 །ཀློང་ཆེན་སྙིང་གི་ཐིག་ལེ་ལས་རྩ་བ་གསུམ་གྱི་འགྲེལ་ཊཱིཀ་དངོས་གྲུབ་བང་མཛོད་བཞུགས་སོ། །སྙིང་ཐིག་རྩ་གསུམ་འགྲེལ་ཊཱིཀཨོ་རྒྱན་ཕྲིན་ལས། རང་བྱུང་འོད་གསལ་རྡོ་རྗེ་ཐུགས་མཆོག་རྩལ། འཇིགས་མེད་དགེ་བའི་དཔལ་ཆེན།Nitartha internationalམཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། སྔ་འགྱུར་གསང་ཆེན་ཆོས་འཁོར་གླིང་གི་མཚམས་སྦྱོར་མདོར་བསྡུས།― ARJ001_Page_0001 ―
[མ་དཔེ་གཟིགས་ན་འདིར་གནོན།]
སྔ་འགྱུར་གསང་ཆེན་ཆོས་འཁོར་གླིང་གི་མཚམས་སྦྱོར་མདོར་བསྡུས་བཞུགས་སོ། ། ― ARJ001_Page_0002 ―
[མ་དཔེ་གཟིགས་ན་འདིར་གནོན།]
དགོན་འདི་ཉིད་ཀྱི་བརྒྱུད་པའི་ཆུ་མགོ་དེ་དག་ལུང་ལས་ཇི་ལྟར་བསྟན་ཚུལ་དང་། དེ་དག་གི་མཛད་རྗེས་གྱི་རིམ་པ་གང་དག་ཡོད་ཚུལ་སོགས་ལས་བརྩམས་ཏེ་ཅུང་ཟད་གླེང་བར་བྱ་བ་སྟེ་གཉིས། ༈ དང་པོ་ལའང་བཞི་སྟེ། དང་པོ། ཀུན་མཁྱེན་ཀློང་ཆེན་རབ་འབྱམས་སམ་ཀུན་མཁྱེན་དྲི་མེད་འོད་ཟེར་ནི། དགོངས་འདུས་ལུང་བསྟན་བཀའ་རྒྱ་མ་ལས། རྫོགས་ཆེན་དོན་སྟོན་དྲི་མེད་འོད་ཟེར་མཚན༔ སྔོན་འབྱུང་རྗེས་གསོ་ཞྭ་ཡི་ལྷ་ཁང་གསོ༔ ཞེས་དང་། ༈ གཉིས་པ་རིག་འཛིན་འཇིགས་མེད་གླིང་པ་འམ། པདྨ་དབང་ཆེན་མཁྱེན་བརྩེའི་འོད་ཟེར་ནི། ལྷོ་ཕྱོགས་འོད་ཟེར་མིང་ཅན་སྤྲུལ་པའི་སྐུ༔ ཟབ་དོན་སྙིང་ཐིག་ཆོས་ཀྱིས་འགྲོ་བ་འདྲེན༔ འབྲེལ་ཚད་རིག་འཛིན་ཞིང་དུ་འཕེན་པ་འབྱུང་༔ ཞེས་དང་། ༈ གསུམ་པ་རྡོ་གྲུབ་དབང་བྱང་ཆུབ་རྡོ་རྗེའམ་འཇིགས་མེད་ཕྲིན་ལས་འོད་ཟེར་ནི། ཤར་ཕྱོགས་འོད་ཟེར་མིང་ཅན་གདུང་ཤུགས་ཅན༔ ཕྲིན་ལས་རྨད་བྱུང་བློ་སྟོབས་ཤེས་རབ་ཅན༔ ཐུགས་ཀྱི་གསང་མཛོད་རྡོལ་བའི་གདམས་པ་འཛིན༔ བསྟན་པ་སྤེལ་གྲོགས་བྱེད་པའི་སྐལ་ལྡན་འབྱུང་༔ ཞེས་དང་། ཤར་ཕྱོགས་འོད་ཟེར་མིང་ཅན་སྤྲུལ་པའི་སྐུ༔ མཐོང་ཐོས་དྲན་རེག་རྫས་ཀྱིས་འགྲོ་བ་འདྲེན༔ ཐུགས་རྗེ་ཆེན་པོའ་ིབསྟན་པ་སྤེལ་བྱེད་འབྱུང་༔ ཞེས་སོགས་རྒྱ་ཆེར་གསུངས་པ་ལྟར། དེ་གསུམ་ནི་གསང་བ་སྙིང་ཐིག་གི་རྩ་བའི་སྲོག་ཤིང་དུ་གྱུར་ཅིང་། གཞན་དྲང་མི་འཇོག་པའི་རྣམ་དཔྱོད་ཆེན་པོ་དང་ལྡན་པའི་རྒྱུ་མཚན་གྱིས་དེ་དག་ལ་ཀུན་མཁྱེན་ཡབ་སྲས་གསུམ་དང་འོད་ཟེར་གསུམ་དུ་གྲགས། དེ་ཡང་ཀྲོ་ལོད་དངོས་བྱོན་ཁྲག་འཐུང་བདུད་འཇོམས་རྡོ་རྗེའི་གསང་བའི་རྣམ་ཐར་ཅུང་ཟད་བཤད་པ་ཌཱཀྐིའི་ཞུས་ལན་ལས། རང་སྣང་པདྨ་འོད་ཀྱི་གླིང་༔ དྲི་མེད་འོད་ཟེར་འཇིགས་མེད་གླིང་༔ གྲུབ་དབང་ཀུན་བཟང་གཞན་ཕན་པ༔ ཡེ་ཤེས་སྒྱུ་མའི་སྐུ་དང་མཇལ༔ སྙིང་ཐིག་ཟབ་མོའ་ིགཏད་རྒྱ་ཐོབ༔ ཅེས་དང་། ཀུན་མཁྱེན་རང་བྱུང་རྡོ་རྗེས་ཀྱང་། འོད་ཟེར་གསུམ་གྱི་བསྟན་པ་སྲིད་མཐའི་བར། །དུས་གསུམ་ཀུན་ཏུ་གཡེལ་མེད་ཁྱོད་ཀྱིས་སྲུངས། །ཞེས་བཀྲ་ཤིས་ཚེ་རིང་མར་གཉེར་གཏད་མཛད་པ་ལྟར་རོ། །བཞི་པ་དེ་ཡི་བྱེ་བྲག་ཕྱི་མ་རྡོ་བ་གྲུབ་ཆེན་གྱི་སློབ་མ་རྣམས་ལུང་བསྟན་པ་ལས། ཤར་ནས་དུང་དཀར་གཡས་སུ་འཁྱིལ་འདྲ་འབྱུང་༔ སྙན་གྲགས་སྒྲོགས་དང་བསྟན་པ་འཕེལ་བར་བྱེད༔ ལྷོ་ཡི་ཕྱོགས་ནས་སློབ་མ་འབྱུང་འགྱུར་ཏེ༔ འབྲས་ཀྱི་ཕུང་པོ་སྤུངས་པ་ལྟ་བུ་ཡི༔ འདོད་ཡོན་ཟས་ནོར་ལོངས་སྤྱོད་འཕེལ་བར་བྱེད༔ ནུབ་ནས་པདྨ་དམར་པོ་འཁྲིགས་འདྲ་བའི༔ སྒྲིབ་མེད་སྒྲུབ་ཚུགས་འཛིན་པའི་སློབ་མ་འབྱུང་༔ བྱང་གི་ཕྱོགས་ནས་ལྕགས་ཕུར་ལྟ་བུ་ཡི༔ མཐུ་རྩལ་ལྡན་པའི་སློབ་མ་འགའ་ཞིག་ནི༔ བསྟན་པ་འཕེལ་བསྐྱེད་ཕྲིན་ལས་སྒྲུབ་པ་འབྱུང་༔ ཞེས་བྱུང་བ་ལྟར། ཤར་དུ་འབྲས་ཁལ་ཁལ་དུ་སྤུངས་འདྲའི་སློབ་མ་རྩ་རླུང་གཏུམ་མོའ་ིབཀའ་བབ་ཁྱུང་ལུང་རས་པ་དམ་ཚིག་རྡོ་རྗེ། ལྷོ་དམར་སེར་པདྨ་རྒྱས་འདྲའི་སློབ་མ་རྒྱལ་སྲས་གཞན་ཕན་མཐའ་ཡས་སམ་རྒྱལ་སྲས་རིག་པའི་རྡོ་རྗེ། ནུབ་སེང་ཆེན་གངས་ལ་འགྱིངས་འདྲའི་སློབ་མ་འཇིགས་མེད་བསྐལ་བ་བཟང་བོའམ་སྐྱེས་བུ་ཡེ་ཤེས་རྡོ་རྗེ། བྱང་སྔགས་ནག་གི་ཕུར་བ་ས་ལ་བཏབ་འདྲའི་སློབ་མ་དྲག་སྔགས་རྒྱ་མཚོའི་བཀའ་བབས་ཆོས་དབྱིངས་སྟོབས་ལྡན་རྡོ་རྗེ་སྟེ་རྡོ་རྗེའི་གདུང་ཆེན་བཞིར་གྲགས་པ་ལས། འཇིགས་མེད་བསྐལ་བ་བཟང་བོའམ། ཨརྱ་དྷེ་ཝ། སྐྱེ་མེད་རྡོ་རྗེ། འཇིགས་མེད་ཡེ་ཤེས་རོལ་པའི་རྡོ་རྗེ། གཅོད་སྨྱོན་ཡེ་ཤེས་རྡོ་རྗེ་དབང་ཆེན་བཞད་པ་རྩལ། འཇིགས་མེད་ཆོས་ཀྱི་བློ་གྲོས། འཕགས་པ་ལྷ་སོགས་མཚན་གྱི་རྣམ་གྲངས་དུ་མ་དང་ལྡན་པ་དེ་ཉིད་ཀྱི་ཞལ་ནས། ཚེ་གཅིག་གིས་ས་ལམ་མཐར་ཕྱིན་པའི། །གཞུང་འཆད་ནུས་མདོ་ཁམས་ཡུལ་གྲུ་ན། །མགོན་གྲུབ་ཆེན་ཆོས་ཀྱི་རྒྱལ་པོ་ཙམ། །ཞེས་རྡོ་གྲུབ་ཉིད་ལ་ཆེད་དུ་བརྗོད་ཅིང་བླ་མར་བཀུར། ༈ གཉིས་པ་དེ་དག་གི་མཛད་པ་ནི། ༈ དང་པོ་ཀུན་མཁྱེན་ཀློང་ཆེན་པས། ཐོས་བསམ་རྒྱ་ཆེར་མཛད་ཅིང་མཁྱེན་རབ་ཀྱི་རྩལ་རྫོགས་པས་གཞུང་ལུགས་ཐམས་ཅད་ཐུགས་ལ་མངའ་བའི་རྒྱུ་མཚན་གྱིས་བསམ་ཡས་ལུང་མང་བ་དང་། དཀའ་སྤྱད་ཆེར་བཞེས་ཀྱི་གོས་གདན་གཉིས་ཀྱི་གོ་སྒྱེ་མོ་ཞིག་གིས་བཅད་ནས་ཐོས་དོན་ཉམས་བཞེས་མཛད་པ་ལ་བསྟེན་ནས་བསམ་ཡས་སྒྱེ་ཉལ་བ་ཞེས་སུ་གྲགས། པདྨའི་སྙིང་ཐིག་གི་གཏད་རྒྱ་མཛད་ཡུལ་ལྷ་ལྕམ་པདྨ་གསལ་གྱི་ཡང་སྲིད་དང་། ཇི་སྐད་དུ། པཎ་ཆེན་བི་མའི་དངོས་སྤྲུལ་བསམ་ཡས་པ། །ཞེས་གསུངས་པ་བཞིན་རྒྱ་ནག་རི་བོ་རྩེ་ལྔ་ནས་སྙིང་ཐིག་གི་བསྟན་པ་དག་གཙང་དང་དར་སྤེལ་ཀྱི་ཕྱིར་པཎ་ཆེན་བི་མའི་སྤྲུལ་པ་རེ་ལོ་བརྒྱ་རེས་མཚམས་སུ་ལན་རེ་འབྱོན་པ་ཡིན་པས་དེ་ཡི་ནང་ཚན་གྱི་གཅིག་ཡིན་པའི་རྒྱུ་མཚན་གྱིས། རྫོགས་པ་ཆེན་པོ་རྒྱ་ཆེ་བ་པཎ་ཊི་དའི་སྐོར་བི་མའི་གསང་བ་སྙིང་ཐིག་དང་། ཟབ་པ་ཀུ་སཱ་ལའི་སྐོར་པདྨའི་མཁའ་འགྲོ་སྙིང་ཐིག་སྟེ་དེ་ལ་སྙིང་ཐིག་མ་གཉིས་དང་། སྔ་མའི་ཡང་ཐིག་བླ་མ་ཡང་ཐིག ཕྱི་མའི་ཡང་ཐིག་མཁའ་འགྲོ་སྙིང་ཐིག དེ་གཉིས་ཀྱི་དགོངས་གནད་གཅིག་ཏུ་བསྡུས་པ་ཟབ་མོ་ཡང་ཐིག་སྟེ། དེ་ལྟར་སྙིང་ཐིག་མ་བུ་རྣམས་གཏེར་དཔེ་དང་དགོངས་པའི་ཀློང་ནས་རྗེན་པར་བཀྲལ་ཏེ་གཏན་ལ་ཕབ། རྒྱུད་བཅུ་བདུན་གྱི་དོན་གྱི་འགྲེལ་བ་མཛོད་ཆེན་བདུན། ངལ་གསོ་སྐོར་གསུམ། རང་གྲོལ་སྐོར་གསུམ། རྒྱུད་འགྲེལ་མུན་སེལ་སྐོར་གསུམ་སོགས་ཡིག་འཇོག་མང་དུ་མཛད། མདོ་སྔགས་ཀྱི་བསྟན་པ་སྤྱི་དང་ཁྱད་པར་རྫོགས་པ་ཆེན་པོའི་བསྟན་པ་རིན་པོ་ཆེ་གཞིར་བཞེངས་སུ་བསླངས། ༈གཉིས་པ་རིག་འཛིན་འཇིགས་མེད་གླིང་པས་བསམ་ཡས་མཆིམས་ཕུར་ལོ་གསུམ་སྙིང་པོའ་ིསྒྲུབ་པ་ལ་གཞོལ་བའི་ཚེ་ཀུན་མཁྱེན་ཆེན་པོའ་ིཞལ་ལན་གསུམ་གཟིགས་ཏེ་སྐུ་གསུངས་ཐུགས་ཀྱི་བྱིན་གྱིས་བརླབས་ཚུལ་སོགས། ཇི་སྐད་དུ། ཉིད་ཀྱི་ཞལ་གསུངས་རྣམ་ཐར་གསོལ་འདེབས་ལས། དཔལ་གྱི་བསམ་ཡས་མཆིམས་ཕུའི་དགེ་འུ་རུ། །ཀུན་མཁྱེན་ཞལ་གཟིགས་ལུང་བསྟན་ཐོབ་པའི་མོད། །ཇི་ལྟ་ཇི་སྙེད་སྤོབས་པའི་གཏེར་གྲོལ་ཏེ། མངོན་པའི་ང་རྒྱལ་ཟད་ལ་གསོལ་བ་འདེབས། །རྙིང་བསྟན་རི་མོའ་ིམར་མེ་ལྟར་གྱུར་ཚེ། །རྒྱུད་འབུམ་གླེགས་བམ་རྫོགས་དང་ཆོས་འབྱུང་བསྐྲུན། །མདོ་རྒྱུད་སེམས་གསུམ་སྙིང་ཐིག་བཀའ་གཏེར་གྱི། །བསྟན་པ་མ་ནོར་འཛིན་ལ་གསོལ་བ་འདེབས། །སྔ་འགྱུར་གྲུབ་མཐའ་ཆོས་ལུགས་སྣ་ཚོགས་ཀྱི། །རྙོག་མར་གྱུར་ལ་གཞན་སྡེས་གཤོང་བའི་ཚེ། །ཡོན་ཏན་རིན་ཆེན་མཛོད་ཀྱི་ཤིང་རྟ་ཆེས། །རང་སྡེའི་གྲུབ་མཐའ་སློང་ལ་གསོལ་བ་འདེབས། །ཞེས་པའི་དོན་གྱིས་ཕྱོགས་ཙམ་མཚོན་ཏེ་ཤེས་པར་བྱའོ། ༈ །གསུམ་པ་རྡོ་གྲུབ་པས། རྫོགས་ཆེན་གངས་ཁྲོད་གོང་མ་བདེ་བ་ཆེན་པོའ་ིཕོ་བྲང་དུ་ལོ་བདུན་སྙིང་པོའ་ིསྒྲུབ་པ་ལ་གཞོལ་བས་གྲུབ་པའི་ས་མཐོར་གཤེགས། དབུས་བཞུད་ཐེངས་བཞིར་མཛད་ཅིང་མཆོད་མཇལ་གནས་བསྐོར་དང་གདམས་ངག་མང་དུ་གསན། བལ་དམག་གིས་ཆོས་འཁོར་གསུམ་སོགས་འཇིག་ལ་ཉེ་བར་ཐུག་པས་ཇི་བྱ་གཏོལ་མེད་དུ་གྱུར་ཏེ་འཇིགས་སྐྲག་ཆུ་ཁོལ་བ་ལྟ་བུའི་ངང་དབུས་གཙང་གྱི་མི་ཐམས་ཅད་ཕྱོགས་དང་ཕྱོགས་སུ་བྲོས་བྱོལ་བྱེད་པའི་སྐབས་དེར། ཁོང་གི་ཐུགས་ལ་མཁན་སློབ་ཆོས་གསུམ་དང་ལོ་པན་ཆེན་པོ་རྣམས་ཀྱིས་མཛད་རྗེས་རླབས་པོ་ཆེ་འདི་དག་རང་གར་བསུབ་ཏུ་འཇོག་ག་ལ་རུང་དགོངས་ཏེ། དཀོར་སྲུང་བེ་ཧར་རྒྱལ་པོར་དམ་ཚིག་བསྒྲགས་ཤིང་བཀའ་བསྒོ་མཛད་པས་སྐུ་གསོབ་ཀྱིས་དབུ་བརྒུར། སྐུ་ལས་རྔུལ་རླངས་མཆེད་པ་བྱ་ཁྱུང་གི་གཟུགས་སུ་གྱུར་ཏེ་གནོད་བྱེད་ཕྱོགས་སུ་སོང་བའི་ཆོ་འཕྲུལ་སྣ་ཚོགས་ཀྱིས་དམག་དཔུང་ཕྱིར་བཟློག འཇིགས་པ་མེད་པའི་བཀའ་ལུང་གི་འབྱམས་ཡིག་བཀྲམ། དབུས་གཙང་དུ་ཐན་པས་ཉེན་པ་ལ་སྦྱིན་བསྲེག་གི་ཐལ་བ་ཆུར་དོར་བ་ཙམ་ནས་འབྲུག་སྒྲ་ལྡིར་ཞིང་ཆར་གྱི་རྒྱུན་བཟང་རྡོལ་བ་སོགས་གྲུབ་པའི་རྟགས་མཚན་དུ་མ་ལ་བརྟེན་ནས། ཇི་སྐད་དུ། སྤྱིར་གྲུབ་པ་ཐོབ་པ་མང་ལགས་ཀྱང་། །གྲུབ་ཐོབ་ཆེན་པོ་གཞན་མ་མཐོང་། །ཞེས་གྲགས་ཤིང་། དགའ་ལྡན་ཕོ་བྲང་གིས་རྡོ་བ་གྲུབ་ཆེན་ཞེས་པའི་མཚན་གྱི་ཅོད་པན་གནང་ཞིང་མཐོང་བཀུར་རྒྱ་ཆེར་མཛད། ཁྱད་པར་དུ་ཚེ་རབས་ལས་ཀྱི་བླ་མ་རིག་འཛིན་ཆེན་པོ་འཇིགས་མེད་གླིང་པའི་ཞབས་སྤྱི་བོར་བླངས་ཤིང་དབང་ཁྲིད་མན་ངག་གི་གདམས་པ་མ་ལུས་པ་བུམ་པ་བྱོས་གྱི་ཚུལ་དུ་ནོད་ཅིང་ཉིད་ཀྱི་རྒྱལ་ཚབ་ཏུ་མངའ་གསོལ་མཛད། རྡོ་རྗེའི་གདུང་མཆོག་གཉིས་དང་། རྡོ་རྗེའི་གདུང་ཆེན་བཞི། རྡོ་རྗེའི་མཚན་ཅན་བཅུ་གསུམ། ནམ་མཁའི་མཚན་ཅན་བཅུ་གསུམ། རྒྱལ་མཚན་ཐོགས་པ་བཅུ་གསུམ། སངས་རྒྱས་ཀྱི་མཚན་ཅན་དྲུག་སོགས་སློབ་ཆེན་གངས་ཀྱི་སེངྒེ་ལྟ་བུ་གྲངས་མེད་པ་བསྐྲུན་ཞིང་སྟོད་རྒྱ་བལ་ནས་སྨད་རྒྱ་སོག་གི་བར་དུ་ཀློང་ཆེན་སྙིང་ཐིག་གི་བསྟན་པ་ཉི་འོད་ཀྱི་ས་གཞི་ལྟར་ཡོངས་ཁྱབ་ཏུ་སྤེལ། ༈ བཞི་པ་རྡོ་བླ་འཇིགས་མེད་བསྐལ་བ་བཟང་པོ་མཆོག་གི་མཛད་པ་ནི། ཡབ་རྗེ་རྡོ་གྲུབ་པའི་བཀའ་བཞིན་སྡེ་བཞི་དགེ་བཅུའི་དཔལ་གྱི་མངོན་པར་མཐོ་བ་ཁམས་སྡེ་དགེ་རྒྱལ་པོའ་ིདབུ་བླ་མཛད། དཔལ་དགེ་བསོད་ནམས་ཕུན་ཚོགས་ཀྱི་ཡང་སྲིད་ཨོ་རྒྱན་འཇིགས་མེད་ཆོས་ཀྱི་དབང་པོ་ངོས་འཛིན་མཛད་ཅིང་སྨིན་གྲོལ་གྱི་རྒྱུན་བསྩལ། སླར་གྲུབ་རྗེ་མཆོག་གིས། ཁྱོད་གསོན་དང་གཞོན་ནུ་བསྐལ་བ་ཅན༔ གནས་སྐབས་སུ་བདེ་སྡུག་སྣ་ཚོགས་པ༔ མྱང་པ་ལ་རེ་དོགས་མ་མཛད་དང་༔ སྐབས་ཤིག་ནས་དོན་གཉིས་ལྷུན་འགྲུབ་འབྱུང་༔ ཞེས་གསུངས་ནས་མདོ་སྨད་གསེར་མོ་ལྗོངས་སུ་འགྲོ་དོན་ལ་བཏང་། ཕྱོགས་དེར་གྲུབ་མཐའི་དབང་གིས་ཉེན་ཁ་མཁྱེན་ཡང་། བྱང་ཆུབ་སེམས་དཔའ་མེ་ཏོག་ཟླ་མཛེས་ཀྱི་རྣམ་ཐར་བདག་གིར་མཛད་དེ་དེར་བྱོན་ནས། ཕ་མཆོག་དྲིན་ཅན་བླ་མ་དེ། །རིག་འཛིན་བྱང་ཆུབ་རྡོ་རྗེ་ཡིན། །གཞལ་དུ་མེད་པའི་ཐུགས་རྗེ་ཅན། །ཐམས་ཅད་མཁྱེན་དེས་རྟག་ཏུ་སྐྱོངས། །གང་དེའི་བྱིན་རླབས་འོད་སྟོང་གཟིས། །བདག་བློས་པད་ཚལ་རབ་བཞད་མཐུས། །སྐལ་བཟང་རྐང་དྲུག་དགའ་སྐྱེད་པའི། །ལེགས་བཤད་དྲི་བསུང་ཅིར་ཡང་སྤྲོ། །ཞེས་གསུངས་ཤིང་། ཁྲི་ཀརོང་བོའ་ིསྔགས་མང་། བ་ཡན། ཨ་མགྲོན་སོགས་དེ་ཕྱོགས་ཀྱི་བན་སྔགས་གྲངས་མེད་པ་སྨིན་ཞིང་གྲོལ་བར་མཛད། ཀ་ཞར་སང་གི་ཁྲི་རབས་དང་མཁན་རབས་དང་པོའང་འདི་ཉིད་ཡིན། དེར་མཁྱེན་རབ་ཀྱི་རྩལ་དང་གྲུབ་པའི་རྟགས་གང་གིས་ཀྱང་གཞན་དང་བསྐྲུན་དུ་མེད་པའི་ཡོན་ཏན་གྱིས་ཡིད་ཕྲོག་ཏེ་འཁོར་གྱི་འདུ་འགོད་རྒྱ་ཆེན་པོར་གྱུར་པ་མཐོང་བས། གྲུབ་མཐའི་ཆགས་སྡང་གི་དུག་ཆུ་ལྷོག་ལྷོག་ཏུ་ཁོལ་ཞིང་ཕྲག་དོག་གི་མེ་ལྕེ་རབ་ཏུ་མཆེད་པའི་བསྟན་བཤིག་འགའི་ངན་འབྲེལ་བྱས་ཏེ་ནག་མེད་ཉེས་འགེལ་གྱི་དབྱེན་སྦྱོར་སྣ་ཚོགས་ལ་བརྟེན་ནས་གོང་མའི་ཁྲི་མུན་དུ་བཙུད་ནས་དེར་སྐུ་གྲོང་། ༈ ཕྱིས་སུ་དེ་ཡི་རྗེས་སྐྱེས་སྒོ་མེ་སྤྱི་ཁྱབ་སྟོང་དཔོན་ཆེན་མོ་འཇིགས་མེད་རྡོ་རྗེ་དང་། ཨ་ནེ་ལྷ་མོ་གཉིས་ཀྱི་སྲས་མི་འགྱུར་རྡོ་རྗེ་ཞེས་པ་ཡིན་ལ། དེ་ནི་ཁྲག་འཐུངས་བདུད་འཇོམས་རྡོ་རྗེའི་སྲས་མི་ཕམ་རྡོ་རྗེའི་སྤྲུལ་སྐུ་ཡིན་པར་སྐུ་ཕྱོགས་དགུ་རོང་འཇིགས་བྲལ་ཆོས་དབྱིངས་རྡོ་རྗེས་ངོས་འཛིན་མཛད། མི་ཕམ་རྡོ་རྗེ་དེ་ཉིད་ནི་ཆེ་ཡོས་རིག་འཛིན་ཆེན་པོའི་སྤྲུལ་བའི་ཟློས་གར་དུ་གྲགས། ཕྱིས་སུ་བསྟན་པ་ཡང་དར་སྐབས་ཡར་ལུང་བསྟན་པའི་ཉི་མས་ཐུབ་བསྟན་ལུང་རྟོགས་རྒྱ་མཚོ་འདི་ཉིད་མི་འགྱུར་རྡོ་རྗེའི་ཡང་སྤྲུལ་དུ་ཐུགས་ཐག་བཅད། དགུ་རོང་རྒྱལ་སྲས། ཨ་ལགས་རྟ་མགྲིན། ཀ་ཞར་དཔོན་ཚང་སོགས་ཆེ་གྲས་རྣམས་འདོད་བློ་གཅིག་མཐུན་གྱིས་དེ་ཉིད་དང་དུ་བླངས་ཏེ་ཁྲི་འདོན་མཛད་ཅིང་། ཀ་ཞར་སྔགས་ཁང་རྣམ་གྲོལ་པདྨ་གླིང་གི་བསྟན་བདག་ཏུ་མངའ་གསོལ་མཛད། དེ་བཞིན་རྒྱལ་ཁབ་ཀྱིས་ཀྱང་དགོན་པ་དོ་དམ་ཨུ་ཡོན་ལྷན་ཁང་གི་ཀྲུའུ་རིན་དུ་བཞག དེར་རྟེན་བཞེངས་དང་དུས་མཆོད་ཀྱང་མང་དུ་བཙུགས། མགོན་པོའ་ིགདུང་སྣ་ཞེས་ས་དཔྱད་ལེགས་ཤིང་གཏེར་ཆེན་མངྒའི་མཚན་ཅན་སོགས་ཚད་ལྡན་གྱི་སྐྱེས་ཆེན་འགའི་གནས་མཆོག་ཁྱད་པར་ཅན་དུ་ལུང་གིས་བསྔགས་པ་དེར་སྔོན་མཁས་གྲུབ་ཀརྨ་ཆགས་མེད་ཀྱི་སྐུ་གདུང་མཆོད་རྟེན་ཡོད་པ་སྐབས་དེར་ཞིག་རལ་དུ་གྱུར་བ་བསྐྱར་བཞེངས་ལེགས་པར་མཛད། ཤིང་ཁྲིའི་མཁན་ཆེན་དཀོན་མཆོག་རིན་ཆེན་གྱི་མདུན་ནས་དཔེ་ཁྲིད་ཞུས་ཏེ་མཁན་ཐོབ་བླངས། རྒྱ་དཀར་ནག་བལ་བོད་སོགས་གང་དུའང་མཐོང་དཀོན་པའི་ཞིང་མཆོག་པདྨ་འོད་ཀྱི་ཕོ་བྲང་རྟེན་དང་བརྟེན་པ་གསར་བཞེངས་དང་མི་རིགས་གཉིས་འཛོམས་ཀྱི་དགེ་འདུན་པའི་སྡེ་བཙུགས་པ་སོགས་བསོད་ནམས་དམ་པའི་ཞིང་ས་ཁྱད་པར་ཅན་དེ་འདྲ་སྔར་མེད་གསར་དུ་བསྐྲུན་པ་དེར་གཟུར་གནས་རྣམས་ཀྱིས་སྙིང་ནས་རྗེས་སུ་ཡི་རངས་བྱེད་འོས་པ་ཞིག་གོ། །སྨྲས་པ། སྤྲོས་བཤད་ཡལ་གའི་འདབ་མ་གྲངས་མང་ཡང་། །བསྡུས་བཤད་གནད་ཀྱི་གཞུང་ཤིང་གཅིག་ཏུ་དྲིལ། །དོན་གྱི་བསྟན་བྱ་སྒྲོ་བཞིའི་རྒྱན་བཟང་ཅན། །འཁྱོག་བཤད་གནམ་རུའི་རྒྱུད་དང་མ་འབྲེལ་བར། །རང་བཞིན་དྲང་པོར་བརྗོད་པའི་ཉག་ཕྲན་འདི། །ཨོ་རྒྱན་ཕྲིན་ལས་མགྲིན་པའི་རྒྱུད་ནས་སྤྲིངས། །ཞེས་བོད་རབ་བྱུང་བཅུ་བདུན་པའི་ས་མོ་ཕག་སྟེ་ཕྱི་ལོ ༢༠༡༩ ལོའ་ིཟླ་ཚེས་དགེ་བར་བྲིས་པ་མངྒ་ལམ།། །། ཀློང་ཆེན་སྙིང་གི་ཐིག་ལེ་ལས་བླ་མ་རིག་འཛིན་འདུས་པའི་བསྙེན་སྒྲུབ་བྱེད་ཚུལ། ཨོ་རྒྱན་ཕྲིན་ལས།― ARJ001_Page_0003 ―
[མ་དཔེ་གཟིགས་ན་འདིར་གནོན།]
ཀློང་ཆེན་སྙིང་གི་ཐིག་ལེ་ལས་བླ་མ་རིག་འཛིན་འདུས་པའི་བསྙེན་སྒྲུབ་བྱེད་ཚུལ་བཞུགས། ― ARJ001_Page_0004 ―
[མ་དཔེ་གཟིགས་ན་འདིར་གནོན།]
ཡན་ལག་བརྒྱད་ལྡན་ཆུ་གཏེར་ལས་འཁྲུངས་ཨུ་ཏམ་ཝ་རའི་པད་སྡོང་ལས། །གདོད་མའི་མགོན་པོ་མི་ཡི་ཟོལ་བྱོན་པདྨ་འབྱུང་གནས་དཔའ་བོའ་ིསྐུ། །འབྱུང་བཞིས་མི་འཇིགས་འཇའ་འོད་རང་བཞིན་སྣ་ཚོགས་སྒྱུ་འཕྲུལ་སྤྲུལ་བའི་གར། །གདུལ་བྱའི་འགྲོ་ལ་རྗེས་བརྩེ་ལྡན་ཁྱོད་བདག་སྙིང་དཔལ་གྱི་རི་བོར་བཞུགས། །གང་གི་བསྟན་པ་མ་དྲོས་འཁྱིལ་བའི་ཀློང་། །གྲུབ་གཉིས་ནོར་བུའི་གཏེར་ཁ་འཛིན་པ་ཡི། །བསྟན་འཛིན་ཀླུ་དབང་ཚོགས་རྣམས་བཞེད་པའི་དོན། །ཡོངས་སུ་གྲུབ་ཅིང་ཞབས་པད་བརྟན་གྱུར་ཅིག །འདིར་ནི་ཀློང་ཆེན་སྙིང་ཐིག་ཅེས་གྲགས་ཚེ་གཅིག་ཆོས་སྐུའི་རྒྱལ་སྲིད་ལ། །དབང་བསྒྱུར་འདོད་ལ་ངལ་བ་མ་ཡིན་ལམ་མཆོག་ཀུན་ཀྱི་ཕུལ་གྱུར་པ། །རིག་འཛིན་འདུས་པའི་སྒྲུབ་གཞུང་ཉིད་ལ་བསྙེན་སྒྲུབ་ཀྱིས་བྲེལ་སྐལ་ལྡན་འགར། །ཕན་པར་བྱ་ཕྱིར་དྲན་པའི་གསལ་འདེབས་ཅུང་ཟད་ཙམ་ཞིག་འདིར་གསལ་བྱ། །དེ་ལ་འདིར་ཀུན་མཁྱེན་འཇིགས་མེད་གླིང་པའི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལས་བྱུང་བའི་ཀློང་ཆེན་སྙིང་གི་ཐིག་ལེ་ལས་བླ་མ་རིག་འཛིན་འདུས་པའི་བསྙེན་སྒྲུབ་བྱེད་ཚུལ་ཅུང་ཟད་ཙམ་དགོད་པ་ལ། དང་པོ་ཡིད་ཆེས་པ་གསུམ་གྱི་ནང་ཚན་དུ་གྱུར་པ་བརྒྱུད་པ་ལ་ཡིད་ཆེས་པ་ནི། དང་བོ་བླ་མ་མཚན་ཉིད་དང་ལྡན་པའི་མདུན་ནས་དབང་ཞུ་བ་དང་། དེ་ཉིད་ཀྱི་བརྒྱུད་པ་ཚད་དང་ལྡན་ཞིང་དེར་ཡིད་ཆེས་པ་གཉིས་གལ་ཆེ་སྟེ། རྒྱུད་ལས། བླ་མ་འདོད་པ་སྤང་བ་ཡིས། །དབང་བསྐུར་ཆོ་ག་རྫོགས་བྱས་ན། །རྡོ་རྗེ་འཛིན་པ་ཆེན་པོར་ཡང་། །ཚེ་འདི་ཉིད་ལ་འགྱུར་བར་ངེས། །ཞེས་དང་། དབང་མེད་ན་ནི་དངོས་གྲུབ་མེད། །བྱེ་མ་བཙིར་ཡང་མར་མེད་བཞིན། །ཞེས་སོགས་གསུངས་པ་ལྟར་དབང་ནི་དངོས་གྲུབ་བསྒྲུབ་པ་ལ་མེད་ན་མི་འབྱུང་བའི་རྒྱུ་ཐུན་མིན་ཡིན་པས་ཤིན་ཏུ་གལ་ཆེ་ཡང་དེ་ཐོབ་ཡོད་པ་གཞིར་བྱས། དེ་ཡང་རང་རེའི་བརྒྱུད་པ་ལ་མཚོན་ན་ཆོས་སྐུ་ཀུན་ཏུ་བཟང་བོ། ལོངས་སྐུ་རྡོ་རྗེ་སེམས་དཔའ། སྤྲུལ་སྐུ་དགའ་རབ་རྡོ་རྗེ། སློབ་དཔོན་འཇམ་དཔལ་བཤེས་གཉེན། རིག་འཛིན་ཤྲྀ་སིང་ཧ། མཁས་པ་ཛྙཱ་ན་སུ་ཏྲ། པཎ་ཆེན་བཱི་མ་མུ་ཏྲ། སློབ་དཔོན་པདྨ་འབྱུང་གནས། ཆོས་རྒྱལ་ཁྲི་སྲོང་སྡེ་བཙན། ལོ་ཆེན་བཻ་རོ་ཙ་ན། མཁའ་འགྲོ་ཡེ་ཤེས་མཚོ་རྒྱལ། ཀུན་མཁྱེན་ཀློང་ཆེན་རབ་འབྱམས། རིག་འཛིན་འཇིགས་མེད་གླིང་བ། འཇིགས་མེད་ཕྲིན་ལས་འོད་ཟེར། འཇིགས་མེད་རྒྱལ་བའི་མྱུ་གུ། འཇམ་དབྱངས་མཁྱེན་བརྩེའི་དབང་བོ། འཇིགས་མེད་བསྟན་པའི་ཉི་མ། ཐུབ་བསྟན་ཆོས་ཀྱི་རྡོ་རྗེ། སྐྱབས་རྗེ་དམ་པ་རྡོ་གྲུབ་ཆེན་སྐུ་ཕྲེང་བཞི་པ་ཐུབ་བསྟན་ཕྲིན་ལས་ཀུན་ཁྱབ་དཔལ་བཟང་བོ་མཆོག་གི་བར་དུ་བརྒྱུད་པ་ཟམ་མ་ཆད་པའོ། །གཉིས་པ་ཆོས་ནི་སྤྱིར་འགྱུར་སྔ་ཕྱིའི་དབང་གིས་བཞག་པ་ལས་སྔ་འགྱུར་རྙིང་མ་བ་དང་ཕྱི་འགྱུར་གསར་མ་བ་གཉིས་ཡོད་པ་ལས། འདི་ནི་སྤྱན་འདྲེན་པ་པོ་ཡོན་བདག་གི་ཆེ་བ། ཕྱག་བཞེས་གཙུག་ལག་ཁང་གི་ཆེ་བ། འཆད་པ་པོ་པཎྚི་དའི་ཆེ་བ། སྒྱུར་བྱེད་ལོ་ཙཱ་བའི་ཆེ་བ། ཞུ་རྟེན་མེ་ཏོག་གི་ཆེ་བ། བརྗོད་བྱ་ཆོས་ཀྱི་ཆེ་བ་སྟེ་ཁྱད་ཆོས་དྲུག་གིས་འཕགས་པ་སྔ་འགྱུར་རྙིང་མ་བ་ཡིན། དེ་ལའང་རང་བརྒྱུད་བཀའ་མ་དང་ཉེ་བརྒྱུད་གཏེར་མ་གཉིས་ཡོད་པ་ལས་ཕྱི་མ་སྟེ། མཁའ་འགྲོའ་ིཞལ་རླངས་མ་ཡལ་བར་བརྒྱུད་ཐག་ཉེ་ཞིང་བྱིན་རླབས་ཀྱི་ཚན་ཁ་ཆེ་བ་དང་གཅིག གཏེར་ཡིག་གི་དཔེ་དཔང་མངའ་བས་ཁུངས་བཙུན་པ་དང་གཉིས། གང་ལ་གང་འདུལ་གྱི་དུས་དང་མཚམས་པར་མངོན་དུ་སྣང་བས་ཟབ་ལམ་ནུབ་པ་མེད་པ་སྟེ་ཆོས་གསུམ་གྱི་ཁྱད་པར་འཕགས་པ་སྟེ་ཉེ་བརྒྱུད་གཏེར་མ་ཡིན། དེ་ཡང་རང་ཅག་ཡན་ཆད་ཀྱི་བརྒྱུད་པའི་བླ་མ་ཐམས་ཅད་ཨ་ཕའི་ཁ་ཕོར་གཙང་ཞེན་ཙམ་མ་ཡིན་པར་གོང་སྨོས་ལྟར་སངས་རྒྱས་མི་གཟུགས་སུ་བྱོན་པ་ཤ་སྟག་ཡིན་པས་བརྒྱུད་པའི་ཟམ་མ་ཆད་ཅིང་། བྱིན་རླབས་ཀྱི་སྤྲིན་ཕུང་ལ་དམ་སེལ་གྱི་རླུང་གིས་མ་གཏོར་བ། བཀའ་རྟགས་ཕྱག་རྒྱ་མ་ཞིག་པ། ཟབ་དོན་གྱི་གནད་མ་འཆུག་པ། ཉམས་སུ་བླངས་པ་རྣམས་ཚེ་འདིར་རིག་འཛིན་གྱི་ས་ལ་འགོད་པ། བསྒྲུབ་ན་འགྲུབ་མྱུར་ཞིང་དཀར་བོ་གཅིག་ཐུབ་ཀྱི་གདམས་པ་ཟབ་མོ་ཀློང་ཆེན་སྙིང་ཐིག་གི་ཆོས་ཚན་ལས་བྱུང་བ་བླ་མ་རིག་འཛིན་འདུས་པའི་སྒྲུབ་པ་འདི་ཉིད་ཡིན་ལ། དེ་ལྟར་བརྒྱུད་པ་ལ་ཡིད་ཆེས་པ་དང་། གདམས་ངག་ལ་ཡིད་ཆེས་པ། སྐུ་ཕྱག་རྒྱའི་རྣལ་འབྱོར། གསུང་བཟླས་པའི་རྣལ་འབྱོར། ཐུགས་འོད་གསལ་གྱི་རྣལ་འབྱོར་ཏེ་ཁྱེར་སོ་གསུམ་དང་མ་བྲལ་བའི་སྒོ་ནས་གང་ཟག་རང་གིས་རང་ལ་ཞེ་མི་ཁྲེལ་བར་ཡིད་ཆེས་པ་དང་གསུམ་གྱི་སྒོ་ནས་ཉམས་སུ་ལེན་དགོས། དེ་ཡང་ཐོག་མར་སྒྲུབ་པ་ལ་འཇུག་པའི་སྔོན་དུ་འགྲོ་བ་ལ་རིང་བ་དང་ཉེ་བ་གཉིས་ལས། དང་བོ། མདོ་རྒྱ་ཆེར་རོལ་པ་ལས། བསོད་ནམས་ལྡན་པའི་མི་ཡི་བསམ་པ་རྣམས་ཀྱང་འགྲུབ། ཅེས་གསུངས་པ་བཞིན་བསོད་ནམས་ཀྱི་དཔུང་བསྐྱེད་པ་གལ་ཆེ་སྟེ། སྒྲུབ་པ་ལ་འཇུག་པ་དང་ཞུགས་ནས་མཐར་ཕྱིན་པ་ནི་བསོད་ནམས་ཅན་གྱི་སྤྱོད་ཡུལ་ལས་གཞན་དུ་མ་ཡིན་པའི་ཕྱིར། དེ་ལ་དཀོན་མཆོག་མཆོད་པ། གསུང་རབ་བཀླག་པ། སྲོག་བསླུ་དང་ཚེ་ཐར་གཏོང་བ། ལམ་འཕྲང་བཅོས་པ། སཱཙྪ་འདེབས་པ། ཆུ་གཏོར་གཏོང་བ། ཆ་གསུམ་དང་བསང་བརྔན་སོགས་ཚོགས་གསོག་གི་རིགས་ཅི་ནུས་བྱ། དེ་ནས་ཇི་སྐད་དུ། དངོས་གྲུབ་སློབ་དཔོན་རྗེས་འབྲང་གསུངས། ཞེས་པ་ལྟར་དབང་ཐོབ་ཅིང་དམ་ཚིག་དང་ལྡན་པ་གལ་ཆེ་སྟེ། དེ་ཡང་དང་བོ་དབང་དང་ཁྲིད་མན་ངག་སོགས་ཐོབ་ཅིང་། བར་དུ་བླ་སློབ་གྱི་དམ་ཚིག་ལ་སེལ་སོང་བ་ཡོད་ན་དེ་ལ་ངེས་པར་བཤགས་པ་བྱེད་དགོས་ཏེ། དེ་ལྟ་མ་བྱས་ན་དངོས་གྲུབ་ཀྱི་སྐལ་བ་མི་ཐོབ་ཅིང་ཕྱི་མ་ངན་སོང་དུ་འགྲོ་དགོས་པའི་ཕྱིར་རོ། །དེ་ཡང་ཇི་ལྟར་བཤགས་པའི་ཚུལ་ནི། བླ་མ་དེ་ཉིད་མདུན་གྱི་ནམ་མཁར་སྐྱབས་གནས་རྒྱ་མཚོའི་སྤྱི་དཔལ་ཆེན་པོར་བཞུགས་པར་མོས་ནས། དེ་ཡི་མདུན་དུ་རང་ཉིད་ངོ་ཚ་འཇིགས་སྐྲག་གིས་གདུང་ཞིང་། ཤིན་ཏུ་གནོང་འགྱོད་དང་བཅས་གླང་བོ་རབ་འབོག་གི་རྒྱུད་ཡེ་ཤེས་སྐུ་མཆོག་ལ་བརྟེན་ནས་ཡིག་གེ་བརྒྱ་བ་འབུམ་ཕྲག་དང་སྦྲེལ་དབང་བཞི་ཡང་ཡང་བླངས་ཏེ་ཉམས་པ་སོར་ཆུད་པར་བྱ། དེ་ནས་མཚམས་ཁུངས་སུ་དགོས་པའི་ཡོ་སྤྱད་རྣམས་ཆ་ཚང་བ་བསགས། སྒྲུབ་རྫས་རྣམས་ལ་བསང་ཁྲུས་དང་རབ་གནས་ཚད་ལྡན་བྱ། སྐྱབས་གསུམ་འཛིན་པའི་དགེ་བསྙེན་ཡན་ཆད་ཀྱི་སྡོམས་པ་བླང་། གཉིས་པ་བསྙེན་སྒྲུབ་བྱེད་པའི་ཐོག་མར་གཟའ་སྐར་ལ་བལྟ་བ་གལ་ཆེ་སྟེ། དེ་ཡང་སྤྱིར་ཟླ་བ་ཡར་གྱི་ངོ་ཚེས་བརྒྱད་དང་། སྐར་མ་རྒྱལ། གཟའ་ཕུར་བུ་འཛོམས་པ་མཆོག་ཏུ་ཤིས་ཏེ། སྒྱུ་འཕྲུལ་ལས། ཚེས་གྲངས་ཡར་གྱི་བརྒྱད་ལ་བརྩམས། །ཤིན་ཏུ་སྐར་མ་རྒྱལ་རྣམས་ལ། །ཞེས་དང་། འཇོམས་བྱེད་ལས། ཟླ་བ་སྐྱེས་དུས་གཟའ་ཕུར་བུ། །དར་ཚེ་སྒྲུབ་པ་མཆོག་ཏུ་ཤིས། །ཞེས་གསུངས་པའི་ཕྱིར་རོ། །གཞན་ཡང་གཟའ་ཉི་མིག་སྤེན་གསུམ་ལས་གཞན་རྣམས་དང་། སྐར་མ་ཐ་སྐར། རྒྱལ། ཁྲུམས་སྟོད། ཁྲུམས་སྨད། ནམ་གྲུ། ལྷ་མཚམས་རྣམས་ཀྱང་ཤིས་ཏེ། འཇམ་དཔལ་རྩ་རྒྱུད་ལས། ཚེས་གྲངས་གཟའ་ཡི་དམ་པར་ལྡན། །ཕུར་བུ་པ་སངས་ཟླ་བ་དང་། གཟའ་ལྷག་མཆོག་ནི་ལས་ཀུན་ལ། །ཞེས་དང་། ཐ་སྐར་སྐར་མ་ཉིད་དང་ནི། །རྒྱལ་དང་ཁྲིམས་ནི་སྟོད་སྨད་གཉིས། །ནམ་གྲུ་དང་ནི་ལྷ་མཚམས་དག །བཟླས་པའི་དུས་སུ་རབ་ཏུ་བསྔགས། །ཞེས་སོ། །༈ །བྱེ་བྲག་ཚེ་ཐུང་བ། ནད་འོང་བ། མི་ཁས་ཉེན་པ། ནོར་ཟད་པ། དགྲ་སྡང་བ། འཇིགས་སྐྲག་འོང་བ། དོན་མི་འགྲུབ་པ། རྒྱལ་བོའ་ིབཀའ་ཆད་ཕོག་པ། བོར་སྟོར་འབྱུང་བ་སྟེ་ངན་པ་དགུ་འདུས་པའི་ཉིན་མོ་དང་། དེ་དང་ཕྱོགས་མཐུན་པའི་ནུས་པ་ཅན་ཞག་ངན། ཡན་གོང་། ཧལ་ཁྱི་སོགས་མ་ཡིན་པ། ༈ ནད་མེད་པ། ཚེ་རིང་བ། དབང་ཕྱུག་དང་ལྡན་པ། དཔལ་དང་ལྡན་པ། གྲགས་པ་དང་ལྡན་པ། སྐལ་བ་བཟང་བ། ལོངས་སྤྱོད་རྒྱ་ཆེན་པོ་ཐོབ་པ། ཞི་རྒྱས་སོགས་ལས་བཞིའི་དངོས་གྲུབ་འགྲུབ་པ་སྟེ་ལེགས་པ་བརྒྱད་འཛོམས་པའི་ཉིན་མོ་དང་། བླ་གཟའ་དར་དུས་བྱ་ལས་འགྲུབ། །ཅེས་དང་། གང་ཚེས་དར་ཡང་བུ་ཡང་དར། །ཞེས་ཟླ་བའི་ཚེས་གཟའ་དང་རང་གི་བླ་གཟའ་གཅིག་ཏུ་གྱུར་པ་དེར་ཁེལ་བ། འཕྲོད་སྦྱོར་ཡང་། ས་གཉིས་འཕྲད་པ་དངོས་གྲུབ་སྦྱོར། །དངོས་གྲུབ་སྦྱོར་བས་ཅི་བསམས་འགྲུབ། །ཅེས་སོགས་གསུངས་པ་ལྟར་རྟེན་འབྲེལ་ཐམས་ཅད་ལེགས་ཕྱོགས་སུ་བསྒྲིགས་པ་གལ་ཆེ་སྟེ། སློབ་དཔོན་སངས་རྒྱས་གཉིས་པའི་ཞལ་ནས། འཁོར་བའི་ཆོས་ཀུན་མ་དག་རྟེན་འབྲེལ་ཏེཿ མྱ་ངན་འདས་པའང་དག་པའི་རྟེན་འབྲེལ་ཙམཿ དེ་ཕྱིར་ལམ་གྱི་སྣང་བ་ཐམས་ཅད་ཀུནཿ རྒྱུ་རྐྱེན་རྟེན་འབྲེལ་ལེགས་པའི་ཕྱོགས་སུ་བསྒྲིགསཿ ཞེས་གསུངས་པའི་ཕྱིར་རོ། །དེ་ནས་རིག་འདུས་ཀྱི་ལས་གཞུང་བསྲིང་ཞིང་མཚམས་བཅད་དེ་བླ་མའི་རྣལ་འབྱོར་ལ་ཞག་བདུན་བཞུགས། བརྒྱུད་འདེབས་སྐབས། སྤྱིར་གསང་སྔགས་ཀྱི་རྩ་བ་དག་སྣང་ཡིན། རྒྱུ་ལམ་བྱེད་དང་འབྲས་བུ་ལམ་བྱེད་གཉིས་ཡོད་པ་ལས། ཕྱི་མ་འབྲས་བུ་ལམ་བྱེད་ནི་སྔགས་ཀྱི་ཁྱད་ཆོས་ཡིན། གུ་རུའི་ཞལ་ནས། ཡིད་ཁྱེད་ཤེས་ཀྱི་དད་པས་བྱིན་རླབས་འཇུག༔ བློ་ཐེ་ཚོམ་དང་བྲལ་ན་ཅི་བསམ་འགྲུབ༔ ཅེས་གསུངས་པ་བཞིན་དྭངས་འདོད་ཡིད་ཆེས་ཀྱི་དད་པའི་སྒོ་ནས་ལུས་ཀྱི་བ་སྤུ་གཡོས། མིག་ནས་མཆི་མ་འཁྲུགས། ལག་ཐར་མོ་སྦྱར། སྙིང་ཁོང་རུས་གཏིང་ལས་བྱུང་བའི་དད་པ་ཤུག་དྲག་པོའི་ངང་ནས་མདུན་གྱི་ནམ་མཁར་འཇའ་འོད་ཀྱི་ཀློང་དུ་བརྒྱུད་པ་གསུམ་གྱི་བླ་མ་ཐམས་ཅད་སྤྲིན་ཕུང་འཁྲིགས་པ་བཞིན་བཞུགས་པར་མོས་ལ་བརྒྱུད་འདེབས་འདོན། དེར་ཏིང་འཛིན་ལྔ་དང་གབ་པ་བཞི་ཡི་གནད༔ ཅེས་གསུངས་པ་ནི་སྟོངས་པ་ཆེན་པོའ་ིཏིང་ངེ་འཛིན་། སྙིང་རྗེ་སྒྱུ་མ། ཕྱག་རྒྱ་གཅིག་པ། ཕྱག་རྒྱ་སྤྲོས་བཅས། ཚོགས་སྒྲུབ་ཀྱི་ཏིང་ངེ་འཛིན་བར་ལྔ་དང་། གབ་པ་བཞི་ནི་ལྷ་དང་སྔགས་དང་ཏིང་འཛིན་མན་ངག་སྟེ་གབ་བྱང་གནད་ཀྱི་མིག་ཚགས་ལྟར་རོ། །དེ་ནས་སྔགས་ལ་ཞུགས་པ་རྣམས་ཀྱི་འབྲལ་མེད་དུ་བཅིངས་བྱར་གྱུར་པའི་རྡོ་རྗེ་དང་དྲིལ་བུ་ནི། སྔགས་ཀྱི་ཉམས་ལེན་རྣམས་རྫོགས་པའི་མཚོན་བྱེད་ཡིན་ལ། དེ་ཡང་རྡོ་རྗེ་ནི་སྣང་ཕྱོགས་ཀྱི་ཆ་ཐབས་བདེ་བ་ཆེན་པོ་མཚོན་བྱེད་དང་། དེ་ཡི་ལྟོ་བ་བཟླུམས་པས་ཡེ་ཤེས་དེ་ཉིད་གཉིས་སྣང་དང་བྲལ་བར་མཉམ་པར་བཞག་པ་མཚོན་ཞིང་། དེ་ཉིད་ལམ་དུས་དང་འབྲས་དུས་ཀྱི་ཁྱད་པར་གྱི་དྲི་མ་ཐམས་ཅད་བྲལ་བྱེད་དམ་བྲལ་བའི་བདག་ཉིད་ཅན་ཡིན་པ་དང་། ནམ་དུའང་དེ་ཉིད་དྲི་མའི་ངོ་བོར་སྐྱེ་མི་སྲིད་པའི་ཕྱིར་དང་། དེ་ཉིད་ཡེ་ཤེས་ལྔ་དང་ཡུལ་གྱི་ཆོས་ཉིད་ལྔ་མཚོན་པའི་ཡར་མར་གྱི་རྩེ་ལྔ་རེ་ལྔ་རེ། ཐུགས་རྗེ་ཆེན་པོས་འཁྱུད་པ་མཚོན་པའི་ཆུ་སྲིན་གྱི་ཁ་དང་། གདུལ་བྱའི་རེ་བ་སྐོང་བ་རྒྱུན་མི་འཆད་པའི་བརྡར་རིན་པོ་ཆེའི་ཕྲེང་བ་དང་ལྡན་པ། དེ་ཉིད་ཀྱི་རྩལ་དུ་རིགས་ལྔ་ཡབ་ཡུམ་དང་། འགྲོ་འདུལ་ཕྲིན་ལས་ཀྱི་མཛད་པ་རྣམས་མཚོན་པའི་བརྡར་པད་འདབ་སོགས་ཀྱིས་བརྒྱན་པའོ། །དྲིལ་བུ་ནི་ཆོས་ཉིད་སྟོངས་པ་ཉིད་རྟོགས་པའི་ཤེས་རབ་མཚོན་བྱེད་ཡིན་པས་དབྱིངས་ཕྱུག་མའི་ཞལ་ནས་ཆོས་ཐམས་ཅད་ཀྱི་དེ་ཁོ་ན་ཉིད་གཟིགས་པ་མཚོན་པ་དང་། རྒྱལ་བའི་ཐུགས་རྟག་ཏུ་ཆོས་ཉིད་ལས་མི་གཡོ་བར་མཉམ་པར་བཞག་པས་རྡོ་རྗེའི་ཕྲེང་བ་དང་། ཡེ་ཤེས་དེ་ལས་ས་དང་ལམ་གྱི་ཡོན་ཏན་མཐའ་དག་རྫོགས་པས་བུམ་པ་དང་། ཡེ་ཤེས་དེ་ཉིད་ཡུམ་ལྔ་དང་སེམས་མ་བརྒྱད་ལ་སོགས་པ་ལྷའི་རྣམ་པར་འཕྲུལ་བ་མཚོན་པའི་པད་འདབ་དང་རྩེ་ལྔ་ལྡན་པའོ། །རྡོར་དྲིལ་བྱིན་རླབས་སྐབས་རང་ཉིད་སྐད་ཅིག་གིས་རྡོ་རྗེ་འཆང་ཡུམ་དང་བཅས་པ་གསལ་ལ། རྡོ་རྗེ་སྔོན་པོ་དྲིལ་བུ་དཀར་བོ་རྩེ་སྔོན་པོ་དག་དྲན་གོང་བཞིན། ཐབས་དང་ཤེས་རབ་གཉིས་སུ་མེད་པར་དམིགས་ལ། རྡོ་རྗེ་འཆང་གི་ང་རྒྱལ་དང་ལྡན་པའི་ངང་ནས་རང་གི་སྙིང་གའི་ཧཱུྃ་གི་འོད་ཟེར་གྱིས་སྐྱབས་འགྲོའ་ིཚོགས་ཞིང་གི་ལྷ་ཚོགས་ཐམས་ཅད་སྤྱན་དྲངས། དེ་ཡང་གང་སྤྱན་དྲངས་ན་སྔར་དེ་བཞིན་གཤེགས་པའི་ས་ལ་བཞུགས་པ་རྣམས་དང་། ད་ལྟ་རང་ལ་དབང་བསྐུར་རྒྱུད་བཤད་མན་ངག་གནང་བ་སོགས་བཀའ་དྲིན་གསུམ་ལྡན་གྱི་བླ་མ་རྣམས་དང་། མ་འོངས་པ་ན་སེམས་ཅན་གྱི་རྒྱུ་ཡོད་པ་རྣམས་དང་། མ་ངེས་པའི་དུས་ན་རྡུལ་གཅིག་གི་སྟེང་ན་རྡུལ་སྙེད་ཀྱི་གྲངས་དང་མཉམ་པར་བཞུགས་པའི་སངས་རྒྱས་ཐམས་ཅད་དང་། མདོར་ན་ཕྱོགས་བཅུ་དུས་བཞིའི་སངས་རྒྱས་དང་བྱང་སེམས་རྣམས་ཀྱི་ཐུགས་རྣམ་པ་ཐམས་ཅད་མཁྱེན་པའི་ཡེ་ཤེས་དེ་ཉིད་ཀྱི་ངོ་བོ་གཅིག་ཏུ་འདུས་པ་མཚུངས་མེད་ཐུགས་རྗེའི་གཏེར་མཛོད་དྲིན་ཅན་རྩ་བའི་བླ་མ་ཡིན་པ་ལ་རྣམ་པ་ཡི་དམ་གྱི་སྐུར་བཞེངས་ནས་མདུན་ཀྱི་ནམ་མཁར་འཇའ་འོད་ཀྱི་གུར་དང་མེ་རི་མེ་དཔུང་གི་ཀློང་དུ་དཀྱིལ་འཁོར་གྱི་གཙོ་བོ་གུ་རུ་སྣང་སྲིད་ཟིལ་གནོན་དང་རིག་འཛིན་ཆེན་པོ་བརྒྱད། རྗེ་འབངས་ཉི་ཤུ་རྩ་ལྔ། འཁོར་གང་ཆེན་སྡེ་བཞི་སོགས་ཞི་བ་དང་ཁྲོ་བོའ་ིརྣམ་པར་སྤྲིན་དཔུང་འཁྲིགས་པ་བཞིན་བཞུགས་པར་མོས་ལ། དེ་རྣམས་ཀྱི་མདུན་དུ་རང་གི་རྩ་བའི་ཕ་མ་དང་དགྲ་བགེགས་ཀྱི་གཙོ་བྱས་པའི་སེམས་ཅན་ཐམས་ཅད་སྲིད་པ་རིགས་དྲུག་གི་སྡུག་བསྔལ་རྒྱུ་འབྲས་ལས་སྣང་བག་ཆགས་ཐམས་ཅད་དང་བྲལ་ནས་མཐའ་གཉིས་ལ་མི་གནས་པར་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་ཐོབ་པ་ཞིག་ཁྱེད་རྣམས་མཁྱེན་སྙམ་པའི་བློ་གཏད་ལིང་བསྐྱུར་གྱི་སྒོ་ནས་ཚོགས་ཞིང་གི་ལྷ་ཚོགས་རྣམས་ལ་སྐྱབས་སུ་འགྲོ་བ་དང་། དེའི་ཆེད་དུ་བླ་མ་རིག་འཛིན་འདུས་པའི་སྒྲུབ་པ་ཟབ་མོ་ཉམས་སུ་བླང་བར་བྱ་སྙམ་པ་སྨོན་སེམས་དང་། བསྙེན་ཡིག་དངོས་གྲུབ་ཀྱི་ཟ་མ་ཏོག་ལས། འཇུག་སེམས་ནི་གཞན་དོན་ལ་དངོས་སུ་འཇུག་པ་ཡིན་པས། བགེགས་གཏོར་དང་མཆོད་ཚོགས་ཕོངས་མེད་དུ་འབུལ་བ་སྦྱིན་པ། ཕྱི་ནང་གི་རྒྱུ་འགྲུལ་གཅོད་ཅིང་ངག་བཅད་བྱེད་པ་དང་འགལ་རྐྱེན་ཇི་ལྟ་བུ་བྱུང་ཡང་མཚམས་མི་གྲོལ་བ་སོགས་དམ་བཅའ་རིས་སུ་མི་བོར་བ་ཚུལ་ཁྲིམས། ཐུན་བཞིའམ་དྲུག་ལ་སོགས་དང་པོ་ནས་ཇི་ལྟར་དམ་བཅས་པའི་དཀའ་སྤྱད་བཟོད་ཅིང་ཚོད་ཡོད་ཕྲི་གཞོལ་གྱི་དབང་དུ་མི་གཏོང་བ་བཟོད་པ། ཐུན་དངོས་དང་ཐུན་མཚམས་ཀྱི་བྱ་བ་གང་ལའང་སོས་དལ་ལེ་ལོའི་དབང་དུ་མི་གཏོང་བ་བརྩོན་འགྲུས། རྟེན་དང་བརྟེན་པའི་རྣམ་པ་གསལ་བ་ལ་སྒོ་ལྔ་སྡུད་ཅིང་ཐ་མལ་གྱི་འཛིན་རྟོག་ཟིལ་གྱིས་གནོན་པ་ལས་ཅུང་ཟད་ཀྱང་མི་གཡེངས་པ་བསམ་གཏན། བསྐྱེད་རིམ་སྒོམ་མཁན་གྱི་སེམས་ཐ་མལ་རང་རྒྱུད་ཅན་མ་ཡིན་པར་ཆོས་ཉིད་མ་བཅོས་པའི་གསལ་ཆར་རང་བཞིན་ལྷུན་གྲུབ་ཏུ་འཆར་བ་ཤེས་རབ་སྟེ་རང་སའི་ཕ་རོལ་ཏུ་ཕྱིན་པ་དྲུག་གི་དོན་གོ་ཞིང་དེ་དོན་ལས་མི་འདའ་བ་འཇུག༵་སེམ༵ས་དང་། དེ་དག་ཐམས་ཅད་བློ་འདས་ཀྱི་དྲན་པའི་རྩིས་ཟིན་པ་ལ་དོན༵་དམ༵་སེམས་བསྐྱེད་ཀྱི་ཐ་སྙད་བཏགས་པའི་དོན་ཤེས་ན་མདོ་སྔགས་དགོངས་པ་གཅིག་ཏུ་མཐུན་པའི་གནད་ཀྱང་རིག་པ་ཡིན། འདིའི་ཡན་ལག་བདུན་པ་དོན་དམ་བདེན་པ་དང་འབྲེལ་བས། དབང་པོ་ཡང་རབ་ཀྱིས་རྫོགས་ཆེན་ཐོད་རྒལ་གྱི་དགོངས་པ་ཤེས་ན་ལྷུན་གྲུབ་སྣང་སྟོང་དུ་ཤར་བ་ཟབ་མོའི་བསྐྱེད་རིམ་ལ་འབྱོར་ཀྱང་དེའི་སྣོད་དཀོན་པས་མོས་པས་དཔྱོད་པ་རྣམས་ཀྱིས་ཡན་ལག་བདུན་པ་སྤྱི་ལྟར་ཚོགས་གསོག་གི་འདུན་པ་ལ་སྦྱོང་། ཞེས་གསུང་། དེ་ཡང་ཅུང་ཟད་ཙམ་སྨོས་ན་ལམ་གྱི་ཁྱད་པར་ཐོད་རྒལ་ནི་སྣང་བ་བཞིའི་དང་པོ་མཚོན་བྱ་སྐུ་དང་ཡེ་ཤེས་ཀྱི་ལམ་རྟགས་མཚོན་བྱེད་ཐིག་ལེ་སྟོངས་པའི་སྒྲོན་མ་དང་རིག་པ་ལུ་གུ་རྒྱུད་ཀྱི་སྒྲོན་མ་སོགས་ཀྱི་ཞལ་མཐོང་བ་ལ་ཕྱག་༵འཚ༵ལ་བ་དང་། དེ་ལས་ཀྱང་སྣང་བའི་འཕེལ་ཇེ་ཆེར་སོང་ནས་ཐིག་ལེའི་ནང་དུ་སྐུའི་རྣམ་པ་ཅུང་ཟད་ཤར་བའམ། ཤར་གྲབ་བྱས་པ་ཚུན་ཆད་ལ་མཆོད་༵པ༵འི་ཐ་སྙད་བཞག་པའོ། །དེ་ལས་ཀྱང་སྐུ་ལྔ་ཚོམས་ནས་སྣང་ཡུལ་ཐམས་ཅད་ཁྱབ་པ་ཚུན་ཆད་བཤགས་བྱ་བཤགས་བྱེད་ལས་འདས་པས་དེ་ལྟར་བཤག༵ ས་པ༵་ཞེས་བརྗོད་པའོ། །དེ་ནས་ཕྱི་ཆོས་ཅན་གྱི་སྣང་བ་ཐམས་ཅད་ཉེར་དགུའི་ཟླ་བ་གནམ་སྟོངས་དབྱིངས་སུ་འཁྱིལ་བ་ལྟར་རྣམ་པར་མི་རྟོག་པའི་ངང་དུ་ཞི་བ་ལ་ཆོས་ཉིད་ཟད་སར་ཞེས་སྒོམ་བྱ་བསྒོམ་བྱེད་ལས་གྲོལ་བ་ལ་རྗེས༵་སུ་༵ཡི༵་ར༵ང་གི་ས་བཅད་བྱས་པའོ། །དེའི་ཚེ་མི་སློབ་པའི་ལམ་མངོན་དུ་གྱུར་པ་ལ་མདོ་སྔགས་སྤྱི་དང་། རྫོགས་ཆེན་གྱི་ཁྱད་པར་ལས་འཇའ་ལུས་འཕོ་བ་ཆེན་པོའ་ིསྐུར་གནས་གྱུར་ནས་རྡུལ་གཅིག་གི་གོ་ས་ན་རྡུལ་སྙེད་ཀྱི་རྒྱལ་བའི་ཞིང་ཁམས་དེས་ཀྱང་མཁའ་ཁྱབ་ཀྱི་འགྲོ་བའི་དོན་རྒྱུན་ཆད་མེད་པར་བྱེད་ནུས་པ་ལ་ཆོས༵་འཁོ༵ར་བསྐོར་བར་བསྐུལ་བའོ། །འཇའ་ལུས་སྐུ་བརྙེས་པདྨ་ཀ་ར་དང་། བི་མ་ལ་ཇི་བཞིན་མྱ་ངན་ལས་མི་འདའ་བར་སྲིད་པ་ཇི་སྲིད་པར་ཕན་བདེ་སྤེལ་བའི་བྱེད་པ་པོར་བཞུགས༵་ཞེས་པ་འཁོར་བ་དང་སྒོ་མཐུན་པའི་གསོ༵ལ་བ༵་བཏབ་པའོ། །དེ་ལྟ་བུའི་ཟག་བཅས་ཟག་མེད་ཀྱི་དགེ་ཚོགས་ཇི་མཆིས་པ་ཐམས་ཅད་ཡེ་ཤེས་ཆེན་པོའ་ིདབྱིངས་སུ་དྲིལ་ཏེ། ཆོས་ཐམས་ཅད་ནང་དབྱིངས་བརྗོད་པའི་མཐའ་དང་བྲལ་བ་དེ་འཁོར་འདས་གཉིས་ཀྱི་སྤྱི་གཞིའམ། ཡེ་གཞི་ཡིན་ཡང་བསྔོ་བའི་ཡུལ་ཡང་དག་པ་མ་ཡིན་ཏེ་སྟོངས་པ་ཕྱོགས་གཅིག་པ་ཡིན་པའི་ཕྱིར་རོ། །དེས་ན་སྟོངས་ཆེན་ནམ་མཁའ་ལྟ་བུ་དེ་ལས་འཁྲུལ་གྲོལ་གྱི་ལམ་མམ་རང་བཞིན་གྱི་གཤིས་ལྷུན་གྱིས་གྲུབ་པའི་སྐུ་དང་ཡེ་ཤེས་ཀྱི་འཆར་གཞི་རྨ་བྱའི་སྒོ་ང་རུམ་ན་ཡོད་པའི་སྐབས་སམ། ཤེལ་འོད་ཉི་མའི་མ་བསླང་བ་ལྟ་བུའི་གནས་སྐབས་ཏེ། ད་ལྟའི་རིག་པ་སྐད་ཅིག་མའི་གདེངས་བགྲེས་རྒུད་དང་བྲལ་བ་འདི་གཞོན་ནུ་ཡིན་ལ། བུམ་སྐུ་ཞེས་པ་སྐུ་དང་ཞིང་ཁམས་ཕྱིར་མ་གསལ་ཡང་ནང་དུ་མི་འགགས་པ་གོང་གསལ་བཞིན་རྨ་བྱའི་སྒོ་ང་དང་ཤེལ་འོད་ཀྱི་དཔེས་བསྟན་པ་དེར་བསྔ ― ARJ001_Page_0005 ―
[མ་དཔེ་གཟིགས་ན་འདིར་གནོན།]
ོ༵་བ༵འི་ཐ་སྙད་སྦྱར་བའོ། །དེ་ལྟར་འབྲས་དུས་ཀྱི་གནས་ལུགས་ཇི་བཞིན་ལམ་གྱི་གནས་སྐབས་དང་ཚུལ་མཐུན་པ་དང་། ཡང་ན་རྒྱུ་དུས་ཀྱི་ཚོགས་བསགས་ང་རྒྱལ་གྱི་གཉེན་པོར་ཕྱག་འཚལ་བ། སེར་སྣའི་གཉེན་པོར་མཆོད་པ་འབུལ་བ། ཞེ་སྡང་གི་གཉེན་པོར་སྡིག་པ་བཤགས་པ། ཕྲག་དོག་གི་གཉེན་པོར་གཞན་གྱིས་དགེ་བ་ལ་རྗེས་སུ་ཡི་རང་། ལོག་ལྟའི་གཉེན་པོར་ཆོས་འཁོར་བསྐོར་བར་བསྐུལ་བ། གཏི་མུག་གི་གཉེན་པོར་མྱ་ངན་ལས་མི་འདའ་བར་བཞུགས་པར་གསོལ་འདེབས་པ། དེ་ལྟར་ཚོགས་བསགས་ཀྱི་དགེ་རྩ་རྣམས་སེམས་ཅན་ཐམས་ཅད་སངས་རྒྱས་འཐོབ་བྱེད་ཀྱི་རྒྱུར་བསྔོ་བ་སྟེ། རྒྱས་པར་ཁ་གསལ་ཞིང་གོ་སླ་བ། དོན་གྱི་གནད་ཟབ་ཅིང་གཏིང་ཕྱིན་པ། ཚིག་སྦྱོར་སྙན་ཞིང་འཇེབས་སྟེ། ཁྱད་པར་དུ་མ་དང་ལྡན་པའི་གཞུང་ཡིད་བཞིན་ནོར་བུ་ལྟ་བུ་དཔལ་སྤྲུལ་རིན་པོ་ཆེས་མཛད་པའི་ཀུན་བཟང་བླ་མའི་ཞལ་ལུང་ལ་གཟིགས་པར་ཞུ། མཐར་སྐྱབས་ཡུལ་གྱི་ལྷ་ཚོགས་རྣམས་དཀྱིལ་འཁོར་གྱི་གཙོ་བོ་ལ་ཐིམ། དེ་འོད་དུ་ཞུ་ནས་ཐིག་ལེ་དམར་བོ་ཞིག་ཏུ་གྱུར་པ་རང་གི་སྨིན་མཚམས་སུ་ཐིམ་པའི་རྐྱེན་གྱིས་རང་ཉིད་སྐད་ཅིག་གིས་ཁྲོ་བོའི་རྒྱལ་བོ་དབང་ཆེན་རྟ་མཆོག་རོལ་བའི་སྐུར་གྱུར་པར་བསྒོམ་ལ་སྔོན་གཏོར་བྱིན་རླབས་བྱས་ཏེ། དམ་ཆོས་བྱང་ཆུབ་སྒྲུབ་པ་ལ་མཐུན་རྐྱེན་བསྒྲུབས་པར་བྱེད་པའི་དཀར་ཕྱོགས་སྐྱོང་བའི་གཞི་བདག་གློ་བུར་ལྷག་པ་དང་གཉུག་མར་གནས་པ་སོགས་ཕྱི་ནང་གསང་བའི་སྡེ་བརྒྱད་ལ་གཏོར་མ་ཕུལ། དེ་ཡང་གཏོར་སྣོད་རིན་པོ་ཆེ་སྣ་ཚོགས་ལས་གྲུབ་པ། རྒྱ་ཁྱོན་ཆོས་ཀྱི་དབྱིངས་དང་མཉམ་པའི་ནང་དུ་དཀར་གཏོར་བདུད་རྩིའི་རྒྱ་མཚོར་གྱུར་པ་ངོ་བོ་སྟོངས་ཉིད་ཀྱི་ཡེ་ཤེས་ལས་གྲུབ་པ། རྣམ་པ་བདུད་རྩིའི་རང་བཞིན་དཀར་ལ་དམར་བའི་མདངས་ཆགས་པ། བྱེད་ལས་མགྲོན་རྣམས་ཀྱི་དབང་ཡུལ་དུ་སྤྱོད་པས་སེམས་བདེ་སྟོང་གི་རོས་ཚིམས་པར་དམིགས་ལ། ཆོས་སྒྲུབ་པའི་མཐུན་རྐྱེན་བསྒྲུབ་པར་མཛོད་ཅིག་ཅེས་ཕྲིན་ལས་བཅོལ། དེ་ནས་ནག་ཕྱོགས་སྐྱོང་བའི་གདོན་བགེགས་ཀྱི་རིགས་ལ་གཏོར་མ་སྦྱིན་ནས་བཀའ་བསྒོ་བ་ནི། བགེགས་གཏོར་གྱི་ངོ་བོ་ཟག་མེད་ཀྱི་བདུད་རྩི་ཡིན་པ་ལ། རྣམ་པ་ནི་སྔོན་རང་གིས་བསད་པ། བརྡུང་བ། འཕྲོག་པ་ལ་སོགས་པའི་ལན་ཆགས་སྙོགས་པའི་རིགས་དང་། ཁྱད་པར་རང་རང་གི་ཞེ་སྡང་ལས་གྲུབ་པའི་ཕོ་གདོན་རྒྱལ་བོ། འདོད་ཆགས་ལས་གྲུབ་པའི་མོ་གདོན་འདྲེ་མོ། གཏི་མིག་ལས་གྲུབ་པའི་ཀླུ་གདོན་ས་བདག་སོགས་སུ་གྱུར་པ་རྣམས་ལ་གང་དང་ཅི་འདོད་པའི་ལོངས་སྤྱོད་དུ་གྱུར་པར་བསམ། བྱེད་ལས་ནི་དེ་དག་གིས་ལོངས་སྤྱོད་མ་ཐག་ཏུ་མཁོན་འཛིན་གནོད་སེམས་སོགས་ཞི་ནས་བྱམས་དང་སྙིང་རྗེའི་རང་བཞིན་ཅན་སེམས་བདེ་སྟོངས་ཀྱི་རོས་ཚིམ་པར་དམིགས་ནས། གཏོར་མ་གཟུགས་མཛེས་པ། སྒྲ་སྙན་པ། དྲི་ཞིམ་པ། རོ་མངར་བ། རེག་བྱ་འཇམ་པ་སོགས་འདོད་པའི་ཡོན་ཏན་མ་ཚང་བ་མེད་པ་དེ་ཉིད་དུས་ཇི་སྲིད་སངས་རྒྱས་ཀྱི་གོ་འཕང་མ་ཐོབ་བར་དུ་འཛད་པ་མེད་པའི་གཏེར་ཆེན་པོར་རྫས་སྔགས་ཏིང་ངེ་འཛིན་གསུམ་གྱིས་བྱིན་གྱི་བརླབས་པ་འདི་ཉིད་ཀྱིས་མགུ་བར་གྱིས་ལ། མི་མི་ཡུལ་དང་ལྷ་འདྲེ་རང་ཡུལ་ན་སྐྱིད་པ་ཡིན་པས་རྒྱ་མཚོར་དོན་ཡོངས་སུ་གྲུབ་པའི་ཚོང་བ་བཞིན་དུ་དགའ་སྤྲོའི་གླུ་དབྱངས་ལེན་བཞིན་རང་ཡུལ་དུ་འགྲོ་བར་གྱིས་ཤིག་ཅེས་གཏོར་མ་ཕུལ་ཞིང་བཀའ་བསྒོ། གལ་ཏེ་བཀའ་ལ་མི་ཉན་པར་སྒྲུབ་པ་ཟབ་མོ་ལ་བར་ཆད་བྱེད་ན། རང་ཉིད་ཡི་དམ་ཁྲོ་རྒྱལ་རྟ་མགྲིན་དུ་གསལ་བའི་སྐུ་ལས་ཁྲོ་བོ་མཚོན་ཆ་མེ་དཔུང་སོགས་དཔག་ཏུ་མེད་པ་སྤྲོས་ནས་ར་ཁྱུ་སེར་བས་དེད་པ་ལྟར་བསྒྲལ་བའི་ཞིང་བཅུ་དང་ཉམས་པ་བདུན་ལྡན་སྤྱི་དང་། ཁྱད་པར་དུ་རྣལ་འབྱོར་བ་བདག་ལ་དོ་བསྡོ་ཕོད་བཙུགས་མི་ཁ་གླེང་བརྗོད་སོགས་ཅི་ནུས་ཀྱིས་གནོད་པའི་བསམ་སྦྱོར་སྣ་ཚོགས་ལྷུར་ལེན་མཁན་གྱི་རིགས་སུ་གྱུར་པ་སྡང་བྱེད་དགྲ་བོའ་ིཡུལ་དུ་བསྐྲད་པར་བསམ་ལ་ཧཱུཾ་བཞིའི་སྔགས་བརྗོད། འདིར་དྲག་སྔགས་སོ་ལྔ་མི་དགོས་པ་ནི་གསུང་རྒྱུན་ཡིན། ཐུན་གྱིས་བྲབ་ཅིང་གུ་གུལ་བདུག དེ་ནས་ཁྲོ་མཚོན་མེ་དཔུང་རྣམས་གཅིག་ཏུ་གྱུར་ནས་བསྲུང་བའི་གུར་དུ་གྱུར་པ་ནི་འོག་རྡོ་རྗེའི་ས་གཞི། སྟེང་རྡོ་རྗེའི་ར་བ་དྲ་བ་བླ་བྲེ་རྣམས་ཀྱི་སྟེང་རྡོ་རྗེའི་གུར་ལྕགས་རྨོག་ཁ་སྦུབ་པ་ལྟ་བུའི་སྟེང་རྡོ་རྗེ་སྔོན་པོ་རྭ་གདེངས་ཀྱི་ཏོག་ལས་མེ་དཔུང་དང་། གུར་ལས་ཁྲོ་མཚོན་སྤྲོ་བ་ལ་བགེགས་དང་ལོག་འདྲེན་རྣམས་བསད་ཅིང་བསྐྲད་པར་འཇིགས་ཏེ་ཕྱོགས་སུ་ཉེ་མི་ནུས་པ་དང་། དེ་ཡི་ཕྱི་རོལ་ཏུ་ཡེ་ཤེས་ལྔའི་ངོ་བོ་ཁ་དོག་ལྔ་ལྡན་གྱི་མེ་དཔུང་རབ་ཏུ་འབར་བའི་ཀློང་དུ་ཕྱོགས་བཞིར་ཐོ་ཕོ་བྲང་དུ་གྱུར་པའི་ནང་དུ་དཔལ་སྨོན་ལས། ཕྱོགས་བཞིར་བཀའ་ཉན་རྒྱལ་བོ་ཆེན་པོ་བཞི༔ ཕྱི་ནང་གསང་བའི་ལྷ་སྲིན་སྡེ་བརྒྱད་ཀུན༔ ཕོ་ཉར་མངགས་ནས་མུ་སྟགས་དམ་སྲི་འདུལ༔ དམ་ཅན་རྒྱ་མཚོའི་དཔའ་རྟགས་རྒྱལ་རྔ་བརྡུང༔ ཞེས་གསུངས་པ་བཞིན། རྒྱལ་ཆེན་སྡེ་བཞི་དཔུང་དང་བཅས་པ། དཔལ་མགོན་བདུན་ཅུ་ལྷ་དམག་བྱེ་བ་དུང་ཕྱིར་མང་བོ་འཚོགས་ནས་ཞལ་ཕྱིར་གཟིགས་ཏེ་ཕྱིའི་བར་ཆད་རྣམས་ནང་དུ་མི་གཏོང་བའི་ཕྲིན་ལས་མཛད་ཅིང་བཞུགས་པར་དམིགས། དེ་ནི་མཚན་བཅས་ཀུན་རྫོབ་ཀྱི་བསྲུང་གུར་དང་། བསྲུང་བྱ་བདག་དང་། བསྲུང་བྱེད་གུར་ཁང་། བསྲུང་རྒྱུའི་གདོན་བགེགས་ཐམས་ཅད་གང་དུའང་མི་དམིགས་ཤིང་རིག་སྟོངས་སྤྲོས་པ་དང་བྲལ་བའི་ངང་དུ་འཇོག་པ་ནི་དོན་དམ་མཚན་མ་མེད་པའི་བསྲུང་གུར་ཡིན་ནོ། །བྱིན་འབེབས་སྐབས་རང་ཉིད་ཡི་དམ་རྟ་མགྲིན་དུ་གསལ་བའི་ཐུགས་ཀའི་ས་བོན་ལས་འོད་ཟེར་དམར་བོ་ལྕགས་ཀྱུའི་སྣེ་ལྟ་བུ་ཉི་རྡུལ་གྱི་གྲངས་དང་མཉམ་པ་འཕྲོས་ཏེ་ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པ་རྣམས་ཀྱི་ཐུགས་ཀར་ཕོག་པ་ཙམ་གྱིས་ངོ་བོ་རྒྱལ་བ་སྲས་བཅས་ཡིན་པ་ལ། རྣམ་པ་བརྒྱུད་གསུམ་བླ་མ་རྣམས་ཀྱི་སྐུ་ཕྱག་རྒྱ་ཆོས་སྐུ་ཀུན་ཏུ་བཟང་བོ་ནས་རང་གི་རྩ་བའི་བླ་མའི་བར་གྱི་སྐུ་མདོག་ཕྱག་མཚན་སྤྱན་གྱི་དཀར་ནག་ཚུན་ཆད་མ་འདྲེས་པར་ཁ་བ་བུ་ཡུག་འཚུབས་པ་ལྟར་བྱོན་པ་དང་། གསུང་ཡིག་འབྲུ་ཨོཾ་ཨཱཿཧཱུཾ། ཨོཾ་ཧཱུཾ་ཏྲཱཾ་ཧྲཱི་ཨཱཿདང་སིདྡྷི་རྟེན་སྙིང་དབྱངས་གསལ་སོགས་དང་། ཐུགས་ཕྱག་མཚན་ནི་རྡོ་རྗེ་འཁོར་ལོ་ནོར་བུ་པདྨ་རྒྱ་གྲམ་སོགས་ཀྱི་རྣམ་པར་བྱོན་ནས་རྒྱ་མཚོ་ཆེན་པོ་ལ་ཁ་ཆར་འབབས་པ་ལྟར་བདག་གནས་ཡོ་བྱད་རྣམས་ལ་སིབ་སིབ་ཐིམ་པས་ཐམས་ཅད་སྐུ་གསུང་ཐུགས་ཀྱི་རང་བཞིན་དུ་བྱིན་གྱིས་བརླབས་པར་བསམ་ལ་དད་མོས་དྲག་པོས་སྒོ་ནས་བྱིན་འབེབས་ཀྱི་ཚིག་རྣམས་བརྗོད། ཨོཾ་ཨཱཿཧཱུཾ་ནི་སྐུ་གསུང་ཐུགས་ཀྱི་ས་བོན། བིདྱ་རྡ་ར་རིག་པ་འཛིན། ཨེ་ནི་འདིར། ཨ་ར་ལི་ནི་རོལ། ཕཻཾ་ཕཻཾ་ཁོས་ཁོས་ཞེས་དབང་དུ་སྡུད་པའི་ཚིག་ཡིན་ལ། དོན་ཐོབ་ཀྱི་དབང་དུ་ན་རིག་པ་འཛིན་པའི་ཚོགས་མ་ལུས་པས་བདག་ལ་སྐུ་གསུང་ཐུགས་ཡོན་ཏན་ཕྲིན་ལས་ལྔས་བྱིན་གྱིས་རློབས་ཤིག་པའོ། །ཧཱུཾ་དགུ་སྦྲེལ་བ་ནི་འདི་བླ་མ་བཀའ་བརྒྱད་ཡིན་པར་ཕྱི་ལྟར་བྱང་སེམས་ནང་རིག་འཛིན༔ གསང་བ་དྲག་གཏུམ་འབར་བའི་ལྷ༔ བདེ་གཤེགས་ཡོངས་རྫོགས་སྒྲུབ་སྡེ་བརྒྱད༔ ཅེས་དང་། རང་གཞུང་ལས། ཕྱོགས་བཞི་ཕྱོགས་མདོག་མཚམས་བཞི་མཐིང་༔ སྒྲུབ་སྡེ་བརྒྱད་ཀྱི་ངོ་བོར་གསལ༔ ཞེས་དང་། དཔལ་ཆེན་གྲུབ་པའི་རིག་འཛིན་བརྒྱད༔ ཀུན་ཀྱང་ཧེ་རུ་ཀ་པའི་ཆས༔ ཞེས་སོགས་དང་། དཔལ་འདུས་ལས། ཆེ་མཆོག་བཛྲ་ཐོད་ཕྲེང་རྩལ༔ སོགས་གསུངས་པ་ལྟར་དཔལ་ཆེན་གཙོ་འཁོར་དགུའི་ཐུགས་རྒྱུད་སྐུལ་བྱེད་དང་། རིགས་ལྔའི་ནང་དུ་སངས་རྒྱས་ཐམས་ཅད་འདུས་པའི་ཕྱིར་ན་བྱིན་འབེབས་སྐབས་རིགས་ལྔའི་ས་བོན་དང་ཕྱག་མཚན་རྣམས་སྤྱན་དྲངས་རྒྱུའི་དགོས་པ་ཡང་དེ་ཡི་ཕྱིར་རོ། །མཆོད་རྫས་བྱིན་རླབས་ནི། ཨོཾ་ཨཱཿཧཱུཾ་ཞེས་ངོ་བོ་རྒྱལ་བ་རྣམས་ཀྱི་སྐུ་གསུང་ཐུགས་རྡོ་རྗེའི་རང་བཞིན་ཡིན་པ་ལ། རྣམ་པ་གསེར་དངུལ་མུ་ཏིག་མུ་མིན་བཻཌརྱྰུ་པདྨ་ར་ག་སོགས་ལས་གྲུབ་པའི་སྣོད་སྟོང་གསུམ་དང་མཉམ་པའི་ནང་དུ་ཡན་ལག་བརྒྱད་ལྡན་གྱི་མཆོད་ཡོན་དང་། དྲི་བཟང་གི་ཆུའི་ཞབས་བསིལ། ལྷ་དང་ཀླུ་དང་མི་ཡུལ་གྱི་རི་ཐང་ཆུ་མཚོ་སོགས་ལས་སྐྱེས་ཤིང་དུག་རིགས་མ་ཡིན་པའི་རང་བྱུང་གི་མེ་ཏོག་ཨུ་དུམ་ཝ་ར་ཙམ་པ་ཀ་དང་། དར་ཟབ་དང་རིན་པོ་ཆེ་ལས་བཅོས་པའི་མེ་ཏོག ཙནྡན་དཀར་བོ་དང་ཨ་ག་རུ་སོགས་རང་བྱུང་དང་སྦྱར་བྱུང་གི་དྲི་ངད་བཟང་བོ་དང་ལྡན་པའི་བདུག་སྤོས། འབྲུ་མར་དང་རྩི་མར་གྱིས་དང་། ནོར་བུ་རིན་པོ་ཆེ་ཉི་མ་དང་ཟླ་བ་གཟའ་སྐར་སོགས་ཀྱི་སྣང་གསལ། གུར་ཀུམ། ཨ་ཀ་རུ། ཀ་བུར། ཙནྡན་སོགས་བསིལ་སྨན་གྱི་རིགས་དང་དྲི་བཟང་བོ་སྣ་ཚོགས་ཀྱི་སྦགས་པའི་དྲི་ཆབ། བཟའ་བ་དང་བཅའ་བ་ལྡག་པ་གཞིབ་པའི་རིགས་རོ་དང་ཁ་དོག་སྣ་ཚོགས་པ་བཟང་ཞིང་གྱ་ནོམས་པའི་ཚོགས་ཀྱི་ཞལ་ཟས། འབུད་དཀྲོལ་བརྡུང་གསུམ་སྣ་ཚོགས་ཀྱི་གཞན་ཡིད་དབང་མེད་དུ་འགུགས་པའི་རོལ་མོའ་ིབྱེ་བྲག་སྣ་ཚོགས་པ། རྒྱལ་སྲིད་སྣ་བདུན་དང་ཉེ་བའི་རིན་ཆེན་བདུན། བཀྲ་ཤིས་རྟགས་བརྒྱད་དང་རྫས་བརྒྱད་སོགས་ཕྱི་མཆོད་དང་། ཕོ་ཐོད་སྐམ་པོ་དཔྲལ་བ་རང་ལ་བསྟན་པ་སྟོང་གསུམ་དང་མཉམ་པའི་ནང་དུ་ཤ་ལྔ་དང་བདུད་རྩི་ལྔ་སྟེ་དབུས་སུ་མི་ཤ་དང་དྲི་ཆེན། ཤར་དུ་བ་གླང་གི་ཤ་དང་ཁུ་བ། ལྷོར་ཁྱི་ཤ་དང་ཀླད་པ། ནུབ་ཏུ་རྟ་ཤ་དང་རྡུལ། བྱང་ཏུ་གླང་ཆེན་གྱི་ཤ་དང་དྲི་ཆུ་རྣམས་འོད་ཟེར་སྤྲོ་བསྡུའི་རིགས་ལྔ་ཡབ་ཡུམ་དུ་གྱུར་པ་མཉམ་པར་སྦྱོར་བས་བྱང་སེམས་དཀར་དམར་གྱི་རྒྱུན་བབས་པས་ཐོད་པ་གང་ཞིང་ལྷ་རྣམས་ཀྱང་འོད་དུ་ཞི་ནས་དེར་ཐིམ་ནས་གཉིས་མེད་དུ་འདྲེས་ཏེ་བདུད་རྩིའི་རྒྱ་མཚོར་གྱུར་པ་དེ་ཉིད། དགོངས་འདུས་ལས། ལྷ་ལ་ཕོག་ན་དགྱེས་པ་སྐོང་བའི་རྫས༔ མཆེད་ལ་ཕོག་ན་དངོས་གྲུབ་འབྱུང་བའི་བཅུད༔ དགྲ་ལ་ཕོག་ན་སྲོག་རྩ་གཅོད་པའི་མཚོན༔ བགེགས་ལ་ཕོག་ན་རྡུལ་དུ་རློག་པའི་ཐུན༔ གང་ལ་ཕོག་ཀྱང་དོན་གྲུབ་བདུད་རྩིར་དམིགས༔ ཞེས་གསུངས་པ་ལྟར་རོ། །རཀྟ་ནི་མོ་ཐོད་རློན་པ་སྐྲ་དང་བཅས་པ་དཔྲལ་བ་རང་ལ་བསྟན་པའི་ནང་དུ་ཁམས་གསུམ་གྱི་ཞེན་རྟོག་ཐམས་ཅད་ཁྲག་གི་རྣམ་པར་འཁྱིལ་བའི་དབུས་སུ་ལྷ་མོ་གིརྟི་མ་དམར་མོ་གཅེར་བུ་གྲི་ཐོད་ཅན་གྱི་བྷ་ག་ནས་རཀྟའི་རྒྱུན་བབས་པ་དང་འདྲེས་ཤིང་གང་བའི་མཐར་ལྷ་མོ་ཡང་འོད་དུ་ཞུ་ནས་དེར་ཐིམ་པས་ཆགས་མེད་བདེ་བ་ཆེན་པོའ་ིངོ་བོ་རཀྟའི་རྒྱ་མཚོ་ལས་རྦ་རླབས་འཕྱོ་ཞིང་མི་རོ་རྟ་རོ་འཁྲིགས་པ་ལས་འདོད་ཡོན་གྱི་སྤྲིན་འཁྲིགས་པར་བསམ་མོ། །གཏོར་མ་ནི་མ་ནིང་གི་ཐོད་པ་རྙིད་པ་སྟོང་གསུམ་དང་མཉམ་པའི་ནང་དུ་འབྲུ་རིགས་དང་ཤིང་ཏོག་ལས་གྲུབ་པའི་བཟའ་བ་དང་བཅའ་བ། ཞིང་བཅུ་དང་ཉམས་པ་བདུན་ལྡན་གྱི་ཤ་སོགས་རི་བོས་གཏོས་དང་མཉམ་ཞིང་། ཁྲག་དང་ཛ་གད་ཀྱི་བཏུང་བ་རྒྱ་མཚོ་ཆེན་པོ་ལ་འགྲན་པ། རྣམ་པ་དེ་ལྟར་ཡིན་པ་ལ་ངོ་བོ་ཡེ་ཤེས་ཀྱི་རང་བཞིན་ཟག་པ་མེད་པའི་བདུད་རྩི་སོགས་མཆོད་རྫས་ཐམས་ཅད་མཆོད་པའི་ལྷ་མོ་དཀར་སེར་དམར་ལྗང་མཐིང་ག་རྣམས་ཀྱི་ཕྱག་ན་བསྣམས་པ་གྲངས་མེད་པ་དང་། དེ་དག་རེ་རེ་ལས་ཀྱང་རྡུལ་སྙེད་ཀྱི་གྲངས་མཉམ་གྲངས་མེད་པ་སྤྲོས་ཏེ་ཀུན་ཏུ་བཟང་བོའ་ིམཆོད་སྤྲིན་དུ་དམིགས་ནས། ཨོཾ་བཛྲ་སོགས་ཀྱི་སྔགས་ལན་གསུམ་བརྗོད། དེ་ཡང་དང་བོར་མཆོད་རྫས་རྣམས་གསལ། གཉིས་པར་ནམ་མཁའ་བར་སྣང་ཐམས་ཅད་གང་བར་མོས། གསུམ་པར་ངོ་བོ་རྒྱལ་བ་རྣམས་ཀྱི་སྐུ་གསུང་ཐུགས་རྡོ་རྗེའི་རང་བཞིན་ལས་གྲུབ་པ་བདེན་མེད་སྒྱུ་མ་ལྟ་བུ་ཡིན་པ་ལ། རྣམ་པ་ཕྱི་ནང་གསང་བའི་མཆོད་རྫས་མ་ཚང་བ་མེད་པ་ནམ་མཁའ་མཛོད་ཀྱི་རང་བཞིན་ཅན། བྱེད་ལས་ལྷ་ཚོགས་རྣམས་ཀྱི་དབང་བོ་དྲུག་གི་སྤྱོད་ཡུལ་དུ་མཆོད་པ་ཙམ་གྱིས་དེ་དག་གི་ཐུགས་རྒྱུད་ལ་སྔར་མེད་ཀྱི་བདེ་བ་ཁྱད་པར་ཅན་སྐྱེས་ཏེ་བསྐལ་མང་གི་ཚོགས་སྐད་ཅིག་ལ་རྫོགས་པའི་རང་བཞིན་ཅན་དུ་གྱུར་བར་བསམ། དེ་ནས་ཏེང་ངེ་འཛིན་ལྷའི་གཟེར་དེ་ལ་བསྐྱེད་རིམ་སྐབས་ཀྱི་དག་རྫོགས་སྨིན་གསུམ་ཚངས་པ་ཞེས་པ་དེ་གང་ཡིན་སྙམ་ན་འདི་ལྟར་གོ་བར་བྱ་སྟེ། འཁོར་བའི་སྐྱེ་འཆི་བར་དོ་གསུམ་དང་། ཐུན་མོང་མ་ཡིན་པའི་བླ་མེད་ཀྱི་སྐུ་གསུམ་སྟེ་ཡར་མར་གྱི་རྣམ་པ་གཉིས་དང་མཐུན་པར་བྱས་ནས། འཆི་བའི་འོད་གསལ་ཆོས་སྐུའི་ངོ་བོར་བལྟས་ཏེ་ལམ་དུ་འཁྱེར་བ་དེ་བཞིན་ཉིད་ཀྱི་ཏིང་ངེ་འཛིན་དང་། བར་དོ་ལོངས་སྐུའི་ངོ་བོར་བལྟས་ཏེ་ལམ་དུ་འཁྱེར་བ་ཀུན་སྣང་གི་ཏིང་ངེ་འཛིན་དང་། སྐྱེ་བ་སྤྲུལ་སྐུའི་ངོ་བོར་བལྟས་ཏེ་ལམ་དུ་འཁྱེར་བ་རྒྱུའི་ཏིང་ངེ་འཛིན་ཏེ། དེ་ལྟར་བསྒོམ་པས་མར་སྐྱེ་བ་བར་དོ་འཆི་བ་གསུམ་གྱི་བག་ཆགས་དག་པའི་ནུས་པ་འཇོག་ཅིང་། ཡར་སྐུ་གསུམ་གྱི་འབྲས་བུ་གཞི་ལ་རྫོགས་པའི་ནུས་པ་འཇོག བར་དུ་རྫོགས་རིམ་གྱི་ལྷན་ཅིག་སྐྱེས་པའི་ཆོས་དབྱིངས་དོན་དམ་བདེན་པ་དང་། སྐུ་གསུང་ཐུགས་ཀྱི་རང་བཞིན་དང་འདུ་འབྲལ་མེད་པ་སྣང་བའི་ཡེ་ཤེས་ཀུན་རྫོབ་བདེན་པ་སྟེ་དེ་གཉིས་ཟུང་འཇུག་དབྱེར་མེད་ཆེན་པོར་རྟོགས་པའི་སྨིན་བྱེད་དུ་འགྱུར་བ་སྟེ་རིམ་པ་བཞོན་ནོ། །ལྷ་བསྐྱེད་དངོས་ལ་འཇུག་ཚེ་སྣོད་བཅུད་ཐམས་ཅད་བསྡུ་རིམ་བྱ། དེ་ཡང་རིམ་བསྡུ་དང་འཇའ་ཡལ་བ་ལྟར་གཉིས་ལས་གང་བྱེད་ཀྱང་མཐར་ཅི་ཡང་མི་དམིགས་པའི་ངང་ལ་ད་ལྟའི་ཤེས་རིག་གསལ་སྟོངས་ངོ་བོ་ངོས་བཟུང་དང་བྲལ་བ་དེ་ཀའི་ངང་ལ་ཅུང་ཟད་མཉམ་པར་བཞག་ནས་སངས་རྒྱས་ཐམས་ཅད་ཀྱི་ཐུགས་རྣམ་པ་ཐམས་ཅད་མཁྱེན་པའི་ཡེ་ཤེས་ཆོས་སྐུ་དེ་ངའོ་སྙམ་པའི་ང་རྒྱལ་འཇོག་པ་ནི་དེ་བཞིན་ཉིད་ཀྱི་ཏིང་ངེ་འཛིན་ནོ། །འདིར་བླ་མ་རིག་འཛིན་འདུས་པའི་བསྐྱེད་རིམ་སྐབས་ཏིང་ངེ་འཛིན་རྣམ་པ་གསུམ་ཆ་ཚང་བ་མི་དགོས་པ་ནི། ཆོས་ཐམས་ཅད་དབྱིངས་ནས་སངས་རྒྱས་པར་སྟོན་པ་ནང་རྒྱུད་ཨ་ནུ་ཡོ་གའི་དགོངས་པ་ཡིན་པའི་ཕྱིར་རོ། །དེ་ལ་རང་བཞིན་གྱི་ཆོས་ཉིད་དེར་རྟོག་བཟོས་མ་བསླད་པའམ་མ་བཅོས་པའི་རིག་པ་ངོ་བོ་སྟོངས་པ་ཉིད་ཀྱི་རང་གདངས་སུ་རྣམ་པར་གསལ་བའི་ལྷག་མཐོང་གི་རྩལ་ལམ་སྣང་ཆ་ཐམས་ཅད་ཡེ་ནས་ལྷུན་གྱིས་གྲུབ་པར་དག་པ་རབ་འབྱམས་ཡིན་པ་ལ་ཡིན་པར་ཤེས་པའི་ངེས་ཤེས་བསྐྱེད་ནས་ལྷ་དང་གཞལ་ཡས་ཁང་ཐམས་ཅད་བསྐྱེད་དགོས་པ་ཡིན་ཏེ་ཉི་མ་དང་ཟེར་བཞིན་ནོ། །དེ་ཡང་གཞུང་ལས། དཀྱིལ་འཁོར་ཆེན་པོར་ལྷུན་རྫོགས་པའི༔ ཞེས་པའི་དཀྱིལ་འཁོར་གྱི་དོན་ནི། དཀྱིལ་ནི་བརྟེན་པ་ལྷ་ཡིན་ལ༔ འཁོར་ནི་གཞལ་ཡས་ཁང་དུ་ཤེས༔ ཞེས་གསུངས་པ་ལྟར་རོ། །དེ་ཡང་རྒྱུ་རྐྱེན་ལས་གསར་དུ་བྱུང་བ་ཙམ་མ་ཡིན་པར། ལྷུན་གྲུབ་ཀྱི་སྣང་ཆ་དག་པ་རབ་འབྱམས་རྒྱལ་བའི་དཀྱིལ་འཁོར་འབྲས་ཆོས་ཀྱི་ཡོན་ཏན་ཡོངས་སུ་རྫོགས་པའི་ཚུལ་དུ་བཞུགས་པ་སྟེ། དེ་ཡང་གཞལ་ཡས་ཁང་ནི་གཞུང་ལས། ཕོ་བྲང་གཞལ་མེད་ཉམས་དགའ་བ༔ ཞེས་བསྲུང་གུར་གྱི་དབུས་སུ་སྣ་ཚོགས་པདྨ་འདབ་མ་སྟོང་ལྡན་ནམ་གྲངས་ལ་ངེས་པ་མེད་པའི་དབུས་ཀྱི་ཟེའུ་འབྲུའི་སྟེང་དུ་སྣ་ཚོགས་རྡོ་རྗེ་རྒྱ་གྲམ་གྱི་ལྟེ་བ་གྲུ་བཞི་ཁ་དོག་མཐིང་ག འཇིག་ཚོགས་ཀྱི་ལྟ་བ་ཉི་ཤུ་དག་པ་མཚོན་པའི་རྭ་ཉི་ཤུ་ཕྱོགས་མདོག་ཅན་ནམ། རྟེན་འབྲེལ་བཅུ་གཉིས་དག་པའི་རྟགས་སུ་རྭ་བཅུ་གཉིས་པ་ཕྱོགས་མདོག་ཅན་གཉིས་གང་རུང་གི་སྟེང་དུ་རྒྱུ་རིན་པོ་ཆེ་སྣ་ཚོགས་ལས་གྲུབ་པའི་ཕོ་བྲང་རྒྱ་ཁྱོན་ཆོས་ཀྱི་དབྱིངས་དང་མཉམ་པ། གྲུ་བཞི་སྒོ་བཞི་མཚན་ཉིད་ལྡན༔ ཞེས་དབྱིབས་གྲུ་བཞི་དང་སྒོ་བཞི་ཅན། རྩིག་པ་རིམ་པ་ལྔ་དང་ལྡན་པ། དེ་ཡང་སྣང་སྲིད་ཟིལ་གནོན་པདྨ་འབྱུང་༔ ཞལ་གཅིག་ཕྱག་གཉིས་དཀར་དམར་མདངས༔ ཞེས་གསུངས་པ་བཞིན་དཀྱིལ་འཁོར་གྱི་གཙོ་བོའ་ིསྐུ་མདོག་གི་དབུ་བྱས་ཏེ་ཕྱི་ནས་རིམ་པ་བཞིན་དཀར་དམར་སེར་ལྗང་མཐིང་གའི་ཁ་དོག་ཅན། སྒོ་འཁྱུད་འགྲམ་ལོགས་གསུམ་དང་ལྡན་པ། སྒོ་ཁང་གི་ནང་དུ་མཛེས་བྱེད་ཀྱི་ཀ་བ་གཉིས་གཉིས་ཀྱིས་བཏེགས་པའི་བཅུ་གཅིག་རྡོ་རྗེའི་དྲྭ་མིག་དང་ལྡན་པ། སྒོ་ཁང་གི་སྟེང་དུ་རྟ་བབས་བང་རིམ་བཞི་དང་ལྡན་པ། བང་རིམ་དང་བོ་དམར་བོ། གཉིས་པ་མཐིང་ག གསུམ་པ་ལྗང་གུ། བཞི་བ་སེར་བོ། དེ་ཡི་སྟེང་དུ་པདྨ་དམར་བོ། ཆོས་འཁོར་སེར་བོ། གདུག་དཀར་བོ། གཡས་གཡོན་དུ་རི་དྭགས་ཕོ་མོ་སེར་བོ། སྒོ་ཁང་གི་ཕྱི་རོལ་རྣམས་སུ་རྟ་བབས་བཏེགས་པའི་ཀ་བ་བཞི་བཞི་འཕན་རེ་རེ་དང་ལྡན་པ། ཀ་བ་རྣམས་ཕྱོགས་མདོག ཀ་རྒྱན་གླང་ཆེན་གྱི་སྟེང་ན་སེངྒེའི་ཀ་ཞི་རྣམས་འདེགས་པ། རྟ་བབས་རྣམས་ཀྱི་ཕྱི་ངོས་སུ་གླིང་རྒྱབ་མིག་གསུམ་དང་ལྡན་པ། དེ་དག་གི་ནང་དུ་ཙི་པ་ཏྲའི་ཁ་ནས་རིན་པོ་ཆེའི་དྲ་བ་དང་དྲ་ཕྱེད་དཔྱངས་པ། རྟ་བབས་རྣམས་ཀྱི་ཡར་མཐའ་ཤར་བུ་བྱ་འདབས་ཁྱུང་མགོ་རྣམས་ཀྱི་རྒྱན་ནོ། །རྩིགས་པའི་ཕྱིའི་རྨང་དུ་འདོད་སྣམ་རིན་པོ་ཆེ་དམར་བོའི་སྟེག་བུས་བསྐོར་བའི་སྟེང་དུ། ཇི་སྐད་དུ། རིན་ཆེན་གཞལ་ཡས་ཁང་གི་འདོད་སྣམ་ལ༔ མཆོད་པའི་ལྷ་མོ་ཆར་སྤྲིན་ལྟ་བུར་གཏིབས༔ འདོད་ཡོན་དྲུག་གི་མཆོད་པས་འཇིག་རྟེན་ཁེངས༔ ཀུན་ཏུ་བཟང་བོའ་ིམཆོད་པའི་བདེ་གཤེགས་མཆོད༔ ཅེས་གསུངས་པ་ལྟར། མཆོད་པའི་ལྷ་མོ་བཅུ་དྲུག་གིས་མཆོད་རྫས་སྣ་ཚོགས་ཐོགས་ནས་ཞལ་ནང་དུ་ཕྱོགས་ཏེ་བཞུགས་པ། རྩིགས་པའི་ཁར་ཕ་གུ་སེར་བོ་རིན་པོ་ཆེའི་ཕྲས་མཛེས་པ་ཁ་བད་ཀྱི་ཚུལ་དུ་ཕྱིར་འཕྱར་བ། དེའི་སྟེང་དུ་བྲེ་སྤུངས་སམ། ཕྱོགས་རེར་ཀ་ཐུང་བཞི་བཞིའི་བཏེགས་པའི་གསེར་གདུང་ལེབ་མོ། དེ་ཡི་སྟེང་དུ་ཐོག་ཕུབ་པའི་ཕྱམས་སྣེ་ལས་ཙི་པ་ཏྲའི་ཁ་ནས་རིན་པོ་ཆེའི་དྲ་བ་དང་དྲ་ཕྱེད་སྔོན་པོ་འཕྱང་བ་རྣམས་ཕ་གུའི་སྟེང་དུ་སླེབས་པ། ཀ་ཐུང་རྣམས་ཀྱི་བར་རྣམས་སུ་དྲ་བ་དྲ་ཕྱེད་རྣམས་རླུང་གིས་ནང་དུ་མི་བསྐྱོད་པའི་ཕྱིར་རིན་པོ་ཆེའི་སྐུད་པའི་སྦྲེལ་བ། ཕྱམས་ཀྱི་སྟེང་གི་རྒྱ་ཕིབས་འདོད་སྣམ་གྱི་ཕྱི་མཐའ་ཁེབས་པ་ཙམ་དུ་ཕྱིར་འཕྱར་བའི་ནང་གི་འོག་ཏུ་རིན་པོ་ཆེ་དཀར་བོའ་ིཤར་བུ་རིལ་བ་སྤྱི་བླུགས་མགོ་ཐུར་བསྟན་ལྟ་བུའི་ཕྲེང་བ་བསྒྲིགས་པའི་རྩེ་རྣམས་ཕྱམས་ཀྱི་མ་མཐར་སླེབས་པ། སྟེང་དུ་དེ་དག་གི་རྩ་བ་གནོན་བྱེད་རིན་པོ་ཆེ་དཀར་བོས་སྤང་ལེབ་རིམ་པ་གསུམ་མམ་བཞི་ཡོད་པ་བསླངས་ནས་བསྒྲིགས་པ་པུ་ཤུའམ་ལན་གན་དུ་གྲགས་པའོ། །གཞལ་ཡས་ཁང་གི་དབུས་སུ་ལྷ་གནས་པདྨ་འདབ་བརྒྱད་ཀྱི་ཕྱོགས་བཞི་ནས་ཀ་བ་བརྒྱད་ཀྱི་བཏེགས་པའི་རྡོ་རྗེའི་གདུང་ཟླུམ་འོད་ལྔའི་རྣམས་པ་ཅན། དེའི་སྟེང་རྡོ་རྗེའི་གདུང་བཞི་བསྣོལ་བའི་སྟེང་ན་ཕྱམ་ཉེར་བརྒྱད་བཏང་བའི་དབུས་ཀྱི་མཐོང་ཀ་མ་གཏོགས་བཀབ་པའི་སྟེང་དུ་རིན་པོ་ཆེའི་སྤང་ལེབ་དང་རིན་པོ་ཆེའི་གྲལ་མ་མེ་ཏོག་རྣམས་ཀྱིས་བཀབ་པ། དབུས་ཕྱུར་བུ་ཞེས་པ་མཐོང་ཀའི་དོན་དེ། དེ་ཡང་རྡོ་རྗེའི་གདུང་བཞི་བསྣོལ་མཚམས་ཀྱི་སྟེང་ནས་ཀ་བ་བཞི་བཞིའི་བཏེགས་པའི་བར། རིན་པོ་ཆེའི་སྒྲོམ་ལེབ་ཀྱི་ཁང་བ་ཕྱོགས་བཞིར་བུམ་སྒོ་ལྟ་བུ་ཡོད་པའི་སྟེང་སྔར་བཞིན་རིན་པོ་ཆེའི་སྒྲོམ་ལེབ་སོགས་ཀྱིས་བཀབ་པ། དེ་སྟེང་པདྨ་འདབ་བཞི་དང་རིན་ཆེན་ཟུར་བརྒྱད་བུམ་པ་སྤོས་ཕོར་གྱི་དབྱིབས་ཅན་རྣམས་བརྩེགས་པའི་སྟེང་རྡོ་རྗེ་སྔོན་པོའ་ིཏོག་གིས་མཛེས་པའོ། །སྒོ་ཕྱི་ནང་གཉིས་སུ་ཐེམ་སྐས་བཞི་དང་ལྡན་པའི་བབས་ཞོན་གྱི་རྟ་བབས་བཞི་ནི་རྒྱུའི་རྟ་བབས་དང་། འབྲས་བུའི་རྟ་བབས་བཞི་ནི་རྒྱན་གྱིས་རྟ་བབས་སོ། །རྩིགས་པའི་ཕྱིའི་གདོང་རྣམས་ལ་ཆུ་སྲིན་དམར་བོའ་ིབརྒྱན་པ། རྟ་བབས་ཀྱི་སྟེང་ན་རྔ་ཡབ་དང་བ་དན་ལ་སོགས་པའི་མཛེས་པར་སྤྲས་པ། ཕྱོགས་བཞིའི་སྒོ་ནང་དུ་རིམ་པ་བཞིན་པདྨ་དང་ཉི་མའི་གདན་ལ་ཤར་ཀེང་དཀར་བོ། ལྷོ་ཀེང་སེར་བོ། ནུབ་ཀེང་དམར་བོ། བྱང་ཀེང་ལྗང་གུ་སྟེ། དེ་རྣམས་ཞལ་གཅིག་ཕྱག་གཉིས། གཡས་དབྱུག་ཏོ་དང་། གཡོན་ཐོད་པ་ཁྲག་གིས་བཀང་བ་འཛིན་པ། ཞལ་ཞི་མ་ཁྲོ་མི་ཆེན་གྱི་གཟུགས་སྨ་ར་དང་ཨག་ཚོམ་ཅན། རྣ་བ་ཀེང་ལྟར་བརྒྱངས་པ། མགོ་ལ་རི་དར་དང་དར་དཔྱང་གིས་བརྒྱན་པ། དར་དམར་བོས་སྨད་ཤམ་བྱས་པ། ཐམས་ཅད་ཀྱི་ཞལ་ཕྱིར་གཟིགས་ནས་སྒོ་བསྲུང་མཛད་པའོ། །ཕྱི་རོལ་ཏུ་རིན་པོ་ཆེའི་པ་ཏྲ་རིས་སུ་མངོན་པ། དཔག་བསམ་གྱི་ལྗོན་ཤིང་། ཡན་ལག་བརྒྱད་ལྡན་གྱི་ཆུ་མིག རྩ་སྡུམ་རྨ་བྱའི་མགྲིན་པ་ལྟ་བུའི་ནེའུ་སེང་། མེ་ཏོག་དང་འབྲས་བུས་བརྒྱན་པའི་སྨན་ལྗོངས་དྲི་བསུང་འཐུལ་བ། དེ་དག་གི་ཁྲོད་ན་བརྟུལ་ཞུགས་གྲུབ་པའི་དྲང་སྲོང་རྣམས་རབ་ཏུ་རྩེན་ཞིང་གཉུག་མ་དོན་གྱིས་མགུར་དབྱངས་འཐེན་པ། སྤྲུལ་བའི་ཁུ་བྱུག་སོགས་བཀྲ་ཤིས་པའི་བྱ་དང་། བུང་བ་སོགས་དལ་གྱིས་རྒྱུ་ཞིང་སྙན་པའི་ཆོས་སྒྲ་སྒྲོགས་པ་སྟེ། དཔལ་རིའི་གསང་ལམ་ལས། དཔག་བསམ་ལྗོན་པའི་ཤིང་དང་བདུད་རྩིའི་ཆུ༔ ནེའུ་སེང་སྨན་ལྗོངས་དྲི་བསུང་འཐུལ་བའི་ཁྲོད༔ དྲང་སྲོང་རིག་འཛིན་བྱ་ཚོགས་བྷྲ་མ་ར༔ ཐེག་གསུམ་ཆོས་ཀྱི་སྒྲ་དང་བརྡ་གླུ་བསྒྱུར༔ ཞེས་པ་ལྟར་དང་། རྒོད་ལྡེམ་པས། འཇའ་ཚོན་སྣ་ལྔས་ཕྱི་ནང་སྤྲིན་ལྟར་གཏིབས༔ མེ་ཏོག་པདྨའི་འོད་ཀྱིས་བར་སྣང་ཁེངས༔ གནས་ཏེ་དྲན་པ་ཙམ་གྱིས་བདེ་ཆེན་ཐོབ༔ ཅེས་གསུངས་པ་ལྟར། ཉིན་མཚན་མེད་པར་འཇའ་འོད་ཀྱིས་ཁེངས་ཤིང་མེ་ཏོག་གི་ཆར་འབེབས་པ་སོགས་ཤིན་ཏུ་ཉམས་དགའ་བ། སྒོའ་ིགཡས་གཡོན་ན་ཏ་ལའི་ལྗོན་པ་དང་། དཔག་བསམ་གྱི་ཤིང་རྣམས་གསེར་གྱི་ཐ་གུས་སྦྲེལ་བ་ལས་དྲིལ་བུའི་སྒྲ་སྙན་པར་སྒྲོགས་པ། མུན་པ་དང་འདོད་སྣམ་གྱི་མཚམས་སུ་ཟླ་ཕྱེད་རྡོ་རྗེར་གནས་པའོ། །དེའི་ཕྱི་རོལ་ཏུ་འོག་གཞིའི་སྣ་ཚོགས་པདྨའི་ར་བ་དེ་ཉིད་ཀྱི་གཞལ་ཡས་ཁང་གི་ཏོག་མན་ཆད་ཚང་བར་ནང་དུ་ཆུད་ཅིང་ཁ་ཟུམ་པ། དེ་ལྟ་བུའི་གཞལ་ཡས་ཁང་མཚན་ཉིད་ཡོངས་སུ་རྫོགས་པའི་དབུས་ཀྱི་ལྷ་གནས་པདྨ་འདམ་ལས་སྐྱེས་ཀྱང་འདམ་གྱི་དྲི་མའི་མ་གོས་པ་ལྟར། རྟག་པ་དངོས་པོས་མཐའ་དང་ཆད་པ་དངོས་མེད་ཀྱི་མཐའ་གཉིས་ཀྱིས་གོས་པ་མེད་པའི་རྟགས་སུ་པདྨ་འདབ་བརྒྱད་ཟེའུ་འབྲུ་གུར་གམ་གྱི་མདོག་ཅན་དེ་ཡི་རྒྱ་ཁྱོན་དང་མཉམས་པའི་དབུས་སུ། ཐབས་ཤེས་དབྱེར་མེད་མཚོན་པའི་རྟགས་སུ་ཉི་མ་དམར་སེར་ལི་ཁྲིའི་མདོག་ཅན། ཟླ་བ་དཀར་བོ་ཉ་གང་བ། དེ་ཡི་སྟེང་དུ་ཡི་གེ་ཧཱུྃ་མཐིང་ཀ་གསལ་ལ་འཚེར་བ། དེ་དག་ཀྱང་གཅིག་ལ་གཅིག་མ་རེག་པའི་ཚུལ་དུ་གསལ། དེ་ནི་མར་འཁོར་བའི་དུས་ཀྱི་སྦྱང་གཞི་སྐྱེ་གནས་བཞི་ལས། སྐབས་འདིར་སྦྱང་བྱ་དྲོད་གཤེར་སྐྱེས་ཡིན་པས་ཉི་མ་དྲོད། ཟླ་བ་གཤེར། ཧཱུྃ་ཡིག་བར་སྲིད་ཀྱི་རྣམ་ཤེས་རྣམས་སྦྱོང་བྱེད་ཡིན། དགོས་པ་དེར་སྐྱེ་བའི་རྒྱུ་ལས་ཉོན་བག་ཆགས་རྣམས་དག་ནས་ཕྱིན་ཆད་དྲོད་གཤེར་གྱི་སྐྱེ་གནས་ལས་སྐྱེ་མི་དགོས་པའི་ཕྱིར་རོ། །ཧཱུྃ་ཡིག་དེ་ཉིད་ཀྱང་སྐད་ཅིག་གིས་སངས་རྒྱས་ཀུན་འདུས་ཀྱི་བདག་ཉིད་དྲིན་ཅན་རྩ་བའི་བླ་མ་དང་གཉིས་སུ་མེད་པའི་བདག་ཉིད་རྣམ་པ་གུ་རུ་སྣང་སྲིད་ཟིལ་གནོན་དུ་གནས་གྱུར་པ་ལ། འཁོར་འདས་ཀྱི་ཆོས་ཐམས་ཅད་ཆོས་ཉིད་དེ་བཞིན་ཉིད་དུ་རོ་གཅིག་པར་མཚོན་པའི་བརྡར་ཞལ་གཅིག ཐབས་དང་ཤེས་རབ་འདུ་འབྲལ་མེད་པའི་བརྡར་ཕྱག་གཉིས། བདེ་སྟོངས་ཟུང་དུ་འཇུག་པའི་བརྡར་སྐུ་མདོག་དཀར་ལ་དམར་མདངས་ཆགས་པ། ཉན་ཐོས་ཀྱི་ཐེག་པ་ཡར་ལྡན་གྱི་ཚུལ་དུ་རྫོགས་པའི་རྟགས་སུ་སྣམ་སྦྱར་དམར་སེར། བྱང་སེམས་ཀྱི་ཐེག་པ་རྫོགས་པའི་བརྡར་བེར་འདུང་སྟེ་ཁྲི་བེར་སྨུག་པོ། གསང་སྔགས་ཀྱི་ཐེག་པ་རྫོགས་པའི་བརྡར་ཕོད་ཆེན་ཏེ་འཆམས་གོས་ཀྱི་བེར་མཐིང་ག སྤང་རྟོགས་མཐར་ཕྱིན་པའི་སྔགས་ཀྱི་སངས་རྒྱས་སྐུ་ལྔའི་ངོ་བོ་ཉིད་ལྷུན་གྲུབ་རིག་འཛིན་གྱི་ས་ལ་བཞུགས་པའི་བརྡར། ཕྱག་གཡས་གསེར་གྱི་རྡོ་རྗེ་རྩེ་ལྔ་བ་གཟུང་འཛིན་གྱི་གདོན་ལ་བསྡིགས་པས་གདུག་པ་ཅན་ཚར་གཅོད་པའི་ཕྲིན་ལས་མཛད་པ། འབྲས་བུའི་ཐེག་པ་འབའ་ཞིག་གིས་སེམས་ཅན་རྣམས་སྨིན་ཅིང་གྲོལ་བར་མཛད་ཅིང་། ཚེ་དབང་རིག་འཛིན་གྱི་དངོས་གྲུབ་ཆེན་པོས་གདུལ་བྱ་རྗེས་སུ་འཛིན་པའི་བརྡར་ཕྱག་གཡོན་མཉམ་བཞག་གི་སྟེང་ན་བྷནྡྷ་དུམ་བུ་གཅིག་པ་ལས་བདུད་རྩི་ཅི་ལི་ལི་ཁོལ་བའི་ནང་དུ་ཚེ་བུམ་དམར་བོ་འཆི་མེད་ཡེ་ཤེས་ཀྱི་བདུད་རྩིས་བཀང་བའི་ཁ་དཔག་བསམ་ལྗོན་པའི་བརྒྱན་པ་འཛིན་པ། སྲིད་དང་ཞི་བ་གཉིས་ཀྱི་མཐའ་ལ་མི་གནས་པར་སྐུ་གསུམ་ཡན་ལག་བདུན་ལྡན་གྱི་བདག་ཉིད་ཡིན་པའི་བརྡར་མཆན་ཁུང་གཡོན་དུ་ཡུམ་ལྷ་ལྕམ་མནྡ་ར་བ་སྐུ་མདོག་དཀར་མོ་རུས་རྒྱན་ཅན། དར་དཔྱང་དམར་བོའ་ིསྨད་དཀྲིས། ཕྱག་གཡས་མདའ་དར་དཀར་བོ། གཡོན་ཚེ་བུམ་དམར་བོ་འཛིན་པ་ན་བཟའི་ཕྱི་ནས་གཉིས་སུ་མེད་པར་རང་འོད་ཀྱི་རྣམ་པར་འཁྲིལ་བ། ཁ་སྦྱོར་ཡན་ལག་བདུན་ལྡན་ནི། འཇམ་དཔལ་གྲགས་པའི་ཞལ་ནས། ལོངས་སྤྱོད་རྫོགས༵་དང་ཁ་སྦྱོར༵་བ༵དེ་ཆེན་༵རང༵་བཞིན་༵མེད། །སྙིང་རྗེའི་ཡོངས་གང༵་རྒྱུན་མི་འཆད་དང༵་འགོགས་པ༵་མེད། །ཅེས་སོ། །རིགས་ལྔའི་དབང་བསྐུར་རྫོགས་པའི་རྟགས་སུ་དབུ་ལ་འདབ་ལྡན་རིགས་ལྔ་སྟེ་ཟ་ཧོར་རྒྱལ་པོས་ཕུལ་བ་དེ་ཉིད་གསོལ་བ། རང་དོན་མཐར་ཕྱིན་ནས་གཞན་དོན་གྱི་མཛད་པ་དང་ཕྲིན་ལས་རྒྱུན་མི་འཆད་པའི་བརྡར་ཞབས་གཉིས་གཡས་བསྐུམ་ཞིང་གཡོན་ཅུང་ཟད་བརྐྱང་བ་རྒྱལ་བོ་རོལ་པའི་སྟབས་སུ་བཞུགས་པའོ། །དེ་ལྟར་གསལ་བ་ནི་བདག་དམ་ཚིག་སེམས་དཔའ་དང་། དེའི་ཐུགས་ཀར་ལྷ་ཡེ་ཤེས་སེམས་དཔའ་རིག་འཛིན་རྡོ་རྗེ་ཆོས། དེ་ཡི་ཐུགས་ཀར་ཏིང་འཛིན་སེམས་དཔའ་ཡི་གེ་ཧཱུྃ་མཐིང་ག་སྟེ་སྐབས་འདི་ནས་སེམས་དཔའ་སུམ་བརྩེགས་སུ་གསལ་བ་གནད་ཆེ་བར་གསུང་། གདུལ་བྱ་རྣམས་ཐེག་པའི་ཡང་རྩེ་རྫོགས་པ་ཆེན་པོའ་ིལམ་ནས་འདྲེན་པར་མཛད་པའི་རྟགས་སུ་དབུ་གཙུག་ཏུ་མིའི་ཐེག་མཆོག་གི་སྟོན་པ་རིག་འཛིན་དགའ་རབ་རྡོ་རྗེ་སྐུ་མདོག་དཀར་བོ་ལོངས་སྐུའི་ཆས་རིན་པོ་ཆེའི་རྒྱན་བརྒྱད་དང་དར་གྱི་ཆས་གོས་ལྔས་བརྒྱན་པ། ཕྱག་གཉིས་རྡོ་རྗེ་དང་དྲིལ་བུ་ཐུགས་ཀར་བསྣོལ་ཐབས་སུ་འཛིན་པ། འཇའ་ཟེར་འོད་ལྔའི་ཐིག་ལེ་ཟླུམ་སྐོར་གྱི་ཀློང་དུ་པདྨ་དང་ཟླ་བའི་གདན་ལ་བཞུགས་པ། དེ་ཡི་དབུ་གཙུག་ཏུ་གདན་གྱིས་མ་རེག་པ་ཙམ་དུ་པདྨ་དང་ཉི་ཟླའི་གདན་ལ་ཐོག་མའི་མགོན་པོ་ཡབ་ཀུན་ཏུ་བཟང་བོ་སྐུ་མདོག་མཐིང་ག་ཞབས་རྡོ་རྗེའི་སྐྱིལ་ཀྲུང་དང་ཕྱག་མཉམ་བཞག་གིས་བཞུགས་པའི་པང་དུ་ཡུམ་ཀུན་ཏུ་བཟང་མོ་སྐུ་མདོག་མཐིང་སྐྱ་ཞབས་པདྨའི་སྐྱིལ་ཀྲུང་དང་། ཕྱག་གཉིས་གྲི་ཐོད་འཛིན་ཞིང་ཡབ་ཀྱི་མགུལ་ནས་འཁྱུད་པ། གཉིས་ཀའང་རྒྱན་དང་ཆས་གོས་སྤང་བའོ། །འདི་ལྟར་སྒོམ་པ་ནི་རྫོགས་པ་ཆེན་པོ་ཉེ་བརྒྱུད་ཀྱི་དབང་དུ་བྱས་པ་སྟེ། དེ་ཡང་ཐང་ཡིག་ལས། པདྨ་སམྦྷས་དགའ་རབ་དྲུང་དུ་ཕྱིན༔ རྫོགས་ཆེན་སྙིང་ཐིག་རྒྱུད་ནི་བཅུ་བདུན་དང་༔ སྔགས་སྲུང་ནག་མོའ་ིརྒྱུད་དང་བཅོ་བརྒྱད་གསན༔ ཞེས་པ་ལྟར་རོ། །དེ་ལྟར་ཆོས་སྐུ་ཀུན་བཟང་ཡབ་ཡུམ། ལོངས་སྐུ་དགའ་རབ་རྡོ་རྗེ། སྤྲུལ་སྐུ་པདྨ་འབྱུང་གནས་ཏེ། དེ་གསུམ་ལྷན་དུ་བསྒོམ་པ་ནི་སྐུ་གསུམ་རིགས་འདུས་ཞེས་པའི་དོན་དང་ཡང་འབྱོར་རོ། །དེ་ཡི་ཕྱི་འཁོར་གྱི་པད་འདབ་རྣམས་ནི་ཤར་དཀར་ལྷོ་སེར་ནུབ་དམར་བྱང་ལྗང་། ཤར་ལྷོ་དམར་བོ། ལྷོ་ནུབ་ལྗང་ཁུ། ནུབ་བྱང་དཀར་བོ། བྱང་ཤར་སེར་བོ་རྣམས་སོ། །ཤར་གྱི་པད་འདབ་སྟེང་ནང་ནས་རིམ་བཞིན་དཀར་མཐིང་སེར་དམར་ལྗང་ཁུའི་ཁ་དོག་ཅན་གྱི་འོད་ལྔའི་ཐིག་ལེ་ཟླུམ་པོ་གུར་ཕུབ་པ་ལྟ་བུའི་ནང་དུ་པདྨ་ཉི་ཟླའི་གདན་ལ་རིག་འཛིན་ཧཱུཾ་ཆེན་ཀ་ར་སྐུ་མདོག་དཀར་བོ་ཞལ་གཅིག་ཕྱག་གཉིས། ཡུམ་མཱ་མ་ཀི་དཀར་སྐྱ་དང་གཉིས་སུ་མེད་པར་རང་འོད་ཀྱི་ཚུལ་དུ་འཁྲིལ་བ། ལྷོར་སེར་དཀར་མཐིང་དམར་ལྗང་ཁུའི་ཐིག་ལེའི་ནང་དུ་པདྨ་ཉི་ཟླའི་གདན་ལ་རིག་འཛིན་མཉྫུ་ཤྲྀ་སྐུ་མདོག་སེར་བོ་ཡུམ་སངས་རྒྱས་སྤྱན་མ་སེར་སྐྱ། ནུབ་ཀྱི་ཐིག་ལེ་དམར་དཀར་སེར་མཐིང་ལྗང་། གདན་གོང་ལྟར་ཀུན་ལ་འདྲ། ནུབ་ཏུ་རིག་འཛིན་ནཱ་གརྫུ་ན་སྐུ་མདོག་དམར་བོ་ཡུམ་གོས་དཀར་མོ་དམར་སྐྱ། བྱང་དུ་ལྗང་དཀར་སེར་དམར་མཐིང་ག རིག་འཛིན་པྲ་བྷ་ཧ་སྐུ་མདོག་ལྗང་ཁུ། ཡུམ་དམ་ཚིག་སྒྲོལ་མ་ལྗང་སྐྱ། མཚམས་བཞིའི་ཐིག་ལེ་རྣམས་ནང་ནས་རིམ་པ་བཞིན་མཐིང་དཀར་སེར་དམར་ལྗང་ཁུ་སྟེ་དེ་དག་དང་གདན་པད་ཉི་ཟླ་བ་སྐུ་མདོག་མཐིང་ག་སྟེ་ཀུན་ལ་འདྲ། ཡུམ་རྣམས་སྐུ་མདོག་མཐིང་སྐྱ་ཡིན། ཤར་ལྷོར་རིག་འཛིན་དྷ་ན་སཾ་སྐྲྀ། ལྷོ་ནུབ་ཏུ་བྷི་མ་ལ། ནུབ་བྱང་དུ་རོམ་བུ་གུ་ཧེ། བྱང་ཤར་དུ་ཤཱིནྟཾ་གྷརྦྷ་རྣམས་སོ། །དེ་དག་གི་བཞུགས་གནས་འོད་ལྔའི་ཐིག་ལེ་ཟླུམ་པོ། དེ་ཡང་གཅིག་ལ་གཅིག་གིས་མ་རེག་ཅིང་། གཅིག་གིས་གཅིག་མི་སྒྲིབ་པ་དཔེར་ན་ནམ་མཁའི་འཇའ་ཚོན་ལྟ་བུའི་རང་བཞིན་ཅན་ནོ། །ཐབས་ཀྱི་ཆ་ལྷ་ཡབ་རྣམས་ཊ་དྲིལ་འཁྲོལ་ཞིང་ཞལ་ཞི་མ་ཁྲོ། དཔྲལ་བར་རྒྱ་སྟག་གི་རི་མོ་བཀྲ་བ། ཞལ་ནས་ཧེ་བརྗོད་པ་ལྟར་ཅུང་ཟད་གདངས་པ། ཕར་ཕྱིན་དྲུག་མཚོན་པའི་རུས་པའི་རྒྱན་དྲུག་གསོལ་བ། དེ་ཡང་སྤྱི་བོར་རུས་པའི་འཁོར་ལོ་བརྩོན་འགྲུས། སྙན་རྒྱན་བཟོད་པ། མགུལ་རྒྱན་སྦྱིན་པ། ཕྱག་ཞབས་གདུ་བུ་རྣམས་ཚུལ་ཁྲིམས། སྐ་རགས་བསམ་གཏན། མཆོད་ཕྱིར་ཐོགས་ཤེས་རབ་རྣམས་སོ། །ཤེས་རབ་ཀྱི་ཆ་ཡུམ་རྣམས་གྱི་སྐུ་ལ་ཡེ་ཤེས་ལྔ་འདུ་འབྲལ་མེད་པའི་བརྡར་ཕྱག་རྒྱ་ལྔས་བརྒྱན་པ། གཟིག་ཤམ་ཅན་གྲི་གུག་གཡས་དང་ཐོད་ཁྲག་གཡོན་དུ་བསྣམས་ནས་ཡབ་དང་ཞལ་སྦྱོར་བ། ཡབ་རྣམས་སྟག་གི་ཤམ་ཐབས་བྱས་པ་ཞབས་གཉིས་གར་སྟབས་ཀྱིས་བཞུགས་པ་སྟེ་འཁོར་བའི་རང་བཞིན་རྣམ་ཤེས་ཚོགས་བརྒྱད་གནས་སུ་དག་པའི་བརྡར་བྱང་ཆུབ་སེམས་དཔའ་བརྒྱད་ཀྱི་ངོ་བོ་རིག་འཛིན་བརྒྱད་ཀྱིས་བསྐོར་བའོ། །བར་མཚམས་རྒྱ་བོད་རིག་འཛིན་སོགས་ནི་ལྷ་གནས་པད་འདབ་བརྒྱད་ཀྱི་ཕྱི་རོལ་མུ་འཁྱུད་གསུམ་གྱི་སྟེང་། བླ་རྣམ་ལས། འཇའ་ཟེར་ཐིག་ལེའི་འོད་ཕུང་ཀློང་ན་བཞུགས༔ ཞེས་པ་ལྟར་འཇའ་ཟེར་ཐིག་ལེའི་ཀློང་དུ་བླ་མཆོད་དངོས་གྲུབ་རྒྱ་མཚོ་ལྟར་རྒྱ་གར་གྱི་གྲུབ་ཐོབ་ཀླུ་སྒྲུབ་ཡབ་སྲས་སོགས་བརྒྱད་ཅུ། བོད་ཀྱི་རྗེ་འབངས་ཉེར་ལྔ། སྤྲུལ་བའི་གཏེར་ཆེན་བརྒྱ་རྩ། རྙིང་མའི་སོ་ཟུར་གནུབས་གསུམ། གསར་མའི་མར་མི་དག་གསུམ་སོགས་རྣམ་འགྱུར་དང་ཆ་ལུགས་མ་ངེས་པ་གྲངས་མེད་པ་ནམ་མཁར་སྤྲིན་འཁྲིགས་པ་ལྟར་བཞུགས་པར་བསྒོམ། སྟེང་ཕྱོགས་རྒྱུད་སྡེ་བཞི་དྲུག་ནི། བྱ་རྒྱུད། སྤྱོད་རྒྱུད། རྣལ་འབྱོར་རྒྱུད། བླ་མེད་རྒྱུད་དང་བཞི། དྲུག་ཏུ་དབྱེ་ན་བླ་མེད་ལ་གསུམ་དུ་དབྱེ་བ་མ་ཧཱ་ཡོ་ག་བསྐྱེད་རིམ། ཨ་ནུ་ཡོ་ག་རྫོགས་རིམ། ཨ་ཏི་ཡོ་ག་རྫོགས་ཆེན་རྣམས་དང་། སྟེང་ཕྱོགས་སུ་དམ་ཚིག་སྒྲུབ་དང་གྲུབ་པ་སྟེ་སྔགས་ཕྱི་པ་གསུམ་དང་། སྐུ་གསུང་ཐུགས་ཀྱི་རང་བཞིན་ནང་རྒྱུད་ཡོ་ག་གསུམ་སྟེ། ཡི་དམ་རྒྱུད་སྡེ་བཞི་དྲུག་གི་ལྷ་ཚོགས་དཔའ་བོ་རྣམས་མེ་རི་དང་མེ་དཔུང་། བླ་མ་སངས་རྒྱས་བྱང་སེམས་རྣམས་འཇའ་དང་འོད་ཕུང་གི་ཀློང་ན་སྐུ་སྣ་ཚོགས་ཀྱི་ཕྱག་རྒྱ་བསྒྱུར་བ། གསུང་དགྱེས་པའི་གད་མོ་སྒྲོགས་པ། ཐུགས་སྙིང་རྗེ་ཆེན་པོའ་ིདགོངས་པ་ལ་རོལ་པ། ཞི་བ་རྣམས་ཚུལ་དགུའི་ཉམས་ཀྱིས་སྒེགས་ཅིང་། ཁྲོ་བོ་རྣམས་གར་དགུའི་སྟབས་ཀྱིས་རོལ་པ། དེ་ཡང་ཏིལ་གྱི་སྒྲོམ་བུ་ཁ་ཕྱེ་བ་བཞིན་བར་མཚམས་མེད་པར་བཞུགས་པར་བསྒོམ། གོང་སྨོས་ལྟར་རྒྱུད་སྡེ་དྲུག་གང་རུང་གི་ལམ་ནས་དངོས་གྲུབ་བརྙེས་པའི་རྒྱ་བོད་ཀྱི་རིག་འཛིན་རྣམས་མགྲོན་ཐབས་ཀྱི་ཚུལ་དུ་བཞུགས་པས་ན་ནང་སྒྲུབ་རིག་འཛིན་འདུས་པ་ཞེས་པའི་སྒྲ་དོན་དང་འབྱོར་ཞིང་། རྒྱ་བོད་ཀྱི་རིག་པ་འཛིན་པ་ཐམས་ཅད་མགྲོན་ཐབས་ཀྱི་ཚུལ་དུ་བསྐྱེད་དགོས་པ་ཡང་། དེ་དག་གི་གཙོ་བོ་ཡིད་དང་ཆོས་སུ་སྣང་བའི་གཉིས་སྣང་གི་འཁྲུལ་བ་ཐམས་ཅད་བསྐྱེད་པའི་གཞི་ཕྲ་རགས་ཀྱི་ཐིག་ལེ་ཐམས་ཅད་ཀྱི་རྩ་བ་ཁམས་དྲུག་གི་ནུས་པ་སྔགས་ཀྱི་ཐབས་ལམ་ཟབ་མོས་བཅོམ་པས་ཡེ་ཤེས་ཀྱི་ཐིག་ལེའི་བདག་ཉིད་དམ་རྣམ་འགྱུར་གྱི་བཀོད་པ་དཀྱིལ་འཁོར་གྱི་ལྷ་ཚོགས་སུ་ཤར་བའི་སྤྲོ་བསྡུས་བྱེད་པོ་འཇའ་ལུས་འཕོ་བ་ཆེན་པོའ་ིསྐུར་བཞུགས་ནས་འཁོར་བ་མ་སྟོངས་ཀྱི་བར་དུ་འགྲོ་བའི་དོན་མཛད་པའི་སློབ་དཔོན་སངས་རྒྱས་གཉིས་པ་པདྨ་འབྱུང་གནས་དེ་ཉིད་ཡིན་པའི་ཕྱིར་རོ། །འཁོར་ཀྱི་ལྷ་རྣམས་ལྷ་གནས་དེར་གོ་རིམ་ཇི་ལྟར་བཞུགས་པའི་ཚུལ་ནི། དཔལ་རིའི་གསང་ལམ་ལས། གཡས་ཀྱི་གྲལ་ན་རྒྱ་བོད་རིག་འཛིན་རྣམས༔ འོད་གསལ་རྡོ་རྗེའི་རོལ་ངོར་འབྱམས་སུ་ཀླས༔ གཡོན་གྱི་གྲལ་ན་འཕགས་བོད་པཎ་གྲུབ་རྣམས༔ བཤད་སྒྲུབ་ཉམས་རྟོགས་བགྲོ་གླིང་ཆོས་སྒྲ་འུར༔ ཞེས་གསུངས་པ་ནི་གཙོ་བོའ་ིགཡས་གཡོན་ལ་མི་གོ་བར་མདུན་གྲལ་གྱི་གཡས་གཡོན་ལ་གོ་བར་སྣང་སྟེ། རིག་འཛིན་མཆོག་གི་བདེ་ལམ་ལས། མདུན་གྲལ་གཡས་སུ་རྒྱ་བོད་རིག་འཛིན་ཚོགས། །ཀློང་ཡངས་བྱ་རྩོལ་བྲལ་བའི་དགོངས་དབྱིངས་སུ། །རྡོ་རྗེའི་མགུར་གླུ་སྦྱོར་སྒྲོལ་བརྟུལ་ཞུགས་སྤྱོད། །མདུན་གྲལ་གཡོན་དུ་མཆོག་གཟིགས་ལོ་པཎ་རྣམས། །ཟབ་དོན་བགྲོ་གླིང་བསྒྱུར་བཤད་འཆད་ཉན་གྱི། །སོ་སོའ་ིགསུང་གདངས་མ་འདྲེའི་ལྷང་ངེར་གསལ། །ཞེས་གསུངས་པའི་ཕྱིར་རོ། །ཡང་སྔ་མ་ལས། མཐའ་སྐོར་བར་མཚམས་རྗེ་འབངས་ཉེར་ལྔ་དང་༔ སྤྲུལ་བའི་གཏེར་སྟོན་གྲུབ་པའི་ཁྱུ་མཆོག་རྣམས༔ ཐེག་པ་རིམ་དགུའི་འཁོར་ལོ་ལ་སྤྱོད་ཅིང་༔ གཡོ་མེད་དགོངས་པའི་གཟེར་གྱི་བརྟུལ་ཞུགས་འཛིན༔ ཞེས་པ་ཡང་། ཕྱི་མ་ལས། གཡས་གྲལ་གཡས་སུ་གཏེར་འབྱིན་གྲུབ་པའི་ཁྱུ། །དགོང་བརྒྱུད་དོན་སྟོན་ཤོག་སེར་ཆིག་བརྒྱུད་ཀྱི། །བརྡ་འགྲོལ་ངོ་མཚར་འཕྲུལ་གྱི་ཟློས་གར་བསྒྱུར། །གཡས་གྲལ་གཡོན་དུ་རིག་སྔགས་འཆང་བའི་ཚོགས། །དམོད་པའི་གཡུལ་འགྱེད་ལས་ཀྱི་མདེའུ་ཁ་བསྒྱུར། །འགལ་བྱེད་བདུད་དགྲ་འབྱུང་བོ་ཕྱེ་མར་འཐག །གཡོན་གྲལ་གཡས་སུ་རྒྱ་བལ་ཌཱ་ཀིའི་ཚོགས། །བདེ་བའི་ཉམས་རྒྱས་ལང་ཚོའི་བཅུད་ཀྱིས་གང་། །གསང་མཆོག་བདེ་བ་ཆེན་པོའ་ིའདོད་ཡོན་སྟོབ། །གཡོན་གྲལ་གཡོན་དུ་མོན་བོད་དྷཱ་ཀིའི་ཚོགས། །རྣལ་འབྱོར་མ་དཔལ་རྡོ་རྗེའི་ཟློས་གར་གྱིས། །བདེ་སྟོངས་ཚོགས་ཀྱི་འཁོར་ལོའི་འདུ་བར་སྤྱོད། །རྒྱབ་ཕྱོགས་འོད་ལྔའི་དྲ་བ་འཁྲིགས་པའི་ནང་། །ཐེག་མཆོག་སྙིང་བོའ་ིཀློང་སྒྲོམ་གླེགས་བམ་བརྩེགས། །མདོ་རྒྱུད་མན་ངག་ཆོས་ཀྱི་རང་སྒྲ་ལྡིར། །ཞེས་པ་ལྟར་རོ། །ཡང་གསང་ལམ་ལས། ཁྱམས་དང་གྲུ་ཆད་གློ་འབུར་འཇའ་རིས་འཁྱིལ༔ ཞེས་དང་། བདེ་ལམ་ལས། ཁྱམས་ལ་དཔལ་གྱི་ཕོ་ཉ་གིངྐ་ར། །ལངྐ་འབར་མ་ཕྲ་མེན་གནས་ཉུལ་རྣམས། །ཉམས་པ་སྐྲོད་ཅིང་དམ་ལྡན་བུ་བཞིན་སྐྱོང་། །ཞེས་གསུངས་པ་ནི་རང་གཞུང་ལས། ཕྱི་ཁྱམས་དཔལ་མགོན་བདུན་ཅུ་དང་༔ དབང་ཕྱུག་ཉི་ཤུ་རྩ་བརྒྱད་སོགས༔ བཀའ་སྡོད་དམ་ཅན་རླུང་ལྟར་འཚུབས༔ ཞེས་གསུངས་པ་ལྟར་ཁྱམས་ནི་ཕྱི་ཁྱམས་ལ་གོ་དགོས་ཏེ། འདི་ལ་ནང་ཁྱམས་མེད་པའི་ཕྱིར་རོ། །གྲུབ་སྟེ། རྡོ་གྲུབ་གསུམ་པའི་ཀློང་སྙིང་ལོ་རྒྱས་ལས། ཁྱམས་ནི་གཞལ་ཡས་ཁང་གི་ཕྱིའམ་བཀའ་སྡོད་ཀྱི་སྣམ་བུ་ཡིན་གྱི། རྩིག་པའི་ནང་གི་ཁྱམས་ཡིན་ན་བར་ཁྱམས་ཞེས་གསུངས་རིག་ལ། དབང་གི་སྤྱི་དོན་གྱི་ཐིག་ཡིག་དེ་རིག་འདུས་ཡིན་པར་གྲགས་པས། དེར་ཟླུམ་སྐོར་ཕྱི་མ་རྩིག་པ་ལ་གཏུག་སྣང་སྟེ། གྲྭ་ཕྱོགས་མདོག་ཅེས་པའི་ཤེས་སོ། །དེས་ན་བར་ཁྱམས་མེད་ཅེས་གསུངས་པའི་ཕྱིར་རོ། །དེས་ན་ཕྱི་ཁྱམས་ཟེར་བ་དེ་གང་ཞིག་ཡིན་སྙམ་ན། དེ་ཡི་ཕྱི་རོལ་ཏུ་མི་འཁྱུད་ཟླུམ་པོའ་ིབསྐོར་བ་ལ་མུ་རན་ཞེས་རྡོ་རྗེའི་ས་གཞི་སྟེ་རྡོ་རྗེ་ཁོ་ན་མ་ཡིན་པར་རྡོ་རྗེའི་རྡུལ་གྱི་ས་གཞི་ཁ་དོག་སྔོན་པོ་ཅན་ནོ། །དེར་དཔལ་མགོན་བདུན་ཅུ་དབང་ཕྱུག་ཉེར་བརྒྱད་སོགས་དཔལ་ཆེན་པོ་དང་གུ་རུ་རིན་པོ་ཆེ་སོགས་ཀྱིས་གསང་སྔགས་ཀྱི་དཀྱིལ་འཁོར་དུ་དབང་བསྐུར། དབང་རྫས་ཀྱི་བདུད་རྩི་ལྕེ་ལ་བཞག དབང་རྟགས་ཀྱི་རྡོ་རྗེ་ལག་ཏུ་གཏད་དེ་དཀྱིལ་འཁོར་གྱི་མཐའ་ལ་བཀོད་ནས་རྡོ་རྗེའི་ཆོས་སྐྱོང་བར་ཁས་བླང་བ་རྣམས་རླུང་ལྟར་འཚུབས་ཤིང་རྣལ་འབྱོར་བའི་བར་ཆད་བསལ་བ་དང་དངོས་གྲུབ་ཀྱི་ལས་སྒྲུབ་པའི་ཕྲིན་ལས་མཛད་བཞིན་བཞུགས་པའོ། །ཞབས་དྲུང་རིན་པོ་ཆེའི་གསུང་རྒྱུན་ཡིན་པར་གྲག་པ་ཞིག་ཏུ། མུ་རན་འདིར་གང་ཆེན་བཅོ་བརྒྱད། ལངྒ་བཅུ་དྲུག་སོགས་ཕོ་ཉ་སུམ་བརྒྱ་དྲུག་ཅུ། དཔལ་མགོན་བདུན་ཅུ། རྡོ་རྗེའི་ཆོས་སྐྱོང་བའི་བསྲུང་མ་གནོད་སྦྱིན་ཙིའུ་དམར་བོ། དགོངས་འདུས་བཙན་རྒོད་སྤུན་བདུན། རྒྱལ་ཆེན་སྐུ་ལྔ་སོགས་རྣམས་འཁོད་པ་དང་། སྔགས་སྲུང་ཨེ་ཀ་ཛ་ཊི། དུར་ཁྲོད་ལྷ་མོ་ང་ནེ་མ། དཔལ་མགོན་ཚོགས་ཀྱི་བདག་པོ་སོགས་བསྲུང་མ་ཡེ་ཤེས་པ་རྣམས་དཀྱིལ་འཁོར་གྱི་ནང་ཁྱམས་སུ་བཞུགས་ཚུལ་ཞིག་ཀྱང་སྣང་། དེ་ཡི་ཕྱི་རོལ་ཏུ་དཔལ་འདུས་ལས། ཕྱི་འཁོར་རོ་གླིང་བརྒྱད་དང་རྡོ་རྗེའི་གུར༔ བསྐལ་མེ་འུར་འུར་ཆེམ་ཆེམ་འབར་བའི་ཀློང་༔ ཞེས་གསུངས་པ་ལྟར། དེའི་ཕྱི་རོལ་ཏུ་རོ་གླིང་ངམ་དུར་ཁྲོད་ཆེན་པོ་བརྒྱད་ཕྱོགས་མདོག མཚམས་བཞི་མཐིང་ག བར་མཚམས་རྣམས་སུ་ཁྲག་མཚོ་འཁྱིལ་བ། དེར་མཆོད་རྟེན་དཀར་བོ་བརྒྱད། གྲུབ་ཐོབ་བརྒྱད། མ་མོ་བརྒྱད། མེ་ཆེན་བརྒྱད། ཆུ་ཆེན་བརྒྱད། སྤྲིན་ཆེན་བརྒྱད། གླུ་ཆེན་བརྒྱད། རླུང་ཆེན་བརྒྱད་རྣམས་དང་། གཅན་གཟན་སྣ་ཚོགས། བྱ་ཤ་ཟན་མང་བོ། རོ་ལང་སོགས་རྒྱུ་བས་ཤིན་ཏུ་འཇིགས་ཤིང་ཡ་ང་བའི་གནས་སོ། །དེ་ཡང་སྔོན་ཧེ་རུ་ཀས་རཱུ་ཏྲ་བཏུལ་ནས་ཁོའ་ིརིག་པ་ཡེ་ཤེས་སུ་སྦྱངས། རྣམ་སྨིན་གྱི་ཁོག་པ་དུར་ཁྲོད་དུ་བྱིན་གྱིས་བརླབས་པར་མཛད་པ་ཡིན་པས། དེར་བགེགས་རྣམས་བཀུག་ན་ཁུགས་སླ་ཞིང་། བྲོ་བརྡུང་བྱས་ན་ཕམ་སླ་བའོ། །དེ་ལྟར་རྣམ་ཤེས་ཚོགས་བརྒྱད་བསྒྲལ་བའི་རོ་ཡི་གང་བའི་བདག་མེད་ཀྱི་དུར་ཁྲོད་དེར་བདག་འཛིན་ཅན་གྱི་བགེགས་རྣམས་གཏན་ནས་འཇུག་མི་ནུས་ཏེ། སྤྱོད་ཡུལ་མིན་པའི་ཕྱིར་བསྲུང་གུར་ཁྱད་པར་ཅན་ནོ། །དེའི་ཕྱི་རོལ་ཏུ་རྡོ་རྗེའི་གུར་སྔོན་པོ་ལྕགས་རྨོག་ཁ་སྦུབ་པ་ལྟ་བུའི་སྟེང་རྡོ་རྗེ་རྭ་གདེངས་མེ་འབར་བའི་ཏོག་དང་ལྡན་པ། དེའི་ཕྱི་རོལ་ཏུ་བསྐལ་བ་འཇིག་དུས་ཀྱི་མེའི་ཚ་ངད་དང་ལྡན་པའི་མེ་དཔུང་ཆེན་པོ་ཁ་ཏོག་ལྔ་ལྡན་འུར་འུར་ཆེམ་ཆེམ་དུ་འབར་བའི་ར་བས་བསྐོར་བའོ། །དེ་ལྟར་དཀྱིལ་འཁོར་རྟེན་དང་བརྟེན་པ་ཐམས་ཅད་སངས་རྒྱས་ཐམས་ཅད་ཀྱི་ཐུགས་རྣམ་མཁྱེན་གྱི་ཡེ་ཤེས་ཉིད་གཞལ་ཡས་ཁང་དང་ལྷ་ཚོགས་སུ་ཤར་བ་ཙམ་ལས་སེམས་མེད་བེམ་པོ་དང་སེམས་ལྡན་རང་མཚན་པར་གོ་མི་རུང་སྟེ། གཞུང་ལས། ཀུན་ཀྱང་སྣང་སྟོང་རོལ་ངང་༔ གསལ་ལ་མ་འདྲེས་ལྷུན་གྱིས་གྲུབ༔ ཅེས་གསུངས་པའི་ཕྱིར། དེ་དག་ཀྱང་སྣང་ཆ་ནས་སྤྱན་གྱི་དཀར་ནག་ཚུན་ཆད་མ་འདྲེས་པའི་མཚོན་དཀྱིལ་འཁོར་རྟེན་དང་བརྟེན་པ་ཐམས་ཅད་ཡོངས་རྫོགས་སུ་གསལ་ཞིང་། སྟོང་ཆ་ནས་རང་བཞིན་དུ་གྲུབ་པ་རྡུལ་ཆ་ཙམ་ཡང་མེད་པ་སྣང་སྟོང་མཉམས་པ་ཉིད་ཀྱི་རང་བཞིན་དུ་བལྟ་བ་གལ་ཆེ་བར་མངོན། གནས་གསུམ་ཡི་གེ་གསུམ་སོགས་ནས་ས་མཱ་ཛཿབར་གྱི་དོན། རང་ཉིད་གུ་རུ་སྣང་སྲིད་ཟིལ་གནོན་དུ་གསལ་བའི་སྤྱི་བོར་སངས་རྒྱས་ཐམས་ཅད་ཀྱི་སྐུ་རྡོ་རྗེའི་ངོ་བོ་ཨོཾ་དཀར་བོ། མགྲིན་པར་གསུང་རྡོ་རྗེའི་ངོ་བོ་ཨཱཿདམར་བོ། ཐུགས་ཀར་ཐུགས་རྡོ་རྗེའི་ངོ་བོ་ཧཱུྃ་མཐིང་ག་གསུམ་གསལ་ལ། དེ་ཡང་ཧཱུྃ་ཡིག་དེ་ཉིད་སྙིང་གི་མདུན། བྲང་གི་ནང་ཁྱམས་སུ་བསྒོམ་དགོས་པར་གསུངས། དེ་དག་ལས་འོད་ཟེར་དཀར་བོའ་ིརྩེ་ལས་ལྷ་མོ་ལྕགས་ཀྱུ་མ་དཀར་མོ་ལྕགས་ཀྱུ་བསྣམས་པ། སེར་བོས་རྩེ་ལས་ཞགས་པ་མ་སེར་མོ་ཞགས་པ་ཐོགས་པ། དམར་བོའ་ིརྩེ་ལས་ལྕགས་སྒྲོག་མ་དམར་མོ་ལྕགས་སྒྲོག་ཐོགས་པ། ལྗང་ཀུའི་རྩེ་ལས་དྲིལ་བུ་མ་ལྗང་ཀུ་དྲིལ་བུ་ཐོགས་པ་གྲངས་མེད་པ་སྤྲོས་ཏེ་ངོ་བོ་རྩ་བའི་བླ་མ་དང་རྣམ་དབྱེར་མ་མཆིས་པ་ཕྱོགས་དུས་ཀྱི་བསྡུས་པའི་རྒྱལ་དང་རྒྱལ་སྲས་རྣམས་ཡིན་པ་ལ། རྣམ་པ་མཁའ་འགྲོ་མ་གསང་བ་ཡེ་ཤེས་སོགས་གཙོ་བོར་བཞུགས་པ་ཨོ་རྒྱན་སྤྲུལ་བའི་ཞིང་དང་། གནས་སོ་གཉིས། ཡུལ་ཉེར་བཞི། དུར་ཁྲོད་ཆེན་པོ་བརྒྱད། ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་སོགས་ན་བཞུགས་པའི་ཨོ་རྒྱན་པདྨ་འབྱུང་གནས། རིག་འཛིན་ཆེན་པོ་བརྒྱད། རྗེ་འབངས་ཉེར་ལྔ། རྒྱུད་སྡེ་བཞི་དྲུག་གི་ལྷ་ཚོགས། ལམ་དེ་དག་ལས་དངོས་གྲུབ་བརྙེས་པའི་གྲུབ་རིགས་རྒྱ་མཚོའི་ཚོགས་དང་བཅས་པ་ཐམས་ཅད་སྔོན་གྱི་དམ་ཚིག་བཞིན་དུ་འདིར་བྱོན་ཅིག་ཅེས། ཁྱེའུས་ཕ་མར་འབོད་འདྲའི་གདུང་དབྱངས་ལ༔ པི་ཝཾ་གླིང་བུའི་གདངས་ལྟར་སྙན་པ་ཡིས༔ ཉིན་མཚན་དུས་དྲུག་རྣམས་སུ་གསོལ་བ་ཐོབ༔ ཅེས་གསུངས་པ་བཞིན་མོས་གུས་གདུང་ཤུགས་དྲག་པོའ་ིདབྱངས་ཀྱིས་སྙན་གསན་དབབ་ཅིང་སྤྱན་དྲང་། པདྨ་ཐོད་ཕྲེང་རྩལ་ནི་གུ་རུ་རིན་པོ་ཆེའི་གསང་བའི་མཚན་ཡིན་པས། དེ་བརྗོད་ན་མྱུར་དུ་བྱོན་པ་ཡིན་པའི་ཕྱིར་སྤོས་རོལ་བཅས་ལན་གསུམ་མམ་ལྔ་སོགས་ཅི་རིག་བརྗོད། དེ་དང་ལྷན་དུ་གོང་སྨོས་ལྟར་རང་གི་གནས་གསུམ་འབྲུ་གསུམ་ལས་འཕྲོས་པའི་འོད་ཟེར་དང་ལྷ་མོ་རྣམས་ཀྱིས་བླ་མ་རིག་འཛིན་འདུས་པའི་དཀྱིལ་འཁོར་རྟེན་དང་བརྟེན་པར་བཅས་པ་ཐམས་ཅད་ནམ་མཁའ་ནས་སྤྲིན་རླུང་གིས་བསྐྱོད་པ་ལྟ་བུ། བར་སྣང་ནས་ཁ་ཆར་བུ་ཡུག་འཚུབས་པ་ལྟ་བུ། ས་གཞི་ནས་རླངས་པ་མཆེད་པ་ལྟར་མདུན་གྱི་ནམ་མཁར་མེ་རི་འདབ་འབྱོར་གྱི་ཚུལ་དུ་སྤྱན་དྲངས་ཏེ་འོད་ཟེར་དང་ལྷ་མོ་རྣམས་རང་ལ་བསྡུ། དེ་ནས་བཞུགས་སུ་གསོལ་བ་ནི། བདག་དམ་ཚིག་སེམས་དཔའི་དཀྱིལ་འཁོར་ལ། ལྷ་ཡེ་ཤེས་ཀྱི་དཀྱིལ་འཁོར་དེ་ཉིད་གཡས་སྐོར་གྱི་ཚུལ་དུ་བྱོན་ནས་མེ་རི་ལ་མེ་རི། བསྲུང་གུར་ལ་བསྲུང་གུར། དུར་ཁྲོད་ལ་དུར་ཁྲོད། མུ་རན་ལ་མུ་རན། དྲ་བ་ལ་དྲ་བ། ར་བ་ལ་ར་བ། བླ་བྲེ་ལ་བླ་བྲེ་སོགས་རྟེན་དང་། བརྟེན་པ་ལྷ་ཚོགས་རྣམས་ཀྱང་གཙོ་བོ་ལ་གཙོ་བོ། འཁོར་ལ་འཁོར། དེ་ཡང་སྤྱན་ལ་སྤྱན། ཤངས་ལ་ཤངས། ཞལ་ལ་ཞལ། ལྗགས་ལ་ལྗགས། སྐུ་ལུས་ལ་སྐུ་ལུས། གདན་ལ་གདན་སོགས་ཐིམ་པའི་མོད། མེ་དཔུང་ལ་འབར་རྫས་བསྣན་པ་ལྟར་དམ་ཚིག་གི་དཀྱིལ་འཁོར་རྟེན་དང་བརྟེན་པར་བཅས་ལ་གཟི་བརྗིད་དང་བཀྲག་མདངས་ཆེར་རྒྱས་པར་བསམ། ཕྱག་འཚལ་སྐབས་རྒྱལ་བོ་གདན་ལ་འཁོད་པ་ན་འབངས་ཀྱིས་ཞེ་ས་བྱེད་པ་ལྟར། གཙོ་བོས་ཐུགས་ཀ་ནས་བདག་དམ་ཚིག་པ་ལས་ཀྱི་རྡོ་རྗེ་ཕྱག་རྒྱ་གཅིག་པ་ཞིག་མར་མེ་གཅིག་ལས་གཉིས་མཆེད་ཀྱི་ཚུལ་དུ་ཆད་དེ་ཤར་སྒོར་ཐོན་ནས་གཙོ་བོ་ལ་ཨ་ཏི་པུ་ཧོ་ཞེསཿ བརྡ་ཕྱག་འཚལ་བ་ལ། གཙོ་བོས་པྲ་ཏི་ཙྪ་ཧོཿ ཞེས་དབུ་བཏུད་ཙམ་གྱིས་ཕྱག་ལན་མཛད། དེ་ཡང་གཙོ་བོ་དང་ལས་ཀྱི་རྡོ་རྗེ་གཉིས་ལ་བཟང་ངན་མེད་པར་མཚོན་པའི་བརྡའོ། །མཆོད་པའི་སྐབས་ཕྱི་བུམ་དབང་དང་མཐུན་པའི་མཆོད་པ་ལ། ལས་ལྷ་དང་འདོད་སྣམ་གྱི་ལྷ་མོ་རྣམས་ལས་གཟུགས་རྡོ་རྗེ་མ་སོགས་གྲངས་མེད་པ་སྤྲོས་ཏེ། མཆོད་ཡོན་ཞལ། ཞབས་བསིལ་ཞབས། མེ་ཏོག་གི་ཕྲེང་བ་དབུ། བདུག་སྤོས་ཤངས། མར་མེ་སྤྱན། དྲི་ཆབ་ཐུགས་ཀར། ཞལ་ཟས་ལྗགས། རོལ་མོ་སྙན། གཟུགས་མེ་ལོང་། སྒྲ་རོལ་མོ། དྲི་སྤོས་ཕོར། རོ་ཞལ་ཟས། རེག་དར་གོས་སྟེ་འདོད་ཡོན་སྣ་ལྔ། གདུག་དང་གསེར་ཉ་སོགས་བཀྲ་ཤིས་རྟགས་བརྒྱད། འཁོར་ལོ་རྟ་མཆོག་སོགས་རྒྱལ་སྲིད་སྣ་བདུན། ཡུངས་དཀར་དུར་བ་སོགས་བཀྲ་ཤིས་རྫས་བརྒྱད་རྣམས་ཕྱག་དང་སྤྱན་ལམ་དུ་ཕུལ་བས་གཞན་ལ་བརྐུས་པ་འཕྲོག་པ་སེར་སྣ་སོགས་ཀྱི་སྒྲིབ་པ་རྣམས་དག་ནས་ཆགས་མེད་ཞེན་མེད་ཀྱི་ངང་ནས་མི་བཟད་ནམ་མཁའ་མཛོད་ཀྱི་ལོངས་སྤྱོད་ལ་དབང་བསྒྱུར་ནུས་པར་བསམ། ནང་གསང་དབང་དང་མཐུན་པའི་མཆོད་པ་ནི། ལས་ལྷ་དང་འདོད་སྣམ་སྟེང་གི་ལྷ་མོ་རྣམས་ཀྱི་གནས་གསུམ་འབྲུ་གསུམ་ལས་བདུད་རྩི་སྨན་གྱི་ལྷ་མོ་གྲངས་མེད་པ་སྤྲོས་ཏེ་རིགས་ལྔ་ཡབ་ཡུམ་མཉམ་པར་སྦྱོར་བའི་བདུད་རྩི་འོ་མའི་རྒྱ་མཚོ་ལྟར་དཀར་ལམ་མེར་འཁྱིལ་བ་ལས། ཐབས་ཤེས་མཚོན་བྱེད་མཐེབ་སྲིན་ཉི་ཟླ་ཁ་སྦྱོར་གྱི་ཕྱག་རྒྱས་བདུད་རྩིའི་གཟེགས་མ་ནམ་མཁར་གཏོར་བ་སྤྲིན་ལྟར་ཆགས་པ་ལས་རྩ་བརྒྱད་ཡན་ལག་སྟོང་སྦྱར་གྱི་བདུད་རྩིའི་སྨན་ཆར་ཆེན་པོ་བབས་པ་ཞལ་དུ་གསོལ་བས་ཐུགས་མཉེས་ཤིང་ཟག་མེད་བདེ་བ་ཆེན་པོའ་ིདགའ་བ་ཁྱད་པར་ཅན་སྐྱེ། རང་གཞན་སེམས་ཅན་རྣམས་སྡུག་བསྔལ་གྱི་རྒྱུ་དུག་ལྔ་སེར་སྣ་བཅས་དག་ནས་སྐུ་ལྔ་ཡེ་ཤེས་ལྔའི་ངོ་བོ་མངོན་དུ་འགྱུར་བའི་ས་བོན་ཐེབས་པར་བསམ། དེ་བཞིན་དུ་ལྷ་མོ་ཞལ་ཟས་མ་སོགས་གྲངས་མེད་པ་སྤྲོས་ཏེ་བཟའ་བཅའ་ལྡག་གཞིབ་སོགས་བྱིན་རླབས་ཀྱི་སྐབས་སྨོས་པ་བཞིན་ཕྱི་གཏོར་སྣོད་དང་བཅུད་གཏོར་མར་གྱུར་པ་གྲངས་མེད་པ་ཐོགས་དེ་མཆོད་པས་མཉེས་ཤིང་། ཆོས་ཉིད་དེ་བཞིན་ཉིད་ཀྱི་ངོ་བོ་མངོན་དུ་གྱུར་ནས་གཏི་མིག་མུན་ནག་གིས་གདུང་བའི་འགྲོ་བ་རྣམས་སྐྱོབ་ནུས་པའི་ས་བོན་ཐེབས་པར་བསམ། ཡང་རཀྟའི་ལྷ་མོ་གིརྟི་མ་སོགས་ལྷ་མོ་གྲངས་མེད་པ་སྤྲོས་ཏེ་ཁམས་གསུམ་གྱི་ཆགས་ཞེན་ཁྲག་གི་རྒྱ་མཚོར་འཁྱིལ་བ་ལས་གཏི་མིག་དང་ཞེ་སྡང་གི་ངོ་བོ་ཤ་དང་རུས་པའི་བདག་ཉིད་མི་རོ་དང་རྟ་རོའ་ིརྦ་ཀློང་རབ་ཏུ་འཁྲིགས་པ་ལས་མཆོད་པའི་སྤྲིན་མུ་མེད་པར་འཕྲོ་བ་དེ་ཉིད་དཀྱིལ་འཁོར་གྱི་ལྷ་ཚོགས་རྣམས་ལ་ཕུལ་བས་བདེ་སྟོངས་ཡེ་ཤེས་ཆེན་པོས་དགའ་བ་ཆེར་འབར་ཏེ་ཐུགས་མཉེས་ཤིང་ཚོགས་རྫོགས་ནས། ཆགས་བྲལ་བདེ་བ་ཆེན་པོའ་ིཡེ་ཤེས་མངོན་དུ་འགྱུར་བའི་ས་བོན་ཐེབས་པར་བསམ། ཤེར་དབང་དང་མཐུན་པའི་མཆོད་པ་ནི། ཕྱི་སྒེག་བཞི། ནང་སྒེག་བཞི། སྐུ་གསུང་ཐུགས་ཡོན་ཏན་ཕྲིན་ལས་ལྔ། ཐུན་མོང་འདོད་ཡོན་གྱི་ལྷ་མོ་གསུམ་སྟེ་བཅུ་དྲུག་གི་མཚོན་སྒེག་བཞད་གཡོ་བའི་གར་མ། བདེ་ཆེན་སྦྱོར་བའི་རིག་མ་སོགས་འབུམ་ཕྲག་གྲངས་མེད་པ་སྤྲོས་ཏེ་དཀྱིལ་འཁོར་བ་རྣམས་ལ་ཕུལ་བས། ལྷ་ཚོགས་དེ་དག་གིས་ཀྱང་ཆགས་མེད་ཆགས་པ་ཆེན་པོའ་ིབརྟུལ་ཞུགས་ཀྱིས་མཉམ་པར་སྦྱར་བས་བདེ་སྟོངས་ཡེ་ཤེས་ཀྱི་རོས་ཐུགས་མཉེས་ཤིང་ཚིམས་པར་བསམ། ཚིག་དབང་དང་མཐུན་པའི་མཆོད་པ་ནི། མཆོད་བྱ་ཐུན་མོང་ཉེར་སྤྱོད་ནས་ཐུན་མིན་རིག་མའི་འདོད་ཡོན་གྱི་བར་དང་། མཆོད་བྱེད་ལས་ཀྱི་རྡོ་རྗེ། མཆོད་ཡུལ་དཀྱིལ་འཁོར་གྱི་ལྷ་ཚོགས་རྣམས་སྒྱུ་མའི་འཕྲུལ་འཁོར་དབྱིངས་སུ་ཞིག་པའམ་རླབས་རྒྱ་མཚོར་ཐིམ་པ་ལྟར་ཆོས་ཅན་ཀུན་གྱི་ཆོས་ཉིད་སྤྲོས་བྲལ་མཉམ་ཉིད་བདེ་བ་ཆེན་པོའ་ིངང་ལ་མཉམ་པར་འཇོག་པ་ནི་མཆོད་པའི་ཕྱག་རྒྱ་ཆེན་པོ་སྟེ། དེ་ལྟར་དབང་བཞིའི་དམ་ཚིག་དང་མཐུན་པའི་མཆོད་པ་རྫོགས་པར་ཕུལ་བས་ལྷ་རྣམས་མཉེས་ཤིང་། དམ་ཚིག་པ་ལའང་དབང་བཞིས་རྒྱུད་སྨིན་པར་བྱས་ཏེ་ཚོགས་གཉིས་མཐར་ཕྱིན་པ་དང་། སྐུ་གཉིས་དམ་པ་མངོན་དུ་འགྱུར་བའི་དངོས་གྲུབ་བསྩལ་བར་བསམ། དེ་ནས་ལྷ་མོ་རྣམས་ལྷ་རྣམས་ཀྱི་གནས་སོ་སོར་ཐིམ་ཞིང་ལས་ལྷ་གཙོ་བོའ་ིཐུགས་ཀར་ཐིམ་པར་བསམ། བསྟོད་པ་ལ། སླར་གཙོ་བོའ་ིཐུགས་ཀ་ནས་ལས་ལྷ་དང་། དེ་ལས་ཀྱང་རྡོ་རྗེའི་ལྷ་མོ་གླུ་མ་གར་མ་པི་ཝཾ་མ་སོགས་གྲངས་མེད་པ་སྤྲོས་ཏེ་ལྷ་ཆེན་འཕྲུལ་དགའི་རྣམ་འགྱུར་ལྟར་དབྱངས་དང་གར་སྟབས་སྣ་ཚོགས་ཀྱིས་དཀྱིལ་འཁོར་ཡོངས་རྫོགས་ལ་བསྟོད་པ་དང་། འཁོར་གྱིས་གཙོ་བོ་ལ་བསྟོད་པ་དང་། ཆོས་ཉིད་ཀྱི་རང་སྒྲས་བསྟོད་པ་རྣམས་ཡོད་མོད། འདིར་ཞལ་རྒྱུན་ཞིག་ཏུ་མིས་མི་ལ་བསྟོད་པ་ལྟར་མདུན་གྱི་ནམ་མཁར་ཕྱོགས་བཅུའི་རྒྱལ་བ་སྲས་དང་བཅས་པ་བྱོན་ནས་སྙན་པའི་གླུ་དང་དབྱངས་ཀྱི་ཡན་ལག་རྒྱ་མཚོའི་སྒོ་ནས་དཀྱིལ་འཁོར་ལྷ་ཚོགས་རྣམས་ཀྱི་ཆེ་བ་བརྗོད་པའི་བསྟོད་པ་སྣ་ཚོགས་མཛད་པར་སྒོམ་ཚུལ་ཞིག་གསུང་། དེ་ཡན་ཆད་ཀྱིས་ཏིང་ངེ་འཛིན་ལྷའི་གཟེར་སོང་། གཉིས་པ་བཟླས་པ་སྔགས་ཀྱི་གཟེར་ལ། གཙོ་བོའ་ིཐུགས་ཀར་ཙིཏྟ་རིན་པོ་ཆེ་མཆོང་གུར་ཕུབ་པ་ལྟ་བུའི་དབུས་སུ་པདྨ་ཉི་ཟླའི་གདན་ལ་ཡེ་ཤེས་སེམས་དཔའ་ངོ་བོ་བཅོམ་ལྡན་འདས་འོད་མཚན་སྟོང་འབར་ཡིན་པ་ལ། རྣམ་པ་རིག་འཛིན་རྡོ་རྗེ་ཆོས་སྐུ་མདོག་དམར་བོ་ཚོན་གང་བ་སྐུ་གཅེར་བུ། རུས་པའི་རྒྱན་དྲུག་གསོལ་ཞིང་དབུ་སྐྲ་ཐོར་ཅོག་བཅིངས་པ། དེའི་པང་དུ་ཡུམ་རྡོ་རྗེ་རྣལ་འབྱོར་མ་སྐུ་མདོག་སྔོན་མོ་གྲི་གུག་གཡས་དང་། ཐོད་ཁྲག་གཡོན་དུ་འཛིན་པའི་ཡབ་ལ་འཁྱུད་ཅིང་ཕྱག་རྒྱ་ལྔ་དང་ལྡན་པ། ཡབ་ཀྱི་ཕྱག་གཡས་རྡོ་རྗེ་དང་གཡོན་དྲིལ་བུ་བསྣམས་པའི་ཐུགས་ཀར་བསྣོལ་ཐབས་སུ་འཛིན་པ། ཞལ་ཞི་མ་ཁྲོ། ཡབ་ཡུམ་གཉིས་སུ་མེད་པ། སྐུ་སྣང་ལ་རང་བཞིན་མེད་པ་ཕྱི་གསལ་ནང་གསལ་འོད་ཀྱི་རང་བཞིན་ཅན། དེ་ཡང་མདུན་སར་བསྒོམ་ན་སྲོག་རླུང་འཇུག་པའི་གེགས་འབྱུང་ཉེན་ཡོད་པས་དམ་ཚིག་སེམས་དཔའི་སྒལ་ཚིགས་དང་ཉེ་ཕྱོགས་སུ་བསྒོམ། དེ་ཡི་ཐུགས་ཀར་པདྨ་དང་ཉི་ཟླའི་གདན་ཡུང་འབྲུ་ཀླེབ་པ་ཙམ་གྱི་དབུས་སུ་ཧཱུྃ་ཡིག་མཐིང་ག་སྤུས་བྲིས་པ་ལྟ་བུ་ཡིག་མགོ་ལྷའི་ཞལ་ཀྱུ་ཕྱོགས་དང་མཐུན་པ། དེའི་མཐར་མདུན་ནས་བརྩམས་ཏེ་ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃཿ ཞེས་རྡོ་རྗེའི་རྭ་ལངས་པ་ལྟར་ཟོར་ཟོར་ཁོང་གསེང་ཡིག་མགོ་ཕྱི་རོལ་ཐུགས་སྲོག་ལ་རྒྱབ་བསྟན་པ། མདོག་མཐིང་ག་སྤུས་བྲིས་པ་ལྟ་བུ་བཀོད་པ་གཡོན་དང་འཁོར་བ་གཡས་སུ་འཁོར་བ། གདན་སྔགས་ཕྲེང་ཐུགས་སྲོག་དང་བཅས་པ་ཐམས་ཅད་གཅིག་ལ་གཅིག་མ་རེག གཅིག་གིས་གཅིག་མི་སྒྲིབ་པ་དྭངས་གསལ་འོད་ཀྱི་རང་བཞིན་ཅན་དུ་བསྒོམ། བཟླས་པ་ལ་འཇུག་ཚེ་ཕྲེང་བ་བྱིན་རླབས་དང་འབྲུ་གསུམ་བརྒྱ་རྩ་འདོན། དེ་ནས་གབ་བྱང་ལས། མི་ལ་གཅེས་པ་རྣམ་ཤེས་ལྟར༔ ཕྱག་རྒྱ་རྟགས་ཀྱི་ལྷ་སྐུ་ཀུན༔ ཟིལ་གནོན་ཡེ་ཤེས་སེམས་དཔའ་ནི༔ ཤིན་ཏུ་གསལ་བརྟན་ཐོན་པ་གནད༔ ཅེས་གསུངས་པ་ལྟར་ཡེ་སེམས་ཐུགས་སྲོག་སྔགས་ཕྲེང་དང་བཅས་པ་ལ་སེམས་བཟུང་སྟེ་བསྙེན་པ་བཟླ། དེ་སྐབས་སུའང་རྣམ་པ་གསལ་བ་རྣམ་དག་དྲན་པ་ང་རྒྱལ་བསྟན་པ་གསུམ་རེས་མོས་ཀྱི་ཉམས་སུ་ལེན་དགོས། དེ་དག་གི་ནང་ནས་ཀྱང་གལ་ཆེ་བ་ནི་ང་རྒྱལ་བརྟན་པ་ཡིན་ཏེ། དེ་ཡོད་ན་གཞན་གཉིས་ཞར་ལ་སྐྱེ་སླ་བའི་ཕྱིར་རོ། །དེ་ཡང་རྣམ་པ་གསལ་བ་ནི་ཆོས་ཉིད་གང་དུའང་མ་གྲུབ་པའི་གསལ་ཆའམ་གདངས་ལས་སྣང་བའི་འཁྲུལ་འཛིན་ཤར་བ་དེ་རིག་འཛིན་འདུས་པའི་དཀྱིལ་འཁོར་རྟེན་དང་བརྟེན་པའི་རྣམ་པར་གསལ་བ་ལ་བསླབ་པ་དེ་དང་། རྣམ་དག་དྲན་པ་ནི་བེམ་པོ་དང་རང་མཚན་པའི་གང་ཟག་ཙམ་མ་ཡིན་པར་རྒྱལ་བ་རྣམས་ཀྱི་ཐུགས་ཡེ་ཤེས་ཆེན་པོའ་ིརང་རྩལ་ལས་ཤར་བར་བལྟ་བ་སྟེ་དེས་ལྷ་རང་རྒྱུད་དུ་འཛིན་པའི་གོལ་ས་སྦྱོང་བའོ། །ང་རྒྱལ་བརྟན་པ་ནི་བདག་ལྷ་དེ་དང་དེ་དངོས་ཡིན་སྙམ་པའོ། །གསུམ་པ་དགོངས་པ་མི་འགྱུར་བའི་གཟེར་ནི། ཆོས་ཉིད་དེ་བཞིན་ཉིད་ཀྱི་ལྟ་བའི་རྩིས་ཟིན་པ་སྟེ། མཉམ་ཉིད་རྡོ་རྗེ་དབྱིངས་ཀྱི་དཀྱིལ་འཁོར་ལ་བསླབས་པ་སྟེ་ཞེས་གསུངས་པ་ལྟར་འདི་ནི་བསྐྱེད་རིམ་གྱིས་སྲོག་གི་གནད་ཡིན་པས། ཇི་སྐད་དུ། འདི་མེད་སྒོམས་པ་འཁྲུལ་བའི་ལམ། །འདི་ལྡན་མ་བསྒོམ་ཆོས་སྐུའི་ངང་། །ཞེས་དང་། སྟོངས་ཉིད་སྙིང་རྗེའི་སྙིང་བོ་ཅན། །བྱང་ཆུབ་སྒྲུབ་པ་ཁ་ཅིག་ལའོ། །ཞེས་གསུངས་པ་བཞིན། སྣང་སྲིད་རྣམ་དག་གི་ལྟ་བ་དང་ཕྱོགས་རེས་བྲལ་བའི་སྙིང་རྗེ་གཉིས་མེད་པར་གྱུར་ན་བསྐྱེད་རིམ་བསྒོམ་ཡང་འཁོར་བའི་རྒྱུ་ལས་འཕགས་མི་ནུས་ཏེ། ཞི་བ་རང་རྒྱུད་དུ་བཟུང་ན་གཟུགས་ཁམས་ཀྱི་ལྷར་སྐྱེ་བ་དང་། ཁྲོ་བོ་རང་རྒྱུད་དུ་བཟུང་ན་རྒྱུ་དེར་འཆི་ཁ་ཞེ་སྡང་གིས་གསོས་བཏབ་ནས་གཞན་གནོད་ཁོ་ན་བྱེད་པའི་མཁའ་ལ་རྒྱུ་བའི་ཡི་དྭགས་རྒྱལ་འགོང་མ་རུང་བ་དང་གཤིན་རྗེའི་འཇིག་རྟེན་དུ་སྐྱེ་བར་གསུང་། དེ་ལྟར་ཆོས་ཉིད་ལས་རྒྱང་རིང་དུ་གྱུར་ནས་ཆོས་ཅན་འཁྲུལ་བའི་གཞན་དབང་དུ་གྱུར་པའི་སེམས་ཅན་རྣམས་ལ་དམིགས་མེད་སྒྱུ་མ་ལྟ་བུའི་སྙིང་རྗེ་ཆེན་པོའི་ངང་ནས་བཟླས་བརྗོད་ཆུ་བོའ་ིརྒྱུན་ལྟར་བརྩོན་པ་དང་། ཁྱད་པར་དུ་མཉམ་རྗེས་གང་གི་སྐབས་སུ་ཡང་དལ་འབྱོར་རྙེད་དཀའ། འཆི་བ་མི་རྟག་པ། འཁོར་བའི་ཉེས་དམིགས། ལས་རྒྱུ་འབྲས། ཡུལ་གོང་མ་ལ་དད་པ། མར་སེམས་ཅན་ལ་བྱམས་དང་སྙིང་རྗེ་སོགས་ལ་རྒྱུན་མ་ཆད་པར་བསླབ་ན་རིམ་གྱིས་བློ་ཆོས་ཕྱོགས་སུ་འཁོར་ནས་ཆོས་པ་ཕྱི་ནང་མཚུངས་པ་རེ་འོངས་སྲིད་དེ། དེ་ནི་བློ་ཆོས་སུ་འགྲོ་བ་དང་ཆོས་ལམ་དུ་འགྲོ་བྱེད་ཡིན་པའི་ཕྱིར་རོ། །བཞི་བ་འཕྲོ་འདུའི་གཟེར་ནི། ཐུན་གྱི་སུམ་ཆ་ཙམ་ལ་ཡེ་ཤེས་སེམས་དཔའི་ཐུགས་ཀའི་སྲོག་གི་ཡེ་གེ་ཧཱུྃ་གཡོ་འགུལ་དང་བྲལ་ཞིང་བཀྲག་མདངས་དང་འོད་ཟེར་འབར་བ། དེ་མཐར་འགལ་མེའི་འཁོར་ལོ་ལྟར་སྔགས་ཕྲེང་ཨོཾ་ཡིག་ནས་བཟུང་གཡས་བསྐོར་དུ་ཀྱི་ལི་ལི་འཁོར་བ་ལ། ཧཱུྃ་གི་འོད་ཟེར་གྱིས་ཉི་འོད་མེ་ཤེར་ལ་ཕོག་པ་ལྟར་འོད་ཟེར་ཆེར་འབར། དེ་ཡིས་ཡེ་ཤེས་སེམས་དཔའ་ལ་བཀྲག་མདངས་རྒྱས། དེ་ལས་བདག་དམ་ཚིག་སེམས་དཔའ་ལ་གཟི་བརྗིད་འབར། དེ་ནས་རིག་འཛིན་བརྒྱད། རྗེ་འབངས་ཉེར་ལྔ། རྒྱུད་སྡེ་དྲུག་དང་རྒྱ་བོད་ཀྱི་རིག་འཛིན་སོགས་ནས་ཀེང་ཆེན་སྡེ་བཞི་གཞལ་ཡས་ཁང་མེ་རི་དང་བཅས་པར་ནང་ནས་རིམ་པ་ལྟར་གཅིག་གིས་འོད་ཟེར་གཅིག་ལ་ཕོག་པས་ཐམས་ཅད་མེ་ཕུང་ཆེན་པོ་རབ་ཏུ་འབར་བ་བཞིན་གཟི་བརྗིད་དང་བཀྲག་མདངས་རྒྱས་ཤིང་འོད་ཟེར་མུ་མེད་པར་འཕྲོ་བ་ཞིག་ལ་གསལ་སྣང་མ་ཐོབ་བར་དུ་འབད་དགོས། དེ་ལྟར་གྲུབ་ཟིན་པའི་རྗེས་ཐོག་ཏུ་གདོད་འོད་ཟེར་སྤྲོ་བསྡུ་ལ་བསླབ་པར་བྱ་སྟེ་དེ་ནི། སྔགས་ཕྲེང་ཤིན་ཏུ་ཕྲ་བ་ལས་འོད་ཟེར་གྱི་ཕུང་བོ་དཀར་ལ་འཚེར་བ། སེར་ལ་སྣུམ་པ། དམར་ལ་བཀྲག་པ། ལྗང་ལ་གནག་པ། མཐིང་ལ་རྔམ་པ་འཕྲོས། ཁྱད་པར་ལྷ་དབང་དུ་སྡུད་པའི་ཕྱིར་འོད་ཟེར་དམར་བོ་ཉི་རྡུལ་གྱི་གྲངས་དང་མཉམ་པ་བ་སྤུའི་བུ་ག་སོ་སོ་ནས་འཕྲོས་པའི་རྩེ་ལས་མཆོད་པའི་ལྷ་མོ་མཆོད་རྫས་དཔག་ཏུ་མེད་པ་ཐོགས་པ་གྲངས་དང་མཐས་མི་ཐུག་པ་མང་བོས་བསྒྲུབ་བྱ་གཙོ་འཁོར་སོགས་ཕྱོགས་བཅུ་དུས་གསུམ་གྱི་རྒྱལ་བ་སྲས་དང་བཅས་པ་རྣམས་ལ་མཆོད་པ་ཕུལ་བས་དེ་དག་གི་ཐུགས་མཉེས། རང་གི་བསོད་ནམས་ཀྱི་ཚོགས་རྫོགས། སླར་འོད་ཟེར་རྣམས་ཚུར་འདུས་པ་དང་ལྷན་དུ་མཆོད་ཡུལ་དེ་དག་གི་རྒྱུད་ལ་བཞུགས་པའི་མཁྱེན་བརྩེ་ནུས་གསུམ་གྱི་ཡོན་ཏན་ཐམས་ཅད་རང་ཉིད་ལ་ཐིམ་པས། ཉོན་མོངས་པའི་སྒྲིབ་པ། ལས་ཀྱི་སྒྲིབ་པ། བག་ཆགས་ཀྱི་སྒྲིབ་པ། ཤེས་བྱའི་སྒྲིབ་པ་སྟེ་བཞི་དག བུམ་དབང་། གསང་དབང་། ཤེར་དབང་། ཚིག་དབང་སྟེ་བཞི་ཐོབ། ཆོས་སྐུ། ལོངས་སྐུ། སྤྲུལ་སྐུ། ངོ་བོ་ཉིད་སྐུ་དང་བཞི་མངོན་དུ་བྱས་པར་བསམ་ལ་ཆོས་ཉིད་ཀྱི་དོན་ལ་མཉམ་པར་བཞག་པས་ཡེ་ཤེས་ཀྱི་ཚོགས་རྫོགས། དེ་ལྟར་ཚོགས་གཉིས་ལ་བརྟེན་ནས་དཀྱིལ་འཁོར་གྱི་ལྷ་དང་ཉེ་བར་བསྙེན་ཅིང་བདག་བྱིན་གྱིས་རློབས་པ་ནི་རང་དོན་ཆོས་སྐུའི་རྟེན་འབྲེལ་བསྒྲིགས་པ་ཡིན། ཡང་ཆོས་སྐུ་སྐྱེ་བ་མེད་པའི་རང་རྩལ་ལས་བྱུང་བའི་དཀྱིལ་འཁོར་གྱི་ལྷ་ཚོགས་རྣམས་དང་ས་བོན་སྔགས་ཕྲེང་དང་བཅས་པ་ལས་འོད་ཟེར་སྔོ་སྐྱ་དཔག་ཏུ་མེད་པ་མར་འཕྲོས། དམྱལ་བ་ཚ་གྲང་། ཡི་དྭགས་བཀྲེས་སྐོམ། དུད་འགྲོ་བླུན་རྨོང་། མི་སྐྱེ་རྒ་ན་འཆི། ལྷ་མ་ཡིན་འཐབ་རྩོད། ལྷ་འཆི་འཕོ་ལྟུང་བྱེད་དང་། རྨི་ལམ་གྱི་ལམ། བག་ཆགས་ཀྱི་ལམ། འཁྲུལ་འཁོར་མ་ངེས་པའི་ལམ། རྒྱུ་འབྲས་སོ་སོར་ངེས་པའི་ལམ། ལས་ཀྱི་མཐའི་ལམ་སྟེ་འགྲོ་དྲུག་དང་། ལམ་རྒྱུད་ལྔའི་ལས་དང་། གང་ཟག་གི་བདག་འཛིན་གྱི་རྩ་བ་ཅན་གྱི་ཉོན་མོང་གི་སྒྲིབ་པ་དང་། ཆོས་ཀྱི་བདག་འཛིན་གྱི་རྩ་བ་ཅན་གྱི་ཤེས་བྱའི་སྒྲིབ་པ་ཐམས་ཅད་བ་མོར་ཉི་འོད་ཕོག་པ་ལྟར་སྐད་ཅིག་ལ་དག་ནས་ཕྱི་སྣོད་གཞལ་ཡས་ཁང་། ནང་བཅུད་ཀྱི་ལུས་ལྷ་སྐུ། ངག་སྙིང་བོ། ཡིད་ཆོས་སྐུའི་དགོངས་པ་འཕོ་འགྱུར་མེད་པའི་ངོ་བོར་སངས་རྒྱས་ནས་སྲིད་པ་ཞེས་བྱ་བའི་མིང་ཙམ་ཡང་དམིགས་སུ་མེད་པར་བལྟ་བ་ནི་གཞན་དོན་ཕྲིན་ལས་ཀྱི་རྟེན་འབྲེལ་བསྒྲིགས་པ་སྟེ་དོན་གཉིས་ལྷུན་གྲུབ་ཀྱི་ས་ལ་སྦྱོར། སྣང་སྲིད་ཐམས་ཅད་བླ་མ་རིག་འཛིན་འདུས་པའི་དཀྱིལ་འཁོར་ཉག་གཅིག་གི་རོལ་པར་བལྟས་ནས་ཐམས་ཅད་ཀྱིས་བཛྲ་གུ་རུའི་སྒྲ་འབྲུག་སྟོང་དུས་གཅིག་ལ་ལྡིར་བ་ལྟར་སྒྲོགས་པར་དམིགས་ལ་བསྙེན་པ་བཟླ། དེ་ཡང་སྣང་གྲག་རིག་གསུམ་ཐ་མལ་དུ་སོང་བའི་བསྙེན་པའི་གོ་མི་ཆོད་པས། སྣང་ཞེན་ལྷ་སྐུའི་ཕྱག་རྒྱར་རྫོགསཿ སྒྲ་གྲག་བདེ་ཆེན་སྔགས་སུ་དགཿ དྲན་རྟོག་འོད་གསལ་ཆོས་སྐུར་སྨིནཿ ཞེས་རང་ལུགས་ཀྱི་དག་རྫོགས་སྨིན་གསུམ་འདི་བསྙེན་པའི་མདོ་ཆིངས་ཆེན་པོ་ཡིན་པས་དེ་ཡི་དགོངས་པ་དང་མ་བྲལ་ན་ཕྱི་མ་ཟངས་མདོག་དཔལ་རིར་ཉིང་མཚམས་སྦྱོར་བ་ལ་ཐེ་ཚོམས་མེད། སྔགས་བཟླ་བ་དེ་ཡང་གནད་ལྔ་དང་ལྡན་དགོས་ཏེ། སྔགས་དག་པ། མ་ཡེངས་པ། གྲིམ་ལྷོད་རན་པ། བར་མ་ཆད་པ། བློ་སྣ་མི་མང་བ་ལྔ་སྟེ། དེ་འདྲའི་སྒོ་ནས་ཚེ་གཅིག་ལུས་གཅིག་གིས་སངས་རྒྱས་པའི་མྱུར་ལམ་འདི་ལ་བརྟེན་ནས་བླ་མ་རིག་འཛིན་འདུས་པའི་གོ་འཕངས་མ་ཐོབ་ཀྱི་བར་དུ་སྲོག་ལ་བབས་ཀྱང་མི་གཏོང་སྙམ་པའི་དམ་བཅའ་ཤུགས་དྲག་པོས་ངང་ནས་ཉམས་ལེན་ལ་བརྩོན་པ་གལ་ཆེ། དེ་ལྟར་སྲོག་སྡོམ་གཟེར་བཞིའི་གནད་དང་ལྡན་པ་ནི་ཆེའི་གལ་བོ་ཆེ་ཞིག་སྟེ། དེ་དག་དང་བྲལ་བའི་བསྐྱེད་རིམ་བསྒོམ་པ་ནི་མི་ཤི་བའི་རོ་དང་འདྲ་བ་ཞིག་གོ ། ཐུན་གྲོལ་བ་ལ་ཕྱོགས་ཚེ་བསྒོམ་པའི་ལྷ་མ་གསལ་བ། བཟླས་པའི་སྔགས་མ་དག་པ། ཡིད་ཀྱི་ཏིང་ངེ་འཛིན་མ་གསལ་བ་རྣམས་དག་པར་བྱ་བའི་ཕྱིར་དབྱངས་གསལ་རྟེན་སྙིང་། དེ་གསུམ་བརྟན་པར་བྱ་བའི་སླད་དུ་ཡི་གེ་བརྒྱ་བ་སྟེ་ཐམས་ཅད་སྦྲེལ་ནས་ལན་གསུམ་གྱི་མཐར་འདོད་གསོལ་དང་མཆོད་བསྟོད་བྱ། དེ་ལྟར་བསྙེན་པ་འབུམ་ཕྲག་བཅུ་གསུམ་སོགས་སོང་རྗེས། སྲོད་ཐུན་མགོར་མཆོད་པ་ཁ་གསོ། བསྒྲུབ་པའི་མགོ་འཛིན་པ་ལ་ཆོ་ག་སྔར་ལྟར་བསྙེན་པ་ལྔ་བརྒྱ་ཙམ་བཏང་རྗེས། གདོད་སིདྡྷིའི་ཚབ་ཏུ་ཨོཾ་ཨཱཿཧཱུཾ་བཛྲ་མ་ཧཱ་གུ་རུ་སརྦ་སིདྡྷི་ཧཱུཾཿ ཞེས་པ་ཁ་དོག་དང་བཀོད་ལུགས་སྔར་ལྟར་ལ། ཐུགས་ཀའི་སྔགས་ཕྲེང་གཡས་བསྐོར་སོགས་བརྗོད་ཅིང་། ཡེ་ཤེས་སེམས་དཔའི་ཡུམ་རྡོ་རྗེ་རྣལ་འབྱོར་མའི་ཐུགས་ཀར་པདྨ་དང་ཉི་མའི་གདན་ལ་བྃ་ཡིག་དམར་བོ་རྣམ་བཅད་མེད་པ་སྤུས་བྲིས་པ་ལྟ་བུ་ཞིག་གསལ་གདབ། དེ་ནས་ཡེ་སེམས་རྡོ་རྗེ་ཆོས་ཀྱི་ཐུགས་སྲོག་ཏིང་འཛིན་སེམས་དཔའ་ཧཱུྃ་ཡིག་སྔགས་ཕྲེང་དང་བཅས་པ་ལ་སེམས་གཏད་ནས་སྒྲུབ་སྔགས་བཟླ། ཐུན་གྱི་སུམ་ཆ་ཙམ་ལ་སྣང་སྟོང་གཉིས་སུ་མེད་པའི་གསལ་སྣང་བརྟན་པོའ་ིངང་ནས་ཐུགས་ཀའི་སྔགས་ཕྲེང་ཡེ་ཤེས་ལྔའི་རང་བཞིན་འོད་ཟེར་ཁ་དོག་ལྔ་ལྡན་བཀྲག་མདངས་གཟི་བརྗིད་དང་ལྡན་པ་དེ་ཉིད་གཡས་སུ་ཀྱུ་ལི་ལི་འཁོར་བ་ལས་འོད་ཟེར་གྱི་ཁྱོགས་དང་བཅས་རང་འདྲ་གཉིས་པ་རེ་ཆད་པ་ལུ་གུ་རྒྱུད་དུ་འབྲེལ་ཡབ་ཀྱི་ཞལ་ནས་ཐོན། ཡུམ་གྱི་ཞལ་དུ་ཞུགས་ནས་ཐུགས་ཀའི་བྃ་ལ་གཡོན་དུ་བསྐོར་ཏེ་མཁའ་གསང་ནས་ཐོན། ཡབ་ཀྱི་རྡོ་རྗེ་ནོར་བུའི་ལམ་དུ་ཞུགས་ཏེ་ཐུགས་སྲོག་ཧཱུྃ་ཡིག་ལ་གཡས་བསྐོར་གྱིས་མདུན་ནས་སིབ་སིབ་ཐིམ་པ་བར་མ་ཆད་པར་འགལ་མེའི་འཁོར་ལོ་བསྐོར་བ་ལྟར་འཁོར་བས་སྔགས་ཕྲེང་དེར་མེ་ཕུང་ལ་ཤིང་བསྣན་པ་ལྟར་འོད་ཟེར་ཆེར་འབར། དེ་ཡི་རྐྱེན་ལས་ཡེ་ཤེས་སེམས་དཔའ་ཡབ་ཡུམ་ལ་བདེ་བ་ཆེན་པོའ་ིཉམས་འབར་ཞིང་ཐུགས་རྗེའི་འོད་ཟེར་ཕྱོགས་བཅུར་འཕྲོས་པ་གཙོ་འཁོར་རྣམས་ལ་ཕོག་པས་སྐུ་ལ་གཟི་བརྗིད་དང་བཀྲག་མདངས་འབར། ཐུགས་བདེ་སྟོངས་ཡེ་ཤེས་ཀྱིས་མྱོས་ཤིང་ཉམས་འུར་ནས་སྐུ་ཡིས་གར་འཁྲབ་ཅིང་ཞལ་ནས་ཧཱུཾ་གླུ་སྒྲོག་བཞིན་ཕྱག་གིས་ཊ་དྲིལ་འཁྲོལ་བར་དམིགས་ལ། སླར་དེ་དག་གི་སྐུ་གསུང་ཐུགས་ལས་བྱུང་བའི་འོད་ཟེར་གྱི་རེག་པ་ཙམ་གྱིས་མ་དག་འཁྲུལ་ངོར་སྣང་བའི་སྣོད་བཅུད་གཉིས་ཀ་ལན་ཚྭ་ཆུར་ཞི་བའམ་མུན་ཁང་དུ་ཉི་འོད་ཕོག་པ་ལྟར་གྱུར་ནས། དབྱིངས་རིག་གཉིས་སུ་མེད་པའི་རྩལ་སྣང་དག་པ་རབ་འབྱམས་སུ་ཤར་བ་བླ་མ་རིག་འཛིན་འདུས་པའི་དཀྱིལ་འཁོར་ཉག་གཅིག་ཏུ་གྱུར་པར་བལྟས་ལ་སྔགས་བཟླ། སྐབས་འདིར་ཉིན་བཞིན་ཚོགས་མཆོད་བསྡུས་པ་རེ་དང་། ཚེས་བཅུ་ཉེར་ལྔ་ལ་ཚོགས་མཆོད་རྒྱས་པ་རེ་གཏོང་། གདན་དྲོད་དང་མི་འབྲལ་བ་དང་། ཕྲེང་བ་ཡི་དམ་དུ་གསལ་བའམ་ཁྲོ་ཞལ་དུ་གསལ་ནས་གདན་བསྲུང་དུ་འཇོག ཐུན་མཚམས་ཀྱི་བྱ་བ་ཐམས་ཅད་གཙོ་བོའ་ིཐུགས་ཀ་ནས་ལས་ལྷ་ཕྱག་རྒྱ་གཅིག་པ་རེ་སྤྲོས་ནས་དེས་བྱེད་པ་དང་། ལྷའི་ང་རྒྱལ་བརྟན་པ་དང་གཅིག གནས་གསུམ་དུ་གོ་ཆས་ལྷ་གཟི་བརྗིད་འབར་བ་དང་གཉིས། བཟའ་བཏུང་ཐམས་ཅད་ཚོགས་འཁོར་དུ་དམིགས་པ་གསུམ་ཐུན་མཚམས་ཀྱིས་བྱ་བའོ། །ཐུན་བར་རྣམས་དང་ཁྱད་པར་སྲོད་ཐུན་དང་ཉལ་བའི་སྐབས་སུ་རང་གི་གནས་གསུམ་དུ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་རང་བཞིན་ཨོཾ་དཀར་ཨཱཿདམར་ཧཱུྃ་མཐིང་གསུམ་གསལ་བའི་འོད་ཀྱིས་རང་ཉིད་ཡི་དམ་ལྷ་ཡི་སྐུ་ལུས་ཀྱི་ཕྱི་ནང་ཐམས་ཅད་ལ་ཁྱབ་པས་འོད་ཕུང་རབ་ཏུ་འབར་ཞིང་བལྟར་མི་བཟོད་པ་ཞིག་ཏུ་དམིགས་ཏེ་རྩ་སྔགས་དང་འབྲུ་གསུམ་བཟླ་བཞིན་གཉིད་ལོག་ན། གཉིད་འོད་གསལ་དུ་འཆར་བ་དང་། འདྲེ་གདོན་སོགས་ཀྱིས་གླགས་མི་རྙེད་པ་དང་། སྡིག་སྒྲིབ་ཐམས་ཅད་རྩད་ནས་དག་པའི་དགོས་པ་ཡོད་དོ། །དེ་ནས་ཐོ་རང་གྱི་ཐུན་ལ་དབྱངས་གསལ་རྟེན་སྙིང་སྦྲེལ་བ་ལན་བདུན་གྱིས་ངག་བྱིན་རླབས་བྱ། བློ་ལྡོག་རྣམ་བཞི་དང་སྐྱབས་སེམས་གཉིས་ལན་བདུན་རེ་བསྐྱལ། ཡིག་བརྒྱ་བརྒྱ་རྩའམ་ཉེར་གཅིག་བརྗོད། ས་ཏྭ་དང་སིདྡྷི་གཉིས་བརྒྱ་རྩ་རེ་བརྗོད་ནས་དབང་བཞི་བླང་བ་བསྔོ་སྨོན་སོགས་རྫོགས་མཐར་ཆོ་ག་གཞུང་བཞིན་བྱ། བསྙེན་པའི་སྐབས་སིདྡྷི་ཁོ་ན་དང་། ཚེས་བཅུ་ཉེར་ལྔ་མ་གཏོགས་ཚོགས་མཆོད་ཀྱང་མི་དགོས། དེ་ཡང་སྒྲུབ་པ་པོའ་ིརྒྱུད་ལྷ་སྔགས་ཡེ་ཤེས་ཀྱི་བྱིན་གྱིས་བརླབས་ནས་དངོས་གྲུབ་ཀྱི་སྣོད་ཁྱད་པར་ཅན་དུ་སྒྲུབ་པར་བྱེད་པའི་སླད་དུ་བསྙེན་པའི་རྣལ་འབྱོར་བཞག་པ་སྟེ། བསྙེན་པའི་ཐད་དུ། རིག་འཛིན་རྒྱ་མཚོས་བྱིན་གྱིས་རློབསཿ ཅེས་པ་ཙམ་ལས་མ་གསུངས་ཤིང་། བསྙེན་ཡིག་ལས་ཀྱང་། དེ་ལྟར་ཚོགས་གཉིས་ལ་བརྟེན་ནས་ལྷ་ཉེ་བར་བསྙེན་ཞིང་། བདག་བྱིན་གྱིས་རློབས་པ་ནི་རང་དོན་སྔོན་དུ་བྱ་བ་ཡིན། ཞེས་སོགས་གསུངས་པའི་ཕྱིར་རོ། །དེ་ལྟར་བསྙེན་པ་ཨོ་རྒྱན་རིན་པོ་ཆེ་ལ་བྱེད་དགོས་པ་ཡང་། ཇི་སྐད་དུ། བོད་ཀྱི་བླ་མའི་སྐལ་བ་གུ་རུ་ཉིདཿ ཅེས་གསུངས་པས་ན་བྱིན་རླབས་ཀྱི་རྩ་བ་བླ་མ་ཡིན་པའི་ཕྱིར་དེ་ལ་བསྙེན་པ་བྱས་ན་བྱིན་རླབས་ཤིན་ཏུ་ཉེ་ཞིང་མྱུར་བ་ཡིན་པའི་ཕྱིར་རོ། །རིག་འཛིན་རྣམ་བཞིར་དངོས་སུ་སྦྱོར་ནུས་ཀྱི་རྟོགས་པ་ཁྱད་པར་ཅན་གྱི་དངོས་གྲུབ་དངོས་སུ་འཐོབ་བྱེད་ནི་སྒྲུབ་པ་ཡིན་ཏེ། དེ་ཡི་ཐད་དུ། འབུམ་ཕྲག་བཅུ་གཉིས་དངོས་གྲུབ་ཐོབཿ ཅེས་གསུངས་པའི་ཕྱིར་རོ། །དེ་ནི་རིག་འཛིན་སྤྱི་ཛབ་སྟེ་སྒྲུབ་པ་དེ་ལ་བྱས་ན་ཚན་ཆེ་སྟེ་རྡོ་རྗེ་འཆང་གི་གྲལ་བརྙེས་སོ་ཅོག་གི་རིག་འཛིན་རྩལ་འཆང་ཐམས་ཅད་དངོས་གྲུབ་སྩོལ་བ་ལ་དགོངས་པ་གཅིག་ཏུ་དྲིལ་ནས་བསྒྲུབ་པས་ཏེ། དེ་ལྟར་མོས་པ་ཡང་གལ་ཆེ་སྟེ། ཆོས་རྣམས་ཐམས་ཅད་རྐྱེན་ཡིན་ཏེ། །འདུན་པའི་རྩེ་ལ་རབ་ཏུ་གནས། །ཞེས་གསུངས་པ་ལྟར་གང་ཟག་གི་བློ་ངོ་ལ་ལྟོས་པའི་ཁྱད་པར་ཤིན་ཏུ་ཆེ་བའི་ཕྱིར་རོ། །དེ་ཡང་བཀའ་བརྒྱད་བདེར་འདུས་དང་གསང་རྫོགས་གཉིས་སུ་རིག་འཛིན་སློབ་དཔོན་ཡོངས་རྫོགས་ཀྱི་སྙིང་པོ་འབྲུ་གསུམ་དང་མ་ཧཱ་གུ་རུའི་སྔགས་འདི་ཉིད་ལ་བཤད་ཅིང་། རིག་འཛིན་ཡོངས་འདུས་དང་། གྲོལ་ཐིག་ལམ་རྒྱས་པར་ཡང་སྔགས་འདི་འབྱུང་བར་གསུང་། ཐུན་བར་རྣམས་སུ་ལེའུ་བདུན་མ་དང་དཀར་དམར་གྱི་གསུར་སོགས་ཆོས་སྤྱོད་རིགས་བླ་མའི་ཞལ་རྒྱུན་ལྟར་བྱ། ཚོགས་བྱ་བ་ལ་དང་བོ། ཡེ་ཤེས་ཀྱི་འཁོར་ལོ་ཐམས་ཅད་མཁའ་ཁྱབ་ཏུ་སད་པར་གྱུར་ཅེས་བརྗོད་པས་མོད་ལ། མདུན་གྱི་ནམ་མཁར་ངོ་བོ་བླ་མ་རིག་འཛིན་འདུས་པའི་དཀྱིལ་འཁོར་གྱི་ལྷ་ཚོགས་ཡིན་པ་ལ། རྣམ་པ་རྒྱལ་བ་ཞི་ཁྲོ་རབ་འབྱམས་ཀྱི་ལྷ་ཚོགས་རྟེན་དང་བརྟེན་པར་བཅས་ཐམས་ཅད་སྐད་ཅིག་གིས་འོག་ཕྱོགས་ཞི་བའི་དཀྱིལ་འཁོར་ན་ཞི་བ་བཞི་བཅུ་རྩ་གཉིས། སྟེང་ཕྱོགས་ཁྲོ་བོའ་ིདཀྱིལ་འཁོར་ན་ཁྲག་འཐུང་ལྔ་བཅུ་རྩ་བརྒྱད། དེ་ཡི་སྟེང་འོག་ཕྱོགས་མཚམས་རྣམས་སུ་བླ་མ་ཡི་དམ་མཁའ་འགྲོ་ཆོས་སྐྱོང་སངས་རྒྱས་བྱང་སེམས་སོགས་སྐྱབས་གྱུར་མ་ལུས་པས་བསྐོར་ནས་བཞུགས་པའི་དྲུང་དུ་བདག་གིས་སྐུ་ཡི་དམ་ཚིག་ཉམས་ཆག་བཤགས་པའི་ཆེད་དུ་རང་ཐ་མལ་གྱི་ཚུལ་དུ་ལུས་ཞིང་གི་རྡུལ་སྙེད་ཀྱི་གྲངས་དང་མཉམ་པར་སྤྲུལ་ནས་དད་པ་བརྟན་པོའ་ིངང་བརྐྱང་ཕྱག་བཙལ་བར་དམིགས་བཞིན། ཨེ་མ་ཧོ༔ ཕྱོགས་བཅུ་དུས་བཞི་སོགས་ཀྱིས་སྐབས་ཚོགས་ཞིང་གི་ལྷ་རྣམས་ཀྱི་དཔྲལ་བ་ལས་འོད་ཟེར་དཀར་བོ་འཕྲོས་ཏེ། ཇི་སྐད་དུ། དེས་ནི་ལུས་ཀྱི་སྒྲིབ་པ་དག༔ སྐུ་ཡི་དམ་ཚིག་ཉམས་པ་བསྐང་༔ ཞེས་གསུངས་པ་ལྟར་སྲོག་གཅོད་མ་བྱིན་ལེན་མི་ཚངས་སྤྱོད་སོགས་ལུས་ཀྱི་སྒོ་ནས་བསགས་པའི་སྡིག་སྒྲིབ་རྣམས་དང་། གསང་སྔགས་རྡོ་རྗེ་ཐེག་པའི་ལམ་ཀྱི་སྐུའི་དམ་ཚིག་ཉམས་པ་ཐམས་ཅད་དག་པར་བསམ། ཚོགས་ཞིང་གི་ལྷ་སྤྱི་དང་། ཁྱད་པར་དུ་གཞུང་ལས། རྡོ་རྗེ་སེམས་དཔའ་སྤྱི་བོར་བསྒོམ༔ ན་རག་དོང་སྤྲུག་སྙིང་བོ་བཟླ༔ ཞེས་གསུང་བཞིན་ཡིག་བརྒྱ་འདོན་སྐབས་སུ་མགྲིན་པ་ལས་འོད་ཟེར་དམར་བོ་འཕྲོས་ཏེ་རྫུན་ཕྲ་མ་ཚིག་རྩུབ་ངག་འཁྱལ་བཞིའི་སྒྲིབ་པ་རྣམས་དང་། བརྒྱ་དང་རྩ་བརྒྱད་བརྗོད་གྱུར་ན༔ མཚམས་མེད་ལྔ་ཡི་སྡིག་པ་བྱང་༔ ཞེས་དང་། འདི་དག་དག་པར་དུས་གཅིག་ལ༔ བརྒྱ་དང་རྩ་བརྒྱད་བརྗོད་གྱུར་ན༔ དུས་གསུམ་རྒྱལ་བའི་སྲས་སུ་སྐྱེ༔ ཞེས་དང་། ཡི་གེ་བརྒྱ་བ་དུས་གཅིག་ལ༔ བརྒྱ་རྩ་བརྒྱད་དུ་བཟླས་པ་ཡིས༔ ངག་གི་སྒྲིབ་པ་རྣམས་སྦྱོང་ཞིང་༔ གསུང་གི་དམ་ཚིག་ཉམས་པ་བསྐང་༔ ཞེས་སོགས་གསུངས་པ་ལྟར་མཚམས་མེད་ལྔ་དང་གསུང་གི་དམ་ཚིག་ཉམས་པ་རྣམས་དག་པར་བསམ། ཀློང་བཤགས་སྐབས་ཐུགས་ཀ་ནས་འོད་ཟེར་མཐིང་ག་འཕྲོས། མེ་ལོང་བག་རྡུལ་ཕྱིས་པ་བཞིན༔ ཡིད་སྒྲིབ་དག་ཅིང་ཐུགས་དམ་བསྐང་༔ ཞེས་པ་ལྟར། བརྣབ་སེམས་གནོད་སེམས་ལོག་ལྟ་གསུམ་དང་། ཐུགས་ཀྱི་དམ་ཚིག་ཉམས་པ་ཐམས་ཅད་བསྐང་ཞིང་དག་པར་བསམ། སྤྱི་བཤགས་སྐབས་དྲང་བོར་འདུག་ལ་ཡང་དག་ལྟོས། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཞེས་པ་ལྟར་གནས་ལུགས་ཀྱི་ངང་ལ་མཉམ་པར་བཞག་པས་སྒོ་གསུམ་ཆ་མཉམ་གྱི་སྒྲིབ་པ་ཐམས་ཅད་དག་པར་བསམ་པ་སྟེ། ལུས་ཀྱི་ཕྱག ངག་གི་ཡིག་བརྒྱ། ཡིད་ཀྱི་ཀློང་བཤགས། སྒོ་གསུམ་ཆ་མཉམ་གྱི་དམ་ཚིག་གསོ་ཕྱིར་རྫོགས་པ་ཆེན་པོའ་ིལྟ་བ་བཞི་ལ་བཤགས་པ་རུ་བཞི་དང་། དེ་ལ་ཁ་བསྐང་སྨན་རཀ་གཏོར་མ་མར་མེའི་བསྐང་བ་སྟེ་དེ་རྣམས་ལ་རུ་ཟུང་བཞིའི་བཤགས་པ་ཞེས་བྱ། དེ་ཡང་རུ་ཟུང་གི་བཤགས་པ་གཉིས་ལ་གྲངས་བཞི་བཞིར་མཛད་པ་ནི་སྒོ་གསུམ་བྱ་བ་བཞིའི་ཉམས་ཆག་སྐོང་ཆེད་ཡིན་པར་ཨོ་རྒྱན་གླིང་པའི་བཀའ་འདུས་ལས་གསུངས་ཤིང་། བཞི་ཚན་གཉིས་ནི་ཉམས་ཆག་བཤགས་པ་དང་། དམ་ཚིག་གསོ་བའི་ཆེད་དུ་མཛད་པར་རྡོ་གྲུབ་གསུང་། ཉམས་སུ་ལེན་ལུགས་ནི་ལྟ་བའི་ཀློང་བཤགས་ཡན་ཆད་ལ་རང་ལུས་ཐ་མལ་དུ་གནས། དེ་ནས་རང་ཡི་དམ་གྱི་ལྷར་གསལ་བའི་ཐུགས་ཀ་ནས་འདོད་ཡོན་གྱི་ལྷ་མོ་གྲངས་མེད་པ་སྤྲོས་ཏེ་དེ་དག་གིས་བཤགས་ཡུལ་རྒྱལ་བ་ཞི་ཁྲོ་རབ་འབྱམས་ཀྱི་ལྷ་ཚོགས་རྣམས་ལ་དང་བོ་སྨན། གཉིས་པ་རཀྟ། གསུམ་པ་གཏོར་མ། བཞི་བ་མར་མེ་རྣམས་རིམ་པར་ཕུལ་བས་དགྱེས་ཤིང་བརྩེ་བར་བཞེས་ཏེ་རང་གི་དམ་ཚིག་ཉམས་ཆག་རྣམས་ཀྱང་ཡོངས་སུ་དག་པར་བསམ། དེ་ནས་མར་མེའི་སྨོན་ལམ་དང་ནམ་མཁའི་མཐར་ཐུག་སོགས་ཀྱི་མཐར། ཚོགས་ཞིང་རྣམས་མཐའ་ནས་རིམ་བཞིན་འོད་དུ་ཞུ་ནས་ཐིག་ལེ་དམར་བོ་ཞིག་ཏུ་གྱུར་པ་རང་གི་སྨིན་མཚམས་སུ་ཐིམ། དེའི་རྐྱེན་ལས་རང་ཉིད་ཡི་དམ་དུ་གསལ་བ་ལ་སྔར་ལས་ཀྱང་གཟི་བརྗིད་ཆེར་རྒྱས་ནས་ཚོགས་རྫས་རྣམས་འདོད་སྣམ་གྱི་ཕྱི་རོལ་རྡོ་རྗེའི་ས་གཞིའི་སྟེང་དུ་ཐབས་བདེ་བ་ཆེན་པོའ་ིངོ་བོ་བཟའ་བ་རྣམས་གཡས་དང་། ཤེས་རབ་སྟོངས་པ་ཉིད་ཀྱི་ངོ་བོ་བཏུང་བ་རྣམས་གཡོན་དུ་བཤམས་ཡོད་པ་ལ་ཆུ་ནང་ཆང་གསུམ་བྲན། དེ་ནས་རང་ཉིད་གུ་རུ་རིན་པོ་ཆེར་གསལ་བའི་ཐུགས་ཀ་ནས་རཾ་ཡཾ་ཁཾ་གསུམ་འཕྲོས་པ་ཚོགས་རྫས་རྣམས་ལ་ཕོག རཾ་ལས་མེས་མ་དག་པ་ཐམས་ཅད་བསྲེགས། ཁཾ་ལས་ཆུ་བྱུང་བས་སྦྱངས། ཡཾ་ལས་རླུང་བྱུང་བས་གཏོར་ཏེ་སྟོངས་པའི་ངང་ལས། ཚོགས་སྣོད་ཀ་པ་ལ་དུམ་བུ་གཅིག་པ་སྟོང་གསུམ་དང་མཉམ་པའི་ནང་དུ་ཚོགས་རྫས་ཤ་ལྔ་བདུད་རྩི་ལྔའི་རང་བཞིན་རི་རབ་དང་རྒྱ་མཚོ་མཉམ་པས་ཁེངས། དེའི་སྟེང་དུ་ཨོཾ་དཀར་ཨཱཿདམར་ཧཱུཾ་མཐིང་གསུམ་ལས་འོད་ཟེར་འཕྲོས། ཕྱོགས་བཅུའི་སངས་རྒྱས་ཐམས་ཅད་ཀྱིས་ཡེ་ཤེས་ཀྱི་བདུད་རྩི་ཐམས་ཅད་སྤྱན་དྲངས། ཚོགས་རྫས་ལ་ཐིམ་པས་ཡེ་ཤེས་ཀྱི་བདུད་རྩི་འདོད་དགུ་ཐམས་ཅད་འབྱུང་བའི་རང་བཞིན་དུ་གྱུར་བར་བསམ། དེ་ནས་འོག་མིན་དང་གནས་ཡུལ་དུར་ཁྲོད་སོགས་ནས་བླ་མ་རིག་འཛིན་འདུས་པའི་ལྷ་ཚོགས་རྣམས་མདུན་གྱི་ནམ་མཁར་སྤྱན་དྲངས། ཚོགས་ཕུད་སྐབས་རང་གི་ཐུགས་ཀ་ནས་མཆོད་པའི་ལྷ་མོ་དཔག་ཏུ་མེད་པ་སྤྲོས་ནས་དེ་དག་གིས་ཕྱག་ན་ཕྱི་ཉེར་སྤྱོད་ལྔ་དང་བཀྲ་རྟགས་རྫས་བརྒྱད་སྣ་བདུན་སོགས་གྲངས་མེད་པ་བསྣམས་ནས་ཐོག་མར་ལྷ་ལ་འདྲེས་གདགས་པའི་ཕྱིར་དུ་ཕུལ་བ་དེ་ཉིད་དགྱེས་བཞིན་བཞེས་ནས་རྣལ་འབྱོར་བ་ལ་མཆོག་ཐུན་མོང་གི་དངོས་གྲུབ་མ་ལུས་པ་བསྩལ་བར་དམིགས། མཐར་མཆོད་ལྷ་རྣམས་རང་ལ་བསྡུ། ཕུད་གཉིས་པ་བར་བཤགས་སྐབས་གོང་ལྟར་མཆོད་ལྷ་སྤྲོས་ཏེ་ཕྱག་ན་ངོ་བོ་ཤ་ལྔ་བདུད་རྩི་ལྔའི་རང་བཞིན་ཡིན་པ་ལ། རྣམ་པ་ཟག་མེད་ཀྱི་བདུད་རྩིའི་བཀང་བའི་ཀ་པ་ལ་དཔག་ཏུ་མེད་པ་ཐོགས་ཏེ་ལྷ་ཚོགས་རྣམས་ལ་འཁོན་སོང་བ་སྦྱང་ཕྱིར་ཕུལ་བས་ཐོག་མེད་ནས་བསགས་པའི་སྡིག་ལྟུང་སྤྱི་དང་། གསང་སྔགས་ཀྱི་དམ་ཚིག་ཉམས་པ་འགལ་བ་རལ་བ་ལ་སོགས་པའི་ཉེས་པ་ཐམས་ཅད་དག་ནས་སྔ་མར་ལྷ་ཐམས་ཅད་ཐུགས་ཁྲོས་ཤིང་མི་དགྱེས་པའི་ཉམས་ཀྱིས་ཞལ་ནག་རོག་གེར་བཞུགས་པ་ལ། ཕྱི་ནས་དགྱེས་པའི་འཛུམ་ཞལ་ཟླ་ལྟར་དཀར་བ་བསྟན་ནས་བུ་ད་ཁྱོད་ཀྱིས་བཅས་རང་གི་ཁ་ན་མ་ཐོ་བའི་ཉེས་པ་ཐམས་ཅད་དག་བྱུང་ཞེས་གསུང་ཚངས་པའི་དབྱངས་ཀྱིས་དབུགས་དབྱུང་བར་བསམ། མཆོད་ལྷ་སླར་རང་ལ་བསྡུ། ཚོགས་བསྒྲལ་སྐབས་སྐད་ཅིག་གིས་མདུན་དུ་ཨེ་ཁང་གྲུ་གསུམ་མཐིང་ནག་ཁ་རུབ་ཅིང་གཏིང་ཟབ་པ། འཇིགས་ཤིང་སྐྱི་གཡའ་བའི་ནང་དུ་བདག་འཛིན་མ་རིག་པའི་ངོ་བོ་བསྟན་དང་འགྲོ་བའི་སྤྱི་དགྲ། རྣལ་འབྱོར་བའི་སྒོས་དགྲར་གྱུར་པ་དེ་ཉིད་ཀྱི་ལུས་རིད་ཅིང་ཁ་ངུ་བ། མིག་ཤི་མིག་ཁྲག་གི་མཆི་མ་འཛག་པ་ལག་གཉིས་མྱ་ངན་གྱི་ཕྱག་རྒྱ་ཅན་དཔྲལ་བ་རང་ལ་བསྟན་པ་ཞིག་བསྐྱེད་ལ་འགུགས་གཞུག་བྱ། རང་ཉིད་སྐད་ཅིག་གིས་མེ་དཔུང་རབ་ཏུ་འབར་བའི་ཀློང་ན་དཔལ་རྟ་མགྲིན་ཁྲོ་བོའ་ིརྒྱལ་བོ་སྐུ་ཆེ་ཞིང་ལྕགས་བསྲེག་གི་རི་ལ་མེ་སྟག་གི་ཚ་ཚ་འཕྲོ་བ་ལྟར་མདོག་དམར་ཞིང་འཇིགས་སུ་རུང་བ། ཞལ་གདངས་ཤིང་ལྗགས་འདྲིལ་བ། མཆེ་བ་གཙིག་ཅིང་ཞལ་ནས་ཧཱུཾ་ཕཊཿ ཀྱི་སྒྲས་གནམ་ས་སྒུལ་བ་ཞིག་ཏུ་གསལ་བའི་ཐུགས་ཀ་ནས་ཕྱག་རྒྱའི་ལྷ་མོ་བཞི་འཕྲོས་ནས་དགྲ་བགེགས་སྡིག་ཅན་དེ་ཉིད་སྲིད་པ་གསུམ་གྱི་ཁམས་གར་གནས་ཀྱང་སྡོད་པའི་རང་དབང་མེད་པར་ལྕགས་ཀྱུས་སྙིང་ནས་བཟུང་། ཞགས་པས་སྐེ་ནས་བཅིངས། ལྕགས་སྒྲོག་གིས་ཡན་ལག་བསྡམས། དྲིལ་བུས་སེམས་མྱོས་པར་བྱས་ཏེ་བྱ་སྤུ་རླུང་གིས་དེད་པ་ལྟར་སྐད་ཅིག་ལ་མདུན་དུ་བཀུག་ནས་ཉ་བོ་ལ་བསྟིམ། ཚེ་ཁྲུས་གནས་གསུམ་གྱི་དམིགས་གནད་དང་ལྡན་པའི་སྒོ་ནས་དགྲ་དགེགས་དེའི་གཞི་དུས་ཀྱི་ལས་ཉོན་སྡིག་སྒྲིབ་སྡུག་བསྔལ་ཐམས་ཅད་རྒྱུན་བཅད། འབྲས་དུས་ཀྱི་སྐུ་གསུམ་མངོན་དུ་བྱས་ནས་རྣམ་ཤེས་འོག་མིན་གྱི་ཞིང་ནས་མགོན་པོ་འོད་དཔག་ཏུ་མེད་པའི་ཐུགས་ཀར་སྤར་བའམ། ཡང་ན་རང་གི་སྤྱི་བོའ་ིཀུན་བཟང་ཡབ་ཡུམ་གྱི་ཐུགས་ཀར་བསྟིམ་པར་བྱ། རྣམ་ཤེས་སླར་ཕུང་བོ་དེར་མི་འཇུག་པའི་ཕྱིར་དུ་ཤེས་རབ་ཀྱི་མཚོན་ཆ་རྣོན་པོས་དུམ་བུར་གཏུབ་ཅིང་ཡེ་ཤེས་ཀྱི་བདུད་རྩིར་བྱིན་གྱིས་བརླབས་ནས་ཚོགས་ཞིང་གི་ལྷ་ཚོགས་རྣམས་ལ་ཕུལ་བས་དགྱེས་པ་ཆེན་པོས་བཞེས་པར་བསམ། ན་མོ་བདེ་གཤེགས་སྙིང་པོའ་ིསོགས་བསྐང་བའི་སྐབས་ཚོགས་ཞིང་གི་ལྷ་ཚོགས་རྣམས་སྤྱན་དྲངས་ནས་སྔར་གྱི་ཚོགས་ཞིང་དང་གཉིས་སུ་མེད་པར་བཞུགས་པའམ། ཡང་ན་སྔར་གྱི་ཚོགས་ཞིང་གི་ལྷ་ཚོགས་རྣམས་གསལ་ཡང་འདེབས་རེ་བྱེད་པ་གཉིས་གང་བདེར་བྱ། བསྐང་རྫས་བྱིན་རླབས་སྐབས་ཀ་པ་ལ་ཕྱི་དཀར་ལ་ནང་དམར་བ་སྟོང་གསུམ་དང་མཉམ་པའི་ནང་དུ་བཅུད་ཡེ་ཤེས་ཀྱི་བདུད་རྩིའི་རང་བཞིན་ནམ་མཁའ་མཛོད་ཀྱི་སྔགས་རྒྱས་མང་བོར་སྤེལ་ཏེ་ལྷ་ཚོགས་རྣམས་ལ་ཕུལ་བས། དེ་དག་གིས་ལྗགས་རྡོ་རྗེ་རིན་ཆེན་པདྨ་རྒྱ་གྲམ་འཁོར་ལོའ་ིརྣམ་པ་སྦུ་གུ་ཅན་དང་འོད་ཟེར་གྱི་རྣམ་པ་ཅན་སྣ་ཚོགས་པ་མཆོད་རྫས་རྣམས་ལ་ཟུག་ནས་བཅུད་དྲངས་ཏེ་གསོལ་བས་ཐུགས་མཉེས་ཤིང་ཟག་མེད་ཀྱི་བདེ་བའི་རོས་ཚིམ། བདག་གི་དམ་ཚིག་ཉམས་ཆག་ཐམས་ཅད་སོར་ཆུད། མཆོག་ཐུན་མོང་གི་དངོས་གྲུབ་མ་ལུས་པ་བསྩལ་བར་དམིགས་པ་སྤྱིའི་བསྐང་བའི་སྐབས་དང་། ཁྱད་པར་གྱི་བསྐང་བའི་སྐབས་བླ་མ་རིག་འཛིན་འདུས་པའི་དཀྱིལ་འཁོར་གྱི་ལྷ་ཚོགས་རྣམས་ལ་དམིགས་པའོ། །ཚོགས་ལ་རོལ་བ་ནི། འདོད་ཡོན་གྱི་ལྷ་མོ་རྣམས་ཀྱིས་བདག་དམ་ཚིག་སེམས་དཔའ་ལ་མཆོད་པའི་ཚུལ་དུ་ཕུལ་བ་དེ་ཉིད་གསོལ་བས་ཟག་མེད་ཀྱི་བདེ་བ་ཁྱད་པར་ཅན་སྐྱེས་ཤིང་བཀྲག་མདངས་དང་གཟི་བརྗིད་ཆེར་རྒྱས་པའི་རྐྱེན་གྱིས་ཉི་འོད་ཕོག་པའི་མར་གསར་བཞིན་ཚོགས་ཞིང་གི་ལྷ་ཚོགས་རྣམས་འོད་དུ་ཞི་ནས་དམ་ཚིག་པར་ཐིམ་པས་མཆོག་ཐུན་གྱི་དངོས་གྲུབ་ཐམས་ཅད་ཐོབ་པར་དམིགས། མདུན་བསྐྱེད་ཡོད་ཚེ་བརྟན་བཞུགས་ལས་འོད་ཞུ་མི་དགོས། ལྷག་མ་ནི། ལྷག་སྣོད་ཀ་པ་ལ་སྟོང་གསུམ་དང་མཉམ་པའི་ནང་དུ་ལྷག་གཏོར་དེ་ཉིད་ངོ་བོ་ཡེ་ཤེས་ཀྱི་བདུད་རྩི་ཡིན་པ་ལ། རྣམ་པ་ཤ་ཆེན་གྱི་རི་བོ་རཀྟའི་རྒྱ་མཚོའི་རང་བཞིན་དུ་དམིགས་ཏེ་ཨ་ཀ་རོ་སོགས་ཀྱིས་བརླབས་ལ། དཀྱིལ་འཁོར་ཆེན་པོའ་ིམུ་རན་ལ་འཁོད་པའི་ལྷག་མགྲོན་རྣམས་ལ་གཏོར་མ་ཕུལ་བས་དགྱེས་ཤིང་ཚིམ་ནས་རྣལ་འབྱོར་བས་བྲན་དང་ཕོ་ཉའི་ཚུལ་གྱིས་ཅི་བཅོལ་བའི་ལས་ཐམས་ཅད་ཐོགས་མེད་དུ་སྒྲུབ་པར་བསམ། ལྷག་གཏོར་བྱང་ཤར་རམ་ལྷོ་ནུབ་གང་བདེར་སྒྲུབ་པ་མ་ཐོན་བར་བཙོན་འཛིན་བྱ། ཆད་ཐོ་ལ་འགུགས་གཞུག་དང་དམིགས་པ་སོགས་ཚོགས་བསྒྲལ་སྐབས་ལྟར་བྱས་ལ། བསྐུལ་བའི་སྐབས་ཕྱི་སྣང་བ་སྣོད་ཀྱི་འཇིག་རྟེན་དབྱིབས་གྲུ་གསུམ་ཁ་དོག་མཐིང་ནག་མེ་རི་དང་མེ་དཔུང་གི་ཚོགས་རབ་ཏུ་འབར་བའི་ནང་དུ། བཅུད་ཁྲོ་བོ་ཁྲོ་མོའ་ིཚོགས་དཔག་ཏུ་མེད་པའི་སྐུ་ལས་འོད་ཟེར་ནག་པོ་དྲག་ལ་རྩུབ་པ་མང་དུ་འཕྲོས་པ་ལས་མཚོན་ཆའི་ཆར་ཆེན་པོ་བབས་ནས་དགྲ་བགེགས་སྡེ་དཔུང་སྡོང་ཟླ་རྒྱབ་རྟེན་དང་བཅས་པ་རྣམས་རམ་ནག་སེར་བས་བརྡུང་བ་ལྟར་བཅོམ་པའི་ཤ་རུས་ཁྲག་གསུམ་ཨོཾ་ཨཱཿཧཱུཾ་གིས་ཟག་པ་མེད་པའི་ཡེ་ཤེས་ཀྱི་བདུད་རྩིར་བསྒྱུར་བ་ཉིད། གཏོར་མ་རྒྱན་ལྡན་གྱི་རྣམ་པར་སྣང་བ་དེ་ཉིད་སྔོན་ཚེ་སློབ་དཔོན་པདྨ་འབྱུང་གནས་ཀྱི་དམ་ལ་བཞག་པའི་ཆོས་སྐྱོང་སྤྱི་དང་། ཁྱད་པར་ཀློང་ཆེན་སྙིང་ཐིག་གི་ཟབ་གཏེར་གྱི་བསྲུང་མ་མ་གཟའ་དམ་གསུམ། གནོད་སྤྱིན་ཙུའུ་དམར་བོ་སོགས་བཀའ་བསྲུང་ཆོས་སྐྱོང་རྣམས་ལ་ཕུལ་བས་ཐུགས་དགྱེས་པར་མཛོད་ལ་སྔོན་གྱི་ཐ་ཚིག་བཞིན་ཞི་རྒྱས་དབང་དྲག་སོགས་ཅི་བཅོལ་བའི་ལས་རྣམས་སྒྲུབ་པར་མཛོད་ཅིག་ཅེས་ཐ་ཚིག་བསྒྲགས། བསྟན་མ་ནི་གོང་གི་ཆད་ཐོའི་གཏོར་སྣོད་ཀྱི་བཤལ་ཆུ་དང་བསྟན་གཏོར་གཉིས་ཨོཾ་ཨཱཿཧཱུཾ་གིས་སྦྱང་སྤེལ་བསྒྱུར་གསུམ་བྱས་ཏེ་བོད་སྐྱོང་བསྟན་མའི་ཚོགས་ལ་ཕུལ་བས་མཐའ་དམག་དང་རྒྱ་འདྲེ་འགོང་བོ། ནད་དང་དལ་ཡམས་མུ་སྟེགས་པ་སོགས་ཀྱིས་རྒྱུ་ལམ་ཆོད་ལ། རྒྱལ་བསྟན་དར་ཞིང་རྒྱས་པའི་ཕྲིན་ལས་མཛོད་ཅིག་ཅེས་ཕྲིན་བཅོལ་བྱ། རྟ་བྲོ་བྱ་བ་ནི། སྔོན་བནྡེ་སྡོམ་ཉམས་དང་སྔགས་པ་དམ་ཉམས་དག་དང་དབང་ཆོས་ལྷན་དུ་ཞུས་ནས་གྲོགས་མཆེད་དུ་གྱུར་པ་ལ་ད་ལྟ་དེ་དག་འདྲེ་དང་རྒྱལ་འགོང་དུ་གྱུར་ནས་ཆོས་བྱེད་རྣམས་ལ་བགེགས་དང་བར་ཆད་བྱེད་པ་ཡིན་པས་བསྲུང་འཁོར་གྱིས་འགོག་མི་ནུས་ལ་མནན་ན་ནོན་པ་ཡིན་པས། རང་ཉིད་གུ་རུ་སྣང་སྲིད་ཟིལ་གནོན་དུ་གསལ་བའི་ཕྱག་གཡས་གསེར་གྱི་རྡོ་རྗེའི་རྩེ་མོ་ལས་དཔལ་རྟ་མགྲིན་ཁྲོ་བོའ་ིཚོགས་གྲངས་མེད་པ་འཕྲོས། དེ་དང་ལྷན་དུ་ཆོས་སྐྱོང་དྲེགས་པའི་ཚོགས་ཀྱི་དཔུང་དང་བཅས་པས་དམ་སྲི་དེ་ཉིད་བྲོས་ཤིང་གབ་པའི་རང་དབང་མེད་པར་འགུགས་འཆིང་སྡོམ་མྱོས་བྱས་ཏེ་གཏོར་གཞོང་རིའི་རྒྱལ་བོ་རི་རབ་མགོ་ཐུར་བསྟན་དུ་གསལ་བའི་འོག་ཏུ་མནན་ཞིང་ལྷ་ཚོགས་དེ་དག་གིས་ཕྱག་གི་མཐེའུ་ཆུང་རྣམས་ལུག་གུ་རྒྱུད་དུ་སྦྲེལ་ནས་སྟེང་དུ་རྡོ་རྗེའི་བྲོ་འཁྲབ་པས་རྒྱུད་ཀྱི་བདག་འཛིན་བདག་མེད་ཀྱི་ཀློང་དུ་མ་ཞིག་གི་བར་དུ་བསྐལ་བ་སྟོངས་ཀྱང་ཐར་མི་ནུས་པར་མནན་པར་བསམ། དེ་ནས་རྣལ་འབྱོར་བ་བདག་ཅག་དཔོན་སློབ་ཡོན་མཆོད་འཁོར་དང་བཅས་པའི་ཚེ་དང་བསོད་ནམས་དཔལ་དང་འབྱོར་བ་ཐམས་ཅད་ཡར་ངོ་ཟླ་བ་ལྟར་རྒྱས་པར་དམིགས་ནས་གཏོར་གཞོང་དེ་ཉིད་འབྲུ་དཀར་གྱིས་བཀང་བར་བྱ། དངོས་གྲུབ་བླང་བ་ནི། བསྒྲུབ་སྔགས་མ་ཧཱ་གུ་རུ་འབུམ་ཕྲག་བཅུ་གསུམ་སོགས་ཀྱི་མཐར། སང་སྔ་མོ་དངོས་གྲུབ་ལེན་པ་ལ་འཇུག་པའི་དགོང་ཐུན་མཇུག་ཏུ་མཆོད་གཏོར་གསར་བ་མང་དུ་བཤམས། རྙིང་བ་རྣམས་ཁ་གསོ། དངོས་གྲུབ་ཀྱི་རྫས་ཀྱང་བཟང་ལ་མང་བ་ཉེ་སྡོག་བྱ། བསྟོད་པའི་མཇུག་ཏུ་ཛབ་ཁ་དབྱེ། བསྙེན་སྒྲུབ་ཀྱི་སྔགས་གཉིས་འདོན་སྐབས་སུ་དངོས་གྲུབ་བསྡུ་བའི་དམིགས་པ་བྱ། རྗེས་ཆོག་གི་བསྟོད་པའི་མཇུག་ཏུ་བཛྲ་ས་མ་ཡ་ཛ་བཏགས་པའི་ཡིག་གེ་བརྒྱ་བ་བརྒྱ་དང་བརྒྱད་ཀྱི་མཐར། ཧོ་རིག་འཛིན་སོགས་དང་། ཨོཾ་ཨཱཿཧཱུཾ་བཛྲ་གུ་རུ་པདྨ་ཐོད་ཕྲེང་སོགས་སྔགས་ཉེར་གཅིག་གིས་ཉན་གསན་དབབ། འདི་ལ་རྩ་སྔགས་དང་སྦྲེལ་དགོས་ཚུལ་ཞིག་ཀྱང་སྣང་། རྗེས་ཆོག་བྱ། ཕྱི་ཉིན་སྔ་མོ་ཆོ་ག་སྔར་ནུབ་ལྟར་ཛབ་ཁ་དབྱེ་ཞིང་མཆོད་བསྟོད་ཚོགས་ཀྱི་བསྐང་བ་ཡན་ཆད་བཏང་རྗེས། བརྗོད་མེད་དོན་གྱི་བཤགས་པ་ཡེ་ཤེས་སྐུ་མཆོག་གི་མཇུག་ཏུ་གོང་ལྟར་བཛྲ་ས་མ་ཡ་ཛ་བཏགས་པའི་ཡིག་བརྒྱ་བརྒྱ་རྩའམ་ཉེར་གཅིག་གང་རུང་གི་མཐར། བགེགས་བསྐྲད་ཅིང་བསྲུང་འཁོར་བསྒོམ། ཚིག་བདུན་སྤྱན་འདྲེན་ལན་གསུམ་དང་། བཞེངས་བསྐུལ་མ། ཧཱུཾ་ཧཱུཾ་ཧཱུཾ་རྗེ་བཙུན་ཆེན་པོ་སོགས་ཀྱི་མཐར། གཞུང་གི་བྱིན་འབེབས། ཧཱུཾཿ སྤྲོས་བྲལ་ཆོས་སྐུའི་སོགས་ཀྱིས་བྱིན་དབབས། དེ་ནས་དངོས་གྲུབ་བསྐུལ་ཆོག ཧོ་དཀྱིལ་འཁོར་ལྷ་ཚོགས་སོགས་དངོས་གྲུབ་བསྐུལ་སྔགས་ཉེར་གཅིག་གི་མཐར་རྫས་རྣམས་གནས་གསུམ་དུ་གཏུགས་ཅིང་ཞལ་དུ་རོལ། དྲང་བ་བླངས། དེ་ཉིན་གྱི་ཚོགས་ལྷག་དང་སྔར་གྱི་ལྷག་བཙོན་རྣམས་ལྷན་ཅིག་བྱིན་རླབས་བྱས་ཏེ་ཕྱི་རོལ་ཀྱི་གཙང་སར་གཤེགས། བསྐུལ་བ་མན་ཆད་དཀྱུས་ལྟར་བྱ། ནོངས་བཤགས་སྐབས། རང་གི་ཐུགས་ཀ་ནས་མར་མེ་གཅིག་ལས་གཉིས་མཆེད་ཀྱི་ཚུལ་དུ་ལྷ་སྐུ་ཕྱག་རྒྱ་གཅིག་པ་ཞིག་སྤྲོས་ཏེ་དཀྱིལ་འཁོར་གྱི་ཤར་སྒོ་ནས་ཐོན་ཏེ་ལྷ་ཚོགས་རྣམས་ལ་བདག་གིས་ཐུན་འདིའི་ནང་དུ་མཆོད་རྫས་མ་ཚངས་པ། སྒྲུབ་པ་གཡེལ་བ་། ཏིང་འཛིན་མ་གསལ་བ། བྱིང་བ་རྨུགས་པ་འཐིབས་པ་གཉིད་པ་སོགས་ཀྱི་ལས་བསགས་པ་ཐམས་ཅད་བཟོད་པར་གསོལ་ལོ། མཐོལ་ལོ། བཤགས་སོ། ཞེས་དག་པར་དམིགས་ལ་ཡིག་བརྒྱ་དང་སྦྲག་ཕྱག་ལན་གསུམ་བཙལ་མཐར་ཕྱག་རྒྱ་གཅིག་པ་རང་ལ་བསྡུ། བསྡུ་རིམ་ནི། ཕྱི་སྣོད་ཀྱི་ཞིང་དང་གཞལ་ཡས་ཁང་རྣམས་རིམ་པར་འོད་དུ་ཞུ་ནས་ནང་བཅུད་ཀྱི་ལྷ་ཚོགས་རྣམས་ལ་ཐིམ། ལྷ་ཚོགས་ཐམས་ཅད་ཀྱང་མཐའ་ནས་རིམ་བཞིན་འོད་དུ་ཞུ་སྟེ་གཙོ་བོ་ལ་ཐིམ། གཙོ་བོ་ཡང་དབུ་ནས་མར་དང་གདན་ནས་ཡར་འོད་དུ་ཞུ་སྟེ་སྙིང་ཀའི་ཡེ་ཤེས་སེམས་དཔའ་ལ་ཐིམ། ཡེ་ཤེས་སེམས་དཔའ་ཡང་ཐུགས་ཀའི་སྔགས་ཕྲེང་ལ་ཐིམ། སྔགས་ཕྲེང་འོད་དུ་ཞུ་ནས་ཐུགས་སྲོག་ཧཱུྃ་ལ་ཐིམ། ཧཱུྃ་ཡང་ཞབས་ཀྱུ་འ་ཆུང་ལ་ཐིམ། འ་ཆུང་ཧ་ཁོག་ལ་ཐིམ། ཧ་ཁོག་ཟླ་ཚེས་ལ་ཐིམ། ཟླ་ཚེས་ཐིག་ལེ་ལ་ཐིམ། ཐིག་ལེ་ན་ད་སུམ་འཁྱོགས་ལ་ཐིམ། ན་ད་ཡང་ནམ་མཁའ་ལ་འཇའ་ཡལ་བ་ལྟར་དམིགས་མེད་ནམ་མཁའི་རང་བཞིན་དུ་གྱུར་ཏེ། གནས་ལུགས་སྤྲོས་པ་དང་བྲལ་བའི་ངང་དུ་དལ་ཅིག་མཉམ་པར་བཞག་ནས་ཡེ་ཤེས་ཆོས་སྐུ་དེ་ངའོ་སྙམ་པའི་ང་རྒྱལ་འཛིན། དེ་ལས་སླར་ཆུ་ལས་ཉ་ལྡང་བ་ལྟར་བླ་མ་རིག་འཛིན་འདུས་པའི་དཀྱིལ་འཁོར་རྟེན་དང་བརྟེན་པར་བཅས་པ་སྐད་ཅིག་གིས་བཀྲ་ལམ་གྱིས་གསལ་བར་བྱེད་པ་ནི་རྗེས་ཐོབ་སྒྱུ་མས་ལྷ་སྐུར་ལྡང་ཞེས་པའི་དོན་ཏེ། སྐད་ཅིག་སྟོང་གསལ་ཆེན་པོའ་ིངང་ཉིད་ལས༔ རྡོ་རྗེ་སེམས་དཔའི་ང་རྒྱལ་མ་བྲལ་བར༔ ཞེས་གསུངས་པ་ལྟར། ཕྱི་ནང་སྣོད་བཅུད་སྣང་གྲགས་ཐམས་ཅད་བླ་མ་རིག་འཛིན་འདུས་པའི་དཀྱིལ་འཁོར་ཉག་གཅིག་ཏུ་ཤར་བའི་སྤྲོ་བསྡུས་བྱེད་པོ་པདྨ་འབྱུང་གནས་ཏེ་ངའོ་སྙམ་པའི་ངང་ནས་གནས་གསུམ་འབྲུ་གསུམ་དང་ཡེ་ཤེས་སེམས་དཔའ་བཅས་གསལ་དགོས་པར་གསུང། བསྔོ་བ་ནི། རང་གི་ཐུན་གཅིག་པོ་འདིའི་ནང་གི་དགེ་བ་དེས་མཚོན། དུས་གསུམ་དུ་བསགས་པའི་དགེ་རྩ་ཐམས་ཅད་མ་རྒན་སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ནས་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པའི་ཆེད་དུ་བསྔོ་བར་བྱ་བའོ། །དེ་ཡང་བསྔོ་བའི་ཡུལ། བསྔོ་རྒྱུའི་དགེ་རྩ། བསྔོ་མཁན་བདག་བཅས་རང་བཞིན་གྱིས་གྲུབ་པ་རྡུལ་ཙམ་ཡང་མེད་པར་བདེན་མེད་སྒྱུ་མའི་རང་བཞིན་དུ་ཤེས་ནས། འདིས་མཚོན་དུས་གསུམ་བསགས་པའི་དགེ་རྩ་ཀུན༔ དྲན་རིག་ཟག་པ་མེད་པའི་ཡེ་ཤེས་ཀྱི༔ འཁོར་གསུམ་ཡོངས་དག་ཆེན་པོར་རྒྱས་བཏབ་ནས༔ གནས་ལུགས་རྫོགས་པ་ཆེན་པོའ་ིཀློང་དུ་ཨཱཿཞེས་རྡོ་རྗེ་ཐོལ་གླུ་ལྟར་འཁོར་གསུམ་ཡོངས་སུ་དག་པའི་བསྔོ་བས་རྒྱས་འདེབས་པའམ། དེ་ལྟར་བློས་མི་ལྕོགས་ན་བསྔོ་བ་རྗེས་མཐུན་པ་དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་དང་། འཕགས་པ་ཀུན་ཏུ་བཟང་བོ་དང་འཇམ་དཔལ་དབྱངས་ཀྱིས་ཇི་ལྟར་བསྔོས་པ་བཞིན་བདག་གིས་ཀྱང་བསྔོ་བར་བྱའོ་སྙམ་པ་དང་། སྨོན་ལམ་ནི། བདག་དང་སེམས་ཅན་ཐམས་ཅད་མི་འབྲལ་ཚོམ་བུ་གཅིག་ཏུ་བླ་མ་རིག་འཛིན་འདུས་པའི་དཀྱིལ་འཁོར་ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་དུ་སངས་རྒྱས་པར་ཤོག་ཅིག་ཅེས་སྨོན་ལམ་གདབ་བོ། །བཀྲ་ཤིས་ནི། རང་གི་མདུན་གྱི་ནམ་མཁར་འཇའ་འོད་མེ་དཔུང་གི་ཀློང་ན་ཕྱོགས་བཅུའི་རྒྱལ་བ་སྲས་དང་བཅས་པ་བླ་མ་ཡི་དམ་མཁའ་འགྲོ་ཆོས་སྐྱོང་ཐམས་ཅད་བཀྲ་ལམ་གྱིས་བྱོན་ནས་ཁྲོ་བོ་རྣམས་ཀྱིས་བགེགས་བསྐྲད། ཁྲོ་མོ་རྣམས་ཀྱིས་བྲོ་བརྡུངས། སངས་རྒྱས་བྱང་སེམས་ཐམས་ཅད་ཀྱིས་བཀྲ་ཤིས་པའི་ཚིག་བཅད་མང་བོ་སྙན་པའི་གླུ་དབྱངས་དང་སྦྲེལ། མཁའ་འགྲོ་མ་རྣམས་ཀྱི་ཕྱག་ན་གདུགས་རྒྱལ་མཚན་བ་དན་སྣ་ཚོགས་པ་ཐོགས་ཤིང་། རོལ་མོའ་ིབྱེ་བྲག་སྣ་ཚོགས་སྒྲོགས་བཞིན་ཐམས་ཅད་ཀྱིས་མེ་ཏོག་མནྡ་རའི་ཆར་ཆེན་པོ་འབེབས་པར་མོས་ལ་བཀྲ་ཤིས་བརྗོད་པར་བྱའོ། །སྨྲས་པ། རྒྱལ་བསྟན་ཁང་ཆེན་རྡིབ་ལ་ཕྱོགས་པ་ན། ནུས་པ་ཆུང་ཡང་ནུས་པའི་ཚོད་ཀྱིས་ནི། །གྱེན་དུ་འདེགས་པའི་ཁུར་བབ་ཅི་ལ་མེད། །དེ་ཕྱིར་ཆེར་བླུན་ཉམ་ཆུང་བདག་འདྲ་ཡང་། །ཆུང་ནས་བསྟན་ཞུགས་ཚོགས་ཀྱི་གྲལ་འདབ་ནས། །མི་ཚེ་མཐའ་རུ་བསྐྱལ་བའི་བག་ཆགས་ཀྱིས། །དེ་ཡི་ཕྱོགས་ལ་ཞེན་པ་ཕྲན་ཙམ་མཆིས། །དེ་ཕྱིར་ངོ་ཚའི་གནས་ལ་མ་འཛེམས་པར། །བླུན་ཚིག་འཆལ་ངག་དུ་མའི་སྒོ་ཕྱེས་པས། །ཉེས་འགལ་མ་ལུས་རྒྱལ་བ་སྲས་བཅས་དང་། །གཟུར་གནས་མཁས་དབང་ཚོགས་ལ་སྙིང་ནས་འཆགས། །མི་སྒྲིབ་ཚངས་པ་མཆོག་གི་དངོས་གྲུབ་སྩོལ། །ཅེས་སྔ་འགྱུར་གསང་ཆེན་ཆོས་འཁོར་གླིང་དུ་ཀློང་སྙིང་རྩ་བ་གསུམ་གྱི་སྒྲུབ་སྡེ་གྲུབ་གཉིས་ནོར་བུའི་གླིང་ཞེས་པ་གསར་འཛུགས་མཛད་པའི་སྐབས་དང་བསྟུན་དཔའ་བོ་ལས་རབ་རྩལ་གྱི་སྤྲུལ་བའི་ཟློས་གར་མཆོག་སྤྲུལ་ལུང་རྟོགས་རྒྱ་མཚོ་ལགས་དང་། གསང་ཆེན་ལུང་བསྟན་གླིང་གི་མཁན་ཆོས་ཀྱི་ཉི་མ་རྣམ་གཉིས་ཀྱིས་བཀའ་བསྩལ་སྤྱི་བོར་བབ་པ་ལྡོག་ཏུ་མ་བཟོད་པར་རྡོ་གྲུབ་དགོན་གྱི་གྲལ་མཐའ་བ་ཨོ་རྒྱན་ཕྲིན་ལས་སུ་འབོད་པ་དེ་ཉིད་ཀྱིས་བྲི་ཁུལ་བྱས་པ་འདི་ཉིད་ཀྱང་ཕྱོགས་དུས་ཐམས་ཅད་དུ་ཁ་དགེ་ཞིང་བཀྲ་ཤིས་པར་གྱུར་ཅིག་གུ ། དཔལ་ཆེན་འདུས་པའི་ལས་བྱང་གི་དགོངས་དོན་ཅུང་ཟད་བཤད་པ་ཟབ་དོན་གསལ་བྱེད་རིན་ཆེན་སྣང་བ། རང་བྱུང་འོད་གསལ་རྡོ་རྗེ་ཐུགས་མཆོག་རྩལ།― ARJ001_Page_0006 ―
[མ་དཔེ་གཟིགས་ན་འདིར་གནོན།]
རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཡི་དམ་ཐུགས་སྒྲུབ་བླ་མ་དྲག་མཐིང་དཔལ་ཆེན་འདུས་པའི་ལས་བྱང་གི་དགོངས་དོན་ཅུང་ཟད་བཤད་པ་ཟབ་དོན་གསལ་བྱེད་རིན་ཆེན་སྣང་བ་ཞེས་བྱ་བ་བཞུགས་སོ། །རྡོ་རྗེའི་བླ་མ་ཐོད་ཕྲེང་རྩལ་དང་བདེ་གཤེགས་སྒྲུབ་སྡེ་ཆེན་པོ་བརྒྱད་དབྱེར་མེད་པའི་ལྷ་ཚོགས་ལ་གུས་པས་ཕྱག་འཚལ་ལོ། །འབར་བའི་ཡེ་ཤེས་ཀློང་དགུའི་རྣམ་རོལ་ཁྲག་འཐུང་དཔའ་བོའ་ིམཚན་དཔེར་བཞེངས། །དངོས་གྲུབ་འདོད་དགུའི་ཆར་གྱི་ལྕིད་པའི་སྒྱུ་འཕྲུལ་སྤྲིན་གྱི་ཕྲེང་བས་མཛེས། །རིགས་ཀུན་ཁྱབ་བདག་བླ་མའི་གསང་གསུམ་མི་ཟད་དབྱིངས་ཀྱི་རྒྱན་རྫོགས་པར། །འདུད་དོ་མཆོག་དངོས་གྲུབ་པའི་དགའ་སྟོན་མཐོང་པའི་ཆོས་ལ་རྫོགས་པར་སྩོལ། །རབ་འབྱམས་རྒྱུད་སྡེའི་སྲོག་གི་ཟུངས། །རིག་འཛིན་གྲུབ་བརྙེས་གཤེགས་ཤུལ་ཆེ། །སྔ་འགྱུར་ཆོས་ཀྱི་ཉིང་ཁུའི་དཔྱིད། །དད་དང་མོས་པས་ཅི་ནུས་དབྱེ། །དེ་ལ་འདིར་འོད་གསལ་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་དངོས་གཞིའི་ལམ་གྱི་གཙོ་བོ་བུམ་དབང་གི་ལམ་རིག་འཛིན་ཞི་དྲག་གི་བསྐྱེད་རིམ་ལས། བླ་མ་དྲག་པོ་ཐུགས་སྒྲུབ་དཔལ་ཆེན་འདུས་པའི་བསྐྱེད་རིམ་ལས་བྱང་གི་དགོངས་དོན་ཅུང་ཟད་བཤད་པ་ལ། ཤེས་བྱའི་རྣམ་བཞག་སྤྱིར་བཤད་པ་དང་། སྒྲུབ་ཐབས་ལས་བྱང་གི་དོན་བྱེ་བྲག་ཏུ་བཤད་པའོ། །དང་པོ་ནི། ཡི་དམ་གྱི་ལྷ་བསྙེན་ཅིང་སྒྲུབ་པར་འདོད་པའི་གང་ཟག་གིས། སྒྲུབ་བྱ་རིན་ཐང་ཆེ་བའི་ནོར་ལྟ་བུ་ཆོས་དབྱིངས་རང་བཞིན་རྣམ་དག་གི་ལྷ། ཡེ་ཤེས་ཀྱི་བདག་ཉིད་ཀྱི་ལྷ། དེ་དག་གིས་བྱིན་གྱིས་བརླབས་པའི་མཚན་མའི་ལྷར་གྲགས་པ་གསུམ་ལ་ཡིད་ཆེས་གསུམ་དང་ལྡན་པས་སྒྲུབ་ན་དངོས་གྲུབ་ཚེགས་མེད་དུ་ཐོབ་པ་གསང་སྔགས་ཀྱི་ཟབ་གནད་ཐུན་མོང་མ་ཡིན་པ་ཡིན། དེའི་དང་པོ་སྒྲུབ་བྱ་རང་ལ་བཞུགས་པ་ཡིད་ཆེས་པའི་ཕྱིར། བསྒྲུབ་བྱའི་ལྷ་གང་ཡིན་པ་ལུང་རིགས་མན་ངག་གསུམ་གྱིས་སྒྲོ་འདོགས་གཅོད་མ་ཤེས་ན། མདའ་འཕེན་པ་ལ་འབེན་ངོས་མ་ཟིན་པ་ལྟར་བསྒྲུབ་བྱ་མེད་པའི་སྒྲུབ་བྱེད་དུ་ཟད་པའི་ཕྱིར། འདིར་གང་བསྒྲུབ་བྱའི་ལྷ་ནི། ངེས་པའི་དོན་དུ་ཆོས་དབྱིངས་རང་བཞིན་རྣམ་དག་གི་ལྷ་དམ་ཚིག་སེམས་དཔའ་གཞི་ལམ་འབྲས་གསུམ་དབྱེར་མི་ཕྱེད་ཆོས་ཉིད་བྱང་ཆུབ་ཀྱི་སེམས་ཆོས་སྐུ་བདེ་བར་གཤེགས་པའི་སྙིང་པོ་སོ་སོ་རང་རིག་པའི་སྤྱོད་ཡུལ་ཅན་ཟབ་གསལ་གཉིས་སུ་མེད་པའི་ཡེ་ཤེས་ཏེ། དཔལ་ཆེན་ཞལ་ལུང་ལས། རིག་པ་ཐིག་ལེ་ཉག་གཅིག་ནི༔ ཆོས་རྣམས་ཀུན་གྱི་གྲོལ་པ་སྟེ༔ མདོ་སྔགས་ཐེག་པ་བསམ་ཡས་སུ༔ བསྟན་ཀྱང་ཐེག་པ་གཅིག་ལས་མེད༔ ཅེས་གསུངས་པ་ལྟར། འོད་གསལ་གདོད་མའི་གནས་ལུགས་རང་རིག་བྱང་ཆུབ་ཀྱི་སེམས་རང་བཞིན་གྱི་རྣམ་པར་དག་པའི་ཆོས་ཉིད་དེ་ནི་རྒྱལ་བས་ཆོས་སྒོ་བརྒྱད་ཁྲི་བཞི་སྟོང་གི་བསྟན་དོན་མཐར་ཐུག་ལམ་ཀུན་གྱི་འབབ་སྟེགས་ཏེ། དེ་ལ་ཆོས་ཉིད་ངོ་བོའ་ིསྒོ་ནས་དབྱེ་བ་བྱར་མེད་ཀྱང་། ཆོས་ཅན་ཐ་སྙད་ཀྱི་སྒོ་ནས་ཕྱེ་ན་རྡོ་རྗེ་ཆོས་ཀྱིས་མཛད་པའི་སེམས་འགྲེལ་ལྔའི་ནང་ཚན་མཛད་པ་ཆོ་འཕྲུལ་ལྷའི་ལུང་ལས། ལྷ་ཞེས་བྱ་བ་བྱང་ཆུབ་སེམས༔ དེ་ནི་རྒྱུད་དུ་རབ་ཏུ་བརྗོད༔ གཞི་ནི་གནས་པའི་དོན་ཉིད་དེ༔ ལམ་ནི་རྣལ་འབྱོར་སྒྲུབ་པའོ༔ འབྲས་བུ་མཐར་ཐུག་མཛད་པའི་ལས༔ ཞེས་པ་ལྟར་སྦྱང་གཞི་འཁོར་འདས་ཀྱི་ཆོས་ཐམས་ཅད་ཆ་མེད་ཀུན་འགྲོ་རིག་སྟོང་གདོད་མའི་འོད་གསལ་ཏིལ་ལ་མར་བཞིན་འདུ་འབྲལ་མེད་པར་གནས་ཀྱང་། སྦྱང་བྱ་རྣམ་འགྱུར་གློ་བུར་གྱི་དྲི་མ་མཁའ་ལ་སྤྲིན་ལྟར་སྣང་བ་འཁོར་བའི་ཆོས་མེད་པ་གསལ་སྣང་དུ་འཛོམ་པས་དོན་གྱི་གནས་ལུགས་སྒྲིབ་པ་ལ། སྦྱོང་བྱེད་རྣམ་འབྱོར་སྒྲུབ་པའི་རིམ་པ་གདུལ་བྱའི་བློ་དང་མཚམས་པ་ཐེག་པའི་སྒོ་དུ་མ་ཞིག་བསྟན་པ་ཡང་། དཔལ་ཆེན་ཞལ་ལུང་ལས། འདི་ཉིད་མ་རིག་རྟོག་ཅན་རྣམས༔ ཐེག་པའི་ཚིག་ལ་རྩོད་པ་བྱེད༔ ཇི་སྲིད་སེམས་ཅན་བློ་མང་བ༔ དེ་སྲིད་ཐེག་པ་བསམ་ཡས་སུ༔ ཀུན་ཏུ་བཟང་པོ་ང་ཡིས་བསྟན༔ ཞེས་སོ། །དེ་ཐམས་ཅད་ཀྱི་སྦྱང་འབྲས་དྲི་མ་དང་བྲལ་བའི་གཞི་ཇི་ལྟ་བའི་ཡོན་ཏན་མངོན་དུ་གྱུར་ནས་སྐུ་གསུམ་ལྷུན་གྲུབ་འོད་གསལ་ཆེན་པོའ་ིས་ལ་ཕྱིན་པས་གདུལ་བྱའི་དོན་མཛད་པ་འབྲས་བུའི་རྣམ་བཞག་བཅས་གསུམ་དུ་དབྱེ་ཡང་དོན་ལ་དུ་མ་རོ་གཅིག་གཉིས་སུ་མེད་པའི་ཆོས་ཉིད་རྣམ་པར་དག་པ་བདེ་བ་ཆེན་པོའ་ིཡེ་ཤེས་གཅིག་ཏུ་ཤེས་པར་བྱ་དགོས་ཏེ། རིག་འཛིན་རྩ་རྒྱུད་ཐོད་པའི་དུམ་བུ་ལས། རྒྱུད་ཅེས་བྱ་བ་རྒྱུན་ཆགས་ཏེ༔ རྒྱུ་ཡིས་མ་བསྐྱེད་རྐྱེན་ལས་གྲོལ༔ རིག་པ་བདེ་གཤེགས་སྙིང་པོའ་ིརྒྱུད༔ སྤྲོས་པ་རྣམ་དག་ངོ་བོ་ཉིད༔ མ་བཅོས་མ་བསླད་དེ་བཞིན་གཤེགས༔ ཅེས་སོ། །གཞི་ངོ་བོའ་ིགནས་ཚུལ་དེ་ལྟར་ཡང་ད་ལྟ་སེམས་ཅན་གྱི་དུས་སུ་གཞི་འབྲས་གཉིས་སུ་མེད་པའི་ཆོས་ཉིད་དེ་དྲི་མ་གློ་བུར་བས་བསྒྲིབས་ཏེ་ཡོན་ཏན་མངོན་གྱུར་དུ་མི་སྣང་བའི་སྐྱོན་བསལ་ཕྱིར་ལམ་ཉམས་སུ་ལེན་དགོས་པས་དེའི་རྣམ་བཞག་ཀྱང་། དཔལ་ཆེན་ཞལ་ལུང་ལས། འོན་ཀྱང་འདིར་ནི་དབང་པོའ་ིཁྱད༔ རབ་དང་འབྲིང་དང་ཐ་མ་གསུམ་༔ གསུམ་ཚན་གསུཾ་དུ་དབྱེ་བ་ལས༔ ཐེག་པའི་རྣམ་གྲངས་དགུ་རུ་བསྟན༔ ཀུན་འབྱུང་འདྲེན་པའི་ཐེག་པ་དང་༔ དཀའ་ཐུབ་རིག་བྱེད་ཐེག་པ་དང་༔ དབང་བསྒྱུར་ཐབས་ཀྱི་ཐེག་པའོ༔ ཞེས་གདུལ་བྱའི་དབང་པོ་རབ་འབྲིང་ཐ་མ་ལ་དགོངས་པས་རྒྱུ་འབྲས་ཀྱི་ཐེག་པའི་རྣམ་བཞག་དགུར་གསུངས་པ་ལས། གང་ཟག་དབང་པོ་རབ་ལ་དགོངས་པས་ལྟ་སྒོམ་སྤྱོད་པའི་ཟབ་གནད་དུ་མས་ཁྱད་པར་འཕགས་པས་ཚེ་གཅིག་འབྲས་བུ་ཟུང་འཇུག་གི་ས་ལ་སྦྱོར་བ་རྣལ་འབྱོར་བླ་ན་མེད་པ་དབང་བསྒྱུར་ཐབས་ཀྱི་ཐེག་པ་ནང་རྒྱུད་ཡོ་ག་གསུམ་སྟེ། སྔ་མ་ལས། དེ་ལ་ཚེ་གཅིག་མྱུར་གྲོལ་ལམ༔ གང་ཟག་སྐལ་པ་མཆོག་ལྡན་ལ༔ དབང་བསྒྱུར་ཐབས་ཀྱི་ཐེག་པ་སྟེ༔ རབ་ལ་རྫོགས་པ་ཆེན་པོའི་ལམ༔ འབྲིང་ལ་ཨ་ནུ་ཡོ་ག་ཆེ༔ དམན་ལ་མ་ཧཱ་ཡོ་གའོ༔ ཞེས་བླ་མེད་ཀྱི་ཐེག་པ་གསུམ་ལས་སྐབས་འདིར་འཆད་བྱ་ནི་མ་ཧཱ་ཡོ་ག་སྟེ། དེ་ལ་སྔ་འགྱུར་འོད་གསལ་རྡོ་རྗེ་སྙིང་པོའ་ིལམ་ལ་རྒྱུད་དང་སྒྲུབ་སྡེའི་ཤིང་རྟ་གཉིས་སུ་གྲགས་པའི་ཕྱི་མ་སྒྱུབ་སྡེའི་རྩ་བ་བདེ་གཤེགས་སྒྲུབ་པ་བཀའ་བརྒྱད་དེ། དཔལ་ཆེན་ཞལ་ལུང་ལས། གསང་སྔགས་ཀུན་གྱི་གཞི་ལྟ་བུ༔་ཞེས་གསུངས་པ་ལྟར་རྡོ་རྗེ་ཐེག་པའི་ལམ་གྱི་འཇུག་སྒོ་དང་པོ་དབང་གི་རྣམ་བཞག་བར་དུ་ལམ་གྱི་གཞུང་ཤིང་དམ་ཚིག ལྟ་བ་དག་མཉམ་བདེན་པ་དབྱེར་མེད། སྒོམ་པ་ལྷ་སྔགས་ཏིང་འཛིན་གྱི་རྣམ་བཞག་གི་བསྐྱེད་རིམ་སོགས་སྔགས་ལམ་གྱི་ཐོག་མར་ཤེས་བྱའི་རྣམ་བཞག་མེད་དུ་མི་རུང་བ་ཐམས་ཅད་སྟོན་པས་ན་མ་ཧཱ་ཡོ་ག་ནི་སྔགས་ཀྱི་ཐེག་པའི་གཞི་སྟེ་དབང་གི་སྤྱི་དོན་སྙིང་པོ་དོན་གསལ་ལས། སྣང་གྲགས་རིག་པའི་ཆོ་འཕྲུལ་དུ་མངོན་པར་བྱང་ཆུབ་པ་དཔལ་ལྡན་སྒྱུ་འཕྲུལ་དྲ་བའི་སྙིང་པོ་དཔལ་ཆེན་ཞལ་ལུང་དང་ཧེ་རུ་ཀ་འདུས་པའི་སྦྱོང་བྱེད་བསྐྱེད་རིམ་ཞེས་གསུངས། སྦྱང་བྱ། སྦྱང་གཞི། སྦྱང་འབྲས་པ་བཞིན། སྔ་མ་ལས། དེ་ལྟར་སྦྱང་གཞི་ལུས་ངག་ཡིད༔ སྦྱོང་བྱེད་ལྷ་སྔགས་ཏིང་འཛིན་གྱིས༔ སྦྱང་འབྲས་བདེ་བཤེགས་སྐུ་གསུང་ཐུགས༔ རྡོ་རྗེ་གསུམ་གྱི་དཀྱིལ་འཁོར་དུ༔ ཡོངས་སྨིན་དོན་གྱི་སངས་རྒྱས་ཏེ༔ ཞེས་གསུངས་པའི་དོན་དཔལ་ཆེན་གཞུང་ལས་ཀྱང་། སྣང་གྲགས་རིག་པ་དཀྱིལ་འཁོར་གསུམ་གྱི་ངང༔ ཞེས་པ་ལྟར་སྦྱང་གཞི་རིག་སྟོང་འོད་གསལ་ཀུན་ཁྱབ་རིས་མེད་ཀྱི་ཆོས་གདོད་ནས་དག་པའི་ངང་དུ་འཁོར་འདས་སྤང་བླང་གཉིས་སུ་མེད་པ་ཉིད་དུ་གནས་ཀྱང་། སྦྱང་བྱ་གློ་བུར་གྱི་དྲི་མ་གཉིས་འཛིན་ཆགས་སྡང་གི་སྣང་བ་སྣོད་ཀྱི་འཇིག་རྟེན་འབྱུང་ལྔ། སྲིད་པ་བཅུད་ཀྱི་སྐྱེ་འགྲོའ་ིཕུང་ཁམས་སྐྱེ་མཆེད་དབང་ཡུལ་དང་བཅས་པ་ལ་བརྟེན་པའི་རྩ་རླུང་ཐིག་ལེའི་ཁམས་རྣམ་ཤེས་ཚོགས་བརྒྱད་ཟག་བཅས་ལས་ཉོན་གྱི་རང་བཞིན་འཁོར་བའི་ཆོས་དང་འབྲེལ་བས་དོན་གྱི་ཡིན་ལུགས་སྒྲིབ་བྱེད་དུ་གྱུར་པ་ལ། སྦྱོང་བྱེད་ཀྱང་བདེན་གཉིས་སྤང་བླང་དུ་མི་བལྟ་བ་སྦྱང་བྱ་སྣོད་བཅུད་རྒྱུད་གསུམ་དང་མཐུན་པར་ཡེ་ཤེས་དག་པའི་ལྷ་གདན་གསུམ་ཞི་ཁྲོའ་ིལྷ་སྔགས་ཡེ་ཤེས་ཀྱི་ཆོ་འཕྲུལ་དུ་གནས་སྣང་གཉིས་ཀ་དག་པ་རབ་འབྱམས་རྣམ་པ་ལམ་དུ་ཁྱེར་བས་གློ་བུར་གཉིས་འཛིན་གྱི་དྲི་མ་ཕྲ་རགས་སངས་ཏེ་ཐམས་ཅད་དག་ཆེན་གཞིའི་ཡིན་ལུགས་དབྱིངས་རིག་གཉིས་མེད་གནས་སྣང་གཉིས་ཀ་ལ་མངོན་དུ་གྱུར་ནས་སྐུ་དང་ཡེ་ཤེས་ཆེན་པོའ་ིཀློང་དུ་མངོན་པར་བྱང་ཆུབ་པའི་འབྲས་བུའི་ཐ་སྙད་བཏགས་པ་རྣམ་པའི་དབྱེ་བ་ཙམ་ལས་དོན་ལ་ཆོས་ཉིད་གཅིག་གི་ངོ་བོ་ལས་མ་འདས་པ་སྟེ། ཆོ་འཕྲུལ་ལྷའི་ལུང་ལས། ཞི་དང་ཁྲོ་བོའ་ིསྐུར་གསལ་བས༔ ཆགས་དང་ཞེ་སྡང་རབ་བསལ་ཏེ༔ གཞན་གྱི་དོན་དུ་སྐུར་སྣང་བ༔ ཐོབ་མེད་འབྲས་བུ་དེ་ཡི་མཆོག༔ དེ་ནི་འབྲེལ་བའི་ལམ་ཞེས་བྱ༔ གཞི་ལམ་འབྲས་གསུམ་མི་ཕྱེད་པའོ༔ ཞེས་གསུངས་པས་ན་སྦྱང་གཞི་འགྲོ་བ་ཐམས་ཅད་རང་བཞིན་གྱིས་རྣམ་པ་ལྷའི་བདག་ཉིན་དུ་གནས་པས། དེའི་རྣམ་པ་ལམ་བྱེད་སྣོད་བཅུད་རྟེན་དང་བརྟེན་པའི་དཀྱིལ་འཁོར་དམ་ཚིག་སེམས་དཔར་སྒོམ་པ་དང་། སྦྱང་འབྲས་སངས་རྒྱས་ཐམས་ཅད་ཆོས་ཀྱི་སྐུ་ཡིན་པ་དེའི་རྣམ་པ་ལམ་བྱེད་ཆོས་སྐུ་ཉིད་ཡེ་ཤེས་སེམས་དཔའ་ཞི་ཁྲོའ་ིརྣམ་པར་སྤྱན་འདྲེན་པ་དང་། གཞི་འབྲས་གཉིས། གདོད་ནས་དབྱེར་མེད་ཀྱི་རང་བཞིན་དུ་བཞུགས་པས། དེའི་རྣམ་པ་ལམ་བྱེད་ཡེ་ཤེས་དམ་ཚིག་དཀྱིལ་འཁོར་གཅིག་ལ་བསྟིམ་སྟེ་བཟང་ངན་གྱི་དབྱེ་བསམ་མེད་པ་གདོད་ནས་དམ་ཡེ་དབྱེར་མེད་དུ་ཤེས་ནས་ཉམས་སུ་ལེན་པའི་གནད་ཀྱི་མདོ་འགག་ཤེས་དགོས་ཤིང་། དེས་ན་སྔ་མ་ལས། ཕུང་པོ་ཁམས་དང་སྐྱེ་མཆེད་ཀུན༔ ཡེ་ནས་མ་བཅོས་ལྷའི་བདག་ཉིད༔ ཞེས་དང་། དཔལ་ཆེན་ཞལ་ལུང་ལས་། སྣང་སྲིད་འཁོར་འདས་ཆོས་རྣམས་དང་༔ ཕུང་པོ་ཁམས་དང་སྐྱེ་མཆེད་ཀུན༔ རྣམ་དག་ལྷ་ཡི་དཀྱིལ་འཁོར་དུ༔ ཤེས་པར་བྱ་བ་དག་བསླབས་པས༔ ཞེས་པ་ལྟར་ཆོས་དབྱིངས་བསམ་གྱིས་མི་ཁྱབ་པའི་དབྱིངས་བྲལ་སྨིན་ཡོན་ཏན་རྒྱ་མཚོའི་དཔལ་དང་འདུ་འབྲལ་འཕེལ་འགྲིབ་མེད་པའི་ཡེ་ཤེས་གཅིག་ལ་ལྡོག་ཆས་དབྱེ་ན། སྐུ་གསུང་ཐུགས་ཡེ་ཤེས་རྡོ་རྗེ་རྣམ་པ་ཐམས་ཅད་པའི་བདག་ཉིད་དུ་གནས་ཤིང་དེ་ནི་ཕྲ་བའམ་གཉུག་མའི་ལུས་ངག་ཡིད་གསུམ་ཞེས་མི་ཤིགས་རྡོ་རྗེ་གསུམ་གྱི་ལྷར་གདོད་ནས་དག་པ་ཡེ་ཤེས་ཀྱི་བདག་ཉིད་ཀྱི་ལྷ་ཡེ་ཤེས་སེམས་དཔའི་ཚུལ་དུ་བཞུགས་ཏེ། དེའི་སྐུ་གསུང་ཐུགས་རྡོ་རྗེ་མཉམ་པ་ཉིད་ཀྱི་ཆོས་རིགས་ཀུན་ཁྱབ་བདག་སྤྱི་དཔལ་ཆེན་པོ་ཆེ་མཆོག་ཧེ་རུ་ཀ་ཡབ་ཡུམ་གྱི་བདག་ཉིད་དེ། དེའི་རང་མདངས་ཀུན་རྫོབ་སྣང་ངོའ་ིཆ་ནས་ཁུ་རྡུལ་རླུང་གསུམ་དང་། རླུང་སེམས་འཇུག་པ་གཅིག་པས་སེམས་དང་བཅས་པའི་རྟེན་དབུ་རྐྱང་རོ་གསུམ་གྱི་རྩ་སྟེ། དེ་དག་ལས་ལུས་ངག་ཡིད་གསུམ་གྱི་ཆོས་སུ་གྲུབ་པའི་ཁམས་དྲུག་ལྡན་ཉིད། དག་པ་ལྷའི་སྐུ་གསུང་ཐུགས་ཡེ་ཤེས་རྡོ་རྗེ་བཞིའི་སྣང་བ་མཐའ་ཡས་པའི་རྣམ་པར་ལམ་དུ་བྱས་པས། བྲལ་འབྲས་དོན་གྱི་གནས་ལུགས་མངོན་དུ་གྱུར་ཏེ་རྡོ་རྗེའི་གསང་བ་ཆེན་པོ་མི་ཟད་རྒྱན་གྱི་འཁོར་ལོར་འཆར་བའི་ཐབས་ཀྱི་གསེང་ལམ་ལ་རྨད་དུ་བྱུང་བ་སྟེ། འཇམ་དཔལ་གཤིན་རྗེ་འཆི་བདག་ཟིལ་གནོན་ལས། ཁམས་དྲུག་ལྡན་པའི་ལུས་ཀྱི་རྟེན༔ རྡོ་རྗེ་བཞི་ཡི་གོ་འཕང་ལ༔ སྦྱོར་བ་རྡོ་རྗེའི་ཏནྟྲ་ལས༔ རྒྱུ་འབྲས་དག་གྲོལ་ལམ་གྱིས་མིན༔ ཞེས་གསུངས། ཡིད་ཆེས་གསུམ་པ་སྒྲུབ་གཞི་དམ་ཡེ་དབྱེར་མེད་ཀྱི་ལྷ་དེ་ལས་སྒྲུབ་བྱའི་བྱིན་རླབས་སམ་རྩལ་ལས་ཤར་བ་མཚན་མའི་ལྷའི་སྒོ་ནས་དབྱེ་ན། དེ་ལ་གཟུགས་ཕུང་སྐུ་རྡོ་རྗེར༔ འཇམ་དཔལ་སྐུ་ཡི་སྒྲུབ་པའི་གནད༔ ཞེས་སོགས་གསུངས་པ་ལྟར་སྐུ་དེ་བཞིན་གཤེགས་པའི་རིགས་འཇམ་དཔལ་གཤིན་རྗེ། གསུང་པདྨའི་རིགས་རྟ་མགྲིན། ཐུགས་རྡོ་རྗེའི་རིགས་ཡང་དག ཡོན་ཏན་རིན་པོ་ཆེའི་རིགས་ཆེ་མཆོག་བདུད་རྩི། འཕྲིན་ལས་ཀྱི་རིགས་ཕུར་པ། དེ་ལས་འཕྲོས་པ་མ་མོ་རྦོད་གཏོང་དང་རིག་འཛིན་སློབ་དཔོན་གཉིས་དྲུག་པ་ཧེ་རུ་ཀའི་རིགས། མཆོད་བསྟོད་དང་དྲེགས་འདུལ་ཐུགས་རྡོ་རྗེའི་རིགས། དྲག་སྔགས་སྟོབས་ལྡན་ནག་པོ་ལས་རིགས་ཏེ་དཀྱིལ་འཁོར་གྱི་ཚོམ་བུ་དགུ་དང་། རིགས་ཀྱི་ངེས་པས་དབྱེ་ན་སྐུ་གསུང་ཐུགས་ཡོན་ཏན་ཕྲིན་ལས་ལྔ་ལ་ནང་གསེས་སྐུ་ཡི་སྐུ་གསུང་ཐུགས་ཡོན་ཏན་ཕྲིན་ལས་ལྔ་སོགས་དབྱེ་བས་ཉེར་ལྔ། བསྡུ་ན་ཁྱབ་བྱ་ཕུང་ཁམས་དག་པའི་རིགས་ལྔའི་ཁྱབ་བྱེད་ཧེ་རུ་ཀའམ་རྡོ་རྗེ་སེམས་དཔའི་རིགས་བསྣན་པས་དྲུག། དེ་ཡང་བསྡུ་ན་ཡོན་ཏན་དང་སྐུ་གཉིས་རྟེན་བརྟེན་པར་འབྲེལ་བས་རིན་འབྱུང་སྐུ་རིགས་སུ་བསྡུ། ཕྲིན་ལས་ཀྱི་གཙོ་བོ་གསུང་ཡིན་ཞིང་དེ་ཡང་རྗེས་ཆགས་སྙིང་རྗེའི་དྲངས་པས་ཕྲིན་ལས་འཇུག་དགོས་པས་དོན་གྲུབ་པདྨའི་རིགས་སུ་བསྡུ། དྲུག་པ་གཙོ་བོ་ཐུགས་བདེ་སྟོང་གཉིས་མེད་ཡེ་ཤེས་ཀྱི་དབྱིངས་གཅིག་པས་རྡོ་རྗེའི་རིགས་སུ་བསྡུས་པས་རིགས་གསུམ་རྡོ་རྗེ་གསུམ་གྱི་ཁྱབ་བདག་དང་། དེ་ཡང་དོན་ལ་སྐུ་གསུང་ཐུགས་གཉིས་སུ་མེད་པ་བདེ་ཆེན་ཐིག་ལེ་ཉག་གཅིག་ལས་མ་འདས་པས་སྤྱི་དཔལ་ཆེན་པོ་རིགས་ཀུན་གྱི་ཁྱབ་བདག་གཅིག་ཏུ་བསྡུ་ནུས་ཤིང་། དེ་དག་ཀྱང་ངོ་བོ་དང་ལྡོག་ཆས་དབྱེ་བ་རྩམ་ལས་གང་ལྟར་བྱས་ཀྱང་མི་འགལ་བས་སྐབས་འདིར་ནི་ཚོམ་བུ་དགུའི་ལྷ་ཚོགས་ཐམས་ཅད་དཔལ་ཆེན་པོའི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་རྣམ་འཕྲུལ་དུ་ཤེས་པས་དཀྱིལ་འཁོར་ཆེན་པོ་གཅིག་ཏུ་བསྡུས་ཏེ་སྒྲུབ་པ་བླ་མེད་རྒྱུད་སྡེ་ཀུན་གྱི་མཐར་ཐུག་སྒྲུབ་བྱེད་ཀྱི་མན་ངག་ལ་ཡིད་ཆེས་གཉིས་པ་སྟེ། གཞུང་ལས། གསང་ཆེན་རྒྱུད་སྡེ་རྒྱ་མཚོ་ཀུན༔ སྒྲུབ་སྡེ་ཆེན་པོ་བརྒྱད་ལ་འདུ༔ རིག་འཛིན་བརྒྱད་དང་མཁས་པ་བཞི༔ གོང་འོག་རྒྱ་མཚོ་ལྟ་བུའི་འཛིང་༔ བརྒལ་བར་མི་ནུས་བློ་ཅན་ལ༔ བཅུད་དྲིལ་འདི་ལས་གཞན་མ་གསུངས༔ ཞེས་དང་། ཐུགས་སྒྲུབ་བར་ཆད་ཀུན་སེལ་གྱི་ལས་བྱང་བདེ་གཤེགས་འདུས་པ་ལས། སོ་སོར་རྟོག་པའི་ཡེ་ཤེས་ཀྱི༔ རང་རྩལ་གཞོམས་མེད་ནཱ་དའི་རྒྱུད༔ རྡོ་རྗེའི་དབྱངས་ཀྱི་རབ་ཕྱེ་བའི༔ ཆོས་འཁོར་དབྱེ་བ་བསམ་ཡས་པ༔ འགྲོ་ཀུན་སྐད་དང་བསམ་པ་བཞིན༔ གང་འདུལ་ཅིང་ཡང་སྣང་བ་ལས༔ ཐམས་ཅད་ཀུན་གྱི་ཟབ་པའི་བཅུད༔ རྒྱུད་དང་སྒྲུབ་པའི་སྡེ་རུ་འདུས༔ དེ་ལ་ཡེ་ཤེས་ཀློང་དགུ་ཡི༔ ཕྱག་རྒྱའི་བྱེ་བྲག་ཇི་སྙེད་ཀུན༔ བླ་མའི་ཐུགས་ལས་བྱུང་བའི་ཕྱིར༔ འདི་སྒྲུབ་བདེ་གཤེགས་ཐམས་འགྲུབ༔ ཞེས་སོ། ཡང་རིག་འཛིན་རྩ་རྒྱུད་ལས། དེ་ནི་མངོན་དུ་བྱེད་པའི་ཐབས༔ ལམ་གྱི་རྒྱུད་ནི་མཐའ་ཡས་ཀྱང༔ ཐབས་ལ་བརྟེན་པ་ཕ་ཡི་རྒྱུད༔ ཤེས་རབ་གཙོར་སྟོན་མ་ཡི་རྒྱུད༔ ཆ་མཉམ་གཉིས་མེད་ཟུང་འཇུག་རྒྱུད༔ ཅེས་གསུངས་པ་ལྟར། སྤྱིར་གདུལ་བྱ་ཞེ་སྡང་ཅན་དང་། ཕྱི་སྤྲོས་པ་ལ་འཆོལ་བའི་དོན་དུ་བསྐྱེད་རིམ་དང་ལས་ཚོགས་གཙོ་བོར་བསྟན་ཅིང་། རྫོགས་རིམས་ཀྱང་ཐབས་སྣང་བའི་ཡེ་ཤེས་སྒྱུ་ལུས་དང་། རླུང་མངོན་སྤྱོད་གཙོ་བོར་སྟོན་པ་ཕའི་རྒྱུད་དང་། གང་ཟག་འདོད་ཆགས་ཅན་དང་རྡོ་རྗེའི་ལུས་ཀྱི་རྩ་རླུང་ཐིག་ལེ་ལ་གནད་དུ་བསྣུན་ནུས་པ་ལ་དགོངས་ནས་རྫོགས་རིམ་སྤྱི་དང་ཤེས་རབ་སྟོང་ཉིད་མངོན་དུ་བྱེད་པའི་གནད་འོད་གསལ། ཐབས་ལམ་ཐིག་ལེ་འཇུ་འདུལ། དབང་གི་ལས་གཙོ་བོར་སྟོན་པ་ལ་མ་རྒྱུད་དང་། གཏི་མུག་ཅན་དང་བྱ་རྩོལ་མེད་པའི་དོན་དུ་ཐབས་ཤེས་དང་བསྐྱེད་རྫོགས་གཙོ་ཆེ་ཆུང་མེད་པར་དག་མཉམ་ཐིག་ལེ་ཉག་གཅིག་གི་གནས་ལུགས་གཙོ་བོར་སྟོན་པ་གཉིས་སུ་མེད་པའི་རྒྱུད་ཀྱི་དབྱེ་བ་གསུམ་དང་། སྔགས་གསར་མ་འགའ་ཞིག་གིས་བླ་མེད་ཀྱི་རྒྱུད་ཐམས་ཅད་ཟུང་འཇུག་གི་དོན་གཏན་ལ་འབེབས་པ་འདྲ་ཡང་ཐབས་ཤེས་ཀྱི་ཕྱོགས་གཙོ་ཆེ་ཆུང་སྟོན་ཚུལ་གྱིས་དབྱེ་བས། དཀྱིལ་འཁོར་གང་དུ་ལྷ་ཕོ་མོ་ཤས་ཆེ་ཆུང་། གཙོ་བོ་གཙོ་མོ་གོ་འཕོ་ལུགས་རིན་པོ་ཆེ་དང་རུས་པའི་རྒྱན་སོགས་ཆ་ལུགས། གཡས་གཡོན་གྱི་བསྐོར་ཕྱོགས། དུས་ཉིན་མཚན་གང་དུ་ཕྲིན་ལས་བརྩམ་པ། དག་པ་སྦྱར་ལུགས་སོགས་གཙོ་ཆེ་ཆུང་གི་ཕ་མའི་རྒྱུད་དེ་ལྟར་འབྱུང་བ་གསུངས་པ་དང་། རྙིང་མས་ཕ་རྒྱུད་མ་ཧཱ། མ་རྒྱུད་ཨ་ནུ། གཉིས་མེད་ཨ་ཏི་ཞེས་གསུངས་པ་ལྟར་ན་སྤྱི་བཀའ་སྒྲུབ་པ་བཀའ་བརྒྱད་ལའང་། སྒོས་བཀའ་གཤིན་རྗེ་དང་། དྲག་སྔགས་དྲེགས་འདུལ་སོགས་དང་། སྤྱི་བཀའ་སྒྲུབ་སྡེ་བརྒྱད་ཆིག་དྲིལ་ལའང་དབང་དང་བསྐྱེད་རིམ་དང་ལས་ཚོགས་སྐོར་མ་ཧཱ། ཡང་དག་རྟ་མགྲིན་ཕུར་པ་སོགས་དང་། རྫོགས་རིམ་ཨ་ནུའི་ཐབས་གྲོལ་དང་དབང་བཞི་པའི་དོན་ཨ་ཏི་གཙོར་བཏོན་པ་ཤེས་ཆེ་བ་སྤྱིར་བཏང་གིས་སྨོས་པ་ལས་སྒྲུབ་སྡེ་བརྒྱད་སྤྱི་དང་བྱེ་བྲག་རེ་རེ་བཞིན་རྒྱུད་ལུང་མན་ངག་གི་དགོངས་པ་རྩལ་དུ་བཏོན་ནས་འཆད་ན་དབང་བཞི་ཀའི་ལམ་ཡོངས་རྫོགས་རེ་བཞུགས་པ་ཀུན་གཟིགས་མཁྱེན་བརྩེའི་དབང་པོའི་སྙན་བརྒྱུད་སྐོར་རྣམས་དང་། གཏེར་ཆེན་མཆོག་གླིང་གི་ཟབ་པ་སྐོར་བདུན་རྣམས་ལྟ་བུ་ཡིན་པས་མཐའ་གཅིག་ཏུ་ཁ་མཚོན་གཅོད་མི་ནུས་ལ། དོན་དུ་བདེ་གཤེགས་སྒྲུབ་པ་བཀའ་བརྒྱད་ཉིད་བླ་མེད་རྒྱུད་སྡེ་རྣམ་པ་གསུམ་ཀའི་དགོངས་བཅུད་གཅིག་ཏུ་དྲིལ་ནས་སྙིགས་དུས་ཀྱི་གང་ཟག་ཤེར་བརྩོན་དམན་ཞིང་བློ་རྨོངས་པ་ལ་དགོངས་ནས་ལྷ་གཅིག་སྒྲུབ་པས་བླ་མེད་རྒྱུད་སྡེ་རབ་འབྱམས་འདུས་པའི་ཉིང་ཁུ། གང་ཟག་གཅིག་གི་ཉམས་སུ་ལེན་བདེ་བ་མན་ངག་ལག་ལེན་དུ་བསྡེབས་པ་སྟེ། དེར་མ་ཟད་གཤིན་རྗེ་སོགས་སྒོས་བཀའ་བྱེ་བྲག་པ་རྣམས་ལ་ཡང་། དབང་མན་ངག་རྒྱུད་ལུང་ཚང་བ་རེ་བཞུགས་ཤིང་རིགས་དང་མཚན་གྱིས་དབྱེ་ན། སྒྲུབ་སྡེ་བརྒྱད་སྤྱིའི་དབང་དུ་བྱས་ན་སྐུ་དེ་བཞིན་གཤེགས་པ་གཤིན་རྗེ་གཤེད་དང་། སྒྲུབ་བྱེད་ཀྱི་ལམ་འཁོར་ལོ་བཞི་སོགས་དང་། སྒོས་བཀའ་གཤིན་རྗེ་གཅིག་ལ་དབྱེ་ན། སྐྱ་དེ་བཞིན་གཤེགས་རིགས་ཕྱག་རྒྱ་ཟིལ་གནོན་ཚེ་བདག་རྡོ་རྗེའི་རིགས་འཇོམས་བྱེད་འཆར་ཁ་ནག་པོ། རིན་པོ་ཆེའི་རིགས་ཁ་ཐུན། པདྨའི་རིགས་རུ་མཚོན་དམར་པོ། ལས་ཀྱི་རིགས་ཤོར་གསང་ཉི་མ་ཁྲོས་པ། ཁྲོ་ཆུ་ཀིང་ཀང་དམར་ནག་སོགས་གསུངས་པས་མཚོན་དུ་མ་ཡོད་ཅིང་། དོན་ལ་ཆོས་ཉིད་བསམ་གྱིས་མི་ཁྱབ་པའི་དབྱིངས་གཅིག་ལས་ཆོས་ཅན་ཡེ་ཤེས་ཀློང་དགུ་གང་ལྟར་བཤད་ཀྱང་རྒྱུད་ཐ་དད་དང་དགོངས་པ་འགལ་འདུ་རུ་མི་གནས་པས་དོན་གནད་དགོངས་པ་གཅིག་ཏུ་འབབ་པ་ནི། ཕུར་བུ་བི་ཏོའ་ིརྒྱུད་ལས། བདེ་བར་གཤེགས་པ་གར་གྱི་བདག །འདོད་དགུར་བསྒྱུར་བས་གར་ཡང་བདེ། །གར་གྱི་དབང་ཕྱུག་ཆེན་པོ་ལ། མཁས་པས་ཕྱོགས་རེས་མི་བརྟག་གོ། ཞེས་གསུངས་པ་བཞིན་ནོ། །དེ་དག་སྒྲུབ་བྱེད་ལམ་གྱི་རྣམ་བཞག་ཀྱང་། །གཤིན་རྗེ་ལ་འཁོར་ལོ་བཞི། །རྟ་མགྲིན་ལ་རྟ་སྐད་ཐེངས་གསུམ། ཡང་དག་ལ་གྲུབ་པ་གཅིག་པུ། ཆེ་མཆོག་ལ་ཆོས་དོན་རྟགས་ཀྱི་བདུད་རྩི། ཕུར་པ་ལ་ཐལ་འབྱིན་རྣམ་པ་བཞི། མ་མོ་ལ་རྩ་རླུང་ཐིག་ལེའི་དགོངས་པ། རིག་འཛིན་ལ་བསྙེན་སྒྲུབ་ལས་གསུམ། མཆོད་བསྟོད་ལ་འབོད་རྦད་བསད་གསུམ། དྲགས་སྔགས་ལ་རྫོང་འཕྲང་སྲོག་གསུམ་གྱི་གནད་དང་། སྒྲུབ་སྡེ་བཀའ་བརྒྱད་ཆིག་དྲིལ་གྱི་རིམ་ལྔ་སོགས་ཟབ་རྒྱས་བསམ་མི་ཁྱབ་པ་བཞུགས་མོད་སྐབས་འདིར་བཤད་བྱའི་སྙིང་པོ་རྩ་རྒྱུད་ཐོད་པའི་དུམ་བུ་ལས། བསྒྲུབ་བྱའི་ཆོས་དང་སྒྲུབ་བྱེད་ཀུན༔ རང་ལས་ལོགས་སུ་མ་ཡིན་ཏེ༔ ཡེ་ཤེས་ལྟར་དུ་ཀློང་དགུའི་རྩལ༔ ཡི་དམ་ལྟར་དུ་སྒྲུབ་སྡེ་བརྒྱད༔ བྱང་སེམས་ལྟར་དུ་ཉེ་བའི་སྲས༔ རིག་འཛིན་ལྟར་དུ་འདི་ལྟར་ཏེ༔ ཞེས་གསུངས་པ་ལྟར་བསྒྲུབ་བྱ་སངས་རྒྱས་རྣམས་ཀྱི་ཐུགས་ཡེ་ཤེས་ཆེན་པོ་ཀློང་དགུའི་བདག་ཉིད། རྣམ་པ་མདོ་སྔགས་ཐུན་མོང་གི་ལམ་ནས་བྱང་ཆུབ་སེམས་དཔའ་ཆེན་པོ་ཉེ་བའི་སྲས་བརྒྱད་ཡིན་པས་དེ་ལས་བྱང་སེམས་ཉེ་བའི་སྲས་རེ་རེའི་ཡང་བྱང་ཆུབ་སྤྱོད་པའི་རྣམ་ཐར་ནི་སངས་རྒྱས་ལས་ཀྱང་ལྷག་པ་ལྟ་བུ་དང་། མཚན་དང་རིགས་སྔགས་བཟུང་བའི་ཕན་ཡོན་བསམ་གྱིས་མི་ཁྱབ་པ་མདོ་རྒྱུད་དུ་མ་ནས་ཡང་ཡང་བསྟན་པ་ཐམས་ཅད་དཀྱིལ་འཁོར་གཅིག་ཏུ་འདུས་ཤིང་། གསང་སྔགས་བླ་མེད་ཀྱི་སྐབས་སུ་དཔལ་ཆེན་སྒྲུབ་སྡེ་བརྒྱད་སངས་རྒྱས་ཐམས་ཅད་ཀྱི་གསང་བ་མི་ཟད་རྒྱན་གྱི་འཁོར་ལོའ་ིདཀྱིལ་འཁོར་རབ་འབྱམས་ཀྱི་རིགས་བརྒྱའི་ཁྱབ་བདག་ཏུ་བཞུགས་པ་དང་། དེ་རེ་རེའི་ལྷ་སྔགས་ཀྱི་རྣལ་འབྱོར་གྱིས་མཆོག་དངོས་བདེ་བླག་ཏུ་སྒྲུབ་ནུས་པ་སྤྱི་དང་བྱེ་བྲག་གི་རྒྱུད་དང་སྒྲུབ་ཐབས་མན་ངག་ལས་རྒྱ་ཆེར་འབྱུང་བ་ཀུན་ཚོམ་བུ་གཅིག་ཏུ་སྒྲུབ་པ་དང་། འཛམ་གླིང་གདུལ་བྱ་ཐུན་མོང་གི་སྣང་ངོར་བཀའ་བབས་རིག་འཛིན་ཆེན་པོ་བརྒྱད་དུ་གྲགས་པ་ལས། ཀླུ་སྒྲུབ་དང་གུ་རུ་པདྨ་ལྟ་བུ་རེ་རེའི་ཡང་མཛད་པ་སངས་རྒྱས་དང་མཉམ་པ་སོ་སོའ་ིརྣམ་ཐར་དུ་གསལ་བ་ཐམས་ཅད་ཀུན་དཔལ་ཆེན་ཧེ་རུ་ཀ་དགུའི་དཀྱིལ་འཁོར་གྱི་འཁོར་ལོ་གཅིག་ཏུ་བསྡུས་པ་བླ་མའི་རྣལ་འབྱོར་སྐབས་བླ་མ་ཁྲོམ་ཚོགས་སུ་སྒོམ་པས་ཚེ་རབས་ཐམས་ཅན་དུ་མཁས་གྲུབ་ཀྱི་བླ་མ་མང་པོའ་ིརྗེས་སུ་འཛིན་པ་གཞོན་ནུ་ནོར་བཟང་ལྟ་བུ་དང་། བླ་མ་སོ་སོའ་ིམཁས་བཙུན་བཟང་གསུམ་གྱི་བྱིན་རླབས་དང་རྣམ་ཐར་གྱི་ཡོན་ཏན་ཐམས་ཅན་བདག་གཅིག་ལ་རྫོགས་པར་ཐོབ་པའི་རྟེན་འབྲེལ་ཡོད་པར་གསུངས་པ་ལྟར། སྒྲུབ་ཆེན་བཀའ་བརྒྱད་སོ་སོའ་ིབྱིན་རླབས་དངོས་གྲུབ་ཐམས་ཅད་དཀྱིལ་འཁོར་གཅིག་སྒྲུབ་པས་ཐོབ་ནུས་པ། བདེ་གཤེགས་སྒྲུབ་ཆེན་བརྒྱད་ཅེས་སྔ་འགྱུར་སྒྲུབ་སྡེའི་སྲོག་རྩ་གཅིག་པུ་རུ་གྱུར་པ་འདི་ཉིད་ལ། གསར་ཕྱོགས་ཀྱི་རྒྱུད་སྡེ་མ་རྒྱུད་རིགས་དྲུག་གི་ནང་ཚན་དཔལ་ཧེ་རུ་ཀའི་རིགས་བདེ་མཆོག་དང་དགྱེས་རྡོར། སྒྱུ་ཐོད་གདན་བཞི་མ་ཡ་རྣམས་དང་། རྡོ་རྗེ་སེམས་དཔའ་མ་ནིང་གི་རྒྱུད་གཉིས་མེད་དུས་ཀྱི་འཁོར་ལོའ་ིབསྐྱེད་རྫོགས་རྣམས་ཀྱིས་ཤིན་ཏུ་ཟབ་པར་གྲགས་པ་རྣམས་ཀྱིས་མཚོན་ཡི་དམ་ཞི་ཁྲོ་རབ་འབྱམས་དཀྱིལ་འཁོར་གཅིག་ཏུ་སྒྲུབ་པ་བདེ་གཤེགས་སྒྲུབ་པ་བཀའ་བརྒྱད་ལ་འདུ། དེ་ཡང་བསྡུ་ན་སངས་རྒྱས་ཐམས་ཅད་མཉམ་པར་སྦྱོར་བ་ཡང་དག་ཧེ་རུ་ཀའི་དཀྱིལ་འཁྱོར་ལ་འདུ། འདི་ནི་རིགས་ཀུན་གྱི་ཁྱབ་བདག་ཧེ་རུ་ཀ་སྤྱི་རྒྱུད་ཀྱི་དགོངས་པ་དཔལ་རྡོ་རྗེ་སེམས་དཔའ་ཁྲོ་བོའ་ིསྐུར་བཞེངས་པ། གུ་རུ་རིན་པོ་ཆེའི་ལྷག་པའི་ལྷ་འདི་ལ་བརྟེན་ནས་ཕྱག་ཆེན་སློབ་པའི་འོད་གསལ་མཐར་ཕྱིན་པའི་ཚུལ་བསྟན་པ་རྣམས་གཙོ་འཁོར་གྱི་དབྱེ་བསྡུ་ཙམ་ལས་དོན་གྱི་ལྷ་སྔགས་ཀྱི་རྣམ་པ། ཟབ་མོའ་ིདགོངས་གནད་ཐམས་ཅད་གཅིག་ཏུ་དྲིལ་བ་སྟེ། གཞུང་ལས། གལ་པོ་ལ་སོགས་ཧེ་རུ་ཀའི༔ ཏནྟྲ་ཀུན་གྱི་བཅུད་ཀྱང་འདྲིལ༔ ཞེས་གསུངས། བཀའ་བརྒྱད་ཁོ་ན་ལའང་དཀྱིལ་འཁོར་གྱི་ལྷའི་རྣམ་པ་དང་། སྔགས་ཀྱི་ཁྱད་པར་ཏིང་ངེ་འཛིན་གྱི་གཟེར་ཁའི་ཁྱད་པར་གྱིས་དབྱེ་ན། མཆོག་གླིང་གི་ཟབ་བདུན་རྩ་གསུམ་ཚེ་ཟབ་ཀྱི་བླ་མ་བཀའ་བརྒྱད། ཐུགས་སྒྲུབ་བར་ཆད་ཀུན་སེལ་གྱི་རིག་འཛིན་བདུད་གཤེད་བླ་ཕུར་བཀའ་བརྒྱད་སྦྲག་མ། རིག་འཛིན་སྐད་ལྡན་འདྲེན་མཛད་བླ་མ་བཀའ་བརྒྱད་དང་། སྙིང་པོ་སྐོར་ལྔའི་མཁའ་འགྲོ་དགུངས་འདུས་སྙིང་པོ་དང་། རྫོགས་ཆེན་སྡེ་གསུམ་བཀའ་སྲུང་ཡེ་ཤེས་མཁའ་འགྲོ་རྣམས་མཁའ་འགྲོ་བཀའ་བརྒྱད་དུ་གསུངས་པས་མཚོན་དུ་མ་བཞུགས་ལ། འདི་ནི་བཀའ་བརྒྱད་ཁོ་ནའི་ལྷ་སྔགས་ལ་དཔྱད་ན་བླ་མ་བཀའ་བརྒྱད་དྲག་སྔགས་ལྟར་སྒྲུབ་པའི་དགོངས་པ་གཙོ་བོར་སྟོན་ནམ་སྙམ་མོ། གསུམ་པ་བླ་མ་ལ་ཡིད་ཆེས་པ་ནི། ཚུལ་དེ་ལྟར་སྒྲུབ་བྱེད་ཉི་མའི་ཟེར་དང་སྒྲུབ་བྱ་སྤྲ་བ་སྐམ་པོར་མེ་མཆད་པའི་མཚམས་སྦྱོར་མེ་ཤེལ་ལྟ་བུ་ཀུན་འདུས་རིག་འཛིན་པདྨ་ས་བྷ་ཝ་ཞེས་མཆོད་རྟེན་ཆེན་པོ་བདེ་བྱེད་བརྩེགས་པ་ནས་སྒྲུབ་ཆེན་བཀའ་བརྒྱད་ཚིག་དྲིལ་གྱི་སྒྲོམ་བཀའ་བབ་རིག་འཛིན་བརྒྱད་ཀྱིས་ཞལ་མ་ཕྱེད་པ་འབྱེད་པ་དང་། དེ་དག་གི་སྨིན་གྲོལ་ཡོངས་སུ་རྫོགས་ཤིང་རྒྱུད་ལུང་མན་དག་ཐམས་ཅན་ཀྱི་ལམ་གནད་དབྱེ་བསྡུ་ལ་སོ་སོ་རང་རིག་པའི་ཡེ་ཤེས་ཀྱི་དབང་ཐོབ་ནས་རིག་འཛིན་བརྒྱད་ལས་ལྷག་པའི་དངོས་གྲུབ་མཆོག་གི་གོ་འཕང་བརྙེས་པའི་ཚུལ་བསྟན་ནས་དེ་དག་ལ་ཆོས་ཀྱི་སྐྱེས་ཕུལ་བ་དང་། རྒྱ་གར། ཟ་ཧོར། ཨུ་རྒྱན། བོད་ཡུལ་ཀུན་ཏུ་བཀའ་བརྒྱད་དང་བཀའ་འདུས་ཀྱི་ཆོས་འཁོར་བསྐོར་ནས་རིག་འཛིན་གྲུབ་ཐོབ་རྒྱ་མཚོའི་ཚངས་བརྟོལ་བ་སོགས་སྤྱི་དཔལ་ཆེན་པོ་དངོས་དང་ཞལ་མི་གཉིས་པ་དེ་ཉིད་བླ་མ་དྲག་པོ་གཏུམ་ཆེན་མཐིང་གའི་སྐུར་བཞེངས་པ་འདིར་བླ་མའི་སྒྲུབ་སྐོར་ལ། སྒྲུབ་ཚུལ་བཞི་ལས་བླ་མ་ཤིན་ཏུ་དྲག་པོ་མཐིང་གའི་གསང་སྒྲུབ་ལྟར་བཀྲལ་བས་སྒྲུབ་པའི་ཕྱིར། བླ་མ་ཡི་དམ་གཉིས་སུ་མེད་པར་སྒྲུབ་པ་ལ་བླ་མ་བཀའ་བརྒྱད་ཅེས་ཡོངས་སུ་གྲགས་པ་མངའ་རིས་པཎ་ཆེན་རིན་པོ་ཆེའི་ཟབ་གཏེར་རིག་འཛིན་ཡོངས་འདུས་དང་། གྲོལ་ཐིག་ལམ་རྒྱས་པའི་ཡང་ཞུན་ལྟ་བུ་སྟེ། ཌཱ་ཀིའི་གསང་གཏན་ཆེན་མོ་ལས། གུ་རུ་རིན་པོ་ཆེ་དང་འཇམ་དཔལ་བཤེས་གཉེན་གྱི་ཞལ་གཟིགས་པའི་རྗེས་ཚེ་འདིའི་སྣང་བ་ཕལ་ཆེར་བརྗེད་ནས་སྐྱེ་བ་འཕོས་པ་ལྟ་བུ་ལ་མངའ་རིས་པཎ་ཆེན་གྱི་བག་ཆགས་འལ་འོད་ཆད་ཆོད་དུ་གསལ་བ་ཁོ་ནའི་ངང་དུས་འདས་ཞེས་སོགས་བྱིན་རླབས་ཀྱི་བབ་ཐོབ་ཚུལ་གྱིས་ཤེས་ཤིང་། གཞུང་ཉིད་ལས་ཀྱང། འདི་བླ་མ་ཡི་དམ་གྱི༔ རྣམ་པར་སྒྲུབ་པས་བྱིན་རླབས་མྱུར༔ ཞེས་གསུངས། དེས་ན་གསང་རྫོགས་ལས། སྒྲུབ་སྡེ་ཆེན་པོ་བརྒྱད་ཀྱི་ལྷའི་འཁོར་ལོ་མངོན་སུམ་མཐོང་མི་ནུས་པའི་གདུལ་བྱའི་དོན་དུ། དཀྱིལ་འཁོར་གྱི་བདག་པོ་ཧེ་རུ་ཀ་བརྒྱད་པོ་ཉིད་རིག་པ་འཛིན་པ་གཙོ་བོའ་ིཚུལ་དུ་སྣང་། ཞེས་འབྱུང་བ་དང་། རྒྱུད་གཞན་ལས། དབང་གི་སྐབས་སུ་སངས་རྒྱས་རྣམས་སློབ་དཔོན་གྱི་ལུས་ལ་ཞུགས་ནས་རྗེས་སུ་འཛིན་པས་སངས་རྒྱས་སྟོང་མཆོད་པ་བས་རྡོ་རྗེ་སློབ་དཔོན་གྱི་བ་སྤུ་གཅིག་མཆོད་པས་བསོད་ནམས་ཀྱི་ཚོགས་ཆེ་བར་གསུངས་པ་ལྟར་རྡོ་རྗེ་ཐེག་པའི་རྒྱུད་སྡེ་རྒྱ་མཚོའི་བཀའ་བབ་རིག་འཛིན་བརྒྱད་དང་ཁྱད་པར་སློབ་དཔོན་པདྨ་ཀཱ་རའི་ཞབས་འདིའི་སྐུའི་རྣམ་འགྱུར་འཁྲུངས་རབས་ཐམས་ཅད་རྣལ་འབྱོར་བླ་མེད་ཀྱི་ཀུན་སྤྱོད་ཉག་གཅིག་གི་སྟེང་ནས་སོང་བས་རྡོ་རྗེའི་བླ་མ་པདྨ་སཾ་བྷ་ཝ་ཞེས་མཚན་དུ་གྲགས་པས་ན་སྤྲུལ་སྐུ་རྣམས་ཀྱི་ཐུགས་ཀྱི་རྒྱུད་ཚོད་ལ་མཆོག་དམན་གྱི་དབྱེ་བསམ་མེད་ཀྱང་གདུལ་བྱ་འདུལ་བའི་མཛད་སྤྱོད་ཀྱི་དབང་གིས་བླ་མ་གུ་རུ་རིན་པོ་ཆེ་ཉིད་ཡི་དམ་གྱི་ཚུལ་དུ་སྒྲུབ་ན། གསང་སྔགས་ཀྱི་བླ་མ་ནི་དབང་གི་ཆུ་བོའ་ིམཛོད་འཆང་བ་ཞིག་ཡིན་པས་སྒྲུབ་པ་པོ་རྡོ་རྗེའི་རིགས་ཀྱི་སྐལ་པ་མཆོག་ལྡན་དུ་བྱིན་གྱིས་བརླབས་ལ་ཐུགས་རྗེ་མྱུར་ཞིང་། བླ་མ་ནི་གདུལ་བྱ་ལ་ཡི་དམ་དང་མཁའ་འགྲོ་ལས་ཐུགས་བརྩེ་ངེས་པར་ཆེ་བ་དང་གདུལ་བྱས་ཀྱང་དངོས་སུ་ཞལ་མཐོང་གསུང་ཐོས་པའི་སྒྲུབ་ཐག་སྙིང་ཉེ་བ་ལྟ་བུར་སོང་བས་ཡི་དམ་དང་མཁའ་འགྲོའ་ིབྱིན་རླབས་གཡེལ་ཞུད་ཀྱི་སྐྱོན་དང་ཉེས་པ་ལེགས་པར་གསོས་ཏེ། བྱིན་རླབས་དངོས་གྲུབ་མྱུར་ཞིང་བར་ཆད་མེད་པ་དང་རས་ལ་འབྱར་རྩི་རྒྱབ་སྟེ་གདོད་ཚོན་ཆུར་བཅུག་ན་ཇི་ལྟར་འདོད་པའི་འཛིན་བཏུབ་པས་ཁ་དོག་བཟང་པོ་འབྱུང་བ་བཞིན། རྩ་བ་གསུམ་གྱི་སྒྲུབ་ཚུབ་སྤྱིར་བཤད་ན། ཐོག་མར་བྱིན་རླབས་ཀྱི་རྩ་བ་བླ་མ་སྒྲུབ་པས་མྱུར་ཞིང་དངོས་གྲུབ་ཀྱི་སྒོ་འབྱེད་ཡིན་པས་བསྟེན་པ། བར་དུ་དངོས་གྲུབ་ཀྱི་རྩ་བ་སངས་རྒྱས་ཀྱི་དག་པའི་གཟུགས་སྐུ་མཐར་ཐུག་ཡི་དམ་གྱི་ལྷ་དང་སྐལ་མཉམ་དུ་བྱེད་པས་སྒྲུབ་པ། མཐར་ཕྲིན་ལས་ཀྱི་རྩ་བ་མཁའ་འགྲོའ་ིཕྲིན་ལས་མྱུར་ཞིང་ལས་ཀྱི་གཉེར་འཛིན་པས་ལས་སྦྱོར་ཚུལ་འབྲེལ་ཆགས་པར་གསུངས་པ་ཡང་འདིར་བཀའ་བརྒྱད་གཅིག་ལ་རྩ་བ་གསུམ་ཀ་ཆིག་དྲིལ་དུ་བྱས་ཏེ་བསྟེན་སྒྲུབ་ལས་གསུམ་ཚིག་རྫོགས་སུ་གསུངས་པས་ཤིན་ཏུ་ཟབ་པ་དང་། གུ་རུ་རིན་པོ་ཆེས་བོད་དུ་ཐོགས་མར་སངས་རྒྱས་ཀྱི་བསྟན་པ་སྤེལ་ནས། གཙུག་ལག་ཁང་དང་སྒྲུབ་གནས་མཛད་སྐུ་ཚབ་ལུང་བསྟན། མཚོ་བྲག་ལ་སྐུ་དང་ཕྱག་ཞབས་ཀྱི་རྗེས་བཞག ཚེས་བཅུའི་དུས་ཆེན་དང་ཉི་མ་འཆར་ནུབ་དུས་བོད་ལ་འབྱོན་པ། གཏེར་སྟོན་དང་གཏེར་གནས་མང་པོ་དུས་སུ་སྣང་ཞིང་། བོད་ཀྱི་ལྷ་འདྲེ་ཐམས་ཅན་བྲན་དུ་བཀོལ། རྒྱུད་འབུམ་བསྒྱུར་ཞུས་དང་། ཇོ་བོ་རྗེ། མི་ཏྲ་ཇོ་ཀི་སྙིང་པོའ་ིཞབས་སོགས་སྤྲུལ་པས། བཀའ་གཏེར་དག་སྣང་གི་ཆོས་རྒྱུན་བཙུགས་པ་སོགས་ཕྱག་མཚན་དུ་ལྷག་པར་བཞེས་པས་བོད་ཡུལ་བསྐལ་པ་མང་པོའ་ིགོང་ནས་ཐུགས་བསྐྱེད་དང་སྨོན་ལམ་གྱིས་འབྲེལ་བའི་བླ་མའི་སྐལ་བར་ངེས་པ་དང་། རྗེ་དེའི་ཐུགས་དམ་གཙོ་བོ་སྒྲུབ་སྡེ་བརྒྱད་ཆིག་དྲིལ་བཀའ་བརྒྱད་ཡིན་ཅིང་། དེའི་རྒྱུད་ལུང་མན་ངག་གི་བཀའ་བབ་བརྙེས་ཏེ་སྤྱི་དཔལ་ཆེན་པོ་དང་ཐ་མི་དད་པའི་གོ་འཕང་བརྙེས་པའི་བཀའ་བརྒྱད་འདི་ནི་གསང་སྔགས་བསྟན་པའི་སྙིང་པོར་གདམས་ཏེ་རྒྱུད་ལུང་མན་ངག་ཀུན་ལས་བཀའ་བརྒྱད་རྣམ་གསུམ་ནི་ཡང་ཉམས་སུ་མི་རུང་བའི་བཀའ་གཙིགས་ཀྱིས་ཕྱག་རྒྱས་བཏབ་པའི་ལྷ་ཡིན་པས་དེ་གཉིས་དབྱེར་མེད་སྒྲུབ་ཚུལ་འདི་ནི་ཐུགས་སྒྲུབ་ཀུན་གྱི་སྙིང་པོ་འབྲེལ་ཚད་དོན་ལྡན་ཡིན་པའི་རྒྱུ་མཚན། ཟ་ཧོར་གྱི་རྒྱལ་ཁབ་ཨོ་རྒྱན་རྒྱལ་པོ་ཚོམ་བུ་དང་བཅས་པ། རྗེ་འབངས་སྙིང་གི་བུ་དགུ་ལ་བསམ་ཡས་བྲག་དམར་ཀེའུ་ཚང་ནས། བོད་ཡུལ་གྱི་གསང་སྔགས་ཆོས་ཀྱི་སྨིན་གྲོལ་གྱི་ཐོག་མ། སྲིན་ཡུལ་དུ་ཕེབས་ཁར་རྒྱལ་སྲས་ལྷ་རྗེ་སོགས་རྗེ་འབངས་ཡབ་ཡུམ་ཉེར་གཅིག་ལ། བཀའ་འདུས་ཆོས་ཀྱི་རྒྱ་མཚོ་འབྲལ་ཁའི་ཞལ་ཆེམས་ཀྱི་ཚུལ་དུ་གསུངས་པ་ཀུན་དོན་དུ་སྒྲུབ་པ་བཀའ་བརྒྱད་ཁོ་ནར་ངེས་པས་ཐུགས་ཀྱི་བརྣག་པ་མཐར་ཐུག་སྟེ། བཀའ་འདུས་སྔ་ཕྱི་བར་གསུམ་གྱི་བར་པ་བླ་མ་དགོངས་འདུས་གསེར་ཆོས་འབྲེལ་ཚད་དོན་ལྡན་བསྔགས་བརྗོད་རྒྱ་ཆེར་གནང་བ་ཡང་། བླ་མ་དང་ཡི་དམ་དབྱེར་མེད་དུ་སྒྲུབ་པ་ལ་གཙོ་བོར་དགོངས་པས་བྱིན་རླབས་ཀྱི་ཚན་ཁ་ཆེ་བ་ཡིན་པས། མཁའ་འགྲོ་ཡེ་ཤེས་མཚོ་རྒྱལ་གྱིས། སྤྱིར་ཡང་མ་འོངས་བོད་ཡུལ་སེམས་ཅན་རྣམས༔ བླ་མའི་སྐལ་པ་པདྨ་འབྱུང་གནས་ཡིན༔ རང་ཉིད་བླ་མ་པདྨའི་རྣམ་པར་བསྒྱུར༔ བྱིན་རླབས་ཐུགས་རྗེ་ལྷག་ཏུ་ཆེ་བར་འབྱུང༔ ཐུགས་སྒྲུབ་རྒྱས་བསྡུས་ཡོངས་ཀྱི་གཞུང་ལྟར་སྒྲུབ༔ ཚེ་གཅིག་སངས་རྒྱས་མ་འགྲུབ་ཁོ་མོས་མནའ༔ ཞེས་དང་། ལམ་རིམ་ཡེ་ཤེས་སྙིང་པོར་ཡང་། ཁྱད་པར་བྱིན་རླབས་དངོས་གྲུབ་མྱུར་འདོད་ན༔ རྩ་གསུམ་ཀུན་འདུས་པདྨ་ང་ཉིད་སྒོམ༔ ཞེས་དང་། ཐུགས་སྒྲུབ་བར་ཆད་ཀུན་སེལ་དབང་ཆོག་ནོར་བུའི་ཕྲེང་བ་ལས། དེ་ལྟར་ཟབ་པའི་ཡང་རྩེ་གསང་སྔགས་ཀྱི༔ འཇུག་སྒོ་སྙིང་པོ་དབང་གི་རིམ་པ་སྟེ༔ དེ་ཡང་བླ་མ་ཡི་དམ་དབྱེར་མེད་པའི༔ ཚུལ་ལ་བརྟེན་ན་བྱིན་རླབས་ལྷག་པར་ཆེ༔ ཞེས་གསུངས། རྒྱུ་མཚན་དེའི་བླ་མ་གསང་འདུས་ཀྱི་སྒྲུབ་པ་ལུང་གི་བྱང་བུ་ལས། འབྲས་བུ་གསང་སྔགས་རྡོ་རྗེ་ཡི༔ རྒྱུད་དང་ལུང་ཆེན་ཀུན་ལས་ཀྱངཿ ཚོགས་ཆེན་གཉིས་རྫོགས་སྙིང་པོ་ཡི༔ དོན་རྟོགས་འདོད་ན་བླ་མ་སྒྲུབ༔ ཞེས་གསུངས་པའི་རྒྱུ་མཚན་མདོ་རྒྱུད་སྤྱི་དང་ཁྱད་པར་གསང་སྔགས་ཀྱི་ལམ་ནས་དངོས་གྲུབ་ཐམས་ཅད་བླ་མའི་བྱིན་རླབས་འབའ་ཞིག་ལ་རགས་ལས་ཤིང་། དེར་མ་ཟད་བསྐྱིད་རྫོགས་རྫོགས་ཆེན་གྱི་ལམ་ཀུན་གྱི་གེགས་སེལ། བོག་འདོན། ཉམས་ལེན་གྱི་སྲོག་རྩ་ཐམས་ཅད་བླ་མའི་རྣལ་འབྱོར་ཁོ་ནར་ངེས་པར་ཡང་ཡང་གསུངས་པ་དང་། ཁྱད་པར་ཀུན་མཁྱེན་བླ་མ་རིག་འཛིན་འཇིགས་མེད་གླིང་པ་ཉིད་དང་པོ་ལམ་གྱི་གྲོལ་བ་བརྙེས་སྐབས་ཀྱང་། རབ་མཆོག་མོས་གུས་ཀྱིས་གྲོལ་ཏེ་རྟོགས་པ་དོན་བརྒྱུད་ཀྱི་རྒྱལ་སར་ཕེབས། ཟབ་ཆོས་ཀྱི་བཀའ་བབ་ཐམས་ཅད་ཀྱང་རྩ་གསུམ་གང་ལྟར་སྒྲུབ་ཀྱང་རྣམ་པ་དང་ངོ་བོ་གཉིས་ཀ་རིག་འཛིན་བླ་མ་ཞི་དྲག་དང་། བླ་མ་མཁའ་འགྲོའ་ིཚུལ་དུ་གསུངས་པས་རིག་འཛིན་བླ་མའི་སྒྲུབ་སྡེའི་བཀའ་བབ་ཏུ་སངས་རྒྱས་གཉེར་པ་སློབ་དཔོན་ཆེན་པོ་ཉིད་ཀྱིས་བླ་མ་དགོངས་འདུས་ལས་རྡོ་རྗེའི་ལུང་གིས་བསྔགས་པ་སྟེ། སྙིང་ཐིག་གི་རྫོགས་རིམ་དང་། རིག་འཛིན་གྱི་བསྐྱེད་རིམ་ལ་བརྟེན་ནས་འགྲོ་ཀུན་རིག་འཛིན་རྣམ་པ་བཞིར་སྦྱོར་བའི་ལམ་སྟོན་དུ་བསྔགས་པའི་ཕྱིར་ཞེས་ཀུན་མཁྱེན་བླ་མ་རང་གིས་ཀྱང་དེ་ལྟར་ཞལ་གྱིས་བཞེས་པ་ལྟར་དང་། སྒྲུབ་བྱའི་ལྷ་རྩ་གསུམ་ཞི་ཁྲོ། སྒྲུབ་པ་བཀའ་བརྒྱད་སོགས་མཚན་དང་དཀྱིལ་འཁོར་གང་ལྟར་སྣང་། ཡང་དོན་ལ་བླ་མའི་ཐུགས་ཡེ་ཤེས་ཆེན་པོའ་ིརོལ་པ་གཅིག་ལས་ཐ་དད་དུ་མ་དམིགས་པར་ཤེས་པ་ནི་རྡོ་རྗེ་ཐེག་པའི་ལམ་གྱི་དངོས་གྲུབ་མྱུར་དུ་ཐོབ་བྱེད་ཀྱི་གནད་ཟབ་མོ་སྟེ། བླ་མ་ཡང་གུ་རུ་རིན་པོ་ཆེ་དང་དབྱེར་མེད་ཤེས་ན་བོད་ཀྱི་བླ་མའི་སྐལ་པ་དང་སྙིགས་མ་དམུ་རྒོད་ཀྱི་སེམས་ཅན་ལས་ཉོན་ནད་མུག་མཚོན་འཁྲུགས་ཀྱིས་མནར་བ་ཀུན་འདུལ་བ་ལ་ཐུགས་རྗེ་ལྷག་པར་མྱུར་ཞིང་མཁྱེན་བརྩེ་འཕྲིན་ལས་སྟོབས་དང་ཤུགས་བླ་མ་སངས་རྒྱས་བྱང་སེམས་ཀུན་ལས་ཆེ་བ་སྟེ། རིག་འཛིན་རྩ་རྒྱུད་ཐོད་དུམ་ལས། འདི་ནི་རིག་འཛིན་རྡོ་རྗེ་ཆོས༔ སྟོན་པ་རང་ཉིད་སྡུད་བྱེད་ཀྱི༔ ཚུལ་བཟུང་ཟབ་མོའ་ིགསང་བ་འཛིན༔ གཙོ་དང་འཁོར་གྱི་ཚོལ་བུའི་ཚུལ༔ ལྟར་དུ་བསྟན་པའི་མན་ངག་བཅུད༔ གསང་སྔགས་ཀུན་གྱི་འབྲས་བུ་སྟེ༔ མངའ་བདག་རྒྱལ་པོའ་ིཆོས་སྐལ་ཡིན༔ ཞེས་སོ། ཁྱད་པར་རིག་འཛིན་འདུས་པའི་དྲག་སྒྲུབ་དང་བཀའ་བརྒྱད་དྲག་སྔགས་ལྟར་སྒྲུབ་པ་ཡི་དམ་ཀུན་འདྲིལ་འདི་ལྟ་བུ་ནི་སྙིགས་དུས་ཀྱི་རྒྱལ་བསེན་དམ་སྲིའི་བར་ཆད་ཐམས་ཅད་ནང་རང་རྒྱུད་ཀྱི་ཉོན་མོངས་དུག་ལྔའི་རང་གཟུགས་ཏེ། དེ་ཀུན་གྱི་རྩ་བ་ཞེ་སྡང་དང་གཏི་མུག་གཉིས་ཡིན་པས་འདུལ་བྱེད་ཀྱི་གཉེན་པོ་ཡང་རྡོ་རྗེའི་རིགས་གུ་རུ་དྲག་མཐིང་དང་ཆེ་མཆོག་དབྱེར་མེད་པ་ཉིད་གཉེན་པོ་སྟོབས་ཀྱི་ལྷ་ཚན་ཆེ་ཞིང་བྱིན་རླབས་མྱུར། དུས་བབ་ཀྱི་ཟབ་ཆོས་སྒྲུབ་བྱ་མ་ནོར་བ་སྟེ། གཞུང་ལས། མ་འོངས་ལྔ་བརྒྱ་ཐ་མའི་ཚེ༔ མཐའ་ཡི་རྒྱ་འདྲེ་འབྱུང་པོ་དང་༔ དབུས་ཀྱི་དམ་སྲི་གློ་བུར་བསྡོངས༔ ཆོས་པའི་སྙིང་ཞུགས་མི་དགེ་སྤྱོད༔ སྐྱེ་བོའ་ིསྙིང་ཞུགས་སྡིག་རྒྱུན་སྤེལ༔ རྨི་ལམ་བཙུན་པ་བྱ་སྤྲེལ་རྨི༔ བག་མི་ཕེབས་ཤིང་སྙིང་རླུང་ལྡང༔ དེ་ཚེ་གཉེན་པོ་སྟོབས་ཀྱི་ལྷ༔ ཕལ་གྱིས་ཐུལ་བར་མི་འགྱུར་བས༔ ཕྱི་ལྟར་བྱང་སེམས་ནང་རིག་འཛིན༔ གསང་བ་དྲག་གཏུམ་འབར་བའི་ལྷ༔ བདེ་གཤེགས་ཡོངས་རྫོགས་སྒྲུབ་སྡེ་བརྒྱད༔ དཔལ་ཆེན་འདུས་པའི་སྒྲུབ་པ་འདིས༔ ལོག་འདྲེན་འདུལ་བར་ཐེ་ཚོམ་མེད༔ ཤིན་ཏུ་གསང་ཞིང་རང་ཉམས་ལོངས༔ བསྟན་འགྲོའ་ིདོན་དུ་སྙིང་སྟོབས་བསྐྱེད༔ ཞེས་གསུངས་པ་ལྟར། སློབ་དཔོན་སངས་རྒྱས། གཉིས་པ་ཉིད་སྤྱི་དཔལ་ཆེན་པོ་དང་གཉིས་སུ་མེད་པའི་གོ་འཕང་མཐོང་བའི་ཆོས་ལ་མངོན་གྱུར་དུ་མཛད་ནས་འཕགས་བོད་ཀུན་ཏུ་བཀའ་བརྒྱད་དང་བཀའ་འདུས་ཀྱིས་ལས་ཅན་རྗེ་འབངས་རྣམས་ལོ་ཟླ་ཙམ་གྱིས་མཆོག་གི་རྡོ་རྗེའི་རིག་པ་འཛིན་པའི་ས་ལ་སྦྱོར་བས་གྲུབ་ཐོབ་ཀྱི་ཚངས་བརྡོལ་བ་དང་། རྗེ་འབངས་སོ་སོའ་ིངོ་སྐལ་བཀའ་བརྒྱད་ཀྱི་རྒྱུད་ལུང་མན་ངག་མདོ་རྒྱུད་སྙིང་པོ་དུ་མས་སྨིན་གྲོལ་མཛད་དེ་གཏེར་ཁ་ཕལ་ཆེར་ལས་བཀའ་བརྒྱད་ཀྱི་ཆོས་སྡེ་མ་བྱོན་པ་མེད་པས་ད་ལྟའང་གདམས་པའི་ལྷག་མ་བཀའ་བརྒྱད་ལུགས་སྲོལ་མི་འདྲ་བ་བཅུ་དགུ་ཙམ་སྨིན་གྲོལ་མ་ཉམས་པར་བཞུགས་པ་དང་། ཁྱད་པར་བོད་ཡུལ་གདུལ་བྱའི་གཙོ་བོ་མངའ་བདག་ཆོས་ཀྱི་རྒྱལ་པོ་ཁུ་དབོན་ནི་སྐུའི་སྐྱེ་བ་ཐམས་ཅད་དུ་དཔལ་ཆེན་བཀའ་བརྒྱད་ཉིད་ཐུགས་དམ་ལྷག་པའི་ལྷར་ཕོག་སྟེ་གུ་རུ་སྲིན་ཡུལ་དུ་གཤེགས་ཁར་འབྲལ་ཁའི་ཞལ་ཆེམས་འདས་རྗེས་ཀྱི་ཚུལ་དུ་བཀའ་དུས་ཆོས་ཀྱི་རྒྱ་མཚོའི་གསང་མཛོད་ཕ་ཕོག་ཏུ་གཏད་རྒྱ་མཛད་པ་ལྟར་མངའ་བདག་ཉང་རིན་པོ་ཆེ་གུ་རུ་ཆོས་ཀྱི་དབང་ཕྱུག། རིག་འཛིན་རྒོད་ལྡེམ་སོགས་ཀྱིས་བཀའ་བརྒྱད་ཡི་དམ་ལྟར་སྒྲུབ་པའི་རྒྱུད་ལུང་མན་ངག་དང་། མངའ་རིས་པཎ་ཆེན་རིན་པོ་ཆེའི་བཀའ་བརྒྱད་བླ་མ་ལྟར་སྒྲུབ་པ། ཡབ་རྗེ་ཨོ་རྒྱན་གླིང་པའི་བཀའ་འདས་ཆོས་ཀྱི་རྒྱ་མཚོའི་གསར་སྙིང་གི་རྒྱུད་སྡེ་རབ་འབྱམས་ཚོམ་བུ་ཉེར་གཅིག་དང་མངའ་བདག་འཇམ་པའི་དབྱངས་ཚངས་པ་ལྷའི་མེ་ཏོག་འབྲས་བུ་མཐར་ཕྱིན་པའི་སྨོན་ལམ་གྱི་རང་གཟུགས། རྒྱལ་སྲས་ལྷ་རྗེའི་སྐྱེ་བ་བཅུ་གསུམ་པ་ཀུན་མཁྱེན་བླ་མ་འཇིགས་བྲལ་གླིང་པ་ཉིད་ཡིན་པ། རྡོ་རྗེའི་གསུངས་ཚད་མས་ཞལ་གྱིས་བཞེས་པའི་ཐུགས་ཐིག་མཐར་ཐུག་དཔལ་ཆེན་འདུས་པ་ཉིད་ཡིན་པ་དང་། གང་དང་གཉིས་སུ་མེད་པའི་ཐུགས་རྗེ་ཡས་སྤྲུལ་གངས་ཅན་མཁས་གྲུབ་རྒྱ་མཚོའི་དེད་དཔོན་ཐམས་ཅད་མཁྱེན་གཟིགས་འཇམ་དབྱངས་མཁྱེན་བརྩེའི་དབང་པོས་རིང་བརྒྱུད་དེ་དག་ཐམས་ཅད་གསན་ཏེ་ཉམས་བཞེས་ཚུལ་བཞིན་གནང་བས། ཨོ་རྒྱན་སངས་རྒྱས་གཉིས་པ་རྗེ་འབངས་གཏེར་སྟོན་སོ་སོའ་ིཡེ་ཤེས་ཀྱི་སྐུའི་རྗེས་སུ་བཟུང་སྟེ་སྨིན་གྲོལ་ཡོངས་སུ་རྫོགས་པའི་ཆུ་བོ་གཅིག་ཏུ་འདུས་པ། སྐལ་བཟང་གི་བཙས་སུ་སླར་ཡར་སྣང་བ་མཛད་ནས་བརྒྱུད་པ་དང་བྱིན་རླབས་ཉམས་པ་གསོས། གུ་རུ་རིན་པོ་ཆེའི་དངོས་ཀྱི་ཞལ་གཟིགས་ནས་རྗེས་སུ་གདམས་པའི་ཉེ་བརྒྱད་ཁྱད་པར་ཅན་རྣམས་ཀྱི་རྒྱུད་ལུང་མན་ངག་སྨིན་གྲོལ་ངོ་མཚར་ཅན་ཟབ་རྒྱས་ད་ལྟའང་མ་ཉམས་པར་བཞུགས་བཞིན་པའི་རྟེན་འབྲེལ་གྱི་དབང་གིས་བདག་ཅག་གུ་རུའི་རྗེས་སུ་འཇུག་པ་ཀུན་ཀྱང་སྔོན་བྱུང་སྟོན་པའི་རྣམ་ཐར་བཞིན་རྗེས་འཇུག་གདུལ་བྱའི་ཉམས་ལེན་ཀྱང་ལྷག་པའི་ལྷ་འདི་ལྟ་བུ་ལ་བསྟེན་ན་གནས་སྐབས་ས་ལམ་གྱི་བར་ཆད་ཞི་ཞིང་མཐར་ཐུག་མཆོག་གི་དངོས་གྲུབ་ལ་སྤྱོད་པའི་སྐལ་བཟང་མཐོང་ཆོས་ལ་མངོན་དུ་འགྱུར་བ་གདོན་མི་ཟ་ཞིང་། ཁྱད་པར་དེང་དུས་ཀྱི་གདུལ་བྱ་བློ་རྨོངས། བརྩོན་འགྲུས་ཆུང་། ལྟོ་གོས་ཀྱི་ཁོལ་པོར་མི་ཚེ་སྟོང་ཟད་དུ་བཅུག་པ་གལ་ཆུང་ཆོས་ལ་བྱས་ནས་ཞག་བདུན་ཕྲག་ཁ་ལོང་བའི་ཐོས་བསམ་སྒོམ་པ་ལ་བརྩོན་པ་མི་ནུས་པའི་སྐབས་འདི་ལྟ་བུ་ལ་ཆེད་དུ་དགོངས་ནས་ཚིག་ཉུང་དོན་ཟབ་བྱིན་རླབས་དང་ནུས་མཐུ་མྱུར། གདུལ་བྱའི་དུས་སྐབས་དང་མཐུན་པའི་མན་ངག་བློ་གཏད་གཅིག་ཆོག་ཏུ་དེ་དག་ཀུན་གྱི་བཅུད་དྲིལ་ལྟ་བུ་འདི་ཉིད་ཡིན་པའི་ཚུལ་གཞུང་ལས། གལྤོ་ལ་སོགས་ཧེ་རུ་ཀའི༔ ཏནྟྲ་ཀུན་གྱི་བཅུད་ཀྱང་འདྲིལ༔ ལས་ལ་མི་ལྟོས་དཔལ་ཆེན་པོའ༔ི སྲོག་ནས་འཕྲོགས་ནས་རྣོ་ལ་མྱུར༔ དབང་གི་ཆུ་བོ་མ་ཉམས་སྟེང༔ བརྒྱུད་པ་བདུན་ལྡན་སྒྲུབ་ཐག་ཉེ༔ ཞེས་དང་། གཏེར་འདི་གཞི་ལམ་འབྲས་བུའི་རྒྱུད༔ རྒྱལ་བ་དགོངས་དང་རིག་འཛིན་གྱི༔ བརྡ་ལས་དབང་དང་བྱིན་རླབས་འབྱུང༔ མཁའ་འགྲོ་གསང་བའི་ཡི་གེ་ལས༔ ཚིག་དང་དོན་དུ་མི་འགལ་ཞིང༔ དངོས་གྲུབ་སྒྲུབ་ལ་མི་བསླུ་བ༔ པདྨ་ང་ཡི་ཁྱད་ཆོས་ཏེ༔ རང་བྱུང་རྡོ་རྗེའི་དཔལ་དུ་ཤོག༔ ཅེས་གསུངས་པའི་ཚུལ་ལ་ཐུགས་གཞིགས་ཀྱིས་འོད་གསལ་སྙིང་ཐིག་གི་གྲུབ་མཐའ་འཛིན་པ་ཀུན་ནས་ཚེས་བཅུའི་དུས་མཆོད་ཙམ་ལ་སྙིང་ཐིག་གི་གྲུབ་མཐའ་ཡིན་རློམས་མི་མཛད་པར་རྒྱུད་ལུང་མན་ངག་གི་སྲོག་རྩ་དམར་འབྱིན་སྐོར་ལ་གསན་བསམ་སྒོམ་པ་གལ་ཆེ་བར་སེམས་ཞེས་གསོལ་བ་འདེབས་པ་ལགས། གཉིས་ཇི་ལྟར་སྒྲུབ་པའི་ཚུལ་ལ། སྒྲུབ་བྱེད་རིན་ཐང་དཔོག་པའི་ཟོངས་ལྟ་བུ་དབང་བཞིའི་རིམ་པ་དང་རྗེས་སུ་འབྲེལ་བའི་ལམ་སྒོང་སྐྱེས་ཀྱི་བག་ཆགས་སྦྱོངས་བ་རྒྱས་པ་ཆེན་པོའ་ིབསྐྱེད་རིམ་དཔལ་ཆེན་ལས་བྱང་རྒྱས་འབྲིང་། མངལ་སྐྱེས་སྦྱོངས་བ་རིག་འཛིན་ཡབ་བཀའ་དང་། བརྫུས་སྐྱེས་སྦྱངས་བ་ཡུམ་བཀའ་དང་། ཡང་གསང་བླ་སྒྲུབ་རྣམས་དང་། ཀུན་གྱི་རྫོགས་རིམ་རང་ལུས་དང་གཞན་ལུས་ཀྱི་སྙན་བརྒྱུད་སྦས་དོན་ཐབས་ལམ། མན་ངག་རྫོགས་པ་ཆེན་པོའི་རྒྱུད་ལུང་མན་ངག་དང་བཅས་དང་ཁྲིད་ཡིག་ཡེ་ཤེས་བླ་མ་རྩ་བ་ཡན་ལག་ཡི་གེ་མང་དུ་བཞུགས་ཀྱང་སྐབས་འདིར་འཆད་བྱ་སྒྲུབ་ཚུལ་ཚོང་གི་ཐབས་ལ་མཁས་པ་ལྟ་བུ། དཔལ་ཆེན་འདུས་པ་རྩ་བའི་ལས་བྱང་གི་སྒོམ་དོན་བསྐྱེད་བཟླས་ཀྱི་ལམ་ཉིད་བཤད་པ་ལ་གསུམ། སྔོན་འགྲོ་བསགས་སྦྱངས་འགལ་སྤངས་མཐུན་སྒྲུབ་ཀྱི་རིམ་པ་དང་། དངོས་གཞི་བསྐྱེད་པའི་རྣལ་འབྱོར་ཡན་ལག་དང་བཅས་པ། རྗེས་ཕྲིན་ལས་ཀྱི་ཁ་སྐོང་བའི་ལས་རིམ་མོ། །དང་པོ་ལ། སྤྱི་དང་བྱེ་བྲག་གི་སྔོན་འགྲོ་གཉིས་ལས། དང་པོ་ནི་རིག་འཛིན་བསྙེན་ཡིག་ལས། ཐུན་མོང་གི་སྔོན་འགྲོས་རྒྱུད་ལེགས་པར་སྦྱངས། བླ་མའི་རྣལ་འབྱོར་གྱི་དབང་བཞི་བླང་བ་ལ་ནན་ཏན་བྱས་པས་ཉམས་ཆག་དག་ཅིང་སྒྲུབ་པ་མཐར་ཕྱིན་པ་ཡིན། ཞེས་གསུངས་པ་ལྟར། རང་རེ་ནང་པ་སངས་རྒྱས་པའི་མདོ་སྔགས་ཀྱི་ཆོས་གང་ཉམས་སུ་བླངས་ཀྱང་ངེས་འབྱུང་གི་གཞི་བཟུང་དགོས་པས་དེ་ཉིད་བསྐྱེད་པའི་ཐབས་བློ་ལྡོག་རྣམ་བཞི་དང་སྐྱབས་འགྲོ། ཐེག་པ་ཆེན་པོའ་ིཆོས་ཀྱི་རྩ་བ་གཞན་ཕན་བྱང་ཆུབ་ཀྱི་སེམས་དང་། གསང་སྔགས་ཀྱི་སྣོད་རུང་དུ་བྱ་ཕྱིར་རྒྱུད་རྣམ་པར་དག་པ་དང་། བསོད་ནམས་ཀྱི་སྐལ་པ་ཆེ་བ་མོས་གུས་ཐུན་མིན་དུ་སྐྱེ་དགོས་པ་དེ་དག་གི་དོན་དུ་བློ་ལྡོག་རྣམ་བཞིའི་དམིགས་རྣམ་གསལ་འདེབས་དང་། སྐྱབས་འགྲོ་སེམས་བསྐྱེད་དང་རྡོར་སེམས་སྒོམ་བཟླས། མཎྜལ་ཕྱི་ནང་། བླ་མའི་རྣལ་འབྱོར་བཅས་སྔོན་འགྲོ་རྣམ་མཁྱེན་ལམ་བཟང་ཁྲིད་ཡིག་རྒྱས་བསྡུས་ལྟར་དམིགས་སྒོམ་རྡོ་རུས་འཕྲོད་པ་གནད་དུ་འགྲོ་བ་ཉམས་ལེན་གྱིས་འབུམ་ལྔ་ཕྱག་ལེན་ལྟར་གྲངས་ཀྱང་འགྲོ་ངེས་དང་། སྔར་བསགས་སྦྱངས་ཟིན་པས་ཀྱང་གསལ་འདེབས་ཀྱི་ཚུལ་དུ་ཞག་བདུན་ཕྲག་ལས་མི་ཉུང་བ་བསྐྱར་ཞིང་གསོལ་འདེབས་དང་། ཁྱད་པར་བླ་མའི་རྣལ་འབྱོར་ལ་འབད་པ་རྩལ་དུ་བཏོན་པས་སྔར་རྒྱུའི་དབང་བཞི་ཐོབ་པའི་ནུས་པ་ལམ་དབང་ཐོད་རྒལ་དུ་ལེན་པས་གསོ་བ་དང་། བདག་ཉིད་དཀྱིལ་འཁོར་དུ་འཇུག་པའི་དོན་ཡང་ཚང་ཞིང་། བླ་མའི་རྡོ་རྗེ་གསུམ་གྱི་ཡེ་ཤེས་ཆེན་པོའི་བྱིན་རླབས་དང་དངོས་གྲུབ་ཀྱི་སྒོ་འབྱེད་ཡིན་པས་ཤིན་ཏུ་གལ་ཆེ་བ་ནི་བརྒྱུད་པ་འདིའི་དམིགས་བསལ་གྱི་ཕྱག་བཞེས་ཡིན་པ་དང་། ཡི་དམ་གྱི་ལྷ་དྲག་པོ་སྒྲུབ་པའི་སྔོན་དུ་ཞི་བ་བསྙེན་ན་རྒྱུད་འཇམ་བཀྲ་ཤིས་བར་ཆད་མི་འབྱུང་བར་གྲགས་པ་བཞིན་བྱིན་རླབས་བླ་མའི་རྣལ་འབྱོར་གྱིས་ཕྱི་གསོལ་འདེབས་ལྟར་སྒྲུབ་པས་ཞི་བསྙེན་དང་། དཔལ་ཆེན་དངོས་གཞིའི་གསང་བ་དྲག་སྒྲུབ་ཏུ་འབྲེལ་ཆགས་པས་ལག་ལེན་ཏུ་ཐེབས་དགོས་སོ། །བྱེ་བྲག་ཏུ་བཀའ་བརྒྱད་བཀའ་གཏེར་སྤྱི་དང་ཁྱད་པར་འདི་ཉིད་ཀྱི་སྨིན་བྱེད་གཞུང་ལྟར་བརྒྱུད་ལྡན་གྱི་བླ་མ་ལས་ནོས་ཤིང་། བསྙེན་སྒྲུབ་ལ་འཇུག་པའི་ཐོག་མར་གྲུབ་ན་བླ་མ་ལས་དབང་བསྐྱར་ཏེ་ཞུ་བ་དང་། མ་བྱུང་ཡང་བདག་འཇུག་གི་ཆོ་ག་ཡང་ཡང་བྱ་ཞིང་དམ་ཚིག་གཞུང་བཞིན་གནས་པ་གལ་ཆེའོ། །གཉིས་པ་བྱེ་བྲག་གི་སྔོན་འགྲོ་སྦྱོར་བའི་ཆོས་ལ། དང་པོ་གང་དུ་སྒྲུབ་པའི་གནས་ནི། དང་པོ་དབེན་ཞིང་ཉམས་དགའི་གནས༔ གྲུབ་ཐོབ་ཞབས་ཀྱིས་བཅགས་པ་དང༔ ཁྱད་པར་དུར་ཁྲོད་རྩུབ་འགྱུར་ཚལ༔ ཞེས་ཐོག་མའི་བསྙེན་སྒྲུབ་བྱ་བའི་ཡུལ་གོང་ལྟར་ཤིས་པའི་དགེ་མཚན་དང་ལྡན་པ་དང་། གཉིས་པ་ཐོབ་པས་དུར་ཁྲོད་སོགས་དང་། རྒྱུན་གྱི་ཉམས་ལེན་དང་བསྙེན་པ་ཙམ་ནི་ཡིད་དགའ་ཉེར་འཚེ་མེད་པའི་གནས་སུ་རུང་གསུངས། གཉིས་པ་ཡོ་བྱད་ནི། དཀྱིལ་འཁོར་རྩིབས་བཅུ་སྒོ་རྫོགས་ཅནཿ མཚན་ཉིད་ཚང་བ་བྲིས་པའི་སྟེང་། སྒྲུབ་རྫས་ཐོད་སྐུ་སྔགས་བྱང་དང་༔ ཙནྡན་དང་ནི་སེང་ཕུར་སོགས༔ སྤྲོས་བཅས་སྒྲུབ་ཡིག་ལྟར་དུའམ༔ ཡང་ན་གཙོ་ཕུར་ཙམ་ལ་བསྟན༔ ཉེར་སྤྱོད་སྨན་གཏོར་རཀྟ་དང་༔ དཀྱིལ་འཁོར་རྒྱན་བཀོད་ལེགས་པར་བཀྲམ༔ ཞེས་གསུངས་རྣལ་འབྱོར་སྤྲོས་མེད་ཏིང་འཛིན་གཙོ་བོར་བཏོན་པ་ལ་བསྙེན་པའི་སྐབས་སུ་སྒྲུབ་རྟེན་རྣམས་ཀྱི་སྤྲོས་པ་རྒྱས་པ་མ་བྱུང་ཀྱང་རུང་སྟེ། བསྙེན་ཡིག་ལས། བསྙེན་སྒྲུབ་ལས་རུང་ལ་དཔལ་གཏོར་ཙམ་ལའང་བརྟེན་དུ་རུང་ངོ་། །ཞེས་སོགས་དང་། དཀྱིལ་འཁོར་ཀྱང་སྒོ་རྫོགས་ཅན་མ་བྱུང་ཀྱང་། འཁོར་ལོ་རྩིབས་བཅུ་མེ་རི་དང་བཅས་པའམ། ཚོམ་བུ་ལ་བརྟེན་དུ་རུང་བར་གསུངས། སྒྲུབ་པ་དང་སྒྲུབ་ཆེན་གྱི་སྐབས་སྤྲོས་པ་ཅི་ཙམ་རྒྱས་ན་ལེགས་པས་ཐིག་ཚོན་བྱིན་རླབས་སྔོན་དུ་འགྲོ་བས་རྡུལ་ཚོན་དང་རས་བྲིས་གང་རུང་བྲི་ཚུལ་སྒྲུབ་ཁོག་ཏུ་གསལ་བ་ལྟར་དང་། ཐོད་པ་མཚན་ལྡན་གྱི་དཔྲལ་བ་ལ་དབུ་བསྟན་པའི་ཆེ་མཆོག་གི་ཕྱག་རྒྱ་རྒྱས་བསྡུས་ཀྱི་སྐུ་མཚན་ཉིད་ཚང་བ་རབ་གནས་དང་ལྡན་པ་དམིགས་རྟེན་དང་ལྷན་ཅིག་པའི་རྒྱབ་ཏུ་གསེར་རམ་མཚལ་གྱིས་བྲིས་པའི་བསྙེན་སྒྲུབ་ཀྱི་སྔགས་བྱང་ཙནྡན་ནམ་སེང་ལྡེང་གི་ཕུར་པ་སོར་བཅུ་གཉིས་པའི་མགུལ་དུ་དཀྲིས་པ་དཀྱིལ་འཁོར་དབུས་སུ་བཞག དར་ནག་གི་ལྡིང་གུར་ཕུབ་པ་ནི་མེད་ཐབས་མེད་ལ། འབྱོར་ན་ཆེ་མཆོག་གི་བུམ་གཅིག་སོགས་བཀའ་བརྒྱད་བདེ་འདུས་ལས་གསུངས་པ་ལྟར་གྲུབ་ན་ལེགས་ཤིང་། སྒྲུབ་པ་པོ་གཅིག་པུས་དབེན་པར་བསྙེན་སྒྲུབ་ཆིག་ཆོད་ཏིང་འཛིན་གྱི་བསྐྱེད་བཟླས་གཙོ་བོར་འདོད་ན་གཞུང་མཐུན་རས་བྲིས་ཀྱི་དཀྱིལ་འཁོར་སྟེང་། ཐོད་སྐུལ་དང་ཕུར་པ་སྔགས་བྱང་དང་བཅས་པ་བསྙེན་པ་ལ་འཇུག་པའི་སྐབས་ནས་བཀོད་པ་ལེགས་པར་སེམས། སྤྱིར་མཆོད་པ་དང་སྒྲུབ་རྫས་ཐམས་ཅན་བག་དྲོ་བརྗིད་ཆགས་པར་བྱས་ན་བྱིན་རླབས་ཆགས་པའི་རྟེན་འབྲེལ་ཡོད་པར་གསུངས། གཞན་སྒྲུབ་པའི་དུས། གྲོགས་ཡོ་བྱད་སོགས་ནི་དངོས་བསྟན་དུ་མ་གསུངས་པས་གསང་བ་སྤྱི་ལྟར་ཤེས་པར་བྱའོ། །གསུམ་པ་ལས་རིམ་གྱི་ཐོག་མར་སོ་ཐེར་གྱི་སྡོམ་པ་ཡར་ལྡན་བྱེད་བྱེད་ཅིང་ལོག་ལྟའི་གཉེན་པོར་སྐྱབས་འགྲོ་ནི། སྔགས་བླ་མེད་ཀྱི་ལམ་སྤྱི་ལ་ཐོག་མར་བསྐྱེད་རིམ་དག་རྫོགས་སྨིན་གསུམ་གནད་དུ་འབྱོར་བས་རྒྱུད་ལས་རུང་དུ་བྱས་ནས་གཟོད་རྫོགས་རིམ་ཐབས་གྲོལ་གྱི་ལམ་གྱིས་མཐར་དོན་གྱི་ཡེ་ཤེས་ཀྱི་མྱོང་བ་རྒྱུད་ལ་འདྲེན་དགོས་ཀྱང་། སྙིང་ཐིག་རང་གཞུང་ཐུན་མིན་གྱི་ལུགས་ལ་ཐོག་མར་དགོངས་བརྒྱུད་ཀྱི་བྱིན་རླབས་དང་ལྡན་པའི་བླ་མས་འོད་གསལ་རིག་པ་ངོ་སྤྲད་ནས་བླ་མ་རང་རིག་དབྱེར་མེད་དུ་ཤེས་པས་མཉམ་པར་བཞག་ཅིང་དེ་ཉིད་སྒྲུབ་བྱའི་ལྷའི་རྟེན་དང་བརྟེན་པའི་བསྐྱེད་བཟླས་བྱེད་པ་མཆོག་གི་བསྐྱེད་རྫོགས་དབྱེར་མེད་སྟེ། དེས་ན་སྔོན་དངོས་རྗེས་ཀྱི་ཉམས་ལེན་ཐམས་ཅད་དབང་བཞི་པའི་རྟོགས་པའི་ཡེ་ཤེས་བཙན་ཐབས་སུ་འདྲེན་པའི་ཐབས་ཁོ་ན་དངོས་བརྒྱུད་ནས་ཡིན་པར་ཤེས་པ་གལ་ཆེ་ཞིང་གསང་སྔགས་པས་འབྲས་བུ་སངས་རྒྱས་རྣམས་ཀྱི་སྐུ་གསུང་ཐུགས་ཡེ་ཤེས་ཆེན་པོ་བྱེད་རྩོལ་དང་བྲལ་བཞིན་དོན་གཉིས་ལྷུན་གྱིས་གྲུབ་པར་བཞུགས་པའི་མཛད་པ་དང་མཐུན་པ་ད་ལྟ་ནས་ལམ་བྱེད་ཀྱིས་སྒོ་གསུམ་ལྷ་སྔགས་ཡེང་ཤེས་སུ་དག་པར་སྦྱངས་དགོས་པས་སངས་རྒྱས་རྣམས་དང་པོ་ཐུགས་བསྐྱེད་པའི་ཡུལ་སངས་རྒྱས་ཞིག་གི་སྤྱན་སྔར་དམ་བཅའ་བ་ལྟར། རྒྱུ་གང་གིས་སྐྱབས་སུ་འགྲོ་ན་སྲིད་ཞིའི་མཐའ་དང་ཐ་མལ་གྱི་སྣང་ཞེན་འཇིགས་པ་། སྐྱབས་ཡུལ་གྱི་མཁྱེན་བརྩེ་ནུས་གསུམ་ལ་དད་པ། སེམས་ཅན་རྣམས་ཀྱང་སྡུག་བསྔལ་ལས་སྐྱོབས་ཕྱིར་སྙིང་རྗེ་གསུམ་གྱིས། ཚུལ་ཇི་ལྟར་སྐྱབས་སུ་འགྲོ་ན་སྣོད་བཅུད་དག་པ་རབ་འབྱམས་ཀྱི་ཞིང་ཁམས་ཆེན་པོར་ཡོངས་སུ་དག་པའི་དབུས་སུ། ཧཱུཾ་ཞེས་སངས་རྒྱས་ཀུན་གྱི་ཐུགས་སྲོག་ས་བོན་བརྗོད་པས་རང་ཉིད་གཉུག་མའི་ལྷར་གསལ་བའི་སྙིང་གའི་རིག་པ་བྱང་ཆུབ་ཀྱི་སེམས་ཧཱུྃ་ཡིག་གི་རྣམ་པ་ལས་བྱུང་བའི་འོད་ཀྱིས་སད་པར་བྱས་པའི་གང་ལ་སྐྱབས་སུ་འགྲོ་བའི་ཡུལ་ནི། ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད་སྐུ་འཇམ་དཔལ་གཤེགས་རིགས། གསུང་རྟ་མགྲིན་པདྨ། ཐུགས་ཡང་དག་དང་དྲེགས་འདུལ་རྡོ་རྗེའི་རིགས། ཡོན་ཏན་བདུད་རྩི་རིན་པོ་ཆེའི་རིགས། ཕྲིན་ལས་ཕུར་པ་དང་དྲག་སྔགས་ལས་ཀྱི་རིགས། རིག་འཛིན་དྲུག་པ་ཧེ་རུ་ཀའི་རིགས་ཀྱིས་བསྡུས་པའི་གསང་བ་མི་ཟད་རྒྱན་གྱི་འཁོར་ལོ་དང་རིགས་མཆོག་ཐམས་ཅན་ཡོངས་སུ་རྫོགས་པ་ནི་གདུལ་བྱའི་སྐལ་པ་དང་མཐུན་པའི་དཀོན་མཆོག་གསུམ་གྱི་རང་བཞིན་ཡང་། ཐུན་མོང་དང་ཐུན་མིན་དེ་བཞིན་མཐོང་བས་འདིར་དབང་པོ་རབ་ཀྱི་སྤྱོད་ཡུལ་ལྟར་གསང་སྔགས་བླ་མེད་ཀྱི་ལུགས་སངས་རྒྱས་ལོངས་སྐུ་ཆེན་པོ་ཡིན་ལ། དེ་དག་གི་སྐུ་གྲོལ་མཐར་ཕྱིན་པའི་དགེ་འདུན། གསུང་འགོག་ལམ་གྱི་བདེན་གཉིས་ཡོངས་རྫོགས་དམ་ཆོས། ཐུགས་སངས་རྒྱས་ཀུན་གྱི་ཡེ་ཤེས་སུ་དཀོན་མཆོག་རིན་པོ་ཆེ་རྣམ་པ་གསུམ་གཅིག་འདུས་ཀྱི་ངང་དུ་བཞུགས་པ་གཞན་རྒྱུད་བྱོན་ཟིན་གྱི་མཆོག་གསུམ་ལ་སྟོན་པ། ལམ་གྲོགས་ཀྱི་ཚུལ་དུ་ཡིད་ཆེས་དད་པས་དུས་འདི་ནས་བྱང་ཆུབ་སྙིང་པོའ་ིབར་བློ་གཏད་ལིང་སྐྱུར་དུ་སྐྱབས་སུ་ཞུ་བ་མདོ་སྔགས་ཐུན་མོང་གི་ཕྱིའི་སྐྱབས་འགྲོ། རིགས་ལྔ་ཞི་ཁྲོའ་ིརྒྱུད་སྡེ་རྒྱ་མཚོའི་ལྷག་པའི་ལྷ་དཀྱིལ་འཁོར་གཅིག་དྲིལ་དུ་རྫོགས་པའི་སྤྱི་དཔལ་ཆེན་པོ་ཁྲོ་རྒྱལ་སྟོབས་ཀུན་འདུས་པའི་གཅིག་གི་གསང་གསུམ་གྱི་ངོ༵་བོར༵་ཡོངས༵་སུ་རྫོགས་པར་ཤར༵་བ༵་ནི་ནང་དུ་རང་གི་ཕུང་ཁམས་སྐྱེ་མཆེད་ཚོགས་བརྒྱད་དབང་ཡུལ་དང་བཅས་པ་བདེ་བ་ཆེན་པོའ་ིཡེ་ཤེས་ཀྱི་རོལ་པར་གདོད་ནས་དག་པའི་ཆོས་ཉིད་དང་འདུ་འབྲལ་མེད་པས་རྩ་གསུམ་ཀུན་འདུས་སུ་རང་ངོ་ཤེས་པ་ནི་སྔགས་སྤྱིའི་ཐུན་མིན་ནང་གི་སྐྱབས་འགྲོ། དེ་ཐམས་ཅད་ཀྱང་རིན་པོ་ཆེའི་གྱང་བུ་གཅིག་གི་ངོས་ལ་རི་མོ་སྣ་ཚོགས་བྲིས་པ་བཟང་ངན་མེད་པ་བཞིན་དཀྱིལ་འཁོར་སྤྲུལ་བཤད་སྤྲོ༵་བསྡུས༵་ཐམས་ཅན་ཀྱི་འཕྲོ་གཞིའམ་བྱེད་༵པ་པོ༵་ནི། ཆོས་ཉིད་བྱང༵་ཆུབ༵་ཀྱི་སེམས༵་ཡེ་ཤེས་ཀློང་དགུའི་ངོ་བོར་གཞི་གནས་ཀྱི་ཡེ་ཤེས་གཅིག་གི་བདག་ཉིད་དུ་ངེས་པ་དོན་གྱི༵་ལྷར༵་རང་ལ་རྫོགས་པར་རང༵་ངོ༵་ཤེས༵་པའི༵་ལྟ་བུའི་ངང༵་བརྐྱང་ནས༵་མྱོང་བའི་རྒྱུན་མ་ཉམས་པར་བསླབ་པ་ནི་རྡོ་རྗེ་སྙིང་པོ་གསང་བའི་སྐྱབས་འགྲོ་སྟེ། རྣམ་བཞག་དེ་དག་ཀྱང་རྒྱུ་འབྲས་ཀྱི་ཚུལ་དུ་རིམ་པར་ཉམས་སུ་ལེན་དགོས་པས་ན་འགལ་མེད་གཅིག་དྲིལ་དུ་ཤེས་པས་བདེན་གཉིས་ཟུང་འཇུག་གི་སྐྱབས་འགྲོའ་ིདོན་ལ་བློ་བཞག་པས་སྐྱབས་སུ་འགྲོ་བའི་རྟེན་གྱི་གང་ཟག་མཁའ་ཁྱབ་སེམས་ཅན་ཐམས་ཅད་ཀྱང་ཚོགས་ཞིང་གི་སྤྱན་སྔར་འཁོད་པས་བདག་གི་རྗེས་སུ་སློབ་པས་སྐྱབས༵་སུ་༵མཆི༵་བར་བསམ་པས་སྐྱབས་འགྲོ་བྱ་ཞེས་སོ། །དམིགས་རིམ་འདི་སྨིན་སློབ་ཏུ་བྱེད་ན་ཕྱི་ནང་གསང་བ་དེ་ཁོ་ན་ཉིད་ཀྱི་སྐྱབས་འགྲོའ་ིརྣམ་བཞག་བློ་སྦྱངས་པས་ངེས་པ་འདྲོང་བར་བྱ་ཞིང་། ཕྲིན་ལས་དཀྱུས་ཀྱི་སྐབས་སྐྱབས་ཡུལ་ཐམས་ཅས་ཆིག་རྫོགས་སུ་བཞུགས་པར་བསམ་ལ། འཁོར་འདས་མཉམ་སྦྱོར་གྱི་ཐལ་མོ་སྙིང་གར་སྦྱར་ནས་དད་པའི་བློས་མོས་པ་ལམ་དུ་བྱས་ཀྱང་རུང་གསུངས། སྐབས་འདིའི་སྦྱང་གཞི་སྦྱིར་རང་སྣང་མ་དག་པ་ཐམས་ཅད་དང་། ཁྱད་པར་འཇིག་རྟེན་པའི་སྐྱབས་མི་དཔོན། མཁར་རྫོང་། དམག་རི་སོགས་དང་། མུ་སྟེགས་པ་ཚངས་པ་དང་དབང་ཕྱུག་སོགས་ཕྱི་པའི་ལྷ་བདུད་བཙན་ཀླུ་སོགས་སྐྱབས་སུ་འགྲོ་མི་འོས་པའི་ལོག་པའི་སྐྱབས་ཡུལ་དང་། ཡང་དག་པའི་སྐྱབས་བསླུ་བ་མེད་པ་བླ་མ་དང་དཀོན་མཆོག་ལ་ལོག་ལྟ་དང་མ་གུས་པ་བགྱིས་པ་དང་། མཐར་ཐུག་གི་སྐྱབས་རང་རིག་བདེ་གཤེགས་སྙིང་པོ་ལ་ཡེ་རྫོགས་སུ་བཞུགས་པ་མ་ཤེས་པའི་འཁྲུལ་རྟོག་གི་སེམས་སྣང་བག་ཆགས་དང་བཅས་པ། སྦྱོངས་བྱེད་ཀྱི་ནང་གསང་བའི་སྐྱབས་འགྲོ་གཞུང་ལྟར་ཉམས་སུ་བླང་བས། སྦྱངས་འབྲས་སྐྱབས་གསུམ་གྱི་ཡོན་ཏན་རང་རྒྱུད་ལ་རྫོགས་པའི་ཐབས་ཐུན་མོང་མ་ཡིན་པ། བྱེད་ལས་གྲུབ་འབྲས་ཡེ་ཤེས་ཟབ་མོའི་མྱོང་བ་རྒྱུད་ལ་སྐྱེས་པ་སྟེ་ནང་པ་སངས་རྒྱས་པའི་ལམ་གྱི་རྨིང་རྡོ་འདི་ཁོ་ན་ཡིན་ཅིང་ཕན་ཡོན་ཚད་མེད་པས་ཉམས་ལེན་གནད་དུ་འགྲོ་བ་ཅིས་ཀྱང་གཅེས་པའོ། །དངོས་གཞི་བསྐྱེད་རིམ་གྱི་གསལ་སྣང་སྒྲུབ་པའི་སྐབས་སུ་གསལ་བརྟན་དག་གསུམ་ཚུལ་བཞིན་མ་ཤེས་ན་ཡི་དམ་གྱི་ལྷ་དང་བླ་མ་དབྱེར་མེད་པ་ལ་སྐྱབས་འགྲོའ་ིའདུན་པས་ཡིད་ཆེས་ཀྱི་དད་པ་ཕྱིར་མི་ལྡོག་པས་གསོལ་བ་བཏབ་ན་དངོས་གྲུབ་ཐོབ་པ་ལ་གནད་ཟབ་པ་ཆོས་རྗེ་དཔལ་སྤྲུལ་རིན་པོ་ཆེའི་སྲོག་སྡོམ་གཟེར་བཞིའི་ལྷ་ཁྲིད་ལས་གསུངས་པ་དང་། འཇམ་མགོན་མི་ཕམ་རིན་པོ་ཆེའི་ཕྱི་ནང་གསང་བའི་བསྙེན་སྒྲུབ་སྤྱིའི་རྣམ་བཞག་ལས་ཀྱང་། ལྷག་པའི་ལྷ་ནི་རྣམ་གྲོལ་ཡེ་ཤེས་ཀྱི་སྐུ་ཅན་དོན་གཉིས་མཐར་ཕྱིན་མཁྱེན་བརྩེ་ནུས་པ་ཚད་མེད་པས་སྨོན་ལམ་དང་ཡེ་ཤེས་ཀྱིས་དངོས་གྲུབ་ཡིད་བཞིན་དུ་སྩོལ་བ་ལ་བསླུ་བ་མེད་པ་དང་བསྐྱེད་བཟླས་མཆོད་སྒྲུབ་བྱས་ན་བདག་འཆིང་བ་ཀུན་ལྡན་ལ་བྱིན་རླབས་ཀྱིས་གཏན་བདེ་ལ་འགོད་ངེས་སྙམ་པ་ཕྱི་ལྟར་སྒྲུབ་པའི་ཚུལ་བཞིན་སྒྲུབ་ན་ཐུགས་རྗེ་ཆེན་པོའ་ིའབྲེལ་བའི་ཕྱིར་དང་། སྨོན་ལམ་དང་ཡེ་ཤེས་ཀྱི་དབང་གིས་ངེས་པར་རྗེས་སུ་འཛིན་པར་གསུངས་པ་རྣམས་དགོངས་པའི་གནད་གཅིག་པའོ། །བཞི་པ་བྱང་སེམས་ཀྱི་བསླབ་པ་མ་ཉམས་པར་བྱེད་ཅིང་ཐེག་དམན་གྱི་གཉེན་པོ་སེམས་བསྐྱེད་ནི། ཧཱུྃ་ཞེས་སངས་རྒྱས་རྣམས་ཀྱི་ཐུགས་རྣམ་པ་ཐམས་ཅན་མཁྱེན་པའི་ཡེ་ཤེས་དང་དམིགས་མེད་སྙིང་རྗེ་ཆེན་པོ་ཟུང་དུ་འཇུག་པའི་སྒྲིབ་པ་སྤང་བའི་སེམས་བསྐྱེད་མཚོན་པའི་ཐུགས་ཀྱི་ས་བོན་བརྗོད་པ་དང་བཅས། ཆོས༵་ཀྱི་༵དབྱིངས༵་ཀ་དག་ཐོག་མའི་སྤྱི་གཞིའི་ངང་ལ་འཁོར་འདས་སྤང་བླང་གི་ཕྱོགས་རིས་མེད་པ་བདག་གཞན་མཉམ༵་ཉིད་བདེ་བ་ཆེན་པོ་གཅིག་ཏུ་བརྡལ༵་བས་གནས་ཞེས་པའི་དོན་རང་ངོ་ཤེས་པ་ནི་དོན་དམ་སེམས་བསྐྱེད་དང་། ཡང༵་ཞེས་པ་ཕྱི་མ་ཀུན་རྫོབ་སེམས་བསྐྱེད་སྡུད་པའི་དོན་ཏེ། དེ་ལྟར་གནས་ལུགས་མ༵་རྟོགས་པས་རིག་རྩལ་ལ་བདག་ཏུ་ཞེན་ནས་མེད་སྣང་རིགས་དྲུག་གི་གནས་དོན་ལུས་ཀྱི་འཁྲུལ༵་པའི་རྒྱུ་འབྲས་རང་རྒྱུད་ཞེན་པས་ཐོག་མ་མེད་པའི་དུས་ནས་སྐྱེ་ཤིའི་ཁ་བརྒྱུད་དེ་འཁྱམ༵ས་པ༵་ལ་ཚད་མེད་བཞིའི༵་ཤུགས་ཀྱིས་དྲངས་པས་རྗེས་སུ་འཛིན་པ་དང་། ལྷག་པར་རྒྱུད་མི་སྲུན་པའི་སྤྱོད་པ་བརླང་པོ་ཅན་རྡོ་རྗེ་ཐེག་པའི་གདུལ་བྱ་ཡིན་པས་བདག་༵འཛིན་༵དུག་གསུམ་ཤུགས་དྲག་པོའ་ི ཉིང་འཁྲུལ་དུ་གྱུར་པའི་རུ་ཏྲ་སྡེ་གསུམ་གྱི་བདུད་༵བཞིའི་དཔུང་མངོན་སྤྱོད་ཀྱི་ཕྲིན་ལས་ཀྱིས་ཚར་གཅོད་དེ་གནས་ལུགས་མཐར་ཐུག་འོད་༵གསལ༵་ཆོས༵་ཀྱི་སྐུ་༵ཟག་མེད་ཆོས་ཁམས་རྒྱ་མཚོ་ལྷུན་གྱིས་གྲུབ་པ་འབྲས་བུ་མི་སློབ་པ་མཐར་ཐུག་གི་ཡེ་ཤེས་ཀྱི་ཀློང༵་དུ་༵བཀོད་པས་སྲིད་ཞིའི་མཐའ་གཉིས་ལས་བསྒྲལ༵་བའི༵་ཕྱིར༵། འབྲས་བུ་གསང་སྔགས་ཀྱི་ལོངས་སྐུ་ཁྱད་པར་བ་བླ་མ་ཤིན་ཏུ་དྲག་པོ་གཏུམ་ཆེན་མཐིང་ག་དང་། དེའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྣམ་རོལ་དཔལ༵་ཆེ༵ན་པོ་སྒྲུབ་སྡེ་བརྒྱད་ཀྱི་ལྷ་༵ཚོགས༵་གཅིག་དྲིལ་གྱི་བསྐྱེད་རྫོགས་ཟབ་མོའ་ིབསྒྲུབ༵་པ༵ས་རྒྱལ་བའི་སྲས་ཀྱི་སྤྱོད་པ་རླབས་པོ་ཆེ་ཡུད་ཙམ་གྱིས་ཡོངས་སུ་རྫོགས་པའི་གོ་ཆ་ལྷུར་བླང་བར༵་བགྱིའོ་སྙམ་པ་སྨོན་འཇུག་གཉིས་མེད་ཀུན་རྫོབ་སེམ༵ས་བསྐྱེད་༵ དོ༵་སྙམ་པའི་དམ་བཅས་སྐྱབས་ཡུལ་གྱི་ཚོགས་ཞིང་རྣམས་དཔང་པོར་བཞུགས་པ་ལས་ལེན་པའོ། །དེས་ན་མཚམས་ཀྱི་ཐོག་མཐའ་ཀུན་ཏུ་སེམས་ཅན་ཐམས་ཅད་ཀྱི་དོན་དུ་བདག་གིས་ལྷག་པའི་ལྷ་བསྒྲུབ་སྙམ་པའི་སྨོན་པ་དང་། སྒོ་གསུམ་གྱི་རྣམ་དཀའ་ཕར་ཕྱིན་དྲུག་ལྡན་དུ་སློབ་པ་འཇུག་པ། དེ་ཐམས་ཅད་བློ་འདས་ཀྱི་དྲན་པའི་རྩིས་ཟིན་པ་དོན་དམ་སེམས་བསྐྱེད་དེ། ཐེག་པ་ཆེན་པོ་མདོ་སྔགས་དགོངས་གཅིག་གི་ཟབ་གནད་དུ་ཤེས་པས་ཉམས་སུ་ལེན་པ་གལ་ཆེའོ། །འདིས་སྦྱངས་གཞི་རང་དོན་ཡིད་བྱེད་ཀྱི་བློ་ངན་གྱི་གཉེན་པོར་སྦྱོངས་བྱེད་སེམས་བསྐྱེད་ཀྱི་རྣལ་འབྱོར་ཟབ་མོའ་ིསྦྱངས་འབྲས་སྐུ་གཉིས་ཐོབ་པར་བྱེད་པའོ། །གསུམ་པ་ཚོགས་བསགས་པ་ནི། སངས་རྒྱས་རྣམས་ཀྱིས་གྲངས་མེད་གསུམ་དུ་ཚོགས་བསགས་པ་དང་མཐུན་པར་ཐབས་མཁས་ལྟ་སྒོམ་ཁྱད་པར་ཅན་གྱི་རྩིས་ཟིན་པས་རྒྱུན་བཤགས་ཡན་ལག་བརྒྱད་ཀྱིས་བསགས་སྦྱངས་བྱ་བ་སྟེ། སྦྱངས་གཞི་སྒོ་གསུམ་ཐ་མལ་གྱི་བྱ་བྱེད་རྒྱུ་འབྲས་དང་བཅས་པ། སྦྱངས་བྱེད་ཚོགས་གཉིས་རྫོགས་སྨིན་སྦྱངས་སྟོབས་རྨད་དུ་བྱུང་བའི་ཐབས་མཁས་ཀྱི་སྒོ་དུ་མས། སྦྱངས་འབྲས་སྐུ་བཞི་བདེ་བ་ཆེན་པོ་བསྐལ་པ་གྲངས་མེད་ཀྱི་ངལ་དུབ་ལ་མ་ལྟོས་པར་ཚེ་ལུས་གཅིག་གི་སྟེང་མངོན་དུ་བྱེད་པ་ཚོགས་བསགས་ཀྱི་རིམ་པ་སྟེ། ཡན་ལག་བདུན་པའི་བསགས་སྦྱངས་ཙམ་མདོ་སྔགས་ཐུན་མོང་ཡིན་ཀྱང་ཏིང་འཛིན་དམིགས་པའི་ཟབ་ཁྱད་ཀྱིས་གནད་དང་ལྡན་པ་དེ་ཡང་རྒྱུད་ཆེན་པོ་སྒྱུ་འཕྲུལ་གྱི་དགོངས་པ་ལྟར་ཡན་ལག་བརྒྱད་ཀྱི་དོན་ནི། ཚོགས་ཞིང་གི་ཡོན་ཏན་ལ་དྭངས་བའི་ཡིད་ཀྱིས་ཧོ༵ཿ ཞེས་ངོ་མཚར་བརྗོད་པ་དང་བཅས། མཚོན་བྱེད་རྫས་ཀྱི་རྡོ་༵རྗེ་༵ཕ་ལམ་དང་ཆོས་མཚུངས་པས་མཚོན་བྱ་དོན་གྱི་རྡོ་རྗེ་ཆོས་ཉིད་ཀྱི་དོན་རང་གིས་གཟིགས་ཤིང་། གོ་འཕང་དེ་ལ་གཞན་ཡང་དཀྲི་མཁས་པའི་སློབ༵་དཔོ༵ན་ནི་དུས་གསུམ་བྱོན་པའི་སང༵ས་རྒྱས༵་ཐམས་ཅད་ཀྱི་ངོ་བོ་བཀའ་དྲིན་དེ་དག་ལས་ལྷག་པའི་དཔལ༵་གྱི་སྒྲས་བསྔགས་པ་སྟེ། དུས༵་གསུམ༵་སངས་རྒྱས་སོགས་མཆོག་གསུམ་རྩ་གསུམ་སྐུ་གསུམ་ཀུན་འདུས་ཀྱི་ངོ་བོ་ཐུགས་རྗེ་ལ་བྲི་གང་མེད་པས་བཞུགས༵་པའི་སྒྲས་རྟེན་ལ༵་ཕྱག་༵འཚ༵ལ་ལོ། །ཞེས་ཡན་ལག་དང་པོ་དང་། དཀོན་མཆོ༵ག་གསུམ༵་པོ་ནི་སློབ་པ་ལམ་གྱི་གནས་སྐབས་ན་སྟོན་པ་ལམ་གྲོགས་ཀྱི་ཚུལ་དུ་དད་པས་བརྟེན་༵པའི༵་ཚོགས་ཀྱི་ཞིང༵་བླ་མེད་དུ་གྱུར༵་པ་ལ་༵དེ་དག་ཡོན་ཏན་རང་རྒྱུད་ལ་སྒྲུབ་པའི་བློས་རྒྱུ་འབྲས་གཉིས༵་སུ་མེད་༵པར་ཤེས་པའི་ཡིད་ཀྱིས༵་སྐྱབས༵་སུ་མཆི༵་བ་དང་། བླ་ན་མེད་པའི་མཆོད་པ་དངོ༵ས་འབྱོར༵་དང་། བླ་ན་མེད་པའི་མཆོད་པ་ཀུན་ཏུ་བཟང་པོའ་ིཏིང་འཛིན་ཡིད་༵ཀྱིས༵་རྣམ༵་པར་སྤྲུལ༵་པའི༵་ཞིང་དང་དངོས་པོ་བསམ་པ་དག་༵པ༵འི་མཆོ༵ད་པ༵་བཞེ༵ས་སུ་གསོལ༵་བར་ཞུས་པ་དང་། མཆོག་ཐུན་གྱི་དངོས༵་གྲུབ༵་ཆུ་༵བོ༵་ལྟ་བུར་ཐོབ་པ་ལ་བར་དུ་གཅོད་༵པའི་བགེགས༵་ཀྱི་གཙོ་བོ་སྒོ་གསུམ་གྱི་ཉེས༵་བྱས༵་དམ་ལྡོམ་ཉམས་ཆགས་མ༵་ལུས༵་པ་ཐམས་ཅད་སྟོབས་བཞིའི་གནད་ལ་བརྟེན་ནས་བཤག༵ ས་པ༵་འབུལ་བར་བ༵གྱི་སྙམ་པའོ། །ཤར་སོགས་ཕྱོགས༵་བཅུ་༵དང་བདག་གཞན་ཐུན་མོང་དུ་དམིགས་པའི་འཁོར་༵གསུམ༵ ། རང་བཞིན་མེད་པའི་དེ་ཁོ་ན་ཉིད་ཁོང་དུ་ཆུད་པ་ནི་བདེན་གཉིས་དབྱེར་མེད་དུ་དག་༵པའི༵་ཆོས༵་ཉིད་དེ། དེའི་ངང་ནས་བདག་གཞན་གང་ལའང་མ༵་ཆགས༵་མ་སྡང་བར་དགེ་བ་ལ་སྤྱོད་༵ ཅིང་འཁོར་གསུམ་དུ་དམིགས་པས་མ་ཞེན་པར་སྒྱུ་མ་ལྟ་བུའི་ཚོགས་གཉིས་ལ༵་གོམ་དུ་འཇུག་པ་ནི་དོན་དམ་པའི་རྗེས༵་སུ་ཡི༵་རངས༵་པའོ། །ཀུན་རྫོབ་ཚད་མེད་བཞི་དང་དོན་དམ་རྟག་ཆད་ཀྱི་དག་༵པའི༵་མཐ༵འ་བ༵ཞི་སྤྲོས་བྲལ་དྲི༵་མ༵་མེད་༵པའི་གནས་ལུགས་ཀྱི་ངང་དུ་སྒྱུ་མ་ལྟ་བུའི་ལམ་བདེན་གྱི་ཚོགས་གཉིས་ཐམས་ཅད་རྫོགས༵་སྨིན་སྦྱངས་བ༵འི་བདེན་གཉིས་དབྱེར་མེད་དུ་བྱང༵་ཆུབ༵་ཀྱི་སེམས༵་བསྐྱེད་༵པའོ། །བདེ༵་གཤེགས༵་འདས་པ། དབང༵་ཕྱུག་༵ད་ལྟ། སེམས༵་ཅན་༵མ་འོངས་པའི་སངས་རྒྱས་རྣམས་ལ༵་འབྲས་བུ་མངོན་དུ་གྱུར་པ་དང་། དབང་དང་བྱིན་རླབས་ཀྱི་སྣོད་དུ་རུང་བ་དང་། གཞན་དོན་མཐར་ཕྱིན་པའི་དགོས༵་པ༵་གསུམ༵་ཐོབ་པའི་ཕྱིར༵་བདག་འཛིན་གྱི་བཅིངས་པའི་ལུས༵་གཅེས་འཛིན་བློས་བཏང་སྟེ་དབུལ༵་ལོ༵་སྙམ་པས་བདག་མེད་རྒྱལ་བའི་ཞིང་དུ་སྤྱོད་ནུས་པ་དང་། བདག་ཉིད་གཅིག་པ་དང་ལྷན་སྐྱེས་ཀུན་བརྟགས་ཀྱི་མ་རིག་པ་གསུམ་གྱིས་འཁྲུལ་པ་ཚེ༵་རབས༵་ཐོག་མར་བགྲང༵་སྟེ་དེ་ནས་ད་ལྟའི་བར་གྱི་བསམ་པ༵་ཡིད། སེམས་དང་ལུས་ངག་གི་དཀར་པོའི༵་ལས༵་རྣམ༵ས་ཀུན་༵སྙིང་རྗེའི་ཐབས་མཁས་དང་ཤེས་རབ་ཟུང་འཇུག་གིས་གཅིག་ཏུ་བསྡུས༵་ཏེ༵་རྫོགས་པའི་བྱང༵་ཆུབ༵་ཆེན༵་པོ༵་ཐོབ་པའི་རྒ ྱ ― ARJ001_Page_0007 ―
[མ་དཔེ་གཟིགས་ན་འདིར་གནོན།]
ུར༵་བསྔོ༵་བ་སྟེ་ཡན་ལག་བརྒྱད་དོ། །དེ་དག་གིས་རྒྱུད་དག་པར་བྱས་ནས་ཚོགས་ཞིང་རང་ལ་བསྡུས་ཏེ་དངོས་གྲུབ་མཆོག་གི་སྣོད་རུང་དུ་གྱུར་བའོ། །བཞི་པ་གཏོར་མ་བཏང་བ་ལ། བསྙེན་པ་འཇུག་པའི་ཐོག་མ་དང་། སྒྲུབ་ཆེན་དང་སྒྲུབ་པའི་སྐབས་འདིར་ཐ་ཚིག་ལ་གནས་པའི་དཀར་ཕྱོགས་ཀྱི་དགེ་བསྙེན་ལ་དཀར་གཏོར་བཏང་ཞིང་ཕྲིན་ལས་བཅོལ། དགེ་བའི་ལས་ལ་བར་དུ་གཅོད་པའི་ནག་ཕྱོགས་ལ་གཏོར་མས་བརྔན་ཏེ་བསྐྲད་པ་ནི། སྟོན་པ་སངས་རྒྱས་པའི་སྔ་ལོག་བདུད་ཀྱིས་བར་གཅོད་བརྩམས་པའི་ཚེ། ས་ཡི་ལྷ་མོས་རྫོགས་སྨིན་སྦྱངས་མཐར་སོན་པའི་དཔང་པོར་ཞུས་པ་དང་། ཐེག་ཆེན་ཐུན་མོན་ལྟར་ན་སྲོད་ལ་བྱམས་པའི་ཏིང་ངེ་འཛིན་དང་། རྒྱུད་རྣམས་ཀུན་གྱི་གླེང་གཞིར་དེ་བཞིན་གཤེགས་པས་གཤིན་རྗེ་དང་ཁྲོ་བོ་མི་གཡོ་བ་དང་སྒྲོལ་མ་བཅས་སྤྲུལ་པའི་སྟོབས་ཀྱིས་བདུད་བཏུལ་བ་དང་མཚུངས་ཏེ། ཧཱུཾ་གི་སྒྲ་ནི་འཇོམ་པ་ལ་འཇུག་པས་ཧཱུཾ་ཞེས་བརྗོད་པ་དང་རང་ཉིད་བགེགས་ཚོགས་ཐམས་ཅན་འཇོམས་བྱེད་ཀྱི་སྤྱི་དཔལ་ཆེན་པོ་ཞེ་སྡང་རྡོ་རྗེ་ཧེ་རུ་ཀ་སྔོན་པོ་རྡོ་རྗེ་དང་དུང་ཁྲག་འཛིན་པ་བཟོད་པར་དཀའ་བའི་གཟི་བྱིན་ཅན་གྱི་ང་རྒྱལ་གྱིས་ཐུགས་ཀའི་འོད་ཀྱིས་མགྲོན་རྣམས་མདུན་དུ་བཀུག་ལ། དངོས་སུ་བཤམས་པའི་གཏོར་མ་ཡོད་ན་རྫས་སྔགས་ཏིང་འཛིན་གསུམ་ལྡན་གྱིས་བྱིན་གྱིས་བརླབས་ཏེ་སྔགས་ཀྱིས་བསྔོས་ལ་བཀའ་བསྒོ་བ་ནི། མ་ཏོག་འཁྲུལ་པའི་སེམས་ཅན་རྣམས་བདག་དང་བདག་གིར་འཛིན་པའི་གཉེན་པོར་ང༵་ནི༵་རྡོ་རྗེའི་ཡེ་ཤེས་ཀྱི་མཚོན་ཆས་ལོག་རྟོག་འཇོམས་པའི་ཁྲོ་རྒྱལ། ཆོས་ཅན་འཁོར་འདས་ཡོངས་ལ་འདོད་རྒུར་དབང་བསྒྱུར་བའི་སྤྱི༵་དཔལ༵་ཆེན་༵པོ༵་ཆོས་ཉིད་གདོད་ནས་དག་པས་བདུག་ཚོགས་ཉིད་དང་ནམ་ཡང་ལྷན་ཅིག་མི་གནས་པའི་ཁྲག་འཐུང་ཁྲོ་བོའ་ིརྒྱལ་པོ་སྟེ༵། བདག་གིས་དེའི་གོ་འཕང་བྱང༵་ཆུབ༵་ཆེན་པོ་སྲིད་ཞིའི་མཐའ་ལ་མི་གནས་པར་བསྒྲུབ༵་པ་ལ༵་བར༵་དུ་གཅོད་༵པ་ནི་སྒྲིབ་པའི༵་དྲི་མ་དང་བཅས་པའི་སེམས་བདུད་དང་གནོད་༵བྱེད་༵རྒྱུ་འབྲས་ལོ༵ག་པར་སྤྱོད་པས་སེམས་ཅན་ངན་འགྲོར་འདྲེན་པའི་འབྱུང་པོ་རྣམ༵ས་སྟོང་དང་སྙིང་རྗེ་དབྱེར་མེད་བྱང་ཆུབ་སེམས་ཀྱིས་བྱིན་གྱིས་བརླབས་པའི་འདོད་ཡོན་མཁོ་དགུའི་གཏོར༵་མ༵་སྔོན་གྱི་ལན་ཆགས་སྦྱངས་པའི་ཕྱིར་བྱིན་པ་འདི་ལོངས༵་ལ༵་གནས་འདིར་མ་འདུག་པར་རྒྱ་མཚོ་ཆེན་པོའ་ིམཐར་ཕྱིར༵་དེངས༵་ཤིག་གལ༵་ཏེ༵་བཀའ༵་བསྒོ་ཞིང་བརྔན་སྟེར་བས་མ་ཚིམ་པར་ལུས་སེམས་མ་རུངས་པས་ད་དུང་བྱང་ཆུབ་སྒྲུབ་པ་ལ་བར་གཅོད་བརྩམས་ཏེ་རྡོ་རྗེའི་སྲུང་འཁོར་གྱི་རྭ་བས་མཚམས་བཅད་པ་ལུས༵་འད༵འ་བར་བྱེད༵་པ་རྣམས༵་ཡེ་ཤེས་རོལ་པའི་མཚོན་ཆས་བརྡུངས་ཏེ་ཡན་ལག་གི་མཆོག་མགོ༵་བོ༵་ཨ་རྫ་ཀའི་འབྲས་བུ་བཞིན་ཚལ༵་པ༵་བརྒྱར༵་འགས༵་ཤི༵ང་། ལུས༵་ནི་༵རྡུལ༵་བྲན་༵བཞི༵ན་དུ་བཤི༵ག་སྟེ་བཅོམ་ངེས་པས་བག་ཡོད་པར་གྱིས་ལ་སོང་ཤོག་ཞེས་བརྗོད་པ་དང་དྲག་སྔགས་མེ་དཔུང་མ་བཟླས་ཞིང་ནག་པོའ་ིཚོགས་འདུལ་བའི་ཏིང་ངེ་འཛིན་གྱིས་གཟིར། བགེགས་ཚོགས་འཇོམས་པའི་ཐུན་ཡུངས་ཀར་གྱི་ཆར་འབེབས་པ་དང་བཅས་བརྡེགས་ཏེ། ཨོ༵་བ༵ཛྲ་མ༵་ཧཱ་༵ཀྲོ༵་ངྷ་༵ནི་རཱ་ཁྲོ་བོ་ཆེན་པོ་སྟེ་སྤྱི་དཔལ་ཧེ་རུ་ཀ་པ༵་པདྨ་༵ཀྲོ༵་དྷི་ཤྭ་༵རཱི༵་ནི་པདྨ་དབྱིངས་ཕྱུགས་སྟེ་ཡབ་ཡུམ་གནམ་ཞལ་མ། བ༵ཛྲ་ཀཱི་ལི༵་ཀཱི་ལ༵་ཡ༵་ནི་ཡབ་ཡུམ་གཉིས་ཀྱི་འབར་བའི་ཕྱག་མཚན་རྡོ་རྗེ༵་ཕུར་པའི་ཆར་ཆེན་པོ་དང་། མ༵་ཧཱ་༵ཡ༵ཀྴ་སྤྲུལ་པའི་ཕོ་ཉ་གནོད་སྦྱིན་ཆེན་པོ། ཀཱ་༵ལ༵་རཱུ་༵པ༵་ནག་པོའ་ིགཟུགས་ཅན་སྤྲོས་ཏེ། ཀ༷རྨ༵་རཾ་རཾ་ཕྲིན་ལས་མེ་དཔུང་། ཛྭ་༵ལ༵་རཾ་འབར་བའི་མེ་དང་བཅས་པས་ཧཱུཾ་ཕ༵ཊ་ནག་ཕྱོགས་འཇོམས་ཤིག་བཅས་པའོ། །བསྙེན་མཚམས་ཀྱི་སྐབས་འདི་ནས་དཀར་གཏོར་དང་གསེར་སྐྱེམས་ཕུལ་ལ། མཚམས་ཐོ་རྒྱལ་ཆེན་སྡེ་བཞི་དཔལ་མགོན་བདུན་ཅུ་དང་བཅས་པར་བསྐྱེད་ལ། མཆོད་སྦྱིན་གཏོར་མ་འདི་བཞེས་ལ། སོགས་ཀྱིས་གཏོར་མ་དང་གསེར་སྐྱེམས་ཕྱི་རོལ་དུ་ཕུལ་བས་དགྱེས་བཞིན་བཞུགས་པས་བར་ཆད་སྲུང་བར་བསམ་ཞེས་རིག་འཛིན་ཡབ་བཀའ་བསྙེན་ཡིག་ལས་གསུངས་པ་ལྟར་ཤེས་པར་བྱ་དགོས་པ་དང་། ལྔ་པ་སྲུང་འཁོར་ནི་བསྙེན་མཚམས་དང་སྒྲུབ་ཆེན་སྐབས་འདིར་རྒྱལ་ཐོ་བཞག་ནས་ཉིན་རེ་བཞིན་རྒྱལ་ཆེན་བཞིའི་དམག་དཔུང་གིས་ཕྱོགས་བཞི་སྲུང་བར་གསལ་ཞིང་མཆོད་གཏོར་འབུལ་བ་ནི་ཕྱི་མཚམས་བཅད་པ་དང་། ཧཱུཾ་ནི་སྡུག་བསྔལ་འཇོམས་ཤིང་འཆོས་པ་འཇུག་པས་དེ་ཉིད་བརྗོད་པས་སྡུག་བསྔལ་གྱི་བདེན་པའི་རྒྱུ་འབྲས་ཀྱི་རང་གཟུགས་གདོན་བགེགས་འཇོམས་ཤིང་བར་གཅོད་མི་འཇུག་པར་འཆོས་པའི་སྲུང་པའི་ཕྱིར་བ༵དག་ཉིད་༵ལས་ཀྱི་ཁྲོ་བོ་ཞེ༵་སྡང༵་རྡོ་རྗེ་ཡི་སྤྱན་མིག་གཡས་གཡོན་ཉི༵་ཟླའི༵་འོད་རྣོན་འབར༵་བའི་སྡང་མིག་གི་མེ་ཆུའི་ཟེར་གྱིས་གཟིར་ཞིང༵་ཞབས་རྡོ་རྗེའི་འགྲོས་དང་གསུང་ཧཱུཾ་ཕཊ་ཀྱི་ང་རོ་བཅས་པས་སྣང་སྲིད་མེ་དཔུང་འབར་བས་བགེགས་ཚོགས་བསྲེགས་པར་བསམ་པ་འབར་བ་སྟངས་སྟབས། དབུས་སུ་སྣང་སྲིད་གནམ་ལྕགས་ཀྱི་འཁོར་ལོ་རྩིབས་བཅུ་པའི་ནང་ཕྱོགས་སྐྱོང་བཅུ་བཀུག་སྟེ་གདན་དུ་གན་རྐྱལ་བྱས་པ་ལ། སྔར་ཐུགས༵་ལ༵ས་སྤྲོས་པའི་ཁྲོ་༵བོའི༵་ཚྭ་༵ཚྭ་༵སྤྲོས་པ་རྣམས་ཚུར་འདུས་པ་ལས། ཧཱུཾ་ཀར་སོགས་ཁྲོ་རྒྱལ་བཅུ་ཞལ་གསུམ་ཕྱག་དྲུག་སྐུ་སྨད་ཕུར་བུའི་རྣམ་པས་གདོན་ཚོགས་གཟིར་ཞིང་མནན་པས་རྟོག་མེད་བདེ་ཆེན་དུ་བརྒྱལ་བར་བསམ་པ་སྲུང་བ་འཁོར་ལོ། །འཁོར་ལོའ་ིཕྱི་རོལ་སྟོང༵་གསུམ༵་ཐམས་ཅན་ཡེ་ཤེས་ཀྱི་སྤྲུལ༵་པའི༵་མེ༵་ཁ་དོག་ལྔ་འབར་བ་ཡིས། གདོན་བགེགས་བག་ཆགས་བཅས་བསྲེགས་པར་བྱེད་པའི་མེ་ལྕེའི་འགེ༵ངས་བར་བསམ་པ་སྲོག་བྱེད་མེའི་མཚམས། ཕྱོགས༵་མཚམ༵ས་ཐམས་ཅན་རྡོ་རྗེ་འཁོར་ལོ་ཕུར་བུ་ཐོ་བ་རལ་གྲིའི་མཚོ༵ན་ཆ་འཆོལ༵་བའི་འཁོར་ལོ་རླུང་སྤུ་གྲི་རེག་ཆོད་ལྟར་འཁོར་བས་གཏམ༵ས་པར་བསམ་པ་མཚོན་ཆ་འཆོལ་བའི་མཚམས། ནམ་མཁའ་ས་གཞི་ཐམས་ཅད་ཁྲོ་བོ་ཁྲོ་མོའ་ིསྤྲིན་ལྟར་ཁྱབ་པར་བསམ་པ་ཁྲོ་བོ་རོལ་པའི་མཚམས། བདག༵་རྟོག་གི་རང་གཟུགས་བར་དུ་གཅད་བྱ་གཅོད་བྱེད་ཐམས་ཅད་དམིགས་མེད་༵སྤྲོས་བྲལ་སྟོང༵་ཉིད་བདེ་བ༵་ཆེན་པོར༵་མཚམ༵ས་བཅ༵ད་དོ༵་སྙམ་པ་གསང་མཚམས་ཏེ་ལྔ་པོ་ནང་མཚམས་བཀའ་བརྒྱད་ཀྱི་སྒོས་ཆོས་སུ་གསུངས་པ་དེ་དག་ལས་དང་པོ་པས། རང་སེམས་སྐྱེ་འགགས་མེད་པའི་གཞི་རྩ་བཅད་པས་བགེགས་བདེན་མེད་དུ་ཤེས་པ་དང་། རྣམ་པ་སྲུང་འཁོར་རྣམས་དེ་དག་གཅིག་ལ་གཅིག་གིས་མི་སྒྲིབ་ཅིང་གསལ་ལ་མ་འདྲེས་པ་ངོ་བོ་སངས་རྒྱས་ཐམས་ཀྱི་ཐུགས་ཡེ་ཤེས་ལྔའི་ངོར་ཤར་བ་གསལ་བཏབ་པར་གསུངས་ཤིང་། སྔགས་དོན་ནི། ཨོཾ༵་གྱིས་ཐོག་དྲང་སུརྻ་ཙནྡྲ་༵ཉི་མ་ཟླ་བ། བ༵ཛྲ་༵ཀྲོ༵་ཏ་རྡོ་རྗེ་ཁྲོ་བོ། ཛྭ་༵ལ༵་ར༵ཾ་ར༵ཾ་འབར་བ་མེ། ཙ༵ཀྲ་ཝརྟི་སྲུང་བའི་འཁོར་ལོ། མ༵་ཧཱ་༵ཀྲོ་ཏ་ཁྲོ་བོ་ཆེན་པོ་སརྦ་དུཥྚ་བགེགས་ཐམས་ཅད། ཨེ༵་དབྱིངས་སྟོང་ཉིད་ཀྱི་ཀློང་དུ་ཧཱུཾ་༵ཕཊ་༵ཀྱིས་གསུངས་ཤིང་གཏོར་བའི་དོན་དུ་སྟེ་སྲུང་འཁོར་ལྔ་དང་ཕྱི་ནང་གསང་མཚམས་བཅད་པ་སྔགས་ཀྱིས་ཀྱང་བརྟན་པར་བྱ། དྲུག་པ་བརྡ་སྒོ་ཕྱག་བཤགས་པ་དང་དམ་བཅའ་བཞིའི་ལས་རིམ་ནི། སྤྲོས་པ་ལ་དགའ་ན་རྡོ་རྗེ་བསྡུ་བའི་ཕྱག་རྒྱས་ཡེ་ཤེས་ཀྱི་འཁོར་ལོ་མཁའ་ཁྱབ་ཏུ་སད་པའི་སྤྱན་སྔར་བདེ་གཤེགས་སྤྱི་བཤགས་བརྗོད་པས་རྟོག་འཁྲུལ་ཉམས་པའི་དངོས་གྲུབ་ཀྱི་གེགས་རྣམས་བཤགས་ལ་ཡིག་བརྒྱ་བཟླ། བསྡུ་ན་ཏིང་འཛིན་གྱིས་བཤགས་ཡུལ་གསལ་བཏབ་པས་ཀྱང་རུང་ལ་ཚིག་དོན་ནི། ཧཱུཾ་ཞེས་ཐུགས་སྲོག་བརྗོད་པས་སྣོད་བཅུད་གདོད་ནས་དག་པ་ཡེ་ཤེས་ལྷ་ཡི་འཁོར་ལོར་སད་པར་མོས་པས། སྣང་སྲིད་ལྷ་དང་གཞལ་ཡས་ཁང་དུ་གནས་ཀྱང་མ༵་རིག་༵པའི་དབང་གིས་གཟུང་འཛིན་རང་རྒྱུད་དུ་ཞེན་པའི་ལོག་རྟོག་གི་འཁྲུལ་པས་སྣོད་བཅུད་ཐ་མལ་དུ་ཞེན་པའི་ལིང༵་རྟོག་༵གི་སྒྲིབ་གཡོག་རང་རིག་ཆོས་ཉིད་མངོན་གསུམ་མཇལ་བའི་ཡེ༵་ཤེས༵་ཀྱི་ཐུར༵་མས༵་དབྱེས༵་པས་དག་པ་རྡོ་རྗེའི་སྤྱན་ཐོབ་སྟེ། ཚད་མེད་ཀྱི་སྒོ་བཞི་ཤག་གིས་ཕྱི་བས་སྣོད་བཅུད་ལྷའི་འཁོར་ལོར་གདོད་ནས་རྫོགས་པའི་སྒྲིབ་བྲལ་ཡེ་ཤེས་ཆེན་པོའ་ིརང་རྩལ་དཔལ་ཆེན་ཚོམ་བུ་དགུའི་ལྷ་ཚོགས་མངོན་སུམ་དུ་མཇལ་བ་ལ་དད་མོས་ཤུགས་བསྐྱེད་པ་ཀུན་རྫོབ། དེ་ཡང་རང་སེམས༵་གཞིར་གནས་གྱི་ཆོས་ཉིད་༵དང་དག་པ་ཡེ་ཤེས་ཀྱི་ལྷ་སྐུར༵་བཟང་ངན་གཉིས་མེད་དུ་རྟོགས༵་པས༵་དོན་དམ་གྱི་བརྡ་ཕྱག་འཚལ༵་ཞིང་། སྔར་བྱས་སྒོ་གསུམ་འགལ་འཁྲུལ་དང་པོ་སོ་བྱང་སྔགས་གསུམ་གྱི་སྡོམ་པ་ལ་ཉམས་ཆགས་སུ་གྱུར་བའི་ཉེས་ལྟུང་ལ་གནོང་འགྱོད་བྱ་བ་སུན་འབྱིན་པའི་སྟོབས་ལས་གནོང་འགྱོད་དྲག་པོའ་ིབཤགས་པ། སྒོ་གསུམ་རྡོ་རྗེ་གསུམ་དུ་སྦྱོར་བའི་དམ་ཚིག་དངོས་གྲུབ་ཀུན་གྱི་གཞི་ཡིན་པ་ཤེས་རབ་དང་ཏིང་འཛིན་གྱིས་རྟོགས་གོམ་མ་བྱས་པའི་ནོ༵ངས་པས༵། ཐུན་མོང་ཁྱད་པར་རྩ་བ་ཡན་ལག་ཉིང་ལག་གི་ཉམས་ཆགས་ཅི་དང་ཅི་བགྱིས་པ་ཀུན་ཡིད་ལ་བྱ་བ་ཉམས་པའི་བརྡ་སྦྱར་བཞི་བཤགས་པས། ལྷ་ཚོགས་རྣམས་ཀྱི་གནས་གསུམ་ལས་བྱུང་བའི་ཡེ་ཤེས་ཆེན་པོའ་ིམེའི་འོད་ཟེར་བདག་ལ་ཕོག་པས། སྡིག་སྒྲིབ་བག་ཆགས་བསྲེགས་པར་མོས་པས་དོན་ལ་སྡིག་སྒྲིབ་དངོས་པོར་མ་གྲུབ་པས་དམིགས་མེད་ཆོས༵་སྐུ་རོ་མཉམ་ཆེན་པོའ་ི༵ཀློང༵་དུ་༵བཤགས༵་པའི་བྱ་བྱེད་ལས་འདས་པའི་དོན་ལ་བློ་བཞག་པ་ཤེས་རབ་ཆེན་པོས་རང་བཞིན་མེད་པར་བཤགས་པ་ཞེས་ཀུན་འདུས་རིག་པའི་མདོ་ལས་གསུངས་པའི་སྡིག་སྦྱོང་གི་སྒོ་བཞིས་རྒྱུད་དག་པར་བྱས་པས། འགྲོ་བ་ཐམས་ཅན་རང་། བཞིན་རྣམ་དག་གི་ལྷའི་བདག་ཉིད་དམ་ཚིག་པ་དང་སངས་རྒྱས་རྣམས་སྒྲིབ་བྲལ་ཆོས་སྐུ་ཡེ་ཤེས་སེམས་དཔའ་གཉིས་མེད་རོ་མཉམ་ཆེན་པོའ་ིལྷ་ནི་སྲིད་ཞིའི་སྤྱི་དཔལ༵་ཆེན་༵ པོ་སྟེ་དེ་ཉིད་གདོད་ནས་རང་དང་འདུ་འབྲལ་མེད་པར་ངོ་ཤེས་པས་དེ་མངོན་དུ་བྱེད་པའི་ལྟ་དགོངས་ཏིང་འཛིན་ཐམས་ཅན་ཀྱང་སྲོག་༵གི༵་ཕྱིར༵་ཡང༵་མི༵་བཏང༵་ངོ༵་ཞེས་དམ་བཅའ་བ་ནི་སྔགས་ཀྱི་སྡོམ་པ་ཡར་ལྡན་དུ་བྱེད་པས་དངོས་གྲུབ་ཐོབ་བྱེད་ཀྱི་རྩ་བའོ། །ཀུན་རྫོབ་བརྡ་སྒོ་ཕྱག་བཤགས་པ་ཐམས་ཅན་དོན་དམ་རང་བཞིན་གནས་པའི་ཡེ་ཤེས་རང་རིག་པས་མངོན་དུ་གྱུར་པ་ལ་འཁོར་གསུམ་དམིགས་མེད་དུ་མཚར་བའི་དོན་གྱིས་ཨ༵་ལ༵་ལ༵་ཧོ༵༔ ཞེས་བརྗོད་པའོ། །བདུན་པ་བྱིན་འབེབས་ནི། སངས་རྒྱས་རྣམས་འོད་ཟེར་ཆེན་པོའ་ིདབང་བསྐུར་བའི་མཛད་པ་དང་མཐུན་པ་སྟེ། རྒྱུད་རྡོ་རྗེ་རྩེ་མོ་ལས། ཧཱུཾ་ནི་སྐུ་གསུང་ཐུགས་ཡིན་ཏེ། རྡོ་རྗེ་ཐུགས་ནི་ཐོབ་བྱེད་པའོ། །ཞེས་པ་ལྟར་རྡོ་རྗེ་གསུམ་དབྱེར་མི་ཕྱེད་པའི་ཡི་གེས་མགོ་དྲངས་ཏེ། སངས་རྒྱས་ཐམས་ཅད་ཀྱི་གསང་བ་མི་ཟད་རྒྱན་གྱི་འཁོར་ལོ་ལྔ་ཡོངས་སུ་རྫོགས་པ་དཔལ༵་ཆེན་༵པོ་གསང་ཆེན་རྒྱུད་སྡེ་རྒྱ་མཚོའི་ཡི་དམ་ལྷག་པའི་ལྷ་རབ་འབྱམས་ཀུན་འདུས༵་པའི༵་བདེ་གཤེགས་སྒྲུབ་པ་བཀའ་བརྒྱད་ཀྱི་ལྷ་༵ཚོགས༵་རྣམ༵ས་དབྱིངས་ཡེ་གཉིས་མེད་ཆོས༵་སྐུའི་ཀློང༵་ནས༵་རང་བྱུང་ཀུན་ཁྱབ་ཀྱི་དམིགས་མེད་ཐུགས༵་རྗེའི༵་ནུས་རྩལ་ཤུགས་དྲག་ཏུ་བསྐྱེད་༵པས་ཐུགས་རྒྱུད་བསྐུལ་ནས། ལོང༵ས་སྐུ་ཁ་སྦྱོར་ཡན་ལག་བདུན་དང་ངེས་པ་ལྔ་རྫོགས་པའི༵་དཀྱིལ་འཁོར་གྱི་ལྷ་ཚོགས་ཞི་ཁྲོ་རབ་འབྱམས་བདུན་བརྒྱ་ཉེར་ལྔའི་ལྷ་སྔགས་ཕྱག་མཚན་གྱི་རྣམ༵་རོལ༵་ཆོས་དབྱིངས་ཁྱབ་པར་བརྡལ་བའི་ཆེ་ཆུང་མ་ངེས་པ་ཁ་བ་བུ་ཡུག་འཚུབ་པ་བཞིན། མཛེས་པའི་གར། རྡོ་རྗེའི་གླུ། མེ་ཏོག་གི་ཆར། དྲི་ཞིམ་གྱི་ངད་པ་ཅིར༵་ཡང༵་བརྒྱུར་བ་དང་བཅས་ཏེ་མཁའ་ཁྱབ་གཟུགས་སྐུའི་ཚུལ་དུ་བཞེངས་པ་ཆར་ཆེན་བབ་པ་བཞིན་བྱོན་ནས། སྤོས་རོལ་གདུང་དབྱངས་ཏིང་འཛིན་གྱིས་བསྐུལ་བས་བདག་གནས་ཡོ་བྱད་དཀྱིལ་འཁོར་སྒྲུབ་རྫས་དང་བཅས་པ་ལྷག་པའི་ཏིང་འཛིན་གྱི་སྤྲུལ་པའི་སྐུ་དང་ཞིང་གི་བཀོད་པའི༵་དཀྱིལ༵་འཁོ༵ར་རྟེན་བརྟེན་༵པར་བཅས༵་པ་ལ་གཉིས་མེད་དུ་ཐིམ་པས་མཐུ་རྩལ་ནུས་པའི་ཆོ་འཕྲུལ་དཔལ་དུ་འབར་བས་ཡོངས་གྲུབ་ཡེ་ཤེས་དཀྱིལ་འཁོལ་མངོན་དུ་གྱུར་པའི་དབང༵་བཞི་བསྐུར་བ་དང་། རྡོ་རྗེ་གསུམ་གྱི་བྱིན་༵ཆེན་ཕོབ༵་ཏེ་མཆོག་ཐུན་གྱི་དངོས་གྲུབ་མྱུར་དུ་འགྲུབ་པའི་ཕྱི་ནང་གསང་བའི་རྟགས༵་མཚ༵ན་མྱུར་བར་སྟོན་༵ པར་མཛོད་ཅེས་ཚིག་གིས་བསྐུལ་ཞིང་། ཁྲག་འཐུང་སྤྱི་སྔགས་རུ་ལུའི་ཛྭ་སཱ་ལ་སྒྲ་འཇུག་ཚུལ་བཅུ་སོགས་གསུངས་པ་ལས། འདིར་སྦྱན་དྲངས་པར་ཤེས་པ་སྟེ་ས༵རྦ་ཐམས་ཅད། ས༵་མ༵་ཡ༵་དམ་ཚིག་ཨ༵་བེ༵་ཤ་༵ཡ༵་ཕོབ་ཅིག་ཕེ༵་ཕེ༵། བདུན་པ་མཆོད་པ་བྱིན་རླབས་ནི། བྱང་སེམས་སློབ་པས་སངས་རྒྱས་ཀྱི་ཞིང་ཁམས་རྒྱ་མཚོ་ཡོངས་སུ་སྦྱངས་བའི་མཛད་པ་ལྟར། ཧཱུཾ་ཞེས་རང་ཉིད་གཉུག་མའི་ལྷ་དཔལ་ཆེན་པོའ་ིང་རྒྱལ་ལ་གནས་པས། སྣོད་བཅུད་ལ་མ་དག་པའི་འཛིན་རྟོག་ཡེ་ནས་མི་དམིགས་པའི་ཆོས་ཉིད་སྟོང་པའི་དབྱིང༵ས་ནས༵་རིག་སྟོང་ཡེ་ཤེས་ཀྱི་རོལ་པ་སྦྱངས་བྱེད་རྡོ་རྗེའི་ཡི༵་གེ༵་འབྲུ་༵གསུམ་ཆར༵་དུ་༵བབ༵་པས་དམིགས་རྟེན་གྱི་མཆོད་པ་གཙོ་བོར་གྱུར༵་པའི་སྣོད་བཅུད་ཐམས་ཅན་ལ་ཕོག་པས་སྲེག་བྱེད་མེའི་ཡི་གེ་རཾ་གྱིས་མཆོ༵ད་རྫས༵་ཀྱི་ཉེས༵་པའི་སྐྱོན་མ༵་དག་༵པ་བསྲེགས༵། ཡཾ་ལས་རླུང་གིས་དངོས་འཛིན་གྱི་འཆིང་བ་གཏོར༵། ཁཾ་ལས་ཆུས་བག་ཆགས་ངན་པའི་དྲི༵་མ་བཀྲུས་ཏེ་ཆོས་ཀུན་རང་བཞིན་གྱིས་དག་པའི་དོན་ལ་བློ་བཞག་སྟེ། བྷཱུྃ་ལ༷ས་རིན་༵པོ་ཆེའི༵་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ལས་བྱུང་བའི་ཉེར་སྤྱོད་བདུན་སོགས་དང་། ཨཱ་༵ལུ་༵བདེ་སྐྱོང་གི་བྷནྔྷ༵ འི༵་སྣོད་ཀྱི་ནང༵་དུ་དབང་ལྔའི་མེ་ཏོག་སོགས་ཕྱི༵་དང༵་ནང༵་སྨན་གཏོར་རཀྟ། གས༵ང་བ་གསུམ༷་གྱི་མཆོད་སྤྲིན་རྣམས་རྣམ་པ་དམ་ཚིག་གི་རྫས་ཇི་ལྟར་འོས་པ། ངོ་བོ་ཡེ་ཤེས་ཀྱི་བདུད་རྩི་རོ་ནུས་ཡོན་ཏན་བརྒྱ་ཕྲག་དུ་མའི་དཔལ་འཛིན་པས་ལྷ་རྣམས་མཉེས་བྱེད་ཀྱི་ཕུལ་དུ་གྱུར་པའི་རང་རིག་ཀུན་ཏུ་བཟང་བོའ་ིརྣམ་འཕྲུལ་ཉག་གཅིག་གི་མཆོད་སྤྲིན་རྒྱ་༵མཚོར༵་ལྷུན་གྱིས་རྫོགས་པ་གྱུར༵་པར་བསམ་ལ། ཐོག་མཐར་སྐུ་གསུང་ཐུགས་རྡོ་རྗེ་གསུམ་གྱི་ཡི་གེ་ནི་དེའི་ཟག་མེད་ཡེ་ཤེས་ཀྱི་རོལ་པར་འཆར་བའི་བྱིན་རླབས་བསྐུལ་བའི་དོན་ཉེར་སྤྱོད་དང་འདོད་ཡོན་གྱི་སྔགས་དང་། པཱུ་༵ཛ༵་མཆོད་པ། ས༵་མ༵་ཡ༵་དམ་ཚིག་སྟེ་མཆོད་པའི་དོན་སྤྱོད་པར་དམ་བཅའ་བ་སྟེ། མཆོད་རྫས་རྣམས་དཀྱིལ་འཁོར་གྱི་ལྷས་སྤྱན་ལམ་བཏེགས་པ་ཙམ་གྱིས་དགྱེས་པས་བཞེས་ཏེ་དངོས་གྲུབ་ཀྱི་གནས་ལ་བསྐུལ་ནུས་པའི་བྱིན་རླབས་ཀྱི་རྒྱུན། སྭཱ་༵ཧཱ་༵ནི་གཞི་ཚུགས་པའི་དོན་དང་། ནང་མཆོད་སྨན་ནི། རླུང་མེ་ཐོད་སྒྱེད་ལ་གནས་པའི་ཀ་པཱ་ལར་ཤ་ལྔ་བདུད་རྩི་ལྔ་ཡིག་འབྲུ་ལྔས་མཚན་པ། རླུང་མེས་བསྐོལ་བས་ཉེས་སྐྱོན་སྦྱངས། ཉི་མ་འཆར་ཀའི་མདངས་ལྟར་ཞུ་བས་དམ་ཚིག་གི་བདུད་རྩིར་རྟོགས། འབྲུ་གསུམ་འོད་ཀྱིས་ཡེ་ཤེས་ཀྱི་བདུད་རྩི་བཀུག་ནས་འདྲེས་པས་དམ་ཡེ་གཉིས་མེད་དུ་སྦར། རཀྟའི་སྣོད་བྷནྡྷ་ལྕང་ལོ་ཅན་དུ་ཁམས་གསུམ་གྱི་ཆགས་པའི་བཅུད་བསྡུས་པའི་ཁྲག་མཚོ་རྦ་རླབས་འཁྲུགས་པ་ལ། གིརྟི་མར་མེའི་མཁའ་གསང་ནས་བབ་པའི་བདེ་རྒྱན་གཅིག་ཏུ་འདྲེས་པ་དང་། གཏོར་མ་སྤྱིར་བདུད་རྩི་ལྟར་ལ་ཟེག་མ་ལས་འདོད་ཡོན་ལྔའི་མཆོད་སྤྲིན་ཟག་མེད་དུ་འཕྲོ་བར་བསམ་ལ་སོ་སོའ་ིསྔགས་ལན་གསུམ་རེ་བརྗོད་པའོ། །སྨན་བྱིན་གྱིས་རླབས་པའི་སྔགས་དོན་ནི། སྐུ་གསུང་ཐུགས་ཀྱི་ས་བོན་འབྲུ་གསུམ་ནི་སྦྱངས་རྟོགས་སྦར་བའི་ས་བོན། ས༵རྦ༵་པ༵་ཉྩ་༵ཨ༵་མྲྀཏ་༵སྨན་དང་བཅུད་ཐམས་ཅད་བདུད་རྩི་ལྔའི་རང་བཞིན། ཧཱུཾ་དམ་ཚིག་གི་ངོ་བོར་ཞུ་བ། ཧྲཱིཿ ཡེ་ཤེས་ཀྱི་བདུད་རྩི་དགུག་པ། ཋ༵ཿ གཉིས་སུ་མི་གནས་པ་གྲོལ་བ་སྟེ་དེས་ན་སྦྱངས་རྟོགས་སྦར་གསུམ་གྱིས་འཁོར་འདས་ཐམས་ཅན་ཡེ་ཤེས་ལྔའི་བདུད་རྩིར་དག་པས་གཙང་དམེའི་རྟོག་པ་ལས་གྲོལ་བར་བྱིན་གྱིས་རླབས་པའི་སྔགས་སོ། །གཏོར་མ་བྱིན་གྱིས་རླབས་པའི་སྔགས་དོན་ནི། ཨོ༵ཾ་ཨཱཿ༵ ཧཱུཾ་སྔ་མ་དང་མཚུངས། མ༵་ཧཱ་༵བ་ལིཾ་ཏ་ནི་གཏོར་མ་ཆེན་པོ་སྟེ། ཕྱི་དམ་རྫས་ནང་ཕུང་པོ་གསང་བ་བྱང་ཆུབ་སེམས་ཀྱི་གཏོར་མ། ཏེ་ཛྭ་བ༵་ལི་ཏ་༵ནི་ཐུགས་རྗེའི་འགྲོ་བ་འདུལ་བའི་རྩ་ལ་སྣང་གི་གཏོར་མ། དེ་ཁོ་ན་ཉིད་དབྱིངས་རིག་གཉིས་སུ་མེད་པ། བྷ་༵ལུ་༵བྷ་ཏེ་དེ་གཉིས་མེད་རོ་གཅིག་ཏུ་སྦྱོར་བའི་དོན། གུ་༵ཧྱ་ནི་གསང་བ་སྟེ་ཕྱི་ནང་གསང་བ་དེ་ཁོ་ན་ཉིད་དབྱེར་མེད་པའི་གཏོར་མའི་དོན་རྟོགས་ན་བྱུང་ཚོར་གྱི་རྟོག་པ་ཁྱབ་བརྡལ་ཆེན་པོ་དབྱིངས་སུ་དག་པའི་གསང་བའི་གཏོར་མ། ས༵་མ༵་ཡེ༵་དེ་ཉིད་ལྷ་ལ་ཕུལ་བའི་ནུས་པས་ཉམས་ཆགས་ཀྱི་རྟོག་སྒྲིབ་དབྱིངས་སུ་བསྐང་བའི་དོན། སྭཱ་༵ཧཱ་༵མཆོད་པ་དེའི་དངོས་གྲུབ་འབྱུང་བའི་གཞི་ཚུགས་ཤིག་ཞེས་དང་། རཀྟ་བྱིན་རླབས་ཀྱི་སྔགས་དོན་ནི། ཨོ༵ཾ་ཨཱཿ༵ ཧཱུཾ་སྔར་ལྟར་ལ། མ༵་ཧཱ་༵ར༵ཀྟ་༵ནི་ཁྲག་ཆེན་སྟེ་འདི་ཁ་དབྱེ་ན། ཀུན་རྫོབ་རྫས་ཀྱི་རཀྟ་ཉེར་ལྔ་སྟེ། རྡོ་ཤིང་རྩི་འབྲུ་མེ་ཏོག་གི་རཀྟ་ལྔ་ལྔ། གུ་ཧྱ་མཱུ་ལ་རཀྟི་ནི་རྟེན་འབྲེལ་བཅུ་གཉིས་ལུགས་འབྱུང་དུ་ཚང་བ་མི་རྒན་པའི་སྙིང་ཁྲག་ཡན་ལག་བརྟན་པའི་རཀྟ་ལོང་རྩའི་ཁྲག་པདྨ་རཀྟ་སྐྱེས་པས་མ་ཙེས་པའི་མཚན་ལྡན་གྱི་རཀྟ། ཉོན་མོངས་འཁོར་བའི་རཀྟ་ཞིང་བཅུའི་སྙིང་ཁྲག་སྣང་བ་བརྡའི་རཀྟ་དམར་པོར་གྱུར་ཚད། ས༵་མ༵ནྟ་ཀུན་ཏུ་སྟེ་དེ་ཐམས་ཅད་འཁོར་འདས་ཀྱི་ཆགས་པ་ཆེན་པོའ་ིདྭངས་མ་འབར་ཞིང་འཕྲོ་བས་བཅུད་བསྡུས་པ། མ༵ཎྜལ༵ ༵་ཟླུམ་པོའ་ིདཀྱིལ་འཁོར་རྣམ་པ་ལྷ་མོ་གིརྟི་མའི་བྷ་ག་ནས་བྱུང་བའི་རཀྟའི་རྒྱན་གྱིས་ཁྲག་མཚོ་མི་རྟའི་རོའ་ིརྦ་རླབས་འཁྲུགས་པ་བདེ་བ་ཆེན་པོའ་ིདཀྱིལ་འཁོར་གྱི་དོན། ཧཱུཾ་གིས་བདེ་བ་ཆེན་པོའ་ིབཅུད་བསྡུས་པའི་ནུས་པས། ཕ༵ཊ་ཀྱིས་རྒྱུད་དྲུག་གི་རྟོག་པ་དབྱིངས་སུ་གཏོར་བའོ། །དེ་ལྟར་ཕྱི་ནང་གི་མཆོད་པ་བྱིན་གྱིས་མ་བརླབས་ན། ཡོན་ཆབ་ལ་དྲི་ཟ་ཉེ་འཁོར། མེ་ཏོག་ལ་མེ་ཏོག་ཚེ་རྒྱན་སོགས་བགེགས་འཇུག་པས་ལྷ་མི་མཉེས་ཤིང་། དངོས་གྲུབ་སྒྲུབ་པའི་རྫས་སུ་མི་རུང་བ་བདེ་འདུས་ལས་གསུངས་ཤིང་། ནང་མཆོད་རྣམས་ལའང་རྫས་སྔགས་ཏིང་འཛིན་གྱིས་བརླབས་པར་འབག་བཙོག་གི་སྐྱོན་ཤོར་ན་རྩ་གསུམ་དམ་ཅན་འདུ་བའི་རྫས་སུ་མི་འགྱུར་བར་གསུངས་སོ། །གཉིས་པ་དངོས་གཞི་ལ། དཔལ་ཆེན་ཞལ་ལུང་ལས། དེ་ལྟར་སྦྱང་གཞི་ལུས་ངག་ཡིདཿ སྦྱོང་བྱེད་ལྷ་སྔགས་ཏིང་འཛིན་གྱིསཿ སྦྱོངས་འབྲས་བདེ་གཤེགས་སྐུ་གསུང་ཐུགསཿ རྡོ་རྗེ་གསུམ་གྱི་འཁོར་ལོ་རུཿ ཡོངས་སྨིན་དོན་གྱི་སངས་རྒྱས་ཏེཿ མ་ཧཱ་ཡོ་གའི་གྲུབ་མཐའ་རུ༔ སྤྱི་དཔལ་ཆེན་པོའ་ིངེས་བཤད་དོ༔ ཞེས་ལམ་གྱི་སྤྱིི་ཆིངས་སུ༔ བསྟན་པའི་རིམ་པ་དང་པོལང་བསྐྱེད་པའི་ངོ་བོ་རིམ་གྱི་ཏེ༔ ཞེས་གསུངས་པ་ལྟར། རྟེན་ཏིང་འཛིན་གྱི་དཀྱིལ་འཁོར་བསྐྱེད་པ་དང་། རང་བཞིན་ཡེ་ཤེས་ཀྱི་དཀྱིལ་འཁོར་སྒྲུབ་པ་གཉིས་ལས། དང་པོ་ལའང་། རྟེན་བརྟེན་པའི་དཀྱིལ་འཁོར་བསྐྱེད་པ་དང་། ཐུགས་རྒྱུད་བསྐུལ་བ་བཟླས་པའི་རིམ་པ་གཉིས་ལས། དང་པོ་དཀྱིལ་འཁོར་བསྐྱེད་པ་ལ་ཡང་། དཔལ་ཆེན་ཞལ་ལུང་ལས། དེ་ལ་མ་ཧཱ་ཡོ་ག་ནི༔ དོན་དམ་མ་སྐྱེས་ཆོས་ཉིད་རྩལཿ ཏིང་འཛིན་གསུམ་གྱི་ཆོ་འཕྲུལ་ལས༔ སྣོད་བཅུད་འཛིན་ཞེན་སྦྱངས་བའི་ཕྱིར༔ རྟེན་དང་བརྟེན་པའི་འཁོར་ལོར་ཤར༔ ཞེས་གསུངས་པ་ལྟར། རྒྱུ་ཏིང་འཛིན་གསུམ་གྱིས་ཁོག་ཕུབ་པ། འབྲས་བུ་རྟེན་དང་བརྟེན་པའི་དཀྱིལ་འཁོར་བསྐྱེད་པ། དབང་བསྐུར་རྒྱས་གདབ་ཀྱི་རིམ་པའོ། །དང་པོ་ནི། སངས་རྒྱས་རྣམས་གང་དུ་འཚང་རྒྱ་བའི་ཚེ་སྣོད་བཅུད་འོག་མིན་གྱི་ཞིང་རང་སྣང་ཡེ་ཤེས་ཀྱི་འཁོར་ལོར་དག་པ་དང་མཚུངས་པར་སྦྱངས་གཞི་སྣོད་བཅུད་ཆགས་པའི་སྐྱེ་བ། སྦྱོངས་བྱེད་སྒོང་སྐྱེས་སྦྱངས་པ་རྒྱས་པ་ཆེན་པོའ་ིབསྐྱེད་རིམ་སྦྱངས་འབྲས་གཟུགས་སྐུ་མངོན་དུ་བྱེད་པའི་ཚུལ་ཏེ། ཏིང་འཛིན་རྣམ་གསུམ་འདི་བསྐྱེད་རིམ་གྱི་མདོ་ཆིངས་ཆེན་པོ་སྟེ། འདི་ལྟར་རང་བཞིན་གྱི་ཆོས་ཉིད་ལ་རྟོག་བཟོས་མ་བཅོས་པའི་རིག་པ་ངོ་བོ་ཉིད་ཀྱིས་སྟོང་ཀྱང་། གདངས་ཀྱིས་གསལ་བའི་ལྷག་མཐོང་གི་རིག་རྩལ་ལམ་སྣང་ཆ་ཐམས་ཅད་དག་པ་རབ་འབྱམས་ཡོངས་གྲུབ་ཆེན་པོའ་ིདཀྱིལ་འཁོར་དུ་གསལ་གདབ་ཤེས་ན་རིག་པ་གཅིག་གི་ཀློང་ཏིང་འཛིན་རྣམ་གསུམ་ཡེ་རྫོགས་སུ་བཞུགས་པ་མངོན་དུ་བྱས་པས་ཤིན་ཏུ་ཟབ་པ་སྙིང་ཐིག་འདིའི་མན་ངག་ལུགས་ལྟར་དང་། དེ་ལྟར་བློས་མ་ཆུན་ན། ཧཱུཾ་ནི་སྤྱིར་སྐུ་གསུང་ཐུགས་བྱེ་བྲག་ཐུགས་ཀྱི་སྙིང་པོ་རྒྱུ་གསུངས་པས་ཏིང་འཛིན་གསུམ་ཀ་མཚོན་པ་སྟེ། སྤྱིར་སྐྱེ་གནས་བཞི་ཀ་སྦྱངས་པའི་བསྐྱེད་རིམ་ཐམས་ཅད་ལ་ཏིང་འཛིན་གསུམ་གྱིས་ཁྱབ་ཀྱང་། ཁྱད་པར་འདི་ནི་སྒོང་སྐྱེས་སྦྱོངས་པ་རྒྱས་པ་ཆེན་པོའ་ིབསྐྱེད་རིམ་པས་ཏིང་འཛིན་རྣམ་གསུམ་རིམ་ཅན་དུ་སྒོམ་པ་སྟེ། དང་པོ་དེ་ཏིང་ནི། འདི་ལྟར་སྣང་བའི་ཆོས་ཐམས་ཅད་སྟོང་ཉིད་སྤྲོས་བྲལ་ར༵ང་བྱུང་གི་རིག་༵པ༵འི་ངོ་བོ་ནི་དངོས་དང་དངོས་མེད་བདག༵་རྟོག་གི་ཡུལ་དུ་མི་གནས་པའི་མེད་༵པ་སྟོང་ཉིད་རང་བཞིན་གྱི་འོད་གསལ་ཇི་ལྟ་བ་དྲན་པ་བྱས་པས་འཆི་སྲིད་ཆོས་སྐུར་སྦྱོང་ཞིང་རྟག་ལྟ་དང་། གཟུགས་མེད་ཁམས་དག་པར་བྱེད་པས་དེ༵་བཞིན་ཉིད་ཀྱི་ཏིང་ངེའི་འཛིན་ཅེས་བྱ། དབྱིངས་རིག་སྟོང་པ་ཆེན་པོ་དེའི་རོལ༵་རྩལ༵་འགྲོ་བ་ཀུན་༵ལ་སྙོམས་པར་སྣང༵་བའི་སྙིང༵་རྗེ༵་ཆེ༵ན་པོ༵་སྒྱུ་མ་ལྟ་བུ་དང་ཟུང་དུ་འཇུག་པ་ནི་ཆད་ལྟ་དང་གཟུགས་ཁམས་ལས་རྣམ་པར་གྲོལ་ཞིང་མཆེད་པ༵འི་ཡེ་ཤེས་བསམ་མི་ཁྱབ་པས་བར་སྲིད་ལོངས་སྐུར་རྫོགས་པའི་གཞི་འདིང་བས་ཀུན་སྣང་གི་ཏིང་འཛིན་དང་། ཟུང་འཇུག་སྲིད་ཞི་ཀུན་ཁྱབ་ཀྱི་དཀྱིལ་འཁོར་བསྐྱེད་པའི༵་རྒྱུ་ཡི༵་རིག་པ༵འི་ངོ་བོ། རྣམ་པ་དཔལ་ཆེན་པོའ་ིཐུགས་སྲོག་ཧཱུཾ་ཡིག་མཐིང་ནག་སྐར་ཆེན་ལྟར་འབར་ཞིང་འོད་འཕྲོ་བ་ནི་ནམ་མཁའི་དཀྱིལ་དུ་ཤར་བ་རྒྱུའི་ཏིང་འཛིན་ཏེ་སྐྱེ་གནས་སུ་འཇུག་ཀ་མའི་སྲིད་བཅས་ཀྱི་ཤེས་པ་དང་། འདོད་ཁམས་སྐྱེ་བ་སྤྲུལ་པའི་སྐུར་སྨིན་པར་བྱེད་དེ་འདི་གསུམ་ནི་བསྐྱེད་རིམ་སྤྱིའི་ཁོག་ཕུབ་ཐུན་མོང་མ་ཡིན་པ་སྟེ། དག་རྫོགས་སྨིན་གསུམ་གྱི་གནད་དོན་དེ་ལྟར་ཤེས་པས་དངོས་གཞི་སྒོམ་པའི་སྐབས་ཧཱུཾ་ཞེས་བརྗོད་པས། སྣང་གྲགས་ཀྱི་ཆོས་ཐམས་ཅད་ནམ་མཁའ་ལ་འཇའ་ཡལ་བ་ལྟར་སོང་བར་བསམ་ལ་རིག་པའི་མྱོང་བ་ཡོད་ན་དེ་ཉིད་དང་མྱོང་བ་མེད་༵ ཀྱང་སེམས་སྣང་མེད་ལ་ཅུང་ཟད་བཞག་དེ་ལྟར་མ་རྟོགས་པའི་སེམས་ཅན་ལ་འཛིན་མེད་སྒྱུ་མ་ལྟ་བུའི་སྙིང་རྗེའི་སེམས་དུང་ངེ་བྱ། ཟུང་འཇུག་དེའི་ངང་ནས་ས་བོན་ཧཱུཾ་དུ་ལམ་གྱི་སྒོམ་པ་སྟེ་མྱོང་ཁྲིད་བྱེད་ན་ཏིང་འཛིན་རྣམ་གསུམ་རེ་རེ་བཞིན་ཞག་གིས་བཅད་པའི་དམིགས་པ་བཟུང་ཞིང་། རྒྱུའི་ཧཱུཾ་ཡིག་རེ་རས་ལ་བྲིས་པ་མདུན་དུ་བཀྲམ་སྟེ་ཞི་གནས་ཀྱི་སེམས་སྒྲུབ་པ་སོགས་བཀའ་བརྒྱད་ཀྱི་སྒྲོམ་ཁོག་ཏུ་གསུངས་པ་ལྟར་ཡིན་ཀྱང་། དེང་སང་མོས་སློབ་ཙམ་གྱི་གཟུགས་བརྙན་ལའང་ཏིང་འཛིན་རྣམ་གསུམ་འདི་གཞི་འབྲས་སྦྲེལ་བའི་ང་རྒྱལ་དང་དག་དྲན་མོས་པ་ཙམ་ལ་གསལ་འདེབས་བརྟན་པོ་བྱས་ན་རྟེན་བརྟེན་པའི་དཀྱིལ་འཁོར་སོ་སོའ་ིགཞི་འབྲས་སྦྲེལ་བའི་ང་རྒྱལ་སོགས་མ་ནུས་ཀྱང་ཏིང་འཛིན་གསུམ་གྱི་དག་རྫོགས་སྨིན་གསུམ་ཚང་བར་ཤེས་ན་དེའི་བསྐྱེད་པའི་ལམ་གྱིས་གནད་དོན་འདུ་བར་གསུངས་པས་གལ་ཆེ་བར་སེམས་སོ། །གཉིས་པ་འབྲས་བུ་རྟེན་དང་བརྟེན་པའི་དཀྱིལ་འཁོར་བསྒོམ་པ། རྡོ་རྗེ་གུར་ལས། སངས་རྒྱས་གནས་གཞི་རྫོགས་བྱས་ནས། །ཀུན་ཏུ་བཟང་པོས་བདེ་བ་དངོས། །རྣམ་པ་ལྔ་པོ་སྒོམ་བྱས་ཏེ། །རང་ལྷག་ལྷ་ཡི་སྒྲུབ་ཐབས་བྱ། །དེ་བཞིན་དཀྱིལ་འཁོར་རྣམ་བཀོད་ལ། །མཆོད་བསྟོད་བདུད་རྩི་མྱོང་སོགས་པ། །རིམ་པ་འདི་ཡིས་སྒོམ་བྱས་ན། །ཡན་ལག་དྲུག་གི་སྦྱོར་བ་འདེད། །ཅེས་གསུངས་པ་ལྟར། བསྐྱེད་རིམ་ཡན་ལག་དྲུག་གི་དང་པོ་གཞལ་ཡས་ཁང་སྒོམ་པ་ནི་སངས་རྒྱས་རྣམ་པར་སྣང་མཛད་ཀྱི་རང་བཞིན་ཏེ། རྟེན་སྐུ་བརྟེན་པ་ཡེ་ཤེས་སུ་གྲགས་པ་ལྟར་ཟག་མེད་འབྲས་བུའི་ཡོན་ཏན་ཐམས་ཅན་ཀྱི་རྟེན་བྱེད་པའི་ཆ་ནས་སྐུ་མི་ཟད་རྒྱན་གྱི་འཁོར་ལོ་སྟེ། དེ་ཉིད་ལྷར་བཞེངས་པ་རྣམ་སྣང་ཡིན་པའི་རྒྱུ་མཚན་གྱིས་སྐུ་དང་ཞིང་ཁམས་རྒྱ་མཚོའི་འབྱུང་གནས་སུ་གྲགས་པ་ལྟར་ཡན་ལག་དང་པོ། ཐོག་མར་རྟེན་གཞལ་ཡས་ཁང་སྒོམ་པ་ནི། འདི་མན་ཆད་མངོན་རྟོགས་ནི་སྒོམ་དོན་ཙམ་ལས་ཧ་ཅང་ཡི་གེ་མང་བར་དོགས་ནས་འབྲུ་འགྲེལ་མ་བྲིས་པས། ཐོག་མར་སངས་རྒྱས་རྣམས་གང་དུ་འཚང་རྒྱ་བའི་ཞིང་ཆོས་ཀྱི་དབྱིངས་ཡིན་ལ། དབྱིངས་དེ་ཉིད་ཀྱི་ཕྱག་རྒྱ་ཡུམ་ལྔར་དག་པ་མཚོན་ཕྱིར་རྒྱུའི་ཧཱུཾ་ལས་འོད་ཟེར་སྤྲོ་བསྡུས་སྣོད་བཅུད་ཐ་མལ་གྱི་ཞེན་རྟོག་སྦྱངས་ཏེ་དག་པའི་ཞིང་དུ་གྱུར་པ་ལ། ཧཱུཾ་ཡིག་ཉིད་སྐད་ཅིག་གིས་སངས་རྒྱས་ཐམས་ཅན་ཀྱི་ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ་རྡོ་རྗེ་སྔོན་པོ་རྩེ་ལྔ་པ་ཧཱུཾ་གིས་མཚན་པ། འཕྲོ་འདུས་ཡོངས་སུ་གྱུར་པ་ལས། ངོ་བོ་སེམས་ཉིད་སྟོང་གསལ་ཀ་དག་ལ། རྣམ་པ་རྒྱུའི་ཧེ་རུ་ཀ་མདོག་སྔོན་པོ་ནམ་མཁས་གར་ཁྱབ་སྐུ་ཡིས་ཁྱབ་ཅིང་ཨ་འབྲས་ཐེར་ཟུགས་མ་ཡིན་པ་ཟང་ཐལ་སྒྲིབ་གཡོག་དང་བྲལ་བས་ཆོས་ཀྱི་དབྱིངས་གང་བའི་ཆོ་འཕྲུལ་ཅན། ཞལ་གཅིག་ཕྱག་གཉིས་པ་རྡོ་རྗེ་དང་དུང་ཁྲག་འཛིན་པ་ཁྲི་བོའ་ིཆས་ཐམས་ཅད་རྫོགས་པ་ཞབས་དོར་སྟབས་ཀྱིས་ནམ་མཁའི་དབྱིངས་སུ་བཞེངས་པར་བསྒོམ། དེའི་ཐུགས་ཀ་ནས་འབྱུང་ལྔ་དག་པ། ཡུམ་ལྔའི་ས་བོན་འོག་ཏུ་རིམ་བརྩེགས་སུ་ཆད་པ་རྡོ་རྗེ་སྲུང་བའི་འཁོར་ལོའི་ནང་དུ། ཨེ་ལས་སྣང་ཆ་གསལ་ཞིང་གོ་འབྱེད་པ་ཐབས། སྟོང་ཆ་ཤེས་རབ་གཉིས་སུ་མེད་པ་འབྱུང་པ་ནམ་མཁའི་དྭངས་མའི་ཡོན་ཏན་བསྡུས་ཏེ་ཞུ་བ་ལས་ཐམས་ཅད་དབྱིངས་ཕྱུག་ནམ་མཁའ་གྲུ་གསུམ། ཡཾ་ལས་སྒྲོལ་མ་གཡོ་བ་རླུང་རྒྱ་གྲམ། ར་ལས་མཱ་ཀི་གཤེར་བ་རཀྟའི་རྒྱ་མཚོ་ཟླུམ་པོ། སུ་ལས་སྤྱན་མ་སྲ་བརྟན་ཞིང་ཆེན་གྱི་ས་གཞི་གྲུ་བཞི། ཀེ་ལས་རུས་པའི་རི་རབ་གྲུ་བཞི་བང་རིམ་བཞི་ལྡན་གྱི་སྟེང་ཁ་ཁྱེད་གྲུ་བཞི་པ། ས་མཚམས་གཅོད་བྱེད་ཕྱི་མཐར་རྡོ་རྗེའི་རྭ་བ་ལྕགས་རི་ལྟ་བུའི་སྲུང་འཁོར་གྱི་ནང་དུ་བསྐོར་བའི་དབུས། རྃ་ལས་གོས་དཀར་དྲོ་བའི་ཁམས་འབར་བའི་མེ་ལྕེ་ཀུན་ཏུ་འཁྱིལ་བའི་ཀློང་དུ། ཧཱུྃ་ཡིག་མཐིང་ག་ཐམས་ཅན་འཇོམས་ཤིང་གསོད་པའི་ས་བོན་ལས་རྡོ་རྗེའི་རྭ་བའི་ནང་དུ་གནམ་ལྕགས་ཞུན་མ་ལས་གྲུབ་པའི་རྡོ་རྗེ་སྔོན་པོ་ཆེ་བ་ཁྲོལ་བླུགས་ཀྱི་བར་མཚམས་སུ་ཆུང་བ་རྡུལ་ཕྲན་ལྟ་བུའི་རྡོ་རྗེ་ཞུ་ལུགས་སུ་འབྲེལ་བའི་བྲག་ཆེན་སྲ་ཞིང་འཐས་པའི་སྟེང་། བྷྲུྃ་ཡིག་ཁ་དོག་ལྔ་ལྡན་ཆད་པ། བྷྲུྃ་ཡེ་ཤེས་ལྔའི་ས་བོན། ར༵ཏྣ་༵རིན་པོ་ཆེ། བྷ་༵ཉྫ་༵ཐོད་པ། ཛྙཱ་༵ན་༵ཡེ་ཤེས། ཙ༵ཀྲ་༵འཁོར་ལོ། མ༵ནྜལ༵ ༵་དཀྱིལ་འཁོར་ཏེ་བྷྲུཾ་ཞེས་པས་རྣམ་པ་གང་ལྟར་སྣང་དོན་ལ་མ་དག་པའི་ཕུང་ལྔ་གཟུགས་ཕུང་ལ་བརྟེན་པས་ངག་ཡིད་ཀྱི་གཞི་ལུས་ཡིན་པ་དང་། འབྲས་བུ་ཆོས་དབྱིངས་ཡེ་ཤེས། ཡེ་ཤེས་གཞན་བཞིའི་འཕྲོ་གཞི། ལམ་དག་པ་ལྷ་རྣམས་ཀྱི་གནས་རྟེན་ཞིང་དང་གཞལ་ཡས་ཁང་ཡིན་པས་གང་དུ་སངས་རྒྱས་པའི་ཞིང་གི་སྒྲོན་མ་བཀོད་པ་བཞིན་ཕྱི་རིན་པོ་ཆེ། ནང་ཐོད་པའི་གཞལ་ཡས་ཁང་། དོན་ཡེ་ཤེས་ལྔའི་རང་བཞིན་རྣམ་སྣང་གི་བདག་ཉིད་གཞལ་ཡས་ཁང་སྒོམ་པ་སྟེ། རྡོ་རྗེ་རྭ་བའི་ནང་ཕྱོགས་མཚམས་སུ་དུར་ཁྲོད་ཆེན་པོ་བརྒྱད་ཀྱི་དབུས་སུ་ཁ་དོག་སྣ་ཚོགས་པའི་པདྨའི་ལྟེ་བ་ཟླུམ་པོ་ལེབ་ཆགས་ལྗང་གུ། གེ་སར་དམར་པོ་ཟིལ་ཕོད་དང་བཅས་པའི་སྟེང་ཉི་དཀྱིལ་དྭངས་གསལ་རྒྱ་གེ་སར་དང་མཉམ་པ། དེའི་དབུས་སྣ་ཚོགས་རྡོ་རྗེ་ལྟེ་བ་མཐིང་ག་གྲུ་བཞི། དེ་ལས་ཐོན་པའི་རྭ་བཅུ་གཉིས་ཕྱོགས་མདོག་རྭ་དབུས་མའི་རྩེ་གེ་སར་དང་མཉམ་པའི་དབུས་སུ་རྒྱུའི་ཧཱུཾ་ལས་བྷྲུྃ་ཁ་དོག་ལྔ་ལྡན་ཆད་པ་གནས་གྱུར་པ་ལས་ཡེ་ཤེས་ཀྱི་སྤྲུལ་པའི་གཞལ་མེད་ཁང་གི་ནང་ནས་རིམ་བཞིན་མཐིང་དཀར་སེར་དམར་ལྗང་བའི་རྩིག་པ་ལྔ་སྦྲག་རེག་ལ་མ་འབྱར་བ། དེའི་ནང་དུ་ཁ་ནས་མེ་འབར། སྣ་ནས་དུད་པ་འཕྱུར། སྤྱུགས་གླུའི་རྩེར་སྒྲ་སྒྲོགས་པའི་ཐོད་པ་སྐམ་རློན་རྙེད་གསུམ་གྱི་རྩིག་པ་རཀྟས་སྦྱིན་ཐབས་སུ་སྦྱར་བ། གནམ་ལྕགས་ཀྱི་གཟེར་བཏབ་པ་གྲུ་བཞིའི་རྩིག་པ་ཕྱི་ནང་གཉིས་ཀ་ཕྱོགས་བཞིར་ཧར་བཏོན་པའི་སྒོ་བཞིའི་གཡས་གཡོན་ནས་མདུན་དུ་ཕྱིར་འཐེན་པའི་སྒོ། དེའི་རྩིག་སྣེ་གཉིས་ནས་ངོས་སུ་འགྱེད་པ་སྒོ་ཁྱུད། དེའི་ངོས་ནས་མདུན་དུ་འཐེན་པ་སྒོ་ལོགས། སྒོལ་རྒྱུའི་རྟ་བབ། སྒོར་འཇུག་པའི་ཕྱི་ནང་གི་ཐེམ་སྐས་བཞི་བཞི་བརྒྱད། འབྲས་བུའི་རྟ་བབ་སྒོ་སྟེང་ཀ་བ་བཞིས་བཏེགས་པའི་བརྒྱད་ནི། གཞི་སྔོན་པོ་ལ་གསེར་གྱི་རྡོ་རྗེ་འགྲེང་བུར་བསྒྲིགས་པའི་རྟ་རྐང་། རིན་པོ་ཆེ་དམར་པོའ་ིབད་འདབ་ཀྱི་ཆུ་སྐྱེས། རིན་པོ་ཆེ་སྣ་ཚོགས་ཀྱི་སྒྲོམ་ལེབ། སྣ་འཕྱང་ལས་འཕྱང་བའི་རིན་པོ་ཆེའི་དྲྭ་མིག་གི་ཟར་ཚགས། གཞི་སོ་སོ་ལ་རིན་པོ་ཆེའི་ཕྲ་བཏབ་པའི་སྣ་འཕྱང་། གཞི་བར་སྟེང་ལ་སེང་མགོའ་ིཁ་ནས་འཕྱང་བའི་དྲྭ་ཕྱེད་ལ་ཆུན་འཕྱང་། གཞི་སྔོན་པོའ་ིསྟེང་དཀར་པོའ་ིཤར་བུས་བསྒྲིགས་པ། བྱ་འདབ་དང་འདྲ་བའི་ཟུར་བཞིར་ཁྱུང་མགོའ་ིལྐོག་མ་ནས་དྲིལ་བུ་རླུང་བསྐྱོད་ཀྱི་རྒྱ་ཕུབ། མདུན་དུ་སྣམ་བུ་རྣམས་གླང་རྒྱབ་ཀྱི་ཐད་དུ་ཆ་གཅིག་དེ་ཉིད་མིག་གསུམ་པའི་དབུས་མར་ཆུ་སྲིན་གྱི་ཁ་ནས་འཕྱང་བའི་དྲྭ་བ་དྲྭ་ཕྱེད། སྒོའ་ིཡ་ཕུབ་ཀྱི་རྩིག་པའི་མདུན་དུ་བླ་རེ་བསིལ་ཁང་གིས་གཞི་དང་རྟ་བབ་འདེགས་བྱེད་ཀྱི་གདུང་དང་བཅས་པ་ཕྱོགས་མདོག་བསིལ་ཁང་གི་སྟེང་དབུས་པདྨ་ལ་གཙོ་བོ་མཚོན་པའི་ཆོས་ཀྱི་འཁོར་ལོ་རྩིབས་བརྒྱད་པའི་ལྟེ་བ་ནས་ངེས་པའི་དོན་མཚོན་པའི་གཟེར་བུ་ནོར་བུའི་ཏོག་ཅན་གྱི་གདུགས་ནང་དུ་ཅོད་པན་ཅན་དང་། གཡས་གཡོན་དུ་འཁོར་མཚོན་བྱེད་གསེར་གྱི་རི་དྭགས་ཕོ་མོའ་ིགཟུགས། དྲང་དོན་མཚོན་པའི་གཎྜི་དང་ཐབས་ཤེས་ཀྱི་རྡོར་དྲིལ་ཡང་བཞག་པར་གསུངས། གཞལ་ཡས་ཁང་གི་རྩིག་པའི་ཕྱི་རོལ་རྨང་གཞི་འགྲམ་སྟེགས་ཀྱི་ཚིལ་རཏྣའི་འདོད་སྣམ་དམར་པོ་སྒོ་ཁྱུད་ཀྱི་རྩིག་པ་ལ་ཐུག་གི་བར་འཁོར་བའི་སྟེང་། ཤར་སྟོད་དུ་པི་ཝཾ་མ་སྔོན་མོ་དང་། གླིང་བུ་མ་སེར་མོ། ཤར་སྨད་དུ་རྔ་ཟླུམ་མ་དམར་མོ་དང་། རྫ་རྔ་མ་ལྗང་གུ། དེ་བཞིན་ལྷོར་སྒེག་མ་སྔོན་མོ་དང་། བཞད་མ་དམར་མོ་རང་རྒྱ། གླུ་མ་སེར་མོ་ཏིང་ཤག་གར་མ་ལྗང་གུ་གར་རྒྱ། ནུབ་ཏུ་མེ་ཏོག་མ་སེར་མོ། སྤོས་མ་ནག་མོ། མར་མེ་མ་དམར་མོ། དྲི་མ་ལྗང་གུ་བྱང་དུ་གཟུགས་མ་དཀར་མོ་མེ་ལོང་། རོ་མ་སེར་མོ་ཟས་གཞོང་། རེག་མ་ལྗང་གུ་ན་བཟའ། ཆོས་དབྱིངས་མ་དཀར་མོ་ཆོས་འབྱུང༵་སྟེ་རྡོ་རྗེའི་ལྷ་མོ་བཅུ་དྲུག་ཞི་ཚུལ་ཅན་དར་དང་རིན་པོ་ཆེས་བརྒྱན་པ། སྒོ་ཁྱུད་ཀྱི་མཚམས་དང་ཤར་ལྷོ་ལ་སོགས་པའི་མཚམས་རྣམས་སུ་ཟླ་ཕྱེད་རྡོ་རྗེ་རེ་རེས་མཚན་པ། རྩིག་པའི་སྟེང་དུ་རིན་པོ་ཆེ་སྣ་ཚོགས་ཀྱི་ཕྲ་བཏབ་པ་ཁ་བད་ཀྱི་ཚུལ་དུ་ཕྱིར་འཕྱ་བ། ཕ་གུའི་སྟེང་ཀ་སྤུངས་ཞུ་དང་བཅས་པས་བཏེགས་པའི་གསེར་གདུང་རྩིག་པའི་ཕྱི་མཐའ་དང་ཁོད་མཉམ་པ། གདུང་དང་འདེགས་ཀྱི་ཕྱི་ངོས་ཕྱིར་འབུར་བའི་གཟེར་ཡས་མས་རིམ་པ་བཞི་བཞིས་བཏབ་པ་ལ། གསེར་སྐུད་དཀྲིས་ཏེ་འཕྲེད་ལ་འཐེན་ནས་བཅིང་པས་དྲ་བ་ནང་དུ་མི་འགྲོ་བའི་སྐ་རག་བཞི། ནང་གི་ཐོག་ཕུབ་ཀྱི་ཕྱམ་རྣམས་གསེར་གདུང་ལ་བཀའ་བའི་སྣེར་ཙི་པ་ཏྲའི་གདོང་བརྐོས་པའི་ཁ་ནས་ནོར་བུ་དང་མུ་ཏིག་གི་དྲྭ་བ་འགུག་གཅིག་ནས་གཅིག་གི་བར་སྦྲེལ་བ་དང་། ཁའི་དབུས་ནས་ཐུར་དུ་དཔྱངས་པའི་སྣེ་ལ་ནོར་བུ་སྦོམ་པོ་བཏགས་པ་དྲྭ་ཕྱེད་ཕ་གུ་ལ་རེག་ལ་ཁད་ཙམ་དུ་དཔྱངས་པ། གཞན་ཡང་མེ་ཏོག་གི་ཕྲེང་བ། དར་དཔྱང་མེ་ལོང་ཟླ་ཕྱེད་རྔ་ཡབ་རླུང་བསྐྱོད་དང་བཅས་པས་བརྒྱན་པས་མཛེས་པ། འདོད་སྣམ་གྱི་ཕྱི་མཐའ་ནོན་པའི་བྱ་འདང་ཕུབ་འདབ་ཕུབ་པའི་ནང་ཙམ་གྱི་འོག་ནས་སྤྱི་བླུགས་མགོ་ཐུར་བསྟན་ལྟ་བུའི་ཤར་བུ་ཕྲེང་བ་དཀར་པོ་བསྒྲིག་པ། བྱ་འདབ་ཀྱི་རྩ་བ་གནོན་བྱེད་རིན་པོ་ཆེའི་སྤང་ལེབ་དཀར་པོ་སྟག་མོ་རིས་རིམ་པ་གསུམ་པའམ་བཞི་ཡོད་པ་བསླང་ནས་བསྒྲིག་པུ་ཤུ་མཆོད་རྟེན་བརྩེགས་སུ་བསྒྲིགས་པའི་མདའ་ཡབ་དང་། ཐོག་ཕུབ་ལ་གཞལ་ཡས་ནང་གི་ཀ་བ་ཕྱོགས་རེར་གཉིས་གཉིས་ཀྱིས་བཏེགས་པའི་ཏལ་གདུང་བཞི་བསྣོལ་མཚམས་འཕེལ་ཀ་བསྒྲིགས་ནས་བཏང་བའི་སྣེ་བརྒྱད་ཀ་བ་བརྒྱད་ཀྱི་སྟེང་དུ་ཁེལ་བར་བྱས་པས་གསེར་གདུང་དང་གདུང་ཆེན་བཞིའི་སྣེ་ཐུག་པའི་སྟེང་ཁོད་མཉམ་པའི་སྟེང་ཕྱམ་ཉི་ཤུ་རྩ་བརྒྱད་ཀྱི་དབུས་ཀྱི་རེའུ་མིག་མ་གཏོགས་གཞན་བརྒྱད་པོ་ཕུབ། སྟེང་དུ་རིན་པོ་ཆེའི་སྤང་ལེབ་ཀྱི་རྒྱལ་མ། ཐོགས་པའི་ཚུལ་དུ་རིན་པོ་ཆེ་གཅལ་དུ་བཀྲམ་པས་བྱ་འདབ་དང་ཁོད་མཉམ་པ། རེའུ་མིག་དབུས་མ་མཐོང་ཀ་བཞག་པའི་ཟུར་བཞིར་ཁང་བུ་བརྩེགས་པ་མཛེས་པས་བཏེགས་པའི་སྟེང་རྒྱ་ཕིབ་བཀལ་བའི་རྩེ་མོར་རྡོ་རྗེ་རིན་པོ་ཆེ་འབར་བའི་ཏོག་གིས་མཚན་པ། གཞལ་ཡས་ཁང་ནང་མ་དུར་ཁྲོད་དྲག་པོའ་ིཕོ་བྲང་མི་མགོའ་ིརྩིག་པ་རིམ་གསུམ་ལ། བྷནྡ་ལྕང་ལོ་ཅན་གྱི་ཁ་བད། ཤ་ཆེན་གྱི་འདོད་སྣམ། ཉི་ཟླའི་ཀ་གདན། ཆུ་སྲིན་གྱི་ཁའི་ཀ་ཞུ། ལྷ་ཆེན་བརྒྱད་ཀྱི་ཀ་བ། ཀླུ་ཆེན་བརྒྱད་ཀྱི་གདུང་མ། གཟའ་ཆེན་བརྒྱད་ཀྱི་ཕྱམ། རྒྱུ་སྐར་གྱི་དྲལ་གཟེབ། འདི་དག་རྣམ་པ་ལྷ་ཀླུ་ཆེན་པོའ་ིགཟུགས་ལ་ངོ་བོ་རིན་པོ་ཆེ་སྣ་ཚོགས་ལས་གྲུབ་པ་ཡིན་ཞེས་བཀའ་མ་རྟ་མགྲིན་ཐུགས་དྲིལ་གྱི་ལས་བྱང་ལས་གསུངས་པ་ལྟར་དང་། རྒྱུ་རློན་དང་རྒྱུས་པའི་དྲྭ་ཕྱེད། ཐོད་ཚལ་གྱི་ཆུན་འཕྱང་། མི་རོའ་ིའཕན་གདུགས་སོགས་འཇིགས་ཤིང་རྔམས་པའི་རྒྱན་གྱིས་སྐྱི་གཡང་བ། ཕྱི་རོལ་དུ་བསིལ་བ་ཚལ། སྐུ་ལ་རྫོགས། ཧེ་ཆེན་རོལ་པ། གསང་ཆེན་རོལ་བ། པདྨ་བརྩེགས། ཡ་མ་ཁ། ཁུ་བྱུག་ཀློང་། འཇིག་རྟེན་མངོན་རྫོགས་ཏེ་ངུ་འཁོར་ཆེན་པོ་བརྒྱད་ལ་ཤིང་བརྒྱད་ཀྱི་རྩ་བར་ཕྱོགས་སྐྱོང་། ཞིང་སྐྱོང་། ཆུ་ཀླུང་སྤྲིན་རི་མཆོད་རྟེན་མེ་རིག་འཛིན་གྲུབ་ཐོབ། ཤ་ཟ་འབྱུང་པོ་བྱ་གཅད་རོ་དང་ཀེང་རུས་ཀྱིས་གང་བ་དང་། རྡོ་རྗེའི་སྲུང་འཁོར་གྱི་ཕྱི་རོལ་ཡེ་ཤེས་བསྐལ་པའི་མེ་ལྕེ་ཁ་དོག་ལྔ་པ་འབར་ཞིང་འཁྲུགས་པའོ། །དེ་ལྟར་ཞི་ཁྲོ་ལོངས་སྤྱོད་རྫོགས་པའི་ཞིང་ཆེན་པོ་རྣམ་པ་གང་ལྟར་སྣང་ཡང་ངོ་བོ་དག་ཆེན་ཡེ་ཤེས་ཀྱི་རོལ་པ་ཀུན་བརྟགས་ཀྱི་བློས་བཅོས་ཤིང་བཏགས་པ་ཙམ་མ་ཡིན་པ་གདོད་ནས་ལྷུན་གྲུབ་མངོན་པར་རྫོགས་པར་སངས་རྒྱས་པའི་གནས་རང་སྣང་འོག་མིན་གྱི་ཞིང་ཁམས་སུ་བྱང་ཆུབ་ཀྱི་ཆོས་རྣམས་ཡོངས་སུ་རྫོགས་པའི་བརྡ་དོན་རྟགས་གསུམ་སྤྱི་ལྟར་ཤེས་པ་ལ་གོམས་པས་བར་ཆད་མེད་ལམ་མངོན་དུ་གྱུར་ནས་འབྲས་དུས་རང་སྣང་དོན་གྱི་འོག་མིན་གྱི་ཞིང་ལ་སྦྱོར་བའི་ཐབས་རྨད་དུ་བྱུང་བའོ། །གཞལ་ཡས་ཁང་གི་དབུས་ཀྱི་ལྟེ་བ་ལ་གནམ་ལྕགས་ཞུན་མ་ལས་གྲུབ་པའི་དྲག་པོའ་ིའཁོར་ལོ་རྩིབས་བརྒྱད་པའི་དབུས་ཀྱི་ལྟེ་བའི་ཆར་ཆོས་དབྱིངས་བདེ་བ་ཆེན་པོའ་ིཡེ་ཤེས་རྣམ་ཐར་སྒོ་གསུམ་གྱི་བདག་ཉིད་ཆོས་འབྱུང་ཟུར་གསུམ་སྟེང་རྡོ་རྗེའི་བྲག་ཆེན་འབར་བའི་རྩེར་དུག་ལྔ་དག་པའི་བརྡར། དཔའ་གཏུམ་སྟག་འཇིགས་བྱེད་སེང་གེ་གདུག་པ་གཟིག་གཏུམ་པ་དོམ། སྟོབས་ལྡན་གླང་ཆེན། བརྗིད་པ་མ་ཧེ། འཛིན་པ་ཆུ་སྲིན། ཞེ་སྡང་སྦྲུལ་ཏེ་བྱོལ་སོང་གཙོ་བོ་བརྒྱད་ཀྱིས་ལྷ་ཀླུའི་དྲེགས་པ་ཆེན་པོ་བརྒྱད་བརྫིས་པའི་འོག་སྐྱོན་གྱིས་མ་གོས་པའི་པདྨ་དང་ཐབས་ཤེས་ཉི་ཟླའི་དཀྱིལ་འཁོར་གྱི་གདན་ཁྲི་དང་བཅས་པའོ། །དེ་ཉིད་ལ་སླར་ཡང་སྔགས་ཀྱིས་གསལ་བཏབ་སྟེ་རུ་༵དྲ་༵དྲག་པོ། ཀྲོ་༵ངྷི་༵ཁྲོ་མོ། ཏི༵་ར༵་རོ། བཾ༵་རོའ་ིས་བོན། པཾ༵་ས་བོན། པ༵དྨ་༵མ༵་ངྷ་༵ལ་པདྨའི་དཀྱིལ་འཁོར་དེའི་འགྲེས་ཏེ། མ་སུརྻ་མ་ངྷ་ལ་ཉི་མ། ཨ་ཙནྜ་མ་དྷ་ལ་ཟླ་བའི་བརྩེགས་མར་བསྒོམ་པའོ། །གཉིས་པ་བརྟེན་པ་ལྷ་བསྐྱེད་པ་ལ། དང་པོ་གཙོ་བོ་བསྐྱེད་པ་ནི། ཡན་ལག་གཉིས་པ་རྗེས་སུ་ཆགས་པ་ནི་ཧེ་རུ་ཀའི་རིགས་རྡོ་རྗེ་འཆང་སྟེ་དེ་ནི་རིགས་ཐམས་ཅད་ཀྱི་ཁྱབ་བྱེད་དུ་གསུངས་པ་ལྟར་དཀྱིལ་འཁོར་གྱི་གཙོ་བོ་ཆེ་མཆོག་རྒྱུ་དང་འབྲས་བུའི་ཧེ་རུ་ཀར་བཞེངས་ནས་གཙོ་འཁོར་ཐམས་ཅན་སྤྲོ་བསྡུས་བྱེད་པོ་ཡིན་ཅིང་དག་བྱ་དག་བྱེད་དག་འབྲས་ཀྱི་གནད་ཀྱང་། དཔལ་ཆེན་ཞལ་ལུང་ལས། བདེ་བ་ཆེན་པོའ་ིམཁའ་ཀློང་དུ༔ ཐབས་ཤེས་རྒྱུ་ཡི་ཧེ་རུ་ཀ༔ བདེ་སྟོང་ཆེན་པོར་རོལ་པ་ལས༔ བདུད་རྩི་བྱང་ཆུབ་སེམས་ཀྱི་སྤྲིན༔ བསམ་མི་ཁྱབ་པའི་ཡེ་ཤེས་ཀྱི༔ འཕྲོ་འདུའི་བཀོད་པ་ཅིར་ཡང་སྣང༔ དུག་ལྔ་ཆགས་འཛིན་བྲལ་བར་སྦྱངས༔ འཕགས་པ་མཆོད་ཅིང་གཞན་དོན་བྱས༔ དེ་ཚེ་ཉོན་མོངས་བདུད་བཅོམ་མོ༔ དེ་ཡང་ཆགས་སྡང་འཛིན་རྟོག་ཀུན༔ གཉིས་མེད་རང་འབྱུང་ཡེ་ཤེས་རྩལ༔ སྤང་ཐོབ་བྲལ་བའི་ཆོས་ཉིད་ལ༔ དགག་སྒྲུབ་ཕྱོགས་ལྷུང་ལས་འདས་པསཿ བསླུ་བྲིད་ལྟ་བུའི་བདུད་བཅོམ་མོ༔ རྡོ་རྗེ་ཕུང་པོའ་ིཡན་ལག་ལྔ༔ རྫོགས་པའི་སངས་རྒྱས་ལྔར་ཤེས་ཤིང༔ རྣམ་དག་ལྷ་ཡི་སྐུར་གྱུར་པས༔ ཐ་མལ་ཕུང་པོའ་ིབདུད་བཅོམ་མོ༔ ཚོགས་གཉིས་འབྲས་བུའི་ཐུགས་ཀ་ལས༔ བསྐྱེད་རྫོགས་གདེང་གྱུར་སངས་རྒྱས་ཏེ༔ དེ་ལས་སྐྱེ་དང་འཆི་བ་ཡི༔ རྣམ་རྟོག་རང་མཚན་མེད་པས་ན༔ འཆི་བདག་བདུད་ནི་བཅོམ་པའོ༔ ཞེས་གསུངས་པ་ལྟར་རྡོ་རྗེ་ཐེག་པས་རྣམ་པ་སྦྱོར་སྒྲོལ་གྱི་སྤྱོད་པ་ངོ་བོ་ཡེ་ཤེས་ཀྱི་རྒྱས་ཐེབས་པས་དོན་ལ་དུག་གསུམ་གྱི་འཆིང་བ་གྲོལ་ཞིང་འབྲས་བུ་དཔལ་ཆེན་པོའ་ིགོ་འཕང་མངོན་དུ་བྱ་ཕྱིར། འབྲས་བུའི་མྱང་འདས་སངས་རྒྱས་ཀྱི་མཛད་པས་མ་དག་འཁོར་བའི་སེམས་ཅན་གྱི་བྱ་སྤྱོད་མ་སྤངས་ལམ་དུ་བྱེད་པ་སྟེ། རྣམ་ཀུན་མཆོག་ལྡན་རྡོ་རྗེ་བཙུན་མོའ་ིརྣམ་ཐར་སྒོ་གསུམ་གྱིས་དབྱིངས་ཁྱབ་པའི་འཁོར་འདས་ཀྱི་བྱེད་པོ་རིག་པ་བྱང་ཆུབ་ཀྱི་སེམས་རྒྱུའི་ཧེ་རུ་ཀའི་གཟུགས་སུ་ཤར་བས་དབྱིངས་རིག་བདེ་སྟོང་ཆེན་པོའ་ིསྦྱོར་བའི་འོད་ཀྱིས་མཁའ་ཁྱབ་ཀྱི་སེམས་ཅན་གྱི་ཐ་མལ་དུག་ལྔ་སྦྱངས་ཤིང་ཧེ་རུ་ཀའི་གོ་འཕང་ལ་བཀོད། འཕགས་པ་རྣམས་བདེ་བ་ཆེན་པོའ་ིཡེ་ཤེས་ཀྱིས་མཉེས་ཏེ་སྣོད་བཅུད་དག་པ་ཆེན་པོའ་ིརོལ་པར་སྦྱངས་བས་ཉོན་མོངས་པའི་བདུད་ཆོམས། བདེ་སྟོང་འཕོ་འགྱུར་མེད་པའི་ཡེ་ཤེས་ནམ་མཁའི་གཟུགས་ཀྱི་དབྱིངས་སུ་རྒྱུའི་ཧེ་རུ་ཀ་རྟོག་པ་དང་བྲལ་བར་བཞུགས་པས་སྣང་གསུམ་འཕོ་བའི་སྒྲིབ་པ་དང་བྲལ་བས་ལྷ་བུའི་བདུད་ཆོམས། དབྱིངས་ཕྱུག་མས་ཞུ་བ་གླུ་བསྐྱལ་གྱིས་ཆོས་སྐུ་ལས་གཟུགས་སྐུར་བཞེངས་ནས་ཐུགས་རྗེའི་རྩལ་གྱི་རྟོག་པ་གཡོས་ཏེ་འགྲོ་བའི་དོན་དུ་དཀྱིལ་འཁོར་སྤྲོས་ནས། གཟུགས་ཕུང་རྣམ་སྣང་གཤིན་རྗེ་གཤེད། ཚོར་བ་རིན་འབྱུང་ཆེ་མཆོག་འདུ་ཤེས་སྣང་མཐའ་རྟ་མགྲིན། འདུ་བྱེད་དོན་གྲུབ་ཕུར་པ། རྣམ་ཤེས་མི་བསྐྱོད་པ་ཡང་དག་གི་དཀྱིལ་འཁོར་སོགས་སྒྲུབ་པ་བཀའ་བརྒྱད་ཀྱི་གཙོ་འཁོར་གྱི་ཚོམ་བུ་བཀོད་པས་ཐ་མལ་གྱི་ཕུང་པོའ་ིབདུད་ཆོམས། རང་སྣང་ཡེ་ཤེས་ཀྱི་སྟོན་འཁོར་ངེས་པ་ལྔ་ལྡན་འབྲས་བུ་མཐར་ཐུག་གི་ལོངས་སྐུ་ལ་བསྐྱེད་རྫོགས་ཟུང་འཇུག་གི་སྦྱངས་འབྲས་ཚོགས་གཉིས་རྫོགས་སྨིན་སྦྱངས་མཐར་སོན་པས་ཐ་མལ་སྐྱེ་འཆིའི་རྒྱུ་འབྲས་ལས་འདས་པས་འཆི་བདག་གི་བདུད་ཆོམས་པ་སྟེ་གནད་དོན་དེ་ལྟར་ཤེས་པའི་སྒོམ་ཚུལ་དངོས་ནི་ནམ་མཁར་གནས་པའི་རྒྱུ་ཡི་ཧེ་རུ་ཀ་དཀྱིལ་འཁོར་དབུས་ཀྱི་གདན་ལ་བབ། ཆགས་པ་ཆེན་པོའ་ིཡབ་མཉམ་པར་སྦྱོར་བའི་དགའ་བའི་རོ་དང་བདེ་བའི་སྒྲ་དང་བཅས་པའི་འོད་ཀྱིས་རྒྱལ་བ་རྣམས་མཆོད་ཅིང་སེམས་ཅན་གཞན་གྱི་དོན་བྱས། སླར་ཉིད་ཀྱི་སྐུ་ལ་བསྡུས་ནས་བྱང་ཆུབ་སེམས་ཀྱི་ངོ་བོར་གྱུར་པ་ཧཱུཾ་ཡིག་གིས་མཚན་པ། བདེ་འདུས་གཞུང་ལས་དབྱིངས་ཕྱུག་མས་ཆོས་ཉིད་སྟོང་པའི་རང་སྒྲས་བསྐུལ་ཏེ་གསུངས། མཚན། ཡོངས་སུ་གྱུར་པ་ལས་འབྲས་བུའི་ཧེ་རུ་ཀ་ཁྲག་འཐུང་ཐམས་ཅད་འདུས་པའི་སྤྱི་གཟུགས་དཔལ་ཆེན་པོ་ཆེ་མཆོག་ཧེ་རུ་ཀ་དང་། བླ་མ་རྡོ་རྗེ་ཐོད་ཕྲེང་རྩལ་ཤིན་ཏུ་དྲག་པོ་གཏུམ་ཆེན་མཐིང་ཀ་དབྱེར་མེད་པའི་བདག་ཉིད་དཀྱིལ་འཁོར་གྱི་གཙོ་བོ་སྐུ་མདོག་མཐིང་ནག་དུག་གསུམ་གདོན་ཚོགས་འཇོམས་པའི་བརྡར་ཞལ་གསུམ། དབུས་མཐིང་གཡས་དཀར་གཡོན་དམར་རལ་པ་ཁམ་ནག་གྱེན་དུབ་རྫེས་པའི་དབུས་རྡོ་རྗེ་རྩེ་ལྔ་པའི་ཏོག་དང་། དབུ་རེ་རེ་ཐོད་པ་སྐམ་པོ་ལྔ་ལྔ་རིན་པོ་ཆེའི་རྩེ་ཕྲན་ཅན་གྱི་ནང་རྒྱལ་བ་རིགས་ལྔར་བཞུགས་པ་ནི་ཞི་བ་རྡོ་རྗེ་དབྱིངས་གདན་གསུམ་གྱི་དཀྱིལ་འཁོར་ཡོངས་སུ་རྫོགས་པ། སྤྱན་དགུ་སྡང་མིག་བསྒྲད་པ་དང་། ཞལ་དྲག་ཏུ་གདངས་ཤིང་མཆེ་བ་བཞི་གཙིགས་པ། ལྗང་འདྲིལ་ཞིང་སྨར་སྨིན་ལས་མེ་འབར་བས་སྲིན་པོ་ལྟར་ཁྲོས་པ། ཕྱག་དང་པོ་གཉིས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་རྫོགས་པས་གཟུང་འཛིན་གྱི་མཚན་རྟོགས་འཇོམས་པའི་བརྡར་རྡོ་རྗེ་དང་། བཟོད་པའི་ཕར་ཕྱིན་རྫོགས་པས་དགྲ་བགེགས་ལ་སྙིང་རྗེའི་ཆགས་པ་མཚོན་པའི་བརྡར་དུང་ཁྲག་བསྣམས་པས་ཡུམ་ལ་འཁྱུད་པ། གཡས་གཉིས་བསམ་གཏན་ཕར་ཕྱིན་བདེ་གསལ་མི་རྟོག་པའི་ཡེ་ཤེས་མཚོན་པའི་ཁ་ཊྭཾ་དང་། བརྩོན་འགྲུས་ཀྱིས་མི་མཐུན་ཕྱོགས་བསྲེགས་པའི་མེ་དཔུང་། གཡོན་གཉིས་སྦྱིན་པའི་ཕར་ཕྱིན་གྱིས་ཚོགས་གཉིས་ཀྱི་ཞིང་ས་བཏུལ་བའི་བརྡར་ཐོང་གཤོལ་དང་། ཚུལ་ཁྲིམས་རྒྱུད་ལ་བཟུང་ནས་མི་གཏོང་བ་མཚོན་ཕྱིར་ལྕགས་སྡིག་ལྟེ་བར་ཕྱིན་དྲུག་རྫོགས་པའི་མཚོན་ཆ་བསྣམས་པ། ཚད་མེད་པ་དང་རྫུ་འཕྲུལ་རྐང་པས་ས་ལམ་མྱུར་དུ་བགྲོད་པའི་བརྡར་ཞབས་བཞི། ཤེས་རབ་ཀྱིས་སྦྲོས་པ་བྲལ་བའི་བརྡར་གཡས་བསྐུམ། ཐབས་མཁས་སྐྱོ་དུབ་དང་བྲལ་བའི་བརྡར་གཡོན་བརྐྱངས་བ་གྱད་ཆེན་པོའ་ིསྟབས་ཀྱིས་ཆགས་སྡང་འཁྲུལ་རྟོག་གི་གཟུགས་རྒྱལ་འགོང་དང་བདུད་བཞི་བསྣོལ་བའི་སྤྱི་བོའི་སྟེང་ནས་བརྫིས་པ་ཐུགས་རྗེའི་འཛིན་ནས་མི་གཏོང་བའི་བརྟར་ཆུ་སྲིན་གྱི་ཕྲག་ཁེབ་ནི་འཕྲག་པ་གཡས་གཡོན་དུ་ཆུ་སྲིན་གྱི་མགོ་ལྤགས་ཀྱི་སྟོད་ཁེབ་ལྟ་བུ་ཡིན་ནམ་དཔྱད། དཔུང་པ་གཡས་གཡོན་དུ་ཐབས་ཤེས་མཚོན་པའི་ཉི་ཟླ་འཆར་བ། ཐབས་ཤེས་དབྱེར་མེད་པའི་རྟགས་སུ་རྡོ་རྗེ་དང་རིན་པོ་ཆེའི་རང་བཞིན་ཁྱུང་གི་གཤོག་པ་གཉིས་བརྐྱང་བ། སྐུ་གསུང་ཐུགས་ཀྱི་ཡེ་ཤེས་ལ་གང་གིས་ཀྱང་མི་ཚུགས་པའི་བརྡར་དབང་གི་བསྭེ་ཁྲབ། རྡོ་རྗེའི་རེ་ཁཱ་ཅན་གྱི་སློག་པ། རྒྱ་གྲམ་བྱེའུ་ཆས་ཆུང་ངུ་མང་པོའ་ིཁྲག་ཡིན་ནམ་དཔྱད། མཆེ་བ་ཟླ་ཚེས་ལྟར་གཙིགས་པ། ཡེ་ཤེས་ཀྱི་མེ་དཔུང་འབར་བའི་ཀློང་དུ་བཞུགས་པ་སྟེ་དཔལ་ཆེན་པོའ་ིསྐུ་ལ་ཟག་མེད་ནང་གི་ཡོན་ཏན་མཚོན་པའི་རྒྱན་ཡེ་ནས་རང་ཆས་སུ་བཞུགས་པའི་དཔལ་གྱི་ཆས་བརྒྱད་དང་། ཐབས་མཁས་ཕྲིན་ལས་ཀྱི་གོས་ཞིང་གི་གཡང་གཞི། ཁྱབ་པ་ཐུགས་རྗེའི་གོས་གླང་ཆེན་ཀོ་རློན་གྱི་སྟོད་གཡོག་ཕྱི་ནང་གསང་གསུམ་སྡུད་པའི་གོས་སྟག་ཤམ་སྟེ་བགོ་བའི་གོས་གསུམ། ཀླུ་རིགས་ལྔའི་རྒྱལ་རིགས་དཀར་པོའ་ིདབུ་སྐྲ་བཅིང་བ་དང་། རྗེ་རིགས་སེར་པོའ་ིསྙན་རྒྱན། ཟམ་ཟེའི་རིགས་དམར་པོའ་ིམགུལ་ཆུན། དམངས་རིགས་ལྗང་གུའི་དོ་ཤལ་ཏེ་ཕྱག་ཞབས་ཀྱི་གདུ་བུའི་རྒྱན་དང་། ཡང་ན་དམར་རིགས་སྔོ་ཁྲས་དོ་ཤལ་གདོལ་པའི་རིགས་ནག་ཁྲས་གདུ་བུ་མཛད་པ་ཡང་འབྱུང་། ཐོད་སྐམ་ལྔའི་དབུ་རྒྱན། ཐོད་རློན་ལྔ་བཅུའི་སེ་རལ། ཐོད་པ་ཚལ་གསུམ་གྱི་ཕྲེང་བའི་ག་ཤལ་ཞེས་ཀྱང་འབྱུང་། ཐོད་པ་ཚལ་བུའི་དཔུང་རྒྱན་ཏེ་འདོགས་པའི་རྒྱན་གཉིས། དུར་ཁྲོད་ཀྱི་ཆས་བརྒྱད་དེ་འདི་རྣམས་གཞན་དང་ཅུང་ཟད་འདྲ་མིན་རོལ་པ་ཆེན་པོའི་གཏོར་ཟློག་ལྟར་ཡིན། མཁུར་ཚོས་སུ་རཀྟའི་ཐིག་ལེ། ཨོག་མར་ཞག་གི་ཟོ་རིས། དཔྲལ་བར་ཐལ་ཆེན་གྱི་ཚོམས་བུ་སྟེ་བྱུག་པའི་རྩི་གསུམ། སྔོན་བྱུང་རུ་ཏྲ་བསྒྲལ་བའི་ལོངས་སྤྱོད་ཀྱི་ཆས་དཔལ་ཆེན་པོའ་ིསྐུའི་རྒྱན་དུ་བཞེས་པའི་རྒྱལ་བྱེད་དཔའ་རྟགས་ཀྱི་ཆས་ཡོངས་གྲགས་དུར་ཁྲོད་ཀྱི་ཆས་བརྒྱད་དོ། །སྙིང་ཐིག་རང་གཞུང་ལྟར་བརྩིས་ན་དུར་ཁྲོད་ཀྱི་ཆས་བཅུས་སྐུ་ལ་བརྒྱན་པ། སྤྱི་གཙུག་ཏུ་རྡོ་རྗེའི་བྱ་ཁྱུང་ལྡིང་བ་སྟེ་སྤྱིར་དཔལ་ཆེན་པོའ ི་ཞལ་ལུང་ལས། དེ་ཡང་རིགས་པས་བསྐྱེད་པའི་ལྷར༔ རང་རྒྱུད་རྩིས་གདབ་མེད་པའི་ཕྱིར༔ རྟོག་པ་འདུལ་བའི་གཉེན་པོ་རུ༔ གཙོ་དང་འཁོར་གྱི་རོལ་པ་དང་༔ ཞལ་ཕྱག་རྣམ་འགྱུར་མཐའ་ཡས་པའི༔ རྟགས་དང་དོན་གྱི་བརྡ་མཚོན་ནས༔ སྣོད་བཅུད་སྤྲུལ་པའི་དཀྱིལ་འཁོར་དུ༔ སྒོ་གསུམ་ལྷ་སྔགས་ཏིང་འཛིན་གྱིས༔ གདམས་པ་གདིང་དུ་གྱུར་པ་ལ༔ བསླབ་ཕྱིར་བདག་སྲས་གཞན་སྲས་ནི༔ ཞེས་སོགས་གསུངས་པ་ལྟར་གཙོ་འཁོར་ཞི་ཁྲོ་རྒྱན་དང་ཕྱག་མཚན་སོགས་རིག་རྩལ་ཡེ་ཤེས་ཀྱི་རོལ་པ་གང་འདུལ་འདོད་དགུར་འཆར་བར་རང་རྒྱུད་ཐ་མལ་གྱི་འཛིན་པ་དག་པ་དང་རྒྱན་དང་ཕྱག་མཚན་གྱི་དོན་རྟགས་བསྐྱེད་རིམ་ཁྲིད་ཟིན་ཕལ་ཆེར་དུ་འབྱུང་བ་ལྟར་ཤེས་པར་བྱ་བ་ལས་འདིར་ཧ་ཅང་ཡིག་ཚོགས་ཐལ་བས་མ་བྲིས་སོ། །ཡུམ་གནམ་ཞལ་དབྱིངས་ཕྱུག་མ་སྔོན་མོ་ཞལ་གཅིག་ཕྱག་གཉིས་སྤྱན་གསུམ་མ། གཅེར་བུ་སྐུ་དཀྲོལ་ཞིང་ནུ་མ་འབུར་བ་གསང་བའི་ཆུ་སྐྱེས་རྒྱས་པ་སོགས་ལང་ཚོས་སྒེག་པ། གཡས་ཀ་ཊཾ་དང་བཅུས་པས་ཡབ་ཀྱི་མགུལ་ནས་འཁྱུད་པ་གཡོན་འདོད་ཆགས་དབྱིངས་སུ་དག་པའི་བརྡར་དུང་ཁྲག་ཞལ་དུ་སྟོབ་པ། ཞབས་གཉིས་གཡོན་བསྐུམ་པས་ཡབ་ལ་འཁྱུད་ཅིང་། གཡས་བརྐྱང་བའི་སྟབས་ཀྱིས་སྙོམས་པར་ཞུགས་པ། གཟིག་ཤམ་དང་ཐོད་སྐམ་གྱི་དབུ་རྒྱན་དང་དོ་ཤལ་ཅན་དབྱིངས་རིག་གཉིས་སུ་མེད་པའི་ཚུལ་དུ་སྦྱོར་ཞིང་བཞུགས་པའོ། །གཉིས་པ་འཁོར་གྱི་ཚོགས་བསྐྱེད་པ་ནི། གཙོ་བོ་ཡབ་ཡུམ་གྱི་མཁའ་གསང་རྡོ་རྗེ་དང་པདྨ་སྦྱོར་བས་ཆགས་པའི་བརྡ་བཞིས་བསྐུལ་ཏེ་འཁྱུད་སྡོམ་སྤྲད་པས་སྦྱོར་བ་སྟེ་དགའ་བཞི་ཉམས་སུ་མྱོང་ནས་མཁའ་གསང་བྱིན་གྱིས་བརླབས་པ་དང་། གདན་དང་། ས་བོན་སྤྲོ་བའི་བྱ་བ་གསུམ་བྱས་པའི་ཚིམ་སྟེ་བདུད་རྩི་བྱང་ཆུབ་སེམས་ཀྱི་སྤྲིན་ལས་སྟོང་གསུམ་སྤྲུལ་པས་ཁྲོ་བོས་གང་། དྲེགས་པ་ཅན་རྣམས་ཚར་བཅད་དབང་དུ་བསྡུས། ཐམས་ཅད་དཔལ་ཆེན་པོའ་ིགོ་འཕང་ལ་བཀོད། ཚུར་འདུས་སྙོམས་འཇུག་གི་བདེ་བའི་བཅུད་དུ་ཞུ་བ་སངས་རྒྱས་ཐམས་ཅད་ཀྱི་སྐུ་གསུམ་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའ་ིབདག་ཉིད་ཧཱུྃ་ཡིག་བརྒྱད་དུ་གྱུར་པ་མཁའ་གསང་ནས་སྤྲོས་ཏེ་ཕྱོགས་མཚམས་སུ་འཁོར་ལོའ་ིརྩིབས་བརྒྱད་ཀྱི་སྟེང་དུ་རང་སྒྲ་བཅས་བབ་པ་ཡོངས་སུ་གྱུར་པ་ལས་ཤར་དུ་ཐུགས་རྡོ་རྗེ་ཡང་དག་མཐིང་ག་ལ་རིགས་བཞིའི་ཧེ་རུ་ཀ་ཡབ་ཡུམ། ལྷོར་ཡོན་ཏན་རྡོ་རྗེ་གཤིན་རྗེ་སེར་ནག་ལ་གཤེད་ཆེན་སྡེ་བཞི། ནུབ་ཏུ་གསུང་རྡོ་རྗེ་རྟ་མགྲིན་དམར་ནག་ལྷོ་བྱང་དུ་སྲས་ཕྲ་མེད་གཉིས། ཤར་ནུབ་ཏུ་རྡོ་རྗེ་དང་པདྨ་ཀར་དབང་། བྱང་དུ་ཕྲིན་ལས་རྡོ་རྗེ་ཕུར་པ་ལྗང་ནག་ལ་རིགས་བཞིའི་སྲས་མཆོག ཤར་ལྷོར་བླ་མེད་ཧེ་རུ་ཀ་སྔོ་ནག་ལ་དབྱིངས་ཀྱི་མ་དྲུགལྷོ་ནུབ་ཏུ་རིག་འཛིན་རྡོ་རྗེ་ཆོས་དཀར་པོ་རིགས་ཀྱི་རིག་འཛིན་བཞི། ནུབ་བྱང་དུ་དྲེགས་འདུལ་མཐིང་ནག་དང་། བྱང་ཤར་སྟོབས་ལྡན་ནག་སོ་ལ་དྲེགས་པའི་སྡེ་དཔོན་བཞི་སྟེ་ལས་བྱང་རྩ་བར་ཀུན་ཀྱང་རིགས་བཞིའི་འཁོར་དང་བཅས༔ ཞེས་གསུངས་པས་བཀའ་བརྒྱད་བདེ་འདུས་ཀྱི་བསྐྱེད་འདིའི་ཡུམ་གྱི་ཕྱག་གཡས་གཟུགས་ཁམས་འདེགས་ཚུལ་གྱེན་དུ་བསྟན་པ། གཡོན་འདོད་ཁམས་གནོན་པས་སྒྲུབ་པའོ། །མཆན་རྫོགས་ཆུང་ངུར་རྩ་རྒྱུད་ཀྱི་ལེའུ་བཅུ་པ་དང་། གཏེར་གཞུང་གེ་ལས་ས་བྱང་དང་རྣམ་བཤད་དུ་འདི་ལྟར་གསུངས་པས་དེ་བཞིན་བཀོད་པ་ཡིན་ལ། དཔལ་དགུའི་ཡུམ་རྣམས་ཆོས་ཉིད་འགྱུར་བ་མེད་པ་མཚོན་པའི་སྐུ་མདོག་མཐིང་ནག་གྲི་ཐོད་ཅན་རུས་རྒྱན་དང་ཐོད་ཕྲེང་རྒྱན་ལྡན། ཡབ་རྣམས་དཔལ་དང་དུར་ཁྲོད་ཆས་གཙོ་བོའ་ིསྐབས་ལྟར་དང་། རིག་འཛིན་ཞི་མ་ཁྲོ། དབུ་སྐུ་ནག་པོ་ཐོར་ཚུགས་རིན་པོ་ཆེའི་དབུ་རྒྱན་དང་ཅོད་པན། ཟི་ལྡིར་དར་གྱི་སྨད་གཡོགས། རུས་པའི་རྒྱན་དྲུག་དར་གྱི་ཕོ་ལོང་བསྒྲིལ་བའི་གདན་ལ་བཞེངས་པ། གཞན་རྣམས་པད་ཉིད་དགྲ་བགེགས་ཕོ་མོའ་ིགདན་དང་བཅས་པའི་གཙོ་འཁོར་ཀུན་གྱི་ཐུགས་ཀར་རང་འདྲའི་ཡེ་ཤེས་སེམས་དཔའ། དེའི་ཐུགས་ཀར་ཉི་མའི་སྟེང་རྡོ་རྗེའི་ལྟེ་བར་ཧཱུྃ་ལ་རང་སྔགས་ཀྱིས་གཡས་སུ་བསྐོར་བར་གསལ། གཞལ་ཡས་ཁང་གི་སྒོ་བཞིར་སྒོ་མ་ལྕགས་ཀྱུ། ཞགས་པ། ལྕགས་སྒྲོག་དྲིལ་བུ་མ་བཞི་དཀར་སེར་དམར་ལྗང་བཞིས་ཕྱག་རྒྱ་བཞི་བསྣམས་པ་ཁྲོ་མོའ་ིཆས་ཅན་དུ་གསལ་བ་དང་། ཕྱག་རྒྱ་རྒྱས་པའི་སྐབས། དཔལ་ཆེན་པོ་དབུ་དགུ། ཕྱག་བཅོ་བརྒྱད། ཞབས་བརྒྱད་ཅན་རྩ་ཕྱག་དང་པོ་གཉིས་རྡོ་རྗེ་དུང་ཁྲག་ཕྱག་གཡས་བརྒྱད་སེམས་དཔའ། གཡོན་བརྒྱད་སེམས་མ་བརྒྱད། ཡེ་ཤེས་སེམས་དཔལ་ཀུན་བཟང་ཡབ་ཡུམ་རིགས་ལྔ་ཡབ་ཡུམ་དགུ་རྒྱན་དུ་རྫོགས་པས་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་རྫོགས་གསུངས་འཁོར་གསལ་ཁ་མི་འདུག་ལས་བྱང་གཞུང་དུ། བདུན་བརྒྱ་ཉེར་ལྔའི་ལྷ་ཚོགས་རྣམས༔ ཉི་ལས་འོད་ཟེར་བཞིན་དུ་ཤར༔ ཅེས་གསུངས་པས་དེ་ལྟར་ཚོམ་བུ་དགུའི་ལྷ་གཙོ་འཁོར་རག་རྩིས་ཀྱི་བདུན་བརྒྱ་ཉེར་ལྔའི་གྲངས་རྩི་ཚུལ་ནི། ཆེ་མཆོག་ལ་ཕྱོགས་བཞིར་རིགས་བཞི་ཡབ་ཡུམ། ཁྱམས་ལ་ཁྲོ་བོ་བཅུ་སྒོ་མཐར་བྱེད་བཞི་སྟེ་གཙོ་འཁོར་ཉེར་བཞི། ཡང་དག་ལ་ཡང་ངག་ཞལ་གསུམ་ཕྱག་དྲུག་གསུམ་རྡོ་རྗེ་ཁ་ཊྭཱྃ་གསང་བའི་རྡེའུ་ཆུང་། གཡོན་གསུམ་དུང་དམར་སྒྱུ་ཞགས་ཕྱུང་ཁྲ། ཞབས་བརྒྱད་ཅན་འཁོར་དངོས་བསྟན་གཽ་རཱི་བརྒྱད་དག་པ་ཅན་གསུངས། རིགས་བཞི་ཡབ་ཡུམ། ཕྱོགས་མཚམས་བརྒྱད་དུ་གཽ་རཱི་བརྒྱད་དང་། སིང་ཧ་མ་བརྒྱད་སྤེལ་ཏེ་བཞུགས་པ་སྒོར་རྟ་གདོང་མ་སོགས་བཞི་སྟེ་གཙོ་འཁོར་སུམ་ཅུ། གཤིན་རྗེ་གཤེད་ཀྱི་འཁོར། གཙོ་བོའ་ིགཡས་སུ་སྒྲོལ་ཡུམ། རྩི་བས་ལ་གཤེད་བཞི་ཡབ་ཡུམ། ཁྱམས་ལ་འཆི་བདག་བཅུ་གཉིས་ཡུམ་བཅས། སྒོར་གདོང་མོ་བཞི་སྟེ་གཙོ་འཁོར་གཤིན་རྗེ་ཞལ་གསུམ་ཕྱག་དྲུག་གི་རྡོ་རྗེ་འཁོར་ལོ་རལ་གྲི་གཡས། བེ་ཅོན་གཏུན་ཤིང་སྡིགས་མཛུབ་གཡོན། ཞབས་བཞི་ཡུམ་སྙིང་དང་གྲི་ཐོགས་པ་རྒྱན་དང་སྤྲུལ་བའི་ལྷ་ཡོངས་རྫོགས། ལས་གཤིན་བཞི་གཤིན་ཆེན་བཅུ་གཉིས་ཟླ་ཞག་གཤེད་བདུན་མེད་པ་ཀིང་ཀང་བཅས་གསུངས་པ་ཕྱོགས་མཚམས་སུ་དགུ་རེ་འདུག་སོ་དགུ། སྒོམ་ཁོག་ཆེན་མོར་གཤེད་བཞི་ལའང་སྒྲོལ་ཡུམ་བཤད་པ་ལྟར་ན་ཞེ་གསུམ་རྟ་མགྲིན་དབུ་ལྔ་ཕྱག་བཅུ་དྲུག་གི་གཡས་རྡོ་རྗེ་ཁ་ཊྭཱཾ་དྲིལ་བུ་ལྕགས་ཀྱུ་སྦྲུལ་ཞགས་འཁོར་ལོ་རལ་གྲི་རྡོ་རྗེ་ཕྲེང་བ། གཡོན་བརྒྱད་ལ་ཕྱག་མཚན་དགུ་འདུག་པ་ཁྱུང་ཁྲ་ཐབས་སུ་འགྱེད་པ་ལས་ཕྱག་གིས་མ་བསྣམས་པ་ཡིན་ནམ་སྙམ། མཆན་ཐོད་ཁྲག་པདྨ་སྙིང་དབྱུག་པ་རྒྱ་གྲམ་བེ་ཅོན་མེ་དཔུང་ཏྲི་ཤུ་ལ་ཁྱུང་ཁྲ། ཞབས་བརྒྱད་ཡུམ་པདྨ་གཟི་ལྡན་ནོར་བུ་ཟ་མ་ཏོག་བསྣམས། འཁོར་གོ་ལ་མ་དྲག་ཡུལ་བཞི་ཁམས་རྒྱ་དམུས་ལོང་ཁྱི་སྤྱང་ཕོ་ཉ་སུམ་བརྒྱ་དྲུག་ཅུ་གསུངས། གྱི་འཁོར་གཡས་གཡོན་དུ་ཕྲ་མེན། རྩིབས་དང་ཁྱམས་ཀྱི་ཕྱོགས་བཞིར་ཟིལ་གནོན་ཡབ་ཡུམ་བརྒྱད། སྒོ་བཞིར་ཁྲོ་བོ་བཞི། རྡོ་རྗེ་གཞོན་ནུའི་འཁོར་རྩིབས་ལ་སྲས་མཆོག་ཀཱོ་ལ་ཡབ་བཞི། ཁྱམས་ཀྱི་ཕྱོགས་མཚམས་དང་ཤར་སྟོད་ནུབ་སྨད་རྣམས་སུ་ཁྲོ་བཅུ་ཡབ་ཡུམ། ཟ་གསོང་ཉི་ཤུ་དང་བཅས་པ་རྡོ་རྗེ་གཞོན་ནུ་ཞལ་གསུམ་ཕྱག་དྲུག་གཡས་རྡོ་རྗེ་རྩེ་དགུ་རྩེ་ལྔ། གཡོན་མེ་དཔུང་ཁ་ཊྭཱྃ་མཐའ་གཉིས་ཕུར་བུ་ཞབས་བཞི། སྦྱོར་ཡུམ་འཁོར་ལོ་རྒྱས་འདེབས་དྲིལ་བུ་ཐོད་ཁྲག་སྒྲོལ་ཡུམ་ཨེ་ཀ་ཛ་ཊི་གྲི་ཐོད་འཁོར་སྲས་མཆོག་རིགས་ལྔ་ཁྲོ་བཅུ་ཁྲ་ཕྱག་ཕུར་སྲུང་དམ་ཅན་གསུངས་པ་འབྱུང་བ་ལྟར་འཕྲོས་དོན་དུ་བཀོད་པ་དང་། སྒོར་གདོང་མོ་བཞི་སྟེ་གཙོ་འཁོར་ལྔ་བཅུ་བླ་མེད་ཧེ་རུ་ཀའི་གཙོ་བོའ་ིགཡས་དང་རྩིབས་བཞིར་རྟག་པའི་རྒྱལ་མོ་ལྔ། གཙོ་བོའ་ིམདུན་དང་གཡོན། ཁྱམས་ཀྱི་ནང་ངོས་རྣམས་སུ་རྗེ་མོ་བཅུ་གཉིས་ཁྱམས་ཀྱི་ཕྱི་ངོས་སུ་སྲིད་པའི་སྨད་མོ་ཉེར་གསུམ། སྒོར་སྲིང་བཞི་སྟེ་གཙོ་འཁོར་ཞེ་བརྒྱད། རིག་འཛིན་ཐོད་པ་རྩལ་གྱི་འཁོར། རྩིབས་ལ་ལྷུན་གྲུབ་རིག་འཛིན་སོགས་བཞི། ཁྱམས་ལ་རིག་འཛིན་བརྒྱད། སྒོར་སློབ་དཔོན་བཞི་སྟེ་གཙོ་འཁོར་བཅུ་བདུན་ནི་རྣམ་བཤད་ལྟར་དང་། སྒོམ་ཁོག་ཆེན་མོར་རྩིབས་མཆན་ལ་རིག་འཛིན་བརྒྱད། ཁྱམས་ལ་སློབ་དཔོན་བཞི་བཀོད་པར་གསུངས། དྲེགས་འདུལ་གྱི་གཙོ་བོའ་ིགཡས་གཡོན་དུ་དབང་ཕྱག་ཡབ་ཡུམ་རྩིབས་ལ་ཡ་མ་རཱ་ཛ་སོགས་བཞི་ཡུམ་བཅས། སྟེང་འོག་ཏུ་གཟའ་དང་ཀླུ་ཡབ་ཡུམ། ཁྱམས་ཀྱི་ཕྱོགས་རེར་ཤམ་སོ་སོགས་གསུམ་གསུམ་སྟེ་བཅུ་གཉིས། སྒོར་སྲོག་བདག་སོགས་བཞི་སྟེ་གཙོ་འཁོར་སོ་གཉིས། སྟོབས་ལྡན་ནག་པོའ་ིའཁོར་རྩིབས་ལ་འཆི་བདག་སོགས་བཞི་ཡུམ་བཅས། ཁྱམས་ཀྱི་ཕྱོགས་བཞིར་མ་ཧཱ་དེ་ཝ་སོགས་བཞི། སྟེང་འོག་ཏུ་གཟའ་དང་ཀླུ། སྒོར་ལི་བྱིན་ཧ་ར་སོགས་བཞི་སྟེ་གཙོ་འཁོར་ཉི་ཤུ་དེ་ལྟར་བསྐྱེད་རྫོགས་ཆེན་མོ་ལྟར་ན། ཕོ་བྲང་གླེང་དགུ་ཡོད་པས་དེའི་ལྷ་ཚོགས་ལ་ཁྱོན་ཉིས་བརྒྱ་དང་ཉི་ཤུ་རྩ་བཞིའོ། །བཀའ་སྲུང་ནི། དཀྱིལ་འཁོར་ཕྱི་ཁྱམས་ལ་དབང་མོ་ཉེར་བརྒྱད། ཕྱིའི་མུ་ཁྱུད་ལ་མཁའ་འགྲོ་སོ་གཉིས། གིང་བཅོ་བརྒྱད་ལངྐའི་གནས་གཞན་འགོད་པའི་རིམ་པས་དྲུག་ཅུ་སྟེ་བཅུ་དྲུག་འབར་མ་བརྒྱད། ས་བདག་སོ་གཉིས། མ་བདུན། སྲིང་བཞི། ཕོ་ཉ་དྲུག་ཅུ་རྩ་བཞི། འབུམ་ཕྲག་ཡངས་པའི་མཁྲོ་རིགས་བསྡུས་པས་ཉི་ཤུ། བརྟན་བཅུ་གཉིས་ཏེ། དྲིལ་བས་བཀའ་སྲུང་ཉིས་བརྒྱ་དང་བཞི་བཅུ་ཞེ་གཅིག་རྣམས་རྩ་རྒྱུད་དང་སྒོམ་ཁོག་ལས་དངོས་སུ་བཤད་ཅིང་། དེ་སྟེང་དཀྱིལ་འཁོར་དགུ་མུ་རན་ལ་བཀོད་པའི་བཀའ་སྲུང་ཆེ་མཆོག་གི་ཅེ་སྤྱན་མ་བརྒྱད། ཡང་དག་གི་དབང་མོ་ཉེར་བརྒྱད། གཤིན་རྗེ་གཤེད་ཀྱི་གིང་བདུད་རྩིས་ཤན་པ་རྣམས་བཞི་བཞི་སྟེ་བཅུ་དྲུག་རྟ་མགྲིན་གྱི་ཁམས་བརྒྱ་མ་དྲུག་དམུས་ལོང་བཞི། ཁྱི་བརྒྱད། སྤྱང་བརྒྱད། ཕོ་ཉ་བཞི། འབྲུག་མོ་བཞི་སྟེ་སོ་གཉིས། ཕུར་པའི་ཤྭ་ན། བདག་ཉིད་ས་བདག་གིང་བདུད་སྐྱེས་བུ་རྣམས་བཞི་བཞི་སྟེ་ཉེར་བཞི། མ་མོའ་ིཡང་གབ་མ་བཞི། སྦས་པའི་མ་བཞི། གདོང་མོ་བཞི། རོ་ཁམ་གསུམ། ནག་མོ་ཕུང་གསུམ་གསང་བའི་ཕོ་ཉ་གསུམ་སྟེ་ཉེར་བཞི། རིག་འཛིན་གྱི་དཔའ་བོ་དང་མཁའ་འགྲོ་མ་བཞི་བཞི་སྟེ་བརྒྱད། དེ་ལྟར་དཀྱིལ་འཁོར་དྲུག་པོའ་ིབཀའ་སྲུང་ཆིག་བརྒྱ་ཞེ་གཉིས་ཡོད་ཅིང་། དྲེགས་འདུལ་དང་དྲག་སྔགས་ཀྱི་མུ་རན་ལ་བཀོད་པ་གྲངས་ངེས་མ་མཛད་དོ། །དེ་རྣམས་ཀྱི་སྟེང་དུ་གཙོ་བོ་ཡབ་ཡུམ་གྱི་ཕྱག་མཚན་ཞི་བ་བཞི་བཅུ་ཞེ་གཉིས་དང་། ཡུམ་གྱི་ཀཾ་སིང་བཅུ་དྲུག་བསྣན་པའི་བསྐྱེད་རྫོགས་ཆེན་མོ་ལྷ་གྲངས་ཀུན་དྲིལ་བས་རགས་རྩིས་བདུན་བརྒྱ་ཉི་ཤུ་རྩ་ལྔ་སྟེ་ལས་བྱང་དུ་དངོས་བསྟན་གསུངས་ཕྱིར་གྲངས་རྩི་ཚུལ་ཤེས་ན་ལེགས་པར་སེམས་ཏེ་བཀོད་པ་ལས། རྒྱས་པའི་སྐུ་མདོག་ཕྱག་མཚན་སོགས་གཙོ་བོའ་ིཡེ་ཤེས་ཀྱི་རོལ་པ་ལས་ཉི་མ་དང་འོད་ཟེར་བཞིན་དུ་མོས་པས་བསྐྱེད་པ་ཙམ་གྱིས་རུང་བར་མངོན་ནོ། །གསུམ་པ་བྱིན་གྱིས་རླབས་ཤིང་དབང་བསྐུར་བ་ནི། སངས་རྒྱས་རྣམས་མངོན་པར་བྱང་ཆུབ་པའི་ཚེ་ནང་གི་སྤང་རྟོགས་ཀྱིས་ཁམས་གསུམ་ཆོས་ཀྱི་རྒྱལ་པོར་ལྷ་དང་བཅས་པའི་འཇིག་རྟེན་གྱིས་མངའ་གསོལ་བ་དང་མཚུངས་པར། སྦྱང་གཞི་ཕྱི་ནང་གཞན་གསུམ་གྱི་སྣོད་བཅུད་རྒྱུད་གསུམ་ལ་སྦྱོངས་བྱེད་དབང་བསྐུར་རྒྱས་གདབ་ཕྱག་རྒྱ་བཞིས་བཅིབས་པ་གསུམ། བསྐྱེད་རིམ་རྒྱས་པ་གཉིས་ཀྱི་ཡན་ལག་ཏུ་འབྱུང་བ་བཞིན་རྫོགས་པར་བྱས་པའི་གནད་ཀྱིས། སྦྱངས་འབྲས་གདན་གསུམ་ཞི་ཁྲོའ་ིསྐུ་གསུང་ཐུགས་ཡེ་ཤེས་ལྔ་དག་པ་བདེ་བ་ཆེན་པོ་མངོན་དུ་བྱེད་པ་སྟེ། ཧཱུཾ་རང་ལས་ཤར་བའི་སོགས་ཀྱི་དོན་དེ་ལྟར་བསྒོམ་པའི་ལྷ་རྣམས་སངས་རྒྱས་ཐམས་ཅད་ཀྱི་སྐུ་གསུང་ཐུགས་དང་རང་གི་སྒོ་གསུམ་གཉིས་སུ་མེད་པ་རྡོ་རྗེ་གསུམ་གྱི་རང་བཞིན་དུ་བྱིན་གྱིས་བརླབས་པས་གསང་བ་བསམ་གྱིས་མི་ཁྱབ་པའི་ནུས་མཐུའི་རྩལ་ཡོངས་སུ་རྫོགས་པར་བྱ་བ་སྟེ། རང་དམ་ཚིག་གི་འཁོར་ལོར་བསྐྱེད་པའི་ལྷ་གཙོ་འཁོར་རྣམས་ཀྱི་སྤྱི་བོར་དུང་ཁང་གི་འཁོར་ལོར་ཟླ་བ་ལ་ཨོཾ་དཀར་པོ་སྐུ་རྡོ་རྗེ་རྣམ་སྣང་དང་རིན་འབྱུང་འདྲེས་པ། མགྲིན་པར་པདྨ་དམར་པོ་ལ་ཨཱཿདམར་པོ་གསུང་རྡོ་རྗེ་སྣང་མཐའ་དང་དོན་གྲུབ་འདྲེས་པ། སྙིང་གར་གཙོ་བོ་ཡབ་རྣམས་ཀྱི་ཡེ་ཤེས་སེམས་པའི་མདུན་དུ་ཡུམ་དང་འཁོར་རྣམས་ཀྱི་ཐུགས་ཀར་ཉི་མ་ལ་ཐུགས་རྡོ་རྗེ་མི་བསྐྱོད་པ་དང་རྡོར་སེམས་འདྲེས་པ་ཧཱུྃ་མཐིང་གའི་མཚན་པ་རྣམས། དུས་འཁོར་ལས་ཟླ་བའི་ཁམས་ཆུ་རླུང་ནམ་མཁའ་གསུམ་ཐབས་ཀྱི་ལུས་ངག་སེམས། ཉི་མའི་ཁམས་ས་མེ་ཡེ་ཤེས་ཀྱི་ཁམས་ཤེས་རབ་ཀྱི་ལུས་ངག་སེམས་སྟེ་ཐབས་ཞུ་བ་དང་། ཤེས་རབ་རླུང་རྒྱུ་བ་ལས་བྱུང་བའི་བྱེད་པས་ཆུ་རླུང་ཟུང་འཇུག་ལུས། མེ་རླུང་ངག་མཁའ་སེམས་ཐུགས་ཏེ་གཉུག་མའི་རྡོ་རྗེ་གསུམ་གྱི་སྒྲུབ་གཞི་འབྱུང་ལྔ་སེམས་དང་བཅས་པ་དྭངས་མའི་ཐིག་ལེ་མི་ཤིགས་པའི་དོན་ལྟར་ཡུམ་ལྔ་རྣམས་ཀྱང་འདྲེས་ཏེ། རྣམ་པ་སྐུ་གསུང་ཐུགས་རྡོ་རྗེ་གསུམ་གྱི་ཡི་གེ་བསྒོམ་པ་ནི། རྒྱལ་བ་རིགས་དྲུག་པོ་རིགས་གསུམ་དུ་འདུས་པའི་བྱིན་བརླབས་ནུས་རྩལ་ཆེ་བའི་བདག་ཉིད་གསུངས་ན་ལྷར་བསྒོམས་པ་ལས་འོད་ཟེར་མཁའ་ཁྱབ་ཏུ་འཕྲོས། དེ་བཞིན་གཤེགས་པ་ཐམས་ཅད་རྡོ་རྗེ་གསུམ་གྱི་རྣམ་པར་སྤྱན་དྲངས། གནས་གསུམ་གྱི་ཡི་གེ་གསུམ་ལ་ཐིམ། དེ་ཡོངས་སུ་གྱུར་པ་ལས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡེ་ཤེས་རྡོ་རྗེའི་ངོ་བོར་རྣམ་པ་ཉི་ཤུ་བྱང་ཆུབ་པའི་ལྷ། སྤྱི་བོར་རྣམ་སྣང་དཀར་པོ་འཁོར་ལོ་འཛིན་པ། མགྲིན་པར་སྣང་མཐའ་དམར་པོ་པདྨ་འཛིན་པ། ཐུགས་ཀར་མི་བསྐྱོད་པ་སྔོན་པོ་རྡོ་རྗེ་འཛིན་པས་རྒྱས་བཏབ་པས་གཞི་ལམ་འབྲས་བུའི་ཡོན་ཏན་ཐམས་ཅད་ཡོངས་སུ་རྫོགས་པར་གྱུར། དེ་བརྟན་པའི་ཕྱིར་རྡོ་རྗེ་རྩེ་ལྔ་པ་དང་། གསུམ་པ་གཅིག་པའི་ཕྱག་རྒྱ་གནས་གསུམ་དུ་བཞག་པ་དང་ཆབས་ཅིག་རྡོ་རྗེ་གསུམ་དུ་བྱིན་གྱིས་བརླབ་པའི་སྔགས་རྣམས་བརྗོད་པས་བརྟན་པར་བྱའོོ། །སྔགས་དོན་ནི། ཨོ༵ཾ་རབ་བསྔགས་ས༵རྦ༵་ཐམས་ཅད། ཏ་༵ཐ་ག་ཏ་༵ དེ་བཞིན་གཤེགས་པ། མ༵་ཧཱ་༵ཆེན་པོ། ཀཱ་ཡ་སྐུ་བཛྲ་སྭ་བྷཱ་ཝ་རྡོ་རྗེའི་རང་བཞིན་ནམ་ངོ་བོ། ཨཏྨཀོ་ཉཧྃ་བདག་ཉིད་ངའོ། ཞེས་དང་། གཞན་གཉིས་ལ་ཝ༵་ཀཱ་གསུང་། ཙི༵ཏྟ་༵ཐུགས་ཀྱི་ཁྱད་པར་རོ། །བསྐྱེད་རིམ་ཡན་ལག་གསུམ་པ་དབང་བསྐུར་བ་ནི་མི་བསྐྱོད་པ་ཡིན་ཏེ། སྦྱངས་བྱ་ཕྱི་རོལ་འཇིག་རྟེན་གྱི་ཆགས་གནས་འཇིག་སྟོང་ཐམས་ཅད་སེམས་ཅན་རྣམས་ཀྱི་ཀུན་རྟོག་གི་དབང་གིས་བསྒྲུབ་པ་སྟེ། སེམས་མེད་པར་ལས་མི་བསགས། ལས་མེད་ན་འཇིག་རྟེན་སྣ་ཚོགས་མངོན་པར་འབྱུང་བའི་རྒྱུ་མེད། ལས་བྱེད་པ་པོ་འཕོ་བའི་རླུང་དང་འགྲོགས་པའི་ཀུན་རྟོག་ལས་གཞན་མེད། རླུང་སེམས་དེ་དག་གི་གཞི་བཞིི་པའི་དུས་ཀྱི་རླུང་སེམས་ཤིན་ཏུ་ཕྲ་བའི་རྩ་བ་ལས་བྱུང་། དེའི་མཐའ་རང་བཞིན་འོད་གསལ་གྱི་དབྱིངས་ལ་གཞན་དུ་དངོས་པོའ་ིགྲུབ་པ་ཅི་ཡང་མེད་བཞིན་སྣང་བ་ཡིན་པས་རང་བཞིན་འོད་གསལ་གྱི་རང་རྩལ་ཡེ་ཤེས་ལྔ་རིགས་ལྔའི་གཟུགས་སུ་ཤར་བའི་དག་པ་ལྷའི་ཕྱག་རྒྱས། མ་དག་པའི་ཕུང་ཁམས་ཉོན་མོངས་ལ་རྒྱས་བཏབ་ན་གསེར་གྱུར་གྱི་རྩི་ཡི་ནུས་པས་ལྕགས་ཐམས་ཅན་གསེར་དུ་བསྒྱུར་ནུས་པ་ལྟར་དབང་བསྐུར་རྒྱས་གདབ་ཀྱི་རིམ་པ་འདི་ནི་རྡོ་རྗེ་ཐེག་པའི་གཞི་ལམ་འབྲས་གསུམ་དབྱེར་མི་ཕྱེད་པའི་མཚོན་དོན་ཆེས་ཟབ་པ་ཡིན་ལ། དེས་ན་མི་བསྐྱོད་པའི་ཡེ་ཤེས་ཀྱིས་རིགས་གཞན་བཞི་ལ་རྒྱས་བཏབ་པ་ནི་རང་བཞིན་ལ་རང་བཞིན་གྱིས་རྒྱས་གདབ་པར་གསུངས། དབང་བསྐུར་བ་ལ། དགྱེས་རྡོར་ལས། ཕྱག་རྒྱ་རྟགས་དང་མཚན་མ་སྟེ། །འདིས་ནི་རིགས་ནི་མཚོན་པར་བྱ། །ཞེས་གསུངས་པ་ལྟར་རིགས་མི་འཆོལ་བའི་ཕྱིར་དང་བོ་དབང་བསྐུར་བྱེད་ཕྱག་རྒྱ་རྡོ་རྗེ་ཐལ་མོ་ལས་གུང་མོ་གཉིས་གཤིབ་པ་སྤྱི་བོ། མཛུབ་མོ་དཔྲལ་བ། སྲིད་མཛུབ་རྣ་ལྟག་གཡས། མཐེ་བོང་ལྟག་པ། མཐེའུ་ཆུང་རྣ་ལྟག་གཡོན་དུ་བཞག་ལ། གཉིས་པ་དབང་བསྐུར་གྱི་སྔགས་དོན་ནི། ཨོ༵ྃ་རབ་བསྔགས། མ༵་ཧཱ་༵ཆེན་པོ། ཤུ་༵ནྱ་༵ཏ་ཡུལ་སྟོང་པ་ཉིད། ཛྙཱ་ན་བ༵ཛྲ་༵ཡུལ་ཅན་གྱི་ཡེ་ཤེས་རྡོ་རྗེ། སྭ་བྷཱ་ཝ༵་དེའི་རང་བཞིན་རྣམ་པར་དག་པ། ཨ༵ཏྨ་༵ཀོ༵ཉ་ཧཱ༵ྃ་བདག་ཉིད་ངའོ། ཨོ༵ཾ་མ༵་ཧཱ་༵ཨ༵་དརྴ༵་མེ་ལོང་ལྟ་བུ། ཨོ༵ཾ་མ༵་ཧཱ་༵ས༵་མ༵་ཏ་༵མཉམ་པ་ཉིད། ཨོཾ་མ་ཧཱ་པྲ་ཏྱ་བེཀྵ་སོ་སོར་རྟོག་པ། ཨོ༵ཾ་མ༵་ཧཱ་༵ཀྲྀཏྱ་ནུཥྛ་ན་བྱ་བ་གྲུབ་པའི་ཁྱད་པར་ལས་ཛྙཱ་ན་མན་ཆད་སྔ་མ་ལྟར་རོ། །གསུམ་པ་དེ་ལྟར་དེ་བཞིན་གཤེགས་པ་ཐམས་ཅད་ཀྱི་བདག་ཉིད་ཁམས་གསུམ་ཆོས་ཀྱི་རྒྱལ་པོར་དབང་བསྐུར་བའི་དམིགས་པ་ནི། ལྷ་ཚོགས་རྣམས་ཀྱི་སྤྱི་བོ། དཔྲལ་བ་རྣ་ལྟག་གཡས། ལྟག་པ་རྣ་ལྟག་གཡོན་ཏེ་མགོ་བོའ་ིགནས་ལྔར་རང་རང་གི་རིགས་ཀྱི་བདག་པོ་དབུས་སུ་སོང་བའི་ཤུལ་དུ་སྣང་མཐའ་སྤོ་བས་འདིར་གཙོ་བོ་ཆེ་མཆོག་གི་རིགས་བདག་སྣང་མཐའ་གསུངས་པ་དཔང་བཙན་དུ་བྱས་པའོ། །མཆན། ངེས་པའི་བདེ་གཤེགས་དབང་ལྷ་ཡབ་ཡུམ་ལྔ་རྗེས་སུ་ཆགས་པའི་སྦྱོར་བའི་ཞུ་བདེའི་ཆུ་རྒྱུན་བྱང་ཆུབ་སེམས་ཡེ་ཤེས་ལྔའི་རོལ་པ་བབས་པས་མགོ་བོའ་ིགནས་ལྔ་ནས་ཞུགས་ལུས་ཀྱི་ནང་དུ་ཞུགས་ཏེ་གནས་བཞིར་གང་བས་དབང་བཞི་བསྐུར། ཉོན་མོངས་པ་ལྔའི་བག་ཆགས་ཀྱི་དྲི་མ་དག་ཕུང་པོ་ལྔ་རིགས་ལྔའི་སངས་རྒྱས་སུ་གནས་གྱུར་པས། མེད་སྣང་སྒྱུ་མའི་འཁྲུལ་འཁོར་ཙམ་དུ་གསལ་བའི་བརྟེན་པ་དུག་ལྔ། རྟེན་ཕུང་ལྔ་མ་དག་པ་གཞན་དབང་གི་ཆ་ཀུན་བརྟགས་ཀྱི་ཆོས་ལ་དག་པའི་གཞན་དབང་རིགས་ལྔའི་ཕྱག་རྒྱས་བཏབ། བྱང་སེམས་ཀྱི་ཆུ་རྒྱུན་གྱི་ལུས་ཀྱི་ནང་གང་བའི་ལྷག་མའམ། ཟེག་མ་སྤྱི་བོར་ལུད་པ་ལས་རིགས་ཀྱི་བདག་པོ་རང་ཆས་སུ་བཞུགས་པ་ལ་ཐིམ་པས་ཐོབ་བྱ་རང་གནས་ཀྱི་ཡེ་ཤེས་མངོན་དུ་གྱུར་པའི་ང་རྒྱལ་འཛིན་པས། དག་པའི་གཞན་དབང་གི་སྣང་ཆ་རིགས་གང་ལྟར་སྣང་ཡང་ངོ་བོ་དཀྱིལ་འཁོར་གྱི་གཙོ་བོའ་ིབདེ་སྟོང་འགྱུར་བ་མེད་པའི་གདན་གསུམ་ཡོངས་གྲུབ་ཡེ་ཤེས་ཆེན་པོའ་ིརོལ་པ་རྒྱས་ཐེབས་ཤིང་དག་པ་ལས་སངས་རྒྱས་ཐམས་ཅད་དང་གཉིས་སུ་མེད་པའི་གོ་འཕང་ཕྱིར་མི་ལྡོག་པས་བརྙེས་པའི་བརྡར་དབུ་གཙུག་ན་རྡོ་རྗེ་ཕྱེད་པ་དང་། དེའི་ལྟེ་བར་རིགས་བདག་སྣང་བ་མཐའ་ཡས་ཀྱི་དབུ་བརྒྱན་པར་གྱུར་སྙམ་པ་ནི་དཔལ་ཆེན་ཕྱག་རྒྱ་རྒྱས་པ་ལས། ཕུང་ཁམས་ཚོགས་བརྒྱད་གཞན་དབང་ཅན༔ གདན་གསུམ་ཡོངས་གྲུབ་ཆེན་པོར་རྒྱ༔ ཞེས་གསུངས་པ་ལྟར་རོ། །སྤྱིར་རིགས་ལྔ་ལ། སྣང་མཐའ་ལྟ་བུའི་པདྨའི་རིགས་གཅིག་ལ་ནང་གསེས་པདྨའི་གཤེགས་རིགས། པདྨ་རྡོ་རྗེ་རིན་ཆེན་ལས་ཀྱི་རིགས་ཆུང་དབྱེར་མཛད་པས། དབང་སྔགས་ཀྱི་སྐབས་ཆོས་དབྱིངས་ཡེ་ཤེས་གཙོ་བོར་གསུངས། རྒྱས་འདེབས་ཀྱི་སྐབས་སྣང་མཐའ་རིགས་བདག་ཏུ་གསུངས་པ། སྔ་མ་གཟུགས་ཕུང་པོ་གཞན་བཞི་ཀའི་རྟེན་ཡིན་པས་དེ་ཉིད་དག་པ་ཁྱབ་བྱེད་གཤེགས་རིགས་གཙོ་བོ་སྟེ་ཡེ་ཤེས་བཞི་ཀའི་དབྱེ་གཞི་ཆོས་དབྱིངས་ཡེ་ཤེས་ཏེ། དེ་ཉིད་གཟུགས་སྐུར་སྣང་བ་རྣམ་སྣང་། གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་རྟེན་སྐུ་ཡིས་བྱེད་པས། སྐུ་གཅིག་གིས་རིགས་ཐམས་ཅད་ཁྱབ་པའི་ཕྱིར་རྣམ་སྣང་གཙོ་བོར་བཞག་པའི་རིགས་ལྔ་སྦྱོར་བའི་བྱང་སེམས་བདུད་རྩིའི་རྒྱུན་གྱིས་དབང་བསྐུར་དྲི་མ་སྦྱངས། ཆུའི་ལྷག་མ་སྤྱི་བོར་འཁྱིལ་བས་ཕྱི་མ་རིགས་བདག་སྣང་བ་མཐའ་ཡས་ཀྱིས་དབུ་བརྒྱན་པར་གསུངས་པ། སངས་རྒྱས་རྣམས་དག་འབྲས་མཐར་ཐུག་ནི་རྟོགས་པ་ཆོས་སྐུ་སྟེ། དེ་ནི་གསུངས་རྡོ་རྗེ་མཐར་ཐུག་ཡིན་པས་ཕུང་ཁམས་སྐྱེ་མཆེད་ཀྱི་འཁྲུལ་པའི་དྲི་མ་གཏོར་ཞིང་དག་པ་ཡེ་ཤེས་ཀྱི་ནུས་པ་མངོན་གྱུར་དུ་སད་དེ་རྣམ་པ་ཉི་ཤུའི་བྱང་ཆུབ་པའི་འབྲས་བུའི་ཆེ་རྟགས་ཁྱབ་བྱེད་རིགས་དྲུག་པ་རྡོར་སེམས་ཀྱི་ངོ་བོ། རྣམ་པ་ཧེ་རུ་ཀའི་རིགས་དེའི་རིགས་ཆུང་སྣང་མཐའ་དབུས་སུ་བཞག་པས་རྒྱས་གདབ་དགོས་པ་དཀྱིལ་འཁོར་གྱི་གཙོ་བོ་ཆེ་མཆོག་འདི་ཉིད་བླ་མ་དྲག་པོ་དང་བཀའ་བརྒྱུད་དབྱེར་མེད་ཡིན་པས། གུ་རུ་རིན་པོ་ཆེ་གསུངས་པདྨའི་རིགས་སུ་གཙོ་བོར་གསུངས་པས་ཡིན་ནམ་སྙམ་སྟེ་བླ་མཆོད་དངོས་གྲུབ་རྒྱ་མཚོ་ལས་ཀྱང་རིགས་བདག་གཙོ་བོ་སྣང་མཐའ་གསུངས་པས་སོ། །དེར་མ་ཟད་ཆེ་མཆོག་ཉིད་སྐུ་མདོག་སྨུག་ནག་དབང་གི་ཁྲོ་བོ་ཞེས་གསུངས་པ་དང་། ཚོགས་ཆེན་འདུས་པའི་སྐབས་དབུ་གཙུག་ཏུ་རྟ་དབུ་འབྱུང་བ་སོགས་དང་། ཟབ་གཏེར་དུ་མའི་ཆེ་མཆོག་དང་། ཡང་དག་རྟ་མགྲིན་རྣམས་ངོ་བོ་གཅིག་པའི་ཚིག་ཟིན་དུ་མ་འདུག་པས་ཟབ་གནད་ཁྱད་པར་ཅན་ཡོད་ངེས་པས་དཔྱད་དགོས་ལ། གཉིས་པ་རང་བཞིན་ཡེ་ཤེས་ཀྱི་དཀྱིལ་འཁོར་སྒྲུབ་པ་ལ། སམྦྷུ་ཊར་སྦྱོར་བའི་ཏིང་འཛིན་མཆོག །རྣལ་འབྱོར་པས་ནི་སྙོམས་འཇུག་བྱ། །དེ་ནས་དཀྱིལ་འཁོར་རྒྱལ་པོ་མཆོག །དེ་ནས་ཡང་ནི་ལས་རྒྱལ་པོ། །ཞེས་ཏིང་འཛིན་གསུམ་དུ་གསུངས་པའི་དང་པོ་ངོ་བོ་ཉིད་སྐུ་སྦྱོར་བའམ་སྙོམས་འཇུག་གི་ཏིང་ངེ་འཛིན་དམ་ཡེ་དབྱེར་མེད་དུ་སྦྱོར་བའི་ཕྱིར་སྤྱན་དྲངས་བསྟིམ། ལོངས་སྐུ་དཀྱིལ་འཁོར་རྒྱལ་མཆོག་འཁོར་གྱི་ལྷ་བསྐྱེད་པ། སྤྲུལ་སྐུ་ལས་རྒྱལ་མཆོག་མཆོད་བསྟོད་ཕྲིན་ལས་རྣམས་ལ་ཏིང་འཛིན་གསུམ་དུ་བཤད་པའི་དང་པོ་ཡེ་ཤེས་ཀྱི་འཁོར་ལོ་སྤྱན་དྲངས་པ་ནི། ཧཱུྃ༔ ཞེས་ཡེ་ཤེས་ལྔ་གཅིག་ཏུ་རྫོགས་པའི་ཐུགས་སྲོག་གིས་བསྐུལ་བ་སྔོན་དུ་འགྲོ་བས། ཚུལ་གང་གིས་སྤྱན་འདྲེན་ན། སངས་རྒྱས་ནི་སེམས་ཅན་གང་གིས་དད་པས་དྲན་པ་ཙམ་གྱིས་དེ་མ་ཐག་དེར་བྱོན་པ་ཆོས་ཉིད་ཡིན་པ་ལ་ཡིད་ཆེས་ཀྱི་དད་པ་བརྟན་པོས་འདུན་པ་སེམས་པའི་རྐྱེན་དང་། སྙིང་གའི་འོད་ཟེར་སྤོས་རོལ་དབྱངས་ཀྱིས་བསྐུལ་ཏེ། གང་ནས་སྤྱན་འདྲེན་ན་འཁོར་འདས་ལམ་གསུམ་ཀུན་ལ་ཁྱབ་ཀྱང་གང་དུའང་མི་གནས་པའི་རྣམ་པ་ཐམས་ཅད་པའི་མཆོག་དང་ལྡན་པའི་སྟོང་ཉིད་ཡུལ་འོག་༵མི༵ན་ཡུལ་ཅན་སོ་སོར་རང་རིག་པའི་སྤྱོད་ཡུལ་གྱི་སྣང་ཆ་ཆོས༵་དབྱིངས༵་ཡེ་ཤེས་སོགས་ལྔ་རུ་རང་སྣང་བདེ༵་ཆེན་༵སྟུག་པོ་བཀོད་པའི་ཞིང༵་ཁམས༵་ཆེན་པོ་ནས༵ ། གང་ཞིག་སྤྱན་འདྲེན་ན། ཆོས་ཀྱི་དབྱིངས་དེའི་ངང་དུ་ལྷུན་༵གྲུབ༵་འོད་གསལ་གྱི་རྩལ་ཕྱིར་གསལ་དུ་ཤར་བའི་རོ༵ལ་པ༵་མེ་ལོང་སོགས་ལྔ་དང་། ཀློང་གྱུར་འདའ་ཀ་དབྱིངས་གྲོལ་མཐའ་གྲོལ་གྱི་ཡེ༵་ཤེས༵་ཀློང༵་དགུའི༵་ཕྱག་རྒྱའི་གཟུགས་སྐུར་བཞེངས་པའི་གར༵་གྱི་སྒྱུ་འཕྲུལ། ཞི༵་བ་རྡོ་རྗེ་དབྱིངས་རིགས་ལྔ། ཁྲོ་༵བོ་བདུན་བརྒྱ་ཉེར་ལྔ་སོགས་རབ༵་འབྱམ༵ས་ཀྱིས་བསྐོར་བའི་དཔལ༵་ཆེན་༵བཀའ༵་བརྒྱད་ཀྱི་ལྷ་༵ཚོགས་རྣམས། དགོས་པ་གང་གིས་ན་དུག་ལྔ་རང་རྒྱུད་དུ་སྤྱོད་པ་གདུག་༵པའི་བདུད་བཞི་དང་རུ་ཏྲ་སྡེ་གསུམ་འདུལ༵་བའི་ཕྱིར༵། གང་དུ་སྤྱན་འདྲེན་ན་ཏིང་ངེ་འཛིན་གྱི་དཀྱིལ་འཁོར་སྒོམ་པའི་གནས༵་འདི༵ར་གཤེགས་སུ་གསོ༵ལ་ཅེས་སོ། ཨེ༵་ཧྱ་༵ཧི་ཚུར་སྤྱོན། ཛཿ ས་ཡེ་ཤེས་པ་འགུག་ཧཱུྃ་གིས་དམ་ཡེ་དབྱེར་མེད་དུ་གཞུག བྃ་གྱིས་བྱ་བ་མ་ཟིན་པར་འཆིང་། ཧོཿ པ་དགྱེས་པས་མྱོས་ཀྱི་ཕྱག་རྒྱ་བཞི། ས༵་མ༵་ཡ༵་དམ་ཚིག་ཧྲིང་ཧྲིང་འདུས་ཤིག་པའི་བརྡ་སྐད། ཛ༵ཿ ཛ༵ཿ ཡིད་དམ་བཅས་པ་སྤྱོན་ཅིག་ཅེས་ནན་གྱིས་བསྐུལ་བའོ། །གཉིས་པ་བཞུགས་གསོལ་ནི། ཧཱུྃ་ཞེས་ཐུགས་སྲོག་ནས་བརྗོད་པས་བསྐུལ་ཏེ་སྦྱངས་བྱ་མ༵་དག་༵ འཁོར་བའི་ཕུང་ཁམས་སྐྱེ་མཆེད་ཀྱི་ཆོས་སུ་སྣང༵་བ༵། སྦྱངས་འབྲས་དག༵་པ༵་ར༵བ་འབྱམ༵ས་བདེ་གཤེགས་སྒྲུབ་པ་བཀའ་བརྒྱད་ཀྱི་རྟེན་༵གཞལ་ཡས་ཁང་དང༵་བརྟེན་༵པ༵་ལྷའི༵་འཁོར༵་ལོར༵་ཡོངས༵་སུ་ཤར༵་བའི༵་ཕྱིར། སྦྱོངས་བྱེད་སྣང་སྲིད་གཞིར་བཞེངས་ཀྱི་ཏིང༵་ངེ་འཛིན་༵གྱིས་སྤྲུལ་པ༵འི་ཞིང༵་མཆོག་༵ ཐ་མལ་གྱི་སྣང་ཞེན་དག་མཉམ་ཆེན་པོར་རྟོགས་པས་ཉམས༵་དགའ༵་བ་བཙལ་ཀྱང་མི་རྙེད་པ་འདིར། གཞི་དམ༵་ཚིག་འབྲས་བུ་ཡེ༵་ཤེས་པ། ལམ་དེ་གཉིས༵་དབྱེར་མེད་༵དུ་ཤེས་པའི་ཏིང་འཛིན་གྱིས་ངོ༵་བོའ་ིགནས་སྣང་གཉིས་ཀ་དག་པའི་བདག་ཉིད་དུ་ནམ་མཁའ་ལྷའི་འཁོར་ལོར་གྱུར་པར་བརྟན་༵པར་བཞུགས༵་སུ་གསོལ་ཞིང་དམ་ཡེ་དབྱེར་མེད་དུ་བསྟིམ་པའི་དོན་ཏེ། སྔགས་ས༵་མ༵་ཡ༵་དམ་ཚིག་པ་ལ། ཨ༵་བེ༵་ཤ་༵ཡ༵་ཡེ་ཤེས་པ་གཉིས་མེད་དུ་ཕོབ་ཅིག་ཏི༵ཥྛ་བརྟན་པ། ལྷན་༵བཞུགས་ཤིག་པའི་བརྡ་སྐད་དོ། །གསུམ་པ་གཉིས་མེད་ཀྱི་དཀྱིལ་འཁོར་ལ་ཕྱག་མཆོད་བསྟོད་པ་ལས། དང་པོ་ཕྱག་ནི། སངས་རྒྱས་རྣམས་འབྲས་བུ་མངོན་དུ་གྱུར་པའི་ཚེ་ས་གསུམ་གྱི་ཆེ་དགུའི་ཕྱག་དང་མཆོད་པས་བཀུར་སྟི་བྱས་པ་དང་། ངོ་མཚར་གྱི་མཛད་པའི་གྲགས་སྙན་འོག་མིན་གྱི་ཞིང་མན་ཆད་དུ་ལྷ་རྣམས་ཀྱིས་བསྒྲགས་ཤིང་ཕྱོགས་བཅུའི་ཞིང་ཀུན་ནས་རྒྱལ་བ་རྣམས་ཀྱི་ཀྱང་བསྔགས་པ་དང་མེ་ཏོག་གཏོར་བ་དང་མཚུངས་པ། སྦྱངས་གཞི་སྣོད་བཅུད་ཐ་མལ་གྱི་ཞེན་སྣང་། སྦྱངས་བྱེད་སྣང་གྲགས་རིག་པ་ལྷ་སྔགས་ཡེ་ཤེས་ཀྱི་རོལ་པར་བལྟ་བ། སྦྱངས་འབྲས་དག་པ་ཆེན་པོའ་ིསྣོད་བཅུད་མངོན་དུ་གྱུར་པའོ། །ཧཱུྃ་ཞེས་ཐུགས་སྲོག་ཡེ་ཤེས་ལྔ་ལ་ཟག་མེད་ཡོན་ཏན་རྫོགས་པའི་དོན་རྗེས་སུ་དྲན་པས་བསྐུལ་ཏེ་དབྱངས་རིག་གཉིད་མེད་ཀྱི་ངོ་བའི་གཞི་ལས་རང་བྱང་བའི་གཞི་སྣང་ཡེ་ཤེས་ཀྱི་རོལ་པར་རང༵་ཤར༵་བས་ན་དོན་ལ་ཡེ་ཤེས་གཅིག་གི་ཉིད་དུ་སྤྲུལ༵་པ་ལས་རྒྱུད་ཐ་དད་པ་གཅིག་ཀྱང་མེད་པའི་རྟེན་དང་བརྟེན་༵པའི༵་དཀྱིལ༵་འཁོར༵་ལ༵། རྣམ་པ་གདུལ་བྱ་འདུལ་ཕྱིར་གཙོ་འཁོར་སོགས་གང་ལྟར་བཀོད་ཀྱང་དམ་ཡེ་དང་བདག་མདུན་ལ་བཟང༵་ང༵ན་གཉིས༵་འཛིན་གྱི་ཀུན་༵རྟོག་༵གིས་གོ་སྐབས་མི་ཕྱེད་པར་སྤྱི་དཔལ་ཆེན་པོ་གཅིག་གི་ཡེ་ཤེས་ཀློང་དགུའི་དབྱིངས་སུ་རྣམ༵་པར་དག་༵པ་ཡིན་ཀྱང༵་། དེ་ཐམས་ཅད་དོན་དམ་རང༵་རིག་༵ཆོས༵་སྐུ་ཐིག་ལེ་ཉག་ཅིག་ལས་མ་འདས་བཞིན་ཀུན་རྫོབ་རྟེན་འབྲེལ་གྱི་སྣང་ཆར་ཚོམ་བུ་དགུའི་ལྷ་ཚོགས་མངོན་སུམ་དུ་མཇ༵ལ་བ༵་ལ་དད་མོས་གུས་པ༵འི་ཚུལ་གྱིས་ཀུན་རྫོབ་འཇིག་རྟེན་གྱི་སྲི་ཞུའི་ཚུལ་དུ་སྔགས་ཕྱི་པ་དང་སྒོ་བསྟུན་ཏེ་ཕྱག་མཆོད་འཕྲུལ་དགའི་ལྷ་རྣམས་རང་གི་སྤྲུལ་པའི་ལོངས་སྤྱོད་ལ་རོལ་པ་ལྟར་བྱ་བས་སྒོ་གསུམ་གུས་བཏུད་ཀྱི་བརྡ་ཕྱག་༵གི་གར༵་གྱིས་བཏུད་པ་དང་དོན་དམ་ལ་དམ་ཡེ་བཟང་ངན་སྤང༵་བླང༵་མེད་༵པའི༵་ཆོས་ཉིད་ངོ་ཤེས་པ་འདྲེས་པ་ནན་ཏན་གྱི་ལྟ་ཕྱག་གི་ངང༵་ནས༵་བདེན་གཉིས་དབྱེར་མེད་ཀྱི་ཚུལ༵་དུ་འཚལ༵་བར༵་བགྱི་ཞེས་སོ། །ཨ༵་ཏི༵་པཱུ་ཧོཿ ཞེས་ཕྱག་འཚལ་བའི་བརྡ་དང་། ན་མ་ཡ་ངྷིཿ ནི་དཀྱིལ་འཁོར་གྱི་ལྷ་རྣམས་ཀྱང་མཉེས་ཤིང་དགྱེས་པས་ལན་དུ་དངོས་གྲུབ་དང་བྱིན་རླབས་སྕལ་བའི་བརྡའོ། །གཉིས་པ་མཆོད་པ་ལ་ཡན་ལག་བཞི་པ་མཆོད་པ་དོན་ཡོད་གྲུབ་པ་སྟེ་སངས་རྒྱས་རྣམས་ཀྱི་ཕྲིན་ལས་ནི། དོན་གཉིས་མཐར་ཕྱིན་པའི་མཛད་པ་ཡིན་པས་དེའི་རྒྱུ་ཚོགས་གཉིས་རྫོགས་སྨིན་སྦྱངས་མཐར་སོན་དགོས་པས་དཀའ་ཐུབ་དང་དུས་ཡུན་རིང་པོ་ལ་མི་ལྟོས་པར་སྔགས་ཀྱི་ཐབས་ཁྱད་པར་ཅན་གྱིས་ཚོགས་གཉིས་བསགས་པའི་ཉེ་རྒྱུ་མཆོད་པ་ཡིན་པས་ཏེ། དེ་ལ་དབྱེ་ན། ཕྱག་རྒྱ་གར་དགུ་ཡེ་ཤེས་གླུ་ཕྱི་ཉེར་སྤྱོད་དང་འདོད་ཡོན། ནང་དུག་གསུམ་གནས་དག་གསང་བ་སྨན། གཏོར་མ། རཀྟ། བདུད་རྩི་གསང་ནན། དེ་ཁོ་ན་ཉིད་སྦྱོར་སྒྲོབ་རྣམས་དབང་བཞིས་ལམ་ཁྱེར་དང་རྗེས་སུ་འབྲེལ་བ་སྟེ། ཕྱི་མཆོད་ཀྱི་དང་པོ་ཕྱག་རྒྱ་གར་མཆོད་ནི། སངས་རྒྱས་རྣམས་ཀྱི་སྒྲིབ་བྲལ་ཡེ་ཤེས་ཀྱི་སྐུ་གདུལ་བྱ་གང་འདུལ་དུ་རྣམ་པ་ཐམས་ཅད་པའི་གཟུགས་ཆུ་ཟླ་དང་འཇའ་ཚོན་བཞིན་འགག་མེད་ཅིང་ཡང་སྣང་བས་མཚན་མའི་བློས་འདི་ཞེས་ཕྱོགས་དང་རིས་སུ་ཆད་པ་མེད་པས་ན་སྐབས་འདིར་གདུག་པ་ཅན་རྣམས་འདུལ་བའི་དོན་དུ་ཁྲག་འཐུང་འབར་བའི་དཀྱིལ་འཁོར་དུ་སྟོན་པ་ཡང་། སངས་རྒྱས་ཀྱི་སྐུའི་ཡོན་ཏན་མཐོང་ན་མི་མཐུན་པ་མེད་པའི་ཁྱད་ཆོས་དང་ལྡན་པ་ཡིན་པས་བསྟོད་པའི་སྐབས་རྒྱས་པར་བཤད་པ་བཞིན་སྐུ་གསུང་ཐུགས་ཀྱི་གར་གསུམ་གསུམ་གྱི་མཛེས་ཤིང་བརྗིད་རྔམས་ཀྱི་ཟིལ་གྱིས་དྲེགས་པའི་ཚོགས་ཀྱི་ཁེངས་དྲེགས་བཅོམ་པས་ཚར་གཅོད་ཅིང་། དད་པ་ཅན་རྣམས་སྙིང་རྗེའི་རོལ་པར་ཤེས་པས་རྗེས་སུ་འཛིན་པ་ལ་དཔལ་བའི་ངང་ཚུལ་རྗེས་སུ་དྲན་པས་སྤྲུལ་པའི་ལྷ་མོ་རྒྱན་ཕྲེང་དུ་མས་མཛེས་པ་རྣམས་ཀྱི་རྡོ་རྗེའི་གར་གྱི་རྣམ་འགྱུར་དེ་དང་མཚུངས་པ་ཕྱག་ཞབས་ཀྱིས་བསྒྱུར་བས་བསྟོད་དབྱངས་སྒྲོགས་པ་དང་། གཉིས་པ་ཡེ་ཤེས་གླུ་མཆོད་ནི། མཆོད་པའི་ལྷ་མོ་དེ་དག་གིས་བསྟས་དགོད་ལག་བཅང་འཁྱུད་པའི་སྒྱུ་རྩལ་དང་བཅས། ཧ་སིད་ལ་སོགས་པའི་གླུས་ལྷ་རྣམས་ཀྱི་ཐུགས་རྒྱུད་ལ་དགའ་བཞིའི་ཉམས་འགྱུར་འདྲེན་པས་བདེ་སྟོང་གི་ཡེ་ཤེས་ཀྱིས་ཀུན་ཏུ་མྱོས་ཤིང་སིམ་པ་ལྟར་སྣང་ཡང་དོན་ལ་རང་བྱུང་རང་ཤར་གྱི་མཆོག་ཏུ་མི་འགྱུར་བའི་བདེ་བ་ཆེན་པོའ་ིཡེ་ཤེས་རྣམ་པར་རྟོག་པས་མི་གཡོ་བའི་གསུང་ཡེ་ཤེས་གླུའི་བསྟོད་པས་མཆོད་པ་དང་། ཡང་ལྷ་མོ་རྣམས་ཀྱིས་ཉེར་སྤྱོད་དང་འདོད་ཡོན་གྱི་མཆོད་པ་ལྷ་ཀླུ་མིའི་ཆེ་རྒུ་རྣམས་ཀྱིས་མི་སྤྱོད་པ་དག་པའི་ཞིང་ན་སངས་རྒྱས་བྱང་སེམས་ཀྱི་སྨོན་ལམ་དང་བསོད་ནམས་ཀྱི་སྟོབས་ལས་བྱུང་བ་རིན་ཐང་གཞལ་དུ་མེད་ཅིང་ནུས་པ་མཆོག་ཏུ་གྱུར་པའི་བདུད་རྩིའི་མཆོད་ཡོན་རིན་པོ་ཆེའི་བྱ་མ་བུམ་པའི་སྣོད་ཀྱིས་བསྒྲེངས་པ་སོགས་བཀུར་སྟི་དང་བཅས་འབུལ་བའི་རྣམ་པ་ཡང་དངོས་སུ་བཤམས་པ་དམིགས་རྟེན་དུ་བྱས་ནས་ཡིད་སྤྲུལ་དང་། བདག་པོས་མ་བཟུང་བ། སྨོན་ལམ་གྱི་སྟོབས་ལས་བྱུང་བའི་ཀུན་ཏུ་བཟང་པོའ་ིམཆོད་སྤྲིན་དུ་སྤྲོས་པ་རྣམས་དོན་ལ་ཡུམ་བཀའི་གསང་སྒྲུབ་སེང་གདོང་ལས། ཡུལ་ལ་དབང་པོའ་ིསྤྱོད་པ་ཡིས༔ མཆོད་དང་མཆོད་བྱར་མི་དམིགས་ཀྱང༔ སྐྱེ་མཆེད་ཡབ་དང་སྦྱོར་བ་ཡི༔ ཡུལ་དྲུག་འདོད་ཡོན་ལྷ་མོར་རོལ༔ ཞེས་གསུངས་པ་ལྟར་ཡུལ་དང་ཡུལ་ཅན་ཐམས་ཡབ་ཡུམ་སྣང་སྟོང་གཉིས་མེད་ལྷ་ལ་ལྷ་རོལ་པའི་ཚུལ་གྱིས་ཞེན་མེད་སྒྱུ་མ་ལྟ་བུར་ལོངས་སྤྱོད་པས་ཚོགས་གཉིས་མིག་འཕྲུལ་ལྟར་རྫོགས་པར་བྱེད་པ་ཐུགས་བདེ་སྟོང་གི་མཆོད་པ་གསུམ་དུ་བཤད་ན་རུང་སྙམ་ཞིང་དེ་གསུམ་ནི་ཕྱི་སྣོད་བཅུད་ཀྱི་དཔལ་ཡོན་ལ་གཙོ་བོར་དམིགས་རྟེན་དུ་བྱས་ཤིང་སྤྲོས་བཅས་ལྟར་སྟོན་པས་བུམ་དབང་གི་ལམ་ཁྱེར་བསྐྱེད་རིམ་དང་འབྲེལ་ཆེ་བ་དང་། གདུག་པའི་རུ་ཏྲ་ཐམས་ཅད་དུག་གསུམ་རང་རྒྱུད་དུ་སྤྱོད་དེ་འཁྲུལ་པ་རྣམས་བདེ་གསལ་མི་རྟོག་པའི་ཡེ་ཤེས་ཀྱི་མཚོན་ཆས་བསྒྲལ་ནས་འདོད་ཆགས་ཁྲག་གི་རྒྱ་མཚོ། ཞེས་སྡང་རུས་པའི་གྲམ་ཁྲོད། གཏི་མུག་ཤ་ཆེན་གྱི་རི་བོའ་ིརྣམ་པར་ཕུལ་བས་དཔལ་གྱི་ལྷ་ཚོགས་རྣམས་ཀྱིས་ཡེ་ཤེས་བདེ་བ་ཆེན་པོའ་ིལོངས་སྤྱོད་དུ་བཞེས་ནས་དུག་གསུམ་གནས་སུ་དག་པའི་སྐུ་གསུམ་བདེ་བ་ཆེན་པོའ་ིགོ་འཕང་ལ་བཀོད་པར་མོས་པ། ནང་དུག་གསུམ་གནས་དག་གི་མཆོད་པ་དང་། སྔགས་དོན་ཀྱང་ཧ་ལ་ནི་དུག་པཉྩ་ལྔ། པཱུ་ཛ་མཆོད་པ། ཧོ་མཉེས་ཚིམ་གྱི་དོན་དེ་དུག་ལྔ་ཡེ་ཤེས་སུ་དག་ཕྱིར་མཆོད་པ་དགྱེས་པའི་དོན་ཏེ་རྩ་བ་དུག་གསུམ་ལ་ང་རྒྱལ་ནི་འདོད་ཆགས། ཕྲག་དོག་ཞེ་སྡང་དུ་འདུ་བས་མཆོད་པ་དམིགས་སུ་མ་གསུངས་པའོ། །སྣང་སྲིད་སྣོད་བཅུད་ཐམས་ཅན་གདོད་ནས་ཡེ་ཤེས་ལྔའི་བདུད་རྩིར་རྣམ་པར་དག་ཅིང་རང་བྱུང་ཡེ་ཤེས་ཀྱི་འཁོར་ལོར་སངས་རྒྱས་རྣམས་གཡོ་བ་མེད་པར་བཞུགས་པའི་ཚུལ་དང་མཐུན་པར་བདུད་རྩི་སྒྲུབ་ཅིང་མཆོད་ནས་དངོས་གྲུབ་སྒྲུབ་པ་ལ་བསླུ་བ་མེད་པ་ནི་རྡོ་རྗེའི་དམ་ཚིག་རྨད་པོ་ཆེ་ཞེས་ལྟ་བ་ཆོས་ཀྱི་བདུད་རྩི། བདུད་རྩི་ལྔ་རེ་རེ་ལ་ཕྱི་ནང་གི་རྩ་བ་བཞི་བཞིར་སྦྱར་བས་བརྒྱད་དེ། བརྒྱད་ཚན་དེ་དག་རེ་རེའི་ལའང་སོ་སོའ་ིསྐྱོབས་དང་འཕྲད་དུ་གྱུར་པའི་རྩི་བཅུད་ཀྱི་སྨན་བརྒྱ་ཉེར་ལྔ་རེ་སྦྱོར་དུ་ཡོད་པས་ཡན་ལག་སྟོང་སྟེ་དེ་ལྟར་སྦྱར་བའི་གྲུབ་པ་ཆེན་པོའ་ིདམ་ཚིག་གི་རྫས་ཀྱི་བདུད་༵རྩི་མཐོང་ཐོས་མྱོང་རེག་གྲོལ་བ་བཞི་ལྡན་དང་། རྒྱུ་ཉོད་མོངས་རང་རྒྱུད་༵དྲུག་༵འབྲས་བུ་ཕུང་ལྔ་འབྱུང་ལྔ་སྡུག་བདེན་གྱི་མཚན་གཞིས་ལོངས་སྤྱད་པ་འགྲོ་དྲུག་གི་སྡུག་བསྔལ་འཇོ༵མས་ཤིང་འཆེས་ཏེ་ཡེ་ཤེས་ལྔར་ལམ་དུ་བྱེད་པའི་རྩི་སྨན་ནི་རང་ལུས་དང་གཞན་ལུས་ལ་བརྟེན་པའི་ལམ་ནི་དོན་གྱི་བདུད་རྩི་དང་། ཆོས་རྫས་དོན་གྱི་བདུད་རྩི་ཐམས་ཅད་དཔལ་ཆེ་མཆོག་ཧེ་རུ་ཀ་རིགས་ལྔ་ཡེ༵་ཤེ༵ས་ལྔ་ཡི༵་དཀྱིལ་འཁོར་དུ་ཤེས་པའི་བསྙེན་སྒྲུབ་ལས་སྦྱོར་གྱི་སྒྲུབ་པས་དངོས༵་གྲུབ་འདོད་དགུ་དབང་བྱེད་པ་རྟགས་ཀྱི་བདུད་རྩི་སྟེ་དེ་དག་རྗེས་སུ་མཚོན་པ་མྱོང་གྲོལ་དམ་རྫས་ཀྱི་མཆོད་པ་དཀྱིལ་འཁོར་གྱི་ལྷ་ཚོགས་སྤྱི་དང་། རྩ་བརྒྱུད་ཀྱི་བླ་མ་ལ་བྱེ་བྲག་ཏུ་མཐེབ་སྲིན་ཉི་ཟླའི་གྭའུའི་བཅུས་ནས་ཕུལ་བས་དྭངས་མའི་སེམས་སྤྲིན་གྱིས་བདེ་བ་ཆེན་པོའ་ིརོས་མཉེས་པའི་མཐུས། སངས་རྒྱས་ཀུན་གྱི་སྐུ་གསུང་ཐུགས་ཀྱི་དངོས་གྲུབ་ཨོཾ་ཨཱ་ཧཱུྃ་རྣམ་པ་བདུད་རྩིའི་སྟེང་དུ་བྱུང་བ་དང་ཚིག་གི་ཕྱག་རྒྱ་གུ་ཧྱ་ལག་གིས་བླང་སྟེ་གནས་གསུམ་དུ་ཐིམ་པས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་པ་དང་། སྔགས་དོན་ཨ༵ྃ་ཨཱ༵ཿ ཧཱུྃ་སྐུ་གསུང་ཐུགས། སརྦ༵་ཐམས་ཅད། པ༵ཉྩ་༵ལྔ་ཨ༵་མྀ༵་ཏ་༵བདུད་རྩི་ཧཱུྃ་རྣམ་པ་རིགས་ལྔའི་དམ་རྫས་ཧཱི༵ཿ ངོ་བོ་ཡེ་ཤེས་ལྔ། ཋ༵་དེ་གཉིས་དབྱེར་མེད་ཀྱི་མཆོད་པ་དང་། བརྒྱུད་མཆོད་སྐབས་ཁ༵་ར༵ཾ་སྟོབ་པ་དང་། ཁཱ་ཧི་གསོལ་ཅིག་པའོ། །དོན་ལ་སྐུ་གསུང་ཐུགས་ཐམས་ཅད་མཉེས་བྱེད་དམ་ཡེ་གཉིས་མེད་བདུད་རྩིའི་མཆོད་པས་བཞེས་ཤིག་གི་དོན་ནོ། །ཀཱ་༵ཡཱ་༵ཝ༵ཀྐ་ཙི༵ཏྟ་༵སྐུ་གསུང་ཐུགས་སིདྡྷི་དངོས་གྲུབ་འབྲུ་གསུམ་རང་ལ་སྩོལ་བའི་དོན་ཏེ། བྷ་༵ག་༵ཞེས་ཆོས་དབྱིངས་རྡོ་རྗེ་བཙུན་མོའ་ིཆུ་སྐྱེས་རྣམ་ཐར་སྒོ་གསུམ་གྱི་བདག་ཉིད་ཅན་ཡངས༵་ཤིང་རྒྱ་ཆེ་བ༵འི་གཏོར༵་གཞོང་དུ། ལི༵ངྒ་༵ནི་སྣོད་བཅུད་ཡོངས་རྫོགས་བདེ་ཆེན་འདོད་ཡོན་གྱི་ཟེགས་མ་འཕྲོ་བའི་རྟགས་ཅན་གཏོར༵་མ༵འི་རྣམ་པ༵ར་དཔལ་དུ་འབར༵་བའི་རྡོ་རྗེ་ཐབས་ཤེས་གཉིས་སུ་མེད་པའི་བཟ༵འ་བཅའ་བཏུང་བ༵འི་ཚོགས་བདའ་དགུའི་རྣམ་པ་དམ༵་ཚིག་༵གི་རྫས༵་ལྷུན་པོ་ལྟར་སྤུངས་ཏེ་ཕུལ་བས་ཨ༵་ལ༵་ལ༵་སྟེ་ཞེས་ལྷ་ཚོགས་དགྱེས༵་རྔམ་ཚིམས་པར༵་རོལ༵་པར་བསམ་པ་དང་། མ༵་ཧཱ་༵བ༵་ལིཾ་ཏ་༵ཁཱ་ཧི་གཏོར་མ་ཆེན་པོ་རོལ་ཅིག། སྐྲ་ལྕང༵་ལོ༵་དང་བཅས༵་པའི་དུང་ཆེན་དུ་རཀྟའི་རྒྱ་མཚོའི་རྦ་ཀློང་འཁྲུགས་པ་ཡང་སེམས་ཅན་རྣམས་ཆོས་ཉིད་རང་ངོ་མ་རིག་པའི་གཏི་མུག་གིས་ང་དང་ང་ཡིར་ཞེན་རྟོག་གི་ཆགས་པས་སེར་སྣ་དང་ཞེ་སྡང་ང་རྒྱལ་ཕྲག་དོག་ཀྱང་དེའི་ཤུགས་ལས་འབྱུང་ཞིང་དེའི་དབང་གིས་རྒྱུད་དྲུག་འཁྲུལ་སྣང་གི་རྟོག་པ་སྐྱེ་འགགས་གནས་བྲལ་ཆོས་ཀྱི་དབྱིངས་སུ་བསྒྲལ་བའི་བརྡ་རྟགས་སུ་ཁྲག་ཆེན་གྱི་རྒྱ་མཚོ་ཞིང་གི་ལྷུ་དུམ་འཕྱོ་ཞིང་དུག་གི་རླངས་སྤྲིན་ཅན་ཕུལ་བས། གཟུང་འཛིན་འཁོར་བའི་རྒྱུ་འབྲས་བདེ་ཆེན་ཆོས་ཉིད་ཀྱི་གནས་སུའམ་རྒྱན་དུ་གདབ་པར་བྱ་བའི་ཕྱིར། ཡེ་ཤེས་ལྷ་ཡི་གཟུགས་པ་ལ་བཟང་ངན་བླང་དོར་གྱི་འཛིན་པ་མེད་པར་བཞེས་པས་གདུལ་བྱའི་རྒྱུད་ལ་དུག་ལྔ་གནས་དག་གི་བདེ་སྟོང་མི་རྟོག་པའི་དགོངས་པའི་རྩལ་རྒྱས་པར་མཛད་དུ་གསོལ་ཞེས་ཕུལ་བ་དང་། མ་ཧཱ་རཀྟ་ཁཱ་ཧི་རཀྟ་ཆེན་པོ་རོལ་ཅིག་རྟགས་དཔལ་ཆེན་པོ་དཀྱིལ་འཁོར་གླིང་དགུའི་གཙོ་བོ་རྣམས་ཡབ་ཡུམ་ཞལ་སྦྱོར་དུ་སྟོན་པ་ནི། རྒྱུ་གཞི་ལམ་འབྲས་བུའི་ཆོས་ཐམས་ཅན་ཐབས་ཤེས་གཉིས་ལས་མ་འདས་པའི་དོན་མངོན་དུ་བྱ་ཕྱིར་ལས་ཆོས་དམ་ཚིག་ཕྱག་རྒྱ་ཆེན་པོ་བཞིས་སྦྱོར་བ་ནི། འབྲས་བུ་རྣམ་ཀུན་མཆོག་ལྡན་གྱི་དབྱིངས་སུ་མཆོག་ཏུ་མི་འགྱུར་བའི་བདེ་བ་ཆེན་པོ་དང་གདོད་ནས་འདུ་འབྲལ་མེད་པ་ཡེ་ཤེས་ཆེན་པོའ་ིརོས་ཁ་སྦྱོར་ཡན་ལག་བདུན་ལྡན་དུ་ལོངས་སྤྱོད་རྫོགས་པའི་སྐུ་རང་སྣང་ཡེ་ཤེས་ཀྱི་འཁོར་ལོ་ལས་མ་གཡོས་པར་བཞུག་པའི་བརྡ། འབྲུ་དང་ཕབ་སྦྱར་བའི་རྫས་ཛ་གད་བཅུད་ཀྱི་ཉིང་ཁུའི་མཆོད་པས་བྱེད་ལས་སེམས་ཀྱི་ཟུག་རྡུ་སེལ་ཞིང་དཔའ་བོའ་ིངར་གྱི་སྟོབས་བསྐྱེད་པའི་བདུད་རྩིར་མཆོད་པ་སྟེ། མ་ཧཱ་༵བཛྲ་ཨ་མྲྀ་ཏ་ཛ་གད་པཱུ་ཛ་ཧོ་ནི་རྡོ་རྗེ་བདུད་རྩི་ཆེན་པོ། ཐབས་བདེ་བ་ཆེན་པོ་རྡོ་རྗེ་ཝཾ་གྱི་གཟུགས་ཅན་ལ་གནས་ཀྱང་ཤེས་རབ་རྣམ་ཐར་གསུམ་ལྡན་ཨེ་དབྱིངས་པདྨའི་གྲོང་ཁྱེར་ལ་སྙོམས་པར་ཞུགས་པའི་གནད་དོན་རྟོགས་པས་མ་བསྐུལ་ན་ཡེ་ཤེས་མངོན་དུ་བྱ་མི་ནུས་པས་ཐབས་ཤེས་སྦྱོར་བའི་བརྟུལ་ཞུགས་ཀྱི་རོལ་པ་ཆེན་པོའ་ིསྒྱུ་རྩལ་གྱིས་རབ་ཏུ་དགྱེས་པར་བསྐུལ་བས། ལྷ་ཚོགས་ཀུན་ཀྱང་ཟག་མེད་བདེ་ཆེན་གྱི་མཆོད་པས་ཤིན་ཏུ་དགྱེས་པའི་དགོངས་པ་ལས་ནམ་ཡང་མ་གཡོས་པས་སྲིད་པ་མིང་མེད་དུ་དག་པར་གྱུར་ནས་སྔུག་བསྔལ་གྱི་བདེན་པའི་གནས་ཚུལ་བདེ་བ་ཆེན་པོར་ཤར་བས། འབྲས་བུ་འཁྲུལ་པའི་རྣམ་རྟོག་གི་རྒྱུ་འབྲས་བདག་དང་བདག་གིར་འཛིན་པ་མེད་པར་ཤིན་ཏུ་ཞི་བ་ཐེག་ཆེན་འགོག་བདེན་མཐར་ཐུག་གི་དབྱིངས་སུ་སིམ་སྟེ་ངལ་སོས་པས་རྟོག་པས་བདག་བསྒྲལ་བས་སྤང་བ། ཐུགས་རྗེས་གཞན་སྒྲོལ་གྱི་རྟོགས་པའི་ཡོན་ཏན་རྫོགས་པས་འབྲས་བུ་སྐུ་གཉིས་ཀྱི་ཕྲིན་ལས་མཐར་ཕྱིན་པའོ། །ཛཿ ཧཱུྃ་བཾ་ཧོ་བཞི་ནི་འཁྱུད་སྡོམ་སྤྲད་པས་ཕྱག་རྒྱ་དང་སྦྱོར་བའི་དོན་ཏན་སྦྱོར་བ། གང་ན་སྒྲོལ་བའི་མཆོད་པས་མཉེས་ཚིམ་གྱི་དོན་པཱུ་ཛ་ཧོཿ སྤྱིར་སྲིད་རྩ་བ་དག་ཏུ་ལྟ་བ་ཆགས་པ་དེའི་མི་མཐུན་ཕྱོགས་ལ་སྡང་སེམས་རང་བཞིན་གྱིས་འབྱུང་བས་དེའི་གཉེན་པོར་མདོ་ལས་སྟོང་ཉིད་དང་སྙིང་རྗེ་སྔགས་ལས་སྦྱོར་སྒྲོལ་གཉིས་གསུངས་པས་མཆོད་པའང་གཞི་མཐུན་དུ་འབུལ་བའོ། །ནང་དང་གསང་བའི་མཆོད་པ་རྣམས་གཙང་དམེ་བླང་དོར་མེད་པར་ལོངས་སྤྱོད་པའི་བརྟུལ་ཞུགས་ཀྱིས་ནང་རྡོ་རྗེའི་ལུས་ཀྱི་རྩ་རླུང་ཐིག་ལེ་དྭངས་མའི་ཁམས་རྣམ་རྒྱས་པས་བདེ་གསལ་མི་རྟོག་པའི་ཞི་བདེའི་ཡེ་ཤེས་འཕེལ་བར་བྱེད་པས་གསང་དབང་གི་ལམ་གྱི་གྲོགས་སུ་གྱུར་བ་དང་། ལས་དང་ཡེ་ཤེས་ཀྱི་ཕྱག་རྒྱ་གང་རུང་ལ་བརྟེན་ནས་ཡབ་ཡུམ་སྙོམས་པར་འཇུག་པ་གསུམ་པའི་དབང་གི་ལམ་ཁྱེར་ལ་བརྟེན་ནས་ཞི་བདེ་འགྱུར་མེད་ཀྱི་ཡེ་ཤེས་ཀྱིས་མཚན་རྟོག་དབྱིངས་སུ་གསོད་པར་བྱེད་པ་དང་། དེ་ཐམས་ཅད་མཆོད་བྱ་མཆོད་བྱེད་ལས་འདས་པ་གདོད་མའི་གཤིས་ལུགས་སྤྲོས་བྲལ་དེ་ཁོ་ན་ཉིད་དབང་བཞི་པའི་ཡེ་ཤེས་དོན་དམ་འོད་གསལ་གྱི་ངོ་བོར་མཉམ་པར་འཇོག་པ་དེ་ཁོ་ན་ཉིད་ཀྱི་མཆོད་པ་དབང་བཞི་པའི་དགོངས་པ་དང་འབྲེལ་བ་སྟེ་རྡོ་རྗེ་གྱུར་གྱི་རྒྱུད་ལས། བདེ་བའི་ཐམས་ཀྱི་སྡོམ་པ་སྟེ། ཞེས་གསུངས་པ་ལྟར་དཀའ་སྤྱད་ལ་མ་ལྟོས་པས་ལམ་གཞན་ལས་བདེ་ཞིང་། གཞི་འབྲས་གཉིས་མེད་ཀྱི་དག་པ་སྦྱོར་ཚུལ་གྱིས་ཐ་མལ་གྱི་སྣང་ཤེས་སྡོམས་པས་མྱུར་བ་སྟོང་པ་ཉིད་རྟོགས་པའི་ཤེས་རབ་ཀྱིས་ཐབས་ཤེས་གཉིས་མེད་དུ་སྦྱོར་བའི་རྒྱུ་མཚན་ཡང་དེ་ཡིན་ནོ། །ཡན་ལག་དྲུག་པ་བསྟོད་པ་ནི་རིན་ཆེན་འབྱུང་ལྡན་ཏེ་བྲལ་སྨིན་གྱི་ཡོན་ཏན་མཐར་ཕྱིན་པའི་ཁྱབ་བདག་རིན་པོ་ཆེའི་རིགས་རིན་འབྱུང་ཡིན་པ་བཞིན་བསྟོད་པའི་གླུས་དཀྱིལ་འཁོར་པའི་ལྷ་ཚོགས་རྣམས་ཀྱི་སྐུ་གསུང་ཐུགས་ཀྱི་ཡོན་ཏན་གྱི་ཆེ་བ་སྒྲོགས་ཤིང་བསྔགས་པ་ཡིན་པས་ན་མཆོད་པའི་ལྷ་མོ་རྣམས་ཀྱིས་རྡོ་རྗེའི་གླུའི་བསྟོད་པ་ལ། ཚིག་བཅད་དང་པོའ་ིསྐུ་གར་དགུའི་རྣམ་འགྱུར་ལ་བསྟོད་པ་སྟེ། ཧཱུྃ་ཞེས་ཐུགས་མཁྱེན་བརྩེ་ནུས་པའི་ཡེ་ཤེས་གདུལ་བྱའི་ཡུལ་ལ་རྗེས་སུ་བསྐུལ་བའི་ཕྱིར་ཐུགས་སྲོག་གི་སྒྲས་བོད་པའི་ཚུལ་དུ་བསྐུལ་ཏེ་གནས་ལུགས་ཡང་དག་པའི་ཡེ་ཤེས་མངོན་དུ་གྱུར་པའི་མཁྱེན་པ་དང་། བྱམས་སྙིང་རྗེ་ཆེན་པོ་བརྩེ་བ་ཟུང་དུ་འཇུག་པའི་ཐུགས་ཀྱི་ངོ་བོ་ལ་ཆགས་སྡང་གི་རྟོག་པའི་རྒྱུ་བ་མི་མངའ་ཡང་། གདུལ་དཀའ་རུ་ཏྲ་རྣམ་སྨིན་རྩུབ་མོའ་ིའཕང་བ་རྣམས་དབང་དྲག་གི་ལྷག་པའི་ཕྲིན་ལས་ཀྱི་འཇུག་པ་མྱུར་བས་འདུལ་བའི་ཕྱིར། མི་བསྐྱོད་པའི་ངོ་བོ་སྐུ་ཆེ་ཞིང་ཡན་ལག་རག་པས་རྨོངས་ཉམས་ཀྱིས་མི་སྡུག་པ་སྲིན་པོ་ལྟར་ཁྲོས་པ། རྣམ་སྣང་གི་ངོ་བོ་སྐུ་རྒྱན་གྱི་མཛེས་ཤིང་ཡབ་ཡུམ་སྦྱོར་བ་སོགས་ནི་ཆགས་ཉམས་ཀྱིས་སྒེག་པ། རིན་འབྱུང་གི་ངོ་བོ་བདུད་བཞི་གདན་༵དུ་བཏིང་བ་སོགས་སྟོབས་དང་ལྡན་པས་ཁྲོ་ཉམས་ཀྱིས་དཔའ་བ། གཟི་བྱིན་ཉི་མ་འབུམ་ལས་ལྷག་པ་ནི་སྐུ་ཡི་ཉམས་གསུམ། དོན་གྲུབ་ཀྱི་ངོ་བོ་ཟུངས་ཤིག་རྒྱོབ་ཅིག་ཧཱུྃ་ཕཊ་སོགས་པའི་དྲག་ཤུལ་ལམ་གཤེ་བས་འཇིགས་པའི་ང་རོ་སྒྲོགས་པ་དང་། འོད་དཔག་མེད་ཀྱི་ངོ་བོ་ཆགས་དགྱེས་དྲེགས་པས་ཧ་ཧ་ལ་སོགས་པའི་རྡོ་རྗེའི་གད་རྒྱང་གིས་བཞད་པ། མཱ་མ་ཀིའི་ངོ་བོ་འབྲུག་སྟོང་དུས་གཅིག་ཏུ་ལྡིར་བ་ལྟ་བུའི་ང་རོ་དྲག་པོ་སྒྲོགས་པས་འཇིགས་རུང་གི་ཉམས་ཏེ་གསུང་གི་གར་གསུམ་སྤྱན་མའི་ངོ་བོ་ཆོས་སྐུ་སྤྲོས་མཚན་ལས་འདས་པ་མི་རྟོགས་པའི་དབྱིངས་ས་སུ་མཆོག་ཏུ་ཞི་བ། དམ་ཚིག་སྒྲོལ་མའི་ངོ་བོ་དམིགས་པ་མེད་པའི་ཐུགས་ནི་སྙིང་རྗེའི་བརྩེ་བ་གོས་དཀར་མོའ་ིངོ་བོ་ཁྲོ་ཆགས་ཀྱིས་ཐུགས་ཚིམ་པ་ལྟ་བུའི་འཕྲིན་ལས་ཅི་ཡང་ནུས་པས་རྔམས་པ་གསུམ་ནི་ཐུགས་ཀྱི་ཉམས་ཏེ་རྡོ་རྗེ་གསུམ་གྱི་གར་དགུའི་རྣམ་པས་ལུས་སྣང་བ་འདོད་ཁམས་ངག་ཕྱེད་སྣང་གཟུགས་ཁམས། ཡིད་མི་སྣང་གཟུགས་མེད་ཁམས་ཀྱི་སྟེང་འོག་བར་གྱི་ས་གསུམ་ལ་གནས་པའི་དྲེགས་པ་ཅན་དུག་གསུམ་གྱི་རང་གཟུགས་རུ་ཏྲ་སྡེ་གསུམ་ཟིལ་གྱིས་མནན་པའི་ཚུལ་ལ་བསྟོད་པའོ། །གཉིས་པ་ཐུགས་ཕྱག་མཚན་གྱི་དག་པ་ལ་བསྟོད་པ་ནི། བརྡ་རྡོ་རྗེ་དང་ཐོད་ཁྲག་རྩ་ཕྱག་གིས་འཛིན་པས། དོན་ཡབ་ཡུམ་གཉིས་སུ་མེད་པར་སྦྱོར་བ། རྟགས་སྲིད་རྩ་མ་རིག་པས་ཁྱབ་བྱེད་དུ་བྱས་པའི་ཁྱབ་བྱ་ཆགས་སྡང་དབྱིངས་སུ་དག་པ་མཚོན་པ་འདིས། གཞི་དབྱིངས་རིག་གཉིས། ལམ་ཐབས་ཤེས་གཉིས་འབྲས་བུ་སྐུ་དང་ཡེ་ཤེས་མཚོན་ཅིང་། ཕྱག་བར་པས་ཁ་ཊྭཱཾ་རྩེ་གསུམ་འཛིན་པས་རྒྱུ་དུག་གསུམ་སྐུ་གསུམ་དུ་དག་པ། གཡོན་བར་བས་ཐོང་གཤོལ་དཀུར་བརྟེན་ནས་ཕྲག་པར་སློང་བས་ཉོན་མོངས་ཐ་རྒོད་གྱིས་བྱང་ཆུབ་ཀྱི་མྱུ་གུ་སྐྱེ་མི་གཏུབ་པ་རྒྱུད་མ་རུངས་པར་བྱས་པའི་གཤིས་ངན་ནད་མུག་མཚོན་སོགས་འཇོམས་པར་རྟོགས་པས་བདག་བསྒྲལ་བ་དང་། ཐ་མ་གཉིས་ཀྱི་མེ་དཔུང་ནི་ཚར་གཅོད་དྲག་པོ་དང་། ལྕགས་སྡིག་གིས་རྗེས་འཛིན་ཞི་བའི་ཕྲིན་ལས་གཉིས་ཀྱིས་ཞེ་སྡང་གི་རྟོག་པའི་རང་གཟུགས་རྒྱལ་པོ་ཕོ་གདོན། ཆགས་དང་སེར་སྣས་འདོད་ཆགས་ཀྱི་རང་གཟུགས་བསེན་མོ་འགོར་པོ། རྟོག་མེད་རྡོ་རྗེ་ཁྲོས་པའི་མཚོན་ཆས་གཏི་མུག་གི་རང་གཟུགས་དྲེག་པ་སྡེ་བརྒྱད་ཀྱི་ཚོགས་ཀུན་འདུལ་ཞིང་བྲལ་དུ་བཀོལ་བའི་མཛད་པས་ཐུགས་རྗེའི་གཞན་སྒྲོལ་བ་ལ་བསྟོད་པའོ། །གསུམ་པས་སྐུ་ཡོངས་རྫོགས་ལ་བསྟོད་པ་སྟེ་དཔལ་ཆེན་པོའ་ིཡེ་ཤེས་ཀྱི་སྐུའི་དབྱིངས་སམ་ངོ་བོ་རྣམ་ཀུན་མཆོག་ལྡན་གྱི་ཆོས་སྐུའི་ངོ་བོ་ནི་གཞི་ལམ་འབྲས་བུའི་སྐབས་ཐམས་ཅད་དུ་སྐྱེ་འགགས་འཕོ་འགྱུར་གྱིས་གཡོ་བ་མེད་པ་མཚོན་པས་སྐུ་མདོག་མཐིང་ག་སྟེ། དེ་ནི་ཁ་དོག་གཞན་གང་གིས་བསྒྱུར་དུ་མི་གཏིབ་པ་བཞིན་ནོ། །ཆོས་སྐུ་དེ་ཡང་སྟོང་པ་ཕྱོགས་གཅིག་མ་ཡིན་པ་ཟག་མེད་བདེ་ཆེན་འབྲས་བུའི་ཡོན་ཏན་ཐམས་ཅད་ཉི་མ་དང་ཟེར་བཞིན་རྫོགས་པར་མངའ་བ་མཚོན་བྱེད་དུ་དབུ་གསུམ་ནི་འབྲས་བུ་སྐུ་གསུམ་གྱི་ཡོན་ཏན་ཕྱག་དྲུག་ནི་ལམ་ཕ་རོལ་ཏུ་ཕྱིན་པ་དྲུག་ཞབས་བཞི་ནི་གཞི་ཚད་མེད་བཞིས་གཞན་ཕན་གྱི་མཛད་པ་རྫོགས་སྨིན་སྦྱངས་མཐར་སོན་པ་སྟེ། སྐུ་ཡི་བརྡ་རྟགས་དང་ཟག་མེད་ཀྱི་ཡོན་ཏན་རྫོགས་པར་མངའ་བ་མཚོན་པའོ། །བཞི་པ་འཁོར་གྱི་ལྷ་ཚོགས་ལ་བསྟོད་པ་ནི། ངང་ཁྲོ་ཤུགས་ཁྲོ་ཁྲོ་བར་བཅས་དང་བཅོས། ཞེས་པ་ལྟར་ཆོས་ཉིད་འགྱུར་བ་མེད་པའི་དབྱིངས་ཀྱི་གཤིས་བདེ་བ་ཆེན་པོ་ཐིག་ལེ་ཉག་གཅིག་གདོད་ནས་སྤངས་བྱ་དང་ལྷན་ཅིག་མི་གནས་པ་ཆོས་སྐུ་མཉམ་པ་ཆེན་པོ་ངང་གིས་ཁྲོས་པའི་ཐུགས་རྗེའི་རྩལ་ལས་ཆོས་ཅན་ཆོས་དབྱིངས་ཡེ་ཤེས་ལ། ཆོས་ཉིད་མེ་ལོང་མཉམ་ཉིད་སོར་རྟོག་བྱ་གྲུབ་ཀློང་གྱུར་འདའ་ཀ་དབྱིངས་སྒྲོལ་མཐའ་གྲོལ་གྱི་ཀློང་དགུར་ཤར་བའི་རང་རྩལ་གྱིས་གདུལ་བྱའི་ཁམས་ལ་ཐུགས་རྗེ་གཡོས་ཏེ་རྟག་ཁྱབ་ལྷུན་གྱིས་གྲུབ་པའི་ཕྲིན་ལས་དགྱེས་པ་ཆེན་པོའི་ཞི་བའི་ཆགས་ཚུལ་ཁྲོ་བོའ་ིརྔམས་གཤེའི་གཟུགས་སྐུའི་ཕྱག་རྒྱར་དཔལ་ཆེན་སྒྲུབ་སྡེ་བརྒྱད་དུ་བཞེངས་པ་ཀུན་ཀྱང་ཁ་སྦྱོར་བདུན་གྱི་བདག་ཉིད་བདེ་བ་ཆེན་པོའ་ིལོངས་སྤྱོད་ཀྱི་ཉམས་ལ་བྲི་གང་མེད་པར་བཞུགས་པ་ཆོས་ཅན་ཤུགས་ཀྱིས་ཁྲོ་བ་དང་། དེ་ཐམས་ཅད་ཀྱི་གསང་བ་རྒྱན་འཁོར་ལྔའི་ངེས་པའི་ཆོ་འཕྲུལ་སྤང་བྱ་དང་ལྷན་ཅིག་ནམ་ཡང་མི་གནས་པའི་ཁྲོ་བ་དང་བཅས་པའི་ཕྱིར། མཁའ་ཁྱབ་ཡིད་ཅན་གདུལ་དཀའ་ཀུན་འདུལ་ཕྱིར་འབར་བ་ཁྲག་འཐུང་གི་འཁོར་ལོས་འདུལ་ནས་འཁོར་བའི་སྐྱེ་རྒྱུན་བཅད་པ་ནི་སྤྲུལ་སྐུ་རྡོ་རྗེའི་ཁྲོ་བོའི་དཀྱིལ་འཁོར་འདུ་འཕྲོའམ་སྤྲོ་བསྡུ་མཛད་པ་སྟེ། ཐུགས་ལ་ཁྲོ་བ་མི་མངའ་ཡང་འགྲོ་བའི་དོན་དུ་ཡེ་ཤེས་ལས་དང་འཇིག་རྟེན་གྱི་ཁྲོ་བོ་དང་། ཕྲ་མེན་གྱི་གཟུགས་སུ་བཅོས་པ་བདུན་བརྒྱ་ཉེར་ལྔའི་དཀྱིལ་འཁོར་གྱི་ལྷ་ཚོགས་ཀུན་ཀྱང་ངོ་བོ་དཔལ་ཆེན་པོ་གཅིག་གི་ཡེ་ཤེས་རྣམ་འཕྲུལ་འགགས་མེད་ཅིང་ཡང་སྟོན་པ་ཀུན་མཁྱེན་བརྩེའི་ཡེ་ཤེས་ལ་བྲི་གང་དང་དགོངས་པ་མཐོ་དམན་མེད་པར་ཤེས་པས་བསྟོད་ཅེས་སོ། །འདི་ལ་མངོན་རྟོགས་རྒྱས་པའི་སྐབས་འབྱུང་བའི་བསྟོད་པའི་དོན་ཀྱང་སངས་རྒྱས་སྐུ་གསུམ་གྱི་ཡོན་ཏན་མཐར་ཕྱིན་པས་དབུ་དགུ་ནི་སྟོབས་བཅུའི་བྱིངས་སུ་ཡེ་ཤེས་ཀྱི་རྩལ་རྫོགས་པས་བདུད་དང་མུ་སྟེགས་ཐམས་ཅན་ཟིལ་གྱིས་གནོན་ནུས་པ་མཚོན་པའི་བརྡ་རྟགས་སུ་དབུ་དགུ་ལས་དང་བྱ་བ་ཐམས་ཅན་ལག་པས་བྱེད་དགོས་པ་ལྟར་སངས་རྒྱས་ཀྱི་སྐུ་གསུང་ཐུགས་ལ་མ་འདྲེས་བཅོ་བརྒྱད་ཀྱི་ཡོན་ཏན་མཐར་ཕྱིན་པའི་བརྡ་དོན་ཕྱག་བཅོ་བརྒྱད་ཀྱིས་ཀུན་བཟང་ཡབ་ཡུམ་མཚོན་པའི་རྡོ་རྗེ་དང་དུང་ཁྲག་སེམས་དཔའི་སེམས་མ་བཅུ་དྲག་ཕྱག་ཆའི་ཚུལ་དུ་བསྣམས་པ་ཡིས། དབང་པོ་སྒོ་ལྔ་དང་ཡུལ་ལྔ་ལས་ཡུལ་ཅན་རྣམ་ཤེས་གསུམ་འདུས་ཀྱིས་སྲེད་ལེན་གྱིས་ལས་འདུ་མི་བྱེད་པར་གདན་གསུམ་ལྷའི་འཁོར་ལོའ་ིཕྱག་རྒྱ་ཆེན་པོའ་ིརྒྱས་བཏབ་པས། བདེ་སྟོང་སྒྱུ་འཕྲུལ་དྲྭ་བ་ཆེན་པོར་འབྱམས་སུ་ཀླས་པས་དག་ཆེན་ཡེ་ཤེས་ཆེན་པོའ་ིདབྱིངས་སུ་སྦྱོར་བ་ལ་བསྟོད་པ། ཀུན་གཞི་ཡིད་ཆོས་ཕུང་ཁམས་སྐྱེ་མཆེད་བྱ་བྱེད་ཀྱི་ཚོགས་དང་བཅས་པ་འབྲས་བུ་དག་ཆེན་ཡེ་ཤེས་ཀྱི་ལྷ་གདན་གསུམ་གཙོ་འཁོར་ཐམས་ཅད་ཀྱང་རྣམ་པ་གང་ལྟར་སྟོན་ཀྱང་དོན་ལ་སྐུ་གསུམ་དང་ཁ་སྦྱོར་ཡན་ལག་བདུན་གྱི་རྣམ་བྱང་ཆེན་པོའ་ིཡོན་ཏན་ཡོངས་སུ་རྫོགས་པས་དགོངས་པ་ལ་མཐོ་དམན་མེད་པ་སངས་རྒྱས་ཉག་གཅིག་ཏུ་བཞུགས་པ་རྣམས། གདུལ་བྱ་རྗེས་སུ་འཛིན་སླད་ཞི་ཁྲོའ་ིབཞིན་ལག་གི་མཚན་དཔེར་རྣམ་འགྱུར་དང་གཙོ་འཁོར་གྱི་ཚུལ་དུ་ཤར་བའི་རོལ་པ་ཅིར་ཡང་སྟོན་པ་ཐམས་ཅན་སྤྱི་དཔལ་ཧེ་རུ་ཀའི་རྣམ་པ་ཀུན་གྱི་མཆོག་དང་ལྡན་པའི་ཡེ་ཤེས་གཅིག་གི་བདག་ཉིད་དུ་རྫོགས་པ་ཁྱེད་ལ་མཆོག་དམན་གྱི་རྟོག་པ་སྤངས་ཏེ་གུས་པས་བསྟོད་པའོ། །བསྙེན་ཡིག་ཏུ་ལྷ་ལ་གསལ་སྣང་མ་ཐོན་བར་དུ་འོད་ཟེར་སྤྲོ་བསྡུ་སོགས་བྱེད་མི་དགོས་ཏེ་ཐོད་སྐུ་ཡོད་ན་ཅེ་རེ་བལྟ་བ་དང་ཡིད་ཡུལ་དུ་གོམས་འཇུག་པ་རེས་མོས་སུ་བསླབ་གསུངས་པ་ནི་བློ་ཆུང་ལས་དང་པོ་པ་རྣམས་ཀྱིས་མ་གོམས་བར་ལ་བརྟགས་པའི་སྐུར་རྩལ་སྦྱངས་པ་སྟེ་བཟོ་བོ་མཁས་པ་བྲིས་སྐུའམ། ལྡེར་བཟོ་རབ་གནས་དང་ལྡན་པ་དམིགས་རྟེན་དུ་དྲན་པ་རྒྱུ་བའི་ཡན་ལག་ཅེས་ཆེད་དུ་མི་སྒོམ་པར་དབུ་ནས་ཞབས་ཀྱི་བར་ལ་མིག་མི་འཛུམ་པར་ཅེ་རེ་བལྟ་བ་ལ་གོམས་པས་རྟོག་ཚོགས་གཡོ་ཉམས་རི་གཟར་གྱི་ཆུ་ལྟར་བྱུང་ཡང་མ་སུན་པར་བྱས་པས་ཇེ་ཞིག་ན་དེའི་རྣམ་འགྱུར་ཇི་ལྟ་བའི་བག་ཆགས་བརྟན་པ་ལས་མིག་གཙུམ་ཡང་ཡིད་ཡུལ་དུ་བཀྲ་གསལ་གྱིས་འཆར་བ་ནི་ཐོབ་པའི་ཉམས་ཞེས་བྱ། དེའི་ཚེགས་གསལ་སྣང་དེས་ཐ་མལ་གྱི་སྣང་ཞེན་ལ་རྒྱས་བཏབ་སྟེ་སྣང་སྟོང་སྒྱུ་མའི་སྐུ་ཤེལ་བུམ་དྲི་མེད་དམ་འཇའ་ཚོན་ལྟ་བུ་ཕྱི་ནང་ཟང་ཐལ་གསལ་འཚེར་བཀྲག་དང་ལྡན་པ་མེ་ལོང་གི་གཟུགས་ལྟ་བུར་རྩལ་སྦྱོངས། དེ་ཡང་ཧ་ཅང་བཙིར་ཟིན་མི་བྱེད་པར། དེ་གའི་གསལ་སྣང་མ་འགགས་པའི་ངང་ལ་ཤིགས་སེ་མཉམ་པར་བཞག་རེ་ཞིག་བྱིང་ཉམས་བྱུང་ནའང་མི་གསེངས། དེ་ལྟར་བསྐྱངས་པས་ཇེ་ཞིག་ན་མི་རྟོག་པའི་ངང་ལས་ལྷ་སྐུའི་གསལ་སྣང་རང་ཤུགས་སུ་འདྲེན་ནུས་པ་འབྱུང་། དེ་ཙ་ན་དམིགས་རྟེན་མི་དམིགས་པར་སྦྱངས་ཏེ་རང་ལྷར་བསྒོམ་པ་རྩེ་གཅིག་ཏུ་མཉམ་པར་བཞག་གསལ་སྣང་ལ་རྩེ་གཅིག་ཏུ་གནས་ཤིང་ང་རྒྱལ་བརྟན་པོ་བྱུང་བ་དང་། བློ་འབྲིང་རྣམས་ཀྱིས་སྐུ་ཡོངས་རྫོགས་ཀྱི་རྣམ་འགྱུར་ཝལ་གྱིས་གསལ་བ་དང་། དེ་ནས་དབུའི་རྣམ་པ། ཕྱག་གཡས་གཡོན་སྐུ་སྐེད་ཡན། ཞབས་གཡས་གཡོན། སྐུ་ཡོངས་རྫོགས་གདན་དང་བཅས་པ་རེ་རེ་ནས་གསལ་སྣང་འདོན། ལྟ་སྐུའི་ཆེ་ཆུང་དང་གཙོ་འཁོར་མང་ཉུང་། རྒྱང་ཉེ་རིང་། ཐུན་རིང་ཐུང་གི་སྐྱེད་བྲི་སོགས་མ་ངེས་པར་རྩལ་སྦྱངས། དེ་ཡང་དང་པོ་དམིགས་རྟེན་གྱི་སྐུ་ལ་བལྟ་ཡུན་རིང་བར་བྱ། སྒོམ་ཡུན་ཐུང་བར་བྱེད། ཅུང་ཟད་གོམས་ནས་བལྟ་ཡུན་ཇེ་ཐུང་། སྒོམ་ཡུན་ཇེ་རིང་ལ་བསླབ། རྣམ་པ་གསལ་བ་སྒྱུ་མ་ལྟ་བུའི་བསྐྱེད་རིམ་ལ་སློབ་པས་ཆད་ལྟར་མི་གོལ་ཞིང་། སྐྱོ་བོའ་ིཚེ་མངོན་རྟོགས་བསྟོད་པའི་སྐབས་སུ་བཤད་པ་ལྟར། རྣམ་དག་དྲན་པ་རྡོ་རྗེ་ལྟ་བུའི་ཏིང་འཛིན་གྱི་ངོ་བོར་རྩལ་སྦྱངས་པས་རྟག་ལྟར་མི་གོལ་བའི་གནད་དོ། །གཞུང་ལས། དང་པོར་མོས་པས་འགོད་པ་སྟེཿ ལྷ་དང་ཞིང་ཁམས་ཆོས་ཉིད་གསུམཿ གཅིག་ཏུ་འདྲེས་པའི་གཟེར་ཐེབས་ཚེཿ རང་སྣང་དོན་གྱི་འོག་མིན་དུཿ འཚང་རྒྱ་འདི་ལ་ཐེ་ཚོམ་མེདཿ ཅེས་གསུངས་པ་ལྟར། བློ་རབ་རྣམས་ཀྱིས་ནི་རང་བཞིན་ཇི་ལྟ་བའི་དངོས་པོ་ངོས་བཟུང་ལས་འདས་པའི་བསྐྱེད་རྫོགས་ཟུང་འཇུག་ཡེ་ཤེས་ཆེན་པོའ་ིསྐུ་རྣམ་པ་གསལ་ཞིང་ངོ་བོས་སྟོང་། ཆོས་ཉིད་སྟོང་བཞིན་དུ་རང་བཞིན་སྤྱན་གྱི་དཀར་ནག་ཚུན་ཕྱེད་པའི་གསལ་སྟོང་དབྱེར་མེད་ཆུ་ཟླ་ལྟ་བུའི་བསྐྱེད་རིམ་འཛིན་ཞེན་དང་བྲལ་བར་རྩལ་སྦྱངས་ཚུལ་གང་ཟག་གི་དབང་པོ་དང་བསྟུན་ནས་ཉམས་སུ་བླང་ཞིང་ལྷ་འཚམས་བཟུང་བ་སོགས་པ་བཅད་བདུན་བླ་མ་དགོངས་འདུས་ཀྱི་མན་ངག་བསྐྱེད་རིམ་འོག་མིན་བགྲོད་པའི་ཐེམ་སྐས་སུ་གསུངས་པ་ལྟར་གོམས་པར་བསླབ་བོ། །དེ་ལྟར་ལྷའི་རྣམ་པ་རང་སེམས་དང་དབྱེར་མེད་བསྲེས་ཏེ་བསྒོམ་པས་སྐུ་ཡོངས་རྫོགས་ཀྱི་གསལ་སྣང་ལ་ཇི་ཙམ་གནས་འདོད་པ་དེ་སྲིད་དུ་སྡོད་པས་བརྟན་པའི་ཉམས་དང་། བ་སྤུའི་བུ་ག་དང་སྤྱན་གྱི་དཀར་ནག་ཚུན་གསལ་ཞིང་ཡུལ་རྐྱེན་གང་གིས་ཀྱང་མི་འཕྲོག་པར་གསལ་བརྟེན་གྱི་ཚད་བརྒྱད་ཐོབ་པ་མཐར་ཕྱིན་པའི་ཉམས་ཞེས་གསུངས་ལ། གཞན་ཡང་དཔལ་ཆེན་ཞལ་ལུང་ལས། ཕྱོགས་རིས་བྲལ་བའི་ལྟ་བ་ཡིས༔ ཐེ་ཚོམ་ཡིད་གཉིས་འཕྲང་ལས་གྲོལ༔ གསལ་འགྲིབ་མེད་པའི་སྒོམ་པ་ཡིས༔ བྱིང་རྒོད་གཉིས་འཛིན་འཕྲང་ལས་གྲོལ༔ སྤྱོད་པ་མ་འཁྲུལ་དམ་ཚིག་གིས༔ ཐེག་པ་དམན་པའི་འཕྲང་ལས་གྲོལ༔ ཞེས་གསུངས་པ་ལྟར། སྣང་བ་ལྷ་དང་འདྲེས་པ་ཙམ་གྱིས་མཆོག་དངོས་ཀྱི་རྒྱུར་མི་འགྱུར་བས་ལྷ་དོན་ལ་སྦྱར་ཞེས་རང་སེམས་ལྷའི་སྐུ་དང་ཡེ་ཤེས་སུ་ཤར་བ་ལ་རིག་པ་བྱང་ཆུབ་ཀྱི་སེམས་ལྷ་སྐུའི་འབྲས་བུར་གདོད་ནས་དུ་མ་རོ་གཅིག་ཏུ་སྨིན་པའི་བསྐྱེད་རྫོགས་དབྱེར་མེད་ཡེ་ཤེས་ཆེན་པོའ་ིསྐུར་ལ་བཟླ་བའི་ཕྱིར་རང་གི་སྒོ་གསུམ་བྱ་བྱེད་དང་བཅས་པ་བདེ་བར་གཤེགས་པའི་སྐུ་གསུང་ཐུགས་མཛད་པ་ཕྲིན་ལས་སུ་སྡོམ་པར་བྱེད་པའི་གཟེར་བུ་ལྟ་བུ་སྲོག་སྡོམ་གཟེར་བཞི་ཅེས་སྔ་འགྱུར་གྱིས་བསྐྱེད་རིམ་མན་ངག་ཐུན་མོང་མ་ཡིན་པར་གསུངས་པའི་གནད་ལ་འོག་མིན་བགྲོད་པའི་ཐེམ་སྐས་སུ་གསུངས་པ་བཞིན་གོམ་པར་བསླབ་པས་རིག་འཛིན་གབ་བྱང་ལས། དབྱིངས་ཀྱི་སྣང་ཆ་ལྷར་ཤར་བས༔ བསོད་ནམས་ཚོགས་ཆེན་འདི་ཡིས་རྫོགས༔ དེ་ལ་དངོས་ཞེན་རྣམ་དག་པས༔ ཡེ་ཤེས་ཚོགས་ཀྱང་རྫོགས་པ་ཡིན༔ ཞེས་དང་། དཔལ་ཆེན་ཞལ་ལུང་ལས། བསོད་ནམས་དང་ནི་ཡེ་ཤེས་མཐུས༔ བསྐྱེད་རྫོགས་གདིང་དུ་གྱུར་པ་ལས༔ རྣམ་རྟོག་རགས་པ་ཆོམས་གྱུར་ཏེ༔ ཡེ་ཤེས་ལྷ་ཡི་ཕྱག་རྒྱ་ཀུན༔ དང་པོ་ཡིད་ཀྱི་ཡུལ་དུ་གསལ༔ དེ་ཡི་དངོས་སྣང་མཐུ་བརྟས་པས༔ སེམས་ཉིད་ཤིན་ཏུ་སྦྱངས་པའི་མཐུས༔ རང་བཞིན་དབང་པོའ་ིཡུལ་དུ་གསལ༔ མཐར་ནི་བདེན་གཉིས་དབྱེར་མེད་ཀྱི༔ ལུས་སེམས་ཤིན་སྦྱངས་ཐོབ་པའི་ལྷ༔ ལུས་ཀྱི་ཡུལ་དུ་མངོན་སུམ་གསལ༔ ཡུལ་གསུམ་གྱད་དུ་གྱུར་པ་ལས༔ མ་དག་ལུས་ཀྱི་དངོས་སྣང་ཆོམས༔ ཞེས་གསུངས་པ་ལྟར་ས་ལམ་གྱི་བགྲོད་ཚུལ་ཀྱང་རིག་འཛིན་གྱི་གབ་བྱང་ལས་འབྱུང་བ་ལྟར་ཤེས་པར་བྱའོ། །གཉིས་པ་ཐུགས་བརྒྱུད་བསྐུལ་བ་བསྙེན་པའི་རིམ་པ་ལ། གཞུང་ལས་བསྙེན་དང་སྒྲུབ་ལས་སྦྱོར་རོ༔ ཞེས་པ་ལྟར་ཞི་བར་བསྙེན་པ། ཁྲོ་བོར་སྒྲུབ་པ། ལས་ལ་སྦྱར་བ་གསུམ་གྱི་དང་པོ་ནི། སངས་རྒྱས་རྣམས་ཀྱིས་འགྲོ་བ་འདུལ་བའི་ཕྲིན་ལས་ཀྱི་གཙོ་བོ་ཆོས་འཁོར་ཡིན་པ་བཞིན་གསུང་རྡོ་རྗེ་རིག་སྔགས་སུ་ཤར་བས་ལས་བཞི་མཆོག་གི་དངོས་གྲུབ་སྒྲུབ་བྱེད་ཀྱི་རྩ་བ་སྔགས་ཏེ་སྦྱངས་གཞི་ཐ་མལ་གྱི་ངག་སྒྲ། སྦྱོངས་བྱེད་བསྙེན་སྒྲུབ་ལས་གསུམ་གྱི་བཟླས་པ། སྦྱངས་འབྲས་གསུང་རྡོ་རྗེ་རྣམ་པ་ཐམས་ཅད་པའི་གོ་འཕང་མངོན་དུ་གྱུར་པའི་གནད་ཤེས་པས་སྒོམ་དོན་གྱི་དམིགས་རིམ་དངོས་ནི། བདག་ཉིད་ཆེ་མཆོག་ཡབ་ཡུམ་སོགས་ཀྱི་དོན་སེམས་དཔའ་སུམ་བརྩེགས་འདི་ཡེ་ཤེས་སེམས་དཔའ་རང་དྲའམ། ཡང་ན་སྒྱུ་འཕྲུལ་ལྟར་རྒྱན་དང་ཕྱག་མཚན་སྤང་བའི་རང་འདྲ་དང་། ཁ་ཅིག་སྤྲུལ་པ་དང་སྤྲུལ་གཞིའི་དབང་དུ་མཛད་པ་དང་། འགའ་ཞིག་ཁྲོ་བོ་ལ་ཞི་བ། ཞི་བ་ལ་ཁྲོ་བོ་སོགས་སྒོམ་ཚུལ་དུ་མ་ལས། འདི་ནི་ཁྲོ་བོའ་ིཐུགས་ཀར་ཞི་བ་སྒོམ་པ་སྟེ། དམིགས་པ་བསྙེན་ཡིག་ཏུ་གསལ་བ་ལྟར་ལ། དེ་ཡང་བདེ་གཤེགས་ཞི་བའི་སྒྲུབ་པ་ལ། རྒྱས་པ་རིགས་བརྒྱ། བསྡུས་པ་ཞེ་གཉིས། རབ་ཏུ་བསྡུས་པ་དེ་ཉིད་རིགས་ལྔ། ཤིན་ཏུ་བསྡུས་པ་གསང་ཆེན་རིགས་གཅིག་དང་། ཕྱག་རྒྱ་རྐྱང་སྒྲུབ་ཀྱི་སྒྲུབ་ཚུལ་བཅས་བདེ་འདུས་ཞི་བ་འདུས་པ་རྩ་བའི་རྒྱུད་དུ་གསུངས་པ་འདི་ནི་གསང་ཆེན་རིགས་གཅིག་གི་སྒྲུབ་ལུགས་རིགས་ཀྱི་ཁྱབ་བདག་ཏུ་རྟོགས་པ་ལྷ་གཅིག་སྒྲུབ་པས་ཐམས་ཅན་འགྲུབ་པར་གསུངས་པའི་དགོངས་པ་སྟེ་འདི་ཉིད་མཆོག་སྒྲུབ་ཀྱི་སྙིང་པོ་ཡིན་པས་གྲངས་བསྙེན་ཚད་ཇི་ཙམ་མང་བཞིན་ལེགས་པ་ཡིན་ནོ། །གཞུང་ལས། རིགས་རྣམས་ཀུན་གྱི་དབང་ཕྱག་མཆོག༔ སངས་རྒྱས་ཀུན་གྱི་མེས་པོ་སྒོམ༔ རྒྱལ་བའི་དཀྱིལ་འཁོར་བསམ་ཡས་ཀུན༔ བདེ་གཤེགས་གཅིག་སྒྲུབ་ཀུན་གྱི་ངང༔ ཞེས་དང་། བཟླ་བྱའི་སྔགས་འབྲུ་གསུམ་ཡང་བདེ་གཤེགས་འདུས་པ་ཞི་བ་གསང་ཆེན་རིགས་གཅིག་ལས། ཏིང་འཛིན་གྱི་གནད་ཡི་གེ་འབྲུ་གསུམ་ལ་འདུས་ཏེ༔ ཨོཾ་གྱིས་དེ་བཞིན་ཉིད་ཀྱི་ཏིང་ངེ་འཛིན༔ ཨཱ༔ ཀུན་སྣང་གི་ཏིང་ངེ་འཛིན་༔ ཧཱུཾ་རྒྱུའི་ཏིང་ངེ་འཛིན་ནོ༔ ཞེས་དང་། སྐུ་ཐམས་ཅད་ཀྱི་གནད་ཀྱང་འབྲུ་གསུམ་ལ་འདུས་ཏེ། ཨོཾ་གྱིས་ཆོས་སྐུ་ཐོབ་པར་བྱེད༔ ཨཱཿཔ་ལོངས་སྐུ་ཐོབ་པར་བྱེད། ཧཱུཾ་གིས་སྤྲུལ་སྐུ་ཐོབ་པར་བྱེད༔ ཞེས་སོགས་རྒྱས་པར་གསུངས་པ་ལྟར་སངས་རྒྱས་ཐམས་ཅན་ཀྱི་གཉིས་སུ་མེད་པའི་རྡོ་རྗེ་གསུམ་གྱི་ས་བོན་དུ་ངེས་པས་བཟླས་པ་ཙམ་གྱིས་ལས་ཀུན་བྱེད་ཅིང་ཕན་ཡོན་ཚད་མེད་པ་སྟེ། བླ་མ་དགོངས་འདུས་ལས། བླ་མ་ཡི་དམ་མཁའ་འགྲོ་ལ་སོགས་པའི་རྒྱལ་བ་ཐམས་ཅད་ཀྱི་སྐུའི་སྙིང་པོ་ཨོཾ༔ གསུང་གི་སྙིང་པོ་ཨཱཿཐུགས་ཀྱི་སྙིང་པོ་ཧཱུྃ་གསུམ་ལ་འདུས་པས༔ འབྲུ་གསུམ་རྩ་བའི་སྙིང་པོ་འདི་འགྲུབ་ན་ཐམས་ཅད་འགྲུབ་ཅིང་༔ འདི་བྱིན་རླབས་ཀུན་འདུས་ཀྱི་རྩ་བ༔ དངོས་གྲུབ་ཀུན་འདུས་ཀྱི་རྩ་བ༔ ཕྲིན་ལས་ཀུན་འདུས་ཀྱི་རྩ་བ་ཡིན་པའི་ཕྱིར༔ སྔགས་ཀྱི་དབུ་ལ་འབྱུང་བ་དང་༔ རྒྱས་འདེབས་པ་ཐམས་ཅད་འབྲུ་གསུམ་གྱིས་བྱེད་པ་དེའོ། །ཞེས་སོ། འདི་ལས་ཀྱང་། ཚེ་གཅིག་བྱང་ཆུབ་འདོད་པ་རྣམས༔ འདི་ལ་རྟག་ཏུ་ནན་ཏན་གྱིས༔ འབྱུང་འཇུག་སྔགས་སུ་གོམས་པ་ན༔ ཕུང་པོ་འོད་སྐུར་དེངས་བར་འགྱུར༔ ཞེས་གསུང་པས་ཆོས་འདིའི་བརྒྱུད་འཛིན་ཐམས་ཅད་མཆོག་གི་དངོས་གྲུབ་ཀྱི་ཉེ་ལམ་ལ་བརྟེན་ནས་རྟོགས་པ་དོན་བརྒྱུད་ཀྱི་རྒྱལ་ས་བཟུང་བའི་རྣམ་ཐར་ལ་མིག་ལྟོས་ཀྱིས་དོན་དམ་ཡེ་ཤེས་ཀྱི་ལྷ་མཆོད་སྒྲུབ་པ་ལ་ནན་ཏན་དུ་བྱ་དགོས་པས་ན་གཞུང་དུ་འབྲུ་གསུམ་ཡིད་བཟླས་སམ། མ་བདེ་ན་ཤུབ་བུའི་བཟླས་པས་འབྱུང་འཇུག་གདོད་ནས་དག་པའི་སྔགས་སུ་གོམས་པར་བྱ་གསུངས་པས་སྔགས་སྒྲུབ་མན་ངག་རིན་ཆེན་ཕྲེང་བ་ལས། མཆོག་གི་དངོས་གྲུབ་བཟླས་པ་ཁྱད་པར་ཅན་གྱིས་འགྲུབ༔ ཅེས་གཡོ་བ་རླུང་གི་རྫོགས་རིམ་དུ་བཤད་པའི་རྡོར་བཟླས། རླུང་ཕྱིར་དབྱུང་བ་ཨོཾ། རྔུལ་པ་ལ་ཨཱཿགནས་པ་ཧཱུྃ་ལ་སྦྱང་བའམ། ཡང་ན་སྤྱི་འགྲོ་ལྟར་དབྱུང་བ་ཨོཾ་རྔུབས་པ་ཧཱུྃ། གནས་པ་ཨཱཿལ་བསླབ་པས་རླུང་རིག་བསྲེ་བའི་ཉམས་ལེན་ལ་འབད་པ་མཆོག་ཏུ་ཟབ་པས་རྡོར་བཟླས། ཡིད་བཟླས་སྤེལ་མ། སྐྱོན་ངག་བཟླས་ཀྱང་ཅུང་ཟད་བྱའོ། །གཉིས་པ་ཁྲོ་བོར་སྒྲུབ་པ་ལ། སྒྲུབ་པ་དང་། སྒྲུབ་ཆེན་གཉིས་ལས། དང་པོ་ནི། དམིགས་གནད་སྙིང་པོ་བསྙེན་ཡིག་ལས། ལྷ་དང་ཞིང་ཁམས་ཆོས་ཉིད་གསུམ་བློས་བཀོད་མ་ཡིན་པར་གཉིས་མེད་རང་ཤར་མ་སྒོམ་ལྷུན་གྱིས་གྲུབ་པའི་བསྐྱེད་རིམ་ཞེས་རིག་པའི་མྱོང་བ་ཡོད་ན་ལྟ་བ་དེའི་རྩི་དང་མ་བྲལ་བས་ལྷ་སྔགས་ཀྱི་གསལ་འདེབས་པ་ནི་ཤིན་ཏུ་ཟབ་པའི་གནད་དེ། ཞེས་གསུངས་པའི་དོན། སེམས་རིག་ལ་ཤན་ཕྱེས་ནས་རིག་པ་སྐུ་གསུམ་ཆེན་པོའ་ིབདག་ཉིད་དེ་མངོན་སུམ་མྱོང་བས་ངོ་ལེགས་པར་འཕྲོད་པ་གཞིར་བཟུང་བས་གཟུང་འཛིན་གྱི་རྟོག་པ་ཐད་དཀར་ཅན་ནས་རིག་པ་ཟང་ཐལ་ཆེན་པོའ་ིངང་བཟོ་མེད་དུ་བཞག་པ་ལས་མ་གཡོས་བཞིན་དེའི་རང་མདངས་དཀྱིལ་འཁོར་གྱི་ལྷར་ཤར་བ་ལ་དམ་ཡེ་བསྲེས་ནས་གསལ་སྣང་དང་ང་རྒྱལ་བརྟན་པོ་ལ་བཞག་ནས་ལྷ་སྔགས་དབྱེར་མེད་དུ་ཤེས་པའི་ངང་བཟླས་པ་ལ་བརྩོན་པའི་རྒྱུན་དྲན་ཤེས་དང་མ་བྲལ་བ་བྱས་ན་རྡོ་རྗེ་གསུམ་གྱི་རྣམ་འབྱོར་ཀྱང་ཚང་ཞིང་། གསལ་སྣང་བརྟན་བཞིན་ཀུན་རྟོག་ཇེ་ཕྲར་འགྲོ། དེའི་ཚེ་ལྷར་སྣང་ཀུན་རྟོག་གི་བཅོས་ནས་སྒོམ་པའི་ཆ་དེ་ཕྲ་བས་གསལ་དཀའ་ཡང་ལྷར་སྣང་དེ་ཡལ་དུ་མི་བཅུག་པ་ཡབ་ཡུམ་སྦྱོར་པའི་བདེ་བ་དང་། དོ་ལའི་བཟླས་པས་བོག་དབྱུང་ནས་བདེ་ཆེན་རྣམ་པར་མི་རྟོག་པའི་ཡེ་ཤེས་དངོས་སུ་འདྲེན་པར་འགྱུར་གྱི་བར་བོག་དབྱུང་བ་དང་། དེ་ལྟར་ཡང་ཡང་གོམས་པའི་གནད་ཀྱིས་འོད་གསལ་རྐྱང་པ་ཙམ་མ་ཡིན་པ་དཀྱིལ་འཁོར་གྱི་ལྷ་སྟོང་གཟུངས་ཀྱི་སྣང་ཆ་དང་བཅས་པ་ཤར། དེ་ལྟར་ཤར་བ་དང་རིག་སྟོང་དབྱེར་མེད་ཀྱི་ཉམས་ལེན་རྐྱང་དེད་བྱས་ནས་སྒོམ་པས་ཡུལ་སྣང་ལྷར་ཐིམ་ལྷར་སྣང་ཆོས་ཉིད་དུ་ཐིམ་ནས་ཀུན་རྟོག་གི་འཁྲུལ་པ་དབྱིངས་སུ་དག་པའི་གང་སྣང་ལྷའི་དཀྱིལ་འཁོར་རང་རིག་སྤྲོས་བྲལ་ཉག་གཅིག་གི་རྣམ་རོལ་དུ་འགྱུར་བས། འདི་ལ་ས་བཅུ་ལམ་ལྔ་རིག་འཛིན་བཞིའི་རྣམ་བཞག་དང་། བོག་འབྱིན་རྩལ་བཅས་དང་རྩོལ་མེད་ཀྱི་རྫོགས་རིམ་སྦྱོར་ཚུལ་རིག་འཛིན་འདུས་པའི་གབ་བྱང་ལས་གསུངས་པ་ལྟར་ཤེས་པར་བྱ་དགོས་པའི་གནད་དེ་ལས། ལྷ་དང་སྣང་བ་ཆོས་ཉིད་གསུམ༔ གཅིག་ཏུ་འདྲེས་པར་མ་གྱུར་བར༔ ཏིང་འཛིན་གནད་ཀྱི་འཛིན་ཕུར་གདབ༔ ཅེས་དང་། གཞུང་ལས། ལྷ་དང་ཞིང་ཁམས་ཆོས་ཉིད་གསུམ༔ གཅིག་ཏུ་འདྲེས་པའི་གཟེར་ཐེབ་ཚེ༔ རང་སྣང་དོན་གྱི་འོག་མིན་དུ༔ འཚང་རྒྱ་འདི་ལ་ཐེ་ཚོམ་མེད་༔ ཅེས་སོ། བསྙེན་སྔགས་ནི་བླ་མ་དྲག་པོ་དང་ཆེ་མཆོག་དབྱེར་མེད་ཀྱི་དོན་ཏེ། ཨོཾ་ཡེ་ཤེས་ལྔ་ལྡན། གུ་རུ་བླ་མ། ཤྲཱི་དཔལ། བཛྲ་ཡཀྴ་རྡོ་རྗེ་གནོད་སྦྱིན། ཀྲོ་ཏ་ཁྲོ་བོ། ཙིཏྟ་ཐུགས། ཧཱུྃ་ཞེས་སྩོལ་བའི་དོན་ཏེ། བླ་མ་དཔལ་རྡོ་རྗེ་གནོད་སྦྱིན་ཁྲོ་བོའི་ཐུགས་ཡེ་ཤེས་ཀྱི་དངོས་གྲུབ་སྩོལ་ཅེས་པ་ནི། བྱིན་རླབས་ཀུན་ཀྱི་རྩ་བ་བླ་མ་ནི༔ དངོས་གྲུབ་སྩོལ་ཕྱིར་དཔལ་ཆེན་རོལ་པའི་ལྷ༔ ཞེས་པ་ལྟར་སྒྲུབ་བྱའི་གཙོ་བོ་ཆོས་ཉིད་དོན་གྱི་ལྷ་ཡེ་ཤེས་རྒྱུད་ལ་འཆར་བ་ནི་བླ་མའི་བྱིན་རླབས་ཁོ་ན་རག་ལས་པས་དེ་ཉིད་དཔལ་ཆེན་པོའ་ིརྣམ་པར་བཞེངས་པས་ཐུགས་རྒྱུད་བསྐུལ་བའི་ཕྱིར་བསྙེན་པ་འདི་ཡང་གསོལ་འདེབས་ཀྱི་ཚུལ་དུ་བཟླས་ན་དངོས་གྲུབ་མྱུར་བའི་གནད་ཡོད་པ་དང་། ལྷ་ཚོགས་འཕྲོ་འདུ་བསམ་ཡས་ཀྱང་༔ གཙོ་བོ་གཅིག་པུའི་ཆོ་འཕྲུལ་ཏེ༔ དཔལ་ཆེན་སྲོག་ལ་དབང་ཐོབ་ན༔ ཚོམས་བུའི་འཁོར་ལོ་མ་སྒྲུབ་ཤར༔ ཞེས་གསུངས་པ་ལྟར་བདུན་བརྒྱ་ཉེར་ལྔ་ལ་སོགས་པའི་གཙོ་འཁོར་དང་། གཙོ་བོ་ལ་ཡང་བསྐྱེད་རྫོགས་རྒྱས་འབྲིང་བསྡུས་པ་སོགས་མང་དུ་གསུངས་ཀྱང་དེ་ཐམས་ཅད་གཙོ་བོ་སྤྱི་དཔལ་ཆེན་པོ་གཅིག་གི་ཡེ་ཤེས་ཀྱི་རོལ་བ་ལས་མ་འདས་པས་ན་ཐོག་མ་ཁོ་ནར་གཙོ་མཆོག་དཔལ་ཆེན་པོའི་གསལ་སྣང་བརྟན་པོར་སྒྲུབ་པའི་སེམས་འཛིན་དང་། དེ་ཡང་གུ་རུ་རིན་པོ་ཆེ་དང་གཉིས་མེད་དུ་ཤེས་པའི་དད་མོས་གདུང་ཤུགས། གསལ་སྣང་དང་ཐུགས་ཡིད་བསྲེས་པའི་རྣམ་འགྱུར་ལ་ཁམས་དང་མཐུན་པར་བསླབ་དགོས་ཏེ། མདོར་ན་ཞི་བ་རིགས་ལྔ། ཁྲོ་བོ་གཙོ་མཆོག་དགུ་ཡི་དཀྱིལ་འཁོར་རྟེན་བརྟེན་པ་དང་། ལྷ་སྔགས་སྤྱི་བྱེ་བྲག་བསྙེན་སྒྲུབ་ལས་གསུམ་གང་ལྟར་བཤད་ཀྱང་དོན་ཡེ་ཤེས་ཐུགས་ཀྱི་ས་བོན་ཧཱུྃ་ལ་འདུས་པས། བཀའ་བརྒྱད་བདེ་འདུས་ལས་ཀྱང་ཧཱུྃ་གི་དྲིལ་སྒྲུབ་སྙིང་བོ་རྫོགས་རིམ། རིམ་ལྔ་དང་སྦྱར་བ། ཡོ་ག་གསུམ་དུ་སྒྲུབ་པ་སོགས་ཟབ་འདྲིལ་མང་པོ་གསུངས་པ་ལྟར་ངག་བཟླས་ཀྱི་སྐྱོ་བ་དང་། ཐུན་མཚམས་ཐམས་ཅད་ལ་ཟབ་མོ་ཐུགས་ཀྱི་སྒྲུབ་པ་ཡིན་པས་ཧཱུྃ་བཟླས་གལ་ཆེ་བར་གསུངས་པས་བཟླས་པའི་སྙིང་པོ་ཧཱུཾ་ལ་བཟུང་ཡང་ཤིན་ཏུ་ཟབ་པོ། །གཉིས་པ་ནི་ཚོམ་བུ་དགུ་སྤྱི་དྲིལ་གྱི་བཟླས་པ་སྟེ། སྔགས་ཀྱང་ཁྲོ་བོ་སྤྱི་བསྡུས་ཀྱི་སྔགས་བཛྲ་ཙཎྜ་འབྲུ་བཅུ་དགུ་པ་སྟེ། ཨོཾ་རབ་སྔགས། བཛྲ་རྡོ་རྗེ། ཙཎྜ་གཏུམ་པོ། སརྦ་ཐམས་ཅད། དུཤྚན་གདུག་པ་ཅན། ཏ་ཀ་མཐར་བྱེད། ཧ་ན་སྣུན། ད་ཧ་སྲེག པ་ཙ་ཆོས། ཧཱུྃ་ཕཊ༔ ཞེས་ཐུགས་སྲོག་གིས་བསྐུལ་བ་དང་། ཐབས་ཤེས་ཀྱི་དབྱིབས་སུ་གཏོར་ཞིང་སྡུད་པའི་དོན་ཏེ། ཊཱིཀ་བསྡུས་དོན་གྱི་ཆིངས་ལས། ཁྲོ་བོ་སྤྱི་བསྡུས་སྔགས་ཀྱི་གནད༔ དྲག་སྔགས་བཅུ་དགུ་པ་ལ་ཐུག༔ ཅེས་གསུངས་སོ། །སྤྱི་བསྡུས་ཀྱི་གྲངས་ཐེམ་པ་དང་སྒྲུབ་པ་ཕྱག་རྒྱ་སྤྲོས་བཅོས་ཀྱི་ཚུལ་དུ་ཕྱག་རྒྱ་རྒྱས་པའི་སྐབས་ལྟར། ཡང་དག་སོགས་རིགས་བཞིའི་ཁྲག་འཐུང་གི་བསྙེན་པ་རུ་ལུ་སོགས་ཀྱང་ཅུང་ཟད་རེ་བཟླས་ན་ལེགས་པར་སེམས་སོ། །དེ་ལྟར་ན་ཕྱག་རྒྱ་རྒྱས་པའི་མངོན་རྟོགས་ཐུན་རེ་རེ་བཞིན་ངེས་པར་སྦྱར་དགོས་སོ། །གསུམ་པ་ལས་སྦྱོར་ནི། སངས་རྒྱས་རྣམས་ཐོག་མར་ཐུགས་བསྐྱེད་པའི་དུས་ནས་གཞན་ཕན་རླབས་པོ་ཆེའི་དམ་བཅའི་དབང་གིས་བྱང་ཆུབ་སེམས་དཔའི་སྐུ་གསུང་ཐུགས་ཀྱི་སྤྱོད་པས་སངས་རྒྱས་ཀྱི་ཕྲིན་ལས་ཐམས་ཅད་གཞན་དོན་འབའ་ཞིག་ལ་འཇུག་པ་ཐེག་པ་ཆེན་པོའ་ིཁྱད་ཆོས་ཏེ། ཁྱད་པར་དུ་གསང་སྔགས་ནི་ལྟ་དགོངས་ཏིང་འཛིན་གྱི་གནད་ཟབ་མོ་ད་ལྟ་ལམ་ལ་མོས་པས་སློབ་པའི་དུས་ནས་སངས་རྒྱས་ཀྱི་ཕྲིན་ལས་དུ་བྱེད་ཕྱིར་རྒྱུད་སྡེ་རིན་པོ་ཆེ་རྣམས་ལས་ལྷ་སྔགས་ཏིང་འཛིན་རྫས་ཀྱི་ལས་སྦྱོར་མང་དུ་གསུང་ཏེ་རྣམ་འབྱོར་པས་དོན་གཉིས་སྒྲུབ་པའི་ཐབས་རྨད་དུ་བྱུང་བ་ནི། སྤྱིར་བྱང་ཆུབ་སྒྲུབ་པའི་གང་ཟག་གིས་དོན་དུ་གཉེར་བྱའི་གཙོ་བོ་ཐམས་ཅད་མཁྱེན་པའི་གོ་འཕང་ཁོ་ན་ཡིན་པས་མཆོག་གི་དངོས་གྲུབ་ཀྱི་ལམ་ལ་སྙིང་པོར་དྲིལ་བ་ལས། ཐུན་མོང་གི་ལས་བཞིའི་རིམ་པ་དང་། ཁྱད་པར་མངོན་སྤྱོད་ཀྱི་ལམ་རིམ་སོགས་གཙོ་བོར་བྱེད་མི་རུང་བ་དམ་པ་རྣམས་ཀྱིས་གསུངས་པ་བཞིན་དོན་ལ་གནས་ཤིང་ཁྱད་པར་བརྒྱུད་པ་འདིའི་ཕྱག་བཞེས་ལ་བསྐྱེད་རྫོགས་གདམས་ངག་གི་ཟབ་གནད་ཐམས་ཅད་བདག་འཛིན་དང་ཉོན་མོངས་པའི་གཉེན་པོར་གནད་དུ་བསྒྲིལ་བ་ལས། ཆགས་སྡང་ཐ་མལ་གྱི་ཀུན་སློང་གིས་དྲག་པོའ་ིསྲུང་བ་ཟློག་བསད་མནན་གཙོར་འདོན་མི་གནང་བའི་རྗེས་སུ་ངེས་པར་སློབ་བྱ་གལ་ཆེ་བ་ཉིད་ནའང་། ཤིན་ཏུ་མི་སྲུང་པ་སྙིགས་དུས་འདིར་ཆོས་བྱེད་ཕལ་ཆེར་བར་ཆད་ཀྱི་གཞན་དབང་དུ་འགྱུར་ཞིང་། བདུད་དང་དམ་སྲི་རྒྱལ་བསེན་ནག་ཕྱོགས་ཁ་དར་བའི་སྐབས་གུ་རུ་རིན་པོ་ཆེའི་བོད་ཀྱི་གདུལ་བྱ་ལ་བརྩེ་བས་ཆེད་དུ་དགོངས་པའི་ལྷ་སྔགས་ཀྱི་གཉེན་པོ་གཅིག་ཆོག་འདི་ལྟ་བུ་ལ་རྫས་དང་འཁྲུལ་འཁོར་ཕྱག་ལེན་རྒྱས་པའི་ཕྱོགས་མ་ཡིན་པའི་ཟབ་མོའ་ིཏིང་འཛིན་གྱི་གནད་གཟེར་སྙིང་པོ་འདི་དག་བྱམས་དང་སྙིང་རྗེའི་རྩིས་ཟིན་ཅིང་། ལྷ་དང་བླ་མ་སྔགས་ལ་ཡིད་ཆེས་ཀྱི་དད་པ་དང་། དགོངས་པའི་སྲོག་གིས་ཟིན་པས་བསྙེན་སྒྲུབ་ཚད་དུ་འཁྱོལ་བ་དག་ལ་མེད་དུ་མི་རུང་བའི་ལས་སྦྱོར་ཡིན་པས་རང་གཞན་བསྟན་འགྲོའ་ིདོན་དུ་ངེས་པར་ཉམས་སུ་བླངས་འོས་ལ། དེར་མ་ཟད་འདིི་ནི་བཀའ་བརྒྱད་རྣམ་གསུམ་གྱི་བཅུད་དྲིལ་ལྟ་བུ་ཡིན་པས་དེ་དག་ཏུ་གསལ་བའི་ལས་སྦྱོར་འདི་ལ་སྦྱར་ཆོག་པ་ཀུན་མཁྱེན་བླ་མ་ཉིད་ཀྱི་ཞལ་ལས་ཐོས་ཞེས་རྡོ་གྲུབ་ཆེན་འཇིགས་མེད་ཕྲིན་ལས་འོད་ཟེར་གྱིས་གསུངས་པ་ལྟར་ལ། སྤྱིར་སྔགས་ཀྱི་ལས་ཐམས་ཅད་དང་ཁྱད་པར་མངོན་སྤྱོད་ལ་རྫོང་འཕྲང་སྲོག་གསུམ་གྱི་ཉམས་ལེན་ཤེས་དགོས་པས་ན། རྫོང་ནི་ལྟ་བ་སྟེ་ལྟ་བ་གདེང་ལྡན་གྱི་རྫོང་ཟིན་ན་གང་ལ་ཡང་མི་འཇིགས་པར་རང་ཉིད་གཏན་སྲིད་ཟིན་པའི་ཕྱིར། འཁོར་འདས་ཀྱི་ཆོས་ཐམས་ཅད་རང་སེམས་སུ་འདུ། རང་གི་སེམས་སྐྱེ་འགགས་མེད་པ་རང་བྱུང་གི་ཡེ་ཤེས་བླ་མའི་མན་ངག་གིས་ངོ་འཕྲོད་པ་ནི་ལྟ་བའི་རྫོང་ཟིན་པ་ཡིན་ལ། ལྟ་ཐོག་ཏུ་མྱོང་བས་མ་སློབ་ན་གོ་ཡུལ་ཙམ་གྱིས་ཕན་མི་ཐོག་པས་སྒོམ་པའི་འཕྲང་བགྲོད་ཕྱིར་ལྟ་དོན་བཞིན་སྒོམ་པ་གལ་ཆེ་སྟེ། མ་སྒོམ་པར་སངས་རྒྱས་པ་ནི་རྡོ་རྗེ་སེམས་དཔས་ཀྱང་མ་གསུངས། ལྟ་སྒོམ་དེ་གཉིས་ཚད་དུ་འཁྱོལ་འདས་ཀྱི་ཆོས་ཀུན་ལ་དབང་བསྒྱུར་བ་ཐོབ་པས་སྤྱོད་པའི་སྒོ་ནས་སྲོག་འཕྲོག་པ་སྟེ། དེ་ནི་རྣམ་འབྱོར་དབང་ཕྱུག་ཆེན་པོའ་ིདགོངས་པ་ཚད་དུ་འཁྱོལ་ན་གསང་བའི་དགྲ་གསུམ་སོད། འཇིགས་པའི་བདུད་བཞི་ཆོམས། འགྲོ་དྲུག་གི་གཡང་ས་ཆོད་པའི་གནད་རྒྱས་པ་བཀའ་བརྒྱད་རྫོང་འཕྲང་ལས་གསུངས་པ་ལྟར་ཤེས་དགོས་སོ། དམིགས་གནད་དངོས་ནི་རྩ་བའི་བསྙེན་ཡིག་ཀུན་མཁྱེན་དངོས་ཀྱི་རྡོ་རྗེའི་གསུངས་པ་ལྟར་ཏེ་སྤྱིར་བསྙེན་སྒྲུབ་གྱི་དམིགས་རིམ་ཐམས་ཅད་བསྙེན་ཡིག་ཏུ་ཞིབ་རྒྱས་སུ་གསུངས་པས་འདིར་ཡི་གེའི་ངལ་བས་མ་བྱས་ལ། དམིགས་གསལ་བསྙེན་སྒྲུབ་ཡན་ལག་བཞི་ནི་ལས་བྱང་གཅིག་གི་སྦྱོར་དངོས་རྗེས་དང་། བསྙེན་བཟླས། རྫོགས་རིམ། རིག་འཛིན་བཞིའི་ལམ་ལ་སྦྱོར་བ་སོགས་ཐ་སྙད་དུ་མར་འཇུག་ཏུ་རུང་བ་ལས་སྐབས་འདིར་གོ་དོན་ཙམ་བཤད་ན་དཔལ་ཆེན་ཞལ་ལུང་ལས། བསླབ་ཕྱིར་བདག་སྲས་གཞན་སྲས་ནི༔ ཐུགས་རྗེའི་དབང་དང་ཤེས་རབ་དབང་༔ ཡེ་ཤེས་ཕྱག་རྒྱའི་འཁོར་ལོ་ལས༔ དང་པོ་བསྙེན་པ་བྱ་བ་ནི༔ སྣང་སྲིད་འཁོར་འདས་ཆོས་རྣམས་དང་༔ ཕུང་པོ་ཁམས་དང་སྐྱེ་མཆེད་ཀུན༔ རྣམ་དག་ལྷ་ཡི་དཀྱིལ་འཁོར་དུ༔ ཤེས་པར་བྱ་བ་དག་བསླབ་པས༔ བདག་གིས་སྲས་སུ་དེ་བཞིན་གཤེགས་༔ མངོན་དུ་བྱས་པར་གྱུར་པ་ཡིན༔ གཉིས་པ་ཡེ་ཤེས་ལྷ་ཉིད་དང་༔ ཉེ་ཕྱེར་ཉེ་བའི་བསྙེན་པ་ནི་༔ དེ་ཡི་བྱིན་རླབས་རྒྱུད་སྨིན་ཅིང་༔ བླ་ན་མེད་པའི་ཡེ་ཤེས་ལ༔ མངོན་པར་བྱང་ཆུབ་ཉིད་དུ་སློབ༔ གསེར་ལ་བསྲེགས་བཅད་བརྡར་བ་བཞིན༔ རང་བཞིན་ནན་གྱིས་གོམས་པ་སྟེ༔ བདག་ཉིད་དེ་བཞིན་གཤེགས་པ་ཡི༔ སྲས་སུ་བྱས་པ་ཉིད་དུའོ༔ གསུམ་པ་བསྒྲུབ་པར་བྱ་བ་ནི༔ བསྐྱེད་རྫོགས་གོམས་པའི་ཡེ་ཤེས་ཀྱི༔ ཚད་མེད་ཐུགས་རྗེ་ཆེན་པོའི་མཐུས༔ འགྲོ་བ་ཀུན་གྱི་དོན་མཐུན་པར༔ དམ་ཚིག་ཆེན་པོའ་ིའཇུག་པ་སྟེ༔ འདི་ནི་བདག་གི་སྲས་ཉིད་དུ༔ དེ་བཞིན་གཤེགས་པ་བྱས་པའོ༔ བཞི་པ་སྒྲུབ་པ་ཆེན་པོ་ནི༔ ཚོགས་གཉིས་ཆེན་པོ་ལ་བསྟེན་ནས༔ བདག་གཞན་གཉིས་ཀའི་ཚོགས་སྒྲུབ་ཀྱི༔ དཀྱིལ་འཁོར་བྱ་བ་ལ་ཞུགས་ཏེ༔ སྤང་རྟོགས་ཡོན་ཏན་མངོན་བྱས་པས༔ དོན་གཉིས་ལྷུན་གྱིས་གྲུབ་པ་སྟེ༔ འདི་ནི་དེ་བཞིན་གཤེགས་པ་ཡི༔ སྲས་སུ་བདག་ཉིད་བྱས་པའོ༔ དེ་ལྟར་བསྙེན་སྒྲུབ་ཡན་ལག་བཞིས༔ རོལ་པ་རྣམ་བཀོད་ཆོ་འཕྲུལ་ལས༔ ཏིང་འཛིན་གདེང་དུ་འགྱུར་པའི་མཐུས༔ ས་བཅུ་ལམ་ལྔའི་ཡོན་ཏན་ཀུན༔ ལུས་རྒྱའི་སྦུབས་ནས་རྫོགས་པའོ༔ ཞེས་གསུངས་པའི་དོན་གཞི་སྣང་སྲིད་འཁོར་འདས་ཀྱི་ཆོས་ཕུང་ཁམས་སྐྱེ་མཆེད་དུ་སྣང་བ་ཀུན་དོན་ལ་སྐུ་དང་ཡེ་ཤེས་གདན་གསུམ་ལྷའི་དཀྱིལ་འཁོར་དག་མཉམ་བདེན་པ་དབྱེར་མེད་དུ་ཤེས་པའི་ལྟ་སྒོམ་ནི་རྒྱུ་བདག་གི་ཕུང་ཁམས་སྐྱེ་མཆེད་ཀྱི་སྲས་སུ་འབྲས་བུ་གདན་གསུམ་ལྷའི་འཁོར་ལོ་གཞན་སྒྲུབ་པས་ཡིན་ལུགས་མངོན་གྱུར་གྱི་ལྷག་པའི་བདེན་པ་དབྱེར་མེད་ཀྱི་དོན་རྟོགས་པ་ནི་མཆོག་གི་དངོས་གྲུབ་ཀྱི་རྒྱུ་རྡོ་རྗེ་ཐེག་པ་འདི་ལྟ་ན་མ་ནོར་བ་ཡིན་པ་ཐོག་མར་གཏན་ལ་དབབ་བྱ་བསྙེན་པའི་ཡན་ལག་དང་། འདི་ནི་སྣོད་བཅུད་རྒྱུད་གསུམ་གྱི་གནས་སྣང་གཉིས་ཀ་སྐུ་དང་ཡེ་ཤེས་ཀྱི་ངོ་བོར་གདོད་ནས་བཞུགས་པ་དག་པ་སངས་རྒྱས་ཀྱི་ཐུགས་རྗེས་ཀུན་ལ་ཁྱབ་པའི་ཡེ་ཤེས་ཀྱི་ནུས་པས་ཡིན་པས་ན་ཐུགས་རྗེའི་དབང་ཞེས་གསུངས་པའོ། །ལྟ་སྒོམ་གྱི་གནད་དེ་ལ་ནན་ཏན་གྱིས་གོམས་པའི་ཕྱིར་སྟོང་པ་ཆེན་པོ། སྙིང་རྗེ་སྒྱུ་མ། ཕྱག་རྒྱ་གཅིག་པ། ཕྱག་རྒྱ་སྤྲོས་བཅས་ཀྱི་ལམ་ལ་བརྩོན་པས་གསེར་བཞུ་བརྟུལ་བྱས་པ་བཞིན། འབྲས་བུ་དག་པ་ཡེ་ཤེས་ཀྱི་ལྷའི་བྱིན་རླབས་ཀྱི་ནུབ་པས་རྒྱུ་སྣོད་བཅུད་རྒྱུད་གསུམ་གནས་སྣང་གཉིས་ཀར་སངས་རྒྱས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོར་དག་པ་ཆེན་པོར་ཤར་བ་ནི། གཞན་དེ་བཞིན་གཤེགས་པའི་སྲས་སུ་བདག་གི་ཕུང་ཁམས་སྐྱེ་མཆེད་དག་པ་ཆེན་པོའི་ལྷའི་རོལ་པོའ་ིལྷའི་རོལ་པར་བྱིན་གྱིས་རླབས་པ་སྟེ་མངོན་གྱུར་དུ་སད་པ་ནི་དག་པའི་གནས་སྣང་གི་ཡིན་ལུགས་མངོན་གྱུར་གྱི་ནུས་པ་ཐོན་པ་ཉེ་བསྙེན། གཞན་སྲས་ནི་བདག་དོན་གྱི་སྤངས་རྟོགས་ཕུན་སུམ་ཚོགས་པ་དང་། བདེན་གཉིས་ལྷག་པའི་བདེན་པ་དབྱེར་མེད་དུ་ཤེས་པ་སངས་རྒྱས་ཀྱི་ཟབ་མོའ་ིདགོངས་དོན་མཐར་ཐུག་དབང་པོ་རྣོན་པོའ་ིཤེས་རབ་ཀྱི་ནུས་པའི་དབང་གིས་རྟོགས་བྱར་གསུངས་པ་དང་། དེ་ལྟར་བསྐྱེད་རྫོགས་ཀྱི་ལམ་ལ་གོམས་པས་ནུས་པའི་གདེང་ཐོབ་སྟེ་ཚད་མེད་སྙིང་རྗེ་ཆེན་པོའི་འགྲོ་བའི་དོན་བྱས་ནས་སྣོད་བཅུད་དག་པ་ཧེ་རུ་ཀའི་ཞིང་དུ་བསྒྱུར་ནུས་པ་ནི། བདག་ཉིད་དཀྱིལ་འཁོར་གྱི་ལྷའི་སྐུ་དང་ཡེ་ཤེས་སྒྱུ་འཕྲུལ་དྲྭ་བའི་རྡོ་རྗེའི་སྲས་དེ་བཞིན་གཤེགས་པའི་གདུང་དུ་སེམས་ཅན་ཐམས་ཅད་བསྐྲུན་པ་སྒྲུབ་པའི་ཡན་ལག་དང་། བསྐྱེད་རྫོགས་རིམ་པ་གཉིས་ཀྱིས་ཚོགས་གཉིས་བདེ་མྱུར་དུ་རྫོགས་སྨིན་སྦྱངས་མཐར་སོན་པས་མཐོང་ལམ་ཆོས་ཉིད་ཀྱི་བདེན་པ་མངོན་དུ་གྱུར་ཅིང་། དངོས་གྲུབ་གཉིས་ལ་དབང་ཐོབ་ནས་སྒོམ་ལམ་ཕྱག་ཆེན་དང་། མཐར་ལམ་ལྷུན་གྲུབ་རིག་འཛིན་སྐུ་ལྔ་ལྷུན་རྫོགས་བདེ་གཤེགས་སྨིན་པ་རྒྱ་མཚོའི་གོ་འཕང་མངོན་དུ་མཛད་ཕྱིར་ཚོམས་བུ་ཚོགས་སུ་སྒྲུབ་སྟེ། འོག་མིན་གྱི་ཞིང་དུ་སངས་རྒྱས་པ་ནི་འབྲས་བུ་དག་པ་མཐར་ཕྱིན་སངས་རྒྱས་གཞན་གྱི་ཕུང་ཁམས་སྐྱེ་མཆེད་རང་སྣང་ཡེ་ཤེས་ཀྱི་འཁོར་ལོའ་ིསྲས་སུ། རྒྱུ་བདག་ཉིད་ཀྱང་གཉིས་སུ་མེད་པར་མངོན་པར་བྱང་ཆུབ་པས་སྒྲུབ་པ་ཆེན་པོའ་ིགཞན་སྲས་ཀྱིི་རྣམ་བཞག་གཉིས་གཞན་དོན་གྱིི་སྤང་རྟོགས་ཏེ། དེ་ནི་གནས་སྣང་གཉིས་ཀ་དག་ཆེན་ཡེ་ཤེས་ཀྱི་འཁོར་ལོ་སངས་རྒྱས་རང་སྣང་གི་དགོངས་པ་སྒྲ་ཇི་བཞིན་དུ་རྟོག་ཅིང་སྣང་བས་ཡེ་ཤེས་ཕྱག་རྒྱའི་འཁོར་ལོ་སྟེ། དེ་དག་གིས་ས་བཅུ་ལམ་ལྔ་ཡོངས་རྫོགས་བསྡུས་ཚུལ་ལུགས་འདིའི་ཐུན་མོང་མ་ཡིན་པའི་དགོངས་པ་དང་། ཡང་གསུང་སྔགས་ཀྱི་བཟླས་པ་ལ་བསྙེན་སྒྲུབ་ཡན་ལག་བཞི་སྦྱོར་ཚུལ་ནི། གང་བསྙེན་བྱའི་ཡེ་ཤེས་ལྷ་རང་རྒྱུད་ལ་ཉེ་བར་བྱེད་པ་བསྙེན་པ་ཞེས་གསུངས་པས་དབང་དམ་ཚིག་ལ་གནས་པས་བསྙེན་སྒྲུབ་ཀྱི་སྟ་གོན་བྱ་བ་བསྙེན་པ། དེ་ལས་ཐུགས་ཡིད་འདྲེས་པར་བྱེད་པ་བདེ་གཤེགས་ཞི་བའི་བསྙེན་པ་ཉིད་བདེ་འདུས་སུ་ཉེ་བསྙེན་དུ་གསུངས་པས་སྐབས་འདིར་ཡེ་ཤེས་རང་དབང་དུ་བྱེད་པ་ཁྲོ་བོར་སྒྲུབ་པ་གསུངས་པས་སྤྱི་དཔལ་གཙོ་བོའི་བསྙེན་བཟླས་སྐབས་ཐུགས་སྲོག་སྔགས་ཕྲེང་ལ་སེམས་འཛིན་ཉེ་བསྙེན། དོ་ལའི་ཁྱོགས་བཟླས་སྒྲུབ་པ། གཞན་དོན་གཙོ་བོ་གྱུར་བའི་ཕྲིན་ལས་བཞིན་སྒྲུབ་པ་སྒྲུབ་ཆེན་དུ་གསུངས་པས་འཁོར་སྤྱི་དྲིལ་དང་རིགས་བཞིའི་བཟླས་པ་ལས་སྦྱོར་གྱི་བཟླས་པ་སྒྲུབ་ཆེན་ཡིན་པ་འདྲ་ཞིང་། དེ་ལྟར་གོམས་པའི་ཕན་ཡོན་ཀྱང་དཔལ་ཆེན་ཞལ་ལུང་ལས། དེ་ལྟར་བསྙེན་སྒྲུབ་ཡན་ལག་བཞིའི༔ རོལ་པ་རྣམ་བཀོད་ཆོ་འཕྲུལ་ལས༔ ཏིང་འཛིན་གདེང་དུ་གྱུར་པའི་མཐུས༔ ས་བཅུ་ལམ་ལྔའི་ཡོན་ཏན་ཀུན༔ ལུས་རྒྱའི་སྦུབས་ནས་རྫོགས་པའོ༔ ཞེས་གསུངས་ལྟར་རོ། །བཟླས་དམིགས་ལའང་བཞི་གསུངས་པ་ལས། ཡེ་ཤེས་རྒྱལ་པོ་སོགས་ཀྱི་སྐབས་བཀོད་པའི་བཟླས་པ་ཟླ་བ་སྐར་ཕྲེང་ལྟ་བུ། རང་རང་སྔགས་ཀྱི་སོགས་དོ་ལའི་ཁྱོགས་ཀྱི་བཟླས་པའམ་འགལ་མེ་ཀླད་བསྐོར་རམ་འཁོར་ལོའ་ིབཟླས་པ་ཞེས་བྱ། སྤྲོ་བསྡུས་དོན་གཉིས་བྱས་པ་དང་། ཕྲིན་ལས་བཞི་སྒྲུབ་པ་ནི་རྒྱལ་པོའ་ིཕོ་ཉ་འགྱེད་པའམ་སྤྲོ་བསྡུའི་བཟླས་པ། ལྷ་ཚོགས་ཀུན་ཀྱང་སོགས་ནི་བུང་བ་ཚང་ཞིག་གམ་བདག་གཞན་གཉིས་མེད་ཀྱི་བཟླས་པ་སྟེ། འདི་བཞི་ཡང་བསྙེན་སྒྲུབ་ཡན་ལག་བཞི་སོ་སོར་སྦྱར་བའམ་ཡོད་ལ། བསྙེན་པའི་ཚད་ཀྱང་གྲངས་བསྙེན་གྱི་དབང་དུ་བྱས་ན། གཙོ་ལ་འབྲུ་འབུམ་ལས་རུང་སྟེ༔ གཞན་དུ་དེ་ཡི་བཞི་འགྱུར་ལ༔ སྤྱི་དྲིལ་བཅུ་ཆ་དག་ཏུའོ༔ ཞེས་གསུངས་པ་ལྟར་སྤྱི་དཔལ་ཆེན་པོ་ལ་འབྲུ་འབུམ་གསུངས་པས་འབུམ་ཕྲུག་བཅུ་གསུམ་དང་། སྤྱི་དྲིལ་བཛྲ་ཙཎྜ་འབུམ་ཕྲག་བཞི་ཁ་སྐོང་བཅས་དང་། གཙོ་བསྙེན་བཞི་འགྱུར་བཟླ་བར་གསུངས་པ་ནི་སྨིན་སློབ་ཀྱི་དབང་དུ་མཛད་པ་ཡིན་ཞེས་མཁྱེན་བརྩེ་རིན་པོ་ཆེའི་དཔལ་འདུས་ཕྲིན་ལས་སྙིང་པོ་ལས་གསུངས་པས་གཙོ་བོ་དང་སྤྱི་དྲིལ་གཉིས་ཀ་བཞི་འགྱུར་དུ་བཟླས་དགོས་པ་ཤུགས་ཀྱིས་བསྟན་པ་བཞིན་བཟླས་ན་རྩོད་དུས་ལ་དགོངས་པའི་གྲངས་བསྙེན་གྲངས་རྒྱས་པར་འགྱུར་བར་སེམས་སོ། །སྤྱིར་བཏང་གཞུང་གི་བསྙེན་ཚད་དངོས་བསྟན་པ་ནི་རྫོགས་ལྡན་གྱི་དུས་ལ་དགོངས་པས། སུམ་ལྡན་ལ་རྫོགས་ལྡན་གྱི་བསྙེན་གྲགས་དེའི་ཉིས་འགྱུར། གཉིས་ལྡན་དུས་གསུམ་འགྱུར་རྩོད་ལྡན་ལ་བཞི་འགྱུར་བཟླ་བར་གསུངས་པས་གཙོ་ཆེར་སྒྲུབ་པ་པོ་རང་གི་ནང་གི་ཤེར་ཏིང་གི་ནུས་ཚད་བསྟུན་པ་གཅེས་ཤིང་། དུས་བསྙེན་གྱི་དབང་དུ་བྱས་ན་རྩ་བའི་བསྙེན་ཡིག་ཏུ་ཟླ་བ་གཅིག་གིས་མཚན་ཏེ་གསུངས་པ་བཞིན་བསྙེན་སྒྲུབ་གཉིས་ཡུན་རིང་ཐུང་ཆ་མཉམ་སྒྲུབ་ཆེན་དེའི་སུམ་ཆ། ལས་སྦྱོར་ཞག་བདུན་ལྟ་བུ་ཡིན། སྤྱིར་དུས་གྲངས་ཀྱི་བསྙེན་ཚད་གཅིག་རྒྱས་པར་སོང་ཕྱིན་སླར་ལོ་རེ་བཞིན་དགོས་པའི་དུས་སྐབས་དང་འབྲེལ་བ་བསྙེན་པ་ཁ་གསོ་རྒྱས་བསྡུས་ཅི་འགྲུབ་བྱས་ན་ཤིན་ཏུ་ལེགས་པ་ཕྱག་བཞེས་ལས་འབྱུང་ཞིང་། འདི་ནི་ཡི་དམ་གཅིག་སྒྲུབ་པས་བླ་མེད་རྒྱུད་སྡེ་རྒྱ་མཚོའི་ལྷ་སྔགས་ཐམས་ཅད་འདུས་པས་དེ་དག་གི་བསྙེན་བཟླས་དཀྱིལ་འཁོར་གཅིག་གིས་གྲུབ་པ་དང་། ཡེ་ཤེས་དང་འཇིག་རྟེན་གྱི་དཀྱིལ་འཁོར་ཐམས་ཅད་གཅིག་དྲིལ་དུ་སྒྲུབ་པས་ནུས་སྟོབས་ཆེ་བ་སོགས་དགོས་པ་དུ་མ་དང་ལྡན་པ་ལས་བྱང་གི་ཡིག་ཆུང་རྣམས་ལས་དངོས་ཤུགས་ཀྱིས་གསུངས་པ་ལྟར་སྐལ་བཟང་དག་གིས་ཤེས་ཤིང་ཉམས་ལེན་ལ་བརྩོན་པ་གཅེས་སོ། །སྤྱིར་བཟླས་པ་ལ། ངག་བཟླས་སྐད་གསང་མཐོན་པོར་བཟླ་བ་དང་། མཆུ་དང་ལྕེ་འགུལ་ཙམ་གྱིས་ཤུབ་བུར་བཟླ་བ་དང་། རླུང་བཟུང་སྟེ་སྔགས་ཀྱི་གཟུགས་དང་སྒྲ་ལ་སེམས་གཏན་པའི་འགོག་བཟླས་དང་། རླུང་འཛིན་པ་ཙམ་ཡང་མི་བྱ་བར་ཡིད་ཁོ་ནས་གཟུགས་སམ་སྒྲ་གདངས་དྲན་པ་ཡིད་བཟླས་དང་། ས་བོན་གྱི་ནཱ་ད་ལས་དབུགས་ཕྱིར་དབྱུང་བ་ལྷན་ཅིག་ཧཱུྃ་གིས་སྒྲས་སྐུའི་འོད་ཟེར་སྤྲོས་ཏེ་དོན་གཉིས་སྒྲུབ། ནང་དུ་འཇུག་པའི་ཚེ་ཨོཾ་གྱི་སྒྲེ་བསྡུས། གནས་པའི་ཚེ་ཨཱཿཡི་སྒྲས་ནཱ་ད་ལ་ཐིམ་པའམ། ཡང་ན་རང་སྔགས་སྦྱར་ཏེ་རྡོ་རྗེའི་བཟླས་པ་བྱ་བ་སོགས་རྣམ་བཞག་ཡོད་པའང་ཞར་ལ་འཕྲོས་དོན་བརྗོད་པའོ། །བཟླ་བྱའི་སྔགས་རྣམས་ཀྱང་སྒྲ་དོན་སྔར་སྨོས་པ་ལྟར་དང་། ཁྱད་པར་སྔགས་ཀྱི་དེ་ཉིད་ལྷ་ལྷའི་དེ་ཉིད་འོད་གསལ་ཞེས་གྲགས་པ་ལྟར་བརྗོད་མེད་བརྗོད་པ་ཀུན་གྱི་རྒྱུར་གྱུར་པའི་ཡི་གེ་ཨ་ལས་བྱུང་ཞིང་ཨའི་ངོ་བོར་གནས་པ་ཨ་ནི་ཆོས་ཉིད་སྐྱེ་བ་མེད་པ་རྗེས་སུ་མཚོན་པས་ཆོས་སྐུ། ཨ་ཡི་གེ་ཕྱེས་ནས་སྣ་ཚོགས་སུ་སྣང་བའི་ངག་གི་འདུ་བྱེད་ཐམས་ཅད་ཡི་གེ་ཨཱ་ལི་ཀཱ་ལི་ཚོགས་པ་ལས་ནུས་པ་མ་འགགས་པ་བྱུང་ཞིང་དོན་ལ་ཐབས་ཤེས་གཉིས་མེད་ལོངས་སྐུ། སྐྱེ་འགགས་གཉིས་མེད་ཀྱི་དབྱིངས་ནས་ཐབས་ཆེན་ཡི་གེའི་ཚོགས་པས་ཆོས་ཀུན་སྟོན་ཞིང་གསལ་བ་ནི་སྤྲུལ་སྐུ་སྟེ་དོན་ལ་སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རང་བཞིན་ཡིན་ཞིང་། བྱེ་བྲག་ཏུ་བཟླ་བྱའི་སྔགས་རྣམས་གྲུབ་པ་བཞི་ལྡན་དུ་བྱིན་གྱིས་བརླབས་པའི་ནུས་མཐུ་ཅན་ཏེ་ཡི་གེ་ཐམས་ཅད་སྟོང་ཆེན་མཉམ་པ་ཉིད་ཀྱི་ངོ་བོ་ཅན་དུ་ཡེ་ནས་གྲུབ་ཅིང་གནས་ལུགས་དེ་རང་ལ་ཡང་བཞུགས་པས་ཆོས་ཉིད་ངོ་བོས་གྲུབ་པ། ཞི་ཁྲོ་གཙོ་འཁོར་གྱི་ལྷ་དེའི་ཐུགས་ཡེ་ཤེས་ཀྱི་ངོ་བོ་ཐུན་མོང་མ་ཡིན་པར་སྣང་བའི་རང་བཞིན་བསླུ་མེད་དུ་གྲུབ་པ། རྩ་རླུང་ཐིག་ལེའི་རྟོག་ཚོགས་ཐམས་ཅད་སྔགས་དང་ཕྱག་རྒྱའི་དཀྱིལ་འཁོར་དུ་རྫོགས་པ་ཆོས་ཅན་རང་བཞིན་གྱིས་གྲུབ་པ། ཆོས་ཀུན་ལ་མངའ་དབང་འབྱོར་བའི་སངས་རྒྱས་རྣམས་ཀྱི་ཡི་གེ་གཅིག་ནས་མང་པོའི་བར་གྱི་སྔགས་རྣམས་མཁྱེན་བརྩེ་ནུས་པའི་ཡེ་ཤེས་ཀྱི་རྣམ་པར་འཕྲུལ་པས་བྱིན་གྱིས་བརླབས་ཀྱིས་གྲུབ་པ། སྨན་དང་ནོར་བུ་བཞིན་ལས་དང་དངོས་གྲུབ་སྒྲུབ་པ་ལ་ནུས་པ་ཐོགས་མེད་མི་བསླུ་བའི་མཐུ་གྲུབ་པ་ཅན་ལྷ་སྔགས་དབྱེར་མེད་དུ་ཤེས་པ་ཤིན་ཏུའང་གཅེས་སོ། །གསུམ་པ་རྗེས་ཀྱི་ལས་རིམ་དང་པོ་ཚོགས་ཀྱི་འཁོར་ལོ་ལ་ཐོག་མར་ཡོ་བྱད་བཤམས་པ་ནི། སྤྱིར་གསང་སྔགས་རྒྱུད་སྡེའི་ཚོགས་ཀྱི་འཁོར་ལོ་མཚན་ཉིད་པ་སྒྲ་ཇི་བཞིན་སྤྱོད་པ་ཡུལ་དུས་གང་ཟག་གིས་དེང་སང་དཀའ་བས་ཡེ་རྒྱ་ལ་བརྟེན་པའི་ཚོགས་འཁོར་རྗེས་མཐུན་ཕྲིན་ལས་ཀྱི་ཁ་སྐོང་དུ་འབྱུང་བ་ལྟར་བཤད་ན་ཀུན་ལ་ཕན་པར་འགྱུར་བའི་ཕྱིར་བཤད་པ་ལ། དུར་ཁྲོད་དང་དབེན་པ་སྒྲུབ་པའི་གནས་རྣམས་སུ་ལྷའི་དཀྱིལ་འཁོར་བཤམས་པའི་དྲུང་དུ་བདག་མདུན་ཆོ་ག་ལ་བརྟེན་པའམ། ཐུ་མཚམས་ཀྱི་ལྷའི་ང་རྒྱལ་གྱིས་བཏང་ཡང་རུང་ཞིང་། གང་ལྟར་ཡང་སྨན་རཀ་གཏོར་མ་ཕྱི་ནང་གི་མཆོད་པ་བཀྲམ་པའི་དྲུང་འདི་ཉིད་ལས། ཤ་ལྔ་བདུད་རྩི་རྣམ་པ་ལྔ༔ བཟའ་བཅའ་བཏུང་བ་ཕྱི་ཡི་ཚོགས༔ ཞེས་གསུངས་པ་ལྟར་ཤ་ལྔ་བདུད་རྩི་དངོས་ནི་བདུད་རྩི་ཆོས་སྨན་ལ་ཚང་ཞིང་། སྦྱངས་རྟོགས་སྦར་གསུམ་གྱི་ལྟ་དགོངས་མེད་པའི་གཙང་དམེའི་རྫས་མང་པོ་བསཊ་མི་རུང་བས་གཙང་ཞིང་ལོག་འཚོས་མ་སྦགས་པའི་འབྲས་བུ། འབྲུ་ཤིང་མེ་ཏོག་སོགས་བཟའ་བཏུང་། ཚོང་འདུས་ཀྱི་ཤ་ཆང་སོགས་ཞིང་ངམ་གཅན་གཟན་གྱི་པགས་པའི་སྟེང་དུ་ཀ་པཱ་ལ་སོགས་ཀྱི་སྣོད་དུ་བཤམས། གཉིས་པ་ཚོགས་ཀྱི་འདུ་བ་ནི། ཐབས་དང་ཤེས་རབ་ལྕམ་དྲལ་ལྡན༔ ཞེས་པ་ལྟར་དམ་ཚིག་དང་ལྡན་ཞིང་འདུ་བར་འོས་པའི་རྣལ་འབྱོར་ཕོ་མོ་ལྷ་གྲངས་ལྟར་རམ་ཇི་ལྟར་འོས་པ་རྣམས་ཚོགས་ཤིང་གྲལ་དུ་འཁོད་པས། གསུམ་པ་ཇི་ལྟར་བྱ་བའི་ལས་རིམ་དངོས་ནི། སྐྱབས་སེམས་ནས་བརྩམས་བཟླས་པའི་བར་ལས་བྱང་ལྟར་བྱ་ཞིང་ཁྱད་པར་བདེ་ཆེན་གྱི་བཟླས་དམིགས་གཙོ་བོར་སྒོམ་པར་གསུངས། ཚོགས་མཆོད་འདི་ཐུན་མཚམས་ཀྱི་བྱ་བ་ཡིན་པས། ལྷའི་སྙིང་པོ་ཙམ་གྱིས་གཉུག་མའི་ཧེ་རུ་ཀའི་ང་རྒྱལ་གནས་པས་ཀྱང་རུང་བར་གསུངས། གང་ལྟར་ཡང་ཕྱི་ནང་གི་ཆོས་སྲུང་ལ་གཏོར་མ་ཕུལ། ལས་ཀྱི་རྡོ་རྗེས་བྱིན་གྱིས་རློབས་པར་བསྐུལ་ཏེ། རང་གི་ཐུགས་ཀ་ནས་སྤྲོས་པའི་རྃ་ཡྃ་ཁྃ་གིས་རྫས་ཀྱི་ཉེས་སྐྱོན་བསྲེགས་གཏོར་བཀྲུས་སྣོད་ཀ་པཱ་ལར་བཅུད་དམ་རྫས་བཅུར་མོས་པས་སྦྱངས་རྟོགས་སྦར་བའི་དམིགས་པས་ཡེ་ཤེས་ཀྱི་བདུད་རྩིར་བྱིན་གྱིས་བརླབས་ལ། ཨོཾ་ཨཱཿཧཱུྃ་ཧ་ཧོ་ཧྲཱིཿ བརྗོད་པས་བྱིན་གྱིས་བརླབས་པས་མགྲོན་དུ་སྐུ་གསུམ་གྱི་ཞིང་རབ་འབྱམས་དང་། ཁྱད་པར་རྡོ་རྗེ་ཐེག་པའི་སྐལ་ལྡན་རིག་འཛིན་དཔའ་བོ་ཌཱ་ཀིའི་ཕོ་ཉའི་འདུ་བ་ཐོབ་པའི་གནས་ཉེར་བཞི་སྟེ། པུལླི་ར། ཛ་ལནྔྷ་ར། ཨོ་རྒྱན། ཨརྦུ་ཏ། བཞི་དཔའ་བོ་དང་རྣལ་འབྱོར་མ་རྟག་ཏུ་བཞུགས་པའི་གནས་དང་། གོ་ད་ཝ་རི། རསྨི་ཤྭ་རི། དེ་ཝི་ཀོ་ཊ་། མ་ལ་ཝ་བཞི་དུས་རེས་འགའ་ཙམ་བཞུགས་པས་ཉེ་བའི་གནས་གཉིས་ནི་སྔོན་ནམ་མཁའ་ལས་བྱུང་བའི་ལྷ་དང་དྲི་ཟ་བཞི་བཞིས་བཟུང་བས་མཁའ་སྤྱོད་ཀྱི་གནས་དང་། ནཱ་ག་ར་དང་། སིནྡྷུ་གཉིས་ཚོགས་འཁོར་ལ་རྟག་ཏུ་རོལ་པའི་ཡུལ་ལམ་དུར་ཁྲོད། མ་རུ་ཏ་དང་། ཀུ་ལུ་རེས་འགའ་རོལ་པས་ཉེ་བའི་དུར་ཁྲོད་དམ་ཡུལ། ཁྲམ་རྟགས་ཅན་བརྒྱད། ས་འོག་ན་གནས་པའི་ཀླུ་དང་ལྷ་མིན་གྱིས་བཟུང་བས་ས་འོག་སྤྱོད་པའི་གནས། ཀཱ་མ་རུ་པ་དང་། ཨོ་ཏྲི་གཉིས་རྟག་པར་སྤྱོད་པའི་ཞིང་དང་། ཏྲི་ཤ་ཀུ་དང་ཀོ་ས་ལ་གཉིས་རེས་འགའ་ལོངས་སྤྱོད་པས་ཉེ་ཞིང་། ཕྲེ་ཏ་པཱུ་རི་དང་གྲི་ཧ་དེ་ཝ་གཉིས་རྟག་ཏུ་བགྲེང་པའི་འདུ་བ་དང་། སོརཥྚ་སུ་ཝརྞ་གཉིས་རེས་མོས་སུ་བགྲོ་བས་ཉེ་འདུ། ཀ་ལིངྐ་དང༷་། ལམྤ་ཀ་༷གཉིས་རྟག་ཏུ་ཁྲུས་བྱེད་པའི་ས་ཡིན་པས་ཚནྔྷོ། ཀཉྩི་དང་ཧི་མ༵་ལ་གཉིས་རེས་འགའ་བྱེད་པས་ཉེ་བའི་ཚནྔྷོ་སྟེ། གོར་རྟགས་ཅན་བརྒྱད། འདི་དག་ས་སྟེང་གི་གནོད་སྦྱིན་དང་སྲིན་པོའ་ིབཟུང་བས་ས་སྤྱོད་ཀྱི་གནས་ཏེ་ཧེ་རུ་ཀ་ཡི་གནས་བཅུ་པོ་འདི་བསྐྱེད་རིམ་བརྟན་པས་བརྟུལ་ཞུགས་ཀྱི་སྤྱོད་པས་རྒྱུ་བའི་གནས་འཛམ་གླིང་ཆར་གདོད་ནས་གྲུབ་པ་དང་། རྒྱ་ནག་ལྟ་བུའི་གྲོང་ཁྱེར་ཆེན་པོ་གཅིག་ན་ཡང་ཚང་བ་ལྟ་བུ་དང་། བསྐྱེད་རིམ་གྱི་དངོས་གྲུབ་གྲུབ་ཟིན་དང་། རྫོགས་རིམ་ཕྲ་ཡངས་ཀྱི་ལུས་ཐོབ་པས་སྤྱོད་ཅིང་རྒྱུ་བའི་གནས་འཇིག་རྟེན་གྱི་ཁམས་ཡོངས་རྫོགས་གཅིག་ལ་བཞག་པ་དང་། ཟུང་འཇུག་གི་སྐུ་གྲུབ་ནས་རིག་པ་བརྟུལ་ཞུགས་ལོངས་སུ་སྤྱོད་པའི་གནས་དག་པའི་ཞིང་ཁམས་རབ་འབྱམས་ལ་བཞག་པ་དང་། དུས་འཁོར་ལས་རྒྱུད་གཞན་དང་གཞན་དུ་གནས་ཉེར་བཞི་ཕྱོགས་རེ་བ་གསུངས་པ་ཐུན་མོང་གི་དབང་དུ་བྱས་ཀྱི། ཕྱིའི་དམངས་རིགས་སོགས་མིའི་རིགས་དྲུག་དང་། ནང་གི་ཕུང་ཁམས་དབང་ཡུལ་ལས་དབང་བྱ་བ་དྲུག་དྲུག་རྣམས་གང་དུའང་གནས་པས། དེར་རང་བཞིན་གྱིས་སྒྲུབ་པའི་རྣམ་འབྱོར་མས་ཀུན་ཏུ་ཁྱབ་པ་བཞིན་ཁྱིམ་གཅིག་ཏུའང་གནས་ཡུལ་ཐམས་ཅད་རྫོགས་པར་གསུངས་པ་སོགས་ཕྱིའི་ཡུལ་ཆེན་དེ་དག་གང་ལ་བརྟེན་པའི་རྣམ་བཞག་མཐའ་ཡས་ཤིང་། ནང་དུ་སྤྱི་བོ་ཛ་ལནྔྷ་ར་དང་། རྩ་ཉི་ཤུ་རྩ་བཞི་ལས་ཁམས་སོ་སེན་སོགས་ཉེར་བཞི་འབབ་པ་ཡུམ་བདེ་རྒྱལ་གྱི་ཚོགས་ལས་འབྱུང་བ་ལྟར་རྩ་གནས་དེ་རྣམས་སུ་རླུང་འགགས་པས་ས་བཅུའི་དང་པོ་རབ་ཏུ་དགའ་བ་སོགས་བརྙེས་པར་བཤད་པ་དང་། དཔལ་འདུས་ཀྱི་འཁོར་ལོ་ལས། ཁྱིམ་བཅུ་གཉིས་དང་། རྟེན་འབྲེལ་བཅུ་གཉིས་ཀྱི་རླུང་གི་འཕོ་བ་དག་པ་ལ་ཡུལ་ཉེར་བཞི་ཡིན་པར་གསུངས་ཤིང་། ཧེ་རུ་ཀ་གལྤོ་ལས། ཡུལ་གྱི་མིང་ནི་རྒྱ་གར་ཡུལ། དུར་ཁྲོད་མིང་ནི་བསིལ་བའི་ཚལ། ཞེས་སོགས་གསུངས་པ་ལྟར། ཨོ་ཊི་ཡཱ་ནར་པདྨ་བརྩེགས་པས་མཚོན་གཞུང་ཚིག་གིས་གསལ་བའི་དུར་ཁྲོད་ཆེན་པོ་བརྒྱད་རྣམས་ན་བཞུགས་པའི་དཔལ་ཆེན་འབར་བ་ཡེ་ཤེས་ཀློང་དགུའི་དཀྱིལ་འཁོར་ལ། དཔའ་བོ་མཁའ་འགྲོ། རིག་འཛིན་རྣལ་འབྱོར། ཤུགས་འགྲོ་ཞིང་སྐྱོང་འཁོར་དང་བཅས་པ་ཐམས་ཅད་ནམ་མཁའ་གང་བར་སྤྱན་དྲངས་པར་བསམ་ཞིང་། གུ་རུ་བླ་མ། དེ་ཝ་ལྷ། ཌཱ་ཀ་དཔའ་བོ། ཌཱཀི་ནི་མཁའ་འགྲོ་མ། ངྷརྨ་པཱ་ལ་ཆོས་སྐྱོང་རྣམས། ས་མ་ཡ་ཛཿ དམ་ཚིག་གི་འདུ་བར་སྤྱོན་ཅིག་ཅེས་པའོ། །ཚོགས་ཀྱི་མཆོད་པ་དངོས་ལ། སྔ་མ་ལས། དང་པོ་འདོད་ཡོན་དྲུག་གིས་མཆོད། གཉིས་པ་དམ་རྫས་བདུད་རྩིའི་བཤགས། གསུམ་པ་དགྲ་བགེགས་གཟུགས་ཕུང་སྟོབ། ཞེས་གསུམ་དུ་གསུངས་པ་ལྟར་ཕུད་དང་པོ་མཆོད་པ་ནི། དམ་ཚིག་གི་རྫས་རྣམས་ལས་ཕྱིའི་ཚོགས་མཆོད་ཤ་ལྔ་བདུད་རྩི་ལྔ་དང་ཐབས་ཤེས་ཀྱི་བཟའ་བཏུང་། ནང་རྡོ་རྗེ་འདོད་ཡོན་གྱི་ལྷ་མོ་ལྔའི་མཛེས་པའི་གཟུགས་སོགས་ཡུལ་ལྔ་དང་། གསང་བ་བདེ་ཆེན་སྦྱོར་མཆོད་ཀྱིས་དགྱེས་པ་བསྐྱེད། བར་པ་བཤགས་པ་ལ། ཆ་གཉིས་པ་བདུད་རྩི་ལྔའིི་རང་བཞིན་དུ་དམིགས་ཏེ་ཕུལ་བས་ཐུགས་དམ་བསྐང་ཞིང་འཁོན་གཅུགས་སོགས་ཉེས་བྱས་ཐམས་ཅད་དག་པར་བསམ་ལ་ཡིག་བརྒྱ་བཟླ། ཐ་མ་བསྒྲལ་སྟབ་ལ། ཚོགས་བྱིན་གྱིས་མ་བརླབས་པའི་སྔ་ལོགས་སུ་བཅད་པའི་ཟན་དང་ཤ་དུམ་ལ་དམིགས་ཏེ། བདག་ལྟ་ཉོན་མོངས་ཀྱི་རང་གཟུགས་ཉམས་པའི་དགྲ་བགེགས་ཕྱག་རྒྱ་བཞིས་འགུགས་བསྟིམ་ལྷ་དང་ཕྲལ་ཞིང་ཉམས་ཐག་པས་གནས་པ་ལ། བདག་ཉིད་ལས་ཀྱི་ཁྲོ་བོའ་ིཕྱག་སོར་རིགས་ལྔ་ཡབ་ཡུམ་དུ་གསལ་བའི་སྦྱོར་མཚམས་ལས་སྐྱེས་པའི་ཕུར་བུ་སྒྲོལ་བྱེད་ཡཀྴ་ཀྲོ་ངྷ་གསལ་བ་བསྒྲལ་བྱའི་སྙིང་གར་བཏབ་པས། ཁོའ་ིཚེ་དཔལ་བཀྲག་དང་གཟི་མདངས་ཨ་ཡི་རྣམ་པར་བསྡུས་ནས་རང་ལ་བསྟིམ་པས་བདག་ཉིད་རྡོ་རྗེའི་ཚེ་སྲོག་དང་དབྱེར་མེད་དུ་བསམ་པ་ཚེ་ལུང་དང་། ཀུན་གཞི་ཎྲྀའ་ིརྣམ་པ་ཕུར་རྩེའི་ཧཱུྃ་གིས་བླངས་ཏེ་ཕཊ་ཀྱིས་འཕངས་བས་རྣམ་ཤེས་ཧྲཱིཿ འི་གཟུགས་ཀྱིས་འོག་མིན་དུ་དཔལ་ཆེན་པོའ་ིསྦྱོར་མཚམས་སུ་ཐིམ་པར་བསམ་པ་ཁྲུས་ལུང་། སྙིགས་མའི་ལུས་དུམ་བུར་གཏུབས་པ་ལྷ་ཚོགས་ལ་ཕུལ་བས་དགྱེས་ཚིམ་དུ་བཞེས་པར་བསམ་ལ། མཱཾ་ས་ཤ་ཆེན། རཀྟ་ཁྲག་ཙིཏྟ་སྙིང་། གོ་རེ་ཙ་ན་ཀླད་པ། བྷ་སུ་ཏ་ནང་ཁྲོལ། ཀེ་ནི་རི་ཏི་རུ་པ། ག་ཎ་ཙཀྲ་པཱུ་ཛ་ཚོགས་ཀྱི་འཁོར་ལོའ་ིམཆོད་པ། ཁ་ཁ་ཁཱ་ཧི་ཟོ་ཤིག་ཅེས་སོ། །དེ་ནས་ནང་རྣལ་འབྱོར་པའི་ཕུང་ཁམས་སྐྱེ་མཆེད་ཀྱི་ལྷ་མཆོད་པའི་ཕྱིར། འདི་ནི་དམ་ཚིག་མཆོག་གི་གནས༔ ཤག་དང་རྩོད་པ་ཀུ་ཅོ་མེད༔ ཞེས་པ་ལྟར་ཚོགས་གྲལ་དུ་ཐ་མལ་གྱི་སྣང་ཞེན་སྤངས་ཏེ། ཚིམ་པ་དང་། དགའ་བ་འཛིན་ཞེན་མེད་པས་མཆོད་རྫས་ལྟེ་བའི་མེས་བཞུས་པའི་དྭངས་མ་བདུད་རྩིའི་ལུས་ཀྱི་ལྷ་ཚོགས་མཉེས་པར་བསམ་ལ་ནང་གི་སྲེག་བླུགས་ཀྱིས་ལོངས་སྤྱོད་པས། རྩ་ཁམས་ཀྱི་དཔའ་བོ་མཁའ་འགྲོ་རྣམས་དང་རང་ཉིད་ཧེ་རུ་ཀ་ཡབ་ཡུམ་རྗེས་ཆགས་ཀྱི་སྦྱོར་བས་དགའ་བཞིའི་ཉམས་སྐྱོང་བ་གསང་བའི་སྲེག་བླུགས་ཡུལ་དང་ཡུལ་ཅན་ཐམས་ཅད་བདེ་སྟོང་ཡེ་ཤེས་སྤྲོས་བ་དང་བྲལ་པའི་ངང་དུ་ལ་བཟླ་བ་ཡང་གསང་གི་མཆོད་པས་དགྱེས་པ་བསྐྱེད་ཅིང་རྡོ་རྗེའི་གླུ་གར་ཀྱང་བྱ། ལྷག་མའི་སྟོང་དམེ་གཏོར་གྱི་རས་མ་དང་ཕུད་ཆ་གསུམ་པའང་བསྣན་ཏེ་སློབ་དཔོན་གྱིས་ཁ་ཕྲུ་བཏབ། ཧེ་རུ་ཀའི་དམ་རྒྱས་མནན་ལ། བྱིན་གྱིས་བརླབས་པ་དཀྱིལ་འཁོར་གྱི་བྱང་ཤར་རམ་ཤར་ལྷོར་བཞག་ལ། ལྷག་སྡུད་སྤྱན་དྲངས་ཏེ། དཔའ་མོ་ཉེར་བརྒྱད། མཁའ་འགྲོ་སོ་གཉིས། གིང་ཆེན་བཅོ་བརྒྱད། ལངྐ་མ་མོ་བདུན། སྲིང་མོ་བཞི། འབར་མ་བརྒྱད། ཕོ་ཉ་སུམ་བརྒྱ་དྲུག་ཅུ་སོགས་ལ་ཕུལ་བས་བཞེས་ཤིང་ཕྲིན་ལས་མཛད་པར་བསམ་ལ ། མཚན་མོ་ཡིན་དུས་མཚན་གྱི་གདོང་ཐུག་བསྲུང་ཕྱིར་དཔལ་འབར་དང་། ཉིན་མོ་སྤོས་མེ་བཙུགས་ལ་གོམ་པ་བདུན་ཅུའི་སར་སྲིན་མོའི་ཟ་ལམ་དུ་འབུལ། ཐམས་ཅད་རྡོ་རྗེའི་རིགས་སུ་སྨོན་ལམ་གདབ་བོ། །གཉིས་པ་ཐུགས་དམ་བསྐུལ་བ་ནི། ཐུགས་དམ་གང་བསྐུལ་ན། ཧཱུྃ་ཞེས་ཐུགས་སྲོག་ས་བོན་བརྗོད་པ་སྔོན་དུ་འགྲོ་བས། མི་གནས་ཡེ་ཤེས་སོགས་རྐང་པ་གཉིས་ཀྱིས་བསྟན་པ་ལྟར། སྲིད་ཞིའི་མཐའ་གང་ལའང་མི་གནས་པའི་གཞི་མ་འཁྲུལ་པའི་སངས་རྒྱས་ཆོས་སྐུ་སྤྲོས་བྲལ་གྱི་ཕོ་བྲང་ནས། རང་སྣང་ཡེ་ཤེས་ཀྱི་འཁོར་ལོ་ལོངས་སྤྱོད་རྫོགས་སྐུ་རྒྱལ་བ་ཞི་བ་དང་ཁྲོ་བོའ་ིལྷ་ཚོགས་རྣམས་ཡུལ་གང་ལ་བསྐུལ་ན། འགྲོ་བའི་དོན་ལ་དགོངས་པར་མཛོད་ཅིག་ཅེས། དགོས་པ་ཅིའི་ཕྱིར་བསྐུལ་ན། སེམས་ཅན་རྣམས་རིག་པའི་རང་བཞིན་བདེ་གཤེགས་སྙིང་པོ་གཤིས་ཀྱི་གནས་ལུགས་དབྱིངས་ཀྱི་བཞུགས་ཚུལ་སོ་སོ་རང་རིག་པའི་ཡེ་ཤེས་ཀྱིས་མ་རྟོགས་པ། ལྷན་སྐྱེས་དང་ཀུན་བརྟགས་ཀྱི་མ་རིག་པའི་མཚན་ཉིད་བག་ཆགས་སྣ་ཚོགས་འཛིན་པའི་ཀུན་གཞི་ལུང་མ་བསྟན་ལས། རྣམ་ཤེས་གསལ་རིག་གིས་གཟུང་འཛིན་དུ་ཞེན་པས་སྒོ་ལྔའི་རྣམ་ཤེས་ཡུལ་ལྔའི་སྣང་བ་དང་། རྟེན་ཅིིང་འབྲེལ་བ་ལས་འགྲོ་བ་རིགས་དྲུག་གི་རྒྱུད་ཉོན་མོངས་དུག་ལྔའི་གནས་དོན་ལུས་ཀྱི་འཁྲུལ་པ་རང་རྒྱུད་ལ་སྤྱོད་དེ་རྒྱུ་ལས་དང་ཉོན་མོངས་ཤུགས་དྲག་པོའ་ིགཟིར་བའི་གཞན་དབང་དུ་གྱུར་བའི་མཐུ་ཡིས། འབྲས་བུ་ཕྱི་རོལ་སྣོད་བཅུད་ཀྱི་ཡུལ་ལ་སྨིན་པའི་རིགས་དྲུག་གི་སྡུག་བསྔལ་གྱིས་ཕྱི་མ་དང་ཚེ་འདིར་ནད་མཚོན་མུ་གེས་མནར་བའི་སེམས་ཅན་རྣམས་ལས་གང་མཛད་ན་ཞི་བའི་ཕྲིན་ལས་དང་། རྩོལ་བཅས་རྒྱུ་འབྲས་ཀྱི་ཐེག་པས་གདུལ་དཀའ་ཞིང་དུག་ལྔ་འཆོལ་ཉོག་ཏུ་སྤྱོད་པའི་རུ་ཏྲ་སྡེ་གསུམ་ལྟ་བུའི་དམུ་རྒོད་པའི་སྙིགས་མའི་སེམས་ཅན་འདི་དག་རྣམས། དྲག་ཤུལ་རྡོ་རྗེ་ཁྲོས་པའི་མངོན་སྤྱོད་ཀྱི་ཕྲིན་ལས་དང་། ཆོས་ཉིད་བསམ་གྱིས་མི་ཁྱབ་པའི་དོན་ལ་དངོས་བརྒྱུད་ཀྱིས་སྦྱོར་བའི་ཐེག་པ་མཆོག་གི་ཆོས་ཀྱིས་གདུལ་ཏེ་ཁྱད་ཆོས་དྲུག་གི་གྲོལ་བང་མཛོད་ཅིག་ཅེས་སོ། །གསུམ་པ་ཆད་ཐོའ་ིགཏོར་མ་འབུལ་བ་ནི། སྐབས་འདིར་བཀའ་གཏེར་སྲུང་མའི་གཏོར་འབུལ་རྣམས་ཀྱང་འབུལ་དགོས་ཤིང་། ཆད་ཐོ་ཞེས་པའི་ཆད་ནི་སྔོན་ནས་ཁས་བླང་བའི་དོན་དང་། ཐོ་ཞེས་པ་ནི་ལས་འདི་ཙམ་ཞིག་གྱིས། འདི་ཙམ་མ་བྱེད་ཅེས་བླང་དོར་གྱི་སྒོ་ནས་མཚམས་བཟུང་བའི་དོན་ཡིན་པས་ན། སྐུ་གསུམ་གྱི་ཞིང་ཁམས་རྣམས་སུ་གསང་སྔགས་ཀྱི་ཆོས་འཁོར་བསྐོར་བའི་ཚེ་བསྟན་པ་སྲུང་ཞིང་སྒྲུབ་པ་པོ་རྣམས་ཀྱི་ཕྲིན་ལས་སྒྲུབ་པར་ཁས་བླང་བའི་སྲུང་མ་རྣམས་ལ་ཐ་ཚིག་བསྐུལ་ཏེ་ལས་སྒྲུབ་པའི་ཆེད་དུ་གཏོར་མ་འབུལ་བའོ། །བཞི་པ་བརྟན་མ་སྐྱོངས་པ་ནི། ངེས་པའི་དོན་དུ་ཧེ་རུ་ཀའི་དཀྱིལ་འཁོར་གྱི་སྒོ་མཚིས་མ་བརྒྱད་དང་། སྙིང་པོའ་ིརྣམ་འབྱོར་བཞི་ཡིན་ཀྱང་རྣམ་པ་གུ་རུ་རིན་པོ་ཆེའི་བོད་སྐྱོངས་ཡུལ་ལྷའི་གཙོ་བོ་དང་། མུ་སྟེགས་ཀྱི་རྒོལ་བ་སྲུང་བར་བཀའ་བསྒོས་པའི་ཐ་ཚིག་བསྐུལ་བའི་ཕྱིར་ཁྱད་པར་དུ་གཏོར་མ་འབུལ་བ་སྔ་འགྱུར་གྱི་ལུགས་ཏེ། བལ་བོད་ཀྱི་ས་མཚམས་སུ་ཚེ་རིང་མ་སོགས་བོད་ཡུལ་མཐའ་དབུས་སུ་བརྟན་ཅིང་ཆགས་པའི་བདུད་དང་གནོད་སྦྱིན་སྨན་མོའ་ིརིགས་ཀྱི་མ་མོ་བཅུ་གཉིས་ཏེ། ཕྱི་ལྟར་ན་དུས་སྦྱོར། ནང་དུ་རྡོ་རྗེའི་ལུས་ཀྱི་འཕོ་བ། གཞན་དུ་རྟེན་འབྲེལ་བཅུ་གཉིས་གནས་སུ་དག་པའི་ཌཱ་ཀི་མ་འཁོར་སྨན་ཕྲན་འབུམ་འབུམ་དང་བཅས་པ་ལ། ཆད་ཐོའ་ིགཏོར་གཞོང་བཤལ་བའི་ཆུས་བྲན་པའི་གཏོར་མ་ཕུལ་ཏེ་ལས་སྤྱི་དང་བོད་དུ་མཐའ་དམ་སྲུང་བར་བསྐུལ་བའོ། །ལྔ་པ་རྟ་བྲོ་ནི། དབང་ཆེན་ཁྲོ་བོའ་ིརྟ་སྐད་ཀྱིས་མ་མོ་མཁའ་འགྲོ་ཐམས་ཅད་བསྡུས་ནས་སྣང་སྲིད་ཁྲོ་བོ་རོལ་པའི་དཀྱིལ་འཁོར་དུ་ཤར་བས་རྡོ་རྗེའི་གླུ་བྲོ་གར་གྱིས་ལས་སོ་སོར་རྒྱས་བཏབ་པ་རྟ་བྲོ་ཞེས་གསུངས་པ་སྟེ། སྣོད་བཅུད་ཁྲག་འཐུང་རོལ་པའི་དུར་ཁྲོད་དུ་གསལ་བས་བྱང་ཆུབ་སེམས་ཀྱི་བརྟུལ་ཞུགས་ལས་རིང་དུ་བྱོལ་བའི་བདག་ལྟ་དམ་སྲིའི་ཚོགས་ཐམས་ཅད་བཀུགས་ནས་སྟོང་ཆེན་རྡོ་རྗེ་བཙུན་མོའ་ིརྣམ་ཐར་གསུམ་གྱི་མཁའ་དབྱིངས་སུ་རྒྱས་བཏབ། འཛིན་ནས་མི་གཏོང་བའི་ཐུགས་རྗེའི་ཆུ་སྲིན་གྱི་གྲེ་བར་གཏད། བཏབ་ནས་མི་འཆོར་བ་ཕྲིན་ལས་དུས་དགྲའི་དབང་པོའ་ིཁམས་གསུམ་ཟ་བའི་ཞལ་དུ་བསྐུར། རང་བྱུང་ཡེ་ཤེས་ཀྱི་མེས་སྲིད་རྩ་མ་རིག་པའི་རྒྱུ་འབྲས་གཏན་མེད་དུ་མ་སོང་བར་མནན་པས། ཀུན་རྫོབ་གཡོ་འཁྲུལ་གྱི་བསྐལ་པ་ཆགས་གནས་འཇིག་སྟོང་བྱུང་ཀྱང་ཐུགས་རྗེའི་ཡལ་བར་དོར་ཏེ་མི་གཏོར་བའི་དགོངས་པས་རྣམ་པ་གཏོར་གཞོང་རི་རིབ་ཏུ་གསལ་བ་སྦུངས་ཏེ་རྡོ་རྗེའི་རྒྱས་བཏབ་པ་ནི་ལས་གང་ལའང་ཐོས་མཐའ་བསྡུ་ན་སླར་གསོར་མི་རུང་བའི་གནད་ཟབ་མོའ།ོ ། དྲུག་པ་དངོས་གྲུབ་བླང་བ་ནི། རྒྱུད་གྱི་དངོས་གྲུབ་བླང་བ་ཞེས་ལྷ་སྒྲུང་པའི་སྐབས་རྟགས་མཚན་ཁྱད་པར་ཅན་བྱུང་ན་དེ་མ་ཐག་དངོས་གྲུབ་ལེན་དགོས་པར་གསུངས་པས་དེ་ནི་ཏིང་ངེ་འཛིན་གསལ་བས་དངོས་གྲུབ་ལེན་ཚིག་སྔགས་བཅས་བརྗོད་པས་རུང་ཞིང་། བསྙེན་སྒྲུབ་རྫོགས་པའི་ཉིན་ཐ་མ་ཡིན་ན་མཚམས་གཅོད་དང་བྱིན་འབེབས། བཤགས་པ། མཆོད་བསྟོད་སྔོན་དུ་འགྲོ་བས། བླ་མ་དང་དཔལ་ཆེན་པོ་གཉིས་སུ་མེད་པའི་དག་པ་ཡེ་ཤེས་ཀྱི་དཀྱིལ་འཁོར་དབང་ལེན་བྱའི་ཡུལ་དང་། རྣམ་འགྱུར་བློ་བུར་གྱི་འཁྲུལ་རྟོག་རྣམ་སྨིན་བག་ཆགས་ཀྱི་རྟེན་ཉིད་དབང་ལེན་པ་པོའ་ིཚུལ་གྱིས་གཙོ་བོ་ལས་ལོགས་སུ་ཕྱེ་ནས། དཀྱིལ་འཁོར་པའི་གནས་གསུམ་ལས་བྱུང་བའི་འོད་ཟེར་དཀར་དམར་མཐིང་གསུམ་འཕྲོས་པ་རང་གི་གནས་གསུམ་དུ་ཐིམ་པས། ས་བཅུ་ལམ་ལྔ་སོགས་མཆོག སྒྲུབ་ཆེན་བརྒྱད་དང་ལས་བཞི་སོགས་ཐུན་མོང་གི་དངོས་གྲུབ་ཐོབ་པར་བསམ་ལ། སྒྲུབ་རྟེན་ཕུར་པ་སོགས་གནས་གསུམ་དུ་བཞགསྒྲུབ་རྫས་རྣམས་མྱོང་བའོ། །རྩ་སྔགས་གུ་རུ་ཤཱིའི་མཐར་དངོས་གྲུབ་བསྐུལ་བའི་སྔགས་དོན་ངྷརྨ་ཀཱ་ཡ་ཆོས་ཀྱི་སྐུ་དང་། སཾ་བྷོ་ཀཱ་ཡ་ལོངས་སྐུ་དང་། ནིརྨ་ཀཱ་ཡ་སྤྲུལ་པའི་སྐུའི་ཙིཏྟ་སིདྔྷི་ཕ་ལ་ཧཱུཾ་ཐུགས་ཀྱི་དངོས་གྲུབ་བཟང་པོ་སྩོལ་བའི་དོན་ཏེ། བསྙེན་སྒྲུབ་ཀྱི་མཐར་བདག་འཇུག་བླང་ནས་དབང་དང་དངོས་གྲུབ་ལེན་པ་གཅིག་རྫོགས་ཀྱིས་ཡན་ལག་ཏུ་འགྱུར་བས་དེ་ལྟར་འདོད་ནས་བདག་མདུན་བུམ་པ་སྒྲུབ་པས་གཞུང་བསྲང་སྟེ་བདག་འཇུག་དབང་དོན་རྒྱ་མཚོ་ལྟར་བྱ་དགོས་སོ། །བདུན་པ་ནོངས་བཤགས་ནི། སྔགས་ཀྱི་དངོས་གྲུབ་ཐོབ་པ་ནི་དམ་ཚིག་རྣམ་པར་དག་པ་ལ་རག་ལས་ཀྱང་། རྨོངས་དང་ཉོན་མོངས་པས་ཟིལ་གྱིས་ནོན་པས་སྒོ་གསུམ་བག་མེད་དུ་གྱུར་པ་བདག་ཅག་གིས་ཏིང་འཛིན་བྱིང་རྒོད་ཆོ་ག་ལྷག་ཆད། མཆོད་རྫས་དམན་པ་ལ་སོགས་པའི་འགལ་འཁྲུལ་གྱིས་ཡེ་ཤེས་ཀྱི་ལྷ་རྣམས་ལ་མཚན་རྟོགས་མི་མངའ་ཡང་། ལེགས་ཉེས་ཀྱི་སྟངས་འཛིན་དམ་ཚིག་གི་རྗེས་གཅོད་པའི་མཁའ་འགྲོ་དང་ཆོས་སྲུང་གི་སྤྱན་སྔར་གནོང་ཞིང་འགྱོད་པས་བཤགས་ན་ཉེས་པའི་རྒྱུར་མི་འགྱུར་བའི་དག་ཚངས་སྩལ་དུ་གསོལ་ཞེས་ཡིག་བརྒྱ་ལན་གསུམ་བཟླས་པས་བཤགས། བརྒྱད་པ་ཉེར་བསྡུ་དང་ལྷར་ལྡང་ནི། མཆོག་གི་སྤྲུལ་སྐུ་རྣམས་སྐུ་དངོས་ཀྱི་གདུལ་བྱ་དང་ཕྲིན་ལས་རྫོགས་པའི་ཚེ། མྱ་ངན་ལས་འདའ་བ་དང་ཆོས་མཚུངས་པར་སྦྱངས་བྱ་སྣོད་བཅུད་འཇིག་པའི་བསྐལ་པས་དབྱིངས་སུ་བསྡུ་བ་འཆི་སྲིད་ཀྱི་སྣང་མཆེད་ཐོབ་གསུམ། སྦྱོངས་བྱེད་དཀྱིལ་འཁོར་གྱི་འཁོར་ལོར་བསྡུ་བ། སྦྱངས་འབྲས་རྣམ་ཀུན་མཆོག་ལྡན་ཆོས་སྐུ་མངོན་དུ་བྱེད་པ་སྟེ། འབྲས་བུ་སངས་རྒྱས་རྣམས་གཟུགས་སྐུའི་སྣང་བ་ཆོས་སྐུའི་ཕྲིན་ལས་ཡིན་ཅིང་། ཆོས་སྐུའི་ཡེ་ཤེས་དབྱིངས་ཀྱི་ངོ་བོ་ཡིན་པས་དེ་དང་རྣམ་པ་མཐུན་པས་གཞི་མ་དག་འཆི་སྲིད་སྦྱོངས་བྱེད་ཐ་མལ་གྱི་སྣོད་བཅུད་ལྷ་དང་གཞལ་ཡས་སུ་ཤར་བ་དག་ཆེན་སྐུ་དང་ཡེ་ཤེས་ཀྱི་རོལ་པའི་སྣོད་བཅུད་ལྷར་སྣང་བ་ཐམས་ཅད་ཀྱང་རིམ་གྱིས་འོད་དུ་ཞུ་སྟེ་སྲུང་འཁོར་ལ་བསྡུ་བ་སྣང་བ་ཐིམ་པ། སྲུང་འཁོར་ནས་རྟེན་གཞལ་ཡས་ཁང་གི་བར་བསྡུ་བ་རགས་པ་ཐིམ་པ། བརྟེན་པའི་ལྷ་རྣམས་ཀྱང་གཙོ་བོ་ཐིམ་པ་སྣང་བ། གཙོ་བོའ་ིཡུམ་ཡབ། ཡབ་ཡེ་ཤེས་སེམས་དཔའ་ལ་ཐིམ་པ་མཆེད་པ། དེ་ཡང་ཧཱུཾ་ལ་ཐིམ་པ་ཐོབ་པ། ཧཱུྃ་ཞབས་ཀྱུ་ནས་བཟུང་གྱེན་རྫོགས་ནཱ་དའི་བར་སྟོང་པའི་དབྱིངས་སུ་བསྡུས་པ་ཉེར་ཐོབ་སྟེ་འཆི་བའི་འོད་གསལ་དང་། དག་པ་ཆོས་སྐུ་ལས་གཟུགས་སྐུའི་མཛད་པ་དང་ཕྲིན་ལས་ཀྱི་འཇུག་པའི་སྣང་བ་རྒྱུན་མི་འཆད་དུ་འཆར་བས་འགྲོ་བ་སྒྲོལ་བའི་མཚོན་དོན། སླར་ཡང་དབྱིངས་ཀྱི་རང་བཞིན་འོད་གསལ་རྣམ་པར་མི་རྟོག་པའི་རིག་པ་བྱང་ཆུབ་ཀྱི་སེམས་ཟུང་འཇུག་གཉུག་མའི་ཧེ་རུ་ཀ་ཕྱག་རྒྱ་གཅིག་པ་ཞལ་གཅིག་ཕྱག་གཉིས་རྡོ་རྗེ་དང་དུང་ཁྲག་འཛིན་པའི་སྐུར་ལྡངས་ལ་གནས་གསུམ་ཨོཾ་ཨཱཿཧཱུྃ་རྡོ་རྗེ་གསུམ་གྱི་ས་བོན་གྱིས་རྒྱས་བཏབ་པས་སྣང་གྲགས་རིགས་གསུམ་ལྷ་སྔགས་ཆོས་སྐུའི་རོལ་པར་ལམ་དུ་ཁྱེར་བར་མཚན་རྟོག་གི་བར་ཆད་ཀྱིས་གླགས་མི་རྙེད་པར་སྲུང་བར་བསམ་ལ། བཛྲ་རཀྵ་ཧ་ཞེས་རྡོ་རྗེ་གོ་ཆའི་རྒྱ་དང་བཅས་པས་རྒྱས་བཏབ་སྟེ་ཡིག་བརྒྱས་བརྟན་པར་བྱའོ། །སྤྱིར་ཐུན་གྱི་དངོས་གཞིའི་སྣང་གྲགས་རིག་པ་ལྷའི་སྐུ་གསུང་ཐུགས་སུ་བལྟ་བའི་ཏིང་ངེ་འཛིན་གྱི་གསལ་སྣང་དེའི་ཐུན་མཚམས་དུའང་མ་བརྗེད་པས་སྤྱོད་ལམ་ཐམས་ཅད་སྒྱུ་མ་དང་རྨི་ལམ་ལྟར་ཞེན་མེད་དུ་སྣང་སེམས་ཀུན་ལྷ་སྔགས་ཆོས་སྐུ་ལམ་ཁྱེར་གྱིས་རྒྱས་ཐེབས་པ་དང་། དད་དང་མོས་གུས་སྙིང་རྗེ་དྲན་ཤེས་རྣམས་དང་མ་བྲལ་བས་མཉམ་རྗེས་འཁོར་མོ་ཡུག་ཏུ་རྒྱུན་ཆགས་པར་བསྐྱང་བས་འགྲུབ་ཐག་ཉེ་ཞིང་བྱིན་རླབས་དང་དངོས་གྲུབ་ཀྱི་ཚན་ཁ་ཆེ་བའི་གནད་ཤིན་ཏུ་ཟབ་པས་དེ་ལྟར་ཉམས་ལེན་ལ་བར་མེད་དུ་བརྩོན་དགོས་སོ། །དགུ་པ་བསྔོ་སྨོན་ནི། ཐེག་པ་ཆེན་པོའ་ིལམ་གྱི་གནད་ཆེ་ཤོས་ཏེ། བསྔོ་བ་མི་ཟད་ལམ་ཡིན་ཏེ། སྤེལ་དང་བསྒྱུར་བའི་ཆོས་ཅན་ཡིན། ཞེས་གསུངས་པ་ལྟར་དུས་གསུམ་དུ་བསགས་པའི་དགེ་རྩ་དམིགས་ཡུལ་དུ་བྱས་པ་འདིས་ཧཱུྃ་ཞེས་ཐུགས་ཆོས་ཀྱི་དབྱིབས་ཡེ་ཤེས་ཆེན་པོའི་དོན་རྗེས་དྲན་གྱིས་ས་བོན་གྱིས་བསྐུལ་ཏེ་གཞི་རྣམ་པ་སྣོད་བཅུད་ཀྱི་སྣང་བ། སྒྲར་གྲགས་པ་དྲན་རྟོག་རིག་པའི་ཆོས་སུ་ཤར་བ་ཐམས་ཅད་དོན་ལ་དཔལ་ཆེན་པོའ་ི རྡོ་རྗེའི་སྐུ་གསུང་ཐུགས་ཀྱི་དཀྱིལ་འཁོར་ཆེན་པོ་གསུམ་གྱི་དང་དུ་ཡེ་ནས་ལྷུན་རྫོགས་སུ་གནས་པའི་ཚུལ་དང་མཐུན་པར་ལམ་དུ་བྱ་བའི་ཕྱིར། རིག་འཛིན་གབ་བྱང་ལས། དབྱིངས་ཀྱི་སྣང་བ་ལྷར་ཤར་བས༔ བསོད་ནམས་ཚོགས་ཀྱང་འདི་ཡིས་རྫོགས༔ དེ་ལ་དངོས་ཞེན་རྣམ་དག་པས༔ ཡེ་ཤེས་ཚོགས་ཀྱང་རྫོགས་པ་ཡིན༔ ཞེས་པ་ལྟར་ཟག་མེད་སྐུ་དང་ཡེ་ཤེས་ཀྱི་ཆོས་ཁམས་རྒྱ་མཚོ་ལྟ་བུ་གདོད་ནས་ཆོས་དབྱིངས་འོད་གསལ་ཆེན་པོའི་ངོ་བོ་རུ་བཞུགས་པ་ནི་གཟུགས་སྐུ་མཐར་ཐུག་དང་། དེ་དག་ཀྱང་དངོས་པོ་དང་མཚན་མའི་ཆོས་སུ་མི་གནས་པ་རྣམ་ཀུན་མཆོག་ལྡན་གྱི་ཆོས་སྐུ་སྟེ་དེ་གཉིས་དབྱེར་མེད་པའི་གནས་ལུགས་དེ་མངོན་དུ་བྱེད་པ་ལ་བསྐྱེད་རྫོགས་གཉིས་སྣང་བཅས་བསོད་ནམས་དང་། སྣང་མེད་ཡེ་ཤེས་ཀྱི་ཚོགས་རླབས་པོ་ཆེ་བདེ་མྱུར་གྱིས་བསགས་པས་རྫོགས་སྨིན་སྦྱངས་པའི་རིམ་པ་གཉིས་སུ་བསྟན་པ་ལ། ལྟ་དགོངས་ཏིང་འཛིན་གྱི་ཐབས་ལ་མཁས་པའི་སྒོ་དུ་མས་བསྐལ་པ་མང་པོའ་ིཚོགས་སྐད་ཅིག་ལ་འདུམ་ནུས་པ་སྔགས་ཀྱི་མྱུར་ལམ་ཁྱད་པར་ཅན་གྱི་རྣལ་འབྱོར་མཆོག་གི་ཚོགས་གཉིས་བསགས་པའི་སྒོ་འདི་ནི། ལམ་གྱི་ཐོག་མ་ནས་ཐབས་ཤེས་ཟུང་འཇུག་གི་ལྟ་དགོངས་ཁྱད་པར་ཅན་གྱི་རྩིས་ཟིན་ཅིང་རྒྱས་ཐེབས་པས་སྲིད་ཞིའི་མཐའ་གཉིས་ལ་མི་གནས་པའི་གོ་འཕང་མཆོག་དམ་པ་འཁོར་འདས་ཀྱི་ཡོན་ཏན་ཐམས་ཅད་ལྷུན་གྱིས་རྫོགས་པའི་ཡེ་ཤེས་སྐུ་གསུམ་འདུ་འབྲལ་མེད་པའི་མྱ་ངན་ལས་འདས་པ་ཆེན་པོའ་ིབདག་ཉིད་དང་ཐ་མི་དད་པའི་གནས་ཚུལ་ཤེས་པ་ནི། འཁོར་གསུམ་ཡོངས་དག་གི་བསྔོ་བའི་རྒྱལ་པོ་འཕགས་ཆེན་རྣམས་ཀྱི་སྤྱོད་ཡུལ་དང་གཉིས་སུ་མེད་པ་སྟེ། དེའི་ནུས་པས་མཁའ་ཁྱབ་ཀྱི་འགྲོ་བ་ཀུན་ལ་ཕྲིན་ལས་རྟག་ཁྱབ་ལྷུན་གྲུབ་ཏུ་བརྡལ་བས་སྤྱི་དཔལ་ཆེན་པོའ་ིམི་སློབ་འབྲས་བུའི་གོ་འཕང་དམ་པ་མངོན་དུ་བྱེད་པའི་གནས་ཐོབ་པར་ཤོག་ཅེས་སྨོན་པ་སྟེ། དེ་ལྟ་བུའི་ཆོ་ག་ཚར་གཅིག་གི་ཐོག་མ་སྐྱབས་འགྲོ་ནས་བརྩམས་ཐོག་མཐའ་ཀུན་ཏུ་སྨོན་འཇུག་གི་རྩིས་ཟིན་པའི་གཞན་ཕན་གྱི་བློས་མཆོད་ཚོགས་ཕངས་མེད་དུ་འབུལ་བ་སྦྱིན་པ། དམ་བཅའི་རིང་དུ་མི་བོར་ཚུལ་ཁྲིམས། དཀའ་སྤྱད་བཟོད་ཅིང་བསགས་སྦྱང་ཀུན་ལ་ཚོད་ཡོད་བྲི་གཞོལ་དུ་མི་གཏོང་བ་བཟོད་པ། ཐུན་དང་ཐུན་མཚམས་ཐམས་ཅད་སོས་དལ་ལེ་ལོའ་ིདབང་དུ་མི་གཏོང་བ་བརྩོན་འགྲུས། ལྷའི་གསལ་སྣང་གིས་ཐ་མལ་གྱི་འཛིན་རྟོག་ཟིལ་གྱིས་གནོན་པ་བསམ་གཏན། ལྷ་སྔགས་སྤྲོ་བསྡུ་ཐམས་ཅད་ཆོས་ཉིད་མ་བཅོས་པའི་གསལ་ཆ་རང་བཞིན་ལྷུན་གྲུབ་ཏུ་འཆར་བའི་ཤེས་རབ་སྟེ་ཕ་རོལ་དུ་ཕྱིན་པ་དྲུག་རྫོགས་པས་བདེན་གཉིས་དབྱེར་མེད་པའི་སེམས་བསྐྱེད་ཀྱི་དོན་མདོ་སྔགས་དགོངས་པ་གཅིག་མཐུན་དུ་ཤེེས་པས་ཇི་སྐད་དུ། ཕུང་བོ་ཁམས་རྣམས་ལྷ་རུ་བསྒོམ། །རྫས་དང་འཕྲོ་འདུ་ཚོགས་ཀྱི་ལམ། །དེ་ཉིད་འདྲིས་བྱེད་སྦྱོར་བའི་ལམ། །ཀུན་ཏུ་བཟང་པོ་ཧེ་རུ་ཀ ། སེམས་སུ་སྨིན་པ་མཐོང་བའི་ལམ། །ཤིན་ཏུ་བརྟན་པ་སྒོམ་པའི་ལམ། །དབྱིངས་ཡིག་གཉིས་མེད་མཐར་ཕྱིན་ལམ། །ཞེས་གསུངས་པ་ལྟར་ལམ་ལྔ་རིམ་རྫོགས་ཀྱིས་བསོད་ནམས་ཀྱི་འབྲས་བུ་ཡང་བསྐལ་ཆེན་གཅིག་གི་ཚོགས་སྒྲུབ་པ་དང་མཉམ་པར་རྒྱལ་བ་རྡོ་རྗེ་འཆང་གི་རྒྱུད་སྡེ་དུ་མ་ནས་གསུངས་པ་ལ་ཡིད་ཆེས་སྤྲོ་བས་སྔོན་སོང་གི་དགེ་རྩའི་དཔེར་མཚོན་ནས་དུས་གསུམ་གྱི་དགེ་རྩ་ཐམས་ཅད་དུས་གསུམ་སྲས་བཅས་རྒྱལ་བས་ཇི་ལྟར་བསྔོས་པ་བཞིན། བདག་གིས་ཀྱང་བསྔོ་བས་ཐེག་པ་ཆེན་པོོའ་ིས་ལམ་གྱི་ཡོན་ཏན་ཐམས་ཅད་རྫོགས་པར་ལོངས་སྤྱོད་པའི་སྐལ་བཟང་སེམས་ཅན་ཐམས་ཅད་ཀྱིས་འགྲུབ་པར་གྱུར་ཅིག་སྙམ་པའི་བསྔོ་སྨོན་བྱ་བ་ནིི། ཐེག་པ་ཆེན་པོའ་ིཚོགས་གཉིས་སྤེལ་བའི་ཐབས་ཁྱད་པར་ཅན་ནོ། །བཅུ་པ་བཀྲ་ཤིས་ནི། སངས་རྒྱས་དང་བྱང་སེམས་རེ་རེའི་མཚན་བཟུང་བས་ཀྱང་བཀྲ་ཤིས་དང་དགེ་ལེགས་རྒྱ་ཆེར་འཕེལ་བར་གསུངས་པས་ན་མཆོག་གསུམ་རབ་འབྱམས་བསྙེན་སྒྲུབ་མཆོད་བསྟོད་ཐུགས་དམ་བསྐུལ་བའི་བདེན་མཐུས་སྲིད་ཞིའི་ཉེས་ཚོགས་ཞི་ཞིང་། བསྟན་འགྲོའ་ིདགེ་མཚན་གྱིས་སྣོད་བཅུད་ཐམས་ཅད་མཛེེས་པའི་བདེན་ཚིག་གི་ཤིས་པ་བརྗོད་པས་མཁའ་དབྱིངས་ནས་རྒྱལ་བ་སྲས་དང་བཅས་པས་ཀྱང་དགྱེས་པའི་ཚུལ་གྱིས་རྡོ་རྗེའི་བདེན་ཚིག་དང་། མེ་ཏོག་གི་ཆར་སིལ་མ་བསྙིལ་བས་བདག་གནས་ཡོ་བྱད་ཐམས་ཅད་ཀྱང་གཟི་མདངས་དང་ཡོན་ཏན་རྒྱས་པར་བསམ་ལ་མེ་ཏོག་འཐོར་ཞིང་རོལ་མོ་འཁྲོལ་བས་དགེ་ལེགས་སུ་བྱ་བའོ། །ཚིག་དོན་ནི། རྡོ་རྗེ་ཐེག་པའི་བསྟན་པ་འཇིག་རྟེན་འདིར་ཇི་ལྟར་སྣང་བའི་ཚུལ་དང་འབྲེལ་བ་སྟེ། འདི་ལྟར་དུས་གསུམ་གྱི་ལྡོག་ཆས་ནས་ནམ་ཡང་ཕྱེ་བ་མེད་པ་ཆོས་དབྱིངས་བསམ་མི་ཁྱབ་པའི་ཀློང་དུ་ཁྱད་པར་དྲུག་གིས་སངས་རྒྱས་པའི་གདོད་མའི་མགོན་པོ་ཆོས་སྐུ་ཀུན་ཏུ་བཟང་པོའ་ིཐུགས་ཡེ་ཤེས་རྒྱ་མཚོ་རྣམ་པ་ལྔའི་ཆོ་འཕྲུལ་སྟོན་པ་རིགས་ལྔ་གངས་ཆེན་མཚོའི་ཡེ་ཤེས་རང་སྣང་གི་སྟོན་འཁོར་དགོངས་པ་རོ་གཅིག་པས་སྐུ་ལྔའི་ཡོན་ཏན་མ་འདྲེས་ལྷུན་རྫོགས་སུ་མངའ་བ་ལོངས་སྤྱོད་རྫོགས་སྐུ་ལས། ཐུགས་རྗེས་སྤྲུལ་པའི་རང་མདངས་ཕྱོགས་དུས་ཀུན་ཏུ་སྐུ་དང་ཞིང་ཁམས་བསམ་མི་ཁྱབ་པའི་སྤྲིན་བཀོད་པའི་ཆ་ཤས་ལས། སྒྲོན་མེའི་བསྐལ་པ་བཟང་པོ་འདི་ལ་སངས་རྒྱས་སྟོང་རྩ་བྱོན་ནས་སོ་སོའ་ིརྣམ་ཐར་དང་ཕྲིན་ལས་སྣ་ཚོགས་པ་ཡིས་གདུལ་བྱ་འདུལ་བའི་ངོ་མཚར་ཅན་གྱི་སྒྲོན་མེའི་བསྐལ་པ་བཟང་པོ་འབྱུང་དཀའ་བ་ཡིན་པའི་རྒྱུ་མཚན་གྱིས་མཆོག་གསུམ་རིན་པོ་ཆེའི་སྣང་བ་རྒྱུན་མི་འཆད་པའི་བཀྲ་ཤིས་ཤོག་ཅེས་སྐུ་གསུམ་སྟོན་པའི་རྣམ་བཞག་དང་། དེ་ལས་བྱེ་བྲག་ཏུ་གདུལ་བྱ་ཕྱོགས་རེའི་འདུལ་ཞིང་མཐུན་པར་མི་མཇེད་ཀྱི་ཞིང་ཁམས་འདིའི་སྒྲོན་མ་བཀོད་ཚུལ་ནི། སངས་རྒྱས་གངས་ཅན་མཚོའི་ཕྱག་མཉམ་གྱི་སྟེང་རིན་པོ་ཆེའི་ལྷུང་བཟེད་སྤོས་ཆུའི་རྒྱ་མཚོ་ལས་སྐྱེས་པའི་པད་སྡོང་ཉི་ཤུ་རྩ་ལྔས་དབུའི་གཙུག་ཏོར་བར་སླེབ་པའི་བཅུ་གསུམ་པ་ཐུགས་ཀྱི་ཐུགས་སྟོང་གསུམ་བྱེ་བ་ཕྲག་བརྒྱ་མི་མཇེད་འཇིག་རྟེན་གྱི་ཁམས་སྟོན་པ་ཤཱཀྱ་ཐུབ་པ་གཅིག་གི་འདུལ་ཞིང་། འདི་ནི་སངས་རྒྱས་ལས་ཀྱང་དཀོན་པའི་གསང་སྔགས་རྡོ་རྗེ་ཐེག་པས་འདུལ་བའི་ཞིང་རྨད་དུ་བྱུང་བའི་ཕྱིར། མཆོག་གི་སྤྲུལ་པའི་སྐུ་ཤཱཀྱ་ཐུབ་པས་གཟུགས་སྐུ་མྱ་ངན་ལས་འདས་ནས་ལོ་ཉི་ཤུ་བརྒྱད་ན་གསང་བའི་བདག་པོའི་དམ་པའི་རིགས་ཅན་དྲྭ་མ་ལྔ་སོགས་ལ་གསང་རྒྱུད་རྣམས་བཟླས་ཏེ་གསུངས་པ་ཕྱག་རྡོར་གྱི་སྤྲུལ་པ་སྐལ་ལྡན་རྒྱལ་པོ་ཛཿ འམ་ཨིནྡྲ་བྷུ་ཏི་ལ་བཀའ་བརྒྱུད་རྟགས་ཀྱི་གླེགས་བམ་གྱི་དབང་ཐོབ་པས་རྒྱུད་དོན་ཐུགས་སུ་ཆུད་པ་སོགས་རིག་པ་འཛིན་པ་རྣམས་ལས་བརྒྱུད་དེ་མི་ཡུལ་དུ་དར་བར་མཛད་པ་དང་། སྒྲུབ་སྡེ་རྣམས་མཁའ་འགྲོ་ལས་ཀྱི་དབང་མོ་ཆེས་མཆོད་རྟེན་བདེ་བྱེད་བརྩེགས་པར་སྦས་པ་བཀའ་བབ་རིག་འཛིན་བརྒྱད་དང་། ཀུན་འདུས་གསུང་རྡོ་རྗེ་པདྨ་སཾ་བྷ་ཝས་སྤྱན་དྲངས་པ་དང་། རྫོགས་པ་ཆེན་པོའ་ིརྒྱུད་འབུམ་ཕྲག་དྲུག་ཅུ་རྩ་བཞི་ནི། སྟོན་པ་བཅུ་གཉིས་ཀྱིས་ལྷ་དང་མིའི་ཡུལ་དུ་དར་ཞིང་རྒྱས་པར་མཛད་པ་རྣམས་རིག་འཛིན་དགའ་རབ་རྡོ་རྗེ་དང་། རྡོ་རྗེ་སེམས་དཔའ་ལས་གསན་ནས་རྒྱལ་ཐབས་སྤྱི་བླུགས་ཀྱི་དབང་བསྐུར་བས་ཡི་དམ་ལྷའི་དབང་ཐོབ། རིག་འཛིན་ཤཱི་སེང་ཧ་ལས་རིག་པ་རྩལ་གྱི་དབང་ཐོབ་པ་གུ་རུ་པདྨ་སཾ་བྷ་ཧ་ཁམས་གསུམ་ཡོངས་སྒྲོལ། སྲིད་གསུམ་གཏིང་དཀྲུགས། དུག་གསུམ་རྩད་ནས་ཆོད་དེ་སངས་རྒྱས་ཐམས་ཅད་དང་སྐུ་གསུང་ཐུགས་ཡོན་ཏན་ཕྲིན་ལས་ཐ་མི་དད་པར་གྱུར་ནས་རྒྱུད་ལུང་མན་ངག་མཐའ་དག་གི་གསང་མཛོད་བརྙེས། ཉང་ཏིང་འཛིན་བཟང་པོས་སྟོང་གསུམ་གཟིིགས་པའི་སྤྱན་ཅན་གྱིས་བསྐུལ་ཏེ་རྒྱ་གར་རྒྱལ་པོའ་ིམཆོད་གནས་པཎྚི་ཏ་ལྔ་བརྒྱ་ལྔ་ཚིག་དང་དབུས་སུ་བཞུགས་པའི་མཁས་པ་བི་མ་མི་ཏྲ་ལ་ཡར་མར་གྱི་སྤྱན་དུས་གཅིག་ཏུ་གཟིགས་ནས་བོད་ཡུལ་ཕེབས་པར་ལུང་བསྟན་པ་ལྟར་བྱོན་ནས་མདོ་རྒྱུད་སྤྱི་དང་ཁྱད་པར་རྫོགས་པ་ཆེན་པོའ་ིབསྟན་པ་སྤེལ་བ་ལ་དགེ་བའི་བཤེས་གཉེན་གྱི་དབང་ཐོབ་པ་སྟེ། དབང་གི་ཆུ་བོ་བཞི་ཡིས་མཚོན་སྟོན་པ་དངོས་ཀྱིས་ཨོ་རྒྱན་གྱི་རྒྱལ་པོ་ལ། ཨིནྡྲ་བྷུ་ཏི་ལ་གསང་བ་འདུས་པ། ཤམྦྷ་ལར་གསང་བདག་ཟླ་བ་བཟང་པོ་ལ་དུས་འཁོར་སློབ་དཔོན་སངས་རྒྱས་ཡེ་ཤེས་ཀྱིས་འཇམ་དཔལ་དབྱངས་དངོས་ལས་ལུང་ནོས་ཏེ། ཀྲྀ་ཡོག་སྡེ་གསུམ་དང་། འདས་སྒྱུ་མཉམ་སྦྱོར་ཟླ་གསང་ཁྲོས་པ་རྒྱ་ཆེར་སྤེལ་བས་མཚོན་གསར་རྙིང་གི་མཁས་གྲུབ་ཀུན་ལ་གྲགས་པའི་རྡོ་རྗེ་ཐེག་པའི་རྒྱུད་སྡེ་རིན་པོ་ཆེའི་གསང་མཛོད་མཐའ་དག་བཞུགས་པ་ནུབ་ཕྱོགས་ཨོ་རྒྱན་གྱི་ཡུལ་འཕུར་འགྲོའ་ིམཁའ་འགྲོའ་ིགནས་སུ་བཞུགས་པའི་གསང་སྔགས་རྡོ་རྗེ་ཐེག་པའི་བསྟན་པའི་འབྱུང་གནས་ཨུ་རྒྱན་ངྷརྨ་གཉྫའི་ཡུལ་གྱི་རྒྱུད་ལུང་མན་ངག་མིག་སྲོག་ལྟ་བུ་རྣམས། སྟོན་པ་ཐམས་ཅད་མཁྱེན་པས་འཇམ་དཔལ་རྩ་རྒྱུད་ལས་ལུང་བསྟན་པ་བཞིན། ཀུན་བཟང་རྣམ་འཕྲུལ་ཐོ་རི་སྙན་ཤལ་གྱི་རིང་ལ་དམ་པ་ཆོས་ཀྱི་དབུ་བརྙེས། སྤྱན་རས་གཟིགས་དངོས་སྲོང་བཙན་སྒམ་པོས་སྲོལ་བཏོད། ཁྱད་པར་དུ་འཕགས་པ་འཇམ་དཔལ་དབྱངས་དངོས་ཆོས་ཀྱི་རྒྱལ་པོའ་ིཚུལ་དུ་སྣང་བ་མངའ་བདག་ཚངས་པ་ལྷའི་མེ་ཏོག་གི་ཐུགས་བསྐྱེད་དུས་སུ་བབ་སྟེ། རྒྱལ་བསྟན་རིན་པོ་ཆེ་དཀར་འབྱམས་སུ་བརྡལ་བའི་གནས་ནི། ཕྱི་ལྟར་གངས་རི་དཔལ་དང་ལྡན་པའི་ཕྲེང་བས་བསྐོར་བ་འཕགས་མཆོག་འཇིག་རྟེན་དབང་ཕྱུག་ཕྱག་མཚན་དུ་བཞེས་པའི་ཡུལ་ལྗོངས། ནང་ལྟར་གསང་སྔགས་རྡོ་རྗེ་ཐེག་པའི་དངོས་གྲུབ་ཀྱི་འབྱུང་གནས་དུས་སྦྱོར་དང་རྟེན་འབྲེལ་གནས་སུ་དག་པའི་ཡུལ་ཉེར་བཞི་ལས། ཟག་བཅས་དང་ཟག་མེད་ཀྱི་བདེ་བ་བཙན་ཐབས་སུ་འདྲེན་པའི་གནས་བདེ་སྐྱོངས་འཁོར་ལོ། གཞན་དུ་ཕྲིན་ལས་རིགས་ཀྱི་གནས་གསང་གནས་རླུང་གི་འཁོར་ལོ་སྟེ། རིགས་གསུམ་རྒྱལ་བའི་སྤྱི་གཟུགས་མཁན་སློབ་ཉི་ཟླ་ཟུང་དང་། རྡོ་རྗེའི་སྐུ་ཅན་བི་མ་ལ་མི་ཏྲ་ལ་སོགས་པའི་པཎ་ཆེན་བརྒྱ་རྩ་བརྒྱད་སྤྱན་དྲངས། གཙུག་ལག་ཁང་བཞེངས། དགེ་འདུན་གྱིི་སྡེ་བཙུགས། དམ་པའི་ཆོས་བསྒྱུར་བཤད་ཉན་གསུམ་གྱིས་གཏན་ལ་ཕབས་ནས་སངས་རྒྱས་ཀྱི་བསྟན་པ་དར་རྒྱས་སུ་མཛད་ཅིང་། ཁྱད་པར་རྒྱ་གར་གྱི་དབང་གི་ཆུ་བོ་བཞི་ཀ་འདུས་པ་སངས་རྒྱས་གཉིས་པ་པདྨ་ཀཱ་ར་ཉིད་ཀྱིས་བསམ་ཡས་མཆིམས་ཕུ་བྲག་དམར་ཀེའུ་ཚངས་ནས་སྒྲུབ་པ་བཀའ་བརྒྱད་ཀྱི་འཁོར་དུ་རྗེ་འབངས་སྙིང་གི་བུ་དགུར་དབང་བསྐུར་ནས་མངའ་བདག་རྒྱལ་པོའི་མེ་ཏོག་དབུས་ཀྱི་ཆེ་མཆོག་ལ་བབ་པ་སོགས་རིགས་ཀྱི་དཀྱིལ་འཁོར་དུ་སྒྲུབ་པས་ལྷ་དང་གཉིས་སུ་མེད་པའི་གོ་འཕང་བརྙེས་ཏེ་རྫུ་འཕྲུལ་སྣ་ཚོགས་བསྟན་པར་མཛད། ཁྱད་པར་གཉགས་ཛྙཱ་ན་ཀུ་མཱ་རའམ་གསང་མཚན་དྲི་མེད་ཟླ་ཤར་དུ་གྲགས་པ་དང་། ལོ་ཆེན་བཻ་རོ་ཙཱ་ནས་རྒྱ་གར་ནས་སློབ་དཔོན་དགའ་རབ་རྡོ་རྗེ་དང་། འཇམ་དཔལ་བཤེས་གཉེན་ལས་དབང་ཐོབ། བོད་ནས་སློབ་དཔོན་ཉིད་དང་དགོངས་པ་མཉམ་པའི་ལོ་ཆེན་བཻ་རོ་ཙཱ་ན་དང་། རྒྱ་གར་གྱི་སློབ་དཔོན་ཧཱུཾ་ཀ་ར་ལས་དབང་ནོས་ཤིང་ཉི་ཟླ་སྟོད་ལ་གནོན་ནུས་པ་གནུབ་ནམ་མཁའི་སྙིང་པོས་ཀྱང་གཉགས་ལ་དབང་བསྐུར། བོད་ཀྱི་དབང་གི་ཆུ་བོ་བཞི་འདུས་གཉགས་ལོ་ཆེན་པོའ་ིགནུབ་ཆེན་སངས་རྒྱས་ཡེ་ཤེས་དང་སོག་པོ་ལྷ་དཔལ་ལ་དབང་བསྐུར། དེས་གནུབ་ཡོན་ཏན་རྒྱ་མཚོ་ལ་བཀའ་བབ་བཞིའི་སྟེང་པཱན་ཏ་ལའི་དབང་བཀའ་དང་ལྔ་འདུས་པས་རིམ་པར་གྲུབ་ཐོབ་དངོས་གྲུབ་པར་བརྒྱུད། དེ་ལས་མངའ་བདག་ཉང་རལ་པ་ཅན་གྱིས་གསན་ཅིང་བཀའ་བརྒྱད་ཀུན་གྱི་ཕྱི་མོ་བདེ་གཤེགས་འདུས་པའི་ཆོས་གཏེར་གྱི་བཀའ་བབ། དེ་ལས་རིམ་བརྒྱུད་ཀྱིས་ཆོས་རྒྱལ་ཐུགས་སྒྲུབ་མངའ་རིས་པཎ་ཆེན་པདྨ་དབང་གི་རྒྱལ་པོས་གསན་པ་རྒྱ་མཚོ་ལྟ་བུའི་ཡང་སྙིང་བཀའ་བརྒྱད་བདེ་འདུས་ཁོ་ནའི་ཚར་ཉེར་ལྔ་གསན་པ་དང་། གཞན་ཡང་མངའ་བདག་གསུང་སྤྲུལ་གུ་རུ་ཆོས་ཀྱི་དབང་ཕྱུག་གི་གཏོར་བྱོན་བཀའ་བརྒྱད་གསང་རྫོགས། སྣ་ནམ་རྡོ་རྗེ་བདུད་འཇོམས་ཀྱི་རྣམ་འཕྲུལ་མཆོག་གི་སྤྲུལ་སྐུ་རྣམ་གསུམ་གྱི་ཡ་གྱལ་རིག་འཛིན་དངོས་གྲུབ་རྒྱལ་མཚན་གྱི་ཟབ་གཏེར་བཀའ་བརྒྱད་རང་ཤར་ཞེས་གཏོར་བྱོན་བཀའ་བརྒྱད་རྣམ་གསུམ་དང་། མངའ་རིས་པཎ་ཆེན་རིན་པོ་ཆེའི་ཟབ་གཏེར་བླ་མ་བཀའ་བརྒྱད་རིག་འཛིན་ཡོངས་འདུས་དང་། ཀུན་མཁྱེན་པྲཛྙཱ་རསྨིའི་ཟབ་གཏེར་གྲོལ་ཐིག་ལམ་རྒྱས་པའི་ཡང་སྙིང་ལྟ་བུ། ཀློང་ཆེན་སྙིང་ཐིག་གི་ཡི་དམ་སྤྱི་སྒྲུབ་རིག་འཛིན་ཐུགས་སྒྲུབ་དཔལ་ཆེན་འདུས་པ། ཉང་དང་ཆོས་དབང་བྱང་བདག་རྣམས་ཀྱི་རྣམ་འཕྲུལ་ཀུན་མཁྱེན་བླ་མ་རིག་འཛིན་འཇིགས་མེད་གླིང་པའི་དགོངས་གཏེར་དུ་བྱོན་པས་མཚོན་བཀའ་གཏེར་ལུགས་སྲོལ་བཅུ་དགུ་ཙམ་གྱི་སྨིན་གྲོལ་གྱི་རྒྱུན་ད་ལྟའང་མ་ཉམས་པ་བཞུགས་ཤིང་དངོས་གྲུབ་བརྙེས་པ་ཟམ་མ་ཆད་པར་བྱོན་པ་ལས། དེ་དག་གི་བཀའ་སྲོལ་རྒྱ་མཚོའི་རྒྱུན་འཇམ་པའི་དབྱངས་དངོས་ཆོས་རྒྱལ་ཁུ་དཔོན་གྱི་མི་སློབ་ཡེ་ཤེས་ཆེན་པོའི་རང་གཟུགས་གངས་ཅན་ཐུབ་པ་ཡོངས་རྫོགས་ཀྱི་མངའ་བདག་འཇམ་མགོན་ཆོས་ཀྱི་རྒྱལ་པོ་རྣམ་གཉིས་ཀྱིས་གསན་བསམ་སྒོམ་པ་མཐར་ཕྱིན་པར་མཛད། གུ་རུ་རིན་པོ་ཆེ་དང་། བཀའ་བབ་རིག་འཛིན་རྣམ་བརྒྱད། རྗེ་འབངས་རྣམས་ཀྱང་སྨིན་གྲོལ་དངོས་སུ་གསན་ཅིང་། སྔོན་མེད་གསང་བ་དུ་མས་བཀའ་བབ་ཀྱི་ཤིང་རྟ་ཆེན་པོར་གྱུར་པས་མཚོན་བསྟན་པ་མཐའ་ནས་མཐའ་རུ་རྒྱས་པའི་བཀྲ་ཤིས་ཤོག་ཅེས་བསྟན་པའི་བབ་ལོ་རྒྱུས་དང་འབྲེལ་བ་དང་། གླིང་བཞིའི་གཙོ་བོ་འཛམ་གླིང་ལས་ཀྱི་ས་པའི་ཡུལ་གྱི་ལྟེ་བ་སྐལ་བཟང་སངས་རྒྱས་སྟོང་སངས་རྒྱས་པའི་གནས་རྒྱ་གར་རྡོ་རྗེ་གདན་བསྐལ་པ་འཕོ་འཇིག་གི་དུས་ཀྱང་མེ་བདུན་ཆུ་གཅིག་གིས་འཇིག་པ་མེད་པར་གནས་པའི་རྡོ་རྗེ་ཕ་ལམ་ལས་གྲུབ་པའི་ལྟེ་བ་ལས་བྱང་ཆུབ་ཀྱི་ཤིང་འཁྲུངས་ཤིང་། རྭ་བཞིར་རྡོ་རྗེ་ཕུར་པའི་མཆོད་རྟེན་བཞིས་མཚོན་པ། ནང་ལྟར་རྡོ་རྗེ་ཕུང་པོའ་ིསྙིང་ག་ཆོས་ཀྱི་འཁོར་ལོར་རླུང་སེམས་ཀྱི་དྭངས་མ་མི་ཤིག་ཐིག་ལེའི་དབྱིབས་སུ་ཞུགས་ནས་ཐིམ་པས་མངོན་པར་སངས་རྒྱས་བར་གསུངས་པ་ནི་འཇིག་རྟེན་གྱི་ཉི་མ་ཐོག་མར་འཆར་བའི་གནས་དང་། མཉམ་མེད་ཐུབ་པའི་བསྟན་པ་རིན་པོ་ཆེ་བྱང་ནས་བྱང་དུ་དར་ཞིང་རྒྱས་པར་ལུང་བསྟན་པ་བཞིན། འཕགས་ཡུལ་གྱི་བྱང་ཐུབ་པ་མཆོག་གིས་འཕགས་པ་ཐུགས་རྗེ་ཆེན་པོ་ལ་གཉེེར་དུ་གཏད་པའི་གངས་ཅན་རྟེན་གྱི་སྣོད་བེམ་པོའ་ིདངོས་པོ་ས་རྡོ་རྣམས་ཀྱང་སྐུ་དང་ཡིག་འབྲུའི་བཀའ་རྟགས་རང་བྱོན་གྱི་བཀོད་པ་དང་། བརྟེན་པ་མིའི་འགྲོ་བ་བསྐྲུན། འཕགས་པ་ཉིད་གང་འདུལ་སྤྲུལ་པའི་རོལ་གར་སྣ་ཚོགས་རྒྱུན་མི་འཆར་པས་བྱིས་པ་སྨྲ་ཤེས་པ་ཚུན་ཆད་ཡི་གེ་དྲུག་པའི་སྒྲ་རྩོལ་མེད་དུ་འབྱུང་བས་སྣོད་བཅུད་གཉིས་ཀ་རི་བོ་གྲུ་འཛིན་དང་གཉིས་སུ་མེད་པར་བྱིན་གྱིས་བརླབས་པའི་གཡོ་རུ་ཁྲ་འབྲུག་བྱམས་པ་མི་འགྱུར་གྱི་གཙུག་ལག་ཁང་དུ་སློབ་དཔོན་སངས་རྒྱས་གཉིས་པ་ལྷོ་ནུབ་སྲིན་ཡུལ་དུ་གཤེགས་ཁར་རྗེ་འབངས་འདུས་པ་ཉེར་གཅིག་ལ་བཀའ་འདུས་ཆོས་ཀྱིི་རྒྱ་མཚོའི་ཆོས་འཁོར་བསྐོར་བ་དང་། བོད་སྲིན་མོ་གན་རྐྱལ་གྱི་ས་གནད་གནོན་པའི་སྙིང་དང་སྙིང་ཁྲག་གི་རུ་གནོན་འཕྲུལ་སྣང་དང་ར་མོ་ཆེའི་གཙུག་ལག་ཁང་གི་རྟེན་གཙོ་སྟོན་པའི་ཞལ་སྐྱིན་རྣམ་གཉིས་དང་རང་བྱོན་འཕགས་པའི་རྟེན་བཞུགས་སུ་གསོལ་བས་གཙོར་མཛད། མཐའ་འདུལ་དང་ཡང་འདུལ་རུ་གནོན་གྱི་ལྷ་ཁང་རྟེན་དང་བརྟེན་པར་བཅས་པ་དང་། ཁྱད་པར་འཕགས་ཡུལ་བཤད་སྒྲུབ་འབྱུང་བའི་གནས་བིཀྲ་མ་ཤཱི་ལ་ལ་དཔེ་བྱས་ཏེ་རི་རབ་གླིང་བཞི་ཉི་ཟླ་ལྕགས་རི་དང་བཅས་པའི་ཚུལ་དུ་ཡོད་པའི་ཆོས་འཁོར་ཆེན་པོ་ལུགས་གསུམ་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་བཞེངས། ཧས་པོ་རི་རྩེར་བྱོན་ནས་ནམ་མཁའ་ལ་རྡོ་རྗེའི་གར་དང་། དྲེགས་པ་ཟིལ་གནོན་གྱི་ཐ་ཚིག་བསྒྲགས་ནས་དགོངས་པས་གཟིར་བ་སོགས་ཀྱིས་མངའ་རིས་ནས་མདོ་ཁམས་བར་གྱི་ལྷ་སྲིན་ཆེ་ཕྲ་ཐམས་ཅད་དམ་ལ་བཏགས་ཤིང་ཆོས་ཀྱི་སྲུང་མར་བསྐོས། ལོ་པཎ་བསྡེབས་པ་ཡོངས་སུ་གྲགས་པ་བརྒྱ་རྩ་སྤྱན་དྲངས་པས་མཚོན་མདོ་སྔགས་ལུང་རྟོགས་ཀྱི་ཆོས་བཤད་ཉན་བསྒྱུར་གསུམ་དང་། བསྟན་པའི་སྦྱིན་བདག་ས་ལ་གནས་པའི་འཕགས་པ་རིགས་གསུམ་མགོན་པོ་ཆོས་སྐྱོངས་པའི་རྒྱལ་པོའི་ཚུལ་དུ་བསམ་བཞིན་བྱོན་ནས་རྒྱལ་བསྟན་རིན་པོ་ཆེ་དར་རྒྱས་ཡུན་དུ་གནས་པར་མཛད་པའི་མཆོད་ཡོན་ཐམས་ཅད་གདན་འཛོམས་པའི་ཕྱག་རྗེས་སུ་སྐུ་རྟེན་གཙུག་ལག་ཁང་གི་གཙོ་བོ་ར་ས་འཕྲུལ་སྣང་བོད་ཡུལ་དབུས་འགྱུར་འཆང་། ལུགས་གསུམ་མི་འགྱུར་ལྷུན་གྱིས་གྲུབ་པའི་བསམ་ཡས། ཁྲ་འབྲུག་བྱམས་པ་མི་འགྱུར་ཏེ་གངས་ཅན་མཛེས་པའི་ཆོས་འཁོར་གསུམ་དང་འབྲེལ་བར་རྡོ་རྗེའི་གནས་ཆེན་པོ་གསུམ་དུ་མཆིམས་ཕུའི་རྗེ་འབངས་ཉེར་ལྔ། ཡེར་པའི་གྲུབ་ཆེན་བརྒྱད་ཅུ ། ཤེལ་བྲག་གི་སྔགས་པ་སུམ་ཅུ་སོགས་ཀྱིས་བསྟན་པ་སྙིང་པོ་འཕགས་ཡུལ་ལས་ཀྱང་ལྷག་པའི་གསར་རྙིང་རིགས་སུ་མ་ཆད་བའི་སྡེ་སྣོད་གསུམ་དང་། རྒྱུད་སྡེ་ཆེན་པོ་བཞིའིི་མདོ་སྔགས་ཀྱི་བསྟན་པ་ཡོངས་སུ་རྫོགས་པ་དར་བ་གངས་ཅན་གྱི་ལྗོངས་སུ་མཐའ་འདུལ་ཡང་འདུལ་གྱི་གཙུག་ལག་ཁང་། གསུང་རྟེན་མདོ་སྔགས་རིག་གནས་དང་བཅས་བསྒྱུར་བཤད་ཉན་གསུམ་མཛད་པའི་ཐུགས་རྟེན་དབུ་ཟླུམ་མདོའ་ིསྡེ་དང་། གོས་དཀར་ལྕང་ལོའ་ིསྡེ་གཉིས་ཀྱིས་དགེ་འདུན་འདུས་པའི་སྡེའི་ཐུགས་བསྐྱེད་དང་སྨོན་ལམ་ཕྲིན་ལས་ཀྱི་ཤིང་རྟས་ཕན་བདེའི་རྩ་ལག་རྒྱལ་བསྟན་རིན་པོ་རྟག་ཁྱབ་ལྷུན་གྱིས་གྲུབ་པའི་ཚུལ་གྱིས་ཡུན་རིང་དུ་གནས་པའི་བཀྲ་ཤིས་ཤོག། །དེ་ལྟར་བཤད་པ་དེ་དག་ཇི་ལྟར་ཉམས་སུ་ལེན་པའི་ཚུལ་གནད་དུ་དྲི་ལན་གསང་སྔགས་ཀྱི་བསླབ་པའི་མཐའ་བཅུའམ་དྲུག་ཏུ་འདུས་པར་ཤེས་པར་བྱ་སྟེ། རིག་འཛིན་རྩ་རྒྱུད་ཐོད་པའི་དུམ་བུ་ལས། དེ་ལ་རྒྱུད་ལུང་མན་ངག་གི༔ ཁྱད་པར་འདིི་ལྟར་ཤེས་བྱ་སྟེ༔ སྟོན་པས་བཀའ་སྩལ་རྒྱུད་ཡིན་ལ༔ ཞུ་བ་པོ་ཡིས་བསྡུས་པ་ལུང་༔ དེ་ལ་དཀྱུས་དང་དཀྲུགས་དང་གབ༔ ཇི་བཞིན་གསལ་བ་མན་ངག་སྟེ༔ ཅེས་གསུངས་པའི་དོན་ལ་རྒྱུད་ཐོབ་པས་གྲོལ་རྟ་ཕོ་སྒྲོགས་སུ་བཀྲོལ་བ་ལྟ་བུའི་བླང་དོར་གྱི་མིག་ཕྱེད། བར་དུ་སྒོ་ཀུན་ནས་ཚོལ་བ་བུང་བ་ཚང་ཚོལ་བ་ལྟ་བུའི་མང་དུ་ཐོས་པའི་སྙིང་པོའ་ིམཛོད་བསགས། མཐར་མདོ་གཅིག་ཏུ་བསྡུས་པ་ཚོང་པ་ཁེ་ཚོལ་བ་ལྟ་བུའི་དོན་གནད་དུ་ཕོག་པས་ཐོས་པས་རྒྱུད་དོན་ཤེས་བསམ་པས་ལུང་གི་དོན་གནད་དུ་བརྡེག་ནས་ཉམས་སུ་བླངས། སྒོམ་པས་མན་ངག་གི་གནད་རིག་ནས་ཐེ་ཚོམ་མེད་པའི་གདིང་ཐོབ་སྟེ། མཁས་པའི་ཕུལ་དུ་ཕྱིན་པ་རི་མཐོན་པོའ་ིརྩེར་ཕྱིན་པ་ལྟ་བུའི་བསླབ་པ་བཞིའི་སྒྲོ་འདོགས་བཅད་པའི་སྟེང་ཉམས་ལེན་གྱི་ལམ་ཀྱང་། སྔ་མ་ལས། རྟག་ཆད་ལས་གྲོལ་ལྟ་བ་དང་༔ ཡུལ་དུས་འབྲེལ་བའི་སྤྱོད་པ་དང་༔ དཀྱིལ་འཁོར་ཕྱག་རྒྱ་གསལ་རྫོགས་དང་༔ ཕྲིན་ལས་བཞི་ཡི་མཐའ་བསྒྱུར་དང་༔ འཇུག་སྒོ་དབང་གི་བྱེ་བྲག་དང་༔ དེ་ཡི་སྲོག་འཛིན་དམ་ཚིག་དང་༔ ལྷ་ཡི་སྙིང་པོ་སྲོག་སྔགས་དང་༔ བདེན་པའི་མཐུ་ཅན་ཕྱག་རྒྱ་དང་༔ ལྷ་དང་སྙིང་ཉེར་བསྙེན་པ་དང་༔ ཚོམས་བུ་ཚོགས་ཀྱི་སྒྲུབ་པ་དང་༔ བསོད་ནམས་ཚོགས་སྤེལ་མཆོད་པ་སྟེ༔ རྒྱུད་ཀྱི་དངོས་པོ་བཅུ་གཅིག་གི༔ མདོ་ཚངས་ཡིན་པས་མཁས་པས་བཟུང་༔ ཞེས་གསུངས་པ་མཚན་ཉིད་ཐེག་པས་ཕ་རོལ་ཏུ་ཕྱིན་པ་བཅུའི་བདག་ཉིད་དུ་བསྟན་པ་གང་རིམ་པའི་དབང་གིས་བསྒྲོད། གཞི་དམ་ཚིག་གིས་བཟུང་། ཐག་ལྟ་བས་བཅད། ཉམས་སུ་ཏིང་ངེ་འཛིན་གྱིས་བླངས། ལམ་སྤྱོད་པས་དོར། དོན་མན་ངག་གིས་སྒྲུབ་པའི་མཐའ་དྲུག་ཏུ་འདུས་ཏེ་དབང་དཀྱིལ་འཁོར་ལ་བསྟེན་དགོས་པ་དང་། བསྙེན་སྒྲུབ་མཆོད་པ་སྔགས་ཕྱག་རྒྱ་ཐམས་ཅད་ཏིང་ངེ་འཛིན་གྱི་ཡན་ལག་ཏུ་ཚོགས་དགོས་པ་དང་། དེ་ཐམས་ཅད་ལས་ཕྲིན་ལས་འབྱུང་བའི་ཕྱིར་སྤྲོས་པ་ཙམ་སྟེ། དེ་ལྟར་ཉམས་སུ་བླང་བས་ལྟ་བ་ཆོས་ཉིད་ཀྱི་རྫོགས་ཟིན་པས་ཐེ་ཚོམ་གྱི་འཕྲང་ལས་གྲོལ། སྒོམ་པ་གསལ་འགྲིམ་མེད་པས་བྱིང་རྒོལ་གཉིས་འཛིན་གྱི་འཕྲང་ལས་བརྒལ། སྤྱོད་པས་འཁོར་འདས་ཀྱི་སྲོག་འཕྲོག་པས་ཐེག་དམན་གྱི་འཕྲང་ལས་གྲོལ་བའི་ཕྱིར། མ་ཧཱ་ཡོ་གའི་བསྐྱེད་རིམ་གསལ་བ་གསུམ་གྱིས་ཉམས་ལྔ་མཐར་སོན་ནས་དེ་ལ། ཨ་ནུས་རྫོགས་རིམ་གྱི་རྣམ་འབྱོར་ཟབ་མོའ་ིརྒྱས་ཐེབས་པས་བོགས་དབྱུང་སྟེ། རྣམ་སྨིན་ཚེ་དབང་ཕྱག་རྒྱ་ཆེ༔ ལྷུན་གྲུབ་རིག་འཛིན་རྣམ་པ་བཞིའི༔ གོ་འཕང་མཆོག་ལ་གནས་པའོ༔ ཞེས་པ་ལྟར་ལམ་ལྔ་ས་བཅུའི་སྤངས་རྟོགས་བསྒྲོད་པས་རིག་འཛིན་བཞིའི་གོ་འཕང་མངོན་དུ་བྱེད་ཚུལ་རྒྱས་པ་རིག་འཛིན་འདུས་པའི་གབ་བྱང་ལས་འབྱུང་བ་བཞིན་མཐར་སོན་པས་ཕྱི་དགྲ་ང་ཡིར་འཛིན་པ་ལས་བྱུང་བའི་འབྱུང་བཞིའི་གནོད་པ་དང་དགྲ་བགེགས་ཀྱི་འཚོ་བ། ནང་དགྲ་ངར་འཛིན་ལས་བྱུང་བའི་ནད་དང་ཉོན་མོངས། གསང་དགྲ་གཟུང་འཛིན་འཁྲུལ་རྟོག་འཕོ་བའི་བག་ཆགས་དག་པས་འཇིགས་པའི་དགྲ་གསུམ་སོད་དེ། ཐབས་སྦྱོར་སྒྲོལ་གྱི་སྤྱོད་པ་རྨད་དུ་བྱུང་བས་ཉོན་མོངས་དུག་ལྔ་ཡེ་ཤེས་ལྔར་དག་ཅིང་དགག་སྒྲུབ་བླང་དོར་ལས་འདས་པའི་རིག་པ་ནམ་མཁའ་ལྟ་བུའི་དགོངས་པ་ཀློང་དུ་གྱུར་པས་ཉོན་མོངས་པའི་བདུད་ཚོམས། ཐ་མལ་གྱི་ཕུང་ཁམས་དྭངས་མའི་ཐིག་ལེར་སྨིན་ཏེ་རིགས་ལྔ་གདན་གསུམ་གྱི་འཁོར་ལོར་ཤར་བས་དངོས་འཛིན་གྱི་བདག་དག་པས་ཕུང་པོའ་ིབདུད་ཚོམས། སྣང་བརྟགས་ཤེས་བྱའི་ཆོས་ལ་བདག་མེད་རོ་མཉམ་ཆེན་པོའ་ིགཉིས་མེད་རང་བྱུང་གི་ཡེ་ཤེས་རྟོགས་པས་བསླུ་བྲིད་ལྷའི་བུའི་བདུད་ཚོམས། སྐྱེ་འཆི་བར་དོའ་ིམཚན་རྟོགས་ཀ་ནས་དག་པས་ཡེ་གནས་གསལ་འགྲིབ་མེད་པ་ཆོས་སྐུའི་ངོ་བོར་འཆི་བདག་གི་བདུད་ཆོམས་ཏེ་ལས་ཉོན་རིགས་དྲུག་གི་གཡང་ས་ཤེར་ཏིང་གི་ནུས་པས་ཆོད་ནས་དོན་གཉིས་ལྷུན་གྲུབ་སྲིད་ཞིའི་སྤྱི་དཔལ་ཆེན་པོའ་ིསྐུ་གསུང་ཐུགས་རྡོ་རྗེའི་ཡེ་ཤེས་ཀྱི་དབྱིངས་སུ་མངོན་པར་བྱང་ཆུབ་པའི་གོ་འཕང་བདེ་བླག་མངོན་དུ་བྱེད་པའི་ཚུལ་ཏེ་དཔལ་ཆེན་ཞལ་ལུང་འདི་ལ་ནང་རྒྱུད་ཡོ་ག་གསུམ་གྱི་ཟབ་གནད་རྒྱ་ཆེར་བཞུགས་པ་ལས། སྐབས་སུ་བབ་པ་མ་ཧཱ་ཡོ་གའི་ལམ་གནད་གལ་ཆེ་བ་དཔལ་འདུས་སུ་སྦྱར་འོས་པ་དག་འཕྲོས་དོན་གྱི་ཚུལ་དུ་རང་བློས་ཇི་ལྟར་དཔོག་ཚོད་འདུས་གསལ་དུ་སྨོས་ཟིན་ཏོ།། །།མཁྱེན་གཉིས་དཀྱིལ་འཁོར་རྫོགས་པའི་ཡེ་ཤེས་རྩལ། །ལྔ་བདོའ་ིའགྲོ་བ་རྗེས་བརྩེའི་ཉིན་མོར་བྱེད། །རྨད་བྱུང་ཕྲིན་ལས་འོད་ཟེར་མཁའ་ཁྱབ་ཞིང་། །སྤྲོ་མཛད་ཀུན་མཁྱེན་ཁྱོད་མཚུངས་གཞན་སུ་ཞིག །མཚན་དཔེའི་ཞལ་མཇལ་སྐལ་པ་ཕྲ་ན་ཡང་། །ངེས་གསང་དགོངས་བཅུད་ཆོས་སྐུའི་མཆོད་སྡོང་ཆེ། །མངོན་སུམ་སྤྱོད་ལ་ཡིད་ཆེས་དད་པ་དང་། །ལྷག་པའི་བསམ་པའི་བསྙེན་བཀུར་ཕྲ་མོ་ཞུས། །ཆ་ཤས་ཙམ་ལ་རྒྱུད་ཀྱི་དངོས་པོ་ཀུན། །རྫོགས་པས་རྡོ་རྗེའི་ཚིག་གི་རྒྱ་དཀྲོལ་ལ། །ལེགས་བཤད་དབྱངས་ཀྱི་རྒྱལ་མོའ་ིམགྲིན་པའི་གླུ། །ཆོས་དབྱིངས་ཁྱད་པར་བརྡལ་ཡང་ཟད་མི་ཤེས། །དེ་ལྟ་ན་ཡང་བློ་དང་འཚམས་པའི་ངག །གོ་སླ་གནད་འདུས་རང་དང་སྐལ་མཉམ་ལ། །ཕན་འདོད་ཁོ་ནས་དམ་པའི་ལེགས་བཤད་བཅུད། །སོར་མོའ་ིབུང་བས་བསྡུས་པའི་ཟེག་མ་ཙམ། །ཟབ་དོན་སྙིང་ཐིག་རྫོགས་ལྡན་ནོར་བུའི་སྤྲིན། །དུས་མཐའི་རླུང་གིས་དབྱིངས་སུ་སྡུད་ཉེ་ཚེ། །རྣམ་བཤད་ཐོ་རངས་སྐར་མ་འདི་ཙམ་ཡང་། །ཐེག་མཆོག་ཉིན་བྱེད་འདྲེན་པའི་ལྟས་སུ་རློམས། །མ་བརྟགས་གྱི་ནར་འཕྱན་པའི་ཅོལ་ཆུང་ལ། །བསྟན་པ་རི་མོའ་ིམར་མེས་བསླུ་ནུས་ཀྱང་། །བློ་ཁ་ནང་དུ་ཕྱོགས་པའི་ཆོས་འདོན་དག། །སྲིད་ན་གྲགས་རྗེས་མ་འབྲང་ཆོས་འདིར་ལྟོས། །མཁས་པའི་རྣམ་དཔྱོད་གྲུབ་པའི་ཉམས་མྱོང་གི ། དྲོད་ཚད་མ་ཡལ་ཞལ་རླངས་འདི་ཡིན་པས། །དད་བརྩོན་སྐལ་བཟང་གསེར་གྱི་སྣོད་མཆིས་ན། །སེང་གེའི་འོ་མ་ཐར་འདོད་བཅུད་དུ་ལོངས། །འདི་ལ་བརྟེན་ནས་རིག་འཛིན་གྲུབ་པའི་ཁྱུ། །གྲོལ་བ་མངོན་གྱུར་མཁའ་སྤྱོད་ཞིང་མཛེས་ཏེ། །བསྟན་འགྲོར་སྨན་པའི་ཕྲིན་ལས་མ་ཉམས་པ། །ད་ལྟའང་བཞུགས་པའི་ངོ་མཚར་གཟིགས་མཛོད་ཀྱེ། །དེ་ཕྱིར་བདག་རྨོངས་རྟོགས་པའི་གདེང་མེད་ཀྱང་། །ཡིད་ཆེས་དད་པའི་ཉེར་ལེན་ཁོ་ན་ཡིས། །ཆོས་འདི་ཐོས་བསམ་བྱས་པའི་ལག་རྗེས་ཕྱིར། །དེེད་དཔོན་རྒན་པོའ་ིརྒྱུས་ཡོད་ལམ་སྟོན་ལགས། །ཕ་མས་བཟང་པོའ་ིབསགས་པའི་གཅེས་དགུའི་དབྱིག། །རྗེས་འཇུག་བུའི་ཕྱིར་ཐང་མར་བརྡལ་བ་འདི། །རང་ནོར་ངོ་ཤེས་པ་ལས་གསེར་བཞིན་དུ། །སྙིང་པོ་ལེན་པ་བློ་ལྡན་ཅིས་མ་ཡིན། །ཐེག་མཆོག་ཆོས་འཛིན་རྣམ་དཀར་ཐམས་ཅད་ཀྱི། །ཕུལ་དུ་སོན་པ་རྒྱལ་བ་དགྱེས་པའི་སྤྲིན། །མ་ལུས་འགྲོ་ལ་སྨན་པའི་དབྱར་རྔ་བཅས། །རྣམ་གྲོལ་སྙེ་མས་འགྲོ་རྒྱུད་ཁེངས་གྱུར་ཅིག །རྣམ་གཡེང་འདུ་འཛིིའི་གོ་སྐབས་མི་ཕྱེད་པའི། །བྲག་རིའི་ཁང་བཟང་ལྗོན་བཟང་སྐྱེད་ཚལ་ཅན། །བྱ་དང་རི་དྭགས་རྩེ་བའི་མདུན་ས་དེར། །འདི་འདྲའི་མན་ངག་ཡིད་ཀྱི་བཅུད་འགྱུར་ཤོག །ཟིན་མེད་འདིར་སྣང་ཆུ་རིས་རྗེས་གཅོད་དང་། །ཆོས་ལྟར་བཅོས་པའི་ངན་སྤྱོད་རིང་སྤངས་ནས། །འབྲེལ་ཚད་གདོད་མའི་ནང་དབྱིངས་འོད་གསལ་ཆེར། །གྲོལ་བ་དྲུག་གི་ཕྲིན་ལས་ཡོངས་རྫོགས་ཤོག། །ཅེས་པའང་རང་ཉིད་ན་ཚོད་གཞོན་པའི་སྐབས་ལམ་འདིའི་བསྙེན་སྒྲུབ་ལ་བརྩོན་པའི་གཡར་ཁྲལ་གྱི་ཚེ། ཀུན་མཁྱེན་དངོས་ཀྱི་གསུངས་བསྙེན་ཡིག་ནི་བསྙེན་སྒྲུབ་རང་རྐྱང་གི་དམིགས་གནད་དམར་ཁྲིད་ཙམ་ལས་མེད་པས་རང་འདྲའི་བློ་དམན་ལ་ཉེར་མཁོའ་ིཆེད་ཟིན་ཐུན་འདི་ལྟ་བུ་ཞིག་བྲིས་པ། འཇམ་མགོན་བླ་མ་ངྷརྨ་མ་ཏི་དང་རྡོ་རྗེ་མཆེད་གྲོགས་རྣམས་ནས་དགྱེས་ཚུལ་གནང་བས་དབུགས་དབྱུང་ནའང་། དུས་ཀྱི་འགྱུར་བས་དཔེ་མི་སྣང་བར་གྱུར་པ་སླར་ཡང་ལྷོ་འབྲུག་གི་སྨན་ལྗོངས་བུམ་ཐང་ཐར་པ་གླིང་གི་འཇིགས་མེད་རྒྱལ་བའི་དབང་ཕྱུག་སོགས་སྤོངས་བ་པ་འགའ་ཞིག་དང་། བལ་ཡུལ་གྱི་བྱེ་བྲག་ནུབ་རིའི་བླ་མ་ཀརྨ་ཚུལ་ཁྲིམས་མཐར་ཕྱིན་ནས་ལམ་འདིའི་སྒྲུབ་གྲྭ་འཇུགས་པ་ལ་ཉེར་མཁོའ་ིཆེད། ལྷ་རྫས་ཀྱི་རྟེན་དང་བཅས་བསྐུལ་ངོར་མཁས་གྲུབ་ཀྱི་དབང་ཕྱུག་མདོ་ཁམས་ཞེ་ཆེན་རྒྱལ་ཚབ་རིན་པོ་ཆེས་སྒྱུ་འཕྲུལ་དྲྭ་བ་རྩ་བའི་དཀྱིལ་འཁོར་དུ་ཐོག་མར་སྨིན་པར་མཛད་པའི་སྐབས་སྩལ་བའི་མིང་། རང༵་བྱུང༵་འོད་༵གསལ༵་རྡོ་རྗེ་ཐུགས༵་མཆོག་རྩལ༵་ལམ་མིང་གཞན་འཇིགས༵་མེད་༵མཁྱེན་༵བརྩེའི་འོད་༵ ཟེར༵་དུ་ཡང་འབོད་པའི་ཀུ་ས་ལི། སྙིང་ཐིག་བཀའ་གཏེར་གྱི་གདམས་པའི་བདུད་རྩིའི་གསང་མཛོད་ཀྱིས་ཕྱུག་པའི་སྔགས་རིག་འཛིན་པས་ལྷོ་འབྲུག་གི་རྒྱལ་ཁབ་ཀྱི་བྱེ་བྲག་རྟ་བབ་བདེ་ཆེན་རྩེའི་སྨན་ལྗོངས་སུ་བསྙེན་སྒྲུབ་ལ་བརྩོན་པའི་ཐུན་གསེང་རྣམས་སུ་བྲིས་པ་འདིས་ཀྱང་ཀུན་བཟང་ཐུགས་ཀྱི་བསྟན་པ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག། །།དགེའོ།། །། མཁའ་འགྲོ་བདེ་ཆེན་རྒྱལ་མོའི་སྒྲུབ་གཞུང་གི་འགྲེལ་བ་རྒྱུད་དོན་སྣང་བ། འཇིགས་མེད་དགེ་བའི་དཔལ་ཆེན།― ARJ001_Page_0008 ―
[མ་དཔེ་གཟིགས་ན་འདིར་གནོན།]
ཀློང་ཆེན་སྙིང་གི་ཐིག་ལེའི་མཁའ་འགྲོ་བདེ་ཆེན་རྒྱལ་མོའི་སྒྲུབ་གཞུང་གི་འགྲེལ་བ་རྒྱུད་དོན་སྣང་བ་བཞུགས་སོ། ། ― ARJ001_Page_0009 ―
[མ་དཔེ་གཟིགས་ན་འདིར་གནོན།]
གདོད་མའི་མགོན་པོ་ཡེ་ཤེས་ཐུགས་ཀྱི་བདུད་རྩིའི་མཚོར། །རྣམ་པར་རོལ་བ་རྒྱལ་བའི་ཐུགས་བསྐྱེད་པད་སྡོང་རྩེར། །འཇའ་ལུས་རྡོ་རྗེ་མཚན་དཔེ་ཀུན་རྫོགས་པདྨ་ཀཱར། །གང་གི་ཞལ་སྐྱིན་འཇིགས་མེད་གླིང་པར་སྙིང་ནས་འདུད། །རང་བཞིན་གདོད་མའི་དབྱིངས་ན་ཀུན་བཟང་མོ། །ཁ་སྦྱོར་ཡན་ལག་བདུན་ལྡན་ཝ་ར་ཧི། །སྣ་ཚོགས་སྤྲུལ་པའི་རང་ཞལ་མཚོ་རྒྱལ་ལྕམ། །སྐུ་གསུམ་མཉམ་ཉིད་དབྱིངས་ཀྱི་མཁའ་འགྲོར་འདུད། །གང་གི་གསང་གསུམ་རྡོ་རྗེའི་གོ་འཕང་ལ། །སྦྱོར་ཐབས་ཡང་གསང་དགོངས་པའི་གཏེར་བཅུད་ཀྱི། །སྒྲུབ་གཞུང་བདེ་བ་ཆེན་པོའ་ིདཔལ་ཕྲེང་ཉིད། །ཅུང་ཟད་བླ་མའི་ལུང་གིས་གསལ་བར་ཕྱེ། །དེ་ལ་རྫོགས་པ་ཆེན་པོ་ཀློང་ཆེན་སྙིང་ཐིག་གི་རིག་འཛིན་ནང་བསྒྲུབ་ཀྱི་ཡུམ་བཀའ་མཁའ་འགྲོ་བདེ་ཆེན་རྒྱལ་མོའ་ིསྒྲུབ་གཞུང་རྣམ་པར་འགྲེལ་བ་ལ་སྦྱོར་དངོས་རྗེས་གསུམ་གྱི་དང་པོ་སྦྱོར་བ་ལའང་བཤམས་ཆོ་གའི་སྔོན་འགྲོའ།ི ། དང་པོ་ནི། དཀྱིལ་འཁོར་ཟླ་གམ་སྒོ་གཅིག་པུས༔ ཆོས་འབྱུང་དམར་པོ་ལྷ་མཚན་ཅན༔ དེ་སྟེང་བདེ་སྐྱོང་མདཱ་ནཿ ཡང་ན་རིན་ཆེན་སྨན་བཅུད་བསྟམསཿཤེལ་དང་མེ་ལོང་སྲོག་གི་རྟེནཿ ཕྱི་ནང་མཆོད་པས་མཐའ་མ་བསྐོར༔ ཞེས་པས་རིག་འཛིན་ཡབ་བཀའི་དཀྱིལ་འཁོར་དུ་དབང་རྫོགས་པར་ཐོབ་ཅིང་། བྱེ་བྲག་ཏུ་འདི་ཉིད་ཀྱི་བྱིན་རླབས་ཀྱིས་རྒྱུད་སྨིན་པར་བྱས་པའི་སྔགས་པ་དམ་ཚིག་དང་ལྡན་པས། མཁའ་འགྲོ་འདུ་བའི་གནས་ཁྱད་པར་ཅན་དུ་ས་བླངས། སྦྱང་བཟུང་། བསྲུང་སོགས་ས་ཆོག་དང་། ས་ལྷ། ལྷ་བུམ་པ། སློབ་མ་ལྟ་གོན་སོགས་སྤྱི་དོན་དང་གཞན་ཡང་རྒྱུད་སྤྱི་དང་བྱེ་བྲག་ནས་བྱུང་བ་བཞིན་སྔོན་དུ་སོང་ནས། ཐིག་ཆེན་བརྒྱད་བཏབ་སྟེ་རྡུལ་ཚོན་ནམ་རས་བྲིས་ཀྱི་དཀྱིལ་འཁོར་ཟླ་གམ་སྒོ་གཅིག་མདུན་བསྟན་གྱི་དབུས་སུ་ཆོས་འབྱུང་དམར་པོ་བཾ་ཡིག་གིས་མཚན་པའི་མཐར་རྡོ་ར་དང་འོད་ཕྲེང་གིས་བསྐོར་བའི་སྟེང་། བྷཐྷབཟང་པོ་བསྲུབས་མེད་པ་ཆང་དང་ཆོས་སྨན་སིནྡྷུ་རས་བྲན་པ་ཉིད་ཡུན་རིང་བསྒྲུབ་ན་ཁ་མར་ཁུས་བཅད་པའམ། ཡང་ན་སྐམ་རྫས་རིན་པོ་ཆེ་དང་མགྲོན་བུ་སྨན་བཅུད་འབྲུ་སྣ་བཟང་པོས་བལྟམས་པས་ཀྱང་རུང་། དེའི་ཁར་མཁར་བེའི་མེ་ལོང་ལ་སིནྡྷུ་རས་བཅག་པར་གཞོན་ནུ་མའི་རྡུལ་གྱིས་ཆོས་འབྱུང་བསྣོལ་མར་བྲིས་པའི་དབུས་སུ་བཾ། མདུན་ནས་གཡས་བསྐོར་གྱིས་ཆོས་འབྱུང་གིས་གྲ་རེར་ཛྙཱ་ན་ཝཱ་ར་ཧཱི་ཧཱུཾཿ ཅེས་ཡིག་འབྲུ་རེ་བཀོད་པའི་སྟེང་ཤེལ་རྡོ་བཞག་སྟེ་ལྡིང་གུར་དམར་པོ་དབུབ། བདག་འཇུག་དང་འབྲེལ་ན་ཤེལ་རྡོའ་ིཚབ་དྲིལ་བུ་བཤམས། མདུན་དུ་གཏོར་མ་ཆོས་འབྱུང་བསྣོལ་མའི་སྟེང་དཔལ་གཏོར་ཟླ་གམ་དབྱིབས་ཅན་མཛེས་བྱེད་པདྨས་བརྒྱན་པ་མེད་ཀྱང་རུང་། གཏོར་མའི་མཐར་འབྲས་ཟན་གྱི་ཆན་ཉ་ཤ་སྒོ་བཙོང་འོ་ཆང་སོགས་མྱོས་བྱེད་ཀྱིས་བརྒྱན་ཀྱང་རུང་སྟེ་སྡོམ་བྱུང་ལས། གཏོར་མ་མྱོས་བྱེད་མེད་པར་ནི། །མྱུར་དུ་འགྲུབ་པར་མི་འགྱུར་རོ། །ཞེས་སོ། གཡས་གཡོན་དུ་ཕོ་མོའ་ིཐོད་པ་ཚད་ལྡན་ནམ། བཅོས་པའི་ཀཱ་པ་ལར། གཡས་སུ་ཆང་ལ་ཆོས་སྨན་དང་། གཡོན་དུ་རཀྟ་སོ་ལྔའམ་མ་འབྱོར་ན་རྩི་ཁྲག་གམ། སྲོག་ཆགས་ཀྱི་ཁྲག་གང་རུང་བཏབ་པ། རྒྱབ་ཏུ་མ་མགོན། གཟའ། ཚེ་རིང་མཆེད་ལྔའི་གཏོར་མ་བཤམས། ཕྱི་མཆོད་མགོ་གཡས་དང་ནང་མཆོད་མགོ་གཡོན་ནས་བརྩམས་པའི་སྒོར་མཆོད་དམ་སྦྲེང་ཚར། གཞན་ཡང་ཚོགས་ཀྱི་ཡོ་བྱད་དང་ཆད་བསྟན། དེ་མ་ཐག་དགོས་པའི་སྔོན་གཏོར། ཌཱ་དྲིལ་འཐོར་ནས་སོགས་ཀྱང་འདུ་བགྱིས་ཏེ། བསྙེན་པའི་སྐབས་སྟན་འོག་ཏུ་ཀུ་ཤ་དང་རྒྱ་གྲམ་བཏང་། ཕྱི་ནང་གི་མཚམས་གཅོད་པ་སོགས་ཀྱང་སྤྱི་བཞིན་བྱ། དཀྱིལ་འཁོར་ཞལ་ཤར་དང་རང་ཉིད་ཁ་ནུབ་ཕྱོགས་ཨོ་རྒྱན་གྱི་ཞིང་དུ་ཕྱོགས་ཏེ་འདུག་གོ། གཉིས་པ་ཆོ་གའི་སྔོན་འགྲོར་ཐུན་མོང་དང་ཁྱད་པར་གཉིས་ལས། དང་པོ་ནི། རང་ཉིད་དལ་འབྱོར་གྱི་ཡོན་ཏན་ཕུན་སུམ་ཚོགས་པའི་ལུས་འདི་རྒྱུ་རྐྱེན་གྱིས་རྙེད་པར་དཀའ་བ། དེ་མྱུར་དུ་འཇིག་པའི་ངང་ཚུལ། ལས་དང་དེའི་འབྲས་དཀར་ནག་མི་ཟད་པ་མྱོང་བ། ཐོག་མཐའ་མི་མངོན་པའི་འཁོར་བའི་སྡུག་བསྔལ་གྱི་རང་བཞིན། དེ་ལས་ལྡོག་སྟེ་ཐར་བའི་ལམ་དུ་ཞུགས་པའི་ཕན་ཡོན། དེའི་ལམ་ཚུལ་བཞིན་ཤེས་པ་ལ་དགེ་བའི་བཤེས་གཉེན་དང་དགེ་བའི་གྲོགས་པོ་ལ་རག་ལས་པར་བསམ་པ་སོགས་ཐུན་མོང་དང་། སངས་རྒྱས་ཀྱི་བསྟན་པའི་སྒོར་ཞུགས་ནས་སྡོམ་པ་མཐའ་དག་རྒྱུད་ལ་བསྟེན་པར་བྱེད་པ་སྐྱབས་སུ་འགྲོ་བ། ཐེག་པ་ཆེན་པོའ་ིསྒོར་ཞུགས་ནས་དམན་སེམས་བཏང་སྟེ་སེམས་ཅན་ཐམས་ཅད་འཁོར་བ་ལས་སྒྲོལ་བའི་དམ་བཅའ་བཟུང་བ་སེམས་བསྐྱེད། དེའི་ཆེད་དུ་རྣམ་མཁྱེན་གྱི་གོ་འཕང་སྒྲུབ་པར་བྱེད་པ་ལ་འགལ་རྐྱེན་སྡིག་སྒྲིབ་ཞི་བར་བྱེད་པ་རྡོར་སེམས་བསྒོམ་བཟླས། མཐུན་རྐྱེན་ཚོགས་རྫོགས་པར་བྱེད་པ་མཎྜལ། བྱིན་རླབས་མྱུར་དུ་རྒྱུད་ལ་འཇུག་པར་བྱེད་པ་བླ་མའི་རྣལ་འབྱོར་གྱི་རིམ་པ་རྣམས་འདིའི་གཞུང་གི་ཁྲིད་རྣམས་སུ་རྗེ་བླ་མས་གསུངས་ན། ཡན་ལག་བརྒྱད་ལྡན་གྱི་རྫིང་བུའི་འགྲམ་དུ་བ་ཚྭ་ཅན་གྱི་ཁྲོན་པ་མི་འགྲུའོ། །གཉིས་པ་ཁྱད་པར་གྱི་སྔོན་འགྲོ་ལ་འགལ་རྐྱེན་བསལ་བ་དང་། མཐུན་རྐྱེན་བསྒྲུབ་པའོ། །དང་པོ་ལའང་གཉིས་ཀྱི་དང་པོ་འགལ་རྐྱེན་བསལ་བ་དངོས་ནི། །གཞུང་དུ་མ་བཤད་ཀྱང་དགོངས་པ་གཅིག་པས་ཡབ་བཀའ་ནས་བླངས་ཏེ། །གཏོར་མ་རཾ་ཡཾ་ཁཾ་གིས་བསྲེགས་གཏོར་བཀྲུས། ཨ་ཀ་རོའམ་བསྡུ་ན་འབྲུ་གསུམ་གྱིས་བརླབས་ལ། འདོད་པ་ཁམས་ཀྱི་དབང་ཕྱུག་དང་དེའི་འཁོར་སྡེ་རིགས་སུ་རྟོགས་ཚད་བྱང་ཆུབ་བསྒྲུབ་པ་ལ་བར་དུ་གཅོད་པ་ཡིན་པས། དེ་འདུལ་བའི་གཉེན་པོར་འདི་ཉིད་ཀྱི་ལས་ཐམས་ཅད་པའི་ལྷ། ཧྲཱི༔ ཞེས་པ་ལས་བདག་ཉིད་རྟ་མགྲིན་པདྨ་དབང་གི་སྐུ་ལོག་འདྲེན་རྣམས་ཀྱི་བལྟར་མི་བཟོད་ཅིང་། བགེགས་རིགས་འདུལ་བའི་གཤེད་པོར་སྐད་ཅིག་དྲན་རྫོགས་སུ་བསྐྱེད་ལ། སྣོད་བཅུད་སྤྲུལ་པའི་དཀྱིལ་འཁོར་འདིརཿ ཀླགས་བལྟ་བར་གཅོད་བདུད་ཀྱི་རིགསཿ གཏོར་མ་ལོང་ལ་གཞན་དུ་དེངསཿ བཀའ་ལས་འདས་ན་རྡོ་རྗེས་གཞོམཿ ཞེས་རྐང་གསུམ་གྱིས་བཀའ་བསྒོ་བ་དང་། གཅིག་གིས་སྡིག་ཤིང་གཟིར་བ་བསྟན་ཏེ། །དེ་ཡང་སྣོད་བཅུད་ཡེ་ནས་གཞལ་ཡས་ཁང་དང་ལྷའི་རང་བཞིན་དུ་གནས་པ་ལ་གནས་པར་ཤེས་པའི་སྤྲུལ་པ་སྒྱུ་མ་ལྟ་བུའི་དཀྱིལ་འཁོར་དུ་ལམ་ལ་ཞུགས་པའི་གང་ཟག་གིས་བསྒོམས་པར་བྱེད་པ་འདིར་ཕྱོགས་ནས་གློ་བུར་དུ་ལྷགས་པའི་བགེགས་རིགས་འབྱུང་པོ་དང་། ས་གཞི་འདིར་གཉུག་མར་གནས་པའི་ནག་ཕྱོགས་ཀྱི་འབྱུང་པོ་རྣལ་འབྱོར་པ་ལ་ཀླགས་བལྟ་ཞིང་། བྱང་ཆུབ་བསྒྲུབ་པ་ལ་བར་དུ་གཅོད་པ་དང་། གསང་སྔགས་ཟབ་མོ་ཉམས་སུ་ལེན་པ་ལ་བདུད་དུ་ལྡང་བའི་རིགས་ཀུན་མཆོད་སྦྱིན་གྱི་གཏོར་མ་འདོད་པའི་ཡོན་ཏན་ལྔ་དང་ལྡན་པ་འདི་ལོང་ལ་ས་ཕྱོགས་གཞན་རྒྱ་མཚོ་ཆེན་པོའ་ིཕ་མཐའ་ལ་སོགས་ཕར་དེངས་ཤིག གལ་ཏེ་བདག་ཉིད་དབང་ཆེན་པདྨས་བཀའ་བསྒོས་པ་དེ་ལས་མདའ་བར་བྱེད་ན་ལུས་ངག་ཡིད་གསུམ་རྡོ་རྗེ་ཅན་གྱི་ཁྲོ་བོ་མེ་རབ་ཏུ་འབར་བའི་སྤྲུལ་པ་མང་པོ་སྤྲོས་ཏེ་རྡོ་རྗེས་རྡུལ་ཕྲན་བཤིག་པ་བཞིན་དུ་གཞོམ་པས། དེ་བས་མ་སྡོད་པར་ཕྱིར་དེངས་ཤིག་ཅེས་པའོ། །ཧཱུྃ་བཞིའི་སྔགས་ནི་སྤྱི་ཁྱབ་ཏུ་གྲགས་ཆེ་བས་ཅུང་ཟད་འགྲེལ་ན། ཨབཱ་སྐྱོང་བའི་དབྱིངས་ལ་མ་ནི་ཎྲ་རྐྱེན། ཨིཎྲ་རྗེས་འགྲེལ། ཚ་བ་དག་གི་ཨུདྲ་སཱ། བཱ་ཨུཌ། ཌ་རྗེས་འབྲེལ། ཨུ་ཨོ། རྟགས་དོན་སི་པིད་བྱི། རྟགས་མཐའི་ནཱ་ཕྱིས། མ་སྲོག་མེད་ད་རོར་བྱས་པས་ཨོཾ་གྲུབ་པས་འགྲོ་བ་ཐུགས་རྗེས་ཉེ་བར་སྐྱོང་བའམ། ཨ་ཨོ་མ་གསུམ་འདུས་པས་སྐུ་གསུང་ཐུགས་ཀྱི་དོན། སུམ་བྷ་གནོད་མཛེས། ནི་སུམ་བྷ་ངེས་པར་གནོད་མཛེས་ཧཱུཾ་ཧཱུཾ་ནི་རྩེ་མོ་ལས། སྡུག་བསྔལ་འཆོས་ཤིང་འཇོམས་བྱེད་ཅིང་། སྲིད་པའི་ཞགས་པ་གཅོད་པར་བྱེད། གདུག་པ་བསྡངས་ཤིང་གསོད་བྱེད་པའི། །ཧཱུཾ་ནི་མཆོག་ཏུ་དྲན་པར་བྱ། ཞེས་དང་། ཕཊ་ཀྱང་དེ་ཉིད་ལས། གདུག་ཅིང་སྡུག་བསྔལ་འཇོམས་བྱེད་ཅིང་། བདེ་བ་དག་ནི་འགུགས་པར་བྱེད། །ཕཊ་ནི་འཇོམས་བྱེད་དགྲ་ཡིན་ཏེ། །གྲོགས་དང་བཅས་པ་འཇོམས་པར་བྱེད། །ཅེས་པའོ། །གྲིཧྞ་གིཧྞ། བཟུང་བཟུང་། གིཧྞ་པ་ཡ། གྲྀཧྣ་པ་ཡ། ཟུངས་ཤིག ཟུངས་ཤིག ཨཱ་ན་ཡ་ཧོཿབྷ་ག་ཝཱན་བིརྱར་ཛ་ཡ་བཅོམ་ལྡན་འདས་རིག་པའི་རྒྱལ་པོ་ཤིན་ཏུ་ཐོབ། ཧཱུཾ་ཧཱུཾ་ཕཊ་གོང་དང་འདྲའོ། །སྤྱིར་སྔགས་འདི་སྔ་འགྱུར་གྱི་གཞུང་ལས་ཀྱང་གསུང་མོད་ཀྱིས། །གསར་མའི་རྒྱུད་མངོན་རྫོགས་བླ་མ་ནས་གསུངས་པ་བཤད་མ་ཐག་པ་དང་། བདེ་མཆོག་རྩ་རྒྱུད་ལས། བྷ་ག་ཝཱན་བཛྲ་ར་ཛ་ཡ་ཏེ་བཅོམ་ལྡན་འདས་རྡོ་རྗེ་རྒྱལ་པོས་ཤིན་ཏུ་ཐོབ་ཀྱི་ཁྱད་ཙམ་གསུངས་སོ། །གཉིས་པ་སྲུང་འཁོར་ནི། །དེ་ལྟར་གེགས་གཏོར་གྱི་གེགས་རྙིང་པ་རྣམས་བཟློག་ནས་འདིས་སྔ་མ་རྣམས་སླར་མི་འཇུག་བ་དང་། གསར་པ་དག་ཀྱང་བསྲུང་བར་བྱེད་དེ། །ཧཱུཾཿ སྣང་སྲིད་དག་པ་རབ་འབྱམས་ལཿ གེགས་དང་བར་གཅོད་མིང་ཡང་མེདཿ གློ་བུར་རྣམ་རྟོག་འཁྲུལ་བའི་གདོནཿ ཆོས་དབྱིངས་ངང་དུ་མཚམས་བཅད་དོཿ ཞེས་པ་སྣང་སྣོད་ཀྱི་འཇིག་རྟེན་གཞལ་ཡས་ཁང་དང་། སྲིད་པ་བཅུད་ཀྱི་སེམས་ཅན་ལྷ་དང་ལྷ་མོའ་ིརང་བཞིན་དུ་ཡེ་ནས་དག་པ་རབ་འབྱམས་ཀྱི་དཀྱིལ་འཁོར་ཆེན་པོ་གཅིག་ཏུ་གྲུབ་པ་ལ། བགེགས་རིགས་འབྱུང་པོས་མི་མཐུན་པར་བལྟ་བ་དང་། བྱང་ཆུབ་སྒྲུབ་པ་ལ་བར་དུ་གཅོད་པའི་མིང་ཙམ་ཡང་དྲོད་ཐོབ་པའི་རྣལ་འབྱོར་གྱི་ངོར་མེད་ན་ཡང་། དེ་ལྟ་བུའི་ཀློང་དུ་མ་གྱུར་པའི་སྣང་ངོར་རབ་རིབ་ཅན་ལ་སྐྲ་ཤད་སྣང་བ་བཞིན་དུ་མེད་བཞིན་པའི་གློ་བུར་གྱི་རྣམ་པར་རྟོག་པ་རང་ངོ་ལ་འཁྲུལ་པའི་གདོན་རིགས་རང་ཤར་ཏེ། སྒྱུ་འཕྲུལ་མེ་ལོང་ལས། སྣམ་རྟོག་འདུ་ཤེས་ཀུན་སྤངས་ན། །བགེགས་ཀྱི་སྦྱོར་བ་ཡོད་མི་འགྱུར། །དེ་བས་རྣམ་རྟོག་བགེགས་ཡིན་པར། །ཡང་དག་རིགས་པ་ཉིད་ཀྱིས་གསུངས། །ཞེས་པས་རྣམ་རྟོག་སྤྲོས་པའི་མཚན་མ་ཐམས་ཅད་ཆོས་ཀྱི་དབྱིངས་དོན་དམ་པའི་རང་བཞིན་གྱི་ངང་དུ་གནས་པ་ལས་ཐ་མལ་དུ་མི་འདའ་བས་མཚམས་བཅད་དོ། །ཞེས་བློ་རབ་རྣམས་ཀྱིས་དེ་ལྟར་གོ་བར་བྱ་ལ། །ལས་དང་པོ་པས་བགེགས་རྒྱ་མཚོའི་ཕ་མཐར་འདེད་པའི་ཁྲོ་བོ་རྣམས་སླར་འདུས་པ་དང་རང་གི་སྙིང་ཁའི་འོད་ཟེར་གཉིས་གཅིག་ཏུ་གྱུར་པ་ལས། རྡོ་རྗེའི་གུར་ཁང་ཟླུམ་པོ་རྡོ་རྗེའི་ས་གཞི་དྲ་བ་དང་བླ་བྲེ། ཏོག་ལ་སོགས་པ་མཐར་ཇེ་ཆུང་ཇེ་ཆུང་གིས་ཞལ་བར་བྱས་ཤིང་། །མེ་དཔུང་ཁྲོ་བོ་མཚོན་ཆ་སྣ་ཚོགས་རྩེ་མོ་ཕྱིར་བསྟན་གྱིས་བསྲུང་བར་བསམ་མོ། གཉིས་པ་མཐུན་རྐྱེན་བསྒྲུབ་པ་ལ་སྐྱབས་སུ་འགྲོ་བ་དང་སེམས་བསྐྱེད་པ་མཆོད་རྫས་བརླབ་པ་གསུམ་ལས། དང་པོ་ལ་བདུན་གྱི་དང་པོ་སྐྱབས་སུ་འགྲོ་བའི་གང་ཟག་ནི་ནང་བ་སངས་རྒྱས་པའི་བསྟན་པ་ལ་ཞུགས་ཤིང་དཀོན་མཆོག་ལ་སྐྱབས་སུ་འགྲོ་བར་ཁས་བླངས་པའི་གང་ཟག་སྡོམ་ལྡན་ནོ། །གཉིས་པ་རྒྱུ་གང་གིས་སྐྱབས་སུ་འགྲོ་བ་ནི་རང་ཉིད་འཁོར་བའི་སྡུག་བསྔལ་ལ་འཇིགས་པ་དང་། །དཀོན་མཆོག་གི་ཡོན་ཏན་ལ་དད་པ་དང་། ཕ་མར་གྱུར་པའི་སེམས་ཅན་སྙིང་རྗེ་བ་སྟེ་གསུམ་མོ། གསུམ་པ་དུས་ནམ་གྱི་བར་དུ་སྐྱབས་སུ་འགྲོ་བ་ནི་རྒྱུའི་སྐྱབས་འགྲོ་ནམ་བྱང་ཆུབ་སྙིང་པོ་མ་ཐོབ་ཀྱི་བར་དུ་དང་། འབྲས་བུའི་སྐྱབས་འགྲོ་དེ་ནས་ཀྱང་འདུ་འབྲལ་མེད་པའི་ཚུལ་གྱིས་སོ། །བཞི་པ་སྐྱབས་སུ་འགྲོ་བའི་ཡུལ་ལ་གཉིས་ལས། རང་བཞིན་གནས་ལུགས་ཀྱི་སྐྱབས་འགྲོ་ནི། སྐྱེ་མེད་ཡེ་ཤེས་མཁའ་འགྲོའ་ིསྐུཿ འགགས་མེད་རང་བྱུང་རྣལ་འབྱོར་མཿ རྒྱལ་ཡུམ་རྡོ་རྗེ་ཕག་མོ་ལཿ འདུ་འབྲལ་མེད་པར་སྐྱབས་སུ་མཆིཿ ཞེས་པ་ལ་གསུམ། དང་པོར་སྣང་སྲིད་འཁོར་འདས་ཀྱི་ཆོས་ཐམས་ཅད་གདོད་ནས་སྐྱེ་བ་མེད་པའི་གཤིས་ཡེ་གྲོལ་ཆེན་པོའ་ིཆོས་ཉིད་ཤེས་པ་ནམ་མཁའ་ལྟ་བུའི་ཀློང་དུ་ཐུགས་རྗེའི་བྱེ་བྲག་ཅིར་ཡང་ཁྱབ་པར་འགྲོ་བས་མཁའ་འགྲོའ་ིསྐུ་སྟེ། སློབ་དཔོན་ཆེན་པོ་པདྨས་མཛད་པའི་ཡང་དག་གི་གསང་འགྲེལ་ཆེན་མོར། ཡེ་ཤེས་དང་ཐུགས་རྗེ་ནམ་མཁའི་ཁམས་སུ་ཁྱབ་པར་འགྲོ་ཞིང་དོན་མཛད་པའི་ཕྱིར་མཁའ་འགྲོ་མ་ཞེས་གསུངས་སོ། དེ་ལ་སྐྱེ་མེད་ཀྱི་གནས་ལུགས་ལ་ཚིག་གི་མཐའ་དཔྱད་པ་དང་དོན་གྱི་ཐོག་ཏུ་དབབ་པ་གཉིས་ལས། དང་པོ་ནི་སློབ་དཔོན་ཀླུ་སྒྲུབ་ཀྱིས་རྩ་ཤེར། བདག་ལས་མ་ཡིན་གཞན་ལས་མིན། གཉིས་ལས་མ་ཡིན་རྒྱུ་མེད་མིན། དངོས་པོ་གང་དང་གང་ལ་ཡང་། སྐྱེ་བ་ནམ་ཡང་ཡོད་མ་ཡིན། །ཞེས་གསུངས་པས། ཕྱི་ནང་གི་དངོས་པོ་ཐམས་ཅད་རང་ཉིད་དངོས་པོར་གྲུབ་ཟིན་པ་ལས་རང་སྐྱེན་ནི་སྐྱེ་བ་ནི་དེ་ཉིད་ཐོབ་པའི་ཕྱིར་དུ་ཡིན་ན་ཐོབ་ཟིན་པ་སྐྱེ་བའི་དགོས་པ་མེད་པ་དང་། སྐྱེ་བ་ཐུག་མེད་དུ་འགྱུར་ཏེ་སྐྱེས་ཟིན་པའི་ས་བོན་ཉིད་ཡང་ནས་ཡང་དུ་སྐྱེ་བའི་ཕྱིར་ཏེ། འཇུག་པ་ལས། དེ་ནི་དེ་ལས་འབྱུང་ན་ཡོན་ཏན་འགའ་ཡང་ཡོད་མ་ཡིན། །སྐྱེས་ཟིན་སླར་ཡང་སྐྱེ་བར་ཡོངས་སུ་རྟོགས་པར་འགྱུར་ན་ནི། །དེ་ཕྱིར་མྱུ་གུ་སོགས་ཀྱི་སྐྱེ་བ་འདིར་རྙེད་མི་འགྱུར་ཞིང་། །ཞེས་སོགས་ཀྱི་བཀག་གོ། །ཅི་སྟེ་གཞན་དུ་གྱུར་པའི་རྐྱེན་ཞིག་ལས་འབྲས་བུ་སྐྱེ་བར་འགྱུར་སྙམ་ན། རང་བཞིན་ཐ་དད་པའི་རྒྱུ་ལས་རང་བཞིན་ཐ་དད་པའི་འབྲས་བུ་སྐྱེ་ན་མར་མེའི་འོད་ལས་ཀྱང་མུན་པ་འཐུག་པོ་འབྱུང་བར་འགྱུར་ཏེ་གཞན་ཡིན་པའི་ཕྱིར་དང་། རྒྱུར་གྱུར་མ་གྱུར་ལས་འབྲས་ཡིན་མིན་ཐམས་ཅད་སྐྱེ་སྟེ་སྔ་མ་ལས། གཞན་ལ་བརྟེན་ནས་འགའ་གཞན་ཞིག་འབྱུང་བར་འགྱུར་ན་ནི། །འོ་ན་མེ་ལྕེ་ལས་ཀྱང་མུན་པ་འཐུག་པོ་འབྱུང་འགྱུར་ཞིང་། །ཐམས་ཅད་ལས་ཀྱང་ཐམས་ཅད་སྐྱེ་བར་འགྱུར་ཏེ་གང་གི་ཕྱིར། །བསྐྱེད་པར་བྱེད་པ་མ་ཡིན་མ་ལུས་པ་ཡང་གཞན་ཉིད་མཚུངས། །ཞེས་སོ། །ཡང་བདག་གཞན་རེ་རེ་བ་ལས་མི་སྐྱེ་སྟེ་གཉིས་ཀ་ཚོགས་པ་ལས་སྐྱེའོ་ཞེ་ན་ཡང་། བཤད་མ་ཐག་པའི་ཉེས་པ་གཉིས་ཀ་ཐོག་ཏུ་འབབ་པ་ཞིག་སྟེ། འཇུག་པ་ལས། གཉིས་ལས་སྐྱེ་བའང་རིགས་པའི་ངོ་བོ་མ་ཡིན་གང་གི་ཕྱིར། །བཤད་ཟིན་ཉེས་པ་དེ་དག་ཐོག་ཏུ་འབབ་པ་ཡིན་ཕྱིར་རོ། །ཞེས་སོ། །ཡང་དངོས་པོ་གང་ལ་ཡང་རྒྱུ་མེད་དེ་ངོ་བོ་ཉིད་ཀྱི་འབྱུང་བའོ་ཞེ་ན། དེ་ཡང་རིགས་པ་མ་ཡིན་ཏེ། བྱ་རོག་ལ་རྨ་བྱའི་མདོངས་འབྱུང་བ་དང་། རི་བོང་ལ་རྭའི་རྭ་སྐྱེ་བ་དང་། སྒོ་ང་ལ་རྟའི་སྤུ་བྱུང་བ་སོགས་སུ་འགྱུར་ཏེ་རྒྱུ་མེད་ལས་འབྱུང་བར་སྙམ་པ་དང་། འཇིག་རྟེན་པ་མཐུན་པའི་ས་བོན་གདབ་པའང་དོན་མེད་དུ་འགྱུར་ཏེ་རྒྱུ་མཚན་མཚུངས་པའི་ཕྱིར། སྔ་མ་ལས། གལ་ཏེ་རྒྱུ་མེད་ཁོ་ནས་ལྟ་ཞིག་འགྱུར་ན་ནི། །དེ་ཚེ་མཐའ་དག་ཐམས་ཅད་ལས་ཀྱང་རྟག་ཏུ་སྐྱེ་འགྱུར་ཞིང་། །འབྲས་འབྱུང་ཆེད་དུ་འཇིག་རྟེན་འདི་ཡི་ས་བོན་ལ་སོགས་ནི། །བརྒྱ་ཕྲག་དག་གི་སྒོ་ནས་སྡུད་པ་བྱེད་པ་ཡང་མི་འགྱུར་ཞེས་མཐའ་བཞི་བཀག་པའི་རིག་པ་ཉིད་ཀྱི་དངོས་པོ་རྣམས་ཀྱི་རང་བཞིན་ནམ་ངོ་བོ་སྐྱེ་མེད་དུ་བསྒྲུབ་ཏེ། སློབ་དཔོན་འཕགས་པ་ལྷས། ཡོད་དང་མེད་དང་ཡོད་མེད་ཅེས། །གང་ལས་ཕྱོགས་ནི་ཡོད་མིན་པས། །དེ་ལ་ཡུན་ནི་རིང་པོ་ནའང་། །ཀླན་ཀ་བརྗོད་པར་ནུས་མ་ཡིན། །ཞེས་དང་། ཀླུ་སྒྲུབ་ཀྱིས་རིན་ཆེན་སྒྲོན་མར། གལ་ཏེ་དངོས་ཞིག་ཡོད་ན་ནི། །ཁས་ནི་བླང་བར་བྱ་དགོས་ན། །དངོས་པོ་སྐྱེ་བ་མེད་ཉིད་ལ། །ཁས་ནི་བླང་བར་ཇི་ལྟར་བྱ། །ཞེས་དང་། གདོད་ནས་སྐྱེ་བ་མེད་པའི་ཕྱིར། །མོ་བཤམ་གྱི་ནི་བུ་བཞིན་ནོ། །ཞེས་སོ། །གཉིས་པ་དོན་གྱི་ཐོག་ཏུ་དབབ་པ་ནི། །བཤད་མ་ཐག་པ་བཞིན་གདོད་ནས་སྐྱེ་བ་མེད་པའི་ཆོས་ཉིད་ཀྱི་ངང་ལས་སྣང་སྲིད་འཁོར་འདས་ཀྱི་བསྡུས་པའི་ཆོས་ཐམས་ཅད་སྐྱེ་བར་སྣང་བ་རྨི་ལམ་སྒྱུ་མ་ལྟ་བུ་སྟེ། །སྐྱེ་བར་སྣང་དུས་ཉིད་ནས་རང་བཞིན་མ་གྲུབ་པའི་ཕྱིར་དོན་ལ་སྐྱེ་བ་མེད་པས་འཁོར་བའི་དུས་ནའང་འཆིང་གྲོལ་གཉིས་སུ་མེད་དེ། རྗེ་བླ་མས། སྐྱེ་བ་མེད་ལས་སྐྱེས་པས་སེམས་ནི་འཁྲུལ། །སྐྱེས་ཙམ་ཉིད་ནས་རང་བཞིན་མེད་ཤེས་ན། །འགག་པ་མེད་པ་ཆོས་སྐུའི་རང་ཞལ་ཏེ། །འཁོར་བའི་དུས་ནའང་འཆིང་གྲོལ་གཉིས་སུ་མེད། །ཅེས་དང་། གསང་སྙིང་ལས། ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། སྐྱེས་པ་ཉིད་ན་སྐྱེ་བ་མེད། །ཅེས་དང་། ཀླུ་སྒྲུབ་ཀྱི་སྐྱེ་མེད་མཛོད་དུ། །གར་ཡང་མ་རྟོག་ཅི་ཡང་མ་བསམས་ཤིག། བཅའ་བཅོས་མ་བྱེད་རང་བཞིན་ལྷུག་པར་ཞོག། མ་བཅོས་པ་དེ་སྐྱེ་མེད་རིན་ཆེན་མཛོད། །དུས་གསུམ་རྒྱལ་བ་སྔ་ཕྱིའི་གཤེགས་ཤུལ་ཡིན། །ཞེས་སོ། །གཉིས་པ་ནི་དེ་ལྟར་ཆོས་ཐམས་ཅད་ཀྱི་ཆོས་ཉིད་ཀྱི་རང་ངོ་ན་སྐྱེ་བ་མེད་ཀྱང་དེའི་རང་བཞིན་ནི་གནས་ལུགས་ཀྱི་གཏིང་མདངས་ཡེ་ཤེས་ཆེན་པོ་ཉིད་འགགས་པ་མེད་པར་གཞན་གྱི་རྐྱེན་གྱིས་མ་བསྐྱེད་ཀྱང་ངོ་བོ་ཉིད་ཀྱི་རང་བྱུང་བའི་ཡེ་ཤེས་མ་བཅོས་རྣལ་མའི་དོན་ལ་དབང་འབྱོར་པའི་བདག་ཉིད་མ་དེ་ལ་མཁའ་འགྲོ་ཞེས་བྱ་སྟེ། མ་ནི་སྙིང་པོ་བྱང་ཆུབ་སེམས། །མོ་ནི་རང་བྱུང་ཡེ་ཤེས་ཕྱིར། །ཞེས་ངོ་བོ་ཉིད་ཀྱི་གནས་ལུགས་ལ་མ་མོ་མཁའ་འགྲོའ་ིམཚན་གཞིར་བཞག་པའི་ཕྱིར་རོ། །དེ་ཡང་དབུ་མ་ཐལ་འགྱུར་བ་རྣམས་ནི་རང་གི་ངོ་བོས་གྲུབ་པའི་རང་བཞིན་རྡུལ་ཙམ་མེད་པ་ལ། བསྐྱེད་བྱ་དང་བསྐྱེད་བྱེད་དང་འགོག་པ་དང་སྒྲུབ་པ་སོགས་འཁོར་འདས་དང་། རྒྱུ་འབྲས་རྟེན་འབྲེལ་གྱི་རྣམ་བཞག་གི་ངེས་པ་མི་འགལ་བར་འཆར་བ་ཉིད་ཀླུའི་དབང་པོས། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བར་འགྱུར། །གང་ལ་སྟོང་ཉིད་མི་རུང་བས། །དེ་ལ་ཐམས་ཅད་རུང་མི་འགྱུར། །ཞེས་དང་། རྟེན་ཅིང་འབྲེལ་པར་འབྱུང་བ་གང་། །དེ་ནི་སྟོང་པ་ཉིད་དུ་བཤད། །དེ་ནི་རྟེན་པ་ནས་གདགས་པ་སྟེ། །དེ་ཉིད་དབུ་མའི་ལམ་ཡིན་ནོ། །གང་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་དང་། ཚིག་གསལ་ལས། གང་ལ་རྟེན་ཅིང་འབྲེལ་བ་འབྱུང་རུང་བ་དེ་ནི་འཕགས་པའི་བདེན་པ་བཞི་རྣམས་རིགས་པར་འགྱུར་རོ། །ཞེས་སོ། དེ་དང་མཐུན་པར་པདྨའི་གསང་འགྲེལ་དུ། །ཐེག་པ་འོག་མ་བས་འབྱུང་བ་ལྔ་པོ་འདི་དང་། འདིས་བསྐྱེད་པའི་སེམས་ཅན་ཀུན་ཀུན་རྫོབ་སྒྱུ་མར་མཐོང་ལ། །དེ་བས་གསང་སྔགས་ཁྱད་པར་ཆེ་སྟེ་ལྷ་སྒྱུ་མར་མཐོང་ཤེས་ལ། །དེ་བས་ཀྱང་རྫོགས་པ་ཆེན་མོ་ཁྱད་པར་ཆེ་སྟེ་ལྷུན་གྲུབ་སྒྱུ་མར་མཐོང་ཞིང་སྤྱོད་པས་རིམ་པས་དཔགས་ཤིང་ཁྱད་ཆེ་བས། །ཤེས་རབ་ཀྱིས་གཡང་ས་ཆོད་པར་བྱས་ནས། ཏིང་ངེ་འཛིན་ལ་ལོངས་སྤྱོད་པར་ཤེས་ན། །ཇི་ལྟར་འདོད་པས་དབང་སྒྱུར་བས་སྒྱུ་མའོ། །དེ་ཡང་ནམ་མཁའ་ཆེ་ལས་ལྷུན་གྲུབ་སྒྱུ་མ་ཡུལ་ལ་རོལ། །ཞེས་དང་། རང་བཞིན་གཅིག་ཏུ་མ་ངེས་པར། །ཇི་ལྟར་བལྟས་པ་དེ་ལྟར་སྣང་། །ཞེས་ཡིད་ཆེས་ཀྱི་ལུང་དང་བཅས་ཏེ་གསུངས་ལ། །ཁྱད་པར་ལྷུན་གྲུབ་ཀྱི་གཏིངས་མདངས་སྒྱུ་མ་ལྟ་བུ་ལས་འཁོར་འདས་འབྱུང་བའི་རྣམ་བཞག་ནི་ཐེག་མཆོག་མཛོད་དང་། རྣམ་མཁྱེན་ཤིང་རྟ་ལས་རྟོགས་པར་བྱའོ། །གསུམ་པ་ནི། དེ་ལྟར་སྐྱེ་མེད་ཀྱིས་ཆོས་ཐམས་ཅད་ཀྱི་གནས་ལུགས་དང་། འགགས་མེད་ཀྱིས་ཆོས་ཐམས་ཅད་ཀྱི་སྣང་ལུགས་རྟོགས་པའི་ཤེས་རབ་ཉིད་དུས་གསུམ་གྱི་རྒྱལ་བ་མ་ལུས་ཤིང་ལུས་པ་མེད་པ་ཀུན་གྱི་ཡུམ་ཀུན་ཏུ་བཟང་མོ་ཉིད་རྣམས་རྟགས་ཀྱི་ལྷ་སྐུ་རྡོ་རྗེ་ཕག་མོའ་ིངོ་བོ་ལ་བླང་དོར་རམ་འདུ་འབྲལ་མེད་པའི་ཚུལ་གྱིས་སྐྱབས་སུ་མཆི་བ་སྟེ། འགྲོ་བའོ། །དེ་ཡང་ཉང་གཏེར་ཕག་མོ་ལས། །རྡོ་རྗེ་ཕག་མོ་བདེ་གཤེགས་ཡུམཿསྤྲོས་བྲལ་ཆོས་སྐུ་བདེ་ཆེན་ལསཿ རང་བཞིན་ལོངས་སྤྱོད་རྫོགས་པའི་སྐུཿཞེས་དང་། །གསང་འགྲེལ་ལས། ཆོས་ཉིད་ཀུན་ཏུ་བཟང་མོའ་ིམཁའ་ཀློང་སྐྱེ་བ་མེད་པའི་མཁའ་ལས། སྐྱེ་བའི་ཆོ་འཕྲུལ་ཇི་ལྟ་བུའི་ངོ་བོར་ཡང་ཤར་ཅིར་ཡང་སྣང་སྟེ། ཞི་བའི་ལྷ་མོ་ལྟ་བུ་དང་། ཁྲོ་མོ་ལྟ་བུ་དང་། གནོད་སྦྱིན་མོ་ལྟ་བུ་དང་། རིགས་དྲུག་རྫོགས་པའི་ཡུམ་བུད་མེད་ལྟ་བུ་ཡང་ཤར་ཞིང་སྣང་སྟེ། ཅིར་ཡང་མེད་པ་ལས་སྒྱུ་མ་མཁན་གྱིས་ཅིར་ཡང་བསྒྱུར་དུ་བཏུབ་པ་བཞིན། དོན་ཆོས་ཉིད་ཡུམ་གྱི་མཁའ་སྐྱེ་བ་མེད་པའི་དོན་རྟོགས་ན། རྟགས་རིགས་པའི་ཡེ་ཤེས་སྐྱེ་བའི་ཆོ་འཕྲུལ་ཇི་ལྟར་ཡང་སྣང་ངོ་། །སརྦ་བུདྡྷ་ལས། རང་གི་ངོ་བོས་ཡོངས་བསྒྱུར་ན། །བུད་མེད་ཀུན་གྱི་སྒྱུ་མ་འགྲུབ། །སྣ་ཚོགས་སྒྱུ་མའི་ཕྱག་རྒྱ་ནི། །མཁའ་འགྲོ་མ་ཞེས་བརྡར་བསྟན་ཏོ། །ཞེས་ལུང་དང་བཅས་གསུངས་སོ། །དེ་ལ་རྡོ་རྗེ་ནི་ཆོས་ཉིད་ཀྱི་ངོ་བོ་མི་འགྱུར་མི་ཤིགས་པའི་དོན་ལ་བཤད་ལ། ཕག་གི་གཙང་རྨེར་རྟོག་པ་མེད་པ་ཐམས་ཅད་ཟ་བ་བཞིན་ཆོས་ཅན་དང་ཆོས་ཉིད་ཀུན་ལ་རྣམ་དབྱེར་མེད་པ་ལོངས་སྤྱོད་པའི་དོན། མོ་ནི་བུད་མེད་བཟང་མོ་ལས་ཅིར་ཡང་འབྱུང་བ་བཞིན་སྐྱེ་འགགས་གཉིས་སུ་མེད་པའི་ངང་ལས་གང་འདུལ་གྱི་ཕྲིས་འབྱུང་བ་སྟེ། ཉང་གཏེར་ཁྲོས་ནག་ལས། སྣང་སྟོང་དབྱེར་མེད་ཆོས་རྣམས་ཀུན་གྱི་གཞིཿ མི་སྐྱེ་མི་འགོག་ནམ་མཁའི་ངོ་བོ་ཉིདཿ གང་ལ་ཅི་འདུལ་དེར་སྟོན་པའིཿ ཡེ་ཤེས་མཁའ་འགྲོའ་ིཚོགས་ལ་ཕྱག་འཚལ་བསྟོདཿཅེས་དང་། བདེ་མཆོག་ལསཿ དེས་ན་ཧེ་རུ་ཀ་དཔལ་རྒྱུདཿ སེམས་ནི་དྲི་མེད་ཡིན་པར་བཤདཿ དག་པའི་ཆོས་ཀྱི་སྤྲུལ་པ་ནིཿ ཕག་མོའ་ིགཟུགས་སུ་བསྟན་པ་ཡིནཿ ཞེས་སོ། །གཉིས་པ་རྣམ་བཅས་དམིགས་པའི་ཡུལ་ནི། སྐྱེ་མེད་ཀྱི་ཆ་ལས་འགགས་མེད་དུ་རང་ཤར་བའི་རྗེ་བཙུན་རྡོ་རྗེ་རྣལ་འབྱོར་མ་པདྨ་རིགས་ཀྱི་མཁའ་འགྲོ་བདེ་ཆེན་ཡེ་ཤེས་ཀྱི་རྒྱལ་མོ་ཉིད་ཀྱི་ཐུགས་ཀར་རྡོ་རྗེ་ཕག་མོ། དབུ་གཙུག་ཏུ་སངས་རྒྱས་ཐམས་ཅད་ཀྱི་འདུས་གཟུགས་རྒྱལ་བ་པདྨ་ཐོད་ཕྲེང་ལ་རྒྱུད་གསུམ་གྱི་བླ་མ་ཡི་དམ་མཁའ་འགྲོ་རབ་འབྱམས་ཀྱིས་བསྐོར་བ། །རྗེ་བཙུན་རྡོ་རྗེ་རྣལ་འབྱོར་མའི་མཐར་ཡུལ་ཉེར་བཞི་གནས་སོ། །གཉིས། དུར་ཁྲོད་བརྒྱད་སོགས་ཀྱི་དཔའ་བོ་རྣལ་འབྱོར་མ་མཁའ་འགྲོ་འབུམ་ཕྲག་རྒྱ་མཚོའི་ཚོགས་དང་བཅས་པ་དེ་དག་གི་སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཉག་གཅིག་གི་རོལ་བ་སྟེ། །གསང་འདུས་ལས། དྲི་མེད་སེམས་ནི་སངས་རྒྱས་རྒྱུད། །ཆོས་ཀྱང་ངག་ཏུ་ཡང་དག་གསུངས། །སྐུ་ནི་དགེ་འདུན་ཞེས་བྱ་སྟེ། །ཞེས་དང་། རྡོ་རྗེ་ཕུར་པའི་རྒྱུད་ལས། ཆོས་སྐུ་མཁའ་འདྲ་གཟུགས་སྐུ་འཇའ་ལྟར་སྣང་། །གསང་སྔགས་སྒྲ་སྙན་ལྟ་བུར་སྒྲ་སྒྲོགས་ཤིང་། །ཁྲོ་བོ་ཁྲོ་མོའ་ིཚོགས་ཀྱི་གདུག་པ་འདུལ། །བླ་མེད་དཀོན་མཆོག་གསུམ་ལ་སྐྱབས་སུ་མཆི། །ཞེས་པ་ལྟར། ཕྱི་ལྟར་ན་སངས་རྒྱས་ཆོས་དང་དགེ་འདུན་གསུམ། །ནང་ལྟར་ན་བླ་མ་ཡི་དམ་མཁའ་འགྲོ་གསུམ། །གསང་བ་ལྟར་ན་རྩ་དང་རླུང་དང་ཐིག་ལེ་གསུམ། །ངོ་བོ་ཉིད་དུ་ཆོས་སྐུ་ལོངས་སྐུ་སྤྲུལ་སྐུ་འམ། ངོ་བོ་རང་བཞིན་ཐུགས་རྗེའི་བདག་ཉིད། དེ་དག་གི་ཡེ་ཤེས་དང་ཐུགས་རྗེའི་བྱེ་བྲག་ཏུ་གྱུར་པ་སྤུང་མ་དམ་ཅན་རྒྱ་མཚོའི་ཚོགས་དང་བཅས་པ་མངོན་སུམ་ལྟ་བུར་མདུན་གྱི་ནམ་མཁའི་གནས་སུ་གསལ་འདེབས་པའོ། །ལྔ་པ་ཚུལ་ཇི་ལྟ་བུས་སྐྱབས་སུ་འགྲོ་ནས། །རང་གི་བྱངས་དྲངས་པའི་ཕ་མ་སེམས་ཅན་ཐམས་ཅད་སྐྱིད་སྡུག་ལེགས་ཉེས་མཐོ་དམན་ཅི་བྱུང་ཡང་ཁྱེད་ཤེས་ཀྱིས་བློས་ལིང་འགེལ་གྱི་ཚུལ་གྱིས་སྐྱབས་སུ་འགྲོ་བ་ནི་གནས་སྐབས་རྒྱུའི་སྐྱབས་འགྲོ་དང་། མཐར་ཐུག་འབྲས་བུའི་སྐྱབས་འགྲོ་ནི་འདུ་འབྲལ་མེད་པའི་ཚུལ་གྱིས་ཏེ་ཡུམ་བར་མ་ལས། རབ་འབྱོར་གང་ལ་སངས་རྒྱས་ཀྱང་མི་དམིགས་ལ་ཆོས་དང་དགེ་འདུན་ཡང་མི་སེམས་ན། འདི་ནི་ཡང་དག་པའི་སྐྱབས་འགྲོའ།ོ ། ཞེས་པས་གོང་དུ་བཤད་པ་ལྟར་རོ། །དྲུག་པ་དགོས་ཆེད་ནི། །རང་དོན་གྱི་ཆེ་བ་མ་ཡིན་པར་བདག་དང་སེམས་ཅན་ཐམས་ཅད་ཀྱི་ཆེད་དུ་སྐྱེས་བུ་ཆེན་པོའ་ིབློས་སོ། །བདུན་པ་བསླབ་བྱ་ནི། དགག་བསྒྲུབ་ཕྱོགས་མཐུན་སྤྱི་ལྟར་བསྲུང་བར་བྱའོ། །གཉིས་པ་བྱང་ཆུབ་མཆོག་ཏུ་སེམས་བསྐྱེད་པ་ནི། འདི་ནས་བྱང་ཆུབ་མ་ཐོབ་པརཿ ཡེ་ཤེས་མཁའ་འགྲོ་ཁྱོད་བསྒྲུབ་ནསཿ ཕྱོགས་རིས་བྲལ་བའི་སེམས་ཅན་རྣམསཿ བདེ་ཆེན་སལ་འགོད་བར་བགྱིཿ ཞེས་པས། འདི་ལྟར་སེམས་ཅན་ཐམས་ཅད་ནི་རང་ཉིད་ལ་དྲིན་འཁོར་ཐབས་མེད་པའི་ཕ་དང་མ་རུ་མ་གྱུར་པ་མེད་ལ། ཕ་མ་དེ་དག་འགྲོ་དྲུག་གི་གནས་རིགས་ཐ་དད་པར་ད་ལྟའི་སྡུག་བསྔལ་ལ་སྤྱོད། ཕྱི་མའི་སྡུག་བསྔལ་གྱི་རྒྱུ་བསྒྲུབ་པས་ཤིན་ཏུའང་སྙིང་རྗེའི་ཡུལ་དུ་གྱུར་ལ། ད་དུང་རང་རྒྱུད་ཀྱི་བདེ་གཤེགས་སྙིང་པོ་རང་ངོ་མ་ཤེས་ན་ནམ་ཡང་ཐར་བའི་སྐབས་མེད་ཅིང་འཁྲུལ་པའི་ལས་ལ་སྤྱོད་པས་ན། དེ་ལ་ད་ལྟ་རང་ཉིད་ཀྱིས་ཕན་འདོགས་པར་ཞུགས་ཀྱང་ལས་ཉོན་མི་ཟད་པའི་སྒྲིབ་པས་བདག་ཀྱང་འཁོར་བའི་གནས་ལས་ཡོངས་སུ་མ་བརྒལ་ན་གཞན་ལ་ཕན་པ་ཇི་ལྟར་བསྒྲུབ། དེ་བས་བདག་གིས་གསང་སྔགས་བླ་ན་མེད་པའི་སྒོར་ཞུགས་ནས། འདི་ནས་བྱང་ཆུབ་སྙིང་པོ་མ་ཐོབ་ཀྱི་བར་དུ་ཡེ་ཤེས་ཀྱི་མཁའ་འགྲོ་མ་ཁྱོད་ཀྱི་སྐུ་གསུང་ཐུགས་ཀྱི་རང་བཞིན་སྤང་ཐོབ་དང་བྲལ་བའི་ཡེ་ཤེས་དང་། བདག་གི་ལུས་ངག་ཡིད་གསུམ་དབྱེར་མེད་དུ་མ་སོང་གི་བར་དུ། བྱང་ཆུབ་སེམས་དང་ཁྱོད་ཉིད་ཁོ་ནས་ཕྱག་རྒྱ་ནམ་ཡང་མི་བཏང་བར་བཟུང་སྟེ་རྩེ་གཅིག་ཏུ་བསྒྲུབ་པར་བགྱིའོ། །ནམ་སྙིང་པོ་བྱང་ཆུབ་ལ་རེག་པར་གྱུར་ནས། གདུལ་བྱའི་སེམས་ཅན་གདུལ་སླ་བ་དཀར་ཕྱོགས་ཀྱི་སྡེ་ཚན་དང་། གདུལ་དཀའ་བ་ནག་ཕྱོགས་ཀྱི་སྡེ་ཚན་ནམ། ཡང་ན་ཉེ་རིང་ཆགས་སྡང་གིས་རིས་སུ་གཅོད་པའི་ཕྱོགས་ལྷུང་གི་བློ་དང་བྲལ་བའི་ངང་ནས། ལམ་དུས་སུ་ཚོགས་སྦྱོར་དུ་མོས་པས་སྤྱོད་པའི་སེམས་བསྐྱེད་དང་། མ་དག་ས་བདུན་ལ་ལྷག་བསམ་དག་པ་དང་། དག་པ་གསུམ་ན་རྣམ་པར་སྨིན་པའི་སེམས་བསྐྱེད་ལ་གོམས་པའི་རང་ཤུགས་ཀྱིས། མི་སློབ་པའི་ལམ་དུ་སྒྲིབ་པ་སྤངས་པའི་སེམས་བསྐྱེད་དམིགས་པ་མེད་པའི་སྙིང་རྗེ་ཆེན་པོའ་ིརྩལ་སེམས་ཅན་རྣམས་ལ་སྤྲོས་ཏེ་རང་རང་གི་སྐལ་པ་དང་འཚམས་པའི་སྤྲུལ་པས། བསམ་པ་དང་མཐུན་པའི་ཆོས་བསྟན་དེ་རྒྱུད་ལས་སུ་རུང་བར་བྱས་ནས། མཐར་ཐུག་དོན་དམ་པར་རང་ཉིད་གང་དུ་བསྒྲོད་པའི་ལམ་ཟབ་དེར་ཡོངས་སུ་དཀྲིས་ཏེ་སེམས་ཅན་ཀུན་ཀྱང་བདེ་བ་ཆེན་པོ་ཁ་སྦྱོར་ཡན་ལག་བདུན་ལྡན་སངས་རྒྱས་སྐུ་གསུམ་གྱི་ས་ལ་འགོད་པར་བགྱིའོ། །ཞེས་པ་སྟེ། མངོན་རྟོགས་རྒྱན་ལས། སེམས་བསྐྱེད་པ་དེ་གཞན་དོན་ཕྱིར། །ཡང་དག་རྫོགས་པའི་སངས་རྒྱས་འདོད། །ཅེས་སོ། །འདི་ནི་སེམས་བསྐྱེད་པ་དང་དམ་བཅའ་སྟབས་གཅིག་ཏུ་བཟུང་བའོ། །གསུམ་པ་མཆོད་རྫས་བྱིན་བརླབས་ནི། ཨོཾ་ཨཱཿཧཱུཾཿ དངོས་པོར་འཛིན་པའི་རྣམ་རྟོག་ཀུནཿཕྱི་ནང་གསང་གསུམ་མཆོད་པའི་སྤྲིནཿ ཀུན་ཏུ་བཟང་པོའ་ིའདོད་ཡོན་ནིཿནམ་མཁའ་ལྟ་བུར་མཛད་པ་མེདཿ ཅེས་པས། ཨོཾ་མཆོད་རྫས་ཀྱི་རང་བཞིན་གྱི་མ་དག་པ་འབག་བཙོག་གི་སྦྱོང་བྱེད་ཡིན་ནོ། །དེ་ལ་རང་བཞིན་གྱི་མ་དག་པ་ནི་མཆོད་ཡོན་ལ་རིག་པ་མཆོག་ལས། ལོག་འདྲེན་ཆུ་ལྟར་གཡོ་བ་ཞེས་བྱ་བ་དེ་དག་གིས་ནི་ཆུ་ལ་གནས་ན་རིགས་སྔགས་འཆང་གྲུབ་པར་བྱེད་པ་རྣམས་འཛིན་པར་བྱེད་དོ། །དེ་དག་གི་མཚན་མ་འབྱུང་སྟེ། །སེམས་འཁྲུག་པར་བྱེད་དེ། །འདོད་པ་ལ་ལྷུར་སེམས་པ་དང་། །བྲུ་བས་གཟིར་ཞིང་། ཁ་ཟས་ལ་མངོན་པར་ཆགས་པ་དང་། །འཇིགས་པའི་སེམས་སྐྱེ་བར་འགྱུར་རོ། །ཞེས་སོ། །དེ་བཞིན་དུ་མེ་ཏོག་ལ་ཁོང་དུ་འཇུག་པས་འཇིག་རྟེན་མེ་ཏོག་དྲི་ཆབ་ལ་ཟས་སུ་དྲི་ཟབ་ཉེ་བར་འཁོར། བདུག་པ་ལ་ནག་པོ་འདུས་ཆེན། མར་མེ་ལ་གཙུག་ཕུད་གཅིག་པ། ལྷ་བཅོས་ལ་གདུགས་དཀར་ལས་ཟས་སུ་གཏོར་མ་ཟ་བ་སོགས་གཞན་ཡང་མཆོད་རྫས་འབུལ་དང་། སྒྲུབ་པ་པོ་ལ་བར་དུ་གཅོད་པར་བྱེད་པའི་ཚུལ་དཔུང་བཟང་གིས་ཞུས་པར། རིག་པ་འདོན་པའི་སེམས་ནི་གཡེང་བར་བྱེད། །དཔེར་ན་ཆུ་ནང་དྲི་མ་སྣང་བ་ལྟར། །དེ་བཞིན་མི་ཡི་ལུས་ལ་འཇུག་པར་འགྱུར། །ཁྲུས་ཚེ་གཞན་ལ་ཟློས་པ་ན་ཡང་གཞན། ཉམས་ན་གཞན་ཡང་མེ་ཏོག་བདུག་པ་དང་། །མར་མེ་འབུལ་བའི་ཚེ་ནའང་གཞན་ཡིན་ལ། །སྦྱིན་བསྲེག་བྱེད་པའི་ཚེ་ནའང་འགེགས་གཞན་འཇུག །ཅེས་སོགས། ཤོ་ལོ་ཀ་དགུས་གསལ་བར་གསུངས་ཀྱང་། འདིར་ཡི་གེར་འཇིགས་ལ། དེ་དག་ཕྱིར་བསྐྲོད་པ་ལ་ཨོཾ་ནི་གེགས་ཞི་ནས་ཤེས་པར་བྱེད་པ་ནོར་བུ་འཛིན་པའི་སྙིང་པོ་སྟེ། རྩེ་མོ་ལས། ཨོཾ་ནི་ཅི་ཞིག་ཡིན་པར་བཤད། །མཆོག་དང་ནོར་སྟེར་དཔལ་དང་གཡང་། །སྐལ་པ་བཟང་པོ་རྣམས་ལྡན་ཞིང་། །དམ་བཅའ་བ་དང་བཀྲ་ཤིས་དོན། །ནོར་བུ་འཛིན་པའི་སྙིང་པོ་ཡིན། །ཞེས་སོ། །ཨཱཿཡིག་གིས་རྟོགས་པ་སྟེ་སྣང་སྲིད་ཐམས་ཅད་མཆོད་པའི་ཕྱག་རྒྱ་ཆེན་པོའ་ིརང་བཞིན་དུ་གནས་པ་ལ་དེ་ལྟར་དུ་རྟོགས་པས་ན་སྤེལ་བ་ཞེས་བྱ་སྟེ། །གསང་རྙིང་ལས། མཉམ་པའི་སྒྲུབ་རྫས་ཆེན་པོ་ནི། །བདག་དང་མཉམ་པའི་ཚོགས་ལ་འབུལ། །ཞེས་དང་། །ཨོཾ་མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་ནི་སྤྲིན་ཆེན་མོ། །ཕྱོགས་བཅུ་ཐམས་ཅད་སངས་རྒྱས་ཞིང་། །ཞེས་སོགས་གསུངས་སོ། །ཧཱུཾ་གིས་ནི་བསྒྱུར་བ་སྟེ། དེ་ཡེ་ཤེས་ལྔའི་བྱེ་བྲག་གིས་ཇི་ལྟར་འདོད་པའི་ཡོན་ཏན་ལྔའི་དངོས་པོར་བྱེད་པ་སྟེ། །ཞལ་ལུང་འགྲེལ་བར་སྨན་ཞབས་ཀྱིས། ཟླ་ཕྱེད་ཐིག་ལེ་རྣམས་སྒེག་པ། །མགོ་བོ་ཨེ་ཡིག་ཐུར་དུ་བལྟས། །མི་བསྐྱོད་པ་ཡི་ངོ་བོའ།ོ ། དྲིལ་བུ་ལྟ་བུའི་ལུས་ཉིད་ནི། །རིན་ཆེན་རྟོག་གི་ངོ་བོའ།ོ ། དེ་ཡི་ཕྱི་རོལ་དུ་དབྱུག་པ་ནི། །ཚེ་དཔག་མེད་ཀྱི་ངོ་བོའ།ོ ། རིང་པོ་ཨུ་ནི་ཕྱིར་ཕྱོགས་འགྱུར། །དོན་ཡོད་གྲུབ་པའི་ངོ་བོའ།ོ ། ཞེས་རྒྱ་ཡིག་གི་ཧཱུྃ་སྦྱར་བ་ལྟར་ན། ཟླ་ཚེས་ཐིག་ལེ་རྣམ་སྣང་། །མགོ་བོ་མི་བསྐྱོད། ཧའི་ཁོག་པ་རིན་འབྱུང་། །འ་ཚེ་དཔག་མེད། ཨུ་དོན་གྲུབ་དང་སྦྱར་བའི་བཤད་པ་ཡིན་ནོ། །ཡང་ན། ཨོཾ་སྐུ་རྡོ་རྗེའི་རྣམ་སྣང་གི་ས་བོན་གྱིས་སྣང་བ་མ་དག་པའི་རྟོགས་ཚོགས་ཆོས་དབྱིངས་ཡེ་ཤེས་སུ་སྦྱོར། །ཨཿ ནི་གསུངས་རྡོ་རྗེའི་ས་བོན་རོ་རྣམ་དག་པ་འོད་དཔག་མེད་ཀྱིས་བདུད་རྩིར་དག་པ་དང་། །ཧཱུྃ་ཐུགས་རྡོ་རྗེ་མི་བསྐྱོད་པའི་ས་བོན་མེ་ལོང་ཡེ་ཤེས་ཀྱིས་མེ་ལོང་གི་ངོས་སུ་ཅིར་ཡང་འཆར་བ་ལྟར་མཆོད་རྫས་རྣམ་པ་གང་འདོད་པའི་དངོས་པོ་ཅིར་ཡང་སྒྱུར་བར་བྱེད་དོ། །དེ་ལྟར་འབྲུ་གསུམ་གྱི་དོན་བསྟན་ནས། དངོས་གཞི་ནི་ཕྱི་ཡུལ་གྱིས་དངོས་པོ་འབྱུང་བ་ལྟ་ལ་རང་རྒྱུད་དུ་འཛིན་པའི་རྣམ་པར་རྟོག་པ་ཀུན་ཀྱང་། སའི་ཁམས་སུ་སྣང་བ་གཟུགས་ཀྱི་ལྷ་མོ་དཀར་མོ་མེ་ལོང་འཛིན་པ་ལ་སོགས་པ་རྒྱལ་བའི་སྤྱན་དུ་དགྱེས་པའི་དངོས་པོ་དང་། ལྷ་མོའ་ིརང་བཞིན་ནི། ཆུའི་ཁམས་སུ་སྣང་བ་ཐམས་ཅད་སྒྲའི་ལྷ་མོ་དམར་མོ་པི་ཝཾ་ཐོགས་པ་ལ་སོགས་པ་རྒྱལ་བའི་སྙན་དུ་དགྱེས་པའི་མཆོད་པའི་དངོས་པོ་དང་ལྷ་མོའ་ིརང་བཞིན། དེ་བཞིན་དུ་མེའི་ཁམས་དྲིའི་ལྷ་མོ་སྔོན་མོ་དྲིའི་དུང་ཆོས་འཛིན་པ་སོགས་རྒྱལ་པའི་ཤངས་དགྱེས་བྱེད། རླུང་གི་ཁམས་རོའ་ིལྷ་མོ་སེར་མོ་མཁར་གཞོང་བཟའ་བཅའ་ལྡག་མྱང་བཏུང་བ་སོགས་ཞལ་ཟས་སྣ་ཚོགས་ཀྱིས་བཀང་བ་འཛིན་པ་སོགས་རྒྱལ་བའི་ལྗགས་དགྱེས་བྱེད། ནམ་མཁའི་ཁམས་རེག་བྱའི་ལྷ་མོ་དཀར་མོ་ན་བཟའ་པཉྪ་ལི་ཀ་ཐོགས་པ་སྣ་ཚོགས་རྒྱལ་བའི་སྐུ་དགྱེས་བྱེད་ཀྱི་མཆོད་པའོ། །ནང་སེམས་ཀྱི་དངོས་པོ་ཕུང་པོ་ལྔ་ལ་རང་རྒྱུད་འཛིན་པའི་རྣམ་པར་རྟོག་པ་ཀུན་ཀྱང་། གཟུགས་སུ་སྣང་བ་གཟུགས་ཀྱི་ལྷ་མོ་དང་མཆོད་པ། ཚོར་བར་སྣང་བ་སྒྲའི་ལྷ་མོ་དང་མཆོད་པ། འདུ་ཤེས་སུ་སྣང་བ་དྲོའ་ིལྷ་མོ་དང་མཆོད་པ། འདུ་བྱེད་དུ་སྣང་བ་ཐམས་ཅད་རོའ་ིལྷ་མོ་དང་མཆོད་པ། རྣམ་ཤེས་སུ་སྣང་བ་རེག་བྱའི་ལྷ་མོ་དང་མཆོད་པའི་རང་བཞིན་དུ་བལྟའོ། །གསང་བ་སེམས་ཀྱི་དངོས་པོ་དུག་ལྔ་ལ་རང་རྒྱུད་དུ་འཛིན་པའི་རྣམ་པར་རྟོག་པ་ཀུན་ཀྱང་། ཞེ་སྡང་གདོད་ནས་རང་བཞིན་གྱིས་རྣམ་པར་དག་པ་མེ་ལོང་ཡེ་ཤེས་ཀྱི་ངོ་བོ་གཟུགས་རྡོ་རྗེ་མ། །དེ་བཞིན་དུ། ང་རྒྱལ་རྣམ་པར་དག་པ་མཉམ་ཉིད་ཡེ་ཤེས་ཀྱིའི་ངོ་བོ་སྒྲ་རྡོ་རྗེ་མ། འདོད་ཆགས་རྣམ་པར་དག་པ་སོར་རྟོག་ཡེ་ཤེས་ཀྱི་ངོ་བོ་དྲི་རྡོ་རྗེ་མ། །ཕྲག་དོག་རྣམ་པར་དག་པ་བྱ་གྲུབ་ཡེ་ཤེས་ཀྱི་ངོ་བོ་རོ་རྡོ་རྗེ་མ། །གཏི་མུག་རྣམ་པར་དག་པ་ཆོས་དབྱིངས་ཡེ་ཤེས་ཀྱི་ངོ་བོ་རེག་རྡོ་རྗེ་མའོ། །དེ་དག་ཀྱང་གསང་འདུས་ཀྱི་བསྒྲུབ་ཐབས་མདོར་བྱང་ལས། གཟུགས་ཕུང་རྟོགས་པ་མེ་ལོང་དང་། །སའི་ཁམས་མིག་གི་དབང་པོ་དང་། །གཟུགས་དང་རྣམ་ལྔར་གྱུར་པ་སྟེ། །མེའི་ཚོར་བའི་ཕུང་པོ་མཉམ་ཉིད་དང་། །ཆུ་ཁམས་རྣ་བའི་དབང་པོ་དང་། །སྒྲ་དང་རྣམ་ལྔར་གྱུར་པ་སྟེ། །འདུ་བྱེད་སོ་སོར་རྟོག་པ་དང་། །བྱིན་ཟ་སྣ་ཡི་དབང་པོ་དང་། །དྲི་དང་རྣམ་ལྔར་གྱུར་པ་སྟེ། །འདུ་བྱེད་བྱ་བ་གྲུབ་པ་དང་། །རླུང་ཁམས་ལྕེ་ཡི་དབང་པོ་དང་། །རོ་དང་རྣམ་ལྔར་གྱུར་པ་སྟེ། །ཞེས་སོགས་གསུངས་པས། ཕྱི་ནང་གསང་བའི་མཆོད་སྤྲིན་དུ་རང་བཞིན་དུ་གྲུབ་མོད། འོན་ཀྱང་གསང་སྔགས་བྱ་སྤྱོད་རྣལ་འབྱོར་གྱི་རྒྱུད་ཀུན་ནས་གཙོ་བོར་གསུངས་ཤིང་། གཞན་ཡང་མདོ་སྔགས་ཀྱི་གཞུང་ཕལ་མོ་ཆེ་ནས་ཐུན་མོང་དུ་བཤད་པ་ལ། ཕྱིའི་མཆོད་པ་དང་སྔགས་ནང་རྒྱུད་ཁོ་ན་ལས་གསུངས་པ་ལ། ནང་གི་མཆོད་པ་དང་ཤིན་ཏུ་གསང་སྟེ་སྤྱོད་པ་སྦྱོར་སྒྲོལ་དང་རྗེས་སུ་འབྲེལ་བ་ལ། གསང་བའི་མཆོད་པ་ཞེས་གསུམ་དུ་གསུངས་པ་ལས། །དང་པོ་གཡུང་འགྲེལ་ལས། ཕྱིའི་མཆོད་པ་རྣམ་པ་ལྔ་དང་གཞན་ཡང་བླ་རེ་དང་། འཕན་གདུགས་དང་རོལ་མོའ་ིབྱེ་བྲག་སྣ་ཚོགས་དང་། ཞེས་གསུངས་པས། ཉེར་མཆོད་ལྔའི་སྔོན་དུ་ཆུ་གཉིས་འགྲོ་བའོ། །དེ་ཡང་ཨོཾ་ལས་རིན་པོ་ཆེའི་སྣོད་དུ། མཆོད་ཡོན་ནི་ཞལ་སྐྱེམས་ཡིན་ཏེ། གུར་ལས། ཏིལ་ནག ནས་ཀུ་ཤུ། འབྲས་ཡོས། མེ་ཏོག་དཀར་པོ་དྲི་ཞིམ། ཙནྡ་དཀར་པོ་བཅས་དུང་ཆོས་ལ་སོགས་པའི་སྣོད་དུ་བླུག་པར་བཤད། བརྒྱད་བདེར་འདུས་ལས། ཆུ་དང་འོ་མ་བསྲེ་བར་གསུངས། ཡན་ལག་བརྒྱད་ལྡན་དུ་བྱིན་གྱིས་བརློབ་ཏེ། །ཡན་ལག་བརྒྱད་ལྡན་འདུལ་བ་ལུང་ལས། །ཡང་དང་དྲོ་དང་འཇམ་པ་དང་། །དྭངས་དང་བསིལ་དང་རྙོག་པ་མེད། །འཐུང་ན་ལྟོ་ལ་མི་གནོད་དང་། །མགྲིན་པ་ལ་ཡང་མི་གནོད་པས། །འདི་དག་ཡན་ལག་བརྒྱང་ལྡན་ཆུ། །ཞེས་སོ། །ཞབས་བསིལ་ནི་ཕྱག་ཞབས་བསིལ་བར་བྱེད་པའི་ཆུ་སྟེ་དྭངས་ཞིང་དྲི་བཟང་དང་བཅས་པའོ། །མེ་ཏོག་ནི་ཆུ་དང་ཐང་ལས་སྐྱེས་པ་ཨུ་དུམ་ཝ་ར་ལ་སོགས་པ་ཕྲེང་བར་སྤེལ་ལེགས་སུ་བརྒྱུས་པ་དབུ་ལ་འཆང་པ་དང་། །འགའ་ཞིག་མགུལ་དུ་འཕྱང་བའོ། །བདུག་སྤོས་ནི་ཙནྡ་དཀར་དམར་དང་སིཧླ་ལ་སོགས་པ་རང་བཞིན་ལས་བྱུང་བ་དང་སྦྱར་བ་སོགས་དྲི་ཞིམ་པ་སྣ་ཚོགས་སྤོས་ཁང་དུ་བསྲེགས་པ་དང་། རེད་བུར་བསྲེགས་པའོ། །མར་མེ་ནི་འབྲུ་མར་དང་ཞུན་མར་སོགས་པ་སྡོད་བུར་ལྡན་པ་དེ་དང་། ཉི་ཟླའི་ནོར་བུའི་སྒྲོན་མ་སོགས་སྣང་བའི་མདངས་དང་ལྡན་པའོ། །དྲི་ཆབ་ནི་དྲིའི་དུང་ཕོར་དུ་ཆུ་གཙང་ལ་དྲི་དང་བཟང་པོའ་ིསྨན་སྣ་ཚོགས་འབྲུ་མར་དང་སྦྱར་བའི་བྱུག་པའོ། །ཞལ་ཟས་ནི་མཁར་གཞོང་དུ་བཟའ་བཅའ་ལྡན་མྱང་སོགས་བཟང་དགུའི་ཁ་ཟས་སྤུངས་པའོ། །རོལ་མོ་ནི། སིལ་སྙན་ཕེབ་རྡོག་པི་ཝཾ་རྔ་དུང་ཆ་ལང་རྫ་རྔ་རྔ་ཟླུམ་གླིང་བུ་སོགས་འབུད་པ་དང་དཀྲོལ་བ་དང་བརྡུང་བའི་རིགས་བྱེད་དོ། །བླ་རེ་ནི་མེ་ཏོག་དང་གོས་བཟང་པོ་ལ་སོགས་པས་གདུགས་ཕྱོགས་སུ་བྲེས་པ་དང་། འཕན་ནི་དེ་བཞིན་གཤེགས་པའི་སྐུ་གཟུགས་ཀྱི་དབྱིངས་ཤམས་བུ་དཔྱངས་པ་དང་། །གདུགས་ནི་མདངས་ཏེ་ཉི་མའི་ཚ་གདུང་སྐྱོབས་པ་དང་། ན་བཟའ་ནི། ལྷའི་གོས་པཉྩ་ལི་ཀ་སོགས་ཚ་གྲང་གདུང་བ་སྐྱོབ་ཅིང་རེག་ན་བདེ་བ་དང་། །སྤོས་དྲི་ཞིམ་པོའ་ིཕྱེ་མའི་འཕུར་མ་སོག། །བྱང་ཆུབ་སེམས་དཔའ་ཀུན་ཏུ་བཟང་པོའ་ིསྤྱོད་པའི་རྗེས་སུ་སློབ་པའི་སྨོན་ལམ་ལས། །མེ་ཏོག་དམ་པ་འཕྲེང་བ་དམ་པ་དང་། །སིལ་སྙན་རྣམས་དང་བྱུག་པ་གདུགས་མཆོག་དང་། །མེར་མེ་མཆོད་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་ཆབ་དང་། །ཕྱེ་མ་འཕུལ་མ་རི་རབ་མཉམ་པ་དང་། །བཀོད་པ་ཁྱད་པར་འཕགས་པའི་མཆོད་ཀུན་གྱིས། །རྒྱལ་བ་དེ་དག་ལ་ཡང་མཆོད་པར་བགྱི། །ཞེས་པ་ལྟར་རོ། །གཉིས་པ་ནང་གི་མཆོད་པ་ནི། གཡུང་འགྲེལ་ལས། ནང་གི་མཆོད་པ་དམ་རྫས་དང་། ཚོགས་ཀྱི་ཡོ་བྱད་གླུ་ཚིག་ཏེ། །གླུ་ཡེ་ཤེས་ཀྱི་མཆོད་པ་དང་། །རྐང་པའི་བྲོ་དང་། ལག་པའི་གར་ཏེ་གར་ཡེ་ཤེས་ཀྱི་མཆོད་པ་སྟེ་སུ་ར་རྭ་བཅུ་དྲུག་དང་། ཞེས་གསུངས་པས། དམ་རྫས་ནི་ཤ་ལྔ་དང་བདུད་རྩི་ལྔའི་རང་བཞིན་སྨན་དང་། རཀྟ་དང་། གཏོར་མའོ། དང་པོ་ནི། སྲིད་པ་ཐམས་ཅད་བདུད་རྩི་སྨན་གྱི་རང་བཞིན་ཏེ་བདུད་རྩི་སྒྲོན་གསལ་ལས། །རྣམ་ཐར་གསུམ་དང་ལྡན་པ་ཡི། །ཡང་དག་དོན་ལ་བདུད་རྩི་ཞེས། །དཔའ་བོ་ཆེན་པོས་དེ་སྐད་གསུངས། །འཁོར་བ་བདུད་དང་འདྲ་བ་ལ། །ཡེ་ཤེས་ཆེན་པོའ ི་རྩི་བཏང་པས། །བདུད་རྩི་ཞེས་ནི་དེ་ལ་བྱ། །ཀུན་རྫོབ་སྒྱུ་མའི་དཔེ་བྱད་ལ། །ཡེ་ཤེས་ཆེན་པོའ་ིརྩི་བཏང་བས། །བདུད་རྩི་ཞེས་ནི་དེ་ལ་བྱ། །ཕུང་པོ་ལྔ་ནི་བདུད་ཡིན་ཏེ། །དེ་བཞིན་རིགས་ལྔའི་རྩི་བཏང་བས། །བདུད་རྩི་ཞེས་ནི་དེ་ལ་བྱ། །དེ་བཞིན་མིག་ལ་རྩོགས་པ་ཡི། །སྐྱེ་མཆོད་རྣམས་ནི་བདུད་ཡིན་ཏེ། །སེམས་དཔའ་སེམས་མའི་རྩི་བཏང་བས། །བདུད་རྩི་ཞེས་ནི་དེ་ལ་བྱ། །འབྱུང་བ་ལྔ་ནི་བདུད་ཡིན་ཏེ། །ཡུམ་ཆེན་ལྔ་ཡི་རྩི་བཏང་བས། །བདུད་རྩི་ཞེས་ནི་དེ་ལ་བྱ། །གཟུགས་ལ་སོགས་པའི་ཡུལ་རྣམས་ཀྱང་། །དེ་བཞིན་དམིགས་པའི་བདུད་ཡིན་ཏེ། །དེ་ལ་འཇོམས་པའི་རྩི་བཏང་བས། །བདུད་རྩི་ཞེས་ནི་དེ་ལ་བྱ། །དེ་བཞིན་འཁོར་བའི་བག་ཆགས་ལ། །ཐུགས་རྗེ་ཆེན་པོའ་ིརྩི་བཏང་བས། །བདུད་རྩི་ཞེས་ནི་དེ་ལ་བྱ། །དེ་ཕྱིར་ཨ་ནི་མཉམ་གནས་ཏེ། །མྲྀ་ནི་ཐམས་ཅད་བདུད་ཡིན་པས། །དེ་ཡི་རྩི་ནི་ཐཱ་ཞེས་བྱ། །དེ་བཞིན་ཨ་ནི་དྲི་ཡིན་ཏེ། །སྨྲྀ་ནི་ཐམས་ཅད་སྨན་ཡིན་ནོ། །དེ་བཞིན་ཐཱ་ནི་རྩི་རུ་བཤད། །ཨ་ནི་ཐམས་ཅད་རྒྱུ་ཡིན་ཏེ། །མྲྀ་ནི་དེ་བཞིན་འབྲས་བུའོ། །དེ་ལ་ཐ་ནི་ཐབས་སུ་གསུང་། །ཨ་ནི་ཆོས་ཉིད་ཡང་དག་སྟེ། །མྲྀ་ནི་ཡེ་ཤེས་ཆེན་པོའ།ི ། ཐ་ནི་ཡོངས་སུ་དག་པའོ། །ཞེས་སོགས་རྒྱ་ཆེར་གསུངས་སོ། །གཉིས་པར་རཀྟ་ནི། ཐུགས་རྗེ་ཆགས་པས་ཁམས་གསུམ་འཁོར་བ་སོ་སོར་རྟོག་པའི་ཡེ་ཤེས་སུ་སྒྲོལ་བ་སྟེ། །བདེ་འདུས་ལས། ཆོས་ཉིད་བརླན་གྱི་ཡེ་ཤེས་ཆུ། །ཐུགས་རྗེ་ཆགས་པའི་ཁ་དོག་དམར། །སྲིད་པ་བསྐྱེད་པ་རྒྱུའི་ཁྲག །པདྨ་རཀྟ་རང་བྱུང་ཁྲག །ཞིང་བཅུ་བསྒྲལ་བ་སྲོག་གི་ཁྲག །རྩི་བཅུད་དམར་པོ་འབྱུང་བའི་ཁྲག །ཐམས་ཅད་དག་པ་དབང་གི་ཁྲག །མ་དག་ཁམས་གསུམ་འཁོར་བའི་རྒྱུ། །ཧེ་རུ་ཀ་ཡི་དགོངས་པ་ཡིས། །སྲིད་གསུམ་འཁོར་བའི་བག་ཆགས་བསྒྲལ། །མཆོད་པའི་རྫས་སུ་བྱིན་རླབས་ཏེ། །ཞེས་སོ། །གསུམ་པ་གཏོར་མ་ནི། སྔ་མ་ལས། སྣང་བ་སྣོད་ཀྱི་འཇིག་རྟེན་གཏོར་གཞོང་དུ། །སྲིད་པ་བཅུད་ཀྱི་སྐྱེ་འགྲོ་གཏོར་མར་བཤམས། །ཞེས་ཚོགས་དྲུག་སྣང་བའི་ཡུལ་གྱུར་ཐམས་ཅད་གཏོར་སྣོད་ལས། །སྲིད་གསུམ་འགྲོ་བའི་ལྔ་ཕུང་ཐམས་ཅད་གཏོར་མར་གདོད་ནས་གྲུབ་ལ། ཡོངས་གྲུབ་རང་བཞིན་དག་པའི་ཆོས་ཉིད་ཀྱིས་བརླབ་པས་སྣང་སྲིད་གཞིར་བཞེངས་ཀུན་ཏུ་བཟང་པོའ་ིམཆོད་སྤྲིན་ཞེས་བྱའོ། །གཞན་ལྷག་མ་ནི་ཚོགས་ཀྱི་སྐབས་སུ་སྟོན་ནོ། །གསུམ་པ་གསང་མཆོད་ནི། གསང་བའི་མཆོད་པ་སྦྱོར་སྒྲོལ་གཉིས་ལས། །དང་པོ་ནི། ཀུན་ཏུ་བཟང་མོའ་ིགསང་བའི་བྷ་ག་ལས། །རྒྱལ་བའི་དཀྱིལ་འཁོར་རབ་འབྱམས་མ་ལུས་ཀུན། །འདུ་འབྲལ་མེད་པའི་ངང་དུ་རོ་གཅིག་པས། །གཉིས་མེད་བྱང་ཆུབ་སེམས་ཀྱི་མཉེས་གྱུར་ཅིག། ཅེས་སོ། །གཉིས་པ་སྒྲོལ་བའི་མཆོད་པ་ནི། །གསང་སྙིང་ལས། ཐོག་མར་བདག་ཉིད་རྟོགས་སྒོམ་བསྒྲལ། །དེ་ནས་གཉིས་མེད་བློ་ཡིས་ནི། །བློང་ན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །ཞེས་དང་། གདོད་མའི་སྟོང་ཆེན་དབྱིངས་ཀྱི་བྷ་གའི་ཀློང་། །རྣམ་ཀུན་མཆོག་ལྡན་རིག་པའི་རྡོ་རྗེ་ཡིས། །རྟེན་འབྲེལ་ལུགས་ལྡོག་འཁོར་བའི་བག་ཆགས་བསྒྲལ། བདེ་སྟོང་དགའ་བཞིར་ཉམས་རྩལ་རྫོགས་པའི་གར། །ཞེས་སོ། །དེ་ལྟར་ཕྱི་ནང་གསང་བའི་མཆོད་པའི་བརླབ་ཚུལ་ནི་སྣང་སྲིད་ཐམས་ཅད་གདོད་ནས་མཆོད་པའི་རང་བཞིན་དུ་གནས་པ་ལ། རྣལ་འབྱོར་རབ་ཀྱི་དེ་ལྟར་གསལ་འདེབས་པར་གཞུང་གི་དགོངས་འགྲེལ་ཙམ་དུ་བཀོད་ལ། བྱེ་བྲག་ཏུ་སོ་སོར་བྱིན་གྱིས་བརླབ་པའི་ཚུལ་ནི། རྗེ་བླ་མས་མཛད་པའི་རྡོ་རྗེ་ཕུར་བ་རྒྱུད་ལུགས་ཀྱི་ལས་བྱང་དཔག་བསམ་ལྗོན་པ་ལས་རྟོགས་པར་བྱའོ། །མཆོད་པའི་སྤྲིན་ནི་ཆིག་ཟུར་བསྡུས་པ་སྟེ། །དེ་ལྟར་མཆོད་པའི་དངོས་རྣམས་སྤྲིན་གྱི་ཕུང་པོ་སྟེ་རྒྱ་མཚོའི་མིང་གི་རྣམ་གྲངས་གྲངས་མེད་པའི་དོན། ཀོ་ས་ལར། དེ་རྣམས་ཀྱི་ཚོགས་ནི་སྤྲིན་ནོ། །སྤྲིན་གྱི་ཕུང་པོ་ནི་རྒྱ་མཚོ་སྟེ་རྒྱ་མཚོའི་སྒྲས་ནི་གྲངས་མཐའ་མེད་པར་ཉིད་དུ་སྟོན། །ཞེས་སོ། །དེ་ཉིད་ཀྱང་ཐུན་མོང་ཞིང་དང་བསམ་པ་དང་། །དངོས་པོ་ཀུན་ལ་ངན་པ་དང་མ་དག་པའི་སེལ་མེད་པར་ཀུན་ནས་ཀུན་ཏུ་བཟང་པོའ་ིམཆོད་རྫས་ཁོ་ནས་འདོད་པའི་ཡོན་ཏན་ལྔའི་ལོངས་སྤྱོད་དུ་ལྷུན་གྱིས་གྲུབ་པ་ནི། མཆོད་པའི་ཕུང་པོ་ཉིད་ཀྱང་སྟོང་གསུམ་དང་མཉམ་ཞིང་དེའི་རྡུལ་རེ་རེར་ཀྱང་དེ་ལྟ་བུའི་མཆོད་སྤྲིན་སྔ་མ་ལྟར་བལྟ་ཞིང་དེའི་རྡུལ་རེའི་ནང་དུའང་དེ་ལྟར་བལྟ་བ་སོགས་གྲངས་མཐའ་མེད་པར་བློས་མོས་པ་ནམ་མཁའ་མཛོད་ལྟ་བུར་ནམ་ཡང་འཛད་པ་མེད་པ་ནི་ཐུན་མོང་བྱང་ཆུབ་སེམས་དཔའ་ཀུན་ཏུ་བཟང་པོའ་ིརྗེས་སུ་སློབ་པའི་མཆོད་སྤྲིན་ཏེ། །དེ་ཡང་མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱིས། །ཞེས་སོ། ཐུན་མོང་མིན་པ་ནི། ནམ་མཁའི་མཐས་བསྡུས་པའི་ཞིང་ཁམས་རྒྱ་མཚོ་ལྟ་བུ་རྒྱལ་བ་ཀུན་ཏུ་བཟང་པོའ་ིཡེ་ཤེས་རོལ་པའི་ཆོ་འཕྲུལ་རང་བཞིན་འདོད་ཡོན་དག་པའི་མཆོད་སྤྲིན་ཆེན་པོ་བློའ་ིསྤྱོད་ཡུལ་ལས་འདས་པ་ནི་ནམ་ཡང་མཁའ་ལྟར་འཛད་པ་མེད་པ་རྒྱལ་བ་ཀུན་ཏུ་བཟང་པོའ་ིཡེ་ཤེས་ཀྱི་མཆོད་པ་སྟེ། །ཞི་ཁྲོ་ལས། སྣོད་བཅུད་མ་ལུས་འདོད་ཡོན་རོལ་པའི་རྒྱནཿཀུན་བཟང་མཆོད་པའི་སྤྲིན་ཕུང་བསམ་ཡས་པཿ ཞེས་སོ། །ཤིན་ཏུ་ཐུན་མོང་མིན་པ་ནི། །དབྱིངས་རིག་གཉིས་སུ་མེད་པ་ཀུན་ཏུ་བཟང་མོའ་ིགསང་བའི་བྷ་གར་ཐབས་མཆོག་ཀུན་ཏུ་བཟང་པོའ་ིཡིས་བདེ་སྟོང་འདོད་པའི་ཡོན་ཏན་ཆེན་པོའ་ིམཆོད་སྤྲིན་ནི་ཟག་བཅས་ཀྱི་འགྱུར་བར་བྲལ་བ་ནམ་མཁའ་ལྟ་བུའི་རང་བཞིན་དུ་ནམ་ཡང་མཛད་པ་མེད་པ་སྟེ། །བཤད་རྒྱུད་ལས། ཡུམ་གྱི་བྷ་ག་དགྱེས་པའི་ཕོ་བྲང་དུ། །ཡབ་ཀྱི་རྡོ་རྗེ་གཉིས་མེད་བྱང་ཆུབ་སེམས། །ཐབས་དང་ཤེས་རབ་འདུ་འབྲལ་མེད་པ་ལ། །ཞེས་སོ། །སརྦ་ནི་ཐམས་ཅད། པཱུ་ཛ་མཆོད་པ། ས་མ་ཡཱཿ དམ་ཚིག་གི་ཧོ་དགྱེས་པ་སྟེ། སྣོད་བཅུད་ཐམས་ཅད་ཡེ་ནས་དག་པ་འདོད་ཡོན་མཆོད་པའི་དམ་ཚིག་ཆེན་པོར་ལྷུན་གྱིས་གྲུབ་པའི་རང་བཞིན་ཏེ། །སྙིང་འགྲེལ་ཕྱོགས་བཅུ་མུན་སེལ་ལས། །གནས་དང་འཁོར་ལ་སོགས་པ་གཞན་ལ་མི་ལྟོས་པར་ཡེ་ཤེས་ཀྱི་རང་སྣང་ཉིད་དུ་ཏིང་ངེ་འཛིན་གྱི་སྒྱུ་མའི་རོལ་པར་ལྷུན་གྱིས་གྲུབ་པས་ལོངས་སྤྱོད་ཆེན་པོ་ཞེས་བྱའོ། །ཞེས་སོགས་དང་མཐུན་ནོ། །སྤྱི་དོན་གཉིས་པ་དངོས་གཞི་བསྐྱེད་པའི་རིམ་པ་བསྒོམ་པ་ལ་གཉིས་ཏེ། རྟེན་དང་བརྟེན་པའི་དཀྱིལ་འཁོར་བསྐྱེད་པ། ཕྲིན་ལས་བྱ་བའི་ཡན་ལག་བསྒྲུབ་པའོ། །དང་པོ་ལ་གསུམ་གྱི་སྐྱེ་མེད་ཨ་ཏིའི་གནས་ལུགས་བསྟན་པ་ནི། །ཨ་ནི་ཡི་གེ་ཀུན་གྱི་འབྱུང་གནས་སྣང་བའི་ཆ་ཙམ་ཡང་མ་དོར་བའི་སྟོང་པའི་མཐར་ཡང་མ་གྲུབ་པ་དང་། །དེ་ཉིད་དངོས་པོ་དང་མཚན་མར་མེད་པས་མི་སྟོང་ཞེས་ཀྱང་དམིགས་སུ་མེད་པ་གང་གི་ཚེ་དེ་གཉིས་ཀྱི་རང་བཞིན་གཉིས་སུ་མེད་པའོ། །ཞེས་པའི་དབུ་མའང་དམིགས་སུ་ཡོད་པ་མ་ཡིན་ཏེ་ལྟོས་པ་སྣང་བ་དང་སྟོང་པའི་རང་བཞིན་ལས་འདས་ཕྱིར་རོ། །དེ་ལྟར་ན་ཆོས་ཐམས་ཅད་མིང་ཙམ་ལས་སྨྲ་བསམ་སྤྲོས་བརྗོད་ཀྱི་ངོ་བོར་མ་གྲུབ་པ་ནི་སངས་རྒྱས་ཀུན་གྱི་དགོངས་པ་ཆོས་སྐུ་ལྷུན་གྲུབ་ཆེན་པོའ་ིརང་བཞིན་ཏེ། གསང་སྙིང་ལས། ཨ་ནི་སྟོང་དང་མི་སྟོང་གི་དབུས་མའང་དམིགས་སུ་ཡོད་མ་ཡིན། །ཐམས་ཅད་མིང་ཙམ་སངས་རྒྱས་ཀུན། །ཡི་གེའི་ཕྲེང་བ་ཉིད་ལ་གནས། །ཞེས་དང་། མཚན་བརྗོད་ལས། ཨ་ནི་ཡིག་འབྲུ་ཀུན་གྱི་མཆོག། དོན་ཆེན་ཡི་གེ་དམ་པ་སྟེ། །ཁོང་ནས་འབྱུང་བའི་སྐྱེ་བ་མེད། །ཚིག་ཏུ་བརྗོད་པ་སྤངས་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག །ཅེས་སོ། །དེ་ཡང་སྐྱེ་མེད་ཀྱི་ངང་ལས་ཐུགས་རྗེ་འགགས་མེད་ལྷུན་གྲུབ་དག་པ་རབ་འབྱམས་ལྷག་མཐོང་གི་ཡེ་ཤེས་ཆེན་པོ་སྣང་ཆའི་རྟེན་འབྲེལ་མངོན་དུ་བྱ་བ་ནི་འདི་མན་གྱི་བསྐྱེད་རིམ་ཐམས་ཅད་ཡེ་སྟོང་འོད་གསལ་རྫོགས་པ་ཆེན་པོའ་ིརྩིས་ཟིན་པའི་རང་གདངས། ཐབས་སྙིང་རྗེ་ཆེན་པོ་དང་ཟུང་དུ་འཇུག་པའི་ཏིང་ངེ་འཛིན་དུ་ལྡང་བར་བྱ་སྟེ། དོ་ཧ་ལས། སྙིང་རྗེ་དང་བྲལ་སྟོང་པ་ཉིད་ཞུགས་གང་། །དེས་ནི་ལམ་མཆོག་རྙེད་པ་མ་ཡིན་ནོ། །འོན་ཏེ་སྙིང་རྗེ་འབའ་ཞིག་སྒོམ་ན་ཡང་། །སྲིད་པར་འདིར་གནས་ཐར་པ་ཐོབ་མི་འགྱུར། །ཞེས་དང་། གུར་ལས། སྟོང་ཉིད་སྙིང་རྗེ་ཐ་དད་མེད། །གང་དུ་སེམས་ནི་རྣམ་བསྒོམ་པ། །དེ་ནི་སངས་རྒྱས་ཆོས་དང་ནི། །དགེ་འདུན་གྱིས་ཡང་བསྟན་པའོ། །གཉིས་པ་འགགས་མེད་འོད་གསལ་ཆེན་པོ་སྐུ་དང་ཡེ་ཤེས་ཀྱི་དཀྱིལ་འཁོར་བསྟན་པ་ལ་གཉིས། །སྣང་སྲིད་ཡེ་ནས་དག་པ་རབ་འབྱམས་ཀྱི་དཀྱིལ་འཁོར་དུ་བསྟན་པ་དང་། །རྣམས་པ་བདེ་ཆེན་ཐིག་ལེ་ཉག་གཅིག་གི་ཕོ་བྲང་དུ་གསལ་གདབ་པའོ། །དང་པོ་ལ་གཉིས་ཀྱི་སྣང་བ་སྣོད་ཀྱི་འཇིག་རྟེན་ཡུམ་ལྔའི་ཀློང་དུ་བསྟན་པ་ནི། །སྣང་བ་ཐམས་ཅད་ཡུམ་ལྔའི་ཀློང༔ ཞེས་པས་ཕྱི་སྣོད་ཀྱི་འཇིག་རྟེན་དུ་སྣང་བ་ཐམས་ཅད་རང་བཞིན་གྱི་རྣམ་པར་དག་པ་རིགས་ཀྱི་ཡུམ་ལྔའི་མཁའ་ཀློང་སྟེ༔ སྲ་བ་སའི་ཁམས་ཐམས་ཅད་རྣམ་པར་དག་པ་ཡུམ་སངས་རྒྱས་སྤྱན་མའི་ཀློང་། །མཉེན་པ་ཆུའི་ཁམས་ཐམས་ཅད་རྣམ་པར་དག་པ་ཡུམ་མ་མ་ཀིའི་ཀློང་། །དྲོ་བ་མེད་པའི་ཁམས་ཐམས་ཅད་རྣམ་པར་དག་པ་ཡུམ་ན་བཟའ་དཀར་མོའ་ིཀློང་། བསྐྱོད་པ་རླུང་གིས་ཁམས་ཐམས་ཅད་རྣམ་པར་དག་པ་ཡུམ་དམ་ཚིག་སྒྲོལ་མའི་ཀློང་། །སྣང་བ་ནམ་མཁའི་ཁམས་ཐམས་ཅད་རྣམ་པར་དག་པ་ཡུམ་ནམ་མཁའ་དབྱིངས་ཕྱུག་མའི་ཀློང་སྟེ། །རྒྱུད་ལས། ས་ཆུ་སྤྱན་དང་མ་མ་ཀི༔ མེ་རླུང་གོས་དཀར་དམ་ཚིག་སྒྲོལ༔ ནམ་མཁའ་དབྱིངས་ཀྱི་དབང་ཕྱུག་མ༔ ཞེས་དག་བྱ་དག་འབྲས་ལ་སྦྱར་ཞིང་། །བྷི་མ་ལས་ཀྱང་། །སྣང་སྲ་མཉེས་དྲོད་བསྐྱོད་དང་ལྔ། །དབྱིངས་ཀྱི་ངོ་བོ་རྒྱལ་མོ་སྟེ། །ཞེས་སོ། །གཉིས་པ་སྲིད་པ་གསུམ་མཁའ་འགྲོའ་ིདཀྱིལ་འཁོར་དུ་བསྟན་པ་ནི། །སྲིད་པ་ཐམས་ཅད་མཁའ་འགྲོའ་ིདལ༔ ཞེས་པར་རྗེ་བླ་མས་བསྙེན་པའི་ཡང་ཡིག་འདུས་དཀྱིལ་མངོན་བརྗོད་དུ། །ས་འོག་ས་སྟེང་ས་བླ་སྟེ་བར་སྣང་སྟོང་པའི་ཆ་གསུམ་ལ་སྲིད་པ་གསུམ་དུ་གྲགས་པ་ཐམས་ཅད་ཀྱང་མཁའ་འགྲོའ་ིདལ་དུ་རང་བཞིན་གྱིས་སངས་རྒྱས་པ་ཡིན་པར་ཤེས་པ་ཡིན་ནོ། ཞེས་གསུང་པའི་དོན་སྡོམ་པའི་རྒྱུད་ལས། །ཤྲཱི་ཧེ་རུ་ཀ་ཡི་སྤྲུལ་པ་ཆེ། །དེ་ཡི་དཀྱིལ་འཁོར་གཙོ་མོ་ཡིན། །མཁའ་འགྲོ་ཉི་ཤུ་རྩ་བཞི་འདིས། །རྒྱུ་དང་མི་རྒྱུའི་འཇིག་རྟེན་གསུམ། །འགྲོ་བ་ཀུན་ལ་འདི་ཡི་ཁྱབ། །ཅེས་དང་། གསང་རྙིང་ལས། །སྲིད་གསུམ་ཡེ་ནས་སངས་རྒྱས་ཞིང་། །སངས་རྒྱས་ཉིད་ལས་གཞན་པའི་ཆོས། །བཙལ་ཀྱང་རྒྱལ་བའི་མི་བསྙེས་སོ། །ཞེས་དང་། སློབ་དཔོན་པདྨས། སྙིགས་མའི་འབྱུང་བ་རྟོག་བཅས་ཀྱི་སེམས་ནམ་མཁའ་ཉིད། །རྟོག་མེད་དུ་ཡེ་ནས་མ་བཅོས་པར་ཆོས་སྐུའི་ངང་དུ་གསལ་ཞིང་། །ཀུན་ཏུ་ཁྱབ་གདལ་བས། །སེམས་དང་ནམ་མཁའ་སྣང་བ་རྟེན་བྱེད་པའི་ཡུམ་ཀུན་ཏུ་བཟང་མོ་རྡོ་རྗེ་རིགས་ཀྱི་མཁའ་འགྲོར་སྣང་ལ་རང་བཞིན་མེད་པར་སངས་རྒྱའོ། །སྙིགས་མའི་རྟོག་བཅས་ཀྱི་འབྱུང་བ་ཤ་རུས་པ་ལྟར་སྣང་བ་རྟོག་མེད་དུ་གསལ་བ། ཤ་རུས་པ་ལྟར་སྣང་བ་རིལ་བསྐྱེད་པའི་རྟེན་བྱེད་པས་ཡུམ་སངས་རྒྱས་སྤྱན་ཏེ། དེ་བཞིན་རིགས་ཀྱི་མཁའ་འགྲོ་མ་ཞེས་བྱའོ། །སྙིགས་མའི་འབྱུང་བ་རྟོག་བཅས་ཁྲག་དང་ཆུ་ལྟར་སྣང་བ་རྟོག་མེད་དུ་གསལ་བས་ཐུགས་རྗེས་རླན་སྡུད་པ་མ་མ་ཀི་སྟེ་རིན་ཆེན་རིགས་ཀྱི་མཁའ་འགྲོ་མ་ཞེས་བྱའོ། །སྙིགས་མའི་འབྱུང་བ་རྟོག་བཅས་དྲོད་དང་མེ་ལྟར་སྣང་བ་རྟོག་མེད་དུ་གསལ་བའི་བྱེས་སྨིན་ཅིང་རྟས་པར་བྱེད་པ་ཡུམ་གོས་དཀར་མོ་ཏེ། པདྨ་རིགས་ཀྱི་མཁའ་འགྲོ་མ་ཞེས་བྱའོ། །སྙིགས་མའི་འབྱུང་བ་དབུགས་དང་རླུང་ལྟར་སྣང་བ། ཐུགས་རྗེས་ཡང་ཞིང་གཡོ་བ་འདེགས་པར་བྱེད་པ་ཡུམ་དམ་ཚིག་སྒྲོལ་མ་སྟེ། །ལས་ཀྱི་རིགས་ཀྱི་མཁའ་འགྲོ་མ་ཞེས་བྱའོ། །ཞེས་སོགས་དང་། །དེ་དག་ཀྱང་ཅིས་མངོན་ཞེས་ན་རྒྱུད་ལས། །སྙིགས་མའི་འབྱུང་བ་ལྔ་ནི་རྟོག་པ་འབྱུང་བ་སྟེ། །དེ་ཉིད་རང་བཞིན་གྱིས་དག་དྭངས་མའི་འབྱུང་བ་ལྔ། །མ་བཅོས་དོན་གྱིས་རིགས་ཀྱི་མཁའ་འགྲོ་མ། །ཞེས་ལུང་དང་བཅས་སྟེ་གསུངས་སོ། །གཉིས་པ་རྣམ་པ་བདེ་ཆེན་ཐིག་ལེ་ཉག་གཅིག་གི་ཕོ་བྲང་གསལ་གདབ་པ་ལ་གཉིས་ཀྱིས། གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དང་། རྟག་བདེ་བ་ཆེན་པོའ་ིདཀྱིལ་འཁོར་རོ། །དང་པོ་ནི། རྒྱུ་རྐྱེན་ལས་འདས་གཞལ་ཡས་ཁངཿ ཐིག་ལེ་ཉག་གཅིག་ཆོས་དབྱིངས་སྒོཿ ཞེས་པས། དེ་ལྟར་སྣང་སྲིད་དག་པ་རབ་འབྱམས་ཀྱི་དཀྱིལ་འཁོར་ཉིད་ཀྱང་། རྒྱུད་སྡེ་འོག་མ་ལྟར་རྒྱུ་མ་ནོར་བ་རྩ་བའི་སྔགས་བྷྲུཾ་ཞེས་པ་ལ་སོགས་པ་རྣམ་པ་བསྐྱེད་པ་རྐྱེན་གྱི་སྔགས་ཀྱིས་གསལ་བཏབ་སྟེ་སྒོམ་པ་ལྟ་བུ་ལས་རྣམ་པར་འདས་པ། ཡེ་ཤེས་ཆེན་པོའ་ིགཞིར་རང་བཞིན་ལྷུན་གྱིས་གྲུབ་པའི་གཞལ་ཡས་ཁང་ཆོས་སྐུ་ཐིག་ལེ་ཉག་གཅིག་ལ་སྐྱེ་འགག་རྟག་ཆད་ལ་སོགས་པ་སྤྲོས་པའི་མཐའ་བརྒྱད་ཀྱི་གྲ་ཟུར་ལས་འདས་པའི་ཕྱི་དབྱིབས་ཀུན་ནས་ཟླུམ་ཞིང་སྟོང་ཉིད་ངང་ལས་ཐུགས་རྗེས་ཆགས་བའི་ཕྲིན་ལས་ཀྱི་འགྲོ་བ་འདུལ་བའི་ནང་དབྱིབས་ཟླ་གམ་གྱི་རྣམ་པ་ལ་ཆོས་ཀྱི་དབྱིངས་གཅིག་དང་དུ་མའི་གྲངས་མཐའ་ཟད་པའི་སྒོ་གཅིག་པ་སྟེ། །རབ་འབོགས་བཀོལ་དུམ་ལས། ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི། །ཟླ་རྒྱས་བཞིན་དུ་སྤྲོས་པ་མི་མངའ་ཡང་། །ཞེས་དང་། བདེ་མཆོག་ལས། འགྲོ་བ་འདི་དག་རང་བཞིན་གྱིས། །གྲུབ་པའི་དཀྱིལ་འཁོར་ལ་གནས་པའོ། །ཞེས་དང་། ཀུན་བྱེད་ལས། དཀྱིལ་ནི་མ་ནོར་དོན་གྱི་སྙིང་པོ་ལ། །འཁོར་ནི་འཁོར་འདས་བདེ་ཆེན་རྫོགས་པར་ལྡན། །དེ་ནི་དཀྱིལ་འཁོར་སྙིང་པོ་ཀུན་གྱི་རྩ། །དཀྱིལ་འཁོར་མ་ལུས་འདི་ལ་རྫོགས་པར་རྟོགས། །ཞེས་སོ། །གཉིས་པ་རྟགས་བདེ་བ་ཆེན་པོའ་ིཕོ་བྲང་ལ་དངོས་དང་དོན་ནོ། །དང་པོ་ནི། བདེ་ཆེན་འབར་བའི་ཕོ་བྲང་དབུསཿ ཞེས་པས་བདེ་བ་ཆེན་པོ་ཁ་སྦྱོར་ཡན་ལག་བདུན་དང་ལྡན་པའི་བདག་ཉིད་ལོངས་སྤྱོད་རྫོགས་པའི་སྐུའི་བཞུགས་གནས་རྡོ་རྗེ་བཙུན་མོའ་ིབྷ་ག་སྐུ་གསུང་ཐུགས་གསུམ་རྣམ་པར་ཐར་པའི་སྒོ་གསུམ་གྱིས་མཚོན་པའི་དབྱིབས་གྲུ་གསུམ། ཐབས་དང་ཤེས་རབ་ཟུང་དུ་ཆུད་པའི་ཕྱིར་ཕྱི་དཀར་ལ་ནང་དམར་བའི་འོད་ཟེར་འབར་བ། །རབ་ཏུ་དགའ་བ་ལ་སོགས་པ་སའི་ཡོན་ཏན་གོང་ནས་གོང་དུ་ཡངས་བའི་ཕྱིར་གདེངས་ཁ་ཆེ་བ་གྱེན་དུ་ཕྱོགས་པ་སྟེ། བི་མ་ལས། ཆོས་ཀྱི་དབྱིངས་ཀྱི་གཞལ་ཡས་ཁང་། བྷ་ག་ཆོས་འབྱུང་ཞེས་སུ་གྲགས། །མཐའ་དབུས་མེད་པ་ཆོས་ཀྱི་དབྱིངས། །དེ་ནི་གནས་ཀྱི་བླ་མར་འདོད། །ཅེས་དང་། འདུས་པའི་རྒྱུད་ཕྱི་མ་ལས། རིག་མའི་སྐྱེས་བུ་རྡོ་རྗེ་ཅན། །ལོངས་སྤྱོད་བཞི་དང་ཡང་དག་ལྡན། །སྐུ་གསུང་ཐུགས་ཀྱི་དབྱེ་བ་ཡིས། །གྲུ་གསུམ་རྣམས་སུ་སྒོམ་པར་བྱ། །ཞེས་དང་། སློབ་དཔོན་པདྨས། འབྱུང་བ་ལྔ་རིགས་ཀྱི་ཡུམ་ལྔ། ཡུམ་ལྔ་པོ་དེ་ཉིད་ཀུན་ཏུ་བཟང་མོ་དེ་ཉིད་ཀྲོ་ཏི་ཤོ་རིམ་སྟེ། །ཡུམ་དེའི་མཁའ་ཆོས་ཀྱི་དབྱིངས་ཀྱི་གཞལ་ཡས་ཁང་། པདྨ་གེ་སར་གྱི་ཀློང་དུ། རིགས་ལྔ་ཡེ་ཤེས་ལྔ་པོ་དེ་ཉིད་དཔལ་ཆེན་པོ་ཡེ་ཤེས་ཀྱི་ཐིག་ལེ་དཀྱིལ་འཁོར་དང་བཅས་པ་ཡང་ཡུམ་གྱི་མཁའ་འདིར་མྱ་ངན་ལས་འདས། ད་ལྟར་བཞུགས་པའི་སངས་རྒྱས་ཞལ་གཞེས་པ་ཡང་ཡུམ་གྱི་མཁའ་འདིར་དབྱེར་མེད་པར་བཞུགས། སླད་ཀྱི་འབྱོན་པའི་སངས་རྒྱས་རིལ་ཡང་མཁའ་འདིར་བརྒྱུད་ནས་བྱོན་པས། ཆོས་ཉིད་ཡུམ་གྱི་མཁའ་འདི་རྒྱལ་བ་རིལ་གྱི་གདུང་། །འགྲོ་འོང་ཀུན་གྱི་གཞི། སྲིད་པ་ཡོངས་ཀྱི་འབྱུང་གནས། ཡེ་ཤེས་ཐ་དད་པར་རོལ་པས་ཡུམ་གྱི་མཁའོ། །ཞེས་དང་། འགྲེལ་ཆེན་དྲི་མེད་འོད་ལས། ཡི་གེ་ཨེ་དང་། གསང་ཆེན་དང་། པདྨ་དྲང་། ཆོས་འབྱུང་དང་། ནམ་མཁའི་ཁམས་དང་། བདེ་བ་ཆེན་པོའ་ིགནས་དང་། སེང་གེའི་ཁྲི་དང་། བྷ་ག་དང་། གསང་བའི་མིང་གིས་སྟོང་པ་ཉིད་བརྗོད་པའི་ཕྱིར་རོ། །ཞེས་དོན་གཅིག་མིང་གི་རྣམ་གྲངས་སུ་གསུང་ཤིང་། བདེ་མཆོག་ལས་ཀྱང་། ཨེ་དང་བྷ་ག་པདྨ་དང་། བདེ་བའི་གནས་དང་བདེ་བ་ཅན། །སེང་གེའི་གདན་དང་དམིགས་མེད་པ། །དེ་བཞིན་ཉིད་དང་ཕ་རོལ་ཕྱིན། །ཞེས་བྱ་བ་ནི་རྟེན་ཡིན་ནོ། །ཞེས་པས། ཕྱི་ལྟར་དུ་ཕྱག་རྒྱའི་སྐྱེས་གནས། །ནང་ལྟར་དུ་རྒྱལ་བའི་སྐུ་གསུང་ཐུགས། །གསང་བ་ལྟར་དུ་རྣམ་ཐར་སྒོ་གསུམ་མམ། །གཞི་ལམ་འབྲས་བུའི་བདག་ཉིད་ཅན་ཏེ། །དེ་ཡང་རྣམ་པར་ཐར་པའི་སྒོ་སྟོང་པ་ཉིད་ནི་ཡོད་མེད་ཀྱི་མཐའ་ལས་འདས་པས་ཆོས་ཐམས་ཅད་ཀྱི་གཞི། །རྣམ་པར་ཐར་བའི་སྒོ་མཚན་མ་མེད་པ་ནི་ད་ལྟར་ཡང་མི་གནས་པས་ལམ། རྣམ་པར་ཐར་པའི་སྒོ་སྨོན་པ་མེད་པ་ནི་མ་འོངས་པ་ལའང་ལྟོས་མི་འཆའ་བས་འབྲས་བུ་སྟེ། རྩ་ཤེ་ལས། ད་ལྟ་ན་ནི་མི་གནས་ཤིང་། །འདས་དང་མ་འོངས་ཡོད་མ་ཡིན། །གང་དུ་དེ་དག་མི་དམིགས་པ། །དེ་ལ་མི་དམིགས་པ་ཞེས་བརྗོད། །ཅེས་སོ། །ཆོས་འབྱུང་དེ་ཡང་ཟུར་གསུམ་སྟེང་དུ་ཕྱོགས་ཤིང་། གཅིག་རྩ་བར་ཟུག་པས། གཞི་དུས་སུ་སྐྱེ་གནས་བཞི་སྦྱོང་། །ལམ་དུས་སུ་དབང་བཞི་ལ་བརྟེན་ནས་དགའ་བ་བཞི་རྒྱུད་ལ་སྐྱེ་ཞིང་། །འབྲས་དུས་སུ་སྐུ་བཞི་མངོན་དུ་བྱེད་དེ། །གསང་བ་གྲུབ་པ་ལས། ཨེ་ཡི་ཆ་བྱད་བཟང་པོ་ལ། །དབུས་སུ་ཝཾ་གྱིས་རྣམ་པར་བརྒྱན། །བདེ་བ་ཀུན་གྱི་འབྱུང་གནས་པ། །སངས་རྒྱས་རིན་ཆེན་ཟ་མ་ཏོག །ཅེས་སོ། །དེ་ཡང་གཞི་དུས་སུ་སྣང་སྟོང་། །ལམ་དུས་སུ་བདེ་སྟོང་། འབྲས་དུས་སུ་སྐུ་གཉིས་མཚོན་པས་བསྣོལ་མ། ཕ་རོལ་ཕྱིན་པ་དྲུག་གམ། ཡེ་ཤེས་ལྔ་དབྱིངས་རྣམ་པར་དག་པའི་ཡེ་ཤེས་དང་དྲུག་གི་ཟུར་དྲུག་པ། དེ་ལྟ་བུའི་ཕོ་བྲང་ཆེན་པོའ་ིདབུས་སུ། གཉིས་པ་ནི། ཆུ་སྐྱེས་གེ་སར་བཞད་པའི་སྟེངཿཉི་མའི་གདན་ལ་ཞེས་པའི་ཆུ་ལས་སྐྱེས་པའི་པདྨ་གེ་སར་ནི་ཀེ་ས་ར་ཟུར་ཆག་པ་ཏེ་ཟེའུ་འབྲུའི་ལང་ཚོ་དར་ལ་བབས་པས་ཤིན་ཏུ་རྒྱས་ཤིང་བཞད་པ་ནི། པདྨ་འདམ་ན་གནས་བཞིན་དུ། འདམ་གྱི་སྐྱོན་གྱིས་གོས་པ་མེད་པ་ལྟར་འཁོར་བ་ན་འགྲོ་བ་འདུལ་བའི་ཕྱིར་གནས་ཀྱང་དེའི་སྐྱོན་གྱིས་གོས་པ་མེད་པ་དང་། །དེའི་སྟེང་དུ། སེམས་ཉིད་ཆོས་སྐུར་ཡེ་ནས་རང་བཞིན་གྱིས་འོད་གསལ་བ་ཉི་མའི་གདན་གྱི་སྟེང་དུ་བཞུགས་པའོ། །གསུམ་པ་བསྟེན་པ་མཁའ་འགྲོའ་ིདཀྱིལ་འཁོར་བསྐྱེད་པ་ལ་གསུམ། གཙོ་མོ་བསྐྱེད་པ་དང་། འཁོར་བསྐྱེད་པ་དང་། རིགས་བདག་གསལ་གདབ་པའོ། །སྔ་མ་གཉིས་ཀྱི་མཁའ་འགྲོ་དངོས་བསྐྱེད་པ་ནི། །མཁའ་འགྲོའ་ིགཙོཿ ཆོས་སྐུའི་ཀློང་ན་ཀུན་བཟང་མོཿ ལོངས་སྐུའི་ཞིང་ན་ཝ་ར་ཧི༔ སྤྲུལ་སྐུ་ཡེ་ཤེས་མཚོ་རྒྱལ་ནི། ཞལ་གཅིག་ཕྱག་གཉིས་སྐུ་མདོག་དམརཿགཅེས་མོ་མཉམ་པའི་དོར་སྟབས་ཅནཿ ཤིན་ཏུ་ཆགས་དང་བཞད་པའི་ཞལཿཕྱག་གཡས་ཐོད་པའི་ཅང་ཏེའུཿ སྙན་གྱི་ཐད་ཀར་གཏོད་ཅིང་འཁྲོལཿ གཡོན་པས་གྲི་གུག་ཡུ་བ་ནིཿ སྐུ་ལ་བསྟེན་ནས་མཆོག་ཏུ་འགྱིངཿ བྷ་ག་རྒྱས་ཤིང་ནུ་མ་འབུརཿ ཞེས་པས། ཉི་མའི་སྟེང་དུ་མཁའ་འགྲོ་ཀུན་གྱི་གཙོ་མོ་ཆོས་སྐུ་སྐྱེ་བ་མེད་པའི་ཀློང་རང་བཞིན་གྱི་སྤྲོས་པ་བྲལ་བ་ན། རྣམ་ཀུན་མཆོག་ལྡན་གྱི་བདེ་བ་ཆེན་པོ་ན་གསལ་གཞོན་ནུ་བུམ་སྐུའི་གནས་ལུགས་ཉིད་ཆོས་ཉིད་ཀུན་ཏུ་བཟང་མོ་སྟེ། རཏྣའི་ཡང་སྙིང་འདུས་པརཿ སྤྲོས་བྲལ་བདེ་ཆེན་ཀུན་བཟང་མོཿཞེས་དང་། སྒྱུ་འཕྲུལ་བླ་མ་ལས། །ཆེས་ཕྲའི་ཡེ་ཤེས་ནང་དུ་གསལཿ དམིགས་མེད་འཆར་གཞི་ཆོས་ཀྱི་སྐུཿ ཞེས་དང་། ཆོས་སྐུ་དཔག་མེད་བརྗོད་དུ་མེད། ཅེས་སོ། དེ་ཕྱིར་གསལ་གྱི་རྣམ་པར་བཞེངས་པ་ལོངས་སྤྱོད་རྫོགས་པའི་སྐུའི་ཞིང་ངེས་པ་ལྔ་ལྡན་སྟུག་པོ་བཀོད་པ་ན་ཡོན་ཏན་ཐམས་ཅད་ལྷུན་གྱིས་གྲུབ་པའི་གཏེར་དུ་གྱུར་པ་བཛྲ་ཝཱ་རཱ་ཧཱི་རྡོ་རྗེ་ཕག་མོ་སྟེ། བདེ་མཆོག་ལས། དག་པའི་ཆོས་ཀྱི་སྤྲུལ་པ་ནི། །ཕག་མོའ་ིགཟུགས་སུ་བསྟན་པ་ཡིན། །ཞེས་པར་གྲུབ་ཆེན་ལྭ་བའི་ན་བཟའ་ཅན་གྱིས་དག་པའི་ཆོས་ནི་སྟོང་པ་ཉིད་དེ་ཕག་མོ་ནི་དེའི་ངོ་བོ་ཉིད་དོ། །ཞེས་དང་། སྒྱུ་འཕྲུལ་ལས། ལོངས་སྤྱོད་ཟག་མེད་རིན་ཆེན་གཏེར། །ཞེས་སོ། །དེ་ཉིད་སྤྲུལ་སྐུ་གང་ལ་གང་འདུལ་དུ་བསྟན་པ་ནི་དཔེར་ན་ནམ་མཁའི་ཟླ་བ་ཉ་གང་བ་ལས་ཆུ་སྣོད་ཐ་དད་པར་གཟུགས་བརྙན་ཤར་བ་བཞིན། །ལོངས་སྐུ་མཁའ་ཟླ་ལྟ་བུ་ལས་གདུལ་བྱའི་ཆུ་སྣོད་གང་དུ་ཡོད་པ་དེར། །སྤྲུལ་སྐུ་ཆུ་ཟླ་ལྟ་བུ་བསམ་གྱིས་མི་ཁྱབ་པར་རང་ཤར་བའི་སྒྱུ་འཕྲུལ་ལས། སྤྲུལ་པ་བྱེ་བ་དཔག་ཏུ་མེད་པས་འགྲོ་དོན་མཛད་པ་ལས་གངས་ཅན་གྱི་ལྗོངས་སུ་ཟབ་ཅིང་རྒྱ་ཆེ་བའི་གསང་སྔགས་ཀྱི་ཆོས་སྡེ་མཁའ་འགྲོའ་ིསྙིང་ཁྲག་ལྟ་བུའི་སྒོ་བརྒྱ་འབྱེད་པར་བྱེད་ཅིང་། དེ་ཉིད་མ་འོངས་འགྲོ་བའི་དོན་དུ་གནས་ཆེན་གངས་བྲག་ཐམས་ཅད་གཏེར་གྱི་བཀང་བ་ནས་ལྔ་བརྒྱ་ཐ་མའི་སེམས་ཅན་གདུལ་བའི་ཕྲིན་ལས་མི་ཟད་པ་མངའ་རྒྱལ་ཡུམ་ཡེ་ཤེས་མཚོ་རྒྱལ་ཉིད་དེ། གཏེར་ཆེན་རཏྣ་དྭཱེ་པས། མཁའ་འགྲོ་བདེ་ཆེན་དུས་གསུམ་རྒྱལ་བའི་ཡུམཿ ཡེ་ཤེས་མཆོག་གི་རྡོ་རྗེ་ཕག་མོ་ཡངསཿ འགྲོ་བའི་དོན་དུ་སྒྱུ་མའི་ལུས་བཟུང་ནསཿཟག་མེད་བདེ་སྟོང་བཀའ་ཡི་བསྡུ་བ་མཛདཿ དངོས་གྲུབ་ཀུན་གྱི་འབྱུང་གནས་ཡིད་བཞིན་གཏེརཿ ཡེ་ཤེས་མཚོ་རྒྱལ་སྐུ་ལ་ཕྱག་འཚལ་ལོཿ ཞེས་པ་ལྟར་རོ། །འདིར་བསྐྱེད་པའི་རིམ་པ་ནི་སྐྱེ་གནས་རྣམ་པ་བཞིའི་བག་ཆགས་སྦྱོང་བྱེད་དོ། །སྒྱུ་འཕྲུལ་དྲྭ་བ་ལས། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། །སྤྲོས་བཅས་སྤྲོས་དང་སྤྲོས་མེད་དང་། །ཤིན་ཏུ་སྤྲོས་པ་མེད་བཞིའོ། །ཞེས་པས་དང་པོའ་ིལས་ཅན་བློ་སྤྲོས་པ་ལ་དགའ་བར་བདག་སྲས་ལ་བསྐྱེང་ཚུལ་ལྔ་དང་། གཞན་སྲས་ལ་བརྒྱད་ཀྱི་བསྐྱེད་རིམས་ཤིན་ཏུ་རྒྱས་པ་རྒྱུད་སྡེ་དང་སྒྲུབ་སྡེ་བཀའ་བརྒྱད་ལས་བཤད་པ་ལྟ་བུ་སྒོང་སྐྱེས་སྦྱོང་བྱེད་དང་། ཅུང་ཟད་གོམས་པའི་དེ་ལས་སྤྲོས་པ་ཆུང་བ་ལ་མངོན་བྱང་བཞིའམ་ལྔའི་སྒོ་ནས་བསྐྱེད་ཅིང་ཞུ་བ་གླུས་བསྐུལ་དང་བཅས་པ་ཡོད་པ་མངལ་སྐྱེས་སྦྱོང་བྱེད་དང་། དེ་བས་ཀྱང་གོམས་པ་བརྟན་པ་སྤྲོས་མེད་ལ་ཉི་ཟླ་ས་བོན་ཙམ་ལས་སྔགས་ཀྱི་རྐྱེན་གྱིས་བསྐྱེད་པ་དྲོད་བཤེར་སྐྱེས་སྦྱོང་བྱེད་དང་། བློ་རབ་གོམས་པ་བརྟན་པ་ཤིན་ཏུ་སྤྲོས་མེད་ལ་རྒྱུ་རྐྱེན་གྱིས་རྩོལ་བ་ལ་མ་ལྟོས་པར་གདོད་ནས་གྲུབ་པ་ལ་གསལ་གདབ་པའི་ཚུལ་གྱིས་སྐད་ཅིག་དྲན་རྫོགས་སུ་བསྒོམ་པ་རྫུས་སྐྱེས་ཀྱི་བག་ཆགས་སྦྱོང་བྱེད་དང་བཞིར་ཡོད་པ་ལས། འདི་ནི་ཕྱི་མའི་དབང་དུ་བྱས་ཏེ་བློ་རབ་ཨ་ཏིའི་རྣལ་འབྱོར་ལ་སྐུ་དང་ཡེ་ཤེས་ཀྱི་དཀྱིལ་འཁོར་ཆེན་པོ་གདོད་ནས་ལྷུན་གྱིས་གྲུབ་པའི་ཚུལ་གྱིས་གསལ་གདབ་པ་ལས་མིང་དང་གཟུགས་དང་མངོན་རྟོགས་ཀྱི་རིམ་པ་རེ་རེ་བ་ནས་བསྐྱེད་པར་མི་བྱ་སྟེ། །རང་ཤར་ལས་ཅིག་ཅར་འཇུག་པ་གང་ཞེ་ན། །ལྷ་རྣམས་མ་བསྐྱེད་སྙིང་པོ་དྲན་པས་རྫོགས། །ཞེས་དང་། དྲིལ་བུ་བས། བརྫུས་ཏེ་འབྱུང་བའི་སེམས་ཅན་བཞིན། །ས་བོན་མེད་པའི་རྣམ་པར་བསྒོམ། །ཞེས་དང་། སྡོམ་འབྱུང་ལས། དབང་པོ་རྣོན་པོའ་ིསྐད་ཅིག་གི། །རྣམ་པ་སེམས་ཙམ་དཀྱིལ་འཁོར་བསམ། །ཞེས་གསུངས་སོ། །གདོད་ནས་རང་བཞིན་ལྷུན་གྱིས་གྲུབ་པའི་ཚུལ་གྱིས་རྣམ་པ་ཆོས་ཐམས་ཅད་ཆོས་ཉིད་དེ་བཞིན་ཉིད་དུ་རོ་གཅིག་པས་ཞལ་གཅིག་ཐབས་སྙིང་རྗེ་ཆེན་པོ་དང་ཤེས་རབ་སྟོང་པ་ཉིད་ཀྱི་ཕྱག་གཉིས། འདོད་ཆགས་རྣམ་པར་དག་པ་སོ་སོར་རྟོག་པའི་ཡེ་ཤེས་ཀྱིས་ངོ་བོ་གསུང་པདྨའི་རིགས་ཀྱི་འགྲོ་བ་འདུལ་བའི་བརྡར་སྐུ་མདོག་དམར་མོ། སྒྲིབ་པ་གཉིས་རྣམ་པར་དག་པས་གཟུང་འཛིན་མཚན་མའི་རྟོག་པའི་གོས་དང་བྲལ་བས་གཅེར་མོའ་ིགཟུགས་ལ་དགའ་བ་བཅུ་དྲུག་མཐར་ཕྱིན་པའི་བཅུ་དྲུག་ལོན་པའི་ལང་ཚོ་ཅན། ཆོས་ཅན་སྲིད་པ་དང་ཆོས་ཉིད་ཞི་བའི་མཐའ་ལ་མི་གནས་པའི་ཞབས་གཉིས་མཉམ་པའི་བཞེངས་སྟབས་ལས། འགྲོ་བའི་དོན་མཛད་པའི་བརྡར་ཅུང་ཟད་དོར་སྟབས་ཅན། འདོད་ཆགས་རང་ག་མའི་ཀུན་ཏུ་རྟོག་པའི་འཆིང་བ་ཡོངས་སུ་བཅད་ཀྱང་འགྲོ་བ་ཀུན་རང་གི་བདེ་གཤེགས་སྙིང་པོའ་ིཆོས་ཉིད་མ་རྟོགས་པ་རྣམ་པར་རྟོག་པའི་གཞན་དབང་དུ་གྱུར་ཏེ་སྣ་ཚོགས་འཁྲུལ་པའི་འཁོར་ལོ་ལ་སྤྱོད་པ་ཀུན་ལ་ཐུགས་བརྩེ་བའི་ཤུགས་ཀྱིས་ཤིན་ཏུ་རྗེས་སུ་ཆགས་པར་སྟོན་པ་དང་། འོན་ཀྱང་སེམས་ཅན་ཀུན་གྱི་རང་བཞིན་གདོད་མ་ནས་མངོན་པར་སངས་རྒྱས་པའི་ཕྱིར་རང་མཚན་དུ་སྡུག་བསྔལ་འཁྲུལ་པའི་འཁོར་ལོ་མི་མངའ་བའི་རང་བཞིན་ལ་གཟིགས་སྟེ་དགྱེས་ནས་བཞད་པའི་ཞལ་གྱི་རྣམ་པར་བསྟན་པའོ། །ཕྱག་གཡས་ཐབས་སྙིང་རྗེ་ཆེན་པོའ་ིརང་བཞིན་གྱིས་རང་བྱུང་བདག་མེད་ཀྱི་ཐོད་པ་འཁོར་འདས་ལྟག་པ་དབྱིངས་སུ་སྤྲད་ཀྱང་སྤང་བླང་དང་བྲལ་བའི་ཆོས་ཉིད་གཅིག་གི་རང་བཞིན་དུ་གནས་པའི་བརྡར་ཁོང་རྒྱུད་བུ་ག་ནས་འབྲེལ་བའི་ཅང་ཏིའུ། རིགས་བདག་བླ་མའི་ཐུགས་བརྒྱུད་བསྐུལ་བའི་ཚུལ་གྱིས་ཁ་གྱེན་དུ་སྙན་གྱི་ཐད་སོར་གཏོད་ཅིང་། ཀུན་རྫོབ་དང་དོན་དམ་བྱང་ཆུབ་སེམས་གཉིས་ཀྱི་ལྕག་གིས་བསྐུལ་ཏེ་འཁྲོལ་བའི་སྒྲ་སྒྲོགས་པ། ཕྱག་གཡོན་ཤེས་རབ་སྤྲོས་པའི་མཐའ་བརྒྱད་དང་བྲལ་བའི་རང་བཞིན་བདག་མེད་རྟོགས་པའི་གནས་ལུགས་སྟོང་པ་ཉིད་ཀྱི་གྲི་གུག་གིས་འཁོར་བའི་རྩ་བ་མ་རིག་གཟུང་འཛིན་གཅོད་པའི་བརྡར་ཁ་ཐུར་དུ་བསྟན་ནས་འཛིན་པའི་ཡུ་བ་ཉིད་ནི་གསང་སྔགས་ཀྱི་ཉེ་ལམ་བདེ་ཆེན་ཡེ་ཤེས་བསྐྱེད་པའི་དཀུ་སྐབས་ལ་བརྟེན་ནས་རྣམ་ཀུན་མཆོག་ལྡན་གྱི་དབྱིངས་སུ་འགྱིང་བ། ཆགས་ཅན་གྱི་གདུལ་བྱ་རྣམས་འདུལ་བའི་ཕྱིར་གསང་བའི་བྷ་ག་བདེ་བའི་རླབས་ཀྱིས་རྒྱས་ཤིང་གཞོན་ནུའི་ལང་ཚོ་ལས་མ་གཡོས་པའི་ནུ་འབུར་ཟུང་གིས་རྣམ་པར་བརྒྱན་པའོ། །གཉིས་པ་ལ་རྒྱན་དང་། སྤྱན་གྱིས་གཟིགས་སྟངས་གཉིས་ལས། དང་པོ་ནི། རིན་པོ་ཆེ་དང་གཞོན་ནུའི་བརྒྱནཿ པུཎྼ་རི་ཀའི་དོ་ཤལ་འཕྱང༔ རུས་པའི་རྒྱུན་དྲུག་སྐུ་ལ་མཛེསཿ གནག་སྣུམ་དབུ་སྐྲའི་ལན་ཚར་ཅནཿ རིན་པོ་ཆེ་ཡི་རྩེ་བྲན་བརྗིདཿ ཅེས་པས། ཕྲེང་བ་དང་གདུ་བུ་ལ་སོགས་པའི་རིན་པོ་ཆེའི་བརྒྱན་སྤྱི་དང་བྱེ་བྲག་ཏུ་གཞོན་ནུའི་རྒྱན་ནམ་བྱིས་པའི་རྒྱན་དུ་གྲགས་པ་ནོར་བུ་རིན་པོ་ཆེ་དང་། པུཎྼ་རི་ཀ་སྤེལ་མར་གསང་གནས་ཐལ་བར་སླེབ་པའི་དོ་ཤལ་འཕྱང་བ་ཡིན་ཏེ་མི་དབང་ས་རས། གཞོན་ནུའི་ཉམས་ཅན་རྣམས་ལ་མེ་ཏོག་གི་རྒྱན་དང་ནོར་བུའི་རིན་པོ་ཆེའི་ཕྲ་སྤེལ་བ་བྱིས་པའི་རྒྱན་དུ་གྲགས་པ་དང་། ཞེས་སོ། །རུས་པའི་རྒྱན་དྲུག་ནི། བདེ་མཆོག་རྩ་རྒྱུད་ལས། ཕ་རོལ་ཕྱིན་པའི་རྒྱན་དྲུག་སོགས། ཞེས་པ་དང་། བརྟག་གཉིས་ལས། སྒོམ་པ་པོ་ཡིས་རྣམ་འཛིན་པ། །རྣ་བ་དག་ལ་རྣ་ཆ་ཟུང་། །སྤྱི་བོར་འཁོར་ལོ་རྣམ་པར་འཛིན། །ལག་པ་དག་ལ་ལག་གདུབ་གཉིད། །སྐྱེད་པ་ལ་ཡང་སྐྱེད་རགས་ཉིད། །རྐང་པར་དེ་བཞིན་རྐང་གདུབ་ཉིད། །ལག་པའི་རྩ་བར་དཔུང་རྒྱན་ཉིད། །མགྲིན་པར་རུས་པའི་ཕྲེང་བ་སྟེ། །ཞེས་དང་། རྐུན་མའི་སྐྲ་ལ་ཅོད་པན་བྱས། །དེ་ལ་ཧཱུཾ་དབྱུང་སྦྱང་བར་བྱ། །སངས་རྒྱས་ལྔའི་ཐོད་པ་རྣམས། །རྣལ་འབྱོར་སྤྱོད་པས་རྣམ་པར་འཛིན། །ཐོད་པ་སོར་ལྔ་བ་ཡི་ཚད། །བྱས་པས་ཅོད་པན་འཛིན་པར་བྱ། །ཞེས་པས། ཤེས་རབ་ཀྱི་ཕ་རོལ་དུ་ཕྱིན་པའི་བརྡར་སྤྱི་བོར་རུས་པའི་འཁོར་ལོ་བུག་པ་བརྒྱད་ཕུག་པའི་མཐའ་མུ་འཁྱུད་ལ་རུས་པའི་ཕྲེང་བས་འཁོར་ལོའ་ིརྩིབས་ལྟ་བུ་བརྒྱད་བྱས་པའི་མདུན་གྱི་རྩིབས་ལྔར། མིའི་ཐོད་པ་སོར་ལྔ་པའི་དཔངས་ལ་ཐོད་སྐམ་བྲིས་པ་ལྔ་འགོད། དེའི་སྟེང་འོག་ཏུ་རུས་པའི་ཕྲེང་བ་རྟག་རྒྱུག་དང་བར་སྡེམས་སུ་གསུམ་བྱས་པའི་མདུན་དུ་ཐོད་པའི་ཐད་དྲ་བ་དྲ་ཕྱེད་སོར་གསུམ་པ་དང་གཡས་གཡོན་དུ་རྣ་བའི་རྩེ་མོ་ནོན་པ་བྱ་ཞིང་རྒྱབ་ངོས་སུ་སྣ་ཚོགས་རྡོ་རྗེ་དང་གཡོན་དུ་ཟླ་ཚེས་བྱ། མི་མགོའ་ིཐོད་དུ་རིན་པོ་ཆེའི་རྩེ་བྲན་བརྗིད་པའི་ཚུལ་རྩེ་མོར་རྡོ་རྗེ་དང་རིན་པོ་ཆེས་བརྒྱན་པར་བཤད་དོ། །བཟོད་པའི་ཕ་རོལ་ཕྱིན་པའི་བརྡར་རྣ་རྒྱན་ནི། རུས་པའི་འཁོར་ལོ་ལ་ཁུག་པ་གསུམ་བྱས་པ་དང་། ཕྱེད་གཉིས་སྟེ་ལྔས་ཡིས་བརྒྱན་པའོ། །བརྩོན་འགྲུས་ཀྱི་ཕ་རོལ་དུ་ཕྱིན་པའི་བརྡར་མགུལ་རྒྱན་ནི། རུས་པའི་གཞུང་གསུམ་གྱི་བར་ཕྲེང་བ་བརྒྱད་ཀྱིས་རྒྱ་གྲམ་དུ་བསྡམས་པའི་ཕྱིར་དོ་ཤལ་གྱི་ཚུལ་དུ་འཕྱང་བའི་རུས་པའི་མདུང་རྩེ་གསུམ་པས་མཛེས་པ་བརྒྱད་དེ་བཅུ་དྲུག་གོ། སྦྱིན་པའི་ཕ་རོལ་དུ་ཕྱིན་པའི་བརྡར་རྐང་ལག་དཔུང་གསུམ་ལ་གདུབ་ཆུང་གཉིས་གཉིས་ཏེ་དྲུག་པོ་ནི་རུས་པའི་གཞུང་གསུམ་ཕྲེང་བ་ལྔ་ལྔས་བར་བསྡམས་པའི་སྨད་དུ་མདུང་རྩེ་དང་གཡེར་ཁས་མཛེས་པའོ། །ཚུལ་ཁྲིམས་ཀྱི་ཕ་རོལ་དུ་ཕྱིན་པའི་བརྡར་སྐ་རགས་ནི། །ཕར་ཚུར་བཅས་གཞུང་ལྔའི་བར་ཕྲེང་བ་བརྒྱད་དམ་བཅུ་དྲུག་གི་རིམ་གྱིས་བསྡམས་པར་དྲབ་དྲ་ཕྱེད་དང་། གཡེར་ཁ། རུས་པའི་མདུང་རྩེས་མཛེས་པའོ། །བསམ་གཏན་གྱི་ཕ་རོལ་དུ་ཕྱིན་པའི་བརྡར་རུས་པའི་ཚངས་སྐུད་ནི། །རུས་པའི་འཁོར་ལོ་བརྒྱད་ལ་བུག་པ་ཕུག་པ་རྒྱ་གྲམ་དུ་བསྡམས་ཏེ་རྒྱབ་མདུན་དུ་ཡོང་བར་བྱས་ཏེ་རྒྱ་གྲམ་དུ་བཅིངས་པའོ། །ཕྱི་མ་འདི་རྐུན་པོ་བསད་པའི་སྐྲ་སྐུད་ལ་བྱས་པའི་ཚེ་རུས་པའི་ཕྱག་རྒྱ་ལྔ་ཞེས་བྱའོ། དེ་དག་གི་དག་པ་ཡང་རྗེ་བཙུན་རིན་པོ་ཆེ་གྲགས་པས། ཐོད་པ་སྐམ་པོ་ལྔ་ནི་རིགས་ལྔ་རེ་རེ་ཡང་སོར་ལྔ་ལྔའི་ཚད་ཡེ་ཤེས་ལྔ། བར་བསྡམས་ཕྲེང་བ་ཚར་ལྔ་དང་ཡེ་ཤེས་ལྔའི་རང་བཞིན་དུ་དག་པ་དྲ་བ་དྲ་ཕྱེད་སངས་རྒྱས་ཀྱི་མཛད་པ་རྒྱ་ཆེན་པོ་མཛད་པ། དབུ་ན་རྒྱུ་པའི་འཁོར་ལོ་ནི་དབྱིངས། དྲ་བ་དྲ་ཕྱེད་ཡེ་ཤེས། སྣ་ཚོགས་རྡོ་རྗེ་སྤྲུལ་སྐུ་གང་འདུལ་གྱི་ཕྲིན་ལས། ཟླ་བ་ཚེས་པ་ཡོན་ཏན་འཕེལ་བ། མགུལ་གྱི་གཞུང་གསུམ་ཕྲེང་བ་བཅུ་དྲུག་གི་སྟོང་ཉིད་བཅུ་དྲུག་གི་སྒྲ་སྒྲོགས་པ། སྐེ་རགས་ཀྱི་གཞུང་ལྔ་ཡེ་ཤེས་ལྔའི་རང་བཞིན། །བར་བསྡོམས་བརྒྱད་འཕགས་ལམ་བརྒྱད་དམ། བཅུ་དྲུག་ནི་དེ་སྟེང་བདེན་བཞི་དང་ཚད་མེད་བཞི། །དྲ་བ་དྲ་ཕྱེད་སེམས་ཅན་གྱི་དོན་བྱེད་པ་སོགས་རྒྱ་ཆེར་བཤད་དོ། །དེ་དག་གི་སྐུ་ལ་མཛེས་པར་སྤྲས་པའོ། །རུས་པའི་རྒྱན་དྲུག་ནི་གསར་སྙིང་ཀུན་གྱི་ཧེ་རུ་ཀ་དང་ཁྲོ་བོ་དང་ཁྲོ་མོ། མཁའ་འགྲོ་སོགས་གང་ལ་ཡང་ཁྱབ་ཆེ་བའི་ཕྱིར་དེང་སང་རྐང་གྲངས་ཙམ་ཤེས་པ་དཀོན་པས་རྗེ་བཙུན་གྲགས་པའི་གསུང་ལ་བརྟེན་ནས་ཅུང་ཟད་བཤད་དོ། །བུང་བའི་ཁ་དོག་ལྟ་བུར་གནག་ཅིང་སྣུམ་པའི་མདངས་དང་ལྡན་པའི་དབུ་སྐྲའི་ལན་ཚར་ཅན་ཏེ་ལྕང་ལོའ་ིཟར་བུ། སྐུ་རྒྱབ་དང་ལྷག་མ་དཔུང་སྟེང་དུ་ཅུང་ཟད་དཔྱངས་པ་ཅན། །རིན་པོ་ཆེའི་རྩེ་བྲན་བརྗིད་པ་ནི་གོང་གི་ཐོད་སྐམ་གྱི་རྩེར་བཀོད་པ་དེ་ཡིན་ནོ། །གཉིས་པ་སྤྱན་གྱིས་གཟིགས་སྟངས་ནི། །དབུ་མའི་སྤྱན་ནི་དབྱིངས་ལ་གཟིགས༔ ལོངས་སྐུའི་སྤྱན་གྱིས་འགྲོ་བ་འདུལ༔ སྤྲུལ་སྐུའི་སྤྱན་གྱིས་ཁམས་གསུམ་དགུགཿ ཅེས་པས། ཆོས་སྐུ་ངོ་བོ་སྟོང་ཉིད་ཀྱི་སྤྱན་ནི་དབྱིངས་ནང་གསལ་རིགས་བདག་བླ་མའི་ཐུགས་ཀ་ལ་གཟིགས་པས་དགོངས་ཀློང་གཅིག་ཏུ་གྱུར་ཏེ་ཡེ་ཤེས་དབྱིངས་སུ་འཁྱིལ། ལོངས་སྐུ་རང་བཞིན་ཡེ་ཤེས་ལྔའི་སྤྱན་གཡས་པ་རང་གི་ཞིང་ཁམས་ལ་ཐད་དཀར་གཟིགས་པས་གསལ་སྣང་སྐུ་དང་ཡེ་ཤེས་སུ་སྨིན་ཏེ་འགྲོ་བ་འདུལ་བའི་ཕྲིན་ལས་མཐར་ཕྱིན། སྤྲུལ་སྐུ་ཐུགས་རྗེ་གང་ལ་གང་འདུལ་གྱི་སྤྱན་གཡོན་པ་ཐུར་དུ་གཟིགས་པས་ཁམས་གསུམ་དུ་འཁོར་བའི་གདུལ་བྱ་རང་རྒྱུད་བདག་ཏུ་ཞེན་པ་རྣམས་དགུག་པ་དང་གཟིར་བ་ལ་སོགས་པའི་དབང་དང་དྲག་ཤུལ་གྱི་སྤྱོད་པས་འཁོར་བ་དབྱིངས་སུ་སྒྲོལ་བ་སྟེ། ནམ་མཁའ་དང་མཉམ་པའི་རྒྱུད་ལས། །ཆོས་ཀྱི་སྐུ་ཡི་གཟིགས་སྟངས་ཀྱིས། །ཁམས་གསུམ་འཁོར་བ་སྤྱི་ནས་འདོན། ལོངས་སྐུས་སྲིད་པའི་གཞི་མ་འཇིགས། སྤྲུལ་སྐུས་སངས་རྒྱས་ཞིང་དུ་སྒྲོལ། །ཞེས་དང་། གསང་བ་སྒྲ་རྒྱུད་ལས། ཕབ་དང་ལྡོག་དང་ཟུར་གྱིས་ནི། །གཟིགས་སྟངས་རྣམ་པ་གསུམ་དུ་གྲགས། །མཛེས་པའི་ཚུལ་དགུ་རྫོགས་ཚུལ་ནི། །སྐྱེ་བ་གནས་སུ་དག་པས་སྐུ་གཉེན་ཤ་ཆགས་པ་དང་། །ན་བ་གནས་སུ་དག་པས་སྐུ་སྐབས་ཕྱེད་ཅིང་རིས་པར་མཚམས་སུ་ལྕུག་པ་དང་། །འཆི་བ་གནས་སུ་དག་པས་སྐུ་ལྷོད་པོར་མ་གྱུར་པ་འཁྲིལ་བག་ཆགས་པ་དང་། །འཁྱོག་པ་མ་ཡིན་དྲང་བས་ན་ལྡེམ་པ། རྒ་བ་གནས་སུ་དག་པས་སྐུ་འཇམ་ཞིང་གཞོན་ཤ་ཆགས་པའི་ངང་ཚུལ་ཅན་ཏེ་ངོ་བོའ་ིཡོན་ཏན་ལྔ་དང་། མཚན་དཔེའི་ཡོན་ཏན་མ་འདྲེས་ཤིང་གཙང་བས་དྲི་མ་མེད་པས་ཁ་དོག་གསལ་བ་དང་། ཟད་པར་རྫོགས་པས་བཀྲག་ཅིང་འཚེར་བའི་མདངས་ཅན་དང་། །གཟི་བརྗིད་ཡིད་དུ་འོང་བས་ལྷུན་སྡུག་པ་དང་། །འགྲོ་བ་ཟིལ་གྱིས་གནོན་པས་གཟི་བྱིན་ཆེན་པོ་དང་ལྡན་པ་སྟེ་རྣམ་པའི་ཡོན་ཏན་བཞི་དང་སྡོམས་པས་དགུ་སྟེ། །གསང་སྙིང་ལས། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་མཚེར་ལྷུན་སྟུག་གཟི་བརྗིད་ལྡན། །ཞེས་སོ། །གཉིས་པ་ལུས་དཀྱིལ་ལ་གཉིས། ངོ་བོ་མདོར་བསྟན་པ་དང་། །རྣམ་པ་རྒྱས་པར་བཤད་པའོ། །དང་པོ་ནི། །སྐུ་ལ་རྒྱུད་སྡེའི་དཀྱིལ་འཁོར་རྫོགསཿ ཞེས་པས་མཁའ་འགྲོའ་ིསྐུའི་དབྱིབས་ལ་རྒྱུད་སྡེ་བཞིའི་དཀྱིལ་འཁོར་གྱི་ལྷ་ཚོགས་ཐམས་ཅད་འགའ་ཞིག་དངོས་དང་འགའ་ཞིག་བརྒྱུད་ནས་མགྲོན་ཐབས་ཀྱི་ཚུལ་གྱིས་རྫོགས་ཏེ། །བཀོད་པ་ལུས་ལ་སྔགས་ཀྱི་དཀྱིལ་འཁོར་རྫོགས། །ཞེས་སོ། །གཉིས་པ་རྣམ་པ་རྒྱས་པར་བཤད་པ་ལ་གཉིས། ཞི་བའི་དཀྱིལ་འཁོར་རྫོགས་ཚུལ་དང་། ཁྲོ་བོའ་ིདཀྱིལ་འཁོར་རྫོགས་ཚུལ་ལོ། །དང་པོ་ལ། གཉིས་གདན་གསུམ་ལྷའི་དཀྱིལ་འཁོར་དང་། དེ་རང་བཞིན་ཡོངས་གྲུབ་ཆེན་པོར་བསྟན་པའོ། །དང་པོ་ལ་གདན་གསུམ་གྱི་དང་པོ་ཕུང་ཁམས་དག་པ་གཤེགས་པ་གཤེགས་མའི་གདན་གྱི་དཀྱིལ་འཁོར་ལ་གཉིས་ཀྱི་དང་པོ་གནས་ནི། ཐུགས་ཀ་དཔལ་གྱི་བེའུ་དབྱིངསཿ མ་བསྐྱེད་རང་བྱུང་ཡོངས་གྲུབ་ལྷཿ འཁོར་ལོ་རྩིབས་ལྔའི་ལྟེ་བ་རུཿ ཞེས་པས། དུས་གསུམ་གྱི་སངས་རྒྱས་སྟོང་རྩ་གཉིས་མ་གདྷ་རྡོ་རྗེའི་གདན་དུ་འཚང་རྒྱ་བ་བཞིན། ད་ལྟ་དུས་གསུམ་དུ་ལུང་དུ་མ་བསྟན་པའི་སེམས་ཉིད་བདེ་བར་གཤེགས་སྙིང་པོ་ཡང་སངས་རྒྱ་བའི་གནས་སྙིང་ཁ་ཆོས་ཀྱི་འཁོར་ལོ་རྡོ་རྗེ་གདན་ཡིན་ཏེ། དེའི་ཕྱིར་བསྐྱེད་རྫོགས་ཐམས་ཅད་ཀྱི་སྤྲོ་བསྡུའི་གཞི་སྙིང་ལ་འགོད་དེ། མངོན་བརྗོད་བླ་མས། རྟག་ཏུ་སྙིང་ལ་གནས་པ་ཡི། །ཐིག་ལེ་གཅིག་ལ་འགྱུར་བ་མེད། །དེ་སྒོམ་བྱེད་པའི་སྐྱེ་བོ་ལ། །ངེས་པར་ཡེ་ཤེས་སྐྱེ་བར་འགྱུར། །ཞེས་དང་། སྒྱུ་འཕྲུལ་གསང་ཐིགས་ཀྱི་འགྲེལ་བར། བི་མ་ལས། །གང་ལ་ཡོད་པ་རྣམ་པ་བརྒྱད་དུ་ཤེས། །ཞེས་པ་གང་དུ་ཡོད་ན་སྙིང་ཁོང་སྟོང་གི་དབུས་ན་རྩ་བརྒྱད་པའི་དབུས་མ་དངས་མའི་རྩ་དཀར་པོའ་ིནང་ན་རང་བཞིན་བྱང་ཆུབ་སེམས་ཀྱི་རྟེན་ཀུན་བཟང་རིགས་ལྔ་བཞུགས་པའི་གཞལ་མེད་ཁང་དེར་རླུང་སེམས་ཀྱི་དངས་མ་ནམ་འདུས་པའི་ཚེ་མྱ་ངན་འདས་པའི་ཞིང་སྣང་མཐའ་དག་འཆར་བར་བཤད་པས། ཐུགས་ཀ་ཡོན་ཏན་ཐམས་ཅད་འབྱུང་བའི་གནས་ཡིན་པས་དཔལ་གྱི་བེའུ་ཏེ། དེའི་དབྱིངས་སུ་བློས་མ་བསྐྱེད་པར་གདོད་ནས་ཕུང་ཁམས་སྐྱེད་མཆེད་ཀྱི་རང་བཞིན་ཏུ་བྱུང་ཞིང་ཡོངས་སུ་གྲུབ་པའི་ལྷའི། འཁོར་ལོ་གཅིག་ཏུ་སྣང་བ་དེའི་གནས་རྩིབས་ཡེ་ཤེས་ལྔ་བསམ་གྱི་མི་ཁྱབ་པའི་ཡེ་ཤེས་ཀྱི་ལྟེ་བ་དང་ལྡན་པ་ལའོ། །གཉིས་པ་ལ་གཉིས་ཀྱི་དང་པོ་ནི། ཀུན་གཞི་ཡིད་ཆོས་གནས་དག་པཿ ཁྱབ་གདལ་རིག་པ་ཀུན་ཏུ་བཟངཿ སྣང་སྟོང་གཉིས་མེད་ཡུམ་དང་སྦྱོརཿ ཞེས་པས་སྤྱིར་རྣམ་པར་ཤེས་པའི་ཚོགས་བརྒྱད་ནི། ཀུན་གཞིའི་རྣམ་ཤེས་མེ་ལོང་དྭངས་མའི་ངོས་ལྟ་བུ་ཤེས་པ་ཡུལ་ལ་མ་འཕྲོས་པའི་འཆར་གཞི་བྱེད་པ་དང་། ཡིད་ཀྱི་རྣམ་ཤེས་དོན་སྤྱིའི་ཡུལ་དང་རྗེས་ཀྱི་བློ་ཡུལ་ལ་དཔྱོད་པ་དང་། །ཉོན་མོངས་པ་ཅན་གྱི་ཡིད་དགག་སྒྲུབ་ཏུ་བྱེད་པའི་ཤེས་པ་དང་། སྒོ་ལྔའི་ཤེས་པ་གཟུགས་མཐོང་བ་ལ་སོགས་པའི་རྟོག་མེད་ལྔའོ། །དེ་ཡང་མཐོང་ཐོས་རེག་ཚོར་གྱི་ཆ་ནི་རྟོག་མེད་ཡིན་ལ། །དེ་ལ་སོ་སོར་ཤེས་པ་ཡིད། དེ་ལ་དགག་སྒྲུབ་བྱེད་པ་ཉོན་ཡིད་དོ། །སྒོ་ལྔ་དང་ཡིད་ཤེས་ཙམ་གྱི་ལས་མི་གསོག །ཉོན་ཡིད་ཀྱི་ཀུན་གཞིའི་སྟེང་དུ་ལས་གསོག། ཀུན་གཞི་ནི་དེ་ཐམས་ཅད་ཀྱི་རྟེན་རྟོག་མེད་ལུང་མ་བསྟན་ཟག་བཅས་རྣམ་བྱང་གི་དགེ་བ་དང་། མི་དགེ་བ་མཐའ་དག་གི་རྟེན་ཡིན་ནོ། །འདི་དག་ནི་འཁོར་བའི་རང་བཞིན་སྦྱང་གཞི་ཡིན་ལ། ཁམས་གསུམ་པའི་སེམས་དང་སེམས་བྱུང་ཀུན་གཞི་དང་བཅས་པ་ལས་ལོག་པ་ནི་སྦྱངས་འབྲས་ཏེ། །དཀོན་མཆོག་བརྩེགས་པ་ལས། །ཞི་བའི་བློ་གྲོས་དེ་བཞིན་གཤེགས་པའི་ཐུགས་ཀྱི་གསང་བ་ནི་སེམས་དང་ཡིད་དང་རྣམ་པར་ཤེས་པ་དང་ཡང་བྲལ་བ་ཏིང་ངེ་འཛིན་གྱི་གནས་ཀྱང་མི་འདོར་ན་འདི་ནི་དེ་བཞིན་གཤེགས་པའི་ཐུགས་ཀྱི་གསང་བ་བསམ་གྱིས་མི་ཁྱབ་པའོ། །ཞེས་གསུངས་པས། དེ་ཡང་ཀུན་གཞི་རྟོག་མེད་ལུང་མ་བསྟན་དྭངས་མ་ཕྱེད་པའི་ལུང་མ་བསྟན་དུ་རྩེ་གཅིག་པ་ཡིན་ལ། ཉམས་སུ་ལེན་དུས་དངས་ལ་རིག་པའི་ཕྱིར་གཟུགས་མེད་དང་ཀུན་གཞིའི་རྣམ་པར་ཤེས་པ་ཡིད་དང་བཅས་པ་གསལ་བ་ཙམ་རིས་སུ་མ་ཆད་པར་གནས་པའི་ཚེ་དེ་རང་རིག་པའི་ངོ་བོར་མ་ཤེས་པ་ལས། ཉམས་སུ་ལེན་དུས་རང་བྱུང་གི་ཡེ་ཤེས་སུ་ཐག་ཆོད་གསལ་དྭངས་སྤྲོས་པ་དང་བྲལ་བ། གཟུགས་དང་ཡིད་ཤེས་ལོག། སྒོ་ལྔའི་རྣམ་ཤེས་ཡུལ་སོ་སོར་གསལ་བ་ལས་འདིར་ཉམས་སུ་ལེན་དུས་གཟུགས་སྒྲ་དྲི་རོ་རེག་སོགས་ཡུལ་ལྔའི་རྗེས་སུ་མི་འབྲང་ཞིང་མི་འཛིན་པས་འདོད་པའི་སེམས་སྒོ་ལྔའི་རྣམ་ཤེས་ཉོན་ཡིད་དང་བཅས་ལོག་པ་དེ་ཉིད་ལ་ཡེ་ཤེས་སམ་དག་འབྲས་ཞེས་བྱ་ཏེ། དེ་དག་སྣང་ཆའི་ཞེན་པ་སྦྱོར་ཕྱིར་ཞལ་ཕྱག་གི་རྣམ་པའི་ལྷར་བཞེངས་པ་ནི་ཀུན་བཟང་རིགས་ལྔ་སོགས་ཞི་ཁྲོའ་ིལྷ་ཚོགས་ཏེ། །ལུས་དཀྱིལ་མངོན་བརྗོད་དུ། དག་བྱ་ནི་དྲི་མ་སྟེ་ཀུན་གཞི་དང་ཉོན་ཡིད་ཀྱིས་ཐོག་མར་བསྐྱེད་པའི་ཕུང་པོ་ལྔ་འབྱུང་བ་ལྔ་རྣམ་པར་ཤེས་པའི་ཚོགས་ཞེས་བྱ་སྟེ་བདག་རྐྱེན་དང་། དམིགས་རྐྱེན་གཉིས་ཀྱི་འབྲས་བུ་དབང་པོ་སྒོ་ལྔ་ལ་སོགས་པའི་སྐྱེ་མཆེད་ཕན་ཚུན་ཡུལ་དང་་ཡུལ་ཅན་དུ་འབྲེལ་བ་རྣམས་ཡིན་ལ། །དག་འབྲས་ནི་རང་ཤེས་རིག་པའི་རྒྱལ་པོ་དཀྱིལ་འཁོར་རྒྱ་མཚོའི་བདག་ཉིད་བཅོམ་ལྡན་འད། དཔལ་ཀུན་ཏུ་བཟང་པོ་ལ་སོགས་ལྷའི་རྣམ་པར་ཤར་ནི། དྲི་མེད་བཤགས་རྒྱུད་ལས། ཀུན་གཞི་གསང་བ་དག་པའི་དབྱིངས་ནས་ཡིད་རང་བྱུང་རང་ཤེས་རིག་པའི་རྒྱལ་པོ། །དུས་གསུམ་སངས་རྒྱས་ཐམས་ཅད་ཀྱི་ཡབ་ཞེས་པ་ལ་སོགས་པས་བསྟན་ལ། དེའང་ཡིད་ནི་བདག་པོའ་ིརྐྱེན་འཕྲུལ་པ་སྐྱེད་པའི་བྱེད་པ་པོ་ཡིན་ལ། དེ་རང་བཞིན་མེད་པར་ཤེས་པ་ལ་གནས་ལུགས་དོན་གྱི་ཀུན་ཏུ་བཟང་པོ་རང་ཤེས་རིག་པའི་རྒྱལ་པོ་ཞེས་བྱའོ། །ཆོས་ཞེས་བྱ་བ་ནི་སྒྲ་ཡང་དག་པ་ཞིག་སྟེ་འདིར་དམིགས་པའི་རྐྱེན་ཡིད་ཀྱི་ཁམས་ཡིན་པས་འཁོར་འདས་ཀྱི་མཚན་ཉིད་ཐམས་ཅད་ལ་འཇུག་ཀྱང་སྐབས་འདིར་ཀུན་རྫོབ་ཏུ་སྣང་བའི་ཆོས་ཐམས་ཅད་དོན་དམ་བདེན་པ་སྤྲོས་པ་དང་བྲལ་བའི་དབྱིངས་སུ་སྡུད་པར་བྱེད་ཅིང་དཀྱིལ་འཁོར་ཐམས་ཅད་བསྐྱེད་པའི་ཡུམ་དུ་ཤར་བས་ཆོས་བྱ་བ་མོ་ཀུན་ཏུ་བཟང་མོ་ཞེས་པའི་བརྡར་བཏགས་པའོ། །གཉིས་པོ་ནི་ཆོས་ཀྱི་སྐུ་སྟེ་དབྱིངས་ལ་བཞུགས་པ་ཉིད་ཀྱང་རེ་ཞིག་སྣང་སྟོང་ཟུང་དུ་འཇུག་པའི་ཐ་སྙད་མཚོན་ཕྱིར་ཞལ་ཕྱག་གི་རྣམ་པ་ཅན་དུ་བསྟན་པའོ། །དེ་སྐད་དུ། །བྱ་བ་བྱེད་དང་ཡིད་ཆོས་རྣམ་པར་དག །ཀུན་བཟང་ཡབ་ཡུམ་གཉིས་ལ་ཕྱག་འཚལ་ལོ། །ཞེས་ལུང་དང་བཅས་ཏེ་གསུངས་པས་འཁོར་ལོའ་ིལྟེ་བ་ལ་ཀུན་གཞི་ལས་ཡིད་དུ་ལངས་པའི་ཤེས་པ་དང་། དེ་ཡུལ་ལ་རྟོག་པའི་ཆོས་དེ་ཉིད་རང་བཞིན་དུ་འོད་གསལ་བའི་གནས་སུ་དག་པ་ཉིད་གུད་དུ་མ་བཟུང་པའི་ཁྱབ་ལ་གྱི་རིག་པ་ཟང་ཐལ་བ་དེ་ཉིད་ཀུན་ཏུ་བཟང་པོ་སྟེ། འདོད་དགུ་ལྷུན་གྱི་གྲུབ་པའི་རིན་པོ་ཆེའི་ཁྲིའི་སྟེང་། རང་བཞིན་གྱི་འོད་གསལ་ཐབས་ཤེས་ཉི་ཟླའི་དཀྱིལ་འཁོར་དང་། ཉེས་པའི་སྐྱོན་གྱིས་གོས་པ་མེད་པས་པདྨའི་གདན་ལ་ཡབ་སྐུ་མདོག་ཆོས་ཉིད་འགྱུར་བ་མེད་ལ་མཐིང་ག །ཆོས་ཉིད་ཐིག་ལེ་ཉག་གཅིག་གི་བརྡར་ཞལ་གཅིག་ཐབས་ཤེས་དང་ལྡན་པའི་ཕྱག་གཉིས་འཁོར་འདས་མཉམ་པ་ཉིད་དུ་མཁྱེན་པའི་ཕྱག་རྒྱ་མཉམ་བཞག་ཅན། །གཟུང་འཛིན་དང་བྲལ་བའི་ཕྱག་རྒྱ་གཅེར་བུ་གོས་མེད། ཞབས་མཉམ་པའི་སྐྱིལ་ཀྲུང་ཅན་སྣང་བའི་ཞེན་པ་སྦྱོང་བྱེད་དང་། དེ་ཉིད་སྟོང་བ་ཉིད་དང་དབྱེར་མེད་པས་ཡུམ་ཀུན་ཏུ་བཟང་མོ་ཉོན་མོངས་པའི་དྲི་མ་སྤངས་པས་སྐུ་མདོག་དཀར་མོ་ཞལ་གཅིག །ཕྱག་གཉིས་འཁོར་འདས་ཐལ་སྦྱར་ལས་ཆོས་ཅན་ཆོས་ཉིད་རྣམ་ཐར་སྒོ་གསུམ་དུ་བསྡུད་པའི་ཆོས་འབྱུང་གི་ཕྱག་རྒྱ་ཅན། ཞབས་བརྟུལ་ཞུགས་ཀྱི་སྐྱིལ་མོ་ཀྲུང་གིས་བཞུགས་པ་དེ་ཉིད་དང་ཞལ་སྦྱོར་བའོ། །གཉིས་པ་གཤེགས་པ་གཤེགས་མ་ལྔ་ནི། རྩིབས་ལྔར་གཟུགས་ཚོར་འདུ་ཤེས་དངཿའདུ་བྱེད་རྣམ་ཤེས་དག་པའི་ལྷཿ རྣམ་སྣང་རིན་འབྱུང་སྣང་མཐའ་ཡསཿ དོན་གྲུབ་རྡོ་རྗེ་མི་བསྐྱོད་ལྔརཿ ས་ཆུ་སྤྱན་དང་མ་མཱ་ཀིཿ མེ་རླུང་གོས་དཀར་དམ་ཚིག་སྒྲོལཿ ནམ་མཁའ་དབྱིངས་ཀྱི་དབང་ཕྱུག་མཿ གནས་དག་རིགས་ཀྱི་ཡུམ་ལྔས་འཁྲིལཿ ཞེས་པས། འཁོར་ལོ་རྩིབས་ལྔ་ལས་མདུན་དུ་ཐོག་པ་འོག་མར་མི་ཆུད་པ་འདིར་ཤོང་ཞིང་། །སྟོབས་རྣམ་པ་བཅུ་མངའ་བའི་བརྡར་གླང་པོས་བཏེག་པའི་རིན་པོ་ཆེའི་ཁྲི་པདྨ་ཉི་ཟླ་དང་བཅས་པར། གཞིག་ཅིང་གཞོམ་དུ་རུང་བ་གཟུགས་སྤྱིའི་མཚན་ཉིད། བྱེ་བྲག་ཏུ་རྒྱུའི་གཟུགས་ས་ཆུ་མེ་རླུང་བཞི། འབྲས་གཟུགས་དབང་པོ་ལྔ་དང་ཡུལ་ལྔ། རྣམ་པར་རིག་བྱེད་མ་ཡིན་པ་སྟེ་བཅོ་ལྔ་གནས་སུ་རང་བཞིན་གྱིས་རྣམ་པར་དག་པའི་རྣམ་པར་སྣང་མཛད་ཉེས་པའི་སྐྱོན་གྱིས་མ་གོས་པའི་སྐུ་མདོག་དཀར་པོ་ཞལ་གཅིག་ཕྱག་གཉིས་གཡས་མེ་ལོང་ལྟ་བུ་ཡེ་ཤེས་ཀྱི་ཀུན་ལ་དབང་བསྒྱུར་ཞིང་འཁོར་བའི་བག་ཆགས་གཅོད་པས་འཁོར་ལོ་ཐུགས་ཀར་འཛིན་ཅིང་གཡོན་ཤེས་རབ་སྟོང་པ་ཉིད་ཀྱིས་ཆོས་སྒྲ་སྒྲོག་པའི་དྲིལ་བུ་དཀུར་བརྟེན་པ། །འབྱུང་བ་སའི་ཁམས་གནས་སུ་དག་པ་ཡུམ་སངས་རྒྱས་སྤྱན་དུས་གསུམ་གྱི་སངས་རྒྱས་ཐམས་ཅད་བསྐྱེད་པའི་གཞི། གཡས་དྲིལ་བུ་འཛིན་པས་ཡབ་ལ་འཁྱུད་ཅིང་། གཡོན་འཁོར་ལོ་འཛིན་པའོ། །དེའི་གཡས་ཀྱི་རྩིབས་ལ་གདུལ་བྱ་མྱུར་དུ་བསྒྲོད་ཅིང་། རྫུ་འཕྲུལ་རྐང་བཞི་བརྙེས་པའི་ཅང་ཤེས་རྟའི་ཁྲི་པདྨ་ཉི་ཟླར་བཅས་པར། ཚོར་བ་སྤྱིའི་མཚན་ཉིད་ཉམས་སུ་མྱོང་བ། །བྱེ་བྲག་ཏུ་བདེ་སྡུག་བར་གསུམ་གནས་སུ་དག་པ་རིན་ཆེན་འབྱུང་ལྡན་ཆེ་བའི་ཡོན་ཏན་དུ་མ་དང་ལྡན་པས་སྐུ་མདོག་སེར་པོར་ཞལ་གཅིག་ཕྱག་གཉིས་གཡས་མཉམ་པ་ཉིད་ཀྱི་ཡེ་ཤེས་ཀྱི་ཆེ་བའི་འདོད་དགུའི་ཡོན་ཏན་འབྱུང་བའི་རིན་པོ་ཆེ་འབར་བ་དང་། གཡོན་དྲིལ་བུ་དཀུར་བརྟེན་པ། འབྱུང་བ་ཆུའི་ཁམས་གནས་སུ་དག་པ་ཡུམ་མ་ཀི་སེར་མོ་གཡས་དྲིལ་བུ་འཛིན་པས་ཡབ་ལ་འཁྱུད་ཅིང་། །གཡོན་རིན་པོ་ཆེ་འཛིན་པའོ། །དེའི་གཡོན་ཀུན་བཟང་གི་རྒྱབ་ཟུར་གྱི་རྩིབས་ལ་སྣང་བ་ཐམས་ཅད་དབང་དུ་བྱེད་ཅིང་དབང་བཅུ་མངའ་བ་རྨ་བྱས་བཏེག་པའི་ཁྲི་པདྨ་ཉི་ཟླར་བཅས་པ། འདུ་ཤེས་སྤྱིའི་མཚན་ཉིད་མཚན་མར་འཛིན་པ། བྱེ་བྲག་ཏུ་ཡུལ་ལ་འཇུག་པ་རྒྱ་ཆེ་ཆུང་བར་མ་གསུམ་གནས་སུ་དག་པ་སྣང་བ་མཐའ་ཡས། །འགྲོ་བའི་དོན་ལ་རྗེས་སུ་ཆགས་པའི་སྐུ་མདོག་དམར་པོ་ཞལ་གཅིག་ཕྱག་གཉིས་གཡས་སོ་སོར་རྟོག་པའི་ཡེ་ཤེས་ཀྱི་སྤྱི་དང་རང་གི་མཚན་ཉིད་གསལ་ལ་མ་ཆགས་པས་པདྨ། གཡོན་དྲིལ་བུ་དཀུར་བརྟེན་པ། འབྱུང་བ་མེའི་ཁམས་གནས་སུ་དག་པ་ཡུམ་ན་བཟའ་དཀར་མོ་གཡས་དྲིལ་བུ་འཛིན་པས་ཡབ་ལ་འཁྱུད། གཡོན་པདྨ་འཛིན་པའོ། །དེའི་གཡས་ཀུན་བཟང་གི་རྒྱབ་ཟུར་གཡོན་གྱི་རྩིབས་ལ་ཕྲིན་ལས་སྣ་ཚོགས་པས་འགྲོ་བ་འདུལ་ཞིང་ཐོགས་པ་མེད་པའི་ཡེ་ཤེས་གསུམ་དང་སོ་སོ་ཡང་དག་པའི་རིག་པ་བཞིས་དོན་མཛད་པའི་ནམ་མཁའ་ལྡིང་གི་ཁྲི་པདྨ་ཉི་ཟླར། འདུ་བྱེད་སྤྱིའི་མཚན་ཉིད་མངོན་པར་འདུ་བྱེད་པ། བྱེ་བྲག་ཏུ་ལྡན་པའི་འདུ་བྱེད་རེག་པ་དང་། ཚོར་བ་དང་། འདུ་ཤེས་དང་། ཡིད་བྱེད་དང་སེམས་པ་སྟེ་ཀུན་ཏུ་འགྲོ་བ་ལྔ། མོས་པ་དང་། འདུན་པ་དང་། དྲན་པ་དང་། ཏིང་འཛིན་དང་། ཤེས་རབ་སྟེ་ཡུལ་སོ་སོར་ངེས་པ་ལྔ། དད་པ་དང་། ངོ་ཚ་དང་། ཁྲེལ་ཡོད་དང་། བག་ཡོད་དང་། བཏང་སྙོམས་དང་། མི་འཚེ་བ་ངང་། ཤིན་དུ་སྦྱངས་པ་དང་། བརྩོན་འགྲུས་དང་། མ་ཆགས་པ་དང་། མི་སྡང་བ་དང་། གཏི་མུག་མེད་པ་སྟེ་དགེ་བ་བཅུ་གཅིག་དང་། འདོད་ཆགས། ཁོང་ཁྲོ། ང་རྒྱལ། མ་རིག་པ། འཇིགས་ཚོགས་ལ་ལྟ་བ། ཐེ་ཚོམ་སྟེ་དྲུག །རྩ་བའི་ཉོན་མོངས་། འགྱོད་པ་གཉིད། རྟོག་པ་དཔྱོད་པ་སྟེ་བཞི་ནི་གཞན་དུ་གྱུར་བའོ། །ཕྲོ་བ། སེར་སྣ། སྒྱུ། གཡོ། རྒྱགས་པ། རྨུགས་པ། རྒོད་པ། མ་དད་པ། ལེ་ལོ། གཡེང་བ། བག་མེད། བརྗེད་ངས། ཤེས་བཞིན་མ་ཡིན་པ། འཚེ་བ། ངོ་ཚ་མེད། ཁྲེལ་མེད་པ། ཁྲོ་བ། འཁོན་འཛིན། ཆབ་པ། འཚིགས་པ་ཏེ་ཉི་ཤུ་ཉེ་ཉོན་རེ་རེ་ལས། ཚོར་བ་དང་འདུ་ཤེས་ལས་གཞན་པའི་ཞེ་དགུ་དང་། མི་ལྡན་པའི་འདུ་བྱེད་གནས་སུ་དག་པ་དོན་ཡོད་གྲུབ་པ། སེམས་ཅན་གྱི་དོན་སྣ་ཚོགས་སུ་འཛད་པའི་སྐུ་མདོག་ལྗང་གུ་ཞལ་གཅིག་ཕྱག་གཉིས་གཡས་བྱ་བ་གྲུབ་པའི་འཕྲིན་ལས་མཐར་ཕྱིན་པས་རལ་གྲིའི་རྡོ་རྗེ་རྒྱ་གྲམ། གཡོན་དྲིལ་བུ་དཀུར་བརྟེན་པ་འབྱུང་བ་རླུང་གི་ཁམས་གནས་སུ་དག་པ་ཡུམ་དམ་ཚིག་སྒྲོལ་མ་ལྗང་གུ་གཡས་དྲིལ་བུ་འཛིན་པས་ཡབ་ལ་འཁྲིལ་ཞིང་། གཡོན་རྒྱ་གྲམ་འཛིན་པའོ། །དེའི་གཡས་གཙོ་བོ་ཀུན་བཟང་གི་གཡོན་དུ། ཐེག་པ་འོག་མས་ཉམས་མི་མངའ་ཞིང་མི་འཇིགས་པ་བཞི་མཚོན་པའི་ཕྱིར་སེར་གེས་བཏེག་པའི་ཁྲི་པདྨ་ཉི་ཟླར། རྣམ་པར་ཤེས་པ་སྤྱིའི་མཚན་ཉིད་ཡུལ་རིག་པ་བྱེ་བྲག་ཏུ་ཀུན་གཞིའི་རྣམ་ཤེས། ཡིད་སྒོ་ལྔའི་རྣམ་ཤེས། ཉོན་ཡིད་བཅས་ཚོགས་བརྒྱད་གནས་སུ་དག་པ་བཅོམ་ལྡན་མི་བསྐྱོད་རྡོ་རྗེ་ཆོས་ཉིད་མི་འགྱུར་བས་སྐུ་མདོག་མཐིང་ག་ཞལ་གཅིག་ཕྱག་གཉིས་གཡས་སྟོང་པ་ཉིད་ཀྱི་ཡེ་ཤེས་ལ་སྐྱེ་ཤི་འཕོ་འགྱུར་མེད་ཅིང་སྣང་སྟོང་ཟུང་དུ་འཇུག་པའི་རྡོ་རྗེ། གཡོན་དྲིལ་བུ་དཀུར་བརྟེན་པ། འབྱུང་བ་ནམ་མཁའི་ཁམས་གནས་སུ་དག་པས་ཡུམ་ནམ་མཁའ་དབྱིངས་ཀྱི་དབང་ཕྱུག་ལ་གཡས་དྲིལ་བུ་འཛིན་པས་ཡབ་ལ་འཁྲིལ་ཞིང་། གཡོན་རྡོ་རྗེ་འཛིན་པའོ། །རིགས་ལྔ་ཡབ་རྣམས་མཉམ་པའི་སྐྱིལ་ཀྲུང་དང་། ཡུམ་རྣམས་བརྟུལ་ཞུགས་ཀྱི་སྐྱིལ་མོ་ཀྲུང་ངོ་། །གཉིས་པ་སྐྱེ་མཆེད་དག་པ་སེམས་དཔའ་སེམས་མའི་གདན་ལ་གཉིས། རྣམ་ཤེས་ཀྱི་སེམས་དཔའ་ནང་སྒེག་བཞི་དང་བཅས་པ་དང་། དབང་པོའ་ིསེམས་དཔའ་ཕྱི་སྒེག་བཞི་དང་བཅས་ཏེ་བཤད་པའོ། །དང་པོ་ལ་གཉིས་ཀྱི་སྤྱིར་བཤད་པ་ནི། གཡས་ཕྱོགས་དབང་པོའ་ིརྩ་བཞི་ལཿ རྣམ་ཤེས་དག་པའི་ནང་སེམས་བཞིརཿ ཡུལ་བཞི་དག་པའི་སེམས་མས་འཁྲིལཿ ཞེས་པས། དེ་ཡང་འབྱུང་བ་བཞིའི་དྭངས་མ་ལྟེ་བའི་རྩ་མདུད་དུ་སྤྱན་གཉིས་ཆགས་པ་ལ་རྩ་གསུམ་གྱིས་སྦྲེལ་ཏེ་ལྟེ་བ་ནས་སྙིང་ཁར་འབྲེལ། དེ་ནས་མགྲིན་པར་འབྲེལ། དེ་ནས་ཀླད་པ་དུང་ཁང་གི་གཡས་སུ་འཁྱིལ་བའི་ཕྱོགས་ཀྱི་རྩ་བཞི་ལས་དབང་པོ་ཡུལ་དུ་འཆར་བར་བྱེད་པའི་རྩ། རྩ་བ་གཉིས་ལ་རྩེ་མོ་ལྔར་གྱེས་ནས་སྒོ་ལྔ་སོ་སོའ་ིརྟེན་བྱེད་པ་ལ། གཟུགས་ཀྱི་རྟེན་མིག སྒྲ་རྣ་བ། དྲི་སྣ། རོ་ལྕེ། རེག་སྨིན་མཚམས་སུ་ཟུག་པའི་ཕྱི་མ་ལས་སྔ་མ་བཞིའི་གཡས་ཕྱོགས་ཀྱི་དབང་པོའ་ིརྩ་བཞི་ལ་མིག་རྣ་བ་སྣ་ལྕེ་བཞི་རྣམ་ཤེས་དག་པའི་ནང་གི་སེམས་དཔའ་བཞི་ལ་ཡུལ་གཟུགས་སྒྲ་དྲི་རོ་བཞི་དག་པའི་སེམས་མ་བཞིས་འཁྲིལ་བ་བསྐྱེད་པར་བྱའོ། །གཉིས་པ་བྱེ་བྲག་ཏུ། མིག་ལ་ས་སྙིང་སྒེག་མོ་མཿ རྣ་བར་ཕྱག་རྡོར་གླུ་མ་གཉིསཿ སྣ་ལ་ནམ་སྙིང་ཕྲེང་བ་མོཿ ལྕེ་ལ་སྤྱན་རས་གཟིགས་གར་མཿ ཞེས་པས་མིག་གི་རྣམ་ཤེས་གཟུགས་མཐོང་བ་གནས་སུ་དག་པ་སངས་རྒྱས་ཀྱི་སྤྱན་ཡུལ་ལྔ་ཀ་ལ་འཇུག་ཅིང་ཆོས་ཉིད་རོ་གཅིག་ཏུ་གཟིགས་པ་བྱང་ཆུབ་སེམས་དཔའ་སའི་སྙིང་པོ་དཀར་པོ་ཡེ་ཤེས་ཀྱི་མྱུ་གུ་བསྐྲུན་པས་གཡས་རིན་པོ་ཆེའི་མྱུ་གུ་འཛིན་ཅིང་། གཡོན་དྲིལ་བུ་དཀུར་བརྟེན་པ་མིག་གི་ཡུལ་དུ་གཟུགས་སུ་སྣང་བ་གནས་སུ་དག་པ་སྒེག་མོ་དཀར་མོ་གཡས་ཡབ་ལ་འཁྱུད་ཅིང་། གཡོན་དྲིལ་བུ་དཀུར་བརྟེན་པ་ལའོ། །སྒྲ་ཐོས་པ་ལས་འཕགས་པ་སངས་རྒྱས་ཀྱི་སྙན་ཡུལ་ལྔ་གར་འཇུག་ཅིང་དེ་བཞིན་ཉིད་དེ་རོ་གཅིག་པར་གསན་པ་བྱང་ཆུབ་སེམས་དཔའ་ཕྱག་ན་རྡོ་རྗེ་མཐིང་ཁ་གཡས་སྡུང་ལ་འཇོགས་བྱེད་རྡོ་རྗེ་རྩེ་གསུམ་འཛིན་ཅིང་། གཡོན་དྲིལ་བུ་དཀུར་བརྟེན་པ། རྣ་བའི་ཡུལ་སྒྲ་ཐོས་པ་གནས་སུ་དག་པ་གླུ་མ་དམར་ཆོས་ཀྱི་སྒྲ་སྒྲོག་པས་བྱེད་པི་ཝཾ་འཛིན་པ་གཉིས་སོ། །སྣའི་རྣམ་ཤེས་དྲི་ཚོར་བ་ལས་འཕགས་པ་སངས་རྒྱས་ཀྱི་ཤངས་ཡུལ་ལྔ་གར་འཇུག་ཅིང་སྐྱེ་བ་མེད་པར་རོ་གཅིག་ཏུ་ཚོར་བ་བྱང་ཆུབ་སེམས་དཔའ་ནམ་མཁའི་སྙིང་པོ་སེར་པོ་ཉོན་མོངས་རྒྱུན་གཅོད་པས་གཡས་རལ་གྲི། གཡོན་དྲིལ་བུ་དཀུར་བརྟེན་པ། སྣའི་ཡུལ་དུ་དྲི་ཚོར་བ་གནས་སུ་དག་པ་ཕྲེང་བ་མོ་སེར་མོ་ཐབས་ཤེས་རབ་འདུ་འབྲལ་མེད་པས་མཚོན་པས་སངས་རྒྱས་རིན་པོ་ཆེའི་ཕྲེང་བ་འཛིན་པའོ། །ལྕེའི་རྣམ་ཤེས་རོ་བརྒྱ་མྱོང་བ་ལས་འཕགས་པ་སངས་རྒྱས་ཀྱི་ལྗགས་ཀྱི་དབང་པོས་ཡུལ་ལྔ་ལ་འཇུག་ཅིང་གཉིས་སུ་མེད་པར་རོ་གཅིག་ཏུ་མྱོང་བ་བྱང་ཆུབ་སེམས་དཔའ་སྤྱན་རས་གཟིགས་མོར་ཉེས་པའི་སྐྱོན་གྱིས་མ་གོས་པས་གཡས་པདྨ། གཡོན་དྲིལ་བུ་དཀུར་བརྟེན་པ། ལྕེའི་ཡུལ་དུ་རོ་མྱོང་བ་གནས་སུ་དག་པ་གར་མ་ལྗང་ཁུ་གདུལ་བྱ་དགའ་བར་སྐྱེད་པས་གར་བསྒྱུར་བའི་ཕྱག་ན་རྡོ་རྗེ་དྲིལ་བུ་འཁྲོལ་བའོ། །གཉིས་པ་ལའང་གཉིས་ཀྱི་དང་པོ་སྤྱིར་བསྟན་པ་ནི། གཡོན་ཕྱོགས་དབང་པོའ་ིརྩ་བཞི་ལཿ དབང་པོ་དག་པའི་ཕྱི་སེམས་བཞིརཿ དུས་བཞི་དག་པའི་སེམས་མས་འཁྲིལཿ ཞེས་པས། གཡོན་ཕྱོགས་ཀྱི་མིག་རྣ་བ་སྣ་ལྕེ་སྟེ། དབང་པོ་བཞིའི་རྩ་བཞི་ལ་ཡང་དབང་པོའ་ིངོ་བོ་བཞི་དག་པའི་ཕྱིའི་སེམས་དཔའ་བཞི་ལ་འདས་མ་འོངས་ད་ལྟར་མ་ངེས་པའི་དུས་བཞི་གནས་སུ་དག་པའི་སེམས་མ་བཞིས་འཁྲིལ་ཏེ། གཉིས་པ་བྱེ་བྲག་ཏུ། མིག་ལ་བྱམས་པ་བདུག་སྤོས་མཿ རྣ་བར་སྒྲིབ་སེལ་མེ་ཏོག་ཅནཿསྣ་ལ་ཀུན་བཟང་ཨ་ལོ་ཀེཿ ལྕེ་ལ་འཇམ་དཔལ་དྲི་ཆབ་མཿ ཞེས་པས། མིག་གི་དབང་པོ་ཟབ་མའི་མེ་ཏོག་ལྟ་བུ་ལས་ཁྱད་པར་འཕགས་པ་རྡོ་རྗེའི་སྤྱན་སྒྲིབ་པ་མེད་པ་ཡུལ་ལྔ་ཀ་ལ་འཛིན་པའི་རྟེན་བྱེད་པ་བྱང་ཆུབ་སེམས་དཔའ་བྱམས་པ་དཀར་སེར་ཉོན་མོངས་པའི་ཚ་གདུང་བསིལ་བས་གཡས་ཀླུ་ཤིང་འཛིན་ཅིང་། གཡོན་དྲིལ་བུ་དཀུར་བརྟེན་པ་སྔར་འདས་པའི་ཆོས་ཞིག་ནས་མེད་པ་ལས་ཁྱད་པར་འཕགས་པ་སྔ་མའི་ཆོས་ཇི་བཞིན་པ་མངོན་སུམ་དུ་གསལ་བའི་རང་བཞིན། འདས་པའི་དུས་ལ་མ་ཆགས་མ་ཐོགས་པར་ཡེ་ཤེས་གཟིགས་པ་ལ་འཇུག་པའི་མཚོན་བྱེད་དུ་བདུག་སྤོས་མ་དཀར་སེར་ཚུལ་ཁྲིམས་ཀྱི་དྲིས་ཚིམ་པར་བྱེད་པས་སྤོས་ཁང་འཛིན་པའོ། །རྣ་བའི་དབང་པོ་གྲོ་ག་གཅུས་པ་ལྟ་བུ་ལས་ཁྱད་པར་འཕགས་པ་སྙན་གྱི་དབང་པོ་ཉམས་པ་མེད་པས་ཡུལ་ལྔ་གསལ་བའི་རྟེན་བྱེད་པ་སྒྲིབ་པ་རྣམ་སེལ་དམར་སེར་སེམས་ཅན་ལ་ཆོས་སྟོན་པས་གཡས་སྒྲོམ་བུ་འཛིན་ཅིང་། གཡོན་དྲིལ་བུ་དཀུར་བརྟེན་པ། ད་ལྟར་གྱི་དབང་པོ་མངོན་སུམ་དུ་སྣང་བ་ལས་འཕགས་པ་ཆོས་ཐམས་ཅད་བསྐལ་དོན་མེད་པར་ད་ལྟའི་དུས་ལ་མ་ཆགས་མ་ཐོགས་པར་ཡེ་ཤེས་གཟིགས་པ་ལ་འཇུག་པའི་མཚོན་བྱེད་མེ་ཏོགས་དམར་སེར། བྱང་ཆུབ་ཀྱི་ཡན་ལག་མཚོན་པར་མེ་ཏོག་གི་ཕྲེང་བ་ཅན་ནི་ཟ་མ་ཏོག་འཛིན་པའོ། །སྣའི་དབང་པོ་ཟངས་ཀྱི་མོ་ཁབ་བཤིབས་པ་ལྟ་བུ་ལས་འཕགས་པ་ཤངས་ཀྱི་དབང་པོ་ཡུལ་ལྔ་ལ་འཇུག་པའི་རྟེན་བྱེད་པ་བྱང་ཆུབ་སེམས་དཔའ་ཀུན་ཏུ་བཟང་པོ་དམར་ལྗང་སེམས་ཅན་གྱི་རེ་བ་སྐོང་བས་གཡས་རིན་པོ་ཆེའི་སྙེམ། གཡོན་དྲིལ་བུ་དཀུར་བརྟེན་པ། མ་འོངས་པའི་ཡུལ་མངོན་སུམ་དུ་གྱུར་པ་ལས་ཁྱད་པར་འཕགས་པ་མ་བྱུང་བའི་ཆོས་རྣམས་སྐྱུ་རུ་ར་ཕྱག་མཐིལ་དུ་བཞག་པ་བཞིན་མཁྱེན་པ་མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས་གཟིགས་པ་ལ་འཇུག་པ་ཨ་ལོ་ཀེ་དམར་ལྗང་མ་རིག་པའི་མུན་པ་སེལ་བས་མར་མེ་འཛིན་པའོ། །ལྕེའི་དབང་པོ་ཟླ་བ་ཕྱེད་པ་ལྟ་བུ་ལས་འཕགས་པ་གསུང་རོ་བྲོ་བའི་མཆོག་མཁྱེན་པས་ཡུལ་ལྔ་ཀ་ལ་འཇུག་པའི་རྟེན་བྱེད་པ་འཇམ་དཔལ་དཀར་ལྗང་། ཉོན་མོངས་པ་སྤངས་པས་གཡས་ཨུཏྤ་ལ་འཛིན་པ། གཡོན་དྲིལ་བུ་དཀུར་བརྟེན་པ། འབྱུང་བ་མ་ངེས་པའི་ཚོགས་དུས་བཞི་མཉམ་པ་ཉིད་ཀྱི་ཡེ་ཤེས་སྟེ་རང་བྱུང་གི་སྣང་བ་ཇི་བཞིན་པའི་ངང་ནས་འཕོ་འགྱུར་མེད་པའི་ཆོས་ཉིད་ལ་བཞུགས་པའི་མཚོན་བྱེད་དུ་དྲི་ཆབ་མ་དཀར་ལྗང་། བག་ཆགས་ཀྱི་དྲི་མ་འཁྲུད་པས་དྲིའི་དུང་ཆོས་འཛིན་པའོ། །སེམས་དཔའ་བརྒྱད་པོ་ཐམས་ཅད་ཀྱང་ཞབས་གཡས་ཅུང་ཟད་བརྐྱང་པའི་ཕྱེད་སྐྱིལ་གྱིས་བཞུགས་ཤིང་། སེམས་མ་རྣམས་གཡོན་ཅུང་ཟད་བརྐྱང་པའི་ཕྱེད་སྐྱེལ་གྱིས་ཡབ་ལ་འཁྱུད་པའོ། །ཞི་བ་དེ་དག་ཀྱང་མཛེས་པའི་ཚུལ་དགུ་དང་ལྡན་ཞིང་། །ལྷ་རྫས་ཀྱི་དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས་དང་ཚིག་གུའི་སྨད་དཀྲིས་དང་། ཁ་དོག་སྣ་ཚོགས་པའི་ཅོད་པཎ་དང་། ཟི་ལྡིར། གར་གྱི་ཕུ་དུང་སྟེ་དར་གྱི་ཆས་གོས་ལྔ་དང་། རིན་པོ་ཆེའི་དབུ་རྒྱན་སྙན་ཆ། མགུལ་རྒྱན། ལྟེ་བར་སླེབ་པའི་སེ་མོ་དོ། །གསང་བར་སླེབ་པའི་དོ་ཤལ། སྐ་རགས། ཕྱག་གདུབ། ཞབས་གདུབ་སྟེ་རིན་པོ་ཆེའི་རྒྱན་བརྒྱད་དེ་ཞི་རྒྱན་བཅུ་གསུམ་མོ། ཡང་ན་ཕྱག་ཞབས་ཀྱི་གདུབ་བུ། གཅིག་ཏུ་བགྲངས་ཏེ་རིན་པོ་ཆེའི་རྒྱུན་བདུན་དང་། སྐུའི་སྟོད་གཡོགས་དར་དཀར། གསུང་གི་ཆོས་གོས་ལེབ་བརྒན། ཐུགས་ཀྱི་ཟི་ལྡིར་མཐིང་འོད། ཡོན་ཏན་སྐུ་རགས་སེར་པོ། ཕྲིན་ལས་གསང་གོས་མརྒད། གར་གྱི་ཕུ་དུང་ལྗང་གུ་སྟེ་དར་རྒྱན་དྲུག་དང་བསྡོམས་པས་ཞི་རྒྱན་བཅུ་གསུམ་མོ། །གསུམ་པ་སྤྲུལ་སྐུ་ཐུབ་པ་དྲུག་ནི། དཔྲལ་བ་ལྕེ་དང་སྙིང་ཁ་དངཿ ལྟེ་བ་གསང་གནས་རྐང་མཐིལ་གཡོནཿ འཇིག་རྟེན་དུག་དང་ཉོན་མོངས་ལྔཿ སེར་སྣ་ལྟ་བ་གནས་དག་པཿ རིག་པའི་སྐྱེས་བུ་ཐུབ་པ་དྲུགཿ ཅེས་པས་དཔྲལ་བར་ལྷའི་འཇིག་རྟེན་དུ་བལྟ་བ་དང་། ཉོན་མོངས་པ་ང་རྒྱལ་གནས་སུ་དག་པ། ལྷའི་ཐུབ་པ་བརྒྱ་བྱིན་དཀར་པོ་ལྷ་རྣམས་ལ་ཆོས་ཀྱི་སྡོམ་བཞི་སྟོན་པས་ཕྱག་རྒྱ་པི་ཝཾ་ཅན། མགྲིན་པར་ལྷ་མ་ཡིན་གྱི་འཇིག་རྟེན་དུ་ལྟ་བ་དང་། ཉོན་མོངས་ཕྲག་དོག་གནས་སུ་དག་པ་ལྷ་མ་ཡིན་གྱི་ཐུབ་པ་ཐགས་བཟུང་རིས་མཐིང་ཁ་ལྷ་མ་ཡིན་རྣམས་ཀྱི་འཐབ་རྩོད་འདུལ་བས་ཕྱག་རྒྱ་གོ་མཚོན་ཅན། སྙིང་ཁར་མིའི་འཇིག་རྟེན་དུ་ལྟ་བ་དང་། ཉོན་མོངས་པ་འདོད་ཆགས་གནས་སུ་དག་པ་མིའི་ཐུབ་པ་ཤཱཀྱ་ཐུབ་པ་སེར་པོ་མི་རྣམས་ལ་དགེ་བ་བཅུ་སྟོན་པས་ཕྱག་རྒྱ་མཁར་བསིལ་ལྷུང་བཟེད་ཅན། །ལྟེ་བར་དུད་འགྲོའ་ིའཇིག་རྟེན་དུ་ལྟ་བ་དང་། ཉོན་མོངས་པ་གཏི་མུག་གནས་སུ་དག་པ། བྱོལ་སོང་གི་ཐུབ་པ་སེང་གེ་རབ་བརྟན་དམར་བ་བྱོལ་སོང་རྣམས་གཏི་མུག་ལས་སྐྱོབ་ཕྱིར་གླེགས་བམ་པོ་ཏི་འཛིན་པ། གསང་གནས་སུ་ཡི་དྭགས་ཀྱི་འཇིག་རྟེན་དུ་ལྟ་བ་དང་། ཉོན་མོངས་པ་སེར་སྣ་གནས་སུ་དག་པ་ཡི་དྭགས་ཀྱི་ཐུབ་པ་ཁ་འབར་སེར་ནག་ཡི་དྭགས་བཀྲེས་སྐོམས་སེལ་བས་ཕྱག་རྒྱ་རིན་པོ་ཆེའི་སྒྲོམ་བུ་ཅན། རྐང་མཐིལ་གཡོན་དུ་དམྱལ་བའི་འཇིག་རྟེན་དུ་བལྟ་བ་དང་། ཉོན་མོངས་པ་ཞེ་སྡང་གནས་སུ་དག་པ་དམྱལ་བའི་ཐུབ་པ་ཨ་ཝ་གླང་མགོ་དུད་ཁ་དམྱལ་བའི་ཉེས་དམིགས་སྟོན་པས་ཕྱག་རྒྱ་མེ་ཆུ་བསྣམས་པ་དྲུག་ཀ་གཙུག་ཏོར་དང་ལྡན་ཞིང་ཆོས་གོས་གསུམ་སོགས་ཚངས་པར་སྤྱོད་པའི་ཆ་ལུགས་ཅན་འགྲོ་བའི་དོན་ལ་འགྲེང་སྟབས་སུ་གཤེགས་པའི་ཚུལ་ཅན་ནོ། །གསུམ་པས་ལས་དབང་དག་པ་ཁྲོ་བོ་ཁྲོ་མོའ་ིགདན་ལ། སྤྱིར་བསྟན་པ་དང་། བྱེ་བྲག་ཏུ་བཤད་པའི་དང་པོ་ནི། །ཡན་ལག་བཞི་ལ་སེམས་ཅན་གྱིཿ ལུས་ཀྱི་རྣམ་པར་ཤེས་པ་དང་། དབང་པོ་རེག་བྱ་རེག་ཤེས་བཞིཿ གནས་དག་སྒོ་བ་ཡབ་བཞི་ལཿརྟག་ཆད་ལྟ་དང་བདག་ལྟ་དང་༔ མཚན་མར་ལྟ་བ་གནས་དག་ཡུམཿ ཞེས་པས། ལག་པ་གཉིས་དང་རྐང་པ་གཉིས་ཏེ་ཡན་ལག་བཞི་ལ་སེམས་ཅན་ཐམས་ཅད་ཀྱི་ལུས་ཀྱི་རྣམ་པ་ཤེས་པ་དང་། དེ་བརྟེན་པའི་ལུས་ཀྱི་དབང་པོ་དང་། རེག་བྱ་ཡུལ་དང་། དེ་གསུམ་འཛོམས་པ་ལས་རེག་པར་ཤེས་པ་སྟེ་གནས་སུ་དག་པའི་སྒོ་བ་ཡབ་བཞི་ལ། །ཕྱི་ནང་གི་དངོས་པོ་ལ་རྟག་པར་ལྟ་བ་དང་། །ཆད་པར་ལྟ་བ་དང་། བདག་ཏུ་ལྟ་བ་དང་། མཚན་མར་ལྟ་བ་གནས་སུ་དག་པ་ལས་སྒོ་མ་ཡུམ་བཞིའོ། །གཉིས་པ་བྱེ་བྲག་ཏུ། ལག་གཡས་གཤིན་རྗེ་ལྕགས་ཀྱུ་མཿགཡོན་པ་སྟོབས་ཆེན་ཞགས་པ་མོཿ རྐང་གཡོན་རྟ་མགྲིན་ལྕགས་སྒྲོག་མཿགཡས་པ་བདུད་རྩི་འཁྱིལ་དྲིལ་བུཿ ཚད་མེད་བཞི་ཡི་ཕྲིན་ལས་ཅནཿ ཞེས་པས་ལག་གཡས་སུ་ལུས་ཀྱི་རྣམ་པར་ཤེས་པ་རེག་བྱ་འཇམ་རྩུབ་མྱོང་བ་ལས་འདས་པ། སངས་རྒྱས་ཀྱི་སྐུའི་རྣམ་ཤེས་ཀྱིས་ཡུལ་ལྔ་ག་ལ་འཇུག་པ་ཤར་སྒོའ་ིབདག་པོ་གཤིན་རྗེ་གཤེད་སྨུག་ནག་འཆི་བདག་གི་བདུད་འཇོམས་པས་ཐོང་དབྱུག་འཛིན་པ་ངོ་བོ་གཟུགས་ལ་སོགས་པ་རྟག་པ་མ་ཡིན་པ་མེད་བཞིན་དུ་སྣང་བ་གཟུགས་བརྙན་ལྟ་བུ་སྦྱིན་པས་སེམས་ཅན་རྣམས་སྡུད་པའི་མཚན་ཉིད་ལྕགས་ཀྱུ་མ་སྨུག་ནག་འཁོར་བ་ཐུགས་རྗེས་འཛིན་པའི་ལྕགས་ཀྱུ་འཛིན་པའོ། །ལག་གཡོན་དུ་ལུས་ཀྱི་དབང་པོ་ལུས་ཀྱི་རྣམ་ཤེས་ཀྱི་རྟེན་བྱེད་པ་ལས་འདས་པ་སངས་རྒྱས་ཀྱི་སྐུའི་དབང་པོ་ཡུལ་ལྔ་ག་ལ་འཇུག་པ་ལྷོ་སྒོའ་ིབདག་པོ་སྟོབས་པོ་ཆེ་སེར་ནག །ཕུང་པོའ་ིབདུད་ཡེ་ཤེས་ལྔས་འཇོམས་བྱེད་རྡོ་རྗེ་རྩེ་ལྔ་འཛིན་པ། སྒྲ་ལ་སོགས་པའི་ཆོས་ཐམས་ཅད་ཆད་པ་མ་ཡིན་པ་ངོ་བོ་རང་རང་གི་སྣང་བ་མ་དོར་བར་སྨིག་རྒྱུ་དང་འདྲ་བར་མཚོན་ཞིང་རྣམ་པ་སྙན་པར་སྨྲ་བས་སེམས་ཅན་རྣམ་སྡུད་པའི་ཕྱིར་ཞགས་པ་མ་སེར་ནག་འཁོར་བ་ཐུགས་རྗེས་འདྲེན་པའི་ཞགས་པ་འཛིན་པའོ། །རྐང་པ་གཡོན་དུ་ལུས་ཀྱི་ཡུལ་རེག་བྱ་ལས་འདས་པ་སངས་རྒྱས་ཀྱི་སྐུའི་རེག་བྱའི་ཁམས་ཡུལ་ལྔ་ལ་ཞུགས་པའི་ནུབ་སྒོའ་ིབདག་པོ་རྟ་མགྲིན་དམར་ནག །ཉོན་མོངས་པའི་བདུད་འཇོམས་པའི་ཐོད་པ་སྦྲུལ་གྱི་དཀྲིས་པ་འཛིན་པ། ཡིད་ཀྱི་ཆོས་རྣམས་ལ་དགག་སྒྲུབ་ཀྱིས་བདག་ཏུ་བཟུང་དུ་མེད་དེ། རྨི་ལམ་དང་འདྲ་ཞིང་། རྣམ་པ་དོན་མཐུན་པས་སེམས་ཅན་རྣམས་དབང་དུ་བྱེད་པའི་ཕྱིར་ལྕགས་སྒྲོག་མ་དམར་ནག་སེམས་ཅན་ཐུགས་རྗེས་མི་འཆོར་བའི་ལྕགས་སྒྲོག་འཛིན་པ། རྐང་པ་གཡས་པར་ལུས་ཀྱི་རྣམ་ཤེས་དང་། དབང་པོ་དང་རེག་བྱ་གསུམ་ཚོགས་པ་ལས་རེག་ཤེས་ཏེ་ལུས་ཀྱི་འདུས་ཏེ་རེག་པའི་རྐྱེན་གྱིས་ཚོར་བ་ལས་འདས་པ་སངས་རྒྱས་ཀྱི་སྐུ་ཡུལ་ལྔར་འཇུག་པ་བྱང་སྒོའ་ིབདག་པོ་བདུད་རྩི་འཁྱིལ་པ་ལྗང་ཁུ། ལྷ་བུའི་བདུད་འཇོམས་པས་རྡོ་རྗེ་རྒྱ་གྲམ་འཛིན་པ། སྣང་སྲིད་འཁོར་འདས་ཀྱི་ཆོས་ཐམས་ཅད་ངོ་བོ་དངོས་པོ་དང་མཚན་མར་མ་གྲུབ་པས་རྨི་ལམ་དང་འདྲ་ཞིང་རྣམ་པ་དོན་སྤྱོད་པས་སེམས་ཅན་རྣམས་ཞི་བ་ལ་འགོད་པའི་ཕྱིར་དྲིལ་བུ་མ་ལྗང་ནག །ཉོན་མོངས་ཐལ་བར་རློག་པའི་དྲིལ་བུ་འཛིན་པའོ། །དེ་ཡང་ཤར་གྱི་སྒོ་བས་བྱམས་པ་ཚད་མེད་དང་ཞི་བའི་ཕྲིན་ལས་དང་། ལྷོའ་ིསྒོ་བས་སྙིང་རྗེ་ཆེན་པོ་རྒྱས་པའི་ཕྲིན་ལས་དང་། ནུབ་ཀྱི་སྒོ་བས་དགའ་བ་ཚད་མེད་པ་དང་དབང་གི་ཕྲིན་ལས་དང་། བྱང་གི་སྒོ་བས་བཏང་སྙོམས་ཚད་མེད་དང་། དྲག་པོའ་ིཕྲིན་ལས་ཏེ་ཚད་མེད་བཞིའི་ཕྲིན་ལས་མཐར་ཕྱིན་པར་མཛད་པ་ཅན་ནོ། །ཁྲོ་བོ་བཞི་ཀའང་གཡོན་སྡིག་མཛུབ་མཛད་ཅིང་། ཡུམ་རྣམས་གཡོན་པ་དུང་ཁྲག་སྟོབས་པའི་ཚུལ་ཅན་ཐམས་ཅད་ཀྱང་ཁྲོ་ཞིང་གཏུམ་ལ་རྣམ་པར་འགྱུར་བའི་ཞལ་ཅན། གར་གྱི་ཉམས་དགུས་སྒེག་ཅིང་། དུར་ཁྲོད་རོལ་པའི་ཆས་ཀྱིས་བརྒྱན་ཏེ་བསྐལ་པའི་མེ་དཔུང་གིས་ཀློང་ན་གྱད་ཀྱི་དོར་སྟབས་ཀྱིས་གདུག་པ་ཅན་ཚར་གཅོད་པའི་ཚུལ་དུ་བཞུགས་པའོ། །དེ་དག་གི་གདན་རིགས་ལྔ་ལ་ལྔ་བརྩེགས། ཀུན་བཟང་ཡབ་ཡུམ་ལ་བཞི་བརྩེགས། །སེམས་དཔའ་ལ་གསུམ་བརྩེགས། ཐུབ་པར་སད་རྐྱང་། ཁྲོ་བོར་ཉི་རྐྱང་སྟེ། འོད་རིམ་ལས། ཕོ་བྲང་དབུས་ཀྱི་ལྟེ་བ་ལ། །མི་འཇིགས་སེང་གེ་བརྒྱད་དང་ལྡན། ཤར་ཕྱོགས་ལྟེ་བར་སྟོབས་ཆེན་གླང་། །ལྷོ་རུ་རྫུ་འཕྲུལ་རྟ་བརྒྱད་དེ། །ནུབ་ཏུ་ཕོ་བྲང་རྨ་བྱ་བ། །བྱང་དུ་ཕྲིན་ལས་ཤང་ཤང་བརྒྱད། །ཁྲི་རྐང་བར་མཛེས་རབ་ལྡན་པས། །ཉི་མ་ཟླ་བ་ལྔ་བརྩེགས་པས། །ཉི་ཟླ་ཆུ་སྐྱེས་གསུམ་བརྩེགས་སེམས། །ཉི་རྐྱང་ཁྲོ་ལ་པད་རྐྱང་ཐུབ། །བྱ་བྱེད་ཀུན་བཟང་ཡབ་ཡུམ་ལ། །ཉི་ཟླ་པདྨ་རིན་ཆེན་རྒྱས། །གདན་ལ་མཉམ་པའི་ཚུལ་དུ་བཞུགས། །ཞེས་སོ། །གཉིས་པ་དེ་རང་བཞིན་ཡོངས་གྲུབ་ཆེན་པོར་བསྟན་པ་ནི། དག་བྱ་དག་བྱེད་རྫོགས་པ་ལསཿ ཡོངས་གྲུབ་གནས་གསུམ་ཚང་བའི་ལྷཿ སྣང་ལ་རང་བཞིན་མེད་པར་གསལཿ ཞེས་པས་དག་བྱ་དག་བྱེད་ནི་སྔར་ཡང་བསྟན་མོད་དེ་ཤིན་ཏུ་གསལ་བར་ཕྱེ་ན། བདེ་གཤེགས་སྙིང་པོ་དག་གཞི་ཀུན་གཞིའི་ཡིད་དག་བྱ། དག་བྱེད་ཀུན་བཟང་ཡབ་ཡུམ་ཏུ་བསྐྱེད་པ། དག་འབྲས་རིག་པ་ཀ་དག་དོན་གྱི་ཀུན་བཟང་ཡབ་ཡུམ་ཐོབ་པ་ཡིན། དེ་དཔེའི་སྒོ་ནས་སྟོན་ན་ལག་པ་དག་གཞི། དག་བྱ་དྲེག་པ་ནག་པོ། དག་བྱེད་སུག་པ་བུལ་ཏོག་ཆུ་བཅས། དག་འབྲས་ལག་མགོ་དྲི་མེད་དཀར་པོར་སོང་བ། དེ་བཞིན་དུ་ཆོས་དག་བྱ། ཀུན་བཟང་མོ་དག་བྱེད། ཕུང་ལྔ་དག་བྱ། རིགས་ལྔ་དག་བྱེད། འབྱུང་ལྔ་དག་བྱ། ཡུམ་ལྔ་དག་བྱེད། མིག་རྣ་བ་སྣ་ལྕེའི་དབང་པོ་དང་རྣམས་དག་བྱ། སེམས་དཔའ་བརྒྱད་དག་བྱེད། ཡུལ་གཟུགས་སྒྲ་དྲི་རོ་བཞི་དང་། དུས་འདས་མ་འོངས་ད་ལྟ་མ་ངེས་པ་བཞི་དག་བྱ། དག་བྱེད་སེམས་མ་བརྒྱད། འཇིག་རྟེན་དྲུག་དང་ཉོན་མོངས་དྲུག་དག་བྱ། ཐུབ་པ་དྲུག་དག་བྱེད། ལུས་ཀྱི་རྣམ་ཤེས་ལུས་དབང་རེག་བྱ། རེག་ཤེས་བཞི་དག་བྱ། སྒོ་བ་བཞི་དག་བྱེད་རྟག་ཆད་བདག་ལྟ་མཚན་མར་ལྟ་བ་བཞི་དག་བྱ། སྒོ་མ་བཞི་དག་བྱེད། དེ་ཐམས་ཅད་ཀྱི་དག་གཞི་བདེ་གཤེགས་སྙིང་པོ། གློ་བུར་གྱི་དྲི་མའི་དག་བྱ་ལ་དག་བྱེད་གདན་གསུམ་ལྷ་ཡི་འཁོར་རྫོགས་པར་སྒོམ་པ་ལས་དག་འབྲས་གདོད་མ་ནས་ཡོངས་སུ་གྲུབ་པའི་གདན་གསུམ་ཚང་བའི་དཀྱིལ་འཁོར་གྱི་ལྷ་ཚོགས་མ་ལུས་མི་ལུས་ལུས་པ་མེད་པ་བསྐྱེད་པ་སྟེ། བརྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད། འོན་ཀྱང་གློ་བུར་དྲི་མས་བསྒྲིབས། དེ་བསལ་ན་ནི་སངས་རྒྱས་ཉིད། ཅེས་དང་། རྒྱུད་བླ་མ་ལས། །རྣམ་དབྱེར་བཅས་པའི་མཚན་ཉིད་ཅན། །གློ་བུར་གྱིས་ནི་ཁམས་སྟོང་གིས། རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱི་སྟོང་མ་ཡིན། །འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཞེས་ཤོ་ལོ་ཀ་ཕྱི་མར་ཚིག་དང་པོ་གཉིས་ཀྱིས་གཞི་གསུམ་པའི་ལམ། བཞི་པས་འབྲས་བུ་བསྟན་ཏོ། །ལྷ་ཚོགས་དེ་དག་ཀྱང་འགགས་པ་མེད་པ་ལྷུན་གྲུབ་ཀྱི་རང་མདངས་སུ་སྣང་ལ། དངོས་པོ་དང་མཚན་མའི་རང་བཞིན་མེད་པས་ཆུ་ཟླ་ལྟ་བུར་གསལ་བར་བསྒོམས་པས་ཚོགས་རྣམ་པ་གཉིས་ཀྱང་ཞར་ལ་རྫོགས་ཏེ། རྒྱུད་ལས། ཡེ་ཤེས་ལྷ་ཉིད་གསལ་སྒོམ་པས། བསོད་ནམས་ཚོགས་ཀྱང་རྫོགས་པར་འགྱུར། །དེ་ཉིད་ཆུ་ཟླའི་ཚུལ་ཤེས་པས། །ཡེ་ཤེས་ཚོགས་ཀྱང་མྱུར་དུ་རྫོགས། །ཞེས་དང་། འཇམ་དཔལ་རྩ་རྒྱུད་ལས། །ཀྱེ་རྒྱལ་བའི་སྲས་དག །དེ་ལྟར་ན་འདིར་བདག་ཅེས་པ་རྟག་ཅིང་གདགས་པར་བྱ་བ་འདི་ཙམ་ཞིག་ཐབས་དང་ཤེས་རབ་ཀྱི་དོན་དུ་བརྟག་པར་འདོད་ལ། །དེ་རྣམ་པ་གང་ཡང་རུང་བ་ཞིག་གིས་ལྷའི་རྣམ་པར་བྱས་པ་ནི་ཐབས་མཁས་པ་ཕུལ་དུ་བྱུང་བའོ། །གང་གི་ཕྱིས་ལྷའི་རྣམ་པ་བདག་དང་བཅས་པ་དེ་དག་ངོ་བོ་ཉིད་མེད་ཅིང་མ་སྐྱེས་ལ། །སྨོན་པ་མེད་པ་ལྷག་པར་ཁོངས་སུ་ཆུད་པ་འདི་ནི་ཤེས་རབ་ཀྱི་ཕ་རོལ་དུ་ཕྱིན་པ་སྟེ། ཀྱེ་རྒྱལ་བའི་སྲས། དེ་ལྟར་ན་འདི་ནི་ཐབས་དང་ཤེས་རབ་ཀྱི་ལམ་ཟུང་དུ་འབྲེལ་བ་སྲིད་པ་དང་ཞི་བའི་དབྱིངས་གཉིས་ཀར་དུ་མི་ལྷུང་བར་འགྲོ་བས་ན་ཐེག་པ་མཆོག་གི་ལམ་ཡིན་ཏེ། །ཐོགས་མེད་པའི་དུས་ཅན་གྱི་རྒྱུད་དང་། ལུས་དང་མིང་དང་འགྲོ་བ་དང་། སྐྱེ་གནས་ཐ་མལ་པ་ལ་མངོན་པར་ཞེན་པ་འགོག་པའི་འབྲས་བུ་ཅན་གྱི་གསང་སྔགས་ཀྱི་ལམ་དུས་གསུམ་དུ་འབྱུང་བའི་རྒྱལ་བ་རྣམས་དགྱེས་པའོ། །ཞེས་སོ། །གཉིས་པ་ཁྲོ་བོའ་ིདཀྱིལ་འཁོར་ནི། དེ་ཡི་བ་སྤུའི་བུ་ག་ལཿཁྲག་འཐུང་རྒྱུད་སྡེའི་དཀྱིལ་འཁོར་ནིཿ མ་ལུས་ལུས་པ་མེད་པ་རྫོགསཿ ཀུན་ཀྱང་སྐུ་མདོག་ཕྱག་མཚན་སོགསཿ རྣམ་འགྱུར་མ་ངེས་སྒྱུ་འཕྲུལ་ནིཿ རང་བྱུང་རང་ཤར་ཆེན་པོའཿོ ཞེས་པ་ལ་གཉིས། གཞུང་གི་དགོངས་པ་མདོར་བསྟན་པ་དང་། ལྷའི་རྣམ་གྲངས་དང་སྐུ་མདོག་ཕྱག་མཚན་རྒྱས་པས་བཤད་པའོ། །དང་པོ་ནི་རང་ཉིད་མཁའ་འགྲོར་གསལ་བ་དེ་ཡི་བ་སྤུའི་ཁུང་བུའི་བུ་ག་ཐམས་ཅད་ལ། ཁྲག་འཐུང་ལྔ་བཅུ་རྩ་བརྒྱད་ལ་སོགས་པ་རྒྱུད་སྡེའི་གནས་ལས་གསུངས་པའི་དཀྱིལ་འཁོར་གྱི་ལྷ་ཚོགས་ནི་ཀུན་བཟང་ཆེ་མཆོག་ཧེ་རུ་ཀ་ལ་སོགས་པ་ཆོས་སྐུའི་ལྷ་ཚོགས་ཐམས་ཅད་མ་ལུས། ཁྲག་འཐུང་ཡབ་ཡུམ་ཀེའུ་སེང་སྒོམ་ལ་སོགས་པ་ལོངས་སྐུའི་ལྷ་ཚོགས་ཐམས་ཅད་མི་ལུས། དབང་ཕྱུག་ཉི་ཤུ་རྩ་བརྒྱད་ལ་སོགས་པ་སྤྲུལ་པའི་ཁྲག་འཐུང་ཁྲོ་བོ་ཁྲོ་མོ་ཐམས་ཅད་ལུས་པ་མེད་པར་རྫོགས་ཤིང་། དེ་དག་ཀུན་ཀྱང་དཀར་ནག་སེར་ནག་དམར་ནག་ལྗང་ནག་མཐིང་ག་ལ་སོགས་པ་སྐུ་མདོག་དང་། རྡོ་རྗེ་དང་འཁོར་ལོ་དང་རིན་པོ་ཆེ་དང་པདྨ་དང་རལ་གྲི་དགྲ་ཝ་སྟ་ཁ་ཊཱཾ་ཐོ་བ་ཞིང་དབྱུག་ཐོད་ཁྲག་དྲིལ་བུ་ལ་སོགས་པའི་ཕྱག་མཚན་སོགས་དང་། རྣམ་པར་འགྱུར་བའི་དབུ་དང་ཕྱག་ཞབས་ཀྱི་རྣམ་པ་ཀུན་ཀྱང་གཅིག་ཏུ་མ་ངེས་པ་སྒྱུ་མའི་འཕྲུལ་པ་བཞིན་དུ་རང་གི་རིག་པའི་ཆོ་འཕྲུལ་ལས་བྱུང་ཞིང་རང་མདངས་ལས་ཤར་བའི་ཁྲག་འཐུང་ཆེན་པོའ།ོ ། གཉིས་པ་ལྷའི་རྣམ་གྲངས་དང་སྐུ་མདོག་ཕྱག་མཚན་སོགས་བསྟན་པ་ལ་གཉིས། གཙོ་བོའ་ིབཞུགས་ཚུལ་དང་། འཁོར་གྱི་བཀོད་པའོ། དང་པོ་ནི། ཀླད་པ་དུང་ཁང་གི་གཞལ་ཡས་ཁང་གི་ནང་དུ་རྩིབས་བཞིར་དབུས་སུ་འགྲོ་བ་ཟིལ་གྱིས་གནོན་པ་ཁྱུ་མཆོག་གི་སྟེང་དབྱུག་མ་དང་ལྷ་ཆེན་ཕོ་མོ་ཟུང་དུ་བསྣོལ་བའི་སྟེང་། །གཏི་མུག་གནས་སུ་དག་པས་ཆོས་དབྱིངས་ཡེ་ཤེས་ཀྱི་ངོ་བོ་བུདྡྷ་ཧེ་རུ་ཀ་སྨུག་ནག་དུག་གསུམ་གནས་སུ་དག་ཅིང་སྐུ་གསུམ་མངའ་བའི་དབུ་གསུམ་གཡས་དཀར་གཡོན་དམར་དབུས་རང་མདོག ཡེ་ཤེས་དྲུག་ལ་དབང་བསྒྱུར་ཞིང་ཕ་རོལ་དུ་ཕྱིན་པ་དྲུག་གིས་འགྲོ་དྲུག་སྒྲོལ་བའི་ཕྱག་དྲུག་གིས་གཡས་དང་པོ་འཁོར་ལོ། བར་པ་རྡོ་རྗེ་རྩེ་ལྔ། ཐ་མ་ཞིང་དབྱུག །གཡོན་དང་པོ་དགྲ་ལྷ། བར་པ་ཐོད་ཁྲག །ཐ་མ་ཁ་ཊྭཾ་བསྣམས་པ་བདུད་བཞི་འདུལ་བའི་ཞབས་བཞི་པའོ། །གཟུགས་ཕུང་རང་བཞིན་མེད་པར་ཤེས་པ་བུདྡྷ་ཀྲོ་ཏི་ཤྭ་རི་མ་སྨུག་ནག་ཞལ་གཅིག་ཕྱག་གཉིས་པ་གཅེར་བུ་སྐྲ་གྲོལ་ཞིང་ལང་ཚོས་སྒེག་པ། གཡས་དྲིལ་བུ་འཛིན་པས་ཡབ་ལ་འཁྱུད་ཅིང་གཡོན་དུང་ཁྲག་སྟོབས་པ། གཟིགས་པ་ཤམ་སོགས་ཁྲ་མོའ་ིཆས་ཅན་ཁྲོ་མོ་ཕྱི་མ་རྣམས་ཀྱང་སྐུ་མདོག་ལས་གཞན་ཆ་ལུགས་མཐུན་ནོ། །དེའི་ཐུགས་ཀར་རང་རིག་པའི་རྒྱལ་པོ་ཆེ་མཆོག་ཧེ་རུ་ཀ་ཁྲོ་བོའ་ིརྗེ་བཙན་སྐུ་མདོག་སྨུག་ནག་ཞལ་གསུམ་གཡས་དཀར་གཡོན་མཐིང་ཕྱག་དྲུག་གཡས་གསུམ་རྡོ་རྗེ་རྩེ་དགུ་རྩེ་ལྔ་རྩེ་གསུམ། གཡོན་གསུམ་བྷན་དམར་འཛིན་པ་ཞབས་བཞི་པ། ཡུམ་གནས་ཞལ་མ་སྨུག་ནག་འཁྲིལ་བའོ། །ཤར་གྱི་རྩིབས་ལ་བརྗིད་པ་མ་ཧེ་ཕྱི་སྟེང་དྲེགས་པ་ཕོ་མོའ་ིགདན་ལ། ཞེ་སྡང་གནས་སུ་དག་པ་མེ་ལོང་ཡེ་ཤེས་ཀྱི་ངོ་བོ་བཛྲ་ཧེ་རུ་ཀ་མཐིང་ནག་ཞལ་གསུམ་གཡས་དཀར་གཡོན་སེར་དབུས་རང་མདོག་ཕྱག་དྲུག་གི་གཡས་གསུམ་རྡོ་རྗེ་རྩེ་དགུ་རྩེ་ལྔ་ཞིང་འབྱུག །གཡོན་གསུམ་དྲིལ་བུ་དུང་ཁྲག་སྟོང་གི་འཇིག་རྟེན་འདེགས་པའོ། །ཞབས་བཞི་པ། རྣམ་ཤེས་རང་བཞིན་མེད་པར་ཤེས་པ་ཡུམ་བཛྲ་ཀྲོ་ཏི་ཤྭ་རིམ་མཐིང་ནག་གོ། །ལྷོའ་ིརྩིབས་ལ་གདུག་པ་གཟིག་གི་སྟེང་གཤིན་རྗེ་བསྣོལ་བའི་གདན་ལ། །ང་རྒྱལ་གནས་སུ་དག་པ་མཉམ་ཉིད་ཡེ་ཤེས་ཀྱི་ངོ་བོར་རཏྣ་ཧེ་རུ་ཀ་སེར་ནག་ཞལ་གསུམ་གཡས་སྔོ་གཡོན་དམར་དབུས་རང་མདོག །ཕྱག་དྲུག་གི་གཡས་གསུམ་ནོར་བུ་རྡོ་རྗེ་ཞིང་དབྱུག །གཡོན་གསུམ་རྒྱུ་ཞགས་དུང་ཁྲག །དགྲ་ལྷ། ཞབས་བཞི་པ། ཚོར་བ་རང་བཞིན་མེད་པར་ཤེས་པ་ཡ་མ་རཏྣ་ཀྲོ་ཏི་ཤྭ་རིམ་སེར་ནག །ནུབ་ཀྱི་རྩིབས་ལ་དཔའ་གཏུམ་སྟག་གི་སྟེང་ཀླུ་དབང་གི་གདན་ལ་འདོད་ཆགས་གནས་སུ་དག་པ་སོར་རྟོག་ཡེ་ཤེས་ཀྱི་ངོ་བོ་པདྨ་ཧེ་རུ་ཀ་དམར་ནག་ཞལ་གསུམ་གཡས་དཀར་གཡོན་སེར་དབུས་རང་མདོག །ཕྱག་དྲུག་གི་གཡས་གསུམ་པདྨ་རྡོ་རྗེ་ཞིང་དབྱུག །གཡོན་གསུམ་དྲིལ་བུ་དུང་ཁྲག་རྔ་ཆུང་། །ཞབས་བཞི་པ། འདུ་ཤེས་རང་བཞིན་མེད་པར་ཤེས་པ་ཡུམ་པདྨ་ཀྲི་ཏི་ཤྭ་རིམ་དམར་ནག་གོ ། བྱང་གི་རྩིབས་ལ་གཏུམ་པ་དོམ་གྱི་སྟེང་གནོད་སྦྱིན་གྱི་གདན་ལ་ཕྲག་དོག་གནས་སུ་དག་པ་བྱ་གྲུབ་ཡེ་ཤེས་ཀྱི་ངོ་བོ་ཀརྨ་ཧེ་རུ་ཀ་ལྗང་ནག་ཞལ་གསུམ་གཡས་དཀར་གཡོན་དམར་དབུས་རང་མདོག་ཕྱག་དྲུག་གི་གཡས་གསུམ་རལ་གྲི། རྡོ་རྗེ། ཞིང་དབྱུག །གཡོན་གསུམ་ཐོང་བཤོལ། དུད་ཁྲག་སྟོང་གི་འཇིག་རྟེན་འདེགས་པ། ཞབས་བཞི་པ། འདུ་བྱེད་རང་བཞིན་མེད་པར་ཤེས་པའི་ཡུམ་ཀརྨ་ཀྲོ་ཏི་ཤྭ་རིམ་ལྗང་ནག་གོ། ཁྲོ་བོ་རྣམས་ཞལ་རེ་རེ་ལ་སྤྱན་གསུམ་གསུམ་ཞལ་གདངས་ཤིང་མཆེ་བ་གཙིགས་པ། ལྗགས་ཀློག་ལྟར་འཁྱུག་པ། ཁྲོ་གཉེར་གཡོ་བ། སྒེག་པ་དཔའ་བ། མི་སྡུག་པ། རྒོད་དང་། གཤེ་དང་། འཇིགས་སུ་རུང་བ་དང་། སྙིང་རྗེ་རྔམས་དང་ཞི་བ་སྟེ་གར་གྱི་ཉམས་དགུ་དང་། ཐེག་ཆེན་གྱི་དོན་ལ་མངའ་བརྙེས་པས་གླང་ཆེན་པགས་པ་དང་། །དྲེགས་པ་དབང་དུ་སྡུད་པའི་ཞིང་གི་གཡང་གཞིའི་སྟོད་གཡོགས། །གཟུང་འཛིན་གྱི་མཐའ་ལས་གྲོལ་བའི་སྟག་ལྤགས་ཀྱི་ཤམ་ཐབས་ཏེ་ཀོ་རློན་གྱི་གོས་གསུམ། རྒྱལ་རིགས་དཀར་པོའ་ིདབུ་རྒྱན། རྗེ་རིགས་སེར་པོའ་ིརྣ་ཆ་དང་མགུར་ཆུ། །བྲམ་ཟེ་རིགས་དམར་པོའ་ིདོ་ཤལ་དང་དཔུང་རྒྱན། །གདོལ་པའི་རིགས་ནག་པོའ་ིཕྱག་ཞབས་ཀྱི་གདུ་བུ། དམངས་རིགས་ལྗང་ཁུའི་སྐ་རགས་ཏེ་སྦྲུལ་ཆུན་ལྔ། །མི་མགོ་སྐམ་པོའ་ིདབུ་རྒྱན། །རྙིད་པའི་སེ་རལ་ཁ། རློན་པ་ལྔ་བཅུ་རྩ་གཅིག་གི་དོ་ཤལ་ཏེ་ཐོད་ཕྲེང་གསུམ། །ཉི་ཟླ་ཕྲག་པ་ནས་འོད་འགྱེད་པ། །དཔྲལ་བར་ཐལ་ཆེན་གྱི་ཚོམ་བུ། །མཁུར་ཚོས་སུ་རཀྟའི་ཐིག་ལེ། །ལྐོག་མར་ཞག་གི་ཟོར་རིས་ཏེ་དཔལ་གྱི་ཆས་བརྒྱད་དང་། ཡང་ན་ཐལ་ཆེན་རཀྟ་ཞག་གི་ཟོར་རིས་དང་། །ཀོ་རློན་གཡང་གཞི་སྟག་གི་ཤམ་ཐབས་དང་། །ཐོད་འཕྲེང་སྦྲུལ་ཆུན་མེ་དཔུང་ཆེས་ཀྱིས་བརྒྱན། །ཞེས་སོ། །གཉིས་པ་འཁོར་གྱི་བཀོད་པ་ལ་གཉིས་ལས། །དང་པོ་ཁྲོ་མོ་ཉི་ཤུའི་བཀོད་པ་ནི། །གནས་ཀྱི་མ་མོ་བརྒྱད་ནི། །དེའང་རྣམ་ཤེས་ཚོགས་བརྒྱད་འཁོར་བར་བསྐྱེད་པའི་གནས་ཡིན་ལ། །དེ་རྣམས་གནས་སུ་དག་པའི་ཕྱིར་གནས་ཀྱི་ཕྱག་རྒྱ་ཞེས་བྱའོ། །དེ་ལ་ཀུན་གཞི་གནས་སུ་དག་པ་ཀེའུ་རི་དཀར་མོ་ཞིང་དབྱུག་དང་བྷན་དམར། ཡིད་ཀྱི་རྣམ་ཤེས་གནས་སུ་དག་པ་ཙོ་རི་སེར་མོ་མདའ་གཞུ་འགེངས་པ། ཉོན་ཡིད་གནས་སུ་དག་པ་པྲ་མོ་ཧ་དམར་མོ་ཆུ་སྲིན་གྱི་རྒྱལ་མཚན་སྒྲེང་པ་ལུས་ཀྱི་རྣམ་ཤེས་གནས་སུ་དག་པ་བཻཏྟ་ལི་ནག་མོ་རྡོ་རྗེ་འཕྱར་ཞིང་བྷན་དམར་འཐུང་བ། མིག་གི་རྣམ་ཤེས་གནས་སུ་དག་པ་པུཀྐ་སི་དམར་སེར་བྱིས་པའི་རྒྱུ་མ་འདྲེན་པ། སྣའི་རྣམ་ཤེས་གནས་སུ་དག་པ་གྷ་སྨ་རི་ལྗང་ནག་དུང་དམར་དཀྲུག་ཅིང་གསོལ་བ། ལྕེའི་རྣམ་ཤེས་གནས་སུ་དག་པ་སྨེ་ཤ་ནི་མཐིང་ནག་བྱིས་པའི་སྙིང་ཟ་བ། རྣ་བའི་རྣམ་ཤེས་གནས་སུ་དག་པ་ཙཎྡ་ལི་སེར་སྐྱ་བམ་གྱི་མགོ་ལུས་འབྲལ་བའོ། །ཡུལ་གྱི་ཕྲེན་བརྒྱད་ལ། དེའང་སྒོ་ལྔའི་རྣམ་ཤེས་ཀྱི་ཡུལ་གཟུགས་སྒྲ་དྲི་རོ་རེག་བྱ་ཡིད་ཀྱི་ཡུལ་ཆོས་ཉོན་མོངས་པ་ཅན་གྱི་ཡུལ་རློམ་སེམས་ཀུན་གཞིའི་ཡུལ་ཕྱི་ནང་གི་ཆོས་ཐམས་ཅད་གནས་སུ་དག་པས་ཡུལ་གྱི་ཕྱག་རྒྱའོ། །དེ་ལ་ཀུན་གཞིའི་ཡུལ་ཕྱི་ནང་གི་ཆོས་གནས་སུ་དག་པ་སིངྷ་སེར་མོ་སེང་གདོང་ལག་པས་རོ་བསྣོལ་ནས་ཁའི་ཐད་དུ་འཛིན་པ། ཡིད་ཀྱི་ཡུལ་ཆོས་གནས་སུ་དག་སུ་བྱ་གྲི་དམར་མོ་སྟག་གདོང་རོ་ལ་མིག་གཉིས་འབྲུ་ཚུགས་སུ་བལྟ་བ། །ཉོན་ཡིད་ཀྱི་ཡུལ་རློམ་སེམས་དག་པ་སྲི་ལ་ནག་མོ་ཝ་གདོང་ཞིང་ཆུང་ལྕེས་འདག་པ། །རེག་བྱ་དག་པ་ཤྭ་ན་མཐིང་ནག་སྤྱང་གདོང་རོའ་ིལྟོ་བ་འབྲལ་བ། གཟུགས་དག་པ་ཀྲྀ་ཏ་གདོང་དམར་མོ་རྒོང་གདོང་རྒྱུ་མ་འདྲེན་པ། སྒྲ་དག་པ་ཀ་མ་ཀ་སེར་མོ་ཀམ་མགོ་ཞིང་ཆེན་ཕྲག་ཏུ་བཀལ་བ། དྲི་དག་པ་ཁ་ཁ་ནག་མོ་བྱ་རོག་མགོ་ཅན་བྷན་གྲི་གདེང་བ། རོ་དག་པ་ཧུ་ལུ་མཐིང་སྐྱ་འུག་གདོང་ལྕགས་ཀྱུ་འདེབས་པའོ། །སྒོམ་བཞིའི་ཕྱག་རྒྱ་ནི། ཕྱིན་ཅི་ལོག་གི་བདུད་བཞི་འཇོམས་ཤིང་ཡེ་ཤེས་བཞིས་རྒྱས་འདེབས་པ་སྟེ། དེའང་གཟུགས་ལ་རྟག་པར་ལྟ་བ་གནས་སུ་དག་པས་འཆི་བདག་གི་བདུད་བཅོམ་ཞིང་ཆོས་ཐམས་ཅད་མེ་ལོང་གི་གཟུགས་བརྙན་ལྟར་མཐོང་བས་མེ་ལོང་ཡེ་ཤེས་ཀྱི་ངོ་བོ་སྟག་གདོང་དཀར་མོ་ལྕགས་ཀྱུ་འཛིན་པ། སྒྲ་ལ་སོགས་པའི་ཆོས་ཐམས་ཅད་ཆད་པར་བལྟ་བ་གནས་སུ་དག་པས་ཕུང་པོའ་ིབདུད་བཅོམ་ཏེ་སྣང་བ་ཐམས་ཅད་སྒྱུ་མ་ལྟ་བུར་སྲིད་ཞི་མཉམ་པར་མཐོང་བས་མཉམ་ཉིད་ཡེ་ཤེས་ཀྱི་ངོ་བོ་ཕག་གདོང་ནག་མོ་ཞགས་པ་འཛིན་པ། །ཡིད་ཀྱི་ཆོས་རྣམས་ཐམས་ཅད་བདག་ཏུ་བལྟ་བ་དག་པས་ཉོན་མོངས་པའི་བདུད་བཅོམ་ཏེ་ཆོས་ཐམས་ཅད་དགག་བསྒྲུབ་སོགས་བདག་ཏུ་བཟུང་དུ་མེད་པར་རྨི་ལམ་ལྟར་སོ་སོ་རང་གི་རིག་པར་མཐོང་བས་སོར་རྟོག་ཡེ་ཤེས་ཀྱི་ངོ་བོ་དྲེད་གདོང་དམར་མོ་ལྕགས་སྒྲོག་འཛིན་པ། །འཁོར་འདས་ཀྱི་ཆོས་ཐམས་ཅད་ལ་མཚན་མར་ལྟ་བ་དག་པས་ལྷའི་བུའི་བདུད་བཅོམ་ཏེ་དངོས་པོ་མཚན་མར་ལྟ་བ་ཐམས་ཅད་སྤྲུལ་པའི་རོལ་གར་དུ་མཐོང་ནས་འགྲོ་བའི་དོན་བྱེད་པས་བྱ་གྲུབ་ཡེ་ཤེས་ཀྱི་ངོ་བོ་སྤྱང་གདོང་མ་ལྗང་གུ་དྲིལ་བུ་འཛིན་པའོ། །གཉིས་པ་དབང་ཕྱུག་ཉི་ཤུ་རྩ་བརྒྱད་ཀྱི་བཀོད་པ་ནི། སྲིན་མོ་སྨུག་ནག་ཐོད་རློན་བསྣམས་པ། ཚངས་པ་དམར་སེར་པདྨ་བསྣམས་པ། ལྷ་ཆེན་དཀར་ལྗང་ཏྲི་ཤུལ་འཛིན་པ། རྟོགས་འདོད་མ་སྔོན་མོ་འཁོར་ལོ་འཆང་བ། གཞོན་ནུ་མ་དམར་མོ་མདུང་ཐུང་འཕེན་པ། བརྒྱ་སྦྱིན་དཀར་མོ་ཨུཎྡྲ་གདེངས་པ་སྟེ་ཤར་གྱི་རྣལ་འབྱོར་མ་དྲུག་གོ ། རྡོ་རྗེ་མ་སེར་མོ་དུང་ཁྲག་འཐུང་བ། བདུད་རྩི་དམར་མོ་པདྨ་བསྣམས་པ། ཟླ་བ་དཀར་མོ་པུཎྚ་རི་ཀ་འཛིན་པ། བེ་ཅོན་མ་ལྗང་ནག་དབྱུག་ཐོ་འཕྱར་བ། །སྲིན་མོ་དམར་མོ་དུང་ཁྲག་འཐུང་བ། ཟ་བ་ལྗང་ནག་སྒྱུ་མ་འདྲེན་པ་སྟེ་ལྷོའ་ིརྣལ་འབྱོར་དྲུག་གོ ། དགའ་བ་དམར་མོ་ཀ་ཏར་འཕྱར་བ། སྟོབས་ཆེན་དཀར་མོ་གཤོལ་མདའ་འཛིན་པ། །རྡོ་རྗེ་སེར་མོ་སྤུ་གྲིས་གཅོད་པ། འདོད་པ་དམར་མོ་མདའ་གཞུ་འགེངས་པ། ནོར་སྲུང་མ་དཀར་མོ་བུམ་པ་འཛིན་པ། རླུང་ལྷ་སྔོན་མོ་བ་དན་འཕྱར་བ་སྟེ་ནུབ་ཀྱི་མ་མོ་དྲུག་གོ ། གསོད་བྱེད་དཀར་མོ་རལ་གྲི་འཛིན་པ། མེ་མོ་དམར་མོ་གསལ་ཤིང་འཕྱར་བ། ཕག་མོ་ནག་མོ་མཆེ་ཞགས་འཛིན་པ། རྒན་བྱེད་མ་དམར་མོ་ཞིང་ཆུང་ཟ་བ། སྣ་ཆེན་མ་དཀར་ལྗང་ཐོད་ཁྲག་འཐུང་བ། ཆུ་ལྷ་སྔོན་མོ་སྤྲུལ་ཞགས་འཛིན་པ་སྟེ་བྱང་གི་རྣལ་འབྱོར་མ་དྲུག་གོ ། རྡོ་རྗེ་ནག་མོ་ལྕགས་ཀྱུ་འཛིན་པ། རྡོ་རྗེ་སེར་ནག་ཞགས་པ་འཛིན་པ། རྡོ་རྗེ་དམར་ནག་ལྕགས་སྒྲོག་འཛིན་པ། རྡོ་རྗེ་ལྗང་དམར་མོ་དྲིལ་འཁྲོལ་དགྱེས་པ་སྟེ་སྒོ་མ་བཞིའོ། །དབང་ཕྱུག་ཉེར་བརྒྱད་འདི་དག་ཀྱང་ཐུན་མོང་དུ་འཇིག་རྟེན་པ། ཐུན་མོང་མ་ཡིན་པར་འཇིག་རྟེན་ལས་འདས་པ། ཤིན་ཏུ་ཐུན་མོང་མ་ཡིན་པར་རྩ་གནས་ཀྱི་ལྷ། སངས་རྒྱས་པའི་ཚེ་མངོན་དུ་སྣང་བ་ཡིན་ལ། ཚུལ་ཡང་རྒྱུན་སྲིན་མོ་ཁྲོས་པའི་གཟུགས་དང་། ཚངས་པ་གདོང་བཞི་པའི་ཆུང་མ་ཞི་བའི་ཉམས་ཅན། གཞན་རྣམས་ཀྱང་ཕལ་ཆེར་ཞི་མ་ཁྲོའ་ིཉམས་ཅན་དང་། ཤིན་ཏུ་ཁྲོས་པའི་ཚེ་ཚངས་མ་སྒྲུལ་གདོང་སོགས་ཕྲ་མེན་གྱི་གཟུགས་ཅན་དུ་བཤད་པ། མཐའ་གཅིག་ཏུ་བཟུང་བ་ནི་རྒྱུད་དང་དེའི་འགྲེལ་པ་རྒྱ་མཚོའི་མཐའ་གཞལ་བར་མ་ནུས་ཤིང་བླ་མའི་མན་ངག་གིས་འཕོངས་པའི་གཏི་མུག་པའི་བློ་ཅན་ཞེས་བྱའོ། །དེ་ལྟར་ཁྲོ་མོ་ཉི་ཤུ་དང་དབང་ཕྱུག་ཉེར་བརྒྱད་རྣམས་ཀྱང་གཏུམ་ཞིང་ཁྲོས་པའི་དྲག་མོའ་ིཉམས་ཅན་དུར་ཁྲོད་རོལ་པའི་ཆས་ཀྱིས་བརྒྱན་པ། ཁྲོ་མོ་ཉི་ཤུར་ཞིང་དང་ཉི་གདན། དབང་ཕྱུག་ལ་ཞིང་གདན་རྐྱང་པའོ། །དེ་ལྟར་ཁྲོ་མོ་ཉི་ཤུའི་དག་པ་ནི་སྙིང་འགྲེལ་ཕྱོགས་བཅུ་མུན་སེལ་དང་། སློབ་དཔོན་ཧཱུ་ཀ་རའི་གདམ་ངག་གནུབས་ནམ་མཁའི་སྙིང་པོ་ལས་བརྒྱུད་པ་རུ་ལུ་གསེར་ཕྲེང་གི་འགྲེལ་པ་བཞིན་བཀོད་ལ། ཞལ་བརྙན་གྱི་དག་པ་དབང་ཕྱུག་རྣམས་ཁྱོ་མིང་ཆུང་མར་བཏགས་པའི་རྒྱུ་མཚན་བཀོད་ན་ཧ་ཅང་མཐའ་ཀླས་པར་འགྱུར་བས་རེ་ཞིག་དེ་ཙམ་མོ། །དེ་དག་ཀྱང་འཁོར་གྱི་ལྷ་ཞེ་བརྒྱད་གི་མཁའ་འགྲོའ་ིསྐུ་ལུས་ཀྱི་བ་སྤུའི་བུ་ག་ཀུན་ཏུ་བསྒོམ་པར་བྱའོ། །གནས་ཡུལ་གྱི་དཔའ་བོ་མཁའ་འགྲོ་ལུས་དཀྱིལ་དུ་བསྒོམ་ཚུལ་འོག་ཏུ་ཚོགས་མཆོད་སྐབས་འཆད་དོ། །གཉིས་པ་འཁོར་ཀྱི་མཁའ་འགྲོ་བསྐྱེད་པ་ནི། འབུམ་ཕྲག་ཡངས་པའི་མཁའ་འགྲོས་བསྐོརཿ ཞེས་པས། རིགས་བསྡུས་ན། སྔ་འགྱུར་རྒྱུད་འབུམ་ནས། དྲི་ཟ་ཆེན་མོ་འབུམ་ཕྲག་དང་། གྲུལ་འབུམ་ཆེན་མོ་འབུལ་ཕྲག་དང་། །ཚངས་མ་ཆེན་པོ་འབུམ་ཕྲག་སོགས་ཡོད་དེ་མཐའ་དག་སྨྲ་བར་མ་ལྡང་ཞེས་ལུས་དཀྱིལ་མངོན་བརྗོད་ནས་བཤད་ལ། །གཞན་ཡང་ཤར་ཕྱོགས་སུ་རྡོ་རྗེ་བདེ་ཆེན་དཀར་མོ་སོགས་ཞི་བའི་ཕྲིན་ལས་བསྒྲུབ་པའི་མཁའ་འགྲོ་དཀར་མོ་འབུམ་ཕྲག་དང་། ལྷོ་ཕྱོགས་སུ་རིན་ཆེན་སེར་མོ་དོན་གྲུབ་ལ་སོགས་རྒྱས་པའི་ཕྲིན་ལས་བསྒྲུབ་པའི་མཁའ་འགྲོ་སེར་མོ་འབུམ་ཕྲག་དང་། ནུབ་ཕྱོགས་སུ་པདྨ་དམར་མོ་སྒྲ་སྒྲོགས་ལ་སོགས་དབང་གི་ཕྲིན་ལས་བསྒྲུབ་པའི་མཁའ་འགྲོ་དམར་མོ་འབུམ་ཕྲག་དང་། བྱང་ཕྱོགས་སུ་ཀརྨ་སྣ་ཚོགས་མཐར་ཕྱིན་སོགས་དྲག་པོའ་ིཕྲིན་ལས་བསྒྲུབ་པའི་མཁའ་འགྲོ་ལྗང་མོ་འབུམ་ཕྲག་དང་། བར་སྣང་གི་ཆ་ལ་བུབྡྷ་ཁྲོས་མ་ནག་མོ་དང་། མཚམས་མ་ངེས་པར་དམ་ཚིག་གི་མཁའ་འགྲོ། ཤ་ཟའི་མཁའ་འགྲོ། འཇིག་རྟེན་གྱི་མཁའ་འགྲོ་སོགས་འབུམ་ཕྲག་འབུམ་སོགས་ཡང་བའི་གྲངས་ཀྱིས་བསྡུས་པས་བརྗོད་དུ་མེད་པའི་དཔའ་བོ་མཁའ་འགྲོའ་ིཚོགས་བསམ་གྱིས་མི་ཁྱབ་པས་བསྐོར་བའོ། །གསུམ་པ་རིགས་བདག་ནི། རིགས་བདག་པདྨ་ཐོད་ཕྲེང་རྩལཿ ཨཱཙརྱ་གཞོན་དཀར་གསལ་འཛུམཿ ཧེ་རུ་ཀ་པ་ཅང་དྲིལ་འཁྲོལཿ དམ་ཚིག་ཡེ་ཤེས་གཉིས་སུ་མེདཿ སྒོམ་པ་ཙམ་གྱིས་དངོས་གྲུབ་ཐོབ༔ ཅེས་པས། རང་གི་རིགས་པདྨའི་དབང་གི་མཚོན་པའི་བརྡར་པདྨའི་རིགས་སངས་རྒྱས་ཐམས་ཅད་ཀྱི་གསུང་གི་བདག་ཉིད་སྣང་བ་མཐའ་ཡས་གང་འདུལ་གྱི་སྐུར་བཞེངས་པ་ཨྱོན་གྱི་སློབ་དཔོན་པདྨ་འབྱུང་གནས་སྐུ་ལ་ཉོན་མོངས་པ་མ་སྤངས་གནས་སུ་དག་པའི་བརྡར་ཐོད་པའི་ཕྲེང་བས་བརྒྱན་པ། ཐོད་ཕྲེང་རྩལ་ཞེས་བྱ་བ་དེ་ཉིད་ཨཱཙརྱ་ཏེ་སློབ་དཔོན་གྱི་སྐད་དོད་ཡིན་པའི་རྒྱ་གར་འཕགས་པའི་ཡུལ་ནས་འོངས་པའི་སྐྱེས་བུ་པཎྜི་ཏ་སྐུ་ལ་གཞོམ་གཞིག་དང་བསྒྲེས་རྒུད་མེད་པའི་སློབ་དཔོན་གཞོན་ནུའི་སྐུ་བྱད་ཅན་སྐུ་མདོག་ཟླ་བའི་འོད་ལྟར་ཤིན་ཏུ་དཀར་ཞིང་གསལ་བར་བྱེད་པ་ཞལ་འཛུམ་ཞིང་སྤྱན་རྩ་ཕྱོགས་བཅུར་འཁྱིལ་བ་ལ་སོགས་པ་མཚན་དཔེའི་ཡོན་ཏན་ཐམས་ཅད་རྫོགས་པ། ཧེ་རུ་ཀའི་ཆས་དབུ་རལ་པའི་ཐོར་ཚུགས་ཅན་རུས་པའི་རྒྱན་དྲུག་དང་སྟག་ཤམ་སོགས་གསོལ་བ་གུ་རུ་ཉི་མ་འོད་ཟེར་ལྟ་བུ། ཕྱག་གཡས་སྐྱེ་མེད་དབྱིངས་ལས་སྐྱེ་བའི་ཆོས་སྒྲ་སྒྲོག་པའི་ཅང་ཏེའུ་དང་། གཡོན་ཤེས་རབ་ཀྱི་སྒྲ་བསྒྲགས་པ་ཉིད་ན་གྲགས་སྟོང་སྐྱེ་བ་མེད་པའི་སེམས་ཉིད་ཀྱི་གནས་ལུགས་མཚོན་པའི་དྲིལ་བུ་འཁྲོལ་བ། ཞབས་སྲིད་ཞིའི་མཐའ་གང་ལ་ཡང་མི་གནས་པའི་མཉམ་པ་ཉིད་ཀྱིས་སྐྱིལ་ཀྲུང་ཅན། དེ་ཉིད་ཀྱི་འཁོར་དུ་རྒྱ་བོད་ཀྱི་པཎ་གྲུབ་རིགས་པ་འཛིན་པའི་ཚོགས། རྒྱུད་སྡེ་བཞིའི་ཡི་དམ་ལྷ་ཚོགས། དམ་ཅན་རྒྱ་ཚོའི་ཚོགས་དང་བཅས་པ་མགྲོན་ཐབས་སུ་བཞུགས་པའོ། །དེ་ལྟར་གསལ་བའི་ལྷ་ཚོགས་ཐམས་ཅད་ཀྱང་། བདག་དམ་ཚིག་པ་ངན་པར་བལྟ་བ་དང་། ལྷ་ཡེ་ཤེས་པ་བཟང་པོར་བལྟ་བ་གཉིས་སུ་མེད་དེ། ཡེ་གདོད་མ་ནས་དག་པའི་ཤེས་པའི་རང་བཞིན་ཡེ་ཤེས་ཏེ་ཐལ་འགྱུར་ལས། ཡེ་ནི་ཐོག་མར་འབྱུང་བ་ལས། ཤེས་པ་ཉོན་མོངས་སྐྱོན་མ་གོས་ཞེས་སོ། །དེ་ལྟར་སྣང་བཅས་ལྷའི་འཁོར་ལོ་བཞེངས་པས་བསྒོམ་པ་ཙམ་གྱིས་འབྲས་བུ་དག་པ་གཉིས་ལྡན་གྱི་ཆོས་སྐུ་དེ་ཉིད་ཡིན་པས་དངོས་གྲུབ་ད་ལྟ་ཐོབ་པའི་ཕྱིར་འབྲས་བུ་ལམ་ཕྱེད་རྡོ་རྗེའི་ཐེག་པ་སྟེ། གསང་སྙིང་ལས། །ས་ལ་སོགས་པར་ཕྱག་རྒྱ་བྱས། །རྣམ་གྲོལ་རིམ་པས་ཐོབ་འགྱུར་ན། །དག་པའི་ཡེ་ཤེས་ཀྱིས་སྦྱང་བྱས་ནས། སྨོས་ཅི་དགོས་ཏེ་དེ་ཉིད་ཡིན། །ཞེས་སོ། །གཉིས་པ་ཕྲིན་ལས་བྱ་བའི་ཡན་ལག་བསྒྲུབ་པ་ལ་ལྔ། ཡེ་ཤེས་པ་སྤྱན་དྲངས་པ། བཞུགས་གསོལ་ཞིང་ཕྱག་བྱ་བ། མཆོད་པ་འབུལ་བ། བསྟོད་པ་བྱ་བ། འཛབ་བཟླ་པའོ། །དང་པོ་ལ་གསུམ། གང་ནས་སྤྱན་འདྲེན་པའི་གནས། གང་སྤྱན་འདྲེན་པའི་ལྷ། སྤྱན་དྲངས་ནས་དོན་ཅི་གསོལ་བའི་དང་པོ་ནི། ཡུལ་གྱི་མིང་ནི་རྒྱ་གར་ཡུལཿ གནས་ཀྱི་མཆོག་གྱུར་ཨོ་རྒྱན་གནསཿ དྷུ་མ་ཐཱ་ལ་མཁའ་འགྲོའ་ིགྲོངཿ གླིང་གི་གླིང་མཆོག་རྔ་ཡབ་གླིངཿ དོན་ལ་འོག་མིན་བདེ་ཆེན་ཞིངཿ རྣམ་པ་མཁའ་སྤྱོད་སྤྲུལ་པའི་གནསཿ དགྱེས་བཞིན་བཞུགས་པའི་ཡུལ་ཀུན་ནས༔ ཞེས་པས་སྤྱིར་ཡུལ་གྱི་མིང་ནི་འཛམ་བུའི་གླིང་འདི་ཆགས་ནས་རིང་ཞིག་ནས་འོད་གསལ་གྱི་གནས་ལ་སོགས་པ་ནས་ཡུལ་དབུས་སུ་བབ་པའི་ལྷ་རྣམས་ལ་ནམ་མཁའ་ནས་སྒྲ་བྱུང་ནས་མི་སྣང་ཞེས་པས་མི་གྲང་པའི་ཡུལ་འཕགས་ཡུལ་ལ་འདོད་རྒྱལ་གྱི་མིང་རྒྱ་གར་གྱི་ཡུལ་ཅེས་བྱ་སྟེ། དེ་ན་ཡུལ་གླིང་མང་དུ་ཡོད་པའི་དབུས་འགྱུར་འཆད་ན་རྡོ་རྗེ་གདན་ཞེས་རྫོགས་པའི་སངས་རྒྱས་སྟོང་གིས་འཚང་རྒྱ་བའི་གནས། བསྐལ་པ་འཇིག་པའི་དུས་ཀྱི་མེ་ཆུ་རླུང་གསུམ་གྱིས་ཀྱང་གཞིག་པར་མི་ནུས་པ་གནས་དམ་པའི་ཆོས་ཀྱི་འབྱུང་གནས་ཏེ། དེ་ཡུལ་གླིང་ནུབ་ཕྱོགས་ན་ཨོཾ་ཌྜྜཱ ― ARJ001_Page_0010 ―
[མ་དཔེ་གཟིགས་ན་འདིར་གནོན།]
ི་ཡ་ན་སྟེ་རིང་འཕུར་ཏེ། མཁའ་འགྲོའམ། འཕུར་འགྲོའ་ིགླིང་ཞེས་པར་ཟུར་ཆགས་པས། ཨོ་རྒྱན་ཡུལ་དེར་རྒྱལ་པོ་ཨིནྡྲ་བྷོདྷི་ཞེས་པ་ལ་བཅོམ་ལྡན་འདས་ཀྱིས་གསང་སྔགས་གསུངས་པས་རྒྱས་པོ་མངའ་འབངས་དང་བཅས་པ་འཇའ་ལུས་ཀྱི་སྐུར་གྱུར་ཏེ་སངས་རྒྱས་པས་ཡུལ་དེ་སྟོངས་པས། ལྷོ་ཕྱོགས་ན་མཚོ་ཞིག་ཡོད་པ་འཕེལ་དེ་ཀླུ་དང་བཅས་པའི་མཚོས་གང་དེ་ནས་ཕྱག་ན་རྡོ་རྗེ་རྒྱུད་ཀྱི་གླེགས་བམ་གསེར་གྱི་བྱང་བུ་ལ་བཻཌུརྱ་ཞུན་མས་བྲིས་ཏེ་ཀླུ་རྣམས་སྨིན་པར་མཛད་དེ་རྒྱུད་གཏད་པས་ཐམས་ཅད་མིར་གྱུར་ཏེ་ཉམས་སུ་བླངས་པས་ཐུན་མོང་དང་མཆོག་གི་དངོས་གྲུབ་ཐོབ། དེ་རྣམས་ཀྱི་བུ་དང་བུ་མོ་དཔའ་བོ་དང་མཁའ་འགྲོར་གྱུར་པས། གནས་དེ་ཉིད་གནས་ཀུན་གྱི་མཆོག་ཏུ་གྱུར་པ་ཨོ་རྒྱན་མཁའ་འགྲོའ་ིགནས་ཞེས་གྲགས། མཚོ་བསྐམས་ཏེ་དཔལ་ཧེ་རུ་ཀའི་ལྷ་ཁང་རང་བྱུང་ཕུན་སུམ་ཚོགས་པ་ཞིག་བྱུང་བས་གསང་སྔགས་ཀྱི་རྒྱུད་མཐའ་དག་གི་གླེགས་བམ་རྣམས་དེར་བཞུགས་པས་ཨོ་རྒྱན་དྷུ་མ་ཐཱ་ལའི་གནམ་མཛོད་ཅེས་སུ་གྲགས་ཏེ་མཁའ་འགྲོའ་ིགྲོང་ཁྱེར་ཆེན་པོ་ཀུན་གྱི་གཙོ་བོ་ཡིན་ལ། གཞན་དུ་ན་ཨོ་རྒྱན་གྱི་ཡུལ་ལ་འཛམ་གླིང་གི་སུམ་གཉིས་ཡོད་པར་བཤད་ཅིང་། །ཤར་ན་འཛམ་བུམ་ལེ། ལྷོ་ན་པ་ཏའི་གླིང་། ནུབ་ན་ནཱ་ག་བྷེ་དྷའི་གླིང་། བྱང་ན་ཀ་ཤ་ཀ་མ་ལིའི་གླིང་ལ་སོགས་པ་ཡོད་པར་བཤད་དོ། །བྱེ་བྲག་ཏུ་ལྷོ་གླིང་གསུམ་ལས་ཀྱང་ཨོ་རྒྱན་ཆེན་པོས་སྲིན་པོ་བཏུལ་བའི་སྐུ་དངོས་ཀྱི་གདུལ་ཞིང་དུ་གྱུར་པ་གླིང་གི་མཆོག་ལྷོ་ནུབ་རྔ་ཡབ་ཀྱི་གླིང་། དབུས་ན་ཟངས་མདོག་དཔལ་གྱི་རིའི་རྩ་བ་ཀླུ་ཆེན་པོ་དག་རྩེ་ཞིང་རོལ་བ། །རྐེད་ལ་དཔའ་བོ་དང་མཁའ་འགྲོ་མང་པོས་ཡོངས་སུ་གང་ཞིང་། རྩེ་མོར་ཚངས་པའི་འཇིག་རྟེན་དུ་སྙེགས་པ་ལྟ་བུ། རྡོ་རྗེ་ཕག་མོའ་ིབྱིན་གྱིས་བརླབས་པ། གསང་སྔགས་བརྡའི་རང་སྒྲ་སྒྲོགས་པ་དེའི་སྟེང་ན་ཕོ་བྲང་གཞལ་མེད་ཆེན་པོ་གྲུ་བཞི་སྒོ་རྒྱན་རྟ་བབས་སོགས་བརྡ་དོན་རྟགས་གསུམ་ཚང་བའི་ཞིང་སྐུ་གསུམ་ལྷུན་གྱི་གྲུབ་པའི་ཞིང་ཁམས་ཆེན་པོ་དེ་ཉིད་དོན་ལ་འོག་མིན་ཆོས་ཀྱི་དབྱིངས་ཀྱི་ཕོ་བྲང་ཏེ། དེ་ཡང་དབྱེ་ན་ཆོས་སྐུའི་འོག་མིན་མཐའ་དབུས་ཕྱོགས་ཆའི་སྤྲོས་པ་ཐམས་ཅད་ལས་འདས་པ་སངས་རྒྱས་ཐམས་ཅད་ཀྱི་མཐར་ཐུག་བསྒྲོད་བྱ་ཀ་དག་གི་ནང་དབྱིངས། ཡང་དག་དོན་གྱི་འོག་མིན་ཏེ་ཀུན་བྱེད་ལས། སྟོན་པ་ཆོས་སྐུའི་གནས་ནི་འདི་ལྟ་སྟེ། །འོག་མིན་ཆོས་ཀྱི་དབྱིངས་ཀྱི་ཕོ་བྲང་སྟེ། །ཡང་དག་དོན་གྱི་འོག་མིན་དེ་རུ་བཤད། །ཅེས་སོ། །ལོངས་སྐུའི་འོག་མིན ། ཆོས་སྐུའི་དབྱིངས་ལས་ཡེ་ཤེས་ཆེན་པོའ་ིརང་སྣང་ལྷུན་གྲུབ་འཕོ་འགྱུར་མེད་པ་སྟེ། །སྒྱུ་འཕྲུལ་རྡོ་རྗེ་ལས། འོག་མིན་ཆེན་པོའ་ིགནས་མཆོག་ན། །རིགས་བདག་ཕྱག་རྒྱ་ལྷུན་གྲུབ་སྐུ། །ཞེས་སོགས་གསུངས་སོ། །སྤྲུལ་སྐུའི་འོག་མིན་ནི། གདུལ་བྱ་སར་གནས་ལ་རང་བཞིན་སྤྲུལ་པའི་སྐུའི་ཞིང་ཁམས་དང་། འདྲེས་མ་ལ་གཙང་མའི་གནས་ཀྱི་འོག་མིན་ནོ། །དེ་དག་ཀྱང་སྡུག་བསྔལ་ཟག་བཅས་ལས་འདས་པ་བདེ་བ་ཆེན་པོའ་ིཞིང་ཁམས། །རྣམ་པ་ལྟར་ན་མཁའ་སྤྱོད་ལ་སོགས་པ་བཤད་མ་ཐག་པ་རང་བཞིན་སྲལ་པའི་སྐུའི་ཞིང་ཁམས་དབུས་ན་སྟུག་པོ་བཀོད་པ། ཤར་ན་མངོན་པར་དགའ་བ། ལྷོ་ན་རིན་པོ་ཆེས་བརྒྱན་པ། ནུབ་ན་བདེ་བ་ཅན། བྱང་ན་ལས་རབ་གྲུབ་པ་ལ་སོགས་པར་ས་བཅུའི་སེམས་དཔའ་ལ་སྟོན་པ་རིགས་ལྔས་གསུང་མཆོག་མི་སྨྲ་ཡང་སྐུའི་འོད་ཟེར་གྱིས་ཆོས་སྟོན་པའི་དེ་དག་དང་ཚུལ་མཚུངས་པ་མཁའ་སྤྱོད་སྤྲུལ་པའི་ཞིང་ཁམས་པདྨ་འོད་ཟེར་བྱ་སྟེ། གནས་དེ་དྲན་པ་ཙམ་གྱི་བདེ་ཆེན་ཐོབཿ ཅེས་སོ། །གཞན་ཡང་དཔའ་བོ་དང་མཁའ་འགྲོ་རྣམས་དགྱེས་ཤིང་བཞུགས་པའི་ཡུལ། ཛ་ལབྷར། ཨོ་རྒྱན་ཡུལ། ཀེ་ཀེ་རི། ཀ་མ་རུ་བཞི་དཔའ་བོ་མཁའ་འགྲོ་རྣམས་རྟག་ཏུ་བཞུགས་པས་གནས་སུ་གྲགས་ཏེ། ས་དང་པོ་རབ་ཏུ་དགའ་བ། མ་ལ་ཝ། སིནྡྷུ། ན་ག་ར། ལྕགས་པའི་བྲང་བཞི་རེས་འགའ་བཞུགས་པའི་ཉེ་བའི་གནས་ཏེ། ས་གཉིས་པ་དྲི་མ་མེད་པ། མུམྨུ་ནི། དེ་ཝི་ཀོ་ཊ་གཉིས་དཔའ་བོ་མཁའ་འགྲོ་རྣམས་རྟག་ཏུ་ཚིགས་ཀྱི་འཁོར་ལོ་ལ་ལོངས་སྤྱོད་ཅིང་དེས་ཡོན་ཏན་བསྐྱེད་པས་ཞིང་ཏེ། ས་གསུམ་པ་འོད་འཕྲོ་བ། ཀུ་མུ་ཏ་དང་ཨཪྤུ་ཏ་གཉིས་ཚོགས་འཁོར་གྱི་རེས་འགའ་ཡོན་ཏན་བསྐྱེད་པས་ཉེ་ཞིང་སྟེ་བཞི་པ་འོད་བྱེད་པ། ཧ་རི་ཀོ་བའི་མཆོད་སྦྱིན་གཉིས་རྟག་ཏུ་རྣམ་རྟོག་འཁྲུད་པས་ཚནྡྷེ་ཧ་སྟེ་ལྔ་པ་སྦྱང་དཀའ་བ། ལཾ་བྷ་ཀ་དང་། ཀཉྩི་གཉིས་རེས་འགའ་འཁྲུད་པས་ཉེ་བའི་ཚོནྡྷེ་སྟེ་དྲུག་པ་མངོན་དུ་གྱུར། བྱེད་པའི་བྲང་དང་གསེར་གླིང་གཉིས་དཔའ་བོ་མཁའ་འགྲོ་རྣམས་རྟག་ཏུ་བཀའ་འགྲོས་བྱེད་པས་འདུ་བ་སྟེ་བདུན་པ་རིང་དུ་སོང་བ། ཀོང་ཀ་ན་དང་། བྷི་རྟ་ར་གཉིས་རེས་འགའ་བྱེད་པས་ཉེ་འདུ་སྟེ། བརྒྱད་པ་མི་གཡོ་བ། རབ་སོན་དགེ་འདུན་དང་རྒྱ་མཚོའི་འགྲམ་གཉིས་རོ་གནས་ཤིང་རྟག་ཏུ་གྷ་ན་ཙཀྐྲས་གཙང་རྨེའི་རྟོག་པ་སྤོང་བས་དུར་ཁྲོད་དེ་དགུ་པ་ལེགས་པའི་བློ་གྲོས། ཙ་རི་ཏྲ་དང་། གཞོན་ནུའི་གྲོང་གཉིས་རེས་འགའ་སྤོང་བས་ཉེ་བའི་དུར་ཁྲོད་དེས་བཅུ་པ་ཆོས་ཀྱི་སྤྲིན་ནོ། དེ་དག་ན་བཞུགས་པའི་དཔའ་བོ་མཁའ་འགྲོ་རྣམས་སངས་རྒྱས་ཀྱི་སྤྲུལ་པ་ཡིན་ཡང་དེ་དང་དེ་ལ་གནས་པའི་ཚུལ་གྱིས་བཞུགས་ཏེ། །སཾ་བྷུ་ཏ་ལས། གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། །ཞིང་ནི་འོད་བྱེད་ཤེས་པར་བྱ། །ཉེ་བའི་ཞིང་ནི་འོད་འཕྲོ་བ། །ཙྪནྡྷོ་ཧ་ནི་སྤྱངས་བཀའ་བས་ཉེ་བས་སྨིན་གསུམ་མངོན་དུ་གྱུར། །འདུ་བ་རིང་དུ་སོང་བ་སྟེ། །ཉེ་བའི་འདུ་བ་མི་གཡོ་བས། །དུར་ཁྲོད་ལེགས་པའི་བློ་གྲོས་ཡིན། །ཉེ་བའི་དུར་ཁྲོད་ཆོས་ཀྱི་སྤྲིན། །ཕ་རོལ་ཕྱིན་བཅུའི་ས་རྣམས་ལ། །རྣལ་འབྱོར་མ་ཡི་ཀླ་ཀློའ་ིསྐད། །སུ་ལས་སོགས་པ་ཅི་གསུངས་པས། །ཕྱི་དང་ནང་དུ་བསམ་པར་བྱ། །ཞེས་སོ། །ཁ་ཆེའི་གྲོང་ཁྱེར་དཔེ་མེད་དང་། གྲོང་གི་མཐའ་གཉིས་རྟག་ཏུ་བདེ་བ་ཆེན་པོའ་ིསྙོམ་འཇུག་ཉམས་སུ་ལེན་པས་འཐུང་གཅོད་དེ་བཅུག་ཅིག་པ་ཀུན་ཏུ་འོད། ཁ་བའི་རི་དང་། ཀོ་ཤ་ལ་གཉིས་རེས་འགའ་ཉམས་སུ་ལེན་པས་ཉེ་བའི་འཐུང་གཅོད་དེ་བཅུ་གཉིས་པ་ཡེ་ཤེས་ལྡན་ཏེ། ཀུ་མུ་ཏི་ལས་འཐུང་གཅོད་དཔེ་མེད་ཇི་བཞིན་དུ། །ཉེ་བའི་འཐུང་གཅོད་ཡེ་ཤེས་ཅན། །ཞེས་སོ། །ལན་ཚ་རྒྱ་མཚོའི་ནང་སྐྱེས་དང་། །སོ་སོར་ཥ་ྜགཉིས་འཐུང་གཅོད་ཀྱི་ཁ་སྐོངས་དང་། ཀ་ལིདྐ། སྐྱེད་ཚལ་གཉིས་ཉེ་བའི་འཐུང་གཅོད་ཀྱི་ཁ་སྐོངས་ཏེ་གནས་སུམ་བཅུ་རྩ་གཉིས་ཏེ་རྟག་པ་གཉིས་པའི་ལུགས་སུ་བཤད་དོ། །དེ་དག་གི་འབྲས་བུ་གསང་ཆེན་རྡོ་རྗེ་འཛིན་པའི་ས་བཅུ་གསུམ་པ་ཡིན་ཏེ། དགོངས་པ་ལུང་བསྟན་ལས། །སངས་རྒྱས་རྣམས་ཀྱིས་གང་བསྟན་པ། །སར་གྱུར་པ་ནི་བཅུ་གསུམ་པ། །ཞེས་སོ། །དེ་དག་ཀྱང་རང་གཞུང་བླ་མཆོད་དང་སུན་བཟློག་ཏུ་རབ་ཏུ་དགའ་དང་དྲི་མ་མེད། གནས་དང་ཉེ་བའི་གནས་ཡིན་ཏེ། །ཞེས་སོགས་གསུངས་པ་དེ་དག་ཀུན་སོ། །གཉིས་པ་གང་སྤྱན་འདྲེན་པའི་ལྷ་ནི། །ཆོས་སྐུ་ཡུམ་ཆེན་མཚོ་རྒྱལ་མཿ འབུམ་ཕྲག་མཁའ་འགྲོའ་ིཚོགས་དང་བཅསཿ བྱིན་གྱིས་བརླབ་ཕྱིར་གཤེགས་སུ་གསོལཿ ཞེས་པས་ཆོས་སྐུ་ཡུམ་ཆེན་མོ་ཤེས་རབ་ཀྱི་ཕ་རོལ་དུ་ཕྱིན་མ་མ་བཅོས་སྒྲོ་བཀུར་དང་བྲལ་བའི་ཤེས་པ་ཉིད་ཡེ་ཤེས་ཀྱི་སྐུ་ཞལ་ཕྱག་གི་རྣམ་པར་སྣང་བ་ནི་མཚོ་རྒྱལ་མ་བདག་ཉིད་ལ་ཡུལ་ཉེར་བཞི། གནས་སོ་གཉིས། དུར་ཁྲོད་ཆེན་པོ་བརྒྱད་ཀྱི་དཔའ་བོ་མཁའ་འགྲོ་ལ་སོགས་འབུམ་ཕྲག་ཡངས་པའི་མཁའ་འགྲོའ་ིའཁོར་དང་བཅས་ཏེ་བདག་གནས་ཡོ་བྱད་རྣམས་བྱིན་གྱིས་བརློབ་པའི་ཕྱིར་དུ་གནས་མཆོག་འདི་ཉིད་དུ་གཤེགས་སུ་གསོལ་ཞེས་པའོ། །དེ་ཡང་ཕྱི་ལྟར་དུ་ཨོ་རྒྱན་ཡུལ་དང་རྔ་ཡབ་པདྨ་འོད་སོགས་མཁའ་སྤྱོད་དང་ས་སྤྱོད་ཀྱི་གནས་ཀུན་ནས་རིག་འཛིན་བླ་མ་དཔའ་བོ་མཁའ་འགྲོ་རྒྱ་མཚོའི་ཚོགས་དང་བཅས་པ་ཐམས་ཅད་སངས་རྒྱས་ཀྱི་སྤྲུལ་བ་ཡིན་ཡང་། རྣམ་པ་དེ་དང་གྲུབ་པ་ཐོབ་པའི་ཚུལ་གྱིས་གཞན་དོན་མཛད་ཅིང་བཞུགས་པ་ནས་སྤྱན་འདྲེན་པའི་ཚུལ། ཧཱུྃ་བཞེངས་ཤིག་པདྨ་འབྱུང་གནས་མཁའ་འགྲོའ་ིཚོགསཿ དགོངས་ཤིག་ཕྱོགས་བཅུའི་དུས་གསུམ་བདེ་གཤེགས་རྣམསཿ རྗེ་བཙུན་ཆེན་པོ་པདྨ་ཐོད་ཕྲེང་རྩལཿ རིག་འཛིན་མཁའ་འགྲོའ་ིགནས་ནས་གཤེགས་སུ་གསོལཿ དབུ་སྐྲ་མཛེས་པའི་ཐོར་ཚུག་ཤིག་སེ་ཤིགཿ རིན་ཆེན་རྒྱན་ཆ་མང་པོ་སི་ལི་ལིཿ སོགས་དང་མཐུན་པར་སྤྱན་འདྲེན་ལ། ནང་ལྟར་ན་རང་གི་རྩ་རླུང་ཐིག་ལེའི་སྒྲིབ་བྱེད་དག་པས། རྩ་ཁམས་ཀྱི་དཔའ་བོ་མཁའ་འགྲོ་རྒྱ་མཚོས་བདེ་ཆེན་ཡེ་ཤེས་ཀྱི་དངོས་གྲུབ་སྟེར་བའི་ཚུལ་གསང་བ་ལྟར་ན་ཕྱོགས་བཅུ་དུས་བཞིའི་དཀྱིལ་འཁོར་ཀུན་གྱི་བདག་ཉིད་ཆེན་པོ་གཤིས་ཀྱི་གནས་ལུགས་གང་དུའང་མི་དམིགས་ཤིང་སྤྲོས་པ་དང་བྲལ་བའི་ཐུགས་ཀྱི་དཀྱིལ་འཁོར་ཆོས་སྐུའི་ངང་ལ་ཡེ་ཤེས་ཀྱི་དཀྱིལ་འཁོར་ཇི་ལྟར་འདོད་པ་ཐམས་ཅད་སྤྱན་དྲང་ངོ་། །ཞེས་པ་སྟེ། གསང་སྙིང་ལས། ཕྱོགས་དུས་དཀྱིལ་འཁོར་བདག་གཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ནས། །དཀྱིལ་འཁོར་ཐམས་ཅད་སྤྱན་དྲངས་སྟེ། །ཞེས་སོ། །དེའང་བློས་འབྱོན་པར་མོས་པ་རྩམ་ལ་སྤྱན་དྲང་བར་བརྗོད་ཅིང་། ཐམས་ཅད་མཁྱེན་པའི་ཐུགས་རྗེས་ཀྱང་བྱིན་གྱིས་རློབས་པ་ཡིན་ལ། །གཙོ་བོར་རང་གི་སེམས་ཀྱི་རྣམ་འཕྲུལ་ཙམ་གོམས་པར་བྱེད་པ་ཡིན་པའི་ཕྱིར་རོ། །དེའང་སེམས་སངས་རྒྱས་ཡིན་པས་དེ་གོམས་ཤིང་གསལ་བས་དཀྱིལ་འཁོར་འགྲུབ་པ་ནི་འཐད་པའོ། །ཞེས་ཀློང་འགྲེལ་ལས་བཤད་དོ། །གསུམ་པ་སྤྱན་དྲངས་ནས་དོན་ཅི་གསོལ་བ་ནི། གནས་མཆོག་འདི་རུ་བྱིན་ཕོབ་ལཿ སྒྲུབ་མཆོག་བདག་ལ་དབང་བཞི་བསྐུརཿབགེགས་དང་ལོག་འདྲེན་བར་ཆད་གསོལཿ མཆོག་དང་མཐུན་མོང་དངོས་གྲུབ་སྩོལ། ཞེས་པས་རྒྱལ་བའི་ཐུགས་ལ་མཚན་འཛིན་གྱི་རྟོག་པ་མི་མངའ་ཡང་། ཡེ་ཤེས་དང་ཐུགས་རྗེའི་བྱེ་བྲག་ལས་བཀྲ་ཤིས་ཡོན་ཏན་རྫོགས་པའི་གནས་མཆོག་འདིར་བྱིན་གྱིས་བརླབ་པའི་དུས་ལ་བབས་པས་ན་འདིར་འདུས་པ་རྣམས་ལ་ལུས་ལ་འགྱུར་མེད་སྐུ། ངག་ལ་ཚངས་དབྱངས་གསུང་། ཡིད་ལ་འཁྲུལ་མེད་ཐུགས། ཡོན་ཏན་འགྲན་ཟླ་བྲལ་བ། ཕྲིན་ལས་འགྲོ་བ་འདུལ་བའི་དངོས་གྲུབ་བབས་རྣམ་པ་བཞིས་བྱིན་ཕོབ་ཅིག །ཁྱད་པར་དུ་བསྒྲུབ་པའི་མཆོག་དོན་གཉིས་ལྷུན་གྲུབ་ཆེན་པོ་མངོན་དུ་བྱེད་པའི་རྣལ་འབྱོར་པ་བདག་ལ་ལུས་ལ་བུམ་པའི་དབང་། ངག་ལ་གསང་བའི་དབང་། ཡིད་ལ་ཤེས་རབ་ཡེ་ཤེས་ཀྱི་དབང་། སེམས་ལ་ཡེ་ཤེས་རྡོ་རྗེ་ཚིག་གི་དབང་སྟེ་དབང་བཞིའི་དབང་ད་ལྟ་ཉིད་དུ་ཐོབ་པར་བསྐུར་དུ་གསོལ། །དེ་དག་མྱུར་དུ་ཐོབ་པའི་འགལ་རྐྱེན་དུ་གྱུར་པ་བགེགས་ཀྱི་མི་མཐུན་པར་བལྟ་བ་དང་ལོག་པར་འདྲེན་པས་དངོས་གྲུབ་ཕྱིན་ཅི་ལོག་ཏུ་བསྒྱུར་བ་དང་དངོས་གྲུབ་ཀློང་དུ་གྱུར་བའི་བར་མཚམས་གཅོད་པར་བྱེད་པ་ཐམས་ཅད་ཕྱིར་སོལ་ལ། །མཐར་ཐུག་ཕྱག་རྒྱ་ཆེན་པོ་མཆོག་གི་དངོས་གྲུབ་དང་། གནས་སྐབས་སུའང་གྲུབ་པ་བརྒྱད་སོགས་ཐུན་མོང་འཇིག་རྟེན་པའི་དངོས་གྲུབ་དམ་པ་བདག་ལ་རྩལ་དུ་གསོལ་ཞེས་པ་སྟེ། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །མཐུ་ཆེན་བདུད་འདུལ་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །ཞེས་པ་དང་མཐུན་ནོ། །ཨོཾ་སྐུ། ཨཱཿགསུང་། ཧཱུཾ་ཐུགས། བཛྲ་རྡོ་རྗེ། ཛྙཱ་ན་ཡེ་ཤེས། ཌཱཀྐི་ནཱི་མཁའ་འགྲོ་མ། ཨཱ་འདིར། ཨ་ར་ལི་རོལ་པ། ཕཻཾ་ཕཻཾ། ཞེས་པ་འདི་ལ་ཕ་ཨེ་མ་གསུམ་གྱི་སྒྲ་དོན་པ་དགོས་གསུངས། དོན་ཁོ་བོས། ཛཿ དགུག་པ་སྟེ་བྱོན་ཞེས་པའོ། །གཉིས་པ་བཞུགས་སུ་གསོལ་ཞིང་ཕྱག་འཚལ་བ་ལ་གཉིས་ཀྱི་དང་པོ་བཞུགས་སུ་གསོལ་བ་ནི། ཧོཿ གདོད་ནས་དམ་ཚིག་ཡེ་ཤེས་པཿ གཉིས་སུ་མེད་དེ་རྡོ་རྗེའི་གདནཿ ཞེས་པ། རང་རིག་གདོད་ནས་སྐུ་དང་ཡེ་ཤེས་ཆེན་པོའ་ིརང་བཞིན་དུ་ལྷུན་གྱི་གྲུབ་པའི་ཕྱིར་དམ་ཚིག་འཁོར་ལོ་བསྐྱེད་པས། ཡེ་ཤེས་པ་དབྱིངས་ནས་སྤྱན་དྲངས་ཏེ་བསྲེ་བའི་གཉིས་སུ་འཛིན་པ་མེད་པ་དེ་ཉིད་རྣམ་པར་རྟོག་པས་དབྱེ་བར་བྱ་མི་ནུས་པའི་ཕྱིར་རྡོ་རྗེའི་གདན་སྟེ། རོང་ཟོམ་ཆེན་པོས། འགྲོ་བ་རྣམས་སེམས་ཀྱི་རང་བཞིན་ནི་དབྱེར་མི་ཕྱེད་པའི་ཕྱིར་རྡོ་རྗེ་ཞེས་དང་། གསང་འདུས་ལས། རྒྱུད་ལྔ་དག་གི་སེམས་དག་ནི། རྡོ་རྗེ་ཞེས་སུ་བཤད་པ་ཡིན། ཞེས་གསུངས་པ་ལས་དང་པོ་པས་ནི་དབྱིངས་ནས་སྤྱན་དྲངས་པའི་ལྷ་ཚོགས་རྣམས་དམ་ཚིག་བསྐྱེད་པའི་འཁོར་ལོ་ཆུ་ལ་ཆུ་བཞག་པ་བཞིན་དབྱེར་མེད་དུ་འདྲེས་ཏེ་ཇི་སྲིད་བསྒྲུབ་བྱ་དང་བསྒྲུབ་བྱེད་གཅིག་ཏུ་མ་གྱུར་གྱི་བར་དུ་རྡོ་རྗེའི་ཆོས་བདུན་དང་ལྡན་པའི་གདན་ལ་བཞུགས་པར་བསམ་མོ། །རྡོ་རྗེའི་ཆོས་བདུན་ནི་རྡོ་རྗེ་རྩེ་མོ་ལས། སྲ་ཞིང་སྙིང་པོ་ཁོང་སྟོང་མེད། །བཅད་དང་ཞིག་པར་བྱ་བ་མེད། །བསྲེགས་པར་བྱར་མེད་འཇིགས་མེད་པས། །སྟོང་ཉིད་རྡོ་རྗེར་བརྗོད་པར་བྱ། ཞེས་སོ། །གཉིས་པ་ཕྱག་འཚལ་བ་ནི། མཁའ་འགྲོ་སེམས་ཀྱི་ཆོ་འཕྲུལ་དུཿ ལྷན་ཅིག་སྐྱེས་ལ་ཕྱག་འཚལ་ལོཿ ཞེས་པས། ཆོས་སྐུ་དབྱིངས་ཀྱི་མཁའ་འགྲོ་རིག་པ་བྱང་ཆུབ་ཀྱི་སེམས་དེ་ཉིད། གཟུགས་སྐུ་ཡེ་ཤེས་ཀྱི་མཁའ་འགྲོ་ཆོ་འཕྲུལ་གྱི་རྣམ་པ་ཇི་སྙེད་དུ་ཤར་ཡང་གདོད་ནས་ཡེ་གྲོལ་ལྷན་གཅིག་སྐྱེས་པའི་ཡེ་ཤེས་སུ་ངེས་པས་རང་རིག་རང་ངོ་ཤེས་པ་ལྟ་བའི་མཇལ་ཕྱག་སྟེ། ཕྱག་ཆེན་ཐིག་ལེ་ལས། ཇི་ལྟར་ཆུ་ལ་ཆུ་བཞག་དངཿ ཇི་ལྟར་མར་ལ་མར་བཞག་བཞིནཿ རང་གི་རིག་པའི་ཡེ་ཤེས་ནིཿ ལེགས་མཐོང་གང་ཡིན་འདིར་ཕྱག་ཡིནཿཞེས་དང་། གཞན་ཡང་། མི་རྟོགས་རྡོ་རྗེ་ཐབས་ཀྱི་ཡེ་ཤེས་ནི་དམིགས་མེད་ཤེས་རབ་ཡུམ་གྱི་ངང་དུ་རྟོགས། །ཐུགས་རྗེ་བྱེ་བྲག་སྣ་ཚོགས་ཅིར་ཡང་སྟོན། །རྡོ་རྗེ་སེམས་དཔའ་ཆེ་ལ་ཕྱག་འཚལ་ལོ། ཞེས་སོ། །རྣམ་པ་འཇིག་རྟེན་དང་བྱ་བྱེད་ཐུན་མོང་གི་ཕྱག་འཚལ་བ་ནི་རང་གི་ཐུགས་ཀ་ནས་ཡིད་དུ་འོང་བའི་ལྷ་མོ་བཞི་སྤྲུལ་ཏེ་སྔ་མའི་ནཱ་མ་ནི་ཕྱག་འཚལ་བའི་དོན་ཏེ་བརྡའ་ཕྱག་སྤངས་བླངས་མེད་པར་བཙལ་བར་ཕྱི་མའི་ནཱ་མས་གཉིས་ཆོས་སུ་མ་གྲུབ་པའི་བརྡར་དེའི་ཐུགས་ཀ་ནས་ཀྱང་ལྷ་མོ་བཞི་བྱུང་སྟེ་ཕྱག་འཚལ་ནས་ཧཱུཾ་གིས་སླར་ཐུགས་ཀར་བསྡུས་པའོ། །གསུམ་པ་མཆོད་པ་འབུལ་བ་ལ་ནི། ཧོཿ སྣང་ཞིང་སྲིད་པའི་ཆོས་སོ་ཅོགཿ འདོད་ཡོན་ལྔ་ཡི་བརྒྱན་དུ་ཤརཿ སེམས་ཀྱི་ཡིད་བཞིན་གཏེར་ཆེན་པོཿ བླང་དོར་མེད་པའི་དགྱེས་མཆོད་འབུལཿ ཞེས་པས་བདེ་བའི་རོལ་པས་ལུས་སུ་སྣང་ཞིང་སྲིད་པའི་གྲོང་ཁྱེར་འདོད་ཁམས། དག་ཕྱེད་དུ་སྣང་ཞིང་སྲིད་པའི་གྲོང་ཁྱེར་གཟུགས་ཀྱི་ཁམས། ཡིད་མི་སྣང་ཞིང་སྲིད་པའི་གྲོང་ཁྱེར་གཟུགས་མེད་ཀྱི་བསྡུས་པའི་ཆོས་སོ་ཅོག་ཐམས་ཅད་ཀྱི་དངོས་པོ་ཀུན་གོང་དུ་མཆོད་པ་བྱིན་བརླབ་སྐབས་བཤད་པ་ལྟར་ཁ་དོག་ཕྱེད་ཅིང་དབྱིབས་ལེགས་པའི་གཟུགས་ཀྱི་མཆོད་པ་སྣ་ཚོགས་དང་སངས་རྒྱས་དང་བྱང་ཆུབ་སེམས་དཔའི་ཡོན་ཏན་བརྗོད་པ་སོགས་སྒྲ་སྙན་པའི་མཆོད་པ། ཙན་དན་སྦྲུལ་སྙིང་སོགས་དྲིའི་མཆོད་པ་སྣ་ཚོགས་དང་། རོ་དང་བཅུད་ཕུན་སུམ་ཚོགས་པ་སེམས་སོགས་ལུས་བརྟག་བྱེད་ཞལ་ཟས་ཀྱི་མཆོད་པ་སྣ་ཚོགས་དང་། འཇམ་ཞིང་འཁྲིལ་བག་ཆགས་པ་ལུས་ཀྱི་དབང་པོ་ཚིམས་བྱེད་རེག་བྱའི་མཆོད་པ་སྣ་ཚོགས་ལ་སོགས་པ་འདོད་པའི་ཡོན་ཏན་རྣམ་པ་ལྔའི་རྒྱན་གྱི་འཁོར་ལོ་ཤར་བ་སྟེ་ཏིང་ངེ་འཛིན་གྱིས་མཆོད་སྤྲིན་བཀོད་པ་ནི་དཀྱིལ་འཁོར་ལ་ཡིད་ཀྱིས་ཇི་ལྟར་མཆོད་པའི་ཕྱག་རྒྱ་ཆེན་པོ་ནི་རང་གི་སེམས་ཀྱིས་བཀོད་པའི་ཡིད་བཞིན་གྱི་འདོད་དགུ་ཐམས་ཅད་འབྱུང་བའི་གཏེར་ཆེན་པོ་བསམ་གྱིས་མི་ཁྱབ་པར་སྤྲིན་གྱི་ཕུང་པོ་ཙམ་རྣམ་པར་འཕྲུལ་བ་ལས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་ཞིང་ཁམས་རྣམ་པར་དག་པ་རིན་པོ་ཆེ་སྣ་ཚོགས་ཀྱི་རང་བཞིན་རྒྱན་སྟུག་པོ་བཀོད་པའི་ཞིང་ཁམས་ལྟ་བུར་བྷྲུཾ་གྱི་གསལ་གདབ་བོ། །དེ་ཡང་རྒྱན་དང་བཀོད་པའི་བྱེ་བྲག་བསམ་གྱིས་མི་ཁྱབ་ཅིང་ཡིད་དུ་འོང་བས་མཛེས་པར་སྤྲས་ཤིང་། གཉེན་ལ་འཇམ་ཞིང་རེག་ན་བདེ་བའི་རང་བཞིན་རྒྱུ་སྣ་ཚོགས་རིན་པོ་ཆེའི་གཞི་འཁོད་སྙོམས་པ་ལ། རིན་པོ་ཆེ་སྣ་ཚོགས་ཀྱིས་མིག་མངས་རིས་སུ་བྲིས་ཤིང་མཛེས་པར་བྱས་ཤིང་ལྷའི་ནོར་བུ་སྣ་ཚོགས་ཀྱི་ཚོམ་བུ་རབ་ཏུ་བརྒྱན་པས་ཕྱོགས་བཅུ་ཀུན་ཏུ་འཁྱིལ་བར་སྤྲས་པ་དང་། ཏྲཾ་ལས་འདོད་དགུ་འབྱུང་བའི་རིན་པོ་ཆེ་སྣ་བདུན་གྱི་ཕུང་པོ་འོད་ཟེར་གྱི་དྲ་བ་འབར་བའི་རི་བོ་ལྷུན་སྟུག་པ་དང་། ཁམ་ལས་མཚོ་དང་ལྟེང་ཀ་ལ་སོགས་པ་མདོག་མཛེས་ཤིང་དབྱིབས་ལེགས་པའི་པདྨའི་རྫིང་བུ་རོ་བྲོ་བའི་མཆོག་བསིལ་བ་ལ་སོགས་པ་ཡན་ལག་བརྒྱད་ལྡན་གྱི་ཆུས་ཡོངས་སུ་གང་བ་མེ་ཏོག་གིས་ཁེབས་ཤིང་བྱ་སྐད་སྙན་པར་སྒྲོགས་པ་དང་། བྷྲུཾ་ལས་རིན་པོ་ཆེའི་ཁང་པ་དབྱིབས་དང་ཁ་དོག་དང་བཀོད་པའི་བྱེ་བྲག་སྣ་ཚོགས་པས་བརྒྱན་པ་རབ་ཏུ་མང་པོ་དང་། ཨོཾ་ལས་སྐྱེད་མོས་ཚལ་གྱིས་གཞིར་རིན་པོ་ཆེའི་རྒྱན་འཕྲོ་དང་དཔག་བསམ་གྱི་ཤིང་ལྗོན་པའི་ཚལ་གོས་དང་ནོར་བུ་སྣ་ཚོགས་ཀྱི་དྲ་བས་དཔྱངས་པ་དང་། ཧྲཱིཿ ལས་སྒྲ་སྐད་ཐམས་ཅད་གླུ་དབྱངས་སྙན་པ་དང་། བསྟོད་པ་དང་ཤིས་པ་བརྗོད་པ་ལ་སོགས་པའི་ཚིགས་སུ་བཅད་པའི་སྒྲ་རང་བྱུང་བ་དང་། ཨཾ་ལས་གོས་ཀྱི་རྣམ་པ་དང་མཆོད་པའི་ཡོ་བྱད་བླ་རེ་དང་རྒྱལ་མཚན་དང་། གདུགས་དང་སྟོད་གཡོགས་སྨད་གཡོགས་ལ་སོགས་པའི་ན་བཟའ་སྣ་ཚོགས་དང་། ཏྲཾ་ལས་དབུ་རྒྱན་དང་མགུལ་རྒྱན་དང་དོ་ཤལ་དང་དཔུང་རྒྱན་དང་སེ་མོ་དོ་ལ་སོགས་པ་རྒྱན་གྱི་བྱེ་བྲག་བསམ་གྱིས་མི་ཁྱབ་པ་དང་། ཨོཾ་ལས་རོ་བརྒྱ་ལྡན་པའི་བཟའ་བ་སྣ་ཚོགས་པ་དང་། བདུད་རྩིའི་བཏུང་བ་ཞིམ་པོ་དང་། གོས་ཟུང་རིན་པོ་ཆེ་སྣ་ཚོགས་ཀྱིས་སྤྲས་པའི་འགོ་བ་སྣ་ཚོགས་པ་རྣམས་དང་། ཧཱུཾ་ལས་སེམས་ཅན་ཐམས་ཅད་ཀྱི་ལུས་དང་རང་རང་ལ་ཇི་ལྟ་བ་འོས་པའི་གོས་དང་རྒྱན་ལ་སོགས་པས་མཛེས་པར་བརྒྱན་པའི་ལྷ་དང་ལྷ་མོའ་ིརང་བཞིན་རྡུལ་ཕྲ་རྙེད་ཀྱི་གྲངས་དང་མཉམ་པར་གྱུར་པ་ཐམས་ཅད་རྐང་བྲོ་དང་ལག་པའི་གར་དང་རོལ་མོའ་ིགླུ་དབྱངས་ལ་སོགས་པ་བསམ་ཡས་ཀྱི་མཉེས་པར་བྱེད་པའོ། །དེ་ལྟ་བུའི་མཆོད་པའི་སྤྲིན་གྱི་ཕྱོགས་བཅུའི་ནམ་མཁའི་ཁམས་ཇི་སྙེད་པ་ཐམས་ཅད་ཡོངས་སུ་བཀང་ནས་འཁོར་བ་དང་མྱ་ངན་ལས་འདས་པའི་དབྱིངས་ཀྱིས་བསྡུས་པའི་གཞི་ལམ་འབྲས་བུའི་དཀྱིལ་འཁོར་དུ་གྱུར་ཏོ་ཅོག་ཀུན་ལ་མཆོད་སྤྲིན་དེ་དག་གིས་རེ་རེ་ཞིང་རྒྱས་པར་འབུལ་བའོ། །ཇི་ལྟར་འབུལ་བའི་ཚུལ་ནི། སྐལ་ལྡན་རྣལ་འབྱོར་པའི་ཏིང་ངེ་འཛིན་མི་གསལ་བ་དང་གསལ་བའི་ཁྱད་པར་གྱིས་བསམ། ཡང་ན་ཅིག་ཅར་དུ་གསལ་ལམ་གྱི་རྒྱ་ཆེ་བ་ཆོས་ཀྱི་དབྱིངས་དང་མཉམ་པར་སྦྱོར་ཞིང་འབུལ་ལོ། །དེ་ལྟར་ཏིང་ངེ་འཛིན་གྱི་མཆོད་པའི་སྤྲིན་གྱི་ཕུང་པོ་དེ་དག་ཀྱང་རང་གི་སེམས་ཙམ་ལས་གང་དུའང་གྲུབ་པ་མེད་ལ་སེམས་དེ་ཡང་ནམ་མཁའ་ལྟ་བུའི་རང་བཞིན་གང་ནའང་མི་གནས་ཤིང་སྤྲོས་པའི་མཐའ་ཐམས་ཅད་དང་བྲལ་བའི་ངང་ལ་མཆོད་བྱ་དང་མཆོད་བྱེད་མཆོད་ཡུལ་གསུམ་མ་གྲུབ་པའི་ཚུལ་གྱིས་མཆོད་པའི་ཕྱག་རྒྱ་ཆེན་པོར་བསྒོམ་པར་བྱའོ། །དེ་འང་བློ་རབ་ཀྱིས་མཆོད་དུས་ཉིད་ནས་དེ་ལྟར་བསྒོམ་ཞིང་འཛིན་ཞེན་མེད་པར་བྱ་ལ། དམན་པས་རྗེས་སུ་མི་དམིགས་པའི་ངང་ལ་བཞག་གོ། འདི་ནི་མཆོད་པའི་མཆོག་སྟེ། དཀོན་མཆོག་ཏ་ལའི་མདོ་ལས། གང་ལ་མཆོད་པ་ནམ་མཁའ་འདྲར་ཤེས་ཤིང་། གང་གི་མི་དམིགས་གང་དུའང་འཛིན་པ་མེད། དེ་ནི་མཆོད་པ་ཀུན་གྱི་དམ་པ་སྟེ། ཡེ་ཤེས་གཞལ་མེད་བསམ་ཡས་རབ་འཐོབ་འགྱུར། །ཞེས་སོ། ཚུལ་དེ་དག་ཀྱང་སྒྱུ་འཕྲུལ་གསང་སྙིང་ལས། མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །གཉེན་འཇམ་རེག་ན་བདེ་བ་ཡི། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲིས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོར་འབར། །དབྱིབས་ལེགས་རྫིང་བུ་ཕྲ་མཆོག་བསིལ། །རིན་ཆེན་ཁང་པ་སྣ་ཚོགས་དང་། །བརྒྱན་དང་དཔག་བསམ་ལྗོན་པའི་ཚུལ། །གླུ་དབྱངས་ཚིགས་སུ་བཅད་པའི་སྒྲ། །བླ་རེ་རྒྱན་མཚན་ན་བཟའ་གདུགས། །དོ་ཤལ་དཔུང་རྒྱན་སེ་མོ་དོ། །བཟའ་དང་བཏུང་བའི་མཆོག་རྣམས་དང་། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱིས། །བྲོ་གར་ལ་སོགས་བསམ་ཡས་ཀྱིས། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ཀུན་ལ་རྒྱས་པར་འབུལ། །སྐལ་ལྡན་གསལ་བའི་ཁྱད་པར་གྱིས། །རིམ་གྱིས་ཡང་ན་ཅིག་ཅར་དུ། །ཆོས་ཀྱི་དབྱིངས་དང་མཉམ་སྦྱོར་ཞིང་། །མཆོད་པའི་ཕྱག་རྒྱ་ཆེན་པོར་སྒོམ། །ཞེས་སོ། །དེ་ལྟར་མཆོད་པའི་དངོས་པོ་སྣང་ཞིང་སྲིད་པའི་ཁྱོན་འདོད་པའི་ཡོན་ཏན་གྱི་རྣམ་གྲངས་དུ་མར་ཕུལ་བ་དག་ཀྱང་བདུད་རྩི་ལྔའི་རང་བཞིན་གཙང་རྨེ་བླང་དོར་གྱི་བློ་རྟོག་རང་གམ་མེད་པའི་རྒྱལ་བ་ཀུན་ཀྱང་དེའི་ངང་ལས་མི་འདའ་བའི་དགྱེས་པའི་མཆོད་སྤྲིན་གྱི་ཕུང་པོར་འབུལ་ཞིང་སྟོབས་པ་སྟེ། བདུད་རྩི་བརྒྱད་ལས། སྲིད་གསུམ་ཡེ་ནས་བདུད་རྩི་ལྔ། །མ་བཅོས་ལྷུན་གྲུབ་རྫོགས་སངས་རྒྱས། །དུས་གསུམ་སྲིད་གསུམ་སྐུ་གསུང་ཐུགས། །ཡེ་ནས་བདུད་རྩི་ཡིན་པའི་ཕྱིར། །ཞེས་དང་། ཚངས་དང་དྲོད་གཙང་མ་ཟད། དེ་དག་གྲོལ་བ་ངས་མ་བཤད། །དངོས་དང་དངོས་མེད་རྟོག་པའི་མཚན། །གཙང་དང་མི་གཙང་རྟོག་པའི་མཚན། །གཙང་མེ་མེད་པར་ཀུན་གྱིས་སྤྱོད། །དེ་དག་གྲོལ་བ་ངས་བཤད་དོ། །ཞེ་སོ། །འགྲེལ་ཆུང་ལས། ཆོས་རྣམས་རོལ་པར་ལོངས་སྤྱོད་དང་། །ཞེས་སོ། །སྔགས་དོན་ལ་གཉིས་དང་པོ་མཆོད་པའི་ཡུལ་ནི། བཛྲ་རྡོ་རྗེ། ཛྙཱ་ན་ཡེ་ཤེས། ཌཱཀྐི་ནི་མཁའ་འགྲོ་མ་སྟེ་ཡེ་ཤེས་རྡོ་རྗེའི་མཁའ་འགྲོ་མ་ཞེས་པའོ། །གཉིས་པ་མཆོད་རྫས་ལ་གསུམ་ལས་དང་པོ་ལ་པུསྤེ་མེ་ཏོག་གི་ཕྲེང་བ་དབུ། དྷུ་པེས་བདུག་སྤོས་ཤངས། ཨ་ལོ་ཀས་མར་མེ་སྤྱན། གྷནྡྷེ་དྲི་ཆབ་སྐུར། ནཱེེ་ཝི་ཏེ་ཞལ་ཟས་ལྗགས། ཤཔྟ་རོལ་མོ་སྙན་དུ་འབུལ་བ་སྟེ་དེ་ཡང་འབུལ་ཚུལ་ནི་གོང་དུ་བྱིན་རློབས་སྐབས་བཤད་པའི་མཆོད་རྫས་རྣམས་དང་ལྷ་ཆེན་འཕྲུལ་དགའ་བ་རྣམས་རང་གི་སྤྲུལ་པའི་འདོད་ཡོན་ལ་ལོངས་སྤྱོད་པ་ལྟར་རང་གི་ཐུགས་གནས་ལྷ་མོ་མཆོད་རྫས་དེ་དག་ཐོགས་པས་མཆོད་ནས་སླར་གནས་སོ་སོ་དང་། རེག་རྡོ་རྗེ་མ་སྨིན་མཚམས་སུ་ཐིམ་པར་བསམ་མོ་གཉིས་པ་ཕྱག་རྒྱ་ཆེན་པོའ་ིམཆོད་པ་ནི། མ་ཧཱ་ནི་ཆེན་པོ། མུ་དྲ་ནི་ཕྱག་རྒྱ་སྟེ། འདི་ལ་གསུམ། ཕྱི་ལྟར་ན་ལྷ་སྐུ་ཕྱག་རྒྱ་ཆེན་པོ་སྟེ། དེ་ཡང་ས་བོན་ཆོས་རྒྱ་བཅའ་བ་དམ་རྒྱ། དགྲོལ་བ་ལས་རྒྱ། ལྷར་སྣང་ཕྱག་རྒྱ་ཆེན་པོ་སྟེ། རྒྱུད་ལས། སྒྱུ་འཕྲུལ་དྲ་བ་མངོན་རྫོགས་པའི། ཐམས་ཅད་བྱང་ཆུབ་མཆོག་གི་རྒྱ། །གསང་བ་དེ་ཉིད་ངེས་པ་ཡི། །སྙིང་པོའ་ིཕྱག་རྒྱ་འདའ་དཀའ་འོ། །ཞེས་སོ། །ནང་ལྟར་ན་རིགས་བདག་བླ་མ་བདེ་བ་ཆེན་པོའ་ིཡེ་ཤེས་སུ་རོལ་པའི་བདུད་རྩིའི་རྒྱུན་གཙོ་མོའ་ིམཁའ་གསང་དུ་འཁྱིལ་བ་དང་། གཞན་ཡང་རྩ་གནས་ཀྱི་ལྷ་དང་དཔའ་བོ་མཁའ་འགྲོ་ཐམས་ཅད་རང་གི་ཡབ་ཡུམ་མཉམ་པར་སྦྱར་བས་དྡྷུ་ཏིའི་མར་སྣའི་དྭངས་མ་ཡེ་ཤེས་ཀྱི་མེར་གྱུར་ཏེ། ཡར་སྣ་བདེ་ཆེན་འཁོར་ལོའ་ིབྱང་ཆུབ་ཀྱི་སེམས་ཞུ་བ་ལས་འཁོར་ལོ་བཞིར་དགའ་བཞིའི་ཡེ་ཤེས་མངོན་དུ་གྱུར་སྟེ་བདེ་སྟོང་གཉིས་སུ་མེད་པའི་འོད་གསལ་དུ་བཞུགས་པས། ཆགས་སྡང་གཉིས་དག་དབྱིངས་རིག་དབྱེར་མེད་དུ་ལ་བཟླས་ཆོས་ཉིད་འོད་གསལ་གྱི་སྣང་བ་རྒྱ་ཆད་ཕྱོགས་ལྷུང་དང་བྲལ་བས་གཟུགས། །ཆོས་ཉིད་བདེ་བའི་རང་སྒྲ་སིད་དང་ཧ་ལ་སོགས་པའི་གདངས་སུ་ཤར་བ་སྒྲ། །འོད་གསལ་གྱི་སྣང་ཆ་མ་འགགས་པས་དྲི་བསུང་ཁྱབ་གདལ་དུ་འཐུལ་བ་དྲི། །འཁོར་འདས་གཉིས་ཆོས་ཐམས་ཅད་ཀ་དག་གི་ངང་དུ་ཆུད་པས་དྭངས་མའི་ཐིག་ལེ་བརྟོས་པ་རོ། །འཕོ་མེད་ཀྱི་རོ་བདེ་བས་སྣང་སྲིད་འཁོར་འདས་ཐམས་ཅད་ཐིག་ལེ་ཉག་གཅིག་གི་ངོ་བོར་རྒྱས་ཐེབས་པས་རེག་བྱ་སྟེ་རྒྱུད་ལས་བདག་ཉིད་ཆེན་པོའ་ིམཆོད་པ་ཡིས། །རྒྱལ་བའི་དཀྱིལ་འཁོར་མ་ལུས་མ་ཉེས། །ཞེས་སོ། །གསལ་བ་ལྟར་ན་མཆོད་བྱའི་རྫས། མཆོད་བྱེད་བདག་མཆོད་ཡུལ་གྱི་དཀྱིལ་འཁོར་ཐམས་ཅད་ཡེ་ཤེས་ཆེན་པོ་གདོད་མའི་དབྱིངས་སུ་རྣམ་པ་དག་པའི་རྟོག་མེད་བློ་འདས་ཆེན་པོའ་ིམཆོད་པ་སྟེ། །ཡབ་བཀའ་ལས། མཆོད་བྱ་མཆོད་བྱེད་མཆོད་ཡུལ་ཀུནཿ ཡེ་ཤེས་དབྱིངས་སུ་རྣམ་དག་པའིཿ མཆོད་པའི་ཕྱག་རྒྱ་ཆེན་པོར་བསྒོམཿ ཞེས་སོཿགསུམ་པ་ནང་གི་མཆོད་པ་ལ་གསུམ་ལས་དང་པོ་ནི། རཀྟ་ཅེས་པས་ཆགས་པའི་དམར་བའི་རང་བཞིན་ཉིད་ཀྱང་སྐད་སོར་བཞག་གིས་རཀྟའི་མཆོད་པ་སྟེ་དེ་ཡང་ཀུན་རྫོབ་ལ་བོར་བའི་རྩ་བ་མཚན་མ་རྫས་ཀྱི་རཀྟ་ཁམས་སུ་སུཾབྷནྡྷ་འབར་བའི་དབྱིངས་སུ། ཉོན་མོངས་པ་ཀུན་གྱི་རྩ་བ་མ་རིག་ཁྲག་གི་རྒྱ་མཚོའི་རླབས་ཕྲེང་རྦ་ཀློང་འཁྲུགས་པའི་ཡེ་ཤེས་ཀྱི་ལྷ་ཚོགས་རྣམས་ཀྱི་ཞལ་དུ་ཕུལ་བས་འཁོར་བ་ལུགས་ལྡོག་ཏུ་སྐད་ཅིག་གིས་སྟོང་བར་བསམ། རཱ་ཕུར་ལས། བྷནྡྷ་འབར་བ་དམར་གྱི་ཞལ་བུ་སྣོདཿ རྟེན་འབྲེལ་བཅུ་གཉིས་མུ་ལ་སྲིད་པའི་ཁྲགཿ མ་ཧཱ་ཆགས་ལ་བསྒྲལ་བའི་ཁྲག་ཆེན་པོཿ ཞེས་སོ། །གཉིས་པ་པཉྩ་ཞེས་པས་ལྔ་སྟེ་བདུད་རྩི་ལྔའོ། །བཾ་བརྒྱད་ལས། །སྐུ་ལྔ་ལྷུན་གྲུབ་བདུད་རྩི་ནི། །སོ་སོའ་ིལུས་ལ་གནས་པ་ཡིན། །དྲི་ཆེན་དྲི་ཆུ་རཀྟ་དང་། །མཾ་ས་སེམས་ཆུ་འདི་རྣམས་ཀུན། །གཙོ་རུ་དང་དུ་བླང་བར་བྱ། །ཞེས་པས་རང་བྱུང་གི་རྫས་ཕྱིའི་རྩ་བརྒྱད། ནང་གི་རྩ་བརྒྱད། གསང་བའི་རྩ་བརྒྱད། །དོན་གྱི་རྩ་བརྒྱད་དང་། ཡན་ལག་སྟོང་ལ། ཆུ་ལས་བྱུང་བ་རླུང་གིས་དེད་པ་རྩི་སྨན། རྡོ་སྨན། སྔོ་སྨན། གཤོག་པ་ཅན། གདོད་པ་ཅན། སྡེར་མོ་ཅན། རྨིག་པ་ཅན། མཆེ་བ་ཅན་ཏེ་བཅུ་དེ་རེ་རེ་ལས་བརྒྱ་བརྒྱ་བྱུང་བས་སྟོང་ཕྲག་གཅིག་གོ། །དེ་དག་ཀྱང་ཡེ་ཤེས་ལྔའི་བདུད་རྩིར་བྱིན་གྱིས་བརླབས་ཏེ་དཀྱིལ་འཁོར་གྱི་ལྷ་ཚོགས་ཀུན་ལ་མཐེབ་སྲིན་གྱི་ཉི་ཟླའི་གའུས་བཅུས་ཏེ་ཕུལ་བས་བདེ་གསལ་ཆེན་པོའ་ིརོས་མཉེས་ཏེ་དངོས་གྲུབ་བདག་ལ་སྩལ་བར་བསམ་སྟེ། ཐལ་བ་ལས། སངས་རྒྱས་ཀུན་དང་མཉམ་སྦྱོར་བའི། །རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལ་སྦྱར་བའི་སྨན། །ཡེ་ཤེས་ལྔ་རྫོགས་གྲུབ་པའི་རྫས། །ཞེས་སོ། །གསུམ་པ་ནི་བྷ་ལིངྟ་ནི་གཏོར་མ་སྟེ། སྔར་བཤམས་པའི་གཏོར་མ་འདོད་ཡོན་གྱི་དབྱིངས་སུ་སྦར་ཏེ་གནས་པ་ལྷ་ཚོགས་རྣམས་ཀྱི་ལྗགས་རྡོ་རྗེའི་སྦུ་གུར་རྩེ་གཅིག་པའི་འོད་ཀྱི་གཏོར་མའི་བཅུད་དྲངས་ཏེ་གསོལ་བར་བསམ་མོ། །སརྦ་ནི་ཐམས་ཅད་པཱུཛ་ནི་མཆོད་པ་སྟེ་མདོར་བསྡུ་ན་བཀུར་བའི་གནས་སུ་གྱུར་པ་རྣམས་སྒོ་གསུམ་ནས་བསྐུར་ཞིང་མཆོད་པ་དང་། རྫས་ཀྱི་སྒོ་ནས་ཀྱང་མཉེས་པར་བྱེད་པའི་བདག་ཉིད་དོ། ཞེས་དཀོན་མཆོག་འགྲེལ་ལས་གསུངས་སོ། །ཨཱཿནི་སྐྱེ་བ་མེད་པའི་དབྱིངས་ལས་ཧཱུྃ་ནི་ཡེ་ཤེས་ལྔའི་མཆོད་པའི་རང་བཞིན་དུ་ལྷུན་གྱི་གྲུབ་པར་བྱེད་པའོ། །བཞི་པ་བསྟོད་པ་ལ་བཞི་ལས། །དང་པོ་རྒྱལ་བ་ཀུན་གྱི་བསྐྱེད་བཞིར་བསྟན་པ་ནི། རྒྱལ་བ་ཀུན་ཡུམ་རྡོ་རྗེ་རྣལ་འབྱོར་མཿ སྣ་ཚོགས་ཡུམ་གྱུར་ཤེས་རབ་ཕ་རོལ་ཕྱིནཿ དགྱེས་ཆགས་བཞད་པའི་རྣམ་འགྱུར་མཚོ་རྒྱལ་ཡུམཿ སངས་རྒྱས་པདྨའི་ལྕམ་ལ་ཕྱག་འཚལ་བསྟོདཿ ཅེས་པས། དུས་གསུམ་གྱི་རྒྱལ་བ་ཀུན་གྱི་ཡུམ་ནི་ཆོས་ཉིད་ཀྱི་གནས་ལུགས་སྒྲོ་སྐུར་དང་བྲལ་བ་སྟེ། ཀུན་བྱེད་ལས། ཀྱེ་ད་ནི་མ་བཅོས་ཇི་བཞིན་སྙིང་པོ་ལ་སྒྲོ་འདོགས་སྐུར་འདེབས་དོན་ལས་ཀུན་འདས་པས། །དུས་གསུམ་རྒྱལ་བ་ང་ལས་བྱུང་བའི། །རྒྱལ་བའི་ཡུམ་ཞེས་ངེས་པར་བསྟན་པ་ཡིན། །ཞེས་སོ། །དེ་ཉིད་ཞལ་ཕྱག་གི་རྣམ་པར་བསྟན་པ་རྗེ་བཙུན་རྡོ་རྗེ་རྣལ་འབྱོར་མ་དཔའ་བོ་དང་མཁའ་འགྲོ་ཀུན་ལ་དབང་བསྒྱུར་ཞིང་སྐུ་གསུམ་ཡེ་ཤེས་ལྔའི་བདག་ཉིད་དེ། རྒྱུད་ལས། དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མ་ཡི་འཁོར་ལོ་བསྒྱུར། །ཡེ་ཤེས་ལྔ་དང་སྐུ་གསུམ་ཐུགས། །འགྲོ་བ་སྐྱོབ་ལ་ཕྱག་འཚལ་ལོ། །ཞེས་སོ། །དེའི་ཕྱིར་བཅོམ་ལྡན་འདས་ཀྱི་དུས་འཁོར་ལོའ་ིཡུམ་སྣ་ཚོགས་ཡུམ་གྱུར་མའང་དེ་དག་ཉིད་ལས་གཞན་དུ་མ་དམིགས་ཏེ། འགྲེལ་ཆེན་དྲི་མེད་འོད་གསལ་ལས། སངས་རྒྱས་ཀུན་གྱི་བསྐྱེད་མཛད་མ། །སྐྱེ་དང་འཇིག་པ་རྣམ་སྤང་ཉིད། །ཀུན་ཏུ་བཟང་མོའ་ིསྤྱོད་པ་དེ། །སྣ་ཚོགས་ཡུམ་ནི་དེ་ལ་འདུད། །ཅེས་དང་། པཉྩི་ཀ་པདྨོ་ཅན་ལས། སྣ་ཚོགས་ཞེས་བྱ་བ་ནི་རྒྱུ་བ་དང་མི་རྒྱུ་བའི་དངོས་པོ་རྣམས་ཏེ། དེ་རྣམས་ཀྱི་རང་བཞིན་གསལ་བར་མཛད་པས་ན། སྣ་ཚོགས་ཡུམ་ཞེས་བྱ་བ་ཡིན་ནོ། །ཞེས་སོ། །དེ་ལྟར་སངས་རྒྱས་ཐམས་ཅད་བསྐྱེད་ཅིང་འབྱུང་བའི་གནས་རྒྱལ་བ་ཀུན་གྱི་ཐུགས་རྣམས་མི་རྟོག་པའི་ཡེ་ཤེས་དེ་ཉིད་ཤེས་རབ་ཕ་རོལ་ཕྱིན་མ་སྟེ། སྒྲ་གཅན་འཛིན་གྱི་ཡུམ་ལ་བསྟོད་པར། །སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན་སོགས། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་ན། །དུས་གསུམ་རྒྱལ་བའི་སྤྱི་ལ་ཕྱག་འཚལ་ལོ། །ཞེས་དང་། །ཕྱོགས་གླང་གིས། །ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །ཞེས་སོགས་གསུངས་སོ། །དེ་ལྟར་རྒྱལ་བ་ཐམས་ཅད་ཐུགས་ཡེ་ཤེས་ཀྱི་ཀློང་དུ་རོ་གཅིག་པ་ལས་འདིར་གང་འདུལ་གྱིས་ཕྲིན་ལས་བསམ་གྱིས་མི་ཁྱབ་པས་ཞི་བའི་ཕྲིན་ལས་ཆེན་པོས་འགྲོ་བ་ཀུན་རྗེས་སུ་འཛིན་པའི་ཕྱིར་དགྱེས་ཞིང་འཛུམ་པའི་རྣམ་པ་ཅན་དང་། དབང་གི་ཕྲིན་ལས་ཆེན་པོས་ཐུགས་རྗེས་ཁམས་གསུམ་ཡོངས་སུ་མི་གཏོང་བའི་ཕྱིར་ཤིན་ཏུ་ཆགས་ཤིང་ཞེན་པའི་རྣམ་པ་ཅན་དང་། རྒྱས་པའི་ཕྲིན་ལས་ཀྱིས་གདུལ་བྱ་སེམས་ཅན་ཐམས་ཅད་ལ་ཅི་འདོད་པའི་དངོས་གྲུབ་ཆེན་པོ་རྩོལ་བའི་ཕྱིར་རྡོ་རྗེའི་གད་མོ་རྣམ་པར་བཞད་པའི་རྣམ་པ་དང་། དེ་དག་གིས་གདུལ་བར་མི་ནུས་པའི་གདུལ་བྱ་ཁྲོ་གཏུམ་མ་རུངས་པའི་ཚོགས་ཐམས་ཅད་དྲག་མོར་ཁྲོས་པའི་རྣམ་པར་འགྱུར་བས་གདུལ་བར་མཛད་ཅིང་སྔོན་མངལ་གྱི་པདྨོ་ལས་རྣམ་པར་གྲོལ་བའི་ཚེ་མཁར་ཆེན་པའི་ཉེ་ལོགས་ཀྱི་ཆུ་མིག་རྒྱས་ཏེ་མཚོར་གྱུར་པས་ན་མཚོ་རྒྱལ་མ་དེ་ཉིད་དུས་གསུམ་གྱི་རྒྱལ་བ་ཐམས་ཅད་བསྐྱེད་པའི་ཡུམ་རྫོགས་པའི་སངས་རྒྱས་པདྨ་ལས་གྲོལ་བའི་བདེ་ཆེན་ཡེ་ཤེས་པ་སྐྱེས་པ་ལྕམ་དེ་ཉིད་ལ་ལུས་གུས་པས་ཕྱག་འཚལ་ཞིང་། ངག་ཡིད་དད་པས་ཡོན་ཏན་ལ་བསྟོད་པའོ། །གཉིས་པ་སྐུ་གསུང་ཐུགས་ཀྱི་རྣལ་རོལ་ལ་བསྟོད་པ་ནི། མཐོང་བས་ཡིད་འཕྲོག་མཚན་དཔེའི་ལང་ཚོ་ཅནཿ ཐོས་པས་རྣམ་གྲོལ་འགགས་མེད་བརྡའ་ཡི་གསུངཿ དྲན་པའི་བདེ་སྟོང་ཡེ་ཤེས་བསྐྱེད་པའི་ཐུགསཿ ཌཱཀྐི་རྗེ་མོ་མཁར་ཆེན་བཟའ་ལ་བསྟོདཿ ཅེས་པས་སྐུ་མི་བཟད་པ་རྒྱན་གྱི་འཁོར་ལོ་མཐོང་བ་ཙམ་གྱིས་འཇིག་རྟེན་འདིའི་སྣང་བ་མཐའ་དག་འགགས་ནས་རྒྱལ་བའི་ཡོན་ཏན་བསམ་གྱི་མི་ཁྱབ་པས་ཡིད་འགོག་པར་བྱེད་པའི་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བརྒྱད་བཅུའི་ལང་ཚོ་ལས་མ་གཡོས་པའི་བདག་ཉིད་ཅན་ཏུ་བཞུགས་ཤིང་། གསུང་གི་མི་ཟད་པ་རྒྱན་གྱི་འཁོར་ལོ་ཐོས་པ་ཙམ་གྱིས་སྲིད་པའི་འཆིང་བ་མཐའ་དག་ལས་རྣམ་པར་གྲོལ་བའི་འགགས་པ་མེད་པ་སངས་རྒྱས་ཀྱི་གསུངས་དབྱངས་ཡན་ལག་དྲུག་ཅུའི་ཡོན་ཏན་རྫོགས་པའི་བརྡའ་དང་བརྡའ་ལན་གྱི་རྣམ་པ་ཅི་ཡང་འཆར་བའི་གསུང་གིས་རྒྱུད་སྡེ་རྒྱ་མཚོའི་གསང་བ་སྟོན་པ་དང་། ཐུགས་མི་ཟད་པ་རྒྱན་གྱི་འཁོར་ལོ་ཡིད་ལ་དྲན་པ་ཙམ་གྱིས་ཉོན་མོངས་པ་རྣམ་པར་རྟོག་པའི་བྱེ་བྲག་ཐམས་ཅད་འགགས་ནས་བདེ་སྟོང་ཆེན་པོའ་ིཡེ་ཤེས་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་སྐད་ཅིག་ལ་བསྐྱེད་པའི་ཐུགས་གཡོ་བ་མེད་པའི་བདག་ཉིད་དང་ལྡན་པའི་ཞིང་ཌཱཀྐི་མཱི་ཞེས་པ་ཌི་ད་ནམ་མཁར་འགྲོ་བ་ལའོ་ཞེས་པའི་དབྱིངས་ལ། ཌ་རྐྱེན། ཌཱ་རྗེས་འགྲེལ་ཕྱིས་སྲོག་གི་ཨ་བཞག །ཌྲ་རྗེས་སུ་འབྲེལ་བ་ལ་མཐའི་དབྱངས་ལ་སོགས་པ། །ཨིང་ཕྱིས་མཚམས་སྦྱར་བས་ཌྲ་གྲུབ། ཨ་ཀ་གྱ་གྱུར་འགྲོ་བ་ལའོ། །ཞེས་པའི་བྱིངས་ལ། ཨ་དབྱངས་དང་མའི་རྐྱེན་ལའང་དབྱི་འོས། ཀའི་ཨ་ཕྱིས། ཨི་ནཱ་དྲངས་པས་ཌཱ་ཀིནཱ་ལ་མོ་རྟགས་སུ་བྱེད་པའི་རྐྱེན་ཨཱི་རིང་པོ་བྱིན་པས། ཌཱ་ཀི་ན་ཞེས་པ་ཚིག་སྡུད་ཀྱི་དབང་གིས་ནཱ་ཨཱི་དང་བཅས་པ་ཕྱིས་པས་ཌཱ་ཀི་ཏེ་མཁའ་འགྲོ་སྟེ་དེ་ཐམས་ཅད་ཀྱི་རྗེ་མོ་ནི་མཁར་ཆེན་པོའ་ིསྲས་མོར་གྱུར་པས་བཟའ་ནི་བུད་མེད་ཀྱི་མིང་སྟེ་དེ་ལ་བསྟོད་པའོ། །བསྟོད་པའི་ཚུལ་སྐུ་གསུང་ཐུགས་ཀྱི་ཡོན་ཏན་དྲན་པས་སྟེང་འོག་ཕྱོགས་མཚམས་ཀུན་ནས་ལྷ་མོ་མཛེས་ཤིང་ཡིད་འོང་དུ་མས་གཙོ་འཁོར་ཀུན་ལ་ཕྱག་འཚལ་ཞིང་གྲགས་སྟོང་སྐྱེ་བ་མེད་པའི་རང་སྒྲ་འབྲུག་སྟོང་ཙམ་ལྡིར་བས་བསྟོད་པར་བསམ་ལ། རྒྱུད་ཀརྨ་མཱ་ལེ་ལས། རྡོ་རྗེ་སོར་ཞིང་དྲིལ་བུ་བསིལ། །རིགས་ལྔའི་ཕྱག་རྒྱའི་དྲིལ་སྟབས་བྱ། །ཞེས་གསུངས་པ་ལྟར་གྱི་ཕྱག་རྒྱ་ཡང་བྱའོ། །གསུམ་པ་སྨོན་ལམ་གདབ་པ་ནི་བཅུ་དྲུག་དགའ་སྟེར་མཆོག་གི་ཕོ་ཉ་མོཿ གསལ་སྣང་སྒྱུ་མའི་ཏིང་འཛིན་དང་འགྲོགས་ནསཿ ཕྱི་ནང་གཞན་གསུམ་རྩ་རླུང་ཐིག་ལེའི་ཁམསཿ ཀུན་ཏུ་བཟང་མོའ་ིཀློང་དུ་དག་གྱུར་ཅིགཿ ཞེས་པས་འཁོར་ལོ་བཞི་སོ་སོར་དགའ་བ་བཞིའི་འགྲོས་རེ་ལ་དགའ་བ་བྱེ་བྲག་པ་བཞི་བཞིར་ཕྱེ་བའི་བཅུ་དྲུག་ཏུ་བསྟན་ཏེ་ཕྱག་ཆེན་ཐིག་ལེ་ལས། དགའ་བ་བཅུ་དྲུག་ཐེག་ལེ་སྟེ། ཐིག་ལེ་ཟླ་བའི་ཐིག་ལེ་སྟེ། ཨཱ་ལི་ཐིག་ལེར་ཤེས་པར་བྱ། །འཁོར་ལོ་བཞི་ཡི་རིམ་པས་སོ། །ཞེས་པས། དེ་ལྟ་བུའི་བཞི་ཚན་བཞིའི་དགའ་བ་སྟེར་བ་བྱེད་པ་ནི་མཆོག་གི་དངོས་གྲུབ་བསྒྲུབ་པར་བྱེད་པའི་ཕོ་ཉ་མོའ་ིཡེ་ཤེས་ཀྱི་སྐུའི་གསལ་སྣང་སྒྱུ་མ་ལྟ་བུར་སྣང་བཞིན་དུ་རང་བཞིན་མ་གྲུབ་པའི་ཏིང་ངེ་འཛིན་དང་རྟག་ཏུ་མི་འབྲལ་བར་འགྲོགས་ནས་ཕྱིར་བསྐྱེད་རིམ་ནང་སྣང་བཅས་ཀྱི་རྫོགས་རིམ། གཞན་སྣང་མེད་འོད་གསལ་གྱི་རྫོགས་རིམ་གསུམ་བརྟེན་ནས་གནས་པ་རྩ། གཡོ་པ་རླུང་། བཀོད་པ་བྱང་ཆུབ་ཀྱི་སེམས་གསུམ་དང་བཅས་པའི་ཐིག་ལེའི་ཁམས་སྐུ་གསུང་ཐུགས་ཡེ་ཤེས་རྡོ་རྗེ་དོན་དམ་པ་ཀུན་ཏུ་བཟང་མོ་དབྱིངས་ཀྱི་ཡེ་ཤེས་ཆེན་པོའ་ིཀློང་དུ་དག་པར་གྱུར་ཅིག་ཅེས་པ་སྟེ་བདག་འཇུག་དབང་དོན་རྒྱ་མཚོ་ལས། རྩ་དག་བསྐྱེད་རིམ་སྤྲུལ་སྐུར་འབྱོངསཿ རླུང་དག་ཁ་སྦྱོར་ཡན་ལག་བདུནཿ ཁམས་དག་རྣམ་ཀུན་མཆོག་ལྡན་གྱིཿ བདེ་ཆེན་ཡེ་ཤེས་ཁྱོད་ཀྱི་མཐོངཿ ཞེས་སོ། །ལྔ་པ་འཛབ་ལ་གསུམ་ལས་དང་པོ་མཁའ་འགྲོའ་ིརྩ་བསྙེན་ལ་གསུམ་གྱི་དང་པོ་རང་ཉིད་མཁའ་འགྲོའ་ིཐུགས་ཀ་རུཿ ཕག་མོ་མཐིང་ནག་གྲི་ཐོད་འཛིནཿ སྙིང་དབུས་དགའ་འཁྱིལ་བཾ་མཚན་མཐརཿ སྔགས་ཕྲེང་འཁོར་བའི་འོད་ཟེར་ལསཿ ལྷ་སྐུའི་སྣང་ཞེན་གསལ་བར་བྱསཿ རིགས་བདག་བླ་མའི་ཐུགས་རྒྱུད་བསྐུལཿ དེ་ལས་འོད་འཕྲོས་དོན་གཉིས་བྱསཿ བླ་མའི་སྐུ་ལས་བདུད་རྩིའི་རྒྱུནཿ ཟག་མེད་བདེ་བ་ཆེན་པོའ་ིབབསཿ དགའ་བ་བཞི་ཡི་བྱེད་ལས་ཀྱིསཿ དབང་བཞི་ཡེ་ཤེས་ཉམས་སུ་མྱོང་༔ ཞེས་པས། བདག་ཉིད་མཁའ་འགྲོའ་ིཐུགས་ཀར་ཡེ་ཤེས་སེམས་དཔའ་རྡོ་རྗེ་ཕག་མོ་ཆོས་དབྱིངས་འགྱུར་བ་མེད་པས་སྐུ་མདོག་མཐིང་ནག །ཕྱག་གཡས་དུག་གསུམ་གཅོད་པའི་གྲི་གུག་ནམ་མཁར་འཕྱར་ཞིང་། གཡོན་བདེ་བ་ཆེན་པོའ་ིཐོད་པ་ཁྲག་བཀང་བསྣམས་པ། བདེ་བ་ཆེན་པོའ་ིཡེ་ཤེས་སུ་ཆོས་ཐམས་ཅད་སྡོམ་པས་ཞབས་གཡས་བསྐུམ་པའི་རྟིང་པ་བྷ་ག་ལ་གཏད་ཅིང་། རྒྱུད་ཀྱི་ཟབ་གནད་སྙིང་ཁའི་རྩ་འཁོར་ལ་བསྣན་དགོས་པས་གཡོན་བརྐྱངས་པས་པདྨ་དང་ཉི་མ་རོའ་ིསྙིང་ཁ་མནན་པ། དེ་ཡང་བམ་རོའ་ིགདན་རྟོག་བྲལ་ཆོས་སྐུ་ཉིད་གདན་རང་བཞིན་གྱིས་འོད་ལ་བས་ལོངས་སྐུ། པདྨའི་གདན་འཁོར་བའི་སྐྱོན་གྱིས་མ་གོས་པས་སྤྲུལ་སྐུའོ། །ཕ་རོལ་ཕྱིན་དྲུག་མངའ་བས་རུས་པའི་རྒྱན་དྲུག །དོན་དམ་འགྱུར་བ་མེད་པས་རྣ་ལྟག་ན་ཕག་ཞལ་ངུར་བ། དུས་གསུམ་གཟིགས་པའི་སྤྱན་གསུམ། སྐུ་གསུམ་ལྡན་ཞིང་ཕྲིན་ལས་བཞི་བསྒྲུབ་པའི་མཆན་ཁུང་ན་ཁ་ཊཾ་ཀ་འཛིན་པའི། སྙིང་གི་དབུས་སུ་མཚན་ཉིད་བཞི་དང་ལྡན་པའི་དགའ་འཁྱིལ་གཡོན་དུ་ཀྱི་ལི་ལི་འཁོར་བའི་དབུས་ན་ཐུགས་སྲེག་བཾ་གྱི་མཚན་པ། དེའི་མཐའ་བསྐོར་དུ་གསང་སྔགས་ཡིག་འབྲུ་བཅུ་གཉིས་པ་བྱུ་རུ་འབྲུ་མར་གྱི་བསྐུས་པ་ལྟ་བུའི་སྔགས་ཕྲེང་གཡོན་དུ་ལངས་ཐབས་སུ་འཁོར་བར་བཀོད་པ་དྲན་པ་བཞག་སྟེ། ལྷ་སྐུ་ལ་གསལ་སྣང་མ་ཐོན་བར་དུ་བསྒོམ། དེའི་ཞེན་པའི་ང་རྒྱལ་གྱི་གསལ་སྣང་འཐོན་པར་བྱས་པ་དང་། སྔགས་ཕྲེང་ལས་འོད་ཟེར་འཕྲོས་སྤྱི་བོ་ནས་འཐོན་རིགས་བདག་བླ་མའི་ཐུགས་དམ་གྱི་རྒྱུད་བསྐུལ། བདེ་སྟོང་གི་མཆོད་པས་མཉེས་དེ་ལས་འོད་ཟེར་མཁའ་ཁྱབ་ཏུ་སྤྲོས། སངས་རྒྱས་ཀྱི་ཞིང་ཁམས་ཐམས་ཅད་མཆོད་ཅིང་གཡོས་ཚུར་འདུས་མཆོག་མཐུན་མདོས་དངོས་གྲུབ་རྣམ་པ་གཉིས་ཐོབ་པས་བདག་དོན་དང་། ཡང་འཕྲོས་ཁམས་གསུམ་རྒྱུད་དྲུག་གི་སྡུག་བསྔལ་རྒྱུ་དང་བཅས་པ་སྦྱངས་ཤིང་འཁོར་བ་གནས་སྤར་ནས་མིང་མེད་པར་བསམས་ཏེ། སྟོང་པ་ཉིད་ལ་བཞག་པ་གཞན་དོན་ཏེ་དོན་གཉིས་བྱས། ཡང་རིགས་བདག་བླ་མའི་སྐུ་ལ་བདུད་རྩིའི་རྒྱུན་ཟག་པ་མེད་པའི་བདེ་བ་ཆེན་པོའ་ིཡེ་ཤེས་ཀྱི་རང་བཞིན་དུ་རང་ཉིད་མཁའ་འགྲོར་གསལ་བའི་སྤྱི་བོར་བབས་པས་དགའ་བ། མགྲིན་པར་མཆོག་དགའ་སྙིང་ཁར་ཁྱད་པར་གྱི་དགའ་བ། ལྟེ་བ་དང་གསང་གནས་སུ་བབས་པས་ལྷན་གཅིག་སྐྱེས་པའི་ཡེ་ཤེས་རྒྱུད་ལ་སྐྱེས། དེའི་བྱེད་ལས་ཀྱིས་རྩ་ཐིག་རླུང་གསུམ་གྱི་དྲི་མ་དག་ཅིང་ཡོན་ཏན་ཁྱད་པར་ཅན་ཐོབ། དེའི་འགྲོས་ཀྱིས་གསང་སྔགས་ཀྱི་རྒྱུད་སྡེ་མ་ལུས་པའི་དབང་བཞི་ཐོབ་དེའི་ཡེ་ཤེས་ཉམས་སུ་མྱོང་ཞིང་། སྒྲིབ་བཞི་དག་པས་ས་ལམ་གྱི་ཡོན་ཏན་རྫོགས་པར་བསམ་མོ། །འདི་ནི་གནད་ཤིན་ཏུ་ཟབ་པ་ཡིན། །ཚོགས་འཁོར་སྟོང་ལ་དགའ། །བདག་འཇུག་དང་དབང་བསྐུར་འབུམ་སྡེ་ཚང་། །ཉམས་ཆགས་དང་སྡིག་ལྟུང་འདག །དངོས་གྲུབ་ཆེན་པོའ་ིསྣོད་དུ་གྱུར། །རིག་པའི་རྩལ་ཁ་རྒྱས། །ཉམས་རྟོགས་རང་བཞིན་གྱིས་འཕེལ། །ཆོས་ཐམས་ཅད་ཀྱི་འབྱུང་གནས། །རྒྱལ་བ་ཀུན་གྱི་ཡུམ་ཡིན་པས་སྐུ་ལ་རྒྱུད་སྡེའི་དཀྱིལ་འཁོར་རྫོགས། །དེ་བསྒྲུབས་པས་གསང་སྔགས་ཀྱི་ཉེ་ལམ་ཟབ་མོའ་ིརྟེན་འབྲེལ་འགྲིག་པ་ཡིན་ནོ། །ཞེས་བསྙེན་ཡིག་ལས་གསུངས་སོ། །གཉིས་པ་འཛབ་དངོས་དང་ཕན་ཡོན་གཉིས་ལས་དང་པོ་ནི། །ཨོཾ་ནི་ཡེ་ཤེས་ལྔའི་ངོ་བོ་སྔགས་བྱིན་གྱིས་རློབས་པ། །པདྨོ་ནི་རང་སྐད་ཆོས་ཐམས་ཅད་ལམ་ཆགས་མི་ཆགས་ཆགས་པ་མེད་པའི། །ཡོ་གོ་ནི། ནི་རྣལ་འབྱོར་མ་སྟེ་ཆོས་ཉིད་རྣལ་མ་མ་བཅོས་པའི་དོན་འབྱོར་བ། ཛྙ་ན་ནི་ཡེ་ཤེས་ཏེ་ཆོས་སྐུའི་གཞི་འཛིན་པ་དང་། ལོངས་སྐུའི་མཚན་ཉིད་འཛིན་པ་དང་། །སྤྲུལ་སྐུ་ཡུལ་ལ་ཁྱབ་པའི་ཡེ་ཤེས་སོ། །ཝ་ར་ཧི་ནི་ཕག་མོ་སྟེ་ཆོས་ཅན་ཆོས་ཉིད་ཀྱི་འཁོར་ལོར་སྡོམ་པ། །ཧཱུྃ་ནི་སྐབས་ཐོབ་ཀྱི་དངོས་གྲུབ་བསྐུལ་བ་ལ་འཇུག་གོ ། དེ་ལྟར་བཟླས་པའི་སྐྱོན་བཅུ་སྤངས། གཟེར་བཞིའི་མན་ངག་དང་ལྡན་པར་བཟླའོ། །བསྙེན་ཚད་ནི། ལས་རུང་ལ་འབྲུ་འབུམ། གྲངས་བསྙེན་ལ་བཞི་འགྱུར། རྟགས་བསྙེན་ལ་རྟགས་མཐོང་གི་བར་རོ། །སྲོག་སྡོམ་གཉིས་པའི་ཕན་ཡོན་ནི། རྒྱལ་ཐབས་སྤྱི་བླུགས་ཚང་བའི་དབངཿ བསྐུར་ཐོབ་མེད་པའི་ཆོས་ཉིད་ལཿ མཉམ་པར་བཞག་པ་གནད་ཀྱི་གཟེརཿ བསྐྱེད་རྫོགས་རྣམ་གྲངས་མང་མི་དགོསཿ འདི་ཉིད་གཅིག་པུས་དགོས་གྲུབ་ཐོབཿ ཅེས་པས་གོ་སླའོ། །གསུམ་པ་གྲུབ་པའི་རྟགས་ནི། རྟགས་ཀྱི་རིམ་པ་བསམ་ཡས་ཀྱངཿ མཆོག་ལ་དགོངས་པ་གཡོ་འགུལ་མེདཿ ཐུན་མོང་མཁའ་འགྲོ་འདུ་བ་དངཿ ཇི་སྙེད་མཁྱེན་པའི་ཀློང་རྡོལ་ནསཿ སྣང་བ་བརྡའ་དང་ཆོས་སུ་འཆརཿ ཉམས་དགའ་བག་ཕེབས་རིག་པ་དངསཿ མཁའ་སྤྱོད་ལ་སོགས་གྲུབ་ཆེན་བརྒྱདཿ དངོས་སུ་གྲུབ་ཅིང་རྨི་ལམ་དུཿ བུད་མེད་དམར་མོ་འདུ་བ་དངཿ མེ་ཏོག་དང་མགྲོན་ཤེལ་དཀར་རྙེདཿ མདའ་དར་ཕྱག་མཚན་མཐོང་བ་སོགསཿ མཁའ་འགྲོ་གྲུབ་པའི་རྟགས་སུ་བཤདཿ ཅེས་པས་མཆོག་གི་དངོས་གྲུབ་མཐོང་ལམ་རྣམ་པར་མི་རྟོག་ཡེ་ཤེས་སོགས་རྟོགས་པ་ཁྱད་པར་ཅན་རྒྱུད་ལ་སྐྱེས་པས་དགོངས་པ་གཡོ་འགུལ་མེད་པར་གནས་པ་དངཿ ཐུན་མོང་གི་དངོས་གྲུབ། ཉིན་མོ་མི། ནུབ་མོ་མཁའ་འགྲོ། ནང་ནུབ་ཏུ་ཟས་འདུ་བ་སྟེ་འདུ་བ་གསུམ་དང་། །ཇི་སྙེད་མཁྱེན་པའི་ཤེས་བྱ་རྒྱ་མཚོའི་ཀློང་རྡོལ་ནས། ཅི་སྣང་ཐམས་ཅད་བརྡའ་ཙམ་དང་འཁོར་འདས་བླང་དོར་སྟོན་པའི་ཆོས་སུ་འཆར་ཞིང་། །གནས་ཁང་ཉམས་དགའ་བ་དང་། བློ་བག་ཕེབས་པ་དང་། །གསང་བ་རིག་པ་དངས་སྙིགས་ཕྱེད་པ་དང་མཁའ་སྤྱོད་ལ་སོགས་པའི་གྲུབ་པ་བརྒྱད་ཐོབ་སྟེ། ཇི་སྐད་དུ། མཁའ་སྤྱོད་རལ་གྲི་རིལ་བུ་དང་། །རྐང་མགྱོགས་བུམ་པ་གནོད་སྦྱིན་འཁོལ། །བཅུད་ལེན་དང་ནི་མིག་སྨན་ནོ། །ཞེས་པས་མཁའ་སྤྱོད་ནི་ནམ་མཁའ་ལ་གནས་ནུས་ཤིང་འཆི་བ་མེད་པ་དང་། རལ་གྲི་ཕ་རོལ་ལས་རྒྱལ་བར་བྱེད། རིལ་བུ་ལག་ཏུ་ཐོགས་པས་ལུས་མི་སྣང་བ་དང་། རྐང་མགྱོགས་འཆི་ལ་ལྷམ་འགྲུབ་སྟེ་དེ་གྱོན་པས་ཡུད་ཙམ་ལ་རྒྱ་མཚོའི་མཐའ་སྐོར་བར་ནུས་པ་དང་། བུམ་པ་དེའི་ནང་དུ་ཅི་འདོད་པའི་གཏེར་འབྱུང་བ་དང་། གནོད་སྦྱིན་འཁོལ་གྱིས་སྐད་ཅིག་ལ་ལས་ཅི་འདོད་བསྒྲུབ་པ་ཙཏྱ་མཆོད་རྟེན་བཞེངས་པ་ལྟ་བུ་དང་། བཅུད་ལེན་གྱིས་ཉི་ཟླའི་ཚེ་གླང་པོའ་ིསྟོབས་པདྨའི་མདངས་སོགས་འབྱུང་བ་དང་། མིག་སྨན་བྱུགས་པས་ས་འོག་གི་གཏེར་མཐོང་བ་དང་ཡོན་ཏན་བརྒྱད་དོ། །དེ་དག་དངོས་སུ་འབྱུང་ཞིང་དབང་དམན་ལ་རྨི་ལམ་དུ་བུད་མེད་དམར་མོ་འདུ་བ་དང་བཀུར་སྟི་བྱེད་པ་དག་འབྱུང་སྟེ་ལྷག་མ་གོ་སླའོ། །ཕྲིན་ལས་ཁ་བསྒྱུར་གཞན་ལས་ཤེས། ཞེས་པ་ནང་བསྒྲུབ་བདེ་ཆེན་སྙིང་པོའ་ིགཏེར་བུམ་བཞིན་ལས་ཚོགས་ཉེར་གཅིག་བསྒྲུབ་པར་རྗེ་བླ་མས་གསུངས་ཤིང་། རྗེ་བཙུན་ཛྙཱ་ནའི་ཆོག །ཁྲིགས་ལས་ཀྱང་གསལ་ལོ། །གཉིས་པ་ལུས་དཀྱིལ་གྱི་འཛབ་ནི། ཨོཾ་ཡེ་ཤེས་ལྔ་དེ་ཡང་ཨ་རྣམ་སྣང་དང་བུདྡྷ་ཧེ་རུ་ཀ་ཡབ་ཡུམ་སྟེ་ཆོས་དབྱིངས་ཡེ་ཤེས། ན་རོ་རིན་འབྱུང་དང་རཏྣ་ཧེ་རུ་ཀ་ཡབ་ཡུམ་སྟེ་མཉམ་ཉིད་ཡེ་ཤེས། ཟླ་ཚེས་སྣང་མཐའ་དང་པདྨ་ཧེ་རུ་ཀ་ཡབ་ཡུམ་སྟེ་སོར་རྟོག་ཡེ་ཤེས། རིང་ཆ་དོན་གྲུབ་དང་ཀརྨ་ཧེ་རུ་ཀ་ཡབ་ཡུམ་སྟེ་བྱ་གྲུབ་ཡེ་ཤེས་ཐིག་ལེ་མི་བསྐྱོད་དང་བཛྲ་ཧེ་རུ་ཀ་ཡབ་ཡུམ་མེ་ལོང་ཡེ་ཤེས་སོ། །གུ་ཧྱ་ཛྙ་ན་གསང་བའི་ཡེ་ཤེས་ཏེ་དེ་དག་གི་རང་བཞིན་གསལ་བར་བྱ་བ་དང་། བོ་དྷི་བྱང་ཆུབ་ཙིཏྟ་སྙིང་པོ་སྟེ་འབྲས་བུའི་སེམས་དཔའ་སེམས་མ། མ་ཧཱ་ཆེན་པོ་སུ་ཁ་བདེ་བ་སྟེ་སྒོ་སྐྱོང་ཐུབ་དྲུག་ལ་སོགས་ཏེ་ལོངས་སྐུ་ཞི་བའི་དཀྱིལ་འཁོར་ཡོངས་རྫོགས་ཀྱི་སྙིང་པོ་དང་། རུ་ལུ་གོང་མ་ཀེའུ་རི་བརྒྱད་རུ་ལུ་འོག་མ་སིང་ཧ་བརྒྱད། ཧཱུཾ་སྒོམ་བཞི་བྷྱོཿ དབང་མོ་ཉེར་བརྒྱད། ཧཱུྃ་དེ་དག་གི་སྐུ་གསུང་ཐུགས་ཀྱི་དངོས་གྲུབ་བསྡུ་བ་སྟེ། གལ་པོ་ལས། ཨོ་ནི་རིགས་ལྔ་ཡབ་ཡུམ་བཅུ། རུ་ལུ་དང་པོ་ཀེའུ་རི་བརྒྱད། རུ་ལུ་འོག་མ་སིང་ཧ་བརྒྱད། །བྷྱོཿ ནི་དབང་ཕྱུག་ཉི་ཤུ་བརྒྱད། །ཧཱུྃ་ནི་ཚད་མེད་སྒོ་མ་བཞི། །ཞེས་སོ། །ལུས་དཀྱིལ་གྱི་བཟླས་པའི་ཚེ་ཀུན་བཟང་ཡབ་ཡུམ་གྱི་ཐུགས་གར་ཉི་ཟླའི་གའུ་ཁ་སྦྱོར་ནང་། །ཐུགས་སྲོག་ཨ་ཡིག་ལ་སྔགས་ཕྲེང་གིས་བསྐོར་བ་ལས་འོད་ཟེར་འཕྲོས་མ་དག་པའི་སྣང་ཞེན་སྦྱངས། སྣང་སྲིད་ཐམས་ཅད་སྐུ་དང་ཡེ་ཤེས་སུ་སངས་རྒྱས་པར་བསམ་མོ། །དེ་ལྟར་གོ་དོན་སློངས་ནས་ཡེ་ཤེས་སེམས་དཔའི་བཞུགས་གནས་ལ་རྒྱུད་སྟེ་གཞན་ནས་སྙིང་ཁ་ཀཉྩི་ཀ་དང་། དྲན་པ་ཧི་མ་ལ་ཡ་ཞེས་དག་སྦྱོར་སོ་སོར་བཤད་པ་ལྟར། འདིར་ཡང་ཐུགས་ཀའི་ཀུན་བཟང་ཡབ་ཡུམ་ཕག་མོར་གནས་བསྒྱུར་བ་ཡང་མ་ཡིན། ཀུན་བཟང་ཡབ་ཡུམ་གྱི་ཐུགས་ཁར་ཕག་མོ་སྣོད་ལ་སྣོད་འཇུག་ལྟ་བུའི་རྣམ་རྟོག་གིས་བཏགས་པའི་བློ་ཞེན་གཅིག་གིས་གཅིག་ལ་ཐུག་རེག་དང་། ཕན་ཚུན་སྒྲིབ་པ་ལྟ་བུའི་རྟོག་པ་ངན་པ་སྤངས་ནས་རང་བཞིན་བཅོས་པའི་གནས་ལུགས་ཀྱི་གདངས་ལྷའི་རྣམ་པ་ཡོངས་སུ་རྫོགས་པར་གསལ་བཏབ་པའི་གཙོ་མོའ་ིཐུགས་ཀའི་ཐད་ཀྱི་འོད་ཀྱི་རྣམ་པའི་ཀློང་དུ་ཕག་མོ་ཉིད་ལྷག་པར་གསལ་བ་ལ་རིག་པ་གཡོ་མེད་དུ་གཏད་ཅིང་འོད་ཟེར་སྤྲོ་བསྡུ་བྱ། སྐུའི་དབྱིངས་ལ་རྒྱུད་སྡེའི་དཀྱིལ་འཁོར་ཚོམ་བུའི་ཚུལ་དུ་རྫོགས་ཚུལ་ལ་དབང་པོ་རབ་ཀྱིས་གོ་དོན་སློང་བ་དང་། འབྲིང་གིས་མོས་པ་ལམ་བྱེད། ཐ་མས་གཙོ་མོ་དང་ཡེ་ཤེས་སེམས་དཔའ་གསལ་ཐེབས་པར་སྒོམ་པ་ནི་སྤྱི་དོན་ཡིན་ནོ། །ཞེས་བསྙེན་ཡིག་ལས་སོ། །གསུམ་པ་འཛབ་འཇུག་བསྡུ་བ་ནི། མཆོད་པ་ཁ་གསོལ་ལ། ཨོཾ་ཧཱུཾ་ཏྲཱཾ་ཏྲི་ཨཱཿལྷ་རྫས་དང་ཏིང་འཛིན་ལས་གྲུབ་པའི་སོགས་མཆོད་ཕྲེང་རྒྱས་པའམ། བསྡུ་ན་མེ་ཏོག་དམ་པ་ཕྲེང་བ་དམ་པ་དང་། སོགས་ཤོ་ལོ་ཀ་དང་ཨརྒྷཾ་སོགས་ཀྱིས་མཆོད་ལ། རྩ་བསྙེན་ལ་མཚོ་དབུས་གེ་སར་དང་། ལུས་དཀྱིལ་ལ་དེ་དག་སྔགས་པ་མི་ཟད་རྒྱ་མཚོས་བསྟོད་དེ། ཡི་གེ་བརྒྱབས་ཉེས་བྱས་བཤགས་སོ། །སྤྱི་དོན་གསུམ་པ་རྗེས་ཀྱི་རིམ་པ་ལ་ཚོགས་བྱ་བ། ཐུགས་དམ་བསྐུལ་བ། ཆད་ཐོ། བསྟན་མ། རྟ་བྲོ། དངོས་གྲུབ་བླངས་བ། ཉེས་བྱས་བཤགས་པ། ཉེར་བསྡུ། བསྔོ་བ། སྨོན་ལམ། བཀྲ་ཤིས་ཀྱི་རིམ་པ་དང་བཅུ་གཅིག་ལས་དང་པོ་ཚོགས་བྱ་བ་ལའང་བཅུ་གཅིག་ལས། དང་པོ་ཚོགས་ཀྱི་ངོ་བོ་ནི་ཤེས་རབ་ཐབས་སྙོམས་པར་འཇུག་པས་བྱང་ཆུབ་ཀྱི་སེམས་མྱང་བའི་བདེ་བ་དང་ལྡན་ཞིང་བཟའ་བ་དང་བཏུང་བ་ལ་སོགས་ལོངས་སྤྱོད་པ་ཚོགས་ཀྱི་འཁོར་ལོ་སྟེ། སྡོམ་འབྱུང་ལས། ཐོད་པའི་རྒྱན་ལ་དགའ་བ་དང་། །རྡོ་རྗེ་དྲིལ་བུ་མཉམ་ལྡན་པས། །ཞེས་སོ། །གཉིས་པ་མཚན་ཉིད་ནི། གསང་སྔགས་ཀྱི་ཀུན་ཏུ་སྤྱོད་པའི་སྐབས་གང་ཞིག་རྟེན་དང་། གང་ཟག་དང་། ཡོ་བྱད་ཁྱད་པར་ཅན་ཚོགས་པ་སྟེ། ཀུན་གསལ་ལས། རྟེན་དང་གང་ཟག་ཡོ་བྱད་ཚོགས། ཐབས་ཆེན་གསང་བས་ཚོགས་ཞེས་བྱ། ཞེས་དང་། སངས་རྒྱས་མཉམ་སྦྱོར་ལས། རང་གི་ལྷ་ཡི་སྦྱོར་བ་ཡིས། བདག་དང་གཞན་ལ་མཆོད་པར་བྱ། །ཡེ་ཤེས་ལ་ནི་ཡེ་ཤེས་རོལ། །འཁོར་ལོ་ལ་ནི་འཁོར་ལོ་རོལ། །ཞེས་སོ། །གསུམ་པ་ངེས་ཚིག་ནི། གྷ་ན་ཙཀྐྲའི་སྒྲ་ལས། དམ་ཚིག་གཅིག་པ་དང་མཛའ་བ་ཕོ་མོ་ཚོགས་ནས། ཞིམ་མི་ཞིམ་དང་། བསྒྲོད་བྱ་དང་བསྒྲོད་མིན་ལ་སོགས་པའི་སྒྲོ་འདོགས་གཅོད་པ་སྟེ། གདན་བཞི་ལས་མཛའ་བ་ཚོགས་པས་ཚོགས་ཞེས་བྱ། །རྣམ་རྟོག་སྤྱོད་པས་འཁོར་ལོ་བརྗོད། །ཅེས་སོ། །བཞི་པ་དབྱེ་བ་ལའང་བཞི། །རྡོ་རྗེ་ལས་རིམ་ལས། སྐྱེ་བོ་འཛའ་བ་ཀུན་ཚོགས་པ་དང་། །རྣལ་འབྱོར་འདུས་པའི་ཚོགས་ཞེས་བྱ། །འབྱོར་བའི་ལོངས་སྤྱོད་ཚང་བ་ནི། །བདེ་བའི་ལོངས་སྤྱོད་ཚོགས་སུ་བཤད། ལྷ་དང་དམ་ཅན་ཀུན་འདུས་པས། །འདུས་པ་ཆེན་པོའ་ིཚོགས་སུ་བཤད། །ཚོགས་གཉིས་རྒྱུན་དུ་རྫོགས་བྱེད་པ། །ཚོགས་ཆེན་པོ་རུ་ངེས་པར་བརྟག །ཅེས་པས་སྐལ་ལྡན་འདུས་པས། འབྱོར་ལྡན་ཡོ་བྱད་དངོས་གྲུབ་ལྷ། བསོད་ནམས་ཡེ་ཤེས་ཀྱི་ཚོགས་དང་བཞི་ལས། དང་པོ་ནི། དམ་ཚིག་ལྡན་པའི་རྣལ་འབྱོར་ཕོ་མོ་ཟུང་དུ་ཚོགས་པས་ཐབས་ཤེས་མཚོན་པ་དང་། དེའང་འདུས་པ་ཆུང་ངུར་གཙོ་བོ་ཡབ་ཡུམ། སྐུ་གསུང་ཐུགས་ཀྱི་ཟུང་གསུམ་རིགས་ལྔས་ཟུང་ལྔ་སྟེ། གཉིས་དང་། དྲུག་དང་། བཅུ་ཚང་བའོ། །འདུས་པ་འབྲིང་ལ་ལྷའི་གྲངས་འདུས་པ་ཆེན་པོར་རབ་ཏུ་མང་པོ་སྟེ། གསང་རྒྱུད་ལས། འདུས་པ་ཆུང་ངུར་གཉིས་དྲུག་བཅུ། འབྲིང་ལ་དཀྱིལ་འཁོར་གྲངས་ཡིན་ཏེ། །ཆེན་པོ་རབ་ཏུ་མང་པོའ།ོ ། ཞེས་སོ། །དེ་ཡང་རྣལ་འབྱོར་ཕོ་མོ་མང་དུ་ཚོགས་ཀྱང་ཟུང་དུ་མ་འབྲེལ་ན། དཔའ་བོའ་ིསྟོན་མོ་དང་། དཔའ་མོའ་ིསྟོན་མོ་ཟེར། དེ་ལ་ཡང་གཙོ་བོ་ལ་ཕྱག་རྒྱས་བཏབ་པའི་བུད་མེད་གཅིག་མེད་ན་ཆང་འཐུང་མི་རུང་བ་དང་། །གཙོ་མོ་ལ་ཕྱག་རྒྱས་བཏབ་པའི་སྐྱེས་པ་གཅིག་མེད་ན་ཤ་ཟ་མི་རུང་བར་བདེ་མཆོག་ལས་གསུངས་སོ། །གཉིས་པ་ནི། ཕྱི་ནང་གསང་བའི་ཡོ་བྱད་ཐམས་ཅད་ཡིན་ལ། ཁྱད་པར་ཤ་ཆང་མེད་དུ་མི་རུང་བའི་ཐབས་ཤེས་ཀྱི་རྫས་ཏེ་སྔ་མ་ལས། མ་ཧཱ་མཾ་ས་བདུད་རྩིར་བཅས། །མེད་དུ་མི་རུང་དངོས་གྲུབ་རྫས། །བཟའ་བཏུང་འབྲུ་བཅུད་ཤིང་འབྲས་དང་། །འདོད་པའི་ཡོན་ཏན་ཐམས་ཅད་དོ། །ཞེས་སོ། །གསུམ་པ་ནི། རྟེན་དང་བརྟེན་པར་བཅས་པའི་དཀྱིལ་འཁོར་དམ་ཅན་རྒྱ་མཚོའི་ཚོགས་དེ་ཐམས་ཅད་ཀྱི་སྐུ་དང་། མེ་ཏོག་གི་ཚོམ། ཏིང་འཛིན་གྱི་བསོད་ནམས་ཀྱི་ཞིང་དུ་སྤྱན་དྲངས་པ་ཐམས་ཅད་དོ། །བཞི་པ་ནི། ཚོགས་ཀྱི་འཁོར་ལོའ་ིཚེ་ཐབས་བསྐྱེད་པའི་རིམས་པ་དང་། འབྲེལ་བས་ཀུན་ཏུ་སྤྱོད་པ་སྣང་བ་དང་བཅས་པ་བསོད་ནམས་ཀྱི་ཚོགས་དང་ཤེས་རབ་རྫོགས་རིམ་གྱིས་བསྡུས་པའི་ཟབ་མོ་སྐྱེ་མེད་དུ་རྟོགས་ཤིང་སྒོམ་པ་རྣམས་ཡེ་ཤེས་ཀྱི་ཚོགས་སྟེ། ལྔ་བ་དགོས་པ་ནི། གང་དུ་ཚོགས་ཀྱི་འཁོར་ལོ་བསྐོར་ཏེ་ཟོས་ན། ཉམས་ཆགས་དག་ནས་འདོད་པའི་དོན་འགྲུབ་པ་དང་མཆོག་དང་མཐུ་མོང་གི་དངོས་གྲུབ་ཐོབ་སྟེ། རྟག་གཉིས་ལས། གང་དུ་ཟོས་ན་འདོད་དོན་ཀུན། །བསྒྲུབ་པ་ཅན་གྱིས་དངོས་གྲུབ་འགྱུར། །ཞེས་སོ། །དྲུག་པ་གནས་ནི་སྔ་མ་ལས། དུར་ཁྲོད་རི་ཡི་བྱ་སྐྱིབས་མཾ། །དེ་བཞིན་མི་མེད་གྲོང་ཁྱེར་རམ། །ཡང་ན་དབེན་པའམ་རྒྱ་མཚོའི་འགྲམ། །ཞེས་སོ། །བདུན་པ་གདན་ནི། རས་ལ་རོའ་ིགཟུགས་སམ། སྟག་ལྤགས་ལྷ་གྲངས་དང་མཉམ་པ་སྟེ་སྔ་མ་ལས། དེ་ལ་གདན་ཏུ་བརྟག་པར་བྱ། །རོ་ཡི་གཟུགས་ཅན་དགུ་དང་ནི། །ཡང་ན་སྟག་གི་ལྤགས་པ་དང་། །དུར་ཁྲོད་རེ་རས་དེ་བཞིན་ནོ། །ཞེས་སོ། །བརྒྱད་པ་རྣལ་འབྱོར་གྱིས་མཚན་ཉིད། །དབང་དང་དམ་ཚིག་ལྡན་པ་ལྟ་བ་ཡེ་གྲོལ་ཀ་དག་སྒོམ་པ་བསྐྱེད་རྫོགས་དབྱེར་མེད། སྤྱོད་པ་བླང་དོར་ཞེན་མེད་དོ། །དགུ་བ་དུས་ནི། རིང་བ་ལོའ་ིམཚན་མོ་རིང་མཐའ་དང་ཐུང་མཐའ་ཉིན་མཚན་མཉམ་དུས་གཉིས་སྟེ་བཞི་དང་། འབྲིང་བ་ཟ་བའི་དུས་མར་ངོའ་ིབརྒྱད་དང་བཅུ་བཞི། ཐུང་བ་ཞག་གི་མཚན་མོའ་ིདུས་སུ་བྱའོ། །བཅུ་པ་བྱ་བའི་རིམ་པ་ལ་བཅུ་གཉིས་ལས། དང་པོར་ཕན་ཡོན་བསྟན་པ་ནི། བསོད་ནམས་ནང་ནས་ཚོགས་འཁོར་མཆོག། ཅེས་པས། བསོད་ནམས་དང་ཡེ་ཤེས་ཀྱི་ཚོགས་གཉིས་གསོག་པ་ཐམས་ཅད་ཀྱི་ནང་ནས་ཚོགས་ཀྱི་འཁོར་ལོ་བསྐོར་བ་ཉིད་ཐབས་མཆོག་ཏུ་གྱུར་ཏེ། བདེ་བ་དང་ནད་མེད་པ་དང་དགེ་བའི་སེམས་ཕུན་སུམ་ཚོགས་པ་ལ་སོགས་ཏེ་ཚེ་འདིར་བསམ་པ་ཐམས་ཅད་འགྲུབ་ཅིང་བགེགས་ཞི་བ་དང་ཕྱི་མ་རིག་འཛིན་རྒྱལ་བའི་ཞིང་དུ་གྲོལ་ནས་ཀུན་ཏུ་བཟང་པོའ་ིགོ་འཕང་ཐོབ་པར་བྱེད་དོ། །རྡོ་རྗེ་དྲ་བ་ལས། བསོད་ནམས་ནང་ནས་ཚོགས་འཁོར་མཆོག །ཚེ་འདིར་བསམས་པ་ཀུན་འགྲུབ་ཅིང་། །བགེགས་དང་བར་ཆད་ཞི་བ་དང་། །ཕྱི་མ་རིག་འཛིན་རྒྱལ་བའི་ཞིང་། །ཀུན་ཏུ་བཟང་པོ་ཐོབ་པར་འགྱུར། །ཞེས་དང་། །སྡོམ་འབྱུང་ལས། བདེ་བ་ཕུན་ཚོགས་ལྡན་པ་དང་། །ནད་མེད་པ་དང་དགེ་བའི་སེམས། །འདོད་དང་སྒྲོལ་སོགས་ཡང་དག་ཐོབ། །དངོས་གྲུབ་ཕུན་སུམ་ཚོགས་པར་འགྱུར། །ཞེས་སོ། །འདིར་ལུང་དང་རྩ་བ་དང་འདྲ་བས་བརྐུས་སམ་མཉམ་ན་མ་ཡིན་ཏེ། །དབུ་མའི་རྩ་བའི་མཆོད་བརྗོད་དཀོན་བརྩེགས་ལས་བཤད་པ་དང་། མངོན་པ་མཛོད་ཀྱི། མངོན་འབྱུང་སྲིད་པ་ཤ་གཟུགས་ཅན། ཞེས་སོགས་རྒྱུད་མང་པོ་ལས་བྱུང་བའི་ཕྱིར་འདི་ནི་མཁའ་འགྲོའ་ིགསང་མཚོད་གི་རོལ་པར་བཤད་པའོ། །གཉིས་པ་བཤམས་པ་ནི། །མཁའ་འགྲོ་འདུ་བའི་དམ་ཚིག་རྫས། ནང་མཆོད་ཁྱད་པར་བཟང་དུ་བཤམས། ཞེས་པས། གནས་དེར་དཀྱིལ་འཁོར་རས་བྲིས་རྡུལ་མཚོན་ཚོམ་བུ་གང་རིགས་བཀོད་པའི་དྲུང་དུ་ཕྱི་ནང་གསང་བའི་མཆོད་པ་དང་། ཁྱད་པར་དུ་དཔའ་བོ་དང་། མཁའ་འགྲོ་རྣམས་དགྱེས་ཤིང་དེ་དག་གི་རྫས་ཚོགས་ཀྱི་ཡོ་བྱད་སྟག་ལྤགས་ཀྱི་སྟེང་དུ་ཀ་པཱ་ལར་བཟའ་བཅའ་ལྡག་མྱང་བཏུང་བའི་བྱེ་བྲག་རབ་བརྒྱ་རྩ་བརྒྱད། འབྲིང་དྲུག་བཅུ་རྩ་བཞི། ཐ་མའང་ཤ་ཆང་ཟན་གསུམ་སོགས་ལས། ནང་མཆོད་ཀྱི་ཁྱད་པར་བདུད་རྩི་ཕུང་མའི་བདུད་རྩི་རིལ་བུ་བཏབ་པས་བྲན་པ། བཟང་ཞིང་གྱ་ནོམ་པར་བཤམ་མོ། །གསུམ་པ་བླ་མ་སྤྱན་དྲངས་ཞིང་གྲལ་ལ་འཁོད་པ་ནི། རྣལ་འབྱོར་ཕོ་མོ་རྣམས་རུས་པའི་རྒྱུན་དྲུག་དང་ཌ་དྲིལ་སོགས་དཔའ་བོ་མཁའ་འགྲོའ་ིཆས་ཀྱིས་བརྒྱན་ལ། སློབ་དཔོན་དང་སྒོ་སྲུང་ལས་ཀྱི་རྡོ་རྗེ་བཅས་སྔོན་དུ་འཇུག །དེ་ནས་གཞན་རྣམས་ཀྱང་རིམས་ཀྱིས་འོངས་ནས་སྒོ་དྲུང་དུ་ཁྲུས་བྱ། སྒོ་བའི་ལེགས་པར་འོངས་སམ་ཞེས་པའི་བརྡར་མཛུབ་མོ་གཅིག་བསྟན། གཞན་དག་གིས་ཀྱང་འོངས་སོ་ཞེས་པའི་བརྡར་གཉིས་བསྒྲེངས་ཏེ་བསྟན་ནས་ནང་དུ་ཕྱིན། ལས་ཀྱི་རྡོ་རྗེས་རིགས་གང་ཡིན་ཞེས་བའི་བརྡར་རྡོ་རྗེ་རྩེ་གསུམ་པའི་ཕྱག་རྒྱ་གདེངས་པའི་ལན་དུ། རིགས་གང་ལ་མེ་ཏོག་ཕོག་པའི་གཙོ་བོའ་ིཕྱག་རྒྱ་བསྟན་ནས། རྡོ་རྗེ་སློབ་དཔོན་ལ་ཕྱག་འཚལ་མཎྜལ་ཕུལ་ཏེ། དབང་གི་རིམ་པ། བུམ་དབང་དགེ་བསྙེན། གསང་དབང་དགེ་ཚུལ། ཤེར་དབང་དགེ་སློང་། རྫོགས་པ་ཆེན་པོ་གནས་བསྟན་སྟེ་གཙོ་བོའ་ིཕྱོགས་བཞིར་འཁོད་དོ། །བཞི་པ་རྣལ་འབྱོར་ལ་གནས་པར་གསོལ་བ་བཏབ་པ་ནི། ལས་ཀྱི་རྡོ་རྗེས་ཕྱག་འཚལ་ཞིང་མེ་ཏོག་འཐོར་ཏེ་ཐལ་མོ་སྦྱར་བས་བཏུང་དེ། །ཧོ ། དཔལ་ཀུན་ཏུ་བཟང་པོའ་ིརང་བཞིན་ཚད་མེད་པའི་ཐུགས་རྗེ་འགྲོ་བའི་དོན་དུ་བཞུགས་པ་བླ་མ་རྡོ་རྗེ་འཛིན་པ་ཆེན་མོས་གཙོ་མཛད། རྣལ་འབྱོར་གྱི་དབང་ཕྱུག་ཆེན་པོ་རྣམས་དགོངས་སུ་གསོལ། ཆོས་ཐམས་ཅད་རྫོགས་པ་ཆེན་པོའ་ིརང་བཞིན་དུ་གདོད་ནས་མངོན་པར་བྱང་ཆུབ་ཀྱང་འགྲོ་བའི་ཁམས་རྣམས་མ་རིག་པའི་དབང་གིས་འཇིག་རྟེན་དྲུག་གི་ཕྱོགས་བཅུ་ཀུན་ཏུ་ཁྱབ་པ་ལ་དགོངས་ཏེ། ཐུགས་རྗེ་ཆེན་པོའ་ིརོལ་བས་རང་བཞིན་ལྷུན་གྱི་གྲུབ་པའི་དཀྱིལ་འཁོར་དུ་ཏིང་ངེ་འཛིན་ཟབ་མོའ་ིརྣལ་འབྱོར་ལ་གནས་པར་ཞུ་འཚལ། ཞེས་དལ་བུས་བརྗོད་པར་བྱའོ། །ལྔ་པ་དཀྱིལ་འཁོར་བསྐྱེད་པ་ནི་གེགས་བསྐྲད་པ་ནས་བཟླས་པའི་བར་དེ་བཤད་མ་ཐོག །དྲུག་པ་བྱིན་གྱིས་བརླབ་པ་ནི། ཧོཿབདེ་བ་ཆེན་པོའ་ིསྣོད་མཆོག་ཏུཿ ཚོགས་ཀྱི་འཁོར་ལོའ་ིལོངས་སྤྱོད་ནིཿ བླང་དོར་མེད་པའི་དམ་ཚིག་རྫསཿ ཨོཾ་ཨ་ཧཱུྃ་གིས་བདུད་རྩིར་བསྒྱུརཿ ཞེས་པས་བདེ་བ་ཆེན་པོའ་ིསྣོད་ནི་ཀ་པ་ལི་སྟེ། ཀ་སུ་ཀ་ན་བདེ་བ། པཱ་ལ་ན་སྐྱོང་བ་སྟེ། བདེ་བ་སྐྱོང་བའི་སྣོད་ཕྱི་ལྟར་ན་ཐོད་པ་གྲུ་གསུམ། ནང་ལྟར་ན་ཕྱག་རྒྱའི་སྐྱེ་གནས། གསང་བ་ལྟར་ན་རྡོ་རྗེ་བཙུན་མོའ་ི བྷ་ག་སྟེ་སངས་རྒྱས་ཀུན་གྱི་བཞུགས་གནས་ཏེ། སངས་རྒྱས་ཐོད་པ་ལས། སངས་རྒྱས་རྡོ་རྗེ་ཞེས་གསུངས་པ། །ཐོད་པ་གྲུ་གསུམ་ཡང་དག་འབྱུང་། །སྦྱོར་བ་གསང་བར་གནས་པའི་རྩ། །དེ་ཡི་སྣ་ཚོགས་ངོ་མཚར་བ། །འདི་ནི་བདེ་ཆེན་ཡེ་ཤེས་སོ། །ཞེས་དང་། རང་གཞུང་ལས་སྣང་སྲིད་བདེ་ཆེན་ཀ་པཱ་མརཿ ཞེས་སོ། །དེ་ཡང་དུམ་བུ་གཅིག་པ་མཆོག་ཏུའོ། །ཚོགས་ཀྱི་འཁོར་ལོ་ནི། དམ་ཚིག་གཅིག་པའི་མཛའ་བ་ཕོ་མོ་ཚོགས་ནས་བདེ་བ་ཆེན་པོའ་ིཡེ་ཤེས་ཉམས་སུ་མྱོང་བའི་འཁོར་ལོ་ལ་ལོངས་སྤྱོད་པ་དེའི་ཡོ་བྱད་དེ་དག་ནི་ཤ་ལྔ་དང་བདུད་རྩི་ལྔའི་རང་བཞིན་དུ་གཙང་རྨེ་བླང་དོར་མེད་པའི་རིགས་ལྔའི་དམ་ཚིག་བྱིན་གྱིས་བརླབ་སྟེ། ཀུན་འདུས་རིག་པའི་མདོར། བ་གླང་ཁྱི་དང་རྟ་ཤ་དང་། །མི་ཤ་གླང་ཆེན་ཤ་ལ་སོགས། །ཟོས་ན་ཡོན་ཏན་ཐམས་ཅད་འགྲུབ། །བདག་ཅག་རྣམས་ཀྱི་དམ་ཚིག་ལྔ། །ཞེས་དང་། ཐལ་བ་ལས། བདུད་རྩི་ལྔ་ནི་རིགས་ལྔའི་དངོས། །དྲི་ཆེན་དྲི་ཆུ་བྱང་ཆུབ་སེམས། །ཞེས་དང་། གསང་འདུས་ལས། ཤ་ཆེན་དམ་ཚིག་ཆེན་པོ་ནི། རྡོ་རྗེ་གསུམ་མཆོག་འགྲུབ་པར་འགྱུར། །ཞེས་དང་། ལེ་ལག་ལས། བདུད་རྩི་ཡེ་ནས་དག་པའི་ཆོས། །བླང་དོར་མེད་པས་ཀུན་ལས་འདས། །ཡེ་བསྲུང་ཆེན་པོའ་ིདམ་ཚིག་ཏུ། མཁས་པས་དང་དུ་བླང་བར་བྱ། །ཞེས་གསུངས་སོ། །དེ་དག་ཀྱང་ཐོད་པ་གསུམ་གྱི་སྒྱེད་པུར་ཀ་པཱ་ལའི་ནང་རྫས་ཨོཾ་ཨ་ཧཱུྃ་འོག་གི་རླུང་མེའི་སྦྱོར་བས་ཞུ་བ་ལས་ཤ་ལྔ་དང་བདུད་རྩི་ལྔར་གྱུར་ཏེ་ཟླ་བའི་ཁ་གཅོད་རྡོ་རྗེ་རྩེ་ལྔ་ཁོང་གསེང་ཅན་ལས་འཕྲོས་པའི་འོད་ཀྱིས་ཡེ་ཤེས་ཀྱི་བདུད་རྩི་སྤྱན་དྲངས་ནས་གཉིས་མེད་དུ་ཐིམ་པས་ངོ་བོ་ཡེ་ཤེས་ཀྱི་བདུད་རྩི་རྣམ་པ་འདོད་ཡོན་གྱི་སྤྲིན་ཕུང་འཆར་བར་བསྒྱུར་རོ། །བདུན་པ་ཚེགས་ཕུད་འབུལ་བ་ལ་གཉིས། སྤྱིར་བསྟན་པ་དང་བྱེ་བྲག་ཏུ་བཤད་པའོ། །དང་པོ་ལ་མཁའ་སྤྱོད་ཀྱི་ཞིང་དང་། ས་སྤྱོད་ཀྱི་ཞིང་གཉིས་ལས། དང་པོ་ནི། །ཧཱུྃ། འོག་མིན་གནས་དང་མཁའ་སྤྱོད་ཞིངཿ སྤྱན་འདྲེན་གྱི་སྐབས། ཞེས་པས་གོང་དུ་བཤད་པའི་ཆོས་ལོངས་སྤྲུལ་གསུམ་གྱི་འོག་མིན་གྱི་གནས་རྣམ་པ་གསུམ་དང་། མཁའ་ལ་སྤྱོད་པ་རང་བཞིན་སྤྲུལ་པའི་སྐུའི་ཞིང་བཅུ་དབུས་དུར་ཁྲོད་མེ་རི་འབར་བ་དང་བཅུ་གཅིག་གོ ། གཉིས་པ་ནི། དཔའ་བོ་མཁའ་འགྲོ་འདུ་བའི་གནས། ཉི་ཤུ་རྩ་བཞི་སྤྲུལ་བའི་ཡུལཿ ཞེས་པས། དཔའ་བོ་དང་མཁའ་འགྲོའ་ིཚོགས་ཐམས་ཅད་འདུ་ཞིང་གནས་པ་ཨོ་རྒྱན་ལ་སོགས་པ་གཙོ་བོ་ཉི་ཤུ་རྩ་བཞི་སྟེ་སངས་རྒྱས་ཀྱི་སྤྲུལ་པ་མང་པོས་འཛིན་པས་ས་སྤྱོད་ཀྱི་ཡུལ་ཁྱད་པར་ཅན་དུ་བཤད་དེ། འཁོར་ལོ་སྡོམ་པ་ལེའུ་ཞེ་གཅིག་པ་ལས། ཀུ་ལུ་ཏ་དང་མ་རུ་དང་། །སིནྡྷའི་ཡུལ་དང་ནཱ་གར། །སུ་ལྦརྞ་དྭི་སོ་རཥྚ། །གྲོ་ཧ་དེ་ཝ་པྲེ་ཏ་པུར། །ཧི་མ་ལ་ཡ་ཀཉྕི་དང་། །ཝཾ་བྷ་ཀའི་ཡུལ་ཀ་ལྐིང་། །ཀཽ་ས་ལ་ཏྲི་ཤ་ཀུན། །ཨེ་ཊེ་ཀ་མ་རུ་པ་དང་། །མ་ལ་ཝ་དང་དཱེ་ཝི་ཀོ་ཏི། །རཱ་མེ་ཤྭ་རི་གོ་ད་ཝར། །ཨེཪྤུ་ཏ་དང་ཨོ་རྒྱན་དང་། །ཛ་ལནྡྷར་པཱུ་ལིར་སོགས། །ཡུལ་འདི་དག་གི་བུ་མོ་གང་། །དཔའ་བོ་གཉིས་མེད་རྣལ་འབྱོར་མ། །ཞེས་སྐུའི་འཁོར་ལོ་ནས་གསུངས་ཀྱང་འདིར་རང་གཞུང་གི་གོ་རིམ་ལྟར་འཆད་ན་སྤྱིར་ཡུལ་འདི་དག་ཚངས་པའི་འཇིག་རྟེན་ནས་རླུང་གི་དཀྱིལ་འཁོར་གྱི་བར་དུ་ཡོད་པར་ཡང་བཤད། རྒྱ་ནག་ལྟ་བུའི་གྲོང་ཁྱེར་ཆེན་པོ་དེར་རྫོགས་པ་ཡང་བཤད། །འཛམ་བུའི་གླིང་དུ་ཡོད་པར་ཡང་བཤད་ཅིང་། དེ་བཞིན་གྲངས་ཀྱང་། དུས་འཁོར་ལས། གླིང་བཞི་གནས། གླིང་ཕྲན་ཉེ་གནས། ཆུ་ཕྱེད་ནང་མའི་ཕྱོགས་བཞི་ཞིང་། །མཚམས་བཞི་ཉེ་ཞིང་། །ཕྱི་མའི་ཕྱོགས་འདུན་པ་མཚམས་ཉེ་འདུན་མེ་ཕྱེད་ནང་མའི་ཕྱོགས་འདུ་བ་མཚམས་ཉེ་འདུ། ཕྱོགས་ཕྱིའི་ཕྱོགས་འཐུང་སྤྱོད། མཚམས་ཉེ་ཐུང་། རླུང་ཕྱེད་ནང་མའི་ཕྱོགས་དུར་ཁྲོད། མཚམས་ཉེ་བའི་དུར་ཁྲོད། ཕྱེད་ཕྱེད་ཕྱི་མར་དུར་ཁྲོད་བརྒྱད་དེ་ཡུལ་ཉེར་བཞི་དང་། བརྟག་གཉིས་སུ་གོང་དུ་བཤད་པའི་གནས་སོ་གཉིས་དང་། ཕྱག་མཐིལ་ལས་ཡུལ་ཉེར་བརྒྱད་བཤད་ཅིང་འདིར་གཞུང་དང་མཐུན་པར་བདེ་མཆོག་གི་རྗེས་སུ་འབྲངས་ཏེ་འཛམ་བུ་གླིང་དུ་ཡོད་པར་བཤད་ན། ཛ་ལནྡྷ་ར་ནི་ཁ་ཆེ་དང་རྒྱ་གར་ཀྱི་མཚམས་དྷོ་ལ་མེ་འབར་ཡོད་པའི་ས་ལྷ་མོ་འབར་བའི་གདོང་ཅན་མ་བྱ་བ་མཚན་མའི་གཟུགས་སུ་གནས་པ་ཡོད་པ་འདིའི་ཀུ་པ་ནའི་དགོན་པར་བསྡུ་བ་གསུམ་པ་ཡང་གྱིས། པུལླི་ར་མ་ཎ་ནི་ཀ་ལི་ཏ་ཀའི་ཡུལ་གྱི་མཐའ་སྔོན་རྒྱལ་པོ་རཱ་མ་ཎས་བཟུང་བའི་ས་ཞིག་ཡིན་ཞེས་སོ། །ཨཪྤུ་ཏ་ལྷོ་ཕྱོགས་ཀྱི་རྒྱུད་ན་ཡོད་པར་གྲགས། འགའ་ཞིག་རི་འབྲང་རྒྱས་ལྟར་མཐོ་བའི་མཐའ་ན་ཌ་ཀྱི་བསྐོར་བར་འདོད་དོ། །ར་མི་ཤྭ་ར་ནི་ཡི་དྭགས་དངོས་སུ་རྒྱུ་བ་ལ་འདོད། ཁ་གཅིག་འཛམ་བུའི་གླིང་གསོག་ཡུལ་ན་ར་མི་ཤྭ་ར་ཞེས་བྱ་རྒྱལ་པོར་མ་ཎས་བྱེ་མ་ལས་བྱས་བའི་དབང་ཕྱུག་གི་རྟེན་དགའ་བྱེད་དབང་ཕྱུག་བྱ་བ་ཡོད་པ་ལ་འདོད་དོ། །ཨོ་རྒྱན་ཡུལ་མི་གོང་དུ་བཤད་པ་ལྟར་དཔའ་བོ་མཁའ་འགྲོ་ཐམས་ཅད་ནམ་མཁའ་ལ་འགྲོ་བའི་འཕུར་འགྲོ་བས་བྱ་བ་དེ་ན་རྡོའ་ིཆོས་འབྱུང་ཡོད་པའོ། །གཽ་ཏ་ཝ་རི་ནི་ལྷོ་ཕྱོགས་དཔའ་གྱི་རི་བོའ་ིཆུ་བོ་གཽ་ཏ་ཝ་རི་འབབ་པའི་ས། སྔོན་དེ་ན་ཆུ་མེད་པར་དྲང་སྲོང་ཞིག་གིས་བ་བསད་པའི་མཆོད་སྦྱིན་བྱས་པས་ཆུ་བྱུང་བའི་མཆོད་སྦྱིན་ཡང་ཟེར་རོ། །དེ་ཝི་ཀོ་ཊ་ནི་རྡོ་རྗེ་གདན་གྱི་བྱང་ཤར་ན་ལྷ་མོ་མཁར་ཞེས་པ་རྡོའ་ིརེ་མ་ཏིའི་ཕྱག་རྒྱ་ཡོད་པའོ། །ཁ་གཅིག་ཨོ་ཌི་བི་ཤའི་བྱང་ན་ཡུལ་བ་ལེ་ཏྲ་བྱ་བའི་གྲོང་ཁྱེར་དཔལ་ལྷ་མོ་མཁར་ཅེས་པ་ན་ལྷ་མོ་ཙ་རྩི་ཀ་གནས་པ་ལ་བཞེད་དོ། །མ་ལ་ཝ་ནི་ཙན་དན་བཟང་པོ་སྐྱེ་བའི་ས་ལ་འདོད་པ་དང་། ཡང་འགའ་ཞིག་ལྷོའ་ིགླིང་ཕྲན་འདོད་པ་དང་། ཁ་ཅིག་ཆུ་བོ་སིནྡྷའི་བྱང་ཕྱོགས་ན། མ་ལ་ཝ་ཞེས་གྲོང་ཁྱེར་ཨུ་ཙ་ཡ་ནིའི་རྒྱལ་པོ་ཉི་མ་རྣམ་པར་གནོན་པའི་སར་དབང་ཕྱུག་གིས་རྟེན་ཡོད་པ་ལ་འདོད་དོ། །འདི་བརྒྱད་ནི་སྔོན་ནམ་མཁའ་ནས་བྱུང་བའི་ལྷ་ས་བཞི་དང་། དྲི་ཟས་བཞིས་བཟུང་བས་ས་བླར་གྲགས་ཤིང་ཐུགས་ཀྱི་འཁོར་ལོའ་ིདཔའ་བོ་དང་རྣལ་འབྱོར་མ་དག་གནས་པའི་ས་སྟེ་སྐུ་མདོག་དང་དག་པ་ནི་རྒྱས་པར་འོག་ཏུ་ལུས་དཀྱིལ་སྐབས་འཆད་དོ། །ལམྤ་ཀ་ནི་ནུབ་ཕྱོགས་ན་གྲོང་ཁྱེར་འབུམ་ཕྲག་བཞི་ཡོད་པའོ། །འགའ་ཞིག་གར་ལོག་གི་ཡུལ་དབྱངས་ཅན་ཞེས་པར་བྲག་དང་ཆུ་འཐབ་བའི་བར་ན་ཡོད་པར་གྲགས། །ཀ་མ་རུ་ནི་རྒྱ་གར་ཤར་ཕྱོགས་འདོད་པའི་གཟུགས་ཅན་ཞེས་ར་བའི་གྲོང་ཁྱེར་རོ། །ཁ་གཅིག་བྱང་ཤར་ཀ་མ་རུ་ཞེས་བྱ་བའི་གྲོང་ཁྱེར་ན་ལྷ་མོ་འདོད་པའི་གཟུགས་ཅན་མོ་ཞེས་བྱ་བ་མོ་མཚན་གྱི་གཟུགས་སུ་གནས་པ་ལ་འདོད་དོ། །ཨོ་ཌི་ནི་བ་ལེ་ཏྲའི་གྲོང་ཁྱེར་ལྷ་མོ་ཙི་རྩ་ཀ་གནས་པའི་རྟེན་ཡོད་པ་དེའོ། །ཀོ་ས་ལ་ལྷོ་ནུབ་མཉན་ཡོད་དང་ཉེ་བའི་ས་ལན་ཛི་ཀོ་ས་ལའོ། །ཀ་ལིངྐ་ནི་ལྷོ་ཕྱོགས་རྒྱ་ཚོའི་འགྲམ་ཏི་ལིང་ཀ་དང་ཉེ་བའི་ཡུལ་ལོ། །ཀཉྩི་ཀ་ནི་ལྷོ་ནུབ་བ། ཡང་ན་རཱ་མི་ཤ་རཱའི་བྱང་ཤར་ན་གྲོང་ཁྱེར་ཆེན་པོ་ཡོད་ཅེས་སོ། །ཧི་མ་ལ་ཡ་ནི་རི་བོ་གངས་ལྡན་ཏེ་ཤམྦྷ་ལོའ།ོ། འདི་བརྒྱད་ནི་སྔོན་ས་སྟེང་ནས་བྱུང་བའི་གནོད་སྦྱིན་གྱི་ས་གཞི་དང་། སྲིན་པོས་བཞི་བཟུང་བས་ས་སྟེང་དུ་གྲགས་ཤིང་། གསུང་གི་འཁོར་ལོའ་ིདཔའ་བོ་མཁའ་འགྲོ་རྣམས་གནས་སོ། །པྲེ་ཏ་པུ་རི་ནི་ཡི་དྭགས་ཀྱི་གྲོང་སྟེ་བོད་ཀྱི་ཏེ་སེའོ། །གྲྀ་ཧཱ་དཱེ་ཝ་ནི་ལྷ་ས་བཟུངསཔ་སྟེ་འདོད་པའི་ལྷ་གནས་ཞིག་གོ ། མ་རུ་ནི་སིནྡྷུའི་ཤར་ཕྱོགས་ན་གནས་སོ། །སཽརཥྚ་ན་ནུབ་ཕྱོགས་སོ་བ་ནཱ་ཐ་ཞེས་པ་དབང་ཕྱུག་གི་རྟེན་ཡོད་པའོ། །སུ་ཝརྞ་དཱི་བ་ནི་གསེར་གྱི་གླིང་ནི་རྒྱ་མཚོའི་བར་གྱི་གླིང་ཕྲན་ཏེ་མི་གནས་པར་བཤད། ནཱ་གར་ནི། རྡོ་རྗེ་གདན་གྱི་བྱང་གངྒའི་འགྲམ་པ་ཏ་ལི་སུ་ཏྲ་ནཱ་གར་བྱ་བའི་ཡུལ་ལོ། །སཱུ་ནཱ་གར་བྱ་བའི་ཡུལ། ཀུ་ལུ་ཏ་ནི་ལྷོ་ནུབ་རྡོ་སྤུས་མོ་ལྟ་བུ་ཡོད་པ་འགའ་ཞིག་བྲག་ཕུག་རྡོ་རྗེའི་ཆོས་འབྱུང་གི་མཚན་པ་རི་སྤུས་མོ་འདྲ་བ་གཉིས་ཀྱི་བར་ན་ཡོད་པ་ལ་འདོད་དོ། །སིནྡྷུ་ནི། ཆུ་བོ་སིནྡྷུ་འབབས་པའི་ས་ཨོ་རྒྱན་དང་ཉེ་བར་ཡོད་དེ་སིནྡྷུ་ཡང་དངོས་ནི་འདི་ནས་བྱུང་བའོ། །འདི་བརྒྱད་ནི་སྔོན་ས་འོག་ནས་བྱུང་བའི་ཀླུས་བཞི་དང་། ལྷ་མིན་གྱིས་བཞི་བཟུང་བས་ས་འོག་ཏུ་གྲགས་ཤིང་སྐུའི་འཁོར་ལོའ་ིདཔའ་བོ་མཁའ་འགྲོ་རྣམས་གནས་སོ། །གཉིས་པ་བྱེ་བྲག་ཏུ་རྒྱས་པར་བཤད་པ་ལ་གསུམ་གྱི་དང་པོ་ཐུགས་ཀྱི་འཁོར་ལོ་ལའང་གསུམ་སྟེ་དཔའ་བོ་མཁའ་འགྲོ་རྣམས་རྩ་གནས་སུ་བཞུགས་ཚུལ་ཚུལ་ཇི་ལྟ་བུས་སྤྱན་དྲངས། ཚོགས་ཀྱི་འཁོར་ལོ་འབུལ་བའི་ཚུལ་གྱི་དང་པོ་ནི་ནང་ལྟར་རྡོ་རྗེ་ཕུང་པོའ་ིགྲོངཿསྤྱི་བོ་ཛ་ལནྡྷ་ར་ལཿ སྨིན་མཚམས་པུལླེ་ར་མ་ཎཿ ལྟག་པའི་རྩ་ཁམས་ཨཪྤུ་ཏཿ མཛོད་སྤུ་རཱ་མི་ཤྭ་ར་དངཿ རྣ་བ་གཡས་པ་ཨོ་རྒྱན་ཡུལཿ གཡོན་པ་གཽ་ཏ་ཝ་རིའི་ཞིངཿ མིག་གཉིས་དེ་ཝི་ཀོ་ཊ་དངཿ ཕྲག་པ་མཱ་ལ་ཝ་བརྒྱད་ནཿ ཞེས་པས་གོང་དུ་བཤད་པའི་ཕྱི་རོལ་གྱི་འཛམ་བུའི་གླིང་ན་ཡོད་པའི་ཡུལ་ཉི་ཤུ་རྩ་བཞི་པོ་ཐམས་ཅད་ནང་ལྟར་ན་རྡོ་རྗེ་ཕུང་པོའ་ིགྲོང་ཁྱེར་ན་རྩ་གནས་ཀྱི་རྣམས་པས་ཚང་སྟེ་དེའི་ཁམས་དཀར་དམར་རྣམས་ཀྱང་དཔའ་བོ་མཁའ་འགྲོའ་ིརང་བཞིན་དུ་གནས་པ་ཡིན་ཏེ ། །དེ་ཡང་རྣམ་མཁྱེན་ཤིང་རྟ་ལས། དེའང་ཐུར་སེལ་གྱི་ལམ་གསུམ་ལྕགས་སྒྲོག་ལྟར་བཅིངས་པའི་རྩ་ལས་དགྱེས་པའི་རྩ་ཆེན་ཉི་ཤུ་རྩ་བཞིའི་སྣང་གཟུགས་པའི་རྩ་མདུད་ཡིག་འབྲུའི་རྣམ་པར་ཡོད་པ་ལ་སྐུ་གསུང་ཐུགས་ཀྱི་བྱེ་བྲག་གིས་གནས་སུ་ཉེ་བར་བརྗོད་ཅིང་དེ་རྣམས་ལས་བྱུང་བའི་ཁམས་ཉི་ཤུ་རྩ་བཞི་པོ་དང་བཅས་པ་ནི་ནང་གི་ཡུལ་ཉི་ཤུ་རྩ་བཞིར་གྲུབ། ཅེས་པས། གཙུག་ཕུད་དམ་སྤྱི་བོར། སྐྲ་རྩེ་ལ་སོགས་པའི་དབྱེ་བས་རྩ་ཕྲ་གཟུགས་མ། སྐྲ་དང་བ་སྤུའི་ཁམས་འབབ་པ། དེ་ཡུལ་ཛཱ་ལནྡྷ་ར། དེའི་ཁམས་དཀར་པོ་ལས་ཀེང་རུས་ཆེན་པོ་དང་། དམར་པོ་ལས་རྣལ་འབྱོར་མ་གཏི་མུག་པའི་མིག་ཅན་མ་དོན་བྱང་ཆུབ་མཆོག་གི་ཆོས་ཚོར་བ་དྲན་པ་ཉེ་བར་བཞག་པའོ། །སྨིན་མཚམས་ཏེ་སྐྲ་སྐྱེ་མཚམས་རྩ་ནང་རྡོ་རྗེ་གསུམ་མི་ཕྱེད་པས་མི་ཕྱེད་མ། སོ་སན་གྱི་ཁམས་འབབ་པ་དེ་ཡུལ་པུལླི་ར་མ་ཎི། དཔའ་བོ་ཐོད་པའི་དུམ་བུ་དང་། རྣལ་འབྱོར་མ་རབ་གཏུམ་མ། དོན་ལུས་དྲན་པ་ཉེར་བར་གཞག་པའོ། །ལྟག་པའི་རྩ་ཁམས་མགོའ་ིརྒྱབ་གཡོན་ཕྱོགས་སུ་བརྟེན་པས་གཡོན་མ། ཤ་འབབ་པ་དེ་ཡུལ་ཨུཏྤ་ཏ། དཔའ་བོ་མཆེ་བ་རྣམ་པར་གཙིགས་པ་དང་དོན་སེམས་དྲན་པ་ཉེ་བར་བཞག་པའོ། །རྣ་བ་གཡས་པར་རྩེ་རྩེ་བ་མོ་པགས་པའི་དྲི་མ་འབབ་པའི་ཡུལ་ཨོ་རྒྱན་ཡུལ། དཔའ་བོ་ཀངྐ་ལ་དང་། རྣལ་འབྱོར་མ་འོད་ལྡན་མོ། དོན་ཆོས་དྲན་པ་ཉེར་བར་གཞག་པའོ། །དེ་དག་གནས་ཏེ་འཁོར་ལོ་བཞིའི་རྩ་བརྒྱད་བརྒྱད་ནས་བྱང་སེམས་དཀར་བའི་ཆ་དང་དམར་བའི་ཆ་བརྒྱད་བརྒྱད་རྒྱུན་དུ་གནས་པས་སོ། །མཛོད་སྤུ་མིག་གཉིས་ཀྱི་དབུས་ཀྱི་ཆ་རྩ་རུས་སྦལ་གཟུགས་ཡོད་པས་རུས་སྦལ་སྐྱེས་མ་རུས་པ་འབབ་དེ་ཡུལ་རཱ་མི་ཤྭ་རར་དཔའ་བོ་འོད་དཔག་མེད་དང་རྣལ་འབྱོར་མ་མིའུ་ཐུང་མའོ། །དོན་མི་དགེ་བའི་ཆོས་སྐྱེས་པ་སྤོང་བའོ། །རྣ་བ་གཡོན་པ། རྩ་ཟླུམ་པོ་ཉིད་ཀྱིས་ཐུང་ངུ་མ། ཞག་འབབ་པ། དེ་ཡུལ་གཽ་ད་ཝ་རི་དཔའ་བོ་སུ་ར་བཻ་རི་དང་། རྣལ་འབྱོར་མ་དཔའ་བོ་བློ་གྲོས་མ། དོན་མི་དགེ་བའི་ཆོས་མ་སྐྱེས་པའི་མི་བསྐྱེད་པའོ། །མིག་གཉིས་གྱི་རྩ་སྲིད་པ་སྒོམ་པས་སྒོམ་པ་མོའ་ིའཇམ་པ་མོ། མཚན་པ་འབབ་པ། དེ་ཡུལ་དཱེ་ཝི་ཀོ་ཊ། དཔའ་བོ་རྡོ་རྗེ་འོད་དང་། རྣལ་འབྱོར་མ་ནམ་མཁའི་དབང་ཕྱུག །དོན་དགེ་བའི་ཆོས་མ་སྐྱེས་པ་བསྐྱེད་དོ། །ཕྲག་པ་གཉིས་ཀྱི་རྩ་བ་དབང་བསྐུར་སྦྱིན་པས་དབང་བསྐུར་སྦྱིན་མ། སྙིང་འབབ། དེ་ཡུལ་མཱ་ལ་དཔའ་བོ་རྡོ་རྗེའི་སྐུ་དང་རྣལ་འབྱོར་མ་ཤིང་གྲིབ་མ། དོན་དགེ་བའི་ཆོས་སྐྱེས་པ་འཕེལ་བར་བྱེད་པའོ། །དེ་བཞིན་རྩ་བརྒྱད་ནི་བྱང་སེམས་དཀར་དམར་རེས་འགའ་གནས་པས་ཉེ་གནས་སོ། །གཉིས་པ་ཚུལ་ཇི་ལྟ་བུས་སྤྱན་འདྲེན་པ་ནི། བཞུགས་པའི་དཔའ་བོ་རྣལ་འབྱོར་མཿ མཁའ་འགྲོ་དང་ནི་མཁའ་འགྲོ་མཿ ཚོགས་ཀྱི་འདུ་བར་གཤེགས་སུ་གསོལཿ དབུ་སྐྲ་ཐོར་ཚུགས་ལྡེམ་སེ་ལྡེམཿ ལྕང་ལོའ་ིཟར་བུ་ཏ་ལ་ལཿ སྙན་ཆ་གདུབ་བུ་ཀྱི་ལི་ལིཿ རུས་རྒྱན་གཡེར་ཁ་ཁྲོ་ལོ་ལོཿ ཅང་ཏེའུ་དྲིལ་བུའི་སྒྲ་དང་བཅསཿ རྡོ་རྗེའི་གླུ་དང་གར་ལ་རོལཿ དེ་ལྟར་ཐུགས་ཀྱི་འཁོར་ལོའ་ིལྷ་ཐམས་ཅད་ནམ་མཁའ་ལ་སྤྱོད་པའི་ཚུལ་གྱིས་བཞུགས་ཤིང་། ཐམས་ཅད་ཀྱང་སྐུ་མདོག་སྔོན་པོ། ཀེང་རུས་ཆེན་པོ་ལ་སོགས་པ་དཔའ་བོ་བརྒྱད་དང་། གཏུ་མིག་མ་ལ་སོགས་ཏེ། རྣལ་འབྱོར་མ་ཡི་མངོན་རྟོགས་གྲུབ་ཆེན་ལུ་ཡི་པས། དཔའ་བོ་ཐམས་ཅད་ཞལ་གཅིག་ལ་སྤྱན་གསུམ་པ་ཕྱག་བཞི། རལ་པའི་ཐོར་ཚུགས་དང་། དར་དཔྱངས་ཅན། འཁྱུད་པའི་ཕྱག་གཉིས་ན་རྡོ་རྗེ་དང་དྲིལ་བུ། ཕྱག་གཡོན་པར་ཁ་ཊཱཾ་ཀ། གཡས་པ་ན་ཌ་མ་རུ། ཕྱག་རྒྱ་ལྔ་ལ་སོགས་པ་དང་ལྡན་པའི་སྐུ་གཡས་བརྐྱང་གི་བཞུགས་པའོ། །དེ་བཞིན་དུ་ལྷ་མོ་ཞལ་གཅིག་ཕྱག་གཉིས་མ། །འཁྱུད་པའི་ཕྱག་གིས་ཐོད་པ་དང་། །གདུག་ལ་སྡིག་མཛུབ་གྲི་གུག་ཅན། །སྤྱན་གསུམ་དྲག་པོའ་ིགཟུགས་ཅན་མ། །སྐྲ་གྲོལ་བས་ནི་རྣམ་པར་མཛེས། །གཉིས་མེད་སྦྱོར་བས་སྙོམ་པར་བཞུགས། །ཕྱོགས་ཀྱི་ན་བཟའ་བསྣམས་པའི་མཆོག །མགུལ་རྒྱན་ནོར་བུ་དཔུང་བརྒྱན་དང་། །རྣ་ཆ་དང་ནི་ཚངས་སྐུད་ཅན། །མགོ་བོའ་ིཕྲེང་བས་མགུལ་བརྒྱན་པ། །སྐེ་རགས་སིལ་སིལ་སྒྲ་སྒྲོགས་པའོ། །ཞེས་སོ། །དེ་དག་གི་འཁོར་དུ་ནམ་མཁའ་ལ་འགྲོ་བའི་དཔའ་བོ་སྐྱེས་པའི་གཟུགས་ཅན་དང་ནི། མཁའ་འགྲོ་མ་སྟེ་བུད་མེད་ཀྱི་གཟུགས་ཅན་བསམ་གྱིས་མི་ཁྱབ་པ་དང་། །དེ་དག་ཕྱི་འདོད་ཡོན་རོལ་པའི་ཚོགས་ཀྱི་འདུ་བར་ཡུལ་སོ་སོ་ནས། གཤེགས་སུ་གསོལ་བར་བསྐུལ་བ་དང་། ནང་ཨ་ཧཾ་མཉམ་སྦྱོར་གྱི་ཚོགས་གྱི་འདུ་བར་རྩ་ཁམས་སོ་སོའ་ིདཔའ་བོ་མཁའ་འགྲོའ་ིརང་བཞིན་ཁམས་དཀར་དམར་འཁོར་ལོ་བཞིའི་གནས་སུ་དགའ་བཞི་ཉམས་སུ་མྱོང་ཕྱིར་གཤེགས་སུ་གསོལ་བ་དང་། གསང་བ་རྩ་གནས་རྣམས་ཀྱི་མདུད་པ་གྲོལ་ནས་མ་རིག་བཅུ་གཉིས་རིམ་གྱིས་དག་ནས་ས་ལམ་གྱི་ཡོན་ཏན་རྫོགས་པར་བསྐུལ་བའོ། །དེ་ལྟར་འབྱོན་པའི་ཡབ་རྣམས་རྩའི་མདུད་པ་ཐམས་ཅད་གྲོལ་བྱང་སེམས་གཙུག་ཏོར་གྱི་རྩེར་སོན་པ་དབུ་སྐྲ་རལ་པའི་ཐོར་ཚུགས་ལྡེམ་སེ་ལྡེམ་པར་གཡོ་བ་ལྟེ་བ། ངེས་བརྗོད་རྩེ་མོ་ལས། རོ་མ་རྐྱང་མ་ཀུན་འདར་མ། །མདུད་པ་འཁོར་བའི་འཁྲུལ་སྣང་སྟེ། གྲོལ་བས་ཡེ་ཤེས་མྱ་ངན་འདའོ། །ཞེས་སོ། །ཡུམ་རྣམས་ཀྱང་ཆོས་རྣམས་ལ་བདག་ཏུ་འཛིན་པ་གྲོལ་བའི་དབུ་སྐྲ་ལྷོད་འཆིངས་སུ་གྲོལ་བའི་ལྕང་ལོའ་ིཟར་བུ་སྐུ་རྒྱབ་དུ་ཏ་ལ་ལ་སྟེམ་གཟིངས་པར་བཤོད་གནས་པ་དང་། ཡབ་ཡུམ་གཉིས་ཀ་བདེ་བ་ཆེན་པོ་གཡོས་པས་ཕན་ཚུན་འཁྱུད་པ་ལ་སོགས་པའི་ཕྱག་རྒྱས་ནོར་བུས་བརྒྱན་པའི་སྙན་ཆ་དང་ཕྱག་ཞབས་ཀྱི་གདུབ་བུ་ཀྱི་ལི་ལི་འགལ་མེད་བཞིན་དུ་འཁོར་བ་དང་། དེ་བཞིན་རུས་པའི་རྒྱན་དང་གཡེར་ཁ་དང་དྲིལ་ཆུང་ཀུན་ཀྱང་ཕན་ཚུན་ཐབས་པའི་སྒྲ་ཁྲོལ་ལོ་ལོ་སྒྲོགས་ཅིང་། ཡབ་དང་འཁོར་ཚོགས་ཀྱི་ཕྱག་གི་ཅང་ཏེའུ་དང་། དྲིལ་བུ་ཀུན་ཀྱང་འགྲོ་བ་བདེ་ཆེན་གྱི་ལམ་ལ་སྦྱོར་ཕྱིར་སྒྲ་འཁྲོལ་བ་དང་བཅས་ཏེ། ཨེ་མ་ཀ་རི་ཀ་རི་ལ་སོགས་པ་མ་སྐྱེས་པས་ན་མི་འགག་པ་ལ་སོགས་ཀྱི་ངག་རྡོ་རྗེའི་གླུ་དང་། སྐུ་ལུས་ཕྱག་རྒྱ་གར་གྱི་རྣམ་པ་ལ་རོལ་བའོ། །གསུམ་པ་ཚོགས་ཀྱི་འཁོར་ལོ་འབུལ་བ་ནི། །འདོད་ཡོན་ལོངས་སྤྱོད་ཚོགས་སུ་འབུལཿ དམ་ཚིག་ཉམས་པ་ཐོ་ལོ་བཤགསཿ ཕྱི་ནང་བར་ཆད་དབྱིངས་སུ་སྒྲོལཿ མཆོག་དང་མཐུན་མོང་དངོས་གྲུབ་སྩོལཿ ཞེས་པས། ཚོགས་ཕུད་དང་པོ་མིག་གི་ཡུལ་དུ་གཟུགས་མཛེས་པ། རྣ་བའི་ཡུལ་དུ་སྒྲ་སྙན་པ། སྣའི་ཡུལ་དུ་དྲི་ཞིམ་པ། ལྕེའི་ཡུལ་དུ་རོ་བྲོ་བ་ལུས་ཀྱི་ཡུལ་དུ་རེག་བྱ་མཇམ་པ། ཡིད་ཀྱི་ཡུལ་དུ་བདེ་སྟོང་ཡེ་ཤེས་ཆེན་པོའ་ིདགའ་བ་ལས་མི་འདའ་བ་དུ་མས་སྤྲུལ་པའི་ལྷ་མོའ་ིསྤྲིན་འདོད་ཡོན་དྲུག་གི་ལོངས་སྤྱོད་ཟད་མི་ཤེས་ཚོགས་སུ་འབུལ་བ་སྟེ། བདེ་མཆོག་ལས། །སྔགས་པས་རྟག་ཏུ་མཉམ་བཞག་པས། །མཚན་མ་ནམ་མཁའི་གོས་ཅན་བྱས། སྐྱེས་པའི་གལ་ཏེ་གཡོན་པ་རུང་། །རྣལ་འབྱོར་མ་ཀུན་དཔའ་བོ་མཉེས། །ཕྱག་རྒྱ་གར་གྱི་མཆོད་པ་ཡིས། །རང་བྱུང་རྟག་ཏུ་མཆོད་ན་ནི། །མ་ལུས་ལུས་པ་མེད་འགྲུབ་ཅིང་། །གཡོན་པའི་མཆོད་པ་རབ་ཏུ་འགྲུབ། །ཞེས་རྟགས་ཀྱི་སྒོ་ནས་མཁའ་འགྲོ་མ་ཚོགས་དང་། །ཀུན་སློང་གི་སྒོ་ནས་གཡོན་པ་ཞེས་པ་བསྟན་པར་རིག་པར་བྱའོ། །ཞེས་རྗེ་བླ་མས་གསུང་ངོ་། །གཉིས་པ་དམ་རྫས་བདུད་རྩི་ཕུལ་བས་རྩ་བའི་དམ་ཚིག་སྐུའི་ཕྱིའི་ཕྱི་སྲོག་མི་གཅོད་པ་སོགས་དགུ ། གསུང་གི་དགུ་ཐུགས་ཀྱི་དགུ་སྟེ་ཉེར་བདུན་དང་། །ཡན་ལག་གི་དམ་ཚིག་ཉི་ཤུ་རྩ་ལྔ། །མེད་པ། ཕྱལ་ཁ་ལྷུན་གྲུབ་གཅིག་པུ་ཏེ་དེ་དག་ལས་འདས་པ་དང་ཉམས་ཆགས་ཐམས་ཅད་མཐོལ་ལོ་བཤགས་སོ་ཞེས་སྟོབས་བཞིའི་སྒོ་ནས་བཤགས་པ་དང་། གསུམ་པ་ཕྱིའི་བར་ཆད་འབྱུང་བ་གཅན་གཟན་དུག་མཚོན་རྒྱལ་པོའ་ིཆད་པ་སོགས་དང་། ནང་གི་བར་ཆད་ནད་གདོན་རྣམ་གཡེང་འདུ་འཛིན་སོགས་དང་། གསང་བའི་བར་ཆད་ཉོན་མོངས་པ་དང་ཤེས་བྱའི་སྒྲིབ་པར་གྱུར་པ་སྟེ་མདོར་ན་བདག་ལྟའི་དབང་གིས་ཅི་བྱུང་བ་ཐམས་ཅད་ཆོས་ཀྱི་དབྱིངས་སྐྱེ་བ་མེད་པའི་ཀློང་དུ་སྒྲོལ་བ་སྟེ། ཧེ་རུ་ཀ་གལ་པོ་ལས། །དང་པོ་འདོད་ཡོན་དྲུག་གིས་མཆོད། །གཉིས་པ་དམ་རྫས་བདུད་རྩིའི་བཤགས། །གསུམ་པ་དགྲ་བགེགས་གཟུགས་ཕུང་སྟོབས། །ཞེས་དང་། རང་གཞུང་དཔལ་ཆེན་འདུས་པ་ལས། །སངས་རྒྱས་དམ་ཚིག་བླ་ན་མེད། ཅེས་སོགས་དང་པོ་དང་། གང་ཞིག་འཁྲུལ་པར་གྱུར་པ་དེ་ནས་བཟུངཿ ཞེས་གཉིས་པ་དང་། ཨེ་ལས་ཐར་མེད་སྲིད་པའི་འབྲུབ་ཁུང་དུ། ཞེས་སོགས་སྒྲལ་སྟོབས་བསྟན་པའི་དོན་རྣམས་ཀྱང་ཁོང་དུ་ཆུད་པར་བྱའོ། །དེ་ལྟར་ཐུགས་དམ་སྐོང་ནས་མཆོག །ཁ་སྦྱོར་ཡན་ལག་བདུན་ལྡན་དང་། །ཐུན་མོང་གྲུབ་པ་བརྒྱད་ལ་སོགས་པས་ལམ་དང་འབྲས་བུའི་ཡོན་ཏན་མཐའ་དག་གི་དངོས་གྲུབ་སྩོལ་བར་མཛོད་ཞེས་པའོ། །གཉིས་པ་གསུང་གི་འཁོར་ལོ་ནི་ལོངས་སྤྱོད་འཁོར་ལོ་ལམྤ་ཀཿ མཆན་དང་མཁལ་ཁུང་ཀ་མ་རུཿ ནུ་མ་གཉིས་ནི་ཨོ་ཊི་སྟེཿ ལྟེ་བ་ཏྲི་ཤ་ཀུ་ནའི་གྲོངཿ སྣ་ཡི་རྩེ་མོ་ཀོ་ས་ལཿ ཡར་རྐན་ཀ་ལིངྐ་ཡི་ཡུལཿ སྙིང་ཁ་ཀཉྩི་ཀ་དང་ནིཿ ཧི་མ་ལ་ཡའི་གྲོང་ཁྱེར་ནཿ བཞུགས་པའི་དཔའ་བོ་རྣལ་འབྱོར་མཿ ཞེས་པས་མགྲིན་པ་ལོངས་སྤྱོད་འཁོར་ལོ་ན་རྩ་བ་མིན་དང་འདྲ་བར་ཚ་བས་ན་ཚ་བ་མ། ལྟོ་བ་འབབ་པ། དེའི་ཡུལ་ལམ་པ་ཀར། དཔའ་བོ་རྡོ་རྗེ་བཟང་པོ་དང་། རྣལ་འབྱོར་མ་ཤིན་ཏུ་བཟང་མོ། །དོན་བརྩོན་འགྲུས་ཀྱི་དབང་པོའ།ི ། མཆན་དང་མཁལ་ཁུར་རྩ་གཉིས་ཉོན་མོངས་སུན་འབྱིན་པས་སྐྱོན་ལྡན་མ། མིག་འབབ། ཡུལ་ཀ་མ་རུ། དཔའ་བོ་མྱུ་གུ་ཅན་དང་། རྣལ་འབྱོར་མ་སྲུང་མ་དོན་འདུན་པའི་རྫུ་འཕྲུལ་གྱི་རྐང་པའོ། །ནུ་མ་གཉིས་ཀྱི་རྩ་ལུས་གཟུང་བསྐྱེད་པར་བྱེད་པས་འཇུག་པ་མ། འཁྲིས་པ་འབབ། དེ་ཡུལ་ཨོ་ཊེ་སྡེ་དཔའ་བོ་རྡོ་རྗེ་རལ་པ་ཅན་དང་། རྣལ་འབྱོར་མ་འཇིགས་བྱེད་ཆེན་མོ། །དོན་བརྩོན་འགྲུས་ཀྱི་རྫུ་འཕྲུལ་གྱི་རྐང་པ། ཕྱི་མ་འདི་གཉིས་འཁོར་ལོ་བཞིའི་རྩ་བརྒྱད་ནས་བྱང་སེམས་གནས་པ་ལ་བརྟེན་ནས་བདེ་བ་ཆེན་པོའ་ིས་ལ་སྤྱོད་པས་ཞིང་ངོ་། །ལྟེ་བར་རྩ་ཐམས་ཅད་བསྐྱེད་པར་བྱེད་པས་མ་མོ་གློ་བར་འབབ་པ། གློ་འབབ་མ། དེ་ཡུལ་ཏྲི་ཤ་ཀུ་ནི། དཔའ་བོ་རྡོ་རྗེ་ཧཱུཾ་མཛད་དང་། །རྣལ་འབྱོར་མ་ཆང་འཐུང་མ་དོན་སེམས་ཀྱི་རྫུ་འཕྲུལ་གྱི་རྐང་པ། །འདི་གཉིས་བདེ་བ་ཆེན་པོ་ལ་རེས་འགའ་ལོངས་སྤྱོད་པས་ཉེ་ཞིང་ངོ་། །ཁའི་ཡ་རྐན་རྩ་ཞི་བ་ཉིད་ཀྱིས་བསིལ་སྦྱིན་མ། ཆུ་རྒྱུས་འབབ་པ། དེ་ཡུལ་ཀ་ལིངྒ་། དཔའ་བོ་རབ་ཏུ་བཟང་པོ་དང་། རྣལ་འབྱོར་མ་སྔོ་སངས་ལྷ་མོ། །དོན་དད་པའི་དབང་པོ། །འདི་དང་གོང་གི་ལམྤ་ཀ་གཉིས་བདེ་བ་ཆེན་པོ་ལ་བརྟེན་ནས་རྣམ་རྟོག་རྟག་ཏུ་འཁྲུད་པས་མཚན་རྡོ་ཧའོ། །སྙིང་ཁའི་རྩ་ཟླ་བ་ལྟ་བུས་ན་འབབ་པའི་ཚད་མའམ་གཞོལ་བ། བཤང་བ་འབབ་པ། དེ་ཡུལ་ཀཉྩི་ཀ། དཔའ་བོ་འཇིགས་བྱེད་ཆེན་པོ་དང་། རྣལ་འབྱོར་མ་རྟ་རྣམ། དོན་དྲན་པ་ཡང་དག་བྱང་ཆུབ་ཀྱི་ཡན་ལག་གོ་དེ་ཉིད་དང་ཡང་ནི་དྲན་པའི་ཆ་རྩ་ས་བོན་གྱི་མཛོད་དབང་པོའ་ིསྒོ་ང་གཉིས་སྐྲ་མཚམས་འབབ་པ། དེ་ཡུལ་ཧི་མ་ལ་ཡའི་གྲོང་ཁྱེར་དཔའ་བོ་མིག་མི་བཟང་དང་། རྣལ་འབྱོར་མ་མཁའ་འགྲོ་གདོང་མ་སྟེ། དོན་ཆོས་རབ་རྣམ་འབྱེད་བྱང་ཆུབ་ཀྱི་ཡན་ལག །འདི་གཉིས་རྣམ་རྟོག་རེ་འགའ་འཁྲུངས་པས་ཉེ་བའི་ཚན་དྷོ་གསུང་གི་འཁོར་ལོའ་ིལྷ་ས་ལ་སྤྱོད་པའི་ཚུལ་གྱིས་བཞུགས་པའི་རྣལ་འབྱོར་མ་ཀུན་ཀྱང་ཐམས་ཅད་ཀྱང་སྐུ་མདོག་དམར་པོའ།ོ ། མཁའ་འགྲོ་དང་ནི་མཁའ་འགྲོ་མཿ མན་གོང་བཞིན་ནོ། །གསུམ་པ་སྐུའི་འཁོར་ལོ་ནི། །མཚན་མ་སྟེ་ཏ་པུ་རིའི་ཞིངཿ བཤང་ལམ་གྲི་ཧཱ་དཱེ་ཝའི་ཡུལཿ མཐེ་བོང་མ་རོ་བརླ་རཥྚཿ བྱིན་བསུ་ཝ་རྞ་དཱི་ཝཿ སོར་མོ་བཅུ་དྲུག་ནཱ་ག་རཿ སྤུས་མོ་ཀུ་ལནྟ་དང་ནིཿ བོལ་གོང་སིནྡྷུའི་གྲོང་ཁྱེར་ནཿ བཞུགས་པའི་དཔའ་བོ་རྣལ་འབྱོར་མཿ ཞེས་པས། མཚན་མ་ནི་རྩེ་བེམ་པོས་བསྡུས་པའི་གཟུགས་ཅན་མའམ་གཟུགས་བཟང་མ། བད་ཀན་ནཾ་རེག་བྱ་འབབ་པ། །དེ་ཡུལ་པྲེ་ཏ་པུ་རིའི་ཞིང་ཁམས་དཔའ་བོ་སྟོབས་པོ་ཆེ་དང་། རྣལ་འབྱོར་མ་འཁོར་ལོའ་ིཤུགས་ཅན་དོན་ཏིང་ངེ་འཛིན་བྱང་ཆུབ་གྱི་ཡན་ལག་གོ ། གཤང་པའི་ལམ་རྩ་མཉམ་པའི་དངོས་པོ་སྤྱི་མ། རྣག་འབབ་པ། དེ་ཡུལ་གྲི་ཧ་དཱེ་ཝའི་ཡུལ་དཔའ་བོ་རིན་ཆེན་རྡོ་རྗེ་དང་། རྣལ་འབྱོར་མ་དུང་བསྐྱེད་མ། །དོན་བརྩོན་འགྲུབ་བྱང་ཆུབ་ཀྱི་ཡན་ལག་འདི་གཉིས་གོང་གི་རྣམ་རྟོག་འཁྱུད་པ་ལ་བརྟེན་ནས། དེ་ཁོ་ན་ཉིད་ཀྱི་རྟོགས་པ་བསྐྱེད་པས་འདུ་བའོ། །རྐང་པའི་མཐེ་བོང་གཉིས་ཀྱི་རྩ་ཉོན་མོངས་སྟེ་འཚད་མ། ལུང་པ་སྐམ་པོ་འབབ་པ་ཡུལ་མ་རུ། དཔའ་བོ་རྣམ་པར་སྣང་མཛད་དང་། །རྣལ་འབྱོར་མ་འཁོར་ལོས་བསྒྱུར་མ། །དོན་ཡང་དག་པའི་རྟོག་པའོ། །བརླ་གཉིས་ཡིད་དགའི་རྒྱུ་ཀུན་སྟེར་བས་རྒྱུ་བྱིན་མ། ཁྲག་འབབ་པ། དེ་ཡུལ་སཽརཥྚ། དཔའ་བོ་རྟ་མགྲིན་དང་། རྣལ་འབྱོར་མ་ཆང་ཚོང་མ། དགའ་བ་ཡང་དག་བྱང་ཆུབ་ཀྱིས་ཡན་ལག་གོ། བྱིན་པའི་རྗེན་དར་སྦྱོར་བ་ཐམས་ཅད་མེད་པས་སྦྱོར་བྲལ་ལ་རྡུལ་འབབ་པ། དེ་ཡུལ་སུ་ཝཪྞ་དཱིབ། དཔའ་བོ་ནམ་མཁའི་སྙིང་པོ་དང་། །རྣལ་འབྱོར་མ་འཁོར་ལོའ་ིགོ་ཆ། །དོན་ཤིན་ཏུ་སྦྱངས་བྱང་ཆུབ་ཀྱི་ཡན་ལག །འདི་གཉིས་རྟོགས་པ་རི་དགའ་བསྐྱེད་པས་ཉེ་འདུའོ། །རྐང་པའི་སོར་མོ་བཅུ་དྲུག་གི་ཕྱེད་དེ་བརྒྱད་རྩ་བ་དགའ་བ་སྡུད་པས་སྡུག་གུ་མ། ཚལ་ཏེ་སྨོན་ཆུ་འབབ་པ། དེ་ཡང་སྡོམ་བྱུང་ལས། རྐང་པའི་སོར་མོ་ནཱ་ག་ར། །རྟག་ཏུ་ཚིལ་འབབ་ཤེས་པར་བྱ། །ཞེས་དང་། རྡོ་རྗེ་མཁའ་འགྲོའ་ིའགྲེལ་བར། སོར་མོ་རྣམས་ནི་རྐང་པའི་སོར་མོ་ཕལ་པ་བརྒྱད་དོ། །ཞེས་པའི་རྗེས་སུ་འཕྲོད། །དེ་ཡུལ་ན་ག་ར། དཔའ་བོ་དཔལ་ཧེ་རུ་ཀ་དང་། །རྣལ་འབྱོར་མ་ཤིན་ཏུ་དཔའ་མོ། །བཏང་སྙོམས་བྱང་ཆུབ་ཀྱི་ཡན་ལག་གོ། །པུས་མོ་གཉིས་རྩ་ཤེས་རབ་ཀྱི་ལྷ་མོ་ཡིན་པས་ཡིད་བཟང་མ། བྱིས་པའི་སྣབས་དང་ཁ་ཆུ་འབབ་པ། ཡུལ་ཀུ་ལུ་ཏ། དཔའ་བོ་རྡོ་རྗེ་སེམས་དཔའ་དང་། །རྣལ་འབྱོར་མ་བརྩོན་འགྲུས་ཆེན་མོ། །ཡང་དག་བྱང་ཆུབ་ཀྱི་ཡན་ལག །གོང་གི་མཐེ་བོང་མ་རུང་འདི་གཉིས་རྣམ་རྟོག་རེས་འགའ་སྤོང་བས་ཉེ་བའི་དུར་ཁྲོད་དོ། །རྐང་པའི་རྒྱབ་བོལ་གོང་གཉིས་དངོས་གྲུབ་སྦྱིན་པས་གྲུབ་མ་མྱ་ངན་དང་མཆིལ་མ་འབབ་པ། དེ་ཡུལ་སིནྡྷུ། དཔའ་བོ་པདྨ་གར་གྱི་དབང་ཕྱུག་དང་། །རྣལ་འབྱོར་མ་སྟོབས་ཆེན་མ། དོན་ཡང་ནག་པའི་དག་གོ། འདི་དང་གོང་གི་ནཱ་ག་ར་གཉིས་རྣམ་རྟོག་རྟག་པར་སྤོང་པའི་དུར་ཁྲོད་དོ། །སྐུའི་འཁོར་ལོ་ས་འོག་ན་སྤྱོད་པའི་ཚུལ་གྱིས་བཞུགས་པའི་དཔའ་བོ་དང་རྣལ་འབྱོར་མ་དག་ཀྱང་ཐམས་ཅད་སྐུ་མདོག་ཕྱག་མཚན་ནི་འཁོར་ལོ་གསུམ་ཀ་མཐུན་ནོ། །ལྷག་མ་གོང་ལྟར་རོ། །ཐམས་ཅད་སྐུ་མདོག་དཀར་སྟེ། དེ་དག་ཀྱང་སྡོམ་བྱུང་ལས། རྩ་ཡི་གནས་དང་ཡུལ་རྣམས་ནི། །ཉི་ཤུ་རྩ་བཞིའི་གྲངས་ཡིན་ཏེ། །ཞེས་དང་། སཾ་བྷུ་ཊར། པཱུ་ལི་རར་ནི་མི་ཕྱེད་མ། །སོ་དང་སེན་མོ་འབབ་པར་བརྗོད། །འབར་བ་འཛིན་པའི་པྲ་གཟུགས་མ། །དེ་བཞིན་སྐྲ་དང་བ་སྤུ་འབབ། །ཨོ་རྒྱན་གནས་ནི་ཆེན་མོ་ལ། །བརྩེ་བ་མ་ནི་རྣམ་པར་གནས། །རྣ་བ་གཡས་པར་གནས་ནས་ནི། །པགས་པ་དྲི་མ་རྣམ་པར་གནས། །ཞེས་སོགས་ནས། ཀུ་ལུ་ཏར་ནི་ཡིད་བཟང་མ། །ཤ་དང་སྣབས་ནི་འབབ་པར་གནས། །ཞེས་པའི་བར་ཚིགས་སུ་བཅད་པ་ཕྱེད་དང་བཅུ་དྲུག་གི་བསྟན་ཅིང་། །ཀུན་སྤྱོད་ལས་ཀྱང་། པཱུ་ལིར་མ་ལ་མགོ་ལ། །ཛ་ལནྡྷ་ར་སྤྱི་གཙུག་ལ། །སོགས་ཚིགས་བཅད་དྲུག་གིས་བཤད་ཀྱང་ཧ་ཅང་མཐའ་ཀླས་པས་ལུང་ཟུར་སྨོས་ཏེ་བཞག་གོ། །སྙིང་ནང་དུ་རྣམ་པ་གསུམ་གྱི་འཇུག་པས་བསྐོར་བས་གསུམ་བསྐོར་མ། གཟུགས་འབབ་པ། འདོད་ཡོན་ཀུན་དང་ལྡན་པས་འདོད་མ་སྒྲ་འབབ་པ་ཁྱིམ་གྱི་བདག་པོ་ཡིན་པས་ཁྱིམ་མ་དྲི་འབབ་པ་གཏུམ་པའི་ལས་བྱེད་པས་གཏུམ་མོ་རོ་འབབ་པ། བདུད་འཇོམས་པར་བྱེད་པས་བདུད་བྲལ་མ་རེག་བྱ་འབབ་པ་སྟེ་རིམ་པ་བཞིན། ཡང་དག་པའི་ལས་ཀྱི་མཐའ། འཚོ་བ། རྩོལ་བ། དྲན་པ། ཏིང་འཛིན་ནོ། །རྐྱང་མ་རོ་མ་དབུ་མ་གསུམ། དྲན་པ་ཏིང་འཛིན་ཤེས་རབ་ཀྱི་དབང་པོའ།ི ། སྙིང་ཁའི་ཡན་ལག་གི་རླུང་གི་རྟེན་རྩ་སུམ་བཅུ་རྩ་གཉིས་སུ་མ་བགྲངས་པས། འགའ་ཞིག་གི་སྦས་རྩ་ཟེར། སྟོབས་ལྔ་དང་སྦྱར་བས་རྩ་དང་བྱང་ཕྱོགས་སོ་བདུན་གྲངས་མཉམ་མོ། །རྩ་ཉེར་བཞིར་དཔའ་བོ་མཁའ་འགྲོ་གནས་ཚུལ་ཡང་སྡོམ་པའི་ཞེ་གཅིག་པར། རྣལ་འབྱོར་མ་དྲུག་ཀུ་ལུ་ཏ། །མ་ལུའི་ཡུལ་ན་མོ་རྣམས། །ཞེས་པ་ནས། ས་སྟེང་ན་ནི་རྫོགས་པར་འགྱུར། །ཞེས་པའི་བར་ལུས་དཀྱིལ་མངོན་བརྗོད་ན་བསྟན་པ་བཞིན་ནོ། །དེ་བཞིན་དཔའ་བོ་དང་རྣལ་འབྱོར་མ་དག་ཀྱང་དྲག་པོ་འཇིགས་བྱེད་བཏུལ་བའི་ཚེ་གདུལ་བྱའི་མིང་གདུལ་བྱེད་ལ་བརྟགས་པ་སྟེ། ངོ་བོ་ནི། ཐོད་པའི་དུམ་བུ་ཀུན་ཏུ་བཟང་པོ། ཀེང་རུས་ཆེན་པོ་འཇམ་དབྱིངས་ཀེང་རུས་ཅན་སྤྱན་རས་གཟིགས་མཆེ་བ་རྣམས་གཙིགས་པ་སྙིང་། ལྷ་དགྲ་ཕྱག་རྡོར། རྡོ་རྗེ་འོད་དཔག་མེད་བྱམས་པ། རྡོ་རྗེ་འོད་ནམ་སྙིང་། རྡོ་རྗེའི་སྐུ་ནམ་མཁའ་མཛོད། རབ་གཏུམ་མོ་རྡོ་རྗེ་ཕོ་ཉ་མོ། གཏུམ་མིག་མ་བསྐུལ་བྱེད་མ། །འོད་ལྡན་མ་རིན་ཆེན་སྒྲོལ་མ། །སྣང་བྱེད་མ་རྡོ་རྗེ་ཉི་མ། །དཔའ་བོའ་ིབློ་གྲོས་མ་རོ་ལངས་མ། །མིའུ་ཐུང་ན་རྡོ་རྗེ་གཞོན་ནུ་མ། །ལང་གའི་དབང་ཕྱུག་མ་ནི་སྐམ་བུ་འཛམ། །ཤིང་གྲིབ་སངས་རྒྱས་བྱང་ཆུབ་མ་སྟེ་ཐུགས་འཁོར་རོ། །རྡོ་རྗེ་མྱུ་གུ་གྲིབ་སེལ་མ་རྡོ་རྗེ་རལ་པ་ཅན་སྤོས་ཀྱི་གླང་པོ། །དཔའ་བོ་ཆེན་པོ་བློ་གྲོས་མི་ཟད་པ། རྡོ་རྗེ་ཧཱུྃ་མཛད་ཡེ་ཤེས་རྟོག །རྡོ་རྗེ་བཟང་པོ་ནི་སྤོབས་པ་བརྩེགས་པ། །རབ་ཏུ་བཟང་པོ་ནི་མྱ་ངན་དང་མུན་པ་ཀུན་འཇོམས། འཇིགས་བྱེད་ཆེན་པོ་ནིངན་སོང་ཀུན་འདྲེན། མིག་མི་བཟང་དྲ་བ་ཅན་གྱི་འོད། །ས་སྲུང་མ་ནི་ཡེ་ཤེས་སྒྲོལ་མའོ། །འཇིགས་བྱེད་ཆེན་མོ་ནི་རྡོ་རྗེ་འཇིགས་བྱེད་མའོ། །ཆང་འཐུང་མ་ནི་རྒྱན་ལྡན་མའོ། །སྔོ་སངས་མ་ནི་སྒྲོལ་མའོ། །རབ་བཟང་མ་ནི་གོས་དཀར་མོ། །རྟ་སྣ་མ་ནི་ཉེ་བའི་སྤྱན། བྱ་གདོང་མ་ནི་ཉེ་བའི་མ་མཱ་ཀཱི་སྟེ་གསུང་འཁོར་རོ། །སྟོབས་པོ་ཆེ་ནི་ཟླ་འོད་གཞོན་ནུ། །རྡོ་རྗེ་རིན་ཆེན་ནི་རྡོ་རྗེ་འོད། །རྟ་མཆོག་ནི་ཉི་མའི་སྙིང་པོ། །ནམ་མཁའི་སྙིང་པོ་ནི་རྡོ་རྗེ་འོད་ཟེར། །ཧེ་རུ་ཀ་ནི་མཐུ་ཆེན་ཐོབ། །པདྨ་གར་དབང་ནི་ནོར་བཟང་། རྣམ་པར་སྣང་མཛད་ནི་བཟང་སྤྱོད། །རྡོ་རྗེ་སེམས་དཔའ་ནི་བློ་གྲོས་རྒྱ་མཚོ། །ཤུགས་ཅན་མ་ནི་རྒྱལ་མཚན་རྩེ་མོ། །དུམ་སྐྱེས་མ་སོ་སོར་འབྲང་མ། རྐོས་རིག་མ་རྒྱ་ཆེན་མོ། །འཁོར་ལོའ་ིགོ་ཆ་མ། ལོ་མ་གྱོན་མ། རབ་ཏུ་དཔའ་མོ་རྡོ་རྗེ་ལུ་གུ་རྒྱུད། །སྟོབས་ཆེན་མ་ཕྱིར་བཟློག་ཆེན་མོ། །འཁོར་ལོ་སྒྱུར་བ་ནི་གཙུག་ཏོར་གདུགས་དཀར། །བརྩོན་འགྲུས་ཆེན་མོ་ནི་རྡོ་རྗེ་འཇིགས་བྱེད་དེ་རྣམས་སྐུའི་འཁོར་ལོ་ཏེ་ཀུན་སྤྱོད་དུ། ཐོད་པའི་དུམ་བུ་སོགས་འཁོར་གསུམ། །ཉི་ཤུ་རྩ་བཞི་གཉིས་མེད་ཡིན། །སེམས་ཅན་འཁོར་བ་ལས་བསྒྲོལ་པས། །དཔའ་བོ་ཉིད་ནི་ཡིན་པར་བཤད། །སོགས་གསུངས་སོ། །བརྒྱད་པ་བཤགས་པ་ལ་བཅུ་ལས། །དང་པོ་ནི་ཡེ་ཤེས་མཁའ་འགྲོའ་ིལྷ་ཚོགས་དགོངས་སུ་གསོལ། །ཞེས་པས། ཡེ་ཤེས་དབྱིངས་ཀྱི་མཁའ་འགྲོ་སྐུ་བཞི་ཡེ་ཤེས་ལྔས་བསྡུས་པའི་ལྷ་ཚོགས་འཁོར་རིན་ཆེན་རྒྱ་མཚོའི་ཚོགས་དང་བཅས་པ་བདག་ལ་དགོངས་སུ་གསོལ་ཞེས་པའོ། །གཉིས་པ་སྡིག་པ་མི་དགེ་བ་བཤགས་པ་ནི། །འདོད་ཆགས་ཞེ་སྡང་གཏི་མུག་དབང་གྱུར་པསཿ ལུས་ངག་སེམས་ཀྱིས་སྡིག་སྤྱད་མཐོལ་ལོ་བཤགསཿ ཞེས་པས་བག་མེད་ཀྱི་དབང་གིས་སོ་སོ་འདོད་ལ་རྣམ་པར་ཆགས་པ་དང་ཀུན་ཏུ་མནར་སེམས་ཞེ་སྡང་དང་། ལས་རྒྱུ་འབྲས་ལ་རྨོངས་པ་སོགས་གཏི་མུག་གི་དབང་དུ་གྱུར་པས་སྲོག་གཅོད་དང་། མ་བྱིན་ལེན་དང་། མི་ཚང་སྤྱོད་དེ་ལ་ལས་ཀྱི་ལས་གསུམ་དང་། རྫུན་ཕྲ་མ། ངག་འཁྱལ། ཚིག་རྩུབ་སྟེ་ངག་གི་བཞི། བརྣབ་སེམས། གནོད་སེམས། ལོག་ལྟ་སྟེ་ཡིད་ཀྱི་ལས་གསུམ་སོགས་མི་དགེའི་ཕྱི་མོ་བཅུ་དང་། མཚམས་མེད་པ་ལྔ་དང་། དེ་དང་ཉེ་བ་ལྔ། ལྕི་བ་བཅུ་དྲུག །ལོག་པ་བརྒྱད་སོགས་སྡིག་པ་མི་དགེ་བའི་ཚོགས་དང་། སོ་སོར་ཐར་པ་རིགས་བདུན་གྱི་སྡོམ་པ། །བྱང་ཆུབ་སེམས་དཔའི་བསླབ་སྡོམ་པ་ཉི་ཤུ་དང་ནག་ཆོས་བཞི་སོགས། རྩ་བ་དང་ཡན་ལག་སོགས་གསང་སྔགས་ཀྱི་དམ་ཚིག་ཉམས་པའི་སྡིག་ལྟུང་ཉེས་ཚོགས་ཅི་མཆིས་པ་མཐོལ་ལོ་བཤགས་སོ། །གསུམ་པ་ཐེག་ཆེན་ལས་ཉམས་པའི་ཉེས་པ་བཤགས་པ་ལ་གཉིས་ཀྱི་དང་པོ་ཡང་དག་དོན་མ་རྟོགས་པ་ནི་ཐེག་པ་དམན་པའི་དབང་དུ་གྱུར་པས་ན། །ཡང་དག་དོན་མ་རྟོགས་པ་མཐོལ་ལོ་བཤགསཿ ཞེས་པས་རང་ཉིད་དང་པོར་ཐེག་པ་ཆེན་པོ་གསང་སྔགས་ཀྱི་སྒོར་ཞུགས་ཏེ་དེ་མནོས་ཀྱང་། ཐེག་པ་དམན་པ་ཉན་རང་གི་དབང་དུ་བློ་གྱུར་པས་ན། གཞན་དོན་ལ་དམིགས་པའི་དམིགས་པ་དང་། ཐབས་ཤེས་འབྲེལ་བའི་བསྒྲུབ་པ་དང་། བདག་མེད་རྟོགས་པའི་ཡེ་ཤེས་དང་། བརྩོན་པ་ནམ་ཡང་མི་འདོར་བས་བརྩོན་འགྲུས་དང་། འགྲོ་ལ་ཕན་བདེའི་ཐབས་དང་། མི་གནས་པའི་མྱ་ངན་ལས་འདས་པས་དོན་གཉིས་ལྷུན་གྱིས་གྲུབ་པས་གྲུབ་པ་དང་། སངས་རྒྱས་ནས་འཁོར་བ་མ་སྟོངས་ཀྱི་བར་དུ་གཞན་དོན་མཛད་པས་མཛད་པ་སྟེ་ཆེན་པོ་བདུན་ནི་མདོ་སྡེའི་རྒྱན་ལས། དམིགས་པ་ཆེན་པོ་ཉིད་དང་ནི། །དེ་བཞིན་བསྒྲུབ་པ་གཉིས་དག་དང་། །ཡེ་ཤེས་རྩོལ་པ་བརྩལ་པ་དང་། །ཐབས་ལ་མཁས་པ་གང་ཡིན་དང་། །ཡང་དག་གྲུབ་པ་ཆེན་པོ་དང་། །སངས་རྒྱས་ཕྲིན་ལས་ཆེན་པོ་སྟེ། །ཆེན་པོ་བདུན་དང་ལྡན་པའི་ཕྱིར། །ཐེག་ཆེན་ཞེས་ནི་ངེས་པར་བརྗོད། །ཞེས་གསུངས་པའི་ཡང་དག་པའི་དོན་མ་རྟོགས་ཏེ་ཕྱིན་ཅི་ལོག་གི་ལམ་དུ་ཞུགས་པ་མཐོལ་ལོ་བཤགས་པའོ། །གཉིས་པ་སྤྱོད་པ་ཉམས་པ་བཤགས་པ་ནི། སྙིང་རྗེ་ཆུང་ཞིང་ཞེ་སྡང་དབང་གྱུར་པས། །འགྲོ་བའི་དོན་མ་བགྱིད་པར་མཐོལ་ལོ་བཤགས། །ཞེས་པས་གསང་སྔགས་ཀྱི་ལམ་གྱི་གཙོ་བོ་ཐབས་སྙིང་རྗེ་ཆེན་པོ་འབའ་ཞིག་གི་ལམ་དུ་འཁྱེར་དགོས་ན་དེ་ལས་ཉམས་ཏེ་སྙིང་རྗེ་ཆུང་ཞིང་བློ་ཞེ་སྡང་རང་ཀ་མའི་དབང་དུ་གྱུར་ཏེ་སྦྱིན་པ་དང་། སྙན་པར་སྨྲ་བ་དང་། དོན་སྤྱོད་པ། དོན་མཐུན་པ་སྟེ་བསྡུ་བའི་དངོས་པོ་བཞི། འགྲོ་བའི་དོན་ཡང་དག་པར་མ་བགྱིས་པར་རང་དོན་ཉི་ཚེའི་སྤྱོད་པས་དུས་འདའ་བ་མཐོལ་ལོ་བཤགས་པའོ། །བཞི་པ་བག་མེད་པ་བཤགས་པ། །ལེ་ལོ་གཉིད་ཀྱི་དབང་དུ་གྱུར་པ་ཡིས། །བསྒོམ་དང་བསྒྲུབ་པ་གཡེལ་བ་མཐོལ་ལོ་བཤགས། །ཞེས་པས་ཉིན་པར་ལེ་ལོ་དང་བག་མེད་གཞན་དབང་འཁྲུལ་པའི་འཁོར་ལོས་དུས་འདས་པས་སྣང་བ་སྒྱུ་མའི་ལྷ་སྐུར་མ་ཤེས་མཚན་མོ་ཉོན་མོངས་པ་གཏི་མུག་གཉིས་ཀྱི་དབང་དུ་གྱུར་ཏེ་འོད་གསལ་རང་ངོ་མ་ཤེས། ནང་ནུབ་ཀུན་ཏུ་ད་ལྟའི་ཤེས་པ་རང་ཀ་མ་འདི་ཟངས་ཐལ་རྗེན་པའི་ཆོས་སྐུ་ཡེ་གྲོལ་བློ་འདས་ཆེན་པོར་མ་ཤེས་པ་དེ་མི་བསྒོམ་པ་རང་བབས་ཀྱི་བསམ་གཏན་ལ་འཛིན་རྩོལ་གྱི་ཞེན་པས་བཅིངས་པ་དང་། བསྒྲུབ་པ་ཡེ་ནས་སྣང་གྲགས་རིག་གསུམ་ལྷ་སྔགས་ཡེ་ཤེས་ཀྱི་རང་བཞིན་ལ་སྤང་བླང་གི་མཚན་མས་གཡེལ་བ་མཐོལ་ལོ་བཤགས་པའི། །ལྔ་པ་མཆོད་པ་ལོ་ཟླར་འདས་པ་བཤགས་པ་ནི། སེར་སྣ་འཇུར་གེགས་དབང་དུ་གྱུར་པས་ན། །མཆོད་པ་ལོ་ཟླར་འདས་པ་མཐོལ་ལོ་བཤགས། །ཞེས་པ་བློ་སྦྱིན་པའི་མི་མཐུན་ཕྱོགས་སེར་སྣ་ཆེ་བ་དང་འཇུར་གེགས་ཀྱི་དབང་དུ་གྱུར་པས་དེས་ན། དཀོན་མཆོག་གི་མཆོད་པ་དང་། རྡོ་རྗེ་སློབ་དཔོན་གྱི་བསྙེན་བསྐུར་དང་། །ཚོགས་ཀྱི་འཁོར་ལོ་ལ་སོགས་པ་བསྒྲུབ་པར་དམ་བཅས་པ་ལས། དུས་རིང་བ་ལོ། ཐུང་བ་ཟླ་བ། ཤིན་ཏུ་ཐུང་བ་ཞག་དུས་སུ་བསྒྲུབ་པར་ཁས་བླངས་པ་ལས་འདས་པ་མཐོལ་ལོ་བཤགས་པའོ། །དྲུག་པ་བླ་མའི་དམ་ཚིག་ཉམས་པ་བཤགས་པ་ནི། ང་རྒྱལ་ཁེངས་སེམས་དབང་དུ་གྱུར་པས་ན། །བླ་མའི་སྐུ་གསུང་ཐུགས་དང་འགལ་བ་མཐོལ་ལོ་བཤགས། །ཞེས་པས་རང་ཉིད་བླ་མ་ལས་རིགས་སམ་ནོར་དང་། གཟུགས་དང་། སྟོབས་དང་། དཔལ་འབྱོར་དང་། ཐོས་པ་ལ་སོགས་པའི་སྒོ་ནས་ཆེ་བར་བལྟས་ཏེ། མངོན་པའི་ང་རྒྱལ་དང་ཁེངས་པ་ཆེན་པོའ་ིསེམས་ཀྱི་དབང་དུ་གྱུར་པས་དེས་ན་བླ་མ་ལ་དངོས་སམ་ལྐོག་ནས་སྐུ་གསུང་ཐུགས་དང་འགལ་བར་བྱས་པ་ཐམས་ཅད་བཤགས་པ་སྟེ། དེ་ཡང་བླ་མ་ནི། འདྲེན་པའི་བླ་མ་ནི་ཆོས་ཀྱི་སྒོར་འདྲེན་པས་རབ་བྱུང་གི་མཁན་པོ་ལྟ་བུ། ཤེས་རྒྱུད་གྲོལ་བ་ནི། ཆོས་འཆད་པའི་སློབ་དཔོན་ལྟ་བུ། །མན་ངག་སྟོན་པ་ནི་སེམས་བསྐྱེད་པའི་དགེ་བའི་བཤེས་གཉེན་ལྟ་བུ། ཉམས་ཆགས་བསྐོང་བ་ནི་སྡིག་པའི་བཤགས་ཡུལ་དམ་ཚིག་དབང་གི་བླ་མ་ནི་རང་ཉིད་ལ་དབང་བསྐུར་ཏེ་རྒྱུད་སྨིན་པར་མཛད་པ། །སྤྱིའི་བླ་མ་ནི་བཀའ་དྲིན་ཅུང་ཟད་ཐོབ་ཅིང་ཀུན་གྱིས་བཀུར་བ་སྟེ། གསལ་བཀུར། སྤྱི་དང་འདྲེན་དང་དམ་ཚིག་དང་། །ཉམས་ཆགས་སྐོང་དང་ཤེས་རྒྱུད་འགྲོལ། །མན་ངག་ལུས་ཀྱི་སློབ་དཔོན་རྣམས། །ཞེས་སོ། །ཁྱད་པར་གསང་སྔགས་ཀྱི་རྡོ་རྗེ་སློབ་དཔོན་ནི། དབང་བསྐུར། རྒྱུད་བཤད། མན་ངག་བསྟན་ན་བཀའ་དྲིན་གསུམ་ལྡན་ཞེས་ཤིན་ཏུ་གཉན་ལ། གཉིས་སམ་རེ་རེ་ལས་མ་ཐོབ་ན་ཡན་ལག་གི་བླ་མ་ཞེས་གོང་མ་ལ་ལྟོས་ན་ནི་གཉན་ནོ། །དེ་དག་ཀྱང་རྩེ་མོར་སངས་རྒྱས་ཆོས་དང་དགེ་འདུན་དང་། སློབ་དཔོན་ཡང་ནི་བཞི་པ་ཡིན། ཞེས་དང་། ཁྱད་པར་གསང་སྔགས་སྟོན་པའི་སློབ་དཔོན་ནི། རྒྱ་མཚོ་ལས། དབང་བསྐུར་མཆོག་ཐོབ་རྡོ་རྗེ་ཡིས། །བླ་མ་ལ་ནི་དེ་བཞིན་གཤེགས། །ཞེས་སོ། །དེའི་སྐུ་གསུང་ཐུགས་ཀྱི་དམ་ཚིག་ཀྱང་། ཡོན་ཏན་མཛོད་དུ། རྩ་བའི་བླ་མའི་སྐུ་གསུང་ཐུགས་གསུམ་ལ། །ཕྱི་ནང་གསང་བའི་དམ་ཚིག་གསུམ་ཚན་གསུམ། །སྲོག་གཅོད་མི་ཚངས་སྤྱོད་དང་རྐུ་བ་སྤོང་། །ཕ་མ་སྤུན་སྲིང་རང་ལུས་ཆོས་གང་སྨོད། །བླ་མའི་གྲིབ་འགོངས་ཡུམ་གཙེ་སྤུན་སྲིང་བརྟེན། །གསུང་གི་གསུམ་ལ་རྫུན་ཕྲ་ཚིག་རྩབ་སྤོངས། །ཆོས་སྨྲ་དོན་སེམས་གནས་ལུགས་བསྒོམ་མི་བསྐུར། །བླ་མའི་ཡུམ་དང་སྤུན་སྲིང་ཚིག་མི་བརྙས། ཐུགས་ཀྱི་གསུམ་ལ་ཡིད་ཀྱི་རྣམ་གསུམ་དང་། །སྤྱོད་དང་སྒོམ་དང་ལྟ་བ་ལོག་པ་སྤང་། །བླ་མ་ལྷ་མཆེད་ལྟ་སྒོམ་མཐུན་ཀུན་སེམས། །ཞེས་གསུངས་པར་སྤྲོ་ན་འགྲེལ་བར་བལྟའོ། །དམ་ཚིག་ཉམས་པའི་ཉེས་བྱས་ནི། །བཤགས་རྒྱུད་ལས། དམ་ཚིག་ཉམས་པའི་ཆད་པ་མི་བཟོད་པས་རྡོ་རྗེ་མཁའ་འགྲོས་སྙིང་ཁྲག་འཐུང་བ་དང་། ཚེ་ཐུང་ནད་མང་ནོར་ཡལ་དགྲས་འཇིགས་དངཿ མནར་མེད་དམྱལ་བ་ཤིན་ཏུ་སྐྱི་གཡའ་བརཿ སྡུག་བསྔལ་མི་བཟད་དྲག་པོ་མྱོང་བར་འགྱུརཿ ཞེས་སོ། །བདུན་པ་མཆེད་ལ་བཤགས་བྱ་བ་ནི། །བརྩེ་གདུང་ཆུང་བའི་དབང་དུ་གྱུར་པས་ན། །གྲོགས་མཆེད་ཐུགས་དང་འགལ་བ་མཐོལ་ལོ་བཤགས། །ཞེས་པས་སྤྱིར་སེམས་ཅན་ཀུན་ལ་སྙིང་བརྩེ་བ་ཞན་པ་དང་། རྡོ་རྗེའི་སྤུན་ལ་གདུང་སེམས་ཆུང་བའི་དབང་དུ་གྱུར་པས། དེས་ན། གྲོགས་མཆེད་དང་ལྕམ་དྲལ་རྣམས་ཀྱི་ཐུགས་དང་འགལ་བ་མཐོལ་ལོ་བཤགས་པའོ། །དེ་ཡང་སྤྱིར་མཆེད་ལྕམ་ལ་རྣམ་པ་དྲུག་སྟེ་སེམས་ཅན་ཐམས་ཅད་ཡེ་གདོད་མ་ནས་གཞི་གཅིག་གིས་བསྡུས་པས་སྤྱིའི་མཆེད། །སངས་རྒྱས་ཀྱི་བསྟན་པ་ལ་ཞུགས་སོ་ཅོག་ལྡན་པ་གཅིག་པའི་མཆེད། །ལྟ་སྤྱོད་གཅིག་པ་མཐུན་པའི་མཆེད། །བླ་མ་གཅིག་པ་མཛེས་པའི་མཆེད། །ཆོས་ལྷན་ཅིག་ཏུ་ཉན་པ་ཉེ་བའི་མཆེད། །དབང་ལྷན་ཅིག་ཏུ་ཞུས་པ་འདྲེས་པའི་མཆེད་དེ་རྡོ་རྗེའི་སྤུན་ནོ། །འདི་ནི་སྤྱིར་ཐར་པ་ལམ་དང་ཐེག་པ་ཆེན་པོར་ཞུགས་པར་བརྩེ་བ་སྟེ། །དཔལ་ཕྲེང་གི་མདོར། བྱང་ཆུབ་སེམས་ལྡན་ཐེག་ཆེན་ཞུགས་ལ་བྱམས། །ཞེས་སོ། །ཁྱད་པར་རྡོ་རྗེའི་སྤུན་ལ་བརྩེ་གདུང་བྱ་སྟེ། རྔམ་ཀློག་ལས། རྡོ་རྗེའི་སྤུན་ལ་དུང་སེམས་ཀྱང་། །འདྲེས་དང་མ་འདྲེས་ཡོངས་ཀྱི་སྤུན། །ཡང་དག་ལམ་དུ་ཞུགས་པ་ལ། །རྔན་དང་བཅས་ཀྱི་སེམས་ཙམ་ཡང་། །རྟག་ཏུ་སྤང་བར་བྱ་བ་ཡིན། །བརྩེ་ཞིང་གདུང་བའི་ཤུགས་ཕྱུང་ལ། གཅིག་ལ་གཅིག་ནི་མིག་བཞིན་བལྟ། །མདོར་ན་སྲོག་ལའང་མི་ཆགས་པར། །སྤུན་དང་མིང་སྲིང་དགོས་པ་བསྒྲུབ། །ཅིའི་ཕྱིར་རྡོ་རྗེའི་སྤུན་རྣམས་ནི། །འདི་ནས་བྱང་ཆུབ་བར་དག་ཏུ། །མི་འབྲལ་འགྲོགས་པའི་གྲོགས་མཆོག་སྟེ། །མར་མེའི་འོད་དང་སྡོང་བུ་འདྲའོ། །ཞེས་སོ། །བརྒྱད་པ་ཕུད་ཉམས་པ་བཤགས་པ་ནི། ཟླ་གྲོགས་ངན་པའི་དབང་དུ་གྱུར་པ་ཡིསཿ ཕུད་དང་ལྷག་མར་གྱུར་པ་མཐོལ་ལོ་བཤགསཿ ཕུད་དང་ལྷག་མར་གྱུར་པའི་སྐྱོན་དབང་གིསཿཕུད་མྱུར་ཐུགས་དང་འགལ་བ་མཐོལ་ལོ་བཤགསཿ ཕུད་ཉུལ་ཐུགས་དང་འགལ་བའི་སྐྱོན་དབང་གིསཿ མཁའ་འགྲོའ་ིབཀའ་ཆད་གནས་གྱུར་མཐོལ་ལོ་བཤགསཿ ཞེས་པས། ཟླ་གྲོགས་ལས་ཀྱི་རྡོ་རྗེ་ལ་སོགས་བློ་བག་མེད་པ་དང་ཡིད་མ་གཞུངས་པས་ངན་པའི་དབང་དུ་གྱུར་པས། དེས་ན་ཕུད་དང་པོ་ཉམས་ཏེ་ལྷག་མའི་གནས་སུ་གྱུར་པ་མཐོལ་ལོ་བཤགས་པ་དང་། ཕུད་དང་པོ་དེ་ནས་ཕྱིས་ཏེ་ལྷག་མའི་གནས་སུ་ཉམས་པའི་སྐྱོན་དབང་གིས་ཕུད་ཉུལ་བའི་ཡེ་ཤེས་ཀྱི་མཁའ་འགྲོ་མ་རྣམས་ཀྱི་ཐུགས་ལ་རྟོག་པ་མི་མངའ་ཡང་རང་གི་དམ་ཚིག་དང་འགལ་བ་མཐོལ་ལོ་བཤགས་སོ། །ཕུད་ཉུལ་ཡེ་ཤེས་མཁའ་འགྲོའ་ིཐུགས་དང་འགལ་བའི་སྐྱོན་གྱིས། དབང་གི་དམ་ཚིག་རྗེས་གཅོད་པའི་ལས་དང་ཤ་ཟ་འཇིག་རྟེན་གྱི་མཁའ་འགྲོ་མའི་ཚུལ་བཟུང་བདག་གི་བཀའ་ཆད་ཀྱི་གནས་སུ་གྱུར་པ་ཐམས་ཅད་མཐོལ་ལོ་བཤགས། །ཞེས་སོ། །དགུ་པ་སྒྲོལ་བ་གནས་སུ་མ་སྟོབས་པའི་བཤགས་པ་ནི། །སྒྲོལ་བའི་དུས་སུ་སྙིང་རྗེ་ཆུང་བ་ཡིསཿ སེམས་ཅན་གནས་མ་སྟོབས་པ་མཐོལ་ལོ་བཤགསཿ ཉོན་མོངས་གནས་མ་སྟོབས་པའི་སྐྱོན་དབང་གིསཿ ཡུན་གྱི་སྒྲིབ་པར་གྱུར་པ་མཐོལ་ལོ་བཤགསཿ ཞེས་པས། །སྙིང་རྗེ་ཆེན་པོའ་ིདབང་གིས་གདུལ་བྱ་གདུག་ཅིང་གཏུམ་པ་ཞི་རྒྱས་དབང་གསུམ་གྱི་གདུལ་མི་ནུས་པ་དག་པ་ཁྲོ་བོའ་ིདཀྱིལ་འཁོར་དུ་དྲག་ཤུལ་མངོན་སྤྱོད་ཀྱི་ཕྲིན་ལས་ཀྱིས་སྒྲོལ་བའི་དུས་སུ་ཐབས་སྙིང་རྗེ་དང་ཤེས་རབ་སྟོང་ཉིད་ཀྱི་རྩལ་ཆུང་བས་ནུས་པས་གསོད་པར་ནུས་ཀྱང་སྟོང་ཉིད་ཀྱིས་སེམས་ཅན་དེའི་རྣམ་ཤེས་ཆོས་ཀྱི་དབྱིངས་བདེ་བ་ཆེན་པོའ་ིགནས་སུ་མ་སྟོབས་ཏེ་གསོ་བར་མ་ནུས་པ་མཐོལ་ལོ་བཤགས་སོ། །དེ་ལྟར་ཆོས་ཉིད་ཀྱི་ནུས་པས་གསོ་བར་མ་ནུས་པར་ཞེ་སྡང་རང་ག་མ་ཉོན་མོངས་པའི་དབང་དུ་སོང་བས་སེམས་ཅན་བདེ་བའི་གནས་སུ་མ་སྟོབས་པར་ངན་སོང་དུ་བྱང་བའི་སྐྱོན་དབང་གིས། བདག་ཉིད་འཁོར་བའི་སྡུག་བསྔལ་མི་བཟད་པའི་གནས་སུ་ཡུན་རིང་དུ་གནས་པའི་སྒྲིབ་པར་གྱུར་པ་མཐོལ་ལོ་བཤགས་སྟེ། སེམས་ཅན་སྒྲིབ་པའི་འགོས་པ་ནི་ངེས་བརྗོད་བླ་མ་ལས། དེ་ལྟར་བསྒྲལ་བའི་དགོས་པ་ཡང་། །བྱང་ཆུབ་སྤྱོད་འཕེལ་སེམས་ཅན་བདེ། །ལྷ་མཉེས་བདག་གི་དམ་སྐོང་ཞིང་། །ལས་ངན་བར་ཆད་སྡུག་མུན་ཐུང་། །ཞེས་དང་། གསང་སྙིང་ལས། ཡོད་མེད་དབུ་མར་མི་དམིགས་ཤིང་། །སྒྱུ་མ་མིག་ཡོར་ལྟ་བུའི་ཚུལ། །སྲོག་མེད་སྲོག་ཀྱང་བཅད་དུ་མེད། །སྲོག་ཀྱང་སྐྱེས་བུའི་ལོག་རྟོག་ཙམ། །ཞེས་སོ། །བཅུ་པ་སྦྱོར་བ་ཚད་དུ་མ་ཕྱིན་པའི་བཤགས་པ་ནི། །སྦྱོར་བའི་དུས་སུ་ཏིང་འཛིན་མ་གསལ་བས། །གཟུང་མ་ཐུགས་དང་འགལ་བ་མཐོལ་བཤགས། །གཟུང་མ་ནི་ཐུགས་དང་འགལ་ཆགས་སྐྱོན་དབང་གིསཿ ཆགས་ཤིང་འཁོར་བར་སྐྱེ་བ་མཐོལ་ལོ་བཤགསཿ བཤགས་ན་སྐུ་གསུང་ཐུགས་ཀྱི་དངོས་གྲུབ་སྩོལཿ ཞེས་པས་རང་གི་རྒྱུད་ཤེས་རབ་སྟོང་པ་ཉིད་ཀྱི་ཡུམ་དང་མཉམ་པར་སྦྱོར་བའི་དུས་སུ། ཞི་གནས་ཀྱི་ཏིང་ངེ་འཛིན་སེམས་གནས་དགུའི་ཐ་མ་མཉམ་པར་འཇོག་པ་སེམས་བྱིང་རྒོད་ཀྱི་དབང་དུ་སོང་ནས་མ་གསལ་བར་གཡོས་པས་སྟོང་ཉིད་རྣམ་པ་ཀུན་གྱི་མཆོག་ལྡན་རྣམ་ཐར་སྒོ་གསུམ་གྱི་གཟུངས་མ་རྡོ་རྗེ་བཙུན་མོའ་ིཐུགས་མཆོག་ཏུ་མི་གཡོ་བ་མཉམ་པ་ཉིད་ཀྱི་གནས་ལུགས་དང་འགལ་བས་མཐོལ་ལོ་བཤགས་སོ། །སྟོང་ཉིད་ཀྱི་གཟུངས་ཐམས་ཅད་ཀྱི་གཞི་མ་ཤེས་རབ་ཀྱི་ཕ་རོལ་དུ་ཕྱིན་མའི་ཐུགས་མི་གཡོ་བ་མཉམ་པ་ཉིད་དང་འགལ་བའི་སྐྱོན་དབང་གིས། གླང་པོ་ཆེ་སྨྱོན་པ་ལྕགས་སྒྲོག་དང་ལྕགས་ཀྱུས་བཏབ་པ་བཞིན་སེམས་དྲན་པའི་ལྕགས་ཀྱུ་དང་ཤེས་བཞིན་གྱི་ལྕགས་སྒྲོག་གིས་བཏང་བས་སྒྱུ་མ་ལྟ་བུའི་ཡུལ་དྲུག་ལ་བདག་ཏུ་འཛིན་པས་ཆགས་པ་ལ་སོགས་པའི་ཉོན་མོངས་རང་དགའི་དབང་དུ་གྱུར་ཞིང་འཁྲུལ་སྣང་མི་ཟད་པའི་འཁོར་བའི་འཁོར་ལོ་སྐྱེ་བདག་གི་རྒྱུད་མཐོལ་ལོ་བཤགས་སོ་ཞེས་པ་སྟེ། རྒྱུད་ལས། རྣམ་པ་ཀུན་གྱི་མཆོག་ལྡན་མ། སྟོང་ཉིད་ཤེས་རབ་མཛེས་མ་ཉིད། །རྒྱལ་བ་ཐམས་ཅད་བསྐྱེད་པའི་ཡུམ། །དེ་ཉིད་མ་བརྟེན་འཚང་མི་རྒྱ། །ཞེས་སོ། །བཤགས་ནས་བདག་གི་རྒྱུད་དག་པར་གྱུར་ཏེ་ཡེ་ཤེས་མཁའ་འགྲོའ་ིསྐུ་མི་འགྱུར་བ། གསུང་མི་འགག་པ། ཐུགས་མི་གཡོ་བ་གསུམ་གྱི་དངོས་གྲུབ་སྩོལ་ཞིག་པའོ། །བཤགས་པའི་ཚིགས་སུ་བཅད་པ་ཕྱེད་བརྒྱད་འདི་ནི་ཧེ་རུ་ཀ་རོལ་པ་ལས་གསུངས་པའི་ཕྱིའི་རྣམ་པར་བཅད་པ་དོར་དགོས་སོ། །དགུ་པ་ཚོགས་ལ་རོལ་པ་ནི། །ལས་ཀྱི་རྡོ་རྗེས་ཕྱག་འཚལ་ཞིང་ཐབས་དང་ཤེས་རབ་ཀྱི་རྫས་པདྨའི་ཕྱག་རྒྱས་བྲིམ་ཞིང་། །ཧཱུཾ། དཔའ་བོ་ཆེན་པོ་དགོངས་སུ་གསོལ། །འདི་ནི་ཆོས་རྣམས་བཟང་པོ་སྟེ། །འདུས་པ་རྣམས་ལ་ཐེ་ཚོམ་མེད། །བྲམ་ཟེ་ཁྱི་དང་གདོལ་བ་གསུམ། རང་བཞིན་གཅིག་ཏུ་དགོངས་ཏེ་རོལ། །ཞེས་པའི་ལན་དུ་ལེན་པ་པོས་ཀྱང་པདྨའི་ཕྱག་རྒྱས། ཨོཾ། བདེ་བར་གཤེགས་པ་ཆོས་ཀྱི་སྐུ། །གཟུགས་དང་འཛིན་པ་རྣམ་པར་སྤངས། །འདོད་ཆགས་ལ་སོགས་དྲི་མ་བྲལ། །དེ་བཞིན་ཉིད་ལ་གུས་ཕྱག་འཚལ། །ཨ་ལ་ལ་ཧོ། ཞེས་བླངས་ཏེ་ལོངས་སྤྱོད་དོ། །ཚོགས་ཀྱི་གྲལ་དུ་རྩོད་པ་དང་། །ཀུ་ཅོ་དང་ཐ་མལ་གྱི་སྣང་བས་བདེན་པར་ཞེན་པ་ལ་སོགས་པ་མི་བྱ་བར། །ཚིམས་པ་དང་། དགའ་བ་དང་། འཛིན་ཞེན་མེད་པས། ལུས་ལྷ། ངག་སྔགས། སེམས་ཆོས་ཉིད་ཀྱི་དཀྱིལ་འཁོར་གསུམ་དུ་ཤེས་པར་བྱའོ། །བཅུ་པ་ལྷག་གཏོར་བཏང་བ་ལ་གཉིས་ཀྱི་དང་པོ་ནི། རབ་ཞིང་ལྤགས་ཀྱི་སྟེང་ཐལ་ཆེན་གྱི་ཚོམ་བུ་བཀོད། འབྲིང་བྱེ་མའི་སའི་མཎྜལ་ལ་དྲི་ཆུ་དང་རཀྟས་ཆག་ཆག་བཏབ། ཐ་མ་སྟེགས་བུ་གང་བྱུང་གི་སྟེང་འབྲུ་ཚོམ་སོགས་བཀོད་པའི་སྟེང་བནྡྷའི་ལྕགས་ཟངས་ཀྱི་སྣོད་དུ། ཤིས་པའི་ལས་གཙོ་བོར་འདོད་ན་དཀྱིལ་འཁོར་གྱི་གཙང་ལྷག་སྟེང་དྲག་ཤུལ་གྱི་ལས་ཐབས་འབའ་ཞིག་གཙོ་བོར་འདོད་ན་རྣལ་འབྱོར་པས་ཚིམ་པར་རོལ་བའི་རྨེ་ལྷག་སྟེང་དུ་བཞག་སྟེ། དཔལ་ཆེན་ལས། འབངས་ཐོག་རྗེ་ཡིས་མི་གནོན་རྒྱུ། སོགས་ཀྱིས་བསྟན་ནོ། །དེ་ནས་རང་ཉིད་ལྷར་གསལ་བའི་ཡ་རྐན་མ་རྐན་ལ་ཨཱཿལས་སྣང་མཐའ་ཡབ་ཡུམ་བསྐྱེད་ལ་བདུད་རྩི་ཁར་བཏུངས་ཏེ་ལྷའི་བྱང་སེམས་དང་མཉམ་དུ་བབས་པར་བསམ་སྟེ་འབྲུ་གསུམ་བརྗོད་བཞིན་དུ་ལྷག་མར་བྱ་ཁྱུང་གི་ཕྱག་རྒྱས་ཁ་ཁྲུས་བཏབ། དོན་ནི་དགོངས་འདུས་ལས། ཕུད་ལ་མཆིས་བསྐལ་མི་ལྡན་གྱིསཿལྷག་མ་ཁ་ཁྲུ་ངེད་ལ་ཞུཿ སོགས་ཀྱི་བཀའ་ཉན་པའི་དགོས་པ་ཡོད་དོ། །ཨོཾ་ནོར་བུ་འཛིན་པའི་སྙིང་པོ། ཨ་ཀ་རོ་མ་སྐྱེས་པ། མུ་ཁ་སྒོ། སརྦ་ཐམས་ཅད། དྷརྨ་ནཾ་ཆོས། ཨ་དྷྱ་གདོད་མ། ཨུཏྤན་སྐྱེ་བ་མེད་པ། ཏྭོ་དྷ་ནི་དེ་ཁོ་ན་ཉིད། དོན་ཨ་ཡིག་ནི་གདོད་མ་ནས་མ་སྐྱེས་པ་སྟེ་ཆོས་ཐམས་ཅད་ཀྱི་སྒོའ།ོ ། ཞེས་ཤེར་ཕྱིན་ནས་གསུངས་པ་དང་མཐུན་ནོ། །ཨོཾ་ཨཱཿཧཱུཾ་ནི་དེ་རྣམས་ཀྱི་སྐུ་གསུང་ཐུགས་བྱིན་གྱིས་བརླབས། ཕཊ་ནི་མ་རུང་པ་ཚར་བཅད། སྭཱ་ཧཱ་ནི། གཞི་ཚུགས་ཤིག་པའོ། །འདོད་ཡོན་གྱི་ཕུང་པོར་དམིགས། འབར་བའི་ཕྱག་རྒྱ་བཅས་ཏེ་ཕཻཾ། ཞེས་པས་ལྷག་མའི་མགྲོན་ཀུན་བྱ་རྒོད་ཤ་ལ་འཐིབ་པ་བཞིན་བྱོན་པར་བསམ་མོ། གཉིས་པ་ལ། མགྲོན་གྱི་རྣམ་གྲངས་བསྟན་པ་དང་། ཕྲིན་ལས་བཅོལ་བ་གཉིས་ལས། དང་པོ་ནི། ལྷག་ལ་དབང་བའི་བཀའ་ཉན་ནིཿ མཁའ་འགྲོ་སུམ་ཅུ་རྩ་གཉིས་དངཿ གིང་ཆེན་ཁྱོ་ཤུགས་ལངྐ་འབུམཿ ཕོ་ཉ་གསུམ་བརྒྱ་དྲུག་བཅུའི་སྡེཿ མགྱོགས་མ་བཞི་དང་འབར་མ་བརྒྱདཿ མ་མོ་བདུན་དང་སྲིང་མོ་བཞིཿ ཤུགས་འགྲོ་གནས་ཉུལ་ཕྲ་མེན་རྣམསཿ ལྷག་ལ་གདུང་ཞིང་ཚོགས་ཁང་འགྲིམཿ ཞེས་པས། ངོ་བོ་དཔལ་ཆེན་པོའ་ིཐུགས་རྗེའི་སྒྱུ་འཕྲུལ་ལས་ཤར་ཀྱང་རྣམ་པ་འཇིག་རྟེན་དྲེགས་པའི་གཟུགས་སུ་བསྟན་པའི་ལྷག་མ་ལེན་པ་ལ་དབང་བསྒྱུར་ཞིང་ཁས་བླངས་པའི་རྒྱལ་བའི་དཀྱིལ་འཁོར་གྱི་རིམས་པ་ཚུལ་བཞིན་སྒྲུབ་པའི་རྣལ་འབྱོར་པའི་བཀའ་ཉན་ནི་དགའ་བྱེད་མ། འདྲེན་བྱེད་མ་སོགས་ཞི་བའི་མཁའ་འགྲོ་བརྒྱད། འཇོམས་བྱེད་མ་ཆགས་བྱེད་མ་སོགས་རྒྱས་པའི་མཁའ་འགྲོ་མི་བརྒྱད། གནོད་སྦྱིན་མ་ཡང་དག་འཕྲོག་སོགས་དབང་གི་འདྲེ་བརྒྱད། ཕག་གདོང་མ། རྔ་མོང་གདོང་སོགས་དྲག་པོའ་ིམཁའ་འགྲོ་བརྒྱད་དེ་སུམ་ཅུ་རྩ་གཉིས་ཆས་མཁའ་འགྲོ་སྤྱི་མཐུན་དང་། རྡོ་རྗེ་གནོད་སྦྱིན་དང་། རྡོ་རྗེ་སྤྱང་ཀི་སོགས་གིང་ཆེན་ཁྱོ་དགུ་རྡོ་རྗེ་འཁྲུལ་མོ་ཆེ་དང་། རྡོ་རྗེ་གང་རྩམ་སོགས་ཤུགས་དགུ་སྟེ་བཅོ་བརྒྱད་ཀིངྐར་ཕོ་ཉའི་སྐད་དོན་ཟུར་ཆག་པས་གིང་སྟེ་ཉྭ་སུལ་རགས་པ། ཡན་ལག་དར་གྱི་སྒྲོག་བཅིངས་དང་དར་ཤིང་། དར་དཔྱངས་སོགས་དང་ལྡན་པའོ། །ལངྐའི་བདག་པོ་མགྲིན་བཅུ་སོགས་སྲིན་པོ་འབུམ་ཕྲག་དུ་མའོ། །རྣམ་པར་རྒྱལ་བ་དང་སྙེམ་མ་དབང་ཕྱུག་སྔོན་ཅན་དང་། རྡོ་རྗེར་སྡེར་མོ་སོགས་ཁྲོ་བོ་ཡབ་ཡུམ་དྲུག་བཅུ་ནི་ཁྲོ་བོའ་ིཚུལ་དང་། རྡོ་རྗེ་འབར་བའི་ཕོ་ཉ་དང་། མཐོང་བྱེད་མ་སོགས་དུང་གི་ཕོ་ཉ་མོ་དྲུག་བཅུ་རྡོ་རྗེ་དབྱིངས་ཕྱུག་མ་དང་། རྡོ་རྗེ་མཁའ་འགྲོ་མ་སོགས་གསེར་གྱི་ཕོ་ཉ་མོ་དྲུག་བཅུ། རྡོ་རྗེ་ཐོག་འབེབས་མ་དང་། རྡོ་རྗེ་འབྲུག་སྒྲོག་མ་སོགས་བསེའི་ཕོ་ཉ་མོ་དྲུག་བཅུ། རྡོ་རྗེ་རྒྱ་གྲམ་མ་དང་རྡོ་རྗེ་འཇོམས་ཆེན་མ་སོགས་གཡུའི་ཕོ་ཉ་མོ་དྲུག་བཅུ་ཏེ་ཕོ་ཉ་ཉིས་བརྒྱ་བཞི་བཅུ་ནི་སྐྲ་བརྫིས་པ་ཐོད་སྐམ་དབུ་རྒྱན། མི་ལྤགས་ཀྱི་སྟོད་གཡོགས། གཟིགས་གི་ཤམ་ཐབས། རུས་པའི་ཕྱག་རྒྱ་ལྔ་སོགས་ཁྲོ་མོའ་ིཆས་སོ། །མོ་མོ་རལ་གཅིག་མ། མ་མོ་ཐལ་མདོག་མ། མ་མོ་རལ་པ་ཅན་སོགས། ཕྱག་མཚན་སྣ་ཚོགས་འཛིན་པ་ཆས་གོང་ལྟར་རོ། །མ་མོ་དྲུག་བཅུ་ནི། དྲུག་བཅུ་དྲུག་གིས་ཕོ་ཉ་སུམ་བརྒྱ་དྲུག་བཅུའི་སྡེ་ཚན་དང་དཀར་མོ་མིག་གཅིག་རྒྱས་འདེབས་སོགས་འགྱོགས་མ་བཞི་དང་། འབར་མ་ཉི་ཟེར་ཅན་དང་མེ་འཁྱེར་གློག་ཕྲེང་ཅན་སོགས་འབར་མ་བརྒྱད། རྡོ་རྗེ་ཀུན་བཟང་མོ་དང་ཀུན་གྲགས་མ་སོགས་མ་མོ་བདུན་དང་། གླིང་བཞི་མགྱོགས་འགྲོ་མ་སོགས་སྲིང་མོ་བཞི་སོགས་ཕལ་ཆེར་གོང་མ་དག་དང་ཆ་ལུགས་མཐུན་པ། ཤུགས་ཀྱི་འགྲོ་བ་དང་གནས་ཉུལ་གྱི་མ་ཚོགས་དང་། དབང་ཕྱུག་མ་སོགས་མགོ་ལུས་མི་མཐུན་པའི་ཕྲ་མེན་གྱི་ཚོགས་ལ་སོགས་པ་རྣམས་ཀྱང་སྔོན་ཚེ་དམ་བཅས་པ་བཞིན་དུ་ལྷག་ལ་གདུང་བཞིན། ཚོགས་ཀྱི་ཁང་པ་ཉུལ་བ་སྟེ། གསང་སྙིང་ལས། ཚོགས་ཀྱི་དཀྱིལ་འཁོར་ཆེན་པོ་འདིའི། མིང་ཙམ་འཛིན་པར་བྱེད་པ་ཡང་། །གཙུག་གི་ནོར་བུ་འབར་བ་ལྟར། །གཡོ་སྒྱུ་མེད་ཅིང་གུས་ལྡན་པས། །སེམས་ཀྱིས་བླངས་ཏེ་སྤྱི་བོ་ཡི། །གཙུག་ཏུ་བླངས་ཏེ་བསྐུར་བར་བྱེད། །ཅེས་པ་ལྟར་རྣལ་འབྱོར་པ་རབ་ལྟ་སྒོམ་གྱི་གདེངས་དང་ལྡན་པས་ཀླུའི་གཙུག་ནོར་བཞིན་ཏུ་བཀུར་ཞིང་གྲིབ་ལྟར་འགྲོགས། ཕྲིན་ལས་མ་བཅོལ་ཀྱང་བསྒྲུབ། །རྣལ་འབྱོར་པ་འབྲིང་བསྐྱེད་རིམས་གསལ་ཞིང་བསྙེན་བསྒྲུབ་ཐེམ་པས་དམངས་ཀྱིས་རྒྱལ་པོ་མཐོང་བ་ལྟར་བཅོལ་བའི་ཕྲིན་ལས་བསྒྲུབ། རྣལ་འབྱོར་ཐ་མ་དམ་ཚིག་གཙང་ཞིང་། མཐུན་རྫས་འཛོམ་ན། རྗེ་དཔོན་གྱིས་འབངས་ལ་དོན་ཆེན་བཅོལ་བ་ལྟར་གཏོར་མ་ལེན་ཅིང་འཆད་ལ་བོར་བའི་ཕྲིན་ལས་བསྒྲུབ་བོ། །གཉིས་པ་ནི། ཕམ་ཕབས་བཟང་པོ་འདི་བཞེས་ལཿ མི་མཐུན་རྐྱེན་ངན་བར་ཆད་སོལཿབཅོལ་བའི་ཕྲིན་ལས་བསྒྲུབ་པར་མཛོདཿ ཅེས་པས། ཕམ་ཕབས་ཀྱི་གཏོར་མ་བཟང་པོ་འདི་བཞེས་ལ་རྣལ་འབྱོར་པ་བདག་ལ་དགྲ་གདོན་ནད་མཚོན་དུག་སོགས་མི་མཐུན་པའི་རྐྱེན་ངན་པ་ཅི་དང་ཅི་ཡིས་དམ་པའི་ཆོས་བསྒྲུབ་པའི་བར་དུ་ཆད་པར་བྱེད་པ་ཐམས་ཅད་ཕྱིར་སོལ་བ། ཞི་བ་དང་རྒྱས་པ་དང་། དབང་དང་། དྲག་ཤུལ་མངོན་སྤྱོད་ཀྱི་ལས་ཆེན་རྣམ་པ་བཅུ་གཉིས་གང་བཅོལ་བའི་ཕྲིན་ལས་ཐམས་ཅད་བསྒྲུབ་པར་མཛོད་ཅིག་པའོ། །བཅུ་གཅིག་པ་རྡོ་རྗེའི་གླུ་གར་བྱ་བ་ནི། ཉི་ཟླ་ཁ་སྦྱོར་རྒྱུད་ནས་གསུངས་པ་ཐེག་མཆོག་མཛོད་ལེའུ་བཅུ་བདུན་པར་ལེགས་པར་བཀྲལ་བ་བཞིན་སྤྲོ་ན་ལྷག་གཏོར་གྱི་གོང་ཚོགས་སུ་རོལ་བའི་རྗེས་སུ་བྱའོ། །བཅུ་གཉིས་པ་སྨོན་ལམ་གདབ་པ་ནི། མཁའ་འགྲོ་མ་ཡི་དཀྱིལ་འཁོར་དུཿ ཚོགས་ཀྱི་འཁོར་ལོ་བསྐོར་བ་ཡིཿ བདག་གཞན་འགྲོ་བ་མ་ལུས་པ། །དཀྱིལ་འཁོར་གཅིག་ཏུ་འགྲུབ་པར་ཤོག །ཅེས་དང་། སྤྲོ་ན་གཞན་བསྔོ་སྨོན་དང་། བཀྲ་ཤིས་ཡང་བྱ་བར་བཤད་དོ། གཉིས་པ་ཐུགས་དམ་བསྐུལ་བ་ནི། །ཧཱུཾ། བཞེངས་ཤིག་ཡེ་ཤེས་མཁའ་འགྲོའ་ིལྷཿ ཆོས་ཀྱི་དབྱིངས་ནས་སྐུར་བཞེངས་ལཿ བྱང་ཆུབ་བསྒྲུབ་པའི་བར་ཆད་ཐུལཿ སྣོད་བཅུད་འབྱུང་བའི་རྒུད་པ་སོལཿ རྩ་རླུང་དབང་ཐང་ཉམས་པ་གསོསཿ བསྒྲུབ་པའི་འབྲས་བུ་མཆིས་པར་མཛོདཿ ཅེས་པས་གནད་ནས་བསྐུལ་བའི་ཚུལ་གྱིས་བཞེངས་ཤིག་ཅེས་སྨོས་ལ་སུ་བཞེངས་ན་ཡེ་ཤེས་དབྱིངས་ཀྱི་མཁའ་འགྲོ་མའི་ལྷ་ཚོགས་ཐམས་ཅད་དོ། །ཚུལ་ཇི་ལྟ་བུས་བཞེངས་ན། སྤྲོས་པའི་མཐའ་གང་ལ་ཡང་མི་གནས་པའི་ཡེ་ཤེས་ཆེན་པོ་ཆོས་ཀྱི་སྐུའི་ཕོ་བྲང་ཆེན་པོའ་ིདབྱིངས་ནས་རྣམ་པ་ལོངས་སྤྱོད་རྫོགས་པའི་སྐུ་ཆགས་ཤིང་བཞད་པའི་རྣམ་པ་ཅན་གྱི་མཚན་དཔེར་བཞེངས་ལ། ཕྲིན་ལས་ཅི་མཛད་ན་བདག་ཅག་བྱང་ཆུབ་བསྒྲུབ་པར་བྱེད་པའི་རྣལ་འབྱོར་པ་ཀུན་གྱི་བར་དུ་གཅོད་པའི་ཚོགས་ཕྱི་ནང་གསང་གསུམ་ཅི་མཆིས་པ་ཐམས་ཅད་ཕྲིན་ལས་རྣམ་བཞིས་འཕྲལ་དུ་ཐུལ་པར་མཛོད་ཅིང་། སྣོད་ཀྱི་འབྱུང་བའི་རྒུད་པས་ཆར་ཆུ་མི་འབེབས་ཤིང་། བཙའ་ཐན་སད་སེར་སྡང་བ། ལོ་ཏོག་བཟའ་ཤིང་སོགས་ལ་འབྲས་བུ་མི་འབྱུང་བ་ནི། རི་ཀླུང་དུ་རྩ་མི་སྐྱེ་བ་སོགས་དང་། བཅུད་ཀྱི་འབྱུང་བའི་རྒུད་པས་མི་རྣམས་ཚེ་ཐུང་། ནད་མང་། དཔལ་དང་གྲགས་པ་ཉམས་པ་སོགས་མཐོ་རིས་ཀྱི་ཡོན་ཏན་བདུན་ལས་ཉམས་པ་དང་། ཕྱུགས་ཀྱི་དཀར་ཤེ་ཉམས་པ་སོགས་ཐམས་ཅད་སེལ་བ་དང་། །ཁྱད་པར་དུ་རྣལ་འབྱོར་པ་ལ་རྩ་རླུང་ཐིག་ལེ་དང་སྟོབས་དང་དབང་ཐང་ཉམས་པས་གློ་བུར་དུ་ལང་ཚོ་རྒུད་ཅིང་འཆི་ལྟས་ཀྱི་མཚན་མ་འབྱུང་བ་དང་ནད་དང་གདོན་གྱི་གནོད་པ་མང་བ་ཁམས་གསུམ་གྱི་སྐྱེ་འགྲོ་དབང་དུ་མི་འདུས་ཤིང་། མངལ་སྐྱེས་ཞིང་སྐྱེས་ལྷན་སྐྱེས་ཀྱི་མཁའ་འགྲོ་མ་རྣམས་གྲོགས་སུ་མི་འགྱུར་བ་ཟས་ནོར་ལོངས་སྤྱོད་ཀྱིས་ཕོངས་ཤིང་ས་ལམ་གྱི་ཡོན་ཏན་འགྲིབ་ཅིང་ཅི་བསམ་དགེ་བར་མི་འགྱུར་བ་མཐའ་དག་གསོས་བསྒྲུབ་པའི་འབྲས་བུ་ཚེ་རིང་ནད་མེད་བདེ་སྐྱིད་དང་ལྡན་ཞིང་ལྷ་འདྲེ་མི་གསུམ་གནས་གསུམ་ཀྱི་དཔའ་བོ་མཁའ་འགྲོ་བཅས་དབང་དུ་བསྡུས། །ས་ལམ་གྱི་ཡོན་ཏན་མངོན་དུ་གྱུར་ཏེ་གནས་སྐབས་སུ་གྲུབ་ཆེན་བརྒྱད་དང་ཕྲིན་ལས་བཞི། མཐར་ཐུག་ཀུན་ཏུ་བཟང་པོ་བྱང་ཆུབ་མཆོག་གི་གནས་དག་མཆིས་པར་མཛོད་ཅེས་སོ། །གསུམ་པ་ཆད་ཐོ་བྱ་བ་ནི། གཏོར་མ་གྲུ་གསུམ་མཐེབ་ཀྱུས་བརྒྱན་པ་བཤམས། འབྲུ་གསུམ་གྱིས་བརླབས་ལ་སྔོན་གྱི་ཆད་ཐོ་ཐ་ཚིག་བསྒྲགས་པ་ལ་གཉིས། སྔོན་བྱུང་གི་རྣམ་པར་བཞག་པ་དང་། གདུལ་བྱའི་དཔལ་ཏུ་རྟེན་འབྲེལ་མངོན་དུ་གྱུར་ཚུལ་ལོ། །དང་པོ་ནི་དུས་གསུམ་ལས་འདས་ཀུན་ཏུ་བཟངཿ རང་སྣང་རྣམ་དག་འོག་མིན་དུཿ གདན་གསུམ་ཚང་བའི་སྟོན་འཁོར་གྱིསཿ གསང་ཆེན་རྒྱུད་སྡེའི་ཆོས་འཁོར་བསྐོརཿ དངོས་འཛིན་དག་པའི་ལྷ་གནས་གསུམཿ རྒྱུད་སྡེ་འབྱུང་བའི་གནས་སུ་བསྟནཿ ཞེས་པས། དུས་གསུམ་ལས་འདས་པ་ཁྱབ་གདལ་དུས་མེད་ཆེན་པོ་ཀུན་ཏུ་བཟང་པོའ་ིབསམ་གྱིས་མི་ཁྱབ་པའི་དུས་ཏེ། མཚན་བརྗོད་ལས་དུས་གསུམ་དུས་མེད་རྟོགས་པའོ། །ཞེས་པས། ཕུན་སུམ་ཚོགས་པ་དང་ཆོས་སྐུའི་དབྱིངས་ཡེ་ཤེས་ཆེན་པོའ་ིརང་སྣང་ཉོན་མོངས་པ་དང་བག་ཆགས་ཀྱི་དྲི་མ་ཤིན་ཏུ་རྣམ་པར་དག་པའི་འོག་མིན་ཆེན་པོ་སངས་རྒྱས་ཉིད་ཀྱི་སྤྱོད་ཡུལ་དུ་གྱུར་པ་རང་ཉིད་སྒྲིབ་པ་མཐའ་དག་སྤངས་ནས་མངོན་པར་འཚང་རྒྱ་བའི་ཚེ་མངོན་དུ་སྣང་བའི་ཕོ་བྲང་སྟེ། སྒྱུ་འཕྲུལ་རྡོ་རྗེ་ལས་འོག་མིན་ཆེན་པོའ་ིགནས་མཆོག་ཏུཿ རིགས་བདག་ཕྱག་རྒྱ་ལྷུན་གྲུབ་སྐུཿ ཞེས་པས་གནས་ཕུན་སུམ་ཚོགས་པ་དང་། ཕུང་པོ་ལྔ་དང་ཁམས་ལྔ་དག་པ། སྟོན་པ་རིགས་ལྔ་ཡབ་ཡུམ། སྐྱེ་མཆེད་དག་པ་སེམས་དཔའ་སེམས་མ་ལས་དབང་དག་པ་ཁྲོ་བོ་ཁྲོ་མོ་སྟེ། དེ་ལྟར་གདན་གསུམ་ཚང་བའི་སྟོན་འཁོར་ནི་གཙོ་དང་འཁོར་ཕུན་སུམ་ཚོགས་པ་བཞི་དང་ལྡན་པ་དེ་ཉིད་ཀྱི་སྐབས་ཆོས་ཕུན་སུམ་ཚོགས་པ་གསང་སྔགས་ཐེག་པ་ཆེན་པོའ་ིརྒྱུད་སྡེའི་ཆོས་ཀྱི་འཁོར་ལོར་རྟག་པ་རྒྱུན་གྱི་འཁོར་གསང་བ་ཆེན་པོའ་ིཚུལ་གྱི་བསྐོར་ཏེ། དེ་དག་ཀྱང་ཕྱག་ན་རྡོ་རྗེ་ལ་སོགས་པ་བཀའི་སྡུད་པ་པོ་དག་གིས་བསྡུས་ཏེ་དངོས་པོའ་ིའཛིན་པ་རྣམ་པར་དག་པའི་ལྷ་གནས་གསུམ་དང་། ཨོ་རྒྱན་གྱི་ཡུལ་དང་། ཤམ་བྷ་ལ་དང་དུར་ཁྲོད་ཆེན་པོ་བརྒྱད་ལ་སོགས་པ་དཔའ་བོ་དང་མཁའ་འགྲོ་དང་། རིག་པ་འཛིན་པ་དང་། ཚེ་ལ་དབང་འབྱོར་བའི་གྲུབ་པའི་དབང་ཕྱུག་ཆེན་པོ་རྣམས་ཀྱིས་བཟུང་ནས་གནས་ས་ནི་དེ་དག་རྒྱུད་སྡེ་འབྱུང་བའི་གནས་ཞེས་སུ་དེ་བཞིན་གཤེགས་པས་བསྟན་ཏེ། མདོ་སྡེ་གདམས་ངག་འབོགས་པའི་རྒྱལ་པོ་ལས། ང་ནི་འདི་ནས་མི་གནས་ནས། །ལོ་ནི་བརྒྱ་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛུམ་བུའི་གླིང་གི་ཕྱོགས་མཚམས་སུ། །མི་ལས་སྐལ་ལྡན་རིགས་ཅན་སྟེ། །རྒྱལ་པོ་ཛཿ ལས་འབྱུང་བར་འགྱུར། །ཞེས་སོ། །གཉིས་པ་ནི། སྔགས་ནི་ལས་ཅན་སྤྲུལ་པའི་ངོརཿ རང་བཞིན་ཉིད་དུ་འབྱུང་བའི་ཚེཿ སྒྲགས་མདའ་མཚོ་རྒྱལ་བླ་མཚོ་རུཿ དཔལ་ལྡན་རང་བྱུང་རྡོ་རྗེའི་རྒྱུདཿགནས་གསུམ་མཁའ་འགྲོས་བྱིན་བརླབས་ཤིངཿ སྲེད་ལེན་མེད་པའི་བརྡའ་ཡིག་ལསཿ མཛད་མེད་གཏེར་གྱི་སྒོ་ཕྱེ་ཚེཿ འཁྲུལ་པ་གཞི་ལ་དག་པ་ཡིཿ རྟེན་འབྲེལ་བཞིན་དུ་ཕྲིན་ལས་མཛོདཿ ཅེས་པས་སྤྱིར་འདུལ་བའི་བསྟན་པ་དང་ཆོག་མའི་སློབ་དཔོན་འབའ་ཞིག་ལ་ལྟོས་པ་བཞིན་གསོལ་བཞིའི་ལས་ཀྱིས་རྫོགས་པ་ཁོ་ན་འདོད་ལ། དེ་བཞིན་དུ་ཐེག་ཆེན། གསང་སྔགས་ཀྱང་གདུལ་བྱ་རང་རྒྱུད་པ་རྣམས་ལ་ནི་མཚན་ཉིད་ལྡན་པའི་སློབ་དཔོན་ལ་བརྟེན་ནས་རང་རང་གི་གཞུང་ནས་གསུང་བའི་སྦྱོར་དངོས་རྗེས་གསུམ་གྱི་ཆོ་ག་མཐའ་དག་མ་ཚང་ན་ཆོ་ག་ཉམས་པས་སྨིན་མི་ནུས་པར་གསུངས་ཤིང་ངེས་པར་གལ་ཆེ་ལ་ལས་ཅན་སྤྲུལ་པའི་གང་ཟག་གི་ངོར་མི་རྒྱལ་བའི་ཕྲིན་ལས་བསམ་གྱིས་མི་ཁྱབ་པས་བརྡའ་དང་རྟེན་འབྲེལ་གྱི་གནད་དང་ཆོས་ཉིད་ཀྱི་དོན་ལ་དབང་འབྱོར་པས་རང་བཞིན་ཉིད་དུ་འབྱུང་བའི་ཚུལ་སྟོན་གྱི་གསར་སྙིང་གི་རྒྱུད་སྡེ་མཐའ་དག་གི་འབྱུང་ཁུང་གི་ཤེས་པ་ཧ་ཅང་མཐའ་ཀླས་པའི་ཕྱིར་ལུང་མ་སྨོས་སོ། །ཁྱད་པར་འདིའི་བྱུང་ཚུལ་ལོ་རྒྱུས་ལས། ཆུ་མོ་སྤྲུལ་གྱི་ལོ་དཔལ་ལྡན་བླ་མ་དམ་པ་དྲི་མེད་གླིང་པའི་དགོངས་རྫོགས་སོགས་སུ་དབེན་གནས་སྒྲགས་ཀྱི་ཡང་རྫོང་དུ་ཚོགས་ཀྱི་འཁོར་ལོ་སྟོང་རྩ་དང་། མཁའ་འགྲོའ་ིམེ་མཆོད་སོགས་ཀྱི་ཆེད་གནས་འབྲེལ་དུ་ལྷག་པའི་ཚེ། རེ་ཞིག་ན་གཡུ་རུ་སྒྲགས་ཀྱི་མདའ་གྲོང་མོ་ཆ་དང་ཉེ་བར། མཚོ་རྒྱལ་བླ་མ་ཚོར་སླེབ་པ་ན། མྱོང་གྲོལ་བདུད་རྩི་ཕུར་མ་མཚོ་དར་དང་བཅས་ཕུལ་པས་སྲོག་ཆགས་འཛུལ་བ་ལྟར་དར་རིམ་གྱིས་གཏིང་དུ་སོང་བའི་དར་མཇུག་མཚོ་ཁར་སྐྱ་ཡལ་ལེ་བསྡད་པས། ངོ་མཚར་བའི་སྣང་བ་ཅུང་ཟད་སྐྱེས། དེར་ངག་པའི་ཤེས་པ་ལྷན་སྐྱེས་སུ་ཤར་ནས་ཐ་མལ་གྱི་སྣང་བ་སྤངས་བའི་ཆུ་ལ་བཏུང་བ་དང་། ཉེ་རེག་བྱས་པའི་ཚེ། སྐག་དེར་བུང་བ་ཤིན་ཏུ་གནག་པ་མེ་ཏོག་ཨུཏྤ་ལའི་རྣམ་པ་ལྟ་བུ་ཞིག་འཕུར་ལྡིང་བྱེད་པ་དང། རྒྱུད་མང་གི་སྒྲ་ལྟ་བུ་སྦོམ་ལ་འགྱུར་བ་ལན་གསུམ་སྒྲོག་པའི་རྐྱེན་ལས། སྣང་སེམས་ཆོས་ཉིད་གསུམ་འདྲེས་པའི་ཀློང་ནས་ཡེ་ཤེས་ཀྱི་མཁའ་འགྲོ་མ་དམར་གསལ་རིན་པོ་ཆེ་ངང་རུས་པའི་རྒྱན་དྲུག །མེ་ཏོག་གི་དོ་ཤལ་འཕྱང་འཕྲུལ་དུ་གཡོ་བ་ཞིག་གིས། རང་གི་མངོན་པར་རྟོགས་པའི་ཚོགས་སྙིང་པོ་དང་བཅས་པ་ལེགས་པར་བསྟན་ཏེཿ མཁའ་འགྲོ་ང་ནི་ཆོས་སྐུའི་ཀློང་ནས་འོངསཿའགྲོ་དང་འོང་གི་རྣམ་རྟོག་ཡོད་མ་ཡིནཿ བུ་མོ་ང་ནི་གནས་ཡུལ་ཉེར་བཞིའི་བདགཿ རྔ་ཡབ་དཔལ་རི་སྤྲུལ་པའི་ཞིང་ནས་འོངསཿ བཀོད་པ་ལུས་ལ་སྔགས་ཀྱི་ཡོན་ཏན་རྫོགསཿ བུ་མོ་ང་ནི་དུས་གསུམ་རྒྱལ་བའི་ཡུམཿ ང་ལས་མ་སྐྱེས་དཀོན་མཆོག་གསུམ་ཡང་མེདཿ མཁའ་འགྲོ་ང་བསྒྲུབ་སྐུ་གསུམ་དངོས་གྲུབ་ཐོབཿ གདུལ་བྱའི་འགྲོ་དོན་ལྷོ་ནུབ་ཕྱོགས་ལ་ཡོདཿ རྟེན་འབྲེལ་མ་འཆོལ་ལས་ཅན་སྐྱེས་བུའི་ཚེཿ ཐིག་ལེ་དྲུག་གི་ཀློང་དུ་ངལ་གསོལ་བཏབཿ ༼ཡོཾ༽ ཞེས་གསུངས་པའི་མདོ་ལསཿ དཔལ་ལྡན་རང་བྱུང་རྡོ་རྗེའི་རྒྱུད་མཁའ་འགྲོ་གསང་བའི་ཡི་གེ་རྫུ་འཕྲུལ་གྱི་བཀོད་པ་ཟད་མི་ཤེས་པ་དང་གཉིས་སུ་མེད་པར་གྱུར་ཏེ་སྙིང་གི་དབུས་སུ་ཐིམ་པར་བྱས་སོ། །དེའི་ཚེ་ཆོས་རྗེ་བྲག་ཕུག་པ་མདུན་ན་ཡོད་པ་ནན་བསྟུད་ཀྱིས་གཟིགས་སྣང་ཅི་བྱུང་ཞེས་དྲི་བ་མཛད་པས་བཏང་སྙོམས་སུ་འཇོག་པའི་རྟེན་འབྲེལ་ནི་སད། གསང་བའི་དམ་ཚིག་ཞག་ལྔར་བསྲུངས་ནས་དམར་ཕྱོགས་ཀྱི་མཁའ་འགྲོ་འདུ་བའི་ཚེས་ཉེར་ལྔ་ལ་ཚོགས་དང་མཆོད་པའི་འདུ་བ་རྒྱ་ཆེན་པོ་དང་བཅས་ཡང་རྫོང་དུས་དགྲའི་དབང་པོའ་ིཕོ་བྲང་དུ་རྟེན་འབྲེལ་ཟབ་མོའ་ིམཚམས་སྦྱོར་དང་བཅས་རྒྱ་ཁྲོལ་ལོ། ཞེས་གསུངས་པས་ས་འོག་ས་སྟེང་ས་བླ་ཏེ་གནས་གསུམ་གྱི་དཔའ་བོ་དང་མཁའ་འགྲོའ་ིངོ་བོ་མཁའ་འགྲོ་བདེ་ཆེན་མས་བྱིན་གྱིས་བརླབས་ཤིང་། དེ་ཉིད་ལ་བདག་ཏུ་འཛིན་པའི་སྲེད་པ་དང་ཟག་བཅས་ཀྱི་དངོས་པོར་ལྟ་བས་ལེན་པ་མེད་པའི་རྟེན་འབྲེལ་བརྡའི་ཡི་གེ་སྤྲུལ་པའི་སྐྱེས་བུ་གང་གི་རྣམ་ཀུན་མཆོག་ལྡན་གྱི་ཐུགས་དང་རོ་གཅིག་པས་འཛད་པ་མེད་པའི་ཐུགས་གཏེར་ནམ་མཁའ་མཛོད་ཀྱི་སྒོ་ཕྱེ་བའི་ཚེ་འཁྲུལ་པའི་རྟོག་ཚོགས་བརྒྱད་ཁྲི་བཞི་སྟོང་གཞི་དབྱིངས་གདོད་མའི་ཀློང་དུ་རང་དག་པ། དེའི་རྟེན་འབྲེལ་བཞིན་དུ་གཏོར་ལེན་དབྱིངས་དང་ཡེ་ཤེས་ཀྱི་མཁའ་འགྲོ་འཁོར་དང་བཅས་པས་ཀྱང་སྔོན་དུ་ཆད་དོན་བྱས་པའི་མདོ་བཞིན་འདི་ཉིད་ཉམས་སུ་ལེན་པའི་རྣལ་འབྱོར་ཀུན་ལའང་རྣམ་རྟོག་དབྱིངས་སུ་ཞི་བ་དང་། ཉམས་རྟོགས་ཀྱི་ཡེ་ཤེས་རྒྱས་པ་དང་། རང་གི་འཁྲུལ་སྣང་རིག་པའི་ཀློང་དུ་འདུས་པ་དང་། རྒྱུད་དྲུག་ལས་སྒྲོལ་བའི་ཕྲིན་ལས་རྣམ་པ་བཞི་མཛོད་ཅེས་པའོ། །གཉིས་པ་བསྟན་མ་སྐྱོང་བ་ནི། གཏོར་ཟླུམ་མཐེབ་སྐོར་བཅུ་གཉིས་ཀྱི་བརྒྱན་པ་བཤམས། གོང་གི་བཤལ་ཆུས་ཀྱང་བྲན་ཏེ། དཔལ་གྱི་བཀའ་ཉན་བོད་ཁམས་སྐྱོང་མ་སྲིང་བསྟན་མ་བཅུ་གཉིས་རྣམསཿ འདིར་བྱོན་གཏོར་མའི་བཤལ་ཆུ་བཞེསཿ བཅོལ་བའི་ཕྲིན་ལས་བསྒྲུབ་པར་མཛོདཿ ཅེས་པས། སྔོན་སློབ་དཔོན་ཆེན་མོ་པདྨ་དང་སློབ་མ་རླངས་ཆེན་དཔལ་གྱི་སེངྒེས་རྒྱ་བལ་གྱི་མཚམས་ཨ་སུ་རའི་བྲག་ཕུག་ཏུ་དཔལ་ཆེན་དྲེགས་པ་ཀུན་འདུས་གྱི་དཀྱིལ་འཁོར་ཞལ་ཕྱེ་ནས་དེའི་སྐུར་བཞེངས་ཏེ་བསྟན་མ་བཅུ་གཉིས་དམ་འོག་བཅུག་སྟེ། དབང་བསྐུར་བདུད་རྩི་སྦྱིན་ལག་ཏུ་རྡོ་རྗེ་གཏད་དེ་བཀའ་ཉན་ནས་སྤྱིར་བོད་ཁམས་སྐྱོང་ཞིང་མུ་སྟེགས་མི་འབྱུང་བ་དང་སངས་རྒྱས་ཀྱི་བསྟན་པ་བསྲུང་བ་དང་། ཁྱད་པར་ཨོ་རྒྱན་ཆེན་པོའ་ིརིང་ལུགས་འཛིན་པ་ཀུན་བུ་གཅིག་པ་མས་སྐྱོང་བ་དང་མིང་པོ་སྲིང་མོས་བཀུར་བ་བཞིན་སྐྱོང་བར་དམ་བཅས་ཤིང་ཞལ་གྱིས་བཞེས་པའི་གཙོ་མོ་དུས་སྦྱོར་དང་རྟེན་འབྲེལ་བཅུ་གཉིས་དག་ནས་བདེན་དོན་རྣམ་པ་བཅུ་གཉིས་ཀྱི་རང་བཞིན་བསྟན་མ་བཅུ་གཉིས་སྟེ། དཔལ་ཆེན་ལས། བལ་བོད་མཚམས་ན་ཚེ་རིང་མཿ ལ་སྟོད་རྡོ་རྗེ་གཡའ་མ་སྐྱོངཿ གནོད་སྦྱིན་གངས་ལ་ཀུན་བཟང་མོཿ འབྲོག་ཆེན་འཁོར་འདུ་བགེགས་ཀྱི་གཙོཿ ཇོ་མོ་གངས་རར་སྤྱན་གཅིག་མཿ བྱང་ན་མཁའ་ལྡིང་ཀླུ་མོ་རྒྱལཿ ཁ་རག་རྡོ་རྗེ་ཁྱུང་བཙུན་མཿ རྨ་ཆེན་སྦོམ་ར་དྲག་མོ་རྒྱལཿ ཀོང་བཙུན་དེ་མོ་བོད་ཁམས་སྐྱོངཿ འབྲོག་བཙན་རྡོ་རྗེ་སྨན་གཅིག་མཿ ཇོ་མོ་ནགས་རྒྱལ་གཡར་མོ་བསིལཿ དབུས་ན་རྡོ་རྗེ་ཟུ་ལེ་སྨནཿ ཞེས་སོ་དེ་རྣམས་སྔོན་པདྨའི་བཀའ་ཉན་བཞིན་འདིར་བྱོན་ལ། དཔལ་གྱི་གཏོར་མའི་བཤལ་ཆུ་དང་ལྡན་པའི་མཆོད་སྦྱིན་འདི་བཞེས་ལ་སྔོན་དམ་བཅས་པ་བཞིན་བདག་གིས་བཅོལ་བའི་འཕྲིན་ལས་བོད་ཁམས་བདེ་བ་དང་རྒྱལ་བསྟན་དར་བ་ཅི་འདོད་པ་ཐམས་ཅད་བསྒྲུབ་པར་མཛོད་ཅེས་པ་དང་། མ་མ་ནི་མ་མོ་བཅུ་གཉིས་ཀྱི་སྙིང་པོ། ཧྲིང་ཧྲིང་འདིར་འདུས་བ་ལིངྷ་གཏོར་མའི་རྡུལ་རེ་རེ་བཞིན་རིན་པོ་ཆེའི་གུར་ཁང་དང་འདོད་ཡོན་ལོངས་སྤྱོད་ཟད་མི་ཤེས་པ་དང་ལྡན་པ་ཁཱ་ཧི་ཟོ་ཞིག་པའོ། །ལྔ་པ་རྟ་བྲོ་ནི། ཡེ་ཤེས་མཁའ་འགྲོའ་ིདཀྱིལ་འཁོར་འདིརཿ ལོག་པར་འདྲེན་པའི་དམ་སྲི་ཀུནཿ མནན་ནོ་ཐེག་པ་རིམ་དགུའི་རྒྱཿ ནམ་ཡང་ལྡང་བར་མ་གྱུར་ཅིག ཅེས་གཏོར་གཞུང་ཁ་སྦུབ་ལ། ཡེ་ཤེས་ཀྱི་མཁའ་འགྲོ་མས་དཀྱིལ་འཁོར་བསྒྲུབ་པ་འདིར་མཐུན་པར་མི་ལྟ་བའི་ལོག་པར་འདྲེན་པའི་སེམས་ཀྱི་བར་ཆད་རྩོམ་པའི་དམ་སྲི་དང་འབྱུང་པོ་ཀུན། གཏོར་གཞོང་ལྕགས་ཀྱི་རི་རབ་ནག་པོ་འདིའི་འོག་ཏུ་མནན་ནོ། ས་འོག་གཤིན་རྗེའི་གྲོང་ཁྱེར་དུ་བསྐྱུར་ཏེ་རིམ་པ་དགུས་རྒྱས་བཏབ་པ་ཉིད་ཀྱང་དོན་ལ་ཐེག་པ་ཆུང་འབྲིང་ཆེན་པོ་རེ་རེར་ཡང་གསུམ་གསུམ་ཕྱེ་བའི་རིམ་པ་དགུས་རྒྱ་ཡིས་བཏབ་ནས་ཆོས་ཀྱི་དབྱིངས་རྣམ་ཐར་གསུམ་ལྡན་རྡོ་རྗེ་བཙུན་མོའ་ིབྷ་གའི་ཧོམ་ཁུང་ལས་ནམ་ཡང་འཁོར་པ་རང་ག་མར་ལྡང་བར་མ་གྱུར་ཅིག །འདིར་མཁའ་འགྲོའ་ིཐུགས་ཁ་དང་ཁ་ཊྭཱཾ་ལས་རྟ་མགྲིན་གྲངས་མེད་པར་འཕྲོས་ཏེ་གླུ་གར་བྲོ་གསུམ་བརྡུངས་པར་བསམས་ལ་རྣལ་འབྱོར་པ་ཡང་ལག་སྡིགས་མཛུབ་ཀྱིས་མཐེའུ་ཆུང་ལུ་གུ་བརྒྱུད་དུ་སྦྲེལ་ལ་གྲུབ་ཁུང་གི་མཐའ་སྐོར་ནས་བྲོ་བརྡུང་པ་ལས་ལས་བཞིར་དབྱེ་བ་མེད་པ་ཀུན་མཁྱེན་ཆེན་པོ་ཀློང་ཆེན་པོ་ཀློང་ཆེན་པས་གསུང་ལ། གཡང་འགྲེལ་དུ། དྲག་པོར་མཐེའུ་ཆུང་། དབང་ལ་སྲིན་ལག །རྒྱས་པར་གུང་མོ། ཞི་བར་མཛུབ་མོ། སྦྲེལ་བར་གསུངས་ཤིང་བྲོ་རར་ཡང་དྲག་པོར་ཟུར་གསུམ། དབང་ལ་ཟླ་གམ། རྒྱས་པར་གྲུ་བཞི། ཞི་བར་ཟླུམ་པོར་བྱ་བར་གསུངས་སོ། །དྲུག་པ་དངོས་གྲུབ་བླང་བ་ནི། མཆོད་བསྟོད་སྔོན་དུ་འགྲོ་བས། མཁའ་འགྲོ་བསྒྲུབ་པའི་དམ་ཚིག་ད་ནངས་ཐེམཿ དངོས་གྲུབ་རྩོལ་བའི་དུས་ལ་ད་བབས་ནཿ མི་གནས་ཡེ་ཤེས་ཐུགས་ཀྱི་དཀྱིལ་འཁོར་ནསཿ སྐུ་གསུང་ཐུགས་དང་མཉམ་སྦྱོར་དབང་བཅུའི་སྟོབཿ ད་ལྟ་ཉིད་དུ་བདག་ལ་སྩལ་དུ་གསོལཿ ཞེས་པས། ཡེ་ཤེས་ཀྱི་མཁའ་འགྲོ་མ་བསྒྲུབ་པའི་རྟགས་གྲངས་དུས་གསུམ་དམ་ཚིག་ཐམས་ཅད་ད་ནངས་ཏེ་སྐྱ་རེངས་དང་པོ་ཤར་བའི་སྐབས་སུ་ཐེམ་པས་དེ་ནི་བཏུང་བ་བྱ་ཞིག་དངོས་གྲུབ་ཐོབ་པའི་དུས་ཁྱད་པར་ཅན་ཏེ་མཆོག་དང་ཐུན་མོང་གི་དངོས་གྲུབ་རྣམ་པ་གཉིས་སྩོལ་བའི་དུས་ལ་ད་ལྟ་བབ་ན་སངས་རྒྱས་ནི་གཞན་དོན་དུས་ལས་མི་ཡོལ་བར་མཛད་པ་ནི་ལས་བརྒྱ་པ་ལས། རྒྱ་མཚོ་ཆུ་སྲིན་རྣམས་ཀྱི་གནས། །དུས་རླབས་ཡོལ་བར་འགྱུ་ཡང་སྲིད། །གདུལ་བར་བྱ་བའི་སྲས་རྣམས་ནི། །སངས་རྒྱས་ཐུགས་ལས་ཡོལ་མི་མངའ། །ཞེས་སོ། །མི་གནས་པ་ལ་གཉིས། ཆོས་ཀྱི་སྐུ་མཐའ་བརྒྱད་སྤྲོས་པ་དང་བྲལ་བའི་ཡེ་ཤེས་ནི་རྩ་ཤེས་ལས། གང་གི་རྟེན་ཅིང་འབྲེལ་བར་འབྱུང་། །འགག་པ་མེད་ཅིང་སྐྱེ་མེད་པ། །འོང་བ་མེད་ཅིང་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་བསྟན་པ། །ཞེས་སོ། །གཟུགས་ཀྱི་སྐུ་ཤེས་རབ་ཀྱི་ཕ་རོལ་ཏུ་ཕྱིན་པ་རྟོགས་པས་འཁོར་བའི་མཐའ་ལ་མི་གནས་སྙིང་རྗེ་ཆེན་པོས་ཞི་བའི་མཐའ་ལ་མི་གནས་པའི་ཡེ་ཤེས་ཏེ་མངོན་རྟོགས་རྒྱན་ལས། ཤེས་པས་སྲིད་ལ་མི་གནས་པ། །སྙིང་རྗེས་ཞི་ལ་མི་གནས་ཤིང་། །མྱ་ངན་འདས་ལ་འཁོར་མི་གནས། །ཞེས་པས། རྒྱལ་བ་ཀུན་གྱི་ཐུགས་རྣམ་ཐར་གསུམ་ལྡན་ཡེ་ཤེས་མཁའ་འགྲོའ་ིདཀྱིལ་འཁོར་གནས་ཏེ། འགྲེལ་ཆེན་དྲི་མེད་འོད་ལས། ཆོས་ཐམས་ཅད་རང་བཞིན་མེད་པའི་མཚན་ཉིད་དང་། རྣམ་པ་ཐམས་ཅད་ཀྱི་མཆོག་དང་ལྡན་པ་དང་། ཤེས་རབ་ཀྱི་ཕ་རོལ་དུ་ཕྱིན་པ་ཆོས་ཐམས་ཅད་བསྐྱེད་པར་མཛད་པ་སྟེ། ཆོས་འབྱུང་གི་སྒྲ་ཡིན་ཀྱང་དེ་བརྗོད་པར་མཛད་དོ། །ཆོས་ཀྱི་འབྱུང་གནས་ཞེས་བྱ་བ་ནི་གང་ལས་ཆོས་རྣམས་ཐམས་ཅད་ནི་རང་བཞིན་མེད་པར་འབྱུང་བར་འགྱུར་ཏེ། རང་བཞིན་མེད་པའི་ཆོས་རྣམས་ནི། སྟོབས་བཅུ་དང་། མི་འཇིགས་པ་བཞི་ལ་སོགས་པ་དང་། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ངོ་། །དེ་རྣམས་འབྱུང་བར་འགྱུར་བས། ཆོས་ཀྱི་འབྱུང་གནས་ནི་སངས་རྒྱས་ཐམས་ཅད་ཀྱི་ཞིང་དང་། བྱང་ཆུབ་སེམས་དཔའ་རྣམས་ཀྱི་གནས་དང་། བདེ་བ་ཆེན་པོའ་ིགནས་དང་། སྐྱེ་བའི་གནས་སོ། །ཞེས་འཕགས་པ་འཇིག་རྟེན་དབང་ཕྱུག་གིས་གསུངས་སོ། །ནས་ནི་འབྱུང་ཁུངས་ཀྱི་ཚིག་སྟེ། དེ་ནས་ཐུགས་རྗེ་ཆེན་པོའ་ིཤུགས་ཕྱུང་ལ་ཞེས་པ་ལྟ་བུ། བདག་གི་སྐུ་གསུང་ཐུགས་ཀྱི་དམ་ཚིག་མངོན་དུ་བསྒྲུབ་པ་ལ་བརྟེན་ནས། དེ་བཞིན་གཤེགས་པའི་སྐུ་གསུང་ཐུགས་ཕྱག་རྒྱ་ཆེན་པོ་དང་ད་ལྟ་ཉིད་དུ་མཉམ་པར་སྦྱོར་བ་སྟེ། གསང་སྙིང་ལས། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བའི། །ཕྱག་རྒྱ་ཆེན་པོར་བདག་སྦྱོར་ཅིག །ཅེས་སོ། །དབང་བཅུ་ནི་མ་དག་པ་བདུན་ལ་དབང་བཅུ་ཕྱི་ལྟར་དུ་ཡོད་དོ། །ཚེ་ལ་དབང་བས་བསྐལ་པ་ཇི་ཙམ་གནས་པར་འདོད་པ་གནས་པ་དང་། །སེམས་ལ་དབང་འབྱོར་བས་ཏིང་འཛིན་དཔག་ཏུ་མེད་པ་ལ་སྐད་ཅིག་རེ་རེར་མཉམ་པར་འཇོག་ཅིང་ལྡང་བར་ནུས་པ་དང་། ཡོ་བྱད་ལ་དབང་འབྱོར་བས་བསམ་པ་ཙམ་གྱིས་འཇིག་ཆེན་གྱི་ཟས་ནོར་སྣ་ཚོགས་པས་གང་བར་ནུས་པ་དང་། ལས་ལ་དབང་བས་བཟོ་དང་ལས་ཀྱི་གནས་ཐམས་ཅད་ལ་ཇི་ལྟར་འདོད་པ་བཞིན་སྤྱོད་པ་དང་། སྐྱེ་བ་ལ་དབང་བས་ལྷ་དང་མིའི་གནས་གང་འདོད་དུ་སྐྱེ་བ་དང་། མོས་པ་ལ་དབང་བས་ས་གཞི་ཐམས་ཅད་རིན་པོ་ཆེ་སྣ་ཚོགས་སུ་བསྒྱུར་ནུས་པ་དང་། སྨོན་ལམ་ལ་དབང་བས་འཇིག་རྟེན་ཐམས་ཅད་སངས་རྒྱས་ཀྱི་གང་བ་ལ་ཇི་ལྟར་སྨོན་པ་འགྲུབ་པ་དང་། རྫུ་འཕྲུལ་ལ་དབང་བས་ཞིང་ཁམས་དཔག་ཏུ་མེད་པ་སྐྲ་རྩེ་གཅིག་གིས་ནམ་མཁའ་ལ་འཛིན་ནུས་པ་སོགས་གང་འདོད་དུ་སྤྲུལ་ནུས་པ་དང་ཡེ་ཤེས་ལ་དབང་བས་ཤེས་བྱ་གང་འདོད་པ་དེ་ཤེས་པ་དང་། ཆོས་ལ་དབང་བས་ཆོས་ཐམས་ཅད་ཀྱི་མིང་དང་དོན་རྣམ་པར་བཞག་པ་ལ་མཁས་པའོ། །དེ་ཡང་དབང་བཅུ་ཕུལ་དུ་བྱུང་བ་ནི་དག་པ་ས་གསུམ་ན་ཡོད་པས་ནང་དུ་བཞག་སྟེ། འདུལ་བ་ལས་གང་ཚེ་མར་མེ་མཛད་ཀྱིས་དང་། ལུང་བསྟན་གྱུར་པ་དེ་ཡི་ཚེ། །ས་བརྒྱད་པ་ནི་ཐོབ་གྱུར་ཅིང་། །དབང་བཅུ་དག་ཀྱང་ཐོབ་པར་འགྱུར། །ཞེས་སོ། །དབང་བཅུ་ཤིན་ཏུ་རྣམ་དག་གི་སངས་རྒྱས་ཀྱི་ས་ན་ཡོད་དོ། །སྟོབས་བཅུ་ནི། དགེ་མི་དགེའང་རྒྱུ་ལས། བདེ་སྡུག་བར་མ་གསུམ་འབྱུང་བར་མཁྱེན་པ་གནས་མཁྱེན་པའི་སྟོབས། དེ་ལས་ལྡོག་ཏེ་མཁྱེན་པ་གནས་མིན་མཁྱེན་པའི་སྟོབས། དེ་བཞིན་འདོད་མི་འདོད་གཉིས་ཀ་ལས་ལྡོག་པ་དང་། ཟད་པའི་དངོས་པོ་སྟེ་ཟག་བཅས་མ་ཡིན་པའི་ལས་དང་། དེའི་རྣམ་སྨིན་དུས་གསུམ་གྱི་དངོས་པོས་བསྡུས་པ་མཁྱེན་སྟོབས་དང་ཉོན་མོངས་ཅན་དང་། དེ་ལས་གཞན་མོས་པ་འབྲིང་དང་མཆོག་སོགས་དུས་གསུམ་གྱི་སྐྱེ་འཕགས་ཀྱི་མོས་པ་སྣ་ཚོགས་མཁྱེན་སྟོབས་དང་། མིག་སོགས་གཟུགས་ཅན་དབང་ལྔ། གཟུགས་མེད་རྣམ་ཤེས་ལྔ། ཕན་ཚུན་འབྲེལ་བ་འདོད་པའི་ལྔ། རང་བཞིན་སྟོང་ཉིད་བཅུ་དྲུག་སོགས་ཁམས་ཀྱི་དབྱེ་བའི་བྱེ་བྲག །དུས་གསུམ་གྱི་ཤེས་བྱར་སྲིད་དོ་ཅོག་ཇི་སྙེད་དུས་གཅིག་མཁྱེན་པ་ཁམས་སྣ་ཚོགས་མཁྱེན་སྟོབས་དང་། མིག་སོགས་དབང་པོ་ཉེར་གཉིས་འབྲས་བུ་དང་བཅས་པ་རྣོན་འབྲིང་རྟུལ་པོའ་ིབྱེ་བྲག་གཟིགས་པ་དབང་པོ་མཆོག་དང་མཆོག་མིན་མཁྱེན་སྟོབས་དང་། འགྲོ་དྲུག །ཉན་རང་། སངས་རྒྱས་གསུམ་གྱི་ལམ་ཡང་དག་དང་ཕྱིན་ཅི་ལོག་མཁྱེན་པ་ཀུན་ཏུ་འགྲོ་བའི་ལམ་མཁྱེན་སྟོབས་དང་། བསམ་གཏན་བཞི། རྣམ་ཐར་བརྒྱད། སྙོམས་འཇུག་སོགས། ཉོན་མོངས་དང་རྣམ་བྱང་གི་ཁྱད་པར་མཁྱེན་སྟོབས་དང་། རང་གཞན་གྱི་གནས་རྗེས་སུ་དྲན་པའི་མཁྱེན་སྟོབས་དང་། དེ་བཞིན་དུ། འཆི་འཕོ་དང་སྐྱེ་བ་འཛིན་པའི་གནས་སྐབས་ཐམས་ཅད་མ་འདྲེས་པར་མཁྱེན་སྟོབས་དང་། ཉན་ཐོས་རང་རྒྱལ་བྱང་སེམས་གསུམ་གྱིས་སྤང་བྱ་དང་། ཟག་པ་ཟད་པའི་སྐབས་མཁྱེན་པའི་སྟོབས་ཏེ། དབུ་མ་འཇུག་པ་ལས། གནས་དང་གནས་མིན་མཁྱེན་སྟོབས་དང་། །དེ་བཞིན་ལས་རྣམས་སྨིན་བློ་དང་། །མོས་པ་སྣ་ཚོགས་ཐུགས་ཆུད་དང་། །སྣ་ཚོགས་ཁམས་ཀྱི་མཁྱེན་སྟོབས་དང་། །སྔོན་གནས་དྲན་པ་མཁྱེན་པ་དང་། དེ་བཞིན་འཆི་འཕོ་སྐྱེ་བློ་དང་། །ཟག་རྣམས་ཟད་པ་མཁྱེན་སྟོབས་དང་། །སྟོབས་བཅུ་པོ་ནི་འདི་དག་གོ ། ཞེས་པས། དེ་སོགས་སངས་རྒྱས་ཀྱི་ཡོན་ཏན་ཐམས་ཅད་དུས་སླད་མ་ལ་སྡང་མི་འཚམ་བར་ད་ལྟ་ཉིད་དུ་བདག་ལ་རྩལ་དུ་གསོལ་ཞེས་པའོ། །རྩ་སྔགས་ཀྱི་དོན་གོང་དུ་བཀྲལ་ལ། བཛྲ་རྡོ་རྗེ། ཀཱ་ཡ་སྐུ། ཝཀྐ་གསུང་། ཙིཏྟ་ཐུགས། སརྦ་ཐམས་ཅད། སིདྡྷི་དངོས་གྲུབ། ཕཱ་ལ་བཟང་པོ། ཧོ་རྩོལ་ཞེས་པ་སྟེ་དོན་དུ་པདྨོ་རྣལ་འབྱོར་མ་དང་ཕག་མོའ་ིསྐུ་གསུང་ཐུགས་རྡོ་རྗེའི་དངོས་གྲུབ་བཟང་པོ་རྩོལ་ཞེས་གནད་ལ་དབབ་པའི་ཚུལ་གྱི་བསྐུལ་བ་སྟེ། སྒྲུབ་རྫས་གནས་གསུམ་དུ་གཏུག་ཅིང་མྱོང་ལ། འདིར་སྒྲུབ་རྟེན་ཚད་ལྡན་ཡོད་ན་དེ་ལྟར་བསྐྱེད་གཏོར་མ་མཆོད་པར་དམིགས་པས་འཐུས། གཏོར་མ་གཅིག་པུའི་ཚེ་ཤེས་པ་གསུམ་ལྡན་གལ་ཆེ་སྟེ་དང་པོར་མཆོད་རྫས་སུ་ཤེས་པ། བར་དུ་ལྷར་ཤེས་པ། ཐ་མ་དངོས་གྲུབ་ཏུ་ཤེས་པ་སྟེ། །དེ་ཡང་གང་ཟག་ལས་དང་པོ་པ་བདག་ནི་གཏོར་མའི་སྟོད་གསུམ་གཉིས་ལྷའི་དཀྱིལ་འཁོར་དུ་བསྒོམ། སྨད་གསུམ་གཅིག་གཏོར་མའི་མཆོད་པ་རི་རབ་གླིང་བཞི་མུ་ཁྱུད་རྣམ་རྒྱལ་ཁང་བཟང་བླ་རེ་འཕན་གདུགས་འདོད་ཡོན་སྤྲིན་ཕུང་དང་བཅས་པར་བསྐྱེད་ལ་མཆོད་རླབས་མཆོད་འབུལ་ཀུན་དམིགས་ཕྱེད་པར་འབུལ་ལོ། །དབང་གི་ཚེ་གཏོར་མ་ཡོངས་རྫོགས་ལྷར་བསྐྱེད་ལ་སྐུ་གསུང་ཐུགས་ཀྱི་དངོས་གྲུབ་ལེགས་པར་བླངས་ནས་བཞིར་གཏུག་པས་མཁའ་འགྲོའ་ིལྷ་ཚོགས་ཀྱི་གནས་བཞི་ལས་ཀྱང་འོད་ཟེར་དཀར་དམར་མཐིང་ལྗང་བཞི་དང་། ལྷ་སྐུ་ཡིག་འབྲུ་ཕྱག་མཚན་བཅས་ཐོན་རང་གི་གནས་བཞིར་ཐིམ། དབང་བཞི་ཐོབ། སྒྲིབ་བཞི་དག །སྐུ་བཞི་མངོན་དུ་གྱུར་པར་བསམ། མཐར་དངོས་གྲུབ་ཏུ་ཤེས་པ་ལྷ་ལ་ལྷ། ཡེ་ཤེས་ལ་ཡེ་ཤེས། ཆོས་ཉིད་ལ་ཆོས་ཉིད་རོལ་པའི་ཚུལ་གྱིས་སྒྲུབ་རྫས་དངོས་གྲུབ་ཏུ་ལོངས་སྤྱོད་དོ། བདུན་པ་ནོངས་བཤགས་ནི། ཡེ་ཤེས་མཁའ་འགྲོའ་ིདཀྱིལ་འཁོར་དུཿ མཆོད་རྫས་མ་ཚང་བསྒྲུབ་པ་གཡེལཿ ཏིང་འཛིན་བྱིང་རྨུགས་འཐིབས་ལ་སོགསཿ འགལ་འཁྲུལ་ནོངས་པ་བཟོད་པར་གསོལཿ ཞེས་པས་ཡེ་ཤེས་མཁའ་འགྲོ་བསྒྲུབ་པའི་དཀྱིལ་འཁོར་འདིའི་སྦྱོར་དངོས་རྗེས་གསུམ་དུ་མཆོད་པའི་རྫས་དང་སྒྲུབ་པའི་རྫས་སོགས་མ་ཚང་ཞིང་སྒྲུབ་པ་གཞན་དབང་དང་ལེ་ལོས་གཡེལ་བ་དང་། སྐུ་གསུམ་ཐུགས་ཀྱི་ཏིང་ངེ་འཛིན་གཉིད་ཀྱིས་བྱིང་བ་དང་། བློ་རྨུགས་པ་དང་མུན་འཐིབས་པ་ལྟ་བུས་གསལ་བརྟན་གྱི་ངར་མ་ཐོན་པ་དང་། ལ་སོགས་ཀྱིས་འདོད་ཆགས་ཀྱི་ཡུལ་ལ་གཡེང་བས་འཕྲོ་རྒོད་ཀྱི་དབང་དུ་གྱུར་པ་སོགས་མདོར་ན་རྒྱུད་དང་འགལ་བ་དང་། ལག་ལེན་འཁྲུལ་བ་ཆོ་གའི་ཡན་ལག་ནོངས་པ་སོགས་ཅི་མཆིས་པ་ཐམས་ཅད་ཡེ་ཤེས་ལྷ་ལ་རྟོག་པ་མི་མངའ་ཡང་། དེའི་འཁོར་བཀའི་སྲུང་མ་དམ་ཚིག་གི་རྗེས་གཅོད་པ་དག་གིས་སེམས་ཅན་གྱི་རང་བཞིན་འཁྲུལ་བའི་གཞན་དབང་ཅན་ལ་སོགས་ན་བག་མེད་འགལ་འཁྲུལ་ཐམས་ཅད་རབ་ཏུ་གནོང་ཞིང་འགྱོད་པས་མཐོལ་ལོ་བཤགས་སོ། །བྱམས་པའི་ཐུགས་ཀྱིས་བཟོད་པར་གསོལ་ལ་ཚངས་པའི་དངོས་གྲུབ་སྩོལ་ཞེས་པའོ། །ཡི་གེ་བརྒྱ་པའི་དོན། །ཨོཾ་མཆོག་སྟེར། བཛྲ་ས་ཏྭ་ས་མ་ཡ། རྡོ་རྗེ་སེམས་དཔའ་དམ་ཚིག །མ་ནུ་པཱ་ལ་ཡ། རྗེས་སུ་སྐྱོང་། བཛྲ་ས་ཏྭ། རྡོ་རྗེ་སེམས་དཔའ། ཏྭེ་ནོ་པ་ཏིཥྛ། ཉིད་ཀྱིས་ཉེར་གནས་མཛོད། །ཌི་ཌྷོ་མེ་བྷ་ཝ། བདག་ལ་བརྟན་པར་མཛད་དུ་གསོལ། སུ་ཏོ་ཥྱོ་མེ་བྷ་ཝ། བདག་ལ་ཤིན་ཏུ་དགྱེས་པར་མཛོད། །སུ་པོ་ཥྱ་མེ་བྷ་ཝ། བདག་ལ་ཤིན་ཏུ་རྒྱས་པར་མཛོད། །ཨ་ནུ་རཀྟོ་མེ་བྷ་ཝ། བདག་ལ་རྗེས་སུ་ཆགས་པར་མཛོད། །སརྦ་སིདྡྷི་མེ་པྲ་ཡཙྪ། བདག་ལ་དངོས་གྲུབ་ཐམས་ཅད་སྩོལ། །སརྦ་ཀརྨ་སུ་ཙ་མེ་ཙིཏྟ། ལས་ཀུན་ལ་ཡང་བདག་སེམས་མ། །ཤྲི་ཡ་ཀུ་རུ་ཧཱུཾ། དགེ་ལེགས་སུ་མཛོད་ཧཱུྃ། །ཧ་ཧ་ཧ་ཧ་ཧོཿ སྐུ་བཞི་ཡེ་ཤེས་ལྔ་ཟུང་དང་འཇུག །བྷ་ག་ཝན་སརྦ་ཏ་ཐཱ་ག་ཏ། བཅོམ་ལྡན་འདས་དེ་བཞིན་གཤེགས་པ་ཀུན་གྱི། བཛྲ་མཱ་མེ་མུཉྩ། རྡོ་རྗེ་ཉིད་དུ་བདག་མ་འདོར། བཛྲི་བྷ་ཝ། རྡོ་རྗེ་ཅན་མཛོད། །མ་ཧཱ་ས་མ་ཡ་ས་ཏཱ་ཨཿ དམ་ཚིགས་སེམས་དཔའ་ཆེན་པོ་ཨཿ ཞེས་པའོ། །བརྒྱད་པ་རྫོགས་རིམ་ནི། ཆུ་ལས་ཆུ་བུར་རྡོལ་བ་བཞིནཿརང་ལས་སྤྲུལ་བའི་དཀྱིལ་འཁོར་ལྷཿ ཡེ་ཤེས་དབྱིངས་སུ་བཛྲ་མུཾཿ རྗེས་ཐོབ་སྒྱུ་མའི་ལྷ་སྐུར་ལྡངཿ ཞེས་པས་ཆུ་ལས་ཆུ་བུར་བརྡོལ་བ་ཆུར་ཐིམ་པ་བཞིན་དུ། རང་གི་སེམས་ལས་སྤྲུལ་པའི་དཀྱིལ་འཁོར་གྱི་ལྷ་ཚོགས་སེམས་ཉིད་ཡེ་གདོད་མའི་ཤེས་པ་མ་བཅོས་མཉམ་པ་ཉིད་ཆོས་ཀྱི་དབྱིངས་སུ་བཛྲ་མུཾ་བསྡུ་བའི་ཐ་ཚིག་སྟེ་ལྷའི་གསལ་སྣང་མེ་ལོང་ལ་ཧས་བཏབ་པ་མཐའ་ནས་རིམ་གྱིས་ཡལ་བ་བཞིན་རང་བཞིན་དུ་ཡལ་བས་དྲན་པའི་མཐའ་གསལ། སླར་ཡང་རྗེས་ཐོབ་ཀྱི་སྣང་ཆ་སྒྱུ་མ་ལྟ་བུའི་ལྷ་སྐུར་ལྡིང་ཞིང་སྐུ་གསུང་ཐུགས་ཀྱི་ཡི་གེས་རྒྱས་བཏབ་པས་གོ་བགོ་བ་ཡང་དེས་གྲུབ་སྟེ་རྒྱུན་གྱི་སྤྱོད་ལམ་ལ་གནས་པར་བྱའོ། །དགུ་པ་བསྔོ་བ་ནི། མཁའ་འགྲོ་མ་ཡི་དཀྱིལ་འཁོར་དུཿ བསྐྱེད་རྫོགས་བཟླས་བརྗོད་བགྱིས་པ་ཡིཿ དགེ་བའི་རྩ་བ་གང་ལགས་པཿ འགྲོ་ཀུན་སངས་རྒྱས་ཐོབ་ཕྱིར་བསྔོཿ ཞེས་པས་མཁའ་འགྲོ་མ་བདེ་ཆེན་རྒྱལ་མོའ་ིདཀྱིལ་འཁོར་འདིར་བདག་ནི་ཞུགས་ནས་ཐབས་བསྐྱེད་པའི་རིམ་པ་དང་། ཤེས་རབ་རྫོགས་པའི་རིམ་པ་དང་། ཕྱིའི་བཟླས་བརྗོད་གསང་སྔགས་དངོས་སུ་བཟླ་བ། ནང་གི་བཟླས་བརྗོད་ཏིང་ངེ་འཛིན་སེམས་དཔའ་སྔགས་ཕྲེང་དང་བཅས་པ་ལ་དམིགས་པ་གསང་བ་རྡོ་རྗེའི་བཟླས་པ་དང་། སྲོག་རྩོལ་འགོག་པ་སོགས་མདོར་ན་མཆོད་པ་འབུལ་པ་སྦྱིན་པ་སྔགས་ཀྱི་དམ་ཚིག་བསྲུང་པ་ཚུལ་ཁྲིམས། སྒྲུབ་པ་ལ་རྩེ་གཅིག་ལས་གཞན་རྐྱེན་ངན་པ་བཟོད་པ་བཟོད་པ། བསྐྱེད་རྫོགས་དམ་ཚིག་གསུམ་ལ་བརྩོན་པ་བརྩོན་འགྲུས། ལྷ་སྐུའི་གསལ་སྣང་ལས་མི་གཡོ་བ་བསམ་གཏན། དེ་ཐམས་ཅད་ཀྱི་རང་བཞིན་སྒྱུ་མ་ལྟ་བུར་གདོད་ནས་མ་གྲུབ་པར་ཤེས་པ་ཤེས་ཏེ་དེ་ལྟར་བགྱིས་པའི་ཕྱིན་དྲུག་དང་འབྲེལ་བའི་དགེ་བའི་རྩ་བ་གང་ལགས་པ་དེ་དག་ཐམས་ཅད་གནས་མིན་དང་ལོག་པར་མི་འགོད་པར་འགྲོ་ཀུན་རྣམ་པ་ཐམས་ཅད་མཁྱེན་པའི་སངས་རྒྱས་ཐོབ་ཕྱིར་བསྔོ་བའོ། །བཅུ་པ་སྨོན་ལམ་ནི། སྣང་སྲིད་ཐམས་ཅད་དག་པ་མཁའ་སྤྱོད་ཞིངཿ བདེ་ཆེན་འགྱུར་མེད་རྡོ་རྗེ་རྣལ་འབྱོར་མཿ རྣམ་ཀུན་མཆོག་ལྡན་དོན་གྱི་ཕག་མོ་དངཿ རང་ཞལ་མཇལ་ཏེ་མངོན་པར་བྱང་ཆུབ་ཤོགཿ སྣང་བ་ཐམས་ཅད་གཞལ་ཡས་ཁང་དང་། སྲིད་པ་བཅུད་ཀྱི་འགྲོ་བ་ཐམས་ཅད་ལྷ་དང་ལྷ་མོར་གནས་དག་པ་མཁའ་ལ་སྤྱོད་པའི་ཞིང་ཁམས་སུ་སེམས་ཉིད་བདེ་བ་ཆེན་པོའ་ིརང་བཞིན་འགྱུར་བ་མེད་པ་རྡོ་རྗེ་རྣལ་འབྱོར་མ་རྣམ་བཅས་ཟག་པའི་དངོས་པོ་ཐམས་ཅད་ལས་འདས་པ་རྣམ་ཀུན་མཆོག་ལྡན་གྱི་སྟོང་ཉིད་དོན་དམ་པའི་གནས་ལུགས་ཀྱི་རྡོ་རྗེ་ཕག་མོ་དང་རང་ཞལ་མཇལ་ཏེ་སྒྲིབ་གཉིས་བག་ཆགས་དང་བཅས་པ་མངོན་པར་བྱང་། སངས་རྒྱས་ཀྱི་ཡོན་ཏན་རྒྱ་མཚོ་ཐམས་ཅད་མ་ལུས་པར་ཆུབ་པ་མཐར་ཐུག་གི་གོ་འཕང་ཐོབ་པར་ཤོག་ཅིག་པ་སྟེ། དྲི་མེད་འོད་ལས། ཕྲ་རབ་རྡུལ་གྱི་ཆོས་ཉིད་འདས། སྲ་ཕབ་པ་ཡི་རང་བཞིན་ཅན། །རྣམ་པ་ཀུན་གྱི་མཆོག་དང་ལྡན། །ཕྱག་རྒྱ་ཆེན་མོ་དེ་ལ་འདུད། ཅེས་དང་། ཡེ་ཤེས་དྲ་བ་ལས། དྲི་མ་བྲལ་ཕྱིར་བྱང་བ་སྟེ། ཡོན་ཏན་རྒྱས་པས་ཆུབ་པ་ཉིད། །གཉིས་མེད་འདྲེས་ཕྱིར་ཟུང་འཇུག་ཕྱིར། མངོན་པར་བྱང་ཆུབ་སྐུར་བརྗོད་དོ། །ཞེས་སོ། །བཅུ་གཅིག་པ་བཀྲ་ཤིས་ལ་གསུམ། དང་པོ་བདེན་དཔང་གསོལ་བ་ནི། རིག་འཛིན་བརྒྱུད་པའི་བྱིན་རླབས་དངཿ དཀོན་མཆོག་གསུམ་གྱི་བདེན་པ་དངཿ གསང་སྔགས་ཟབ་མོའ་ིརྟེན་འབྲེལ་གྱིསཿ ཞེས་པས་ཀུན་ཏུ་བཟང་པོ་སོགས། རྒྱལ་བ་དགོངས་པ་བརྒྱུད་པ། རིག་འཛིན་བརྡའ་ཡི་བརྒྱུད་པ། གང་ཟག་སྙན་ཁུང་གི་བརྒྱུད་པ་སོགས་རིག་པ་འཛིན་པའི་ཚོགས་གཅིག་ནས་གཅིག་ཏུ་ཟམ་མ་ཆད་པར་བརྒྱུད་པའི་བྱིན་རླབས་དང་སངས་རྒྱས་ཆོས་དང་དགེ་འདུན་སྟེ་དཀོན་མཆོག་རིན་པོ་ཆེ་རྣམ་པ་གསུམ་གྱི་བཀའི་བདེན་པ་དང་། གསང་སྔགས་ཟབ་མོའ་ིདཀྱིལ་འཁོར་ཚུལ་བཞིན་དུ་བསྒྲུབ་པའི་རྒྱུ་འབྲས་རྟེན་ཅིང་འབྲེལ་འབྱུང་གིས། ཞེས་པའོ། །གཉིས་པ་གནས་སྐབས་ལས་བཞི་འགྲུབ་པའི་བཀྲ་ཤིས་ནི། འཇིགས་བརྒྱད་ཞི་བའི་བཀྲ་ཤིས་ཤོགཿ ཚེ་བསོད་རྒྱས་པའི་བཀྲ་ཤིས་ཤོགཿ སྣང་བ་དབང་འདུད་བཀྲ་ཤིས་ཤོགཿ ལོག་འདྲེན་ཚར་གཅོད་བཀྲ་ཤིས་ཤོགཿ ཅེས་པས་གོང་གི་བདེན་པ་དང་། རང་གི་སྨོན་པའི་མཐུས། སེངྒེ་གླང་ཆེན་མེ་སྦྲུལ་ཆོམ་རྐུན་ལྕགས་སྒྲོག་ཤ་ཟ་རྒྱལ་མོའ་ིཆད་པ་སོགས་འཇིགས་པ་བརྒྱད་ཞི་བའི་བཀྲ་ཤིས་པར་ཤོག །ཚེ་དང་བསོད་ནམས་དང་དཔལ་དང་གྲགས་པ་རྒྱས་པའི་བཀྲ་ཤིས་ཤོག །ཁམས་གསུམ་རང་སྣང་དང་བཅས་པ་དབང་དུ་འདུས་པའི་བཀྲ་ཤིས་ཤོག །ལོག་པར་འདྲེན་པའི་དགྲ་བགེགས་ཚར་གཅོད་པའི་བཀྲ་ཤིས་ཤོག་ཅེས་པའོ། །གསུམ་པ་མཐར་ཐུག་དག་རྫོགས་སྨིན་གསུམ་གྱི་བདེན་པས་འཇའ་ལུས་འགྲུབ་པའི་བཀྲ་ཤིས་ནི། སྣང་ཞེན་ལྷ་སྐུའི་ཕྱག་རྒྱར་རྫོགསཿ སྒྲ་གྲགས་བདེ་ཆེན་སྔགས་སུ་དགཿ དྲན་རྟོག་འོད་གསལ་ཆོས་སྐུར་སྨིནཿ འཇའ་ལུས་ཟང་ཐལ་བཀྲ་ཤིས་ཤོགཿ ཅེས་པས་ཕྱིའི་སྣང་བ་ལ་ཞེན་པ་གདོད་ནས་སྐྱེ་བ་མེད་པ་ཆོས་ཀྱི་སྐུའི་རང་མདངས་ལྷ་སྐུ་ཕྱག་རྒྱ་ཆེན་པོ་རོལ་པར་རྫོགས། །ཇི་ལྟར་སྒྲ་རུ་གྲགས་པ་ཐམས་ཅད་བདེ་བ་ཆེན་པོ་གསུང་གི་དཀྱིལ་འཁོར་སྐྱེ་མེད་སྔགས་ཀྱི་རང་མདངས་སུ་དག །དྲན་རྟོག་གི་རང་ག་མའི་སྣང་བ་མཐའ་དག་འོད་གསལ་ཆོས་ཀྱི་སྐུའི་རང་བཞིན་དུ་སྨིན་པ་ལ་བརྟེན་རྣལ་འབྱོར་པའི་ལུས་རྡོས་བཅས་ལས་འདས་ཏེ་འཇའ་ལུས་འཕོ་བ་ཆེན་པོའ་ིསྐུ་ཐོབ། ཡིད་གཏད་མེད་ཀྱི་རིག་པ་ཟང་ཐལ་དུ་རྟོགས་ཀ་དག་ཏུ་གྲོལ། རང་མལ་དུ་ཐོབ་པས་ཀུན་ཏུ་བཟང་པོ་བྱང་ཆུབ་མཆོག་གི་ཀློང་དུ་མ་འདས་ཀྱང་གཞན་དོན་དུ་འཁོར་བ་མ་སྟོངས་ཀྱི་བར་དུ་ཕྲིན་ལས་རྒྱུན་ཆད་མེད་པ་སློབ་དཔོན་ཆེན་པོ་པདྨ་འབྱུང་གནས་དང་པཎ་ཆེན་བཱི་མ་ལ་ལྟ་བུའི་དགེ་མཚན་བཀྲ་ཞིང་ལེགས་པའི་ས་ལ་ཤིས་པ་བརྟགས་པ་དེང་འདིར་ཤོག །ཅེས་པ་སྟེ། ཀུན་བྱེད་ལས་སྟོན་པའི་སྟོན་པ་ཀུན་བྱེད་རྒྱལ་པོ་ཡིས། །སྙིང་པོ་སྐུ་ཡི་དཀྱིལ་འཁོར་བཀོད་པ་ནི། ཇི་ལྟར་སྣང་བཞིན་གནས་པའི་ཆོས་རྣམས་ཀུན། སྐྱེ་བ་མེད་པའི་ཆོས་ཉིད་ངང་ལ་བཀོད། །སྙིང་པོ་གསུང་གི་དཀྱིལ་འཁོར་བཀོད་པ་ནི། ཇི་ལྟར་གྲགས་ཤིང་གནས་པའི་ཆོས་རྣམས་ཀུན། སྐྱེ་མེད་དབྱིངས་ལ་ཚིག་རྣམས་གསུང་དུ་བཀོད། །སྙིང་པོ་རིག་པའི་དཀྱིལ་འཁོར་བཀོད་པ་ནི། ཇི་ལྟར་དྲན་རིག་རྟོག་པ་ཐམས་ཅད་ཀུན། །མ་སྐྱེས་ཀུན་བྱེད་ཉིད་ཀྱི་དོན་དུ་རིག །ཅེས་དང་། མཚན་བརྗོད་ལས། བཀྲ་ཤིས་ཀུན་གྱི་བཀྲ་ཤིས་པ། །ཇི་གྲགས་པའི་བཀྲ་ཤིས་སྙན་གྲགས་དགེ །ཅེས་སོགས་རྒྱ་ཆེར་གསུངས་སོ། །དེ་ལྟར་རྒྱལ་བ་ཀུན་གྱི་ཡུམ་གྱུར་ཡེ་ཤེས་མཁའ་འགྲོའ་ིབསྒྲུབ་པའི་གཞུང་། །ཟབ་ཅིང་རྒྱ་ཆེའི་རྡོ་རྗེའི་ཚིག་དོན་བདག་བློའ་ིསྤྱོད་ཡུལ་མ་གྱུར་ནའང་། དཔལ་མགོན་བླ་མའི་ལུང་གིས་གནང་དང་ཆོས་བདག་མཁའ་འགྲོས་བསྐུལ་བའི་ངོར། །བདག་བློས་ཇི་ལྟར་དཔོག་པར་གྱུར་ཀུན་གཅིག་ཏུ་གུས་པས་ལེགས་པར་ཕྱེ། །དབང་རྣོན་ཟུར་སྨོས་ཙམ་གྱིས་མཁྱེན་ཏེ་བརྗོད་བྱའི་གནས་ཀུན་དཔྱིས་མི་ཕྱིན། །བརྡུལ་ལ་ལན་བརྒྱ་བསྐོར་བར་འོས་ཏེ་ཚིག་གི་རྙོག་དེ་མཁས་པས་ཁྲེལ། །དེ་ཕྱིར་ཚིག་ཉུང་དོན་དུ་འཚམས་ཏེ་སྔོན་བྱོན་དམ་པའི་གཤེགས་ཤུལ་ཏེ། །བདག་གི་བློ་གྲོས་བུང་བའི་རླབས་ཉིད་ཚུལ་དེར་འཇུག་ལ་སྤྲོ་མོད་ཀྱང་། །དེང་སང་ཚུལ་འདིར་མཁས་པའི་སྤྱན་མངའ་ཞིང་། །བླ་མའི་ཞལ་ལུང་བདུད་རྩིས་ཐུགས་མཚོ་བལྟམས། །མང་དུ་གཟིགས་པའི་དཔྱོད་ལྡན་མཁན་པའི་དབུས། །བློ་ངན་བདག་འདྲས་སྤྱི་བརྟོལ་བསྐྱེད་འདིས་ཅི། །འོན་ཀྱང་རང་ཉིད་གྲགས་ཕྱིར་མ་ཡིན་བློ་མཆོག་མངའ་བར་བསྐུལ་ཕྱིར་ལགས། །ཆོས་དོན་ཡོངས་སུ་མཐོང་ཕྱིར་མ་ཡིན་བླ་མའི་མན་ངག་ཟིན་ཕྱིར་དང་། །རང་གི་བློ་གྲོས་ཡོངས་སུ་བྱང་ཞིག་སྐལ་མཉམ་འགའ་ལ་བསྟན་ཕྱིར་དུ། གཞན་ལ་བསམས་པ་བཟང་པོས་བྲིས་ན་ཉེས་འགལ་ལྷ་དང་སྲུང་མར་བཤགས། །འདིར་འབད་དགེ་བའི་ལྷག་བསམ་ཟླ་བ་སེམས་ཀྱི་རྙོག་པ་དྭངས་པའི་མཁར། །ཕན་དང་བདེ་བའི་བསིལ་ཟེར་བྱེ་བའི་འོད་རབ་འགྱེད་བཞིན་ཤར་བ་ལས། བྱུང་བའི་དགེ་ཚོགས་དྲི་མ་མེད་དེས་འཁོར་བའི་འཁོར་ལོ་འཕྱན་པའི་འགྲོ། །འབྲས་བུའི་ལམ་མཆོག་དམ་པ་འདིར་བརྟེན་སྐུ་གསུམ་གདོད་མར་མངོན་གྱུར་ཤོག །གནས་སྐབས་སུ་ཡང་འཇིག་རྟེན་འདིར། །དུས་ཀྱི་རྒུད་པ་ཀུན་ཞི་ཞིང་། །ལེགས་བྱས་ལྷ་མའི་བདེ་འབྲས་ཀུན། །རྫོགས་ལྡན་གསར་དུ་འོངས་ལ་སྨོན། །དམ་ཆོས་སྤྱོད་ཀུན་བག་ཡོད་པས། །ཆོག་ཤས་བདུད་རྩིས་རབ་ངོམས་ཏེ། །ལུང་དོན་རྟོགས་ཤིང་བསམ་པའི་དོན། །སྒོམ་ལ་གཡེང་བ་ཞི་གྱུར་ཅིག །བཤད་དང་བསྒྲུབ་པའི་ཉིན་བྱེད་ཀྱིས་བསྐུལ་ཏེ། །སྡོམ་གསུམ་པདྨོ་འཛུམ་པའི་བསྟན་འཛིན་རྣམས། །ཟབ་དོན་འབྲས་བུ་ཕན་བདེའི་དྲི་བསུང་བཅས། །སྐལ་ལྡན་བུང་བའི་ཉེར་འཚོར་རབ་གནས་ཤོག །དེ་ལྟར་རྫོགས་པ་ཆེན་པོ་ཀློང་ཆེན་སྙིང་ཐིག་གི་ཡུམ་བཀའ་མཁའ་འགྲོ་བདེ་ཆེན་རྒྱལ་མོའ་ིསྒྲུབ་གཞུང་གི་འགྲེལ་བ་རྒྱུད་དོན་སྣང་བ་ཞེས་བྱ་བ་འདི་ནི། སྔོན་དུ་ས་སྐྱོང་མི་དབང་དཱེ་ཝ་པུ་རིའི་རྗེ་བཙུན་སྐུ་མཆེད་ནས་དྲི་མ་མེད་པའི་ལྷ་རྫས་དང་བཅས་ཡང་ཡང་ནན་ཏན་ཆེན་པོས་གསོལ་བ་བཏབ་པ་རིམ་འགྱང་གི་ཐོག་འདི་ཉིད་ཀྱི་ཕྲིན་ལས་བྱེད་པར་ལུང་གིས་བསྔགས་ཤིང་ངོས་ཀྱང་སྒོ་འདིར་འདྲེན་པའི་བཀའ་དྲིན་ཅན་གང་མཚོའི་གདུང་མཐའ་རྗེ་བཙུན་ཛྙཱ་ནའི་མཚན་ཅན་གྱིས་རིན་ཆེན་གཉིས་པའི་དོང་རྩེ་ཕར་ཕྱིན་གྲངས་ལྡན་དང་། ལྷ་གོས་བཅས་ནན་ཏན་ཆེན་པོས་ཡང་ཡང་བསྐུལ་བའི་གསུང་མ་ལྡོག་པར་བརྟེན། ཡུལ་ཉང་སྟོད་རིག་པའི་འབྱུང་གནས་ཀྱི་སའི་ཐིག་ལེ་ཤམ་བྷོ་རྩེ་དགུའི་གླང་ཆེན་འགྱིངས་པ་ལྟ་བུའི་འདབས་སུ་སྐྱེས་ཤིང་། སྔོན་བྱོན་སྐད་གཉིས་སྨྲ་བའི་གཙུག་རྒྱན་གྲུབ་པའི་དབང་ཕྱུག་ཆེན་པོ་རྭ་ལོ་ཙྭ་བ་རྡོ་རྗེ་གྲགས་ཀྱི་དབོན་ཆོས་རབ་གནས་བཟུང་། དམ་པའི་ངང་ཚུལ་ཅན་རྒྱུད་མར་འབྱོན་པའི་རབ་ཉི་ཤུ་རྩ་ལྔ་པ། ངག་དབང་བསྟན་འཛིན་རྡོ་རྗེའི་འཇིགས་མེད་དགེ་བའི་དཔལ་ཆེན་གྱིས་རྗེ་བླ་མའི་གསུང་གི་གནང་བ་ལན་མང་དུ་ཐོབ་པ་བརྗོད་པར་འཕངས་ནས་དབེན་པའི་བྲག་སྐྱིབས་པདྨ་འོད་གསལ་ཐར་པ་གླིང་དུ་ལོ་གསུམ་བསྒྲུབ་པས། ཚེ་བློ་ངན་ལྕགས་མོ་བྱའི་ལོའ་ིནག་པ་ཟླ་བའི་དམར་ཕྱོགས་ཀྱི་དགའ་བ་དང་པོར་སུག་བྲིས་ཡོངས་སུ་འགྲུབ་པར་བགྱིས་པ་རྡོ་རྗེ་ཐེག་པའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག །དགེའོ། དགེའོ། དགེའོ། སྔ་འགྱུར་བསྟན་པ་རྒྱ་མཚོའི་འཁོར་ལོས་བསྒྱུར། །འགྲོ་ལ་ཐེག་མཆོག་སྒྲ་སྒྲོགས་རྫོགས་ཆེན་པ། །དོན་ཀུན་འགྲུབ་པ་འཇིགས་མེད་གླིང་པ་ཡི། །བསྟན་པ་འཕེལ་རྒྱས་ཡུན་རིང་གནས་གྱུར་ཅིག །དགེ་ལེགས་འཕེལ། |
