 ཞེ་ཆེན་རྒྱལ་ཚབ་གསུང་འབུམ་པོད་བདུན་པ།གླེགས་བམ། ཇ༽ཞེ་ཆེན་རྒྱལ་ཚབ་འགྱུར་མེད་པདྨ་རྣམ་རྒྱལ།ཞེ་ཆེན་མཁན་པོ་པདྨ་ཀུན་བཟང་ནས་པར་དུ་བསྐྲུན།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། དཔེ་སྐྲུན་གསལ་བཤད།བསྐལ་བཟང་སངས་རྒྱས་སྟོང་གི་གདུལ་ཞིང་། སྟོང་གསུམ་མི་མཇེད་ཀྱི་ཆ་ཤས་འཛམ་གླིང་གི་བྱང་ཕྱོགས། བོད་གངས་ཅན་གྱི་བསྟན་པ་རྒྱ་མཚོའི་ཕྱི་མོ། གསང་སྔགས་སྔ་འགྱུར་བའི་བསྟན་པའི་འབྱུང་གནས། སྟོད་ན་རྡོར་སྨིན་གཉིས། སྨད་ན་ཀཿདཔལ་གཉིས། བར་ན་ཞེ་རྫོགས་གཉིས་ཞེས་གྲགས་པའི་བྱེ་བྲག་གསང་སྔགས་རྙིང་མའི་གདན་ས་ཆེ་རྒུའི་ཡ་རྒྱལ། ཞེ་ཆེན་བསྟན་གཉིས་དར་རྒྱས་གླིང་ཞེས་སྔ་འགྱུར་བཀའ་གཏེར་ཆོས་ཀྱི་རྒྱ་མཚོ་ཆེན་པོ་འཛིན་སྐྱོང་སྤེལ་གསུམ་གྱི་ཕྱག་རྗེས་བཀྲ་ཤིས་རེ་ཁ་ཆེས་ཆེར་བཀྲ་བར། མཁས་གྲུབ་གཉིས་ལྡན་གྱི་སྐྱེས་མཆོག་བགྲང་ལས་འདས་པ་བྱོན་པའི་དབུས་སུ་མངོན་པར་འཕགས་པ། གངས་ལྗོངས་རྒྱལ་བསྟན་ཡོངས་རྫོགས་ཀྱི་ཤིང་རྟ་བཀའ་བབས་བདུན་ལྡན་༧འཇམ་དབྱངས་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པ་དང་། མཁས་གྲུབ་དབང་པོ་མ་ཧཱ་པཎྜི་ཏ་འཇམ་དབྱངས་མི་ཕམ་ཕྱོགས་ལས་རྣམ་རྒྱལ་རྣམ་གཉིས་ཀྱི་ཐུགས་སྲས་ཐུ་བོ། ཞེ་ཆེན་རྒྱལ་ཚབ་རིན་པོ་ཆེ་འགྱུར་མེད་པདྨ་རྣམ་རྒྱལ་དཔལ་བཟང་པོ་གང་གི་གསུང་འབུམ་མདོ་སྔགས་རིག་གནས་ཀྱི་མཛོད་ཆེན་འདི་ཉིད། སྔོན་ཆད་རྗེ་དེའི་སྲས་ཀྱི་ཐུ་བོ་ཞེ་ཆེན་ཀོང་སྤྲུལ་རིན་པོ་ཆེས་གདན་སར་ཤིང་པར་དུ་བཀོད་པ་སྙིགས་དུས་ཀྱི་སྐྱེ་འགྲོ་བསོད་ནམས་དམན་རྐྱེན་ཉམས་རྒུད་རྩ་བརླག་ཏུ་སོང་ཡང་། ཕྱིས་རྒྱ་གར་འཕགས་ཡུལ་དུ་མགོན་པོ་གང་དེའི་དགོངས་བརྒྱུད་ཀྱི་བྱིན་རླབས་ཐོབ་ཅིང་བསྟན་པ་ཡོངས་རྫོགས་ཀྱི་མངའ་བདག ༧སྐྱབས་རྗེ་དིལ་མཁྱེན་རྡོ་རྗེ་འཆང་འགྱུར་མེད་ཐེག་མཆོག་བསྟན་པའི་རྒྱལ་མཚན་མཆོག་གིས་མ་དཔེ་འཚོལ་བསྡུས་ཀྱི་སླར་ཡང་པར་བསྐྲུན་མཛད་ཅིང་བཤད་ལུང་གི་རྒྱུན་ཡང་སྤེལ་བར་མཛད་དེ་རྒྱལ་བསྟན་སྤྱི་བྱེ་ལ་སྨན་པའི་སྐུ་དྲིན་བླ་མེད་བསྐྱངས་པ་དེ་ལྟར་ཡང་། ད་ཆ་མདོ་དབུས་ཁམས་གྱི་མཚོན་པའི་འཛམ་གླིང་མཐའ་གྲུ་ཀུན་ཏུ་རྒྱལ་བསྟན་སྤྱི་དང་། ཡང་སྒོས་སྔ་འགྱུར་བའི་ལྟ་གྲུབ་དྲི་མ་མེད་པ་ཐོས་བསམ་སྒོམ་པས་འཛིན་སྐྱོང་སྤེལ་བའི་བསྟི་གནས་དགོན་སྡེ་ཁག་གི་ནང་སློབ་གཉེར་བ་ལོ་རེ་བཞིན་ཇེ་མང་དུ་འགྲོ་བ་ཚོར། འཁྲུལ་མེད་རྒྱལ་བ་དགྱེས་པའི་ལམ་གནད་གསལ་བོར་སྟོན་པའི་ལེགས་བཤད་རྨད་དུ་བྱུང་བ་རྣམས་གཟིགས་ཆོག་ཡོང་བ་དང་། དེང་གི་ཆར་སྔོན་མེད་འཕྲུལ་ཡིག་ལེགས་ཐོན་གྱིས་དཔེ་དེབ་སྤུས་དག་ཡོང་ངེས་དང་། འཇམ་མགོན་རྒྱལ་བ་ཡབ་སྲས་ཀྱི་རྡོ་རྗེའི་གསུང་གི་ཕྲིན་ལས་འཛམ་གླིང་ཕྱི་ནང་ཀུན་ཏུ་ཁྱབ་བརྡལ་ཡོང་བའི་རེ་འདུན་ཆེན་པོས། རྒྱལ་བསྟན་སྤྱི་དང་རང་བསྟན་ལ་ལྷག་བསམ་རྣམ་པར་དཀར་བ་ཞེ་ཆེན་དགོན་གྱི་མཁན་པོ་པདྨ་ཀུན་བཟང་མཆོག་ནས་དེང་རབས་ཀྱི་གློག་ཀླད་འཕྲུལ་འཁོར་ལ་བརྟེན་ནས་པར་བསྐྲུན་གནང་བཞིན་ཡོད་པར་ཡི་རང་བསྔགས་བརྗོད་བྱེད་པ་དང་ཆབས་ཅིག གསུང་རབ་འདིས་རྒྱལ་བའི་དགོངས་པ་དྲི་མ་མེད་པ་གསང་ཆེན་སྔ་འགྱུར་བའི་ལྟ་གྲུབ་ཀྱི་གནད་གསང་གསལ་བར་སྟོན་པ་ཀུན་གྱིས་མཁྱེན་རྟོགས་ཐུབ་པས་རང་གཞན་གྱི་འདི་ཕྱིའི་དོན་འབྲས་རླབས་ཆེན་ཡོང་རྒྱུའི་རེ་སྨོན་བཅས། ཞེ་ཆེན་རབ་འབྱམས་བདུན་པར་འབོད་པ། དགེ་སྦྱོང་ངག་དབང་ཆོས་དཔལ་རྒྱ་མཚོས་ཕྱི་ལོ་ ༢༠༡༠ ཟླ་ ༢ ཚེས་ ༢༤ བཟང་པོ་ལ། གསལ་བཤད་ཉུང་ངུ་།༈ དེ་ཡང་མི་རིང་བའི་འདས་པའི་ལོ་རབས་འགའི་ཡུན་ལ་བོད་གངས་ཅན་གྱི་ཆོས་དང་རིག་གཞུང་ལ་ཉམས་རྒུད་ཚབས་ཆེན་ཐེབས་ནས། དེང་གི་དུས་འདིར་བོད་ཀྱི་རིག་གཞུང་ཟེར་བ་དེ་སྒྲ་གཅན་གྱི་ཁ་ནས་ཕྱེད་ཙམ་ཐར་པའི་ཟླ་བ་ལྟ་བུ་ཞིག་ཡིན་ལ། འདི་ཉིད་ཉམས་པ་སླར་གསོ་དང་མི་ཉམས་ཡུན་རིང་དུ་གནས་པའི་ཆེད་དུ་མཁས་པ་དང་ལྷག་བསམ་ཅན་གྱི་སྐྱེས་བུ་དམ་པ་དག་གིས་སྔ་རབས་ཀྱི་མཁས་པའི་གསུང་རབ་རྣམས་སྤུས་ལེགས་ཀྱི་ཡིག་གཟུགས་སུ་སྤེལ་ནས་འགྲེམ་སྤེལ་གནང་བཞིན་པ་འདི་དག་ནི་འཆི་ཁ་མ་ལ་སྲོག་བསྩལ་པ་ལྟ་བུའི་བསྟན་པའི་སྲོག་སྙིང་གསོ་བའི་བྱ་བ་གལ་ཆེན་ཞིག་ཡིན་ལ། འདིར་ཡང་ཁམས་ཞེ་ཆེན་བསྟན་གཉིས་དར་རྒྱས་གླིང་གི་མཁན་རིན་པོ་ཆེ་པདྨ་ཀུན་བཟང་ལགས་ཀྱིས་མཁས་པའི་དབང་ཕྱུག་ཞེ་ཆེན་རྒྱལ་ཚབ་སྐུ་ཕྲེང་བཞི་པ་འགྱུར་མེད་པདྨ་རྣམ་རྒྱལ་གྱི་གསུང་རབ་འདི་དག་དེབ་ཏུ་བསྐྲུན་པ་འདི་བསྔགས་འོས་ཀྱི་མཛད་པ་བླ་ན་མེད་པ་ཞིག་ཏུ་ཤེས་ཏེ། དེ་ཡང་ཞེ་ཆེན་རྒྱལ་ཚབ་རིན་པོ་ཆེ་ནི་བོད་གངས་ཅན་གྱི་ཆོས་དང་རིག་གཞུང་སྤྱི་དང་ཁྱད་པར་གསང་སྔགས་སྔ་འགྱུར་གྱི་མདོ་རྒྱུད་རྒྱ་མཚོའི་གནས་ལ་ཐུགས་སྤྱན་ནམ་མཁའ་ལྟར་ཡངས་པའི་མཁས་གྲུབ་གཉིས་ལྡན་གྱི་སྐྱེས་ཆེན་དམ་པ་ཞིག་ཡིན་པར་མ་ཟད་འཇམ་མགོན་མི་ཕམ་རིན་པོ་ཆེས་བསྟན་པ་ཡོངས་རྫོགས་ཀྱི་བདག་པོར་མངའ་གསོལ་བའི་གསང་སྔགས་སྔ་འགྱུར་གྱི་བསྟན་པ་ལ་མཛད་རྗེས་བླ་ན་མེད་པའི་མཁས་པའི་དབང་ཕྱུག་ཆེན་པོ་ཞིག་སྟེ། རྗེ་འདི་ཉིད་ཀྱིས་འཇམ་མགོན་བླ་མའི་གསུང་གི་མཛད་པ་ལ་ཆེད་དུ་དམིགས་ཏེ་མཆན་འགྲེལ་དང་ཁ་སྐོང་། གཞན་ཡང་དེ་དག་གི་ཟབ་དོན་རྗེན་པར་ཕྱུང་བའི་ཡིག་ཆ་ངེས་དོན་བདེ་གཤེགས་སྙིང་པོའི་དོན་གཏན་ལ་ཕབ་པའི་ལེགས་བཤད་སོགས་བསྟན་བཅོས་མང་དུ་བཞག་ཡོད་པ་ཡིན་ལ། བཤད་སྲོལ་ལ་ཡང་ངེས་ཤེས་རིན་པོ་ཆེའི་སྒྲོན་མེ་དང་རྗེ་འདི་ཉིད་ཀྱི་བདེན་གཉིས་གློག་གི་སྒྲོན་མ་འདི་གཉིས་ཀྱི་དོན་ཤེས་ན་གསང་སྔགས་སྔ་འགྱུར་གྱི་མདོ་སྔགས་ཀྱི་ལྟ་གྲུབ་ཡོངས་རྫོགས་ཀྱི་གནད་ཟིན་པ་ཡིན་ཞེས་ཟེར་བ་ལྟ་བུ་ཡིན་ནོ། །དེས་ན་འཇམ་མགོན་བླ་མ་ཡབ་སྲས་གཉིས་ཀྱི་གསུང་དག་ནི་གསང་སྔགས་སྔ་འགྱུར་པའི་བསྟན་པའི་ཟབ་གནད་ཀྱི་ཉི་མ་རང་རྒྱུད་ལ་འདྲེན་པའི་སྐྱ་རེངས་དཀར་པོའི་འོད་སྣང་ལྟ་བུ་ཞིག་ཡིན་པས་འཇམ་པའི་དབྱངས་དངོས་ཀུན་མཁྱེན་མི་ཕམ་རྒྱ་མཚོའི་ཡིག་ཆ་དག་ལ་སྦྱང་བརྩོན་བྱེད་པའི་བློ་གསར་དག་གིས་ཀྱང་རྗེ་ཉིད་ཀྱི་མདོ་སྔགས་ཀྱི་གསུང་རབ་དག་ལ་ལྟ་ཀློག་ཡང་ཡང་བྱེད་པ་ཤིན་ཏུ་གལ་ཆེ་བའི་གནས་སུ་སེམས་སོ། ། གསེར་ལྗོངས་བླ་མ་རུང་དུ་འཆི་མེད་རིག་འཛིན་གྱིས་བྲིས། ཐོག་མའི་སྙན་སྒྲོན།དེ་ཡང་ཀུན་མཁྱེན་མི་ཕམ་རིན་པོ་ཆེས་བསྟན་བཅོས་བརྩམ་པ་བཀས་སྐུལ་ཞིང་། གསུང་རྩོམ་རིགས་བསྟན་པའི་གཙིགས་སུ་ཆེ་བས་འཐོར་ཟགས་སུ་མ་སོང་བར་ཕྱོགས་གཅིག་ཏུ་བསྡུ་དགོས་པར་ཡང་བཀའ་གནང་ལས་གྲུབ་པའི་བཀའ་འབུམ་འདི་ཉིད་འགྲེམས་སྤེལ་ཞུས་པའི་ཐོག་མའི་སྙན་སྒྲོན་ནི། རྡོ་རྗེ་ཐེག་པའི་ཐུན་མོང་གི་སྔོན་འགྲོ་སྤྱི་ལ་སྦྱོར་ཆོག་པའི་ཁྲིད་ཀྱི་རྒྱབ་ཡིག་ཀུན་མཁྱེན་ཞལ་ལུང་རྣམ་གྲོལ་ཤིང་རྟ།༄༅། །རྡོ་རྗེ་ཐེག་པའི་ཐུན་མོང་གི་སྔོན་འགྲོ་སྤྱི་ལ་སྦྱོར་ཆོག་པའི་ཁྲིད་ཀྱི་རྒྱབ་ཡིག་ཀུན་མཁྱེན་ཞལ་ལུང་རྣམ་གྲོལ་ཤིང་རྟ་ཞེས་བྱ་བ་བཞུགས་སོ། །ན་མོ་པདྨཱ་ཀ་ར་ཡཻ། གཟོད་ནས་མངོན་རྫོགས་ཆོས་སྐུར་རྟག་བཞུགས་ཀྱང་། །སྙིང་རྗེ་ཆེན་པོས་སྲིད་པ་གནས་ཀྱི་བར། །གང་འདུལ་སྒྱུ་འཕྲུལ་དྲྭ་བའི་ཚུལ་སྟོན་པ། །ཡེ་ཤེས་སྐུ་ཅན་ཁྱབ་བདག་བླ་མས་སྐྱོངས། །ཟབ་དང་རྒྱ་ཆེའི་ཆོས་མཆོག་སྙིང་པོའི་བཅུད། །ཚང་ལ་མ་ནོར་རིག་འཛིན་བརྒྱུད་པའི་ལུང་། །དང་པོའི་ལས་ཅན་གང་ལ་འཇུག་པའི་སྒོ། །སྔོན་འགྲོའི་ཁྲིད་རྒྱབ་རྣམ་གྲོལ་ཤིང་རྟ་འགོད། །དེ་ཡང་། འོ་སྐོལ་གྱི་སྟོན་པ་ཐབས་མཁས་ཤིང་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱིས་གདུལ་བྱའི་བློ་དང་འ ཚམ་པའི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལ་སོགས་པ་ཇི་སྙེད་ཅིག་བསྟན་པ་དེ་ཐམས་ཅད་ཀྱང་གདུལ་བྱའི་བློ་དང་འཚམ་པར་རིམ་གྱིས་ཁྲིད་པའི་ཐབས་ཚུལ་འབའ་ཞིག་ཏུ་ཟད་དེ། རིན་ཆེན་མཛོད་ཀྱི་མདོ་ལས། དཔེར་ན་བྱིས་པ་བཙས་མ་ཐག །ནུ་ཞོ་ལ་སོགས་རིམ་བསླབས་ནས། །ཕྱིས་ནས་སྲ་བ་འབྲས་ཆེན་སོགས། །མང་པོ་ཟོས་ཀྱང་སྟོབས་འཕེལ་འགྱུར། །དེ་བཞིན་ང་ཡི་སྲས་རྣམས་ཀྱང་། །འདུལ་བ་མདོ་སྡེ་མངོན་པ་གསུམ། །རིམ་པའི་རྗེས་ལ་མན་ངག་འདི། །བསྟན་པས་བླ་མེད་བྱང་ཆུབ་འགྲུབ། །ཅེས་དང་། སྒྱུ་འཕྲུལ་རྒྱས་པ་ལས། ཐུགས་རྗེ་ཆེན་པོ་དང་ལྡན་པས། །ཐར་ལམ་ཀུན་ལ་མཁས་པར་བྱ། །ཤེས་རབ་མཆོག་དང་ལྡན་པས་ནི། །སེམས་ཅན་སྣོད་རིམ་དང་སྦྱར་ནས། །ཐེག་པ་མཐོ་དམན་དོན་ཉིད་ནི། །སོ་སོར་འཚམ་པར་བསྟན་དགོས་སོ། །ཞེས་གསུངས། བྱེ་བྲག་ཏུ་སྙིང་པོའི་དོན་ལེན་པའི་རྒྱུད་ལས། སྔོན་འགྲོ་རང་རྒྱུད་སྦྱོང་བའི་ཐབས། །རྟེན་འདི་རྙེད་དཀར་བསམ་པ་དང་། །མི་རྟག་འཁོར་བའི་ཉེས་པ་དང་། །སྡིག་སྦྱང་སྐྱབས་འགྲོ་སྡོམ་པ་སོགས། །རྫོགས་ནས་ཉན་ཐོས་ལ་སོགས་པ། །གྲུབ་མཐའི་རིམ་པས་ལེགས་ཞུགས་ནས། །སྙིང་རྗེ་ཤེས་རབ་ལྡན་གྱུར་པར། །ཡང་དག་ངེས་དོན་འདིར་འཇུག་བྱ། །དེས་ནི་དོན་ཆེན་འགྲུབ་པར་འགྱུར། །ཞེས་གསུངས། དེའི་ཕྱིར་ཀུན་མཁྱེན་ཆོས་ཀྱི་རྒྱལ་པོས་ཀྱང་ཡིད་བཞིན་རིན་པོ་ཆེའི་མཛོད་ལས། བླ་མ་མཆོག་དེས་སྐལ་བཟང་སློབ་མ་ལ། །དམ་པའི་ཆོས་ནི་ཡོངས་སུ་འཆད་པ་ན། །ཐོག་མར་སྣོད་ཀྱི་དབང་པོ་བརྟག་པ་གཅེས། །བྱིས་དང་རྒན་བཞིན་ཁ་ཟས་ཐ་དད་ལྟར། །དེ་ཡི་ཆོས་ཀྱང་རང་བཞིན་ཐ་དད་དོ། །དེ་ནས་རིམ་པར་ཁྲིད་པའི་ཚུལ་གྱིས་བཤད། །དེས་ནི་ཐེག་པའི་རིམ་པ་ཤེས་པ་དང་། །ཡོན་ཏན་གོང་འཕེལ་འཇིགས་དང་དངངས་སྐྲག་མེད། །ནོར་བ་མེད་ཅིང་ལྟ་སྤྱོད་ཟུང་འབྲེལ་འགྱུར། །ཞེས་གསུངས་པས། སྤྱིར་གདུལ་བྱའི་བློ་ཚོད་དང་སྦྱར་ཏེ། གང་ཟག་མཆོག་སྔོན་སྦྱངས་པའི་ལས་འཕྲོ་ཅན་དབང་རྣོན་ཅིག་ཅར་བའི་རིགས་ཡིན་ན་ཆོས་ཀྱང་ལས་འཕྲོ་གང་ཡོད་དེ་ནས་ཐོད་རྒལ་དུ་འཇུག་པ་ཡོད་ཀྱང་དེ་འདྲའི་གང་ཟག་སྙིགས་དུས་འདིར་དཀའ་ཞིང་། མངོན་ཤེས་མེད་པས་ཇི་བཞིན་མི་རྟོགས་ལ། ལས་འཕྲོ་དམན་པའམ། མ་ངེས་པ་དག་ལ་ལམ་དེས་ཕན་མི་ཐོགས་ཤིང་རྒྱུད་ཆུད་ཟོས་སུ་འགྱུར་བས། ཐོག་མར་ལམ་གྱི་རིམ་པ་དང་མཐུན་པར་འཁྲིད་ན་ལམ་གྱི་ཡོན་ཏན་འཕེལ་བ་དང་། ཟབ་མོའི་དོན་ལ་མི་སྐྲག་ཅིང་ལམ་ལ་གོལ་འཆུག་མེད་པར་ལྟ་སྒོམ་སྤྱོད་གསུམ་ཟུང་དུ་འཇུག་པ་སོགས་ཀྱི་ཕན་ཡོན་དང་དགོས་པ་ཚད་མེད་ལ། དེ་བས་གཞན་དུ་མི་ཤེས་པའི་བློ་ཅན་དག་གིས་དང་པོར་འོག་མ་ནས་རིམ་གྱིས་མ་བསླབས་པར། ཐོག་མ་ནས་ངེས་དོན་ཅིག་ཅར་བསྟན་ན་ཉེས་དམིགས་ཤིན་ཏུ་ཆེ་ཞིང་སྐྱོན་མང་པོ་འབྱུང་བར་གསུང་སྟེ། ཀུན་མཁྱེན་བླ་མས། དེ་ལྟར་མ་བཤད་སྐྱོན་ནི་ཚད་མེད་དེ། །གོང་འོག་སྔ་ཕྱིའི་རིམ་པ་དང་བྲལ་བས། །བསྟན་པའི་སྤྱི་སྲོལ་རིམ་པ་ཉམས་པ་དང་། །བློ་ཆུང་སྔངས་སྐྲག་ལོག་ལྟས་འདོར་བ་དང་། །གོ་རིམ་མ་ཤེས་ཟབ་མོར་མི་རྟོགས་དང་། །འདུས་བྱས་དགེ་བ་ཁྱད་དུ་གསོད་པ་དང་། །སྒྲོ་སྐུར་རྒྱུར་གྱུར་རྒྱུ་འབྲས་འཆོལ་བ་དང་། །བླང་དོར་མི་ཤེས་ཤེས་བྱའི་དོན་ལ་རྨོངས། །ཐེག་ཆེན་སེམས་བསྐྱེད་སྙིང་རྗེ་སྤངས་པ་དང་། །སྟོང་ལྟས་དད་ལྡན་ངན་འགྲོར་བསླུས་པ་དང་། །བྱར་མེད་ཟེར་ནས་ཐ་མལ་ལུས་པ་དང་། །མ་སྨིན་འགྲོ་ལ་གསང་བ་སྒྲོགས་པ་སྟེ། །ཉེས་མང་ལྡན་ཕྱིར་ཐེག་པ་རིམ་གྱིས་བཤད། །ཅེས་གསུངས་པ་ལྟར། བསྟན་པའི་སྤྱི་སྲོལ་ཉམས་པ། བློ་ཆུང་དག་སྐྲག་ནས་ཆོས་དང་བླ་མ་སྤང་བ། ངེས་དོན་མི་གོ་བ་དང་། གོ་ཡང་ཟབ་མོར་མི་རྟོགས་པ་དང་། མཚན་བཅས་ཀྱི་དགེ་བ་ཁྱད་དུ་གསོད་པ་དང་། བློ་དམན་གྱིས་སྒྲོ་སྐུར་གྱི་གཞིར་འགྱུར་བ་དང་། ཤེས་བྱའི་གནས་ལ་རྨོངས་པ་དང་། དགེ་སྡིག་གི་བླང་དོར་འཛོལ་བ་དང་། བྱང་ཆུབ་སེམས་དཔའི་སྤྱོད་པ་རྣམས་སྤང་བའི་ཉེས་པ་ཡོད་ཅིང་། ཁྱད་པར་སྟོང་པའི་མཐའ་ལ་ཞེན་པས་རྒྱུ་འབྲས་ལ་སྐུར་བ་བཏབ་ནས་འབྲས་བུ་ངན་སོང་དུ་འགྲོ་བའི་ཉེས་པ་ཡོད་དེ། དཀོན་མཆོག་བརྩེགས་པ་ལས། འོད་སྲུང་གང་ཟག་ཏུ་ལྟ་བ་རི་རབ་ཙམ་བླའི། མངོན་པའི་ང་རྒྱལ་ཅན་སྟོང་པ་ཉིད་དུ་ལྟ་བ་ནི་དེ་ལྟ་མ་ཡིན་ཏེ་གསོར་མི་རུང་བའི་ཕྱིར་རོ། །ཞེས་སོ། །གཞན་ཡང་ཆོས་ཐམས་ཅད་གདོད་མ་ནས་ནམ་མཁའ་ལྟ་བུའི་རང་བཞིན་ཡིན་པས་གང་ཡང་བྱར་མེད། བྱས་པས་ཕུང་བ་ཡིན་ཟེར་ཞིང་སྒོ་གསུམ་སོས་དལ་ལ་ཞེན་ནས་ཐ་མལ་དུ་ལུས་པའི་ཉེན་ཡོད་དེ། དེ་ཉིད་ལས། མ་འོངས་པ་ན་དགེ་སློང་མངོན་པའི་ང་རྒྱལ་ཅན་ལུག་ལྟར་བླུན་པ་དག བཅོམ་ལྡན་འདས་ཀྱིས་ཆོས་ཐམས་ཅད་ནམ་མཁའ་ལྟ་བུའོ། །ཞེས་གསུངས་ན། ཆོས་གང་ཡང་རྩོལ་བར་མ་བྱེད་ཅིང་ཞེས་ཡུལ་འཁོར་གྱི་བསོད་སྙོམས་འབྲས་བུ་མེད་པར་བྱེད་པ་དག་འབྱུང་སྟེ། དེ་དག་ལ་ནི་མཐོ་རིས་ཀྱི་བདེ་བའང་ཐོབ་པར་མི་འགྱུར་ན། བླ་ན་མེད་པའི་བྱང་ཆུབ་ལྟ་ཅི་སྨོས་ཞེས་སོ། །མ་སྨིན་པ་ལ་གསང་བ་བསྒྲགས་པས་ཆོས་སྤོང་བའི་ལས་ཀྱིས་སྒྲིབ་པར་འགྱུར་ཏེ། ཡུམ་བར་མ་ལས། རབ་འབྱོར་ཐམས་ཅད་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའོ་ཞེས་ལས་དང་པོ་པ་ཐེག་པ་ལ་གསར་དུ་ཞུགས་པ་དག་གི་མདུན་དུ་བརྗོད་པར་མི་བྱའོ། །དེ་ཅིའི་ཕྱིར་ཞེ་ན། སྔངས་ཤིང་སྐྲག་ལ་འདོར་དུ་འོང་བའི་ཕྱིར་རོ། །ཞེས་དང་། རྩ་ལྟུང་བཅུ་བཞི་པ་ལས། ཡོངས་སུ་མ་སྨིན་སེམས་ཅན་ལ། །གསང་བ་སྒྲོག་པ་བདུན་པ་ཡིན། །ཞེས་སོ། །དེའི་ཕྱིར་འཕགས་བོད་ཀྱི་རྡོ་རྗེ་འཛིན་པ་ཆེན་པོ་རྣམས་ཀྱིས་བསྟན་པའི་རིམ་པ་དང་མཐུན་པར་སྐལ་ལྡན་གྱི་འགྲོ་བ་རྣམས་སངས་རྒྱས་ཀྱི་སར་འཁྲིད་པར་མཛད་པ་ལས། འདིར་ནི་གྲུབ་པའི་སློབ་དཔོན་ཆེན་པོ་པདྨ་སམ་བྷ་ཝ་དང་། ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར་སོགས་མཆོག་གི་གྲུབ་པ་བརྙེས་པའི་སྔ་འགྱུར་གྱི་རིག་པ་འཛིན་པ་རྣམས་ཀྱི་རྡོ་རྗེའི་གསུངས་དངོས་ཉིད་བྱིན་རླབས་ཀྱི་ཚན་ཁ་གཞན་ལས་ཁྱད་པར་དུ་འཕགས་པའི་ཕྱིར་རྩ་བར་བཟུང་ཞིང་། སྐབས་སུ་བབས་པའི་ཚིག་སྦྱོར་ཅུང་ཟད་རེས་ཀྱང་བརྒྱན་ཏེ་ཐུན་མོང་གི་སྔོན་འགྲོའི་ཁྲིད་ཀྱི་རིམ་པ་སྟོན་པ་ལ་གསུམ། ཐོག་མར་དགེ་བ་ཆོས་འཆད་ཉན་ཇི་ལྟར་བྱ་བའི་ཚུལ། བར་དུ་དགེ་བ་ཐུན་མོང་བློ་ལྡོག་རྣམ་བཞིས་རྒྱུད་སྦྱང་བ། ཐ་མར་དགེ་བ་རྡོ་རྗེ་ཐེག་པའི་ལམ་གྱི་སྔོན་འགྲོ་དངོས་བཤད་པའོ། །དང་པོ་ལ་གསུམ། ཀུན་སློང་། ཀུན་སྤྱོད། ཞར་ལ་འཆད་ཉན་བགྱིས་པའི་ཕན་ཡོན་གྱིས་སྤྲོ་བ་བསྐྱེད་པའོ། །དང་པོ་ལ་གཉིས། བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་དང་། ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་ངོ་། །དང་པོ་ནི། འདི་ལྟར་ནམ་མཁའ་ལ་མཐའ་དང་མུ་མེད་པ་བཞིན་དུ་སེམས་ཅན་གྱི་ཁམས་ལའང་མཐའ་དང་མུ་མེད། འདི་ཐམས་ཅད་ཚེ་རབས་ཐོག་མ་མེད་པའི་དུས་ནས་འཁོར་བ་ན་ཡང་ཡང་འཁོར་བའི་ཚེ། བདག་གཞན་ཕན་ཚུན་ཕ་མ་དང་གཉེན་དུ་མ་འབྲེལ་བ་ནི་གཅིག་ཀྱང་མེད་དེ། དཔལ་མགོན་འཕགས་པ་ཀླུ་སྒྲུབ་ཀྱིས། གང་གི་མངལ་དུ་ལན་གཅིག་མིན་པར་བདག །མ་གནས་པའམ་བདག་ལ་གང་མ་གནས། །སེམས་ཅན་དེ་ནི་འདི་ན་གང་ཡང་མེད། །དེ་ཕྱིར་ཐམས་ཅད་གཉེན་དུ་འགྱུར་བ་ཡིན། །ཞེས་སོ། །དེ་ཡང་ལན་རེ་ཙམ་མ་ཡིན་པར་ཡང་ཡང་ལན་གྲངས་དཔག་ཏུ་མེད་པ་བྱས་པ་ཡིན་ཏེ། བཤེས་སྤྲིང་ལས། མ་ཡི་ཐུག་མཐའ་རྒྱ་ཤུག་ཚི་གུ་ཙམ། །རིལ་བུར་བསྒྲིལ་ཀྱང་ས་ཡིས་ལང་མི་འགྱུར། །ཞེས་སོ། །དེའི་ཚེ་ནའང་ད་ལྟའི་རྩ་བའི་ཕ་མ་དང་བུ་རྒྱུད་བཞིན་དུ་གདུང་སེམས་ཀྱིས་འབྲེལ་བས། ཕན་བཏགས་ཅི་ནུས་དང་། གནོད་པ་ལས་སྐྱབས་ཅི་ནུས་ཀྱིས་བསྐྱབས་པའི་དྲིན་ཆེན་ཤ་སྟག་སྟེ། འདི་ཐམས་ཅད་འདོད་པ་བདེ་བ་འདོད་ཀྱང་ཐབས་ལ་མི་མཁས་པའི་དབང་གིས་བདེ་བའི་རྒྱུ་དགེ་བའི་ལས་ནི་སྒྲུབ་མ་ཤེས། སྡུག་བསྔལ་མི་འདོད་ཀྱང་སྡུག་བསྔལ་གྱི་རྒྱུ་མི་དགེ་བ་སྤངས་མ་ཤེས་ཤིང་མ་ནུས་པ་ལ་བརྟེན་ནས་བདེ་བ་དང་ནི་བྲལ། སྡུག་བསྔལ་མང་པོ་ནི་ལྡན། ཞེ་འདོད་དང་ལག་ལེན་ཕྱིན་ཅི་ལོག་ཏུ་གྱུར་པ་སྨྱོན་པ་བཙན་དུག་ཟ་བ་ལྟ་བུའི་སེམས་ཅན་འདི་ཐམས་ཅད་སྙིང་རེ་རྗེ། ད་སྙིང་རེ་རྗེ་ཞེས་བཞག་པས་ཅི་ཕན། འོ་སྐོལ་རྣམས་ད་རེས་དལ་འབྱོར་གྱི་མི་ལུས་ནི་ཐོབ། མཚན་ལྡན་གྱི་བླ་མ་དང་ནི་མཇལ། ཟབ་རྒྱས་ཀྱི་གདམས་པ་ནི་ཐོས། ཆོས་བྱེད་ཐབས་ཀྱང་ཅུང་ཟད་ཤེས། བྱེད་དབང་ཡང་ཡོད། ཆོས་མཐུན་གྱི་རྐྱེན་ཀུན་ཀྱང་འཛོམས་པའི་སྐབས་འདིར། མ་སེམས་ཅན་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་ནས་རྣམ་གྲོལ་གཏན་གྱི་བདེ་བ་ལ་འགོད་པའི་ཐབས་ཤིག་ཅིས་ཀྱང་བྱ་དགོས་ཏེ། རྨད་དུ་བྱུང་བའི་སློབ་དཔོན་ཆེན་པོ་ཙནྡྲ་གོ་མིས། ཉེ་དུ་འཁོར་བའི་རྒྱ་མཚོའི་ནང་དུ་ཆུད་གྱུར་པ། །ཀློང་གི་ནང་དུ་ལྷུང་བ་ལྟ་བུར་གནས་བཞིན་དུ། །སྐྱེ་ཤི་འཕོས་པས་ངོ་མ་ཤེས་པ་དེ་བོར་ནས། །གལ་ཏེ་གཅིག་ཐར་བྱེད་ན་དེ་ལས་ཁྲེལ་བོར་མེད། །ཅེས་གསུངས། དེ་ལྟ་བུའི་ཐབས་དང་ཐུགས་རྗེ་ནུས་པ་དེ་གང་ལ་མངའ་ན། རྫོགས་པའི་སངས་རྒྱས་ཁོ་ན་མ་གཏོགས་གཞན་སུ་ལའང་མེད། དེའི་ཕྱིར་ཐོག་མར་བདག་གིས་སངས་རྒྱས་ཀྱི་གོ་འཕང་རིན་པོ་ཆེ་དེ་ཐོབ་པར་བྱས་ནས་མཐའ་ཡས་པའི་སེམས་ཅན་གཅིག་ཀྱང་མ་ལུས་པར་བདག་ཁོ་ནས་ཅི་ནས་ཀྱང་སྒྲོལ་བར་བྱ། དེའི་ཆེད་དུ་ཟབ་པ་དང་རྒྱ་ཆེ་བའི་ཆོས་ཀྱི་བདུད་རྩི་འདི་ཉིད་ཉན་འཆད་སྒོམ་གསུམ་སོགས་ལ་བརྩོན་པར་བྱའོ་སྙམ་དུ། སྙིང་རྗེས་སེམས་ཅན་དང་། ཤེས་རབ་ཀྱིས་རྫོགས་བྱང་ལ་དམིགས་པ་སྟེ་ཟུར་གཉིས་སམ་དོན་གཉིས་དང་ལྡན་པ་ནི་བྱང་ཆུབ་ཀྱི་སེམས་ཏེ། མགོན་པོ་བྱམས་པས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་གསུངས། དེ་ལྟ་བུའི་བྱང་ཆུབ་སེམས་ཀྱི་ཀུན་སློང་ནི། ཆོས་ཉན་དུས་བཤད་དུས་སྒྲུབ་དུས་གང་གི་སྐབས་སུའང་ཤིན་ཏུ་གཅེས་ཏེ། དགེ་བའི་རྩ་བ་རྒྱ་ཆེ་ཆུང་ཇི་ལྟ་བུ་ཞིག་སྒྲུབ་ཀྱང་། དགེ་རྩ་དེ་ཐབས་ཀྱིས་ཟིན་པར་བྱེད་པ་སྦྱོར་བ་སེམས་བསྐྱེད། དགེ་བ་དེ་རྐྱེན་གྱིས་མི་བཤིག་པར་བྱེད་པ་དངོས་གཞི་དམིགས་མེད། དགེ་བ་དེ་གོང་ནས་གོང་དུ་འཕེལ་བར་བྱེད་པ་མཇུག་བསྔོ་བས་རྒྱས་ཐེབས་པ་སྟེ། དམ་པ་གསུམ་གྱིས་རྩིས་ཟིན་པར་བྱེད་པ་ནི་ཤིན་ཏུ་གལ་ཆེ་སྟེ། རྣམ་སྣང་མངོན་བྱང་ལས། གསང་བའི་བདག་པོ། ཐམས་ཅད་མཁྱེན་པའི་ཡེ་ཤེས་དེ་ནི་སྙིང་རྗེའི་རྩ་བ་ལས་བྱུང་བ་ཡིན། བྱང་ཆུབ་སེམས་ཀྱི་རྒྱུ་ལས་བྱུང་བ་ཡིན། ཐབས་ཀྱིས་མཐར་ཕྱིན་པ་ཡིན། ཞེས་དང་། ཨོ་རྒྱན་དུས་གསུམ་མཁྱེན་པས། དེས་ན་ཐེག་པ་ཆེན་པོའི་ལམ་གྱི་ངོ་བོ་ནི་བྱམས་སྙིང་རྗེ་བྱང་ཆུབ་ཀྱི་སེམས་ཡིན་པས་མེད་ཀ་མེད་ཡིན་ནོ། །དེ་དག་ལ་བརྟེན་ནས་རང་གཞན་གྱི་དོན་ཐམས་ཅད་འགྲུབ་པས་ལམ་གྱི་ཁ་བསྒྱུར་ཡིན་ཏེ། རྟའི་ཁ་ལོ་སྲབ་ཀྱིས་བསྒྱུར་བ་བཞིན་ནོ། །ཞེས་དང་། དབུ་མ་འཇུག་པ་ལས་ཀྱང་། ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །སངས་རྒྱས་བྱང་ཆུབ་སེམས་དཔའ་ལས་འཁྲུངས་ཤིང་། །སྙིང་རྗེའི་སེམས་དང་གཉིས་སུ་མེད་བློ་དང་། །བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་སོ། །དེས་ན་ཆོས་ཉན་བཤད་སྒོམ་སྒྲུབ་གང་གི་སྐབས་སུའང་ཀུན་སློང་འདི་གཙོ་ཆེ་སྟེ། ཡོན་ཏན་རིན་པོ་ཆེའི་མཛོད་ལས། བསམ་པ་དགེ་དང་མི་དགེའི་བྱེ་བྲག་ལས། །དགེ་སྡིག་གཟུགས་བརྙན་ཆེ་ཆུང་རྗེས་མི་འགྲོ། །ཞེས་གསུངས་པ་ལྟར། རང་ཉིད་ཆེ་འདོད་དང་གྲགས་འདོད་སོགས་འཇིག་རྟེན་ཚེ་འདི་དོན་དུ་གཉེར་བའི་ཀུན་སློང་གིས། ཆོས་ཇི་ཙམ་འཆད་ཉན་སོགས་བྱས་ཀྱང་ཡང་དག་པའི་ཆོས་སུ་མི་འགྲོ་བས། །དཔོན་སློབ་གཉིས་ཀས་ཐོག་མར་ཁ་ནང་དུ་ལོག་སྟེ་རང་གི་ཀུན་སློང་བཅོས་པ་འདི་གནད་ཤིན་ཏུ་ཆེ། འདི་ལྟར་ཀུན་སློང་བཅོས་ཤེས་ན་དགེ་བ་གང་བྱེད་ཐབས་ཀྱིས་ཟིན་ཏེ་སྐྱེས་བུ་ཆེན་པོའི་ལམ་དུ་འགྱུར་ཞིང་བསོད་ནམས་ཚད་མེད་པའི་འཇུག་ངོགས་དམ་པར་འགྱུར་བ་ཡིན་ནོ། །གཉིས་པ་ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་ནི། སྤྱིར་མདོ་སྔགས་གཉིས་པོ་བསྒྲུབ་བྱ་རྫོགས་པའི་བྱང་ཆུབ་ཐོབ་པར་འདོད་པ་ལ་དོན་གཅིག་ཀྱང་། གསང་སྔགས་རྡོ་རྗེ་ཐེག་པ་འདིར་ནི་འཇུག་སྒོའི་དབང་སོགས་ཐབས་ལ་མ་རྨོངས་པ་དང་། རང་གཞན་གྱི་དོན་གཉིས་འབད་མེད་དུ་སྒྲུབ་པར་བྱེད་པའི་ཐབས་མང་བ་དང་། དཀའ་བ་ཆེན་པོར་རང་སྤྱད་མི་དགོས་པར་འབྲས་བུ་མངོན་དུ་བྱེད་པས་ཐབས་སླ་བ་དང་། དབང་པོ་རྣོན་པོའི་དབང་དུ་བྱས་ཏེ་གསུངས་པས་ན་སྔ་མ་ལས་ཁྱད་པར་དུ་འཕགས་ཏེ། ཚུལ་གསུམ་པའི་སྒྲོན་མེ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ཏེ། །སྔགས་ཀྱི་ཐེག་པ་ཁྱད་པར་འཕགས། །ཞེས་སོ། །དེའི་རྩ་བ་ཡང་འདུན་པ་སྒྱུར་བ་ལ་རག་ལས་པས་སྐབས་འདིར་ཡང་། ཀུན་མཁྱེན་བླ་མས་ཡིད་བཞིན་རིན་པོ་ཆེའི་མཛོད་དུ། སྤྲུལ་སྐུ་ཆོས་ལ་ཤཱཀྱའི་རྒྱལ་པོ་དང་། །ལོངས་སྐུའི་གསང་སྔགས་རིགས་ལྔ་རྡོ་རྗེ་འཆང་། །ཆོས་སྐུ་ནམ་མཁའ་ལྟ་བུའི་ཆོས་རྣམས་ལ། །ཀུན་བཟང་ཤེས་རབ་ཕ་རོལ་ཕྱིན་ཡུམ་བསམ། །ཡང་ན་རང་རང་ཆོས་དེའི་སྟོན་པར་བསམ། །ཞེས་གསུངས་པ་ལྟར་བྱེ་བྲག་སོ་སོའི་སྟོན་པ་དང་འཁོར་གྱི་རྣམ་པར་བསྒོམ་དགོས་ནའང་། འདིར་སྤྱི་ཙམ་གྱི་དབང་དུ་བྱས་ཏེ། ད་ལྟར་གྱི་ཆོས་འཆད་པའི་གནས་ཁང་དང་སྟོན་འཁོར་སོགས་ཐ་མལ་གྱི་རྣམ་པ་ཅན་འདི་ལྟ་བུ་མ་ཡིན་པར། གནས་ཕུན་སུམ་ཚོགས་པ་འོག་མིན་ཆོས་ཀྱི་དབྱིངས་ཀྱི་ཕོ་བྲང་ཡེ་ཤེས་འོད་ལྔ་ལས་གྲུབ་པའི་གཞལ་མེད་ཁང་བཀོད་པ་ཚད་མེད་པར་མངོན་པར་འཕགས་པར། སྟོན་པ་ཕུན་སུམ་ཚོགས་པ་སྐྱོན་ཀུན་ཟད། ཡོན་ཏན་ཀུན་རྫོགས། རིགས་ཀུན་གྱི་ཁྱབ་བདག་དཔལ་རྡོ་རྗེ་སེམས་དཔའ་ལྟ་བུར་རང་རང་གི་དཀྱིལ་འཁོར་གྱི་གཙོ་བོ་གང་ཡིན་པ་དང་། འཁོར་ཕུན་སུམ་ཚོགས་པ་རྡོ་རྗེ་རིགས་ཀྱི་སེམས་དཔའ་དང་སེམས་མ་ལྷ་དང་ལྷ་མོའི་རང་བཞིན་སོགས་རིགས་གང་ཡིན་ནམ། ཡང་ན་ཕོ་ཐམས་ཅད་འཕགས་པ་འཇམ་པའི་དབྱངས་དང་། མོ་ཐམས་ཅད་འཕགས་མ་སྒྲོལ་མར་གསལ་བ་དང་། དུས་ཕུན་སུམ་ཚོགས་པ་རྟག་པ་རྒྱུན་གྱི་འཁོར་ལོར། ཆོས་ཕུན་སུམ་ཚོགས་པ་ཐེག་མཆོག་བླ་ན་མེད་པ་སྒྲ་ཚིག་བྱ་རྩོལ་ལས་འདས་པའི་གཞོམ་མེད་ནཱ་དའི་སྒྲ་དབྱངས་གྲགས་སྟོང་སྐྱེ་བ་མེད་པར་སྒྲོག་པས་སྲིད་ཞིའི་རྒུད་པ་མཐའ་དག་སེལ་བའི་སྒྲ་ལྷང་ལྷང་དུ་ཡོད་སྙམ་པ་སྟེ། དེ་ཐམས་ཅད་ཀྱང་མ་ཡིན་པ་ལ་ཡིན་པར་གསལ་གདབ་པ་ལྟ་བུ་མ་ཡིན་པར་ཡིན་པ་ལ་ཡིན་པར་ཤེས་པའི་བློ་བཞག་པ་ཙམ་སྟེ། སྒྱུ་འཕྲུལ་གསང་སྙིང་ལས། སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་གསུང་། ཁྱད་པར་དུའང་། བླ་མ་ནི་སངས་རྒྱས་ཐམས་ཅད་འདུས་པའི་བདག་ཉིད། འདས་པའི་སངས་རྒྱས་རྣམས་ཀྱི་སྤྲུལ་པ། མ་འོངས་པའི་སངས་རྒྱས་རྣམས་ཀྱི་འབྱུང་ཁུངས། ད་ལྟའི་སངས་རྒྱས་རྣམས་ཀྱི་རྒྱལ་ཚབ། སྐལ་བཟང་སངས་རྒྱས་སྟོང་གིས་ཀྱང་མ་ཐུལ་བའི་རང་རེ་རྨུ་རྒོད་སྙིགས་མའི་སེམས་ཅན་རྣམས་རྗེས་སུ་འཛིན་པའི་ཕྱིར། ཡོན་ཏན་སངས་རྒྱས་དང་མཉམ་ཡང་བཀའ་དྲིན་སངས་རྒྱས་ལས་ཀྱང་ལྷག་པ་ཡིན་ཏེ། ཇི་སྐད་དུ། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཡིན། །བླ་མ་དཔལ་ལྡན་རྡོ་རྗེ་འཆང་། །ཞེས་དང་། ཏིང་ངེ་འཛིན་མཆོག་དམ་པ་ལས། རིགས་ཀྱི་བུ། དེ་ཡང་ཕྱི་མ་ཕྱི་མའི་དུས་ན་ང་ཉིད་དགེ་བའི་བཤེས་སུ་སྤྲུལ་ནས། ཏིང་ངེ་འཛིན་འདི་སྟོན་པར་འགྱུར་རོ། །དེའི་ཕྱིར་དགེ་བའི་བཤེས་གཉེན་ནི་ཁྱོད་ཀྱི་སྟོན་པ་ཡིན་པས་ནམ་བྱང་ཆུབ་སྙིང་པོ་ལ་འདུག་གི་བར་དུ་བརྟེན་ཅིང་རིམ་གྲོ་དང་བཀུར་སྟི་གྱིས་ཤིགཅེས་དང་། ནམ་མཁའ་དྲི་མ་མེད་པའི་མདོ་ལས། ཀུན་དགའ་བོ། དེ་བཞིན་གཤེགས་པ་ནི་སེམས་ཅན་ཐམས་ཅད་ལ་སྣང་བ་མ་ཡིན་གྱི། དགེ་བའི་བཤེས་གཉེན་ནི་སྣང་བས་ཆོས་སྟོན་ཅིང་ཐར་པའི་ས་བོན་འདེབས་པའི་ཕྱིར། དེ་བཞིན་གཤེགས་པ་རྣམས་ལས་དགེ་བའི་བཤེས་གཉེན་ལྷག་པར་ཡང་ཟུངས་ཤིག ཅེས་སོ། ཁྱད་པར་གསང་སྔགས་རྡོ་རྗེ་ཐེག་པའི་ཆོས་སྨྲ་བ་པོ་ནི་སྟོན་པ་ཉིད་ཀྱིས་དངོས་སུ་བྱིན་གྱིས་བརླབས་པ་ཞེས་བྱ་སྟེ། གསང་སྙིང་ལས། དེ་བཞིན་གཤེགས་པ་ཐམས་ཅད་ཀྱིས། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བར་གང་བྱེད་པ། །དེ་ནི་ང་ཡིན་དབང་ཡང་རྫོགས། །ཞེས་སོ། །ཆོས་ཉན་པའི་འཁོར་རྣམས་ཀྱང་། གཞི་བདེ་གཤེགས་སྙིང་པོ། རྟེན་མི་ལུས་རིན་ཆེན། རྐྱེན་དགེ་བའི་བཤེས་གཉེན། ཐབས་དེའི་གདམས་ངག་གིས་ཟིན་པས་མ་འོངས་པའི་སངས་རྒྱས་ཡིན་ཏེ། བརྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །དྲི་མ་དེ་བསལ་སངས་རྒྱས་དངོས། །ཞེས་གསུངས་པ་བཞིན་ནོ། །གཉིས་པ་ཀུན་སྤྱོད་ལའང་གཉིས། སྤང་བྱ་དང་། བླང་བྱའོ། །དང་པོ་ལ་གསུམ། ཉན་པ་པོ་སློབ་མ། འཆད་པ་པོ་སློབ་དཔོན། གཉིས་ཀས་ཐུན་མོང་དུ་སྤང་བར་བྱ་བའོ། །དང་པོ་ནི། ཡིད་བཞིན་མཛོད་ལས། དེ་ནས་ཉན་བྱེད་སློབ་མའི་ཆོས་ཚུལ་ནི། །སྐྱོན་རྣམས་སྤངས་ལ་གུས་པས་མཉན་པར་བྱ། །ཞེས་གསུངས་ཏེ། དེ་ལ་ཆོས་ཉན་པའི་ཚེ། སྣོད་ཀྱི་སྐྱོན་གསུམ་དྲི་མ་དྲུག ཉེས་པ་སུམ་ཅུ་རྩ་དྲུག་གི་ཚོགས་དང་བྲལ་བའི་ཚུལ་གྱིས་མཉན་པར་བྱ་དགོས་ཏེ། དེ་ལ་སྣོད་ཀྱི་སྐྱོན་གསུམ་ནི། ཁ་སྦུབ་པ། ཞབས་རྡོལ་བ། དུག་ཅན་ལྟ་བུའི་ཚུལ་ཏེ། དེ་ཡང་སྣོད་ཁ་སྦུབ་པའི་སྟེང་དུ་བདུད་རྩིའི་ཆར་བབས་ཀྱང་ཐིགས་པ་གཅིག་ནང་དུ་མི་འོང་པ་ལྟར། ཆོས་ལ་རྣ་བ་མི་གཏོད་པའམ། གཏོད་ཀྱང་གཉིད་རྨུགས་དང་རྩེད་འཇོ་དང་གཞན་དུ་ཡིད་འཕྲོ་བར་བྱེད་པའོ། །ཞབས་རྡོལ་བའི་སྣོད་ས་ལ་ཡོད་རིང་ཆར་བབས་པའི་ཆུ་ཡོད་པ་ཀུན་བཏེགས་ན་ཟགས་པ་ལྟར། ཆོས་ཐོས་པ་ཐེངས་རེ་དེ་ན་ཡོད་རིང་ཟིན་ཀྱང་ཡང་དང་ཡང་དུ་དྲན་པ་ལ་འདྲིས་པར་མ་བྱས་པས་བརྗེད་པར་གྱུར་པ་དང་། སྣོད་དུག་ཅན་དུ་ཆར་ཆུས་གང་བ་མ་བོ་བར་གནས་ཀྱང་གང་གིས་སྤྱད་པ་མི་བདེ་བ་ལྟར། ཉོན་མོངས་པའི་དབང་དུ་སོང་ནས་སླར་ཞིང་ཐོས་པས་རྒྱགས་པར་འགྱུར་བ་ཡིན་ཏེ། དེ་གསུམ་སྤང་བར་གདམས་པ་ཡང་། ཡུམ་བར་མ་ལས། ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བཤད་དོ་ཞེས་གསུངས་ཏེ། ཉོན་མོངས་པ་མེད་པར་ལེགས་པར་ཉོན། ཁ་མ་སྦུབ་པར་རབ་ཏུ་ཉོན། ཞབས་མ་རྡོལ་བར་ཡིད་ལ་ཟུངས་ཞེས་གདམས་པ་ཡིན་ནོ། །དྲི་མ་དྲུག་ནི། རྣམ་བཤད་རིག་པ་ལས། ང་རྒྱལ་དང་ནི་མ་དད་དང་། །དོན་དུ་གཉེར་བ་མེད་ཉིད་དང་། །ཕྱི་རོལ་རྣམ་གཡེང་ནང་དུ་སྡུད། །སྐྱོ་བས་ཉན་པ་དྲི་མ་ཡིན། །ཞེས་པ་ལྟར་ཆོས་འཆད་པའི་བླ་མ་ལས་ཀྱང་ང་ལྷག་སྙམ་པའི་ང་རྒྱལ། ཆོས་དང་བླ་མ་ལ་མ་དད་པ། ཆོས་ལ་དོན་གཉེར་གྱི་འདུན་པ་མེད་པ། སེམས་ཕྱི་རོལ་ཚོགས་དྲུག་གི་ཡུལ་ལ་རྣམ་པར་གཡེང་བ། དབང་པོ་སྒོ་ལྔ་ཧ་ཅང་ནང་དུ་སྡུད་ཆེས་པ། ཆོས་ཐུན་རིང་དྲགས་པ་སོགས་ཀྱིས་སྐྱོ་བ་སྟེ་དྲི་མ་དྲུག་པོ་འདི་སྤང་དགོས་སོ། །ཉེས་པ་སུམ་ཅུ་རྩ་དྲུག་ནི། ཡིད་བཞིན་རིན་པོ་ཆེའི་མཛོད་ལས། མ་གུས་ལ་སོགས་བདུད་ཀྱི་ལས་དྲུག་དང་། །ང་རྒྱལ་ལ་སོགས་སྒྲིབ་པའི་ལས་དྲུག་དང་། །ཚུལ་དུ་འཆོས་སོགས་ཆོས་སྤང་ལས་དྲུག་དང་། །ཟང་ཟིང་གཉེར་སོགས་གཡེང་བའི་སྐྱོན་དྲུག་དང་། །རྙེད་བཀུར་ཆགས་སོགས་ལོག་པའི་སྐྱོན་དྲུག་དང་། །གཞན་དུ་བྱེད་སོགས་གོལ་བའི་ཆོས་དྲུག་སྟེ། །ཉེས་པ་སུམ་ཅུ་རྩ་དྲུག་སྤངས་ལ་མཉན། །ཞེས་གསུངས་ཏེ། དེ་ལ་བདུད་ཀྱི་ལས་དྲུག་ནི། ཡོན་ཏན་ཡོངས་སུ་བཀོད་པའི་མདོ་ལས། ལེ་ལོ་དང་། སྙོམ་ལས་དང་། ཆོས་དང་ཆོས་སྨྲ་བ་ལ་མ་དད་པ་དང་། དགེ་བའི་བཤེས་གཉེན་ལ་སྲི་ཞུས་མི་འདུད་པ་དང་། བསྟན་པ་བཞིན་ཡིད་ལ་མི་བྱེད་པ་དང་། འཇིག་རྟེན་འདི་ལ་སེམས་པས་ལས་དང་ལས་ཀྱི་རྣམ་པར་སྨིན་པ་ཁྱད་དུ་གསོད་པའོ། །ཞེས་སོ། །སྒྲིབ་པའི་ལས་དྲུག་ནི། བློ་གྲོས་རྒྱ་མཚོས་ཞུས་པའི་མདོ་ལས། རང་གི་རྒྱུད་ལ་བདུད་ཞུགས་པས་ང་རྒྱལ་ཆེ་བ་དང་། ལས་ཀྱི་སྒྲིབ་པས་ཆོས་སྤོང་བ་དང་། རྒྱང་འཕེན་གྱི་གསང་ཚིག་འཚོལ་བས་ཉེ་བར་བསྟན་པ་ཉན་པ་དང་། བྱང་ཆུབ་སེམས་དཔའི་སྡེ་སྣོད་མི་ཉན་པ་དང་། དགེ་བའི་བཤེས་གཉེན་ལ་ལོག་པར་ལྟ་བ་དང་། ཆོས་ལ་ལོག་པར་ལྟ་བའོ། །ཞེས་སོ། །ཆོས་སྤོང་བའི་རྒྱུ་དྲུག་ནི། དེ་ཉིད་ལས། སྡིག་པ་འདོད་པས་ལུས་སེམས་ཚུལ་འཆོས་པ་དང་། ང་རྒྱལ་གྱིས་ཆོས་སྨྲ་བ་ལ་མི་གུས་པ་དང་། ཐེ་ཚོམ་གྱིས་ཆོས་ལ་མི་གུས་པ་དང་། ཚུལ་འཆོས་ཀྱིས་ལོག་པར་འཚོ་བ་དང་། ཕ་མ་དང་མཁན་པོ་དང་སློབ་དཔོན་ལ་མི་གུས་པ་དང་། ལུས་སེམས་རྩུབ་པས་རྟག་ཏུ་མི་མཐུན་པར་རྩོད་པའོ། །ཞེས་སོ། །ཆོས་ལས་གཡེང་བའི་སྐྱོན་དྲུག་ནི། དེ་ཉིད་ལས། འཇིག་རྟེན་གྱི་བྱ་བྱེད་མང་བ་དང་། ཟང་ཟིང་གི་རྙེད་པ་མང་བ་དང་། ངག་ཚིག་བྲེ་མོའི་གཏམ་གྱི་སྦྱོར་བ་མང་བ་དང་། སྡིག་པའི་གྲོགས་ཀྱི་མཛའ་བཤེས་མང་བ་དང་། ལོག་པར་རྟོག་པའི་བློ་མང་བ་དང་། ལས་ངན་པའི་དབང་གིས་ནད་གདོན་མང་བའོ། །ལོག་པར་འཁྱོག་པའི་སྐྱོན་དྲུག་ནི། ཡུལ་འཁོར་སྐྱོང་གིས་ཞུས་པའི་མདོ་ལས། བཀའ་དྲིན་གྱིས་བྱས་པ་མི་གཟོ་ཞིང་གཡོ་བྱེད་པ་དང་། རྙེད་པ་དང་བཀུར་སྟི་ལ་ཆགས་པས་ཆོས་སྒྲུབ་པ་དང་། ཕ་རོལ་གྱི་རྙེད་པ་ལ་ཕྲག་དོག་དང་སེར་སྣ་བྱེད་པ་དང་། ཆོས་སྨྲ་བའི་ཡོན་ཏན་ལ་མི་སེམས་པར་འཁྲུལ་བ་ཚོལ་བ་དང་། སྡིག་པའི་སློབ་དཔོན་ལ་དད་ཅིང་བརྟེན་པ་དང་། རྟོག་གེ་འཚོལ་གྱི་བསོད་ནམས་ཀྱི་ཡོན་ཏན་མི་འཚོལ་བའོ། །ཞེས་སོ། །ཐེག་པ་ཆེན་པོ་ལས་གོལ་བའི་ཆོས་དྲུག་ནི། འཇམ་དཔལ་རྣམ་པར་འཕྲུལ་བའི་མདོ་ལས། བྱང་ཆུབ་སེམས་དཔའི་སྡེ་སྣོད་མི་འཚོལ་བར་མུ་སྟེགས་ཀྱི་རྫུ་འཕྲུལ་འཚོལ་བ་དང་། འཇིག་རྟེན་པའི་ཞལ་ཏ་བྱེད་ཅིང་མང་དུ་ཐོས་པ་མི་འཚོལ་བ་དང་། ཚིག་གིས་ཐོས་པ་འཚོལ་ཞིང་དེའི་རྣམ་པར་གྲོལ་བ་མི་འཚོལ་བ་དང་། ཉན་རང་གི་སྡེ་སྣོད་ཚོལ་གྱི་བྱང་ཆུབ་སེམས་དཔའི་སྡེ་སྣོད་མི་འཚོལ་བ་དང་། ཐབས་ལ་མཁས་པ་མངོན་དུ་མི་བྱེད་པར་ཉོན་མོངས་པ་ཟད་པ་འཚོལ་བ་དང་། རིག་པའི་གནས་ལ་མཁས་པ་འདོད་ཀྱི་དགེ་བའི་བཤེས་གཉེན་མི་འཚོལ་བའོ། །ཞེས་སོ། །དེ་ལྟ་བུའི་སྐྱོན་རྣམས་སྤངས་ནས་ལེགས་པར་ཚུལ་བཞིན་དུ་མཉན་པར་བྱའོ། །གཉིས་པ་ནི། འཆད་པ་པོ་སློབ་དཔོན་གྱིས་ཀྱང་། ཉོན་མོངས་པ་ང་རྒྱལ་དང་། རྣམ་གཡེང་དང་། ཆོས་དང་གང་ཟག་ལ་མ་གུས་པ་དང་། བག་མེད་པ་དང་། ཆོས་བརྒྱད་དོན་གཉེར་གྱི་བསམ་པ་སོགས་ཀུན་སློང་གི་བསམ་པ་ངན་པ་དང་། སྦྱོར་བ་ཆོས་འཆད་པའི་ཚེ་ན། སྐབས་འཆོལ་བ། བརྡ་མ་འཕྲོད་པ། ཚིག་དོན་ནོར་བ། ཕྲག་དོག་སོགས་ཉོན་མོངས་པས་ཀུན་ནས་བསླངས་པའི་སེམས་དང་ངག་སྤྲོ་བ། ཚིག་མི་གསལ་བ། ལྷག་ཆད་དུ་གྱུར་པ། དམ་བཅའ་སྔ་མ་ཕྱི་མས་སུན་འབྱིན་པ། ཆོས་ཀྱི་གསེབ་ཏུ་ཟུར་གྱིས་བདག་ལ་བསྟོད་པ་དང་། གཞན་ལ་འཕྱ་བ་དང་། ཡུལ་གྱི་བརྡ་སྐད་ངན་པ་འདྲེས་པ། གདུལ་བྱའི་བློ་དང་མི་འཚམ་པར་སྟོན་པས་སློབ་མའི་རྒྱུད་ཆུད་འཛའ་ཞིང་སྐྱོན་དུ་གྱུར་པ་རྣམས་སྤངས་ལ། ཚིག་གི་སྦྱོར་བ་ཕུན་སུམ་ཚོགས་པས་བཤད་དེ། བརྡ་གསལ་ལ་འཁོར་གྱི་ཁྱམས་སུ་ཁྱབ་པ། རྣ་བར་སྙན་པས་ཀུན་གྱིས་ཉན་པར་སྤྲོ་བ། ཚིག་དོན་ངེས་པས་ཐེ་ཚོམ་གཅོད་པ། དཔེ་དོན་མཁས་པས་ཉན་པ་པོའི་ཡིད་དུ་འབབ་ཅིང་རྟོགས་པར་སླ་བ། བློ་དང་འཚམ་པས་གདུལ་བྱའི་དོན་དུ་འགྱུར་བ། སྐབས་སུ་གཏམ་རྒྱུད་ངོ་མཚར་ཅན་བསྟན་པས་ཉན་པ་པོའི་གཉིད་རྨུགས་དང་སྐྱོ་བ་སེལ་བ། ལུང་རིགས་ཀྱི་སྒྲོམ་ནས་བཏོན་པས་ནོར་འཁྲུལ་མེད་པ། ཕྱོགས་སྔ་དང་སྐྱོན་རྣམས་སྤངས་པས་ཉེས་པ་ལས་བཟློག་པར་མཁས་པ། ཐེག་པ་ཐམས་ཅད་དང་མཐུན་པར་བཤད་པས་ཀུན་དང་འཐད་པ། གོ་བདེ་ཞིང་ཡུལ་སྐད་ངན་པ་མ་འདྲེས་པས་ཚིག་གཟུང་བར་འོས་པ། སྤྲོས་ཤིང་སྡུད་པ་ལ་མཁས་པས་བཤད་པ་རང་དབང་དུ་གྱུར་པ། སོས་དལ་ཞིང་ཁོང་ཡངས་པ་ཐོགས་རྡུགས་དང་ངལ་དུབ་མེད་པའི་ཚུལ་ནི་ཡོན་ཏན་འབྱོར་ལྡན་གྱི་བཤད་པ་ཞེས་བྱའོ། །གསུམ་པ་ནི། ཆོས་འཆད་ཉན་ལ་ཞུགས་པའི་ཚེ། དཔོན་སློབ་ཐམས་ཅད་ཀྱིས་ཡིད་གཡེང་བའི་རྒྱུ་འདུ་འཛི་རྣམ་གཡེང་གི་ཟང་ཟིང་དང་། བསྙེན་བཀུར་སོགས་ཀྱི་ཆེད་དུ་མགྲོན་དུ་བོས་པས་དུས་འགྱངས་པ་དང་། དྲན་པ་མི་གསལ་བའི་རྒྱུ་ཆང་དང་གཉིད་རྨུགས་ལ་སོགས་པ་ཆོས་འཆད་ཉན་ལ་བར་ཆད་དུ་གྱུར་པ་རྣམས་སྤང་བར་བྱ་སྟེ། ཀུན་མཁྱེན་བླ་མས། ཕྱི་ནང་འདུ་འཛི་བསྙེན་བཀུར་ཟང་ཟིང་དང་། །ཆང་དང་གཉིད་རྨུགས་དྲན་པ་ཉམས་ལ་སོགས། །ཐོས་པའི་དོན་ལ་བར་ཆད་གྱུར་རྣམས་སྤང་། །ཞེས་སོ། །གཉིས་པ་བླང་བྱའི་ཀུན་སྤྱོད་ལའང་བཤད་མ་ཐག་པ་ལྟར་གསུམ་ལས། དང་པོ་སློབ་མའི་ཀུན་སྤྱོད་ལ། ཡོན་ཏན་སུམ་ཅུ་རྩ་དྲུག་དང་ལྡན་པ། ཡང་དག་པའི་འདུ་ཤེས་བཞི་བསྐྱེད་པ། ཕ་རོལ་ཏུ་ཕྱིན་པ་དྲུག་ལྡན་དུ་བྱ་བ། སྤྱོད་ལམ་གཞན་བསྟན་པ་དང་བཞི་ལས། དང་པོ། ཡིད་བཞིན་རིན་པོ་ཆེའི་མཛོད་ལས། གང་ཚེ་ལེགས་པའི་ཚུལ་གྱིས་མཉན་བྱ་བ། །ནོར་བུའི་འདུ་ཤེས་ལ་སོགས་གཅེས་པ་དྲུག །ཉོན་མོངས་བཟོད་སོགས་དཀའ་བའི་སྤྱོད་པ་དྲུག །ཐོས་མང་གཉེར་སོགས་རྐྱེན་གྱིས་མི་འགྱུར་དྲུག །སྙིང་རྗེ་བསྐྱེད་སོགས་ཆེད་དུ་བྱ་བ་དྲུག །བྱེ་བྲག་ཤེས་སོགས་དགོས་པ་རྣམ་པ་དྲུག །ཆོས་འཚོལ་ལ་སོགས་འཚོལ་བ་རྣམ་དྲུག་སྟེ། །ཡོན་ཏན་སུམ་ཅུ་རྩ་དྲུག་ལྡན་པས་ཉན། །ཞེས་གསུངས་ཏེ། དེ་ལས་གཅེས་པའི་འདུ་ཤེས་དྲུག་ནི། ལག་བཟང་གིས་ཞུས་པའི་མདོ་ལས། ཆོས་སྨྲ་བའི་བླ་མ་ལ་རིན་པོ་ཆེའི་གཏེར་དུ་འདུ་ཤེས་པ་དང་། དེ་བཞིན་དུ་ཆོས་ལ་ཡིད་བཞིན་གྱི་ནོར་བུར། ཆོས་ཉན་པ་ལ་རབ་ཏུ་དཀོན་པར། ཆོས་འཛིན་ཅིང་བསམ་པ་ལ་གཅེས་པའི་དོན་ཡོད་པར། ཆོས་སོ་སོར་རྟོག་པ་ལ་ཚེ་རབས་བརྒྱར་མི་རྙེད་པར། ཆོས་འཚོལ་བ་སྤང་བ་རྣམས་ལ་བདུད་རྩི་བོར་ནས་དུག་ལ་སྤྱོད་པར་འདུ་ཤེས་པ་དང་། ཉན་ཞིང་སེམས་པ་རྣམས་ལ་དོན་དང་བཅས་པར་འགྱུར་བའི་འདུན་པ་བརྟེན་པར་བྱའོ། །ཞེས་སོ། །དཀའ་བའི་བཟོད་པ་དྲུག་ནི། དེ་ཉིད་ལས། དགེ་བའི་བཤེས་གཉེན་དང་ཆོས་ཀྱི་ཕྱོགས་སུ་ཚ་བ་དང་གྲང་བའི་ཉོན་མོངས་པ་བཟོད་པ་དང་། དེ་བཞིན་དུ། བཀྲེས་པ་དང་སྐོམ་པས་ཉོན་མོངས་པ། ངན་སྨྲས་དང་རྒྱ་གད་ཀྱིས་ཉོན་མོངས་པ། ངལ་དུབ་འགྲོ་ལས་ཀྱིས་ཉོན་མོངས་པ། ཡོ་བྱད་གཏོང་བ་དང་འཚོལ་བས་ཉོན་མོངས་པ་བཟོད་པ་དང་། གཅེས་པར་བྱ་བའི་སྲོག་ལའང་བསྡོ{བདོ}ས་ཏེ་བཟོད་པར་བྱ་བ་གཅེས་སོ། །ཞེས་སོ། །རྐྱེན་གྱིས་མི་འགྱུར་བའི་གོ་ཆ་དྲུག་ནི། དེ་ཉིད་ལས། ཆོས་སྟོན་པ་དང་ཆོས་ཀྱི་ནན་ཏན་ལྷུར་བྱེད་པ་ལ་མདུང་ཐུང་གིས་ཀྱང་མི་བཟློག་པར་འབད་དོ། །ཐོས་པ་མང་དུ་བསོག་པ་དང་། ཐོས་པ་མང་དུ་འཛིན་པ་དང་། ཆོས་ཀྱི་དོན་ཤེས་པ་དང་། དེ་ཉིད་སྤྱོད་པ་དང་ལྡན་པ་དང་། གཞན་ཡང་དེ་ལྟ་བུ་ལ་བརྟེན་པ་དང་། དེ་ལྟ་བུ་ལ་བསྙེན་བཀུར་བྱེད་པའོ། །ཞེས་སོ། །ཆེད་དུ་བྱ་བའི་ཁྱད་པར་དྲུག་ནི། དེ་ཉིད་ལས། དགེ་བའི་རྩ་བ་ཐམས་ཅད་ཤེས་པར་བྱ་བ་དང་། ཤེས་ནས་དེ་དག་ཚུལ་བཞིན་དུ་བསྒྲུབ་པ་དང་། སེམས་ཅན་ལ་སྙིང་རྗེ་ཆེན་པོ་བསྐྱེད་པ་དང་། དམ་པའི་ཆོས་ཡོངས་སུ་གཟུང་བ་དང་། དཀོན་མཆོག་གསུམ་གྱི་གདུང་མི་གཅད་པ་དང་། སེམས་ཅན་ཡོངས་སུ་སྨིན་པར་བྱ་བ་སྟེ། ཆེད་དུ་བྱ་བ་དེ་ལྟ་བུ་དང་ལྡན་པར་བྱའོ། །ཞེས་དང་། དགོས་པ་དྲུག་སྒྲུབ་པ་ནི། འོད་སྲུང་གིས་ཞུས་པ་ལས། ཐོས་ནས་ཆོས་ཀྱི་བྱེ་བྲག་ཤེས་པར་བྱ་བའི་དགོས་པ་དང་། དེ་བཞིན་དུ། ཤེས་ནས་བྱ་བ་མ་ཡིན་པ་མི་བྱེད་པའི། གཞན་ལའང་དེ་ལྟར་བསྟན་པའི། དེ་ལྟར་བསྟན་པས་རང་དང་གཞན་གྱིས་རྣམ་པར་གྲོལ་བ་ཐོབ་པའི། རང་དང་གཞན་གྱིས་ཤེས་རབ་སྦྱོང་བའི་དགོས་པ་དང་། ཕྱོགས་བཞི་ནས་ལྷགས་པ་རྣམས་ཀྱི་ཐེ་ཚོམ་གཅོད་པའི་དགོས་པ་སྟེ། དེ་ལྟར་དྲུག་གིས་ཉན་པ་ལ་བརྩོན་པར་བྱའོ། །ཞེས་སོ། །འཚོལ་བ་དྲུག་ནི། ཤིན་ཏུ་རྒྱས་པ་ཆེན་པོ་སངས་རྒྱས་ཕལ་པོ་ཆེའི་མདོ་ལས། གཡོ་དང་སྒྱུ་མེད་པར་བསམ་པ་ཐག་པ་ནས་ཆོས་འཚོལ་བ་དང་། དེ་བཞིན་དུ། རང་གི་ཆེད་མ་ཡིན་པར་ཀུན་ལ་ཕན་པའི་ཆེད་དུ། རྙེད་པ་དང་བཀུར་སྟི་མི་འདོད་པར་འགྲོ་བའི་ཉོན་མོངས་པ་སྤོང་བར་འདོད་པས། གཟུ་ལུམ་མ་ཡིན་པར་ཤེས་རབ་ཀྱི་འཇུག་པས། ཡིད་གཉིས་མེད་པར་ཀུན་གྱི་ཐེ་ཚོམ་གཅོད་པའི་ཕྱིར་འཚོལ་བ་དང་། རློམ་སེམས་དང་འདོད་པ་མེད་པར་སངས་རྒྱས་ཀྱི་ཆོས་རྫོགས་པར་བྱ་བའི་ཕྱིར་འཚོལ་བ་སྟེ། ཡོངས་སུ་འཚོལ་བ་དེ་ལྟ་བུས་བཙལ་བར་བྱའོ། །ཞེས་སོ། །གཉིས་པ་ཡང་དག་པའི་འདུ་ཤེས་བཞི་བསྟེན་པ་ནི། འཕགས་པ་སྡོང་པོ་བཀོད་པ་ལས། རིགས་ཀྱི་བུ། ཁྱོད་ཀྱིས་བདག་ཉིད་ལ་ནད་པའི་འདུ་ཤེས་བསྐྱེད་པར་བྱའོ། །ཆོས་ལ་སྨན་གྱི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་སྨན་པ་མཁས་པའི་འདུ་ཤེས་བསྐྱེད་པར་བྱའོ། །ནན་ཏན་ཉམས་སུ་ལེན་པ་ལ་ནད་ཉེ་བར་འཚོ་བའི་འདུ་ཤེས་བསྐྱེད་པར་བྱའོ། །ཞེས་སོགས་དཔེ་དུ་མའི་སྒོ་ནས་རྒྱ་ཆེར་གསུངས་པ་བཞིན་ནོ། །གསུམ་པ་ཕར་ཕྱིན་དྲུག་དང་ལྡན་པར་བྱ་བ་ནི། ཀུན་མཁྱེན་བླ་མས། མེ་ཏོག་སྟན་སོགས་འབུལ་བ་སྦྱིན་པ་སྟེ། །སྒོ་གསུམ་རབ་བསྡམས་ཚུལ་ཁྲིམས་ཕ་རོལ་ཕྱིན། །གནོད་པ་བཟོད་པ་སྤྲོ་བ་བརྩོན་འགྲུས་ཏེ། །མ་ཡེངས་ཐོས་པ་འཛིན་པ་བསམ་གཏན་ཉིད། །ཐེ་ཚོམ་སྒྲོ་འདོགས་གཅོད་པ་ཤེས་རབ་མཆོག །ཅེས་གསུངས་པས། ཆོས་ཉན་པའི་ཚེ་བླ་མའི་ཆོས་ཀྱི་ཁྲི་སྟན་བཤམས་པ་དང་། མེ་ཏོག་ལ་སོགས་པའི་མཆོད་པས་བརྒྱན་ཅིང་མཎྜལ་འབུལ་བ་སོགས་སྦྱིན་པ། རང་གི་སྒོ་གསུམ་བསྡམས་ཤིང་ཕྱོགས་དེའི་སྲོག་ཆགས་ཕྲ་མོ་ལྗི་ཤིག་ཚུན་ཆད་ལ་འཚེ་བ་སྤོང་བ་ཚུལ་ཁྲིམས། ཚ་གྲང་སོགས་བཟོད་པ་ནི་བཟོད་པ། བླ་མ་ལ་གསོལ་བ་འདེབས་ཤིང་ཉན་པ་ལ་སྤྲོ་བ་བརྩོན་འགྲུས། སེམས་མ་ཡེངས་པར་རྩེ་གཅིག་ཏུ་ཉན་པ་བསམ་གཏན། ཐོས་པའི་དོན་ལ་ཐེ་ཚོམ་དང་སྒྲོ་འདོགས་གཅོད་པ་ཤེས་རབ། དེ་ཐམས་ཅད་ཀྱང་སྣང་ལ་རང་བཞིན་མེད་པ་འཁོར་གསུམ་ཡོངས་སུ་དག་པའི་ཚུལ་གྱིས་མཉན་པར་བྱའོ། །བཞི་པ་སྤྱོད་ལམ་གཞན་བསྟན་པ་ནི། ཡིད་བཞིན་རིན་པོ་ཆེའི་མཛོད་ལས། དེ་ཡང་རྣམ་གཡེང་འདུ་འཛིན་རྣམ་སྤངས་ལ། །ཆོས་ཀྱི་མཆོད་པ་དངོས་དང་ཡིད་མཆོད་ནས། །ཕྱག་འཚལ་དྲང་པོར་འདུག་སྟེ་ཐལ་མོ་སྦྱར། །མ་ཡེངས་གུས་པའི་ཚུལ་གྱིས་མཉན་པར་བྱ། །ཞེས་གསུངས་ཏེ། དེ་ལ་རྣམ་གཡེང་དང་འདུ་འཛི་ནི། འཇིག་རྟེན་གྱི་ཚོང་ལ་སོགས་པ་ནི་སྒོ་གསུམ་རྣམ་པར་གཡེང་བ་ཡིན་ལ། འཁོར་དང་ལོངས་སྤྱོད་ནང་དུ་འདུ་བ་དང་། དེའི་དབང་དུ་སོང་བས་སྒོ་གསུམ་བྲེལ་བས་འཛི་བ་དང་འཛིངས་པ་ཞེས་བྱ་སྟེ། དེ་དག་སྤངས་ནས། ཆོས་ལ་བར་དུ་གཅོད་པའི་སྐྱོན་མེད་པའི་ཕྱོགས་སུ་ཆོས་འཆད་པ་པོ་ལ་སེང་གེའི་ཁྲི་བཤམས་ཏེ། དར་ཟབ་ལ་སོགས་པའི་གདན་ལ་བཞུགས་སུ་གསོལ་ནས། ཕྱག་འཚལ་བ་དང་། སྤོས་དང་མེ་ཏོག་མར་མེ་ལ་སོགས་པ་དངོས་སུ་བཤམས་ཤིང་མཆོད་པ་དང་། ནམ་མཁའི་དབྱིངས་སུ་བདག་པོས་ཡོངས་སུ་བཟུང་བ་དང་མ་བཟུང་བའི་མཆོད་པའི་སྤྲིན་ཕུང་འཁྲིགས་པར་བསམ་ལ་འབུལ་ཞིང་། རང་གི་སྒེག་ཆོས་གདུགས་དང་། འཁར་བ་དང་། མཚོན་ཆ་དང་། མགོ་གཡོགས་པ་དང་། མཆིལ་ལྷྭམ་གྱོན་པ་རྣམས་སྤངས་ལ། རྒྱབ་དང་ཟུར་གྱིས་བལྟ་བ་རྣམས་མ་ཡིན་པར་སྐྱིལ་ཀྲུང་ཕྱེད་པའམ་ཙོག་པུར་འདུག་ལ། མིག་ཕབ་ཐལ་མོ་སྦྱོར་ཏེ་འཁོད་པར་བྱའོ། །ཆོས་ལས་སེམས་གཞན་དུ་མ་ཡེངས་པར་ཉན་ཞིང་ཆོས་དང་བླ་མ་ལ་གུས་ཤིང་དགའ་སྤྲོ་དང་བཅས་པས་ཉན་ཏེ། སྡུད་པ་ལས། དགའ་དང་གུས་དང་དད་པའི་མཆོག་ནི་ཉེར་བཞག་སྟེ། །སྒྲིབ་པ་ཉོན་མོངས་བསལ་ནས་དྲི་མ་ལས་འདས་པ། །འགྲོ་དོན་མངོན་ཞུགས་ངེས་པའི་ཤེས་རབ་ཕ་རོལ་ཕྱིན། །གང་ལ་དཔའ་རྣམས་སྤྱོད་པ་དེ་ནི་མཉན་པར་གྱིས། །ཞེས་སོ། །དེ་ལས་གཞན་དུ་འཆད་པ་པོ་འདིས་ཆོས་མི་ཤེས་ཀྱི། རིགས་ངན་པ་དང་། ལོངས་སྤྱོད་ཆུང་བ་དང་། ཉོན་མོངས་པ་རགས་པ་དང་། ཁྲོ་བ་དང་། གཏུམ་པ་དང་། ངག་མི་སྙན་པ་དང་། ཆས་གོས་ངན་པ་དང་། དབུལ་ཞིང་ཕོངས་པ་དང་། འཁོར་ངན་པ་ལ་སོགས་པར་སེམས་པ་སྐད་ཅིག་ཀྱང་བསྐྱེད་པར་མི་བྱའོ། །དེ་ལྟར་སེམས་པ་བྱུང་ན་བཤགས་བསྡམ་བྱ་ཞིང་། བཀའ་དྲིན་ལ་བསམས་ནས་སངས་རྒྱས་དངོས་ཀྱི་འདུ་ཤེས་བསྐྱེད་པར་བྱའོ། །ཆོས་ཉན་པའི་ཚེ་ཏིང་ངེ་འཛིན་ནི་འཆད་པ་པོའི་ཞལ་ནས་ཆོས་ཀྱི་འོད་ཟེར་བྱུང་། རང་རང་གི་སྙིང་ནང་དུ་ཕོག་པས། མ་རིག་པའི་མུན་པ་སངས་ཤིང་བློ་གྲོས་ཀྱི་པདྨོ་རྒྱས་པར་བསམ་པ་ནི་གདམས་ངག་ཡིན་ནོ་གསུངས་སོ། །གཉིས་པ་འཆད་པ་པོ་སློབ་དཔོན་གྱི་ཀུན་སྤྱོད་ནི། དམ་ཆོས་པད་དཀར་ལས། གཙང་ཞིང་ཡིད་དུ་འོང་བའི་ས་ཕྱོགས་སུ། །མཛེས་པའི་ཁྲི་སྟན་ལེགས་པར་བཤམས་ནས་ནི། །གོས་བཟང་ཡིད་འོང་གཙང་མ་རྣམས་བགོས་ཏེ། །བཅོས་མའི་རས་སོགས་རྣམ་པ་མང་བཏིང་ནས། །རྐང་རྟེན་བཅས་པའི་ཁྲི་ལ་འདུག་ནས་ནི། །རྩེ་གཅིག་ཉན་པའི་འཁོར་གྱི་ཚོགས་ནང་དུ། །ཟང་ཟིང་རྙེད་དང་གྲགས་ལ་མི་སེམས་པར། །བྱམས་པའི་སེམས་ཀྱིས་ལེ་ལོ་མེད་པར་སྟོན། །ཞེས་གསུངས་པས། ཐོག་མར་ཆོས་སྨྲ་བ་པོ་རང་ཉིད་ཁྲུས་བྱ་ཞིང་། ཆོས་གོས་སོགས་ལེགས་པར་བགོ གཙང་སྦྲའི་ཀུན་སྤྱོད་དང་ལྡན་པས་ཆོས་ཀྱི་ཁྲི་ལ་འདུག་སྟེ་སྐྱིལ་མོ་ཀྲུང་བཅས་ནས། ཡན་ལག་བདུན་པ་སོགས་དབྱངས་དང་བཅས་པས་དབུལ་ཞིང་། བདུད་ཚར་གཅོད་ཀྱི་སྔགས་དང་། ཉན་པར་བསྐུལ་བ་སོགས་སྔོན་དུ་འགྲོ་བས། རྙེད་བཀུར་སོགས་ཟང་ཟིང་གི་བསམ་པས་མ་ཡིན་པར། སྨོན་པ་དང་འཇུག་པའི་བྱང་ཆུབ་ཀྱི་སེམས་བསྐྱེད་དེ། སེམས་ཅན་ཐམས་ཅད་ཀྱིས་ཆོས་ཀྱི་མིག་རྙེད་པར་བྱ། ཡེ་ཤེས་ཀྱི་སྒྲོན་མེ་སྦར་བར་བྱ། སངས་རྒྱས་ཀྱི་ཆོས་ཡུན་རིང་དུ་གནས་པར་བྱ་སྙམ་དུ་དྲན་པས་རང་ཉིད་བསྐྱེད་རྫོགས་ཀྱི་དོན་གསལ་བཏབ་སྟེ་བཤད་དོ། །འཆད་ཚུལ་ཡང་། ཀུན་མཁྱེན་བླ་མས། ཆོས་ཀྱི་ཚིག་དོན་ནོར་འཁྲུལ་སྐྱོན་མེད་པར། །དོན་གསལ་དབྱངས་སྙན་མོས་པ་ཇི་བཞིན་བཤད། །དབྱངས་དེས་འཇིག་རྟེན་ཁམས་ཀུན་ཁྱབ་གྱུར་ཏེ། །སེམས་ཅན་ཀུན་ཐོས་མ་རིག་སངས་པར་བསམ། །ཞེས་གསུངས་པས། ཆོས་ཀྱི་སྒྲ་དབྱངས་ཡན་ལག་དྲུག་ཅུ་པར་གྱུར་པ་དེས་འཇིག་རྟེན་གྱི་ཁམས་ཀུན་ཁྱབ་ཅིང་སེམས་ཅན་ཐམས་ཅད་ཀྱིས་ཐོས་པས་མ་རིག་པའི་མུན་པ་སངས་ཏེ། ཐམས་ཅད་ཀྱིས་ཆོས་སྒོའི་གཟུངས་དང་སྤོབས་པ་དང་ཏིང་འཛིན་ཐོབ་པར་བསམ་ཞིང་ཆོས་ཀྱི་ཚིག་འབྲུ་གསལ་དག་སྙན་པས་རྒྱས་བསྡུས་འཚམ་ཤིང་གདུལ་བྱར་གོ་སླ་ལ་ཐེ་ཚོམ་ཆོད་པར་རང་རང་གི་བློ་དང་སྐལ་བ་འཚམ་པར་བཤད་དེ། སྤྱོད་འཇུག་ལས། དམན་ལ་མཆོག་གི་ཆོས་མི་བསྟན། །རྒྱ་ཆེན་ཆོས་ཀྱི་སྣོད་གྱུར་པ། །དམན་པའི་ཆོས་ལ་སྦྱར་མི་བྱ། །ཞེས་སོ། །དེས་ན་ཨ་ཏི་བཀོད་པ་ཆེན་པོ་ལས། དམན་པ་གསུམ་ལ་བསྟན་པ་ནི། །འདུལ་བ་མདོ་སྡེ་མངོན་པ་སྟེ། །འབྲིང་པོ་གསུམ་ལ་ངེས་བསྟན་པ། །ཀྲཱི་ཡ་ཡོ་ག་ཨུ་པའོ། །ཆེན་པོ་རིམ་ལྡན་གསུམ་དག་ལ། །བསྐྱེད་དང་རྫོགས་པ་ཆེན་པོར་བསྟན། །ཞེས་གསུངས་པ་བཞིན་དབང་པོའི་རིམ་པ་དང་འཚམས་པར་བསྟན་ཞིང་། ཁྱད་པར་དུ་སློབ་མ་ངེས་འབྱུང་ཅན་སྒྲུབ་པ་སྙིང་པོར་བྱེད་པ་རྣམས་ལ། ཚིག་ཉུང་ལ་དོན་འདྲིལ་བས་མྱུར་དུ་ཐར་པར་བགྲོད་པའི་གནད་ཟབ་མོ་རྣམས་བཤད་དེ། ཚེ་ཡུན་ཐུང་བ་དང་། ཚིག་ཐ་སྙད་མང་བ་དང་། གང་ལའང་སྙིང་པོ་མེད་པའི་ཕྱིར་ཏེ། དཔལ་མར་མེ་མཛད་ཡེ་ཤེས་ཀྱི་ཞལ་སྔ་ནས། ཚེ་འདི་ཡུན་ཐུང་ཤེས་བྱའི་རྣམ་པ་མང་། །ཚེ་ཡི་ཚད་ཀྱང་ཇི་ཙམ་མི་ཤེས་པས། །ངང་པ་ཆུ་ལས་འོ་མ་ལེན་པ་ལྟར། །རང་གི་འདོད་པ་དང་དུ་བླང་བར་གྱིས། །ཞེས་དང་། འཇིག་རྟེན་སྤྱོད་པ་དག་ལ་ཕར་བལྟས་པས། །བྱས་པ་ཐམས་ཅད་དོན་མེད་སྡུག་བསྔལ་རྒྱུ། །ཅི་ལ་བསམས་ཀྱང་ཕན་པར་མི་གདའ་བས། །རང་གི་སེམས་ལ་ལྟ་བ་གོམས་པར་གྱིས། །ཞེས་གསུངས་པ་བཞིན་ནོ། །དེ་ལྟར་དམ་ཆོས་ལེགས་པར་བཤད་པ་ལ་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་ཏེ། ཀུན་མཁྱེན་བླ་མས། དེ་ཚེ་འཆད་པའི་ཕ་རོལ་ཕྱིན་དྲུག་ནི། །ཚིག་དོན་ལེགས་བཤད་ཆོས་ཀྱི་སྦྱིན་པ་སྟེ། །ཉོན་མོངས་མེད་བཤད་ཚུལ་ཁྲིམས་ཕ་རོལ་ཕྱིན། །སྐྱོ་ངལ་བཟོད་པ་སྤྲོ་བས་བརྩོན་འགྲུས་ཏེ། །མ་ཡེངས་བསམ་གཏན་འབྱེད་པ་ཤེས་རབ་བོ། །ཞེས་གསུངས་ཏེ། ཆོས་ཀྱི་ཚིག་དོན་ལེགས་པར་བཤད་པ་སྦྱིན་པ། ཉོན་མོངས་ཆགས་སྡང་སོགས་དང་མ་འདྲེས་པར་འཆད་ཅིང་ངག་གི་ཉེས་སྤྱོད་སྡོམ་པས་ཚུལ་ཁྲིམས། འཆད་ཚེ་སྐྱོ་ངལ་བཀྲེས་སྐོམ་ཚ་གྲང་སོགས་བཟོད་པས་བཟོད་པ། འཆད་པ་ལ་མི་སྐྱོ་ཞིང་སྤྲོ་བས་བརྩོན་འགྲུས། སེམས་གཞན་དུ་མ་ཡེངས་པར་འཆད་པས་བསམ་གཏན། གང་བཤད་བྱའི་གནས་སོ་སོར་འབྱེད་པ་དང་རང་བཞིན་མེད་པར་རྟོགས་ཤིང་ཆོས་འཆད་དུས་ན་རྨི་ལམ་དང་སྒྱུ་མ་ལྟ་བུར་ཤེས་པ་ཤེས་རབ་སྟེ། དེས་ན་དམ་ཆོས་ལེགས་པར་བཤད་པས་བསོད་ནམས་དང་ཡེ་ཤེས་ཀྱི་ཚོགས་གཉིས་ཡོངས་སུ་རྫོགས་པར་འགྱུར་རོ། །གསུམ་པ་ནི། བླ་སློབ་གཉིས་ཀས་འཆད་ཉན་ལེགས་པར་ཟིན་པ་ན། སྒྱུ་མ་ལྟ་བུའི་ངང་ནས། བདག་དང་། ཉན་པ་པོ་དང་། ཆོས་རྣམས་སྣང་ལ་རང་བཞིན་མེད་པར་ཤེས་པར་བྱས་ལ། སྦྱིན་པ་རྒྱ་ཆེན་སོགས་དང་། རིན་ཆེན་དགེ་ཚོགས་སོགས་ཀྱིས་དགེ་བ་བསྔོ་ཞིང་། དམ་པའི་ཆོས་ལ་སྤྱད་དུ་ཡོད་པ་འདི་བླ་མ་དགེ་བའི་བཤེས་གཉེན་ལས་བྱུང་བས། རྩ་བ་དང་བརྒྱུད་པར་བཅས་པའི་བླ་མ་བཀའ་དྲིན་ཆེ་སྙམ་པ་དང་། ཆོས་ནི་སངས་རྒྱས་ཀྱི་གསུང་ཡིན་པས་སངས་རྒྱས་བཀའ་དྲིན་ཆེ་སྙམ་པ་དང་། གྲོགས་དམ་པ་རྣམས་དང་ལྷན་ཅིག་ཐོས་པས་དགེ་བ་ལ་འདུན་པའི་གྲོགས་རྣམས་བཀའ་དྲིན་ཆེ་སྙམ་པ་དང་། ཆོས་ལ་བར་ཆད་མེད་པ་འདི་མཁའ་འགྲོ་དམ་ཅན་རྒྱ་མཚོའི་དྲིན་ཡིན་པས་སྲུང་མ་དམ་ཅན་རྒྱ་མཚོ་རྣམས་བཀའ་དྲིན་ཆེ་སྙམ་པ་དང་། ཆོས་ལ་སྤྱོད་པའི་ལུས་གསོ་སྐྱེད་བྱེད་པའི་ཕ་མ་བཀའ་དྲིན་ཆེ་སྙམ་པ་དང་། ཐམས་ཅད་སངས་རྒྱས་ཀྱི་བསྟན་པ་དམ་པའི་བཀའ་དྲིན་ཡིན་པས། ཕན་བདེའི་འབྱུང་གནས་སངས་རྒྱས་ཀྱི་བསྟན་པ་བཀའ་དྲིན་ཆེ་བས་ཡུན་རིང་དུ་གནས་པར་གྱུར་ཅིག་སྙམ་དུ་བསམ་པར་བྱ་བའོ། །གསུམ་པ་ཞར་བྱུང་ཕན་ཡོན་གྱི་སྒོ་ནས་སྤྲོ་བ་བསྐྱེད་པ་ལ་གཉིས་ལས། དང་པོ་འཆད་པ་པོ་སློབ་དཔོན་གྱིས་ཐོབ་པའི་ཕན་ཡོན་ནི། ཀུན་མཁྱེན་བླ་མས། དེ་ཡི་ཕན་ཡོན་དྲན་དང་ཏིང་འཛིན་དང་། །ཉོན་མོངས་རྙོག་བྲལ་སྤོབས་པ་ཟད་མི་ཤེས། །ཆོས་མཛོད་འཛིན་དང་བདེ་གཤེགས་ཆོས་ཐོས་ནས། །ལྷ་མིས་བསྟོད་ཅིང་གྲགས་དང་བསམ་པ་འགྲུབ། །ཚེ་རབས་ཀུན་ཏུ་ཆོས་དང་མི་འབྲལ་ཞིང་། །མྱུར་དུ་བདེ་གཤེགས་ཆོས་ཆར་འབེབས་པ་ཐོབ། །ཅེས་གསུངས་པས། ཟང་ཟིང་མེད་པའི་སེམས་ཀྱིས་དམ་པའི་ཆོས་ལེགས་པར་བཤད་ན། དྲན་པ་དང་། ཏིང་ངེ་འཛིན་དང་། སྤོབས་པ་དང་། ཉོན་མོངས་པ་ལས་རྣམ་པར་གྲོལ་བ་དང་། ཆོས་ཀྱི་མཛོད་འཛིན་པ་དང་། སངས་རྒྱས་ལས་ཆོས་ཐོས་པ་དང་། ལྷ་དང་མིའི་ཚོགས་ཀྱིས་བསྟོད་ཅིང་འདུན་པ་དང་། ལེགས་དགུའི་བསམ་པ་ཐམས་ཅད་འགྲུབ་པ་དང་། ཚེ་རབས་ཐམས་ཅད་དུ་དམ་པའི་ཆོས་དང་མི་འབྲལ་བ་དང་། མྱུར་དུ་སངས་རྒྱས་ནས་ཆོས་ཀྱི་ཆར་ཆེན་པོས་གདུལ་བྱ་སྨིན་པར་བྱེད་པ་དང་། རང་གཞན་གྱི་དོན་ཐམས་ཅད་འགྲུབ་པར་འགྱུར་བ་སོགས་ཕན་ཡོན་ཚད་མེད་དེ། རབ་ཞི་རྣམ་ངེས་ཀྱི་མདོ་ལས། ཤེས་རབ་རྣོ་བ། སྤོབས་པ་མི་ཟད་པ། འཁོར་ལོས་སྒྱུར་བ་དང་། བརྒྱ་བྱིན་དང་ཚངས་པའི་རྫུ་འཕྲུལ་ཐོབ་པ་དང་། བླ་ན་མེད་པའི་སངས་རྒྱས་སུ་འགྱུར་བ་རྣམས་གསུངས་ཤིང་། ནམ་མཁའ་མཛོད་ཀྱི་མདོ་ལས། སྐྱེ་བོ་མང་པོ་དགའ་བ། ཆོས་སྲུང་རྣམས་ཀྱིས་བསྲུང་བ། ལྷ་རྣམས་ཀྱིས་བསྟོད་པ། མི་མ་ཡིན་གྱི་གནོད་པས་མི་བརྫི་བ། དམ་པའི་ཆོས་བསྲུང་བ། ཕྱོགས་བཅུར་སྙན་པས་གྲགས་པ། བདེ་བར་གཤེགས་པ་རྣམས་ཀྱིས་བསྔགས་པ། ཆོས་གོས་ལ་སོགས་པ་རྙེད་པ། ལས་བྱས་ནས་བསོད་སྙོམས་ཟ་བ། བློ་གྲོས་དང་རྟོགས་པ་ལྡན་པ། དུག་གསུམ་ཆུང་བ། རང་གཞན་གྱི་ཉོན་མོངས་པ་ཚར་གཅོད་པ། སངས་རྒྱས་ཀྱི་ཆོས་འཛིན་པ། ངན་སོང་གི་འཇིགས་པ་མེད་པ། དཀའ་བ་མེད་པར་ལྷ་དང་མིར་སྐྱེ་བ། སྐྱེ་བ་དྲན་པ། ཞིང་དག་པར་སྐྱེ་བ། དབང་པོ་ཚང་བ། དཀོན་མཆོག་གསུམ་དང་མི་འབྲལ་བ། སྤོབས་པ་མི་ཟད་པའི་རྒྱུ་འཛིན་པ། གཟི་བརྗིད་ཅན་གྱི་གཟུངས་ཐོབ་པ། སྐྱེ་བོ་མཁས་པའི་གཡོག་བྱེད་པ། ཤེས་རབ་ཆེན་པོའི་རྒྱུད་འཛིན་པ། མྱུར་དུ་ཆོས་ཀྱི་སྣང་བ་ཐོབ་པ། ཚུལ་མིན་ཡིད་བྱེད་ཀྱི་རྟོག་པ་མི་འབྱུང་བ། ཟང་ཟིང་གི་སྦྱིན་པ་ཐམས་ཅད་ཟིལ་གྱིས་གནོན་པ། མཚན་སུམ་ཅུ་རྩ་གཉིས་ཐོབ་པ། ཆོས་ཀྱི་གཏེར་མི་ཟད་པ་ཡོངས་སུ་འཛིན་པ་རྣམས་གསུངས་ཤིང་། གཞན་ཡང་ལྷག་བསམ་བསྐུལ་བའི་མདོ་ལས་ཆོས་བཤད་པའི་ཕན་ཡོན་ཉི་ཤུ་དང་། ཏིང་འཛིན་རྒྱལ་པོ་ལས་ཕན་ཡོན་བཅུ་གསུངས་པས་མཚོན་མཐའ་ཡས་ཏེ། གསང་སྔགས་ཀྱི་ལྷའི་མཚན་དང་གཟུངས་སྔགས་ཁྱད་པར་ཅན་རེ་རེ་ཙམ་གཞན་གྱི་རྣ་བར་བསྒྲགས་པས་ཀྱང་བསྐལ་པ་མང་པོའི་སྒྲིབ་པ་དག་པ་དང་ཚོགས་རྫོགས་པ་སོགས་བསམ་གྱིས་མི་ཁྱབ་སྟེ། མདོར་ན་ཤེར་ཕྱིན་སྡུད་པ་ལས། བྱང་ཆུབ་སེམས་དཔའ་གང་ཞིག་ཤེས་རབ་མཆོག་བསྒོམ་སྟེ། །དེ་ལས་ལངས་ནས་གོས་པ་མེད་པའི་ཆོས་བརྗོད་ཅིང་། །དེ་ཡང་འགྲོ་བའི་དོན་དུ་བྱང་ཆུབ་རྒྱུར་བསྔོ་ན། །དགེ་བ་དེ་དང་མཉམ་པ་འཇིག་རྟེན་གསུམ་ན་མེད། །ཅེས་དང་། རྟོགས་པ་ཆེན་པོ་ཡོངས་སུ་རྒྱས་པ་ལས། ང་ནི་འདས་ནས་གཤེགས་ཕྱིན་ན། །མི་ཡི་ནང་ན་ལ་ལ་ཞིག །སེམས་ཅན་རྣམ་པ་ཐམས་ཅད་ལ། །བདེ་གཤེགས་སྙིང་པོ་ཉིད་ཡོད་ཅེས། །མོས་པ་རྣམ་དག་བྱེད་ནུས་པ། །སངས་རྒྱས་བཀའ་དྲིན་འཚོབ་པ་ཡིན། །ཞེས་དང་། མདོ་གཞན་ལས་ཀྱང་། ལེགས་སོ་ལེགས་སོ་དེ་བཞིན་གཤེགས་པའི་སྙིང་པོ་སྟོན། །ལེགས་བརྗོད་གར་བགྱིད་དེ་བཞིན་གཤེགས་པའི་སྙིང་པོ་ཐོས། །དེ་དག་འཇིག་རྟེན་དུ་ནི་འཁོར་མོར་མི་གཅིག་པུ། །ཕྱིས་དུས་སངས་རྒྱས་འགྱུར་ཞེས་དེ་བཞིན་གཤེགས་པས་གསུངས། །ཞེས་དང་། དེ་བཞིན་གཤེགས་པའི་སྙིང་པོ་སྟོན་པར་བྱེད་པ་ནི། ཉོན་མོངས་པ་དང་བཅས་པའམ། ཉོན་མོངས་པ་མེད་པའམ་གང་ཡང་རུང་སྟེ། དེ་ཉིད་རྫོགས་པའི་སངས་རྒྱས་ཞེས་བྱའོ། །ཞེས་དང་། ཧེ་རུ་ཀ་གལ་པོ་ལས། སྐུ་དང་གསུང་ཐུགས་རྡོ་རྗེ་ཡི། །རྣལ་འབྱོར་འདིར་གྱུར་ཕྱིན་ཆད་ནི། །ཀློག་གམ་ཡང་ན་སེམས་ཀྱང་རུང་། །དེ་ཡང་རྡོ་རྗེ་འཛིན་འདྲར་འགྱུར། །ཞེས་གསུངས་པས་མཚོན་ཞིབ་པར་གཞན་དུ་ཤེས་སོ། །གཉིས་པ་ཉན་པ་པོ་སློབ་མས་ཐོབ་པའི་ཕན་ཡོན་ཡང་། ཀུན་མཁྱེན་བླ་མས། དེ་ཡི་ཕན་ཡོན་ཤིན་ཏུ་ཚད་མེད་དེ། །ཆོས་རྔ་བསྒྲགས་པ་ཐོས་པའི་སེམས་ཅན་ཡང་། །ངན་སོང་རྣམ་གྲོལ་ཉན་པ་སྨོས་ཅི་འཚལ། །ཤེས་རབ་ཏིང་འཛིན་དྲན་པའི་གཟུངས་ཐོབ་ཅིང་། །སྤང་བླང་མཚམས་བྱེད་དགེ་འཕེལ་སྡིག་ཀུན་སྲབ། །ལྷ་མིས་བསྟོད་ཅིང་མ་རིག་མུན་པ་སངས། །པདྨའི་སྟེང་མཛེས་རྒྱ་ཆེན་ཆོས་ཐོས་ཤིང་། །མྱུར་དུ་ཆོས་རྒྱལ་མྱ་ངན་མེད་ཐོབ་འགྱུར། །ཞེས་གསུངས་པས། རྣམ་གྲོལ་དང་། ཤེས་རབ་དང་། ཏིང་འཛིན་དང་། ཆོས་ཀྱི་རྒྱུན་ལ་སོགས་པའི་གཟུངས་དང་། སྤང་བླང་གི་མཚམས་ཕྱེད་པ་དང་། དགེ་བ་འཕེལ་ཞིང་མི་དགེ་བ་སྲབ་པ་དང་། ལྷ་དང་བཅས་པའི་འཇིག་རྟེན་གྱིས་བསྟོད་ཅིང་འདུན་པ་དང་། མ་རིག་པའི་མུན་པ་སངས་པ་དང་། ཤི་འཕོས་ནས་ཀྱང་དག་པའི་ཞིང་ཁམས་སུ་པདྨོ་ལ་བརྫུས་ཏེ་སྐྱེ་བ་དང་། སངས་རྒྱས་མཆོག་གི་སྤྲུལ་པའི་སྐུ་ལས་ཆོས་ཐོས་པ་དང་། མྱུར་དུ་སངས་རྒྱས་ནས་ཆོས་ཀྱི་འཁོར་ལོ་བསྐོར་བར་གྱུར་པ་སོགས་ཕན་ཡོན་ཚད་མེད་དེ། སྲེད་མེད་བུས་ཞུས་པའི་མདོ་ལས། ཐོས་པ་དང་ལྡན་ན་ཤེས་རབ་འབྱུང་བ་དང་། ཤེས་རབ་དང་ལྡན་ན་ཉོན་མོངས་པ་ཞི་བ་དང་། ཉོན་མོངས་པ་མེད་ན་བདུད་ཀྱིས་གླགས་མི་རྙེད་པར་གསུངས་པ་དང་། སྒྱུ་མ་མཁན་རབ་བཟང་གིས་ཞུས་པའི་མདོ་ལས། རང་གཞན་གྱི་ཤེས་རབ་སྦྱོང་བ། གདུལ་བྱ་རྣམས་ཀྱི་ཐེ་ཚོམ་གཅོད་པ། སངས་རྒྱས་དང་བྱང་ཆུབ་སེམས་དཔས་བསྔགས་པ། དམ་པའི་ཆོས་ཡོངས་སུ་འཛིན་པ་དང་བཞིར་གསུངས་པ་དང་། ཆེད་དུ་བརྗོད་པའི་ཚོམ་སོགས་ལས་ཀྱང་ཐོས་པའི་བསྔགས་པ་རྒྱ་ཆེར་གསུངས་ཤིང་། ཤེར་ཕྱིན་སྟོང་ཕྲག་བརྒྱ་པ་ལས། ཤཱ་རིའི་བུས་གསོལ་པ། བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཐོས་ནས་མོས་པའི་སེམས་ཅན་དེ་དག་ནི་བྱང་ཆུབ་ཏུ་ངེས་པར་འགྱུར་བ་ལགས་སོ། །བྱང་ཆུབ་ལ་ཉེ་བར་གྱུར་པ་དང་། དེ་དག་ནི་སངས་རྒྱས་ཉིད་དུ་བལྟ་བར་བྱའོ། །ཞེས་དང་། བློ་གྲོས་རབ་གནས་ཀྱིས་ཞུས་པའི་མདོ་ལས། བདག་ཏུ་ལྟ་བ་ཐམས་ཅད་ཀྱིས་སངས་རྒྱས་གངྒཱའི་ཀླུང་གི་བྱེ་མ་སྙེད་འཁོར་དང་བཅས་པ་ལ་ཇི་སྲིད་འཚོ་བའི་བར་དུ་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པ་བས། ཆོས་ཟབ་མོ་སྟོང་པ་ཉིད་དང་མཚན་མ་མེད་པའི་སྒོའི་རྣམ་གྲངས་འཇིག་རྟེན་ཐམས་ཅད་དང་མི་མཐུན་པ་ཐོས་ནས་དད་པ་བྱེད་པ་ཕན་ཡོན་ཆེའོ། །དེ་ཅིའི་ཕྱིར་ཞེ་ན། འདིས་ནི་ཆོས་ཟབ་མོ་སྤངས་པས་དམྱལ་བར་ལྟུང་བ་དེ་ཡང་ཆེས་མྱུར་དུ་ལྡང་ཞིང་ཐར་བར་འགྱུར་ལ། ཐོས་པ་འདི་ནི་སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་འབྱུང་བ་དང་འདྲའོ། །ཞེས་དང་། ཕལ་པོ་ཆེའི་དྲང་སྲོང་བླ་མའི་རབས་ལས། བྱང་ཆུབ་སེམས་དཔའ་ཆོས་འདོད་པ་དང་། བསམ་པ་ཕུན་སུམ་ཚོགས་པ་གུས་པ་དང་བཅས་པ་རྣམས་ལ། འཇིག་རྟེན་གྱི་ཁམས་གཞན་ན་བཞུགས་པའི་སངས་རྒྱས་རྣམས་ཀྱང་ཞལ་ཉེ་བར་སྟོན་ཅིང་ཆོས་ཐོས་པར་མཛད་དོ། །བྱང་ཆུབ་སེམས་དཔའ་ཆོས་འདོད་པ་དྲི་མ་མེད་པའི་གཟི་བརྗིད་ཅན་རྣམས་ནི་ཆོས་ཀྱི་གཏེར་རིའི་སུལ་དང་། ཤིང་གི་ནང་དུ་བཅུག་པའི་ཆོས་ཀྱི་སྒོ་གླེགས་བམ་དུ་གྱུར་པ་མཐའ་ཡས་པ་དག་ཀྱང་ལག་མཐིལ་དུ་གནས་པར་འགྱུར་རོ། །དེ་བཞིན་དུ་དེ་དག་ལ་སྔོན་སངས་རྒྱས་མཐོང་བའི་ལྷ་རྣམས་ཀྱིས་སྤོབས་པ་ཉེ་བར་བསྒྲུབ་པ་དང་། ཚེ་ཟད་ན་ཡང་སངས་རྒྱས་བཅོམ་ལྡན་འདས་དང་ལྷ་རྣམས་ཀྱིས་སྟོབས་ཉེ་བར་བསྒྲུབ་པ་དང་། རྒྱུ་དེས་འདོད་ན་ལོ་སྟོང་དུ་ཡང་གནས་པ་དང་། བསྐལ་པའང་ཇི་སྙེད་འདོད་པ་སྲིད་དུ་གནས་པ་དང་། བདེ་བར་གཤེགས་པ་རྣམས་ཀྱིས་དགའ་བ་སྤེལ་བ་དང་། ནད་སེལ་བ་དང་། དྲན་པ་ཉེ་བར་བསྒྲུབ་པ་དང་། རྟོགས་པ་དང་། བློ་གྲོས་དང་། སྤོབས་པ་ཡང་ཉེ་བར་བསྒྲུབ་པ་དང་ལྟ་བ་ལོག་པ་ཡང་སེལ་བ་དང་། ཡང་དག་པའི་ལྟ་བ་ཉེ་བར་བསྒྲུབ་པ་དང་། ཕ་རོལ་གྱི་གནོད་པས་འཇིགས་པ་ཐམས་ཅད་མི་འབྱུང་ངོ་། །དེས་ན་བྱང་ཆུབ་སེམས་དཔའ་དེས་ཐོས་པའི་ཚོགས་ལ་མངོན་པར་བརྩོན་པར་བྱའོ། །ཞེས་དང་། ཏིང་འཛིན་རྒྱལ་པོ་ལས། མདོ་སྡེ་དམ་པ་འདི་ཐོས་ནས། །མ་འོངས་པ་ཡི་བསྐལ་པ་ནི། །གྲངས་མེད་བདུན་ཅུ་རྩ་གསུམ་དུ། །ངན་འགྲོ་རྣམས་སུ་ལྟུང་མི་སྲིད། །བསྟན་པ་ཟད་དུས་ཉེ་བའི་ཚེ། །གང་གིས་མདོ་སྡེ་འདི་བཟུང་ནས། །མྱུར་དུ་སྤོབས་པ་ཐོབ་པར་འགྱུར། །ཚིགས་བཅད་གཅིག་ཙམ་བཟུང་བས་ཀྱང་། །བསོད་ནམས་ཕུང་པོ་དཔག་ཡས་ན། །ཉན་པར་འདོད་པས་མདོ་སྡེ་ཡང་། །ཐམས་ཅད་བཟུང་བ་ཅི་ཞིག་སྨོས། །སེམས་ཅན་ཐམས་ཅད་བྱང་ཆུབ་ཐོབ། །ཅེས་དང་། དེ་བཞིན་གཤེགས་པའི་སྙིང་པོ་བསྟན་པའི་མདོ་ལས། ང་ཡང་སྔོན་དུ་སྤྱད་པ་སྤྱོད་པའི་ཚེ། །བདེ་བར་གཤེགས་པ་སེང་གེའི་རྒྱལ་མཚན་ལས། །མདོ་སྡེ་འདི་ཡི་མིང་ནི་ཐོས་པར་གྱུར། །གུས་པར་བྱས་ཏེ་ཐོས་ནས་ཐལ་མོ་སྦྱར། །ང་ནི་ལེགས་པར་བྱས་པའི་ལས་དེ་ཡིས། །བྱང་ཆུབ་དམ་པ་མྱུར་དུ་ཐོབ་པར་གྱུར། །དེ་བས་བྱང་ཆུབ་སེམས་དཔའ་མཁས་རྣམས་ཀྱིས། །རྟག་ཏུ་མདོ་སྡེ་མཆོག་འདི་བཟུང་བར་གྱིས། །ཞེས་དང་། གསང་སྙིང་ལས། གང་ཞིག་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ནས་ཐམས་ཅད་དུ། །ཉེ་བའི་སྲས་སུ་དགོངས་པར་འགྱུར། །ཞེས་སོགས་མདོ་རྒྱུད་ཀུན་ནས་རྒྱ་ཆེར་གསུངས་པ་ཡིན་ནོ། །སྐྱོབ་པ་མཆོག་དེས་གྲངས་མེད་བསྐལ་པ་རུ། །སྐུ་སྲོག་བྱེ་བ་བཏང་ནས་བཙལ་བའི་དངོས། །དམ་ཆོས་རིན་ཆེན་མཛོད་ཁང་འདི་ཡིན་པས། །གུས་པས་འཆད་ཉན་མཛོད་ཅིག་ཤེས་ལྡན་རྣམས། །ཐོག་མར་དགེ་བ་ཉན་འཆད་ཇི་ལྟར་བྱ་བའི་སྐབས་སོ། །གཉིས་པ་བར་དུ་དགེ་བ་ཐུན་མོང་བློ་ལྡོག་རྣམ་བཞིས་རང་རྒྱུད་སྦྱོང་བ་ལའང་གཉིས། ཐུན་ལ་འཇུག་པའི་སྔོན་འགྲོ་དང་། བྱེ་བྲག་སོ་སོར་བསྒོམ་པའོ། །དང་པོ་ནི། ཉིན་མོ་སྐྱེ་བོའི་རྒྱུ་འགྲུལ་དང་མཚན་མོ་སྒྲའི་ཀློག་སྦྱོར་ལ་སོགས་པ་བསམ་གཏན་གྱི་ཚེར་མ་མི་འབྱུང་བའི་གནས་དབེན་པར་བདེ་བའི་སྟན་ལ་ལུས་གནད་རྣམ་སྣང་ཆོས་བདུན་བཅའ་སྟེ། དེ་ཡང་རྐང་པ་གཉིས་གཡོན་འོག་དང་གཡས་སྟེང་དུ་བྱས་པའི་རྡོ་རྗེ་སྐྱིལ་ཀྲུང་བཅའ། ལག་གཉིས་མཐེ་བོང་གིས་སྲིན་རྩ་མནན་ཏེ་ཁུ་ཚུར་བརྐྱངས་པ་བརླ་གཡས་གཡོན་གཉིས་ཀྱི་ཁུག་པར་བཞག ལག་ཡུ་དྲང་པོར་བསྲང་། དཔུང་མགོ་གྱེན་ལ་འཐེན། ལྟོ་བ་མདུན་དུ་ཕུལ། སྒལ་ཚིགས་གསེར་གྱི་དོང་ཙེ་ལྟར་བརྩེགས། ལྟག་རྩ་བསྲང་སྟེ། མགྲིན་པའི་ཨོལ་ཀོས་ཨོལ་མདུད་མནན། མིག་འབྲས་མི་གཡོ་ཞིང་རྫི་མ་ཐབ་ཐིབ་མི་བྱེད་པར་སྣ་རྩེའི་ཐད་ཀྱི་བར་སྣང་ལ་ཅེ་རེ་གཏད། མགོ་བོ་ཡ་ཡོ་མེད་པར་གཟིང་བྱ་ཞིང་ལུས་ཀྱི་ཆ་ཐམས་ཅད་ཧྲིལ་གྱིས་བསྒྲིམས་ལ་འཇོག་དགོས་ཏེ། དེའི་རྒྱུ་མཚན་ཡང་ལུས་གྲོང་ཁྱེར་དང་འདྲ། རྩ་ལམ་སྲང་དང་འདྲ། རླུང་རྟ་དང་འདྲ། རྣམ་ཤེས་མི་ཞ་བོ་དང་འདྲ་བས་བྱེད་པ་བཅིངས་ན་གསང་སྒོ་ཁེགས་པས་མི་རྟ་ནང་དུ་ཚུད་དེ་འགྲོ་མི་ཐུབ་པ་དང་འདྲ་སྟེ། དཔེར་ན་སྦྲུལ་ལ་ཡན་ལག་ཡོད་ཀྱང་མ་གཅུར་ན་མི་གསལ་བ་དང་འདྲ་བས་ན། ལུས་ཀྱི་གནད་དང་ཆུན་ཆེར་ཡོང་བའི་ཐབས་བྱས་པས་ཡེ་ཤེས་ཀྱི་སྣང་བ་རྣམས་གོང་འཕེལ་དུ་འགྱུར་ཏེ། རྟེན་འབྲེལ་ལུས་ལ་བསྒྲིགས་པས་རྟོགས་པ་སེམས་ལ་འཆར་བའི་དགོས་པ་ཡོད་ཅེས་མཁས་གྲུབ་གོང་མ་རྣམས་ཀྱིས་གསུངས་སོ། །དེ་ལྟར་ལུས་གནད་བཅས་ཟིན་མཚམས་ངག་གི་གནད་ཐུན་གྱི་ཐོག་མར་རླུང་རོ་དགུ་སྤྲུགས་སུ་བསལ་ཏེ། དེ་ཡང་དང་པོ་སྣ་བུག་གཡོན་ནས་ཆུང་འབྲིང་ཆེ་གསུམ། དེ་བཞིན་གཡས་ནས་གསུམ། གཉིས་ཀ་ནས་ཕྲུགས་གཅིག་ཏུ་གསུམ་སྟེ་དགུ་སྤྲུགས་དང་། ཐུན་ཕྱི་མ་རྣམས་ཀྱི་མགོར་གཡོན་གཡས་དབུས་གསུམ་ནས་ལན་རེ་སྟེ་སུམ་སྤྲུགས་སུ་བསལ། དེའི་ཚེ་དམིགས་པ་ནི། རང་གཞན་སེམས་ཅན་ཐམས་ཅད་ཀྱིས་ཚེ་རབས་ཐོགས་མ་མེད་པས་བསགས་པའི་སྡིག་སྒྲིབ་ནད་གདོན་བར་ཆད་མི་མཐུན་པའི་ཕྱོགས་ཐམས་ཅད་འུབ་ཀྱིས་འདུས་ནས་སྣ་སྒོའི་རླུང་དང་འགྲོགས་ཏེ་ཕྱིར་སང་སང་སོང་བར་བསམ་པའམ། ཡང་ན་སྣ་བུག་གཡོན་ནས་འདོད་ཆགས། གཡས་ནས་ཞེ་སྡང་། དབུས་ནས་གཏི་མུག་གིས་བསགས་པའི་ལས་ཉོན་དྲི་མའི་ཚོགས་རྣམས་སང་གིས་སོང་བས་ལུས་ནང་བཤལ་བ་ལྟར་གྱུར་པར་བསམས་ཏེ། འདི་ནི་དཔེར་ན་བཅུད་བཟང་པོ་ཞིག་བླུགས་པ་ལ་སྔོན་དུ་སྣོད་བཀྲུ་བཤལ་བྱེད་པ་དང་འདྲའོ། །དེ་ནས་སེམས་ཀྱི་གནད་གོང་དུ་བཤད་པ་ལྟར་གྱིས་ཀུན་སློང་གི་བློ་བཅོས་ཏེ་བྱང་ཆུབ་ཏུ་སེམས་བསྐྱེད་ནས། རང་ཐ་མལ་དུ་གནས་པའི་སྤྱི་བོར་རྟོག་པའི་མཐའ་བརྒྱད་རྣམ་པར་དག་པའི་རང་བཞིན་གྱི་སྣ་ཚོགས་པདྨ་འདབ་མ་བརྒྱད་པ་གེ་སར་ཟེ་ཕོན་དང་བཅས་པའི་སྟེང་དུ་ཐབས་དང་ཤེས་རབ་མཚོན་བྱེད་འོག་ཉི་མ་དང་སྟེང་ཟླ་བའི་དཀྱིལ་འཁོར་རྣམས་རེག་ལ་མ་འབྱར་བའི་ཚུལ་དུ་གསལ་བཏབ། དེ་རྣམས་ལ་གསལ་སྣང་ཐོན་བྱུང་བ་དང་། དེའི་སྟེང་དུ་རང་གི་རྩ་བའི་བླ་མ་ཉིད་རྣམ་པ་རྡོ་རྗེ་སེམས་དཔའ་འམ་ཨོ་རྒྱན་ཆེན་པོ་ལྟ་བུ་གང་མོས་སམ་ཡང་ན་རྒྱུན་གྱི་སྐུའི་རྣམ་འགྱུར་ཇི་ལྟ་བ་ལ་ཕྱག་གཉིས་ཆོས་འཆད་དམ་མཉམ་བཞག་གི་ཕྱག་རྒྱ་གང་བདེར་བཞུགས་ཤིང་གཟི་བྱིན་མཆོག་ཏུ་འབར་བའི་མཚན་དཔེའི་ལང་ཚོ་རབ་ཏུ་རྒྱས་པའི་སྐུ་ཅན་དུ་ལམ་གྱིས་གསལ་གདབ་སྟེ། དེ་ཡང་རང་གི་དད་མོས་སྐྱེ་ཚུལ་ལ་ཁྱད་ཡོད་ན་གང་མོས་དེའི་རྣམ་པར་བསྒོམ་པ་ཡིན་ལ། ཁྱད་མེད་ན་བླ་མ་ཉིད་དངོས་སུ་བསྒོམ་པར་གསུངས་སོ། །གང་ལྟར་ཡང་ལས་དང་པོ་པས་ཐོག་མར་ཙབ་ཙུབ་ཅི་དྲག་མང་པོ་མི་བསམ་པར་ལམ་གྱིས་གསལ་བཏབ་སྟེ་རྩེ་གཅིག་ཏུ་བསྒོམ་པར་བྱ། དེ་ལ་གསལ་སྣང་ཐོན་བྱུང་བ་དང་། བླ་མ་སངས་རྒྱས་སུ་མཐོང་ཞིང་ཅི་མཛད་ཁྱེད་ཤེས་ཀྱི་མོས་གུས་གདུང་ཤུགས་དྲག་པོས་ངག་ཏུ། དཔལ་ལྡན་རྩ་བའི་བླ་མ་རིན་པོ་ཆེ། །སོགས་དང་། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེ་མཁྱེན། བདག་གི་རྒྱུད་སྨིན་ཅིང་གྲོལ་བར་བྱིན་གྱིས་བརླབ་ཏུ་གསོལ། ཟབ་ལམ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཚེ་འདི་ཉིད་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་བྱིན་གྱིས་བརླབ་ཏུ་གསོལ། ཞེས་གསོལ་འདེབས་ཀྱི་ཚིག་ཅི་ནུས་དང་། སྤྲོ་ན་བླ་མ་རྒྱང་འབོད་སོགས་ཀྱང་བྱ་སྟེ། མདོར་ན་མོས་གུས་ཀྱི་རྟོགས་པ་གོང་འཕེལ་དུ་མ་གྱུར་པ་དེ་སྲིད་དུ་འདོད་པའི་དོན་ལ་ཞེ་ཐག་པ་ནས་གསོལ་བ་ཕུར་ཚུགས་སུ་བཏབ་རྗེས། མཐར་བླ་མ་ཉིད་ཐུགས་དགྱེས་པ་ཆེན་པོས་སྐུ་འོད་ལྔའི་གོང་བུར་ལྟེམ་གྱིས་ཞུ་ནས་རང་གི་སྤྱི་བོ་ནས་སྙིང་དབུས་སུ་སིབ་ཀྱིས་ཐིམ་སྟེ་རང་གི་སྒོ་གསུམ་དང་བླ་མའི་རྡོ་རྗེ་གསུམ་ཐ་དད་དུ་འཛིན་པའི་རྟོག་པ་དང་ཕྲལ་ཏེ་རང་བཞིན་གཉིས་སུ་མེད་པ་ཆུ་ལ་ཆུ་བཞག་པའི་ཚུལ་གྱིས་སྤྲོས་བྲལ་བདེ་བ་ཆེན་པོའི་ངང་ལ་ཅི་ག ནས་སུ་མཉམ་པར་བཞག་རྗེས། མཐར་དགེ་བ་འདི་ཡིས་སོགས་ཀྱིས་དགེ་བ་བསྔོ་བ་དང་བཅས་བྱ་སྟེ། འདི་ནི་ངེས་གསང་སྔ་འགྱུར་རྡོ་རྗེ་ཐེག་པའི་བསྟན་པའི་ཉི་མ་གཅིག་པུར་གྱུར་པ་ཆོས་རྒྱལ་གཏེར་བདག་གླིང་པའི་ཕྱག་བཞེས་ཐུན་ནམ་སྒོམ་རེ་བཞིན་སྔོན་འགྲོ་མགོ་འཛིན་གྱི་ཚུལ་དུ་གཏོང་བར་མཛད་དེ། བྱིན་རླབས་མྱུར་དུ་འཇུག་པས་དངོས་གཞི་གང་སྒོམ་གྱི་ཉམས་རྟོགས་མྱུར་དུ་སྐྱེ་བར་བྱེད་པའི་སྒོ་ཁྱད་པར་དུ་འཕགས་པ་ཡིན་ནོ། །གཉིས་པ་ནི། སྤྱིར་ཀུན་མཁྱེན་བླ་མས་མཛོད་འགྲེལ་པདྨ་དཀར་པོར། དལ་འབྱོར་རྙེད་དཀའ་བ། ཚེ་མི་རྟག་པ། དད་པའི་ཕན་ཡོན། ལས་རྒྱུ་འབྲས། འཁོར་བའི་ཉེས་དམིགས་ཏེ། རྣམ་པ་ལྔ་བསམ་པ་ལ་འཇུག་པར་བྱའོ། །དེ་ཡང་བྱང་ཆུབ་སྒྲུབ་པའི་རྟེན་རྣམས་ལས་མཆོག་ཏུ་གྱུར་པ་དལ་འབྱོར་གྱི་མི་ལུས་ཡིན་པས་དེ་ཐོབ་པ་ལ་སྤྲོ་དགའ་བསྐྱེད་དགོས་ཏེ། དེ་མ་བསམས་ན་དལ་བ་ཆུད་གསོན་པའི་ཉེས་པ་ཡོད། དེ་ནས་དེ་ཐོབ་ཀྱང་ཡིད་བརྟན་{བརྟེན}མེད་པས། དགེ་བའི་ཚོགས་སྒྲུབ་པ་ལ་བསྐུལ་བ་བརྩོན་འགྲུས་ཀྱི་ལྕག་འདེབས་ཚེ་མི་རྟག་པར་བསམ་དགོས། དེ་མ་བསམས་ན་ལེ་ལོ་སྙོམ་ལས་ཀྱིས་ཐར་པའི་ལམ་ཟིན་དུས་མི་འོང་བའི་ཉེས་པ་ཡོད། དེ་ནས་རྩེ་གཅིག་ཏུ་གཅེས་པ་དད་པའི་དཔུང་ཚོགས་བསྐྱེད་དགོས། དེ་མ་བསྐྱེད་ན་ཆོས་ཀྱི་རྩ་བ་སྟོར་བའི་ཉེས་པ་ཡོད། དེ་ནས་ལས་དགེ་སྡིག་རྒྱུ་འབྲས་ཕྲ་མོ་ལ་བསམ་དགོས། དེ་མ་བསམས་ན་གཏན་དུ་འཁོར་བའི་སྡུག་བསྔལ་ལས་མི་ཐར་བའི་ཉེས་པ་ཡོད། དེ་ནས་འཁོར་བ་མཐོ་དམན་གྱི་ཉེས་དམིགས་བསམ་དགོས། དེ་མ་བསམས་ན་འཁོར་འདས་ལ་སྤང་བླང་མི་ཤེས་པས་ཐར་པ་བྱང་ཆུབ་ཀྱི་ལམ་སྣ་མི་ཟིན་པའི་ཉེས་པ་ཡོད། དེ་ལྟར་ན་ཆོས་འདི་ལྔས་གང་ཟག་གཅིག་ཐར་པར་བགྲོད་པའི་འཇུག་སྲོལ་མི་འཆུག་པར་བྱེད་པའོ། །ཞེས་བསམ་བྱའི་རྣམ་གྲངས་ལྔར་གསུངས་པ་ལས། དད་པའི་རང་བཞིན་ནི་འོག་ཏུ་སྐྱབས་འགྲོའི་སྐབས་སུ་འཆད་པར་འགྱུར་བས་འདིར་ཁྲིད་རིམ་སྤྱི་ལྟར་སྟོན་པ་ལ་བཞི། དལ་འབྱོར་རྙེད་དཀའ་བ་ལ་བསམས་ནས་དོན་མེད་འཇིག་རྟེན་གྱི་བྱ་བ་ལས་བློ་ལྡོག་ནས་ཐར་ལམ་དོན་དུ་གཉེར་བའི་ཁྲིད། འཆི་བ་མི་རྟག་པ་ལ་བསམས་ནས་ལེ་ལོ་སྙོམ་ལས་ལས་བློ་ལྡོག་སྟེ་ཆོས་ལ་བརྩོན་འགྲུས་བསྐྱེད་པའི་ཁྲིད། ལས་རྒྱུ་འབྲས་ལ་བསམས་ནས་མི་དགེ་བ་མཐའ་{ཐ}དག་ལས་བློ་ལྡོག་ནས་དཀར་པོ་དགེ་ཆོས་ལ་རྩེ་གཅིག་ཏུ་འབད་པའི་ཁྲིད། འཁོར་བའི་སྡུག་བསྔལ་ལ་བསམས་ནས་སྲིད་པའི་ཕུན་ཚོགས་ལས་བློ་ལྡོག་སྟེ་གཏན་གྱི་ཐར་པ་དོན་དུ་གཉེར་བར་བྱེད་པའི་ཁྲིད་དོ། དང་པོ་ལ། སྤྱིར་ཀུན་མཁྱེན་བླ་མས་སེམས་ཉིད་ངལ་གསོའི་དོན་ཁྲིད་དུ་ས་བཅད་དམ་ཁྲིད་རྐང་བཅུའི་སྒོ་ནས་གསུངས་ཀྱང་། འདིར་འཆད་བདེ་བའི་དབང་དུ་བྱས་ཏེ། དལ་འབྱོར་ངོས་བཟུང་བ། དེ་ཉིད་རྙེད་དཀའ་བ། རྙེད་ན་དོན་ཆེ་བ། དེ་ལྟར་བསྒོམ་པའི་ཕན་ཡོན་དང་འབྱོང་ཚད་བསྟན་པ་བཞི་ལས། དང་པོ་དལ་འབྱོར་ངོས་བཟུང་བ་ལ་གཉིས། ངོ་བོ་དལ་བ་དང་། ཁྱད་པར་ཀྱི་ཆོས་འབྱོར་བ་ངོས་བཟུང་བའོ། །དང་པོ་ནི། ཁྱད་གཞི་མི་ཁོམ་པའི་གནས་རྣམས་ལས་ལྡོག་པ་ནི་དལ་བའི་ངོ་བོ་ཡིན་ཏེ། དེ་ལ་མི་ཁོམ་པའི་གནས་ལའང་དབྱེ་ན་གསུམ། རང་རྒྱུད་རྟེན་གྱིས་མི་ཁོམ་པ་བརྒྱད། འཕྲལ་བྱུང་རྐྱེན་གྱིས་མི་ཁོམ་པ་བརྒྱད། རིགས་ཆད་བློ་ཡིས་མི་ཁོམ་པ་བརྒྱད་དོ། དང་པོ་ནི། པདྨའི་ལམ་རིམ་ཆེན་མོའི་རང་འགྲེལ་རིན་ཆེན་ཕྲེང་བ་ལས། བྱང་ཆུབ་སྒྲུབ་པའི་རྟེན་ནི་དལ་འབྱོར་ཁོ་ན་ཡིན་ལ། དལ་བ་ཞེས་བྱ་བ་ནི་མི་ཁོམ་པའི་གནས་བརྒྱད་དང་བྲལ་བ་ལ་བྱ་སྟེ། མི་ཁོམ་པ་བརྒྱད་ནི། དམྱལ་བ་ཡི་དྭགས་དུད་འགྲོ་དང་། །ཚེ་རིང་ལྷ་དང་ཀླ་ཀློ་དང་། །སངས་རྒྱས་མི་འབྱུང་ལོག་ལྟ་དང་། །ལྐུགས་པ་འདི་དག་མི་ཁོམ་བརྒྱད། །ཅེས་པས། ངན་སོང་གསུམ་དང་ལྷ་ཚེ་རིང་པོ་སྟེ། མི་མ་ཡིན་པ་བཞི་དང་། སངས་རྒྱས་ཀྱི་བསྟན་པ་མེད་པ་དང་། ཡོད་ཀྱང་མ་ཁྱབ་པའི་ཀླ་ཀློ། ལས་འབྲས་མེད་ཅེས་ལོག་པར་ལྟ་བ་དང་། འོན་ལོང་དིག་ལྐུགས་ལ་སོགས་པ་དབང་པོ་མ་ཚང་བ་མིས་བསྡུས་པ་བཞི་སྟེ་བརྒྱད་དོ། །སྐྱོན་བཞི་གཉིས་དང་བྲལ་བ་ནི་དལ་བ་སྟེ། ཆོས་ཁྱད་པར་ཅན་གྱི་རྟེན་དུ་རུང་བ་ཡིན་ནོ། །ཞེས་གསུངས་ཏེ། དེ་ཡང་ཀུན་མཁྱེན་བླ་མས་དོན་ཁྲིད་དུ་རང་ཉིད་དེར་མ་ལྟུང་བས་དལ་བ་ཐོབ་པ་ལ་དགའ་བ་བསྐྱེད་དེ་ཆོས་བསྒྲུབ་པ་ལ་བརྩོན་པར་བྱའོ། །དེའང་དམྱལ་བར་སྐྱེས་ན་ཚ་གྲང་གི་སྡུག་བསྔལ་ལ་སྤྱོད་ནས་ཆོས་སྒྲུབ་པའི་གནས་མེད། ཡི་དྭགས་སུ་སྐྱེས་ན་བཀྲེས་སྐོམ་གྱི་མེ་འབར་བས་ཆོས་སྒྲུབ་པའི་གནས་མེད། དུད་འགྲོར་སྐྱེས་ན་གཅིག་ལ་གཅིག་ཟ་ལ་སོགས་པས་འཚེ་བས་ཆོས་སྒྲུབ་པའི་གནས་མེད། ལྷ་ཚེ་རིང་པོར་སྐྱེས་ན་འདུ་ཤེས་མེད་པའི་ངང་དུ་བསྐལ་པར་འབྱམས་ནས་འཆི་ཁར་ལོག་པར་ལྟ་བས་ཆོས་སྒྲུབ་པའི་གནས་མེད། ཡུལ་མཐའ་འཁོབ་ཏུ་སྐྱེས་ན་བསྟན་པའི་སྣང་བ་མེད་པས་ཆོས་སྒྲུབ་པའི་གནས་མེད། མུ་སྟེགས་བྱེད་ལ་སོགས་པར་སྐྱེས་ན། ལོག་པར་ལྟ་བས་ཆོས་སྒྲུབ་པའི་གནས་མེད། མུན་པའི་བསྐལ་པ་ལ་སྐྱེས་ན་དཀོན་མཆོག་གསུམ་གྱི་སྒྲ་མི་གྲགས་པས་ཆོས་སྒྲུབ་པའི་གནས་མེད། ལྐུགས་པར་སྐྱེས་ན་ཡིད་ཀྱི་དབང་པོ་སྣོད་དུ་མི་{མ}རུང་བས་ཆོས་སྒྲུབ་པའི་གནས་མེད། དེ་བས་ན་བརྒྱད་པོ་དེར་དེ་ལྟར་བདག་མ་སྐྱེས་པས་ཁོམ་པ་ཞེས་བྱ་སྟེ། ཆོས་སྒྲུབ་པ་ལ་བརྩོན་པར་བྱ་སྙམ་པ་སྟེ། དེའང་སྐྱབས་སུ་འགྲོ་བ་དང་སེམས་བསྐྱེད་ནས། མི་ཁོམ་པ་བརྒྱད་དང་དེ་ལས་ལོག་པ་དལ་བ་ཐོབ་པའི་རང་བཞིན་ལ་བསམ་སྟེ་ཆོས་ཁོ་ན་བྱ་སྙམ་པ་ཡང་ནས་ཡང་དུ་བསམ་ལ། རྗེས་དགེ་བ་བསྔོ་ཞིང་སྤྱོད་ལམ་ཐམས་ཅད་དུ་ཡང་དེ་ལྟར་བསམ་ལ་སྦྱར་རོ། །ཞེས་གསུངས། སྒོམ་ཚུལ་འདི་འོག་གི་ཁྲིད་རྐང་ཐམས་ཅད་ལ་འགྲེ་ཤེས་པར་བྱ་དགོས་པས་ཀུན་ལ་སྦྱོར་རྗེས་ཚང་བར་ཉམས་སུ་བླང་བར་བྱའོ། །གཉིས་པ་ནི། ཀུན་མཁྱེན་བླ་མས་ཡིད་བཞིན་རིན་པོ་ཆེའི་མཛོད་ལས། དུག་ལྔ་འཁྲུག་དང་བླུན་རྨོངས་བདུད་ཀྱིས་ཟིན། །ལེ་ལོ་ཅན་དང་ལས་ངན་མཚོ་ཆེན་རྡོལ། །གཞན་དབང་འཇིགས་སྐྱོབ་ཆོས་ལྟར་བཅོས་པ་སྟེ། །འཕྲལ་བྱུང་རྐྱེན་གྱིས་མི་ཁོམ་རྣམ་པ་བརྒྱད། །ཐར་ལམ་ཆོས་ཀྱི་སྣོད་མིན་ཕྱིན་ཅི་ལོག །ཅེས་མིར་གྱུར་པ་གང་ཞིག་ཆོས་སྤྱོད་པའི་ཡུལ་དུ་སྐྱེས་ཀྱང་། དུག་ལྔ་ཤིན་ཏུ་རགས་པས་རང་རྒྱུད་རྟག་ཏུ་འཁྲུག་པ་དང་། སྡིག་པའི་གྲོགས་པོས་ཁྲིད་པའི་བླུན་རྨོངས་རྣམས་དང་། ལྟ་སྤྱོད་ཕྱིན་ཅི་ལོག་པས་ལམ་ནོར་བའི་བདུད་ཀྱིས་ཟིན་པ་དང་། ཆོས་ལ་སློབ་པར་འདོད་ཀྱང་བརྩོན་འགྲུས་མེད་པའི་ལེ་ལོ་ཅན་དང་། བརྩོན་ཀྱང་ཡོན་ཏན་མི་སྐྱེ་བའི་སྡིག་སྒྲིབ་ཅན་ལས་ངན་གྱི་མཚོ་རྡོལ་བ་དང་། རང་དབང་མེད་པར་གཞན་གྱིས་བཀོལ་བ་བྲན་གྱི་རིགས་རྣམས་དང་། ཚེ་འདིའི་ལྟོ་གོས་ཀྱི་ཆེད་དམ་འཚེ་བས་འཇིགས་ནས་དེའི་ཆེད་དུ་ཆོས་ལ་ཞུགས་ནའང་སྔོན་གྱི་བག་ཆགས་རྙིང་པས་ཆོས་མིན་སྤྱོད་པ་དང་། ཆོས་སུ་བཅོས་ནས་ཡོ་བྱད་དང་རྙེད་བཀུར་དང་སྙན་གྲགས་སྒྲུབ་པའི་གཟུགས་བརྙན་ཅན་རྣམས་ཏེ། བརྒྱད་པོ་དེ་ཡང་ཆོས་སྒྲུབ་པའི་གནས་སུ་མི་ཁོམ་པ་ཡིན་ནོ། །གསུམ་པ་ནི། དེ་ཉིད་ལས། འཆིང་བ་དམ་ལྡན་ཀུན་སྤྱོད་ཤིན་ཏུ་ངན། །འཁོར་བས་མི་སྐྲག་དད་པ་ཅུང་ཟད་མེད། །མི་དགེ་སྡིག་སྤྱོད་ཆོས་ལ་སེམས་པ་མེད། །སྡོམ་དང་དམ་ཚིག་ཉམས་པ་ཞེས་བྱ་བ། །རིགས་ཆད་བློ་ཡིས་མི་ཁོམ་རྣམ་པ་བརྒྱད། །ཆོས་ལས་རིང་གྱུར་ཐར་པའི་སྒྲོན་མེ་ནུབ། །ཅེས་ཚེ་འདིའི་རྫས་ཡོ་བྱད་བུ་ནོར་གཉེན་འདུན་ལ་སོགས་པའི་འཆིང་བ་དམ་པོས་བཅིངས་པ་དང་། ངང་རྒྱུད་ངན་པས་མི་གཞི་ཏིལ་འབྲུ་ཙམ་མེད་ཅིང་ཀུན་སྤྱོད་ལ་སྐྱེད་འདོན་དུ་མེད་པ་དང་། ངན་སོང་དང་འཁོར་བའི་ཉེས་པ་བཤད་དམ་ཚེ་འདིའི་སྡུག་བསྔལ་ཇི་ལྟ་བུ་ལའང་སྐྲག་པའི་བློ་གཏན་ནས་མི་སྐྱེ་བ་དང་། ཐར་པ་དང་དཀོན་མཆོག་གི་བསྔགས་པ་བརྗོད་དམ་ཡུལ་ཡོན་ཏན་ཅན་མཐོང་ཡང་དད་པ་ཅུང་ཟད་མེད་པ་དང་། མི་དགེ་སྡིག་སྤྱོད་ལ་དགའ་བས་སྒོ་གསུམ་ཉེ་བར་མ་ཞི་བ་དང་། ཡོན་ཏན་དང་དགེ་བ་དང་དམ་པའི་ཆོས་ཀྱི་སེམས་པ་མེད་པ་ཁྱིའི་མདུན་དུ་རྩྭ་བཞག་པ་ལྟ་བུ་དང་། ཐུན་མོང་གི་ཐེག་པ་ལ་ཞུགས་ནས་སེམས་བསྐྱེད་དང་སྡོམ་པ་རལ་བས་ངན་སོང་ལས་འགྲོ་ས་མེད་པ་དང་། གསང་སྔགས་ཀྱི་ཐེག་པར་ཞུགས་ནས་བླ་མ་དང་མཆེད་གྲོགས་ལ་དམ་ཚིག་ཉམས་པ་སྟེ། བརྒྱད་པོ་འདི་ནི་དམ་པའི་ཆོས་ལས་རིང་ཞིང་ཐར་པའི་སྒྲོན་མེ་ནུབ་པ་ཞེས་བྱའོ། །འདིར་རིགས་ཆད་གསུངས་པ་ནི་དམན་པ་ལ་དགག་སྒྲ་སྦྱར་བ་སྟེ་ཡུན་རིང་པོར་འཁོར་བ་ན་འཁོར་བའི་དོན་ཡིན་གྱི་གཏན་གྱི་རིགས་ཆད་ནི་མ་ཡིན་ཏེ་རང་བཞིན་གནས་རིགས་མེད་པ་ནི་སེམས་ཅན་གྱི་ཁམས་ན་འགའ་ཡང་མེད་པའི་ཕྱིར་རོ། །ཕྱི་མ་འདི་གཉིས་ཀུན་མཁྱེན་ཆེན་པོས་མན་ངག་གི་ལུགས་གསར་དུ་བསྡུས་པར་བཞེད་མོད་སྔོན་གྱི་ཟུར་པའི་ཡིག་རྙིང་ཞིག་ནའང་སྣང་བས་སྔ་འགྱུར་གྱི་རྒྱུད་ཅིག་ནས་བསྟན་པ་འདྲའོ། །དེ་ལྟ་བུའི་མི་ཁོམ་པའི་གནས་བརྒྱད་ཚན་རྣམས་སུ་མ་སྐྱེས་པར་རང་དབང་དམ་པའི་ཆོས་ལ་སྤྱོད་དུ་ཡོད་པ་ནི་དལ་བ་ཕུན་སུམ་ཚོགས་པ་ཡིན་ཏེ། སྡུད་པ་ལས། མི་ཁོམ་བརྒྱད་སྤངས་དེ་ཡིས་དལ་བ་རྟག་ཏུ་རྙེད། །ཅེས་གསུངས་པ་བཞིན་ནོ། །གཉིས་པ་ཁྱད་པར་གྱི་ཆོས་འབྱོར་བ་ལ་གཉིས། རང་འབྱོར་དང་། གཞན་འབྱོར་རོ། །དང་པོ་ནི། ལམ་རིམ་ལས། མིར་གྱུར་ཡུལ་གྱི་དབུས་སྐྱེས་དང་། །དབང་པོ་ཚང་ཞིང་གནས་ལ་དད། །དེ་བཞིན་ལས་མཐའ་མ་ལོག་པའོ། །ཞེས་གསུངས་ཏེ། དེ་ཡང་། མིའི་ལུས་མ་ཐོབ་ན་ཆོས་བྱར་མེད་པ་ལས། ད་རེས་མིར་སྐྱེས་པས་ཀྱང་རང་ཉིད་འབྱོར་པ་དང་། ཡུལ་ཕྱོགས་ཆོས་མེད་སར་སྐྱེས་ནའང་ཆོས་སྤྱོད་དུ་མེད་པ་ལས། ཆོས་དར་ས་ནི་དོན་གྱི་ཡུལ་དབུས་ཏེ་དེར་སྐྱེས་པས་ཀྱང་རང་ཉིད་འབྱོར་པ་དང་། དབང་པོ་མ་ཚང་ནའང་ཆོས་བྱར་མེད་པ་ལས། དབང་པོའི་སྒོ་ཚང་བས་ཀྱང་རང་ཉིད་འབྱོར་བ་དང་། ལས་ཀྱི་མཐའ་ལོག་ནས་རྟག་ཏུ་མི་དགེ་བ་ལ་སྤྱོད་ནའང་ཆོས་བྱར་མེད་པ་ལས། ལས་ཀྱི་མཐའ་མ་ལོག་པར་དགེ་བ་ལ་མོས་པས་ཀྱང་རང་ཉིད་འབྱོར་བ་དང་། བསྟན་པ་ལ་མ་དད་ནའང་ཆོས་སྤྱད་དུ་མེད་པ་ལས། སངས་རྒྱས་ཀྱི་བསྟན་པ་ལ་དད་པས་ཀྱང་རང་ཉིད་འབྱོར་པ་སྟེ་ལྔ་ནི་རང་ངོས་ནས་ཚང་དགོས་པས་རང་འབྱོར་ཞེས་བྱ་སྟེ། དལ་བ་ཕུན་སུམ་ཚོགས་པ་བཅུ་གཉིས་བསྟན་པའི་མདོ་ལས། མི་ཉིད་ཐོབ་པ་དང་། འཕགས་པའི་ཡུལ་དུ་སྐྱེས་པ་དང་། དབང་པོ་ཚང་བ་དང་། ལས་ཀྱི་མཐའ་མ་ལོག་པ་དང་། གནས་ལ་དད་པ་སྟེ་ལྔ་ནི་བདག་ཕུན་སུམ་ཚོགས་པ་ཡིན་ནོ། །ཞེས་དང་། ཉང་གཏེར་བླ་མའི་དམར་ཁྲིད་ལས། ཡུལ་དབུས་སུ་སྐྱེས་པ་དང་། མི་ལུས་ཐོབ་པ་དང་། དབང་པོ་ཚང་བ་དང་། གནས་ལ་དད་པ་དང་། ལས་ཀྱི་མཐའ་མ་ལོག་པའོ། །ཞེས་སོ། །གཉིས་པ་གཞན་འབྱོར་ལྔ་ནི། ལམ་རིམ་ལས། སངས་རྒྱས་རྣམས་བྱོན་ཆོས་གསུངས་དང་། །བསྟན་པ་གནས་དང་དེ་རྗེས་འཇུག །གཞན་ཕྱིར་སྙིང་རྗེ་ལྔ་ཡིན་ནོ། །ཞེས་གསུངས་ཏེ། དེ་ཡང་། སངས་རྒྱས་འཇིག་རྟེན་དུ་མ་བྱོན་ན་ཆོས་ཀྱི་མིང་མེད་པ་ལས། ད་རེས་སངས་རྒྱས་བྱོན་པས་ཀྱང་གཞན་འབྱོར་དམ་པ་ཚང་བ་དང་། སངས་རྒྱས་བྱོན་ཀྱང་ཆོས་མ་གསུངས་ན་ཕན་མེད་པ་ལས། ཆོས་འཁོར་གསུམ་དུ་བསྐོར་བས་ཀྱང་གཞན་འབྱོར་དམ་པ་ཚང་བ་དང་། ཆོས་གསུངས་ཀྱང་བསྟན་པ་མི་གནས་ན་ཕན་མེད་པ་ལས། ད་ལྟ་བསྟན་པ་མ་ནུབ་ཙམ་དུ་ཡོད་པས་ཀྱང་གཞན་འབྱོར་དམ་པ་ཚང་བ་དང་། བསྟན་པ་གནས་ཀྱང་མ་ཞུགས་ན་ཕན་མེད་པ་ལས། བསྟན་པ་ལ་ཞུགས་པས་ཀྱང་གཞན་འབྱོར་ཚང་བ་དང་། ཞུགས་ཀྱང་མཐུན་རྐྱེན་དགེ་བའི་བཤེས་གཉེན་མེད་ན་བླང་དོར་གྱི་གནས་མི་ཤེས་པ་ལས། ཡང་དག་པར་དགེ་བའི་བཤེས་གཉེན་གྱི་སྙིང་བརྩེ་བས་ལྷག་པར་ཐུགས་རྗེས་ཡོངས་སུ་འཛིན་མཁན་ཡོད་པས་ཀྱང་གཞན་འབྱོར་དམ་པ་ཚང་བ་སྟེ། དེ་ལྟར་ལྔའོ། །སྐབས་འདིར་གཞན་རྣམས་གོ་སླ་ལ། བསྟན་པ་ལ་ཞུགས་པ་ཞེས་པ་ནི། མཛོད་འགྲེལ་པད་དཀར་ལས། བསྟན་པ་ཡོད་ཀྱང་བདག་ཉིད་ལ་འདོམས་ཤིང་རྗེས་སུ་ཕན་བདེ་བྱེད་པའི་གྲོགས་མེད་ན་ཕན་མེད་པ་ལས། བཀའ་ལུང་དང་རྗེས་སུ་མཐུན་པའི་ཆོས་ཀྱི་གྲོགས་ཁྱད་པར་ཅན་ཡོད་པས་ཐོས་བསམ་དང་སྒོམ་སྒྲུབ་བྱེད་པའི་འབྱོར་པ་ཚང་སྟེ། ཟླ་བའི་སྙིང་པོའི་མདོ་ལས། འཇིག་རྟེན་དང་ཆོས་དང་རྗེས་སུ་མཐུན་པའི་ནན་ཏན་བྱེད་པ་ཡང་རྙེད་པར་དཀའོ། །ཞེས་སོ། །ཞེས་གསུངས་པ་བཞིན་ཤེས་པར་བྱ་སྟེ། དེ་ལྔ་ནི་གཞན་ངོས་ནས་ཚང་དགོས་པས་གཞན་འབྱོར་ཞེས་བྱ་སྟེ། མདོ་སྔ་མ་ལས། སངས་རྒྱས་བྱོན་པ་དང་། ཆོས་གསུངས་པ་དང་། དམ་པའི་ཆོས་གནས་པ་དང་། གཞན་དག་ཀྱང་དེ་ལ་སྤྱོད་པ་དང་། ཆོས་བྱེད་པ་ལ་གཞན་བརྩེ་བ་སྟེ་ལྔ་ནི་གཞན་ཕུན་སུམ་ཚོགས་པ་ཡིན་ནོ། །ཞེས་དང་། དམར་ཁྲིད་ལས། གཞན་འབྱོར་ལྔ་ནི། སངས་རྒྱས་འཇིག་རྟེན་དུ་བྱོན་པ་དང་། དེས་ཆོས་གསུངས་པ་དང་། དེའི་བསྟན་པ་ཡུན་རིང་དུ་གནས་པ་དང་། གཞན་དེའི་རྗེས་སུ་འཇུག་པའི་གྲོགས་ཡོད་པ་དང་། གཞན་གྱི་ཕྱིར་སྙིང་བརྩེ་ལ་ཞུགས་པའོ། །ཞེས་གསུངས་སོ། །དེ་ལྟ་བུའི་རང་གཞན་གྱི་འབྱོར་པ་ལྔ་ཕྲག་གཉིས་ལས་གཞན་རྣམས་ཅུང་དྲག་ཀྱང་། ཡུལ་རྐྱེན་ངན་པ་དང་། སྡིག་པའི་གྲོགས་པོ་སོགས་དང་འཕྲད་ན། ལས་མཐའ་ལོག་པ་དང་། དད་པ་ཉམས་པ་དང་། དགེ་བའི་བཤེས་གཉེན་དང་དགེ་བའི་གྲོགས་པོ་དང་བྲལ་བ་སོགས་ཀྱིས་སྐལ་ངན་བྱེད་པས་རྟག་ཏུ་གཟབ་པར་བྱ་དགོས་ཏེ། ཀུན་མཁྱེན་འཇིགས་མེད་གླིང་པས། ཁོམ་ལྡན་མང་སྟེ་ལོག་ལྟས་མི་ཁོམ་བྱེད། །རང་གཞན་འབྱོར་པ་ལྔ་ཕྲག་གཉིས་སོ་སོའི། །དང་པོ་གསུམ་ལས་ཐ་མ་གཉིས་གཉིས་ནི། །འདུ་འབྲལ་བྱེད་པས་འདི་ལ་ལེགས་པར་སོམས། །ཞེས་གསུངས་ཤིང་། ཁྱད་པར་དུའང་མ་དད་པ་དང་ལོག་པར་ལྟ་བས་ནི་དལ་བ་ཕུན་སུམ་ཚོགས་པ་ཉམས་པར་བྱེད་ཅིང་དེ་ལས་ཕུང་ཚབས་ཆེ་བ་གཞན་ཡོད་མི་སྲིད་ཀྱང་། དེང་དུས་ཀྱི་སྐྱེ་བོ་སྐལ་དམན་ཕལ་མོ་ཆེ་ནི། རང་སྣང་ལོག་པར་ལྟ་བའི་རབ་རིབ་ཀྱིས་མིག་སྒྲིབ་སྟེ། དཔེར་ན་མཁྲིས་ནད་ཅན་གྱིས་དུང་སེར་པོར་མཐོང་བ་བཞིན། ཆོས་ལ་ང་མཁས་དང་། ཐོས་པ་ང་ཆེ་དང་། ཡོན་ཏན་ང་བཟང་སྙམ་པའི་ཨོ་ཟོབ་སྟོང་ལྡིར་གྱིས་གློ་བ་བརྒྱང་ནས། ཆོས་དང་བླ་མ་ལ་སྐྱོན་འདོགས་སོ་བྱ་ཉྭ་སྒུག་པ་ལྟ་བུས་སངས་རྒྱས་དངོས་སུ་བྱོན་ཀྱང་དག་མི་སྟེར་བ་འདིས། བླ་སློབ་ཐོག་མའི་རྟེན་འབྲེལ་འཆུགས། བྱིན་རླབས་ཀྱི་སྒོ་མོ་འགག དག་སྣང་གི་མིག་འགྲིབ། ལྷ་དང་སྲུང་མའི་བཀའ་ཆད་འདུ། ཆོས་ཇི་ཙམ་ཐོས་བཞིན་རྒྱུད་ཇེ་རྩུབ། ཉོན་མོངས་པ་ཇེ་རགས། འདོད་པ་ཇེ་ཆེ། སྤྱོད་པ་ཇེ་རྩིང་། མཐར་ཆོས་མགོ་ཙམ་ཡང་མི་ཐོན་པར། ཚེ་མཇུག་ཁྱིམ་པ་ཕལ་ལས་ཀྱང་ལོད་པར་བྱུང་བ་ནི་མཐོང་ཆོས་བཞིན་དང་། ལྷག་པར་ཡང་ངེས་དོན་གྱི་མདོ་རྒྱུད་ཟབ་མོ་རྣམས་དགོངས་པའི་སྐྱེལ་སོ་མཐར་ཐུག་གཅིག་ཀྱང་། གནས་སྐབས་གྲུབ་མཐའི་དབང་གི་བཀའ་ཡི་འགྲེལ་ཚུལ་དང་། བདེན་གཉིས་ཀྱི་འཇོག་མཚམས་ཐ་དད་པ་ཙམ་ལ་དཔག་ནས། ཡང་དག་པའི་ཆོས་དང་གང་ཟགས་ཚད་མར་གྱུར་པ་རྣམས་ལ་ངན་སེམས་སྐུར་འདེབས་དང་། རང་གཞན་གྱི་ཕྱོགས་བཟུང་ནས་ཆོས་སྤོང་གི་ལས་ཚན་པོ་ཆེ་བསགས་པ་འདི་ནི་ཤིན་ཏུ་ཡ་ཆ་ཞིང་འབྱུང་ཡང་ཉེ་བས་ཅི་ནས་ཀྱང་གཟབ་པར་བྱ་སྟེ། དབུ་མ་རིན་ཆེན་ཕྲེང་བ་ལས། དེ་བཞིན་གཤེགས་དགོངས་གསུངས་པ་རྣམས། །ཤེས་པར་སླ་མིན་དེ་ཡི་ཕྱིར། །ཐེག་གཅིག་ཐེག་པ་གསུམ་གསུངས་པས། །བཏང་སྙོམས་ཀྱིས་ནི་བདག་བསྲུང་བྱ། །བཏང་སྙོམས་ཀྱིས་ནི་སྡིག་མི་འགྱུར། །སྡང་བས་སྡིག་འགྱུར་དགེ་བ་མིན། །ཞེས་གསུངས་པ་བཞིན་ནོ། །གཞན་ཡང་རྫོགས་པ་ཆེན་པོ་སེམས་ཉིད་ངལ་གསོ་ལས། འདི་ལྟར་མི་ཡི་ལུས་རྙེད་ཙམ་པོ་དང་། །ཁྱད་པར་ཅན་དང་མི་ལུས་རིན་པོ་ཆེ། །ཞེས་རྣམ་པ་གསུམ་དུ་གསུངས་པ་ལས། དང་པོ་ཙམ་པོ་པའམ་བྱུར་པོ་ཆེ་ནི། དེ་ཉིད་ལས། རིམ་བཞིན་དགེ་སྡིག་མི་ཤེས་ཆོས་མིན་སྤྱོད། །དབང་པོ་ཚང་ཡང་མི་ལུས་ཕལ་པ་སྟེ། །ཡུལ་དབུས་སྐྱེས་ཀྱང་མཐའ་འཁོབ་ཀླ་ཀློ་ཉིད། །ཅེས་གསུངས་ཏེ། འདི་ལྟར་དགེ་སྡིག་གི་དོན་མི་ཤེས་ཤིང་རྟག་ཏུ་སྡིག་པ་སྤྱོད་པའི་རིགས་ཅན་རྣམས་ནི་ངན་སོང་དམྱལ་བའི་གཏིང་རྡོ་ཡིན་པས་བྱུར་པོ་ཆེ་ཞེས་བྱ་སྟེ། ནམ་མཁའ་རིན་པོ་ཆེ་མདོ་ལས། གང་དག་སྔོན་གྱི་དགེ་བའི་རྒྱུས་མིའི་འཇིག་རྟེན་དུ་ཡང་སྐྱེས། དབང་པོ་རྣམས་ཀྱང་ཡོངས་སུ་ཚང་། རྟག་ཏུ་ཆོས་སྤྱོད་པའི་ཡུལ་དུ་སྐྱེས་ཀྱང་ལས་དང་ལས་ཀྱི་རྣམ་པར་སྨིན་པ་མི་ཤེས། མི་དགེ་བའི་ལམ་མང་དུ་བརྟེན་ཅིང་སྤྱོད་པ་དེ་དག་མིར་གྱུར་པ་ཞེས་བརྗོད་ཀྱང་ཐ་མར་གྱུར་པ་སྟེ་ཤི་བའི་འོག་ཏུ་ངན་འགྲོ་མུ་མཐའ་མེད་པར་ལྟུང་བའི་ཕྱིར་རོ། །ཞེས་སོ། །གཉིས་པ་ཁྱད་པར་བ་ནི། ལུང་སྔ་མའི་འཕྲོར། བསྟན་ལ་མ་ཞུགས་པ་དང་དགེ་སྡིག་འཆོལ། །ཚེ་འདི་གཉེར་ཞིང་འདུ་འཛིས་རྣམ་པར་གཡེངས། །མི་བསྲུན་འཕྱར་ལ་ཕྱི་མ་རྒྱང་བསྲིང་སྟེ། །ཐར་པ་མི་གཉེར་དེ་དག་ཆོས་ཐོས་ནའང་། །མཆོག་གི་ཡུལ་མིན་རང་བཞིན་བར་མ་སྟེ། །སྐབས་འགར་དགེ་ལ་ཅུང་ཟད་སེམས་གཞོལ་ཞིང་། །ཕལ་ཆེར་སྡིག་པས་བློ་མིག་ཁེབས་པའི་ཕྱིར། །རྟགས་ཙམ་བཟུང་བས་རང་གཞན་ཕན་ཅི་ཡོད། །དེ་དག་ཁྱིམ་པའམ་དགེ་སྦྱོང་གཟུགས་བཟུང་རུང་། །ངན་འགྲོ་རྣམས་ལས་ཅུང་ཟད་འཕགས་པའི་ཕྱིར། །མི་ལུས་ཁྱད་པར་ཅན་ཞེས་རྒྱལ་བས་གསུངས། །ཞེས་གསུངས་ཏེ། གང་དག་རབ་ཏུ་བྱུང་བའམ་ཁྱིམ་པ་གང་ཡིན་ཀྱང་ཕལ་ཆེར་བག་མེད་པའི་དབང་དུ་རྣམ་པར་གཡེངས་ཤིང་། སྐབས་རེར་དགེ་བློ་ཅུང་ཟད་སྐྱེས་ཏེ་དགེ་སྡིག་འདྲེས་མར་སྤྱོད་པ་ནི་དུས་རིང་མོ་ཞིག་ན་ཐར་པའི་ས་བོན་ཐེབས་པས་སྔ་མ་ལ་ལྟོས་ནས་མི་ལུས་ཁྱད་པར་བ་ཞེས་བྱ་སྟེ། མདོ་སྔ་མ་ལས། སེམས་ཅན་གྱི་ཁམས་ན་གང་དག་ཆོས་འདི་པ་དག་ཏུ་མ་ཞུགས་པའམ། ཞུགས་ཀྱང་རུང་སྟེ། དགེ་བ་དང་མི་དགེ་བ་འདྲེས་མར་སྤྱོད་ཅིང་འདུ་འཛི་དང་རྣམ་པར་གཡེང་བ་ལྷུར་ལེན་པས། ལུས་དང་ངག་དང་ཡིད་མི་བསྲུན་ཞིང་འཕྱར་བ་ངན་སོང་གསུམ་དུ་འབབ་ཅིང་ངན་འགྲོར་གཞོལ་བའི་ལས་ཅན་དེ་དག་ཀྱང་། སངས་རྒྱས་ཀྱི་ཐུགས་རྗེ་ཉི་མའི་འོད་ཀྱིས་གཟིགས་ཏེ་ཡུན་རིང་མོ་ཞིག་ན་ཐར་པའི་ས་བོན་དང་ལྡན་པས། དེའི་ཕྱིར་མི་ལུས་ཁྱད་པར་ཅན་དུ་གྱུར་པ་ཞེས་བྱའོ། །ཞེས་སོ། །གསུམ་པ་མི་ལུས་རིན་པོ་ཆེ་ནི། ངལ་གསོ་ལས། རབ་མཆོག་སྐྱེ་བོ་དྲི་མེད་ཆོས་ཀྱི་སྣོད། །ཐོས་བསམ་སྙིང་པོའི་དོན་ལ་དབང་འབྱོར་ཞིང་། །རང་ཉིད་བརྟུལ་ནས་གཞན་དག་དགེ་ལ་འགོད། །སྒྲུབ་པའི་རི་རྒྱལ་རབ་ཏུ་མི་གཡོ་བ། །དྲང་སྲོང་རྒྱལ་མཚན་རྣམ་པ་དེ་དག་ཀུན། །ཁྱིམ་པའམ་རབ་ཏུ་བྱུང་བའི་གཟུགས་སླ་ཡིས། །མི་ལུས་རིན་ཆེན་ལགས་པར་སྟོན་པས་གསུངས། །ཞེས་གསུངས་ཏེ། དེ་ལ་དམ་པའི་ཆོས་ཀྱི་སྒོ་བཟང་པོ་ཐོས་པ་དང་། བསམ་པ་དང་། རྣལ་འབྱོར་དུ་གནས་པས་རང་གི་རྒྱུད་བཏུལ་ནས། །གཞན་དག་ཀྱང་དགེ་བ་ལ་བསྐུལ་ཞིང་ཐར་པའི་གོ་ཆ་ཆེན་པོ་བགོས་པ་ནི་དྲང་སྲོང་གི་རྒྱལ་མཚན་ཆེན་པོ་སྟེ། གོས་ཀྱི་ཆ་ལུགས་ལ་དྲང་སྲོང་གི་རྒྱལ་མཚན་བརྗོད་པ་ཙམ་མ་ཡིན་ནོ། །དེ་ལྟ་བུའི་བརྩོན་པ་དང་དགེ་བ་ལ་བསྐུལ་བ་ནི་ཁྱིམ་ན་གནས་པའམ། རབ་ཏུ་བྱུང་བའི་གཟུགས་སུ་འདུག་ཀྱང་མི་ལུས་རིན་པོ་ཆེ་ཞེས་བརྗོད་དེ། དཔལ་སྦས་ཀྱིས་ཞུས་པའི་མདོ་ལས། དཔལ་སྦས། འདི་ལ་མང་དུ་ཐོས་པ་ཐོས་པར་བྱེད། དེའི་དོན་སེམས་པར་བྱེད། ཉོན་མོངས་པ་མེད་པའི་སྒོམ་པས་རྣལ་འབྱོར་དུ་བྱེད། གཞན་དག་ཀྱང་དེ་ལ་སྐུལ་བར་བྱེད་ན། དེ་ནི་ལྷ་དང་བཅས་པའི་འཇིག་རྟེན་ན་མཆོག་ཏུ་མཛེས་པས་དལ་འབྱོར་སྙིང་པོར་བྱེད་པ་ཞེས་བྱའོ། །དལ་འབྱོར་རིན་པོ་ཆེ་ཞེས་བྱའོ། །ཞེས་དང་། ཡུམ་བར་མ་ལས། རབ་འབྱོར་བྱང་ཆུབ་སེམས་དཔའ་གང་དག་བདག་ཀྱང་དགེ་བ་ལ་སྤྱོད་ཅིང་གཞན་ཡང་དེ་ལ་བསྐུལ་བ་ནི་དལ་འབྱོར་སྙིང་པོར་བྱེད་པ་སྟེ་སངས་རྒྱས་ཐམས་ཅད་ཀྱིས་བསྔགས་སོ། །བསྟོད་དོ། །བཀུར་རོ། །ཞེས་སོ། །དེས་ན་ད་རེས་དལ་འབྱོར་ཐོབ་པའི་རྟེན་ལ་དམ་པའི་ཆོས་ཤིག་མ་བསྒྲུབས་ན་ལས་ཀྱི་དབང་གིས་ཤི་བའི་འོག་ཏུ་ངན་སོང་གསུམ་དུ་སྐྱེས་དུས་ཆོས་ཀྱི་སྒྲ་ཡང་མི་ཐོས། དགེ་བའི་བཤེས་གཉེན་དང་ཡང་མི་མཇལ། དགེ་སྡིག་ངོ་ཡང་མི་ཤེས། གང་ཅི་བྱེད་ཐམས་ཅད་སྡིག་པ་མ་གཏོགས་དགེ་བ་མེད་པས། རྟག་ཏུ་འཁོར་བ་ན་འཁོར་བ་འདི་མཚང་རེ་ཆེ། དེ་བས་དལ་འབྱོར་དོན་ཡོད་པར་བྱའོ་སྙམ་དུ་བསྒོམ་པར་བྱའོ། །གཉིས་པ་དེ་ལྟ་བུའི་དལ་འབྱོར་ཕུན་སུམ་ཚོགས་པའི་མི་ལུས་རིན་པོ་ཆེ་ཉིད་རྙེད་དཀའ་བའི་རྒྱུ་མཚན་བསམ་པ་ལ་བཞི། ངོ་བོའི་སྒོ་ནས་རྙེད་དཀའ་བ། རྒྱུ་རྐྱེན་གྱི་སྒོ་ནས་རྙེད་དཀའ་བ། དཔེ་ཡི་སྒོ་ནས་རྙེད་དཀའ་བ། གྲངས་ཀྱི་ཁྱད་པར་ལ་བསམ་ནས་རྙེད་དཀའ་བའོ། །དང་པོ་ནི། ཡིད་བཞིན་རིན་པོ་ཆེའི་མཛོད་ལས། འདི་ལྟར་སེམས་ཅན་ཙམ་གྱི་ལུས་མཐོང་ན། །མི་ལུས་ཐོབ་པ་འཁོར་ལོས་སྒྱུར་{བསྒྱུར}རྙེད་འདྲ། །མི་ལུས་ནང་ནས་དད་ལྡན་ཆོས་བྱེད་རིགས། །དེ་བས་དཀོན་ཕྱིར་སངས་རྒྱས་ཐོབ་དང་མཚུངས། །དེ་བས་རྟག་ཏུ་དལ་འབྱོར་བསམ་འཚལ་ལོ། །དེ་བཞིན་དབང་པོ་མ་ཚང་མཐའ་འཁོབ་སྐྱེས། །ཆོས་ལ་ལས་མེད་ལས་ཀྱི་མཐའ་ལོག་ཅིང་། །བསྟན་ལ་མ་དད་ཆོས་མིན་སྡིག་པའི་གྲོགས། །ཤིན་ཏུ་གྲངས་མང་རབ་ཏུ་བསམས་བྱས་ནས། །དེ་དག་མ་གྱུར་ཆོས་ལྡན་ལུས་རྙེད་འདི། །ཉིན་མཚན་ཀུན་ཏུ་ངེས་པར་བསམ་པར་བྱ། །ཞེས་གསུངས་པ་ལྟར། སྤྱིར་སེམས་ཅན་ཙམ་གྱི་རིམ་པ་དང་གྲངས་ལ་བསམ་ན་ཚད་མེད། དེ་ལས་འཛམ་བུའི་གླིང་གི་འབུ་སྲིན་སོགས་སེམས་ཅན་ཕྲ་མོ་རྣམས་ཀྱི་གྲངས་ལ་ལྟོས་ཀྱང་མི་ཡི་ལུས་ཉིད་ཐོབ་པ་ནི་འཁོར་ལོས་སྒྱུར་བ་རྙེད་པ་དང་འདྲ། མི་ལའང་རྒྱ་དཀར་ནག་ལ་སོགས་པའི་ཡུལ་གྲུ་དང་ཚོང་འདུས་རེ་རེ་ན་འཚོགས་པ་ལ་བསམས་ཀྱང་ཆོས་མེད་པ་སྡིག་པ་འབའ་ཞིག་ལ་སྤྱོད་པ་ལས་ཆོས་ལ་མོས་པ་དང་ཆོས་ཐོས་པ་སྲིད་པ་ཙམ། དེ་ལས་ཀྱང་སྙིང་ནས་ཡང་དག་པའི་ཆོས་ཀྱི་སྒོར་ཞུགས་པ་དང་ཚུལ་བཞིན་དུ་རྗེས་སུ་སློབ་ཅིང་སྤྱོད་པའི་དད་པ་ཅན་ནི་སངས་རྒྱས་འཇིག་རྟེན་དུ་བྱོན་པ་བས་ཀྱང་དཀོན་ཞིང་། ཞ་ལོང་འོན་ལྐུགས་སོགས་དབང་པོ་མ་ཚང་བ་རྣམས་ལ་བསམ་ན། ཐོས་བསམ་གྱི་རྟེན་དབང་པོ་ལས་སུ་རུང་བ་འདི་ལྟ་བུ་ཡང་ཤིན་ཏུ་རྙེད་པར་དཀའ། ཡུལ་མཐའ་འཁོབ་དཀོན་མཆོག་གསུམ་གྱི་སྒྲ་ཙམ་ཡང་མི་གྲགས་པའི་རྡོ་དང་། སོག་པོ་ལ་སོགས་པ་ལ་བལྟས་ཀྱང་རང་ཉིད་དེར་མ་སྐྱེས་པ་ཁ་རྗེ་ཆེ། ཆོས་ལ་ལས་འབྲས་མེད་པའི་མི། ཟ་ཉལ་འགྲོ་འདུག་ཅི་བྱེད་ཀྱང་། དཀོན་མཆོག་གསུམ་སྐད་ཅིག་ཀྱང་མི་དྲན་ཅིང་། སྐྱབས་སུ་མཆི་ཞེས་པ་ལན་གཅིག་ཀྱང་ཁར་འདོན་མ་མྱོང་བ་རྣམས་དང་། ལས་ཀྱི་མཐའ་ལོག་པ་སྔོན་ཆོས་སྒོར་ཞུགས་ཀྱང་ལོག་ནས་སྡིག་པ་སྣ་དགུ་བྱེད་པ་རྣམས་དང་། སངས་རྒྱས་ཀྱི་བསྟན་པ་ལ་མ་དད་པའི་རིགས་རྣམས་དང་། སྡིག་པ་འབའ་ཞིག་བྱེད་པ་རྣམས་ལ་བསམས་ནས། འདི་ལྟ་བུས་ཡུལ་གཞན་དག་ནའང་ཁེངས་ཡོད་ངེས། བདག་ཀྱང་དེ་འདྲ་བའི་རིགས་ཅན་དུ་མ་སྐྱེས་པར། སྔོན་གྱི་ལས་འཕྲོ་བཟང་པོས་དལ་འབྱོར་གྱི་རྟེན་རྙེད་པ་འདི་ངོ་མཚར། གང་དག་འདིར་མི་ཉིད་ཐོབ་ཀྱང་སྐྱེ་བ་ཕྱི་མ་ལ་མི་ལུས་གཏན་ནས་མི་ཐོབ་བའི་རིགས་ཀྱང་ཆེས་མང་སྟེ། སའི་སྙིང་པོའི་མདོ་ལས། འཁོར་བར་མི་ཉིད་རྙེད་དཀའ་བའི་གང་ཟག་བཅུ་ཡོད་དེ། གང་ཞེ་ན། དགེ་བའི་རྩ་བ་མི་བསྐྱེད་པ་དང་། བསོད་ནམས་ཀྱི་ཚོགས་མི་གསོག་པ་དང་། སྡིག་པའི་གྲོགས་པོའི་རྗེས་སུ་སྤྱོད་པ་དང་། ཉོན་མོངས་པས་ཉིང་མཚམས་སྦྱོར་བ་དང་། ཚེ་ཕྱི་མའི་སྡུག་བསྔལ་ལ་མི་འཇིགས་པ་དང་། ཉོན་མོངས་པས་སེམས་འཁྲུགས་པ་དང་། ལེ་ལོ་དང་གཡེངས་པས་ཆོས་ལ་རྟག་ཏུ་གཡེལ་བ་དང་། སངས་རྒྱས་ཀྱི་བཀའ་ལ་ཞུགས་ཀྱང་རྗེས་སུ་མི་སྤྱོད་པ་དང་ལོག་པར་ལྟ་བའི་རྗེས་སུ་འཇུག་པ་དང་། ལོག་པར་ལྟ་བ་དམ་དུ་འཛིན་པའོ། །ཞེས་སོ། །དེས་ན་སྤྱོད་འཇུག་ལས། བདག་གི་སྤྱོད་པ་འདི་འདྲས་ནི། །མི་ཡི་ལུས་ཀྱང་རྙེད་མི་འགྱུར། །མི་ལུས་ཐོབ་པར་མ་གྱུར་ན། །སྡིག་པ་འབའ་ཞིག་དགེ་བ་མེད། །གང་ཚེ་དགེ་སྤྱད་སྐལ་ལྡན་ཡང་། །དེ་ཚོ་བདག་གིས་མ་བྱས་སོ། །ཞེས་གསུངས། དེའི་ཕྱིར་ཡབ་སྲས་མཇལ་བའི་མདོ་ལས། མི་ཁོམ་བརྒྱད་པོ་ཐམས་ཅད་རབ་སྤངས་ཤིང་། །དལ་བ་ཕུན་ཚོགས་རྙེད་དཀའ་ཐོབ་གྱུར་ནས། །བདེ་གཤེགས་བསྟན་ལ་དད་པ་རྙེད་གྱུར་པའི། །མཁས་པ་རྣམས་ཀྱིས་རིགས་པའི་རྣལ་འབྱོར་སྤྱོད། །ཅེས་སོ། །གཞན་འབྱོར་རྣམས་ཀྱང་རྙེད་པར་དཀའ་སྟེ། སྤྱིར་བསྐལ་པ་ལ། སངས་རྒྱས་འཇིག་རྟེན་བྱོན་པ་སྒྲོན་མེའི་བསྐལ་པ་དང་། མ་བྱོན་པ་མུན་པའི་བསྐལ་པ་གཉིས་ཡོད་དེ། དེ་ཡང་དགོངས་འདུས་ལས། སྒྲོན་མེའི་བསྐལ་པ་ནི་སྔོན་འདས་པའི་དུས་ན་བསྐལ་པ་ཆེན་པོ་མངོན་པར་དགའ་བ་ཞེས་བྱ་བ་ལ། སངས་རྒྱས་སུམ་ཁྲི་སུམ་སྟོང་བྱོན། དེའི་འོག་ཏུ་མུན་པའི་བསྐལ་པ་བརྒྱ་བྱུང་ངོ་། །དེ་ནས་བསྐལ་པ་རྫོགས་ལྡན་ཞེས་བྱ་བ་ལ་སངས་རྒྱས་བྱེ་བ་ཕྲག་བརྒྱུད་ཅུ་བྱུང་ངོ་། །དེའི་འོག་ཏུ་མཐའ་འཁོབ་ཀྱི་བསྐལ་པ་བརྒྱ་བྱུང་ངོ་། །དེའི་འོག་ཏུ་བསྐལ་པ་བཟང་ལྡན་ཞེས་བྱ་བ་ལ་སངས་རྒྱས་བྱེ་བ་ཕྲག་བརྒྱད་ཅུ་རྩ་བཞི་བྱུང་ངོ་། །དེའི་འོག་ཏུ་མུན་པའི་བསྐལ་པ་ལྔ་བརྒྱ་བྱུང་ངོ་། །དེ་ནས་བསྐལ་པ་མཐོང་ན་དགའ་བ་ལ་སངས་རྒྱས་བྱེ་བ་ཕྲག་བརྒྱད་ཅུ་བྱུང་ངོ་། །དེ་ནས་མུན་པའི་བསྐལ་པ་བདུན་བརྒྱ་བྱུང་ངོ་། །དེ་ནས་བསྐལ་པ་དགའ་བ་དང་ལྡན་པ་ལ་སངས་རྒྱས་སྟོང་ཕྲག་དྲུག་ཅུ་བྱུང་ངོ་། །དེའི་རྗེས་ལ་བསྐལ་པ་བཟང་པོ་འདི་ཉིད་བྱུང་སྟེ་སངས་རྒྱས་སྟོང་མངོན་པར་བྱུང་བའོ། །འདིའི་འོག་ཏུ་མཐའ་འཁོབ་ཀྱི་བསྐལ་པ་རིགས་ངན་དྲུག་ཏུ་འབྱུང་ངོ། །དེའི་འོག་ཏུ་བསྐལ་པ་གྲངས་ལྡན་ལ་སངས་རྒྱས་སྟོང་ཕྲག་བཅུ་འབྱུང་ངོ་། །དེའི་འོག་ཏུ་རིགས་ངན་གྱི་བསྐལ་པ་སྟོང་ཕྲག་བཅུ་འབྱུང་ངོ་། །དེ་དག་ལ་སོགས་པ་མུན་པ་དང་སྒྲོན་མེའི་བསྐལ་པ་དུ་མ་འབྱུང་བ་ལས། མུན་པའི་བསྐལ་པ་དང་ཕྲད་པའི་དུས་སུ་སངས་རྒྱས་ཀྱི་མིང་ཡང་མེད་དོ། །ཞེས་གསུངས་པས་སངས་རྒྱས་འཇིག་རྟེན་དུ་བྱོན་པ་དཀའ། སངས་རྒྱས་བྱོན་ཀྱང་སྤྱིར་ཆོས་གསུངས་པ་དཀོན་ཞིང་བྱེ་བྲག་གསང་སྔགས་རྡོ་རྗེ་ཐེག་པའི་བསྟན་པ་ནི་ཨུ་དུམྺཱ་རའི་མེ་ཏོག་བཞིན་དུ་དུས་གསུམ་ན་འབྱོན་པར་དཀའ་སྟེ། རྣམ་སྣང་མངོན་བྱང་ལས། འཇིག་རྟེན་དུ་ནི་ཀུན་མཁྱེན་དག །ཨུ་དུམྺཱ་རའི་མེ་ཏོག་བཞིན། །བརྒྱ་ལམ་ཡང་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འདི་ནི། །དེ་བས་ཀྱང་ནི་དཀོན་པ་སྟེ། །གང་གིས་སེམས་ཅན་མཉམ་མེད་དོན། །བླ་མེད་བྱེད་པར་ནུས་མ་ཡིན། །ཞེས་སོ། །ཆོས་གསུངས་ཀྱང་བསྟན་པ་ནུབ་ན་མི་ཕན་པ་ལས། ད་ནི་ལྔ་བརྒྱ་ཐ་མའི་དུས་ལ་བསླེབས་པས་མི་རྣམས་ཀྱི་བསམ་སྤྱོད་ཞན། སངས་རྒྱས་ཀྱི་བསྟན་པའི་ཉི་མའང་ནུབ་རིའི་མགོར་ལྷུང་དུ་ཉེ་བས། དམ་པའི་བཤེས་གཉེན་ཕལ་ཆེར་ནི་ཞིང་གཞན་གྱི་གདུལ་བྱ་ལ་དགོངས་ཏེ་མི་བཞུགས། རབ་ཏུ་བྱུང་བ་རྣམས་ཀྱང་གྲྭ་སའི་ཆགས་སྡང་དང་། ཟང་ཟིང་གི་འདུ་འགོད་ཙམ་ལས་སངས་རྒྱས་ཀྱི་བསྟན་པ་ཚུལ་བཞིན་དུ་ཐུགས་ལ་དགོངས་པ་དང་འཛིན་སྐྱོང་བྱེད་པ་ནི་ཉིན་མོའི་སྐར་མ་ཙམ། མཐའ་ཡི་དམག་མི་དང་ནག་ཕྱོགས་ཀླ་ཀློའི་རྒྱུ་འགྲུལ་ནི་སེར་སྤྲིན་བཞིན་དུ་གཡོ་བས། གང་ལ་བརྟགས་ཀྱང་རིང་དུ་མི་གནས་པའི་བརྡ་རྟགས་ཐམས་ཅད་མངོན་སུམ་དུ་གྱུར་པས་ཕྱིས་ནས་ཡང་ཡང་འཕྲད་པར་དཀའ། བསྟན་པ་གནས་ཀྱང་བཀའ་ལུང་དང་རྗེས་སུ་མཐུན་པའི་ཆོས་ཀྱི་གྲོགས་པོ་དང་། བླང་དོར་ཚུལ་བཞིན་དུ་འདོམས་པའི་བཤེས་གཉེན་མཚན་ཉིད་དང་ལྡན་པ་དག་མེད་ན་མི་ཕན་པས། དེ་ལྟ་བུ་ཤིན་ཏུ་རྙེད་དཀའ་བ་དང་། ཆོས་སྒྲུབ་པ་ལ་ཟས་གོས་སོགས་མཐུན་རྐྱེན་སོགས་ཀྱང་འབྱོར་དཀའ་བས། དེ་ཐམས་ཅད་སྔོན་བསགས་ཀྱི་རྒྱུ་རྐྱེན་ལ་ལྟོས་དགོས་པས་ན་ཤིན་ཏུ་རྙེད་དཀའ་བ་ཡིན་ཏེ། འཕགས་པ་སྡོང་པོ་བཀོད་པ་ལས། མི་ཁོམ་པ་བརྒྱད་ལས་ལྡོག་པའང་རྙེད་པར་དཀའ། མིར་གྱུར་པའང་རྙེད་པར་དཀའ། དལ་བ་ཕུན་སུམ་ཚོགས་པ་རྣམ་པར་དག་པའང་རྙེད་པར་དཀའ། སངས་རྒྱས་འབྱུང་བའང་རྙེད་པར་དཀའ། དབང་པོ་མ་ཚང་བ་མེད་པའང་རྙེད་པར་དཀའ། སངས་རྒྱས་ཀྱི་ཆོས་ཉན་པའང་རྙེད་པར་དཀའ། སྐྱེས་བུ་དམ་པ་དང་འགྲོགས་པའང་རྙེད་པར་དཀའ། ཡང་དག་པའི་དགེ་བའི་བཤེས་གཉེན་རྣམས་ཀྱང་རྙེད་པར་དཀའ། ཡང་དག་པའི་ཚུལ་རྗེས་སུ་བསྟན་པ་ཉེ་བར་སྒྲུབ་པ་ཡང་རྙེད་པར་དཀའ། ཡང་དག་པའི་འཚོ་བ་ཡང་རྙེད་པར་དཀའ། མིའི་འཇིག་རྟེན་ན་ཆོས་དང་རྗེས་སུ་མཐུན་པའི་ཆོས་ལ་ནན་ཏན་བྱེད་པའང་རྙེད་པར་དཀའོ། །ཞེས་དང་། གཙུག་ན་རིན་ཆེན་གྱིས་ཞུས་པའི་མདོ་ལས། འདྲེན་པ་མཐོང་བ་ཤིན་ཏུ་རྙེད་པར་དཀའ། །ཞི་བའི་ཆོས་གསུངས་ཐོས་པའང་ཤིན་ཏུ་དཀའ། །དལ་འབྱོར་མིར་སྐྱེ་རྙེད་པར་ཤིན་ཏུ་དཀའ། །ཚུལ་ཁྲིམས་དད་པའང་རྟག་ཏུ་རྙེད་པར་དཀའ། །ཞེས་སོ། །དེས་ན་ད་རེས་ཡང་དག་པའི་བླ་མ་དང་མཇལ། ཟབ་མོའི་ཆོས་ཐོས། ཐར་པའི་ལམ་དུ་བསླབ་རྒྱུ་ཡོད་པ་མི་ལུས་རིན་པོ་ཆེ་ཐོབ་པའི་དུས་འདིར། དཔེར་ན་ནོར་བུའི་གླིང་དུ་ཕྱིན་ནས་སྟོང་པར་ལོག་ན་རྒྱ་མཚོ་ཆེན་པོར་ཕྱིན་པ་དོན་མེད་པ་ལྟར། མི་ལུས་རིན་པོ་ཆེའི་གླིང་དུ་ཕྱིན་ནས། དམ་པའི་ཆོས་ཀྱི་ནོར་སྐལ་མ་བླངས། ཐར་པའི་ལམ་སྣ་མ་ཟིན་པར། ཚེ་འདིའི་བྱ་བས་གཡེངས་ན། མི་ལུས་རིན་པོ་ཆེ་ཐོབ་ཀྱང་སྟོང་ལོག་བྱས་པ་ཡིན། དམ་ཆོས་སྒྲུབ་པ་སེམས་ལ་རག་ལས་ཤིང་སེམས་དེ་དལ་འབྱོར་གྱི་ལུས་ལ་བརྟེན་པས་ན། མཐུན་པའི་རྟེན་འབྲེལ་ཚོགས་པའང་དཀའ་ལ། ནད་མེད་པ་དང་སྡུག་བསྔལ་གྱིས་མ་གཟིར་བ་དང་། གཞན་དབང་དུ་མ་གྱུར་པ་དང་། རང་དབང་ཐོབ་པའི་རྟེན་ལ་ཅི་ནས་དམ་པའི་ཆོས་ལ་འབད་དགོས་སྙམ་དུ་བསམ་པར་བྱའོ། །གཉིས་པ་རྒྱུ་རྐྱེན་གྱི་སྒོ་ནས་རྙེད་དཀའ་བར་བསམ་པ་ནི། དེ་ལྟ་བུའི་དལ་འབྱོར་ཕུན་སུམ་ཚོགས་པ་དེ་ཡང་རྒྱུ་མེད་རྐྱེན་མེད་དུ་བྱུང་བ་མ་ཡིན་ཏེ། སྔོན་བསོད་ནམས་བསགས་པའི་འབྲས་བུ་ཡིན། བསོད་ནམས་དེ་ཡང་སྦྱིན་སོགས་རྒྱ་ཆེན་པོ་དང་ལྡན་ཡང་ཚུལ་ཁྲིམས་དང་མི་ལྡན་ན། དེས་ལྷ་མི་ལ་སོགས་པའི་ལུས་ཕུན་སུམ་ཚོགས་པ་མི་ཐོབ་སྟེ། དབུ་མ་འཇུག་པ་ལས། སྐྱེས་བུ་ཚུལ་ཁྲིམས་རྐང་པ་ཆག་གྱུར་ན། །སྦྱིན་པས་ལོངས་སྤྱོད་ལྡན་ཡང་ངན་འགྲོར་ལྟུང་། །ཞེས་གསུངས་ཤིང་དེར་མ་ཟད། མང་དུ་ཐོས་པ་ལ་སོགས་པའི་ཡོན་ཏན་གྱི་ཁྱད་པར་གཞན་ཡོད་ཀྱང་མི་ཕན་ཏེ། དེ་ཉིད་ལས། མངོན་མཐོའི་རྒྱུ་ནི་ཚུལ་ཁྲིམས་ལས་གཞན་མེད། །ཅེས་དང་། ཏིང་འཛིན་རྒྱལ་པོ་ལས། ཚུལ་ཁྲིམས་འཆལ་བས་ངན་འགྲོར་དེ་འགྲོ་སྟེ། །དེ་ལ་ཐོས་པ་མང་པོས་སྐྱོབ་མི་ནུས། །ཞེས་དང་། མྱ་ངན་ལས་འདས་པའི་མདོ་ལས། དགེ་སློང་ལྷས་སྦྱིན་གྱིས་མདོ་སྡེ་བལ་གྱི་གླང་པོ་ཆེའི་ཁུར་གྱིས་ཐེག་ཚད་ཙམ་དུ་ཐོས་ཤིང་འཛིན་པར་བྱས་ཀྱང་། མི་དགེ་བའི་དབང་གིས་ངན་སོང་ལ་ལྟུང་བ་ལ་ལྟོས་ཞེས་གསུངས། གལ་ཏེ་ཚུལ་ཁྲིམས་ཡང་བསྲུང་། མཆོད་སྦྱིན་སོགས་དགེ་བ་རྒྱ་ཆེན་པོ་ལ་བརྩོན་ཀྱང་། རྐྱེན་བདུད་དང་གཤིན་རྗེའི་འཇིག་རྟེན་སོགས་སྲིད་པའི་ཕུན་ཚོགས་གཞན་དང་གཞན་དུ་བསྔོས་ན་མི་ཕན་པས་གཙོ་བོར་སྔོན་གྱི་སྨོན་ལམ་དང་འཆི་ཁའི་མཚམས་སྦྱོར་ཁོ་ན་ལ་རག་ལས་པས། དེ་ལྟ་བུའི་རྒྱུ་རྐྱེན་རྟེན་འབྲེལ་ཚོགས་པ་དཀོན་པས་འབྲས་བུ་དལ་འབྱོར་ཕུན་སུམ་ཚོགས་པ་ཐོབ་པ་ཡང་ཆེས་དཀོན། དེས་ན་ད་ལྟ་ཆོས་སྒྲུབ་པའི་རྟེན་ཕུན་སུམ་ཚོགས་པ་ཐོབ་པ་འདི་སྔོན་བསོད་ནམས་རྒྱ་ཆེན་བསགས་པའི་འབྲས་རྟགས་བསླུ་མེད་ཡིན་ཏེ། བཤེས་སྤྲིང་ལས། མཐུན་པར་གྱུར་པའི་ཡུལ་ལ་གནས་བཅས་ཤིང་། །སྐྱེས་བུ་དམ་པ་རྣམས་ལ་བརྟེན་པ་དང་། །བདག་ཉིད་ལེགས་སྨོན་སྔོན་ཡང་བསོད་ནམས་བགྱིས། །འཁོར་ལོ་ཆེན་པོ་བཞི་ནི་ཁྱོད་ལ་མངའ། །ཞེས་གསུངས། དེས་ན་ལམ་གྱི་མཐུན་རྐྱེན་ལ་འཁོར་ལོ་ཆེན་པོ་བཞི་དང་ལྡན་པའི་མི་ལུས་རིན་པོ་ཆེ་འདི་ཉིད་ཐོབ་པའི་སྐབས་སུ་མྱུར་དུ་བརྩོན་པས་ཆོས་ལ་མ་འབད་ན་ཕྱིས་རྙེད་པར་ཤིན་ཏུ་དཀའ་སྟེ། སྤྱོད་འཇུག་ལས། དལ་འབྱོར་འདི་ནི་ཤིན་ཏུ་རྙེད་པར་དཀའ། །སྐྱེས་བུའི་དོན་སྒྲུབ་ཐོབ་པར་གྱུར་བ་ལ། །གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་འདི་ཡང་དག་འབྱོར་པར་ག་ལ་འགྱུར། །ཞེས་གསུངས། གསུམ་པ་དཔེའི་སྒོ་ནས་རྙེད་དཀའ་བར་བསམ་པ་ནི། རྒྱ་མཚོ་ཆེན་པོ་རླུང་གིས་བསྐྱོད་པའི་སྟེང་ན་གཉའ་ཤིང་བུ་ག་གཅིག་པ། གཅིག་ཏུ་མི་གནས་པར་ཆུའི་རླབས་ཀྱིས་འཁྱེར་བ་དང་། ཆུའི་འོག་ན་རུས་{རུ}སྦལ་ཞར་བ་ལོ་བརྒྱ་བརྒྱ་ན་སྟེང་དུ་ལན་རེ་འོང་བ་དེ་འཛོམས་ནས། གཉའ་ཤིང་གི་བུག་པར་རུས་སྦལ་གྱི་མགྲིན་པ་ཚུད་པ་བས། ངན་སོང་ནས་མི་ལུས་ཐོབ་པ་དཀའ་བ་དང་། གྱང་ལོག་གི་ཞལ་བ་འཇམ་པོ་ལ་སྲན་མ་སྤར་གང་གཏོར་ན་གཅིག་ཙམ་ཆགས་པའང་དཀའ་བ་ལས་མི་ལུས་ཐོབ་དཀའ་བ་སོགས་མདོ་ལས་གསུངས་ཏེ། བཤེས་སྤྲིང་ལས། རྒྱ་མཚོར་ཆེར་གཡེང་གཉའ་ཤིང་བུག་པ་དང་། །རུས་སྦལ་ཕྲད་པ་བས་ཀྱང་དུད་འགྲོ་ལས། །མི་ཉིད་ཆེས་ཐོབ་དཀའ་བས་མི་དབང་གིས། །དམ་ཆོས་སྤྱོད་པས་བདེ་འབྲས་མཆིས་པར་མཛོད། །ཅེས་དང་། ཨོ་རྒྱན་ཆེན་པོས། ཡང་ཡང་རྙེད་དཀའ་ཨུ་དུམྺཱ་ར་འདྲ། །རྙེད་པ་དོན་ཆེན་ཡིན་བཞིན་ནོར་ལས་ལྷག །ད་རེས་ཕུན་ཚོགས་རྐྱེན་ཀུན་འཛོམས་དུས་འདིར། །བརྩོན་འགྲུས་དྲག་པོས་སྲིད་ལས་སྒྲོལ་བར་མཛོད། །ཅེས་དང་། ཡིད་བཞིན་རིན་པོ་ཆེའི་མཛོད་ལས། མཚོ་དབུས་གཡེང་པའི་གཉའ་ཤིང་བུ་ག་རུ། །རུས་སྦལ་མགྲིན་ཆུད་སྲིད་ཀྱིས་ངན་སོང་ལས། །མིར་གྱུར་རྙེད་དཀའ་དེ་བཞིན་རྩིག་ངོས་ཀྱི། །ཞལ་ཞལ་ལོགས་ལ་སྲན་མ་ཆགས་སྲིད་ཀྱི། །མིར་གྱུར་ན་ཡང་ཡུལ་དབུས་སྐྱེས་པ་དཀོན། །ཨུ་དུམྦཱ་ར་འཇིག་རྟེན་འབྱུང་དཀའ་བས། །དེ་བས་ཆོས་ཞུགས་ཡང་དག་ལམ་ཕྲད་དཀོན། །ཁ བ་མིག་རས་ཡུག་ཆུད་པར་དཀའ་བས་ཀྱང་། །ལམ་རྙེད་དེ་དག་ཚུལ་བཞིན་སྒྲུབ་པ་དཀོན། །མཚོ་གླིང་དག་ནས་ཡིད་བཞིན་རྙེད་པས་ཀྱང་། །ཡང་དག་བླ་མ་རྙེད་པར་དཀའ་བས་ན། །དེ་དག་བསམ་ལ་བརྩོན་པས་སྒྲུབ་འཚལ་ལོ། །ཞེས་གསུངས་པ་བཞིན་ནོ། །བཞི་པ་གྲངས་ཀྱི་ཁྱད་པར་ལ་བསམ་ནས་རྙེད་དཀའ་བ་ནི། འདུལ་བ་རྣམ་འབྱེད་ལས། དགེ་སློང་དག ངན་སོང་གི་འགྲོ་བ་ལ་ལྟོས། ཕྱི་ཕྱིར་མི་ཉིད་ཀྱི་དངོས་པོ་ཐོབ་པའང་ཤིན་ཏུ་དཀའོ། །ལོག་པར་སྟོན་པའི་སྟོན་པ་འདི་དག་ལ་ལྟོས། ཡང་དག་པའི་དགེ་བའི་བཤེས་གཉེན་དང་འཕྲད་དང་པར་རབ་ཏུ་དཀའོ། །ཚུལ་ཁྲིམས་དང་རྣམ་པར་གྲོལ་བ་ལས་ཉམས་པའི་ཚུལ་ལས་ཉམས་པ་འདི་དག་ལ་ལྟོས། སྦྱངས་པའི་ཡོན་ཏན་ལ་གནས་པ་གཅིག་ཏུ་དགེ་བའི་ཆོས་སྒྲུབ་ཅིང་ཤིང་དྲུང་ངམ་དགོན་པའི་གནས་སུ་སྤྲོ་བས་ཚེ་འདའ་བར་གྱིས་ཤིག ཅེས་དང་། མདོ་གཞན་ལས་ཀྱང་། ཤཱ་རིའི་བུས་གསོལ་པ། བཅོམ་ལྡན་འདས། དམྱལ་བའི་ཚད་ནི་ཇི་ཙམ། ཡི་དྭགས་ཀྱི་ཚད་ཇི་ཙམ། དུད་འགྲོའི་ཚད་ཇི་ཙམ། ལྷ་མ་ཡིན་གྱི་ཚད་ཇི་ཙམ། ལྷ་མི་གཉིས་ཀྱི་ཚད་ཇི་ཙམ། བཀའ་སྩལ་པ། དམྱལ་བའི་ཚད་ནི་སའི་རྡུལ་གྱི་གྲངས་ཙམ། ཡི་དྭགས་ནི་བྱེ་མའི་གྲངས་ཙམ། དུད་འགྲོ་ནི་ཆང་གི་སྦང་མ་ཙམ། ལྷ་མ་ཡིན་ནི་ཁ་བ་དང་བུ་ཡུག་ཙམ། ལྷ་མི་ནི་སེན་མོའི་སྟེང་གི་རྡུལ་ཙམ་མོ་ཞེས་དང་། དཔེ་ཆོས་ལས་ཀྱང་འདི་དང་མཐུན་པར་གསུངས་ལ། བྱང་ཆུབ་སེམས་དཔའི་སྡེ་སྣོད་ལས། ཤིང་རྟའི་འཕང་ལོ་གཅིག་གི་ཁྱོན་ན་ཐམས་ཅད་མཁྱེན་པས་གཟིགས། གཞན་གྱི་མི་མཐོང་བའི་སེམས་ཅན་ཙམ་སྟོང་གསུམ་གྱི་ལྷ་མི་ལའང་མེད་པར་གསུངས་པས་མཚོན་སེམས་ཅན་ཀྱི་ལས་སྣང་བསམ་གྱིས་མི་ཁྱབ་སྟེ། མདོར་ན་ཨོ་རྒྱན་ཆེན་པོས། རྙེད་དཀའི་དལ་འབྱོར་མི་ལུས་རིན་ཆེན་འདི། །རྒྱུ་རྐྱེན་དཔེ་གྲངས་གང་ལ་བརྟག་དཔྱད་ཀྱང་། །ངེས་པར་དཀའ་སྟེ་རྒྱལ་ཀུན་འདིར་བརྟེན་འདུས། །དེ་ཕྱིར་དལ་འབྱོར་རྙེད་དཀའ་བསམ་པ་ལ། །ཕོངས་པས་གཏེར་རྙེད་བཞིན་དུ་སྤྲོ་བ་བསྐྱེད། །ཉིན་མཚན་མི་དལ་དམ་ཆོས་སྒྲུབ་པར་བྱ། །ཞེས་དང་། ཡུལ་འཁོར་སྐྱོང་གི་ཞུས་པའི་མདོ་ལས། སངས་རྒྱས་འཇིག་རྟེན་ཕན་པ་དྲང་སྲོང་ཆེ། །བསྐལ་པ་བྱེ་བར་བརྒྱ་ལམ་འབྱུང་བར་འགྱུར། །ད་ལྟར་དལ་བ་དམ་པ་རྙེད་པ་ལ། །གལ་ཏེ་ཐར་འདོད་བག་མེད་སྤོང་བར་གྱིས། །ཞེས་དང་། ཚུལ་ཁྲིམས་ཡོངས་སུ་དག་པའི་མདོ་ལས། དགེ་སློང་དག་དེ་ཐོབ་ནས་དེ་རྙེད་དེ་རྒྱལ་བའི་བསྟན་པ་ལས་རབ་ཏུ་བྱུང་བ་ཡང་རྙེད་པར་དཀའ་ན། ཅིའི་ཕྱིར་བརྩོན་འགྲུས་དང་། བརྟུལ་བ་བརྟན་པོས་བསྒྲུབ་པར་མི་བྱེད། རྒས་པ་དང་ན་བ་དང་འཆི་བ་ནི་མངོན་པར་འོང་ཞིང་། ཐུབ་པའི་བསྟན་པ་ཡང་ནུབ་པར་འགྱུར་ན། ཕྱིས་འགྱོད་པར་འགྱུར་ཏ་རེ། ཞེས་གསུངས་པ་བཞིན་ཡང་དང་ཡང་དུ་གོམས་པར་བྱའོ། །གསུམ་པ་སངས་རྒྱས་སྒྲུབ་པའི་རྟེན་ཁྱད་པར་དུ་འཕགས་པ་ཡིན་པས་དེ་རྙེད་ན་དོན་ཆེ་བར་བསྟན་པ་ནི། རྫོགས་པ་ཆེན་པོ་སེམས་ཉིད་ངལ་གསོ་ལས། འདིར་ནི་འདྲེན་པ་མཐོང་བ་དོན་ཡོད་ཅིང་། །ཆོས་ཐོས་པ་དང་བསྒྲུབ་པའང་དོན་ཡོད་ལ། །ཚེ་འདི་དོན་ཡོད་ཕྱི་མ་འབྲས་བཅས་ཀུན། །དལ་འབྱོར་ལུས་རྙེད་ལས་བྱུང་དེ་ཡི་ཕྱིར། །རབ་ཏུ་དགའ་བ་ཡང་དང་ཡང་སྒོམས་ཤིག །ཅེས་གསུངས་པས། སྐྱེས་བུ་ཆུང་ངུའི་ལམ་མངོན་པར་མཐོ་བ་དང་། ཆེ་འབྲིང་གི་ལམ་ངེས་ལེགས་བྱང་ཆུབ་གསུམ་གང་ཡང་རུང་བའི་ལམ་གྱི་རྟེན་སངས་རྒྱས་མཇལ་ཞིང་ཆོས་ཐོས་པ་དང་ནན་ཏན་གྱིས་སྒྲུབ་པ་སོགས་འདི་ཕྱིའི་ལེགས་ཚོགས་མཐའ་དག་དལ་འབྱོར་གྱི་རྟེན་ཕུན་སུམ་ཚོགས་པ་ལས་འབྱུང་བ་ཡིན་ཏེ། དྲན་པ་ཉེར་བཞག་ཆེན་པོ་ལས། དགའ་བྱེད་ཁྱོད་ཀྱིས་ལེགས་པར་མཐོང་བ་དང་ལེགས་པར་ཐོས་པ་གང་ཡིན་དེ་ནི་དལ་བ་བསམས་པ་ལས་བྱུང་བ་ཇི་ལྟ་བ་བཞིན་དུ་མི་རྣམས་ཀྱི་བདེ་བ་དང་ལེགས་པའི་ཆོས་གང་ཡིན་པ་དེ་དག་ཐམས་ཅད་ཀྱང་འགྲུབ་པར་བལྟའོ། །ཞེས་གསུངས། གཞན་ཡང་ལུང་སྔ་མ་ལས། རྣམ་པར་མི་རྟོག་བདེན་མཐོང་ཡེ་ཤེས་ས། །ལྷ་མིའི་ནང་ནས་མིར་གྱུར་རྙེད་སླ་སྟེ། །རྡོ་རྗེ་ཐེག་པའི་ལམ་ཟབ་སྙིང་པོ་ཡང་། །མི་ཡི་ལུས་རྙེད་འབྲས་བུ་འགྲུབ་པར་སླ། །དེ་ཕྱིར་ཐེག་པ་ཆེ་ཆུང་ཆོས་ཀྱི་རྟེན། །དལ་འབྱོར་མི་ལུས་མཆོག་ཏུ་འཕགས་པར་གསུངས། །ཞེས་པ་ལྟར། ཐེག་པ་ཐམས་ཅད་ཀྱི་ལམ་གྱི་ངོ་བོ་ཟག་མེད་འཕགས་པའི་ཡེ་ཤེས་བསྐྱེད་པའི་རྟེན་ཡང་ཡིན་ཏེ། མཛོད་ལས། གསུམ་དུའོ་གོང་ན་མཐོང་ལམ་མེད། །ཅེས་གླིང་གསུམ་གྱི་མིའི་རྟེན་ཅན་དུ་གསུངས་པ་དང་། སློབ་སྤྲིང་ལས། བདེ་གཤེགས་ལམ་བསྟེན་འགྲོ་བ་འདྲེན་པར་ཆས་གྱུར་ཅིང་། །སེམས་ཀྱི་སྟོབས་ཆེན་མི་ཡི་རྙེད་པ་གང་ཡིན་པའི། །ལམ་དེ་ལྷ་དང་ཀླུ་ཡིས་མི་རྙེད་ལྷ་མིན་དང་། །མཁའ་ལྡིང་རིག་འཛིན་མིའམ་ཅི་དང་ལྟོ་འཕྱེས་མིན། །མི་ཡི་དངོས་པོ་ཤིན་ཏུ་རྙེད་དཀའ་རྙེད་གྱུར་ནས། །དོན་དུ་བརྣགས་པར་གང་ཡིན་དེ་ནི་བརྟུན་ཏེ་སྒྲུབས། །ཞེས་གསུངས། ཁྱད་པར་གསང་སྔགས་རྡོ་རྗེ་ཐེག་པའི་ལམ་གྱི་རྟེན་དུ་ཁམས་དྲུག་ལྡན་གྱི་རྡོ་རྗེའི་ལུས་འདི་འབའ་ཞིག་བསྔགས་ཏེ། འབྱུང་བཞི་ཟད་པའི་རྒྱུད་ལས། གསང་སྔགས་རྒྱལ་པོ་རྨད་བྱུང་འདི། །མི་རྣམས་ཀྱིས་ནི་བརྩོན་བྱས་ན། །ཚེ་འདི་ཉིད་ལ་འགྲུབ་པར་འགྱུར། །རྣལ་འབྱོར་དངོས་གྲུབ་གཞན་ཅི་སྨོས། །ཞེས་གསུངས། དེར་མ་ཟད། ངལ་གསོ་ལས། ལྷར་བཅས་འཇིག་རྟེན་དབུས་ན་འགྲོ་བའི་གཙོ། །ཉན་རང་སྲས་ཀྱིས་བསྐོར་བའི་མགོན་པོ་ཡིས། །འཆི་མེད་བདུད་རྩིའི་གོ་འཕང་བརྙེས་པའང་། །མི་ལུས་རིན་ཆེན་མཆོག་ལས་བྱུང་བས་ན། །ལྷ་བས་ལྷག་པའི་ལུས་ཞེས་དལ་འབྱོར་བསྔགས། །དེ་ཕྱིར་མི་ཉིད་ཐོབ་ལ་སྤྲོ་བ་བསྐྱེད། །ཅེས་གསུངས་པ་ལྟར། ཐེག་གསུམ་ལམ་གྱི་འབྲས་བུ། ཉན་རང་གི་དགྲ་བཅོམ་དང་། སངས་རྒྱས་ཀྱི་བྱང་ཆུབ་ཀྱང་དལ་འབྱོར་གྱི་རྟེན་ལས་ཐོབ་པས། ལྷ་ལས་ལྷག་པའི་ལུས་ཞེས་བསྔགས་པ་ཡིན་ཏེ། མངོན་པར་བྱང་ཆུབ་པའི་མདོ་ལས། ལྷའི་གནས་སུ་མངོན་པར་བྱང་མི་ཆུབ་པ་ནི། གནས་རིས་ལ་ང་རྒྱལ་དུ་བྱེད་པས་བདེན་པ་མངོན་པར་མི་རྟོགས་པའི་ཕྱིར་དང་། དལ་བ་དང་འབྱོར་པ་ཕུན་སུམ་ཚོགས་པ་མི་ཉིད་ཁོ་ནར་གཟིགས་ནས་སེར་སྐྱའི་གནས་སུ་གཤེགས་ཏེ་ཞེས་དང་། སྤྱོད་འཇུག་ལས། ལྷ་བས་ལྷག་པའི་ལུས་ཀྱིས་ནི། །ཞེས་གསུངས། དེས་ན་ཕོངས་པས་ནོར་བུ་རྙེད་པ་ལྟར། རང་གི་དལ་འབྱོར་ལ་ལྟ་ཞིང་འདི་རྨི་ལམ་ཡིན་ནམ། ངེས་པར་བདེན་པ་ཡིན་སྙམ་དུ་སྤྲོ་དགའ་བསྐྱེད་ཅིང་། དལ་འབྱོར་དོན་མེད་དུ་བྱེད་པའི་རྒྱུ་འཇིག་རྟེན་གྱི་བྱ་བ་ལས་བློ་ལྡོག་སྟེ་ཆོས་ལ་བརྩོན་པར་བྱ་དགོས་ཏེ། ཡིད་བཞིན་རིན་པོ་ཆེའི་མཛོད་ལས། ཚེ་འདིའི་སོ་ཚིས་གྲོགས་དང་གྲོས་འདུན་དང་། །ལོངས་སྤྱོད་ཕྱོགས་རིས་གྲུབ་མཐའ་ངན་པ་རྣམས། །དལ་འབྱོར་ཆུད་གསོན་ཕུང་ཁྲོལ་ལགས་པས་སྤང་། །ཞེས་དང་། འཇིག་རྟེན་གྱི་བྱ་བ་ཅི་བྱས་ཀྱང་ཕྱི་མ་ཕན་ཆད་ཀྱི་དོན་ཆེན་པོ་མེད་ཅིང་འཁོར་བའི་འདམ་དུ་བྱིང་བ་ལས་མེད་པར་ཐག་བཅད་ནས་ཆོས་ལ་བརྩོན་དགོས། དེ་ཡང་སོ་ནམ་ཡུན་གྱི་གཏན་སྲིད་མེད་པ་ཡུལ་ཞིང་གི་སོ་ཚིས། གྲོགས་ཡུན་གྱི་དོན་སྲིད་མེད་པ་ཁྱོ་ཤུག་དང་ཉེ་འབྲེལ། ལོངས་སྤྱོད་ཟས་ནོར་གྱི་གཉེར་པ། གྲོས་འདུན་ཚེ་འདིའི་ཆེ་ཐབས། འཁྲུགས་རྩོད་དགྲ་གཉེན་གྱི་ཕྱོགས་རིས། གྲུབ་མཐའ་མཐར་འཛིན་གྱི་དགག་སྒྲུབ་སོགས་ཡུན་དུ་མི་ཕན་པའི་བྱ་བ་ཐམས་ཅད་སྤངས་ལ། དལ་འབྱོར་ཆུད་མི་གསོན་པར་སྙིང་ནས་དམ་པའི་ཆོས་ལ་བརྩོན་དགོས། དེ་ཡང་འཇིག་རྟེན་ཁྱིམ་པ་རྣམས་ལ་དགྲ་གཉེན་གྱི་ཕྱོགས་རིས། བུ་ཚ་དང་ཁྱིམ་ཐབ་ཀྱི་གཉེར་ཁ། ཁྲལ་དང་གཙེར་བའི་སེམས་ལས། ནང་ནུབ་ལྟོ་གོས་ཁོལ་པོ། གང་བྱས་ཀྱང་མ་ཟིན། ཅི་བྱུང་ཡང་མི་འདོད། ཇི་ལྟར་བྱས་ཀྱང་མི་མགུ། ཉིན་མི་དལ་མཚན་མི་གཉིད་པར་བྱས་ཀྱང་བྲེལ་དོ་ལ་ཟིན་པའི་དུས་མེད། ཆོས་ལ་སེམས་པའི་བློ་དཀོན། གང་བྱེད་སྡིག་པ་དང་འདྲེས་པས་གཞི་ཆེ། ཁྱིམ་མཚེས་ཆགས་སྡང་གི་མེ་དཔུང་དབལ་ཚ། བུ་ཚ་ལན་ཆགས་ཀྱི་རྡོས་ཐག་ཤུགས་དྲག ཅི་བྱས་སྡུག་བསྔལ་གྱི་བསྣོན་མ་ཁུར་ཆེ། རང་སྡུག་བསྔལ་བ་བས་གཞན་ཕུན་སུམ་ཚོགས་པ་ལ་མི་བཟོད་པ་གྲངས་མང་བའི་ཕྱིར་ཆོས་ལས་རིང་བ་ཡིན་ཏེ། མདོ་ལས། ཁྱིམ་ན་ཉོན་མོངས་གནས་པ་སྟེ། །དཀར་པོའི་ཆོས་རྣམས་འཇིག་པར་བྱེད། །ཅེས་གསུངས། སྙིགས་དུས་ཀྱི་རབ་ཏུ་བྱུང་བ་རྣམས་ཀྱང་། ཁྱིམ་ཆུང་སྤངས་པའི་ཁྱིམ་ཆེན། ཚོང་དང་སོ་ནམ་གྱི་གཉེར་པ། རྟ་བོང་ཁལ་ཕྱུགས་ཀྱི་བྲན་གཡོག ནོར་རྫས་སྐྱེད་འཕེལ་གྱི་བྲེལ་དོ། །རྒས་ཀ་ཚེ་གཞུག་གི་སོ་ཚིས། ཉེ་དུ་འབྲེལ་བའི་གྲོས་འདུན། འདོད་ཡོན་སྲེད་པའི་ཞེན་ཆགས། བཟའ་བཏུང་ལོངས་སྤྱོད་ཀྱི་སྐྱིད་འདོད། གནས་དང་མཁར་ལས་ཀྱི་བྱ་གཞག ཟིན་མེད་བྲེལ་དོའི་རྣམ་གཡེང་། ཉིན་མཚན་ཆགས་སྡང་གི་ཁོར་ཡུག གོང་འོག་སེམས་འཛིན་གྱི་ཁུར་ལས། ལོ་འདོད་འཇིག་རྟེན་གྱི་སྣང་ཤེས། ཐོས་བསམ་གཟུགས་བརྙན་གྱི་ཁ་ཆོས། ཆགས་སྡང་འགྲན་སེམས་ཀྱི་མེ་དཔུང་། རྟག་ཏུ་ཟུག་རྔུའི་ཚེར་མ། ཅི་བྱས་ཚེ་འདིའི་བྱ་བ། རྟག་ཏུ་རེ་བའི་སོ་ཚིས། དཔོན་སློབ་དད་མེད་ཀྱི་འཆིང་རེས། གྲོགས་མཆེད་འགྲན་སེམས་ཀྱི་ཕྲག་དོག དྲགས་ཤོས་ཆོས་བརྒྱད་ཀྱི་རི་བོ། ཞན་ཤོས་ཐོས་མེད་ཀྱི་ཀུན་སྤྱོད། ཆོས་དང་རང་རྒྱུད་འཛོལ་བའི་ཉེས་པ་ཤིན་ཏུ་མང་བས་དམ་པའི་ལྷ་ཆོས་རབ་ཏུ་དཀའ་སྟེ། ལུང་ལས། གང་ཞིག་རབ་ཏུ་བྱུང་ཡང་ཡོན་ཏན་སྣོད་མ་གྱུར། །སྐྲ་དང་ཁ་སྤུ་བྲེགས་ཀྱང་དགེ་སྦྱོང་ཚུལ་མ་ཞུགས། །རབ་བྱུང་དེ་ནི་རབ་བྱུང་མ་ཡིན་ཁྱིམ་པའང་མིན། །ཆུ་མེད་ཁྲོན་པ་རི་མོའི་མར་མེ་བཞིན། །ཞེས་གསུངས། དེས་ན་ཆོས་ཚུལ་བཞིན་བྱེད་ན་འཇིག་རྟེན་གྱི་སྣང་བ་ལས་བློ་བཟློག་པ་གལ་ཆེ། དེས་ན་ད་རེས་ཐར་པའི་ལམ་སྣ་མ་ཟིན་ན། གསེར་གླིང་ནས་སྟོང་པར་ལོག་པ་བས་ཀྱང་མདོ་ཆུང་བས་ཟབ་མོའི་ཆོས་ཤིག་བསྒྲུབས་ཏེ་ལམ་སྣ་ཅི་ཟིན་བྱ། སྤྱོད་ལམ་དུས་དྲུག་ཐམས་ཅད་དུ་དྲན་ཤེས་ཀྱི་བྱ་རས་ཟིན་པར་བྱས་ནས། ཚོགས་དྲུག་གི་ཡུལ་ལ་མ་ཡེངས་པར་རང་གིས་རང་ལ་བསྐུལ་ཏེ། དཔེར་ན་གྲུ་ཡོད་དུས་ཆུ་བོ་ལས་སྒྲོལ་དགོས་པའམ། རྟ་ཅང་ཤེས་ཡོད་དུས་ཤུལ་རིང་གི་ལམ་ལ་བགྲོད་དགོས་པ་དང་། དྲོད་གཤེར་དང་ཆུ་ལུད་འཛོམས་དུས་ས་བོན་ཅི་ཐེབས་བྱེད་པ་དང་། དཔའ་བའི་དཔུང་ཚོགས་ཡོད་དུས་དགྲ་འདུལ་བ་དང་། གསེར་དངུལ་གྱི་གཏེར་ཁ་རྡོལ་དུས་ཅི་ལོན་བྱེད་པ་དང་། སྟོན་ཀའི་ལོ་ཐོག་སྨིན་དུས་སུ་ཅི་འདུས་བྱེད་པ་དང་། འཇིགས་སར་སྐྱེལ་མ་ཡོད་དུས་བརྩོན་པ་ཆེར་བསྐྱེད་པ་དང་། བྲན་གཡོག་གི་བྱ་གཞག་བྱེད་དུས་སུ་ལསབསྒྲུབས་པ་ལྟར། དལ་འབྱོར་གྱི་མི་ལུས་རིན་པོ་ཆེ་རྙེད་དུས་འདིར་དལ་ཁོམ་མེད་པར་ཆོས་ལ་བརྩོན་པར་བྱ་དགོས་ཏེ་མི་རྟག་པ་མྱུར་དུ་འོང་བའི་ཕྱིར། འདི་ལ་བསམས་ན་གཉིད་ལོག་པ་དང་དབུགས་འབྱུང་རྔུབ་ཙམ་ཡང་ཁོམ་གླགས་མེད་པར་ཆོས་ལ་བརྩོན་པར་རིགས་ཏེ། སྤྱོད་འཇུག་ལས། མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་ཕྱིན་ཆད་རྙེད་དཀའ་བས། །རྨོངས་པ་དུས་སུ་གཉིད་མ་ལོག །ཅེས་གསུངས། དེས་ན་ཟ་ཉལ་འགྲོ་འདུག་སོགས་སྤྱོད་ལམ་གང་གི་སྐབས་སུའང་ལེ་ལོ། སྙོམས་ལས་དང་། བཏང་སྙོམས་དང་། གཡེང་བ་དང་། འདུ་འཛི་དང་། སྒོ་གསུམ་མ་ཞི་བའི་ཆ་ལུང་མ་བསྟན་དང་བཅས་པ་རྣམས་བསྡོམས་ཏེ། བདག་དམ་པའི་ཆོས་སྒོར་ཞུགས་པ་ཡིན་པས། ཐ་མལ་པའི་སྐྱེ་བོ་གཞན་དང་མི་མཚུངས་སྙམ་དུ་དྲན་པ་དང་ཤེས་བཞིན་གྱིས་རང་གི་རྒྱུད་ལ་བརྟགས། མི་དགེ་བ་བྱུང་ན་བཤགས་སྡོམ་བྱ། མ་བྱུང་ན་དགའ་བ་བསྒོམ། སྐབས་སུ་གང་བབས་ཀྱི་མཚན་བཅས་མཚན་མེད་ཀྱི་དགེ་སྦྱོར་ལ་འདེམ་ཁ་མེད་པར། བཀྲེས་པ་ཟས་ལ་འཕྲད་པ་བཞིན་དུ་མྱུར་དུ་བརྩོན། འདུས་བྱས་ཀྱི་དགེ་བ་ཁྱད་དུ་མི་གསད། ཀུན་ཀྱང་སྒྱུ་མ་ལྟ་བུའི་ངང་ནས་ཚོགས་གཉིས་ཟུང་འབྲེལ་རྒྱལ་བ་དགྱེས་པའི་ལམ་ལ་སློབ་ཅིང་གཞན་དག་ཀྱང་དགེ་བར་བསྐུལ་ནས་ཉིན་མཚན་ཆོས་ཀྱིས་འདའ་བས། ཕྱི་མའི་ལམ་སྣ་ཟིན་ངེས་ཀྱིས་དལ་འབྱོར་དོན་ཡོད་དུ་བྱའོ། །ཀུན་མཁྱེན་བླ་མས། འགྲོ་ཉལ་འདུག་དང་ཟས་ལ་སོགས་པ་ནའང་། །ལེ་ལོ་ལ་སོགས་སྐྱོན་དྲུག་རྣམ་སྤངས་ནས། །མངོན་མཐོ་ངེས་ལེགས་དོན་རྣམས་བསྒྲུབ་པ་ན། །བཀྲེས་པ་ཟས་མཐོང་ལ་སོགས་དཔེས་འཇུག་སྟེ། །ཉིན་མཚན་ཀུན་དུ་དགེ་ལ་བརྩོན་པར་བྱ། །ཞེས་དང་། ཕ་དམ་པས། དལ་འབྱོར་མི་ལུས་རིན་ཆེན་གླིང་དང་འདྲ། །མདོ་མེད་སྟོང་ལོག་མ་བྱེད་དིང་རི་བ། །ཞེས་གསུངས་པའི་དོན་རྣམས་ཡིད་ལ་ཡང་ནས་ཡང་དུ་གོམས་པར་བྱ་ཞིང་། ངག་ཏུའང་རྗེ་བླ་མ་ཐམས་ཅད་མཁྱེན་པ་འཇམ་དཔལ་དགྱེས་པའི་ཞལ་སྔ་ནས་བསྩལ་པའི་སྔོན་འགྲོ་ཐར་ལམ་རབ་གསལ་གྱི་ཚིག་འདི་ཉིད་བརྗོད་པས་གསལ་གདབ་པར་བྱ་སྟེ། དལ་འབྱོར་རྙེད་དཀའ་ཨུ་དུ མྺཱ་ར་འདྲ། །རྙེད་ན་དོན་ཆེ་ཡིད་བཞིན་ནོར་ལས་ལྷག །འདི་འདྲ་རྙེད་པར་ད་རེས་ཙམ་ཞིག་ལ། །དོན་ཆེན་གཏན་གྱི་འདུན་མ་མི་སྒྲུབ་པར། །དོན་མེད་ཆུད་ཟར་གྱུར་པ་བདག་ཅག་ལ། །དཀོན་མཆོག་ཀུན་འདུས་བླ་མའི་ཐུགས་རྗེས་གཟིགས། །དལ་འབྱོར་དོན་ཡོད་བྱེད་པར་བྱིན་གྱིས་རློབས། །ཞེས་སྙིང་ཐག་པ་ནས་ཡང་ཡང་བརྗོད་ཅིང་གསོལ་བ་གདབ་བོ། །བཞི་པ་དེ་ལྟར་བསྒོམས་པའི་ཕན་ཡོན་འབྱོངས་ཚད་དང་བཅས་པ་བསྟན་པ་ནི། ཡིད་བཞིན་རིན་པོ་ཆེའི་མཛོད་ལས། དེ་ཡི་ཕན་ཡོན་ཚེ་འདི་བློས་ཐོངས་ཤིང་། །ཕྱི་མ་དོན་གཉེར་བརྩོན་འགྲུས་མེ་བཞིན་འབར། །དལ་ཁོམ་མེད་པར་དགེ་བས་དུས་འདའ་ཞིང་། །མྱུར་དུ་སྲིད་གསུམ་རྒྱ་མཚོའི་ཕ་རོལ་འགྲོ། །ཞེས་གསུངས་དེ་ལྟར་ཉིན་མཚན་དུ་དལ་འབྱོར་རྙེད་དཀའ་བསམ་པ་དེའི་ཕན་ཡོན་ཚད་མེད་ཀྱང་བསྡུ་ན། ཚེ་འདིའི་བྱ་བ་ཐམས་ཅད་དོན་མེད་དུ་འདུ་ཤེས་ནས་མི་འཇུག་པ། ཕྱི་མའི་འདོད་དོན་དང་དུ་ལེན་པ། ཅི་བྱེད་ལས་འབྲས་དང་མི་འགལ་བར་སྤྱོད་པ། དལ་ཁོམ་རེས་འཇོག་མེད་པར་བརྩོན་འགྲུས་མེ་བཞིན་འབར་བས་ཐོས་བསམ་བསྒོམ་པའི་དོན་ལ་བརྩོན་པ། སྡིག་པའི་གྲོགས་པོ་སྤངས་ནས་རྟག་ཏུ་དགེ་བ་ལ་སྤྱོད་པས་རང་ཉིད་དམ་པར་གནས་པ། འཁོར་བའི་འདུན་མ་བོར་ནས་དལ་བ་ཆུད་མི་གསོན་པས་འཆི་དུས་སྤྲོ་དགའ་དང་བཅས་པ། སེར་སྣའི་མདུད་པ་གྲོལ་བས་སྦྱིན་པའི་ལམ་རྒྱགས་སོག་ནས་གར་སྐྱེས་དབུལ་ཕོངས་དང་བྲལ་བ། རྟག་ཏུ་ཆོག་ཤེས་ཡོད་པས་ནོར་རྫས་ལ་ཞེན་པ་མེད་ཅིང་སྒོ་གསུམ་ཆོས་དང་མཐུན་པ། གང་ཡང་སྙིང་པོ་མེད་པས་བྱས་པ་དོན་མེད་དུ་རྟོགས་ཏེ་ཆགས་ཞེན་གྱི་འཁྲི་བ་ཆོད་པ། ཐམས་ཅད་འགྲོ་བར་ཤེས་པས་འཐབ་རྩོད་ཀྱི་ཟུག་རྔུ་མེད་ཅིང་ངང་རྒྱུད་ཁོང་ནས་དགེ་བ། ཅི་བྱས་དགོས་མེད་དུ་མཐོང་བས་མཐུན་འཇུག་གི་རྩིག་པ་འགྱེལ་ཞིང་ཆོས་བརྒྱད་ཀྱི་རི་བོ་ཞིག་པ། ཐར་པའི་ལམ་སྣ་ཟིན་པས་དམ་ཆོས་ཚུལ་བཞིན་བསྒྲུབ་ཅིང་མྱུར་དུ་སངས་རྒྱས་འགྲུབ་པར་འགྱུར་བའོ། །ཞེས་གསུངས། འབྱོངས་པའི་ཚད་ནི་དགེ་བཤེས་སྤྱན་སྔ་བ་ལྟ་བུ་ཞིག་དགོས་པ་ཡིན་ཏེ། ཁོང་མནལ་ཡེ་མ་ལོག་པར་དགེ་སྦྱོར་ཁོ་ན་མཛད་པས། དགེ་བཤེས་སྟོན་པས། བུ་ཁམས་དུབ་པ་རེ་སང་། ཁམས་ལོག་ཉེན་ཡོད་གསུངས་པས། ཁམས་སང་བ་ཡང་དེ་ཀ་ལགས་ཏེ། བདག་གིས་དལ་འབྱོར་རྙེད་དཀའ་འདི་བསམ་ཙ་ན་ཁམས་སང་ལོང་མི་འདུག་གསུངས། ཁོང་གིས་མི་གཡོ་བའི་བསྙེན་པ་དུང་ཕྱུར་དགུ་གསུངས་པ་ཡིན། མི་ཚེ་ལ་མནལ་ཡེ་མ་ལོག་པ་ཡིན་ནོ། །མདོར་ན། ད་རེས་ཀྱི་རྟེན་འདིར་ཆོས་གཤའ་མ་ཞིག་མ་འགྲུབ་ན། ཕྱིན་ཆད་འདི་འདྲའི་རྟེན་བཟང་མི་རྙེད་པར་ཁོ་ཐག་ཆོད་འདུག་བསམས་ནས། ཚེ་འདིའི་བྱ་གཞག་ཐམས་ཅད་བོར་ནས་དམ་པའི་ཆོས་ཁོ་ན་ལ་ཆིག་དྲིལ་དུ་བྱེད་ན་འབྱོངས་ཚད་ཡིན་པས། དེ་ལྟར་ངེས་པར་རྒྱུད་ལ་མ་སྐྱེས་ཀྱི་བར་དུ་བསྒོམ་པར་བྱའོ། །རྙེད་དཀའ་དོན་ཆེན་ཡིད་བཞིན་ནོར་འདྲའི་རྟེན། །སྔོན་བསགས་མཐུ་ཡིས་རྙེད་པ་ད་རེས་ཙམ། །དོན་མེད་ཚེ་འདིའི་བྱ་བས་མི་གཡེངས་པར། །དོན་ཆེན་སྙིང་པོ་ལོངས་ཤིག་ཤེས་ལྡན་རྣམས། །དལ་འབྱོར་རྙེད་དཀའ་བསམ་པའི་ཁྲིད་དོ། ། འཆི་བ་མི་རྟགས་པ་ལ་བསམ་ནས་ལེ་ལོ་སྙོམ་ལས་ལས་བློ་ལྡོག་སྟེ་ཆོས་ལ་བརྩོན་འགྲུས་བསྐྱེད་པའི་ཁྲིད།༈ གཉིས་པ་འཆི་བ་མི་རྟགས་པ་ལ་བསམ་ནས་ལེ་ལོ་སྙོམ་ལས་ལས་བློ་ལྡོག་སྟེ་ཆོས་ལ་བརྩོན་འགྲུས་བསྐྱེད་པའི་ཁྲིད་ལ་བཞི། སྣོད་བཅུད་མི་རྟག་པའི་རང་བཞིན་སྤྱིར་བསྟན་པ། གདམས་ངག་རྣམ་པ་བཅུ་གཉིས་ཀྱི་སྒོ་ནས་རྒྱས་པར་དབྱེ་བ། འཆི་བ་དགུ་ཕྲུགས་ཀྱི་ཚུལ་དུ་དྲིལ་ནས་ཉམས་སུ་ལེན་པ། དེ་ལྟར་བསྒོམ་པའི་ཕན་ཡོན་འབྱོངས་ཚད་དང་བཅས་པ་བསྟན་པའོ། །དང་པོ་ནི། ཨོ་རྒྱན་ཆེན་པོས་ཆོས་སྤྱོད་ལམ་རིམ་ལས། སྣོད་ཀྱི་འཇིག་རྟེན་མི་རྟག་མེ་ཆུས་འཇིག །བཅུད་ཀྱི་སེམས་ཅན་མི་རྟག་ལུས་སེམས་བྲལ། །དབྱར་དགུན་སྟོན་དཔྱིད་ནམ་ཟླ་དུས་མི་རྟག །སྐྱོ་ཤས་གཏིང་ནས་སྐྱེ་བར་བྱིན་གྱིས་རློབས། །ན་ནིང་ད་ལོ་ནམ་ཟླ་སྟོད་སྨད་དང་། །ཞག་དང་ཉིན་མཚན་སྐད་ཅིག་དུས་མི་རྟག །ལེགས་པར་བསམ་ན་རང་ཉིད་འཆི་བས་གཏུག །སྒྲུབ་ལ་སྙིང་རུས་ནུས་པར་བྱིན་གྱིས་རློབས། །ཞེས་དང་། རྫོགས་པ་ཆེན་པོ་སེམས་ཉིད་ངལ་གསོ་ལས། དེ་ལྟར་རྙེད་དཀའི་དལ་བ་ཐོབ་གྱུར་ཀྱང་། །སྐད་ཅིག་མི་རྟག་འཇིག་པའི་ཆོས་ཅན་ཏེ། །རྣམ་པར་བརྟགས་ན་སྙིང་པོ་འགའ་ཡང་མེད། །དབུ་བ་རྡོས་འདྲ་ཡིད་བརྟན་མི་རུང་བས། །ཉིན་མཚན་ཀུན་ཏུ་ངེས་པར་འཆི་བ་བསམ། །ཞེས་གསུངས་པས། ཕྱི་སྣོད་ཀྱི་འཇིག་རྟེན་རི་རབ་གླིང་བཞི་དང་བཅས་པའི་སྟོང་གསུམ་མི་མཇེད་ཀྱི་ཞིང་རགས་པ་སྲ་ཞིང་འཐས་པར་སྣང་བ་འདི་ཡང་མཐར་མེ་ཆུ་རླུང་གསུམ་གྱིས་འཇིག་སྟེ་ནམ་མཁའ་སྟོང་པར་འགྲོ་བའི་སྐབས་ཡོད་དེ། ཏིང་འཛིན་རྒྱལ་པོ་ལས། ནམ་ཞིག་འཇིག་རྟེན་ཁམས་འདི་འབྱུང་བ་དང་། །བྱུང་ནས་ཞིག་སྟེ་འཇིག་རྟེན་ཁམས་འདི་མེད། །ཇི་ལྟར་སྔོན་བཞིན་ཕྱིས་ཀྱང་དེ་བཞིན་ཏེ། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་གསུངས། ནང་བཅུད་ཀྱི་སེམས་ཅན་ཐམས་ཅད་ཀྱང་སྐྱེ་ཤིའི་འཁོར་ལོ་ལས་མ་འདས་ཏེ། ཚེ་རིང་པོ་བསྐལ་པར་ཐུབ་པ་རྣམས་ཀྱང་འཆི། ཐུང་བ་སྐད་ཅིག་ལས་མེད་ཀྱང་འཆི། བར་མ་ལོ་ཟླ་ཞག་ལ་སོགས་པ་ཐུབ་པ་ཐམས་ཅད་ཀྱང་འཆི་བ་ལས་མ་འདས་ཏེ། མྱང་འདས་ལས། འཇིག་རྟེན་བཅས་པ་ཐམས་ཅད་ནི། །སྐྱེ་བ་ཡོད་ན་འཆི་བ་ཡོད། །འདུས་པ་ཡོད་ན་འབྲལ་བ་ཡོད། །ཚེ་ལོ་གྲངས་མེད་ཐུབ་པ་ཡང་། །ཐ་མ་ཟད་པར་ཤེས་པར་བྱ། །ཞེས་གསུངས། ད་ལྟ་ཅུང་ཟད་གནས་པའི་སྐབས་འདིར་ཡང་། སྔོན་བསྐལ་པ་རྫོགས་ལྡན་གྱི་དུས་དང་། སུམ་ལྡན་དང་ཉིས་ལྡན་དང་ཐ་མ་རྩོད་ལྡན་གྱི་དུས་བཞིར་འགྱུར་བ་དང་མི་ཚེ་གཅིག་ལའང་བཙས་པ་བུ་ཆུང་གི་དུས་དང་བྱིས་པ་གཞོན་ནུའི་དུས་དང་དར་ལ་བབ་པའི་དུས་དང་། རྒས་ཤིང་འཁོགས་པའི་དུས་བཞིར་འགྱུར་བ་དང་། ལོ་གཅིག་ལའང་དཔྱིད་ས་བོན་རྨོ་རྐོའི་དུས་དང་། དབྱར་ལོ་འདབ་རླན་རྒྱས་ཀྱི་དུས་དང་། སྟོན་འབྲས་བུ་བཅུད་རྫོགས་ཀྱི་དུས་དང་། དགུན་ས་སྐ མ་རྡོ་འཁྱགས་ཀྱི་དུས་བཞིར་འགྱུར་བ་དང་། དེ་བཞིན་དུ་ཉིན་མཚན་སྐད་ཅིག་ཐང་ཅིག་གིས་འགྱུར་བས་ཀྱང་མི་རྟག་པར་མངོན་སུམ་གྱིས་གྲུབ་ལ། ཕྲ་བ་ཆོས་ཉིད་ཀྱི་མི་རྟག་པ་བྱིས་པ་རྣམས་ཀྱིས་དངོས་སུ་མི་མཐོང་ཡང་འཕགས་པ་རྣམས་ཀྱིས་གཟིགས་པས་མི་བསླུ་བར་གྲུབ་ལ། དོན་དུ་བེམ་ཤེས་ཀྱིས་བསྡུས་པའི་ཆོས་ཐམས་ཅད་སྐད་ཅིག་མའི་ཕྲེང་བ་ལས་མ་འདས་ཏེ། ཆེད་དུ་བརྗོད་པའི་ཚོམ་ལས། ཀྱེ་མ་འདུས་བྱས་རྣམས་མི་རྟག །སྐྱེ་ཞིང་འཇིག་པར་འགྱུར་བ་ཡིན། །སྐྱེས་ནས་འཇིག་པར་འགྱུར་བས་ན། །དེ་བས་མྱུར་དུ་ཞི་བ་བདེ། །སྐར་མ་རབ་རིབ་མར་མེ་དང་། །སྒྱུ་མ་ཟིལ་པ་ཆུ་བུར་ལྟར། །རྨི་ལམ་གློག་དང་སྤྲིན་ལྟ་བུར། །འདུས་བྱས་ཆོས་ཀུན་དེ་ལྟར་བལྟ། །ཞེས་གསུངས། གཞན་ཡང་བསགས་པ་ཐམས་ཅད་མི་རྟག་སྟེ་འཛད། མཐོན་པོར་སྣང་བ་ཐམས་ཅད་མི་རྟག་སྟེ་དམའ། དར་བ་ཐམས་ཅད་མི་རྟག་སྟེ་གུད། འདུས་པ་ཐམས་ཅད་མི་རྟག་སྟེ་འབྲལ། བཟང་པོ་ཐམས་ཅད་མི་རྟག་སྟེ་འགྱུར། བརྩེགས་པ་ཐམས་ཅད་མི་རྟག་སྟེ་འགྱེལ། སྐྱེས་པ་ཐམས་ཅད་མི་རྟག་སྟེ་འཆི་བར་འགྱུར་བས་གང་ལའང་ཡིད་བརྟན་རུང་བ་མེད་དེ། འདུལ་བ་ལུང་ལས། བསགས་པ་ཀུན་གྱི་མཐའ་འཛད་ཅིང་། །མཐོན་པོ་རྣམས་ཀྱི་མཐའ་ལྷུང་འགྱུར། །སྐྱེས་པའི་མཐའ་ནི་འཆི་བ་སྟེ། །འདུས་པའི་མཐའ་ནི་འབྲལ་བ་ཡིན། །ཞེས་དང་། མྱང་འདས་ལས། དར་བ་ཡོད་ན་རྒུད་པ་ཡོད། །འདུས་པ་ཡོད་ན་འབྲལ་བར་འགྱུར། །ལང་ཚོ་དེ་ཡང་མི་རྟག་སྟེ། །དར་བའི་མདོག་ཀྱང་ནད་ཀྱིས་འཕྲོག །རྟག་པའི་ཆོས་ནི་གང་ཡང་མེད། །ཅེས་དང་། ཚོམ་ལས། བསགས་པ་ཀུན་གྱི་མཐའ་འཛད་ཅིང་། །བསླངས་པའི་ཐ་མ་འགྱེལ་བར་འགྱུར། །འཕྲད་པའི་མཐའ་ནི་འབྲལ་བ་སྟེ། །གསོན་པོའི་མཐའ་ནི་འཆི་བར་འགྱུར། །ཞེས་དང་། ཨོ་རྒྱན་ཆེན་པོས། མདོར་ན་སྐྱེས་པའི་ཐ་མ་འཆི་བ་སྟེ། །འགྲོགས་པའི་ཐ་མ་དེ་བཞིན་འབྲལ་བ་ཡིན། །བསགས་པ་འཛད་ཅིང་འབྱོར་པ་རྒུད་པའི་རྒྱུ། །ཞེས་དང་། ཕ་དམ་པས། བཟའ་ཚང་མི་རྟག་ཚོང་དུས་མགྲོན་པོ་འདྲ། །ངན་ཤགས་འཐབ་མོ་མ་བྱེད་དིང་རི་བ། །ཞེས་གསུངས། གཉིས་པ་གདམས་ངག་རྣམ་པ་བཅུ་གཉིས་ཀྱི་སྒོ་ནས་རྒྱས་པར་དབྱེ་བ་ནི། ཀུན་མཁྱེན་བླ་མའི་དོན་ཁྲིད་ལས། ཚེ་མི་རྟག་པར་བསམ་པ་ལ་བཅུ་གཉིས་ཏེ། རྟེན་ཕུང་པོ་ལ་བསམས་ཏེ་མི་རྟག་པ། སྐྱེ་དགུའི་བདག་པོ་ལ་བསམས་ཏེ་མི་རྟག་པ། སྣོད་བཅུད་ཆགས་འཇིག་ལ་བསམས་ཏེ་མི་རྟག་པ། དམ་པའི་སྐྱེ་བོ་ལ་བསམས་ཏེ་མི་རྟག་པ། ནམ་འཆི་ངེས་མེད་ལ་བསམས་ཏེ་མི་རྟག་པ། འདུས་བྱས་ཀྱི་རང་བཞིན་ལ་བསམས་ཏེ་མི་རྟག་པ། འཆི་རྐྱེན་དྲག་པོ་ལ་བསམས་ཏེ་མི་རྟག་པ། གཅིག་པུར་འགྲོ་བ་ལ་བསམས་ཏེ་མི་རྟག་པ། དུས་ཀྱི་སྐྱེ་བོ་ལ་བསམས་ཏེ་མི་རྟག་པ། ཡིད་བརྟན་མེད་པ་ལ་བསམས་ཏེ་མི་རྟག་པ། རྐྱེན་སྣང་ངེས་མེད་ལ་བསམས་ཏེ་མི་རྟག་པ། འདུན་པ་དྲག་པོ་ལ་བསམས་ཏེ་མི་རྟག་པའོ། །ཞེས་གསུངས་པས། དང་པོ་རྟེན་ཕུང་པོ་ལ་བསམ་པ་ནི། རང་དང་གཞན་གྱི་ལུས་ཡན་ལག་དང་ཉིང་ལག་ཏུ་ཚོགས་པ་ལ་བལྟས་ཏེ། ད་ལྟ་མཐུན་པའི་ཟས་གོས་བརྟེན། རྒྱན་དང་བྱི་དོར་བྱས་ཀྱང་ནམ་ཞིག་འཆི་བའི་དུས་སུ་གཅེར་བུ་གོས་དང་བྲལ། ས་ཕྱོགས་སྟོང་པར་བསྐྱལ། ཝ་དང་བྱ་རྒོད་ཀྱིས་ཟ། ཡན་ལག་དང་ཉིང་ལག་འབྲལ། རུས་པའང་དུམ་བུ་ཐ་དད་དུ་འགྲོ་བའི་གནས་སྐབས་ཡོད་ན། དེས་ན་ད་ལྟ་ཉིད་དུ་དམ་པའི་ཆོས་ལ་སྤྱོད་དགོས་སྙམ་དུ་སྦྱོར་དངོས་རྗེས་གསུམ་ཚང་བས་ཉམས་སུ་བླང་བར་བྱ་སྟེ། སྤྱོད་འཇུག་ལས། དཀའ་བ་མང་པོས་སྒྲུབ་པ་ཡི། །ཟས་དང་གོས་ཀྱིས་བསྐྱང་བའི་ལུས། །ཁྱོད་དང་མི་འགྲོགས་བྱ་ཁྱིས་ཟ། །ཡང་ན་འབར་བའི་མེ་ཡིས་འཚིག །ཡང་ན་ཆུ་ཡི་ནང་དུ་འདྲུལ་{འདྲུག}། ཡང་ན་ས་ཡི་དོང་དུ་སྦ། །ཞེས་དང་། ལུས་འདི་ཐང་ཅིག་བརྙན་པོ་བཞིན། །ཞེས་གསུངས། གཉིས་པ་སྐྱེ་དགུའི་བདག་པོ་ལ་བསམ་པ་ནི། འདི་ལྟར་ལྷའི་དབང་པོ་ཚངས་པ་དང་བརྒྱ་བྱིན་དང་། དབང་ཕྱུག་དང་། ཁྱབ་འཇུག་དང་། དྲང་སྲོང་ཆེན་པོ་རྒྱས་པ་དང་། གྲོག་མཁར་བ་སོགས་གཟུགས་བཟང་བ། གཟི་བརྗིད་ཆེ་བ། ཚེ་བསྐལ་པར་ཐུབ་པ། རིག་པའི་ཡོན་ཏན་ཆེ་བ། སྤྱན་དང་མངོན་ཤེས་མངའ་བ། རྫུ་འཕྲུལ་དཔག་ཏུ་མེད་པ་དག་ཀྱང་འཆི་བའི་རང་བཞིན་ལས་མ་འདས་ཏེ། འདུལ་བ་ལུང་ལས། ཚངས་དང་བརྒྱ་བྱིན་དྲག་པོ་མིག་སྟོང་ཅན། །སྲེད་མེད་གྱུར་ཀྱང་མི་རྟག་ཕ་རོལ་འགྲོ། །ཉི་མ་ཟླ་བ་ཡུད་ཙམ་རོལ་བ་དང་། །ས་ཆེན་གླིང་བཞིའི་འཇིག་རྟེན་སྟོང་ལ་ལྟོས། །ཞེས་དང་། བསམ་གཏན་གྲུབ་པའི་ལྷ་དང་མིའམ་ཅི། །ལྷ་མིན་དྲང་སྲོང་དཀའ་ཐུབ་དཔལ་འབར་བ། །རྒྱུན་རིང་བསྐལ་པར་གནས་པའང་མི་རྟག་ན། །མི་རྣམས་ལྟོས་མེད་དབུ་བ་རྡོས་འདྲའི་ལུས། །སོ་སོར་འཇིག་ཅིང་འབྲལ་བ་སྨོས་ཅི་འཚལ། །ཞེས་དང་། མྱ་ངན་བསལ་བ་ལས། དྲང་སྲོང་ཆེན་པོ་ལྔ་མངོན་ཤེས། །མཁའ་ལ་རྒྱང་རིང་འགྲོ་བ་ཡང་། །གང་དུ་འཆི་མེད་སྤྱོད་ཡུལ་བའི། །ས་དེར་འགྲོ་བར་མི་ནུས་སོ། །ཞེས་གསུངས། གཞན་ཡང་གླིང་བཞིའི་དབང་པོ་འཁོར་ལོས་སྒྱུར་བ་དང་། རྒྱལ་པོ་དང་བློན་པོ་དང་། དགེ་སྦྱོང་དང་། བྲམ་ཟེ་དང་། ཁྱིམ་བདག་ལ་སོགས་པ་འགྲོ་བ་ཕལ་པ་ཇི་སྙེད་པ་ཀུན་ཀྱང་འཆི་བ་ལས་མ་འདས་ཏེ། ཆེད་དུ་བརྗོད་པའི་ཚོམ་ལས། རིན་ཆེན་བདུན་ལྡན་རྒྱལ་པོ་དང་། །གཞན་ཡང་རྒྱལ་ཕྲན་བློན་པོ་དང་། །དགེ་སྦྱོང་བྲམ་ཟེ་ཁྱིམ་བདག་སོགས། །འགྲོ་བ་འདི་ཀུན་མི་རྟག་སྟེ། །རྨི་ལམ་འགྲོ་བ་ཇི་བཞིན་ནོ། །ཞེས་གསུངས། དེས་ན་བདག་ལྟ་བུ་ཅིའི་ཕྱིར་མི་འཆི། དེ་བས་ད་ལྟ་རང་དམ་པའི་ཆོས་སྒྲུབ་སྙམ་དུ་བསམ་མོ། །གསུམ་པ་སྣོད་བཅུད་ཆགས་འཇིག་ལ་བསམ་པ་ནི། འདི་ལྟར་རི་དང་ཡུལ་གྲུས་མཚོན་པའི་སྣོད་ཀྱི་འཇིག་རྟེན་རི་རབ་གླིང་བཞི་ལྷ་གནས་དང་བཅས་པའི་བཀོད་པ་སྲ་ཞིང་འཐས་པ་ལྟར་སྣང་བ་འདི་རྣམས་ཀྱང་། ཐོག་མར་འབྱུང་བའི་བྱེར་སྡུད་དང་སེམས་ཅན་གྱི་ལས་སྣང་བཀོད་པས་རིམ་གྱིས་ཆགས་ཤིང་། མཐར་མེ་བདུན་དང་ཆུ་གཅིག་གིས་ཞིག་ནས་སྟོང་པའི་སྐབས་ཡོད་ཀྱིས། སྐྱེས་པ་དང་བུད་མེད་ཀྱིས་མཚོན་པའི་ནང་བཅུད་ཀྱི་སེམས་ཅན་འདི་ཐམས་ཅད་ཀྱང་། མ་རིག་ཀུན་རྟོག་ལས་རླུང་གི་འཕེན་པས་ཐོག་མར་མ་ཡི་མངལ་དུ་ཆགས་ཤིང་། མཐར་ཕྱི་ནང་གི་འབྱུང་བའི་ཐིམ་རིམ་གྱིས་འགགས་ནས་ཐམས་ཅད་ནམ་མཁའ་བཞིན་དུ་སྟོང་པའི་སྐབས་ཡོད་ན། བདག་ཅིའི་ཕྱིར་མི་འཆི་སྙམ་དུ་བསམ་པར་བྱ་སྟེ། བཤེས་སྤྲིང་ལས། ས་དང་ལྷུན་པོ་རྒྱ་མཚོ་ཉི་མ་བདུན། །འབར་བས་བསྲེགས་པའི་ལུས་ཅན་འདི་དག་ཀྱང་། །ཐལ་བར་ཡང་ནི་ལུས་པར་མི་འགྱུར་ན། །ཤིན་ཏུ་ཉམ་ཆུང་མི་ལྟ་སྨོས་ཅི་འཚལ། །ཞེས་དང་། ཀུན་མཁྱེན་བླ་མས། སྣོད་བཅུད་མི་རྟག་སྲིད་པ་ཆགས་འཇིག་གིས། །མེ་བདུན་ཆུ་གཅིག་རླུང་གིས་འཐོར་བའི་ཚེ། །ཁོར་ཡུག་རྒྱ་མཚོ་གླིང་དང་རིས་བསྐོར་བའི། །ལྷུན་པོ་རི་ཆེན་བཞི་ཡང་མི་རྟག་ཅིང་། །ཐམས་ཅད་ནམ་མཁའ་གཅིག་ཏུ་འགྱུར་བའི་སྐབས། །ངེས་པར་བསམ་སྟེ་སྙིང་ནས་ཆོས་མཛོད་ཅིག །ཅེས་གསུངས། བཞི་པ་དམ་པའི་སྐྱེ་བོ་ལ་བསམ་པ་ནི། འདི་ལྟར་སངས་རྒྱས་རྣམ་པར་གཟིགས་དང་། གཙུག་ཏོར་ཅན་དང་ཐམས་ཅད་སྐྱོབ་དང་། འཁོར་བ་འཇིགས་དང་གསེར་ཐུབ་དང་། འོད་སྲུང་དང་། ཤཱཀྱ་ཐུབ་པ་སྟེ་སངས་རྒྱས་རབ་བདུན་འཁོར་ཉན་ཐོས་དང་བྱང་ཆུབ་སེམས་དཔའི་ཚོགས་དང་བཅས་པ་དང་། བར་བར་དུ་བྱོན་པའི་རང་སངས་རྒྱས་ཀྱི་ཚོགས་དང་བཅས་པ་བསྒྲངས་ལས་འདས་པ་བྱོན་ཀྱང་ཐམས་ཅད་རིམ་གྱིས་གཤེགས་ཤིང་། དེ་དག་གི་བསྟན་པ་དམ་པའི་ཆོས་ཀྱང་རིམ་པར་ནུབ་ནས། ད་ལྟ་སངས་རྒྱས་ཤཱཀྱ་ཐུབ་པའི་བསྟན་པའི་ལྷག་ཞབས་ཙམ་དུ་ཐུག་ན། བདག་ཅག་ལྟ་བུ་ལས་ངན་གྱིས་བསྐྱེད་པའི་སེམས་ཅན་ཉེ་འཁོར་དང་བཅས་པ་ལ་རྟག་པ་ག་ལ་ཡོད། དེའི་ཕྱིར་ད་ལྟ་ཉིད་ནས་དམ་པའི་ཆོས་སྒྲུབ་སྙམ་དུ་བསམ་པར་བྱ་སྟེ། མི་རྟག་པའི་ཚོམ་ལས། མཚན་སྟོང་གིས་འབར་བདེ་གཤེགས་སྙིང་པོའི་སྐུ། །བསོད་ནམས་བརྒྱ་ལས་གྲུབ་པའང་མི་རྟག་ན། །དབུ་བ་རྡོལ་འདྲ་ཡིད་བརྟན་མི་རུང་བའི། །རང་གི་ལུས་འདི་ངེས་པར་ཅིས་མི་འཇིག །འགྲོ་བའི་དོན་གཤེགས་རྒྱལ་བ་ཉི་མ་འདྲ། །དམ་ཆོས་མཛོད་ཀྱི་ཟླ་བ་ནུབ་ལ་ལྟོས། །རང་གི་ཕུན་ཚོགས་འཁོར་དང་ལོངས་སྤྱོད་ཀུན། །རྟག་པ་མེད་པ་ཉིད་དུ་མཁྱེན་འཚལ་ལོ། །ཞེས་དང་། གང་དག་སངས་རྒྱས་རང་སངས་རྒྱས། །སངས་རྒྱས་རྣམས་ཀྱི་ཉན་ཐོས་ཀྱང་། །སྐུ་ལུས་འདི་ནི་སྤོང་མཛད་ན། །སྐྱེ་བོ་ཕལ་པ་སྨོས་ཅི་དགོས། །ཞེས་གསུངས། ལྔ་པ་ནམ་འཆི་ངེས་མེད་ལ་བསམ་པ་ནི། ཚེ་ལ་སྣོན་པ་ནི་མེད། འབྲིད་པ་ནི་ཡོད་ཉིན་མཚན་སྐད་ཅིག་ཐང་ཅིག་རེས་ཀྱང་འཆི་བ་ལ་ཇེ་ཉེར་སོང་སྟེ། བྱི་བ་དཀར་ནག་གི་རྩ་ཐག་གི་ཉག་མ་གཅོད་པ་དང་འདྲ། གར་འཆི་དང་འདིར་འཆི་ཆ་མེད་ལ་འཆི་བའི་རྐྱེན་མང་བས་ནམ་འཆི་ཨང་བསམ་དུ་བསྒོམ་དགོས་ཏེ། སྤྱོད་འཇུག་ལས། ཉིན་མཚན་སྡོད་པ་ཡོང་མེད་པར། །ཚེ་འདི་རྟག་ཏུ་གོད་འགྱུར་ཞིང་། །སྣོན་པ་གུད་ནས་འོང་མིན་ན། །བདག་ལྟ་འཆི་བར་ཅིས་མི་འགྱུར། །ཞེས་དང་། དཔུང་བཟང་གི་མདོར། རིའམ་ངམ་གྲོག་གཅོང་རོང་གཡང་སའམ། །ཁྱིམ་མམ་ལམ་སྲང་ཆུ་བོའི་ངོགས་ཉིད་དམ། །ས་ཡི་ཕྱོགས་གང་བདག་གི་ཐ་མའི་གནས། །གཏོལ་མ་མཆིས་པ་ཉིད་དུ་ཤེས་བྱ་སྟེ། །འཇིག་རྟེན་དགའ་བ་རྣམ་པར་ཟློག་པར་བྱ། །ཞེས་དང་། རིན་ཆེན་ཕྲེང་བ་ལས། འཆི་བའི་རྐྱེན་ནི་མང་བ་སྟེ། །གསོན་པོའི་རྐྱེན་ནི་ཉུང་ཟད་ཅིག །དེ་ཡང་འཆི་བའི་རྒྱུ་བྱེད་པས། །དེ་བས་རྟག་ཏུ་ཆོས་མཛོད་ཅིག །ཅེས་གསུངས། དྲུག་པ་འདུས་བྱས་ཀྱི་རང་བཞིན་ལ་བསམ་པ་ནི། སྤྱིར་འདུས་བྱས་ཀྱི་ཆོས་མི་རྟགསྒོས་སུ་སྐྱེས་བུའི་ཚེ་མི་རྟག ཁྱད་པར་ལུས་སེམས་ཀྱི་ཚོགས་པའི་རྟེན་མི་རྟག སྔོན་དར་ཞིང་རྒྱས་པའི་གྲོང་ཁྱེར་དང་། སྡེ་དགོན་ཞིག་རལ་སྟོང་པའི་དཔེས། རང་གི་ལུས་གྲོང་ལྟ་བུ། སེམས་མི་ལྟ་བུས་ནམ་སྟོང་པའི་སྐབས་ཡོད་དམ་སྙམ་དུ་སྙིང་ནས་སྒོམ་དགོས་ཏེ། ངལ་གསོ་ལས། འབྱུང་བཞི་འདུས་པའི་ལྡིང་ཁང་སེམས་པ་ཅན། །གཡོ་བའི་ཀུན་རྟོག་སྐྱེ་བོས་བརྒྱན་པ་ཡང་། །རྐྱེན་ལས་སྐྱེས་ཕྱིར་འདུས་བྱས་འཇིག་པའི་ཆོས། །གྲོང་ཁྱེར་རྙིང་པ་བཞིན་དུ་མི་རྟག་གིས། །མྱུར་བ་ཉིད་དུ་དམ་པའི་ཆོས་མཛོད་ཅིག །ཅེས་དང་། བཅོམ་ལྡན་འདས་ཀྱིས། འདུས་བྱས་ཐམས་ཅད་ནི་མི་རྟག་པའོ། །ཅེས་གསུངས། བདུན་པ་འཆི་རྐྱེན་དྲག་པོ་ལ་བསམ་པ་ནི། དཔེར་ན་མར་མེ་འབར་བ་ནི་མྱུར་དུ་འཛད་པས་མི་རྟག་པ་ལ་གློ་བུར་དུ་རླུང་གིས་བཏབ་ན་སྐད་ཅིག་ལ་འཆི་བ་ལྟར། སྐྱེས་ནས་འཆི་བར་ཕྱོགས་པ་ལ། གློ་བུར་དུ་ནད་གདོན་ནམ་འཚེ་བ་དྲག་པོས་དུས་མ་ཡིན་པར་འཆི་བའི་རྐྱེན་བྱུང་ན་སྐད་ཅིག་ཀྱང་གནས་དབང་མེད་པའི་ཕྱིར། བདག་ལའང་དེ་ལྟ་བུ་ནམ་འབྱུང་ཆ་མེད་སྙམ་དུ་བསམ་དགོས་ཏེ། སློབ་སྤྲིང་ལས། མར་མེའི་མེ་ལྕེ་ཤུགས་དྲག་རླུང་གིས་བསྐྱོད་པ་ལྟའི། །ཚེ་འདི་སྐད་ཅིག་གནས་པའི་གདེང་ཡང་ཡོད་མ་ཡིན། །ཞེས་གསུངས། བརྒྱད་པ་གཅིག་པུར་འགྲོ་བ་ལ་བསམ་པ་ནི། འཇིག་རྟེན་འདིའི་སྣང་བ་ནི་འདོར། ཕྱི་མའི་ལམ་དུ་ནི་ཞུག མལ་གྱི་ཐ་མར་ཉལ། ཟས་དང་གོས་ཀྱི་ཐ་མར་སྤྱོད། གཏམ་གྱི་ཐ་མལ་སྨྲ་བའི་ཚེ། འཁོར་དང་། ལོངས་སྤྱོད་དང་། ཉེ་དུ་འབྲེལ་བ་ལ་སོགས་པ་ཐམས་ཅད་བཞག་ནས་གཅིག་པུར་འགྲོ་དགོས་པའི་དུས་ཤིག་འབྱུང་སྟེ་ཤིན་ཏུ་བཟོད་པར་དཀའ། བདག་ལའང་དེ་ལྟ་བུ་ནམ་འབྱུང་ཆ་མེད་སྙམ་དུ་བསམ་སྟེ། རྒྱལ་པོ་ལ་གདམས་པའི་མདོ་ལས། དུས་ཀྱིས་བསྙེན་ཏེ་རྒྱལ་པོ་འགྲོ་འགྱུར་ན། །ལོངས་སྤྱོད་མཛའ་དང་གཉེན་བཤེས་རྗེས་མི་འབྲང་། །སྐྱེས་བུ་དག་གི་གར་གནས་གར་འགྲོ་ཡང་། །ལས་ནི་གྲིབ་མ་བཞིན་དུ་རྗེས་སུ་འབྲང་། །ཞེས་དང་། དཔལ་སྦྱིན་གྱིས་ཞུས་པའི་མདོ་ལས། འདྲེས་མའི་ལས་ཀྱིས་ལོངས་སྤྱོད་ཚོལ་བྱེད་ཅིང་། །བུ་དང་དེ་བཞིན་ཆུང་མ་གསོ་བར་བྱེད། །ཤིན་ཏུ་སྡུག་བསྔལ་གྱུར་པ་འཆི་དུས་ན། །བུ་དང་ཆུང་མ་སྐྱབས་སུ་འགྱུར་མ་ཡིན། །ཇི་ལྟར་སྣ་ཚོགས་ལས་བྱས་བླངས་པ་བཞིན། །བུ་དང་ཆུང་མ་དག་ཀྱང་འདོར་བར་འགྱུར། །བདག་ཉིད་གཅིག་པུ་སྡུག་བསྔལ་མྱོང་བར་འོང་། །དེ་དག་དེ་ཚེ་བདག་གི་སྐལ་མི་ལེན། །ཕ་མ་སྤུན་ཟླ་བུ་དང་ཆུང་མ་དང་། །བྲན་དང་ནོར་དང་རྩ་ལག་རྣམས་ཀྱི་ཚོགས། །ཤི་བའི་ཕྱི་བཞིན་དེ་དག་འགྲོ་བ་མེད། །ལས་རྣམས་རྗེས་སུ་འབྲང་ཞིང་བྱིས་པ་འགྲོ། །ཞེས་གསུངས། དགུ་པ་དུས་ཀྱིས་སྐྱེ་བོ་ལ་བསམ་པ་ནི། འདི་ལྟར་ལོ་བརྒྱའི་གོང་དུ་འདས་པའི་མི་དང་དུད་འགྲོ་ལ་སོགས་པའི་སེམས་ཅན་ཡོད་པ་ཀུན་ད་ལྟ་གཅིག་ཀྱང་མེད་ལ། ད་ལྟའི་ས་སྟེང་གི་སེམས་ཅན་ཕལ་ཆེར་ཡང་ལོ་བརྒྱའི་འོག་ཏུ་གཅིག་ཀྱང་མེད་པར་འགྱུར་ལ། བདག་ཀྱང་རང་བཞིན་དེ་ལས་མ་འདས་ཤིང་། མ་འོངས་པའི་འགྲོ་བ་རྣམས་ཀྱང་དེ་དང་འདྲ་སྟེ། དུས་ཀྱི་ལོ་ཐོག་བརྗེ་བ་ལྟར་རྙིངས་ཤིང་། སྔོན་བདག་བཙས་པའི་དུས་ཀྱི་ཡུལ་གྱི་ནང་མི། ཁྱིམ་མཚེས། གྲོགས་གཉེན་འདུན། སྒོ་ཁྱི་ར་ཕྱུགས། དགྲ་སྡང་བ། ན་ཟླ་དང་སྤུན་སྲིང་ལ་སོགས་རིམ་གྱིས་འཆི་བའི་ཚུལ་ལ་བསམ་པར་བྱ་སྟེ། ཨ་རོ་ཡེ་ཤེས་འབྱུང་གནས་ཀྱིས་མཛད་པའི་ཐེག་ཆེན་རྣལ་འབྱོར་ལས། འཇིག་རྟེན་འདི་ན་ཆེ་ཆུང་ཕྱུག་དབུལ་ཀུན། །འཆི་བདག་དབང་དུ་མ་གྱུར་གང་ཡང་མེད། །སྔ་མ་ཤི་བའི་མི་རྣམས་ཀུན་གྱིས་ཀྱང་། །རྟག་ཏུ་རེ་རེས་བུ་དང་ནོར་བསགས་ཀྱང་། །བུ་ནོར་ཕྱིར་ལུས་བདག་ལ་ཕན་པ་མེད། །རང་ཉིད་དགེ་སྡིག་གཉིས་དང་འགྲོགས་ནས་འགྲོ། །ད་ལྟ་རང་རེ་གནས་པའི་རིང་འདི་ལ། །དགེ་བཤེས་གཉེན་འདུན་མཛའ་དང་མི་མཛའ་དང་། །ན་ཚོད་མཐུན་དང་རྒན་གཞོན་ཇི་སྙེད་ཅིག །ཤི་བ་མཐོང་ཞིང་ཐོས་པ་མ་ལགས་སོ། །ད་ལྟའི་ས་སྟེང་སེམས་ཅན་འདི་ཀུན་ཀྱང་། །ལོ་བརྒྱ་ཚུན་ཆོད་གཅིག་ཀྱང་མི་ལུས་པས། །དེ་བས་རང་རེའང་འཆི་བའི་ཆོས་ཅན་ཡིན། །དེང་འཆི་སང་འཆི་སུས་ཀྱང་མི་ཤེས་ཏེ། །ཚོད་འཛིན་པའམ་མི་འཇིགས་སྦྱིན་མེད་པས། །སོང་ཕོད་དེང་སང་བདག་ནི་ཇི་འདྲར་འགྱུར། །འཆི་བའི་ཚེ་ན་ཕ་མ་བུ་ཚ་དང་། །ཕུ་ནུ་མཛའ་བཤེས་བྲན་ཁོལ་ནོར་རྣམས་ཀྱང་། །བདག་ཉིད་འཆི་བའི་ཚེ་ནི་འོང་མེད་པས། །སྡུག་བསྔལ་སྐལ་ལེན་འགའ་ཡང་མ་མཆིས་ཏེ། །བདག་ཉིད་དགེ་སྡིག་གཉིས་དང་ཆས་ནས་འགྲོ། །དེ་བས་སྐྱེ་བའང་བདག་ཉིད་གཅིག་པུར་སྐྱེ། །མཐའ་མ་འཆི་བའང་བདག་ཉིད་གཅིག་པུར་འཆི། །སྐབས་གཅིག་ཚེ་འདིར་ལས་མཐུན་ཉེ་བཞི་རྣམས། །མགྲོན་པོ་གནས་མཐུན་ཙམ་སྟེ་སོ་སོར་འགྲོ། །འོ་ན་བུ་ཚ་ཉེ་བཞིས་ཅི་ལ་ཕན། །སྐད་ཅིག་ཙམ་ཡང་འབྲལ་བར་མི་ཕོད་པའི། །བུ་དང་ཆུང་མ་ཉེ་བཞི་རྩ་ལག་དང་། །ཡུལ་འཁོར་ནོར་ཕྱུགས་ལོངས་སྤྱོད་ཀུན་བོར་ནས། །དེ་རིང་སང་ནི་བདག་ཉིད་གཅིག་པུར་འགྲོ། །ཇི་ཙམ་སྡིག་དང་བསྡོས་ནས་ནོར་བསགས་ཀྱང་། །སྡིག་པའི་རྣམ་སྨིན་རྨོངས་པ་བདག་ཉིད་ཁུར། །བསགས་པའི་ནོར་ནི་ཁོང་ཅག་བུ་ཚས་ཁྱེར། །དེ་ཕྱིར་བསགས་པའི་ནོར་གྱིས་ཅི་ཞིག་ཕན། །ཞེས་དང་། ཀུན་མཁྱེན་བླ་མས། སྔ་རབས་སྐྱེ་བོ་དཔག་མེད་འདས་གྱུར་ཅིང་། །ད་ལྟའི་ས་སྟེང་འགྲོ་བ་ཕལ་ཆེར་ཡང་། །ལོ་བརྒྱའི་ནང་དུ་ངེས་པར་མི་རྟག་ལ། །མ་འོངས་རྣམས་ཀྱང་ཚུལ་དེའི་རྗེས་སུ་འགྲོ། །རྒན་རབས་གཞོན་རབས་སྐལ་མཉམ་འདས་ལ་ལྟོས། །བདག་ཀྱང་རང་བཞིན་དེ་ལས་མ་འདས་པས། །ངེས་པར་འཆི་བ་བསམས་ལ་ཆོས་མཛོད་ཅིག །ཅེས་གསུངས། བཅུ་པ་ཡིད་བརྟན་མེད་པ་ལ་བསམ་པ་ནི། རིའི་ཟོམ། རྒྱ་མཚོའི་ནང་། བར་སྣང་གི་ཁམས་ལ་སོགས་པ་ཕྱོགས་གང་དང་འདུག་ས་ཇི་ལྟ་བུ་ནའང་འཆི་བས་མི་ཚུགས་པ་གཅིག་ཀྱང་མེད་པར། དུས་དང་དུས་མ་ཡིན་པའི་རྐྱེན་གྱིས་རང་དབང་མེད་པར་འཆི་བས་ཡིད་བརྟན་མི་རུང་བའི་ཕྱིར་ནམ་འཆི་ཆ་མེད་སྙམ་དུ་བསམ་སྟེ། འདུལ་བ་ལུང་ལས། གང་དུ་གནས་ན་འཆི་བས་མི་ཚུགས་པའི། །ས་ཕྱོགས་དེ་ནི་ཡོད་པ་མ་ཡིན་ཏེ། །བར་སྣང་ལ་མེད་རྒྱ་མཚོའི་ནང་ནའང་མེད། །རི་རབ་རྣམས་ཀྱི་གསེབ་ཏུ་ཞུགས་པའང་མེད། །ཅེས་གསུངས། བཅུ་གཅིག་པ་རྐྱེན་སྣང་ངེས་མེད་ལ་བསམ་པ་ནི། འཆི་རྐྱེན་གློ་བུར་བ་མེད་ཀྱང་ནུབ་ཀའི་གྲིབ་སོ་ལྟར་འཆི་བདག་འོང་ན་དུག་དང་། མཚོན་དང་། མེ་དང་། ཆུ་དང་། དགྲ་དང་། ནད་དང་། གདོན་དང་། ཐ་ན་ཟས་གོས་སྤྱོད་ལམ་ཉེས་པས་རྐྱེན་བྱས་ཏེ་འཆི་བ་ཤིན་ཏུ་མང་བས། བདག་ཀྱང་ནམ་འཆི་སྙམ་དུ་སྙིང་ཐག་པ་ནས་བསམ་པར་བྱ་སྟེ། སྤྱོད་འཇུག་ལས། ནད་མེད་ཉི་མ་འདི་ལྟ་བུར། །ཟས་བཅས་འཚེ་བ་མེད་ཀྱང་ནི། །ཚེ་འདི་སྐད་ཅིག་བསླུ་བ་སྟེ། །ལུས་འདི་ཐང་ཅིག་བརྙན་པོ་བཞིན། །ཞེས་དང་། སྡུད་པ་ལས། རིན་ཆེན་ཆོས་ཀྱང་དཀོན་ལ་རྟག་ཏུ་འཚེ་བའང་མང། །ཞེས་དང་། ལུང་ལས། ཁ་ཅིག་ཟས་ཀྱིས་བརྣངས་ནས་འཆི། །ལ་ལ་སྨན་གྱིས་འཆི་བའང་ཡོད། །མི་མཐུན་རྐྱེན་ལྟ་ཅི་ཞིག་སྨོས། །དེ་བས་ངེས་པ་འགའ་མེད་དོ། །ཞེས་གསུངས། བཅུ་གཉིས་པ་འདུན་པ་དྲག་པོ་ལ་བསམ་ཏེ་མི་རྟག་པ་བསྒོམ་པ་ནི། ཡུལ་གཞན་དུ་འགྲོ་ན་ད་རེས་འཆིའམ་གནས་འདིར་ཨེ་ལོག་ཆ་མེད་དོ་སྙམ་པ་དང་། ལམ་དུ་ཞུགས་པ་དང་ངལ་སྟེགས་ལ་སྡོད་ནའང་འདིར་འཆིའམ་སྙམ་པ་དང་། གང་ན་འདུག་ཀྱང་ད་རེས་འཆི་འམ་སྙམ་པ་དང་། ཟ་བ་དང་འཆག་པ་དང་། ཉལ་བ་ལ་སོགས་པའི་སྤྱོད་ལམ་ཅི་བྱེད་ཀྱང་འ ཇིག་རྟེན་འདིའི་སྤྱོད་ལམ་གྱི་ཐ་མ་ཡིན་སྙམ་དུ་འཆི་བ་འབའ་ཞིག་དུང་དུང་བསྒོམ་སྟེ། སྤྱོད་འཇུག་ལས། དེ་རིང་ཁོ་ནར་མི་འཆི་ཞེས། །བདེ་བར་འདུག་པ་རིགས་མ་ཡིན། །བདག་ནི་མེད་པར་འགྱུར་བའི་དུས། །དེ་ནི་གདོན་མི་ཟ་བར་འབྱུང་། །ཞེས་དང་། ཕྱིན་ཅི་ལོག་བཞི་སྤང་བའི་གཏམ་ལས། བྱིས་པ་རྣམས་ལ་བརྩེ་མེད་རྒན་ལ་གུས་པར་གྱུར་བ་ཅུང་ཟད་མེད། །གཞོན་ནུ་མ་ལ་ངོར་ལྟ་ཕྲ་མོ་མེད་ཅིང་ཉམ་ཐག་རྣམས་ལ་བརྩེ་མེད་པས། །དེ་ལྟར་གཞུངས་ལུགས་མེད་པའི་འཆི་བདག་གང་ཡིན་དེ་ནི་བདག་ལ་ནི། །དུས་ལ་སྡོད་ཅེས་གཞོན་ལུས་ཤ་རྒྱས་སྲ་བར་ཁྱེད་ཡིད་མ་སེམས་ཤིག །ཅེས་གསུངས་པ་བཞིན་ནོ། །གསུམ་པ་འཆི་བ་དགུ་ཕྲུགས་ཀྱི་ཚུལ་དུ་དྲིལ་ནས་ཉམས་སུ་ལེན་པ་ནི། པདྨའི་ལམ་རིམ་ཆེན་མོ་ལས། མི་རྟག་པ་བསྒོམ་པ་ལ་གསུམ་སྟེ། སྐྱེས་ཕན་ཆད་འཆི་ངེས་པར་འདུགདེ་ཀ་མི་རྟག་པའི་ངོ་བོ་ཡིན། དཔེ་སྙིང་ལ་མཚོན་ཕོག་པའི་སྐྱེས་བུ་དང་འདྲ། དེ་ཡང་ནམ་འཆི་ངེས་པ་མི་འདུག དེ་ཀ་མི་རྟག་པའི་མཚན་ཉིད་ཡིན། དཔེ་རྩྭ་ཁའི་ཟིལ་བ་དང་འདྲ། འཆི་བ་ལ་ཅིས་ཀྱང་མི་ཕན་པར་འདུག དེ་ཀ་མི་རྟག་པའི་ཁྱད་ཆོས་ཡིན། དཔེ་ཉི་མ་རྒས་པའི་གྲིབ་སོ་དང་འདྲའོ། །ཞེས་སོགས་དེ་རེ་རེ་ལའང་རྒྱུ་མཚན་གསུམ་གསུམ་གྱིས་གསུངས་པ་ལྟར། དང་པོ་འཆི་ངེས་པ་ལ་རྒྱུ་མཚན་གསུམ་ལས། དང་པོ། སྔར་སྐྱེས་ནས་མ་ཤི་བར་ཚེ་ཐར་དུ་ལུས་པ་མེད་པས་རང་ཡང་འཆི་བར་ངེས་ཏེ། མྱ་ངན་བསལ་བ་ལས། སའམ་འོན་ཏེ་མཐོ་རིས་ན། །སྐྱེས་ནས་ལ་ལ་མ་ཤི་བ། །འགའ་ཞིག་ཁྱོད་ཀྱིས་མཐོང་བའམ། །ཐོས་སམ་འོན་ཏེ་ཐེ་ཚོམ་ཟ། །ཞེས་དང་། མི་རྟག་པའི་གཏམ་ལས། བདག་བཞིན་ཁྱོད་ཀྱང་འཆི་འགྱུར་ཞེས། །མི་རྟག་གདམས་ངག་འདི་འདྲ་ལ། །ཐེ་ཚོམ་ཡང་ནི་མི་ཟ་བ། །ཀྱི་ཧུད་བདག་ནི་བྱོལ་སོང་བཞིན། །ཞེས་གསུངས། གཉིས་པ། ཚེ་ལ་སྣོན་པ་མེད་ཅིང་རྟག་ཏུ་འབྲིད་པ་ཡོད་པས་ཀྱང་ངེས་པར་འཆི་སྟེ། མི་རྟག་པའི་གཏམ་ལས། ལྟག་ཆུ་བཅད་པའི་རྫིང་བཞིན་དུ། །སྣོན་མེད་འབྲིད་པ་དང་བཅས་པས། །ཀུན་ཀྱང་འཆི་བའི་ལམ་ཞུགས་ན། །གློ་བུར་ཚེ་ལ་སུ་ཡིད་རྟོན། །ཞེས་དང་། འདུས་པ་རིན་པོ་ཆེའི་ཏོག་ལས། གྲོགས་དག་ཚེ་འདི་མྱུར་འགྲོ་སྟེ། །རི་གཟར་ཆུ་དྲག་མགྱོགས་འདྲ་ན། །བྱིས་པའི་སྐྱེ་བོས་མི་ཤེས་ཏེ། །མི་མཁས་འདོད་པའི་དྲེགས་པས་མྱོས། །ཞེས་དང་། ལྗོན་ཤིང་གི་མདོ་ལས། གསོད་སར་ཁྲིད་པའི་བརྩོན་བཞིན་དུ། །གོམ་རེ་བོར་ཞིང་འཆི་ལ་ཉེ། །ཞེས་གསུངས། གསུམ་པ། ལུས་སེམས་འདུས་བྱས་ཡིན་པས་ཀྱང་ངེས་པར་འཆི་སྟེ། མདོ་ལས། འདུས་བྱས་རྟག་པར་གྱུར་པ་ཡི། །གནས་ནི་གང་ནའང་མི་རྙེད་དེ། །འདུས་བྱས་ཐམས་ཅད་མི་རྟག་གི། །མྱ་ངན་མ་བྱེད་ཀུན་དགའ་བོ། །ཞེས་དང་། ཚོམ་ལས། ཀྱེ་མ་འདུས་བྱས་མི་རྟག་སྟེ། །སྐྱེ་ཞིང་འཇིག་པའི་ཆོས་ཅན་ཡིན། །ཞེས་དང་། རྒྱ་ཆེ་རོལ་པ་ལས། འདུ་བྱེད་བརྟན་པ་མ་ཡིན་མི་རྟག་སྟེ། །རྫ་སོ་མ་བཏང་ལྟ་བུར་འཇིག་པའི་བདག །གཞན་གྱི་རྫས་ལ་བརྙན་པོ་བྱས་དང་མཚུངས། །ཞེས་གསུངས། གཉིས་པ་ནམ་འཆི་ངེས་པ་མེད་པ་ལའང་རྒྱུ་མཚན་གསུམ་ལས། དང་པོ། ཚེ་ལ་དུས་བཏབ་མེད་པས་ནམ་འཆི་ངེས་པ་མེད་དེ། སྤྱིར་སྒྲ་མི་སྙན་མ་གཏོགས་འགྲོ་བ་གཞན་གྱི་ཚེ་ལ་ངེས་པ་མེད་ཅིང་། ཁྱད་པར་འཛམ་བུ་གླིང་པའི་ཚེ་ལ་ངེས་པ་མེད། ཡང་དགོས་སྙིགས་མ་ལྔ་བདོའི་ཚེ་ལ་ངེས་པ་མེད་དེ། མཛོད་ལས། འདི་ན་མ་ངེས་ཐ་མ་ནི། །ལོ་བཅུ་དང་པོ་དཔག་ཏུ་མེད། །ཅེས་དང་། ཆེད་དུ་བརྗོད་པའི་ཚོམ་ལས། གང་གི་ནུབ་མོ་ཁོ་ན་ནས། །མངལ་དུ་དང་པོ་འཇུག་པའི་མི། །དེ་ནི་སྣོན་མེད་གོད་འགྱུར་ཞིང་། །སོང་བ་ལས་ཀྱང་བཟློག་པ་མེད། །སྔ་དྲོ་སྐྱེ་བོ་མང་མཐོང་བ། །ཕྱི་དྲོ་ཁ་ཅིག་མཐོང་མི་འགྱུར། །ཕྱི་དྲོ་སྐྱེ་བོ་མང་མཐོང་བ། །སྔ་དྲོ་ཁ་ཅིག་མཐོང་མི་འགྱུར། །སྐྱེས་པ་བུད་མེད་མང་པོ་དག །དར་ལ་བབ་པའང་འཆི་འགྱུར་ན། །དེ་ལ་མི་འདི་གཞོན་ཞེས་ཏེ། །གསོན་པའི་གདེང་བྲོད་ཅི་ཞིག་ཡོད། །ཁ་ཅིག་མངལ་དུ་འཆི་བར་འགྱུར། །དེ་བཞིན་ཁ་ཅིག་བཙས་པའི་སར། །ཁ་ཅིག་གོག་པོ་འགོག་ཙམ་ན། །དེ་བཞིན་ཁ་ཅིག་ཡོངས་རྒྱུག་ན། །ལ་ལ་རྒན་དང་ལ་ལ་གཞོན། །ལ་ལ་དར་ལ་བབ་པའི་མི། །རིམ་གྱིས་རབ་ཏུ་འགྲོ་གྱུར་ཏེ། །འབྲས་བུ་སྨིན་པ་ལྷུང་བ་བཞིན། །ཞེས་གསུངས། གཉིས་པ། འཆི་བའི་རྐྱེན་མང་བས་ཀྱང་ནམ་འཆི་ངེས་པ་མེད་དེ། བྱང་ཆུབ་སེམས་དཔའི་སྡེ་སྣོད་ལས། གློ་བུར་གྱི་འཆི་བའི་རྒྱུ་དགུ་སྟེ། མི་འཕྲོད་པའི་ཟས་ཟ་བ་དང་། ཟས་འབྲངས་ཀྱང་མང་དུ་ཟ་བ་དང་། སྔ་མ་མ་ཞུ་བར་ཕྱི་མ་ཟ་བ་དང་། བཤང་གཅི་དུས་སུ་མི་འདོར་བར་བསྡོམ་པ་དང་། ནད་པས་སྨན་པ་དང་ནད་གཡོག་གི་ངག་མི་ཉན་པ་དང་། མཚན་མོ་འགྲོ་བས་གདོན་དང་འབྱུང་པོ་དྲག་པོས་བཏབ་པ་དང་། སྐྱུག་སྨན་བཏང་བ་མནན་ནས་མི་སྐྱུག་པ་དང་། མ་བརྟགས་པའི་དྲག་ཤུལ་སྤྱོད་པ་དང་། བག་མེད་པར་བུད་མེད་ལ་འཁྲིག་པ་སྤྱོད་པའོ། །ཞེས་གསུངས་པས་མཚོན་ཚད་མེད་དོ། ཀུན་མཁྱེན་བླ་མས། ཁྱད་པར་མི་ཡི་འཇིག་རྟེན་འཚེ་བ་མང་། །ནད་གདོན་གནོད་པ་དུ་མའི་གཞིར་གྱུར་ཅིང་། །མཚོན་དང་མེ་དང་གཡང་ས་གཅན་གཟན་དུག །རྒྱལ་པོ་དགྲ་དང་ཆོམ་རྐུན་ལ་སོགས་ཀྱིས། །འཚོ་བའི་སྲོག་འཇོམས་ཕུན་ཚོགས་འཇིག་པར་བྱེད། །ཅེས་དང་། བཤེས་སྤྲིང་ལས། ཚེ་ནི་གནོད་མང་རླུང་གིས་བཏབ་པ་ཡི། །ཆུ་ཡི་ཆུ་བུར་བས་ཀྱང་མི་རྟག་ན། །དབུགས་དབྱུང་དབུགས་རྔུབ་གཉིད་ཀྱིས་གང་ལོག་པ། །སད་ཁོམ་གང་ལགས་དེ་ནི་ངོ་མཚར་ཆེ། །ཞེས་གསུངས། གསུམ་པ། ལུས་ཉམ་ཆུང་ཞིང་སྙིང་པོ་མེད་པས་ཀྱང་ནམ་འཇིག་ཆ་མེད་དེ། སྤྱོད་འཇུག་ལས། ཐོག་མར་པགས་པའི་རིམ་པ་འདི། །རང་གི་བློ་ཡིས་ཐ་དད་དབྱེ། །ཤ་ཡང་རུས་པའི་དྲྭ་བ་ལས། །ཤེས་རབ་མཚོན་གྱིས་གུད་དུ་ཕྱེད། །རུས་པ་རྣམས་ཀྱང་ཕྱེ་བྱས་ནས། །རྐང་གི་བར་དུ་བལྟ་བྱ་ཞིང་། །འདི་ལ་སྙིང་པོ་ཅི་ཡོད་ཅེས། །བདག་ཉིད་ཀྱིས་ནི་བལྟ་བར་གྱིས། །ཞེས་དང་། ཨོ་རྒྱན་ཆེན་པོས། ཅི་སྟེ་མཚན་དང་དཔེ་བྱད་འབར་བའི་སྐུ། །རྡོ་རྗེ་ཅན་ཡང་རྟག་པར་མི་འགྱུར་ན། །མི་གཙང་རྫས་ལས་གྲུབ་པའི་འདམ་གཟུགས་དག །མི་རྟག་མྱུར་དུ་འཇིག་པ་སྨོས་ཅི་དགོས། །ཞེས་གསུངས། མདོར་ན་མཁས་མཆོག་དཔའ་བོས། འཆི་བདག་སུ་དང་མི་བཤེས་པ། །གློ་བུར་དག་ཏུ་འབབ་འགྱུར་བས། །སང་དག་བྱ་ཞེས་མ་སེམས་པར། །དམ་པའི་ཆོས་ལ་བསྣུར་ཏེ་མཛོད། །འདི་སང་དེང་འདི་མི་བྱ་ཞེས། །བྱ་བ་མི་ལ་བཟང་པོ་མིན། །ནམ་ཞིག་ཁྱོད་ནི་མེད་གྱུར་པའི། །སང་དེ་གདོན་མི་ཟ་བར་འོང་། །ཞེས་གསུངས་པ་བཞིན་ནོ། །གསུམ་པ་འཆི་བ་ལ་ཅིས་ཀྱང་མི་ཕན་པ་ལ་རྒྱུ་མཚན་གསུམ་ལས། དང་པོ། བསགས་པའི་ནོར་གྱིས་མི་ཕན་པ་ནི། ནོར་གྱི་མཆོག་ལྷ་རྫས་ཀྱི་རིན་པོ་ཆེ་སྣ་བདུན། འཁོར་ལོས་སྒྱུར་བའི་དཔལ་འབྱོར། རྣམ་ཐོས་སྲས་ཀྱི་བང་མཛོད་ལྟ་བུ་ཡོད་ཀྱང་ཐམས་ཅད་བཞག་ནས་འགྲོ་དགོས་ཏེ། འདུལ་བ་ལུང་ལས། ལྗོན་ཤིང་རྡིབ་པར་གྱུར་པའི་ཚེ། །ཡལ་ག་ལོ་མས་ཅི་ཞིག་བྱ། །དེ་བཞིན་སྐྱེས་བུ་འཆི་བའི་ཚེ། །ཡོངས་སུ་བཟུང་བས་ཅི་ཞིག་བྱ། །ཞེས་གསུངས། གཉིས་པ་འབྲེལ་བའི་གཉེན་གྱིས་མི་ཕན་པ་ནི། གྲོགས་འཁོར་ལོས་སྒྱུར་བའི་རྒྱལ་པོ་རྙེད་ཀྱང་། ཆུང་མ་ལྷའི་བུ་མོ་ལྔ་བརྒྱས་བསྐོར་ཀྱང་། བུ་ཚ་ལྷའི་ཁྱེའུ་སྟོང་གིས་རྩེ་ཡང་། ཚ་ཞང་ལྷའི་དབང་པོ་ཡོད་ཀྱང་། སྲིད་སྡེ་ལྷ་མིན་གྱི་དམག་མི་ཡོད་ཀྱང་། རྒྱལ་འབངས་གླིང་བཞི་ལྷ་ཡུལ་ཡོད་ཀྱང་། ཕ་ཁུ་ཚངས་པ་བརྒྱ་བྱིན་ཡོད་ཀྱང་། མཛའ་གྲོགས་རྒྱལ་ཆེན་རིགས་བཞི་ཡོད་ཀྱང་། བྲན་གཡོག་ལྷ་བྲན་སྟོང་ཕྲག་ཡོད་ཀྱང་། ཕོ་བྲང་རྣམ་པར་རྒྱལ་བའི་ཁང་བཟང་ཡོད་ཀྱང་། དགོན་གཞིས་ལྷའི་གྲོང་ཁྱེར་ལྟ་བུ་ཡོད་ཀྱང་། གྲྭ་འཁོར་ནམ་མཁའི་སྐར་ཙམ་ཡོད་ཀྱང་། ཡོན་བདག་ཆུ་ཁའི་བྱེ་མ་རྙེད་ཡོད་ཀྱང་། དེ་དག་གིས་སྲོག་བཟུང་བའམ། ཕན་གདགས་པའམ། ཚེ་མཐུད་པའམ། ར་མདའ་སྙེགས་པའམ། གྲོགས་བྱར་མེད་ཅིང་། གབ་ས་དང་འཁྲས་ས་ཅུང་ཟད་ཀྱང་མེད་པར་གཅིག་པུར་མར་གྱི་གསེབ་ནས་སྤུ་བཏོན་པ་ལྟར་བར་དོའི་འཕྲང་ལ་སུ་དང་ཡང་འགྲོགས་སུ་མེད་པར་འགྲོ་དགོས་ཏེ། འཇམ་དཔལ་རྣམ་པར་རོལ་པ་ལས། ཕ་མ་ཁྱོད་ཀྱི་སྐྱབས་མ་ཡིན། །མཛའ་བཤེས་རྩ་ལག་རྣམས་ཀྱང་མིན། །དེ་དག་གིས་ནི་ཁྱོད་བོར་ནས། །རང་ཉིད་གཅིག་པུ་ཕྱི་མར་འགྲོ། །ཞེས་དང་། རྣལ་འབྱོར་གྱི་དབང་ཕྱུག་ཤྲཱི་ཛ་ག་ཏ་མི་ཏྲས། ལྷ་ཅིག་ཇི་ལྟར་ཁྱེད་འབྱོར་ཀྱང་། །གཤེགས་ནས་འཇིག་རྟེན་གཞན་བཞུད་ཚེ། །མྱ་ངན་ཐང་ལ་དགྲས་བཅོམ་ལྟར། །གཅིག་པུ་སྲས་མེད་བཙུན་མོ་མིན། །ན་བཟའ་མ་མཆིས་བཤོས་མ་མཆིས། །རྒྱལ་སྲིད་མ་མཆིས་ཁབ་མ་མཆིས། །དཔག་མེད་མཐུ་དཔུང་མངའ་ལགས་ཀྱང་། །གཟིགས་སུ་མ་མཆིས་གསན་མ་མཆིས། །གཅིག་ཙམ་ཉིད་ཀྱང་ཕྱི་ཐག་གིས། །རྗེས་སུ་འབྲང་བའང་མི་མངའོ། །མདོར་ན་ཉིད་ཀྱི་མཚན་ཙམ་ཡང་། །དེ་ཚེ་མེད་ན་གཞན་ཅི་སྨོས། །ཞེས་དང་། རྒྱལ་སྲས་ཞི་བ་ལྷས། བདག་ཉིད་མལ་ན་གནས་བཞིན་དུ། །གཉེན་བཤེས་ཀུན་གྱིས་མཐའ་བསྐོར་ཀྱང་། །སྲོག་འཆད་པ་ཡི་ཚོར་བ་དག །བདག་ཉིད་གཅིག་པུས་མྱོང་བར་བྱེད། །ཅེས་གསུངས། གསུམ་པ། ལྷན་ཅིག་སྐྱེས་པའི་ལུས་ཀྱིས་ཀྱང་མི་ཕན་ཏེ། ཐེག་ཆེན་རྣལ་འབྱོར་ལས། བདག་ལ་ཤིན་ཏུ་ཕངས་{འཕངས}པའི་ལུས་འདི་ཡང་། །དེ་རིང་སང་ནི་རྫ་ཆག་བཞིན་དུ་འདོར། །ལྷན་ཅིག་སྐྱེས་པའི་ཤ་རུས་གཉིས་དང་འབྲལ། །དབང་མེད་བདག་ནི་གཅིག་པུར་འཁྱམས་ནས་ནི། །ལས་ཀྱི་དབང་གིས་གང་དུ་སྐྱེ་འགྱུར་ཨང་། །དེ་བས་ལུས་ཀྱི་ཕྱིར་ན་སྡིག་མི་བྱ། །ལུས་འདི་ས་སྟེང་འདྲ་སྟེ་ཆོག་མི་ཤེས། །མི་གཙང་ལས་བྱུང་མི་གཙང་ཕུང་པོ་ཡིན། །རྒ་ན་འཆི་སོགས་སྡུག་བསྔལ་ཀུན་གྱི་གནས། །ཤི་ནས་ལུས་བོར་ས་ཡི་ཕྱོགས་ཙམ་བཙོག །བྱ་དང་ཁྱི་སྤྱང་ལ་སོགས་ཀུན་གྱི་ཟས། །བསྙེན་བཀུར་འབད་ཀྱང་འཆི་བདག་སྲིན་པོས་འཕྲོག །མཁས་པས་སྨོད་ཅིང་བླུན་པོ་ཆགས་པའི་གནས། །དེ་བས་ལུས་ལ་མཁས་པ་སུ་ཞིག་ཆགས། །ལུས་ཀྱི་ཕྱིར་ནི་རང་ཡང་སྡུག་མི་བྱ། །འདི་ལ་གླ་རྔན་གོས་ཟས་བྱིན་ནས་ཀྱང་། །ཡུན་གྱི་ཕན་ཕྱིར་དགེ་བ་བྱེད་དུ་ཆུག །ཅེས་དང་། བཤེས་སྤྲིང་ལས། ལུས་མཐའ་ཐལ་བ་མཐར་སྐམ་མཐར་འགྲུལ་ཞིང་། །ཐ་མར་མི་གཙང་སྙིང་པོ་མ་མཆིས་པ། །རྣམ་པར་འཇིག་དེངས་མྱགས་པར་འགྱུར་བ་སྟེ། །སོ་སོར་འགྱེས་ཆོས་ཅན་དུ་མཁྱེན་འཚལ་ལོ། །ཞེས་གསུངས། གཞན་ཡང་གཙོ་བོའི་གྲོས་ཀྱིས་མི་བསྟོངས་པས། གཏམ་དང་ཤགས་ཀྱིས་ལན་གདབ་ས་མེད། དཔའ་བོའི་རྩལ་གྱིས་མི་བསྟོངས་པས་འཐབ་ས་མེད། མགྱོགས་པའི་བང་གིས་མི་བསྟོངས་པས་འབྲོས་ས་མེད། མཚར་མོའི་བྱད་ཀྱིས་མི་བསྟོངས་པས་བསླུ་ས་མེད། དྲག་པོའི་ལས་ཀྱིས་མི་བསྟོངས་པས་རྩོམ་ས་མེད། ངན་པའི་གཡོ་སྒྱུས་མི་བསྟོངས་པས་འབྱོལ་ས་མེད་པར་གཅིག་པུར་འགྲོ་དགོས་ཏེ། འདུལ་བ་ལུང་ལས། འདི་ན་མཐུ་ཆེན་གནས་མཐོ་བར། །གནས་པའི་ལྷ་ཚེ་རིང་པོ་ཡང་། །ཚེ་ཟད་ཉམས་པར་འགྱུར་བ་ལ། །འཆི་ལས་དེ་རིང་སུ་ཞིག་ཐར། །དཔའ་བརྟུལ་གྱིས་ཀྱང་སྐྱོབ་ནུས་མིན། །རྒྱལ་པོ་སྡོམ་བརྩོན་དཀའ་ཐུབ་དང་། །ལས་དང་བརྩོན་འགྲུས་བརྟུལ་ཕོད་དང་། །འཁོར་ཚོགས་རྒྱ་ཆེན་བློ་གྲོས་ཀྱིས། །འཆི་ལས་ཇི་ལྟར་ཐར་མི་ནུས། །ཞེས་སོ། །མཐུ་སྟོབས་དཔུང་གཉེན་གྱིས་ཀྱང་མི་བསྟོངས་ཏེ། ཚངས་པ་དང་། བརྒྱ་བྱིན་དང་། དབང་ཕྱུག་དང་། ཁྱབ་འཇུག་དང་། དྲང་སྲོང་དང་། སྲེད་མེད་ཀྱི་བུ་ལ་སོགས་པ་མཐུ་སྟོབས་ཅན་རྣམས་ཀྱང་འཆི་བ་ལས་མ་འདས། གནོད་སྦྱིན་དང་། སྲིན་པོ་དང་། བདུད་དང་ཀླུ་ལ་སོགས་པ་རྣམས་ཀྱིས་མི་ཐར། སྨན་དང་གཙུག་ལག་དང་མོ་པྲ་ལ་སོགས་པའི་ཐབས་ཀྱིས་མི་ཐར། གསང་སྔགས་དང་། རིག་སྔགས་དང་། རྫུ་འཕྲུལ་དང་། མངོན་ཤེས་ལ་སོགས་པའི་ནུས་པས་མི་བསྟོངས། ཕོ་ལྷ་དང་ཆོས་སྐྱོང་དང་མཁའ་འགྲོ་ལ་སོགས་པའི་སྲུང་མས་མི་སྐྱོབ། བཅུད་ལེན་དང་། རྫས་དང་། སྨན་གྱི་ནུས་པས་མི་ཕན་པར་འཆི་སྟེ། དེ་ཉིད་ལས། མཐུ་ཆེན་ནོར་ལྡན་གྲགས་འབར་བ། །ཚངས་དང་བརྒྱ་བྱིན་ཁྱབ་འཇུག་དང་། །མུན་བྱེད་སྐྲ་ངན་སྐྱ་སེང་བུ། །དེས་ཀྱང་འཆི་བ་ཟློག་མི་ནུས། །མཐར་བྱེད་པ་ལ་སྨན་དག་དང་། །རིག་སྔགས་ཀུན་དང་དཔུང་དག་དང་། །ལྷ་དང་སྲུང་མ་རྟེན་འབྲེལ་དང་། །ནོར་དང་ཉེ་དུས་སྐྱོབ་མི་ནུས། །ཞེས་དང་། ཨོ་རྒྱན་ཆེན་པོས། གཅེས་དགུ་བཞག་ནས་འགྲོ་ལ་ཐུག་ཙ་ན། །འཆི་བ་མ་བཤོལ་ཚེ་ལ་གདན་འདྲེན་བྱུང་། །སྨན་པའི་རྒྱལ་པོ་དངོས་སུ་བྱོན་གྱུར་ཀྱང་། །ཚེ་ཡི་འཕེན་ཟད་སྲོག་ལ་མཐུད་མི་ཤེས། །མར་གྱི་དཀྱིལ་ནས་སྤུ་བཏོན་བཞིན་དུ་འགྲོ། །ཞེས་གསུངས། ཟས་གོས་ལོངས་སྤྱོད་ཀྱིས་མི་བསྟོངས་ཏེ། ལྷའི་བདུད་རྩིའི་ཟིལ་མངར། པཉྩ་ལི་ཀའི་གོས་མཆོག མིའི་ཟས་མཆོག་རོ་བརྒྱ། དར་ཟབ་རས་མཆོག་སྣ་ཚོགས་ཏེ། མདོར་ན་གཟུགས་མཛེས་སྒྲ་སྙན། དྲི་ཞིམ། རོ་བྲོ། རེག་བྱ་འཇམ་པོ་སྣ་ཚོགས་ཀྱིས་མི་བསྟོངས་པར་ཚེ་ཡི་དུས་བྱེད་པ་ཉིད། རྒྱ་ཆེར་རོལ་པ་ལས། རྟག་ཏུ་གཟུགས་སྡུག་མཆོག་དང་སྒྲ་སྙན་དང་། །དྲི་ཞིམ་རོ་མཆོག་རེག་ན་བདེ་བྱེད་དང་། །དུས་ངན་རྙི་ལ་འགྲོ་བ་འདི་དག་ཐོགས། དཔེར་ན་རྔོན་པའི་རྙི་ལ་སྤྲེའུ་ཐོགས་བཞིན། །འདོད་པའི་ཡོན་ཏན་མྱ་ངན་གནོད་པ་མང་། །འཇིག་བཅས་རྟག་ཏུ་དགྲ་བྱེད་ཉོན་མོངས་བཅས། རལ་གྲིའི་སོ་ལ་དུག་གི་ལོ་མ་འདྲ། །ཞེས་དང་། རྒྱལ་པོ་ལ་གདམས་པའི་མདོ་ལས། རྒྱལ་པོ་ཆེན་པོ་འདི་ལྟ་སྟེ་དཔེར་ན། བདག་གི་ཕྱོགས་བཞི་ནས་རི་ཆེན་པོ་སྲ་བ་བརྟན་པ་སྙིང་པོ་དང་ལྡན་པ་མ་གས་པ། མ་ཞིག་པ་ཤིན་ཏུ་མཁྲེགས་པ་ལྷུན་མཐོ་བ་ཞིག་བཟློག་སྟེ། རྡིབ་ནས་དུས་གཅིག་ལ་རྩྭ་དང་ནགས་ཚལ་དང་སྲོག་ཆགས་ཐམས་ཅད་ཕྱེ་མར་འཐག་ཅིང་འོང་ན། དེ་དག་ལ་མགྱོགས་པས་འབྲོས་པའམ་ནོར་གྱིས་བསླུ་བའམ་སྟོབས་ཀྱིས་བཟློག་པའམ་ཐབས་ཀྱིས་ཐར་བའམ་སྨན་དང་སྔགས་དང་རྫས་ཀྱི་ནུས་པས་བཟློག་པའི་གོ་སྐབས་མེད་དོ། །རྒྱལ་པོ་ཆེན་པོ་དེ་བཞིན་དུ་སྐྱེ་བ་དང་རྒ་བ་དང་ན་བ་དང་འཆི་བའི་འཇིགས་པ་ཆེན་པོ་འདི་དག་འོང་སྟེ། དེ་དག་ལ་མགྱོགས་པར་འབྲོས་པའམ། ནོར་དང་སྟོབས་ལ་སོགས་པས་བཟློག་པའི་གོ་སྐབས་མེད་དོ། །དེ་ཡང་རྒས་པས་ནི་དར་ལ་བབ་པ་འཇོམས་ཤིང་འོང་ངོ་། །ན་བས་ནི་ནད་མེད་པའི་བདེ་བ་འཇོམས་ཤིང་འོང་ངོ་། །རྒུད་པས་ནི་ཕུན་སུམ་ཚོགས་པ་ཐམས་ཅད་འཇོམས་ཤིང་འོང་ངོ་། །འཆི་བས་ནི་ཚེ་དང་སྲོག་འཇོམས་ཤིང་འོང་སྟེ། ཅིས་ཀྱང་བཟློག་པར་མེད་དོ། །ཞེས་གསུངས། གཞན་ཡང་དཔེ་དོན་སྣ་ཚོགས་ལ་བསམ་དགོས་ཏེ། ཉང་གཏེར་བླ་མའི་དམར་ཁྲིད་མཚོ་རྒྱལ་གྱི་ཞུས་ལན་ལས། ཨོ་རྒྱན་པདྨའི་ཞལ་ནས། མཚོ་རྒྱལ་ཉོན་དང་། མི་འཆི་བ་མ་དྲན་པ་རྣམས་ཀྱིས་ཆོས་ཡེ་མི་འོང་། འཆི་བ་རྗེས་སུ་དྲན་པ་སྒོམ་དགོས་པར་འདུག འཆི་བ་མ་དྲན་པས་འཇིག་རྟེན་འདི་ལ་མངོན་པར་ཞེན་པ་ཡིན། དེ་ལ་དང་པོ་ཕྱིའི་མི་རྟག་པ་ནི། ཡུལ་གང་ན་གཅེས་པའི་མི་ཞིག་ཤི་བ་ལ་བལྟས་པས། མི་ན་བའི་གནས་སྐབས་ནས། ན་བའི་གནས་སྐབས་ཇི་ལྟར་སོང་། མི་ན་བའི་དུས་མདངས་ཡལ་ལེ་ཡོད་པ་ལས་ན་ཙམ་ན་སོ་དྲེག་{དྲག}མཆུ་དྲེག་{དྲགས}ཆགས་ཤིང་མདངས་ཡལ་ནས་ནག་ཆོམ་གྱིས་སོང་། དེ་ཚུར་བདག་ལ་སྦྱར་ཏེ་བདག་ལའང་འདི་ལྟ་བུ་འོང་ངེས། དེ་ནས་གསོན་པའི་གནས་སྐབས་ན། ཀུན་ལ་གཅེས་པར་ཡོད་པས། ཉེ་འབྲེལ་ཐམས་ཅད་ཀྱིས་བསྐོར་ཞིང་ཁ་ཟས་སྟེར་ནས་གནས་པ་ལས། ཤི་ནས་སུ་ལ་ཡང་མི་མཁོ། གཟུགས་ཀྱི་ཕུང་པོ་དེ་ཕྱིར་མྱུར་དུ་ཐོན་ན་དགའ། དེ་ལྟར་ཤི་བ་དེ་ལྟ་ཞིང་བདག་ཀྱང་འདི་ལས་མ་འདས་པ་ཡིན་སྙམ་དུ་བསམ། དེ་ནས་རོ་དེ་ཕྱིར་ཕྱུང་ནས་དུར་ཁྲོད་དུ་བསྐྱལ་བའི་གནས་སྐབས་ན་ཡང་ཕུང་པོ་ཞིག་པ་དང་རུལ་བ་དང་མ་རུལ་བའི་རྣམ་པ་ལ་སོགས་པ་ལའང་བལྟས་ནས། བདག་ཀྱང་དེ་ལས་མ་འདས་བསམ། གཞན་ཡང་རང་གི་ཉེ་འབྲེལ་དང་། ཡུལ་མི་ཁྱིམ་མཚེས་ན་ཟླ་ལ་སོགས་པ་ཤི་བ་མཐོང་བའི་དུས་ལ་ཡང་རང་ལ་སྦྱར་བས་རང་ཡང་དེ་ལས་མ་འདས་པ་ཡིན། སྟོན་དཔྱིད་ལ་སོགས་པ་དུས་ཀྱི་འགྱུར་བ་ལ་བརྟེན་ནས་ཚེ་ཟད་པར་རྟོགས་པ་རིགས་ཏེ། དེ་ལྟར་མ་རིག་པ་རྣམས་ལ་འཆི་བའི་རྣམ་པར་རྟོག་པ་བློ་ལ་མ་སྐྱེས་པ་ཡིན། མི་རྣམས་ཀྱིས་སྐད་ཅིག་མའི་མི་རྟག་པ་ཡང་མ་ཚོར་བར་འདུག བདག་སྐྱེས་ནས་ད་ལྟ་ཕན་ཆད་དུ། སྐད་ཅིག་མ་རེ་རེ་ནས་ཚེ་ཟད་པས་སྔ་མ་ཡང་ཚེ་དེ་ཙམ་ཞིག་ཟད་དེ། རང་གིས་ལོ་དེ་ཙམ་ཞིག་ལོན། ད་ཡང་ཚེ་ཚད་བཅས་པར་ཐུབ་ཀྱང་། དེ་བས་ལྷག་པར་ཐུབ་ཀྱང་། སྐད་ཅིག་མ་རེ་རེ་ནས་འཛད་པ་ཡིན། སྐད་ཅིག་མ་རེ་སོང་ཞིང་འཆི་ལ་ཉེར་འགྲོ་བས་བདག་མྱུར་དུ་འཆི་བར་འགྱུར་བ་ཡིན། དུད་འགྲོ་ལ་སོགས་པའི་སྲོག་ཆགས་གསོད་པའི་སར་ཁྲིད་ན་གོམ་པ་རེ་བོར་ཞིང་འཆི་བ་ལ་ཉེར་འགྲོ་བ་བཞིན་དུ་བདག་ཀྱང་འཆི་བ་ལ་ཉེར་འགྲོ་བ་ཡིན། ལར་སྐད་ཅིག་མ་ཉི་མའི་གྲིབ་སོ་ཙམ་དུ་ཚེ་འགྲོ་བ་ཡིན་ཏེ། ཡུད་ཙམ་མི་སྡོད་པར་འདི་ཁམ་ཆེ་བར་འདུག མི་ཐམས་ཅད་ཀྱིས་རྒྱུན་གྱིས་མི་རྟག་པ་ཡང་མ་ཚོར་བར་འདུག བདག་མ་ལས་སྐྱེས་ནས་ད་ལྟ་ཕན་ཆད་ཉིན་མཚན་དེ་སྙེད་ཀྱིས་ཚེ་ཟད་ཨང་། སྔ་མ་ཡང་ཚེ་དེ་ཙམ་ཞིག་ཟད། ད་ཡང་དེ་བས་ལྷག་པ་ཐུབ་ཀྱང་ཉིན་མཚན་ཙམ་གྱིས་ཚེ་འཛད་པ་ཡིན། དེ་རིང་སོང་། དོ་ནུབ་སོང་། ཞག་གཅིག་སོང་གཅིག་འུད། གཉིས་སོང་གཉིས་འུད། དེ་བཞིན་དུ་ཉིན་མཚན་འུད་འུད་འཛད་པས། བདག་རིང་པོ་མི་ཐོག་པར་འཆི་བར་འགྱུར་བ་ཡིན། ལར་ཚེ་ཉིན་ཞག་གཅིག་གིས་འཛད་པར་འདུག་པ་ལ། ཉི་མ་རིང་ཐུང་དང་ནམ་རིང་ཐུང་བརྩི་བར་འདུག་སྟེ། ཉི་མ་དང་ནམ་རིང་བས་བདག་གི་ཚེ་ལ་མི་ཕན། མི་རྣམས་ཀྱིས་རང་མི་རྟག་པ་ཡང་མ་ཚོར་བར་འདུག་རང་གི་ཚེ་འདི་སྐྱ་བ་མེད་པའི་རྒྱ་མཚོའི་གྲུ་དང་འདྲ། འཆི་བདག་གི་བདུད་རྒྱ་མཚོའི་ཆུ་བོ་དང་འདྲ། རང་ནི་ཚེ་གད་ཁའི་ཤིང་ཕུང་དང་འདྲ། འཆི་བདག་གི་བདུད་གད་རྩའི་ཆུ་རྒྱུན་དང་འདྲ་བས་རྐོ། རང་གི་ཚེ་ཐོ་ཡོར་ཁར་བྱ་སྒྲོ་བཙུགས་པ་དང་འདྲ། འཆི་བདག་གི་བདུད་སྐྱི་སེར་གྱི་རླུང་དང་འདྲ་བས་གཡོ། རང་གི་ཚེ་ཤ་བ་རྨས་མ་དང་འདྲ་བར་བྲོས། འཆི་བདག་གི་བདུད་ཤ་ཁྱིས་ཉུལ་མ་དང་འདྲ་སྟེ་འདེད་པ་ཡིན། ལར་རང་གི་ཚེའི་འགྲིབ་ལུགས་མི་མཐོང་བར། གཞན་དག་ཤི་བ་ལ་མྱ་ངན་ཆེན་པོ་བྱེད་པར་འདུག ཇི་ལྟར་ཡིན་ནམ། མི་རྣམས་ཀྱིས་གློ་བུར་དུ་མི་རྟག་པ་ཡང་མ་ཚོར་བར་འདུག ཚེ་ཚད་དང་ལྡན་པར་ཐུབ་ཀྱང་ནམ་ཀྱང་འཆི་བ་ལས་མ་འདས། དེ་རིང་འཆིའམ་དོ་ནུབ་འཆི་རང་ཡང་ངེས་པར་རང་དབང་ཐོབ་པ་མེད། རང་གི་ལུས་ཀྱིས་ཀྱང་ལྕགས་ནས་འཆི། ལུས་འབྱུང་བ་བཞིས་བསྐྱེད་དེ། འབྱུང་བ་བཞི་རླུང་མཁྲིས་བད་ཀན་འདུས་པ་ཆ་མ་སྙོམས་པ་ལས་འཆི་རྐྱེན་བྱེད། ལུས་ཟས་ཀྱིས་གསོ་བ་ཡིན་ཏེ། སུབ་པ་དང་བརྣངས་པས་ཀྱང་འཆི། ཆུ་རྩལ་ཅན་ཆུ་གྲིར་འཆི། གཟོབ་པོ་ལྕེ་གྲིར་འཆི། ཤ་དུག་དང་ཟས་མ་འཕྲོད་པས་ཀྱང་འཆི། རྟ་རྩལ་ཅན་རྟ་གྲིར་འཆི། དཔའ་བོ་མཚོན་གྲིར་འཆི། དྲག་པོ་དུག་གྲིར་འཆི། ལར་འཆི་རྐྱེན་དུ་མ་སོང་བ་མེད། རང་གིས་ཞག་གཅིག་ཀྱང་མི་འཆི་བའི་གསོན་ཡང་མི་ལོན་པར། རང་ལ་རྫུན་ཟེར་བ་ཤ་སྟག་སྣང་། འཆི་རྐྱེན་གྱིས་ནམ་འཆི་ཆ་མེད། འཆི་རྐྱེན་ཅི་འོང་ཆ་མེད། ཚེ་ལ་ཡིད་བརྟན་དུ་མེད། བདག་འཆི་ངེས་པ་ཡིན། གཞོན་པ་མི་འཆི་བ་མེད། རྒས་པ་ཐར་བ་མེད། ན་བ་གཅིག་གི་སྔོན་མི་ན་བ་བརྒྱ་འཆི། ནད་ཚབས་ཆེན་པོ་ཞིག་ཐང་ཅིག་སོས་ཀྱང་དེས་འཆི་བ་དང་ན་བ་ལས་ཐར་བ་མེད། འཆི་བ་ལ་མི་དགའ་བས་ཕན་པ་མེད། ཤི་མོད་རང་གཅིག་པུ་མིན། གཞན་ཐམས་ཅད་འཆི་བ་ལ་ཟེར་བས་ཀྱང་མི་ཕན། ཤི་ནས་ལུས་མི་ལེན་ན་དེ་ཉིད་ཡིན་ཏེ། སྐྱེ་བ་ལེན་དགོས། སྐྱེ་གནས་ལ་རང་དབང་མེད། ཤི་ཙ་ན་དགེ་སྡིག་གི་ལས་འབའ་ཞིག་རྗེས་སུ་འབྲང་བ་ཡིན། ལར་འཆི་བར་ཤེས། དགེ་སྡིག་ཆ་ཡོད་བཞིན་དུ་སྡིག་པ་བྱེད་པ་འདི་ཀུན་ལ་བསམ་པ་ཅི་ཡོད་དམ། མཚོ་རྒྱལ་ཤི་ནས་མེད་དུ་མི་འགྲོ། ཡང་ལས་ཀྱི་སྐྱེ་དགོས་པ་ཡིན། ལས་དགེ་མི་དགེ་ལུང་མ་བསྟན་གསུམ་ལས། དགེ་བའི་འབྲས་བུ་མཐོ་རིས་ལ་སོགས་བདེ་བ་ཡིན། མི་དགེ་བའི་འབྲས་བུ་ངན་སོང་གསུམ་ལ་སོགས་པའི་སྡུག་བསྔལ་ཡིན། ལུང་དུ་མ་བསྟན་པ་ས་བོན་རུལ་བ་དང་འདྲ་བར་འབྲས་བུ་མི་འབྱིན། ལར་ངན་སོང་གསུམ་དུ་སྐྱེ་བའི་རྒྱུ་སྡིག་པ་དང་ཞེན་པ་ཡིན། དེ་ཡང་སྡིག་པའི་ལས་ཀྱིས་དམྱལ་བ་ཡིན། ཞེན་པས་ཡི་དྭགས་དང་དུད་འགྲོར་སྐྱེ་བ་ཡིན་གསུངས། ཡང་ཨོ་རྒྱན་དུས་གསུམ་མཁྱེན་པས་རྗེ་མངའ་བདག་ཆེན་པོ་ལ་གདམས་པ་ལས་ཀྱང་། ཉོན་མོངས་པ་མ་བཏུལ་ན་དགྲ་སྡང་བ་མང་བས་དོན་མེད་རང་སེམས་སྡུག་པར་ཡིད་ཆེས། ཆོས་སྤྱོད་ཀྱི་དགེ་སྦྱོར་མ་བསྐྱངས་ན་གཉེན་བྱམས་པ་ལ་མི་ཚེ་བསྐྱལ་ཀྱང་འཆི་བའི་དུས་མི་བསྟོངས་པར་ཡིད་ཆེས། ཐུབ་པའི་གདན་ས་ལ་མ་བཟུང་ན་འཇིག་རྟེན་གྱི་ཁེ་གྲགས་བཟུང་བས་སླར་འཁོར་བར་བསྐྱུར་བར་ཡིད་ཆེས། འགྱུར་མེད་ཀྱི་རྫོང་ལ་མ་གནས་ན་ས་རྡོའི་མཁར་ལེན་བཟང་ཡང་བཞག་ནས་འགྲོ་བར་ཡིད་ཆེས། ཚོགས་གཉིས་མ་བསགས་ན་ནོར་རྫས་བསགས་ཀྱང་ཤི་ནས་སྤྱོད་དུ་མེད་པར་ཡིད་ཆེས། ཆོས་ཉིད་ཀྱི་བདུད་རྩི་མ་བསྟེན་ན་ཟས་ཞིམ་དགུ་ཟོས་ཀྱང་མི་གཙང་བར་འགྱུར་བ་ཡིད་ཆེས། ཆོས་སྐུ་སྐྱེ་མེད་མ་ཐོབ་ན་ཤ་ཁྲག་གི་ཕུང་པོ་ལ་བདག་འཛིན་གཅེས་སྤྲས་བྱས་ཀྱང་འབྱུང་བ་གཡར་པོ་བདག་པོས་ཁྱེར་བར་ཡིད་ཆེས། ཐབས་ཤེས་རབ་དང་མ་འགྲོགས་ན་ཡིད་མཐུན་གྱི་མཛའ་བཤེས་སྟོང་དང་འགྲོགས་ཀྱང་མྱུར་དུ་བྲལ་ནས་འགྲོ་བར་ཡིད་ཆེས། བརྗོད་མེད་ཀྱི་དོན་དང་མ་འཕྲད་ན་སྙན་གྲགས་ཀྱིས་སྟོང་གསུམ་ཁྱབ་ཀྱང་བསླུ་བྲིད་ཀྱི་བདུད་ཡིན་པར་ཡིད་ཆེས། རང་སེམས་ལ་རང་དབང་མ་ཐོབ་ན་འཁོར་ལོས་སྒྱུར་བའི་མཐུ་དཔུང་དང་ལྡན་ཡང་འཆི་བའི་དུས་ལ་བབ་པའི་ཚེ་རང་དབང་མི་འོང་བར་ཡིད་ཆེས། ཤེས་རབ་རིག་པའི་རྩལ་དང་མ་ལྡན་ན་གྱད་སྟོབས་པོ་ཆེ་ལྟར་དཔའ་ཡང་འཁོར་བའི་གཡུལ་ངོ་མི་ཟློག་པར་ཡིད་ཆེས། གྲགས་སྟོང་ཀ་དག་གི་དོན་ཁོང་དུ་མ་ཆུད་ན་སྨྲ་བའི་སེང་གེར་གྱུར་ཀྱང་རྣམ་སྨིན་ལ་ཤགས་མི་ཐེབ་པ་ཡིད་ཆེས། བདེ་ཆེན་རང་ལ་མ་རྙེད་ན་ཅང་ཤེས་རྟ་ལ་ཞོན་ཡང་འཁོར་བའི་སྡུག་བསྔལ་ལས་མི་ཐར་བར་ཡིད་ཆེས། སངས་རྒྱས་ཀྱི་ཆེ་བའི་ཡོན་ཏན་གྱིས་མ་སྤྲས་ན་ནམ་མཁའི་ལྷ་ཕྲན་ལྟར་གཟུགས་མཛེས་ཀྱང་འཆི་བདག་གི་བདུད་བསླུར་མི་འདོད་པ་ཡིད་ཆེས། བླ་མ་དང་དཀོན་མཆོག་གི་སྐྱབས་འོག་ཏུ་མ་ཚུད་ན་ཉོན་མོངས་ཀྱི་དགྲ་ལས་{ལ}སུས་ཀྱང་མི་སྐྱོབ་པར་ཡིད་ཆེས། རང་སེམས་སངས་རྒྱས་སུ་མ་རྟོགས་ན་རྟོག་པ་གཞན་ཐམས་ཅད་ཀྱིས་བསླུ་བར་ཡིད་ཆེས། དེས་ན་ཐར་པ་དང་བྱང་ཆུབ་ཀྱི་རྒྱུར་མི་འགྱུར་བའི་འཇིག་རྟེན་གྱི་བྱ་བ་ཐམས་ཅད་ལ་དོན་མེད་པས་ཆུ་ཤིང་ལྟར་སྙིང་པོ་མེད་པར་ཡིད་ཆེས་པར་མཛོད་ཅིག་གསུངས། ཡང་གསུངས་པ། འཁོར་བའི་རྒྱུ་ང་བདག་གཟུང་འཛིན་གྱི་རྣམ་རྟོག་མ་སྤོང་བ་ལས་བྱུང་སྟེ་བདག་དང་སེམས་ཅན་ཐམས་ཅད་བྱང་ཆུབ་ཀྱི་སེམས་སུ་གཅིག་པ་ལ་བདག་གཞན་གྱི་རིས་སུ་འབྱེད་པ་སྙིང་མེད་པ་ཡིན། ཁམས་གསུམ་གྱི་སེམས་ཅན་ཐམས་ཅད་ཚེ་སྔ་མ་ཡང་སྔ་ལ་སོགས་པའི་ཕ་མ་ཡིན་པ་ལ་དགྲ་གཉེན་དུ་འཛིན་པ་སྙིང་མེད་པ་ཡིན། འཁོར་འདས་གཉིས་ཀྱི་ཤན་འབྱེད་པའི་དུས་འདིར་འཇིག་རྟེན་ཆོས་བརྒྱད་སྐྱོང་ཁོམ་པ་སྙིང་མེད་པ་ཡིན། ཚེ་འདི་ཡུད་ཙམ་དུ་འདུག་པ་ལ་གནས་ཁང་གི་མཁར་ལས་བྱེད་པ་སྙིང་མེད་པ་ཡིན། མི་གཙང་བའི་རྫས་ཀྱིས་གང་བའི་ཕུང་པོ་ལ་ཚེར་མ་ཟུག་ཀྱང་མི་བཟོད་པའི་བདག་འཛིན་བྱེད་པ་སྙིང་མེད་པ་ཡིན། གྲོགས་ཉེ་འབྲེལ་ཐམས་ཅད་མི་རྟག་པར་འཆི་ཞིང་འདུག་པ་ལ་བདག་རྟག་ཏུ་རེ་བ་སྙིང་མེད་པ་ཡིན། རང་འཆི་བའི་དུས་སུ་ལག་སྟོང་དུ་འགྲོ་བ་ལ་མི་དགེ་བ་སྣ་ཚོགས་སྤྱད་ནས་ཟས་ནོར་འཚོལ་བ་སྙིང་མེད་པ་ཡིན། ཕྱི་སྣང་བ་ཡང་མི་སྡོད་པར་འགྱུར་ཞིང་འདུག་པ་ལ་ལོངས་སྤྱོད་རྟག་ཏུ་རེ་བ་སྙིང་མེད་པ་ཡིན། ཚེ་ཉི་མ་ནུབ་པའི་གྲིབ་སོ་ལྟར་འགྲིབ་པ་ལ་ལེ་ལོ་སྙོམ་ལས་བྱེད་པ་སྙིང་མེད་པ་ཡིན། འདི་ཕྱི་གཉིས་ཀར་སྐྱིད་པ་ཆོས་ལས་ལོག་ནས་ཁྱིམ་ཐབས་ལ་འཇུག་པ་སྙིང་མེད་པ་ཡིན། སྡིག་པའི་ལས་བྱས་པས་ངན་སོང་དུ་འགྲོ་ངེས་པ་ལ་རྣམ་སྨིན་ལ་མི་འཛེམ་པ་སྙིང་མེད་པ་ཡིན། ད་ལྟ་མེ་སྟག་ཕོག་པ་ཡང་མི་བཟོད་པར་ཚ་བའི་དམྱལ་བ་བཟོད་དུ་རེ་བ་སྙིང་མེད་པ་ཡིན། དགུན་ཁ་ནང་གཅིག་འཁྱགས་པ་ཡང་མི་བཟོད་པར་གྲང་བའི་དམྱལ་བར་བཟོད་དུ་རེ་བ་སྙིང་མེད་པ་ཡིན། ཞག་གསུམ་གྱི་བཀྲེས་སྐོམ་ཡང་མི་བཟོད་པར་ཡི་དྭགས་ཀྱི་སྡུག་བསྔལ་བཟོད་དུ་རེ་བ་སྙིང་མེད་པ་ཡིན། རང་གི་བཀོལ་སྤྱོད་ལ་སོགས་པ་དར་གཅིག་མི་བཟོད་པར་དུད་འགྲོའི་སྡུག་བསྔལ་བཟོད་དུ་རེ་བ་སྙིང་མེད་པ་ཡིན། རང་གི་རང་ལ་གྲོས་འདེབས་དགོས་པའི་དུས་འདིར་བླ་མས་བཤད་ཀྱང་མི་ཉན་པ་སྙིང་མེད་པ་ཡིན། རང་དབང་རང་གིས་ཐོབ་པའི་དུས་འདིར་འདོད་པའི་ཁོལ་པོ་བྱེད་པ་སྙིང་མེད་པ་ཡིན། ཆོས་སྐད་ཅིག་ཀྱང་མི་བྱེད་པར་ཚེ་ཕྱི་མ་ལ་ཡང་འདི་ལྟར་འོང་དུ་རེ་བ་སྙིང་མེད་པ་ཡིན། སྐྱེས་ནས་འཆི་བ་དང་རང་ཆས་སུ་འགྲོགས་པ་ལ་སོང་ཕོད་ཀྱི་བཙས་{བཅས}བྱེད་ཁོམ་པ་སྙིང་མེད་པ་ཡིན། ཡར་འགྲོ་མར་འགྲོ་རང་དབང་ཡོད་པའི་དུས་ད་རེས་ཐར་པའི་ཆོས་ལ་མི་འཇུག་པ་སྙིང་མེད་པ་ཡིན། འཁོར་བར་ཅི་བྱས་སྡུག་བསྔལ་ལས་མ་འདས་པར་འདུག་པ་ལ་བྱ་བྱེད་མི་སྤང་བ་སྙིང་མེད་པ་ཡིན། འཁོར་བ་མཐའ་མེད་དུ་ད་གཟོད་འཁྱམས་དགོས་པ་ལ་རང་བརྫུན་རང་ལ་གཏོང་བ་འདི་སྙིང་མེད་པ་ཡིན། མངའ་བདག་མིའི་ལུས་ལ་བ་གླང་གི་བསམ་པ་ཅན་དེ་རྣམས་ཀྱིས་གྱོད་ལ་གཏུག་པར་མཆིའོ་གསུངས། དེས་ན་རང་ཉིད་འཆི་དུས་ལམ་སྣ་འདྲེན་ཅིང་བར་དོའི་འཇིགས་པ་སེལ་བ་དང་བདེ་ཆེན་ཐར་པའི་གོ་འཕང་ལ་འགོད་པར་མཛད་པ་ནི་བླ་མ་དཀོན་མཆོག་འབའ་ཞིག་ཡིན་པས། ད་ལྟ་ཉིད་ནས་བླ་མ་དམ་པ་འབྲལ་མེད་དུ་བསྟེན། དཀོན་མཆོག་གསུམ་ལ་སྐྱབས་སུ་འགྲོ་ཆོས་སྤྱོད་དགེ་སྦྱོར་ལ་ཡེངས་མེད་དུ་འབད། ཚོགས་གཉིས་ཀྱི་ལམ་རྒྱགས་བསགས། ཏིང་འཛིན་གྱི་ཕ་མཁར་བརྩེགས། དྲན་ཤེས་ཀྱི་གྲོགས་དང་འགྲོགས། སྐུ་གསུམ་གྱི་བཙན་ས་ཟིན་པ་ཞིག་ཅིས་ཀྱང་དགོས་ཏེ། རྒྱལ་པོ་ལ་གདམས་པའི་མདོ་ལས། རྒྱལ་པོ་ཆེན་པོ་དེའི་ཚེ་དེའི་དུས་ན་ཆོས་ནི་གླིང་དང་གནས་དང་མགོན་དང་རྟེན་པར་འགྱུར་རོ། །དཔེར་ན་གྲང་བས་ཉེན་པ་ལ་མེ་དང་། ཚ་བས་ཉེན་པ་ལ་བསིལ་ཁང་དང་། སྐོམ་པས་ཉེན་པ་ལ་ཆུ་བསིལ་དང་། མགྲོན་པོ་ངལ་ཞིང་དུབ་པ་ལ་གྲིབ་མ་དང་། ལམ་རིང་པོར་ཞུགས་པ་ལ་བཞོན་པ་དང་། ཉལ་བ་ལ་གནས་མལ་བཟང་པོ་དང་། བཀྲེས་པ་ལ་ཁ་ཟས་བཟང་པོ་དང་། གདུང་བ་ལ་ཚིམ་པར་བྱེད་པ་དང་། ལམ་སྟོར་བ་ལ་ས་མཁན་དང་། ནད་ཀྱིས་བཏབ་པ་ལ་སྨན་པ་དང་། འདམ་དུ་བྱིང་བ་ལ་འཇུ་ཐག་དང་། ཆུ་བོས་ཁྱེར་བ་ལ་གྲུ་གཟིངས་དང་། བརྒལ་བར་དཀའ་བ་ལ་ཟམ་པ་དང་། ཉམ་ང་བ་ལ་འབབ་སྟེགས་དང་། མུན་ཁུང་དུ་སྒྲོན་མེ་དང་། རྒྱ་མཚོ་ཆེན་པོ་ལ་གྲུ་བོ་དང་། དབུལ་པོ་ལ་ནོར་དང་། ལས་བྱེད་པ་ལ་གྲོགས་དང་། གཅོད་པ་ལ་ལག་ཆ་དང་། གཡུལ་ངོར་འཇུག་པ་ལ་གོ་ཆ་དང་། འཇིགས་པ་ལ་བསྐྱེལ་མ་བཟང་པོ་དང་། འཐབ་པ་ལ་དཔུང་གཉེན་དང་། མུ་གེ་ལ་འབྲུ་དང་། དོག་པ་ལ་གོ་འབྱེད་པ་དང་། འཁྱམས་པ་ལ་གནས་དང་། ཉེན་པ་ལ་མགོན་སྐྱབས་བྱེད་པ་ལྟ་བུའོ། །ཞེས་སོ། །དེ་ལྟ་བུའི་དཔེ་དང་གཏན་ཚིགས་སྣ་ཚོགས་པའི་སྒོ་ནས་འགྲོ་འཆག་ཉལ་འདུག བཟའ་བགོ་གཏམ་སྨྲ་བ་སོགས་སྤྱོད་ལམ་ཐམས་ཅད་ཀྱི་སྐབས་སུ་འཆི་བ་མི་རྟག་པ་འབའ་ཞིག་དྲན་པར་བྱ་སྟེ། ལས་བརྒྱ་པ་ལས། རྟག་ཏུ་སྤྱོད་ཡུལ་ཐམས་ཅད་དུ། །འཆི་བདག་རྗེས་སུ་དྲན་པར་བྱ། །ཞེས་དང་། སྤྱོད་འཇུག་ལས། ཉིན་མཚན་ཀུན་ཏུ་བདག་གིས་ནི། །འདི་ཉིད་འབའ་ཞིག་བསམ་པས་རིགས། །ཞེས་གསུངས། དེ་ལྟ་བུའི་ཚུལ་གྱིས་ངག་ཏུ་ཡང་། འདུས་བྱས་ཐམས་ཅད་མི་རྟག་གློག་བཞིན་གཡོ། །སྣོད་བཅུད་གང་ལ་བསམས་ཀྱང་འཇིག་པའི་ཆོས། །འཆི་བར་ངེས་ཤིང་ནམ་འཆི་ཆ་མེད་ཀྱང་། །རྟག་འཛིན་སེམས་ཀྱིས་རང་མགོ་བསྐོར་ནས་སུ། །བག་མེད་ངང་དུ་གནས་པ་བདག་ཅག་ལ། །དཀོན་མཆོག་ཀུན་འདུས་བླ་མའི་ཐུགས་རྗེས་གཟིགས། །མི་རྟག་འཆི་བ་དྲན་པར་བྱིན་གྱིས་རློབས། །ཞེས་བརྗོད་ལ་སེམས་ཀྱིས་གསལ་གདབ་ཡང་ཡང་བྱ་ཞིང་དམ་པ་གསུམ་གྱིས་རྩིས་ཟིན་པར་བྱའོ། །བཞི་པ་དེ་ལྟར་བསྒོམ་པའི་ཕན་ཡོན་འབྱོང་ཚད་དང་བཅས་པ་བསྟན་པ་ནི། ཡིད་བཞིན་རིན་པོ་ཆེའི་མཛོད་ལས། དེ་ཡི་ཕན་ཡོན་ཤིན་ཏུ་མཐའ་ཡས་ཏེ། །འཁོར་བའི་ཉེས་སྤོང་ཡོན་ཏན་ངང་གིས་འདུ། །རྟག་འཛིན་ལས་གྲོལ་དགྲ་གཉེན་ཆགས་སྡང་ཞི། །དགེ་ལ་རབ་བརྩོན་ཚེ་འདི་འཁྲུལ་བར་ཤེས། །ཚོགས་གཉིས་རབ་རྫོགས་གྲགས་ལྡན་ལྷས་གཟིགས་ཤིང་། །བདེ་བར་ཚེ་ཡི་དུས་བྱེད་མཐོ་རིས་འགྲོ། །མྱུར་དུ་འཆི་མེད་བདུད་རྩིའི་གོ་འཕང་ཐོབ། །ཅེས་འཁོར་བའི་ཆོས་ལ་སྐྱོ་ཤས་གཏིང་ནས་སྐྱེ་བས་ཚེ་འདིའི་ཆོས་ལས་བློ་ལྡོག་པ་དང་། སྔར་མེད་པའི་ཡོན་ཏན་མང་པོ་རྒྱུད་ལ་སྐྱེ་བ་དང་། རྟག་འཛིན་གྱི་བློ་ལས་ལོག་པ་དང་། དགྲ་གཉེན་ལ་ཆགས་སྡང་མེད་པ་དང་། རྟག་ཏུ་དགེ་ལ་བརྩོན་པ་དང་། ཚེ་འདི་འཁྲུལ་སྣང་དུ་ཤེས་པ་དང་། ཚོགས་གཉིས་རྫོགས་པ་དང་། ཆོས་མཐུན་གྱི་གྲགས་པ་དང་ལྡན་པ་དང་། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་དགོངས་པ་དང་། བདེ་བར་ཚེ་ཡི་དུས་བྱེད་ཅིང་མཐོ་རིས་སུ་སྐྱེ་བ་དང་། སྐྱེས་མ་ཐག་པར་དམ་པའི་ཆོས་དང་། དགེ་བའི་བཤེས་གཉེན་དང་ཕྲད་པ་དང་། རྟག་ཏུ་རང་དབང་ཡོད་པ་དང་། བསྟན་ལ་རབ་ཏུ་བྱུང་བ་དང་། ཚུལ་ཁྲིམས་མཐར་ཕྱིན་པ་དང་། ཉིན་མཚན་ཆོས་ཀྱིས་འདའ་བ་དང་། ཐེག་པ་ཆེན་པོའི་ཆོས་ལ་སྤྱོད་པ་དང་། སྐྱེས་བུ་དམ་པ་རྣམས་དང་འགྲོགས་པ་དང་། མྱུར་དུ་སངས་རྒྱས་འགྲུབ་པ་སོགས་ཕན་ཡོན་ཚད་མེད་པར་གསུངས་ཤིང་། རྗེ་དྭགས་པོ་རིན་པོ་ཆེ་སྒྲུབ་པ་ལ་བྱོན་ཁར། བླ་མ་བྱ་ཡུལ་པས། ངའི་སྙིང་ཕྱུང་ཡང་ཤ་དུམ་པ་ཞིག འཆི་བ་མི་རྟག་པ་སྒོམ་པ་གལ་ཆེ། དེ་མ་བསྒོམས་{སྒོམས}ན་ཆོས་གནད་དུ་མི་འགྲོ་བ་ཡིན་གསུངས། སྒོམ་པོ་པས་ཀྱང་དེ་ལ་ཐུགས་ཆེས་ནས་ཐུགས་དམ་གྱི་མཐིལ་དུ་མཛད། དེའི་སློབ་མ་དང་ཡང་སློབ་ཐམས་ཅད་ཀྱིས་ཀྱང་འདི་ལ་ཐུགས་རྩིས་ཆེར་མཛད། ཆོས་རྗེ་སངས་རྒྱས་སྟོན་པའི་ཞལ་ནས་ཀྱང་འཆི་བ་མི་རྟག་པའི་འདི་བཤད་པ་པོས་བཤད་རིན་མ་ཆོག ཉན་པ་པོས་ཉན་རིན་མ་ཆོག སྒོམ་པ་པོས་བསྒོམས་རིན་མ་ཆོག་པར་བྱས་ནས། ཆོས་ཟབ་མོ་ཞིག་ལྐོག་ཏུ་ལུས་འདུག་གསུངས། སྒ་ལོ་སྤྱན་ལྔའི་དྲུང་དུ་བྱོན་དུས། ཆོས་ཟབ་མོ་ཞིག་ཐུགས་ལ་འདོག་པར་ཞུས་པས། འཆི་བ་མི་རྟག་པ་སྒོམས་ཤིག་གསུངས། དེ་རྒྱུད་ལ་སྐྱེ་གདའ་བས། དེ་བས་ཟབ་པ་ཞིག་གསུངས་པར་ཞུ་ཞུས་པས། དགེ་བའི་བཤེས་གཉེན་འབྲོམ་སྟོན་གྱིས་སློབ་མ་བྱང་ཆུབ་སེམས་དཔའ་སྟོང་དང་ལྔ་བརྒྱ་བཞུགས་པ་རྣམས་ལ་ཆོས་ཟབ་ཤོས་འདི་ལ་བྱེད་པ་ཡིན་གསུངས། འདི་ལས་ཟབ་པའི་ཆོས་ང་ལ་མེད་གསུངས། སངས་རྒྱས་དབོན་སྟོན་གྱིས། འཆི་བ་རྒྱུད་ལ་མ་དྲན་ན། །ཆོས་གསང་བ་འདུས་པ་ཟབ་རྒྱུ་མེད། །འཆི་བ་རྒྱུད་ལ་སྐྱེས་པ་ན། །ལམ་སྐྱབས་སུ་འགྲོ་ལས་ཟབ་པ་མེད། །ཅེས་དང་། རྨོག་ཅོག་པས། འཆི་བ་རྒྱུད་ལ་མ་སྐྱེས་པའི། །ཉམས་མྱོང་སྟོན་ཀའི་ན་བུན་འདྲ། །འཆི་བ་རྒྱུད་ལ་མ་སྐྱེས་པའི། །བཙུན་པོ་རྒྱལ་པོའི་བཙུན་མོ་འདྲ། །འཆི་བ་རྒྱུད་ལ་མ་སྐྱེས་པའི། །སྙིང་རུས་དབྱར་ཁའི་ཆབ་རོམ་འདྲ། །ཞེས་གསུངས། གཞན་ཡང་དམ་པ་རྒྱ་གར་སོགས་སྒྲུབ་བརྒྱུད་འཛིན་པ་ཐམས་ཅད་ཀྱིས་འདི་འབའ་ཞིག་བསྔགས་ཤིང་ཐུགས་དམ་གྱི་མཐིལ་དུ་མཛད། བཅོམ་ལྡན་འདས་ཀྱིས་ཀྱང་། རྗེས་རྣམས་ཀྱི་ནང་ནས་ཁྱུ་མཆོག་གི་རྗེས་མཆོག་ཡིན་པ་བཞིན་དུ་འདུ་ཤེས་ཐམས་ཅད་ཀྱི་ནང་ནས་མི་རྟག་པ་དྲན་པ་མཆོག་ཡིན་པར་གསུངས་པ་དང་། འདུལ་བ་ལུང་ལས་ཀྱང་། ངའི་འཁོར་བུམ་པ་བཟང་པོ་ལྟ་བུ། དགེ་སློང་ཤཱ་རིའི་བུ་དང་། མོའུ་འགལ་གྱི་བུ་དང་འདྲ་བ་བརྒྱ་ལ་གདུགས་ཚོད་ཡོན་དང་བཅས་པ་བྱིན་པ་བས། འདུས་བྱས་མི་རྟག་སྐད་ཅིག་དྲན་པ་མཆོག་ཡིན་ནོ། །ཞེས་གསུངས། འབྱོངས་ཚད་ཀྱང་ཀུན་མཁྱེན་བླ་མས། སྣང་བ་གང་ལ་ཡང་འཇིག་པར་མཐོང་བས་ཕྱི་ཡུལ་ལ་མི་ཞེན་པའི་བློ་གཏིང་ནས་སྐྱེས་པ་དང་། དགེ་བ་ལ་བརྩོན་འགྲུས་མེ་འབར་བ་འདྲ་བའི་བློ་སྐྱེས་པ་དང་། འཁོར་བའི་སྡུག་བསྔལ་ལ་འཇིགས་སྐྲག་ཐུན་མོང་མ་ཡིན་པ་སྙིང་ནས་སྐྱེས་པ་དང་། འཆི་བའི་ཚེ་ཅིས་ཀྱང་མི་བསྟོངས་པར་ཤེས་ནས་ཚེ་འདིའི་བྱ་བ་འདོར་བ་དང་། སྐད་ཅིག་ཙམ་ཡང་ཐ་མལ་སོས་དལ་དུ་མི་སྡོད་པར་སྒོ་གསུམ་ཆོས་ལ་སྤྱོད་པ་དང་། ལས་འབྲས་ཀྱི་སྨིན་སོ་མཐོང་བས་ངེས་འབྱུང་སྐྱོ་ཤས་སྐྱེས་པ་དང་། ནམ་འཆི་ངེས་མེད་དུ་ཤེས་པས་གང་ལ་ཡང་བློ་ལྟོས་མི་འཆའ་བ་རྣམས་ཏེ། མི་རྟག་པ་སྙིང་ནས་གོམས་པའི་རྟགས་དང་ཚད་དོ་གསུངས། དེ་རྒྱུད་ལ་སྐྱེས་པ་ཁ་རག་སྒོམ་ཆུང་ལྟ་བུ་ཡིན་ཏེ། ཁོང་གཙང་གི་ཇོ་མོ་ཁ་རག་གི་རི་ཁྲོད་དུ་སྒྲུབ་པ་བྱེད་པ་ལ་བྱོན་པས་བྲག་ཕུག་གི་སྒོ་ན་ཚེར་ཕུང་ཞིག་འདུག་པ་ལ་ན་བཟའ་ཐོགས་པས་དང་པོ་བཅད་དམ་སྙམ་པ་ལ། རྗེས་སུ་ཨ་ཅང་བྲག་ཕུག་གི་ནང་འདིར་འཆི་བ་ལས་སླར་ཨེ་ལྡོག་མི་ཤེས་དེ་བས་དགེ་སྦྱོར་རང་བྱས་ན་ཁེ་བས་ཆེ་དགོངས་བཅད་པ་མ་བྱུང་། ཡང་སྒོར་བྱོན་སྐབས་ཀྱང་དེ་བཞིན་བྱུང་བ་ལ་ང་སྒོ་ནང་དུ་ཨེ་ལྡོག་མི་ཤེས་དགོངས་ཏེ་དེ་ལྟར་གནས་དེར་ལོ་བཅུ་གཉིས་ཀྱི་བར་དུ་བཞུགས་ཏེ་བླ་མ་གྲུབ་པ་ཐོབ་ཀྱང་ཚེར་ཕུང་གཅོད་རྒྱུ་མ་བྱུང་བ་ཡིན། ཁོང་གི་ཞལ་ནས། ཚེ་འདིའི་ལྟོ་གོས་ཇི་ལྟར་བྱས་ཀྱང་ཕྱིད། །ཤི་ནས་འབྲས་བུ་བྱང་ཆུབ་བཙལ་ཐབས་མེད། །དགྲ་གཉེན་སྡེ་རིས་ཀུན་ལ་མ་ཆགས་པར། །བསོད་ནམས་ཆེན་པོ་འཕྲལ་དུ་བསག་པར་བྱ། །ཚེ་ལ་ལོང་མེད་ཐ་སྙད་ཐུག་པ་མེད། །དེ་བས་དམ་པའི་དགོངས་པ་ལོངས་མཛོད་ལ། །འདུ་འཛི་སྤང་བའི་དགོན་པར་ཞི་གནས་བསྟེན། །བསེ་རུ་ལྟ་བུ་གཅིག་པུར་གནས་པར་བྱ། །ཞེས་གསུངས་པ་ལྟར་ཅིས་ཀྱང་དགོས་མེད་ཀྱི་བློ་སྣ་བཙན་ཐབས་སུ་བསྟུང་ཞིང་འདོད་ཆུང་ཆོག་ཤེས་འཕགས་པའི་རིགས་ལ་གནས་པས་གཅིག་པུར་དབེན་པར་ཉམས་སུ་ལེན་པ་གལ་ཆེ་སྟེ། སྔོན་གྱི་སློབ་དཔོན་དག་གི་གསུངས་ལས། འདོད་པ་ཆུང་ན་འཕགས་པའི་རིགས་ཡིན་ཞིང་། །འདོད་པ་ཟད་ན་འཕགས་པ་དངོས་ཡིན་པས། །རྟག་ཏུ་འདོད་པ་ཆུང་ལ་བསླབ་པར་བྱ། །ཞེས་དང་། སོ་སོ་ཐར་པའི་མདོ་ལས། ངེས་པར་བྱས་ཤིང་དབང་པོ་ཐུལ་བ་དང་། །དགོན་པ་ཞི་བ་རྣམས་སུ་རྒས་གྱུར་པ། །མང་དུ་ཐོས་པ་ནགས་ཀྱི་ནང་དག་ཏུ། །ལང་ཚོ་ཡོལ་བ་རྣམས་ནི་གནས་པ་བདེ། །ཞེས་རྗེས་སུ་འདོམས་པར་མཛད་པ་ཡིན་ནོ། །སྣོད་བཅུད་མི་རྟག་སྒྱུ་མའི་སྤྲིན་རུམ་དུ། །ཚེ་སྲོག་གཡོ་བ་གློག་གི་ཟློས་གར་རྩེན། །སང་ཙམ་མི་འཆིའི་གདེང་ཚད་ཡོད་མིན་པས། །གཅིག་བུར་བྱང་ཆུབ་སྒྲུབས་ཤིག་ཤེས་ལྡན་རྣམས། །ཚེ་མི་རྟག་པར་བསམ་པའི་ཁྲིད་དོ། །། ། གསུམ་པ་ལས་རྒྱུ་འབྲས་ལ་བསམས་ནས་མི་དགེ་བ་མཐའ་དག་ལས་བློ་ལྡོག་ནས་དཀར་པོའི་དགེ་ཆོས་ལ་རྩེ་གཅིག་ཏུ་སྦྱོར་བའི་ཁྲིད།༈ གསུམ་པ་ལས་རྒྱུ་འབྲས་ལ་བསམས་ནས་མི་དགེ་བ་མཐའ་དག་ལས་བློ་ལྡོག་ནས་དཀར་པོའི་དགེ་ཆོས་ལ་རྩེ་གཅིག་ཏུ་སྦྱོར་བའི་ཁྲིད་ལ་བཞི། ལས་ཀྱི་ངོ་བོ་ངོས་བཟུང་བ། ལས་བཅུ་བྱེ་བྲག་ཏུ་བཤད་པ། ས་མཚམས་དང་རྣམ་གྲངས་ཀྱི་དབྱེ་བ་གཞན་བསྟན་པ། ཐམས་ཅད་ལས་ཀྱི་རང་བཞིན་དུ་ཤེས་པར་བྱ་བའོ། །དང་པོ་ནི། པདྨའི་ལམ་རིམ་ལས། གང་ཉེས་པར་སྤྱོད་པ་དངོས་སམ་བརྒྱུད་ནས་སྡུག་བསྔལ་བསྐྱེད་པ་ནི་སྡིག་པ་སྟེ་མི་དགེ་བའི་ལས་སོ། །དེ་ལ་གསུམ་སྟེ་རང་བཞིན་གྱི་ཁ་ན་མ་ཐོ་བ་སྤྱད་པ་ཉིད་ན་སྡིག་ཏུ་འགྱུར་བ། མཚམས་མེད་ལྔ། དེ་དང་ཉེ་བ་ལྔ། མི་དགེ་བཅུའོ། །བཅས་པའི་ཁ་ན་མ་ཐོ་བ། བཅས་པ་ཉིད་ན་ལྟུང་བར་གྱུར་པ། །སྡོམ་པ་གསུམ་གྱི་བཅས་འགལ་གྱི་ཉེས་པའོ། །འཇིག་རྟེན་གྱི་ཁ་ན་མ་ཐོ་བ། གཞན་གྱི་སྡིག་རྐྱེན་བྱེད་པ་སྟེ། མི་ཤེས་པ་དང་། བག་མེད་པ། མ་གུས་པ། ཉོན་མོངས་པ་མང་བའོ། །གང་ལེགས་པར་སྤྱོད་པ་དངོས་སམ་བདེ་བ་སྐྱེད་པ་ནི་དགེ་བའོ། །དེ་ལ་གསུམ། འཁོར་གསུམ་དམིགས་པ་དང་བཅས་ནས་གཏོང་བ་བསོད་ནམས་ཆ་མཐུན་གྱི་དགེ་བ། ངེས་འབྱུང་གི་སེམས་ཀྱིས་ཀུན་ནས་བསླང་སྟེ་གཏོང་བ་ཐར་པ་ཆ་མཐུན་གྱི་དགེ་བ། འཁོར་གསུམ་ཡང་དག་མི་དམིགས་པར་ཤེས་པ་ཐར་པ་བླ་ན་མེད་པའི་དགེ་བའོ། །དགེ་སྡིག་གཉིས་ཀ་མ་ཡིན་པ་ནི་ལུང་མ་བསྟན་གྱི་ལས་སོ། །ཞེས་གསུངས་པས། དབྱེ་ན་གསུམ། སྤང་བྱ་མི་དགེ་བ། བླང་བྱ་དགེ་བ། ལུང་མ་བསྟན་ནོ། །དང་པོ་ལ། ངོ་བོ་ནི། ཉོན་མོངས་པ་དུག་གསུམ་གྱིས་ཀུན་ནས་བསླངས་པའི་ལས་ཏེ། རིན་ཆེན་ཕྲེང་བ་ལས། འདོད་ཆགས་ཞེ་སྡང་གཏི་མུག་གསུམ། །དེས་བསྐྱེད་ལས་ནི་མི་དགེ་བ། །ཞེས་སོ། །ངེས་ཚིག་ནི། ཉེས་པར་སྤྱོད་པའམ་ཁ་ན་མ་ཐོ་བ་སྟེ། དངོས་སམ་བརྒྱུད་ནས་འབྲས་བུ་སྡུག་བསྔལ་སྐྱེད་པའམ། དངོས་སུ་ལག་ཏུ་ལེན་པ་ལྟ་ཅི་ཁ་ནས་སྨྲ་བ་ཙམ་ཡང་མི་རུང་བས་དེ་སྐད་ཅེས་བྱའོ། །དབྱེ་ན། གང་སྤྱད་པ་ཙམ་གྱིས་ཐར་ལམ་ལ་བར་དུ་གཅོད་ཅིང་སྡིག་ཏུ་འགྱུར་བ། རང་བཞིན་གྱི་ཁ་ན་མ་ཐོ་བ། གང་བཅས་པ་ཉིད་ནས་སྡིག་ཏུ་འགྱུར་བ་བཅས་པའི་ཁ་ན་མ་ཐོ་བ། འཇིག་རྟེན་ན་སྐྱེ་བོས་སྨོད་ཅིང་སྡིག་ཏུ་འགྱུར་བ་འཇིག་རྟེན་གྱི་ཁ་ན་མ་ཐོ་བ་གསུམ་མོ། །དེ་ལས་དང་པོ་ལ། ཡུལ་ལ་ལྟོས་ནས་སྟོབས་ཆེ་བ། ཚེ་འདི་ཉིད་ཀྱི་ཕ་གསོད་པ། མ་གསོད་པ། དགྲ་བཅོམ་པ་བཀྲོངས་པ། དགེ་འདུན་གྱི་འཁོར་ལོའི་དབྱེན་བྱེད་པ། དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་འབྱིན་པ་སྟེ། འདི་ལྔ་ལས་གང་རུང་རེ་སྤྱད་ན་སྐྱེ་བ་གཞན་གྱི་བར་མཚམས་མེད་པར་ངན་སོང་དམྱལ་བ་ཆེན་པོ་མནར་མེད་པར་སྐྱེ་བར་འགྱུར་བས་མཚམས་མེད་པའི་ལས་ཞེས་བྱའོ། །མཆོད་རྟེན་བཤིག་པ། བྱང་སེམས་ངེས་གནས་བཀྲོངས་པ། དགྲ་བཅོམ་མ་ལ་ལོག་པར་གཡེམ་པ། འཕགས་པ་རྒྱུན་ཞུགས་སོགས་སློབ་པ་གསོད་པ། དགེ་འདུན་གྱི་འདུ་སྒོ་འཕྲོག་པ་སྟེ། ཉེས་པ་སྔ་མ་དང་ཆ་འདྲ་བས་ཉེ་བའི་མཚམས་མེད་ལྔ་ཞེས་བྱའོ། །རྣམ་པའི་སྒོ་ནས་ལུས་ཀྱིས་སྲོག་གཅོད་པ་སོགས་བཅུ་སྟེ་ཞིབ་པར་འོག་ཏུ་སྟོན་ནོ། །གཞན་ཡང་ཉེས་པ་ཤིན་ཏུ་ལྕི་བ། རང་ལས་ཡོན་ཏན་ཆེ་བའི་མཁས་པའི་གྲལ་གོང་དུ་སྡོད་པ་ཡེ་ཤེས་ལྡན་པའམ་རང་ལས་བསླབ་པ་རྒན་པའི་དགེ་སློང་གི་ཕྱག་ལེན་པ། སྒྲུབ་པ་པོའི་འཚོ་བའི་ཟས་ལ་རང་གར་སྤྱོད་པ། ཚོགས་འཁོར་དང་གཏོར་མའི་ཡོ་བྱད་སོགས་དམ་ཚིག་དང་ལྡན་པའི་སྔགས་པའི་རྫས་ལ་སྤྱོད་པ་སྟེ། མི་འོས་པའི་སྤྱོད་པ་ལོག་པ་ལ་ཞུགས་པས་ལོག་པའི་ལྕི་བ་བཞི་སྟེ། འདི་ལ་རང་གིས་ཆོས་སྟོན་པ་སོགས་ཀྱི་སྐབས་ནི་མ་གཏོགས་སོ། །མི་ཆོས་ཀྱི་མནའ་ཟོས་པ། ཉན་ཐོས་ཀྱི་འདུལ་ཁྲིམས་ཉམས་པ། བྱང་སེམས་ཀྱི་བསླབ་པ་ཉམས་པ། གསང་སྔགས་ཀྱི་དམ་ཚིག་ཉམས་པ་སྟེ། འདི་བཞི་གང་ལ་སྤྱོད་པ་དེའི་རང་རང་གི་ངང་ཚུལ་ཉམས་པར་བྱེད་པས་ཉམས་པའི་ལྕི་བ་བཞི་དང་། ཉོན་མོངས་པ་གཏི་མུག་གི་དབང་གིས་རྒྱལ་བའི་བཀའ་ཚད་མ་ལ་སྨད་པ། དེ་བཞིན་དུ། ང་རྒྱལ་གྱི་དབང་གིས་མཁས་པ་གཞན་གྱི་ཡོན་ཏན་ལ་སྨོད་པ། ཕྲག་དོག་གི་དབང་གིས་གཞན་གྱི་བདེན་པའི་ཚིག་ལ་སྨད་པ། ཕྱོགས་ལྷུང་གི་དབང་གིས་གཞན་གྱི་ཆོས་ལ་སྐྱོན་མེད་བཞིན་དུ་ཡོད་པར་སྒྲོ་བཏགས་ནས། དགག་སྒྲུབ་བགྱིས་པ་སྡེ་ཡུལ་གཉན་པོ་ལ་སྨད་པས་སྨད་པའི་ལྕི་བ་བཞི་དང་། མཚམས་མེད་ལྔ་ཡི་ནང་ནས་ཁྲག་འབྱིན་ལྕི་སྟེ་གཞན་བཞི་པོ་སངས་རྒྱས་ལ་བརྟེན་ནས་བཤགས་སུ་ཡོད་ཀྱང་། དེ་ཉིད་ལ་གནོད་པ་བགྱིས་པས་བཤགས་ཡུལ་ཉིད་སྤང་བའི་ཕྱིར་རོ། །མི་དགེ་བཅུ་ལས་ལོག་ལྟ་ལྕི་སྟེ་རྒྱུ་འབྲས་ཡིད་ཆེས་ཀྱི་ལྟ་བ་ཡོད་ན་གཞན་དགུ་པོ་ཕྱིར་འཆོས་པར་རུང་ལ། ལོག་ལྟས་ནི་དགེ་རྩ་ཐམས་ཅད་རྒྱུན་གཅོད་ཅིང་ཕྱིར་འཆོས་པ་མི་སྲིད་པས་སོ། །ངེས་དོན་གྱི་ཆོས་མཉམ་པ་ལ་གཅིག་གི་ཕྱོགས་བཟུང་ནས་གཅིག་ཤོས་ཁྱད་དུ་གསོད་པ་ནི་ཆོས་སྤངས་པའི་སྒྲིབ་པར་འགྱུར་བའི་ཕྱིར་དང་། བྱང་ཆུབ་སེམས་དཔའ་གཞན་ལ་ཉེས་པ་བརྗོད་པའི་ས་བོན་ནམ་རང་བཞིན་གཞི་མེད་པ་ལ་གལ་དུ་འཛུགས་ཏེ་ཡོད་པར་སྒྲོ་བཏགས་ནས་སྐུར་པ་འདེབས་པ་སྟེ་ཡུལ་ཁྱད་པར་ཅན་ལ་སྐུར་པ་བཏབ་པས་ཉེས་པ་ཤིན་ཏུ་ལྕི་བའི་ཕྱིར་སྐུར་བའི་ལྕི་བ་བཞི་སྟེ་དེ་ལྟར་ལྕི་བ་བཅུ་དྲུག་དང་། གཞན་ཡང་དགེ་བ་ལ་སྨད་པ། སྡིག་པ་ལ་བསྟོད་པ། དགེ་བ་ཅན་གྱི་ཐུགས་དཀྲུགས་པ། དད་པ་ཅན་གྱི་ཚོགས་བཅག་པ། བཀའ་དྲིན་ཅན་གྱི་བླ་མ་སྤངས་པ། དངོས་གྲུབ་ཀྱི་རྩ་བ་ཡི་དམ་སྤངས་པ། དམ་ཚིག་གིས་འབྲེལ་བའི་མཆེད་ལྕམ་སྤངས་པ། དཀྱིལ་འཁོར་གཉེན་པོའི་མཚམས་འདྲལ་བ་སྟེ་བྱ་བ་ལོག་པ་ལ་ཞུགས་པས་ལོག་པ་བརྒྱད་དེ་དེ་ལ་སོགས་པའོ། །གཉིས་པ་ནི། གང་སྤྱད་པ་ཙམ་གྱིས་ཀུན་ལ་སྡིག་ཏུ་མི་འགྱུར་ཀྱང་། ཁྲིམས་ལྡན་གྱིས་སྤྱད་ན་ཉེས་པར་འགྱུར་བ། རབ་ཏུ་བྱུང་བ་ལ་ཕྱི་དྲོའི་ཁ་ཟས་དང་། ཆོས་གོས་འབྲལ་སྤངས། བྱང་སེམས་ལ་གཞན་གྱི་སྡུག་བསྔལ་སེལ་བར་མི་བྱེད་པ་དང་ནད་གཡོག་མི་བྱེད་པ་སོགས་དང་། གསང་སྔགས་ལ་སྣོད་བཅུད་ཐ་མལ་དུ་འཛིན་པ་ལྟ་བུ་སྟེ། མདོར་ན་ཐུབ་པ་རྫོགས་པའི་སངས་རྒྱས་ཀྱིས་བཅས་པའི་སྡོམ་པ་གསུམ་གྱི་ཉེས་ལྟུང་གི་རིགས་ཇི་སྙེད་པའོ། །གསུམ་པ་ནི། འཇིག་རྟེན་ན་སྐྱེ་བོ་ཡ་རབས་རྣམས་ཀྱིས་མཐོང་ཞིང་ཐོས་ན་སྨོད་པར་འགྱུར་བའི་གནས། བླང་དོར་གྱི་གནས་མི་ཤེས་པ་དང་། ཤེས་ཀྱང་མ་གུས་པ་དང་། བྱ་བ་ཀུན་ལ་མ་བརྟགས་པར་བག་མེད་པར་འཇུག་པ་དང་། དཀོན་མཆོག་དང་ལས་འབྲས་སོགས་ལ་ཡིད་ཆེས་ཀྱི་དད་པ་མེད་པ་དང་། ཉོན་མོངས་པ་རགས་པས་རྒྱུད་རྩུབ་ཅིང་མ་བསྡམས་པ་སོགས་ཏེ། མདོར་ན་ཀུན་གྱིས་འཕྱ་ཞིང་ཁྲེལ་བར་འགྱུར་བའི་སྡིག་པའི་ལས་རྣམས་སོ། །དེ་ཐམས་ཅད་ཀྱི་ནང་ནས་ཀྱང་སེམས་བསྐྱེད་པའི་བྱང་ཆུབ་སེམས་དཔའ་དང་བླ་མ་རྡོ་རྗེ་སློབ་དཔོན་མཆེད་དང་ལྕམ་དྲལ་བཅས་པ་ལ་གནོད་པའི་ལས་བགྱིས་པ་དང་དམ་པའི་ཆོས་སྤངས་པ་སོགས་ནི་ཤིན་ཏུ་ལྕི་སྟེ་དད་པའི་སྟོབས་བསྐྱེད་པའི་ཕྱག་རྒྱའི་མདོ་ལས་ཕྱོགས་བཅུའི་སེམས་ཅན་ཐམས་ཅད་བཙོན་དུ་བཅུག་པ་བས་བྱང་ཆུབ་ཏུ་སེམས་བསྐྱེད་པའི་གང་ཟག་ལ་ཁྲོས་ཏེ་རྒྱབ་བསྟན་ན་སྡིག་པ་ཆེའོ། །ཆུ་བོ་གངྒཱའི་ཀླུང་གི་བྱེ་མའི་རྡུལ་གྱི་གྲངས་དང་མཉམ་པའི་མཆོད་རྟེན་བཤིག་པ་བས། བྱང་ཆུབ་སེམས་དཔའ་ལ་གནོད་སེམས་དང་། ཁོང་ཁྲོ་བ་དང་། ཚིག་ངན་དང་། སྐུར་བ་བཏབ་པ་རྣམས་སྡིག་པ་ལྕིའོ། །ཞེས་གསུངས་པ་དང་། སྔགས་སུ་བླ་མ་དང་མཆེད་ལྕམ་སོགས་ལ་དམ་ཚིག་ཉམས་པའི་ཉེས་པས་བསྐལ་པ་འཇིག་ཀྱང་ཞིག་པར་མི་འགྱུར་བའི་གནས་རྡོ་རྗེའི་དམྱལ་བ་ཆེན་པོར་སྐྱེ་བར་གསུངས་པ་དང་། མདོ་སྡེ་དུ་མ་ནས་མཚམས་མེད་པ་ལྔ་བསགས་པ་དང་། འཛམ་བུ་གླིང་གི་མཆོད་རྟེན་ཐམས་ཅད་བཤིག་པ་བས་དམ་པའི་ཆོས་སྤོང་བ་ཉེས་པ་ལྕི་བར་གསུངས་པས་མཚོན་མཐའ་ཡས། མདོར་ན། ཆེད་དུ་བརྗོད་པའི་ཚོམ་ལས། སྡིག་པ་ཆུང་ངུ་བྱས་པས་ཀྱང་། །འཇིག་རྟེན་ཕ་རོལ་འཇིགས་ཆེན་དང་། །ཕུང་ཁྲོལ་ཆེན་པོ་བྱེད་འགྱུར་ཏེ། །ཁོང་པར་སོང་བའི་དུག་བཞིན་ནོ། །ཞེས་སོ། །གཉིས་པ་བླང་བྱ་དགེ་བ་ལ། ངོ་བོ་ནི། དུག་གསུམ་མེད་པའི་ཀུན་ནས་བསླང་བའི་ལས་ཐམས་ཅད་དེ། རིན་ཆེན་ཕྲེང་བ་ལས། མ་ཆགས་མི་སྡང་གཏི་མུག་མེད། །དེས་བསྐྱེད་ལས་ནི་དགེ་བ་ཡིན། །དགེ་ལས་བདེ་འགྲོ་ཐམས་ཅད་དང་། །སྐྱེ་བ་ཀུན་ཏུ་བདེ་བ་ཉིད། །ཅེས་སོ། །ངེས་ཚིག་ནི། དགེ་བའམ་ལེགས་པར་སྤྱད་པ་སྟེ། དངོས་སམ་བརྒྱུད་ནས་བདེ་བའམ་ལེགས་པ་འབའ་ཞིག་སྐྱེད་པར་བྱེད་པས་ན་དེ་སྐད་ཅེས་བྱའོ། །དབྱེ་ན་གསུམ། བསོད་ནམས་ཆ་མཐུན། ཐར་པ་ཆ་མཐུན། བླ་ན་མེད་པའི་དགེ་བའོ། །དང་པོ་ནི། གང་ཟག་སོ་སོ་སྐྱེ་བོ་བདག་མེད་པའི་དོན་མ་རྟོགས་ཤིང་འཁོར་བ་མཐའ་དག་ལ་ངེས་འབྱུང་མ་སྐྱེས་པས་ཐབས་ཤེས་རྒྱ་ཆུང་བའི་དབང་གིས་ཕྱི་མ་ལྷ་མིའི་བདེ་འབྲས་ཙམ་དོན་དུ་གཉེར་བའི་སྒོ་ནས་སྦྱིན་པ་གཏོང་བ་དང་ཚུལ་ཁྲིམས་བསྲུང་བ་དང་སྙོམས་འཇུག་གི་ཏིང་ངེ་འཛིན་གོམས་པར་བྱེད་པ་ལ་སོགས་པའོ། །གཉིས་པ་ནི། གང་ཟག་གི་བདག་མེད་ཙམ་རྟོགས་པའི་ཤེས་རབ་དང་འཁོར་བ་མཐའ་དག་ལ་ངེས་པར་འབྱུང་བའི་བློས་སྲིད་པའི་ཕུན་ཚོགས་དོན་དུ་གཉེར་བ་མ་ཡིན་ཡང་རང་ཉིད་གཅིག་པུ་ཐར་པའི་རང་ལམ་གྱི་འབྲས་བུ་ཉི་ཚེ་བ་ལ་དམིགས་པའི་ཐབས་ཤེས་ཕྱོགས་གཅིག་གིས་ཟིན་པའི་དགེ་བའི་རྩ་བ་ཇི་སྙེད་པའོ། །གསུམ་པ་ནི། བདག་མེད་གཉིས་རྟོགས་ཀྱི་མཁྱེན་པས་འཁོར་གསུམ་ཡང་དག་མི་དམིགས་པར་ཤེས་པ་དང་། སེམས་ཅན་ལ་བརྩེ་བའི་སྙིང་རྗེ་ཟུང་དུ་ཆུད་པའི་ཐབས་ཤེས་ཁྱད་པར་ཅན་གྱིས་ཟིན་པའི་དགེ་བའི་རྩ་བ་རྣམས་ཏེ། གཞུང་གཞན་ན་ཕྱི་མ་གཉིས་གཅིག་ཏུ་བྱས་པ་ལ་ཐར་ཆ་དང་། སྦྱོར་ལམ་པའི་རྒྱུད་ཀྱི་དགེ་རྩ་རྣམས་ལ་ངེས་འབྱེད་ཆ་མཐུན་ཏེ་གསུམ་དུ་དབྱེ་བའང་ཡོད་དོ། །དེ་ཐམས་ཅད་ཀྱི་ནང་ནས་དམ་པའི་ཆོས་འཛིན་པ་དང་། སེམས་ཅན་གྱི་སྲོག་བསླུ་བ་དང་། བྱང་ཆུབ་སེམས་ཀྱིས་ཟིན་པའི་དགེ་བ་སོགས་ནི་ཆེས་ཁྱད་པར་དུ་འཕགས་ཏེ། བློ་གྲོས་རྒྱ་མཚོས་ཞུས་པའི་མདོ་ལས། རྫོགས་པའི་བྱང་ཆུབ་སེམས་དང་ཆོས་འཛིན་དང་། །ཆོས་སྒྲུབ་པ་དང་སྲོག་ཆགས་སྙིང་བརྩེ་བ། །ཆོས་བཞི་འདི་དག་ཡོན་ཏན་མཐའ་ཡས་ཏེ། །འདི་དག་མཐའ་ནི་རྒྱལ་བས་མི་གསུང་ངོ་། །ཞེས་སོ། །མདོར་ན་ཆེད་དུ་བརྗོད་པའི་ཚོམ་ལས། དགེ་བ་ཆུང་ངུ་བྱས་པས་ཀྱང་། །འཇིག་རྟེན་ཕ་རོལ་བདེ་ཆེན་འདྲེན། །དོན་ཆེན་དག་ཀྱང་བྱེད་འགྱུར་ཏེ། །འབྲུ་རྣམས་ཕུན་ཚོགས་སྨིན་པ་བཞིན། །ཞེས་སོ། །གསུམ་པ་ནི། ངོ་བོ་དགེ་མི་དགེ་གང་ཡང་མ་ཡིན་པས་ཀུན་ནས་བསླངས་པའི་ལུས་ངག་གི་ལས་སོ། །ངེས་ཚིག་ནི་ལུང་དུ་མ་བསྟན་པ་སྟེ། དགེ་མི་དགེ་གང་དུའང་ཁ་ཚོན་གཅོད་དུ་མེད་པས་སོ། །དབྱེ་ན། འགྲོ་བ་དང་། འདུག་པ་དང་། ཟ་བ་དང་། ཉལ་བ་དང་། གཏམ་སྨྲ་བ་དང་། གཞན་ཡང་བཟོ་ལ་སོགས་པ་སྟེ། འདི་རྣམས་ཀྱིས་འབྲས་བུ་གཞན་མི་འབྱིན་པས་ས་བོན་རུལ་བ་དང་འདྲ་ཡང་། དལ་འབྱོར་ཆུད་གསོན་པ་ལ་ནི་ཆེས་ཐུ་བས་ཐབས་ལ་མཁས་པས་དགེ་བའི་ལམ་དུ་སྒྱུར་བ་གལ་ཆེ་ཞིང་། དེའི་རྩ་བའང་མོས་¡eཔ་ཞུ་མཆན། ¡fལ་རག་ལས་ཏེ། རྒྱལ་སྲས་ཞི་བ་ལྷས། དགེ་བའི་ཕྱོགས་རྣམས་ཐམས་ཅད་ཀྱི། །རྩ་བ་མོས་པར་ཐུབ་པས་གསུངས། །དེ་ཡི་རྩ་བ་རྟག་ཏུ་ནི། །རྣམ་སྨིན་འབྲས་བུ་བསྒོམ་ལས་སོ། །ཞེས་དང་། ཡིད་ལ་བསམ་པ་དགེ་བྱས་པས། །གང་དང་གང་དུ་འགྲོ་གྱུར་པ། །དེ་དང་དེར་ནི་བསོད་ནམས་དེས། །འབྲས་བུའི་ཡོན་གྱིས་མངོན་མཆོད་འགྱུར། །ཞེས་གསུངས་པ་བཞིན་ནོ། །གཉིས་པ་ལས་བཅུའི་རང་བཞིན་བྱེ་བྲག་ཏུ་བསམ་པ་ནི། སེམས་ཉིད་ངལ་གསོ་ལས། འཁོར་བར་འདུ་བྱེད་ལས་དེ་དཀར་ནག་གཉིས། །དགེ་དང་མི་དགེ་བཅུ་བཅུའི་རང་བཞིན་ནོ། །ཞེས་གསུངས་པས། འདི་ལ་གཉིས། སྤང་བྱ་མི་དགེ་བ་བཅུ་དང་། བླང་བྱ་དགེ་བ་བཅུའི་རང་བཞིན་བསྟན་པའོ། །དང་པོ་ལ་གཉིས། ཀུན་མཁྱེན་ཆེན་པོས་སེམས་ཉིད་ངལ་གསོ་ལས་གསུངས་པ་ལྟར་བསྡུས་ཏེ་བསྟན་པ་དང་། ཨོ་རྒྱན་དུས་གསུམ་མཁྱེན་པའི་ཞལ་ལུང་དངོས་འགོད་པའོ། །དང་པོ་ནི། རྩ་བར། མི་དགེའི་ལས་བཅུ་ལུས་གསུམ་ངག་གི་བཞི། །ཡིད་གསུམ་རིམ་བཞིན་སོ་སོར་དབྱེ་བ་ནི། །ཞེས་སྡེ་ཚན་གསུམ་དུ་བསྡུས་པ་ལས། དང་པོ་ལུས་ཀྱི་གསུམ་ནི། སྲོག་གཅོད་བསམ་བཞིན་མ་ནོར་གཞན་བསད་ལ། །ཕྱོགས་མཐུན་རྡེག་འཚོག་ལ་སོགས་སྲོག་ལ་འཚེ། །མ་བྱིན་ལེན་པ་གཞན་ནོར་བརྐུ་བ་སྟེ། །ཕྱོགས་མཐུན་གཡོ་སྒྱུས་ཕ་རོལ་ནོར་ལ་ལེན། །འདོད་ལོག་གཞན་གྱིས་བདག་བཟུང་ཉིད་ལ་སྤྱོད། །ཕྱོགས་མཐུན་བསྒྲོད་མིན་རྩོལ་སོགས་འཁྲིག་པའི་ཆོས། །ཞེས་གསུངས་པས། ཐ་ན་འབུ་སྦྲང་དུ་གྱུར་པ་ཡན་ཆད་ལ་དེར་ཤེས་པས་སྲོག་གཅོད་དངོས་དང་། རྡེག་པ་དང་འཚོག་པ་ལ་སོགས་པ་ནི་དེའི་ཕྱོགས་མཐུན་ནོ། །གཞན་གྱི་ནོར་བརྐུ་བ་དངོས་དང་། ཕྱོགས་མཐུན་དལ་བུས་སྟེར་དུ་འཇུག་པ་ལ་སོགས་པའོ། །འདོད་པས་ལོག་པར་གཡེམ་པ་དངོས་ནི། ཁྱིམ་ཐབས་གཞན་གྱིས་བདག་ཏུ་བཟུང་བ། ཉེ་དུ་ཡིན་པ། དབང་པོའི་སྒོ་གཞན་ཡིན་པ། གནས་དང་དུས་སུ་མི་རུང་བར་རྩོལ་བའོ། །ཕྱོགས་མཐུན་ལག་པ་ལ་སོགས་པ་བསྒྲོད་བྱ་མ་ཡིན་པའི་གནས་དེར་ཆགས་པས་སྩོལ་བའོ། །དེ་དག་གི་འབྲས་བུ་སྤྱིར་རྣམ་སྨིན་རྒྱུ་མཐུན། དབང་ངམ་བདག་འབྲས། སྐྱེས་བུ་བྱེད་པ་སྟེ་སོ་སོར་བཞི་རེས་སྟོན་ཀྱང་། འདིར་བསྡུས་ཏེ་དོན་ཁྲིད་དངོས་ལྟར་ན། སྲོག་བཅད་པས་གང་དུ་སྐྱེས་པ་དེར་ཚེ་ཐུང་ཞིང་ནད་མང་ལ། ཡུལ་ཡང་ཉམས་མི་དགའ་བའི་ངོམ་གྲོག་དང་། གཡང་ས་ལ་སོགས་པ་ཚེ་ལ་བར་དུ་གཅོད་པར་གནས་པ་དང་། ངན་སོང་གསུམ་གྱི་སྡུག་བསྔལ་མྱོང་བ་ལ་སོགས་པའོ། །མ་བྱིན་པར་བླངས་པས་དབུལ་ཞིང་ཕོངས་ལ་སད་སེར་མུ་གེས་ཉེན་པའི་ཡུལ་ངན་པར་གནས་པ་དང་། ངན་སོང་གསུམ་ལས་ཁྱད་པར་ཡི་དྭགས་ཀྱི་ཡུལ་དུ་སྐྱེ་བ་ལ་སོགས་པའོ། །ལོག་པར་གཡེམ་པས་ཁྱིམ་ཐབ་མི་མཛེས་ལ་དགྲ་ཟླ་དང་བཅས་ཤིང་། ཚ་སྒོ་དང་ཡོངས་སུ་དྲི་ང་ལ་བཙོག་པའི་ཡུལ་དུ་གནས་པ་དང་། ངན་སོང་གི་སྡུག་བསྔལ་མྱོང་བར་བྱེད་པའི་ཕྱིར། བདག་གིས་དེང་ནས་ལུས་ཀྱི་མི་དགེ་བ་གསུམ་པོ་སྤང་དགོས་སྙམ་དུ་སྦྱོར་དངོས་རྗེས་གསུམ་ཚང་བས་ཉམས་སུ་བླང་ངོ་། །ཞེས་གསུངས་ཏེ། འདི་ལས་ངན་སོང་དུ་སྐྱེ་བར་གསུངས་པ་ནི་རྣམ་སྨིན། ཚེ་ཐུང་བ་སོགས་ནི་མྱོང་བ་རྒྱུ་མཐུན། ཡུལ་མི་དགའ་བ་སོགས་དབང་ངམ་བདག་འབྲས། སོགས་སྒྲས། སྐྱེ་བ་ཕྱི་མར་མི་དགེའི་ལས་དེ་ལ་ཡང་ཡང་འཇུག་སྤྲོ་བ་བྱེད་པ་རྒྱུ་མཐུན་དང་། ལས་དེ་གཉེན་པོས་མ་བཅོམ་ན་གོང་དུ་འཕེལ་བ་སྐྱེས་བུ་བྱེད་འབྲས་གཉིས་བསྟན་པ་ཡིན་པས་འོག་མ་ཀུན་ལའང་དེ་བཞིན་སྦྱོར་ཤེས་པར་བྱའོ། །གཉིས་པ་ངག་གི་ལས་བཞི་ནི། བརྫུན་ཚིག་འདུ་ཤེས་གཞན་སྒྱུར་ཚིག་དོན་གོ །ཕྱོགས་མཐུན་དྲང་སོགས་གཞན་སེམས་སླུ་བ་ཉིད། །ཕྲ་མ་ཕ་རོལ་འབྱེད་ཚིག་སྨྲ་བ་སྟེ། །ཕྱོགས་མཐུན་གཞན་ཚིག་གཞན་ཟློས་མི་མཐུན་བྱེད། །ངག་འཁྱལ་བསྟན་བཅོས་ངན་དང་བྲེ་མོའི་གཏམ། །ཕྱོགས་མཐུན་འབྲེལ་མེད་བརྗོད་སོགས་ཆོས་མིན་གཏམ། །ཚིག་རྩུབ་ཕ་རོལ་ཞེར་འདེབས་རྩུབ་མོའི་ཚིག །ཕྱོགས་མཐུན་འཇམ་སོགས་གཞན་ཡིད་མི་བདེའི་གཏམ། །ཞེས་གསུངས་ཏེ། གཞན་གྱི་འདུ་ཤེས་བསྒྱུར་བའི་ཚིག་མི་བདེན་པར་སྨྲ་བ་ནི་བརྫུན་དངོས་དང་། དྲང་པོར་བརྗོད་པས་ཕ་རོལ་བསླུ་བར་མཐོང་ནས་བརྗོད་ན་དེའི་ཕྱོགས་མཐུན་ནོ། །གཞན་གཉིས་འབྱེད་པའི་ཚིག་ཟློས་པ་ནི་ཕྲ་མ་དངོས་དང་། ཇི་སྐད་ཟེར་བ་གཅིག་དྲུང་དུ་གཅིག་གི་ཚིག་བརྗོད་པ་ནི་དེའི་ཕྱོགས་དང་མཐུན་པའོ། །མཆོད་སྦྱིན་དང་སྙན་དངགས་ལ་སོགས་པ་དང་བྲེ་མོའི་གཏམ་སྣ་ཚོགས་ཆོས་དང་འགལ་བ་བརྗོད་པ་ནི་ངག་འཁྱལ་དངོས་དང་། དུས་དང་མ་འབྲེལ་བའི་བརྗོད་པ་འགའ་ཞིག་སྨྲ་བ་ནི་དེའི་ཕྱོགས་དང་མཐུན་ནོ། །གཞན་གྱི་རྣ་བར་མི་སྙན་ཞིང་ཞེར་འདེབས་པའི་ཚིག་སྨྲ་བ་ནི་རྩུབ་མོ་དངོས་དང་། སྙན་པར་སྨྲས་ཀྱང་ཡིད་མི་བདེ་བ་བསྐྱེད་ན་དེ་ཡང་དེའི་ཕྱོགས་མཐུན་པའོ། །འདི་ལས་གོང་དུ་སྙན་དངགས་ཞེས་པ་ཕྱི་རོལ་པའི་རིགས་བྱེད་བཞིིའི་ནང་ཚན་སྙན་ཚིག་གམ་སྙན་དངགས་ཟེར་བ་དེ་ཡིན་གྱི། ད་ལྟ་བོད་ན་ཡོད་པའི་སྙན་དངགས་ཀྱི་གཞུང་ལྟ་བུ་ནི་མ་ཡིན་ཏེ། བཅོམ་ལྡན་འདས་ཀྱིས་མདོ་ལས། སངས་རྒྱས་ཀྱི་བསྟན་པ་གསལ་བའི་ཕྱིར་རྒྱལ་བའི་སྙན་དངགས་བྱའོ་ཞེས་རྗེས་སུ་གནང་བའི་ཕྱིར་དང་། དུས་དང་མ་འབྲེལ་བར་བརྗོད་པའི་ཁོངས་སུ་མ་གུས་པ་དང་སྣོད་མིན་ལ་ཆོས་བཤད་པ་སོགས་བསྡུ་བར་གསུངས་སོ། །གཞན་རྣམས་གོ་སླ། འབྲས་བུ་ནི། བརྫུན་གྱིས་སྐུར་བ་མང་ཞིང་རྟག་ཏུ་བསླུ་བ་དང་། ཕྲ་མས་འཁོར་འདབས་མི་མཛའ་ཞིང་ཕན་བཏགས་པའང་དགྲར་ལྡང་བ་དང་། ཚིག་རྩུབ་མོས་མི་སྙན་པ་འབའ་ཞིག་རྣ་བར་ཐོས་ཤིང་འཐབ་མོའི་ཚིག་ཏུ་འགྱུར་བ་དང་། ངག་འཁྱལ་བས་ཚིག་མི་བཙུན་ཞིང་འཁྱོལ་བ་སྟེ། ངན་འགྲོ་ལོག་པར་ལྟུང་བའི་གནས་སུ་བརྒྱུད་ཅིང་སྡུག་བསྔལ་མྱོང་བར་ངེས་པས་བདག་གིས་སྤངས་དགོས་སྙམ་དུ་ཉམས་སུ་བླང་བར་བྱའོ། །གསུམ་པ་ཡིད་ཀྱི་གསུམ་ནི། བརྣབ་སེམས་གཞན་འབྱོར་མི་བཟོད་བདག་གིར་བྱེད། །ཕྱོགས་མཐུན་ཐོས་སོགས་ཕ་རོལ་དཔལ་ལ་བརྐམ། །གནོད་སེམས་གཞན་ལ་གནོད་འཚེས་ཞེ་སྡང་ཞིང་། །ཕྱོགས་མཐུན་ཕན་པར་མི་འདོད་ཁྲོ་བའི་སེམས། །ལོག་ལྟ་རྟག་ཆད་རྒྱུ་འབྲས་མེད་པར་བལྟ། །ཕྱོགས་མཐུན་སྒྲོ་སྐུར་འདེབས་སོགས་ཕྱིན་ཅི་ལོག །ཞེས་གསུངས་ཏེ། གཞན་གྱི་ཡོ་བྱད་ལ་སོགས་པ་རང་གི་ཡིན་པར་གྱུར་ན་ཅི་མ་རུང་སྙམ་པ་ནི་བརྣབ་སེམས་དངོས་དང་། ཐོས་པ་ལ་སོགས་པ་ལ་ཕ་རོལ་པོ་ལ་ཁྲོ་བཞིན་དུ་བདག་གིར་གྱུར་ན་སྙམ་པ་ནི་ཕྱོགས་མཐུན་ནོ། །གཞན་ལ་གནོད་པའི་བསམ་པ་ནི་གནོད་སེམས་དངོས་དང་། ཕན་པར་མི་དགའ་ཞིང་ཁོང་ཁྲོ་བ་ནི་ཕྱོགས་མཐུན་ནོ། །ལས་རྒྱུ་འབྲས་ལ་སྐུར་བ་འདེབས་ཤིང་རྟག་ཆད་ཀྱི་མཐར་ལྟུང་བ་ནི་ལོག་ལྟ་དངོས་དང་། ཡང་དག་པའི་ཆོས་དང་དེ་སྟོན་པའི་དགེ་བའི་བཤེས་གཉེན་ལ་སོགས་པ་ཆོས་དང་མཐུན་པ་ལ་སྒྲོ་སྐུར་འདེབས་པ་ནི་དེའི་ཕྱོགས་མཐུན་ནོ། །དེ་རྣམས་ཀྱི་འབྲས་བུ་ནི། བརྣབ་སེམས་ཀྱིས་གང་བསམ་པ་མི་འགྲུབ་ཅིང་མ་བསམས་པ་ཐོག་ཏུ་འབབ་པ་དང་། གནོད་སེམས་ཀྱིས་རྟག་ཏུ་འཇིགས་ཤིང་འཚེ་དོགས་མང་ལ་ཉམ་ང་བ་དང་། ལོག་ལྟས་ལྟ་བ་ངན་པ་རྒྱུ་འབྲས་མེད་པ་དང་རྟག་ཆད་ཀྱི་ལུགས་ངན་ལ་གནས་ཏེ། ངན་འགྲོར་འཁོར་བའི་སྡུག་བསྔལ་གྱི་གདུང་བའི་ཕྱིར་བདག་གིས་སྤང་བར་བྱའོ་སྙམ་དུ་བསྒོམ་པར་བྱའོ། །མདོར་ན་འདུལ་བ་ལུང་ལས། མི་དགེ་བ་ནི་དུག་དང་འདྲ་སྟེ་ཆུང་ངུས་ཀྱང་སྡུག་བསྔལ་ཆེན་པོར་བསྐྱེད་པའི་ཕྱིར་རོ། །མི་རྒོད་དང་འདྲ་སྟེ་དགེ་བའི་ཚོགས་འཛོམས་པའི་ཕྱིར་རོ། །ཞེས་གསུངས་པས། མི་དགེ་བ་ནི་གང་གིས་སྤྱད་པའི་འབྲས་བུ་རྣམ་སྨིན་རྩུབ་མོ་མྱོང་བའི་ཕྱིར་ཁ་ཞེ་ངོ་ལྐོག་མེད་པར་ནམ་དུའང་སྤང་བར་བྱ་དགོས་ཏེ། མཛངས་བླུན་ལས། སྡིག་པ་ཆུང་ངུ་དག་ལ་ཡང་། །མི་གནོད་སྙམ་དུ་བརྙས་མི་བྱ། །མེ་མདག་ཆུང་ངུ་དག་གིས་ཀྱང་། །རྩྭ་ཕུང་རི་ཙམ་སྲེག་པར་བྱེད། །ཅེས་དང་། སྐྱེས་རབས་ལས། མ་མཐོང་བར་ནི་སྡིག་པ་བགྱིས་པ་དག །དུག་ཟོས་བཞིན་དུ་བདེ་བར་ག་ལ་འགྱུར། །ལྷ་དང་རྣལ་འབྱོར་ཅན་གྱི་མི་དག་གི། །རྣམ་དག་མིག་གིས་མི་མཐོང་མི་སྲིད་དོ། །ཞེས་སོ། །གཉིས་པ་ནི། ཉང་གཏེར་བླ་མའི་དམར་ཁྲིད་ལས་གསུངས་པ་ཉིད་ཚིགས་སྣ་ཅུང་ཟད་བསྡུས་ཏེ་བཀོད་པ། མི་དགེ་བ་བཅུ་ལས། ལུས་ཀྱི་ལས་གསུམ་ནི། སྲོག་གཅོད་པ་དང་། མ་བྱིན་པ་ལེན་པ་དང་། མི་ཚངས་པར་སྤྱོད་པ་གསུམ་ཡིན། དེ་ཡང་སྲོག་གཅོད་པའི་ངོ་བོ་ནི་འཚོ་བའི་རྒྱུན་གཅོད་པ་ཡིན། དབྱེ་ན་དུག་གསུམ་གྱི་སྒོ་ནས་འབྱེད་དེ། འདོད་ཆགས་ཀྱིས་སྲོག་གཅོད་པ་ནི། ཤ་དང་ལྤགས་པ་ལ་སོགས་པ་འདོད་པའི་ཕྱིར་གསོད་པ། ཞེ་སྡང་གིས་སྲོག་གཅོད་པ་ནི། ཀུན་ནས་མནར་སེམས་པ་དགུ་དང་བཅས་པས་མི་ཤ་ཆགས་པ་སོགས་གསོད་པ། གཏི་མུག་གིས་སྲོག་གཅོད་པ་ནི། དེ་ལྟ་བུའི་བསམ་པ་གང་ཡང་མེད་ཀྱང་བྱིས་པས་བྱེའུ་གསོད་པ་ལྟ་བུའམ། རྡོག་པའི་འོག་ཏུ་གྲོག་སྦུར་ཤི་བ་ལྟ་བུ་ཡིན། དེའི་ཡན་ལག་ནི་བཞི་སྟེ། སྡིག་པ་འདི་ལྟ་བུ་བྱའོ་སྙམ་པའི་བློ་སྔོན་དུ་སོང་བ་དང་གཅིག སྦྱོར་བ་དོན་དུ་གཉེར་བ་སྟེ་དེ་ལ་རྩོལ་བས་འཇུག་པ་དང་གཉིས། དངོས་གཞི་ཉམས་སུ་མྱོང་སྟེ་བསད་པ་དང་གསུམ། མཇུག་འགྱོད་པ་མེད་པར་རྗེས་སུ་ཡི་རང་བ་དང་བཞིས་རྫོགས་པ་ཡིན། དེའི་འབྲས་བུ་ནི་རྣམ་པ་གསུམ་དུ་འབྱུང་སྟེ། རྣམ་པར་སྨིན་པའི་འབྲས་བུ་ནི། འདོད་ཆགས་ཀྱིས་སྲོག་གཅོད་པ་ཕལ་ཆེར་ཡི་དྭགས། ཞེ་སྡང་གིས་སྲོག་བཅད་པས་ནི་དམྱལ་བ། གཏི་མུག་གིས་བྱོལ་སོང་དུ་སྐྱེའོ། །དབང་གི་འབྲས་བུ་ནི་སྔོན་གྱི་ལས་ངན་དེ་དག་གི་དབང་གིས་གལ་ཏེ་མིར་སྐྱེ་བ་ན་ཡང་ཚེ་ཐུང་། རྒྱུ་མཐུན་གྱི་འབྲས་བུ་སྔ་མའི་བག་ཆགས་ཀྱིས་སྲོག་གཅོད་པ་ལ་དགའ་བར་འགྱུར་རོ། །དེས་ན་བདག་ཅག་རྣམས་ཀྱིས་དེ་ལྟ་བུ་སྤྱད་པར་བྱ་བའི་ལས་མ་ཡིན་པས། འབད་པས་སྤངས་ན་རྣམ་སྨིན་དང་། རྒྱུ་མཐུན་དང་། དབང་གི་འབྲས་བུ་སྔར་ལས་ལོག་ནས། ལྷ་མིའི་བདེ་སྐྱིད་ཕུན་སུམ་ཚོགས་པ་སྤྱོད་པར་འགྱུར་རོ། །ཞེས་མདོ་ནས་བཤད་གསུངས། ཚིག་ཕྱི་མ་འདི་འོག་མ་རྣམས་ལའང་གསུངས་པས་དེ་ལྟར་ཤེས་པར་བྱ་དགོས་ལ། སྐབས་འདིར་གལ་ཆེ་བའི་འཕྲོས་དོན་ཅུང་ཟད་བཤད་ན། གོང་སྨོས་གཏི་མུག་གིས་{གི}སྲོག་གཅོད་པ་དངོས་ནི་གཞུང་འདིར་མ་གསུངས་ཀྱང་གཞུང་གཞན་ལས་བཤད་པ་ལྟར་མཆོད་སྦྱིན་གྱི་ཕྱིར་སྲོག་གཅོད་པ་ཡིན་ཏེ། དེ་ནི་ཕྱི་རོལ་པ་རྣམས་ཀྱིས་མ་ཧཱ་དེ་བ་དང་དཀའ་བཟློག་མ་སོགས་མཆོད་པའི་ཕྱིར་མ་ཧེ་སོགས་གསོད་པ་དང་། ཀླ་ཀློ་རྣམས་ཀྱི་སྲོག་གཅོད་པ་ལ་དགེ་བར་འཛིན་པ་དེ་ཡིན་ལ། ད་ལྟ་ཆོས་སྟོན་དང་རྟེན་བཞེངས་སོགས་དགེ་བའི་ལས་ཀྱི་ཕྱིར་སེམས་ཅན་གསོད་པར་བྱེད་པ་འདི་ཡང་། དེ་དག་གི་ལྟ་གྲུབ་དང་མི་མཐུན་ཡང་སྤྱོད་པ་ནི་མཉམ་པོར་ཞུགས་པ་ཡིན་པས་ནང་པ་སངས་རྒྱས་པའི་ལུགས་ལས་གཞན་དུ་གྱུར་པར་ཤེས་པར་བྱ་དགོས་ཏེ། ཇི་སྐད་དུ། སངས་རྒྱས་འཇིག་རྟེན་ཕན་བརྩོན་པའི། །ཆོས་ནི་འཚེ་བ་མེད་པ་ཡིན། །དེ་ལ་ཡིད་བརྟན་དེའི་རྗེས་ཞུགས། །དེ་ཡང་འཚེ་བ་མེད་པར་བརྗོད། །ཡུན་རིང་ཕན་པའི་བྱ་བ་མཛད། །དེ་ལས་བྱང་ཆུབ་ཐོབ་གྱུར་ནས། །རྟག་ཏུ་འཚེ་མེད་ཕན་པར་སྤྱོད། །འཁོར་ལའང་ཕན་པ་བརྩོན་པར་འདོམས། །བྲམ་ཟེའམ་ཡང་ན་དགེ་སྦྱོང་ནི། །གཞན་གྱིས་ཐོས་པའི་ཚིག་ལ་ཡང་། །འདིས་གནོད་བྱས་པའི་ཚུལ་ཡོད་མིན། །ཀུན་ཏུ་དགེ་བའི་ངང་ཚུལ་འདིའོ། །ཞེས་དང་། ཁྱད་པར་འཕགས་བསྟོད་ལས། །ལྷ་རྟེན་དང་ནི་མཆོད་སྦྱིན་ལ། །སེམས་ཅན་གསོད་པར་བྱེད་པ་གང་། །འཇིག་རྟེན་པ་ཡི་ཆོས་སུ་འཚལ། །ཁྱོད་ཀྱི་བསྟན་ལ་དེ་དག་སྨད། །གང་ཞིག་སྲོག་ཆགས་ལ་རྟག་གནོད། །དེ་ལ་ཆོས་ཉིད་ག་ལ་ཡོད། །ཅེས་དང་། མཆོད་སྦྱིན་ལ་ནི་ཕྱུག་འགུམ་པ། །དྲང་སོང་རྣམས་ནི་སྨྲ་ཞེས་གྲགས། །སྡིག་མེད་ཁྱོད་ཀྱིས་གྲོག་མ་ལའང་། །གནོད་པ་བགྱིད་པར་རྗེས་མ་གནང་། །ཞེས་སོ། །ཚུལ་དེས་རྒྱལ་བ་དགྱེས་པའི་ཐབས་སུ་ནི་མི་འགྱུར་ཏེ། རྒྱལ་སྲས་ཞི་བ་ལྷས། གང་དག་བདེ་བས་ཐུབ་རྣམས་དགྱེས་འགྱུར་ཞིང་། །གང་ལ་གནོད་ན་མི་དགྱེས་འབྱུང་འགྱུར་བ། །དེ་དག་དགའ་བས་ཐུབ་པ་ཀུན་དགྱེས་ཤིང་། །དེ་ལ་གནོད་བྱས་ཐུབ་ལ་གནོད་པ་བྱས། །ཇི་ལྟར་ལུས་ལ་ཀུན་ནས་མེ་འབར་བ། །འདོད་པ་ཀུན་གྱིས་ཡིད་བདེར་མི་འགྱུར་བ། །དེ་བཞིན་སེམས་ཅན་གནོད་པ་བྱས་ན་ཡང་། །ཐུགས་རྗེས་ཆེ་རྣམས་དགྱེས་པའི་ཐབས་མེད་དོ། །ཞེས་སོ། །དེས་རང་གཞན་ལ་ཕན་པ་དང་བདེ་བའི་འབྲས་བུ་ནི་བསྐྱེད་མི་སྲིད་དེ། །སྤྱོད་འཇུག་ལས། སྡིག་པ་སྤྱད་པ་བདེ་འདོད་ཀྱང་། །གང་དང་གང་དུ་འགྲོ་འགྱུར་བ། །དེ་དང་དེར་ནི་སྡིག་པ་དེས། །སྡུག་བསྔལ་མཚོན་གྱིས་རྣམ་པར་འཇོམས། །ཞེས་དང་། སྐྱེས་རབས་ལས། བདག་གི་ཕྱིར་དང་གཞན་གྱི་ཕྱིར་དག་ཏུ། །བདེ་བ་འདོད་ན་སྡིག་པ་མི་བྱ་སྟེ། །བྱིས་པ་བདེ་འདོད་གང་ཞིག་སྡིག་བྱེད་ན། །དེ་ཡི་འབྲས་བུ་སོ་སོར་མྱོང་བར་འགྱུར། །ཞེས་དང་། དོན་དམ་བསྙེན་པ་ལས། ཐམས་ཅད་མཁྱེན་པ་ཉིད་ཀྱི་གཞུང་ཀུན་རྣམས་ལས་ནི། །སྲོག་གཅོད་ཀྱིས་ནི་གྲོལ་བ་ཡོད་པ་མ་ཡིན་ནོ། །ཞེས་སོ། །དེས་ན་དཔལ་མགོན་འཕགས་པ་ཀླུ་སྒྲུབ་ཀྱིས། ཁྱོད་ཀྱིས་བྲམ་ཟེ་དགེ་སྦྱོང་ལྷ་དང་ནི། །མགྲོན་དང་ཡབ་ཡུམ་དག་དང་བཙུན་མོ་དང་། །འཁོར་གྱི་སླད་དུའང་སྡིག་པ་མི་བགྱིད་དེ། །དམྱལ་བའི་སྡུག་བསྔལ་སྐལ་ནོད་འགའ་མ་མཆིས། །སྡིག་པའི་ལས་རྣམས་སྤྱད་པ་འགའ་ཡང་ནི། །དེ་ཡི་མོད་ལ་མཚོན་བཞིན་མི་གཅོད་ཀྱང་། །འཆི་བའི་དུས་ལ་བབ་ན་སྡིག་པ་ཡི། །ལས་ཀྱི་འབྲས་བུ་གང་ལགས་མངོན་དུ་འགྱུར། །ཞེས་རྒྱལ་པོ་བདེ་སྤྱོད་ལ་གདམས་པར་མཛད་པ་བཞིན་ནོ། །ཁྱད་པར་དུའང་བླ་མ་དང་སེར་མོ་བའི་རིགས་ཡིན་ན་ནི་ལྷག་པར་ཡང་ཉེས་པ་ལྕི་སྟེ། ཐོག་མར་སྡོམ་པ་ཀུན་གྱི་གཞི་རྟེན་སྐྱབས་འགྲོའི་བསླབ་བྱ་དང་ཡང་འགལ་ཏེ། མདོ་ལས། དམ་པའི་ཆོས་ལ་སྐྱབས་གསོལ་ན། །འཚེ་ཞིང་གནོད་པའི་སེམས་དང་བྲལ། །ཞེས་གསུངས་པས། འཚོ་བ་དང་ཕྲལ་བ་ལས་ཆེ་བའི་གནོད་འཚེ་ཡོད་མི་སྲིད་པས་སོ། །སོ་ཐར་གྱི་ཁྲིམས་དང་ཡང་འགལ་ཏེ། དེ་ནི་གཞན་གནོད་གཞིར་བཅས་སྤངས་པ་ལུས་ངག་གི་སྤང་བདུན་གཙོ་བོར་གྱུར་པའི་ཕྱིར། སྐྱོན་འདི་ལྟ་བུ་འབྱུང་བར་དགོངས་ནས། དགེ་སློང་རྣམས་ཀྱིས་རྣམ་གསུམ་དག་པ་ལས་ཤ་ཡི་བཟའ་བ་གཞན་སྤོང་དགོས་པ་དང་། སེམས་ཅན་ལ་གནོད་པའི་རྩྭ་ཆུ་ཙམ་ལའང་ལོངས་སྤྱད་པར་རྗེས་སུ་མ་གནང་བས་མཁོ་བའི་ཡོ་བྱད་ཆུ་ཚགས་སོགས་ཀྱང་དགོས་པའི་དོན་དེ་ཡིན། བྱང་སེམས་ལས་གཞན་དོན་དུ་འགྱུར་ན་ལུས་ངག་གི་ལས་བདུན་གནང་བའི་སྐབས་ཡོད་ཀྱང་ཚུལ་འདི་ལྟ་བུ་མ་ཡིན་ཏེ། ཐེག་པ་ཆེ་ཆུང་གི་སྟོན་པའི་རྣམ་ཐར་དང་སྐྱེས་རབས་རྣམས་སུ་འདི་ལྟ་བུ་གཅིག་ཀྱང་མ་བསྟན་པའི་ཕྱིར། དེས་ན་བསླབ་བྱའི་གཙོ་བོ་བདག་བས་གཞན་གཅེས་ཀྱིས་སེམས་ཅན་བློས་མི་སྤོང་བ་ཡིན་པས་དེ་དང་མངོན་སུམ་དུ་འགལ་བའི་ཕྱིར་རོ། །སྔགས་སུ་ཏན་གན་གྱི་སྤྱོད་པ་སོགས་གསུངས་པ་ཡོད་དེ། དེ་ནི་གྲུབ་པའི་སྤྱོད་པ་ནུས་པས་སྒྲོལ་བ་དང་སྙིང་རྗེས་གསོ་བ་གཉིས་ཀ་གྲུབ་པ་སློབ་དཔོན་པདྨ་དང་བི་མ་ལ། འཕགས་ཡུལ་གྱི་གྲུབ་ཆེན་ཤ་བ་རི་དང་། བོད་ཀྱི་གསང་བདག་ཟུར་ཆེ་ཆུང་སོགས་དང་འབྲུག་སྨྱོན་ཀུན་དགའ་ལེགས་པ་ལྟ་བུ་ཡིན་གྱི་ཕལ་གྱིས་སྤྱོད་ཡུལ་མིན་ཏེ། ལས་དང་པོ་པས་རྣལ་འབྱོར་པ་དང་། རྣལ་འབྱོར་པས་གྲུབ་པ་དང་། གྲུབ་པས་ཐམས་ཅད་མཁྱེན་པའི་སྤྱོད་པ་མི་བྱ་བར་གསུངས་པས་ཤེས་ལ། སྒྱུ་འཕྲུལ་རྒྱས་པ་ལས། མ་རྟོགས་པ་ཡིས་སྤྱད་གྱུར་ན། །ཡི་དྭགས་སྲིན་པོའི་གནས་སུ་སྐྱེ། །ཞེས་གསུངས་ཏེ། ཐར་པ་ནག་པོ་སོགས་ཀྱི་ལོ་རྒྱུས་ཀྱིས་ཀྱང་ཤེས་པར་ནུས་སོ། །དེས་ན་དང་པོ་དབང་གི་སྡོམ་བཟུང་སྐབས། དེང་ནས་སྲོག་གཅོད་མི་བྱ་ཞིང་། །ཞེས་ཁས་བླངས་དང་འགལ་ཞིང་། དངོས་གཞི་བདེ་གཤེགས་བཀའ་འདས་ཀྱི་རྩ་ལྟུང་དུ་འདུ་བའི་ཕྱིར། དེས་ན་རྡོ་རྗེ་རྩེ་མོ་ལས། བརྟན་པ་མ་ཐོབ་བར་དུ་ནི། །ཁ་ན་མ་ཐོ་རྡུལ་མེད་ཅིང་། །སྡོམ་པ་གསུམ་ལ་གནས་པར་བྱ། །ཞེས་སོ། །ཚུལ་དེ་ལ་དགོངས་ནས་ཚོགས་འཁོར་སོགས་ཀྱི་སྐབས་སུའང་། འཕགས་ཡུལ་དུ་བཟའ་བའི་ཕྱིར་གསད་པར་མི་འགྱུར་བའི་མི་ལ་སོགས་པའི་ཤ་ལྔ་པོ་དམ་ཚིག་གི་རྫས་སུ་གསུངས་པ་ཡིན་ལ། གལ་ཏེ་དེ་ལྟ་བུའི་སྡིག་མེད་མ་རྙེད་ན། གསང་འདུས་ལས། ཤ་ལ་སོགས་པ་མེད་ན་ཡང་། །ཐམས་ཅད་བསམ་པས་རྣམ་པར་བརྟགས། །ཞེས་དང་། མཉམ་སྦྱོར་ལས། བག་ཟན་ལས་ནི་བྱས་པའི་ཕྱུགས། །ཙན་དན་དམར་པོས་སྒྲུབ་པ་དང་། །བག་ཕྱེ་ཟན་ལས་བྱས་པའི་ཤ །རྒྱལ་པོའི་ཟན་ཞེས་བཤད་པའོ། །ཞེས་ཙན་དན་སོགས་ཀྱིས་ཁ་སྒྱུར་བའི་ཟན་ལ་དེར་མོས་པས་བྱ་བར་གསུངས་པའི་དོན་ཡང་དེ་ཡིན་ནོ། །དངོས་སུ་རང་གི་བསད་པ་དང་། གཞན་ལ་ལྐོག་ཏུ་གསོད་བཅུག་པ་གཉིས་རྣམ་སྨིན་གྱི་འབྲས་བུ་བསྐྱེད་པ་ལ་ཁྱད་པར་ཅུང་ཟད་ཀྱང་མེད་དེ། མཛོད་ལས། དམག་ལ་སོགས་པ་དོན་གཅིག་སྟེ། །ཐམས་ཅད་བྱེད་པ་པོ་བཞིན་ལྡན། །ཞེས་སོ། །དེར་མ་ཟད་དེ་ལརྗེས་སུ་ཡི་རང་བའང་མཉམ་པོར་གསུངས་ཏེ། འཕགས་པ་ཕུང་པོ་གསུམ་པ་ལས། མི་དགེ་བ་བཅུའི་ལས་ཀྱི་ལམ་ཡང་དག་པར་བླངས་པ་ལ་ཞུགས་པ་དང་། འཇུག་ཏུ་སྩལ་བ་དང་། འཇུག་པ་ལ་རྗེས་སུ་ཡི་རང་བའམ། ལས་ཀྱི་སྒྲིབ་པ་གང་གིས་བསྒྲིབས་ནས། བདག་སེམས་ཅན་དམྱལ་བར་མཆི་བའམ། ཞེས་སོགས་གསུངས་པའི་ཕྱིར་རོ། །དེ་ལྟར་སེམས་ཅན་གཅིག་ཙམ་གསོད་པའི་སྦྱོར་བ་ལ་གཏོགས་ཀྱང་། རྣམ་སྨིན་གྱི་འབྲས་བུ་བར་གྱི་བསྐལ་པ་གཅིག་ལ་སེམས་ཅན་ཉི་ཚེ་བའི་དམྱལ་བར་གནས་དགོས་པར་མདོ་དྲན་པ་ཉེར་བཞག་ལས་གསུངས་ཤིང་། དེར་མ་ཟད་སེམས་ཅན་ལས་ངན་པ་རྣམས་ལོག་པའི་སྨོན་ལམ་ལ་གོམས་པ་ཡིན་པས་སེམས་ཅན་འཆི་ཀ་མའི་སྨོན་ལམ་སྟོབས་བཙན་པས། སྔོན་ཤཱཀྱ་རྣམས་ཉ་པར་གྱུར་པའི་ཚེ་ཉ་ཆེན་པོ་གཉིས་ཀ་བ་ལ་བཏགས་ནས་བསད་པས། དེ་གཉིས་ཀྱིས་ད་ལྟ་ངེད་གཉིས་ཉེས་མེད་དུ་གསོད་པ་འདི་བཞིན་དུ་མ་འོངས་པ་ན་ངེད་གཉིས་ཀྱིས་ཀྱང་ཁྱེད་རྣམས་ཉེས་མེད་དུ་གསོད་པར་གྱུར་ཅིག་ཅེས་སྨོན་ལམ་བཏབ་པས། ཕྱིས་ཉ་ཆེན་གཉིས་པོ་རྒྱལ་པོ་འཕགས་སྐྱེས་པོ་དང་། བློན་པོ་མ་ལ་གནོད་གཉིས་སུ་གྱུར་ནས། ཤཱཀ་རིགས་བརྒྱད་ཁྲི་འཕགས་པའི་ཆོས་ཐོབ་ཟིན་ཀྱང་ཉིན་གཅིག་ལ་ཁ་འདོགས་པར་བྱས་པ་དང་། ཆོམ་རྐུན་པ་སུམ་ཅུ་རྩ་གཉིས་ཀྱིས་བ་ཞིག་བརྐུས་ཏེ་བསད་པས་དེས་ལོག་སྨོན་བཏབ་པའི་དབང་གིས་བ་གླང་དེ་རྒྱལ་པོ་གསལ་རྒྱལ་དུ་གྱུར་ནས་ལྷག་མཚམས་མའི་བུ་ཁྱེའུ་སོ་གཉིས་པོ་ཉིན་གཅིག་ལ་རྐེ་བཅད་པ་དང་། མཁན་སློབ་ཆོས་གསུམ་བྱ་རྫི་མའི་བུ་གསུམ་དུ་འཁྲུངས་ཏེ་མཆོད་རྟེན་བྱ་རུང་ཁ་ཤོར་བཞེངས་པའི་སྐབས་སུ་ས་རྡོ་བསྐྱལ་བའི་གླང་ཞིག་ཡོད་པ་ལ་དགེ་རྩ་བསྔོ་རྒྱུ་ལུས་པས་ཁོ་ཁྲོས་ནས་ལོག་སྨོན་བཏབ་པ་ཕྱིས་རྒྱལ་པོ་གླང་དར་མར་གྱུར་ཏེ། མཁན་སློབ་གསུམ་གྱི་མཛད་པའི་ཕྱག་རྗེས་བསྲུབ་པ་སོགས་མང་བས་དེ་ལྟར་མི་འགྱུར་བའི་ངེས་པ་མེད་པས་ཀྱང་བག་ཡོད་པར་བྱ་དགོས་ཤིང་། འཕགས་པ་ཀཱ་ཏྱ་ན་གྲོང་ཞིང་ན་བསོད་སྙོམས་ལ་བྱོན་པས་དེ་ན་བུད་མེད་གཅིག་གིས་བུ་ཞིག་པང་། ཉ་ཤ་ཞིག་ཟ། དེའི་རུས་པ་ཁྱི་མོ་ཞིག་གིས་ཟ་བ་ལ་རྡོས་རྡེག་པར་གཟིགས་ནས། མངོན་ཤེས་ཀྱིས་བཏགས་པས། ཉ་དེ་བུད་མེད་དེའི་ད་ལྟའི་ཕ་དང་ཁྱི་མོ་དེ་ད་ལྟའི་མ། བུ་དེ་ཚེ་སྔོན་རང་གསོད་པའི་དགྲ་བོ་དེ་ཡིན་པར་གཟིགས་ནས། ཕ་ཤ་ཟ་ཞིང་མ་ལ་རྡེག །གསོད་པའི་དགྲ་བོ་པང་དུ་བླང་། །ཆུང་མས་ཁྱོ་ཡི་རུས་པ་མུར། །འཁོར་བའི་ཆོས་ལ་གད་མོ་བྲོ། །ཞེས་གསུངས། དེས་ན་གསད་བྱའི་སེམས་ཅན་དེ་ད་ལྟ་རང་གི་ཕ་མ་སོགས་སྔར་ཤི་བ་དེ་དག་མིན་པའི་ངེས་པའང་མི་འདུག་ལ། ཚེ་སྔོན་གྱི་ཕ་མ་ནི་ཡིན་ངེས་པས་ཁྱིམ་པའམ་རབ་ཏུ་བྱུང་བ་གང་ཡིན་ཀྱང་སྲོག་གཅོད་ཀྱི་ལས་འདི་ལ་ཤིན་ཏུ་གཟབ་དགོས་པར་སྣང་ཡང་། དེང་སང་ནི་ཁྱིམ་པ་ལྟ་ཅི་རབ་ཏུ་བྱུང་བ་རྣམས་ནས་ཀྱང་དགག་བྱ་ཕྲ་མོ་ཙམ་གྱི་ཁོངས་སུའང་རྩིས་གདབ་གནང་མཁན་ཆེར་མི་འདུག་ཀྱང་། དེས་དགེ་སྦྱོང་གི་ཚུལ་ནི་འཇིག་པར་གསུངས་ཏེ། སོ་སོ་ཐར་པའི་མདོ་ལས། རབ་ཏུ་བྱུང་བ་གཞན་ལ་འཚེ་བ་དང་། །གཞན་ལ་གནོད་པ་དགེ་སྦྱོང་གང་ཡིན་ནོ། །ཞེས་སོ། །དེ་དང་འབྲེལ་བར་དགོན་སྡེ་སོགས་ཁ་ཅིག་ཏུ་བསད་ཤའི་རྒྱུགས་འདྲེན་པ་དང་དམར་ཆོག་བཟའ་བའི་སྲོལ་ཡོད་འདུག་པའང་མི་བཟང་སྟེ། ལང་ཀར་གཤེགས་པ་ལས། བློ་གྲོས་ཆེན་པོ། ང་ནི་སེམས་ཅན་ཐམས་ཅད་ལ་བུ་གཅིག་བཞིན་གྱི་འདུ་ཤེས་དང་ལྡན་པ་ཡིན་ན། ཇི་ལྟར་བདག་གི་བུའི་ཤ་བཟའ་བར་ཉན་ཐོས་རྣམས་ལ་གནང་བར་བྱ། རང་གིས་བཟའ་བ་ལྟ་ཅི་སྨོས་ཏེ། ངས་ཉན་ཐོས་རྣམས་ལ་གནང་བ་དང་། བདག་ཉིད་ཀྱིས་ཟོས་སོ་ཞེས་བྱ་བ་འདི་ནི་བློ་གྲོས་ཆེན་པོ་གནས་མེད་དོ། །ཞེས་དང་། ཁེ་ཡི་ཕྱིར་དུ་སེམས་ཅན་གསོད། །ཤ་ཡི་ཆེད་དུ་ནོར་སྦྱིན་བྱེད། །དེ་དག་གཉིས་ཀ་སྡིག་པ་ཅན། །འོ་དོད་འབོད་ལ་སོགས་པར་བཙོ། །གང་གིས་ཐུབ་པའི་ཚིག་འདས་ཏེ། །བསམ་པ་ངན་པས་ཤ་བཟའ་ན། །འཇིག་རྟེན་གཉིས་ནི་གཞིག་པའི་ཕྱིར། །ཤཱཀྱའི་བསྟན་ལ་བརྟུལ་ཞུགས་བླང་། །ཤིན་ཏུ་མི་བཟད་དམྱལ་བར་ཡང་། །སྡིག་པའི་ལས་ཅན་དེ་དག་འདོང་། །མ་རུངས་འོ་དོད་འབོད་སོགས་སུ། །ཤ་ཟ་དེ་དག་གཙོ་བར་འགྱུར་། །རྣམ་གསུམ་དག་པའི་ཤ་རྣམས་ནི། །མ་བརྟགས་པ་དང་མ་བསླངས་དང་། །མ་བསྐུལ་བ་ཡང་ཡོད་མིན་ཕྱིར། །དེ་བས་ཤ་ནི་མི་བཟའ་འོ། །ཞེས་སོགས་རྒྱ་ཆེར་གསུངས་པ་དང་། འཇམ་དཔལ་གྱི་ལྟ་འདོད་མདོར་བསྟན་ལས་ཀྱང་། རྫས་ཐོབ་དོན་དུ་སྲོག་གཅོད་དང་། །བཟའ་བའི་དོན་དུ་རིན་འཇལ་བ། །གཉིས་པོ་དག་ཀྱང་གསོད་པ་སྟེ། །ངུ་འབོད་ལ་སོགས་རྣམས་སུ་འཚེད། །གང་ཚེ་རྫས་ཀྱིས་ཤ་ཉོས་པ། །ཁྱིམ་པ་རྣམས་ལ་སྡིག་མེད་ན། །དེ་བཞིན་སྐུ་གཟུགས་ལ་སོགས་པ། །བྱས་ནའང་ཇི་ལྟར་བསོད་ནམས་འགྱུར། །གསོད་པོ་ནོར་ལ་སྲེད་པ་དག །བསྐལ་པ་འབུམ་དུ་འཚེད་པའོ། །ཟ་པོ་ཤ་ལ་སྲེད་པ་དག །བསྐལ་པ་བྱེ་བར་འཚེད་པའོ། །ཤ་བཟའ་བ་ཡི་མི་གང་ཞིག །དང་པོ་ཡི་དྭགས་འགྲོ་བ་སྟེ། ཕྱི་མ་ངུ་འབོད་འགྲོ་བའོ། །ཞེས་རྒྱུ་མཚན་དང་བཅས་དང་པོ་ཡི་དྭགས་ཀྱི་རིགས་ལས་ཀྱི་སྲིན་པོར་སྐྱེས་ཤིང་འཕོས་ནས་ངུ་འབོད་དུ་འགྲོ་བར་གསུངས་པ་དང་། དེ་ལས་ཀྱང་བསྔོས་ཤའི་རིགས་ནི་ཉེས་པ་བརྒྱ་འགྱུར་གྱིས་དེ་ལས་ལྕི་བར་གསུངས་ཏེ། གཞན་གྱིས་བསད་པ་བརྒྱ་ལས་ནི། །རང་གིས་བསད་དམ་གསོད་བཅུག་པའི། །ཤ་ནི་ཉེས་པ་བརྒྱ་འགྱུར་ལྕི། །ཞེས་སོ། །དེ་དང་འབྲེལ་བར་ཡུལ་སྲོལ་ཁ་ཅིག་ན་དགེ་འདུན་པ་ལ་ཆང་འདྲེན་སྲོལ་དང་། བཙུན་གཟུགས་པ་ཁ་ཅིག་གིས་དེ་ལ་འཕྱོར་ཟས་སུ་བྱེད་པའང་སྣང་མོད། དེས་ནི་རང་ཉིད་སྟོན་པའི་རྗེས་འཇུག་མ་ཡིན་པའི་ནང་ཆ་ཟང་མར་ངོམ་པ་སྟེ། འདུལ་བ་ལུང་ལས། ང་ལ་སྟོན་པར་ཁས་འཆེ་བའི་དགེ་བསྙེན་ཡན་ཆོད་ཀྱིས། ཆང་མི་བཙོ། མི་བླུད། མི་བཏུང་། དེ་ལྟར་མི་བྱེད་ན་དེ་ཡང་ངའི་འཁོར་མིན་ལ། ང་ཡང་དེའི་སྟོན་པ་མིན་ནོ། །ཞེས་དང་། མདོ་གཞན་རྣམས་ལས། ཚེ་འདིར་ཆང་བཏུང་ན་ཟངས་ཁུ་འཐུང་བའི་དམྱལ་བར་སྐྱེ་བ་དང་། གལ་ཏེ་མིར་སྐྱེས་ཀྱང་སྐྱེ་བ་ལྔ་བརྒྱར་སྨྱོན་པར་འགྱུར་བ་དང་། གཞན་ལ་ཆང་བླུད་ན་ཚེ་རབས་ལྔ་བརྒྱར་ལག་རྡུམ་དུ་འགྱུར་བར་གསུངས་པ་སོགས་ཉེས་པ་ཚད་མེད་དེ། སྐྱེས་རབས་ལས། གང་ཞིག་བསྟེན་ན་ངན་པ་སྤྱོད་པར་འགྱུར། །རབ་ཏུ་འཇིགས་པའི་སེམས་ཅན་དམྱལ་བར་ལྟུང་། །དུད་འགྲོའི་གནས་དང་ཡི་དྭགས་དབུལ་འགྱུར་བ། །མཐོང་བར་འདོད་པ་དེ་ནི་སུ་ཞིག་ཡོད། །ཆང་དེ་ཉུང་ངུར་འཐུངས་ཀྱང་རྣམ་པར་སྨིན་པ་ནི། །མི་ཡི་གནས་སུ་སྐྱེས་ཀྱང་ཚུལ་ཁྲིམས་ལྟ་བ་ཉམས། །གང་གི་ཕྱིས་ཀྱང་མནར་མེད་འབར་བས་བསྲེགས་པར་འགྲོ། །ཡི་དྭགས་ཡུལ་དང་དུད་འགྲོ་དམན་པར་གནས་པར་འགྱུར། །ཚུལ་ཁྲིམས་ཉམས་པར་འགྱུར་ཞིང་གཏམ་ངན་མངོན་དུ་འབྱུང་། །ངོ་ཚ་མེད་ཅིང་བློ་གྲོས་དྲི་མ་ཅན་དུ་འགྱུར། །ཞེས་སོ། །གཞན་ཡང་ཚོང་སོགས་གཡོ་སྒྱུའི་སྒོ་ནས་ཁེ་སྤོོགས་ཐོན་པ་དང་། དེང་སང་བཙུན་ཆུང་དུ་གྲགས་པ་དང་ལྷ་མཐོང་འདྲེ་མཐོང་བཤད་པ་སོགས་ཕལ་ཆེར་ཀྱང་། ངོ་བོ་མ་བྱིན་ལེན་དང་ལོག་པར་གཡེམ་པ་དང་རྫུན་སོགས་ལས་མི་འདའ་བས་བསླབ་སྡོམ་འཇིག་པ་ལ་ཁྱད་པར་ཅུང་ཟད་ཀྱང་མེད་པས་དེ་ལྟར་ཤེས་པར་བྱས་ནས་དྲན་ཤེས་བག་ཡོད་ཀྱིས་བསྲུང་བ་ནི་ཤིན་ཏུ་གལ་ཆེའོ། །དེ་ལྟར་སྐབས་ཀྱི་འཕྲོས་དོན་ཅུང་ཟད་བཤད་ནས། ད་ནི་རྡོ་རྗེའི་གསུང་གི་གཞུང་དངོས་ལ་འཇུག་པར་བྱ་སྟེ། ལུས་ཀྱི་མི་དགེ་བ་གཉིས་པ་མ་བྱིན་པར་ལེན་པའི་ངོ་བོ་ནི། གཞན་གྱི་རྫས་བདག་གིར་བྱེད་པ་ཞིག་ཡིན་ཏེ། དབྱེ་ན། མཐུས་ལེན་པ་དངོས་སུ་འཕྲོག་པ་ལྟ་བུ། འཇབ་བུས་ལེན་པ་མ་ཚོར་བར་བརྐུ་བ། གཡོ་སྒྱུས་ལེན་པ་བྲེ་སྲང་གི་ཟོལ་ལ་སོགས་པ་བྱེད་པ་ཡིན། དེ་རྫོགས་པར་བྱེད་པའི་ཡན་ལག་སྔར་ལྟར་བཞི་ཚང་བས་རྫོགས། འབྲས་བུ་ལ་གསུམ་ལས། རྣམ་པར་སྨིན་པའི་འབྲས་བུ་ཤས་ཆེ་འབྲིང་ཆུང་གསུམ་གྱིས་ངན་སོང་གསུམ་དུ་ལྟུང་། ཁྱད་པར་དུ་ཡི་དྭགས། དབང་གི་འབྲས་བུ་གལ་ཏེ་མིར་སྐྱེས་སྲིད་ན་ཡང་། འབྱོར་པ་ཆུང་ཞིང་རྐུ་འཕྲོག་མང་དུ་འབྱུང་བར་འགྱུར་རོ། །རྒྱུ་མཐུན་གྱི་འབྲས་བུ་ནི་། བག་ཆགས་ངན་པ་ཀུན་གཞི་ལ་སོགས་པས་ཚེ་རབས་ཐམས་ཅད་དུ་ཡང་མ་བྱིན་པར་ལེན་པ་ལ་དགའ་བར་འགྱུར་རོ། །ལུས་ཀྱི་མི་དགེ་བ་གསུམ་པ་འདོད་པས་ལོག་པར་གཡེམ་པའི་ངོ་བོ་ནི། འདོད་པའི་ཡུལ་རང་དབང་དུ་མ་གྱུར་པ་ལ་གཡེམ་པ་ཞིག་ཡིན། དབྱེ་ན། རྒྱལ་པོས་བསྲུང་བ་རྒྱལ་པོའི་བཙུན་མོ་ལ་འབངས་ཀྱིས་སྤྱད་དུ་མི་རུང་བའམ། ཁྲིམས་བཅས་པས་སྤྱད་དུ་མི་རུང་བ་ལྟ་བུའོ། །ཕ་མས་བསྲུང་བ་ནི། རྒྱ་གར་པ་བབ་ཅོལ་དུ་སྤྱད་དུ་མེད་དེ། ཕོ་མོ་ཁྱིམ་དུ་མ་བསྟུན་གྱི་བར་ལ་ཕ་མས་བསྲུང་བ་ལྟ་བུ་ལ་སྤྱད་པའོ། །མི་ཆོས་ཀྱིས་བསྲུང་བ་ཞེས། མ་སྲིང་ལ་སོགས་པ་ངོ་ཚ་བའི་གནས་ལ་སྤྱད་དུ་མི་རུང་བའོ། །ལྷ་ཆོས་ཀྱིས་བསྲུངས་པ་ཞེས། སློབ་དཔོན་གྱི་ཕྱག་རྒྱ་མའམ། འདུལ་ཁྲིམས་ཅན་ལ་སོགས་པ་ཡིན། བདག་གི་དབང་དུ་བྱས་པའི་གྲོགས་ལའང་སྤྱད་དུ་མི་རུང་བའི་སྐབས་ཡོད་དེ། དུས་མི་རུང་བ་ཉ་སྟོང་བརྒྱད་གསུམ་ལ་མི་རུང་། གནས་དཀོན་མཆོག་གི་རྟེན་སོགས་ཀྱི་སྤྱན་སྔར་མི་རུང་། ཡན་ལག་མ་ཡིན་པ་བྱོལ་སོང་གི་སྤྱོད་ཚུལ་སོགས་མི་རུང་ངོ་། །རྫོགས་བྱེད་ཀྱི་ཡན་ལག་སྔར་ལྟར་བཞི་ཚང་བས་རྫོགས། འབྲས་བུ་ལ་ཡང་གསུམ། རྣམ་པར་སྨིན་པའི་འབྲས་བུ་ངན་སོང་གསུམ་དུ་སྐྱེས། གལ་ཏེ་མཐོ་རིས་ཐོབ་སྲིད་ན་ཡང་ཁྱོ་ཤུག་འཐབ་འདོད་པ་ལ་སོགས་པར་འགྱུར། དབང་གི་འབྲས་བུ་ནི། ཚེ་རབས་སུ་ཡང་བདག་གི་མཆིས་འབྲང་སྙིང་རིང་ཞིང་ལོག་པ་སྣ་ཚོགས་བྱེད། རྒྱུ་མཐུན་གྱི་འབྲས་བུ་བག་ཆགས་ངན་པས་འདོད་ལོག་ལ་དགའ་བར་འགྱུར་རོ། །གཉིས་པ་ངག་གི་མི་དགེ་བ་བཞི་སྟེ། དང་པོ་རྫུན་དུ་སྨྲ་བའི་ངོ་བོ་ནི། དངོས་པོའི་ཆོས་ལ་མི་གནས་པ་ལ་དེར་ངག་གི་བརྗོད་པ། དབྱེ་ན། ཕན་གནོད་མེད་པའི་རྫུན་རྒན་པོས་རྫུན་བྱེད་པ་ལྟ་བུ། ཕན་གནོད་ཡོད་པའི་རྫུན་ཡུལ་གཅིག་ལ་ཕན་གཅིག་ལ་གནོད་པའི་རྫུན་དང་། མི་ཆོས་བླ་མའི་རྫུན་ཞེས་ཏེ་བདག་གི་རྒྱུད་ལ་མེད་པའི་མངོན་པར་ཤེས་པ་ལ་སོགས་པའི་ཡོན་ཏན་ཡོད་པར་སྨྲ་བ་རྣམས་ཡིན། དེ་རྫོགས་པར་བྱེད་པའི་ཡན་ལག་སྔར་ལྟར་བཞི་ཚང་བས་རྫོགས། འབྲས་བུ་ལ་གསུམ་ལས། རྣམ་སྨིན་གྱི་འབྲས་བུ་ངན་སོང་གསུམ་དུ་ལྟུང་། དབང་གི་འབྲས་བུ་གལ་ཏེ་མིར་སྐྱེས་ན་ཡང་ངག་མི་བཙན་པར་འགྱུར། རྒྱུ་མཐུན་གྱི་འབྲས་བུ་ཚེ་རབས་སུ་ཡང་རྫུན་སྨྲ་བ་ལ་དགའ་བར་འགྱུར་རོ། །ངག་གི་མི་དགེ་བ་གཉིས་པ་ཕྲ་མའི་ངོ་བོ་ནི། གཞན་གྱི་མཛའ་བོ་དབྱེ་བ་ཞིག་ཡིན། དབྱེ་ན། བཙན་ཕྲ་ཞེས་བྱ་སྟེ་ངོས་ནས་རྒོལ་བ་དང་། གཞོགས་ཕྲ་སྟེ་ཟུར་ཟློས་བྱེད་པ་དང་། ལྐོག་ཕྲ་སྟེ་ལྐོག་ཏུ་གཞན་ལ་སོ་སོར་སྒྲོག་པ་རྣམས་ཡིན། ཡན་ལག་སྔར་དང་འདྲ། འབྲས་བུ་ལ་གསུམ་ལས། རྣམ་སྨིན་གྱི་འབྲས་བུ་ངན་སོང་གསུམ་དུ་ལྟུང་། དབང་གི་འབྲས་བུ་ནི། མི་ལུས་ཐོབ་སྲིད་ན་ཡང་། མཛའ་བོ་ཉུང་བ་དང་། འཐབ་ཟླ་མང་བ་དང་། རྟག་ཏུ་གྱོད་སྣ་མང་། ཀུན་གྱི་ཡིད་དུ་མི་འོང་། དོན་མེད་པར་འགྱུར། རྒྱུ་མཐུན་ཚེ་རབས་སུ་ཕྲ་མ་ལ་དགའ་བར་འགྱུར་རོ། །ངག་གི་མི་དགེ་བ་གསུམ་པ་ཚིག་འཁྱལ་བའི་ངོ་བོ་ནི། དལ་བ་ཆུད་གསོན་པ་ཞིག་ཡིན། དབྱེ་ན། མི་དཔོན་དང་། སྒྲུང་སྡེའུ་དང་། བྲེ་མོའི་གཏམ་མོ། །ཡན་ལག་སྔར་ལྟར་བཞིས་རྫོགས། འབྲས་བུ་ལ་གསུམ་ལས། རྣམ་སྨིན་གྱི་འབྲས་བུ་ངན་སོང་གསུམ་དུ་སྐྱེ། དབང་གི་འབྲས་བུ་མིར་སྐྱེ་སྲིད་ན་ཡང་ཚིག་མི་བཙུན་པ་དང་། སྨོད་ཚིག་ཅན་དང་། འཁྱལ་བར་འགྱུར། རྒྱུ་མཐུན་ཚེ་རབས་སུ་བཀྱལ་བ་སྨྲ་བ་ལ་དགའ་བར་འགྱུར་རོ། །ངག་གི་མི་དགེ་བ་བཞི་པ་ཚིག་རྩུབ་ཀྱི་ངོ་བོ་ནི། གཞན་གྱི་ཞེ་གཅོད་པའི་ངག དབྱེ་ན། ངོར་མཚང་འབྲུ་བ། བརྒྱུད་དེ་ཞེ་གཅོད་པ། ལྐོག་ཏུ་ཞེ་གཅོད་པ་རྣམས་ཡིན། ཡན་ལག་བཞིས་རྫོགས། འབྲས་བུ་ལ་གསུམ་ལས། རྣམ་སྨིན་ངན་སོང་གསུམ་དུ་སྐྱེ། དབང་གི་འབྲས་བུ་མིར་སྐྱེ་ན་ཡང་། ཅི་སྨྲས་གཞན་གྱི་ཞེ་གཅོད་ལ་འཕོག་པ་དང་། རྟག་ཏུ་ཞེ་གཅོད་དུ་འོང་། རྒྱུ་མཐུན་འབྲས་བུ་ཚིག་རྩུབ་ལ་དགའ་བར་འགྱུར་རོ། །གསུམ་པ་ཡིད་ཀྱི་མི་དགེ་བ་ལ་གསུམ་སྟེ། དང་པོ་བརྣབ་སེམས་ཀྱི་ངོ་བོ་ནི། ཕུན་སུམ་ཚོགས་པ་ལ་ཆགས་པ། དབྱེ་ན། བདག་གི་ལ་ཡོད་པ་གཞན་ལ་མི་གཏོང་བ། གཞན་གྱི་དེ་བདག་གི་དབང་དུ་བྱ་བར་འདོད་པ་དེ་གཉིས་ཀ་མ་ཡིན་པའི་བདག་པོ་མེད་པའི་ས་འོག་གི་གཏེར་ལྟ་བུ། ཕུན་སུམ་ཚོགས་པ་ལ་ཆགས་པ་རྣམས་ཡིན། ཡན་ལག་བཞིས་ཡིད་ཀྱི་གསུམ་པོའི་གཞི་བསམ་སྦྱོར་བ་མཐར་ཐུག་གི་ཕྱི་མ་གསུམ་ངོ་བོ་གཅིག་ཀྱང་ལྡོག་པ་ཙམ་གྱི་སྒོ་ནས་དབྱེའམ་སྙམ་མོ། །མཆན། རྫོགས། རྣམ་སྨིན་གྱི་འབྲས་བུ་ངན་སོང་གསུམ། དབང་གི་འབྲས་བུ་མིར་སྐྱེས་ན་ཡང་རྟག་ཏུ་ཡུལ་ངན་པ་བཀྲེས་པ་དང་སྐོམ་པ་དང་བཅས་པར་འགྱུར། རྒྱུ་མཐུན་ཚེ་རབས་སུ་བརྣབ་སེམས་ལ་དགའ་བར་འགྱུར་རོ། །གཉིས་པ་གནོད་སེམས་ཀྱི་ངོ་བོ་ནི། གཞན་ལ་བསམ་ངན་འཆང་བ། དབྱེ་ན་ཞེ་སྡང་གི་ཆ་ལས་བྱུང་བ། འཁོན་དུ་འཛིན་པའི་ཆ་ལས་བྱུང་བ། ཕྲག་དོག་གི་ཆ་ལས་བྱུང་བ་གསུམ་ཡིན། ཡན་ལག་བཞིས་རྫོགས། རྣམ་སྨིན་གྱི་འབྲས་བུ་ངན་སོང་གསུམ་དུ་སྐྱེ། དབང་གི་འབྲས་བུ་མིར་སྐྱེ་སྲིད་ན་ཡང་། ཉེས་པ་མེད་པར་གཞན་ཞེ་སྡང་བ་དང་། རྟག་ཏུ་དགྲ་མང་ཁ་མཆུ་མང་བར་འགྱུར། རྒྱུ་མཐུན་འབྲས་བུ་གནོད་སེམས་ཅན་དུ་འགྱུར་རོ། །གསུམ་པ་ལོག་པར་ལྟ་བའི་ངོ་བོ་ནི། བདེན་པའི་དོན་ལས་ཕྱིན་ཅི་ལོག་པ། དབྱེ་ན། སྒྲོ་སྐུར་འདོགས་པ་དང་། མུ་སྟེགས་ལྟར་རྟག་ཆད་དུ་ལྟ་བ་དང་། ཁྱི་དང་བྱ་ཡི་དཀའ་ཐུབ་ལ་སོགས་པ་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་། འཇིག་ཚོགས་ལ་ལྟ་བ་རྣམས་ཡིན། ཡན་ལག་བཞིས་རྫོགས། རྣམ་སྨིན་འབྲས་བུ་ངན་སོང་གསུམ་དུ་སྐྱེ། དབང་གི་འབྲས་བུ་མིར་སྐྱེ་སྲིད་ན་ཡང་། ཡུལ་མཐའ་འཁོབ་ཀླ་ཀློ་ལ་སོགས་པ་དཀོན་མཆོག་གི་སྒྲ་ཙམ་ཡང་མི་ཐོས་སར་སྐྱེ། རྒྱུ་མཐུན་ལོག་པར་ལྟ་བའི་བག་ཆགས་ཀུན་གཞི་ལ་འཐས་ནས་ལོག་པར་ལྟ་བ་ལ་དགའ་བར་འགྱུར་རོ། །དེ་ལྟར་མི་དགེ་བ་བཅུ་པོ་འདི་ནི་འཕགས་པ་རྣམས་ཀྱིས་སྨད་པ། མཁས་པ་རྣམས་ཀྱིས་སྤངས་པ། ལྷ་མི་དལ་འབྱོར་ཁྱད་པར་ཅན་ཐོབ་པ་རྣམས་ཀྱིས་སྤྱད་པར་བྱ་བ་མ་ཡིན་པས་སྤོངས་ཤིག དེ་ལྟ་བུའི་མི་དགེ་བ་བཅུ་པོ་ལ། སྡིག་པ་ཆེ་ཆུང་གི་ཁྱད་པར་ཡོད་དེ། སྤྱིར་ཉོན་མོངས་པའི་སྒོ་ནས་དབྱེ་ན། ཞེ་སྡང་གི་སྒོ་ནས་མི་དགེ་བ་བཅུ་སྤྱད་ན་དམྱལ་བ། འདོད་ཆགས་ཀྱི་སྒོ་ནས་ཡི་དྭགས། གཏི་མུག་གིས་སྤྱད་ན་དུད་འགྲོར་སྐྱེའོ། །ཡུལ་གྱི་སྒོ་ནས་ཆེ་ཆུང་ཡོད་དེ། ཡུལ་ཁྱད་པར་ཅན་ལ་མི་དགེ་བ་བཅུ་སྤྱད་པས་དམྱལ་བ། ཡུལ་ཐ་མལ་པ་ཕལ་ལ་ཡི་དྭགས། ཡུལ་དམན་པས་དུད་འགྲོར་སྐྱེ་བར་འགྱུར་རོ། །གྲངས་ཀྱི་སྒོ་ནས་མང་དུ་སྤྱད་ན་དམྱལ་བ། ལན་འགར་སྤྱད་ན་ཡི་དྭགས། ལན་རེ་ཙམ་གྱིས་དུད་འགྲོར་སྐྱེ་བར་ཡང་གཞུང་གཞན་ནས་གསུངས་སོ། །མཆན། དེ་ཡང་བྱེ་བྲག་ཏུ་སྲོག་གཅོད་པའི་ནང་ནས་སེམས་བསྐྱེད་པའི་བྱང་ཆུབ་སེམས་དཔའ་སྲོག་དང་ཕྲལ་བའི་སྡིག་པ་རྣམ་སྨིན་ཆེ། མ་བྱིན་པར་ལེན་པའི་ནང་ནས་དཀོན་མཆོག་གི་དཀོར་ལ་རྐུ་བ་སྡིག་ཆེ། འདོད་ལོག་གི་ནང་ནས་དགྲ་བཅོམ་མ་ལ་སྤྱད་ན་སྡིག་ཆེ། རྫུན་གྱི་ནང་ནས་བླ་མ་དང་དགེ་འདུན་མཆོད་པར་འོས་པའི་མགོ་བསྐོར་བ་སྡིག་ཆེ། ཕྲ་མའི་ནང་ནས་དགེ་འདུན་གྱི་དབྱེན་བྱས་པ་སྡིག་ཆེ། ཚིག་རྩུབ་ཀྱི་ནང་ནས་དགེ་འདུན་ལ་མི་སྙན་པར་བརྗོད་པ་སྡིག་ཆེ། ངག་འཁྱལ་གྱི་ནང་ནས་དགེ་སློང་བསམ་གཏན་གཉིས་མེད་ཀྱི་དོན་སྒོམ་པའི་བློ་དཀྲུགས་པ་སྡིག་ཆེ། བརྣབ་སེམས་ཀྱི་ནང་ནས་དཀོན་མཆོག་གི་ནོར་ལ་བརྣབས་པ་སྡིག་ཆེ། གནོད་སེམས་ཀྱི་ནང་ནས་མཚམས་མེད་པ་ལྔ་ཤོམ་པ་སྡིག་ཆེ། ལོག་ལྟའི་ནང་ནས་ཡང་དག་པའི་དོན་ལ་སྐུར་བ་འདེབས་པ་སྡིག་ཆེ། དེ་ལྟ་བུ་ནི་སྲོག་ལ་བབས་ཀྱང་མི་རུང་། སྤྱིར་བསྟན་ན་མི་དགེ་བ་བཅུ་ཉིད་ལ་ཡང་ཁྱད་ཡོད་དེ། སྲོག་གཅོད་པ། ཕྲ་མ། ཚིག་རྩུབ། གནོད་སེམས་བཞིས་དམྱལ་བ། འདོད་ལོག མ་བྱིན་པར་ལེན་པ། བརྣབ་སེམས་གསུམ་གྱིས་ཡི་དྭགས། རྫུན། ངག་འཁྱལ། ལོག་ལྟ་གསུམ་གྱིས་དུད་འགྲོར་སྐྱེའོ། །ཞེས་གསུངས་སོ། །གཉིས་པ་བླང་བྱ་དགེ་བཅུའི་རང་བཞིན་བསྟན་པ་ལའང་གཉིས་ཏེ། སེམས་ཉིད་ངལ་གསོ་ལས་གསུངས་པ་དང་། གུ་རུ་རིན་པོ་ཆེའི་རྡོ་རྗེའི་གསུང་འགོད་པའོ། །དང་པོ་ནི། རྩ་བ་ལས། མཐོ་རིས་འཕེན་པ་དགེ་བའི་ལས་བཅུ་ཡང་། །མི་དགེ་བཅུ་སྤོང་སེམས་པ་དགེ་བ་སྟེ། སྲོག་མི་གཅོད་དང་མ་བྱིན་ལེན་པ་སྤངས། །ལོག་པར་མི་གཡེམ་རྫུན་དང་ཕྲ་མ་སྤངས་། །ངག་འཁྱལ་ཚིག་རྩུབ་མི་སྨྲ་བརྣབ་སེམས་མེད། །གནོད་སེམས་ལོག་ལྟ་རིང་དུ་སྤངས་པ་སྟེ། །ཞེས་པས། མི་དགེ་བ་བཅུ་ལས་ལོག་ཙམ་གྱིས་དགེ་བ་བཅུར་མི་འགྱུར་ཏེ། རྒྱུད་བསྡམས་པ་མེད་པའི་ཕྱིར་རོ། །དེ་བས་ན་མི་དགེ་བ་བཅུ་སྤོང་བའི་སེམས་ནི་དགེ་བ་བཅུའི་ངོ་བོ་ཡིན་ཏེ། ཡུམ་བར་མ་ལས། བདག་ཉིད་ཀྱང་སྲོག་གཅོད་པ་སྤངས་པ་ཡིན་ཞེས་པ་ལ་སོགས་བཅུ་གསུངས་སོ། །དེས་ན་སྲོག་གཅོད་སོགས་ལས་ལོག་ཙམ་གྱིས་ནི། དེའི་རྣམ་སྨིན་གྱིས་གོས་པར་མི་འགྱུར་ཡང་། རྒྱུད་བསྡམས་པ་མེད་ན་བསོད་ནམས་ཀྱི་འཕེལ་མི་འབྱུང་ཞིང་དགེ་བཅུ་མཚན་ཉིད་པར་མི་འགྱུར་བས། གང་ཟག་གམ་རྟེན་ཁྱད་པར་འཕགས་པ་སོགས་ཀྱི་སྤྱན་སྔར་རང་གི་ཁས་བླངས་སོགས་ཀྱིས་རྒྱུད་བསྡམས་པར་བྱེད་པ་ཉིད་ཤིན་ཏུ་གལ་ཆེ་སྟེ། ཇོ་བོས་མཛད་པའི་ལས་རྣམ་འབྱེད་ལས། མངོན་པར་མཐོ་བ་མཐོ་རིས་ལྷ་དང་མི། །ཐོབ་པར་བྱེད་པ་སྡོམ་པའི་ཚུལ་ཁྲིམས་ཡིན། །ཞེས་གསུངས་པས། མདོར་ན་དགེ་བཅུའི་ངོ་བོ་ནི། གོང་དུ་སྨོས་པའི་མི་དགེ་བ་བཅུ་པོ་དངོས་དང་དེའི་ཕྱོགས་གཏོགས་བཅས་སྤོང་བའི་སེམས་པ་ས་བོན་དང་བཅས་པ་ཉེས་སྤྱོད་སྡོམ་པའི་ཚུལ་ཁྲིམས་ཀྱི་ངོ་བོར་གྱུར་པ་དེ་ཉིད་ཡིན་ཏེ། སྤྱོད་འཇུག་ལས། སྤོང་བའི་སེམས་ནི་ཐོབ་པ་ལ། །ཚུལ་ཁྲིམས་ཕ་རོལ་ཕྱིན་རྫོགས་བཤད། །ཅེས་སོ། །དེའི་འབྲས་བུ་ལ་བཞི་ལས། རྣམ་སྨིན་གྱི་འབྲས་བུ་ནི། ངལ་གསོ་ལས་ཆུང་ངུས་མི་དང་འབྲིང་གིས་འདོད་པའི་ལྷ། །ཆེན་པོས་བསམ་གཏན་གཟུགས་མེད་ཏིང་འཛིན་འབྲེལ། །གོང་མའི་ཁམས་གཉིས་བདེ་བ་འཛིན་པར་བྱེད། །འབྲས་བུ་བཞི་སྟེ་སྔར་གྱི་བཟློག་པའི་དཔེས། །དགེ་བཅུའི་འབྲས་བུ་མཐོ་རིས་ཤེས་པར་བྱ། །ཞེས་གསུངས་ཏེ། དེའང་ཆུང་ངུ་དང་འབྲིང་དུ་སྤྱད་པས་འདོད་པའི་མི་དང་ལྷར་སྐྱེ་ལ། ཆེན་པོ་ཏིང་འཛིན་དང་འབྲེལ་བས་ཁམས་གོང་མ་གཉིས་སུ་སྐྱེ་སྟེ། མཐོ་རིས་མངོན་པར་སྒྲུབ་པ་ཉིད་དང་། ངན་སོང་གི་སྒོ་གཅོད་པར་བྱེད་པ་ཉིད་དེ། རིན་ཆེན་ཕྲེང་བ་ལས། ཆོས་འདིས་དམྱལ་བ་ཡི་དྭགས་དང་། །དུད་འགྲོ་དག་ལས་རྣམ་གྲོལ་ཞིང་། །ལྷ་དང་མི་ཡི་ནང་དག་ཏུ། །བདེ་དཔལ་རྒྱལ་སྲིད་རྒྱས་པ་ཐོབ། །བསམ་གཏན་ཚད་མེད་གཟུགས་མེད་ནི། །ཚངས་སོགས་བདེ་བ་མྱོང་བར་བྱེད། །ཅེས་སོ། །དེ་ཉིད་ཐབས་ཤེས་ཕྱོགས་གཅིག་པའམ་ཐབས་ཤེས་བླ་ན་མེད་པས་ཟིན་ན་བྱང་ཆུབ་གསུམ་གང་རུང་དེའི་རྒྱུར་འགྱུར་ཞིང་རང་རང་གི་འབྲས་བུ་འབྱིན་པར་བྱེད་དོ། །རྒྱུ་མཐུན་གྱི་འབྲས་བུ་ནི། རྩ་བར། རྒྱུ་མཐུན་བྱེད་པས་ངང་གིས་དགེ་ལ་གཞོལ། །མྱོང་བས་ཚེ་རིང་བ་དང་ལོངས་སྤྱོད་ཆེ། །མཐུན་པའི་ཁྱིམ་ཐབ་དགྲ་ཟླ་མེད་པ་དང་། །སྐུར་བ་མི་འབྱུང་ཕན་ཚུན་མཛའ་བཤེས་བཞིན། །ཚིག་བཟུང་འོས་དང་ཀུན་གྱི་རྣ་བར་སྙན། །ཆོག་ཤེས་བྱམས་ལྡན་ལྟ་བ་བཟང་པོར་འགྱུར། །ཞེས་གསུངས་ཏེ། འདི་ལ་གཉིས། བྱེད་པ་རྒྱུ་མཐུན་ནི་ཚེ་རབས་གར་སྐྱེས་ཀྱང་ངང་གིས་དགེ་བཅུའི་ལས་ལ་སྤྲོ་ཞིང་འཇུག་པར་འགྱུར་རོ། །མྱོང་བ་རྒྱུ་མཐུན་ནི། སྲོག་གཅོད་པ་སྤངས་པས་ཚེ་རིང་ཞིང་ནད་མེད་པ་དང་། མ་བྱིན་པར་ལེན་པ་སྤངས་པས་ལོངས་སྤྱོད་ཕུན་སུམ་ཚོགས་པ་དང་། འདོད་ལོག་སྤངས་པས་མཐུན་པའི་ཁྱིམ་ཐབ་མཛེས་ཤིང་དགྲ་ཟླ་མེད་པ་དང་། རྫུན་སྤངས་པས་ཀུན་གྱིས་བསྟོད་ཅིང་དགའ་བར་བྱེད་པ་དང་། ཕྲ་མ་སྤངས་པས་འཁོར་གཡོག་མཐུན་ཅིང་མཆོག་ཏུ་གུས་པ་དང་། ཚིག་རྩུབ་སྤངས་པས་རྣ་བར་སྙན་ཅིང་བསྟོད་པ་དང་། ངག་འཁྱལ་སྤངས་པས་ཚིག་བཟུང་བར་འོས་ཤིང་ཚད་མར་བྱེད་པ་དང་། བརྣབ་སེམས་སྤངས་པས་རེ་བ་འགྲུབ་པ་དང་། གནོད་སེམས་སྤངས་པས་འཚེ་བ་མེད་པ་དང་། ལོག་ལྟ་སྤངས་པས་ལྟ་བ་བཟང་པོར་འགྱུར་བ་ཡིན་ནོ། །དབང་གི་འབྲས་བུ་ནི། དེ་ཉིད་ལས། དབང་གིས་ཡུལ་བཟང་གཟི་བརྗིད་ཕུན་སུམ་ཚོགས། །བཟའ་བཏུང་སྨན་སོགས་འཇུ་སླ་མཐུ་ཆེ་ཞིང་། །ཕྱོགས་གཙང་སྨན་སོགས་དྲི་ཞིམ་ངད་དང་ལྡན། །གཞན་གྱིས་མི་བསླུ་འཇིགས་བྲལ་གནོད་འཚེ་མེད། །སྐྱེ་དགུ་མཐུན་དང་རེག་ན་མཆོག་ཏུ་བདེ། །དུས་ཀྱི་རྗེས་འགྲོ་ལེགས་སྨིན་འབྲས་བུས་ཕྱུག །ས་ཕྱོགས་མཉམ་ལ་མཚོ་བསིལ་རྫིང་བུས་བརྒྱན། །མེ་ཏོག་འབྲས་མང་བཟང་དགུ་འཕེལ་བ་མཐོང་། །ལོ་འབྲས་སྨན་སོགས་རོ་མཆོག་བདའ་བ་དང་། །འབྱུང་ཁུངས་བཟང་ཞིང་དཔུང་གཉེན་ལྡན་པར་སྐྱེ། །ཞེས་གསུངས་ཏེ། དེ་ལ་སྲོག་གཅོད་པ་སྤངས་པས་ནི་ཡུལ་བཟང་ལ་ཉམས་དགའ་བར་སྐྱེའོ། །མ་བྱིན་པར་ལེན་པ་སྤངས་པས་བཟའ་བཏུང་འཇུ་སླ་ཞིང་རོ་བྲོ་བ་དང་སྨན་མཐུ་ཆེའི་ཡུལ་དུ་སྐྱེའོ། །འདོད་པས་ལོག་པར་གཡེམ་པ་སྤངས་པས། ས་ཕྱོགས་གཙང་ལ་སྤོས་ཀྱི་ངད་དང་ལྡན་པའི་སྨན་ཤིང་ཅན་དུ་སྐྱེའོ། །བརྫུན་དུ་སྨྲ་བ་སྤངས་པས་ཡུལ་ཕྱོགས་གང་ན་དགྲ་དང་ཆོམ་རྐུན་ལ་སོགས་པའི་གནོད་འཚེ་མེད་ཅིང་མི་སླུ་བར་སྐྱེའོ། །ཕྲ་མ་སྤངས་པས་གང་ན་སྐྱེ་དགུ་མཐུན་ཅིང་ས་ཕྱོགས་རྡོ་གསེག་དང་ཚེར་མ་ཉུང་སར་སྐྱེའོ། །ཚིག་རྩུབ་མོ་སྤངས་པས་དུས་ཚིགས་མ་ལོག་ཅིང་མེ་ཏོག་དང་འབྲས་བུ་དུས་སུ་སྨིན་པའི་ཡུལ་དུ་སྐྱེའོ། །བཀྱལ་བ་སྤངས་པས་ས་ཕྱོགས་ཐད་ཀ་མཉམ་ལ་མཚོ་དང་རྫིང་བུ་བརྒྱན་སར་སྐྱེའོ། །བརྣབ་སེམས་སྤངས་པས་ས་ཕྱོགས་མེ་ཏོག་དང་། འབྲས་བུ་དང་། ལོ་ཐོག་བཟང་དགུ་འཕེལ་བར་མཐོང་བར་སྐྱེའོ། །གནོད་སེམས་སྤངས་པས་ལོ་མ་དང་འབྲས་བུའི་སྡོང་པོ་མང་ཞིང་རོ་ཞིམ་པར་སྐྱེའོ། །ལོག་པར་ལྟ་བ་སྤངས་པས་འབྲུ་དང་རིན་པོ་ཆེ་ལ་སོགས་པའི་འབྱུང་ཁུངས་བཟང་ཞིང་། མགོན་སྐྱབས་དང་དཔུང་གཉེན་ཕུན་སུམ་ཚོགས་པར་སྐྱེའོ། །ཞེས་དགེ་བ་བཅུ་བསྟན་པའི་མདོ་ལས་བསྟན་ཏོ། །སྐྱེས་བུ་བྱེད་འབྲས་ནི། འཇོམས་བྱེད་ཀྱི་རྐྱེན་དང་མ་འཕྲད་ན་དགེ་བ་དེ་ཉིད་གོང་ནས་གོང་དུ་འཕེལ་ཏེ་དཔག་ཏུ་མེད་པར་འགྱུར་བ་ཡིན་ཏེ། གཞུང་དེ་ཉིད་ལས། སྐྱེས་བུ་བྱེད་པ་དགེ་ལས་དགེ་འཕེལ་བས། །ལེགས་དགུའི་བསམ་པ་ཡིད་བཞིན་འགྲུབ་པ་ཡིན། །ཞེས་སོ། །མདོར་ན་མཛངས་བླུན་ལས། དགེ་བ་ཆུང་ངུ་དག་ལ་ཡང་། །མི་ཕན་སྙམ་དུ་བརྙས་མི་བྱ། །ཆུ་ཡི་ཐིགས་པ་བསགས་པ་ཡིས། །སྣོད་ཆེན་རིམ་གྱིས་གང་བར་འགྱུར། །ཞེས་གསུངས་པས་དགེ་བ་ཆུང་ངུ་ནས་ལག་ཏུ་ཅི་ལོན་དུ་བརྩོན་པར་བྱ་དགོས་ཤིང་། དེ་ཡང་ཐར་པ་ཆ་མཐུན་གྱི་དགེ་བའི་རྩ་བར་བསྒྱུར་བ་གལ་ཆེ་བས། དེ་ནི་དགེ་བ་གང་བྱེད་ཀྱང་འཁོར་བ་ལས་ཐར་ནས་ཞི་བ་མྱ་ངན་ལས་འདས་པར་ཐོབ་པར་བྱ་སྙམ་པ་སྟེ། དབྱེ་ན། ཉན་ཐོས། རང་སངས་རྒྱས། རྫོགས་པའི་སངས་རྒྱས་ཀྱི་ཐར་པ་གསུམ་ལ་ལྟོས་ནས་གསུམ་དུ་ཡོད་ཀྱང་། ད་རེས་འདིར་ནི་རྫོགས་པའི་སངས་རྒྱས་ཐོབ་པར་འདོད་པས་དགེ་བ་བཅུ་དང་། བསམ་གཏན་བཞི་དང་། གཟུགས་མེད་བཞི་དང་། ཞི་ལྷག་གཉིས་དང་། ཚད་མེད་བཞི་དང་། ཕ་རོལ་དུ་ཕྱིན་པ་དྲུག་ལ་སོགས་པ་ཐམས་ཅད་ལ་བརྩོན་པར་བྱ་ཞིང་། དེ་ཡང་གཞན་དོན་དུ་སྦྱོར་བ་སེམས་བསྐྱེད། དངོས་གཞི་བདེན་ཞེན་གྱི་དམིགས་པ་མེད་པ་རྗེས་བྱང་ཆུབ་ཏུ་བསྔོ་བ་གསུམ་གྱིས་ཟིན་པར་བྱས་ལ་སྐད་ཅིག་ཀྱང་མི་དལ་བར་སྒྲུབ་དགོས་ཏེ། ཚོགས་མ་རྫོགས་ན་སངས་རྒྱས་མི་ཐོབ་པའི་ཕྱིར་སྙམ་དུ་སྦྱོར་དངོས་རྗེས་གསུམ་ཚང་བས་ཉམས་སུ་བླང་བར་བྱ་དགོས་ཏེ། སྔ་མ་ལས། གང་ཞིག་བསོད་ནམས་ཡེ་ཤེས་ཚོགས་རབ་འབྲས། །ཐར་པ་དམ་པའི་འཇུག་ངོགས་ཆེན་པོ་སྟེ། །དེ་ལས་གཞན་ཞིག་ནམ་ཡང་ཡོད་མིན་པས། །དགེ་ཆོས་སྤྲིན་གཙང་ཆར་བསིལ་སྣང་བར་མཛོད། །ཅེས་གསུངས་པ་བཞིན་ནོ། །གཉིས་པ་ནི། གཙོ་བོར་དགེ་བ་ཆོས་སྡུད་ཀྱི་ཚུལ་ཁྲིམས་ཀྱིས་བསྡུས་པ་མཐུན་ཕྱོགས་སྒྲུབ་པའི་སྒོ་ནས་གསུངས་ཏེ། དམར་ཁྲིད་ལས། དགེ་བ་བཅུ་ལ་དོན་བཞི་སྟེ། ངོ་བོ་ནི། མངོན་མཐོ་སྐྱེད་པར་བྱེད་པའི་ལུས་ངག་ཡིད་གསུམ་དག་པ་ཞིག་ཡིན། ངེས་ཚིག་ནི། དལ་འབྱོར་ཐོབ་པའི་གང་ཟག་གིས་ཚུལ་བཞིན་དུ་སྤྱད་ན། ཡིད་ལ་འདོད་པའི་འབྲས་བུ་སྟེར་བར་བྱེད་པས་ན་དགེ་བ་ཞེས་བྱ། དབྱེ་ན། མི་དགེ་བ་བཅུ་ལས་ལོག་པའི་དགེ་བ་སྟེ། སྲོག་འདོན་བྱ་བ་དང་། སྦྱིན་པ་རྒྱ་ཆེན་གཏོང་བ་དང་། ཚངས་པར་སྤྱོད་པ་ལ་གནས་པ་དང་། བདེན་པར་སྨྲ་བ་དང་། འཐབ་པ་རྣམས་སྡུམ་པ་དང་། ཞི་ཞིང་དུལ་བར་སྨྲ་བ་དང་། གསོང་པོར་སྨྲ་བ་དང་། སེམས་ཅན་རྣམས་ལ་བྱམས་པར་བྱ་བ་དང་། ཆགས་པ་མེད་པར་བྱ་བ་དང་། ལས་འབྲས་དང་ཡང་དག་པའི་དོན་ལ་ཐེ་ཚོམ་དང་བྲལ་བར་བྱའོ། །དེ་དག་རྒྱུད་ལ་གནས་པར་བྱེད་པའི་གྲོགས་ལ་བཅུ་སྟེ། ཡང་དག་པའི་ཆོས་ལ་དད་པ་དང་། ངོ་ཚ་ཤེས་ཤིང་ཁྲེལ་ཡོད་པ་ལ་གནས་པ་དང་། རྒྱན་པོ་མི་འགྱེད་ཅིང་རྩོད་པ་མེད་པ་དང་། ཁྲོམ་འདུས་པ་ལ་མི་བལྟ་བ་དང་། རྟག་ཏུ་བག་ཡོད་པར་སྤྱད་པ་དང་། ལེ་ལོ་མེད་པ་དང་། སྡིག་པའི་གྲོགས་དང་མི་འགྲོགས་པ་དང་། ལུས་ངག་ཡིད་གསུམ་ཤིན་ཏུ་སྦྱངས་པ་དང་། ཁྱད་པར་དུ་འཕགས་པའི་ཡིད་བྱེད་ལ་དམིགས་པའི་སྐྱེ་མཆེད་མུ་བཞི་སྒོམ་པའོ། །འབྲས་བུ་ནི། རྣམ་སྨིན་གྱི་འབྲས་བུ་ལྷ་མིར་སྐྱེ། ཚངས་པ་བཞིན་དུ་དབྱངས་སྙན། བརྒྱ་བྱིན་བཞིན་དུ་གཟུགས་བཟང་། འཁོར་ལོས་སྒྱུར་བའི་རྒྱལ་པོ་བཞིན་དུ་ལོངས་སྤྱོད་དང་ལྡན་པར་འགྱུར་རོ། །དབང་གི་འབྲས་བུ་ཐོས་པ་འཛིན་ཅིང་ཤེས་རབ་དང་ལྡན་པ་དང་། སངས་རྒྱས་ཀྱིས་བསྟན་པའི་ཆོས་རྣམས་དང་འཕྲད་པར་འགྱུར་བ་དང་། མཐར་བྱང་ཆུབ་གསུམ་གྱི་འབྲས་བུ་འཐོབ་པར་འགྱུར་རོ། །རྒྱུ་མཐུན་འབྲས་བུ་ཚེ་རབས་ཐམས་ཅད་དུ་མི་དགེ་བ་བཅུ་སྤང་ཞིང་དགེ་བ་ལ་བརྩོན་པར་འགྱུར་རོ། །ཞེས་གསུངས་སོ། །གསུམ་པ་ས་མཚམས་དང་རྣམ་གྲངས་ཀྱི་དབྱེ་བ་གཞན་བསྟན་པ་ནི། སྤྱིར་དམ་པའི་ཆོས་མངོན་པ་སོགས་ལས་མང་དུ་གསུངས་ནའང་། འདིར་པདྨའི་ལམ་རིམ་ཆེན་མོའི་གཞུང་གི་དངོས་བསྟན་ཉིད་བཤད་པ་ལ་གཉིས། ས་མཚམས་དབྱེ་བ་དང་རྣམ་གྲངས་སོ། །དང་པོ་ལ། དབྱེ་བ་བདུན་གསུངས་པ་ལས། དང་པོ་ནི། དོན་གྱི་དགེ་བ་གནས་ལུགས་འདུས་མ་བྱས། དོན་གྱི་མི་དགེ་བ་འདུས་བྱས་འཁོར་བའི་ཆོས་སོ། །ཞེས་གསུངས་ཏེ། དེ་ཡང་ཆོས་ཐམས་ཅད་ཀྱི་གནས་ལུགས་མཐར་ཐུག་ཟབ་གསལ་གཉིས་མེད་ཆོས་དབྱིངས་འདུས་མ་བྱས་ཆེན་པོ་ནི། སྡུག་བསྔལ་ཐམས་ཅད་ཉེ་བར་ཞི་བས་མཆོག་ཏུ་བདེ་བའི་རང་བཞིན་ཡིན་པའི་ཕྱིར་དང་། འཕགས་པ་རྣམས་ཀྱི་སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་ཡིན་པའི་ཕྱིར་དང་། སངས་རྒྱས་ཀྱི་ཆོས་གངྒཱའི་ཀླུང་གི་བྱེ་མ་སྙེད་ཀྱི་འབྱུང་གནས་ཡིན་པའི་ཕྱིར་དང་། དགེ་བའི་རྩ་བ་གཞན་ཐམས་ཅད་འདི་རྟོགས་པའི་ཐབས་སམ་ཉེར་ལེན་དུ་འགྱུར་བའི་ཕྱིར་དོན་དམ་པའི་དགེ་བ་ཡིན་ཏེ། ལང་ཀར་གཤེགས་པ་ལས། དེ་བཞིན་གཤེགས་པའི་སྙིང་པོ་དགེ། །རྟོག་གེ་ཅན་གྱི་སྤྱོད་ཡུལ་མིན། །ཞེས་དང་། སེམས་ཀྱི་རང་བཞིན་འོད་གསལ་ཏེ། །དེ་བཞིན་གཤེགས་པའི་སྙིང་པོ་དགེ། །ཞེས་དང་། སློབ་དཔོན་ཆེན་པོ་འཕགས་པ་ཐོགས་མེད་ཀྱིས་ཀྱང་། དོན་དམ་པའི་དགེ་བ་གང་ཞེ་ན། དེ་བཞིན་ཉིད་དོ། །ཞེས་གསུངས་སོ། །འདུས་བྱས་འཁོར་བའི་ཆོས་ཐམས་ཅད་ནི་སྐྱོན་གྱི་རང་བཞིན་སྡུག་བསྔལ་ཐམས་ཅད་ཀྱི་རྟེན་དང་སྣོད་དང་བསྐྱེད་པའི་རྩ་བར་གྱུར་པའི་ཕྱིར་མི་དགེ་བའོ། །གཉིས་པ་ནི། རང་བཞིན་གྱིས་དགེ་བ་རིག་པའི་ཡེ་ཤེས། རང་བཞིན་གྱིས་མི་དགེ་བ་ཉོན་མོངས་དུག་ལྔའོ། །ཞེས་གསུངས་ཏེ། སོ་སོ་རང་རིག་པའི་ཡེ་ཤེས་ནི་གནས་ལུགས་ཡང་དག་པའི་དོན་ཕྱིན་ཅི་མ་ལོག་པར་རིག་ཐོག་ཏུ་མཉམ་པར་བཞག་པའི་ཡུལ་ཅན་གྱི་ཡེ་ཤེས་ཡང་དག་པ་སྟེ་ངོ་བོ་དུག་གསུམ་མེད་པའི་དགེ་བའོ། །ཉོན་མོངས་པ་ནི་ཟག་པ་དང་བཅས་པ་སྟེ་ཚུལ་མིན་ཡིད་བྱེད་ཀྱི་ཀུན་རྟོག་ལ་རྟེན་ཅིང་མི་དགེ་བའི་ལས་ཐམས་ཅད་བསྐྱེད་པའི་རྩ་བར་གྱུར་པས་མི་དགེ་བའོ། །དེ་ཡང་གོང་མ་གཉིས་ནི་ཡུལ་གྱི་སྒོ་ནས་དང་། ཕྱི་མ་འདི་གཉིས་ནི་ཡུལ་ཅན་གྱི་སྒོ་ནས་དབྱེ་བའོ། །གསུམ་པ་ནི། གཤིས་ཀྱི་དགེ་བ་ཆོས་ཉིད་སྟོང་པ། གཤིས་ཀྱི་མི་དགེ་བ་མ་རིག་པའོ། །ཞེས་གསུངས་པས། སྟོང་པ་ཉིད་ནི་ཆོས་ཐམས་ཅད་ཀྱི་ཆོས་ཉིད་དམ་གནས་ཚུལ་ཡང་དག་པ་སྟེ། དེ་ཉིད་རྟོགས་ཤིང་གོམས་པར་བྱས་པས་འདུ་བྱེད་འཁོར་བའི་ཆོས་ཀུན་གྱི་གཉེན་པོ་བྱེད་པས་དགེ་བ་དང་། མ་རིག་པ་ནི་སྲིད་པའི་རྩ་བ་ཀུན་འབྱུང་ཐམས་ཅད་ཀྱི་གཞིར་གྱུར་པས་མི་དགེ་བའོ། །འདི་ནི་སྲིད་པའི་དངོས་གཉེན་དང་དངོས་རྒྱུ་བྱེད་པའི་དབང་གིས་དབྱེ་བའོ། །བཞི་པ་ནི། ཡང་དག་པའི་དགེ་བ་བློ་ལས་འདས་པ། ཡང་དག་པའི་མི་དགེ་བ་ཡིད་ཀྱིས་བསླད་པའོ། །ཞེས་གསུངས་ཏེ། དོན་དམ་པ་ནི་སྒྲ་རྟོག་མཚན་མའི་ཞེན་ཡུལ་ལས་འདས་པས་གཟུང་འཛིན་གྱི་བློའི་སྤྱོད་ཡུལ་ལས་འདས་པ་ངོ་བོ་ཉིད་ཀྱིས་མི་དགེ་བའི་ཆོས་ཀྱིས་དབེན་པས་ན་དགེ་བ་དང་། གཟུང་འཛིན་གཉིས་སྣང་གི་སྤྲོས་པ་ཅན་གྱི་ཀུན་རྫོབ་ནི་ཡང་དག་པའི་དོན་ལ་སྒྲིབ་བྱེད་ཀྱི་དྲི་མ་གློ་བུར་བ་ཡིན་པའི་ཕྱིར་མི་དགེ་བ་སྟེ། སྤྱོད་འཇུག་ལས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་སོ། །འདི་ནི་གནས་ཚུལ་ལ་སྒྲིབ་མི་སྒྲིབ་དང་གནས་སྣང་མཐུན་མི་མཐུན་གྱི་དབང་གིས་ཕྱེ་བའོ། །ལྔ་པ་ནི། ཡིད་ལ་མི་བྱེད་པ་ནི་མྱང་འདས་ཏེ་དགེ་བ་དང་། ཡིད་ལ་བྱེད་པ་ནི་འཁོར་བ་སྟེ་མི་དགེ་བའོ། །ཞེས་གསུངས་ཏེ། བདེན་གཉིས་ལས། སེམས་དང་སེམས་བྱུང་ཁམས་གསུམ་པ། །སྒྲོ་བཏགས་རྣམ་པ་ཅན་རྟོག་ཡིན། །ཞེས་གསུངས་པ་ལྟར་ཁམས་གསུམ་གྱི་སེམས སེམས་བྱུང་གི་རྟོག་པ་མཐའ་དག་ཞི་བའི་ཡིད་ལ་མི་བྱེད་པ་ནི། བཅོམ་ལྡན་འདས་ཀྱིས། ཅི་ཡང་ཡིད་¡eལ་ཞུ་མཆན། ¡fམི་བྱེད་པ་ནི་སངས་རྒྱས་རྗེས་སུ་དྲན་པའོ། །ཆོས་རྗེས་སུ་དྲན་པའོ། །དགེ་འདུན་རྗེས་སུ་དྲན་པའོ། །ཞེས་གསུངས་པས་དགེ་བ་དང་། སེམས་སེམས་བྱུང་གི་རྣམ་པར་རྟོག་པའི་སྤྲོས་པ་ནི་འདུ་བྱེད་འཁོར་བ་ཉིད་ཡིན་པའི་ཕྱིར་མི་དགེ་བ་སྟེ། སློབ་དཔོན་ཕྱོགས་ཀྱི་གླང་པོས། རྣམ་པར་རྟོག་ལས་མ་གཏོགས་པ། །འཁོར་བ་ཞེས་བྱ་གང་ཡང་མེད། །རྣམ་རྟོག་དེ་དང་བྲལ་བས་ནས། །ཁྱོད་ནི་རབ་ཏུ་མྱ་ངན་འདས། །ཞེས་སོ། །འདི་ནི་འཁོར་བའི་ཀུན་རྟོག་གི་སྤྲོས་པ་ཡོད་མེད་ཀྱིས་དབྱེ་བའོ། །དྲུག་པ་ནི། དུག་གསུམ་ཕྲ་མོས་སྦགས་པའི་དགེ་བས་མཐོ་རིས་གསུམ། དུག་གསུམ་གྱིས་ཀུན་ནས་བསླངས་པའི་སྡིག་པས་ངན་སོང་གསུམ་བསྐྱེད་དོ། །ཞེས་གསུངས་པས། བདག་མེད་པའི་དོན་རྟོགས་པ་དང་བྲལ་བའི་བདག་ཏུ་འཛིན་པའི་མ་རིག་པ་དང་མཚུངས་ལྡན་གྱི་ཟག་བཅས་དགེ་བའི་ལས་ཀྱིས་བདེ་འགྲོ་དང་། དུག་གསུམ་མངོན་གྱུར་གྱི་ཀུན་སློང་ངན་པས་བསྐྱེད་པའི་ལས་མི་དགེ་བས་ངན་སོང་དུ་འཕེན་པ་སྟེ། ཞིབ་པར་གོང་དུ་བསྟན་པ་བཞིན་རྣམ་སྨིན་གྱི་འབྲས་བུ་སྐྱེད་ཚུལ་ལ་ལྟོས་ནས་ཟག་བཅས་བསོད་ནམས་ཆ་མཐུན་དང་མི་དགེ་བའི་ལས་དངོས་ཀྱིས་དབྱེ་བའོ། །བདུན་པ་ནི། ཐབས་ཤེས་ཀྱི་དགེ་བས་མི་གནས་པའི་མྱང་འདས། ཐབས་ཤེས་ཅི་རིགས་པའི་དགེ་བས་ཕྱོགས་གཅིག་པའི་མྱང་འདས་སོ། །ཞེས་གསུངས་ཏེ། གོང་དུ་བསྟན་པ་བཞིན་ཐབས་ཤེས་བླ་ན་མེད་པས་ཟིན་པའི་དགེ་བས་རྫོགས་པའི་བྱང་ཆུབ་འགྲུབ་པ་དང་། ཐབས་ཤེས་ཕྱོགས་གཅིག་གིས་ཟིན་པའི་དགེ་བས་ཞི་བ་ཕྱོགས་གཅིག་པ་ཉན་རང་གི་འབྲས་བུ་ཐོབ་པར་བྱེད་པ་སྟེ། འདི་ནི་ཐར་པ་ཆ་མཐུན་གྱི་དགེ་བ་ལ་ཐབས་ཤེས་རྒྱ་ཆེ་ཆུང་གིས་དགེ་བའི་རྩ་བ་གཉིས་སུ་དབྱེ་བ་ཡིན་ནོ། །གཉིས་པ་ལས་ཀྱི་རྣམ་གྲངས་ལའང་ལྔ་ལས། དང་པོ་ལས་ཀྱི་རྣམ་གྲངས་སྤྱིར་བསྟན་པ་ནི། གཅིག་ཏུ་དཀར་བའི་ལས། གཅིག་ཏུ་གནག་པའི་ལས། འདྲེས་མའི་ལས་ཏེ་གསུམ་མོ། །ཞེས་གསུངས་ཏེ། ལས་དང་རྣམ་སྨིན་གཉིས་ཀ་གཅིག་ཏུ་དཀར་བའི་ལས་དགེ་བ་ཁམས་གོང་མའི་བདེ་བ་མྱོང་བྱེད་བསམ་གཏན་གྱི་ས་ལ་བརྟེན་པ། གཅིག་ཏུ་གནག་པ་འདོད་པར་སྡུག་བསྔལ་འབའ་ཞིག་སྐྱེད་བྱེད་མི་དགེ་བ། འདྲེས་མ་འདོད་པའི་རྟེན་ཅན་ལ་བདེ་སྡུག་སྤེལ་མར་མྱོང་བྱེད་ཀྱི་ལས་ཏེ་ལས་རང་གི་ངོ་བོ་དཀར་ནག་འདྲེས་པ་མིན་ཀྱང་ལས་སྣ་ཚོགས་པའི་དབང་གིས་རྣམ་སྨིན་མྱོང་ཚུལ་ལམ་བྱེད་ལས་ཀྱི་སྒོ་ནས་དེ་ལྟར་བཞག་པའོ། །འདིའི་སྟེང་དུ་ཟག་བཅས་ཀྱི་ལས་དཀར་ནག་དེ་ཐམས་ཅད་ཟད་པར་བྱེད་པ་ཟག་མེད་ཀྱི་ལས་དང་བཞིར་ཆོས་མངོན་པ་ལས་བཤད་དོ། །གཉིས་པ། བསམ་སྦྱོར་གྱི་ཁྱད་པར་ལས། བསམ་པ་དཀར་ལ་སྦྱོར་བ་གནག་པ་དང་། བསམ་པ་ནག་ལ་སྦྱོར་བ་དཀར་བ་དང་། བསམ་སྦྱོར་གཉིས་ཀ་དཀར་བ་དང་། གཉིས་ཀ་ནག་པོའོ། །ཞེས་གསུངས་པས། བསམ་པ་དཀར་ལ་སྦྱོར་བ་གནག་པ། དེད་དཔོན་སྙིང་རྗེ་ཅན་གྱིས་མི་ནག་མདུང་ཤིང་ཅན་བསད་པ་ལྟ་བུ། བསམ་པ་ནག་ལ་སྦྱོར་བ་དཀར་བ་གཞན་གསོད་པའི་ཕྱིར་བསྙེན་བཀུར་བྱེད་པ་ལྟ་བུ། གཉིས་ཀ་དཀར་བ་སངས་རྒྱས་ཐོབ་པའི་ཕྱིར་གཞན་སྲོག་སྐྱོབ་{སྐྱོབས་འདིའི་རིགས་འདི་ལྟར་ཞུས། }པ་ལྟ་བུ། གཉིས་ཀ་ནག་པ་སྡང་སེམས་ཀྱིས་མཚོན་བསྣུན་ཏེ་བསད་པ་ལྟ་བུ་སྟེ། འདི་ནི་གཙོ་བོར་བསམ་པ་རྒྱུའི་ཀུན་སློང་ཉིད་གཙོ་ཆེ་བའི་དབང་གིས་དགེ་སྡིག་ཏུ་འགྱུར་ཚུལ་ལོ། །གསུམ་པ་འབྲས་བུ་མྱོང་ཚུལ་ལ་ལྟོས་ནས། མཐོང་ཆོས་འབྲས་བུ་ཅན། སྐྱེས་ནས་མྱོང་གྱུར། ལན་གྲངས་གཞན་ལ་མྱོང་བ་ཞེས་གསུངས་ཏེ། མཐོང་ཆོས་མྱོང་གྱུར་ནི་ཡུལ་དཀོན་མཆོག་དང་ཕ་མ་སོགས་གཉེན་པོ་ལ་ཀུན་སློང་བསམ་པ་དྲག་པོས་ལས་སྟོབས་ཆེན་བྱས་པ་འགའ་ཞིག་གི་འབྲས་བུ་ཚེ་ཕྱི་མ་སོགས་ལ་མི་ལྟོས་པར་ད་ལྟའི་རྟེན་འདི་ཉིད་ལ་སྨིན་པའོ། །སྐྱེས་ནས་མྱོང་གྱུར་ནི་སྐྱེ་བ་འདིའི་འོག་ཏུ་སྐྱེ་བ་གཞན་གྱི་བར་ཆོད་པར་ཕྱི་མའི་རྟེན་དེ་ཁོ་ནར་སྨིན་གྱུར་གྱི་ལས་སོ། །ལན་གྲངས་གཞན་ལ་མྱོང་བ་ནི། སྐྱེ་བ་གསུམ་ཕན་ཆོད་ཀྱི་རྟེན་ལ་སྨིན་ངེས་ཀྱི་ལས་རྣམས་སོ། །འདིའི་སྟེང་དུ་ལས་ཁ་ཅིག་གཉེན་པོ་སྟོབས་ལྡན་གྱིས་ས་བོན་ནུས་མེད་དུ་བཅོམ་པ་མྱོང་བར་མ་ངེས་པའི་ལས་དང་བཞིར་ཡང་གསུངས་ཏེ། འདི་བཞི་ནི་ལས་སྟོབས་ཆེ་ཆུང་གི་སྒོ་ནས་བཞག་པ་ཡིན་ནོ། །བཞི་པ་འབྲས་བུ་སྐྱེད་ཚུལ་ལ་ལྟོས་ནས། ལས་དཀར་རྣམ་སྨིན་དཀར་བ། ལས་ནག་རྣམ་སྨིན་གནག་པ། ལས་དཀར་རྣམ་སྨིན་གནག་པ། ལས་ནག་རྣམ་སྨིན་དཀར་བ། ཞེས་གསུངས་སྟེ། འདི་ལ་གཞུང་མཆན་དུ་དགེ་བ་བྱས་པས་བདེ་འགྲོར་སྐྱེ་བ་ལྟ་བུ་ལས་དཀར་རྣམ་སྨིན་དཀར་བ། མི་དགེ་བ་བྱས་པས་ངན་སོང་དུ་སྐྱེ་བ་ལྟ་བུ་ལས་ནག་རྣམ་སྨིན་ནག་པ། མི་སྡུག་བསྔལ་ཅན་ལྟ་བུ་ལས་དཀར་རྣམ་སྨིན་ནག་པ། ལྷའི་གླང་པོ་ཆེ་རབ་བརྟན་ལྟ་བུ་ལས་ནག་རྣམ་སྨིན་དཀར་བ། ཞེས་བཤད་དེ། འདི་ནི་རྣམ་སྨིན་དང་རྒྱུ་མཐུན་གྱི་འབྲས་བུ་བསྐྱེད་པའི་ལས་ལས་ཕྱེ་བའོ། །ལྔ་པ་འཕེན་རྫོགས་ཀྱི་དབྱེ་བ་ལ་ལྟོས་ནས། འཕེན་བྱེད་དགེ་ལ་རྫོགས་བྱེད་ཀྱང་དགེ་བ། འཕེན་བྱེད་དགེ་བ་ལ་རྫོགས་བྱེད་མི་དགེ་བ། འཕེན་བྱེད་ཀྱང་མི་དགེ་བ་ལ་རྫོགས་བྱེད་ཀྱང་མི་དགེ་བ། འཕེན་བྱེད་མི་དགེ་བ་ལ་རྫོགས་བྱེད་དགེ་བའི་ལས་ཡོད་དོ། །ཞེས་གསུངས། དེ་ཡང་འཕེན་བྱེད་དགེ་བ་ལ་རྫོགས་བྱེད་ཀྱང་དགེ་བ་མིའི་རྟེན་ཅན་ལ་འཁོར་ལོས་སྒྱུར་བ་དང་ལྷའི་རྟེན་ཅན་ལ་དབང་པོ་བརྒྱ་བྱིན་ལྟ་བུ། འཕེན་བྱེད་དགེ་བས་མཐོ་རིས་སུ་འཕངས་ཀྱང་རྫོགས་བྱེད་མི་དགེ་བས་རྫོགས་པ་མི་ནད་བུ་ཅན་དང་ལྷ་དབུལ་པོ་ལྟ་བུ། གཉིས་ཀ་མི་དགེ་བ་ངན་སོང་གི་རྟེན་ཅན་ལ་སྡུག་བསྔལ་དོས་དྲག་པོ་མནར་མེད་དང་ལུས་སྲུལ་པོ་ལྟ་བུ། འཕེན་བྱེད་མི་དགེ་བས་ངན་སོང་དུ་འཕངས་ཀྱང་རྫོགས་བྱེད་དགེ་བས་རྫོགས་པ་ཀླུ་ཕྱུག་པོའམ་ཡི་དྭགས་རྫུ་འཕྲུལ་ཅན་ལྟ་བུ་སྟེ། འདི་ལ་འཕེན་རྫོགས་གཉིས་ཀ་བྱེད་པ་དང་གང་རུང་རེ་བྱེད་པའི་ལས་ཡོད་ཅིང་། དེ་ཡང་གཅིག་གིས་དུ་མ་དང་། དུ་མས་དུ་མ་དང་། དུས་མས་གཅིག་དང་། གཅིག་གིས་གཅིག་འཕེན་པའི་ལས་ཏེ་མུ་བཞི་འཕེན་རྫོགས་གཉིས་ཀར་ཡོད་པར་གསུངས་སོ། །གཞན་ཡང་མཛངས་བླུན་དང་། ལས་བརྒྱ་པ་དང་ལས་རྣམ་འབྱེད་སོགས་མདོ་སྣ་ཚོགས་ལས་གསུངས་པའི་ལས་ཀྱི་རྣམ་གྲངས་དང་ལས་འབྲས་ལ་ཡིད་ཆེས་བསྐྱེད་པའི་གཏམ་རྒྱུད་སོགས་ནི་ཁོ་བོས་བསྡུས་པའི་བསྟན་བཅོས་ཡང་དག་ཐར་ལམ་བགྲོད་པའི་ཐེམ་སྐས་སོགས་ལས་ཤེས་པར་བྱ་ཞིང་རྒྱས་པར་མདོ་སྡེ་རྣམས་ལ་བལྟ་ཞིང་ཉན་པར་བྱ་དགོས་སོ། །མདོར་ན་རྟ་དབྱངས་ཀྱིས། སྡིག་པས་སྡུག་བསྔལ་བསོད་ནམས་ཀྱིས། །བདེའོ་འདྲེས་མས་འདྲེས་མ་སྟེ། །ལས་རྣམས་ཀྱི་ནི་རྣམ་པར་སྨིན། །འདྲ་བ་རྒྱུ་མཚན་ཡིན་པར་བརྟག །ཅེས་དང་། དེས་པས་ཞུས་པའི་མདོ་ལས། ས་བོན་ཚ་བ་རྣམས་ཀྱིས་ནི། །འབྲས་བུ་ཚ་བ་སྨིན་པར་འགྱུར། །ས་བོན་མངར་བ་རྣམས་ཀྱིས་ནི། །འབྲས་བུ་མངར་བ་སྐྱེ་བར་འགྱུར། །དཔེ་ཟླར་བྱས་པ་འདི་ཡིས་ནི། །སྡིག་པའི་རྣམ་སྨིན་ཚ་བ་དང་། །དཀར་པོའི་འབྲས་བུ་མངར་བ་དག །མཁས་པའི་མིས་ནི་ཤེས་པར་འགྱུར། །རྟག་ཏུ་ལུས་ངག་ཡིད་ཀྱིས་ནི། །སྡིག་པ་རྣམ་གསུམ་མི་བྱ་ཞིང་། །གཞན་དག་བྱེད་ཀྱང་མཁས་པ་ཡིས། །རྗེས་སུ་དགའ་བར་མི་བྱའོ། །ལུས་དང་ངག་དང་ཡིད་རྣམས་ཀྱིས། །དཀར་པོ་རྣམ་གསུམ་རྟག་ཏུ་བྱ། །གང་དག་དགེ་ལ་སྤྱོད་བྱེད་པ། །གཞན་དག་ལ་ཡང་ཡི་རང་བྱ། །ཞེས་དང་། ཨོ་རྒྱན་ཆེན་པོས། བདག་གིས་བྱས་པའི་ལས་གཞན་ལ་མི་སྨིན། གཞན་གྱིས་བྱས་པ་བདག་ལ་མི་སྨིན། ལས་མ་བྱས་པ་དང་མི་འཕྲད། བྱས་པ་ཆུད་མི་ཟ། དཀར་ནག་གི་ལས་མི་འཆོལ་བར་ཤིན་ཏུ་ཕྲ་བ་ནས་འདོར་ལེན་བྱའོ། །ཞེས་རྗེས་སུ་གདམས་པ་བཞིན་བདག་ལེགས་སུ་འདོད་པ་དག་གིས་འཇུག་ལྡོག་ལག་ལེན་དུ་ཐེབ་པར་བྱ་བ་གལ་ཆེའོ། །བཞི་པ་ཐམས་ཅད་ལས་ཀྱི་རང་བཞིན་དུ་བསམ་པ་ནི། ཀུན་མཁྱེན་བླ་མའི་དོན་ཁྲིད་ལས། འདི་ལྟར་འཁོར་བའི་བདེ་སྡུག་དང་མཐོ་དམན་ཐམས་ཅད་ཀྱང་རང་གི་ལས་དགེ་སྡིག་གིས་བྱས་པ་ཡིན་ལ། བྱང་ཆུབ་གསུམ་དང་དེའི་བདེ་ལེགས་ཐམས་ཅད་པའང་ཐར་པ་ཆ་མཐུན་གྱི་ལས་ཁྱད་པར་ཅན་སོ་སོས་བྱས་པའི་ཕྱིར། ལས་འདི་ནི་རི་མོ་མཁན་དང་འདྲ་བ་གཅིག་གིས་མང་པོར་བསྒྱུར་བ། རྗེས་སུ་འགྲོ་བས་ལུས་ཀྱི་གྲིབ་མ་དང་འདྲ་བ། རང་གིས་བྱས་པ་གཞན་ལ་མི་འཕོ། གཞན་གྱི་ལས་རང་ལ་མི་འཕོ་བས་ལུས་ཐ་དད་ཀྱི་བདེ་སྡུག་ལྟ་བུ། དགེ་སྡིག་ཤུགས་དྲག་པོས་མཐོ་རིས་དང་ངན་འགྲོར་འཕེན་པ་རྒྱལ་པོ་དབང་པོ་ཆེ་ལྟ་བུ། རྒྱ་ཆེ་བས་ནམ་མཁའི་དབྱིངས་ལྟ་བུ། རྣམ་པ་གྲངས་མང་བས་ཚོང་དུས་ཀྱི་ཟོང་ལྟ་བུ། ཕན་ཚུན་གཅིག་ཏུ་མི་འདྲེ་བས་ཟ་འོག་གི་བེར་ཁྱིམ་ལྟ་བུ། དཀར་ནག་ངོ་བོ་མི་འགྱུར་བས་ཨུཏྤལ་དང་ཀུ་མུཏ་ལྟ་བུ། གང་ཅི་བསགས་པ་དེ་དང་མཐུན་པའི་འབྲས་བུ་རེ་འབྱིན་པར་བྱེད་པའི་ཕྱིར་བདག་གིས་ཐམས་ཅད་ལས་སུ་ཤེས་པར་བྱས་ལ་བླང་དོར་བརྩོན་པར་བྱ་དགོས་སྙམ་དུ་སྦྱོར་དངོས་རྗེས་གསུམ་ཚང་བས་ཉམས་སུ་བླང་ངོ་། །ཞེས་གསུངས་ཏེ། དེ་ཡང་མ་དག་གཞན་དབང་འཁོར་བའི་ཆོས་ཕུང་ཁམས་སྐྱེ་མཆེད་ཀྱིས་བསྡུས་པ་འདི་ཐམས་ཅད་ཟག་བཅས་ལས་དང་ཉོན་མོངས་པའི་རྒྱུ་ལས་བྱུང་བའི་རྟེན་འབྲེལ་གྱི་སྣང་ཆ་འབའ་ཞིག་ཡིན་ཏེ། ལས་བརྒྱ་པ་ལས། ལུས་ཅན་རྣམས་ཀྱི་བདེ་སྡུག་ནི། །ལས་རྣམས་ཡིན་པར་ཐུབ་པས་གསུངས། །ལས་རྣམས་ཀྱང་ནི་སྣ་ཚོགས་ལ། །དེ་ཡིས་འགྲོ་འདི་སྣ་ཚོགས་བྱས། །སྣ་ཚོགས་རྣམ་པར་འཁྱམས་ཤིང་འཇུག །ལས་ཀྱི་དྲྭ་བ་འདི་ཆེའོ། །ཞེས་སོ། །དག་པ་གཞན་དབང་མྱ་ངན་ལས་འདས་པའི་ཆོས་སྐུ་དང་ཡེ་ཤེས་ཀྱི་ཚོགས་ཀྱང་ཚོགས་གཉིས་མཐར་ཕྱིན་པའི་རང་གཟུགས་རྟེན་འབྱུང་སྒྱུ་མ་ཙམ་སྟེ། རིན་ཆེན་ཕྲེང་བ་ལས། གཟུགས་ཀྱི་སྐུ་ནི་མདོར་བསྡུས་ན། །བསོད་ནམས་ཚོགས་ལས་འཁྲུངས་པ་སྟེ། ཆོས་ཀྱི་སྐུ་ནི་མདོར་བསྡུས་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་དང་། ཡེ་ཤེས་སྣང་བ་རྒྱན་གྱི་མདོ་ལས། དེ་བཞིན་གཤེགས་པ་ཟག་མེད་དགེ་བ་ཡིན། །ཆོས་ཀྱི་གཟུགས་བརྙན་ཡིན་ཏེ་འདི་ལ་ནི། །དེ་བཞིན་ཉིད་མེད་དེ་བཞིན་གཤེགས་པའང་མེད། །འཇིག་རྟེན་དག་ན་གཟུགས་བརྙན་ཀུན་ཏུ་སྣང་། །ཞེས་སོ། །དེས་ན་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རྟེན་ཅིང་འབྲེལ་བར་འབྱུང་བའི་ཆོས་ཉིད་བརྟགས་{བཏག}མི་བཟོད་ཅིང་མ་བརྟགས་ཉམས་དགའ་བ་ཙམ་དུ་གནས་ཏེ། ངལ་གསོ་ལས། ལས་རྣམས་བརྟགས་ན་ངོ་བོ་འགའ་མེད་ཀྱང་། །རྨི་ལམ་བཞིན་དུ་བདེ་སྡུག་སྣ་ཚོགས་བྱེད། །བློས་བཏགས་ལས་རྣམས་དངོས་པོ་མཚན་མ་མེད། །རྒྱུ་འབྲས་མི་བསླུ་རྟེན་འབྲེལ་ཟབ་མོ་ཉིད། །ཡོད་མིན་མེད་མིན་རང་བཞིན་གཉིས་སུ་མེད། །ཇི་ལྟར་སྤྱོད་པ་དེ་ལྟར་རྣམ་པར་སྨིན། །འདི་ནི་ཇི་སྙེད་ཇི་བཞིན་གཟིགས་པའི་ཡུལ། །རྣམ་ཀུན་མཁྱེན་པ་དེ་ཡིས་ལེགས་པར་གསུངས། །ཞེས་དང་། དབུ་མ་རྩ་བ་ལས། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ཏེ། །དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་སོ། །དེས་ན་དོན་དམ་པའི་གཤིས་ལ་ལས་མེད་ཀྱང་། ཀུན་རྫོབ་རྨི་ལམ་དང་འདྲ་བའི་ནང་འདིར་ཇི་སྲིད་གཟུང་འཛིན་གྱི་འཁྲུལ་པ་དབྱིངས་སུ་མ་དག་གི་བར་དུ་ལས་དང་ལས་ཀྱི་འབྲས་བུ་ཆུད་མི་འཛའ་ཞིང་ནམ་ཡང་བསླུ་བ་མི་སྲིད་དེ། ལས་བརྒྱ་པ་ལས། ལུས་ཅན་རྣམས་ཀྱི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབས་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་དང་། དྲན་པ་ཉེར་བཞག་ལས། མེ་ནི་གྲང་བར་འགྱུར་ཡང་སྲིད། །རླུང་ནི་ཞགས་པས་ཟིན་ཡང་སྲིད། །ཉི་ཟླ་ཐང་ལ་ལྷུང་ཡང་སྲིད། །ལས་ཀྱི་རྣམ་སྨིན་བསླུ་མི་སྲིད། །ཅེས་དང་། དཀོན་མཆོག་བརྩེགས་པ་ལས། ཅི་འདྲ་བ་ཡི་ལས་བྱས་ན། །རྣམ་པར་སྨིན་པའང་དེ་འདྲར་འགྱུར། །བསྐལ་པ་བྱེ་བ་བརྒྱར་ཡང་ནི། །དེ་ནི་ཅུང་ཟད་འགྱུར་བ་མེད། །ཅེས་སོ། །དེ་ཡང་རྒྱུ་བསགས་དུས་ཆུང་ཡང་དེ་ཉིད་གོང་དུ་འཕེལ་ཏེ་འབྲས་བུ་མྱོང་དུས་བདེ་སྡུག་ཆེར་སྨིན་པར་འགྱུར་བས་ཕྲ་ཞིབ་ནས་འདོར་ལེན་བྱེད་པ་གལ་ཆེ་སྟེ། འདུལ་བ་ལུང་ལས། སྡིག་པ་ཆུང་ངུ་དག་ལ་ཡང་། །མི་གནོད་སྙམ་དུ་བརྙས་མི་བྱ། །མེ་སྟག་ཆུང་ངུ་དག་གིས་ཀྱང་། །རྩྭ་ཕུང་རི་ཙམ་སྲེག་པར་བྱེད། །དགེ་བ་ཆུང་ངུ་དག་ལ་ཡང་། །མི་ཕན་སྙམ་དུ་བརྙས་མི་བྱ། །ཆུ་ཡི་ཐིགས་{ཐིག་འདིའི་རིགས་འདི་ལྟར་ཞུས། }པ་བསོག་པ་ཡིས། །སྣོད་ཆེན་རིམ་གྱིས་གང་བར་འགྱུར། །ཞེས་སོ། །ཚུལ་འདི་ལྟ་བུར་སྨྲ་བ་ནི་ཐམས་ཅད་མཁྱེན་པ་ཁོ་ནའི་ཁྱད་ཆོས་ལས། གཞན་ཕྱི་རོལ་པ་སོགས་ཀྱི་ལུགས་ལ་མེད་པའི་ངོ་མཚར་རྨད་དུ་བྱུང་བའི་ཆོས་ཏེ། སློབ་དཔོན་བྷ་བྱས་མཛད་པའི་དབུ་མ་རིན་པོ་ཆེའི་སྒྲོན་མ་ལས། རྒྱུ་འབྲས་བསླུ་བ་མེད་པ་ཡི། །ལས་རྣམས་རྨི་ལམ་ལྟ་བུ་ཞེས། །བཅོམ་ལྡན་ཁྱོད་ཀྱིས་གང་གསུངས་པ། །དེ་གཞན་བསྟན་བཅོས་ལས་མ་བཤད། །ཅེས་དང་། བྱང་ཆུབ་སེམས་འགྲེལ་ལས། ཆོས་རྣམས་སྟོང་པ་ཉིད་ཤེས་ནས། །དགེ་བའི་ལས་འབྲས་རྟེན་བྱེད་པ། །ངོ་མཚར་བས་ཀྱང་ངོ་མཚར་ཞིང་། །རྨད་བྱུང་བས་ཀྱང་འདི་རྨད་བྱུང་། །ཞེས་སོ། །རྟེན་འབྱུང་ཟབ་མོའི་ཚུལ་དེ་ལེགས་པར་རྟོགས་ན་མཐའ་གཉིས་ལ་མི་གནས་པའི་མྱང་འདས་ཐར་པ་བྱང་ཆུབ་ཀྱི་གོ་འཕང་མངོན་དུ་བྱེད་པ་ཡིན་ཏེ། རིན་ཆེན་ཕྲེང་བ་ལས། མེད་པ་པོ་ནི་ངན་འགྲོར་འགྲོ། །ཡོད་པ་པོ་ནི་བདེ་འགྲོར་འགྲོ། །ཡང་དག་ཇི་བཞིན་ཡོངས་ཤེས་ཕྱིར། །གཉིས་ལ་མི་བརྟེན་ཐར་པར་འགྱུར། །ཞེས་སོ། མདོར་ན་སྒྱུ་མ་མཁན་བཟང་པོས་ཞུས་པའི་མདོ་ལས། སྒྱུ་མ་ལྟ་བུར་ཚོགས་བསགས་པས། །སྒྱུ་མ་ལྟ་བུར་སངས་རྒྱས་ཏེ། །སྒྱུ་མ་ལྟ་བུའི་སེམས་ཅན་དོན། །སྒྱུ་མ་ལྟ་བུར་བྱེད་པ་ཡིན། །ཞེས་གསུངས་པ་ལྟར། ཆོས་ཐམས་ཅད་སྣང་ལ་རང་བཞིན་མེད་པ་སྒྱུ་མ་དང་རྨི་ལམ་ལྟ་བུར་ཤེས་པའི་ངང་ནས། ཚོགས་གཉིས་སྒྱུ་མ་ལྟ་བུར་བསགས་པས། འབྲས་བུ་སྐུ་གཉིས་སྒྱུ་མ་ལྟ་བུ་མངོན་དུ་མཛད་ནས། སྒྱུ་མ་ལྟ་བུའི་སེམས་ཅན་གྱི་དོན་རྒྱ་ཆེན་པོ་མཛད་པ་ནི་དག་པའི་རྒྱུ་འབྲས་རྟེན་འབྲེལ་ཟབ་མོའི་ཆོས་ཉིད་དེ་ཐེག་པ་ཆེན་པོའི་ལམ་སྲོལ་བླ་ན་མེད་པ་ཡིན་ནོ། །གལ་ཏེ་དེ་ལྟ་བུའི་རྟེན་འབྲེལ་གྱི་གནད་གསང་ཕྲ་བ་མ་རྟོགས་ཀྱང་། འཇིག་རྟེན་ཕ་རོལ་དང་ལས་རྒྱུ་འབྲས་ཡོད་པར་ཤེས་པ་འཇིག་རྟེན་པའི་ཡང་དག་པའི་ལྟ་བ་རྣམ་པར་དག་པ་དང་ལྡན་ན་ཡང་ངན་འགྲོའི་སྒོ་འཕར་གཅོད་ཅིང་བསོད་ནམས་ཚད་མེད་པའི་འཇུག་ངོགས་སུ་འགྱུར་ཏེ། ཆེད་དུ་བརྗོད་པའི་ཚོམ་ལས། འཇིག་རྟེན་པ་ཡི་ཡང་དག་ལྟ། །ཆེན་པོ་གང་ལ་ཡོད་གྱུར་པ། །དེ་ནི་ཚེ་རབས་སྟོང་དུ་ཡང་། །ངན་འགྲོར་འགྲོ་བར་མི་འགྱུར་རོ། །ཞེས་སོ། །དེ་ལས་ཟློག་སྟེ་དགེ་སྟོང་སྡིག་སྟོང་ནག་པོ་ཁ་འབྱམས་བདུད་ཀྱི་ལྟ་བའི་དབང་དུ་གྱུར་ཏེ་ལས་འབྲས་ཁྱད་དུ་གསོད་པ་ནི་བདུད་ཀྱིས་བསླུས་པས་རྣམ་སྨིན་ངན་འགྲོ་མུ་མཐའ་མེད་པར་འཁྱམས་ཤིང་ནམ་ཡང་ཐར་པའི་དུས་མི་ཡོང་སྟེ། དཔུང་བཟང་ལས། གང་ལ་ལ་དག་ལས་མེད་ལས་ཀྱི་རྣམ་པར་སྨིན་པ་ཡང་མེད་དེ་བྱིས་པ་རྣམས་དྲང་བའི་ཚུལ་ཙམ་དུ་ཟད་དོ་ཞེས་ཟེར་ཞིང་མི་དགེ་བའི་ཚོགས་མང་དུ་བསྟན་པ་དེ་དག་ནི། ཆོས་འདི་པར་ཁས་འཆེ་བ། འཇིག་རྟེན་རྒྱང་འཕེན་པའི་ལུང་ལ་བརྟེན་པ། བདུད་ཀྱི་བསླུས་པ་ཡིན་པར་རིག་པར་བྱའོ། །ཞེས་དང་། རིན་ཆེན་ཕྲེང་བ་ལས། མདོར་ན་མེད་པར་ལྟ་བ་ཉིད། །ལས་ཀྱི་འབྲས་བུ་མེད་ཅེས་པ། །བསོད་ནམས་མ་ཡིན་ངན་སོང་བ། །དེ་ནི་ལོག་པར་ལྟ་ཞེས་བཤད། །ཅེས་དང་། ཀུན་མཁྱེན་བླ་མས། གང་ཞིག་ལས་འབྲས་ཁྱད་དུ་གསོད་པ་དག །མུ་སྟེགས་ཆད་པར་ལྟ་བའི་སློབ་མ་སྟེ། །སྟོང་པའི་ལྟ་ལ་གདེང་ཙམ་སུས་འཆའ་བ། །ཆད་པའི་མཐར་ལྷུང་འོག་ནས་འོག་ཏུ་འགྲོ། །ལམ་ངན་ཞུགས་པ་དེ་དག་གནས་ངན་ལས། །ནམ་ཡང་མི་ཐར་བདེ་འགྲོ་རིང་དུ་བྱེད། །རྒྱུ་འབྲས་སྙིང་རྗེ་བསོད་ནམས་ཚོགས་འདི་དག །དྲང་དོན་བྱིས་པའི་ཆོས་ཏེ་སངས་མི་རྒྱ། །ངེས་དོན་བྱར་མེད་ནམ་མཁའ་ལྟ་བུའི་དོན། །རྣལ་འབྱོར་ཆེན་པོ་རྣམས་ཀྱིས་སྒོམས་ཤིག་ལོ། །ཆད་པ་ལས་ཀྱང་ཆད་པའི་ལྟ་བ་ཅན། །དམན་པ་ལས་ཀྱང་དམན་པའི་ལམ་ཞུགས་དག །རྒྱུ་ཉིད་བཀག་ནས་འབྲས་བུ་སྒྲུབ་པ་མཚར། །ཞེས་གསུངས། མདོར་ན། ཨོ་རྒྱན་ཆེན་པོས། ཁ་ཅིག་གསང་སྔགས་ཡིན་པར་གསོལ་ནས་སྤྱོད་པ་རྩིང་པོར་སྤྱོད་པ་འདི་གསང་སྔགས་པ་མིན། ཐེག་པ་ཆེན་པོ་བྱ་བ་སེམས་ཅན་ཐམས་ཅད་ལ་གཅེས་པར་འཛིན་པ། སྙིང་རྗེ་ཕྱོགས་རིས་མེད་པ་ལ་ཟེར་བ་ཡིན། གསང་སྔགས་པར་ཁས་བླངས་ནས་ལས་མི་དགེ་བ་ལ་མི་འཛེམས་པ་འདིས་ནི་མི་བཏུབ་པ། གསང་སྔགས་པ་ལ་སྙིང་རྗེ་ཆེན་པོ་རྒྱུད་ལ་སྐྱེད་པ་གལ་ཆེ། སྙིང་རྗེ་རྒྱུད་ལ་མ་སྐྱེས་ན། གསང་སྔགས་པར་ཁས་བླངས་ཀྱང་མུ་སྟེགས་ལོག་པར་འགྲོ། གསང་སྔགས་བྱ་བ་ཐེག་པ་ཆེན་པོ་ཡིན། ཐེག་པ་ཆེན་པོ་བྱ་བ་གཞན་དོན་བྱེད་པ་ཡིན། གཞན་དོན་བྱེད་པ་ལ་འབྲས་བུ་སྐུ་གསུམ་ཐོབ་དགོས། སྐུ་གསུམ་ཐོབ་པ་ལ་ཚོགས་གཉིས་གསོག་དགོས། ཚོགས་གཉིས་གསོག་པ་ལ་བྱང་ཆུབ་ཀྱི་སེམས་དགོས། ལམ་བསྐྱེད་རྫོགས་ཟུང་འཇུག་བསྒོམ་དགོས། ལར་བྱང་ཆུབ་ཀྱི་སེམས་མེད་པའི་གསང་སྔགས་འདིས་ཅི་ཡང་མི་རུང་། ཐེག་པ་ཆེན་པོར་མི་རུང་། སྔགས་མཚན་ཉིད་གཉིས་ཟེར་ཡང་ཕུག་གཅིག ལྟ་སྤྱོད་གཉིས་མེད་ན་གོལ་བས། ལྟ་བ་ཡས་འབུབས་ལ་སྤྱོད་པ་མས་འཇུག་འདི་ང་ཡི་གདམས་པ་ཡིན་ནོ། །ཞེས་གསུངས་པ་ལྟར། བདེན་གཉིས་ཀྱི་རྣམ་དབྱེ་ལ་མཁས་པས། མཉམ་བཞག་ཏུ་ལྟ་བས་ལ་ཟློ་བ་དང་། རྗེས་ཐོབ་ཏུ་སྤྱོད་པས་ཤན་འབྱེད་པ་འདི་སྔ་འགྱུར་པའི་རིང་ལུགས་ཟླ་མེད་པ་ཡིན་པས་ཚུལ་དེ་ལྟར་ངེས་པར་བྱས་ནས། ངག་ཏུ་ཡང་། དཀར་ནག་ལས་འབྲས་ནམ་ཡང་ཆུད་མི་ཟ། །རྒྱུ་འབྲས་བསླུ་བ་མེད་པའི་ལམ་འདི་ལས། །འཁོར་དང་མྱ་ངན་འདས་པའི་ཆོས་སུ་སྣང་། །རང་བྱས་རང་ལ་སྨིན་པར་ངེས་ན་ཡང་། །ཚུལ་བཞིན་འཇུག་ལྡོག་མི་ནུས་བདག་ཅག་ལ། །དཀོན་མཆོག་ཀུན་འདུས་བླ་མའི་ཐུགས་རྗེས་གཟིགས། །དགེ་སྡིག་བླང་དོར་བགྱིད་པར་བྱིན་གྱིས་རློབས། །ཞེས་གསོལ་བ་ཡང་ཡང་གདབ་ཅིང་བློ་ལ་འདྲེས་ངེས་སུ་བསྒོམ་པར་བྱའོ། །འབྱོངས་པའི་ཚད་ནི་བྲམ་ཟེ་སྒྲ་མཁན་ལྟ་བུ་སྟེ། ཁོང་གིས་རང་ཉིད་ཀྱི་རྒྱུད་ལ་བརྟག་སྟེ། དགེ་སེམས་སྐྱེས་པ་ན་རྡེའུ་དཀར་པོ་རེ། སྡིག་སེམས་སྐྱེས་པ་ན་ནག་པོ་རེ་བོར་བས། དང་པོ་རྡེལ་ནག་འབའ་ཞིག་བྱུང་། དེ་ནས་གཉེན་པོ་བསྐྱེད་དེ་བསྒོམས་པས། བར་དུ་དཀར་ནག་འདྲེས་མ་དང་། མཐར་རྡེའུ་དཀར་པོ་འབའ་ཞིག་ཏུ་བྱུང་བར་གསུངས། ཚུལ་དེ་ལྟ་བུས་གོམས་པར་བྱ་ཞིང་ལག་ཏུ་ལོན་པར་བྱའོ། །འཁོར་འདས་བདེ་སྡུག་ལས་ཀྱིས་སྤྲུལ་པ་སྟེ། །ལས་འབྲས་མི་བསླུ་ཐུབ་གསུང་གཅེས་པའི་མཛོད། །ཕྱོགས་ཙམ་གོ་ཞིང་རང་དབང་ཡོད་དུས་འདིར། །འཇུག་ལྡོག་ལག་ལེན་མཛོད་ཅིག་ཤེས་ལྡན་རྣམས། །ལས་རྒྱུ་འབྲས་བསམ་པའི་ཁྲིད་ཀྱི་སྐབས་སོ། ། བཞི་པ་འཁོར་བའི་སྡུག་བསྔལ་ལ་བསམས་ནས་སྲིད་པའི་ཕུན་ཚོགས་ལས་བློ་ལྡོག་སྟེ་གཏན་གྱི་ཐར་པ་དོན་དུ་གཉེར་བར་བྱེད་པའི་ཁྲིད།༈ བཞི་པ་འཁོར་བའི་སྡུག་བསྔལ་ལ་བསམས་ནས་སྲིད་པའི་ཕུན་ཚོགས་ལས་བློ་ལྡོག་སྟེ་གཏན་གྱི་ཐར་པ་དོན་དུ་གཉེར་བར་བྱེད་པའི་ཁྲིད་ལ་བཞི་སྟེ། འཁོར་བའི་སྡུག་བསྔལ་སྤྱིར་བསམ་པ། བྱེ་བྲག་ཏུ་རིགས་དྲུག་སོ་སོའི་སྡུག་བསྔལ་བསམ་པ། དེ་ལས་ཐར་པའི་ཐབས་སྒྲུབ་དགོས་པར་གདམས་པ། དེ་ལྟར་གོམས་པའི་ཕན་ཡོན་དང་འབྱོངས་ཚད་བསྟན་པའོ། །དང་པོ་ནི། པདྨའི་ལམ་རིམ་ལས། འཁོར་བ་ནི་ཁམས་གསུམ་གྱི་སེམས་ཅན་ཡིན་ལ། དེ་དག་ནི་སྡུག་བསྔལ་གྱི་རང་བཞིན། སྡུག་བསྔལ་གྱི་ངོ་བོ། སྡུག་བསྔལ་གྱི་ཡོ་ལང་ཡིན་ཏེ། རྩ་བའི་སྡུག་བསྔལ་བཞི་ལུ་གུ་རྒྱུད་དང་འདྲ་སྟེ་གཅིག་ག ཤམ་ལ་གཅིག་འབྲེལ། ཡན་ལག་གི་སྡུག་བསྔལ་དྲུག་ནི་རྒྱ་མཚོའི་རླབས་དང་འདྲ་སྟེ་བུད་པ་དང་སངས་པ་མེད། ཉིང་ལག་གི་སྡུག་བསྔལ་གནམ་གྱི་སྐར་མ་དང་འདྲ་སྟེ་གྲངས་དང་ཚད་མེད། དེས་ན་གང་དུ་སྐྱེས་ཀྱང་སྡུག་བསྔལ་གྱི་ཡོ་ལང་། སུ་དང་འགྲོགས་ཀྱང་སྡུག་བསྔལ་གྱི་གྲོགས་པོ། གང་དུ་ཕྱིན་ཀྱང་སྡུག་བསྔལ་གྱི་གནས་སོ། །གང་ཡིན་ཀྱང་སྡུག་བསྔལ་གྱི་སྣོན་མར་འདུག་པས། ལོ་ཀའི་ཕུན་སུམ་ཚོགས་པ་ཐམས་ཅད་སྡུག་བསྔལ་གྱི་རྒྱུ། མ་ཚོགས་པ་ཐམས་ཅད་སྡུག་བསྔལ་གྱི་འབྲས་བུ་སྟེ། སྡུག་བསྔལ་ལུ་གུ་རྒྱུད་དང་འདྲ་བས་གཅིག་གཤམ་ནས་གཅིག་འབྲེལ། ཆུ་ཡི་གཉེར་མ་དང་འདྲ་སྟེ་བུད་པ་དང་སངས་པ་མེད། གནམ་གྱི་སྐར་མ་དང་འདྲ་སྟེ་གྲངས་དང་ཚད་མེད་དོ། །མདོར་ན་འདོད་པ་སེམས་ཀྱི་སྡུག་བསྔལ། མྱོང་བ་ལུས་ཀྱི་སྡུག་བསྔལ། སྣང་བ་ཡུལ་གྱི་སྡུག་བསྔལ། སྒོ་གསུམ་རྩོལ་སྒྲུབ་ཀྱི་སྡུག་བསྔལ་ཏེ། སྡུག་བསྔལ་མེད་པ་གཅིག་ཀྱང་མེད་དོ། །དེ་ལྟར་བསམ་ཙ་ན་འཁོར་བ་འདི་ལ་བློ་ལྡོག་པ་ཡིན་ནོ། །ཞེས་གསུངས་ཤིང་། ཀུན་མཁྱེན་བླ་མས། དེ་ལྟར་མི་རྟག་ཁམས་གསུམ་འཁོར་བའི་ཆོས། །རྣམ་པར་འགྱུར་བས་ཤིན་ཏུ་སྡུག་བསྔལ་ཏེ། །སྡུག་བསྔལ་འགྱུར་དང་འདུ་བྱེད་ཉིད་གསུམ་གྱི། །གྲོང་ཁྱེར་དྲུག་གི་འགྲོ་ཀུན་ཉམ་རེ་ཐག །ཇི་ལྟར་མེ་ནང་གཅན་གཟན་མི་རྒོད་ཁྲོད། །རྒྱལ་པོའི་བཙོན་རར་ཆུད་པའི་འགྲོ་བ་ལྟར། །སྡུག་བསྔལ་སྔ་ཕྱི་བརྒྱུད་མས་མནར་བཞིན་དུ། །ད་དུང་ཐར་པའི་སྐབས་མེད་སྐྱོ་བ་འཕེལ། །ཞེས་གསུངས་ཏེ། འདི་ལྟར་ཐོག་མ་མེད་པའི་དུས་ནས་ཁམས་གསུམ་གྱི་འཁོར་བ་ན་བརྒྱུད་མར་འཁོར་དུས་སེམས་ཅན་ཐམས་ཅད་གཅིག་གིས་གཅིག་གི་ཕ་མ་གཉེན་འདུན་མཛའ་བཤེས་དང་། བར་མ་དང་། དགྲ་སྡང་བ་མ་བྱས་པ་མེད་ལ། རང་ཉིད་གྲོག་སྦུར་གཅིག་པུར་སྐྱེས་པའི་མགོ་དང་རྐང་ལག་བསྡམས་ཏེ་གཅིག་ཏུ་ཕུང་པོར་བྱར་ཡོད་ན་རི་རབ་ལས་ཆེས་མཐོ་ཞིང་། ངུས་པའི་མཆི་མ་རྒྱ་མཚོ་ལས་ལྷག་ལ། འདོད་པའི་ཕྱིར་མགོ་དང་ཡན་ལག་བཅད་པའང་གྲངས་མེད་ཅིང་། ཚེ་འདིར་ཕྱུག་ཅིང་འབྱོར་པ་འཁོར་དང་དབང་ཕྱུག་ཕུན་སུམ་ཚོགས་པ་རྣམས་ཀྱང་། ཤི་ནས་དབུལ་ཞིང་ཕོངས་པའི་གནས་སུ་སྐྱེ་བ་ནི་རྨི་ལམ་གྱི་བདེ་སྐྱིད་གཉིད་སད་ནས་མེད་པ་ལྟ་བུ་སྟེ། ཚེ་འདིའི་སྣང་བ་ལ་རང་གཞན་ཆགས་ཤིང་སྐྱིད་པར་སྣང་ཡང་ངང་ཚུལ་དེ་ལས་མ་འདས་པའི་ཕྱིར་གང་གིས་ཀྱང་ཅི་བྱ། འདི་ལས་ཕྱི་མ་རྒྱུན་རིང་བས་ཐར་པའི་ཆོས་ལ་གནས་པར་བྱའོ་སྙམ་དུ་སྦྱོར་དངོས་རྗེས་གསུམ་གྱི་ཉམས་སུ་བླང་བར་བྱ་སྟེ། མདོ་དྲན་པ་ཉེར་བཞག་ལས། དགེ་སློང་དག་སྲིད་པའི་ཁམས་ལ་སྐྱོ་བར་གྱིས་ཤིག དེ་ཅིའི་ཕྱིར་ཞེ་ན། ཐོག་མ་མེད་པའི་འཁོར་བ་ན་འཁོར་བ་གང་གི་ཚེ། གྲོག་སྦུར་དུ་སྐྱེས་ཏེ་དོར་བའི་ལུས་ཀྱང་གཅིག་ཏུ་བསྡམས་ཏེ་ཕུང་པོར་བྱས་ན་རིའི་རྒྱལ་པོ་རི་རབ་བས་ཀྱང་ཆེས་མཐོ་ཞིང་། ངུས་པའི་མཆི་མའང་རྒྱ་མཚོ་བཞིའི་ཆུ་བས་ལྷག་གོ །དམྱལ་བ་དང་ཡི་དྭགས་སུ་གྱུར་པ་དེའི་ཚེ་ལན་གྲངས་དཔག་ཏུ་མེད་པ་ཞིག་འཐུང་བའི་ཟངས་ཞུན་ཁོལ་མ་དང་། ཁྲག་དང་། ཆུ་སེར་དང་། རྣག་དང་། ངར་སྣབས་ཀྱང་འདི་ལྟར་གླིང་བཞི་པའི་ནང་ནས་མཐའི་རྒྱ་མཚོར་འབབ་པའི་ཆུ་ཀླུང་ཆེན་པོ་བཞི་བས་མང་ཞིང་། འདོད་པའི་ཕྱིར་མགོ་དང་མིག་དང་ཡན་ལག་དང་ཉིང་ལག་བཅད་པའང་གངྒཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་ན་ས་དང་ཆུ་དང་མེ་དང་རླུང་གི་རྡུལ་ཤིན་ཏུ་ཕྲ་བ་སྙེད་ལས་འདས་པའི་གྲངས་དང་མཉམ་པར་གྱུར་ཏོ། །ཞེས་གསུངས་སོ། །གཞན་ཡང་དགྲ་གཉེན་གནས་ལུས་སོགས་ངེས་མེད་དུ་འགྱུར་བའི་སྡུག་བསྔལ་ཡང་། བཤེས་སྤྲིང་ལས། ཕ་ནི་བུ་ཉིད་མ་ནི་ཆུང་མ་ཉིད། །སྐྱེ་བོ་དགྲར་གྱུར་པ་དག་བཤེས་ཉིད་དང་། །ལྡོག་པ་ཉིད་དུ་མཆི་བས་དེ་སླད་དུ། །འཁོར་བ་དག་ན་ངེས་པ་འགའ་མ་མཆིས། །ཞེས་དང་། མྱ་ངན་བསལ་བ་ལས། ཁྱོད་ཀྱིས་ཇི་སྙེད་གཉེན་བཤེས་རྣམས། །འཁོར་བའི་ནང་དུ་བླང་བོར་བ། །གངྒཱའི་བྱེ་མ་རྣམས་ལ་ཡང་། །དེ་སྙེད་ཙམ་དུ་ཡོད་མ་ཡིན། །གང་ཉིད་ཁྱོད་ཀྱིས་རབ་བསྒྲིམས་ཏེ། །བརྩེ་བས་བུ་ཡི་འདུ་ཤེས་པ། །དེ་ནི་ཚེ་རབས་གཞན་དུ་ན། །རྡེག་པར་བྱེད་ཅིང་དགྲར་འདུ་ཤེས། །རང་གི་བཞོས་པའི་ནུ་མ་ཡང་། །ཁྱོད་ཀྱིས་འཐུང་བ་སྲིད་གཞན་ན། །དེ་ཡི་ཁྲག་ཉིད་འཐུང་བ་དང་། །རྒྱབ་ནས་ཤ་ཡང་ཟོས་པ་ཡིན། །ཞེས་གསུངས། དེར་མ་ཟད་ཚེ་འདི་ཉིད་ལའང་དགྲ་གཉེན་བར་མའི་འགྱུར་ལྡོག་མ་ངེས་ཏེ། དཔུང་བཟང་ལས། རེ་ཞིག་གཅིག་ན་དགྲ་ཡང་མཛའ་བོར་འགྱུར། །མཛའ་བོ་ཡང་ནི་དགྲར་ཡང་འགྱུར་བ་ཉིད། །དེ་བཞིན་ཁ་ཅིག་ཀྱང་ནི་བར་མར་འགྱུར། །བར་མ་དེ་ཉིད་ཀྱང་ནི་དགྲ་བོར་འགྱུར། །དེ་བཞིན་མཛའ་བཤེས་འགྱུར་བར་རིགས་ནས་ནི། །བློ་གྲོས་ལྡན་པ་ནམ་ཡང་ཆགས་མི་བྱ། །ཞེས་གསུངས། སྔོན་ཆད་མཐོ་རིས་དང་ངན་སོང་གི་བདེ་སྡུག་ཇི་ཙམ་མྱོང་ཡང་ངོམས་པ་དང་སྐྱོ་སུན་མེད་པའི་ཉེས་པའང་། སློབ་སྤྲིང་ལས། སྔོན་ཆད་ལན་མང་མ་མྱོང་སྡུག་བསྔལ་དེ་ཡོད་མིན། །འགྲོ་བར་གང་གིས་ཚིམས་གྱུར་འདོད་པ་དེ་དག་མེད། །གང་གི་ལྟོར་མ་ཉལ་བའི་སེམས་ཅན་དེ་མེད་ན། །འོན་ཀྱང་ཇི་ལྟར་འཁོར་བ་ཅན་ན་ཆགས་བྲལ་མེད། །ཅེས་གསུངས། དེ་བཞིན་དུ་ཚེ་འདིར་ཡང་འདོད་པས་ཆོག་མི་ཤེས་པའི་ཉེས་པ་མང་སྟེ། རྒྱ་ཆེ་རོལ་པ་ལས། འདོད་པ་ཐམས་ཅད་མི་གཅིག་གིས་ཐོབ་ཀྱང་། །དེས་ཀྱང་ཆོག་པ་མེད་ཅིང་ད་དུང་ཚོལ། །འདོད་པའི་ཡོན་ཏན་ཆོག་པ་ཅི་ཡང་མེད། །ཇི་ལྟར་མི་དག་ལན་ཚྭའི་ཆུ་འཐུང་བཞིན། །ཞེས་དང་། བྱེ་བྲག་གཟུགས་སོགས་འདོད་ཡོན་ལ་ཆགས་པའི་ཉེས་དམིགས། འཕགས་པ་དབྱིག་གཉེན་གྱིས། རི་དྭགས་ཉིད་ནི་སྒྲ་ཙམ་གྱིས། །རེག་པས་གླང་པོ་རླག་པར་བྱེད། །གཟུགས་ཉིད་ཀྱིས་ནི་ཕྱེ་ལེབ་{བྱེ་སླེབ}སྟེ། །རོ་ཡིས་ཉ་ནི་རྣམ་པར་བརླག །བུང་བ་དྲི་ལ་ཆགས་པ་སྟེ། །འདི་དག་རྒྱུ་ནི་རེ་རེས་སོ། །སྐྱེས་བུ་དག་ནི་གཅིག་ལ་ཡང་། །ལྔ་པོ་འདི་དག་རྟག་ལྡན་ཞིང་། །ཉིན་མཚན་དུ་ནི་རབ་འཇོམས་ན། །བདེ་གནས་ཐོབ་པ་ཇི་ལྟར་འགྱུར། །ཞེས་གསུངས། ལུས་ཡང་ཡང་འདོར་ཞིང་ཉིང་མཚམས་སྦྱོར་བའི་ཉེས་པའང་། བཤེས་སྤྲིང་ལས། རེ་རེའི་བདག་ཉིད་རུས་པའི་ཕུང་པོ་ནི། །ལྷུན་པོ་མཉམ་པ་སྙེད་ཅིག་འདས་གྱུར་ཏེ། །མ་ཡི་ཐུག་མཐའ་རྒྱ་ཤུག་ཚིག་གུ་ཙམ། །རིལ་བུར་བསྒྲངས་ཀྱང་ས་ཡིས་ལང་མི་འགྱུར། །ཞེས་གསུངས། ཡང་ཡང་མཐོ་དམན་དུ་འགྱུར་བའི་ཉེས་པའང་། བཤེས་སྤྲིང་ལས། བརྒྱ་བྱིན་འཇིག་རྟེན་མཆོད་འོས་གྱུར་ནས་ནི། །ལས་ཀྱི་དབང་གིས་ཕྱིར་ཡང་ས་སྟེང་ལྷུང་། །འཁོར་ལོས་སྒྱུར་བ་ཉིད་དུ་གྱུར་ནས་ཀྱང་། །འཁོར་བ་དག་ན་ཡང་བྲན་ཉིད་དུ་འགྱུར། །ཞེས་དང་། མྱ་ངན་བསལ་བ་ལས། གང་ཁྱོད་འདི་ལྟར་འཁོར་གྱུར་ཏེ། །མགོ་ལ་ལན་གྲངས་བརྒྱར་བརྗོད་པ། །དེ་ཉིད་བྲན་གྱུར་ཁྱོད་ཡིན་ཏེ། །རྡོག་པས་ལན་གྲངས་བརྒྱར་ཡང་བཏགས། །འགྲོ་བ་རྒྱུ་ཡི་དངོས་པོ་ཡིས། །སྔོན་ཆད་གཞན་དུ་སྣང་གྱུར་ལ། །སྨེ་བདུན་དྲང་སྲོང་བདུན་ཚོགས་བཞིན། །ཞེས་དང་། སྤྱོད་འཇུག་ལས། བདེ་འགྲོར་ཡང་དང་ཡང་འོངས་ཏེ། །བདེ་བ་མང་པོ་སྤྱད་སྤྱད་ནས། །ཤི་ནས་ངན་སོང་སྡུག་བསྔལ་ནི། །ཡུན་རིང་མི་བཟད་རྣམས་སུ་ལྷུང་། །ཞེས་གསུངས། ཚེ་འདི་ཉིད་ལའང་འབྱོར་རྒུད་འདུ་འབྲལ་སྣ་ཚོགས་འབྱུང་བ་མངོན་སུམ་གྱིས་མཐོང་ཞིང་ཐོས་པས་ཀྱང་ཤེས་ལ། མཐར་གཅིག་པུར་གྲོགས་མེད་པར་འགྲོ་བས་སྡུག་བསྔལ་བའི་ཉེས་པའང་། དེ་ཉིད་ལས། གསོན་ཚེ་འདི་དང་དེ་བཞིན་དུ། །གཉེན་དང་བཤེས་པ་རྣམས་སྤངས་ནས། །གཅིག་པུ་ག་ཤེད་འགྲོ་དགོས་ན། །མཛའ་དང་མི་མཛའ་ཀུན་ཅི་རུང་། །ཞེས་དང་། ལུས་འདི་གཅིག་པུ་བྱུང་བ་ཡང་། །ལྷན་ཅིག་སྐྱེས་པའི་ཤ་རུས་དག །ཞིག་སྟེ་སོ་སོར་འགྱེས་འགྱུར་ན། །མཛའ་བ་གཞན་ལྟ་སྨོས་ཅི་དགོས། །སྐྱེ་བ་གཅིག་པུ་སྐྱེ་འགྱུར་ཞིང་། །འཆི་ནའང་དེ་ཉིད་གཅིག་འཆི་སྟེ། །སྡུག་བསྔལ་སྐལ་གཞན་མི་ལེན་ན། །གེགས་བྱེད་མཛའ་བས་ཅི་ཞིག་བྱ། །ཞེས་གསུངས། མདོར་ན་མ་དག་གཞན་དབང་སྣོད་བཅུད་ཀྱིས་བསྡུས་པའི་ཕུང་ཁམས་སྐྱེ་མཆེད་ཐམས་ཅད་སྡུག་བསྔལ་བདེན་པའི་མཚན་གཞི་ཡིན་པས། སྡུག་བསྔལ་གསུམ་གྱི་རང་བཞིན་ལས་མ་འདས་ཏེ། རྒྱལ་པོ་ལ་གདམས་པའི་མདོ་ལས། རྒྱལ་པོ་ཆེན་པོ་སྲིད་པ་ནི་འགྱུར་བ། སྲིད་པ་འདི་ནི་མི་རྟག་པ། སྲིད་པ་འདི་ནི་སྡུག་བསྔལ་བའོ། །ཞེས་དང་། སྙིང་རྗེ་པད་དཀར་ལས། ལྷའི་རྒྱལ་སྲིད་ནི་སྡུག་བསྔལ་འབྱུང་བའི་རྒྱུ་ལགས་སོ། །མི་རྣམས་ཀྱི་རྒྱལ་སྲིད་ཀྱང་སྡུག་བསྔལ་བའི་རྒྱུ་ལགས་སོ། །ཞེས་གསུངས་པ་ལྟར། འཁོར་བའི་བདེ་བ་ལྟར་སྣང་བ་འདི་ཐམས་ཅད་ལ་རྟག་ཐུབ་པ་གཅིག་ཀྱང་མེད་པས་མཐར་འགྱུར་ཞིང་འགག་པའི་ཚེ་སྡུག་བསྔལ་གྱི་རྒྱུ་བྱེད་པའི་ཕྱིར་འགྱུར་བའི་སྡུག་བསྔལ་ཡིན་ཏེ། དཔེ་འབྲས་ཆན་དུག་དང་འདྲེས་པ་ཟ་བ་དང་འདྲའོ། །སྐྱེ་རྒ་ན་འཆི་ཚ་གྲང་བཀྲེས་སྐོམ་མི་སྡུག་པ་དང་འཕྲད་པ་སོགས་ཡིད་དུ་མི་འོང་བའི་དངོས་པོ་རྣམས་ནི་སྡུག་བསྔལ་གྱི་སྡུག་བསྔལ་ཏེ། སྐྱེས་ཙམ་ནས་སྡུག་བསྔལ་གྱི་ངོ་བོར་སྣང་བའི་ཕྱིར། དཔེ་རིམས་ནད་དྲག་པོས་གཟིར་བ་དང་འདྲ་སྟེ། ལས་རྣམ་འབྱེད་ལས། སྲིད་པའི་སྡུག་བསྔལ་ནི་བསིལ་བའི་སྐབས་མེད་པས་མེ་ཡི་འོབས་ལྟ་བུའོ། །འཇིགས་ཤིང་ཉམ་ང་བས་གཅན་གཟན་ཁྲོ་བོ་དང་མི་རྒོད་ཀྱི་ནང་ན་གནས་པ་ལྟ་བུའོ། །ཐར་པའི་གོ་སྐབས་དཀའ་བ་རྒྱལ་པོའི་བརྩོན་ར་ལྟ་བུའོ། །ཡང་དང་ཡང་དུ་འབྱུང་བ་རྒྱ་མཚོའི་རླབས་ལྟ་བུའོ། །བདེ་འགྲོའི་སྲོག་འཇོམས་པ་ཧ་ལ་ཧ་ལ་ལྟ་བུའོ། །ཞེས་གསུངས། ཟག་བཅས་ཀྱི་ཕུང་པོ་མཐའ་དག་སྲིད་པ་ཉེ་བར་ལེན་པའི་རྒྱུ་ཡིན་པས་ཁྱབ་པ་འདུ་བྱེད་ཀྱི་སྡུག་བསྔལ་གྱི་ངོ་བོ་དངོས་ཡིན་ཏེ། དཔེ་འབྲས་ཀྱི་ནང་{ནད}མ་སྨིན་པ་དང་འདྲའོ། །དེ་ཡང་སོ་སོ་སྐྱེ་བོ་རྣམས་ཀྱིས་འདུ་བྱེད་ཀྱི་སྡུག་བསྔལ་འདི་མི་ཚོར་ཏེ། དཔེར་ན་རིམས་ནད་དྲག་པོས་ཟིན་ཙ་ན་ལུས་ཀྱི་ན་ཚ་ཁལ་ཁོལ་གཞན་ཡོད་ཀྱང་མི་ཚོར་བ་དང་འདྲ་ལ། འཕགས་པ་རྣམས་ཀྱིས་འདུ་བྱེད་ཀྱི་སྡུག་བསྔལ་འདི་གཟིགས་ཏེ། རིམས་ནད་ཆེར་སོས་ཙ་ན་ལུས་ཀྱི་ན་ཚ་ཁལ་ཁོལ་ཡོད་པ་ཚོར་བ་བཞིན་ནོ། །དཔེ་གཞན་ཡང་མཛོད་འགྲེལ་ལས། ལག་མཐིལ་སྤུ་ཉག་གཅིག་འདུག་པ། །དེ་ནི་མིག་ཏུ་སོང་བ་ན། །མི་བདེ་བ་དང་སྡུག་བསྔལ་སྐྱེད། །བྱིས་པ་ལག་མཐིལ་འདྲ་བ་ཡིས། །འདུ་བྱེད་སྡུག་བསྔལ་སྤུ་མི་རྟོགས། །འཕགས་པ་མིག་དང་འདྲ་བ་ཡིས། །འདུ་བྱེད་ལ་ནི་སྡུག་བསྔལ་གཟིགས། །ཞེས་གསུངས། དེས་ན་ཚོར་བ་བདེ་བ་ཐམས་ཅད་འགྱུར་བ་དང་། སྡུག་བསྔལ་བ་ཐམས་ཅད་སྡུག་བསྔལ་གྱི་སྡུག་བསྔལ་དང་། བཏང་སྙོམས་པ་རྣམས་འདུ་བྱེད་ཀྱི་སྡུག་བསྔལ་ལས་མ་འདས་པས་ཚོར་བ་ཐམས་ཅད་སྡུག་བསྔལ་བདེན་པའི་རང་བཞིན་དུ་གསུངས་པ་ཡིན་ལ། དེར་མ་ཟད་ལེགས་པར་བརྟགས་ན། ད་ལྟ་ཟས་གོས་སོགས་ཀྱི་ཆེད་དུ། སེམས་ཅན་གྱི་སྲོག་བཅད་པ་དང་གཞན་ནོར་འཕྲོག་པ་སོགས་ཀྱིས་ཕྱི་མ་དམྱལ་བ་དང་ཡི་དྭགས་སོགས་ཀྱི་སྡུག་བསྔལ་མངོན་པར་འདུ་བྱེད་པས་ཐམས་ཅད་སྡུག་བསྔལ་གྱི་རང་བཞིན་ལས་མ་འདས་སོ། །དེ་ཡང་གཙོ་བོར་ངན་སོང་གསུམ་ལ་སྡུག་བསྔལ་གྱི་སྡུག་བསྔལ་དང་། མི་དང་འདོད་ལྷར་འགྱུར་བའི་སྡུག་བསྔལ་དང་། ཁམས་གོང་མ་གཉིས་ན་འདུ་བྱེད་ཀྱི་སྡུག་བསྔལ་ཡོད་པར་གསུངས་ཏེ། མདོ་ལས། འདོད་པའི་ཁམས་ནི་སྐྱོན་དང་བཅས་པ་སྟེ། །དེ་བཞིན་གཟུགས་ཀྱི་ཁམས་ཀྱང་སྐྱོན་དང་བཅས། །གཟུགས་མེད་ཁམས་ཀྱང་སྐྱོན་དང་བཅས་པ་སྟེ། །མྱ་ངན་འདས་པ་འབའ་ཞིག་སྐྱོན་མེད་མཐོང་། །ཞེས་སོ། །གཉིས་པ་བྱེ་བྲག་ཏུ་རིགས་དྲུག་སོ་སོའི་སྡུག་བསྔལ་ལ་བསམ་པ་ལ་དྲུག་ལས། དང་པོ་དམྱལ་བའི་སྡུག་བསྔལ་བསམ་པ་ལའང་ཚ་བའི་སྡུག་བསྔལ་དང་། གྲང་བའི་སྡུག་བསྔལ་གཉིས་ལས། དང་པོ་ཚ་བའི་དམྱལ་བ་བརྒྱད་ནི། ཨོ་རྒྱན་སངས་རྒྱས་གཉིས་པས། དང་པོ་དམྱལ་བའི་འཇིག་རྟེན་ན། །ཚ་གྲང་སྡུག་བསྔལ་བསམ་མི་ཁྱབ། །ཡང་སོས་ཐིག་ནག་བསྡུས་འཇོམས་དང་། །ངུ་འབོད་ངུ་འབོད་ཆེན་པོ་དང་། །ཚ་བ་རབ་ཏུ་ཚ་བ་དང་། །མནར་མེད་པ་སྟེ་ཚ་དམྱལ་བརྒྱད། །ཅེས་གསུངས་པས། དང་པོ་ཡང་སོས་ནི། ལྕགས་བསྲེགས་ཀྱི་ས་གཞིར་མདག་མེ་རབ་ཏུ་འབར་བའི་ཡུལ་ཁམས་སུ་སེམས་ཅན་དམྱལ་བ་པ་ཀུན་འདུས་ཏེ། དགྲ་བོ་མི་ཤ་བོ་གཅིག་གིས་གཅིག་མཐོང་བ་ལྟར་ཕན་ཚུན་ལས་ཀྱི་དབང་གིས་རང་བཞིན་དུ་གྲུབ་པའི་མཚོན་ཆས་གསོད་རེས་བྱས་ཏེ་ཤི་མ་ཐག་ཡང་སོས་པར་གྱུར་ཅིག་གི་སྒྲ་ནམ་མཁའ་ལ་གྲགས་པས་སོས་ཏེ། ཡང་འཆི་ཡང་སོས་པ་ལས་མ་ཟད་བར་དུ་མྱོང་དགོས་ཏེ། སེམས་ཉིད་ངལ་གསོ་ལས། ཡང་སོས་ལྕགས་ཀྱི་མདག་མེ་འབར་བའི་སྟེང་། །ཕན་ཚུན་འདུས་ནས་མཚོན་གྱིས་སྲོག་དང་ཕྲལ། །ཡང་སོས་སྒྲ་ཡིས་སྔར་བཞིན་སྡུག་བསྔལ་བ། །ལས་ཟད་བར་དུ་དེ་ལྟར་མྱོང་འཚལ་ལོ། །ཞེས་དང་། བཤེས་སྤྲིང་ལས། འདི་ན་ཉིན་གཅིག་མདུང་ཐུང་སུམ་བརྒྱ་ཡིས། །རབ་ཏུ་དྲག་བཏབ་སྡུག་བསྔལ་གང་ལགས་པ། །དེས་ནི་དམྱལ་བའི་སྡུག་བསྔལ་ཆུང་ངུ་ལའང་། །འོལ་ཡང་མི་བཟོད་ཆར་ཡང་མི་ཕོད་དོ། །དེ་ལྟར་སྡུག་བསྔལ་ཤིན་ཏུ་མི་བཟད་ལོ། །བྱེ་བ་ཕྲག་བརྒྱར་ཉམས་སུ་མྱོང་ཡང་ནི། །ཇི་སྲིད་མི་དགེ་དེ་ཟད་མ་གྱུར་པ། །དེ་སྲིད་སྲོག་དང་ཕྲལ་བར་མི་འགྱུར་རོ། །ཞེས་གསུངས། ཚེ་ཚད་སྤྱིར་དམྱལ་བ་རྣམས་གཉེན་པོ་དྲག་པོ་སྐྱེས་པ་སོགས་གློ་བུར་དུ་འཕོ་བ་དང་། རྡོ་རྗེ་སློབ་དཔོན་ལ་བརྙས་པ་སོགས་བསྐལ་ཆེན་དུ་མར་གནས་དགོས་པར་གསུངས་པས་མཐའ་གཅིག་ཏུ་ངོས་བཟུང་དཀའ་ཡང་ཐེག་པ་ཐུན་མོང་བའི་ལུགས། མངོན་པར་མཛོད་དང་། དྲན་པ་ཉེར་བཞག་སོགས་ལས་གསུངས་པ་གོ་བསྟུན་ཏེ་གོ་བདེ་བར། ཀུན་མཁྱེན་བླ་མས། ཚེ་ཚད་མི་ཡི་ལོ་གྲངས་ལྔ་བཅུ་ལ། །རྒྱལ་ཆེན་རིགས་བཞིའི་ལྷ་ཡི་ཉིན་ཞག་གཅིག །དེ་ཉིད་སུམ་ཅུ་ཟླ་བ་བཅུ་གཉིས་ལོ། །ལྔ་བརྒྱས་ཡང་སོས་ཞག་གཅིག་གོང་འཕེལ་བས། །རང་ལོ་ལྔ་བརྒྱར་སྡུག་བསྔལ་བརྣག་དགོས་སོ། །དེ་ཉིད་རབ་ཏུ་དབྱེ་བའི་གྲངས་བཤད་པ། །མི་ལོ་བྱེ་བ་ཕྲག་འབུམ་དྲུག་ཁྲི་དང་། །སྟོང་ཕྲག་གཉིས་སུ་ངེས་པར་མདོ་ལས་གསུངས། །ཞེས་སོ། །གཉིས་པ་ཐིག་ནག་ནི། དམྱལ་སྲུང་གཤེད་མ་རྣམས་ཀྱིས་ལུས་སྤྱི་གཙུག་ནས་རྐང་སེན་གྱི་བར་ཐིག་ནག་པོ་བཞིའམ་བརྒྱད་ལ་སོགས་པ་དུ་མ་བཏབ་སྟེ་རལ་གྲི་དང་སོག་ལེ་དང་སྟ་རེ་མེ་འབར་བས་གཤོག་པ་དང་ཡང་འབྱར་ཡང་གཅོད་པས་སྡུག་བསྔལ་ཏེ། བཤེས་སྤྲིང་ལས། ཁ་ཅིག་སོག་ལེས་འདྲ་སྟེ་དེ་བཞིན་གཞན། །སྟ་རེ་མི་བཟད་སོ་རྣོན་རྣམས་ཀྱིས་གཤགས། །ཞེས་སོ། །ཚེ་ཚད་ཀྱང་། ངལ་གསོ་ལས། མི་ཡི་ལོ་བརྒྱ་རྩ་གསུམ་ཞག་གཅིག་སྟེ། །དེ་ཡི་ལོ་སྟོང་ཐིག་ནག་ཞག་གཅིག་ལ། །རང་ལོ་སྟོང་ཐུབ་མི་ལོ་བྱེ་བ་ཕྲག །ས་ཡ་གཉིས་འབུམ་དགུ་ཁྲི་དྲུག་སྟོང་རྩ། །བཅུ་གཉིས་བར་དུ་ཐུབ་པར་སྟོན་པས་གསུངས། །ཞེས་སོ། །གསུམ་པ་བསྡུས་འཇོམས་ནི། རི་ར་ལུག་དང་གླང་པོ་ཆེའི་གདོང་འདྲ་བའི་བར་དུ་ཚོགས་པ་བཙིར་ཏེ་ཏིལ་གཏུན་དུ་ཏིལ་བརྡུང་བ་བཞིན་ལུས་དམར་འདག་འདག་སོང་བ་ན་ཡང་སྔར་བཞིན་འཚོ་བས་སྡུག་སྔར་ལས་མ་ཟད་ཀྱི་བར་དུ་མྱོང་དགོས་ཏེ། སློབ་སྤྲིང་ལས། རི་དང་མཉམ་ལུག་རུ་རིང་འཇིགས་སུ་རུང་བ་གཉིས་། །འདུས་པའི་ཕྲག་ཏུ་ལུས་ཀུན་ཕྱེ་མར་རློག་ཅིང་འཇོམས། །ཅུང་ཟད་བསིལ་བའི་རླུང་ཞིག་ལངས་པས་རྟས་ནས་ནི། །དེ་བཞིན་ཕྱིར་ཡང་ལན་བརྒྱར་ཀུན་ནས་ཕྱེ་མར་རློག །ཅེས་དང་། བཤེས་སྤྲིང་ལས། ཁ་ཅིག་ཏིལ་བཞིན་འཚིར་ཏེ་དེ་བཞིན་གཞན། །ཕྱེ་མ་ཞིབ་མོ་བཞིན་དུ་འཐག་པར་བགྱིད། །ཅེས་གསུངས། ཚེ་ཚད། ངལ་གསོ་ལས། མི་ལོ་ཉིས་བརྒྱ་འཐབ་བྲལ་ཞག་གཅིག་སྟེ། །མཚེ་མའི་ཉིས་སྟོང་བསྡུས་འཇོམས་ཉིན་ཞག་གཅིག །རང་ལོ་སྟོང་ཕྲག་གཉིས་སུ་སྡུག་བསྔལ་ལོ། །དེ་ཡང་མི་ལོ་བྱེ་བ་ཕྲག་སུམ་འབུམ། །དྲུག་ཁྲི་བརྒྱད་སྟོང་རྩ་གཅིག་ཐུབ་པར་གསུངས། །ཞེས་སོ། །བཞི་པ་ངུ་འབོད་ནི། དེ་དག་མཐོང་བས་འཇིགས་ཏེ་ཡིབ་པའི་སྣང་བ་སྐྱེས་པ་ན་ལྕགས་ཁང་མེ་འབར་བར་ཆུད་དེ་ཡུན་རིང་མི་ཐར་བ་དང་ཟངས་ཞུན་བསྐོལ་བར་འཚོད་ཅིང་ལུས་ལ་མེ་འབར་བས་ངུ་ཞིང་འོ་དོད་འབོད་པས་སྡུག་བསྔལ་ཏེ། ངལ་གསོ་ལས། ངུ་འབོད་འབར་བའི་མེས་འཚིག་འོ་དོད་འབོད། །ལྕགས་ཞུན་བསྐོལ་བར་འཚོད་པས་སྡུག་བསྔལ་བ། །ཞེས་དང་། ཚེ་ཚད། མི་ལོ་བཞི་བརྒྱ་དགའ་ལྡན་ཉིན་ཞག་གཅིག །དེ་ཡི་བཞི་སྟོང་ངུ་འབོད་ཞག་གཅིག་སྟེ། །རང་ལོ་བཞི་སྟོང་བར་དུ་སྡུག་བསྔལ་བ། །མི་ལོ་བྱེ་བ་ཕྲག་ས་ཡ་གཉིས་དང་། །བྱེ་བ་ཕྲག་དགུ་འབུམ་བཞི་ཁྲི་སྟོང་དང་། །བྱེ་བ་བདུན་ཕྲག་བར་དུ་ཐུབ་པའོ། །ཞེས་སོ། །ལྔ་པ་ངུ་འབོད་ཆེན་པོ་ནི། ལྕགས་ཀྱི་ཁང་སྒྲོམ་གཉིས་རིམ་ཚ་རླབས་ཀྱང་སྔ་མ་ལས་ཉིས་འགྱུར་གྱི་ཆེ་བའི་ནང་དུ་ཚུད་ནས། སྒོ་སྔ་མ་ལས་ཐར་ཡང་ཕྱི་མ་ལས་ཡུན་རིང་བར་དུ་མི་ཐར་ཞིང་། མེ་རབ་ཏུ་འབར་བས་བསྲེགས་ཤིང་གཤིན་རྗེའི་ཕོ་ཉ་རྣམས་ཀྱིས་འཚོད་པར་བྱེད་པས་སྡུག་བསྔལ་ཏེ། སྔ་མ་ལས། འབོད་སྒྲོགས་ཆེན་པོ་ལྕགས་ཁྱིམ་འབར་བ་རུ། །འབར་བའི་མེས་བསྲེག་གཤིན་རྗེས་འཚོད་པར་བྱེད། །ཅེས་དང་། ཚེ་ཚད་ཀྱང་། མི་ལོ་བརྒྱད་བརྒྱ་འཕྲུལ་དགའི་ཞག་གཅིག་སྟེེ། །དེ་ལོ་བརྒྱད་སྟོང་ངུ་འབོད་ཆེའི་ཞག་གཅིག །རང་ལོ་བརྒྱད་སྟོང་ཉིད་དུ་སྡུག་བསྔལ་བ། །མི་ལོ་བྱེ་བ་ཕྲག་ས་ཡ་གསུམ་དང་། །བྱེ་བ་ཕྲག་ལྔ་འབུམ་ལྔ་ཁྲི་ཉིས་སྟོང་། །དྲུག་ཅུ་རྩ་དྲུག་བར་དུ་ཐུབ་པ་ཡིན། །ཞེས་སོ། །དྲུག་པ་ཚ་བའི་དམྱལ་བ་ནི། ལྕགས་ཁང་མེ་འབར་བའི་ནང་དུ་བཅུག་ནས། མདུང་གིས་འབིགས་པ་དང་། ཁྲོ་ཆུ་ཁོལ་མ་ཁར་བླུགས་པས་ཁོང་པ་ཚིག་པ་དང་། ལྕགས་སྲེག་གི་ས་གཞིར་གན་རྐྱལ་དུ་བསྒྱེལ་ནས་ཐོ་བ་མེ་འབར་བས་རྡུང་བར་བྱེད་དེ། ངལ་གསོ་ལས། ཚ་བ་ལྕགས་ཁང་ནང་གཞུག་མདུང་ཐུང་གིས། །གླད་པ་འགེམ་ཞིང་ཐོ་བས་རབ་ཏུ་བརྡུང་། །འབར་བའི་མེ་ལྕེས་ཕྱི་ནང་ཀུན་ཏུ་བསྲེག །ཅེས་དང་། ཚེ་ཚད། མི་ལོ་སྟོང་དང་དྲུག་བརྒྱ་གཞན་འཕྲུལ་ཞག །དེ་ཡི་ལོ་ཁྲི་དྲུག་སྟོང་ཚ་བའི་ཞག །རང་ལོ་ཁྲི་དང་དྲུག་སྟོང་བར་ཐུབ་པ། །མི་ལོ་བྱེ་བ་ཕྲག་ས་ཡ་བརྒྱད་དང་། །བཞི་འབུམ་དང་ནི་བྱེ་བ་ཁྲག་ཁྲིག་ཕྲག །དྲུག་སྟོང་ལྔ་བརྒྱ་སུམ་ཅུ་སྙེད་མཆིས་སོ། །ཞེས་སོ། །བདུན་པ་རབ་ཏུ་ཚ་བ་ནི། ལྕགས་ཁང་ཉིས་རིམ་ཕྱི་ནང་དུ་མེ་རབ་ཏུ་འབར་བས་བསྲེག་པ་དང་། ལྕགས་ཀྱི་གསལ་ཤིང་རྩེ་གསུམ་པ་མེ་འབར་བ་རྐང་མཐིལ་གཉིས་འཕོངས་དང་གསུམ་ལ་བཙུགས་ནས་སྤྱི་བོ་དང་ཕྲག་པ་གཉིས་སུ་ཕྱུང་ཞིང་ལྕགས་ལེབ་མེ་འབར་བས་ལུས་ཀུན་ཁྱབ་པར་དཀྲི་བ་དང་། ལྕགས་ཟངས་ཆེན་མོར་ཁྲོ་ཆུ་ཁོལ་མར་འཚོད་པས་སྡུག་བསྔལ་ཏེ། དེ་ཉིད་ལས། རབ་ཏུ་ཚ་བ་ལྕགས་ཁྱིམ་གཉིས་རིམ་ནང་། །འབར་བའི་མེ་དང་མདུང་རྩེ་གསུམ་པས་བསྣུན། །སྤྱི་བོ་ཕྲག་པ་གཉིས་ཕྱུང་ལེབ་མས་དཀྲིས། །ཟངས་ཆེན་ཁོལ་མར་འཚོད་པས་སྡུག་བསྔལ་བ། །ཞེས་དང་། ཚེ་ཚད་ཀྱང་། ཚེ་ཚད་བར་གྱི་བསྐལ་པ་ཕྱེད་ཐུབ་སྟེ། །མི་ལོའི་གྲངས་ཀྱིས་གཞལ་བའི་ཡུལ་ལས་འདས། །འཇིག་རྟེན་ཆགས་གནས་འཇིག་སྟོང་བསྐལ་ཆུང་བཞི། །བར་བསྐལ་གཅིག་སྟེ་བརྒྱད་ཅུ་བསྐལ་ཆེན་ནོ། །ཞེས་སོ། །བརྒྱད་པ་མནར་མེད་ནི། ལྕགས་ཁང་མེ་འབར་བ་འཁོར་ལྷགས་པ་བཅུ་དྲུག་གིས་བསྐོར་བའི་ནང་དུ་སྔར་གྱི་སྡུག་བསྔལ་ཐམས་ཅད་མྱོང་ཞིང་། སྨྲེ་སྔགས་ཀྱི་སྒྲ་འདོན་པ་ཙམ་ལས་མེ་དང་སེམས་ཅན་སོ་སོར་མཐོང་བ་མེད་དེ། སྔ་མ་ལས། མནར་མེད་ལྕགས་ཁང་མེ་ལྕེ་འབར་བའི་ནང་། །སེམས་དམྱལ་ཀུ་ཅོ་སྨྲེ་སྔགས་འདོན་པ་ལས། །མེ་དང་སེམས་ཅན་སོ་སོ་མཐོང་བ་མེད། །མར་མེ་འབར་བ་སྙིང་པོ་ལ་ཞེན་བཞིན། །སྲོག་གི་ཟུངས་ཙམ་མེ་ནང་དབུས་གནས་པ། །ཞེས་དང་། ཚེ་ཚད་ཀྱང་། བར་བསྐལ་གནས་པའི་ཡུན་ཙམ་བརྣག་དགོས་ཏེ། །དེ་ལས་ཆེ་བའིི་སྡུག་བསྔལ་གཞན་མེད་པས། །མནར་མེད་བསྟིར་མེད་ཅེས་སུ་བཤད་པ་ཡིན། །ཞེས་དང་། ཨོ་རྒྱན་ཆེན་པོས། མནར་མེད་པའི་སྡུག་བསྔལ་དེ་བས་ཆེར་མི་བཏུབ་པས་མནར་མེད་པའོ། །དམྱལ་བ་དེ་རྣམས་ཤི་ན་དགའ་ཡང་འཆིར་མི་བཏུབ། སྡུག་བསྔལ་མྱོང་ཞིང་སོས་ནས་འོང་བ་ཡིན། མནར་མེད་དུ་སྐྱེ་བའི་རྒྱུ་ནི་མཚམས་མེད་པ་ལྔ་དང་བཀའ་ལ་ཉོ་ཚོང་བྱས་པས་སྐྱེ་བ་ཡིན། གཞན་སྲོག་གཅོད་པའི་ལས་གཙོ་བོར་བྱས་པས་གཞན་རྣམས་སུ་སྐྱེ་བ་ཡིན་གསུངས། དེ་ལྟར་སྨོས་པའི་དམྱལ་བ་དེ་དག་ཀྱང་། གོང་མ་གོང་མ་ལས་འོག་མ་འོག་མ་རྣམས་མེ་སོགས་བདུན་འགྱུར་གྱིས་ཚ་ཞིང་ཚོར་བའང་བདུན་འགྱུར་གྱིས་རགས་པས་སྡུག་བསྔལ་བདུན་འགྱུར་གྱིས་ཆེ་སྟེ། སྔ་མ་ལས། གོང་དུ་སྨོས་པའི་དམྱལ་བ་དེ་དག་ཀྱང་། །རིམ་གྱིས་མེ་ལྕེ་བདུན་འགྱུར་གྱིས་ཚ་ཞིང་། །འོག་མར་སྔ་མའི་སྡུག་བསྔལ་ལྷག་དང་བཅས། །ཅི་སྲིད་ལས་མ་ཟད་པར་སྡུག་བསྔལ་མྱོང་། །ཞེས་དང་། རྣམ་འབྱེད་ལས། ཐ་མལ་ཙན་དན་དུས་མཐའ་དང་། །དམྱལ་མེ་རྣམས་ཀྱང་གོ་རིམ་བཞིན། །བདུན་འགྱུར་གྱིས་ནི་རབ་ཏུ་ཚ། །དེ་བཞིན་སྡུག་བསྔལ་བདུན་ཕྲག་འགྱུར། །ཞེས་གསུངས། དེ་དག་གི་ཁོངས་སུ་གཏོགས་པའི་ཉི་ཚེ་བ་ནི། རི་དང་། བྲག་དང་། ཆུ་དང་། མེ་དང་། ནམ་མཁའ་ལ་སོགས་པ་ངེས་པ་མེད་པའི་གནས་སུ་ཉི་ཚེ་བའི་སེམས་ཅན་གཏུན་ལྟ་བུ་དང་། ཐག་པ་ལྟ་བུ་དང་། ཕྱགས་མ་ལྟ་བུ་དང་། མགལ་དུམ་ལྟ་བུ་དང་། སྡོང་དུམ་ལྟ་བུ་དང་། སེམས་ཅན་ཐ་དད་པའི་གཟུགས་ལྟ་བུ་དུ་མ་འདུས་སམ་གཅིག་པུར་གནས་ཀྱང་རུང་སྟེ། ཚ་བ་དང་། གྲང་བ་དང་། བཀྲེས་པ་དང་། སྐོམ་པ་དང་། གཤགས་པ་དང་། གཏུབ་པ་དང་། འཚེད་པ་ལ་སོགས་པའི་སྡུག་བསྔལ་གང་རུང་རེ་རེ་ནི་བཟོད་གླགས་མེད་པས་ཉིན་མཚན་ཕྱེད་པའམ། ཡུད་ཙམ་མམ། རྟག་པར་ལས་ཀྱི་ལེན་སོ་ཐ་དད་པའི་དབང་གིས་གདུང་བས་ཉི་ཚེ་བ་ཞེས་བྱ་སྟེ། འདུལ་བ་ལུང་ལས། མོའུ་འགལ་གྱི་བུས་རྒྱ་མཚོའི་མཐར་ཕྱིན་པ་ལས། ཉི་ཚེ་བའི་སེམས་ཅན་དམྱལ་བ་གཏུན་ལྟ་བུ་དང་ཕྱགས་མ་ལྟ་བུ་དང་། ལྗོན་ཤིང་ལྟ་བུ་རབ་ཏུ་མང་པོ་སྡུག་བསྔལ་གྱི་གདུང་བར་གཟིགས་པར་གསུངས་པ་ལྟ་བུ་སྟེ། ངལ་གསོ་ལས། ཉི་ཚེ་རི་དང་ལྗོན་ཤིང་ནམ་མཁའ་དང་། །བྲག་བར་མེ་ཆུ་ངེས་མེད་གནས་རྣམས་སུ། །ཉུང་ངུར་གནས་དང་འདུས་དང་གཅིག་པུར་གནས། །དེར་ནི་སྡུག་བསྔལ་གང་རུང་རེ་རེས་གདུང་། །དེ་ཕྱིར་ཉི་ཚེ་བ་ཞེས་བཤད་པ་ཡིན། །ཞེས་སོ། །ཉེ་འཁོར་བ་ནི། མནར་མེད་ཀྱི་འཁོར་ལྷག་པ་བཅུ་དྲུག་ཡིན་ཏེ། དེའི་ཕྱོགས་བཞི་རེ་རེ་ན་མེ་མར་མུར་གྱི་འོབས། རོ་མྱགས་ཀྱི་འདམ། མཚོན་ཆའི་ཐང་། ཐལ་ཚན་གྱི་ཆུ་བོ་རབ་མེད་དེ་བཞི་རེ་གནས་པས་བཞི་བཞི་བཅུ་དྲུག་དང་། མཚམས་སུ་ལྕགས་ཀྱི་ཤལ་མ་ལིའི་རི་བོ་བཅས་ཡོད་པའོ། །དེ་ཡང་སྔར་མནར་མེད་ཀྱི་ལྕགས་ཁང་དུ་སྡུག་བསྔལ་ཆེ་དྲགས་པ་དེ་མྱོང་བའི་ལས་བསྲབས་པ་དང་ཕྱོགས་བཞིའི་སྒོ་བྱེ་སྙམ་པ་ལས་དམྱལ་བ་པ་དག་སོ་སོ་ནས་ཕྱིར་འཐོན་མ་ཐག འོབས་བཟང་པོ་གྲིབ་མ་ཅན་ལྟ་བུ་མཐོང་ནས་དེར་ཞུགས་པས། མདག་མེ་འབར་བའི་ནང་དུ་ཤ་རུས་ཀུན་འཚིགས་པས་སྡུག་བསྔལ་ཏེ། མདག་མེ་འབར་བར་པུས་མོ་ནུབ་བརྒལ་བས། །ཤ་ཀུན་ཚིག་ནས་རུས་པ་ཀུན་དའི་མདོག །ཡང་སོས་སྔར་བཞིན་ཤིན་ཏུ་སྡུག་བསྔལ་ལོ། །ཞེས་སོ། །དེ་ནས་ཐར་པ་སྙམ་བྱེད་པ་ན་བསིལ་བའི་ཆུ་ཀླུང་འབབ་པར་མཐོང་ནས་དེའི་ནང་དུ་ཞུགས་པས་རོ་མྱགས་ཕྱི་སའི་འདམ་རྫབ་དྲི་ང་བར་སྲིན་བུ་ལྕགས་ཀྱི་མཆུ་ཅན་ལ་སོགས་པས་འབིགས་ཤིང་སྡུག་བསྔལ་ཏེ། ཡང་ནི་བསིལ་བའི་འདམ་མཐོང་ཞུགས་མ་ཐག །རོ་མྱགས་རུལ་དྲི་ང་བའི་འདམ་བྱིང་ནས། །ལྕགས་ཟངས་གསེར་གྱི་མཆུ་ཅན་སྲིན་བུས་འབིགས། །ཞེས་སོ། །དེ་ལས་ཐོན་ནས་ཐང་ཉམས་དགའ་བ་མཐོང་ནས་དེར་ཕྱིན་པ་ལས་ཐང་ཐམས་ཅད་སྤུ་གྲིར་སོང་སྟེ་རྐང་པ་བཞག་ན་དུམ་བུར་གཤོག་བཏེགས་ན་སོས་པས་སྡུག་བསྔལ་ཞིང་། ནགས་ཚལ་བཟང་པོ་མཐོང་ནས་དེར་ཕྱིན་པ་ན་ལོ་མ་རྣམས་རལ་གྲིར་སོང་ནས་རླུང་གིས་བསྐྱོད་པས་ལུས་དུམ་བུར་གཅོད་ཅིང་སོས་པས་སྡུག་བསྔལ་ཏེ། སླར་ཡང་ཐང་ཉམས་དགའ་མཐོང་ཕྱིན་མ་ཐག སྤུ་གྲི་འབར་བས་དུམ་བུར་གཏུབས་ཤིང་འཚེ། །ནགས་ཚལ་ཡིད་འོང་ནང་དུ་ཕྱིན་པ་ལས། །རལ་གྲིའི་ནགས་ཚལ་ལས་རླུང་འཁྲུག་པས་བཅོམ། །ཞེས་སོ། །ཡང་ལྕགས་ཀྱི་ཤལ་མ་ལིའི་རི་མཐོང་སྟེ་རིའི་རྩེ་ནས་སྔོན་སྐྱེས་པ་དང་བུད་མེད་རང་རང་གི་འཁྲིག་པའི་ཆོས་བསྟེན་པའི་ཡུལ་དེ་དང་ཉེ་དུ་དང་འབྲེལ་བ་དག་གིས་རང་ལ་འབོད་པར་མཐོང་ནས་འཛེགས་པ་ན། ལྕགས་ཀྱི་ཐུར་མས་ཐུར་དུ་རང་གི་ལུས་འབིགས་ཤིང་སྟེང་དུ་སླེབ་དུས་ཁྭ་དང་བྱ་རྒོད་ཀྱིས་ཀླད་པ་འབྲུ་ལ། རིའི་འདབས་ནས་ཡང་འབོད་པར་མཐོང་སྟེ་འཐུར་དུ་འབབ་པ་ན་ལྕགས་ཀྱི་ཐུར་མས་གྱེན་ལ་འབིགས་ཤིང་། སྔར་གྱི་ཡུལ་དེ་ལ་འཁྱུད་པས་ལྕགས་ཀྱི་སྐྱེས་པའམ་བུད་མེད་མེ་འབར་བར་སོང་སྟེ་རབ་ཏུ་འཁྱུད་ཅིང་བསྲེགས་ལ་ཟ་བར་བྱེད་པས་སྡུག་བསྔལ་ཏེ། དེ་འདས་རི་བོ་རབ་ཏུ་ཉམས་དགའི་རྩེར། །སྔོན་གྱི་ཡུལ་འབོད་མཐོང་སྟེ་ཕྱིན་པ་ལས། །ལྕགས་ཀྱི་ཐུར་མ་རྣོན་པོས་ཤ་ཁྲག་གཟགས། །སྟེང་དུ་སོན་ཚེ་བྱ་རྒོད་ཀླད་པ་འགེམས། །སླར་ཡང་རི་ཡི་དྲུང་ནས་འབོད་པ་སྙམ། །འཐུར་དུ་བབས་པས་ཐུར་མར་གྱེན་དུ་གཟགས། །ཐང་མཚམས་སྐྱེས་པ་བུད་མེད་མཆེ་རྣོན་ཅན། །འབར་བས་འཁྱུད་དེ་ཤིན་ཏུ་སྡུག་བསྔལ་ཞིང་། །ཁྱི་དང་ལྕེ་སྤྱང་མང་པོས་ཟ་བར་བགྱིད། །ཅེས་གསུངས། དེ་ལྟ་སྤུ་གྲིའི་ཐང་རལ་གྲིའི་ནགས་ཚལ། ལྕགས་ཀྱི་ཤལ་མ་ལི་སྟེ་ནང་སེས་གསུམ་ཡོད་ཀྱང་དེ་ཐམས་ཅད་མཚོན་ཆའི་ཐང་ཞེས་གཅིག་ཏུ་བཤད་པ་ཡིན་ནོ། །དེ་ནས་སོང་བ་ན་ཆུ་ཀླུང་བཟང་པོ་རྒྱང་མ་ནས་འབབ་པར་མཐོང་སྟེ། འབོག་མ་ཐག་ཐལ་ཚན་སྐེད་ནུབ་ཙམ་དུ་ཚུད་དེ་ཤ་རུས་ཚིག་ནས་ཕྱིར་བྲོས་པ་ལས། འགྲམ་གཉིས་ན་གཤིན་རྗེའི་སྐྱེས་བུས་བསྲུང་བར་སྣང་བས་སྡུག་བསྔལ་ཏེ། ཡང་ནི་བསིལ་བའི་ཆུ་ཀླུང་འབབ་མཐོང་ནས། །དགའ་བས་སོང་སྟེ་རབ་ཏུ་འབོག་མ་ཐག །ཐལ་ཚན་སྐེད་ནུབ་ཤ་རུས་ཚིག་གྱུར་ཅིང་། །འགྲམ་གཉིས་གཤིན་རྗེའི་སྐྱེས་བུས་བསྲུང་བར་མཐོང་། །དེར་ནི་ལོ་སྟོང་མང་པོར་སྡུག་བསྔལ་ལོ། །ཞེས་གསུངས། ཉེ་འཁོར་བའི་གནས་འདི་རྣམས་སུ་དང་པོ་མནར་མེད་དུ་སྐྱེས་ན་དེ་ནས་ལས་རིམ་གྱིས་བསྲབས་པས་གནས་རིས་དེ་དག་ཏུ་སྐྱེ་བ་དང་། ལས་ཁ་ཅིག་གིས་ཐོག་མ་ནས་དེ་དང་དེར་སྐྱེས་ནས་ཐར་པ་གཉིས་ཀ་ཡོད་པར་གསུངས་སོ། །དེ་ལྟ་བུའི་དམྱལ་སྲུང་གཤེད་མ་དང་སྲོག་ཆགས་གདུག་པ་ཅན་གྱི་ཚོགས་དེ་དག་ཉན་ཐོས་བྱེ་སྨྲ་བ་སོགས་ཁ་ཅིག་གིས་རང་རྒྱུད་པར་འདོད་མོད་དོན་ལ་ནི་རང་སེམས་སྡིག་པ་ཅན་གྱི་དབང་གིས་སྣང་བ་ལས་གཞན་ལོགས་ན་མེད་དེ། སྤྱོད་འཇུག་ལས། ལྕགས་སྲེག་ས་གཞི་སུ་ཡིས་བྱས། །མོ་ཚོགས་དེ་དག་ཅི་ལས་བྱུང་། །དེ་ཕྱིར་དེ་དག་ཐམས་ཅད་ནི། །སྡིག་སེམས་ལགས་པར་ཐུབ་པས་གསུངས། །ཞེས་དང་། མདོ་ལས། ཁམས་གསུམ་པོ་ནི་སེམས་ཙམ་མོ་ཞེས་གསུངས་པས་ཐེག་ཆེན་དབུ་སེམས་དགོངས་པ་མཐུན་ནོ། །དེས་ན་དེ་ལྟ་བུའི་སྡུག་བསྔལ་སྔར་ཡང་ལན་གྲངས་དཔག་ཏུ་མེད་པ་མྱོང་ཞིང་། ད་ཡང་མྱོང་ངེས་པས་འདི་ལས་ངེས་པར་དབྱུང་བར་བྱའོ་སྙམ་དུ་སྦྱོར་དངོས་རྗེས་གསུམ་ཚང་བས་ཉམས་སུ་བླང་ཞིང་དེར་སྐྱེས་པའི་སེམས་ཅན་རྣམས་ལའང་སྙིང་རྗེ་དྲག་ཏུ་བསྒོམ་མོ། །གཉིས་པ་གྲང་བའི་དམྱལ་བ་བརྒྱད་ནི། ངལ་གསོ་ལས། གྲང་བས་ཉམ་ཐག་པ་ཡང་རྣམ་པ་བརྒྱད། །གངས་སོགས་ཤིན་ཏུ་གྲང་བའི་གནས་དག་ཏུ། །མུན་ནག་བུ་ཡུག་འཚུབ་པས་སྦྲེབས་པའི་ལུས། །ཆུ་བུར་ཅན་དང་ཆུ་བུར་རྡོལ་བ་ཅན། །གྲང་བས་སོ་འཐམ་སྨྲེ་སྔགས་ཨ་ཆུ་ཟེར། །ཀྱི་ཧུད་ཨུཏྤལ་ལྟར་གས་པདྨ་དང་། །པདྨ་ཆེ་ལྟར་གས་པའི་རྨ་ནང་དུ། །སྲོག་ཆགས་མཆུ་རྣོན་འབར་བས་ཟ་བ་ནི། །ཅི་སྲིད་ལས་མཐའ་གཏུག་ཚེ་གཡོ་བར་འགྱུར། །ཞེས་གསུངས་པས། དང་པོ་ཆུ་བུར་ཅན་ནི། གངས་རི་དང་ཁ་བ་དང་ཆབ་རོམ་གྱི་ཁྲོད་བུ་ཡུག་འཚུབས་པའི་གནས་སུ་ལོ་གསར་སྒང་གི་ལྷགས་པ་བས་ཉི་ཤུ་འགྱུར་གྱི་གྲང་བས་ཉེན་པས། ལུས་ལ་ཆུ་བུར་བརྒྱ་ཕྲག་སོགས་བྱུང་བས་སྡུག་བསྔལ་བའོ། །གཉིས་པ་ཆུ་བུར་རྡོལ་བ་ནི། སྔ་མ་བས་ཉི་ཤུ་འགྱུར་གྱི་གྲང་ཆེས་པས་ཆུ་བུར་རྣམས་རྡོལ་ནས་རྨར་གྱུར་པ་ལས་ཁྲག་དང་ཆུ་སེར་འཛག་པ་ལ་སྲིན་བུ་ལྕགས་ཀྱི་མཆུ་ཅན་གྱིས་ཟ་ཞིང་འབིགས་ནས་སྡུག་བསྔལ་ལོ། །གསུམ་པ་ཨ་ཆུ་ཟེར་བ་ནི། སྔ་མ་བས་ཉི་ཤུ་འགྱུར་གྱི་གྲང་བས་མ་བཟོད་ནས་སྨྲེ་སྔགས་རྒྱུན་མི་ཆད་པར་འདོན་པའོ། །བཞི་པ་ཀྱི་ཧུད་ཟེར་བ་ནི། དེ་ལས་ཀྱང་ཆེས་གྲང་བས་ཨ་ཆུ་མ་ཐོན་པར་ཀྱི་ཧུད་ཅེས་ངུ་སྐད་ཤིབ་ཤིབ་འབྱིན་པའོ། །ལྔ་པ་སོ་འཐམ་པ་ནི། དེ་ལས་ཀྱང་ཆེས་གྲང་བས་སྐད་མི་ཐོན་པས་རེངས་ཤིང་སོ་འཐམས་པའོ། །དྲུག་པ་ཨུཏྤལ་ལྟར་གས་པ་ནི། སྔ་མ་ལས་ཀྱང་ཆེས་གྲང་བས་ལུས་བཞི་ཚལ་དུ་གས་པའོ། །བདུན་པ་པདྨ་ལྟར་གས་པ་ནི། དེ་ལས་ཀྱང་གྲང་བས་ལུས་བརྒྱད་ཚལ་དུ་གས་པའོ། །བརྒྱད་པ་པདྨ་ཆེན་པོ་ལྟར་གས་པ་ནི། ཆེས་གྲང་བས་ཉེན་ནས་ལུས་ཚལ་པ་བཅུ་དྲུག་གམ་སུམ་ཅུ་རྩ་གཉིས་སོགས་སུ་གས་པའོ། །དེ་ལྟར་གས་པའི་རྨ་ནང་དུ་སྲོག་ཆགས་ཕྲ་མོ་ཞུགས་ནས་ཟ་ཞིང་གྲང་བའི་སྡུག་བསྔལ་མི་བཟོད་པ་མྱོང་དགོས་ཏེ། དེ་དག་གི་ཚེ་ཡི་ཚད་ཀྱང་། དྲན་པ་ཉེར་བཞག་ལས། འདི་ལྟ་སྟེ། གྲོང་ཁྱེར་ཀོ་ས་ལའི་བྲེས་གྲངས་སུ་བཅལ་བའི་ཏིལ་གྱི་ཚོགས་བཅུ་ཚད་ཉི་ཤུ་ཤོང་བའི་རྫོང་བ་ཞིག་ཏིལ་གྱིས་བར་མཚམས་མེད་པར་ཡོངས་སུ་གང་སྟེ། ཆུ་བུར་ཅན་གྱི་དམྱལ་བ་ལས་ལོ་བརྒྱ་བརྒྱ་ན་ཏིལ་ཉག་མ་རེ་རེ་ཕྱིར་ཕྱུང་བས་ཟད་པར་གྱུར་པ་དེའི་ཚེ། ཆུ་བུར་ཅན་གྱི་སེམས་ཅན་དམྱལ་བ་དེ་དག་ཚེ་འཕོ་བར་རིགས་པར་བྱ་སྟེ། གཞན་དག་ནི་དེ་ལས་ཀྱང་ཆེས་ལྷག་པ་ཉི་ཤུས་བསྒྲེས་པར་སྡུག་བསྔལ་ཆེན་པོ་བརྣག་དགོས་སོ། །ཞེས་གསུངས། དེས་ན། བཤེས་སྤྲིང་ལས། སྡིག་ཅན་དབུགས་དབྱུང་འགག་པ་ཙམ་ཞིག་གི། །དུས་ཀྱི་བར་དུ་ཆོད་རྣམས་དམྱལ་བ་ཡི། །སྡུག་བསྔལ་གཞལ་ཡས་ཐོས་ནས་རྣམ་སྟོང་དུ། །མི་འཇིགས་གང་ལགས་རྡོ་རྗེའི་རང་བཞིན་ནོ། །དམྱལ་བ་བྲིས་པ་མཐོང་དང་ཐོས་པ་དང་། །དྲན་དང་བཀླགས་དང་གཟུགས་སུ་བགྱིས་རྣམས་ཀྱང་། །འཇིགས་པ་སྐྱེ་བར་འགྱུར་ན་མི་བཟད་པའི། །རྣམ་སྨིན་ཉམས་སུ་མྱོང་རྣམས་སྨོས་ཅི་དགོས། །ཞེས་གསུངས་པ་ལྟར། དེ་ལྟ་བུའི་ཚ་གྲང་གི་སྡུག་བསྔལ་ཚད་མེད་པ་ལ་བསམ་སྟེ། ད་རེས་དེ་འདྲ་བའི་གནས་སུ་རང་མ་སྐྱེས་པ་ལ་དགའ་བ་བསྒོམ་ཞིང་། གཞན་སྐྱེས་པ་རྣམས་ལ་སྙིང་རྗེ་ཚད་མེད་པའི་བློས། རང་གཞན་གྱི་དོན་དུ་ཆོས་ལ་འབད་དགོས་སྙམ་དུ་ཉམས་སུ་བླང་བར་བྱའོ། །གཉིས་པ་ཡི་དྭགས་ཀྱི་སྡུག་བསྔལ་བསམ་པ་ལ་གཉིས། བྱིངས་{དབྱིངས}ན་གནས་པ་དང་། མཁའ་ལ་རྒྱུ་བའོ། །དང་པོ་ལའང་། སློབ་དཔོན་ཆེན་པོས། དེས་ན་ཡི་དྭགས་འཇིག་རྟེན་ན། །བཀྲེས་སྐོམ་སྡུག་བསྔལ་དཔག་ཏུ་མེད། །བཟའ་བཏུང་མི་མཐོང་མཐོང་སྲིད་ཀྱང་། །རྩོག་མཐོང་ཕྱི་ཡི་སྒྲིབ་པ་ཅན། །ཟས་སྐོམ་མི་ཆུད་ཆུད་སྲིད་ཀྱང་། །ཚ་རྩུབ་ནང་གི་སྒྲིབ་པ་ཅན། །བཟའ་བཏུང་མི་རྙེད་རྙེད་སྲིད་ཀྱང་། །གཞན་བསྲུང་སྒོས་ཁུར་སྒྲིབ་པ་ཅན། །ཟས་སྐོམ་རྣམ་པ་གང་དུ་ཡང་། །མི་རྙེད་སྤྱི་མཐུན་སྒྲིབ་པ་ཅན། །ཞེས་གསུངས་པ་ལྟར་བཞི་ལས། དང་པོ་ཕྱིའི་སྒྲིབ་པ་ཅན་ནི། ལུས་རིད་ཅིང་ཡན་ལག་ཕྲ་བ། བཟའ་བཏུང་གི་སྒྲ་མི་ཐོས་ཤིང་རྟག་ཏུ་བཀྲེས་སྐོམ་གྱིས་གདུང་ལ། གལ་སྲིད་ཟས་སྐོམ་མཐོང་ནའང་ངན་སྐྱུགས་ལ་སོགས་པ་མི་གཙང་རྫབ་ཏུ་མཐོང་ནས་བཟའ་བཏུང་དུ་མི་རུང་བའོ། །གཉིས་པ་ནང་གི་སྒྲིབ་པ་ཅན་ནི། ལུས་ཆེ་ཞིང་ལྟོ་བ་ཡངས་པ། རྐང་ལག་ཕྲ་བ། ཁ་ཁབ་མིག་ཙམ་པས། ཟས་སྐོམ་མི་རྙེད་ཅིང་། གལ་སྲིད་རྙེད་ཀྱང་ཁར་མི་ཚུད། ཚུད་ཀྱང་མགྲིན་པ་རྟ་རྔ་ཙམ་ནས་མི་འགྲོ། སོང་ཡང་ལྟོ་བ་ཡུལ་ལྗོངས་ཙམ་མི་ཁེངས་ཤིང་། ཁེངས་ཀྱང་རྐང་ལག་འཇག་སྐྱ་ཙམ་གྱིས་མི་ཐེག་ལ། གློ་སྙིང་ལས་མེ་འབར་བས་འཚིག་ཅིང་། ཁ་སྣ་ནས་དུད་པ་ཕྱུར་བས་སྡུག་བསྔལ་ལོ། །གསུམ་པ་སྒོས་ཁུར་གྱི་སྒྲིབ་པ་ཅན་ནི། བཟའ་བཏུང་མི་རྙེད་ལ། རྙེད་ཀྱང་གཞན་གྱིས་བསྲུང་བར་མཐོང་བ་དང་། ཡི་དྭགས་རེ་རེའི་ལུས་ལ་མང་པོ་གནས་བཅས་ཏེ་ཤ་ལ་ཟ་བར་སྣང་བས་སྡུག་བསྔལ་བའོ། །བཞི་པ་སྤྱི་མཐུན་གྱི་སྒྲིབ་པ་ཅན་ནི། བཟའ་བཏུང་གང་ཡང་མེད་ཅིང་དབུལ་ཕོངས་ཀྱིས་འཇིགས་ཤིང་དུས་ཚིགས་ལོག་པས། དབྱར་ནི་ཟླ་བས་ཀྱང་བསྲེགས་ལ། དགུན་ནི་ཉི་མས་ཀྱང་གྲང་རེག་བསྐྱེད་པས་བཟོད་པར་དཀའ་ཞིང་། མི་གཙང་བ་དང་མེ་མདག་སོགས་སྡུག་བསྔལ་བསྐྱེད་པའི་ཁ་ཟས་སྣ་ཚོགས་པ་བསྟེན་དགོས་པ་དང་། ཕན་ཚུན་དགྲར་གྱུར་པས་འཐབ་ཅིང་རྩོད་པ་དང་། གཏད་སོ་མེད་པར་ལས་རླུང་གིས་དེད་པ་སོགས་སྡུག་བསྔལ་མཐའ་ཡས་ཏེ། སེམས་ཉིད་ངལ་གསོ་ལས། ཡི་དྭགས་བྱིངས་མཁར་རྒྱུ་བའི་བྱིངས་གནས་པ། །ལུས་ཆེ་རྐང་ལག་ཕྲ་ཞིང་ལྟོ་བ་ཡངས། །མགྲིན་པ་ཕྲ་ཞིང་ཁབ་ཀྱི་མིག་ཙམ་ཁ། །ཟས་སྐོམ་མི་རྙེད་བཀྲེས་སྐོམ་འབར་བས་གདུངས། །སྨན་ཤིང་མེ་ཏོག་ལ་སོགས་མཐོང་བས་བསྐམས། །ཕྱི་རོལ་ཡིད་དུ་མི་འོང་ངན་སྐྱུགས་ཟ། །ཟས་སྐོམ་མཐོང་ཡང་བསྲུང་བར་སྣང་བ་དང་། །ནང་གི་སྒྲིབ་པས་ལྟོ་བར་མེ་འབར་ཞིང་། །ཁ་ནས་མེ་ལྕེ་དུད་པར་བཅས་པ་འཐུལ། །སྤྱི་མཐུན་སྒྲིབ་པས་དབུལ་ཕོངས་འཇིགས་སྔངས་འཚེ། །ཉམ་ངའི་གནས་སུ་མགོན་མེད་སྡུག་བསྔལ་ཉེན། །ཞེས་གསུངས། གཉིས་པ་མཁའ་ལ་རྒྱུ་བ་ནི། གནོད་སྦྱིན་དང་སྲིན་པོ་དང་བཙན་དང་ཤི་འདྲེ་ལ་སོགས་པ་སྟེ། འདི་དག་ཀྱང་ཡི་དྭགས་ཀྱི་འགྲོ་བས་བསྡུས་པའི་ཕྱིར་སྡུག་བསྔལ་དཔག་ཏུ་མེད་དེ། ཡུལ་ཡིད་དུ་མི་འོང་བ་དང་། འཚེ་བ་དང་། ཉམ་ང་བ་དང་། བཀྲེས་སྐོམ་དང་། གང་དུ་སྙིང་ཉེ་སར་ཕྱིན་ཀྱང་དེ་དག་ལ་སྔོན་འཆི་ཀའི་གནད་གཅོད་ཀྱི་ནད་དེས་གནོད་པ་དང་རང་ཡང་ནད་དེས་གཏན་དུ་གདུང་བས་གཞན་ལ་སྤོ་འདོད་པ་དང་། ཚེ་དང་མ དངས་འཕྲོག་པ་སོགས་གཞན་གནོད་འབབ་ཞིག་སྒྲུབ་པས་སླར། དམྱལ་བ་སོགས་སུ་སྐྱེ་བའི་རྒྱུ་སྒྲུབ་པ་དང་། རིགས་སྔགས་མཁན་གྱིས་བཅིངས་པ་སོགས་སྡུག་བསྔལ་མཐའ་ཡས་ཏེ། སྔ་མ་ལས། མཁའ་ལ་རྒྱུ་བའི་ཡི་དྭགས་འདྲེ་རྣམས་དང་། །གནོད་སྦྱིན་སྲིན་པོ་བཙན་དང་རྒྱལ་པོ་སོགས། །ལས་ཀྱི་རྫུ་འཕྲུལ་ཐོགས་མེད་ཀུན་ཏུ་རྒྱུ། །གནོད་པ་སྣ་ཚོགས་མངོན་པར་བསྒྲུབ་པ་སྟེ། །ནད་གཏོང་མདངས་འཕྲོག་ཚེ་ལ་བར་དུ་གཅོད། །ཅེས་གསུངས། དེ་དག་གི་ཚེ་ཚད་ཀྱང་། མཛོད་དང་བཤེས་སྤྲིང་སོགས་ལས་གསུངས་པའི་དོན་བཞིན། སྔ་མ་ལས། ཚེ་ཚད་མི་ཡི་ཟླ་བ་ཉིན་ཞག་གཅིག །རང་ལོ་ལྔ་བརྒྱ་མི་ལོ་ཁྲི་ལྔ་སྟོང་། །གཤིན་རྗེའི་འཇིག་རྟེན་དག་ཏུ་སྡུག་བསྔལ་ལོ། །ཞེས་སོ། །ཨོ་རྒྱན་ཆེན་པོས། དེར་སྐྱེ་བའི་རྒྱུ་ནི་སེར་སྣ་དང་འཇུར་གེགས་ཡིན། སེར་སྣ་ནི་རང་གིས་གཏོང་མི་ཕོད་པ་ཡིན། འཇུར་གེགས་བྱ་བ་གཞན་གཏོང་བ་ལ་གེགས་བྱེད་པ་ལ་ཟེར་བ་ཡིན་གསུངས། དེས་ན་དེ་ལྟ་བུའི་གནས་སུ་མ་སྐྱེས་པ་ཞིག་བྱ་དགོས་སྙམ་དུ་བསམ་མོ། །གསུམ་པ་དུད་འགྲོའི་སྡུག་བསྔལ་བསམ་པ་ནི། སློབ་དཔོན་ཆེན་པོས། དེ་ནས་དུད་འགྲོའི་འཇིག་རྟེན་ན། །རང་བཞིན་བླུན་ཞིང་བརྡ་མི་འཕྲོད། །གཏི་མུག་གླེན་ལྐུགས་མུན་པ་འདྲ། །བྱོལ་སོང་གཅིག་ལ་གཅིག་ཟ་བ། །གཤེད་མ་གཞན་གྱིས་གསོད་པ་དང་། །དབང་མེད་བཀོལ་སྤྱོད་སྡུག་བསྔལ་ལོ། །ཞེས་གསུངས་ཏེ། དེ་ལ་གཉིས། བྱིངས་ལ་གནས་པ་ནི། ཕྱིའི་རྒྱ་མཚོ་ཆེན་པོ་དང་། གླིང་བར་ཉི་ཟླ་མེད་པའི་མུན་པའི་གླིང་དུ་ཉ་དང་དུང་དང་ཆུ་སྲིན་ལ་སོགས་པས་གོ་མཚམས་མེད་པར་གང་བ་ཆང་དར་མའི་སྦང་མ་ཙམ་ཞིག་ལྕིག་ལྕིག་ཡོད་དེ། ཆེ་བས་ཆུང་བ་ཟ་བ་དང་། ཆུང་བས་ཆེ་བ་ཟ་བ་དང་། རང་གི་ཤ་རང་གིས་བཅད་དེ་ཟ་བ་སོགས་སྡུག་བསྔལ་དཔག་ཏུ་མེད་དེ། ངལ་གསོ་ལས། དུད་འགྲོ་བྱིངས་གནས་ཆུ་གཏེར་བཞི་ཡི་ཁྱོན། །གཅིག་གིས་གཅིག་ཟ་སྡུག་བསྔལ་དཔག་ཏུ་མེད། །གླིང་བར་མུན་ནག་རྒྱ་མཚོར་གནས་པ་ཡང་། །ཚ་གྲང་བཀྲེས་སྐོམ་གཅིག་ཟའི་འཚེ་བས་འཇིགས། །ཞེས་གསུངས། གཉིས་པ་ཁ་འཐོར་བ་ནི། མིའི་ཡུལ་ན་ཡོད་པའི་བྱ་དང་རི་དྭགས་དང་ཆུ་གནས་ལ་སོགས་པ་བདག་ཏུ་བཟུང་བ་རྣམས་ནི་རྔོན་པ་དང་། ཉ་པ་དང་། བྱ་གཤོར་བ་དག་གིས་འཚེ་བ་དང་། ཤ་དང་པགས་པ་དང་རུས་པ་སོགས་ཕྱིར་གསོད་པ་དང་། གཅིག་གིས་གཅིག་ཟ་བ་སོགས་ཀྱི་སྡུག་བསྔལ་མཐའ་ཡས་ལ། བདག་ཏུ་བཟུང་བའི་དུད་འགྲོ་རྣམས་ནི། ཁལ་བཀལ་བ་དང་། རྨོས་རྨོ་བ་དང་། ཤ་གཅོད་པ་དང་། སྤུ་བཏོགས་པ་སོགས་བཀོལ་ཞིང་སྤྱད་པའི་མཐར་ཡུལ་གཞན་དུ་སྤྱུག་པ་དང་། གསོད་པ་དང་། རྡེག་པ་དང་། ཁྲག་གཟག་པ་དང་། ཁོང་ལག་གཏོང་བ་དང་། པགས་པ་བཤུ་བ་དང་། གཤེད་མ་ལ་གཏད་པ་སོགས་སྡུག་བསྔལ་བསམ་གྱིས་མི་ཁྱབ་ཅིང་། སྤྱི་མཐུན་དུ་བླུན་ཞིང་གཏི་མུག་པ་དང་། ཀླུ་རྣམས་ཉིན་མཚན་ནམ་སྔ་དྲོ་ཕྱི་དྲོ་གང་རུང་བདེ་ཡང་། གང་རུང་དུ་ཚ་གྲང་དང་བཀྲེས་སྐོམ་ལ་སོགས་པ་སོ་སོའི་སྡུག་བསྔལ་མང་པོས་རྩེན་པ་དང་། ཁ་ཅིག་གི་ལུས་ལ་བྱེ་ཚན་གྱི་ཆར་བབས་ཏེ་ཤ་རུས་སོ་སོར་བྱེ་བ་དང་། འགའ་ཞིག་ཁྱུར་མི་ཚུད་པར་གྲོགས་མེད་པའི་སྡུག་བསྔལ་དང་། ནམ་མཁའ་ལྡིང་དང་རིགས་སྔགས་ཀྱི་འཇིགས་པ་སོགས་མཐའ་ཡས་ཤིང་། དུད་འགྲོ་དེ་རྣམས་ཀྱི་ཚེ་ཚད་ཀྱང་མ་ངེས་ཏེ། ཁ་ཅིག་ཡུད་ཙམ་དང་། ཉིན་གཅིག་ལ་སོགས་པ་ནས། ཀླུའི་རྒྱལ་པོ་འཇོག་པོ་སོགས་བར་བསྐལ་ཐུབ་པའང་ཡོད་པར་གསུངས་ཏེ། ངལ་གསོ་ལས། ཁ་འཐོར་མི་ཡུལ་བྱ་དང་རི་དྭགས་སོགས། །རྔོན་པས་གཙེ་ཞིང་རང་རང་གནོད་པས་ཉེན། །རྟ་གླང་རྔ་མོ་ར་དང་བོང་བུ་སོགས། །བཀོལ་སྤྱོད་རྡེག་འཚོག་སྡུག་བསྔལ་མཐའ་ཡས་ཤིང་། །ཤ་དང་པགས་པ་རུས་པའི་ཕྱིར་འཆི་བས། །རང་བཞིན་སྡུག་བསྔལ་ཕ་མཐའ་མི་མངོན་ཞིང་། །ཀླུ་རྣམས་ཉིན་མཚན་ཕྱེད་མའི་སྡུག་བསྔལ་དང་། །སྔ་དྲོ་ཕྱི་དྲོ་འགྱུར་བའི་བདེ་སྡུག་དང་། །ཁ་ཅིག་གནས་སུ་བྱེ་ཚན་ཆར་འབབས་ལ། །ལ་ལ་གཅིག་པུར་གྲོགས་བྲལ་ཕོངས་པས་ཉེན། །ཕལ་ཆེར་རྨོངས་དང་མཁའ་ལྡིང་འཇིགས་ལ་སོགས། །སྡུག་བསྔལ་རྣམ་པ་སྣ་ཚོགས་དུ་མ་ལྡན། །ཚེ་ཡང་མ་ངེས་ཁ་ཅིག་ཉིན་རེ་ལ། །འཇོག་པོ་ལ་སོགས་བསྐལ་པར་གནས་པའང་གསུངས། །ཞེས་སོ། །ཨོ་རྒྱན་ཆེན་པོས། དེར་སྐྱེ་བའི་རྒྱུ་ནི་སྡིག་པ་ཕྲ་མོ་ལ་མི་འཛེམ་པ་ཡིན་གསུངས། དེས་ན་དེ་ལྟ་བུར་མ་སྐྱེས་པ་ཞིག་བྱ་སྙམ་དུ་ཡང་ཡང་བསྒོམ་པར་བྱའོ། །བཞི་པ་མི་ཡི་སྡུག་བསྔལ་བསམ་པ་ནི། སྤྱིར་སྡུག་བསྔལ་གྱི་སྡུག་བསྔལ་མཛེ་ཐོག་ཏུ་ཕོལ་བྱུང་བ་ལྟ་བུ། ན་ཚ་ལ་སོགས་མི་འདོད་པའི་རིགས་གཅིག་མ་སངས་པར་གཅིག་བརྩེགས་ནས་བྱུང་བ་དང་། འགྱུར་བའི་སྡུག་བསྔལ་བག་མ་བླངས་ནས་བྲོ་བརྡུངས་པས་ཁང་པ་རྡིབས་ནས་ཉམས་ཉེས་བྱུང་བ་ལྟ་བུ། ད་ལྟ་བདེ་བ་དེ་ཉིད་དེ་མ་ཐག་ཏུ་སྡུག་བསྔལ་དུ་གྱུར་ནས་གདུང་བ་དང་། འདུ་བྱེད་ཀྱི་སྡུག་བསྔལ་ཟས་དུག་ཅན་ཟོས་པའམ་གཞན་ལ་གནོད་བསྐྱལ་བ་ལྟ་བུ་ཕྱིས་སྡུག་བསྔལ་འདུ་བྱེད་པས་སྡུག་བསྔལ་ཞིང་ཡིད་མི་བདེ་བར་བྱེད་པའི་རིགས་ཏེ་སྡུག་བསྔལ་གསུམ་གྱི་རང་བཞིན་ཡིན་ལ། བྱེ་བྲག་ཏུ་ངལ་གསོ་ལས། སྐྱེ་རྒ་ན་འཆི་མི་སྡུག་ཕྲད་པ་དང་། །སྡུག་བྲལ་འདོད་པས་ཕོངས་དང་ཉེ་བར་ལེན། །རྣམ་པ་བརྒྱད་ཀྱི་སྡུག་བསྔལ་ཚད་མེད་དེ། །ཞེས་རྩ་བའི་སྡུག་བསྔལ་བཞི་དང་། ཡན་ལག་གི་སྡུག་བསྔལ་བཞི་སྟེ། རྣམ་གྲངས་བརྒྱད་དུ་གསུངས་པ་ལས། རྩ་བའི་སྡུག་བསྔལ་བཞི་ཡི་དང་པོ་སྐྱེ་བའི་སྡུག་བསྔལ་ནི། བར་དོའི་སེམས་ཅན་དྲི་ཟ་ཉེ་བར་འཁོར་དང་ཕ་མའི་ཁུ་ཁྲག་འདྲེས་པ་ལ། ཞག་བདུན་ཚན་བདུན་དུ། མེར་མེར་པོ་དང་། ནུར་ནུར་པོ་ལ་སོགས་པས་ལུས་ཆགས་ཤིང་། དེ་ནས་གོང་དུ་འཕེལ་ཏེ། མའི་ལྟོ་བ་ན་གནས་དུས། དྲི་ང་བ་དང་། སྐྱུག་བྲོ་བ་དང་། འཁུམས་པ་དང་། མ་ཡི་ཟས་གོས་སྤྱོད་ལམ་ཉེས་པས་རེས་འགའ་མེ་དོང་དུ་ཚུད་པ་ལྟ་བུ་ཧ་ཅང་ཚ་བ་དང་། རེས་གངས་དང་ཆུའི་ནང་དུ་ཚུད་པ་ལྟར་གྲང་བ། རེས་རིས་ནོན་པ་ལྟར་ལྗི་བ། རེས་གཡང་ལ་བསྐྱུར་བ་ལྟར་ཉམ་ང་བ་དང་། བཙའ་རན་པའི་དུས་སུ་མགོ་འཇུག་ལྡོག་ནས་སྤྲུགས་པ་ལྟར་ཤིན་ཏུ་སྡུག་བསྔལ་བ་དང་། བཙའ་དུས་སུ་བསྡུས་འཇོམས་ཀྱི་དམྱལ་བ་ལྟར་ཉམ་{ཉམས་འདིའི་རིགས་འདི་ལྟར་ཞུས། }ཐག་པས་དལ་ཅིག་རྒྱལ་བ་དང་། ལག་པས་རེག་དུས་ཤ་འུར་སྤུ་གྲིས་རེག་པ་ལྟར་མི་བཟོད་པ་དང་། ཁྲུས་བྱས་པ་ན་པགས་པ་བཤུ་བ་ལྟར་ཚ་བ་སོགས་ཀྱིས་སྡུག་བསྔལ་ཏེ། ཨོ་རྒྱན་ཆེན་པོས། དང་པོ་ཀུན་གཞི་ཕ་མའི་ཁུ་ཁྲག་ཏུ་འཐུམས་པའི་དུས་སུ་མུན་པའི་གླིང་དུ་ཚུད་པ་སྙམ་པའམ། རི་ཆེན་པོའི་འོག་ཏུ་མནན་པ་སྙམ་བྱེད། དེ་ནས་གཟུགས་དོད་འགུལ་འཕྲིག་གི་དུས་སུ་མ་ཟས་ཀྱིས་འགྲངས་པའི་དུས་སུ། བྲག་བར་དུ་བཙིར་བ་སྙམ་བྱེད། མ་ལྟོགས་པའི་དུས་སུ། དཔྱང་ལ་བཏགས་པ་སྙམ་བྱེད། དྲག་ཤུལ་བྱས་པའི་དུས་སུ་བྲག་བར་དུ་བཙིར་བ་སྙམ་བྱེད། དེ་ནས་སྐྱེ་བའི་དུས་སུ་བྲག་བར་དུ་བཙིར་ནས་འདོན་པ་དང་འདྲ། ཐང་ལ་ལྷུང་བ་ན་པགས་པ་བཤུས་ནས་ཚེར་མའི་དོང་ནང་དུ་བསྐྱུར་བའི་སྡུག་བསྔལ་ལམ། རྨིག་པས་བརྫིས་པ་སྙམ་བྱེད། སྡུག་བསྔལ་ཤིན་ཏུ་ཆེའོ། །དེ་ནས་ཀྱང་བཀྲེས་པ་དང་། སྐོམ་པ་དང་། རྐང་ལག་ན་བ་སོགས་ཤིན་ཏུ་སྡུག་བསྔལ་ཡོད་དོ། །ཞེས་གསུངས། གཉིས་པ་རྒ་བའི་སྡུག་བསྔལ་ནི། ལུས་ཀྱི་སྟོབས་ཉམས་པས་ལྡང་འདུག་དང་སྒུལ་བསྐྱོད་དཀའ། དབང་པོའི་མདངས་ཉམས་པས་མིག་འགྲིབ། རྣ་བ་མི་གསོང་། དྲན་པ་མི་གསལ། ཤེས་པའི་རྩལ་ཤོར་བས་བློའི་སྤྲོ་བ་ཞི་ཞིང་སེམས་ཁོང་དུ་ཆུད། རྩ་རླུང་གི་འཕེལ་བྲི་བས་བྱིས་པ་བཞིན་དུ་ཅོལ་ཆུང་ལ་ཚོར་བ་རགས། ནང་གི་ལུས་སེམས་འགྱུར་བས་ནད་དང་འཚེ་བ་མང་ཞིང་ཀུན་གྱི་ཡིད་དུ་མི་འོང་། ངག་ཏུ་འཆི་བ་ལ་སྨོན་ཡང་དོན་ལ་ཤི་ཡིས་དོགས་པ་ལ་སོགས་པའི་སྡུག་བསྔལ་དཔག་ཏུ་མེད་དེ། རྒྱ་ཆེ་རོལ་བ་ལས། རྒས་པ་གཟུགས་སྡུག་གཟུགས་ནི་མི་སྡུག་བྱེད། རྒས་པས་གཟི་བརྗིད་འཕྲོག་ཅིང་མཐུ་སྟོབས་ཉམས། །རྒས་པས་བདེ་བ་འཕྲོག་ཅིང་སྡུག་བསྔལ་བསྐྱེད། །རྒས་པས་འཆི་བྱེད་རྒས་པས་མདངས་ཀྱང་འཕྲོག །ཅེས་གསུངས། གསུམ་པ་ན་བའི་སྡུག་བསྔལ་ནི། འབྱུང་བཞིའི་འདུ་བ་འཁྲུགས་པས་ཟུག་གཟེར་གྱི་ཚོར་བ་རགས། ལུས་ཀྱི་རང་བཞིན་འགྱུར་ཞིང་འཚིག་ཅིང་ཡིད་མི་བདེ། དབང་པོའི་སྟོབས་ཉམས་པས་མལ་ནས་ལྡང་འདུག་དཀའ། ཟས་སྐོམ་སོགས་གང་ཡང་ཡིད་དུ་མི་འོང་བས་རྟག་ཏུ་འདུ་ཤེས་འཁྲུགས། གདོན་བགེགས་བར་ཆད་ལངས་པས་གློ་བུར་ཡེ་འདྲོག་ཆེ། ལོངས་སྤྱོད་འཛད་པ་དང་ཤི་ཡིས་དོགས་པའི་སྡུག་བསྔལ་དཔག་ཏུ་མེད་དེ། ལས་བརྒྱ་པའི་སྟོད་འགྲེལ་དུ། ན་བས་གདུང་བའི་ལུས་ཅན་ནི། །དམྱལ་བའི་ཚོར་བ་དེ་འདྲ་སྟེ། །དེ་སྙེད་ཕྱིར་ཕྱིར་ལྡང་གྱུར་པ། །སྲེད་ཅན་སྲིད་པའི་ཟུག་རྔུ་འདྲ། །ཞེས་དང་། ཨོ་རྒྱན་ཆེན་པོས། ན་བའི་སྡུག་བསྔལ་སྣ་ཚོགས་མི་བཟོད་པ་ཡོད་དེ། ལུས་ཀྱི་དབང་པོ་གང་ན་ཡང་། མིག་ལྟ་བུ་ཞིག་ན་ན། མིག་མ་ཡིན་པ་གཞན་ཞིག་ན་ན་ཅི་མ་རུང་སྙམ། གང་ཡང་མི་བཟོད་ལུས་ཀྱི་མདངས་ཉམས། དབང་པོ་དང་སྟོབས་ཉམས། ནོར་དང་འབྲུ་དང་། ལོངས་སྤྱོད་ཐམས་ཅད་ཐ་མར་བྱེད་པས་ཤིན་ཏུ་སྡུག་བསྔལ་ལོ་གསུངས། བཞི་པ་འཆི་བའི་སྡུག་བསྔལ་ནི། མལ་གྱི་ཐ་མ་ན་འདུག ཟས་གོས་ཀྱི་ཐ་མ་ལ་སྤྱད། གཏམ་གྱི་ཐ་མ་སྨྲ། འཁོར་འདབས་{འདབ}དང་ཉེ་དུ་འབྲེལ་བ་མང་པོས་བསྐོར་ཀྱང་ཕན་པ་ནི་ཅུང་ཟད་མེད། འཆི་བའི་ཚོར་བས་ནི་གདུངས། འཁྲུལ་སྣང་གི་སུན་མས་སླེབས། བར་དོའི་འཕྲང་ལ་ཞུགས། ལུས་ཀྱི་འབྱུང་བ་སྡུད། ཚེ་འདིའི་སྣང་བ་འདོར། ཕྱི་མའི་ཡུལ་ལ་སྙེགས། ཐམས་ཅད་བོར་ནས་གཅིག་པུར་མར་གྱི་གསེབ་ནས་སྤུ་གཏོན་པ་ལྟར་འགྲོ་བའི་དུས་ན། ཟས་ནོར་ཇི་ཙམ་ཡོད་ཀྱང་ཟན་ཆང་ཅིག་ཁྱེར་བའི་དབང་ཡང་མེད། འཁོར་དང་ཉེ་དུ་ཇི་ཙམ་ཡོད་ཀྱང་མི་གཅིག་དང་ཡང་འགྲོགས་དབང་མེད་པར་གཅིག་པུར་འགྲོ་དགོས་པ་སོགས་ཀྱི་སྡུག་བསྔལ་ཕ་མཐའ་ཡས་ཏེ་སློབ་དཔོན་ཆེན་པོས། དེ་ནས་འཆི་བའི་སྡུག་བསྔལ་ནི། །ཀུན་ལ་ཐོག་བབ་ཐབས་སུ་འབྱུང་། །མལ་གྱི་ཐ་མ་ཤི་ལ་འཇུག །གོས་ཀྱི་ཐ་མ་རོ་གོས་གྱོན། །ཟས་ཀྱི་ཐ་མ་དུར་རྒྱགས་སྙོད། །གཏམ་གྱི་ཐ་མ་ཁ་ཆེམས་བཞག །གཉེན་འདུན་རྣམས་ཀྱི་མཐའ་བསྐོར་ཡང་། །ངོ་མི་ཤེས་ཤིང་བླ་ཅོལ་སྨྲ། །ཟས་སྐོམ་རྣམས་ཀྱི་མཐའ་བསྐོར་ཡང་། །དོང་ཁར་འོང་བ་ཆུ་ལས་མེད། །ཕན་པའི་ཐབས་མེད་ནུས་མཐུར་རྡུགས། །ཐམས་ཅད་ཁོ་ཐག་ཆོད་པའི་ཚེ། །མི་ཚེ་དོན་མེད་ཡེང་ལ་སོང་། །ཆོས་མ་སྤྱད་ཅིང་སྡིག་སྤྱད་པས། །འོ་འགྱོད་བྲང་ལ་སེན་མོས་འབྲད། །འགྱོད་ཀྱང་ཅིས་ཕན་བྱ་བ་ཐལ། །འཁོར་བའི་གཡང་ལ་ཉམ་ང་བས། །འབྲུ་ཚུགས་བལྟ་ཤིང་ཤི་སྦར་འཐམ། །རླུང་སེམས་གནས་སུ་མི་སྡོད་པས། །དབུགས་ནི་ཧ་རིང་ཕྱིར་ལ་འདོན། །རང་ལུས་འབྱུང་བ་སྡུད་པ་ལས། །སྣང་བ་འཇུག་པར་གྱུར་པའི་ཚེ། །འོད་གསལ་ངང་ལ་ཅུང་ཞིག་བརྒྱལ། །དེ་ལས་ལང་སྟེ་བྲེད་སྔངས་ནས། །ཕན་ཚུན་གར་རྒྱུགས་སུ་ཟློག་ཀྱང་། །བརྡ་མི་འཕྲོད་ཅིང་མགོན་སྐྱབས་མེད། །ཤི་བར་ཤེས་ཤིང་ཆོ་ངེ་འདེབས། །འཇིགས་ཤིང་སྐྱི་ཡ་གཤིན་རྗེ་ཡི། །ཕོ་ཉས་རང་དབང་མེད་པར་འཁྲིད། །ལྷན་ཅིག་སྐྱེས་པའི་ལྷ་འདྲེ་ཡིས། །དགེ་སྡིག་གྲངས་འདེབས་འཐེན་འཐེན་བྱེད། །གཤིན་རྗེ་ཆོས་ཀྱི་རྒྱལ་པོ་ཡིས། །སྲིད་པ་ལས་ཀྱི་མེ་ལོང་བསྟན། །ལམ་རྒྱུད་ལྔ་ཡི་བདག་པོ་ཡིས། །གང་ཐོབ་ལམ་ལ་སྦྱོར་བར་བྱེད། །སྔ་མའི་གཟུགས་ཅན་ཡིད་ཀྱི་ལུས། །བར་དོར་སྡུག་བསྔལ་སྣ་ཚོགས་མྱོང་། །ཞེས་དང་། མཚོ་རྒྱལ་ཞུས་ལན་ལས། འཆི་བའི་སྡུག་བསྔལ་འདི་དམྱལ་བའི་སྡུག་བསྔལ་ལས་ཀྱང་འཇིགས་སུ་རུང་གསུངས། དེས་ན་དེ་སྔ་ཕན་ཆད་ཚེ་འདིའི་སྣང་བ་དགྲ་འདུལ་གཉེན་སྐྱོང་། གནས་དང་ཡོ་བྱད་ཀྱི་ཕྱི་ཚིས། བུ་ཚ་འཁོར་འདབས་ཀྱི་ཤ་ཚ་བྱས་པ་ལ་དོན་ཅི་ཡོད་སྙམ་དུ་འཆི་མེད་ཐར་པའི་ལམ་མཆོག་སྒྲུབ་པར་བྱའོ། །ཡན་ལག་གི་སྡུག་བསྔལ་བཞི་ལས། དང་པོ་མི་སྡུག་པ་དང་ཕྲད་པ་ནི། དགྲ་སྡང་བ་དང་འཕྲད་པ་ན་དེས་ལུས་དང་སྲོག་དང་ལོངས་སྤྱོད་མ་རུངས་པར་བྱེད་པ་དང་བྱེད་ཀྱིས་དོགས་པས་སྡུག་བསྔལ་ཞིང་ཡིད་མི་བདེ་བའོ། །གཉིས་པ་སྡུག་པ་དང་བྲལ་བ་ནི། གཉེན་དང་མཛའ་བཤེས་ཤི་བ་དང་། ཡུལ་ཐག་རིང་པོར་སོང་སྟེ་བྲལ་བ་ན། དེའི་ཡོན་ཏན་དང་ལུས་ངག་གི་རྣམ་འགྱུར་དྲན་པའི་མོད་ལ་ཡིད་གདུང་ཞིང་མངོན་པར་མི་དགའ་བའོ། །གསུམ་པ་འདོད་པས་ཕོངས་པ་ནི། ཇི་ལྟར་འདོད་པའི་དངོས་པོ་བཙལ་བས་མ་རྙེད་པ་དང་། སྔར་ཡོད་ཀྱི་དངོས་པོ་བཟང་དགུ་ཉམས་པ་དང་། བསོད་ནམས་མར་འགྲིབ་པ་སོགས་དབུལ་ཕོངས་ཀྱིས་ཉེན་ནས་མྱ་ངན་སྐྱེའོ། །བཞི་པ་ཟག་བཅས་སྡུག་བསྔལ་གྱི་རང་བཞིན་ནི། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་སྟེ། རང་གི་ཉེར་ལེན་གྱི་ཕུང་པོ་ལྔ་པོ་འདི་ཡང་སྡུག་བསྔལ་གྱི་གནས་དང་རྟེན་དང་འབྱུང་ཁུངས་སུ་གྱུར་པས་སྡུག་བསྔལ་ཏེ། དེ་ཡང་གཟུགས་ནི་སྡུག་བསྔལ་གྱི་གནོད་པ་མངོན་དུ་སྒྲུབ་པའི་ཕྱིར་གནས་སོ། །ཚོར་བས་ནི་དང་དུ་ལེན་པར་བྱེད་པས་སྣོད་དོ། །འདུ་ཤེས་ནི་རྟོག་པ་གཡོ་བར་བྱེད་པའི་དང་པོའི་སྒོར་གྱུར་པའི་ཕྱིར་རྟེན་ནོ། །འདུ་བྱེད་དང་རྣམ་པར་ཤེས་པས་ནི་བྱེད་པ་པོ་དང་རིག་པར་བྱེད་པས་ན་འབྱུང་ཁུངས་ཡིན་ཏེ། དཔེར་ན་ཚེར་མ་ཞིག་ཟུག་ནའང་གཟུགས་ལ་ན་ཚའི་ཟུག་རྔུ་འབྱུང་། ཚོར་བ་སེམས་ཀྱིས་དེ་ཤེས། ན་ཚ་དེ་ཉིད་སྐད་ཅིག་འབྲེལ་ཆགས་སུ་འདུ་ཤེས་པ་འདུ་ཤེས། ཡང་ན་བར་བྱེད་པ་འདུ་བྱེད། ཚེར་མའི་ཟུག་གི་ཤེས་པ་རྣམ་པར་ཤེས་པ་སྟེ། ལུས་ལ་ན་ཚ་སེམས་ལ་སྡུག་བསྔལ་ཅི་བྱུང་ཡང་ཕུང་པོ་ལྔ་པོ་འདིའི་སྟེང་དུ་མ་གཏོགས་པ་གཞན་དུ་མི་འབྱུང་བའི་ཕྱིར། ད་ནི་སྡུག་བསྔལ་བདེན་པའི་ཆ་ཤས་ཉེ་བར་ལེན་པ་ཟག་བཅས་ཀྱི་ཕུང་པོ་རྣམས་དང་མི་ལྡན་པ་འཕགས་པའི་ཡེ་ཤེས་ཤིག་ཅིས་ཀྱང་ཐོབ་པར་བྱ་དགོས་སྙམ་དུ་སྦྱོར་དངོས་རྗེས་གསུམ་ཚང་བས་ཉམས་སུ་བླང་བར་བྱ་སྟེ། ཨོ་རྒྱན་ཆེན་པོས་ཀྱང་། དེ་ནས་ཆེར་སྐྱེས་ནས་ཀྱང་། མེད་པ་ཤ་ཐང་ཆད་པར་བཙལ་གྱིས་མི་རྙེད་པའི་སྡུག་བསྔལ་སྣ་ཚོགས་པ་དང་། ཡོད་པ་རྐུ་འཕྲོག་ལ་སོགས་པ་ཤོར་གྱིས་དོགས་པའི་སྡུག་བསྔལ་སྣ་ཚོགས་པ་དང་། དགྲ་སྡང་བ་དང་འཕྲད་ཀྱིས་དོགས་པའི་སྡུག་བསྔལ་སྣ་ཚོགས་པ་དང་། གཉེན་བྱམས་པ་དང་བྲལ་གྱིས་དོགས་པའི་སྡུག་བསྔལ་སྣ་ཚོགས་པ་དང་། འདུ་བྱེད་ཀྱི་སྡུག་བསྔལ་ཕུང་པོ་འདི་བླང་བ་ཙམ་གྱིས་སྡུག་བསྔལ་བའི་ཁུར་ཆེན་པོ་ཡིན་ཏེ། ཚ་མི་བཟོད། གྲང་མི་བཟོད། བཀྲེས་མི་བཟོད། སྐོམ་མི་བཟོད་པ་ལ་སོགས་པའི་སྡུག་བསྔལ་སྣ་ཚོགས་པ་ཡོད་པ་ཡིན་གསུངས་སོ། །ལྔ་པ་ལྷ་མ་ཡིན་གྱི་སྡུག་བསྔལ་བསམ་པ་ནི། འཕེན་བྱེད་ཕྲག་དོག་གིས་འཕང་བའི་རྒྱུ་མཐུན་གྱིས་རང་སྡེ་ཕན་ཚུན་འཐབ་ཅིང་རྩོད་པ་དང་། སུམ་ཅུ་རྩ་གསུམ་པའི་དཔལ་དང་འབྱོར་པ་མཐོང་ནས་ཁོང་ཁྲོ་དང་ཕྲག་དོག་གི་མེས་གདུངས་པ། རེས་འགའ་ལྷ་རྣམས་དང་འཐབ་པའི་གཡུལ་ངོར་མགོ་དང་ཡན་ལག་གཅོད་པ་དང་། རྡོ་རྗེ་དང་། མདའ་དང་། འཁོར་ལོ་ལ་སོགས་པས་སྣད་དེ་ཁ་ཅིག་འཆི་བའམ་འཆི་ལ་ཐུག་པའི་སྔངས་སྐྲག་དང་སྡུག་བསྔལ་ཡོད་ཅིང་། དེ་དག་རྣམ་སྨིན་གྱི་སྒྲིབ་པ་ཡིན་པས་ཐེག་པ་འོག་མའི་ལུགས་ལྟར་ན་ཉན་རང་གི་ལམ་གྱི་བདེན་པ་མཐོང་བའི་རྟེན་དུ་མི་རུང་བ་སོགས་ཉེས་པ་དང་སྐྱོན་ཤིན་ཏུ་མང་སྟེ། བཤེས་སྤྲིང་ལས། ལྷ་མིན་དག་ནའང་རང་བཞིན་གྱིས་ལྷ་ཡི། །དཔལ་ལ་སྡང་ཞིང་ཡིད་ཀྱི་སྡུག་བསྔལ་ཆེ། །དེ་དག་བློ་དང་ལྡན་ཡང་འགྲོ་བ་ཡི། །སྒྲིབ་པས་བདེན་པ་མཐོང་བ་མ་མཆིས་སོ། །ཞེས་གསུངས། དེས་ན་ཀུན་མཁྱེན་བླ་མས། ལྷ་མིན་རྣམས་ལའང་བདེ་བའི་སྐབས་མེད་དེ། །དོན་མེད་འཐབ་རྩོད་འཁྲུག་ཅིང་ཞེ་སྡང་ལ། །ལྷ་ཡི་དཔལ་ལ་མི་བཟོད་ཕྲག་དོག་ལྡན། །གཡུལ་ངོར་སྡུག་བསྔལ་བརྒྱ་ཕྲག་བརྟེན་འཚལ་ལོ། །དེ་བས་དགེ་ལེགས་ཞི་བའི་འགྲོ་བ་དག །མྱུར་བ་ཉིད་དུ་ཐར་པའི་ཆོས་མཛོད་ཅིག །ཅེས་རྗེས་སུ་འདོམས་པར་མཛད་པ་ཡིན་ནོ། །དྲུག་པ་ལྷ་ཡི་སྡུག་བསྔལ་བསམ་པ་ནི། འདི་ལྟར་རྒྱལ་ཆེན་རིགས་བཞི་དང་། སུམ་ཅུ་རྩ་གསུམ་དང་། མཚེ་མ་དང་དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དེ་འདོད་པའི་ལྷ་རྣམས་ཀྱི་ནང་ན་དར་ཅིག་བདེ་བ་ལྟར་སྣང་ཡང་། འཆི་འཕོ་བའི་ཚེ་སྔོན་གྱི་ལས་དགེ་བ་ཟད། མི་དགེ་བའི་འབྲས་བུས་ངན་འགྲོར་སྐྱེ་བ་མངོན་ཤེས་ཀྱིས་ཤེས་པས། ཉ་བྱེ་ཚན་ལ་བསྒྲེས་པ་ལྟ་བུའི་སྡུག་བསྔལ་དྲག་པོ་གོང་སྨོས་ལྟར་ལྷ་རང་རང་གི་ཞག་བདུན་དུ་མྱོང་དགོས་ཏེ། ཨོ་རྒྱན་ཆེན་པོས། ལྷ་ལ་ལྟུང་བའི་སྡུག་བསྔལ། རིམ་ཚ་བས་བཏབ་པའི་སྡུག་བསྔལ་ཡོད། ལྷུང་བའི་སྡུག་བསྔལ་འདི་ནི་ཁྱད་པར་ཆེ་སྟེ། འཆི་ལྟས་རྣམས་ནི་བྱུང་། ལུས་ཀྱི་ཁ་དོག་ནི་འགྱུར། སྟན་ལ་ནི་མི་དགའ། མེ་ཏོག་གི་ཕྲེང་བ་རྙིང་། གོས་ལ་དྲི་མ་ཆགས། སྔོན་ཆད་མེད་པའི་རྔུལ་འབྱུང་། ངན་སོང་གསུམ་སོགས་སུ་སྐྱེ་བར་ནི་མངོན་ཤེས་ཀྱིས་མཐོང་ཙམ་ན། ཉ་སྐམ་ལ་བཏོན་པའམ། ཀླུ་ཕྲུག་ནམ་མཁའ་ལྡིང་གིས་ཁྱེར་བའམ། རྔ་མོ་བུ་སྟོར་བའམ། རྒྱ་མཚོ་ཆེན་པོར་གྲུ་ནུབ་པ་ཙམ་ཡོད། མནར་མེད་པའི་སེམས་ཅན་དམྱལ་བ་ལས་ཡིད་ཀྱི་སྡུག་བསྔལ་བདུན་འགྱུར་རམ་བཅུ་དྲུག་གི་འགྱུར་གྱིས་ཆེ་བ་ཡིན་སྙམ་དུ་བསམ་དགོས། རིམ་ཚ་བས་བཏབ་པའི་སྡུག་བསྔལ་ནི་མནར་མེད་པ་བས་བཅུ་དྲུག་འགྱུར་གྱིས་ཆེ་བ་ཡོད་པ་ཡིན། ལར་མཐོ་རིས་སུ་སྐྱེས་ཀྱང་སྡུག་བསྔལ་དེ་ལ་སོགས་དཔག་ཏུ་མེད་པ་ཡོད་པ་ཡིན་གསུངས། དེ་བཞིན་དུ་གཟུགས་དང་གཟུགས་མེད་པའི་ཁམས་རྣམས་སུ་སྡུག་བསྔལ་མངོན་གྱུར་པ་མེད་ཅིང་། ཟག་བཅས་ཀྱི་ཏིང་ངེ་འཛིན་གྱི་བདེ་བ་ལ་དར་ཅིག་སྤྱོད་ཀྱང་། མཐར་ལས་བཟང་པོ་ཟད། ངན་པའི་སྟོབས་ཀྱིས་སྲིད་པ་འོག་མ་རྣམས་སུ་ལྷུང་བའི་སྡུག་བསྔལ་འདུ་བྱེད་པས་ཕུང་པོ་ཉིང་མཚམས་སྦྱོར་བར་འགྱུར་བ་དང་། འདུ་བྱེད་ཀྱི་སྡུག་བསྔལ་ལ་སྤྱོད་པ་ལས་མ་འདས་ཏེ། བཤེས་སྤྲིང་ལས། ཚངས་རིས་ལ་སོགས་བསམ་གཏན་ལྷུན་གྲུབ་ཀུན། །འོད་དང་ཁ་དོག་གཟི་བརྗིད་མཐའ་ཡས་ཀྱང་། །བདག་རྟོག་བག་ལ་ཉལ་བ་མ་གཟིགས་ནས། །ཤི་ནས་དམྱལ་བར་སྐྱེ་བ་ཆ་མེད་དོ། །ཞེས་གསུངས། མདོར་ན། ཨོ་རྒྱན་ཆེན་པོས། མཐོ་རིས་སྲིད་པའི་རྩེ་མོ་ནས་དམའ་བ་མནར་མེད་པའི་དམྱལ་བ་ཡན་ཆད་དུ་སྡུག་བསྔལ་གྱི་རང་བཞིན་ལས་མ་འདས་སོ། །ཞེས་གསུངས་པས། ད་རེས་ཁམས་གསུམ་རིགས་དྲུག་གི་གནས་འདི་ནས་ཅིས་ཀྱང་ཐར་བ་ཞིག་བྱ་དགོས་སྙམ་དུ་སྦྱོར་དངོས་རྗེས་གསུམ་ཚང་བས་ཉམས་སུ་བླང་བར་བྱའོ། །གསུམ་པ་ཐར་པ་སྒྲུབ་དགོས་པར་བསྟན་པ་ནི། ཀུན་མཁྱེན་ཆོས་རྗེས། འཁོར་བ་མཐོ་དམན་གྱི་རང་བཞིན་ཟོ་ཆུའི་ཁྱུད་མོ་འདྲ་བ། འཕོ་ཞིང་རྟག་མི་ཐུབ་པ་འདི་མཚང་རེ་ཆེ། འཁོར་བར་མི་འཇུག་པའི་ཐབས་དམ་པ་ཐར་པའི་བྱང་ཆུབ་མ་གཏོགས་པར་ཡིད་བརྟན་མི་རུང་ཞིང་བསླུ་བ་འདི་ཡ་ཆ། ཐར་པའི་ལམ་དུ་ཞུགས་ན་འཕྲལ་གྱི་བདེ་བ་མཐོ་རིས་དང་། ཡོན་ཏན་བཟང་པོ་འཐོབ་སྟེ་རྒྱལ་སྲས་བྱང་ཆུབ་སེམས་དཔའ་རྣམས་བཞིན། ཡུན་གྱི་བདེ་བ་བླ་ན་མེད་པའི་བྱང་ཆུབ་འགྲུབ་སྟེ་སངས་རྒྱས་རྣམས་བཞིན་ནོ། །དེ་བས་ན་གནས་སྐབས་དང་མཐར་ཐུག་གི་བདེ་བ་ཕུན་སུམ་ཚོགས་པ་བསྒྲུབ་པར་བྱ་སྙམ་དུ་བསམ་མོ། །ཞེས་གསུངས་ཤིང་། ཨོ་རྒྱན་ཆེན་པོས་ཀྱང་། ཡར་འགྲོ་མར་འགྲོའི་ས་མཚམས་ད་རེས་ཡིན་ནོ། །སྐྱིད་སྡུག་གཉིས་ཀྱི་ཤན་འབྱེད་ད་རེས་ཡིན་ནོ། །འཁོར་འདས་གཉིས་ཀྱི་ཤན་འབྱེད་དུས་ད་རེས་ཡིན་ནོ། །དུས་ད་རེས་ཤན་མ་ཕྱེ་ན། ཕྱིས་འཁོར་བ་ནས་ཐོན་པ་ཤིན་ཏུ་དཀའོ། །ད་རེས་ཀྱི་འཁོར་བ་འདི་སྲིད་པ་ལུགས་ནས་བཟློག་ན་གཏན་དུ་ལུས་བླངས་མི་དགོས། ལུས་མ་བླངས་ཙམ་ན་འཁོར་འདས་ཤན་འབྱེད་པ་ཡིན་ནོ། །ཕོ་མདོ་ཆེ་ཆུང་དང་། མོ་སྒྲིན་གླེན་དུས་ད་རེས་ལ་བལྟའོ། །རང་དོན་ཕྱལ་བར་བཏང་ནས་མི་ཚེ་སྟོང་སྐྱལ་མ་བྱེད་ཅིག ནོར་བུ་རིན་པོ་ཆེའི་གླིང་ནས་སྟོང་ལོག་མ་བྱེད་ཅིག གསུངས། དེ་ཡང་ཐར་པ་རང་གིས་མ་བསྒྲུབས་པར་གཞན་གྱིས་གྲོགས་བགྱིར་ཅུང་ཟད་ཀྱང་མེད་དེ། འདུལ་བ་ལུང་ལས། ངས་ནི་ཁྱེད་ལ་ཐར་པའི་ལམ་བསྟན་གྱིས། །ཐར་པ་རང་ལ་རག་ལས་བརྩོན་པར་གྱིས། །ཞེས་གསུངས། དེས་ན་ཀུན་མཁྱེན་བླ་མས། འདི་ལྟར་ཐར་པ་རང་ལ་རག་ལས་ཤིང་། །ཐར་པའི་ཐབས་ནི་ལྷ་མིའི་སྟོན་པས་གསུངས། །གཞན་གྱིས་གློ་བུར་འབྱིན་པའི་སྐབས་མེད་དེ། །གཉིད་མྱོས་རྨི་ལམ་སུས་ཀྱང་དགག་མེད་བཞིན། །གལ་ཏེ་ནུས་ན་བདེ་གཤེགས་སྲས་བཅས་ཀྱི། །ཐུགས་རྗེའི་ཟེར་གྱིས་འཁོར་བ་སྟོངས་ཟིན་ངེས། །དེ་བས་རང་ཉིད་བརྩོན་པའི་གོ་བགོས་ཏེ། །ཐར་ལམ་འཛེག་ལ་བརྩོན་པའི་དུས་ལ་བབ། །ཅེས་གསུངས། དེས་ན་སྔོན་འདས་པའི་སངས་རྒྱས་གྲངས་མེད་པ་བྱོན་ཀྱང་བདག་ཅག་རང་རང་གི་ཉེས་པས་ཐུགས་རྗེས་འཛིན་པའི་ཡུལ་དུ་མ་གྱུར་ཅིང་སྲིད་པའི་གནས་འདིར་ཡང་ནས་ཡང་དུ་འཁོར་བ་ཡིན་ལ། ད་དུང་ཡང་ཉོན་མོངས་པ་དང་བག་མེད་པ་དང་རྣམ་པར་གཡེངས་པའི་གཞན་དབང་དུ་གྱུར་ན་དེ་བཞིན་དུ་འཁོར་བ་མཐའ་མེད་དུ་འཕྱན་པ་ལས། འཕགས་པའི་ཐུགས་རྗེ་འཇུག་པའི་རྒྱུ་མེད་པའི་ཕྱིར་ནམ་ཡང་ཐར་བར་དཀའ་སྟེ། ཀུན་མཁྱེན་བླ་མས། གྲངས་མེད་འདས་པའི་སངས་རྒྱས་དེ་དག་གིས། །གསོ་བའི་སྤྱོད་ཡུལ་མ་གྱུར་བདག་ལྟ་བུ། །སྡིག་པའི་རང་བཞིན་སྲིད་ལམ་དགོན་པར་འཁྱམས། །སྔར་བཞིན་བརྩོན་པ་མེད་ན་ཡང་དང་ཡང་། །འགྲོ་དྲུག་གནས་སུ་སྡུག་བསྔལ་བྱེད་འདི་སོམས། །འཁོར་བའི་སྡུག་བསྔལ་མཁའ་ལྟར་མཐའ་ཡས་ཤིང་། །མེ་ལྟར་མི་བཟད་ཡུལ་ལྟར་སྣ་ཚོགས་ལ། །བཟོད་པའི་སེམས་ཁྱོད་གནས་མིན་སྨད་པའི་གནས། །ངོ་ཚ་མི་ཤེས་ཁྲེལ་བག་བྲལ་བ་ལ། །ཐུགས་རྗེའི་གོ་སྐབས་འཇུག་པར་ག་ལ་འགྱུར། །ཐབས་མཁས་མཛད་པའི་ཕྲིན་ལས་དེ་ཡང་ནི། །གདུལ་བྱའི་ལས་ཅན་དག་ལས་འབྱུང་བར་གསུངས། །དེ་བས་རང་གི་ཉེས་ཀུན་ཤེས་བྱས་ཏེ། །འཁོར་བའི་སྡུག་བསྔལ་སྙིང་ནས་དྲན་བྱས་ནས། །བདག་དང་འགྲོ་ཀུན་སྲིད་ལས་ཐར་བྱའི་ཕྱིར། །ཞི་བའི་ལམ་ལ་ཡང་དག་འཛེག་པར་གྱིས། །ད་ལྟའི་སྡུག་བསྔལ་ཅུང་ཟད་མི་བཟོད་ན། །སྲིད་པའི་སྡུག་བསྔལ་མི་བཟད་ཇི་ལྟར་བཟོད། །དེ་ལྟར་བཤད་ཀྱང་ཅུང་ཟད་མི་སྐྱོ་བ། །བདག་སྙིང་ལྕགས་ཀྱི་གོང་བུ་ཆེན་པོའམ། །རྡོ་ཡི་ཁམས་བཞིན་སེམས་པ་མེད་པར་མངོན། །ཞེས་གསུངས། དེས་ན་ད་རེས་རྟེན་དལ་འབྱོར་གྱི་མི་ལུས་ཐོབ་ཅིང་རང་དབང་རང་ལ་ཡོད་དུས་འདིར། ལུས་ལ་མེ་སྟག་ཕོག་པ་ཙམ་མམ། དགོང་གཅིག་གི་ལྟོ་ག ཅོག་པའམ། ངལ་དུབ་ཕྲ་མོ་ཙམ་ཡང་མི་བཟོད་ན། ཤི་ནས་དམྱལ་བ་ཚ་གྲང་། ཡི་དྭགས་བཀྲེས་སྐོམ། དུད་འགྲོ་བཀོལ་སྤྱོད་ལ་སོགས་པའི་སྡུག་བསྔལ་དྲག་ལ་རྒྱུན་རིང་བ་བཟོད་པར་ཇི་ལྟར་ནུས་། ད་ལྟ་ཉིན་རེའི་ནད་དང་སྡུག་བསྔལ་ཡང་མི་བཟོད་ན། འཁོར་བ་མཐའ་མེད་ཀྱི་སྡུག་བསྔལ་ཇི་ལྟར་བཟོད། མི་སྐྱེ་བའི་གདེང་ཚད་ཅི་ཡོད། དེར་སྐྱེས་པ་ཐམས་ཅད་ཀྱང་རང་གི་ཚེ་སྔོན་གྱི་ཕ་མ་ཤ་སྟག་ཡིན་པས་ཇི་ལྟར་བཟོད། དེ་བས་ད་རེས་རང་གཞན་འཁོར་བའི་སྡུག་བསྔལ་ཆེན་པོ་དེ་ལས་སྒྲོལ་བའི་ཕྱིར་དུ་དམ་པའི་ཆོས་གཤའ་མ་ཞིག་མི་བྱེད་རེ་ཤི་སྙམ་དུ་ཞེ་དམ་དྲག་པོས། ངག་ཏུ། བཟོད་པར་དཀའ་བའི་སྡུག་བསྔལ་མང་དང་ལྡན། །བདེ་བར་སྣང་ཡང་ཡིད་བསླུས་འགྱུར་བ་ཅན། །ཟག་བཅས་ཕུང་པོ་མཐའ་དག་སྡུག་བསྔལ་རྒྱུ། །ཁམས་གསུམ་འཁོར་བ་མེ་ཡི་འོབས་འདྲ་ཡང་། །དེ་ལྟར་མ་ཤེས་ཆགས་ལྡན་བདག་ཅག་ལ། །དཀོན་མཆོག་ཀུན་འདུས་བླ་མས་ཐུགས་རྗེས་གཟིགས། །ངེས་འབྱུང་བསམ་པ་སྐྱེ་བར་བྱིན་གྱིས་རློབས། །ཞེས་ཡང་ཡང་བརྗོད་ཅིང་སྦྱོར་དངོས་རྗེས་གསུམ་དམ་པ་གསུམ་གྱིས་ཟིན་པར་ཉམས་སུ་བླང་ངོ་། །བཞི་པ་དེ་ལྟར་གོམས་པའི་ཕན་ཡོན་འབྱོང་ཚད་དང་བཅས་པ་བསྟན་པ་ནི། ཨོ་རྒྱན་ཆེན་པོས་རྒྱལ་པོ་ཁྲི་སྲོང་ལ་གདམས་པ་ལས། འཁོར་བའི་མཚན་ཉིད་ཤེས་ན་འཇིག་རྟེན་ལས་བློ་ལྡོག་པ་ཆོས་ཉིད་ཡིན་གསུངས། དེས་ན་འདི་གལ་ཆེ་སྟེ། འཁོར་བ་ལས་བློ་མ་ལོག་པར་ཆོས་ཉན་ལོ། སྒྲུབ་ལོ་ཇི་ལྟར་བྱས་ཀྱང་བསམ་པ་ཚེ་འདིའི་དབང་དུ་སོང་བས་ཡང་དག་པའི་ཆོས་སུ་མི་འགྲོ་ཞིང་། ཐར་པའི་ལམ་སྣ་ཟིན་པ་ལ་ཅུང་ཟད་ཀྱང་ཕན་པ་མེད་དེ། ཨོ་རྒྱན་ཆེན་པོས། ཆོས་སྒོར་ཞུགས་ཀྱང་ཆོས་སུ་མ་སོང་བ་མང་དུ་ཡོད་པས་དེར་མ་སོང་བར་བྱ་དགོས། དེ་ཡང་རབ་ཏུ་བྱུང་བར་བྱས་ཀྱང་འཚོ་སྐྱོང་དང་ཡོ་བྱད་ཁྱིམ་པ་དང་མཉམ་ན་ཆོས་པ་མིན། མི་ཆོས་ཀྱི་བྱ་བ་བཞག་ཀྱང་ཐ་མལ་གྱི་ལོང་གཏམ་མ་སྤངས་ན་ཆོས་པ་མིན། དགོན་པར་གནས་ཀྱང་བྱ་བ་འཇིག་རྟེན་དང་མཉམ་ན་ཆོས་པ་མིན། རང་ཡུལ་བོར་ཡང་འཇིག་རྟེན་པ་དང་འདྲིས་འབྲེལ་མ་སྤངས་ན་ཆོས་པ་མིན། ཉམས་ལེན་བྱས་ཀྱང་འདོད་པ་ལས་བློ་མ་ལོག་ན་ཆོས་པ་མིན། དཀའ་ཐུབ་སྣ་ཚོགས་བྱེད་ཀྱང་གཞན་གྱི་གནོད་པ་མ་བཟོད་ན་ཆོས་པ་མིན། བསྐྱེད་རྫོགས་སྒོམ་ཡང་དམ་ཚིག་མ་བསྲུངས་{བསྲུང}ན་ཆོས་པ་མིན། གཉིས་མེད་སྒོམ་ཡང་ལྷ་འདྲེ་ལ་ཕན་གནོད་རེ་ན་ཆོས་པ་མིན། ཐེག་ཆེན་ལ་ཞུགས་ཀྱང་སེམས་ཅན་ལ་ཕན་པ་མི་སྒྲུབ་ན་ཆོས་པ་མིན། འགྲོ་དོན་བྱེད་ཀྱང་བྱང་ཆུབ་སེམས་ཀྱིས་མ་ཟིན་ཅིང་ཞེ་འདོད་དང་མ་བྲལ་ན་ཆོས་པ་མིན། ལྟ་བ་རྟོགས་ཀྱང་རྣམ་སྨིན་ལ་མི་འཛེམ་པ་ཆོས་པ་མིན། ཐེག་པ་རིམ་དགུ་ཤེས་ཀྱང་རང་རྒྱུད་ཆོས་དང་མ་འདྲེས་ན་ཆོས་པ་མིན། རྟག་ཏུ་རྩེ་གཅིག་བསྒོམས་ཀྱང་སྣང་བའི་དངོས་འཛིན་མ་ཞིག་ན་ཆོས་པ་མིན། བསླབ་པ་གསུམ་དང་ལྡན་ཡང་རློམ་སེམས་ཀྱི་དམིགས་པ་སྤྱོད་ན་ཆོས་པ་མིན། དགེ་སྦྱོར་ཅི་བྱེད་ཀྱང་སྦྱོར་དངོས་མཇུག་གསུམ་གྱིས་མ་ཟིན་ན་ཆོས་པ་མིན། ལུས་ངག་གི་སྤྱོད་ལམ་བཟང་བ་རང་བཞིན་བྱེད་ཀྱང་སེམས་ལ་ཉོན་མོངས་པ་རང་རྒྱུད་པར་ཤོར་ན་ཆོས་པ་མིན། ད་ལྟ་སྒྲུབ་པར་ནུས་པའི་བྱ་བ་རྣམས་བཞག་ནས་ཕྱིས་སྨོན་ལམ་ལ་རེ་བ་རྣམས་ཆོས་པ་མིན། སེམས་ཉིད་རང་ངོ་མ་ཤེས་པར་འབྲས་བུ་ཕྱི་དུས་ལ་རེ་ན་ཆོས་པ་མིན། ལས་སུ་དགེ་བའི་བྱ་བ་བྱས་ཀྱང་འཇིག་རྟེན་ཆོས་བརྒྱད་དང་མ་བྲལ་ན་ཆོས་པ་མིན། འཇིག་རྟེན་ཆོས་བརྒྱད་ཀྱང་། བདག་ལ་བསྟོད་ན་དགའ་བ་དང་། སྨད་ན་མི་དགའ་བ་དང་། གྲགས་ན་དགའ་བ་དང་། མ་གྲགས་ན་མི་དགའ་བ་དང་། སྙན་ན་དགའ་བ་དང་། མ་སྙན་ན་མི་དགའ་བ་དང་། རྙེད་ན་དགའ་བ་དང་། མ་རྙེད་ན་མི་དགའ་བ་རྣམས་ལགས་ཏེ། དེ་ཡང་བདག་གི་ལུས་ངག་ཡིད་གསུམ་གྱི་དགེ་བའི་རྩ་བའི་གང་ལའང་སྔར་དེ་རྣམས་ཀྱི་བསམ་པ་དང་བཅས་པས་བྱས་སམ་མ་བྱས། ད་ལྟ་བྱེད་ཅིང་འདུག་གམ་མི་འདུག མ་འོངས་པ་ན་དེ་བརྒྱད་དང་ལྡན་པས་བྱེད་དམ་མི་བྱེད་བརྟགས་ཏེ་དེ་དང་མ་འབྲེལ་བ་གལ་ཆེ། མངའ་བདག་ཆེན་པོ། པདྨ་བདག་གི་རྗེས་སུ་འབྲང་ན། ཆོས་གང་ལ་འཇུག་ཀྱང་སངས་རྒྱས་ཀྱི་བྱང་ཆུབ་ཆེན་པོ་མྱུར་དུ་ཐོབ་པར་བྱེད་པའི་ལམ་ཕྱིན་ཅི་མ་ལོག་པ་ལ་སྤྱོད་ཅིག དོན་རྒྱ་ཆེ་ལ་ཟབ་པ་དང་ལྡན་པར་སྤྱོད་ཅིག ཡང་དག་པར་རྫོགས་པའི་སངས་རྒྱས་ཀྱི་བཀའ་མཐའ་དག་དང་ལྡན་པར་སྤྱོད་ཅིག ཐེག་པ་རིམ་དགུའི་དོན་གང་ཟག་གཅིག་གི་རྒྱུད་ལ་ཡར་ལྡན་དུ་རྫོགས་པར་སྤྱོད་ཅིག སྤྱད་བྱ་དང་སྤྱོད་བྱེད་གང་ཡང་མ་གྲུབ་པའི་ཚུལ་གྱིས་སྤྱོད་ཅིག འཁོར་འདས་ཀྱི་ཆོས་ཐམས་ཅད་ཆོས་སྐུ་ཐིག་ལེ་ཉག་གཅིག་གི་ངང་དུ་སྤྱོད་ཅིག བདག་གི་གདམས་པ་འདི་ཁོ་ན་ལྟར་སྤྱོད་ཅིག བྱང་ཆུབ་ཀྱི་འབྲས་བུ་ལ་ཐེ་ཚོམ་མེད་ཀྱིས་གསུངས། དེས་ན་གོང་གི་སྐྱོན་ཐམས་ཅད་འཁོར་བ་ལས་བློ་མ་ལོག ཚེ་འདི་བློས་མ་ཐོང་བས་ལན་པས། དེའི་གཉེན་པོར་འཁོར་བའི་སྡུག་བསྔལ་བསམ་པ་འདི་ཡིན་པས། འདི་ལས་གདམས་ངག་ཟབ་པ་མེད། བཅོམ་ལྡན་འདས་ཀྱིས་ཀྱང་ཆོས་འཁོར་རིམ་གསུམ་དུ་གསུངས་པའི་ཀུན་གྱི་ཐོག་མར། དགེ་སློང་དག་འདི་ནི་སྡུག་བསྔལ་ལོ་ཞེས་སྡུག་བསྔལ་ཤེས་པར་བྱ་བ་ནས་མགོ་བརྩམས་ཏེ་གསུངས་པ་ཡིན་ཞིང་། འདི་རྒྱུད་ལ་གོམས་ན། སྐྱོ་ཤས་དང་ངེས་འབྱུང་སྐྱེ། རྒྱགས་པ་དང་བག་མེད་སེལ། ཡང་དག་པའི་བླ་མ་དང་གདམས་ངག་ལ་མོས། ལས་འབྲས་ལ་ཡིད་ཆེས་སྐྱེ་བས་དགེ་སྡིག་གི་འདོར་ལེན་ནུས། གཞན་སེམས་ཅན་ཐམས་ཅད་ལ་བྱམས་པ་སྙིང་རྗེ་སྐྱེ་བ་སོགས་ཐེག་གསུམ་ལམ་གྱི་རྟེན་འབྲེལ་ཐམས་ཅད་འདི་ལས་འབྱུང་བས་ཕན་ཡོན་ཚད་མེད། སྔོན་བཅོམ་ལྡན་འདས་ཀྱིས་ཀྱང་། གཅུང་དགའ་བོ་ལ། དམྱལ་བ་མངོན་སུམ་དུ་སྤྲུལ་ནས་བསྟན་པས། ངེས་འབྱུང་གི་བསམ་པ་ཡང་དག་པ་སྐྱེས་ཏེ། བསླབ་པའི་གནས་ཕྲ་མོ་ཙམ་ཡང་མ་འགལ་བས། དགྲ་བཅོམ་པའི་གོ་འཕང་མངོན་དུ་བྱས་ཏེ། དབང་པོའི་སྒོ་བསྡོམ་པ་རྣམས་ཀྱི་མཆོག་ཏུ་བསྟན་པ་བཞིན་ནོ། །འབྱོངས་པའི་ཚད་ནི་དགེ་བཤེས་གླང་རི་ཐང་པ་ལྟ་བུ་ཞིག་དགོས་ཏེ། གླང་ཐང་པ་ལ་ཉེ་གནས་ཀྱིས། བླ་མ་གཞན་ཚོས་གླང་རི་ཐང་པ་ངོ་ནག་པ་ཟེར་གྱིན་གདའ་ཞུས་པས། ཁམས་གསུམ་འཁོར་བའི་སྡུག་བསྔལ་འདི་ལ་བསམས་ན་ངོ་གདོང་དཀར་པོ་འདུག་གེ་གསུངས། སྐོར་གཅིག་ཁོང་གི་མཎྜལ་གྱི་སྟེང་ན་གཡུ་ཞིག་ཡོད་པ་བྱི་བ་གཅིག་གིས་བཏེག་པས་མ་ཐེག་པ་ལ། ཙིག་ཙིག་ཅེས་བྱི་བ་གཞན་ལ་སྦྲན་ནས་གཅིག་གིས་ཕུལ། གཅིག་གིས་འཐེན་པ་གཟིགས་པས་ཞལ་འཛུམ་པ་ཞིག་བྱུང་བ་མ་གཏོགས་ནམ་ཡང་ཞལ་འཛུམ་པ་ཙམ་ཡང་མ་མཛད་པར་གྲགས་སོ། །དེས་ན་དེ་ལྟ་བུའི་ཚུལ་གྱིས་རྟག་ཏུ་གོམས་པར་བྱའོ། །མེ་འོབས་སྲིན་གླིང་ལྟ་བུའི་འཁོར་བ་འདིར། །སྡུག་བསྔལ་འཇིགས་དང་གནོད་པ་བསམ་མི་ཁྱབ། །འདི་ལ་ཞེན་རྣམས་ཀྱེ་མ་ཕྱུགས་བས་བླུན། །བཅོས་མིན་ངེས་འབྱུང་བསྐྱེད་ཅིག་ཤེས་ལྡན་རྣམས། །འཁོར་བའི་སྡུག་བསྔལ་བསམ་པའི་ཁྲིད་དོ། །། ། ཐ་མར་དགེ་བ་རྡོ་རྗེ་ཐེག་པའི་ལམ་གྱི་སྔོན་འགྲོ་དངོས་བཤད་པ།༈ གསུམ་པ་ཐ་མར་དགེ་བ་རྡོ་རྗེ་ཐེག་པའི་ལམ་གྱི་སྔོན་འགྲོ་དངོས་བཤད་པ་ལ། སྤྱིར་ཁྲིད་གཞུང་རྣམས་སུ་དམིགས་རྐང་མང་ཉུང་དང་། གོང་འོག་གི་གོ་རིམ་སོགས་ཅི་རིགས་པ་འབྱུང་བ་ཁྲིད་གཞུང་སོ་སོ་ལྟར་འཆད་ཤེས་པར་བྱ་ལ། འདིར་སྤྱི་འགྲེ་ལྟར་འཆད་པ་ལ་ལྔ། ལམ་ལོག་པ་ལས་ཁྱད་པར་དུ་བྱེད་པ་སྐྱབས་སུ་འགྲོ་བའི་ཁྲིད། ལམ་དམན་པ་ལས་ཁྱད་པར་དུ་བྱེད་པ་སེམས་བསྐྱེད་ཀྱི་ཁྲིད། འགལ་རྐྱེན་སྡིག་སྒྲིབ་སྦྱོང་བྱེད་རྡོར་སེམས་བསྒོམ་བཟླས་ཀྱི་ཁྲིད། མཐུན་རྐྱེན་ཚོགས་གཉིས་རྫོགས་བྱེད་མཎྜལ་གྱི་ཁྲིད། བྱིན་རླབས་ཁྱད་པར་ཅན་རྒྱུད་ལ་འཇུག་པར་བྱེད་པ་བླ་མའི་རྣལ་འབྱོར་གྱི་ཁྲིད་དོ། །དང་པོ་ལ་གསུམ། སྐྱབས་སུ་འགྲོ་བའི་རྒྱུའི་གཙོ་བོ་དད་པའི་རང་བཞིན་བསྟན་པ། དངོས་གཞི་ཇི་ལྟར་སྐྱབས་སུ་འགྲོ་བའི་ཚུལ་བཤད་པ། རྗེས་བསླབ་བྱ་དང་ཕན་ཡོན་གྱི་ཁྱད་པར་བསྟན་པའོ། །དང་པོ་ནི། དཀོན་མཆོག་ལ་སྐྱབས་སུ་འགྲོ་བ་སོགས་དཀར་ཆོས་ཀྱི་ཡོན་ཏན་མཐའ་དག་རང་རྒྱུད་དུ་བསྐྱེད་པའི་རྒྱུའམ་རྩ་བ་ལྟ་བུ་ནི་དད་པ་ཕུན་སུམ་ཚོགས་པ་ཉིད་ཡིན་ཏེ། བཅོམ་ལྡན་འདས་ཀྱིས་མདོ་ལས། དད་པ་དཀར་པོའི་ཆོས་རྣམས་ཀྱི། །སྔོན་དུ་འགྲོ་དང་བསྐྱེད་པར་བྱ། །སྡུག་བསྔལ་མཐར་ཕྱིན་འདོད་པ་དང་། །བདེ་བའི་མཐར་ཡང་འགྲོ་འདོད་པས། །དད་པའི་རྩ་བ་བརྟན་བྱས་ནས། །བྱང་ཆུབ་ལ་ནི་བློ་བརྟན་བྱ། །ཞེས་དང་། དཔལ་མགོན་འཕགས་པ་ཀླུ་སྒྲུབ་ཀྱིས། དད་ཅན་ཉིད་ཕྱིར་ཆོས་ལ་བསྟེན། །ཤེས་རབ་ལྡན་ཕྱིར་ཡང་དག་རིག །འདི་གཉིས་གཙོ་བོ་ཤེས་རབ་སྟེ། དེ་ཡི་སྔོན་འགྲོ་དད་པ་ཡིན། །ཞེས་དང་། མཁས་མཆོག་དཔའ་བོས། དད་པའི་འཁོར་ལོ་རིན་པོ་ཆེ། །ཉིན་མཚན་དགེ་བའི་ལམ་སྣ་འདྲེན། །ཞེས་འཕགས་པའི་ནོར་བདུན་གྱི་ཐོག་མར་གསུངས་ཤིང་། རང་རྒྱུད་ལ་དད་པ་མེད་ན་དཀར་པོའི་ཆོས་ཀྱི་ཡོན་ཏན་ཐམས་ཅད་འབྱུང་མི་སྲིད་དེ། མདོ་ལས། དད་པ་མེད་པའི་མི་རྣམས་ལ། །དཀར་པོའི་ཆོས་ནི་མི་འབྱུང་སྟེ། །ས་བོན་མེ་ཡིས་ཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་གསུངས་པས་རང་རྒྱུད་ལ་དད་པ་བསྐྱེད་པ་གལ་ཆེ། །དེ་ལ་དད་པའི་ངོ་བོ་ནི། སྤང་བླང་གི་ཡུལ་ལ་འཇུག་ལྡོག་གིས་དམིགས་པའི་བློ་རབ་ཏུ་དང་བ་སྟེ། དབྱེ་ན། ཀུན་མཁྱེན་ཆོས་རྗེས། འདོད་པའི་དད་པས་རྒྱུ་འབྲས་བླང་དོར་བྱེད། །མོས་པའི་དད་པས་ཡུལ་མཆོག་སེམས་རབ་གཞོལ། །གུས་པའི་དད་པས་བག་ཡོད་མཆོག་དང་ལྡན། །དང་བའི་དད་པས་ཡོན་ཏན་སེམས་རབ་དང་། །ཡིད་ཆེས་དད་པས་ཆོས་ལ་ཐེ་ཚོམ་ཟད། །ངེས་སེམས་དད་པས་ཐོས་བསམ་སྒོམ་པ་ཡིས། །ཆོས་མཆོག་རྣམས་ལ་ལྷག་པར་དད་པའོ། །ཞེས་རྣམ་པ་དྲུག་ཏུ་གསུངས་ཏེ། དེ་ཡང་འདོད་པའི་དད་པ་ནི། འཁོར་འདས་བླང་དོར་དུ་འདོད་པ་སྟེ། དབྱེ་ན། འཁོར་བ་སྤང་འདོད། མྱང་འདས་ཐོབ་འདོད། དེ་གཉིས་ཀྱི་རྒྱུ་ལ་བླང་དོར་གྱིས་འཇུག་པར་འདོད་པ་སྟེ་གསུམ་མོ། །མོས་པའི་དད་པ་ནི། བླ་མ་དང་དཀོན་མཆོག་ལ་སེམས་རབ་ཏུ་དགའ་བ་སྟེ། དབྱེ་ན། བླ་མ་ལ་བསྟེན་བྱར་མོས་པ། སངས་རྒྱས་ལ་བསྒྲུབ་བྱར་མོས་པ། ཆོས་ལ་ལམ་དུ་མོས་པ། དགེ་འདུན་ལ་གྲོགས་སུ་མོས་པ་སྟེ་བཞིའོ། །གུས་པའི་དད་པ་ནི། སེམས་དང་བ་ལ་བརྟེན་ནས་བླང་དོར་གྱི་གནས་ལ་བག་ཡོད་པས་བཀའ་ལས་མི་འདའ་བ་སྟེ། དབྱེ་ན། ལུས་གུས་པས་ཕྱག་དང་བཀུར་སྟི། ངག་གུས་པས་བསྟོད་པ་དང་ཞེ་ས། སེམས་གུས་པས་མཆོད་འོས་སུ་མཐོང་ནས་ཕུ་དུད་བྱེད་པ་གསུམ་མོ། །དང་བའི་དད་པ་ནི། ཡུལ་གོང་མ་རྣམས་ཀྱི་ཡོན་ཏན་ལ་སེམས་མངོན་པར་དང་བའོ། །དབྱེ་ན། ཀུན་རྫོབ་སྣང་ཆའི་དགེ་བ། དོན་དམ་ཤེས་རབ་ཀྱི་དགེ་བ། ཟུང་འཇུག་ཆ་མཉམ་གྱི་དགེ་བ་གསུམ་ལ་དང་བའི་དད་པ་གསུམ་མོ། །ཡིད་ཆེས་ཀྱི་དད་པ་ནི། གཞི་ལམ་འབྲས་བུའི་ཆོས་རྣམས་ལ་ཐེ་ཚོམ་མེད་པ་སྟེ། དབྱེ་ན། འཁོར་བ་རྒྱུ་འབྲས་སྤང་བྱར་ཡིད་ཆེས་པ། མྱང་འདས་རྒྱུ་འབྲས་བླང་བྱར་ཡིད་ཆེས་པ། ལུང་མ་བསྟན་རྣམས་དགོས་མེད་དུ་ཡིད་ཆེས་པ་གསུམ་མོ། །ངེས་སེམས་ཀྱི་དད་པ་ནི། ངེས་དོན་མདོ་རྒྱུད་ཟབ་མོའི་བསྟན་དོན་ཆོས་ཉིད་ཟབ་མོ་ལ་སེམས་མཉམ་པར་འཇོག་འདོད་པ་སྟེ། དབྱེ་ན། དེའི་དོན་སྟོན་པའི་གཞུང་ཐོས་པ་དང་། བསམ་པ་དང་། སྒོམ་པ་ལ་ངེས་པར་སེམས་པའི་དད་པ་གསུམ་མོ། །དེ་དྲུག་ཀྱང་བསྡུ་ན་དང་འདོད་ཡིད་ཆེས་ཀྱི་དད་པ་གསུམ་དུ་འདུ་སྟེ། མོས་པ་དང་གུས་པ་དང་དང་བའི་དད་པ་གསུམ་ནི་དང་བའི་དད་པའི་ནང་དུ་གཏོགས་ལ། འདོད་པ་དང་ཡིད་ཆེས་པ་གཉིས་ནི་ཡིད་ཆེས་ཀྱི་དད་པར་གཏོགས་ལ། ངེས་པར་སེམས་པ་ནི་འདོད་པའི་དད་པ་ཉིད་ཡིན་ཏེ། མཚན་ཉིད་དེ་ཁོ་ན་ཉིད་འགོག་ལམ་མ་ནོར་བ་ལ་ཞུགས་པས་སྡུག་བསྔལ་ཀུན་འབྱུང་གཉིས་འདོར་ཞིང་ཐར་པ་འདོད་པའི་ཕྱིར་རོ་གསུངས། དེས་ན་གཞུང་ཕལ་ཆེར་དུ། དཀོན་མཆོག་གསུམ་ལ་སེམས་རབ་ཏུ་དང་བ་དང་བའི་དད་པ་དང་། བདེན་བཞི་ལ་བླང་དོར་དུ་འདོད་པ་འདོད་པའི་དད་པ་དང་། ལས་འབྲས་ལ་ཡིད་ཆེས་པ་ཡིད་ཆེས་ཀྱི་དད་པ་སྟེ་གསུམ་དུ་བཞག་པ་དང་། ཁ་ཅིག་ཏུ་དེ་ལས་ཕྱིར་ལྡོག་པ་མེད་པ་མི་ལྡོག་པའི་དད་པ་སྟེ་བཞིར་བཞག་པ་སོགས་ཡོད་ཀྱང་དབྱེ་བསྡུ་ཙམ་ལས་དོན་གྱི་གནད་གཅིག་གོ །དེ་ལྟ་བུའི་དད་པ་དེ་རྒྱུད་ལ་ཡོད་ན། ཞིང་ས་གཤིན་པོ་དང་འདྲ་སྟེ་བྱང་ཆུབ་ཀྱི་མྱུ་གུ་འཁྲུངས། གྲུ་གཟིངས་བཟང་པོ་དང་འདྲ་སྟེ་འཁོར་བའི་ཆུ་བོ་ལས་སྒྲོལ། སྐྱེལ་མ་དཔའ་བོ་དང་འདྲ་སྟེ་བདུད་དང་ཉོན་མོངས་པའི་དགྲ་བོ་ལས་སྐྱོབ། བཞོན་པ་བཟང་པོ་དང་འདྲ་སྟེ་ཐར་པའི་གླིང་དུ་འདྲེན། ཡིད་བཞིན་གྱི་ནོར་བུ་དང་འདྲ་སྟེ་ཅི་བསམ་འགྲུབ། སྐྱེས་བུ་དཔའ་བོ་དང་འདྲ་སྟེ་སྡིག་ཏོ་མི་དགེ་བའི་ཕྱོགས་ཚར་གཅོད་ནུས། གཞན་ཡང་མི་ཁོམ་པའི་གནས་རྣམས་སྤངས་ཤིང་དགེ་བའི་རྩ་བ་སྡུད་པར་བྱེད་པ་སོགས་ཡོན་ཏན་ཚད་མེད་པ་དང་ལྡན་ཏེ། དཀོན་མཆོག་ཏ་ལ་ལས། དད་པ་སྔོན་འགྲོ་མ་ལྟར་སྐྱེད་པ་སྟེ། །ཡོན་ཏན་ཐམས་ཅད་སྲུང་ཞིང་འཕེལ་བར་བྱེད། །དོགས་པ་སེལ་ཞིང་ཆུ་བོ་རྣམས་ལས་སྒྲོལ། །དད་པ་བདེ་བའི་གྲོང་ཁྱེར་མཚོན་པ་ཡིན། །དད་པ་རྙོག་པ་མེད་ཅིང་སེམས་དྭངས་བྱེད། །ང་རྒྱལ་སྤོང་ཞིང་གུས་པའི་རྩ་བ་ཡིན། །དད་པ་གཏེར་དང་ནོར་དང་རྐང་པའི་མཆོག །ལག་པ་བཞིན་དུ་དགེ་སྡུད་རྩ་བ་ཡིན། །དད་པ་ཡོངས་སུ་གཏོང་ལ་དགའ་བར་བྱེད། །དད་པ་རྒྱལ་བའི་ཆོས་ལ་རབ་དགའ་སྐྱེད། །དད་པ་ཡོན་ཏན་ཡེ་ཤེས་ཁྱད་པར་བྱེད། །སངས་རྒྱས་གོ་འཕང་སྟོན་ཅིང་ཐོབ་པར་བྱེད། །དབང་པོ་རྣོ་ཞིང་རབ་ཏུ་གསལ་བར་བྱེད། །དད་པའི་སྟོབས་ལ་གཞན་གྱིས་མི་རྫི་ཞིང་། །ཉོན་མོངས་རྣམ་པར་སེལ་བའི་གཞི་རྟེན་ཡིན། །དད་པ་རང་འབྱུང་ཡོན་ཏན་རྣམས་ཀྱང་ཚོལ། །དད་པ་ཆགས་པའི་སྒོ་ལ་ཆགས་པ་མེད། །མི་ད ལ་སྤངས་ཤིང་དལ་བའི་མཆོག་གཅིག་ཡིན། །དད་པས་བདུད་ཀྱི་ལམ་ལས་འདའ་བྱེད་ཅིང་། །ཐར་པའི་ལམ་མཆོག་སྟོན་པར་བྱེད་པ་ཡིན། །ཡོན་ཏན་ཞིང་གི་ས་བོན་མ་རུལ་བ། །དད་པ་བྱང་ཆུབ་ཤིང་ནི་རྣམ་པར་སྐྱེད། །ཡེ་ཤེས་ཁྱད་པར་ཡོན་ཏན་འཕེལ་བར་བྱེད། །དད་པ་རྒྱལ་བ་ཐམས་ཅད་སྟོན་པ་ཡིན། །དད་པས་མོས་པའི་ཁྱད་པར་དགའ་རྣམས་ཀྱི། །དེ་ལ་སྤྱོད་པ་རིམ་གྱིས་བརྗོད་པར་བྱ། །དེ་འདྲའི་ཆོས་ནི་འཇིག་རྟེན་རབ་དཀོན་ཏེ། །རྒྱ་མཚོའི་ནང་ན་རིན་ཆེན་རྒྱལ་པོ་བཞིན། །ཞེས་སོགས་རྒྱ་ཆེར་བསྔགས་པར་མཛད་པ་བཞིན་ནོ། །རང་རྒྱུད་ལ་དད་པ་མེད་ན་སངས་རྒྱས་དངོས་སུ་བཞུགས་ཀྱང་ཕན་མི་ཐོགས་ཏེ། རྒྱ་མཚོའི་གཏིང་གི་རྡོ་བ་དང་འདྲ་སྟེ་ཐར་པའི་སྐམ་སར་མི་ཕྱིན། མཉན་པ་མེད་པའི་གྲུ་དང་འདྲ་སྟེ་སྡུག་བསྔལ་གྱི་ཆུ་བོ་ལས་མི་སྒྲོལ། ལག་སྡུམ་གསེར་གྱི་གླིང་དུ་ཕྱིན་པ་ལྟར་ཡོན་ཏན་རང་རྒྱུད་ལ་མི་ལོན། ས་བོན་མེས་ཚིག་པ་དང་འདྲ་སྟེ་བྱང་ཆུབ་ཀྱི་མྱུ་གུ་མི་འཁྲུངས། ལོང་བ་ལྷ་ཁང་དུ་ཕྱིན་པ་ལྟར་ཆོས་ཀྱི་སྣང་བ་མི་མཐོང་། རྒྱ་མཚོའི་ཀློང་འཁོར་དུ་ཆུད་པ་ལྟར་ནམ་ཡང་འཁོར་བ་ལས་ཐར་པའི་དུས་མི་འོང་བས། ཐར་པ་བྱང་ཆུབ་འདོད་པ་རྣམས་ཀྱིས་རང་རྒྱུད་ལ་དད་པ་བསྐྱེད་དགོས། དད་པ་སྐྱེ་བའི་ཡུལ་ནི། འདོད་པའི་དད་པ་ཡུལ་འཁོར་བའི་རང་བཞིན་མཐོང་བ་ལས་སྐྱེ། མོས་པའི་དད་པ་སྡིག་གྲོགས་ལ་སྐྱོ་བ་སྐྱེས་པ་ལས་སྐྱེ། གུས་པའི་དད་པ་དཀོན་མཆོག་གི་རྟེན་ངོ་མཚར་ཅན་མཇལ་བ་ལས་སྐྱེ། དང་བའི་དད་པ་ཡུལ་མཆོག་གི་རྟེན་ནམ་བྱང་ཆུབ་སེམས་དཔའི་སྐྱེས་རབས་སོགས་གཏམ་རྒྱུད་ཐོས་པ་ལས་སྐྱེ། ཡིད་ཆེས་པའི་དད་པ་ལས་རྒྱུ་འབྲས་ཀྱི་རྣམ་གཞག་མཐོང་བ་ལས་སྐྱེ། ཆོས་ལ་སེམས་པའི་དད་པ་ཆོས་ཟབ་མོ་ཐོས་པའི་རྒྱུ་ལས་སྐྱེ་བས། ཡུལ་དེ་དག་གི་རང་བཞིན་ལ་དམིགས་ནས་སྐྱེར་གཞུག གཞན་ཡང་དད་པ་འཕེལ་བའི་རྒྱུ་བླ་མ་དགེ་བའི་བཤེས་གཉེན་བསྟེན་ཞིང་སངས་རྒྱས་དངོས་མཐོང་གི་མོས་གུས་སྐྱེད། གྲོགས་ཁྱད་པར་ཅན་ཆོས་དང་རང་རྒྱུད་འདྲེས་ངེས་པ་ལ་བསྟེན་ཞིང་དེའི་རྗེས་སུ་འབྲང་། མདོ་རྒྱུད་ཟབ་མོ་ལ་ལྟ་ཞིང་འཆི་བ་མི་རྟག་པ་ཡང་ཡང་དུ་བསམ། དཀོན་མཆོག་གི་ཡོན་ཏན་དང་ལས་རྒྱུ་འབྲས་སྟོན་པའི་མདོ་སོགས་གཏམ་རྒྱུད་རྣམས་བལྟ་ཞིང་ཉན། ཟབ་མོའི་སྒོམ་སྒྲུབ་སོགས་ལ་སྔར་བས་བརྩོན་པར་ཆེར་བསྐྱེད། དད་པ་འགྲིབ་བའི་རྐྱེན། རང་རྒྱུད་ལ་བདུད་ཞུགས་པའི་རྟགས་སུ། བླ་མ་དང་དགེ་བའི་བཤེས་གཉེན་གྱི་སྐྱོན་ལ་རྟོག་པ། ཆོས་བྱེད་སྤྱིའི་ངན་སྐྱོན་ལ་རྟོག་པ། ཐ་མལ་གྱི་གྲོགས་ངན་པ་དང་འགྲོགས་པ། ཉམས་ལེན་གྱི་བརྩོན་འགྲུས་འགྲིབ་པ། འདོད་ཡོན་ལ་རང་གར་སྤྱོད་པ། དཀོན་མཆོག་ལ་མོས་གུས་མེད་པ་སྟེ། འདིའི་དུས་སུ་ཟློག་པའི་ཐབས་ནི། བླ་མ་དཀོན་མཆོག་མཆེད་གྲོགས་དང་བཅས་པའི་ཡོན་ཏན་བསམ་ཞིང་། ཆོས་བྱེད་ཐམས་ཅད་ལ་དག་སྣང་དང་མོས་གུས་བསྐྱེད། ཕ་རོལ་ངན་པར་མཐོང་བ་དེ་རང་མ་དག་པའི་རྟགས་ཏེ་མ ཁྲིས་ནད་ཅན་གྱིས་དུང་སེར་པོར་འཛིན་པ་བཞིན་ནོ་སྙམ་དུ་རང་ལ་གྲོས་གདབ། ཐ་མལ་པའི་གྲོགས་དང་མི་འགྲོགས། འདོད་ཡོན་གྱི་ཉེས་དམིགས་དྲན་པར་བྱས་ལ། དད་པ་འགྲིབ་པའི་སྐྱོན་ཐམས་ཅད་བདུད་དུ་ཤེས་པར་བྱ་ལ་གཉེན་པོ་བསྐྱེད། གཞན་ཡང་། སྐྱེ་ཤིའི་འཕོ་འགྱུར་མཐོང་དུས་དད་པ་སྐྱེ་བའི་རྐྱེན་ཡིན་པས་གཞན་དག་ཤི་བ་བགྲངས་ལ་དད་པ་བསྐྱེད་དགོས། དེ་བཞིན་དུ། རང་ལ་ནད་གནོད་གྱི་བར་ཆད་བྱུང་དུས་དགེ་བསྐུལ་གྱི་སློབ་དཔོན་དུ་ཤེས་པར་བྱས་ལ་སྐྱེད་དགོས། རྐྱེན་ངན་གྱི་སྡུག་བསྔལ་བྱུང་དུས་བྱང་ཆུབ་ཀྱི་འདྲེན་པར་ཤེས་པས་སྐྱེད་དགོས། དམ་པའི་ཆོས་ཐོས་པའི་ཚེ་ཡང་དག་པའི་འཇུག་ལྡོག་ལ་དམིགས་ནས་སྐྱེད་དགོས། གོང་མའི་རྣམ་ཐར་ཐོས་དུས་དཀའ་སྤྱད་ཆོས་ལ་སྤྱོད་པས་སྐྱེད་དགོས། སངས་རྒྱས་དང་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་མདོ་སྡེ་སྐྱེས་རབས་སོགས་ཐོས་དུས་ཐེག་ཆེན་གྱི་བྱང་ཆུབ་ལ་དམིགས་ནས་དད་པ་སྐྱེད་དགོས། དེའང་ཉིན་རེ་བཞིན་ཏེ་ཐམས་ཅད་དམ་གང་རུང་རེའི་སྒོ་ནས་དད་པ་བསྐྱེད་པ་ལ་འབད་པ་གལ་ཆེ་བས། གང་ལའང་སྣུམ་དྲེད་མ་ཁྱེར་བ་གཅེས་སོ། །དད་པ་སྐྱེས་པའི་ཚད་ནི། འཁོར་བའི་འཁྲུལ་སྣང་ལ་ཡིད་འབྱུང་བ་སྐྱུག་ནད་ཅན་གྱིས་ཟས་མཐོང་བ་ལྟ་བུ། བླ་མ་དང་དཀོན་མཆོག་ལ་མོས་གུས་ཀྱིས་གདུང་བ་བུ་ཆུང་མ་ལ་གདུངས་པ་ལྟ་བུ། ཐོས་བསམ་ལ་ནན་ཏན་བྱེད་པ་སྐོམ་པ་ཆུས་གདུང་བ་ལྟ་བུ། བསླབ་པ་ལ་གཅེས་སྤྲས་བྱེད་པ་དབུལ་པོས་གསེར་གཡུ་རྙེད་པ་ལྟ་བུ། དགེ་སྦྱོར་ཉམས་ལེན་ལ་སྤྲོ་བ་ཚོང་པ་གསེར་གླིང་དུ་ཕྱིན་པ་ལྟ་བུ། སྡིག་པ་ལ་འཛེམ་བག་ཆེ་བ་མིག་ཏུ་རྡུལ་སྤང་བ་ལྟ་བུ། ཐེག་པ་ཐམས་ཅད་ལ་དད་པ་འདོད་པ་ཅན་ཚོང་འདུས་སུ་ཕྱིན་པ་ལྟ་བུ་བྱུང་ན་དད་པ་སྐྱེས་པའི་ཚད་ཡིན་པས་མ་ཉམས་ཤིང་གོང་འཕེལ་དུ་བྱ་བ་གལ་ཆེའོ། །དེའི་དུས་སུ་རང་རྒྱུད་ཆོས་ཀྱིས་ཐུལ་བས་ཆོས་དང་གང་ཟག་མ་འཛོལ་བ་ཡིན་གསུངས། དད་པ་འགྲིབ་ན་བསྐྱེད་པའི་ཐབས་གོང་དུ་སྨོས་པ་ལྟར། འཆི་བ་མི་རྟག་པ་དང་། ལས་རྒྱུ་འབྲས་གཞན་གྱི་ཡོན་ཏན། ཆོས་ཐོས་པར་དཀའ་བ། བླ་མའི་བཀའ་དྲིན། མཆེད་གྲོགས་ཀྱི་དག་སྣང་། སངས་རྒྱས་ཀྱི་ཡོན་ཏན་སོགས་བསམས་ནས། མཐོ་དམན་དང་ཕྱོགས་རིས་མེད་པར་དད་པ་བསྒོམ་ཞིང་རང་གི་རྒྱུད་གདུལ། འདྲ་མིན་གོལ་སར་གྱུར་པའི་དད་པ་རེས་འགའ་བ་སྤངས་ལ་ཟུང་ཐུབ་པར་བྱ་དགོས་ཏེ། དེ་ཡང་ཆོས་བྱེད་ལས་དང་པོ་པ་ཁ་ཅིག་བླ་མ་དང་འགྲོགས་དུས་དད་པ་ཆེ་ཆེ་ལྟར་བྱེད་ཀྱང་བྲལ་ནས་ཐ་མལ་ལས་ཀྱང་ལོད་པ་དང་། ཁ་ཅིག་རྐྱེན་དང་འཕྲད་དུས་དད་པ་སྐྱེ་མྱུར་ཡང་ཡུན་དུ་མི་བརྟན་པར་ཅིག་ཅར་ཡལ་བ་དང་། ཁ་ཅིག་རང་འདོད་པའི་ཆོས་དང་ལོངས་སྤྱོད་དམ་ནད་གདོན་གྱིས་གཙེས་པ་མ་གྲོལ་བར་དད་པ་ཆེ་ཆེ་འདྲ་ཡང་དེ་དྲག་པའམ་ཐོབ་དུས་ཕྱི་ནས་སྤང་བ་དང་། ཁ་ཅིག་དགེ་སྦྱོར་གཅིག་བྱེད་འཕྲོར་གཅིག་བརྩམ་སྟེ་མཐར་གཉིས་ཀའི་མགོ་མི་ཐོན་པ་དང་། ཁ་ཅིག་ཆོས་ཟབ་མོ་གཅིག་དང་རྩ་བའི་བླ་མ་གཅིག་ལ་མི་བྱེད་པར་གང་བདེ་བདེར་འཇུག་ནས་མཐར་དམ་ཉམས་ཀྱི་རྒྱུ་སྒྲུབ་པ་དང་། ཁ་ཅིག་དད་པ་ཅུང་ཟད་རེ་སྐྱེས་ཀྱང་རྐྱེན་ཕྲ་མོ་ཅུང་ཟད་རེས་ཀྱང་འགྲིབ་པའི་གློ་བུར་ཡེ་འདྲོག་ཅན་དེ་ལྟ་བུའི་རིགས་སྤོངས་ལ། དང་པོ་ལེགས་པར་བརྟགས་ནས་ཡང་དག་པའི་ཆོས་དང་བླ་མར་བཟུང་ཕྱིན་ཆད་རྐྱེན་ཅི་བྱུང་ཡང་སྐྱོ་ངལ་དང་འཕེལ་འགྲིབ་མེད་པའི་དད་གུས་བྱ་སྟེ། དེ་ཡང་འགྱུར་ལྡོག་མེད་པ་རི་རྒྱལ་ལྟ་བུ། འཕེལ་འགྲིབ་མེད་པ་ཉི་མ་ལྟ་བུ། ཁ་གཏིང་མེད་པ་རྒྱ་མཚོ་ལྟ་བུ། བྱས་ཡུས་མེད་པ་མ་ལྟ་བུ། མཐའ་དབུས་མེད་པ་ནམ་མཁའ་ལྟ་བུ། ཐང་ལྷོད་མེད་པ་གཞུ་བདུང་བའི་རྒྱུད་ལྟ་བུ། གཞན་གྱིས་བསྒྱུར་རམ་བཀའ་བཀྱོན་ལ་སོགས་པའི་རྐྱེན་གྱིས་མི་འཕྲོག་པ་ནམ་མཁའ་ལྟ་བུ། སྐྱོ་དུབ་མེད་པ་གྲུ་ཟམ་ལྟ་བུ། རྒྱུན་ཆད་མེད་པ་ཆུ་བོའི་གཞུང་ལྟ་བུ། གུས་ཤིང་མཉེན་ལྕུག་དང་ཞེ་སས་བརྒྱན་པའི་དད་པ་དར་ཐག་ལྟ་བུ་སྟེ་བཅུས་བསྟེན་པར་བྱའོ། །དེ་ལྟར་བླ་མ་དང་དཀོན་མཆོག་སོགས་ཞིང་གི་དམ་པ་རྣམས་བསྟེན་ཅིང་དད་པ་བསྐྱེད་པའི་ཕན་ཡོན་ཚད་མེད་ཀྱང་བསྡུ་ན། དཀར་པོའི་ཆོས་ཐམས་ཅད་ཀྱི་གཞིར་གྱུར་པ་དང་། འཁོར་བའི་སྡུག་བསྔལ་ཐམས་ཅད་སེལ་བ་དང་། ཐར་པའི་ལམ་སྣ་ཟིན་པ་དང་། ཆོས་ཟབ་མོའི་སྣོད་དུ་འགྱུར་བ་དང་། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་རྟག་ཏུ་དགོངས་པ་དང་། ངོ་ཚ་ཤེས་པ་དང་། ཁྲེལ་ཡོད་པ་དང་། ཤེས་བཞིན་དང་། བག་ཡོད་པ་དང་། ཤེས་རབ་དང་ལྡན་པ་སོགས་ཀྱི་ཡོན་ཏན་གྱི་ཚོགས་དང་ལྡན་པས་སངས་རྒྱས་ཀྱི་ཞིང་ཁམས་དག་པར་སྐྱེ་བ་དང་། སྐྱེ་བ་ཀུན་ཏུ་བླ་མ་དང་ཆོས་དང་གྲོགས་དམ་པ་རྣམས་སྐྱེས་མ་ཐག་པར་མཇལ་ཞིང་ཆོས་ལ་སྤྱོད་པ་དང་། དཀར་པོ་ལ་དགའ་བའི་ལྷས་བསྲུང་བ་དང་། བདེ་བར་གཉིད་ལོག་ཅིང་རྨི་ལམ་དུའང་བླ་མ་དང་དཀོན་མཆོག་དང་ཆོས་ལ་སྤྱོད་པའི་སྣང་བ་བཟང་པོ་རྨི་ཞིང་བདེ་བར་སད་པ་དང་། ཅི་བསམ་པ་ཐམས་ཅད་འགྲུབ་པ་དང་། བདེ་བར་ཚེ་ཡི་དུས་བྱེད་ཅིང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ལམ་སྣ་བདེ་བར་འདྲེན་པ་དང་། བར་དོའི་འཇིགས་པ་མེད་པ་དང་། གང་དུ་སྨོན་པའི་གནས་སུ་སྐྱེ་བས་དཀོན་མཆོག་གི་གདུང་འཚོབ་པ་དང་། མྱུར་དུ་སངས་རྒྱས་ཀྱི་གོ་འཕང་ཐོབ་པ་སྟེ། རྒྱས་པ་ནི་བསྐལ་པ་མཐའ་ཡས་པ་ཇི་སྙེད་བརྗོད་ཀྱང་ཟད་པར་མི་འགྱུར་ཏེ། དཀོན་མཆོག་ཏ་ལ་ལས། གང་གིས་ཞིང་བཅུའི་རྡུལ་སྙེད་སེམས་ཅན་ལ། །བདེ་བ་ཀུན་གྱིས་བསྐལ་པར་བསྙེན་བཀུར་པས། །ཆོས་འདིར་དད་པའི་བསོད་ནམས་ཅི་འདྲ་བ། །ཁྱད་པར་འཕགས་པ་དེ་ཉིད་དེ་ལ་མེད། །ཅེས་དང་། གང་དག་རྟག་ཏུ་སངས་རྒྱས་དད་གུས་པ། །དེ་དག་རྒྱལ་ལ་མཆོད་པ་རྒྱ་ཆེན་བྱེད། །གང་དག་རྒྱལ་ལ་མཆོད་པ་ཆེ་བྱེད་པ། །དེ་དག་སངས་རྒྱས་དད་པ་བསམ་མི་ཁྱབ། །གང་དག་རྟག་ཏུ་ཆོས་ལ་དད་གུས་པ། །དེ་དག་རྒྱལ་བར་ཆོས་ཉན་ངོམས་པ་མེད། །གང་དག་རྒྱལ་བའི་ཆོས་ཉན་མི་ངོམས་པ། །དེ་དག་ཆོས་ལ་མོས་པ་བསམ་མི་ཁྱབ། །གང་དག་རྟག་ཏུ་དགེ་འདུན་དད་གུས་པ། །དེ་དག་མི་ལྡོག་དགེ་འདུན་དད་པ་ཡིན། །གང་དག་མི་ལྡོག་དགེ་འདུན་རབ་དད་པ། །དེ་དག་དད་པའི་སྟོབས་ཀྱིས་ལྡོག་མི་འགྱུར། །ཞེས་དང་། གསང་བ་བསམ་མི་ཁྱབ་པའི་མདོ་ལས། དད་པ་དང་ལྡན་ན་སངས་རྒྱས་མཐོང་བ་དང་། ཆོས་ཉན་པ་དང་། དགེ་འདུན་ལ་བསྙེན་བཀུར་བྱེད་པ་ལས་མི་ཉམས་ཤིང་། གང་དུ་སྐྱེ་བར་ཡང་དེ་དང་མི་འབྲལ་བར་འགྱུར་རོ། །ཞེས་དང་། དད་པ་དང་ལྡན་པ་ནི་སངས་རྒྱས་རྣམས་ཀྱི་སྤྱན་སྔར་སྐྱེས་ནས་དགེ་བ་གང་ཡིན་པ་ཡོངས་སུ་འཚོལ་བ་ལ་བརྩོན་པས་ཁྱིམ་དང་ཆུང་མ་དང་བུ་མོ་ལ་སོགས་པ་དོན་དུ་མི་གཉེར་བ། གཞོན་པ་ནས་རྩེ་བ་ལ་མི་དགའ་བས། དད་པས་རབ་ཏུ་བྱུང་སྟེ་དགེ་བའི་བཤེས་གཉེན་བསྟེན་ཞིང་། དགེ་བའི་བསམ་པས་ཆོས་ཉན་པ་དང་། སྒྲུབ་པ་ལ་ནན་ཏན་སྙིང་པོར་བྱེད་ཅིང་ཚིག་ལྷུར་ལེན་པ་མི་བྱེད་དོ། །དེ་མང་དུ་ཐོས་པ་ལ་བརྩོན་པར་བྱེད་ཅིང་། ཇི་ལྟར་ཐོས་པའི་ཆོས་རྣམས་ཀྱང་ཟང་ཟིང་ལ་མི་ལྟ་བར་སྙིང་རྗེས་གཞན་ལ་སྟོན་པར་བྱེད་དོ། །ཞེས་དང་། འཕགས་པ་བཟང་པོ་སྤྱོད་པ་ལས། ལན་གཅིག་ཙམ་ཡང་དད་པ་བསྐྱེད་པ་ནི། །བསོད་ནམས་དམ་པའི་མཆོག་ཏུ་འདི་འགྱུར་རོ། །ཞེས་གསུངས་ཤིང་། ཀུན་མཁྱེན་བླ་མས་བློ་གསལ་རི་བོང་གི་རྟོགས་པ་བརྗོད་པ་ལས་ཀྱང་། དད་པ་ནོར་རྣམས་ནང་ནས་རིན་པོ་ཆེ། །འདི་ཕྱིའི་ལེགས་པ་གང་ཡིན་ཆར་འབེབས་པས། །ཀླུ་དབང་ཡིད་བཞིན་དབང་གི་མཆོག་ལས་འཕགས། །དད་པ་ཟས་རྣམས་ནང་ནས་བདེ་བའི་ཟས། །ཏིང་འཛིན་ཡིད་བཞིན་དགའ་བ་བསྐྱེད་པས་ན། །འདོད་པའི་བཟའ་བཏུང་ཀུན་ལས་ཁྱད་པར་འཕགས། །དད་པ་གོས་རྣམས་ནང་ནས་མཆོག་གི་གོས། །ངོ་ཚ་ཁྲེལ་ཡོད་བག་དང་རབ་ལྡན་པས། །ལྷ་མིའི་གོས་མཆོག་དམ་པས་ཆར་མི་ཕོད། །དད་པ་རྒྱན་རྣམས་ནང་ནས་མཛེས་པའི་མཆོག །ཡོན་ཏན་རང་བཞིན་སྐྱེ་བོ་དམ་པ་མཚོན། །རྒྱལ་བས་བསྔགས་ཤིང་འཇིག་རྟེན་གསུམ་གྱིས་བསྟོད། །དད་པ་གནས་རྣམས་ནང་ནས་ཀུན་གྱི་མཆོག །དམ་པའི་བསྟི་གནས་ཡིད་བཞིན་མཚུངས་པ་མེད། །ལྷ་མིའི་ཁང་བཟང་མཆོག་རྣམས་ཀུན་ལས་འཕགས། །དད་པ་གྲོགས་རྣམས་ནང་ནས་མཆོག་གི་གྲོགས། །ཚེ་རབས་བགྲངས་ཀྱང་རྟག་ཏུ་འབྲལ་མི་ཤེས། །སྐྱོ་ངལ་མེད་པས་རྟག་ཏུ་ཕན་བདེ་བྱེད། །དད་པ་འཁོར་རྣམས་ནང་ནས་ཉེ་བའི་འཁོར། །རྨི་ལམ་ན་ཡང་བདག་གི་རྗེས་སུ་བྱེད། །ཅི་འདོད་སྒྲུབ་པས་དགེ་བའི་ལས་སུ་བྱེད། །དད་པ་གཉེན་རྣམས་ནང་ནས་ཉེ་བའི་གཉེན། །ལེགས་པ་སྟོན་ཅིང་ཉེས་པ་འགོག་པ་དང་། དགེ་བའི་ཕྱོགས་ལ་གྲོགས་དང་དོན་བྱེད་པ། །དད་པ་བཤེས་རྣམས་ནང་ནས་མཛའ་བའི་བཤེས། །མཆོག་ཏུ་ཉེ་ཞིང་རང་སྣང་ཆོས་ལ་བསྒྱུར། །བདེ་སྡུག་ཀུན་གྱི་དུས་སུ་འབྲང་བས་ན། །དད་པ་མགོན་རྣམས་ནང་ནས་སྐྱབས་ཀྱི་{ཀྱི་ལྷག}མཆོག །ངན་འགྲོ་འགོག་ཅིང་མཐོ་རིས་དགའ་བདེ་སྟེར། །འཁོར་བ་སྤངས་ཤིང་མྱ་ངན་འདས་ལ་འགོད། །དད་པ་སྟོན་པའི་ནང་ནས་རླབས་པོ་ཆེ། །གང་ཞིག་ཡོད་པས་ལེགས་ཚོགས་ཀུན་བསྒྲུབ་ནས། །མཐར་ཐུག་རྒྱལ་བའི་འབྱོར་པས་མཛེས་པར་བྱེད། །དད་པ་ཆོས་རྣམས་ནང་ནས་རྩ་བ་སྟེ། །དམ་པ་རྣམས་ཀྱི་ལམ་སྲོལ་ཤིང་རྟ་ཆེ། །འདི་ཕྱིར་ལེགས་པ་ཀུན་གྱི་གཞི་ཡིན་པས། །དད་པའི་རང་བཞིན་བཟང་པོ་བསྐྱེད་པར་མཛོད། །ཅེས་རྗེས་སུ་གདམས་པར་མཛད་པ་བཞིན་ནོ། །གཉིས་པ་དངོས་གཞི་ཇི་ལྟར་སྐྱབས་སུ་འགྲོ་བའི་ཚུལ་བཤད་པ་ལ་གསུམ། རྣམ་དབྱེ་སྤྱིར་བསྟན་པ། ཨོ་རྒྱན་དུས་གསུམ་མཁྱེན་པའི་ཞལ་ལུང་སྙིང་པོར་དྲིལ་བ། ཇི་ལྟར་སྐྱབས་སུ་འགྲོ་ཚུལ་གྱི་དམིགས་ཁྲིད་དངོས་བཤད་པའོ། །དང་པོ་ལ་གཉིས། མཚན་ཉིད་རྒྱུ་ཡི་སྐྱབས་འགྲོ་དང་། འབྲས་བུ་རྡོ་རྗེ་ཐེག་པའི་ལུགས་ཀྱི་སྐྱབས་འགྲོའོ། །དང་པོ་ལ། གང་སྐྱབས་སུ་འགྲོ་བའི་གང་ཟག་ནི། རྫོགས་པ་ཆེན་པོ་སེམས་ཉིད་ངལ་གསོ་ལས། ལམ་རྣམས་ཀུན་གྱི་གཞི་རྟེན་སྐྱབས་སུ་འགྲོ། །སྐྱེས་བུ་ཆུང་རྣམས་ངན་འགྲོས་འཇིགས་པ་སྟེ། །འབྲིང་གཉིས་སྲིད་པས་འཇིགས་དང་ཆེན་པོ་རྣམས། །འཁོར་བའི་སྡུག་བསྔལ་ཆ་དང་བཅས་མཐོང་ནས། གཞན་གྱི་སྡུག་བསྔལ་མི་བཟོད་ཞི་བདེས་འཇིགས། །རྒྱལ་སྲས་ཐེག་པ་ཆེ་རྣམས་འགྲོ་བའི་ཕྱིར། །སྐྱབས་སུ་འགྲོ་བྱེད་གསུམ་དང་བསམ་པ་གསུམ། །ཕལ་པ་མཆོག་དང་བླ་ན་མེད་པའོ། །ཞེས་གསུངས་པས། ཆོ་གས་བླངས་པའི་སོར་བྱང་སྔགས་གསུམ་གྱི་སྡོམ་པ་ཀུན་གྱི་རྟེན་གཞིར་མེད་ཐབས་མེད་པས་ལམ་གྱི་རྩ་བ་ནི་སྐྱབས་སུ་འགྲོ་བ་ཉིད་ཡིན་ལ། དེར་འགྲོ་བྱེད་ཀྱི་གང་ཟག་ཀྱང་གསུམ་སྟེ། འདི་ལྟར་ངན་སོང་གསུམ་གྱི་སྡུག་བསྔལ་ལ་འཇིགས་ནས་བདེ་འགྲོ་མཐོ་རིས་ཀྱི་བདེ་བ་དོན་དུ་གཉེར་བའི་ཕྱིར། དཀོན་མཆོག་གསུམ་ལ་སྐྱབས་སུ་འགྲོ་ན་སྐྱེས་བུ་ཆུང་ངུ་ཞེས་བྱ་སྟེ། འབྲས་བུ་གནས་སྐབས་ཀྱི་བདེ་བ་ཙམ་དོན་དུ་གཉེར་བ་ལས་གཞན་མེད་པའི་ཕྱིར་ཕལ་པའམ་དམན་པ་ཡིན་ལ། འཁོར་བའི་སྡུག་བསྔལ་མཐའ་དག་ལ་སྐྲག་ནས་རང་ཉིད་གཅིག་པུ་ཞི་བདེ་དོན་དུ་གཉེར་བའི་ཕྱིར་དཀོན་མཆོག་གསུམ་ལ་སྐྱབས་སུ་འགྲོ་ན་སྐྱེས་བུ་འབྲིང་ཞེས་བྱ་སྟེ། འཁོར་བ་ལས་རང་ཉིད་ཙམ་ཐར་པའི་འབྲས་བུ་ལ་དམིགས་པའི་ཕྱིར་སྔ་མ་ལ་ལྟོས་ནས་མཆོག་ཏུ་བཞག་པའོ། །མཐའ་མེད་པར་འཁོར་བའི་སེམས་ཅན་གཞན་རྣམས་ཀྱི་སྡུག་བསྔལ་མཐོང་ནས། དེ་རྣམས་འཁོར་བ་ལས་བསྒྲལ་བའི་ཕྱིར་དཀོན་མཆོག་གསུམ་ལ་སྐྱབས་སུ་འགྲོ་ན་སྐྱེས་བུ་ཆེན་པོ་ཞེས་བྱ་སྟེ། སེམས་ཅན་གྱི་དོན་དུ་སངས་རྒྱས་འདོད་པ་ལ་དམིགས་པའི་ཕྱིར་དེའི་གོང་ན་གཞན་མེད་པས་བླ་ན་མེད་པའི་སྒྲས་བསྟན་ཏོ། །དེའི་ཕྱིར་ད་རེས་ཀྱི་སྐབས་སུ་སྐྱེས་བུ་ཆུང་འབྲིང་གི་ཆ་ལས་ལོག་སྟེ་སེམས་ཅན་ཐམས་ཅད་ཀྱི་དོན་དུ་སྐྱེས་བུ་ཆེན་པོའི་རྗེས་སུ་བསླབ་པར་བྱའོ། །དུས་ཀྱི་ཁྱད་པར་ཡང་བསམ་པའི་རྗེས་སུ་འགྲོ་བས། སྐྱེས་བུ་ཆུང་ངུ་རྣམས་ཇི་སྲིད་ཕྱི་མའི་བདེ་འབྲས་མཐོ་རིས་ཐོབ་ཀྱི་བར་ཡིན་ཞིང་། འབྲིང་ནི་གནས་སྐབས་ཇི་སྲིད་འཚོའི་བར་དང་མཐར་ཐུག་ཉན་རང་གི་འབྲས་བུ་ཐོབ་ཀྱི་བར་ཡིན་ལ། ཆེན་པོ་ནི་སྙིང་པོ་བྱང་ཆུབ་ལ་མཆིས་ཀྱི་བར་ཏེ་ནམ་སངས་རྒྱས་ཀྱི་ཡེ་ཤེས་མངོན་དུ་མ་གྱུར་གྱི་བར་ཏེ་སྐབས་འདིར་དེའི་རྗེས་སུ་འབྲང་བར་བྱ་བ་ཡིན་ནོ། །གང་ལ་སྐྱབས་སུ་འགྲོ་བའི་ཡུལ་ནི། འཇིག་རྟེན་ན་ཆེ་བར་གྲགས་པའི། ཚངས་པའམ། ཁྱབ་འཇུག་གམ། མ་ཧཱ་དེ་ཝ་ལ་སོགས་པ་ཕྱི་རོལ་པ་རྣམས་ལ་གྲགས་པ་དང་། རང་རང་གི་ཡུལ་གྱི་རི་བྲག་ལྗོན་ཤིང་སོགས་ལ་གནས་པའི་ལྷ་ཀླུ་གནོད་སྦྱིན་མི་མ་ཡིན་གྱི་སྡེ་ཚན་རྣམས་དང་། རང་རང་གི་ཕ་མ་གཉེན་འདུན་མཛའ་བཤེས་ལ་སོགས་གང་གིས་ཀྱང་སྐྱོབ་པར་མི་ནུས་ཏེ། རང་ཉིད་འཁོར་བའི་འཇིགས་པ་ལས་མ་གྲོལ་བའི་ཕྱིར་དེ་དག་ནམ་ཡང་སྐྱབས་སུ་བརྟེན་བྱ་མ་ཡིན་ཏེ། མདོ་རྒྱལ་མཚན་དམ་པ་ལས། འཇིགས་པས་སྐྲག་པའི་མི་རྣམས་ནི། །ཕལ་ཆེར་རི་དང་ནགས་ཚལ་དང་། ཀུན་དགའ་ར་བ་མཆོད་རྟེན་དང་། །ལྗོན་ཤིང་དག་ལ་སྐྱབས་འགྲོ་སྟེ། །སྐྱབས་དེ་ལ་ནི་བརྟེན་ནས་སུ། །འཇིགས་པ་ཀུན་ལས་སྐྱོབ་མི་ནུས། །ཞེས་དང་། འཇམ་དཔལ་རྣམ་པར་རོལ་པའི་མདོ་ལས། ཕ་མ་ཁྱེད་ཀྱི་སྐྱབས་མ་ཡིན། །མཛའ་བཤེས་རྩ་ལག་རྣམས་ཀྱང་མིན། །དེ་དག་གིས་ནི་ཁྱོད་བོར་ནས། །ཇི་ལྟར་འདོད་པ་བཞིན་དུ་འགྲོ། །འཇིགས་གྱུར་འཇིགས་པ་སེལ་མཛད་ཅིང་། །སྐྱབས་མེད་སྐྱོབ་པའི་སངས་རྒྱས་དང་། །ཆོས་དང་ཚོགས་མཆོག་དགེ་འདུན་ལ། །དེ་རིང་སྐྱབས་སུ་འགྲོ་བར་གྱིས། །ལྷ་དང་དྲི་ཟ་མི་རྣམས་ལས། །གང་དག་དེ་ལ་སྐྱབས་སོང་བ། །འཇིགས་པ་ཀུན་ལས་ཐར་བར་འགྱུར། །བདེ་བ་རྙེད་པར་དཀའ་བ་མེད། །ཅེས་གསུངས། དེས་ན་གནས་སྐབས་དང་མཐར་ཐུག་གི་འཇིགས་དང་སྡུག་བསྔལ་ལས་སྐྱོབ་ནུས་པ་ནི་སྐྱབས་གནས་དཀོན་མཆོག་གསུམ་འབའ་ཞིག་ཡིན་པས་དེ་ལ་སྐྱབས་སུ་འགྲོ་བར་བྱ་སྟེ། དེ་ལའང་ཐེག་པ་ཆེ་ཆུང་སོགས་གྲུབ་མཐའི་དབྱེ་བས་འདོད་ཚུལ་མང་ཡང་། འདིར་ཐེག་པ་ཆུང་ངུ་དང་ཆེན་པོའི་ལུགས་གཉིས་ལས། ཐེག་པ་ཆུང་ངུ་པས་ནི། སངས་རྒྱས་ནི་མཆོག་གི་སྤྲུལ་པའི་སྐུའོ། །ཆོས་ལུང་དང་རྟོགས་པའི་བདག་ཉིད་གསུང་རབ་ཡན་ལག་བཅུ་གཉིས་ཏེ། ཐེག་དམན་གྱི་སྡེ་སྣོད་དང་། སོ་སོའི་རྒྱུད་ཀྱི་ལམ་དང་ཏིང་ངེ་འཛིན་ལ་སོགས་པའོ། །དགེ་འདུན་ལ་སྐྱེ་འཕགས་གཉིས་ལས། སོ་སོའི་སྐྱེ་བོ་ལ་དགེ་འདུན་ཆུང་ངུ་དགེ་ཚུལ་ཕ་མ་དགེ་བསྙེན་དང་བཅས་ཏེ་འགྲོ་བའི་བསོད་ནམས་ཀྱི་ཞིང་ཡིན་པའི་ཕྱིར་རོ། །ཆེན་པོ་བསྙེན་པར་རྫོགས་པ་སྟེ། དགེ་སློང་གི་དགེ་འདུན་ཆེན་པོ་དང་། ཞེས་སོ། །དེའང་བཞིར་ལོངས་ནས་དགེ་འདུན་འདུས་པ་ཞེས་བྱའོ། །འཕགས་པ་ལ། རྒྱུན་ཞུགས། ཕྱིར་འོང་། ཕྱིར་མི་འོང་། དགྲ་བཅོམ་པའི་ཞུགས་པ་བཅས་ཏེ། དགྲ་བཅོམ་འབྲས་གནས་ནི་སངས་རྒྱས་ཀྱི་ཁོངས་སུ་བསྡུ་བར་འདོད་དོ། །ཐེག་པ་ཆེན་པོ་ལ་གྲགས་པ་ནི། སངས་རྒྱས་སྐུ་གསུམ་གྱི་བདག་ཉིད་དག་པ་གཉིས་ལྡན་མཐར་ཐུག་པ་དོན་གཉིས་ཕུན་སུམ་ཚོགས་པ་སྟེ། རྒྱུད་བླ་མ་ལས། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པ། །མཁྱེན་དང་བརྩེ་དང་ནུས་པར་ལྡན། །དོན་གཉིས་ལྡན་པ་སངས་རྒྱས་ཉིད། །ཅེས་གསུངས་ཏེ། རྒྱུ་རྐྱེན་གྱིས་གསར་དུ་མ་བསྐྱེད་པས་འདུས་མ་བྱས་དང་། འབད་རྩོལ་གྱིས་གཡོ་བ་མེད་པས་ལྷུན་གྱིས་གྲུབ་པ་དང་། སངས་རྒྱས་ཉིད་ཀྱི་རང་བྱུང་གི་ཡེ་ཤེས་ཀྱིས་གཟིགས་པས་གཞན་རྐྱེན་གྱིས་རྟོགས་པ་མིན་པ་སྟེ། རང་དོན་ཆོས་སྐུའི་ཡོན་ཏན་གསུམ་དང་། སྔ་མ་གསུམ་གྱི་དོན་ཕྱིན་ཅི་མ་ལོག་པར་ཐུགས་སུ་ཆུད་པའི་མཁྱེན་པ་དང་། གདུལ་བྱ་གཞན་རྣམས་དེ་ལ་འགོད་པར་བཞེད་པའི་བརྩེ་བ་དང་། གཞན་རྒྱུད་ཀྱི་སྡུག་བསྔལ་རྒྱུ་འབྲས་སེལ་བའི་ནུས་པ་སྟེ། གཞན་དོན་གཟུགས་སྐུའི་ཡོན་ཏན་གསུམ་བཅས་དྲུག་དང་། དབྱེ་གཞི་གཉིས་སོ་སོར་བགྲངས་པའི་ཡོན་ཏན་བརྒྱད་དང་ལྡན་པ་ཉིད་དོ། །ཆོས་ནི་ངོ་བོ་སྨྲ་བསམ་བརྗོད་དུ་མེད་པ། རང་བཞིན་སངས་རྒྱས་སུ་འགྲོ་བའི་ལམ་མམ་གཉེན་པོ་ཡིན་པ་རྣམ་པ་ལམ་དང་འགོག་པ་གཉིས་ཀྱི་མཚན་ཉིད་ཅན་དོན་གྱི་ཆོས་དང་། ཚིག་གི་ཆོས་གསུང་རབ་ཡན་ལག་བཅུ་གཉིས་ཏེ། དེ་ཉིད་ལས། བསམ་མེད་གཉིས་མེད་རྟོག་མེད་པ། །དག་གསལ་གཉེན་པོའི་ཕྱོགས་ཉིད་ཀྱིས། །གང་ཞིག་གང་གིས་ཆགས་བྲལ་བ། །བདེན་གཉིས་མཚན་ཉིད་ཅན་དེ་ཆོས། །ཆགས་བྲལ་ཉིད་ནི་འགོག་པ་དང་། །ལམ་གྱི་བདེན་པ་དག་གིས་བསྡུས། །ཞེས་གསུངས་ཏེ། བརྡ་དང་ཐ་སྙད་དཔེ་དང་གཏན་ཚིགས་སོགས་ཐ་སྙད་ཀྱི་ཤེས་པས་གཞལ་ཡུལ་མིན་པའི་ཕྱིར་བསམ་དུ་མེད་པ་དང་། ལས་དང་ཉོན་མོངས་པ་ཞི་བས་གཉིས་མེད་དང་། དེའི་རྒྱུ་ཚུལ་མིན་ཡིད་བྱེད་ཀྱི་རྟོག་པ་དང་བྲལ་བས་རྟོག་མེད་དེ། གང་ཞིག་ཆགས་པ་དང་བྲལ་བ་འགོག་བདེན་གྱི་ཡོན་ཏན་གསུམ་དང་། ཉོན་སྒྲིབ་ཀྱི་དྲི་མ་མེད་པས་རྣམ་པར་དག་པ། ཤེས་སྒྲིབ་དང་བྲལ་བས་ཡེ་ཤེས་ཀྱི་སྣང་བ་གསལ་བ། དུག་གསུམ་འཇོམས་པས་གཉེན་པོའི་ཕྱོགས་སུ་གྱུར་པ་སྟེ། གང་གིས་ཆགས་པ་དང་བྲལ་བར་བྱེད་པ་ལམ་བདེན་གྱི་ཡོན་ཏན་གསུམ་བཅས་དྲུག་དང་། དབྱེ་གཞི་སོ་སོར་བསྒྲངས་པའི་ཡོན་ཏན་བརྒྱད་དང་ལྡན་པ་ནི་ཆོས་དཀོན་མཆོག་གོ །ལུང་གི་ཆོས་གསུང་རབ་ཡན་ལག་བཅུ་གཉིས་ནི། མདོ་ཡི་སྡེ་དང་། དབྱངས་སུ་བསྙད་པ་དང་། ལུང་དུ་བསྟན་པ་དང་། ཚིགས་སུ་བཅད་པ་དང་། ཆེད་དུ་བརྗོད་པ་དང་། རྟོགས་པ་བརྗོད་པ་དང། དེ་ལྟ་བུ་བྱུང་བ་དང་། གླིང་གཞི་དང་། ཤིན་ཏུ་རྒྱས་པ་དང་། སྐྱེས་རབས་དང་། གཏན་ལ་དབབ་པ་དང་། རྨད་དུ་བྱུང་བའི་སྡེ་རྣམས་སོ། །དེ་ལ་འགོག་པ་གཉིས་ནི་དྲི་མ་སྔར་ཡོད་གཉེན་པོས་བསལ་ཏེ་སྤྲོས་པ་མེད་པར་སོ་སོར་བརྟ གས་པའི་འགོག་པ་དང་། དྲི་མའམ་སྤྲོས་པ་ནམ་མཁའ་ལྟར་རང་བཞིན་གྱིས་མེད་པའི་དོན་ལ་མཉམ་པར་འཇོག་པ་སོ་སོར་བརྟགས་མིན་གྱི་འགོག་པའོ། །ལམ་ནི་ཚོགས་སྦྱོར་མཐོང་སྒོམ་གྱི་རྟོགས་པའི་ཆའོ། །མདོར་ན་བདེན་གཉིས་ཀྱི་མཚན་ཉིད་འཛིན་པ་ལུང་དང་རྟོགས་པའི་ཆོས་ཐམས་ཅད་དོ། །དགེ་འདུན་ནི་སེམས་ཀྱི་རང་བཞིན་འོད་གསལ་བའི་དོན་གསར་དུ་མཐོང་བ་འཕགས་པའི་ས་བཅུ་ལ་གནས་པ་སྟེ། དེ་ཉིད་ལས། ཇི་ལྟ་ཇི་སྙེད་ནང་གི་ནི། །ཡེ་ཤེས་གཟིགས་པ་དང་ལྡན་ཕྱིར། བློ་ལྡན་ཕྱིར་མི་ལྡོག་པའི་ཚོགས། །བླ་མེད་ཡོན་ཏན་དང་ལྡན་ཉིད། །ཅེས་གསུངས་ཏེ། གདོད་མ་ནས་རྣམ་པར་དག་པའི་ཆོས་དབྱིངས་བདེ་གཤེགས་སྙིང་པོ་ཉིད་ཕྱིན་ཅི་མ་ལོག་པར་གཟིགས་པ་ཇི་ལྟ་བ་དང་། དེ་ཉིད་སེམས་ཅན་མཐའ་ཡས་པ་ཀུན་གྱི་ཆོས་ཉིད་དུ་རང་བཞིན་མཉམ་པར་གཟིགས་པ་ཇི་སྙེད་པ་མཁྱེན་པ། དེ་གཉིས་གཞན་དང་ཐུན་མོང་མིན་པར་ནང་སོ་སོ་རང་གི་ཡེ་ཤེས་ཀྱིས་གཟིགས་པ་སྟེ་རིག་པའི་ཡོན་ཏན་གསུམ་དང་། དེ་དག་ཀྱང་ཆགས་པ་ཉོན་མོངས་པ། ཐོགས་པ་ཤེས་བྱའི་སྒྲིབ་པ། དམན་པ་ཉན་རང་གི་སྒྲིབ་པ་སྟེ། སྒྲིབ་པ་གསུམ་ལས་གྲོལ་ཞིང་རྣམ་པར་དག་པ་སྟེ་གྲོལ་བའི་ཡོན་ཏན་གསུམ་དང་། ཁ་ཅིག་གིས་དབྱེ་གཞི་སོ་སོར་བསྒྲངས་པའི་ཡོན་ཏན་བརྒྱད་དང་ལྡན་པར་ཡང་བཞེད་ལ། དེ་ལྟ་བུའི་བློ་ལྡན་བྱང་ཆུབ་སེམས་དཔའ་ཕྱིར་མི་ལྡོག་པའི་ཚོགས་ནི་ཉན་རང་ལས་མཆོག་ཏུ་གྱུར་པའི་བླ་ན་མེད་པའི་ཡོན་ཏན་དང་ལྡན་པ་ཉིད་དོ། །གཞན་ཡང་མདུན་དུ་བཞག་པའི་སངས་རྒྱས་ཞེས་མདོ་ལས་གསུངས་པའི་ཕྱིར་ཆོས་དང་དགེ་འདུན་ལ་ཡང་དེས་འགྲེ་བས། མདུན་བཞག་གི་སངས་རྒྱས་ནི་སྐུ་གཟུགས་དང་མཆོད་རྟེན། ཆོས་ནི་མདོ་སྔགས་ཀྱི་གླེགས་བམ་ཡི་གེའི་གཟུགས་སུ་སྣང་བ། དགེ་འདུན་ནི་སོ་སྐྱེའི་དགེ་འདུན་ཚུལ་ཁྲིམས་དང་ལྡན་པ་དག་སྟེ། འདི་རྣམས་ཀྱང་གདུལ་བྱའི་དབང་གིས་སངས་རྒྱས་ཉིད་དེ་དང་དེར་སྤྲུལ་པ་ཡིན་པས་སྐྱབས་ཀྱི་ཡུལ་དུ་གཟུང་བར་བྱ་སྟེ། སངས་རྒྱས་ཕལ་པོ་ཆེ་ལས། ཀྱེ་དེ་བཞིན་གཤེགས་པའི་སྤྲུལ་པ་ནི་ཚད་མེད་དེ། འགྲོ་བ་གང་ལ་གང་གིས་འདུལ་བ་ལ། དེ་དང་དེའི་ཁ་དོག་དང་མིང་གིས་དོན་མཛད་དོ། །ཞེས་དང་། འཇམ་དཔལ་རྩ་རྒྱུད་ལས། སྐུ་གཟུགས་རྣམ་པ་མང་པོ་དེར་སྤྲུལ་ནས། །འགྲོ་བ་དགེ་ལ་སྦྱོར་བའི་དོན་མཛད་དོ། །ཞེས་དང་། ཕལ་ཆེན་ལས། ལྔ་བརྒྱ་ཐ་མར་གྱུར་པ་ན། །ང་ཉིད་ཡི་གེའི་གཟུགས་སུ་སྣང་། །ང་ཡིན་སྙམ་དུ་ཡིད་བྱོས་ལ། །དེ་ཚེ་ང་ལ་གུས་པ་གྱིས། །ཞེས་དང་། མྱང་འདས་ལས། ང་ནི་སྙིགས་མའི་དུས་ཀྱི་ཚེ། །དགེ་བའི་བཤེས་གཉེན་ཉིད་སྤྲུལ་ནས། །ཁྱོད་ལ་སོགས་པའི་དོན་བྱེད་འགྱུར། །ཞེས་གསུངས་པ་ཡིན་ནོ། །ཅིའི་ཕྱིར་དཀོན་མཆོག་ཅེས་བྱ་སྙམ་ན། རྒྱུད་བླ་མ་ལས། འབྱུང་བ་དཀོན་ཕྱིར་དྲི་མེད་ཕྱིར། །མཐུ་ལྡན་ཕྱིར་དང་འཇིག་རྟེན་གྱི། རྒྱན་གྱུར་ཕྱིར་དང་མཆོག་ཉིད་ཕྱིར། འགྱུར་བ་མེད་ཕྱིར་དཀོན་མཆོག་ཉིད། །ཅེས་གསུངས་པས། རཏྣའི་སྒྲས་ལས་དྲང་ན་ནོར་བུ་རིན་པོ་ཆེ་དང་ཆོས་མཐུན་པ་དྲུག་གིས་བསྟན་ཏེ། བསྐལ་པ་མང་པོར་དགེ་བའི་རྩ་བ་མ་བསྐྲུན་པ་རྣམས་དང་འཕྲད་པར་མི་འགྱུར་བའི་ཕྱིར་འབྱུང་བ་དཀོན་པ་དང་། རྣམ་པ་ཐམས་ཅད་དུ་དྲི་མ་དང་བྲལ་བའི་ཕྱིར་དྲི་མ་མེད་པ་དང་། མངོན་པར་ཤེས་པ་དྲུག་སོགས་ཡོན་ཏན་གྱི་མཐུ་བསམ་གྱིས་མི་ཁྱབ་པ་དང་ལྡན་པའི་ཕྱིར་མཐུ་དང་ལྡན་པ་དང་། འགྲོ་བ་ཐམས་ཅད་ཀྱི་བསམ་པ་དགེ་བའི་རྒྱུ་ཡིན་པའི་ཕྱིར་འཇིག་རྟེན་གྱི་རྒྱན་དུ་གྱུར་པ་དང་། འཇིག་རྟེན་ལས་འདས་པའི་ཕྱིར་མཆོག་ཏུ་གྱུར་པ་དང་། འདུས་མ་བྱས་ཀྱི་རང་བཞིན་ཡིན་པའི་ཕྱིར་འགྱུར་བ་མེད་པ་ཉིད་ཀྱིས་སོ། །དེ་ལྟར་གསུམ་དུ་འཇོག་པའི་ཚུལ་ཡང་། དེ་ཉིད་ལས། སྟོན་པ་བསྟན་པ་སློབ་དོན་གྱིས། །ཐེག་པ་གསུམ་དང་བྱེད་གསུམ་ལ། །མོས་པ་རྣམས་ཀྱི་དབང་བྱས་ནས། །སྐྱབས་གསུམ་རྣམ་པར་གཞག་པ་ཡིན། །ཞེས་གསུངས། དེ་ཡང་གནས་སྐབས་སུ་གདུལ་བྱ་རིམ་གྱིས་གཞུག་པའི་དོན་དུ་ཐེག་པ་གསུམ་དང་བྱེད་པ་གསུམ་སྟེ་གང་ཟག་དྲུག་གི་དབང་དུ་བྱས་ཏེ་སྐྱབས་གསུམ་དུ་འཇོག་པར་མཛད་པ་ཡིན་ཏེ། ཐེག་པ་གསུམ་ལས་ཐེག་པ་ཆེན་པོས་རྫོགས་བྱང་ཉིད་དོན་དུ་གཉེར་བ་དང་། བྱེད་པ་གསུམ་ལས་སངས་རྒྱས་ནི་རྐང་གཉིས་རྣམས་ཀྱི་མཆོག་ཏུ་རིག་ནས་ཕྱག་མཆོད་སོགས་བྱ་བ་བྱེད་པར་མོས་པ་རྣམས་ཀྱི་ངོར་སངས་རྒྱས་ཉིད་སྐྱབས་སུ་བཞག་ལ། དེ་བཞིན་དུ་རང་རྒྱལ་གྱི་ཐེག་པ་རང་གི་རྟེན་འབྲེལ་གྱི་ཆོས་ཟབ་མོ་རྟོགས་ཤིང་ཐོབ་པར་འདོད་པ་དང་། ཆོས་ནི་ཆགས་པ་དང་བྲལ་བའམ་བྲལ་བྱེད་ཀྱི་མཆོག་ཏུ་རིག་ནས་ཀློག་པ་སོགས་བྱ་བ་བྱེད་པར་མོས་པ་རྣམས་ཀྱི་ངོར་ཆོས་དང་། ཉན་ཐོས་ཀྱི་ཐེག་པ་བ་གཞན་གྱིས་བསྟན་པའི་རྗེས་སུ་འབྲངས་ནས་ཟུང་བཞི་ཡ་བརྒྱད་ཀྱི་འབྲས་བུ་ཐོབ་པར་འདོད་པ་དང་། དགེ་འདུན་ནི་ཚོགས་ཀྱི་མཆོག་ཏུ་རིག་ནས་མཁོ་བའི་ཡོ་བྱད་བསྟབ་པ་སོགས་ཀྱི་བྱ་བ་བྱེད་པར་མོས་པ་རྣམས་ཀྱི་ངོར་དགེ་འདུན་ཉིད་སྐྱབས་སུ་བཞག་པ་སྟེ། མདོར་ན་རྒྱུའི་ཐེག་པའི་སྐབས་སུ་སྐྱབས་སུ་བསྟེན་བྱའི་ཡུལ་ནི། གཞན་རྒྱུད་ཀྱིས་བསྡུས་པའི་དཀོན་མཆོག་གསུམ་ཡིན་ཏེ། ཡིད་བཞིན་རིན་པོ་ཆེའི་མཛོད་ལས། སྐྱབས་འགྲོའི་ཡུལ་ནི་དཀོན་མཆོག་གསུམ་ཉིད་དེ། །རྒྱུ་ཡི་ཡུལ་གྱུར་གཞན་རྒྱུད་བྱོན་ཟིན་པའི། །སངས་རྒྱས་སྐུ་གསུམ་སྤངས་རྟོགས་ཕྲིན་ལས་ལྡན། །ཆོས་ནི་འགོག་ལམ་བདེན་པ་རྣམ་པ་གཉིས། །དགེ་འདུན་སར་ཞུགས་རྒྱལ་སྲས་འཕགས་རྣམས་ཏེ། །གནས་སྐབས་དེ་གསུམ་མཚུངས་པར་སྐྱབས་སུ་འགྲོ། །ཞེས་གསུངས། དེ་གསུམ་ལ་སྐྱབས་སུ་ཇི་ལྟར་འགྲོ་ན། སངས་རྒྱས་ལ་སྟོན་པ་ཞུ་སྟེ། བླང་དོར་གྱི་གནས་མི་ཤེས་པ་སྟོན་མཁན་ཞུ་བ་དང་། ཆོས་ལ་སྐྱབས་དངོས་ཞུ་སྟེ། སངས་རྒྱས་ཀྱིས་བླང་དོར་བསྟན་པ་དེ་ཆོས་ཡིན་པས། དེའི་ནང་ནས་འབྱུང་བ་ལྟར་ལག་ལེན་ལ་བཏབ་པས་འཇིགས་པ་ཀུན་ལས་ཐར་པའི་བདེ་བ་མཆོག་དེ་ཐོབ་པའི་ཕྱིར་རོ། །དགེ་འདུན་ལ་ཟླ་གྲོགས་ཞུ་སྟེ། རྒྱུས་མེད་ཀྱི་ལམ་དུ་འགྲོ་བ་ལ་ལམ་སྣ་འཚོལ་བ་ཡིན། དཔེར་ན་ལམ་སྣ་བ་གར་སོང་ལ་འགྲོ་དགོས་པ་ལྟར་དེ་རྣམས་ཀྱིས་གང་མཛད་ཀྱི་རྗེས་སུ་སློབ་དགོས་པ་ཡིན། དངོས་ནི་འཕགས་པ་མངོན་སུམ་དུ་མཇལ་བའི་དབང་དུ་བྱས་མོད། འཕགས་པ་ལས་གཅིག་ལས་གཅིག་ཏུ་བརྒྱུད་པའི་མན་ངག་དང་ལག་ལེན་གྱི་རྒྱུན་ཡོད་པའི་སོ་སྐྱེའི་དགེ་འདུན་རྣམ་དག་ཡོད་ན་དེ་ལ་ཡང་བློ་གཏད་འཆར་རུང་སྟེ། དེང་སང་ནི་འདི་ཉིད་གཙོ་ཆེ་སྟེ། མདོ་རྒྱུད་ཀུན་ནས་དགེ་བའི་བཤེས་གཉེན་ཉིད་ལམ་སྟོན་གྱི་སྐྱེལ་མ་མཆོག་ཏུ་གསུངས་པ་ཡིན། གཞན་ཡང་སངས་རྒྱས་ནི་མཁྱེན་བརྩེ་ནུས་གསུམ་མཐའ་ཡས་པ་མངའ་བའི་ཕྱིར་ཏེ། མཁྱེན་པས་སྐྱབས་སུ་སོང་བའི་སེམས་ཅན་ཐམས་ཅད་འཇིགས་པ་དང་སྡུག་བསྔལ་ལས་དང་ཉོན་མོངས་པ་ཐམས་ཅད་ལས་སྐྱོབ་པའི་ཐབས་མ་ལུས་པ་མཁྱེན། བརྩེ་བས་སེམས་ཅན་གྱི་དོན་ལ་བཏང་སྙོམས་མི་མཛད་པར་རྟག་ཏུ་སྐྱོབ་པར་མཛད། ནུས་པས་གདུལ་བྱ་རང་རང་གི་སྐལ་བ་དང་འཚམ་པར་སྐྱོབ་ནུས་པའི་ཕྱིར་སངས་རྒྱས་ཀྱིས་སྐྱབས་ཐུབ་པ་ཡིན། དགེ་འདུན་འཕགས་པ་ཡང་རླབས་ཆེ་ཆུང་གི་ཁྱད་ཙམ་མ་གཏོགས་དེ་དང་ཕྱོགས་མཚུངས་ཏེ། མཁྱེན་བརྩེ་ནུས་གསུམ་ཁྱད་པར་ཅན་མངའ་བས་སྐྱབས་སུ་འོས་ཤིང་སྐྱོབ་པར་མཛད་པ་ཡིན། སྐྱོབ་ལུགས་ཀྱི་གཙོ་བོ་ནི། སངས་རྒྱས་དགེ་འདུན་དང་བཅས་པས་གསུངས་པའི་དམ་པའི་ཆོས་ལྟར་དུ་བསྒྲུབས་པས། རྒྱུ་ཉོན་མོངས་སྤངས་ན། འབྲས་བུ་སྡུག་བསྔལ་དང་འཇིགས་པ་ཐམས་ཅད་ལས་གྲོལ་འགྲོ་བའི་ཚུལ་འདི་ཡིན། སྐྱོབ་ལུགས་ཀྱི་རྣམ་གྲངས་གཞན་ཕལ་པ་ནི། འཇིགས་དང་སྡུག་བསྔལ་གྱི་རྒྱུ་ལས་ཉོན་སྤོང་བ་ཁོ་ན་ལ་མ་ལྟོས་ཀྱང་། སངས་རྒྱས་ཀྱི་མཚན་བཟུང་བ་དང་། ཕྱག་འཚལ་བ་དང་། གསོལ་བ་བཏབ་པ་ཙམ་གྱིས་ཀྱང་གནས་སྐབས་འཇིགས་པ་བརྒྱད་དམ་བཅུ་དྲུག་སོགས་ཉེར་འཚེ་ཐམས་ཅད་ལས་དངོས་སུ་སྐྱོབ་པར་མཛད་ཅིང་། ངན་སོང་དུ་སྐྱེ་བར་འགྱུར་བ་ཡང་གཏན་ནས་ཟློག་པའམ། ཐག་སྲིང་བར་བྱེད་པ་སོགས་སྒོ་ཐམས་ཅད་ནས་སྐྱོབ་པར་མཛད་པ་ཡིན། དེར་མ་ཟད་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐབས་དང་སྨོན་ལམ་དང་ཏིང་ངེ་འཛིན་དང་ཡེ་ཤེས་ཀྱི་རྣམ་པར་འཕྲུལ་པ་ནི་ཚད་མེད་དེ། ཆོ་འཕྲུལ་རྣམ་པར་བསྟན་པའི་མདོ་ལས། ཀྱེ་རྒྱལ་བའི་སྲས། དེ་བཞིན་གཤེགས་པའི་ཐབས་ལ་མཁས་པ་དང་། སེམས་ཅན་ཡོངས་སུ་སྨིན་པར་བྱ་བ་ནི་མང་ངོ་། །སེམས་ཅན་གྱི་བསམ་པ་ཇི་ལྟ་བུ། ཇི་ལྟར་འདུལ་བ་དང་། དགེ་བའི་རྩ་བ་ཇི་ལྟ་བུ་དང་། སེམས་ཅན་རྣམས་ཀྱི་མོས་པ་སྣ་ཚོགས་ཀྱི་སྤྱོད་པ་མཁྱེན་ནས་ཆོས་སྟོན་ཏེ། སེམས་ཅན་ཁ་ཅིག་ནི་བྱང་ཆུབ་སེམས་དཔས་འདུལ། ཁ་ཅིག་ནི་ཉན་ཐོས་ཀྱིས་འདུལ། ཁ་ཅིག་ནི་རང་སངས་རྒྱས་ཀྱིས་འདུལ། ཁ་ཅིག་ནི་ལྷས་འདུལ། ཁ་ཅིག་ནི་བརྒྱ་བྱིན་གྱིས་འདུལ། ཁ་ཅིག་ནི་ཚངས་པས་འདུལ། ཁ་ཅིག་ནི་ཀླུས་འདུལ། ཁ་ཅིག་ནི་རྫུ་འཕྲུལ་ཆེན་པོས་འདུལ། ཁ་ཅིག་ནི་རྒྱལ་པོས་འདུལ། ཁ་ཅིག་ནི་ཏིང་ངེ་འཛིན་གྱིས་འདུལ། ཁ་ཅིག་ནི་ཆོས་ཉན་པས་འདུལ། ཁ་ཅིག་ནི་ཆོ་འཕྲུལ་གྱིས་འདུལ། ཁ་ཅིག་ནི་དེ་བཞིན་གཤེགས་པ་མྱ་ངན་ལས་འདས་པས་འདུལ། ཁ་ཅིག་ནི་རིང་བསྲེལ་གྱིས་འདུལ། ཁ་ཅིག་ནི་མཆོད་རྟེན་བྱེད་དུ་འཇུགགཙུག་ལག་ཁང་དང་། སྐྱེད་མོས་ཚལ་བྱེད་དུ་གཞུག་པའི་དགེ་བའི་རྩ་བ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་སྐུ་གཟུགས་བྱེད་དུ་གཞུག་པ་དང་། རི་མོ་དང་། གསེར་དང་དངུལ་དང་ར་གན་གྱི་སྐུ་གཟུགས་བྱེད་དུ་གཞུག་པའི་དགེ་བའི་རྩ་བ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་དགེ་སློང་གི་དགེ་འདུན་ལ་མཆོད་པ་དང་བཀུར་སྟི་བྱ་བའི་དགེ་བའི་རྩ་བ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་མདོ་སྡེ་འདྲི་བ་དང་འདྲིར་འཇུག་པ་དང་། བསླབ་པ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་མར་མེ་དང་། སྤོས་དང་། མེ་ཏོག་དང་། དྲི་དང་། ཕྲེང་བ་དང་། དོ་ཤལ་ལ་སོགས་པས་བརྒྱན་པ་ལ་སྤྲོ་བ་བསྐྱེད་པས་འདུལ་བ་ཡིན་ཏེ། དོན་དམ་པ་མཁས་པའི་ཆོས་དང་ལྡན་པ་དང་། མྱ་ངན་ལས་འདས་པའི་ཆོས་དང་ལྡན་པ་ནི་མ་ཡིན་ནོ། །ཞེས་དང་། ཕལ་པོ་ཆེ་ལས། རྩྭ་སྐམ་སྤུངས་པ་རི་བོ་མཆོག་ཙམ་ཡོད་གྱུར་ཀྱང་། །མེ་མདག་ཡུང་འབྲུ་ཙམ་གྱིས་དེ་ཉིད་ཚིག་འགྱུར་ཏེ། དེ་བཞིན་བདེ་གཤེགས་རྣམས་ལ་མཆོད་པ་གཅིག་བྱས་པར། །ཉོན་མོངས་ཐམས་ཅད་ཚིག་བྱེད་མྱ་ངན་འདས་རྒྱུར་འགྱུར། །རི་བོ་ཁ་བ་ཅན་ལ་མཐོང་ལེགས་སྨན་ཡོད་དེ། །དེ་ཉིད་མཐོང་ཞིང་ཐོས་པས་ནད་རྣམས་ཞི་བར་བྱེད། །དེ་བཞིན་སྟོབས་བཅུ་རྣམས་ནི་མཐོང་ངམ་ཐོས་གྱུར་ཀྱང་། །ཡོན་ཏན་ཀུན་ལྡན་སངས་རྒྱས་ཡེ་ཤེས་ཐོབ་པར་འགྱུར། །ཞེས་དང་། དམ་ཆོས་པདྨ་དཀར་པོ་ལས། གང་གི་རྩིག་ངོས་གཟུགས་ཀྱི་རི་མོ་དག །བསོད་ནམས་བརྒྱ་མཚན་ཡོངས་སུ་རྫོགས་པའི་སྐུ། །བདག་གིས་བྲིས་སམ་འབྲི་{ འདྲི}རུ་བཅུག་ཀྱང་རུང་། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །སྐྱེས་བུ་དག་གམ་འོན་ཏེ་གཞོན་ནུའང་། །གང་དག་ལ་ལས་དེ་ནི་སློབ་པའི་ཚེ། །རྩེད་མོ་དགའ་དང་བསང་བར་བྱེད་པ་ན། རྩིག་ངོས་སེན་མོས་ཤིང་བུས་གཟུགས་བྲིས་པ། །དེ་དག་ཐམས་ཅད་བྱང་ཆུབ་ཐོབ་འགྱུར་ཏེ། །དེ་དག་ཐམས་ཅད་སྙིང་རྗེ་ཅན་དུ་འགྱུར། །ཐམས་ཅད་ཀྱང་ནི་སྲོག་ཆགས་བྱེ་བ་སྒྲོལ། །བྱང་ཆུབ་སེམས་དཔའ་མང་པོ་ཡང་དག་འཛུད། །ཅེས་དང་། གསལ་རྒྱལ་གྱིས་ཞུས་པ་ལས། བཅོམ་ལྡན་འདས་ཀྱི་མཆོད་རྟེན་རྣམས་དང་ནི། །སྐུ་གཟུགས་རྣམས་ལ་རྡུལ་ཕྲན་ཅི་སོང་བ། །དེ་ཡི་གྲངས་སྙེད་དེ་བྱེད་མི་རྣམས་ཀྱིས། །ལྷ་ཡུལ་ས་སྟེང་ངེས་པར་རྒྱལ་སྲིད་འཐོབ། །གཟུགས་དང་གཟུགས་མེད་ཁམས་ཀྱི་ཏིང་ངེ་འཛིན། །ཕུན་སུམ་ཚོགས་པའི་ས་མཆོག་ཀུན་མྱོང་ནས། །ཐ་མར་སྐྱེ་དང་རྒ་ལ་སོགས་པ་ཡི། །སྡུག་བསྔལ་མེད་པའི་སངས་རྒྱས་གོ་འཕང་ཐོབ། །ཅེས་སོགས་དང་། འོད་ཟེར་དྲི་མེད་ཀྱི་གཟུངས་ལས། ཡང་གང་ལ་ལ་ཞིག་གིས་གསང་སྔགས་ཡི་གེར་བྲི་བ་གཞན་གྱི་མིང་ནས་སྨོས་ཏེ། མཆོད་རྟེན་གྱི་ནང་དུ་བཅུག་ལ་ནན་ཏན་དུ་མཆོད་པ་བྱས་ན་ཤི་བ་གང་ཡིན་པ་དེ་ངན་སོང་གི་གནས་ནས་ཐར་ཏེ་མཐོ་རིས་སུ་སྐྱེ་བར་འགྱུར་རོ། །ཡང་ན་དགའ་ལྡན་གྱི་ལྷའི་རིས་སུ་སྐྱེ་བར་འགྱུར་ཏེ། སངས་རྒྱས་ཀྱི་བྱིན་གྱིས་བརླབས་ཀྱིས་ངན་སོང་དུ་ལྟུང་བར་མི་འགྱུར་རོ། །རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་མཆོད་རྟེན་དེ་ལ་བསྐོར་བ་བྱས་སམ། མཆོད་པ་ཕུལ་ཡང་རུང་སྟེ། དེ་བཞིན་གཤེགས་པའི་བྱིན་གྱིས་བརླབས་ཀྱིས་བླ་ན་མེད་པའི་བྱང་ཆུབ་ཀྱི་ལམ་ལས་ཕྱིར་མི་ལྡོག་པར་འགྱུར་རོ། །སྔོན་གྱི་ལས་ཀྱི་སྒྲིབ་པ་རྣམས་ཀྱང་མ་ལུས་པ་འབྱང་བར་འགྱུར་རོ། །ཐ་ན་བྱ་དང་རི་དྭགས་སོགས་ཏེ་གང་དག་ལ་མཆོད་རྟེན་དེའི་གྲིབ་མ་ཕོག་པ་དེ་དག་ཀྱང་ནམ་ཡང་དུད་འགྲོ་ལ་སོགས་པ་ངན་སོང་གི་གནས་སུ་སྐྱེ་བར་མི་འགྱུར་རོ། །གང་ལ་ལ་མཚམས་མེད་པ་ལྔའི་སྡིག་པ་ཆེན་པོ་དང་ལྡན་པ་ཡང་མཆོད་རྟེན་དེ་ལ་རེག་གམ། དེའི་གྲིབ་མ་ཕོག་ཀྱང་རུང་སྟེ། དེའི་སྡིག་པ་ཐམས་ཅད་བྱང་ཞིང་ཟད་པར་འགྱུར་རོ། །ཞེས་དང་། ཡང་གང་ལ་ལ་ཞིག་གིས་མཆོད་རྟེན་འདི་ལྟ་བུ་རྨི་ལམ་དུ་རྨིས་སམ། རྒྱང་ནས་མཐོང་ངམ། དྲིལ་བུའི་སྒྲ་ཐོས་སམ། མཆོད་རྟེན་བཞེངས་པ་རྣ་བར་གཏམ་ཐོས་པ་དེ་དག་ཀྱང་མཚམས་མེད་པ་ལྔ་ལ་སོགས་ཏེ། སྡིག་པ་དང་སྒྲིབ་པ་ཐམས་ཅད་བྱང་སྟེ། རྟག་ཏུ་དེ་བཞིན་གཤེགས་པ་རྣམས་ཀྱིས་བསྲུང་བ་དང་། རྗེས་སུ་དགོངས་པ་མཛད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ལམ་ཡོངས་སུ་དག་པ་ཐོབ་པར་འགྱུར་རོ། །ཞེས་དང་། གཞན་ཡང་གསང་བ་རིང་བསྲེལ་ཟ་མ་ཏོག་གི་གཟུངས་དང་། སྒྲིབ་སེལ་གྱི་གཟུངས་དང་། རྟེན་ཅིང་འབྲེལ་བར་འབྱུང་བའི་མདོ་དང་། གཙུག་ཏོར་རྣམ་པར་རྒྱལ་བའི་མདོ་སོགས་ལས་ཀྱང་ཚུལ་དེ་དང་མཐུན་པར་གསུངས་ཤིང་། ཆོ་འཕྲུལ་རྣམ་པར་བསྟན་པའི་མདོ་ལས། འཛམ་བུའི་གླིང་འདི་དེ་བཞིན་གཤེགས་པའི་རིང་བསྲེལ་གྱི་མཆོད་རྟེན་རིན་པོ་ཆེ་སྣ་བདུན་ལས་བྱས་པས་གང་བར་བགྱིས་ཏེ་ལོ་འབུམ་དུ་ལྷའི་ཡོ་བྱད་སྣ་ཚོགས་པས་མཆོད་པ་དང་། འཛམ་བུ་གླིང་གི་སེམས་ཅན་ཐམས་ཅད་འཕགས་པའི་ལམ་ཡན་ལག་བརྒྱད་དང་ལྡན་པ་ལ་བཞག་ཅིང་། དེ་དག་ལ་ལོ་སྟོང་དུ་ཡོ་བྱད་ཐམས་ཅད་ཀྱིས་མི་བྲེལ་བར་མཆོད་པ་ལས་ཆོས་ཀྱི་རྣམ་གྲངས་འདི་ལས་ཚིགས་སུ་བཅད་པ་གཅིག་འབྲི་འཆང་ཉན་ཀློག་གི་ཕན་ཡོན་ཆེ་བར་གསུངས་པ་དང་། དེ་བཞིན་གཤེགས་པའི་སྙིང་པོ་བསྟན་པའི་མདོ་ལས། མདོ་དེ་ཉིད་འཆད་ཉན་འབྲི་འཆང་བྱས་མ་ཐག་ཏུ་བྱེད་པ་པོ་དེས་བྱང་ཆུབ་ཐོབ་བོ་སྙམ་དུ་འདུ་ཤེས་བསྐྱེད་ཅིང་ལྷ་དང་བཅས་པའི་འཇིག་རྟེན་གྱིས་ཕྱག་བྱ་བའི་འོས་སུ་གསུངས་པ་དང་། བྱང་ཆུབ་སེམས་དཔའི་སྤྱོད་པ་བསྟན་པའི་མདོ་ལས། བྱང་ཆུབ་སེམས་དཔའ་གང་གིས་བསྐལ་པ་འབུམ་གྱི་བར་དུ་ཐབས་ལ་མཁས་པ་མེད་པར་ཕ་རོལ་དུ་ཕྱིན་པ་དྲུག་ལ་སྤྱད་པ་བས་ཆོས་ཀྱི་རྣམ་གྲངས་འདི་སོམ་ཉི་དང་བཅས་པས་ཐོས་པ་བསོད་ནམས་ཆེ་བར་གསུངས་པ་སོགས་མཐའ་ཡས་ཤིང་། སྡུད་པ་ཚིགས་སུ་བཅད་པ་ལས་ཀྱང་། ལ་ལས་བདེ་གཤེགས་མྱ་ངན་འདས་པར་གྱུར་པའི་ཚེ། །མཆོད་རྟེན་རིན་ཆེན་བདུན་ལས་བྱས་ཤིང་མཆོད་བྱེད་ལ། །བདེ་བར་གཤེགས་པའི་མཆོད་རྟེན་དེ་དག་གངྒཱ་ཡི། །བྱེ་མ་སྙེད་ཀྱིས་བྱེ་བ་ཕྲག་སྟོང་ཞིང་བཀང་སྟེ། །ཡོངས་སུ་བརྟག་བཟུང་ཞིང་རྣམས་བྱེ་བ་མཐའ་ཡས་ན། །སེམས་ཅན་ཇི་སྙེད་འཁོད་པ་དེ་དག་ཐམས་ཅད་ཀྱིས། །ལས་གཞན་མི་བྱེད་ལྷ་ཡི་མེ་ཏོག་སྤོས་རབ་དང་། བྱུག་པས་དུས་གསུམ་བསྐལ་པའམ་དེ་བས་ལྷག་མཆོད་པ། །གང་ཞིག་གང་ལས་རྣམ་འདྲེན་སྟོབས་བཅུ་འབྱུང་འགྱུར་བ། །བདེ་བར་གཤེགས་པའི་ཡུམ་འདི་གླེགས་བམ་ལ་བྲིས་ཏེ། །འཆང་ཞིང་མེ་ཏོག་བྱུག་པས་བསྟི་སྟང་བྱེད་གྱུར་ན། མཆོད་རྟེན་བྱས་མཆོད་བསོད་ནམས་དེས་ནི་ཆར་མི་ཕོད། །ཅེས་དང་། ལ་ལས་གང་གཱའི་ཀླུང་གི་བྱེ་སྙེད་ཞིང་རྣམས་ནས། །སེམས་ཅན་ཇི་སྙེད་འཁོད་ཀུན་དགྲ་བཅོམ་ཉིད་བཏུལ་བས། །གང་གིས་ཤེས་རབ་ཕ་རོལ་ཕྱིན་འདི་ཡིག་བྲིས་ཏེ། །སེམས་ཅན་མཆོག་ལ་གླེགས་བྱིན་བསོད་ནམས་ཁྱད་པར་འཕགས། །ཅི་ཕྱིར་ཞེ་ན་སྨྲ་མཆོག་དེ་དག་འདིར་བསླབས་ནས། །ཆོས་རྣམས་མཐའ་དག་སྟོང་པ་ཉིད་དུ་འདིར་སྟོན་བྱེད། །དེ་ཐོས་ཉན་ཐོས་མྱུར་ལམ་རྣམ་པར་གྲོལ་ལ་རེག །རང་རྒྱལ་བྱང་ཆུབ་དང་ནི་སངས་རྒྱས་བྱང་ཆུབ་རེག །ཅེས་དང་། མདོ་སྡེ་དཀོན་མཆོག་སྤྲིན་ལས། ཇི་ལྟར་ན་བྱང་ཆུབ་སེམས་དཔའ་མཆོད་པ་དང་། རིམ་འགྲོའི་སྦྱིན་པ་ཕུན་སུམ་ཚོགས་པ་ཡིན་ཞེ་ན། བྱང་ཆུབ་སེམས་དཔའ། སངས་རྒྱས་དང་ཆོས་དང་དགེ་འདུན་ལ་བྱ་བ་དག་བྱེད་དེ་ཇི་ལྟར་སངས་རྒྱས་ལ་བྱ་བ་དག་བྱེད་ཅེ་ན། འདི་ལྟ་སྟེ། དེ་བཞིན་གཤེགས་པའི་མཆོད་རྟེན་དག་དང་། དེ་བཞིན་གཤེགས་པའི་སྐུ་གཟུགས་ལ་སྤོས་སམ་མེ་ཏོག་གམ་བདུག་པའམ་བྱུག་པའམ། སྐྱོང་ནུལ་ལམ་དེ་བཞིན་གཤེགས་པའི་མཆོད་རྟེན་ཞིག་པ་བཅོས་པ་དག་གིས་ཏེ། དེ་ལྟར་ན་སངས་རྒྱས་ལ་བྱ་བ་དག་བྱེད་དོ། །ཇི་ལྟར་ན་ཆོས་ལ་བྱ་བ་དག་བྱེད་ཅེ་ན། དེ་ཆོས་ཉན་ཏོ། །ཀློག་གོ །འཆད་དོ། །ཡི་གེར་འདྲིའོ། །ཁ་ཏོན་བྱེད་དོ། །ཀུན་ཆུབ་པར་བྱེད་དོ། །སེམས་སོ། །ཕྱིན་ཅི་མ་ལོག་པར་སྦྱོར་བས་གོམས་པར་བྱེད་དོ། །དེ་ལྟར་ན་ཆོས་ལ་བྱ་བ་དག་བྱེད་དོ། །ཇི་ལྟར་ན་དགེ་འདུན་ལ་བྱ་བ་དག་བྱེད་ཅེ་ན། དེ་ལ་གོས་དང་། བསོད་སྙོམས་དང་། མལ་ཆ་དང་། ན་བའི་རྐྱེན་སྨན་དང་། ཡོ་བྱད་རྣམས་དང་། ཆུང་ངུ་ནས་ཆུ་གྲང་མོ་ཁྱོར་བ་གང་ཙམ་ཡང་དགེ་འདུན་ལ་འབུལ་བ་སྟེ། དེ་ལྟར་ན་དགེ་འདུན་ལ་བྱ་བ་དག་བྱེད་དོ། །དེ་ལྟར་ན་བྱང་ཆུབ་སེམས་དཔའི་མཆོད་པ་དང་། རིམ་འགྲོའི་སྦྱིན་པ་ཕུན་སུམ་ཚོགས་པ་ཡིན་ནོ། །ཞེས་དང་། ཁང་བུ་བརྩེགས་པའི་མདོ་ལས། ཀུན་དགའ་བོ། སངས་རྒྱས་དང་ཆོས་དང་དགེ་འདུན་ལ་དགེ་བའི་རྩ་བ་བསྐྱེད་པ་གསུམ་པོ་འདི་ནི་འཁོར་བར་ཟད་པར་མི་འགྱུར་ཞིང་ཡོངས་སུ་གཏུག་པར་མི་འགྱུར་ལ། ཟད་མི་ཤེས་པའི་མྱ་ངན་ལས་འདས་པ་ཐོབ་པར་འགྱུར་རོ། །ཞེས་སོགས་མདོ་སྡེ་རྣམས་ནས་རྒྱ་ཆེར་གསུངས་པ་ཞིབ་པར་གཞན་དུ་གསལ་ལ། འོག་ཏུའང་ཅུང་ཟད་སྟོན་པར་འགྱུར་རོ། །ཚུལ་དེ་ལྟ་བུའི་སྒོ་ནས་འགྲོ་བ་སྐྱོབ་པའི་རྣམ་འཕྲུལ་ཚད་མེད་པ་ལ་རྒྱུ་མཚན་ཤེས་ནས་དད་གུས་བླ་ལྷག་ཏུ་བྱ་བར་རིགས་སོ། །དེ་ལྟར་འཕྲོས་དོན་ཅུང་ཟད་བཤད་ནས་ད་ནི་དཀྱུས་ལ་འཇུག་པར་བྱ་སྟེ། མདོར་བསྡུ་ན་གནས་སྐབས་ཀྱི་སྐྱབས་ནི་གོང་དུ་སྨོས་པ་ལྟར་དཀོན་མཆོག་གསུམ་ཀ་ཡིན་ལ། མཐར་ཐུག་གི་འབྲས་བུའི་སྐྱབས་ནི་སངས་རྒྱས་ཉག་གཅིག་ཡིན་ཏེ། རྒྱུད་བླ་མ་ལས། དམ་པའི་དོན་དུ་འགྲོ་བ་ཡི། །སྐྱབས་ནི་སངས་རྒྱས་ཉག་གཅིག་ཡིན། །ཞེས་གསུངས་པས། གསུང་རབ་ལུང་གི་ཆོས་ནི། ཆུ་བརྒལ་བའི་གཟིངས་བཞིན་དུ་དོན་རྟོགས་ནས་ཚིག་གི་དགོས་པ་དེ་ཙམ་དུ་ཟད་པས་སྤང་བའམ་འདོར་ནས་འགྲོ་བའི་ཕྱིར་དང་། རྟོགས་པའི་ཆོས་ལས་སློབ་ལམ་གྱི་རྟོགས་པ་རྣམས་ནི་གོང་ནས་གོང་དུ་འཕོ་བའི་ཚེ་འོག་མ་འོག་མ་རྣམས་འདོར་བས་མི་བརྟན་ཏེ་བསླུ་བའི་ཕྱིར་དང་། ཐེག་དམན་གྱི་འགོག་པ་ནི་མར་མེ་རྒྱུན་ཆད་པ་བཞིན་དུ་སྡུག་ཀུན་དང་བྲལ་བའི་མེད་པ་ཙམ་སྟེ་མེད་པ་ཙམ་ནི་སྐྱབས་དང་སྐྱབས་མིན་གང་དུའང་མི་འགྱུར་བའི་ཕྱིར་དང་། ཐེག་ཆེན་འཕགས་པ་སློབ་པ་རྣམས་ཀྱང་ད་དུང་འཇིགས་མེད་རྟག་པའི་གོ་འཕང་མ་ཐོབ་པས་འདུ་བྱེད་ལ་སེམས་བསྲུང་བ་དང་། ད་དུང་སངས་རྒྱས་ལ་སྐྱབས་སུ་འགྲོ་དགོས་པའི་ཕྱིར་དེ་དག་གཏན་གྱི་སྐྱབས་དངོས་མ་ཡིན་ལ། མཐར་ཐུག་དོན་དམ་པའི་སྐྱབས་ནི། སངས་རྒྱས་ཆོས་ཀྱི་སྐུ་འབའ་ཞིག་སྟེ། དེ་ནི་རྟོགས་པའི་ཆོས་འགོག་བདེན་མཐར་ཐུག་པ་ཡིན་ལ། ཚོགས་རྣམས་ཀྱི་ཡོན་ཏན་མཐར་ཐུག་པ་ཡང་དེ་ཡིན་པའི་ཕྱིར། དོན་དམ་པའི་དབང་དུ་བྱས་ན་སྐྱབས་གསུམ་ཐ་དད་དུ་གྲུབ་པ་ནི་ཅུང་ཟད་ཀྱང་མེད་དོ། །དེ་ལྟར་ཡང་ཡིད་བཞིན་རིན་པོ་ཆེའི་མཛོད་ལས། མཐར་ཐུག་སངས་རྒྱས་ཆོས་སྐུ་ཉག་གཅིག་སྟེ། །དཀོན་མཆོག་མཐར་ཐུག་སྐྱབས་ཀྱི་དམ་པ་ཉིད། །ལམ་བདེན་ཀུན་རྫོབ་རྒྱལ་སྲས་སྒྲིབ་བཅས་ཕྱིར། །སངས་རྒྱས་ཉིད་ལས་མཐར་ཐུག་སྐྱབས་གང་ཞིག །འབྲས་བུའི་སྐྱབས་འགྲོ་དཀོན་མཆོག་རྣམ་པ་གསུམ། །རང་ལ་སྒྲུབ་འདོད་སླད་དུ་སྨོན་པ་ཡིན། །ཞེས་གསུངས་ཏེ། འདི་ལ་དབྱེ་ན། མཐར་ཐུག་སངས་རྒྱས་ཐོབ་པའི་ཆེད་དུ་སྟོན་པ་ལམ་གྲོགས་ཀྱི་ཚུལ་དུ་སྐྱབས་སུ་འགྲོ་བ་ལ་རྒྱུའི་སྐྱབས་འགྲོ་དང་། མཐར་ཐུག་དོན་དམ་པའི་དཀོན་མཆོག་གསུམ་དབྱེར་མེད་པ་སངས་རྒྱས་ཆོས་ཀྱི་སྐུ་དེ་རང་རྒྱུད་ལ་གྲུབ་པར་འདོད་པ་འབྲས་བུའི་སྐྱབས་འགྲོ་སྟེ། ཁྱིམ་བདག་དྲག་ཤུལ་ཅན་གྱིས་ཞུས་པའི་མདོ་ལས། སངས་རྒྱས་ལ་སྐྱབས་སུ་འགྲོ་བ་ནི་སངས་རྒྱས་ཐོབ་པར་འདོད་པ་ཡིན། ཆོས་ལ་སྐྱབས་སུ་འགྲོ་བ་ནི་ཆོས་ཐོབ་པར་འདོད་པའོ། །དགེ་འདུན་ལ་སྐྱབས་སུ་འགྲོ་བ་ནི་དགེ་འདུན་ཐོབ་པར་འདོད་པའོ། །ཞེས་གསུངས། འདི་དང་སྨོན་སེམས་ཀྱི་ཁྱད་པར། སྨོན་པ་སེམས་བསྐྱེད་གཞན་གྱི་དོན་དང་། འདི་རང་དོན་ལ་དམིགས་པ་སོགས་ཀྱི་ཁྱད་ཡོད་པར་བཞེད་དོ། །མདོར་ན། སྐྱབས་འགྲོའི་རྒྱུ་ནི། འཇིགས་པ་དང་། དད་པ་དང་། སྙིང་རྗེ་གསུམ་ཡིན། ངོ་བོ་ནི་ཁས་ལེན་པའི་དོན་ཅན་ཏེ། སངས་རྒྱས་ལ་སྟོན་པ། ཆོས་ལ་ལམ། དགེ་འདུན་ལམ་སྒྲུབ་པའི་གྲོགས་སུ་བསྟེན་པར་ཁས་བླངས་པས། སྟོན་པ་གཞན་དང་། དེའི་ལུགས་དང་། དེ་འཛིན་པ་རྣམས་སྟོན་པ་ལམ་གྲོགས་སུ་མི་བསྟེན་པར་དམ་བཅའ་བ་ནི་རྒྱུའི་སྐྱབས་འགྲོ་དང་། མཐར་ཐུག་སྐྱབས་གསུམ་དབྱེར་མེད་སངས་རྒྱས་དེ་ཐོབ་པར་བྱས་ནས་ཆོས་ཀྱི་འཁོར་ལོ་བསྐོར་བ་སོགས་ཀྱིས་འཇིག་རྟེན་ན་དཀོན་མཆོག་གསུམ་གྱི་གདུང་མི་གཅོད་པར་ཁས་བླང་ཞིང་དམ་བཅའ་བ་ནི་འབྲས་བུའི་སྐྱབས་འགྲོར་ཤེས་པར་བྱའོ། །གཉིས་པ་འབྲས་བུ་རྡོ་རྗེ་ཐེག་པའི་ལུགས་ཀྱི་སྐྱབས་འགྲོ་ནི། སྐྱབས་ཡུལ་ཐུན་མོང་བའི་དབང་དུ་བྱས་ན་གོང་སྨོས་སྤྱི་ཁྱབ་ཀྱི་དཀོན་མཆོག་གསུམ་པོ་དེ་དང་། ཁྱད་པར་གྱི་ཡུལ་བླ་མ་ཡི་དམ་མཁའ་འགྲོ་གསུམ་ལ་སྐྱབས་སུ་འགྲོ་དགོས་ཏེ། དེའི་¡eརྒྱུ་ཞུ་མཆན། ¡fམཚན་ནི། གསང་སྔགས་རྡོ་རྗེ་ཐེག་པའི་སྐབས་འདིར་བཀའ་དྲིན་ཐོབ་པའི་ཡུལ་དེའི་བྱིན་རླབས་འཇུག་དགོས་པ་དང་། བཀའ་དྲིན་དྲན་དགོས་པའི་ཕྱིར་བླ་མ་དང་། མཆོག་ཐུན་མོང་གི་དངོས་གྲུབ་རྣམས་ཞུ་བའི་ཡུལ་ཐུན་མོང་མ་ཡིན་པ་ཉིད་ཡིན་པའི་ཕྱིར་ཡི་དམ་དཀྱིལ་འཁོར་གྱི་ལྷ་ཚོགས་དང་། བར་ཆད་སེལ་བ་དང་གནས་སྐབས་ཀྱི་འདོད་དོན་རྣམས་འགྲུབ་པའི་ཕྲིན་ལས་འཚོལ་དགོས་པའི་ཕྱིར་མཁའ་འགྲོ་དང་ཆོས་སྲུང་ལོགས་སུ་སྨོས་པ་སྟེ། དེ་ཡང་ཡི་དམ་ནི་སངས་རྒྱས་དཀོན་མཆོག་གི་ནང་ཚན་ཡིན་ལ། མཁའ་འགྲོ་ཆོས་སྐྱོང་ཡེ་ཤེས་པ་རྣམས་ནི་དགེ་འདུན་དཀོན་མཆོག་གི་ནང་ཚན། བླ་མ་ནི་དཀོན་མཆོག་གསུམ་ཀའི་ངོ་བོ་སྟེ། སྡོམ་འབྱུང་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཔལ་ལྡན་རྡོ་རྗེ་འཆང་། །ཞེས་དང་། རྡོ་རྗེ་ཕྲེང་བ་ལས། དྲི་མེད་སེམས་ནི་སངས་རྒྱས་ཉིད། །ཆོས་ནི་ངག་ཏུ་ཡང་དག་བསྡུས། །སྐུ་ནི་དགེ་འདུན་ཞེས་བྱ་སྟེ། །ཞེས་དང་། ཨིནྡྲ་བྷཱུ་ཏིས་མཛད་པའི་ཡེ་ཤེས་གྲུབ་པ་ལས། བླ་མ་སངས་རྒྱས་ཆོས་གྱུར་ཅིང་། །དགེ་འདུན་ཡང་ནི་དེ་ཉིད་དེ། །དེ་ཡིན་དྲིན་གྱིས་ཤེས་འགྱུར་བས། །དེ་བས་དཀོན་མཆོག་གསུམ་ཡང་ཡིན། །ཞེས་གསུངས་ཤིང་། གཞུང་ལ་ལར་དཀོན་མཆོག་བཞི་པ་ཞེས་སུའང་བཞག་སྟེ། མཉམ་སྦྱོར་ལས། སངས་རྒྱས་ཆོས་དང་དགེ་འདུན་དང་། །བླ་མ་ཡང་ནི་བཞི་པ་ཡིན། །ཞེས་གསུངས་པ་དང་། རྡོ་རྗེ་མེ་ལོང་ལས། རྡོ་རྗེ་སེམས་དཔའ་དཀྱིལ་འཁོར་གཙོ། །བླ་མ་སངས་རྒྱས་དངོས་དང་མཉམ། །ཞེས་དང་། གསང་འདུས་ལས། ཁམས་རྣམས་དང་ནི་ཕྲིན་ལས་དག །རང་བཞིན་མཉམ་པ་ཉིད་ཀྱི་ཕྱིར། །བླ་མ་སངས་རྒྱས་ཀུན་དང་མཉམ། །འགྲོ་བ་གང་ལ་ལམ་སྟོན་ཕྱིར། །སངས་རྒྱས་ཉིད་ལས་མཆོག་ཏུ་འཕགས། །ཞེས་སོགས་གསུངས་པས་མཚོན། སྐབས་རེར་དཀྱིལ་འཁོར་གྱི་བདག་པོ་དང་། སངས་རྒྱས་དང་མཉམ་པ་དང་། སངས་རྒྱས་ལས་ཆེས་འཕགས་པའི་ཚུལ་རྒྱ་ཆེར་བསྟན་པ་ཡིན་ནོ། །ཐུན་མོང་མ་ཡིན་པའི་དབང་དུ་བྱས་ན། རྫོགས་པ་ཆེན་པོ་སེམས་ཉིད་ངལ་གསོ་ལས། མཐར་ཐུག་འབྲས་བུའི་སྐྱབས་གནས་ཆོས་སྐུ་ཏེ། །སངས་རྒྱས་ཆོས་ཚོགས་སྙིང་པོ་དོན་གྱི་ལྷ། །རང་སེམས་འོད་གསལ་སྤྲོས་ཀུན་བྲལ་བ་ཡིན། །ཞེས་གསུངས་ཏེ། དེ་ཡང་མཚན་ཉིད་ཀྱི་ཐེག་པས་འབྲས་བུའི་སྐྱབས་འགྲོ་རང་གིས་འབྲས་བུ་སངས་རྒྱས་ཐོབ་འདོད་ཙམ་ཡིན་པས་སྐབས་འདིར་རྒྱུའི་ཁོངས་སུ་བསྡུས་ལ། འདིར་ནི་མཐར་ཐུག་འབྲས་བུའི་སྐྱབས་གནས་ཆོས་ཀྱི་སྐུ་ཡིན་ཏེ། དཀོན་མཆོག་གསུམ་མཐར་ཐུག་པ་ནི་དེ་ཡིན་པའི་ཕྱིར་རོ། །ཆོས་སྐུ་དེ་ཡང་གཞན་རྒྱུད་ལ་བྱོན་ཟིན་ནི་རྒྱུའི་སྐྱབས་ཡིན་གྱི། འབྲས་བུའི་སྐྱབས་ནི་རང་གི་སེམས་ཉིད་སྤྲོས་པའི་མཐའ་ཐམས་ཅད་དང་བྲལ་བ་ཉིད་དཀོན་མཆོག་གསུམ་གྱི་རང་བཞིན་དུ་གནས་པས་དེ་ལ་སྐྱབས་སུ་འགྲོ་བ་སྟེ། ཡེ་ཤེས་གྲུབ་པ་ལས། དག་ཐོབ་བྲལ་བའི་སེམས་སངས་རྒྱས། །མི་འགྱུར་དྲི་མེད་ཆོས་དང་ནི། །ཡོན་ཏན་ལྷུན་རྫོགས་དགེ་འདུན་ཉིད། །ཡིན་ཕྱིར་རང་གི་སེམས་ཉིད་མཆོག །ཅེས་དང་། པདྨའི་ལམ་རིམ་ལས། ཡེ་ནས་སངས་རྒྱས་པའི་གནས་ལུགས་ནི་རང་རིག་པ་བྱང་ཆུབ་ཀྱི་སེམས་ཏེ། གཉིས་ཆོས་འཁྲུལ་པ་སངས་ལ་གཉིས་མེད་ཡེ་ཤེས་རྒྱས་པས་སངས་རྒྱས་སོ། །དེ་ཡང་འཁྲུལ་པ་ཡོད་པ་གཅིག་མེད་པར་སངས་ནས་གཉིས་མེད་ཡེ་ཤེས་མེད་པ་གཅིག་ཡོད་པར་རྒྱས་པ་ནི་མ་ཡིན་ཏེ། གཤིས་ལ་འཁྲུལ་པ་མ་གྲུབ་ཅིང་ངོ་བོ་གཉིས་མེད་ཡེ་ཤེས་སུ་རྒྱས་པས་ཡེ་ནས་སངས་རྒྱས་པ་ཡིན་ཏེ། རང་བཞིན་སྟོང་པ་ཆོས་སྐུ། རང་མདངས་གསལ་བ་ལོངས་སྐུ། གསལ་སྟོང་གཉིས་མེད་སྤྲུལ་སྐུ། རང་བཞིན་སྟོང་པ་ཇི་ལྟ་བ། རང་མདངས་གསལ་བ་ཇི་སྙེད་པ། གསལ་སྟོང་གཉིས་མེད་དམ་དབྱེར་མེད་དེ་མཁྱེན་པའི་ཡེ་ཤེས་སོ། །གཤིས་ལ་འཁྲུལ་པ་མེད་པས་སྤངས་པ་ཕུན་ཚོགས། ངོ་བོ་གཉིས་མེད་དུ་ཡོད་པ་རྟོགས་པ་ཕུན་ཚོགས། དེ་ལྟར་ཡེ་ནས་སངས་རྒྱས་མ་ཡིན་ན་བསྒོམས་ཀྱང་སངས་རྒྱས་མི་འབྱུང་སྟེ། ས་ལེ་སྦྲམ་ཡེ་ནས་གསེར་མ་ཡིན་ན་བྱས་ཀྱང་གསེར་དུ་མི་འགྲོ་བ་བཞིན་ནོ། །ཞེས་སོ། །ཇི་ལྟར་སྐྱབས་སུ་འགྲོ་བའི་ཚུལ་ཡང་། གང་ལ་སྐྱབས་སུ་འགྲོ་བའི་ཡུལ་དཀོན་མཆོག་གསུམ་དང་། གང་སྐྱབས་སུ་འགྲོ་བ་པོ་བདག་དང་སེམས་ཅན་ཐམས་ཅད་རང་གི་སེམས་ཀྱི་ཆོ་འཕྲུལ་ལས་དོན་ལ་ཐ་དད་དུ་གྲུབ་པ་རྡུལ་ཙམ་ཡང་མི་འདུག་ཅིང་། སེམས་ཉིད་དེ་གང་གི་ཕྱོགས་སུ་ཡང་མ་ལྷུང་བ་ནམ་མཁའ་ལྟ་བུའི་ངོ་བོར་འདུག་པས་སྤྲོས་པ་དང་བྲལ་བའི་ངང་ལ་བཞག་པ་སྟེ། ཡུམ་བར་མ་ལས། རབ་འབྱོར། གང་ལ་སངས་རྒྱས་ཀྱང་མི་དམིགས་ལ་ཆོས་དང་དགེ་འདུན་ཡང་མི་སེམས་ན། འདི་ནི་ཡང་དག་པའི་སྐྱབས་སུ་འགྲོ་བའོ། །ཞེས་དང་། ཡེ་ཤེས་གྲུབ་པ་ལས། འོད་གསལ་བ་ཡི་སེམས་ཉིད་ནི། །དཀྱིལ་འཁོར་གསུམ་གྱི་བདག་ཉིད་དུ། །རྟོགས་ནས་རྩེ་གཅིག་མཉམ་འཇོག་པ། །འབྲས་བུའི་མཆོག་ཏུ་ཡང་དག་བཤད། །ཅེས་སོ། །གཉིས་པ་ཨོ་རྒྱན་དུས་གསུམ་མཁྱེན་པའི་ཞལ་ལུང་སྙིང་པོར་དྲིལ་བ་ནི། ཉང་གཏེར་བླ་མའི་དམར་ཁྲིད་མཚོ་རྒྱལ་ཞུས་ལན་ལས་གསུངས་པ་ཉིད་ཚིགས་སྣ་ཅུང་ཟད་བསྡུས་ནས་བརྗོད་པར་བྱ་སྟེ། དེ་ཡང་ཆོས་ཐམས་ཅད་ཀྱི་གཞི་ནི་སྐྱབས་འགྲོ་ཡིན། ཆོས་ཐམས་ཅད་ཀྱི་རྟེན་དཀོན་མཆོག་གསུམ་ཡིན། སྐྱེ་ཤི་ཟད་པར་བྱེད་{བྱེ}པའི་ཐབས་སྐྱབས་འགྲོ་ཡན་ལག་དང་བཅས་པ་ཡིན། དེ་ལ་སྐྱབས་འགྲོའི་ངོ་བོ་ནི། བླ་ན་མེད་པའི་བྱང་ཆུབ་འདོད་ཅིང་སྙིང་རྗེའི་ཁས་ལེན་དང་བཅས་པའོ། །ངེས་ཚིག་ནི། ངན་སོང་གསུམ་གྱི་འཇིགས་པ་དང་། མུ་སྟེགས་ལ་སོགས་པའི་འཇིག་ཚོགས་ཀྱི་ལྟ་བ་དམན་པ་ལས་སྐྱོབ་པས་སྐྱབས་འགྲོའོ། །དབྱེ་ན། ཕྱི་ནང་གསང་བའི་སྐྱབས་འགྲོ་གསུམ་ལས། དང་པོ་ཕྱི་ཡི་སྐྱབས་འགྲོ་ནི། སྐྱེ་བའི་རྒྱུ་འཁོར་བའི་སྡུག་བསྔལ་གྱིས་འཇིགས་པ་དང་། དཀོན་མཆོག་གསུམ་ལ་སྐྱབས་གནས་སུ་ཡིད་ཆེས་པ་དང་། དེ་སྐྱབས་སུ་འཛིན་པ་དང་གསུམ་གྱིས་སྐྱབས་སུ་འགྲོ་བ་སྐྱེ་བ་ཡིན། ཡུལ་གང་ལ་སྐྱབས་སུ་འགྲོ་ན། དཀོན་མཆོག་གསུམ་ལ་སྐྱབས་སུ་འགྲོ་སྟེ། སྐྱེ་འཆི་ཟད་པར་བྱེད་པའི་ཐབས་གང་གིས་ནུས་ན། རྣམ་པ་ཐམས་ཅད་མཁྱེན་པའི་སངས་རྒྱས་ནི་སྐྱོན་མཐའ་དག་དང་བྲལ་ཞིང་ཡོན་ཏན་མཐའ་དག་རྫོགས་པ་ཡིན་པས། དེས་གསུངས་པའི་བཀའ་དང་། དེའི་བསྟན་པ་འཛིན་པའི་དགེ་འདུན་དང་བཅས་པ་འདིས་བདག་གཞན་གྱི་སྐྱེ་ཤི་ཟད་པར་ནུས་པས་སྐྱབས་ཀྱི་ཡུལ་འདི་ཁོ་ན་ཡིན། དེས་ན་དེ་ལ་སྐྱབས་སུ་འགྲོ་བ་ཡིན། གང་ཟག་གང་སྐྱབས་སུ་འགྲོ་ན། མོས་པ་གུས་པ་དད་པ་གསུམ་དང་ལྡན་ཞིང་། དཀོན་མཆོག་གི་ཡོན་ཏན་དྲན་པ་ཞིག་སྐྱབས་སུ་འགྲོ། དེ་ཡང་ཁྱད་པར་གྱི་བསམ་པ་གསུམ་དང་ལྡན་དགོས་ཏེ། འཁོར་བ་ཐོག་མ་མེད་པས་འདི་དུས་ད་རེས་བཟློག་དགོས་སྙམ་པ་དང་གཅིག མུ་སྟེགས་ལ་སོགས་པའི་ལྷ་རྣམས་བདག་གི་སྐྱབས་སུ་འགྲོ་བའི་ཡུལ་མ་ཡིན་སྙམ་པ་དང་གཉིས། རྣམ་པ་ཐམས་ཅད་མཁྱེན་པའི་སངས་རྒྱས་དེ་ཁོ་ན་བདག་གི་སྐྱབས་སུ་འགྲོ་བའི་ཡུལ་དམ་པ་ཡིན་སྙམ་པ་དང་གསུམ་མོ། །སྐྱབས་འགྲོ་ཐུན་མོང་བ་སྐྱེ་དུས་དེ་ཙམ་ན་ཡིན། ཚུལ་ལམ་ཐབས་ཇི་ལྟ་བུས་འགྲོ་ན། ངན་སོང་དང་འཁོར་བས་འཇིགས་པ་དང་། དཀོན་མཆོག་གསུམ་གྱི་བྱིན་རླབས་ལ་ཡིད་ཆེས་པ་དང་། དད་པ་དང་སྙིང་རྗེ་བརྟན་པོ་དང་ལྡན་པ་གསུམ་གྱིས་སྐྱབས་སུ་འགྲོ་བ་ཡིན། བསམ་པའི་ཁྱད་པར་གང་གིས་འགྲོ་ན། གཞན་དོན་ལྷུར་ལེན་པས་འགྲོ་སྟེ། འཁོར་བ་སྤངས་ཤིང་མྱང་འདས་ཀྱི་འབྲས་བུ་ཐོབ་པར་འདོད་པ་ཙམ་གྱིས་ཀྱང་སངས་མི་རྒྱ་བས། སེམས་ཅན་ཐམས་ཅད་འཁོར་བའི་སྡུག་བསྔལ་ལས་བསྒྲལ་བའི་ཕྱིར། བདག་དང་ཁམས་གསུམ་གྱི་སེམས་ཅན་ཐམས་ཅད་སྙིང་པོ་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་སྙམ་པའི་བསམ་པས་འགྲོ་གསུངས། བསླབ་བྱ་ནི་འོག་ཏུ་སྟོན་ནོ། །གཉིས་པ་ནང་གི་སྐྱབས་འགྲོ་ནི། ཡུལ་གང་ལ་སྐྱབས་སུ་འགྲོ་ན། བླ་མ་ཡི་དམ་མཁའ་འགྲོ་གསུམ་ལ་སྐྱབས་སུ་འགྲོ། གང་ཟག་གང་འགྲོ་ན་གསང་སྔགས་ཀྱི་སྒོར་ཞུགས་པ་རྣམས་འགྲོ། ཚུལ་ལམ་ཐབས་ཇི་ལྟར་འགྲོ་ན་ལུས་ངག་ཡིད་གསུམ་མོས་གུས་དང་ལྡན་པས་འགྲོ། བསམ་པའི་ཁྱད་པར་གང་གིས་འགྲོ་ན་བླ་མ་སངས་རྒྱས་སུ་མཐོང་བ། ཡི་དམ་སྲོག་གི་ཕྱིར་དུ་ཡང་མི་སྤོང་བ། མཁའ་འགྲོ་རྒྱུན་དུ་མཆོད་པ་གསུམ་གྱིས་འགྲོ། དུས་ཇི་ཙམ་ན་ཐོག་མར་དབང་བསྐུར་སེམས་བསྐྱེད་བྱས་པའི་དུས་ནས་རྡོ་རྗེ་འཛིན་པའི་ས་མ་ཐོབ་ཀྱི་བར་དུ་འགྲོ། རྐྱེན་གང་གིས་ན་གསང་སྔགས་ལ་མོས་གུས་སྐྱེས་པས་འགྲོ། དགོས་ཆེད་དམ་ཡོན་ཏན་ནི་གསང་སྔགས་ཀྱི་སྣོད་དུ་རུང་བ་དང་བྱིན་རླབས་ཁྱད་པར་ཅན་འཇུག་པའི་དགོས་པ་ཡོད་དོ་གསུངས། བསླབ་བྱ་ནི་འོག་ཏུ་སྟོན་ནོ། །གསུམ་པ་གསང་བའི་སྐྱབས་འགྲོ་ནི། ཡུལ་གང་ལ་སྐྱབས་སུ་འགྲོ་ན། ལྟ་བ་སྒོམ་པ་སྤྱོད་པ་གསུམ་ལ་སྐྱབས་སུ་འགྲོ། གང་ཟག་གང་འགྲོ་ན་དབང་པོ་ཡང་རབ་ཚེ་གཅིག་ལ་སངས་རྒྱས་པར་འདོད་པ་དེ་འགྲོ། ཚུལ་ལམ་ཐབས་ཇི་ལྟར་འགྲོ་ན་ལྟ་སྒོམ་སྤྱོད་གསུམ་གྱི་སྒོ་ནས་འགྲོ་སྟེ། ལྟ་བ་གདེང་དང་ལྡན་པ། སྒོམ་པ་ཉམས་དང་ལྡན་པ། སྤྱོད་པ་རོ་སྙོམས་དང་ལྡན་པའི་ཚུལ་གྱིས་འགྲོ། བསམ་པའི་ཁྱད་པར་གང་གིས་ན། ལྟ་བ་ལ་ཞེ་འདོད་མེད་པ་སྟེ། སངས་རྒྱས་ཐོབ་བྱར་མི་འདོད། འཁོར་བ་སྤང་བྱར་མི་འདོད་པའོ། །སྒོམ་པ་ནི་ངོས་བཟུང་མེད་ཅིང་ཕྱོགས་སུ་མ་ལྷུང་བའོ། །སྤྱོད་པ་ནི་སྤངས་བླང་མེད་ཅིང་བྱ་རྩོལ་དང་བྲལ་བའོ། །དུས་ཇི་ཙམ་ན་སངས་མ་རྒྱས་ཀྱི་བར་དུ་འགྲོ། རྐྱེན་གང་གིས་ན་ལུས་མི་ལེན་པར་འདོད་པས་འགྲོ། དགོས་ཆེད་དམ་ཡོན་ཏན་ནི་རྫོགས་པའི་སངས་རྒྱས་ཚེ་འདི་ཉིད་ལ་ཐོབ་པའི་དགོས་པ་ཡོད་དོ་གསུངས། བསླབ་བྱ་ནི་འོག་ཏུ་འཆད་པར་འགྱུར་རོ། །གཞན་ཡང་པདྨའི་ལམ་རིན་ཆེན་མོའི་རང་འགྲེལ་ལས། སྐྱབས་འགྲོ་བྱེ་བྲག་ཏུ་བཤད་པ་ལ་གསུམ། ཐུན་མོང་། ཁྱད་པར། བླ་ན་མེད་པའི་སྐྱབས་འགྲོའོ། །དང་པོ་ལ་གསུམ་ལས། དང་པོ་སྐྱབས་གནས་ངོས་བཟུང་བ་ནི། སངས་རྒྱས་ནི་སྤྲུལ་པའི་སྐུ་ཁོ་ན་དམ་པར་འཛིན་ཏེ་ཤཱཀྱ་ཐུབ་པ། ཆོས་ནི་རྒྱུའི་ཐེག་པ་བདེན་པ་བཞི། ལྷག་པ་ཚུལ་ཁྲིམས་ཀྱི་བསླབ་པ་གཙོ་བོར་བྱེད། དགེ་འདུན་ནི་ཕྱིའི་ཆ་ལུགས་དང་སྤྱོད་ལམ་གྱིས་འདུལ་བ་ཕྱི་གཟུགས་རྟགས་ཀྱི་དགེ་འདུན་ནོ། །གཉིས་པ་སྐྱབས་སུ་འགྲོ་བྱེད་ཀྱི་གང་ཟག་ནི། ཉན་ཐོས་རང་རྒྱལ་གཉིས་སོ། །གསུམ་པ་སྐྱབས་སུ་འགྲོ་ཚུལ་ནི། རང་དོན་དུ་བྱེད་པའོ། །ཐུན་མོང་གི་སྐྱབས་འགྲོ་ལ་བརྟེན་ནས་སོ་ཐར་གྱི་སྡོམ་པ་སྐྱེ། དེ་ཆོ་གའི་དུས་སུ་ཐོབ། དེ་ལམ་བདེན་པ་བཞིས་སྦྱངས་ནས། འབྲས་བུ་སྲིད་པ་གསུམ་ན་དགྲ་བཅོམ་པ་ཐོབ། གཉིས་པ་ཁྱད་པར་གྱི་སྐྱབས་འགྲོ་ལ་གསུམ། དང་པོ་སྐྱབས་གནས་ངོས་བཟུང་བ་ནི། སངས་རྒྱས་ནི་སྤངས་རྟོགས་ཕུན་སུམ་ཚོགས་པ་སྟེ། ཆོས་སྐུ་ལོངས་སྐུ་སྤྲུལ་སྐུ་གསུམ། དེ་ཡང་ཆོས་སྐུ་དག་པ་གཉིས་ལྡན། ལོངས་སྐུ་ངེས་པ་ལྔ་ལྡན། སྤྲུལ་སྐུ་མ་ངེས་ལྔ་ལྡན། ཆོས་ནི། རྒྱུའི་ཐེག་པ་དོན་དམ་རྣམ་པར་ངེས་པའམ། མཚན་ཉིད་མེད་པའི་འཁོར་ལོ་ལྷག་པ་ཤེས་རབ་ཀྱི་བསླབ་པ་གཙོ་བོར་བྱེད། དགེ་འདུན་ནི་གཞན་དོན་སེམས་ཀྱི་དགེ་འདུན་ཏེ་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་སྤྱོད་པའོ། །གཉིས་པ་སྐྱབས་སུ་འགྲོ་བྱེད་ཀྱི་གང་ཟག་ནི། བྱང་ཆུབ་སེམས་དཔའ་གང་ཟག་སྟེ་དབང་པོ་རྣོན་པོ་དང་། རྟུལ་པོའི་རིགས་གཉིས་སོ། །གསུམ་པ་སྐྱབས་སུ་འགྲོ་ཚུལ་ནི། ཚད་མེད་པ་བཞིའི་སྒོ་ནས་རང་གཞན་གཉིས་ཀྱི་དོན་བྱེད་པའོ། །ཁྱད་པར་གྱི་སྐྱབས་འགྲོ་དེ་ལ་བརྟེན་ནས་བྱང་སེམས་ཀྱི་སྡོམ་པ་སྐྱེ། དེ་སེམས་བསྐྱེད་ཀྱི་དུས་སུ་ཐོབ། དེ་ལམ་ཕ་རོལ་དུ་ཕྱིན་པ་དྲུག་ལ་སྦྱངས་ནས། འབྲས་བུ་བསྐལ་པ་གྲངས་མེད་གསུམ་ནས་སངས་རྒྱས་ཐོབ་བོ། །གསུམ་པ་བླ་ན་མེད་པའི་སྐྱབས་འགྲོ་ལའང་གཉིས་ཏེ། གསང་སྔགས་སྤྱིའི་སྐྱབས་འགྲོ་དང་། ཁྱད་པར་ཨ་ཏིའི་སྐྱབས་འགྲོའོ། །དང་པོ་ལ་གསུམ་ལས། དང་པོ་སྐྱབས་གནས་ངོས་བཟུང་བ་ནི། སངས་རྒྱས་ནི་སྐུ་ལྔ་དབྱེར་མེད་གཅིག་དང་དུ་མ་དང་བྲལ་བ། ཆོས་ནི་འབྲས་བུ་རྡོ་རྗེ་ཐེག་པ་ལུང་དུ་བསྟན་ཅིང་རྨད་དུ་བྱུང་བ། བསླབ་པ་གསུམ་གང་དུ་ཡང་བསྟན་ཏུ་བཏུབ་སྟེ། གསང་སྔགས་ཀྱི་ཆོས་ལ་གཙོ་བོར་བྱེད། དགེ་འདུན་ནི་ཡང་དག་དོན་གྱི་དགེ་འདུན་ཏེ་མི་དགེ་བ་ངང་གིས་མི་གནས་པའོ། །གཉིས་པ་སྐྱབས་སུ་འགྲོ་བྱེད་ཀྱི་གང་ཟག་ནི། གསང་སྔགས་རིག་པ་འཛིན་པའི་རྣལ་འབྱོར་ཏེ་སྡོམ་པ་གསུམ་ལྡན་ནོ། །གསུམ་པ་སྐྱབས་སུ་འགྲོ་ཚུལ་ནི། རང་གཞན་གྱི་ལུས་ངག་ཡིད་གསུམ་དང་དཀོན་མཆོག་གསུམ་དབྱེར་མེད་པས་ཡུལ་དང་ཡུལ་ཅན་གཉིས་མེད་ཀྱི་ཚུལ་དུ་འགྲོའོ། །བླ་མེད་ཀྱི་སྐྱབས་འགྲོ་དེ་ལ་བརྟེན་ནས། གསང་སྔགས་ཀྱི་སྡོམ་པ་སྐྱེ་སྟེ། དེ་དབང་གི་དུས་སུ་ཐོབ། དེ་ལམ་རིམ་པ་གཉིས་ཀྱིས་སྦྱངས་ནས་སྐྱེ་བ་གཅིག་གམ་གཉིས་སམ། གསུམ་མམ། ལྔ་ནས་སངས་རྒྱས་སོ། །གཉིས་པ་ཨ་ཏིའི་སྐྱབས་འགྲོ་ལ་གསུམ་སྟེ། དང་པོ་དཀོན་མཆོག་གསུམ་པོ་ངོས་བཟུང་བ་ནི། རིག་པ་སྐུ་བཞིར་གནས་པ་སངས་རྒྱས་དཀོན་མཆོག དེ་ཉིད་དབྱིངས་སྟོང་པ་དང་དབྱེར་མེད་པའོ། །དེ་ཤེས་ཀྱི་ཤེས་པ་ཆོས་དཀོན་མཆོག་སྟེ། ཨ་ཏི་ཡོ་ག་ཁྱད་པར་རྨད་དུ་བྱུང་བ་ངེས་པ་དོན་གྱི་ཆོས་སོ། །གཤིས་ལ་སྡིག་པ་མ་གྲུབ་ཅིང་། ངོ་བོ་ཟག་པ་མེད་པའི་དགེ་བར་གནས་པ་ནི་ཡང་དག་དོན་གྱི་དགེ་འདུན་ནོ། །གཉིས་པ་གང་ཟག་ངོས་བཟུང་བ་ནི། སྐྱེས་མཆོག་གང་ཟག་ཡང་རབ་ཨ་ཏིའི་རྣལ་འབྱོར་རོ། །གསུམ་པ་སྐྱབས་སུ་འགྲོ་ཚུལ་ལ་གསུམ། དཀོན་མཆོག་གསུམ་རང་གི་སེམས་ལ་གྲུབ་པར་ཤེས་པ་ནི་དོན་དུ་གཉེར་བའི་སྐྱབས་འགྲོ། རང་གི་སེམས་མ་ཡིན་པའི་དཀོན་མཆོག་གསུམ་ལོགས་ན་མེད་པར་རྟོགས་པ་ནི་གཞན་སེལ་བའི་སྐྱབས་འགྲོ། སེམས་ཉིད་དཀོན་མཆོག་གསུམ་གྱི་རང་བཞིན་གཅིག་དང་དུ་མ་དང་བྲལ་ཞིང་། མཐའ་གང་ལ་ཡང་མི་གནས་པ། གཉིས་མེད་རང་གྲོལ་དུ་རྟོགས་པ་ནི་ཡང་དག་བླ་མེད་ཀྱི་སྐྱབས་འགྲོའོ། །དེས་ན་སངས་རྒྱས་ཀྱི་བཀའ་བཞིན་དུ་སྒྲུབ་ཅིང་གསུང་ན་བླ་མ་ཡིན། དེའི་གསུང་བཞིན་དུ་སྒྲུབ་ན་སློབ་མ་ཡིན། དེའི་ཆ་རྐྱེན་སྒྲུབ་ན་ཡོན་བདག་ཡིན། དེ་ལྟ་བུ་གང་ན་ཡོད་པ་དེ་ན་སངས་རྒྱས་ཀྱི་བསྟན་པ་ཡོད་དོ་གསུངས། གསུམ་པ་ཇི་ལྟར་འགྲོ་ཚུལ་གྱི་དམིགས་ཁྲིད་དངོས་ནི། ཁྲིད་གཞུང་སོ་སོའི་དགོངས་པ་ལྟར་འཆད་ཤེས་པར་བྱ་སྟེ། འདིར་སྨིན་གླིང་རྡོར་སེམས་ལྟ་བུར་མཚོན་ན། འཇིགས་རུང་འཁོར་བའི་སྡུག་བསྔལ་མེ་ཡི་འོ བས་དང་འདྲ་བ་ལས། སེམས་ཅན་ཐམས་ཅད་སྒྲོལ་བའི་སྐྱབས་དཔུང་ར་མདའ་དེ་བསླུ་བ་མེད་པའི་སྐྱབས་གནས་དཀོན་མཆོག་རིན་པོ་ཆེ་རྣམ་པ་གསུམ་ལ་ཞུ་སྙམ་དུ། རང་ཉིད་འཁོར་བ་ལ་འཇིགས་པ་དང་། དཀོན་མཆོག་གི་ཡོན་ཏན་ལ་དད་པ་དང་། གཞན་སེམས་ཅན་ལ་དམིགས་པའི་སྙིང་རྗེ་གསུམ་དང་མ་བྲལ་བའི་ངང་ནས་ལུས་སེམས་རྣལ་དུ་ཕབ་སྟེ། རང་གར་གནས་པའི་ས་ཕྱོགས་འདི་ཉིད་ཡིད་དུ་འོང་ཞིང་ཉམས་དགའ་བའི་ཞིང་ཁམས་རྒྱུ་རིན་པོ་ཆེ་སྣ་ཚོགས་ལས་གྲུབ་པའི་རང་བཞིན་ཅན་ནམ། ཡང་ན་བཻཌཱུཪྱའི་ས་གཞི་ལ་གསེར་གྱི་མིག་མང་རིས་སུ་བྲིས་པ། མཐའ་བསྐོར་ཐམས་ཅད་རིན་པོ་ཆེའི་ར་བས་ཟླུམ་པོར་བྱས་པ། བདུད་རྩིའི་ཆུ་དང་། དཔག་བསམ་གྱི་ཤིང་མེ་ཏོག་གི་ཚལ། འདོད་ཡོན་གྱི་ལྷ་མོ། སྤྲུལ་པའི་བྱ་ཚོགས་སྐད་སྙན་པར་སྒྲོགས་པས་གང་བ། མནན་ན་ནེམ་ཞིང་བཏེག་ན་འཕར་སྙམ་བྱེད་པ། ཡངས་ཤིང་རྒྱ་ཆེ་ལ་ཁོད་སྙོམས་པའི་དབུས་སུ་དཔག་བསམ་གྱི་ཤིང་གི་སྡོང་པོ་རྒྱུ་རིན་པོ་ཆེ་སྣ་ཚོགས་ལས་གྲུབ་པ། རྩ་བ་བརྟན་ཞིང་ཡལ་འདབ་རྒྱས་པ་མེ་ཏོག་དང་འབྲས་བུའི་ཁུར་གྱིས་དུད་པ། རྒྱ་ཁྱོན་ནམ་མཁའི་དབྱིངས་ཁྱབ་པ། དེའི་ཡལ་ག་དབུས་དང་ཕྱོགས་བཞིར་གྱེས་པའི་ཕན་ཚུན་ཐམས་ཅད་གསེར་གྱི་ཐ་གུས་བྲིས་པ། མེ་ཏོག་གི་ཆུན་འཕྱང་དང་ཁ་དོག་སྣ་ཚོགས་པའི་དར་དཔྱངས། རིན་པོ་ཆེའི་དྲྭ་བ་དྲྭ་ཕྱེད་དང་། གསེར་དངུལ་གྱི་དྲིལ་གཡེར་ལ་སོགས་པས་མཛེས་པར་སྤྲས་པ། རླུང་གཡོས་པ་ཙམ་གྱིས་མི་རྟག་སྡུག་བསྔལ་སྟོང་བདག་མེད་ལ་སོགས་པའི་ཆོས་ཀྱི་སྒྲ་སྐད་ལྷང་ལྷང་དུ་སྒྲོག་པ། དེ་ཡང་དངོས་འཛིན་གདོས་བཅས་ཅན་གྱི་རྣམ་པ་མ་ཡིན་པ་འཇའ་ཚོན་འོད་ཀྱི་རང་བཞིན་ཅན་དུ་གསལ་བཏབ། དེ་ལ་གསལ་སྣང་ཐོན་པ་ན། དབུས་ཀྱི་ཡལ་ག་ལ་སེང་གེ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་མཐོ་ཞིང་ཡངས་པ། དེའི་སྟེང་དུ་པདྨ་དང་ཟླ་བའི་གདན་ལ་ངོ་བོ་རང་གི་རྩ་བའི་བླ་མ་ཉིད་རྣམ་པ་བཅོམ་ལྡན་འདས་དཔལ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་གཡས་རྡོ་རྗེ་ཐུགས་ཀར་འཛིན་ཅིང་། གཡོན་དྲིལ་བུ་ད ཀུར་བརྟེན་པ་ཡུམ་རྡོ་རྗེ་སྙེམས་མ་དཀར་མོ་གྲི་ཐོད་འཛིན་པ་དང་མཉམ་པར་སྦྱོར་བ། ཞབས་རྡོ་རྗེ་དང་པདྨའི་སྐྱིལ་མོ་ཀྲུང་གིས་བཞུགས་པ་དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ་འོད་དང་འོད་ཟེར་མུ་མེད་པ་འཕྲོ་བའི་བདག་ཉིད་ཅན་སྐུ་ལ་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་སྤྲས་པ། གསུང་ཡན་ལག་དྲུག་ཅུའི་ཆོས་སྒྲ་སྒྲོག་པ། ཐུགས་ཏིང་ངེ་འཛིན་གྱི་སྒོ་བརྒྱ་ཕྲག་དུ་མ་ལ་མཉམ་པར་འཇོག་པའི་བདག་ཉིད་དུ་གསལ་བའི་དབུ་གཙུག་ནས་ཡར་བརྒྱུད་པའི་བླ་མ་རྡོ་རྗེ་འཆང་བློ་གྲོས་འཐའ་ཡས་འཇམ་དབྱངས་མཁྱེན་བརྩེའི་དབང་པོ། རྗེ་བཙུན་མ་ཕྲིན་ལས་ཆོས་སྒྲོན། གནུབས་ཆེན་ཡང་སྲིད་ཕྲིན་ལས་རྣམ་རྒྱལ། དབང་ཆེན་སྤྲུལ་པ་པདྨ་བསྟན་འཛིན། བི་མའི་རྣམ་འཕྲུལ་རིན་ཆེན་རྣམ་རྒྱལ། ཟབ་གཏེར་སྒོ་འབྱེད་རིག་འཛིན་འགྱུར་མེད་རྡོ་རྗེ། ལོ་ཆེན་བཻ་རོ་ཙ་ན། རྒྱལ་ཡུམ་ཡེ་ཤེས་མཚོ་རྒྱལ། ཨོ་རྒྱན་པདྨ་འབྱུང་གནས། པཎ་ཆེན་བི་མ་མི་ཏྲ། གྲུབ་པའི་རིག་འཛིན་ཧཱུྃ་ཀ་ར། ཟུང་འཇུག་མཐར་ཕྱིན་ཤྲཱི་སེང་ཧ། སྤྲུལ་སྐུ་དགའ་རབ་རྡོ་རྗེ། ལོངས་སྐུ་རྡོ་རྗེེ་སེམས་དཔའ། ཆོས་སྐུ་ཀུན་ཏུ་བཟང་པོའི་བར་ཐོག་བརྩེགས་ཀྱི་རྣམ་པ་ཅན་དཀོན་མཆོོག་ཀུན་འདུས་ཀྱི་ངོ་བོར་བཞུགས་པར་བསམ། དེ་ནས་ཕྱོགས་བཞིའི་ཡལ་ག་ལ་གདན་མཐོ་ཞིང་ཡངས་པར། མདུན་མར་ཁྱད་པར་གྱི་སངས་རྒྱས་དཀོན་མཆོག་ཡི་དམ་རྒྱུད་སྡེ་བཞི་དྲུག་གི་ལྷ་ཚོགས་ཞི་བ་དང་ཁྲོ་བོའི་རོལ་གར་བསམ་གྱིས་མི་ཁྱབ་པ། གཡས་སུ་ཐུན་མོང་གི་སངས་རྒྱས་སྟོན་པ་ཐུབ་པའི་དབང་པོ་ལ་འཁོར་ཕྱོགས་བཅུ་དུས་བཞིའི་སངས་རྒྱས་ཆགས་བྲལ་མཆོག་གི་སྤྲུལ་པའི་སྐུའི་རྣམ་པ་ཅན་གྱིས་བསྐོར་བ། རྒྱབ་ཀྱི་ཡལ་གར་ངོ་བོ་ཤེས་རབ་ཀྱི་ཕ་རོལ་དུ་ཕྱིན་མ་ལ་རྣམ་པ་འོད་ལྔའི་དྲྭ་མིག་གི་ནང་དུ་གླེགས་བམ་བྲག་རི་བརྩེགས་པ་ལྟ་བུ། གཡོན་དུ་ཐུན་མོང་གི་དགེ་འདུན་ཉེ་བའི་སྲས་ཆེན་བརྒྱད་དང་ཉན་ཐོས་མཆོག་བརྒྱད་གནས་བརྟན་བཅུ་དྲུག་སོགས་བྱང་སེམས་ཉན་རང་འཕགས་པའི་ཚོགས། དེ་ཐམས་¡eཅད་ཞུ་མཆན། ¡fཀྱི་མཐའ་བསྐོར་དུ་ཁྱད་པར་གྱི་དགེ་འདུན་གནས་གསུམ་གྱི་དཔའ་བོ་དང་མཁའ་འགྲོ་དམ་པ་ཆོས་སྐྱོང་{སྐྱོངས་འདིའི་རིགས་འདི་ལྟར་ཞུས། }བའི་སྲུང་མ་ཡེ་ཤེས་པ་རྣམས་སྤྲིན་ཕུང་གཏིབ་པ་ལྟར་མངོན་སུམ་གྱིས་བཞུགས་པ། དེ་ཐམས་ཅད་ཀྱང་རྩ་བའི་བླ་མའི་ཐུགས་བདེ་སྟོང་གི་སྣང་ཆ་ལས་མ་གཡོས་བཞིན་དུ་ཐུགས་རྗེ་ལ་བྲི་གང་དང་དགོངས་པ་ལ་མཐོ་དམའ་མེད་པར་དྭངས་པའི་མཁའ་ལ་གཟའ་སྐར་ཤར་བ་ལྟར་གསལ་བཏབ་པ་ནི་སྐྱབས་སུ་འགྲོ་བའི་ཡུལ་ཡིན་ལ། སྐྱབས་སུ་འགྲོ་བའི་གང་ཟག་ནི་རང་གི་གཡས་སུ་ཚེ་འདིའི་ཕ། གཡོན་དུ་མ། མདུན་དུ་དགྲ། རྒྱབ་ཏུ་གཉེན། མཐའ་བསྐོར་དུ་དགྲ་གཉེན་བར་མ་རིས་སུ་མ་ཆད་པའི་སེམས་ཅན་ཐམས་ཅད་ས་ཆེན་པོའི་དྲེག་པ་ལྟར་འཁོད་པར་བསམས་ལ། དེ་དག་གི་བྱང་རང་གིས་དྲངས་ཏེ། ལུས་གུས་པའི་སྒོ་ནས་པུས་མོ་བཙུགས། ལག་པ་ཐལ་མོ་སྦྱར། ངག་གུས་བའི་སྒོ་ནས་སྐྱབས་འགྲོའི་ཚིག་ཉིད་ཁ་ཙམ་ཚིག་ཙམ་མ་ཡིན་པར་འུར་དིར་དིར་སྒྲོག་ཅིང་། ཡིད་གུས་པའི་སྒོ་ནས་མཐོར་གཏོང་། དམར་གཏོང་། སྐྱིད་སྡུག་ལེགས་ཉེས་ཅི་བྱུང་ཡང་རེ་ལྟོས་ཁྱེད་རྣམས་ལས་མེད་པས་ཅི་མཛད་ཁྱེད་རང་ཤེས། བདག་དང་བདག་གི་མ་སེམས་ཅན་ཐམས་ཅད་སྤྱིར་འཁོར་བ་སྡུག་བསྔལ་གྱི་འཇིགས་པ། དགོས་ཐེག་དམན་རང་དོན་ཡིད་བྱེད་ཀྱི་འཇིགས་པ། ཡང་སྒོས་ཐ་མལ་འཁྲུལ་འཛིན་གྱི་འཇིགས་པ་སྟེ་འཇིགས་དང་སྡུག་བསྔལ་ཐམས་ཅད་ལས་དུས་མྱུར་བ་ཉིད་དུ་བསྐྱབ་ཏུ་གསོལ་སྙམ་པའི་མོས་གུས་གདུང་ཤུགས་དྲག་པོས། ན་མོཿ ཕྱོགས་དུས་བདེ་གཤེགས་རྒྱལ་བ་སྲས་བཅས་ལ༔ སོཊ༴ སྐྱབས་འགྲོའི་ཚིག་བརྒྱ་སྟོང་ཁྲི་འབུམ་ལ་སོགས་པ་གྲངས་བསགས། དེ་ཡང་བྱང་ཆུབ་སྒྲུབ་པའི་འགལ་རྐྱེན་སེལ་བ་དང་། མཐུན་རྐྱེན་ཚོགས་གཉིས་རྫོགས་པ་དང་། མྱུར་དུ་བྱང་ཆུབ་ཐོབ་པའི་ཆེད་དུ་སྐྱབས་སུ་འགྲོ། ཚེ་འདིའི་འཇིགས་པ་དང་། བར་དོའི་འཁྲུལ་སྣང་དང་ཕྱི་མའི་སྐྱེ་གནས་ཀྱི་འཇིགས་པ་དང་། ལམ་ལོག་པར་ཞུགས་པ་སོགས་ལས་སྐྱོབ་པ་དང་། ལམ་གྱི་ཡོན་ཏན་སྔར་མ་སྐྱེས་པ་སྐྱེས་པ་དང་། སྐྱེས་པ་བརྟན་ཞིང་གོང་དུ་འཕེལ་བ་སོགས་ཀྱི་འདོད་པའི་དོན་ལ་གསོལ་བ་གདབ། མཐར་ཐུན་འཇོག་ཁར། སྐྱབས་ཡུལ་རྣམས་ཀྱི་སྐུ་ལས་འོད་ཟེར་འཕྲོས། བདག་སོགས་སེམས་ཅན་ཐམས་ཅད་ལ་ཕོག་པས་སྡིག་སྒྲིབ་སྦྱངས། སེམས་ཅན་ཐམས་ཅད་འཇའ་འོད་ཀྱི་ལམ་ནས་བྱེའུ་ཁྱུ་འཕུར་བ་ལྟར་འུར་དིར་གྱིས་དག་པའི་ཞིང་དུ་སོང་བར་བསམ། མཐར་རྩ་བའི་བླ་མའི་སྐུ་ལས་འོད་ཟེར་འཕྲོས། འཁོར་གྱི་སྐྱབས་ཡུལ་རྣམས་ལ་ཕོག་པས་ཀུན་ཀྱང་འོད་ཀྱིས་གོང་བུར་ཞུ་ནས་རྩ་བའི་བླ་མ་ལ་ཐིམ་པས་གཟི་མདངས་སྔར་ལས་ཀྱང་ཆེ་བར་བསམ། རྩ་བའི་བླ་མ་ཉིད་རང་གི་སྤྱི་བོར་བྱོན་ནས་དགྱེས་པ་ཆེན་པོས་འོད་དུ་ཞུ་ནས་རང་ལ་ཐིམ་པས། རང་སེམས་དང་བླ་མའི་ཐུགས་གཉིས་སུ་འཛིན་པའི་རྟོག་པ་དང་ཕྲལ་ནས་སྤྲོས་བྲལ་བདེ་བ་ཆེན་པོའི་ངང་ལ་ཅི་གནས་སུ་མཉམ་པར་བཞག་པ་ནི་མཐར་ཐུག་དོན་དམ་པའི་སྐྱབས་འགྲོ་སྟེ། རྗེས་ལ་བསྔོ་བ་བྱ། ནུབ་མོ་ཉལ་བའི་ཚེ་ན་ཡང་སྐྱབས་ཡུལ་གྱི་རྟེན་དེ་ཉིད་མ་བསྡུས་པར་དེ་ལ་མགོ་ཕྱོགས་ཏེ། གློ་གཡས་འོག་ཏུ་བཅུག་པའི་སེང་གེའི་ཉལ་སྟབས་ཀྱིས་མོས་གུས་དུང་ངེ་བའི་ངང་ལ་གཉིད་དུ་འགྲོ་བར་བྱ། ཐོ་རེངས་ལྡང་བའི་ཚེ་སྐྱབས་ཡུལ་རྣམས་ཀྱིས་ཕྱག་ཌ་དྲིལ་འཁྲོལ་བས་སད་པར་མོས་ལ། སྟོད་གཡོགས་ཐབས། སྨད་གཡོགས་ཤེས་རབ། སྐ་རགས་ཐབས་ཤེས་ཟུང་འཇུག ཞྭ་དང་གོན་པ་བླ་མའི་ངོ་བོར་བསམ་པ་དང་། ལས་ཅི་ལ་ཐུག་ཀྱང་བླ་མ་དཀོན་མཆོག་གསུམ་མི་སྤོང་སྙམ་དུ་བསམ་ཞིང་། ནམ་ཟ་འཐུང་གི་ཚེ་ནའང་ཕུད་མཆོད་པའི་ཚུལ་དུ་འབུལ་ཞིང་། རི་སོགས་གྱེན་ལ་ཡར་འཛེགས་ཏེ་འགྲོ་བའི་ཚེ་སེམས་ཅན་རྣམས་བདེ་ཆེན་གྱི་ཞིང་དུ་དྲངས་ནས་འགྲོ་སྙམ་པ་དང་། ཐུར་དུ་འགྲོ་བའི་ཚེ་སེམས་ཅན་ཐམས་ཅད་ངན་སོང་ལས་དྲང་བའི་ཕྱིར་འགྲོ་བ་ཡིན་སྙམ་པ་དང་། ཕྲེད་དུ་འགྲོ་བ་ན་སྐྱབས་ཡུལ་རྣམས་ཕྲག་པར་གསལ་བཏབ་ལ་སེམས་ཅན་ཐམས་ཅད་དང་འགྲོགས་ཏེ་སྐོར་བར་བསམས་ལ་སྐྱབས་འགྲོ་འདོན་པ་སོགས་སྤྱོད་ལམ་རྣམ་བཞི་གང་གི་སྐབས་སུའང་མོས་གུས་དང་མ་བྲལ་བར་ལམ་དུ་ཁྱེར་རོ། །གསུམ་པ་རྗེས་བསླབ་བྱ་དང་ཕན་ཡོན་གྱི་ཁྱད་པར་བསྟན་པ་ལ་གོང་སྨོས་ལྟར་སྤྱི་དང་ཁྱད་པར་གཉིས་ལས། དང་པོ་ལ་གཉིས། བསླབ་བྱ་དངོས་དང་བསྲུང་བའི་ཕན་ཡོན་ནོ། །དང་པོ་ལ་གཉིས། རྒྱུའི་བསླབ་བྱ་དང་། འབྲས་བུའི་བསླབ་བྱའོ། །དང་པོ་ལ་གསུམ། སྤང་བའི་བསླབ་བྱ་གསུམ། སྒྲུབ་པའི་བསླབ་བྱ་གསུམ། ཆ་མཐུན་གྱི་བསླབ་བྱ་གསུམ་རྗེས་འབྲེལ་དང་བཅས་པའོ། །དང་པོ་ནི། པཎ་ཆེན་བི་མ་ལས་མཛད་པའི་སྐྱབས་འགྲོ་ཡན་ལག་དྲུག་པ་ལས། སྐྱབས་གསུམ་དང་པོའི་བསླབ་བྱ་ནི། །གནོད་སྦྱིན་མི་བརྟེན་ཕྱག་མི་འཚལ། །གཉིས་པ་སེམས་ཅན་ཐམས་ཅད་ལ། །འཚེ་བ་སྤང་ཞིང་བརྩེ་བར་བྱ། །གསུམ་པ་བདག་དང་གཞན་གྱི་ཡུལ། །སྡིག་པ་ཅན་དང་འགྲོགས་པ་མིན། །ཞེས་དང་། མདོ་མྱང་འདས་ལས། གང་ཞིག་སངས་རྒྱས་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ། །ནམ་དུ་ཡང་ནི་ལྷ་གཞན་ལ། །སྐྱབས་སུ་སོང་བ་མ་ཡིན་ནོ། །དམ་པའི་ཆོས་ལ་སྐྱབས་འགྲོ་བ། །འཚེ་ཞིང་གནོད་པའི་སེམས་དང་བྲལ། །དགེ་འདུན་ལ་ཡང་སྐྱབས་འགྲོ་བ། །མུ་སྟེགས་གཞན་ལ་ཕྱོགས་མི་བྱེད། །ཅེས་སོ། །འདིའི་སྟེང་དུ་ཀུན་མཁྱེན་ཆོས་རྗེས་ངལ་གསོ་ལས། བླ་མར་སྐྱབས་སོང་མཆོད་འོས་མི་བསླུ་ཞིང་། །དམ་པ་རྣམས་ལ་སྐུར་འདེབས་མི་སྙན་སྤངས། །ཞེས་དང་། སྡོང་པོ་བཀོད་པ་ལས། དགེ་བའི་བཤེས་གཉེན་ལ་བསྟེན་པས་ནི་མཆོད་པར་འོས་པ་མི་བསླུ་བ་དང་། སྐྱེས་བུ་དམ་པ་རྣམས་ལ་མི་སྙན་པ་སྨྲ་བ་ཡོངས་སུ་སྤང་བར་བྱ་ཞིང་། དམ་པའི་ཆོས་ཀྱི་རྗེས་སུ་འགྲོ་བར་བྱའོ། །ཞེས་གསུངས་པའི་དོན་ཉིད་བསྣན་པར་མཛད་དོ། །གཉིས་བ་ནི། བི་མ་ལས། སྐུ་གཟུགས་ཚིགས་སུ་བཅད་པ་དང་། །ལྷན་པ་སེར་པོ་བཏབ་པ་ལའང་། །དད་མོས་སྒོ་ནས་སྟོན་པར་བརྟག །ཞལ་ནས་གསུངས་པ་མཐའ་དག་ལ། །སྐུར་བ་མི་གདབ་སྤྱི་བོར་བླངས། །གང་ཟག་དག་དང་མ་དག་ལ། །དམ་པར་བལྟ་བར་བྱ་བ་ཡིན། །ཞེས་གསུངས། གསུམ་པ་ནི། གཞི་བསྡུ་བར་སྐྱེས་བུ་དམ་པ་ལ་བསྟེན་པ་དང་། དམ་པའི་ཆོས་ཉན་པ་དང་། དགེ་འདུན་དང་རྗེས་སུ་མཐུན་པར་བསྒྲུབ་པ་ནི་སྐྱབས་སུ་འགྲོ་བའོ་ཞེས་བཤད་དོ། །གཞན་ཡང་ལས་ཅི་ལ་ཐུག་ཀྱང་དཀོན་མཆོག་གསུམ་མི་སྤང་བ་དང་། ཆེ་བའི་ཡོན་ཏན་རྗེས་སུ་དྲན་པ་དང་། ཐ་ན་ཅི་ཟ་ཅི་འཐུང་གི་ཕུད་ཀྱིས་མཆོད་པ་དང་། ཉིན་མཚན་དུས་དྲུག་ཏུ་སྐྱབས་འགྲོ་ལ་བརྩོན་པ་སོགས་ཏེ། བི་མ་ལས། ལུས་སྲོག་ཕྱིར་ཡང་གསུམ་མི་སྤང་། །དུས་འདིར་རྐྱེན་རྣམས་ཅི་བྱུང་ཡང་། །མགོན་སྐྱབས་གཞན་དུ་བཙལ་བ་མིན། །ཆེ་བའི་ཡོན་ཏན་ཟས་དག་གིས། །རྟག་ཏུ་དྲན་ཅིང་མཆོད་པ་ཡིན། །རྒྱུན་གྱི་སྐྱབས་འགྲོ་བརྗོད་བྱ་བ། །དུས་དྲུག་རྒྱུན་གྱི་བསྐུལ་མ་ཡིན། །ཞེས་གསུངས་སོ། །གཉིས་པ་འབྲས་བུའི་བསླབ་བྱ་ནི། འདི་ལྟར་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་མཉམ་པ་ཆེན་པོར་ཤེས་པའི་ལྟ་བས་ཐག་བཅད་པའི་དོན་ལ་མཉམ་པར་བཞག་ཅིང་སྣང་སྲིད་དཀྱིལ་འཁོར་ཆེན་པོར་ཤེས་པར་བྱ་བ་སྟེ། ངལ་གསོ་ལས། འབྲས་བུའི་བསླབ་བྱ་མཉམ་ཉིད་ནན་ཏན་བྱ། །བཟང་ངན་མི་རྟོག་མཆོག་དམན་བླང་དོར་མིན། །སྤྲོས་ལ་མི་བརྟེན་ཆོས་ཉིད་གཉུག་མར་སྦྱང་། །ཐམས་ཅད་ལྷུན་རྫོགས་དཀྱིལ་འཁོར་གཅིག་ཏུ་སྦྱང་། །ཞེས་དང་། ཡུམ་བར་མ་ལས། ཤེས་རབ་ཀྱི་ཕ་རོལ་དུ་ཕྱིན་པ་བསྒོམ་པར་འདོད་པས། ཆོས་གང་ལའང་མི་དམིགས་ཤིང་རྗེས་སུ་མི་མཐོང་བའི་ཚུལ་གྱིས་བསླབ་པར་བྱ་སྟེ། གང་ཞེ་ན། འདི་ནི་མཆོག་གོ །འདི་ནི་དམན་ནོ། །འདི་ནི་ནོར་བའོ། །འདི་ནི་སངས་རྒྱས་པའི་ཆོས་སོ། །འདི་ནི་གཞན་ཀུན་དུ་རྒྱུ་དག་གི་ཆོས་སོ་ཞེས་གཉིས་སུ་མཐོང་བའི་ཚུལ་གྱིས་དཔྱད་པར་མི་བྱའོ། །ཞེས་གསུངས། འདི་ནི་དེང་སང་གི་དུས་ན་རང་གཞན་ཀུན་གྱི་སྙིང་ལ་བཅང་བྱའི་གདམས་ངག་གི་གནད་གལ་པོ་ཆེ་སྟེ། དེ་ལས་གཞན་དུ་འདི་ནི་རང་ལུགས་སོ། །འདི་ནི་གཞན་ལུགས་སོ། །འདི་ནི་ཆོས་ཡང་དག་པའོ། །འདི་ནི་ཡང་དག་པ་མ་ཡིན་ནོ་ཞེས་སོགས་ཆོས་དང་གྲུབ་མཐའི་ཕྱོགས་ཞེན་ལ་བརྟེན་ནས་སྨྲ་བ་མང་པོ་ནི་བདུད་ཀྱིས་བྱིན་གྱིས་བརླབས་པའི་རྟགས་སུ་རིག་པར་བྱ་སྟེ། དེས་སྐྱབས་འགྲོའི་བསླབ་བྱ་དང་འགལ་བར་མ་ཟད་ཆོས་སྤོང་བའི་རྣམ་སྨིན་གྱི་སྒྲིབ་པ་མི་བཟད་པ་མྱོང་བར་འགྱུར་ཏེ། རྣམ་པར་འཐག་པ་བསྡུས་པའི་མདོ་ལས། དེ་ལྟར་མི་བླུན་པོ་དེ་དག་ངན་སོང་དུ་འགྲོ་བར་བདུད་ཀྱིས་བྱིན་གྱིས་བརླབས་པའི་ཕྱིར། དེ་ལའང་སྐྱོན་འདོགས་པར་སེམས་སོ། །དེ་བཞིན་གཤེགས་པས་གནང་བའི་ཆོས་སྨྲ་བ་དེ་ལའང་སྐྱོན་འདོགས་པར་སེམས་སོ། །ཞེས་དང་། འཇམ་དཔལ་གང་ལ་ལ་དེ་བཞིན་གཤེགས་པས་གསུངས་པའི་ཆོས་ལ་ལ་ནི་བཟང་བར་འདུ་ཤེས། ལ་ལ་ནི་ངན་པར་འདུ་ཤེས་ན་དམ་པའི་ཆོས་སྤོང་བའོ། །དམ་པའི་ཆོས་སྤངས་པས་དེ་བཞིན་གཤེགས་པ་ལ་སྐུར་བ་འདེབས་པ་ཡིན་ནོ། །དགེ་འདུན་ལ་ངན་དུ་བརྗོད་པ་ཡིན་ནོ། །ཞེས་དང་། རྣམ་སྣང་མངོན་བྱང་གི་རྒྱུད་ཕྱི་མ་ལས། བདག་གི་སེམས་ཀྱི་གནས་གཏན་ལ་མ་ཕབ་པར་རྣམ་པར་འཁྲུལ་བས་འདི་སྐད་དུ། འདི་ནི་སངས་རྒྱས་ཀྱིས་གསུངས་པ་མ་ཡིན་ཏེ་རང་བཟོ་ཅན་གྱིས་རང་བཟོར་བྱས་པ་ཡིན་ནོ་ཞེས་ཟེར་བ་དག་འབྱུང་བར་འགྱུར་རོ། །གསང་བའི་བདག་པོ། མི་བླུན་པོ་དེ་ནི་འགྲོ་བ་གཉིས་སུ་འགྲོ་བར་རིག་པར་བྱ་སྟེ། གཉིས་གང་ཞེ་ན། སེམས་ཅན་དམྱལ་བ་དང་དུད་འགྲོའོ། །གསང་བའི་བདག་པོ། དེ་དག་ལ་དགེ་བའི་རྩ་བའི་རྒྱུ་ཅུང་ཟད་ཀྱང་ཡོད་པར་ང་མི་སྨྲའོ། །ཞེས་དང་། ཏིང་འཛིན་རྒྱལ་པོ་ལས། གང་གིས་འཛམ་བུ་གླིང་འདིར་ནི། །མཆོད་རྟེན་ཐམས་ཅད་བཤིག་བྱེད་ལས། །གང་གིས་མདོ་སྡེ་སྤོང་བྱེད་པའི། །སྡིག་པ་དེ་ནི་ཆེས་ཁྱད་འཕགས། །ཞེས་དང་། སྟོང་ཕྲག་བརྒྱ་པ་ལས། མཚམས་མེད་པ་ལྔས་ནི་ཆོས་སྤོང་བར་འགྱུར་བ་འདི་ཡི་གཟུགས་བརྙན་ཙམ་དུའང་མི་སྤྱོད་དོ། །ཤཱ་རིའི་བུ། ཆོས་སྤོང་བའི་བསམ་པས་འདི་སྐད་དུ། འདི་ལ་ཁྱེད་དང་བདག་གིས་བསླབ་པར་མི་བྱ་སྟེ། འདི་ནི་ཆོས་མ་ཡིན་ནོ། །འདུལ་བ་མ་ཡིན་ནོ། །འདི་ནི་སྟོན་པའི་བསྟན་པ་མ་ཡིན་ནོ། །འདི་ནི་དེ་བཞིན་གཤེགས་པས་གསུངས་པ་མ་ཡིན་ནོ། །ཞེས་ཟེར་ཞིང་དེ་བདག་ཉིད་ཀྱང་སྤངས་ལ་གཞན་དག་ལ་ཡང་མོས་པ་མེད་པར་བྱེད་ཅིང་། བསམ་དང་གཞན་གྱི་བསམ་པ་ཉམས་པར་བྱེད་པ། བདག་གཞན་ཆུད་གསན་པར་དགའ་བ། བདག་ཉིད་ཀྱང་ཕྱིར་སྤོང་བར་འདོད་པ། གཞན་ལ་ཡང་སྤང་དུ་འཇུག་པ། ཆོས་འཇིག་པའི་ལས་བསགས་པ་དེའི་བཟུགས་བརྙན་དུའང་འགྱུར་རེ་སྐན{ཀན}། ཞེས་དང་། མཇམ་དཔལ་རྩ་རྒྱུད་ལས། གང་ཞིག་ཆོས་མཆོག་གཙོ་བོ་འདི། །རྒྱལ་བས་གསུངས་པའི་ཆོས་ཀྱི་མཛོད། །ས་སྟེང་མིས་ནི་སྤོང་བྱེད་པ། །དེ་ནི་མནར་མེད་དམྱལ་བར་འགྲོ། །བསྐལ་པ་ཆེན་པོར་དེ་འཚོད་ཅེས། །རྣམ་པ་དུ་མས་དབྱེ་བ་བསྟན། །ནམ་ཞིག་གོང་དུ་འབྱུང་བ་ཡི། །མི་ཡི་ལུས་སུ་སྐྱེས་ན་ཡང་། །དབུལ་ཞིང་ནད་མང་གླེན་པ་དང་། །ཀླ་ཀློ་དག་ཏུ་སྐྱེ་བར་འགྱུར། །འཇིག་རྟེན་སྨད་པར་འགྲོ་བ་སྟེ། །དེ་ནི་མཛེ་ཅན་ནད་པར་འགྱུར། །ལྐུག་ཅིང་འོན་པ་ཡན་ལག་ཉམས། །བློོ་ཉམས་ལོང་བ་ཉིད་དང་ནི། །རྩུབ་ཅིང་རྟག་ཏུ་འཇིགས་པའི་གཟུགས། །ས་སྟེང་ཡི་དྭགས་ལྟ་བུར་སྣང་། །གོས་ངན་སེམས་ནི་ངན་པ་དང་། །སེན་མོ་དང་ནི་ལུས་ཀྱང་ངན། །སྲིན་བུ་རྣམས་ཀྱིས་ཟོས་པ་དང་། །ཤུ་བ་གཡན་པ་ཡང་དག་ལྡན། །མདོ་སྡེ་འདི་དག་སྤང་བ་ན། །གང་དང་གང་གི་འགྲོ་བར་འགྱུར། །དེ་དང་དེར་ནི་སྐྱེ་བ་ན། །བློ་ངན་རྨོངས་པར་སྐྱེ་བར་འགྱུར། །ཞེས་དང་། བརྒྱད་སྟོང་པ་ལས། རབ་འབྱོར་ཆོས་ཀྱིས་ཕོངས་པར་གྱུར་པའི་ལས་བསགས་པ་དེ་ནི་ངན་སོང་ལོག་པར་ལྟུང་བ་རྣམས་སུ་སྐྱེ་ཞིང་མནར་མེད་པའི་སེམས་ཅན་དམྱལ་བ་ཆེན་པོར་སྡུག་བསྔལ་ལོ། །དེར་ཡང་མེ་ཡི་སྡུད་པའི་བསྐལ་པ་བྱུང་བ་དེའི་ཚེ་འཇིག་རྟེན་གྱི་ཁམས་གཞན་གྱི་དམྱལ་བ་རྣམས་སུ་འདོང་ཞིང་། དེར་ཡང་མེ་ཡི་སྡུད་པའི་བསྐལ་པ་བྱུང་ན་ཡང་གཞན་གྱི་དམྱལ་བར་སྐྱེ་བ་སོགས་དཔག་ཏུ་མེད་པ་གསུངས་ཤིང་། དེ་བཞིན་ཆོས་སྨྲ་བའི་དགེ་བའི་བཤེས་གཉེན་བྱང་ཆུབ་སེམས་དཔའ་རྣམས་ལ་ངན་དུ་སེམས་པའི་འབྲས་བུ་ཡང་། འཕགས་པ་སྤྱན་རས་གཟིགས་ཀྱི་མདོ་ལས། སངས་རྒྱས་སྲས་པོ་དེ་དག་ལ། །མི་གང་མི་དགའ་བྱེད་པ་དེ། །ལྷ་དང་མི་ནི་སྤངས་ནས་སུ། །དེ་དག་དམྱལ་བ་སྤྱོད་ཡུལ་འགྱུར། །བྱུང་ཆུབ་སེམས་དཔའ་རྣམས་ལ་ནི། །མི་གང་ལ་ལ་གནོད་བྱེད་པ། །མིག་མེད་པའམ་ལོང་བ་དང་། །སྡུག་བསྔལ་དཔུང་གཉེན་མེད་པར་འགྱུར། །ཤི་འཕོས་ནས་ནི་མནར་མེད་འགྲོ། །དེ་ནི་འབར་ཞིང་འཇིགས་སྐྲག་འགྱུར། །ལུས་ནི་ཆེན་པོར་གྱུར་ནས་ཀྱང་། སྡུག་བསྔལ་ཚོར་བ་མྱོང་བར་འགྱུར། །ཚེ་རབས་དེ་དང་དེ་དག་ཏུ། །དེ་ལུས་དཔག་ཚད་ཙམ་གྱུར་ཏེ། །དེ་ནི་ཕྲུམ་ལྟར་ཟླུམ་གྱུར་ལ། །ཀུན་ནས་ཡོངས་སུ་བཟའ་བར་འགྱུར། །དེ་ཚེ་ལུས་དང་མགོ་བོ་ནི། །ལྔ་སྟོང་ཡོད་པར་འབྱུང་འགྱུར་ཞིང་། མགོ་བོ་དེ་དག་རེ་རེ་ལའང་། །ལྕེེ་ནི་ལྔ་བརྒྱ་ཐམ་པ་ཡོད། །གཅིག་ལའང་ཐང་གཤོལ་བརྒྱ་དག་གིས། །ལྕེ་ནི་རབ་ཏུ་རྨོ་བར་འགྱུར། །ཞེས་དང་། མདོ་གཞན་ལས་ཀྱང་དེ་དང་མཐུན་པར་གསུངས་ཏེ། ཚུལ་དེ་ལ་དགོངས་ནས། དཀོན་མཆོག་བརྩེགས་པ་ལས། འོད་སྲུང་ངའམ་ང་འདྲ་བས་ཆོས་དང་གང་ཟག་གི་ཚོད་གཟུང་བར་བྱ་ཡི། གང་ཟག་གིས་གང་ཟག་དང་ཆོས་ཀྱི་ཚོད་གཟུང་བར་མི་བྱ་སྟེ། ལྟུང་བར་འགྱུར་བའི་ཕྱིར་རོ། །ཞེས་དང་། བདེ་མཆོག་ཉུང་ངུའི་རྒྱུད་ལས། མོས་པ་དུ་མའི་སེམས་ཅན་ལ། །སྤྱོད་པ་སྣ་ཚོགས་སྟོན་མཛད་དེ། །སྣ་ཚོགས་ཡུལ་གྱི་གདུལ་བྱ་ལ། །ཐབས་ནི་སྣ་ཚོགས་སྟོན་པ་ཡིན། །ཟབ་མོའི་ཆོས་འདི་སྟོན་པ་ན། །གལ་ཏེ་མོས་པར་མ་གྱུར་ཀྱང་། །སྨད་པ་དག་ཏུ་མི་བྱ་སྟེ། །ཆོས་ཉིད་བསམ་མི་ཁྱབ་དྲན་བྱ། །གང་གིས་འདིར་བདག་ཡུལ་མིན་པ། །གང་གི་ཆོས་ཉིད་མི་ཤེས་ཡིན། །རྫོགས་སངས་རྒྱས་དང་དེ་ཡི་སྲས། །ཤེས་རབ་ཆེན་པོ་རྣམས་གྱིས་མཁྱེན། །ཞེས་དང་། མདོ་རྒྱན་ལས། ཡིད་ཀྱི་ཉེས་པ་རང་བཞིན་གདུག་པ་སྟེ། །མི་རིགས་པ་ཡི་གཟུགས་ལའང་མི་རིགས་ན། །ཐེ་ཚོམ་ཟ་བའི་ཆོས་ལ་སྨོས་ཅི་དགོས། །དེ་བས་བཏང་སྙོམས་བཞག་ལེགས་ཉེས་པ་མེད། །ཅེས་གསུངས་པ་ཉིད་སེམས་ལ་བཞག་ནས་བདག་ཉིད་སྲུང་བར་བྱེད་པ་འདི་དོན་ཆེ་བར་འཁུམས་སོ། །དེ་ལྟར་འཕྲོས་དོན་ཅུང་ཟད་སྨོས་ནས། ཉམས་པའི་རྒྱུ་གཞན་ཡང་། ངལ་གསོ་ལས། གཏོང་རྒྱུ་བཏགས་པ་ཁས་ལེན་འདས་པ་དང་། །མཚན་ཉིད་པ་ནི་ལོག་ལྟ་སྐྱེས་པས་གཏོང་། །བསླབ་བྱ་ཉམས་པས་དམན་པར་ལྟུང་བ་སྟེ། །བག་ཡོད་དྲན་པས་བསྒྲིམས་ཏེ་བླང་དོར་བྱ། །ཞེས་གསུངས་ཏེ། དེ་ཡང་སྙིང་པོ་བྱང་ཆུབ་ཏུ་སངས་རྒྱས་པ་ན་ཆོ་གས་བླང་བའི་དུས་འདས་པས་གཏོང་རྒྱུ་བཏགས་པ་བ་དང་། ལོག་ལྟ་སྐྱེས་ནས་དཀོན་མཆོག་གསུམ་སྤངས་པ་དང་། སྒྲུབ་མ་ནུས་ཏེ་སྐྱབས་འགྲོའི་བསླབ་པ་ཕུལ་བ་ནི་གཏོང་རྒྱུ་མཚན་ཉིད་པ་ཡིན། འཇིག་རྟེན་པའི་ལྷ་ལ་ཕྱག་འཚལ་བ་སོགས་བསླབ་བྱ་ཅུང་ཟད་ཉམས་པ་ནི་དམན་པར་ཕྱོགས་པ་ཞེས་བྱ། དེ་ལྟར་སྐྱབས་འགྲོའི་བསླབ་པ་ཉམས་པའི་ཉེས་པའང་། རྒྱལ་པོ་རིགས་ལད་པ་ལྟར་ནང་པའི་ཁོངས་སུ་མི་ཆུད། ཚོང་པ་སྐྱེལ་མས་བསླུས་པ་ལྟར་ཅི་བྱེད་འཇིགས་པ་དང་བཅས། གྱང་འགྱེལ་བའི་རི་མོ་ལྟར་བསླབ་སྡོམ་ཐམས་ཅད་འཇིག་པར་སླ། དཔུང་གཉེན་དང་བྲལ་བའི་དམངས་ལྟར་གནོད་པ་དང་འཚེ་བ་མང་། ཁྲིམས་ལས་འདས་པའི་སྐྱེ་བོ་ལྟར་དམ་བཅའ་ཉམས་པས་ངན་སོང་དུ་སྐྱེ་བ་སོགས་མཐའ་ཡས། དེས་ན་ཉམས་པའི་ཉེས་དམིགས་ལ་བསམས་ཏེ་འགྱོད་བཤགས་དང་། ཕྱིན་ཆད་སྡོམ་སེམས་ཀྱིས་སྡོམ་པ་སླར་བླངས་ནས་སོར་ཆུད་པར་བྱའོ། །གཉིས་པ་བསྲུང་བའི་ཕན་ཡོན་ནི། སློབ་དཔོན་བི་མ་ལས། མུ་སྟེགས་སྤྱོད་ལས་ལོག་པ་ཡིན། །གསུམ་དུ་མི་སྐྱེ་རྟེན་དུ་འགྱུར། །བར་ཆད་མེད་པས་ནད་ཉུང་རིང་། །བྱང་ཞིང་སོག་པའི་ཕན་ཡོན་ནོ། །ཞེས་ནང་པ་སངས་རྒྱས་པའི་གྲལ་དུ་ཆུད་པ། ངན་འགྲོར་མི་སྐྱེ་བ། སྡོམ་པ་ཀུན་གྱི་རྟེན་དུ་གྱུར་པ། བར་ཆད་མེད་པ། ནད་ཉུང་བ། ཚེ་རིང་བ། སྡིག་སྒྲིབ་བྱང་བ། ཚོགས་གཉིས་རྫོགས་ཤིང་མྱུར་དུ་སངས་རྒྱས་ཐོབ་པ་སྟེ་ཕན་ཡོན་ཆེན་པོ་བརྒྱད་གསུངས་ཤིང་། དེ་ཡང་འདི་ལྟར་སྐྱབས་སུ་སོང་བ་ཙམ་གྱིས་ངན་སོང་གི་སྒོ་གཅོད་ཅིང་། མཐོ་རིས་དང་ཐར་པའི་ལམ་པོ་ཆེར་ཚེ་རབས་ཐམས་ཅད་དུ་འགོད་ནུས་པ་ཡིན་ཏེ། ཕག་གི་རྟོགས་བརྗོད་ལས། གང་ཞིག་སངས་རྒྱས་སྐྱབས་འགྲོ་བ། །དེ་དག་ངན་འགྲོར་མི་འགྲོ་སྟེ། །མི་ཡི་ལུས་ཀྱང་སྤངས་ནས་ནི། །ལྷ་ཡི་ལུས་སུ་སྐྱེ་བར་འགྱུར། །ཞེས་སོ། །བསོད་ནམས་དང་ཡེ་ཤེས་ཀྱི་ཚོགས་རྣམ་པ་གཉིས་མྱུར་དུ་རྫོགས་པར་གྱུར་བའང་། མྱང་འདས་ལས། གསུམ་ལ་སྐྱབས་སུ་འགྲོ་བ་གང་། །བསོད་ནམས་ཡེ་ཤེས་དམ་པའི་ཚོགས། །འཇིག་རྟེན་རྒྱལ་བའི་ཆོས་འཕེལ་བས། །སངས་རྒྱས་ཉིད་ནི་ཐོབ་པར་འགྱུར། །ཞེས་སོ། །ཡོན་ཏན་ཚད་མེད་པར་འཐོབ་ཅིང་རྟག་པར་དཀོན་མཆོག་གསུམ་གྱི་སྣང་བ་དང་མི་འབྲལ་བའང་། ཁྱེའུ་རིན་ཆེན་བྱིན་གྱིས་ཞུས་པའི་མདོ་ལས། གང་དག་སངས་རྒྱས་ལ་སྐྱབས་སུ་སོང་བ་དེས་ནི་དགེ་བའི་ཆོས་ཐམས་ཅད་མངོན་པར་འཕེལ་བ་ཡིན་ནོ། །ངོ་ཚ་ཤེས་པ་ཡིན་ནོ། །ཁྲེལ་ཡོད་པ་ཡིན་ནོ། །ཆོས་ལ་སྐྱབས་སུ་སོང་བ་དེ་དག་ནི་བག་ཡོད་པ་ཡིན་ནོ། །ཡོན་ཏན་ཚོགས་མང་བ་ཡིན་ནོ། །རྟག་ཏུ་ཚེ་རབས་དྲན་པ་ཡིན་ནོ། །ཆོས་ཀྱི་བགོ་སྐལ་གྱི་ཚོགས་དང་ལྡན་པ་ཡིན་ནོ། །དགེ་འདུན་ལ་སྐྱབས་སུ་སོང་བ་དེ་དག་གི་སེམས་ལས་སུ་རུང་བ་ཡིན་ནོ། །ཏིང་ངེ་འཛིན་དང་གཟུངས་ཀྱི་སྒོ་མང་བ་ཡིན་ནོ། །རྟག་ཏུ་རིགས་བཙུན་པ་ཡིན་ནོ། །རྨི་ལམ་དུའང་སངས་རྒྱས་དང་། ཆོས་དང་། དགེ་འདུན་དང་མི་འབྲལ་བ་ཡིན་ནོ། །ཞེས་སོ། །དཀར་ཕྱོགས་ཀྱི་ལྷས་སྲུང་ཞིང་དགེ་བའི་རྩ་བ་གོང་འཕེལ་དུ་འགྱུར་བའང་། དེ་ཉིད་ལས། གཞན་ཡང་དཀར་པོ་ལ་དགའ་བའི་ལྷ་རྣམས་ཀྱིས་བསྲུང་བ་ཡིན་ནོ། །དགེ་བའི་རྩ་བ་དག་ཀྱང་སྤེལ་ལོ། །ཞེས་སོ། །འཇིགས་དང་འཚེ་བ་ཐམས་ཅད་སེལ་ཞིང་བདུད་དང་ངན་སོང་གི་གནོད་པས་མི་བརྫི་བའང་། མདོ་རྒྱལ་མཚན་དམ་པ་ལས། དགེ་སློང་དག་ཁྱོད་དགོན་པ་དང་། དུར་ཁྲོད་དང་། འབྲོག་སྟོང་ལ་སོགས་པ་ན་འདུག་ཀྱང་རུང་། གསུམ་ལ་སྐྱབས་སུ་སོང་ཞིག་དང་། འཇིགས་པ་དང་། སྡུག་བསྔལ་བ་དང་། སྤུ་ཟིང་ཞེས་བྱེད་པ་དེ་དག་མེད་པར་འགྱུར་རོ། །ཞེས་དང་། ཉི་མའི་སྙིང་པོའི་མདོ་ལས། སངས་རྒྱས་སྐྱབས་སུ་སེམས་ཅན་སུ་འགྲོ་བ། །བདུད་རྣམས་བྱེ་བས་གསད་པར་མི་ནུས་ཏེ་། །ཚུལ་ཁྲིམས་ཉམས་ཤིང་བློ་ནི་འཁྲུགས་གྱུར་ཀྱང་། །དེ་ནི་ངེས་པར་སྐྱེ་བའི་ཕ་རོལ་འགྲོ། །ཞེས་སོ། །མདོར་ན་གནས་སྐབས་སུ། ཉོན་མོངས་པ་དང་། འཚེ་བ་དང་ཐེག་པ་དམན་པའི་ལམ་དང་། འཁོར་བ་དང་ངན་སོང་ལ་སོགས་པ་མི་མཐུན་པའི་ཕྱོགས་ཐམས་ཅད་ལས་སྐྱོབ་ཅིང་ཡོན་ཏན་ཀུན་གྱི་རྟེན་གཞིར་གྱུར་པ་དང་། མངོན་པར་མཐོ་བ་དང་། ངེས་པར་ལེགས་པའི་དོན་ཐམས་ཅད་ཐོབ་པར་བྱེད་ཅིང་། མཐར་ཐུག་སངས་རྒྱས་ལ་སྐྱབས་སུ་སོང་བས་སངས་རྒྱས་ཉིད་འགྲུབ། ཆོས་ལ་སྐྱབས་སུ་སོང་བས་ཆོས་ཀྱི་འཁོར་ལོ་བསྐོར། དགེ་འདུན་ལ་སྐྱབས་སུ་སོང་བས་ཕྱིར་མི་ལྡོག་པའི་དགེ་འདུན་རྒྱ་མཚོ་ལྟ་བུ་འདུ་བས་སྲིད་ཞིའི་རྒུད་པ་སེལ་བ་སོགས་ཕན་ཡོན་ཚད་མེད་པ་དང་ལྡན་པ་ཡིན་ཏེ། མདོ་རྒྱན་ལས། རྟག་ཏུ་ཉོན་མོངས་ཚོགས་ཀུན་དང་། །ཉེས་པར་སྤྱོད་པ་ཐམས་ཅད་དང་། །རྒ་དང་འཆི་བ་དག་ལས་ཀྱང་། །སངས་རྒྱས་ཉིད་ཀྱིས་ཡོངས་སུ་སྐྱོབ། །འཚེ་བ་དག་ནི་ཐམས་ཅད་དང་། །ངན་སོང་དང་ནི་གནས་མིན་དང་། །འཇིགས་ཚོགས་ཐེག་པ་དམན་དག་ལས། །སྐྱོབ་ཕྱིར་སྐྱབ་ཀྱི་དམ་པ་ཡིན། །ཞེས་དང་། མྱང་འདས་ལས། གང་སུ་གསུམ་ལ་སྐྱབས་སུ་གྲོ། །དེ་དག་མྱུར་དུ་སངས་རྒྱས་འགྱུར། །ཞེས་དང་། དཀོན་མཆོག་བརྩེགས་པ་ལས། མི་གང་གསུམ་ལ་སྐྱབས་སུ་འགྲོ། །དེ་ཡིས་ཚོགས་ཀྱང་རབ་རྫོགས་ཤིང་། །སངས་རྒྱས་ཉིད་ཀྱང་འགྲུབ་པ་དང་། །ཆོས་དང་དགེ་འདུན་འཐོབ་པར་འགྱུར། །ཞེས་དང་། དྲི་མ་མེད་པའི་མདོ་ལས། སྐྱབས་སུ་སོང་བའི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་ནས། །དེ་ནི་དེ་བས་ལྷག་པར་འགྱུར། །ཞེས་གསུངས་པ་བཞིན་ནོ། །གཉིས་པ་ཕྱི་ནང་གསང་བའི་སྐྱབས་འགྲོའི་བསླབ་བྱ་བླ་མའི་དམར་ཁྲིད་ལས་གསུངས་པ་ནི། དང་པོ་ཕྱིའི་སྐྱབས་འགྲོའི་བསླབ་བྱ་ལ་ཁྱད་པར་གྱི་བསླབ་བྱ་གསུམ་དང་ཐུན་མོང་གི་ལྔ་བཅས་བརྒྱད་ལས། དང་པོ་གསུམ་ནི། སངས་རྒྱས་ལ་སྐྱབས་སུ་སོང་ནས་ལྷ་གཞན་ལ་ཕྱག་མི་འཚལ། ཆོས་ལ་སྐྱབས་སུ་སོང་ནས་སེམས་ཅན་ལ་འཚེ་བ་སྤངས། དགེ་འདུན་ལ་སྐྱབས་སུ་སོང་ནས་མུ་སྟེགས་ཅན་ལ་མི་འགྲོགས་པ་གསུམ་ཡིན། དང་པོ་ལྷ་གཞན་ལ་ཕྱག་མི་འཚལ་བ་ནི། ལྷ་གཞན་གུ་ལང་དང་ཁྱབ་འཇུག་དང་དབང་ཕྱུག་ཆེན་པོ་དང་དེ་ལ་སོགས་པ་འཇིག་རྟེན་པའི་ལྷ་ལ་ཕྱག་འཚལ་ན་སྐྱབས་འགྲོ་ཉམས། དེ་རྣམས་ལ་སྐྱབས་སུ་སོང་ན་སྐྱབས་འགྲོའི་སྡོམ་པ་འཆོར། གཉིས་པ་སེམས་ཅན་ལ་འཚེ་བ་སྤངས་བ་ནི། ཆེ་རབ་གསོད་པ་ཡིན། དེས་སྐྱབས་འགྲོའི་སྡོམ་པ་འཆོར། ཁོང་ཁྲོས་རྡེག་པ་དང་འཁོལ་བ་དང་སྣ་འབིགས་པ་དང་གོ་རར་འཇུག་པ་དང་རྩིང་བ་འབལ་བ་སོགས་བྱས་ན་སྡོམ་པ་ཉམས་པ་ཡིན། གསུམ་པ་མུ་སྟེགས་ཅན་ལ་མི་འགྲོགས་པ་ནི། ལྟ་སྤྱོད་རྟག་ཆད་དུ་འཛིན་པའི་མི་དང་འགྲོགས་ན་སྡོམ་པ་ཉམས། དེ་དང་ལྟ་སྤྱོད་བསྟུན་ན་སྐྱབས་འགྲོའི་སྡོམ་པ་འཆོར་བ་ཡིན་ནོ། །ཐུན་མོང་གི་བསླབ་བྱ་ལྔ་ལས། དང་པོ་དུས་རྟག་ཏུ་དཀོན་མཆོག་མཆོད་ཅིང་ཅི་ཟ་ཅི་འཐུང་གི་ཕུད་ཀྱིས་མཆོད་པ་ནི། དཀོན་མཆོག་གིི་རྟེན་གྱིི་སྤྱན་སྔར་ཅི་འབྱོར་པའི་མཆོད་པ་བཤམས་ལ། མཆོད་པ་ལ་འབྱོན་པར་གསོལ་བ་གདབ། མཆོད་པ་དངོས་ལ་བཞི་ལས། དང་པོ་ཕྱག་གི་མཆོད་པ་ནི། རང་གི་ལུས་དྲང་པོར་བསྲངས་ལ་ཐལ་མོ་སྦྱར་ཏེ། སངས་རྒྱས་དང་བྱང་ཆུབ་སེམས་དཔའི་ཡོན་ཏན་ཡིད་ལ་དྲན་པར་བྱ་ཞིང་ཕྱག་འཚལ་བས། དེ་རྣམས་ཀྱི་ཞབས་འཁོར་ལོས་མཚན་པ་ལ་གཏུགས་པར་བསམ་མོ། །གཉིས་པ་རྫས་ཀྱི་མཆོད་པ་ནི། མེ་ཏོག་ལ་སོགས་པ་བདག་པོས་ཡོངས་སུ་བཟུང་བ་དང་མ་བཟུང་བ་དང་། ཏིང་ངེ་འཛིན་གྱི་མཆོད་པ་དང་། བདག་གི་ལུས་ཀྱང་འབུལ་ལོ། །གསུམ་པ་བསྟོད་པའི་མཆོད་པ་ནི། དབྱངས་དང་ལྡན་པའི་སྒོ་ནས་བྱའོ། །བཞི་པ་བསྒྲུབ་པའི་མཆོད་པ་ནི། སྟོང་པ་ཉིད་དང་སྙིང་རྗེ་བྱང་ཆུབ་ཀྱི་སེམས་མི་ཕྱེད་པར་བསྒོམས་ནས་དེ་ལས་བྱུང་བའི་དགེ་བའི་རྩ་བ་དེས་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་སྨོན་ལམ་འདེབས་པ་ཡིན། དཀོན་མཆོག་གསུམ་ལ་ཆུ་ཕོར་གང་དང་དུད་པ་རྡུལ་གཅིག་གི་དགོས་པ་མེད། རང་ལ་སངས་རྒྱས་ཀྱི་འོད་ཟེར་འཇུག་པའི་རྒྱུ་ཡིན། ཅི་ཟ་ཅི་འཐུང་གི་ཕུད་ཀྱིས་མཆོད་པ་ནི། ཟས་ཀྱི་ཕུད་ཀྱིས་ལྷ་བཤོས་གསུམ་བཅད་ལ་ༀ་ཨཱཿཧཱུྃ་ལན་གསུམ་བརྗོད་པས་བདུད་རྩིའི་རྒྱ་མཚོར་གྱུར་པར་བསམ། དེ་ནས་རང་གི་ཡི་དམ་གྱི་ལྷ་ལ་དཀོན་མཆོག་གསུམ་པོ་དཔག་ཏུ་མེད་པས་བསྐོར་ནས་བཞུགས་པར་བསམས་ལ། དེ་རྣམས་ལ་བདུད་རྩིའི་མཆོད་པ་བཞེས་ཤིག་པར་འབུལ། དེ་ཙམ་མ་ཤེས་ན་དཀོན་མཆོག་བཞེས་ཤིག་པར་འབུལ། ཐ་ན་འབུལ་རྒྱུ་གཅིག་ཀྱང་མེད་ཀྱང་ཉི་མ་རེ་ལ་ཆུ་ཕོར་བ་རེ་འབུལ་ལོ། དེ་ལྟར་མ་ཕུལ་ན་སྐྱབས་འགྲོའི་སྡོམ་པ་ཉམས་པ་ཡིན། དཀོན་མཆོག་ལ་ཟས་ཀྱི་དགོས་པ་མེད། རང་གི་ཚོགས་མ་ཚོར་བར་བསགས་པ་ཟ་གཏོར་ཡིན། གཉིས་པ་ལུས་སྲོག་དང་གཙིགས་དང་བྱ་དགའི་ཆེད་དུ་དཀོན་མཆོག་གསུམ་མི་སྤོང་བ་ནི། ལུས་ཀྱི་ཕྱིར་མི་སྤོང་བ། མིག་འབྱིན་པ་དང་། སྒྱིད་པ་གཅོད་པ་དང་། རྣ་བ་གཅོད་པ་དང་། སྣ་གཅོད་པ་དང་། ཡན་ལག་གཞན་གཅོད་ཟེར་ཡང་གཅོད་དུ་འཇུག་པ་ལས་མི་སྤོང་བ་ཞིག་དགོས། སྲོག་གི་ཕྱིར་ཡང་མི་སྤོང་བ་ནི། གསོད་ཟེར་ཡང་གསོད་དུ་འཇུག་པ་ལས་སྐྱབས་འགྲོ་མི་སྤོང་བ་ཞིག་དགོས། གཙིགས་དང་བྱ་དགའི་ཆེད་དུ་མི་སྤོང་བ་ནི། འཛམ་བུའི་གླིང་རིན་པོ་ཆེས་བཀང་ལ་སྦྱིན་གྱིས། སྐྱབས་འགྲོ་ཐོངས་ཟེར་ཡང་མི་གཏོང་བ་ཞིག་དགོས་སོ། །གསུམ་པ་རང་ལ་ན་ཚ་དང་སྐྱིད་སྡུག་ཅི་བྱུང་ཡང་ཐབས་གཞན་མི་བཙལ་བ་ནི། རང་ལ་ན་ཚ་སོགས་བྱུང་དུས། མཎྜལ་དང་མཆོད་པ་རྣམ་ལྔ་བཤམས་ལ་དཀོན་མཆོག་གསུམ་ལ་ཕུལ་ཏེ། དེ་ནས་སྐྱབས་འགྲོ་བྱ། བླ་མ་རྡོ་རྗེ་འཛིན་པ་ཆེན་པོ་ལ་སོགས་པ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་གི་ན་ཚ་དང་མི་དང་མི་མ་ཡིན་པ་དང་། འབྱུང་པོ་དང་འབྱུང་པོ་ལས་གྱུར་པ་ཐམས་ཅད་མི་འབྱུང་ཞིང་། ཞི་བ་དང་བཀྲ་ཤིས་བདེ་ལེགས་ཐམས་ཅད་འབྱུང་བར་མཛད་དུ་གསོལ་ཞེས་གསོལ་བ་གདབ། གཞན་ཡང་ཚོགས་བསགས་ཀློག་འདོན་དང་གཏོར་མ་ལ་སོགས་པ་ནི་སྐྱབས་འགྲོའི་རྒྱུར་འགྲོ་བར་བྱས་པས་ཆོག དེས་ཀྱང་མ་ཕན་ན་དཀོན་མཆོག་ལ་བྱིན་རླབས་མེད། ཆོས་མི་བདེན་སྙམ་དུ་ལོག་ལྟ་སྐྱེ་མི་རུང་། བདག་རང་གི་ལས་ངན་ཟད་པའི་དུས་ན་སོས་ཏེ་འོང་སྙམ་དུ་བསམ། མོ་བོན་ལ་སོགས་པ་གཞན་ཐམས་ཅད་མི་བཙལ་བར་སྐྱབས་འགྲོ་འབའ་ཞིག་བྱའོ། །བཞི་པ་ཕྱོགས་གར་འགྲོ་ཡང་སངས་རྒྱས་དང་བྱང་ཆུབ་སེམས་དཔའ་ཡིད་ལ་དྲན་པར་བྱས་ལ་མཆོད་པ་བྱ་ཞིང་སྐྱབས་སུ་འགྲོ་བ་ནི། སང་ལྟ་བུ་ཤར་དུ་འགྲོ་ན། དེའི་རིང་ལྟ་བུར་མཎྜལ་དང་མཆོད་པ་བཤམས་ལ། ཕྱོགས་འདེའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་སྐྱབས་སུ་འགྲོ། བླ་མ་རྡོ་རྗེ་འཛིན་པ་ཆེན་པོ་ལ་སོགས་པ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་འདི་ཚུན་ཆད་དུ་འགྲོ་བ་ལ་དེ་བར་དེར་མ་ཕྱིན་ཚུན་ཆད་ལ་མི་དང་མི་མ་ཡིན་པའི་བར་ཆད་མི་འབྱུང་ཞིང་བཀྲ་ཤིས་པར་མཛད་དུ་གསོལ་ཞེས་གསོལ་བ་བཏབ་ལ་འགྲོ། དེ་རིང་མ་གྲུབ་ན་ཡང་ནམ་འགྲོ་བའི་དུས་ན་དེ་ལྟར་བྱ། འགྲོ་བའི་ཚེ་ཐེམ་པའི་ཕྱི་རོལ་ནས་གོམ་པ་བཅུའམ་བདུན་ཚུན་ཆད་ལ་སྐྱབས་འགྲོ་མ་དྲན་ན་སྐྱབས་འགྲོ་ཉམས་པ་ཡིན། དེའི་དུས་ཀྱིས་མི་ཕན་པ་ལས་ཕྱིས་ནི་མི་འཆོར། ལར་སྐྱབས་འགྲོ་ལ་བློ་ཁེལ་ན་བསླུ་མི་སྲིད་དོ། །ལྔ་པ་སྐྱབས་འགྲོའི་ཡོན་ཏན་དྲན་པར་བྱས་ལ་ཡང་དང་ཡང་དུ་བསླབ་པ་ནི། དཀོན་མཆོག་གསུམ་ལ་སྐྱབས་སུ་སོང་བས་ན། རེ་ཡང་དཀོན་མཆོག་ལ་རེ། ལྟོས་ཀྱང་དཀོན་མཆོག་ལ་ལྟོས། སྐྱབས་ཀྱང་དཀོན་མཆོག་ཁོ་ན་ལ་འགྲོ། གསོལ་བ་ཡང་དཀོན་མཆོག་ལ་བདེབས། བྱིན་རླབས་ཀྱང་དཀོན་མཆོག་ལ་ཞུ་དགོས། ད་ལྟའི་དུས་ཀྱི་དཀོན་མཆོག་གི་རྟེན་ལུགས་སུ་བླུགས་པ་དང་། འབུར་དུ་དོད་པ་དང་། རིས་སུ་བྲིས་པ་དང་། མཆོད་རྟེན་དང་། པོ་ཏི་དང་། གླེགས་བམ་ལ་སོགས་པ་ལ་ཆོས་ཀྱི་སྐུར་མོས་པ་བྱས་ལ་ཕྱག་མཆོད་དང་གསོལ་བ་གདབ། འདིས་ཆོས་སྐུའི་ངོ་བོར་ཝལ་གྱིས་རྟོགས་ནས་འགྲོ་བ་ཡང་སྲིད། དེ་ལྟར་མ་གྱུར་ཀྱང་ད་ལྟར་དཀོན་མཆོག་གསུམ་ལ་ཕྱག་དང་མཆོད་པ་སོགས་བྱས་ཤིང་ལས་ཀྱི་འབྲེལ་བ་བཞག་པས་མ་འོངས་པའི་དུས་ན་སངས་རྒྱས་ཀྱི་གདུལ་བྱར་འགྱུར་བ་ཡིན། རང་ལ་ཡོན་ཏན་དང་བདེ་བ་ཅི་བྱུང་ཡང་བླ་མ་དང་དཀོན་མཆོག་གི་བྱིན་རླབས་ཡིན་པར་བསམ། དེས་བྱིན་རླབས་འཇུག་པ་ཡིན། རང་ལ་སྐྱོན་དང་སྡུག་བསྔལ་ཅི་བྱུང་ཡང་རང་གི་ལས་ངན་ཡིན་པར་བསམ། དེས་ལས་ངན་ཐམས་ཅད་འཛད་པ་ཡིན། ལར་རང་གིས་དཀོན་མཆོག་ལ་བློ་མ་ཁེལ་བར། དཀོན་མཆོག་ལ་བྱིན་རླབས་མི་འདུག་ཟེར་ནས་ལོག་ལྟར་འཛིན་ན་དམྱལ་བའི་གཏིང་ནས་མི་ཐར་རོ། །དེ་ལྟར་སྐྱབས་སུ་སོང་བ་ལ་ཡོན་ཏན་བརྒྱད་ཡོད་དོ། །དང་པོ་ནང་པ་སངས་རྒྱས་པའི་ཁྱུར་ཚུད་པ་ནི། དཀོན་མཆོག་ལ་སྐྱབས་སུ་སོང་ན་ནང་པ་སངས་རྒྱས་པ་ཟེར་བ་ཡིན། སྐྱབས་འགྲོ་མ་སྐྱེས་ན་གང་ཟག་འཕགས་པ་དང་སྒོམ་ཆེན་སངས་རྒྱས་དངོས་ཡིན་ཟེར་ཡང་ནང་པ་སངས་རྒྱས་པའི་ཁྱུར་མི་ཚུད་དོ། །གཉིས་པ་སོ་སོར་ཐར་པ་ལ་སོགས་པ་སྡོམ་པ་མཐའ་དག་གི་རྟེན་དུ་རུང་བ་ནི། སྐྱབས་འགྲོའི་སྡོམ་པ་ཤོར་ན་དེ་ལ་བརྟེན་པའི་སྡོམ་པ་ཐམས་ཅད་ཀྱང་འཆོར། སོར་འཇུག་པ་ཡང་སྐྱབས་འགྲོའི་སྡོམ་པ་སོར་ཆུད་པས་ཆོག་སྟེ། དེ་ཡང་རང་གིས་དཀོན་མཆོག་གསུམ་ལ་མོས་པ་བྱས་ནས། དེའི་སྤྱན་སྔར་སྡོམ་པ་བླང་བས་ཆོག་གོ །གསུམ་པ་སྔར་བྱས་ཀྱིས་སྡིག་པ་ཐམས་ཅད་ཟད་པར་འགྱུར་བ་ནི། བསྙེན་གནས་ནས་གསང་སྔགས་ཀྱི་སྡོམ་པ་མན་ཆད་ཀྱི་ཐོག་མར་གསུམ་ལ་བསྐྱབས་སུ་འགྲོ་བའི་སྡོམ་པས་ལས་ཐམས་ཅད་སྲབ་ཅིང་ཟད་པར་བྱེད་དོ། །དེ་ཡང་སྐྱབས་འགྲོ་ཁྱད་པར་ཅན་གྱིས་སྒྲིབ་པ་གཏན་ནས་འཛད། ཐུན་མོང་བས་ལས་ཀྱི་སྒྲིབ་པ་སྲབ་པར་བྱེད། ཡང་སྐྱབས་འགྲོ་གཤའ་མ་ཤིག་རྒྱུད་ལ་སྐྱེས་ན་ལས་ཀྱི་སྒྲིབ་པ་གཏན་ནས་འཛད། ཚིག་ཙམ་གྱིས་ཀྱང་སྲབ་པར་བྱེད། ཡང་འགྲོ་འཆག་ཉལ་འདུག་དུས་རྟག་ཏུ་སྐྱབས་འགྲོ་བྱས་ན་གཏན་ནས་འཛད། མདོ་ལོང་མདོ་ལོང་གིས་ཀྱང་སྲབ་གསུངས། བཞི་པ་རྒྱུད་ལ་བསོད་ནམས་རྒྱ་ཆེན་པོ་དང་ལྡན་པར་འགྱུར་བ་ནི། འཇིག་རྟེན་པའི་བསོད་ནམས་ཚེ་རིང་བ་དང་། ནད་མེད་པ་དང་། དཔལ་དང་གཟི་མདངས་དང་ལྡན་པ་དང་། འབྱོར་པ་རྒྱ་ཆེན་པོ་ལ་སོགས་པ་ཡང་སྐྱབས་འགྲོ་ལས་འབྱུང་ལ། འཇིག་རྟེན་ལས་འདས་པའི་བླ་ན་མེད་པའི་བྱང་ཆུབ་ཀྱང་སྐྱབས་འགྲོ་ལས་འབྱུང་བའོ། །ལྔ་པ་ཚེ་འདིའི་བར་དུ་གཅོད་པ་མི་དང་མི་མ་ཡིན་ཐམས་ཅད་ཀྱིས་མི་ཚུགས་པ་ནི། རང་ལ་སྐྱབས་འགྲོ་གཤའ་མ་ཞིག་བློ་ལ་སྐྱེས་ཙམ་ན། ཚེ་འདི་ལ་མིའི་བར་དུ་གཅོད་པས་ཀྱང་མི་ཚུགས། མི་མ་ཡིན་ཀླུ་དང་རྒྱལ་པོ་ལ་སོགས་པས་ཀྱང་མི་ཚུགས་སོ། །དྲུག་པ་ཇི་ལྟར་བསམ་པའི་དོན་ཐམས་ཅད་འགྲུབ་པར་འགྱུར་བ་ནི། སྐྱབས་འགྲོ་གཤའ་མ་ཞིག་རྒྱུད་ལ་སྐྱེས་ན་ཅི་བསམ་པ་ཐམས་ཅད་མི་འགྲུབ་པ་མི་སྲིད་དེ། སྐྱབས་འགྲོ་ལ་བློ་ཁེལ་ན་ཡིད་བཞིན་གྱི་ནོར་བུ་རིན་པོ་ཆེ་ལ་གསོལ་བ་བཏབ་ན་ཅི་འདོད་འོང་བ་དང་འདྲའོ། །བདུན་པ་ངན་སོང་དང་ངན་འགྲོ་དང་ལོག་པར་མི་ལྟུང་བ་ནི། ངན་སོང་ནི་དམྱལ་བ་ཡི་དྭགས་དུད་འགྲོ་ལ་བྱ། ངན་འགྲོ་ནི་ཡུལ་མཐའ་འཁོབ་ལ་སོགས་པ་ཆོས་མེད་པའི་ཡུལ་དུ་སྐྱེ་བ་ཡིན། ལོག་པར་ལྟུང་བ་ནི་མུ་སྟེགས་ཏེ། དེ་དག་ཏུ་མི་ལྟུང་བར་འདོད་ན་ཡང་སྐྱབས་འགྲོ་ཁོ་ན་བྱའོ། །བརྒྱད་པ་མྱུར་དུ་མངོན་པར་རྫོགས་པར་འཚང་རྒྱ་བའི་ཕན་ཡོན་ནི། ཕན་ཡོན་གཞན་ལྟ་སྨོས་ཀྱང་ཅི་དགོས་ཏེ། ཐེག་པ་ཆེན་པོ་གསང་སྔགས་ནས་ཚེ་གཅིག་ལུས་གཅིག་ལ་འཚང་རྒྱ་བར་བཤད་དེ། དེ་ཡང་མྱུར་དུ་འཚང་རྒྱ་བ་ལས་མེད། དུས་རེས་འགའ་སྐྱབས་འགྲོ་བྱས་པས་ཆོག་སྙམ་པའི་དོགས་པ་བཅད་ལ་ཡང་དང་ཡང་དུ་ཉིན་མཚན་མེད་པར་སྐྱབས་སུ་འགྲོ་བར་བྱ་དགོས། དེ་ལྟར་བྱས་ན་མྱུར་དུ་མངོན་པར་རྫོགས་པར་བྱང་ཆུབ་ངེས་པར་འཐོབ་བོ། །སྐྱབས་འགྲོ་ལ་རེམ་ན་ཆོས་མང་པོ་བྱ་མི་དགོས། བྱང་ཆུབ་ལས་འཆོལ་དོགས་མེད་དོ། །རང་ལ མ་ལོག་པར་སོང་གིས་དོགས་པ་ལ་ཡང་ལམ་རྣལ་མ་དང་ཕྲད་པར་གསོལ་བ་བཏབ་པས་དེ་དང་ཅིས་ཀྱང་འཕྲད། སྟོང་ཉིད་དང་ལྷའི་དཀྱིལ་འཁོར་བསྒོམ་པ་སོགས་ཆོས་ཟབ་མོ་སྐྱེར་མ་འདོད་པ་ཀུན་ལ་ཡང་སྐྱབས་སུ་འགྲོ་བས་སྒྲིབ་པ་འབྱོངས་ཤིང་ཚོགས་བསགས་པས་སྐྱེ་བ་ཡིན། དེ་ལྟར་བྱས་པས་སྐྱོབ་ལུགས་ཀྱང་། སངས་རྒྱས་རྣམས་ཀྱིས་སེམས་ཅན་རྣམས་འཁོར་བ་ནས་དངོས་སུ་ཕྱག་གིས་ཁྲིད་ནས་གདོན་ནམ་སྙམ་ན། དེ་ལྟར་མི་བཏུབ་སྟེ། གལ་ཏེ་བཏུབ་ན་སངས་རྒྱས་ཐུགས་རྗེ་ཆེ་ལ་ཐབས་མཁས་པ་དེས་སེམས་ཅན་གཅིག་ཀྱང་མ་ལུས་པར་འདོན་མོད། འོ་ན་ཅིས་སྐྱོབ་ན་ཆོས་ཀྱིས་སྐྱོབ། སྐྱབས་འགྲོ་རྒྱུད་ལ་སྐྱེས་ན་ཆོས་གཞན་བྱ་མི་དགོས། དཀོན་མཆོག་གི་ཐུགས་རྗེས་མི་སྐྱོབ་མི་སྲིད་དོ། །གཉིས་པ་ནང་གི་སྐྱབས་འགྲོའི་བསླབ་བྱ་ལའང་སྔར་ལྟར་བརྒྱད་ལས། ཁྱད་པར་གྱི་བསླབ་བྱ་གསུམ་ནི། དང་པོ། བླ་མ་ལ་སྐྱབས་སུ་སོང་ནས་བླ་མ་ལ་ངན་སེམས་འཕྱ་སེམས་རྨི་ལམ་ཙམ་དུའང་མི་བྱ། གཉིས་པ། ཡི་དམ་ལ་སྐྱབས་སུ་སོང་ནས་ཡི་དམ་གྱི་སྒོམ་བཟླས་རྒྱུན་མི་བཅད། གསུམ་པ། མཁའ་འགྲོ་ལ་སྐྱབས་སུ་སོང་ནས་ཚོགས་དང་བསྐང་བཤགས་སོགས་དུས་ཀྱི་མཆོད་པ་རྒྱུན་མི་བཅད་པའོ། །ཐུན་མོང་གི་བསླབ་བྱ་ལྔ་ནི། དང་པོ། ཅི་ཟ་ཅི་འཐུང་གི་ཕུད་བདུད་རྩིར་བྱིན་གྱིས་བརླབས་ལ། བླ་མ་སྤྱི་བོར་བསྒོམས་ལ་མཆོད། ཡི་དམ་སྙིང་གར་བསྒོམས་ཏེ་མཆོད། མཁའ་འགྲོ་ལྟེ་བར་བསམ་སྟེ་མཆོད་པའོ། །གཉིས་པ། ཕྱོགས་གང་དུ་འགྲོ་ཡང་བླ་མ་ཡི་དམ་མཁའ་འགྲོ་གསུམ་ལ་གསོལ་བ་གདབ། བླ་མ་སྤྱི་བོར་བསྒོམ། རང་ཡི་དམ་དུ་བསྒོམ། མཁའ་འགྲོ་ཆོས་སྐྱོང་དཔུང་གཉེན་དུ་བསྒོམས་ཏེ་འགྲོ་བར་བྱའོ། །གསུམ་པ། ལུས་དང་སྲོག་གི་ཕྱིར་ཡང་མི་སྤོང་བར་བླ་མ་སྙིང་བཞིན་བསམ། ཡི་དམ་མིག་བཞིན་བསམ། མཁའ་འགྲོ་ལུས་བཞིན་བསམ་པ་ལ་བསླབ་པའོ། །བཞི་པ། རང་ལ་ན་ཚ་སྐྱིད་སྡུག་ཅི་བྱུང་ཡང་བླ་མ་ལ་གསོལ་བ་གདབ། ཡི་དམ་ལ་མཆོད་པ་བྱ། མཁའ་འགྲོ་ལ་གཏོར་ཚོགས་གཏོང་བ་མ་ཡིན་པ། མོ་བོན་སོགས་ཐབས་གཞན་མི་བཙལ་བ་ལ་བསླབ་བོ། །ལྔ་པ། བླ་མ་ཡི་དམ་མཁའ་འགྲོ་གསུམ་གྱི་ཡོན་ཏན་དྲན་པས་ཡང་ཡང་སྐྱབས་སུ་འགྲོ་བ་སྟེ། བླ་མ་ལ་སྐྱབས་སུ་སོང་བས་བྱིན་རླབས་འཇུག ཡི་དམ་ལ་སྐྱབས་སུ་སོང་བས་ཕྱག་རྒྱ་ཆེན་པོའི་སྐུ་འཐོབ། མཁའ་འགྲོ་ལ་སྐྱབས་སུ་སོང་བས་བར་ཆད་སེལ་བ་ཡིན་ནོ། །དེ་ལྟར་ནང་གི་སྐྱབས་འགྲོ་བགྱིས་པའི་ཕན་ཡོན་ཡང་། བླ་མ་ལ་སྐྱབས་སུ་སོང་བས་རང་ཉིད་འཆིང་བའི་བློ་ལས་སྐྱོབ། མི་ཤེས་གཏི་མུག་གི་བར་ཆད་སེལ། ལྷག་མཐོང་རིག་པའི་ཚོགས་རྫོགས། རྟོགས་པ་རང་ཤར་གྱི་དངོས་གྲུབ་འབྱུང་ངོ་། །ཡི་དམ་ལ་སྐྱབས་སུ་སོང་བས་ཐ་མལ་འཁྲུལ་འཛིན་ལས་སྐྱོབ། ཞེ་སྡང་ན་རག་གི་སྡུག་བསྔལ་སེལ། རང་བྱུང་གི་ཚོགས་སོག ཕྱག་རྒྱ་ཆེན་པོའི་དངོས་གྲུབ་འབྱུང་ངོ་། །མཁའ་འགྲོ་ལ་སྐྱབས་སུ་སོང་བས་བར་ཆད་འབྱུང་པོ་ལས་སྐྱོབ། ཡི་དྭགས་དབུལ་ཕོངས་ཀྱི་སྡུག་བསྔལ་སེལ། ཞེན་གྲོལ་ཆགས་མེད་ཀྱི་ཚོགས་རྫོགས། བདེ་ཆེན་ལོངས་སྐུའི་དངོས་གྲུབ་ཐོབ་པ་ཡིན་ནོ། །གསུམ་པ་གསང་བའི་སྐྱབས་འགྲོའི་བསླབ་བྱ་ལའང་སྔར་ལྟར་གཉིས་ལས། ཁྱད་པར་གྱི་བསླབ་བྱ་གསུམ་ནི། དང་པོ། ལྟ་བ་རྟོགས་པ་དང་ལྡན་པ་ལ་བསླབ་པ། སེམས་ཅན་ཐམས་ཅད་དང་སངས་རྒྱས་རྒྱུ་མཉམ་པས་སངས་རྒྱས་ལོགས་ནས་ཐོབ་རྒྱུ་མེད་པར་གདེང་བཅའ། སྣང་སེམས་ཐ་མི་དད་དུ་རྟོགས་པས་སྣང་སྟོང་དབྱེར་མེད་གདིང་བཅའ་བ་ལ་བསླབ་བོ། །གཉིས་པ། སྒོམ་པ་ཉམས་དང་ལྡན་པ་ལ་བསླབ་པ། ཤེས་པ་ཕྱིར་མ་བཞག ནང་དུ་མི་དགུག རང་བབས་ལྷུག་པ་གཏད་མེད་དུ་གཞག་པ་ལ་བསླབ་བོ། །གསུམ་པ། སྤྱོད་པ་རོ་སྙོམས་དང་ལྡན་པ་ལ་བསླབ་པ། འགྲོ་འཆག་ཉལ་འདུག་ཐམས་ཅད་དུ་བསྒོམ་དུ་མེད་ཀྱང་། ཡེངས་སུ་སྐད་ཅིག་ཀྱང་མེད་པ་ལ་བསླབ་བོ། །ཐུན་མོང་གི་བསླབ་བྱ་ལ་བདུན་ཏེ། སངས་རྒྱས་སེམས་སུ་རྟོགས་ཀྱང་བླ་མ་མི་སྤང་། སྣང་བ་སེམས་སུ་རྟོགས་ཀྱང་འདུས་བྱས་ཀྱི་དགེ་རྩ་རྒྱུན་མི་གཅད། དམྱལ་བ་ལ་དོགས་པ་མེད་ཀྱང་སྡིག་པ་ཕྲ་མོ་ནས་སྤང་། སངས་རྒྱས་ལ་རེ་བ་མེད་ཀྱང་ཆོས་གང་ལའང་སྐུར་བ་མི་གདབ། རང་ལ་ཏིང་ངེ་འཛིན་ཁྱད་པར་ཅན་མཐོང་ཡང་ང་རྒྱལ་དང་རློམ་པ་མི་བྱ། རང་གཞན་གཉིས་སུ་མེད་པར་གོ་ཡང་སེམས་ཅན་ལ་སྙིང་རྗེ་རྒྱུན་མི་གཅད། འཁོར་བ་དང་མྱང་འདས་གཉིས་མེད་དུ་རྟོགས་ཀྱང་རྟག་ཏུ་དགོན་པར་གོམས་པར་བྱ་བ་ལ་བསླབ་པ་དང་བདུན་ནོ། །དེ་ལྟར་སྐྱབས་སུ་སོང་བའི་ཕན་ཡོན་གྱི་ཁྱད་པར་ཡང་། ལྟ་བ་ལ་སྐྱབས་སུ་སོང་བས་རྟག་ཆད་གཉིས་ལས་སྐྱོབ། ལོག་ལྟ་ཞེན་འཛིན་གྱི་བར་ཆད་སེལ། ཆོས་ཉིད་འོད་གསལ་གྱི་ཚོགས་སོག སྐུ་གསུམ་འགག་མེད་ཀྱི་དངོས་གྲུབ་འབྱུང་ངོ་། །སྒོམ་པ་ལ་སྐྱབས་སུ་སོང་བས་ལྟ་བས་ཀྱང་སྒོམ་པ་ལ་སྐྱོབ་པར་བྱེད། སྟོང་ཞེན་བག་ཆགས་ཀྱི་བར་ཆད་སེལ། གཉིས་མེད་ཟུང་འཇུག་གི་ཚོགས་སོག ཐག་ཆོད་ཡེ་གྲོལ་གྱི་དངོས་གྲུབ་འབྱུང་ངོ་། །སྤྱོད་པ་ལ་སྐྱབས་སུ་སོང་བས་ལོག་སྤྱོད་ཆད་ལྟ་ལས་སྐྱོབ་པར་བྱེད། ཚུལ་འཆོས་ཐོ་ཅོའི་བར་ཆད་སེལ། ཆགས་མེད་ཟིང་ལོང་གི་ཚོགས་སོག ཅི་སྤྱད་དགེ་བར་འགྱུར་བའི་དངོས་གྲུབ་འབྱུང་ངོ་། །དེ་ལྟ་བུའི་སྐྱབས་འགྲོ་ཕྱི་ནང་གསང་གསུམ་དུ། ཆོས་ཕྱི་ནང་ལྟ་བ་མཐོ་དམན། སྔགས་མཚན་ཉིད་རྩ་བ་གཅིག་ཏུ་འདུས་པའི་མན་ངག་ཡིན་ནོ། །འདི་ལྟར་བྱས་ན་ཆོས་ཆོས་སུ་འགྲོ། ཆོས་ལམ་དུ་འགྲོ། ལམ་འབྲས་བུར་སྨིན་འགྲོ། མཁར་ཆེན་བཟའ་ཡིས་དེ་ལྟར་ཤེས་པར་གྱིས་ཤིག ཅེས་གསུངས་སོ། །རིན་ཆེན་རྣམ་གསུམ་ཞེས་པའི་མཚན་འདི་ཡང་། །བསྐལ་པ་བྱེ་བ་ཕྲག་བརྒྱར་རྙེད་དཀའ་བས། །ད་རེས་སྔོན་བསགས་དཔལ་གྱིས་འབྱོར་དུས་འདིར། །འབྲལ་མེད་སྐྱབས་སུ་བསྟེན་ཅིག་ཤེས་ལྡན་རྣམས། །སྐྱབས་འགྲོའི་ཁྲིད་ཀྱི་སྐབས་སོ། །། ། ལམ་དམན་པ་ལས་ཁྱད་པར་དུ་བྱེད་པ་ཐེག་ཆེན་ལམ་རྩ་བྱང་ཆུབ་ཏུ་སེམས་བསྐྱེད་པའི་ཁྲིད།༈ གཉིས་པ་ལམ་དམན་པ་ལས་ཁྱད་པར་དུ་བྱེད་པ་ཐེག་ཆེན་ལམ་རྩ་བྱང་ཆུབ་ཏུ་སེམས་བསྐྱེད་པའི་ཁྲིད་ལ་གསུམ། སྔོན་འགྲོ་ཚད་མེད་བཞི་ལ་བློ་སྦྱོང་བ། དངོས་གཞི་བྱང་ཆུབ་ཀྱི་སེམས་བསྐྱེད་ཚུལ་བསྟན་པ། རྗེས་བསླབ་བྱ་སྲུང་ཚུལ་ཕན་ཡོན་བཅས་པའོ། །དང་པོ་ནི། སེམས་ཉིད་ངལ་གསོ་ལས། དེ་ལྟར་སྐྱབས་སོང་རྟེན་གྱི་གང་ཟག་གིས། །བྱམས་པའི་ས་གཞིར་སྙིང་རྗེའི་མེ་ཏོག་བཀྲམ། །དགའ་བའི་གྲིབ་བསིལ་བཏང་སྙོམས་ཆུ་གཙང་གིས། །འགྲོ་ལ་ཕན་ཕྱིར་རང་གི་སེམས་སྦྱང་ངོ་། །ཞེས་དང་། ཡུམ་བར་མ་ལས། རབ་འབྱོར། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོས་བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་བསྒོམ་པར་བྱའོ། །ཞེས་གསུངས་ཏེ། དེ་ལ་ཚད་མེད་པ་བཞི་ཡི་ངོ་བོ་ནི། སེམས་ཅན་རྣམས་བདེ་བ་དང་ལྡན་པར་འདོད་པ་བྱམས་པ། སྡུག་བསྔལ་དང་བྲལ་བར་འདོད་པ་སྙིང་རྗེ། སྡུག་བསྔལ་མེད་པའི་བདེ་བ་ལ་གནས་པར་འདོད་པ་དགའ་བ། ཉེ་རིང་ཆགས་སྡང་གི་བློ་བཏང་བ་བཏང་སྙོམས་ཏེ་དེ་བཞི་ཡིན། དེ་ལ་དབྱེ་ན། འཇིག་རྟེན་པ་དང་འཇིག་རྟེན་ལས་འདས་པའི་ལམ་གཉིས་ཡོད་དེ། སྙིང་པོ་མཆོག་ལས་ཤཱ་རིའི་བུ་འདི་ལ་སེམས་ཡང་དག་པར་མ་བསྐྱེད་རྗེས་སུ་མ་བསྐྱེད་པའི་བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་བཞི་ནི་ཚངས་པའི་གནས་པ་བཞི་སྟེ། སྲིད་པར་མངོན་པར་འདུ་བྱེད་པ་དང་བཅས་པའོ། །སེམས་ཡང་དག་པར་བསྐྱེད། རྗེས་སུ་བསྐྱེད་པའི་བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་བཞི་ནི་ཚད་མེད་པ་བཞི་སྟེ། མྱ་ངན་ལས་འདས་པའི་ལམ་དུ་འདུ་བྱེད་པའི་ཕྱིར་རོ་ཞེས་གསུངས། དེ་ལ་ཚངས་པའི་གནས་པ་བཞིའི་དམིགས་ཡུལ་སེམས་ཅན་གཅིག་དང་གཉིས་ལ་སོགས་པ་ཚད་ཡོད་པ་ལ། བློའི་རྣམ་པ་བྱམས་པ་ལ་སོགས་པ་བཞིར་སྐྱེ་ཞིང་། དེ་ཡང་ཐར་པའི་སེམས་ཀྱིས་མ་ཟིན་པ་སྟེ། དཔེར་ན་ཆུ་བོ་གངྒཱ་ལ་བུད་མེད་བུ་ཆུང་ངུ་དང་བཅས་པས་བརྒལ་དུས་ཕན་ཚུན་གཅིག་ལ་གཅིག་བྱམས་བཞིན་དུ་ཚེ་ཡི་དུས་བྱས་པས་ཚངས་པའི་འཇིག་རྟེན་དུ་སྐྱེས་པ་ལྟ་བུ་སྲིད་པའམ་འཁོར་བའི་རྒྱུ་བྱེད་པ་སྟེ། སྤྱོད་འཇུག་ལས། སེམས་གསལ་གཅིག་སྐྱེས་འབྲས་བུ་གང་། །ཚངས་ལ་སོགས་པ་ཡིན་པ་ལྟར། །ཞེས་པ་བཞིན་ནོ། །ཚད་མེད་པ་བཞིའི་དམིགས་ཡུལ་ནི་འགྲོ་བ་ཐམས་ཅད་ལ་བློའི་རྣམ་པ་དམིགས་པ་དང་བཅས་པའི་ཚད་མེད་པ་བཞི་སྐྱེ་ཞིང་། ཆོས་ཐམས་ཅད་ཀྱི་ཆོས་ཉིད་དེ་བཞིན་ཉིད་དམིགས་པའི་ཡུལ་ལ། བློའི་རྣམ་པ་དམིགས་པ་མེད་པའི་ཚད་མེད་པ་བཞི་སྐྱེ་སྟེ། ས་སྡེ་ལས། སེམས་ཅན་དང་ཆོས་ཉིད་ལ་བརྟེན་ནས་དམིགས་པ་དང་བཅས་པ་དང་། དམིགས་པ་མེད་པའི་ཚད་མེད་པ་རྣམ་པ་བཞི་ཉིད་སྐྱེ་སྟེ། ཞེས་སོ། །དེ་ལ་དབྱེ་ན། སེམས་ཅན་ལ་དམིགས་པ་དང་ཆོས་ལ་དམིགས་པ་དང་། དམིགས་པ་མེད་པ་གསུམ་སྟེ། དེ་གསུམ་རིམ་པར་བདག་མེད་པའི་དོན་མ་རྟོགས་པའི་སྐྱེ་བོ་ཕལ་པ་དང་། གང་ཟག་གི་བདག་མེད་ཙམ་མམ་ཆོས་ཀྱི་ཕྱོགས་གཅིག་སྟེ་བདག་མེད་ཕྱེད་དང་གཉིས་རྟོགས་པའི་འཕགས་པ་ཉན་ཐོས་དང་རང་སངས་རྒྱས། གཉིས་ཀ་རྫོགས་པར་རྟོགས་པ་བྱང་སེམས་འཕགས་རྒྱུད་དང་འབྲེལ་བའི་ཚད་མེད་པ་བཞི་ལ་དེ་སྐད་ཅེས་བྱ་སྟེ། བྱང་ས་ལས། སེམས་ཅན་ལ་དམིགས་པ་ནི་མུ་སྟེགས་ཅན་རྣམས་དང་ཐུན་མོང་བ་ཡིན་ནོ། །ཆོས་ལ་དམིགས་པ་ནི་ཉན་ཐོས་དང་རང་རྒྱས་ཐམས་ཅད་དང་ཐུན་མོང་བ་ཡིན་ནོ། །དམིགས་པ་མེད་པ་ནི་དེ་ཐམས་ཅད་དང་ཐུན་མོང་མ་ཡིན་པའོ། །ཞེས་གསུངས། དེས་ན་དམིགས་པ་མེད་པའི་བྱམས་སོགས་ནི་ཐེག་པ་ཆེན་པོའི་ལམ་གྱི་གཞུང་ཤིང་ཡིན་པས་དེའི་དབང་དུ་མཛད་ནས། པདྨའི་ལམ་རིམ་ཆེན་པོའི་འགྲེལ་པར། ཡུལ་གང་ལའང་ཡིད་དུ་འོང་ཅིང་། དེ་དག་བདེ་བ་དང་ལྡན་པར་བྱའོ་སྙམ་པ་འཇིག་རྟེན་པར་བྱམས་པ། ཡུལ་སེམས་ཅན་དེ་དག་ལ་ཕ་མར་ཤེས་ཤིང་། དེ་རྣམས་བདེ་བ་དང་ལྡན་པར་བྱའོ་སྙམ་དུ་བསྒོམ་པ་ཆོས་ཀྱི་བྱམས་པ། དེ་ལྟར་སེམས་ཅན་ཐམས་ཅད་ཕ་མར་ཤེས་ཤིང་། དེ་དག་ལ་ཕན་གདགས་པའི་བློ་སྐྱེས་པ་ནི་བྱམས་པའི་ཏིང་ངེ་འཛིན། དེ་རྒྱུན་ཆགས་སུ་སྐྱེས་པ་ནི་བྱམས་པ་ཚད་མེད་པའམ་ཆེན་པོ་ཞེས་བྱའོ། །དེ་ལ་གསུམ་ལས། སེམས་ཅན་ལ་དམིགས་པ་ནི། སེམས་ཅན་ཐམས་ཅད་ཕ་མར་ཤེས་ཤིང་། དེ་དག་བདེ་བ་དང་ལྡན་པར་བྱ་སྙམ་པའི་བློ་སྐྱེས་པའོ། །ཆོས་ལ་དམིགས་པའི་བྱམས་པ་ནི། དོན་དམ་པར་ཅིར་ཡང་མ་གྲུབ་པ་ཡིན་ཡང་། ཀུན་རྫོབ་རྨི་ལམ་སྒྱུ་མ་ཙམ་གྱི་ངོར་མ་འདི་རྣམས་བདེ་བ་དང་ལྡན་པར་བྱ་སྙམ་པའི་བློའོ། །དམིགས་པ་མེད་པའི་བྱམས་པ་ནི། དེ་ལྟར་བསྒོམ་པའི་དུས་ཉིད་ན་རང་གཞན་ཐམས་ཅད་ཀྱི་ངོ་བོ་སྟོང་ཉིད་སྤྲོས་བྲལ་ནམ་མཁའ་ལྟར་ཤེས་པས། གདངས་མ་འགགས་པར་བྱམས་པར་དུང་ངེ་། གཤིས་མ་གྲུབ་པ་སྟོང་པར་ལྷག་གེ། ངོ་བོ་མི་རྟོག་མི་དམིགས་ཤིང་འཁོར་གསུམ་ཡོངས་སུ་དག་པའོ། །ཞེས་སྙིང་རྗེ་ལའང་དེས་བསྒྲེས་ཏེ་གསུངས་པས་གཞན་གཉིས་ལའང་མཚོན་པར་ནུས་ལ། འདིའི་སེམས་ཅན་ལ་དམིགས་པ་སོགས་གསུམ་པོ་འདི་ནི་ཐེག་ཆེན་ཁོ་ནའི་དབང་དུ་མཛད་ནས། བྱང་ཆུབ་སེམས་དཔའ་ལས་དང་པོ་པ་དང་། བདེན་གཉིས་ཀྱི་རྣམ་དབྱེ་ལ་གོ་མྱོང་ཅི་རིགས་སྐྱེས་པ་དང་། གནས་ལུགས་རྟོགས་པའི་དབང་དུ་བྱས་ནས་བཞག་པ་ཡིན་པས། གོང་དུ་མུ་སྟེགས་སོགས་གསུམ་དུ་བཞག་པ་དང་འཁྲུལ་བར་མི་བྱའོ། །དེ་ལྟར་གོམས་པའི་ཕན་ཡོན་ཡང་། བྱམས་པས་གནས་སྐབས་སུ་ཀུན་གྱི་ཡིད་དུ་འོང་ཞིང་མཐར་ཐུག་ཞེ་སྡང་གནས་གྱུར་མེ་ལོང་ལྟ་བུའི་ཡེ་ཤེས་མངོན་དུ་གྱུར་ནས་ལོངས་སྤྱོད་རྫོགས་པའི་སྐུ་ཐོབ་པ་ཡིན་ཏེ། པདྨ་རྩེ་མོ་ལས། བྱམས་པས་ཞེ་སྡང་གནས་སུ་དག །མེ་ལོང་ཡེ་ཤེས་ལོངས་སྤྱོད་རྫོགས། །ཞེས་སོ། །སྙིང་རྗེས་གནས་སྐབས་སུ་འཚེ་བ་མེད་ཅིང་མཐར་ཐུག་འདོད་ཆགས་དག་པ་སོ་སོར་རྟོག་པའི་ཡེ་ཤེས་དང་ཆོས་སྐུ་ཐོབ་སྟེ། དེ་ལས། སྙིང་རྗེས་འདོད་ཆགས་གནས་སུ་དག །ཀུན་རྟོགས་ཡེ་ཤེས་ཆོས་ཀྱིས་སྐུ། །ཞེས་སོ། །དགའ་བས་གནས་སྐབས་སུ་ཕྲག་དོག་མེད་ཅིང་མཐར་ཐུག་ཕྲིན་ལས་ཕུན་སུམ་ཚོགས་པའི་རང་བཞིན་བྱ་བ་གྲུབ་པའི་ཡེ་ཤེས་ཐོབ་ཅིང་། ཕྲག་དོག་དག་ནས་སྤྲུལ་པའི་སྐུ་མངོན་དུ་བྱེད་དེ། སྔ་མ་ལས། དགའ་བས་ཕྲག་དོག་གནས་སུ་དག །བྱ་གྲུབ་ཡེ་ཤེས་སྤྲུལ་པའི་སྐུ། །མཛད་པ་ལྷུན་གྲུབ་དམ་པའོ། །ཞེས་སོ། །བཏང་སྙོམས་ཀྱིས་གནས་སྐབས་སུ་སེམས་ལས་སུ་རུང་ཞིང་མཐར་ཐུག་ང་རྒྱལ་དང་གཏི་མུག་གནས་སུ་དག་ནས་མཉམ་པ་ཉིད་དང་ཆོས་ཀྱི་དབྱིངས་ཀྱི་ཡེ་ཤེས་འགྲུབ་སྟེ། ངོ་བོ་ཉིད་ཀྱི་སྐུ་མི་འགྱུར་བས་རྡོ་རྗེ་དང་། མངོན་པར་བྱང་ཆུབ་པའི་སྐུ་མངོན་དུ་བྱེད་དེ། དེ་ཉིད་ལས། བཏང་སྙོམས་བཏང་སྙོམས་ཆེན་པོ་ཡིས། །ང་རྒྱལ་གཏི་མུག་གནས་སུ་དག །མཉམ་ཉིད་ཆོས་དབྱིངས་ཡེ་ཤེས་བདག །བྱང་ཆུབ་རྡོ་རྗེའི་སྐུ་ཉིད་དོ། །ཞེས་སོ། །གཞན་ཡང་འདོད་པར་ལྷ་དང་མིའི་ལུས་འགྲུབ་པས་གནས་སྐབས་ཀྱི་ཕན་བདེ་བྱེད་ལ། གཟུགས་ཀྱི་ཏིང་ངེ་འཛིན་དང་སྐྱེ་གནས་དག་པའི་ཡོན་ཏན་མངོན་དུ་བྱེད་པ་སོགས་ཕན་ཡོན་ཚད་མེད་པ་དང་ལྡན་ཏེ། དཔལ་ཕྲེང་གི་མདོ་ལས། གང་གིས་ཚད་མེད་བཞི་བསྒོམ་པ། །དེ་ནི་བདེ་གཤེགས་རྣམས་ཀྱིས་དགོངས། །ཀུན་ཏུ་ཡོན་ཏན་ཚད་མེད་དེ། །ནམ་མཁའི་ལམ་ལས་རབ་འདས་པའོ། །ཞེས་གསུངས་པ་བཞིན་ནོ། །དེ་ལྟར་ངེས་པར་བྱས་ནས་སྒོམ་ཚུལ་དངོས་ལ། ཐོག་མར་སྐྱེ་སླ་རིམ་ནས་བཟུང་སྟེ། དང་པོ་བཏང་སྙོམས་བསྒོམ་པ་ལའང་དམིགས་པ་དང་རྣམ་པ་གཉིས་ལས། དམིགས་ཡུལ་ཡོངས་སུ་བརྟགས་ནས་ཤེས་པར་བྱ་བ་ནི། ད་ལྟར་ཕ་མ་དང་གཉེན་འདུན་ལ་སོགས་པ་རང་གི་ཕྱོགས་ལ་ཆགས་ཤིང་། དགྲ་དང་དེའི་ཕྱོགས་ལ་སྡང་བའི་སེམས་འདི་མི་རིགས་ཏེ། ཚེ་རབས་སྔ་མར་དགྲ་འདིས་ཀྱང་གཉེན་བྱས། གཉེན་གྱིས་ཀྱང་དགྲ་བྱས་པའི་ཕྱིར་མ་ངེས་པ་དང་། ད་ལྟའང་རྟག་ཏུ་དགྲས་ཀྱང་གནོད་པར་མི་ནུས་ཤིང་བསྟུན་ན་གཉེན་བཞིན་ཕན་པའང་སྲིད་ལ། གཉེན་གྱིས་ཀྱང་ཚིག་མི་སྙན་པར་སྨྲ་བ་དང་། འཐབ་པ་དང་། ནོར་རྫས་འགོད་པ་དང་། དེ་ལ་མི་འདོད་པ་བྱུང་ན་རང་གི་སེམས་ལ་ཟུག་རྔུ་བསྐྱེད་པའི་ཕྱིར་དགྲ་བཞིན་དོན་ལ་གནས་པ་དང་། མ་འོངས་པ་ནའང་གཉེན་དགྲར་འགྱུར་བ་དང་། དགྲ་གཉེན་དུ་འགྱུར་བ་སོགས་ངེས་པ་མེད་པའི་ཕྱིར། རང་ཕྱོགས་ལ་ཆགས། གཞན་ཕྱོགས་ལ་སྡང་བའི་སེམས་ཀྱིས་ཉེ་རིང་དུ་བཏགས་པའི་བློ་སྤངས་ལ་དགྲ་གཉེན་ངོ་མཉམ་གྱི་དོན་ལ་བརྟག་ཅིང་། སེམས་ཅན་ཐམས་ཅད་ལ་དེ་ལྟར་བལྟ་བ་ནི་ཡུལ་ལ་དམིགས་པའོ། །བློའི་རྣམ་པ་ནི་དེ་ལྟར་སེམས་ཅན་གཅིག་ནས་གཉིས་དང་གསུམ་དང་། གྲོང་གཅིག་དང་། ཡུལ་ཁམས་གཅིག་དང་། གླིང་གཅིག་དང་། སྟོང་གཅིག་ནས་ནམ་མཁའི་མཐའི་བར་གྱི་ཀུན་ལ་སྙོམས་པར་བསྒོམས་ཤིང་མཐར་དམིགས་པ་མེད་པའི་བཏང་སྙོམས་ཆེན་པོ་ལ་གོམས་པར་བྱའོ། །དེ་ལ་གོམས་ནས་བྱམས་པ་བསྒོམ་པ་ལའང་གཉིས་ལས། དམིགས་ཡུལ་ནི་སེམས་ཅན་ཐམས་ཅད་དེ། རང་ཕྱོགས་ཕ་བདེ་བ་དང་མི་ལྡན་པ་ཀུན་ལ་བདེ་བ་དང་འཕྲད་པར་སྨོན་པ་བཞིན། སེམས་ཅན་ཐམས་ཅད་ལའང་བདེ་བ་དང་མི་ལྡན་པ་ཀུན་བདེ་བ་དང་ཕྲད་པར་གྱུར་ཅིག་སྙམ་དུ་ཡོངས་ལ་སྙོམས་པར་བྱམས་པ་བསྒོམ་པ་སྟེ། བློའི་རྣམ་པ་ནི་དང་པོ་རང་གི་ཕ་མ་ལྟ་བུས་མཚོན་ནས་སྙིང་ཉེ་བ་དག་བདེ་བ་འཕྲད་པར་འདོད་པ་དང་། དེ་ནས་གཞན་གཅིག་ནས་ཀུན་གྱི་བར་དུ་དེ་ལྟར་དུ་བསྒོམ། རྗེས་གང་དུའང་དམིགས་པ་མེད་པའི་ངང་དུ་མཉམ་པར་བཞག་གོ །དེ་ལ་གོམས་ནས་སྙིང་རྗེ་བསྒོམ་པ་ལའང་། དམིགས་ཡུལ་ངན་སོང་གི་འགྲོ་བའམ་མི་མཛེ་ནད་ཅན་ལྟ་བུ་སྡུག་བསྔལ་དྲག་པོས་གདུངས་པ་བློས་མི་བཟོད་པ་ཞིག་བསམས་ལ། བློའི་རྣམ་པ་སྡུག་བསྔལ་འདི་དང་བྲལ་བར་ཤོག་ཅིག་སྙམ་པའི་སྙིང་རྗེ་དུང་དུང་བ་མཆི་མ་ཐོན་ཐོན་དུ་བསྒོམས་ལ་མཐར་སེམས་ཅན་གཅིག་ནས་ཀུན་གྱི་བར་ལ་བསྒོམས་པའི་རྗེས་གང་ལ་ཡང་མི་དམིགས་པའི་ངང་ལ་དར་ཅིག་མཉམ་པར་བཞག་གོ །དེ་ནས་དགའ་བ་སྒོམ་པ་ནི། མཐོ་རིས་ཀྱི་ཡུལ་ན་སུ་ཞིག་བདེ་ཞིང་སྐྱིད་པ་ཆེ་ཆུང་ཅི་ཡོད་པ་ནས། བདེ་བ་དང་ལྡན་པའི་ཆ་ཐམས་ཅད་དམིགས་ཡུལ་དུ་བྱས་ཏེ། བློའི་རྣམ་པ་བདེ་བ་འདི་དང་མི་འབྲལ་ཞིང་། འདི་བས་ཀྱང་སྐྱིད་ཅིང་བདེ་བ་ཚེ་རིང་བ་དང་། འཁོར་མང་བ། ལོངས་སྤྱོད་འབྱོར་པ། འཚེ་བ་མེད་པ། ཤེས་རབ་ཆེ་བ་ལ་སོགས་པས་ནམ་སངས་རྒྱས་མ་ཐོབ་ཀྱི་བར་དུ་འབྱོར་བར་ཤོག་ཅིག་སྙམ་དུ་ཡུལ་གཅིག་ནས་ཀུན་གྱི་བར་ལ་སྦྱར་ཞིང་བསྒོམས། ཁྱད་པར་དུ་རང་ལ་གནོད་པའི་དགྲ་བོ་དང་སེམས་ལ་ཕྲག་དོག་གི་གནས་སུ་གྱུར་པ་རྣམས་ལ་ཡང་དང་ཡང་དུ་སྦྱར་ཞིང་མཐར་སྟོང་ཉིད་ཀྱི་ངང་དུ་མཉམ་པར་བཞག་གོ །དེ་ནས་རྩལ་སྦྱང་བ་ནི། གོ་རིམ་ངེས་པ་ཅན། བྱམས་པ། སྙིང་རྗེ། དགའ་བ། བཏང་སྙོམས་བཞི་པོ་རིམ་པར་བསྒོམ་ཞིང་། ཡང་བཟློག་ནས་བསྒོམ་པ་བཏང་སྙོམས་ནས་བྱམས་པའི་བར་དང། སྤེལ་མ། བྱམས་པ་དང་དགའ་བ། སྙིང་རྗེ་དང་བཏང་སྙོམས་སྤེལ་ཏེ་བསྒོམ་ཞིང་། སྐད་ཅིག་སྐད་ཅིག་ལ་གོམས་པར་སྦྱོང་སྟེ། དེ་དག་སྦྱོར་དངོས་རྗེས་གསུམ་གྱིས་ཟིན་པར་ཉམས་སུ་བླང་ངོ་། །གཉིས་པ་དངོས་གཞི་བྱང་ཆུབ་ཀྱི་སེམས་བསྐྱེད་ཚུལ་བསྟན་པ་ལ། གོ་དོན་རྣམ་པར་བཞག་པ་དང་དམིགས་ཁྲིད་དངོས་བསྟན་པའོ། །དང་པོ་ལ་གཉིས། རྣམ་གཞག་སྤྱིར་བཤད་པ་དང་། བྱེ་བྲག་ཨོ་རྒྱན་དུས་གསུམ་མཁྱེན་པའི་ཞལ་ལུང་དངོས་བཤད་པའོ། །དང་པོ་ནི། སེམས་ཉིད་ངལ་གསོ་ལས། དེ་ལྟར་ཚད་མེད་བཞི་ལ་གོམས་པ་ཡིས། །ཆོས་ཀུན་རྩ་བ་བྱང་ཆུབ་སེམས་གཉིས་བསྒོམས། །ཞེས་དང་། བྱང་ཆུབ་སེམས་དཔའི་སྡེ་སྣོད་ལས། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བར་འདོད་པས། ལྷག་པའི་བསམ་པ་བྱང་ཆུབ་ཀྱི་སེམས་ལ་བསླབ་པར་བྱའོ། །ཞེས་གསུངས་ཏེ། འདི་ལ་གཉིས། དེ་ལྟར་སློབ་དགོས་པའི་རྒྱུ་མཚན་དང་། སེམས་བསྐྱེད་ཚུལ་དངོས་བཤད་པའོ། །དང་པོ་ནི། རང་ཅག་རྣམས་ད་རེས་བླ་མེད་བྱང་ཆུབ་ཀྱི་འབྲས་བུ་མ་ཐོབ་ན་འཁོར་བའི་གནས་རིས་མཐོ་དམན་གང་དུ་སྐྱེས་ཀྱང་རྒྱུ་ལས་དང་ཉོན་མོངས་པ་དང་། འབྲས་བུ་སྡུག་བསྔལ་གསུམ་གྱི་རང་བཞིན་ལས་མ་འདས་པས་ཉེས་པའི་སྐྱོན་གྱི་རང་བཞིན་ངན་སྐྱུགས་དང་ཕྱི་སའི་ཕུང་པོ་ལྟ་བུ་སྟེ། མདོ་ལས། འདོད་པའི་ཁམས་ནི་སྐྱོན་དང་བཅས་པ་སྟེ། །དེ་བཞིན་གཟུགས་ཀྱི་ཁམས་ཀྱང་སྐྱོན་དང་བཅས། །གཟུགས་མེད་ཁམས་ཀྱང་སྐྱོན་དང་བཅས་པ་སྟེ། །མྱ་ངན་འདས་པ་འབའ་ཞིག་སྐྱོན་མེད་མཐོང་། །ཞེས་གསུངས། འོ་ན་སྲིད་པ་ལས་ཐར་པའི་མྱང་འདས་ཀྱི་འབྲས་བུ་ཉན་རང་དགྲ་བཅོམ་ཙམ་ཐོབ་པས་ཆོག་གམ་སྙམ་ན་མི་ཆོག་སྟེ། ཉན་རང་འཕགས་པ་དེ་དག་རང་རེ་སོ་སྐྱེ་ལས་དང་པོ་པ་ལ་ལྟོས་ན་སྡུག་ཀུན་འགོག་པའི་མྱང་འདས་ཀྱི་འབྲས་བུ་མངོན་དུ་མཛད་པས་ངོ་མཚར་དང་ཡོན་ཏན་ཆེ་མོད། ཐེག་ཆེན་བྱང་ཆུབ་སེམས་དཔའ་ལ་ལྟོས་ན་རྒྱ་མཚོ་དང་གནག་རྗེས་ཀྱི་ཆུ་ལས་ཀྱང་ཡོན་ཏན་གྱི་ཁྱད་པར་ཆེ་སྟེ། ཉན་རང་དགྲ་བཅོམ་པ་དེ་དག་རང་དོན་དུ་ཡང་སྤངས་པ་མ་རྫོགས་ཏེ། ཉོན་མོངས་ཁོ་ན་སྤངས་ཀྱི་ཤེས་བྱའི་སྒྲིབ་པ་གཏན་ནས་མ་སྤངས་པ་དང་། རྟོགས་པ་མ་རྫོགས་ཏེ་གང་ཟག་གི་བདག་མེད་དང་གནས་སྐབས་ཀྱི་རྟེན་འབྲེལ་ཉི་ཚེ་ཙམ་རྟོགས་མོད་ཀྱི་ཆོས་ཀྱི་བདག་མེད་དང་རྟེན་འབྲེལ་མཐར་ཐུག་མ་རྟོགས། ཡོན་ཏན་གྱི་ཁྱད་པར་ཡང་ཐར་བུ་ཐོར་བུ་མ་གཏོགས་སྟོབས་བཅུ་མི་འཇིགས་མ་འདྲེས་ལ་སོགས་པ་སངས་རྒྱས་ཀྱི་ཆོས་དང་བྱང་འཕགས་ཀྱི་ལམ་གྱི་ཡོན་ཏན་མཐའ་དག་མ་རྫོགས། གཞན་དོན་དུ་ཐབས་དང་ཤེས་རབ་རྒྱ་ཆུང་བས་སེམས་ཅན་ལ་ཕན་ཐོགས་ཀྱི་ནུས་པའི་ཤུགས་ཆུང་བ་དང་། དགེ་བའི་རྩ་བ་དང་ཡོན་ཏན་གྱི་ཆོས་ཀུན་ཀྱང་ཕུང་པོ་ལྷག་མ་མེད་པའི་དབྱིངས་སུ་རྒྱུན་ཆད་ནས་དུས་རིང་མོ་ཞིག་ན་སླར་ཡང་ཐེག་ཆེན་ལ་ཞུགས་དགོས་པའི་ཕྱིར་ཏེ། དཔལ་ལྡན་ཟླ་བས་སྐྱབས་འགྲོ་བདུན་བཅུ་པར། དེས་ནི་ཐེག་པ་ཆེན་པོའི་ཤིང་། །མ་ལུས་རང་གི་ལམ་གྱིས་བསྲེགས། །བྱང་ཆུབ་སེམས་དཔའི་ནང་དུ་ནི། །སྐྱེས་བུ་དབུལ་པོ་ལྟ་བུར་གནས། །འདི་དག་སྲིད་པས་སྐྲག་པ་ཡི། །ཡིད་ཀྱིས་བྱང་ཆུབ་གཉིས་ཐོབ་པ། །ཚེ་ཟད་པར་ནི་དགར་འགྱུར་ཞིང་། །མྱ་ངན་འདས་ཐོབ་འདུ་ཤེས་ཅན། །དེ་ལ་མྱ་ངན་འདས་ཡོད་མིན། །འོན་ཀྱང་སྲིད་གསུམ་སྐྱེ་བ་ནི། དེ་དག་ལ་ནི་ཡོད་མིན་གྱི། །ཟག་པ་མེད་པའི་དབྱིངས་ན་འཁོད། །མི་ཤེས་ཉོན་མོངས་མིན་སྤང་ཕྱིར། །ཕྱིས་ནས་སངས་རྒྱས་ཀྱིས་བསྐུལ་བས། །བྱང་ཆུབ་ཀྱི་ནི་ཚོགས་བསགས་པས། །དེ་ཡང་འཇིག་རྟེན་འདྲེན་པར་འགྱུར། །ཞེས་དང་། འཕགས་པ་ཀླུས། ཐེག་པ་གཉིས་པོ་དག་ཀྱང་ནི། །ཐེག་པ་ཆེན་པོས་འབྱུང་བས་ན། །སྲིད་པའི་ལམ་གྱིས་དུབ་རྣམས་ལ། །ངལ་གསོའི་དོན་དེ་དེ་ཉིད་མིན། །ཉན་ཐོས་དེ་དག་དེ་སྲིད་དུ། །སངས་རྒྱས་རྣམས་ཀྱིས་མ་བསྐུལ་བར། །དེ་སྲིད་ཡེ་ཤེས་ལུས་གཅིག་གིས། །ཏིང་འཛིན་མྱོས་པས་བརྒྱལ་ཏེ་གནས། །བསྐུལ་ནས་སྣ་ཚོགས་གཟུགས་ཀྱིས་ནི། །སེམས་ཅན་དོན་ལ་དགའ་བྱེད་ཅིང་། །བསོད་ནམས་ཡེ་ཤེས་ཚོགས་བསགས་ནས། །སངས་རྒྱས་བྱང་ཆུབ་འཐོབ་པར་འགྱུར། །ཞེས་གསུངས་། དེ་དག་སྔོན་སློབ་ལམ་དུ་ཚོགས་ཇི་ཙམ་བསགས་པ་དེ་སྙེད་ཀྱི་ཡུན་ཙམ་དུ་འགོག་པའི་དབྱིངས་སུ་ཏིང་ངེ་འཛིན་གྱིས་བརྒྱལ་ཏེ་གནས་པ་ལ། སངས་རྒྱས་རྣམས་ཀྱི་ཐུགས་རྗེའི་འོད་ཟེར་གྱིས་བསྐུལ་བས་བརྒྱལ་སངས་ནས་སླར་ཐེག་ཆེན་གྱི་ལམ་ལ་ཞུགས་ན་རང་སྔར་ལམ་དམན་པ་ལ་ཞུགས་པའི་དབང་གིས་རང་དོན་ཡིད་བྱེད་ཀྱི་བག་ཆགས་ངན་པ་དེས་གེགས་བྱས་པས་ལམ་བགྲོད་པ་ལ་ཤིན་ཏུ་བུལ་བ་ཡིན་ཏེ། རྣམ་སྣང་མངོན་བྱང་ལས། ཉན་ཐོས་དང་རང་སངས་རྒྱས་ཀྱི་ལམ་གྱིས་བླ་ན་མེད་པའི་འབྲས་བུ་ལས་བསྐལ་པ་ཆེན་པོ་བརྒྱད་ཁྲིས་རིང་སྟེ། ཞེས་གསུངས། སྐྱོན་གཞན་ཡང་ཡོད་དེ། སློབ་སྤྲིང་ལས། ཉེ་དུ་འཁོར་བའི་རྒྱ་མཚོའི་ཁོངས་སུ་ཆུད་གྱུར་པ། །ཀློང་གི་ནང་དུ་ལྷུང་བ་ལྟ་བུར་སྣང་བཞིན་དུ། །སྐྱེ་ཤི་འཕོས་པས་ངོ་མ་ཤེས་པ་དེ་བོར་ནས། །གལ་ཏེ་གཅིག་ཐར་བྱེད་ན་དེ་ལས་ཁྲེལ་བོར་མེད། །བྱིས་པ་པང་ན་བཙས་པ་ཅི་ཡང་མི་ནུས་པས། །གང་གི་ནུ་ཞོ་བྱམས་པའི་ཤུགས་ཀྱིས་ཟག་འཐུངས་པ། །ངལ་བ་མང་བརྟེན་བྱམས་པས་བརྟེན་པ་དེ་དག་འདིར། །ཤིན་ཏུ་མ་རབས་ཤིག་ནའང་སྤོང་བར་སུ་ཞིག་སྤྲོ། །ཞེས་གསུངས་པ་ལྟར། སེམས་ཅན་ཐམས་ཅད་ཚེ་རབས་ཐོག་མ་མེད་པ་ནས་རང་གི་ཕ་མ་བྱས་པའི་དྲིན་ཆེན་ཤ་སྟག་ཡིན་པ་ལ། དེ་དག་གི་དོན་མི་བྱེད་པར་རང་གཅིག་པུ་ཞི་བདེ་ཚོལ་བ་ནི་དྲིན་མི་ཤེས་ཤིང་བྱས་པ་མི་གཟོ་བའི་ཁུར་ཅན་སྐྱེ་བོ་ཐ་ཤལ་མ་རབས་ཁྲེལ་མེད་ཀྱི་སྤྱོད་པར་འགྱུར་བ་དང་། ཁྱད་པར་དུའང་ཐེག་པ་ཆེན་པོའི་ལམ་གྱི་མི་མཐུན་ཕྱོགས་ཀྱི་རྒྱུའི་གཙོ་བོ་སེམས་བསྐྱེད་ཀྱི་སྡོམ་པ་རྩད་ནས་གཏོང་བར་བྱེད་པས་ཉེས་པ་ཕས་ཕམ་བས་ཀྱང་ལྕི་སྟེ། ཤེར་ཕྱིན་སྡུད་པ་ལས། གལ་ཏེ་བསྐལ་པ་བྱེ་བར་དགེ་བའི་ལས་ལམ་བཅུ། །སྤྱོད་ཀྱང་རང་རྒྱལ་དགྲ་བཅོམ་ཉིད་ལ་འདོད་བྱེད་ན། །དེ་ཚེ་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་ཡིན། །སེམས་བསྐྱེད་དེ་ནི་ཕས་ཕམ་བས་ཀྱང་ཤིན་ཏུ་ལྕི། །ཞེས་གསུངས། རྒྱུ་མཚན་དེའི་ཕྱིར་མགོན་པོ་བྱམས་པས་མདོ་སྡེ་རྒྱན་ལས། ཇི་ལྟར་བདག་ལ་ཕན་འདོད་དུག་དང་མཚོན་དང་ནི། །གནམ་ལྕགས་ལྕེ་དང་དགྲ་ལས་རང་གི་ལུས་ཟློག་པ། །དེ་བཞིན་རྒྱལ་སྲས་ཐེག་པ་དམན་པ་རྣམ་གཉིས་ལས། །ལས་རྣམ་གསུམ་གྱིས་བདག་ཉིད་ཟློག་པར་བྱེད་པ་ཡིན། །ཞེས་གསུངས་སོ། །འོ་ན་གང་ཐོབ་པར་བྱ་སྙམ་ན། བླ་ན་མེད་པའི་རྫོགས་པའི་བྱང་ཆུབ་ཀྱི་འབྲས་བུ་སྟེ། དེ་ནི་སྔ་མ་ལས་ལྡོག་སྟེ་སྤངས་པའི་ཁྱད་པར་སྒྲིབ་གཉིས་བག་ཆགས་དང་བཅས་པ་རྫོགས་པར་སྤངས། རྟོགས་པའི་ཁྱད་པར་ཤེས་བྱ་ཇི་ལྟ་བ་དང་། ཇི་སྙེད་པའི་རྣམ་པ་མ་ལུས་པ་མངོན་སུམ་དུ་མཁྱེན། གཞན་དོན་སེམས་པའི་ཕྲིན་ལས་ཀྱི་ཁྱད་པར་འཁོར་བ་མ་སྟོང་གི་བར་རྒྱུན་མི་ཆད་པར་འབད་མེད་ལྷུན་གྲུབ་ཏུ་འབྱུང་བས་ཕུང་པོ་ལྷག་མ་མེད་པའི་དབྱིངས་སུའང་དགེ་ཚོགས་རྒྱུན་མི་འཆད་པར་ཆོས་ཀྱི་དབྱིངས་དང་མཉམ་པར་འབྱུང་བ་སྟེ། མདོར་ན་རང་གཞན་གྱི་དོན་གཉིས་མཐར་ཕྱིན་པར་ཡོངས་སུ་རྫོགས་པ་ཡིན་པས་དེ་ཐོབ་པར་བྱ་བ་ཡིན་ལ། དེའི་རྒྱུ་ནི་བྱང་ཆུབ་ཀྱི་སེམས་རིན་པོ་ཆེ་འདི་ཉིད་ཡིིན་ཏེ། འཇུག་པ་ལས། ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །སངས་རྒྱས་བྱང་ཆུབ་སེམས་དཔའ་ལས་འཁྲུངས་ཤིང་། །སྙིང་རྗེའི་སེམས་དང་གཉིས་སུ་མེད་བློ་དང་། །བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་དང་། སྡུད་པ་ལས། ཆུ་ཡི་ཐིགས་པས་བུམ་པ་དང་པོ་ཐ་མའི་བར། །རིམ་གྱི་ཉུང་ངུ་ཉུང་ངུས་དེ་ཡོངས་འགེངས་པ་ལྟར། །དེ་བཞིན་དང་པོའི་སེམས་ཀྱང་བྱང་ཆུབ་མཆོག་རྒྱུ་སྟེ། །རིམ་གྱིས་དཀར་པོའི་ཡོན་ཏན་རྫོགས་པའི་སངས་རྒྱས་འགྱུར། །ཞེས་གསུངས། ཕན་ཡོན་གྱི་ཁྱད་པར་གཞན་རྣམས་ནི་འོག་ཏུ་འཆད་པར་འགྱུར་ལ། གལ་ཏེ་གང་ཟག་བློ་ཆུང་བ་ཁ་ཅིག་འདི་སྙམ་དུ། རྫོགས་པའི་བྱང་ཆུབ་ནི་ཡོན་ཏན་ཆེ་མོད་ཐོབ་པར་དཀའ་ཞིང་དེའི་རྒྱུ་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་བསླབ་དགོས་ན་དེ་ལྟ་བུ་བདག་གིས་ག་ལ་ནུས་སྙམ་དུ་སེམས་ཤིང་སྒྱིད་ལུག་པར་གྱུར་ན། དེ་ལྟར་བསམ་པར་མི་བྱ་སྟེ། ལག་བཟང་གིས་ཞུས་པའི་མདོ་ལས། ལག་བཟང་། གཞན་ཡང་བྱང་ཆུབ་སེམས་དཔས་འདི་ལྟར་བསླབ་སྟེ། སེང་གེ་དང་། སྟག་དང་། ཁྱི་དང་། ཅེ་སྤྱང་དང་། བྱ་རྒོད་དང་། ཁྲུང་ཁྲུང་དང་། བྱ་རོག་དང་། འུག་པ་དང་། སྲིན་བུ་དང་། སྦྲང་མ་དང་། སྦྲང་བུ་དང་། ཤ་སྦྲང་དུ་གྱུར་པ་དེ་དག་གིས་ཀྱང་སངས་རྒྱས་ཐོབ་པར་འགྱུར་ན། བདག་མིར་གྱུར་བཞིན་དུ་སྲོག་གི་ཕྱིར་ཡང་ཅིའི་ཕྱིར་བྱང་ཆུབ་ཐོབ་པར་འགྱུར་བའི་བརྩོན་འགྲུས་ཉམས་པར་བྱ་སྙམ་མོ། །ལག་བཟང་། གཞན་ཡང་འདི་ལྟར་བསླབ་པར་བྱ་སྟེ། མི་བརྒྱའམ་སྟོང་གིས་ཀྱང་སངས་རྒྱས་ཉིད་རྟོགས་ཤིང་ཐོབ་ན། བདག་གིས་ཀྱང་ཅིའི་ཕྱིར་མི་རྟོགས་ཤིང་ཐོབ་པར་མི་འགྱུར། ཞེས་གསུངས་ཏེ། དེ་ཡང་ཟ་མ་ཏོག་བཀོད་པ་ལས། དེ་ནས་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་སིངྒའི་གླིང་ནས་བྱུང་སྟེ། ཡུལ་འཁོར་མོ་འཇིག་གི་གྲོང་ཁྱེར་ཆེན་པོ་བཤང་བ་དང་གཅི་བའི་གནས་དེ་ན། སྲིན་བུའི་རིགས་བརྒྱ་སྟོང་དུ་མ་གནས་པ་ལས། དེའི་ཚེ་སྤྱན་རས་གཟིགས་ཀྱི་དབང་པོ་བུང་བའི་གཟུགས་སུ་སྤྲུལ་ཏེ་སྒྲ་བུང་བུང་བྱུང་སྟེ་སངས་རྒྱས་ལ་ཕྱག་འཚལ་ལོ། །ཞེས་སྨྲས་པ་དང་། དེ་དག་སངས་རྒྱས་ལ་ཕྱག་འཚལ་ལོ་ཞེས་བྱ་བ་རྗེས་སུ་དྲན་ནས། འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་ཡེ་ཤེས་ཀྱི་རྡོ་རྗེས་བཅོམ་ནས། དེ་དག་བྱང་ཆུབ་སེམས་དཔའ་ཁ་ནས་སྤོས་ཀྱི་དྲི་ཞེས་བྱ་བར་གྱུར་ཏེ་འཇིག་རྟེན་གྱི་ཁམས་བདེ་བ་ཅན་དུ་སྐྱེས་སོ། །ཞེས་གསུངས་པ་ལྟ་བུས་མཚོན་ཏེ། རྒྱུ་མཚན་དེའི་ཕྱིར། སྤྱོད་འཇུག་ལས། བདག་གིས་བྱང་ཆུབ་ག་ལ་ཞེས། །སྒྱིད་ལུག་པར་ནི་མི་བྱ་སྟེ། །འདི་ལྟར་དེ་བཞིན་གཤེགས་པ་ནི། །བདེན་པར་གསུངས་པས་བདེན་འདི་གསུངས། །སྦྲང་བུ་ཤ་སྦྲང་བུང་བ་དང་། །དེ་བཞིན་སྲིན་བུར་གང་གྱུར་པ། །དེས་ཀྱང་བརྩོན་པའི་སྟོབས་བསྐྱེད་ན། །བྱང་ཆུབ་ཐོབ་དཀའ་བླ་མེད་ཐོབ། །བདག་ལྟ་རིགས་ཀྱི་མིར་སྐྱེས་ལ། །ཕན་དང་གནོད་པ་ངོ་ཤེས་པས། །བྱང་ཆུབ་སྤྱོད་པ་མ་བཏང་ན། །བདག་གིས་བྱང་ཆུབ་ཅིས་མི་འཐོབ། །ཅེས་དང་། བསོད་ནམས་ཀྱིས་ནི་ལུས་བདེ་ལ། །མཁས་པ་ཡིས་ནི་སེམས་བདེ་ན། །གཞན་དོན་འཁོར་བར་གནས་ཀྱང་ནི། །སྙིང་རྗེ་ཅན་དག་ཅི་སྟེ་སྐྱོ། །འདི་ནི་བྱང་ཆུབ་སེམས་སྟོབས་ཀྱིས། །སྔོན་གྱི་སྡིག་པ་ཟད་བྱེད་ཅིང་། །བསོད་ནམས་རྒྱ་མཚོ་སྡུད་བྱེད་ཕྱིར། །ཉན་ཐོས་རྣམས་ལས་མཆོ་ཏུ་བཤད། །དེ་བས་སྐྱོ་ངལ་ཀུན་སེལ་བའི། །བྱང་ཆུབ་སེམས་ཀྱི་རྟ་ཞོན་ནས། །བདེ་ནས་བདེ་བར་འགྲོ་བ་ལ། །སེམས་ཤེས་སུ་ཞིག་སྒྱིད་ལུག་འགྱུར། །ཞེས་དང་། མདོ་རྒྱན་ལས། གང་ཞིག་སེམས་ཅན་མི་གྱུར་པ། །ཚད་མེད་སྐད་ཅིག་རེ་རེ་ལ། །རྫོགས་པའི་བྱང་ཆུབ་ཐོབ་དེའི་ཕྱིར། །ཞུམ་པ་དང་དུ་བླང་མི་བྱ། །ཞེས་གསུངས། མདོར་ན་འཕགས་པ་ཀླུ་སྒྲུབ་ཀྱིས། ལུས་ཅན་དཔག་ཏུ་མེད་དོན་དུ། །བྱང་ཆུབ་དཔག་ཏུ་མེད་འདོད་ཅིང་། །དགེ་བ་དཔག་ཏུ་མེད་བྱེད་པ། །དེ་ཀོ་བྱང་ཆུབ་དཔག་མེད་ཀྱང་། །དཔག་ཏུ་མེད་པ་རྣམ་པ་བཞིའི། །ཚོགས་ཀྱང་རིང་པོར་མི་ཐོགས་པར། །ཇི་ལྟ་བུར་ན་ཐོབ་མི་འགྱུར། །བསོད་ནམས་མཐའ་ཡས་ཞེས་པ་དང་། །ཡེ་ཤེས་མཐའ་ཡས་ཞེས་པ་དེས། །ལུས་དང་སེམས་ཀྱི་སྡུག་བསྔལ་དག །མྱུར་བ་ཉིད་དུ་སེལ་བར་བྱེད། །སྡིག་པས་ངན་འགྲོར་ལུས་ཀྱི་ནི། །སྡུག་བསྔལ་བཀྲེས་སྐོམ་ལ་སོགས་འབྱུང་། །དེས་སྡིག་མ་བྱས་བསོད་ནམས་ཀྱིས། །སྲིད་པ་གཞན་ན་དེ་མེད་དོ། །རྨོངས་པས་ཡིད་ཀྱི་སྡུག་བསྔལ་ནི། །ཆགས་དང་འཇིགས་དང་འདོད་ལ་སོགས། །དེ་རྟེན་མེད་པའི་ཡེ་ཤེས་ཀྱིས། །དེ་ནི་མྱུར་བ་ཉིད་དུ་སྤོངས། །ལུས་དང་ཡིད་ཀྱི་སྡུག་བསྔལ་གྱིས། །དེ་ལྟར་ཤིན་ཏུ་མ་སྨས་ན། །གལ་ཏེ་འཇིག་རྟེན་མཐར་ཐུག་པར། །འཇིག་རྟེན་འདྲེན་ཀྱང་ཅི་སྟེ་སྐྱོ། །སྡུག་བསྔལ་བ་ལ་དུས་ཐུང་ཡང་། །བཟོད་དཀའ་ཡུན་རིང་སྨོས་ཅི་དགོས། །སྡུག་བསྔལ་མེད་ཅིང་བདེ་བ་ལ། །མཐའ་ཡས་དུས་ཀྱང་ཅི་ཞིག་གནོད། །དེ་ལ་ལུས་ཀྱི་སྡུག་བསྔལ་མེད། །ཡིད་ཀྱི་སྡུག་བསྔལ་ག་ལ་ཡོད། །དེ་ནི་སྙིང་རྗེས་འཇིག་རྟེན་ན། །དེ་ཉིད་ཀྱིས་ནི་ཡུན་རིང་གནས། །དེ་བས་སངས་རྒྱས་རིང་ཐོགས་ཞེས། །བློ་དང་ལྡན་པ་སྒྱིད་མི་ལུག །ཉེས་ཟད་ཡོན་ཏན་དོན་དུ་ནི། །འདི་ལ་རྟག་ཏུ་འབད་པར་བྱ། །ཞེས་གསུངས་པ་ལྟར་བྱང་ཆུབ་སེམས་དཔའ་རྣམས་ནི་རྒྱུ་ལས་ཉོན་སྤངས་པས་འབྲས་བུ་སྡུག་བསྔལ་མི་འབྱུང་ལ། དུས་སྐད་ཅིག་རེར་ཡང་བསོད་ནམས་ཀྱི་ཚོགས་དཔག་ཏུ་མེད་པ་ཟླུམ་པས། འབྲས་བུ་བདེ་ནས་བདེ་བར་འགྲོད་པ་ལ་སུ་ཞིག་སྒྱིད་ལུག་སྟེ། དེ་བས་ན་ངོ་མཚར་རྨད་དུ་བྱུང་བའི་ཚུལ་འདི་ལ་སྤྲོ་བ་རྒྱ་ཆེན་པོ་བསྐྱེད་པར་བྱའོ། །དེ་ལྟར་ཁེ་ཉེན་གྱི་ཁྱད་པར་ཤེས་པར་བྱས་ནས། གཉིས་པ། ཐེག་པ་ཆེན་པོའི་ལམ་གྱི་རྩ་བ་བྱང་ཆུབ་ཏུ་སེམས་བསྐྱེད་པའི་ཚུལ་དངོས་བཤད་པ་ལའང་། སྐལ་བ་དང་ལྡན་པའི་གཞི་རིགས་ཀྱི་རང་བཞིན་དང་། བསླབ་པ་ལ་སྦྱོར་བའི་གཞི་སེམས་བསྐྱེད་ཀྱི་རྣམ་གཞག་གཉིས་ལས། དང་པོ། རིགས་ཞེས་བྱ་བ་ནི་སྤྱིར་ཁམས་དང་ས་བོན་དང་རྒྱུ་རྣམས་ལ་འཇུག་པ་ལས། འདིར་ཐར་པ་དང་ཐམས་ཅད་མཁྱེན་པའི་རྒྱུའམ་ས་བོན་ཏེ། དེ་ལ་གྲུབ་མཐའི་དབང་གིས་འདོད་ཚུལ་དང་ཁས་ལེན་མི་འདྲ་བ་ཤིན་ཏུ་མང་ཡང་། འདིར་ཐེག་ཆེན་ཐུན་མོང་མ་ཡིན་པའི་དབང་དུ་བྱས་ན། རྒྱུད་བླ་མ་ལས། གཏེར་དང་འབྲས་བུའི་ཤིང་བཞིན་དུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང་། །ཡང་དག་བླང་བ་མཆོག་ཡིན་ནོ། །ཞེས་གསུངས་པས་རང་བཞིན་གནས་རིགས་དང་། རྒྱས་འགྱུར་གྱི་རིགས་གཉིས་སུ་བཞེད་ལ། རང་བཞིན་གནས་རིགས་དེ་ཡང་། དེ་བཞིན་ཡིད་ཀྱི་ནང་ཆུད་རིན་ཆེན་གཏེར། །དྲི་མེད་བཞག་དང་བསལ་མེད་ཆོས་ཉིད་ཀྱང་། །མ་རྟོགས་པས་ན་དབུལ་བའི་སྡུག་བསྔལ་ནི། །རྣམ་མང་རྒྱུན་དུ་སྐྱེ་དགུ་འདིས་མྱོང་ངོ་། །ཞེས་བསལ་བཞག་དང་བྲལ་བའི་ཆོས་ཉིད་འདུས་མ་བྱས་ལ་གསལ་བར་བཤད་པ་དེ་ཡིན། དེ་ཡང་སྤྱིར་འཁོར་ལོ་ཐ་མའི་མདོ་དང་དེའི་དགོངས་འགྲེལ་བྱམས་གཞུང་རྗེས་འབྲང་བཅས་ལ་བོད་འདིར་དབུ་སེམས་སུ་འདོད་ཕྱོགས་སྣ་ཚོགས་སྣང་ན་ཡང་། རང་ལུགས་སྔ་འགྱུར་པ་རྣམས་ནི། ཨོ་རྒྱན་དུས་གསུམ་མཁྱེན་པ་དང་། ཀུན་མཁྱེན་ཆོས་ཀྱི་རྒྱལ་པོ་སོགས་རིག་འཛིན་སྔ་མ་རྣམས་ཀྱི་བཞེད་པའི་རྗེས་སུ་འབྲང་དགོས་པས། དེ་ལྟ་ན་ཀུན་མཁྱེན་ཆེན་པོས་ངེས་དོན་ཤིང་རྟ་ཆེན་མོར། འདི་ལྟར་བཀའ་ཐ་མ་ལས་ཁམས་རང་བཞིན་གྱིས་དག་པ་ཡོན་ཏན་ཡེ་ལྡན་དུ་ཡོད་ལ། ལམ་ཉམས་སུ་བླང་དུས་ཡོན་ཏན་སྐྱེ་བ་ལྟར་སྣང་བ་ཁས་ལེན་པ་དང་། སྔགས་ལས་རང་བཞིན་གྱི་དཀྱིལ་འཁོར་འགྲོ་བ་ཀུན་ལ་གནས་པར་བཤད་པ་གཉིས་ཁྱད་མེད་པས་གཞི་གཅིག་ལ། ལམ་ཡང་ཐབས་ཤེས་ཚོགས་གཉིས་སུ་གཅིག་ལ། འབྲས་བུ་ཡང་སྐུ་དང་ཡེ་ཤེས་སུ་གཅིག་པས་ན། སྔོན་གྱི་སློབ་དཔོན་ཆེན་པོ་པདྨ་འབྱུང་གནས་ལ་སོགས་པས་ཕྱི་ནང་དུ་བཤད་པ་མཛད་པ་ཡིན་ནོ། །ཞེས་གསུངས་པ། རིག་འཛིན་འཇིགས་མེད་གླིང་པས་ཀྱང་ཡོན་མཛོད་འགྲེལ་པར་འགོད་པར་མཛད་ལ། རྗེ་དེ་ཉིད་ཀྱི་རིགས་བདག་ཤནྟ་པུ་རི་བ་ཆེན་པོས་ཀྱང་། གཟུང་བའི་ཆོས་ཀུན་ནམ་ཡང་ཡོད་མིན་ཞིང་། །འཛིན་པའི་ཤེས་པའང་འཁྲུལ་བར་གདོན་མི་ཟ། །གཉིས་མེད་ཡེ་ཤེས་སྦྱང་གཞིར་བཞག་པ་འདི། །འཁོར་ལོ་ཐ་མའི་ལམ་གྱི་རིམ་པའོ། །མི་ཕམ་མགོན་དང་ཀླུ་སྒྲུབ་སྙིང་པོ་ཡིས། །བྱམས་པའི་ཆོས་བཞི་བསྟོད་ཚོགས་གཞུང་གིས་བཀྲལ། །ཐོགས་མེད་མཆེད་ཀྱི་གསུང་རབ་ཉི་འོད་ཀྱིས། །གངས་རིའི་ཁྲོད་འདིར་མི་ཕམ་རྒྱལ་བ་དང་། །ཐོགས་མེད་མཆེད་ཀྱི་གཞུང་བཟང་ངོ་མཚར་ཅན། །དབུ་སེམས་སོ་སོར་འགྲེལ་བྱེད་མང་ན་ཡང་། །གང་དེ་དབུ་མའི་གཞུང་དུ་གདོན་མི་ཟ། །ཞེས་གསུངས་ཤིང་། ཆོས་རྗེ་སྨིན་གླིང་པ་ཡབ་སྲས་སོགས་ཚད་མར་གྱུར་པའི་མཁས་གྲུབ་ཆེན་པོ་རྣམས་དགོངས་པ་གཅིག་ཏུ་འབབ་པ་ཡིན་ལ། དེར་མ་ཟད་བཅོམ་ལྡན་འདས་རང་ཉིད་ཀྱིས་ཀྱང་རིགས་ཁམས་ནོར་བུ་སྦྱང་བའི་དཔེ་སོགས་ཀྱིས་ངེས་དོན་མཐར་ཐུག་ཏུ་དངོས་སུ་གསུངས་པ་ལ་སུས་ཀྱང་བསྙོན་དུ་མེད་དོ། །དེས་ན་དབུ་མ་སྤྱིའི་ལུགས་ལ། སེམས་ཅན་ཐམས་ཅད་ཀྱི་ཆོས་ཉིད་ཆོས་ཀྱི་དབྱིངས་རང་བཞིན་གྱིས་འོད་གསལ་བ་སྟེ། དེ་ཉིད་ཉོན་མོངས་པའི་སྦུབས་ན་གནས་པ་ལ་བདེ་གཤེགས་སྙིང་པོ་ཞེས་གྲགས་པ་དེ་ཉིད་རང་བཞིན་གནས་རིགས་དང་། ཐེག་པ་ཆེན་པོའི་ཆོས་ལ་ཐོས་བསམ་དང་བྱང་ཆུབ་ཏུ་སེམས་བསྐྱེད་པ་སོགས་ཀྱི་རྣམ་པར་དཀར་བའི་རྐྱེན་གང་ཡང་རུང་བས་རང་བཞིན་གནས་རིགས་ལ་གསོས་བཏབ་པ་ཉིད་རྒྱས་འགྱུར་གྱི་རིགས་སུ་བཞེད་པ་སོགས་ཡོད་ཀྱང་། སྔ་འགྱུར་རང་ལུགས་ཐུན་མིན་ནི། ཀུན་མཁྱེན་ཆོས་ཀྱི་རྒྱལ་པོས། ཐར་པ་དགེ་བའི་རྟེན་ནི་རིགས་ཡིན་ལ། དེ་ཡང་སེམས་ཀྱི་རང་བཞིན་འོད་གསལ་བ། །དྲི་མེད་ཁམས་ཏེ་རང་བཞིན་གནས་པའི་རིགས། །དེ་ཡི་སྣང་ཆ་སྐུ་གཉིས་དཔེ་རྣམ་དགུ། །སྙིང་རྗེའི་རང་བཞིན་ཡེ་ནས་གནས་པ་ནི། །རྒྱས་འགྱུར་རིགས་ཞེས་བདེ་བར་གཤེགས་པས་གསུངས། །རྩ་བ་རིགས་པའི་ཡེ་ཤེས་འོད་གསལ་བ། །ངོ་བོ་དུག་གསུམ་མེད་པའི་དགེ་བ་ཡིན། །ཞེས་དང་། དེའི་འགྲེལ་པར། དེའང་རང་བཞིན་གྱིས་དག་ཅིང་ངོ་བོ་ཉིད་དྲི་མ་མེད་པའི་སེམས་ཉིད་སངས་རྒྱས་ཀྱི་ཡེ་ཤེས་དམ་པ་ཡེ་ནས་གནས་པའི་སེམས་ཀྱི་རང་བཞིན་འོད་གསལ་བའི་སྣང་ཆ་ལས་སངས་རྒྱས་གཟུགས་སྐུའི་ཡོན་ཏན་ལྷུན་གྲུབ་ཏུ་ཡོད་པ་དཔེ་དགུས་བསྟན་ཅིང་། སྟོང་ཆ་ལ་ཆོས་སྐུའི་ཡོན་ཏན་ནམ་མཁའ་ལྟ་བུའི་དཔེ་མདོ་དང་རྒྱུད་ཐམས་ཅད་ནས་བཤད་ལ། དེ་གཉིས་དབྱེར་མེད་པ་ནི་ཐོག་མ་མེད་པའི་ཆོས་ཁམས་དགེ་བ་སྟེ། འགྱུར་བ་མེད་པས་རང་བཞིན་དུ་གནས་པའི་རིགས་དང་། དྲི་མ་སྦྱངས་ནས་ཡོན་ཏན་རྒྱས་པར་མངོན་པས་རྒྱས་འགྱུར་གྱི་རིགས་ཞེས་བཏགས་ཀྱང་། རྩ་བ་རང་རིག་པའི་ཡེ་ཤེས་འོད་གསལ་བ་ཉིད་དོ། །ཞེས་གསུངས་པ་ལྟར་སྒྲ་ཇི་བཞིན་པར་འདོད་དེ། ཀུན་མཁྱེན་འཇིགས་མེད་གླིང་པས། ཤེས་བྱ་སྣང་བས་མ་བཅིངས་སྟོང་པའི་དངོས། །སྟོང་པའི་རང་བཞིན་གསལ་བའི་སྙིང་པོ་ནི། །རིག་པར་བཞུགས་པས་སྐུ་དང་ཡེ་ཤེས་ཁམས། །འདུ་འབྲལ་མེད་པ་ཉི་མའི་སྙིང་པོ་བཞིན། །ཞེས་གསུངས། དེས་ན་རིགས་གཉིས་སུ་བཤད་པའང་ངོ་བོ་གཅིག་ལ་ལྡོག་པས་ཕྱེ་བ་ཙམ་ལས་དོན་ལ་ནི་རང་གི་སེམས་ཉིད་སྤྲོས་བྲལ་རང་བྱུང་གི་ཡེ་ཤེས་གཤིས་ཅིར་ཡང་མ་གྲུབ་ལ་གདངས་འགག་མེད་དུ་འཆར་བའི་གཉུག་མའི་ཤེས་པ་དྭངས་གསལ་རྗེན་པ་འདི་ཉིད་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་ས་བོན་ནམ་བདེ་བར་གཤེགས་པའི་སྙིང་པོ་ཡིན་ཏེ། འཇམ་དཔལ་རྣམ་པར་རོལ་པ་ལས། སྲིང་མོ་འདི་ལྟ་སྟེ། དཔེར་ན་ནམ་མཁའ་གང་ལ་མེ་འབར་ཡང་ནམ་མཁའ་ནི་མེ་དེས་ཚིག་པར་མི་ནུས་སོ། །སྲིང་མོ་དེ་བཞིན་དུ་གང་རང་བཞིན་གྱིས་འོད་གསལ་བ་ལ། གློ་བུར་གྱི་ཉོན་མོངས་པ་བྱུང་ཡང་། རང་བཞིན་གྱིས་འོད་གསལ་བ་དེ་ནི་གློ་བུར་གྱི་ཉོན་མོངས་པ་དེས་ཀུན་ནས་ཉོན་མོངས་པར་བྱེད་མི་ནུས་སོ། །ཞེས་དང་། མགོན་པོ་བྱམས་པས་རྒྱུད་བླ་མར། སེམས་ཀྱི་རང་བཞིན་འོད་གསལ་གང་ཡིན་པ། །དེ་ནི་ནམ་མཁའ་བཞིན་དུ་འགྱུར་མེད་དེ། །ཡང་དག་མིན་རྟོག་ལས་བྱུང་འདོད་ཆགས་སོགས། །གློ་བུར་དྲི་མས་དེ་ཉོན་མོངས་མི་འགྱུར། །ཞེས་དང་། འཕགས་པ་ཀླུས་སེམས་ཀྱི་རྡོ་རྗེ་ལ་བསྟོད་པ་ལས། ས་ཡི་དཀྱིལ་ན་ཡོད་པའི་ཆུ། །དྲི་མ་མེད་པར་གནས་པ་ལྟར། །ཉོན་མོངས་ནང་ན་ཡེ་ཤེས་ཀྱང་། །དེ་བཞིན་དྲི་མ་མེད་པར་གནས། །ཞེས་དང་། རྣམ་སྣང་མངོན་བྱང་ལས། བྱིས་པ་མི་ཤེས་པས་བསྒྲིབས་པ། །ཚུལ་འདི་ཤེས་པར་མ་གྱུར་རྣམས། །སངས་རྒྱས་གཞན་དུ་ཚོལ་བར་བྱེད། །འདི་ན་གནས་པར་ཡོད་མ་རྟོགས། །འཇིག་རྟེན་ཁམས་གཞན་གང་ནས་ཀྱང་། །སངས་རྒྱས་རྙེད་པར་ཡོང་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་བསྟན་ཏོ། །ཞེས་དང་གླང་པོ་རབ་འབོག་གི་རྒྱུད་ལས། སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ། །ཆོས་རྣམས་རྣམ་དག་ཡེ་ནས་འོད་གསལ་ཞིང་། །རྣལ་འབྱོར་ཉིད་དབྱིངས་སྨྲ་བསམ་ལས་འདས་པའི། །མཉམ་ཉིད་བྱང་ཆུབ་སེམས་ལ་རྟག་ཏུ་འདུད། །ཅེས་དང་། གསང་སྙིང་ལས། ཕྱོགས་བཅུ་དུས་བཞི་ཀུན་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་འཚོལ་ཅིག །ཅེས་དང་། རྡོ་རྗེ་གུར་ལས། ཆོས་ཀྱི་དབྱིངས་ནི་མཆོག་ཏུ་ཞི། །འདི་ནི་རིན་ཆེན་སེམས་སུ་བརྗོད། །འདོད་དོན་འབྲས་བུ་རབ་སྟེར་བ། །སེམས་ཀྱི་དེ་ཉིད་རང་བཞིན་དག །ཅེས་དང་། དོ་ཧ་ལས། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལ་སྲིད་དང་མྱ་ངན་འདས་འཕྲོ་བ། །འདོད་པའི་འབྲས་བུ་སྟེར་བར་བྱེད་པ་ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་སོ། །དེ་ལྟ་བུའི་བདེ་གཤེགས་སྙིང་པོ་དེ་ནི་འགྲོ་བ་ཀུན་ལ་ཁྱབ་གདལ་དུ་ཡོད་པར་གང་གིས་ངེས་ན་ལུང་དང་། རིགས་པ་དང་། རྟགས་གསུམ་གྱིས་ངེས་ནུས་ཏེ། ལུང་ནི། དེ་བཞིན་གཤེགས་པའི་སྙིང་པོ་བསྟན་པའི་མདོ་ལས། དེ་བཞིན་གཤེགས་པ་རྣམས་བྱུང་ཡང་རུང་། མ་བྱུང་ཡང་རུང་སྟེ་སེམས་ཅན་འདི་དག་ནི་རྟག་ཏུ་དེ་བཞིན་གཤེགས་པའི་སྙིང་པོ་ཅན་ཡིན་ནོ། །ཞེས་དང་། ཕལ་པོ་ཆེ་ལས། གང་ལ་དེ་བཞིན་གཤེགས་པའི་ཡེ་ཤེས་མཐའ་དག་རྗེས་སུ་མ་ཞུགས་པའི་སེམས་ཅན་དེ་ནི་སེམས་ཅན་གྱི་རིས་ན་འགའ་ཡང་མེད་དེ། ཞེས་དང་། མྱང་འདས་ལས། སྔོན་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་བརྗོད་པ་ལས། ངས་ཆོས་ཐམས་ཅད་སྟོང་པ་ཉིད་དུ་གང་བསྟན་པ་གང་ཡིན་པ་དེ་ནི་བྱིས་པ་རྣམས་བདག་ཏུ་ཞེན་པ་ལས་ཡོངས་སུ་གྲོལ་བའི་ཕྱིར་བཤད་ཀྱི། ཡང་དག་པར་ནི་དེ་བཞིན་གཤེགས་པའི་སྙིང་པོ་ཉག་གཅིག་དོན་དམ་པའི་བདེན་པའོ། །ཞེས་དང་། དཔེར་ན་འོ་མ་ལ་མར་གྱིས་ཁྱབ་པར་གནས་སོ། །དེ་བཞིན་དུ་དེ་བཞིན་གཤེགས་པའི་སྙིང་པོས་ཀྱང་སེམས་ཅན་ཐམས་ཅད་ལ་ཁྱབ་པར་གནས་སོ། །ཞེས་དང་། མདོ་སྡེ་རྒྱན་ལས། དེ་བཞིན་ཉིད་ནི་ཐམས་ཅད་ལ། །ཁྱད་པར་མེད་ཀྱང་དག་གྱུར་པ། །དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཞེས་དང་། ཀླུ་སྒྲུབ་ཀྱིས། གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱོང་བ་བྱས་པ་ལས། །དག་པ་དེ་ཉིད་མྱ་ངན་འདས། །ཆོས་ཀྱི་སྐུ་ཡང་དེ་བཞིན་ནོ། །ཞེས་དང་། །ཇི་ལྟར་སོ་གའི་དུས་སུ་ཆུ། །དྲོའོ་ཞེས་ནི་བརྗོད་པར་བྱེད། །དེ་ཉིད་གྲང་བའི་དུས་སུ་ནི། །གྲང་ངོ་ཞེས་ནི་བརྗོད་པ་ཡིན། །ཉོན་མོངས་དྲྭ་བས་གཡོགས་པ་ན། །སེམས་ཅན་ཞེས་ནི་བརྗོད་པར་བྱ། །དེ་ཉིད་ཉོན་མོངས་བྲལ་གྱུར་ན། །སངས་རྒྱས་ཞེས་ནི་བརྗོད་པར་བྱེད། །ཅེས་དང་། ཇོ་བོའི་བྱང་ཆུབ་ལམ་སྒྲོན་འགྲེལ་པ་ལས། ཡང་ན་ཐེག་པ་ཆེན་པོའི་གྲུབ་མཐའ་དབང་བཙན་པར་བྱས་ན་ནི། འདི་ལྟར་ཐེག་པ་ཆེན་པོའི་སྣོད་དུ་མ་གྱུར་པ་འགའ་ཡང་མེད་དེ། སེམས་ཅན་ཐམས་ཅད་རིགས་གཅིག་པ་ཡིན་ཏེ། དེ་བཞིན་གཤེགས་པའི་སྙིང་པོ་ཅན་ནོ། །ཞེས་དང་། མཐར་ཐུག་གསང་རྒྱུད་ཀུན་ནས་བསྟན་ཏེ། དུས་འཁོར་ཡེ་ཤེས་ལེའུ་ལས། སེམས་ཅན་རྣམས་ནི་སངས་རྒྱས་ཡིན་ཏེ་སངས་རྒྱས་ཆེན་པོ་གཞན་འདིར་འཇིག་རྟེན་ཁམས་ན་ཡོད་མ་ཡིན། །ཞེས་དང་། གསང་འདུས་རྩ་རྒྱུད་ལས། རིགས་ཀྱི་བུ་དག་སེམས་ཅན་གྱི་ཁོངས་སུ་གཏོགས་པའི་སེམས་ཅན་ཇི་སྙེད་ཡོད་པ་དེ་དག་ཐམས་ཅད་སངས་རྒྱས་ལ་གནས་པ་བྱང་ཆུབ་རྡོ་རྗེའོ། །ཞེས་དང་། གུར་ལས། རིན་ཆེན་སེམས་ལས་ཕྱིར་གྱུར་པའི། །སེམས་ཅན་མེད་ཅིང་སངས་རྒྱས་མེད། །ཅེས་དང་། བརྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་སྒྲིབ། །དྲི་མ་དེ་བསལ་སངས་རྒྱས་དངོས། །ཞེས་དང་། རྡོ་རྗེ་སྙིང་པོ་རྒྱན་གྱི་རྒྱུད་ལས། འབྱུང་དང་འབྱུང་འགྱུར་ཐམས་ཅད་ལ། །བཅོམ་ལྡན་འདས་ནི་བདེ་ཆེན་པོ། །ཀུན་ཏུ་བཟང་པོ་རྡོ་རྗེ་འཛིན། །ཀུན་ཏུ་ཁྱབ་པར་བྱས་ཏེ་གནས། །ཞེས་དང་། གཉིས་མེད་རྣམ་རྒྱལ་ལས། བདེ་བར་གཤེགས་པའི་མཚན་དང་དཔེ་བྱད་རྣམས། །སེམས་ཅན་ཀུན་གྱི་ལུས་ལ་ངེས་པར་བཞུགས། །དབྲི་བསྣན་མེད་པར་འཆར་བས་གསལ་བར་བྱེད། །དེ་ནི་སྦས་པའི་དོན་དུ་ཚུལ་འདི་བསྟན། །ཞེས་སོགས་མཐའ་ཡས་ཏེ། མདོར་ན། གསང་སྙིང་ལས། སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་དང་། རྡོ་རྗེ་སེམས་དཔའ་སྙིང་གི་མེ་ལོང་ལས། འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཏིལ་འབྲུ་ལ་མར་གྱིས་ཁྱབ་པ་བཞིན་དུ་གནས་སོ། །ཞེས་གསུངས་པས་ཤེས་པར་ནུས་སོ། །རིགས་པ་ནི། རྒྱུད་བླ་མ་ལས། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་གསུངས་ཏེ། དེ་ཡང་གོང་དུ་སྨོས་པ་ལྟར་སངས་རྒྱས་བཅོམ་ལྡན་འདས་ཀྱིས་འཁོར་ལོ་བར་ཐར་ངོ་བོ་སྟོང་ཕྱོགས་དང་། རང་བཞིན་སྐུ་དང་ཡེ་ཤེས་སོགས་སྣང་ཕྱོགས་ནས་བསྟན་པ་དེ་ཐམས་ཅད་འགལ་མེད་སྣང་སྟོང་ཟུང་དུ་འཇུག་པའི་ཡེ་ཤེས་ཟུང་འཇུག་མཉམ་པ་ཉིད་རྡོ་རྗེ་ནམ་མཁའི་དཀྱིིལ་ལྟ་བུ་མཐར་ཐུག་རྣམ་གྲངས་མིན་པའི་དོན་དམ་རང་བྱུང་འདུས་མ་བྱས་ཆེན་པོ་དེ་ལ་ཆོས་ཀྱི་དབྱིངས་སམ། བདེ་བར་གཤེགས་པའི་སྙིང་པོའམ། སྔགས་སུ་གཉུག་མ་འོད་གསལ་གྱི་སེམས་སོགས་གང་ལ་འདོགས་གཞི་དེ་ཡིན་པས་དེ་ཉིད་སྒྲིབ་བྱེད་མཐའ་དག་དང་བྲལ་བའི་དག་པ་མཐར་ཐུག་མངོན་དུ་གྱུར་པ་ན་སངས་རྒྱས་ཆོས་ཀྱི་སྐུ་ཞེས་བྱ་སྟེ་དེ་ལས་གཞན་དུ་དམིགས་སུ་མེད་དོ། །དེའི་ཕྱིར་མཐར་ཐུག་ཆོས་སྐུའི་ཡོན་ཏན་ནམ་མཁའ་དང་མཉམ་པ་དེ། སྔོན་ཐ་མལ་འཆིང་བ་ཀུན་ལྡན་དུ་གྱུར་པའི་གང་ཟག་གི་རྒྱུད་ལས་ཕྱིས་མངོན་དུ་གྱུར་པ་ཡོད་པའི་ཕྱིར་དང་། རིགས་མེད་ན་བརྩོན་ཀྱང་དེ་ལྟར་མངོན་དུ་འགྱུར་བར་མི་འཐད་པའི་ཕྱིར་དང་། བྲལ་འབྲས་ཆོས་སྐུའི་ཡོན་ཏན་དེ་རང་བཞིན་འགྱུར་བ་མེད་པ་འདུས་མ་བྱས་རྟག་པའི་ངོ་བོ་ཡིན་པའི་ཕྱིར་ཏེ། དེ་ལྟར་རྒྱུ་མཚན་གསུམ་གྱིས་སེམས་ཅན་གྱི་རྒྱུད་ལ་སངས་རྒྱས་ཀྱི་སྙིང་པོ་ཡོད་པར་ལྟོས་པའི་རིགས་པས་གྲུབ་པ་དང་། འཁོར་འདས་ཀྱི་ཆོས་ཐམས་ཅད་སྟོང་ཉིད་དེ་བཞིན་ཉིད་གདོད་མའི་འོད་གསལ་ཆེན་པོར་དབྱེར་མེད་རོ་གཅིག་པའི་ཕྱིར། འཁྲུལ་པ་གློ་བུར་བས་སྤྲུལ་པའི་སེམས་ཅན་ལྟར་སྣང་བ་རྣམས་ཀྱང་གནས་ལུགས་དོན་དམ་པའི་ཆོས་ཉིད་ལས་ཅུང་ཟད་ཀྱང་མ་གཡོས་པར་ཆོས་ཉིད་ཀྱི་རིགས་པས་གྲུབ་པ་དང་། སེམས་ཅན་གྱི་རྒྱུད་ལ་དྲི་མ་གློ་བུར་པ་སྤང་རུང་དང་། ཡོན་ཏན་ཡེ་ལྡན་གྱི་ཆོས་སྐུ་མངོན་རུང་དུ་ཀུན་ལ་ཁྱད་མེད་དུ་བཞུགས་པའི་ཕྱིར་སངས་རྒྱས་ཀྱི་རིགས་ཡོད་པར་གྲུབ་ལ། རིགས་དེ་ཡོད་ན་ལུས་ཅན་དེ་སངས་རྒྱས་ཀྱི་སྙིང་པོ་ཅན་དུ་བྱ་བ་བྱེད་པའི་རིགས་པས་གྲུབ་པ་ཡིན་ཏེ། ཞིབ་པར་སྟོང་ཐུན་སེང་གེའི་ང་རོ་སོགས་ལས་ཤེས་པར་བྱའོ། །རྟགས་ཀྱིས་ངེས་པ་ནི། རྒྱུད་བླ་མ་ལས། གལ་ཏེ་སངས་རྒྱས་ཁམས་མེད་ན། །སྡུག་ལ་སྐྱོ་བར་མི་འགྱུར་ཞིང་། །མྱ་ངན་འདས་ལ་འདོད་པ་དང་། །དོན་གཉེར་སྨོན་པའང་མེད་པར་འགྱུར། །སྲིད་དང་མྱ་ངན་འདས་ལ་དེའི། །སྡུག་བདེའི་སྐྱོན་ཡོན་མཐོང་བ་འདི། །རིགས་ཡོད་ལས་ཡིན་གང་ཕྱིར་དེ། །རིགས་མེད་དག་ལ་མེད་ཕྱིར་རོ། །ཞེས་གསུངས་ཏེ། སྲིད་པའི་སྡུག་བསྔལ་ལ་སྐྱོ་བའི་ཡིད་ཅན་དེས། ཐར་པའི་བདེ་བ་ལ་སྨོན་པའི་སེམས་སྐྱེ་བ་དེ་ཡང་ཡེ་ནས་རང་གི་རྒྱུད་སྡུག་བསྔལ་བ་དང་འབྲལ་རུང་དང་། མྱང་འདས་ཐོབ་རུང་དུ་ཡོད་པའི་རྟགས་ཡང་དག་པ་ཡིན་པའི་ཕྱིར་རོ། །དེ་ལྟར་བྱང་ཆུབ་ཆེན་པོའི་རིགས་སམ་ཁམས་བདེ་བར་གཤེགས་པའི་སྙིང་པོ་དེ་ཉིད་རང་ལ་ཡོད་པའི་ཚུལ་འདི་ཐོག་མར་ངེས་དགོས། དེ་མ་ངེས་ན་སངས་རྒྱས་སྒྲུབ་འདོད་ཀྱི་བློ་མི་སྐྱེ་སྟེ། དཔེར་ན་ས་འོག་ན་གསེར་ཡོད་པར་མ་ངེས་ན་གསེར་བརྐོ་འདོད་ཀྱི་བསམ་པ་མི་སྐྱེ་བ་བཞིན་ཏེ། ཀླུ་སྒྲུབ་ཀྱིས། ཁམས་ཡོད་ན་ནི་ལས་བྱས་པ། །ས་ལེ་སྦྲམ་དག་མཐོང་བར་འགྱུར། །ཁམས་མེད་ན་ནི་ལས་བྱས་ན། །ཉོན་མོངས་འབའ་ཞིག་སྐྱེ་བར་ཟད། །ཅེས་གསུངས། འདི་ལ་བློ་ཆུང་ཁ་ཅིག་གིས། དེ་ལྟ་བུའི་བདེ་གཤེགས་སྙིང་པོ་རང་ལ་ཡོད་ན་ད་ལྟ་མི་མངོན་པ་ཅི་སྙམ་དུ་ཐེ་ཚོམ་ཟ་ན། དེ་ནི་ཐོག་མ་མེད་པའི་དུས་ནས་གོམས་པའི་ལས་ཉོན་བག་ཆགས་ཀྱིས་སྒྲིབ་པའི་ཕྱིར་ཡིན་ཏེ། རྒྱུད་བླ་མ་ལས། ཐོག་མེད་གྱུར་ཀྱང་ཐ་མ་དང་ལྡན་པ། །རང་བཞིན་གྱིས་དག་རྟག་པའི་ཆོས་ཅན་ནི། །ཐོག་མེད་སྦུབས་ཀྱིས་སྒྲིབ་ཕྱིར་མི་མཐོང་སྟེ། །ཇི་ལྟར་གསེར་གྱི་གཟུགས་ནི་སྒྲིབ་པ་བཞིན། །ཞེས་གསེར་གཟུགས་ས་འདོམ་གྱིས་སྒྲིབ་པའི་དཔེ་བསྟན་པ་དང་། དབུ་མ་ཆོས་དབྱིངས་བསྟོད་པ་ལས། ཇི་ལྟར་རིན་ཆེན་བཻཌཱུཪྱ། །དུས་རྣམས་ཀུན་ཏུ་འོད་གསལ་ཡང་། །རྡོ་ཡི་ནང་ན་གནས་གྱུར་པ། །དེ་ཡི་འོད་ནི་གསལ་མ་ཡིན། །དེ་བཞིན་ཉོན་མོངས་ཀྱིས་བསྒྲིབས་པའི། །ཆོས་དབྱིངས་ཤིན་ཏུ་དྲི་མེད་པའང་། །འཁོར་བར་འོད་ནི་གསལ་མ་ཡིན། །མྱ་ངན་འདས་ན་འོད་གསལ་འགྱུར། །ཞེས་ནོར་བུ་ཤུན་པས་སྒྲིབ་པའི་དཔེས་གསུང་བ་ཡིན་ལ། མདོར་ན་ཀུན་མཁྱེན་པྲཛྙཱ་ར སྨིས། ཁམས་ཀྱིས་རང་བཞིན་བདེ་གཤེགས་སྙིང་པོ་ཉིད། །ཐོག་མའི་མགོན་པོ་ཡེ་ཤེས་སྐུར་བཞུགས་ཀྱང་། །ཕྲ་རབ་རྡུལ་གྱིས་ཆ་ལས་རབ་འདས་ཤིང་། །ས་བཅུའི་དབང་ཕྱུག་གིས་ཀྱང་མཐོང་མི་ནུས། །དུས་གསུམ་རྒྱལ་བ་ཁོ་ནའི་རང་སྣང་ངོ་། །ཞེས་གསུངས་པ་བཞིན་ནོ། །འོ་ན་ཁྱི་ཕག་སོགས་སེམས་ཅན་རྣམས་ཀྱི་སེམས་ཀྱི་རྒྱུད་ལ་སྟོབས་བཅུའི་ཡེ་ཤེས་ཡོད་དམ་སྙམ་ན། སྟོབས་བཅུའི་ཡེ་ཤེས་ཀྱི་ཡོན་ཏན་དེའི་རྒྱུད་ཀྱི་གཤེགས་སྙིང་ལ་ཡེ་ནས་ཡོད་དེ། ཁོ་རང་གི་ཆོས་ཉིད་ཀྱི་ཡོན་ཏན་ཡིན་པས་མེ་དང་ཚ་བ་བཞིན་དུ་ནམ་ཡང་འབྲལ་མི་ཤེས་པས་ཁམས་ཡོད་ན་ཡོད་མོད་ཀྱི་དེ་ཉིད་མངོན་དུ་མི་འགྱུར་ཏེ། དཔེར་ན་རལ་གྲི་ལ་གཅོད་པའི་བྱ་བ་ཡོད་ཀྱང་ཤུབ་ཏུ་ཆུད་པ་ལ་གཅོད་པའི་བྱ་བ་མངོན་གྱུར་དུ་མེད་པ་དང་། མེ་ལོང་ལ་གཟུགས་བརྙན་འཆར་རུང་གི་ཡོན་ཏན་ཡོད་ཀྱང་སྒྲོམ་དུ་བཅུག་པ་ལ་མངོན་གྱུར་དུ་མི་འཆར་བ་དང་འདྲ་སྟེ། རང་རྒྱུད་ལྡན་གྱི་གང་ཟག་དེའི་རྒྱུད་ལ་ཡོད་པའི་སྒྲིབ་པས་ཁམས་ཀྱི་ཡོན་ཏན་མངོན་དུ་མི་སྣང་སྟེ། རང་གི་སེམས་ཀྱི་ཆོས་ཉིད་རྣམ་ཀུན་མཆོག་ལྡན་གྱི་སྟོང་ཉིད་ཡོད་ཀྱང་ངོ་མ་སྤྲད་ཅིང་གོམས་པར་མ་བྱས་ན་མངོན་དུ་མི་འགྱུར་བ་བཞིན་ནོ། །དེས་ན་གཤིས་ཀྱི་གནས་ལུགས་གོ་བ་ཙམ་གྱིས་མི་ཕན་པར་སྒྲིབ་པ་སྤོང་བའི་ཚུལ་ལ་འབད་དགོས་ཤིང་། དེའི་ཐབས་ཀྱི་མཆོག་ནི་བྱང་ཆུབ་ཏུ་སེམས་བསྐྱེད་པ་ཡིན་ཏེ། འཕགས་པ་བྱམས་པས་ཞུས་པའི་མདོ་ལས། བྱམས་པ། བྱང་ཆུབ་སེམས་དཔའ་ཆོས་གཅིག་དང་ལྡན་ན་ངན་སོང་ཐམས་ཅད་ཡོངས་སུ་སྤངས་ཤིང་སྡིག་པའི་གྲོགས་པོའི་ལག་ཏུ་མི་འགྲོ་ལ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། ཆོས་གཅིག་པོ་གང་ཞེ་ན། འདི་ལྟ་སྟེ། ལྷག་པའི་བསམ་པ་བྱང་ཆུབ་ཀྱི་སེམས་ཏེ། བྱམས་པ་ཆོས་གཅིག་པོ་དེ་དང་ལྡན་ན། ངན་འགྲོ་ཐམས་ཅད་སྤངས་ཤིང་སྡིག་པའི་གྲོགས་པོའི་ལག་ཏུ་མི་འགྲོ་ལ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱའོ། །ཞེས་གསུངས། སེམས་མ་བསྐྱེད་པར་སངས་རྒྱས་པའི་ཐབས་གཞན་མེད་དེ། བྱང་ཆུབ་སེམས་འགྲེལ་ལས། བྱང་ཆུབ་སེམས་ནི་མ་བསྐྱེད་པར། །སངས་རྒྱས་ནམ་ཡང་མི་ཐོབ་ཅིང་། །འཁོར་བར་རང་གཞན་དོན་སྒྲུབ་པའི། །ཐབས་གཞན་ཡོད་པར་མ་ཡིན་ནོ། །ཞེས་སོ། །བྱང་ཆུབ་ཏུ་སེམས་བསྐྱེད་པ་དེ་ཡང་དགེ་རྩ་གོམས་པ་ལས་སམ། ཐེག་ཆ ེན་གྱི་སྡེ་སྣོད་ཐོས་པ་ལས་སམ། དགེ་བའི་བཤེས་གཉེན་གྱིས་རྗེས་སུ་བསྟན་པ་ལས་ཀྱང་རུང་སྟེ་རིགས་སད་པའི་རྟགས་དང་ལྡན་པ་ཞིག་ལ་སྐྱེ་བས། དེ་ལ་རྒྱས་འགྱུར་གྱི་རིགས་སད་པའི་རྟགས་ནི། མདོ་རྒྱན་ལས། སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང་། །དགེ་ལ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་དང་། རང་བཞིན་གནས་རིགས་སད་པའི་རྟགས་ནི། དབུ་མ་འཇུག་པ་ལས། སོ་སོ་སྐྱེ་བོའི་དུས་ནའང་སྟོང་ཉིད་ཐོས། །རབ་ཏུ་དགའ་བ་ཡང་དང་ཡང་དུ་ལྡན། །དགའ་བ་ལས་བྱུང་མིག་ནི་མཆི་མས་བརླན། །ལུས་ཀྱི་བ་སྤུ་ལྡང་བའང་སྐྱེ་བར་འགྱུར། །དེ་ལ་རྫོགས་སངས་རྒྱས་བློའི་ས་བོན་ཡོད། །ཅེས་པ་ལྟར་རོ། །དེ་ལྟ་བུའི་རིགས་སད་པའི་རྟགས་དང་ལྡན་པས་སྲོལ་གཉིས་གང་ཡང་རུང་བའི་ཆོ་གའི་ཡན་ལག་ཚང་བ་ཞིག་གི་སྒོ་ནས་བྱང་ཆུབ་མཆོག་གི་སེམས་རིན་པོ་ཆེ་ཇི་ལྟ་བ་བཞིན་དུ་བསྐྱེད་ནས་བསླབ་པ་ལ་ཚུལ་བཞིན་དུ་སློབ་པར་བྱས་ན་རིང་པོར་མི་ཐོགས་པར་ཆོས་ཀྱི་རྒྱལ་པོ་ཐམས་ཅད་མཁྱེན་པའི་གོ་འཕང་ཐོབ་ནས་མཐའ་ཡས་པའི་ལུས་ཅན་ཐམས་ཅད་ཀྱི་སྐྱབས་དང་མགོན་དང་དཔུང་གཉེན་བྱེད་པར་འགྱུར་ཏེ། ཀུན་མཁྱེན་ཆོས་རྗེས། མ་ལུས་འགྲོ་ཀུན་བདེ་གཤེགས་སྙིང་པོ་ཅན། །གློ་བུར་དྲི་མས་གཡོགས་པའི་སྦུབས་ནང་ན། །འོད་གསལ་ཆོས་ཁམས་མར་མེ་ཡེ་ནས་གནས། །སྐུ་དང་ཡེ་ཤེས་ལྷུན་གྱིས་གྲུབ་པའི་ཆོས། །རང་ལ་ཡོད་དེ་དེ་ཉིད་ལྷུན་གྱིས་གྲུབ། །སྟོང་དང་སྙིང་རྗེའི་སྙིང་པོ་ལྷུར་ལེན་པས། །ཁམས་དེ་བྱང་ཆུབ་ཞེས་བྱའི་མིང་ཐོབ་ནས། །མ་ལུས་སྐྱེ་དགུའི་ཚོགས་ལ་ཕན་བདེ་བྱེད། །ཅེས་དང་། འཕགས་པ་ཀླུ་སྒྲུབ་ཀྱིས། ཇི་ལྟར་མར་མེ་བུམ་ནང་ན། །སུ་ཞིག་སྣང་བར་མི་འགྱུར་བ། །དེ་བཞིན་ཉོན་མོངས་བུམ་ནང་ན། །ཆོས་ཀྱི་དབྱིངས་ཀྱང་མི་མཐོང་ངོ་། །ཕྱོགས་ནི་གང་དང་གང་དག་ནས། །བུམ་པར་བུ་ག་བཏོད་གྱུར་པའི། །དེ་དང་དེ་ཡི་ཕྱོགས་ཉིད་ནས། །འོད་ཀྱི་རང་བཞིན་འབྱུང་བར་འགྱུར། །གང་ཚེ་ཏིང་འཛིན་རྡོ་རྗེ་ཡིས། །བུམ་པ་དེ་ཉིད་བཅག་གྱུར་པ། །དེ་ཚེ་དེ་ནི་ནམ་མཁའ་ཡི། །མཐར་ཐུག་བར་དུ་སྣང་བར་བྱེད། །ཅེས་གསུངས། མདོར་ན། ཨོ་རྒྱན་དུས་གསུམ་མཁྱེན་པས། གདོད་ནས་དག་པའི་རིག་པ་ནིཿ ཡེ་ནས་ཆོས་སྐུར་གནས་པ་ལ༔ དབུལ་པོའི་ཁྱིམ་གྱི་ས་འོག་ན༔ གནས་པའི་ནོར་བུ་རིན་ཆེན་བཞིན༔ ངོ་མ་ཤེས་པས་འཁོར་བར་འཁྲུལ༔ ངོ་སྤྲོད་དེ་ངོ་ཤེས་པ་ནི༔ ཆོས་དབྱིངས་ཡེ་ཤེས་རྟོགས་པ་སྟེ༔ སངས་རྒྱས་ཞེས་སུ་གྲགས་པའོ༔ ཞེས་དང་། ཀུན་མཁྱེན་དྷརྨ་ཤྲཱི ས། སྲིད་ཞི་ཀུན་ཁྱབ་ཀྱི་ཡེ་ཤེས་འགྱུར་བ་མེད་པ་ཉིད་རྒྱལ་བ་རྣམས་ཀྱི་རང་བཞིན་ནམ་གཤིས་ཚུལ་ཡིན་པས་ན་རྒྱལ་བའི་སྙིང་པོའམ་བདེ་བར་གཤེགས་པའི་སྙིང་པོ་སྟེ། དེ་ཉིད་གདོད་མ་ནས་དྲི་མ་དང་བྲལ་བ་ཡིན་ཡང་སྒྲིབ་གཉིས་མ་གྲོལ་བར་དུ་སངས་རྒྱས་སུ་མི་འགྱུར་བས་རང་བཞིན་གནས་རིགས་སམ་དྲི་བཅས་དེ་བཞིན་ཉིད་དེ་ཁམས་ཀྱི་དོན་དང་། དྲི་མ་དང་འབྲེལ་ཡང་དྲིི་མ་དེ་མེད་སྣང་གློ་བུར་བ་ཡིན་པས་རང་གི་ངོ་བོ་ལ་གོས་མ་མྱོང་བ་ནི་རང་བཞིན་རྣམ་དག་སྟེ་བྱང་ཆུབ་ཀྱི་དོན་དང་། གདོད་མ་ནས་སངས་རྒྱས་ཀྱི་ཡོན་ཏན་ཐམས་ཅད་གཞི་ལ་ལྷུན་གྲུབ་ཏུ་བཞུགས་ཀྱང་དཀར་པོའི་ཆོས་ཀྱིས་སད་པར་མ་བྱས་ན་ནུས་པ་འབྱིན་མི་ནུས་པ་ཡོན་ཏན་གྱི་དོན་དང་། སེམས་ཅན་ཐམས་ཅད་ལ་རིས་མེད་ཀུན་ཁྱབ་ཀྱིས་མགོན་དང་བཅུད་དུ་བཞུགས་པས་གནས་སྐབས་དང་མཐར་ཐུག་གི་སྡུག་བསྔལ་སེལ་ཞིང་བདེ་བ་བསྐྱེད་པའི་ཕྲིན་ལས་ལྷུན་གྱིས་གྲུབ་ཀྱང་བྱ་བྱེད་ཀྱི་རྟོག་པ་མེད་པ་ཕྲིན་ལས་ཀྱི་དོན་ཏེ། དེ་ལ་ནི་རྟོག་གེ་པའི་བློའི་ཡུལ་ལས་འདས་པས་བསམ་གྱིས་མི་ཁྱབ་པའི་གནས་ཡིན་ཏེ། རྒྱུད་བླ་མ་ལས། སངས་རྒྱས་ཁམས་དང་སངས་རྒྱས་བྱང་ཆུབ་དང་། །སངས་རྒྱས་ཆོས་དང་སངས་རྒྱས་ཕྲིན་ལས་ཏེ། །དག་པའི་སེམས་ཅན་གྱིས་ཀྱང་བསམ་བྱ་མིན། །འདི་ནི་འདྲེན་པ་རྣམས་ཀྱི་སྤྱོད་ཡུལ་ཡིན། །ཞེས་སོ། །ཞེས་གསུངས་པ་བཞིན་ཏེ། ཞིབ་པར་ངེས་དོན་གྱི་མདོ་སྡེ་རྣམས་མཇལ་ཞིང་དོན་ཕྱིན་ཅི་མ་ལོག་པར་སེམས་པར་བྱས་ན་ཐེ་ཚོམ་གྱི་འཆིང་བ་ལས་གྲོལ་ཞིང་ཡང་དག་པའི་བློ་མིག་ཐོབ་པར་འགྱུར་བ་ཡིན་ཏེ། རྩོད་དུས་ཀྱི་ཐམས་ཅད་མཁྱེན་པ་དཔལ་སྤྲུལ་རིན་པོ་ཆེས་ཀྱང་ཐེག་ཆེན་མདོ་མཐོང་གི་ཕན་ཡོན་ལས། ཤིན་ཏུ་རྣམ་དག་དྲི་མེད་ཆོས་ཀྱི་དབྱིངས། །ཐུབ་པའི་ཆོས་སྐུ་མཐའ་ཡས་འགྲོ་ཁམས་ལ། །པདྨའི་སྦུབས་བཞུགས་སྤྲུལ་པའི་སངས་རྒྱས་བཞིན། །ཡོད་པར་ཤེས་པ་མདོ་སྡེ་མཐོང་ལ་ཡོད། །གཞི་ལམ་འབྲས་བུའི་ཁམས་ཀྱི་དེ་བཞིན་ཉིད། །རིན་ཆེན་གསེར་ལྟར་འགྱུར་བ་མེད་པའི་ཆོས། །ཉོན་མོངས་རྟོགས་པའི་སྐྱོན་གྱིས་གོས་མིན་ཞེས། །ཡང་དག་ཤེས་པ་མདོ་སྡེ་མཐོང་ལ་ཡོད། །སྙིང་རྗེ་ཆེན་པོ་རྒྱལ་བ་ཀུན་གྱི་རིགས། །རིན་ཆེན་གཏེར་དང་འབྲས་བུ་ཅན་ཤིང་བཞིན། །མངོན་བྱས་ཡོན་ཏན་གོང་ནས་གོང་འཕེལ་བའི། །རིགས་དེ་སད་པ་མདོ་སྡེ་མཐོང་ལ་ཡོད། །ཁམས་ཀྱི་རང་བཞིན་སྒྲིབ་པའི་དྲིས་སྤངས་པ། །བདེ་གཤེགས་བྱང་ཆུབ་འབྲས་བུའི་མཐར་ཐུག་ཉིད། སྒྲིབ་མ་མྱོང་ཡང་དྲི་མས་དག་གྱུར་ཕྱིར། །བསམ་གྱིས་མི་ཁྱབ་མདོ་སྡེ་མཐོང་རྣམས་ཤེས། །རྟོགས་པའི་ཡེ་ཤེས་གསར་དུ་ཐོབ་མིན་ཏེ། །སྤྲིན་དང་བྲལ་བའི་ཉི་བཞིན་གསལ་གྱུར་པ། །སྐུ་གསུམ་བདག་ཉིད་རྟག་པ་ཆེན་པོའི་དོན། །ཇི་བཞིན་མཐོང་བས་མདོ་སྡེ་མཐོང་ལ་ཡོད། །བྲལ་སྨིན་ཡོན་ཏན་རྣམ་པ་ཐམས་ཅད་པ། །ཚད་མེད་བསམ་གྱིས་མི་ཁྱབ་རྣམ་པར་དག །གང་ཚེ་མངོན་བྱས་འབྲལ་མི་ཤེས་པའི་ཁམས། །ཇི་བཞིན་མཐོང་བ་མདོ་སྡེ་མཐོང་ལ་ཡོད། །འདུ་ཤེས་འཆིང་བས་སྔོན་ཆད་བཅིངས་གྱུར་པའི། །ཡང་དག་ཡེ་ཤེས་འཆིང་བ་ཆད་པ་ན། །སྟོབས་སོགས་མཁྱེན་པ་ཐོགས་པ་མེད་འཇུག་ཅིང་། །མཚན་དཔེའི་གཟུགས་སྐུ་འགྲོ་ལ་སྟོན་ནུས་པའི། །རྒྱལ་བའི་གོ་འཕང་མདོ་སྡེ་མཐོང་རྣམས་ཐོབ། །ཡིད་བཞིན་ནོར་ལྟར་འབད་མེད་འགྲོ་བའི་དོན། །རྒྱལ་བའི་ཕྲིན་ལས་རྟག་ཁྱབ་ལྷུན་གྲུབ་ཏུ། །གདུལ་བྱའི་སྐལ་བཞིན་ཐོགས་པ་མེད་འཇུག་པའི། །གནས་དེར་མི་རྨོངས་མདོ་སྡེ་མཐོང་ལ་ཡོད། །ཅེས་རྒྱ་ཆེར་གསུངས་པ་བཞིན་ནོ། །གཉིས་པ་བསླབ་པ་ལ་སྦྱོར་བའི་གཞི་སེམས་བསྐྱེད་དངོས་ཀྱི་རྣམ་པར་གཞག་པ་ལ་གཉིས། སེམས་བསྐྱེད་སྐྱེ་བའི་རྟེན་དང་། བརྟེན་པ་བྱང་ཆུབ་སེམས་ཀྱི་རང་བཞིན་བཤད་པའོ། །དང་པོ་རྟེན་ལ། ལུས་ཀྱི་རྟེན་ནི། སེམས་ཙམ་གྱི་ལུགས་ལྟར་ན་འཇུག་སེམས་ཀྱི་རྟེན་དུ་སོ་ཐར་རིགས་བདུན་གང་རུང་དགོས་པས་རྟེན་ཡང་གླིང་གསུམ་གྱི་སྐྱེས་པ་བུད་མེད་གང་རུང་ལ་བཤད་དེ། ལམ་སྒྲོན་ལས། སོ་སོར་ཐར་པ་རིགས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི། །སྐལ་པ་ཡོད་ཀྱིས་གཞན་དུ་མིན། །ཞེས་སོ། །དབུ་མའི་ལུགས་ལ་དེ་ལྟར་དགོས་པའི་ངེས་པ་མེད་དེ། མདོ་སྡེ་རྣམས་ལས་ལྷ་དང་ཀླུ་དང་ལྷ་མ་ཡིན་དང་དྲི་ཟ་དང་ནམ་མཁའ་ལྡིང་ལ་སོགས་པ་འགྲོ་བ་དུ་མས་བྱང་ཆུབ་མཆོག་ཏུ་སེམས་བསྐྱེད་པར་བསྟན་པས་ལུས་ཀྱི་རྟེན་ལ་མི་ལྟོས་པར་བཞེད། རང་ལུགས་ཀུན་མཁྱེན་ཆེན་པོས་ནི། ལུགས་འདི་གཉིས་ཀྱང་དོན་གྱིས་མི་འགལ་བར་གོ་སྟེ། འདི་ལྟར་སེམས་བསྐྱེད་དུས་སོ་སོར་ཐར་པའི་སྡོམ་པར་མིང་མ་བཏགས་ཀྱང་། དོན་འདྲ་བར་སྲོག་མི་གཅོད་པར་དམ་བཅའ་ནུས་པ་ལ་སོགས་པ་དགོས་པས། དེའི་ཆ་ནས་རྟེན་འདྲ་རུང་དུ་ངེས་ཏེ། དོན་ལ་གནོད་པ་ལས་བློ་ལོག་པ་ཞིག་ལ་སྐྱེ་ངེས་སོ། །སོ་སོར་ཐར་པའི་སྡོམ་པ་གང་རུང་སྡོམ་ནུས་པ་ཞིག་མེད་ན་གང་ལའང་མི་སྐྱེ་སྟེ། སེམས་བསྐྱེད་དེ་ཉིད་ཀྱི་བསླབ་པ་དང་འགལ་བའི་ཕྱིར་རོ། །ཞེས་གསུངས། གང་ལྟར་ཡང་གཉིས་ཀ་ལ་བསམ་པའི་རྟེན་གཙོ་ཆེ་སྟེ། དེ་ལ་རྣམ་གྲངས་མང་ཡང་སངས་རྒྱས་ལ་དམིགས་པའི་དད་པ། སེམས་ཅན་ལ་དམིགས་པའི་སྙིང་རྗེ། བྱང་ཆུབ་སེམས་ཀྱི་ཕན་ཡོན་ཐོས་ནས་ཡིད་ཆེས་ཤིང་སྡོམ་པ་ལེན་འདོད་ཡོད་པ་གསུམ་ལ་འདུ་སྟེ། དཀོན་མཆོག་སྒྲོན་མེའི་མདོ་ལས། རྒྱལ་དང་རྒྱལ་བའི་ཆོས་ལ་དད་གྱུར་ཅིང་། །རྒྱལ་སྲས་རྣམས་ཀྱི་སྤྱོད་ལ་དད་བྱེད་པ། །བྱང་ཆུབ་བླ་ན་མེད་ལ་དད་བྱེད་ན། །བློ་དང་ལྡན་པ་རྣམས་ཀྱི་སེམས་སྐྱེའོ། །ཞེས་གསུངས། དེ་ལས་ཀྱང་སྙིང་རྗེ་ནི་བྱང་ཆུབ་ཐོབ་པའི་རྒྱུའི་གཙོ་བོ་མེད་དུ་མི་རུང་ཞིང་ཡོད་ན་དེ་ཁོ་ནས་ཀྱང་ཆོག་པ་ཡིན་ཏེ། ཆོས་ཡང་དག་པར་སྡུད་པའི་མདོ་ལས། སྤྱན་རས་གཟིགས་ཀྱིས་གསོལ་པ། བཅོམ་ལྡན་འདས་སངས་རྒྱས་ཐོབ་པར་འདོད་པས་ཆོས་མང་པོ་ལ་བསླབ་པར་མི་བགྱི་ཡི་ཆོས་གཅིག་ལ་བསླབ་པར་བྱའོ། །དེ་གང་ཞེ་ན། སྙིང་རྗེ་ཆེན་པོའོ། །བཅོམ་ལྡན་འདས་འདི་ལྟ་སྟེ། འཁོར་ལོས་སྒྱུར་བའི་རྒྱལ་པོ་དེ་འཁོར་ལོ་རིན་པོ་ཆེ་གང་དུ་མཆིས་པ་དེར་དཔུང་གི་ཚོགས་ཐམས་ཅད་མཆིའོ། བཅོམ་ལྡན་འདས། དེ་བཞིན་དུ་བྱང་ཆུབ་སེམས་དཔའི་སྙིང་རྗེ་ཆེན་པོ་གང་དུ་མཆིས་པ་དེར་སངས་རྒྱས་ཀྱི་ཆོས་ཐམས་ཅད་མཆིས་པ་ལགས་སོ། །ཞེས་གསུངས་པ་ལྟར་སྙིང་རྗེ་ཆེན་པོ་དང་ལྡན་པའི་བསམ་པ་གཙོ་ཆེའོ། །གཉིས་པ་བརྟེན་པ་སེམས་བསྐྱེད་ཀྱི་རང་བཞིན་དངོས་བཤད་པ་ལ་བཞི། ངོ་བོ་སྒྲ་དོན། དབྱེ་བ་ལེན་ཚུལ་ལོ། །དང་པོ་ནི། པཎྜི་ཏ་པདྨ་དབང་གི་རྒྱལ་པོས་སྡོམ་གསུམ་རྣམ་ངེས་ལས། ངོ་བོ་བྱམས་དང་སྙིང་རྗེས་རྒྱུད་བརླན་ཅིང་། །གཞན་གྱི་དོན་དུ་བྱང་ཆུབ་ཐོབ་འདོད་པས། །སྒོ་གསུམ་ཉེས་པ་སྤོང་བའི་སེམས་པའོ། །ཞེས་གསུངས་པ་ལྟར། དོན་གཉིས་སམ་ཟུར་གཉིས་དང་ལྡན་པ་སྟེ། གང་གི་ཆེད་དུ་བྱ་བ་སྙིང་རྗེས་གཞན་དོན་ལ་དམིགས་པ་དང་། གང་ཆེད་དུ་བྱ་བ་ཤེས་རབ་ཀྱིས་རྫོགས་བྱང་ལ་དམིགས་པ་གཉིས་སོ། །དེ་གཉིས་མ་ཚང་ན་གཞན་ལ་ཕན་འདོད་ཙམ་དང་རྫོགས་བྱང་ཐོབ་འདོད་ཙམ་ནི་སེམས་བསྐྱེད་དུ་མི་འགྲོ་སྟེ། མཐར་ཐུག་རྫོགས་བྱང་མི་འདོད་ན་སེམས་ཅན་གཞན་ལ་གནས་སྐབས་དང་མཐར་ཐུག་གི་ཕན་བདེ་གཞན་ཇི་ལྟ་བུ་འདོད་ཀྱང་བྱམས་པ་དང་སྙིང་རྗེ་ཙམ་ལས་མི་འདའ་ལ། རང་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འདོད་པ་ཙམ་ནི་ཉན་ཐོས་ཀྱི་གཞུང་ནས་ཀྱང་བཤད་པས་མདོར་ན་སེམས་ཅན་གྱི་དོན་དུ་སྙམ་པ་དང་། རྫོགས་པའི་བྱང་ཆུབ་ཀྱི་གོ་འཕང་ཐོབ་པར་བྱ་སྙམ་པའི་ཟུར་གཉིས་པོ་འདི་མ་ཚང་ན་བྱང་ཆུབ་ཀྱི་སེམས་མཚན་ཉིད་པར་མི་འགྲོ་བས་བྱམས་སྙིང་རྗེ་བྱང་ཆུབ་སེམས་གསུམ་གྱི་ཁྱད་པར་ལེགས་པར་ཤེས་དགོས་ཏེ། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་སོ། །དེ་ལའང་བློ་སྟོབས་ཆེ་ཆུང་གི་དབང་གིས། སྔོན་ལ་སེམས་ཅན་ཐམས་ཅད་སངས་རྒྱས་ལ་བཀོད་ནས་རྗེས་རང་ཉིད་འཚང་རྒྱ་བར་འདོད་པ་ཕྱུགས་རྫི་ལྟ་བུ་དཔེ་མེད་པའི་སེམས་བསྐྱེད་དང་། བདག་གཞན་ཐམས་ཅད་དུས་མཉམ་དུ་སངས་རྒྱས་པར་འདོད་པ་མཉན་པ་ལྟ་བུ་ཡེ་ཤེས་དམ་པའི་སེམས་བསྐྱེད་དང་། སྔོན་ལ་རང་ཉིད་སངས་རྒྱས་ནས་གཞན་གྲོལ་བར་འདོད་པ་རྒྱལ་པོ་ལྟ་བུ་འདོད་ཆེན་སེམས་བསྐྱེད་གསུམ་དུ་ཡོད་ཅིང་། དེ་རྣམས་ཀྱང་བློ་སྟོབས་ཆེ་ཆུང་གིས་རིམ་བཞིན་བསྐལ་པ་གྲངས་མེད་གསུམ་དང་། བདུན་དང་། སུམ་ཅུ་རྩ་བདུན་ནས་སངས་རྒྱས་ཀྱི་གོ་འཕང་ཐོབ་པར་བཞེད་དོ། །གཉིས་པ་ནི། བོ་དྷི་ས་ཏྭ་ཞེས་པའི་སྒྲ་ལས་དྲངས་ན་བྱང་ཆུབ་ཀྱི་སེམས་ཏེ་སྤང་བྱའི་སྒྲིབ་པ་མཐའ་དག་བྱང་ཞིང་རྟོགས་བྱ་མཐའ་དག་ཐུགས་སུ་ཆུབ་པའི་མི་གནས་པའི་མྱང་འདས་ཆེན་པོ་མཐར་ཐུག་རྫོགས་པའི་སངས་རྒྱས་ཀྱི་གོ་འཕང་ལ་དམིགས་ནས་རང་གཞན་རྣམས་ཀྱིས་དེ་ཐོབ་འདོད་ཀྱི་འདུན་པ་དང་བཅས་པའི་སེམས་པ་ཡིན་པའི་ཕྱིར་དེ་སྐད་ཅེས་བྱའོ། །གསུམ་པ་ནི། རྣམ་ངེས་ལས། དབྱེ་བ་ཀླུ་སྒྲུབ་ཐོགས་མེད་སྲོལ་གཉིས་གྲགས། །རེ་རེ་གཅིག་ནས་དྲུག་བར་གཉིས་གཉིས་ཏེ། །དང་པོ་སྟོང་ཉིད་སྙིང་རྗེ་སྙིང་པོ་ཅན། །ཚོགས་གཉིས་བསླབ་པ་ཀུན་རྫོབ་དོན་དམ་གཉིས། །ཚུལ་ཁྲིམས་ཏིང་འཛིན་ཤེས་རབ་བསླབ་པ་གསུམ། །ཚོགས་སྦྱོར་མོས་པས་སྤྱོད་པའི་སེམས་བསྐྱེད་དང་། །མ་དག་ས་བདུན་ལྷག་བསམ་དག་པ་དང་། །དག་པ་ས་གསུམ་རྣམ་པར་སྨིན་པ་དང་། །ཐུགས་རྗེ་ཆེན་པོ་སྒྲིབ་ཀུན་སྤངས་པ་ནི། །སངས་རྒྱས་ས་ཡི་སེམས་བསྐྱེད་དག་དང་བཞི། །ལྔ་ནི་ལམ་ལྔ་དྲུག་ནི་ཕར་ཕྱིན་དྲུག །ས་གསེར་ཟླ་བ་མེ་སོགས་ཉེར་གཉིས་ནི། །ས་མཚམས་ཀྱིས་ཕྱེ་ས་བཅུའི་བར་དུའོ། ཞེས་གསུངས་ཏེ། སྲོལ་གཉིས་རེ་རེ་ལའང་དབྱེ་ན་གཅིག་ནས་དྲུག་ཚན་གྱི་བར་དང་། ས་མཚམས་ཀྱི་དབྱེ་བ་གཉིས། དེ་དག་རེ་ལའང་དབྱེ་གཞི་ལ་ལྟོས་ནས་སམ་སྨོན་འཇུག་གི་དབྱེ་བས་གཉིས་གཉིས་སུ་འགྱུར་རོ། །དེ་ལ་གཅིག་ནས་དྲུག་ཚན་གྱི་བར་གྱི་དབྱེ་བ་ལས། དང་པོ་ནི། སྟོང་ཉིད་རྟོགས་པའི་ཤེས་རབ་ཀྱིས་དེ་མ་རྟོགས་པ་ལ་སྙིང་རྗེས་དྲངས་པའི་བྱང་ཆུབ་ཀྱི་སེམས་སྐྱེས་པ་ལ་ལྟོས་ནས་སྟོང་ཉིད་སྙིང་རྗེ་སྙིང་པོ་ཅན་གྱི་སེམས་བསྐྱེད་ཅེས་བྱ་སྟེ། མགོན་པོ་བྱམས་པས། བདག་སྲེད་མ་ལུས་ཤེས་རབ་ཀྱིས་བཅད་ནས། །སེམས་ཅན་སྲེད་ཕྱིར་བློ་ལྡན་ཞི་ཐོབ་མིན། །དེ་ལྟར་བློ་བརྩེ་བྱང་ཆུབ་སེམས་བརྟན་ན། །འཕགས་པ་འཁོར་བའམ་མྱ་ངན་འདའ་མི་འགྱུར། །ཞེས་དང་། ཀླུ་སྒྲུབ་ཀྱིས། སྟོང་ཉིད་སྙིང་རྗེ་སྙིང་པོ་ཅན། །བྱང་ཆུབ་སྒྲུབ་པ་ཁ་ཅིག་ལའོ། །ཞེས་གསུངས། འདི་ནི་སྟོང་ཉིད་སྙིང་རྗེ་གཉིས་ངོ་བོ་གཅིག་ལ་ལྡོག་པས་ཕྱེ་བ་ཙམ་སྟེ་འདི་གཉིས་ཡ་བྲལ་དུ་གྱུར་ན་ནི་རྫོགས་པའི་བྱང་ཆུབ་ལས་ཕྱིར་ལྡོག་པར་འགྱུར་ཏེ་སྡུད་པ་ལས། ཐབས་མེད་ཤེས་རབ་བྲལ་བ་ཉན་ཐོས་ཉིད་དུ་ལྷུང་། །ཞེས་དང་། འཇམ་དཔལ་རྣམ་པར་འཕྲུལ་བའི་མདོ་ལས། སྟོང་པ་ཉིད་ལ་སོ་སོར་རྟོག་ཅིང་སེམས་ཅན་ཡལ་བར་འདོར་བ་ཡང་བདུད་ཀྱི་ལས་སོ། །ཤེས་རབ་ཀྱིས་རྣམ་པར་མི་དཔྱོད་ཅིང་སྙིང་རྗེ་ཆེན་པོ་ལ་དམིགས་པར་འཛིན་པ་ཡང་བདུད་ཀྱི་ལས་སོ། །ཞེས་དང་། ས་ར་ཧས་ཀྱང་། སྙིང་རྗེ་དང་བྲལ་སྟོང་པ་ཉིད་ཞུགས་གང་། །དེས་ནི་ལམ་མཆོག་རྙེད་པ་མ་ཡིན་ནོ། །གལ་ཏེ་སྙིང་རྗེ་འབའ་ཞིག་སྒོམ་ན་ཡང་། །འཁོར་བ་འདིར་གནས་ཐར་པ་ཐོབ་མི་འགྱུར། །གང་ལ་གཉིས་པོ་སྦྱོར་བར་ནུས་པ་དེ། །འཁོར་བ་མི་གནས་མྱ་ངན་འདའ་མི་གནས། །ཞེས་མདོ་དང་བསྟན་བཅོས་ཐམས་ཅད་ནས་སྟོང་ཉིད་སྙིང་རྗེ་ཟུང་དུ་འཇུག་པ་ལ་བྱང་ཆུབ་ཀྱི་སེམས་སུ་གསུངས་ཤིང་། གཞུང་ལ་ལར་སྙིང་རྗེ་ཆེན་པོ་དང་། དམིགས་པ་མེད་པའི་སྙིང་རྗེ་ཞེས་ཀྱང་བཤད་དེ། པདྨའི་ལམ་རིམ་ཆེན་མོའི་འགྲེལ་པར་ཡང་། དམིགས་པ་མེད་པའི་སྙིང་རྗེ་ནི། དེ་ལྟར་སྒོམ་པའི་དུས་ཉིད་ན་རང་གཞན་ཐམས་ཅད་ཀྱི་ངོ་བོ་སྟོང་པ་ཉིད་ནམ་མཁའ་ལྟར་ཤེས་པས། གདངས་མ་འགགས་པ་སྙིང་རྗེ་དུང་ངེ་། གཤིས་མ་གྲུབ་པ་སྟོང་ཉིད་དུ་ལྷག་གེ། ངོ་བོ་མི་དམིགས་མི་རྟོག་ཅིང་འཁོར་གསུམ་ཡོངས་སུ་དག་པའོ། །ཞེས་གསུངས་པ་བཞིན་ནོ། །གཉིས་པ་ནི། དམིགས་བཅས་བསོད་ནམས་ཀྱི་ཚོགས་དང་དམིགས་མེད་ཡེ་ཤེས་ཀྱི་ཚོགས་གཉིས་ལ་ལྟོས་ནས་སམ། ཡང་ན་རགས་པ་བརྡ་ལས་བྱུང་བ་ཀུན་རྫོབ་དང་། ཕྲ་བ་ཆོས་ཉིད་བསྒོམས་སྟོབས་ལས་བྱུང་བ་དོན་དམ་གྱི་སེམས་བསྐྱེད་གཉིས་སོ། །གསུམ་པ་ནི། དག་པར་བྱེད་པ་ཚུལ་ཁྲིམས། གནས་པར་བྱེད་པ་ཏིང་འཛིན། གྲོལ་བར་བྱེད་པ་ཤེས་རབ་ཀྱི་བསླབ་པ་གསུམ་ལ་ལྟོས་ནས་སེམས་བསྐྱེད་གསུམ་མམ། ཡང་ན་སྡོམ་སྡུད་དོན་བྱེད་ཀྱི་ཚུལ་ཁྲིམས་གསུམ་ལ་ལྟོས་ཏེ་གསུམ་མོ། །བཞི་པ་ནི། ཚོགས་སྦྱོར་གྱི་སྐབས་སུ་མོས་པས་སྤྱོད་པའི་སེམས་བསྐྱེད་དེ་དོན་དམ་སྟོང་པ་ཉིད་ལ་དད་པས་མོས་པའི་དབང་གིས་སོ། མ་དག་ས་བདུན་ན་ལྷག་བསམ་དག་པའི་སེམས་བསྐྱེད་དེ་ལྷག་པའི་བསམ་པ་ཆོས་ཉིད་ཀྱི་བདེན་པ་མངོན་དུ་མཐོང་ཞིང་མཐོང་སྤང་ཀུན་བརྟགས་ཀྱི་དྲི་མ་རྣམ་པར་དག་པས་སོ། །དག་ས་གསུམ་ལ་རྣམ་པར་སྨིན་པའི་སེམས་བསྐྱེད་དེ་ཉོན་སྒྲིབ་ལྷག་མེད་དུ་སྤངས་ཤིང་རྣམ་པར་མི་རྟོག་པའི་ཡེ་ཤེས་སྟོབས་སུ་གྱུར་པས་སོ། །སངས་རྒྱས་ཀྱི་ས་ན་ཐུགས་རྗེ་ཆེན་པོ་སྒྲིབ་པ་སྤངས་པའི་སེམས་བསྐྱེད་དེ་སྒྲིབ་གཉིས་མཐའ་དག་སྤངས་པའི་དབང་གིས་སོ། །ལྔ་པ་ནི། ལམ་ལྔའི་སེམས་བསྐྱེད་དེ། ཚོགས་ལམ་གྱི་སྐབས་སུ་ལས་དང་པོ་པའི་སེམས་བསྐྱེད། སྦྱོར་ལམ་གྱི་སྐབས་སུ་ཡོངས་སུ་སྦྱངས་པ་བྱས་པའི་སེམས་བསྐྱེད། མཐོང་ལམ་གྱི་སྐབས་སུ་ཆོས་མཐོང་བའི་སེམས་བསྐྱེད། སྒོམ་ལམ་གྱི་སྐབས་སུ་རྣམ་པར་གྲོལ་བའི་སེམས་བསྐྱེད། མི་སློབ་པའི་ལམ་དུ་བསམ་གྱིས་མི་ཁྱབ་པའི་སེམས་བསྐྱེད་དང་ལྔའོ། །དྲུག་པ་ནི། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་སྟེ་ཕ་རོལ་དུ་ཕྱིན་པ་དྲུག་ལ་ལྟོས་ནས་སེམས་བསྐྱེད་དྲུག་གོ །གཉིས་པ་ས་མཚམས་ཀྱི་དབྱེ་བ་ནི། མངོན་རྟོགས་རྒྱན་ལས། དེ་ཡང་ས་གསེར་ཟླ་བ་མེ། །གཏེར་དང་རིན་ཆེན་འབྱུང་གནས་མཚོ། །རྡོ་རྗེ་རི་སྨན་བཤེས་གཉེན་དང་། །ཡིད་བཞིན་ནོར་བུ་ཉི་མ་གླུ། །རྒྱལ་པོ་མཛོད་དང་ལམ་པོ་ཆེ། །བཞོན་པ་བཀོད་མའི་ཆུ་དང་ནི། །སྒྲ་སྙན་ཆུ་བོ་སྤྲིན་རྣམས་ཀྱིས། །རྣམ་པ་ཉི་ཤུ་རྩ་གཉིས་སོ། །ཞེས་གསུངས་ཏེ། དེ་རྣམས་དཔེ་གྲོགས་ཆོས་མཐུན་པར་སྦྱོར་ན། བྱང་ཆུབ་ལ་འདུན་པ་དང་མཚུངས་པར་ལྡན་པའི་སེམས་བསྐྱེད་ནི་ས་ལྟ་བུ་ཡིན་ཏེ། སངས་རྒྱས་དང་དེའི་རྒྱུ་ཚོགས་གཉིས་ཀྱི་ཆོས་དཀར་པོ་ཐམས་ཅད་ཀྱི་གཞིར་གྱུར་པས་སོ། །དེའི་རྒྱུན་གནས་པའི་བསམ་པ་དང་ལྡན་པའི་སེམས་བསྐྱེད་ནི་གསེར་ལྟ་བུ་སྟེ། ཕ་རོལ་དུ་ཕྱིན་པ་དྲུག་གི་སྒོ་ནས་གཞན་ལ་ཕན་བདེ་སྒྲུབ་པའི་བསམ་པ་བཟང་པོ་བྱང་ཆུབ་ཀྱི་བར་དུ་འགྱུར་བ་མི་མངའ་བས་སོ། །བསམ་པ་དེ་ཉིད་ཆེས་ཆེར་འཕེལ་བའི་ལྷག་པའི་བསམ་པ་དང་ལྡན་པའི་སེམས་བསྐྱེད་ནི་ཟླ་བ་ཚེས་པ་ལྟ་བུ་སྟེ་བྱང་ཆུབ་ཕྱོགས་ཀྱི་ཆོས་སུམ་ཅུ་སོ་བདུན་སོགས་དགེ་བའི་ཆོས་མཐའ་དག་གོང་ནས་གོང་དུ་འཕེལ་བས་སོ། །རྣམ་པར་མི་རྟོག་པའི་ཡེ་ཤེས་ལ་དངོས་སུ་སྦྱོར་པའི་ཞི་ལྷག་གི་སྦྱོར་བ་དང་ལྡན་པའི་སེམས་བསྐྱེད་ནི་མེ་ལྟ་བུ་ཡིན་ཏེ་སྒྲིབ་པའི་བུད་ཤིང་བསྲེག་པ་ལ་མྱུར་བས་སོ། །སྦྱིན་པའི་ཕར་ཕྱིན་དང་ལྡན་པའི་སེམས་བསྐྱེད་ནི་གཏེར་ཆེན་པོ་ལྟ་བུ་སྟེ། ཆོས་དང་ཟང་ཟིང་གི་ལོངས་སྤྱོད་ཀྱིས་སེམས་ཅན་ཐམས་ཅད་ཚིམས་པར་བྱས་ཀྱང་མི་ཟད་པས་སོ། །ཚུལ་ཁྲིམས་ཀྱི་ཕ་རོལ་དུ་ཕྱིན་པ་དང་ལྡན་པའི་སེམས་བསྐྱེད་ནི་རིན་པོ་ཆེའི་འབྱུང་གནས་ལྟ་བུ་ཡིན་ཏེ། སྟོབས་དང་མི་འཇིགས་པ་ལ་སོགས་པའི་ཡོན་ཏན་གྱི་རིན་ཆེན་རྣམས་འབྱུང་བས་སོ། །བཟོད་པའི་ཕར་ཕྱིན་དང་ལྡན་པའི་སེམས་བསྐྱེད་ནི་རྒྱ་མཚོ་ཆེན་པོ་ལྟ་བུ་སྟེ། མེ་མཚོན་སོགས་མི་འདོད་པའི་དངོས་པོ་ཐམས་ཅད་ཐོག་ཏུ་བབས་ཀྱང་ཡིད་མི་འཁྲུགས་པས་སོ། །བརྩོན་འགྲུས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་རྡོ་རྗེ་ལྟ་བུ་ཡིན་ཏེ། བླ་ན་མེད་པའི་བྱང་ཆུབ་ལ་ཡིད་ཆེས་བརྟན་པར་གྱུར་པས་བདུད་བཞི་རྣམས་ཀྱིས་སྐབས་མི་ཕྱེད་པས་སོ། །བསམ་གཏན་གྱི་ཕར་ཕྱིན་དང་ལྡན་པའི་སེམས་བསྐྱེད་ནི་རི་ཡི་རྒྱལ་པོ་ལྟ་བུ་ཡིན་ཏེ། མཚན་མའི་རྣམ་པར་གཡེང་བས་ཏིང་ངེ་འཛིན་ལས་ཡིད་བསྐྱོད་མི་ནུས་པས་སོ། །བདག་མེད་གཉིས་རྟོགས་ཤེས་རབ་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་སྨན་ཆེན་པོ་ལྟ་བུ་ཡིན་ཏེ། ཆགས་སོགས་ཉོན་མོངས་པའི་སྒྲིབ་པ་དང་། གཟུང་བར་རྟོགས་པ་སོགས་ཤེས་བྱའི་སྒྲིབ་པའི་ནད་རབ་ཏུ་ཞི་བར་བྱེད་པས་སོ། །ཐབས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་དགེ་བའི་བཤེས་གཉེན་ལྟ་བུ་སྟེ། སྙིང་རྗེ་དང་ཐབས་ལ་མཁས་པས་འབྱོར་རྒུད་གང་གི་དུས་སུའང་སེམས་ཅན་གྱི་དོན་ཡོངས་སུ་མི་གཏོང་བས་སོ། །སྨོན་ལམ་གྱི་ཕར་ཕྱིན་དང་ལྡན་པའི་སེམས་བསྐྱེད་ནི་ཡིད་བཞིན་གྱི་ནོར་བུ་ལྟ་བུ་སྟེ། ཡིད་ལ་ཇི་ལྟར་སྨོན་པའི་འབྲས་བུ་མངོན་དུ་གྲུབ་པས་སོ། །སྟོབས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་ཉི་མ་ལྟ་བུ་སྟེ། གདུལ་བྱའི་རྒྱུད་ཀྱི་དགེ་བའི་ལོ་ཏོག་སྨིན་པར་བྱེད་པའི་མཐུ་དང་ལྡན་པས་སོ། །ཡེ་ཤེས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་དྲི་ཟའི་གླུ་དབྱངས་ལྟ་བུ་སྟེ། གདུལ་བྱའི་ཁམས་དང་མཐུན་པར་ཡིད་འདུན་པར་བྱེད་པའི་ཆོས་སྟོན་པས་སོ། །མངོན་ཤེས་དྲུག་དང་ལྡན་པའི་སེམས་བསྐྱེད་ནི་རྒྱལ་པོ་ཆེན་པོ་ལྟ་བུ་སྟེ། གཞན་དོན་གྲུབ་པ་ལ་མཐུ་ཆེན་པོ་དང་ལྡན་པས་སོ། །ཚོགས་གཉིས་དང་ལྡན་པའི་སེམས་བསྐྱེད་ནི་བང་མཛོད་ལྟ་བུ་ཡིན་ཏེ། བསོད་ནམས་དང་ཡེ་ཤེས་བསམ་གྱིས་མི་ཁྱབ་པའི་གནས་སུ་གྱུར་པས་སོ། །བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་དང་ལྡན་པའི་སེམས་བསྐྱེད་ནི་ལམ་པོ་ཆེ་ལྟ་བུ་ཡིན་ཏེ། དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་གཤེགས་ཤིང་རྗེས་སུ་གཤེགས་པར་འགྱུར་བས་སོ། །ཐབས་ཤེས་གཉིས་དང་ལྡན་པའི་སེམས་བསྐྱེད་ནི་གཞོན་པ་བཟང་པོ་ལྟ་བུ་ཡིན་ཏེ། སྲིད་ཞི་གཉིས་ཀྱི་མཐའ་ལ་མི་ལྟུང་བར་མི་གནས་པའི་མྱང་འདས་ཀྱི་སར་བདེ་བླག་ཏུ་འགྲོ་བས་སོ། །རང་གི་ཐོས་པ་མི་བརྗེད་པར་འཛིན་པའི་གཟུངས་དང་གཞན་ལ་ཐོགས་མེད་དུ་འཆད་པའི་སྤོབས་པ་གཉིས་དང་ལྡན་པའི་སེམས་བསྐྱེད་ནི་བཀོད་མའི་ཆུ་ལྟ་བུ་སྟེ་བྲི་བ་དང་ཟད་པ་མེད་པས་སོ། །མི་རྟག་པ་དང་བསྡུག་བསྔལ་བ་དང་བདག་མེད་པ་དང་ཞི་བ་སྟེ་སྡོམ་བཞིའི་ཆོས་ཀྱི་དགའ་སྟོན་དང་ལྡན་པའི་སེམས་བསྐྱེད་ནི་སྒྲ་སྙན་ལྟ་བུ་ཡིན་ཏེ་སྙན་པར་སྒྲོགས་པས་སོ། །བགྲོད་པ་གཅིག་པའི་ལམ་དང་ལྡན་པའི་སེམས་བསྐྱེད་ནི་ཆུ་བོའི་རྒྱུན་ལྟ་བུ་སྟེ། གཞན་གྱི་དོན་དུ་འབད་རྩོལ་མེད་པར་ཤེས་རབ་དང་སྙིང་རྗེས་ངང་གིས་འཇུག་པས་སོ། །ཆོས་ཀྱི་སྐུ་དང་མཚུངས་པར་ལྡན་པའི་སེམས་བསྐྱེད་ནི་སྤྲིན་ལྟ་བུ་ཡིན་ཏེ། དགའ་ལྡན་གྱི་གནས་ན་བཞུགས་ཏེ་མཛད་པ་བཅུ་གཉིས་ཀུན་ཏུ་སྟོན་པའི་སྤྲིན་ཆེན་པོ་ལས་ཆོས་ཀྱི་ཆར་ཆེན་པོས་གདུལ་བྱའི་ལོ་ཏོག་སྨིན་པར་བྱེད་པས་སོ། །དེ་རྣམས་ཀྱི་ས་མཚམས་ནི། འདུན་སོགས་གསུམ་ནི་ཚོགས་ལམ་ཆུང་འབྲིང་ཆེ་གསུམ་ནའོ། །སྦྱོར་བ་ནི་སྦྱོར་ལམ་ནའོ། །སྦྱིན་པ་ནས་ཡེ་ཤེས་ཀྱི་བར་བཅུ་ནི་མཐོང་སྒོམ་གྱིས་བསྡུས་པའི་ས་བཅུ་ནའོ། །མངོན་ཤེས་ནས་གཟུངས་སྤོབས་ཀྱི་བར་ལྔ་ནི་ཁྱད་པར་གྱིས་ལམ་དག་པ་ས་གསུམ་ཀ་ན་ཁྱབ་པར་ཡོད་དོ། །ཆོས་ཀྱི་དགའ་སྟོན་སོགས་གསུམ་ནི་སངས་རྒྱས་ཀྱི་ས་ཞེས་ཐེག་ཆེན་དགྲ་བཅོམ་ཞུགས་པའི་ས་སྟེ་ས་བཅུ་པའི་སྦྱོར་དངོས་རྗེས་གསུམ་ན་ཡོད་དོ། །འོ་ན་སངས་རྒྱས་ཀྱི་ས་ན་སེམས་བསྐྱེད་ཡོད་དམ་མེད་སྙམ་ན། ཆོ་གའི་བརྡ་ལས་ཐོབ་པའི་སེམས་བསྐྱེད་ནི་མེད་དེ། ཁས་བླངས་པའི་དུས་ལས་འདས་པའི་ཕྱིར། དོན་དམ་སེམས་བསྐྱེད་ནི་ཡོད་དེ། ཆོས་ཉིད་ཀྱིས་ཐོབ་པའི་སེམས་བསྐྱེད་ཐོབ་ལ་མ་ཉམས་པར་གོང་འཕེལ་དུ་ཡོད་པའི་ཕྱིར་དང་། ཐུགས་རྗེ་ཆེན་པོ་སྒྲིབ་པ་དང་བྲལ་བའི་སེམས་བསྐྱེད་ཀྱིས་གཞན་དོན་རྩོལ་མེད་དུ་མཛད་པ་ཡོད་པའི་ཕྱིར་རོ། །དེ་ཐམས་ཅད་ཀྱང་བསྡུ་ན་སྨོན་འཇུག་གཉིས་སུ་འདུ་སྟེ། རྣམ་ངེས་ལས། ཀུན་ཀྱང་བསྡུ་ན་སྨོན་འཇུག་རྣམ་པ་གཉིས། །དེ་ཡང་བསམ་པས་སྨོན་དང་སྦྱོར་བས་ཁྱབ། །འགྲོ་བར་འདོད་དང་འགྲོ་བ་ཇི་བཞིན་ནོ། །ཞེས་སོ། །དེ་གཉིས་ཀྱི་ཁྱད་པར་སྤྱོད་འཇུག་ལས། བྱང་ཆུབ་སེམས་དེ་མདོར་བསྡུ་ན། །རྣམ་པ་གཉིས་སུ་ཤེས་བྱ་སྟེ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པར་བྱ། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་གསུངས་པས། མཐའ་ཡས་པའི་སེམས་ཅན་གཞན་གྱི་དོན་དུ་བདག་གིས་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་དེ་ཅི་ནས་ཀྱང་ཐོབ་པར་བྱའོ་སྙམ་དུ་དམ་བཅའ་བ་འགྲོ་བར་འདོད་པ་ལྟ་བུ་ནི་སྨོན་པ་སེམས་བསྐྱེད་དང་། དེའི་ཆེད་དུ་ཕར་ཕྱིན་དྲུག་སོགས་ལམ་གྱི་རིམ་པ་ལ་ཚུལ་བཞིན་དུ་སློབ་པར་དམ་བཅས་ནས་སྦྱོར་བ་ལག་ལེན་གྱིས་ཁྱབ་པ་འགྲོ་བ་དངོས་ལྟ་བུ་ནི་འཇུག་པ་སེམས་བསྐྱེད་དོ། །དེ་ཡང་རྒྱུ་འབྲས་ཡན་ལག་བདུན་གྱི་སྒོ་ནས་ཉམས་སུ་ལེན་པར་བྱ་སྟེ། ཐོག་མར་སེམས་ཅན་ཐམས་ཅད་ལ་ཉེ་རིང་ཆགས་སྡང་དང་བྲལ་བའི་སེམས་བཏང་སྙོམས་པ་ཡུན་རིང་དུ་བསྒོམ་རྗེས། དེ་ཐམས་ཅད་སྐྱེ་བ་སྔ་མར་ཡང་དང་ཡང་དུ་རང་གི་མར་གྱུར་པའི་ཚུལ་ཤེས་པ་དང་། དེའི་དུས་སུ་རང་ལ་ཕན་བཏགས་ཤིང་གནོད་པ་ལས་སྐྱབས་པའི་དྲིན་དྲན་པ་དང་། དེའི་དྲིན་ལན་འཇལ་འདོད་ཀྱི་བློ་བསྐྱེད་ནས་ཕན་བདེ་སྒྲུབ་པར་དམ་བཅའ་བ་དང་། དེ་རྣམས་བདེ་བ་རྒྱུ་དང་བཅས་པ་དང་ཕྲད་འདོད་ཀྱི་བྱམས་པ་དང་། སྡུག་བསྔལ་རྒྱུ་དང་བཅས་པ་བྲལ་འདོད་ཀྱི་སྙིང་རྗེ་དང་། དེ་དག་བདེ་བ་དང་ལྡན་ཞིང་སྡུག་བསྔལ་དང་བྲལ་བར་བདག་ཁོ་ནས་བྱའོ་སྙམ་ལྷག་བསམ་གྱི་རྒྱུ་ལ་བརྟེན་ནས། འབྲས་བུ་སྨོན་འཇུག་གི་རང་བཞིན་ཅན་གྱི་བྱང་ཆུབ་ཀྱི་སེམས་དངོས་བསྐྱེད་པར་བྱ་བ་སྟེ། དེ་ལྟར་ཡང་། མར་ཤེས་དྲིན་དྲན་དྲིན་གཟོ་དང་། །བྱམས་པ་སྙིང་རྗེ་ལྷག་བསམ་རྒྱུ། །བྱང་ཆུབ་སེམས་ནི་འབྲས་བུའོ། །ཞེས་སོ། །བཞི་པ་ནི། རྣམ་ངེས་ལས། དང་པོ་སྡོམ་པ་མ་ཐོབ་ཐོབ་ཚུལ་ནི། །ལེན་ཚུལ་སྡོམ་གནས་དགེ་བའི་བཤེས་གཉེན་ལ། །ཐེག་ཆེན་སྣོད་གྱུར་དད་ལྡན་སློབ་མ་ཡིས། །ཡན་ལག་བདུན་མཐར་སྨོན་འཇུག་སྟབས་གཅིག་ཏུ། །ལེན་ཅིང་རང་གཞན་དགའ་བ་བསྒོམ་པ་རྣམས། །ཀླུ་སྒྲུབ་ལུགས་ཡིན་ཐོགས་མེད་བཞེད་པ་ནི། །སྨོན་སེམས་ལེན་ལ་སོ་ཐར་མི་དགོས་ཀྱང་། །ཡང་དག་བླངས་པ་རིགས་བདུན་སྔོན་སོང་ནས། །བར་ཆད་འདྲི་དང་བསླབ་པ་ཁས་ལེན་སོགས། །སྨོན་འཇུག་ཆོ་ག་སོ་སོའི་སྒོ་ནས་ལེན། །རྒྱལ་བའི་རྟེན་ལའང་རུང་བར་སྲོལ་གཉིས་མཐུན། །ཐོབ་མཚམས་{ཚུལ}བརྗོད་པ་གསུམ་གྱི་མཐའ་ལའོ། །ཞེས་གསུངས་པ་བཞིན། དབུ་མ་ལུགས་ལ། སྦྱོར་བ། གདམས་ངག་ཁྱད་པར་ཅན་གྱིས་བློ་བཅོས། ཡུལ་ཁྱད་པར་ཅན་ལ་མཎྜལ་ཕུལ་ཞིང་གསོལ་བ་གདབ། རྟེན་ཁྱད་པར་ཅན་དཀོན་མཆོག་གསུམ་ལ་སྐྱབས་སུ་འགྲོ། ཐབས་ཁྱད་པར་ཅན་ཡན་ལག་བདུན་པས་ཚོགས་བསགས་ནས། དངོས་གཞི་ལ། བདག་བས་གཞན་གཅེས་ཀྱིས་བློ་སྦྱོང་བ་སྔོན་དུ་འགྲོ་བས། དགོངས་གསོལ་དང་། དམ་བཅའི་ཚིག་ལན་གསུམ་བརྗོད་པས་སྨོན་འཇུག་གི་སེམས་བསྐྱེད་སྟབས་གཅིག་ཏུ་བླངས་ཤིང་ཐོབ་ཤེས་བསྐྱེད། རྗེས་རང་གཞན་དགའ་བ་བསྒོམས་ནས་གཏང་རག་དང་བསླབ་བྱ་བརྗོད་པའོ། །སེམས་ཙམ་གྱི་ལུགས་ལ་སྨོན་འཇུག་གཉིས་སོ་སོར་ལེན་པ་སྟེ། ཞིབ་པར་སོ་སོའི་ཆོ་ག་ལས་ཤེས་པར་བྱ་བ་ལས་འདིར་མ་སྤྲོས་ལ། གལ་ཏེ་བླ་མ་དང་རྟེན་གཉིས་ཀ་མ་འབྱོར་ནའང་ར ང་སྟོབས་ཀྱི་ནུས་པ་ཡོད་ན་འཇམ་དཔལ་ཞིང་གི་ཡོན་ཏན་བཀོད་པའི་མདོ་ལས་གསུངས་པ་ལྟར། རྒྱལ་བ་སྲས་བཅས་མདུན་གྱི་ནམ་མཁར་བློས་བསམ་སྟེ་དེ་ལས་ལེན་པར་ཇོ་བོའི་བྱང་ཆུབ་ལམ་སྒྲོན་ལས་གསུངས་པ་ལྟར་ལེན་པར་བྱ་སྟེ། ཆོས་རྣམས་ཐམས་ཅད་རྐྱེན་ཡིན་ཏེ། །འདུན་པའི་རྩེ་ལ་རབ་ཏུ་གནས། །ཞེས་གསུངས་པ་བཞིན་ནོ། །གཉིས་པ་ཨོ་རྒྱན་དུས་གསུམ་མཁྱེན་པའི་ཞལ་ལུང་བླ་མའི་དམར་ཁྲིད་ལས་གསུངས་པ་ནི། ཐེག་པ་ཆེན་པོར་ཞུགས་ནས་བྱང་ཆུབ་ཀྱི་སེམས་མ་སྦྱངས་ན། ཐེག་པ་འོག་མར་ལྷུང་བས་རྟག་ཏུ་གཞན་དོན་ལ་སློབ་པ་ཤིན་ཏུ་གལ་ཆེ། དེ་རྒྱས་པར་བཤད་ན། ཐེག་པ་ཆེན་པོའི་མདོ་རྒྱུད་ནས་དཔག་ཏུ་མེད་པར་གསུངས་ཀྱང་། དེ་དག་དང་ཚུལ་བསྟུན་ནས་བསྡུས་ཏེ་བསྟན་པ་ལ་དོན་གསུམ་སྟེ། ཕྱི་ལྟར་བསླབ་པ། ནང་ལྟར་བསླབ་པ། གསང་བ་ལྟར་བསླབ་པའོ། །དང་པོ་ཕྱི་ལྟར་བསླབ་པ་ལ་དོན་བཅུ་གཉིས་ཏེ། ངོ་བོ། ངེས་ཚིག དབྱེ་བ། གང་ཟག་གི་མཚན་ཉིད། བླང་བའི་ཡུལ། བླང་བའི་ཆོ་ག བསླབ་པའི་ཕན་ཡོན། སློབ་དགོས་པའི་གཏན་ཚིགས། མ་བསླབས་པའི་ཉེས་དམིགས། བསྲུང་བྱའི་ཆོས། གཏོང་ཐོབ་ཀྱི་ས་མཚམས། ཉམས་ན་གསོ་བའི་ཐབས་སོ། །དང་པོ་ངོ་བོ་ནི། སེམས་ཅན་ཐམས་ཅད་འཁོར་བ་ལས་བསྒྲལ་བའི་དོན་དུ་བླ་ན་མེད་པའི་བྱང་ཆུབ་ཐོབ་པར་འདོད་པའི་ཁས་ལེན་དང་བཅས་པ་ཡིན། གཉིས་པ་ངེས་ཚིག་ནི། སྔར་བདག་ལ་མ་སྐྱེས་པའི་གཞན་དོན་གྱི་བློ་བསྐྱེད་པ་ཞིག་ཡིན། གསུམ་པ་དབྱེ་བ་ནི། མདོ་ནས་རྣམ་གྲངས་མང་དུ་བཤད་མཆི་ཡང་། བསྡུ་ན་སྨོན་པ་དང་འཇུག་པ་གཉིས་ཡིན་པས། དེ་ཡང་སྨོན་པ་ནི་སེམས་ཅན་གྱི་དོན་བསྒྲུབ་པར་སེམས་ཀྱིས་སྨོན་པ་ཡིན། དེ་གཅིག་པུས་མི་ཆོག སེམས་ཅན་ཐམས་ཅད་ལ་ཕན་གདགས་པ་ལ་དངོས་སུ་འཇུག་པ་གལ་ཆེ། བཞི་པ་གང་ཟག་ནི། ཉན་ཐོས་དང་རང་སངས་རྒྱས་ལྟ་བུ་མ་ཡིན་པར། ཐེག་པ་ཆེན་པོའི་ཆོས་ལ་མོས་པ། བློ་ཆེ་བ། གང་ལ་ཡང་ཐེ་ཚོམ་མི་ཟ་བ། སློབ་དཔོན་དང་དཀོན་མཆོག་གསུམ་གྱི་སྐྱབས་འོག་ཏུ་ཚུད་པ། ལོག་པ་དང་དམན་པའི་ཆོས་ལས་ཡིད་དབྱུང་བ། རང་བཞིན་གྱིས་ཞི་ཞིང་དེས་པ་ཞིག་དགོས་སོ། །ལྔ་པ་བླང་ཡུལ་ནི། བླ་མ་ཐེག་པ་ཆེན་པོའི་སེམས་བསྐྱེད་པ། བྱམས་པ་དང་སྙིང་རྗེའི་མཐུ་དང་ལྡན་པ། རང་དོན་སྐད་ཅིག་ཀྱང་མི་སྒྲུབ་པ། བསླབ་བྱ་མ་ཉམས་པར་སྲུང་བ་ཞིག་ལས་བླང་དགོས། དྲུག་པ་ཆོ་ག་ནི། འདིར་མ་སྨོས་ཏེ་གཞུང་དུ་གསལ་ལོ། །བདུན་པ་བསླབ་པའི་ཕན་ཡོན་ནི། ཉན་རང་ལས་ཁྱད་པར་དུ་འཕགས་ཏེ། ཐེག་པ་ཆེན་པོའི་ཁྱུར་ཚུད་པ་དང་། ཉོན་མོངས་པ་དང་སྡིག་སྒྲིབ་རྩད་ནས་གཅོད་པ་དང་། སྒོ་གསུམ་གྱིས་དགེ་བའི་ལས་བྱས་པ་ཐམས་ཅད་དོན་ཡོད་པའི་རྒྱུར་འགྱུར་བ་དང་། རྒྱུད་ལ་བསོད་ནམས་ཀྱི་ཚོགས་རྒྱ་ཆེན་པོ་རྫོགས་པར་འགྱུར་བ་དང་། སངས་རྒྱས་དང་བྱང་ཆུབ་སེམས་དཔའ་དང་ཆོས་སྐྱོང་བ་ཆེན་པོ་རྣམས་ཀྱིས་རྟག་ཏུ་དགོངས་པ་དང་། སེམས་ཅན་ཐམས་ཅད་ཀྱིས་བུ་བཞིན་དུ་བརྩེ་ཞིང་མཐོང་ན་ཡིད་དུ་འོང་བ་དང་། རྟག་ཏུ་ཐེག་པ་ཆེན་པོའི་ཆོས་དང་མི་འབྲལ་བ་དང་། མདོར་ན་སངས་རྒྱས་ཀྱི་ཆེ་བའི་ཡོན་ཏན་ཡིད་བཞིན་དུ་འགྲུབ་ནས་མྱུར་དུ་མངོན་པར་རྫོགས་པར་སངས་རྒྱ་བ་ལ་སོགས་པའི་ཡོན་ཏན་བསམ་གྱིས་མི་ཁྱབ་པས་འདི་ཁོ་ན་ལ་ནན་ཏན་གྱིས་ཤིག བརྒྱད་པ་དེ་ལྟར་སློབ་དགོས་པའི་གཏན་ཚིགས་ནི། འོ་ན་རང་གཅིག་པུ་ཐར་བས་ཆོག་མོད། སེམས་ཅན་ཐམས་ཅད་འཁོར་བ་ལས་སྒྲོལ་དགོས་པ་ཅིའི་ཕྱིར་ཞེ་ན། སེམས་ཅན་ཐམས་ཅད་ཕ་མ་ཡིན། ཕ་མའི་དྲིན་ལན་བསམ་གྱིས་ཁྱབ་པས། དྲིན་ལན་ལན་གྱི་བླན་པའི་ཕྱིར་བསླབ་དགོས་ཏེ། དྲིན་ཡང་ལུས་སྲོག་བསྐྱེད་པའི་རྒྱུ་རྟེན་བྱས་པ་དང་། ཆུང་ནས་བཟའ་བཏུང་གྱ་ནོམ་པས་གསོས་པ་དང་། སྡུག་བསྔལ་དང་དཀའ་བ་སྣ་ཚོགས་སྤྱད་པ་དང་། རང་བས་ཀྱང་གཅེས་པར་ཁོང་གི་སྙིང་བས་ལྷག་པ་དང་། དེ་ནས་ནོར་རྫས་ཀྱི་སྐལ་བ་ཕོག་པ་དང་། ཤེས་བྱའི་ཡོན་ཏན་བསླབ་པ་དང་། དམ་པའི་ཆོས་ལ་སྦྱར་བ་སོགས་ཕ་མའི་དྲིན་བསམ་གྱིས་མི་ཁྱབ་པས། དེ་རྣམས་འཁོར་བ་ལས་བསྒྲལ་དགོས། གཞན་ཡང་སེམས་ཅན་ཐམས་ཅད་ལ་རྒྱུ་བྱང་ཆུབ་ཀྱི་སྙིང་པོ་ཡོད་པས་ཀྱང་འབྲེལ་བས། དེ་རྣམས་འཁོར་བ་ལས་བསྒྲལ་དགོས། རང་ཉིད་གཅིག་པུ་ཞི་བདེ་འདོད་ན་རྫོགས་པའི་སངས་རྒྱས་དང་འཕྲད་པ་མེད་དོ། །དགུ་པ་མ་བསླབས་པའི་ཉེས་དམིགས་ནི། ཉན་ཐོས་དང་རང་སངས་རྒྱས་སུ་ལྷུང་ནས་བྱང་ཆུབ་ཆེན་པོའི་གེགས་བྱེད་པ་དང་། བྱ་བའི་ལས་ཐམས་ཅད་དོན་མེད་པར་འགྱུར་བ་དང་། རྟག་ཏུ་མི་མ་ཡིན་རྣམས་ཀྱིས་འཚེ་བ་དང་། ཀུན་གྱིས་ཡིད་དུ་མི་འོང་ཞིང་ཞེ་སྡང་བ་དང་། བསམ་པ་ཐམས་ཅད་མི་འགྲུབ་པ་ལ་སོགས་པའི་ཉེས་དམིགས་དཔག་ཏུ་མེད། བྱང་ཆུབ་ཀྱི་སེམས་མེད་པར་ཐེག་པ་ཆེན་པོར་རེ་བ་ལྟས་ངན་ཡིན། བཅུ་པ་བསྲུང་བྱའི་ཆོས་ནི། སྨོན་པའི་བསྲུང་བྱ། སེམས་ཅན་བློས་མི་སྤོང་བའི་བསམ་པས། ཡང་ཡང་བྱང་ཆུབ་ཀྱི་སེམས་ལ་སློབ་དགོས་ཏེ། ཡུལ་སེམས་ཅན་གཞན་ཡིན་པ་ལ་སྤོང་བའི་བསམ་པ་སྔོན་དུ་སོང་བས་ཁྲོ་བ་དང་རྡེག་པ་ལ་སོགས་པ་བྱས་ནས་གཉེན་པོས་མ་བསླེབས་པར་ཉིན་ཞག་གཅིག་འདས་ན་སྨོན་པ་ཉམས། དེའི་གཉེན་པོར་རྟག་ཏུ་ཞི་བ་དང་དུལ་བས་ཕན་གདགས་པ་དང་། དཀར་ནག་གི་ཆོས་བཞི་ལ་བླང་དོར་བྱེད་པ་ཡིན། འཇུག་པའི་བསྲུང་ཆོས། སྤང་བྱ་མི་དགེ་བ་བཅུ་སྤང་། གཉེན་པོ་དགེ་བ་བཅུ་བརྟེན། བྱ་བ་ལ་འཇུག་པའི་རྒྱུ་ཕ་རོལ་དུ་ཕྱིན་པ་བཅུ་ལ་སློབ་པའོ། བཅུ་གཅིག་པ་གཏོང་ཐོབ་ཀྱི་ས་མཚམས་ནི། ཐོབ་པའི་དུས་ནི་བསོད་ནམས་ཀྱི་ཚོགས་མང་པོ་བསགས་ནས་རྒྱུད་ཡོངས་སུ་དག་པར་སྦྱངས་ཏེ། སེམས་ཅན་གྱི་དོན་ཕྱིན་ཅི་མ་ལོག་པར་བྱ་དགོས་བའི་བསམ་པ་སྐྱེས་པ་དང་། ཆོ་ག་རྫོགས་པའི་བརྗོད་པ་གསུམ་གྱི་ཐ་མ་ལ་འཐོབ། གཏོང་བའི་དུས་ནི་ལོག་ལྟ་སྐྱེས་པས་དཀོན་མཆོག་གསུམ་སྤངས་ཏེ། བསླབ་བྱ་ལས་འདས་ན་འཆོར་བས་དྲན་པ་དང་ཤེས་བཞིན་གྱི་བྱ་ར་བས་འབད་པ་འདོན་པ་གལ་ཆེའོ། །བཅུ་གཉིས་པ་ཉམས་ན་གསོ་བའི་ཐབས་ནི། རྩ་བ་ཉམས་པ་སྔར་ལྟར་བླང་དགོས། ཡན་ལག་ཉམས་ན། སློབ་དཔོན་དང་། དཀོན་མཆོག་གི་སྤྱན་སྔར་བཤགས་པ་བྱའོ་གསུངས་། གཉིས་པ་ནང་ལྟར་སེམས་བསྐྱེད་པ་ལའང་སྔར་ལྟར་བཅུ་གཉིས་ལས། དང་པོ་ངོ་པ་ནི། ཆོས་ཉིད་ཡང་དག་པའི་དོན་སྤྲོས་པ་དང་བྲལ་བ་ཡིན་པ་ལ། དེ་ལྟར་མ་རྟོགས་པ་རྣམས་ལ་ཕན་སེམས་བསྐྱེད་པ་ཡིན། གཉིས་པ་ངེས་ཚིག་ནི། དེ་ལྟ་བུ་དེ་ཕྱི་ལུས་ངག་གི་བྱ་བ་ལ་མི་ལྟོས་པར་སེམས་ཁོ་ནས་བསྐྱེད་པའི་ཕྱིར་ནང་ཞེས་བྱའོ། །གསུམ་པ་དབྱེ་བ་ནི་སྨོན་འཇུག་གཉིས་ཏེ། སྨོན་པ་ནི། དེ་ལྟར་སེམས་ཅན་མ་རྟོགས་པ་རྣམས་ཀྱིས་དེ་ལྟར་རྟོགས་པར་འདོད་པ་ཞིག་སྟེ། དེ་ཡང་ཁ་འཁུན་ནས་བསྡད་པས་མི་ཆོག སེམས་ཅན་ཐམས་ཅད་ཀྱིས་དེ་ཐོབ་པར་བྱེད་པའི་ཐབས་ལ་ཅིས་ཀྱང་འབད་པ་གལ་ཆེ། བཞི་པ་བསླབ་པ་ལ་འཇུག་པའི་གང་ཟག་ནི། སྔར་བཤད་པ་ལྟ་བུའི་སྟེང་དུ་རྟོག་པའི་སྤྲོས་པ་ཆུང་བ་ཞིག་དགོས། ལྔ་པ་བླང་བའི་ཡུལ་ནི། བླ་མ་ཤེས་རབ་གསུམ་ལ་བསླབ་པ། བདག་མེད་གཉིས་ཀྱི་དོན་རྟོགས་ཏེ། ཆོས་བརྒྱད་དང་བྲལ་བ་ལས་བླང་དགོས། དྲུག་པ་བླང་བའི་ཆོ་ག་ནི་འཁོར་གསུམ་ཡང་དག་བྱས་ནས། འཇིག་རྟེན་གྱི་བྱ་བ་མཐའ་དག་བློས་བཏང་སྟེ། ཡང་དག་པའི་གདམས་ངག་ཞུ་བ་དེ་ཡིན། བདུན་པ་བསླབ་པའི་ཕན་ཡོན་ནི། ལམ་ལོག་པ་དང་། ཐེག་པ་དམན་པ་ལས་ཁྱད་པར་དུ་འཕགས་ཏེ། ང་བདག་དང་གཟུང་འཛིན་གྱི་རྟོག་པ་ཐམས་ཅད་སྤངས་ནས་བདག་མེད་པའི་དོན་རྟོགས་པའི་དགོས་པ་ཡོད་དོ། །བརྒྱད་པ་སེམས་བསྐྱེད་དེ་ལ་སློབ་དགོས་པའི་གཏན་ཚིགས་ནི། བདག་གིས་སེམས་ཅན་ཐམས་ཅད་ཡང་དག་པའི་ལམ་བདག་མེད་གཉིས་ཀྱི་དོན་ལ་དགོད་དགོས་པས་སོ། །དགུ་པ་མ་བསླབས་པའི་ཉེས་དམིགས་ནི། བདག་མེད་པའི་དོན་ལས་གོལ་ཏེ་གང་ཟག་དང་ཆོས་སུ་འཛིན་པའི་དབང་གིས་སྲིད་པར་འདུ་བྱེད་པའོ། །བཅུ་པ་བསྲུང་བྱའི་ཆོས་ནི། བདག་མེད་པའི་དོན་ལ་བསླབ་པ་སྟེ། འདི་ལ་གཉིས་ལས། སྨོན་པའི་བསླབ་བྱ་ནི། དུས་རྟག་ཏུ་སེམས་ཅན་ཐམས་ཅད་ཀྱིས་བདག་མེད་པའི་དོན་རྟོགས་པར་གྱུར་ཅིག་སྙམ་དུ་སྨོན་ལམ་རྒྱུན་མི་འཆད་པ་དང་གཅིག གཞན་བདག་མེད་པའི་དོན་སྒོམ་པ་རྣམས་ལ་ཉིན་མཚན་ལན་གསུམ་གསུམ་དུ་རྗེས་སུ་ཡི་རང་སྒོམ་པ་དང་གཉིས། དུས་རྟག་ཏུ་བདག་མེད་པའི་དོན་ལས་མི་འདའ་བར་བསླབ་པའོ། །གཉིས་པ་འཇུག་པའི་བསླབ་བྱ་ལ་ཕྱི་ནང་གཉིས་ཏེ། དང་པོ་ཕྱིའི་བསྲུང་བྱ་བཞི་ནི། བདག་མེད་པའི་དོན་མ་རྟོགས་ཀྱི་བར་དུ་དེ་སྟོན་པའི་བླ་མ་དགེ་བའི་བཤེས་གཉེན་དང་མི་འབྲལ་བ་དང་། གནས་ཡུལ་སྡེ་རིས་དང་དགྲ་གཉེན་གྱི་ཕྱོགས་ཆ་སྤངས་པ་དང་། བདག་མེད་སྟོང་པ་ཉིད་སྟོན་པའི་ཆོས་ལ་ཐོས་བསམ་སྒོམ་གསུམ་བྱ་བ་དང་། མིང་རུས་ལུས་དང་གསུམ་ལ་བདག་ཏུ་མི་གཟུང་བ་དང་བཞིའོ། །གཉིས་པ་ནང་གི་བསླབ་བྱ་ལའང་བཞི་སྟེ། ཕྱི་རོལ་གྱི་བཏགས་པའི་མིང་དང་ཐ་སྙད་ཐམས་ཅད་སེམས་ཉིད་ཀྱི་ངོ་བོ་ལས་མ་གྲུབ་པས་ཐ་སྙད་ལ་དོན་དུ་མི་བཟུང་བ་དང་གཅིག སྣོད་བཅུད་ཀྱིས་བསྡུས་པའི་དངོས་པོ་འདི་རྣམས་རྨི་ལམ་ལྟ་བུ་སྣང་ཡང་རང་བཞིན་མ་གྲུབ་པར་ཤེས་པ་དང་གཉིས། དེ་ལྟར་གང་དུ་ཡང་མ་གྲུབ་པ་ལ་སྣ་ཚོགས་སུ་འཛིན་མཁན་གྱི་སེམས་རིག་པ་དེ་ཉིད་ཉིན་ལན་གསུམ་མཚན་ལན་གསུམ་དུ་བཙལ་བ་དང་གསུམ། བཙལ་བས་མ་རྙེད་པར་མིང་མེད་མཐའ་བྲལ་དུ་འདུག་པའི་དོན་ལས་མི་འདའ་བ་དང་བཞི་ལ་བསླབ་བོ། །བཅུ་གཅིག་པ་གཏོང་ཐོབ་ཀྱི་ས་མཚམས་ལས། ཐོབ་པའི་དུས་ནི་བླ་མ་ལས་མན་ངག་ཐོབ་པའི་དུས་ན་ཐོབ། གཏོང་བའི་དུས་ནི་རང་བཞིན་མེད་པར་མ་རྟོགས་ནས་གཟུང་འཛིན་རང་ཁ་མའི་ཕྱིར་འཕྲེང་ན་འཆོར་བས་གཉེན་པོས་སླེབ་པར་གྱིས་ཤིག བཅུ་གཉིས་པ་ཉམས་ན་གསོ་བའི་ཐབས་ནི། སྔར་གྱི་དོན་ལས་མ་ཡེངས་པར་བསླབ། དེ་ལྟར་བསླབས་པས་གཟུང་འཛིན་གྱི་མདུད་པ་ཤུགས་ཀྱིས་གྲོལ་ནས་འགྲོ་གསུངས། གསུམ་པ། གསང་བའི་སེམས་བསྐྱེད་ལ་དོན་བཅུ་གཅིག་གིས་བསྟན་ནས་གསུངས་ཀྱང་ལམ་གྱི་དངོས་གཞི་ཐུན་མིན་དང་འབྲེལ་བས་སྐབས་འདིར་མི་འཆད་དོ། །དེ་ལྟར་རྣམ་གཞག་སྤྱིར་ངེས་པར་བྱས་ནས། གཉིས་པ་དམིགས་ཁྲིད་དངོས་བསྟན་པ་ལ། སེམས་བསྐྱེད་ཚུལ་སྤྱིར་བསྟན་པ་དང་། བྱེ་བྲག་དམིགས་ཁྲིད་དངོས་སོ། །དང་པོ་ནི། སེམས་ཉིད་ངལ་གསོ་ལས། གནས་གཙང་མཆོད་པས་མཛེས་ཤིང་ཉམས་དགའ་བར། །རྒྱལ་བའི་སྐུ་གཟུགས་ལ་སོགས་སྟ་གོན་བྱ། །ནམ་མཁའི་གནས་སུ་ནམ་མཁའ་གང་བ་ཡི། །རྒྱལ་བ་སྲས་བཅས་རྒྱ་མཚོའི་སྤྲིན་ཕུང་བསམ། །ཞེས་སོགས་གསུངས་པ་ལྟར། སྦྱོར་བ་དཀོན་མཆོག་གསུམ་གྱི་རྟེན་གྱི་དྲུང་དུ་ཅི་འབྱོར་བའི་མཆོད་པ་ལེགས་པར་བཤམས། སྟེང་གི་ནམ་མཁར་བླ་མ་དང་དཀོན་མཆོག་ཡི་དམ་མཁའ་འགྲོ་ཆོས་སྐྱོང་བའི་སྲུང་མ་རྣམས་སྤྲིན་ཕུང་འཐིབ་པ་ཙམ་དུ་བཞུགས་པར་མོས་ལ། དེའི་སྤྱན་སྔར་རང་གཞན་སེམས་ཅན་ཐམས་ཅད་སྒོ་གསུམ་གྱི་འཇུག་པ་གཅིག་པས་ཕྱག་འཚལ་བ་དང་། མཆོད་པ་འབུལ་བ་དང་། སྡིག་པ་བཤགས་པ་དང་། དགེ་བ་ལ་རྗེས་སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པ་དང་། མྱ་ངན་ལས་མི་འདའ་བར་བཞུགས་པར་གསོལ་བ་དང་། དགེ་ཚོགས་བྱང་ཆུབ་ཏུ་བསྔོ་བ་སྟེ་ཡན་ལག་བདུན་པས་ཚོགས་བསགས་རྗེས། དེ་ཉིད་ལས། དེ་ནས་སངས་རྒྱས་ཆོས་དང་ཚོགས་མཆོག་ལ། །ལན་གསུམ་བར་དུ་སྐྱབས་སུ་འགྲོ་བྱས་ལ། །མགོན་པོ་སྲས་དང་བཅས་རྣམས་དགོངས་སུ་གསོལ། །ཇི་ལྟར་སྔོན་གྱི་བདེ་གཤེགས་སྲས་བཅས་ཀྱིས། །བྱང་ཆུབ་ཐུགས་བསྐྱེད་བསླབ་ལ་གནས་པ་ལྟར། །དེང་ནས་བདག་གིས་འགྲོ་ལ་ཕན་དོན་དུ། །བྱང་ཆུབ་སེམས་བསྐྱེད་བསླབ་ལ་གནས་པར་བགྱི། །མ་བརྒལ་བ་རྣམས་བདག་གིས་བསྒྲལ་བར་བགྱི། །མ་གྲོལ་བ་རྣམས་བདག་གིས་དགྲོལ་བགྱི་ཞིང་། །དབུགས་མ་དབྱུང་རྣམས་བདག་གིས་དབུགས་དབྱུང་སྟེ། །སེམས་ཅན་རྣམས་ནི་མྱ་ངན་འདས་ལ་འགོད། །དེ་ལྟར་ཉིན་དང་མཚན་མོ་ལན་གསུམ་དུ། །བྱང་ཆུབ་སེམས་གཉིས་བསྐྱེད་ལ་འབད་པར་བྱ། །བརྗོད་པ་དང་པོས་སྨོན་པ་སེམས་བསྐྱེད་ལ། །གཉིས་པ་འཇུག་པ་སེམས་བསྐྱེད་གསུམ་པ་ཡིས། །གཉིས་ཀ་བརྟན་ཞིང་དག་པ་ཐོབ་པར་འགྱུར། །ཞེས་གསུངས་པ་ལྟར། དངོས་གཞི་ལ་དགོངས་གསོལ་སྔོན་དུ་འགྲོ་བ་ཅན་གྱི། བྱང་ཆུབ་སྙིང་པོར་མཆིས་ཀྱི་བར། །སོགས་ཀྱི་སྐྱབས་འགྲོ་ལན་གསུམ་དང་། དེ་ནས་ཇི་ལྟར་སྔོན་གྱི་བདེ་གཤེགས་ཀྱིས་སོགས་སྤྱོད་འཇུག་ལས་འབྱུང་བ་ལྟར་གྱིས་ཚིག་ལན་གསུམ་བརྗོད་པས། དང་པོས་སྨོན་སེམས་དང་། གཉིས་པས་{པ}འཇུག་སེམས། གསུམ་པས་གཉིས་ཀ་བརྟན་པར་བྱ་བའི་ཚུལ་གྱིས་སྨོན་འཇུག་གི་སེམས་བསྐྱེད་སྟབས་གཅིག་ཏུ་བླང་ཞིང་རྗེས་ལ། དེང་ནས་བདག་གི་འགྲོ་ཀུན་ཉེར་མཚོའི་གཞི། །རྒྱལ་སྲས་བྱང་ཆུབ་སེམས་དཔའི་མིང་ཡང་ཐོབ། །སྲིད་ན་མི་འཇིགས་འགྲོ་བའི་དོན་བྱེད་ཅིང་། །རྟག་ཏུ་ཕན་པ་འབའ་ཞིག་ལྷུར་ལེན་པས། །མི་ཡི་སྲིད་པ་དོན་དང་བཅས་པར་གྱུར། །ཞེས་སོགས་ཀྱིས་བསྟན་པ་བཞིན། དེང་དུས་བདག་ཚེ་འབྲས་བུ་ཡོད། །ཅེས་སོགས་ཀྱིས་རང་གཞན་དགའ་བ་བསྒོམ་ཞིང་སྨོན་ལམ་གདབ། རྟག་པར་དྲན་ཤེས་བག་ཡོད་དང་མ་བྲལ་བས་བྱང་ཆུབ་སེམས་དཔའི་སྤྱོད་པ་ལ་བསླབ་པའོ། །དེ་ཡང་གོང་དུ་དྲངས་པའི་ལུང་གི་ཚིག སེམས་ཅན་མ་བརྒལ་བ་རྣམས་ཞེས་པ་ནི། དམྱལ་བ་ཡི་དྭགས་དུད་འགྲོ་རྣམས་ཏེ། ངན་སོང་གི་སྡུག་བསྔལ་རྒྱ་མཚོ་ལྟ་བུ་ལས་མ་བརྒལ་བའི་ཕྱིར་རོ། །བསྒྲལ་ཞེས་པ་ནི། དེ་དག་མངོན་མཐོའི་ལམ་ལ་བཀོད་ནས་ངན་སོང་གི་སྡུག་བསྔལ་ལས་བསྒྲལ་ཏེ་ལྷ་མིའི་གོ་འཕང་འཐོབ་པར་བྱ་བའོ། །དེ་བཞིན་དུ་མ་གྲོལ་བ་རྣམས་ནི་ལྷ་མི་སོགས་མཐོ་རིས་ཀྱི་འགྲོ་བ་སྟེ། དེ་དག་ཉོན་མོངས་པའི་འཆིང་བ་ལྕགས་སྒྲོག་ལྟ་བུ་ལས་མ་གྲོལ་བ་རྣམས། དེ་དག་ངེས་ལེགས་ཀྱི་ལམ་ལ་བཀོད་ནས་ཉོན་མོངས་པའི་འཆིང་བ་ལས་དགྲོལ་ནས་ཐར་པའི་གོ་འཕང་ཐོབ་པར་བྱ་བའོ། །དབུགས་མ་དབྱུང་བ་རྣམས་ནི་ཉན་རང་སྟེ་ཐེག་པ་ཆེན་པོ་ལ་དབུགས་མ་དབྱུང་བའི་ཕྱིར། དེ་དག་བྱང་ཆུབ་ཏུ་སེམས་བསྐྱེད་དུ་བཅུག་ནས་ཐེག་པ་ཆེན་པོའི་ལྟ་སྤྱོད་ལ་དབུགས་དབྱུང་སྟེ་ས་བཅུའི་གོ་འཕང་ལ་འགོད་པར་བྱ་བའོ། །ཡོངས་སུ་མྱ་ངན་ལས་མ་འདས་པ་རྣམས་ནི་བྱང་ཆུབ་སེམས་དཔའ་རྣམས་ཏེ། མི་གནས་པའི་མྱ་ངན་ལས་འདས་པ་མ་ཐོབ་པའི་ཕྱིར། དེ་དག་ཡོངས་སུ་མྱ་ངན་ལས་འདས་པ་སངས་རྒྱས་ཀྱི་སར་འགོད་པར་དམ་བཅའ་བའོ། །གཉིས་པ་དམིགས་ཁྲིད་དངོས་ནི། མདུན་གྱི་ནམ་མཁར་ཚོགས་ཞིང་སྐྱབས་ཡུལ་ལྟར་གསལ་བཏབ་པའི་སྤྱན་སྔར། འདི་ལྟར་ཕྱོགས་བཅུ་གང་ནས་གཞལ་ཀྱང་འཇིག་རྟེན་གྱི་ཁམས་ལ་མཐའ་མེད། དེ་ཐམས་ཅད་རིགས་དྲུག་གི་སེམས་ཅན་གྱི་གོ་མཚམས་མེད་པར་ཁྱབ། སེམས་ཅན་དེ་ཐམས་ཅད་ཀྱིས་རང་གི་ཕ་མ་ལན་གྲངས་དཔག་ཏུ་མེད་པ་ཞིག་བྱས་ཏེ། དེ་དག་གི་སྐབས་སུ་ད་ལྟའི་རྩ་བའི་ཕ་མ་འདི་བཞིན་དུ་ལེགས་པར་བསྐྱངས་པའི་དྲིན་ཅན་ཤ་སྟག་ཡིན། དེ་ཐམས་ཅད་འདོད་པ་བདེ་བ་འདོད་ཀྱང་སྒྲུབ་པ་སྡུག་བསྔལ་གྱི་རྒྱུ་བསྒྲུབས་པས། ཞེ་འདོད་དང་ལག་ལེན་ཕྱིན་ཅི་ལོག་ཏུ་གྱུར་པའི་སྨྱོན་པ་ལྟ་བུ་འདི་རྣམས་སྙིང་རེ་རྗེ། བདག་གི་ཕ་མ་མི་འདོད་བཞིན་དུ་སྡུག་བསྔལ་སྣ་ཚོགས་ཉམས་སུ་མྱོང་བ་འདི་ཀུན་ཅི་ཙུག་བྱ། ད་སྙིང་རྗེ་ཟེར་ནས་བཞག་པས་ཅི་ཕན། འདི་རྣམས་འཁོར་བའི་སྡུག་བསྔལ་ལས་དྲངས་ཏེ། ཐར་པའི་མཆོག་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་ས་ལ་མྱུར་དུ་འགོད་པར་བྱ། ད་ལྟ་དེའི་ནུས་པ་བདག་ལ་མེད་པས་བདག་གིས་འགྲོ་ཀུན་སྒྲོལ་ནུས་པའི་སངས་རྒྱས་ཀྱི་གོ་འཕང་དེ་ཚེ་འདི་ཉིད་ལ་ཐོབ་པར་བྱ་སྙམ་པ་སྨོན་པ་སེམས་བསྐྱེད་དང་། དེའི་ཆེད་དུ་དཔལ་རྡོ་རྗེ་སེམས་དཔའ་ལ་སོགས་པ་དངོས་གཞིའི་ལམ་གང་ཡིན་གྱི་བསྐྱེད་རྫོགས་ཀྱི་ལམ་ཟབ་མོ་བསྒོམ་པར་བགྱིའོ། །སྙམ་དུ་དམ་བཅས་ཤིང་དངོས་སུ་སྦྱོར་བས་བརྩོན་པ་ནི་འཇུག་པ་སེམས་བསྐྱེད་དེ། དེ་ལྟ་བུའི་ཚུལ་གྱིས་ཚོགས་ཞིང་རྣམས་དཔང་པོའི་ཚུལ་དུ་བྱས་ཏེ། ཧོ༔ དེང་ནས་བཟུང་སྟེ་འཁོར་བ་མ་སྟོང་བར༔ ཞེས་སོགས་སེམས་བསྐྱེད་ཀྱི་ཚིག་གང་ཡིན་དེ་དམ་བཅའི་ཚུལ་དུ་བརྒྱ་སྟོང་ཁྲི་འབུམ་ལ་སོགས་པར་གྲངས་བསགས། དེ་ཡང་ཁ་ཡེངས་མིག་ཡེངས་ཚིག་ཙམ་དུ་མ་སོང་བར་སེམས་རྩེ་གཅིག་པའི་སྒོ་ནས་ཚོགས་ཞིང་སྐྱབས་ཡུལ་རྣམས་ཀྱིས་བདག་གི་བསམ་སྦྱོར་ཐམས་ཅད་ཇི་ལྟ་བ་བཞིན་དུ་མཁྱེན་ངེས་སོ་སྙམ་པས་བླ་མ་དཀོན་མཆོག་ལ་དད་པ་དང་། སེམས་ཅན་ཐམས་ཅད་སྡུག་བསྔལ་ལས་བསྒྲལ་བར་འདོད་པའི་སྙིང་རྗེ་དང་། དེའི་ཆེད་དུ་རྫོགས་པའི་སངས་རྒྱས་ཐོབ་པར་འདོད་པའི་འདུན་པ་དྲག་པོ་དང་མ་བྲལ་བའི་ལྷག་པའི་བསམ་པ་ཡང་ནས་ཡང་དུ་བསྐྱེད་ཅིང་རྒྱུན་དུ་གོམས་པར་བྱའོ། །མཐར་ཚོགས་ཞིང་རྣམས་དགྱེས་པས་འོད་དུ་ཞུ་ནས་རང་གཞན་སེམས་ཅན་ཐམས་ཅད་ལ་ཐིམ་པས་སྐྱབས་ཡུལ་རྣམས་ཀྱི་ཐུགས་རྒྱུད་ན་བཞུགས་པའི་བྱམས་སྙིང་རྗེ་བྱང་ཆུབ་ཀྱི་སེམས་གནས་ལུགས་རྟོགས་པའི་ལྟ་བ་ཕྱིན་ཅི་མ་ལོག་པ་དེ་རང་གཞན་སེམས་ཅན་ཐམས་ཅད་ཀྱི་རྒྱུད་ལ་སྐྱེས་པར་མོས་ལ་མི་དམིགས་པའི་ངང་ལ་དར་ཅིག་མཉམ་པར་བཞག་རྗེས་བདག་གཞན་མཉམ་བརྗེའི་བྱང་ཆུབ་ཀྱི་སེམས་བསྒོམ་པར་བྱ་སྟེ། དེ་ལ་བདག་གཞན་མཉམ་པ་ནི། འདི་ལྟར་སེམས་ཅན་ཐམས་ཅད་དང་བདག་གཉིས། བདག་ཉིད་བདེ་བར་འདོད་པ་དང་། སྡུག་བསྔལ་མི་འདོད་པ་དང་། རྟག་ཏུ་སྐྱིད་ཅིང་ལེགས་ན་དགའ་བར་ཆབས་ཅིག་སྟེ་མཉམ་པ་ཡིན་ཀྱང་། སེམས་ཅན་རྣམས་ཀྱི་ནི་དེའི་རྒྱུ་དགེ་སྡིག་ངོ་མ་ཤེས་ཤིང་བླང་དོར་གྱི་གནས་ལ་རྨོངས་པས་རྟག་ཏུ་སྡུག་བསྔལ་གསུམ་ལ་སྤྱོད་པ་འདི་སྙིང་རེ་རྗེ། ཀྱེ་མ་སེམས་ཅན་བདེ་བ་དང་མི་ལྡན་པ་རྣམས་བདེ་བ་དང་འཕྲད་སྡུག་བསྔལ་གྱི་ཉམ་ཐག་པ་རྣམས་སྡུག་བསྔལ་དང་བྲལ། བདེ་ཞིང་སྐྱིད་པ་རྣམས་དགའ་བདེ་དེ་དང་དུས་རྟག་ཏུ་མི་འབྲལ། ཉེ་རིང་ཆགས་སྡང་ཅན་རྣམས་ཆགས་སྡང་མེད་པའི་སེམས་བཏང་སྙོམས་ལ་གནས། ཀུན་ཀྱང་ཐར་པའི་ལམ་ལ་ཞུགས་ཏེ་རྟག་ཏུ་དགེ་བའི་ཆོས་ལ་སྤྱོད་ཅིང་། བདག་དང་སེམས་ཅན་ཐམས་ཅད་མྱུར་དུ་རྫོགས་པའི་སངས་རྒྱས་ཐོབ་པར་གྱུར་ཅིག་སྙམ་དུ་སྙིང་ཐག་པ་ནས་འདུན་པ་དྲག་པོས་བསྒོམས། དེ་ནས་བདག་གཞན་བརྗེ་བ་ནི། གང་སྙིང་རྗེ་བའི་སེམས་ཅན་གཅིག་ཐོག་མར་མདུན་དུ་བསམས་ནས། རང་གི་བདེ་བ་དང་ལེགས་པ་ལུས་ལོངས་སྤྱོད་དགེ་བའི་རྩ་བ་དང་བཅས་པ་ཐམས་ཅད་བློས་ལིངས་ཀྱིས་ཕུད་དེ་གོས་གཡོགས་པ་ལྟར་དེ་ལ་བྱིན་པས་དེ་ཉིད་བདེ་ཞིང་སྐྱིད། སེམས་ཅན་དེའི་སྡུག་བསྔལ་དང་ཉེས་པ་ཅི་ཡོད་པ་ཐམས་ཅད་ཚུར་བླངས་ཏེ། རང་གི་སྟེང་དུ་བཞག་པས་རང་སྡུག་བསྔལ་བ་དང་གཞན་སྡུག་བསྔལ་བ་དང་བྲལ་བ་ལ་དགའ་བ་བསྐྱེད་དེ་དང་དུ་བླངས་པ་ནི་གོས་བརྗེ་བ་ལྟར་བྱ་ཞིང་། དེ་ལྟར་འབྱོང་དུས་དབུགས་ཕར་རྒྱུ་བ་ན་བདག་གི་བདེ་བ་སེམས་ཅན་ལ་སྦྱིན། ཚུར་རྔུབ་དུས་སེམས་ཅན་གྱི་སྡུག་བསྔལ་ཚུར་དང་དུ་བླང་སྟེ་སྦྱངས། དེ་ལྟར་སེམས་ཅན་གཅིག་ནས་ཐམས་ཅད་ཀྱི་རབ་དུ་གཏོང་ལེན་སྤེལ་མར་བྱ། མཐར་བུ་གཅིག་པའི་མ་བུ་ལ་བརྩེ་བ་བཞིན་དུ་བདག་འཁོར་བར་གནས་རུང་། ན་རུང་། ཤི་རུང་། ཉམས་ཉེས་ཅི་བྱུང་ཡང་བཟོད་ཀྱི། མ་སེམས་ཅན་འདི་རྣམས་འཁོར་བར་འཁྱམས་ཤིང་སྡུག་བསྔལ་བ་ག་ལ་བཟོད་སྙམ་དུ་བརྩེ་སེམས་ཐུན་མོང་མ་ཡིན་པ་བསྐྱེད་ཅིང་། སེམས་ཅན་ཐམས་ཅད་ཀྱི་གཉེར་ཁ་ང་ལ་ཡོད་སྙམ་དུ། དགྲ་གཉེན་བར་མའི་འགྲོ་བ་གང་ཅི་མཐོང་བ་དང་ཐོས་པའི་སེམས་ཅན་རྣམས་ཀྱིས་མཚོན་ནས་ནམ་མཁའི་མཐར་ཁྱབ་པའི་སེམས་ཅན་ཐམས་ཅད་ལ་ལྷག་པའི་བྱང་ཆུབ་སེམས་ཀྱིས་བལྟ་ཞིང་གོམས་པར་བྱ་བ་ཅི་ནས་གལ་ཆེའོ། །ཐུན་རྗེས་སུ་འཁོར་གསུམ་ཡོངས་སུ་དག་པའི་ཚུལ་གྱིས་བསྔོ་བས་རྒྱས་གདབ་པར་བྱ་ཞིང་། ཐུན་མཚམས་རྣམས་སུའང་དེའི་ཉམས་བསྐྱངས་ཤིང་རྟག་ཏུ་སེམས་ཅན་ལ་ཕན་པར་བརྩོན་པ་དང་། ཁྱད་པར་སངས་རྒྱས་ཕལ་པོ་ཆེའི་སྤྱོད་ཡུལ་ཡོངས་སུ་དག་པ་ལས་གསུངས་པ། བྱང་ཆུབ་སེམས་དཔའ་ཁང་བུའི་ནང་དུ་འཇུག་པའི་ཚེ། སེམས་ཅན་ཐམས་ཅད་ཀྱིས་ཐར་པའི་གྲོང་ཁྱེར་ཐོབ་པར་གྱུར་ཅིག་སྙམ་དུ་སེམས་བསྐྱེད་དོ། །དེ་བཞིན་དུ། ཉལ་བའི་ཚེ་སངས་རྒྱས་ཀྱི་ཆོས་ཀྱི་སྐུ་ཐོབ་པར་གྱུར་ཅིག རྨི་ལམ་རྨིས་པ་ན་ཆོས་ཐམས་ཅད་རྨི་ལམ་ལྟ་བུར་རྟོགས་པར་གྱུར་ཅིག གཉིད་སད་པ་ན་མ་རིག་པ་ལས་སད་པར་གྱུར་ཅིག ལྡང་བ་ན་སངས་རྒྱས་ཀྱི་གཟུགས་སྐུ་ཐོབ་པར་གྱུར་ཅིག གོས་གྱོན་པ་ན་ངོ་ཚ་ཁྲེལ་ཡོད་ཀྱི་གོས་གྱོན་པར་གྱུར་ཅིག སྐ་རགས་འཆིང་བ་ན་དགེ་བའི་རྩ་བ་དང་འབྲེལ་བར་གྱུར་ཅིག སྟན་ལ་འདུག་པ་ན་རྡོ་རྗེའི་གདན་ཐོབ་པར་གྱུར་ཅིག རྒྱབ་བརྟེན་པ་ན་བྱང་ཆུབ་ཀྱི་ཤིང་ཐོབ་པར་གྱུར་ཅིགམེ་བཏང་བ་ན་ཉོན་མོངས་པའི་བུད་ཤིང་བསྲེག་པར་གྱུར་ཅིག མེ་འབར་བ་ན་ཡེ་ཤེས་ཀྱི་མེ་འབར་བར་གྱུར་ཅིག གཡོས་ཟིན་པ་ན་ཡེ་ཤེས་ཀྱི་བདུད་རྩི་ཐོབ་པར་གྱུར་ཅིག ཁ་ཟས་བཟའ་བ་ན་བསམ་གཏན་གྱི་ཟས་ཐོབ་པར་གྱུར་ཅིག ཕྱིར་འགྲོ་བ་ན་འཁོར་བའི་གྲོང་ལས་ཐར་བར་གྱུར་ཅིག སྐས་ལ་འབབ་པ་ན་སེམས་ཅན་གྱི་དོན་ལ་འཁོར་བར་འཇུག་པར་གྱུར་ཅིག སྒོ་འབྱེད་པ་ན་ཐར་པའི་གྲོང་གི་སྒོ་འབྱེད་པར་འགྱུར་ཅིག སྒོ་གཅོད་པ་ན་ངན་སོང་གི་སྒོ་གཅོད་པར་གྱུར་ཅིག ལམ་དུ་འཇུག་པ་ན་འཕགས་པའི་ལམ་དུ་འཇུག་པར་གྱུར་ཅིག གྱེན་ལ་འགྲོ་བ་ན་སེམས་ཅན་ཐམས་ཅད་མཐོ་རིས་ཀྱི་བདེ་བ་ལ་འགོད་པར་གྱུར་ཅིག ཐུར་ལ་འབབ་པ་ན་ངན་སོང་གསུམ་རྒྱུན་གཅོད་པར་གྱུར་ཅིག སེམས་ཅན་དང་ཕྲད་པ་ན་སངས་རྒྱས་དང་མཇལ་བར་གྱུར་ཅིག རྐང་པ་འཇོག་པ་ན་སེམས་ཅན་ཐམས་ཅད་ཀྱི་དོན་ལ་འགྲོ་བར་གྱུར་ཅིག རྐང་པ་འདེགས་པ་ན་འཁོར་བ་ནས་འདོན་པར་གྱུར་ཅིག རྒྱན་དང་ལྡན་པ་མཐོང་ན་མཚན་དཔེའི་རྒྱན་ཐོབ་པར་གྱུར་ཅིག རྒྱན་མེད་པ་མཐོང་ན་སྦྱངས་པའི་ཡོན་ཏན་དང་ལྡན་པར་གྱུར་ཅིག སྣོད་གང་བ་མཐོང་ན་ཡོན་ཏན་གྱིས་གང་བར་གྱུར་ཅིག སྟོང་པ་མཐོང་ན་སྐྱོན་གྱིས་སྟོང་པར་གྱུར་ཅིག སེམས་ཅན་དགའ་བ་མཐོང་ན་ཆོས་ལ་དགའ་བར་གྱུར་ཅིག མི་དགའ་བར་མཐོང་ན་འདུས་བྱས་ཀྱི་དངོས་པོ་ལ་མི་དགའ་བར་གྱུར་ཅིག སེམས་ཅན་བདེ་བ་མཐོང་ན་སངས་རྒྱས་ཀྱི་བདེ་བ་ཐོབ་པར་གྱུར་ཅིག སྡུག་བསྔལ་བ་མཐོང་ན་སེམས་ཅན་གྱི་སྡུག་བསྔལ་ཐམས་ཅད་ཞི་བར་གྱུར་ཅིག ནད་པ་མཐོང་ན་ནད་ལས་གྲོལ་བར་གྱུར་ཅིག དྲིན་དུ་གཟོ་བ་མཐོང་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་དྲིན་ལན་ལྡོན་པར་གྱུར་ཅིག དྲིན་དུ་མི་གཟོ་བ་མཐོང་ན་ལྟ་བ་ལོག་པ་ལ་དྲིན་དུ་མི་གཟོ་བར་གྱུར་ཅིག རྒོལ་བ་མཐོང་ན་ཕས་ཀྱི་རྒོལ་བ་ཐམས་ཅད་ཚར་གཅོད་ནུས་པར་གྱུར་ཅིག བསྟོད་པ་མཐོང་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བསྟོད་པར་གྱུར་ཅིག ཆོས་ཀྱི་གཏམ་བྱེད་པ་མཐོང་ན་སངས་རྒྱས་ཀྱི་སྤོབས་པ་ཐོབ་པར་གྱུར་ཅིག སྐུ་གཟུགས་མཐོང་ན་སངས་རྒྱས་ཐམས་ཅད་མཐོང་བ་ལ་སྒྲིབ་པ་མེད་པར་གྱུར་ཅིག མཆོད་རྟེན་མཐོང་ན་འགྲོ་བ་ཐམས་ཅད་ཀྱི་མཆོད་རྟེན་དུ་འགྱུར་བར་གྱུར་ཅིག ཚོང་བྱེད་པར་མཐོང་ན་འཕགས་པའི་ནོར་བདུན་ཐོབ་པར་གྱུར་ཅིག ཕྱག་འཚལ་བ་མཐོང་ན་ལྷ་དང་བཅས་པའི་འཇིག་རྟེན་གྱིས་སྤྱི་གཙུག་པ་བལྟར་མི་མངོན་པ་ཐོབ་པར་གྱུར་ཅིག་སྙམ་དུ་སེམས་བསྐྱེད་པར་བྱའོ། །ཞེས་གསུངས་པ་དང་། གཞན་ཡང་། སྐྱེས་བུ་ཆེན་པོའི་རྣམ་རྟོག་བརྒྱད་བསྒོམ་པར་བྱ་སྟེ། བདག་གིས་དུས་ནམ་ཞིག་ན་སེམས་ཅན་ཐམས་ཅད་ཀྱི་སྡུག་བསྔལ་སེལ་ནུས་པར་འགྱུར་སྙམ་པ་དང་། དེ་བཞིན་དུ་ནམ་ཞིག་དབུལ་བས་ཉེན་པའི་སེམས་ཅན་རྣམས་བདག་གིས་འབྱོར་པ་ཆེན་པོ་ལ་འཇོག་ནུས་སྙམ་པ་དང་། ནམ་ཞིག་ཤ་ཁྲག་དང་བཅས་པའི་ལུས་འདིས་སེམས་ཅན་གྱི་དོན་བྱེད་ནུས་སྙམ་པ་དང་། ནམ་ཞིག་བདག་དམྱལ་བར་ཡུན་རིང་དུ་གནས་ནས་ཀྱང་སེམས་ཅན་ལ་ཕན་འདོགས་ནུས་སྙམ་པ་དང་། ནམ་ཞིག་འཇིག་རྟེན་དང་འཇིག་རྟེན་ལས་འདས་པའི་འབྱོར་པ་ཆེན་པོས་སེམས་ཅན་གྱི་རེ་བ་རྫོགས་པར་བྱེད་ནུས་སྙམ་པ་དང་། ནམ་ཞིག་བདག་སངས་རྒྱས་སུ་གྱུར་ནས་སེམས་ཅན་གྱི་སྡུག་བསྔལ་ཐམས་ཅད་ངེས་པར་འབྱིན་ནུས་སྙམ་པ་དང་། བདག་དུས་ནམ་དུ་ཡང་སེམས་ཅན་ལ་མི་ཕན་པའི་སྐྱེ་བ་དང་། དོན་དམ་པའི་རོ་ལ་གཅིག་ཏུ་སྤྱོད་པ་དང་། སྐྱེ་བོ་ཐམས་ཅད་ལ་སེམས་དགའ་བར་མི་བྱེད་པའི་ཚིག་དང་། གཞན་ལ་མི་ཕན་པའི་འཚོ་བ་དང་ལུས་དང་ཤེས་རབ་དང་ནོར་དང་དབང་ཕྱུག་དང་ལྡན་པ་དང་། གཞན་ལ་གནོད་པ་བྱེད་པ་ལ་དགའ་བར་ཚེ་རབས་ཐམས་ཅད་དུ་མ་གྱུར་ཅིག་སྙམ་པ་དང་། སེམས་ཅན་གྱི་སྡིག་པའི་འབྲས་བུ་བདག་ལ་སྨིན་ཅིང་། བདག་གི་དགེ་བའི་འབྲས་བུ་སེམས་ཅན་ལ་སྨིན་ནས་སེམས་ཅན་ཐམས་ཅད་བདེ་བར་གྱུར་ཅིག་སྙམ་དུ་བསམ་པར་བྱའོ། །གཞན་ཡང་བྱང་ཆུབ་སེམས་དཔའ་འཕགས་པ་རྣམས་ཀྱི་སྨོན་ལམ་གྲངས་མེད་པ་འབུམ་ཕྲག་བཅུ་ཡང་སྨོན་ལམ་ཆེན་པོ་བཅུར་འདུ་བ་ཡིན་པས། འདི་ལྟར་སྨོན་ཅིང་སེམས་སྦྱང་བར་བྱ་སྟེ། སངས་རྒྱས་ཐམས་ཅད་ལ་མཆོད་པ་ཐམས་ཅད་ཀྱིས་མཆོད་པར་སྨོན་པ་ནི་དང་པོའོ། །དམ་པའི་ཆོས་ཐམས་ཅད་ཡོངས་སུ་བཟུང་ཞིང་བསྲུང་བར་སྨོན་པ་ནི་གཉིས་པའོ། །ཕྱོགས་བཅུའི་སངས་རྒྱས་རྣམས་ཀྱིས་མཛད་པ་ངོ་མཚར་ཅན་ཀྱི་དྲུང་དུ་ཐོགས་པ་མེད་པའི་ལུས་ཀྱིས་བདག་འགྲོ་ཞིང་བྱ་བ་ཁྱད་པར་ཅན་བྱེད་པར་སྨོན་པ་ནི་གསུམ་པའོ། །རྟག་ཏུ་བྱང་ཆུབ་སེམས་དཔའི་སྤྱོད་པ་ཐམས་ཅད་སྤྱོད་པར་སྨོན་པ་ནི་བཞི་པའོ། །བདག་གིས་སེམས་ཅན་ཐམས་ཅད་ཡོངས་སུ་སྨིན་པར་བྱེད་པར་སྨོན་པ་ནི་ལྔ་པའོ། །འཚང་རྒྱ་བར་འགྱུར་བའི་ཞིང་འཇིག་རྟེན་གྱི་ཁམས་མཐའ་ཡས་པ་འགྲུབ་པར་སྨོན་པ་ནི་དྲུག་པའོ། །མངོན་པར་སྒྲུབ་པའི་ཞིང་ཁམས་རྣམས་ཀྱང་མཐའ་ཡས་པ་བསམ་གྱིས་མི་ཁྱབ་པའི་སྤྱོད་ཡུལ་ཅན། བྱང་ཆུབ་སེམས་དཔའ་མཆོག་གིས་ག ང་བ་སོགས་དག་པ་རབ་འབྱམས་འབའ་ཞིག་ཏུ་སྦྱོང་བར་སྨོན་པ་ནི་བདུན་པའོ། །བྱང་ཆུབ་སེམས་དཔའ་ཐམས་ཅད་དང་བདག་ཉིད་བསམ་སྦྱོར་གཅིག་པར་སྨོན་པ་ནི་བརྒྱད་པའོ། །སྤྱོད་པ་དང་ཉམས་ལེན་ཐམས་ཅད་དོན་གྱི་མཆོག་ཁོ་ན་མཐའ་ཡས་པར་འགྲུབ་པར་སྨོན་པ་ནི་དགུ་པའོ། །ནམ་མཁའི་མཐར་གཏུགས་པ་ཐམས་ཅད་དུ་མཛད་པ་མཐའ་ཡས་པ་སྟོན་པའི་ཚུལ་གྱིས་མངོན་པར་རྫོགས་པའི་སངས་རྒྱས་པར་སྨོན་པ་ནི་བཅུ་པའོ། །དེ་ཐམས་ཅད་ཀྱང་མཐའ་ཐུག་པ་མེད་པའི་ཚུལ་གྱིས་འདུན་ཞིང་སྨོན་པ་དང་སེམས་སྦྱང་བར་བྱ་བ་ནི་ཐེག་པ་ཆེན་པོའི་ལམ་ཐམས་ཅད་ཀྱི་རྩ་བ་མེད་དུ་མི་རུང་བ་སྟེ། འཕགས་པ་བཟང་པོ་སྤྱོད་པ་ལས། ནམ་མཁའི་མཐར་ཐུག་གྱུར་པ་ཇི་ཙམ་པར། །སེམས་ཅན་མ་ལུས་མཐའ་ཡང་དེ་བཞིན་ཏེ། །ཇི་ཙམ་ལས་དང་ཉོན་མོངས་མཐར་གྱུར་པ། །བདག་གི་སྨོན་ལམ་མཐའ་ཡང་དེ་ཙམ་མོ། །ཞེས་གསུངས་ཤིང་། ཚུལ་འདི་ལྟ་བུ་ལ་ལན་གཅིག་ཙམ་དུ་དད་པ་སྐྱེས་པའང་བསོད་ནམས་ཚད་མེད་པའི་འཇུག་ངོགས་ཏེ། གང་ཡང་ཕྱོགས་བཅུའི་ཞིང་རྣམས་མཐའ་ཡས་པ། །རིན་ཆེན་བརྒྱན་ཏེ་རྒྱལ་བ་རྣམས་ལ་ཕུལ། །ལྷ་དང་མི་ཡི་བདེ་བ་མཆོག་རྣམས་ཀྱང་། །ཞིང་གི་རྡུལ་སྙེད་བསྐལ་པར་ཕུལ་བ་བས། །གང་གིས་བསྔོ་བའི་རྒྱལ་པོ་འདི་ཐོས་ནས། །བྱང་ཆུབ་མཆོག་གི་རྗེས་སུ་རབ་མོས་ཤིང་། །ལན་གཅིག་ཙམ་ཡང་དད་པ་བསྐྱེད་པ་ནི། །བསོད་ནམས་དམ་པའི་མཆོག་ཏུ་འདི་འགྱུར་རོ། །ཞེས་གསུངས་པ་ལྟར་བྱང་ཆུབ་སེམས་དཔའ་ཐབས་ལ་མཁས་པ་རྣམས་ཀྱིས་བསོད་ནམས་ཡོངས་སུ་སྡུད་པའི་ཏིང་ངེ་འཛིན་གྱི་མཆོག་བླ་ན་མེད་པ་ཡིན་ནོ། །གསུམ་པ་རྗེས་བསླབ་བྱ་སྲུང་ཚུལ་ཕན་ཡོན་དང་བཅས་བཤད་པ་ནི། དེ་ཡང་སྤྱིར་བྱང་ཆུབ་སེམས་དཔའི་བསླབ་བྱ་ཐམས་ཅད་གཞན་ཕན་གཞིར་བཅས་སྒྲུབ་པ་ལ་འདུ་བ་ཡིན་ཡང་། ད་ལྟ་རང་རེ་སོ་སྐྱེ་ལས་དང་པོ་པའི་སྐབས་འདིར་སྦྱོར་བས་དངོས་སུ་སེམས་ཅན་ལ་ཕན་ཐོགས་རྒྱ་ཆེན་པོ་འབྱུང་བར་དཀའ་ཞིང་བྱ་དཀའ་བའི་གནས་ལ་འཇུག་མི་ནུས་ནའང་། གཙོ་བོར་ཀུན་སློང་གི་བསམ་པ་གཞན་ཕན་འབའ་ཞིག་ཁོང་དུ་བཅུག་ནས། སྦྱོར་བ་རང་རྒྱུད་ཀྱི་ཉེས་སྤྱོད་སྡོམ་ཞིང་དགེ་ཆོས་སྤེལ་བའི་སྒོ་ནས་རང་གི་རྒྱུད་ཀྱི་འཆིང་བ་གྲོལ་བའི་ཐབས་ལ་བརྩོན་པས་དེས་གཞན་དོན་ཡང་ཞར་ལ་འགྲུབ། ནམ་འཕགས་ས་ཐོབ་ནས་གཞན་དོན་ནུས་པའི་སྐབས་སུ་སྐད་ཅིག་ཀྱང་མི་གཡེལ་བར་བསམ་སྦྱོར་གཉིས་ཀ་གཞན་ཕན་འབའ་ཞིག་སྒྲུབ་པས་དེས་རང་དོན་དུ་སྤངས་རྟོགས་ཀྱང་ཞར་ལ་རྫོགས་ནས། མཐར་ཕྱིན་སངས་རྒྱས་ཀྱི་ས་ན་རང་གཞན་གྱི་དོན་གཉིས་འབད་མེད་ལྷུན་གྲུབ་ཀྱི་ཚུལ་དུ་འབྱུང་བས་ན། རང་གི་ལུས་དང་ལོངས་སྤྱོད་དགེ་ཚོགས་བཅས་ནུས་པ་དང་འཚམ་པར་བཏང་བསྲུང་དག་པ་སྤེལ་བའི་ཚུལ་ལ་མཁས་པར་བྱ་ཞིང་། དེ་ལ་དབྱེ་ན་བཞི། བསྲུང་བྱའི་བསླབ་པ་ངོས་བཟུང་བ། དེ་ཉིད་མི་ཉམས་པར་ཇི་ལྟར་སྲུང་བའི་ཚུལ། ཉམས་ན་ཉེས་དམིགས་དང་གསོ་ཚུལ་བསྟན་པ། དེ་ལྟར་བསླབ་པའི་ཕན་ཡོན་བསྟན་པའོ། །དང་པོ་ལ་གཉིས། བསླབ་བྱ་རྒྱས་པར་དབྱེ་བ་དང་། བསྡུས་ཏེ་བསྟན་པའོ། །དེའི་དང་པོ་ལ་གཉིས། སྨོན་པའི་བསླབ་བྱ་དང་། འཇུག་པའི་བསླབ་བྱའོ། །དང་པོ་ནི། བྱང་ཆུབ་སེམས་དཔའ་ཟླ་འོད་གཞོན་ནུས། སེམས་ཅན་བློས་མི་གཏོང་བ་དང་། །སེམས་དེའི་ཕན་ཡོན་དྲན་བྱ་དང་། །ཚོགས་གཉིས་གསོག་པར་བྱ་བ་དང་། །ཡང་ཡང་བྱང་སེམས་སྦྱོང་བ་དང་། །དཀར་ནག་ཆོས་བརྒྱད་བླང་དོར་ཏེ། །ལྔ་པོས་སྨོན་པའི་བསླབ་བྱ་བསྡུས། །ཞེས་གསུངས་ཏེ། དེ་ལ་དང་པོ་སེམས་ཅན་བློས་མི་འདོར་བ་ནི། བྱང་ཆུབ་ཀྱི་སེམས་རིན་པོ་ཆེ་དེ་ཉིད་མི་འཆོར་བའི་ཐབས་སམ་རྒྱུའི་གཙོ་བོ་སྟེ། མ་དྲོས་པས་ཞུས་པའི་མདོ་ལས། བྱང་ཆུབ་སེམས་དཔའ་ཆོས་གཅིག་དང་ལྡན་ན། རྣམ་པ་ཐམས་ཅད་ཀྱི་མཆོག་དང་ལྡན་པའི་སངས་རྒྱས་ཀྱི་ཆོས་རྣམས་ཡོངས་སུ་འཛིན་ཏེ། ཆོས་གཅིག་པོ་གང་ཞེ་ན། སེམས་ཅན་བློས་ཡོངས་སུ་མི་བཏང་བའི་སེམས་སོ། །ཞེས་སོ། །གཉིས་པ་བྱང་ཆུབ་སེམས་ཀྱི་ཕན་ཡོན་དྲན་པ་ནི། བྱང་ཆུབ་ཀྱི་སེམས་དེ་མི་ཉམས་པའི་ཐབས་ཡིན་པས་རྒྱས་པར་སྡོང་པོ་བཀོད་པ་སོགས་ལས་གསུངས་པ་དང་། བསྡུ་ན་བྱམས་སྨོན་ལས་གསུངས་པ་འདི་ལྟ་བུ་དུས་རྒྱུན་དུ་ངག་ཏུ་བརྗོད་ཅིང་བསམ་པར་བྱ་བ་སྟེ། ངན་སོང་ཐམས་ཅད་ཟློག་བགྱིད་ཅིང་། །མཐོ་རིས་ལམ་ནི་རབ་སྟོན་ལ། །རྒ་ཤི་མེད་པར་འདྲེན་བགྱིད་པའི། །བྱང་ཆུབ་སེམས་ལ་ཕྱག་འཚལ་ལོ། །ཞེས་སོ། །གསུམ་པ་དུས་རྒྱུན་དུ་བསོད་ནམས་དང་ཡེ་ཤེས་ཀྱི་ཚོགས་བསགས་པ་ནི། བྱང་ཆུབ་ཀྱི་སེམས་དེའི་སྟོབས་བསྐྱེད་པའི་ཐབས་ཏེ། ཚོགས་ཀྱི་གཏམ་ལས། དེ་རིང་བདག་གི་བསོད་ནམས་དང་། །ཡེ་ཤེས་ཚོགས་ནི་གང་བྱ་དང་། །སེམས་ཅན་ཕན་པ་གང་བྱ་ཞེས། །བྱང་ཆུབ་སེམས་དཔས་རྟག་ཏུ་བསམ། །ཞེས་སོ། །བཞི་པ་ཡང་ནས་ཡང་དུ་བྱང་ཆུབ་ཀྱི་སེམས་སྦྱོང་བ་ནི། བྱང་ཆུབ་ཀྱི་སེམས་དེ་གོང་ནས་གོང་དུ་འཕེལ་བའི་ཐབས་ཏེ། བྱམས་སོགས་ཚད་མེད་བཞི་ལ་བློ་སྦྱོང་བ་དང་བདག་གཞན་མཉམ་བརྗེའི་བྱང་ཆུབ་ཀྱི་སེམས་བསྒོམ་པ་དང་ཉིན་མཚན་དུས་དྲུག་ཏུ་བྱང་སྡོམ་རང་སྟོབས་ཀྱིས་ལེན་པ་རྣམས་ཏེ། ཀུན་མཁྱེན་ཆོས་རྗེས། འགྲོ་བའི་སྡུག་བསྔལ་བདག་གིས་བླང་བྱ་ཞིང་། །བདག་གི་བདེ་བས་འགྲོ་བ་བདེ་འགྱུར་ཏེ། །བྱང་ཆུབ་བར་དུ་དེ་དང་མི་འབྲལ་ཤོག །སྙམ་དུ་གཏོང་ལེན་སྤེལ་མར་སྤྱད་བྱ་ཞིང་། །སྨོན་པའི་བསླབ་བྱ་ཚད་མེད་བཞི་པོ་བསྒོམ། །དེ་ཡི་མི་མཐུན་ཕྱོགས་སྤངས་སེམས་བསྲུང་བྱ། །ཞེས་དང་། རྒྱལ་སྲས་ཞི་བ་ལྷས། བདག་བདེ་གཞན་གྱི་སྡུག་བསྔལ་དག །ཡང་དག་བརྗེ་བར་མ་བྱས་ན། །སངས་རྒྱས་ཉིད་དུ་མི་འགྲུབ་ཅིང་། །འཁོར་བ་ན་ཡང་བདེ་བ་མེད། །ཅེས་སོ། །ཞིབ་པར་ཁོ་བོས་བྱས་པའི་བློ་སྦྱོང་གི་གཞུང་དུ་གསལ་ལོ། །དུས་དྲུག་ཏུ་སེམས་བསྐྱེད་ལེན་ཚུལ་ཡང་། བྱང་མཆིས་མ་ལྟ་བུ་སྤྱི་ལྟར་དང་། བསྡུ་ན་སངས་རྒྱས་ཆོས་ཚོགས་མ་ཙམ་གྱིས་བྱ་སྟེ་ཚིག་འདི་ནི་ཇོ་བོས་མཛད་པའི་སེམས་བསྐྱེད་ཆོ་ག་ལས་ཀྱང་གསུངས་ལ་བླ་མའི་དམར་ཁྲིད་ནས་ཀྱང་འབྱུང་ངོ་། །ལྔ་པ་དཀར་ནག་ཆོས་བརྒྱད་ལ་བླང་དོར་བྱ་བ་ནི། བྱང་ཆུབ་ཀྱི་སེམས་དེ་ཉིད་ཚེ་རབས་ཐམས་ཅད་དུ་མི་བརྗེད་པའི་ཐབས་ཏེ། དེ་ལ་སྤང་བྱ་ནག་པོའི་ཆོས་བཞི་ནི། དཀོན་མཆོག་བརྩེགས་པར་འོད་སྲུང་གིས་ཞུས་པའི་ལེའུ་ལས། འོད་སྲུང་། ཆོས་བཞི་དང་ལྡན་ན་བྱང་ཆུབ་ཀྱི་སེམས་བརྗེད་པར་འགྱུར་ཏེ། བཞི་གང་ཞེ་ན། བླ་མ་དང་མཆོད་པར་འོས་པ་བསླུ་བ་དང་། གཞན་འགྱོད་པའི་གནས་མ་ཡིན་པ་ལ་འགྱོད་པ་བསྐྱེད་པ་དང་། སེམས་སྐྱེད་པའི་བྱང་ཆུབ་སེམས་དཔའ་ལ་སྡང་སེམས་ཀྱིས་སྐྱོན་ནས་བརྗོད་པ་དང་། སེམས་ཅན་ལ་གཡོ་སྒྱུས་སྤྱོད་པའོ། །ཞེས་སོ། །འདི་བཞི་བྱུང་ནས་གཉེན་པོས་མ་བསླེབས་པར་ཉིན་ཞག་གཅིག་འདས་ན་སྨོན་སེམས་ཀྱི་སྡོམ་པར་འཆོར་བར་བླ་མའི་དམར་ཁྲིད་ལས་གསུངས། དེ་བཞི་ལས་ལྡོག་པ་ནི། དཀར་པོའི་ཆོས་བཞི་ཡིན་པས་སོ་སོའི་གཉེན་པོར་བརྟེན་ཅིང་སྒྲུབ་པར་བྱ་སྟེ། མདོ་དེ་ཉིད་ལས། འོད་སྲུང་ཆོས་བཞི་དང་ལྡན་ན་བྱང་ཆུབ་ཀྱི་སེམས་བརྗེད་པར་མི་འགྱུར་ཏེ། བཞི་གང་ཞེ་ན། ཤེས་བཞིན་དུ་རྫུན་དུ་མི་སྨྲ་བ་དང་། བྱང་ཆུབ་སེམས་དཔའ་ལ་སྟོན་པའི་འདུ་ཤེས་སྐྱེད་པ་དང་། སེམས་ཅན་ལ་གཡོ་སྒྱུ་མེད་པར་ལྷག་པའི་བསམ་པ་ལ་གནས་པ་དང་། སེམས་ཅན་ཐམས་ཅད་ཐེག་པ་ཆེན་པོ་ལ་ཡང་དག་པར་འགོད་པའོ། །ཞེས་སོ། །གཞན་ཡང་བྱང་ཆུབ་སེམས་དེ་བརྟན་པའི་ཐབས་སུ་འདུ་ཤེས་བཞི་བསྐྱེད་པར་བྱ་སྟེ། ཏིང་འཛིན་རྒྱལ་པོ་ལས། གཞོན་ནུ། འདུ་ཤེས་བཞི་དང་ལྡན་ན་བྱང་ཆུབ་ཀྱི་སེམས་བརྟན་པོར་འགྱུར་ཏེ། བཞི་གང་ཞེན། ཡང་དག་པའི་དགེ་བའི་བཤེས་གཉེན་ལ་སངས་རྒྱས་ཀྱི་འདུ་ཤེས་དང་། དེས་བསྟན་པའི་ཆོས་ལ་ལམ་གྱི་འདུ་ཤེས་དང་། དེ་བསྒྲུབ་པ་རྣམས་ལ་ལམ་གྲོགས་ཀྱི་འདུ་ཤེས་དང་། སེམས་ཅན་ཐམས་ཅད་ལ་བུ་གཅིག་པའི་འདུ་ཤེས་སོ། །ཞེས་སོ། །དེས་ན་ཀུན་མཁྱེན་ཆོས་རྗེས། མདོར་ན་ནག་པོའི་ཆོས་བཞི་སྤང་བྱ་ཞིང་། །དཀར་པོའི་ཆོས་བཞིི་དག་ལ་ནན་ཏན་བྱ། །ཞེས་གསུངས་སོ། །གཉིས་པ་ནི། ཀུན་མཁྱེན་བླ་མས། འཇུག་པའི་བསླབ་བྱ་ཕ་རོལ་ཕྱིན་དྲུག་སྤྱད། །དེ་ཡི་མི་མཐུན་ཕྱོགས་སྤང་བརྩོན་པར་བྱ། །ཞེས་དང་། མཉམ་མེད་སྒམ་པོ་པས། སྦྱིན་དང་ཚུལ་ཁྲིམས་བཟོད་པ་དང་། །བརྩོན་འགྲུས་བསམ་གཏན་ཤེས་རབ་སྟེ། །དེ་ལྟར་རྣམ་པ་དྲུག་པོ་འདིས། །འཇུག་པའི་སེམས་བསྐྱེད་བསླབ་བྱ་བསྡུས། །ཞེས་དང་། ལག་བཟང་གིས་ཞུས་པའི་མདོ་ལས། བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་མངོན་པར་རྫོགས་པར་བྱང་ཆུབ་པར་བྱ་བའི་ཕྱིར། ཕ་རོལ་དུ་ཕྱིན་པ་དྲུག་པོ་འདི་དག་ལ་རྟག་ཏུ་རྒྱུན་དུ་ཡོངས་སུ་རྫོགས་པར་བྱའོ། །དྲུག་གང་ཞེ་ན། འདི་ལྟ་སྟེ། སྦྱིན་པའི་ཕ་རོལ་དུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་དུ་ཕྱིན་པ་དང་། བཟོད་པའི་ཕ་རོལ་དུ་ཕྱིན་པ་དང་། བརྩོན་འགྲུས་ཀྱི་ཕ་རོལ་དུ་ཕྱིན་པ་དང་། བསམ་གཏན་གྱི་ཕ་རོལ་དུ་ཕྱིན་པ་དང་། དྲུག་པ་ཤེས་རབ་ཀྱི་ཕ་རོལ་དུ་ཕྱིན་པ་སྟེ། ཞེས་གསུངས། འདི་ལ་གཉིས། རྣམ་གཞག་སྤྱིར་བསྟན་པ་དང་། ཡན་ལག་ཕྱེ་སྟེ་རྒྱས་པར་བཤད་པའོ། །དང་པོ་ནི། རྗེ་སྒམ་པོ་པས། གྲངས་ངེས་གོ་རིམ་ངེས་པ་དང་། །མཚན་ཉིད་དང་ནི་ངེས་ཚིག་དང་། །རབ་ཏུ་དབྱེ་དང་བསྡུ་བ་སྟེ། །དྲུག་གིས་ཕ་རོལ་ཕྱིན་དྲུག་བསྡུས། །ཞེས་གསུངས་ཏེ། དེ་ལ་གྲངས་ངེས་ནི། མངོན་མཐོ་དང་ངེས་ལེགས་གཉིས་ཀྱི་དབང་དུ་བྱས་ཏེ། ལོངས་སྤྱོད་ཀྱི་དོན་དུ་སྦྱིན་པ། ལུས་ཀྱི་དོན་དུ་ཚུལ་ཁྲིམས། འཁོར་གྱི་དོན་དུ་བཟོད་པ་སྟེ་མངོན་མཐོའི་དོན་དུ་གསུམ་དང་། ཡོན་ཏན་འཕེལ་བར་བྱེད་པའི་དོན་དུ་བརྩོན་འགྲུས། ཞི་གནས་ཀྱི་དོན་དུ་བསམ་གཏན། ལྷག་མཐོང་གི་དོན་དུ་ཤེས་རབ་སྟེ། ངེས་ལེགས་ཀྱི་དོན་དུ་གསུམ་བཅས་དྲུག་ཏུ་ངེས་ཏེ། མདོ་རྒྱན་ལས། ལོངས་སྤྱོད་དང་ལུས་ཕུན་སུམ་ཚོགས་པ་དང་། །འཁོར་ནི་ཕུན་སུམ་ཚོགས་པ་མངོན་མཐོ་དང་། །ཞེས་སོགས་ཀྱིས་བསྟན་པ་བཞིན་དང་། ཡང་ན་བྱང་ཆུབ་སེམས་ཀྱི་སྒྲུབ་པའི་ཆོས་ཐམས་ཅད་བསླབ་པ་གསུམ་དུ་འདུ་བ་ལ་ལྟོས་ནས་དྲུག་ཏུ་གྲངས་ངེས་ཏེ། སྦྱིན་པ་རྒྱུ་དང་ཚུལ་ཁྲིམས་ངོ་བོ་དང་བཟོད་པ་ཁྱད་པར་རམ་འབྲས་བུའི་སྒོ་ནས་དེ་གསུམ་ཚུལ་ཁྲིམས་ཀྱི་བསླབ་པ་དང་། བསམ་གཏན་ནི་ཏིང་ངེ་འཛིན་དང་། ཤེས་རབ་ནི་ལྷག་པ་ཤེས་རབ་ཀྱི་བསླབ་པ་དངོས་ཏེ། བརྩོན་འགྲུས་ནི་དེ་ཐམས་ཅད་ཀྱི་གྲོགས་སུ་འགྱུར་བས་ཏེ། དེ་ལས། བསླབ་གསུམ་དབང་དུ་མཛད་ནས་ནི། །རྒྱལ་བས་ཕ་རོལ་ཕྱིན་པ་དྲུག །ཡང་དག་བཤད་དེ་དང་པོ་གསུམ། །ཐ་མ་གཉིས་ཀྱི་རྣམ་པ་གཉིས། །གཅིག་ནི་གསུམ་ཆར་ལ་ཡང་གཏོགས། །ཞེས་སོ། །གོ་རིམ་ནི། སྦྱིན་པས་ལུས་ལོངས་སྤྱོད་ལ་མི་ལྟ་ན་ཚུལ་ཁྲིམས་ལེན། དགེ་སྦྱོང་གི་ཆོས་བཞི་དང་ལྡན་པ་ལས་བཟོད་པ་འབྱུང་། བཟོད་པ་དང་ལྡན་ན་བརྩོན་འགྲུས་བརྩམས་ནུས། བརྩོན་འགྲུས་བརྩམས་ན་ཏིང་ངེ་འཛིན་སྐྱེ། ཏིང་ངེ་འཛིན་ལ་སེམས་མཉམ་པར་བཞག་ན་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པར་འབྱུང་བས་རྒྱུ་འབྲས་ཀྱི་གོ་རིམ་དང་། ཡང་ཚུལ་ཁྲིམས་ཀྱི་གཏམ་ལས། རྒྱ་མཚོ་དང་ནི་གླང་རྗེས་ཀྱི། །ཁྱད་པར་དག་ནི་གང་ཡིན་པ། །སྦྱིན་པ་དང་ནི་ཚུལ་ཁྲིམས་ཀྱི། །ཁྱད་པར་དག་ནི་དེ་ཡིན་ནོ། །ཞེས་པ་ལྟར་སྔ་མ་དམན་ལ་ཕྱི་མ་མཆོག་ཡིན་པས་དམན་མཆོག་གི་གོ་རིམ་དང་། སྦྱིན་པ་ཤན་པ་རྣམས་དང་ནི། །རིགས་ངན་དག་ཀྱང་སྦྱིན་པར་བྱེད། །གང་ཡང་རུང་བའི་ཚུལ་ཁྲིམས་ནི། །ཡོངས་སུ་བསྲུང་བར་མི་ནུས་སོ། །ཞེས་སོགས་གསུངས་པ་བཞིན་སྔ་མ་རྣམས་རགས་པས་སྒྲུབ་སླ་ལ་ཕྱི་མ་རྣམས་ཕྲ་བས་སྒྲུབ་དཀའ་བའི་ཕྱིར་ཏེ། མདོ་རྒྱན་ལས། སྔ་མ་ལ་བརྟེན་ཕྱི་མ་སྐྱེ། །དམན་དང་མཆོག་ཏུ་གནས་ཕྱིར་དང་། །རགས་པ་དང་ནི་ཕྲ་བའི་ཕྱིར། །དེ་དག་རིམ་བཞིན་བསྟན་པ་ཡིན། །ཞེས་སོ། །མཚན་ཉིད་ནི། ཁྱད་ཆོས་བཞི་ལྡན་ཏེ། སྦྱིན་སོགས་རང་རང་གི་མི་མཐུན་ཕྱོགས་སེར་སྣ་སོགས་ཉམས་པར་བྱེད་པ་དང་། གྲོགས་འཁོར་གསུམ་དུ་རྣམ་པར་མི་རྟོག་པའི་ཡེ་ཤེས་ཀྱིས་ཟིན་པ་དང་། བྱེད་ལས་ཐབས་དེས་སེམས་ཅན་གཞན་གྱི་འདོད་པ་ཐམས་ཅད་ཡོངས་སུ་རྫོགས་པར་བྱེད་པ་དང་། ཐབས་དེས་གདུལ་བྱའི་རྒྱུད་སྐལ་བ་དང་འཚམ་པར་ཡོངས་སུ་སྨིན་པར་བྱེད་པ་རྣམས་ཏེ། དེ་ཉིད་ལས། སྦྱིན་པ་མི་མཐུན་ཕྱོགས་ཉམས་དང་། །རྣམ་པར་མི་རྟོག་ཡེ་ཤེས་ལྡན། །འདོད་པ་ཐམས་ཅད་ཡོངས་རྫོགས་བྱེད། །སེམས་ཅན་རྣམ་སྨིན་བྱེད་རྣམ་གསུམ། །ཞེས་དང་། དེ་བཞིན་དུ་ཚུལ་ཁྲིམས་སོགས་ལའང་སྦྱར་ཏེ་གསུངས་སོ། །ངེས་ཚིག་ནི། ཐུན་མོང་དུ་འཇིག་རྟེན་པ་དང་ཉན་རང་གི་དགེ་བ་ཀུན་ལས་ཕུལ་དུ་བྱུང་ཞིང་སྲིད་ཞི་གཉིས་ཀའི་ཕ་རོལ་དུ་འགྲོ་བས་ན་ཕ་རོལ་ཕྱིན་པའོ། །བྱེ་བྲག་ཏུ་དབུལ་བ་འདོར་བར་བྱེད་པས་སྦྱིན་པ། བསིལ་བ་ཐོབ་པར་བྱེད་པས་ཚུལ་ཁྲིམས། ཁྲོ་བ་བཟོད་པས་བཟོད་པ། མཆོག་གམ་དགེ་ལ་སྦྱོར་བས་བརྩོན་འགྲུས། ཡིད་ནང་དུ་འཛིན་པས་བསམ་གཏན། དོན་དམ་པའི་གནས་ལུགས་ཤེས་པས་ཤེས་རབ་སྟེ། དེ་ཉིད་ལས། དབུལ་བ་འདོར་བར་བྱེད་པ་དང་། །བསིལ་བ་ཐོབ་དང་ཁྲོ་བཟོད་དང་། །མཆོག་སྦྱོར་བ་དང་ཡིད་འཛིན་དང་། །དོན་དམ་ཤེས་པའི་ཕྱིར་བཤད་དོ། །ཞེས་སོ། །དབྱེ་ན། སྦྱིན་སོགས་དྲུག་པོ་རེ་རེ་ལའང་དྲུག་རེ་དབྱེ་སྟེ། གཞན་ཕ་རོལ་དུ་ཕྱིན་པ་དྲུག་ལ་འགོད་པ་སྦྱིན་པའི་སྦྱིན་པ་སོགས་སོ་སོའི་སྦྱིན་པ་དང་། དེ་བཞིན་དུ་རང་རང་གི་མི་མཐུན་ཕྱོགས་སེར་སྣ་ཚུལ་འཆལ་ཁོང་ཁྲོ་རྣམ་གཡེང་ཤེས་འཆལ་རྣམས་ཀྱིས་མ་གོས་པར་སྤྱོད་པ་སོ་སོའི་ཚུལ་ཁྲིམས། རང་རང་གི་དཀའ་སྤྱད་བཟོད་པས་སྤྱོད་པ་སོ་སོའི་བཟོད་པ། དགའ་སྤྲོ་དང་བཅས་པས་སྤྱོད་པ་སོ་སོའི་བརྩོན་འགྲུས། དེ་ལྟར་བརྩོན་པས་སེམས་ཟིན་ཏེ་གཞན་དུ་མི་གཡེང་བས་སྤྱོད་པ་སོ་སོའི་བསམ་གཏན། འཁོར་གསུམ་དུ་མི་རྟོག་པའི་སྒོ་ནས་ཕྱིན་དྲུག་ལ་སློབ་པ་སོ་སོའི་ཤེས་རབ་སྟེ་སུམ་ཅུ་རྩ་དྲུག་ཏུ་འགྱུར་བར། མངོན་རྟོགས་རྒྱན་ལས། དེ་དག་སོ་སོར་སྦྱིན་ལ་སོགས། །རྣམ་པ་དྲུག་ཏུ་བསྡུས་པ་ཡིས། །གོ་ཆའི་སྒྲུབ་པ་གང་ཡིན་དེ། །དྲུག་ཚན་དྲུག་གིས་ཇི་བཞིན་བཤད། །ཅེས་སོ། །དེའི་སྟེང་དུ་ཨོ་རྒྱན་དུས་གསུམ་མཁྱེན་པས་ཐབས་སྟོབས་སྨོན་ལམ་ཡེ་ཤེས་བཞི་བསྣན་ཏེ། བླ་མའི་དམར་ཁྲིད་ལས། ལན་ལ་རེ་བ་མེད་པའི་སྦྱིན་པས་སེར་སྣ་དང་དབུལ་བ་འཇོམས་པས་སྟོབས་ཀྱི་ཕར་ཕྱིན་དང་། སོ་སོའི་སྐྱེ་བོ་དང་ཐེག་པ་དམན་པའི་བསམ་པ་དང་བྲལ་བས་ཐབས་ཀྱི་ཕ་རོལ་དུ་ཕྱིན་པ་དང་། བདག་དང་སེམས་ཅན་ཐམས་ཅད་ཀྱི་དབུལ་བ་རྒྱུན་གཅོད་པར་གྱུར་ཅིག་སྙམ་དུ་གཏོང་བ་སྨོན་ལམ་གྱིི་ཕ་རོལ་དུ་ཕྱིན་པ་དང་། འཁོར་གསུམ་ཡོངས་སུ་དག་པར་གཏོང་བས་ཡེ་ཤེས་ཀྱི་ཕ་རོལ་དུ་ཕྱིན་པའོ། །དེ་བཞིན་དུ་འཁོར་བའི་འབྲས་བུ་འདོད་པ་མ་ཡིན་པའི་ཚུལ་ཁྲིམས་ཀྱིས་མི་དགེ་བ་འཇོམས་པ་སྟོབས། ཆོས་བརྒྱད་ཀྱི་བསམ་པ་དང་བྲལ་བར་སྲུང་བ་ཐབས། བདག་གཅིག་པུ་ལྷ་མི་འདོད་པ་མ་ཡིན་པར་སེམས་ཅན་ཐམས་ཅད་ཚུལ་ཁྲིམས་རྒྱུན་ཆད་པར་མ་གྱུར་ཅིག་སྙམ་པ་སྨོན་ལམ། འཁོར་གསུམ་མི་དམིགས་པས་ཡེ་ཤེས་སོ། །ཀུན་ལ་སྙོམས་པའི་བཟོད་པས་ཁོང་ཁྲོ་འཇོམས་པས་སྟོབས། གཡོ་སྒྱུ་ལ་སོགས་པ་འཇིག་རྟེན་པའི་ཆེད་དུ་མ་ཡིན་པས་ཐབས། བདག་གཅིག་པུ་ལྷ་མིའི་གཟུགས་བཟང་པོ་འདོད་པ་མ་ཡིན་པར་སེམས་ཅན་ཐམས་ཅད་ཀྱང་མི་སྡུག་པ་རྣམས་ཞི་བར་གྱུར་ཅིག་སྙམ་པ་སྨོན་ལམ། དེ་དག་འཁོར་གསུམ་མི་དམིགས་པས་ཟིན་པ་ཡེ་ཤེས་སོ། །ཡོན་ཏན་རྗེས་སུ་དྲན་པའི་བརྩོན་འགྲུས་ཀྱིས་ལེ་ལོ་འཇོམས་པས་སྟོབས། གཞན་དང་གཞན་དུ་རེ་བ་ལ་སོགས་པ་འཇིག་རྟེན་གྱི་བྱ་བ་མ་ཡིན་པར་བརྩོན་པ་ཐབས། སེམས་ཅན་གྱི་ལེ་ལོ་རྒྱུན་བཅད་དེ་ཡང་དག་པའི་ལམ་ལ་རྩོལ་བར་གྱུར་ཅིག་སྙམ་པས་སྨོན་ལམ། འཁོར་གསུམ་མི་དམིགས་པས་ཟིན་པ་ཡེ་ཤེས་སོ། །གཟུགས་གཟུགས་མེད་སྤངས་པའི་བསམ་གཏན་གྱིས་གཡེང་བ་འཇོམས་པས་སྟོབས། ལྷ་དང་མིའི་གོ་འཕང་འདོད་པ་མ་ཡིན་པར་བླ་ན་མེད་པའི་བྱང་ཆུབ་ཀྱི་ཡོན་ཏན་ཕུན་སུམ་སོགས་པ་སྒྲུབ་པའི་ཕྱིར་ཐབས། སེམས་ཅན་ཐམས་ཅད་ཀྱི་གཡེང་བ་རྒྱུན་ཆད་པར་གྱུར་ཅིག་སྙམ་པ་སྨོན་ལམ། དེ་ཡང་འཁོར་གསུམ་ཡོངས་སུ་མི་དམིགས་པ་ཡེ་ཤེས་སོ། །སྟོང་ཉིད་སྙིང་རྗེའི་བདག་ཉིད་ཅན་གྱི་ཤེས་རབ་ཀྱིས་མཚན་མའི་སྤྲོས་པ་འཇོམས་པར་བྱེད་པས་སྟོབས། དེ་ཉིད་དང་དུས་གསུམ་དུ་འབྲལ་བ་མེད་པས་ཐབས། བདག་གཞན་ཐམས་ཅད་ཡང་དག་པའི་དོན་རྟོགས་པར་གྱུར་ཅིག་སྙམ་པ་སྨོན་ལམ། རང་གི་སེམས་ཉིད་ཡེ་ནས་ཤེས་པ་ཤེས་རབ་དེ་ལྟ་བུའི་རང་བཞིན་ཡིན་པ་ལ་ཡིན་པར་ཤེས་པ་ཡེ་ཤེས་ཀྱི་ཕ་རོལ་དུ་ཕྱིན་པ་ཡིན་གསུངས་སོ། །བསྡུ་ན། བསོད་ནམས་དང་ཡེ་ཤེས་ཀྱི་ཚོགས་གཉིས་སུ་འདུ་སྟེ་སྦྱིན་པ་དང་ཚུལ་ཁྲིམས་གཉིས་བསོད་ནམས་ཀྱི་ཚོགས། ཤེས་རབ་ཡེ་ཤེས་ཀྱི་ཚོགས། གཞན་གསུམ་གཉིས་ཀྱི་གྲོགས་སུ་གཏོགས་ཤིང་། ཡང་ཐམས་ཅད་འཁོར་གསུམ་ཡོངས་དག་གི་རྩིས་ཟིན་ན་ཡེ་ཤེས་ཀྱི་ཚོགས་སུ་གྱུར་ཏེ། མདོ་རྒྱན་ལས། སྦྱིན་དང་ཚུལ་ཁྲིམས་བསོད་ནམས་ཀྱི། །ཚོགས་ཡིན་ཤེས་རབ་ཡེ་ཤེས་ཀྱི། །གསུམ་ནི་གཉིས་ཆར་ལ་ཡང་གཏོགས། །ལྔ་ཆར་ཡང་ནི་ཡེ་ཤེས་ཚོགས། །ཞེས་སོ། །གཞན་ཡང་ཕར་ཕྱིན་རྣམས་སྒྲུབ་ཚུལ་ནི། ལེན་དང་རྣམ་སྨིན་ལ་མི་རེ་བའི་སྒོ་ནས་སྦྱིན་པ་གཏོང་། ཡང་སྲིད་བདེ་འགྲོ་ལ་རེ་སྨོན་དང་བྲལ་བའི་ཚུལ་ཁྲིམས་བསྲུང་། སེམས་ཅན་ཐམས་ཅད་ལ་ཞེ་འགྲས་པ་མེད་པའི་བཟོད་པ་བསྒོམ། རང་གཞན་གྱི་དགེ་ཆོས་མཐའ་དག་སྡུད་པ་ལ་ངང་གིས་སྤྲོ་བའི་བརྩོན་འགྲུས་བརྩོམ། བསམ་གཟུགས་ཀྱི་སྙོམས་འཇུག་ལས་འདས་པའི་བསམ་གཏན་ལ་མཉམ་པར་འཇོག སྙིང་རྗེའི་ཐབས་དང་མ་བྲལ་བའི་ཤེས་རབ་སྒྲུབ་པར་བྱེད་པ་སྟེ། དེ་ཉིད་ལས། རེ་བ་མེད་པའི་སྦྱིན་པ་དང་། །ཡང་སྲིད་མི་འདོད་ཚུལ་ཁྲིམས་དང་། །ཐམས་ཅད་ལ་ནི་བཟོད་པ་དང་། །ཡོན་ཏན་ཀུན་སྡུད་བརྩོན་འགྲུས་དང་། །དེ་བཞིན་བསམ་གཏན་གཟུགས་མེད་མིན། །ཤེས་རབ་ཐབས་དང་ལྡན་པ་ཡིས། །ཕ་རོལ་ཕྱིན་པ་དྲུག་པོ་ལ། །བརྟན་པ་རྣམས་ཀྱིས་ཡང་དག་སྦྱོར། །ཞེས་སོ། །དེ་ཐམས་ཅད་ཀྱང་མི་མཐུན་པའི་ཕྱོགས་ཆགས་བདུན་གྱི་དྲི་མས་མ་གོས་ཤིང་། མཐུན་རྐྱེན་དམ་པ་དྲུག་གམ་བཅུ་གཉིས་དང་ལྡན་པས་ཉམས་སུ་བླང་དགོས་ཏེ། དེ་ལ་ཆགས་བདུན་ནི། སེར་སྣ་དང་འཆལ་ཚུལ་སོགས་རང་རང་གི་མི་མཐུན་ཕྱོགས་རྣམས་དང་། ཕྱི་བཤོལ་དང་། ཅུང་ཟད་ཙམ་གྱིས་ཆོག་པར་འཛིན་པ་དང་། ཚེ་འདི་ཡི་ལན་ལ་རེ་བ་དང་། ཕྱི་མའི་རྣམ་སྨིན་ལ་རེ་བ་དང་། མི་མཐུན་པའི་ཕྱོགས་ཀྱི་ས་བོན་བག་ལ་ཉལ་དང་། དམན་ལམ་ཡིད་བྱེད་དམ་འཁོར་གསུམ་དུ་རྟོག་པའི་རྣམ་གཡེང་རྣམས་ལ་ཆགས་པ་ཡིན་པས་དེ་དག་གི་དྲི་མས་མ་གོས་པར་བྱ་དགོས་ཏེ། སྔ་མ་ལས། བྱང་ཆུབ་སེམས་དཔའི་སྦྱིན་པ་ནི། །མ་ཆགས་མི་ཆགས་ཆགས་པ་མེད། །ཆགས་པ་ཉིད་ཀྱང་མ་ཡིན་ལ། །མ་ཆགས་མི་ཆགས་ཆགས་པ་མེད། །བྱང་ཆུབ་སེམས་དཔའི་ཚུལ་ཁྲིམས་ནི་། །ཞེས་སོགས་ཐམས་ཅད་ལ་སྦྱར་ནས་གསུངས་སོ། །མཐུན་ཕྱོགས་དམ་པ་དྲུག་ནི། རྟེན་དམ་པ་བྱང་ཆུབ་ཀྱི་སེམས་དང་ལྡན་པ། དངོས་པོ་དམ་པ་སྦྱིན་སོགས་ཕྱོགས་རེ་ཙམ་མ་ཡིན་པར་གཞིའམ་དངོས་པོ་ཐམས་ཅད་ལ་འཇུག་པ། ཆེད་དུ་བྱ་བ་དམ་པ་སེམས་ཅན་ཐམས་ཅད་ཀྱི་དོན་དུ་སྦྱོར་བ། ཐབས་དམ་པ་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པ། བསྔོ་བ་དམ་པ་བླ་ན་མེད་པའི་བྱང་ཆུབ་ཏུ་འདུན་པ་བསྒྱུར་བ། རྣམ་པར་དག་པ་དམ་པ་སྒྲིབ་པ་གཉིས་ཀྱི་དངོས་གཉེན་དུ་སྤྱོད་པ་སྟེ་དྲུག་གོ །དམ་པ་བཅུ་གཉིས་ནི། དབུས་མཐའ་ལས་རྒྱ་ཆེ་བ་དང་ཡུན་རིང་དང་། །ཆེད་དུ་བྱ་བ་མི་ཟད་དང་། །རྒྱུན་མི་འཆད་དང་ཚད་མེད་དང་། །དབང་འབྱོར་པ་དང་ཡོངས་བཟུང་དང་། །རྩོམ་དང་ཐོབ་དང་རྒྱུ་མཐུན་དང་། །འགྲུབ་པ་དམ་པར་ཡོད་པ་ཡིན། །ཞེས་གསུངས་པས། རྒྱ་ཆེ་བ་དམ་པ། འཇིག་རྟེན་གྱི་ཕུན་སུམ་ཚོགས་པ་ཐམས་ཅད་པས་མཆོག་ཏུ་གྱུར་པའི་བྱང་ཆུབ་ཆེན་པོ་འདོད་པ། ཡུན་རིང་བ་དམ་པ། བསྐལ་པ་གྲངས་མེད་གསུམ་ལ་སོགས་པར་བསྒོམ་པ། ཆེད་དུ་བྱ་བ་དམ་པ། སེམས་ཅན་ཐམས་ཅད་ཀྱི་དོན་བྱེད་པའི་ཆེད་དུ། ཟད་མི་ཤེས་པ་དམ་པ། བྱང་ཆུབ་ཆེན་པོར་ཡོངས་སུ་བསྔོས་པས་གཏན་དུ་ཟད་མི་ཤེས་པ། རྒྱུན་མི་འཆད་པ་དམ་པ། བདག་གཞན་མཉམ་ཉིད་དུ་མོས་པས་སེམས་ཅན་ཐམས་ཅད་ཀྱི་ཕྱིན་དྲུག་རྫོགས་པ། ཚེགས་མེད་པ་དམ་པ། གཞན་གྱི་སྦྱིན་སོགས་ལ་རྗེས་སུ་ཡི་རང་བ་ཙམ་གྱིས་ཕར་ཕྱིན་རྫོགས་པར་བྱེད་པ། དབང་འབྱོར་པ་དམ་པ། ནམ་མཁའ་མཛོད་ཀྱི་ཏིང་ངེ་འཛིན་སོགས་ཐོབ་ནས་སྦྱིན་སོགས་རྫོགས་པར་བྱེད་པ་ལ་དབང་འབྱོར་པ། ཡོངས་སུ་བཟུང་བ་དམ་པ། རྣམ་པར་མི་རྟོག་པའི་ཡེ་ཤེས་ཀྱིས་བཟུང་བ་དང་། རྩོམ་པ་དམ་པ། མོས་སྤྱོད་ཀྱི་ས་ལ་བཟོད་པ་ཆེན་པོར་གྱུར་པ། ཐོབ་པ་དམ་པ་ས་དང་པོ། རྒྱུ་མཐུན་དམ་པ་ས་གཉིས་པ་ནས་དགུ་པའི་བར། འགྲུབ་པ་དམ་པ་ས་བཅུ་པ་དང་དེ་བཞིན་གཤེགས་པའི་ས་ལ་བྱང་ཆུབ་སེམས་དཔའི་ས་མཐར་ཐུག་པ་དང་སངས་རྒྱས་ཀྱི་ས་འགྲུབ་པ་སྟེ་བཅུ་གཉིས་པོ་དེ་དང་ལྡན་པ་ནི་ཐེག་དམན་སོགས་ལས་ཁྱད་པར་དུ་གྱུར་པའི་ཐེག་ཆེན་ལམ་གྱི་ཕར་ཕྱིན་མཚན་ཉིད་པ་སྟེ། བཤད་སྦྱར་ལས། བསེ་རུ་ལྟ་བུ་རྣམས་ལ་ནི། །ཕ་རོལ་ཕྱིན་དྲུག་མིང་ཡང་མེད། །བཅོམ་ལྡན་ཉག་གཅིག་ཕ་རོལ་ཕྱིན། །དྲུག་གི་སྤྱི་ལ་བཞུགས་པ་ལགས། །ཞེས་སོ། །ཡོན་ཏན་གྱི་ཁྱད་པར་ཡང་རྣམ་པ་བཞི་དང་ལྡན་ཏེ། གཞན་དོན་དུ་རྫོགས་བྱང་ལ་དམིགས་པས་རྒྱ་ཆེ་བ་དང་། ལན་དང་རྣམ་སྨིན་ལ་རེ་བ་སོགས་སོ་སོའི་མི་མཐུན་ཕྱོགས་དང་བྲལ་བས་ཟང་ཟིང་མེད་པ་དང་། སེམས་ཅན་ཐམས་ཅད་མངོན་མཐོ་དང་ངེས་ལེགས་བྱང་ཆུབ་གསུམ་ལ་འགོད་པས་དོན་ཆེ་བ་དང་། རེ་རེ་བཞིན་ཡང་སྟོང་ཉིད་སྙིང་རྗེ་ཟུང་འཇུག་གི་ཐབས་དང་བསྔོ་བས་ཟིན་པས་གོང་ནས་གོང་དུ་འཕེལ་བའི་ཕྱིར་མི་ཟད་པ་སྟེ། མདོ་རྒྱན་ལས། རྒྱ་ཆེ་བ་དང་ཟང་ཟིང་མེད། །དོན་ཆེ་བ་དང་མི་ཟད་པ། །སྦྱིན་པ་ལ་སོགས་ཐམས་ཅད་ཀྱི། །ཡོན་ཏན་བཞིར་ནི་ཤེས་པར་བྱ། །ཞེས་སོ། །དེ་ཉམས་སུ་བླངས་{བླང}པས། གནས་སྐབས་སུ་རྒྱུ་མཐུན་གྱི་འབྲས་བུའང་། སྦྱིན་པས་ལོངས་སྤྱོད་འཕེལ་བས་ནམ་ཡང་མི་ཕོང་བ་དང་། ཚུལ་ཁྲིམས་ཀྱིས་གཞན་གྱིས་འཚེ་བ་དང་བྲལ་ཞིང་མི་ཁོམ་པ་སྤངས་པའི་བདེ་བ་འཐོབ་པ་དང་། བཟོད་པས་གཟུགས་བཟང་ཞིང་གནོད་པས་སེམས་མི་འཁྲུགས་པ་དང་། བརྩོན་འགྲུས་ཀྱིས་དགེ་ལ་སེམས་སྤྲོ་ཞིང་ཡོན་ཏན་གྱི་ཚོགས་འཕེལ་བས་བརྗིད་པར་འགྱུར་བ་དང་། བསམ་གཏན་གྱིས་མཚན་མའི་གཡེང་བ་ཞི་ཞིང་ཏིང་ངེ་འཛིན་གྱིས་སེམས་དགའ་བར་བྱེད་པ་དང་། ཤེས་རབ་ཀྱིས་རང་རྒྱུད་འཆིང་བ་ལས་གྲོལ་ཞིང་ལེགས་པར་བཤད་པས་སྐྱེ་བོ་མགུ་བར་བྱེད་པ་སྟེ། དེ་ཉིད་ལས། མི་ཕོངས་པ་དང་རྣམ་པར་མི་འཚེ་དང་། །རྣམ་འཚེ་བཟོད་ཅིང་བྱ་བས་མི་སྐྱོ་དང་། །དགའ་བྱེད་ལེགས་པར་བརྗོད་པ་དེ་ཡི་ཕྱིར། །གཞན་གྱི་དོན་ཉིད་རང་གི་དོན་ཡིན་ནོ། །ཞེས་དང་། རིན་ཆེན་ཕྲེང་བ་ལས། སྦྱིན་པས་ལོངས་སྤྱོད་ཁྲིམས་ཀྱིས་བདེ། །བཟོད་པས་གཟུགས་བཟང་བརྩོན་པས་བརྗིད། །བསམ་གཏན་གྱིས་ཞི་བློ་ཡིས་གྲོལ། །སྙིང་བརྩེ་བས་ནི་དོན་ཀུན་འགྲུབ། །ཅེས་སོ། །མཐར་ཐུག་ཚོགས་གཉིས་ཀྱི་འབྲས་བུ་སྐུ་གཉིས་འཐོབ་པ་སྟེ། དེ་ཉིད་ལས། གཟུགས་ཀྱི་སྐུ་ནི་མདོར་བསྡུ་ན། །བསོད་ནམས་ཚོགས་ལས་འཁྲུངས་པ་སྟེ། །ཆོས་ཀྱི་སྐུ་ནི་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་གསུངས་པ་བཞིན་ནོ། །གཉིས་པ་ཡན་ལག་ཕྱེ་སྟེ་རྒྱས་པར་བཤད་པ་ལ་དྲུག སྦྱིན་པ། ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ་བོ། །དང་པོ་སྦྱིན་པ་ལ། ངོ་བོ་ནི། ཁྱད་ཆོས་བཞི་ལྡན་གྱི་གཏོང་སེམས་དགེ་བ་ས་བོན་དང་བཅས་པ། ངེས་ཚིག་ནི། དཱ་ནའི་སྒྲ་ལས་དྲངས་ན་སྦྱིན་པ་སྟེ་ཕ་རོལ་གྱི་དབུལ་བ་འདོར་བའི་དོན་གྱིས་སྦྱིན་པའོ། །དབྱེ་ན། མདོ་སྡེ་རྒྱན་ལས། དེ་ཡང་སེར་སྣ་མེད་ལྡན་དང་། །ཆོས་དང་མི་འཇིགས་ཟང་ཟིང་གཏོང་། །སྦྱིན་པ་དེ་འདྲར་ཡོངས་ཤེས་ནས། །མཁས་པས་ཡང་དག་སྒྲུབ་པར་བྱེད། །ཅེས་པ་ལྟར་གསུམ་ལས། ཟང་ཟིང་གི་སྦྱིན་པ་ནི་གཞན་གྱི་ལུས་བརྟན་པར་བྱེད་པ་ཡིན་ཏེ། ངོ་བོ་ནི་མཁོ་བའི་ཡོ་བྱད་སྦྱིན་པ་སྟེ་ཐོག་མར་ཆུང་ངུ་སྟེར་བ་ནས་རིམ་གྱིས་གོམས་ཏེ་མཐར་དངོས་པོ་ཐམས་ཅད་གཏོང་བའོ། །དེ་ལ་དབྱེ་ན་གསུམ་སྟེ། འཕགས་པ་འཇིག་རྟེན་འཛིན་གྱི་དྲིས་པས་ལུང་བསྟན་པའི་མདོ་ལས། དེ་ལ་ཟང་ཟིང་གི་སྦྱིན་པས་ནི་བསོད་ནམས་ཀྱི་ཚོགས་རྫོགས་ལ། ཆོས་ཀྱི་སྦྱིན་པས་ནི་ཡེ་ཤེས་ཀྱི་ཚོགས་རྫོགས་ཏེ། འདི་གཉིས་ནི་རྣམ་པ་ཐམས་ཅད་མཁྱེན་པ་ཉིད་སྒྲུབ་པར་བྱེད་པའོ། །དེ་ལ་ཟང་ཟིང་གི་སྦྱིན་པ་གང་ཞེ་ན། འདི་ལྟ་སྟེ། གཏོང་བ་དང་། གཏོང་བ་ཆེན་པོ་དང་། ཤིན་ཏུ་གཏོང་བའོ། །དེ་ལ་གཏོང་བ་ཞེས་བྱ་བ་ནི། ཟས་དང་། གོས་དང་། ཤིང་རྟ་དང་། གླང་པོ་ཆེ་གཞན་ལ་སྦྱིན་པའོ། །གཏོང་བ་ཆེན་པོ་ཞེས་བྱ་བ་ནི། བུ་དང་། བུ་མོ་དང་། ཁྱིམ་ཐབ་སྦྱིན་པའོ། །ཤིན་ཏུ་གཏོང་བ་ཞེས་བྱ་བ་ནི། བྱ་དཀའ་བ་སྟེ། མགོ་དང་། མིག་དང་། ལག་པ་དང་། རྐང་པ་ལ་སོགས་པ་གཏོང་བའོ། །ཞེས་སོ། །མི་འཇིགས་པའི་སྦྱིན་པ་ནི་གཞན་གྱི་སྲོག་བརྟན་པར་བྱེད་པ་སྟེ། བྱང་ས་ལས། མི་འཇིགས་པའི་སྦྱིན་པ་ནི། སེང་གེ་དང་། སྟག་དང་། ཆུ་སྲིན་འཛིན་ཁྲི་དང་། རྒྱལ་པོ་དང་། ཆོམ་རྐུན་དང་། ཆུ་ལ་སོགས་པའི་འཇིགས་པ་ལས་ཡོངས་སུ་བསྐྱབ་པ་ཡིན་པར་རིགས་པར་བྱའོ། །ཞེས་སོ། །ཆོས་ཀྱི་སྦྱིན་པས་ནི་གཞན་གྱི་སེམས་བརྟན་པར་བྱེད་པ་སྟེ། དབྱེ་ན་གསུམ། ལུང་སྔ་མའི་འཕྲོར། དེ་ལ་ཆོས་ཀྱི་སྦྱིན་པ་གང་ཞེ་ན། སྨྱུ་གུ་དང་། སྣག་ཚ་དང་། གླེགས་བམ་སྦྱིན་པ་ནི་ཆུང་ངུའོ། །སྐལ་བ་ཇི་ལྟ་བ་བཞིན་དུ། ཉན་ཐོས་དང་། རང་སངས་རྒྱས་དང་། བླ་ན་མེད་པའི་ཆོས་སྟོན་པ་ནི་ཆེན་པོའོ། །བླ་ན་མེད་པའི་བྱང་ཆུབ་འཛིན་དུ་འཇུག་ཅིང་། ནམ་མཁའ་ལྟར་བསམ་གྱིས་མི་ཁྱབ་པའི་ཆོས་སྟོན་པ་ནི་ཤིན་ཏུ་ཆེན་པོ། །ཞེས་སོ། །ཡང་ན་སྦྱིན་པ་དང་པོ་གཉིས་ཀྱིས་གཙོ་བོར་གཞན་ལ་ཚེ་འདིའི་བདེ་བ་སྒྲུབ་པ་ཡིན་ལ། ཆོས་ཀྱི་སྦྱིན་པས་ནི་གཙོ་བོར་ཕྱི་མའི་བདེ་བ་སྒྲུབ་པ་ཡིན་ནོ། །དེ་ཡང་བྱང་སེམས་ཁྱིམ་པས་གཙོ་བོར་ཟང་ཟིང་དང་། རབ་ཏུ་བྱུང་བས་ཆོས་སྦྱིན་གཙོ་བོར་གཏོང་བར་བཤད་ཅིང་། རྒྱལ་སྲིད་དང་བུ་དང་ཆུང་མ་དང་མགོ་དང་རྐང་ལག་སོགས་དངོས་སུ་གཏོང་བ་ནི་མི་སྐྱེ་བའི་ཆོས་ལ་བཟོད་པ་ཐོབ་པའི་སྤྱོད་ཡུལ་དུ་གསུངས། བློས་ནི་ལས་དང་པོ་པའི་སྐབས་ནས་ཀྱང་ཐམས་ཅད་གཏོང་བ་ལ་བློ་འབྱོང་བར་བྱ་བ་གལ་ཆེ་ཞིང་། དེ་ལྟར་གོམས་ནས་རིམ་གྱིས་དངོས་སུ་གཏོང་ནུས་པའི་བར་དུ་འགྱུར་རོ། །ཆོས་ཀྱི་སྦྱིན་པའང་གང་ཟག་འཕགས་པའམ་ཡང་དག་པའི་མན་ངག་དང་ལྡན་པའི་མཁས་པ་ཆོས་ཀྱི་སྤྱན་དང་ལྡན་པ་ལས་ཕལ་གྱི་སྤྱོད་ཡུལ་དུ་མི་འགྱུར་ནའང་། མདོ་སྡེ་ཟབ་མོ་དང་གཟུངས་སྔགས་ཁྱད་པར་ཅན་བཟླས་ཏེ་དེས་སེམས་ཅན་ཐམས་ཅད་ཀྱི་ཤེས་རྒྱུད་གྲོལ་བར་མོས་པ་དང་། མ་འོངས་པ་ན་ཆོས་ཀྱི་བདུད་རྩིས་སྐྱེ་རྒུ་ཀུན་གྱི་རེ་བ་རྫོགས་པར་བྱེད་པ་ལ་སྨོན་ལམ་ཡང་ཡང་དུ་གདབ་པར་བྱའོ། །དེ་ལྟ་བུའི་སྦྱིན་པ་གསུམ་པོ་གང་ལའང་དག་པར་བྱེད་པ་ནི་ཤེས་རབ་སྟོང་པ་ཉིད་དང་ཐབས་སྙིང་རྗེས་ཆེན་པོ་སྟེ། ཐབས་ཤེས་ཁྱད་པར་ཅན་འདི་གཉིས་ཀྱིས་ཟིན་པའི་དགེ་བའི་རྩ་བ་ཆེ་ཆུང་ཇི་ལྟར་ཡང་སྲིད་པ་འཁོར་བ་དང་ཞི་བ་མྱང་འདས་ཕྱོགས་གཅིག་པ་ཐེག་པ་དམན་པའི་རྒྱུར་མི་འགྱུར་ཞིང་བླ་ན་མེད་པའི་བྱང་ཆུབ་ཆེན་པོའི་རྒྱུར་འགྱུར་བས་ན་ཡོངས་སུ་དག་པ་སྟེ། བསླབ་བཏུས་ལས། སྟོང་ཉིད་སྙིང་རྗེའི་སྙིང་པོ་ཅན། །སྤྱོད་པས་བསོད་ནམས་དག་པར་འགྱུར། །ཞེས་སོ། །སྦྱིན་པ་མི་ཟད་ཅིང་གོང་དུ་སྤེལ་བའི་ཐབས་ནི། བྱང་ཆུབ་སེམས་དཔའི་སྡེེ་སྣོད་ལས། ཤཱ་རིའི་བུ་བྱང་ཆུབ་སེམས་དཔའ་མཁས་པ་ནི། སྦྱིན་པ་ཉུང་ངུ་ཡང་མང་པོར་བྱེད་དེ། ཡེ་ཤེས་ཀྱི་སྟོབས་ཀྱིས་ལྷག་པར་བྱེད་དོ། །ཤེས་རབ་ཀྱིས་རྒྱས་པར་བྱེད་དོ། །བསྔོ་བའི་སྟོབས་ཀྱིས་དཔག་ཏུ་མེད་པར་བྱེད་དོ། །ཞེས་གསུངས། དེ་ལ་ཡེ་ཤེས་ཀྱི་སྟོབས་ནི་འཁོར་གསུམ་ཡོངས་སུ་དག་པར་ཤེས་པ་སྟེ་སྦྱིན་པ་པོ་ཡང་སྒྱུ་མ་ལྟ་བུ། སྦྱིན་པར་བྱ་བའི་ཡུལ་ཡང་སྒྱུ་མ་ལྟ་བུར་ཤེས་པར་བྱ་བའོ། །ཤེས་རབ་ཀྱི་སྟོབས་ཀྱིས་ནི། སྦྱིན་པ་གང་གཏོང་ཡང་། དང་པོར་སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་པའི་ཆེད་དུ་གཏོང་། བར་དུ་སྦྱིན་པའི་དངོས་པོ་ལ་ཞེན་པ་མེད། མཐར་སྦྱིན་པའི་རྣམ་སྨིན་ལ་རེ་བ་དང་བྲལ་ན་སྦྱིན་པའི་བསོད་ནམས་རྒྱས་པའམ་མང་པོ་འབྱུང་བར་བྱེད་དེ། སྡུད་པ་ལས། སྦྱིན་པ་བྱིན་ནས་དངོས་ལ་གནས་པ་མེད་པར་བྱེད། །དེ་ནི་ནམ་དུའང་རྣམ་པར་སྨིན་ལའང་རེ་བ་མེད། །དེ་ལྟར་གཏོང་བ་མཁས་པས་ཐམས་ཅད་གཏོང་བ་སྟེ། །ཆུང་ངུ་བཏང་ལ་མང་པོར་དཔག་ཏུ་མེད་པར་འགྱུར། །ཞེས་སོ། །བསྔོ་བའི་སྟོབས་ཀྱིས་ནི། སྦྱིན་པ་དེ་དག་སེམས་ཅན་ཐམས་ཅད་ཀྱི་དོན་དུ་བླ་ན་མེད་པའི་བྱང་ཆུབ་ཏུ་བསྔོས་པས་དཔག་ཏུ་མེད་པར་འཕེལ་ཞིང་ནམ་ཡང་འཛད་པར་མི་འགྱུར་ཏེ། འཕགས་པ་བློ་གྲོས་མི་ཟད་པའི་མདོ་ལས། བཙུན་པ་ཤཱ་ར་དཱ་ཏིའི་བུ། དཔེར་ན་ཆུ་ཐིགས་པ་གཅིག་རྒྱ་མཚོ་ཆེན་པོར་ལྷུང་བ་ནི་བསྐལ་པའི་མཐར་ཐུག་གི་བར་དུ་བར་མ་དོར་ཟད་པ་མེད་དོ། །དེ་བཞིན་དུ་དགེ་བའི་རྩ་བ་བྱང་ཆུབ་ཏུ་བསྔོས་པ་ནི། བྱང་ཆུབ་སྙིང་པོ་ལ་འདུག་གི་བར་དུ་བར་མ་དོར་འགའ་ཡང་ཟད་པར་མི་འགྱུར་རོ། །ཞེས་སོ། །དག་པ་དང་སྤེལ་བ་འདི་གཉིས་ནི། སྦྱིན་པ་ཙམ་དུ་མ་ཟད་ཐེག་ཆེན་ལམ་གྱི་དགེ་རྩ་ཀུན་ཀྱི་རྗེས་སུ་འགྲོ་བས་ཚུལ་ཁྲིམས་སོགས་ཕར་ཕྱིན་ཕྱི་མ་རྣམས་ལའང་སྦྱོར་ཤེས་པར་བྱའོ། །དེ་ལྟར་སྦྱིན་པ་མ་བཏང་བའི་སྐྱོན་ནམ་ཉེས་པ་ནི། ཕལ་ཆེར་ཡི་དྭགས་སུ་སྐྱེ་ཞིང་། མིར་སྐྱེས་ནའང་དབུལ་ཞིང་ཉམ་ཐག་པར་འགྱུར་ཏེ། སྡུད་པ་ལས། སེར་སྣ་ཅན་ནི་ཡི་དྭགས་གནས་སུ་སྐྱེ་བར་འགྱུར། །གལ་ཏེ་མིར་སྐྱེས་ན་ཡང་དེ་ཚེ་དབུལ་པོར་འགྱུར། །ཞེས་སོ། །སྦྱིན་པ་ལེགས་པར་བཏང་ན་གནས་སྐབས་སུ་དེ་ལས་ལྡོག་པའི་ཡོན་ཏན་འབྱུང་སྟེ། དེ་ཉིད་ལས། བྱང་ཆུབ་སེམས་དཔའི་སྦྱིན་པས་ཡི་དྭགས་འགྲོ་བ་གཅོད། །དབུལ་བ་དང་ནི་དེ་བཞིན་ཉོན་མོངས་ཐམས་ཅད་གཅོད། །སྤྱོད་ཚེ་ལོངས་སྤྱོད་མཐའ་ཡས་རྒྱས་པ་ཐོབ་པར་འགྱུར། །ཞེས་སོ། །མཐར་ཐུག་འབྲས་བུ་བྱང་ཆུབ་ཐོབ་པའང་། བྱང་ཆུབ་སེམས་དཔའི་སྡེ་སྣོད་ལས། སྦྱིན་པ་གཏོང་ལ་བྱང་ཆུབ་རྙེད་མི་དཀའ། །ཞེས་གསུངས་པ་བཞིན་ནོ། །སྐབས་འདིར་སྦྱིན་པའི་གཏམ་ཅུང་ཟད་རེ་བརྗོད་པར་འདོད་ན་ཁོ་བོས་བྱས་པ་གཞན་ནས་ཅི་རིགས་པ་བླང་ལ་སྐབས་དང་མཐུན་པར་འཆད་ཤེས་པར་བྱའོ། །གཉིས་པ་ཚུལ་ཁྲིམས་ནི། ངོ་བོ་ཁྱད་ཆོས་བཞི་ལྡན་གྱི་སྤོང་སེམས་དགེ་བ་ས་བོན་དང་བཅས་པའོ། །ངེས་ཚིག་ནི། ཤཱི་ལའི་སྒྲ་ལས་ཚུལ་ཁྲིམས་ཏེ། ཡུལ་གྱི་གདུང་བས་མི་རྫི་བར་བསིལ་བ་ཐོབ་པར་བྱེད་པས་ན་ཚུལ་ཁྲིམས་སོ། །དབྱེ་ན། དཀོན་མཆོག་བརྩེགས་པ་ལས། འོད་སྲུང་དེ་ལ་བྱང་ཆུབ་སེམས་དཔའི་ཚུལ་ཁྲིམས་ནི་རྣམ་པ་གསུམ་སྟེ། སྡོམ་པའི་ཚུལ་ཁྲིམས་དང་། དགེ་བའི་ཆོས་རྣམས་སྡུད་པའི་ཚུལ་ཁྲིམས་དང་། སེམས་ཅན་གྱི་དོན་སྒྲུབ་པའི་ཚུལ་ཁྲིམས་སོ། །དེ་ལ་སྡོམ་པའི་ཚུལ་ཁྲིམས་ཀྱིས་ནི་མི་དགེ་བ་ལས་སེམས་བསྲུང་བ་ཡིན་ནོ། །དགེ་བའི་ཆོས་སྡུད་པའི་ཚུལ་ཁྲིམས་ཀྱིས་ནི་དགེ་བའི་རྩ་བ་མངོན་པར་སྒྲུབ་པ་ཡིན་ནོ། །སེམས་ཅན་གྱི་དོན་བྱེད་པའི་ཚུལ་ཁྲིམས་ཀྱིས་ནི་གཞན་ལ་ཕན་པ་ལྷུར་ལེན་པ་ཡིན་ནོ། །ཞེས་དང་། ཀུན་མཁྱེན་ཆོས་རྗེས། སྡོམ་དང་ཆོས་སྡུད་སེམས་ཅན་དོན་བྱེད་དེ། །རྒྱལ་སྲས་རྣམས་ཀྱིས་ཚུལ་ཁྲིམས་གསུམ་རྟག་བསྲུང་། །ཞེས་གསུངས་པ་ལྟར་གསུམ་ལས། དང་པོར་ཉེས་སྤྱོད་སྡོམ་པའི་ཚུལ་ཁྲིམས་ནི། སྤྱིར་མི་དགེ་བའི་ཕྱོགས་ཐམས་ཅད་སྤོང་བ་སྟེ། དེ་ཡང་སོ་ཐར་གྱི་དབང་དུ་བྱས་ན། དུས་ཁྲིམས་དང་གཏན་ཁྲིམས་གཉིས་ལས། དང་པོ་ནི། བསྙེན་གནས་ཡན་ལག་བརྒྱད་པ་བསྲུང་བ་ལྟ་བུའོ། །གཉིས་པ་ནི། སོ་ཐར་རིགས་བདུན་ཏེ། སྐྱབས་གསུམ་སྔོན་དུ་འགྲོ་བ་ཅན་གྱི་དགེ་བསྙེན་ཕ་མ་གཉིས། དགེ་ཚུལ་ཕ་མ་གཉིས། དགེ་སློབ་མ། དགེ་སློང་ཕ་མ་གཉིས་སོ། །དེ་རྣམས་ཀྱང་བསམ་པ། ཚེ་འདིར་རྒྱལ་པོའི་ཆད་པ་དང་དཔྱ་ཁྲལ་སོགས་ལ་འཇིགས་ནས་དེ་ལས་སྐྱོབ་པའི་ཆེད་དུ་བླངས་ན་འཇིགས་སྐྱོབ། ཚེ་ཕྱི་མར་ལྷ་མིའི་གོ་འཕང་ཙམ་དང་། ཚེ་འདིར་ཟས་གོས་ཀྱི་བདེ་སྐྱིད་ལ་དམིགས་ནས་བླངས་ན་ལེགས་སྨོན་ཏེ། འདི་གཉིས་ནི་ཐར་པའི་རྒྱུར་མི་འགྲོ་ལ། ཁམས་གསུམ་གྱི་འཁོར་བ་མཐའ་དག་སྡུག་བསྔལ་གྱི་རང་བཞིན་དུ་རྟོགས་ནས་རང་ཉིད་གཅིག་པུ་དེ་ལས་ཐར་འདོད་ཀྱིས་བླངས་ན་ངེས་འབྱུང་གི་ཚུལ་ཁྲིམས་ཏེ་ཐེག་དམན་གྱི་སོ་ཐར་མཚན་ཉིད་པ་ཡིན། དེ་ལ་སེམས་ཅན་གཞན་དོན་དུ་ཀུན་སློང་བྱང་ཆུབ་སེམས་ཀྱིས་ཟིན་ན་ཐེག་ཆེན་སོ་ཐར་དུ་འགྱུར། དེ་ཡང་དང་པོར་བླང་དུས། འཇིགས་སྐྱོབ་དང་། ལེགས་སྨོན་གྱི་ཚུལ་ཁྲིམས་ཡིན་ཡང་། ཕྱིས་ངེས་འབྱུང་གི་བསམ་པ་ནམ་སྐྱེས་པ་ན་ངེས་འབྱུང་གི་ཚུལ་ཁྲིམས་དང་། ཐེག་ཆེན་གྱི་བྱང་ཆུབ་སེམས་ནམ་སྐྱེས་པ་ན་ཐེག་ཆེན་གྱི་སོ་ཐར་དུ་འགྲོ་བ་ཡིན་ནོ། །སྐབས་འདིར་བྱང་ཆུབ་སེམས་དཔའི་རྩ་ལྟུང་གི་དབང་དུ་བྱས་ན། དབུ་མ་ལུགས་དང་སེམས་ཙམ་ལུགས་གཉིས་ཏེ། དང་པོ་ནམ་མཁའི་སྙིང་པོའི་མདོ་དང་ཐབས་ལ་མཁས་པའི་མདོའི་རྗེས་སུ་འབྲང་བ་ཀླུ་སྒྲུབ་ལུགས་ཞི་བ་ལྷས་བསླབ་བཏུས་སུ་གསུངས་པའི་དོན། སྡོམ་གསུམ་རྣམ་ངེས་ལས། དཀོན་མཆོག་དཀོར་འཕྲོག་དང་ནི་ཆོས་སྤོང་ལས། །ཚུལ་ལྡན་ཚུལ་འཆལ་ཁྲིམས་གཅོད་བསླབ་འབེབས་སོགས། །མཚམས་མེད་ལས་བྱེད་ལོག་ལྟ་རྒྱལ་པོ་ལྔ། །གྲོང་ལྗོངས་གྲོང་ཁྱེར་གྲོང་རྡལ་ཡུལ་འཁོར་རྣམས། །འཇོམས་པར་བྱེད་པའང་བློན་པོར་ངེས་པ་ལྔ། །མ་སྦྱངས་སྟོང་ཉིད་བརྗོད་སྔས་ཉན་ཐོས་སྨོན། །རྫོགས་བྱང་ཕྱིར་ལྡོག་ཐེག་དམན་སེམས་བསྐྱེད་དང་། །སོ་ཐར་སྤངས་ནས་ཐེག་ཆེན་སློབ་པ་དང་། །ཉན་ཐོས་ཐེག་པས་ཆགས་སོགས་མི་བཟློག་པས། །དེ་བཟློག་དེ་ཡི་འབྲས་བུ་མེད་པར་བྱས། །ཕྲག་དོག་དབང་གིས་བདག་བསྟོད་གཞན་སྨོད་དང་། །རྙེད་དང་བཀུར་སྟིའི་ཆེད་དུ་བདག་འཚོང་དང་། དགེ་སློང་ཆད་པས་གཅོད་འཇུག་སུག་འབུལ་དང་། །སྤོང་བའི་ལོངས་སྤྱོད་ཁ་ཏོན་པ་ལ་བྱིན། །ཞི་གནས་འདོར་བཅུག་ཕལ་ལ་འབྱུང་ངེས་བརྒྱད། །དེ་དེར་འབྱུང་ཉེ་གཞག་གི་ཀུན་ལ་ཀུན། །མིང་དུ་བཅོ་བརྒྱད་རྫས་སུ་བཅུ་བཞི་སྟེ། །སྨོན་འཇུག་སེམས་བཏང་དེ་རྣམས་རྩ་ལྟུང་ཡིན། །ཞེས་རྩ་ལྟུང་ཉི་ཤུར་གསུངས་ཏེ། དེ་ལ་བྱང་སེམས་རྒྱལ་པོ་ལ་འབྱུང་ཉེ་བ་ལྔ་ལས། དང་པོ་དཀོན་མཆོག་གི་དཀོར་འཕྲོག་པ་ནི། སངས་རྒྱས་ཀྱི་དཀོར་མཆོད་རྟེན་ནམ་སྐུ་གཟུགས་ཀྱི་རྫས། ཆོས་ཀྱི་དཀོར་གླེགས་བམ་དང་ཆོས་སྨྲ་བའི་ཆ་རྐྱེན། དགེ་འདུན་གྱི་དཀོར་དགེ་འདུན་སྤྱིའི་རྫས་ཏེ། དེ་ལྟར་བསྔོས་པ་ལས་མར་མེ་ཀོང་བུ་གང་ངམ་ནས་བྲེ་གང་ཡན་ཆད་ཤེས་བཞིན་དུ་རང་གིས་འཕྲོག་པ་དང་གཞན་ལ་འཕྲོག་ཏུ་བཅུག་པའོ། །གཉིས་པ་དམ་པའི་ཆོས་སྤོང་བ་ནི། སངས་རྒྱས་ཀྱིས་གསུངས་པའི་ཆོས་ཐེག་པ་ཆེ་ཆུང་གང་ཡང་རུང་བ་ལ་ཐར་པ་ཐོབ་པའི་ཆོས་མ་ཡིན་ནོ་ཞེས་རང་གིས་སྤོང་བར་བྱེད་དམ་གཞན་ལ་སྤོང་དུ་འཇུག་པའོ། །གསུམ་པ་དགེ་སྦྱོང་ལ་ཆད་པ་གཅོད་པ་ནི། ཚུལ་ཁྲིམས་དང་ལྡན་པའམ་ཚུལ་ཁྲིམས་འཆལ་བ་ཡང་རུང་རབ་བྱུང་གི་རྟགས་ཙམ་འཆང་བ་ལའང་ཁྲིམས་གཅོད་པ་དང་། བརྩོན་དུ་བཟུང་བ་དང་། བསླབ་པ་འབེབས་པ་དང་གསོད་པ་སོགས་བྱེད་ནའོ། །བཞི་པ་མཚམས་མེད་ལྔ་བྱེད་པ་ནི། ཕ་དང་མ་དང་དགྲ་བཅོམ་པ་གསོད་པ། དགེ་འདུན་གྱི་དབྱེན་བྱེད་པ། སངས་རྒྱས་ཀྱི་སྐུ་ལ་ངན་སེམས་ཀྱི་ཁྲག་འབྱིན་པ་རྣམས་ལས་གང་རུང་བྱེད་ནའོ། །ལོག་ལྟ་ནི། ལས་རྒྱུ་འབྲས་དང་། ཚེ་སྔ་ཕྱི་མེད་ཅེས་སྙིང་ནས་མི་དགེ་བ་ལ་འཇུག་པའོ། །གཉིས་པ་བློན་པོ་ལ་འབྱུང་ཉེ་བ་ལྔ་ནི། གོང་གི་དཀོན་མཆོག་དཀོར་འཕྲོག་པ་ནས་མཚམས་མེད་བར་གྱི་བཞི་པོའི་སྟེང་དུ། ལྔ་པ་གྲོང་སོགས་འཇོམས་པ་སྟེ། དེ་ལ་གྲོང་ནི་ཁྱིམ་གཅིག་པ་ཡན་དང་། ལྗོངས་ནི་མི་རིགས་བཞི་ཡོད་པ་དང་། གྲོང་ཁྱེར་ནི་བཟོ་རིགས་བཅོ་བརྒྱད་ཡོད་པ་དང་། གྲོང་རྡལ་ནི་ཚོང་པ་མང་པོ་ཚོགས་པའི་གནས་དང་། ཡུལ་འཁོར་ནི་ཙམ་པ་ཀ་ལྟ་བུ་སོགས་ཡུལ་ཆེན་པོ་རྣམས་ལས་གང་ཡང་རུང་བ་གཅིག་འཇོམས་པའོ། །གསུམ་པ་ཕལ་པ་ལ་འབྱུང་ངེས་པ་བརྒྱད་ནི། དང་པོ་ཐེག་པ་ཆེེན་པོ་ལ་བློ་མ་སྦྱངས་པའི་གང་ཟག་ལ་སྣོད་མ་བརྟགས་པར་ཟབ་མོ་སྟོང་པ་ཉིད་ཀྱི་ཆོས་བསྟན་ན་དེ་དེ་ལ་སྐྲག་ནས་བྱང་ཆུབ་ཀྱི་སེམས་བཏང་སྟེ་ཉན་ཐོས་སུ་སྨོན་པའོ། །གཉིས་པ་རྫོགས་པའི་བྱང་ཆུབ་ཀྱི་ལམ་ཐེག་ཆེན་དུ་ཞུགས་པ་ལ། ཁྱོད་ཀྱིས་བསྐལ་པ་གྲངས་མེད་དུ་མར་དཀའ་བ་སྤྱད་པ་སོགས་མི་ནུས་ཀྱི། དེ་བས་ཉན་རང་གི་ལམ་འདི་ལ་ཞུགས་དང་ཚེགས་མེད་པར་འཁོར་བ་ལས་ངེས་པར་འབྱུང་ངོ་ཞེས་ཐེག་དམན་དུ་སེམས་བསྐྱེད་དུ་བཅུག་པའོ། །གསུམ་པ་གང་ཟག་ཉན་ཐོས་ཀྱི་རིགས་ཅན་སོ་ཐར་ལ་སློབ་པའམ་སློབ་པར་འདོད་པ་ལ། དགོས་པ་ཁྱད་པར་ཅན་མེད་བཞིན་དུ། ཁྱོད་ཀྱིས་སོ་ཐར་ཚུལ་ཁྲིམས་དག་པས་ཅི་ཞིག་བྱ། དེ་བས་བྱང་ཆུབ་ཏུ་སེམས་བསྐྱེད་པར་བྱེད་ན། སོ་ཐར་གྱི་ཉེས་པ་རྣམས་བྱང་ཆུབ་ཀྱི་སེམས་ཀྱི་མཐུས་འཇོམས་པར་འགྱུར་རོ་ཞེས་སོ་ཐར་སྤངས་ནས་ཐེག་ཆེན་ལ་སློབ་བཅུག་པའོ། །བཞི་པ། ཉན་ཐོས་ཀྱི་ཐེག་པར་ཇི་ཙམ་བསླབ་ཀྱང་ཆགས་སོགས་ཉོན་མོངས་པ་རྣམས་མི་ཟློག་པས། དེ་ལས་ཟློག་པར་གྱིས་ཤིག་ཅེས་རང་ཡང་འཛིན་ཞིང་གཞན་ལའང་འཛིན་དུ་འཇུག་ནའོ། །ལྔ་པ། ཕྲག་དོག་གི་བསམ་པས་གཞན་བྱང་ཆུབ་སེམས་དཔའ་རྙེེད་བཀུར་ཅན་ལ་ཉེས་པའི་སྐྱོན་བརྗོད་ཅིང་། རང་ཉིད་ཡོན་ཏན་མེད་པ་ལ་ཡོན་ཏན་ཅན་དུ་སྒྲོགས་པར་བྱེད་པའོ། །དྲུག་པ་ནི། རྙེད་བཀུར་གྱི་ཕྱིར་རང་གིས་ཟབ་མོ་སྟོང་པ་ཉིད་ཀྱི་དོན་མ་རྟོགས་ཀྱང་རྟོགས་སོ་ལྟ་བུ་མི་ཆོས་བླ་མའི་རྫུན་གྱིས་གཞན་གྱི་མགོ་བསྐོར་བའོ། །བདུན་པ། རྒྱལ་པོ་ལྟ་བུ་མི་དབང་ཆེན་དང་དགེ་སློང་གཞན་གཉིས་ཀྱི་བར་དུ་རང་གི་ཕྲ་མ་བཅུག་ནས། དགེ་སློང་དེ་ལ་ཆད་པས་གཅོད་དུ་འཇུག་པ་དང་། དགེ་སློང་དེས་དཀོན་མཆོག་གི་དཀོར་བརྐུས་ནས་རང་ལ་སུག་འབུལ་ཏེ་ལྐོག་ཏུ་བྱིན་པ་ན། དེ་རང་གིས་ལེན་པའམ་གཞན་དབང་པོ་ཆེ་དེ་ལ་བྱིན་པའོ། །བརྒྱད་པ། སྤོང་བ་བསམ་གཏན་པ་ལ་གནོད་པའི་ཁྲིམས་ངན་བཅས་ཏེ། དེས་བསམ་གཏན་བསྒོམ་པ་སོགས་ལ་བར་དུ་གཅོད་པ་དང་། དེ་དག་གི་རྙེད་པ་སོགས་ལོངས་སྤྱོད་འཕྲོག་ནས། ཀློག་པ་ཁ་ཏོན་པ་ལ་སྦྱིན་སོགས་ཐབས་སྣ་ཚོགས་ཀྱིས་བར་དུ་གཅོད་ཅིང་ཏིང་ངེ་འཛིན་འདོར་དུ་བཅུག་པ་སྟེ། འདི་དག་ནི་སེམས་ཅན་དམྱལ་བ་ཆེན་པོའི་རྒྱུ་བྱེད་པ་ཡིན་ཏེ། བསླབ་བཏུས་ལས། དེ་དག་རྩ་བའི་ལྟུང་བ་སྟེ། །སེམས་ཅན་དམྱལ་བ་ཆེན་པོའི་རྒྱུ། །ཞེས་སོ། །དེ་ལྟར་རྒྱལ་བློན་ཕལ་པའི་རྩ་ལྟུང་དུ་བཞག་པ་ནི། གཙོ་བོར་གང་ཟག་དེ་ལ་འབྱུང་ཉེ་བའི་སྒོ་ནས་བཞག་གིས་གཞན་ལ་རྩ་ལྟུང་དུ་མི་འགྱུར་བ་ནི་མིན་པས་ཐམས་ཅད་ཀྱིས་ཐམས་ཅད་བསྲུང་བར་བྱའོ། །དེ་ལྟར་མདོ་ལས་མིང་དུ་བཅོ་བརྒྱད་དུ་ཕྱེ་ཡང་རྫས་སུ་བཅུ་བཞིར་འདུ་སྟེ། བློན་པོའི་རྩ་ལྟུང་དང་པོ་བཞི་རྒྱལ་པོའི་རྩ་ལྟུང་དང་པོ་བཞི་ལས་ཐ་དད་དུ་མེད་པའི་ཕྱིར་རོ། །དེ་ལྟར་བཅོ་བརྒྱད་པོའི་སྟེང་དུ། གསང་ཆེན་ཐབས་ལ་མཁས་པའི་མདོ་ལས། རིགས་ཀྱི་བུ་བྱང་ཆུབ་སེམས་དཔའ་ཉན་ཐོས་དང་རང་སངས་རྒྱས་ཡིད་ལ་བྱེད་པས་གནས་པ་འདི་ནི་བྱང་ཆུབ་སེམས་དཔའི་རྩ་བའི་ལྟུང་བ་ལྕི་བའོ། །ཞེས་སྨོན་སེམས་འདོར་བ་དང་། དཀོན་མཆོག་བརྩེགས་པ་ལས་གསུངས་པ་ལྟར་འཇུག་སེམས་སྤངས་ཏེ་དགེ་ལ་མི་སྦྱོར་བ་སྟེ་འདི་གཉིས་བསྣན་པས་ཉི་ཤུར་འགྱུར་རོ། །གཉིས་པ་ནི། འཕགས་པ་ཐོགས་མེད་ཀྱིས་ཐེག་པ་ཆེན་པོའི་མདོ་སྣ་ཚོགས་ལས་བཏུས་ནས་བྱང་ཆུབ་སེམས་དཔའི་སར་གསུངས་པའི་དོན་རྨད་བྱུང་གི་སློབ་དཔོན་ཆེན་པོ་ཙནྡྲ་གོ་མིས་སྡོམ་པ་ཉི་ཤུ་པར། ཉོན་མོངས་དྲག་ལས་བྱུང་བ་ཡིས། །སྡོམ་པ་ཞིག་པར་གང་གྱུར་པ། །དེ་ཡི་ཉེས་པ་བཞི་པོ་ནི། །ཕམ་པ་འདྲ་བར་དགོངས་པ་ཡིན། །རྙེད་དང་བཀུར་སྟིར་ཆགས་པ་ཡིན། །བདག་བསྟོད་གཞན་ལ་སྨོད་པ་དང་། །སྡུག་བསྔལ་མགོན་མེད་གྱུར་པ་ལས། །སེར་སྣས་ཆོས་ནོར་མི་སྟེར་དང་། །གཞན་གྱིས་བཤགས་ཀྱང་མི་ཉན་པར། །ཁྲོས་པས་གཞན་ལ་འཚོག་པ་དང་། །ཐེག་པ་ཆེན་པོ་སྤོང་བྱེད་ཅིང་། །དམ་ཆོས་འདྲར་སྣང་སྟོན་པའོ། །ཞེས་ཆགས་སོགས་ཉོན་མོངས་པ་དྲག་པོའི་རྒྱུ་ལས་བྱུང་བ་བྱང་ཆུབ་སེམས་དཔའི་སྡོམ་པ་འཇིགས་པར་བྱེད་པས་ཉན་ཐོས་ཀྱི་ཕམ་པ་དང་འདྲ་བའི་རྩ་བའི་ལྟུང་བ་བཞི་ལས། དང་པོ་ནི། ཆགས་པའི་དབང་གིས་རྙེད་པ་སྟེ་ཡོན་འབུལ་བ་དང་། བཀུར་སྟི་སྟེ་གདན་སྟོབས་པ་སོགས་ལ་ལྷག་པར་ཞེན་པའི་དབང་གིས་བདག་ལ་བསྟོད་པ་དང་། ཡོན་ཏན་ཅན་གཞན་ལ་སྨོད་པའོ། །གཉིས་པ་ནི། སེར་སྣའི་དབང་གིས་སྡུག་བསྔལ་བ་དང་མགོན་མེད་པ་རྣམས་ལ་ཟང་ཟིང་དང་། སྣོད་ལྡན་ལ་ཆོས་མི་སྟེར་བའོ། །གསུམ་པ་ནི། ཞེ་སྡང་གི་དབང་གིས་གཞན་ཕ་རོལ་པོས་རང་ལ་བཟོད་གསོལ་གྱི་ཤད་སྦྱངས་ཚུལ་མཐུན་བྱས་ཀྱང་མི་ཟློག་པར་འཁོན་དུ་འཛིན་པ་དང་། ཕ་རོལ་པོ་ལ་ཁྲོ་བས་ཚིག་རྩུབ་སྨྲས་པ་ཙམ་གྱིས་མི་ཆོག་པར་རྡེག་ཅིང་འཚོག་པས་འཚེ་བ་བྱེད་པའོ། །བཞི་པ་ནི། གཏི་མུག་གི་དབང་གིས་ཐེག་པ་ཆེན་པོའི་ཆོས་ལ་སྐུར་བ་འདེབས་ཤིང་སྤངས་པ་དང་། རང་ངམ་གཞན་དག་གིས་རང་གིས་བློ་བཟོར་བྱས་ཏེ་ཆོས་ལྟར་བཅོས་པ་དམ་ཆོས་འདྲར་སྣང་སྟོན་པར་བྱེད་པའོ། །དེ་ལྟར་ཀུན་སློང་གི་བསམ་པའིསྒོ་ནས་རྩ་ལྟུང་བཞིར་བཞག་པ་དེ་ཉིད་ལ། གོང་དུ་སྨོས་པ་ལྟར་སྦྱོར་བའི་སྒོ་ནས་གཉིས་གཉིས་སུ་འགྱུར། དེ་ལྟར་ཕྱེས་ཏེ་བརྒྱད་དུ་འགྱུར་བར་ཇོ་བོ་རྗེས་བཞེད་དོ། །གཞན་ཡང་བསླབ་བཏུས་ནས་གསུངས་པའི་ཉེས་བྱས་ཕྲ་མོ་བརྒྱད་ཅུ་དང་། སྡོམ་པ་ཉི་ཤུ་པ་ནས་གསུངས་པའི་ཉེས་བྱས་ཕྲ་བ་ཞེ་དྲུག་སོགས་སྲོལ་གཉིས་ཀ་ནས་བསྟན་པའི་ཡན་ལག་གི་ཉེས་བྱས་ཕྲ་བ་རྣམས་ཏེ་མདོར་ན་སྒོ་གསུམ་གྱི་བྱ་བའི་ལས་གཞན་ལ་གནོད་པ་བཞི་དང་བཅས་པ་སྤོོང་བ་ནི་ཉེས་སྤྱོད་སྡོམ་པའི་ཚུལ་ཁྲིམས་སོ། །གཉིས་པ་དགེ་བ་ཆོས་སྡུད་ནི། གོང་དུ་བསྟན་པ་ལྟར་གྱིས་གཞན་དོན་དུ་ཕ་རོལ་ཏུ་ཕྱིན་པ་དྲུག་པོ་ལ་བསླབ་ཅིང་དངོས་སམ་བརྒྱུད་ནས་གཞན་ལ་ཕན་པ་གཞི་དང་བཅས་པ་སྒྲུབ་པ་སྟེ། མདོར་ན་ཚོགས་གཉིས་དང་འབྲེལ་བའི་དགེ་ཚོགས་རྒྱ་མཚོ་ལྟ་བུ་སྒྲུབ་ཅིང་། དེའི་མི་མཐུན་ཕྱོགས་སྤང་བ་ལ་བསླབ་པར་བྱ་བ་སྟེ། གཞན་ཡང་བྱང་ས་ལས། བྱང་ཆུབ་སེམས་དཔའི་ཚུལ་ཁྲིམས་ལ་བརྟེན་ཞིང་གནས་ནས། ཐོས་པ་དང་བསམ་པ་དང་སྒོམ་པ་དང་གཅིག་པུར་དགའ་བ་ལ་བརྩོན་པར་བྱེད་དོ། །བླ་མ་རྣམས་ལ་བཀུར་སྟི་དང་རིམ་གྲོ་བྱེད་པ་དང་། ནད་པ་ལ་རིམ་གྲོ་དང་ནད་གཡོག་བྱེད་པ་དང་། ལེགས་པར་སྦྱིན་ཞིང་ཡོན་ཏན་བསྒྲག་པ་དང་། གཞན་གྱི་བསོད་ནམས་ལ་ཡི་རང་ཞིང་བརྙས་པ་ལ་བཟོད་པ་དང་། དགེ་བ་བྱང་ཆུབ་ཏུ་བསྔོ་ཞིང་སྨོན་ལམ་འདེབས་པ་དང་། དཀོན་མཆོག་མཆོད་ཅིང་བརྩོན་འགྲུས་རྩོམ་པ་དང་། བག་ཡོད་པར་གནས་པ་དང་། བསླབ་པ་དྲན་པ་དང་། ཤེས་བཞིན་གྱིས་བསྲུང་བ་དང་། དབང་པོའི་སྒོ་བསྲུང་ཞིང་ཟས་ཀྱི་ཚོད་ཤེས་པ་དང་། ནམ་གྱི་ཆ་སྟོད་དང་། ཆ་སྨད་ལ་མི་ཉལ་བར་བརྩོན་པ་དང་། སྐྱེས་བུ་དམ་པ་དང་། དགེ་བའི་བཤེས་གཉེན་ལ་བསྟེན་པ་དང་། རང་གི་འཁྲུལ་པ་ལ་བརྟགས་ནས་དེ་འཆགས་ཤིང་གཏོང་བ་སྟེ། དེ་ལྟ་བུའི་ཆོས་རྣམས་བསྒྲུབ་པ་དང། བསྲུང་བ་དང་། རྣམ་པར་འཕེལ་བར་བྱེད་པ་ནི་དགེ་བ་ཆོས་སྡུད་ཀྱི་ཚུལ་ཁྲིམས་ཞེས་བྱའོ། །ཞེས་གསུངས་སོ། །གསུམ་པ་སེམས་ཅན་དོན་བྱེད་ཀྱི་ཚུལ་ཁྲིམས་ནི། བྱང་ས་ལས། བྱ་བ་དོན་དང་ལྡན་པ་ལ་གྲོགས་སུ་འགྲོ་བ་དང་། སེམས་ཅན་སྡུག་བསྔལ་བ་དང་། ཐབས་མི་ཤེས་པ་ལ་རིག་པ་སྟོན་པ་དང། བྱས་པ་གཟོ་ཞིང་ཚོར་ཏེ་ལན་དུ་ཕན་འདོགས་པ་དང་། འཇིགས་པ་རྣམས་ལས་བསྲུང་བ་དང་། སྡུག་བསྔལ་བ་རྣམས་ཀྱི་མྱ་ངན་སེལ་བ་དང་། ཡོ་བྱད་མེད་པ་རྣམས་ལ་ཡོ་བྱད་སྟོབ་པ་དང་། ཆོས་ཀྱིས་འཁོར་ལེགས་པར་སྡུད་པ་དང་། སེམས་དང་མཐུན་པར་འཇུག་པ་དང་། ཡང་དག་པའི་ཡོན་ཏན་གྱིས་དགའ་བར་བྱེད་པ་དང་། ལེགས་པར་ཚར་གཅོད་པ་དང་། རྫུ་འཕྲུལ་གྱིས་སྐྲག་པ་དང་འདུན་པར་བྱེད་པའོ། །ཞེས་རྣམ་གྲངས་བཅུ་གཉིས་སུ་གསུངས་པ་རྣམས་དང་། ཁྱད་པར་དུ་སྡོམ་གསུམ་རྣམ་ངེས་ལས། སེམས་ཅན་དོན་བྱེད་ཚུལ་ཁྲིམས་བསྡུ་དངོས་བཞི། །ཐོག་མར་སྦྱིན་པས་གདུལ་བྱ་རབ་བསྡུས་ནས། །སྙན་པར་སྨྲ་བའི་གཏམ་གྱིས་ཡིད་རབ་དྲངས། །ཐེག་པ་རིམ་དགུར་དཀྲི་བ་དོན་སྤྱོད་དེ། །དེ་དག་འདྲེན་ཕྱིར་རང་ཡང་དོན་དེ་སྤྱོད། །ཅེས་པ་ལྟར། བསྡུ་དངོས་བཞི་སྟེ། དང་པོ་ནི། གདུལ་བྱ་འཁོར་དུ་མ་འདུས་པ་བསྡུ་བར་བྱ་བའི་ཕྱིར་ཐོག་མར་ཟང་ཟིང་གི་སྦྱིན་པས་མགུ་བར་བྱེད་པ་སྟེ། མཁས་མཆོག་དཔའ་བོས་པདྨ་སྤུངས་པ་ལས། སྦྱིན་པའི་གཡབ་མོས་ལེགས་བོས་ཏེ། །ཞེས་སོ། །གཉིས་པ་ནི། འཁོར་དུ་འདུས་ནས་སྙན་པར་སྨྲ་བའི་གཏམ་གྱིས་བློ་རིམ་གྱིས་དྲངས་ཏེ་དམ་པའི་ཆོས་བསྟན་པས་དེ་སྒྲུབ་པ་ལ་དོན་གཉེར་གྱི་མོས་འདུན་དང་སྤྲོ་བ་བསྐྱེད་དུ་འཇུག་པ་སྟེ། དེ་ཉིད་ལས། སྙན་པར་སྨྲ་བའི་ཚིག་གིས་བསུ། །ཞེས་སོ། །གསུམ་པ་ནི། བྱིས་པ་རྣམས་ཁ་ཟས་འཇམ་རྩུབ་ཀྱིས་རིམ་པར་གསོ་བ་ལྟར་གདུལ་བྱ་རང་རང་གི་བློ་དང་འཚམ་པར་ཆོས་ལ་སྤྱོད་དུ་འཇུག་པ་སྟེ། སྔ་མ་ལས། དོན་སྤྱོད་གྲོས་ཆེན་གདབ་པར་བྱ། །ཞེས་སོ། བཞི་པ་ནི། སེམས་ཅན་དེ་དག་དམ་པའི་ཆོས་དང་དགེ་བ་ལ་སྦྱོར་བའི་ཕྱིར་རང་ཡང་དེ་དང་མཐུན་པར་བསླབ་པ་སྟེ། དེ་ཉིད་ལས། དོན་མཐུན་པ་ཡིས་བག་ཕབ་སྟེ། །ཞེས་སོ། །གཞན་ཡང་རང་མི་ཉམས་ཤིང་གཞན་དད་པར་བྱ་བའི་ཕྱིར། ལུགས་ཀྱི་འདུ་བྱེད་མ་དག་པ་དོན་མེད་པའི་མཆོང་རྒྱུག་སོགས་དང་། ངག་གི་དོན་མེད་པའི་སྨྲ་བ་མང་པོ་དང་གཞན་སྐྱོན་འབྲུ་བ་སོགས་དང་། ཡིད་རྙེད་བཀུར་གཉིད་རྨུགས་ལ་དགའ་བ་སོགས་སྤངས་ཤིང་། ལུས་ཀྱི་འདུ་བྱེད་དག་པ་སྤྱོད་ལམ་ཞི་ཞིང་དུལ་བ། ངག་གི་ཚིག་འཇམ་ཞིང་རན་པར་སྨྲ་བ། ཡིད་དད་སོགས་གཡོ་སྒྱུ་མེད་པའི་ལྷག་པའི་བསམ་པ་ལ་གནས་པར་བྱ་སྟེ། སྤྱོད་འཇུག་ལས། དེ་ལྟར་རང་དབང་ཡོད་གྱིས་ཏེ། །རྟག་ཏུ་འཛུམ་པའི་བཞིན་དུ་གྱིས། །ཁྲོ་གཉེར་ངོ་འཛུམ་ཡོངས་སྤངས་ཏེ། །འགྲོ་བའི་བཤེས་དང་གསོང་པོར་གྱིས། །ཞེས་སོགས་དང་། ཟླ་བ་སྒྲོན་མའི་མདོ་ལས། གང་གིས་འཁྲུལ་པ་ཅི་མཐོང་ཡང་། །དེ་དག་ཉེས་པར་མི་བསྒྲག་སྟེ། །ཅི་འདྲ་བ་ཡི་ལས་བྱས་པ། །འབྲས་བུ་དེ་འདྲར་ཐོབ་པར་འགྱུར། །ཞེས་དང་། ལུང་སྔ་མ་ལས། སྨྲ་ན་ཡིད་ཕེབས་འབྲེལ་བ་དང་། །དོན་གསལ་ཡིད་དུ་འོང་བ་དང་། །ཆགས་དང་ཞེ་སྡང་སྤང་བ་དང་། །འཇམ་ཞིང་རན་པར་སྨྲ་བར་བྱ། །ཞེས་དང་། ལྷག་བསམ་བསྐུལ་བའི་མདོ་ལས། བྱམས་པ་བྱང་ཆུབ་སེམས་དཔས་རྙེད་པ་དང་བཀུར་སྟི་ནི་འདོད་ཆགས་བསྐྱེད་པར་བརྟག་གོ །རྙེད་པ་དང་བཀུར་སྟི་ནི་ཞེ་སྡང་བསྐྱེད་པར་རིགས་པར་བྱའོ། །རྙེད་པ་དང་བཀུར་སྟི་ནི་གཏི་མུག་བསྐྱེད་པར་རིགས་པར་བྱའོ། །རྙེད་པ་དང་བཀུར་སྟི་ནི་གཡོ་བསྐྱེད་པར་རིགས་པར་བྱའོ། །རྙེད་པ་དང་བཀུར་སྟི་ནི་སངས་རྒྱས་ཐམས་ཅད་ཀྱིས་མི་གནང་བར་བརྟག་པར་བྱའོ། །རྙེད་པ་དང་བཀུར་སྟི་ནི་དགེ་བའི་རྩ་བ་འཕྲོག་པར་བརྟག་པར་བྱའོ། །རྙེད་པ་དང་བཀུར་སྟི་ནི་ཕ་རོལ་འབྲིད་པའི་སྨད་འཚོང་མ་དང་འདྲ་བར་བརྟག་པར་བྱའོ། །ཞེས་སོགས་གསུངས་པ་ལྟར་ཏེ། མདོར་ན་ཞི་བ་ལྷས། གཞན་དག་མ་དད་གྱུར་པའི་ཆ། །མཐོང་དང་དྲིས་ལ་སྤོང་བར་བྱ། །ཞེས་སོ། །དེ་ལྟར་ཚུལ་ཁྲིམས་གསུམ་པོ་ཡང་གོང་དུ་སྨོས་པ་ལྟར་ཐབས་ཤེས་ཁྱད་པར་ཅན་ལ་བརྟེན་ནས་རྣམ་པར་དག་པ་དང་སྤེལ་བའི་ཚུལ་ལ་མཁས་པར་བྱའོ། །དེ་ལྟར་ཚུལ་ཁྲིམས་དང་མི་ལྡན་པའི་སྐྱོན་ནི། དབུ་མ་འཇུག་པ་ལས། སྐྱེས་བུ་ཚུལ་ཁྲིམས་རྐང་པ་ཆག་གྱུར་ན། །སྦྱིན་པས་ལོངས་སྤྱོད་ལྡན་ཡང་ངན་འགྲོར་ལྟུང་། །ཞེས་གསུངས། ཚུལ་བཞིན་བསྲུང་བའི་ཕན་ཡོན་ཡང་། གནས་སྐབས་སུ། སྡུད་པ་ལས། ཁྲིམས་ཀྱིས་དུད་འགྲོའི་འགྲོ་བ་དུ་མའི་ངོ་བོ་དང་། །མི་ཁོམ་བརྒྱད་སྤོང་དེ་ཡིས་དལ་བ་རྟག་ཏུ་རྙེད། །ཅེས་དང་། བྱང་ཆུབ་སེམས་དཔའི་སྡེ་སྣོད་ལས། ཤཱ་རིའི་བུ། ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔས་ལྷ་དང་མིའི་དཔལ་ཕུན་སུམ་ཚོགས་པ་མྱོང་བ་མི་འགྱུར་བ་གང་ཡང་མེད་དོ། །ཞེས་སོ། །མཐར་ཐུག་གི་འབྲས་བུ་ནི། བྱང་ས་ལས། བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ཡོངས་སུ་རྫོགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་གསུངས་པ་བཞིན་ཚུལ་ཁྲིམས་འདི་གསུམ་གྱིས་ལམ་བསླབ་པ་གསུམ་སྒྲུབ་ཅིང་ཚོགས་གཉིས་རྫོགས་ནས་སངས་རྒྱས་པའི་ཚེ་སྡོམ་པའི་ཚུལ་ཁྲིམས་ཀྱིས་སྤངས་པ་ཕུན་སུམ་ཚོགས་པ་སྒྲིབ་གཉིས་བག་ཆགས་དང་བཅས་པ་སྤངས་པ་ཐོབ་པར་བྱེད་དོ། །དགེ་བ་ཆོས་སྡུད་ཀྱི་ཚུལ་ཁྲིམས་ཀྱིས་རྟོགས་པ་ཕུན་སུམ་ཚོགས་པ་ཇི་ལྟ་བ་དང་ཇི་སྙེད་པའི་མཁྱེན་པ་ལ་སོགས་པ་ཐོབ་བོ། །སེམས་ཅན་དོན་བྱེད་ཀྱི་ཚུལ་ཁྲིམས་ཀྱིས་ཕྲིན་ལས་ཕུན་སུམ་ཚོགས་པ་གང་ལ་གང་འདུལ་དུ་དེ་དང་འཚམ་པའི་དོན་གཉིས་ལྷུན་གྲུབ་ཏུ་འབྱུང་བའི་རྒྱུ་ཅན་ཐོབ་པ་ཡིན་ནོ། །གསུམ་པ་བཟོད་པ་ནི། ངོ་བོ་ཁྱད་ཆོས་བཞི་ལྡན་གྱི་མི་འཁྲུགས་པའི་སེམས་པ་དགེ་བ་ས་བོན་དང་བཅས་པའོ། །ངེས་ཚིག་ནི། ཀྵནྟའི་སྒྲ་ལས་བཟོད་པ་སྟེ། སྡུག་བསྔལ་སོགས་ལ་བསྲན་ཚུགས་པས་བཟོད་པའོ། །དབྱེ་ན། རྣམ་ངེས་ལས། ཁོང་ཁྲོ་ཟབ་མོ་སྡུག་བསྔལ་བཟོད་པར་བྱ། །ཞེས་པ་ལྟར་གསུམ་ལས། དང་པོ་གནོད་བྱེད་ལ་ཇི་མི་སྙམ་པའི་བཟོད་པ་ནི། རང་དང་རང་གི་ཕྱོགས་ལ་ཕ་རོལ་པོས་གནོད་པ་ཇི་དང་ཇི་ལྟ་བུ་བྱེད་ཀྱང་། རྒྱུ་རང་གིས་སྔོན་ཕར་ལ་གནོད་པ་བགྱིས་པའི་འབྲས་བུ་ཡིན་པ་དང་། ད་ལྟ་ཁོ་རང་སེམས་འཁྲུལ་བའི་དབང་གིས་གདོན་གྱིས་མྱོས་པ་བཞིན་དུ་རང་དབང་མེད་པར་བདག་ལ་འདི་ལྟ་བའི་གནོད་པ་བྱས་པས་ཕྱི་མ་ངན་སོང་གི་སྡུག་བསྔལ་མྱོང་དགོས་པས་སྙིང་རེ་རྗེ་སྙམ་པ་དང་། བདག་ནི་ཐབས་འདི་ལ་བརྟེན་ནས་བཟོད་པ་བསྒོམས་པས་སྡིག་པ་མང་པོ་འཛད་ཅིང་བསོད་ནམས་ཀྱི་ཚོགས་འཕེལ་བར་བྱེད་པས་དགེ་བའི་གཤེས་གཉེན་བཞིན་དུ་གནོད་བྱེད་ཀྱི་དགྲ་འདི་བཀའ་དྲིན་ཆེ་སྙམ་པ་དང་། བདག་གིས་འདིའི་དྲིན་ལན་དུ་དགེ་བའི་རྩ་བ་གང་བྱེད་ཐུན་མོང་དུ་བསྔོ་བར་བྱའོ་སྙམ་པ་ལས། གནོད་བྱེད་ལ་སེམས་འཁྲུགས་པ་དང་། གནོད་ལན་བྱེད་པ་དང་། འཁོན་དུ་འཛིན་པ་སོགས་མི་བྱ་བ་ལ་བསླབ་པ་སྟེ། སྤྱོད་འཇུག་ལས། ཞེ་སྡང་ལྟ་བུའི་སྡིག་པ་མེད། །བཟོད་པ་ལྟ་བུའི་དཀའ་ཐུབ་མེད། །དེ་བས་བཟོད་ལ་ནན་ཏན་དུ། །སྣ་ཚོགས་ཚུལ་གྱིས་བསྒོམ་པར་བྱ། །ཞེས་དང་། བདག་གིས་སྔོན་ཆད་སེམས་ཅན་ལ། །འདི་འདྲ་བ་ཡི་གནོད་པ་བྱས། །དེ་བས་སེམས་ཅན་འཚེ་བྱེད་པ། །བདག་ལ་གནོད་བྱེད་འདི་འབྱུང་རིགས། །ཞེས་དང་། བྱང་ཆུབ་སྤྱོད་པའི་གྲོགས་གྱུར་པས། །བདག་གིས་དགྲ་ལ་དགའ་བར་བྱ། །འདི་དང་བདག་གིས་བསྒྲུབས་པས་ན། །དེ་ཕྱིར་བཟོད་པའི་འབྲས་བུ་འདི། །ཐོག་མར་འདི་ལ་བརྡལ་འོས་ཏེ། །འདི་ལྟར་དེ་ནི་བཟོད་པའི་རྒྱུ། །ཞེས་སོ། །ལེགས་པར་བརྟགས་ན་གནོད་བྱ་གནོད་བྱེད་གནོད་པ་གསུམ་ཀའང་རང་བཞིན་གྱིས་གྲུབ་པ་མེད་པས་སྤྲུལ་པ་ལྟ་བུའི་ཆོས་ལ་སུ་ཞིག་ཁྲོ་བར་བྱ་སྟེ། སྔ་མ་ལས། དེ་ལྟར་ཤེས་ན་སྦྲུལ་ལྟ་བུའི། །དངོས་པོ་ཀུན་ལ་ཁྲོ་མི་འགྱུར། །ཞེས་དང་། དེ་ལྟར་སྟོང་པའི་ཆོས་རྣམས་ལ། །ཐོབ་པ་ཅི་ཡོད་ཤོར་ཅི་ཡོད། །མི་དགར་ཅི་ཡོད་དགར་ཅི་ཡོད། །ཐམས་ཅད་ནམ་མཁའ་འདྲ་བར་ནི། །བདག་འདྲས་ཡོངས་སུ་བཟུང་བར་བགྱི། །ཞེས་སོ། །གཉིས་པ་སྡུག་བསྔལ་དང་དུ་ལེན་པའི་བཟོད་པ་ནི། ཆོས་སྒྲུབ་པའི་ཕྱིར་དུ་ལུས་ཀྱི་ན་ཚ་དང་ཚ་གྲང་ལྟོགས་སྐོམ་སོགས་འཕྲལ་གྱི་སྡུག་བསྔལ་དང་དཀའ་བ་ཇི་ལྟ་བུ་སྤྱོད་དགོས་པ་བྱུང་ཡང་། གནས་སྐབས་སུ་སྡིག་པ་འཛད་པ་དང་། མཐར་ཐུག་བླ་ན་མེད་པའི་བྱང་ཆུབ་ཐོབ་བྱེད་དུ་འགྲོ་བས་པདྨའི་མཚོ་ལ་ངང་པ་འཇུག་པ་ལྟར་སྤྲོ་བས་དང་དུ་ལེན་པར་བྱ་སྟེ། སྤྱོད་འཇུག་ལས། གསད་བྱའི་མི་གཅིག་ལག་བཅད་དེ། །གལ་ཏེ་ཐར་ན་ཅིས་མ་ལེགས། །གལ་ཏེ་མི་ཡི་སྡུག་བསྔལ་གྱིས། །དམྱལ་བ་བྲལ་ན་ཅིས་མ་ལེགས། །བདག་གིས་བྱང་ཆུབ་སྒྲུབ་པ་ཡི། །སྡུག་བསྔལ་འདི་ནི་ཚོད་ཡོད་དེ། །ཟུག་རྔུ་ཁོང་བརླག་གནོད་བསལ་ཕྱིར། །ལུས་རྨ་གཏོད་པའི་སྡུག་བསྔལ་བཞིན། །ཞེས་སོ། །གསུམ་པ་ཆོས་ལ་ངེས་རྟོག་གི་བཟོད་པ་ནི། སྙིང་རྗེ་ཆེན་པོས་བསྐལ་པའི་མཐའི་བར་དུ་སེམས་ཅན་གྱི་དོན་རྒྱ་ཆེན་པོ་སྒྲུབ་པ་དང་། ཤེས་རབ་ཆེན་པོས་ཆོས་ཐམས་ཅད་ཀྱི་གནས་ལུགས་དེ་ཁོ་ན་ཉིད་སྟོང་པ་ཉིད་དང་། རང་བཞིན་གྱིས་འོད་གསལ་བ་དང་། རང་བྱུང་གི་ཡེ་ཤེས་འདུས་མ་བྱས་དང་བདེ་གཤེགས་སྙིང་པོ་དང་། བསམ་གྱིས་མི་ཁྱབ་པ་སོགས་གནས་ལུགས་ཟབ་མོའི་དོན་ལ་མི་སྐྲག་པའི་བཟོད་པའོ། །བཟོད་པ་དེ་གསུམ་ཡང་ཐབས་ཤེས་ཁྱད་པར་ཅན་གྱིས་དག་པ་དང་སྤེལ་བའི་ཚུལ་ལ་མཁས་པར་བྱའོ། །དེ་ལྟ་བུའི་བཟོད་པ་དང་མི་ལྡན་པའི་སྐྱོན་ནི། ཞི་བ་ལྷས། བསྐལ་པ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཀྱང་། །ཁོང་ཁྲོ་གཅིག་གིས་འཇོམས་པར་བྱེད། །ཅེས་སོ། །བཟོད་པ་བསྒོམས་པའི་འབྲས་བུ། གནས་སྐབས་སུ། སྔ་མ་ལས། འཁོར་ཚེ་བཟོད་པས་མཛེས་སོགས་དང་། །ནད་མེད་པ་དང་གྲགས་པ་ཡིས། །ཤིན་ཏུ་ཡུན་རིང་འཚོ་བ་དང་། །འཁོར་ལོས་སྒྱུར་བའི་བདེ་རྒྱས་ཐོབ། །ཅེས་དང་། མདོ་ལས། འཁོན་མི་མང་བ་ཡིན། དབྱེན་མི་མང་བ་ཡིན། བདེ་བ་དང་ཡིད་བདེ་བ་མང་བ་ཡིན། འགྱོད་པ་མེད་པར་འཆི་བའི་དུས་བྱེད་པ་ཡིན། ལུས་ཞིག་ནས་ཀྱང་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་འགྱུར་རོ། །ཞེས་ཕན་ཡོན་ཆེན་པོ་ལྔ་གསུངས་སོ། །མཐར་ཐུག་བྱང་ཆུབ་མངོན་དུ་བྱེད་པའང་། ཡབ་སྲས་མཇལ་བའི་མདོ་ལས། ཁྲོ་བ་སངས་རྒྱས་ལམ་མིན་ཞེས། །རྟག་ཏུ་བྱམས་པ་སྒོམ་པ་ན། །བྱང་ཆུབ་དེ་ལས་སྐྱེ་བར་འགྱུར། །ཞེས་གསུངས་སོ། །བཞི་པ་བརྩོན་འགྲུས་ནི། ངོ་བོ་ཁྱད་ཆོས་བཞི་ལྡན་གྱི་སྤྲོ་བའི་སེམས་པ་དགེ་བ་ས་བོན་དང་བཅས་པའོ། །ངེས་ཚིག བཱིཪྻའི་སྒྲ་ལས་བརྩོན་འགྲུས་ཏེ། སྙིང་སྟོབས་མ་ཞུམ་པས་མཆོག་གི་གནས་ལ་སྦྱོར་བས་ན་བརྩོན་འགྲུས་སོ། །དབྱེ་ན། རྣམ་ངེས་ལས། གོ་ཆ་དགེ་སྡུད་གཞན་ཕན་བརྩོན་འགྲུས་བརྩམ། །ཞེས་པ་ལྟར་གསུམ་ལས། དང་པོ་བསམ་པ་གོ་ཆའི་བརྩོན་འགྲུས་ནི། ཐོག་མར་ཆོས་ལ་འཇུག་པའི་ཚེ་ན་བདུད་ཀྱིས་མི་བརྫི་བའི་རྒྱུ་སེམས་ཅན་ཐམས་ཅད་རྫོགས་བྱང་ལ་མ་འཁོད་ཀྱི་བར་དུ་བདག་གིས་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་བསྒྲུབ་པ་ལ་ནམ་ཡང་བརྩོན་པ་འདོར་བར་མི་བྱའོ་སྙམ་དུ་སྙིང་སྟོབས་བསྐྱེད་དེ་ཞེ་ཐག་པ་ནས་བསམ་པ་སྟེ། བྱང་ཆུབ་སེམས་དཔའི་སྡེ་སྣོད་ལས། ཤཱ་རིའི་བུ་བསམ་གྱིས་མི་ཁྱབ་པའི་གོ་ཆ་བགོ་བར་བྱ་སྟེ། འཁོར་བའི་ཐ་མ་ཇི་ཙམ་པར་བྱང་ཆུབ་ཀྱི་ཕྱིར་བརྩོན་འགྲུས་ལྷོད་པར་མི་བྱ་སྟེ། ཞེས་དང་། གོ་ཆ་བཀོད་པའི་མདོ་ལས། བྱང་ཆུབ་སེམས་དཔས་སེམས་ཅན་རྣམས། བསྡུ་ཕྱིར་གོ་ཆ་བགོ་བར་བྱ། །སེམས་ཅན་ཚད་ནི་མེད་པའི་ཕྱིར། །གོ་ཆ་བགོས་པ་ཚད་མེད་དོ། །ཞེས་དང་། བློ་གྲོས་མི་ཟད་པས་ཞུས་པའི་མདོ་ལས། དེ་བསྐལ་པ་འདི་སྙེད་ཅིག་གོ་ཆ་བགོ་ལ། དེ་བསྐལ་པ་འདི་སྐད་ཅིག་གོ་ཆ་མི་བགོ་ཞེས་བསྐལ་པ་བགྲང་བས་བྱང་ཆུབ་མི་འཚོལ་གྱི། བསམ་གྱིས་མི་ཁྱབ་པའི་གོ་ཆ་གོན་པར་བྱའོ། །ཞེས་སོ། །གཉིས་པ་སྦྱོར་བ་ལག་ལེན་དུ་འདེབས་པ་སྦྱོར་བའི་བརྩོན་འགྲུས་ནི། ལམ་ལྔ་དང་ས་བཅུ་རྫོགས་པར་བྱེད་པའི་སྤངས་རྟོགས་ཀྱི་ཡོན་ཏན་ཐོབ་འགྱུར་ལ་སྤྲོ་དགའ་དང་བཅས་ཏེ་དེ་འཐོབ་བྱེད་ཀྱི་རྒྱུ་ཐོས་བསམ་སྒོམ་གསུམ་སོགས་དགེ་ཚོགས་རྒྱ་མཚོ་ལྟ་བུ་སྡུད་པ་ལ་འཇུག་ཅིང་། ཞུགས་ནས་ཀྱང་སྒྲུབ་པ་ལ་སྙིང་སྟོབས་དཔའ་མི་ཞུམ་པ་དང་། གནས་སྐབས་ཀྱི་ཡོན་ཏན་ཅུང་ཟད་རེ་ཙམ་ཐོབ་པས་མི་ངོམ་པ་དང་། གཞན་གྱི་ལོག་སྒྲུབ་སོགས་རྐྱེན་གྱིས་མི་ལྡོག་པའི་སྒོ་ནས་རྟག་སྦྱོར་དང་གུས་སྦྱོར་གྱིས་འབད་པར་བྱ་བ་སྟེ། དེ་ལ་རྟག་སྦྱོར་ནི། དཀོན་མཆོག་སྤྲིན་ལས། འདི་ལ་བྱང་ཆུབ་སེམས་དཔའི་སྤྱོད་ལམ་ཐམས་ཅད་དུ་བརྩོན་འགྲུས་བརྩམས་པ་ནི། ཅི་ནས་ལུས་སྐྱོ་བར་མི་འགྱུར་བ་དང་། སེམས་སྐྱོ་བར་མི་འགྱུར་བ་དེ་ལྟར་རྩོམ་སྟེ། འདི་ནི་བྱང་ཆུབ་སེམས་དཔའི་རྟག་པའི་བརྩོན་འགྲུས་ཞེས་བྱའོ། །ཞེས་སོ། །གུས་སྦྱོར་ནི་དགའ་བཞིན་སྤྲོ་བཞིན་མྱུར་དུ་བྱེད་པ་སྟེ། ཇི་སྐད་དུ། དེ་ལྟར་ལས་ཚར་ཕྱིན་བྱའི་ཕྱིར། །ཉི་མ་ཕྱེད་དུས་གདུང་བ་ཡི། །གླང་ཆེན་མཚོར་འཕྲད་འཇུག་པ་ལྟར། །ལས་དེ་ལ་ཡང་འཇུག་པར་བྱ། །ཞེས་སོ། །གསུམ་པ་རང་གཞན་གྱི་དོན་འགྲུབ་པའི་རྒྱུས་སེམས་ཅན་དོན་བྱེད་ཀྱི་བརྩོན་འགྲུས་ནི། ཉིན་དང་མཚན་མོ་སོགས་དུས་དང་རྣམ་པ་ཀུན་ཏུ་བསམ་པ་དང་སྦྱོར་བ་གང་ཡང་རུང་བས་དངོས་སམ་བརྒྱུད་ནས་སེམས་ཅན་གྱི་ཕན་བདེ་སྒྲུབ་པའི་ཐབས་འབའ་ཞིག་ལ་བརྩོན་པར་བྱ་བ་སྟེ། དངོས་སམ་ཡང་ན་བརྒྱུད་ཀྱང་རུང་། །སེམས་ཅན་དོན་ལས་གཞན་མི་བསམ། །སེམས་ཅན་ཁོ་ནའི་དོན་གྱི་ཕྱིར། །ཐམས་ཅད་བྱང་ཆུབ་རྒྱུར་བསྔོའོ། །ཞེས་སོ། །དེ་དག་གི་སྐབས་སུ་བརྩོན་འགྲུས་ཀྱི་མི་མཐུན་ཕྱོགས་ལེ་ལོ་སྤང་བར་བྱ་སྟེ། དེ་ཡང་ལེ་ལོ་ལ་གསུམ། སྙོམ་ལས་ཀྱི་ལེ་ལོ། སྒྱིད་ལུག་པའི་ལེ་ལོ། སྨད་པའམ་བྱ་བ་ངན་ཞེན་གྱི་ལེ་ལོའོ། །དང་པོ་ནི། ཉལ་བ་དང་། བསྙེལ་བ་དང་། གཉིད་ལོག་པ་སོགས་སོས་དལ་གྱི་བདེ་བ་ལ་ཆགས་པ་སྟེ། དེའི་གཉེན་པོར་མི་རྟག་པ་དྲན་པར་བྱ་སྟེ། མདོ་ལས། དགེ་སློང་དག་ཤེས་པ་ནི་འགྲིབ། སྲོག་ནི་ཆད། སྟོན་པའི་བསྟན་པའང་ངེས་པར་ནུབ་པར་འགྱུར་ན། ཅིའི་ཕྱིར་བརྩོན་འགྲུས་དང་བརྟུལ་བ་བརྟན་པོས་སྒྲུབ་པར་མི་བྱེད། ཅེས་དང་། སྤྱོད་འཇུག་ལས། མྱུར་བ་ཉིད་དུ་ཚོགས་བསགས་བྱ། །ཞེས་སོ། །གཉིས་པ་ནི། བདག་ལྟ་བུ་ངན་པས་འབད་ཀྱང་བྱང་ཆུབ་ག་ལ་ཐོབ་སྙམ་དུ་སེམས་ཞུམ་ནས་འཇུག་མི་ནུས་པ་སྟེ། དེའི་གཉེན་པོར་སེམས་གཟེངས་བསྟོད་དུ་འཇུག་པར་བྱ་བ་ནི་སྔར་བསྟན་ཟིན་ཏོ། །གསུམ་པ་ནི། དགྲ་འདུལ་གཉེན་སྐྱོང་ཚོང་སོ་ནམ་སོགས་འཇིག་རྟེན་གྱི་བྱ་བ་ངན་པ་ལ་ཆགས་ཤིང་ཞེན་པ་སྟེ། དེ་དག་སྡུག་བསྔལ་གྱི་རྒྱུ་དངོས་ཡིན་པས་སྤང་བར་བྱ་དགོས་ཏེ། ཨ་ཏི་ཤས། འཇིག་རྟེན་བྱ་བ་ཀུན་ལ་ཕར་བལྟས་པས། །བྱས་པ་ཐམས་ཅད་དོན་མེད་སྡུག་བསྔལ་རྒྱུ། །ཅི་ལ་བསམས་ཀྱང་སྙིང་བོ་མི་གདའ་བས། །རང་གི་སེམས་ལ་ལྟ་བ་གོམས་པར་གྱིས། །ཞེས་གདམས་པར་མཛད་པ་བཞིན་ནོ། །བརྩོན་འགྲུས་དག་པར་བྱེད་པ་དང་སྤེལ་བའི་ཚུལ་ནི་སྔ་མ་རྣམས་དང་མཐུན་ནོ། །གང་ལ་བརྩོན་འགྲུས་མེད་ཅིང་ལེ་ལོའི་དབང་དུ་གྱུར་པའི་སྐྱོན་ནམ་ཉེས་པ་ནི། བློ་གྲོས་རྒྱ་མཚོས་ཞུས་པའི་མདོ་ལས། ལེ་ལོ་ཅན་ལ་ནི་སྦྱིན་པ་ནས་ཤེས་རབ་ཀྱི་བར་དུ་མེད་དོ། །ལེ་ལོ་ཅན་ལ་ནི་གཞན་དོན་བྱ་བ་མེད་དོ། །ལེ་ལོ་ཅན་ལ་ནི་བྱང་ཆུབ་ཤིན་ཏུ་རིང་ཞིང་རྣམ་པར་རིང་ངོ་། །ཞེས་སོ། །ལེགས་པར་བརྩོན་པའི་འབྲས་བུའང་གནས་སྐབས་སུ་སྲིད་པའི་བདེ་བ་མཆོག་རྣམས་ཐོབ་སྟེ། མདོ་རྒྱན་ལས། བརྩོན་འགྲུས་ཀྱིས་ནི་སྲིད་སྤྱོད་བདེ་བ་འཐོབ། །ཅེས་སོ། །མཐར་ཐུག་གི་འབྲས་བུ་བྱང་ཆུབ་ཐོབ་པའང་། མདོ་སྔ་མ་ལས། བརྩོན་འགྲུས་བརྩམས་པ་རྣམས་ཀྱིས་ནི་བླ་ན་མེད་པའི་བྱང་ཆུབ་དཀའ་བ་མ་ཡིན་ནོ། །ཅིའི་ཕྱིར་ན། བློ་གྲོས་རྒྱ་མཚོ་གང་ན་བརྩོན་འགྲུས་ཡོད་པ་དེ་ན་བྱང་ཆུབ་ཡོད་དོ། །ཞེས་དང་། གང་པོས་ཞུས་པ་ལས། རྟག་ཏུ་བརྩོན་འགྲུས་གང་རྩོམ་པ། །དེ་ལ་བྱང་ཆུབ་ཡོང་མི་དཀའ། །ཞེས་གསུངས་པ་བཞིན་ནོ། །ལྔ་པ་བསམ་གཏན་ནི། ངོ་བོ་ཁྱད་ཆོས་བཞི་ལྡན་གྱི་དམིགས་པ་ལ་རྩེ་གཅིག་པའི་སེམས་པ་དགེ་བ་ས་བོན་དང་བཅས་བའོ། །ངེས་ཚིག་ནི། དྷྱཱ་ན་ཞེས་པའི་སྒྲ་ལས་བསམ་གཏན་ཏེ། སེམས་པའི་རྒྱུན་གཞན་དུ་མ་ཡེངས་པར་འཛིན་པས་ན་བསམ་གཏན་ནོ། །དབྱེ་ན། ལང་ཀར་གཤེགས་པ་ལས། བྱིས་པ་ཉེར་སྤྱོད་ཀྱི་བསམ་གཏན་དང་། །དོན་རབ་འབྱེད་བའི་བསམ་གཏན་དང་། །དེ་བཞིན་གཤེགས་དགེའི་བསམ་གཏན་ཏེ། །ཞེས་གསུངས་པ་ལྟར་གསུམ་ལས། དང་པོ་བྱིས་པ་ཉེར་སྤྱོད་ཀྱི་བསམ་གཏན་ནི། ཐར་ལམ་ལ་མ་ཞུགས་པའི་རྒྱུད་ལའང་ཡོད་པའི་ཏིང་ངེ་འཛིན་ཏེ། དབྱེ་ན། འདོད་ཁམས་ཀྱི་རྣམ་རྟོག་སྤང་བ་ལ་བསམ་གཏན་བཞི་དང་། གཟུགས་ཁམས་ཀྱི་རྣམ་རྟོག་སྤང་བ་ལ་གཟུགས་མེད་པའི་སྙོམས་འཇུག་བཞིའོ། །དེ་ལས་བསམ་གཏན་བཞིའི་སྙོམས་པར་འཇུག་པ་ནི། ལྷག་མཐོང་གི་རྟེན་གཞིར་གྱུར་པའི་ཞི་གནས་དང་། གཟུགས་མེད་ཀྱི་སྙོམས་འཇུག་བཞི་ནི་ཏིང་ངེ་འཛིན་གྱི་གོལ་ས་སྟེ། མདོར་ན། ལྷག་མཐོང་མཚན་ཉིད་པས་མ་ཟིན་པའི་ཞི་གནས་རྐྱང་པ་ཙམ་གྱིས་སེམས་གནས་ཇི་ཙམ་བརྟན་ཡང་བསམ་གཏན་བཞི་དང་། དཔྱད་པའི་འཛིན་སྟངས་ཇི་ཙམ་རྣོ་ཡང་ཕལ་ཆེར་གཟུགས་མེད་ཀྱི་སྙོམས་འཇུག་ལས་མ་འདས་ཏེ། ཏིང་ངེ་འཛིན་གྱི་ཚོགས་ལེའུ་ལས། ཏིང་ངེ་འཛིན་ཀྱང་རབ་བརྟན་ལ། །དེ་ལ་མངོན་པར་ཞེན་བྱེད་ན། །བྱིས་པ་ཉེར་སྤྱོད་ཅེས་བྱ་སྟེ། །མྱ་ངན་འདས་པ་ཐོབ་མི་འགྱུར། །ཞེས་སོ། །གཉིས་པ་དོན་རབ་འབྱེད་པའི་བསམ་གཏན་ནི། ལམ་ཞུགས་ཚོགས་སྦྱོར་གྱི་རྒྱུད་ལ་ཡོད་པའི་ཏིང་ངེ་འཛིན་ཏེ། སྔར་གྱི་ཞི་གནས་རྐྱང་པ་ཙམ་མ་ཡིན་པར། དོན་རབ་ཏུ་འབྱེད་པ་སྟེ་སོ་སོར་རྟོག་པའི་ལྷག་མཐོང་དང་ཟུང་འཇུག་ཏུ་བསྒོམ་པ་ལ་བརྟེན་ནས་ཇི་སྐད་བཤད་པའི་ཚོགས་སྦྱོར་གྱི་ཡོན་ཏན་ཁྱད་པར་འཕགས་པ་རྣམས་རིམ་གྱིས་ཐོབ་སྟེ་མངོན་ཤེས་ཕྲ་མོ་ལ་བརྟེན་ནས་གཞན་དོན་ཀྱང་ཅི་རིགས་པར་སྒྲུབ་ནུས་པ་སྟེ། སྤྱོད་འཇུག་ལས། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱས་ནས། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ། །ཅེས་སོ། །གསུམ་པ་དེ་བཞིན་གཤེགས་དགེའི་བསམ་གཏན་ནི། མཐོང་ལམ་ས་དང་པོ་ཡན་ཆད་འཕགས་རྒྱུད་ཀྱི་ཏིང་ངེ་འཛིན་ཟག་པ་དང་བྲལ་བ་དེ་བཞིན་གཤེགས་པའི་ཡེ་ཤེས་ཀྱི་ཡུལ་ལ་སྙོམས་པར་འཇུག་པ་སྟེ། མགོན་པོ་བྱམས་པས། སེམས་ལས་གཞན་དུ་མེད་པར་བློས་རིག་ནས། །དེ་ནས་སེམས་ཀྱང་མེད་པ་ཉིད་རྟོགས་ཏེ། །བློ་དང་ལྡན་པས་གཉིས་པོ་མེད་རིག་ནས། །དེ་མི་ལྡན་པས་ཆོས་ཀྱི་དབྱིངས་ལ་གནས། །ཞེས་སོ། །ཇི་ལྟར་བསམ་གཏན་བསྒོམ་པའི་ཚུལ་དངོས་ལ། ཐོག་མར་འགྱུར་ཞིང་མི་རྟག་པའི་རང་བཞིན་བསམ་པ་ནི། འདི་ལྟར་སྐྱེས་པ་ཐམས་ཅད་ནི་འཆི། འདུས་པ་ཐམས་ཅད་ནི་འབྲལ། བསགས་པ་ཐམས་ཅད་ནི་འཛད། འབྱོར་པ་མཐའ་དག་ནི་རྒུད་པའི་མཐའ་ཅན་ཏེ། གཡོ་ཞིང་སྙིང་པོ་མེད་པ་ཚེ་འདིའི་སྣང་བ་རྨི་ལམ་གྱི་བཀོད་པ་བཞིན་མི་རྟག་ཅིང་འགྱུར་བའི་རང་བཞིན་ལ་ཆགས་པའི་སྐྱེ་བོ་རྣམས་ཕུང་ཚབས་རེ་ཆེ། བདག་ཀྱང་མྱུར་དུ་འཆི། ངེས་པར་འཆི། སང་ནང་པར་རམ་དོ་ནུབ་ཙམ་ཡང་མི་འཆི་བའི་གདེང་མེད་ཅིང་རང་དབང་མེད་ན། འཁྲུལ་སྣང་ཚེ་འདིའི་བྱ་བས་ཅི་བྱ། འཆི་བའི་དུས་སུ་ཕན་པར་ངེས་པ་ནི་ཟབ་མོ་བླ་མའི་གདམས་ངག་ཁོ་ན་ཡིན་པས་དེ་ལ་རྩེ་གཅིག་ཏུ་མཉམ་པར་བཞག་སྟེ་བསམ་གཏན་བསྒོམ་པ་ལ་བརྩོན་པར་བྱ་སྙམ་པ་སྟེ། མདོ་ལས། སང་ཙམ་འཆིའམ་སུས་ཤེས་ཀྱི། །དེ་རིང་ཉིད་དུ་བསྟུན་ཏེ་སྒྲུབ། །འཆི་བདག་སྡེ་ཆེན་དེ་དང་ནི། །ཁྱོད་ཉིད་བཤེས་པ་མ་ཡིན་ནོ། །ཞེས་སོ། །དེ་ནས་འདོད་པའི་ཉེས་དམིགས་ལ་བསམ་པ་ནི། འདི་ལྟར་འདོད་པ་རྣམས་ནི་ཉེས་པ་མང་བ་སྟེ། བསགས་བསྲུང་སྤེལ་གསུམ་གྱིས་བྲེལ་ཞིང་། མི་དགེ་བ་འཕེལ་བ། ཀུན་དང་རྩོད་པ་དང་བཅས་པ། ཡོད་ཅིང་ཆོག་མི་ཤེས། ཁེངས་ཞིང་སེར་སྣ་འཕེལ་བ། ཟད་ཀྱིས་དོགས། བརླགས་ཀྱིས་དོགས། འཕྲོག་གིས་དོགས། རྐུན་པོ་ལ་སོགས་པ་ཐམས་ཅད་དང་ཐུན་མོང་བ། བསགས་ཀྱང་འཆི་བའི་དུས་སུ་ཐམས་ཅད་འཇོག་ཅིང་འབྲལ་བའི་རང་བཞིན་ཅན། ཇི་ཙམ་དུ་འབྱོར་པ་དེ་ཙམ་དུ་སྡུག་བསྔལ་དེ་བས་མང་བ་སྟེ། ཐོས་པ་དང་བསམ་པ་དང་སྒོམ་པ་དང་ཚུལ་ཁྲིམས་ལ་སོགས་པ་རྣམ་པར་གྲོལ་བའི་ཆོས་དང་འགལ་བ། འཕགས་པ་རྣམས་ཀྱིས་ཀུན་ཏུ་སྨད་པ་སྟེ། བཤེས་སྤྲིང་ལས། བསགས་དང་བསྲུང་དང་བརླགས་པའི་སྡུག་བསྔལ་གྱིས། །ནོར་ནི་ཕུང་ཀྲོལ་མཐའ་ཡས་ཤེས་པར་བྱ། །ཞེས་སོ། །དེས་ན་འདོད་ཆུང་ཆོག་ཤེས་ལ་བསླབ་པར་བྱ་སྟེ། དེ་ཉིད་ལས། ནོར་རྣམས་ཀུན་གྱི་ནང་ནས་ཆོག་ཤེས་པ། །རབ་མཆོག་ལགས་པར་ལྷ་མིའི་སྟོན་པས་གསུངས་། །ཀུན་ཏུ་ཆོག་ཤེས་མཛོད་ཅིག་ཆོག་མཁྱེན་ན། །ནོར་མི་བདོག་ཀྱང་ཡང་དག་འབྱོར་པ་ལགས། ཞེས་སོ། །དེ་ནས་བྱིས་དང་འགྲོགས་པའི་ཉེས་པ་བསམ་པ་ནི། འདི་ལྟར་ཁྱིམ་པ་དང་རབ་ཏུ་བྱུང་བ་ལ་སོགས་སོ་སོ་སྐྱེ་བོའི་ཚོགས་འཁོར་དང་། མཛའ་བཤེས་དང་། གཉེན་འདུན་དང་། གྲོགས་དང་། དགྲ་དང་། བར་མའི་ཕྱོགས་ཐམས་ཅད་ཀྱང་འགྲོགས་པར་མི་བཟོད་དེ། རང་བཞིན་ངན་པར་དང་། བྱས་པ་མི་གཟོ་བ། ཕན་པའི་ལན་དུ་གནོད་པ་སྦྱིན་པ། འདོད་པ་ཆེ་བ། ཆོག་མི་ཤེས་པ། ཁོང་ཁྲོ་བ། ཚིག་རྩུབ་པ། རང་གི་འདོད་པ་འབའ་ཞིག་སྒྲུབ་པ། གཞན་ལ་ངང་གིས་གནོད་པ། ཕྱི་ཐག་ཐུང་བ། རང་གི་འབྱོར་པ་ཉམས་ན་འདོར་ཞིང་སྨོད་པ། ངོ་ཚ་བ་དང་ཆོས་དང་དམ་ཚིག་ལ་སོགས་པ་དང་། ལ་ཡོགས་དང་རྣམ་སྨིན་གང་ལའང་མི་འཛེམ་པ། དོན་དང་བྱ་བ་མང་བ། མགུ་བར་ཤིན་ཏུ་དཀའ་བ། འཐབ་པ་དང་། འཚེ་བ་དང་། ཕྲག་དོག་ལ་སོགས་པ་ཆོས་མ་ཡིན་པ་འབའ་ཞིག་གིས་བསླུ་ཞིང་། ཚེ་འདའ་བའི་རང་བཞིན་ཏེ། འགྲོགས་པ་ཙམ་གྱིས་དགེ་བ་འགྲིབ་ཅིང་མི་དགེ་བ་འཕེལ་བའི་བྱིས་པ་རྣམས་ནི། འཕགས་པ་རྣམས་ཀྱིས་ཀྱང་རིང་དུ་སྤོང་བའི་ཕྱིར། བདག་ཀྱང་ཐར་པ་དམ་པ་སྒྲུབ་པ་ལ་བར་གཅོད་པས་སུ་དང་ཡང་འགྲོགས་པར་མི་བྱ། གཅིག་པུར་ཞི་བའི་ཏིང་ངེ་འཛིན་སྒྲུབ་སྙམ་དུ་བསམ་པར་བྱ་སྟེ། སྤྱོད་འཇུག་ལས། བྱིས་དང་སྐལ་བ་མཉམ་སྤྱོད་ན། །ངེས་པར་ངན་འགྲོར་འགྲོ་འགྱུར་ཏེ། །སྐལ་མི་མཉམ་པར་འཁྲིད་བྱེད་ན། །བྱིས་ལ་བརྟེན་པས་ཅི་ཞིག་བྱ། །སྐད་ཅིག་གཅིག་གིས་མཛའ་འགྱུར་ལ། །ཡུད་ཙམ་ཞིག་གིས་དགྲར་ཡང་འགྱུར། །དགའ་བའི་གནས་ལ་ཁྲོ་བྱེད་པའི། །སོ་སོའི་སྐྱེ་བོ་མགུ་བར་དཀའ། །ཕན་པར་སྨྲས་ན་ཁྲོ་བར་བྱེད། །བདག་ཀྱང་ཕན་ལས་ཟློག་པར་བྱེད། །དེ་དག་ངག་ནི་མ་ཉན་ན། །ཁྲོས་པས་ངན་འགྲོར་འདོང་བར་འགྱུར། །མཐོ་ལ་ཕྲག་དོག་མཉམ་ལ་འགྲན། །དམའ་ལ་ང་རྒྱལ་བསྟོད་ན་དྲེགས། །མི་སྙན་བརྗོད་ན་ཁོང་ཁྲོ་སྟེ། །ནམ་ཞིག་བྱིས་ལས་ཕན་པ་ཐོབ། །ཅེས་དང་། དེས་ཀྱང་བདག་དོན་མ་བྱས་ལ། །བདག་ཀྱང་དེ་དོན་མི་འགྱུར་བས། །བྱིས་ལས་ཐག་རིང་འབྱོལ་བར་བྱ། །ཞེས་སོ། འདུ་འཛིའི་ཉེས་དམིགས་ལ་བསམ་པ་ནི། འདི་ལྟར་སྤྱིར་འཇིག་རྟེན་གྱི་སྣང་བ། སྒོས་ཚེ་འདིའི་བྱ་བ་རྣམས་ལ་ཟིན་པ་དང་ཆོག་པའི་དུས་མེད་པར། རྟག་ཏུ་བྲེལ་ཞིང་གཡེང་ལ་དོན་ཆུང་བ། ཇི་ཙམ་བརྩོན་ཀྱང་སྙིང་པོ་མེད་པ། དགྲ་བཏུལ་ཡང་མཐའ་མེད་པ། གཉེན་བསྐྱངས་ཀྱང་མཐའ་མེད་པ། ཚོང་སོ་ནམ་བཟོ་རིག་ཤེས་གང་ཅི་བྱས་ཀྱང་ལྟོ་གོས་ཀྱི་རྩོལ་སྒྲུབ་ལས། བྱས་པ་དོན་དུ་འགྱུར་བ་ཆོས་ཀྱི་ལམ་དུ་འགྲོ་བ་རྡུལ་ཙམ་ཡང་མེད་པ། ཉིན་མཚན་འཁོར་ཡུག་ཏུ་རྣམ་གཡེང་གི་འདུ་འཛིའི་དུས་འདའ་བ་འདིས་ཅི་བྱེད། དེ་བས་ཚེ་འདི་བློས་བཏང་ནས་བསམ་གཏན་བསྒོམ་སྙམ་དུ་བསམ་པར་བྱ་སྟེ། ཨོ་རྒྱན་ཆེན་པོས། ཕ་ཡུལ་མ་སྤང ས་ན་ང་རྒྱལ་གྱི་བདུད་མི་ཆོམ། ཁྱིམ་གྱི་བྱ་བ་མ་བཏང་ན་ཆོས་བྱ་བའི་སྐབས་མི་རྙེད། དད་པ་སྐྱེས་པའི་ཚེ་ན་ཆོས་ལ་མ་ཕྱིན་ན་ལས་ལ་ཟིན་པ་མི་འོང་། རང་ལ་དད་པ་མེད་པར་མི་གཞན་ལ་བསྙད་མ་འདོགས་རང་གི་ཡོ་བྱད་རླུང་ལ་མ་བསྐུར་ན་མི་ཆོས་ལ་ཁོ་ཐག་མི་ཆོད། གཉེན་འབྲེལ་དང་རྒྱང་མ་བསྲིངས་ན་ཆགས་སྡང་རྒྱུན་མི་ཆོད། དུས་ད་རེས་ཆོས་མ་བྱས་ན་ཕྱིས་གང་དུ་སྐྱེ་ཆ་མེད། རང་ལ་རྫུན་མི་བྱེད་ན་ཞེ་འདོད་ཆོད་ལ་དམ་པའི་ཆོས་གྱིས། གཉེན་འདུན་བུད་མེད་ཐམས་ཅད་དོར་ནས་འགྲོ་དགོས་པ་ལ་ད་ལྟ་དོར་ན་དོན་ཅན་དུ་འགྲོ་བ་ཡིན། རང་ལ་མི་སྟོངས་ངེས་པའི་སྲིད་མ་སྐྱོང་བར་དགོས་ངེས་པའི་དགེ་བ་སྐྱོངས། དགོས་སམ་མི་དགོས་མི་ངེས་པའི་སང་ཕོད་ཀྱི་བཙས་མ་བྱེད་པར་དགོས་ངེས་པའི་དགེ་སྦྱོར་གྱིས་ཤིག ཅེས་དང་། ལོང་གཏམ་ཀུ་རེ་བཞད་གད་གསུམ། །སྒོམ་པའི་བར་ཆད་ཡིན་པས་སྤོངས། །གཉེན་དང་གྲོགས་པོ་སློབ་མ་གསུམ། །ཆོས་བརྒྱད་རྟོད་ཕུར་ཡིན་པས་སྤོངས། །རྫས་དང་འདུ་འཛི་ནོར་རྫས་གསུམ། །ཆོས་ཀྱི་གཡེང་བ་ཡིན་པས་སྤོངས། །གཉིད་དང་སྙོམ་ལས་ལེ་ལོ་གསུམ། །ཆོས་བྱེད་དགྲ་ཆེན་ཡིན་པས་སྤོངས། །ཞེས་སོ། །དབེན་པའི་ཡོན་ཏན་ལ་བསམ་པ་ནི། སྔོན་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་ཞི་བའི་ནགས་སུ་བསྒྲུབས་པས་བདུད་རྩི་བརྙེས་པའི་ཕྱིར། བདག་ཀྱང་དབེན་པ་བསྟེན་པར་བྱ་སྟེ། དབེན་པའི་གནས་དེ་ན་འདུ་འཛི་དང་རྣམ་གཡེང་མེད། བྱ་བ་དང་བྲེལ་དོ་མེད། ཚོང་དང་སོ་ནམ་མེད། བྱིས་པ་དང་འགྲོགས་པ་མེད། བྱ་དང་རི་དྭགས་དང་འགྲོགས་ན་བདེ་བས་གང་ཞིང་། ཆུ་དང་ལོ་མ་སོགས་དཀའ་ཐུབ་ཀྱི་ཟས་དང་མཐུན། ཕུག་དང་བྲག་རིའི་དྲུང་སོགས་གནས་མལ་ཆོས་དང་མཐུན། སུ་ཡང་བཤེས་འདྲིས་མེད་པས་ཆགས་སྡང་སོགས་ཉོན་མོངས་ངང་གིས་ཞི། སྐྱོ་ཤས་དང་ངེས་འབྱུང་བསྐུལ་བའི་རྐྱེན་མང་བས་དགེ་སྦྱོར་ངང་གིས་འཕེལ། རིག་པ་ངང་གིས་དྭངས་པས་ཤེས་རབ་གསལ་ལ་དྭངས། དེ་སོགས་དབེན་པའི་ཡོན་ཏན་མང་བས་དེ་རིང་ཉིད་ནས་དབེན་པར་གནས་དགོས་སྙམ་དུ་བསམ་པར་བྱ་སྟེ། གང་པོས་ཞུས་པའི་མདོ་ལས། རི་དང་ནགས་ཚལ་གནས་མོས་པས། །ཡོན་ཏན་འབྱུང་གནས་འཕེལ་བར་བྱེད། །དབེན་པར་གནས་ལ་རྟེན་བྱེད་པས། །འདོད་ལྔའི་ཆགས་པ་ཡོངས་སུ་སྤོངས། །དེས་ན་འདུ་འཛི་མེད་པས་ན། །དགེ་ཆོས་ཅན་ཉིན་ཉམས་མི་འགྱུར། །ཕན་ཚུན་འགྲུལ་ཞིང་གཏམ་འདྲི་དང་། །ཚིག་གིས་སྨྲ་བར་མི་བྱེད་པས། །སྟོང་དབེན་ཉེར་ཞི་དབེན་པ་ལ། །སངས་རྒྱས་རྣམས་ཀྱིས་རབ་ཏུ་བསྔགས། །དེ་ཕྱིར་བྱང་ཆུབ་སེམས་དཔའ་རྣམས། །རྟག་པར་དགོན་པ་བསྟེན་བྱ་ཞིང་། །གྲོང་ཁྱེར་ལ་ནི་ཆགས་མི་བྱ། །ཞེས་དང་སོ་སོ་ཐར་པ་ལས། །མང་དུ་ཐོས་པ་ནགས་ཀྱི་ནང་དག་ཏུ། །ལང་ཚོ་ཡོལ་བ་རྣམས་ནི་གནས་པ་བདེ། །ཞེས་སོ། །དེ་ལྟ་བུའི་དབེན་པའི་གནས་ནི་འཕགས་པ་རྣམས་ཀྱི་སྨོན་པར་བྱ་བ་ཡིན་ཏེ། རྒྱལ་སྲས་ཞི་བ་ལྷས། ནགས་ན་རི་དྭགས་བྱ་དག་དང་། །ཤིང་རྣམས་མི་སྙན་བརྗོད་མི་བྱེད། །འགྲོགས་ན་བདེ་བ་དེ་དག་དང་། །ནམ་ཞིག་ལྷན་ཅིག་བདག་གནས་འགྱུར། །ཕུག་གམ་ལྷ་ཁང་སྟོང་པའམ། །ལྗོན་ཤིང་དྲུང་དུ་གནས་བཅས་ཏེ། །ནམ་ཞིག་རྒྱབ་ཏུ་མི་བལྟ་ཞིང་། །ཆགས་པ་མེད་པར་འགྱུར་ཞིག་གུ། །ས་ཕྱོགས་བདག་གིར་བཟུང་མེད་པ། །རང་བཞིན་གྱིས་ནི་ཡངས་རྣམས་སུ། །རང་དབང་སྤྱོད་ཅིང་ཆགས་མེད་པར། །ནམ་ཞིག་བདག་ནི་གནས་པར་འགྱུར། །ཞེས་སོ། །གཞན་ཡང་དབེན་པ་བསྟེན་པས་སངས་རྒྱས་རྣམས་ལ་བསྙེན་བཀུར་གྱི་མཆོག་ཏུ་འགྱུར་བ་དང་། ཟླ་བ་སྒྲོན་མེའི་མདོ་ལས། ཟས་དང་སྐོམ་དང་དེ་བཞིན་གོས་རྣམས་དང་། །མེ་ཏོག་སྤོས་དང་ཕྲེང་བ་རྣམས་ཀྱིས་ནི། །ཁྱུ་མཆོག་རྒྱལ་ལ་བསྙེན་བཀུར་བྱས་མི་འགྱུར། །གང་ཞིག་བྱང་ཆུབ་རབ་ཏུ་འདོད་བྱེད་ཅིང་། །འདུས་བྱས་ངན་པས་ཡིད་འབྱུང་སེམས་ཅན་གྱི། །དོན་དུ་དགོན་པར་གནས་ཏེ་གོམ་བདུན་བོར། །འདི་ནི་དེ་བས་བསོད་ནམས་ཁྱད་པར་འཕགས། །ཞེས་སོ། །ཁྱད་པར་དུ་ཏིང་ངེ་འཛིན་མྱུར་དུ་ཐོབ་པར་འགྱུར་བའང་། དེ་ཉིད་ལས། གྲོང་དང གྲོང་ཁྱེར་དག་ལ་དགའ་སྤོངས་ལ། །རྟག་ཏུ་དབེན་ཞིང་ནགས་ཁྲོད་བསྟེན་པར་གྱིས། །བསེ་རུ་ལྟ་བུར་རྟག་ཏུ་གཉིས་མེད་བྱོས། །རིང་པོར་མི་ཐོགས་ཏིང་འཛིན་མཆོག་ཐོབ་འགྱུར། །ཞེས་སོ། །དེ་ལྟར་ལུས་འདུ་འཛི་ལས་རྒྱང་བསྲིང་སྟེ་དབེན་པ་བསྟེན་ནས། སེམས་འདུ་འཛི་ལས་དབེན་པར་བྱ་བའི་ཕྱིར། བདག་དགོན་པར་འོངས་པ་འདི་ཅིའི་ཕྱིར་འོངས་སྙམ་དུ་བསམ་པར་བྱའོ། །དེ་ལ་བདག་དགོན་པར་འོངས་པ་འདི་གྲོང་དང་གྲོང་ཁྱེར་ལ་སོགས་པ་གཡེང་བའི་ཕྱོགས་ནས་འཇིགས་ཤིང་སྐྲག་ནས་བྲོས་ཏེ་དགོན་པར་འོངས་པ་ཡིན་ནོ། །དེ་ཡང་ཅིའི་འཇིགས་ན། ཁྱིམ་བདག་དྲག་ཤུལ་ཅན་གྱིས་ཞུས་པའི་མདོ་ལས། འདུ་འཛིས་འཇིགས་ཤིང་སྐྲག་གོ །རྙེད་པ་དང་བཀུར་སྟིས་འཇིགས་ཤིང་སྐྲག་གོ །སྡིག་པའི་གྲོགས་པོས་འཇིགས་ཤིང་སྐྲག་གོ །མི་དགེ་བའི་གཤེས་གཉེན་གྱིས་འཇིགས་ཤིང་སྐྲག་གོ །འདོད་ཆགས་དང་ཞེ་སྡང་གཏི་མུག་གསུམ་གྱིས་འཇིགས་ཤིང་སྐྲག་གོ །ཕུང་པོ་དང་ཉོན་མོངས་པ་དང་འཆི་བདག་དང་ལྷའི་བུའི་བདུད་ཀྱིས་འཇིགས་ཤིང་སྐྲག་གོ །དམྱལ་བ་དང་ཡི་དྭགས་དང་དུད་འགྲོ་གསུམ་གྱིས་འཇིགས་ཤིང་སྐྲག་གོ །བདག་དེ་ལྟ་བུས་འཇིགས་ཤིང་སྐྲག་ནས་དགོན་པར་འོངས་སོ། །ཞེས་གསུངས་སོ། །དེ་ལྟར་འཇིགས་ཤིང་སྐྲག་ནས་འོངས་ན་ད་ལྟ་བདག་དགོན་པ་ན་གནས་པའི་ཚེ་ལུས་ངག་ཡིད་གསུམ་ཅི་བྱེད་ཅིང་འདུག་སྙམ་དུ་བརྟག་པར་བྱས་ཏེ། མི་དགེ་བ་དང་ལུང་མ་བསྟན་གྱི་བྱ་བས་དུས་འདའ་བའི་ཚེ། ཀྱེ་མ་བདག་ནི་ནགས་ན་གནས་པའི་གཅན་གཟན་དང་རྔོན་པ་དང་ཆོམ་རྐུན་དང་འདབ་ཆགས་དང་རི་དྭགས་དང་སྤྲ་སྤྲེ་སོགས་དང་ཁྱད་མེད་ན། དེས་བདག་དགོན་པར་འོངས་པའི་འདོད་པའི་དོན་ཅི་ཞིག་འགྲུབ་སྟེ་དོན་མེད་དོ་སྙམ་ནས་རང་ལ་རྔན་བགྲངས་ཤིང་གཉེན་པོ་བསྐྱེད་ལ་འཕྲལ་དང་འཕྲལ་དུ་ཟློག་ཅིང་འབད་པར་བྱའོ། །དེ་ལྟར་ཏིང་ངེ་འཛིན་གྱི་རྒྱུ་ཚོགས་སྒྲུབ་ནས། དངོས་གཞི་ཏིང་ངེ་འཛིན་ཇི་ལྟར་བསྒོམ་པའི་ཚུལ་ནི། སེམས་ཉིད་ངལ་གསོ་ལས། དེར་ནི་སྟན་ལ་སྐྱིལ་ཀྲུང་རབ་བཅས་ནས། །རྩེ་གཅིག་སེམས་ལ་མི་གཡོ་མཉམ་པར་བཞག །བྱིས་པ་ཉེར་སྤྱོད་དོན་རབ་འབྱེད་པ་དང་། །དེ་བཞིན་གཤེགས་དགེའི་བསམ་གཏན་དམ་པ་སྒྲུབ། །ཅེས་གསུངས་ཏེ། གནས་དབེན་པར་རྣམ་སྣང་གི་ཆོས་བདུན་གང་ལྡན་པས་སྐྱབས་སུ་འགྲོ་བ་དང་སེམས་བསྐྱེད་དེ། གང་དུའང་མི་རྟོག་ཅིར་ཡང་མི་འཛིན་པའི་ངང་ལ་མ་ཡེངས་པར་ལྷན་ནེ་བཞག་པ། སྣང་ཡུལ་འགགས་ལ་འཛིན་རྟོག་ཞི་བའི་ཏིང་ངེ་འཛིན་སྐྱེ་སྟེ། དེ་ཡང་དམིགས་པའི་རྟེན་གང་ཡང་རུང་བ་ལ་སེམས་བྱིང་རྒོད་ཀྱི་སྐྱོན་སྤངས་ཏེ་རྩེ་གཅིག་ཏུ་མཉམ་པར་བཞག་པས་སེམས་གཞན་དུ་མི་འཕྲོ་བའི་ཞི་གནས་ཐོབ་པ་ནི་བྱིས་པ་ཉེར་སྤྱོད། སོ་སོར་རྟོག་པའི་ཤེས་རབ་ཀྱིས་བདག་མེད་ཀྱི་དོན་གཏན་ལ་ཕབ་ནས་ཁས་ལེན་ཐམས་ཅད་དང་བྲལ་བའི་ལྷག་མཐོང་མངོན་དུ་གྱུར་བ་ན། དེའི་ངང་དུ་མཉམ་པར་འཇོག་པའི་ཞི་ལྷག་ཟུང་འབྲེལ་གྱི་ལམ་སྒྲུབ་པ་ནི་དོན་རབ་འབྱེད་པ། དེ་ཡུན་རིང་དུ་གོམས་པས་གཟུང་འཛིན་གྱི་གཉིས་སྣང་དབྱིངས་སུ་ནུབ་སྟེ་མཐོང་ལམ་ས་དང་པོ་ཐོབ་ནས་དེ་བཞིན་གཤེགས་དགེའི་བསམ་གཏན་དུ་གནས་འགྱུར་བ་ཡིན་ལ། དེ་ཡང་ས་དང་པོ་ནས་བདུན་པའི་བར་དུ་མཉམ་བཞག་ཏུ་རྣམ་པར་མི་རྟོག་པའི་ངང་དུ་གནས། རྗེས་ཐོབ་གཟུང་འཛིན་གྱི་ཆ་དང་བཅས་པའི་ཕྱིར་མཉམ་རྗེས་ཐ་དད་ལ། ས་བརྒྱད་པ་ནས་བཟུང་སྟེ་མཉམ་རྗེས་ཐ་དད་རང་མཚན་པ་མེད་ལ། བཏགས་པ་བ་ཡོད། སངས་རྒྱས་ཀྱི་སར་ནི་རྟག་ཏུ་མཉམ་པར་བཞག་བཞིན་པ་ལས་ནམ་ཡང་གཡོ་བ་མི་སྲིད་དོ། །དེ་ལྟར་མཉམ་པར་བཞག་རྗེས་བསྔོ་བ་བྱའོ། །གཞན་ཡང་དེ་ལྟར་བསྒོམས་པས་སྤྲོས་པའི་སྣང་བ་ནུབ་སྟེ། ནང་དུ་བསམ་གཏན་ལས་སྐྱེས་པའི་དགའ་བདེ་ཐོབ་པ་ནི་མཐོང་ཆོས་བདེར་གནས་གྱི་བསམ་གཏན་དང་། ཕྱིན་དྲུག་སོགས་དགེ་ཚོགས་སྒྲུབ་དུས་སེམས་རྩེ་གཅིག་པའི་ཆའམ་ཟད་པར་དང་ཟིལ་གནོན་སོགས་དང་རྣམ་ཐར་གཟུངས་སྤོབས་རྒྱ་མཚོ་སྒྲུབ་པ་ནི་ཡོན་ཏན་སྒྲུབ་པའི་བསམ་གཏན་དང་། སེམས་ཅན་དོན་ལ་དམིགས་པ་རྩེ་གཅིག་པའམ་བསམ་གཏན་གྱི་དངོས་གཞིའི་སེམས་ལས་རྫུ་འཕྲུལ་འདོད་དགུར་སྒྱུར་བའི་བཀོད་པས་སེམས་ཅན་གྱི་དོན་བྱེད་པ་སེམས་ཅན་དོན་བྱེད་ཀྱི་བསམ་གཏན་ཏེ། དེ་ལྟར་གསུམ་དུ་བྱེད་བའང་ཡོད་དོ། །བསམ་གཏན་དག་པ་དང་སྤེལ་བར་བྱེད་པ་ནི་སྔར་ལྟར་རོ། །བསམ་གཏན་དང་མི་ལྡན་ཞིང་སེམས་རྣམ་པར་གཡེངས་པའི་སྐྱོན་ནམ་ཉེས་པ་ནི། སྤྱོད་འཇུག་ལས། བཟླས་བརྗོད་དང་ནི་དཀའ་ཐུབ་ཀུན། །ཡུན་རིང་དུས་སུ་སྤྱད་བྱས་ཀྱང་། །སེམས་གཞན་གཡེངས་པས་བྱས་པ་ནི། །དེ་ཉིད་རིག་པས་དོན་མེད་གསུངས། །གང་གིས་ཆོས་ཀྱི་གཙོ་བོ་མཆོག །སེམས་ཀྱི་གསང་འདི་མ་ཤེས་ན། །བདེ་འཐོབ་སྡུག་བསྔལ་གཞོམ་འདོད་ཀྱང་། །དེ་དག་དོན་མེད་གྱི་ནར་འཁྱམས། །ཞེས་དང་། འོད་སྲུང་གིས་ཞུས་པའི་མདོ་ལས། དཔེར་ན་མི་ཞིག་རྒྱ་མཚོའི་ཆུས་འཁྱེར་ལ། །དེ་ནི་སྐོམ་ཞིང་འཆི་བའི་དུས་བྱེད་འགྱུར། །དེ་བཞིན་ཆོས་མང་སྲེད་པས་བག་མེད་པ། །ཆོས་ཀྱི་རྒྱ་མཚོར་གནས་ཀྱང་ངན་འགྲོར་འགྲོ། །ཞེས་སོ། །ཚུལ་བཞིན་དུ་བསམ་གཏན་སྒོམ་པའི་ཕན་ཡོན་ཡང་། གནས་སྐབས་སུ་འདོད་པའི་ཡོན་ཏན་ལ་ཞེན་པ་འདོར་ཞིང་མངོན་ཤེས་དང་ཏིང་ངེ་འཛིན་སོགས་ཡོན་ཏན་མང་པོ་འགྲུབ་སྟེ། སྡུད་པ་ལས། བསམ་གཏན་གྱིས་ནི་འདོད་པའི་ཡོན་ཏན་སྨད་པ་འདོར། །རིག་དང་མངོན་པར་ཤེས་དང་ཏིང་འཛིན་མངོན་པར་འགྲུབ། །ཞེས་སོ། །མཐར་ཐུག་གི་འབྲས་བུ་བྱང་ཆུབ་ཐོབ་པའང་། བྱང་ས་ལས། བྱང་ཆུབ་སེམས་དཔས་ནི་བསམ་གཏན་གྱི་ཕ་རོལ་དུ་ཕྱིན་པ་ཡོངས་སུ་རྫོགས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་སངས་རྒྱས་སོ། །རྒྱའོ། །རྒྱ་བར་འགྱུར་རོ། །ཞེས་གསུངས་པ་བཞིན་ནོ། །དྲུག་པ་ཤེས་རབ་ནི། ངོ་བོ་ཁྱད་ཆོས་བཞི་ལྡན་གྱི་ཆོས་རབ་ཏུ་རྣམ་པར་འབྱེད་པའི་སེམས་པ་དགེ་བ་ས་བོན་དང་བཅས་པའོ། །ངེས་ཚིག་ནི། པྲཛྙཱ་ཞེས་པའི་སྒྲ་ལས་ཤེས་རབ་སྟེ། རྟོགས་བྱའི་ཡུལ་དོན་དམ་པ་ཉིད་རྟོགས་པའམ་ཁོང་དུ་ཆུད་པས་ན་ཤེས་རབ་བོ། །དབྱེ་ན། ཀླུ་སྒྲུབ་ཀྱིས། ཤེས་རབ་རྒྱས་བྱེད་པ་ནི་ཐོས་པ་སྟེ། །བསམ་པ་དང་ནི་གཉིས་པོ་ཡོད་གྱུར་ན། །དེ་ལ་སྒོམ་པ་ཡང་ནི་རབ་ཏུ་འབྱུང་། །ཞེས་གསུངས་པ་ལྟར་ཐོས་བསམ་སྒོམ་པའི་ཤེས་རབ་གསུམ་ལས། དང་པོ་ཐོས་པའི་ཤེས་རབ་ནི། གང་ལ་ཐོས་པ་བྱ་བའི་ཡུལ་རྒྱལ་བའི་གསུང་རབ་དགོངས་འགྲེལ་དང་བཅས་པ་ནང་རིག་པ་ཉིད་གཙོ་བོ་ཡིན་ལ། དེས་གདུལ་བྱ་རྗེས་སུ་འཛིན་པའི་ཡན་ལག་ཏུ་ཐུན་མོང་གི་རིག་གནས། གཞན་དག་ཚར་གཅོད་པ་ལ་སྒྲ་དང་ཚད་མ། རྗེས་སུ་འཛིན་པ་ལ་བཟོ་དང་གསོ་བ་བཅས་དེ་བཞི་ལའང་བསླབ་དགོས་ཏེ། ཐམས་ཅད་མཁྱེན་པའི་གོ་འཕང་འཐོབ་པར་བྱེད་པ་ལ་མེད་དུ་མི་རུང་བའི་ཕྱིར་ཏེ། མགོན་པོ་བྱམས་པས། རིག་པའི་གནས་ལྔ་དག་ལ་མཁས་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འགྱུར་ཏེ། །དེ་ལྟ་བས་ན་གཞན་དག་ཚར་གཅོད་རྗེས་བཟུང་དང་། །བདག་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱ། །ཞེས་གསུངས། དེ་ལས་ཁྱད་པར་དུ་གསུང་རབ་ཀྱི་དགོངས་དོན་དཔྱིས་ཕྱིན་པར་བྱེད་པ་ལ། ཕྱི་ནང་གི་གྲུབ་མཐའི་ཁྱད་པར་དང་། རང་སྡེ་ཐེག་པ་གོང་འོག་གི་བཞེད་སྲོལ། གསུང་རབ་དྲང་ངེས་ལྡེམ་དགོངས་ཀྱི་དབྱེ་བསལ། ཤེས་བྱ་བདེན་གཉིས་ཀྱི་རྣམ་འབྱེད་སོགས་ལེགས་པར་གཏན་ལ་ཕེབས་དགོས་པས། བླ་མ་མཁས་པ་ཤེས་རབ་དང་ལྡན་པ་བསྟེན་ནས། མདོ་སྔགས་ཀྱི་གཞུང་ཆེན་པོ་རྣམས་སྤྱི་དང་། ཁྱད་པར་རང་ལུགས་ལ་ཀུན་མཁྱེན་ཆོས་ཀྱི་རྒྱལ་པོ་དང་། རོང་ཟོམ་པ་ཆོས་ཀྱི་བཟང་པོ། ཐམས་ཅད་མཁྱེན་པ་སྨིན་གླིང་སྐུ་མཆེད། རིག་འཛིན་འཇིགས་མེད་གླིང་པ། ཆོས་རྗེ་ཀཿཐོག་པ་ཡབ་སྲས་སོགས་དང་། ཁོ་བོ་ཅག་གི་ཡོངས་འཛིན། རྩོད་དུས་ཀྱི་ཐམས་ཅད་མཁྱེན་པ་རྣམ་གསུམ་སོགས་ཀྱི་གཞུང་བཟང་དྲི་མ་མེད་པ། དོན་བཟང་པོ། ཚིག་འབྲུ་བཟང་པོ། ལུང་དང་འབྲེལ་ཞིང་རིགས་པས་གྲུབ་པ། རྒྱལ་བ་རིག་འཛིན་བརྒྱུད་པའི་མན་ངག་གི་དགོངས་པ་ཕྱིན་ཅི་མ་ལོག་པར་གཏན་ལ་དབབ་པས། ཕྱི་གྲུབ་མཐའི་སྐང་ཚུགས་པ། ནང་ཉམས་ལེན་གྱི་གནད་འདྲིལ་བ། གསང་བ་བྱིན་རླབས་ཀྱི་རོ་བཅུད་མ་ཡལ་བ། དུས་གསུམ་ན་འབྱོན་པར་དཀའ་བའི་གཞུང་བཟང་ཡིད་བཞིན་གྱི་ནོར་བུ་རིན་པོ་ཆེ་ལྟ་བུ་རྣམས་ལ་མང་དུ་ཐོས་པའི་ཤེས་རབ་དྲི་མ་མེད་པ་ཉིད་བསྐྱེད་པར་བྱ་དགོས་ཏེ། མདོ་ལས། མིག་ལྡན་སྣང་བ་ཡོད་གྱུར་ན། །གཟུགས་རྣམས་མཐོང་བ་ཇི་ལྟ་བར། །དེ་བཞིན་དགེ་དང་མི་དགེའི་ཆོས། །ཐོས་པས་རྣམ་པར་ཤེས་པར་འགྱུར། །ཞེས་དང་། བྱང་ཆུབ་སེམས་དཔའི་སྡེ་སྣོད་ལས། ཐོས་པས་ཆོས་རྣམས་ཤེས་པར་འགྱུར། །ཐོས་པས་སྡིག་ལས་ལྡོག་པར་འགྱུར། །ཐོས་པས་དོན་མེད་སྤོང་བར་འགྱུར། །ཐོས་པས་མྱ་ངན་འདས་པ་ཐོབ། །ཞེས་སོགས་མདོ་དང་བསྟན་བཅོས་ཀུན་ནས་རྒྱ་ཆེར་བསྔགས་པ་ཡིན་ལ། མདོར་ན་དངོས་སུ་ཉན་པ་ལྟ་ཅི། ཐ་ན་རྔའམ་གཎྜིའི་སྒྲ་ཐོས་པ་ཙམ་གྱིས་ཀྱང་བྱང་ཆུབ་ཀྱི་འབྲས་བུ་སྟེར་བར་གསུངས་ཏེ། གཎྜིའི་མདོ་ལས། དམ་ཆོས་བཤད་པའི་དུས་བསྟན་ཕྱིར། །རྔའམ་གཎྜི་བརྡུངས་ནཔའི་སྒྲ། །ཐོས་པས་བྱང་ཆུབ་ཐོབ་འགྱུར་ནི། །ཉན་ཕྱིར་ལྷགས་པ་སྨོས་ཅི་དགོས། །ཞེས་སོ། །གཉིས་པ་བསམ་པའི་ཤེས་རབ་ནི། དེ་ལྟར་ཐོས་པའི་དོན་རྣམས་ཐོས་པ་ཙམ་དུ་མི་བཞག་པར། དེའི་དོན་ལ་རྣམ་པར་དཔྱོད་པ་སྟེ། དེ་ཡང་གཞལ་བྱ་རང་རེ་སོ་སྐྱེའི་བློ་ངོར་སྣང་ཚུལ་ལ་ལྟོས་ནས། མངོན་གྱུར་དང་། ལྐོག་གྱུར་དང་། ཤིན་ཏུ་ལྐོག་གྱུར་གསུམ་ལ། གཞལ་བྱེད་ཀྱི་ཚད་མའང་། མངོན་སུམ་དང་། རྗེས་དཔགས་དང་། ལུང་གི་ཚད་མ་གསུམ་ལས། གཙོ་བོར་ནི་རྒྱལ་བའི་བཀའ་ལུང་ཚད་མ་ལ་བརྟེན་དགོས་ཏེ། རྒྱན་སྟུག་པོ་བཀོད་པ་ལས། ཡིད་ཆེས་ལུང་དང་མི་ལྡན་པར། །ཆོས་རྣམས་སྟོན་པར་བྱེད་པ་ནི། །མཚན་ཉིད་རྣམ་པར་རྟོག་པ་ཡིས། །བདག་ཀྱང་ཆུད་ཟོས་གཞན་ཆུད་གསོན། །ཞེས་གསུངས། ལུང་དེ་ལའང་གནས་སྐབས་ཀྱི་གདུལ་བྱ་ལ་ལྟོས་ནས་དྲང་ངེས་ལྡེམ་དགོངས་སྒྲ་ཇི་བཞིན་ཡིན་མིན་སོགས་སྣ་ཚོགས་ཡོད་པས། དཔེར་ན་དྲི་མ་དག་པར་བྱེད་པ་ཆུ་ཡིན་ཀྱང་། ཆུ་ཉིད་དག་པར་བྱེད་པ་སྔགས་ལ་ལྟོས་པ་བཞིན་དུ། ལུང་དོན་རིགས་པས་དཔྱད་ནས་གཏན་ལ་འབེབས་དགོས་ཏེ། བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ནས་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་གསུངས། རིགས་པ་དེ་ལའང་ལྟར་སྣང་བ་དང་། ཡང་དག་པ་གཉིས་ཀྱི། ཕྱི་མ་ལའང་། སྣང་བ་ཀུན་རྫོབ་ཐ་སྙད་དཔྱོད་བྱེད་དང་། སྟོང་པ་དོན་དམ་གནས་ཚུལ་ལ་དཔྱོད་པ་དང་། མཐར་ཐུག་བདེན་གཉིས་དབྱེར་མེད་དུ་དཔྱོད་པའི་ཚད་མ་གསུམ་ལས། གནས་སྐབས་སུ་འཇུག་ཡུལ་དེ་གསུམ་གང་ཡིན་མ་འདྲེས་པར་ཤན་འབྱེད་པ་གལ་ཆེ་ཞིང་། མཐར་ཐུག་ཏུ་བཅོམ་ལྡན་འདས་ཀྱིས། དོན་ལ་རྟོན་པར་བྱ་ཡི་ཚིག་འབྲུ་ལ་རྟོན་པ་མ་ཡིན་པ་དང་། ཡེ་ཤེས་ལ་རྟོན་པར་བྱ་ཡི་རྣམ་ཤེས་ལ་རྟོན་པར་བྱ་བ་མ་ཡིན་པ་དང་། ངེས་པའི་དོན་ལ་རྟོན་པར་བྱ་ཡི་དྲང་བའི་དོན་ལ་རྟོན་པ་མ་ཡིན་པ་དང་། ཆོས་ལ་རྟོན་པར་བྱ་ཡི་གང་ཟག་ལ་རྟོན་པར་བྱ་བ་མ་ཡིན་པའོ། །ཞེས་བཀའ་སྩལ་ཏེ། རྟོན་པ་ནི་དེའི་རྗེས་སུ་འབྲང་བའི་དོན་ཡིན་པས། དེ་དག་དང་མི་འགལ་བར་མཐར་ཐུག་དོན་དཔྱོད་དམ་ཆོས་ཉིད་ཀྱི་རིགས་པས་གྲུབ་པ་བཞིན། གཟུང་འཛིན་ཅན་གྱི་རྣམ་ཤེས་ཀྱི་ཡུལ་ལས་འདས་པའི་ཡེ་ཤེས་རྣམ་པར་མི་རྟོག་པས་ཆོས་ཐམས་ཅད་ཟུང་འཇུག་བརྗོད་བྲལ་མཉམ་པ་ཉིད་རང་བཞིན་འདུས་མ་བྱས་པ་རྡོ་རྗེ་ནམ་མཁའི་དཀྱིལ་ལྟ་བུར་རྟོགས་པའི་སོ་སོར་རྟོགས་པའི་ཤེས་རབ་ལྷག་མཐོང་མཚན་ཉིད་པ་ཉིད་རྒྱུད་ལ་སྐྱེད་པར་བྱ་སྟེ། མདོ་རྒྱ་ཆེ་རོལ་པ་ལས། ཟབ་ཞི་རྡུལ་བྲལ་འོད་གསལ་འདུས་མ་བྱས། །བདུད་རྩི་ཆོས་ཉིད་བདག་གིས་ཐོབ་པར་འགྱུར། །བདག་གིས་བསྟན་ཀྱང་གཞན་གྱིས་མི་ཤེས་ཏེ། །མི་སྨྲ་ནགས་འདབས་གནས་པར་བྱ་བ་སྙམ། །ཚིག་བྲལ་ངག་གི་ལམ་གྱིས་མི་གོས་པ། །དེ་བཞིན་ཉིད་ཆོས་རང་བཞིན་ནམ་མཁའ་འདྲ། །སེམས་དང་ཡིད་ཀྱི་རྒྱུ་བ་རབ་གྲོལ་བ། །མཆོག་རབ་ངོ་མཚར་ཆེ་བ་དམ་པ་ཤེས། །དོན་ཚུལ་འདི་ནི་ཡི་གེ་རྣམས་ཀྱིས་སུ། །ཤེས་པར་མི་ནུས་མཛངས་པས་རིག་པ་ཡིན། །སྔོན་གྱི་རྒྱལ་ལ་ལྷག་བྱས་སེམས་ཅན་རྣམས། །དེ་དག་ཆོས་འདི་ཐོས་ན་ཡིད་ཆེས་འགྱུར། །ཞེས་གསུངས། དེ་ཚུལ་བཞིན་རྟོགས་པར་བྱེད་པ་ལ་ཚུར་མཐོང་གི་རིགས་པ་ལྟར་སྣང་བ་དང་དྲང་དོན་དབང་བཙན་གྱི་ལུང་ཙམ་གྱི་གཏན་ལ་ཕེབས་བར་མི་འགྱུར་བས། ངེས་དོན་གྱི་མདོ་རྒྱུད་ཟབ་མོ་རྣམས་ཀྱི་དགོངས་པ་བཙལ་ཞིང་། ཁྱད་པར་དོན་བརྒྱུད་རྟོགས་པ་དང་ལྡན་པའི་བླ་མ་བཙལ་ནས་ཞལ་གྱི་གདམས་པ་ནོས་ཏེ་དགོངས་པའི་གསང་མཛོད་ལོན་པར་བྱེད་པ་འདི་ཁོ་ན་སྒྲུབ་བརྒྱུད་ཀུན་གྱི་གཅེས་ནོར་ཡིན་པས་སྙིང་གི་དྭངས་མར་བཅང་བར་བྱ་ལ། གཞན་ཡང་། གོང་དུ་སྨོས་པའི་ཚུལ་གྱི་དལ་འབྱོར་རྙེད་དཀའ་སོགས་ཡང་དང་ཡང་དུ་བསམ་སྟེ་རང་རྒྱུད་ཆོས་དང་འདྲེས་པར་བྱ་བ་ཡིན་ནོ། །གསུམ་པ་སྒོམ་པའི་ཤེས་རབ་ནི། དེ་ལྟར་ཐོས་བསམ་གྱིས་གཏན་ལ་ཕབ་པའི་དོན་དེ་ཉིད་རྩེ་གཅིག་ཏུ་བསྒོམས་པས་ལྷག་མཐོང་རྣམ་པར་མི་རྟོག་པའི་ཤེས་རབ་ཟབ་མོ་ཉིད་རང་རྒྱུད་ལ་བསྐྱེད་པར་བྱ་བ་ཡིན་ཏེ། ཇི་ལྟར་སྒོམ་པའི་ཚུལ། ཀུན་མཁྱེན་བླ་མའི་དོན་ཁྲིད་ལས། དང་པོ་སྣང་བའི་རང་བཞིན་སྒྱུ་མའི་དཔེ་བརྒྱད་དུ་ལྟ་བ་ནི། འདི་ལྟར་ཕྱི་ཡུལ་དུ་སྣང་བ་ཐམས་ཅད་ནི་མེད་བཞིན་འཁྲུལ་པའི་ངོ་ལ་སྣང་བ་རྨི་ལམ་ལྟ་བུ། རྒྱུ་རྐྱེན་རྟེན་འབྲེལ་གྱི་ཚོགས་པ་ལས་གློ་བུར་བར་སྣང་བས་སྒྱུ་མའི་རྣམ་པ་ལྟ་བུ། མེད་ལ་ཡོད་པར་སྣང་བས་མིག་ཡོར་ལྟ་བུ། སྣང་དུས་ནས་བདེན་པར་མ་གྲུབ་པས་སྨིག་རྒྱུ་ལྟ་བུ། ཕྱི་ནང་གང་ལ་ཡང་མེད་བཞིན་སྣང་བས་བྲག་ཅའི་སྒྲ་སྙན་ལྟ་བུ། རྟེན་དང་བརྟེན་པར་མེད་པས་དྲི་ཟའི་གྲོང་ཁྱེར་ལྟ་བུ། སྣང་ལ་རང་བཞིན་མེད་པས་གཟུགས་བརྙན་གྱི་སྣང་བ་ལྟ་བུ། མེད་སྣང་ཅིར་ཡང་ཤར་བས་སྤྲུལ་པའི་གྲོང་ཁྱེར་ལྟ་བུ། ཇི་ལྟར་སྣང་བཞིན་པའི་དུས་ནའང་བརྫུན་ལ་དངོས་པོ་མེད་པས་སྟོང་གཟུགས་དངོས་སུ་འདུག་སྙམ་དུ་བསྒོམ་པར་བྱ་སྟེ། ཏིང་འཛིན་རྒྱལ་པོ་ལས། ཇི་ལྟར་མཚན་མོ་ཆུ་ཡི་ཟླ་བ་དག །དྭངས་ཤིང་རྙོག་པ་མེད་པའི་མཚོར་སྣང་ཡང་། །ཆུ་ཟླ་སྟོང་པ་གསོབ་སྟེ་སྙིང་པོ་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་སོགས་རྒྱ་ཆེར་གསུངས་པ་བཞིན་ནོ། །དེའི་རྗེས་སུ་ཆོས་ཉིད་སྟོང་པར་བརྟག་པ་ནི། ཕྱི་ཡུལ་སྣང་རགས་པ་དང་། རང་གི་ལུས་ཀྱི་དངོས་པོ་འདི་རྡུལ་ཕྲན་དུ་གཞིགས་པས་ཡུལ་མེད་སྟོང་པར་ཐག་ཆོད། ནང་འཛིན་པའི་སེམས་ལ་སྐད་ཅིག་ཆ་མེད་དུ་བརྟགས་པས་འཛིན་མེད་སྟོང་པར་ཐག་ཆོད། གཟུང་འཛིན་གང་དུའང་མ་གྲུབ་པར་རྟོགས་པའི་ངང་དེར་སྟོང་པ་གཏད་མེད་དུ་མཉམ་པར་གཞག་པར་བྱ་སྟེ། ཤེར་ཕྱིན་ལས། གང་ཞིག་གཟུགས་ལ་མི་གནས་ཚོར་ལ་མི་གནས་ཤིང་། །གང་ཞིག་འདུ་ཤེས་མི་གནས་སེམས་པར་མི་གནས་ལ། །རྣམ་ཤེས་གང་མི་གནས་པ་ཆོས་ཉིད་གནས་པ་སྟེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་སོ། །དེ་ལྟར་ལེགས་པར་གཏན་ལ་ཕེབས་ནས་མཐའ་བྲལ་དབུ་མའི་དོན་ལ་མཉམ་པར་གཞག་པ་ནི། སྐྱབས་སེམས་སྔོན་དུ་འགྲོ་བས། ལུས་མི་གཡོ། ངག་མི་བརྗོད། སེམས་མི་རྟོག་པས་ཕྱི་ཡུལ་སྣང་མ་འགགས་ལ་ཡུལ་འཛིན་གྱི་རྣམ་རྟོག་ཞི། ནང་རིག་པ་སྟོང་གསལ་ལ་འཛིན་ཞེན་གྱི་སྤྲོས་པ་ཞི། བར་ལུས་སེམས་རྟེན་མེད་ལ་དོན་དམ་ཆོས་ཉིད་ཤར་སྟེ། སྟོང་གསལ་ནམ་མཁའ་ལྟ་བུའི་རིག་པ། སྨྲ་བསམ་བརྗོད་མེད་ཆེན་པོའི་ཡེ་ཤེས། བློ་བྲལ་དབུ་མའི་དེ་ཁོ་ན་ཉིད་ཀྱི་ངང་དུ་ཇི་ཙམ་གནས་ཀྱི་བར་དུ་མཉམ་པར་བཞག་སྟེ། དེ་ཉིད་ལས། འགྲོ་བ་འཁྲུལ་པ་རི་དྭགས་རྒྱར་ཚུད་འདྲར་ཤེས་ནས། །ཤེས་རབ་ལྡན་པ་མཁའ་ལ་བྱ་བཞིན་རྣམ་པར་རྒྱུ། །སྤྱོད་པ་ཡང་དག་གང་ཞིག་གཟུགས་ལ་མི་སྤྱོད་ཅིང་། །རྣམ་ཤེས་འདུ་ཤེས་ཚོར་བ་སེམས་པར་མི་སྤྱོད་ན། །དེ་ལྟར་སྤྱོད་པ་ཆགས་པ་ཐམས་ཅད་ཡོངས་སྤོང་ཞིང་། །ཆགས་ལས་རྣམ་གྲོལ་བདེ་གཤེགས་རྣམས་ཀྱི་ཤེས་རབ་སྤྱོད། །དེ་ལྟར་སྤྱོད་པའི་བྱང་ཆུབ་སེམས་དཔའ་མཁས་གསལ་བ། །ཆགས་པ་བཅད་ནས་གྲོལ་ལ་ཆགས་པ་མེད་པར་འགྲོ། །ཉི་མ་སྒྲ་གཅན་གཟའ་བྲལ་ལྷང་ངེར་འདུག་པ་དང་། །མེ་བཏང་རྩྭ་དང་ཤིང་དང་ནགས་ཚལ་བསྲེགས་པར་བཞི ན། །ཆོས་རྣམས་ཐམས་ཅད་རང་བཞིན་དག་ཅིང་ཡོངས་དག་པར། །བྱང་ཆུབ་སེམས་དཔའ་ཤེས་རབ་ཕ་རོལ་ཕྱིན་ལྟ་ན། །བྱེད་པ་པོ་ཡང་མི་དམིགས་ཆོས་ཀུན་མི་དམིགས་ཏེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་དང་། བྱམས་པས། འདི་ལ་བསལ་བྱ་ཅི་ཡང་མེད། །བཞག་པར་བྱ་བའང་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཅེས་དང་། ཀླུ་སྒྲུབ་ཀྱིས། གར་ཡང་མ་རྟོག་ཅིར་ཡང་མ་སེམས་ཤིག །བཅས་བཅོས་མ་བྱེད་རང་བཞིན་ལྷུག་པར་ཞོག །མ་བཅོས་པ་ནི་སྐྱེ་མེད་རིན་ཆེན་མཛོད། །དུས་གསུམ་སངས་རྒྱས་ཀུན་གྱི་དགོངས་པ་ཡིན། །ཞེས་སོ། །རྗེས་ལ་དེ་ལས་ལངས་ནས་ཆོས་ཐམས་ཅད་སྒྱུ་མ་ལྟ་བུར་ཤེས་པའི་ངང་དགེ་བ་བསྔོ་ཞིང་གཞན་ལ་ཆོས་བཤད་པ་སོགས་ཚོགས་གཉིས་ཟུང་འབྲེལ་གྱིས་ལམ་བསླབ་པར་བྱ་སྟེ། སྡུད་པ་ལས། བྱང་ཆུབ་སེམས་དཔའ་གང་ཞིག་ཤེས་རབ་མཆོག་བསྒོམས་ཏེ། །དེ་ལས་ལངས་ནས་གོས་པ་མེད་པའི་ཆོས་བརྗོད་ཅིང་། །དེ་ཡང་འགྲོ་བའི་དོན་དུ་བྱང་ཆུབ་རྒྱུར་བསྔོ་ན། །དགེ་བ་དེ་དང་མཉམ་པ་འཇིག་རྟེན་གསུམ་ན་མེད། །ཅེས་སོ། །སྐབས་འདིར་གཞི་དབུ་མ་བདེན་གཉིས། ལམ་དབུ་མ་ཚོགས་གཉིས། འབྲས་བུ་དབུ་མ་སྐུ་གཉིས་ཀྱི་རྣམ་གཞག་སོགས་སྤྲོ་ན་འཆད་པར་བྱའོ། །ཤེས་རབ་དག་ཅིང་སྤེལ་བར་བྱ་བའི་ཚུལ་རྣམས་ནི་སྔར་དང་འདྲའོ། །དེ་ལྟར་ཤེས་རབ་ཀྱིས་མ་ཟིན་པའི་སྐྱོན་ནི། གཞན་སྦྱིན་སོགས་ལྔ་ལ་ཇི་ཙམ་འབད་ཀྱང་ཕར་ཕྱིན་མ ཚན་ཉིད་པར་མི་འགྱུར་བས། རྣམ་མཁྱེན་ལ་དངོས་སུ་སྦྱོར་མི་ནུས་ཏེ། དེ་ཉིད་ལས། དམུས་ལོང་དམིགས་བུ་མེད་པ་བྱེ་བ་ཁྲག་ཁྲིག་རྣམས། །ལམ་ཡང་མི་ཤེས་གྲོང་ཁྱེར་འཇུག་པར་ག་ལ་ནུས། །ཤེས་རབ་མེད་ན་མིག་མེད་ཕ་རོལ་ཕྱིན་ལྔ་ཡིས། །དམིགས་བུ་མེད་པས་བྱང་ཆུབ་རེག་པར་ནུས་མ་ཡིན། །གང་ཚེ་ཤེས་རབ་ཀྱིས་ནི་རབ་ཏུ་ཟིན་གྱུར་པ། །དེ་ཚེ་མིག་རྙེད་གྱུར་ཅིང་དེ་ཡི་མིང་ཐོབ་བོ། །ཞེས་སོ། །ཕན་ཡོན་ནམ་འབྲས་བུ་ནི། གནས་སྐབས་སུ་འཇིག་རྟེན་དང་འཇིག་རྟེན་ལས་འདས་པའི་ལེགས་ཚོགས་ཐམས་ཅད་འབྱུང་སྟེ། སྔ་མ་ལས། སངས་རྒྱས་སྲས་དང་ཉན་ཐོས་རང་རྒྱལ་ལྷ་རྣམས་དང་། །འགྲོ་བ་ཀུན་གྱི་བདེ་སྐྱིད་ཆོས་རྣམས་ཇི་སྙེད་པ། །དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་། །ཞེས་སོ། །མཐར་ཐུག་བྱང་ཆུབ་ཆེན་པོ་ཐོབ་པའང་། དེ་ཉིད་ལས། ཤེས་རབ་ཀྱིས་ནི་ཆོས་ཀྱི་རང་བཞིན་ཡོངས་ཤེས་ནས། །ཁམས་གསུམ་མ་ལུས་པ་ལས་ཡང་དག་འདའ་བར་འགྱུར། །མི་ཡི་ཁྱུ་མཆོག་འཁོར་ལོ་རིན་ཆེན་བསྐོར་བྱས་ནས། །སྡུག་བསྔལ་ཟད་པར་བྱ་ཕྱིར་འགྲོ་ལ་ཆོས་ཀྱང་སྟོན། །ཞེས་གསུངས་པ་བཞིན་ནོ། །གཉིས་པ་བསྡུས་ཏེ་བསྟན་པ་ནི། བྱང་སེམས་ལས་དང་པོ་པའམ་དབང་རྟུལ་གོང་གི་བསླབ་བྱ་རྣམས་ལ་རྒྱས་པར་སློབ་མི་ནུས་པ་རྣམས་ཀྱི་དོན་དུ་བསླབ་བྱ་བསྡུས་ཏེ་བསྟན་པ། རྒྱལ་པོ་ལ་གདམས་པའི་མདོ་ལས། རྒྱལ་པོ་ཆེན་པོ། ཁྱོད་ནི་འདི་ལྟར་བྱ་བ་མང་བ། བྱེད་པ་མང་བ་སྟེ། ཐམས་ཅད་ཀྱིས་ཐམས་ཅད་དུ་སྦྱིན་པ་ནས་ཤེས་རབ་ཀྱི་ཕ་རོལ་དུ་ཕྱིན་པའི་བར་ལ་བསླབ་པར་མི་ནུས་ཀྱིས། དེ་བས་ན་རྒྱལ་པོ་ཆེན་པོ་ཁྱོད། ཡང་དག་པར་རྫོགས་པའི་བྱང་ཆུབ་ཏུ་འདུན་པ་དང་། དད་པ་དང་། དོན་དུ་གཉེར་བའི་སྨོན་པ་དང་གསུམ་འགྲོ་ཡང་རུང་། འདུག་ཀྱང་རུང་། ཉལ་ཡང་རུང་། སད་ཀྱང་རུང་། ཟ་ཡང་རུང་། བཏུང་ཡང་རུང་། རྟག་པར་རྒྱུན་དུ་དྲན་པས་ཡིད་ལ་བཟུང་སྟེ་སྒོམས་ཤིག གཞན་གྱི་དགེ་བ་ལ་རྗེས་སུ་ཡི་རང་བར་གྱིས་ཤིག རྗེས་སུ་ཡི་རང་ནས་ཀྱང་སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་ལ་ཕུལ་ཅིག ཕུལ་ནས་ཀྱང་སེམས་ཅན་ཐམས་ཅད་དང་ཐུན་མོང་དུ་གྱིས་ཤིག དེ་ནས་སེམས་ཅན་ཐམས་ཅད་ཀྱིས་སངས་རྒྱས་ཀྱི་ཆོས་ཡོངས་སུ་རྫོགས་པར་འགྱུར་བར་ཉིན་གཅིག་བཞིན་དུ་བླ་ན་མེད་པའི་བྱང་ཆུབ་ཏུ་བསྔོས་ཤིག རྒྱལ་པོ་ཆེན་པོ་དེ་ལྟར་རྒྱལ་སྲིད་ཀྱང་བྱེད་ལ། རྒྱལ་པོའི་བྱ་བ་ཡང་ཉམས་པར་མི་འགྱུར་ལ། བྱང་ཆུབ་ཀྱི་ཚོགས་ཀྱང་ཡོངས་སུ་རྫོགས་པར་འགྱུར་རོ། །ཞེས་གསུངས་པ་བཞིན། ཐེག་ཆེན་ལམ་གྱི་རྟེན་གཞི་གཞན་དོན་དུ་རྫོགས་བྱང་དོན་གཉེར་གྱི་འདུན་པ་དང་། དེ་ལ་དད་པ་དང་། ཡོངས་སུ་སྨོན་པ་གསུམ་དང་མ་བྲལ་བའི་ངང་། གཞན་གྱི་དགེ་བ་བྱས་པ་ལ་རྗེས་སུ་ཡི་རང་ཞིང་དེའི་དགེ་རྩ་ཡང་སངས་རྒྱས་ལ་མཆོད་པ་དང་། སེམས་ཅན་ལ་ཡོངས་སུ་བསྔོ་བ་སྟེ། མདོར་ན་བྱང་ཆུབ་སྨོན་པའི་སེམས་བསྐྱེད་ཀྱི་རྩ་བ་སེམས་ཅན་བློས་མི་འདོར་བའི་ངང་། གཞན་གནོད་གཞི་དང་བཅས་པ་སྤོང་ཅི་ནུས་དང་། གཞན་ཕན་གཞི་དང་བཅས་པ་སྒྲུབ་ཅི་ནུས་སུ་འབད་ཅིང་། དེ་ཐམས་ཅད་ཀྱང་དམ་པ་གསུམ་གྱིས་རྩིས་ཟིན་པར་བྱ་བ་སྟེ། དེ་ལ་དམ་པ་གསུམ་ནི། སྦྱོར་བ་སེམས་བསྐྱེད་དངོས་གཞི་དམིགས་མེད། རྗེས་བསྔོ་བ་དམ་པའོ། །དང་པོ་ནི། བདག་གི་ཕ་མར་གྱུར་པའི་སེམས་ཅན་བདེ་བ་འདོད་ཀྱང་བདེ་བས་ཕོངས་ཤིང་། སྡུག་བསྔལ་མི་འདོད་ཀྱང་སྡུག་བསྔལ་གྱི་རྒྱུ་འབྲས་མང་པོ་ལ་རྟག་ཏུ་ལོངས་སྤྱོད་པ་འདི་རྣམས་སྡུག་བསྔལ་གྱི་གནས་རིས་དེ་ལས་བསྒྲལ་ནས་རྣམ་གྲོལ་གཏན་གྱི་བདེ་བའི་མཆོག་ལ་འགོད་པར་བྱ་བའི་ཕྱིར་དུ་བདག་གིས་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་དེ་ཅི་ནས་ཀྱང་ཐོབ་པར་བྱ། དེའི་ཆེད་དུ་དགེ་སྒྲུབ་སྡིག་སྤོང་འདི་དང་འདི་ལྟ་བུ་བགྱིའོ་སྙམ་པའི་ཀུན་སློང་གི་བསམ་པ་སྟེ། མདོར་ན། རྒྱུ་འབྲས་ཡིད་ཆེས་ཀྱི་དད་པ་དང་། སེམས་ཅན་རྣམས་ཕན་བདེ་ལ་འགོད་འདོད་ཀྱི་བརྩེ་བ་དང་། དེའི་ཆེད་དུ་རྫོགས་བྱང་དོན་གཉེར་འདུན་པ་སྟེ། དེ་གསུམ་དང་མ་བྲལ་བའི་ངང་ནས་ཐ་ན་མར་མེ་ཀོང་བུ་གང་ངམ་ཆུ་ཐིགས་པ་གཅིག་གམ། ཟན་ཁམ་གཅིག་ཙམ་སྦྱིན་པ་གཏོང་ངམ། ཉིན་ཞག་གཅིག་ཙམ་དུ་བསླབ་པ་སྲུང་པའམ། མ་ཎི་རྡོག་གཅིག་གམ། ཕྱག་ལན་གཅིག་འཚལ་བ་ཡན་ཆད་ཐེག་པ་ཆེན་པོའི་ལམ་གྱི་དགེ་རྩར་འགྱུར་བས་ནམ་བྱང་ཆུབ་སྙིང་པོ་ལ་ཐུག་གི་བར་དུ་བར་མ་དོར་ཆུད་མི་འཛའ་ཞིང་གོང་དུ་འཕེལ་བ་དང་། དེར་ཡང་དོར་བ་མེད་པའི་སྟོང་པ་ཉིད་དང་དབྱེར་མེད་རོ་མཉམ་པར་གྱུར་ཏེ་ཕུང་པོ་ལྷག་མ་མེད་པའི་དབྱིངས་སུའང་འཛད་པར་མི་འགྱུར་བ་སོགས་ཕན་ཡོན་དང་དགོས་པ་བསམ་གྱིས་མི་ཁྱབ་པ་དང་ལྡན་པ་ཡིན་ཏེ། འཕགས་པ་བརྒྱད་སྟོང་པ་ལས། བཙུན་པ་ཤཱ་རིའི་བུ་དགེ་བའི་རྩ་བ་གང་གིས་ལྷ་དང་མིའི་ནང་དུ་ཕྱིན་ནས་བླ་ན་མེད་པ་སངས་རྒྱས་སུ་འགྱུར་བ་ཡོད་དེ། གང་ཞེ་ན། བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་གཅིག་དང་ལྡན་པའི་དགེ་བ་བཅུ་དང་། བསམ་གཏན་བཞི་དང་། གཟུགས་མེད་པའི་སྙོམ་པར་འཇུག་པ་བཞི་དང་། ཕ་རོལ་དུ་ཕྱིན་པ་དྲུག་སྟེ་བར་མ་དོར་ཟད་ཅིང་མེད་པར་མི་འགྱུར་རོ། །ཞེས་དང་། བྱམས་པས་ཞུས་པའི་མདོ་ལས། དཔེར་ན་རྒྱ་མཚོ་ཆེན་པོར་ཆུ་གང་ཇི་སྙེད་གཅིག་འབབ་པ་དེ་དག་བསྐལ་པའི་བར་དུ་ཟད་པར་མི་འགྱུར་རོ། །བྱམས་པ་དེ་བཞིན་དུ་བྱང་ཆུབ་ཏུ་སེམས་བསྐྱེད་པས་ཟིན་པའི་དགེ་བའང་བླ་ན་མེད་པའི་བྱང་ཆུབ་ཏུ་སངས་རྒྱས་ཀྱི་བར་དུ་ཟད་པར་མི་འགྱུར་རོ། །བྱམས་པ་གང་ཡང་། འདི་ལྟ་སྟེ། དཔེར་ན་འབྱུང་ཁུངས་བཟང་པོར་གང་ཅི་ཡང་རུང་བའི་ས་བོན་ཐམས་ཅད་རྒྱས་ཤིང་འཕེལ་བ་དེ་བཞིན་དུ། བྱང་ཆུབ་སེམས་ཀྱིས་ཟིན་པའི་དགེ་བའང་རྒྱ་ཆེར་འཕེལ་བར་འགྱུར་རོ། །ཞེས་དང་། ཟ་མ་ཏོག་བཀོད་པ་ལས། འཇམ་དཔལ་འདི་ལྟ་སྟེ། ཤིང་ལྗོན་པ་སྣ་ཚོགས་པ་ནི་ཁམས་བཞི་བཟུང་ན་རྣམ་པར་འཕེལ་ལོ། །འཇམ་དཔལ་དེ་བཞིན་དུ་དགེ་བའི་རྩ་བའམ་བྱང་ཆུབ་སེམས་ཀྱིས་བཟུང་ཞིང་རྣམ་པ་ཐམས་ཅད་མཁྱེན་པར་བསྔོས་ན་རྣམ་པར་འཕེལ་ལོ། །ཞེས་དང་། རྒྱལ་པོ་ལ་གདམས་པའི་མདོ་ལས། རྒྱལ་པོ་ཆེན་པོ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སེམས་ཀྱིས་དགེ་བའི་རྩ་བའི་ལས་ཀྱི་རྣམ་པར་སྨིན་པས་ལན་དུ་མར་ལྷ་ཡི་ནང་དུ་སྐྱེས། ལན་དུ་མར་མི་ཡི་ནང་དུ་སྐྱེས་ཏེ། ལྷ་དང་མིར་སྐྱེས་པ་ཐམས་ཅད་དུའང་དབང་པོ་བྱེད་པར་གྱུར་ཀྱང་། ད་དུང་རྒྱལ་པོ་ཆེན་པོ་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སེམས་ཀྱིས་དགེ་བའི་རྩ་བའི་ལས་ལ་བྲི་བའམ་གང་བ་མི་མངོན་ནོ། །ཞེས་དང་། འཕགས་པ་སྡོང་པོ་བཀོད་པ་ལས། རིགས་ཀྱི་བུ་བྱང་ཆུབ་ཀྱི་མཆོག་ཏུ་སེམས་བསྐྱེད་པ་གང་དང་ལྡན་པ་དེའི་ལུས་དང་ངག་དང་སེམས་ཀྱི་རྩོམ་པ་ཐམས་ཅད་དོན་ཡོད་པ་སྟེ་རྟག་ཏུ་རོ་གཅིག་པར་འགྱུར་རོ། །ཞེས་སོ། །གཉིས་པ་ནི། དེ་ལྟར་གྲུབ་པའི་སྐབས་སུ་བདེན་ཞེན་གྱི་དམིགས་པས་བཅིངས་པ་ནི་ཐེག་པ་ཆེན་པོའི་ལམ་གྱི་མི་མཐུན་ཕྱོགས་ཏེ། ཡུམ་ལས། རབ་འབྱོར། དམིགས་པ་དང་བཅས་པའི་འདུ་ཤེས་ཅན་རྣམས་ལ་རྗེས་སུ་མཐུན་པའི་བཟོད་པའང་དཀའ་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལྟ་སྨོས་ཀྱང་མི་དགོས། ཞེས་དང་། སྡུད་པ་ལས། ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་དེ་འདྲར་རྒྱལ་བས་གསུངས། །ཞེས་གསུངས། དེས་ན་ཤེས་ཤིང་ནུས་ན་དེ་ཐམས་ཅད་ཀྱི་སྐབས་སུ་འཁོར་གསུམ་དམིགས་མེད་ཀྱིས་རྩིས་ཟིན་པར་བྱ་སྟེ། དེ་གང་ཞེ་ན། གང་གིས་སྒྲུབ་པ་པོ་རང་དང་། གང་གི་ཆེད་དུའམ་གང་བསྒྲུབ་བྱའི་དགེ་བ། ཇི་ལྟར་སྒྲུབ་པའི་ཐབས་སམ་འབྲས་བུ་དང་བཅས་པ་གསུམ་ཀ་རྨི་ལམ་དང་སྒྱུ་མ་ལྟ་བུར་སྣང་ལ་རང་བཞིན་མེད་པར་ཤེས་པར་བྱ་སྟེ། དཀོན་མཆོག་སྤྲིན་ལས། གང་ལ་དགེ་བ་མི་དམིགས་པ་དང་། ཇི་ལྟར་བྱ་བ་མི་དམིགས་པ་དང་། ཡོངས་སུ་འབད་པ་མི་དམིགས་པའི་ཚུལ་གྱིས་བསོད་ནམས་དང་ཡེ་ཤེས་ཀྱི་ཚོགས་བསགས་པར་བྱའོ། །དེ་ཡང་སྒྱུ་མ་ལྟ་བུ་དང་། སྨིག་རྒྱུ་ལྟ་བུ་དང་། མིག་ཡོར་ལྟ་བུ་དང་། སྤྲུལ་པ་ལྟ་བུའི་སེམས་ཀྱིས་རྗེས་སུ་བསྒྲུབ་པར་བྱའོ། །ཞེས་དང་། ཉེ་བར་འཁོར་གྱིས་ཞུས་པའི་མདོ་ལས། ཇི་ལྟར་སྒྱུ་མ་མཁན་གྱིས་འཇིག་རྟེན་ན། །སེམས་ཅན་བརྒྱ་ཕྲག་མང་པོ་སྤྲུལ་བྱས་ཏེ། །སྤྲུལ་པ་དེ་དག་ཐམས་ཅད་བསད་གྱུར་ཀྱང་། །སྒྱུ་མ་དེ་དག་བསད་པ་ཡོད་མིན་ལྟར། །འགྲོ་བ་འདི་ཀུན་སྒྱུ་མའི་རང་བཞིན་ཏེ། །འདི་ལ་མཐའ་ནི་ནམ་ཡང་དམིགས་སུ་མེད། །ཅེས་དང་། འགྲོ་དོན་བྱང་ཆུབ་ཕྱིར་ནི་སེམས་བསྐྱེད་ཅེས། །སྤྱོད་མཆོག་ཁྱད་པར་འཕགས་པ་བསྟན་བྱས་ཀྱང་། །བྱང་ཆུབ་ནམ་ཡང་དམིགས་སུ་ཡོད་མིན་ཏེ། །འདོད་པ་གང་ཡིན་དེ་ཡང་ཡོད་མ་ཡིན། །ཞེས་དང་། སྦྱིན་པའི་བསྔགས་པ་འཇིག་རྟེན་ངེས་བརྗོད་ཀྱང་། །སེར་སྣའི་ཆོས་དེ་དམིགས་སུ་ཡོད་མ་ཡིན། །དེ་ལྟར་རྒྱལ་བའི་ཆོས་རྣམས་བསམ་ཡས་ཏེ། །དེ་ཡང་དམིགས་མེད་དེ་ཡང་མཐོང་བ་མེད། །ཅེས་དང་། ཏིང་འཛིན་རྒྱལ་པོ་ལས། ཡིད་ཀྱི་འདུ་ཤེས་དང་ནི་འཛིན་པ་ཡིས། །བདེ་གཤེགས་མཐོང་མཆོད་སངས་རྒྱས་མཉེས་བྱས་སྙམ། །སྐྱེས་པ་མེད་ཅིང་མཆོད་པ་བྱས་པའང་མེད། །མི་དག་བདག་གི་ཁྱིམ་ན་རྨི་ལམ་བཞིན། །ཞེས་དང་། ལྗོན་པས་ཞུས་པའི་མདོ་ལས། མེ་ལོང་དཀྱིལ་འཁོར་ཡང་དག་ལ། །ཇི་ལྟར་རང་བཞིན་མེད་པ་ཡི། །བཞིན་གྱི་དཀྱིལ་འཁོར་སྣང་བ་ལྟར། །ལྗོན་པ་ཆོས་རྣམས་ཤེས་པར་གྱིས། །ཞེས་སོ། །དེ་ལྟར་མི་ཤེས་ཤིང་མི་ནུས་ན། དོན་དམ་པར་ཆོས་ཐམས་ཅད་རང་བཞིན་གྱིས་བདེན་པར་མ་གྲུབ་ཀྱང་། ཀུན་རྫོབ་ཏུ་ལས་དང་ལས་ཀྱི་འབྲས་བུ་ནམ་ཡང་བསླུ་བ་མེད་པ་ནི་རྒྱལ་བ་རྫོགས་པའི་སངས་རྒྱས་ཀྱི་གསུང་དྲི་མ་མེད་པ་ཡིན་ནོ་སྙམ་དུ་དད་པ་དང་གུས་པ་དང་སྤྲོ་བས་བརྩོན་པར་བྱའོ། །གསུམ་པ་ནི། ཡུམ་བར་མ་ལས། རབ་འབྱོར་དགེ་བའི་རྩ་བ་འདི་ནི་སངས་རྒྱས་ཀྱི་ས་ཁོ་ནར་བསྔོ་བར་བྱ་ཡི། ཉན་ཐོས་དང་། རང་སངས་རྒྱས་དང་། དེ་ལས་གཞན་གྱི་སར་ཡང་བསྔོ་བར་མི་བྱ་སྟེ། ཞེས་གསུངས་པས། དེ་ལྟར་བགྱིས་པའི་དགེ་བའི་རྩ་བ་དེ་ཐམས་ཅད་གནས་སྐབས་ལྷ་མིའི་བདེ་འབྲས་ཙམ་དང་དམན་པ་ཉན་རང་གི་འབྲས་བུ་ཙམ་དུ་བསྔོ་བར་མི་བྱ་བར། ཇི་ལྟར་དུས་གསུམ་དུ་གཤེགས་པའི་རྒྱལ་བ་སྲས་དང་སློབ་མར་བཅས་པས་གཞན་དོན་དུ་དགེ་བའི་རྩ་བ་ཇི་ལྟར་བསྔོས་པ་དང་། བསྔོ་བར་འགྱུར་བ་དང་། བསྔོ་བར་མཛད་པ་དེ་བཞིན་དུ་བདག་གིས་ཀྱང་རྫོགས་པའི་བྱང་ཆུབ་ཆེན་པོར་ཡོངས་སུ་བསྔོ་བར་བགྱིའོ་སྙམ་དུ་འདུན་པ་བསྒྱུར་ནས་འཕགས་པ་བཟང་པོ་སྤྱོད་པའི་སྨོན་ལམ་ལྟ་བུ་རྒྱལ་བའི་བཀའ་དང་གང་ཟག་ཁྱད་པར་ཅན་བདེན་ཚིག་གྲུབ་པ་རྣམས་ཀྱི་གསུང་གང་ཡང་རུང་བ་ལ་བརྟེན་ནས་ཚིག་གིས་བསྔོ་བར་བྱེད་པ་སྟེ། དེ་ལྟར་བསྔོས་པའི་དགེ་བའི་རྩ་བ་དེ་ནམ་ཡང་མི་འཛད་ཅིང་གོང་དུ་འཕེལ་ཏེ་རྫོགས་པའི་བྱང་ཆུབ་ཏུ་འགྱུར་བ་ཡིན་ཏེ། བློ་གྲོས་རྒྱ་མཚོས་ཞུས་པའི་མདོ་ལས། བློ་གྲོས་རྒྱ་མཚོ། འདི་ལྟ་སྟེ། དཔེར་ན་མཆིལ་མའི་ཐལ་བ་ཞིག་བྱེ་མའི་སྟེང་དུ་བོར་ན་མྱུར་དུ་བསྐམ་པར་འགྱུར་རོ། །དེ་ཉིད་རྒྱ་མཚོ་ཆེན་པོར་བོར་ན་ནི་ཇི་སྲིད་རྒྱ་མཚོ་ཆེན་པོ་ཟད་ཅིང་སྐམ་པར་གྱུར་པ་དེ་སྲིད་ཀྱི་བར་དུ་མཆིལ་མའི་ཐལ་བ་དེ་ཡང་མི་བསྐམ་མོ། །བློ་གྲོས་རྒྱ་མཚོ། དེ་བཞིན་དུ་དགེ་བའི་རྩ་བ་སྒྲུབ་པ་དེ་ཡང་། འགྱོད་པ་དང་། ཕངས་པ་དང་། དམན་པ་དང་། ལོག་པར་བསྔོས་ན་ནི་འཛད་ལ། གང་རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ཀྱི་རྒྱ་མཚོ་ཆེན་པོར་བསྔོས་ན་ནི་མི་འཛད་ཅིང་གོང་དུ་འཕེལ་ལོ། །ཞེས་དང་། བློ་གྲོས་མི་ཟད་པའི་མདོ་ལས། གང་ཇི་ལྟར་དགེ་བའི་སེམས་སྐྱེས་ཤིང་བྱུང་བ་བྱང་ཆུབ་ཀྱི་ཕྱིར་ཡོངས་སུ་བསྔོ་བར་བྱེད་པ་འདི་ནི་བྱང་ཆུབ་སེམས་དཔའི་སྒྲུབ་པ་མི་ཟད་པ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་ཏུ་ཡོངས་སུ་བསྔོས་པའི་ཕྱིར་ཏེ། བྱང་ཆུབ་ཏུ་བསྔོས་བའི་དགེ་བའི་རྩ་བ་ནི་བྱང་ཆུབ་སྙིང་པོ་ལ་འདུག་གི་བར་དུ་བར་མ་དོར་ཡོངས་སུ་ཟད་པའམ་གཏུག་པར་འགྱུར་བ་གང་ཡང་མེད་དོ། །བཙུན་པ་ཤ་ར་དྭ་ཏིའི་བུ་འདི་ལྟ་སྟེ། དཔེར་ན་ཆུའི་ཐིགས་པ་རྒྱ་མཚོ་ཆེན་པོར་ལྷུང་བ་ནི་བསྐལ་པའི་མེས་མ་བསྲེགས་ཀྱི་བར་དུ་བར་མ་དོར་ཡོངས་སུ་ཟད་པའམ་གཏུག་པར་མི་འགྱུར་རོ། །དེ་བཞིན་དུ་བྱང་ཆུབ་ཏུ་ཡོངས་སུ་བསྔོས་པའི་དགེ་བའི་རྩ་བ་ཡང་བྱང་ཆུབ་སྙིང་པོ་ལ་འདུག་གི་བར་དུ་བར་མ་དོར་ཡོངས་སུ་ཟད་པའམ་གཏུག་པར་འགྱུར་བ་གང་ཡང་མེད་དོ། །ཡང་དག་པར་བསྒྲུབ་པ་ཞེས་བྱ་བ་ནི། གང་འདི་ཡང་དག་པར་བསྒྲུབ་པ་སྟེ། ཡང་དག་པར་ཞུགས་པ་ནི་དགེ་བའི་རྩ་བ་གང་དག་ཡང་དག་པར་བསྒྲུབ་པ། སེམས་ཅན་ཐམས་ཅད་བསྐྱབ་པ་དང་། སེམས་ཅན་ཡོངས་སུ་སྨིན་པར་བྱ་བ་དང་། སེམས་ཅན་ཐམས་ཅད་དགེ་བའི་རྩ་བ་ལ་གཟུད་པའི་ཕྱིར། དགེ་བའི་རྩ་བ་དེ་དག་ཡོངས་སུ་བསྔོ་བར་བྱེད་དེ། ཐམས་ཅད་མཁྱེན་པའི་ཡེ་ཤེས་མངོན་པར་སྒྲུབ་པའི་ཕྱིར་དགེ་བའི་རྩ་བ་དེ་དག་ཡོངས་སུ་བསྔོའོ། །སེམས་ཅན་ཐམས་ཅད་ཉེ་བར་འཚོ་བའི་ཕྱིར་དགེ་བའི་རྩ་བ་དེ་དག་ཡོངས་སུ་བསྔོའོ། །སེམས་ཅན་མྱ་ངན་ལས་བཟླ་བ་དང་། ཐམས་ཅད་མཁྱེན་པའི་ཡེ་ཤེས་ལ་རབ་ཏུ་འགོད་པའི་ཕྱིར་དགེ་བའི་རྩ་བ་དེ་དག་ཡོངས་སུ་བསྔོ་བ་སྟེ། དེ་ནི་བྱང་ཆུབ་སེམས་དཔའི་སྒྲུབ་པ་མི་ཟད་པའོ། །ཞེས་སོ། །མདོར་ན་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པ་ནི་བསམ་གྱིས་མི་ཁྱབ་སྟེ། དགེ་བའི་རྩ་བ་ལ་བདག་ཉིད་དངོས་སུ་སྦྱོར་བ་ལྟ་ཅི་སྨོས་ཏེ། གཞན་གྱི་དགེ་བ་ལ་རྗེས་སུ་ཡི་རང་བ་སོགས་བསམ་པའི་ཀུན་སློང་ཙམ་གྱིས་ཀྱང་བྱང་ཆུབ་ཀྱི་སྤྱོད་པ་རྒྱ་མཚོ་ལྟ་བུ་སྡུད་པར་བྱེད་པ་ཡིན་ཏེ། གསང་ཆེན་ཐབས་ལ་མཁས་པའི་མདོ་ལས། རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ནི། གང་གི་ཚེ་དུད་འགྲོའི་སྐྱེ་གནས་སུ་གྱུར་པ་ལ་ཟན་ཁམ་གཅིག་ཙམ་ཡང་སྦྱིན་པར་བྱེད་ན། དེ་ཡང་ཐམས་ཅད་མཁྱེན་པ་ཉིད་དང་ལྡན་པའི་སེམས་ཀྱིས་སྦྱིན་པར་བྱེད་ཅིང་། དགེ་བའི་རྩ་བ་དེ་ཡང་སེམས་ཅན་ཐམས་ཅད་སངས་རྒྱས་ཀྱི་ཆོས་ཡོངས་སུ་རྫོགས་པར་བྱ་བར་ཡོངས་སུ་བསྔོ་བའི་ཕྱིར་རོ། །དེ་རྒྱུ་གཉིས་ཀྱིས་ན་སེམས་ཅན་ཐམས་ཅད་ལ་ཡོངས་སུ་བསྔོ་བར་བྱེད་དེ། གཉིས་གང་ཞེ་ན། ཐམས་ཅད་མཁྱེན་པ་ཉིད་ཀྱི་སེམས་དང་། ཡོངས་སུ་བསྔོ་བ་ལ་མཁས་པ་ཉིད་ཀྱིས་ཏེ། རིགས་ཀྱི་བུ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའོ། །ཐབས་ལ་མཁས་པ་ཡིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ནི། གཞན་གྱི་དགེ་བའི་རྩ་བ་མངོན་པར་འདུས་བྱས་པ་ལོ་རྗེས་སུ་ཡི་རང་བར་བྱེད་ཅིང་རྗེས་སུ་ཡི་རང་ནས་ཀྱང་སེམས་ཅན་ལ་ཡོངས་སུ་བསྔོ་ཞིང་བཏང་སྟེ་ཡོངས་སུ་བསྔོ་བར་བྱེད་དོ། །དེ་ཐམས་ཅད་མཁྱེན་པ་ཉིད་དུ་བསྔོས་པའི་དགེ་བའི་རྩ་བ་དེས། བྱང་ཆུབ་ཀྱི་སེམས་དང་བྲལ་བའི་སྦྱིན་པ་པོ་དང་། སྦྱིན་བདག་གང་དག་ཡིན་པ་དེ་དག་ཀྱང་ཟིལ་གྱིས་གནོན་པར་བྱེད་ལ། ལེན་པ་པོ་གང་དག་ཡིན་པ་དེ་དག་ཀྱང་ཟིལ་གྱིས་གནོན་པར་བྱེད་དེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ཡིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ནི། ཕྱོགས་བཅུ་དག་ན་མེ་ཏོག་གི་ཤིང་ལྗོན་པ་དང་། སྤོས་ཀྱི་ཤིང་ལྗོན་པ་དང་། མེ་ཏོག་དང་། མེ་ཏོག་གི་ཕྲེང་བ་དང་། སྤོས་དང་། ཕྱེ་མ་དང་། བྱུག་པ་བདག་གིར་མ་བྱས་ཤིང་ཡོངས་སུ་མ་བཟུང་བ་གང་ཇི་སྙེད་པ་དེ་དག་ཐམས་ཅད་བསམ་པས་ཡོངས་སུ་བཟུང་ཞིང་ཡོངས་སུ་བསྡུས་ནས་སངས་རྒྱས་ཐམས་ཅད་ལ་འབུལ་བར་བྱེད་ཅིང་། དགེ་བའི་རྩ་བ་དེ་ཡང་སེམས་ཅན་ཐམས་ཅད་ལ་གཏོང་བར་བྱེད་དེ། ཡོངས་སུ་བཏང་ནས་ཀྱང་ཐམས་ཅད་མཁྱེན་པ་ཉིད་དུ་བསྔོ་བར་བྱེད་དོ། །ཕྱོགས་བཅུ་དག་ན་མེ་ཏོག་གི་ཤིང་ལྗོན་པ་དང་། མེ་ཏོག་དང་། མེ་ཏོག་གི་ཕྲེང་བ་དང་། སྤོས་དང་། ཕྱེ་མ་དང་། བྱུག་པ་བདག་གི་དང་བཅས་ཤིང་ཡོངས་སུ་བཟུང་བ་དང་བཅས་པ་གང་ཇི་སྙེད་པ་དེ་དག་ཐམས་ཅད་ཀྱི་དྲི་རླུང་གིས་བཏབ་པའི་ངད་དེ་དག་ཐམས་ཅད་ཀྱང་བྱང་ཆུབ་སེམས་དཔའ་ཐབས་ལ་མཁས་པས་སངས་རྒྱས་ཐམས་ཅད་ལ་འབུལ་བར་བྱེད་ཅིང་། དགེ་བའི་རྩ་བ་དེ་ཐམས་ཅད་ཀྱང་བདག་དང་སེམས་ཅན་ཐམས་ཅད་ཀྱིས་ཐམས་ཅད་མཁྱེན་པ་ཉིད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱེད་དོ། །དེ་ཐམས་ཅད་མཁྱེན་པ་ཉིད་བསྔོས་པའི་དགེ་བའི་རྩ་བ་དེས། ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དཔག་ཏུ་མེད་པ་ཐོབ་པར་འགྱུར་ཏེ། རིགས་ཀྱི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ཡིན་ནོ། །ཞེས་གསུངས། དེས་ན་ཐབས་དེ་ལྟ་བུས་ཟིན་ན། ཐ་ན་སེམས་ཅན་དམན་པ་ལོང་སྤྲང་ངམ་ཁྱི་ཕག་ལྟ་བུ་ཞིག་ལ། དངོས་པོ་དམན་པ་ཟན་ཆང་གཅིག་ཙམ་བྱིན་ན་ཡང་། དེ་ལ་ཕ་རོལ་དུ་ཕྱིན་པ་དྲུག་ཀ་ཚང་བ་ཡིན་ཏེ། གཞན་དོན་དུ་གཏོང་སེམས་ཀྱིས་བྱིན་པ་སྦྱིན་པ་དངོས་དང་། དེའི་སྐབས་སུ་སྒོ་གསུམ་གྱི་ཉེས་པ་བསྡམས་པ་ཚུལ་ཁྲིམས། དེ་ལ་སེམས་མི་འཁྲུགས་པ་བཟོད་པ། སྤྲོ་བས་སྦྱིན་པ་བརྩོན་འགྲུས། སེམས་མ་ཡེངས་པ་བསམ་གཏན། འཁོར་གསུམ་བདེན་མེད་དུ་ཤེས་པ་ཤེས་རབ་བོ། །དེས་བསྒྲེས་ཏེ་ཀུན་ལ་ཤེས་པར་བྱའོ། །གཞན་ཡང་། སྡོམ་པ་ཉི་ཤུ་པ་ལས། གཞན་རྣམས་དང་ནི་བདག་ལའང་རུང་། །སྡུག་བསྔལ་ཡིན་ཡང་གང་ཕན་དང་། །ཕན་དང་བདེ་བ་རྣམས་བྱ་ཞིང་། །བདེ་ཡང་མི་ཕན་མི་བྱའོ། །ཞེས་གསུངས་པས། རང་དང་གཞན་ལ་ཚེ་འདིར་སྡུག་བསྔལ་ཡང་ཚེ་ཕྱི་མ་ཕན་ཆད་དུ་ཕན་པར་འགྱུར་བ་དང་། འདི་དང་ཕྱི་མ་གཉིས་ཀར་ཕན་པར་དང་བདེ་བར་འགྱུར་བ་རྣམ་པར་དཀར་བའི་ལས་རྣམས་ནི་རང་གིས་ཀྱང་སྒྲུབ་ཅིང་གཞན་ལའང་སྒྲུབ་ཏུ་གཞུག་པར་བྱ་བ་དང་། འདིར་བདེ་ཡང་ཕྱི་མ་ཕན་ཆད་དུ་སྡུག་བསྔལ་གྱི་རྒྱུར་འགྱུར་བ་དང་། འདི་ཕྱི་གཉིས་ཀར་གནོད་པའི་མི་དགེ་བའི་ཕྱོགས་རྣམས་ནི་རང་ཡང་སྤངས་ལ་གཞན་ལའང་སྤོངས་དུ་གཞུག་པ་སྟེ། དགག་སྒྲུབ་ཀྱི་བསླབ་བྱ་འདི་གཉིས་སུ་མ་འདུས་པ་གཞན་མེད་ལ། དེ་ཡང་བྱམས་པ་དང་སྙིང་རྗེ་ཆེན་པོས་ཀུན་ནས་བསླངས་ཏེ་གཞན་ལ་ཕན་པ་ཆེན་པོར་འགྱུར་ངེས་པར་མཐོང་ན་ནི་གང་ལའང་ཉེས་པར་མི་འགྱུར་ཞིང་དང་དུ་བླང་བར་བྱ་བ་ཡིན་ཏེ། དེ་ཉིད་ལས། སྙིང་རྗེར་ལྡན་ཞིང་བྱམས་ཕྱིར་དང་། །སེམས་དགེ་བ་ལ་ཉེས་པ་མེད། །ཅེས་སོ། །གལ་ཏེ་དངོས་སུ་གཞན་ལ་ཕན་པ་སྒྲུབ་མ་ནུས་ཀྱང་། ཕན་སེམས་ཀྱི་བསམ་པ་ཉམས་པར་མ་གྱུར་ན་ནི་དེ་ལ་དོན་གྱིས་ཞུགས་པ་ཡིན་ཏེ། བྱང་ཆུབ་སེམས་འགྲེལ་ལས། གཞན་དོན་ལས་ལ་མཐུ་མེད་ཀྱང་། །དེ་ཡི་བསམ་པ་རྟག་ཏུ་བྱ། །གང་ལ་བསམ་པ་དེ་ཡོད་པ། །དེ་ནི་དེ་ལ་དོན་གྱིས་ཞུགས། །ཞེས་སོ། །དེས་ན། སྤྱོད་འཇུག་ལས། དངོས་སམ་ཡང་ན་བརྒྱུད་ཀྱང་རུང་། །སེམས་ཅན་དོན་ལས་གཞན་མི་སྤྱད། །སེམས་ཅན་ཁོ་ནའི་དོན་གྱི་ཕྱིར། །ཐམས་ཅད་བྱང་ཆུབ་རྒྱུར་བསྔོའོ། །ཞེས་གསུངས་པ་ལྟར་རྟག་ཏུ་བརྩོན་པར་བྱའོ། །གཉིས་པ་དེ་ཉིད་མི་ཉམས་པར་ཇི་ལྟར་བསྲུང་བའི་ཚུལ་ལ་གསུམ། འགལ་རྐྱེན་རང་གཞན་གྱི་སྤྱོད་པ་ཉམས་པའི་རྒྱུ་བདུན་སྤོང་བ། མཐུན་རྐྱེན་མི་ཉམས་པའི་རྒྱུ་དང་འཕེལ་བའི་རྐྱེན་ལ་བསླབ་པ། དུས་རྟག་ཏུ་དྲན་ཤེས་བག་ཡོད་ཀྱིས་བསྲུང་བར་བསླབ་པའོ། །དང་པོ་ལ་གཉིས། རང་དོན་ཤེས་རབ་ཀྱི་གེགས་གསུམ་དང་། གཞན་དོན་སྤྱོད་པའི་སྐྱོན་བཞི་སྤོང་བའོ། །དང་པོ་ནི། ཐོས་པ་ལ་མི་མོས་པ། བསམ་པ་ལ་གཡེལ་བ། སྒོམ་པ་ལ་ལྷོད་པ་གསུམ་སྤོང་བའོ། །གཉིས་པ་ནི། སྦྱོར་བ་ལེ་ལོ་ཆེ་བ། སྤྱོད་པ་གཞན་མི་དད་པ་ལ་སྦྱོར་བ། ཀུན་སློང་སྙིང་རྗེ་མེད་པ། བྱེད་ལས་ཕྱིན་ཅི་ལོག་སྒྲུབ་པ་བཞི་སྤོང་བའོ། །གཉིས་པ་ལའང་མི་ཉམས་པའི་རྒྱུ་གསུམ་དང་། འཕེལ་བའི་རྐྱེན་དགུ་ལ་བསླབ་པ་གཉིས་སོ། །དང་པོ་ལ་གསུམ་ལས། དང་པོ་ཚེ་འདིར་མི་ཉམས་པའི་རྒྱུ་ནི་དྲན་པ་གསུམ་སྟེ། སེམས་བསྐྱེད་སྐྱེས་པའི་ཕན་ཡོན། ཉམས་པའི་ཉེས་དམིགས། རྙེད་པར་དཀའ་བ་ཡང་ཡང་དྲན་པར་བྱེད་པའོ། །གཉིས་པ་ཕྱི་མར་མི་ཉམས་པའི་རྒྱུ་ནི་ཕྱིན་ཅི་མ་ལོག་པའི་ཐབས་གསུམ་སྟེ། དུས་གསུམ་དུ་ཡན་ལག་བདུན་པ་བྱེད་པ། རྒྱལ་བ་སྲས་བཅས་ལ་གསོལ་བ་འདེབས་པ། ཆོས་དང་འགལ་བའི་བདུད་ལས་སྤོང་བའོ། གསུམ་པ་འདི་ཕྱི་གཉིས་ཀར་མི་ཉམས་པའི་རྒྱུ་ནི་གཅེས་པ་ལྔ་སྟེ། བསྒྲུབ་བྱ་སེམས་ཅན་ལ་རང་བས་གཅེས་པ། སྒྲུབ་བྱེད་ཆོས་ལ་ནོར་བས་གཅེས་པ། གཙོ་བོ་བྱང་སེམས་ལ་སྙིང་བས་གཅེས་པ། བདག་རྐྱེན་བཤེས་གཉེན་ལ་ཕ་མ་བས་གཅེས་པ། ཐོབ་བྱ་སངས་རྒྱས་ལ་ལོངས་སྤྱོད་བས་གཅེས་པ་ལྔ་ལ་བསླབ་པར་བྱའོ། །གཉིས་པ་འཕེལ་རྐྱེན་དགུ་ལ། དྲན་པ་ལྔ་དང་། བྱ་བ་བཞི་སྟེ། དང་པོ་ནི། འདུས་བྱས་ཀྱི་གཡོ་བ། སྡུག་བསྔལ་གྱི་མཐའ། ཆོས་ཀྱི་ཕན་ཡོན། སྟོན་པའི་ཆེ་བ། བྱང་སེམས་ཀྱི་ཕན་ཡོན་དྲན་པའོ། །གཉིས་པ་ནི། ཤེས་བཞིན་གྱི་མིག་གིས་བལྟ་བ། བརྩོན་འགྲུས་ཀྱི་རྟ་མཆོག་གིས་འགྲོ་བ། ངེས་འབྱུང་གི་ལྕག་གིས་བསྐུལ་བ། ཐར་པའི་གྲོང་ཁྱེར་ཡིད་ལ་བྱེད་པ་བཞིའོ། །གསུམ་པ་ནི། ཀུན་མཁྱེན་ཆོས་རྗེས། རྟག་ཏུ་དྲན་དང་ཤེས་བཞིན་བག་ཡོད་ཀྱིས། །མི་དགེ་སྤང་ཞིང་དགེ་ཆོས་རྒྱ་མཚོ་སྒྲུབ། །ཅེས་གསུངས་ཏེ། དེ་ལ་ལྟུང་བ་འབྱུང་བའི་རྒྱུ་ནི། མི་ཤེས་པ་དང་། བག་མེད་པ་དང་། ཉོན་མོངས་པ་མང་བ་དང་། མ་གུས་པའོ། །དེ་ལ་མི་ཤེས་པ་ནི་བསླབ་པ་ལ་འབད་ཀྱང་ལྟུང་སོགས་ཀྱི་མཚན་ཉིད་མི་ཤེས་པས་ལྟུང་བ་འབྱུང་བ་སྟེ། དེའི་གཉེན་པོར་བསླབ་བྱ་རྣམས་ཉན་ནས་ཤེས་པར་བྱའོ། །བག་མེད་པ་ནི་ལྟུང་བ་ཤེས་ཀྱང་ཉེས་དམིགས་མ་མཐོང་བའམ་མཐོང་ཡང་དྲན་ཤེས་མེད་པས་ལྟུང་བ་འབྱུང་བ་སྟེ། དེའི་གཉེན་པོར་བླང་དོར་གྱི་དམིགས་རྣམས་མི་བརྗེད་པའི་དྲན་པ་དང་། སྒོ་གསུམ་ལ་སོ་སོར་རྟོག་ཅིང་ལེགས་ཉེས་གང་ལ་འཇུག་ལྡོག་ཤེས་པར་བྱེད་པའི་ཤེས་བཞིན་དང་། བདག་གམ་ཆོས་ཀྱི་དབང་དུ་བྱས་ཏེ་ཉེས་པ་ལ་འཛེམ་པའི་ངོ་ཚ་ཤེས་པ་དང་། གཞན་ནམ་འཇིག་རྟེན་གྱིས་སྨད་དུ་འོང་སྙམ་ནས་འཛེམ་པའི་ཁྲེལ་ཡོད་དང་། ཉེས་སྤྱོད་ཀྱི་རྣམ་སྨིན་ལ་འཇིགས་ནས་གཟོབ་པ་ལྷུར་ལེན་པ་བག་ཡོད་ལ་བསླབ་པར་བྱའོ། །ཉོན་མོངས་པ་མང་བ་ནི། འཛེམ་བག་ཅུང་ཟད་སྐྱེས་ཀྱང་དུག་གསུམ་ཤས་ཆེ་བས་ཉོན་མོངས་པའི་དབང་གིས་ལྟུང་བ་འབྱུང་བ་སྟེ། དེའི་གཉེན་པོར་རང་རྒྱུད་ལ་བརྟགས་ཏེ་ཉོན་མོངས་པ་གང་ཤས་ཆེ་བའི་གཉེན་པོ་འབད་ནས་བསྟེན་ཅིང་འདི་ཙམ་འགལ་ཡང་ཉེས་པ་ཆུང་ངོ་སྙམ་པའི་བག་ཡངས་ཀྱིས་ཚོད་ཡོད་མི་བྱའོ། །མ་གུས་པ་ནི། ལྟུང་བ་སོགས་ཤེས་ཀྱང་དམན་པ་ལ་མོས་ནས་བསླབ་པ་ལ་མི་འཇུག་པས་ལྟུང་བ་འབྱུང་བ་སྟེ། དེའི་གཉེན་པོར་སྟོན་པ་དང་། དེས་བཅས་པ་རྣམས་ལ་གུས་པར་བྱའོ། །དེ་ཡང་མི་ཤེས་པ་དང་བག་མེད་པས་ལྟུང་བ་བྱུང་ན་ཆུང་ངུ་། ཉོན་མོངས་པ་མང་བས་འབྲིང་། མ་གུས་པ་ལ་ཆེན་པོ་འབྱུང་ཞིང་བསམ་པའི་ཁྱད་པར་གྱི་ཅི་རིགས་པར་འགྱུར་བའང་ཡོད་དོ། །དེས་ན་བླང་དོར་གྱི་གནས་རྣམས་ལ་སྲོག་དང་བསྡོས་ནས་བསླབ་པ་ལ་ནན་ཏན་དུ་བྱ་སྟེ། ཏིང་འཛིན་རྒྱལ་པོ་ལས། ཁྱིམ་པ་སྐྱ་བོའི་གོས་གྱོན་ལ། །ངས་ནི་བསླབ་པ་གང་བཤད་པ། །དེ་ཚེ་དགེ་སློང་དེ་དག་ལ། །བསླབ་པ་དེ་ཡང་མེད་པར་འགྱུར། །ཞེས་དགེ་བསྙེན་ལ་གསུངས་པའི་བསླབ་པའི་གཞི་ལྔ་པོ་དགེ་སློང་གིས་ཀྱང་བསྲུང་བ་མེད་པའི་དུས་འདིར་བསླབ་པ་ལ་བརྩོན་པ་ནི་འབྲས་བུ་ལྷག་པར་ཡང་ཆེ་སྟེ། དེ་ཉིད་ལས། བསྐལ་པ་བྱེ་བ་གངྒཱའི་བྱེ་སྙེད་དུ། དད་པའི་སེམས་ཀྱིས་ཟས་དང་སྐོམ་རྣམས་དང་། །གདུགས་དང་བ་དན་མར་མེའི་ཕྲེང་བ་ཡིས། །སངས་རྒྱས་བྱེ་བ་ཁྲག་ཁྲིག་རིམ་གྲོ་བྱས། །གང་གིས་དམ་ཆོས་རབ་ཏུ་འཇིག་པ་དང་། །བདེ་གཤེགས་བསྟན་པ་འགག་པར་གྱུར་པའི་ཚེ། །ཉིན་མཚན་དུ་ནི་བསླབ་པ་གཅིག་སྤྱོད་པ། །དེ་ནི་དེ་བས་བསོད་ནམས་ཁྱད་པར་འཕགས། །ཞེས་གསུངས་སོ། །གསུམ་པ་ཉམས་པའི་ཉེས་དམིགས་དང་གསོ་ཚུལ་བཤད་པ་ལ་གཉིས། ཉམས་པའི་ཉེས་དམིགས་དང་། ཉམས་ན་གསོ་བའི་ཚུལ་ལོ། །དང་པོ་ནི། སྤྱིར་བྱང་སེམས་ཀྱི་སྡོམ་པ་གཏོང་བའི་རྒྱུ་རྟེན་གཞི་སྨོན་སེམས་བཏང་བ། འགལ་ཟླ་རྩ་ལྟུང་བྱུང་བ། སྤོང་རྐྱེན་སྡོམ་པ་ཕུལ་བ་གསུམ་གྱིས་ཡིན་ལ། དེ་ལྟར་བྱུང་ན་ཉམས་པའི་ཉེས་དམིགས་དངོས་ལ། ལྟུང་བ་སྤྱིའི་ཉེས་དམིགས་དང་། ཁྱད་པར་རྩ་ལྟུང་གི་ཉེས་དམིགས་གཉིས་ལས། དང་པོ་ལ་གསུམ་སྟེ། ཁས་བླངས་ཉམས་པས་སྨད་པའི་གནས་སུ་འགྱུར་བ་ནི། སྟོན་པ་སངས་རྒྱས་བསླུས་པས་སངས་རྒྱས་མི་མཉེས། ཡུལ་སེམས་ཅན་བསླུས་པས་དེ་དག་མི་མ གུ། རང་བསླུས་པར་རང་དོན་ཉམས་པས་ཀུན་གྱིས་སྨད་པའི་གནས་སུ་འགྱུར་བའི་ཕྱིར་ཏེ། བློ་གྲོས་རྒྱ་མཚོས་ཞུས་པའི་མདོ་ལས། བྱང་ཆུབ་སེམས་དཔའ་དེ་ལྟར་སེམས་བསྐྱེད་ནས་ཇི་སྐད་སྨྲས་པ་བཞིན་མི་བྱེད་ན་ལྷ་དང་བཅས་པའི་འཇིག་རྟེན་བསླུས་པ་ཡིན་ནོ། །ཞེས་སོ། །མིང་དོན་ཤོར་བས་མི་འདོད་པ་ཐམས་ཅད་འདུ་བ་ནི། རྒྱལ་པོ་རྒྱལ་སྲིད་ཉམས་པ་ལྟར་ཚེ་འདིར་བཀྲ་མི་ཤིས་ཤིང་འཆི་ཁར་མྱ་ངན་གྱིས་གདུང་བར་འགྱུར་བའི་ཕྱིར་རོ། །ཉེས་པ་ལྕི་བས་ཕྱི་མ་ངན་འགྲོར་ལྟུང་ཞིང་ཐར་བར་དཀའ་བ་ནི། བསླབ་བཏུས་ལས། རྫོགས་སངས་རྒྱས་ཀྱིས་གསུངས་ཚུལ་དུ། །འབད་པ་མེད་ན་ངན་འགྲོར་འགྲོ། །ཞེས་སོ། །གཉིས་པ་ནི། སྔོན་བསྐྱེད་པའི་བྱང་སེམས་ཀྱི་དགེ་རྩ་ཐམས་ཅད་ཐལ་བར་རློག་པ་དང་། དེ་ཉིད་ཀྱི་ནི་དཀོན་མཆོག་ལྷ་དང་བཅས་པ་བསླུས་པ་དང་། དེས་ནི་སྤྱིར་ངན་འགྲོ་དང་ཁྱད་པར་སེམས་ཅན་དམྱལ་བ་ཆེན་པོ་སྐྱེ་བར་འགྱུར་ཏེ། དེ་ལས། དེ་དག་རྩ་བའི་ལྟུང་བ་སྟེ། །སེམས་ཅན་དམྱལ་བ་ཆེན་པོའི་རྒྱུ། །ཞེས་སོ། །སྡོམ་པ་ཕུལ་བ་ནི། སོ་ཐར་ལས་བསྲུང་མི་ནུས་ན་འབུལ་བ་བསླབ་བྱར་གནང་མོད། བྱང་སྡོམ་ཕུལ་ན་ནི་ཉེས་པ་ཆེས་ལྕི་བར་འགྱུར་ཏེ། རྒྱལ་བ་སྲས་དང་བཅས་པའི་སྤྱན་སྔར་འགྲོ་བའི་ཕན་བདེ་སྒྲུབ་པར་དམ་བཅས་པ་ཉིད་བཏང་བའི་ཕྱིར། སྤྱོད་འཇུག་ལས། བླ་ན་མེད་པའི་བདེ་བ་ལ། །བསམ་པ་ཐག་པས་མགྲོན་གཉེར་ནས། །འགྲོ་བ་ཐམས་ཅད་བསླུས་བྱས་ན། །བདེ་འགྲོར་ཇི་ག་འགྲོ་འགྱུར་རམ། །ཞེས་དང་། སེམས་ཅན་གཅིག་གི་བདེ་བ་ཡང་། །བཤིག་ན་བདག་ཉིད་ཉམས་གྱུར་ན། །ནམ་མཁའ་མ་ལུས་མཐའ་ཀླས་པའི། །ལུས་ཅན་བདེ་བཤིག་སྨྲོས་ཅི་དགོས། །ཞེས་གསུངས་པ་བཞིན་ནོ། །གཉིས་པ་ཉམས་ན་ག སོ་བའི་ཚུལ་ལ་གཉིས། ཉེས་པ་བཤགས་པ་དང་། སྡོམ་པ་བཏང་ན་སླར་བླང་བའི་ཚུལ་ལོ། །དང་པོ་ནི། གང་ཟག་གི་དབང་གིས་གསུམ་དུ་གསུངས་ཏེ། དམན་པ་ཁ་ཅིག་ནི་དངོས་པོར་འཛིན་པའི་དབང་གིས་འགྱོད་ཅིང་ཡིད་ལ་གཅགས་པས་གཞན་གྱི་དྲུང་དུ་ཉེས་པ་འཆགས་ཤིང་། ཕྱིས་སྡོམ་པས་རིམ་གྱིས་ཉེས་པ་དེ་ལས་རིང་ཞིག་ན་ལྡང་བ་ཡོད་དོ། །ཞེས་འབྱུང་བས། བཤགས་ཡུལ་ལྟུང་བས་མ་གོས་པའི་བྱང་ཆུབ་སེམས་དཔའ་དངོས་རྙེད་ན་དེའི་མདུན་དང་། མ་རྙེད་ན་རྟེན་གྱི་དྲུང་དུ་བྱང་ཆུབ་ཀྱི་སེམས་དང་ལྡན་པས་སྐྱབས་གསོལ་སྔོན་དུ་འགྲོ་བ་ཅན་གྱི་གཉེན་པོ་སྟོབས་བཞིའི་སྒོ་ནས་བཤགས་པ་དང་། ཁྱད་པར་ཉིན་མཚན་དུ་འཕགས་པ་ཕུང་པོ་གསུམ་པའི་མདོ་སོགས་བཏོན་ནས་བཤགས་པ་བྱ་སྟེ། སྤྱོད་འཇུག་ལས། ཉིན་དང་མཚན་མོ་ལན་གསུམ་དུ། །ཕུང་པོ་གསུམ་པ་གདོན་བྱ་ཞིང་། །རྒྱལ་དང་བྱང་ཆུབ་སེམས་བརྟེན་ན། །ལྟུང་བའི་ལྷག་མ་དེས་ཞི་བྱ། །ཞེས་སོ། །ཡང་བར་མ་གཅིག་ནི་རིགས་སྔགས་དང་གསང་སྔགས་ཀྱི་ལྷ་བྱང་ཆུབ་སེམས་དཔའ་ནམ་མཁའི་སྙིང་པོ་ལ་སོགས་པ་མ ཉེས་པར་བྱས་ཏེ། ལྷའི་རྗེས་སུ་གནང་བ་ཐོབ་པས་ལྟུང་བ་ལྡང་ངོ་། །ཞེས་པས། ངན་སོང་དུ་ལྟུང་བས་འཇིགས་ཏེ་འགྱོད་པ་ཆེན་པོས་འཕགས་པ་ནམ་མཁའི་སྙིང པོ་མཐོང་བར་ནུས་ན་དེ་ལ་ད ངོས་སུ་བཤགས་པ་དང་། དེ་ལྟར་མི་ནུས་ན་ཐོ་རངས་ལངས་ལ་གཙང་སྦྲ་དང་ལྡན་པས་ཤར་དུ་ཁ་ཕྱོགས་ཏེ་མཆོད་ཅིང་ལྷའི་བུ་སྐྱ་རེངས་ལ་ཕྲིན་གསོལ་ནས། རྨི་ལམ་དུ་དེའི་མདུན་དུ་ལྟུང་བ་བཤགས་པ་དང་། ཕྱག་བྱ་བ་དང་། གཟུང་སྔགས་བཟླ་བ་སོགས་ཀྱི་སྒོ་ནས་འཕགས་པ་དེ་མངོན་སུམ་མཐོང་བའམ། སྡིག་པ་དག་པའི་རྟགས་མ་བྱུང་གི་བར་དུ་བཤགས་པར་བྱ་སྟེ། བསླབ་བཏུས་སུ། རྨི་ལམ་འཕགས་པ་ནམ་སྙིང་པོའི། །མདུན་དུ་འདུག་སྟེ་བཤགས་པར་བྱ། །ཞེས་སོ། །ཡང་། དམ་པ་ཁ་ཅིག་ནི་གང་གིས་ལྟུང་བར་བརྗོད་པ་དེ་ཉིད་ལ་རང་བཞིན་མཚན་མ་མེད་པའི་བྱང་ཆུབ་ཀྱི་སེམས་སུ་ཤེས་པས་ཚེགས་མེད་པར་བྱང་བར་འགྱུར་ཏེ། ཇི་ལྟར་འཕགས་པའི་ཆོས་ཐམས་ཅད་འབྱུང་བ་མེད་པར་བསྟན་པ་ཞེས་བྱ་བའི་ཐེག་པ་ཆེན་པོའི་མདོ་ལས། འཇམ་དཔལ་བྱང་ཆུབ་སེམས་དཔའ་གང་གིས་ལས་མེད་ཅིང་རྣམ་པར་སྨིན་པ་མེད་པར་ཤེས་པ་དེས་ལས་ཀྱི་སྒྲིབ་པ་རྣམ་པར་དག་པ་ཐོབ་བོ། །ཞེས་གསུངས་པ་ལྟར་རོ། །གཉིས་པ་ནི། སྨོན་སེམས་བཏང་བ་དང་། ཀུན་དཀྲིས་ཆེན་པོས་ཕམ་པའི་གནས་ལྟ་བུའི་རྩ་བའི་ལྟུང་བ་བྱུང་ན་གཏོང་བས། དེ་བྱུང་ན་བཤགས་སྡོམ་དང་བསགས་སྦྱང་ལ་ན ན་ཏན་བྱས་ལ། དགེ་བའི་བཤེས་གཉེན་ནམ་རྟེན་གྱི་དྲུང་དུ་སྡོམ་པ་སླར་བླང་བར་བྱའོ། །ཀུན་དཀྲིས་འབྲིང་གིས་སྤྱད་པའི་ཕམ་འདྲ་རྣམས་ནི་གང་ཟག་གསུམ་ཡན་ཆད་དང་། ཀུན་དཀྲིས་ཆུང་ངུས་སྤྱད་པའི་རྩ་ལྟུང་དང་། དེ་ལས་གཞན་པའི་ཉེས་བྱས་རིགས་ནི་ཀུན་སློང་གི་དབང་གིས་ཉོན་མོངས་ཅན་ཡིན་མིན་དང་ལྟུང་ལྟུང་མེད་དུ་འགྱུར་བའང་ཡོད་པས། དེ་དག་གང་བྱུང་ཡང་གང་ཟག་གཅིག་ཡན་ཆད་ཀྱི་དྲུང་དུ་བཤགས་ཤིང་བསྡམས་པས་དག་པར་འགྱུར་ཏེ། སྡོམ་པ་ཉི་ཤུ་པ་ལས། སྡོམ་པ་སླར་ལ་བླང་བར་བྱ། །ཟག་པ་འབྲིང་ནི་གསུམ་ལ་བཤགས། །གཅིག་གི་མདུན་དུ་ལྷག་མ་རྣམས། །ཉོན་མོངས་མི་མོངས་བདག་སེམས་བཞིན། །ཞེས་གསུངས་པ་བཞིན་ནོ། །བཞི་པ་དེ་ལྟར་སློབ་པའི་ཕན་ཡོན་བསྟན་པ་ལ། རྒྱས་པར་དབྱེ་ན་ཚད་མེད་ཀྱང་། བསྡུ་ན་གཉིས་ཏེ། གནས་སྐབས་དང་མཐར་ཐུག་གོ །དང་པོ་ལ་བདུན། མིང་དོན་འཕོ་བ། སྡིག་པ་སྟོབས་ཆེན་སྤོང་བ། བསོད་ནམས་རྒྱ་ཆེན་ཐོབ་པ། ཡོན་ཏན་མཐའ་ཡས་ཐོབ་པ། ཕན་ཡོན་དཔེས་བསྟན་པ། སངས་རྒྱས་ཐམས་ཅད་མཆོད་པར་འགྱུར་བ། ཕན་ཡོན་ལུང་དང་སྦྱར་བའོ། །དང་པོ་མིང་དོན་འཕོ་བ་ནི། བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་སོ། །གཉིས་པ་སྡིག་པ་སྟོབས་ཆེན་སྤོང་བ་ནི། སྡོང་པོ་བཀོད་པ་ལས། ཉེས་བྱས་ཐམས་ཅད་སྲེག་པར་བྱེད་པས་བསྐལ་པའི་མེ་ལྟ་བུའོ། །མི་དགེ་བའི་ཆོས་ཐམས་ཅད་ཟད་པར་བྱེད་པའི་ཕྱིར་ས་ཡི་འོག་ལྟ་བུའོ། །ཞེས་སོ། །གསུམ་པ་བསོད་ནམས་རྒྱ་ཆེན་ཐོབ་པ་ནི། དཔལ་བྱིན་གྱིས་ཞུས་པའི་མདོ་ལས། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་སྟེ། །དེ་བས་ཀྱང་ནི་ལྷག་པར་འགྱུར། །ཞེས་དང་། གཏམ་སྦྱར། སྐྱེས་བུ་གང་ཞིག་བྱང་ཆུབ་སེམས། །སྐད་ཅིག་ཙམ་ཞིག་སྒོམ་བྱེད་པ། དེ་ཡི་བསོད་ནམས་ཕུང་པོ་ནི། །རྒྱལ་བ་ཡིས་ཀྱང་བགྲང་མི་སྤྱོད། །ཅེས་སོ། །བཞི་པ་ཡོན་ཏན་མཐའ་ཡས་པ་ཐོབ་པ་ནི། དཀོན་མཆོག་ཏ་ལ་ལས། བྱང་ཆུབ་གཞིར་གྱུར་པ་ནི་རང་བྱུང་སེམས། །ཐོག་མ་ཉིད་དུ་སྐྱེས་པ་གང་ཡིན་པ། །དེ་ཡི་ཡོན་ཏན་བསྔགས་པ་མཐའ་ཡས་ཏེ། །མཚུངས་མེད་རྣམས་ཀྱིས་དེ་དག་བརྗོད་མི་སྤྱོད། །ཅེས་དང་། བློ་གྲོས་རྒྱ་མཚོས་ཞུས་པའི་མདོ་ལས། རྫོགས་པའི་བྱང་ཆུབ་སེམས་དང་ཆོས་འཛིན་དང་། །ཆོས་སྒྲུབ་པ་དང་སྲོག་ཆགས་སྙིང་བརྩེ་བ། །ཆོས་བཞི་འདི་དག་ཡོན་ཏན་མཐའ་ཡས་ཏེ། །དེ་དག་མཐའ་ནི་རྒྱལ་བ་མི་གསུང་ངོ་། །ཞེས་སོ། །ལྔ་པ་ཕན་ཡོན་དཔེས་བསྟན་པ་ལ་གསུམ་ལས། དམན་པ་མཆོག་ཏུ་བསྒྱུར་བ་གསེར་གྱི་རྩིའི་དཔེས་བསྟན་པ་ནི། སྤྱོད་འཇུག་ལས། གསེར་འགྱུར་རྩི་ཡི་རྣམ་པ་མཆོག་ལྟ་བུར། །མི་གཙང་ལུས་འདི་བླངས་ནས་རྒྱལ་བའི་སྐུ། །རིན་ཆེན་རིན་ཐང་མེད་པར་བསྒྱུར་བས་ན། །བྱང་ཆུབ་སེམས་ཞེས་བྱ་བར་རབ་བརྟན་ཟུངས། །ཞེས་སོ། །རྙེད་དཀའ་ཞིང་རིན་ཆེ་བ་རིན་པོ་ཆེའི་དཔེས་བསྟན་པ་ནི། དེ་ཉིད་ལས། འགྲོ་བའི་དེད་དཔོན་གཅིག་པུ་ཚད་མེད་བློས། །ལེགས་པར་ཡོངས་སུ་བརྟགས་ན་རིན་ཆེ་བས། །འགྲོ་བའི་གནས་དང་བྲལ་བར་འདོད་པ་རྣམས། །རིན་ཆེན་བྱང་ཆུབ་སེམས་ལེགས་བརྟན་པར་ཟུང་། །ཞེས་སོ། །འབྲས་བུ་མི་ཟད་ཅིང་འཕེལ་བ་དཔག་བསམ་གྱི་ཤིང་གི་དཔེས་བསྟན་པ་ནི། དེ་ཉིད་ལས། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་སྤྱད་པས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་པས་མི་ཟད་འཕེལ་བར་འགྱུར། །ཞེས་སོ། །དྲུག་པ་སངས་རྒྱས་ལ་མཆོད་པར་འགྱུར་བ་ནི། བློ་གྲོས་རྒྱ་མཚོས་ཞུས་པའི་མདོ་ལས། གསུམ་པོ་འདི་དག་ནི་དེ་བཞིན་གཤེགས་པ་ལ་མཆོད་པ་བླ་ན་མེད་པ་ཡིན་ཏེ། བྱང་ཆུབ་ཏུ་སེམས་བསྐྱེད་པ་དང་། དམ་པའི་ཆོས་འཛིན་པ་དང་། སྲོག་ཆགས་རྣམས་ལ་སྙིང་བརྩེ་བའོ། །ཞེས་དང་། དཔལ་བྱིན་གྱིས་ཞུས་པའི་མདོ་ལས། གངྒཱའི་བྱེ་མའི་གྲངས་སྙེད་ཀྱི། །སངས་རྒྱས་ཞིང་ཀུན་མི་གང་གིས། །རིན་ཆེན་བདུན་གྱི་ཡོངས་བཀང་སྟེ། །སངས་རྒྱས་རྣམས་ལ་ཕུལ་བ་བས། །གང་གིས་ཐལ་མོ་སྦྱར་བྱས་ཏེ། །བྱང་ཆུབ་ཏུ་ནི་སེམས་བཏུད་ན། །བསོད་ནམས་འདི་ནི་ཁྱད་པར་འཕགས། །འདི་ལ་མཐའ་ནི་མ་མཆིས་སོ། །ཞེས་དང་། ཏིང་འཛིན་རྒྱལ་པོ་ལས། བྱེ་བ་ཁྲག་ཁྲིག་གཏམས་པའི་ཞིང་དག་ན། །མཆོད་པ་རྣམས་མང་དཔག་མེད་ཅི་ཡོད་པ། །སྐྱེས་མཆོག་རྣམས་ལ་ཉིན་རེ་རྟག་མཆོད་པས། །བྱམས་པའི་སེམས་ཀྱི་གྲངས་དང་ཆར་མི་ཕོད། །ཅེས་སོ། །བདུན་པ་ཕན་ཡོན་ལུང་དང་སྦྱར་བ་ནི། སྡོང་པོ་བཀོད་པའི་མདོ་ལས། རིགས་ཀྱི་བུ་བྱང་ཆུབ་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ། །འགྲོ་བ་ཐམས་ཅད་ཀྱི་ཆོས་དཀར་པོ་ཐམས་ཅད་རྣམ་པར་འཕེལ་བར་བྱེད་པས་ཞིང་ས་ལྟ་བུའོ། །འཇིག་རྟེན་ཐམས་ཅད་རྟེན་པས་ས་ལྟ་བུའོ། །ཞེས་བྱ་བ་ནས། བྱང་ཆུབ་སེམས་དཔའ་ཐམས་ཅད་བསྲུང་བས་ཕ་ལྟ་བུའོ། །ཞེས་པའི་བར་དང་། དེ་བཞིན་དུ་སྦྱར་ཏེ། དབུལ་བ་ཐམས་ཅད་གཅོད་པས་རྣམ་ཐོས་ཀྱི་བུ་ལྟ་བུའོ། །དོན་ཐམས་ཅད་ཡང་དག་པར་སྒྲུབ་པས་ཡིད་བཞིན་གྱི་ནོར་བུའི་རྒྱལ་པོ་ལྟ་བུའོ། །བསམ་པ་ཐམས་ཅད་ཡོངས་སུ་རྫོགས་པར་བྱེད་པས་བུམ་པ་བཟང་པོ་ལྟ་བུའོ། །ཉོན་མོངས་པའི་དགྲ་ཕམ་པར་བྱེད་པས་མདུང་ཐུང་ལྟ་བུའོ། །ཚུལ་བཞིན་མ་ཡིན་པ་ཡིད་ལ་བྱེད་པ་འགེགས་པས་གོ་ཆ་ལྟ་བུའོ། །ཉོན་མོངས་པའི་མགོ་ལྷུང་བར་བྱེད་པས་རལ་གྲི་ལྟ་བུའོ། །ཉོན་མོངས་པའི་ཤིང་གཅོད་པས་སྟ་རེ་ལྟ་བུའོ། །འཚེ་བ་ཐམས་ཅད་ལས་སྐྱོབ་པས་མཚོན་ཆ་ལྟ་བུའོ། །འཁོར་བའི་ཆུ་ནང་ན་གནས་པ་སྟེང་དུ་འབྱིན་པས་མཆིལ་པ་ལྟ་བུའོ། །སྒྲིབ་པས་ཁེབས་པའི་རྩ་ཐམས་ཅད་རྣམ་པར་འཐོར་བས་རླུང་གི་དཀྱིལ་འཁོར་ལྟ་བུའོ། །བྱང་ཆུབ་སེམས་དཔའི་སྤྱོད་པ་དང་སྨོན་ལམ་བསྡུས་པའི་ཕྱིར་མདོར་བསྟན་པ་ལྟ་བུའོ། །ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ན་མཆོད་སྡོང་ལྟ་བུ་སྟེ། རིགས་ཀྱི་བུ་དེ་ལྟར་བྱང་ཆུབ་ཀྱི་སེམས་ནི་ཕན་ཡོན་དེ་དག་དང་ཡོན་ཏན་གྱི་བྱེ་བྲག་ཚད་མེད་པ་གཞན་དང་ཡང་ལྡན་ནོ། །ཞེས་པའི་བར་གྱིས་དཔེ་ཉིས་བརྒྱ་དང་སུམ་ཅུ་ཙམ་གྱིས་སྒོ་ནས་བྱང་ཆུབ་ཏུ་སེམས་བསྐྱེད་པའི་ཕན་ཡོན་མགོན་པོ་བྱམས་པས་གཞོན་ནུ་ནོར་བཟང་ལ་གསུངས་པ་བཞིན་ནོ། །གཉིས་པ་མཐར་ཐུག་སངས་རྒྱས་ཀྱི་ཆོས་མཐའ་དག་རྫོགས་པར་བྱེད་པའི་ཕན་ཡོན་ནི། བྱང་ཆུབ་སེམས་དཔའི་སྡེ་སྣོད་ལས། ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཅིག་དང་ལྡན་ན་སངས་རྒྱས་ཀྱི་ཆོས་འདི་དག་དང་གཞན་ཡང་དཔག་ཏུ་མེད་པ་དག་ཡོངས་སུ་འཛིན་ཏོ། །ཆོས་གཅིག་པོ་དེ་གང་ཞེ་ན། འདི་ལྟ་སྟེ། བསམ་པ་ཕུན་སུམ་ཚོགས་པ་བྱང་ཆུབ་ཀྱི་སེམས་ཏེ། ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཅིག་པོ་དེ་དང་ལྡན་ན་སངས་རྒྱས་ཀྱི་ཆོས་འདི་དག་དང་གཞན་དཔག་ཏུ་མེད་པ་དག་ཡོངས་སུ་འཛིན་པར་འགྱུར་རོ། །ཞེས་སོ། །དེ་བཞིན་དུ་རྟག་པར་སངས་རྒྱས་དང་ཆོས་ཀྱི་སྣང་བ་དང་མི་འབྲལ་ཞིང་བྱིན་གྱིས་བརླབས་པས་མྱུར་དུ་བྱང་ཆུབ་ཐོབ་པར་བྱེད་པའང་། ཆོས་ཡང་དག་པར་སྡུད་པའི་མདོ་ལས། བཅོམ་ལྡན་འདས། བསམ་པ་ཕུན་སུམ་ཚོགས་པ་ནི་ཆོས་ཐམས་ཅད་ཀྱི་རྩ་བ་སྟེ། གང་བསམ་པ་མ་མཆིས་པ་དེ་ལ་སངས་རྒྱས་ཀྱི་ཆོས་ཐམས་ཅད་རིང་བ་ལགས་སོ། །བཅོམ་ལྡན་འདས། བསམ་པ་ཕུན་སུམ་ཚོགས་པ་ལ་ནི་འཇིག་རྟེན་གྱི་ཁམས་གཞན་ན་འདུག་ཀྱང་སངས་རྒྱས་བཅོམ་ལྡན་འདས་རྣམས་ཞལ་སྟོན་པར་མཛད་ཅིང་ཆོས་ཀྱང་སྟོན་པར་མཛད་དེ། གལ་ཏེ་སངས་རྒྱས་མི་བཞུགས་ནའང་ནམ་མཁའི་དཀྱིལ་དང་། རྩིག་པ་དང་། ཤིང་ལྗོན་པ་རྣམས་ལས་ཀྱང་སྒྲ་འབྱུང་ངོ་། །བྱང་ཆུབ་སེམས་དཔའ་བསམ་པ་དག་པ་ལ་ནི་རང་གི་ཡིད་ཀྱིས་དཔྱོད་པ་ཉིད་ལས་གདམས་ངག་དང་རྗེས་སུ་བསྟན་པ་ཐམས་ཅད་འབྱུང་ངོ་། །དེ་བས་ན་བྱང་ཆུབ་སེམས་དཔའ་བསམ་པ་ཕུན་སུམ་ཚོགས་པ་བགྱིའོ། །བཅོམ་ལྡན་འདས་འདི་ལྟ་སྟེ། དཔེར་ན་གང་རྐང་པ་མཆིས་པ་དེ་ལ་འགྲོ་བ་མཆིས་སོ། །དེ་བཞིན་དུ་གང་ལ་བསམ་པ་མཆིས་པ་དེ་ལ་སངས་རྒྱས་ཀྱི་ཆོས་རྣམས་མཆིས་སོ། །བཅོམ་ལྡན་འདས་འདི་ལྟ་སྟེ། ཡན་ལག་གི་དང་པོ་མགོ་བོ་མཆིས་པ་དེ་ལ་འཚོ་བ་མཆིས་སོ། །དེ་བཞིན་དུ་ལྷག་པའི་བསམ་པ་གང་ལ་ཡོད་པ་དེ་ལ་སངས་རྒྱས་ཀྱི་བྱང་ཆུབ་མཆིས་སོ། །ཞེས་སོ། །མདོར་ན། སྡོང་པོ་བཀོད་པ་ལས། མདོར་ན་སངས་རྒྱས་ཀྱི་ཆོས་ཐམས་ཅད་དང་། སངས་རྒྱས་ཀྱི་ཡོན་ཏན་ཇི་སྙེད་ཡོད་པ་བྱང་ཆུབ་སེམས་ཀྱི་ཡོན་ཏན་དང་ཕན་ཡོན་ཡང་དེ་སྙེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའི་དཀྱིལ་འཁོར་ཐམས་ཅད་འདི་ལས་བྱུང་ཞིང་། འདས་པ་དང་། མ་འོངས་པ་དང་། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱང་འདི་ལས་སྐྱེས་སོ། །ཞེས་གསུངས་པ་བཞིན། དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་ཀྱི་བགྲོད་པ་གཅིག་པའི་ལམ་མཆོག སྲིད་ཞིའི་རྒུད་པ་མཐའ་དག་སེལ་ཞིང་། ཕན་བདེའི་དངོས་པོ་མཐའ་དག་ཡིད་བཞིན་དུ་འཇོ་བའི་རིན་ཆེན་བྱང་ཆུབ་སེམས་ལ་དུས་རྟག་ཏུ་བརྩོན་པར་བྱའོ། །སངས་རྒྱས་ཡོན་ཏན་གཞན་ཕན་མཐུ་ཡིས་བརྙེས། །འཁོར་སྐྱོན་མཐའ་དག་བདག་གཅེས་འཛིན་ལས་བྱུང་། །དེ་ཕྱིར་འདི་གཉིས་ཁེ་ཉེན་ཤེས་བྱོས་ལ། །བྱང་ཆུབ་སེམས་མཆོག་བསྐྱེད་ཅིག་ཤེས་ལྡན་རྣམས། །སེམས་བསྐྱེད་ཀྱི་ཁྲིད་ཀྱི་སྐབས་སོ། །། ། འགལ་རྐྱེན་སྡིག་སྒྲིབ་སྦྱོང་བྱེད་རྡོ་རྗེ་སེམས་དཔའི་བསྒོམ་བཟླས་ཀྱི་ཁྲིད།༈ གསུམ་པ་འགལ་རྐྱེན་སྡིག་སྒྲིབ་སྦྱོང་བྱེད་རྡོ་རྗེ་སེམས་དཔའི་བསྒོམ་བཟླས་ཀྱི་ཁྲིད་ལ་གསུམ། སྟོབས་བཞིའི་རང་བཞིན་སྤྱིར་བསྟན་པ། བྱེ་བྲག་རྡོ་རྗེ་སེམས་དཔའི་བསྒོམ་བཟླས་དངོས་བཤད་པ། རྗེས་སྡིག་སྒྲིབ་དག་པའི་རྟགས་ཚད་ཕན་ཡོན་བསྟན་པའོ། །དང་པོ་ནི། རང་ཅག་རྣམས་ཚེ་རབས་ཐོག་མ་མེད་པའི་དུས་ནས་གཏན་དུ་འཁོར་བ་ན་འཁོར་ཞིང་ཐར་པ་བྱང་ཆུབ་ཀྱི་གོ་འཕང་མི་འཐོབ་པར་བྱེད་པ་ནི་སྡིག་པ་དང་སྒྲིབ་པ་ཡིན་པས་དེ་སྦྱོང་དགོས་ལ། ཇི་ལྟར་སྦྱོང་བའི་ཚུལ་ནི། རྒྱལ་སྲས་ཞི་བ་ལྷས། སྦྱང་བྱ་སྡིག་པའི་སྒོ་དྲུག་སྟེ། །སྦྱོང་བྱེད་གཉེན་པོ་སྟོབས་བཞིས་སྦྱངས། །སྦྱོང་ཚུལ་སྦྱོར་དངོས་རྗེས་གསུམ་གྱི། །རང་བཞིན་དག་པའང་སྔོན་དུ་འགྲོ། །ཞེས་གསུངས་པས། སྦྱང་བྱ། སྦྱོང་བྱེད། སྦྱོང་ཚུལ་གསུམ་ལས། དང་པོ་སྦྱང་བྱ་ནི། སྡིག་པའི་སྒོ་དྲུག་སྟེ། དེ་ཡང་ཀུན་སློང་གི་སྒོ་ནི་ཉོན་མོངས་པ་དུག་གསུམ་སྟེ། དེས་ཀུན་ནས་བསླང་ས་པའི་ལས་རྣམས་ནི་ངོ་བོ་མི་དགེ་བ་བྱེད་ལས་སྡུག་བསྔལ་འབའ་ཞིག་སྐྱེད་པར་བྱེད་པ་ཡིན་ཏེ། རིན་ཆེན་ཕྲེང་བ་ལས། འདོད་ཆགས་ཞེ་སྡང་གཏི་མུག་གསུམ། །དེས་བསྐྱེད་ལས་ནི་མི་དགེ་བ། །མི་དགེ་བ་ལས་སྡུག་བསྔལ་ཀུན། །དེ་བཞིན་ངན་འགྲོ་ཐམས་ཅད་དོ། །ཞེས་དང་། སྤྱོད་འཇུག་ལས། མི་དགེ་བ་ལས་སྡུག་བསྔལ་འབྱུང་། །འདི་ལས་ཇི་ལྟར་ངེས་ཐར་ཞེས། །ཉིན་མཚན་ཀུན་ཏུ་བདག་གིས་ནི། །འདི་ཉིད་འབའ་ཞིག་བསམ་པར་རིགས། །ཞེས་སོ། །འགྲིམ་པའི་སྒོ་ནི་ལུས་ངག་ཡིད་གསུམ་སྟེ། ཡུལ་དཀོན་མཆོག་གསུམ་དང་། ཕ་མ་དང་། མཁན་པོ་དང་། སློབ་དཔོན་ལ་སོགས་པ་ལ། དུས་ཐོག་མ་མེད་ནས་ད་ལྟའི་བར་དུ། ངོ་བོ་མི་དགེ་བ་བཅུ་ལ་སོགས་པ་རང་བཞིན་གྱི་སྡིག་པ་དང་། རབ་བྱུང་ཡིན་ན་ཕྱི་དྲོའི་ཁ་ཟས་ལ་སོགས་པ་བཅས་པ་དང་འགལ་བ་ཐམས་ཅད་དེ། མདོར་ན། ཕྱི་སོ་ཐར། ནང་བྱང་སེམས། གསང་བ་རིག་འཛིན་སྔགས་ཀྱི་སྡོམ་པ་དམ་ཚིག་དང་འགལ་བ་ཇི་སྙེད་པ་ཐམས་ཅད་དེ། འཕགས་པ་བཟང་པོ་སྤྱོད་པའི་སྨོན་ལམ་ལས། འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །ཞེས་སོ། །སྦྱོར་བ་རང་གིས་བྱས་པའམ། གཞན་ལ་བྱེད་དུ་བཅུག་པའམ། བྱས་པ་ལ་རྗེས་སུ་ཡི་རང་བ་རྣམས་ཏེ། སྤྱོད་འཇུག་ལས། ཐོག་མ་མེད་ལྡན་འཁོར་བ་ནས། །ཚེ་རབས་འདིའམ་གཞན་དག་ཏུ། །བདག་གིས་མ་འཚལ་སྡིག་བགྱིས་པའམ། །བགྱིད་དུ་སྩལ་བ་ཉིད་དང་ནི། །གཏི་མུག་འཁྲུལ་བས་བདག་ནོན་ཏེ། །རྗེས་སུ་ཡི་རང་གང་བགྱིས་པ། །ནོངས་པ་དེ་ནི་མཐོང་བགྱིས་ནས། །བསམ་པ་ཐག་པས་མགོན་ལ་བཤགས། །བདག་གིས་དཀོན་མཆོག་གསུམ་དང་ནི། །ཕ་མའམ་བླ་མ་གཞན་དག་ལ། །ཉོན་མོངས་སྒོ་ནས་ལུས་ངག་དང་། །ཡིད་ཀྱི་གནོད་བགྱིས་གང་ལགས་དང་། །ཉེས་པ་དུ་མས་སྐྱོན་ཆགས་པའི། །སྡིག་ལྡན་བདག་གིས་སྡིག་པ་གང་། །ཤིན་ཏུ་མི་བཟད་བགྱིས་པ་སྟེ། །ཐམས་ཅད་འདྲེན་པ་རྣམས་ལ་འཆགས། །ཞེས་པ་ལྟར་རོ། །གཉིས་པ་སྦྱོང་བྱེད་ནི། གཉེན་པོ་སྟོབས་བཞི་སྟེ། ཆོས་བཞི་བསྟན་པའི་མདོ་ལས། བྱམས་པ། ཆོས་བཞི་དང་ལྡན་ན་སྡིག་པ་བྱས་ཤིང་བསགས་པ་ཐམས་ཅད་ཟིལ་གྱིས་གནོན་པར་འགྱུར་རོ། །བཞི་གང་ཞེ་ན། འདི་ལྟ་སྟེ། རྣམ་པར་སུན་འབྱིན་པ་ཀུན་ཏུ་སྤྱོད་པ་དང་། གཉེན་པོ་ཀུན་ཏུ་སྤྱོད་པ་དང་། སོར་ཆུད་པའི་སྟོབས་དང་། རྟེན་གྱི་སྟོབས་སོ། །དེ་ལ་དང་པོ་ནི་མི་དགེ་བའི་ལས་སྤྱོད་ནའང་དེ་ལ་འགྱོད་པ་མང་བ་ཡིན་ནོ། །གཉིས་པ་ནི་མི་དགེ་བའི་ལས་བྱས་ཀྱང་དགེ་བའི་ལས་ལ་ཤིན་ཏུ་བརྩོན་པའོ། །གསུམ་པ་ནི། སྡོམ་པ་ཡང་དག་པར་བླང་ནས་སྡིག་པ་མི་བྱེད་པའི་སྡོམ་པ་ཐོབ་པ་ཡིན་ནོ། །བཞི་པ་ནི། སངས་རྒྱས་དང་། ཆོས་དང་། དགེ་འདུན་ལ་སྐྱབས་སུ་འགྲོ་བ་དང་། བྱང་ཆུབ་ཀྱི་སེམས་མི་གཏོང་བ་ཡིན་ནོ། །ཞེས་གསུངས་ཏེ། དེ་ལ་འདིར་འཆད་བདེ་བའི་དབང་དུ་བྱས་ཏེ་ཐོག་མར་རྟེན་གྱི་སྟོབས་ནས་བཟུང་རིམ་གྱིས་བཤད་པ་ལ་བཞི་ལས། དང་པོ་རྟེན་གྱི་སྟོབས་ལ་གཉིས། ཡུལ་གྱི་རྟེན་ནི་སྡིག་པ་བཤགས་པའི་ཡུལ་བླ་མ་དགེ་བའི་གཤེས་གཉེན་ནམ་དེ་བཞིན་གཤེགས་པའི་སྐུ་གསུང་ཐུགས་ཀྱི་རྟེན་ཁྱད་པར་ཅན་དངོས་སུ་མཆོད་པའི་དབུས་སུ་སྤྱན་དྲངས་ཤིང་ཡིད་ཀྱི་དམིགས་པས་ཀྱང་མདུན་གྱི་ནམ་མཁར་རྒྱལ་བ་སྲས་བཅས་དཔང་པོའི་ཚུལ་དུ་མངོན་སུམ་གྱིས་བཞུགས་པར་མོས་པ་སྟེ། སྤྱོད་འཇུག་ལས། སངས་རྒྱས་བྱང་ཆུབ་སེམས་དཔའ་དག །ཀུན་ཏུ་ཐོགས་མེད་གཟིགས་པར་ལྡན། །ཞེས་དང་། ཕྱོགས་རྣམས་ཀུན་ན་བཞུགས་པ་ཡི། །རྫོགས་སངས་རྒྱས་དང་བྱང་ཆུབ་སེམས། །ཐུགས་རྗེ་ཆེན་པོ་མངའ་རྣམས་ལ། །ཐལ་མོ་སྦྱར་ཏེ་གསོལ་བ་ནི། །ཞེས་པའི་ཚུལ་གྱིས་སོ། །རང་རྒྱུད་ཀྱི་རྟེན་ནི་སྐྱབས་སུ་འགྲོ་བ་དང་སེམས་བསྐྱེད་པ་ཡིན་པས་སེམས་ཅན་ཐམས་ཅད་སྒྲོལ་འདོད་ཀྱི་སྙིང་རྗེས་རྫོགས་བྱང་དོན་གཉེར་གྱི་སེམས་དང་ལྡན་པས། སྐྱབས་འགྲོ་སྤྱི་དང་། ཁྱད་པར་སྤྱོད་འཇུག་ལས་གསུངས་པའི་གཙོ་རྒྱལ་མ་ལྟ་བུས་འཇིགས་པ་ལས་སྐྱབས་པར་གསོལ་བ་འདེབས་པ་སྟེ། དེ་ཡང་སྐྱབས་སུ་འགྲོ་བས་སྡིག་པ་འདག་པ་ནི། མྱ་ངན་འདས་ཆེན་གྱི་མདོ་ལས། དཀོན་མཆོག་གསུམ་ལ་སྐྱབས་སོང་བས། །འཇིགས་པ་མེད་པར་ཐོབ་པར་འགྱུར། །ཞེས་སོ། །བྱང་ཆུབ་ཏུ་སེམས་བསྐྱེད་པས་སྡིག་པ་འདག་པ་ནི། སྤྱོད་འཇུག་ལས། དེས་ནི་དུས་མཐའི་མེ་བཞིན་སྡིག་ཆེན་རྣམས། །སྐད་ཅིག་གཅིག་གིས་ངེས་པར་སྲེག་པར་བྱེད། །ཅེས་སོ། །གཉིས་པ་རྣམ་པར་སུན་འབྱིན་པའི་སྟོབས་ནི། སྔར་བྱས་ཀྱི་སྡིག་ལྟུང་དྲན་ཞིང་འགྱོད་པ་དྲག་པོས་དེ་དང་དེའི་མིང་དངོས་སུ་བརྗོད་ནས་བཤགས་པ་བྱེད་པ་སྟེ། དེ་ཡང་ཇི་ལྟར་འགྱོད་པར་བྱ་ཞེ་ན། འགྱོད་པ་སྐྱེད་ལུགས་གསུམ་སྟེ། དོན་མེད་པར་བརྟགས་ལ་འགྱོད་པ་སྐྱེད་པ་དང་། འཇིགས་པར་བརྟགས་ལ་འགྱོད་པ་སྐྱེད་པ་དང་། མྱུར་དུ་འབྲལ་དགོས་པར་བརྟགས་ལ་འགྱོད་པ་སྐྱེད་པའོ། །དེ་ལ་དང་པོ་ནི། བདག་གིས་བྱས་པའི་སྡིག་པ་དེ་ཡང་། རེས་འགའ་དགྲ་འདུལ་བའི་ཆེད་དུ་བྱས། རེས་འགའ་ནི་གཉེན་བསྐྱང་བའི་ཆེད་དུ་བྱས། རེས་འགའ་ནི་རྙེད་བཀུར་དང་སྙན་གྲགས་ཀྱི་ཆེད་དུ་བྱས། རེས་འགའ་ལུས་གནས་པའི་ཆེད་དུ་བྱས། རེས་འགའ་ལོངས་སྤྱོད་དང་ནོར་རྫས་གསོག་པའི་ཆེད་དུ་བྱས་ཏེ། བདག་ཤི་ནས་འཇིག་རྟེན་ཕྱི་མར་སྐྱེས་འདེགས་པའི་ཚེ། དགྲ་དང་གཉེན་དང་ཡུལ་དང་ལུས་དང་ནོར་རྫས་སོགས་དེ་རྣམས་ནི་བདག་དང་མི་འགྲོགས་པར། ལས་ངན་གྱི་སྡིག་སྒྲིབ་རྣམས་བདག་དང་འགྲོགས་ནས་གང་དུ་སྐྱེ་བ་དེར་གནོད་བྱེད་ཀྱི་གཤེད་མར་ལྡང་བ་ཡིན་ཏེ། དཔལ་བྱིན་གྱིས་ཞུས་པའི་མདོ་ལས། ཕ་མ་སྤུན་དང་བུ་དང་ཆུང་མ་དང་། །བྲན་དང་ནོར་དང་རྩ་ལག་ཚོགས་རྣམས་ཀྱང་། །ཤི་བའི་རྗེས་ཕྱིར་དེ་དག་འགྲོ་བ་མེད། །ལས་རྣམས་རྗེས་སུ་འབྲང་ཞིང་དེ་དག་འགྲོ། །ཞེས་དང་། ཤིན་ཏུ་སྡུག་བསྔལ་གྱུར་པ་དེ་དུས་སུ། །བུ་དང་ཆུང་མ་སྐྱབས་སུ་འགྱུར་མ་ཡིན། །བདག་ཉིད་གཅིག་པུས་སྡུག་བསྔལ་མྱོང་བར་འདོང་། །དེ་དག་དེ་ཚེ་བདག་གི་སྐལ་མི་ལེན། །ཞེས་དང་། སྤྱོད་འཇུག་ལས། ཐམས་ཅད་བོར་ཏེ་ཆས་དགོས་པར། །བདག་གིས་དེ་ལྟར་མ་ཤེས་ནས། །མཛའ་དང་མི་མཛའི་དོན་གྱི་ཕྱིར། །སྡིག་པ་རྣམ་པ་སྣ་ཚོགས་བྱས། །མཛའ་བ་རྣམས་ཀྱང་མེད་པར་འགྱུར། །མི་མཛའ་རྣམས་ཀྱང་མེད་པར་འགྱུར། །བདག་ཀྱང་མེད་པར་འགྱུར་བ་སྟེ། །དེ་བཞིན་ཐམས་ཅད་མེད་པར་འགྱུར། །ཞེས་སོ། །དེས་ན་སྡིག་པ་ནི་དགྲ་གཉེན་གཉིས་དང་། ལུས་ལོངས་སྤྱོད་སོགས་ཀྱི་ཕྱིར་བྱས་པ་ཡིན་ན། དེ་ཐམས་ཅད་དང་བདག་ཡུན་དུ་འགྲོགས་སུ་མེད་ཅིང་། རང་ངན་སོང་དུ་ལྟུང་སྟེ་ཤིན་ཏུ་ཉམ་ཐག་ཅིང་དགོས་གལ་ཆེ་བའི་སྐབས་སུ་ནི་དེ་དག་རང་གི་ཕྱོགས་ཙམ་དུ་མི་ཉེ་ཞིང་ཕན་མེད། རྣམ་སྨིན་སྡུག་བསྔལ་གྱི་འབྲས་བུ་ནི་རང་འབའ་ཞིག་གི་མྱོང་དགོས་པས། སྡིག་པ་ཉིད་ཚེགས་ཆེ་ལ་དོན་ཆུང་བར་བསམས་ལ་འགྱོད་པ་དྲག་པོ་བསྐྱེད་དོ། །གཉིས་པ་ནི། གལ་ཏེ་དོན་མེད་ཀྱང་དེས་བདག་ལ་གནོད་པར་མི་འགྱུར་སྙམ་ན་མ་ཡིན་ཏེ། སྡིག་པ་བྱས་པའི་འབྲས་བུས། རང་ཉིད་འཆི་ཀ་དང་། ཤི་བའི་ཚེ་དང་། ཤི་བའི་འོག་ཏུ་འཇིགས་པ་མི་བཟད་པ་བསྐྱེད་པར་བྱེད་དེ། དེ་ཡང་མི་སྡིག་པ་ཅན་རྣམས་འཆི་ཀའི་དུས་སུ་གནད་གཅོད་དང་འཁྲུལ་སྣང་སོགས་སྡུག་བསྔལ་མི་བཟད་པ་མྱོང་སྟེ། སྤྱོད་འཇུག་ལས། བདག་ནི་མལ་ན་འདུག་བཞིན་དུ། །གཉེན་བཤེས་རྣམས་ཀྱིས་མཐའ་བསྐོར་ཡང་། །སྲོག་གཅོད་པ་ཡི་ཚོར་བ་དང་། །བདག་ཉིད་གཅིག་པུས་མྱོང་བར་འགྱུར། །ཞེས་སོ། །དེ་ནས་ཤི་བའི་ཚེ་ནའང་། གཤིན་རྗེའི་ཕོ་ཉ་སྐྱེས་བུ་མདོག་ནག་ཅིང་མིག་རྩ་དམར་བ་འཇིགས་སུ་རུང་བའི་སྒྲ་དྲག་པོ་སྒྲོག་པའི་གཏུམ་པོ་མ་རུངས་པ་རྣམས་ཀྱིས་ཞགས་པས་མགུལ་ནས་བཅིངས་ཤིང་། དབྱུག་པ་དང་ཤང་ལང་ལ་སོགས་པ་མེ་འབར་བའི་མཚོན་ཆ་ཐོགས་པ་རྣམས་ཀྱིས་རྡེག་ཅིང་ཕྱིན་ནས་དེད་དེ། རྒྱོབ་རྒྱོབ་དང་སོད་སོད་ཀྱི་སྒྲ་དྲག་པོ་དང་བཅས་ཏེ། མཚོན་ཆའི་ཐང་དང་རྡོ་བསྲེགས་ཀྱི་ས་གཞི་སོགས་ཉམས་ང་བའི་དམྱལ་གནས་རྣམས་སུ་འཁྲིད་ཅིང་རང་དབང་མེད་པར་སྡུག་བསྔལ་བའི་གནོད་པ་མི་བཟད་པ་འབྱུང་སྟེ། སློབ་སྤྲིང་ལས། དུས་ཀྱི་ཞགས་པས་སྐེ་ནས་བཏགས་ཏེ་གཤིན་རྗེ་མི། །གཏུམ་པོ་རྣམས་ཀྱིས་དབྱུག་པས་བདའ་ཞིང་འཁྲིད་པར་འགྱུར། ཞེས་དང་། སྤྱོད་འཇུག་ལས། སྐྱེ་བོ་ཡན་ལག་བཅད་པའི་སར། །དེ་རིང་ཁྲིད་པའང་བྲེད་གྱུར་ཏེ། །ཁ་སྐམ་མིག་རྩ་ངན་ལ་སོགས། །སྔར་ལས་གཞན་དུ་འགྱུར་སྣང་ན། །གཤིན་རྗེའི་ཕོ་ཉ་འཇིགས་འཇིགས་ལྟའི། །ཤ་ཚུགས་ཅན་གྱིས་བཟུང་འགྱུར་ཞིང་། །འཇིགས་ཆེན་ནད་ཀྱི་ཐེབས་གྱུར་པ། །རབ་ཏུ་ཉམ་ཐག་སྨོས་ཅི་དགོས། །ཞེས་དང་། གཤིན་རྗེའི་ཕོ་ཉས་ཟིན་པ་ལ། །གཉེན་གྱིས་ཅི་ཕན་བཤེས་ཅི་ཕན། །དེ་ཚེ་བསོད་ནམས་གཅིག་སྐྱབས་ན། །དེ་ཡང་བདག་གིས་མ་བསྟེན་ཏོ། །ཞེས་སོ། །ཤི་བའི་འོག་ཏུ་འཇིགས་པའང་། སྡིག་པའི་འབྲས་བུས་ངན་སོང་དམྱལ་བ་ཆེན་པོར་ལྟུང་ནས། བཙོ་བསྲེགས་གཤོག་འདྲལ་ལ་སོགས་པའི་སྡུག་བསྔལ་མི་བཟད་པ་མྱོང་བར་འགྱུར་ཏེ། བཤེས་སྤྲིང་ལས། སྡིག་ཅན་དབུགས་དབྱུང་འགག་པ་ཙམ་ཞིག་གིས། །དུས་ཀྱིས་བར་དུ་ཆོད་རྣམས་དམྱལ་བ་ཡི། །སྡུག་བསྔལ་གཞལ་ཡས་ཐོས་ནས་རྣམ་སྟོང་དུ། །མི་འཇིགས་གང་ལགས་རྡོ་རྗེའི་རང་བཞིན་ནོ། །དམྱལ་བ་བྲིས་པ་མཐོང་དང་ཐོས་པ་དང་། །དྲན་དང་བཀླགས་དང་གཟུགས་སུ་བགྱིས་རྣམས་ཀྱང་། །འཇིགས་པར་སྐྱེད་པར་འགྱུར་ན་མི་བཟད་པའི། །རྣམ་སྨིན་ཉམས་སུ་མྱོང་རྣམས་སྨོས་ཅི་འཚལ། །ཞེས་སོ། །དེས་ན་སྡིག་པའི་འབྲས་བུ་དེ་ཤིན་ཏུ་འཇིགས་པས་འགྱོད་པ་ཡང་ཡང་བསྐྱེད་པར་བྱའོ། །གསུམ་པ་ནི། སྡིག་པ་དེ་ཕྱིས་བཤགས་པས་ཆོག་གམ་སྙམ་ན་མི་ཆོག་སྟེ། སྡིག་པ་མ་བྱང་བའི་སྔོན་དུ་བདག་ཉིད་འཆི་བའི་དོགས་པ་ཡོད་དེ། སྤྱོད་འཇུག་ལས། བདག་ནི་སྡིག་པ་མ་བྱང་བར། །སྔོན་དུ་འགུམ་པར་འགྱུར་དུ་འཆི། །ཇི་ལྟར་འདི་ལས་ངེས་ཐར་བར། །མྱུར་བའི་ཚུལ་གྱིས་བསྐྱབ་ཏུ་གསོལ། །ཞེས་སོ། །སྡིག་པ་མ་བྱང་བར་བདག་མི་འཆིའོ་སྙམ་ན། འཆི་བདག་གི་བདུད་དེས་བདག་གི་སྡིག་པ་བྱང་བ་དང་མ་བྱང་བའི་ཚིས་ལ་མི་ལྟ་བར། གླགས་གང་རྙེད་ཀྱིས་འཕྲལ་དུ་སྲོག་འཕྲོག་པར་བྱེད་པས་ཡིད་བརྟན་མི་རུང་སྟེ། དེ་ལས། ཡིད་བརྟན་མི་རུང་འཆི་བདག་འདིས། །བྱས་དང་མ་བྱས་མི་སྡོད་པར། །ན་དང་མི་ན་ཀུན་གྱིས་ཀྱང་། །གློ་བུར་ཚེ་ལ་ཡིད་མི་བརྟན། །ཞེས་སོ། །དེས་ན་སྡིག་པ་མ་བྱང་བར་འཆི་དོགས་ཡོད་པས་མྱུར་དུ་བཤགས་པ་ལ་འབད་པར་བྱ་སྟེ། དེ་ཡང་མཐོལ་བཤགས་ཞེས་པ། ཉེས་པ་བྱས་པ་གསང་ཞིང་སྦས་ན་སྡིག་པ་དེ་ཇེ་འཕེལ་དུ་འགྱུར་ལ། མ་གསང་ཞིང་མ་སྦས་པར་སྐྱོན་དུ་ཤེས་ནས་ཚོགས་སུ་བསྒྲགས་ན་སྡིག་པ་དེ་སྟོབས་ཇེ་ཆུང་དུ་འགྱུར་ཞིང་། ནམ་ཡང་འཕེལ་བར་མི་འགྱུར་བས། བདག་གིས་ཉེས་པ་འདི་ལྟ་བུ་བགྱིས་སོ་ཞེས་བཤགས་ཡུལ་གཙོ་བོར་གྱུར་པའི་ཚོགས་སུ་བསྒྲགས་པ་ནི་མཐོལ་བ་ཡིན་ལ། བདག་གིས་འདི་ལྟར་བགྱིས་པ་ནི་ཤིན་ཏུ་ཉེས་ཤིང་བླུན་ནོ་ཞེས་འགྱོད་པ་དྲག་པོས་སེམས་གདུང་བ་དང་བཅས་ཏེ་ལས་དེ་སྐྱོན་དུ་ཁས་ལེན་པ་ནི་བཤགས་པ་སྟེ། རང་ཉིད་ཉེས་པ་དང་བཅས་པས་ཞུམ་ཞིང་དམའ་བའི་གནས་སུ་ཞུགས། གཞན་ཉེས་པ་དེ་དང་མི་ལྡན་པ་རྣམས་ཡོན་ཏན་གྱིས་མངོན་པར་མཐོ་ཞིང་མཆོག་དང་ངོ་མཚར་ཅན་དུ་ཤེས་པས་གུས་པས་གཙུག་ཏུ་ཁུར་བའི་བློས་ཀུན་ནས་བསླང་སྟེ། རང་གིས་ཉེས་སྤྱོད་བགྱིས་པ་ལ་ངོ་ཚ་ཡང་། གསོང་པོར་སྨྲ་བའི་སྒོ་ནས། ཁྱེད་རྣམས་ཀྱིས་བརྩེ་བས་རྗེས་སུ་བཟུང་དུ་གསོལ། ལས་འདི་དག་པར་མཛད་དུ་གསོལ། ཞེས་སྙིང་ཐག་པ་ནས་བརྗོད་པ་ནི་བཤགས་པའི་དོན་གྱི་སྙིང་པོའོ། །གསུམ་པ་གཉེན་པོ་ཀུན་ཏུ་སྤྱོད་པའི་སྟོབས་ནི། སྡིག་པའི་གཉེན་པོར་དགེ་བ་ལ་སྤྱོད་པ་སྟེ། དེ་ལས་འགྲུབ་སླ་ཞིང་ཕན་ཡོན་ཆེ་བ་འགའ་ཞིག་གཅེས་པར་བཏུས་པ་ལ་གཉེན་པོ་ཀུན་ཏུ་སྤྱོད་པའི་སྒོ་དྲུག་ཅེས་གྲགས་ཏེ། དེ་ལ་དང་པོ་སངས་རྒྱས་དང་བྱང་ཆུབ་སེམས་དཔའི་མཚན་བཟུང་བ་ནི། དཔེར་ན་བདག་ཅག་གི་སྟོན་པ་ཐུགས་རྗེ་ཅན་གྱི་མཚན་ཐོས་ན་བསྐལ་ཆེན་བརྒྱད་ཁྲིའི་སྡིག་པ་བྱང་བར་གསུངས་པ་ལྟ་བུ་མདོ་སྡེ་རྣམས་ནས་སངས་རྒྱས་དང་བྱང་ཆུབ་སེམས་དཔའ་མང་པོ་ཞིག་གི་མཚན་དང་དེ་བཟུང་བས་ལས་ཀྱི་སྒྲིབ་པ་བྱང་བར་འགྱུར་བའི་ཚུལ་རྒྱ་ཆེར་བཀའ་སྩལ་པ། ཀུན་མཁྱེན་བླ་མ་འཇམ་དཔལ་རྡོ་རྗེས་ཕྱོགས་བསྡུས་སུ་མཛད་པ་མཚན་འབུམ་ནོར་བུའི་ཕྲེང་བ་ལྟ་བུ་སྟེ། དེ་ཉིད་རང་གིས་བརྗོད་པའམ་གཞན་ལ་སྒྲོག་པར་བྱེད་དུ་བཅུག་པའོ། །གཉིས་པ་གཟུགས་སྐུ་དང་མཆོད་རྟེན་བཞེངས་པ་ནི། དེ་གཉིས་ཀྱིས་མཚོན་ནས་སངས་རྒྱས་ཀྱི་གསུང་རབ་དང་བཅས་པ་བཞེངས་པ་སྟེ། དེ་ཡང་སྐུ་རྟེན་གྱི་སྡིག་པ་བྱང་བ་ནི། དེ་བཞིན་གཤེགས་པའི་སྐུ་གཟུགས་ཀྱི་ལེའུ་ལས། དེ་བཞིན་གཤེགས་པའི་སྐུ་གཟུགས་བཞེངས་པར་བྱ། རལ་བ་གསོ་བར་བྱ། གྲུམ་པ་བཅོས་པར་བྱས་ཏེ། དེ་བཞིན་གཤེགས་པའི་སྐུ་གཟུགས་བཞེངས་ན། རིགས་དམའ་བ་ཐམས་ཅད་དང་། སྡིག་པ་བྱེད་པའི་རིགས་རྣམས་དང་། ལོག་པར་ལྟ་བའི་རིགས་སུ་མི་སྐྱེ། ཡན་ལག་མ་ཚང་བར་མི་འགྱུར་རོ། །གལ་ཏེ་མཚམས་མེད་པ་ལྔ་བྱས་སུ་ཟིན་ཀྱང་དེ་བཞིན་གཤེགས་པ་ལ་དད་པ་རྙེད་དེ་སྐུ་གཟུགས་བྱས་ན། སེམས་ཅན་དམྱལ་བ་མྱོང་བ་ཆུང་ངུ་མྱོང་སྟེ། ཐེག་པ་གསུམ་གང་ཡང་རུང་བས་ངེས་པར་འབྱུང་བར་འགྱུར་རོ། །དཔེར་ན་མི་ཞིག་མི་གཙང་བ་ལ་རེག་པ་ལ། རབ་ཏུ་དག་པར་བསྐྲུས་ཏེ་སྤོས་ཀྱིས་བྱུགས་ན་དྲི་མི་ཞིམ་པ་དེ་མེད་པར་འགྱུར་རོ། །དེ་བཞིན་དུ་མཚམས་མེད་པ་བྱས་པ་དེའི་སྡིག་པ་ཡང་མེད་པར་འགྱུར་རོ། །མི་དགེ་བ་བཅུའི་ལས་ཀྱི་ལམ་དང་ལྡན་པ་ཡང་དེ་བཞིན་གཤེགས་པ་ལ་དད་པ་རྙེད་དེ་སྐུ་གཟུགས་བྱས་ན་དེའི་སྡིག་པ་དེ་ཇི་ལྟར་མེ་ཡི་ཕུང་པོས་མར་ཚིག་སྟེ་དུ་བ་ཡང་མི་མངོན་པ་བཞིན། དེའི་སྡིག་པ་དེ་ཡང་མི་སྣང་བར་འགྱུར་རོ། །ཞེས་སོ། །མཆོད་རྟེན་གྱིས་སྡིག་པ་བྱང་བ་ནི། གཙུག་ཏོར་དྲི་མེད་ལས། མཆོད་རྟེན་བཞེངས་པའི་ཆོ་གའི་ཚུལ་རྣམས་གསལ་བར་བསྟན་ནས། དེས་ནི་གངྒཱའི་ཀླུང་གི་བྱེ་མ་སྙེད་ཁྲག་ཁྲིག་ཕྲག་འབུམ་གྱི་བྱེ་མ་སྙེད་ཀྱི་དེ་བཞིན་གཤེགས་པ་རྣམས་ལ་དགེ་བའི་རྩ་བ་བསྐྱེད་པར་འགྱུར་རོ། །བསོད་ནམས་ཆེན་པོ་དང་ལྡན་པར་འགྱུར་རོ། །མཚམས་མེད་པ་ལྔ་ཡི་སྒྲིབ་པ་རྣམས་ཀྱང་ཡོངས་སུ་བྱང་བར་འགྱུར་རོ། །སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་གྱི་ངན་སོང་རྣམས་ལས་ཡོངས་སུ་ཐར་བར་འགྱུར་རོ། །ཚེ་རིང་བར་འགྱུར་རོ། །སྦྲུལ་གྱི་པགས་པ་བརྗེས་པ་བཞིན་དུ་ལུས་བོར་ནས་སྐལ་པ་མཉམ་པའི་ཕྱིར། འཇིག་རྟེན་གྱི་ཁམས་བདེ་བ་ཅན་དུ་འགྲོ་བར་འགྱུར་རོ། །ཕྱིན་ཆད་མངལ་གྱི་གནས་ཀྱི་དྲི་མས་མི་གོས་པར་འགྱུར་རོ། །ཞེས་སོགས་རྒྱ་ཆེར་གསུངས་པ་དང་། སྒྲིབ་སེལ་གཟུངས་སོགས་གཞན་ལས་ཀྱང་། མཆོད་རྟེན་མཐོང་བ་དང་། དྲིལ་བུའི་སྒྲ་ཐོས་པ་ཙམ་གྱིས་ཀྱང་མཚམས་མེད་པ་ལྔ་སོགས་བྱང་ཞིང་འཆི་བའི་འོག་ཏུ་བདེ་བ་ཅན་དུ་སྐྱེ་བར་འགྱུར་བར་གསུངས་པ་སོགས་མང་ངོ་། །སངས་རྒྱས་ཀྱི་གསུང་རབ་འབྲི་འཆང་ཀློག་སོགས་ཀྱི་སྒྲིབ་པ་འཛད་པ་ནི་གཞུང་སོ་སོ་ནས་གསུངས་པ་ལྟར་ཚད་མེད་ལ། འཕགས་པ་བཟང་པོ་སྤྱོད་པ་ལས་ཀྱང་། མཚམས་མེད་ལྔ་པོ་དག་གི་སྡིག་པ་རྣམས། །གང་གིས་མི་ཤེས་དབང་གིས་བྱས་པ་དག །དེ་ཡིས་བཟང་པོ་སྤྱོད་པ་འདི་བརྗོད་ན། །མྱུར་དུ་མ་ལུས་ཡོངས་སུ་བྱང་བར་འགྱུར། །ཞེས་དང་། གང་གིས་བཟང་པོ་སྤྱོད་པའི་སྨོན་ལམ་འདི། །འཆང་བ་དང་ནི་སྟོན་ཏམ་ཀློག་ན་ཡང་། །དེ་ཡི་རྣམ་པར་སྨིན་པའང་སངས་རྒྱས་མཁྱེན། །བྱང་ཆུབ་མཆོག་ལ་སོམ་ཉི་མ་བྱེད་ཅིག །ཅེས་གསུངས་པ་བཞིན་ནོ། །གསུམ་པ་རྟེན་ལ་ཕྱག་མཆོད་སྐོར་བ་བྱེད་པ་ནི། རྟེན་གསུམ་དང་དགེ་འདུན་ལ་ཕྱག་དང་མཆོད་པ་མཎྜལ་འབུལ་བ་སོགས་ཚོགས་གསོག་དང་། སྔགས་ལ་ཞུགས་པ་ཡིན་ན། ཚོགས་ཀྱི་མཆོད་པ་དང་། བཤགས་སྐོང་ཀུན་གྱི་མཆོག་ནི་བླ་མ་མཉེས་པར་བྱ་བ་སྟེ། མེ་ཏོག་བརྩེགས་པའི་གཟུངས་ལས། གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལོ་གཅིག་གམ་ལོ་བརྒྱའམ་ལོ་སྟོང་ཡང་རུང་སྟེ། བདེ་བའི་ཡོ་བྱད་ཀྱིས་བསྙེན་བཀུར་བ་དང་། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་རྟེན་རྣམས་ལ་མེ་ཏོག་འགའ་འབུལ་ལམ། ཆུ་སྙིམ་པ་གང་འཐོར་རམ། བྱུག་པའི་ཐིག་ལེ་འདྲིའམ། མེ་ཏོག་གི་རྡུལ་ཉལ་ཉིལ་འཕྱག་གམ། བྱུག་པ་འབུལ་ལམ། སྤོས་འབུལ་ལམ། བདུག་སྤོས་འབུལ་ལམ། མར་མེ་འབུལ་ལམ། ཕུལ་ན་དགའ་བའི་སེམས་ཀྱིས་གོམས་པའི་སྟབས་འགའ་བོར་ཏེ། སངས་རྒྱས་བཅོམ་ལྡན་འདས་ལ་ཕྱག་འཚལ་ལོ། །ཞེས་སྨྲ་བ་དེ་དག་ནི། སེང་གེ་རྣམ་པར་བརྩེ་བ་བསྐལ་པ་བརྒྱའམ། བསྐལ་པ་སྟོང་དུའམ། བསྐལ་པ་བརྒྱ་ཕྲག་སྟོང་དུ་ཡང་ངན་འགྲོ་ལོག་པར་ལྟུང་བའི་གནས་སུ་འགྲོ་བར་འགྱུར་བ་དེ་ནི་གནས་མེད་དོ། །ཞེས་དང་། རྡོ་རྗེ་ཉི་མ་ལས། འགལ་ན་ཚོགས་ཀྱི་འཁོར་ལོས་བཤགས། །ཉམས་ན་རང་གི་བདོག་པས་བསྐང་། །འདས་ན་བུ་དང་ཆུང་མ་དང་། །ཉེ་འཁོར་ལུས་དང་ངག་དག་དང་། །ཡིད་དང་བདོག་པར་བཅས་པས་བསྐང་། །རལ་ན་རང་གི་སྲོག་གིས་བསྐང་། །ཞེས་དང་། རྡོ་རྗེ་དྲྭ་བ་ལས། བསོད་ནམས་ནང་ནས་ཚོགས་འཁོར་མཆོག །ཚེ་འདིར་བསམ་པ་ཀུན་འགྲུབ་ཅིང་། །བགེགས་དང་བར་ཆད་ཞི་བ་དང་། །ཕྱི་མར་རིག་འཛིན་རྒྱལ་བའི་ཞིང་། །ཀུན་ཏུ་བཟང་པོ་ཐོབ་པར་འགྱུར། །ཞེས་དང་། ཡེ་ཤེས་རྒྱ་མཚོའི་རྒྱུད་ལས། གལ་ཏེ་ཙནྡན་ག་བུར་རམ། །དྲི་ཡིས་བླ་མ་མཉེས་བྱས་ན། །བསྐལ་པ་སྟོང་ཕྲག་དུ་མར་ནི། །སངས་རྒྱས་ཞིང་ཁམས་འབུམ་ཕྲག་ལ། །མཆོད་ལས་བསོད་ནམས་ཁྱད་པར་འཕགས། །སངས་རྒྱས་བྱང་ཆུབ་སེམས་དཔའ་ཡི། །སྐུ་གཟུགས་སྟོང་ཕྲག་གཞལ་མེད་ལ། །རིན་ཆེན་ལྔ་ཡིས་སྤྲས་པ་བས། །བླ་མའི་སྐྲའམ་བ་སྤུ་ཞིག །རིན་ཆེན་ལྔ་ཡིས་བརྒྱན་པ་ན། །འདི་ནི་བསོད་ནམས་ཕ་མཐའ་ཡས། །ཇི་ལྟར་དགེ་སློང་ཁྲིམས་ལྡན་པ། །འབུམ་ཕྲག་དྲུག་ཅུ་རྩ་གཉིས་ལ། །སྟོན་མོ་ལན་བདུན་བཅུག་པ་ཡིས། །སྔ་མའི་ཞལ་དུ་འབྲས་ཆེན་འབྲུ། །རྡོག་མ་བདུན་དྲངས་བསོད་ནམས་ལ། །བརྒྱ་སྟོང་ཁྲི་འབུམ་ཆར་མི་ཕོད། །ཅེས་དང་། གསང་སྙིང་ལས། བླ་མ་དཀྱིལ་འཁོར་ཐམས་ཅད་ཀྱི། །དབང་ཕྱུག་ལོངས་སྤྱོད་ལྔས་མཆོད་ན། །དཀྱིལ་འཁོར་ཐམས་ཅད་མཆོད་པ་ཡིན། །ཉེ་བའི་དཀྱིལ་འཁོར་སྨོས་ཅི་དགོས། །ཉེས་པ་ཐམས་ཅད་འདག་པ་དང་། །ཡོན་ཏན་ཐམས་ཅད་ཐོབ་པར་འགྱུར། །ཞེས་སོ། །བཞི་པ་མདོ་རྒྱུད་ཟབ་མོ་ཀློག་པའམ་ཁ་ཏོན་བྱ་བ་ནི། སྤྱིར་སངས་རྒྱས་ཀྱི་བཀའ་རྣམས་ལ་ཁྱད་མེད་ཀྱང་། གཙོ་བོར་སྡིག་སྒྲིབ་སྦྱང་བ་ལ་ཆེད་དུ་བསྔགས་པ་བྱང་ཆུབ་ལྟུང་བཤགས་དང་ཐར་པ་ཆེན་པོའི་མདོ་སོགས་དང་དྲི་མེད་བཤགས་པའི་རྒྱུད་སོགས་མདོ་རྒྱུད་ཟབ་མོ་རྣམས་ཀློག་པ་དང་། ཁ་ཏོན་བྱེད་པ་སྟེ་ཕན་ཡོན་གྱི་ཁྱད་པར་སོགས་རང་གཞུང་ནས་བསྟན་པ་བཞིན་ནོ། །ལྔ་པ་གཟུངས་སྔགས་བཟླ་བ་ནི། དེ་བཞིན་གཤེགས་པའི་ཡི་གེ་བརྒྱ་པ་དང་མི་འཁྲུགས་པའི་གཟུངས་སོགས་སྡིག་སྦྱངས་ལ་ལྷག་པར་བསྔགས་པ་དང་། གཞན་ཡང་ཀུན་མཁྱེན་འཇམ་དཔལ་རྡོ་རྗེས་བཀའ་བསྡུ་གནང་བའི་གཟུངས་འབུམ་ལྟ་བུ་བཀླག་ཅིང་ཕན་ཡོན་གྱི་ཁྱད་པར་རྣམས་ལ་ཡིད་ཆེས་བསྐྱེད་པར་བྱའོ། །དྲུག་པ་སྟོང་ཉིད་བསྒོམ་པ་ནི། གནས་ལུགས་ངོ་འཕྲོད་ཀྱི་ལྟ་བ་སྐྱོང་རྒྱུ་ཡོད་ན་དེའི་ངང་དང་། དེ་ལྟར་མེད་ན། སྡིག་པའི་ལས་དེ་ཉིད་དང་། བྱེད་པ་པོ་གང་ཟག་དང་། སྡིག་པའི་ས་བོན་འཛིན་པའི་རྣམ་ཤེས་དང་། འབྲས་བུ་སྡུག་བསྔལ་དང་བཅས་པ་ལ་རྒྱུ་གང་ལས་སྐྱེས། ངོ་བོ་ཇི་ལྟ་བུ། གནས་གང་ན་གནས། མཐར་གང་དུ་འགགས་སོགས་སོ་སོར་བརྟགས་ནས་མཐར་མི་དམིགས་སྤྲོས་པ་དང་བྲལ་བའི་ངང་དུ་འཇོག་པ་སྟེ། ཕྱོགས་སུ་རྒྱས་པའི་མདོ་ལས། གང་ཞིག་འགྱོད་ཚང་བྱེད་འདོད་ན། །དྲང་པོར་འདུག་ལ་ཡང་དག་ལྟོས། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །འདི་ནི་འགྱོད་ཚངས་མཆོག་ཡིན་ནོ། །ཞེས་དང་། སངས་རྒྱས་མཛོད་ཀྱི་མདོ་ལས། ཕ་མ་དང་རང་སངས་རྒྱས་བསད་པ་ཡང་། སྟོང་པ་ཉིད་བསྒོམས་པས་རྣམ་པར་གྲོལ་ལོ། །ཞེས་སོ། །མདོར་ན་སྡིག་པའི་ལས་བྱས་པ་གཉེན་པོ་དགེ་བའི་ལས་ཀྱིས་འགོག་པ་སྟེ། འདུལ་བ་ལུང་ལས། གང་ཞིག་སྡིག་པའི་ལས་བྱས་པ། །དགེ་བ་ཡིས་ནི་འགོག་བྱེད་དེ། །ཉི་ཟླ་སྤྲིན་ལས་བྱུང་བ་བཞིན། །འཇིག་རྟེན་འདི་དེར་སྣང་བར་འགྱུར། །ཞེས་སོ། །འོ་ན་སྡིག་པའི་གཉེན་པོར་དགེ་བ་བྱེད་པ་དེ་ཡང་སྡིག་པ་བྱས་པ་ཇི་སྙེད་ཀྱི་དགེ་བ་བྱ་དགོས་སམ་ཞེ་ན། དེ་ཙམ་མི་དགོས་ཏེ། མྱ་ངན་འདས་ཆེན་གྱི་མདོ་ལས། དགེ་བ་གཅིག་བྱས་ཀྱང་སྡིག་པ་མང་པོ་འཇོམས་ཏེ། ཞེས་དང་། རྡོ་རྗེ་ཆུང་ངུས་རི་རབ་བམ། མེ་ཆུང་ངུས་རྩྭ་ཤིང་ངམ། དུག་ཆུང་ངུས་སེམས་ཅན་འཇོམས་པ་ལྟར། དགེ་བ་ཆུང་ངུས་ཀྱང་སྡིག་པ་ཆེན་པོ་འཇོམས་ནུས་པར་གསུངས་པ་ཡིན་ནོ། །བཞི་པ་སོར་ཆུད་པའི་སྟོབས་ནི། དུག་གི་རྒྱུས་ཤེས་པས་ཕྱིན་ཆད་དུག་མི་འཐུང་བ་བཞིན་དུ། རྣམ་སྨིན་གྱི་འབྲས་བུ་ལ་འཇིགས་ནས། ཕྱིན་ཆད་སྲོག་ལ་བབས་ཀྱང་སྡིག་པའི་ལས་འདི་དག་མི་བྱའོ་ཞེས་དམ་བཅས་ནས་ཉེས་སྤྱོད་ཀྱི་ལས་མི་བྱེད་པ་སྟེ། སྤྱོད་འཇུག་ལས། འདྲེན་པ་རྣམས་ཀྱིས་བདག་ནི་སྡིག །ནོངས་པ་ལགས་པར་གཟུང་དུ་གསོལ། །འདི་ནི་བཟང་པོ་མ་ལགས་པས། །སླན་ཆད་བདག་ནི་ཡོངས་མི་བགྱིད། །ཅེས་གསུངས་པ་བཞིན་ནོ། །གསུམ་པ་སྦྱོང་ཚུལ་ལ། སྦྱོར་དངོས་རྗེས་གསུམ་ལས་སྦྱོར་བ་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་བསམ་ལ་སྐྱབས་འགྲོ་བྱ། དངོས་གཞི་སྡིག་པ་ཐམས་ཅད་དྲན་ཞིང་འགྱོད་པས་རང་གཞན་གྱི་སྡིག་པ་ཐམས་ཅད་ལྕེ་ཐོག་ཏུ་ནག་ལིང་ངེར་བསམ་པ་བཤགས་པས། སངས་རྒྱས་དང་བྱང་ཆུབ་སེམས་དཔའི་སྨིན་མཚམས་སོགས་ནས་འོད་ཟེར་བྱུང་སྟེ་འཕྲལ་དུ་དག་པར་བསམ་རྗེས་འོད་ཟེར་མང་དུ་བྱུང་ནས་སྡིག་པ་ཐམས་ཅད་དག ལུས་ཤེལ་གོང་ལྟར་གྱུར་པར་བསམས་ལ། སྡིག་པ་བཤགས་པའི་ཚིག་བྱང་ཆུབ་ལྟུང་བཤགས་དང་བཟང་སྤྱོད་སྤྱོད་འཇུག་སོགས་ལས་འབྱུང་བའམ། བླ་མ་རྡོར་འཛིན་མ་ལྟ་བུ་བརྗོད་པའི་མཐར། གང་ལ་བཤགས་པའི་རྟེན། གང་བཤགས་པའི་སྡིག་པ། གང་གིས་བཤགས་པའི་བྱེད་པོ་རྣམས་མི་དམིགས་པའི་ངང་ལ་བཞག་པ་སྟེ་སྦྱོར་དངོས་རྗེས་གསུམ་ཚང་བས་ཉམས་སུ་བླང་ངོ་། །གཉིས་པ་བྱེ་བྲག་རྡོ་རྗེ་སེམས་དཔའི་བསྒོམ་བཟླས་ཀྱི་དམིགས་ཁྲིད་དངོས་བཤད་པ་ནི། དེ་ཡང་རང་ཅག་རྣམས་གཞན་དོན་དུ་རྫོགས་བྱང་སྒྲུབ་པར་བྱེད་པ་ལ་བར་དུ་གཅོད་པའི་གེགས་ནི་སྡིག་སྒྲིབ་ཡིན་པས་དེ་སྦྱང་དགོས། དེ་སྦྱོང་བྱེད་ཀྱི་མཆོག་རྡོ་རྗེ་སེམས་དཔའི་བསྒོམ་བཟླས་ཡིན་པས་རྣལ་འབྱོར་ཟབ་མོ་ལ་འཇུག་པར་བགྱིའོ་སྙམ་དུ་བསམ་ནས་ལུས་སེམས་རྣལ་དུ་ཕབ་ལ། རང་ཐ་མལ་དུ་གནས་པའི་སྤྱི་བོར་པདྨ་དཀར་པོ་འདབ་མ་བརྒྱད་པ་གེ་སར་ཟེ་ཕོན་དང་བཅས་པའི་སྟེང་ཁ་ཡར་བལྟ་བ། རྩ་བ་རང་གི་ཚང་བུག་ཏུ་ཟུག་པ། དེའི་སྟེང་དུ་ཟླ་བའི་དཀྱིལ་འཁོར་ཉ་གང་བ་རྣམས་གསལ་གདབ། དེ་ལ་གསལ་སྣང་ཐོན་པ་དང་། དེའི་སྟེང་དུ་ཧཱུྃ་ཡིག་དཀར་པོ་གསལ་ཞིང་འཚེར་བ་ཞིག་བསམ། དེ་ལས་འོད་ཟེར་ཁ་དོག་ལྔ་ལྡན་བུན་ཟེར་གྱིས་འཕྲོས། ཕྱོགས་བཅུའི་རྒྱལ་བ་སྲས་དང་བཅས་པ་ལ་སྐུ་གསུང་ཐུགས་མཉེས་པའི་མཆོད་པ་ཕུལ། སེམས་ཅན་ཐམས་ཅད་ལ་ཕོག་པས་སྡིག་སྒྲིབ་སྦྱངས། འོད་ཟེར་ཚུར་འདུས་ཡོངས་སུ་གྱུར་པ་ལས། ངོ་བོ་རང་གི་དྲིན་ཆེན་རྩ་བའི་བླ་མ་དེ་ཉིད་རྣམ་པ་བཅོམ་ལྡན་འདས་དཔལ་རྡོ་རྗེ་སེམས་དཔའ་སྐུ་མདོག་དཀར་པོ་གངས་ཀྱི་རི་བོ་ལ་ཉི་མ་ཤར་བ་ལྟ་བུའི་གཟི་བརྗིད་འབར་བ། སྒེག་ཅིང་འཛུམས་ལ་རབ་ཏུ་རྒྱས་པའི་ཞལ་ཅན་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་མཛེས་པར་བྱས་པ། ཞལ་གཅིག་ཕྱག་གཉིས་པ། གཡས་རྡོ་རྗེ་རྩེ་ལྔ་པ་ཐུགས་ཀར་གསོར་ཞིང་གཡོན་དྲིལ་བུ་དཀུར་བརྟེན་པའི་ཚུལ་གྱིས་ཤེས་རབ་མ་ལ་འཁྱུད་པ་ཞབས་སེམས་དཔའི་སྐྱིལ་མོ་ཀྲུང་གིས་བཞུགས་ཤིང་། ཡུམ་རྡོ་རྗེ་སྙེམས་མ་དཀར་པོ་གྲི་གུག་དང་ཐོད་པ་འཛིན་པས་མགུལ་ནས་འཁྱུད་པ་དང་མཉམ་པར་སྦྱོར་བ། གཉིས་ཀའང་ང་རྒྱལ་མ་སྤངས་གནས་སུ་དག་པའི་བརྡར་ཕྱག་ཞབས་རྣམས་གསེར་ཞུན་མ་ལྟར་མཉེན་པ། ཞེ་སྡང་མ་སྤངས་གནས་སུ་དག་པའི་བརྡར་ཕྱག་སོར་རྣམས་སྦྲུལ་གྱི་མཇུག་མ་ལྟར་ལྕུག་པ། འདོད་ཆགས་མ་སྤང་གནས་སུ་དག་པའི་བརྡར་ཐབས་ཤེས་ཕན་ཚུན་གཡུ་ལྗང་ལྟར་འཁྲིལ་བ། གཏི་མུག་མ་སྤངས་གནས་སུ་དག་པའི་བརྡར་སྐུ་སྐེད་ཐང་ཤིང་ལྟར་དྲང་ཞིང་ལྡེམ་པ། ཕྲག་དོག་མ་སྤངས་གནས་སུ་དག་པའི་བརྡར་བྱིས་པ་ལོ་བརྒྱད་པ་ལྟར་གཞོན་ཤ་ཆགས་པ། ཐུགས་ལ་མ་རིག་པ་མེད་པའི་རྟགས་སུ་ཟླ་བ་ལྟར་གསལ་བ། ཆེ་བའི་ཡོན་ཏན་ལྷུན་གྱིས་གྲུབ་པའི་རྟགས་སུ་ཉི་མ་ལྟར་འཚེར་བ། མཚན་དཔེ་ཡོངས་སུ་རྫོགས་པའི་བརྡར་དབུས་ཀྱི་རི་བོ་མཆོག་རབ་ལྟར་ལྷུན་སྟུག་པ། ཐམས་ཅད་ཟིལ་གྱིས་གནོན་པའི་བརྡར་སེང་གེ་འབུམ་གཞིབས་པ་ལྟར་གཟི་བྱིན་དང་ལྡན་པ་སྟེ་ཞི་བའི་ཉམས་དགུ་དང་ལྡན་པ། དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས། ཚི་གུ་སྟེ་དར་སྣ་ཚོགས་པའི་སྨད་དཀྲིས། དར་སྣ་ལྔའི་ཅོད་པཎ། དར་མཐིང་ཁྲའི་ཟི་ལྡིར་ཏེ་རྒྱབ་འཕན། གར་གྱི་ཕུ་དུང་སྟེ་དར་གྱི་ཆས་གོས་ལྔ་དང་། རིན་པོ་ཆེ་སྣ་ཚོགས་པའི་དབུ་རྒྱན། སྙན་ཆ། མགུལ་རྒྱན། སེ་མོ་དོ། ཕྱག་གདུབ་ཞབས་གདུབ། སྐ་རགས། དོ་ཤལ་ཏེ་རིན་པོ་ཆེའི་རྒྱན་བརྒྱད་ཀྱིས་མཛེས་པར་སྤྲས་པ། འོད་ཟེར་མཐའ་ཡས་མུ་མེད་པར་སྤྲོ་ཞིང་། བདེ་སྟོང་གཉིས་སུ་མེད་པའི་ངོ་བོར་བཞུགས་པ། དེའི་ཐུགས་ཀར་པད་ཟླའི་སྟེང་དུ་རྡོ་རྗེ་དཀར་པོ་རྩེ་ལྔ་པ་འགྲེང་སྟབས་སུ་ལངས་པའི་ལྟེ་བར་ཧཱུྃ་དཀར་པོ། དེ་ལ་ཡིག་བརྒྱའི་སྔགས་ཕྲེང་དཀར་པོས་གཡས་སུ་བསྐོར་བར་དམིགས་ཏེ། དེ་ཉིད་སྐྱབས་གནས་ཀུན་འདུས་སུ་མོས་པ་རྟེན་གྱི་སྟོབས། སྔར་བྱས་ཀྱི་སྡིག་པ་མི་དགེ་བའི་ལས་སྤྱི་དང་བྱེ་བྲག་སྡོམ་པ་གསུམ་གྱི་བསྲུང་མཚམས་དང་འགལ་བ་ཁྱད་པར་བླ་མ་རྡོ་རྗེ་སློབ་དཔོན་གྱི་སྐུ་གསུང་ཐུགས་དང་འགལ་བའི་ལས་རང་གིས་བྱས་པ་དང་། གཞན་ལ་བཅོལ་བ་དང་། གཞན་གྱིས་བྱས་པ་ལ་ཡི་རང་བགྱིས་པ་སོགས་དངོས་སུ་གང་དྲན་པ་རྣམས་གཙོ་བོར་ཡིད་ཡུལ་དུ་བྱས་ཏེ་ངོ་ཚ་དང་གནོང་འགྱོད་ཀྱི་བསམ་པ་དྲག་པོས་བླ་མ་རྡོ་རྗེ་སེམས་དཔའ་ཁྱེད་མཁྱེན་ནོ། །བདག་དང་སེམས་ཅན་ཐམས་ཅད་ཀྱིས་མི་ཤེས་པ་དང་། མ་གུས་པ་དང་། ཉོན་མོངས་པ་མང་བའི་དབང་གིས་སྔོན་ཆད་སྡིག་པའི་ལས་ཅི་དང་ཅི་བགྱིས་པ་ཐམས་ཅད་མི་འཆབ་བོ། །མི་སྦེད་དོ། །མཐོལ་ལོ་བཤགས་སོ། །སྡིག་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ་སྙམ་དུ་སྙིང་ཁུང་རུས་པའི་གཏིང་ནས་བསམ་པ་ནི་སུན་འབྱིན་པའི་སྟོབས་སོ། །ད་ཕྱིན་ཆད་ལས་ཅི་ལ་ཐུག་ཀྱང་འཆི་བ་སྲོག་ལ་བབས་ཀྱང་། དེ་ལྟ་བུའི་སྡིག་པའི་ལས་དངོས་སུ་ལྟ་ཅི། ཐ་ན་རྨི་ལམ་དུ་ཡང་མི་བགྱིད་དོ། །དེ་ལྟར་བགྱིད་པར་མ་གྱུར་ཅིག་སྙམ་པ་སྡིག་པ་ལས་སླར་ལྡོག་པའི་སྟོབས་སོ། །སྔར་བྱས་ཀྱི་གཉེན་པོར་དཔལ་རྡོ་རྗེ་སེམས་དཔའི་སྒོམ་བཟླས་ལ་སྤྱོད་པ་གཉེན་པོ་ཀུན་ཏུ་སྤྱོད་པའི་སྟོབས་ཏེ། དེ་ལྟར་སྟོབས་བཞིའི་དམིགས་གནད་དྲན་བཞིན་པའི་ངང་ནས་ཡི་གེ་བརྒྱ་པ་དག་ཅིང་གསལ་ལ་མི་ཚིག་སོགས་ཀྱི་བར་མ་ཆོད་པར་བརྒྱ་སྟོང་ཁྲི་འབུམ་སོགས་སྡིག་སྒྲིབ་དག་པའི་རྟགས་མཚན་མངོན་དུ་མ་གྱུར་གྱི་བར་དུ་བཟླ་བར་བྱའོ། །དེ་ལྟར་བཟླས་པའི་ཚེ་ཐོག་མར་ཐུགས་ཀའི་ས་བོན་དང་། ཞབས་ཀྱི་མཐེ་བོང་གི་རྩེ་དང་། ཡབ་ཡུམ་མཉམ་སྦྱོར་གྱི་མཁའ་གསང་དང་མཐར་སྐུ་ཡི་ཆ་ཐམས་ཅད་ནས་བྱང་སེམས་བདུད་རྩིའི་ཆུ་རྒྱུན་དཀར་ཆིལ་ཆིལ་བབ་པ་པད་སྡོང་ལ་འཁྲིལ་བའི་ཚུལ་དུ་བྱུང་བ་རང་གི་ཚང་བུག་ནས་ཞུགས། ནད་ཐམས་ཅད་རྣག་ཁྲག་དང་ལྗན་ལྗིན། གདོན་ཐམས་ཅད་སྡིག་སྦྲུལ་སོགས་སྲོག་ཆགས་ཕྲ་མོའི་རྣམ་པ། སྡིག་སྒྲིབ་ཐམས་ཅད་སོལ་ཁུའམ་དུད་ཁུའི་རྣམ་པ་ཅན་ནག་ཉིལ་གྱིས་རང་གི་དབང་པོའི་སྒོ་དང་བ་སྤུའི་བུ་ག་ཐམས་ཅད་ནས། མདོར་ན་ཕུ་ཆུ་དྲག་པོས་ཐལ་བ་བདས་པ་བཞིན་ཕྱིར་སང་སང་སོང་ནས་རང་ལུས་ཤེལ་གོང་དག་པ་ལྟར་གྱུར་བར་མོས། སླར་ཡང་སྔར་ལྟར་གསོལ་བ་བཏབ་པས་བྱང་སེམས་བདུད་ཅིའི་རྒྱུན་དེས་རང་གི་སྤྱི་གཙུག་ནས་རྐང་སེན་གྱི་བར་དེ་སྲིད་དུ་མེར་ཁྲིག་གེ་ལྟེམ་ཙེར་གྱིས་གང་བས་སྒོ་གསུམ་གྱི་སྒྲིབ་པ་བག་ཆགས་དང་བཅས་པ་བྱང་། སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་དབང་དང་དངོས་གྲུབ་ཐོབ། ཁྱད་པར་དངོས་གཞིའི་ལམ་གྱི་ཡོན་ཏན་མཐའ་དག་རྩོལ་མེད་དུ་སྐྱེ་ནུས་པའི་སྣོད་རུང་དུ་བྱིན་གྱིས་བརླབས་པར་མོས། མཐར་ཐུན་འཇོག་པ་ན། མགོན་པོ་བདག་ནི་སོགས་ཀྱིས་གསོལ་བ་བཏབ་པས་བླ་མ་རྡོ་རྗེ་སེམས་དཔའ་ཉིད་དགྱེས་པས་ཞལ་འཛུམ་པ་དང་བཅས་ཏེ། འོ་རིགས་ཀྱི་བུ། ཁྱོད་ཀྱི་སྡིག་སྒྲིབ་ཐམས་ཅད་དག་པ་ཡིན་ནོ། །ཞེས་གནང་བ་བྱིན་པར་བསམས་ལ། སྤྱི་བོའི་བླ་མ་རྡོ་རྗེ་སེམས་དཔའ་ཉིད་དབུའི་ནོར་བུ་ནས་མར་འོད་དུ་ཞུ། གདན་པདྨ་ནས་ཡར་འོད་དུ་ཞུ། ཐུགས་འོད་ལྔའི་གོང་བུའི་རང་བཞིན་དུ་གྱུར་པ་དེ་ཉིད་རང་གི་ཚང་བུག་ནས་ཞུགས་སྙིང་དབུས་སུ་སིབ་ཀྱིས་ཐིམ་པར་བསམས་ལ་སྡིག་སྒྲིབ་སྦྱང་བྱ་སྦྱོང་བྱེད་ཀྱི་ངོ་བོ་ལ་ཅེར་གྱིས་བལྟས་ཏེ་མཐར་འཁོར་གསུམ་ཡང་དག་བརྗོད་བྲལ་བདེ་བ་ཆེན་པོའི་ངང་དུ་ཅི་གནས་སུ་མཉམ་པར་བཞག་རྗེས་བསྔོ་བ་བྱའོ། །གསུམ་པ་རྗེས་སྡིག་སྒྲིབ་དགེ་བའི་རྟགས་ཚད་ཕན་ཡོན་བསྟན་པ་ནི། དེ་ལྟར་སྟོབས་བཞིའི་དམིགས་པ་དང་ལྡན་པའི་སྡིག་པ་བཤགས་པས་དག་པའི་རྟགས་རྨི་ལམ་དུ་ཡོང་སྟེ། སྐུལ་བྱེད་ཀྱི་གཟུངས་ལས། རྨི་ལམ་ན་ཟས་ངན་སྐྱུགས་པ་དང་། ཞོ་དང་འོ་མ་སོགས་འཐུང་བ་དང་། ཉི་མ་དང་ཟླ་བ་མཐོང་བ་དང་། ནམ་མཁའ་ལ་འགྲོ་བ་དང་། མེ་འབར་བ་དང་། མ་ཧེ་དང་མི་ནག་པོ་ཐུབ་པ་དང་། དགེ་སློང་དང་དགེ་སློང་མའི་དགེ་འདུན་མཐོང་བ་དང་། འོ་མ་འབྱུང་བའི་ཤིང་དང་གླང་པོ་དང་ཁྱུ་མཆོག་དང་རི་དང་སེང་གེའི་ཁྲི་དང་ཁང་བཟང་གི་སྟེང་དུ་འཛེགས་པ་དང་། ཆོས་ཉན་པ་ལ་སོགས་པ་རྨིས་ན་སྡིག་པ་དང་བྲལ་བར་འགྱུར་ཏེ། ཞེས་གསུངས་པ་དང་། གཞན་ཡང་ཁྲུས་བྱས་པ་དང་། གོས་དཀར་པོ་གྱོན་པ་དང་། བླ་མ་དང་ཡི་དམ་གྱི་ཞལ་མཐོང་བ་དང་། གསུང་ཐོས་པ་སོགས་དང་། དངོས་སུ་ཡང་ཉམས་དགའ་ཞིང་རིག་པ་དྭངས་པ་དང་། དགེ་སྦྱོར་འཕེལ་བ་དང་། ཤེས་རབ་དང་སྙིང་རྗེ་རྩོལ་མེད་དུ་སྐྱེ་བ་སོགས་ལམ་གྱི་ཡོན་ཏན་ཅི་རིགས་པ་རྒྱུད་ལ་སྐྱེ་བར་འགྱུར་རོ། །དེ་ལྟར་སྟོབས་བཞི་ལ་བརྟེན་པས་སྡིག་སྒྲིབ་དག་པའི་ཤེས་བྱེད་དམ་ཕན་ཡོན་ཡང་། སྔོན་བྲམ་ཟེའི་ཁྱེའུ་མི་གདུང་བ་སོར་མོའི་ཕྲེང་བ་ཅན་ཞེས་བྱ་བ་མི་དགུ་བརྒྱ་དང་དགུ་བཅུ་རྩ་དགུ་བསད་པའི་སྡིག་ཅན་ཞིག་ཀྱང་རྣམ་པར་སུན་འབྱིན་པའི་སྟོབས་ལ་བརྟེེན་ནས་བཤགས་པས་སྡིག་པ་བྱང་ནས་ཚེ་དེ་ཉིད་ལ་དགྲ་བཅོམ་པ་ཐོབ་པ་དང་དེ་བཞིན་དུ་ཁྱེའུ་བདེ་བྱེད་ཅེས་བྱ་བ་མ་བསད་པའི་སྡིག་ཅན་ཞིག་ཀྱང་གཉེན་པོ་ཀུན་ཏུ་སྤྱོད་པའི་སྟོབས་ཀྱིས་སྡིག་པ་དག་ནས་ལྷར་སྐྱེས་ཏེ་འཕགས་པ་རྒྱུན་ཞུགས་ཀྱི་འབྲས་བུ་ཐོབ་པ་དང་། གཅུང་དགའ་བོ་ཞེས་བྱ་བ་བུད་མེད་ལ་ཆགས་པའི་སྡིག་ཅན་ཀྱང་སྡོམ་པའི་སྟོབས་ཀྱིས་སྡིག་པ་དག་ནས་དགྲ་བཅོམ་པ་ཐོབ་པ་དང་། རྒྱལ་བུ་མཐོང་ལྡན་ཞེས་པ་ཕ་བསད་པའི་སྡིག་ཅན་ཞིག་ཀྱང་རྟེན་གྱི་སྟོབས་ཀྱིས་སྡིག་པ་དག་ནས་བྱང་ཆུབ་སེམས་དཔར་གྱུར་པ་ཡིན་ཏེ། བཤེས་སྤྲིང་ལས། གང་ཞིག་སྔོན་ཆད་བག་མེད་གྱུར་པ་ལས། །ཕྱིས་ནས་བག་དང་ལྡན་པ་གྱུར་དེ་ཡང་། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་སོ། །གཞན་ཡང་གསེར་འོད་དམ་པའི་མདོ་ལས། གང་གིས་བསྐལ་པ་སྟོང་རྣམས་སུ། །སྡིག་པ་ཤིན་ཏུ་མི་བཟད་བགྱིས། །ལན་གཅིག་རབ་ཏུ་བཤགས་པ་ཡིས། །དེ་དག་ཐམས་ཅད་བྱང་བར་འགྱུར། །ཞེས་དང་། བྱམས་པ་སེང་གེ་སྒྲ་ཆེན་པོས་ཞུས་པའི་མདོ་ལས། མི་ཤེས་པས་ནི་གང་བྱས་པའི། །སྡིག་པའི་ལས་ནི་བཤགས་པར་བགྱི། །མཁས་པས་ཉེས་པ་བཤགས་ན་ནི། །ལས་དང་ལྷན་ཅིག་མི་གནས་སོ། །ཞེས་དང་། ལས་རྣམ་འབྱེད་ལས། ཤིན་ཏུ་མི་བཟད་ལས་རྣམས་བྱས་པ་ནི། །བདག་ལ་རྣམ་པར་སྨོད་པས་བསྲབ་པར་འགྱུར། །རབ་ཏུ་བཤགས་དང་སྡོམ་པར་བྱེད་པ་ཡིས། །དེ་དག་ཤིན་ཏུ་རྩ་ནས་བཏོན་པ་བཞིན། །ཞེས་གསུངས། ཁྱད་པར་དུ་རྡོར་སེམས་བསྒོམ་བཟླས་བགྱིས་པའི་ཕན་ཡོན་ཀྱང་། གསང་བ་སྤྱི་རྒྱུད་ལས། སངས་རྒྱས་ཀུན་གྱི་སྐུ་གཅིག་པུ། །རྡོ་རྗེ་སེམས་དཔའ་ལ་དམིགས་ནས། །ཡི་གེ་བརྒྱ་པ་ཆོ་ག་བཞིན། །ཉིན་རེ་བཞིན་ཡང་དུས་དྲུག་ཏུ། །ཉི་ཤུ་རྩ་གཅིག་རེ་རེ་བཟླས། །དེ་ཡིས་ལྟུང་སོགས་བྱིན་བརླབས་ནས། །འཕེལ་བར་ནམ་ཡང་མི་འགྱུར་རོ། །འབུམ་ཕྲག་གཅིག་ནི་བཟླས་པ་ན། །སྒྲུབ་པ་མཆོག་གི་ལེགས་བཤད་པས། །རྣམ་པར་དག་པའི་བདག་ཉིད་འགྱུར། །ཞེས་དང་། མེ་ཏོག་བཀོད་པའི་རྒྱུད་ལས། བླ་མ་རྡོ་རྗེ་སེམས་དཔའ་སྒོམ། །རང་བྱུང་ཡི་གེ་བརྒྱ་པའི་མཐུས། །སྒྲིབ་པ་རྣམ་གཉིས་བྱང་བར་འགྱུར། །ཞེས་དང་། དགོངས་པ་ཚིག་གསུམ་པའི་རྒྱུད་ལས། རྡོ་རྗེ་སེམས་དཔའ་བསྒོམ་ནས་ནི། །སྔགས་ཀྱང་རབ་ཏུ་བཟླ་བྱེད་པ། །དེ་ཡི་སྡིག་ཀུན་བྱང་ནས་ནི། །རྡོ་རྗེ་སེམས་དཔའ་འདྲ་བར་འགྱུར། །ཞེས་གསུངས་པ་བཞིན་ནོ། །ཤིན་ཏུ་མི་བཟད་སྒྲིབ་གཉིས་མུན་ཚོགས་ཀྱིས། །ཡོངས་ཁེབས་སྲིད་པའི་ནགས་ན་ཉམས་ཉེས་པ། །སྟོབས་བཞི་ནོར་བུའི་སྒྲོན་མེས་རབ་བསལ་ནས། །རྣམ་གྲོལ་ཐར་གླིང་བགྲོད་ཅིག་ཤེས་ལྡན་རྣམས། །རྡོར་སེམས་བསྒོམ་བཟླས་ཀྱི་ཁྲིད་ཀྱི་སྐབས་སོ། །། ། ཚོགས་གཉིས་རྫོགས་པར་བྱེད་པ་མཎྜལ་གྱི་ཁྲིད།༈ བཞི་པ་ཚོགས་གཉིས་རྫོགས་པར་བྱེད་པ་མཎྜལ་གྱི་ཁྲིད་ལ་གསུམ། གོ་དོན་སྤྱིར་བཤད་པ། འབུལ་ཚུལ་བྱེ་བྲག་ཏུ་བསྟན་པ། ཞར་བྱུང་དཀོན་མཆོག་མཆོད་པའི་ཕན་ཡོན་ཅུང་ཟད་བཤད་པའོ། །དང་པོ་ནི། བདག་ལེགས་སུ་འདོད་པ་རྣམས་ཀྱིས་དོན་དུ་གཉེར་བྱའི་མཆོག་རྣམ་པ་ཐམས་ཅད་མཁྱེན་པའི་འབྲས་བུའང་། རྒྱུ་ཚོགས་གཉིས་ལ་མ་བརྟེན་པར་མངོན་དུ་བྱེད་མི་ནུས་ཤིང་། ཁྱད་པར་དངོས་གཞིའི་ཉམས་ལེན་གྱི་སྙིང་པོ་བདག་མེད་རྟོགས་པའི་ཤེས་རབ་བམ་ཟབ་མོ་སྟོང་པ་ཉིད་བརྗོད་བྲལ་ལྷན་ཅིག་སྐྱེས་པའི་ཡེ་ཤེས་ཀྱང་ཚོགས་གཉིས་ཀྱི་བྱེད་རྐྱེན་ལ་རག་ལས་པ་ཡིན་ཏེ། ཤེར་ཕྱིན་ལས། ཇི་སྲིད་ཚོགས་གཉིས་དམ་པ་དེ་ནི་མ་རྫོགས་པར། །དེ་སྲིད་སྟོང་ཉིད་དམ་པ་དེ་ནི་རྟོགས་མི་བྱེད། །ཅེས་དང་། ཞི་བྱེད་ཆུ་ཀླུང་རོལ་པའི་མདོ་ལས། དོན་དམ་ལྷན་ཅིག་སྐྱེས་པའི་ཡེ་ཤེས་ནི། །ཚོགས་བསགས་སྒྲིབ་པ་སྦྱངས་པའི་ལག་རྗེས་དང་། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བཙལ་བ་རྨོངས་པར་ཤེས་པར་བྱ། །ཞེས་སོ། །དེ་ལ་ཚོགས་གཉིས་བསག་ཚུལ་གྱི་སྒོ་མང་ཡང་། ཐབས་སླ་ཞིང་ཕན་ཡོན་ཆེ་བ་ནི་མཎྜལ་འབུལ་བ་ཉིད་ཡིན་ཏེ། རྒྱུད་ལས། སངས་རྒྱས་ཞིང་ཁམས་ཐམས་ཅད་ལ། །སྟོང་གསུམ་ཞིང་ཁམས་མ་ལུས་པ། །འདོད་པའི་ཡོན་ཏན་བརྒྱན་པ་ཡིས། །མཆོད་ན་སངས་རྒྱས་ཡེ་ཤེས་རྫོགས། །ཞེས་གསུངས། དེ་ལ་ཐོག་མར་གོ་བའི་གནད་ཅུང་ཟད་མ་ཤེས་ན་མི་རུང་བས་དེ་བཤད་པ་ལ་ལྔ། མ་ཕུལ་བའི་སྐྱོན། ཕུལ་བའི་དགོས་ཆེད། ནམ་འབུལ་བའི་དུས། ཇི་ལྟར་འབུལ་བའི་ཚུལ། དེ་ལྟར་ཕུལ་བའི་ཕན་ཡོན་ནོ། །དང་པོ་ནི། རྒྱུ་བསོད་ནམས་ཀྱི་ཚོགས་ལ་མ་བརྟེན་ན་འབྲས་བུ་ཡེ་ཤེས་ཀྱི་ཚོགས་ཀྱང་རྫོགས་པར་མི་འགྱུར་ལ་དེ་མ་རྫོགས་ན་གནས་སྐབས་དང་མཐར་ཐུག་གི་འདོད་པའི་འབྲས་བུ་གང་ཡང་གྲུབ་པར་མི་འགྱུར་ཏེ། ལུང་ལས། སྐྱེས་བུ་གང་དག་བླ་མེད་ཐེག་ཆེན་སྒྲུབ་འདོད་ཀྱང་། །བླ་མ་ལྷ་ལ་གུས་པས་མཎྜལ་མ་ཕུལ་ན། །འདོད་པའི་དོན་ཉིད་ཅིག་ཆར་འགྲུབ་པར་མི་འགྱུར་ཞིང་། །མཐར་ཐུག་རྣམ་དག་ཞིང་ཁམས་བགྲོད་པའི་དུས་འགྱང་ངོ་། །ཞེས་དང་། ཚོགས་གཉིས་ལམ་ལ་མ་བརྟེན་པར། །གང་ཡང་འགྲུབ་པར་མི་འགྱུར་རོ། །ཞེས་སོ། །གཉིས་པ་ནི། དེ་ལས་ལྡོག་སྟེ། གནས་སྐབས་སུ་འདོད་པའི་དོན་འགྲུབ་ཅིང་མཐར་ཐུག་བྱང་ཆུབ་ཀྱི་འབྲས་བུ་འབྱིན་པ་ཡིན་ཏེ། སློབ་དཔོན་འཇམ་དཔལ་གྲགས་པས་མཛད་པའི་སྙིང་པོ་རྒྱན་ལས། མཎྜལ་མཆོད་རྟེན་བསྐོར་བའི་ལས། །སྤྱིན་སྲེག་དང་ནི་རབ་གནས་དང་། །འབྱུང་པོ་ཆེ་དང་དམན་པ་ཡི། །གཏོར་མའི་ལས་ལ་བརྩོན་བྱས་ན། །ཚེ་དང་བསོད་ནམས་འཕེལ་བར་འགྱུར། །བྱང་ཆུབ་ཀྱི་ནི་རྒྱུ་ཉིད་ཕྱིར། །འབད་དེ་དེ་ཡི་ལས་བྱའོ། །ཞེས་སོ། །གསུམ་པ་ནི། སྤྱིར་དུས་དང་རྣམ་པ་ཐམས་ཅད་དང་། ཁྱད་པར་ལྷ་དང་བླ་མ་ནམ་དྲན་པའི་དུས་སོགས་ཏེ། ཨོ་རྒྱན་ཆེན་པོས། ཐར་པ་དང་ཐམས་ཅད་མཁྱེན་པ་མྱུར་དུ་སྒྲུབ་པར་འདོད་པའི་སྐྱེས་བུ་གང་དང་གང་། དུས་དང་རྣམ་པ་ཐམས་ཅད་དུ་མཎྜལ་དབུལ་བ་ལ་རབ་ཏུ་བརྩོན་པ་ཤིན་ཏུ་གལ་ཆེའོ། །ཞེས་དང་། ལྷ་དང་བླ་མ་ནམ་དྲན་དུས་ཉིད་དམ། །ཚོགས་པ་རྒྱ་མཚོའི་དབུས་དང་ཆོས་འཕེལ་ཚེ། །ཆོས་སྤྱོད་ཀུན་གྱི་སྙིང་པོ་མཎྜལ་དབུལ། །ཞེས་སོ། །བཞི་པ་ལ་གསུམ་སྟེ། ཕྱི་ལྟར་འབུལ་བ། ནང་ལྟར་འབུལ་བ། གསང་བ་ལྟར་འབུལ་བའོ། །དང་པོ་ལ་གཉིས། སྒྲུབ་པའི་མཎྜལ་དང་། མཆོད་པའི་མཎྜལ་ལོ། །དང་པོ་ལ་གསུམ། མཎྜལ་གྱི་རྒྱུ། ཚོམ་བུའི་རྒྱུ། བཤམས་ཤིང་བསྐྱེད་པའོ། །དང་པོ་ནི། མཎྜལ་གྱི་རྒྱུ་རབ་གསེར་དངུལ། འབྲིང་དུང་དང་མཁར་བ་སོགས་ཕལ་བ། ཐ་མ་ས་རྡོ་ཤིང་གསུམ་སྟེ་རང་རང་གི་འབྱོར་པ་དང་བསྟུན་གང་འཛོམས་ལ། ཚད་ཀྱང་གསེར་ཡིན་ན་སོར་བཞི་དང་། དངུལ་སོགས་མཛུབ་གང་། མཁར་བ་སོགས་གཞན་ཕལ་པ་ལ་ཁྲུ་གང་ལས་མི་ཆུང་བར་གསུངས་སོ། །གཉིས་པ་ནི། ཚོམ་བུའི་རྒྱུ་ཡང་རང་རང་གི་འབྱོར་འཁོས་དང་བསྟུན་ཏེ། རབ་རིན་ཆེན། འབྲིང་སྨན་གྱི་རིགས། ཐ་མ་འབྲུ་སྣ་ཚོགས། དེ་ཡང་མ་འཛོམས་ན་རྡེའུ་དང་སྲན་{སྲེག}མ་སོགས་ལས་ཀྱང་རུང་སྟེ། གང་ཡང་ངོམ་ཆོས་དང་སེར་སྣ་དང་སླ་ཆོས་སོགས་ཀྱི་སྐྱོན་གྱིས་མ་སྦགས་པ་གལ་ཆེའོ། །གསུམ་པ་ནི། རང་གི་ལག་གིས་རྡུལ་དང་བྲལ་བར་ལེགས་པར་ཕྱིས་པའི་མཎྜ་ལར་དྲི་དང་བ་བྱུང་གི་ཆུས་བྱུག་སྟེ། ཚོམ་བུ་དཀྱིལ་འཁོར་གྱི་ལྷའི་གཙོ་བོའི་གྲངས་སམ་སྤྱི་ཙམ་དུ་དབུས་དང་ཕྱོགས་བཞི་སྟེ་ལྔ་བཀོད་ལ་མདུན་སྟེགས་མཐོ་བར་བཞུགས་སུ་གསོལ་ལ། འཛོམས་ན་ཅི་འབྱོར་པའི་མཆོད་པས་ཀྱང་མཐའ་བསྐོར་ལ་བཤམས། ཚོམ་བུ་རྣམས་རང་གཞུང་གི་དཀྱིལ་འཁོར་གྱི་ལྷ་ཚོགས་སུ་གསལ་བའམ་སྤྱི་ཙམ་དུ་གོང་གི་སྐྱབས་ཡུལ་གྱི་སྐབས་ལྟར་གསལ་བཏབ། སྤྲོ་ན་ཡེ་ཤེས་པ་སྤྱན་དྲངས་ཤིང་བསྟིམ་པའི་ཆོ་ག་མཛད་པའི་ལུགས་ཀྱང་ཡོད་ལ། མི་སྤྲོ་ན་ཁྲིད་གཞུང་ཕལ་ཆེར་དུ་མ་གསུངས་པས་མི་དགོས། གལ་ཏེ་འབྱོར་པ་དམན་པས་མཎྜལ་གཅིག་ལས་མ་འབྱོར་པའམ་འཕྲལ་དུ་འབུལ་དགོས་ཀྱིས་མ་འཛོམས་ཀྱང་། ཚོགས་ཞིང་རྣམ་མདུན་མཁར་བསམ་པས་ཀྱང་དོན་འགྲུབ་སྟེ། གཙོ་བོར་རང་རང་གི་མོས་པའི་རྗེས་སུ་འགྲོ་བའི་ཕྱིར་ཏེ། ཡུམ་བར་མ་ལས། གང་ལ་ལ་ཞིག་གིས་དེ་བཞིན་གཤེགས་པ་ཡིད་ལ་བྱས་ཏེ། སངས་རྒྱས་ལ་ཕྱག་འཚལ་ལོ། །ཞེས་བརྗོད་ན་ཡང་དེའི་མདུན་ན་དེ་བཞིན་གཤེགས་པ་བཞུགས་སོ། །ཞེས་དང་། འཇམ་དཔལ་ཞིང་གི་ཡོན་ཏན་བསྟན་པ་ལས། ཆོས་རྣམས་ཐམས་ཅད་རྐྱེན་བཞིན་ཏེ། །འདུན་པའི་རྩེ་ལ་རབ་ཏུ་གནས། །གང་གིས་སྨོན་ལམ་ཅི་བཏབ་པ། །དེ་འདྲའི་འབྲས་བུ་ཐོབ་པར་འགྱུར། །གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་དེ་བཞུགས་ཏེ། །རྟག་པར་བྱིན་གྱིས་རློབ་བྱེད་ཅིང་། །ཉེས་པ་ཀུན་ལས་རྣམ་པར་གྲོལ། །ཞེས་དང་། ཏིང་འཛིན་རྒྱལ་པོ་ལས། འཆག་དང་འདུག་དང་འགྲེང་དང་ཉལ་བ་ན། །མི་གང་ཐུབ་པའི་ཟླ་བ་དྲན་བྱེད་པ། །དེ་ཡི་མདུན་ན་རྟག་ཏུ་སྟོན་པ་བཞུགས། །དེ་ནི་རྒྱ་ཆེན་མྱ་ངན་འདའ་བར་འགྱུར། །ཞེས་དང་། གཞན་ཡང་། མོས་པ་གང་གི་སླད་དུ་འབྱོན་པ་ནི། །རྒྱལ་བ་སྲས་དང་བཅས་པའི་ཐ་ཚིག་ཡིན། །ཞེས་སོ། །ཡང་ན་མཎྜལ་གཅིག་པོ་དེར་ཐོག་མར་སྒྲུབ་པའི་མཎྜལ་ལྟར་ཚོམ་བུ་བཀོད་ཅིང་། དེ་ལ་ཚོགས་ཞིང་བསྐྱེད་བསྟིམ་མཆོད་ཅིང་གསོལ་བ་བཏབ་རྗེས་ཚོགས་ཞིང་ནམ་མཁར་བཏེགས་ནས་ཚོམ་བུ་བསྡུས་ཏེ་བྱི་དོར་བྱས་ལ་སླར་མཆོད་པའི་མནྜལ་བྱ་བར་པདྨའི་ལམ་རིམ་ལས་གསུངས་སོ། །གཉིས་པ་མཆོད་པའི་མཎྜལ་ནི། མཎྜལ་དང་ཚོམ་བུའི་རྒྱུ་སོགས་སྔར་བཤད་པ་བཞིན་ལ། སྐབས་འདིར་མཎྜལ་འབུམ་ཕྲག་སོགས་འབུལ་ན། འབྱོར་པ་ཡོད་ན་མཎྜལ་གྱི་ཚོམ་བུ་རྣམས་གསར་དུ་བརྗེ་བ་ལས་རྙིང་པ་སླར་མི་འབུལ་ཞིང་། མཆོད་འབྲུ་རྙིང་པ་རྣམས་རྟེན་གྱི་དྲུང་དུ་སྤུངས་པའམ་ངན་སློང་གཞན་ལ་སྦྱིན་པ་གཏོང་བ་ལས་རང་གི་ལོངས་མི་སྤྱད། འབྱོར་འཁོས་མེད་ན་ཚོམ་བུ་རྙིང་པ་ལ་གསར་པས་ཁ་གསོས་ཏེ་འབུལ་བ་ལ་གྲངས་བཟུང་། གང་ལའང་དངོས་པོ་དག་ཅིང་གཙང་ལ་སེར་སྣ་སོགས་ཀྱིས་མ་སྦགས་པ་གལ་ཆེའོ། །བླུགས་དུས་ཀྱང་མཎྜལ་རང་གིས་ལག་གཡོན་གྱིས་བཏེགས་ལ་གཡས་ཀྱིས་ཚོམ་བུ་འགོད། གྲངས་མང་པ་སོགས་ཀྱིས་ཧ་ཅང་ལག་གིས་འདེགས་མ་ནུས་ན་མདུན་སྟེགས་སུ་བཀོད་ནས་ཚོམ་བུས་ཁ་གསོ་བ་ཕྱག་ལེན་ནོ། །དེ་ལ་ཚོམ་བུའི་གྲངས་གསར་རྙིང་གི་ཁྱད་པར་སྐུ་གསུམ་གྱི་མཎྜལ་སོགས་དབྱེ་བསྡུ་མང་བས་སོ་སོའི་གཞུང་ལྟར་བྱ་ལ། འདིར་ཡོངས་ལ་གྲགས་ཆེ་བའི་ཕྱིར་འགྲོ་མགོན་ཆོས་རྒྱལ་འཕགས་པས་མཛད་པར་གྲགས་པའི་སོ་བདུན་མ་ལྟར་བཤད་ན། ཐོག་མར་ཡིག་བརྒྱ་དང་མཆོད་པའི་སྤྲིན་གཟུངས་འདོན་བཞིན་རང་གི་ལག་གིས་ཕྱི་སྟེ། དེ་ཡང་མ་དག་པ་ཞིག་ཕྱི་རྒྱུ་ཡོད་པ་ཁོ་ནའི་དོན་མིན། རང་རྒྱུད་ཀྱི་དྲི་མ་འདག་པའི་ཆེད་དུ་ཡིན། དེ་ནས་ལག་གཡོན་གྱིས་ནས་ཚོམ་ཞིག་བླངས་ལ་མཎྜལ་བཟུང་། ལག་གཡས་ཀྱིས་རང་རྒྱུད་བྱམས་སྙིང་རྗེའི་ཆུས་ཡོངས་སུ་བརླན་པའི་དོན་དུ་མཎྜལ་གྱི་གཞི་ལ་དྲི་དང་བ་བྱུང་གི་ཆུས་ཁྱབ་པར་བྱུགས་པ་བཞིན། ༀ་བཛྲ་བྷུ་མི་སོགས་བརྗོད་པས་དབང་ཆེན་གསེར་གྱི་ས་གཞི་ཁོད་སྙོམས་པ་ཡངས་ཤིང་རྒྱ་ཆེ་བར་བསམ། དེ་ནས་གཡས་པའི་མཐེབ་སྲིན་གྱིས་མེ་ཏོག་གི་ཚོམ་བུ་ཞིག་བཟུང་སྟེ། ༀ་བཛྲ་རེ་ཁེ་སོགས་ཀྱི་སྔགས་ཚིག་དང་སྦྲགས། མཎྜལ་གྱི་གཞི་ལ་གཡོན་དུ་བསྐོར་ཞིང་། མཐར་དབུས་སུ་བཞག་པས་དབང་ཆེན་གསེར་གྱི་ས་གཞིའི་མཐའ་བསྐོར་དུ་ལྕགས་ལས་གྲུབ་པའི་རིའི་ར་བས་ཡོངས་སུ་བསྐོར་བར་བསམ་སྟེ། བཟོས་པའི་ལྕགས་རི་འགོད་རྒྱུ་ཡོད་ནའང་སྐབས་འདིར་འགོད། དེ་ནས་རིའི་རྒྱལ་པོ་རི་རབ་ཞེས་བརྗོད་པའི་ཚེ། དེའི་དབུས་སུ་ཚོམ་བུ་ཆེ་བ་གཅིག་དགོད་ལ། དབང་ཆེན་གསེར་གྱི་ས་གཞིའི་དབུས་སུ། རིའི་རྒྱལ་པོ་རི་རབ་གྲུ་བཞི་པ་རྒྱུ་རིན་པོ་ཆེ་སྣ་བཞི་ལས་གྲུབ་པ་སྟེ། ཤར་ཕྱོགས་ཤེལ། ལྷོ་ཕྱོགས་བཻཌཱུཪྱ། ནུབ་པདྨ་རཱ་ག བྱང་གསེར་ལས་གྲུབ་པ། འོག་ནས་རིམ་པ་བཞིན་གཡུའི་རྡོ་རྗེ་ཅན་དང་། རྣམ་པར་སྤུངས་པ་དང་། ཤེལ་འོད་འབར་བ་དང་། འཁོར་ལོ་རྣམ་པར་བརྩེགས་པ་སྟེེ་བང་རིམ་བཞི་དང་ལྡན་པ། དེའི་ཕྱི་རོལ་ནས་རིམ་པར། གཉའ་ཤིང་འཛིན་དང་། གཤོལ་མདའ་འཛིན་དང་། སེང་ལྡེང་ཅན་དང་། ལྟ་ན་སྡུག་དང་། རྟ་རྣ་དང་། རྣམ་འདུད་དང་། མུ་ཁྱུད་འཛིན་ཏེ་གསེར་གྱི་རི་བདུན་གྱིས་གྲུ་བཞི་པར་བསྐོར་བ། དེ་དག་གི་བར་མཚམས་སུ། རོལ་པའི་མཚོ་བདུན་དང་། ཕྱི་རོལ་དུ་མཐའི་རྒྱ་མཚོ་དང་བཅས་པ་གསལ་གདབ། དེ་ནས་ཤར་ལུས་འཕགས་པོ་སོགས་གླིང་བཞི་འགོད་པའི་ཚེ། ཤར་རང་ཕྱོགས་སམ་ཡང་ན་འབུལ་ཡུལ་གྱི་ཕྱོགས་གཉིས་གང་བྱས་ཀྱང་འདྲ་ལ། གང་ལྟར་ཡང་ཤར་ནས་རིམ་པས་གཡས་བསྐོར་གྱིས་དགོད་ལ། དེ་ཡང་ཤར་ལུས་འཕགས་པོ་རྒྱུ་ནོར་བུ་ཆུ་ཤེལ་ལས་གྲུབ་པ་ཁ་དོག་དཀར་པོ་དབྱིབས་ཟླ་གམ་གྱི་བཅད་ཁ་ཆེ་བ་རི་རབ་དང་། འབུར་ངོས་ལྕགས་རིའི་ཕྱོགས་སུ་བསྟན་པ། ལྷོ་འཛམ་བུ་གླིང་རྒྱུ་བཻཌཱུཪྱ་ལས་གྲུབ་པ་ཁ་དོག་སྔོན་པོ་དབྱིབས་སོག་ཁ་འཕེལ་ཆེ་བ་རི་རབ་དང་ཆུང་བ་འཁོར་ཡུག་ལ་གཏད་པ། ནུབ་བ་གླང་སྤྱོད་རྒྱུ་པདྨ་རཱ་ག་ལས་གྲུབ་པ་ཁ་དོག་དམར་པོ་དབྱིབས་ཟླུམ་པོ། བྱང་སྒྲ་མི་སྙན་རྒྱུ་རིན་པོ་ཆེ་གསེར་ལས་གྲུབ་པ་ཁ་དོག་སེར་པོ་དབྱིབས་གྲུ་བཞི་པ། དེ་ནས་ལུས་དང་ལུས་འཕགས་སོགས་གླིང་གཡོག་དགོད་པའི་ཚེ། གླིང་རང་རང་གི་གཡས་གཡོན་དུ་གླིང་གཡོག་གཉིས་རེ་རིམ་པ་ལྟར་དགོད་ཅིང་། དེ་ཡང་ཤར་གླིང་གི་གཡས་སུ་ལུས་དང་། གཡོན་དུ་ལུས་འཕགས། དེ་བཞིན་དུ་ལྷོ་གླིང་གི་གཡས་གཡོན་དུ་རྔ་ཡབ་དང་རྔ་ཡབ་གཞན་གཉིས། ནུབ་གླིང་གི་གཡས་གཡོན་དུ་གཡོ་ལྡན་དང་། ལམ་མཆོག་འགྲོ་གཉིས། བྱང་གླིང་གི་གཡས་གཡོན་དུ་སྒྲ་མི་སྙན་དང་། སྒྲ་མི་སྙན་གྱི་ཟླ་གཉིས་བཅས་དེ་ཐམས་ཅད་ཀྱི་རྒྱུ་དབྱིབས་བཀོད་པ་རང་རང་གི་གཙོ་བོའི་གླིང་དང་འདྲ་བ་ལ་རྒྱ་ཁྱོན་དེའི་ཕྱེད་ཀྱིས་ཆུང་བའོ། །རི་གླིང་སོགས་ཀྱི་ཆ་ཚད་སྤྱིར་མངོན་པ་མཛོད་དང་དུས་ཀྱི་འཁོར་ལོ་ལས་གསུངས་པ་སོགས་གང་ལྟར་ཡང་མི་འགལ་མོད་རང་ལུགས་གཙོ་བོ་ཀུན་མཁྱེན་ཆེན་པོས་ཡིད་བཞིན་མཛོད་དུ་གསུངས་པ་ཉིད་གཟུང་བར་བྱ་དགོས་ཀྱང་འདིར་ཞིབ་པར་མ་སྨོས་ལ་མཎྜལ་གྱི་སྐབས་འདིར་གོང་དུ་བཤད་པ་ལ་དོན་འདུས་པ་ཡིན་ཞིང་། གལ་ཏེ་ཤེས་པར་འདོད་ན་གཞུང་དེ་ཉིད་དུ་བལྟ་བར་བྱའོ། །དེ་ནས་རིམ་པར་ཚོམ་བུ་དང་སྦྲགས། ཤར་གླིང་གི་ནང་དུ་རིན་པོ་ཆེའི་རི་བོ་རྒྱུ་རིན་པོ་ཆེ་སྣ་ཚོགས་ལས་གྲུབ་པ་རྒྱ་དཔང་ཚད་གཟུང་དུ་མེད་པ། ལྷོ་གླིང་གི་ནང་དུ་དཔག་བསམ་གྱི་ཤིང་རིན་པོ་ཆེ་སྣ་བདུན་གྱི་རང་བཞིན་ཅན་ཡལ་འདབ་མེ་ཏོག་འབྲས་བུའི་ཁུར་གྱིས་དུད་ཅིང་འདོད་པ་ཐམས་ཅད་འབྱུང་བའི་ཡོན་ཏན་དང་ལྡན་པ། ནུབ་གླིང་གི་ནང་དུ་འདོད་འཇོའི་བ་དམར་སེར་གཟུགས་བཟང་ཞིང་ལྟ་ན་སྡུག་པ་ཅི་འདོད་འཇོ་བའི་ཡོན་ཏན་དང་ལྡན་པ། བྱང་གླིང་གི་ནང་དུ་མ་རྨོས་ཤིང་མ་བཏབ་པར་རང་འཁྲུངས་པའི་ལོ་ཏོག་ཕུན་སུམ་ཚོགས་པའི་རོ་བཅུད་དང་ལྡན་པ། རིན་པོ་ཆེའི་རིའི་མདུན་དུ་འཛམ་བུའི་ཆུ་གསེར་ལས་གྲུབ་པའི་འཁོར་ལོ་རྩིབས་སྟོང་དང་ལྡན་པ་ཉི་མའི་གཟི་བྱིན་འཕྲོ་བ། དཔག་བསམ་ཤིང་གི་མདུན་དུ་ནོར་བུ་བཻཌཱུཪྱ་ཟུར་བརྒྱད་པ་འོད་ཟེར་གྱིས་དཔག་ཚད་བརྒྱའི་བར་གྱི་འཁོར་ཡུག་ཏུ་མུན་པ་སེལ་ཞིང་། ཚ་བའི་དུས་སུ་བསིལ་བ་དང་། གྲང་བའི་དུས་སུ་དྲོ་བའི་ནུས་པ་དང་ལྡན་ཞིང་འདོད་རྒུའི་ཆར་འབེབས་པ། འདོད་འཇོའི་བའི་མདུན་དུ་བཙུན་མོ་རིན་པོ་ཆེ་བུད་མེད་ཀྱི་ཉེས་པའི་སྐྱོན་རྣམས་དང་བྲལ་ཞིང་ཡོན་ཏན་ཐམས་ཅད་ཚང་བ་རེག་པ་ཙམ་གྱིས་བདེ་སྟོང་གི་ཡེ་ཤེས་བསྐྱེད་ནུས་པ། མ་རྨོས་པའི་ལོ་ཏོག་གི་མདུན་དུ་བློན་པོ་རིན་པོ་ཆེ་གཟུགས་བཟང་ཞིང་སྟོབས་རྩལ་དང་ཡོན་ཏན་ཕུན་སུམ་ཚོགས་པ་བདོག་དགུའི་འབྱོར་པ་ཟད་མི་ཤེས་ལ་ལོངས་སྤྱོད་པ། ལུས་དང་རྔ་ཡབ་གཞན་གཉིས་ཀྱི་བར་མཚམས་ཀྱི་ཤར་ལྷོར་གླང་པོ་རིན་པོ་ཆེ་ཁ་དོག་ཐལ་སྐྱ་མཆེ་བ་དྲུག་ལྡན། སྤྱི་གཙུག་དམར་ཞིང་དཔངས་མཐོ་བ་ནོར་བུའི་དྲྭ་བས་གཡོགས་པ་གླང་ཆེན་ཕལ་པ་སྟོང་གི་སྟོབས་ཤུགས་ཅན། རྔ་ཡབ་དང་ལམ་མཆོག་འགྲོའི་བར་མཚམས་ཀྱི་ལྷོ་ནུབ་ཏུ་རྟ་མཆོག་རིན་པོ་ཆེ་ཁ་དོག་སྔོན་པོའི་སྤུ་རྨ་བྱའི་མགྲིན་པ་ལྟར་སྡུག་ལ། ནད་གཅོང་མེད་ཅིང་ཡིད་དུ་འོང་བ། ཉིན་གཅིག་ལ་འཛམ་གླིང་ལན་གསུམ་དུ་བསྐོར་ནུས་པའི་བང་འགྲོས་ཅན། གཡོ་ལྡན་དང་གླིང་ཆུང་སྒྲ་མི་སྙན་གྱི་ཟླའི་བར་མཚམས་ཀྱི་ནུབ་བྱང་དུ་དམག་དཔོན་རིན་པོ་ཆེ་སྙིང་སྟོབས་དང་ལྡན་ཞིང་སྒྱུ་རྩལ་དང་གཡུལ་གྱི་བྱ་བ་ལ་མཁས་པས་དཔུང་ཚོགས་ཡན་ལག་བཞིའི་འགྲོ་ལྡོག་ལ་གོམས་ཤིང་གཟི་བྱིན་བཟོད་པར་དཀའ་བ་གོ་ཞུབ་ཀྱིས་སྤྲས་པ། སྒྲ་མི་སྙན་དང་ལུས་འཕགས་ཀྱི་བར་མཚམས་ཀྱི་བྱང་ཤར་དུ་གཏེར་ཆེན་པོའི་བུམ་པ་དགོས་འདོད་ཀུན་ཚང་རིན་པོ་ཆེའི་ཕྲས་སྤུད་པ། འཁོར་ལོ་རིན་པོ་ཆེའི་མདུན་ཏེ་ཤར་དུ་སྒེག་མོ་མ་དཀར་མོ་མཛེས་ཤིང་ལྟ་ན་སྡུག་པ། མེ་ལོང་འཛིན་ཅིང་སྒེག་པའི་རྣམ་འགྱུར་བསམ་མི་ཁྱབ་པ་སྟོན་པ། ལྷོར་ནོར་བུ་རིན་པོ་ཆེའི་མདུན་དུ་ཕྲེང་བ་མཐིང་ཀ་རིན་པོ་ཆེའི་ཕྲེང་བ་འཛིན་པ། ནུབ་ཕྱོགས་བཙུན་མོ་རིན་པོ་ཆེའི་མདུན་དུ་གླུ་མ་དམར་མོ་པི་ཝང་འཛིན་ཅིང་འགྱུར་ཁུག་དང་ལྡན་པའི་གླུ་ལེན་པ། བྱང་ཕྱོགས་བློན་པོ་རིན་པོ་ཆེའི་མདུན་དུ་གར་མ་ལྗང་གུ་གར་གྱི་ཕྱག་མཛད་ནས་གར་སྒྱུར་པ། ཤར་ལྷོར་གླང་པོ་རིན་པོ་ཆེའི་མདུན་དུ་མེ་ཏོག་མ་དཀར་མོ་མེ་ཏོག་འཛིན་པ། ལྷོ་ནུབ་ཏུ་རྟ་མཆོག་རིན་པོ་ཆེའི་མདུན་དུ་བདུག་སྤོས་མ་སེར་མོ་སྤོས་ཕོར་འཛིན་པ། ནུབ་བྱང་དམག་དཔོན་རིན་པོ་ཆེའི་མདུན་དུ་སྣང་གསལ་མ་དམར་མོ་མར་མེ་འཛིན་པ། བྱང་ཤར་གཏེར་ཆེན་པོ་བུམ་པའི་མདུན་དུ་དྲི་ཆབ་མ་ལྗང་གུ་དུང་ཞལ་འཛིན་པ། སྒེག་མོ་མའི་སྟེང་གི་ནམ་མཁའ་ལ་མེ་ཤེལ་ལས་གྲུབ་པའི་ཉི་མའི་དཀྱིལ་འཁོར་འོད་ཟེར་འབར་བ། གླུ་མའི་མདུན་གྱི་སྟེང་གི་ནམ་མཁའ་ལ་ཆུ་ཤེལ་ལས་གྲུབ་པའི་ཟླ་བའི་དཀྱིལ་འཁོར་དྭངས་ཤིང་གསལ་བ། གར་མའི་མདུན་གྱི་ནམ་མཁར་རིན་པོ་ཆེའི་གདུགས་དཀར་པོ་གསེར་གྱི་ཡུ་བ་ཅན། ཕྲེང་བ་མའི་མདུན་གྱི་ནམ་མཁར་ཕྱོགས་ལས་རྣམ་པར་རྒྱལ་བའི་རྒྱལ་མཚན་དྲང་ཞིང་ལྡེམ་པ་ནོར་བུའི་དྲྭ་ཕྱེད་ཀྱིས་མཛེས་པའོ། །ཕྱི་མ་འདི་གཉིས་ཀྱི་འཚབ་ཏུ་དུས་འཁོར་དང་དགོངས་པ་རང་གྲོལ་སོགས་ལས་སྒྲ་གཅན་དུས་མེ་ཞེས་འབྱུང་བ་ལྟར་ན། ཤར་དུ་སྒྲ་གཅན་ཁ་དོག་མཐིང་ནག ནུབ་ཏུ་དུས་མེ་ཁ་དོག་སེར་པོ། དེ་གཉིས་ཀར་ཡང་དྭངས་ཤིང་འཚེར་ལ་འོད་ཟེར་འཕྲོ་བ་དབྱིབས་ཟླུམ་པོའོ། །གང་ལྟར་ཡང་དེ་དག་གི་དབུས་དང་བར་མཚམས་རྣམས་སུ་ལྷ་དང་མི་ཡི་དཔལ་འབྱོར་ཕུན་སུམ་ཚོགས་པ་ཐམས་ཅད་ཀྱིས་ཕྱུར་བུར་བཀང་ཞིང་། ཤིན་ཏུ་གཙང་ཞིང་ཡིད་དུ་འོང་བའི་རྣམ་པ་ཅན། དེ་ཐམས་ཅད་ཀྱང་རང་རང་ལ་མངའ་བའི་ཡོན་ཏན་དང་ཆ་མཐུན་པའི་ལོངས་སྤྱོད་ཉི་ཟེར་ལ་རྡུལ་ཕྲན་འཁྲིགས་པ་ལྟར་ལང་ལོང་དུ་འཕྲོ་ཞིང་། དེ་ལྟ་བུའི་རྡུལ་ཕྲ་རབ་རེ་རེའི་ཁོངས་སུ་ཡང་བཤད་མ་ཐག་པའི་མཎྜལ་རྡུལ་སྙེད་དུ་འཁྲིགས་ཤིང་། སོ་སོ་སྐྱེ་བོའི་བློས་དཔག་པར་མི་ནུས་ཤིང་མཐའ་གཏུགས་པ་མེད་པའི་བར་དུ་ཏིང་ངེ་འཛིན་གྱིས་རྣམ་པར་འཕྲུལ་ནས་འབུལ་བ་ནི། བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པ་འབུལ་ཚུལ་དུ་གྲགས་ལ། ལུགས་ལ་ལར་བྱང་ཆུབ་སེམས་དཔའ་ཀུན་ཏུ་བཟང་པོ་གཅིག་གི་ཐུགས་ཀ་ནས་འོད་ཟེར་བྱེ་བ་ཐེར་འབུམ་ཁུག་པ་གསུམ་གྱིས་ཀྱང་མི་ཆོད་པ་སྤྲོས་པའི་སྣེ་མོར་ཀུན་ཏུ་བཟང་པོ་རེར་སྤྲུལ་ནས་མཎྜལ་འབུལ་བ་པོར་བགྱིས་ཏེ། དེ་ལྟ་བུ་རེ་རེའི་ལྟེ་བ་ལས་ཀྱང་འོད་ཟེར་དེ་འདྲ་བ་སྤྲོས་ནས་མཁའ་ཁྱབ་ཏུ་ཕུལ་བ་ལ་ཀུན་ཏུ་བཟང་པོའི་མཎྜལ་དུ་བཞེད་པའོ། །དེ་ལྟར་ཡང་གུ་རུའི་ཆོས་སྤྱོད་ལམ་རིམ་ལས། གཞི་མ་དབང་ཆེན་གསེར་གྱི་ས་གཞིར་གྱུར། །ཕྱི་རོལ་རིན་ཆེན་ལྕགས་རི་འཁོར་ཡུག་ལ། །དབུས་སུ་རི་རྒྱལ་ལྷུན་པོ་མཆོག་རབ་ཉིད། །རིན་ཆེན་སྣ་ལྔ་ལས་གྲུབ་ལྷུན་ཆགས་ཤིང་། །དབྱིབས་ལེགས་མཛེས་ཤིང་ལྟ་ན་སྡུག་པ་ལ། །གསེར་གྱི་རི་བདུན་རོལ་མཚོ་བདུན་གྱིས་བསྐོར། །ཤར་དུ་ལུས་འཕགས་ལྷོ་རུ་འཛམ་བུའི་གླིང་། །ནུབ་ཏུ་བ་ལང་སྤྱོད་ཀྱི་གླིང་གིས་བརྒྱན། །བྱང་དུ་སྒྲ་མི་སྙན་གྱི་གླིང་ཆེན་ལ། །ལུས་དང་ལུས་འཕགས་རྔ་ཡབ་རྔ་ཡབ་གཞན། །གཡོ་ལྡན་ལམ་མཆོག་འགྲོ་དང་སྒྲ་མི་སྙན། །སྒྲ་མི་སྙན་གྱི་ཟླ་དང་གླིང་ཕྲན་བརྒྱད། །ཉི་མ་ཟླ་བ་སྒྲ་གཅན་དུས་མེ་དང་། །ལྷ་མིའི་ལོངས་སྤྱོད་དཔལ་འབྱོར་ཕུན་ཚོགས་འདི། །བླ་མ་དཀོན་མཆོག་འཁོར་དང་བཅས་ལ་འབུལ། །ཞེས་པ་ལྟར་རོ། །གཉིས་པ་ནང་ལྟར་མཎྜལ་འབུལ་བ་ལ་གཉིས་ཏེ། ཡུལ་སྒྲུབ་པའི་མཎྜལ་བསྐྱེད་པ་དང་། མཆོད་པའི་མཎྜལ་ཕུལ་བའོ། །དང་པོ་ནི། རང་ལུས་ཕུང་ཁམས་སྐྱེ་མཆེད་ཀྱིས་བསྡུས་པའི་ཆོས་ཐམས་ཅད་ཀྱི་ཆོས་ཉིད་ཡེ་ནས་གདན་གསུམ་ཚང་བ་ལྷ་ཡི་དཀྱིལ་འཁོར་གྱི་འཁོར་ལོར་གནས་པ་ནི་སྒྲུབ་པའི་མཎྜལ་ཏེ། སྒྱུ་འཕྲུལ་གསང་བ་སྙིང་པོ་ལས། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མ་མཱ་ཀི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་སོ། །དེ་ཉིད་ཡེ་ནས་ཡིན་པ་ལ་ཡིན་པར་ཤེས་པའི་ངེས་ཤེས་ཀྱིས་གསལ་གདབ་ཙམ་ལས་གཞན་བསྐྱེད་བསྟིམ་སོགས་གང་ཡང་མི་དགོས་སོ། །གཉིས་པ་མཆོད་པའི་མཎྜལ་ནི། ནང་རང་ལུས་ཕུང་ཁམས་སྐྱེ་མཆེད་ཀྱི་ཆོས་འདི་རྣམས་ཕྱི་སྣོད་ཀྱི་འཇིག་རྟེན་གླིང་བཞི་རྒྱན་གྱུར་སོགས་དང་སྦྱར་ན། པགས་པ་ནི་དབང་ཆེན་གསེར་གྱི་ས་གཞི། ཁྲག་ནི་དྲི་ཡི་བྱུག་པ། སྒལ་ཚིག་ནི་མཐའི་ལྕགས་རི་འཁོར་ཡུག མགོ་བོ་དབུས་ཀྱི་རི་བོ་མཆོག་རབ། ལག་པ་གཡས་ཤར་ལུས་འཕགས་པོ། གཡོན་ལྷོ་འཛམ་བུའི་གླིང་། རྐང་པ་གཡས་པ་ནུབ་བ་ལང་སྤྱོད། གཡོན་བྱང་སྒྲ་མི་སྙན། མིག་གཉིས་ཉི་མ་དང་ཟླ་བ། ཉིང་ལག་རྣམས་གླིང་ཕྲན་དང་གླིང་གཡོག རྩིབ་མ་གསེར་གྱི་རི་བདུན། རྒྱུ་མ་རོལ་པའི་མཚོ་བདུན། གློ་བ་དཔག་བསམ་གྱི་ཤིང་། སྙིང་གཏེར་ཆེན་པོའི་བུམ་པ། མཁལ་མ་འདོད་འཇོའི་བ། མཆིན་པ་མ་རྨོས་པའི་ལོ་ཏོག གླད་པ་ལྷ་ཡི་བདུད་རྩི། སྐྲ་དང་སྨིན་མ་ཙན་དན་གྱི་ནགས་ཚལ། བ་སྤུ་གུརྒུམ་གྱི་སྤང་རི། དབང་པོ་ལྔ་འདོད་ཡོན་གྱི་ལྷ་མོ། བྱང་ཆུབ་ཀྱི་སེམས་ལྷ་མིའི་འབྱོར་ཚོགས་སུ་དམིགས་ནས་འབུལ་བ་སྟེ། ཆོས་སྤྱོད་ལས། རང་ལུས་རྩ་ཁམས་དག་པའི་གཞལ་ཡས་སུ། །དབང་པོ་རྣམ་ལྔ་བཀྲག་དང་མདངས་ཀྱིས་བརྒྱན། །ཁམས་དང་སྐྱེ་མཆེད་ཡོངས་སུ་ད ག་པ་འདི། །བླ་མ་དཀོན་མཆོག་ལོངས་སྐུའི་ཞིང་དུ་འབུལ། །ཞེས་པ་བཞིན་ནོ། །གསུམ་པ་གསང་བའི་མཎྜལ་ལའང་གཉིས་ལས། དང་པོ་ནི། སེམས་ཉིད་གདོད་ནས་སྤྲོས་བྲལ་ཐིག་ལེ་ཉག་གཅིག་གི་ཀློང་དུ་འཁོར་འདས་ཀྱི་ཆོས་ཐམས་ཅད་ཡེ་ནས་མ་བཙལ་ལྷུན་གྱིས་གྲུབ་པའི་ཚུལ་དུ་རྫོགས་པ་ནི་སྒྲུབ་པའི་མཎྜལ་ཏེ། ཀུན་བྱེད་ལས། ཀྱེ། དཀྱིལ་ནི་མ་ནོར་དོན་གྱི་སྙིང་པོ་ལ། །འཁོར་ནི་འཁོར་འདས་བདེ་ཆེན་རྫོགས་པར་ལྡན། །དེ་ནི་དཀྱིལ་འཁོར་སྙིང་པོ་ཀུན་གྱི་རྩ། །དཀྱིལ་འཁོར་མ་ལུས་འདི་ལའང་འདུས་པར་རྟོགས། །ཞེས་སོ། །གཉིས་པ་འབུལ་བ་ནི། དེའང་ཀུན་རྫོབ་ཏུ་སྦྱར་ན་སེམས་ཉིད་སྤྲོས་པ་དང་བྲལ་བའི་གནས་ལུགས་ཡེ་དོན་གྱི་ཀུན་གཞི་ཡོངས་ལ་ཁྱབ་པ་ནི་གཞི་དབང་ཆེན་གསེར་གྱི་ས་གཞི། དེ་ཉིད་སྙིང་རྗེ་བྱང་ཆུབ་སེམས་ཀྱི་རླན་དང་མ་བྲལ་བ་ནི་དྲིའི་བྱུག་པ། ངོ་བོ་རྒྱ་ཆད་ཕྱོགས་ལྷུང་དང་བྲལ་བར་གནས་པ་ནི་མཐའི་ལྕགས་རི་མུ་ཁྱུད། མེ་ལོང་ལྟ་བུ་ལ་སོགས་པའི་ཡེ་ཤེས་ལྔ་ནི་དབུས་ཀྱི་རི་ཆུ་ལ་ལྷུན་པོ་དང་། གླིང་ཆེན་བཞི། ཚོགས་བརྒྱད་ཀྱི་ཤེས་པ་འགག་མེད་དུ་གསལ་བ་ནི་གླིང་ཕྲན་བརྒྱད། ཚོགས་དྲུག་གི་སྤྱོད་ཡུལ་དུ་འདོད་ཡོན་ལྔ་ཡི་རོལ་པ་ཚད་མེད་པར་འཆར་བ་ནི་སྲིད་ཞིའི་མཆོད་རྫས་མ་ཚང་བ་མེད་པ་སྟེ། དེ་ཐམས་ཅད་ཀྱང་རིག་སྟོང་ཀ་དག་གི་དབྱིངས་སུ་ཤར་གྲོལ་འཛིན་མེད་དུ་ངང་གིས་ཤར་བས་དེ་ལྟར་མངོན་སུམ་དུ་རྟོགས་པའི་ཤེས་རབ་ནི་ཉི་མ་དང་། དེའི་རྩལ་ལས་དེ་ལྟར་མ་རྟོགས་པའི་སེམས་ཅན་རྣམས་ལ་ཐབས་སྙིང་རྗེ་ཆེན་པོ་རྩོལ་མེད་དུ་སྐྱེ་བ་ནི་རི་བོང་འཛིན་པ་སྟེ། མདོར་ན་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སེམས་ཉིད་སྟོང་པའི་རང་རྩལ་དུ་རྫོགས་པས་དེ་ལྟར་རྟོགས་ན་དོན་དམ་པའི་མཎྜལ་ཏེ། མཆོད་ཡུལ་མཆོད་མཁན་མཆོད་པ་ཐམས་ཅད་ལས་འདས་པ་སྟེ། ཆོས་སྤྱོད་ལས། སེམས་ཉིད་ཆོས་སྐུ་དག་པའི་གཞལ་ཡས་སུ། །དམིགས་མེད་སྟོང་གསལ་འཛིན་མེད་ངང་དུ་གནས། །གདོད་ནས་དག་པའི་གཉུག་མའི་ཡེ་ཤེས་འདི། །བླ་མ་དཀོན་མཆོག་ཆོས་སྐུའི་ཞིང་དུ་འབུལ། ཞེས་གསུངས་པ་བཞིན་ནོ། །ལྔ་པ་དེ་ལྟར་ཕུལ་བའི་ཕན་ཡོན་ནི། སངས་གླིང་གཏེར་བྱོན་བླ་མ་དགོངས་འདུས་ལས། མཎྜལ་ཕུལ་བའི་ཡོན་ཏན་དང་ལྡན་འབྲས་ནི། གནས་སྐབས་སུ་ལོངས་སྤྱོད་ཕུན་སུམ་ཚོགས་པ་དང་ལྡན་ཞིང་དབུལ་ཕོངས་ཀྱི་སྡུག་བསྔལ་དང་བྲལ་ཞིང་ལོངས་སྤྱོད་ཆེན་པོ་འབྱུང་། བླ་མ་དམ་པ་ལ་མི་ཕྱེད་པའི་དད་པ་དང་། ཐེག་པ་ཆེན་པོའི་ཆོས་ལ་ངེས་ཤེས་ཁྱད་པར་ཅན་རྒྱུད་ལ་སྐྱེ། འགྲོ་བ་མཐའ་དག་གི་ཡིད་དུ་འོང་ཞིང་ཀུན་གྱིས་བཀུར་བར་འགྱུར། དུས་ཁྱད་པར་ཅན་རྣམས་ལ་བླ་མ་དང དཀོན་མཆོག་ལ་སོགས་པའི་རྟེན་ཁྱད་པར་ཅན་གྱི་དྲུང་དུ། གུས་པ་དང་ལྡན་པས་མཎྜལ་ཚར་གཅིག་ཕུལ་བའི་བསོད་ནམས་ཀྱི་ཕུང་པོ་ནི། བསྐལ་པ་དཔག་ཏུ་མེད་པར་བདེ་བར་གཤེགས་པའི་ཚོགས་དང་བཅས་པ་ཐམས་ཅད་ལ་ཕྱི་ནང་གི་མཆོད་གསོལ་རྒྱ་ཆེན་པོ་བྱས་པ་བས་ལྷག་པའི་བསོད་ནམས་ཐོབ་པར་འགྱུར། ཅི་བསམ་པའི་དོན་ཐམས་ཅད་འགྲུབ། བསྐལ་པ་ནས་བསྐལ་པར་བསགས་པའི་སྡིག་སྒྲིབ་ཉེས་ལྟུང་གི་ཚོགས་ཐམས་ཅད་བྱང་ཞིང་དག་པར་འགྱུར། མཎྜལ་ཚར་གཅིག་ཕུལ་ནས་ཡིད་དད་པས་སྨོན་ལམ་ཇི་ལྟར་བཏབ་པ་ཐམས་ཅད་འབད་མེད་དུ་འགྲུབ། དེ་བས་ནི་ཕྱི་རབས་ཀྱི་སྐྱེས་བུ་དམ་པ་རྣམས་ཀྱིས་མཎྜལ་འབུལ་བ་ལ་བརྩོན་པར་གྱིས་ཤིག ཅེས་དང་། ཆོས་སྤྱོད་ཐམས་ཅད་གཅིག་ཏུ་དྲིལ་བའི་བསོད་ནམས་ལས། མཎྜལ་ཕུལ་བའི་བསོད་ནམས་ཁྱད་པར་ཆེ་ཞིང་། ཏིང་ངེ་འཛིན་དང་རྟོགས་པ་ཁྱད་པར་ཅན་རྒྱུད་ལ་སྐྱེ། ཚེ་ཕྱི་མ་ལ་སོགས་པའི་མཐར་ཐུག་རང་ཉིད་ཇི་ལྟར་འདོད་པའི་ལོངས་སྤྱོད་དང་། དཔལ་འབྱོར་ཐོབ་ཅིང་ཞིང་ཁམས་བགྲོད་པར་འགྱུར། བདེ་བར་གཤེགས་པ་ཐམས་ཅད་ཀྱིས་དགོངས་པར་འགྱུར་བ་ལ་སོགས་པའི་བསོད་ནམས་ཀྱི་ཕུང་པོ་གང་གིས་ཀྱང་དཔག་པར་མི་ནུས་སོ། །ཞེས་གསུངས་པ་དང་། མཎྜལ་གྱི་མདོ་ལས་ཀྱང་། བ་ལྕི་ཆུ་བཅས་སྦྱིན་པ་སྟེ། །བྱི་དོར་བྱས་པ་ཚུལ་ཁྲིམས་ཡིན། །སྲོག་ཆགས་བསལ་བ་བཟོད་པ་སྟེ། །བརྩོན་འགྲུས་བྱ་བ་བྱེད་ལ་བརྩོན། །བསམ་གཏན་དེར་སེམས་སྐད་ཅིག་མ། །རི་མོ་ལེགས་འབར་ཤེས་རབ་པོ། །ཕ་རོལ་ཕྱིན་པ་དྲུག་རྣམས་ཀྱི། །ཐུབ་པའི་མཎྜལ་ལེགས་བྱས་པའོ། །འདིར་ནི་ལུས་ཀྱི་ལས་བྱས་ན། །ཁ་དོག་གསེར་ལྟར་འགྱུར་བ་དང། །ནད་རྣམས་ཀུན་ལས་རྣམ་པར་གྲོལ། །ལྷ་དང་མི་ལས་ཆེས་ལྷག་ཅིང་། །ཟླ་བ་ལྟ་བུར་གཟི་བརྗིད་ལྡན། །ནོར་དང་གསེར་ནི་ཕུན་སུམ་ཚོགས། །རྒྱལ་པོའི་རིགས་དང་སངས་རྒྱས་པ། །མཆོག་གི་ཁྱིམ་དུ་སྐྱེ་བ་ཉིད། །ཅེས་དང་། སློབ་དཔོན་དཔའ་བོས་ཀྱང་ཚུལ་དེ་དང་མཐུན་པར་གསུངས་ཤིང་། རྡོ་རྗེ་ཕུར་པའི་གསང་རྒྱུད་ལས་ཀྱང་། དགེ་དོན་མཎྜལ་རྩོམ་པ་རྩོན་འགྲུས་ཏེ། །འབུ་སྲིན་སེམས་ཅན་བསལ་བ་བཟོད་པའི་མཆོག །ག་དར་བྱི་དོར་བྱང་ཆུབ་ཚུལ་ཁྲིམས་ཏེ། །སྨན་དང་དྲི་ཡི་སྐྱང་ནུལ་སྦྱིན་པ་ཡིན། །མེ་ཏོག་ཕུད་བུ་བཀོད་པ་ཤེར་རབ་བོ། །དེ་ཉིད་ལྷ་རུ་བསམ་པ་བསམ་གཏན་ཏེེ། །སྤྱན་དྲངས་བཞུགས་ཕྱག་མཆོད་བསྐོར་ཐབས་སུ་ཤེས། །སྒྲིབ་གཉིས་སྦྱངས་ཏེ་ཚོགས་གཉིས་རྫོགས་ཏེ་སྟོབས། །དེ་ཡི་འབྲས་བུ་ཐོབ་པ་ཡེ་ཤེས་སོ། །འགྲོ་བའི་དོན་དུ་ཤེས་པར་སྨོན་ལམ་ཉིད། །མཎྜལ་དོན་གྱི་ཕ་རོལ་ཕྱིན་པ་རྫོགས་པར་འགྱུར། །དེ་ཕྱིར་མཎྜལ་དེ་ཉིད་དོན་ལ་བརྩོན་པར་འབད། །ཅེས་གསུངས། མདོར་ན་མཎྜལ་ཕུལ་བས་ཕར་ཕྱིན་དྲུག་གམ་བཅུ་རྫོགས་པ་ཡིན་པས་དེ་སྙེད་ཀྱི་ཕན་ཡོན་རྣམས་ཐོབ་པ་ཡིན་པས་རྒྱུ་མཚན་དེའི་ཕྱིར་ལུང་ལས་ཀྱང་། ཡོན་ཏན་རྒྱ་ཆེན་བསྐྱེད་བྱེད་པའི། །མཎྜལ་ཕུལ་བའི་དགེ་བ་གང་། །འཕགས་པས་ཀྱང་ནི་བརྗོད་མི་སྤོབས། །ཞེས་གསུངས། དེས་ན་བླ་མ་ལྔ་བཅུ་པ་ལས། མཆོག་ཏུ་གུས་པས་དུས་གསུམ་དུ། །མཎྜལ་མེ་ཏོག་བཅས་ཐལ་མོས། །བླ་མ་སྟོན་པ་བསྙེན་བཀུར་ཞིང་། །ཞབས་ལ་སྤྱི་བོས་ཕྱག་དག་བྱ། །ཞེས་དང་། དོན་དམ་བསྙེན་པ་ལས། ཐུན་མཚམས་གསུམ་དུ་ཤིན་ཏུ་རྣམ་པར་དག་པ་ཡིས། །ཁ་དང་ལག་པ་རྐང་པ་དག་ནི་བཀྲུས་བྱས་ནས། །མེ་ཏོག་ཡང་དག་བླངས་ཏེ་བླ་མའི་སྤྱན་སྔར་ནི། །རྒྱལ་བ་རྣམས་ཀྱི་དཀྱིལ་འཁོར་ཤིན་ཏུ་ཟླུམ་པོ་བྱ། །ཞེས་གསུངས་པ་ལྟར་དུས་རྟག་ཏུ་བརྩོན་པར་བྱའོ། །གཉིས་པ་འབུལ་ཚུལ་བྱེ་བྲག་ཏུ་བསྟན་པ་ནི། མདུན་དུ་སྒྲུབ་པའི་མཎྜལ་དངོས་སུ་བཤམས་པ་ཡོད་ན་དེ་ཉིད་དམིགས་རྟེན་དང་། མེད་ན་མདུན་གྱི་ནམ་མཁར་ཚོགས་ཞིང་གི་མཎྜལ་སྐྱབས་ཡུལ་བཞིན་དུ་གསལ་བཏབ་ལ། མཆོད་པའི་མཎྜལ་ནི། རིན་པོ་ཆེ་ལ་སོགས་པའི་མཎྜལ་གང་འབྱོར་དང་། དེ་ཡང་མེད་ན་ས་གཞི་བྱི་དོར་བྱས་པར་དྲི་དང་བ་བྱུང་གིས་ཆུས་བྱུགས་པ་ལ། ལུས་ཀྱིས་ལས་སུ་མེ་ཏོག་གི་ཚོམ་བུ་དགོད་ཅིང་། ངག་གི་ལས་སུ་རང་གཞན་སེམས་ཅན་ཐམས་ཅད་ཀྱིས་མགྲིན་གཅིག་ཏུ། རིན་ཆེན་ས་གཞི་ལྷུན་པོ་འཁོར་ཡུག་བཅས། སོགས་རང་གཞུང་གི་མནྜལ་གྱི་ཚིག་རྣམས་བརྗོད་པ་དང་། ཡིད་ཀྱི་ལས་སུ་གོང་དུ་བཤད་པ་ལྟར་དབང་ཆེན་གསེར་གྱི་ས་གཞི་ལ་བརྟེན་པའི་ལྷུན་པོ་རི་མཚོ་གླིང་བཞི་གླིང་ཕྲན་ཉི་ཟླ་སོགས་སྣོད་བཅུད་ཀྱི་འཇིག་རྟེན་བྱེ་བ་ཕྲག་བརྒྱ་བསམ་མི་ཁྱབ་པར་ལྷ་དང་མི་ཡི་འབྱོར་ཚོགས་བཟང་ལ་གྱ་ནོམ་པས་གོ་མཚམས་མེད་ཅིང་ཕྱུར་བུར་བཀང་བར་དམིགས་ནས་འབུལ་བ་དང་། གཞན་ཡང་སངས་རྒྱས་ཀྱི་ཞིང་ཁམས་རྣམ་པར་དག་པ་བཀོད་པ་ཚད་མེད་པའི་འབྱོར་པས་ལེགས་པར་སྤྲས་ཤིང་། སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་གང་བ། སྤྲུལ་པའི་ལྷ་དང་ལྷ་མོ་རྣམས་ཀྱིས་མཆོད་པའི་སྤྲིན་རབ་འབྱམས་ཀྱིས་མངོན་པར་མཆོད་ཅིང་། ཐེག་པ་ཆེན་པོའི་ཆོས་ཀྱི་འབྱོར་པ་ཚད་མེད་པ་དང་ལྡན་པ། འཕགས་པ་རྣམས་ཀྱིས་ཚོགས་གཉིས་ཡོངས་སུ་རྫོགས་པའི་མཐུ་དང་། གཟུངས་དང་ཏིང་ངེ་འཛིན་དང་སྨོན་ལམ་དང་ཡེ་ཤེས་ཀྱི་སྟོབས་དཔག་ཏུ་མེད་པས་རྣམ་པར་འཕྲུལ་བ་ཡུལ་ནམ་མཁའི་མཐའ་དང་ཆོས་ཀྱི་དབྱིངས་དང་སེམས་ཅན་གྱི་ཁམས་ཇི་ཙམ་གནས་པ་དེ་སྲིད་དུ་རྟག་རྒྱུན་གྱི་འཁོར་ལོར་འབྱུང་ཞིང་རྒྱས་པར་དམིགས་ལ་འབུལ་བ་དང་། རང་གཞན་གྱི་ལུས་ལོངས་སྤྱོད་དུས་གསུམ་བསགས་ཡོད་ཀྱི་དགེ་བའི་རྩ་བ་གང་དང་ཅི་མཆིས་པ་དེ་ཐམས་ཅད་ཀྱང་བློས་གཅིག་ཏུ་བསྡོམས་ཏེ་ལྟོས་པ་མེད་པར་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་འཕྲུལ་བ་ལས་བྱུང་བ་ལྟ་བུའི་མཆོད་པའི་ཡོ་བྱད་བསམ་མི་ཁྱབ་པར་སྤྲུལ་ནས་ཕུལ་ལ། རང་གཞན་ཀུན་གྱི་རྒྱུད་ལ་དད་པ་དང་ངེས་འབྱུང་དང་བྱམས་སྙིང་རྗེ་བྱང་ཆུབ་ཀྱི་སེམས་ཡང་དག་པའི་ལྟ་བ་གནས་ལུགས་རྟོགས་པའི་ཤེས་རབ་སོགས་ཉམས་རྟོགས་ཡོན་ཏན་ཁྱད་པར་ཅན་མྱུར་དུ་སྐྱེ་བ་དང་། རྟོགས་པ་མཆོག་ཏུ་གྱུར་པ། ཉམས་མྱོང་རྒྱུན་ཆད་མེད་པ། སྣང་བ་རྟེན་འབྲེལ་དུ་འཆར་བ། ཅི་བྱས་གཞན་དོན་དུ་འགྱུར་བ་སོགས་འདོད་པའི་དོན་ལ་གསོལ་བ་རྩེ་གཅིག་ཏུ་གདབ་ལ་གྲངས་བརྒྱ་སྟོང་ཁྲི་འབུམ་སོགས་ཇི་ནུས་སུ་འབུལ། མཐར་ཚོགས་ཞིང་མཆོད་རྫས་ཀྱི་མཎྜལ་དང་བཅས་པ་ཧཱུྃ་གི་རྣམ་པས་རང་ལ་བསྡུས་ནས་འཁོར་གསུམ་དམིགས་མེད་བདེ་བ་ཆེན་པོའི་ངང་དུ་དར་ཅིག་བཞག་ནས། དགེ་བ་འདི་ཡིས་སྐྱེ་བོ་ཀུན། །ལ་སོགས་པ་བསྔོ་སྨོན་ཇི་ལྟར་རིགས་པས་མཐའ་བརྒྱན་ཏེ། ཐུན་མཚམས་ཀུན་ཏུའང་བག་མེད་དུ་མ་སོང་བར་རྟེན་ལ་ཕྱག་མཆོད་བསྐོར་བ་སོགས་བསོད་ནམས་དང་ཡེ་ཤེས་ཀྱི་ཚོགས་སྤེལ་བ་ལ་བརྩོན་པར་བྱའོ། །གསུམ་པ་ཞར་བྱུང་དུ་དེ་དང་རྗེས་སུ་འབྲེལ་བར་དཀོན་མཆོག་མཆོད་པའི་ཕན་ཡོན་ཅུང་ཟད་བཤད་པ་ལ་གསུམ། མཆོད་པའི་ངོ་བོ། ངེས་ཚིག དབྱེ་བའོ། །དང་པོ་ནི། བཀུར་བྱའི་གནས་གང་ཞིག་སྒོ་གསུམ་གྱིས་མཆོད་པ་དང་། རྫས་ཀྱི་སྒོ་ནས་མཉེས་པར་བྱེད་པའོ། །གཉིས་པ་ནི། པཱུ་ཛ་ཞེས་པའི་སྒྲ་ལས་མཆོད་པ་སྟེ། སྔོན་དུ་བསྐྱེད་པ་དང་། ཡང་དང་ཡང་དུ་དགྱེས་པ་བསྐྱེད་པ་དང་། བཀུར་བའི་དོན་གྱིས་གནས་སུ་སྟོབས་པར་བྱེད་པའི་དོན་གྱིས་ན་མཆོད་པ་ཞེས་བྱའོ། །གསུམ་པ་ནི། སྤྱིར་ཐེག་པ་ཆེན་པོ་མདོ་སྡེ་རྒྱན་ལས། རབ་དྭངས་སེམས་དང་ལྡན་པ་ཡིས། །ཚོགས་གཉིས་རྫོགས་པར་བྱ་བའི་ཕྱིར། །སངས་རྒྱས་རྣམས་ལ་གོས་སོགས་ཀྱིས། །མངོན་སུམ་མངོན་སུམ་མིན་པར་མཆོད། །སངས་རྒྱས་འབྱུང་བར་དོན་ཡོད་པར། །སྨོན་ལམ་དང་ནི་ལྡན་པ་ཡི། །གསུམ་པོ་དམིགས་པར་མི་བྱེད་པ། །སངས་རྒྱས་མཆོད་པ་རྫོགས་པ་ཡིན། །ཞེས་མཆོད་པ་ལ་འཇུག་པའི་རྒྱུ་སེམས་རབ་ཏུ་དྭངས་པ་དང་མཚུངས་པར་ལྡན་པའི་དད་པ་དང་། ཡོངས་སུ་བསྔོ་བ་རང་གཞན་གྱི་ཚོགས་གཉིས་རྫོགས་པར་བྱ་བའི་འདུན་པ་དང་། རྟེན་རང་གི་མདུན་དུ་མངོན་སུམ་དུ་བཞུགས་པའམ་ཡིད་ཀྱིས་དམིགས་པ་དང་། དངོས་པོ་གོས་དང་རྒྱན་ལ་སོགས་པ་ཡིད་དུ་འོང་བ་དང་། རྒྱུ་སྔོན་གྱི་སྐྱེ་བ་རྣམས་སུ་སངས་རྒྱས་འབྱུང་བ་ལ་དོན་ཡོད་པར་གྱུར་ཅིག་ཅེས་སྨོན་ལམ་བཏབ་པ་དང་། ཡེ་ཤེས་མཆོད་བྱ་མཆོད་བྱེད་མཆོད་ཡུལ་ཏེ་འཁོར་གསུམ་པོ་མི་དམིགས་པའི་ཤེས་རབ་ཀྱིས་ཟིན་པ་སྟེ་དྲུག་གིས་མཆོད་པ་རྫོགས་པར་གསུངས་པ་དང་། དེ་ཡང་ངོམས་མི་ཤེས་པ་དང་། རྒྱ་ཆེ་བ་དང་། དགའ་བ་དང་། ཕན་པ་དང་། མ་གོས་པ་དང་། དགེ་བའི་བསམ་པ་སྟེ་དྲུག་དང་ལྡན་པར་གསུངས་ཤིང་། བྱང་ཆུབ་སེམས་དཔའི་སྤྱོད་པ་ལ་འཇུག་པའི་རྣམ་བཤད་དུ། རྟེན་དམ་པ་བྱང་ཆུབ་ཐོབ་འདོད་ཀྱི་བསམ་པ། ཆེད་དུ་བྱ་བ་དམ་པ་སེམས་ཅན་ཐམས་ཅད་ཀྱི་དོན་དུ། དངོས་པོ་དམ་པ་ཡིད་འོང་གི་རྣམ་པ། ཐབས་ལ་མཁས་པ་དམ་པ་འཁོར་གསུམ་ཡོངས་སུ་དག་པ། རྣམ་པར་དག་པ་དམ་པ་མི་མཐུན་ཕྱོགས་ཀྱི་དྲི་མ་དང་བྲལ་བ། ཡོངས་སུ་བསྔོ་བ་དམ་པ་བྱང་ཆུབ་ཆེན་པོར་འདུན་པ་བསྒྱུར་བ་སྟེ་དམ་པ་དྲུག་ཏུ་གསུངས་པ་དང་། བྱང་ཆུབ་སེམས་དཔའི་ས་ལས། སངས་རྒྱས་ཀྱི་སྐུ་གཟུགས་ཉིད་ལ་མཆོད་པ་དང་། མཆོད་རྟེན་ལ་མཆོད་པ་དང་། མངོན་སུམ་དང་། མངོན་སུམ་མ་ཡིན་པ་དང་། བདག་གིས་བྱས་པ་དང་། གཞན་ལ་བྱེད་དུ་བཅུག་པ་དང་། རྙེད་བཀུར་དང་། རྒྱ་ཆེན་པོ་དང་། ཀུན་ནས་ཉོན་མོངས་པ་ཅན་མ་ཡིན་པ་དང་། སྒྲུབ་པའི་མཆོད་པ་སྟེ་བཅུ་དང་། ཆོས་དང་དགེ་འདུན་ལ་ཡང་དེ་དག་འདྲ་བར་ཅི་རིགས་པར་མཆོད་པར་གསུངས་སོགས་དབྱེ་བསྡུའི་ཁྱད་པར་མང་ཡང་། འདིར་ཞིང་། བསམ་པ། དངོས་པོ། སྦྱོར་བ་དག་པ་སྟེ་བཞིས་སྒོ་ནས་བཤད་ན། དང་པོ་ཞིང་དག་པ་ནི། སྤྱིར་རྒྱལ་སྲས་ཞི་བ་ལྷས། ཡོན་ཏན་ཞིང་དང་ཕན་འདོགས་ཞིང་། །སྡུག་བསྔལ་བ་ལས་དགེ་ཆེན་འགྱུར། །ཞེས་ཡོན་ཏན་གྱི་ཞིང་བླ་མ་མཆོག་གསུམ། ཕན་འདོགས་ཀྱི་ཞིང་ཕ་མ་དང་གྲོགས་ཚངས་པ་མཚུངས་པར་སྤྱོད་པ། སྡུག་བསྔལ་གྱི་ཞིང་ནད་པ་དབུལ་ཕོངས་མགོན་མེད་པ་སོགས་ཏེ་གསུམ་དུ་གསུངས་ལ། སྨོན་ལམ་རྣམ་པར་དག་པའི་མདོ་ལས། ངས་སྔོན་སེམས་ཅན་ཞིང་དང་ནི། །ཐུབ་པའི་ཞིང་ལ་བརྟེན་ནས་ནི། །སངས་རྒྱས་ཆོས་རྣམས་མཐའ་ཡས་པ། །ལོ་ཏོག་ཕུན་སུམ་ཚོགས་པ་ཐོབ། །ཅེས་མཆོད་ཡུལ་སངས་རྒྱས་ཀྱི་ཞིང་དང་། སྦྱིན་ཡུལ་སེམས་ཅན་གྱི་ཞིང་གཉིས་སུ་གསུངས་པས་མཚོན་དབྱེར་སྒོ་མང་དུ་ཡོད་ཀྱང་ཞིང་གི་མཆོག་ནི་དཀོན་མཆོག་རིན་པོ་ཆེ་རྣམ་པ་གསུམ་ཡིན་ཏེ། ཆོས་ཀྱི་རྒྱལ་པོའི་མདོ་ལས། ལྷ་དང་བཅས་པའི་འཇིག་རྟེན་ན། །དཀོན་མཆོག་གསུམ་པོ་མ་གཏོགས་པའི། །ཡོན་གྱི་གནས་འགའ་ཡོད་མིན་པས། །དངོས་པོ་ཀུན་གྱིས་དེ་ལ་མཆོད། །ཅེས་དང་། ཁང་བུ་བརྩེགས་པའི་མདོ་ལས། སངས་རྒྱས་འདྲ་བའི་སྟོན་པ་མེད། །ཆོས་དང་འདྲ་བའི་སྐྱོབ་པ་མེད། །དགེ་འདུན་འདྲ་བའི་ཞིང་ས་མེད། །དེ་ཕྱིར་གསུམ་ལ་དབུལ་བར་བྱ། །ཞེས་དང་། དཀོན་མཆོག་བརྩེགས་པ་ལས། དེ་ལྟར་དཀོན་མཆོག་གསུམ་པོ་དེ་ནི་ལྷ་དང་བཅས་པའི་འཇིག་རྟེན་ན་ཕྱག་བྱ་བའི་འོས་སུ་གྱུར་པ། ཐལ་མོ་སྦྱར་བའི་འོས་སུ་གྱུར་པ། བསོད་ནམས་ཀྱི་ཞིང་དམ་པ་ཡིན་ཏེ། ཞེས་སོ། །དེ་ཐམས་ཅད་ལས་ཀྱང་མཆོག་ཏུ་གྱུར་པ་ནི་བླ་མ་ཉིད་ཡིན་ཏེ། ཡེ་ཤེས་རྒྱན་གྱི་མདོ་ལས། རིགས་ཀྱི་བུའམ་རིགས་ཀྱི་བུ་མོ་དད་པ་མཆོག་དང་ལྡན་པ་གང་ལ་ལ་ཞིག་གིས་དགེ་བའི་གཤེས་གཉེན་ལ་བསྙེན་བཀུར་ན་བསྐལ་པ་གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་ལ་མཆོད་པ་བྱས་པ་བས་བསོད་ནམས་ཀྱི་ཕུང་པོ་ཚད་མེད་དཔག་ཏུ་མེད། ཞེས་དང་། ཡེ་ཤེས་དམ་པའི་རྒྱུད་ལས། བསྐལ་པའི་སངས་རྒྱས་མཆོད་པ་བས། །བླ་མའི་བ་སྤུ་ཉག་གཅིག་ལ། །འབྲུ་མར་ཐིགས་པ་གཅིག་བྱུགས་པ། །བསོད་ནམས་ཕུང་པོ་ཁྱད་པར་འཕགས། །ཞེས་སོ། །གཉིས་པ་བསམ་པ་དག་པ་ནི། བྱང་ཆུབ་སེམས་དཔའི་ས་ལས། བྱང་ཆུབ་སེམས་དཔའ་ནི་གྲགས་པ་དང་ཚིགས་སུ་བཅད་པའི་ཕྱིར་ཡང་སྦྱིན་པར་མི་བྱེད། དབུལ་པོར་འགྱུར་དུ་དོགས་པའི་འཇིགས་པས་སྦྱིན་པར་ཡང་མི་བྱེད། བརྒྱ་བྱིན་ཉིད་དང་། འཁོར་ལོས་སྒྱུར་བ་ཉིད་དང་། དབང་ཕྱུག་ལ་བརྟེན་ཅིང་སྦྱིན་པར་མི་བྱེད། འབྲས་བུ་ལ་བལྟ་ཞིང་སྦྱིན་པར་མི་བྱེད་དོ། །སྦྱིན་པ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཉིད་ཀྱི་ཕྱིར་བྱིན་ཞིང་བསྔོ་བར་བྱེད་དོ། །ཞེས་དང་། ལག་བཟང་གིས་ཞུས་པའི་མདོ་ལས། ལག་བཟང བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་སྦྱིན་པའི་ཕ་རོལ་དུ་ཕྱིན་པ་ཡོངས་སུ་རྫོགས་པར་བྱེད་ཅེ་ན། ལག་བཟང་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཆོས་ཀྱི་ལོངས་སྤྱོད་རྣམས་ཡོངས་སུ་ཚོལ་གྱིས་ཆོས་མ་ཡིན་པས་ནི་མ་ཡིན་ནོ། །མཉམ་པ་ཡིན་གྱི་མི་མཉམ་པས་མ་ཡིན་ནོ། །དེ་སྲོག་ཆགས་གཞན་དག་དང་། སེམས་ཅན་གཞན་རྣམས་ལ་གནོད་པ་མི་བྱེད། ཉམ་ང་བར་མི་བྱེད་པར་སྦྱིན་པ་སྦྱིན་ཏེ། རྗོད་པ་དང་། སྒྲ་དང་། ཚིགས་སུ་བཅད་པའི་ཕྱིར་མ་ཡིན། འཛེམ་པའི་ཕྱིར་མ་ཡིན། འཇིགས་པའི་ཕྱིར་མ་ཡིན། ལན་དུ་ཕན་འདོགས་སུ་རེ་བའི་ཕྱིར་མ་ཡིན། མཐོ་རིས་ཀྱི་ཕྱིར་མ་ཡིན། ཚུལ་འཆོས་པ་མ་ཡིན། ཁ་གསག་བྱེད་པ་མ་ཡིན། བརྙས་པ་མ་ཡིན་པའོ། །ཞེས་སོགས་རྒྱ་ཆེར་གསུངས་པ་བཞིན་ཏེ། མདོར་ན་གཞན་ལ་འགྲན་སེམས་སོགས་ཀུན་སློང་ཉོན་མོངས་པ་ཅན་དང་། ཚེ་འདིའི་བདེ་སྐྱིད་སྙན་གྲགས་དང་། ཕྱི་མ་འཁོར་བའི་བདེ་འབྲས་སོགས་སྲིད་པའི་ཕུན་ཚོགས་དོན་དུ་གཉེར་བའི་བསམ་པས་མ་ཡིན་ལ། དེར་མ་ཟད་དམན་པའི་མྱང་འདས་ཀྱི་འབྲས་བུ་ཙམ་དོན་དུ་གཉེར་བའི་བསམ་པས་མ་ཡིན་ཏེ། དེ་དག་ལ་རྣམ་སྨིན་གྱི་འབྲས་བུ་སྤྱིར་མེད་པ་མ་ཡིན་ཀྱང་དྲུང་པོར་མི་འབྱིན་ཏེ། ཀུན་སློང་ཉོན་མོངས་ཅན་ནི་ཁ་ཟས་བཟང་པོ་དུག་དང་འདྲེས་པ་དང་འདྲ་སྟེ་ནམ་ཡང་ཐར་པའི་སྲོག་གི་ཟུང་དུ་མི་འགྱུར་ལ། གཞན་ལྷ་མིའི་བདེ་འབྲས་དང་ཉན་རང་གི་འབྲས་བུ་དོན་དུ་གཉེར་བ་ཡང་ཆུ་ཤིང་གི་འབྲས་བུ་ལན་གཅིག་སྨིན་ནས་ཟད་པར་འགྱུར་བ་བཞིན་རང་འབྲས་ལན་གཅིག་སྨིན་ནས་ཟད་པར་འགྱུར་བ་དང་། ཁོང་ཁྲོ་ལ་སོགས་པའི་རྐྱེན་གཞན་དྲག་པོ་དང་འཕྲད་ན་བར་དོར་ཡང་ཆུད་ཟ་བར་འགྱུར་བས་འདིར་འདོད་བྱ་མ་ཡིན་ལ། གང་སྙམ་ན་གོང་དུ་ཡང་ཡང་བསྟན་པ་བཞིན་དུ་གཞན་དོན་དུ་རྫོགས་བྱང་དོན་གཉེར་གྱི་བསམ་པ་བཟང་པོ་བྱང་ཆུབ་ཀྱིས་ཟིན་པར་བྱ་དགོས་ཏེ། དེས་ཟིན་ན་སྨོས་མ་ཐག་པའི་ཉེས་པ་མཐའ་དག་འགོག་ཅིང་ནམ་ཡང་ཆུད་མི་ཟ་བར་གོང་ནས་གོང་དུ་འཕེལ་བ་ནི་དཔག་བསམ་གྱི་ཤིང་ལྗོན་པ་བཟང་པོ་དང་འདྲ་སྟེ། ཞིབ་པར་གོང་དུ་བསྟན་པ་བཞིན་ལ། རིན་ཆེན་ཕུང་པོའི་མདོ་ལས་ཀྱང་། སྲིད་པ་གསུམ་གྱི་སེམས་ཅན་དེ་དག་རེ་རེས་མཆོད་རྟེན་རི་རབ་ཙམ་བྱེད་ལ། སོ་སོ་ནས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བསྟི་སྟང་བྱེད་པ་བས། ཐམས་ཅད་མཁྱེན་པ་ཉིད་ཀྱི་སེམས་དང་མ་བྲལ་བས་མེ་ཏོག་གཅིག་འཐོར་ན། སྔ་མ་ལས། བསོད་ནམས་ཆེས་བསྐྱེད་པར་གསུངས་པ་དང་། འཕགས་པ་བྱམས་པས་འཇུག་པའི་མདོ་ལས། གལ་ཏེ་སེམས་ཅན་མཐའ་དག་སངས་རྒྱས་ཏེ། །སྤོབས་པ་མཐའ་ཡས་ལྡན་པ་ཉིད་གྱུར་ལ། །ཇི་ལྟར་སྔོན་གྱི་འཁོར་བའི་བསྐལ་པའི་བར། །སེམས་ཅན་གཅིག་པུས་མཆོད་པ་བྱས་པ་དང་། །མཁས་པའི་མི་ནི་གང་ཡང་རུང་བ་ཡིས། །བྱང་ཆུབ་མཆོག་ཏུ་སེམས་ནི་བསྐྱེད་ནས་ཀྱང་། །མེ་ཏོག་གཅིག་དུ་ཕུལ་བའི་བསོད་ནམས་འདི། །དེ་བས་ཁྱད་པར་འཕགས་པར་འགྱུར་བ་ཡིན། །བསྐལ་པ་བྱེ་བ་ཁྲག་ཁྲིག་མང་པོར་ནི། བསོད་ནམས་དེ་ཡི་བཤད་པ་བརྩམས་བྱས་ཀྱང་། །བསོད་ནམས་འབྲས་བུ་དེ་ཡི་བཤད་པ་ནི། །ནམ་ཡང་ཟད་པར་འགྱུར་བ་མ་ཡིན་ནོ། །ཞེས་སོ། །དེ་ལྟར་ཕན་ཡོན་འབྱུང་བའི་འཐད་པ་ཡང་། རིན་ཆེན་ཕྲེང་བ་ལས། སེམས་ཅན་ཁམས་ནི་ཚད་མེད་པ། །ཕན་འདོད་དེ་ནི་དེ་འདྲའོ། །ཞེས་དང་། ཞི་བ་ལྷས། སེམས་ཅན་རྣམས་ཀྱི་ཀླད་ནད་ཙམ། །བསལ་ལོ་སྙམ་དུ་བསམ་ན་ཡང་། །ཕན་འདོད་བསམ་པ་དང་ལྡན་ཞིང་། །བསོད་ནམས་དཔག་མེད་འབྱུང་འགྱུར་ན། །སེམས་ཅན་རེ་རེའི་མི་བདེ་བ། །དཔག་ཏུ་མེད་པ་བསལ་འདོད་ཅིང་། །རེ་རེའང་ཡོན་ཏན་དཔག་མེད་དུ། །སྒྲུབ་པར་འདོད་པ་སྨྲོས་ཅི་དགོས། །ཞེས་དང་། ཕན་པར་བསམ་པ་ཙམ་གྱིས་ཀྱང་། །སངས་རྒྱས་མཆོད་ལས་ཁྱད་འཕགས་ན། །སེམས་ཅན་དཔག་ཏུ་མེད་པ་ཡི། །བདེ་དོན་བརྩོན་པ་སྨོས་ཅི་དགོས། །ཞེས་སོ། །གསུམ་པ་དངོས་པོ་རྣམ་པར་དག་པ་ནི། དེ་ལྟར་ཞིང་དང་བསམ་པ་དག་ཀྱང་དངོས་པོ་མ་དག་ན་དཀོན་མཆོག་མཆོད་པའི་ཡོད་བྱད་དུ་མི་རུང་བས། མདོ་ལས། དངོས་པོ་རྐུ་འཕྲོག་དཀོར་ཟས་དང་། །གཞན་ལ་གནོད་པ་མ་ཡིན་པ། །རབ་ཏུ་གཅེས་དང་ཡིད་འཐད་རྫས། །མཁོ་བར་གྱུར་ན་མཆོག་ཡིན་ནོ། །ཞེས་དང་། དངོས་པོ་གང་ཞིག་སྡིག་དང་མ་འདྲེས་ཤིང་། །དགེ་འདུན་ལ་སོགས་ཕན་བདེ་སྐྱེད་པས་ཏེ། །ཞེས་གསུངས་ཤིང་། གཞན་ཡང་། བྱང་ཆུབ་སེམས་དཔའ་དུག་དང་མེ་དང་མཚོན་ཆ་ལ་སོགས་པ་ལེན་པ་པོ་ཁོ་རང་ལ་གནོད་པར་བྱ་བའམ། ཕ་རོལ་ལ་གནོད་པའི་ཕྱིར་སློང་བར་སྦྱིན་པར་མི་བྱེད་དོ། །རྒྱ་དང་རྔོན་གྱི་འཁྲུལ་འཁོར་དང་དེའི་ཐབས་ལ་སོགས་པ་མདོར་ན་གནོད་པར་འགྱུར་བ་དང་སྡུག་བསྔལ་དུ་འགྱུར་བ་ཅི་ཡང་རུང་བ་དེ་དག་ཐམས་ཅད་སློང་བ་རྣམས་ལ་སྦྱིན་པར་མི་བྱེད་དོ། །ཕ་དང་མ་སྦྱིན་པར་མི་བྱེད་དོ། །ཕ་དང་མ་གཏའ་མར་འཇོག་པར་མི་བྱེད་དོ། །བུ་དང་ཆུང་མ་ལ་སོགས་པ་མི་དགའ་བཞིན་དུ་གཞན་འདོད་པ་རྣམས་ལ་སྦྱིན་པར་མི་བྱེད་དོ། །ལོངས་སྤྱོད་མང་པོ་ཡོད་བཞིན་དུ་ཉུང་ངུ་སྦྱིན་པར་མི་བྱེད་དོ། །ཞེས་བྱང་སའི་དོན་བསྡུས་ཏེ་ཐར་རྒྱན་དུ་གསུངས་པ་དང་། དྲང་སྲོང་རྒྱས་པས་ཞུས་པའི་མདོ་ལས། ཞིང་བསམ་སྦྱོར་དངོས་ཅི་རིགས་པས་མ་དག་པའི་སྦྱིན་པར་འགྱུར་བ་སུམ་ཅུ་རྩ་གཉིས་གསུངས་པ་སྔོན་གྱི་མཁས་པ་དག་གིས་སྡོམ་དུ་བསྡུས་པ། ལོག་ལྟ་མ་དད་ལན་འདོད་ཆགས། །རྒྱལ་དང་མེ་ཆུ་ལ་སྟེར་དང་། །འཇིགས་ཕྱིར་དུག་མཚོན་བསད་ཤ་དང་། །བག་མེད་རྣམས་ལ་ཆང་སྟེར་དང་། །བསྡུ་ཕྱིར་བསྟོད་ཕྱིར་རོལ་མོ་མཁན། །སྐར་མཁན་གཞན་ནོར་མཛའ་ལ་སྟེར། །གཞན་འབྲུ་དུད་འགྲོས་ཟོས་ལ་དགའ། །བཟོ་བོ་སྨན་པ་སྤྱོས་ནས་སྟེ། །རྣམ་སྨིན་ཐེ་ཚོམ་ཟ་དང་འགྱོད། །འདི་ཡིས་ཕྱི་མར་ཕན་སྙམ་དང་། །རྣམ་སྨིན་རང་ཉིད་ན་སོ་རྒས། །ན་དང་འཆི་ཚེ་བསྐུལ་ནས་མཆོད། །གཞན་ཡུལ་གྲགས་ཕྱིར་ཕོད་བསྟན་ཕྱིར། །བུད་མེད་ཕྱིར་དང་བུ་མེད་ཕྱིར། །ཕྱི་མ་རྙེད་ཕྱིར་དམན་པ་རྣམས། །བོར་ནས་ཕྱུག་པོ་རྣམས་ལ་སྟེར། །མ་དག་སྦྱིན་པ་སུམ་ཅུ་གཉིས། །ཞེས་བསྟན་པ་དང་། གཞན་ཡང་། བྱང་ཆུབ་སེམས་དཔའ་རབ་ཏུ་བྱུང་བས་ཆོས་གོས་གསུམ་མི་སྦྱིན་པར་གསུངས་སོགས་མང་ཡང་། གཙོ་བོར་ནི། གཞན་ནས་བརྐུས་པ་དང་འཕྲོག་པ་དང་སྲོག་གཅོད་ཀྱི་ཉོ་བཙོང་བྱས་པ་སོགས་གཞན་ལ་གནོད་པར་འགྱུར་བའི་ཁ་ན་མ་ཐོ་བའི་ལས་ཀྱིས་མངོན་པར་སྒྲུབ་པའི་ཡོ་བྱད་ནི་ཇི་ཙམ་མང་ཞིང་ཇི་ཙམ་བཟང་ཡང་ཐབས་དེས་རྒྱལ་བ་དགྱེས་པའི་ལམ་དུ་མི་འགྱུར་ཏེ། མདོ་ལས། སེམས་ཅན་དོན་ཉིད་ང་ལ་གུས་ཡིན་གཞན་ལ་གུས་པས་མིན། །གུས་པའིའང་ང་ཡི་དེ་ལ་སྙིང་རྗེ་མི་སྤོང་བ་ཡིན་ཏེ། །སྙིང་རྗེ་སྤངས་པའི་སྤྱོད་པས་དམན་པར་གྱུར་པ་གང་ཡིན་ལ། །སྙིང་རྗེ་ཉིད་ཀྱིས་དེ་ལ་གནོད་པར་རིགས་ཀྱི་གཞན་གྱིས་མིན། །གང་ཞིག་སེམས་ཅན་རྣམས་ལ་སྙིང་རྗེ་ལྡན་པས་རབ་འཇུག་ན། །དེས་ནི་ང་ལ་མཆོད་ཅིང་བསྟན་པ་གཅེས་པར་རབ་ཏུ་བཟུང། །གང་ལ་ཚུལ་ཁྲིམས་ཐོས་དང་སྙིང་རྗེ་བློ་གྲོས་གསལ་ཡོད་པ། །དེ་ལྟར་དེས་ནི་བདེ་བར་གཤེགས་པ་རྟག་ཏུ་མཆོད་པར་འགྱུར་བ་ཡིན། །སེམས་ཅན་ཕན་པའི་དབང་དུ་བྱས་ནས་ངས་འདི་བསྒྲུབས་པ་སྟེ། །སྐུ་འདི་སེམས་ཅན་དོན་ཉིད་ཁོ་ནར་ཀུན་ནས་བསྐྱེད་པ་ལ། །གང་གིས་ཡིད་ཀྱིས་ཀྱང་ནི་སེམས་ཅན་དག་ལ་གནོད་བྱེད་པ། །དེ་ནི་ཇི་ལྟར་ང་ལ་རྟེན་ཏེ་ང་ལ་ལྟོས་བྲལ་ཡིན། །གང་གིས་ཡིད་ལ་དགའ་བ་བསྐྱེད་ན་མཆོད་པ་ཡིན་པས་ན། །སེམས་ཅན་དག་ལ་ཕན་ན་ཆུ་ཡང་མཆོད་པ་ཡིན། །འཚེ་བའི་བདག་ཉིད་ཅན་དང་གཞན་ལ་གནོད་པ་འབྱུང་བ་ཡི། །མཆོད་པ་ལེགས་པར་སྦྱར་བ་ཡིན་ཡང་མཆོད་པར་འགྱུར་བ་མིན། །ཆུང་མ་རྣམས་དང་བུ་དང་དབང་ཕྱུག་རྒྱལ་སྲིད་ཆེན་པོ་དང་། །ཤ་རྣམས་དང་ནི་ཁྲག་དང་ཚིལ་དང་ལུས་རྣམས་དང་ནི་མིག །གང་རྣམས་ཁོ་ན་དགའ་བའི་དབང་བྱས་པ་ཡིས་བཏང་བ་སྟེ། །གང་ཞིག་དེ་ལ་འཚེ་ན་ང་ལ་གནོད་པ་ཡིན། །སེམས་ཅན་རྣམས་ལ་མཆོག་ཏུ་ཕན་ན་ང་ལ་མཆོད་མཆོག་ཡིན། །སེམས་ཅན་རྣམས་ལ་གནོད་པའི་མཆོག་ནི་ང་ལ་གནོད་མཆོག་ཡིན། །ང་དང་སེམས་ཅན་དག་ནི་བདེ་སྡུག་མཚུངས་འདོད་པས། །གང་ཞིག་སེམས་ཅན་གནོད་བྱེད་དེ་ནི་ང་ལ་ཇི་ལྟར་མོས། །སེམས་ཅན་བརྟེན་ནས་ང་ཡི་སྐྱོབ་པ་མཉེས་དང་དགེ་བ་བྱས། །སེམས་ཅན་དག་ལ་བརྟེན་ནས་དོན་བསྒྲུབས་ཕ་རོལ་ཕྱིན་པའང་ཐོབ། །སེམས་ཅན་དོན་ལ་ཡིད་ལ་བརྩོན་པ་བསྐྱེད་ནས་བདུད་བཏུལ་ཏེ། །དེ་བཞིན་སེམས་ཅན་དེ་ཉིད་སྤྱོད་གང་ཡིན་པས་ང་སངས་རྒྱས། །གལ་ཏེ་སྐྱེ་དང་སྐྱེ་བར་སྲོག་ཆགས་དགའ་བའི་གྲོགས་མིན་ན། །གང་འདི་བྱམས་དང་སྙིང་རྗེ་སུ་ལ་དམིགས་པའི་གཞི་ལས་སྐྱེ། །རྣམ་ཐར་དགའ་སོགས་སུ་ལ་ལྟོས་ཤིང་ཡུལ་དང་གཞི་གང་ཡིན། །སུ་ཡི་དོན་དུ་རིང་ནས་ང་ཡི་ཡིད་ཀྱིས་སྙིང་རྗེ་བསྒོམས། །ངས་ནི་སྲོག་ཆགས་ཉིད་དེ་གླང་སོགས་དངོས་གྱུར་དུ་མ་བྱིན། །སེམས་ཅན་ཉིད་ནི་སྣོད་དུ་གྱུར་པས་ང་ཡིས་སྦྱིན་པ་བླངས། །སེམས་ཅན་སྣ་ཚོགས་རྒུད་གྱུར་པ་ལས་ང་ཡི་སྙིང་རྗེ་འཕེལ། །གལ་ཏེ་སེམས་ཅན་མི་སྐྱོང་སུ་ཡི་དོན་དུ་བསྒྲུབ་པར་བྱ། །གལ་ཏེ་སྲོག་ཆགས་འཁོར་བར་སྡུག་བསྔལ་དུ་མས་བཅོམ་མིན་ན། །སྐྱེ་བ་ལེན་ཅིང་སྡུག་བསྔལ་ཉམས་མེད་སུ་ཕྱིར་བདག་གིར་བྱེད། །བདག་ཉིད་ཆེན་པོ་འཁོར་བའི་རྒྱན་གྱི་བདེ་བར་གཤེགས་པ་འདི། །གལ་ཏེ་སེམས་ཅན་དགའ་ཕྱིར་མིན་ན་ངལ་འདི་སུ་ཕྱིར་བསྒྲུབས། །ང་ཡི་བསྟན་པ་ཇི་སྲིད་འགྲོ་བ་འདི་ན་གསལ་སྣང་བ། །དེ་སྲིད་གཞན་ལ་མཆོག་ཕན་བདག་གཞན་མཉམ་པར་གནས་པར་གྱིས། །ང་ཡི་སེམས་ཅན་དོན་དུ་རབ་མཉམ་སྐྱོ་མེད་སྦྱོར་རྣམས་ལ། །སྐྱོ་བར་བྱེད་པ་ལུས་འདི་ཟས་ཀྱིས་གསོས་པའི་སྙིང་པོ་མེད། །ཅེས་གསུངས་ཏེ་ཞིབ་པར་གོང་དུ་སྨོས་པ་བཞིན་ནོ། །མདོར་ན་བཙུན་པ་ཆོས་ལྡན་རབ་འབྱོར་གྱིས། བདག་དང་གཞན་གྱི་དོན་བྱེད་དང་། །གཞན་ལ་གནོད་པ་སློང་བ་ནི། །བསོད་ནམས་ཡིན་ནོ་བཟློག་པ་སྡིག །བདག་ཉིད་ཆེན་པོ་དེ་སྐད་གསུངས། །ཞེས་གསུངས་པ་ལྟར་དངོས་པོ་གང་ཡང་སྡིག་དང་མ་འདྲེས་ཤིང་སེར་སྣ་སོགས་ཀྱིས་མ་སྦགས་པའི་དག་ཅིང་གཙང་བར་སྦྱར་བ་གལ་ཆེ་སྟེ། མདོ་རྒྱན་ལས། རྒྱལ་སྲས་རྣམས་ཀྱི་བརྩེ་བས་སྦྱིན་པ་ནི། །ཁ་ན་མ་ཐོ་མེད་ཅིང་དག་པའི་གཞི། །བདེ་བར་འདྲེན་པར་བྱེད་པ་ཉིད་དང་ནི། །རྗེས་སུ་སྲུང་བཅས་ཚོལ་དང་གོས་པ་མེད། །ཅེས་གསུངས་པ་བཞིན་ནོ། །བཞི་པ་སྦྱོར་བ་དག་པའི་ཁྱད་པར་ནི། དེ་ལྟར་དངོས་པོ་དག་ཀྱང་སྦྱོར་བ་མ་དག་ན་སྐྱོན་དུ་འགྱུར་བའི་ཕྱིར། འཕགས་པ་སྐྱེས་བུ་དམ་པའི་མདོ་ལས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ལྔ་པོ་འདི་དག་ནི་སྐྱེས་བུ་དམ་པའི་སྦྱིན་པ་དག་ཡིན་ཏེ། ལྔ་གང་ཞེ་ན། སྐྱེས་བུ་དམ་པ་ནི་དད་པས་སྦྱིན་པ་སྦྱིན་པར་བྱེད་པ་ཡིན། གུས་པར་བྱས་ཏེ་སྦྱིན་པ་སྦྱིན་པར་བྱེད་པ་ཡིན། རང་གི་ལག་པས་སྦྱིན་པ་སྦྱིན་པ་ཡིན། དུས་སུ་སྦྱིན་པ་སྦྱིན་པ་ཡིན། གཞན་དག་ལ་མི་གནོད་པར་སྦྱིན་པ་སྦྱིན་པར་བྱེད་པ་ཡིན་ནོ། །ཞེས་དེ་དག་གི་ཕན་ཡོན་བཅས་རྒྱས་པར་གསུངས་པ་དང་། སྦྱིན་པའི་ཕན་ཡོན་བསྟན་པའི་མདོ་ལས། སེར་སྣ་རྣམ་པར་སྤང་བའི་ཕྱིར་དད་པས་སྦྱིན་པ་སྦྱིན་ནོ། །དུས་སུ་སྦྱིན་ནོ། །དེ་བཞིན་གཤེགས་པའི་རུང་བ་དངོས་པོ་གསུམ་ཡོངས་སུ་དག་པ་སྦྱིན་པ་སྦྱིན་ནོ། །སེམས་ཀྱི་འཁྲུགས་པའི་སྐྱོན་ཐམས་ཅད་སྤང་བའི་ཕྱིར་བསྟི་སྟང་དུ་བྱས་ཏེ་སྦྱིན་པ་སྦྱིན་ནོ། །སྙིང་པོ་མེད་པའི་ལུས་ལ་སྙིང་པོ་བླང་བའི་ཕྱིར་རང་གི་ལག་པ་ནས་སྦྱིན་པ་སྦྱིན་ནོ། །ཞེས་དང་། བྱམས་པ་ལ་གནས་ཏེ་སྦྱིན་པ་སྦྱིན་ན་གནོད་སེམས་མེད་པ་ཐོབ་པར་འགྱུར་རོ། །དེ་བཞིན་དུ་སྙིང་རྗེ་ལ་གནས་ནས་བྱིན་ན་འཚེ་བ་མེད་པ་དང་། དགའ་བ་ལ་གནས་ཏེ་བྱིན་ན་མི་འཇིགས་པ་སྦྱིན་པ་འཐོབ་པ་དང་། བཏང་སྙོམས་ལ་གནས་ཏེ་བྱིན་ན་མི་དགའ་བ་སྤོང་བ་དང་། རྣམ་པ་སྣ་ཚོགས་ཀྱི་སྦྱིན་པ་བྱིན་ན་ལོངས་སྤྱོད་སྣ་ཚོགས་པ་འཐོབ་པདང་། ལན་ལ་མི་རེ་བ་ལ་གནས་ཏེ་སྦྱིན་པ་བྱིན་ན་རྣམ་པར་སྨིན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རབ་ཏུ་འཐོབ་པར་འགྱུར་ཏེ། དགེ་སློང་དག་མཁས་པ་རྣམས་ཀྱིས་རྣམ་པ་སུམ་ཅུ་རྩ་བདུན་པོ་དེ་དག་སྦྱིན་པ་སྦྱིན་ནོ། །ཞེས་དང་། སྦྱིན་པའི་ཕར་ཕྱིན་གྱི་མདོ་ལས། རང་གི་ལག་པས་བྱིན་པས་ནི་བསྙེན་བཀུར་བྱེད་པ་འཐོབ་པར་འགྱུར་རོ། །གུས་པར་བྱས་ཏེ་བྱིན་པས་གཉེན་ལ་སོགས་པའི་ནང་དུ་གཞན་གྱིས་བཀུར་སྟི་བྱ་བར་འགྱུར། དུས་སུ་བྱིན་པས་ནི་ནོར་རྣམས་དུས་སུ་འགྲུབ་སྟེ་རྒྱས་པར་འགྱུར། མཐུན་པ་དང་ཡིད་དུ་འོང་བ་བྱིན་པས་ནི་མལ་དང་གོས་ལ་སོགས་པ་ལོངས་སྤྱོད་ཡིད་དུ་འོང་བ་རྣམས་ལ་སེམས་འཇུག་པར་འགྱུར། གཞན་ལ་མི་གནོད་པར་སྦྱིན་པས་ནི་ལོངས་སྤྱོད་བརྟན་པ་དག་འཐོབ་པར་འགྱུར། མི་དགའ་བ་དང་དུ་ལེན་པའི་སྦྱིན་པས་ནི་འཁོར་སྙིང་ཉེ་བར་འགྱུར་རོ། །ཞེས་དང་། དེ་སྦྱིན་པ་དེ་ལྟ་བུ་སྦྱིན་པ་ནི་ཆགས་པས་སྦྱིན་པར་མི་བྱེད། སྡང་བས་སྦྱིན་པར་མི་བྱེད། ཚིག་པ་ཟ་ཞིང་སྦྱིན་པར་མི་བྱེད། བརྙས་བཞིན་དུ་སྦྱིན་པར་མི་བྱེད། རྡེག་ཅིང་སྦྱིན་པར་མི་བྱེད། ཚར་བཅད་དེ་སྦྱིན་པར་མི་བྱེད། ཁྱད་དུ་གསོད་ཅིང་སྦྱིན་པར་མི་བྱེད། སྨད་དེ་སྦྱིན་པར་མི་བྱེད། ང་རྒྱལ་གྱིས་ཁེངས་བཞིན་དུ་སྦྱིན་པར་མི་བྱེད། འགྱོད་བཞིན་དུ་སྦྱིན་པར་མི་བྱེད། ལྷག་མར་གྱུར་པ་སྦྱིན་པར་མི་བྱེད། རུལ་ཞིང་མྱགས་པ་སྦྱིན་པར་མི་བྱེད་ཀྱི་སྦྱིན་པ་གང་དང་གང་སྦྱིན་པ་དེ་གུས་པར་བྱས་ཏེ་སྦྱིན་པར་བྱེད། བླ་མར་བྱེད། རི་མོར་བྱེད། མཆོད་པ་བྱས་ཤིང་བརྗོད་ནས་སྦྱིན་པར་བྱེད། མང་དུ་སྦྱིན་པར་བྱེད། བཟང་པོ་སྦྱིན་པར་བྱེད། རབ་ཏུ་དགའ་བས་སྦྱིན་པར་བྱེད་དགའ་ཞིང་མགུ་བས་སྦྱིན་པར་བྱེད། གཙང་བ་དང་རྒྱ་ཆེར་སྦྱིན་པར་བྱེད། རང་གི་ལག་པས་སྦྱིན་པར་བྱེད། གུས་པ་དང་བཅས་པ་དང་ཞེ་ས་དང་བཅས་པས་སྦྱིན་པར་བྱེད། བསམ་པ་དག་ཅིང་བཟང་ལ་དགེ་བས་སྦྱིན་པར་བྱེད། སེར་སྣ་མེད་པར་སྦྱིན་པར་བྱེད། བརྐམ་པ་མེད་པར་སྦྱིན་པར་བྱེད། ཞུམ་པ་མེད་པར་སྦྱིན་པར་བྱེད། འཇིགས་པ་མེད་པར་སྦྱིན་པར་བྱེད། རྒྱ་ཆེ་ཞིང་ཡངས་པར་སྦྱིན་པར་བྱེད། ཞེས་སོགས་རྒྱ་ཆེར་གསུངས་པ་བཞིན་ལ། ཁྱད་པར་དུའང་ལྷ་དང་བཅས་པའི་འགྲོ་བ་མཐའ་དག་གི་ཕྱག་གི་གནས། མཆོད་པའི་ཡུལ། བཀུར་བའི་འོས། བསོད་ནམས་ཀྱི་ཞིང་། ཡོན་ཏན་གྱི་ཕུང་པོ་ཚད་མེད་པ་དང་ལྡན་པའི་སྐྱབས་ཀྱི་དམ་པ་དཀོན་མཆོག་གསུམ་ནི་ཡུལ་ཆེས་གཉན་ཞིང་མ་དད་པ་དང་མ་གུས་པ་སོགས་ཀྱིས་ཉེས་པར་སྤྱོད་པའི་ཆ་ཕྲ་མོས་ཀྱང་རྣམ་སྨིན་གྱི་འབྲས་བུ་ཚད་མེད་པ་བསྐྱེད་པར་མདོ་སྡེ་རྣམས་ལས་གསུངས་པའི་ཕྱིར། དཀོན་མཆོག་མཆོད་པ་ལ་མ་གུས་པ་དང་། བག་མེད་པ་དང་། གཙང་སྦྲ་མ་ཐོན་པ་དང་། ཚོད་ཡོད་དང་། བརྙས་བཅོས་དང་། ལེ་ལོ་དང་སེར་སྣ་ལ་སོགས་པའི་སྐྱོན་གྱིས་མ་གོས་པར། དཀོན་མཆོག་གི་དད་པ་དང་། ཕན་ཡོན་གྱི་ཁྱད་པར་ཤེས་པར་བྱས་ནས་སེམས་རབ་ཏུ་དྭངས་བ་དང་། དགའ་བ་དང་སྤྲོ་བ་ཚད་མེད་པའི་ངང་ནས་བག་མེད་པའི་སྤྱོད་ལམ་གྱི་དབང་པོའི་སྒོ་བསྡམས་ཤིང་། མེ་ཏོག་ལ་སོགས་པའི་ཅི་འབྱོར་བའི་མཆོད་པའི་ཡོ་བྱད་རྣམས་ཀྱང་རྒྱུ་བཟང་བ། དངོས་གཙང་བ། བཀོད་ལེགས་པ། བསམ་པ་དག་ཅིང་སྦྱོར་བ་གུས་པ་རང་གཞན་སུས་མཐོང་ཡང་ཡིད་ལ་དྭངས་པ་དང་སྤྲོ་བ་བསྐྱེད་ནུས་པའི་བཀོད་པ་ཕུན་སུམ་ཚོགས་པ་ལེགས་པར་བལྟར་བར་བྱ་དགོས་ཏེ། འཕགས་པ་བཟང་པོ་སྤྱོད་པ་ལས། བཀོད་པ་ཁྱད་པར་འཕགས་པའི་མཆོག་རྣམས་ཀྱིས། །རྒྱལ་བ་དེ་དག་ལ་ནི་མཆོད་པར་བགྱི། །ཞེས་དང་། སྤྱོད་འཇུག་ལས། རིན་ཆེན་སེམས་དེ་གཟུང་བར་བྱ་བའི་ཕྱིར། །དེ་བཞིན་གཤེགས་པ་རྣམས་དང་དམ་པའི་ཆོས། །དཀོན་མཆོག་དྲི་མ་མེད་དང་སངས་རྒྱས་སྲས། །ཡོན་ཏན་རྒྱ་མཚོ་རྣམས་ལ་ལེགས་པར་མཆོད། །ཅེས་གསུངས་པ་བཞིན་ནོ། །དེ་ལྟར་རྣམ་པ་དག་པའི་མཆོད་པ་དངོས་ལ་དབྱེ་སྒོ་མང་ཡང་། སྐབས་འདིར་བླ་ན་ཡོད་པ་དང་། བླ་ན་མེད་པ་གཉིས་ཀྱིས་སྟོན་ཏེ། དང་པོ་ནི། སྤྱིར་ཞིང་གི་དམ་པ་དཀོན་མཆོག་མཆོད་པ་ཐམས་ཅད་བླ་ན་མེད་པ་ཡིན་མོད་ཀྱི་འདིར་ཟང་ཟིང་དང་སྒྲུབ་པའི་སྒོ་ནས་དེ་གཉིས་ཀྱི་ཁྱད་པར་འབྱེད་པ་ཡིན་ལ། དེ་ལ་ཟང་ཟིང་གི་ཁྱད་པར་བཟང་སྤྱོད་སོགས་ནས་བསྟན་པའི་གོ་རིམ་བཞིན། དངོས་སུ་འབྱོར་བའི་མཆོད་པ་ལ། ཐོག་མར་དཀོན་མཆོག་གསུམ་གྱི་རྟེན་ལ་ཕྱག་འཚལ་བའི་ཕན་ཡོན་ནི། འདུལ་བ་ལུང་ལས། དགེ་སློང་དག་ཁྱེད་རྣམས་ཀྱིས་དེ་བཞིན་གཤེགས་པའི་དབུ་སྐྲ་དང་སེན་མོའི་མཆོད་རྟེན་ལ་དད་པས་ཕྱག་འཚལ་བ་དེའི་རྣམ་པར་སྨིན་པ་ནི། ཇི་སྲིད་དུ་ཚངས་པ་མཚུངས་པར་སྤྱོད་པ་རྣམས་ལ་ཁོང་ཁྲོ་མ་སྐྱེས་པ་དེ་སྲིད་དུ་དབང་ཆེན་གསེར་གྱི་ས་གཞི་ལ་ཐུག་གི་བར་གྱི་རྡུལ་ཕྲ་རབ་ཀྱི་གྲངས་དང་མཉམ་པའི་འཁོར་ལོས་སྒྱུར་བའི་རྒྱལ་པོའི་བདེ་བ་མྱོང་ཞིང་། ལྷ་དང་མི་རྣམས་ཀྱི་ནང་དུ་ཕྱིན་པར་འགྱུར་རོ། །ཞེས་དང་། ཁང་བུ་བརྩེགས་པ་ལས། ཀུན་དགའ་བོ། གང་ལ་ལ་ཐལ་མོ་སྦྱར་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་ཕྱག་འཚལ་ལོ། །ཕྱག་འཚལ་ལོ་ཞེས་ཕྱག་འཚལ་བར་བྱེད་ན་སེམས་ཅན་དེ་དག་ངས་ཡོངས་སུ་བཟུང་ཞིང་མྱ་ངན་ལས་བཟླས་པ་ཡིན་ནོ། །ཞེས་དང་། འཕགས་པ་སྤྱན་རས་གཟིགས་ཀྱི་མདོར། གང་ཞིག་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ལ། །བསྐལ་པ་བྱེ་བ་གཞལ་ཡས་བསྟི་སྟང་བྱེད་པ་བས། །གང་ཞིག་ཕྱི་དུས་མི་བཟད་བསྐལ་པ་འདི་ལ་ནི། །མཆོད་རྟེན་ཕྱག་འཚལ་དེ་ཡི་བསོད་ནམས་ཆེས་མང་ངོ་། །ཞེས་སོགས་རྒྱ་ཆེར་གསུངས་པ་དང་། མདོ་སྡེ་ལས་རྣམ་འབྱེད་ལས། རྟེན་ལ་ཕྱག་འཚལ་བ། ཐལ་མོ་སྦྱར་བ། ཕྱག་དར་བྱེད་པ། གདུགས། དྲིལ་བུ། བ་དན། མེ་ཏོག ཕྲེང་བ། མར་མེ། བྱུག་པ་དང་སྤོས། རོལ་མོ་སིལ་སྙན་རྣམས་ཕུལ་བ་ལ་སོ་སོར་ཕན་ཡོན་ཆེན་པོ་བཅུ་རེ་དང་། ན་བཟའ་ཕུལ་བའི་ཕན་ཡོན་བཅུ་གཉིས་འཐོབ་པར་གསུངས་པ་སོགས་ནི་ཁོ་བོས་གཞན་དུ་བྲིས་ཟིན་པ་ལ་བལྟ་བར་བྱ་ཞིང་། རྡོ་རྗེ་དྲྭ་བའི་རྒྱུད་ལས་ཀྱང་། གང་གིས་སྒོ་གསུམ་བཏུད་བྱས་ནས། །རྒྱལ་བའི་སྐུ་ལ་ཕྱག་འཚལ་ནས། །དེ་ཡི་བསོད་ནམས་འཇིག་རྟེན་དུ། །གཟུགས་ཅན་གྱུར་ན་ཤོང་མི་འགྱུར། །ཞེས་སོ། །བསྟོད་པ་བགྱིས་པའི་ཕན་ཡོན་ནི། མདོ་ལས། སྔོན་དེ་བཞིན་གཤེགས་པ་སྐར་རྒྱལ་ཞེས་བྱ་བ་ལ་བདག་ཅག་གི་སྟོན་པས་ཚིགས་སུ་བཅད་པ་གཅིག་པའི་དབྱངས་ཀྱིས་བསྟོད་པས་བསྐལ་པ་དགུའི་ཚོགས་འདུམ་པར་གསུངས་པ་དང་། མདོ་སྡེ་སྐལ་བཟང་ལས། བདེ་བར་གཤེགས་པ་དུས་མཁྱེན་རྒྱལ་པོ་ནི། །སྙན་དངགས་མཁན་ཚེ་བདེ་གཤེགས་རྩྭ་མཆོག་ལ། །ཚིགས་སུ་བཅད་པའི་དབྱངས་ཀྱིས་བསྟོད་བྱས་ནས། །དང་པོ་བྱང་ཆུབ་མཆོག་ཏུ་སེམས་བསྐྱེད་དོ། །ཞེས་གསུངས། ཚིགས་བཅད་བཞི་པ་ལས། གང་གིས་ཚིགས་བཅད་འདི་བཞི་ཡིས། །དེ་བཞིན་གཤེགས་པར་བསྟོད་བྱེད་ན། །བསྐལ་པ་བྱེ་བ་སྟོང་དུ་ནི། །དེ་ནི་ངན་འགྲོར་འགྲོ་མི་འགྱུར། །ཞེས་དང་། གསལ་རྒྱལ་གྱི་ཚིགས་སུ་བཅད་པ་ལས། སུ་དག་རྒྱལ་བའི་གདུང་ལྡན་བསྟོད་བྱེད་པ། །དེ་དག་གླིང་བུའི་སྒྲ་དང་གླུ་སྙན་དང་། །སྒྲ་སྙན་ཡིད་དུ་འོང་བ་ཐོབ་པ་དང་། །སོ་སོ་ཡང་དག་རིག་པའང་འཐོབ་པར་འགྱུར། །ཞེས་དང་། རྒྱུད་ལས་ཀྱང་། འདི་ནི་སངས་རྒྱས་ཐམས་ཅད་ཀྱི། །ཡང་དག་ཡོན་ཏན་རྒྱ་ཆེན་ཏེ། །ལན་གཅིག་ཙམ་ཞིག་བརྗོད་པས་ཀྱང་། །སངས་རྒྱས་ཐམས་ཅད་འགྲུབ་པར་འགྱུར། །ཞེས་སོ། །རྟེན་ལ་མེ་ཏོག་ཕུལ་བའི་ཕན་ཡོན་ཡང་། བློ་གྲོས་བཟང་མོས་ཞུས་པའི་མདོ་ལས། བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་སངས་རྒྱས་བཅོམ་ལྡན་འདས་རྣམས་ཀྱི་ཐད་དུ་རིན་པོ་ཆེའི་པདྨ་ལ་བརྫུས་ཏེ་སྐྱེ་བར་འགྱུར་ཏེ། བཞི་གང་ཞེ་ན། འདི་ལྟ་སྟེ། ཕྱེ་མའམ་མེ་ཏོག་ཨུཏྤལའམ། པདྨའམ། ཀུ་མུདའམ། པདྨ་དཀར་པོས་ལག་པ་བཀང་སྟེ་དེ་བཞིན་གཤེགས་པའི་སྐུ་གཟུགས་སམ་དེ་བཞིན་གཤེགས་པའི་མཆོད་རྟེན་ལ་འབུལ་བ་དང་། གཞན་དག་ལ་ཡང་གནོད་སེམས་མི་བསྐྱེད་པ་དང་། དེ་བཞིན་གཤེགས་པའི་སྐུ་གཟུགས་པདྨའི་གདན་ལ་བཞུགས་པར་བྱེད་དུ་འཇུག་པ་དང་། སངས་རྒྱས་ཀྱི་བྱང་ཆུབ་ལ་ངེས་པར་རྒྱ་ཆེར་མོས་པ་སྟེ། བུ་མོ་ཆོས་བཞི་དང་ལྡན་ན་སངས་རྒྱས་བཅོམ་ལྡན་འདས་རྣམས་ཀྱིས་ཐད་དུ་རིན་པོ་ཆེའི་པདྨ་ལ་བརྫུས་ཏེ་སྐྱེ་བར་འགྱུར་རོ། །ཞེས་དང་། སྤྱན་གཟིགས་མདོར། སུ་ཞིག་དགའ་བའི་སེམས་ཀྱིས་མེ་ཏོག་བླངས། །དད་བསྐྱེད་འཇིག་རྟེན་མགོན་ལ་ཆར་དུ་གཏོར། །དེ་ནི་མི་ཡི་འཇིག་རྟེན་བསོད་ནམས་ལྡན། །རྒྱལ་སྲིད་གནས་ནས་རྒྱལ་བ་མཆོད་པར་འགྱུར། །ཞེས་དང་། མཆོད་རྟེན་བསྐོར་བའི་ཚིགས་བཅད་ལས། །མཁས་པ་གང་གིས་སངས་རྒྱས་མཆོད་རྟེན་ལ། །དགའ་བའི་སེམས་ཀྱིས་མེ་ཏོག་སིལ་མ་སྤུངས། །འཛམ་བུའི་ཆུ་ཀླུང་གསེར་སྣོད་འབུམ་བཞག་པ། །དེ་ནི་དེ་དང་མཚུངས་པ་ཡོད་མ་ཡིན། །ཞེས་སོ། །དེ་བཞིན་དུ་མེ་ཏོག་དང་རིན་པོ་ཆེ་ལ་སོགས་པའི་ཕྲེང་བ་ཕུལ་ན། སྤྱན་གཟིགས་མདོར། མེ་ཏོག་ཕྲེང་བ་བྱས་ནས་སུ། །མཆོད་རྟེན་དེ་ལ་སུས་འབུལ་བ། །དེ་ནི་ནམ་ཡང་ཕོངས་མི་འགྱུར། །མི་ཡི་ནང་ནས་ཤི་འཕོས་ནས། །སུམ་ཅུ་རྩ་གསུམ་འགྲོ་བར་འགྱུར། །དེ་ན་རིན་ཆེན་སྣ་ཚོགས་ཀྱི། །གཞལ་མེད་ཁང་པ་འཐོབ་པར་འགྱུར། །ཞེས་དང་། གསལ་རྒྱལ་ལས། ཕྲེང་བ་མེ་ཏོག་རྒྱ་ཆེན་ཆར་རྣམས་ཀྱིས། །སུ་དག་འདིར་ནི་རྒྱལ་བའི་གཟུགས་ལ་མཆོད། །དེ་དག་ལྷ་དང་མི་ཡི་འཇིག་རྟེན་དུ། །ཆ་བྱད་ཡིད་འོང་སྣ་ཚོགས་ལེགས་པར་བརྒྱན། །ཞེས་དང་། མཁས་པ་སུ་དག་བདེ་གཤེགས་མཆོད་རྟེན་ལ། །དད་པའི་སེམས་ཀྱིས་ཕྲེང་བ་འདོགས་བྱེད་པ། །གསེར་ཕྲེང་རིན་ཆེན་མང་པོས་ལེགས་སྤྲས་པ། །བསོད་ནམས་ལས་ལྡན་དེ་ཡི་མགོ་ལ་ཐོགས། །སྟོན་པའི་མཆོད་རྟེན་དག་ལ་རྒྱན་འཕྱང་འདོགས། །དེ་དག་དོ་ཤལ་རྒྱན་ཕྲེང་ནོར་བུ་དང་། །གདུ་བུ་དག་དང་དཔུང་རྒྱན་མཆོག་རྣམས་ཀྱིས། །ལུས་བརྒྱན་འཇིག་རྟེན་དག་ན་རྒྱུ་བར་འགྱུར། །ཞེས་དང་། ཚིགས་བཅད་ལས། མཁས་པ་གང་གིས་སངས་རྒྱས་མཆོད་རྟེན་ལ། །དགའ་བའི་སེམས་ཀྱིས་མེ་ཏོག་ཕྲེང་བ་ཐོགས། །འཛམ་བུའི་ཆུ་ཀླུང་གསེར་ཁལ་བྱེ་བ་གཉིས། །དེ་ནི་དེ་དག་མཚུངས་པ་ཡོད་མ་ཡིན། །ཞེས་སོ། །སིལ་སྙན་ཏེ་རོལ་མོའི་བྱེ་བྲག་འབུད་དཀྲོལ་བརྡུང་གསུམ་སྣ་ཚོགས་པའི་སྒྲ་ཡིས་མཆོད་ན། སྤྱན་གཟིགས་མདོར། རོལ་མོའི་སྒྲ་ཡིས་མི་མཆོག་མཆོད་བྱས་ན། །མྱ་ངན་མེད་ཅིང་དབང་ལྡན་རྒྱལ་པོར་འོངས། །མི་ཡི་འཇིག་རྟེན་ཡིད་འོང་སྒྲ་ལྡན་འགྱུར། །དེ་སྒྲ་ཡན་ལག་ཚང་ཞིང་དག་པ་འོངས། །ཞེས་དང་། རྒྱལ་བའི་མཆོད་རྟེན་རོལ་མོའི་སྒྲ་ཕུལ་བས། །ཟབ་ཅིང་རིགས་པའི་སྤོབས་པ་ཕུན་སུམ་ཚོགས། །ཡན་ལག་ལྔ་རྫོགས་ཡིད་འོང་ཚིག་དང་ལྡན། །སྒྲ་སྐད་དག་གིས་འཇིག་རྟེན་འགེངས་པར་བྱེད། །ཅེས་དང་། རྒྱལ་བའི་མཆོད་རྟེན་ལ་ནི་དྲིལ་ཕུལ་བས། །ཚིག་བཙན་གྲགས་པ་ཆེན་པོ་དག་དང་ལྡན། །ཚངས་པའི་སྒྲ་དབྱངས་ཡིད་འོང་སྐྱེ་བ་དྲན། །ཞེས་སོ། །འབྲུ་མར་དང་སྤོས་སོགས་ཀྱི་བྱུག་པ་འབུལ་ན། སྤྱན་གཟིགས་ལས། རྒྱལ་བའི་མཆོད་རྟེན་སྤོས་བྱུག་ཕུལ་བྱས་ན། །བཅོམ་ལྡན་འདས་ཀྱི་བསྟན་པ་འཇིགས་འགྱུར་ཚེ། །འཛམ་བུ་གླིང་དུ་སྐྱེ་བར་མི་འགྱུར་ཞིང་། །དེ་ནི་དེ་ཚེ་མཐོ་རིས་བདག་པོར་འགྱུར། །ཞེས་དང་། གསལ་རྒྱལ་ལས། སུ་དག་སྤོས་མཆོག་སྦྱར་བའི་འབྲུ་མར་གྱིས། །བདེ་བར་གཤེགས་པའི་མཆོད་རྟེན་ཉུག་བྱེད་པ། །དེ་དག་སྤོས་ཀྱིས་མཆོད་ཅིང་ཙན་དན་གྱིས། །ལུས་བྱུགས་ཉི་མའི་འོད་དང་འདྲ་བར་འགྱུར། །ཞེས་སོ། །གདུགས་དང་བླ་བྲེ་བ་དན་རྒྱལ་མཚན་ལྡ་ལྡི་ལ་སོགས་པས་མཆོད་ན། སྤྱན་གཟིགས་མདོར། འཇིག་རྟེན་སངས་རྒྱས་འགྱུར་ཞེས་མོས་བསྐྱེད་དེ། །བཅོམ་ལྡན་མཆོད་རྟེན་བ་དན་ཕུལ་བྱས་ན། །དེ་ནི་སྐྱེ་བོ་མང་པོས་མཆོད་འོས་འགྱུར། །བྱང་ཆུབ་མཆོག་སྤྱད་དམ་པ་ཞི་བ་སྤྱོད། །ཅེས་དང་། རྡུལ་བསལ་སེམས་ཅན་མཆོག་ལ་རྒྱལ་མཚན་ཕུལ། །རིང་པོར་མི་ཐོགས་ནོར་མང་རྙེད་པར་འགྱུར། །ཤེས་རབ་མཐའ་ཡས་མཛོད་ནི་མང་ལྡན་འོང་། །སེམས་ཆུང་མི་འགྱུར་དམན་པའི་སེམས་མི་འགྱུར། །ཞེས་དང་། སངས་རྒྱས་དམ་པ་མི་མཆོག་བཞུད་པའི་ཚེ། །འདྲེན་པ་མཚུངས་པ་མེད་ལ་དད་བྱས་ཏེ། །སྟོན་པའི་སྐུ་ལ་ཉི་ཟེར་མི་འབབ་པར། །མེ་ཏོག་མ་ལི་ཀ་གདུགས་བཅོམ་ལྡན་ཕུལ། །དེ་ནི་ལས་མཛེས་དམ་པ་གུས་བྱས་པས། །ལྷ་དབང་བརྒྱ་བྱིན་དུ་ནི་ལན་འབུམ་འགྱུར། །འཇིག་རྟེན་ཀུན་ན་ཚངས་པའི་བདག་པོར་འགྱུར། །ཞེས་སོགས་ནས། བཅོམ་ལྡན་མཆོད་རྟེན་རྣམས་ལ་གདུགས་འབུལ་བ། །ཇི་ལྟ་བུ་ཡང་བྱང་ཆུབ་སེམས་མི་འདོར། །བྱམས་ལ་གནས་ཤིང་མི་དམན་སེམས་སུ་འགྱུར། །དེ་ཡི་ཤེས་པ་ནམ་ཡང་ཉམས་པ་མེད། །ཅེས་པའི་བར་གྱིས་རྒྱ་ཆེར་བསྟན་པ་དང་། གསལ་རྒྱལ་ལས། སུ་དག་ལ་ལ་མཆོད་རྟེན་སྐུ་གཟུགས་ལ། །དད་པའི་ཡིད་ཀྱིས་བླ་རེ་འབུལ་བྱེད་ན། །དེ་དག་ས་སྟེང་རྒྱ་མཚོའི་མཐར་ཀླས་པ། །མ་ལུས་དབང་བྱེད་རྒྱལ་གཅིག་དབང་བྱེད་འགྱུར། །བདེ་གཤེགས་མཆོད་རྟེན་དག་ལ་དགའ་བཞིན་དུ། །རྣམ་མང་རྒྱ་ཆེན་གདུགས་ནི་བཏགས་པ་ཡིས། །ལྷ་མིའི་འཇིག་རྟེན་དག་ན་གདུགས་འདྲ་བར། །ལྷ་དང་མི་ཡི་དབང་པོ་ལྟ་བུར་འགྱུར། །མི་རྣམས་སུ་དག་སྐུ་གདུང་སྙིང་པོ་ཅན། །དྲི་མེད་བསོད་ནམས་འབྱུང་གནས་གྱུར་པ་ལ། །བ་དན་མཛེས་པ་སྣ་ཚོགས་འདོགས་པ་དང་། །མཐུ་དང་ལྡན་ཞིང་སྲིད་གསུམ་མཆོད་གནས་འགྱུར། །བདེ་གཤེགས་མཆོད་རྟེན་ཅོད་པཎ་བཏགས་པ་ཡིས། །མི་དབང་དཔལ་དང་ལྷ་དབང་དཔལ་ཐོབ་ཅིང་། །བདེ་བའི་མཆོག་ཀྱང་ཉམས་སུ་མྱོང་གྱུར་ནས། །རྣམ་པར་གྲོལ་བའི་ཅོད་པཎ་ཁྱད་པར་འཐོབ། །ཅེས་སོ། །མར་མེ་ལ་སོགས་པ་སྣང་གསལ་གྱི་སྒྲོན་མེས་མཆོད་ན། སྤྱན་གཟིགས་མདོར། སངས་རྒྱས་མཆོད་རྟེན་མར་མེ་གཅིག་ཕུལ་ན། །འདི་ནས་བཟུང་སྟེ་སྲིད་པའི་རྩེ་མོའི་བར། །སངས་རྒྱས་ཞིང་ནི་འཛམ་བུའི་གསེར་གྱིས་གང་། །དེ་འདྲའི་དཔལ་དེ་ཟད་པར་བྱ་མི་ནུས། །བདེ་གཤེགས་མཆོད་རྟེན་མར་མེ་ཕུལ་བྱས་ན། །དེ་ཡི་ལུས་ནི་མདོག་ངན་ཡོངས་མི་འགྱུར། །གཟུགས་མཆོག་སྲ་ཞིང་ལག་པ་གཟུ་བ་འདྲ། །སྣང་བ་ཐོབ་ནས་འཇིག་རྟེན་ཀུན་ཏུ་རྒྱུ། །གལ་ཏེ་ཁྲག་ཁྲིག་བརྒྱ་སྟོང་སངས་རྒྱས་ཞིང་། །ཡུང་འབྲུ་དག་གིས་ཕྱུར་བུར་གང་གྱུར་པ། །བགྲང་བ་དང་ནི་གཞལ་ཞིང་བརྗོད་པར་ནུས། །བདེ་གཤེགས་མར་མེ་གཅིག་ཕུལ་དེ་ལྟར་མིན། །ཞེས་དང་། གལ་ཏེ་མི་མཇེད་འཇིག་རྟེན་ཁམས་འདི་ཀུན། །ནོར་བུ་རིན་ཆེན་བཻཌཱུཪྱས་གང་བ། །ཟད་པར་བྱ་ནུས་སངས་རྒྱས་མཆོད་རྟེན་ལ། །མར་མེ་གཅིག་ཕུལ་དཔལ་དེ་ཟད་མི་ནུས། །ཞེས་དང་། གསལ་རྒྱལ་ལས། དཔེ་མེད་མཆོད་རྟེན་མར་མེ་ཕུལ་བ་ཡིས། །ཨུཏྤལ་སྔོན་པོ་ཁ་བྱེ་འདབ་འདྲའི་མིག །གསལ་ཞིང་སྡུག་ལ་མིག་གི་དཀྱུས་རིང་མཛེས། །དྲི་མ་མེད་པ་ལྷ་ཡི་མིག་དང་ལྡན། །སུ་དག་མཆོད་རྟེན་མར་མེ་དངར་བ་འབུལ། །དེ་དག་མིག་ཏུ་སྡུག་ཅིང་མཛོད་རབ་རྒྱས། །མིག་གི་དཀྱུས་རིང་མཐོན་ཀའི་མདོག་དང་ལྡན། །སྐྱེས་པ་བུད་མེད་དག་གིས་བལྟ་བར་འོས། །མཚན་མོ་ཐུབ་ཆེན་སྤྱན་སྔར་ཐལ་སྦྱར་འཁོད། །འབྱོར་དང་ལྡན་པ་མར་མེའི་སྡོང་བུ་འབུལ། །དེ་དག་སྲིད་པ་གཞན་དུ་འབྲས་བུར་ལྡན། །རིན་ཆེན་རགས་པའི་འོད་ཀྱི་ལུས་ཀྱང་འཐོབ། །རྒྱལ་ལ་ཕུལ་བའི་མར་མེ་འཆི་བ་ནི། །དགའ་བའི་སེམས་ཀྱིས་འདིར་ནི་དགའ་བཞིན་དུ། །སྙིང་པོ་བསྐུལ་བར་བྱེད་པ་དེ་དག་ནི། །སྤྱན་ལྔ་དག་ཀྱང་ངེས་པར་འཐོབ་པར་འགྱུར། །ཞེས་དང་། གཞན་ཡང་འཕགས་པ་མར་མེ་འབུལ་བའི་མདོ་སོགས་ལས་རྒྱ་ཆེར་གསུངས་སོ། །སྦྱར་བ་དང་མ་སྦྱར་བའི་དྲི་ཞིམ་པོ་སྲེག་པའི་བདུག་སྤོས་ཀྱིས་མཆོད་ན། སྤྱན་གཟིགས་མདོར། གང་ཞིག་སྤོས་ཆུ་ཡུང་འབྲུ་ཙམ་བླང་སྟེ། །བཅོམ་ལྡན་མཆོད་རྟེན་རྣམས་ལ་བདུག་བྱེད་པ། །དེ་ཡི་ཕན་ཡོན་བརྗོད་ཀྱིས་སེམས་དྭངས་ཤིང་། །རྡུལ་དང་དྲི་མ་སྤོངས་ལ་མཉན་པར་གྱིས། །དེ་ནི་ནད་མེད་གྱུར་ཅིང་ཕྱོགས་ཀུན་རྒྱུ། །ནད་མེད་གྱུར་ཅིང བློ་བརྟན་བག་ཡོད་ལྡན། །སྤྱད་པ་རྣམ་པར་སྤྱོད་ཚེ་མྱ་ངན་འདུལ། །སྐྱེ་བོ་མང་པོ་དགའ་ཞིང་ཡིད་དུ་འོང་། །རྒྱལ་པོ་ཐོབ་ནས་རྒྱལ་བ་མཆོག་བཀུར་འགྱུར། །མཐུ་ཆེན་རབ་མཁས་འཁོར་ལོས་སྒྱུར་འགྱུར་ཏེ། །གསེར་གྱི་མདོག་ཅན་མཚན་གྱི་གོ་ཆ་ཅན། །འཇིག་རྟེན་དག་ན་ཡིད་འོང་དྲི་ལྡན་འཐོབ། །ཅེས་དང་། གསལ་རྒྱལ་ལས། སངས་རྒྱས་མཆོད་རྟེན་ལ་ནི་དྲི་ཞིམ་ཕུལ། །བདུག་སྤོས་རྒྱ་ཆེན་མང་པོ་ལྡན་སྦྱར་དང་། །ཨ་ག་རུ་ཡི་བདུག་སྤོས་ཕུལ་བ་ཡིས། །དེ་ཡི་ལུས་ཀུན་སྤོས་ངད་ལྡན་པར་འགྱུར། །ཞེས་སོ། །དར་གོས་སོགས་ན་བཟའ་རྣམ་པ་སྣ་ཚོགས་ཕུལ་ན། སྤྱན་གཟིགས་མདོར། སུ་ཞིག་དགའ་མགུ་སེམས་ཀྱིས་གོས་ཀྱིས་ནི། །བཅོམ་ལྡན་མཆོད་རྟེན་རྣམས་ལ་མཆོད་བྱེད་ན། །དེ་ནི་གོས་མཛེས་བྱེ་བ་སྟོང་རྣམས་དང་། །ཁྲག་ཁྲིག་བརྒྱ་བགྲངས་མཐའ་ཡས་རྟག་ཏུ་རྙེད། །ཞེས་དང་། གང་ཞིག་གོས་ཀྱིས་བཅོམ་ལྡན་མཆོད་རྟེན་དང་། །འདྲེན་པ་མཚུངས་མེད་རྣམས་ལ་མཆོད་བྱེད་པ། །དེ་འདིར་མཚུངས་པ་མེད་པའི་ལུས་ཐོབ་སྟེ། །སུམ་ཅུ་རྩ་གཉིས་མཚན་གྱི་མེ་ཏོག་རྒྱས། །བཅོམ་ལྡན་མཆོད་རྟེན་གོས་ཀྱིས་དཀྲིས་བྱས་ན། །ལག་མཐིལ་ནས་ནི་མུ་ཏིག་ཕྲེང་མཛེས་པ། །སྣ་ཚོགས་དག་དང་སེང་གེའི་ཕྲེང་བ་དང་། །གསེར་སྐུད་རབ་མཛེས་བསྐལ་པ་མཐའ་ཡས་འབྱུང་། །ཞེས་དང་། གལ་ཏེ་རིན་ཆེན་རབ་མཆོག་སྣ་བདུན་གྱིས། །སྟོང་གི་ཞིང་ཀུན་རབ་ཏུ་བཀང་བ་ཡི། །དེ་འདྲའི་དཔལ་འདི་ཟད་པར་བྱ་ནུས་ཀྱི། །རྒྱལ་བའི་མཆོད་རྟེན་གོས་གཅིག་ཕུལ་བའི་མིན། །ཞེས་དང་། གསལ་རྒྱལ་ལས། རྒྱལ་བའི་མཆོད་རྟེན་ལ་ནི་གོས་ཕུལ་བས། །བསོད་ནམས་བྱམས་པའི་ངོ་ཚའི་གོས་གྱོན་ཏེ། །དགའ་ཞིང་ཡོན་ཏན་ཀུན་ལྡན་སེར་སྣ་མེད། །མདོག་ཀྱང་འཇམ་ཞིང་ཁ་དོག་གསེར་འདྲར་འགྱུར། །ཞེས་སོ། །གུར་གུམ་སོགས་ཀྱིས་ཆུས་ཆག་ཆག་བཏབ་པ་དང་། མཆོད་ཡོན་ཁྲུས་ཆབ་སོགས་དྲི་བཟང་པོའི་རིགས་ཀྱིས་མཆོད་ན། གསལ་རྒྱལ་ལས། སུ་དག་དཔྱིད་ཀྱི་དུས་ན་གཙང་མའི་ཆུས། །མཆོད་རྟེན་ཉེ་སྐོར་རྡུལ་རྣམས་ཞི་བྱེད་པ། །དེ་ལ་བུད་མེད་རྣམས་ནི་དགའ་བཞིན་དུ། །རྡུལ་གཡབ་གསེར་གྱི་ཡུ་བ་ཅན་གྱིས་གཡོབ། །ཞེས་དང་། མི་རྣམས་གང་དག་ཐུབ་དབང་མཆོད་རྟེན་ལ། །སྤོས་ཆུ་གཙང་ཞིང་དྭངས་པས་ཁྲུས་གསོལ་ན། །དེ་དག་ལུས་ལ་དྲི་མ་མེད་པ་དང་། །གདུང་བ་མེད་ཅིང་མདོག་འཇམ་མྱ་ངན་མེད། །ཅེས་དང་། ཚིགས་བཅད་ལས། མཁས་པ་སུ་དག་སངས་རྒྱས་མཆོད་རྟེན་ལ། །དགའ་བའི་སེམས་ཀྱིས་སྤོས་ཆུས་དབང་བསྐུར་བས། །འཛམ་བུའི་ཆུ་ཀླུང་གསེར་གྱི་ཕུང་པོ་འབུམ། །དེ་ནི་དེ་དང་མཚུངས་པ་ཡོད་མ་ཡིན། །ཞེས་སོ། །གཞན་ཡང་གཙུག་ལག་ཁང་དང་མཆོད་རྟེན་སོགས་ལ་རྡུལ་ཕྱག་བགྱིས་ན། འདུལ་བ་ལུང་ལས། ཕྱག་དར་བྱས་པ་ལ་ཕན་ཡོན་ལྔ་ཐོབ་སྟེ། རང་གི་སེམས་དྭངས་པར་འགྱུར་བ་དང་། གཞན་གྱི་སེམས་མོས་པར་འགྱུར། ལྷ་རྣམས་ཡིད་དགའ་བར་འགྱུར། མཛེས་པར་འགྱུར་བའི་དགེ་བའི་རྩ་བ་སོག་པར་འགྱུར་རོ། །ལུས་ཞིག་ནས་ཀྱང་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཞེས་དང་། སྤྱན་གཟིགས་མདོར། བསོད་ནམས་འདོད་པ་སུ་ཞིག་ཕྱག་ཐོགས་ཏེ། །བཅོམ་ལྡན་མཆོད་རྟེན་གུས་པས་མཆོད་བྱེད་པ། །དེ་ནི་སྨད་ཅིང་མི་གཙང་ལུས་མི་འགྱུར། །བ་སྤུའི་ཁུང་ནས་ཙན་དན་དྲི་ངད་འབྱུང་། །བཅོམ་ལྡན་མྱ་ངན་འདས་པའི་མཆོད་རྟེན་ཕྱགས། །བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ། །ཡན་ལག་མ་སྨད་ཁྱད་འཕགས་ལུས་འཐོབ་ཅིང་། །མཛེས་ལ་མཚན་གྱི་གོ་ཆ་བྱས་པར་འགྱུར། །ཞེས་དང་། དད་པའི་ཤུགས་བསྐྱེད་བཅོམ་ལྡན་མཆོད་རྟེན་ལ། །མེ་ཏོག་སྐམ་པོ་ཉལ་ཉིལ་ཕྱགས་བྱས་ན། །འདོད་པ་སྨད་པ་སྡུག་བསྔལ་བྱེད་པ་སྤོངས། །སྟོབས་བཅུ་མངའ་བའི་དེད་དཔོན་མཉེས་པར་བྱེད། །མཆོད་རྟེན་མེ་ཏོག་རྙིང་པ་སུས་འཕྱག་པ། །དེ་ནི་མཛེས་ཤིང་རྣམ་དག་ལུས་སུ་འགྱུར། །སྐྱེ་བོ་མང་པོས་མཆོད་འོས་བལྟ་འོས་འགྱུར། །དེ་ལ་རྒྱལ་པོས་གནོད་པ་སེམས་མི་འགྱུར། །ཞེས་དང་། གསལ་རྒྱལ་ལས། རྒྱལ་བའི་མཆོད་རྟེན་མེ་ཏོག་རྙིང་བསལ་བས། །འདོད་ཆགས་ཆགས་མེད་ཞེ་སྡང་སྡང་མི་འགྱུར། །གཏི་མུག་རྨོངས་མེད་ལྟ་ངན་ཆགས་མི་འགྱུར། །མི་རྣམས་རབ་ཏུ་དགའ་ཞིང་སྐྱིད་པར་འགྱུར། །ཞེས་སོ། །རྟེན་ལ་བ་རྒྱ་སེལ་བ་སོགས་བྱི་དོར་བགྱིས་ན། སྤྱན་གཟིགས་མདོར། འཇིག་རྟེན་སྒྲོན་མ་མཚུངས་མེད་བསོད་རྣམས་ཞིང་། དེ་ཡི་མཆོད་རྟེན་བ་རྒྱ་སུས་སེལ་བ། །བག་ཡོད་གྱུར་ནས་དེ་ནི་བདུད་རྒྱ་དྲལ། །དུས་རྣམས་ཀུན་ཏུ་ངན་སོང་ས་ཡང་སྤོང་། །རྟག་ཏུ་སངས་རྒྱས་རྡུལ་བྲལ་བསྟི་སྟང་བྱེད། །རྟག་ཏུ་སྟོབས་ལྡན་འཁོར་ལོས་སྒྱུར་བར་འགྱུར། །མི་ཡི་འཇིག་རྟེན་སྐྱེས་ནས་བསོད་ནམས་ལྡན། །རྒྱལ་པོ་ཀུན་གྱི་མཆོད་པའི་གནས་སུ་འགྱུར། །ལྷ་ནང་ལྷ་ཡི་དབང་པོས་མཆོད་བྱར་འགྱུར། །ཞེས་དང་། གསལ་རྒྱལ་ལས། ཐུབ་དབང་མཆོད་རྟེན་བྱི་དོར་བྱས་པ་ཡིས། །ཤིན་ཏུ་ལྟ་ན་སྡུག་ཅིང་མིག་ཏུ་མཛེས། །བྱད་བཞིན་བཟང་ཞིང་པདྨོའི་མདོག་དང་ལྡན། །སྲིད་པའི་སྐྱོན་རྣམས་དང་ཡང་འབྲལ་བར་འགྱུར། །ཞེས་སོ། །ལྷ་ཁང་སོགས་ལ་ཐིགས་ཚགས་བྱས་ན། སྤྱན་གཟིགས་མདོར། འཇིག་རྟེན་སངས་རྒྱས་ཇི་ལྟར་འགྱུར་ཞེས་ཏེ། མོས་པ་བསྐྱེད་ནས་མཆོད་རྟེན་རྩྭ་སྐྱེས་སེལ། །དེ་ཡི་ཕན་ཡོན་དེ་དག་ངས་བཤད་ཀྱིས། །ཐ་བ་དྲི་སོལ་དྭངས་པའི་སེམས་ཀྱིས་ཉོན། །མཐུ་ཆེན་སྐྱེས་བུ་དམ་པ་ཁྱད་འཕགས་པ། །རྒྱལ་བ་དམ་པ་མ་འོངས་དུས་ན་མཐོང་། །དེ་དག་མཆོད་པ་དམ་པ་མཆོག་གིས་མཆོད། །དེ་ནི་གཞར་ཡང་དད་པ་དམ་པ་འཐོབ། །སངས་རྒྱས་སྟོབས་བཅུ་དེད་དཔོན་དེས་མཐོང་ནས། །འདྲེན་པ་མཚུངས་པ་མེད་ལ་མཆོད་པ་བྱས། །མཚན་གྱི་གོ་ཆར་རྒྱས་པའི་སངས་རྒྱས་སུ། །འགྱུར་ཞེས་ཐུགས་དགྱེས་དེ་དག་ལུང་ཡང་སྟོན། །ཞེས་སོགས་རྒྱ་ཆེར་གསུངས་སོ། །མཆོད་རྟེན་སོགས་ཞིག་རལ་དུ་གྱུར་པ་བཅོས་པ་དང་སྤྱི་གབ་གཙང་ཁང་སོགས་བྱས་ན། གསལ་རྒྱལ་ལས། མི་རྣམས་གང་དག་རྩྭ་ཤིང་སོ་ཕག་གིས། །འཇིག་རྟེན་བླ་མའི་སྤྱི་གབ་རིགས་པས་བྱེད། །ཡང་ན་གཞན་དག་བྱེད་དུ་འཇུག་ཀྱང་རུང་། །དེ་དག་འགྲོ་བ་རྣམས་ཀྱི་སྐྱབས་འདྲར་འགྱུར། །མི་རྣམས་གང་དག་རྒྱལ་བའི་གཙང་ཁང་བྱེད། །དེ་དག་འགྲོ་བ་རྣམས་སུ་འཁོར་བ་ན། །ལྷ་དབང་གནས་འདྲའི་ཁང་ཁྱིམ་འོད་འབར་བ། །དུས་ཚིགས་ཀུན་ཏུ་བདེ་ལྡན་ཐོབ་པར་འགྱུར། །མཐོ་རིས་ལམ་བཟང་འབྲས་བུའི་གནས་རྣམས་སུ། །བསྐལ་པར་དགའ་བྱེད་རྟག་ཏུ་དགའ་བཞིན་དུ། །རྩེན་པར་བྱེད་ཅིང་མྱ་ངན་མེད་པ་དང་། །ཐ་མར་ཞི་བའི་གོ་འཕང་ཐོབ་པར་འགྱུར། །གང་དག་འཇའ་ཁུགས་འདྲ་བའི་རྟ་བབས་མཛེས། །ཐུབ་པའི་ཆབ་སྒོར་སྦྲེང་བྱེད་དེ་དག་ནི། །སྲིད་པ་གཞན་དུ་ཁང་ཁྱིམ་སྒོ་དང་བཅས། །རྣམ་པར་བརྒྱན་པ་རྣམས་ནི་ཐོབ་པར་འགྱུར། །མི་རྣམས་གང་དག་སྟོན་པའི་སྐུ་གདུང་ཁང་། །བསྲུང་ཕྱིར་དད་པས་འོབས་དང་སྒོ་འཛུགས་པ། དེ་དག་ཚེ་རབས་གཞན་དུ་དགྲ་རྣམས་ཀྱིས། །དཔལ་ཡོན་རྣམས་དང་བྲལ་བར་ཡོངས་མི་ནུས། །མི་རྣམས་སུ་དག་མཆོད་རྟེན་རྙིང་པ་རྣམས། །གཞན་གྱི་ངོར་བྱེད་མ་ཡིན་རང་གི་བློས། །རལ་ཚེམ་བྱེད་པའི་སྐྱེ་བོ་དེ་དག་ནི། །ལུས་བཟང་ཡོན་ཏན་དམ་པས་བརྒྱན་པར་འགྱུར། །ཞེས་དང་། དགེ་རྩ་ཡོངས་འཛིན་མདོར། དེ་བཞིན་གཤེགས་པའི་མཆོད་རྟེན་མཆོད་པ་དང་། ཕྱིར་བཅོས་པ་དང་། བྱི་དོར་བགྱིས་པས། གཟུགས་དང་། དལ་བ་དང་། ཡང་དག་པར་བླང་བ་དང་། དེ་བཞིན་གཤེགས་པར་ལྟ་བའི་སྨོན་ལམ་གྱི་མཆོག་རྣམ་པར་དག་པ་བཞི་རྗེས་སུ་འཐོབ་པར་གསུངས་ཤིང་། འཕགས་པ་བདུད་རྩི་བརྗོད་པ་ཞེས་བྱ་བའི་ཐེག་པ་ཆེན་པོའི་མདོ་ལས། འདི་ལྟ་སྟེ། རྒྱུན་མི་ཆད་པར་ཆོས་སྦྱིན་པ་དང་། དེ་བཞིན་དུ་སེམས་ཅན་ཐམས་ཅད་ལ་མི་འཇིགས་པ་སྦྱིན་པ་དང་། ཚད་མེད་པ་བཞི་བསྒོམ་པ་དང་། མཆོད་རྟེན་རྙིང་པ་གསོས་པ་དང་། སེམས་ཅན་ཐམས་ཅད་བྱང་ཆུབ་ཀྱི་སེམས་ལ་མོས་པར་བྱ་བ་སྟེ། བྱམས་པ་བྱང་ཆུབ་སེམས་དཔའ་རྣམས་ཆོས་ལྔ་པོ་དེ་དག་དང་ལྡན་ན་བདུད་ཀྱི་རིས་ཐམས་ཅད་ཀྱི་བགེགས་བྱ་བར་མི་འགྱུར་བ་དང་། བདུད་ཀྱི་འཁོར་ཐམས་ཅད་ཀྱིས་འདའ་བར་བྱ་བ་མ་ཡིན་པ་དང་། སེམས་ཅན་ཐམས་ཅད་ལ་སྙིང་བརྩེ་བའི་ཕྱིར་ཚེ་རིང་དུ་སྐྱོང་བར་བྱེད་པ་དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་སོ། །ལྷ་ཁང་དང་མཆོད་རྟེན་སོགས་ལ་ཞལ་བ་དང་ཚོན་རྩི་སོགས་ཕུལ་ན། གསལ་རྒྱལ་ལས། སུ་དག་བདེ་བར་གཤེགས་པའི་མཆོད་རྟེན་ལ། །ས་དང་ལྕི་བས་ཉུག་པ་དེ་དག་ནི། །ལྷ་དང་མིར་སྐྱེ་ལུས་མདོག་སྡུག་པ་དང་། །རྣམ་དག་རྨ་མེད་བདེ་དང་ལྡན་པར་འགྱུར། །ཞེས་དང་། སུ་ཞིག་སངས་རྒྱས་མཆོད་རྟེན་སྐུ་གཟུགས་ཁང་། །ཚོན་རྩི་སྣ་ཚོགས་དག་གིས་མཛེས་བྱེད་པ། །དེ་ནི་བདེ་གཤེགས་མངའ་བའི་ཡོན་ཏན་རྣམས། །སྣ་ཚོགས་ལྡན་པ་ཀུན་གྱིས་བརྩེགས་པར་འགྱུར། །ཞེས་དང་། ཐུབ་དབང་མཆོད་རྟེན་རྡོ་ཐལ་བྱུགས་པ་ཡིས། །ལྷ་མིའི་འཇིག་རྟེན་དག་ན་ཚེ་རིང་ཞིང་། །ལུས་སེམས་ནད་དང་མྱ་ངན་བྱེད་སྤངས་ཏེ། །རྟག་ཏུ་སྐྱིད་ཅིང་ནོར་གྱིས་ཕྱུག་པར་འགྱུར། །ཞེས་སོ། །མཆོད་རྟེན་དང་སྐུ་གཟུགས་སོགས་ལ་ཕྲ་རྒྱན་སོགས་ཕུལ་ན། དེ་ཉིད་ལས། སྐྱེ་བོ་སུ་དག་འཇིག་རྟེན་མགོན་པོ་ལ། །རིན་ཆེན་འབར་བ་ཡིད་དང་འཐད་པ་རྣམས། །འབུལ་བ་དེ་དག་རིན་ཆེན་བདུན་པོ་དང་། །བྱང་ཆུབ་ཡན་ལག་རིན་ཆེན་དྲི་མེད་འཐོབ། །ཅེས་དང་། ཤིན་ཏུ་དྲི་མེད་ཟླ་བ་ཉ་འདྲ་བའི། །མེ་ལོང་སྡུག་གུ་ཐམས་ཅད་མཁྱེན་ལ་འབུལ། །དེ་དག་ཚེ་རབས་བརྒྱུད་པ་རྣམས་སུ་ཡང་། །ལྷ་མི་རྣམས་ཀྱིས་བལྟ་བར་འོས་པར་འགྱུར། །ཞེས་དང་། སྤྱན་གཟིགས་མདོར། དགའ་བའི་སེམས་ཀྱིས་མགུ་བའི་ཤུགས་བསྐྱེད་དོ། །བཅོམ་ལྡན་མཆོད་རྟེན་ནོར་བུའི་དྲྭ་བ་འབུལ། །དེ་ནི་རྒྱལ་པོ་མཚན་གྱི་གོ་ཆ་ཅན། །མཐུ་ཆེན་བླ་མ་འཁོར་ལོས་སྒྱུར་བར་འགྱུར། །ཞེས་སོ། །དགེ་འདུན་ལ་ཆོས་སྟོན་སོགས་ཞལ་ཟས་བཟའ་བཏུང་རིགས་ཕུལ་ན། གསལ་རྒྱལ་ལས། སུ་དག་རབ་ཏུ་བྱུང་དང་མཚམས་པ་ཡི། །ཁ་ཟས་བཟང་པོ་དགེ་འདུན་སྦྱིན་བྱེད་པ། །དེ་དག་འཁོར་བའི་དགོན་པར་གནས་པ་ན། །ཁ་ཟས་ཁ་དོག་རོ་ལ་སོགས་ལྡན་འཐོབ། །སུ་དག་རབ་ཏུ་བྱུང་དང་མཚམས་པ་ཡི། །བཏུང་བ་རྒྱ་ཆེན་དགེ་འདུན་སྦྱིན་བྱེད་པ། །དེ་དག་འཁོར་བའི་དགོན་པར་གནས་པ་ན། །བཏུང་བ་ཁ་དོག་རོ་ལ་སོགས་པ་འཐོབ། །ཅེས་དང་། སྦྱིན་པའི་ཕར་ཕྱིན་བསྟན་པ་ལས། ཁ་ཟས་སྦྱིན་པ་བྱིན་ན་ནི། །དེས་ནི་ཚེ་དང་ཁ་དོག་དང་། །སྟོབས་དང་བདེ་བ་ལྔ་པ་སྤོབས། །ཤེས་རབ་ཅན་གྱིས་བྱིན་པ་ཡིན། །ཁ་ཟས་བྱིན་པས་དགའ་བ་དང། །ཚེ་རིང་བདེ་སྐྱིད་སྟོབས་ལྡན་འགྱུར། །སྐྱིིད་ཅིང་བརྟན་པ་དེ་དག་ནི། །ཐོགས་མེད་སྤོབས་པ་ལྡན་པར་འགྱུར། །ཕྱུག་ཅིང་ནོར་མང་དཔལ་དང་ལྡན། །མི་ནི་དེས་ཤིང་བློ་ལྡན་ལ། །བསོད་ནམས་ལྡན་ཞིང་མཁས་ལ་ཞི། །ཁ་ཟས་བྱིན་པས་དེ་ལྟར་འགྱུར། །ཞེས་དང་། སྐོམ་བྱིན་པས་ནི་མཁས་པ་དེ། །ཀུན་ཏུ་འབར་ཞིང་རབ་འབར་བའི། །ཡི་དྭགས་ཉམས་པར་མི་སྐྱེ་ཞིང་། །སྐོམ་པའི་གནོད་པ་འབྱུང་མི་འགྱུར། །ཞེས་སོ། །གོས་ཕུལ་ན། དེ་ལས། གོས་སྦྱིན་ཤིན་ཏུ་དཔལ་དང་ལྡན། །རྟག་ཏུ་རིགས་ལྡན་གཟུགས་བཟང་ཞིང་། །མི་དེ་ངོ་ཚར་ཤེས་པར་འགྱུར། །མི་ནི་གྲགས་ལྡན་སྐལ་དང་ལྡན། །ཞེས་སོ། །གནས་མལ་ཕུལ་ན། དེ་ལས། གཞལ་མེད་ཁང་གནས་སྦྱིན་པ་ཡིས། །གང་དང་གང་དུ་སྐྱེས་པ་ན། །ཁྱིམ་དང་གནས་དང་ཡུལ་འཁོར་གྱིས། །བདག་པོ་དང་ནི་གཙོ་བོར་འགྱུར། །ཞེས་དང་། མལ་དང་སྔས་རྣམས་སྦྱིན་པར་བྱེད་པའི་མི། །བསྟན་བཅོས་དག་ལ་མཁས་པར་སྐྱེ་བར་འགྱུར། །ཞི་གནས་འཐོབ་ཅིང་རྒྱ་ཆེར་སྦྱིན་པ་དང་། །པདྨ་ལས་བྱུང་གཟི་ཅན་གཞོན་ནུར་འགྱུར། །ཞེས་དང་། སྣ་ཚོགས་རིན་ཆེན་བདུན་ལས་བྱས། །འཕང་དུ་དཔག་ཚད་གཉིས་ཡོད་པ། །ཁོ་ར་ཁོར་ཡུག་དཔག་ཚད་གཅིག །རི་རབ་བཞིན་དུ་སྤ་བ་དང་། །རིན་ཆེན་ལྗོན་ཤིང་བརྒྱས་བསྐོར་ཞིང་། །གཞལ་མེད་ཁང་གིས་ལེགས་པར་བརྒྱན། །དྲིལ་བུ་གཡེལ་ཁའི་དྲྭ་བས་བཀབ། །ནོར་བུ་རིན་ཆེན་སྤྲས་གསལ་བ། །ཚངས་པ་མཚུངས་པར་སྤྱོད་རྣམས་ལ། །ཁྲིའུ་སྟན་དང་སྟེགས་བྱིན་པས། །འཁོར་བ་དག་ན་འཁོར་བའི་ཚེ། །དེ་འདྲའི་སྟན་ནི་འཐོབ་པར་འགྱུར། །ཞེས་སོ། །སྨན་སོགས་མཁོ་བའི་ཡོ་བྱད་ཕུལ་ན། རྩི་དང་སྨན་གྱི་སྦྱིན་པ་ཡིས། །ཟླ་བ་ཉ་ལྟར་ནད་མེད་ཅིང་། །གནོད་ཆུང་སྐྱིད་ཅིང་བདེ་བར་གནས། །མི་རྣམས་ཚེ་ནི་རིང་བར་འགྱུར། །ཞེས་དང་། ཡོ་བྱད་རབ་ཏུ་བྱིན་པ་ཡིས། །གང་དང་གང་དུ་སྐྱེས་པ་དེར། །རྣམ་པ་ཀུན་གྱི་མཆོག་ལྡན་པའི། །ཡན་ལག་ཐམས་ཅད་རྫོགས་པར་འགྱུར། །ཞེས་སོ། །དཀོན་མཆོག་གསུམ་གྱི་རྟེན་ལ་བསྐོར་བ་བྱས་ན། སྤྱན་གཟིགས་ལས། སྲོག་ཆགས་ཀུན་ལ་ཕན་པའི་ཕྱིར། །བྱང་ཆུབ་ཏུ་ནི་སེམས་བསྐྱེད་ནས། །འཇིག་རྟེན་མགོན་གྱི་མཆོད་རྟེན་ལ། །སུ་ཞིག་བསྐོར་བ་བྱེད་པ་ནི། །ཚེ་རབས་དག་ནི་ཐམས་ཅད་དུ། །བྱང་ཆུབ་སྤྱད་པ་སྤྱོད་པའི་ཚེ། །དྲན་དང་ལྡན་ཞིང་བློ་གྲོས་ལྡན། །བསོད་ནམས་ལྡན་ཞིང་འཇིགས་མེད་འགྱུར། །ཞེས་དང་། གསལ་རྒྱལ་ལས། སུ་ཞིག་དད་པས་ཐུབ་པའི་མཆོད་རྟེན་ནམ། །སྐུ་གཟུགས་དག་ལ་བསྐོར་བ་བྱེད་པ་སྟེ། །ཕྱི་མའི་ཚེ་ན་དགྲ་ཆེན་རྣམས་ཀྱིས་བཏུད། །བཟང་པོའི་སྣོད་འགྱུར་ཡོན་ཏན་རྣམས་དང་ལྡན། །ཞེས་དང་། ཁྱད་པར་མཆོད་རྟེན་བསྐོར་བའི་ཚིགས་བཅད་ལས། མཆོད་རྟེན་བསྐོར་བ་བྱས་པ་ཡིས། །ལྷ་ཀླུ་གནོད་སྦྱིན་དྲི་ཟ་དང་། །ལྷ་མིན་མཁའ་ལྡིང་མིའམ་ཅི། །ལྟོ་འཕྱེ་ཆེ་རྣམས་མཆོད་བྱེད་འགྱུར། །དལ་བ་བརྙེད་དཀའ་ཐོབ་གྱུར་ནས། །སྐད་ཅིག་གཅིག་ཙམ་བར་དུ་ཡང་། །མཆོད་རྟེན་བསྐོར་བ་བྱས་པས་ནི། །མི་ཁོམ་བརྒྱད་རྣམས་སྤོང་བར་འགྱུར། །དྲན་དང་ལྡན་ཞིང་བློ་གྲོས་ལྡན། །ཁ་དོག་ལྡན་ཞིང་མཛངས་པ་དང་། །ཐམས་ཅད་དུ་ནི་མཆོད་པར་འགྱུར། །ལྷ་དང་དེ་བཞིན་མི་རྣམས་ཀྱིས། །ཚེ་རིང་བ་ཡང་དེ་ཡིས་འཐོབ། །གྲགས་པ་ཆེན་པོའང་འཐོབ་པར་འགྱུར། །ཞེས་པ་ནས། དྲན་པ་ཉེ་བར་བཞག་པ་བཞི། །སེམས་ཀྱི་ཚད་མེད་བཞི་པོ་དང་། །རྫུ་འཕྲུལ་རྐང་པའི་དབང་ཡང་འཐོབ། །འཕགས་པའི་བདེན་པ་བཞི་པོ་དང་། །དབང་པོ་རྣམས་དང་སྟོབས་རྣམས་དང་། །བྱང་ཆུབ་ཡན་ལག་འབྲས་བུ་འཐོབ། །མངོན་ཤེས་དྲུག་དང་ཟག་པ་མེད། །ཉོན་མོངས་ཐམས་ཅད་སྤངས་པ་ཡི། །དགྲ་བཅོམ་རྫུ་འཕྲུལ་ཆེན་པོར་འགྱུར། །འདོད་ཆགས་ཞེ་སྡང་སྤངས་པ་དང་། །འཁོར་རྣམས་ཐམས་ཅད་སྤངས་པ་ཡི། །རང་རྒྱལ་བྱང་ཆུབ་འཐོབ་པར་འགྱུར། །འཇིག་རྟེན་དག་ཏུ་དེ་བཞིན་གཤེགས། །མཚན་རྣམས་ཀྱིས་ནི་བརྒྱན་པ་དང་། །གསེར་གྱི་སྐུ་མདོག་འཐོབ་པར་འགྱུར། །ལུས་ཀྱི་ལས་ཀྱང་བསྐོར་བ་ཡིན། །ངག་གི་ལས་ཀྱང་བསྐོར་བ་ཡིན། །ཡིད་ཀྱི་ལས་ཀྱང་བསྐོར་བ་ཡིན། །སྨོན་ལམ་བཏབ་པའང་བསྐོར་བ་ཡིན། །འདིར་ནི་བསྐོར་བ་བྱས་པ་ཡི། །བགྲོད་དཀའ་བདེ་དགུར་དོན་རྣམས་འགྲུབ། །འཇིག་རྟེན་མགོན་པོའི་མཆོད་རྟེན་ལ། །བསྐོར་བ་བྱས་པའི་ཡོན་ཏན་གང་། །དེ་ནི་ཚིག་ཙམ་ཉི་ཚེ་ཡིས། །ལེགས་པར་བསྟན་པར་མི་ནུས་སོ། །ཞེས་སོགས་རྒྱ་ཆེར་གསུངས་ཏེ། སྐབས་འདི་དག་ཏུ་གསུངས་པའི་མཆོད་རྟེན་ཞེས་པ་ནི་དཀོན་མཆོག་གསུམ་གྱི་རྟེན་སྤྱི་ལ་བཤད་པ་ཡིན་ནོ། །མདོར་ན་ཆོ་འཕྲུལ་བསྟན་པའི་མདོ་ལས། མཆོད་རྟེན་དང་ནི་རི་མོ་དང་། །སྐུ་གཟུགས་བྱེད་དུ་གཞུག་པ་དང་། །མཆོད་དང་བཀུར་སྟི་བྱ་བའི་ཕྱིར། །གང་དག་མཚན་ནི་དྲན་བྱེད་པ། །བྱང་ཆུབ་ཕྱིར་ནི་གནས་པ་རྣམས། །ཐམས་ཅད་ཐར་པ་ཐོབ་པར་འགྱུར། །ཞེས་དང་། དམ་ཆོས་པད་དཀར་ལས། བདེ་གཤེགས་རིང་བསྲེལ་ལ་ནི་ཅུང་ཟད་དང་། །སིལ་སྙན་གཅིག་བརྡུང་པ་ཡི་སྒྲ་བྱུང་ངམ། །མེ་ཏོག་གཅིག་ཙམ་གྱིས་ནི་མཆོད་པ་དང་། །བདེ་གཤེགས་གཟུགས་དག་རྩིག་ངོས་བྲིས་པ་ལ། །འཁྲུགས་བཞིན་པ་ཡི་སེམས་ཀྱིས་མཆོད་ན་ཡང་། །དེ་དག་རིམ་གྱིས་སངས་རྒྱས་བྱེ་བ་མཐོང་། །མཆོད་རྟེན་དག་ལ་གང་གིས་ཐལ་མོ་སྦྱར། །ཡོངས་སུ་ཚང་བའམ་ཐལ་མོ་ཡ་གཅིག་གམ། །ཡང་ན་མགོ་བོ་སྐད་ཅིག་བཏུད་པ་དང་། དེ་བཞིན་ལན་གཅིག་ལུས་ཀྱང་བཏུད་པ་དང་། །གང་གིས་རིང་བསྲེལ་གནས་པ་དེ་དག་ལ། །གཡེངས་པའི་སེམས་ཀྱིས་ཕྱག་འཚལ་སངས་རྒྱས་ཞེས། །ཚིག་གཅིག་ལན་འགའ་བརྗོད་པར་བྱས་པ་ཡང་། །དེ་དག་ཀུན་གྱིས་བྱང་ཆུབ་མཆོག་འདི་འཐོབ། །ཅེས་དང་། དཀོན་མཆོག་སྤྲིན་ལས། རིགས་ཀྱི་བུ་དེ་བཞིན་གཤེགས་པ་ནི་ཆོས་ཀྱི་སྐུ་སྟེ། རིགས་ཀྱི་བུ་དག་ཆོས་མཆོད་པས་དེ་བཞིན་གཤེགས་པ་ཐམས་ཅད་མཆོད་པར་འགྱུར་རོ། །ཞེས་གསུངས། མདོར་ན། ས་སྙིང་འཁོར་ལོ་བཅུ་པའི་མདོ་ལས། ཁམས་གསུམ་དག་ན་བདེ་ཞིང་སྐྱིད་པ། །ཐམས་ཅད་དཀོན་མཆོག་མཆོད་ལས་བྱུང་བ། །དེས་ན་བདེ་ཞིང་སྐྱིད་པར་འདོད་པས། དཀོན་མཆོག་གསུམ་པོ་མཆོད་ལ་བརྩོན་བྱ། །ཞེས་དང་། འཕགས་པ་སྤྱན་རས་གཟིགས་ཀྱི་མདོ་ལས། དེ་ལྟའི་ཕན་ཡོན་ཆེན་པོ་འདི་ཐོས་ནས། །མེ་ཏོག་ཕྲེང་བ་རྒྱལ་མཚན་གོས་མཆོག་དང་། །རོལ་མོ་སྒྲ་དང་གདུགས་དང་བྱུག་བདུག་གིས། །མགོན་པོ་མཆོད་ལ་སངས་རྒྱས་འགྱུར་བར་གྱིས། །ཞེས་སངས་རྒྱས་ཐུགས་རྗེ་ཅན་ཉིད་ཀྱིས་རྗེས་སུ་འདོམས་པར་མཛད་པ་ཡིན་ནོ། །འོ་ན་སངས་རྒྱས་དངོས་སུ་བཞུགས་པ་དང་། ད་ལྟར་རྟེན་ལ་མཆོད་པ་གཉིས་ལ་ཁྱད་པར་ཡོད་དམ་ཞེ་ན། དེ་ནི་ཅུང་ཟད་ཀྱང་མེད་དེ། མདོ་ལས། དྲང་སྲོད་ཆེན་པོ། གང་ལ་ལ་ཞིག་བཅོམ་ལྡན་འདས་ཡོངས་སུ་མྱ་ངན་ལས་འདས་པ་དང་། ད་ལྟར་བཞུགས་པ་ལ་མཆོད་པ་བྱེད་པ་རྣམ་པར་སྨིན་པ་ནི་མཚུངས་ཤིང་འདྲའོ་ཞེས་ང་འཆད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི་གཟུགས་ཆོས་ཀྱི་སྐུས་རབ་ཏུ་ཕྱེ་བ་ཡིན་གྱི། ཆོས་གཟུགས་ཀྱི་སྐུས་རབ་ཏུ་ཕྱེ་བ་མ་ཡིན་པའི་ཕྱིར་རོ། །གང་ལ་ལ་ཞིག་གང་འདུག་པའམ། ཡོངས་སུ་མྱ་ངན་ལས་འདས་པ་ལ་མཆོད་ན་སེམས་མཚུངས་པའི་ཕྱིར་འདི་གཉིས་ལ་བསོད་ནམས་ཀྱི་ཁྱད་པར་ཅུང་ཟད་མེད་དོ། །ཞེས་དང་། ད་ལྟ་ང་ལ་མཆོད་པ་དང་། །མ་འོངས་སྐུ་གཟུགས་མཆོད་པ་གཉིས། །བསོད་ནམས་མཉམ་ཞིང་རྣམ་སྨིན་མཉམ། །འདི་གཉིས་ཐ་དད་ཅུང་ཟད་མེད། །ཅེས་དང་། རྒྱལ་བ་མྱ་ངན་འདས་པ་དང་། །གང་དག་ད་ལྟ་བཞུགས་པ་ལ། །གང་ཞིག་དད་པས་གུས་མཆོད་པ། །སེམས་དགེ་བ་ནི་མཚུངས་པའི་ཕྱིར། །བསོད་ནམས་ཕུང་པོ་མཉམ་པར་འཐོབ། །ཅེས་གསུངས་སོ། །གཞན་ཡང་ལུང་རྣམ་འབྱེད་ལས། ཀུན་དགའ་ར་བ་གཙུག་ལག་ཁང་། །མལ་སྟན་འཚོ་བ་ནར་མ་དང་། །གློ་བུར་ནད་པའི་ནད་གཡོག་དང་། །ཡུལ་ངན་ཚེ་ན་སྦྱིན་པ་ནི། །རྫས་ལས་བྱུང་བའི་བསོད་ནམས་བདུན། །ཞེས་རྫས་ལས་བྱུང་བའི་བསོད་ནམས་ཀྱི་དངོས་པོ་བདུན་དང་། ཁྱད་པར་དབུས་མཐའ་ལས། ཡི་གེ་འབྲི་མཆོད་སྦྱིན་པ་དང་། །ཉན་དང་ཀློག་དང་ལེན་པ་དང་། །འཆད་དང་ཁ་ཏོན་བྱེད་པ་དང་། །དེ་སེམས་པ་དང་སྒོམ་པའོ། །སྤྱོད་པ་འདི་བཅུའི་བདག་ཉིད་ནི། །བསོད་ནམས་ཕུང་པོ་དཔག་ཏུ་མེད། །ཅེས་ཆོས་སྤྱོད་བཅུར་གསུངས་པ་རྣམས་གཙོ་བོར་ཐུན་མཚམས་ཀྱི་བྱ་བ་གལ་པོ་ཆེ་ཡིན་ནོ། །གཉིས་པ་བླ་ན་མེད་པའི་མཆོད་པ་ནི། མདོ་ལས། ཚངས་པ་གསུམ་པོ་འདི་ནི་དེ་བཞིན་གཤེགས་པ་ལ་མཆོད་པ་དང་། རིམ་གྲོ་བླ་ན་མེད་པའོ། །མཆོད་པའི་ལས་བླ་ན་མེད་པ་བསོད་ནམས་ཚད་མེད་པ་འབྱུང་ངོ་། །གསུམ་གང་ཞེ་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དང་། དེ་བཞིན་གཤེགས་པ་རྣམས་ཀྱི་ཆོས་འཛིན་པ་དང་། ཇི་ལྟར་ཐོས་པའི་ཆོས་རྣམས་དེ་བཞིན་དུ་སྒྲུབ་པའོ། །ཞེས་གསུངས་ཏེ། དེ་ལ་བྱང་ཆུབ་སེམས་ཀྱི་ཕན་ཡོན་ནི་སྔར་བཤད་ཟིན་ལ། དམ་པའི་ཆོས་བཟུང་བའི་ཕན་ཡོན་ནི། སྤྱིིར་ཐེག་པ་ཆེན་པོའི་ཆོས་ལ་ཉན་འཆད་སྒོམ་སྒྲུབ་བགྱིས་པའི་བསོད་ནམས་ནི་བསམ་གྱིས་མི་ཁྱབ་སྟེ། བློ་གྲོས་རྒྱ་མཚོས་ཞུས་པའི་མདོ་ལས། སྟོང་ཆེན་པོ་ཡི་འཇིག་རྟེན་ཁམས་འདི་ནི། །གསེར་གྱིས་བཀང་སྟེ་བདེ་གཤེགས་ཕུལ་བ་བས། །གང་གིས་ཆོས་ཀྱི་མཛོད་འདི་ཐོས་ནས་ནི། །མོས་པའི་བསོད་ནམས་འདི་ནི་ཁྱད་པར་འཕགས། །གང་གིས་འཇིག་རྟེན་ཁམས་ཁྲི་རིན་ཆེན་བཀང་། །དེ་བཞིན་གཤེགས་པ་རྣམས་ལ་ཕུལ་བ་བས། །གང་གིས་མདོ་སྡེ་འདི་ལ་འཇུག་བྱས་པ། །བསོད་ནམས་དེ་ལ་སྔ་མས་བསྐྱེད་དུ་མེད། །གང་གིས་འཇིག་རྟེན་ཁམས་ནི་སྟོང་ཕྲག་བཅུ། །རིན་ཆེན་བཀང་སྟེ་སྦྱིན་པ་བྱིན་པ་བས། །གང་གིས་མདོ་འདི་བཏོན་ནས་སྟོན་པ་ཡི། །བསོད་ནམས་དེ་ཡི་ཆ་ནི་སྔ་མ་མིན། །ཞིང་ནི་བྱེ་བ་ཁྲག་ཁྲིག་སྟོང་གི་ཁམས། །རིན་ཆེན་བཀང་སྟེ་འཇིག་རྟེན་སློབ་དཔོན་སྐྱོབ། །སངས་རྒྱས་རྣམས་ལ་དབུལ་བར་ཕུལ་བ་བས། །གང་འདིར་ཚུལ་འདིར་རབ་ཏུ་སྦྱོར་བ་དང་། །ཕྱོགས་བཅུ་རྣམས་སུ་གང་གཱའི་བྱེ་སྙེད་ཞིང་། །རིན་ཆེན་བཀང་སྟེ་རྒྱལ་ལ་ཕུལ་བ་བས། །ཇི་ལྟར་བསྟན་པ་བཞིན་དུ་གང་གནས་པའི། །བསོད་ནམས་དེ་ལ་མཉམ་པ་ཡོད་མ་ཡིན། །ཞེས་སོ། །ལྷག་པར་བསྟན་པ་འཇིག་ལ་ཉེ་བའི་སྐབས་དེང་སང་ལྟ་བུར་དམ་པའི་ཆོས་བཟུང་བའི་ཕན་ཡོན་ནི་བསམ་གྱིས་མི་ཁྱབ་སྟེ། སྤྱན་རས་གཟིགས་ཀྱི་མདོ་ལས། འཇིག་ཚེ་རྒྱལ་བ་མཆོག་གི་ཆོས་བཟུང་བ། །མཐུ་དང་སྟོབས་དང་ལྡན་ཞིང་བརྩོན་འགྲུས་ལྡན། །མི་དམན་པ་རྣམས་ཀུན་དུ་རྣམ་པར་རྒྱུ། །སངས་རྒྱས་བརྒྱ་སྟོང་དག་ལ་བསྙེན་བཀུར་བྱེད། །འཇིག་ཚེ་རྒྱལ་བ་མཆོག་གི་ཆོས་བཟུང་བས། །མཆོག་ཏུ་རབ་མཛེས་གཟུག་ལྡན་ཤེས་རབ་ལྡན། །མི་ཡི་འཇིག་རྟེན་མཆོག་ཏུ་བསྙེན་བཀུར་བྱེད། །རྒྱལ་པོ་མཁས་པ་མཛངས་པ་རྣམས་ཀྱིས་བསྔགས། །ཞེས་སོགས་ནས། གང་གིས་སངས་རྒྱས་སྟོང་རྣམས་དང་། །བརྒྱ་དང་བྱེ་བ་བགྲང་དག་ལ། །བསྐལ་པ་གངྒཱའི་བྱེ་མ་སྙེད། །དེ་སྙེད་བསྐལ་པར་བཀུར་བ་པས། །འཇིག་རྟེན་མགོན་གྱི་གསུངས་པ་ཡི། །དམ་ཆོས་འཇིག་ཚེ་གང་ཞིག་གིས། །ཉིན་དང་མཚན་དུ་འཛིན་བྱེད་པ། །དེ་ནི་བསོད་ནམས་ཁྱད་པར་འཕགས། །ཆོས་འཇིག་དུས་སུ་ཆོས་འཛིན་པ། །སྔོན་གྱི་སངས་རྒྱས་ཐམས་ཅད་དང་། །སངས་རྒྱས་ཡེ་ཤེས་རབ་གནས་པ། །ང་ལ་དེས་ནི་མཆོད་པ་བྱེད། །དམ་པའི་ཆོས་ནི་འཇིག་པའི་ཚེ། །སྟོན་པའི་བསྟན་པ་བསྲུང་བྱེད་པ། །བསྐལ་པ་བྱེ་བ་སྟོང་རྣམས་སུ། །དེ་ནི་ནམ་ཡང་རྒུད་མི་འགྱུར། །ལུས་ཀྱི་བདེ་བ་མྱོང་འགྱུར་ཞིང་། །དེ་ནི་ནད་ཀྱིས་བཏབ་མི་འགྱུར། །ནམ་ཡང་ཕྲོག་པར་མི་འགྱུར་རོ། །སྟོན་པའི་བསྟན་པ་བསྲུངས་བྱས་ན། །བཟོད་པ་ཕུན་སུམ་ཚོགས་པ་དང་། །དེས་དང་གསལ་དང་མཉེན་པ་དང་། །སེམས་ཅན་རྣམས་ལ་བྱམས་པར་འགྱུར། །ཞེས་སོགས་དང་། གང་དག་ཕྱིན་ཆད་མདོ་སྡེ་འདི་འཛིན་པ། །དེ་དག་རྟག་ཏུ་ང་དང་མཐུན་པའི་སྲས། །སངས་རྒྱས་བྱེ་བ་དེ་དག་བསྔགས་བརྗོད་ཀྱང་། །དེ་དག་བསྔགས་པ་མཐར་ནི་ཕྱིན་མི་འགྱུར། །ཞེས་དང་། བློ་གྲོས་རྒྱ་མཚོས་ཞུས་པའི་མདོ་ལས། །དེ་བཞིན་གཤེགས་པའི་དམ་པའི་ཆོས་འཛིན་པ། །དེ་ནི་དེ་བཞིན་གཤེགས་ལ་བྱས་གཟོ་ཡིན། །རྒྱལ་བ་རྣམས་ཀྱི་མཛོད་འཛིན་ཡིད་བརྟེན་ཞིང་། །ཕྱོགས་བཅུ་རྣམས་སུ་སངས་རྒྱས་མཆོད་པ་ཡིན། །སངས་རྒྱས་སྤྱན་གྱིས་གཟིགས་པའི་ཞིང་མང་པོ། །རིན་ཆེན་བཀང་སྟེ་དེ་བཞིན་གཤེགས་ལ་ཕུལ། །ཟད་པའི་དུས་ན་ཇི་ལྟར་ཆོས་འཛིན་ལྟར། །བསོད་ནམས་ཕུང་པོ་དེ་ཙམ་འཕེལ་མ་ཡིན། །ཞེས་དང་། དེ་དག་རྣམས་ཀྱིས་ཡོན་ཏན་ཕན་ཡོན་རྣམས། །བསྐལ་པ་རྒྱུན་མི་འཆད་པར་བརྗོད་བྱས་ཀྱང་། །དམ་ཆོས་འཛིན་པའི་ཕན་ཡོན་འདི་དག་ནི། །བརྗོད་པས་མཐའ་མར་ཕྱིན་པར་མི་འགྱུར་རོ། །ཞེས་དང་། ནམ་མཁའ་མཛོད་ཀྱིས་ཞུས་པའི་མདོ་ལས། ཇི་ལྟར་བསྐལ་པ་བྱེ་བ་སྟོ་བརྗོད་ཀྱང་། །སངས་རྒྱས་ཡེ་ཤེས་མཐའ་ཡོད་པ་མ་ཡིན་ལྟར། །དེ་བཞིན་གཤེགས་པའི་དམ་པའི་ཆོས་འཛིན་པའི། །བསོད་ནམས་དེ་ཡང་ཚད་ཡོད་པ་མ་ཡིན་ནོ། །ཞེས་གསུངས་པ་བཞིན་ནོ། །ཇི་ལྟར་ཐོས་པའི་དོན་ཚུལ་བཞིན་དུ་སྒྲུབ་པའི་ཕན་ཡོན་ནི། ཏིང་འཛིན་རྒྱལ་པོ་ལས། གཞོན་ནུ་བྱང་ཆུབ་སེམས་དཔའ་ཆེན་པོ་ནང་དུ་ཡང་དག་འཇོག་པ་ལ་བརྩོན་པའི་ཕན་ཡོན་ནི་བཅུ་སྟེ། སེམས་རྙོག་པ་མེད་པ་དང་། བག་ཡོད་པར་གནས་པ་དང་། སངས་རྒྱས་རྗེས་སུ་དྲན་པ་དང་། སྤྱོད་པ་ལ་དད་པ་དང་། ཡེ་ཤེས་ལ་ནེམ་ནུར་མེད་པ་དང་། སངས་རྒྱས་ལ་བྱས་པ་གཟོ་བ་དང་། ཆོས་མི་སྤོང་བ་དང་། ཤིན་ཏུ་བསྡམས་པར་གནས་པ་དང་། དུལ་བའི་རྗེས་སུ་འཐབ་པ་དང་། སོ་སོ་ཡང་དག་པ་རིག་པ་བཞི་མངོན་དུ་བྱེད་པ་སྟེ། གཞོན་ནུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ནང་དུ་ཡང་དག་འཇོག་པ་ལ་བརྩོན་པའི་ཕན་ཡོན་ནོ། །ཞེས་པ་ནས། བྱང་ཆུབ་སེམས་དཔའ་དེ་ནི་ཤི་འཕོས་ནས། །བདེ་བ་ཅན་གྱི་འཇིག་རྟེན་ཁམས་སུ་འགྲོ། །ཚེ་དཔག་མེད་ལས་ཆོས་བཟང་མཆོག་ཐོས་ནས། །སྐྱེ་བ་མེད་པའི་ཆོས་ལ་བཟོད་པ་འཐོབ། །ཅེས་པའི་བར་གྱིས་བསྟན་པ་དང་། ཁྱད་པར་སྦྱིན་སོགས་ལས་མཆོག་ཏུ་གྱུར་པའི་ཕན་ཡོན་ཀྱང་། མདོ་ལས། འཇམ་དཔལ་བྱང་ཆུབ་སེམས་དཔའ་གང་ལ་ལས་ལྷ་ཡི་ལོ་སྟོང་དུ་དཀོན་མཆོག་ལ་ཅི་དགོས་པ་བྱིན་པ་བས། བྱང་ཆུབ་སེམས་དཔའ་གཞན་ཞིག་གིས་ཐ་ན་སེ་གོལ་གཏོགས་པ་སྲིད་དུ། འདུ་བྱེད་ཐམས་ཅད་མི་རྟག་པའོ། །འདུ་བྱེད་ཐམས་ཅད་ནི་སྡུག་བསྔལ་བའོ། །འདུ་བྱེད་ཐམས་ཅད་ནི་སྟོང་པའོ། །འདུ་བྱེད་ཐམས་ཅད་ནི་བདག་མེད་པའོ། །སྙམ་དུ་དཔྱོད་ན་དེ་དེ་བས་བསོད་ནམས་གྲངས་མེད་པ་བསྐྱེད་པར་བྱེད་དོ། །ཞེས་དང་། བྱམས་པ་སེང་གེའི་སྒྲ་ལས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་མཆོད་པའི་ཡོ་བྱད་ཐམས་ཅད་ཀྱིས་བཀང་སྟེ། དེ་བཞིན་གཤེགས་པ་ལ་ལོ་འབུམ་གྱི་བར་དུ་ཉིན་ལན་གསུམ་མཚན་ལན་གསུམ་དུ་ཕུལ་བ་བས་ནི། གང་གིས་བྱང་ཆུབ་དོན་དུ་གཉེར་ཞིང་ཚུལ་ཁྲིམས་ཀྱི་ཕུང་པོ་ལ་གནས་པ་དེས། མཁན་པོ་ལས་ལུང་མནོས་ཏེ། ཁ་ཏོན་དུ་བྱེད་ཅིང་ཐ་ན་ཚིག་བཞི་པའི་དོན་ཡིད་ལ་བྱེད་པ་དང་། འདུ་འཛི་ལ་སྐྲག་ནས་དགོན་པར་གོམས་པ་བདུན་བོར་བ་བསོད་ནམས་ཆེ་བར་གསུངས་པ་དང་། གཞན་ཡང་རྒྱལ་པོ་མུ་ཁྱུད་འཛིན་གྱིས། དེ་བཞིན་གཤེགས་པ་མེ་ཏོག་སྣ་ཚོགས་ལ་ལོ་བརྒྱད་ཁྲི་བཞི་སྟོང་དུ་ཡོ་བྱད་ཐམས་ཅད་ཀྱིས་མཆོད་པ་བས། གང་དགོན་པར་གནས་ཏེ་ཆོས་ཐམས་ཅད་མ་སྐྱེས་པའོ་ཞེས་ཐ་ན་སེ་གོལ་གཅིག་གཏོགས་པ་ཙམ་དུ་བསྒོམ་ན། སྔ་མ་དེས་སྟོང་ནས་བྱེ་བ་ཁྲག་ཁྲིག་འབུམ་གྱི་བར་གྱི་ཆ་དང་གྲངས་ནས་རྒྱུ་བའི་བར་དུ་ཉེ་བར་མི་འགྲོ་བར་གསུངས་སོ། །ཉན་པ་སོགས་ལས་ཁྱད་པར་དུ་འཕགས་པའང་། དེ་ཁོ་ན་ཉིད་བསྟན་པའི་མདོ་ལས། ཤཱ་རིའི་བུ། གང་གིས་བསྐལ་པ་གཅིག་གི་བར་དུ་ཉན་པ་བས། གང་གིས་སེ་གོལ་གཏོགས་པ་ཙམ་གཅིག་ཏུ་དེ་ཁོ་ན་ཉིད་ཀྱི་ཏིང་ངེ་འཛིན་བསྒོམས་ན་བསོད་ནམས་མང་དུ་འཕེལ་ལོ། །ཤཱ་རིའི་བུའི་དེ་ལྟ་བས་ན། དེ་ཁོ་ན་ཉིད་ཀྱི་ཏིང་ངེ་འཛིན་འདི་གཞན་ལ་ནན་གྱིས་གདམས་པར་བྱའོ། །ཞེས་དང་། གཙུག་ཏོར་ཆེན་མོའི་མདོ་ལས། བསྐལ་པ་མང་པོར་ཐོས་པ་དང་བསམ་པ་བས་ནི་ཉིན་གཅིག་ཆོས་ཉིད་ཀྱི་དོན་བསྒོམས་ན་བསོད་ནམས་ཆེའོ། །དེ་ཅིའི་ཕྱིར་ཞེ་ན། དེས་སྐྱེ་འཆིའི་ལམ་དང་རིང་དུ་བྱེད་པའི་ཕྱིར་རོ། །ཞེས་སོ། །དེས་མི་མཐུན་ཕྱོགས་སྒྲིབ་པའི་ཚོགས་ཀྱི་གཉེན་པོ་བྱེད་པའང་། དཀོན་བརྩེགས་ལས། མུན་ཁང་དུ་སྒྲོན་མེ་བཏེགས་པའི་དཔེ་སྔོན་དུ་བཏང་ནས། འོད་སྲུང་དེ་བཞིན་དུ་ལས་དང་ཉོན་མོངས་པར་གྱུར་པ་ལ་ལོ་འབུམ་དུ་བསགས་པ་ཡང་ཚུལ་བཞིན་དུ་ཡིད་ལ་བྱེད་པ་སོ་སོར་རྟོག་པ་གཅིག་གིས་མེད་པར་འགྱུར་རོ། །ཞེས་དང་། འོད་སྲུང་ཚུལ་བཞིན་ཡིད་ལ་བྱེད་པ་སོ་སོར་རྟོག་པ་གཅིག་གིས་བསྐལ་པ་འབུམ་དུ་བསགས་པའི་ལས་དང་ཉོན་མོངས་པ་རྣམ་པར་བྱང་ང ོ། །ཞེས་སོགས་དང་། དེ་བཞིན་དུ་འདོད་ཡོན་ལ་ཞེན་པ་ཟློག་ཅིང་མངོན་ཤེས་དང་ཏིང་འཛིན་འཆར་བའང་སྡུད་པ་ལས། བསམ་གཏན་གྱིས་ནི་འདོད་པའི་ཡོན་ཏན་སྨད་པ་འདོར། །རིགས་དང་མངོན་པར་ཤེས་པ་དང་ཏིང་ངེ་འཛིན་མངོན་པར་འགྲུབ། །ཅེས་སོ། །ཐེ་ཚོམ་གྱི་གནས་རྣམས་གཅོད་པའང་། ས་སྙིང་འཁོར་ལོ་བཅུ་པའི་མདོ་ལས། ཏིང་འཛིན་བསྒོམ་པས་ཐེ་ཚོམ་གཅོད་འགྱུར་གྱི། །དེ་མ་རྟོགས་པར་གཞན་གྱི་ནུས་མ་ཡིན། །དེ་བས་ཏིང་འཛིན་བསྒོམ་པ་མཆོག་ཡིན་གྱི། །མཁས་པ་དག་གིས་དེ་ལ་ནན་ཏན་བྱ། །ཞེས་སོ། །སྙིང་རྗེ་ཆེན་པོ་སྐྱེ་ཞིང་ཡང་དག་པའི་དོན་མཐོང་བས་མྱ་ངན་ལས་འདས་པའི་འབྲས་བུ་མངོན་དུ་བྱེད་པའང་། ཆོས་ཡང་དག་པར་སྡུད་པ་ལས། ཡིད་མཉམ་པར་བཞག་པས་ཡང་དག་པ་ཇི་ལྟ་བ་བཞིན་མཐོང་བར་འགྱུར་རོ། །ཡང་དག་པར་ཇི་ལྟ་བ་བཞིན་མཐོང་བས་བྱང་ཆུབ་སེམས་དཔའ་སེམས་ཅན་རྣམས་ལ་སྙིང་རྗེ་ཆེན་པོ་འཇུག་གོ །ཞེས་སོ། །གདུལ་བྱ་རྣམས་ཡོངས་སུ་སྨིན་པར་ནུས་པའི་ཁྱད་པར་ཡང་། །ཤེར་མདོ་ལས། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་ཏིང་ངེ་འཛིན་གསུམ་ལ་གནས་ཤིང་སེམས་ཅན་རྣམས་སྨིན་པར་བྱེད་དོ། །ཞེས་དང་། མདོ་སྡེ་རྒྱན་ལས། བསམ་གཏན་གྱིས་ཀྱང་སྐྱེ་བོ་ཐམས་ཅད་བྱང་ཆུབ་གསུམ་ལ་འགོད། །ཅེས་སོ། །གཞན་ཡང་གནས་ལུགས་དེ་ཁོ་ན་ཉིད་ཀྱི་དོན་ལ་མཉམ་པར་བཞག་པས་མདོ་སྔགས་ཀྱི་ལམ་ཐམས་ཅད་དེ་ལ་རྫོགས་ཤིང་ཚང་བའི་ཚུལ་ལུང་དང་བཅས་ཏེ་ཆོས་རྗེ་སྒམ་པོ་པས་ལམ་མཆོག་རིན་ཆེན་ཐར་པའི་རྒྱན་དུ་གསུངས་པ་ལྟར་ཤེས་པར་བྱ་ལ། མདོར་ན་བློ་གྲོས་རྒྱ་མཚོའི་ཞུས་པའི་མདོ་ལས། རྫོགས་པའི་བྱང་ཆུབ་སེམས་དང་ཆོས་འཛིན་དང་། །ཆོས་སྒྲུབ་པ་དང་སྲོག་ཆགས་སྙིང་བརྩེ་བ། །ཆོས་བཞི་འདི་དག་བསོད་ནམས་མཐའ་ཡས་ཏེ། །དེ་དག་མཐའ་ནི་བདེ་གཤེགས་མི་གསུང་ངོ། །ཞེས་གསུངས་པ་བཞིན་ཏེ། འདིར་སྲོག་ཆགས་སྙིང་བརྩེ་བ་ཞེས་པའི་ཟུར་གྱིས་བྱང་ཆུབ་སེམས་ཀྱིས་ཀུན་ནས་བསླང་བའི་སྲོག་བསླུ་སོགས་ཀྱང་བླ་ན་མེད་པའི་མཆོད་པར་འགྱུར་ཞིང་ཕན་ཡོན་གོང་མཚུངས་ཐོབ་པར་དོན་གྱིས་བསྟན་པའང་ཡིན་ནོ། །ཚོགས་གཉིས་ནོར་བུའི་མཛོད་ཁང་མ་བསགས་ན། །སྐུ་གཉིས་འབྱོར་པའི་ཁྱད་པར་མི་འཐོབ་པས། །བག་མེད་བྱ་བ་ཐམས་ཅད་སྤངས་ནས་ནི། །རྩེ་གཅིག་བརྩོན་པར་མཛོད་ཅིག་ཤེས་ལྡན་རྣམས། །ཚོགས་བསགས་མཎྜལ་གྱི་ཁྲིད་ཀྱི་སྐབས་སོ། །། ། བྱིན་རླབས་ཁྱད་པར་ཅན་རྒྱུད་ལ་འཇུག་པར་བྱེད་པ་བླ་མའི་རྣལ་འབྱོར་གྱི་ཁྲིད།༈ ལྔ་པ་བྱིན་རླབས་ཁྱད་པར་ཅན་རྒྱུད་ལ་འཇུག་པར་བྱེད་པ་བླ་མའི་རྣལ་འབྱོར་གྱི་ཁྲིད་ལ་གསུམ། ཡོན་ཏན་གཞི་རྟེན་བཤེས་གཉེན་བསྟེན་ཚུལ་སྤྱིར་བཤད་པ། བྱེ་བྲག་རྣལ་འབྱོར་ཟབ་མོ་ཇི་ལྟར་བསྒོམ་པའི་ཚུལ་དངོས། རྗེས་དེ་ལྟར་བསྟེན་ཅིང་སྒྲུབ་པའི་ཕན་ཡོན་བསྟན་པའོ། །དང་པོ་ལ་གསུམ། བསྟེན་དགོས་པའི་རྒྱུ་མཚན། བསྟེན་བྱའི་མཚན་ཉིད། ཇི་ལྟར་བསྟེན་པའི་ཚུལ་ལོ། །དང་པོ་ནི། ཡང་དག་པའི་དགེ་བའི་བཤེས་གཉེན་ལ་བསྟེན་ན་དེའི་ཡོན་ཏན་དང་ལེགས་པའི་ཆ་ཐམས་ཅད་རང་ལ་འགོ་བ་ནི་ཙན་དན་གྱི་ཤིང་ལ་བརྟེན་པའི་ཤིང་ཕལ་པ་ལའང་དྲི་བཟང་པོའི་ངད་འགོ་བ་ལྟ་བུ་ཡིན་ཏེ། འདུལ་བ་ལུང་ལས། སཱ་ལའི་ཤིང་ལ་འཁྲི་ཤིང་བཞིན། །དམ་པ་རྣམས་ལ་བསྟེན་གྱུར་ན། །བཟང་པོའི་དཔལ་གྱིས་འཁྱུད་པར་བྱེད། །ཅེས་སོ། །དེས་ན་དགེ་བའི་བཤེས་གཉེན་དང་དགེ་བའི་གྲོགས་པོ་ལ་བསྟེན་པར་བྱ་དགོས་ཏེ། རང་གིས་དགེ་བ་དང་ལེགས་པའི་ཡོན་ཏན་ཐནས་ཅད་གོང་དུ་འཕེལ་ཤིང་རྒྱས་པར་འགྱུར་བའི་ཕྱིར། བྱམས་པའི་ཞུས་པའི་མདོ་ལས། གང་ཉན་ཐོས་དང་། རང་སངས་རྒྱས་དང་། བླ་ན་མེད་པའི་སངས་རྒྱས་རྣམས་ཀྱི་རྣམ་པར་གྲོལ་བ་དང་། ཡེ་ཤེས་མཐོང་བའི་ཕུང་པོ་ཇི་སྙེད་པ་དེ་ཐམས་ཅད་ཀྱང་དགེ་བའི་བཤེས་གཉེན་བསྟེན་པ་ལས་བྱུང་བར་རིགས་པར་བྱའོ། །བྱམས་པ། གཞན་ཡང་སེམས་ཅན་རྣམས་ཀྱི་ཕན་པ་དང་བདེ་བའི་ཤས་ཇི་སྙེད་པ་དེ་ཐམས་ཅད་ཀྱང་རང་གི་དགེ་བའི་རྩ་བ་ལས་བྱུང་སྟེ། དེ་ཡང་དགེ་བའི་བཤེས་གཉེན་ལས་བྱུང་བར་རིགས་པར་བྱའོ། །ཞེས་དང་། ཀྱེ་རིགས་ཀྱི་བུ། ཁྱོད་ཀྱིས་དགེ་བའི་བཤེས་གཉེན་མཉེས་པར་གྱིས་ཤིག་དང་། དེས་ནི་བསོད་ནམས་དང་བསོད་ནམས་མ་ཡིན་པའི་ཚོགས་ཡོངས་སུ་ཤེས་པས། འཁོར་བ་ན་རྒྱུ་བ་རྣམས་ཡོངས་སུ་སེལ་ལོ། །ཞེས་སོ། །དེ་ལས་ལྡོག་སྟེ་མི་དགེ་བའི་བཤེས་གཉེན་དང་སྡིག་པའི་གྲོགས་པོ་བསྟེན་ན། དེའི་སྐྱོན་ངང་གིས་འགོ་བ་ནི་མི་གཙང་བའི་ཁྲོད་དུ་ཀུ་ཤ་ཉ་རུལ་གྱིས་བསྒོས་པ་ལྟ་བུ་སྟེ། ལུང་ལས། མི་ཡི་མདུན་དུ་ཀུ་ཤ་ལ། །ཉ་རུལ་གྱིས་ནི་དཀྲིས་གྱུར་ན། །དེ་ནི་རིང་པོར་མི་ཐོགས་པར། །ཀུ་ཤ་ཉིད་ཀྱང་དེ་འདྲར་འགྱུར། །དེ་ཕྱིར་དམ་པ་མ་ཡིན་ལ། །བསྟེན་པར་གྱུར་པའང་དེ་བཞིན་ནོ། །ཞེས་སོ། །དེའི་ཕྱིར་བདག་གིས་མི་དགེ་བའི་བཤེས་གཉེན་དང་སྡིག་པའི་གྲོགས་པོ་རྣམས་སྤང་བར་བྱ་དགོས་ཏེ། མི་དགེ་བའི་ཕྱོགས་ཐམས་ཅད་བསྲབས་ཤིང་སྤངས་ནས་མེད་པར་བྱ་དགོས་པའི་ཕྱིར་ཏེ། སྡོང་པོ་བཀོད་པ་ལས། རིགས་ཀྱི་བུ་དགེ་བའི་རྩ་བ་མངོན་པར་འདོད་པས་དགེ་བའི་བཤེས་གཉེན་བསྟེན་པར་བྱ་ཡི། སྡིག་པའི་གྲོགས་པོ་དག་ལ་ནམ་ཡང་བསྟེན་པར་མི་བྱའོ། །དེ་ཅིའི་ཕྱིར་ཞེ་ན། དེ་དག་གིས་དགེ་བའི་ཕྱོགས་ལ་བར་དུ་གཅོད་པའི་ཕྱིར་རོ། །ཞེས་སོ། །གཞན་ཡང་། གཏན་བདེ་བྱང་ཆུབ་སྒྲུབ་པའི་འདུན་གྲོས་འདྲི་བའི་ཡུལ་ཡང་བླ་མ་ལས་གཞན་མེད་པས་བསྟེན་དགོས། དགོངས་འདུས་ལས། གང་འདིར་མུན་པར་འཁྱམས་པ་ལ། །བདེ་ཆེན་སྣང་བའི་ལམ་སྟོན་པ། །སྐྱབས་ཆེན་བླ་མ་དེ་ཉིད་ལས། །གཞན་གྱིས་སྟོན་པར་ནུས་མ་ཡིན། །ཞེས་སོ། །བྱ་བ་དང་བྱ་བ་མ་ཡིན་པའི་བླང་དོར་གྱི་དམིགས་སྟོན་པར་བྱེད་པའང་བླ་མ་ལས་གཞན་མེད་པས་ཀྱང་བསྟེན་དགོས་ཏེ། སྒྱུ་འཕྲུལ་བརྒྱ་པ་ལས། ཡོན་ཏན་རིན་ཆེན་གཏེར་ཆེན་པོ། །ཐམས་ཅད་མ་ལུས་སྟོན་བྱེད་ཅིང་། །ཉོན་མོངས་མ་ལུས་རྩད་གཅོད་པ། །བླ་མེད་འབྲས་བུ་ཐོབ་པར་བྱེད། །ཡུལ་ལ་དབང་བའི་རྒྱལ་པོ་བས། །ཤིན་ཏུ་ལྷག་པའི་བཀུར་སྟི་བྱ། །དྲིན་ཆགས་ལུས་བསྐྱེད་ཕ་མ་ལས། །ཤིན་ཏུ་གདུང་ཞིང་བརྩེ་བར་བྱ། །ཞེས་སོ། །བྱང་ཆུབ་སྒྲུབ་པའི་རྟེན་ཚོགས་གཉིས་ལ་རག་ལས་ཤིང་། བསོད་ནམས་བྱ་བའི་ཡུལ་ཡང་བླ་མ་ལས་ལྷག་མེད་པས་བསྟེན་དགོས་ཏེ། ཀུན་ཏུ་ཁ་སྦྱོར་གྱི་རྒྱུད་ལས། ཡེ་ཤེས་ཀུན་སེམས་ཞེས་བྱ་བའི། །རྒྱལ་བ་ཀུན་གྱི་སློབ་དཔོན་མཆོག །དངོས་གྲུབ་མ་ལུས་སྟེར་བས་ན། །བློ་དང་ལྡན་པས་རྟག་མཆོད་བྱ། །གང་ཕྱིར་ཕྱོགས་བཅུའི་སངས་རྒྱས་དང་། །བྱང་ཆུབ་སེམས་མཆོད་བསོད་ནམས་ལས། །བླ་མའི་བ་སྤུའི་ཁུང་གཅིག་མཆོག །དེ་ཕྱིར་སློབ་དཔོན་མཆོད་བྱེད་པ། །སངས་རྒྱས་བྱང་ཆུབ་སེམས་དཔས་གཟིགས། །ཞེས་སོ། །འཇིགས་དང་སྡུག་བསྔལ་ཀུན་ལས་སྐྱོབ་པར་ནུས་པའི་སྐྱབས་དང་སྐྱོབ་པ་བླ་ན་མེད་པ་ཡིན་པས་ཀྱང་བསྟེན་དགོས་ཏེ། སྒྱུ་འཕྲུལ་རྒྱལ་པོ་ལས། འཁོར་བའི་འཇིགས་ལས་ངེས་སྐྱོབ་ཅིང་། །མྱ་ངན་འདས་པར་འདྲེན་པའི་མཆོག །བླ་མ་ཉིད་ལས་གཞན་ཡོད་མིན། །ཞེས་སོ། །རང་རྒྱུད་ལ་ཡོན་ཏན་གྱི་འབྱོར་པ་མཐའ་དག་རྒྱས་པར་བྱེད་པའང་བླ་མ་ལས་གཞན་མེད་པས་བསྟེན་དགོས་ཏེ། དཔལ་འབྱུང་བའི་རྣམ་ཐར་ལས། བྱང་ཆུབ་སེམས་དཔའི་ཡོན་ཏན་ཐམས་ཅད་དགེ་བའི་བཤེས་གཉེན་ལས་འབྱུང་ངོ་། །ཞེས་སོ། །བླ་མ་ལས་མཆོག་ཏུ་གྱུར་པའི་སྟོན་པ་གཞན་མེད་པས་ཀྱང་བསྟེན་པར་བྱ་སྟེ། གསང་འདུས་ལས། བླ་མ་སངས་རྒྱས་ཀུན་དང་མཉམ། །བླ་མ་སངས་རྒྱས་ཀུན་ལས་ལྷག །ཡོན་ཏན་མཆོག་གི་གཏེར་གྱུར་པ། །དཔལ་ལྡན་བླ་མ་སྤྱི་བོས་འདུད། །ཞེས་སོ། །གཞན་ཡང་། སྡོང་པོ་བཀོད་པ་ལས། ཁྱོད་ཀྱིས་དགེ་བའི་བཤེས་གཉེན་འཚོལ་བ་ལ་ཡོངས་སུ་མི་སྐྱོ་བར་བྱའོ། །སྙེད་ནས་ཀྱང་དེའི་རྗེས་སུ་སྒྲུབ་པ་ལ་བསྙེལ་བ་མེད་པའི་སྲི་ཞུ་བྱའོ། །ཁུར་ཐམས་ཅད་ཀྱིས་མི་སྐྱོ་བ་ས་ལྟ་བུའི་འདུ་ཤེས་བསྐྱེད་པར་བྱའོ། །ཅི་བསྒོ་བ་ཉན་པ་བྲན་ལྟ་བུའི་འདུ་ཤེས་བསྐྱེད་པར་བྱའོ། །ཞེས་གསུངས་པ་བཞིན། རྟག་ཏུ་བླ་མ་དམ་པ་བཙལ་ཞིང་བསྟེན་པར་བྱའོ། །གཉིས་པ་ནི། སྤྱིར་དགེ་བའི་བཤེས་གཉེན་གྱི་མཚན་ཉིད་མདོ་རྒྱུད་བསྟན་བཅོས་རྣམས་ལས་གསུངས་པའི་དོན་ཀུན་མཁྱེན་བླ་མས་ཡིད་བཞིན་རིན་པོ་ཆེའི་མཛོད་དུ་རྒྱ་ཆེར་གསུངས་པ་ལྟར་ཤེས་པར་བྱ་དགོས་ཀྱང་། འདིར་དོན་གནད་སྙིང་པོར་བསྡུས་ཏེ་དོན་ཁྲིད་ལས་གསུངས་པ་ལྟར་ན། ཐུན་མོང་དང་ཐུན་མིན་གཉིས་ལས། དང་པོ་ཐུན་མོང་གི་མཚན་ཉིད་ནི། ཚོང་པ་རིན་པོ་ཆེའི་གླིང་དུ་ཁྲིད་པ་དེད་དཔོན་མཁས་པ་ལ་རག་ལས་པ་ལྟར། བདག་ཅག་ཐར་པའི་གླིང་དུ་ཕྱིན་ནས་སངས་རྒྱས་ཐོབ་པར་བྱེད་པའང་བླ་མ་དགེ་བའི་བཤེས་གཉེན་ལ་རག་ལས་པས། སྐུ་གསུང་ཐུགས་ཀྱི་སྤྱོད་པ་ལ་སྐྱོན་མེད་ཅིང་ཡོན་ཏན་ཕུན་སུམ་ཚོགས་པས་བརྒྱན་པ། ཐོས་པ་དང་སྙིང་རྗེ་ཆེ་བ། ཚད་མེད་པའི་མཁྱེན་རབ་དང་ཐུགས་རྗེ་མངའ་བ། འབྲེལ་ཚད་ཐར་པའི་ལམ་ལ་འགོད་པ། སྐྱོ་དུབ་དང་དཀའ་སྤྱད་བཟོད་པ་ཞིག་བསྟེན་པར་བྱ་དགོས་ཏེ། མདོ་སྡེ་རྒྱན་ལས། བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་བརྩོན་བཅས་ལྷག་པར་ལུང་གིས་ཕྱུག །དེཉིད་རབ་ཏུ་རྟོགས་ལ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་ངལ་སྤངས་ལ་བསྟེན། །ཞེས་སོ། །གཉིས་པ་ཐུན་མིན་གྱི་མཚན་ཉིད་ནི། ཚེ་འདི་ཡི་འབྱོར་བའི་དངོས་པོ་མངའ་རིས་དང་། དབང་ཕྱུག་ཕུན་སུམ་ཆོགས་པ་སྦྱིན་པོ་འཁོར་ལོས་སྒྱུར་བ་སོགས་རྒྱལ་པོ་བཟང་པོ་ལ་རག་ལས་པ་ལྟར། བདག་ཅག་རྣམས་ཀྱིས་ཀྱང་ཚེ་གཅིག་གི་བླ་ན་མེད་པའི་འབྲས་བུ་དང་ཡོན་ཏན་ཐོབ་པ་བླ་མ་རྡོ་རྗེ་འཛིན་པ་མཁས་གྲུབ་དམ་པ་ལ་རག་ལས་པས། བླ་མ་དམ་པ་རིམ་བརྒྱུད་བྱིན་རླབས་དང་ལྡན་ཞིང་དབང་དང་དམ་ཚིག་ཕུན་སུམ་ཚོགས་པ། རྒྱུད་དང་མན་ངག་གི་གནད་ལ་མཁས་པ། བསྙེན་སྒྲུབ་ཟབ་མོའི་ནུས་པ་ཐོབ་པ། ལྟ་དགོངས་ཏིང་ངེ་འཛིན་གྱི་གདེང་{གདེངས}ཚད་མངའ་བ། གཞན་དོན་ཕྲིན་ལས་ཕུན་སུམ་ཚོགས་པ་ཞིག་ལ་བསྟེན་དགོས་ཏེ། སྒྱུ་འཕྲུལ་རྡོ་རྗེ་ལས། མང་དུ་ཐོས་ཤིང་ཤེས་རབ་ཆེ། །ལུང་གི་དགོངས་པ་ངེས་པར་རྟོགས། །ཟང་ཟིང་རྙེད་པ་དོན་མི་གཉེར། །དཀའ་བ་སྤྱོད་ཅིང་སྐྱོ་ངལ་ཆུང་། །མན་ངག་ཆེ་ཞིང་ལམ་ལས་གྲོལ། །རིགས་ལ་མཁས་ཤིང་དྲོད་ཚད་ཤེས། །བྱང་ཆུབ་སེམས་ལྡན་ཉིང་རྗེ་ཆེ། །བརྒྱུད་ལྡན་བཀའ་བབས་སྒྲུབ་ལ་མཁས། །མཛོད་ལྡན་ཆུ་བོ་ཡོངས་སུ་རྫོགས། །རང་རྒྱུད་གྲོལ་ཞིང་གཞན་དོན་བརྩོན། །གསང་སྔགས་བླ་མའི་མཚན་ཉིད་དོ། །ཞེས་གསུངས། དེ་ལྟ་བུའི་བླ་མ་དམ་པ་སྔོན་ཆད་བདག་གིས་མ་མཇལ་བ་རྣམས་དང་མཇལ་བར་ཤོག་ཅིག མཇལ་ཟིན་པ་རྣམས་དང་ནམ་ཡང་མི་འབྲལ་བར་ཤོག་ཅིག རྟག་ཏུ་བླ་མ་མཉེས་ཤིང་ཐུགས་རྗེས་འཛིན་པར་ཤོག་ཅིག་སྙམ་དུ་ཡང་ནས་ཡང་དུ་བསམ་པར་བྱའོ། །གསུམ་པ་ཇི་ལྟར་བསྟེན་པའི་ཚུལ་ལ་གཉིས། བསམ་པའི་སྒོ་ནས་བསྟེན་ཚུལ་དང་། སྦྱོར་བའི་སྒོ་ནས་བསྟེན་ཚུལ་ལོ། །དང་པོ་ལ་གསུམ། ཡོན་ཏན་དྲན་པ། བཀའ་དྲིན་དྲན་པ། སངས་རྒྱས་སུ་བལྟ་བའི་ཚུལ་ལོ་། །དང་པོ་ནི། སྡོང་པོ་བཀོད་པ་ལས། ཀྱཻ་རིགས་ཀྱི་བུ་དགེ་བའི་བཤེས་གཉེན་ནི་འཁོར་བའི་རྒྱ་མཚོ་ལས་སྒྲོལ་བའི་ཕྱིར་གྲུ་བོ་ཆེ་ལྟ་བུའོ། །ཐར་པའི་ལམ་དུ་ཞུགས་པ་རྣམས་ཀྱི་དེད་དཔོན་ལྟ་བུའོ། །སྲིད་པའི་རྒུད་པ་རྣམས་སེལ་བས་ཡིད་བཞིན་གྱི་ནོར་བུའི་རྒྱལ་པོ་ལྟ་བུའོ། །ལས་དང་ཉོན་མོངས་པའི་མེ་འཇིལ་བའི་ཆུ་བོ་ལྟ་བུའོ། །ཆོས་ཀྱི་ཆར་ཆེན་པོ་འབེབས་པས་སྤྲིན་བཟང་པོ་ལྟ་བུའོ། །ཞེས་སོགས་རྣམ་གྲངས་དུ་མས་གསུངས་པའི་དོན་རྣམས་མདོར་བསྡུས་ཏེ། ཀུན་མཁྱེན་ཆེན་པོའི་དོན་ཁྲིད་ལས་གསུངས་པ་ལྟར་ན། འཇིག་རྟེན་དུ་ཨུདུམྺ་རའི་མེ་ཏོག་འབྱུང་བར་དཀའ་བ་ལྟར་སངས་རྒྱས་འབྱུང་དཀའ། དེའི་ཐུགས་རྗེ་ལས་སྤྲུལ་པའི་དགེ་བའི་བཤེས་གཉེན་དམ་པའང་འབྱུང་དཀའ་སྟེ། ད་རེས་བདག་ཅག་གི་དཔལ་མགོན་བླ་མ་དམ་པ་འདིས་མཚོན་ནས་ཡང་དག་པའི་དགེ་བའི་བཤེས་གཉེན་རྣམས་ལ་ཡོན་ཏན་ཚད་མེད་པ་མངའ་བ་ནི་སྲིད་པའི་རྒྱ་མཚོ་ལས་སྒྲོལ་བས་གྲུ་ཆེན་མཉེན་པ་ལྟ་བུ། ཐར་པའི་ལམ་སྣ་འདྲེན་པས་དེད་དཔོན་མཁས་པ་ལྟ་བུ། སྲིད་ཞིའི་རྒུད་པ་སེལ་བས་ཡིད་བཞིན་གྱི་ནོར་བུ་ལྟ་བུ། ཉོན་མོངས་པའི་མེ་དཔུང་འཇིལ་བས་བདུད་རྩིའི་ཆུ་རྒྱུན་ལྟ་བུ། ཆོས་ཀྱི་ཆར་ཆེན་འབེབས་པས་ཆར་སྤྲིན་བཟང་པོ་ལྟ་བུ། འགྲོ་ཀུན་དགའ་བ་བསྐྱེད་པས་ལྷའི་རྔ་སྒྲ་ལྟ་བུ། དུག་གསུམ་ནད་ཀུན་སེལ་བས་སྨན་པའི་རྒྱལ་པོ་ལྟ་བུ། མ་རིག་པའི་མུན་པ་སེལ་བས་ཉི་ཟླའི་སྒྲོན་མེ་ལྟ་བུ། འདོད་དགུའི་རེ་བ་འབྱུང་བས་དཔག་བསམ་གྱི་ཤིང་ཆེན་ལྟ་བུ། ཕྲིན་ལས་འོད་སྟོང་མངའ་བས་ཉི་མའི་དཀྱིལ་འཁོར་ལྟ་བུའི་ཡོན་ཏན་མངའ་བ་སྟེ་ངོ་མཚར་ཏོ། །གཞན་ཡང་། འདི་ལྟར་དགེ་བའི་བཤེས་གཉེན་དམ་པ་རྣམས་ཀྱི་དགོངས་པ་ནམ་མཁའ་ལྟར་རྒྱ་ཆེ། ཏིང་འཛིན་ཉི་ཟླ་ལྟར་འོད་གསལ། མཁྱེན་རབ་རྒྱ་མཚོ་ལྟར་ཚད་མེད། ཐུགས་རྗེ་ཆུ་ཀླུང་ལྟར་ཤུགས་དྲག རང་བཞིན་རི་རྒྱལ་ལྟར་ཐུགས་བརྟན། སྐྱོན་བྲལ་པདྨ་ལྟར་རྣམ་པར་དག འགྲོ་ལ་ཕ་མ་ལྟར་ཐུགས་སྙོམས། ཡོན་ཏན་གཏེར་མཛོད་ལྟར་ལྷུན་གྲུབ། འཇིག་རྟེན་རྒྱལ་བ་ལྟར་ཡོངས་སུ་འདྲེན་པའི་རང་བཞིན་དམ་པ་སྟེ། ཡོན་ཏན་རེ་རེའི་ཆ་ཡང་དཔག་གིས་མི་ལངས་པས་ངོ་མཚར། རྟག་ཏུ་དགྱེས་ཤིང་ཐུགས་རྗེས་འཛིན་པར་གྱུར་ཅིག འདི་ལྟར་དཔལ་མགོན་བླ་མ་དམ་པ་རྣམས་ནི་མཐོང་བ་དང་ཐོས་པ་དང་དྲན་པ་དང་རེག་པ་ཙམ་གྱིས་ཐར་བའི་ས་བོན་འདེགས་ཤིང་འཁོར་བ་ཕྱིར་བསྙིལ་བས་སངས་རྒྱས་ཀུན་དང་ཕྲིན་ལས་ཀྱི་བྱེད་པ་གཅིག་པ་དང་། ཐར་པའི་ལམ་དུ་འདྲེན་པས། སྐལ་བ་མཆོག་ཏུ་གྱུར་པ་དང་། དཀྱིལ་འཁོར་གང་དུ་ཧེ་རུ་ཀའི་ངོ་བོར་དབང་རྫོགས་ཤིང་ཐམས་ཅད་ཀྱི་བྱ་བ་བྱེད་པས་དཀོན་མཆོག་བཞི་པར་བྱོན་པ་དང་། གདུལ་ངོར་སངས་རྒྱས་ལས་ཀྱང་བཀའ་དྲིན་མཆོག་ཏུ་ཆེ་བའི་ཡོན་ཏན་མངའ་བ་སྟེ། ཕལ་པོ་ཆེ་ལས། དགེ་བའི་བཤེས་གཉེན་གྱི་ཡོན་ཏན་དང་བསྔགས་པ་བརྗོད་པ་ནི། རྒྱས་པར་བསྐལ་པར་བརྗོད་ཀྱང་ཟད་མི་ཤེས་པ་དང་ལྡན་པ་དེའི་ཕྱིར། རྟག་ཏུ་དགེ་བའི་བཤེས་གཉེན་ལ་བསྟེན་པར་བྱའོ། །ཞེས་དང་། བདེ་མཆོག་རྩ་རྒྱུད་ལས། མཐོང་བ་དང་ནི་རེག་པ་དང་། །ཐོས་པ་དང་ནི་དྲན་པ་ཡིས། །སྡིག་པ་ཀུན་ལས་གྲོལ་འགྱུར་བ། །དེ་ལྟ་ཉིད་དུ་ཐེ་ཚོམ་མེད། །ཅེས་དང་། སངས་རྒྱས་མཉམ་སྦྱོར་ལས། སངས་རྒྱས་ཆོས་དང་དགེ་འདུན་དང་། །བླ་མ་ཡང་ནི་བཞི་པ་ཡིན། །ཞེས་དང་། ནམ་མཁའ་དྲི་མ་མེད་པའི་མདོ་ལས། ཀུན་དགའ་བོ། དེ་བཞིན་གཤེགས་པ་ནི་སེམས་ཅན་ཐམས་ཅད་ལ་སྣང་བ་མ་ཡིན་གྱི། དགེ་བའི་བཤེས་གཉེན་ནི་ཡོངས་སུ་སྣང་བས་ཆོས་སྟོན་ཅིང་ཐར་པའི་ས་བོན་འདེབས་པའི་ཕྱིར། དེ་བཞིན་གཤེགས་པ་རྣམས་ལས་དགེ་བའི་བཤེས་གཉེན་ལྷག་པར་ཡང་ཟུངས་ཤིག ཅེས་སོ། །དེས་ན་དེང་སང་བདག་ལྟ་བུས་མཇལ་ཞིང་བསྟེན་དུ་ཡོད་པ་འདི་རེ་འཚེངས། ཚེ་འདིར་སྨིན་གྲོལ་ཟབ་མོའི་ལམ་ལ་འགོད་པར་མཛད་པའི་དཔལ་མགོན་བླ་མ་བཀའ་དྲིན་ཅན་རྣམས་ཚེ་རབས་ཐམས་ཅད་དུ་བསྟེན་ཅིང་མཉེས་ནས་ཐུགས་རྗེས་བྱིན་གྱིས་རློབས་པར་ཤོག་ཅིག སྙམ་དུ་བསམས་ཤིང་ཉམས་སུ་ལེན་པར་བྱའོ། །གཉིས་པ་བཀའ་དྲིན་དྲན་པ་ནི། སྡོང་པོ་བཀོད་པ་ལས། དགེ་བའི་བཤེས་གཉེན་ནི་བྱ་བ་དང་མི་བྱ་བ་ཐམས་ཅད་སྟོན་པ། འཇིག་རྟེན་གྱི་གནས་འདོར་བ། སྡིག་ཏོ་དང་བག་མེད་པའི་གནས་ཐམས་ཅད་ལས་ཟློག་པ། སྒྲིབ་པ་ཐམས་ཅད་རྣམ་པར་བྱང་བ། འཁོར་བའི་གྲོང་ཁྱེར་ལས་འདོན་པ། བདུད་ཀྱི་ཞགས་པ་གཅོད་པ། མ་རིག་པའི་མུན་པ་སེལ་བ། ལྟ་བའི་འཆིང་བ་གཅོད་པ། སྡུག་བསྔལ་གྱི་ཟུག་རྔུ་འབྱིན་པ། མི་ཤེས་པའི་འཐིབ་པོ་སེལ་བ། སྲིད་པའི་ཆུ་བོ་ལས་སྒྲོལ་བ། འདོད་པའི་འདམ་ནས་འབྱིན་པ། བྱང་ཆུབ་སེམས་དཔའི་ལམ་སྟོན་པ། ཡི་དམ་ལ་འཇོག་པ་ནན་ཏན་ལ་འགོད་པ། རྣམ་པར་གྲོལ་བའི་ལམ་སྟོན་པ། སྙིང་རྗེ་ཆེན་པོ་བསྐྱེད་པ། ཤེས་རབ་ཀྱི་མིག་སྦྱོང་བ། བྱང་ཆུབ་ཀྱི་སེམས་སྤེལ་བ། བྱང་ཆུབ་སེམས་དཔའི་སྤྱོད་པ་སྟོན་པ། ཕ་རོལ་ཏུ་ཕྱིན་པའི་གདམས་པ་སྟོན་པ། ས་བཅུའི་གནས་ལ་འགོད་པ། སངས་རྒྱས་ཀྱི་ཆོས་ཐམས་ཅད་ལ་གནས་པར་བྱེད་པའོ། །ཞེས་དང་། ཡང་དེ་ཉིད་ལས། བྱང་ཆུབ་སེམས་དཔའི་སྤྱོད་པ་ཐམས་ཅད་ནི་དགེ་བའི་བཤེས་གཉེན་ལ་རག་ལས་པའོ། །སྨོན་ལམ་གྱི་སྒོ་ཐམས་ཅད་ཀྱང་དེ་ལས་འབྱུང་ངོ་། །དགེ་བའི་རྩ་བ་ཐམས་ཅད་ཀྱང་དེས་བསྐྱེད་དོ། །བསོད་ནམས་དང་ཡེ་ཤེས་ཀྱི་ཚོགས་ཐམས་ཅད་ཀྱང་དེས་སྒྲུབ་པའོ། །ཆོས་ཀྱི་སྒོ་ཐམས་ཅད་ཀྱང་དེས་སྣང་བར་བྱེད་དོ། །ལམ་རྣམ་པར་དག་པ་ཐམས་ཅད་ཀྱང་དེ་ལས་འབྱུང་བའོ། །ལྷག་པའི་བསམ་པ་རྣམ་པར་དག་པ་ཐམས་ཅད་ཀྱི་རྩ་བར་གྱུར་པའོ། །སེམས་བསྐྱེད་བསྟན་པ་ཐམས་ཅད་ཀྱང་དེ་ལས་བསྐྱེད་དོ། །གཟུངས་དང་སྤོབས་པའི་སྣང་བ་ཐམས་ཅད་ཀྱང་དེས་སྟོན་པར་བྱེད་དོ། །རྣམ་པར་དག་པའི་སྒོའི་མཛོད་ཐམས་ཅད་ཀྱང་དེས་ཡོངས་སུ་གཟུང་བའོ། །ཡེ་ཤེས་ཀྱི་སྣང་བ་ཐམས་ཅད་ནི་དེས་བསྐྱེད་པའོ། །སྨོན་ལམ་ཁྱད་པར་ཅན་ཐམས་ཅད་ནི་དེའི་ལག་ན་འདུག་པའོ། །ཞེས་དང། ཡང་། དགེ་བའི་བཤེས་གཉེན་ནི་སངས་རྒྱས་ཀྱིི་རིགས་སུ་སྐྱེས་པས་འཁོར་ལོས་སྒྱུར་བའི་རྒྱལ་པའི་བུ་ཐུ་བོ་ལྟ་བུའོ། །ཡོན་ཏན་གྱི་རིགས་བསྐྱེད་པས་མ་ལྟ་བུའོ། །ཕན་པ་རྒྱ་ཆེན་པོ་སྒྲུབ་པས་ཕ་ལྟ་བུའོ། །སྡིག་པ་ལས་བསྲུངས་པས་མ་ལྟ་བུའོ། །བསླབ་པ་རྣམས་སློབ་པས་སློབ་དཔོན་ལྟ་བུའོ། །ཕ་རོལ་དུ་ཕྱིན་པའི་ལམ་ལ་འཛུད་པས་ས་མཁན་ལྟ་བུའོ། །ཉོན་མོངས་པའི་ནད་གསོ་བས་སྨན་པ་ལྟ་བུའོ། །འཇིགས་པ་ལས་བསྲུངས་པས་དཔའ་བོ་ལྟ་བུའོ། །འཁོར་བའི་ཆུ་བོ་ལས་སྒྲོལ་བས་མཉེན་པ་ལྟ་བུ་སྟེ། །བྱང་ཆུབ་སེམས་དཔའི་སྤྱོད་པ་ཐམས་ཅད་ནི་དགེ་བའི་བཤེས་གཉེན་ལ་རག་ལས་པའོ། །ཞེས་དང་། ཕལ་པོ་ཆེ་ལས། གཞོན་ནུ་ནོར་བཟང་། དགེ་བའི་བཤེས་གཉེན་རྣམས་ནི་བདག་ངན་སོང་ཐམས་ཅད་ལས་སྐྱོབ་པའོ། །ཆོས་མཉམ་པ་ཉིད་དུ་རྟོགས་པར་བྱེད་པའོ། །ལམ་བདེ་བ་དང་མི་བདེ་བ་སྟོན་པའོ། །ཀུན་ཏུ་བཟང་པོའི་སྤྱོད་པ་འདོམ་པའོ། །ཐམས་ཅད་མཁྱེན་པའི་གྲོང་ཁྱེར་གྱི་ལམ་སྟོན་པའོ། །ཐམས་ཅད་མཁྱེན་པའི་གནས་སུ་སྐྱེལ་བའོ། །ཆོས་ཀྱི་དབྱིངས་ཀྱི་རྒྱ་མཚོར་འཇུག་པའོ། །དུས་གསུམ་གྱི་ཤེས་བྱའི་རྒྱ་མཚོ་སྟོན་པའོ། །འཕགས་པའི་ཚོགས་ཀྱི་དཀྱིལ་འཁོར་སྟོན་པའོ། །དགེ་བའི་བཤེས་གཉེན་ནི་བདག་གི་དཀར་པོའི་ཆོས་ཐམས་ཅད་འཕེལ་བར་བྱེད་པའོ། །ཞེས་དང་། འདི་ནི་བདག་གི་དགེ་བཤེས་ཆོས་སྨྲ་བ། །ཆོས་ཀུན་ཡོན་ཏན་ཡོངས་སུ་སྟོན་བྱེད་དེ། །བྱང་ཆུབ་སེམས་དཔའི་སྤྱོད་ལམ་ཡང་སྟོན་པ། །ཡིན་ཞེས་སེམས་གཅིག་བསམས་ནས་འདིར་འོངས་སོ། །འདི་དགེ་བསྐྱེད་པས་བདག་གི་མ་ལྟ་བུ། །ཡོན་ཏན་འོ་མ་ལྡུད་པའི་མ་མ་འདྲ། །བྱང་ཆུབ་ཡན་ལག་ཡོངས་སུ་སྦྱོང་བ་ཡིན། །དགེ་བཤེས་འདི་དག་གནོད་པ་རྣམ་པར་ཟློག །རྒ་ཤི་མཐར་བྱེད་སྨན་པ་ལྟ་བུ་སྟེ། །བདུད་རྩིའི་ཆར་འབེབས་ལྷ་དབང་བརྒྱ་བྱིན་འདྲ། །ཟླ་ཉ་ལྟ་བུར་དཀར་པོའི་ཆོས་ཀྱིས་རྒྱས། །ཞི་བའི་ཕྱོགས་སྟོན་ཉི་མ་གསར་པ་འདྲ། །དགྲ་དང་གྲོགས་ལ་རི་བོ་འདྲ་བ་སྟེ། །རྒྱ་མཚོ་བཞིན་དུ་མི་འཁྲུགས་སེམས་དང་ལྡན། །ཡོངས་སུ་སྐྱོང་དང་གཉེན་པ་འདྲ་བ་ཞེས། །དེ་འདྲའི་སེམས་ཀྱིས་ནོར་བཟང་འདིར་འོངས་སོ། །བྱང་ཆུབ་སེམས་དཔའ་བདག་གི་བློ་བསྐྱེད་པ། །སངས་རྒྱས་སྲས་པོ་བྱང་ཆུབ་སྐྱེད་བྱེད་པ། །འདི་དག་དགེ་བཤེས་སངས་རྒྱས་བསྔགས་པ་ཞེས། །དེ་ལྟར་དགེ་བའི་སེམས་ཀྱིས་འདིར་འོངས་སོ། །འཇིག་རྟེན་སྐྱོབ་པས་དཔའ་བོ་ལྟ་བུ་སྟེ། །དེད་དཔོན་མགོན་དང་སྐྱབས་སུ་འགྱུར་བ་ཡིན། །འདི་དག་བདག་ལ་བདེ་སྟོབས་མིག་ཡིན་ཞེས། །དེ་འདྲའི་སེམས་ཀྱིས་དགེ་བཤེས་བསྙེན་བཀུར་བྱེད། །ཅེས་པ་ལྟར། འཁོར་བ་དང་ངན་སོང་གི་སྡུག་བསྔལ་ལས་སྐྱབས་ཤིང་། མཐོ་རིས་དང་ཐར་པའི་ལམ་བཟང་སྟོན་པ་དང་། འཕྲལ་དང་ཡུན་གྱི་འབྱོར་པ་ཕུན་སུམ་ཚོགས་པའི་གོ་འཕང་སྦྱིན་པ་དང་། ཉེས་པ་ཕྲ་མོ་ལས་ཀྱང་ཐབས་དུ་མས་ཟློག་པར་མཛད་ནས་ཡོན་ཏན་གྱི་ཆ་ཤས་རེ་རེ་ནས་རྒྱུད་ལ་སྦྱོར་བའི་བཀའ་དྲིན་སྙིང་ནས་དྲན་པར་བྱ་ཞིང་། ཁྱད་པར་གསང་སྔགས་རྡོ་རྗེ་ཐེག་པའི་ལུགས་ཀྱི། དབང་བསྐུར། རྒྱུད་བཤད། མན་ངག་སྟོན་པའི་བཀའ་དྲིན་སུམ་ལྡན་ནི་སངས་རྒྱས་ལས་ཀྱང་ལྷག་པས་ཁོང་པའི་སྙིང་དང་དཔྲལ་བའི་མིག་ལྟ་བུར་བསྟེན་པར་བྱ་སྟེ། མི་ཟད་པའི་གཏེར་མཛོད་མན་ངག་གི་གླུ་ལས། སྣ་ཚོགས་ཆོས་རྣམས་ཐམས་ཅད་དོན་གཅིག་པར། །སྟོན་པར་བྱེད་པ་བླ་མ་དམ་པ་ཉིད་ཡིན་ཏེ། །ངང་པའི་མཆུ་དང་མཚུངས་པའི་རྗེ་བཙུན་མཆོག་དེ་ནི། །གུས་པའི་སེམས་ཀྱིས་གཙང་མའི་སྤྱི་བོས་བླང་བར་བྱ། །གཅིག་ཏུ་སྡུས་པའི་སེམས་ནི་མཚོན་བྱེད་བླ་མ་སྟེ། །མཚོན་པར་བྱ་བའི་གཞི་ནི་སློབ་མའི་སྙིང་ཉིད་དོ། །དེ་རྟོགས་པ་ཡིས་སྡུག་བསྔལ་ཐམས་ཅད་སྐད་ཅིག་ལ། །འཇོམས་པར་བྱེད་པའི་དཔའ་བོ་དེ་ནི་དྲིན་ཅན་པས། །དོན་ལ་བལྟས་ན ས་བྱས་པ་དྲིན་དུ་གཟོ་བའི་ཕྱིར། །སྨན་པའི་རྒྱལ་པོ་དེ་ནི་རྟག་ཏུ་གཟུང་བར་བྱ། །ཞེས་པ་ནས། ཉོན་མོངས་ཐམས་ཅད་ཐབས་ཀྱི་མཆོག་ཏུ་སྒྱུར་བྱེད་དང་། །རྟོག་པའི་ཟུག་རྔུ་གང་གིས་བསྒྱུར་བར་མི་ནུས་པ། །འདི་ནི་མན་ངག་སྙིང་པོ་ལས་ནི་ངེས་འབྱུང་སྟེ། །དེ་ཡང་རྗེ་བཙུན་མཐུ་ལས་ངེས་པར་རྙེད་པར་འགྱུར། །དེ་ཕྱིར་བརྒྱུད་པར་ལྡན་པའི་བྱིན་རླབས་གང་ལྡན་པ། །དུས་ཐབས་བསྟན་པ་མཁས་པས་རྟག་ཏུ་བརྟེན་པར་བྱ། །ཞེས་དང་། ངལ་གསོ་ལས། དཀོན་མཆོག་བཞི་པ་བླ་མ་སངས་རྒྱས་ཏེ། །དཀྱིལ་འཁོར་དབང་ཕྱུག་ཧེ་རུ་ཀ་དཔལ་ཉིད། །སྙིགས་དུས་འགྲོ་བ་གདུལ་དཀའི་དོན་མཛད་པས། །གདུལ་བྱའི་ངོར་ནི་སངས་རྒྱས་ཀུན་ལས་ལྷག །དངོས་གྲུབ་རྩ་བ་རྡོ་རྗེ་སློབ་དཔོན་ལ། །སྒོ་གསུམ་ཟོལ་མེད་གཙང་མའི་སྤྱི་བོས་བསྟེན། །ཞེས་སོ། །གཞན་ཡང་ད་ལྟར་གྱི་སངས་རྒྱས་མངོན་སུམ་པའི་ཏིང་ངེ་འཛིན་ལས་ཀྱང་། དགེ་བའི་བཤེས་གཉེན་ནི་རྙེད་པར་དཀའ་བས་མཁན་པོ་དང་སློབ་དཔོན་ལ་བཀུར་སྟི་སྤྲོ་བར་བྱའོ། །སུ་ལ་ཆོས་ཐོས་པ་དང་། གླེགས་བམ་བྲི་བར་ཞུས་པ་དེ་ལ་ངེས་པར་སྟོན་པའི་འདུ་ཤེས་དང་། དགེ་བའི་བཤེལ་གཉེན་གྱི་འདུ་ཤེས་བསྐྱེད་དེ། ཆོས་དེ་དང་། རྫོགས་པའི་བྱང་ཆུབ་སྨིན་པར་བྱ་བའི་ཕྱིར། དེ་ལ་ལྷག་པར་དགའ་བ་དང་གུས་པ་བསྐྱེད་དོ། །ཞེས་དང་། ཆོས་བཅུ་པའི་མདོ་ལས། ཆོས་འཛིན་པ་ལ་གུས་པ་དང་བཅས་ནས་ཞུས་པས་སྣང་བའི་འདུ་ཤེས་བསྐྱེད་དོ། །དེ་ལ་སྟོན་པའི་འདུ་ཤེས་བསྐྱེད་དོ། །དགེ་བའི་བཤེས་གཉེན་གྱི་འདུ་ཤེས་བསྐྱེད་དོ། །སྲིད་པའི་རྒྱ་མཚོ་ལས་སྒྲོལ་བར་བྱེད་པའི་འདུ་ཤེས་བསྐྱེད་དོ། །བདག་འཁོར་བར་འཁྱམས་པ་འཚོལ་བར་བྱེད་པའི་འདུ་ཤེས་བསྐྱེད་དོ། །གཏི་མུག་གི་གཉིད་ལས་སད་པར་བྱེད་པའི་འདུ་ཤེས་བསྐྱེད་དོ། །བདག་འཁོར་བའི་འདམ་དུ་བྱིང་བ་ལས་འབྱིན་པར་བྱེད་པའི་འདུ་ཤེས་བསྐྱེད་དོ། །ལམ་ངན་པར་ཞུགས་པ་ལས་བཟང་པོར་སྟོན་པར་བྱེད་པའི་འདུ་ཤེས་བསྐྱེད་དོ། །སྲིད་པའི་བཙོན་རར་བཅིངས་པ་ལས་གྲོལ་བར་བྱེད་པའི་འདུ་ཤེས་བསྐྱེད་དོ། །ཡུན་རིང་པོར་ནད་ཀྱིས་གདུངས་པ་ལས་སྨན་པའི་འདུ་ཤེས་བསྐྱེད་དོ། །ཉོན་མོངས་པའི་མེ་འབར་བ་ལས་ཞི་བར་བྱེད་པའི་ཆར་སྤྲིན་གྱི་འདུ་ཤེས་བསྐྱེད་དོ། །ཞེས་དང་། འཕགས་པ་རྟག་ཏུ་ངུས་སྒྲ་སྒྲོགས་པ་ལས་ཀྱང་། གང་ལ་ལ་ཤེས་རབ་ཀྱི་ཕ་རོལ་དུ་ཕྱིན་པ་ཐོས་པ་དེ་ལ་སངས་རྒྱས་ཀྱི་འདུ་ཤེས་ཀྱིས་བྱས་པ་གཟོ་བར་བྱ་སྟེ། བདག་གིས་འདི་ལས་ཆོས་ཐོས་པས་མྱུར་དུ་བླ་ན་མེད་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །སངས་རྒྱས་ལ་བསྙེེན་པས་དེའི་ཞིང་དུ་སྐྱེ་བར་འགྱུར་རོ། །མི་ཁོམ་པའི་གནས་རྣམས་ཡོངས་སུ་སྤོང་བར་འགྱུར་རོ། །དལ་བ་ཕུན་སུམ་ཚོགས་པ་ཡོངས་སུ་ཐོབ་པར་འགྱུར་རོ། །ཞེས་ཆོས་སྨྲ་བ་ལ་སྟོན་པའི་འདུ་ཤེས་བསྐྱེད་དོ། །ཞེས་སོ། །གཞན་ཡང་ཀུན་མཁྱེན་བླ་མས་ཕྱི་རོལ་པས་དོན་མེད་པའི་དཀའ་ཐུབ་མེ་ལྔ་བསྟེན་པ་སོགས་ལའང་འབད་པ་དྲག་པོ་བྱེད་ན། བདག་གིས་དོན་ཡོད་པ་བདེ་ནས་བདེ་བར་འཁྲིད་པར་བྱེད་པའི་བླ་མ་ལ་མོས་གུས་དང་། བསྙེན་བཀུར་ཅིའི་ཕྱིར་མི་བྱ་སྙམ་པ་དང་། དེ་བཞིན་དུ་འཇིག་རྟེན་པ་རྣམས་དཔུང་གཉེན་གྱི་དོན་དུ་རྗེ་དཔོན་ལ་སོགས་པར་བཀུར་ཞིང་མཆོད་ན། བདག་གིས་འཁོར་བའི་སྡུག་བསྔལ་ཐམས་ཅད་སྐྱོབ་པའི་བླ་མ་ལ་ཅིའི་ཕྱིར་མི་མཆོད། དར་ཅིག་འཇིགས་པས་སྐྲག་པ་རྣམས་དཔའ་བོ་བསྟེན་ན། བདག་གིས་གཏན་གྱི་འཁོར་བ་དང་ངན་སོང་ལས་ཐར་བར་བྱེད་པའི་བླ་མ་ཅིའི་ཕྱིར་མི་བསྟེན། རྒྱལ་པོ་ལའང་རིན་པོ་ཆེ་དང་། རོལ་མོ་གདུགས་ལ་སོགས་པས་མཆོད་ན། བདག་གིས་ཡུན་གྱི་དོན་སྲིད་ཆེན་པོ་སྟེར་བའི་བླ་མ་ལ་མོས་གུས་དང་བསྙེན་བཀུར་ཅིའི་ཕྱིར་མི་བྱེད། བཟོ་ལ་སོགས་པ་འཇིག་རྟེན་གྱི་རིག་པ་སློབ་པའི་སློབ་དཔོན་ལ་ཡང་བསྙེན་བཀུར་བྱེད་ན། སེམས་ཅན་ལ་སངས་རྒྱས་སྒྲུབ་པ་སྟོན་པའི་བླ་མ་ལ་མོས་གུས་དང་བསྙེན་བཀུར་ཅིའི་ཕྱིར་མི་བྱ། འདུ་བ་སྙོམས་པའི་སྨན་པའང་མཆོད་ན། དུག་ལྔའི་གཅོང་ནད་འདོན་པའི་བླ་མ་ལ་མོས་གུས་དང་བསྙེན་བཀུར་ཅིའི་ཕྱིར་མི་བྱ། ཉིན་རེའི་འཇིགས་པ་སྐྱོབ་པའི་སྐྱེལ་མ་ལ་ཡང་གཅེས་སྤྲས་ཀྱིས་མཆོད་ན། བདུད་བཞིའི་དགྲ་ལས་སྐྱོབ་པའི་བླ་མ་ལ་མོས་གུས་དང་བསྙེན་བཀུར་ཅིའི་ཕྱིར་མི་བྱ་ཟས་གོས་དང་ནོར་ལ་སོགས་པའི་ཆས་ཅུང་ཟད་ཀྱིས་ཕན་འདོགས་པ་དེ་དག་གི་ཕྱིར་སྲོག་ཀྱང་གཏོང་བར་ནུས་ན། དགོས་འདོད་ཀྱི་ནོར་བུ་སྟེར་བའི་བླ་མ་ལ་མོས་གུས་དང་བསྙེན་བཀུར་ཅིའི་ཕྱིར་མི་བྱ། དར་ཅིག་འགྲོགས་པའི་གྲོགས་ལའང་དགའ་བས་མཆོད་ན། གཏན་གྱི་གྲོགས་མཆོག་དམ་པ་ཆོས་ཟབ་མོ་དང་ངོ་སྤྲོད་པའི་བླ་མ་ལ་མོས་གུས་དང་བསྙེན་བཀུར་ཅིའི་ཕྱིར་མི་བྱ། ཚེ་འདིར་བརྩེ་བའི་འདུན་གྲོས་བསླབ་པ་ལའང་གཅེས་སྤྲས་བྱེད་ན། གཏན་གྱི་སྐྱིད་སྡུག་འཆོས་པའི་བླ་མ་ལ་མོས་གུས་དང་བསྙེན་བཀུར་ཅིའི་ཕྱིར་མི་བྱེད་སྙམ་པ་ལ་སོགས་པས་བླ་མ་བསྟེན་པ་ལ། དཀའ་བ་དང་། དཔེ་དང་། རྣམ་གྲངས་མང་པོ་བལྟས་ལ་མོས་གུས་དང་བསྙེན་བཀུར་བྱའོ། །དེས་ནི་རྒྱུ་འབྲས་ཀྱིས་ཆེ་བས་གཞན་གྱིས་བསྟོད་ཅིང་བཀུར་བ་དང། ཚེ་རིང་ནད་མེད་འབྱོར་པས་མཐོ་བ་དང་། གང་འདོད་པ་འགྲུབ་ཅིང། བདེ་བར་ཚེ་ཡི་དུས་བྱེད། བར་དོའི་འཇིགས་པ་ལས་སྐྱོབ། ཕྱི་མ་ལ་སངས་རྒྱས་དངོས་སུ་བཞུགས་པའི་ཞིང་ཁམས་དག་པར་པདྨོའི་སྟེང་དུ་བརྫུས་ཏེ་སྐྱེས་ནས་བྱང་ཆུབ་འགྲུབ་པ་ལ་སོགས་པའི་ཡོན་ཏན་ཐོབ་བོ། །ཞེས་གསུངས་སོ། །གསུམ་པ་བླ་མ་སངས་རྒྱས་སུ་བལྟ་བའི་ཚུལ་ནི། སྤྱིར་བླ་མའི་ངོས་ན་སངས་རྒྱས་མངོན་སུམ་ལྟ་བུར་བཞུགས་ཀྱང་། བྱིན་རླབས་དང་དངོས་གྲུབ་ཀྱི་སྐལ་བ་རང་གི་མོས་གུས་ཁོ་ནའི་རྗེས་སུ་འགྲོ་བ་ཡིན་ཏེ། བླ་མ་སངས་རྒྱས་དངོས་སུ་མཐོང་བའི་མོས་གུས་ཡོད་ན། བྱིན་རླབས་ཀྱང་སངས་རྒྱས་དངོས་ཀྱི་བྱིན་རླབས་འབྱུང་། བླ་མ་བྱང་ཆུབ་སེམས་དཔའ་དང་། དགེ་བའི་བཤེས་གཉེན་ཁྱད་པར་ཅན་དུ་མཐོང་ན་བྱིན་རླབས་ཀྱི་རིམ་པའང་དེ་དང་མཚུངས། བླ་མ་གང་ཟག་རང་རྒྱུད་པར་བཟུང་ན་བྱིན་རླབས་གཏན་ནས་མི་འབྱུང་སྟེ། སྔོན་དགེ་བཤེས་འབྲོམ་སྟོན་པས་ཇོ་བོ་རྗེ་ལ་བོད་ན་སྒོམ་སྒྲུབ་བྱེད་པ་མང་པོ་ཡོད་ཀྱང་ཡོན་ཏན་ཁྱད་ཅན་བརྙེས་པ་མི་བདོག་ཅི་ལགས་ཞུས་པས། ཇོ་བོའི་ཞལ་ནས། ཐེག་པ་ཆེན་པོའི་ཡོན་ཏན་ཆེ་སྐྱེས་ཆུང་སྐྱེས་ཐམས་ཅད་བླ་མ་ལ་བསྟེན་ནས་སྐྱེ་བ་ལ། ཁྱེད་བོད་བླ་མ་ལ་ཐ་མལ་པའི་འདུ་ཤེས་ལས་མེད་པས་ཡོན་ཏན་ག་ན་སྐྱེ་གསུངས་པ་དང་། ཡང་ཇོ་བོ་ལ། སློབ་མ་ཞིག་གིས། ཨ་ཏི་ཤ་གདམས་ངག་ཞུ་ན་ཞེས་སྐད་ཆེན་པོས་བོས་པ་ན། ཧེ་ཧེ་ཁོ་བོ་ལ་རྣ་བ་བཟང་པོ་བཟང་པོ་བདོག་སྟེ་མན་ངག་བྱ་བ་དད་པ་ཡིན། དད་པ་དད་པ་གསུངས་པ་ལྟར་དད་པ་གལ་ཆེ། རྒྱུ་མཚན་དེའི་ཕྱིར་ན་བླ་མའི་མོས་གུས་ཀྱི་མཐུ་ལས་རྒྱལ་པའི་དགོངས་པ་བདེ་བླག་ཏུ་རྟོགས་པར་འདོད་པའི་གང་ཟག་རྣམས་ཀྱིས་བླ་མ་སངས་རྒྱས་དངོས་སུ་མཐོང་བ་ཞིག་དགོས་ཏེ། ལག་ན་རྡོ་རྗེ་དབང་བསྐུར་བའི་རྒྱུད་ལས། གསང་བའི་བདག་པོ་སློབ་དཔོན་ལ་སློབ་མས་ཇི་ལྟར་བལྟ་བར་བྱ་ཞེ་ན། སངས་རྒྱས་བཅོམ་ལྡན་འདས་ལ་ཇི་ལྟ་བ་དེ་བཞིན་ནོ། །དེ་ཡི་སེམས་ནི་དེ་ལྟ་ན། །རྟག་ཏུ་དགེ་བ་སྐྱེ་བར་འགྱུར། །དེ་ནི་འཇིག་རྟེན་ཐམས་ཅད་ལ། །ཕན་པར་བྱེད་པའི་སངས་རྒྱས་འགྱུར། །ཞེས་གསུངས་སོ། །དེ་ཡང་དོན་ལ་སངས་རྒྱས་མིན་པ་ཞིག་བློས་སངས་རྒྱས་སུ་བཅོས་པ་ལྟ་བུ་མ་ཡིན་པར་བླ་མ་ཉིད་ཡེ་ནས་སངས་རྒྱས་དངོས་ཡིན་པའི་རྒྱུ་མཚན་ཡང་། དུས་གསུམ་གྱི་སངས་རྒྱས་ཐམས་ཅད་ཆོས་སྐུ་མཉམ་པ་ཉིད་ཀྱི་དབྱིངས་སུ་དགོངས་ཀློང་འདུ་འབྲལ་མེད་པར་རྟག་ཏུ་བཞུགས་པ་ལས། སྔོན་སློབ་ལམ་སོགས་སུ་སེམས་ཅན་གྱི་དོན་དུ་སྨོན་ལམ་བཏབ་པ་དང་། གདུལ་བྱ་སེམས་ཅན་རྣམས་ཀྱི་དཀར་པོ་རྣམ་པར་འཕེལ་བའི་དབང་གིས། རྒྱུ་རྐྱེན་རྟེན་འབྱུང་ལྷན་ཅིག་ཏུ་འཚོགས་པ་ན། ངོ་བོ་སངས་རྒྱས་རྣམས་ཀྱི་ཟག་པ་མེད་པའི་ཡེ་ཤེས་ཉིད་རྣམ་པ་ཐམས་ཅད་པར་འཆར་བའི་ཚུལ་གྱིས། དཔེར་ན་མཁའ་ཟླ་དང་ཆུ་སྣོད་ལྷན་ཅིག་ཏུ་འཚོགས་པའི་དབང་གིས་རང་རང་གི་ངོ་སྐལ་དུ་གཟུགས་བརྙན་འཆར་བ་བཞིན། ལོངས་སྤྱོད་རྫོགས་པའི་སྐུ་ཡི་དཀྱིལ་འཁོར་དང་། བཟོ་སྐྱེ་མཆོག་གི་སྤྲུལ་པའི་སྐུའི་བཀོད་པ་ཇི་སྲིད་འཁོར་བ་མ་སྟོང་གི་བར་དུ་རྒྱུན་མི་ཆད་པར་རང་རང་གི་སྐལ་བ་དང་འཚམ་པར་སྟོན་པར་མཛད་པ་ཡིན་ཏེ། ཡེ་ཤེས་སྣང་བརྒྱན་གྱི་མདོ་ལས། དེ་བཞིན་གཤེགས་པ་ཟག་མེད་དགེ་བ་ཡི། །ཆོས་ཀྱི་གཟུགས་བ་རྙན་ཡིན་ཏེ་འདི་ལ་ནི། །དེ་བཞིན་ཉིད་མེད་དེ་བཞིན་གཤེགས་པའང་མེད། །འཇིག་རྟེན་དག་ན་གཟུགས་བརྙན་ཀུན་ཏུ་སྣང། །ཞེས་དང་། རྒྱུད་བླ་མ་ལས། ཇི་ལྟར་བཻཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །ཞེས་དང་། སྤྱོད་འཇུགས་ལས། ཡིད་བཞིན་ནོར་བུ་དཔག་བསམ་ཤིང་། །ཇི་ལྟར་རེ་བ་ཡོངས་སྐོང་བ། །དེ་བཞིན་གདུལ་བྱར་སྨོན་ལམ་གྱི། །དབང་གིས་རྒྱལ་བའི་སྐུར་སྣང་ངོ། །ཞེས་དང་། རྒྱུད་གསང་བ་སྙི ང་པོ་ལས། དེ་བཞིན་དབྱིངས་ལས་མ་གཡོས་ཀྱང་། །ཡང་དག་ཐར་པའི་གཟུགས་སྐུ་དང་། །འགྲོ་བ་མ་ལུས་འདུལ་བའི་ཕྱིར། །མཐུན་བྱས་སྐུ་ནི་སོ་སོར་སྟོན། །ཞེས་སོ། །དེ་ཡང་སྔོན་དུས་སངས་རྒྱས་ཀྱིས་འདུལ་བའི་ཚེ་སངས་རྒྱས་དངོས་སུ་སྣང་བས་དོན་མཛད་ལ། དེ་ནས་དགྲ་བཅོམ་པ་དང་། པཎྜི་ཏར་སྣང་བས་དོན་མཛད་དུས་དེ་དག་ཏུ་སྤྲུལ་ནས་བཀའ་བསྡུ་བ་དང་། བསྟན་བཅོས་མཛད་པ་ཡིན་ཞིང་། དེང་སང་ནི་བསྟན་པ་འཛི ན་ཞིང་ཐར་པའི་ལམ་སྟོན་པ་ལ་དགེ་བའི་བཤེས་གཉེན་དུ་སྤྲུལ་ནས་དོན་མཛད་པ་ཡིན་ཏེ། ཏིང་འཛིན་མཆོག་དམ་པའི་མ དོ་ལས། རིགས་ཀྱི་བུ་དེ་ཡང་ཕྱི་མའི་ཚེ་ཕྱི་མའི་དུས་ན་ང་ཉིད་དགེ་བའི་བཤེས་གཉེན་དུ་སྤྲུལ་ནས་ཏིང་ངེ་འཛིན་འདི་སྟོན་པར་འགྱུར་རོ། །དེའི་ཕྱིར་དགེ་བའི་བཤེས་གཉེན་ནི་ཁྱོད་ཀྱི་སྟོན་པ་ཡིན་པས། ནམ་བྱང་ཆུབ་སྙིང་པོ་ལ་འདུག་གི་བར་དུ་བསྟེ ན་ཅིང་རིམ་གྲོ་དང་བཀུར་སྟི་གྱིས་ཤིག ཅེས་དང་། རྡོ་རྗེ་གུར་ལས། རྡོ་རྗེ་སེམས་དཔའ་ཇི་ལྟ་བུས། །དེ་ལྟར་སློབ་དཔོན་གཟུགས་འཛིན་ཏེ། །སེམས་ཅན་རྗེས་སུ་བཟུང་དམིགས་ནས། །ཕལ་བའི་གཟུགས་ཀྱིས་གནས་པའོ། །ཞེས་དང་། སྒྱུ་འཕྲུལ་གསང་སྙིང་ལས། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བར་གང་བྱེད་པ། །དེ་ནི་ང་ཡིན་དབང་ཡང་རྫོགས། །ཞེས་དང་། ཨོ་རྒྱན་དུས་གསུམ་མཁྱེན་པས་ཀྱང་། ལུང་པ་རེ་ན་གཏེར་སྟོན་རེ་རེ་དང་། །དེ་ལ་ང་ཡི་སྒྲུབ་གནས་གཏེར་གནས་རེ། ཡུལ་གྲུ་རེ་ན་གྲུབ་ཐོབ་གྲགས་འདོད་རེ། །གྲོང་པ་རེ་ན་མཆོད་གནས་སློབ་དཔོན་རེ། །ཁྱིམ་བདག་རེ་ལ་དགེ་སློང་མཆོད་གནས་རེ། །དེ་བཞིན་འདྲེ་འདུལ་མཛད་པའི་སྔགས་པ་རེ། །མ་འོངས་བསྟན་པ་མཐའ་རུ་རྒྱས་པར་འགྱུར། །དེ་རྣམས་ཐམས་ཅད་ང་ཡི་སྤྲུལ་པ་ཡིན། །དག་སྣང་བསྐྱེད་ཅིག་མ་འོངས་བོད་ཁམས་རྣམས། །ཞེས་གསུངས། ཡང་བླ་མ་སངས་རྒྱས་དང་མཉམ་ཤིང་དཀོན་མཆོག་གསུམ་འདུས་ཀྱི་ངོ་བོའམ། དཀོན་མཆོག་བཞི་པར་ཡང་རྡོ་རྗེ་མེ་ལོང་དང་སངས་རྒྱས་མཉམ་སྦྱོར་སོགས་ཀྱི་ལུང་གིས་སྔར་བསྟན་པ་བཞིན་དང་། སློབ་དཔོན་ཆེན་པོས་ཀྱང་། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་ན་མེད། །བླ་མ་དཔལ་ཆེན་ཧེ་རུ་ཀ །ཞེས་དང་། གསང་བ་རབ་འབྱམས་ལས། དཀྱིལ་འཁོར་དབང་ཕྱུག་ཧེ་རུ་ཀ །བླ་མ་མཆོག་ཡིན་དངོས་གྲུབ་ཆེ། །ཞེས་གསུངས། དེར་མ་ཟད་ཁམས་རང་བཞིན་གྱིས་དག་པ་དང་། སེམས་ཅན་གྱི་དོན་མཛད་པ་དང་། ཕྲིན་ལས་རླབས་ཆེ་བའི་ཆ་འགའ་ཞིག་གི་ངོས་ནས་བླ་མ་དང་སངས་རྒྱས་མཉམ་པར་བརྟགས་ལ། རང་རེ་ལ་བཀའ་དྲིན་གྱི་ངོས་ནས་སངས་རྒྱས་ལས་ལྷག་པ་ཉིད་དེ་། གསང་འདུས་ལས། ཁམས་རྣམས་དང་ནི་ཕྲིན་ལས་དག །རང་བཞིན་མཉམ་པ་ཉིད་ཀྱི་ཕྱིར། །སངས་རྒྱས་ཀུན་དང་བླ་མ་མཉམ། འགྲོ་བ་གང་ལ་ལམ་སྟོན་ཕྱིར། །སངས་རྒྱས་ཉིད་ལས་མཆོག་ཏུ་འཕགས། །ཞེས་དང་། དགོངས་འདུས་ལས། དོན་དང་ལྡན་པའི་མཁས་པ་ལ། །དུས་གསུམ་དུས་ནི་ཐམས་ཅད་དུ། །ཕྱོགས་བཅུའི་ཞིང་ན་བཞུགས་པ་ཡི། །བདེ་གཤེགས་རྒྱལ་བ་ཀུན་བྱོན་ནས། །བསྔགས་དང་འདུན་པས་ཕྱག་མཛད་དོ། །ཞེས་དང་། བསྐལ་པ་སྟོང་གི་སངས་རྒྱས་བས། །བླ་མ་གཉན་པར་ཤེས་པར་བྱ། །ཅི་ཕྱིར་བསྐལ་པའི་སངས་རྒྱས་རྣམས། །བླ་མ་དག་ལ་བསྟན་ནས་འབྱུང་། །ཞེས་སོ། །ཁྱད་པར་དུའང་དབང་དང་གདམས་ངག་ཟབ་མོ་སྟོན་པ་དང་། རྣལ་འབྱོར་པ་རྣམས་ཀྱི་ཚོགས་ཀྱི་དཔོན་དུ་བཞུགས་པའི་སྐབས་སུ། ཧེ་རུ་ཀ་དང་རྡོ་རྗེ་རྣལ་འབྱོར་མ་སོགས་དགྱེས་ཤིང་བརྩེ་བའི་སྒོ་ནས་རྡོ་རྗེ་སློབ་དཔོན་གྱི་སྐུ་ལ་ཞུགས་ནས་མཐོང་ཐོས་དྲན་རེག་གི་འགྲོ་བ་མཐའ་ཡས་པའི་དོན་མཛད་པའང་ཡིན་ཏེ། བདེ་མཆོག་རྩ་རྒྱུད་ལས། རྟག་པ་ཉིད་དུ་དཔལ་ཆེན་དང་། །རོལ་བར་ལྡན་པར་ཐེ་ཚོམ་མེད། །དེ་ཡི་ཐུགས་ཀར་གནས་ཕག་མོ། །ང་དང་དཔའ་བོ་རྣལ་འབྱོར་མ། །ཕོ་ཉ་རྣམས་དང་ལྷན་ཅིག་གནས། །དེ་དག་གང་ཞིག་ལེགས་སྐྱེས་པའི། །སྲོག་ཆགས་བསོད་ནམས་མཐོང་བ་ཡིན། །ཞེས་སོགས་གསུངས་པའི་དོན་ལ་དྲན་པ་ཉེ་བར་བཞག་ནས་བླ་མ་སངས་རྒྱས་ཆོས་ཀྱི་སྐུ་དངོས་སུ་མཐོང་བའི་མོས་གུས་གཏིང་ཚུགས་པར་བྱེད་པ་ནི་སྐབས་འདིའི་གནད་གལ་པོ་ཆེ་ཡིན་ནོ། །གཉིས་པ་སྦྱོར་བའི་སྒོ་ནས་ཇི་ལྟར་བསྟེན་པའི་ཚུལ་ལ་གཉིས། མི་མཐུན་ཕྱོགས་རྣམས་སྤང་བ་དང་། མཐུན་ཕྱོགས་སྒྲུབ་པའི་སྒོ་ནས་སོ། །དང་པོ་ནི་། དགོངས་འདུས་ལས་། སློབ་དཔོན་དག་ལ་མ་བསྟེན་པར། །སངས་རྒྱས་ནམ་ཡང་མི་འབྱུང་སྟེ། །འབྱུང་བར་ཡང་དག་ངས་མ་མཐོང་། །བྱུང་ན་དམ་པའི་ལུང་དང་འགལ། །ཞེས་དང་། འཁོར་ལོ་བདེ་བའི་རྒྱུད་ལས། དེ་ཕྱིར་ཆོས་ཀུན་རྩ་བ་ནི། །བླ་མ་རྡོ་རྗེ་འཛིན་པར་བཤད། །བླ་མ་དག་ལས་མ་བྱུང་བའི། །དངོས་གྲུབ་རྙེད་པར་འགྱུར་མི་སྲིད། །བླ་མ་ཉིད་ལས་མ་བྱུང་བའི། །སངས་རྒྱས་ཞེས་བྱ་འབྱུང་མི་སྲིད། །སྲིད་པའི་ཁ་ལོ་གྱེན་དུ་ནི། །བླ་མ་མཚན་ཉིད་ལྡན་པས་སྒྱུར། །ཞེས་གསུངས་པ་བཞིན། བླ་ན་མེད་པའི་སངས་རྒྱས་སྒྲུབ་པའི་ཐབས་སམ། རྒྱུའི་གཙོ་བོ་ནི་བདག་རྐྱེན་དགེ་བའི་བཤེས་གཉེན་བླ་མ་དམ་པ་བསྟེན་པ་ཁོ་ན་ལ་རག་ལས་པའི་ཕྱིར། དེའི་ཚེ་བདུད་སྡིག་ཅན་བརྩོན་པས་བར་དུ་གཅོད་པར་བྱེད་དེ། ཅི་ནས་དཔོན་སློབ་དག་གི་བར་དུ་དབྱེན་བཅུག་པ་དང་། མཐུན་རྐྱེན་དཀོན་ཅིང་བར་ཆད་ཀྱི་འཚེ་བ་མང་པོས་ཡིད་དབྱུང་བ་དང་། བླ་མ་དང་ཆོས་ལ་ལོག་ལྟ་སོགས་བློ་གྲོས་ངན་པ་དག་འཆར་དུ་འཇུག་པས། དེའི་ཚེ་ཐར་པ་ལ་བར་དུ་གཅོད་པའི་བདུད་དུ་ཤེས་པར་བྱས་ནས་སྤོང་ཞིང་། སླར་ཡང་བླ་མ་ལ་གུས་པ་ཆེན་པོས་བསྟེན་པར་བྱ་སྟེ། སྡུད་པ་ལས། རིན་ཆེན་ཆོས་ཀྱང་དཀོན་ལ་རྟག་ཏུ་འཚེ་བའང་མང་། །ཞེས་དང་། ཡུམ་བར་མ་ལས། ནོར་བུ་རིན་པོ་ཆེ་ནི་བདུད་མང་བའི་ཕྱིར་བརྩོན་པ་དང་སྤྲོ་བ་ཆེན་པོས་གཅེས་སྤྲས་སུ་བྱ་བ་དེ་བཞིན་དུ། ཤེས་རབ་ཀྱི་ཕ་རོལ་དུ་ཕྱིན་པའི་རིན་པོ་ཆེ་ཡོངས་སུ་འཚོལ་བ་ན། བདུད་སྡིག་ཅན་བར་ཆད་བྱ་བ་ལ་བརྩོན་པར་འགྱུར་ཏེ། ཅི་ནས་ཀྱང་དེ་ཐོས་པར་མི་འགྱུར་བ་དེ་ལྟར་བརྩོན་ཞིང་། གང་དུ་དགེ་བའི་བཤེས་གཉེན་དང་བྲལ་བར་གྱུར་པའི་དེ་ལྟར་གནོད་པ་སྣ་ཚོགས་སུ་གྲུབ་པས་ཡིད་ཕྱིར་ཕྱོགས་པར་བྱེད་དོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོས་འདི་སྙམ་དུ། བདུད་སྡིག་ཏོ་ཅན་དག་གིས་དགེ་བའི་ཕྱོགས་ལ་བར་དུ་གཅོད་པ་སྟེ། ཅི་ནས་ཀྱང་དེའི་དབང་དུ་མི་འགྱུར་བ་དེ་ལྟར་བྱ་བ་ལ་གོར་མ་ཆག་གོ་སྙམ་ནས། གོ་ཆ་ཆེན་པོ་ཡོངས་སུ་བགོ་བར་བྱའོ། །ཞེས་གསུངས། དེའི་ཕྱིར་ཀུན་མཁྱེན་བླ་མས་སེམས་ཉིད་ངལ་གསོར། རྟག་ཏུ་བླ་མའི་ཡོན་ཏན་དྲན་བྱ་ཞིང་། །སྐྱོན་ལ་མི་རྟོག་མཐོང་ཡང་ཡོན་ཏན་བསམ། །རང་སྣང་ཡིན་ངེས་ཁོང་ལ་མི་མངའ་ཞེས། །སྙིང་ནས་བསམ་ཞིང་བཤགས་སྡོམ་གཉེན་པོ་བསྟེན། །བླ་མ་མི་མཉེས་ཆ་དང་བཅས་སྤང་ཞིང་། །ཇི་ལྟར་མཉེས་པའི་ཐབས་ལ་འབད་པར་བྱ། །བླ་མའི་བཀའ་སྩལ་ནམ་ཡང་མི་བཅག་ཅིང་། །བླ་མའི་འཁོར་སྡུག་ལའང་བླ་མ་བཞིན། །བླ་མའི་འཁོར་གཡོག་སློབ་མར་མི་བསྡུ་ཞིང་། །ཆོས་བཤད་དབང་བསྐུར་ལ་སོགས་ཞུས་ཏེ་བྱ། །བླ་མའི་སྤྱན་སྔར་ལུས་ངག་ཡིད་བསྡམ་ཞིང་། །རྐང་བ་བརྐྱང་དང་སྐྱིལ་ཀྲུང་རྒྱབ་མི་བསྟན། །ངོ་འཛུམ་མི་གནག་ཁྲོ་གཉེར་བསྟན་མི་བྱ། །བབ་ཅོལ་མི་སྨྲ་རྫུན་ཚིག་ཕྲ་མོ་དང་། །གཞན་གྱི་སྐྱོན་བརྗོད་ཡོན་ཏན་རྩུབ་མོའི་ཚིག །མ་བརྟགས་འབྲེལ་བ་མེད་རྣམས་སྨྲ་མི་བྱ། །བླ་མའི་རྫས་ལ་བརྣབ་སེམས་མི་བྱ་ཞིང་། །སྡེར་བཅས་གནོད་སེམས་ཆ་དང་བཅས་ཀུན་བསྡམས། །བླ་མའི་མཛད་སྤྱོད་སྣ་ཚོགས་ཆོ་འཕྲུལ་ལ། །ཁ་ཞེ་འཛོལ་བས་འཁྲུལ་བར་མི་བརྟག་ཅིང་། །འདི་ནི་མི་རིགས་ཁོང་རང་མཛད་མོད་སྙམ། །ཅུང་ཟད་འགལ་འདུ་ཉེས་སྐྱོན་ལོག་ལྟ་དོར། །གལ་ཏེ་བླ་མ་སྡང་བར་མངོན་ན་ཡང་། །རང་སྐྱོན་ཡོད་ངེས་བརྟགས་ལ་བཤགས་སྡོམ་བྱ། །སྤྱི་གཙུག་བསྒོམས་ལ་གསོལ་བ་དྲག་པོ་གདབ། །དེ་ཡིས་མཉེས་ཤིང་དངོས་གྲུབ་མྱུར་དུ་འཐོབ། །ཅེས་གསུངས་པས། ནམ་ཡང་བླ་མའི་སྐྱོན་ལ་མི་རྟོག་ཅིང་ཡོན་ཏན་འབའ་ཞིག་དྲན་པར་བྱ། གལ་ཏེ་ཅུང་ཟད་མ་དད་པའི་སྐྱོན་མཐོང་ན་ཡང་། མཁྲིས་ནད་ཅན་གྱིས་དུང་ལ་སེར་པོར་མཐོང་བ་བཞིན་རང་སྣང་ངན་པས་སྣང་བ་ཡིན། ཁོང་ལ་འདི་འདྲ་མེད་ངེས་སྙམ་དུ་དག་སྣང་སྦྱང་ཞིང་བཤགས་སྡོམ་བྱ། ཐ་ན་རྨི་ལམ་དུ་བྱུང་ནའང་སད་མ་ཐག་བཤགས་དགོས་ཏེ། འཁོར་ལོ་ཆུབ་པ་རོལ་པ་ལས། གལ་ཏེ་རྨི་ལམ་ནང་དག་ཏུ། །བླ་མའི་སྐྱོན་དག་མཐོང་གྱུར་ན། །སད་མ་ཐག་ཏུ་བཤགས་པ་བྱ། །གལ་ཏེ་བཤགས་པ་མ་བྱས་ན། །འདི་ཡང་མནར་མེད་རྒྱུར་འཕེལ་འགྱུར། །ཞེས་སོ། །དུས་རྟག་ཏུ་བླ་མ་མི་མཉེས་པར་འགྱུར་བའི་ཆ་གང་ཡོད་ཤེས་པ་རང་གིས་བརྟག་མ་ཤེས་པ་གཞན་ལ་དྲིས་ཏེ་སྤངས་པ་དང་། ཇི་ལྟར་མཉེས་པར་འགྱུར་བའི་ཐབས་འབའ་ཞིག་ལ་བསླབ། གསུང་གི་ཟུར་ཙམ་ཡང་མི་བཅག བླ་མའི་སྐུ་འཁོར་སོགས་ཐུགས་ལ་གང་གཅེས་པ་དེ་ཡང་བླ་མ་བཞིན་དུ་བཀུར་དགོས། དེ་མ་བཀུར་ན་དེ་དག་གི་རྐྱེན་གྱིས་བླ་མའི་ཐུགས་དང་ཡང་འགལ་བར་འགྱུར་བའི་ཕྱིར། གཞན་ཡང་བླ་མའི་འཁོར་རྣམས་རང་ཉིད་ཀྱི་ཆེ་བ་བསྐྱེད་པའི་ཕྱིར་འཁོར་དུ་མི་བསྡུ་ཞིང་། བླ་མའི་ཉེ་འཁོར་དུ་དབང་དང་ཆོས་བཤད་རབ་གནས་སོགས་ཆོས་སྤྱོད་ཀྱི་བྱ་བ་གང་བྱེད་ཀྱང་ཐོག་མར་བླ་མ་ལ་བཀའ་འདྲི་ཞུས་ནས་བཀའ་ཡི་གནང་བ་ཐོབ་པར་བྱེད་པ་ལས་རང་གར་འཇུག་པར་མི་བྱ་སྟེ། སྔ་མ་ལས། གལ་ཏེ་སྐྱོན་དང་བཅས་ན་ཡང་། །ཇི་སྐད་གསུངས་པ་ལྟར་བྱ་ན། །ཡང་དག་དོན་དུ་འགྱུར་བ་ལ། །བསྒྲུབ་པར་བྱ་བ་སྨོས་ཅི་དགོས། །ཉེ་འཁོར་སྡུག་པའང་བླ་མ་བཞིན། །འཁོར་རྣམས་སློབ་མར་མི་བསྡུ་ལ། །ཆོས་དང་དབང་བསྐུར་རབ་གནས་དང་། །སྦྱིན་སྲེག་ལ་སོགས་ཞུས་ཏེ་བྱ། །ཞེས་སོ། །གཞན་ཡང་བླ་མའི་སྤྱན་སྔར་ལུས་ཀྱི་མ་གུས་པའི་སྤྱོད་པ་སྒེག་ཆོས་ཀྱིས་རྐང་པ་བརྐྱང་པ་དང་རྒྱབ་སྟོན་ནས་འདུག་པ་སོགས་དང་། བླ་མའི་གཟིམས་སྤྱིལ་སོགས་སུ་མཆིལ་སྣབ་དང་ངན་སྐྱུགས་སོགས་འདོར་བ། སྐུ་ཡི་གྲིབ་མ་དང་ཞབས་རྗེས་འགོམ་པ། སྐུ་ཡི་ཚད་འཇལ་བ། ན་བཟའ་དང་བཞུགས་སྟན་སོགས་འགོམ་པ་དང་། བླ་མས་མ་གནང་བར་སྐུའི་ཉེར་སྤྱད་ལ་ལོངས་སྤྱོད་པ་སོགས་མདོར་ན་མ་གུས་་པའི་སྤྱོད་ལམ་ཐམས་ཅད་སྤང་དགོས་ཏེ། རིམ་གསུམ་ལས། བླ་མའི་སྤྱན་སྔར་ལུས་ཀྱི་ལས། །སྐྱིལ་ཀྲུང་འདུག་དང་རྒྱབ་མི་བསྟན། །ཁྲོ་གཉེར་ངོ་འཛུམ་གནག་པའང་མིན། །མདོར་ན་ལུས་ཀྱི་བག་ཡོད་བྱ། །ཞེས་དང་། དགོངས་འདུས་ལས། བླ་མ་མཆོག་ཏུ་བཀུར་བྱ་སྟེ། །དམ་པར་གྱུར་པ་མ་ཡིན་ཡང་། །དམ་པ་མཆོག་བཞིན་ཕུད་དུད་བྱ། །གལ་ཏེ་བརྙེས་ཤིང་ཁྱད་གསོད་ན། །ཐུར་དུ་བལྟས་ནས་དམྱལ་བར་འཚེད། །ཅེས་དང་། རྣལ་འབྱོར་མ་དམ་པའི་རྒྱུད་ལས། དབུ་སྔས་ལ་སོགས་འགོམ་པ་ན། །ཤལ་མ་རི་ལ་འཛེག་པར་འགྱུར། །བླ་མའི་སྐུ་ལ་མཐོས་གཞལ་ན། །མི་དེ་མདུང་ཐུང་སུམ་བརྒྱས་འབིགས། །ཞེས་དང་། མཁའ་འགྲོ་མ་གསང་བའི་རྒྱུད་ལས། བླ་མའི་མཇུག་ནས་མི་འོང་ཞིང་། །ཞབས་ཀྱི་རྗེས་ལ་མནན་མི་བྱ། །བླ་མའི་མདུན་ལ་འགྲོ་མི་བྱ། །གཞན་གྱིས་ཁྲེལ་བརྡས་རྒྱབ་ཕྱོགས་པས། །སྒྲོ་སྐུར་སྡིག་པའི་ལས་སུ་འགྲོ། །བླ་མའི་གཡས་ཕྱོགས་བཞུགས་མི་བྱ། །ཕལ་པ་འགྲོ་ལ་དགའ་བ་ཡིས། །བླ་མའི་རྟིང་ཕྱོགས་གཡོན་ནས་འགྲོ། །ཞེས་དང་། གཙུག་ཏོར་འཁོར་ལོས་སྒྱུར་བ་ལས། བདེན་པའི་དོན་སྟོན་བླ་མ་ཡི། །དབུ་ཡི་གྲིབ་མ་སོགས་འགོམ་པས། །ཡང་དག་སྤངས་ནས་དམྱལ་བར་ལྟུང་། །ཞེས་སོ། །ངག་གི་སྤྱོད་ལམ་བག་མེད་པ། །ཀུ་རེ་བཞད་གད་དང་། ལོང་གཏམ་འབྲེལ་མེད་དང་། ཟེ་རེ་ཟློས་སེ་དང་། རྫུན་ཚིག་ཕྲ་མ་དང་། གཞན་ལ་སྨོད་པ་སོགས་མི་བྱ་སྟེ། དུས་གཞན་དུ་བརྒྱ་སྟོང་བརྗོད་པ་བས། བླ་མའི་དྲུང་དུ་ལན་གཅིག་སྡིག་པ་ལྕི། དེ་དག་བདེན་པ་ཡིན་ཀྱང་སྨྲ་བ་པོ་རང་ལ་མི་དགེ་བ་ཆེན་པོ་ཐོབ་སྟེ། ཅིའི་ཕྱིར་ན་བླ་མའི་ཐུགས་ཀྱིས་ཁྲེལ་བ་དང་། འཁྲུགས་པར་འགྱུར་བའི་ཕྱིར་ཏེ། བླ་མའི་ཐུགས་སྐད་ཅིག་འཁྲུགས་ཀྱང་ཉེས་པ་ཆེན་པོ་བསྐྱེད་དེ། བག་མེད་ཚིག་དང་འབྲེལ་གྱུར་པ། །བླ་མའི་མདུན་དུ་བརྗོད་མི་བྱ། །ཐ་མལ་པ་ཞིག་ཁྲོས་ན་ཡང་། །ཉི་ཚེ་བ་ཡི་དམྱལ་བར་ལྟུང་། །བླ་མའི་ཐུགས་དང་འགལ་བ་གང་། །མནར་མེད་མུན་པ་མུན་ནག་ཏུ། །བསྐལ་པ་བྱེ་བ་བརྒྱ་སྟོང་འཚེད། །ཅེས་སོ། །དེའི་ཕྱིར་འཕགས་པ་ཡོན་ཏན་བཀོད་པའི་མདོ་ལས། བདུད་ཀྱི་ལས་བཞི་སྟེ། བླ་མ་ལ་མི་གུས་པ་དང་། ཆོས་ཡིད་ལ་མི་བྱེད་པ་དང་། ཁེངས་པའི་ཚིག་སྨྲ་བ་དང་། ཚེ་འདི་ལ་སེམས་པའོ། །ཞེས་དང་། མཁའ་འགྲོ་གསང་བའི་རྒྱུད་ལས། བླ་མ་སངས་རྒྱས་རང་བཞིན་ལ། །ལྐོག་ནས་འཆལ་གཏམ་ཆེར་སྨྲ་བ། །བསྡུས་འཇོམས་སུ་འཇོམས་མགུལ་པ་འགག །ཞེས་དང་། རྒྱབ་ཀྱི་བླུན་རྨོངས་ཞེས་སྨྲ་བ། །བྱང་ཆུབ་ལམ་དང་འཕྲད་མི་སྲིད། །ཅེས་དང་རྒྱན་དམ་པ་ལས། ངག་ཚིག་བརླང་པོ་ཞེ་འགེངས་པ། །བསྐལ་པ་སྟོང་ཕྲག་དམྱལ་བར་ལྟུང་། །རྡོ་རྗེ་སློབ་དཔོན་དམ་པ་ཡི། །ཟབ་པོའི་ཚིག་ལ་སྒྲོ་སྐུར་བ། །མནར་མེད་གནས་སུ་ལྟུང་བར་འགྱུར། །ཞེས་དང་། གསང་བ་ཀུན་སྙོམས་ཀྱི་རྒྱུད་ལས། བླ་མ་མཆོག་ལས་རང་ཉིད་ནི། །ཆོས་མཆོག་རློམ་སེམས་སྨྲ་བ་ནི། །བསྐལ་པ་སྟོང་ཕྲག་དུ་མ་རུ། །ཐུར་དུ་བལྟས་ནས་དམྱལ་བར་འགྲོ། །ཞེས་དང་། གསང་བ་རོལ་བ་ལས། ལྐོག་འཕྱས་སྨྲ་བར་གང་བྱེད་པ། །རྡོ་རྗེ་དམྱལ་བ་ཉིད་དུ་འཚེད། །ཀུ་རེ་ཙམ་དུའང་སྨོད་མི་བྱ། །ངག་གི་ཉེས་བྱས་ཡང་དག་བསྡམས། །ཞེས་སོ། །ཡིད་ཀྱི་སྤྱོད་པ་མ་བསྡམས་པ། བླ་མའི་རྫས་ལ་བརྣབ་སེམས་དང་། ཉེ་འཁོར་དང་སློབ་མ་སོགས་ལ་གནོད་སེམས་དང་། སྐུ་གསུང་ཐུགས་ཀྱི་མཛད་པ་ལ་སྐྱོན་དང་བཅས་པའོ་སྙམ་དུ་མ་དད་ལོག་ལྟ་སོགས་སྐད་ཅིག་ཙམ་ཡང་དྲན་མི་རུང་སྟེ། ཡེ་ཤེས་གྲུབ་པའི་རྩ་རྒྱུད་ལས། བླ་མའི་རྫས་དང་འཁོར་རྣམས་དང་། །ཉེ་འཁོར་སུན་འབྱིན་བརྣབ་སེམས་སྤངས། །མཛད་པ་སྣ་ཚོགས་སེམས་ཅན་ལ། །ཕན་པའི་ཐབས་ཆེན་འཕྲུལ་ཆེན་པོ། །དགོངས་སྤྱོད་རྒྱ་མཚོ་མཐའ་ཡས་ལ། །ཉེས་པས་ལོག་པར་ལྟ་བ་དོར། །ཞེས་དང་། ད་ལྟར་གྱི་སངས་རྒྱས་མངོན་སུམ་པའི་ཏིང་ངེ་འཛིན་ལས། གལ་ཏེ་དེས་ཆོས་སྨྲ་བ་དེ་ལ་མནར་སེམས་པའམ། ཐ་བའམ། སྡང་བའི་སེམས་ཀྱིས་གནས་སམ། སྟོན་པ་སངས་རྒྱས་ཀྱི་འདུ་ཤེས་མི་བསྐྱེད་ན། དེ་དག་གི་ཡོན་ཏན་ཐོབ་པའི་གནས་མེད་དོ། །མ་ཐོབ་པའི་ཆོས་ཐོབ་པའམ། ཐོབ་པ་ཆུད་མི་ཟ་བ་ནི་གནས་མེད་དོ། །མ་གུས་པས་ཆོས་ནུབ་པར་འགྱུར་རོ། །ཞེས་དང་སྙོམས་འཇུག་གསང་བའི་རྒྱུད་ལས། བླ་མ་དག་ལ་འགྲན་སེམས་དང་། །ཡི་དམ་རྒྱལ་བའི་ལྷ་སྤངས་པས། །བོང་འཐེང་ཞོན་ནས་མཚོ་བསྐོར་ལྟར། །རྒྱལ་བའི་སངས་རྒྱས་འགྲུབ་མི་སྲིད། །བླ་མའི་དཀོར་ལ་བརྣབ་སེམས་པ། །བསྐལ་པ་གཉིས་སུ་ཡི་དྭགས་གནས། །ཞེས་དང་། དཔུང་རྣམ་པར་ཟློག་པའི་རྒྱུད་ལས། བླ་མ་དང་ནི་དེ་ཡི་འཁོར། །ཁྲོ་བས་ཞེ་འགྲས་སུན་འབྱིན་པ། །བསྐལ་པ་ཞིང་གི་རྡུལ་སྙེད་དུ། །མནར་མེད་གནས་སུ་འཚེད་པའོ། །ཞེས་དང་། བྱང་ཆུབ་བདེ་བའི་དཔུང་བསྐྱེད་ནས། །རྡོ་རྗེའི་བླ་མ་སྨད་མི་རུང་། །འདོད་ཆགས་ཞེ་སྡང་ལ་སོགས་པ། །ལྔ་པོ་ལྡན་ཞེས་བསམ་མི་བྱ། །དེ་བསམ་མནར་མེད་ས་གཞིར་བསྲེགས། །ཞེས་དང་། གཞུང་རྒྱ་མཚོ་ལས། རྡོ་རྗེ་ཡིད་བཞིན་རྒྱལ་པོ་ལ། །ཟས་སྐོམ་ནོར་ལ་སྲེད་སྙོམ་པས། །རབ་མཐའ་བཅུ་ཡི་ད མྱལ་བར་འཚེད། །གསང་མཆོག་སྨྲ་བྱེད་རྒྱལ་པོ་ལ། །ཤེས་པ་ཅན་གྱི་ཡིད་སྒོ་ནས། །ང་རྒྱལ་ཆེ་བའི་ཡིད་མི་བསམ། །དེ་སྐྱོན་ཁ་འཐབ་གནས་སུ་ལྟུང་། །ཞེས་དང་། དུ་མ་འདུས་པའི་མདོ་ལས། བདག་གི་དྲིན་ལ་གནས་བསམ་པས། །མནར་མེད་པར་ཡང་རབ་ཏུ་སྐྱེ། །སློབ་དཔོན་སྐྱོན་ལ་གང་སེམས་པ། །དགེ་བསགས་དོན་མེད་ལྷ་སྤངས་པས། །ལྷ་ཀླུ་གདུག་པ་ལ་སོགས་ཀྱིས། །མྱུར་དུ་སྲོག་གཅོད་དམྱལ་བར་ལྟུང་། །ཞེས་དང་། སྙིང་པོ་རྣམ་པར་ལེན་པའི་རྒྱུད་ལས། མཆོག་ཏུ་སྔགས་ལ་ཞུགས་པ་ལ། །གནོད་པ་བྱེད་པའི་སེམས་འཆང་ན། །གྲང་བའི་དམྱལ་བར་ངེས་པར་ལྟུང་། །ཞེས་སོ། །དེས་ན་དུས་ནམ་ཡང་བླ་མའི་སྐྱོན་ལ་མི་བསམ་ཞིང་། གལ་ཏེ་འགས་དབྱེན་བཅོས་ཏེ་བླ་མས་སྡང་བར་མངོན་ན་ཡང་། མ་ཉེས་པའི་བཤགས་པ་བྱ་ཞིང་། སྡིག་པ་ཟད་པའི་རྒྱུར་བསམ་སྟེ་ཡོན་ཏན་ལ་བསམ་སྟེ་བསྟེན་པར་བྱའོ། །དེ་ལྟར་མི་བྱེད་པ་བླ་མའི་ཐུགས་དང་འགལ་བར་གྱུར་ན་ཉེས་པ་བསམ་གྱིས་མི་ཁྱབ་སྟེ། ལག་ན་རྡོ་རྗེ་དབང་བསྐུར་བའི་རྒྱུད་ལས། བཅོམ་ལྡན་འདས་གང་དག་སློབ་དཔོན་ལ་བརྙས་པར་བགྱིད་པ་དེ་དག་གི་རྣམ་པར་སྨིན་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ལྷ་དང་བཅས་པའི་འཇིག་རྟེན་སྐྲག་པར་འགྱུར་གྱིས་དེ་སྐད་མ་སྨྲ་ཞིག གསང་བའི་བདག་པོ། འོན་ཀྱང་ཅུང་ཟད་ཅིག་བརྗོད་པར་བྱ་ཡི། དཔའ་བོ་བསྒྲིམས་ཏེ་དེ་ཉོན་ཅིག །མཚམས་མེད་ལ་སོགས་མི་བཟད་པ། །དམྱལ་བ་གང་དག་ངས་བཤད་པ། །དེ་རྣམས་ཀྱི་ནི་གནས་སུ་བརྗོད། །དེ་ནའང་བསྐལ་པ་མཐའ་ཡས་སོ། །དེ་ལྟ་བས་ན་རྣམ་ཀུན་ཏུ། །དེ་ལ་ནམ་ཡང་བརྙས་མི་བྱ། །ཞེས་དང་། འཇམ་དཔལ་ཞལ་ལུང་ལས། མ་འོངས་རྡོ་རྗེ་འཆང་བ་སྟེ། །དེ་ལ་བརྙས་བྱེད་སེམས་ཅན་གང་། །དེ་ཡིས་ང་ལ་བརྙས་བྱེད་པས། །ངས་ནི་དེ་ཀུན་དུས་སུ་སྤོང་། །ཞེས་དང་། ཕུར་བའི་རྒྱུད་ལས། སློབ་དཔོན་ལས་ནི་དངོས་གྲུབ་ཐོབ། །གལ་ཏེ་དེ་ལ་བརྙས་བྱེད་ན། །དམྱལ་བའི་སྡུག་བསྔལ་རབ་ཏུ་འཐོབ། །གལ་ཏེ་དེ་ལས་ཐར་ན་ཡང་། །བསྐལ་པ་བྱེ་བ་བརྒྱ་སྟོང་དུ། །དམ་ཆོས་མིང་ཡང་མི་ཐོས་སོ། །ཞེས་དང་། སྒྱུ་ཕྲུལ་དྲྭ་བའི་རྒྱུད་ལས། བླ་མ་ལ་ནི་སྨོད་པ་དང་། །ཐུགས་དཀྲུག་པ་ཡི་ཉེས་པ་ནི། །ཕྱི་ཡི་རྒྱ་མཚོ་ཆེན་པོ་ལས། །ཆུ་དེ་ཉ་ཡིས་གཏོར་ནུས་པ། །དེ་ཡི་ཚད་དུ་སྡུག་བསྔལ་མྱོང་། །ཞེས་དང་། རྡོ་རྗེ་མཁའ་འགྲོའི་རྒྱུད་ལས། སློབ་དཔོན་ཉིད་ལ་གང་སྨོད་པ། །ཚེ་འདི་ཉིད་ལ་སྡུག་བསྔལ་འབྱུང་། །རིམ་དང་དུག་དང་དབྱིག་དུག་དང་། །ཌཱ་ཀི་རྣམས་ཀྱིས་གཙེས་པ་དང་། །གདོན་དང་ལོག་འདྲེན་གཏུམ་པོ་ཡིས། །བསད་ནས་སེམས་ཅན་དམྱལ་བར་ལྟུང་། །ཞེས་དང་། བླ་མ་ལྔ་བཅུ་པ་ལས། སློབ་དཔོན་ལ་ནི་སྨོད་པ་དེ། །ཡམས་དང་མཛེ་དང་ནད་རྣམས་དང་། །གདོན་དང་རིམ་དང་དུག་རྣམས་ཀྱིས། །རྨོངས་ཆེན་དེ་ནི་འཆི་བར་འགྱུར། །རྒྱལ་པོ་མེ་དང་སྦྲུལ་གདུག་དང་། །ཆུ་དང་མཁའ་འགྲོ་རྐུན་པོ་དང་། །གདོན་དང་ལོག་འདྲེན་རྣམས་ཀྱིས་ཀྱང་། །བསད་ནས་སེམས་ཅན་དམྱལ་བར་འགྲོ། །ནམ་ཡང་སློབ་དཔོན་དག་གི་ནི། །ཀུན་ཏུ་སེམས་དཀྲུགས་མི་བྱ་སྟེ། །གལ་ཏེ་རྨོངས་པས་བྱས་གྱུར་ན། །དམྱལ་བར་ངེས་པར་འཚེད་པར་འགྱུར། །མནར་མེད་ལ་སོགས་འཇིགས་རུང་བའི། །དམྱལ་གནས་བསྟན་པ་གང་ཡིན་པ། །སློབ་དཔོན་ལ་ནི་སྨོད་པ་རྣམས། །དེར་ནི་གནས་པར་ཡང་དག་བཤད། །ཅེས་སོ། །དེ་ཡང་སྔགས་ཀྱི་རྡོ་རྗེ་སློབ་དཔོན་རྩ་ལྟུང་གི་རྟེན་ཡིན་པས་ཆེས་ལྕི་མོད། དེ་ལས་གཞན་དུ་ཀློག་སྦྱོར་སློབ་པ་ཡན་ཆོད་ཀུན་ལ་བླ་མར་བཟུང་ཞིང་བསྲུང་དགོས་ལ། དེ་ལྟར་མ་བསྲུངས་ན་ཉེས་པ་ཤིན་ཏུ་ལྕི་སྟེ། རྒྱུད་ལས། ཚིགས་བཅད་གཅིག་ཙམ་མཉན་པ་ལ། །གང་གིས་བླ་མར་མི་འཛིན་པ། །ཁྱི་ཡི་སྐྱེ་བ་བརྒྱར་སྐྱེས་ནས། །སྨེ་ཤ་ཅན་དུ་སྐྱེ་བར་འགྱུར། །ཞེས་གསུངས། སྨེ་ཤ་ཅན་ནི་དུར་ཁྲོད་དུ་གནས་པའི་རིགས་ངན་གྱི་ཤ་ཟར་བཞེད་ལ་གཞུང་ཁ་གཅིག་ལས་རང་ཤ་རང་གིས་ཟ་བའི་སེམས་ཅན་ལའང་བཤད་དོ། །དེས་ན་ངེས་དོན་ཤིང་རྟ་ཆེན་མོ་ལས། དེ་ཡང་སྤྱིར་གང་དང་འཁོན་ཡང་། ཕྱེད་རང་ལ་ངེས་པར་བརྟེན་ཏེ་མེད་ན་མི་འབྱུང་བ་འཛམ་བུ་གླིང་པ་དང་། སྒྲ་མི་སྙན་པའི་མི་གཉིས་ཀྱི་ཁྲོ་བ་བཞིན་ཡིན་པས་རྔ་དང་དབྱུ་གུ་ལྟར་གཅིག་ལ་གཅིག་མཐོང་ཐོས་ལ་སོགས་པའི་རྐྱེན་བྱས་པས་ན། འཁོན་པ་དེ་བདག་ལ་མི་རུང་སྟེ། གཞན་གྱི་སྡིག་པའི་མིག་རྐྱེན་དུ་འགྱུར་བ་དང་། རང་གི་ཁོང་ཁྲོ་དང་ཞེ་སྡང་གཏན་དུ་ལྡང་བས་དམྱལ་བའི་ས་བོན་བྱེད་པའི་ཕྱིར་རོ། །དེས་ན་གང་འཁོན་པ་དེ་སྤྱི་བོར་བསྒོམས་ལ་བཤགས་པས་ཞག་འགའ་ན་འཁོན་དང་སྒྲིབ་པ་བྱང་ངེས་སོ། །ཁྱད་པར་དུ་བླ་མ་ལ་མི་རུང་བས་སྤྱི་བོར་བསྒོམས་ཏེ་ཕྱག་དང་མཆོད་པ་བྱས་ལ། རབ་ཏུ་འགྱོད་པས་མཆི་མ་འབྱིན་ཞིང་ཐལ་མོ་སྦྱར་ཏེ། ཀྱེ་ཀྱེ་བླ་མ་རིན་པོ་ཆེ། །བདག་ལ་རེ་ས་གཞན་ན་མེད། །ཐུགས་རྗེའི་སྤྱན་གྱིས་གཟིགས་སུ་གསོལ། །མ་རིག་འཁྲུལ་པས་བདག་ནོན་ཏེ། །སྒོ་གསུམ་ཉེས་པ་ཅི་མཆིས་པ། །རབ་ཏུ་འགྱོད་པས་བཤགས་པར་བགྱི། །སྡོམ་པ་གསུམ་དང་འགལ་གྱུར་ཅིང་། །ཉེས་པའི་དྲི་མས་སེམས་གོས་པ། །དེ་ཀུན་ཁྱོད་ཀྱི་ཐུགས་རྗེ་ཡིས། །སྐད་ཅིག་ཉིད་ལ་བྱང་བར་མཛོད། །བདག་ནི་མི་ཤེས་རྨོངས་པ་ཡིས། །མ་འཚལ་བཞིན་དུ་སྡིག་བགྱིས་པས། །སྔར་ཡང་འཁོར་བར་རབ་ཏུ་འཁྱམས། །ད་ནི་བླ་མ་ཐུགས་རྗེ་ཅན། །ཁྱོད་ཀྱིས་བདག་གི་སྒྲིབ་པ་ཀུན། །སྐད་ཅིག་ཉིད་ལ་བསལ་བར་མཛོད། །འདི་ལྟར་མི་ཤེས་བྱིས་པ་ལ། །སྐྱོན་གྱུར་མཐོང་ཚེ་ལྷག་པར་ཡང། །ཐུགས་རྗེའི་གཟིགས་པ་མི་འཇུག་ན། །དེ་ལས་གཞན་ལ་ཅིར་འགྱུར་དགོངས། །བུ་ཡི་ཉེས་པ་གང་ལགས་པ། །མ་ཡིས་སེལ་ཞིང་སྐྱོང་བ་ལྟར། །བདག་ཅག་འགྲོ་དྲུག་སེམས་ཅན་ལ། །ཁྱོད་ཀྱིས་དང་པོར་ཐུགས་བསྐྱེད་ནས། །ཕན་པ་མཛད་ཅེས་དམ་བཅས་ན། །དུས་འདིར་བདག་ལ་ཅིས་མི་དགོངས། །བདག་ཅག་འཁྲུལ་པའི་སེམས་ཅན་རྣམས། །གཟིགས་ནས་ཐུགས་རྗེས་མི་འཛིན་ན། །ཁྱོད་ཀྱི་ཕྲིན་ལས་གདུལ་བྱ་ལ། །ཕན་པ་དེ་ཡང་ཇི་ལྟ ར་དགོངས། །སྔོན་གྱི་རྒྱལ་བ་གྲངས་མེད་ཀྱང་། །བདག་ཅག་སྤངས་ནས་ཐར་པར་གཤེགས། །ད་ནི་ཕྱོགས་བཅུའི་རྒྱལ་བ་ཡིས། །ཁྱོད་ལ་བསྐུལ་ནས་བདག་ཅག་གི། །དོན་དུ་བླ་མར་རྣམ་འཕྲུལ་ན། །ཁྱོད་ཀྱིས་བདག་ཅག་འདོར་ཕོད་དམ། །འཇིགས་སར་སྐྱེལ་མས་བསླུས་པ་བཞིན། །ཁྱོད་ཀྱིས་དེ་རིང་བསླུ་མཛད་དམ། །ཡིད་བཞིན་ནོར་བུ་རིན་ཆེན་ཡང་། །གསོལ་བ་བཏབ་ན་འདོད་དགུ་འབྱིན། །ཁྱོད་ནི་བརྩེ་ཆེན་ཐབས་ལ་མཁས། །དེ་སླད་བདག་ལ་ཅིས་མི་གཟིགས། །ཤ་ཟ་རྣམས་ཀྱང་མཆོད་སྦྱིན་དང་། །བདེན་པའི་ཚིག་ནི་བརྗོད་མ་ཐག །སྔོན་གྱི་ཁྲོ་བའང་འདོར་བགྱིད་ན། །ཁྱོད་ནི་ཐུགས་རྗེ་འགྲོ་བའི་ཡབ། །གུས་མཆོད་གདུང་བས་སེམས་གདུངས་ཤིང་། །ཉེས་པ་བཤགས་ན་ཅིས་མི་གཟིགས། །བདག་གི་སྡིག་ཀུན་མ་བྱང་བར། །སྐྱེ་བ་གཞན་དུ་སོང་གྱུར་ན། །དམྱལ་མེས་བསྲེག་པ་ཁོ་ནར་ཟད། །དེ་ལ་ཁྱོད་ཀྱིས་མི་གཟིགས་ན། །ཐུགས་རྗེའི་བདག་ཉིད་ཇི་ལྟར་ལགས། །ཀྱེ་མ་ཀྱེ་ཧུད་བདག་གི་སྡིག །མ་ལུས་བྱང་བར་མཛད་དུ་གསོལ། །སྐད་ཅིག་འདི་ལ་ཐུགས་རྗེས་དགོངས། །བདག་ལ་དབང་བསྐུར་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། །བགེག་དང་ལོག་འདྲེན་བར་ཆད་སོལ། །ཚེ་འདིར་བསམ་པ་ཀུན་འགྲུབ་ཅིང་། །འཆི་ཀར་གནད་གཅོད་སྡུག་བསྔལ་མེད། །བར་དོའི་འཇིགས་པ་ཀུན་ལས་སྒྲོལ། །འོག་མིན་གནས་སུ་འཁྲིད་པར་མཛོད། །ཅེས་ཉིན་མ ཚན་ཐུན་བཞིར་གསོལ་བ་ལན་བདུན་གདབ་བོ། །དེས་ནི་ཉམས་ཆག་{ཆགས་འདིའི་རིགས་འདི་ལྟར་ཞུས། }ཐམས་ཅད་དག་ནས་མཆོག་དང་ཐུན་མོང་གི་དངོས་གྲུབ་མྱུར་དུ་འཐོབ་བོ། །ཉམས་ཆག་སྐོང་བ་ལ་འདི་ལས་ཟབ་པ་གཞན་མེད་དོ། །ཞེས་གསུངས་ལྟར་བརྩོན་པས་ཉམས་སུ་བླང་བར་བྱའོ། །གཉིས་པ་ནི། སྡོང་པོ་བཀོད་པའི་མདོ་ལས། ཁུར་ཐམས་ཅད་ཁུར་བ་ལ་མི་སྐྱོ་བ་ས་ལྟ་བུའི་སེམས་དང་། དབྱེན་གྱིས་མི་ཕྱེད་པ་རྡོ་རྗེ་ལྟ་བུའི་སེམས་དང་། སྡུག་བསྔལ་གྱིས་མི་བསྐྱོད་པ་འཁོར་ཡུག་ལྟ་བུའི་སེམས་དང་། ཅི་བསྒོ་བའི་ལས་ཐམས་ཅད་བྱེད་པ་བྲན་ལྟ་བུའི་སེམས་དང་། ཆེ་བའི་ང་རྒྱལ་རྣམ་པར་སྤངས་པ་ཕྱག་དར་པ་ལྟ་བུའི་སེམས་དང་། ཁུར་ལྕི་བ་ཁུར་བས་ཐེག་པ་གླང་པོ་ཆེ་ལྟ་བུའི་སེམས་དང་། བདག་པོ་ལ་མི་ཁྲོ་བ་ཁྱི་ལྟ་བུའི་སེམས་དང་། འགྲོ་འོང་གིས་མི་སྐྱོ་བ་གྲུ་ལྟ་བུའི་སེམས་དང་། ཉོན་མོངས་པས་མི་སྐྱོ་བ་མ་ལྟ་བུའི་སེམས་དང་། མི་བསྲུན་པ་སྤངས་པ་རྟ་ཅང་ཤེས་ལྟ་བུའི་སེམས་དང་། རྐྱེན་གྱིས་མི་གཡོ་བ་རི་བོ་ལྟ་བའི་སེམས་དང་། ཆེ་གྲགས་མེད་པ་གདོལ་པ་ལྟ་བུའི་སེམས་དང་། དྲེགས་པ་མེད་པ་ཁྱུ་མཆོག་རྭ་བཅད་པ་ལྟ་བུའི་སེམས་དང་། དགེ་བའི་བཤེས་གཉེན་གྱི་ངོར་བལྟ་བས་བུ་འཛངས་པ་ལྟ་བུ་སོགས་ཀྱི་སེམས་ཀྱིས་དགེ་བའི་བཤེས་གཉེན་ལ་བཀུར་བར་བྱའོ། །ཞེས་གསུངས་པའི་ཚུལ་གྱིས་བཀའ་ལས་མི་འདའ་བར་སྲི་ཞུ་བསྒྲུབ་པར་བྱ་སྟེ། དེའི་ཚུལ་ཡང་། ངལ་གསོ་ལས། བླ་མ་མ ཐོང་ཚེ་ལྡང་དང་ཕྱག་འཚལ་ཞིང་། །བཞུགས་ཚེ་སྟན་སོགས་མཁོ་བའི་ཡོ་བྱད་དབུལ། །སྙན་པར་སྨྲ་བས་བསྟོད་ཅིང་ཐལ་མོ་སྦྱོར། །བཞུད་ཚེ་ལྡང་དང་ཞབས་འབྲིང་བསྙེན་བཀུར་བྱ། །རྟག་ཏུ་དྲན་དང་ཤེས་བཞིན་བག་ཡོད་ཅིང་། །གུས་དང་འཇིགས་བཅས་ཞུམ་པས་གནས་པར་བྱ། །ཇི་ལྟར་བག་མ་གསར་པའི་ཚུལ་བཞིན་དུ། །སྒོ་གསུམ་ཞི་བས་བླ་མའི་དྲུང་འདུག་གི། །འཕྱར་ཞིང་གཡེང་ལ་རྒོད་བག་བྱ་བ་མིན། །ཕྱོགས་རིས་མ་ཡིན་ཁེ་དང་གྲགས་པས་མིན། །གཡོ་སྒྱུས་མ་ཡིན་དེ་བཞིན་ཚུལ་འཆོས་མིན། །ངོས་ལྐོག་མ་ཡིན་ཉེ་རིང་ཆགས་སྡང་མིན། །རང་ལ་འབྱོར་པ་ཡོད་ན་བླ་མ་མཆོད། །ལུས་ངག་ཞབས་ཏོག་བསྙེན་བཀུར་སྲི་ཞུ་དང་། །ཚེ་འདི་བློས་བཏང་སྒྲུབ་པས་མཉེས་པར་བྱ། །གཞན་གྱིས་མི་སྙན་བརྗོད་ནའང་དེ་ཟློག་ཅིང་། ནུས་པ་མེད་ན་སླར་ཡང་ཡོན་ཏན་བསམ། །རྣ་བ་དགབ་ཅིང་སྙིང་རྗེས་ཕན་པ་སྒྲུབ། །དེ་ལ་མི་བརྟེན་བག་ཕེབས་སྨྲ་བ་མིན། །དེས་ནི་ཚེ་རབས་ཀུན་ཏུ་ཕན་པ་འགྲུབ། །དམ་པ་རྣམས་དང་འཕྲད་ཅིང་ཆོས་རབ་ཐོས། །ས་དང་ལམ་དང་གཟུངས་དང་ཏིང་ངེ་འཛིན། །སྣ་ཚོགས་ཡོན་ཏན་འབྱོར་པས་ཡོངས་གང་ཞིང་། །འགྲོ་ལ་ཞི་བདེའི་དགའ་སྟོན་འགྱེད་པ་ཡིན། །ཞེས་གསུངས་པས། གཡོ་ཟོལ་མེད་པའི་མོས་གུས་ཀྱིས། བླ་མ་ལ་མཐོང་ཕྱག་འཚལ་བ་དང་། བཞུགས་སྟན་འདིང་བ་དང་། ཇི་ལྟར་བཞེད་པའི་མཁོ་བའི་ཡོ་བྱད་འབུལ་བ་དང་། ཡོན་ཏན་ལ་མངོན་པར་བསྟོད་ཅིང་ཐལ་མོ་སྦྱར་བ་དང་། འབྱོན་བཞུད་ཀྱི་ཚེ་ལྡང་ཞིང་བསུ་སྐྱེལ་སོགས་བླ་མའི་ཐུགས་ལ་གང་འཕྲོད་བྱ་དགོས་ཏེ། ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་ལས། བྱང་ཆུབ་སེམས་དཔའ་ཆོས་སྨྲ་བའི་དྲུང་དུ་སོང་ལ། སྟོན་པ་སངས་རྒྱས་ཀྱི་འདུ་ཤེས་ཀྱིས་བསྙེན་བཀུར་བྱ་བ་ཐམས་ཅད་བྱ་ཞིང་རྗེས་སུ་འབྲེང་ངོ་། །ཐ་ན་ཆོས་ཉན་པ་ཙམ་གྱི་ཕྱིར་ཡང་ཇི་སྲིད་འཚོའི་བར་དུ་འབྲེང་དགོས་ན་ལུང་ནོད་པ་དང་། འདྲི་བ་དང་། བསྒོམ་པའི་ཕྱིར་ལྟ་ཅི་སྨོས། དེ་དུས་ཐམས་ཅད་དུ་རང་ཉམས་བཏང་སྟེ། དགེ་བའི་བཤེས་གཉེན་དེའི་བློ་བཞིན་དུ་འཇུག་པར་བྱའོ། །ཞེས་དང་། འདུལ་བ་ལུང་ལས། མཁན་པོ་མཐོང་མ་ཐག་སྟན་ལས་ལྡང་བར་བྱའོ། །ཞེས་དང་། དེ་ལྟར་མ་ལངས་ན་ཚེ་རབས་ལྔ་བརྒྱར་འཕྱེ་བོར་སྐྱེ་བ་ལས་བརྒྱ་པར་གསུངས། ལྡང་ཞིང་ཞབས་འབྲིང་བྱས་ནས་སངས་རྒྱས་ཀྱི་མཚན་དཔེ་ཐོབ་སྟེ། མངོན་རྟོགས་རྒྱན་གྱི་འགྲེལ་པ་ལས། བླ་མ་སྐྱེལ་བ་དང་བསུ་བ་ལ་སོགས་པ་ཉིད་ཀྱིས་ཕྱག་དང་ཞབས་འཁོར་ལོའི་མཚན་དང་ལྡན་པ་ཉིད་དང་། ཞེས་སོ། །ཚེ་འདི་ལའང་དམ་ཚིག་མཆོག་གི་རྒྱུད་ལས། ལུས་དང་ངག་དང་ཡིད་སྟོབས་ཀྱིས། །ཅི་ནུས་པ་ཡིས་བླ་མ་ལ། །བསྙེན་བཀུར་སྲི་ཞུ་སུས་བྱས་པ། །འདི་ལ་མཐུ་དང་ནུས་པའི་ཚོགས། །བྱིན་རླབས་ཐོགས་པ་མེ ད་པ་འབྱུང་། །ཞེས་སོ། །གཞན་ཡང་བླ་མའི་དྲུང་ན་འདུག་ཚེའམ་རང་གི་གནས་ཁང་སོགས་གཞན་ན་འདུག་ཀྱང་རུང་ནམ་ཡང་དྲན་པས་ཟིན་པར་བྱས་ཏེ། སྒོ་གསུམ་གྱི་ཉེས་སྤྱོད་ཆ་དང་བཅས་པ་བསྡམས་ཤིང་ཤེས་བཞིན་གྱིས་ཟིན་པར་བྱས་ནས། སེམས་ལ་སེམས་ཀྱིས་བལྟ་ཞིང་ཉོན་མོངས་པའི་དབང་དུ་མ་ཤོར་བར་བསྡམས་ལ་བག་ཡོད་ཀྱིས་ཟིན་པ་བག་མ་གསར་པའི་ཚུལ་ལམ། དགེ་སློང་གསར་པ་བཞིན་དུ་ཞི་དུལ་དང་ལྡན་པས་འདོད་པ་སྒྲུབ་དགོས་ཏེ། སྤྱོད་འཇུག་ལས། སེམས་ཀྱི་གླང་ཆེན་མྱོས་པ་ནི། །ཆོས་ལ་སེམས་པའི་ཀ་ཆེན་ལ། །ཇི་ལྟར་བཏགས་པ་མི་འཆོར་བ། །དེ་ལྟར་འབད་པས་ཀུན་གྱིས་བརྟག །ཅི་ནས་རྩེ་གཅིག་སེམས་ཀྱིས་ནི། །སྐད་ཅིག་གཅིག་ཀྱང་མི་འཆོར་བར། །བདག་གི་ཡིད་འདི་གར་སྤྱོད་ཅེས། །དེ་ལྟར་ཡིད་ལ་སོ་སོར་བརྟག །ཅེས་དང་། སེམས་སྲུང་འདོད་པ་རྣམས་ལ་ནི། །དྲན་པ་དང་ནི་ཤེས་བཞིན་དང་། །སྲོག་ལ་བབ་ཀྱང་སྲུངས་ཤིག་ཅེས། །བདག་ནི་དེ་ལྟར་ཐལ་མོ་སྦྱོར། །ཞེས་སོ། །དེ་ཡང་བླ་མ་དང་འགྲོགས་པ་དང་། མཁན་པོས་གདམས་པ་དང་། ངན་སོང་འཁོར་བའི་སྡུག་བསྔལ་ལ་འཇིགས་པ། རང་གིས་ཉམས་སུ་ལེན་པའི་ཆོས་ལ་གུས་པས་བརྩོན་པ་རྣམས་ལ་དྲན་ཤེས་བཞིན་བག་ཡོད་དང་དགེ་བ་མང་པོ་ངང་གིས་སྐྱེ་སྟེ། དེ་ཉིད་ལས། བླ་མ་དང་ནི་འགྲོགས་པ་དང་། །མཁན་པོས་རྗེས་སུ་བསྟན་པ་དང་། །འཇིགས་པས་སྐལ་ལྡན་གུས་བྱེད་ལ། །དྲན་པ་བདེ་བླག་ཉིད་དུ་སྐྱེ། །ཞེས་སོ། །དེ་ལྟར་དགེ་བ་བྱེད་པ་དང་། བླ་མ་བཀུར་བ་ཡང་ཕྱོགས་ཆ་དང་། ཁེ་གྲགས་དང་། གཡོ་སྒྱུ་དང་། ངོ་ལྐོག་དང་། ཉེ་རིང་མ་ཡིན་པར་དུས་ཐམས་ཅད་དུ་ཐམས་ཅད་ལ་དེ་ལྟར་བྱ་སྟེ། རང་གི་ཚོགས་རྫོགས་ཤིང་སྒྲིབ་པ་འདག་པར་མངོན་ལྐོག་སོགས་ཁྱད་མེད་པའི་ཕྱིར་རོ། །ཁྱད་པར་དུའང་དཔལ་མགོན་བླ་མ་དམ་པ་ནི་མཉེས་པ་གསུམ་གྱི་སྒོ་ནས་བསྟེན་དགོས་པས། ཐ་མ་ཟང་ཟིང་གིས་མཉེས་པར་བྱ་བ་ནི། རང་ལ་ཡོད་པའི་ཡོ་བྱད་བསྲི་ཕངས་མེད་པས་མཆོད་ཅིང་། ཐུགས་མཉེས་པར་བྱ་བ་ཙམ་དུ་མ་ཟད། རང་གིས་གཞན་གྱི་མདུན་དུའང་ཡོན་ཏན་བརྗོད་ལ་འབུལ་དུ་གཞུག་གོ །དེ་ཡང་བླ་མ་དེ་དག་ལ་མཉེས་པའི་ཡོ་བྱད་བཞེད་མ་ཐག་བསྲི་ཕངས་མེད་པར་འབུལ་ལ། གཉིས་འདམ་དུ་ཡོད་ན་བཟང་ཤོས་དེ་བླ་མ་ལ་འབུལ་ལོ། །བླ་མ་དམ་པ་དེ་སྐུ་དྲིན་དང་ཆོས་ཀྱི་ཡོན་དུ་ཡོ་བྱད་ཕུལ་བས་ཡོན་ཏན་གྱི་ཚོགས་མང་དུ་ཐོབ་བོ། །ཆོས་ཀྱི་ཚིག་རེ་རེའི་ཡོན་བསྐལ་པར་རེ་བསྙེན་བཀུར་བྱས་པས་མི་རྫོགས་ན་བླ་མ་ཉིད་ཀྱི་དྲིན་ལྟ་ཅི་སྨོས་ཏེ། ཁྱིམ་བདག་དྲག་ཤུལ་ཅན་གྱིས་ཞུས་པའི་མདོ་ལས། བྱང་ཆུབ་སེམས་དཔའ་འགའ་ཞིག་གིས་ལུང་ནོད་པ་དང་། ཁ་ཏོན་བྱ་བ་དོན་དུ་གཉེར་བས་ཕ་རོལ་ཏུ་ཕྱིན་པ་དྲུག་གམ་བྱང་ཆུབ་སེམས་དཔའི་ལམ་ཚོགས་ལ་སོགས་པ་དང་ལྡན་པའི་ཚིགས་སུ་བཅད་པ་གཅིག་ལུང་མནོས་སམ་བླངས་པའི་སློབ་དཔོན་དེ་ལ་ཡི་གེའི་གྲངས་ཇི་སྙེད་ཡོད་པའི་བསྐལ་པར་རྙེད་པ་དང་། བཀུར་སྟི་དང་། མཆོད་པ་ཐམས་ཅད་ཀྱིས་བསྙེན་བཀུར་བྱས་ཀྱང་ད་དུང་སློབ་དཔོན་གྱི་གུས་པའང་མ་རྫོགས་ན་ཆོས་ཀྱི་གུས་པ་ལྟ་ཅི་སྨོས། ཞེས་སོ། །དེ་ལྟར་ཕུལ་བའི་ཕན་ཡོན་ཀྱང་ཚད་མེད་དེ་ཞིབ་པར་འོག་ཏུ་སྟོན་པར་འགྱུར་རོ། །དེའི་ཕྱིར་ལྷ་དང་བཅས་པའི་འཇིག་རྟེན་ན་ཡོན་ཏན་གྱི་གནས་དམ་པ་བླ་མ་ལས་ལྷག་པ་མེད་ཅིང་། དྲིན་ཆེ་བའང་གཞན་མེད་ན། དེ་ལ་ཐ་མལ་ཟང་ཟིང་གི་ནོར་རྫས་ཅུང་ཟད་ཙམ་ཕུལ་བ་ལ་ཁེ་རྔམ་དང་དྲིན་མི་བགྲང་{དྲིང་མི་འགྲང}སྟེ། དྲིན་མི་འཁོར་ཞིང་ཆོས་ཀྱི་ཡོན་ཏན་གཞལ་དུ་མེད་པའི་ཕྱིར་རོ། །སྐྱེ་བོ་ཐ་ཤལ་དག་བླ་མའི་མདུན་དུ་དངོས་སུ་དྲིན་འདྲེན་ཅིང་། ལྐོག་ཏུ་ངས་འདི་ཕུལ་ཞེས་ཡང་ཡང་གཞན་གྱི་རྩར་སྒྲོགས་པར་བྱེད་ལ། དུས་གཞན་དུ་ཕུལ་བ་ལ་འགྱོད་པ་འབྱུང་བས། དེ་ལྟར་མི་བྱ་སྟེ། དགེ་བ་ཡང་བགྲངས་ན་འཛད། འགྱོད་པ་སྐྱེས་ན་འཛད་ཅེས་མདོ་ལས་གསུངས་པ་ཡིན། གཞན་ཡང བླ་མ་དེས་འཁོར་བའི་རྒུད་པ་སེལ་ཞིང་། སངས་རྒྱས་ཀྱི་འབྱོར་པ་ཐོབ་པར་བྱེད་པ་བླ་ན་མེད་པའི་ཆོས་རིན་པོ་ཆེ་བསྟན་ཞིང་། སེམས་ཉིད་སངས་རྒྱས་སུ་ངོ་སྤྲོད་པའི་དྲིན་མི་འདྲེན་པར། ཁོ་ཟང་ཟིང་ཅུང་ཟད་ཀྱི་དྲིན་དྲང་བར་མི་འོས་ལ། གཅིག་ཏུ་རང་གི་དགེ་བ་སྤེལ་བའི་ཕྱིར་ཕུལ་ན་ལེན་མཁན་དྲིན་ཆེ། ནན་གྱིས་ཕུལ་ཅིག་མ་བྱས་བས་ཀྱང་དྲིན་དྲང་དུ་ཅི་ཡོད། དེས་ན་བཀའ་དྲིན་བསམས་ལ། ཚེ་འདི་དང་ཕྱི་མའི་བདེ་ལེགས་སྒྲུབ་ཅིང་ལམ་རྒྱགས་བསགས་པའི་ཕྱིར། རང་ལ་ཅི་ཡོད་ལེགས་དགུས་བླ་མ་མཆོད་ཅིང་། བསྙེན་བཀུར་བྱ་བ་ལ་སྐྱོ་བ་མེད་པས་བརྩོན་པར་བྱ་སྟེ། སྡོང་པོ་བཀོད་པ་ལས། རིགས་ཀྱི་བུ་ཁྱོད་ཀྱིས་དགེ་བའི་བཤེས་གཉེན་ལ་དྲིན་དུ་གཟོ་བས་བསྙེན་བཀུར་བ་ལ་འབད་པར་བྱའོ། །དེ་ཅིའི་ཕྱིར་ཞེ་ན། དགེ་བའི་ཆོས་ཐམས་ཅད་ནི། དེའི་ལག་ན་འདུག་པའི་ཕྱིར་རོ། །ཞེས་དང་། ཡེ་ཤེས་དྲི་མེད་ལས། མཛོད་ལྡན་བླ་མའི་ཕྱོགས་དག་ཏུ། །བཀུར་སྟི་རིམ་གྲོ་སུས་བྱས་པ། །ཡོངས་སུ་སྒྲོག་དང་བགྲང་མི་བྱ། །གལ་ཏེ་དེ་ལྟར་སུས་བྱེད་པ། །འབྲས་བུ་མེད་ཅིང་བརླག་པར་འགྱུར། །ཞེས་སོ། །འབྲིང་ལུས་ངག་གིས་མཉེས་པར་བྱ་བ་ལས། ལུས་ཀྱི་སྒོ་ནས་བླ་མའི་ཕྱོགས་སུ་རང་གི་ལུས་བཀོལ་བས། ཕྱག་དང་བསྐོར་བ་བྱ་བ་དང་། སྤོས་དང་མར་མེ་སོགས་ཕྱིའི་མཆོད་པ་དང་། བཟའ་བཏུང་སོགས་བྱིན་གྱིས་བརླབས་ཏེ་ཚོགས་ཀྱི་མཆོད་པས་མཉེས་པར་བྱ་བ་ནང་དང་། རྟོགས་པ་ཏིང་འཛིན་ཤེས་རབ་ལ་སོགས་པ་གསང་བའི་མཆོད་པ་བཞུགས་དུས་སམ། སྐུ་འདས་པའི་རྗེས་ལའང་། ཚེས་གྲངས་གང་ལ་ཐུགས་འཕོས་པ་དེའི་ཉིན་མཚན་ལ་མཆོད་པ་དང་། སྐྱེ་བོ་ལ་སྦྱིན་པ་བྱ་བ་སོགས་གུས་པའི་བཀའ་དྲིན་དྲན་པས་བྱ་བ་དང་། བླ་མར་མེ་ཆུ་གཡང་ས་དང་གཅན་གཟན་ནམ་དགྲའི་བར་ཆད་བསྲུང་བ་དང་བླ་མའི་བྱ་བ་ལ་ཡུལ་ཐ་དད་བར་བང་ཆེན་གྱི་མངག་གཞུག་བྱ་བ་དང་། འཕྲལ་ཉེ་བར་མཁོ་བའི་གཡོག་གང་དགོས་བྱ་བ་དང་། བཞུགས་སར་སྟན་འདིང་བ་དང་། ལམ་ཕྱགས་པ་དང་། རང་གི་གོས་སམ་དར་ལམ་ལ་སོགས་བྱ་བ་དང་། སྤོས་ཀྱིས་བསུ་ཞིང་བསྐྱལ་བ་དང་། དྲིས་ཆག་ཆག་བྱ་བ་དང་། གཟིམས་ཁང་ལ་སོགས་པའི་ཉེ་འཁོར་དུ་ཕྱག་དར་བྱ་བ་དང་། མཎྜལ་འབུལ་བ་དང་། རྟ་དང་འདོ་ལེ་ལ་སོགས་པའི་བཞོན་པ་འབུལ་བས་བསུ་ཞིང་བསྐྱལ་བ་དང་། འབུལ་བ་དང་། བླ་མ་ལ་མཐོང་ཕྱག་འཚལ་ཞིང་བྱིན་རླབས་ཞུ་བ་དང་། ལྡང་བ་དང་ཐལ་མོ་སྦྱར་བ་ལ་སོགས་པ་བྱའོ། །དེ་ལ་བྱིན་རླབས་ཞུ་བ་ནི་དེང་སང་ཕྱག་དབང་ལེན་པའི་སྲོལ་འདི་ཡིན་ལ། དེའི་དོན་ནི་བླ་མའི་ཞབས་སྤྱི་བོས་ལེན་པར་མདོ་རྒྱུད་ནས་གསུངས་པའི་དགོངས་དོན་ཡིན་ཏེ། དགོས་པ་བླ་མ་དང་དཀྱིལ་འཁོར་གྱི་དབང་ཕྱུག་དབྱེར་མེད་པའི་སྐུ་ལ་གདན་གསུམ་ཡོངས་རྫོགས་རྩ་གསུམ་རབ་འབྱམས་ཏིལ་གྱི་གོང་བུ་བཞིན་བ་སྤུའི་མཐའ་ཚུན་ཀུན་ལ་ཁྱབ་པར་བཞུགས་པས། ཕྱག་ཞབས་སོགས་སྐུ་ཡི་ཆ་ཤས་གང་ལ་ཡང་རེག་པ་ཙམ་གྱིས་སྔོན་བསགས་ཀྱི་སྡིག་སྒྲིབ་ཐམས་ཅད་སྐད་ཅིག་ལ་བྱང་ཞིང་རིང་པོར་མི་ཐོགས་པར་ཧེ་རུ་ཀའི་གོ་འཕང་ཐོབ་པར་འགྱུར་བའི་ཚུལ། རྒྱུད་ལས། ཧེ་རུ་ཀ་དཔལ་ཡེ་ཤེས་ཆེ། །རྣམ་པར་དག་པའི་མཚན་ཉིད་ཀུན། །སྒྲུབ་པ་པོ་ཡི་བདེ་བའི་ཆུ། །གཉིས་མིན་གཉིས་སུ་མེད་པ་ཉིད། །གཉིས་མེད་སྦྱོར་བ་ཡིས་རེག་པ། །དག་བྱེད་སྡིག་པ་འཇོམས་བྱེད་པ། །རེག་པ་དང་ནི་སྨྲས་པས་ཀྱང་། །སྡིག་པ་ཀུན་ལས་གྲོལ་བར་འགྱུར་། །སྡིག་པ་ཐམས་ཅད་རྣམ་གྲོལ་ཞིང་། །ལུས་དག་པ་ལས་སྐྱོན་མེད་པ། །མི་མཆོག་ཀུན་ནས་སྦྱང་བྱེད་པ། །སྡིག་པ་ཐམས་ཅད་རྣམ་དག་པའི། །དེ་བཞིན་གཤེགས་པའི་ས་ཐོབ་འགྱུར། །སྡིག་པ་ཐམས་ཅད་རྣམ་དག་པ། །དེ་བཞིན་གཤེགས་པའི་རིགས་སྐྱེ་ཞིང་། །ཆོས་དང་ལྡན་པའི་རྒྱལ་པོར་འགྱུར། །ཞེས་གསུངས་པའི་དོན་གྱིས་ཏེ། འདི་ལ་ཞུ་བ་པོ་རང་གི་དད་མོས་གཙོ་ཆེ་བར་རྗེ་གཏེར་ཆེན་ཆོས་ཀྱི་རྒྱལ་པོས་བཞེད་དོ། །གཞན་ཡང་། རང་ཉིད་ཉལ་བའི་སྔས་ཀྱང་བླ་མ་བཞུགས་པའི་ཕྱོགས་སུ་སྟོན་པ་དང་། བཟའ་བཏུང་ཅི་ཟ་བ་ན་བླ་མ་དྲན་པས་ཕུད་འབུལ་བ་དང་། བྱ་བ་གང་བྱེད་ཀྱང་བླ་མས་གསུང་འབྱོན་པ་ཡིན་ནོ་སྙམ་ནས་ཤེས་བཞིན་གྱིས་དོན་སྒྲུབ་པ་ལ་འབད་པར་བྱའོ། །མདོར་ན་དུས་རྟག་ཏུ་བླ་མ་ལ་གདུང་བའི་སྲི་ཞུས་གནས་པར་བྱ་སྟེ། སྡོང་པོ་བཀོད་པ་ལས། ཡང་ཚོང་དཔོན་གྱི་བུ་ནོར་བཟང་བྱང་ཆུབ་ཆེན་པོར་མོས་ཤིང་བརྩོན་འགྲུས་བརྩམས་པས། དགེ་བའི་བཤེས་གཉེན་འཕགས་པ་འཇམ་དཔལ་གྱི་ཕྱི་བཞིན་དུ་འབྲངས་ནས་བསྟོད་པ་བྱས་པ་ན། འཇམ་དཔལ་གྱིས་བཀའ་སྩལ་པ། བླ་མ་དང་འགྲོགས་ཤིང་རིམ་གྲོ་བྱེད་པ་ནི་བྱང་ཆུབ་ཆེན་པོ་འགྲུབ་པའི་གཞི་ཡིན་གྱིས། དེ་བསྟེན་ཅིང་འགྲོགས་པས་མི་སྐྱོ་བར་བྱའོ། །ཞེས་སོ། །ངག་གི་སྒོ་ནས་ཀྱང་གུས་པའི་ཡིད་ཀྱིས་ཀུན་ནས་བསླངས་ཏེ། བླ་མ་ལ་བསྟོད་པ་དང་། སྐྱབས་སུ་འགྲོ་བ་དང་། བླ་མ་དང་འབྲེལ་བ་ཐམས་ཅད་ལ་ཞེ་ས ས་ཟིན་པར་བྱས་ལ། དངོས་སམ་ལྐོག་ནའང་བླ་མ་དམ་པའི་གསུང་གི་གཅེས་པ་ལ་སོགས་བརྗོད་ཅིང་། གསུང་སྒྲོས་དོན་དང་ལྡན་བཟུང་ནས་མ་བརྗེད་པར་གཞན་ལ་སྒྲོགས་པ་དང་། གལ་ཏེ་གསུང་སྒྲོས་ཅུང་ཟད་ཉམས་པ་སྲིད་ན། བདག་གིས་འདིའི་དགོངས་པ་ཇི་བཞིན་པ་མ་ལོན་ཏེ། སྒྲ་ཇི་ལྟ་བ་འདི་ནི་འགལ་བ་ལྟར་སྣང་བ་རང་གི་བློའི་སྐྱོན་ཡིན་སྙམ་དུ་བསམ་ལ། བླ་མའི་ཆོས་ཀྱི་སྒྲོས་སམ། འཇིག་རྟེན་གྱི་སྒྲོས་ནོར་བ་ལྟ་བུའང་རང་གིས་མ་རྟོགས་པ་ཉིད་དུ་སེམས་པར་བྱའོ། །གཞན་གྱིས་འདྲི་ནའང་དགོངས་པ་ཅན་དེ་ནི་བདག་གིས་ཁོང་དུ་མ་ཆུད་ཅེས་ལན་གདབ་བོ། །བླ་མའི་དེ་མ་ཡིན་ཞེས་བརྗོད་པའམ་བསམ་པ་སྐད་ཅིག་ཀྱང་མི་བྱ་སྟེ། སངས་རྒྱས་ཀྱི་གསུང་ལ་སྐུར་བ་བཏབ་པས་ཀྱང་སྡིག་ཆེའོ། །དེས་ན་བླ་མས་ཅི་གསུངས་པ་དེ་སྒྲུབས་ལ། བྱ་བ་གང་ཞིག་ཉེས་པར་མངོན་ནའང་། དང་པོ་གསུང་སྣ་ཁྲིད་ལ། མགོ་བརྩམས་པའི་འོག་ཏུ་ཁེ་ཉེན་དང་ལེགས་ཉེས་བརྗོད་པས་ཐུགས་དགོངས་རྟོགས་པར་ངེས་སོ། །ཅི་གསུང་བདག་ལ་ལེགས་སོ་སྙམ་དུ་ཡོན་ཏན་ནས་བསམ་ཞིང་རྗེས་སུ་ཡི་རང་བས་མངོན་པར་བསྟོད་དོ། །རྒྱུས་མེད་པའམ་ཡོད་ཀྱང་རྒྱུས་ཆུང་བ་དག་དང་། ཡུལ་གཞན་དུ་སོང་དུས་རང་གི་བླ་མའི་ཡོན་ཏན་ངེས་པ་རྣམས་བརྗོད་ཅིང་། ཐུན་བཞི འམ་རྟག་ཏུ་བླ་མ་དྲན་ལ་གསོལ་བ་འདེབས་པའང་སྐད་སྙན་ཤོས་ཀྱིས་བྱ། གཞན་ཡང་ངག་གིས་བསྟོད་པ་དང་། ཚིག་སྙན་པ་དང་། འཇམ་པ་དང་། གདོང་མི་ཟློག་པ་དང་། གསོང་པོར་སྨྲ་བ་དང་། གཞན་དག་ཏུའང་ཡོན་ཏན་བརྗོད་པ་དང་། ཅི་གསུང་ལ་གུས་པས་སྒྲུབ་པའི་ལན་སྙན་པོ་འབུལ་བ་དང་། ཁ་གླལ་བ་དང་། སྦྲིད་པ་བྱུང་བའི་ཚེ་ཁ་དགབ་པ་དང་། གང་ཅི་བྱེད་ཀྱང་གསུང་གི་གནང་བ་ཞུ་བ་དང་། དགེ་བ་ལ་སྦྱོར་བའི་ཐོག་མར་བླ་མ་དྲན་པས་བསྟོད་པ་དང་། གསོལ་བ་གདབ་པར་བྱ་སྟེ། དཀོན་མཆོག་སྤྲིན་ལས། རིམ་གྲོར་བྱས་ཏེ་སྟན་ལ་སྡོད་དོ། །བསྔགས་པ་བརྗོད་དོ། །ལེགས་སོ་འབུལ་ལོ་ཞེས་སོགས་གསུངས་པ་བཞིན་ནོ། །ཡིད་ཀྱི་སྒོ་ནས་ཀྱང་མཆོག་ཏུ་དད་པའི་ཡིད་ཀྱིས་བླ་མའི་ཡོན་ཏན་དྲན་པར་བྱས་ལ། འཕྲད་པར་དཀའ་བའི་བློས་དད་གུས་བསྐྱེད་ལ་བསྟེན་པར་བྱའོ། །དེ་ཡང་དཀོན་མཆོག་བཞི་པར་བལྟ་བས་སངས་རྒྱས་དང་མཉམ་པའམ། ལྷག་པར་མོས་པས། མཚན་ཐོས་པ་དང་། ཞལ་མཐོང་བ་དང་། སྨོན་ལམ་གྱིས་མཇལ་བ་དང་། བཙལ་བས་རྙེད་པ་དང་། གསུང་ཐོས་པ་དང་། སྤྱི་བོར་ཕྱག་གིས་རེག་པ་ཙམ་ལའང་དགའ་བ་ཆེན་པོ་བསྐྱེད་དེ། བདག་ལྟ་བུས་དགེ་བའི་བཤེས་གཉེན་དམ་པ་འདི་ལྟ་བུ་ལ་དངོས་སུ་འཕྲད་པ་རེ་དགའ་སྙམ་དུ་རྙེད་པར་དཀའ་བའི་བློས་བསམས་ལ། ཐབས་སྣ་ཚོགས་པས་མཉེས་པ་བསྒྲུབ་ཅིང་དམ་པ་དེ་ཉིད་འཇིག་རྟེན་དུ་འབྱུང་དཀའ་ལ། བདག་དང་འཕྲད་པའང་རྙེད་དཀའ་ཞིང་། ནམ་འབྲལ་མི་ཤེས་པའི་བློས་བསྟེན་ཞིང་། བླ་མ་དེས་རྗེས་སུ་གཟུང་བའིའགྲོ་བ་ཐམས་ཅད་ལའང་གུས་པས་སྲི་ཞུ་དང་། ཕྱག་འཚལ་བ་དང་། བསྙེན་བཀུར་བ་སོགས་ཀྱི་མོས་གུས་དང་དག་སྣང་བྱའོ། །དེས་ནི་འདི་དང་ཕྱི་མའི་ལེགས་པ་ཐམས་ཅད་འགྲུབ་པ་ཡིན་ནོ། །འཕགས་པ་དཀོན་མཆོག་སྤྲིན་ལས། ས་ཕྱོགས་གང་ན་ཆོས་སྨྲ་བ་གནས་པ་དེ་ལ་མཆོད་རྟེན་གྱི་འདུ་ཤེས་དང་། ཆོས་སྨྲ་བ་ལ་བླ་མ་དང་། དགེ་བའི་བཤེས་གཉེན་དང་། སྟོན་པའི་འདུ་ཤེས་བསྐྱེད་དེ་མཐོང་ན་དགའ་བ་དང་། རངས་པ་བསྐྱེད་དོ། །ཞེས་སོགས་དང་། སྡོང་པོ་བཀོད་པ་ལས། དགེ་བའི་བཤེས་གཉེན་ཡིད་ལ་བྱེད་པ་དང་མ་བྲལ་བ་ལས་དོན་ཐམས་ཅད་འགྲུབ་པར་འགྱུར་རོ། །ཞེས་དང་། དགོངས་འདུས་ལས། དོན་དང་ལྡན་པའི་བླ་མ་ལ། །དུས་གསུམ་ཕྱོགས་བཅུའི་རྒྱལ་བ་དང་། །རྒྱལ་སྲས་ལྷ་དང་མི་དག་དང་། །དེ་བཞིན་ཀླུ་དང་གནོད་སྦྱིན་དང་། །སྲིན་པོ་ལོག་ལྟ་ཅན་དག་གི། །རིག་པ་འཛིན་པ་ཀུན་འདུས་ནས། །མེ་ཏོག་གཏོར་ཞིང་བསྟོད་པས་འདུད། །དཔེར་ན་མ་ཡིས་བུ་བསྐྱེད་ལྟར། །རྒྱལ་བ་སྲས་དང་རིག་འཛིན་རྣམས། །དམ་པ་ལས་བྱུང་ཤེས་པར་གྱིས། །ཞེས་སོ། །རབ་བཀའ་བཞིན་རྗེས་སུ་སྒྲུབ་པའི་མཆོད་པ་ནི། མཆོད་པ་རྣམས་ཀྱི་ནང་ནས་མཆོག་ཡིན་ལ། སངས་རྒྱས་ནས་རིམ་པར་བྱོན་པའི་བླ་མ་རྣམས་ཀྱིས་ཆོས་སྟོན་ཞིང་འཇིག་རྟེན་དུ་བྱོན་པའི་དགོས་པའང་དེ་ཡིན་པས། ཇི་སྐད་ཐོས་པ་རྣམས་ལེགས་པར་བླང་དོར་གྱི་དམིགས་ཕྱེད་པས་བསྒྲུབ་པར་བྱའོ། །ཐོས་པ་དེ་ཡང་རྐྱེན་བླ་མ་དམ་པ་ལ་རག་ལས་པས། དམ་པ་མང་དུ་བསྟེན་ཞིང་ཐོས་པ་ཕྱོགས་མེད་དུ་བཙལ་ནས་སྒྲུབས་ལ། དེ་ཡང་བསམ་པས་ཕྱིན་ཅི་མ་ལོག་པར་ཤེས་ནས་བསྒྲུབ་ཅིང་། ཤེས་ལོ་ཙམ་དུ་མ་བཞག་པར་དོན་ཉམས་སུ་བླངས་ལ་བསྒྲུབ་བོོ། །ཉམས་སུ་ལེན་པ་ཡང་གཟུགས་བརྙན་ཙམ་དུ་མ་སོང་བར་ཆོས་དང་རང་རྒྱུད་བསྲེས་ལ་བསྒྲུབ་ཅིང་། དེ་ཡང་ཐབས་ཤེས་རབ་ཟུང་དུ་འཇུག་པས་ཡིད་སྨོན་ལ་མ་ལུས་པར་བརྩོན་པས་བསྒྲུབ་བོ། །དེ་ལྟར་བསྒྲུབས་པས་བླ་མ་དང་སངས་རྒྱས་སྲས་དང་བཅས་པ་ཐམས་ཅད་མཉེས་པའི་མཆོད་པར་འགྱུར་ཏེ། སྐྱེས་བུ་དམ་པའི་སྤྱོད་པ་ཡིན་པའི་ཕྱིར་རོ། །མངོན་རྟོགས་རྒྱན་ལས། སངས་རྒྱས་དགྱེས་པའི་སྤྱོད་པ་སྟེ། །ཞེས་དང་། ཡུམ་བར་མ་ལས། གང་དགེ་བའི་བཤེས་གཉེན་གྱིས་ཡོངས་སུ་གདམས་པ་དེ་བསྒྲུབ་པར་བརྩོན་པ་ལ་ནི་སངས་རྒྱས་ཐམས་ཅད་ཀྱིས་བསྔགས་སོ། །བསྟོད་དོ། །བཀུར་རོ། །ཞེས་དང་། དགོངས་འདུས་ལས། སྔོན་གྱི་དམ་པ་བདེ་གཤེགས་རྣམས། །དེད་དཔོན་དམ་པ་མཉེས་བྱས་ནས། །ཀུན་སྤངས་དགོན་པའི་མཐར་གཤེགས་ཏེ། །སྒྲུབ་པས་མང་དག་ཐར་པ་བརྙེས། །དེ་བས་དེ་ལྟར་རྗེས་སློབ་ན། །རྒྱལ་བའི་རྣམ་གྲོལ་གདུང་འཚོབ་བོ། །དེ་བས་དམ་པ་དྲིན་ཆེན་ལ། །སྐྱོ་དུབ་མེད་པའི་དད་པ་དང་། །གྱོང་ཁེངས་མེད་པའི་མཉེན་ལྕུག་དང་། །སེར་སྣ་མེད་པའི་ཟང་ཟིང་དང་། །སོམ་ཉི་མེད་པའི་སྲི་ཞུ་དང་། །གཡོ་སྒྱུ་མེད་པའི་དྲང་སྐད་དང་། །ཁ་གསག་མེད་པའི་རང་རྒྱུད་དང་། །རྨོངས་པ་མེད་པའི་ཤེས་རབ་དང་། །དྲི་མ་མེད་པའི་ལྷག་སེམས་བརྒྱད། །དམ་པ་དེ་ལ་རྫོགས་པར་འབུལ། །ཞེས་སོ། །མདོར་ན་བླ་མ་དམ་པ་དེ་ནི་སྡེ་སྣོད་དང་རྒྱུད་སྡེ་ཀུན་ནས་སངས་རྒྱས་ཀྱི་སྤྲུལ་པར་གསུངས་པའི་ཕྱིར་དེའི་རྣམ་པར་ཐར་པ་བཞིན་བསྒྲུབས་པས་སངས་རྒྱས་ཀྱི་རྣམ་པར་ཐར་པ་ལ་བསླབ་པར་འགྱུར་བའི་ཕྱིར། སྐུ་གསུང་ཐུགས་ཀྱི་ཡོན་ཏན་སངས་རྒྱས་དང་མཉམ་པར་བལྟས་ལ། བདག་གིས་ཀྱང་དེ་ཁོ་ན་ཉིད་འདྲ་བ་ཞིག་བྱའོ་སྙམ་དུ་སེམས་པས་བླ་མའི་མཛད་སྤྱོད་ལ་སློབ་ཅིང་། ཐོས་པ་དང་བསམ་པ་དང་། སྒོམ་པས་དུས་འདའ་བར་བྱས་ན་མཆོག་དང་ཐུན་མོང་གི་དངོས་གྲུབ་མྱུར་དུ་ཐོབ་པ་ཉིད་དེ། ཡེ་ཤེས་རྒྱ་མཚོའི་རྒྱུད་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཀོན་མཆོག་བསམ་པའི་ཡུལ། །བླ་མ་མི་སྤང་བླ་མ་བཀུར། །མོས་དང་བསམ་པའི་བྱེ་བྲག་གིས། །བླ་མ་དང་ནི་རྡོ་རྗེ་འཛིན། །ཐ་དད་པར་ནི་མི་ལྟའོ། །དེ་ལས་བྱུང་བའི་དངོས་གྲུབ་ནི། །རྣལ་འབྱོར་པ་ཡིས་བཟའ་བར་བྱ། །དེ་ཡིས་དཔལ་ལྡན་རྫོགས་སངས་རྒྱས། །དངོས་གྲུབ་ཀུན་གྱི་ལས་ཀྱི་མཐའ། །བླ་མ་མཉེས་པ་ཉིད་ལས་འབྱུང་། །ཞེས་དང་། སྒྱུ་འཕྲུལ་དྲྭ་བ་ལས། སློབ་དཔོན་ཇི་ལྟར་བལྟ་ཞེ་ན། །བླ་མ་སངས་རྒྱས་ཀུན་དང་མཉམ། །དེ་ཉིད་རྟག་ཏུ་རྡོ་རྗེ་འཆང་། །དེ་བཞིན་གཤེགས་པ་རིན་ཆེན་ཏོག །དེ་ཉིད་ཡེ་ཤེས་རྒྱ་མཚོ་སྟེ། །ཡིད་བཞིན་ནོར་བུ་རིན་ཆེན་སྦྱིན། །སློབ་དཔོན་གྱི་ནི་ཡོན་ཏན་གཟུང་། །སྐྱོན་ནི་ནམ་ཡང་མ་ཡིན་ནོ། །ཡོན་ཏན་བཟུང་བས་དངོས་གྲུབ་ཅིང་། །སྐྱོན་རྣམས་ཀྱིས་ནི་དངོས་གྲུབ་ཉམས། །ཞེས་གསུངས། གཞན་ཡང་གསང་འདུས་ལས། རིགས་ངན་སྨྱིག་མ་མཁན་ལ་སོགས། །གསོད་དོན་དོན་གཉེར་སེམས་པ་རྣམས། །ཐེག་ཆེན་བླ་ན་མེད་པ་ཡི། །ཐེག་མཆོག་འདི་ལ་འགྲུབ་པར་འགྱུར། །སེམས་ཅན་མཚམས་མེད་ལ་སོགས་པ། །སྡིག་པ་ཆེན་པོ་བྱེད་པ་ཡང་། །རྡོ་རྗེའི་ཐེག་པ་རྒྱ་མཚོ་ཆེ། །ཐེག་པ་མཆོག་ནི་འདི་ལ་འགྲུབ། །སྙིང་ནས་སློབ་དཔོན་སྨོད་པ་དག །བསྒྲུབས་ཀྱང་འགྲུབ་པར་ཡོངས་མི་འགྱུར། །ཞེས་གསུངས་ཤིང་། འདིའི་ཐད་ཀྱི་འགྲེལ་པ་སྒྲོན་གསལ་དུ། རང་གི་བླ་མ་ལ་སྙིང་ཐག་པ་ནས་སྨོད་མཁན་དེ་དང་། རང་ཡང་སྙིང་ཉེ་བར་བྱས་ན། སློབ་དཔོན་ལ་རང་གིས་དངོས་སུ་མ་སྨད་ཀྱང་། སློབ་དཔོན་སྨད་པ་དང་ཁྱད་མེད་པར་བཤད་པས། འགའ་ཞིག་གིས་རང་གི་བླ་མ་ལ་ངན་དུ་སྒྲོགས་ན། ཐབས་ཞི་དྲག་གང་རུང་གིས་དེ་ལས་ཟློག་ཐུབ་ན་བཟློག དེའི་ནུས་པ་མེད་ན་བླ་མའི་ཡོན་ཏན་བསམ་ཞིང་རང་གི་རྣ་བ་མཛུབ་མོས་བཀག་ནས། མི་དེ་ལ་བསྟེེན་འདྲིས དང་བག་ཕེབས་པར་མི་བྱ། བྱས་ན་ཉེས་པ་ཤིན་ཏུ་ལྕི་སྟེ། བདུད་རྩི་འབྱུང་བའི་རྒྱུད་ལས། རྡོ་རྗེ་སློབ་དཔོན་སྨོད་པ་ན། །ཞི་བའམ་མངོན་སྤྱོད་ལས་ཀྱིས་ཟློག །ནུས་པ་ཡོད་པར་མ་གྱུར་ན། །རྣ་ཆ་དྲན་པས་དགབ་པར་བྱ། །བརྟེན་པར་མི་བྱ་གཏམ་མི་བྱ། །གལ་ཏེ་དེ་དང་འདྲེས་གྱུར་ན། །ངན་སོང་དག་ཏུ་འཚེད་པར་འགྱུར། །ཞེས་སོ། །མདོ་རྒྱུད་ནས་བཤེས་གཉེན་བརྟག་ཚུལ་ཇི་སྙེད་གསུངས་པ་སྔར་མ་བརྟེན་པའི་སྐབས་ཡིན་གྱི། བརྟེན་ཟིན་ནས་གང་ལྟར་ཡང་ཅི་མཛད་ལེགས་མཐོང་གིས་མོས་གུས་ཀྱིས་བསྟེན་པར་བྱ་དགོས་ཏེ། དགོངས་འདུས་ལས། དམ་པར་བཟུང་བར་གྱུར་ཕན་ཆད། །དམ་པར་ངེས་དང་མ་ངེས་ཀྱང་། །བཀའ་བཅག་ལུང་བོར་ག་ལ་སྲིད། །གལ་ཏེ་དེ་ཡི་རྒྱ་ཉམས་ན། །རྡོ་རྗེའི་དམྱལ་བར་རབ་ཏུ་འཚེད། །ཅེས་སོ། །སྤྱིར་ཡང་། སངས་རྒྱས་དང་བྱང་ཆུབ་སེམས་དཔའ་དང་གྲུབ་པའི་རིག་པ་འཛིན་པ་ཆེན་པོ་རྣམས་ནི་ཐབས་དང་། ཏིང་ངེ་འཛིན་དང་། ཡེ་ཤེས་དང་། སྤོབས་པ་བསམ་གྱིས་མི་ཁྱབ་པ་གང་དང་གང་གིས་འདུལ་བ་ལ་དེ་དང་དེ་ལྟ་བུའི་ཚུལ་དང་མཐུན་པར་སྟོན་པས་ཚུར་མཐོང་གིས་བློས་བསམ་པར་བྱ་བ་མ་ཡིན་པའི་ཕྱིར། སྐྱོན་ལྟར་སྣང་ཡང་དེ་ལྟར་མ་ངེས་ཏེ། ཕལ་པོ་ཆེ་ལས། དེ་དག་ཐབས་ཚུལ་རྣམ་པ་སྣ་ཚོགས་ཀྱིས། །འཇིག་རྟེན་རྒྱུ་ཞིང་འགྲོ་བའི་དོན་རྣམས་བྱེད། །འཇིག་རྟེན་མི་ཆགས་ཆུ་ལ་པདྨ་བཞིན། །དགའ་ཞིང་དད་པར་བྱེད་ལ་རྣམ་པར་རྒྱུ། །དེ་དག་སྙན་ངག་མཁན་རྒྱལ་སྙན་ངག་སྦྱོར། །གར་མཁན་རྔ་མཁན་གྱད་དང་རོལ་མོ་མཁན། །བཞག་མཛེས་རྒྱན་ཕྲེང་ཐོགས་ཤིང་གར་བྱེད་དང་། །སྒྱུ་མ་མཁན་པོ་གཟུགས་མང་ཀུན་ཏུ་སྟོན། །གྲོང་པ་གྲོང་དཔོན་ཁ་ལོ་སྒྱུར་བར་འགྱུར། །དེ་བཞིན་དེད་དཔོན་ཚོང་དཔོན་ཁྱིམ་བདག་འགྱུར། །རྒྱལ་པོ་བློན་པོ་མདུན་འདོན་ཕོ་ཉ་དང་། །སྨན་པ་འཇིག་རྟེན་བསྟན་བཅོས་ཆོ་ག་མཁན། །དེ་དག་དགོན་པར་ལྗོན་ཤིང་ཆེན་པོར་འགྱུར། །ཞེས་སོགས་རྒྱ་ཆེར་གསུངས་པ་དང་། འཕགས་པ་སྟོང་ཕྲག་བརྒྱ་པ་ལས། བྱང་ཆུབ་སེམས་དཔའ་སེམས་དཔའ་ཆེན་པོ་ལ་ལ་ནི་ཐབས་ལ་མཁས་པས་སེམས་ཅན་ཡོངས་སུ་སྨིན་པར་བྱ་བའི་ཕྱིར། འདོད་པའི་ཡོན་ཏན་ལྔ་ལ་ཡོངས་སུ་སྤྱད་དེ་ཆུང་མའི་འཁོར་གྱི་ནང་ནས་མངོན་པར་བྱུང་ནས་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །ཞེས་དང་། སློབ་དཔོན་སངས་རྒྱས་གསང་བས་མཛད་པའི་སྒྱུ་འཕྲུལ་ལམ་རིམ་ལས། རེས་འགའ་ཞི་ལ་རེས་འགའ་དྲག །གཡེམ་ལ་གཡེམ་སྟོན་སྡང་ལ་སྡང་། །དྲེགས་ལ་རི་དང་མུན་ལ་མུན། །རླུང་ལའང་དེ་བཞིན་མཐུན་མི་མཐུན། །རྒྱ་མཚོ་ལྟ་བུ་ཐབས་སྤྱོད་དང་། །ཕྲིན་ལས་དེ་བཞིན་པ་ཡིས་དགྲོལ། །ཞེས་གསུངས། དེའི་ཕྱིར་རིག་འཛིན་འཇིགས་མེད་གླིང་པས་ཡོན་ཏན་རིན་པོ་ཆེའི་མཛོད་ལས། མཛད་སྤྱོད་གང་ཡང་ལོག་པར་མི་བལྟ་སྟེ། །འཕགས་པའི་ཡུལ་གྱི་དབང་ཕྱུག་ཕལ་མོ་ཆེ། །གདོལ་པ་གཡུང་པོ་སྡིག་སྤྱོད་ཕལ་པའི་ཚུལ། །ཉམས་པ་ལས་ཀྱང་ཤིན་ཏུ་ཉམས་པར་ཡོད། །རང་གི་ཉེར་ལེན་དབང་དུ་མ་གྱུར་པར། །འཁྲུལ་པ་བརྟག་པའི་ཉེས་པ་ཚད་མེད་དོ། །སྡེ་སྣོད་བཅུ་གཉིས་བློ་ལ་ཆུབ་པ་ཡི། །དགེ་སློང་སྐར་བཟང་སྡིག་པའི་མཐུས་བཏབ་ནས། །སྟོན་པའི་མཛད་པ་གཡོ་སྒྱུར་མཐོང་བའི་ཚུལ། །ལེགས་པར་བསམས་ལ་རང་གིས་རང་ཉིད་འཆོས། །ཞེས་གསུངས་པ་ལྟར་ནམ་ཡང་འཁྲུལ་པ་མི་བརྟག་པར་ཡོན་ཏན་འབའ་ཞིག་ཏུ་བསམས་ནས་སྟོན་པ་སངས་རྒྱས་དངོས་ཀྱི་འདུ་ཤེས་བཞག་དགོས་ཏེ། འཕགས་པ་དཀོན་མཆོག་སྤྲིན་ལས། བླ་མ་བསྟེན་ན་དགེ་བའི་ཆོས་འཕེལ་བ་དང་། སྡིག་པ་འགྲིབ་བོ་སྙམ་སྟེ་མཁན་པོ་ཐོས་པ་མང་ཡང་རུང་། ཉུང་ཡང་རུང་། ཤེས་སམ་མི་ཤེས་ཀྱང་རུང་ཚུལ་ཁྲིམས་དང་ལྡན་ནམ་མི་ལྡན་ཡང་རུང་སྟེ། དེ་ལ་སྟོན་པའི་འདུ་ཤེས་བསྐྱེད་དོ། །ཞེས་གསུངས། དེའི་ཕྱིར་སྔོན་གྱི་བཀའ་བརྒྱུད་ཀྱི་གྲུབ་ཐོབ་ཁ་ཅིག་གི་གསུངས་ལས། མཚན་ལྡན་བླ་མ་རིན་ཆེན་འདིས། །གང་མཛད་ཐམས་ཅད་ལེགས་པ་ཡིན། །ཅི་མཛད་ཐམས་ཅད་ཡོན་ཏན་ཡིན། །མི་གསོད་བཤན་པ་མཛད་ན་ཡང་། །དེ་ཁས་འཚེངས་ཤིང་དེ་ཁ་ལེགས། །སེམས་ཅན་ཐུགས་རྗེས་འཛིན་པར་ངེས། །ལོག་གཡེམ་འཆལ་བའི་ཚུལ་སྟོན་ཡང་། །ཡོན་ཏན་འཕེལ་ཞིང་ཡོན་ཏན་འབྱུང་། །ཐབས་ཤེས་ཟུང་དུ་འཇུག་པའི་བརྡ། །རྫུན་གྱི་གཞན་མགོ་བསྐོར་བ་ན། །བརྡ་ཐབས་རྣམ་པ་སྣ་ཚོགས་ཀྱིས། །འགྲོ་ཀུན་ཐར་པའི་ལམ་ལ་འདྲེན། །རྐུ་འཕྲོག་ཆོམ་པོ་མཛད་ན་ཡང་། །གཞན་གྱི་ཡོ་བྱད་ཚོགས་སུ་བསྒྱུར། །སྐྱེ་བོ་ཕོངས་པ་ཞི་བ་ཡིན། །དོན་ལ་འདི་འདྲའི་བླ་མ་ཡིས། །བཀའ་བཀྱོན་མཛད་ན་དྲག་སྔགས་ཡིན། །རྐྱེན་ངན་བར་ཆད་སེལ་བར་ངེས། །བརྡུངས་བཏགས་མཛད་ན་བྱིན་རླབས་ཡིན། །དངོས་གྲུབ་ཐམས་ཅད་དེ་ལས་འབྱུང་། །མོས་གུས་ཅན་ཚོ་ཉམས་རེ་དགའ། །ཞེས་གསུངས་པ་ལྟ་བུའི་དད་གུས་བསྐྱེད་དགོས་ཤིང་། ཚུལ་དེ་ལྟ་བུ་དང་ལྡན་ན་འཁོར་བ་ལས་མི་གྲོལ་མི་སྲིད་དེ། རིག་འཛིན་འཇིགས་མེད་གླིང་པས། འདི་ལྟར་ཟབ་མོའི་མདོ་སྡེ་དང་། རྒྱུད་སྡེ་རྣམས་ནས་བླ་མ་དང་སློབ་མའི་མཚན་ཉིད་དང་། ཉམས་ལེན་གྱི་གནད་གསང་ཆེན་པོ་མང་དུ་བསྟན་ཀྱང་། འགག་གཅིག་ཏུ་དྲིལ་ན་མཐོང་ཆོས་སུ་གྱུར་པའི་གཏན་ཚིགས་འདི་ཡིན་ཏེ། ངེས་པར་འཁོར་བ་ལས་འཕགས་པའི་བླ་མ་རྟོགས་པས་བདག་རྒྱུད་གྲོལ་ཞིང་སྙིང་རྗེ་ཆེན་པོ་དང་ལྡན་པ་ཞིག་ལ། སློབ་མ་དད་པའི་གོ་ཆ་ཆེ་བ་ཀླུའི་བྱང་ཆུབ་ལྟ་བུ། རྐྱེན་གྱིས་བསྐྱུར་བར་དགའ་བས་བློ་བརྟན་ཅིང་ལུས་དང་སྲོག་ལ་མི་བལྟ་བར་ཞབས་ཏོག་བྱེད་པ་དཔལ་གྱི་ཡེ་ཤེས་ལྟ་བུ། རང་དོན་ཡལ་བར་དོར་ནས་ཅི་གསུང་གི་བཀའ་བསྒྲུབ་པའི་མོས་གུས་ཅན་གཅིག་གིས་གསོལ་བ་སྙིང་ནས་བཏབ་ཅིང་ཐུགས་དགོངས་གཅིག་ཏུ་འདྲེས་ན་མི་གྲོལ་མི་སྲིད་པ་ཡིན་ཏེ། ཅིའི་ཕྱིར་ན། བྱིན་རླབས་དང་དངོས་གྲུབ་ཀྱི་ཉེ་བར་ལེན་པ་ནི་བསྒོམ་སྲན་ན་མི་འདུག་གི་མོས་གུས་རྣམ་པར་དག་པའོ། །མན་ངག་ཏུ་མི་འདུག་གིས་དད་པ་ལ་འདུག་གོ །འདི་ལྟར་སློབ་དཔོན་འཕགས་པས་ངར་སྣབས་དོར་བ་ཀླུའི་བྱང་ཆུབ་ཀྱིས་ཙན་གྱིས་བླངས་ནས་ཁར་བཅུག་པས་དེ་ཉིད་དུ་ས་དང་པོའི་བདེན་པ་མཐོང་། དཔལ་གྱི་ཡེ་ཤེས་ཀྱིས་བཙོན་སྲུང་བ་གཉིས་བཀུམ་ནས་སློབ་དཔོན་གཉགས་བཙོན་དོང་ནས་སྤྱན་དྲངས་ནས་དེ་མ་ཐག་ཏུ་དངོས་གྲུབ་ཐོབ། ཁོ་བོས་རྒྱལ་བ་མཉེས་པའི་གསུང་རབ་མཐོང་བ་ལ་བརྟེན་ནས་སྔོན་ཆད་ཟབ་པ་དང་རྒྱ་ཆེ་བའི་ལམ་གང་དང་ཡང་མ་ཕྲད་པར་རིག་ཅིང་མོས་གུས་བསམ་གྱིས་མི་ཁྱབ་པ་སྐྱེས་པ་ལ་བརྟེན་ནས་ཡེ་ཤེས་ཀྱི་སྐུ་དངོས་སུ་བསྟན་ནས་རྗེས་སུ་བཟུང་། སླར་ཡང་སྲོག་འདོར་ཕོད་པ་ཙམ་གྱི་མོས་གུས་ཆེན་པོ་སྐྱེས་པ་ལ་བརྟེན་ནས་སེམས་ཟག་པ་རྣམས་ལས་བཙན་ཐབས་སུ་གྲོལ། དུས་ད་ཕན་ཆད་ཉན་པ་པོ་བརྒྱ་ཕྲག་ཐར་པ་ལ་ཁྲིད་ལུང་བསྟན་པ་ཡིན་ཏེ། བསྒོམ་སྲན་ཅན་འཇིག་རྟེན་པའི་བསམ་གཏན་ལས་ནི་མི་འཕར། ཤེས་རབ་ཅན་གྱིས་དང་པོ་ངོ་བོ་ཉིད་མེད་པའི་དོན་མཐོང་ཀྱང་མོས་གུས་ཡལ་འཕྲལ་ལ་རྟོགས་པ་ཟབ་མོ་དང་འབྲེལ་ཆད། གནས་ལུགས་ཀྱི་སྐྱེ་ཚུལ་མོས་གུས་ཀྱི་སྲང་ལ་ཐེག་པ་ཤ་སྟག་ཏུ་སྣང་ངོ་། །ཞེས་གསུངས། རྒྱུ་མཚན་དེ་ལྟ་བུའི་ཕྱིར་ན། མདོ་དགོངས་འདུས་ལས། ཆོས་ཀུན་མི་ཤེས་མ་རྟོགས་ཀྱང་། དམ་པར་གྱུར་པའི་བླ་མ་ལ། །བཀུར་ནས་རིམ་གྲོ་ཆེར་བྱས་པས། །འཁོར་བའི་རྒྱ་མཚོ་བརྒལ་བར་འགྱུར། །དཔེར་ན་ཞིང་ས་གཤིན་པོ་ལ། །ས་བོན་བཏབ་ནས་འཕེལ་རྒྱས་བཞིན། །ཞེས་གསུངས་པཡིན་ནོ། །གཉིས་པ་རྣལ་འབྱོར་ཟབ་མོ་དངོས་ཉིད་ཇི་ལྟར་བསྒོམ་པའི་ཚུལ་ནི། ཀུན་འདུས་རིན་པོ་ཆེའི་རྒྱུད་ལས། གང་གིས་བསྐལ་པ་འབུམ་ཕྲག་ཏུ། །ལྷ་སྐུ་འབུམ་ཕྲག་བསྒོམས་པ་བས། །བླ་མ་ཅུང་ཟད་དྲན་པ་མཆོག །བསོད་ནམས་འདི་ནི་ཕ་མཐའ་ཡས། །ཞེས་དང་། ཨ་ཏི་བཀོད་པ་ཆེན་པོ་ལས། དྲིན་དང་ལྡན་པའི་བླ་མ་དེ། །སྤྱི་བོའི་གཙུག་གམ་ལག་པའི་མཐིལ། །སྙིང་གི་དཀྱིལ་དུ་སུས་བསྒོམས་པ། །སངས་རྒྱས་སྟོང་གི་ཡོན་ཏན་ཡང་། །གང་ཟག་དེ་ཡིས་འཛིན་པར་འགྱུར། །ཞེས་དང་། ཚིགས་གསུམ་པའི་རྒྱུད་ལས། གང་ཞིག་རྡོ་རྗེ་སློབ་དཔོན་ནི། །བཀུར་ཞིང་སྤྱི་བོར་སུས་བསྒོམས་པ། །དེ་ལ་རྒྱལ་བས་བྱིན་གྱིས་རློབས། །ཞེས་སོགས་གསང་རྒྱུད་རྣམས་ལས་རྒྱ་ཆེར་གསུངས་པ་བཞིན། གསང་སྔགས་རྡོ་རྗེ་ཐེག་པའི་ལམ་གྱི་རྩ་བ་བྱིན་རླབས་དང་དངོས་གྲུབ་ཐམས་ཅད་ཀྱི་འབྱུང་ཁུངས་གཅིག་པུར་གྱུར་པ་ནི་ལམ་ཟབ་མོ་བླ་མ་སྒྲུབ་པ་ཉིད་ཡིན་ཏེ། དེའི་རྒྱུ་མཚན་ཡང་། ཐོག་མར་སྔགས་ལ་ཞུགས་པའི་ཚེ་འཇུག་སྒོ་དབང་གི་སྐབས་སུའང་། དབང་བསྐུར་བ་པོ་དཀྱིལ་འཁོར་གྱི་བདག་པོ་ཉིད་ནི་རྡོ་རྗེ་སློབ་དཔོན་ཡིན་ལ། གདན་གསུམ་ཚང་བའི་དཀྱིལ་འཁོར་དབང་གི་ལྷ་རྣམས་ཀྱང་དེའི་ཏིང་ངེ་འཛིན་གྱི་སྤྲུལ་པ་ཡིན་པའི་ཕྱིར། དེ་ལྟར་མ་ཤེས་པར་བླ་མ་ལས་ཡི་དམ་གཙོ་བོར་བཟུང་བས་དངོས་གྲུབ་ཀྱི་སྐལ་བ་ཆད་པའི་ལོ་རྒྱུས་ཀྱང་མང་དུ་བྱུང་བ་དེ་ཡིན། བར་དུ་དངོས་གཞིའི་ལམ་གྱི་ཉམས་ལེན་བསྐྱེད་བཟླས་རྫོགས་གསུམ་གང་བསྒོམས་ཀྱང་། རྩ་བའི་བླ་མའི་སྐུ་གསུང་ཐུགས་ཀྱི་རྣམ་པ་འབའ་ཞིག་ལས་གཞན་དུ་གྱུར་པ་ཅུང་ཟད་མེད་ལ། ཁྱད་པར་རྫོགས་པའི་རིམ་པ་མཐར་ཐུག་པ་ནི། ཆོས་ཉིད་རྣམ་པར་མི་རྟོག་པའི་ཡེ་ཤེས་ལ་རྣལ་འབྱོར་དུ་བྱེད་པ་སྟེ། དེ་ནི་རྟོགས་པ་དང་ལྡན་པའི་བླ་མའི་ཐུགས་ཀྱི་ངོ་བོ་ཉིད་ཡིན་པས་བླ་མ་དང་ཐུགས་ཡིད་འདྲེས་པ་ལས་རྟོགས་པའི་ཡོན་ཏན་རྒྱུད་ལ་སྐྱེ་བ་ཡིན། གཞན་ཡང་ལྷ་གྲུབ་ནས་འདི་ཕྱི་ཡི་བར་དོར་ཞལ་མཇལ་བ་དང་གསུང་ཐོས་པ་སོགས་ཀྱང་བླ་མའི་ཐུགས་རྗེ་དང་རང་གི་དད་མོས་ཀྱི་རྒྱུ་ལས་དེ་དང་དེར་སྣང་བ་ཙམ་ལས་གཞན་དུ་རང་མཚན་པར་གྲུབ་པ་རྡུལ་ཙམ་ཡང་མེད། དེ་ལྟར་མ་ཤེས་པར། དབང་དང་མན་ངག་ངོ་སྤྲོད་སོགས་ཐབས་ཙམ་ཞིག་བླ་མ་ལས་ནོས་ནས། བྱིན་རླབས་དང་དངོས་གྲུབ་སོགས་དངོས་ནི་བླ་མ་ལས་ལྷག་པའི་ཡི་དམ་མམ་མཁའ་འགྲོ་སོགས་གཞན་ཞིག་ལས་ལེན་པར་སེམས་པ་ནི་དངོས་གྲུབ་སྒྲུབ་པའི་གེགས་ཆེ་ཤོས་ཡིན་པར་གསར་རྙིང་གི་རྡོ་རྗེ་འཛིན་པ་ཆེན་པོ་རྣམས་ཀྱིས་ཡང་ཡང་གསུངས་པ་ཡིན་ལ། ཧེ་བཛྲ་ལས་ཀྱང་། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དོ། །བླ་མའི་དུས་ཐབས་བསྟན་པ་དང་། །བདག་གི་བསོད་ནམས་ལས་ཤེས་བྱ། །ཞེས་དང་། ཀླུ་སྒྲུབ་ཀྱིས་མཛད་པའི་རིམ་ལྔ་ལས། རི་དབང་རྩེ་ནས་འགའ་ཞིག་ལྷུང་གྱུར་ན། །ལྷུང་བར་མི་བྱ་སྙམ་དུ་ལྷུང་བར་འགྱུར། །བླ་མའི་དྲིན་གྱིས་ཕན་པའི་ལུང་ཐོབ་ན། །གྲོལ་བར་མི་འདོད་ཀྱང་ནི་གྲོལ་བར་འགྱུར། །ཞེས་དང་། དཔལ་ས་ར་ཧས། བླ་མས་སྨྲས་པ་གང་གི་སྙིང་ཞུགས་པ། །ལག་པའི་མཐིལ་ན་གནས་པའི་གཏེར་དང་འདྲ། །ཞེས་དང་། ཨིནྡྲ་བྷུ་ཏིའི་ཡེ་ཤེས་གྲུབ་པ་ལས། སྐྱ་བ་འཛིན་པ་མེད་པར་ནི། །གྲུ་ཡིས་ཕ་རོལ་སྒྲོལ་མི་འགྱུར། །ཡོན་ཏན་ཐམས་ཅད་རབ་རྫོགས་ཀྱང་། །བླ་མ་མེད་པར་སྲིད་མཐར་མིན། །ཞེས་དང་། ལམ་ཟབ་ལས། ཉི་མའི་དཀྱིལ་འཁོར་རབ་ཚ་ཡང་། །མེ་ཤེལ་མེད་པར་མེ་མི་འབྱུང་། །དེ་བཞིན་སངས་རྒྱས་བྱིན་རླབས་ཀྱང་། །བླ་མ་མེད་པར་འབྱུང་མི་སྲིད། །ཅེས་དང་། དམ་ཚིག་མཆོག་གི་རྒྱུད་ལས། དངོས་གྲུབ་འདོད་པའི་དད་པ་ཅན། །མོས་གུས་བླ་མ་མཉེས་ལས་བྱུང་། །དེས་ནི་ཉོན་མོངས་ཉེ་ཉོན་མོངས། །ཉེས་པ་ཐམས་ཅད་ཟད་པར་འགྱུར། །ཞེས་དང་། ལྕེ་བཙུན་ཆེན་པོའི་མགུར་ལས། བླ་མ་ལ་གདུང་བ་སྐྱེས་ཙ་ན། །ཉམས་དང་བྱིན་རླབས་སྐྱེ་བར་ངེས། །ཞེས་སོ། །སྒྲུབ་ཚུལ་ཡང་། སྤྱིར་ལམ་གྱི་ཐོག་མར་སྐྱབས་སུ་འགྲོ་བའི་ཚེ་ཚོགས་ཞིང་དུ་གསལ་བ་སོགས་ཕྱི་ལྟར་སྒྲུབ་པ་དང་། རྒྱུད་དག་པར་བྱ་བའི་སླད་དུ་སྤྱི་བོར་སངས་རྒྱས་ཐམས་ཅད་འདུས་པའི་བདག་ཉིད་དུ་བསྒོམ་པ་ནང་ལྟར་སྒྲུབ་པ་དང་། བྱིན་རླབས་ཅིག་ཆར་དུ་འཇུག་པའི་ཕྱིར་སྙིང་དབུས་སུ་བསྒོམ་པ་སོགས་གསང་བ་ལྟར་སྒྲུབ་པ་དང་། རང་ལུས་སུ་བསྒོམ་པའམ་དེ་བཞིན་བསྐྱེད་རིམ་བསྒོམ་པའི་ཚེའང་བླ་མ་ཡི་དམ་གྱི་རྣམ་པར་བཞེངས་པ་ཡང་གསང་ལྟར་སྒྲུབ་པ་ཞེས་རིག་འཛིན་འཇིགས་མེད་གླིང་པས་བཞེད་པ་དང་། མཐར་ཐུག་བླ་མ་དང་རང་སེམས་དབྱེར་མེད་དུ་རྟོགས་ནས་བསྒྲུབ་བྱ་སྒྲུབ་བྱེད་ལས་འདས་པ་དེ་ཁོ་ན་ཉིད་ཀྱི་སྒྲུབ་པ་སོགས་སྒྲུབ་ཚུལ་གྱི་དབྱེ་བ་མང་ཞིང་། བླ་མའི་རྣལ་འབྱོར་གྱི་སྐབས་འདིར་ཡང་། རྩ་བརྒྱུད་ཀྱི་བླ་མ་ཐོ་བརྩེགས་སུ་བསྒོམ་པ། ཁྲོམ་འ ཚོགས་སུ་བསྒོམ་པ་ཀུན་འདུས་ནོར་བུའི་ལུགས་སུ་བསྒོམ་པ་སོགས་མང་དུ་ཡོད་པ། རང་རང་གི་ཁྲིད་གཞུང་ལྟར་འཆད་པར་བྱ་བ་ཡིན་ལ། འདིར་རྡོར་སེམས་རྩ་ཁྲིད་ཀྱི་དགོངས་པ་ལྟར་ན། རྟེན་བསྐྱེད་པ། ཡན་ལག་བདུན་པ་འབུལ་བ། གསོལ་བ་གདབ་པ། དབང་བླང་བ། ཐུགས་ཡིད་བསྲེས་ཏེ་མཉམ་པར་བཞག་པ་དང་ལྔ་ལས། དང་པོ་ནི། རྩ་བའི་ཁྲིད་ཡིག་ལས། མདུན་མཁར་གང་ལ་གསོལ་བ་གདབ་བྱའི་ཡུལ་སྔར་གྱི་སྐྱབས་ཡུལ་བཞིན་དུ་གསལ་བཏབ། ཅེས་གསུངས་པས། ཤར་སྒོ་ཙམ་དུ་སྔར་གྱི་སྐྱབས་ཡུལ་ཉིད་མ་བསྡུས་པར་ཡོད་ན་དེ་ག་ལ་དམིགས་པ་གསལ་འདོན་ཙམ་བྱ། དེ་ལྟ་མིན་ན་གོང་དུ་སྐྱབས་འགྲོའི་སྐབས་སུ་བཤད་པ་ཉིད་འདིར་ཡང་བསྒོམ་པར་བྱ་བ་ཡིན་པས་དེ་ལྟར་ལེགས་པར་གསལ་གདབ། དེ་ཐམས་ཅད་ཀྱང་ཐུགས་རྗེ་ལ་བྲི་གང་དང་དགོངས་པ་ལ་མཐོ་དམན་མེད་པར་རྩ་བའི་བླ་མའི་ཐུགས་བདེ་སྟོང་གི་སྣང་ཆ་སྒྱུ་མ་ལྟ་བུའི་རོལ་པར་ཤར་བས། རང་གཞན་སེམས་ཅན་ཐམས་ཅད་ལ་བྱིན་གྱིས་རློབ་པའི་ཚུལ་དུ་གཟིགས་ཤིང་བྱིན་འཐིབས་སེ་སད་པར་བསྒོམ་པ་སྟེ། དེ་ཡང་རང་གི་རྩ་བའི་བླ་མ་ཉིད་སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཏེ། དཀོན་མཆོག་ཀུན་འདུས། སྐུ་བླ་མ། ཐུགས་ཡི་དམ། ཡོན་ཏན་ཕྲིན་ལས་མཁའ་འགྲོ་ཆོས་སྐྱོང་སྟེ་རྩ་གསུམ་ཀུན་འདུས། སྐུ་སྤྲུལ་སྐུ། གསུང་ལོངས་སྐུ། ཐུགས་ཆོས་སྐུ་དབྱེར་མེད་ངོ་བོ་ཉིད་སྐུ་སྟེ། སྐུ་བཞི་དབྱེར་མེད་ཀྱི་ངོ་བོར་ཤེས་པར་བྱ་སྟེ། གསང་རྒྱུད་ལས། རྡོ་རྗེ་སློབ་དཔོན་སྐུ་ཉིད་ལ། །བདེ་གཤེགས་རྒྱལ་བའི་སྐུ་རྣམས་རྫོགས། །བླ་མ་སངས་རྒྱས་བླ་མ་ཆོས། དེ་བཞིན་བླ་མ་དགེ་འདུན་ཏེ། །བླ་མ་དཔལ་ཆེན་ཧེ་རུ་ཀ །ཀུན་གྱི་རྒྱལ་པོ་བླ་མ་ཡིན། །ཞེས་དང་། དུས་འཁོར་འགྲེལ་ཆེན་དྲི་མེ་འོད་ལས། དུས་ཀྱི་འཁོར་ལོའི་རྒྱུད་སྟོན་པ་པོ་རྡོ་རྗེ་སློན་དཔོན་ནི། བཅོམ་ལྡན་འདས་འཇམ་དཔལ་ཇི་ལྟ་བ་དང་། དུས་ཀྱི་འཁོར་ལོ་དང་པོའི་སངས་རྒྱས་ཇི་ལྟ་བ་བཞིན་ཏུ་ཐར་པ་དོན་དུ་གཉེར་བ་རྣམས་ཀྱིས་བལྟ་བར་བྱའོ། །ཞེས་དང་། གསང་སྙིང་ལས་ཀྱང་། དབང་ཕྱུག་ལོངས་སྤྱོད་ལྔས་མཆོད་ན། །ཞེས་སོགས་བླ་མ་དཀྱིལ་འཁོར་གྱི་བདག་པོ་ཡིན་པས་དབང་ཕྱུག་གི་སྒྲས་བསྟན་པ་དང་། དེ་བཞིན་དུ་དཀྱིལ་འཁོར་གྱི་བདག་པོ་ཧེ་རུ་ཀའི་སྒྲ་བསྡུས་ཏེ་སྔ་འགྱུར་གྱི་གཞུང་རྙིང་པ་རྣམས་སུ་བླ་མ་ལ་རུ་ཞེས་གསུངས་པའི་དོན་ཡང་དེ་ཡིན་ལ། ཁ་ཅིག་གིས་གུ་རུའི་སྒྲ་བསྡུས་པ་ལ་བཞེད་པའང་ཡོད་དོ། །མཐུ་སྟོབས་དབང་ཕྱུག་བིརྦ་པས་ཀྱང་། བླ་མ་དང་ནི་རྡོ་རྗེ་སེམས། །ཐ་དད་པར་ནི་མི་བྱ་སྟེ། །བླ་མ་སང ས་རྒྱས་ཆོས་དང་ནི། །དེ་བཞིན་དགེ་འདུན་བླ་མ་སྟེ། །དངོས་གྲུབ་གོ་འཕང་མཆོག་འདོད་པས། །ཀུན་ནས་བླ་མ་མཉེས་པར་བྱ། །སངས་རྒྱས་ཀུན་དངོས་རྡོ་རྗེ་འཆང་། །རྩོད་པའི་དུས་འདིར་བདག་དོན་དུ། །ཀུན་དང་མཐུན་པར་སྟོན་མཛད་པ། །དེ་ལྟར་ཤེས་ནས་དངོས་ཀུན་གྱིས། །བསྟེན་བྱ་དུས་གསུམ་སངས་རྒྱས་ཀྱི། །དངོས་གྲུབ་བདེ་ཆེན་ཐོབ་པར་འགྱུར། །ཞེས་དང་། འབྲི་གུང་སྐྱོབ་པ་རིན་པོ་ཆེས། བླ་མ་སྐུ་བཞིའི་གངས་རི་ལ། །མོས་གུས་ཀྱི་ཉི་མ་མ་ཤར་ན། །བྱིན་རླབས་ཀྱི་ཆུ་རྒྱུན་མི་འབེབས་པས། །སེམས་མོས་གུས་འདི་ལ་ནན་ཏན་མཛོད། །ཅེས་དང་། བཅོམ་ལྡན་འདས་ཀྱིས་ཀྱང་། ཤཱ་རིའི་བུ། དོན་དམ་པ་ནི་དད་པས་རྟོགས་པར་བྱ་བ་ཡིན་ནོ། །ཞེས་གསུངས་པ་བཞིན་ནོ། །གཉིས་པ་ལ་བདུན་ལས། དང་པོ་ཕྱག་འཚལ་བ་ནི། ཐར་པ་ཆེན་པོར། པདྨ་ཁ་འབུས་བྱེ་འདྲ་བར། །ལག་གཉིས་སྤྱི་བོར་ཐལ་སྦྱར་ཏེ། །ལུས་དཔག་མེད་པའི་སྤྲིན་ཚོགས་ཀྱིས། །ཕྱོགས་བཅུའི་སངས་རྒྱས་ལ་ཕྱག་འཚལ། །ཞེས་གསུངས་པ་དང་ཚུལ་མཐུན་པར་ཀུན་མཁྱེན་བླ་མས་ཀྱང་། ཡིད་འོང་རྫིང་བུའི་ནང་ན་གནས་པ་ཡི། འཆར་ཀའི་པདྨ་ཁ་འབུས་བྱེ་འདྲ་བ། །ལག་གཉིས་སྤྱི་བོར་ཐལ་སྦྱར་བསྟོད་དབྱངས་བཅས། །ལུས་དཔག་མེད་པར་སྤྲུལ་ནས་གུས་ཕྱག་འཚལ། །ཞེས་གསུངས་པས་ཚོགས་ཞིང་ཁྱད་པར་ཅན་དེ་དག་གི་སྤྱན་སྔར་རང་གཞན་སེམས་ཅན་ཐམས་ཅད་ལུས་ཞིང་གི་རྡུལ་སྙེད་དུ་སྤྲུལ་ནས། ཆེ་བའི་ཡོན་ཏན་རྗེས་སུ་དྲན་པའི་བསྟོད་དབྱངས་དང་བཅས། མེ་ཏོག་པདྨ་དཀར་པོ་གསར་དུ་ཁ་འབུས་པ་དང་འདྲ་བར་ལག་གཉིས་ཐལ་མོ་སྦྱར་ཏེ། དེ་ཡང་སྤྱི་བོར་སྦྱར་བས་ལུས་སྒྲིབ་དག མགྲིན་པར་སྦྱར་བས་ངག་སྒྲིབ་དག སྙིང་གར་སྦྱར་བས་ཡིད་སྒྲིབ་དག དེ་ནས་ལུས་ཀྱི་མལ་ལྔ་ས་ལ་ཕབ་པ་ཞེས། དཔྲལ་བ་དང་གཅིག ལག་པའི་མཐིལ་གཉིས། པུས་མོ་གཉིས་དང་བཅས་ལྔ་པོ་ས་ལ་ཕབ་སྟེ་ཕྱག་བྱས་པས། རང་རྒྱུད་ཀྱི་ཉོན་མོངས་པ་དུག་ལྔའི་སྒྲིབ་པ་དགཚོགས་ཞིང་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་དབང་དང་བྱིན་རླབས་ཐོབ་པ་དང་། མཐར་ཐུག་སངས་རྒྱས་ཀྱི་དབུའི་གཙུག་ཏོར་བལྟར་མི་མངོན་པ་འགྲུབ་པར་བྱེད་པའི་ཕན་ཡོན་དང་དགོས་པ་ཡོད་པ་ཡིན། སྔོན་འགྲོ་གཞན་རྣམས་འབུམ་ཐེར་སོགས་གྲངས་བསགས་ན་ཕྱག་ཀྱང་དེའི་གྲངས་ངེས་པར་བསགས་དགོས་པས། དེང་སང་གི་ཕྱག་ལེན་ཁ་ཅིག་ཏུ་སྐྱབས་འགྲོའི་སྐབས་སུ་དེའི་འདོན་ཚིག་དང་སྦྲགས་པའི་ལུགས་ཀྱང་སྣང་བ་དོན་ལ་མི་འགལ་མོད། གཙོ་བོར་གཞུང་གི་དངོས་བསྟན་ནི་འདིའི་སྐབས་སུ་ཡིན་པས་འགྲུབ་ན་འདིར་ལེགས་པ་ཡིན་ནོ། །དེ་ལྟར་འཚལ་བའི་ཕན་ཡོན་ཀྱང་། ངལ་གསོར། ས་འདི་རིར་བཅས་རྒྱ་མཚོའི་རྡུལ་སྙེད་དུ། །བསོད་ནམས་དེ་འདྲ་འཇིག་རྟེན་གསུམ་ན་མེད། །ལུས་བཏུད་དབང་ཆེན་བར་གྱི་རྡུལ་རྣམས་དང་། །མཉམ་པའི་གྲངས་སྙེད་འཁོར་ལོས་སྒྱུར་འགྲོ་ཞིང་། །མཐར་ཐུག་ཞི་བ་མཆོག་གི་གོ་འཕང་ཐོབ། །ཅེས་གསུངས་ཏེ་གོང་དུ་བསྟན་པ་བཞིན་ནོ། །གཉིས་པ་མཆོད་པ་འབུལ་བ་ནི། དེ་ཉིད་ལས། དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །མཆོད་པ་བླ་མེད་རྒྱ་ཆེན་རྣམས་ཀྱིས་མཆོད། །ཅེས་གསུངས་པས། དངོས་སུ་ཅི་འབྱོར་པའི་མཆོད་པ་བཤམས་ཤིང་། ཡིད་ཀྱིས་ནམ་མཁའ་དང་ས་གཞི་ཐམས་ཅད་ལྷ་དང་མི་ཡི་མཆོད་རྗས་བདུག་སྤོས་མེ་ཏོག་མར་མེ་ལ་སོགས་པ་དང་། གཞལ་ཡས་ཁང་དང་ཡུལ་འཁོར་སོགས་བཀོད་པ་ཚད་མེད་པ་དང་། འཁོར་ལོ། ནོར་བུ། བཙུན་མོ། བློན་པོ། རྟ་མཆོག གླང་པོ། དམག་དཔོན་ཏེ་རྒྱལ་སྲིད་བདུན་དང་། གདུགས། གསེར་ཉ། བུམ་པ། པདྨ། དུང་དཀར། དཔལ་བེའུ། རྒྱལ་མཚན། འཁོར་ལོ་སྟེེ་བཀྲ་ཤིས་པའི་རྟགས་བརྒྱད། ཡུངས་ཀར། དཱུརྦ། བིལྦ། ལི་ཁྲི། ཞོ། འགིའུ་ཝཾ། མེ་ལོང་། དུང་གཡས་སུ་འཁྱིལ་བ་སྟེ་བཀྲ་ཤིས་པའི་རྫས་བརྒྱད། ལྷམ། སྟན། བཞོན་པ། མལ་ཆ། ཁྲི། རལ་གྲི། ཀླུའི་པགས་པ་སྟེ་ཉེ་བའི་རིན་ཆེན་བདུན་སོགས་དང་། ལྷ་དང་ལྷ་མོའི་ཁྱད་པར་མང་པོ་གླུ་གར་དང་རོལ་མོའི་སྤྲིན་ཕུང་འཕྲོ་བས་ཞིང་ཁམས་འདི་དང་ཞིང་གཞན་གྱི་བཀོད་པའི་མཆོག་ཐམས་ཅད་དང་། གསང་སྔགས་ནང་གི་དམ་རྫས་མཆོག་གི་མ་ད་ན་དང་རུ་རྡིར་སྣ་ཚོགས་པའི་བཟའ་བཅའ་ལྡག་མྱོང་ལ་སོགས་པ་ཟག་པ་མེད་པའི་འདོད་ཡོན་གྱི་རྣམ་པར་ཅིར་ཡང་འཆར་བ་འཕགས་པ་ཀུན་ཏུ་བཟང་པོའི་མཆོད་སྤྲིན་ལྟ་བུར་སྤྲུལ་ནས་འབུལ་བ་སྟེ། དེ་ཡང་བྱང་ཆུབ་སེམས་དཔའ་ཀུན་ཏུ་བཟང་པོའི་ཏིང་ངེ་འཛིན་གྱི་མཐུ་ལས། རང་གི་ཐུགས་ཀ་ནས་འོད་ཟེར་ཁ་དོག་མི་འདྲ་བ་བྱེ་བ་བརྒྱ་སྟོང་སངས་རྒྱས་ཀྱི་ཞིང་ཁམས་གྲངས་མེད་པའི་རྡུལ་དང་མཉམ་པར་སྤྲོས། འོད་ཟེར་དེ་རེ་རེའི་རྩེར་ཡང་བྱང་ཆུབ་སེམས་དཔའ་ཀུན་ཏུ་བཟང་པོ་རང་འདྲ་བ་རེ་རེ་སྤྲུལ། དེ་རེ་རེའི་ཐུགས་ཀ་ནས་སྔར་དང་འདྲ་བའི་འོད་ཟེར་སྤྲོ་ཞིང་། དེའི་རྩེར་ཀུན་ཏུ་བཟང་པོ་སྤྲུལ་པ་སོགས་གྲངས་མེད་བསམ་གྱིས་མི་ཁྱབ་པའི་བར་དུ་སྤྲོས་ཏེ། དེ་དག་རེ་རེས་ཀྱང་དཔག་ཏུ་མེད་པའི་མཆོད་རྫས་ཀྱི་རྣམ་གྲངས་བསམ་གྱིས་མི་ཁྱབ་པས་ཕྱོགས་བཅུའི་རྒྱལ་བ་སྲས་དང་བཅས་པ་ལ་མཆོད་པ་ནི་ཀུན་ཏུ་བཟང་པོའི་མཆོད་པའི་སྤྲིིན་ཕུང་ཞེས་བྱའོ། །ཚུལ་དེ་འདྲ་བ་རང་གི་བློས་ཅི་ལྕོགས་སུ་{ལྕོག་ཏུ་}སྤྲུལ་ནས་འབུལ་བའོ། །དེ་ལྟར་མཆོད་པའི་ཕན་ཡོན་ཡང་། དམ་ཆོས་པད་དཀར་ལས། བདེ་གཤེགས་རིང་བསྲེལ་ལ་ནི་ཅུང་ཟད་དང་། །སིལ་སྙན་གཅིག་བརྡུང་བ་ཡི་སྒྲ་ཕྱུང་ངམ། །མེ་ཏོག་གཅིག་ཙམ་གྱིས་ནི་མཆོད་པ་དང་། །བདེ་གཤེགས་སྐུ་གཟུགས་རྩིག་ངོས་བྲིས་པ་ལ། །འཁྲུགས་བཞིན་པ་ཡི་སེམས་ཀྱིས་མཆོད་ན་ཡང་། །དེ་དག་རིམ་གྱིས་སངས་རྒྱས་བྱེ་བ་མཐོང་། །ཞེས་སོགས་ཏེ་ཞིབ་པར་གོང་དུ་བསྟན་པ་བཞིན་ནོ། །གསུམ་པ་སྡིག་པ་བཤགས་པ་ནི། ཚོགས་ཞིང་ཁྱད་པར་ཅན་དེ་རྣམས་ཀྱི་སྤྱན་སྔར་ཐལ་མོ་སྦྱར་ཏེ་གནོང་ཞིང་འགྱོད་པས། དྲན་པ་དང་མི་དྲན་པའི་སྡིག་པ། ཚེ་རབས་ཐོག་མ་མེད་པ་ནས་དེ་རིང་ཡན་ཆད་ལ་བསགས་པ། ལུང་ངག་ཡིད་གསུམ་གྱི་སྒོ་ནས་ཕ་མ་དང་མཁན་པོ་དང་སློབ་དཔོན་དང་མཆེད་གྲོགས་དང་སྐྱེ་བོ་དམ་པ་གཞན་དག་ལ་མ་གུས་པ་བྱས་པ། སྡིག་པ་མི་དགེ་བ་བཅུ། མཚམས་མེད་པ་ལྔ་། དེ་དང་ཉེ་བ་ལྔ། དཀོན་མཆོག་གི་དཀོར་ལ་འབགས་པ། སེར་སྣ་དང་འཇུར་གེགས་བྱས་པ་ལ་སོགས་པ་དང་། ཁྱད་པར་བླ་མ་རྡོ་རྗེ་འཛིན་པ་ལ་ཐ་མལ་མི་རུ་བཟུང་བའི་དབང་གིས་སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་དང་འགལ་བ་དང་། ཉམས་པ་དང་འདྲེས་ཤིང་ཉམས་པའི་སྐྱོན་ཆགས་པ་ལ་སོགས་པ་མདོར་ན་མཆོག་དང་ཐུན་མོང་གི་དངོས་གྲུབ་སྒྲུབ་པ་ལ་བར་དུ་གཅོད་པའི་སྒོར་གྱུར་པའི་བཅས་པ་དང་རང་བཞིན་གྱི་ཁ་ན་མ་ཐོ་བ་ཐམས་ཅད་ལྕེ་ཐོག་ཏུ་ནག་ཕུང་གིས་འདུས་པར་བསམ་ནས་བཤགས་པས། སྐད་ཅིག་དེ་ཉིད་ལ་རྟེན་ཚོགས་ཞིང་རྣམས་ཀྱི་སྐུ་གསུང་ཐུགས་ལས་འོད་དཀར་པོ་བྱུང་བ་ཕོག་པའི་རྐྱེན་གྱིས་སངས་ཀྱིས་དག་པར་བསམས་ལ། ཕྱིས་མི་བྱེད་པར་གཉེན་པོས་བསྡོམ་ཞིང་བཤགས་པའི་ཚིག་བརྗོད་པར་བྱ་བའོ། །ཕན་ཡོན་ནི། འབུམ་པ་ལས། གང་ཞིག་དྲན་པའི་མོད་ལས་ནི། །སྡིག་རྣམས་དྲན་ནས་འགྱོད་པ་ཡིས། །བཤགས་པས་ཐསས་ཅད་འཛད་པ་སྟེ། །རྒྱལ་བའི་སྲས་པོ་ཕྱིས་སྡོམས་ཤིག །ཅེས་གསུངས་ཏེ་ཞིབ་པར་གོང་དུ་སྨོས་པ་བཞིན་ནོ། །བཞི་པ་རྗེས་སུ་ཡི་རང་བ་ནི། ཕྱོགས་བཅུ་དུས་བཞིའི་རྒྱལ་བ་རྣམས་ཀྱིས་གཞན་དོན་དུ་ཆོས་ཀྱི་འཁོར་ལོ་བསྐོར་བ་ལ་སོགས་པའི་དགེ་བ། བྱང་ཆུབ་སེམས་དཔའ་རྣམས་ཀྱིས་བྱང་ཆུབ་ཀྱི་སྤྱོད་པ་རླབས་{བརླབ}པོ་ཆེ་སྤྱད་པའི་དགེ་བ། འཕགས་པ་ཉན་ཐོས་དང་རང་སངས་རྒྱས་རྣམས་ཀྱི་ཤེས་རབ་དང་རྣམ་པར་གྲོལ་བའི་ཕུང་པོ། སེམས་ཅན་ཐམས་ཅད་ཀྱིས་བསོད་ནམས་དང་ཐར་པ་ཆ་མཐུན་གྱི་དགེ་བ་བསྐྲུན་པ། རང་གིས་སྔར་བྱས་པ། ད་ལྟ་བྱེད་བཞིན་པ། སླད་ཀྱིས་བྱེད་པར་ངེས་པ་ཐམས་ཅད་ལ་རྗེས་སུ་ཡི་རང་བ་སྙིང་ཐག་པ་ནས་དུང་དུང་བསྒོམ་པ་སྟེ། དེའི་ཕན་ཡོན་ཀྱང་། སྡུད་པ་ལས། སེམས་བསྐྱེད་པ་ལ་བསམ་པ་དག་པས་ཡི་རང་བ། །སྟོང་གསུམ་རི་རབ་སྲང་ལ་གཞལ་བས་ཚད་བཟུང་རུང་། །རྗེས་སུ་ཡི་རང་དགེ་བ་དེ་ནི་དེ་ལྟ་མིན། །ནོར་བུ་འཆིང་བུའི་ཕུང་པོ་ཆེན་པོར་གྱུར་པ་ཡང་། །རིན་ཆེན་བཻཌཱུཪྱ་གཅིག་དེ་ཀུན་ཟིལ་གྱིས་གནོན། །དེ་བཞིན་འགྲོ་ཀུན་སྦྱིན་སོགས་ཕུང་པོ་རྒྱ་ཆེན་ཀུན། །རྗེས་སུ་ཡི་རང་བྱང་སེམས་གཅིག་གི་ཟིལ་གྱིས་གནོན། །ཞེས་སོ། །ལྔ་པ་ཆོས་ཀྱི་འཁོར་ལོ་བསྐོར་བར་བསྐུལ་བ་ནི། སངས་རྒྱས་དང་བྱང་ཆུབ་སེམས་དཔའ་བླ་མ་དགེ་བའི་བཤེས་གཉེན་ཆེན་པོ་གཞན་དོན་རླབས་པོ་ཆེ་ལ་གཤེགས་པ་རྣམས་ལས། ཞུ་བ་པོ་གཞན་ལ་དགོངས་པའམ། འཁོར་གྱི་ལོག་སྒྲུབ་དང་སྐྱོ་ངལ་གྱིས་ཐུགས་སུན་ནས་ཆོས་མི་གསུང་བར་བཞུགས་པ་རྣམས་ཀྱི་དྲུང་དུ་སྔོན་ཚངས་པ་དང་བརྒྱ་བྱིན་གྱིས་ཞུ་བ་ཕུལ་བ་ལྟར། བདག་ཀྱང་ལུས་བྱེ་བ་མང་པོར་སྤྲུལ་ཏེ་མདུན་ན་མངོན་སུམ་དུ་སྣང་བར་བྱས་ཏེ། དུང་དཀར་པོ་གཡས་སུ་འཁྱིལ་བ་དང་། གསེར་གྱི་འཁོར་ལོ་རྩིབས་སྟོང་པ་སོགས་ཕུལ་ནས་ཆོས་ཀྱི་འཁོར་ལོ་བསྐོར་བར་ཞུས་པས་ཐམས་ཅད་ཀྱང་དགྱེས་པས་ཞལ་གྱིས་བཞེས་ཏེ་གདུལ་བྱའི་བསམ་པ་དང་མཐུན་པར་དུས་རྟག་པ་རྒྱུན་གྱི་འཁོར་ལོར་ཆོས་ཀྱི་འཁོར་ལོ་བསྐོར་བར་མོས་པ་སྟེ། ཕན་ཡོན་ཀྱང་ཆོས་སྤངས་པའི་སྒྲིབ་པ་འདག་ཅིང་། ཚེ་རབས་ནས་ཚེ་རབས་ཐམས་ཅད་དུ་དམ་པའི་ཆོས་རྒྱུད་ལ་འཛིན་པ་དང་མི་འབྲལ་བར་འགྱུར་བ་སོགས་མཐའ་ཡས་ཏེ། གཙུག་ན་རིན་ཆེན་གྱིས་ཞུས་པའི་མདོ་ལས། རྒྱལ་བས་དགོངས་པ་མཛད་པ་ལ། །གང་ཞིག་གསོལ་བ་འདེབས་པ་དེ། །དབང་གི་རྒྱལ་པོ་ལྟ་བུ་སྟེ། །བསོད་ནམས་གཞན་དག་འཆིང་བུ་འདྲ། །ཞེས་སོ། །དྲུག་པ་མྱ་ངན་ལས་མི་འདའ་བར་གསོལ་བ་གདབ་པ་ནི། ཞིང་ཁམས་འདི་དག་གཞན་དག་ན་བླ་མ་དང་སངས་རྒྱས་བྱང་སེམས་གང་དག་སེམས་ཅན་གྱི་དོན་མཛད་ཟིན་ནས་གཟུགས་སྐུ་མྱ་ངན་ལས་འདའ་བར་དགོངས་པ་རྣམས་ཀྱི་མདུན་དུ། སྔོན་དགེ་བསྙེན་ཙུནྡས་བཅོམ་ལྡན་འདས་ལ་གསོལ་བ་བཏབ་པ་ལྟར་བདག་གི་ལུས་མང་པོར་སྤྲུལ་པ་དག་གིས་གསོལ་བ་བཏབ་པས། འཁོར་བ་མ་སྟོངས་ཀྱི་བར་དུ་བཞུགས་ནས་སེམས་ཅན་གྱི་དོན་རྒྱ་ཆེན་པོ་མཛད་པར་མོས་པ་སྟེ། དེས་ནི་ཚེ་ཐུང་བ་དང་། དུས་མ་ཡིན་པར་འཆི་བ་དང་། གཞན་གྱི་སྲོག་ལ་འཚེ་བའི་སྡིག་པ་འབྱང་ཞིང་། ཚེ་དཔག་ཏུ་མེད་པ་ཐུབ་པར་འགྱུར་བ་སོགས་ཕན་ཡོན་མཐའ་ཡས་ཏེ། ཚངས་པ་ཁྱད་པར་སེམས་ཀྱིས་ཞུས་པའི་མདོ་ལས། ཉོན་ཅིག་ཚངས་པའི་རྒྱལ་པོ་ཁྱོད། །བཅོམ་ལྡན་འདས་ལ་གསོལ་འདེབས་པ། །བསོད་ནམས་དེ་ནི་ཁྱད་པར་འཕགས། །སངས་རྒྱས་མྱ་ངན་ཡོངས་མི་འདའ། །ཞེས་སོ། །བདུན་པ་བསྔོ་བ་ནི། ཕྱག་འཚལ་བ་ནས་བཟུང་སྟེ། མྱ་ངན་ལས་མི་འདའ་བར་གསོལ་བ་གདབ་པའི་བར་གྱི། ད་ལྟར་བྱས་པའི་དགེ་བའི་རྩ་བ་འདིས་མཚོན་ཏེ། རང་གཞན་སེམས་ཅན་ཐམས་ཅད་ཀྱིས་དུས་གསུམ་དང་འབྲེལ་བར་བསགས་པའི་དགེ་བ་ཐམས་ཅད་བདག་གཞན་སེམས་ཅད་ཐམས་ཅད་ཀྱི་དོན་དུ་རྗེ་བཙུན་འཇམ་པའི་དབྱངས་དང་འཕགས་པ་ཀུན་ཏུ་བཟང་པོས་ཡོངས་སུ་བསྔོ་བ་ཇི་ལྟ་བར་དམིགས་པ་མེད་པའི་ཤེས་རབ་ཀྱིས་རྒྱས་འདེབས་པ་དང་བཅས་རྫོགས་པའི་སངས་རྒྱས་ཀྱི་སར་བསྔོ་བ་སྟེ། ཕན་ཡོན་གྱི་ཁྱད་པར་ཡང་། བློ་གྲོས་རྒྱ་མཚོས་ཞུས་པའི་མདོ་ལས། ཇི་ལྟར་རྒྱ་མཚོ་ཆེ་ནང་ཆུ་ཐིགས་ལྷུང་། །རྒྱ་མཚོ་མ་ཟད་བར་དུ་དེ་མི་འཛད། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་གསུངས་ཏེ་ཞིབ་པར་གོང་དུ་བསྟན་པ་བཞིན་ནོ། །དེ་ལྟར་ངེས་པར་བྱས་ནས་ཚུལ་དེ་ལྟ་བུའི་དམིགས་གནད་དང་སྦྲགས་ཏེ{སྦྲག་སྟེ}། བླ་མ་དཔལ་ལྡན་རྡོ་རྗེ་སེམས༔ སོགས་ཅི་ནུས་སུ་ངག་ཏུ་བརྗོད་པར་བྱའོ། །དེ་ལྟ་བུའི་ཡན་ལག་བདུན་པ་སྤྱིའི་ཕན་ཡོན་ཡང་། དཔལ་སྦས་ཀྱིས་ཞུས་པའི་མདོ་ལས། གང་གིས་ཕྱོགས་བཅུའི་སངས་རྒྱས་ལ། །དམིགས་ནས་ཐལ་མོ་སྦྱར་བྱས་ཏེ། །ཕྱག་འཚལ་དེ་བཞིན་མཆོད་བྱེད་དམ། །བསོད་ནམས་དག་ལ་ཡི་རང་ཞིང་། །སྡིག་པ་དག་ཀྱང་འཆགས་པར་བགྱིད། །བསྐུལ་དང་གསོལ་བ་འདེབས་གྱུར་པ། །དེ་ཡི་བསོད་ནམས་ཕུང་པོ་ནི། །ནམ་མཁའ་གང་བར་རྟག་ཏུ་འབྱུང་། །ཞེས་གསུངས་པ་ཡིན་ནོ། །གསུམ་པ་གསོལ་བ་གདབ་པ་ནི། བླ་མ་ཉིད་སངས་རྒྱས་ཀུན་འདུས་སུ་ཡང་ཡང་སྒྲོ་འདོགས་ཆོད་པས་གཅིག་ཆོག་རྒྱལ་པོར་ངེས་པ་གཏིང་ཚུགས་པའི་ཡོན་ཏན་དང་། བཀའ་དྲིན་རྗེས་སུ་དྲན་པས་ཅི་བྱེད་ཁྱེད་ཤེས་ཀྱི་རེ་ལྟོས་ལིང་གིས་སྐྱུར་ལ་གདུང་ཤུགས་དྲག་པོས་ངག་ཏུ། ཁྱབ་བདག་དང་པོའི་མགོན་པོ་ཀུན་ཏུ་བཟང་། །ཞེས་སོགས་ཀྱིས་བརྒྱུད་པའི་གསོལ་འདེབས་བྱ་སྟེ། དེ་ཡང་ཀུན་མཁྱེན་སྒྲོལ་མགོན་ཞབས་ཀྱིས། རྩ་བའི་བླ་མ་དེ་ཉིད། དངོས་པོ་ལ་སུ་གང་ཡིན་རུང་། སོ་སོའི་སྐྱེ་བོའམ། འཕགས་པ་སློབ་པ་ལྟ་བུ་དང་། དགེ་བའི་བཤེས་གཉེན་ཕལ་པ་སོགས་སུ་བལྟ་བ་མ་ཡིན། སངས་རྒྱས་དངོས་སུ་བསྒོམ་དགོས། དོན་ལ་སངས་རྒྱས་གཅིག་དང་མང་པོ་ལ་ཁྱད་མེད་ཀྱང་། མོས་གུས་འཇུག་ཚུལ་ལ་ཁྱད་ཡོད་པས། སངས་རྒྱས་གཅིག་གམ་གཉིས་ལྟ་བུ་མ་ཡིན། ཕྱོགས་བཅུ་དུས་གསུམ་གྱི་སངས་རྒྱས་ཀུན་འདུས་པའི་ངོ་བོ་ཡིན། དེའི་ཕྱིར་ཆོས་དང་དགེ་འདུན་ཀུན་ཀྱང་འདུས། དེ་བས་ན་བདག་གི་བླ་མ་འདི་དངོས་གནས་ལ་དཀོན་མཆོག་ཀུན་འདུས། བླ་མ་ཉིད་དཀོན་མཆོག་གསུམ། དཀོན་མཆོག་གསུམ་ཉིད་བླ་མ་ཡིན། རང་རེའི་སྣང་ངོ་དང་བསྟུན་ན། དཀོན་མཆོག་གསུམ་བས་ཀྱང་བླ་མ་བཀའ་དྲིན་ཆེ། ཕྱོགས་བཅུའི་སངས་རྒྱས་རྣམས་སྤྱིར་བཏང་བཟང་སྟེ། བདག་ལ་ཞལ་མི་སྟོན། གསུང་མི་འབྱོན། སངས་རྒྱས་དང་ཡི་དམ་དང་བྱང་སེམས་དང་མཁའ་འགྲོ་ཆོས་སྐྱོང་སོགས་དངོས་སུ་བྱོན་ཀྱང་རུང་། བདག་ལ་དཔལ་ལྡན་བླ་མས་མཛད་པ་ལས་ལྷག་པོ་མཛད་རྒྱུ་དང་སྟོན་རྒྱུ་མེད། དེ་དག་དངོས་སུ་མཇལ་བའི་སྐལ་བ་མེད་དུས་འདིར། དེ་རྣམས་ཀྱི་མཛད་རྒྱུ་ཐམས་ཅད་བླ་མས་མཛད་པ་ཡིན་བཀའ་དྲིན་རང་ཆེའོ་སྙམ། བླ་མ་སངས་རྒྱས་ཀུན་འདུས་སུ་ཤེས་ནས་ཡོན་ཏན་མཐའ་མེད་པའི་དད་པ་དང་། བཀའ་དྲིན་ཤིན་ཏུ་ཆེ་བར་ཤེས་པ་གཉིས་འཛོམས་ན་མོས་གུས་ཀྱི་ངོ་བོ་གོ་ལུགས་བཟང་བ་ཡིན། གོ་ཡུལ་བཟང་པོ་དེ་འདྲ་གཅིག་ཡོད་པའི་ལུགས་བྱས་ཀྱང་། སྐབས་སྐབས་སུ་མིན་པ་བླ་མ་མི་དྲན་པར་བརྗེད། ལན་རེ་དྲན་པའི་སྐབས་ཀྱང་བ་སྤུ་གཡོ་ནུས་པའི་གདུང་ཤུགས་མི་འབྱུང་ན། གོ་བ་ཙམ་ལ་ལུས་པ་ཡིན། ཉམས་རྟོགས་འཕྲལ་མར་སྐྱེད་ཐུབ་པ་དེ་མིན། གདུང་ཤུགས་དྲག་པོ་ཐ་མལ་གྱི་སྣང་བ་འགོག་ནུས་པ། རིག་པ་བསྒྱུར་ཐུབ་པ་ཞིག་བྱུང་ན། བྱིན་རླབས་འཕྲལ་དུ་འཇུག ཉོན་མོངས་པ་གློ་བུར་དུ་འགག ཡེ་ཤེས་སྐད་ཅིག་གིས་འབེབས། དེ་ལྟ་བུ་ཡང་ཡང་དྲན་པས་རྟག་ཏུ་སྒོམ་པར་འགྲོ། གོམས་པ་ལས་སྐྱོན་ཐམས་ཅད་སྤོང་ཞིང་ཡོན་ཏན་ཐམས་ཅད་སྐྱེ་བ་ཡིན། སངས་རྒྱས་དངོས་སུ་མཐོང་བ་མེད་ན། ཕྱོགས་ཞེན་དང་ཕོ་རུས་དང་། ཡིད་འོང་གི་གདུང་ཤུགས་ཡོད་ཀྱང་། ཟག་བཅས་འཇིག་རྟེན་པའི་རྣམ་རྟོག་ཡིན་པས་གྲོལ་མི་ཐུབ། དགེ་བཤེས་ཕལ་པ་དང་གྲུབ་ཐོབ་ཕལ་པར་བརྩི་བའི་དད་པ་ཡང་རྣམ་རྟོག་འཇིག་རྟེན་པ་དེ་ཀ་ཡིན། སྐྱེ་བོ་བླུན་པོས་བླ་མ་སངས་རྒྱས་ཟེར་བ་གཅིག་ཡོད་དེ། དེ་ཡང་མི་ཇོ་བཟང་གཅིག་གམ། ཟས་ནོར་གྱིས་ཕན་འདོགས་བྱེད་པ་ཅིག་ལ་སངས་རྒྱས་ཟེར་རམ། སངས་རྒྱས་སངས་རྒྱས་ཞེས་པའི་ཚིག་ཙམ་མིན་པ་བློ་རྩེ་གཏད་མཚམས་ཅི་ཡང་མེད། དེ་འདྲས་སེམས་རྒྱུད་གྲོལ་བ་ལ་ཕན་པ་ཅི་ཡང་མེད། དེས་ན་སངས་རྒྱས་ཀྱི་ཡོན་ཏན་ཤེས་ནས། དེ་ཉིད་བླ་མ་ལ་ཚང་བའི་མོས་གུས་དགོས་པ་ཡིན། དེ་ལྟར་བླ་མ་སངས་རྒྱས་སུ་ཤེས་པ་དེ། དམིགས་ཡུལ་འཇིག་རྟེན་ལས་འདས་པའི་མཆོག་སངས་རྒྱས་ལ་དམིགས་པ་ཡིན་པས་ལམ་སྒོམ་པ་ཐམས་ཅད་ཀྱི་སྙིང་པོ་ཡིན། སྤྱིར་སངས་རྒྱས་ཐམས་ཅད་ཀྱི་བྱིན་རླབས་འཇུག སྒོས་སུ་རང་རེའི་བླ་མ་དེ་ལ་ཞུས་པའི་ཡི་དམ་རྣམས་ཀྱི་བྱིན་རླབས་འཕྲལ་རང་ལ་མྱུར་དུ་འཇུག བཀའ་དྲིན་དྲན་པ་མེད་ན། སྤྱིར་བྱས་པ་མི་གཟོ་ཞིང་། ངོ་ཚ་ཁྲེལ་མེད་དེ་བྱུར་ཆགས་ཉེས་པ་ཐམས་ཅད་ཀྱི་རྩ་བ་ཡིན། བསོད་ནམས་དང་དཔལ་དང་གཡང་དང་ལེགས་པ་ཐམས་ཅད་ཕྱགས་མས་བཏབ་པ་བཞིན་ཉམས་འགྲོ། སྒོས་སུ་ཆོས་ཐོབ་པ་དྲིན་དུ་མི་སེམས་པ་དེ། ཆོས་ལ་ཡང་རྩིས་མེད་དད་པ་མེད་པ་ཡིན་པས། འབད་པ་བྱས་ཚད་དོན་མེད་དུ་འགྱུར། ཡང་སྒོས་སུ་རྩ་ལྟུང་དང་པོའི་ཞད་ཀྱིས་གོས་པ་ཡིན་ལ། བཀའ་དྲིན་དྲན་པས་དགེ་ལེགས་ཐམས་ཅད་ཀྱི་གཞིར་འགྱུར་ཞིང་། གུས་པ་ཆེན་པོ་རང་ཤུགས་ཀྱིས་སྐྱེ་བ་ཡིན་ནོ། དེ་ལྟར་ན་སངས་རྒྱས་སུ་ཤེས་པ། བཀའ་དྲིན་དྲན་པ། གདུང་ཤུགས་དྲག་པ། ཡང་ཡང་མ་བརྗེད་པ་དྲན་པ་སྟེ་ཁྱད་པར་བཞི་དང་ལྡན་པའི་མོས་གུས་ཡོད་ན་མོས་གུས་ཚད་དུ་ཕྱིན་པ་ཞེས་བྱ། དེས་ན་རྡོ་རྗེ་སློབ་དཔོན་མཚན་ཉིད་དང་ལྡན་པ་ལ། སློབ་མ་དམ་ཚིག་དང་ལྡན་པས་མོས་གུས་དེ་ལྟ་བུའི་སྒོ་ནས་བླ་མ་བསྒོམས་ཤིང་གསོལ་བ་བཏབ་ན། ཐབས་གཞན་མེད་ཀྱང་། མཆོག་ཐུན་མོང་གི་འདོད་དོན་ཐམས་ཅད་འགྲུབ་པར་འགྱུར་བ་ཡིན་ནོ། །ཞེས་གསུངས་པ་འདི་མན་ངག་གི་གནད་དུ་ཆེ་བར་གོ་ལ། གཞན་ཡང་འཇམ་མགོན་ས་སྐྱ་པཎ་ཆེན་ལ། སྒོམ་ཆེན་ཞིག་གིས། མཆོག་གི་དངོས་གྲུབ་བླ་མ་དང་ཡི་དམ་གང་ལས་ཐོབ་ཞུས་པས། དེ་གཉིས་སོ་སོར་ཕྱེ་བ་ལས་མི་འབྱུང་། བླ་མ་དང་ཡི་དམ་དང་དུས་གསུམ་གྱི་སངས་རྒྱས་དང་། རང་གི་སེམས་དང་། འཁོར་འདས་ཐམས་ཅད་དབྱེར་མེད་དུ་རྟོགས་པ་ལས་འབྱུང་བ་ཡིན་གསུངས། མདོར་ན་གོང་དུ་བསྟན་པ་བཞིན་ཡོན་ཏན་དང་བཀའ་དྲིན་དྲན་པ། སངས་རྒྱས་སུ་བལྟ་བའི་ཚུལ་རྣམས་ཡང་དང་ཡང་དུ་རང་གི་རྒྱུད་ལ་འདྲིས་ཤིང་གོམས་པར་བྱས་ཏེ་བླ་མ་སངས་རྒྱས་ཆོས་སྐུར་ཐག་ཆོད་པའི་མོས་གུས་དང་མ་བྲལ་བར་བྱའོ། །སྔོན་འགྲོ་གཞན་འབུམ་ཐེར་སོགས་གྲངས་བསགས་པ་ཡིན་ན། གསོལ་འདེབས་འདི་ཡང་འབུམ་ཕྲག་ལོངས་{ལང}པ་སོགས་དགོས་པས། དེ་ཚེ་གསོལ་འདེབས་ཀྱི་ཚིགས་སྣ་ཅུང་མང་བས་ལྕོགས་དཀའ་ན། ཐོག་མར་བརྒྱུད་འདེབས་ཅི་ནུས་དང་། དེ་ནས་བླ་མ་ཉིད་ཀུན་འདུས་ནོར་བུའི་ལུགས་སུ་མོས་པས་གུ་རུའི་གསོལ་འདེབས་ཐམས་ཅད་ཀྱི་རྒྱལ་པོ་ཚིག་བདུན་གསོལ་འདེབས་ཉིད་ལ་གྲངས་བསགས་པས་ཆོག་པར་རྡོ་རྗེ་འཆང་མཁྱེན་བརྩེའི་དབང་པོའི་ཞལ་ནས་ཁོ་བོས་ཐོས་པ་ལགས་སོ། །འདི་ལ་བླ་མ་རྡོ་རྗེ་སེམས་དཔར་བསྒོམ་ནས་གསོལ་བ་ཨོ་རྒྱན་རིན་པོ་ཆེར་འདེབས་པ་མི་འགལ་ལམ་སྙམ་ན་མི་འགལ་སྟེ། རྒྱལ་བ་ཐམས་ཅད་ཡེ་ཤེས་ཀྱི་ཀློང་དུ་ངོ་བོ་གཅིག་པའི་ཕྱིར། གདུལ་བྱའི་དབང་དུ་ཇི་ལྟར་སྣང་ཡང་རྒྱུད་ཐ་དད་དུ་གྲུབ་པ་ཅུང་ཟད་ཀྱང་མེད་པས། རྡོ་རྗེ་སེམས་དཔའ་ཨོ་རྒྱན་ཆེན་པོ་ཡིན་ལ། ཨོ་རྒྱན་ཆེན་པོ་ཡང་རྡོ་རྗེ་སེམས་དཔའ་ཉིད་ཡིན་པའི་ཕྱིར་རོ། །དེར་མ་ཟད་གདུལ་བྱའི་དབང་གིས་རབ་འབྱམས་རྩ་བ་གསུམ་གྱི་ལྷ་ཞི་བ་དང་ཁྲོ་བོའི་རྣམ་འགྱུར་ཇི་སྙེད་པར་བསྟན་པ་དེ་ཐམས་ཅད་ཀྱང་རྩ་བའི་བླ་མའི་ཐུགས་བདེ་སྟོང་གི་སྣང་ཆ་ཡེ་ཤེས་གཅིག་གི་རོལ་པ་ཡིན་པའི་ཕྱིར་རང་གི་རྩ་བའི་ཡི་དམ་རྡོར་སེམས་ལྟ་བུ་གཅིག་ལ། སྔོན་འགྲོ་དང་བསྙེན་སྒྲུབ་སོགས་དངོས་གཞིའི་ཉམས་ལེན་མཐར་ཕྱིན་པ་ཞིག་ཐོན་ན་གཞན་རྣམས་ལའང་དོན་གྱིས་གྲུབ་པ་ཡིན་ཏེ། བཀྲ་ཤིས་རིག་པ་ཁུ་བྱུག་གི་རྒྱུད་ལས། ཆོས་སྐུ་རོ་གཅིག་འགྲོ་དོན་བྱེད་མཉམ་སྟེ། །མོས་པའི་བློ་ལ་སོ་སོར་ཉིད་དུ་གསལ། །ཡེ་ཤེས་དབྱིངས་སུ་ཕྱག་རྒྱ་ཀུན་གཅིག་ཕྱིར། །བདེ་གཤེགས་གཅིག་བསྒོམ་རྒྱལ་བ་ཀུན་གྱི་ངང་། །ཞེས་གསུངས་པ་བཞིན་ཤེས་པར་བྱའོ། །བཞི་པ་དབང་བླང་བ་ནི། དེ་ལྟར་ཡང་ཡང་གསོལ་བ་གདབ་རྗེས། རྩ་བའི་བླ་མའི་སྐུ་ལས་འཕྲོས་པའི་འོད་ཟེར་གྱིས་རེག་པས། བརྒྱུད་པའི་བླ་མ་རྣམས་དང་དཀོན་མཆོག་གསུམ་སོགས་འཁོར་རྣམས་འོད་དུ་ཞུ་ནས་རིམ་བཞིན་རྩ་བའི་བླ་མའི་སྐུ་ལ་བསྡུས། རྩ་བའི་བླ་མ་ཉིད་སྐྱབས་གནས་ཀུན་ཀྱི་ངོ་བོ་སྔར་ལས་ཀྱང་གཟི་མདངས་ཆེར་འབར་ཏེ་མཚུངས་པ་མེད་པའི་སྐུ་ཅན་དུ་གྱུར་པའི་སྤྱི་བོར་ༀ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་རྣམས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡེ་ཤེས་རྡོ་རྗེའི་བདག་ཉིད་དུ་བཞུགས་པ་ལ། སླར་ཡང་ཚད་མེད་པའི་མོས་གུས་ཀྱིས། སྐུ་བཞིའི་དབང་ཕྱུག་སོགས་ཀྱིས་གསོལ་བ་དྲག་ཏུ་བཏབ་པས། གུ་རུའི་སྤྱི་བོའི་ༀ་ལས་འོད་ཟེར་དཀར་པོ་ཟླ་བ་ཤར་བ་ལྟ་བུ་དཔག་ཏུ་མེད་པ་འཕྲོས། རང་གི་དཔྲལ་བའི་སྨིན་མཚམས་སུ་ཐིམ་པས། བུམ་པའི་དབང་ཐོབ། སྦྱང་བྱ་སྲོག་བཅད་པ་སོགས་ལུས་ཀྱི་སྒོ་ནས་བསགས་པའི་སྡིག་པ་དང་ལུས་རྩ་ཡི་སྒྲིབ་པ་དག སྦྱོང་བྱེད་ལམ་སྣང་སྟོང་བསྐྱེད་རིམ་དབྱིབས་ཀྱི་རྣལ་འབྱོར་བསྒོམ་པ་ལ་དབང་། སྦྱངས་འབྲས་སྐུ་རྡོ་རྗེ་སྤྲུལ་པའི་སྐུ་ཐོབ་པའི་སྐལ་བ་ཅན་དུ་བྱས། ཡང་བླ་མའི་མགྲིན་པའི་ཨཱཿལས་འོད་ཟེར་དམར་པོ་མར་མེའི་ཕྲེང་བ་ལྟ་བུ་དཔག་ཏུ་མེད་པ་བྱུང་། རང་གི་མགྲིན་པར་ཐིམ་པས་གསང་བའི་དབང་ཐོབ། སྦྱང་བྱ་རྫུན་སོགས་ངག་གི་སྒོ་ནས་བསགས་པའི་སྡིག་པ་དང་ངག་གི་རླུང་གི་སྒྲིབ་པ་དག སྦྱོང་བྱེད་ལམ་གསལ་སྟོང་གཏུམ་མོ་བསྒོམ་པ་ལ་དབང་། སྦྱངས་འབྲས་གསུང་རྡོ་རྗེ་ལོངས་སྤྱོད་རྫོགས་པའི་སྐུ་འགྲུབ་པའི་སྐལ་བ་ཅན་དུ་བྱས། ཡང་བླ་མའི་ཐུགས་ཀའི་ཧཱུྃ་ལས་འོད་ཟེར་སྔོན་པོ་མཐིང་སྔོན་ཞུན་མའི་མདོག་ལྟ་བུ་དཔག་ཏུ་མེད་པ་འཕྲོས། རང་གི་སྙིང་གར་ཐིམ་པས་ཤེས་རབ་ཡེ་ཤེས་ཀྱི་དབང་ཐོབ། སྦྱང་བྱ་བརྣབ་སེམས་སོགས་ཡིད་ཀྱི་སྒོ་ནས་བསགས་པའི་སྡིག་པ་དང་ཡིད་ཐིག་ལེའི་སྒྲིབ་པ་དག སྦྱོང་བྱེད་ལམ་ཕོ་ཉའི་རྣལ་འབྱོར་བསྒོམ་པ་ལ་དབང་། སྦྱངས་འབྲས་ཐུགས་རྡོ་རྗེ་ཆོས་ཀྱི་སྐུ་འགྲུབ་པའི་སྐལ་བ་ཅན་དུ་བྱས། སླར་ཡང་བླ་མའི་སྐུ་ཡི་གནས་གསུམ་ནས་འོད་ཟེར་དཀར་དམར་མཐིང་གསུམ་གྱི་ཚོགས་དཔག་ཏུ་མེད་པ་ཅིག་ཅར་དུ་འཕྲོས། རང་གི་སྒོ་གསུམ་ལ་ཆར་བབས་པ་བཞིན་དུ་ཐིམ་པས་དབང་བཞི་པ་ཚིག་དབང་རིན་པོ་ཆེ་ཐོབ། སྦྱང་བྱ་སྒོ་གསུམ་ཆ་སྙོམས་དང་ཤེས་བྱའི་སྒྲིབ་པ་དག སྦྱོང་བྱེད་ལམ་རྫོགས་པ་ཆེན་པོ་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་ཟུང་འབྲེལ་དུ་བསྒོམ་པ་ལ་དབང་། སྦྱངས་འབྲས་ཡེ་ཤེས་རྡོ་རྗེ་ངོ་བོ་ཉིད་སྐུ་ཐོབ་པའི་སྐལ་པ་ཅན་དུ་བྱས་པར་མོས་ཏེ་མཉམ་པར་བཞག འདི་ལ་རྒྱས་པར་སྤྲོ་ན་བླ་མའི་སྐུའི་གནས་རྣམས་ནས། སྐུ་ཕྱག་རྒྱ། གསུང་ཡིག་འབྲུ་སྔགས་ཕྲེང་། ཐུགས་ཕྱག་མཚན་སྤྲོ་བསྟིམ་ཨ་ཏི་ཟབ་དོན་སོགས་ལས་གསུངས་པ་ལྟར་སྦྱར་ནའང་ཆོག་མོད། རྩ་བའི་ཁྲིད་ཀྱི་དངོས་བསྟན་ནི་གོང་དུ་བཤད་པ་ཉིད་དོ། །དེ་ཡང་སྤྱིར་གསང་སྔགས་རྡོ་རྗེ་ཐེག་པའི་ལམ་ཐམས་ཅད་སྨིན་བྱེད་དབང་ལ་མ་བརྟེན་པར་བསྒྲུབ་ཏུ་མི་རུང་སྟེ། གསང་སྙིང་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་བརྩོན་པ་ནི། །འབྲས་བུ་མེད་ཅིང་བརླག་པར་འགྱུར། །ཞེས་དང་། རྒྱུད་གཞན་ལས་ཀྱང་། དབང་མ་བསྐུར་བར་དངོས་གྲུབ་མེད། །བྱེ་མ་བཙིར་ཡང་མར་མི་འབྱུང་། །ཞེས་སོ། །དེ་ལ་དབང་གི་ངོ་བོ་ནི། ཐོབ་བྱའི་ཡེ་ཤེས་རང་རྒྱུད་ལ་འཇོག་ཅིང་སྨིན་པར་བྱེད་པ། ངེས་ཚིག་ནི་ཨ་བྷི་ཥཉྩིའི་སྒྲ་ལས་དྲངས་ན་མངོན་པར་གཏོར་བའམ་བླུགས་པ་སྟེ། རང་རྒྱུད་ཀྱི་དྲི་མ་འཁྲུད་ཅིང་ཡེ་ཤེས་ཁྱད་པར་ཅན་འཇོག་པས་ན་དབང་ངོ། །དབྱེ་ན། ཐོག་མར་མཚན་ཉིད་དང་ལྡན་པའི་སློབ་དཔོན་གྱིས་སྣོད་ལྡན་གྱི་སློབ་མ་གང་ཞིག་གསང་མཆོག་རྒྱལ་པོའི་དཀྱིལ་འཁོར་དུ་བཅུག་ནས་བསྐུར་བ་དེ་གཞིའི་དབང་། དེའི་རྗེས་སུ་བླ་མའི་རྣལ་འབྱོར་སོགས་ལ་བརྟེན་ནས་གཞན་རྐྱེན་ལ་ལྟོས་པ་མེད་པར་རང་ཉིད་ཀྱིས་དབང་བཞི་ཟབ་མོ་ཏིང་ངེ་འཛིན་སོགས་ཀྱིས་ལེན་པ་ལམ་དབང་། མཐར་ཐུག་འབྲས་དུས་འོད་ཟེར་ཆེན་པོའི་དབང་ངམ་ཟབ་གསལ་གཉིས་མེད་ཀྱི་དབང་བསྐུར་ཐོབ་ནས་མངོན་སངས་རྒྱས་པ་ནི་འབྲས་དབང་ངོ། །དེས་ན་རྡོ་རྗེ་ཐེག་པའི་ལམ་ཐམས་ཅད་སྨིན་བྱེད་དབང་གི་ནང་དུ་འདུ་བ་ཡིན་པས། སྔོན་འགྲོའི་སྐབས་འདི་ཙམ་དུ་མ་ཟད། དངོས་གཞིའི་བསྐྱེད་རྫོགས་བསྒོམ་པ་སོགས་ལམ་གང་གི་ཡང་སྔོན་དུ་བླ་མའི་རྣལ་འབྱོར་ལ་བརྟེན་ནས་དབང་བཞི་ལེན་ཅིང་ཐུགས་ཡིད་བསྲེ་བ་འདི་མེད་ཐབས་མེད་དེ། ནམ་མཁའ་ཀློང་ཡངས་ཀྱི་རྒྱུད་ལས། བླ་མ་བསྒོམས་ན་ཆོས་སྐུ་བསྒོམ། །ལྷ་སྐུ་འབུམ་ཕྲག་སྟོང་བསྒོམས་པས། །བསོད་ནམས་དེ་ཡི་ཆར་མི་ཕོད། །དེ་ཕྱིར་དཀར་པོའི་ཆོས་སྤྱོད་རྣམས། །ཉན་བཤད་བསྒོམ་དང་འཛིན་པ་དང་། །མཆོད་གཏོར་ལ་སོགས་གང་བྱེད་ཀྱང་། །སྔོོན་དུ་འགྲོ་བའི་ལས་ཡིན་པས། །བླ་མ་དུས་གསུམ་སངས་རྒྱས་དཔལ། ཞེས་སོ། །དེ་ལྟར་བགྱིས་པའི་ཕན་ཡོན་ཡང་། གནས་སྐབས་སུ་བླ་མ་ལ་རྩོལ་མེད་ཀྱི་མོས་གུས་སྐྱེ་བ་དང་། ཏིང་ངེ་འཛིན་སོགས་གང་བསྒོམ་པའི་དམིགས་པ་གསལ་བ་དང་། མཐར་ཐུག་རང་བྱུང་གི་ཡེ་ཤེས་བདེ་བ་ཆེན་པོ་ཉིད་རྟོགས་པར་བྱེད་པ་ཡིན་ཏེ། ཟབ་ལམ་ཐུགས་རྗེ་ཆེན་པོ། བདེ་གཤེགས་ཀུན་འདུས་ཀྱི་དབང་གཞུང་གུ་རུ་རིན་པོ་ཆེས་མཛད་པ་ལས། དེ་ལྟར་དབང་བསྐུར་ཡོན་ཏན་གྱིས། །བྱིན་རླབས་མཚན་མ་དང་པོ་ནི། །རྩོལ་མེད་མོས་གུས་རྒྱུད་ལ་སྐྱེ། །བྱིན་རླབས་མཚན་མ་གཉིས་པ་ནི། །གང་གཏད་དམིགས་པ་གསལ་ཞིང་བརྟན། །བྱིན་རླབས་མཚན་མ་གསུམ་པ་ནི། །རང་བྱུང་ཡེ་ཤེས་རྟོགས་པ་འཆར། །ཞེས་གསུངས་པ་ཡིན་ནོ། །ལྔ་པ་ཐུགས་ཡིད་བསྲེས་ཏེ་མཉམ་པར་འཇོག་པ་ནི། དེ་ལྟར་དབང་བཞི་བླངས་པའི་རྗེས་སུ། སླར་ཡང་མོས་གུས་དུང་བ་དང་ཡིད་ཀྱིས་གསོལ་བ་བཏབ་པས། བླ་མ་དེ་ཉིད་ཤིན་ཏུ་དགྱེས་པའི་ཚུལ་གྱིས་རང་གི་སྤྱི་བོར་བྱོན་པ་འོད་དུ་ཞུ་ནས་རང་ལ་ཐིམ་པས། བླ་མ་དང་རང་སེམས་དབྱེར་མེད་ཀྱི་ངང་ལ་མཉམ་པར་བཞག་པ་སྟེ། ཇི་ལྟར་མཉམ་པར་འཇོག་པའི་ཚུལ་ནི། ཨོ་རྒྱན་དུས་གསུམ་མཁྱེན་པས་རྔོག་ཤེས་རབ་རྒྱལ་པོ་ལ་གདམས་པ། ཉོན་ཅིག་རྒད་པོ། རང་རིག་པ་བྱང་ཆུབ་ཀྱི་སེམས་འདི་ལ་ལྟོས་ཤིག གཟུགས་དང་ཁ་དོག་ཏུ་གྲུབ་པ་མེད། ཕྱོགས་དང་རིས་སུ་གྲུབ་པ་མེད། མཐའ་དང་དབུས་སུ་གྲུབ་པ་མེད། དང་པོ་བྱུང་ས་མེད་དེ་སྟོང་། བར་དུ་གནས་ས་མེད་དེ་སྟོང་། ཐ་མ་འགྲོ་ས་མེད་དེ་སྟོང་། སྟོང་པ་ཅིར་ཡང་མ་གྲུབ་པ། གསལ་ལ་དྭངས་པ་ཞིག་འདུག་པ་དེ་མཐོང་ནས་ངོ་ཤེས་ན་རང་ངོ་རང་གིས་ཤེས་པ་ཡིན། ཆོས་ཀྱི་ཆོས་ཉིད་གོ་བ་ཡིན། སེམས་ཀྱི་སེམས་ཉིད་མཐོང་བ་ཡིན། དངོས་པོ་དོན་གྱི་གནས་ལུགས་གཏན་ལ་ཕེབས་པ་ཡིན། ཤེས་བྱའི་སྒྲོ་འདོགས་ཆོད་པ་ཡིན། རིག་པ་བྱང་ཆུབ་ཀྱི་སེམས་དེ་དངོས་པོ་ཅིར་ཡང་མ་གྲུབ་པས། རང་བྱུང་རང་ལ་གནས་ཏེ་གཞན་ནས་བཙལ་དུ་མེད་པས་ཆོས་ཉིད་ཀྱི་དོན་རྟོགས་སླ། ཆོས་ཉིད་ཀྱི་དོན་ལ་གཟུང་འཛིན་གྱི་དངོས་པོ་མ་གྲུབ། རྟག་ཆད་ཀྱི་མཐའ་ལས་འདས། སངས་ལ་རྒྱ་རྒྱུ་མེད་དེ་སངས་རྒྱས་ཀྱང་རང་གི་རིག་པ་དྭངས་སངས། དམྱལ་བར་འགྲོ་རྒྱུ་མེད་དེ་རིག་པ་རང་དག ཆོས་ལ་བྱ་རྒྱུ་མེད་དེ་ཆོས་ཉིད་རང་གསལ། ལྟ་བ་རང་ལུགས་ཆེན་པོ་དེ་རང་ལ་ཡོད་པས་གཞན་ནས་བཙལ་དུ་མེད་པར་ཐག་བཅད་དོ། །དེ་ལྟར་ལྟ་བ་རྟོགས་ནས་ཉམས་སུ་ལེན་པར་འདོད་པས། རང་གང་ན་འདུག་པའི་ས་དེ་ལུས་ཀྱི་རི་བོ་དགོན་པའི་གནས། ཕྱི་སྣང་བ་གང་ཤར་བ་དེ་སྣང་བ་རང་སྣང་། སྟོང་པ་རང་སྟོང་། རང་བྱུང་རང་ཞི་སྤྲོས་པའི་མཐའ་དང་བྲལ་བར་བཞག་གོ །དེས་ཕྱི་སྣང་བ་གྲོགས་སུ་ཤར་བས། སྣང་བ་རང་སར་དག་སྟེ། སྣང་བ་ལམ་དུ་ཁྱེར་ཅིང་ཉམས་སུ་བླངས་པས། ཕྱི་སྣང་བ་གང་ཤར་ཀྱང་ཉམས་སུ་བླང་བར་བདེའོ། །ནང་སེམས་ལ་དྲན་པ་ཅི་ཤར་ཡིད་ལ་ཅི་འགྱུས་ཀྱང་། དེ་ལ་ངོ་བོ་མེད་དེ་སྟོང་པར་འདུག འགྱུ་དྲན་རང་སར་དག་སེམས་ཉིད་གསལ་ཐེབས་པས། འགྱུ་དྲན་ལམ་དུ་སློང་ནས་ཉམས་སུ་བླང་བར་བདེའོ། །གསང་བ་ཉོན་མོངས་པ་གང་ལངས་ཀྱང་། ཉོན་མོངས་པ་ལ་བལྟས་པས་རྗེས་མེད་དུ་རང་བྱུང་རང་ཞི། ཉོན་མོངས་པ་རང་སར་དག ཉོན་མོངས་པ་ལམ་དུ་སློང་བས་ཉམས་སུ་བླང་བར་བདེའོ། །དེ་ལྟར་ཉམས་སུ་ལོན་ཙ་ན་བསྒོམ་པ་ཐུན་སྒོམ་བྱར་མེད། ཐམས་ཅད་གྲོགས་སུ་ཤར་བས་ཉམས་ལ་གསལ་འགྲིབ་མེད། ཆོས་ཉིད་ཀྱི་དོན་ལ་རྒྱུན་ཆད་མེད། སྤྱོད་པ་ལ་ཡངས་དོག་མེད་དོ། །ཇི་ལྟར་གནས་ཀྱང་ཆོས་ཉིད་ཀྱི་དོན་ལ་འདུ་འབྲལ་མེད། དེ་ལྟར་རྟོགས་ཙ་ན་འབྱུང་བའི་ལུས་རྒས་ཀྱང་བྱང་ཆུབ་སེམས་ལ་རྒས་པ་མེད་པས་ན་སོ་ལ་རྒན་གཞོན་མེད། ཆོས་ཉིད་ཀྱི་དོན་ལ་ཕྱོགས་རིས་མེད་པས་རིག་པ་ཆོས་ཉིད་ཀྱི་ཡེ་ཤེས་དེ་རང་ལ་ཡོད་པར་ངོ་ཤེས་པས་དབང་པོ་ལ་རྣོ་རྟུལ་མེད་དོ། །ཆོས་ཉིད་ཀྱི་དོན་ལ་ཕྱོགས་རིས་མེད་པས་དེ་རང་ལ་ཡོད་པར་གོ་བས་ཐོས་པ་ལ་ཆེ་ཆུང་མེད་དེ། བེམ་རིག་གི་བརྙན་ལུས་ཞིག་ཀྱང་རིག་པ་ཡེ་ཤེས་ཆོས་ཀྱི་སྐུ་ལ་རྒྱུན་ཆད་མེད། མི་འགྱུར་བརྟན་པ་ཐོབ་པས་ཚེ་ལ་རིང་ཐུང་མེད་དོ། །རྒད་པོ་ཡང་དག་པའི་དོན་དེ་ཉམས་སུ་ལོངས་མཛོད། ཉམས་ལེན་རྒྱུད་ལ་ཁོལ་མཛོད། ཚིག་དང་དོན་དུ་མ་འཛོལ་བར་མཛོད། བརྩོན་འགྲུས་ཀྱི་གྲོགས་དང་མ་འབྲལ་བར་མཛོད། དྲན་པའི་རྩི་ཡིས་ཟིན་པར་མཛོད། ལོང་གཏམ་དང་འཆལ་གཏམ་ལ་མ་དགའ་བར་མཛོད། ཐ་མལ་གྱི་བློ་དང་མ་འདྲེས་པར་མཛོད། བུ་ཚའི་སྡུག་བསྔལ་མ་ཆེ་མཛོད། བཟའ་བཏུང་ལ་སྲེད་པ་མ་ཆེ་མཛོད། ཐ་མལ་དུ་འཆི་བ་ལ་སེམས་མཛོད། ཚེ་ལ་ལོང་མེད་བརྩོན་འགྲུས་སྐྱེད་མཛོད། རྒད་པོ་འཆི་ཁ་མའི་གདམས་ངག་འདི་ལ་མཛོད། ཅེས་གསུངས་ནས། རྒད་པོའི་སྙིང་གར་ཕྱག་འཁར་བཙུགས་ནས་གདམས་པ་བཏབ་པས་རྒད་པོ་འཁར་བཙུགས་ཀྱི་གདམས་པ་ཞེས་བྱ། རྔོག་ཤེས་རབ་རྒྱལ་པོ་དེས་གྲོལ་ཏེ་གྲུབ་པ་ཐོབ་བོ། །འདི་ནི་བཀའ་གཏེར་གཉིས་ཀའི་བརྒྱུད་པའི་ཆུ་བོ་ཟམ་མ་ཆད་པར་བྱོན་པ། སེམས་ཁྲིད་ཐམས་ཅད་ཀྱི་རྩ་བ་རྡོ་རྗེའི་གསུང་བྱིན་རླབས་ཀྱི་ཚན་ཁ་ཁྱད་པར་དུ་འཕགས་པ་སྟེ། སྤྲོ་ན་སྔོན་དུ་སེམས་ཚོལ་སོགས་སྤྱི་ལྟར་སོང་ཡང་ལེགས་སོ། །གང་ལྟར་ཡང་། དེ་ལྟར་མཉམ་པར་བཞག་རྗེས། སྣང་སྲིད་ཐམས་ཅད་བླ་མའི་རྣམ་རོལ་དུ་གསལ་ཞིང་། དགེ་བ་འདི་ཡིས་མྱུར་དུ་བདག །དཔལ་མགོན་བླ་མ་འགྲུབ་གྱུར་ནས། །སོགས་བསྔོ་བ་དང་སྨོན་ལམ་ཇི་ལྟར་རིགས་པས་མཐའ་བརྒྱན་པར་བྱའོ། །དེ་ལྟ་བུའི་བླ་མའི་རྣལ་འབྱོར་དེ་འགྲོ་བའི་ཚེ་ཕྲག་པ་གཡས་ཀྱི་ནམ་མཁར་བསྒོམ། དེ་བསྐོར་བ་བྱེད་པའི་རྟེན་ཡིན། འདུག་པའི་ཚེ་སྤྱི་བོའི་གཙུག་གི་ནམ་མཁའ་ལ་བསྒོམ། དེ་གསོལ་བ་འདེབས་པའི་རྟེན་ཡིན། ཟ་འཐུང་བྱེད་པའི་ཚེ་མགྲིན་པའི་དབུས་སུ་བསྒོམ། དེ་ཅི་ཟ་ཅི་འཐུང་གི་ཕུད་ཀྱིས་མཆོད་པ་ཡིན། ཉལ་བའི་ཚེ་སྙིང་གི་དབུས་སུ་བསྒོམ། དེ་འོད་གསལ་འཛིན་པའི་གནད་ཡིན། མདོར་ན་དུས་དང་རྣམ་པ་ཐམས་ཅད་དུ་བླ་མ་མ་བརྗེད་པར་དྲན་པར་བྱ། རང་ལ་ན་ཚ་དང་གདོན་བགེགས་ཀྱི་གནོད་པ་སོགས་མི་འདོད་པ་ཅི་བྱུང་ཡང་བདག་གི་ལས་ངན་འཛད་པའི་ཐབས་སུ་བླ་མའི་ཐུགས་རྗེས་གནང་བ་ཡིན་སྙམ་དུ་དགའ་བ་བསྒོམ་ཞིང་སྤང་བློ་མི་བྱ། སྐྱིད་ལ་ཟོས་བདེ་དགེ་སྦྱོར་འཕེལ་བ་སོགས་བྱུང་ན། དེ་དག་ཀྱང་བླ་མའི་ཐུགས་རྗེར་ཤེས་ཏེ་ང་རྒྱལ་དང་དགའ་བྲོད་མི་བྱ། ཏིང་ངེ་འཛིན་བསྒོམས་པས་སྐྱོ་དུབ་དང་བྱིང་རྒོད་ལ་སོགས་པ་བྱུང་ན། བླ་མའི་ཐུགས་དང་རང་གི་རིག་པ་དབྱེར་མེད་དུ་བསྲེས་ཏེ་གནས་ལུགས་ལྟ་བའི་རང་མདངས་བསྐྱངས་ཤིང་། གསོལ་འདེབས་སོགས་ལ་ཆིག་དྲིལ་དུ་བརྩོན་པར་བྱ་སྟེ། མདོར་ན་རྩེ་ལེ་སྣ་ཚོགས་རང་གྲོལ་གྱིས། དད་མོས་གདུང་བས་བླ་མ་དྲན་པ་འདི། །ཀུན་རྫོབ་རྩོལ་བཅས་བླ་མའི་རྣལ་འབྱོར་ཡིན། །བླ་མའི་ཐུགས་དང་རང་སེམས་འདྲེས་པ་ན། །དོན་དམ་རྩོལ་མེད་བླ་མའི་རྣལ་འབྱོར་ཡིན། །རིག་པ་མ་བཅོས་ལྷུག་པར་འཇོག་པ་འདི། །ཀུན་ཁྱབ་ཆོས་སྐུ་བླ་མའི་རྣལ་འབྱོར་ཡིན། །ཚོགས་དྲུག་སྣང་བ་གང་ཤར་ཞེན་མེད་འདི། །གསལ་མདངས་ལོངས་སྐུ་བླ་མའི་རྣལ་འབྱོར་ཡིན། །རྣམ་རྟོག་འགྱུ་དྲན་རང་ངོ་ཤེས་པ་འདི། །སྣ་ཚོགས་སྤྲུལ་སྐུ་བླ་མའི་རྣལ་འབྱོར་ཡིན། །སངས་རྒྱས་ཐམས་ཅད་བླ་མའི་ངོ་བོར་གཅིག །དེ་ལྟར་ཤེས་ན་བྱིན་རླབས་ངང་གིས་འཇུག །ལྷ་ཚོགས་མ་ལུས་བླ་མའི་རྣམ་འགྱུར་ཚུལ། །ཡིན་པར་ཤེས་ན་དངོས་གྲུབ་ཟད་མེད་འབྱུང་། །མཁའ་འགྲོ་ཆོས་སྐྱོང་བླ་མའི་སྤྲུལ་པ་ཡིན། །དེ་ལྟར་གོ་ན་ཕྲིན་ལས་རྣམ་བཞི་འགྲུབ། །སྣང་སྲིད་ཀུན་ཀྱང་བླ་མའི་དཀྱིལ་འཁོར་ཡིན། །དག་སྣང་འབྱོང་ན་ཐུགས་རྗེ་ཀུན་ལ་ཡོད། །ཕྱི་རོལ་འབྱུང་བ་ཐམས་ཅད་བླ་མའི་སྤྲུལ། །གང་ལ་གང་མཁོའི་འགྲོ་དོན་མཛད་པ་ཡིན། །ནང་བཅུད་སྐྱེ་འགྲོ་ཐམས་ཅད་བླ་མའ་ིསྤྲུལ། །ཆོས་སྐུ་བདེ་གཤེགས་སྙིང་པོས་མ་ཁྱབ་མེད། །བདེ་སྐྱིད་ལོངས་སྤྱོད་ཐམས་ཅད་བླ་མའི་སྤྲུལ། །གང་བསམ་ཡིད་བཞིན་དངོས་གྲུབ་སྩལ་པ་ཡིན། །ན་ཚ་རྐྱེན་ངན་ཀུན་ཀྱང་བླ་མའི་སྤྲུལ། །སྡུག་བསྔལ་མྱོང་བས་སྡིག་སྒྲིབ་ཟད་པར་བྱེད། །ཀུན་ཁྱབ་ཀུན་བྱེད་ཀུན་འབྱུང་ཀུན་ཏུ་བཟང་། །དེ་ཕྱིར་བླ་མའི་ལམ་ཁྱེར་གནད་དུ་ཟབ། །ཅེས་དང་། བླ་མ་རང་སེམས་དབྱེར་མེད་མ་རྟོགས་ན། །ཀུན་རྫོབ་གཟུགས་སྐུའི་བླ་མ་འདུ་འབྲལ་ཡོད། །རང་རིག་བླ་མ་ཆོས་སྐུར་ཤེས་པ་གནད། །བཟང་ངན་མཐའ་དག་བླ་མར་མ་རྟོགས་ན། །དག་སྣང་ཕྱོགས་མེད་འཆར་བའི་ཐབས་གཞན་མེད། །དག་སྣང་མ་འབྱོངས་སྣང་སྲིད་དགྲ་རུ་ལྡང་། །དེ་བས་གང་འདུལ་སྤྲུལ་པར་ཤེས་པ་གནད། །དགྲ་འདྲེ་རྐྱེན་ངན་བླ་མར་མ་ཤེས་ན། །བར་ཆད་གཅིག་ལ་བཟུར་ཡང་གཅིག་དང་འཕྲད། །བདག་འཛིན་བློ་ཡི་མ་ཐེངས་འདི་ཀས་ལན། །གང་བྱུང་བླ་མའི་ཐུགས་རྗེར་ཤེས་་གནད། །འཆི་ཁའི་དུས་ནའང་བླ་མ་མ་དྲན་ན། །ཤེས་ཤེས་བྱས་བྱས་མང་ཡང་རྨི་ལམ་འདྲ། །རྣམ་ཤེས་གཅིག་པུར་བར་དོར་འཁྱམས་པའི་ཚེ། །རེ་ས་སྐྱབས་ཡུལ་གཞན་ན་གང་ཡང་མེད། །དེ་ཕྱིར་བླ་མའི་ལམ་ཁྱེར་ཟབ་གནད་འདི། །ཚིག་དང་ཡི་གེར་མ་བཞག་ཉམས་སུ་ལོངས། །བརྒྱད་ཁྲི་བཞི་སྟོང་ཆོས་ལས་འདི་ཉིད་ཟབ། །ཟབ་དང་མི་ཟབ་ཉམས་སུ་ལེན་ལ་རག །ཉམས་ལེན་མི་བྱེད་ཟབ་ཀྱང་ཕན་པར་དཀའ། །དེ་ཕྱིར་བློ་སྙིང་བྲང་གསུམ་འདི་ལ་གཏོད། །ཅེས་གསུངས་པ་ལྟར་ཚུལ་བཞིན་ཉམས་སུ་ལེན་པ་ལ་བརྩོན་པར་བྱའོ། །གསུམ་པ་དེ་ལྟར་བསྟེན་ཅིང་སྒྲུབ་པའི་ཕན་ཡོན་ནི། སྤྱིར་དགེ་བའི་བཤེས་གཉེན་བསྟེན་པའི་ཕན་ཡོན་ནི། ཚད་མེད་དེ་ཅུང་ཟད་སྔར་བསྟན་པས་ཤེས་པར་ནུས་ལ། འདིར་སྡོང་པོ་བཀོད་པ་ལས། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་ངན་སོང་དུ་མི་ལྟུང་ངོ་། །ཐེག་པ་ཆེན་པོ་ལས་ཕྱིར་མི་ལྡོག་གོ །ཉན་ཐོས་དང་རང་སངས་རྒྱས་ཀྱི་སར་མི་ལྟུང་ངོ་། །ལས་དང་ཉོན་མོངས་པ་རྣམས་ཀྱིས་ཐུབ་པར་དཀའ་འོ། །བྱིས་པའི་ས་ལས་ཡོངས་སུ་འདའ་འོ། །བསླབ་པ་དང་འགལ་བར་མི་བྱེད་དོ། །དེས་བསྲུངས་པས་སྡིག་པའི་གྲོགས་པོས་བཀྲིར་མེད་དོ། །དེས་བསྐྱངས་པས་བྱང་ཆུབ་སེམས་དཔའི་ཆོས་ཉིད་ལས་མི་ཉམས་སོ། །འཇིག་རྟེན་གྱི་ཆོས་ཀྱིས་མི་གོས་པས་ཡང་དག་པར་འཕགས་སོ། །དེ་ལ་བསྙེན་བཀུར་བྱེད་པ་ན་སྤྱོད་པ་ཐམས་ཅད་ལས་མ་འཁྲུལ་པར་སྤྱོད་དོ། །དེས་སྒྲུབ་པ་ནི་རྩོམ་ཐམས་ཅད་ལས་མི་ཟློག་གོ །དེས་ཉེ་བར་སྟོན་པ་ནི་བདུད་ཀྱིས་མི་བརྫི་བའོ། །ཞེས་དང་། བྱང་ཆུབ་སེམས་དཔའི་སྤྱོད་པ་ནི། དགེ་བའི་བཤེས་གཉེན་ལ་རག་ལས་པའོ། །ཡོན་ཏན་ཐམས་ཅད་ཡོངས་སུ་རྫོགས་པ་ནི་དགེ་བའི་བཤེས་གཉེན་གྱིས་བསྐྱེད་པའོ། །སངས་རྒྱས་ཀྱི་ཡོན་ཏན་ཐམས་ཅད་ནི་དགེ་བའི་བཤེས་གཉེན་ལ་རིམ་གྲོ་བྱས་པས་ཐོབ་པ་ཡིན་ནོ། །ཞེས་དང་། བྱང་ཆུབ་སེམས་དཔའི་སྡེ་སྣོད་ལས། མདོར་ན་བྱང་ཆུབ་སེམས་དཔའི་སྤྱོད་པ་ཐམས་ཅད་ཐོབ་ཅིང་ཡོངས་སུ་རྫོགས་པ་དང་། དེ་བཞིན་དུ་ཕ་རོལ་ཏུ་ཕྱིན་པ་དང་ས་དང་། བཟོད་པ་དང་། ཏིང་ངེ་འཛིན་དང་། མངོན་པར་ཤེས་པ་དང་། གཟུངས་དང་། སྤོབས་པ་དང་། བསྔོ་བ་དང་། སྨོན་ལམ་དང། སངས་རྒྱས་ཀྱི་ཆོས་ཐམས་ཅད་འཐོབ་ཅིང་ཡོངས་སུ་རྫོགས་པ་ནི་བླ་མ་ལ་རག་ལས་པས། བླ་མ་རྩ་བར་གྱུར། བླ་མ་ལས་བྱུང་། བླ་མ་སྐྱེ་གནས་དང་སྐྱེ་མཆེད་དུ་གྱུར། བླ་མས་བསྐྱེད། བླ་མས་སྤེལ། བླ་མ་ལ་བསྟེན། བླ་མ་རྒྱུར་གྱུར་པ་དག་གོ །ཞེས་གསུངས་པ་དང། འཁོར་ལོ་བདེ་བའི་རྒྱུད་ལས། དེ་ཕྱིར་ཆོས་ཀུན་རྩ་བར་ནི། །བླ་མ་རྡོ་རྗེ་འཛིན་པར་བཤད། །བླ་མ་དག་ལས་མ་བྱུང་བའི། །དངོས་གྲུབ་རྙེད་པར་འགྱུར་མི་སྲིད། །བླ་མ་ཉིད་ལས་མ་བྱུང་བའི། །སངས་རྒྱས་ཞེས་བྱ་འབྱུང་མི་སྲིད། །སྲིད་པའི་ཁ་ལོ་གྱེན་དུ་ནི། །བླ་མ་མཚན་ཉིད་ལྡན་པས་སྒྱུར། །ཞེས་དང་། དགོངས་འདུས་ལས། སློབ་དཔོན་དག་ལ་མ་བསྟེན་པར། །སངས་རྒྱས་ནམ་ཡང་མི་འབྱུང་སྟེ། །འབྱུང་བར་ཡང་དག་ངས་མ་མཐོང་། །བྱུང་ན་དམ་པའི་ལུང་དང་འགལ། །ཞེས་གསུངས། གཞན་ཡང་རིག་འཛིན་འཇིགས་མེད་གླིང་པས། སྤྱིར་ཡུལ་མཆོག་བླ་མ་དང་། མཁན་པོ་དང་། སློན་དཔོན་དང་། དེ་བཞིན་དུ་ཆོས་སྨྲ་བ་དང་། སྲིད་པ་མཐའ་མའི་བྱང་ཆུབ་སེམས་དཔའ་དང། ཉན་ཐོས་དང་། རང་སངས་རྒྱས་འཕགས་པ་དང་། ཕ་མ་དང་། ནད་པ་ལ་སོགས་པ་འདི་དག་ནི་བསོད་ནམས་དང་། བསོད་ནམས་མ་ཡིན་པ་གཉིས་ཀ་སྟོབས་ཆེ་བས་འབྲས་བུའང་སྐྱེ་བ་མིི་བརྒྱུད་པར་མཐོང་བའི་ཆོས་སུ་སྨིན་པར་མདོ་སྡེ་དག་ལས་གསུངས་ལ། ཁྱད་པར་དེང་སང་དུས་སྙིགས་ཤིང་རྟོག་པ་རགས་པས་སྔོན་བསྐལ་པ་ཡར་ལྡན་གྱི་དུས་རྣམ་རྟོག་ཤས་ཆུང་བས་དགེ་སྡིག་གི་འབྲས་བུ་ཚེ་རབས་གཞན་དུ་དལ་གྱིས་སྨིན་པ་དང་མི་འདྲ་བར་ཚེ་འདི་ཀར་སྨིན་པ་ཤས་ཆེ་བས་བླ་མ་བསྟེན་ཅིང་། བསྙེན་བཀུར་བྱས་པའི་ཕན་ཡོན་གྱི་སྒོ་ནས་བྲོད་པ་བསྐྱེད་པའང་འདི་ལྟར་འཇིག་རྟེན་རྨོངས་པ་བ་གླང་རྫི་ལྟ་བུ་ཅི་ཡང་མི་ཤེས་པ། ཟང་ཟིང་གིས་ཕོངས་པ། ཀུན་གྱིས་བརྙས་པའི་གནས་སུ་གྱུར་པས་ཀྱང། དགེ་བའི་བཤེས་གཉེན་ལ་བསྟེན་ཅིང་ཆོས་ཀྱི་ལམ་སྲོལ་ལ་ཞུགས་པ་ཙམ་ནས། འཇིག་རྟེན་གྱིས་བཀུར་བའི་གནས། ཞེ་སར་བཅས་པ། ཐ་ན་ཟས་སྐོམ་གྱི་རྙེད་པ་ཙམ་ཡང་ཐོབ་སླ་བར་འགྱུར་བ་ལ་ལྟོས། ཞེས་དང་། བྱང་ཆུབ་སེམས་དཔའི་སྡེ་སྣོད་ལས། གཞན་ཡང་གངས་ཀྱི་རི་ལ་བརྟེན་པའི་རྩི་སྨན་ལྟར་དགེ་བའི་རྩ་བ་ཐམས་ཅད་རྣམ་པར་འཕེལ་ལོ། །མཚོ་ཆེན་པོ་ཆུའི་སྣོད་དུ་གྱུར་པ་ལྟར་ཡོན་ཏན་ཐམས་ཅད་སྣོད་དུ་འགྱུར་རོ། །རྒྱ་མཚོ་ཆེན་པོ་རིན་པོ་ཆེའི་འབྱུང་གནས་སུ་གྱུར་པ་ལྟར་ཡོན་ཏན་ཐམས་ཅད་ཀྱི་འབྱུང་གནས་སུ་འགྱུར་རོ། །མེའི་དྲོད་ཀྱིས་གསེར་ཡོངས་སུ་སྦྱངས་པ་ལྟར་བྱང་ཆུབ་ཀྱི་སེམས་ཡོངས་སུ་སྦྱོང་བར་འགྱུར་རོ། །རྒྱ་མཚོ་ལས་རི་རབ་མངོན་པར་འཕགས་པ་ལྟར་འཇིག་རྟེན་ཐམས་ཅད་ལས་འཕགས་པར་འགྱུར་རོ། །ཞེས་སོགས་རྒྱ་ཆེར་གསུངས་པ་བཞིན་མཐོང་བའི་ཆོས་ཚེ་འདིར་ཡང་ཡོན་ཏན་གྱི་འབྱོར་པས་མངོན་པར་ཕྱུག་པར་འགྱུར་བ་དང་། སངས་རྒྱས་དང་བྱང་ཆུབ་སེམས་དཔའ་དང་དགེ་བའི་བཤེས་གཉེན་དམ་པ་རྣམས་ཐུགས་མཉེས་ཏེ་རྗེས་སུ་བཟུང་བས་གནས་སྐབས་དང་མཐར་ཐུག་གི་འདོད་པའི་དོན་ཐམས་ཅད་འགྲུབ་པར་འགྱུར་བའང་། སྡོང་པོ་བཀོད་པ་ལས། རིགས་ཀྱི་བུ། དགེ་བའི་བཤེས་གཉེན་གྱིས་རྗེས་སུ་བསྟན་པ་ལ་རྗེས་སུ་ཞུགས་པའི་བྱང་ཆུབ་སེམས་དཔའ་ལ་སངས་རྒྱས་བཅོམ་ལྡན་འདས་རྣམས་ཐུགས་མཉེས་པར་འགྱུར་རོ། །དགེ་བའི་བཤེས་གཉེན་གྱི་ཚིག་དང་མི་འགལ་བར་གནས་པའི་བྱང་ཆུབ་སེམས་དཔའ་ལ་ཐམས་ཅད་མཁྱེན་པ་ཉེ་བར་འགྱུར་རོ། །དགེ་བའི་བཤེས་གཉེན་ཀྱིི་ཚིག་ལ་ཐེ་ཚོམ་མེད་པ་ལ་དགེ་བའི་བཤེས་རྣམས་ཉེ་བར་འགྱུར་རོ། །དགེ་བའི་བཤེས་གཉེན་ཡིད་ལ་བྱེད་པ་དང་མ་བྲལ་བ་ལ་དོན་ཐམས་ཅད་མངོན་དུ་འགྱུར་རོ། །ཞེས་སོ། །གཞན་ཡང་། འདི་ལྟར་དམ་པའི་སྐྱེས་བུ་བསྟེན་པས་ཚེ་ཕྱི་མ་ངན་འགྲོ་མྱོང་བའི་ལས་ཡོད་ཀྱང་ད་རེས་ལུས་སེམས་ལ་གནོད་པ་ཕྲ་མོ་ཙམ་བྱུང་བའམ། ཐ་ན་རྨི་ལམ་ཙམ་དུ་མྱོང་བས་ཀྱང་ལས་དེ་ཟད་པར་འགྱུར་བ་དང་། བླ་མ་ལ་བསྙེན་བཀུར་སྔ་དྲོ་གཅིག་བྱས་པའི་ཕན་ཡོན་གྱིས་སངས་རྒྱས་བྱེ་བ་སྙེད་ལ་དགེ་བའི་རྩ་བ་བསྐྱེད་པའི་ཕན་ཡོན་ཟིལ་གྱིས་གནོན་པའང་། ས་ཡི་སྙིང་པོའི་མདོ་ལས། དེས་ཟིན་པ་ནི་བསྐལ་པ་བྱེ་བ་ད པག་ཏུ་མེད་པར་ངན་འགྲོར་འཁྱམས་པར་འགྱུར་བའི་ལས་རྣམས་ཚེ་འདིར་རིམས་ལ་སོགས་པའམ། མུ་གེ་ལ་སོགས་ལུས་དང་སེམས་ལ་གནོད་པ་བྱུང་བས་བྱང་བར་འགྱུར་ཏེ། ཐ་ན་བརྒྱད་བཀག་གམ་རྨི་ལམ་ཙམ་གྱིས་བྱང་བར་འགྱུར་རོ། །དེས་སངས་རྒྱས་བྱེ་བ་དཔག་ཏུ་མེད་པ་ལ་དགེ་བའི་རྩ་བ་བསྐྱེད་པ་སྦྱིན་པའམ། མཆོད་པའམ། བསླབ་པ་བཟུང་བ་ལས་བྱུང་བ་རྣམས་སྔ་དྲོ་གཅིག་གིས་ཟིལ་གྱིས་གནོན་ནོ། །བླ་མ་ལ་བསྙེན་བཀུར་བྱས་པ་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་ནོ། །ཞེས་གསུངས་པས་མཚོན། ཚེ་འདིར་མངོན་པར་མཐོ་བ་དང་། ཕྱི་མ་ངེས་པར་ལེགས་པའི་ཡོན་ཏན་ཐམས་ཅད་ཀྱིས་མངོན་པར་འབྱོར་བར་འགྱུར་རོ། །བྱེ་བྲག་ཏུ་ཟང་ཟིང་གི་བདོག་པས་རང་གི་བླ་མ་ཉིད་མཆོད་པའི་ཕན་ཡོན་ཡང་། ཡེ་ཤེས་རྒྱ་མཚོའི་རྒྱུད་ལས། རང་གི་རྫས་དང་ཡོ་བྱད་ཀྱིས། །བླ་མ་མཉེས་པར་སུས་བྱས་པ། །འདིས་ནི་ཁམས་གསུམ་འཁོར་བ་ལས། །སྤྲུལ་སྐུའི་ཞིང་དུ་དབུགས་དབྱུང་སྟེ། །མྱ་ངན་འདས་པའི་སར་གཤེགས་སོ། །ཞེས་དང་། དགོངས་འདུས་ལས། དེས་ན་སངས་རྒྱས་སྟོང་ཕྲག་ལ། །བསྐལ་པ་སྟོང་དུ་མཆོད་བྱས་པས། །བླ་མའི་བ་སྤུའི་ཁུང་རེ་ལ། །ཙན་དན་ཐིགས་པ་གཅིག་བྱུགས་པ། །སྟོང་ཕྲག་ཆར་ཡང་ཕོད་པ་མིན། །ཞེས་དང་། བདུད་རྩི་རྒྱ་མཚོ་འབྱུང་བའི་རྒྱུད་ལས། ནམ་མཁའ་གང་བའི་སངས་རྒྱས་ལ། །སྣ་ཚོགས་རིན་ཆེན་སྤྲས་པ་ཡི། །སྟོང་གསུམ་གང་བ་ཕུལ་གྱུར་པས། །བླ་མའི་བ་སྤུ་ཉག་རེ་ལ། །མར་གྱི་ཐིགས་པ་གཅིག་བྱུག་པ། །བསོད་ནམས་བརྒྱ་ཕྲག་ཆར་མི་ཕོད། །ཅེས་དང་། གསང་འདུས་ལས། དུས་གསུམ་སངས་རྒྱས་ཀུན་མཆོད་པས། །བླ་མའི་བ་སྤུ་ཉག་རེ་ལ། །མར་གྱི་ཐིགས་པ་གཅིག་བྱུགས་པ། །དེ་ཡི་བསོད་ནམས་ཁྱད་པར་འཕགས། །ཞེས་དང་། རྡོ་རྗེ་མེ་ལྕེའི་རྒྱུད་ལས། བླ་མ་ཉིད་དང་བླ་མའི་འཁོར་། །ཉེ་འཁོར་གཡོག་དང་བཅས་པ་ལ། །གསེར་ལ་སོགས་པའི་ཡོན་ཕུལ་ན། །སངས་རྒྱས་ཞིང་ཁམས་བརྗོད་མེད་པའི། །གཙོ་འཁོར་འབུམ་ཕྲག་གྲངས་མེད་ལ། །བསྙེན་བཀུར་མཆོད་པ་གྲངས་མེད་པས། །བསོད་ནམས་འདི་ཡི་ཆར་མི་ཕོད། །ཅེས་གསུངས། དེ་ཡང་རང་གི་བླ་མ་ཉིད་དུས་གཞན་དུ་བྱེ་བ་བརྒྱ་སྟོང་དུ་མཆོད་པ་བས། དབང་དང་གདམས་ཁྲིད་ཟབ་མོས་རྗེས་སུ་བཟུང་བའི་ཚེ་ལན་ཅིག་མཆོད་པ་བསོད་ནམས་ཆེ་བའང་། དབང་རྣམ་པར་ཕྱེ་བ་ལས། གལ་ཏེ་དབང་བསྐུར་དུས་མིན་པར། །རང་གི་བླ་མ་མཆོད་པ་ནི། །བརྒྱ་སྟོང་བྱེ་བ་གྲངས་མེད་པས། །དབང་གི་དུས་གཅིག་བྱས་པ་ཡི། །བསོད་ནམས་ཚད་མེད་དཔག་ཏུ་མེད། །ཅེས་སོ། །དེ་ལྟར་འབྱུང་བའི་རྒྱུ་མཚན་ཡང་། རྩ་བརྒྱུད་ཀྱི་བླ་མ་ཡི་དམ་དཔའ་བོ་མཁའ་འགྲོ་སངས་རྒྱས་དང་བྱང་ཆུབ་སེམས་དཔའི་ཚོགས་ཇི་སྙེད་པ་སྐབས་དེར་རྡོ་རྗེ་སློབ་དཔོན་གྱི་སྐུ་གསུང་ཐུགས་ལ་གཉིས་སུ་མེད་པར་བཞུགས་ནས་སློབ་མའི་རྒྱུད་བྱིན་གྱིས་རློབས་པ་དང་མཆོད་པ་དང་མཆོད་པ་ལེན་པ་སོགས་བསོད་ནམས་ཀྱི་ཚོགས་སྤེལ་བའི་དུས་ཡིན་པའི་ཕྱིར་ཏེ། འཇམ་དཔལ་ཞལ་ལུང་ལས། འདི་ཡིས་དོན་ལྡན་འགའ་ཞིག་ལ། །ང་ནི་དེ་ཡི་ལུས་གནས་ཏེ། །སྒྲུབ་པོ་གཞན་ལས་མཆོད་པ་ལེན། །དེ་མཉེས་དེ་ཡིས་རང་གི་རྒྱུད། །ལས་ཀྱི་སྒྲིབ་པ་དག་བྱེད་དོ། །ཞེས་དང་། ཀུན་ཏུ་ཁ་སྦྱོར་གྱི་རྒྱུད་ལས། ཡེ་ཤེས་ཀུན་སེམས་ཞེས་བྱ་བའི། །རྒྱལ་བ་ཀུན་གྱི་སློབ་དཔོན་མཆོག །དངོས་གྲུབ་སྣ་ཚོགས་སྟེར་བས་ན། །བློ་དང་ལྡན་པས་རྟག་མཆོད་བྱ། །ཞེས་སོ། །གཞན་ཡང་། བྱང་ཆུབ་སེམས་དཔའི་སྡེ་སྣོད་ལས། སྙིང་པོ་མེད་པའི་ལུས་ལ་སྙིང་པོ་བླང་བར་བྱ་བའི་ཕྱིར་བླ་མ་མཉེས་པར་བྱ་སྟེ། ཐ་ན་ཅི་ཡང་མེད་ཀྱང་ཆུ་རྫ་མ་གང་ཙམ་ཡང་འབུལ་ལོ། །དེས་དགེ་བའི་རྩ་བ་དཔག་ཏུ་མེད་པ་དག་ཀྱང་རྣམ་པར་འཕེལ་ལོ། །ཞེས་དང་། ས་ཡི་སྙིང་པོའི་མདོ་ལས། བླ་མ་ལ་བསྙེན་བཀུར་བྱེད་པ་ནི། ཡོན་ཏན་གྱི་ཆོས་བསམ་གྱི་མི་ཁྱབ་པ་དང་ལྡན་ནོ། །ཞེས་སོགས་ལུང་མཐའ་ཡས་ཤིང་། ཀུན་མཁྱེན་བླ་མས་མཛོད་འགྲེལ་དུའང་། མདོར་བསྡུ་ན་བསོད་ནམས་དང་ཡེ་ཤེས་ཀྱི་ཚོགས་རྫོགས་པ་དང་། རྐྱེན་ངན་པའི་བར་ཆད་ཐམས་ཅད་ཞི་བ་དང་། དཔལ་དང་འབྱོར་པ་ཆེ་བ་དང་། མྱུར་དུ་སངས་རྒྱས་ཐོབ་པ་ནི། མཐོང་བ་དང་མ་མཐོང་བའི་ཡོན་ཏན་ཏེ། བདག་གིས་ཀྱང་ཚེ་ཟད་པ་ལས། བླ་མ་དམ་པ་ཀུ་མཱ་རཱ་ཛ་ལ་འཁོར་གསུམ་དག་པས་མཆོད་པའི་ཕན་ཡོན་གྱིས་ཕྱིར་ཡང་ཚེ་འཕེལ་ཏེ། ལོངས་སྤྱོད་དང་འདུ་བ་དང་ལྡན་པར་གྱུར་ཏོ། །དེས་ན་ཚེ་འདི་ཉིད་དུ་ཡིད་ཆེས་པའི་ཕན་ཡོན་དེ་འདྲ་ན། ཚེ་རབས་གཞན་དུ་ལྟ་ཅི་སྨོས། ཞེས་གསུངས་ཤིང་། གཞན་ཡང་དུས་རྒྱུན་དུ་རང་གི་བཟའ་བགོའི་ཕུད་ཀྱིས་མཆོད་པ་དང་། ཚོགས་དང་གཏོར་མ་འབུལ་བ་དང་། རིན་ཆེན་འབྲུ་སྨན་ལ་སོགས་པ་དངོས་སུ་འབྱོར་པ་དང་མ་འབྱོར་ཡང་ཡིད་ཀྱིས་དམིགས་ཤིང་མཎྜལ་སོགས་ཕུལ་བའི་བསོད་ནམས་ཀྱི་ཁྱད་པར་ཡང་། མེ་ལྕེ་ཕྲེང་བའི་རྒྱུད་ལས། གལ་ཏེ་རྣལ་འབྱོར་བློ་ལྡན་གྱིས། །རང་ཟས་གོས་ལ་གྱོང་བསྐུར་ནས། །བླ་མ་རྡོ་རྗེ་མཆོད་པ་ནི། །ཞིང་གི་འཁོར་ཡུག་རྒྱལ་ཁམས་ན། །དགེ་སློང་དཔག་ཏུ་མེད་པ་ལ། །སྟོན་མོ་ལན་སྟོང་ཕུལ་བ་བས། །ཟས་སམ་ཡང་ན་གོས་ཀྱང་རུང་། །བླ་མ་ལན་གཅིག་མཆོད་པ་ཡིས། །བསོད་ནམས་བརྒྱ་ཕྲག་བརྗོད་མི་རྫོགས། །ཞེས་དང་། རྡོ་རྗེེ་རོ་ལང་གི་རྒྱུད་ལས། གང་གིས་བླ་མ་རྡོ་རྗེ་འཆང་། །བཟའ་བཏུང་ཕུད་ཀྱི་རྟག་ཏུ་མཆོད། །འདིར་ཡང་བཟའ་བཏུང་འཕེལ་བ་དང་། །འཁོར་ལོས་སྒྱུར་རྒྱལ་ཐོབ་པར་འགྱུར། །ཞེས་དང་། རྡོ་རྗེ་བེ་ཅོན་གྱི་རྒྱུད་ལས། བླ་མའི་མདུན་དུ་ཚོགས་གཏོར་ལ། །གཏན་དུ་ཆོ་ག་རྫོགས་བྱས་ན། །ལོངས་སྤྱོད་ལྡན་དང་ཚོགས་རྗོགས་དང་། །རང་གཞན་བར་ཆད་ཀུན་སེལ་ཞིང་། །འཕོས་ནས་གསང་བདག་འཁོར་དུ་སྐྱེ། །ཞེས་དང་། བཀོད་པ་ཆེན་པོ་ལས། རྟ་དང་གླང་པོ་ནོར་གྱི་དབྱིག །རྒྱལ་སྲིད་བུ་དང་ཆུང་མ་དང་། །གསེར་དངུལ་ཟང་ལྕགས་རིན་པོ་ཆེ། །བཟའ་བཅའ་དགའ་སྟོན་ན་བཟའ་དང་། །སྙིང་པོ་སྨན་འབྲུ་མེ་ཏོག་དང་། །ཆོས་དང་ཟང་ཟིང་ལོངས་སྤྱོད་རྣམས། །བླ་མ་མཉེས་ཕྱིར་ཡོན་དུ་འབུལ། །དེས་ནི་དངོས་གྲུབ་མ་ལུས་པ། །ད་ལྟ་ཉིད་དུ་ཐོགས་མེད་འགྲུབ། །གལ་ཏེ་དེ་ལྟར་མ་འབྱོར་ན། །ཡིད་ལས་འབྱུང་བའི་མཆོད་པའི་ཚོགས། །རང་གི་ལོ་གྲངས་ཙམ་ཕུལ་ན། །འདིས་ཀྱང་བསོད་ནམས་སྔར་དང་མཚུངས། །ཞེས་སོ། །དེས་ན། གསང་འདུས་རིམ་ལྔ་ལས། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམས། །དེ་གཉིས་པས་ནི་ཀུན་མཁྱེན་གྱི། །ཡེ་ཤེས་མཆོག་ནི་ཐོབ་པར་འགྱུར། །བླ་མེད་བྱེད་པ་སློབ་དཔོན་ཡི། །རྡོ་རྗེར་སེམས་དཔར་མཆོད་བྱས་པས། །དེ་ཡིས་བསོད་ནམས་མ་བྱས་ཅིང་། །དཀའ་ཐུབ་མ་བསྟེན་ཅི་ཞིག་ཡོད། །ཅེས་སོགས་གསུངས་པ་བཞིན་ནོ། །གཞན་ཡང་། རང་གིས་ལུས་ངག་གི་སྒོ་ནས་བླ་མའི་ཞབས་ཏོག་དང་སྲིད་ཞུ་བགྱིས་པའི་ཕན་ཡོན་ཡང་། དམ་ཚིག་མཆོག་གི་རྒྱུད་ལས། ལུས་དང་ངག་དང་ཡིད་སྟོབས་ཀྱིས། །ཅི་ནུས་པ་ཡིས་བླ་མ་ལ། །བསྙེན་བཀུར་སྲི་ཞུ་སུས་བྱས་པ། །འདི་ལ་མཐུ་དང་ནུས་པའི་ཚོགས། །བྱིན་རླབས་ཐོགས་པ་མེད་པར་འབྱུང་། །ཞེས་གསུངས། ཁྱད་པར་ལུས་ཀྱི་སྒོ་ནས་བླ་མ་མཉེས་པར་བྱས་པའི་ཕན་ཡོན་ཀྱང་། ཡེ་ཤེས་རྒྱ་མཚོའི་རྒྱུད་ལས། གང་གིས་བླ་མའི་བྱ་བ་ལ། །མཁས་པའི་སྐལ་ལྡན་གང་ཡིན་དེས། །དུས་གསུམ་སངས་རྒྱས་ཐམས་ཅད་ལ། །བསྐལ་པ་བྱེ་བ་དྲུག་འབུམ་དུ། །ཕྱག་བྱས་པས་ནི་འདི་དོན་ཆེ། །བླ་མས་བསྒོ་བ་བཞིན་བསྒྲུབས་ན། །འདོད་པ་ཐམས་ཅད་འགྲུབ་པ་དང་། །བསོད་ནམས་དཔག་ཏུ་མེད་པ་འཐོབ། །ཅེས་དང་། བདུད་རྩི་འབྱུང་བའི་རྒྱུད་ལས། གལ་ཏེ་བླ་མ་ལ་གནོད་ན། །མ་རུངས་སེམས་ཀྱིས་བརྩམས་པ་ལ། །བདག་ཉིད་ཀྱིས་ནི་བསད་བྱས་ན། །སེམས་ཅན་འབུམ་གྱི་སྲོག་བཏོན་པ། །བསོད་ནམས་དེས་ནི་ཆར་མི་ཕོད། །བླ་མའི་བྱ་བ་རྫོགས་བྱས་ན། །འདི་ཡང་དེ་དང་མཉམ་པའོ། །ཞེས་སོ། །ངག་གི་སྒོ་ནས་མཉེས་པར་བྱས་པའི་ཕན་ཡོན་ཡང་། འཁོར་ལོ་ཆུབ་པ་རོལ་པའི་རྒྱུད་ལས། ཤེས་རབ་མཆོག་གི་བླ་མ་ལ། །ངག་གིས་མཉེེས་པར་བྱས་ན་ནི། །སངས་རྒྱས་རྣམས་ཀྱི་གསུང་བའི་ཆོས། །བསྐལ་པ་བརྒྱ་ཕྲག་མང་པོར་ཡང་། །སུ་ཡིས་ཀློག་ཅིང་བརྗོད་པ་ཡི། །བསོད་ནམས་འབུམ་ཕྲག་བསམ་ཡས་སོ། །ཞེས་སོ། །ཡིད་ཀྱི་སྒོ་ནས་མཉེས་པར་བྱས་པའི་ཕན་ཡོན་ཡང་། དེ་ཉིད་ལས་། ཡོན་ཏན་ནང་ནས་དད་པ་མཆོག །སྟོང་གསུམ་གང་བའི་སངས་རྒྱས་ལ། །མཆོད་པ་སྟོང་གསུམ་མཆོད་པ་བས། །འདི་ཡིས་མཉེས་པའི་ཆར་མི་ཕོད། །ཅེས་སོ། །གསུང་བཞིན་རྗེས་སུ་སྒྲུབ་པའི་སྒོ་ནས་མཉེས་པའི་ཕན་ཡོན་ཡང་། ཆུབ་པ་རོལ་པའི་རྒྱུད་ལས། བསྐྱེད་རིམ་བསྐལ་པ་གསུམ་བསྒོམས་པས། །སྒྲུབ་པས་བླ་མ་མཉེས་པ་ནི། །བསོད་ནམས་སྐད་ཅིག་ཁྱད་པར་འཕགས། །ཞེས་དང་། མདོ་རྒྱན་ལས། དེ་ཆོས་བགོ་སྐལ་ལ་སྤྱོད་ཡོན་ཏན་ལྡན། །བཤེས་གཉེན་རབ་ཏུ་བསྟེན་བྱེད་ཟང་ཟིང་མིན། །ཞེས་དང་། སྐྱེས་རབས་ལས། ཕན་པའི་ལན་དུ་མཆོད་པ་བྱེད་པ་ནི། །བསྒོ་བའི་ཚིག་བཞིན་ཉམས་སུ་ལེན་པ་ཡིན། །ཞེས་དང་། ཡུམ་བར་མ་ལས། གང་དགེ་བའི་བཤེས་གཉེན་གྱིས་ཡོངས་སུ་གདམས་པ་དེ་བསྒྲུབ་པར་བརྩོན་པ་ལ་ནི་སངས་རྒྱས་ཐམས་ཅད་ཀྱིས་བསྔགས་སོ། །བསྟོད་དོ། །བཀུར་རོ། །ཞེས་སོ། །ཁྱད་པར་དུ་ཞབས་ཏོག་དང་སྲི་ཞུའི་གནས་ཅི་མཆིས་པ་ལུས་ངག་གིས་ལས་སུ་བསྡུ་ཞིང་། ཡིད་ཀྱི་སྒོ་ནས་བླ་མའི་རྣལ་འབྱོར་བསྒོམ་ཞིང་བསྒྲུབ་པ་ནི་བསོད་ནམས་དམ་པའི་ཚོགས་མཐར་ཐུག་པ་དང་། ཐུགས་ཡིད་འདྲེས་པའི་ཆོས་ཉིད་ལ་མཉམ་པར་འཇོག་པ་ནི་ཡེ་ཤེས་ཀྱི་ཚོགས་ཏེ། ཚོགས་གཉིས་ཀྱི་འབྲས་བུའི་ཐུས་ཀའམ་ངོ་བོ་ཉིད་ཡིན་པའི་ཕྱིར། རྣམ་པ་ཐམས་ཅད་པའི་བསྐྱེད་རིམ་རྒྱ་མཚོ་ལ་གོམས་པར་བྱས་པ་སོགས་ལས་ཀྱང་ལམ་མྱུར་ཞིང་ཟབ་པ་ཡིན་ཏེ། འཁོར་ལོ་ཆུབ་བར། གང་གིས་བསྐལ་པ་བྱེ་བ་རུ། །ལྷ་ཡི་སྐུ་ནི་བསྒོམ་བྱ་བས། །མགོན་པོ་ཀུན་གྱི་དབང་ཕྱུག་ཆེ། །བླ་མ་དྲན་པ་མཆོག་ཏུ་བཤད། །ཅེས་དང་། ཡིད་བཞིན་མཆོག་གི་རྒྱུད་ལས། གང་གིས་བླ་མ་འདུན་པའི་ལྷ། །སྤྱི་བོའི་གཙུག་ཏུ་བསྒོམས་པ་ཡིས། །སངས་རྒྱས་དཀྱིལ་འཁོར་སྟོང་ཕྲག་གཉིས། །ལག་མཐིལ་བཞག་ནས་སྟོང་གསུམ་བསྐོར། །སྙིང་གར་ལན་སྟོང་བསྟིམས་བྱས་པས། །བརྒྱ་སྟོང་རྒྱུ་དང་ཆར་མི་ཕོད། །དེ་བས་རྟག་ཏུ་དྲན་པ་ཡིས། །སྤྱི་གཙུག་འཁོར་ལོའི་རྒྱན་ཉིད་དུ། །དཔལ་ལྡན་བླ་མ་བསམ་པར་བྱ། །ཞེས་དང་། ཀུན་ཏུ་བཟང་པོ་ཆེ་བ་རང་ལ་གནས་པའི་རྒྱུད་ལས། རྫོགས་པ་ཆེན་པོ་ཨ་ཏི་ལས། །བྱུང་བའི་བླ་མ་དྲིན་ལྡན་ཉིད། །སྙིང་གི་དཀྱིལ་ལམ་ལག་པའི་མཐིལ། །སྤྱི་བོའི་གཙུག་ཏུ་སུས་བསྒོམས་པ། །སངས་རྒྱས་སྟོང་གི་ཡོན་ཏན་ཡང་། །གང་ཟག་དེ་ཡིས་འཛིན་པར་འགྱུར། །ཞེས་དང་། ཨ་ཏི་བཀོད་པ་ཆེན་པོ་ལས། གང་གིས་ལྷ་སྐུ་འབུམ་ཕྲག་བསྒོམས་པ་བས། །བླ་མའི་སྐུ་ལ་དམིགས་པ་མ་ལོག་ན། །བསོད་ནམས་བརྒྱ་ཕྲག་སྟོང་གིས་ཆར་མི་ཕོད། །བསྙེན་སྒྲུབ་བཟླས་བརྗོད་ས་ཡ་དུང་ཕྱུར་བས། །བླ་མའི་གསོལ་འདེབས་ལན་གསུམ་བརྗོད་པ་ནི། །ནུས་པ་འབུམ་ཕྲག་ཆར་ཡང་མི་ཕོད་པས། །རྫོགས་པའི་རིམ་པ་བསྐལ་པའི་བར་དུ་ཡང་། །གང་གིས་འདུ་འཛི་སྤངས་ནས་བསྒོམས་པ་བས། །བླ་མ་རང་སེམས་དཀྱིལ་དུ་ཤར་བ་ཙམ། །བསོད་ནམས་སྟོང་ཕྲག་ཉི་ཤུས་ཆར་མི་ཕོད། །བླ་མ་བསྒོམས་དང་བསྟོད་དང་བསམ་པ་ཡིས། །སངས་རྒྱས་འབྲས་བུ་ཅིག་ཆར་འགྲུབ་པར་ངེས། །ཞེས་དང་། གསང་སྒྲོན་ལས། བསྙེན་སྒྲུབ་བཟླས་པ་ས་ཡ་བས། །བླ་མའི་གསོལ་འདེབས་ཚིག་གཅིག་དགའ། །ལྷ་སྐུ་མ་སྒོམས་བླ་མ་སྒོམས། །ལྷ་སྐུ་བྱེ་བ་སྟོང་བསྒོམས་པས། །བླ་མ་བསྒོམས་པ་བསོད་ནམས་ཆེ། །ཞེས་དང་། དམ་ཚིག་བཀོད་པ་ལས། གཡོ་མེད་མོས་གུས་ཟླ་དྲུག་གིས། །རྡོ་རྗེ་འཆང་གི་ས་ཐོབ་འགྱུར། །ཞེས་དང་། ཡེ་ཤེས་མངོན་ཕྱུང་ལས། ས་དང་ལམ་གྱི་རིམ་པ་རྣམས། །བླ་མའི་མོས་གུས་ལོ་ཟླས་བསྒྲུབ། །བླ་མའི་སྣང་བ་མ་བྲལ་ན། །སངས་རྒྱས་རྣམས་དང་འབྲལ་མེད་གནས། །ཞེས་གསུངས་པས་མཚོན་ལུང་མཐའ་ཡས་སོ། །མདོར་ན་ཡོན་ཏན་རིན་པོ་ཆེའི་མཛོད་ལས། འཇུག་པའི་སྤྱོད་ལ་ངེས་པར་ཞུགས་པ་ཡི། །དམ་པ་མཆོག་གི་བསོད་ནམས་ཡེ་ཤེས་ཚོགས། །གང་གི་ཁྲོད་དུའང་དོན་མཐུན་སྤྱོད་པ་དང་། །མངག་གཞུག་བང་ཕྱིན་ཕྱག་དར་ཚུན་ཆོད་ཀྱང་། །ངལ་བ་འབྲས་བཅས་ཚོགས་ཀྱི་ལམ་མཆོག་ཡིན། །ཞེས་དང་། དེའི་འགྲེལ་པར། འདི་ལྟར་དགེ་བའི་ཚོགས་མཐའ་དག་པ་སྦྱོར་དངོས་རྗེས་གསུམ་ཚང་བ་དེ་ཐར་པའི་རྒྱུར་འགྱུར་བ་ལས་གཞན་དུ་མ་ཡིན་ན། རང་གིས་བགྱིས་པ་ནི་ཐབས་དང་ཤེས་རབ་མཐའ་དག་གིས་ཟིན་པ་ཞིག་རེ་ཞིག་དཀའ་ལ། དེའི་ཕྱིར་དམ་པའི་བླ་མ་ཕ་རོལ་དུ་ཕྱིན་པ་དྲུག་གི་སྤྱོད་པ་ལ་ཞུགས་པ་ཞིག་གིས་དགེ་ལ་སྦྱོར་བའི་ལས་དང་། ཚོགས་གསོག་མཛད་པའི་ཁྲོད་དུ་རང་གི་བདོག་པའི་དངོས་པོ་དང་། ལུས་ངག་གི་ལས་དང་། ཐོས་བསམ་བསྒོམ་པའི་བྱ་བ་མཐའ་དག་དེ་དང་ཕྲུགས་གཅིག་ཏུ་སྤུངས་ཤིང་། ཐ་ན་བང་ཕྱིན་དང་། མངག་གཞུག་པའི་ལས་དང་། ཕྱག་དར་ཚུན་ཆོད་ལ་འབུངས་པས། བླ་མ་དམ་པའི་ཚོགས་རྣམ་པ་གཉིས་ཇི་ཙམ་རྫོགས་པ་དེ་སྲིད་དུ་རང་གི་ཚོགས་ཀྱང་འདུམ་པའི་ཚུལ་སྔགས་ལམ་མྱུར་བའི་དབང་དུ་བྱ་ནས་བླ་མ་བསྟེན་ཞིང་། བསྙེན་བཀུར་དང་། བསགས་སྦྱང་ལ་བརྩོན་པ་ཚོགས་ལམ་གྱི་དོད་ཐུབ་བར་བསྟན་ནས། དམ་པའི་བྱིན་རླབས་ལས། རྣམ་པར་མི་རྟོག་པའི་ཡེ་ཤེས་ལ་སྦྱོར་བ་དང་། ཆོས་ཉིད་དངོས་སུ་མཐོང་བ་དང་། མཐོང་ཟིན་བསྒོམ་པར་བྱ་བ་དང་། བསླབ་བྱ་མཐར་ཐུག་པས་མི་སློབ་པའི་ལམ་དུ་འགྲོ་བའང་། རྒྱུད་ལས། བླ་མ་བསྙེན་བཀུར་ཡོངས་རྫོགས་ནས། །དམ་པའི་དྲུང་ན་གནས་པ་ནི། །ཚོགས་ཀྱི་ལམ་ཞེས་དེ་ལ་བྱ་། །བླ་མ་དམ་པས་དོན་བཤད་ཅིང་། །གདམས་ངག་གཉིས་ཀྱང་དེ་ལ་སྦྱོར། །སྦྱོར་བའི་ལམ་དུ་ང་ཡིས་བསྟན། །ཚེ་འདིར་ངེས་པའི་བདེན་པ་མཐོང་། །མཐོང་བའི་ལམ་དུ་ང་ཡིས་བཤད། །བསྒོམ་དུ་མེད་པའི་སྒོམ་པ་དང་། །བསྒོམ་དུ་ཡོད་པའི་མེད་པ་གཉིས། །འདུ་འབྲལ་མེད་པ་གནས་པ་ནི། །སྒོམ་པའི་ལམ་དུ་ང་ཡིས་བསྟན། །མི་གནས་ཚུལ་གྱིས་མཐར་ཕྱིན་པས། །མཐར་ཕྱིན་ལམ་དུ་ང་ཡིས་བཤད། །ཅེས་བསྟན་པ་བཞིན་ནོ། །ཞེས་གསུངས་པ་བཞིན་ཤེས་པར་བྱའོ། །བླ་མའི་བྱིན་རླབས་སེམས་ལ་མ་ཞུགས་ན། །ནམ་ཡང་གནས་ལུགས་ཟབ་མོ་རྟོགས་མི་སྲིད། །དེ་ཕྱིར་མདོ་རྒྱུད་ལམ་སྙིང་འདི་ཁོ་ན། །རྟག་ཏུ་བླ་མ་སྒྲུབས་ཤིག་ཤེས་ལྡན་རྣམས། །བླ་མའི་རྣམ་འབྱོར་གྱི་ཁྲིད་ཀྱི་སྐབས་སོ། །དེ་ལྟར་ཐུན་མོང་གི་སྔོན་འགྲོའི་ཁྲིད་ཀྱི་རྒྱབ་ཆོས་ཅུང་ཟད་སྔོན་བྱོན་དམ་པ་རྣམས་ཀྱི་གསུང་ལས་བཏུས་ཏེ་བཀོད་པའི་དགོས་པའང་། སྤྱིར་རྡོ་རྗེ་ཐེག་པའི་ལུགས་ལ། །སྨིན་བྱེད་ཀྱི་དབང་། གྲོལ་བྱེད་ཀྱི་ཁྲིད། རྒྱབ་རྟེན་གྱི་ལུང་དང་བཤད་དཀའ་ཞེས་ཡོངས་སུ་གྲགས་པ་ལས། ཐོག་མའི་འཇུག་སྒོ་སྨིན་བྱེད་ཀྱི་དབང་ནི་རྒྱུད་སྡེའི་དབང་གིས་དབྱེ་སྒོ་མང་ཡང་། སྔགས་བླ་མེད་ཀྱི་དབང་རྣམས་ནི་བུམ་གསང་ཤེས་རབ་དེ་ཁོ་ན་ཉིད་དེ་དབང་བཞིའི་ཁོང་སུ་འདུ་བ་ཡིན་ལ། དེའི་སྲོག་ནི་དམ་ཚིག་ལ་ཐུག་པས་རྩ་བ་དང་ཡན་ལག་གི་ད མ་ཚིག་རྣམས་མ་ཉམས་པར་སྲུང་བ་གལ་ཆེ་སྟེ། དབང་དང་དམ་ཚིག་མེད་པ་ལ་གསང་བ་ཟབ་མོ་ཉན་པའི་སྐལ་བ་ཙམ་ཡང་མེད་པའི་ཕྱིར། གལ་ཏེ་དེ་ལྟ་བུ་ལ་བསྟན་ན་དཔོན་སློབ་གཉིས་ཀ་འཚིག་པར་འགྱུར་བས་སོ། །དེ་ན་དབང་དང་དམ་ཚིག་གཞིར་བཞག་ཐོག་གྲོལ་བྱེད་ཀྱི་ཁྲིད་ནི་བླ་མ་རྟོགས་པ་དོན་བརྒྱུད་དང་ལྡན་ཞིང་ཉམས་མྱོང་སྒོམ་པའི་དྲོ་ཚད་དང་ལྡན་པ། གེགས་སེལ་བོགས་འདོན་གྱི་གནད་ལ་མཁས་པས། སློབ་མ་སྣོད་ལྡན་དད་བརྩོན་སྒྲུབ་པ་སྙིང་པོར་བྱེད་པ་ལ། མན་ངག་དོན་གྱི་སྙིང་པོ་བསྡུས་ཏེ་ཉམས་མྱོང་དམར་ཁྲིད་ཀྱི་ཚུལ་དུ་བཏབ་པས། དབང་པོ་རབ་ཁྲིད་ཟིན་པ་དང་གྲོལ་བ་དུས་མཉམ། འབྲིང་ཉམས་མྱོང་དང་རྟོགས་པའི་སྣེ་ཟིན། ཐ་མའང་ངེས་འབྱུང་དང་སྐྱོ་ཤས། དད་པ་དང་མོས་གུས། བྱམས་སྙིང་རྗེ་སྒྲུབ་ལ་བརྩོན་པ་སོགས་དཀར་པོའི་རིགས་ཀྱི་ཡོན་ཏན་གྱི་ནུས་པ་གོང་འཕེལ་དུ་གྱུར་ནས་ཐར་པའི་ལམ་སྣ་ཟིན་པར་བྱེད་པ་ཡིན། རྒྱབ་རྟེན་གྱི་ལུང་ནི་ཀློག་པ་པོ་སྤྱིར་དམ་པའི་ཡོན་ཏན་རྣམས་ཚང་དགོས་མོད་གཙོ་བོར་བརྒྱུད་པ་བར་མ་ཆད་ཅིང་དམ་སེལ་སོགས་ཀྱི་སྐྱོན་གྱིས་མ་བསླད་པ་ཞིག་གིས། ཉན་པ་པོ་དད་འདུན་དང་མོས་པ་ཡོད་པ་ཞིག་ལ། གང་བཀླག་བྱའི་གཞུང་དེའི་ཚིག་གི་ཟུར་ཕྱིན་ཅིང་སྒྲ་དག་ལ་གསལ་བས་ཉན་པ་པོའི་རྣ་བར་ཐོས་ངེས་སུ་བཀླགས་པས་དེའི་རྒྱུད་ལ་ཐོས་པའི་བག་ཆགས་འཇོག་པར་བྱེད་པ་ཡིན་པས་འདི་ལ་ཀློག་པ་པོ་སྒྲ་དག་ཅིང་གསལ་བ་དང་། ཉན་པ་པོའི་དད་པ་དང་འདུན་པ་གཙོ་ཆེ། བཤད་དཀའ་ནི་འཆད་པ་པོ་ཤེས་རབ་གསུམ་དང་ལྡན་ཞིང་ལྷག་པར་ཐོས་པས་རང་རྒྱུད་གྲོལ་བ་ཞིག་གིས་འཆད་ཡུལ་སློབ་མ་ཤེས་རབ་དང་བརྩོན་འགྲུས་ལྡན་པ་ལ། གང་འཆད་བྱའི་ཚིག་གི་དོན་ཉིད་ལུང་རིགས་ཀྱི་སྐྱ་བར་ནས་གཏོན་ཏེ་རྒྱས་བཤད་ཚིག་གི་སྤྲོས་པས་ཉན་པོའི་རྒྱུད་ལ་བསམ་བྱུང་གི་ཤེས་རབ་བསྐྱེད་ཅིང་ཐེ་ཚོམ་གྱི་སྒྲོ་འདོགས་སེལ་བར་བྱེད་པ་ཡིན་པས། འདི་ལ་མངོན་རྗེས་ལུང་གི་ཚད་མ་གསུམ་དང་བདེན་གཉིས་དཔྱོད་བྱེད་ཀྱི་རིག་པའི་རྣམ་འགྱུར་གཙོ་ཆེ། ཁྱད་པར་ངེས་དོན་ཟབ་མོ་འཆད་པ་ལ་རྟོན་པ་བཞི་དང་མི་འགལ་བར་རྡོ་རྗེ་ཐེག་པ་མཐའ་དྲུག་ཚུལ་བཞིའི་གནད་རྣམས་རིག་འཛིན་བརྒྱུད་པའི་མན་ངག་གི་སྣང་བ་ལ་བརྟེན་ནས་འཆད་དགོས་ཀྱི་ཐ་སྙད་རྟོག་གེའི་རིགས་ལམ་སྐམ་པོས་གར་ཡང་མི་ཕྱིན་ནོ། །དེས་ན་གཙོ་བོར་ལུང་གིས་ཐོས་པའི་བག་ཆགས་འཇོག བཤད་པས་བསམ་བྱུང་གི་ཤེས་རབ་བསྐྱེད་ཅིང་ཚིག་གི་འགལ་འགྲེལ་གཅོད། ཟབ་ཁྲིད་ཀྱིས་སྒོམ་བྱུང་གི་ཤེས་རབ་བསྐྱེད་ཅིང་དོན་རྒྱུད་ལ་སྤྱོད་པ་ཡིན་པས། འདི་ལ་གེགས་སེལ་བོགས་འདོན་དང་ཉམས་མྱོང་ངོ་སྤྲོད་གཙོ་ཆེ། བཤད་ཡམ་དང་ཚིག་ཚོགས་མང་མི་དགོས། དེའི་ཕྱིར་སྔོན་གྱི་མཁས་གྲུབ་དམ་པ་རྣས་ཀྱིས་ཁྲིད་ཡིག་ཏུ་ཉམས་ལེན་སྦར་བཅང་ཟབ་གནད་དམིགས་རྐང་ཙམ་དུ་བསྡུས་ནས་གསུངས་པའི་དོན་དེ་ཡིན། དེས་ན་ཁྲིད་རྒྱུན་ཙམ་ལ་རིག་འཛིན་སྔ་མ་རྣམས་ཀྱིི་རྡོ་རྗེའི་གསུང་བྱིན་རླབས་ཀྱི་ཚན་ཁ་གཞན་ལས་འཕགས་པས་དེ་ཉིད་བརྡ་འཕྲོད་ངེས་སུ་བཀླགས་པས་གོ་ཆོད་ཅིང་དོན་འགྲུབ་པ་ཡིན་ལ་དམ་པ་རྣམས་ཀྱི་ཕྱག་ལེན་གྱི་རྒྱུན་ཡང་དེ་ལྟར་གནང་སྲོལ་ཡོད་མོད། དེང་སང་སྒྲུབ་དུས་ཕལ་ཆེར་ཡོལ་ནས་ལུང་དང་རྟགས་ཙམ་གྱི་བསྟན་པར་ཉེ་བའི་དབང་གིས། མི་རྣམས་སྐྱོ་ཤས་དང་ངེས་འབྱུང་ཆུང་། སྒྲུབ་པ་ལ་མི་དགའ། ཐ་སྙད་ཀྱི་ཚིག་སྐམ་ཙམ་ལ་གློ་བ་ཞེན་པའི་དབང་གིས། དམ་པ་ཁ་ཅིག་ལ་སྲིད་མཐའ་མ་བཀག་ཙམ་ལ་ཕལ་ཆེར་དུ་ཉམས་མྱོང་ཟབ་ཁྲིད་ཀྱི་རྒྱུན་ཆད། ཁྲིད་ལུང་བཤད་པ་གསུམ་ལ་དབྱེ་བསལ་མེད་པ་ལྟ་བུར་སོང་བས། ཟབ་ཁྲིད་གཞུང་གི་དངོས་བསྟན་ཙམ་ལ། འཆད་པ་པོས་འཆད་གོ་མ་ཆོད། ཉན་པ་པོས་ཉན་གོ་མ་ཆོད་པ་ལྟར་སོང་བས་སྤྱི་དོན་ཅུང་ཟད་རེ་མ་སྤྲོས་ན། ཐབས་མེད་ལྟ་བུར་གྱུར་པས་འདི་ལྟར་བཏུས་པ་ཡིན་ཀྱང་། གཙོ་བོར་ནི་འཆད་ཡུལ་དང་འཆད་མཁན་གཉིས་ཀས་ཚིགས་ཚོགས་ཀྱིི་སྤྲོས་པ་ལྷུར་ལེན་པ་ཙམ་ལ་གཙོ་བོར་མི་བྱ་བར། རང་རྒྱུད་ལ་སྦྱར་ནས་ཉམས་སུ་ཅི་ལོན་ལ་བརྩོན་པ་གལ་ཆེ་སྟེ། འཕགས་པ་སྡོང་པོ་བཀོད་པ་ལས། ཡང་དག་སངས་རྒྱས་བསྟན་པ་འདི། །ཐོས་པ་ཙམ་གྱིས་མི་འགྲུབ་བོ། །དཔེར་ན་ལ་ལ་ཆུ་ཀླུང་གིས། །སྟོབས་མེད་ནན་གྱིས་ཁྱེར་བ་ཞིག །སྐོམ་ནས་ཤི་བར་འགྱུར་བ་བཞིན། །མ་བསྒོམས་ཆོས་ཀྱང་དེ་བཞིན་ནོ། །ཇི་ལྟར་འགྲོ་བ་མང་པོ་ལ། །ཟས་དང་སྐོམ་དག་བྱིན་གྱུར་ཀྱང་། །བདག་ཉིད་བཀྲེས་ནས་ཤི་བ་ལྟར། །མ་བསྒོམས་{བསྒོམ་འདིའི་རིགས་འདི་ལྟར་ཞུས། }ཆོས་ཀྱང་དེ་བཞིན་ནོ། །ཇི་ལྟར་སྨན་པ་ལ་ལ་ཞིག །སྨན་རྣམས་ཐམས་ཅད་བདོག་བཞིན་དུ། །ལྟོ་བའི་ནད་ཀྱིས་ཤི་བ་བཞིན། །ཆོས་ལ་མ་བསྒོམས་དེ་བཞིན་ནོ། །ཇི་ལྟར་དབྱིག་གི་མཛོད་དག་ཏུ། །རིན་ཆེན་གྲངས་མང་བགྲང་བྱེད་ཀྱང་། །བདག་ཉིད་གཅིག་ཙམ་མ་ཐོབ་པ། །ཆོས་ལ་མ་བསྒོམས་དེ་བཞིན་ནོ། །ཇི་ལྟར་བདེ་བ་ཀུན་ལྡན་པའི། །རྒྱལ་པོའི་ཕོ་བྲང་འཁོར་སྐྱེས་ཀྱང་། །ཟས་དང་སྐོམ་དག་མི་བདོག་པ། །མ་བསྒོམས་ཆོས་ཀྱང་དེ་བཞིན་ནོ། །ཇི་ལྟར་དམུས་ལོང་རི་མོ་མཁན། །ཚོང་འདུས་དབུས་སུ་འབྲིར་བཅུག་ཀྱང་། །བདག་ཉིད་ཀྱིས་ནི་མ་མཐོང་བ། །ཆོས་ལ་མ་བསྒོམས་དེ་བཞིན་ནོ། །ཇི་ལྟར་མཚོ་ཆེན་མཉན་པ་ཞིག །སྐྱེ་བོ་མང་པོ་སྒྲོལ་བྱེད་ཀྱང་། །བདག་ཉིད་དེ་ནས་འཆི་བ་ལྟར། །མ་བསྒོམས་ཆོས་ཀྱང་དེ་བཞིན་ནོ། །ཇི་ལྟར་ལམ་གྱི་གཞི་མདོར་ཡང་། །ཕུན་སུམ་ཚོགས་པ་ཀུན་བརྗོད་ཅིང་། །བདག་གིས་ཐོས་པར་མི་འགྱུར་བས། །མ་བསྒོམས་ཆོས་ཀྱང་དེ་བཞིན་ནོ། །ཞེས་དང་། དཔེར་ན་རྐྱལ་མཁན་ཆུ་ཡིས་ཁྱེར་བ་ཞིག །རྐྱལ་བའི་ལོ་རྒྱུས་སེམས་ལ་ཡོད་གྱུར་ཀྱང་། །མ་རྐྱལ་བར་དུ་ཐར་བར་མི་འགྱུར་བས། །ཤེས་ནས་མ་བསྒོམས་ཆོས་ཀྱང་དེ་དང་མཚུངས། །དཔེར་ན་ཡུལ་པ་སོ་ནམ་མཁན་གྱི་མིས། །རང་གི་ཞིང་བསྐྱུར་རོགས་ལ་ལེགས་བསླབ་ཀྱང་། །སྟོན་ཐོག་སྨིན་ནས་རང་ལ་མེད་པ་བཞིན། །ཤེས་ནས་མ་བསྒོམས་ཆོས་ཀྱང་དེ་དང་མཚུངས། །ཞེས་དང་། ཏིང་འཛིན་རྒྱལ་པོ་ལས། ང་ཡིས་རབ་ཏུ་བཟང་བའི་ཆོས་བཤད་ཀྱང་། །ཁྱོད་ཀྱིས་ཐོས་ནས་ཡང་དག་མ་སྦྱངས་ན། །ནད་པས་སྨན་གྱི་རྐྱལ་བ་ཐོགས་པ་དག །རང་གི་ནད་ནི་གསོ་བར་མི་ནུས་བཞིན། །ཞེས་གསུངས། མང་དུ་ཐོས་པ་ཡིན་ཀྱང་སྨྲ་བ་ཁོ་ན་ལ་དགའ་བའི་སྐྱོན་མང་པོ་ལྷག་བསམ་བསྐུལ་བའི་མདོ་ལས་གསུངས་པ། ཐོས་པས་རྒྱགས་ནས་གུས་པར་མི་འགྱུར་ཏེ། །རྣམ་པར་འགྱེད་པའི་སྨྲ་བ་རྣམས་ལ་ཆགས། །བརྗེད་པར་འགྱུར་ཞིང་ཤེས་བཞིན་མེད་པར་འགྱུར། །སྨྲ་ལ་དགའ་བའི་ཉེས་པ་འདི་དག་གོ །ནང་གི་སེམས་ལ་ཤིན་ཏུ་རིང་པར་འགྱུར། །ལུས་དང་སེམས་ཀྱང་རབ་སྦྱངས་མ་ཡིན་འགྱུར། །ཁེངས་པ་དང་ནི་མདུད་པ་མང་པོར་འགྱུར། །སྨྲ་ལ་དགའ་བའི་ཉེས་པ་འདི་དག་གོ །བྱིས་པ་དམ་པའི་ཆོས་བསམ་རབ་ཏུ་ཉམས། །སེམས་ནི་མི་གཉེན་ཤིན་ཏུ་རྩུབ་པར་འགྱུར། །ཞི་གནས་ལྷག་མཐོང་དག་དང་རིང་བར་འགྱུར། །སྨྲ་ལ་དགའ་བའི་ཉེས་པ་འདི་དག་གོ །རྟག་ཏུ་བླ་མ་དག་ལ་གུས་པ་མེད། །སྦགས་པའི་གཏམ་དག་ལ་ནི་དགའ་བ་སྐྱེད། །སྙིང་པོ་མེད་ལ་གནས་ཤིང་ཤེས་རབ་ཉམས། །སྨྲ་ལ་དགའ་བའི༴ དེ་ནི་ལྷ་ཡི་ཚོགས་རྣམས་ཀྱིས་མི་བཀུར། །དེ་ཚེ་དེ་ལ་འདོད་པ་མི་བསྐྱེད་ལ། །སོ་སོ་ཡང་དག་རིག་ལས་ཉམས་འགྱུར་ཏེ། །སྨྲ་ལ་དགའ་བའི༴ ཞེས་དང་། བདག་ནི་སྒྲུབ་ཉམས་ད་ནི་ཅི་བྱ་ཞེས། །འཆི་བའི་དུས་ཚེ་བྱིས་པ་མྱ་ངན་བྱེད། །གཏིང་རྙེད་མ་གྱུར་ཤིན་ཏུ་སྡུག་བསྔལ་འགྱུར། །སྨྲ་ལ་དགའ༴ རྩྭ་བསྐྱོད་བཞིན་དུ་འགུལ་ཞིང་གཡོ་བ་སྟེ། །དེ་ནི་དེ་ལྟ་ཐེ་ཚོམ་འགྱུར་དུ་ངེས། །དེ་ནི་ནམ་ཡང་བློ་བརྟན་མི་འགྱུར་ཏེ། །སྨྲ་ལ་དགའ་བའི་ཉེས་པ༴ གར་ལ་བལྟ་བའི་ཁྲོད་དུ་འདུག་པ་ཞིག །དཔའ་བོ་གཞན་གྱི་ཡོན་ཏན་བརྗོད་པ་བཞིན། །བདག་ཉིད་ནན་ཏན་ཉམས་པར་འགྱུར་བ་སྟེ། །སྨྲ་ལ་དགའ་བའི༴ དེ་ནི་གཡོ་ལྡན་ཡང་ཞིང་རེ་འཆང་ཡང་། །ཕྱིར་ཕྱིར་བཞིན་ནི་རྣམ་པར་འགྱེད་པར་བརྩམས། །འཕགས་པའི་དམ་པའི་ཆོས་ལས་རབ་ཏུ་རིང་། །སྨྲ་ལ་དགའ་བའི་ཉེས་པ༴ མཐུ་ཆུང་བསྟི་སྟང་གིས་ནི་དགའ་འགྱུར་ཏེ། །མི་ཤེས་ལྡན་པ་གཡོ་ཞིང་འགྱུར་བ་ཡིས། །སྤྲེ་ལྟར་དེ་ཡི་སེམ་ནི་གཡོ་བར་འགྱུར། །རང་གི་བློ་ཡི་ཤེས་པ་དམའ་བའི་ཕྱིར། །རྨོངས་པ་དེ་ནི་གཞན་གྱི་དྲིང་ལ་འཇོག །དེ་ནི་ཉོན་མོངས་ཕྱོགས་ཀྱི་དབང་དུ་འགྲོ། །སྨྲ་ལ་དགའ་བའི་ཉེས་པ་འདི་དག་གོ །མིག་ཀྱང་འཁྲུལ་ཞིང་དེ་བཞིན་རྣ་བའང་འཁྲུལ། །སྣ་ཡང་འཁྲུལ་ཞིང་དེ་བཞིན་ལྕེ་ཡང་འཁྲུལ། །ལུས་ཀྱང་འཁྲུལ་ཞིང་ཡིད་ཀྱང་འཁྲུལ་བར་འགྱུར། །སྨྲ་ལ་དགའ་བའི་ཉེས་པ༴ དེ་ཡི་སེམས་ནི་རྣ་བའི་རྣམ་ཤེས་ལ། །རབ་ཏུ་ཆགས་ཤིང་སྒྲས་རྒྱགས་ཤེས་རབ་ཉམས། །ལོག་པར་སེམས་ཤིང་ལམ་ངན་འགྲོ་བར་འགྱུར། །སྨྲ་ལ་དགའ་བའི་ཉེས་པ་འདི་དག་གོ །ཞེས་བྱ་བ་ལ་སོགས་པ་ནས། ཡུན་རིང་དུས་ནས་སྨྲ་ལ་དགའ་བས་ན། །དེས་ནི་བདག་ཉིད་དགའ་བ་མི་འཐོབ་བོ། །ཚིག་གང་དགའ་བ་མཐའ་ཡས་འཐོབ་འགྱུར་པ། །ཚིག་གཅིག་ཙམ་ཞིག་བསོད་ནམས་མཆོག་ཡིན་ནོ། །བུ་རམ་ཤིང་ཤུན་སྙིང་པོ་ཅི་ཡང་མེད། །དགའ་བར་བྱ་བའི་རོ་ནི་ནང་ན་འདུག །ཤུན་པ་ཟོས་པའི་མིས་ནི་བུ་རམ་རོ། །ཞིམ་པོ་རྙེད་པར་འགྱུར་བ་མ་ཡིན་ནོ། །ཇི་ལྟར་ཤུན་པ་དེ་བཞིན་སྨྲ་བ་སྟེ། །རོ་ལྟ་བུ་ནི་འདི་ལ་དོན་སེམས་ཡིན། །དེ་ལྟ་བས་ན་སྨྲ་ལ་དགའ་སྤངས་ཏེ། །རྟག་ཏུ་བག་ཡོད་བྱོས་ལ་དོན་སོམས་ཤིག །ཅེས་རྗེས་སུ་གདམས་པར་མཛད་པ་ཡིན་ལ། རྒྱུ་མཚན་དེའི་ཕྱིར། དེ་ཁོ་ན་ཉིད་བསྟན་པའི་མདོ་ལས། ཤཱ་རིའི་བུ། གང་གིས་བསྐལ་པ་གཅིག་གི་བར་དུ་ཉན་པ་བས། གང་གིས་སེ་གོལ་གཏོགས་པ་ཙམ་ཞིག་ཏུ་དེ་ཁོ་ན་ཉིད་ཀྱི་ཏིང་ངེ་འཛིན་བསྒོམས་ན་བསོད་ནམས་མང་དུ་འཕེལ་ལོ། །ཤཱ་རིའི་བུ། དེ་ལྟ་བས་ན། དེ་ཁོ་ན་ཉིད་ཀྱི་ཏིང་ངེ་འཛིན་འདི་གཞན་ལ་ནན་གྱིས་གདམས་པར་བྱའོ། །ཞེས་དང་། རྟོགས་པ་ཆེན་པོ་རྒྱས་པའི་མདོ་ལས། ཐང་གཅིག་བསམ་གཏན་ཐུན་ཞུགས་ན། །ཁམས་གསུམ་གང་བའི་མི་རྣམས་ལ། །སྲོག་སྦྱིན་པས་ནི་འདི་དོན་ཆེ། །ཞེས་དང་། གཙུག་ཏོར་ཆེན་པོའི་མདོ་ལས། བསྐལ་པ་མང་པོའི་བར་དུ་ཐོས་པ་དང་བསམ་པ་བས་ནི། ཉིན་གཅིག་ཆོས་ཉིད་ཀྱི་དོན་བསྒོམ་པས་བསོད་ནམས་ཆེའོ། །དེ་ཅིའི་ཕྱིར་ཞེ་ན། དེ་སྐྱེ་འཆིའི་ལམ་དང་རིང་དུ་བྱེད་པའི་ཕྱིར་རོ། །ཞེས་སོགས་ཞིབ་པར་གོང་དུ་བསྟན་པ་བཞིན་ལ། གཞན་ཡང་དཀོན་མཆོག་བརྩེགས་པ་ལས། སྔོན་གྱི་སངས་རྒྱས་འཇིག་རྟེན་མགོན། །གང་དུ་མྱ་ངན་འདས་གྱུར་པ། །ཀུན་གྱི་དགོན་པ་རབ་དགོན་དུ། །བླ་མེད་བྱང་ཆུབ་བརྙེས་པར་འགྱུར། །མྱུར་དུ་དགོན་པར་གནས་བྱེད་ན། །འདོད་པའི་སྲེད་པ་སྤོང་འགྱུར་ཞིང་། །ཉེས་པ་ཇི་བཞིན་རྣམ་རིག་ནས། །དེ་དག་ལས་ནི་སེམས་རྟོག་འགྱུར། །ཁྱིམ་ནི་མྱུར་དུ་སྤངས་ནས་སུ། །དགོན་པ་ལ་ནི་གནས་འགྱུར་བ། །མཁས་པ་ཡང་དག་མཐོང་བ་རྣམས། །སངས་རྒྱས་རྣམས་ཀྱིི་རྗེས་སུ་སློབ། །གང་དག་བྱང་ཆུབ་ཕྱིར་བརྩོན་པ། །དེ་དག་བདེན་པ་བརྟེན་བྱེད་ཅིང་། །དེ་དག་དགོན་པར་དགའ་འགྱུར་གྱི། །དེ་དག་ཁྱིམ་ལ་དགའ་མི་འགྱུར། །དེ་དག་སངས་རྒྱས་རྣམ་དག་གི། །སྤྱོད་ཡུལ་རྣམས་དང་མཚུངས་སྤྱོད་དེ། །གང་ཞིག་ལམ་འདིར་འཇུག་གྱུར་པ། །དེ་དག་བྱང་ཆུབ་རྙེད་དཀའ་མིན། །ཞེས་དང་། ཟླ་བ་སྒྲོན་མའི་མདོ་ལས། འདོད་པ་དག་ནི་རབ་ཏུ་བརྟེན་བྱེད་ཅིང་། །བུ་དང་ཆུང་མ་དག་ལ་སྲེད་བསྐྱེད་ཅིང་། །སྨད་པར་བྱ་བའི་ཁྱིམ་ལ་བརྟེན་བྱེད་པ། །བླ་མེད་བྱང་ཆུབ་དམ་པ་གཞར་མི་འཐོབ། །གང་དག་འདོད་པ་ལྕི་སྐམ་མེད་བཞིན་སྤོངས། །བུ་དང་ཆུང་མ་དག་ལ་སྲེད་སྤངས་ནས། །ཁྱིམ་གྱིས་སྐྲག་ནས་ཁྱིམ་ནས་མངོན་ཕྱུང་བ། །དེ་དག་བྱང་ཆུབ་མཆོག་འདི་རྙེད་མི་དཀའ། །གང་དག་ཁྱིམ་ལ་གནས་པར་བྱེད་བཞིན་དུ། །བྱང་ཆུབ་དམ་པ་མཆོག་འདི་ཐོབ་པ་ཡིན། །སངས་རྒྱས་གང་ཡང་སྔོན་ཆད་མ་བྱུང་སྟེ། །མ་འོངས་པའང་མི་འབྱུང་གནས་པ་མེད། །རྒྱལ་སྲིད་མཆིལ་མའི་ཐལ་བ་བཞིན་སྤངས་ནས། །དབེན་པར་འདོངས་ཏེ་དགོན་པར་གནས་བྱེད་པས། །ཉོན་མོངས་སྤངས་ཏེ་བདུད་ཀྱིི་དཔུང་བཅོམ་ནས། །བྱང་ཆུབ་རྡུལ་མེད་འདུས་མ་བྱས་འཚང་རྒྱ། །གང་ཞིག་བྱང་ཆུབ་རབ་ཏུ་འདོད་བྱེད་ཅིང་། །འདུས་བྱས་ངན་པས་ཡིད་ཕྱུང་སེམས་ཅན་གྱི། །མངོན་པར་ཕྱོགས་ཏེ་དགོན་པར་གོམ་བདུན་བོར། །འདི་ནི་དེ་བས་བསོད་ནམས་ཁྱད་པར་འཕགས། །གང་དག་དགའ་དང་མི་དགའ་ཅུང་ཟད་མེད། །དེ་དག་མི་ཡི་འཇིག་རྟེན་རྟག་རབ་བདེ། །གང་དག་གནས་དང་རི་སུལ་དགའ་བ་ནི། །དགེ་སྦྱོོང་ཉིད་ཀྱི་རབ་བདེ་མྱོང་བར་འགྱུར། །གང་དག་བདག་གིར་བྱེད་པ་ཅི་ཡང་མེད། །གང་དག་ཡོངས་འཛིན་རྣམ་པ་ཀུན་ཏུ་མེད། །བསེ་རུ་ལྟ་བུར་འཇིག་རྟེན་འདིར་གནས་པ། །དེ་དག་ནམ་མཁའ་ལ་ནི་རླུང་ལྟར་འགྲོ། །གང་དག་འཇིག་རྟེན་ལ་ནི་ཡིད་མི་ཆགས། །དེ་དག་མི་ཡི་འཇིག་རྟེན་རབ་ཏུ་བདེ། །དགའ་དང་མི་དགའ་ལ་ནི་ཆགས་མེད་པ། །དེ་དག་འདི་ནི་རྟག་ཏུ་སེམས་རླུང་འདྲ། །གང་དག་སྡུག་བསྔལ་མཛའ་དང་བྲལ་བ་དང་། །གང་དག་སྡུག་བསྔལ་གནས་པ་མི་དགའ་བ། །མཐའ་དེ་གཉི་གའང་རབ་ཏུ་སྤངས་ནས་སུ། །མི་གང་ཆོས་ལ་དགའ་བ་དེ་དག་བདེ། །ཞེས་དང་། ཉེས་པའི་ཚོགས་མང་ཐམས་ཅད་སྤངས་ནས་སུ། །རྣལ་འབྱོར་ཅན་ནི་རྟག་ཏུ་བྱེད་པ་ཉུང་། །རྣལ་འབྱོར་དག་བརྩོན་ནམ་ཡང་རྩོད་པ་མེད། །དགོན་པར་གནས་པ་དེ་ཡི་ཕན་ཡོན་ནི། །དེ་ནི་རྟག་ཏུ་འདུས་བྱས་ཡིད་འབྱུང་འགྱུར། །དེ་ནི་འཇིག་རྟེན་ཅི་ལའང་འདོད་པ་མེད། །ཟག་པ་དག་ནི་རྣམ་པར་འཕེལ་མི་འགྱུར། །ནགས་ན་གནས་པ་དེ་ཡི་ཕན་ཡོན་ནི། །དེ་ནི་ནམ་ཡང་རྩོད་པར་མི་འགྱུར་ཏེ། །རྟག་ཏུ་ཞི་ཞིང་དགའ་ལ་དབེན་པར་འགྱུར། །ལུས་དང་ངག་དང་ཡིད་ནི་རབ་བསྡམས་པ། །དགོན་པར་གནས་པ་འདི་ལ་ཡོན་ཏན་མང་། །དེ་ནི་ཐར་པའི་རྗེས་སུ་མཐུན་པ་ཡིན། །དེ་ནི་རྣམ་གྲོལ་ཞི་བ་མྱུར་རྟོགས་བྱེད། །ནགས་ན་གནས་ཞིང་རྣམ་གྲོལ་རྟེན་བྱེད་ན། །དགོན་གནས་དེ་ལ་ཡོན་ཏན་འདིི་ཀུན་འབྱུང་། །ཞེས་དང་། གྲོང་དང་གྲོང་ཁྱེར་དག་ལ་དགའ་སྤངས་ལ། །རྟག་ཏུ་དབེན་ཞིང་ནགས་ཁྲོད་བསྟེན་པར་གྱིས། །བསེ་རུ་ལྟ་བུ་རྟག་ཏུ་གཉིས་མེད་བྱོས། །རིང་པོར་མི་ཐོགས་ཏིང་འཛིན་མཆོག་འདི་ཐོབ། །ཅེས་སོགས་འདོད་ཆུང་ཆོག་ཤེས་དང་དབེན་པར་བསྟེན་པའི་ཕན་ཡོན་གྱི་བསྔགས་པ་རྒྱ་ཆེར་མདོ་སྡེ་རིན་པོ་ཆེ་རྣམས་ནས་གསུངས་པའི་དོན་ལ་དྲན་པ་ཉེ་བར་བཞག་སྟེ་ཚུལ་བཞིན་དུ་བསྟེན་པར་བྱ་དགོས་ལ། གལ་ཏེ་དེ་ལྟ་བུའི་ཏིང་ངེ་འཛིན་གྱི་དོན་འཚོལ་མི་ནུས་པ་ཞིག་ཡིན་ཡང་གཞན་དབེན་པ་བརྟེན་པ་དང་བསྒོམ་བསྒྲུབ་ཉམས་ལེན་བྱེད་པ་རྣམས་ལ་བར་གཅོད་མི་བྱེད་ཅིང་དེ་ལ་དགའ་བས་རྗེས་སུ་ཡི་རང་བ་བསྐྱེད་པའང་བསོད་ནམས་བསམ་གྱིས་མི་ཁྱབ་སྟེ། མདོ་སྡེ་སྐལ་བཟང་ལས། སྔོན་བྱུང་བ་འདས་པའི་དུས་ན། དེ་བཞིན་གཤེགས་པ་བརྩོན་འགྲུས་མཐའ་ཡས་ཞེས་བྱ་བ་འཁོར་ཐེར་འབུམ་སྙེད་དང་བཅས་པ་ཞིག་བྱུང་བར་གྱུར་ཏེ། ཏིང་ངེ་འཛིན་སྟོན་ཏོ། །དེ་ཏིང་ངེ་འཛིན་སྟོན་པ་ན་དེའི་ཚེ་རྒྱལ་པོ་བསོད་ནམས་མེ་ཏོག་ཅེས་བྱ་བ་ཞིག་བྱུང་བས་ཐོས་ནས། དེས་བཙུན་མོ་སྟོང་དང་སྲས་སྟོང་ལ་སྨྲས་པ། ཏིང་ངེ་འཛིན་ཟད་པར་སྣང་བ་འདིའི་དོན་མི་ཤེས་སོ། །མ་ཤེས་པས་རྟོགས་པར་བྱར་ཡང་མི་ནུས་སོ། །དེ་ལྟ་ཡིན་ཀྱང་དེ་བཞིན་གཤེགས་པས་ལེགས་པར་གསུངས་པ་ལ་བདག་ཅག་གིས་རྗེས་སུ་ཡི་རང་བར་ནི་བྱའོ་ཞེས་བཅོམ་ལྡན་འདས་ཀྱིས་ལེགས་པར་གསུངས་ཤིང་བཤད་པའི་ཏིང་ངེ་འཛིན་འདི་ལ་རྗེས་སུ་ཡི་རང་བར་བྱས་པས། དེ་དག་རྗེས་སུ་ཡི་རང་བའི་མོད་ལ་བསྐལ་པ་བརྒྱད་ཁྲིར་འཁོར་བ་ཕྱིར་བསྙིལ་ནས། དེ་ལས་ཁ་ཕྱིར་ཕྱོགས་པར་གྱུར་ཏེ། ཁྱིམ་ཅན་ཞེས་བྱ་བའི་གཟུངས་ཐོབ་པར་གྱུར་ཏེ། དགེ་བའི་རྩ་བ་དེས་ནི་སངས་རྒྱས་སུམ་འབུམ་དག་མཉེས་པར་གྱུར་ཏོ། །ཐམས་ཅད་དུ་ཡང་ཏིང་ངེ་འཛིན་འདི་ཐོབ་པར་གྱུར་ཏོ། །ལོག་པར་ལྟུང་བ་དང་མི་ཁོམ་པ་དག་ཏུ་ནམ་ཡང་ལྟུང་བར་མ་གྱུར་ཏོ། །རྒྱུ་དེ་ཁོ་ནས་མངོན་པར་རྫོགས་པའི་སངས་རྒྱས་པར་འགྱུར་རོ། །ཞེས་སོ། །མདོར་ན་དོན་དམ་རིག་པ་ལས། །གང་ཞིག་བླ་མའི་མན་ངག་བདུད་རྩིའི་ཆུ། །གདུང་སེལ་བསིལ་ལྡན་ངོམས་པར་མི་འཐུང་བར། །དེ་ནི་བསྟན་བཅོས་དོན་མང་མྱ་ངན་གྱི། །ཐང་ལ་སྐོམ་པས་གདུང་སྟེ་ཤི་བར་ཟད། །ཅེས་དང་། །མགོན་པོ་ཨ་ཏི་ཤས། ཚེ་ནི་ཡུན་ཐུང་ཤེས་བྱའི་རྣམ་པ་མང་། །ཚེ་ཡི་ཚད་ཀྱང་ཇི་ཙམ་མི་ཤེས་པས། །ངང་པས་ཆུ་ལས་འོ་མ་ལེན་པ་བཞིན། །རང་གི་འདོད་པ་དང་དུ་བླང་བར་བྱ། །འཇིག་རྟེན་སྤྱོད་པ་དག་ལ་ཕན་བལྟས་པས། །བྱས་པ་ཐམས་ཅད་དོན་མེད་སྡུག་བསྔལ་རྒྱུ། །ཅི་ལ་བསམ་ཡང་སྙིང་པོ་མི་གདའ་བས། །རང་གི་སེམས་ལ་བལྟ་བ་གོམས་པར་གྱིས། །ཞེས་གསུངས་པ་ལྟར་བདག་ལེགས་སུ་འདོད་པ་དག་གིས་བརྒྱུད་ལྡན་དམ་པའི་ཞལ་ལུང་ལ་སྙིང་པོར་བྱས་ཏེ་ཅི་ནུས་སུ་རང་གི་རྒྱུད་ལ་སྦྱར་བ་འདིི་ཁོ་ན་དོན་ཆེ་བས་དེ་དེ་བཞིན་དུ་མཛོད་ཅིག་ཅེས་ཐལ་མོ་སྦྱར་ནས་གསོལ་བ་འདེབས་པ་ལགས་སོ། །སྨྲས་པ། སྔོན་དུས་སྐྱེ་བོ་ངེས་འབྱུང་སྐྱོ་ཤས་ཆེ། །སྣོད་དང་བཅུད་འཛོམས་རྩེ་གཅིག་སྒྲུབ་ལ་དགའ། །གདམས་ཟབ་སྣ་རེས་སྐལ་ལྡན་སྨིན་གྲོལ་བྱེད། དེ་ཚེ་བཤད་ཡམ་མང་པོས་དགོས་པ་ཅི། དེང་སང་སྐྱེ་བོ་ཕལ་ཆེར་སྤྲོས་ལ་དགའ། །དོན་གནད་མི་མྱོང་ཚིག་མཐའ་འབའ་ཞིག་དེད། །མྱོང་ཁྲིད་རྒྱུན་ཆད་ཁ་བཤད་འུར་གྱིས་འགེངས། །དེ་ཕྱིར་འཆད་འདོད་རྣམས་ལ་ཚུལ་འདི་མཁོ། །མཁས་པའི་གཞུང་ལ་འདྲིས་ཆ་མ་བྱས་ཤིང་། །གྲུབ་པའི་ཉམས་མྱོང་དྲི་ཡིས་མ་གོས་པའི། །སྙིགས་དུས་བླ་མའི་གོ་ས་འཛིན་བྱེད་པ། །བདག་དང་བདག་འདྲའི་ཟོག་པོས་རྒྱལ་ཁམས་ཁེངས། །རང་གར་འདུག་ཚེ་བག་མེད་འདུ་འཛིས་གཡེངས། །དགོས་གལ་བྱུང་དུས་དཔེ་མང་ཀློག་པས་དུབ། །འཕྲལ་དུ་གང་དྲན་འབྲེལ་མེད་སྨྱོན་པའི་ངག །སྒྲོགས་ལ་བླུན་པོ་མ གུ་ཡང་མཁས་པས་ཁྲེལ། །གཞན་བརྗོད་རྗེས་ཟློས་བྲག་ཆའི་རོལ་མོའི་དབྱངས། །སྙན་ཡང་བརྒྱུད་པའི་བྱིན་རླབས་ཆུ་ཤིང་སྙིང་། །དེ་སླད་གྲུབ་པའི་རིག་འཛིན་མཆོག་རྣམས་ཀྱི། །གསུང་གི་ཟེགས་{ཟེག}མ་བསྡུས་འདི་དོན་ལྡན་ཉིད། །བདག་ནི་དམ་པ་མ་ཡིན་མཁས་པའང་མིན། །གྲུབ་པ་ལྟ་ཅི་བཟང་སྤྱོད་དྲི་ཡིས་དབེན། །འོན་ཀྱང་བླ་མ་རྫོགས་པའི་སངས་རྒྱས་དངོས། །ཞལ་མཇལ་གསུང་གི་གདམས་པ་ཤས་ཙམ་མྱོང། །ལུས་ངག་སྲི་ཞུས་ཞབས་ཏོག་མ་འགྲུབ་ཀྱང་། །མོས་གུས་རྡོ་ཡི་རི་མོ་སྙིང་དབུས་སུ། །ནམ་ཡང་བསྲུབ་ཏུ་མེད་པ་འདི་ཙམ་གྱིས། །དལ་བའི་རྟེན་ལ་སྙིང་པོ་བྱས་པར་རློམ། །འོན་ཀྱང་ཡུལ་རྐྱེན་བསིལ་བུས་རབ་བསྐྱོད་པའི། །གཡོ་བའི་ཀུན་རྟོག་ཀུ་ཤའི་རྩེ་མོ་བཞིན། །རྣམ་པར་གཡོ་བའི་སྣང་ཚུལ་འདི་མཐོང་ཚེ། །སྐྱོ་བའི་སེམས་ལ་སངས་པའི་དུས་ཀྱང་ཅི། །ཆོས་ལྟར་བཤད་ན་ཉན་མཁན་གཅིག་ཀྱང་མེད། །ཆོས་འགལ་སྨྲས་ན་ཉན་ཡང་རྣམ་སྨིན་ལྕི། །ཇི་ལྟར་བྱས་ཀྱང་སུ་ལ་ཕན་པར་ནུས། །ཀྱེ་མ་ཀྱེ་ཧུ་བླ་མ་དཀོན་མཆོག་མཁྱེན། །བྱས་ན་དགའ་བ་གཅིག་ཀྱང་མི་བྱེད་ལ། །མ་བྱས་བསམ་པ་བརྒྱ་ཕྲག་ཁུར་དུ་ལེན། །ཕན་པར་བསླབས་ཀྱང་ཐ་མ་འཁོན་གྱི་རྒྱུ། །འདི་འདྲའི་འཁོར་སློབ་མཐོང་ནས་སེམས་པ་སྐྱོ། །རང་རྒྱུད་མ་དུལ་གཞན་ཕན་ག་ལ་འབྱུང་། །རང་རྒྱུད་དུལ་ན་ཇི་ལྟར་བྱས་ཀྱང་རུང་། །ད་ནི་ཚེ་མཇུག་སྤྲིན་བར་ཉི་ཙམ་འདིར། །གཡེངས་པ་སྤངས་ལ་རྩེ་གཅིག་སྒོམ་པར་ཤོག །མི་འགྲུབ་དྲན་རྒྱ་སྔ་མ་དེ་ཙམ་ཡིན། །བྱས་བྱས་མང་པོའི་གྲུབ་འབྲས་ཅི་འདུག་སོམས། །ད་ནི་སྤྲང་པོ་རང་ཚུགས་བཟུང་བའི་དུས། །ཉམ་ཆུང་བས་མཐར་ཁྱི་བཞིན་འཆི་བར་སྨོན། །བདག་གི་ཡབ་གཅིག་དམིགས་མེད་ཐུགས་རྗེའི་གཏེར། །མི་མངོན་དབྱིངས་ནས་བརྩེ་བས་རྗེས་དགོངས་ཏེ། །རང་དབང་དམ་པའི་ཆོས་ལ་སྤྱོད་པ་དང་། །ཇི་ལྟར་སྨོན་པ་འགྲུབ་པའི་བྱིན་རླབས་སྩོལ། །ནམ་ཞིག་འདི་སྣང་ནུབ་པར་གྱུར་པའི་ཚེ། །གནད་གཅོད་ཚོར་བ་དྲག་པོ་མི་འབྱུང་ཞིང་། །འོད་གསལ་དག་པའི་སྣང་བས་མདུན་བསུས་ཏེ། །ཁྱབ་བདག་བླ་མའི་ཞབས་དྲུང་སྐྱེ་བར་སྨོན། །དེར་ནི་རིག་འཛིན་འདུས་པའི་ཚོགས་རྣམས་དང་། །ལྷན་ཅིག་གསང་སྔགས་ཟབ་མོའི་སྤྱོད་པ་ཡིས། །དཀའ་བ་མེད་པར་ལམ་གྱི་འཕྲོ་མཐུད་ནས། །དཔལ་མགོན་བླ་མའི་གོ་འཕང་མངོན་བྱེད་ཤོག །དེ་མ་ཐོབ་ཀྱི་ཚེ་རབས་ཕྲེང་བ་རུ། །དགོན་གོག་ཁ་འཛིན་མི་དགེའི་བཤེས་གཉེན་དང་། །སྡིག་སྤྱོད་རྒྱལ་བློན་བྲན་འཁོར་ཕོ་ཉ་བ། །ངན་འགྲོ་ལོག་པར་ལྟུང་བར་བདག་མ་སྐྱེས། །བསྟན་སེལ་འཇུག་པའི་རྟོག་གེ་ཐ་སྙད་མཁན། །སྟོང་པ་ཁ་ཁྱེར་རྒྱུ་འབྲས་ཁྱད་གསོད་དང་། །མ་གྲུབ་གྲུབ་བརྫུས་གཞན་མགོ་བསྐོར་བ་ཡི། །རང་གཞན་གཉིས་ཕུང་ལུས་སུ་བདག་མ་སྐྱེས། །གནས་བརྟན་ལས་བྱེད་ནང་ཁྲིམས་པ་ལ་སོགས། །དམ་པ་རྣམས་ཀྱིས་སྨོད་ཅིང་སྤངས་པ་ཡི། །གནས་ངན་རྣམས་སུ་ནམ་ཡང་མི་སྐྱེ་བར། །རྟག་པར་དམ་པའི་ཆོས་དང་མི་འབྲལ་ཤོག །མཐུན་རྐྱེན་འཁོར་ལོ་བཞི་ཡིས་འབྱོར་པ་ཡི། །རྣམ་དག་དལ་བའི་རྟེན་བཟང་ལེགས་རྙེད་ཅིང་། །རྟག་ཏུ་དཔལ་མགོན་བླ་མ་མཉེས་བྱས་ནས། །ངེས་དོན་སྙིང་པོའི་རིང་ལུགས་འཛིན་གྱུར་ཅིག །རྨི་ལམ་ན་ཡང་སྡིག་སེམས་མི་སྐྱེ་ཞིང་། །བྱང་ཆུབ་སེམས་ནི་ནམ་ཡང་བརྗེད་མ་གྱུར། །ཚོགས་གཉིས་ཟུང་འབྲེལ་རྒྱལ་བ་དགྱེས་པའི་ལམ། །ཚང་ལ་མ་ནོར་ཇི་བཞིན་སྤྱོད་པར་ཤོག །ཁྱད་པར་མཚན་ཉིད་ཀུན་ལྡན་བླ་མ་ལས། །དབང་བཞིས་རྒྱུད་སྨིན་དམ་ཚིག་རྣམ་པར་དག །རིམ་པ་གཉིས་ཀྱི་རྣལ་འབྱོར་མཐར་ཕྱིན་ནས། །ཚེ་དེར་སྲིད་པའི་རྒྱ་མཚོ་བརྒལ་བྱེད་ཤོག །ནམ་ཞིག་རང་དོན་རྫོགས་ནས་གཞན་གྱི་དོན། །སྒྲུབ་ལ་དཀའ་བ་མེད་པའི་མཐུ་ཐོབ་ཚེ། །སྐད་ཅིག་ཙམ་ཡང་སྐྱོ་སེམས་མི་བགྱིད་པར། །མ་ལུས་འགྲོ་ལ་ཕན་བདེ་བྱེད་པར་ཤོག །མཁའ་ཁྱབ་ཞིང་དུ་རྣམ་འཕྲུལ་ཚད་མེད་པས། །རྒྱལ་མཆོད་དམ་ཆོས་ཀུན་འཛིན་འགྲོ་སྨིན་བྱེད། །ཀུན་བཟང་སྤྱོད་པ་རྒྱ་མཚོ་མཐར་ཕྱིན་ནས། །དཔལ་མགོན་བླ་མའི་ཕྲིན་ལས་ཀུན་འགྲུབ་ཤོག །ཀྱེ་ཧོ་བདག་ལ་འདུན་པའི་མི་ཡོད་ན། །ཚེ་འདིའི་ལྟོ་གོས་ཕྱེད་ཙམ་སུ་ལའང་ཡོད། །ཕྱི་མར་ཕན་པའི་ཆོས་ནི་སུ་ལའང་དཀོན། །རང་གིས་རང་བསླུ་མ་བྱེད་བསམ་གཞིག་ཐོངས། །དལ་བའི་རྟེན་འདི་ཡིད་བཞིན་ནོར་ལས་ལྷག །སྔོན་བསགས་བཟང་པོས་འབྱོར་པ་ད་རེས་ཙམ། །རང་གིས་བརྩོན་ན་བྱང་ཆུབ་གམ་ན་འདུག །དོན་མེད་སྟོང་ལོག་བྱས་ན་ཀྱེ་མ་བླུན། །ལང་ཚོའི་མེ་ཏོག་མགུལ་རྒྱན་ཡུད་ཀྱིས་རྙིང་། །དཔལ་འབྱོར་རྩྭ་ཁའི་ཟིལ་ཐིགས་མི་བརྟན་གཡོ། །ཚེ་སྲོག་གློག་གི་ཟློས་གར་ཡིད་བརྟན་ཅི། །དེ་རིང་ཉིད་ནས་བརྩོན་པའི་དཔུང་བསྐྱེད་འཚལ། །འདུ་བྱེད་ལས་ནི་ལུས་དང་གྲིབ་མ་བཞིན། །བདེ་སྡུག་མི་འཆོལ་དཀར་ནག་འབྲས་བུ་སྨིན། །ལས་ལས་མཐུ་ཆེ་སྲིད་པ་གསུམ་ན་སུ། །དེ་ཕྱིར་འཇུག་ལྡོག་ལག་ལེན་གནད་དུ་དྲིལ། །རྒ་ཤི་མེད་པའི་བཅུད་ལེན་མ་གྲུབ་ན། །སྲིད་པའི་འགྲོ་བ་གཅོང་ཆེན་ནད་པ་བཞིན། །གནས་རིས་གང་ནའང་བདེ་བའི་གོ་སྐབས་ཅི། །རྣམ་གསུམ་སྡུག་བསྔལ་ཟུག་རྔུ་རྒྱུན་མི་འཆད། །དེ་ལས་སྐྱོབ་ནུས་བླ་མ་དཀོན་མཆོག་གསུམ། །སྐྱབས་འདིས་ནམ་ཡང་བསླུ་བ་མི་སྲིད་པས། །ཡིད་ཆེས་དད་པས་སྐྱབས་སུ་བསྟེན་ནུས་ན། །སྲིད་པའི་ཀླུང་ཤུགས་ཟློག་ན་ཕལ་ཅི་སྨོས། །རྨོངས་པ་ཁ་ཅིག་འདྲེ་ལའང་སྐྱབས་སུ་འགྲོ། །སྐྱབས་གནས་དཀོན་མཆོག་གསུམ་ལ་བློ་གཏད་མེད། །རང་ཕུང་གཞན་ཕུང་ཡི་དྭགས་དམྱལ་བའི་རྒྱུ། །ཚུལ་འདི་བསམ་གྱིན་སྙིང་ནས་མཆི་མ་དཀུ། །ཚད་མེད་རྣམ་བཞིའི་ཤིང་རྟའི་རླུང་ཤུགས་ཀྱིས། །ཉེར་དྲངས་སྨོན་འཇུག་སེམས་གྱི་འོད་དཀར་ཅན། །སྲིད་ཞིའི་གདུང་བ་འཕྲོག་པའི་དུག་སེལ་བཅུད། །ཐེག་ཆེན་ལམ་གྱི་རྩ་བ་འདི་ཁོ་ན། །བདག་བདེ་འདོད་ལ་ཉེས་པ་ཀུན་བརྟེན་ཞིང་། །གཞན་ཕན་བསྒྲུབས་ལས་སངས་རྒྱས་འབྲས་བུ་སྨིན། །དེ་ཕྱིར་དེ་ཡི་ཁེ་ཉ ེན་ཤེས་བྱོས་ལ། །རྟག་པར་ཕྱིན་དྲུག་ལམ་ལ་སློབས་ཤིག་ཀྱེ། །བསྐལ་མང་བསགས་པའི་སྒྲིབ་པའི་བུད་ཤིང་ཚོགས། །ཡུད་ཀྱིས་ཟ་བ་འཇིག་བྱེད་དུས་ཀྱི་མེ། །སྟོབས་བཞིའི་རླུང་གིས་བསྐུལ་བའི་བཟླས་སྒོམ་ལ། །བརྩོན་གང་སྤྲིན་བྲལ་ཟླ་བ་བཞིན་དུ་མཛེས། །ཞིང་ས་གཤིན་ལ་ས་བོན་ལེགས་བཏབ་བཞིན། །གང་དང་འབྲེལ་ན་ཚོགས་གཉིས་འབྲུའི་བང་མཛོད། །ཡོངས་སུ་འགེངས་བྱེད་དཀོན་མཆོག་རྩ་བ་གསུམ། །སྐུ་གསུམ་འབྱོར་པས་བསྙེན་གང་འབྲས་བུར་བཅས། །སྒྲིབ་གཉིས་མ་བྱང་ཚོགས་གཉིས་མ་རྫོགས་པའི། །སངས་རྒྱས་གང་ནའང་མི་འབྱུང་བྱུང་སྲིད་ན། །ཡང་དག་མ་ཡིན་མདོ་རྒྱུད་ལུང་དང་འགལ། །དེ་ཕྱིར་བསགས་སྦྱང་གཉིས་ལ་བརྩོན་པ་གལ། །རང་ལ་དྲིན་ཐོབ་རྩ་བའི་བླ་མ་དེ། །མདོ་རྒྱུད་ཀུན་ནས་སངས་རྒྱས་དངོས་སུ་བསྟན། །བཀའ་དྲིན་སངས་རྒྱས་ལས་ཀྱང་ཁྱད་པར་འཕགས། །མཉེས་པ་གསུམ་གྱིས་བསྟེན་རྣམས་སྐལ་བ་བཟང་། །དོན་བརྒྱུད་དགོངས་པའི་བྱིན་རླབས་མ་འཕོས་ན། །སྒྲིན་པོའི་བློ་ཡིས་གནས་ལུགས་རྟོགས་མི་སྲིད། །དད་པ་ཅན་ལ་མ་སྦས་ཁོང་ནས་འཆར། །དེ་ཕྱིར་བླ་མའི་རྣལ་འབྱོར་ལམ་གྱི་མཆོག །ཕྱག་མཆོད་སྡིག་བཤགས་ཡི་རང་བསྐུལ་ལ་སོགས། །ཐབས་ལ་མཁས་པས་བསྐལ་པ་མང་པོའི་ཚོགས། །སྐད་ཅིག་འདུམ་བྱེད་གང་དེའི་བསོད་ནམས་ཕུལ། །གཟུགས་སུ་གྲུབ་ན་ནམ་མཁའ་སྣོད་དུ་ཆུང་། །གསོལ་གདབ་དབང་ལེན་ལ་སོགས་གང་ལ་ཡང་། །བླ་མ་སངས་རྒྱས་མཐོང་བའི་མོས་གུས་གཅེས། །མོས་གུས་མེད་ན་ཅིས་ཀྱང་ཕན་མི་ཐོགས། །མོས་གུས་ཡོད་ན་ཇི་ལྟར་བྱས་ཀྱང་རུང་། །ཀུན་རྫོབ་གཟུགས་སྐུའི་བླ་མ་འདུ་འབྲལ་ཡོད། །དེ་ལ་གདུང་བ་མི་དགོས་སྐལ་ལྡན་རྣམས། །དོན་དམ་ཆོས་སྐུའི་བླ་མ་འདུ་འབྲལ་མེད། །རང་སེམས་བླ་མར་རྟོགས་ན་དེ་ཀ་རང་། །དེ་བས་སྐལ་བཟང་དོན་མཐུན་གྲོགས་པོ་རྣམས། །བླ་མའི་རྣལ་འབྱོར་ལན་གྱི་སྙིང་པོར་ཟུངས། །ཐུགས་ཡིད་བསྲེས་ལ་དགོངས་པའི་ཉམས་སྐྱོངས་དང་། །ཉམས་ལེན་གནད་ཀུན་འདི་རུ་མ་འདུས་མེད། །བསྐྱེད་བཟླས་རྫོགས་སོགས་ལམ་ཁྱེར་གནད་ཀུན་གྱི། །འབྲས་བུའི་ཐུག་ས་འདི་ཡིན་གཞན་དུ་མིན། །དེ་ཕྱིར་རྟག་ཏུ་བརྩོན་པའི་སྐལ་བཟང་ལ། །ནམ་ཡང་འབྲལ་བ་མེད་དོ་གྲོགས་མཆོག་རྣམས། །དེ་ལྟར་བཤད་པའི་དགེ་བས་མཁའ་ཁྱབ་འགྲོ། །ནམ་ཡང་བླ་མ་མཆོག་གིས་རྗེས་བཟུང་སྟེ། །ཐེག་མཆོག་ལམ་གྱི་རྟེན་འབྲེལ་ཀུན་འགྲིགས་ནས། །རྫོགས་སྨིན་སྦྱངས་པ་མཐར་ཕྱིན་སངས་རྒྱས་ཤོག །རྒྱལ་བའི་བསྟན་དར་བསྟན་འཛིན་ཞབས་པད་བརྟན། །བཤད་སྒྲུབ་སྡེ་རྒྱས་རྒྱལ་ཁམས་བདེ་ཞིང་སྐྱིད། །རྫོགས་ལྡན་དུས་བཞིན་སྣོད་བཅུད་འབྱོར་པ་ཡི། །བཀྲ་ཤིས་དཔལ་གྱིས་ཕྱོགས་ཀུན་ཁྱབ་གྱུར་ཅིག །ཅེས་པའང་སྔོན་སོར་རིག་འཛིན་གྲུབ་པའི་ཁྱུ་མཆོག་འགྲོ་འདུལ་དཔའ་བོ་རྡོ་རྗེའི་ཞལ་སྔ་ནས། ཁྱོད་ནས་ཀྱང་སྔོན་འགྲོ་རེ་ཙམ་ལ་བཤད་རྒྱུ་བྱུང་ན་ལེགས་པའི་གསུང་འཕྲོས་ཕེབས་པ་བཞིན། རང་གི་བསྙེལ་གསོས་ཙམ་དུ་བློ་ལྡོག་རྣམ་བཞི་ཡན་ལ་ཟིན་ཐུན་ཞིག་བཏབ་ཀྱང་། ཡུལ་རྐྱེན་འགའ་ཞིག་ལ་བརྟེན་ནས་དགོས་འབྲེལ་མེད་པར་མཐོང་སྟེ་སྤྲོས་པ་སྐྱུང་བ་ལ། སླད་ནས། རང་བཞིན་བཟང་པོ་གསེར་ལྟར་འགྱུར་བ་མེད་པའི་མཆོག་སྤྲུལ་རིན་པོ་ཆེ་པདྨ་དྲི་མེད་ལེགས་པའི་བློ་གྲོས་དང་། གཅུང་ཐུབ་བསྟན་དགེ་ལེགས་རྒྱ་མཚོ་གཉིས་ནས་བྲི་གཞིའི་སྣག་ཤོག་གི་མཐུན་སྦྱོར་བཅས་ནན་གྱིས་བསྐུལ་བའི་གསུངས་ངོ་མི་ལྡོག་ཙམ་དུ། རྫོགས་པའི་སངས་རྒྱས་བློ་གྲོས་མཐའ་ཡས་རིགས་བདག་ཏུ་ཐོབ་པའི་དགེ་སྦྱོང་རྒན་པོ་འགྱུར་མེད་པདྨ་རྣམ་རྒྱལ་ལམ། རྒྱལ་བའི་སྲས་པོ་འཇམ་དབྱངས་བློ་གྲོས་རྒྱ་མཚོའི་སྒྲ་དབྱངས་སུ་འབོད་པས། རང་ལོ་ང་གཅིག་པ་ལྕགས་བྱ་ས་ག་ཟླ་བའི་དུས་ཚེས་དགེ་བར། མདོ་ཁམས་སེེང་གེ་གནམ་རྫོང་བྱང་ཆུབ་ཤིང་གི་ནགས་ཁྲོད་ན་མཛེས་པའི་སྒྲུབ་སྡེ་བདེ་ཆེན་པདྨ་འོད་གླིང་གི་དབེན་སྤྱིལ་བཀྲ་ཤིས་འཆི་མེད་གྲུབ་པའི་དགའ་ཚལ་དུ་བྲིས་པ་དགེ། །། |