ཀུན་མཁྱེན་གོ་རམས་པ་བསོད་ནམས་སེང་གེའི་གསུང་འབུམ།

གསུང་འབུམ་པོད། ཕ༽

ཀུན་མཁྱེན་གོ་རམས་པ་བསོད་ནམས་སེང་གེ

Nitartha International

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

སྡེ་བདུན་མདོ་དང་བཅས་པའི་དགོངས་འགྲེལ་ཚད་མ་རིག་པའི་གཏེར་གྱི་འགྲེལ་པ་རིགས་ལམ་རབ་གསལ།

སྡེ་བདུན་མདོ་དང་བཅས་པའི་དགོངས་འགྲེལ་ཚད་མ་རིག་པའི་གཏེར་གྱི་འགྲེལ་པ་རིགས་ལམ་རབ་གསལ་ཞེས་བྱ་བ་བཞུགས་སོ།། ཨོཾ་སྭ་སྟི་སིདྡྷཾ། སྡེ་བདུན་མདོ་དང་བཅས་པའི་དགོངས་འགྲེལ་ཚད་མ་རིག་པའི་གཏེར་གྱི་འགྲེལ་པ་རིགས་ལམ་རབ་གསལ་ཞེས་བྱ་བ་ཤེས་བྱའི་གནས་ལ་བསླུ་བ་མེད་པའི་ཡེ་ཤེས་ཡོངས་སུ་དག་པ་བླ་མ་འཇམ་པའི་དབྱངས་ཀྱི་ཞབས་ལ་སྒོ་གསུམ་གུས་པའི་སྒོ་ནས་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ། དྲི་མ་མ་ལུས་ཡོངས་སུ་དག་པའི་སྐུ་ནི་རབ་དཀར་གངས་རི་ལྟར་བརྗིད་ཅིང་། །དམ་ཆོས་ཆོས་སྒྲ་ཕྱོགས་བཅུར་སྒྲོགས་པའི་གསུང་ནི་རབ་སྙན་ལྷ་ཡི་རྔ་བོ་ཆེ། །ཆོས་ཀུན་ཀུན་ལ་ཆགས་ཐོགས་མེད་པའི་ཐུགས་ནི་རབ་འབྱམས་ནམ་མཁའ་ལྟར་ཞི་བ། །སྲིད་ཞིའི་ཉེས་པས་མི་གཡོ་འགྲོ་བའི་མགོན་པོ་ལྷ་མཆོག་དེ་ལ་སྙིང་ནས་འདུད། །འཛམ་གླིང་མཛེས་བྱེད་འཛམ་བུའི་གསེར་གྱི་ཅོད་པཎ་མཆོག་ལྟར་བློ་གསལ་ཀུན་གྱི་སྤྱི་བོའི་རྒྱན། །རྒྱལ་བས་ལུང་བསྟན་རྒྱལ་བའི་སྲས་ཚོགས་ཀུན་གྱི་དབུས་ན་རྒྱལ་བ་ལྟ་བུར་ལྷམ་མེ་བ། །ཕྱོགས་ལས་རྣམ་རྒྱལ་ཕྱོགས་བཅུའི་རྒྱལ་བ་ཀུན་གྱི་རྣམ་དཀར་མཛད་པའི་ལས་བཟང་རྣམས། །རབ་ཏུ་སྒྲུབ་མཛད་རབ་དགའི་ས་བརྙེས་དཔལ་ལྡན་རིགས་པའི་དབང་ཕྱུག་རྣམ་གཉིས་རྟག་ཏུ་རྒྱལ། །ལུང་རྟོགས་བསྟན་པ་ཀུན་གྱི་རྩ་ལག་མཆོག །ཕན་བདེའི་དགའ་སྟོན་ཀུན་ལ་རྩོལ་བའི་གཉེན། །རྒྱལ་བའི་མཚན་དཔེ་ཀུན་གྱི་དཔལ་མངའ་བ། །ལྷུན་གྲུབ་འཕྲིན་ལས་བཟང་པོ་དེར་ཕྱག་འཚལ། །ལྷུན་གྲུབ་མཛད་པ་རྒྱུན་ཆད་མེད་པར་སྒྲུབ་མཛད་བཟང་པོའི་མཛད་པ་ཅན། །བྱམས་བརྩེའི་གཟིགས་པ་མཁའ་མཉམ་འགྲོ་ལ་མཁའ་ལྟར་ཁྱབ་པའི་ཐུགས་རྗེ་ཅན། །ཟབ་ཡངས་ཡེ་ཤེས་ཟབ་ཡངས་ཆོས་ལ་ཐོགས་མེད་འཇུག་པའི་མཁྱེན་པ་ཅན། །ལེགས་བཤད་མཆོག་གིས་ལེགས་པར་སྐྱོང་མཛད་ཡོངས་འཛིན་མཆོག་རྣམས་བསྟོད་པར་བགྱི། །རྣམ་དག་རིགས་པའི་རིན་ཆེན་གཏེར། །རྣམ་པར་ཕྱེ་རློམ་མང་ན་ཡང་། །རྣམ་རྫོགས་གསལ་བར་མ་ནུས་པས། །རྣམ་བཤད་ཉི་མའི་འོད་ཀྱིས་དབྱེ། །འདི་ལ་མཚན་གྱི་དོན། གཞུང་གི་དོན། མཇུག་གི་དོན་གསུམ། དང་པོ་ནི། རྒྱ་གར་སོགས་སོ། །གཉིས་པ་ལ་བཤད་པ་ལ་འཇུག་པའི་ཡན་ལག བཤད་པ་ཉིད་ཉེ་བར་དགོད་པ། བཤད་པ་ཡོངས་སུ་རྫོགས་པའི་བྱ་བ་དང་གསུམ་ལས། དང་པོ་ལ་མཆོད་པར་བརྗོད་པ། རྩོམ་པར་དམ་བཅའ་བ་གཉིས་ལས། དང་པོ་ལ་ལྷག་པའི་ལྷ་ལ་མཆོད་པར་བརྗོད་པ། རྩ་བའི་བླ་མ་ལ་མཆོད་པར་བརྗོད་པ། རིགས་པའི་དབང་ཕྱུག་གཉིས་ལ་མཆོད་པ་བརྗོད་པའོ། །དང་པོ་ནི། འཕགས་པ་འཇམ་དཔལ་ཞེས་སོགས་སོ། །གཉིས་པ་ནི། ཕྱག་འཚལ་ལོ་ཞེས་པ་ནི་གཞིར་གཞག་གོ །གང་གིས་ན་རྩོམ་པ་པོས། ཚུལ་ཇི་ལྟར་ན་རང་ཉིད་ཀྱི་ཡན་ལག་གི་མཆོག་མགོ་བོས། གང་ལ་ན་སྤྱི་དང་ཁྱད་པར་གྱི་བཀའ་དྲིན་ལྷག་པར་སྟོན་པའི་རྩ་བའི་བླ་མ་རྣམས་ཀྱི་སྐུའི་དམན་ཤོས་ཞབས་ལའོ། །བླ་མ་དེ་ཇི་ལྟ་བུ་ཞེ་ན། ཡི་དམ་གྱི་ལྷ་འཇམ་དབྱངས་མགོན་པོ་དང་དབྱེར་མེད་པའོ། །གང་གི་སྒོ་ནས་ན། ཇི་ལྟ་ཇི་སྙེད་ཀྱི་ཤེས་བྱ་ཐམས་ཅད་གསལ་བར་གཟིགས་པའི་སྤྱན་ཡངས་པ་སྟེ་མཁྱེན་པ་དང་། གདུལ་བྱའི་འགྲོ་བ་ཀུན་ལ་རྒྱུ་དགེ་བ་གཉིས་དང་། འབྲས་བུ་མངོན་པར་མཐོ་བ་དང་ངེས་པར་ལེགས་པར་རང་རང་གི་སྐལ་བ་དང་འཚམས་པར་སྒྲུབ་པའི་ཐུགས་རྗེ་ཅན་ཏེ་བརྩེ་བ་དང་། བསམ་ཡས་ཏེ་ལྷུན་གྱིས་གྲུབ་པའི་རྒྱུན་མི་ཆད་པའི་ཕྲིན་ལས་མཛད་པའི་སྟོབས་མངའ་བ་སྟེ་ནུས་པའི་ཡོན་ཏན་གསུམ་བརྗོད་པའི་སྒོ་ནས་སོ། །ཁོ་བོའི་ལེགས་བཤད་དོ། །གཞན་དག་གིས་ནི་ཇི་ལྟ་བ་བཞིན་མ་ཤེས་པ་སྣང་བ་ཡིན་ནོ། །གསུམ་པ་ནི། ཀླུའི་དབང་པོ་དང་ཆོས་མཚུངས་པའི་དཔལ་ལྡན་ཕྱོགས་ཀྱི་གླང་པོ་དང་། ཆོས་ཀྱི་གྲགས་པ་རྣམ་པ་གཉིས་པོ་རྟག་ཏུ་རྒྱལ་ལོ། །ཇི་ལྟར་ཀླུའི་དབང་པོ་དང་མཚུངས་ཤེ་ན། རྒྱན་དང་། རོ་འཛིན་དང་། སྒྲ་སྒྲོགས་པ་དང་། གཞན་འཇིགས་པར་བྱེད་པ་དང་། གཞན་མཛེས་པར་བྱེད་པ་ལྔས་ཆོས་མཚུངས་པ་ལས། དང་པོ་ནི། ཀླུའི་དབང་པོའི་སྤྱི་གཙུག་ནོར་བུའི་སྤྲས་པ་ལྟར། འདི་གཉིས་ཀྱི་རབ་ཏུ་རྒྱས་པའི་བློ་གྲོས་ཀྱི་སྤྱི་བོའི་གཙུག་འཕགས་པའི་ནོར་ལ་སོགས་པ་ཡོན་ཏན་ནོར་བུ་རིན་པོ་ཆེའི་རྒྱན་གྱིས་ལེགས་པར་སྤྲས་པའོ། །གཉིས་པ་ནི། དེ་ལ་དུག་དང་སྨན་གྱི་རོ་འཛིན་པའི་ལྕེ་གཉིས་ཡོད་པ་ལྟར། འདི་གཉིས་ལའང་ཀུན་རྫོབ་དང་དོན་དམ་པའི་བདེན་པ་གཉིས་ཀྱི་རོ་མངོན་སུམ་དུ་འཛིན་པའི་དབང་པོ་གཉིས་ཡོད་པའོ། །གསུམ་པ་ནི། དེས་ཕུཊ་སྒྲ་སྒྲོགས་པ་ལྟར། འདི་གཉིས་ཀྱིས་ཀྱང་གཉིས་སྟོང་གི་སྟོང་པ་ཉིད་ཀྱི་སྒྲ་ལེགས་པར་སྒྲོགས་པའོ། །བཞི་པ་ནི། དེ་ལ་མཐོང་བའི་དུག་ཡོད་པས་བལྟར་མི་བཟོད་པ་ལྟར། འདི་གཉིས་ཀྱི་མཁྱེན་བརྩེའི་ལྟ་ཟེར་ཕྱི་ནང་གི་ཕས་རྒོལ་གྱི་སྐྱེ་བོ་ཐམས་ཅད་ཀྱིས་མི་བཟོད་པའོ། །ལྔ་པ་ནི། དེ་རང་གནས་པའི་རྒྱ་མཚོའི་རྒྱན་དུ་གྱུར་པ་ལྟར། འདི་གཉིས་ཀྱང་བློ་གསལ་གྱི་གདུལ་བྱ་རྒྱ་མཚོ་ལྟ་བུ་ཐམས་ཅད་ཀྱི་རྒྱན་དུ་གྱུར་པའོ། །གཉིས་པ་རྩོམ་པར་དམ་བཅའ་བ་ནི། བཤད་དོ་ཞེས་པ་གཞིར་གཞག གང་ན། སྡེ་བདུན་མདོ་དང་བཅས་པའི་སྙིང་པོ་ཚད་མ་རིག་པའི་གཏེར་འདིའོ། །ཀུན་སློང་ཇི་ལྟ་བུས་ན། གདུལ་བྱ་རྣམས་ཀྱིས་སྡེ་བདུན་གྱི་དགོངས་པ་ཐམས་ཅད་ཇི་ལྟ་བ་བཞིན་རྟོགས་པར་འདོད་པའི་བརྩེ་བའི་བསམ་པས་ཀུན་ནས་བསླངས་ནས་སོ། །ཡུལ་ནི་རྣམ་དཔྱོད་ཀྱི་ཤེས་རབ་དང་ལྡན་པ། ལེགས་བཤད་ལ་ཕྲག་དོག་མེད་པའི་བློ་གཟུ་བོར་གནས་པ་ལེགས་བཤད་དོན་དུ་གཉེར་བ་སྡེ་སྣོད་ཀྱི་ཡོན་ཏན་དང་ལྡན་པ་གཞན་ལའོ། །གང་ལ་བརྟེན་ནས་ན། ཆོས་ཀྱིས་གྲགས་པའི་བཞེད་པ་སྟོན་པའི་གཞུང་སྡེ་བདུན་གྱི་བརྗོད་དོན་ཇི་ལྟ་བ་བཞིན་དུ་ཤིན་ཏུ་གསལ་བའི་མིག་གིས་གཟུགས་མཐོང་བ་ལྟར་བློ་གྲོས་གསལ་པོས་ལེགས་པར་མཐོང་བ་ལ་བརྟེན་ནས་སོ། །དགོས་པ་གང་གི་ཕྱིར་དུ་ན། རྒྱུ་སྐར་གྲངས་མང་བ་བྱེ་བ་ངོ་བོའི་ཤིན་ཏུ་རྒྱས་པ་དག་གིས་པདྨོའི་ཚལ་རྣམས་ཕྱེ་སྟེ་གེ་སར་གྱི་སྙིང་པོ་གསལ་བར་རློམ་ཀྱང་ཉི་འོད་ཀྱིས་མ་ཁྱབ་པ་དེ་སྲིད་དུ་གེ་སར་གྱི་སྙིང་པོ་གསལ་བར་མ་ནུས་པ་ལྟར། རྒྱུ་སྐར་གྱི་གྲངས་ལྟ་བུའི་མཁས་པའི་ཚོགས་གངས་རིའི་ཁྲོད་འདིར་བྱོན་པ་རྣམས་ཀྱིས་དཔལ་ལྡན་གྲགས་པའི་གསུང་རབ་པདྨོའི་ཚལ་ལྟ་བུ་རབ་ཏུ་ཕྱེ་སྟེ་གེ་སར་གྱི་སྙིང་པོ་ལྟ་བུའི་དགོངས་དོན་གསལ་བར་རློམ་མོད་འོན་ཀྱང་ས་སྐྱ་པཎྜི་ཏ་གང་གི་བློ་གྲོས་ཀྱི་ཉི་མའི་འོད་ཀྱི་སྣང་བས་མ་ཁྱབ་པ་དེ་སྲིད་དུ་གཞུང་ལུགས་སྡེ་བདུན་གྱི་དགོངས་དོན་གེ་སར་གྱི་སྙིང་པོ་ཇི་ལྟ་བ་བཞིན་གསལ་བ་མ་ནུས་པས་དེ་གསལ་བའི་ཕྱིར་དུ་བཤད་དོ། །རྒྱས་ལ་སྔོན་འཇུག་ཡོད་པ་ནི་མ་དག་པ་ཡིན་ནོ། །གཉིས་པ་བཤད་པ་ཉིད་ཉེ་བར་དགོད་པ་ལ། ཤེས་བྱ་སྤྱི་ལྡོག་ནས་གཏན་ལ་དབབ་པ་དང་། ཤེས་བྱེད་ཚད་མའི་རང་བཞིན་ངེས་པར་བྱ་བ་གཉིས། དང་པོ་ལ་ཤེས་བྱའི་ཡུལ། ཤེས་བྱེད་ཀྱི་བློ། བློས་ཡུལ་རྟོགས་པའི་ཚུལ་གསུམ། དང་པོ་ལ། མཚན་ཉིད་དང་། དབྱེ་བ་གཉིས། དང་པོ་ནི། བློས་རིག་པར་བྱ་བ་ཆོས་ཅན། ཡུལ་གྱི་མཚན་ཉིད་ཡིན་ཏེ། དེའི་དངོས་འགལ་གཅོད་པའི་དོན་ལྡོག་གྲུབ་པ་ཡིན་པའི་ཕྱིར། དེ་ཡང་དངོས་འགལ་གཅོད་པ་ཞེས་པས་དེ་མིན་དང་། དོན་ལྡོག་ཅེས་པས་མཚོན་བྱ་དང་མཚན་གཞིའི་ལྡོག་པ་གཅོད་ཅིང་། གྲུབ་པ་ཞེས་པས་དོན་སྤྱི་དང་རང་མཚན་སོ་སོར་མ་ཕྱེ་བའི་ལྟོ་ལྡིར་བ་ཙམ་སྟོན་ཏེ། དོན་ལྡོག་ནི་དོན་སྤྱི་ཡིན་ལ་དེ་ཉིད་གཉིས་པོ་སོ་སོར་མ་ཕྱེ་བའི་ལྟོ་ལྡིར་བ་ཙམ་ལ་གྲུབ་པའི་ཕྱིར་རོ། །གཉིས་པ་དབྱེ་བ་ལ། གཞན་ལུགས་དགག་པ། རང་གི་འདོད་པ་བརྗོད་པ། རྩོད་པ་སྤོང་བ་གསུམ། དང་པོ་ལ་ཁས་བླངས་བརྗོད་པ། དེ་དགག་པ་གཉིས། དང་པོ་ནི། བོད་རྣམས་རྟོག་པའི་སྣང་ཡུལ་དོན་སྤྱི་དང་ནི་རྟོག་མེད་འཁྲུལ་ཤེས་ཀྱི་སྣང་ཡུལ་མེད་པ་གསལ་བ་གཉིས་རིམ་པ་བཞིན་བློ་གཉིས་ཀྱི་གཟུང་ཡུལ་ཡིན་ཞིང་། དེ་ཡང་ཡུལ་གཉིས་པོ་མེད་ན་འཁྲུལ་པ་གཞི་མེད་དུ་འགྱུར་བས་ཡོད་ལ། དེའང་འཁྲུལ་ཤེས་གཉིས་འཛིན་པའི་རང་རིག་གི་ཤུགས་ལས་གྲུབ་བོ་ཞེས་དང་། ཉན་ཐོས་མང་བཀུར་བ་སོགས་སྒྲ་སྤྱི་མིང་དང་དོན་སྤྱི་མཚན་མའི་རྣམ་པ་ཅན་མི་ལྡན་པའི་འདུ་བྱེད་རྫས་སུ་གྲུབ་པ་གང་རུང་གཟུང་ཡུལ་དུ་བྱས་པ་ལས་རྟོག་པ་དང་རྨི་ལམ་གྱི་ཤེས་པ་རྣམས་སྐྱེ་བར་འདོད་དོ་ཞེ་ན། གཉིས་པ་ལ་གཉིས་ལས། དང་པོ་དགག་པ་རྒྱས་པར་བཤད་པ་ལ། བློ་མ་འཁྲུལ་བར་ཐལ་བ། ཡུལ་སྣང་རུང་དུ་ཐལ་བ་གཉིས། དང་པོ་ལ་ཐལ་བ་དགོད་པ། ཉེས་སྤོང་དགག་པའོ། །དང་པོ་ནི། ཡུལ་གཉིས་པོ་དེ་འཛིན་པའི་རྟོག་པ་དང་རྟོག་མེད་འཁྲུལ་པའི་ཤེས་པ་གཉིས་པོ་ཆོས་ཅན། འཁྲུལ་པར་འགལ་བར་ཐལ་ཏེ། གཟུང་ཡུལ་ཡོད་པ་ཅན་གྱི་བློ་ཡིན་པའི་ཕྱིར། དཔེར་ན་བུམ་འཛིན་གྱི་མིག་ཤེས་བཞིན་ནོ། །གཉིས་པ་ནི། གལ་ཏེ་ཁྱབ་པ་མ་གྲུབ་སྟེ། གཟུང་ཡུལ་ཡོད་ན་ཡང་དེ་གཉིས་འཁྲུལ་པ་མི་འགལ་ཏེ། ཐག་པ་ལ་སྦྲུལ་དུ་འཛིན་པ་དང་། ཉ་ཕྱིས་ལ་དངུལ་དུ་འཛིན་པ་བཞིན་ནོ་ཞེ་ན། མི་འཐད་དེ། ཐག་པའི་ཁྲ་བོ་འཛིན་པའི་མིག་ཤེས་ལ་བྱེད་དམ། ཐག་པའི་ཁྲ་བོ་འདི་སྦྲུལ་ལོ་སྙམ་དུ་འཛིན་པའི་བློ་ལ་བྱེད། དང་པོ་ལྟར་ན་ཐག་པའི་ཁྲ་བོ་འཛིན་པའི་མིག་ཤེས་ཆོས་ཅན། མ་འཁྲུལ་བ་ཡིན་ཏེ། རང་གི་གཟུང་ཡུལ་ཡོད་པའི་ཕྱིར། གཉིས་པ་ལྟར་ན། ཐག་པ་འདི་ནི་སྦྲུལ་ལོ་སྙམ་དུ་འཛིན་པའི་བློ་ཆོས་ཅན། འཁྲུལ་ཏེ། རང་གི་གཟུང་ཡུལ་དོན་ལ་མེད་པས་ན་སྟེ་དེའི་ཕྱིར། གཉིས་པ་ལའང་ཐལ་བ་དགོད། ཉེས་སྤོང་དགག་པའོ། །དང་པོ་ནི། ཤེས་པ་གཉིས་ཀྱི་སྣང་ཡུལ་དོན་སྤྱི་དང་མེད་པ་གསལ་བ་གཉིས་པོ་ཆོས་ཅན། རང་གིས་མཐོང་བར་མ་ཟད་ཡུལ་སྣང་རུང་གཅིག་ན་ཉེ་བར་གནས་པའི་གང་ཟག་གཞན་གྱིས་ཀྱང་རང་གིས་མཐོང་བ་བཞིན་དུ་མཐོང་བར་འགྱུར་ཏེ། རང་གི་ཡུལ་ཅན་གྱི་ཤེས་པ་ལས་ཐ་དད་པའི་གཟུང་ཡུལ་ཡིན་པའི་ཕྱིར་ན་སྟེ་དེའི་ཕྱིར། བུམ་པ་ལ་སོགས་པ་ཐམས་ཅད་ཀྱིས་མཐོང་བ་བཞིན་ནོ། །རྟགས་ཁས། ཁྱབ་སྟེ། ཡུལ་རྣམ་པ་ནི་རགས། ཡིད་ཉེ་བར་གཏད་པ་ནི་ཡོད། འཁྲུལ་པའི་རྒྱུ་མཚན་ནི་མེད་པས་སོ། །གཉིས་པ་ནི། འཁྲུལ་ཤེས་གཉིས་ཀྱི་སྣང་ཡུལ་གཉིས་པོ་གཟུང་བའི་དོན་ཉིད་ཡིན་ཡང་ཡུལ་རུང་བ་ན་གནས་པའི་གང་ཟག་གཞན་གྱིས་རྟོགས་པ་མེད་དེ། སྣང་བ་པོ་བདག་ཉིད་ཀྱི་བློ་ལ་རྟག་ཏུ་ཡུལ་དང་ཡུལ་ཅན་དུ་འབྲེལ་བའི་ཕྱིར། དཔེར་ན་ལུས་ཀྱི་ནང་གི་གློ་སྙིང་སོགས་གཞན་གྱིས་མི་མཐོང་བ་བཞིན་དུའོ་ཞེ་ན། ལུས་ཀྱི་ནང་གི་གློ་སྙིང་ནི་ཆོས་ཅན། ཁྱོད་སྣང་ཡུལ་གཉིས་པོ་དེ་ཡུལ་རུང་བ་ན་ཡོད་པའི་གང་ཟག་གིས་མི་མཐོང་བའི་དཔེ་ཡང་དག་མིན་ཏེ། ཁྱོད་ཡུལ་རུང་བ་ན་ཡོད་པ་མ་ཡིན་པ་དེས་ན་རང་གིས་ཀྱང་མི་མཐོང་ལ་སྣང་ཡུལ་གཉིས་པོ་ནི་རང་གིས་མཐོང་བའི་ཕྱིར། འགའ་ཞིག་གི་ཚེ་ཡུལ་རུང་བ་ན་གནས་ན་མཐོང་ངོ་། །ཀྱང་ནི་གཞན་གྱིས་མི་མཐོང་བར་མ་ཟད་པའི་དོན་ཏོ། །གལ་ཏེ་ནང་གི་ལུས་སུ་མ་ཟད་སྣང་ཡུལ་གཉིས་པོའང་ཡུལ་རུང་བ་ན་གནས་པ་མ་ཡིན་ཏེ། རང་རང་གི་བློ་ཁོ་ན་དང་རྟག་ཏུ་ཡུལ་ཡུལ་ཅན་དུ་འབྲེལ་བས་ན་སྟེ་དེའི་ཕྱིར་ཞེ་ན། འོ་ན་བུམ་པ་འཆད་པ་པོའི་བློའི་ཡུལ་དོན་སྤྱི་ཆོས་ཅན། སྒྲས་བརྗོད་ཀྱང་རང་རིག་པ་བཞིན་དུ་ཉན་པ་པོ་གཞན་གྱིས་རྟོགས་པར་མི་འགྱུར་བར་ཐལ། འཆད་པ་པོ་རང་གི་བློ་ཁོ་ན་དང་ཡུལ་ཡུལ་ཅན་དུ་འབྲེལ་བའི་ཕྱིར། དེའང་རྣམ་འགྲེལ་ལས། བདག་ལ་རྟག་ཏུ་འབྲེལ་ཡིན་ན། །ཞེས་སོགས་གཉིས་སོ། །གལ་ཏེ་ཉན་པ་པོའི་བློ་ལ་སྣང་བའི་དོན་སྤྱི་དེ་སྒྲས་བརྗོད་པས་དེ་ཉིད་ཉན་པ་པོས་རྟོགས་ཏེ་འཆད་ཉན་བྱེད་པ་པོའི་བློ་ལ་སྣང་བའི་དོན་སྤྱི་གཉིས་ནི་རང་རང་གི་ཡུལ་ཅན་གྱི་བློ་ཁོ་ན་དང་ཡུལ་ཡུལ་ཅན་དུ་འབྲེལ་བའི་ཕྱིར་ཞེ་ན། འོ་ན་འཆད་པ་པོ་དང་ཉན་པ་པོ་རང་རང་གི་བློ་ཁོ་ན་དང་ཡུལ་ཡུལ་ཅན་དུ་འབྲེལ་བའི་དོན་སྤྱི་རྐྱང་པ་དེ་བརྗོད་པས་གང་ཟག་གཉིས་ཀྱི་བརྗོད་བྱའི་དོན་ཐུན་མོང་བ་གཅིག་གོ་མི་ནུས་པར་ཐལ། དེའི་དོན་སྤྱི་གཉིས་སོ་སོ་བ་ཁོ་ན་གོ་བ་ཡིན་པའི་ཕྱིར། འདོད་ན་གང་ཟག་གཉིས་པོ་དེས་དོན་སྤྱི་གཉིས་པོ་མཚམས་སྦྱོར་མི་ནུས་པར་ཐལ། འདོད་པའི་ཕྱིར། དེའང་རྣམ་འགྲེལ་ལས། རེ་རེ་དག་དང་འབྲེལ་ན་ནི། །ཞེས་སོགས་ཚིགས་བཅད་གཅིག་གོ །གལ་ཏེ་འཆད་པ་པོ་དང་ཉན་པ་པོའི་བློ་ལ་སྣང་བའི་དོན་སྤྱི་གཉིས་རང་རང་བློ་དང་འབྲེལ་ཡང་དེ་གཉིས་མཚམས་སྦྱོར་ནུས་པ་མི་འགལ་ཏེ། འཆད་ཉན་བྱེད་པ་པོའི་གང་ཟག་སོ་སོ་ལ་ཡོད་པའི་སེམས་ཀྱི་རྣམ་པ་གཉིས་ལྟོ་ལྡིར་ཞབས་ཞུམ་དུ་འདྲ་བས་འདྲ་བ་ལ་གཅིག་ཏུ་ཞེན་པ་ལ་ཐ་སྙད་དངོས་སུ་སྦྱོར་བའི་ཕྱིར་ཞེ་ན་མི་འཐད་དེ། འཆད་པ་པོའི་བློ་ལ་སྣང་བའི་དོན་སྤྱི་ཆོས་ཅན། འཆད་ཉན་བྱེད་པའི་བློ་ཐུན་མོང་དུ་མི་འཛིན་པར་ཐལ། འཆད་པ་པོ་རང་གི་བློ་ཁོ་ནའི་ཡུལ་ཡིན་པའི་ཕྱིར་ཏེ། འཆད་པ་པོ་རང་ལ་ཤར་བའི་དོན་སྤྱི་ཡིན་པའི་ཕྱིར་ནའོ། །གལ་ཏེ་མ་གྲུབ་ན་དེ་ཆོས་ཅན། འཆད་པ་པོའི་བློའི་ཡུལ་མ་ཡིན་པར་ཐལ། དེ་ལ་མ་ཤར་ན་ནི་སྟེ་མ་ཤར་བའི་ཕྱིར། འདོད་ན། ཕན་ཚུན་འདྲ་བར་མི་ཤེས་པའི་ཕྱིར་དོན་གོ་བ་མི་སྲིད་པར་འགྱུར་རོ། །དོན་སྤྱི་གཉིས་པོ་བློ་སོ་སོ་དང་ཡུལ་ཡུལ་ཅན་དུ་འབྲེལ་བ་དེས་ན་གང་ཟག་གཉིས་པོ་དེས་དོན་སྤྱི་གཉིས་ལ་གཅིག་ཏུ་འཛིན་པ་ག་ལ་སྲིད་དེ་མི་འཛིན་པར་ཐལ། དོན་སྤྱི་གཉིས་པོ་བློ་ཐ་དད་པ་ཁོ་ནའི་གཟུང་བར་བྱ་བ་ཡིན་པའི་ཕྱིར། གལ་ཏེ་བློ་གཉིས་ཀྱི་ཡུལ་དོན་སྤྱི་ཐ་དད་པ་ཁོ་ན་ཡིན་ཡང་འཁྲུལ་པའི་སྒོ་ནས་གཅིག་ཏུ་འཛིན་པས་མི་འགལ་ལོ་ཞེ་ན། འཆད་ཉན་བྱེད་པ་པོའི་རྟོག་པ་ཆོས་ཅན། རང་གི་གཟུང་ཡུལ་མེད་པར་གྲུབ་པ་ཡིན་ཏེ། འཁྲུལ་ཤེས་ཡིན་པའི་ཕྱིར་ཏེ། དོན་སྤྱི་གཉིས་གཅིག་ཏུ་འཛིན་པའི་བློ་ཡིན་པའི་ཕྱིར། དེས་ན་རྟོག་པ་ཐམས་ཅད་ཀྱི་གཟུང་ཡུལ་མེད་པར་གྲུབ་ཅིང་། དེས་ཁྱེད་ལྟར་ན་རྟོག་པ་ཐམས་ཅད་ཀྱི་སྣང་ཡུལ་མེད་པ་ཉིད་དུ་གྲུབ་སྟེ། ཡུལ་གཉིས་པོ་གཅིག་ཏུ་ཁས་བླངས་པའི་ཕྱིར་ཞེས་པ་ནི་རྩ་འགྲེལ་གྱི་དགོངས་པ་ཕྱིན་ཅི་མ་ལོག་པ་ཡིན་གྱི། འགྲེལ་པ་འདི་ལ་བརྟེན་ནས་རྟོག་པའི་སྣང་ཡུལ་གཏན་མེད་དུ་སྨྲ་བ་རྣམས་ཀྱིས། རྒྱུ་མཚན་གཞན་ནི་ཡོད་པ་ན། །བློ་ནི་ཡོད་དང་མེད་ཕྱིར་རོ། །ཞེས་པའི་རིགས་པའི་ཁྱབ་འབྲེལ་ལ་དཔྱོད་པ་མ་ཞུགས་པའམ། གལ་ཏེ་ཞུགས་ནའང་དབང་ཤེས་ཀྱི་དངོས་ཡུལ་དུ་གྱུར་པའི་དོན་རང་མཚན་ཁས་ལེན་དགོས་པས་བག་ཡོད་པར་གྱིས་ཤིག གཉིས་པ་བཅས་ཚིག་གི་སྒོ་ནས་དགག་པ་བསྡུས་ཏེ་བསྟན་པ་ནི། རིག་པས་བརྟགས་ཤིང་དཔྱད་ན་སྤྱི་དང་མེད་པ་གསལ་སྣང་དོན་དུ་མེད་བཞིན་དུ་ད་དུང་བོད་ཕལ་ཆེར་དེ་གཉིས་གཟུང་ཡུལ་དུ་ཞེན་པ་ནི་འཁྲུལ་པ་ཡིན་ཏེ། བླུན་པོའི་སྟོབས་ཀྱིས་དེ་ལྟར་སྨྲས་པའི་ཕྱིར། དཔེར་ན། སོར་མོའི་རྩེ་མོས་ནམ་མཁའ་འདིའོ་ཞེས་བསྟན་པ་ན་ནམ་མཁའ་མཐོང་ངོ་ཞེས་ཞེན་པ་ནི་བླུན་པོ་ཡིན་པ་བཞིན་ནོ་ཞེས་པ་འདི་བར་སྐབས་ཀྱི་ཚིགས་སུ་བཅད་པའོ། །གཉིས་པ་རང་གི་འདོད་པ་བརྗོད་ན། དོན་སྣང་གི་ཤེས་པའི་གཟུང་ཡུལ་གྱི་གཞལ་བྱ་ནི་དོན་རང་མཚན་གཅིག་ཁོ་ན་ཡིན་པས། རྟོག་པ་དང་རྟོག་མེད་ཀྱི་འཁྲུལ་ཤེས་ཀྱི་གཟུང་ཡུལ་ནི་མེད་དེ། གཟུང་ཡུལ་དེ་ཉིད་ལ་བླང་དོར་བྱེད་པ་ཐམས་ཅད་དེ་ལ་འཇུག་པ་ན་རང་མཚན་ཡོད་མེད་དཔྱད་དེ་དོན་བྱེད་ནུས་པ་ལ་འཇུག་གི་དོན་བྱེད་མི་ནུས་པ་ལ་དགོས་ནུས་མེད་པས་མི་འཇུག་པའི་ཕྱིར་ཏེ། རང་གི་མཚན་ཉིད་གཅིག་གཞལ་བྱ་ཞེས་སོགས་དང་། མེད་པ་གཞལ་བྱ་མ་ཡིན་ཕྱིར་ཞེས་སོགས་སོ། །དེ་ཡང་རང་མཚན་ཁོ་ནས་དོན་སྤྱི་དང་། དོན་གཅིག་པུས་མེད་པ་གསལ་སྣང་ལས་ཁྱད་པར་དུ་བྱས་སོ། །ཡུལ་ལ་དབྱེ་ན་གསུམ་ཡོད་པ་ཡང་ཡུལ་ཅན་ལ་ལྟོས་ནས་གཞག་དགོས་པས་གཟུང་ཡུལ་གྱི་རང་མཚན་དེ་ཉིད་ཤེས་པ་གང་ལ་རྣམ་པ་དངོས་སུ་གཏད་པའི་སྒོ་ནས་འཇལ་ན་ཤེས་པ་དེའི་གཟུང་ཡུལ་ཡིན་ལ། རང་མཚན་དེ་ཉིད་ཤེས་པ་གང་གིས་ལྐོག་གྱུར་དུ་གྱུར་པའི་སྒོ་ནས་འཇལ་ན་དེའི་ཞེན་ཡུལ་དང་། རང་མཚན་དེ་གཉིས་ཀ་ཡང་འཇལ་བྱེད་གཉིས་ཀྱིས་དཔྱད་དེ་སྐྱེས་བུའི་འཇུག་ན་ཡུལ་ཅན་གསུམ་པོ་དེའི་ངོར་མི་སླུ་བས་ཡུལ་ཅན་གསུམ་གྱི་འཇུག་ཡུལ་དུ་འཇོག་གོ །འོ་ན་ཅི་ཕྱིར་སྣང་ཡུལ་མ་བསྟན་ཞེ་ན། དོན་གྱིས་ནི་བཤད་ལ། དངོས་སུ་མ་བསྟན་པ་ནི་དོན་རང་མཚན་ལ་ཡུལ་གསུམ་གཞག་པའི་སྐབས་ཡིན་ཏེ། དེའི་ཚེ་གཟུང་ཡུལ་བཤད་པས་དེའི་ཡུལ་ཅན་གྱི་སྣང་ཡུལ་གྲུབ་ཅིང་རྗེས་དཔག་དང་སྐྱེས་བུའི་སྣང་ཡུལ་གྱི་བེམས་པོ་མེད་པ་ལ་དགོངས་ཏེ་ཁོ་བོ་འབའ་ཞིག་གི་སྤྱོད་ཡུལ་ལོ། །ཡུལ་གྱི་དབྱེ་བ་ནི་འདིའི་སྐབས་དོན་གྱི་གཙོ་བོ་ཡིན་ཡང་གཞན་དག་གི་རྟོག་པའི་ཡུལ་ཙམ་དུ་ཡང་མ་གྱུར་ན་རྣམ་པར་དཔྱོད་པའི་བློ་གྲོས་ཀྱིས་ཇི་ལྟ་བ་བཞིན་རྟོགས་པ་ལྟ་ག་ལ་སྨོས། སྐལ་ལྡན་གྱི་བཤེས་གཉེན་མཐའ་ཡས་པའི་རྣམ་དཔྱོད་ཀྱི་ལུས་སྟོབས་རབ་ཏུ་རྒྱས་པའི་དགའ་སྟོན་དུ་འབུལ་ལོ། །གསུམ་པ་རྩོད་པ་སྤང་བ་ལ། འཁྲུལ་ཤེས་ཡུལ་མེད་ལ་རྩོད་པ་སྤོང་བ། གཟུང་ཡུལ་རང་མཚན་ལ་རྩོད་པ་སྤང་བའོ། །དང་པོ་ལ་བཞི་སྟེ། གཞལ་བྱ་གཉིས་སུ་གསུངས་པ་དང་འགལ་བ་སྤོང་། དོན་སྤྱི་དང་མེད་པ་གསལ་བ་ཡུལ་དུ་མཚུངས་པའི་རྩོད་པ་སྤོང་། མྱོང་བ་དང་འགལ་བ་སྤོང་། དགག་པ་ཚད་མས་མི་རྟོགས་པར་ཐལ་བ་སྤོང་བའོ། །དང་པོ་ནི། དོན་སྤྱི་གཟུང་ཡུལ་མིན་ན། ཡུལ་ལ་རང་སྤྱི་གཉིས་སུ་སློབ་དཔོན་ཕྱོགས་གླང་བཞེད་པས་དེས་གནོད་དོ་ཞེ་ན་མི་གནོད་དེ། དོན་སྟེང་ན་གཞལ་བྱ་གཉིས་ཡོད་ནས་གསུངས་པ་མིན་གྱི་ཚད་མ་གཉིས་པོ་འཇུག་ཚུལ་གྱི་སྒོ་ནས་མངོན་གྱུར་དང་ཀློག་གྱུར་གྱི་རང་མཚན་གཉིས་རིམ་པ་བཞིན་རང་གི་ངོ་བོའི་སྒོ་ནས་དང་། གཞན་གྱི་ངོ་བོའི་སྒོ་ནས་འཇལ་བ་ལ་དགོངས་ནས་རང་སྤྱི་གཉིས་སུ་གསུངས་པ་ཙམ་ཡིན་པའི་ཕྱིར་ཏེ། དེ་ནི་རང་གཞན་ངོ་བོ་ཡིས། །ཞེས་སོགས་གསུངས་སོ། །གཉིས་པ་ནི་ཁ་ཅིག་དོན་སྤྱི་དང་མེད་པ་གསལ་བ་སྐྲ་ཤད་གཉིས་ཡུལ་མིན་པར་མཚུངས་པ་ལ་བློའི་འཇུག་ཚུལ་གྱིས་དོན་སྤྱི་གཞལ་བྱ་གཉིས་པར་འཇོག་པ་ལྟར་མེད་པ་གསལ་བའང་གཞལ་བྱ་གསུམ་པར་མཚུངས་སོ་ཞེ་ན། མི་མཚུངས་ཏེ། སྐྲ་ཤད་སོགས་མེད་པ་གསལ་བ་དེ་ལ་ཡུལ་གྱི་དགོས་ནུས་གང་ཡང་མེད་པས་ཡུལ་མིན་ལ། དོན་སྤྱི་འཇུག་བྱའི་ཡུལ་དངོས་མིན་ཡང་དེར་འཁྲུལ་ནས་ཞུགས་པས་འཇུག་ཡུལ་ཐོབ་པས་ན་ཡུལ་དུ་འཇོག་པའི་ཕྱིར་རོ། །དང་པོ་གྲུབ་སྟེ། ཡུལ་དངོས་པོ་ལའང་མེད། ཡུལ་དུ་ཞེན་པ་ཡང་མེད། ཞེན་པ་བྱས་ཀྱང་དོན་དང་ཕྲད་པའང་མེད། གལ་ཏེ་ཕྲད་ན་དེ་འཇལ་གྱི་ཚད་མ་གསུམ་པ་ཡོད་དགོས་པ་ལས་མེད་པའི་ཕྱིར། འོ་ན་སྐྲ་ཤད་སོགས་དོན་བྱེད་མི་ནུས་པས་རང་མཚན་མིན། རྟོག་པས་མ་བཟུང་བས་སྤྱི་མཚན་མིན་པས་གང་དུ་འདུ་ཞེ་ན། དབང་ཤེས་འཁྲུལ་བ་ལ་སྐྲ་ཤད་དང་ཟླ་གཉིས་སོགས་སུ་སྣང་བ་ནི་ཆོས་ཅན། རང་མཚན་ཡིན་ཏེ། དབང་བློའི་རྣམ་པ་ཉིད་ཡིན་པའི་ཕྱིར། དེ་ལ་སྣང་བའི་སྐྲ་ཤད་ཆོས་ཅན། གཞལ་བྱའི་དོན་དུ་གྲུབ་པ་མེད་དེ། གཞལ་བྱའི་དོན་དུ་མོས་པ་སོགས་མེད་ཕྱིར། སྐྲ་ཤད་དེ་ནི་དངོས་པོར་ཡོད་དམ་མེད་ཅེས་རྟོག་པས་དཔྱོད་ན། རྟོག་པའི་དངོས་ཡུལ་ཆོས་ཅན། སྤྱི་མཚན་ཡིན་ཏེ། དོན་བྱེད་མི་ནུས་པའི་ཆོས་ཡིན་པའི་ཕྱིར། དེའང་སྐྲ་ཤད་ལ་སོགས་དོན་མིན་ཏེ། །སོགས་དང་། སྐྲ་ཤད་ལ་སོགས་སྤྱི་མིན་ཏེ། །ཞེས་སོགས་དང་། དེ་དག་གི་ཡང་དེ་ལྟའི་དངོས། །ཞེས་སོགས་སོ། །གསུམ་པ་ནི། དངོས་མེད་དོན་སྤྱི་དང་མེད་པ་གསལ་བ་གཉིས་པོ་ཤེས་པ་གཉིས་ཀྱི་གཟུང་ཡུལ་མིན་པ་ཚད་མས་བསལ་ཏེ། ཤེས་པ་གཉིས་མྱོང་བའི་རང་རིག་གི་ཤུགས་ལས་གྲུབ་པས་སོ་ཞེ་ན། རྟོག་པ་དང་རྟོག་མེད་འཁྲུལ་ཤེས་གཉིས་ལ་སྣང་བའི་དོན་སྤྱི་དང་མེད་པ་གསལ་སྣང་ཆོས་ཅན། ཁྱོད་གཟུང་ཡུལ་དུ་མེད་དེ། ཁྱོད་དེ་ལྟར་བྱས་ན་ཚད་མས་གནོད་པའི་ཕྱིར། དོན་སྤྱི་དང་སྐྲ་ཤད་གཉིས་སྣང་བའི་བློའི་རྣམ་པ་གཉིས་ཆོས་ཅན། ཤེས་པ་ཉིད་ཡིན་ཏེ། འཁྲུལ་ཤེས་གཉིས་མྱོང་བའི་རང་རིག་གིས་ནི་སོ་སོར་མྱོང་བའི་ཕྱིར། ཤེས་པ་གཉིས་པོ་དེ་ཡང་ནི་ཆོས་ཅན། འཁྲུལ་ཤེས་ཉིད་ཡིན་ཏེ། རང་གི་གཟུང་ཡུལ་མེད་པ་འཛིན་པའི་ཤེས་པ་ཡིན་པའི་ཕྱིར། དེའང་རུང་ཡུལ་གནས་པས་མི་ཤེས་པ། །ཞེས་སོགས་དང་། གལ་ཏེ་སྤྱི་ནི་ཤེས་ངོ་བོས། །ཞེས་སོགས་སོ། །བཞི་པ་ནི། དངོས་མེད་དོན་སྤྱི་ལྟ་བུ་ཚད་མའི་གཞལ་བྱར་འགལ་ཏེ། དོན་རང་མཚན་མིན་པའི་དོན་སྤྱི་རྟོག་པའི་གཟུང་ཡུལ་དུ་མེད་པའི་ཕྱིར་ཞེ་ན། དངོས་མེད་གཞལ་བྱར་འགལ་བ་མེད་དེ། དགག་བྱའི་ཆོས་འགོག་པའི་གཞི་ཆོས་ཅན་སོ་སོའི་སྟེང་དུ་མི་རྟག་པ་ལྟ་བུ་སྒྲུབ་པའི་ཚེ་འཇིག་པའི་དངོས་པོར་ཡོད་ཅེས་སྒྲུབ། འགོག་པའི་ཚེ་དེའི་དངོས་པོར་མེད་ཅེས་འགོག་པའི་ཕྱིར་ན་སྟེ། རྣམ་འགྲེལ་ལས། སྒྲ་དོན་བསྙོན་པ་མེད་རྣམས་ཀྱིས། །ཞེས་སོགས་ཚིགས་བཅད་གཉིས་སོ། །རྩོད་པ་བཞི་པོ་འདི་དག་ལའང་རྩོད་པ་སློང་ཚུལ་མ་ཤེས་པར་གཟུང་ཡུལ་རང་མཚན་གཅིག་པུར་ངེས་ན་ཞེས་སོགས་སྨྲ་བ་རྣམས་ནི་རང་ལུགས་བཞག་པའི་གཞུང་ཚིག་གིས་འཁྲུལ་གཞི་བྱས་ཤིང་། འཁྲུལ་ཤེས་ཡུལ་མེད་ལ་རྩོད་པ་སྤོང་ཞེས་པའི་ཚིག་ལ་གྱེར་འདོན་བྱེད་པ་ཙམ་དུ་ཟད་དོ། །གཉིས་པ་གཟུང་ཡུལ་རང་མཚན་ལ་རྩོད་པ་སྤོང་བ་ལ། རྩོད་པ་དང་ལན་གཉིས། དང་པོ་ནི། འཁྲུལ་ཤེས་ཡུལ་མེད་དུ་མ་ཟད་གཟུང་ཡུལ་གྱི་གཞལ་བྱ་རང་མཚན་གཅིག་ཉིད་དུ་ངེས་པ་ཡང་མི་འཐད་དེ། རང་མཚན་ལ་གཉིས་ལས་ཕྱི་བེམས་པོར་གྱུར་པ་ཡི་གཟུང་ཡུལ་ནི། མཁས་པ་ཕྱོགས་གླང་དང་ཆོས་ཀྱི་གྲགས་པ་གཉིས་ཀྱིས་བཀག་ལ། ནང་ཤེས་པའི་གཟུང་ཡུལ་དབྱེ་བའི་སྐབས་འདིར་མི་སྲིད་པ་དེས་ན་སྟེ་དེའི་ཕྱིར་ཏེ་ཡུལ་ཅན་དེ་ཡུལ་ལ་རང་རིག་པ་ཡིན་པའི་ཕྱིར་ན་ཕྱིར་ཞེས་པ་ནི་འགའ་ཞིག་སྨྲའོ། །གཉིས་པ་ལ་གྲུབ་མཐའི་རྣམ་གཞག་སྤྱིར་དཔྱད། དེ་ལ་གཞན་གྱིས་བཏགས་པ་དགག བདེ་བར་གཤེགས་པའི་ལུགས་སྒྲུབ་པའོ། །དང་པོ་ནི། གྲུབ་པའི་མཐའ་ཐ་དད་དུ་མ་རང་གཞན་གྱི་སྡེ་པ་རྣམས་འདོད་པ་ཡོད་དེ། མུ་སྟེགས་ངོ་བོ་ཉིད་རྒྱུར་སྨྲ་བ་ནི་འཇིག་རྟེན་ཐམས་ཅད་ངོ་བོ་ཉིད་ལས་བྱུང་བ་དང་། དབང་ཕྱུག་པ་དབང་ཕྱུག་གིས་བྱས་པ་དང་། གྲངས་ཅན་པ་གཙོ་བོས་བྱས་པ་དང་། གཟེགས་ཟན་དང་ཉན་ཐོས་པ་རྡུལ་ཕྲན་གྱིས་བྱས་པ་དང་། སེམས་ཙམ་པ་རྣམ་པར་རིག་པ་སེམས་ཀྱིས་བྱས་པ་དང་། དབུ་མ་པ་དོན་དམ་པར་རྟེན་ཅིང་འབྲེལ་བར་འབྱུང་བ་སྤྲོས་པ་དང་བྲལ་བ་ཡིན་ཞེས་འདོད་ཅིང་ཀུན་རྫོབ་ཏུ་དངོས་པོ་སྨྲ་བ་དེ་དག་གི་རྗེས་སུ་འཇུག་ཀྱང་རུང་སྟེ། དེ་དག་གང་གི་ལྟར་ཡང་ཀུན་ཏུ་ཐ་སྙད་པ་ལ་དོན་དང་ཤེས་པ་གཉིས་སུ་ཁ་ཚོན་ཆོད་དོ། །འདིས་སེམས་ཙམ་པའི་ལུགས་ལ་ཐ་སྙད་དུ་ཕྱི་དོན་ཡོད་པར་བསྟན་ཞིང་། དེའི་དོན་ཡང་སྔོ་འཛིན་དབང་མངོན་གྱི་ངོར་སྔོན་པོ་ཡོད་པ་ལྟ་བུ་ཀུན་ཏུ་ཐ་སྙད་པའི་ཚད་མ་ལ་ཐ་སྙད་དུ་གཞག་ཅིང་། འདི་དག་གིས་ཚད་འབྲས་ལ་དངོས་སྨྲ་བ་བཞིའི་ཚད་འབྲས་ལས་ལོགས་སུ་དབུ་མ་པའི་ཚད་འབྲས་མི་སྟོན་པའི་རྒྱུ་མཚན་ཡང་ཤེས་པར་གྱིས་ཤིག ཁོ་བོའི་སྤྱོད་ཡུལ་ལོ། །གཉིས་པ་ནི། ངོ་བོ་ཉིད་རྒྱུར་སྨྲ་བ་ནི། །རྒྱུ་མེད་ལས་སྐྱེ་བ་ཡིན་པས། །རྒྱུ་མེད་གཞན་ལ་མི་ལྟོས་ཕྱིར། །ཞེས་སོགས་ཀྱིས་ཁེགས་ལ། དབང་ཕྱུག་དང་གཙོ་བོ་གཉིས་ཀའང་རྟག་པ་བྱེད་པ་པོར་འགལ་བས་མི་འཐད་དོ། །གསུམ་པ་ལ་དགོངས་པ་ངོས་བཟུང་བ། དེ་སློབ་དཔོན་གྱིས་ཇི་ལྟར་གཏན་ལ་ཕབ་པའི་ཚུལ། གྲུབ་མཐའ་དང་སྦྱར་ཏེ་དངོས་ལན་བཤད་པ་དང་གསུམ། དང་པོ་ནི། ཐུབ་པས་ཕྱི་རོལ་དཔྱོད་པ་ན་རྡུལ་ཕྲན་ཞལ་གྱིས་བཞེས་ལ། ཐ་སྙད་ཀྱི་དེ་ཁོ་ན་ཉིད་དཔྱོད་པ་ན་སེམས་ཙམ་ཞལ་གྱིས་བཞེས་ཤིང་། དོན་དམ་པའི་དེ་ཁོ་ན་ཉིད་ལ་འཇུག་པ་ན་སྤྲོས་པ་དང་བྲལ་བ་ལ་འཇུག་པར་མཛད་དོ། །དེའང་། དེས་དེ་ཉིད་དོན་བཏང་སྙོམས་ཅན། །ཞེས་སོགས་གསུངས་སོ། །གཉིས་པ་ལ། དོན་རིག་དང་། རྣམ་རིག་གཉིས་སོ། །དང་པོ་ལ། གཞན་ལུགས་དགག རང་ལུགས་བརྗོད། རྩོད་པ་སྤང་བའོ། །དང་པོ་ལ་བྱེ་བྲག་སྨྲ་བའི་ལུགས་དགག བོད་ཀྱི་ལུགས་དགག་པའོ། །དང་པོ་ནི། བྱེ་སྨྲ་ན་རེ། རྣམ་ཤེས་ཀྱིས་དོན་འཛིན་པ་མིན་ཏེ། གལ་ཏེ་འཛིན་ན་བར་དུ་ཆོད་པའི་དོན་ཡང་འཛིན་དགོས་ན་དེ་མིན་པའི་ཕྱིར། དེས་ན་དབང་པོ་ཁོ་ན་དོན་ལ་ལྟ་བར་བྱེད་པ་པོ་སོགས་ཡིན་ལ་དེ་ལ་ཡང་དེ་མཚུངས་རྣམས་མ་ཡིན་ཡང་དུས་མཉམ་པའི་བརྟེན་པ་རྣམ་ཤེས་དང་བཅས་པ་ཁོ་ནས་འཛིན་པ་ཡིན་ཞེས་ཟེར་ཞིང་། ལོ་ཞེས་པ་ནི་འཇམ་དབྱངས་མ་རངས་པའི་ཚིག་གོ །མདོ་སྡེ་པ་ཡན་ནི་ཕྱིས་བྱུང་གི་རྟེན་དུ་འདོད་དོ། །མི་འཐད་དེ། རྟེན་བཅས་ཀྱི་དབང་པོ་ཆོས་ཅན། དོན་ལ་ལྟ་བར་བྱེད་པ་སོགས་མིན་པར་ཐལ། རང་བེམས་པོ་ཡིན་པའི་ཕྱིར་ན་ལྟ་བྱེད་དུ་འགལ་བའི་ཕྱིར། གཞན་དུ་ན་དབང་པོས་ཀྱང་མ་ཕྲད་པར་འཛིན་པས་བར་དུ་ཆོད་པར་འཛིན་པར་འགྱུར་ལ། ཕྲད་ནས་འཛིན་ན། བར་དང་བཅས་ནས་འཛིན་པའམ། །ཞེས་སོགས་ཕྱོགས་ཀྱི་གླང་པོའི་རིགས་པ་རྣམས་འཇུག་གོ །ཡང་བརྟེན་བཅས་ཀྱི་དབང་པོ་དང་དོན་གཉིས་ཆོས་ཅན། ཡུལ་ཡུལ་ཅན་མིན་པར་ཐལ། ཁྱེད་ལ་འབྲེལ་པ་གཉིས་པོ་གང་ཡང་མེད་པའི་ཕྱིར་ཏེ། དུས་མཉམ་རྫས་གཞན་ཡིན་པའི་ཕྱིར། གཉིས་པ་ནི། གངས་ཅན་པ་ཕལ་ཆེར་ན་རེ། དུས་མཉམ་པའི་ཡུལ་གཟུགས་དང་ཡུལ་ཅན་མིག་གི་རྣམ་ཤེས་ལྟ་བུ་ཁོ་ན་གཟུང་འཛིན་དུ་འཇོག་སྟེ་དུས་མི་མཉམ་ན་ཡུལ་ཡུལ་ཅན་མིན་ཞིང་དབང་པོ་ལྟ་བྱེད་མིན་པའི་ཕྱིར་ཞེ་ན། གཟུགས་འཛིན་པའི་མིག་གི་རྣམ་ཤེས་ཆོས་ཅན། ཁྱོད་དང་གཟུགས་ལ་དེ་བྱུང་གི་འབྲེལ་པ་མེད་པར་ཐལ། དེ་དང་དུས་མཉམ་པའི་ཕྱིར་ནའོ། །འདོད་ན། དེ་མི་འཛིན་པར་ཐལ་ལོ། །ཡང་དེ་ཆོས་ཅན། གཟུགས་ལ་དམིགས་ནས་སྐྱེ་བའི་དབང་ཤེས་སུ་འགལ་བར་ཐལ། དེ་ཁྱོད་ཉིད་རྒྱུར་མེད་པའི་ཕྱིར། གལ་ཏེ་གཟུགས་འཛིན་མིག་ཤེས་ལས་སྐད་ཅིག་གིས་སྔ་བའི་ཡུལ་གཟུགས་འཛིན་དེའི་དམིགས་པའི་རྒྱུ་ཡིན་ལ། རང་དང་དུས་མཉམ་པའི་གཟུགས་གཟུང་ཡུལ་ཡིན་ནོ་ཞེ་ན། གཟུགས་འཛིན་མིག་གི་རྣམ་ཤེས་ཆོས་ཅན། རང་གི་སྐད་ཅིག་གིས་སྔ་མའི་གཟུགས་ལ་བརྟེན་ནས་གྲུབ་ཟིན་པར་ཐལ། ཡུལ་དབང་རྣམ་ཤེས་གསུམ་ལས་སྐྱེས་པའི་ཕྱིར། མིག་གི་རྣམ་ཤེས་དེ་ཆོས་ཅན། ཁྱོད་ལ་རང་དང་དུས་མཉམ་པའི་གཟུགས་གཟུང་ཡུལ་དུ་དགོས་པ་མེད་པར་ཐལ། དེའི་དུས་སུ་གྲུབ་ཟིན་པའི་ཕྱིར། ཁྱབ་སྟེ། གྲུབ་ཟིན་ཡང་དུས་མཉམ་པའི་ཡུལ་རེ་གྲོགས་སུ་དགོས་ན་དུས་མཉམ་པའི་དབང་པོ་དང་ཡིད་བྱེད་རེ་གྲོགས་སུ་དགོས་པས་ཧ་ཅང་ཐལ་ཏེ། མ་ལ་ཡར་རྒྱུ་ཚོགས་པ་ལས་ཙནྡན་སྐྱེ་ཡང་གངས་ཅན་གྱི་རི་གྲོགས་སུ་དགོས་སོ་ཞེས་སྨྲ་བ་བཞིན་ནོ། །དེའང་། རྒྱུ་ཡི་དངོས་པོ་མ་གཏོགས་པའི། །ཞེས་སོགས་དང་། རྣམ་པ་གཏོད་པར་ནུས་པའི་ཕྱིར་ཤེས་པའི་ཡུལ་རྒྱུ་ཡིན་ལ། རྗེས་སུ་འགྲོ་བ་དང་ལྡོག་པ་དག་གི་ཞེས་སོགས་དང་། བདེ་བར་གཤེགས་པས། མིག་ལ་བརྟེན་ཞིང་གཟུགས་ལ་དམིགས་ནས་མིག་གི་རྣམ་པར་ཤེས་པ་སྐྱེ་ཞེས་གསུངས་པའང་དེ་ཡིན་ནོ། །གཉིས་པ་རང་གི་འདོད་པ་ནི། ཕྱི་རོལ་དོན་ཁས་ལེན་པ་ན་མདོ་སྡེ་པའི་ལུགས་གཟུང་བར་བྱའོ། །འདི་ལ་ཡང་དམིགས་པ་ཡུལ་དང་རྟེན་དབང་པོ་དང་དེ་མ་ཐག་རྐྱེན་ཡིད་ལ་བྱེད་པ་གསུམ་ཚོགས་པའི་སྐད་ཅིག་དང་པོ་ནི་ཕྱི་རོལ་གྱི་ཡུལ་དང་འདྲ་བའི་སྐྱེད་བྱེད། གསུམ་པོ་དེ་དག་ཚོགས་པ་ལས་སྐད་ཅིག་གཉིས་པར་ཡུལ་གྱི་རྣམ་པ་ཅན་དུ་སྐྱེས་པའི་རྣམ་ཤེས་ནི་སྐྱེས་ལ་འདྲ་བའི་ཤེས་པ་ཡིན་ལ། རྣམ་ཤེས་དང་དེ་ལ་ཤར་བའི་རྣམ་པ་གཉིས་ཆར་ཡུལ་གྱི་འབྲས་བུ་ཡིན་པས་གཟུང་འཛིན་དུས་མི་མཉམ་མོ་ཞེས་གསུངས་པ་ནི་རང་གི་ལུགས་སོ། །རྐྱེན་གསུམ་དབང་ཤེས་ཀྱིས་རྒྱུར་མཚུངས་པ་ལ་དབང་ཤེས་ཡུལ་ཁོ་ན་དང་འདྲ་བ་སྐྱེ་བ་ཅི་ཡིན་ཞེ་ན། རྐྱེན་གསུམ་ཆར་དབང་ཤེས་ཀྱི་རྒྱུ་ཡིན་ཡང་དབང་ཤེས་ཡུལ་དང་འདྲ་བ་སྐྱེ་གཞན་གཉིས་དང་མིན་ཏེ། དེ་རྟེན་འབྲེལ་གྱི་ཆོས་ཉིད་ཡིན་པའི་ཕྱིར། དཔེར་ན་ཟས་དང་སོགས་པ་དྲོད་དུས་རྣམས་བུ་ཡི་རྒྱུ་ཡིན་པར་མཚུངས་ན་ཡང་བུ་དེ་ཕ་མ་གང་རུང་གི་གཟུགས་དང་འདྲ་བར་སྐྱེ་ཟས་སོགས་དང་མིན་པ་བཞིན་ནོ། །དེའང་། དཔེར་ན་ཟས་དང་དུས་ལ་སོགས། །ཞེས་སོགས་གསུངས་སོ། །དབང་ཤེས་ཡུལ་དང་འདྲ་བ་སྐྱེ་བ་དེས་ན་ཡུལ་བུམ་པ་ལྟ་བུ་གཅིག་ལ་ལག་རྗེས་ཀྱིས་འབྲས་བུ་གཉིས་གྲུབ་སྟེ། དེས་ཉེར་ལེན་བྱས་ནས་བུམ་པ་སྐད་ཅིག་གཉིས་པ་བེམས་པོར་སྐྱེད། དེས་ལྷན་ཅིག་བྱེད་པའི་གྲོགས་བྱས་ནས་མིག་ཤེས་བུམ་གཟུགས་དང་འདྲ་བར་སྐྱེ་བའི་ཕྱིར་རོ། །དེར་མ་ཟད་བློ་བུམ་འཛིན་མིག་ཤེས་ཀྱང་གཟུང་བ་དང་འཛིན་པའི་ཚུལ་གཉིས་པ་ཅན་ཡིན་པར་འདོད་དེ། ཡུལ་ཤེས་པ་དང་ཤེས་པ་དེ་ཤེས་པའི་དབྱེ་བས་སོ། །དེའང་མདོར། ཡུལ་ཤེས་དེ་ཡི་ཤེས་པ་ཡི། །ཞེས་སོགས་གསུངས་སོ། །གསུམ་པ་ནི། བོད་རྣམས་ཕྱི་རོལ་གྱི་དོན་ལྐོག་ན་མོ་ཞེས་བྱ་བ་རྣམ་པ་འཇོག་བྱེད་གོས་ཀྱི་ལྐོག་ན་ལག་པར་ཡོད་པ་ལྟ་བུར་བསམས་ནས། དོན་གྱིས་རྣམ་པ་གཞག་ན་ཤ་ཟས་ཀྱང་གཞག་པར་མཚུངས་སོ་ཞེས་སྨྲ་བ་ནི་མི་མཚུངས་ཏེ། ཤ་ཟས་བཞག་ན་ཤེས་པ་ཤ་ཟ་དང་འདྲ་བར་སྐྱེ་དགོས་པ་ལས་མ་སྐྱེས་ལ་བུམ་སོགས་ལ་ཤ་ཟར་འདོགས་ན་མིང་ལ་མི་བརྩད་དོ། །དེས་ན་དོན་ཁས་ལེན་བཞིན་དུ་མདོ་སྡེ་པ་འགོག་པ་ནི་ཆོས་ཀྱིས་གྲགས་པའི་དགོངས་པ་མ་ཤེས་པར་ཟད་དེ། ཆོས་ཀྱི་གྲགས་པ་ཉིད་ཀྱིས། གལ་ཏེ་ཕྱི་རོལ་དཔྱོད་ལ་འཇུག་པ་ན། །ཁོ་བོ་མདོ་སྡེའི་སྐས་ལ་རྣམ་པར་བརྟེན། །ཞེས་གསུངས་སོ། །གཉིས་པ་རྣམ་རིག་ལ་གསུམ་སྟེ། གཞན་གྱིས་བརྟགས་པ་དགག རྣམ་པར་རིག་པ་བསྒྲུབ། དེ་ལ་རྩོད་པ་སྤང་བའོ། །དང་པོ་ལ་ཕྱི་རོལ་གྱི་དོན་གྲུབ་པ་དགག འཇིག་རྟེན་གྲགས་པ་ལ་བརྟེན་ནས་དགག་པའོ། །དང་པོ་ནི། དོན་སྣང་གི་དབང་ཤེས་ཆོས་ཅན། རང་ལ་རྣམ་པ་དངོས་སུ་གཏོད་བྱེད་ཀྱི་དོན་བདེན་པར་མེད་དེ། དེ་རགས་པ་ཡན་ལག་ཅན་གྱི་རྫས་གཅིག་མུ་སྟེགས་དང་ཉན་ཐོས་ལྟར་ཕྱོགས་ཆ་མེད་པའི་རྡུལ་ཕྲན་དུ་མ་གང་རུང་དུ་བདེན་པ་དང་བྲལ་བའི་ཕྱིར། དང་པོ་སྒྲུབ་པ་ནི། རགས་པ་ཡན་ལག་ཅན་གྱི་རྫས་གཅིག་ཏུ་མེད་དེ། ཕྱོགས་ཆ་དུ་མ་དང་འབྲེལ་བའི་ཕྱིར། དཔེར་ན་འབྲུའི་ཕུང་པོ་བཞིན་ནོ། །གཉིས་པ་བསྒྲུབ་པ་ནི། ཕྱོགས་ཀྱི་ཆ་མེད་ཀྱི་དུ་མར་མི་བདེན་ཏེ། ཆ་དྲུག་དང་འབྲེལ་བའི་ཕྱིར། དཔེར་ན་ཁང་པ་བཞིན་ནོ་ཞེས་པས་ཁེགས་སོ། །དྲུག་གི་ཅིག་ཆར་སྦྱར་བ་ན། །ཞེས་སོགས་སོ། །དོན་བདེན་པར་མེད་པ་དེས་ན་དོན་གྱིས་གཏད་པའི་རྣམ་པར་མ་ཟད་བག་ཆགས་ཀྱི་དབང་གིས་དབང་ཤེས་ལ་དོན་དུ་སྣང་བའི་རྣམ་པའང་ཆོས་ཅན། བདེན་པར་མེད་དེ། བདེན་པའི་གཅིག་དང་དུ་མ་དང་བྲལ་བའི་ཕྱིར། དེའང་། གང་གིས་དངོས་པོ་རྣམ་དཔྱད་ན། །ཞེས་སོགས་སོ། །འདི་ནི། །རྣལ་འབྱོར་པ་ཡང་བློ་ཁྱད་ཀྱིས། །ཞེས་སོགས་དང་ཚུལ་མཚུངས་པར། བེམས་པོ་ཡིན་ཕྱིར་ལྟ་བྱེད་མིན། །ཞེས་པར་བྱེ་སྨྲ་དང་། འདིར་རྣམ་བདེན་པས་མདོ་སྡེ་པ་དང་། རྣམ་རྫུན་པས་རྣམ་བདེན་པ་བཀག་པར་སྣང་སྟེ་ཁོ་བོའི་སྤྱོད་ཡུལ་ཁོ་ནར་བས་སོ། །གཉིས་པ་ནི། རྟོག་གེ་པ་ཁ་ཅིག་མངོན་སུམ་དང་རྗེས་དཔག་ལ་སོགས་པའི་ཀུན་རྫོབ་བམ་ཐ་སྙད་ཀྱི་རྣམ་གཞག་རྣམས་བློ་འཇིག་རྟེན་པ་མ་བརྟགས་མ་དཔྱད་པའི་ངོར་ཇི་ལྟར་གྲགས་པ་ལ་བརྟེན་ནས་འཇོག་གི་གང་ཟག་འཇིག་རྟེན་པ་ནི་མིན་ནོ་ཞེ་ན། འདི་ཡང་ཀུན་ཏུ་ཐ་སྙད་པའི་ཚད་མ་དཔྱོད་པ་ན་འཐད་པ་མིན་ཏེ། མ་བརྟགས་མ་དཔྱད་པའི་བློ་ངོར་མངོན་སུམ་དང་རྗེས་དཔག་དང་སྣང་སེལ་སོགས་ཀྱི་རྣམ་གཞག་མི་འཇུག་པས་ཚད་མ་དང་ཚད་མ་མིན་པའི་རྣམ་གཞག་སྡེ་བདུན་ལས་བཤད་པ་ཐམས་ཅད་འགལ་ཞིང་ནུབ་པར་འགྱུར་བའི་ཕྱིར་རོ། །གལ་ཏེ་འཇིག་རྟེན་གྲུབ་མཐའ་ཁས་ལེན་པ་དེ་དག་གི་རྗེས་སུ་འབྲང་བར་འདོད་ན། ཐ་སྙད་དེ་དག་འཐད་པར་མ་ཟད། ཤེས་བྱ་ལ་དངོས་པོ་དངོས་མེད་གཉིས། དངོས་པོ་ལ་བེམས་རིག་གཉིས་ལས་མ་འདས་པས་བེམས་པོའི་ལུགས་གང་འདོད་ཀྱང་བཀག་ཟིན་ལ། རིག་པ་ནི་སེམས་ཙམ་ལས་གཞན་འཐད་པ་མིན་ནོ་ཞེས་གསུངས་པ་འདི་ནི་འོག་གི་གསལ་ཞིང་རིག་པའི་རྟགས་ཀྱི་ཕྱོགས་ཁྱབ་སྒྲུབ་བྱེད་དོ། །གཉིས་པ་ནི། གསལ་ཞིང་རིག་པ་དང་ལྷན་ཅིག་དམིགས་པ་ངེས་པའི་གཏན་ཚིགས་གཉིས་ཀྱི་བྱེད་པས་དབང་ཤེས་ཀྱི་སྣང་བ་དབང་ཤེས་ལས་རྫས་གཞན་པའི་དོན་མིན་པར་འགྲུབ་བོ། །འདི་ལ་གཉིས་ལས། དང་པོ་ནི། དབང་ཤེས་ལ་དོན་དུ་སྣང་བ་ཆོས་ཅན། ཤེས་པ་ཡིན་ཏེ། གསལ་ཞིང་རིག་པ་ཡིན་པའི་ཕྱིར། འདི་ཡི་ཕྱོགས་ཆོས་ནི་གོང་དུ་མཐའ་གཞན་བཀག་པའི་སྒོ་ནས་བསྒྲུབས་ཟིན་ལ། ཁྱབ་པ་ཡོད་དེ། གསལ་ཞིང་རིག་པ་ཤེས་པའི་མཚན་ཉིད་ཡིན་པའི་ཕྱིར། དཔེར་ན་ལྐོག་ཤལ་གྱིས་བ་ལང་སྒྲུབ་པ་བཞིན་ནོ། །འདི་ནི་ཕྱོགས་ཆོས་དང་ཁྱབ་པ་གཉིས་ཆར་གྱི་དཔེ་བསྟན་པ་འདྲ་སྟེ་དཔྱད་པར་བྱའོ། །གཉིས་པ་ནི། གང་ལྷན་ཅིག་དམིགས་ངེས་ཡིན་པ་ལ་རྫས་གཞན་མི་སྲིད་པས་ཁྱབ་སྟེ། དཔེར་ན་དབང་ཤེས་འཁྲུལ་པ་ལ་སྣང་བའི་ཟླ་གཉིས་ཀྱི་རྣམ་པ་གཉིས་བཞིན། སྔོ་འཛིན་དབང་ཤེས་དང་དེ་ལ་སྔོན་པོར་སྣང་བ་གཉིས་ཀྱང་ལྷན་ཅིག་དམིགས་ངེས་ཡིན་ཏེ་ཞེས་པ་ནི་ཁྱབ་བྱེད་འགལ་བ་དམིགས་པའོ། །འདིའི་ཕྱོགས་ཆོས་ནི་རང་རིག་གིས་གྲུབ་ལ། རྗེས་ཁྱབ་ནི་ཟླ་གཉིས་ཀྱི་རྣམ་པའི་སྟེང་དུ་གྲུབ་ཅིང་། ལྡོག་ཁྱབ་ནི་རྟགས་མི་མཐུན་ཕྱོགས་ལ་འགོག་པའི་རིགས་པས་འགྲུབ་སྟེ། འདི་ལྟར། གང་རྫས་གཞན་ཡིན་པ་ལ་རྟགས་ལྷན་ཅིག་དམིགས་ངེས་མི་སྲིད་དེ། རྫས་གཞན་ལ་དེ་མཐའ་གཞན་བཀག་པས་ཁེགས་པའི་ཕྱིར། ཇི་ལྟར་ཞེ་ན་རྫས་གཞན་ལ་དུས་མི་མཉམ་པ་དང་མཉམ་པ་གཉིས་ལས། དང་པོ་ལ་དུས་མི་མཉམ་པ་ཉིད་ཀྱིས་ཁེགས་ལ། དུས་མཉམ་པ་ལའང་སྒྲོ་བཏགས་པར་ངེས་པ་ཉིད་ཀྱི་ཡུལ་རྫས་གཞན་མེད་པར་གྲུབ་ཅིང་། དུས་མཉམ་རྫས་ཐ་དད་པ་ནི་གནོད་པ་ཅན་གྱི་རྟགས་ཀྱིས་ཁེགས་ཏེ། གང་འབྲེལ་མེད་ཡིན་ན། ལྷན་ཅིག་དམིགས་ངེས་མིན་པས་ཁྱབ། དཔེར་ན་སྔོ་སེར་གཉིས་བཞིན། མིག་གཟུགས་གཉིས་ཀྱང་དུས་མཉམ་རྫས་གཞན་དུ་ཁྱོད་ཀྱིས་ཁས་བླངས་པས་སོ་ཞེས་པའོ། །གསུམ་པ་རྣམ་རིག་ལ་རྩོད་པ་སྤང་བ་ལ། རིག་པའི་རྟགས་མ་གྲུབ་པ་སྤང་། རྡུལ་ཕྲན་དང་མཚུངས་པ་སྤང་། རྣམ་པ་ཡོད་མེད་བརྟགས་ན་མི་འཐད་པ་སྤང་བའོ། །དང་པོ་ནི། རིག་བྱ་འགོད་ན་མ་ངེས། རིག་བྱེད་འགོད་ན་མ་གྲུབ། དེ་གཉིས་ལས་གཞན་པའི་རིག་པ་ཙམ་མི་རྙེད་དོ་ཞེ་ན། སྔ་མ་གཉིས་པོ་གང་གིས་ཀྱང་ཁྱད་པར་དུ་མ་བྱས་པའི་རིག་པ་ཙམ་འགོད་དེ། བ་གླང་གི་མཚན་ཉིད་དུ་དཀར་ཟལ་ཡིན་མིན་གང་གིས་ཀྱང་ཁྱད་པར་དུ་མ་བྱས་པའི་ལྐོག་ཤལ་ཙམ་འགོད་པ་བཞིན་ནོ། །གཉིས་པ་ནི། དབུ་མ་པ་ན་རེ། སེམས་ཆོས་ཅན། བདེན་པར་མེད་དེ། རྒྱུན་གཅིག་ཏུ་བདེན་ན་རགས་པ་ཡན་ལག་ཅན་འགོག་པའི་རིགས་པ་དང་མཚུངས། སྐད་ཅིག་ཆ་མེད་ཀྱི་དུ་མར་བདེན་ན་རྡུལ་གྱི་ཆ་ཤས་ལ་དཔྱད་པའི་རིག་པ་བཞིན་དུ་མཚུངས་པའི་ཕྱིར། དང་པོ་གྲུབ་སྟེ། དུས་ཀྱི་ཆ་སྔ་ཕྱི་ཐ་དད་པ་ཡོད་པའི་ཕྱིར་ཏེ། གང་ལ་དུས་ཆ་ཐ་དད་ཡོད། །དེ་ནི་གཅིག་ལ་མི་རུང་ངོ་། །ཞེས་གསུངས་པ་ལྟར་རོ། །གཉིས་པ་གྲུབ་སྟེ། དྲུག་གི་ཅིག་ཆར་སྦྱར་བའི་རིགས་པ་ཁ་སྤོས་པས་ཁེགས་པའི་ཕྱིར། དེས་ན་སེམས་ཆོས་ཅན། བདེན་པར་མེད་དེ། རྒྱུན་རྫས་གཅིག་དང་སྐད་ཅིག་ཆ་མེད་ཀྱི་དུ་མ་གང་རུང་དུ་བདེན་པ་དང་བྲལ་བའི་ཕྱིར། དང་པོ་གྲུབ་སྟེ། སྐད་ཅིག་གསུམ་གྱི་བདག་ཉིད་ཡིན་པའི་ཕྱིར། གཉིས་པ་གྲུབ་སྟེ། གང་དུ་བསྒྲུབས་ཟིན་པའི་ཕྱིར་ཞེས་ཟེར་ན། འདི་ལ་བོད་རྣམས་རྡུལ་དང་སྐད་ཅིག་འགོག་པའི་རིགས་པ་མཚུངས་པས་སྐད་ཅིག་ཆ་ཤས་ཅན་ཡིན་ནོ་ཞེས་ཟེར་བ་མི་མཚུངས་ཏེ། སེམས་སྐད་ཅིག་གཅིག་ཡིན་པ་མི་སྲིད་པར་འགྱུར་ཏེ། སེམས་ཐམས་ཅད་སྐད་ཅིག་གསུམ་གྱི་བདག་ཉིད་ཡིན་པའི་ཕྱིར། འདོད་ན། སེམས་ཐམས་ཅད་སྐད་ཅིག་གསུམ་གྱི་བདག་ཉིད་ཡིན་པ་ཉམས་པར་ཐལ། སྔ་ཕྱི་གཉིས་ཀྱི་བར་དུ་བཅར་བའི་སེམས་སྐད་ཅིག་མ་མི་སྲིད་པའི་ཕྱིར་ནའོ། །འོ་ན་རྡུལ་ཕྲན་ཡང་གཅིག་ཡིན་ན་དྲུག་ཡིན་པར་འགལ། དྲུག་ཡིན་ན་གཅིག་ཡིན་པར་འགལ་བར་མཚུངས་སོ་ཞེ་ན། ཁོ་བོ་ཡང་དེ་ལྟར་འདོད་པས་རྡུལ་ཕྲན་འཇིག་གོ །འོ་ན་སྐད་ཅིག་ཀྱང་འཇིག་གོ་ཞེ་ན། དེ་གཉིས་མི་མཚུངས་ཏེ། དབུས་རྡུལ་ལ་ཕྱོགས་དྲུག་གིས་ཅིག་ཆར་དུ་མ་བསྐོར་ན་རགས་པ་རྩོམ་པར་མི་ནུས་ལ། ཅིག་ཆར་དུ་བསྐོར་བ་ན་དབུས་ཀྱི་རྡུལ་ཕྲན་ཕྱོགས་ཆ་དང་བཅས་པར་འགྱུར་ལ། སེམས་ཀྱི་དུས་གསུམ་ཅིག་ཆར་སྐྱེས་ན་འདས་མ་འོངས་ད་ལྟ་བར་ཐལ་བས་དེ་དག་ཅིག་ཆར་མི་སྐྱེ་བའི་ཕྱིར་ན། ད་ལྟའི་སེམས་སྐད་ཅིག་ཆ་མེད་ཡིན་པར་གྲུབ་སྟེ། ད་ལྟར་སྐྱེ་བའི་སྐད་ཅིག་ལས་གཞན་པའི་དངོས་པོར་མི་སྲིད་པའི་ཕྱིར། གསུམ་པ་ནི། ཟླ་གཅིག་དང་ཟླ་གཉིས་འཛིན་པའི་དབང་ཤེས་གཉིས་ལ་ཚད་མ་ཡིན་མིན་མཚུངས་པར་ཐལ། དེ་གཉིས་ཀྱི་ཡུལ་གཉིས་པོ་ཡོད་མེད་མཚུངས་པའི་ཕྱིར་དང་། ཤེས་པ་རྣམ་བཅས་རྣམ་མེད་གང་ཡིན་རུང་བདེན་རྫུན་མཚུངས་པའི་ཕྱིར་ཞེ་ན། དོན་སྣང་གི་བློ་ཐམས་ཅད་ལ་རང་ལས་རྫས་གཞན་པའི་ཡུལ་མེད་པར་མཚུངས་ཏེ། དབང་ཤེས་ལ་དོན་དུ་སྣང་བ་ཐམས་ཅད་དབང་བློ་ཉིད་ཡིན་ལ། སྣང་བ་དེ་ཉིད་ཕྱི་རོལ་ན་གྲུབ་པ་མེད་པའི་ཕྱིར། འོན་ཀྱང་ཀུན་ཏུ་ཐ་སྙད་པའི་ཚད་མ་དཔྱོད་པ་ན་ཐ་སྙད་དུ་བློ་གཉིས་པོ་ལ་ཚད་མ་ཡིན་མིན་གྱི་ཁྱད་པར་ཡོད་དེ། བག་ཆགས་བརྟན་དང་མི་བརྟན་པའི་ཁྱད་པར་ལས་ཟླ་བ་གཅིག་དང་དུང་དཀར་པོ་སོགས་ལ་བདེན་པ་དང་། ཟླ་བ་གཉིས་དང་དུང་སེར་པོ་སོགས་ལ་རྫུན་པའི་རྣམ་གཞག་བྱེད་པའི་ཕྱིར། ཇི་སྐད་དུ་རྣམ་ངེས་ལས། གཞན་ནི་བག་ཆགས་བརྟན་ཕྱིར་འཁོར་བ་ཇི་སྲིད་བར་མི་འབྲལ་བར་རྗེས་སུ་འབྲེལ་བ་ནི་ཐ་སྙད་ལ་མི་སླུ་བ་ལ་ལྟོས་ནས་འདིར་ཚད་མ་ཡིན་ནོ། །འདི་ནི་ཀུན་ཏུ་ཐ་སྙད་པའི་ཚད་མའི་རང་བཞིན་བརྗོད་པའོ། །ཞེས་གསུངས་སོ། །གསུམ་པ་ནི། སྤྱིར་གྲུབ་མཐའི་རྣམ་དབྱེ་དུ་མ་ཡོད་པ་ལས་འདིར་སློབ་དཔོན་གྱིས་དོན་རིག་དང་རྣམ་རིག་གཉིས་གཏན་ལ་ཕབ་ལ། གཟུང་ཡུལ་གྱི་གཞལ་བྱ་རང་མཚན་གཅིག་པུར་ངེས་པ་ནི་དོན་རིག་ཏུ་གཏན་ལ་ཕབ་པའི་སྐབས་ཡིན་ཏེ། ཇི་སྲིད་ཕྱི་རོལ་གྱི་དོན་ཁས་ལེན་པ་དེ་སྲིད་དུ་རང་ངོས་ནས་རང་འདྲའི་རྣམ་པ་གཏོད་བྱེད་ཀྱི་རྒྱུ་ལ་གཟུང་ཡུལ་ཞེས་ཟེར་བའི་ཕྱིར། ཤེས་བྱ་ཐམས་ཅད་ནང་སེམས་ཡིན་པའི་གྲུབ་མཐའ་ལ་ཞུགས་པ་ན་ཕྱི་རོལ་གྱི་གཟུང་ཡུལ་དང་། དེས་རྣམ་པ་གཏད་པའི་ཡུལ་ཅན་མངོན་སུམ་གྱི་ཚད་མ་ཡང་གྲུབ་པ་མེད་དེ་ཕྱི་དོན་མེད་པའི་ཕྱིར། དེས་ན། ཕྱི་ཡི་གཟུང་ཡུལ་མཁས་པས་བཀག །ཅེས་པ་དོན་རིག་ཏུ་གཏན་ལ་ཕབ་པའི་དབང་དུ་བྱས་ན་མ་གྲུབ་ཅིང་། རྣམ་རིག་ཏུ་གཏན་ལ་ཕབ་པའི་ཚེ་གཟུང་ཡུལ་གྱི་གཞལ་བྱ་རང་མཚན་དུ་སྨྲས་པ་མེད་པས་སྔར་གྱི་རྩོད་པ་དེ་ནི་མི་འཐད་པ་ཁོ་ནའོ། །ཚད་མ་རིག་པའི་གཏེར་ལས་ཡུལ་བརྟག་པའི་རབ་ཏུ་བྱེད་པར་དང་པོའི་རྣམ་པར་བཤད་པ་བསྟན་ཟིན་ཏོ།། ༈ །།གཉིས་པ་ཤེས་བྱེད་ཀྱི་བློ་ལ། བློ་ཙམ་གྱི་རྣམ་གཞག་སྤྱིར་བསྟན། ཚད་མ་དང་ཚད་མིན་གྱི་བསྡུ་བ་བྱེ་བྲག་ཏུ་བཤད་པ་གཉིས། དང་པོ་ལ་བློ་ཙམ་གྱི་མཚན་ཉིད། དེའི་དབྱེ་བསྡུ། དེ་དག་གི་དོན་གཏན་ལ་དབབ་པའོ། །དང་པོ་ནི། རིག་པ་ཆོས་ཅན། བློའི་མཚན་ཉིད་ཡིན་ཏེ། དེའི་དངོས་འགལ་གཅོད་པའི་དོན་ལྡོག་གྲུབ་པ་ཡིན་པའི་ཕྱིར། གཉིས་པ་ནི། བློ་ལ་དབྱེ་ན་དུ་མར་འགྱུར་ཏེ། ཡུལ་གྱི་སྒོ་ནས་དབྱེ་ན། རྟོག་པ་དང་རྟོག་མེད་གཉིས། སོགས་པ་ངོ་བོའི་སྒོ་ནས་འཁྲུལ་མ་འཁྲུལ་གཉིས། འཇུག་ཚུལ་གྱི་སྒོ་ནས་ཤིང་གཅོད་པ་ལྟར་ཡུལ་ལ་མ་ཞུགས་པ། འཇུག་བཞིན་པ། ཞུགས་ཟིན་པ་གསུམ་སྟེ་དེ་དག་ཀྱང་ལས་བྱེད་པ་པོ་བྱ་བའི་སྒོ་ནས་དབྱེ་བ་ཡིན་ལ། དེ་ལའང་ཤེས་པ་ཡིན་པའི་སྒོ་ནས་རང་གི་ངོ་བོ་ལ་རང་རིག་གཅིག་པུར་འདུས་ཏེ། དོན་ཐམས་ཅད་དོན་བྱེད་པའི་སྒོ་ནས་རང་མཚན་ཡིན་པའི་ཕྱིར་རོ། །གསུམ་པ་ལ་ཚད་མ་དང་། ཚད་མ་མིན་པ་གཉིས་ལས། དང་པོ་འོག་ཏུ་འཆད། ཚད་མ་མིན་པ་ལ་གཞན་ལུགས་དགག་པ། རང་ལུགས་གཞག་པ་གཉིས། དང་པོ་ལ་དགག་པའི་ཡུལ་སྤྱིར་བསྟན་པ། མི་འཐད་པའི་ཆ་དགག་པའོ། །དང་པོ་ནི། པཎྜི་ཏ་འགའ་ཞིག་མཐའ་ཡས་པས་དབྱེ་བ་མེད་དོ་ཟེར་བའང་ཐོས། ཆ་བ་སོགས་བོད་ཕལ་ཆེར་ཚད་མིན་གྱི་བློའི་རིགས་ལ་ལྔར་ངེས་ཏེ། ཡིད་དཔྱོད། སྣང་ལ་མ་ངེས་པ། བཅད་ཤེས། ལོག་ཤེས། ཐེ་ཚོམ་རྣམས་སུ་ངེས་པའི་ཕྱིར་ཞེས་ཟེར་རོ། །གཉིས་པ་ལ། དབྱེ་བའི་ངོ་བོ་དགག་པ། དབྱེ་བའི་ཚུལ་དགག་པའོ། །དང་པོ་ལ། ཡིད་དཔྱོད། སྣང་ལ་མ་ངེས་པ། བཅད་ཤེས་དགག་པའོ། །དང་པོ་ལ་ཕྱོགས་སྔ་མ་བརྗོད་པ། དེ་དགག་པ་གཉིས། དང་པོ་ལ་མཚན་ཉིད་ནི། རྟགས་ལ་མ་ལྟོས་པར་སྔར་མ་གཏོགས་པའི་ལྐོག་གྱུར་དོན་དང་མཐུན་པར་ངེས་པའོ། །དབྱེ་ན། རྒྱུ་མཚན་མེད་པའི་ཡིད་དཔྱོད་ཁྲོན་པ་རྙིང་པ་ན་ཆུ་ཡོད་པར་ངེས་པ་དང་། རྒྱུ་མཚན་ཕྱིན་ཅི་ལོག་ཤ་བསྲེགས་པའི་གསུར་ལ་འདུས་པའི་སྦྲང་བུའི་ཚོགས་ལ་མེར་ངེས་པ་ལྟ་བུ། རྒྱུ་མཚན་མ་ངེས་པ་ཚུལ་གསུམ་མི་ཤེས་ཀྱང་བྱས་པའི་རྟགས་ལས་མི་རྟག་པ་རྟོགས་པ་ལྟ་བུའོ་ཞེའོ། །གཉིས་པ་ལ་སྤྱིར་དགག་པ། སོ་སོར་དགག་པ་གཉིས། དང་པོ་ལ་བརྟགས་ན་མི་འཐད་པ། ཧ་ཅང་ཐལ་བ། བཟློག་པ་མཚུངས་པ་གསུམ། དང་པོ་ནི། ཡིད་དཔྱོད་དེ་རྟགས་སུ་བཀོད་ཙམ་ལ་ལྟོས་སམ་གཏན་མི་ལྟོས། ཕྱི་མ་ལྟར་ན་དེ་ཆོས་ཅན། ཐེ་ཚོམ་དུ་འགྱུར་གྱི་ངེས་པ་མི་སྲིད་དེ། མྱོང་བ་དང་རྟགས་གང་ལའང་མ་བརྟེན་པར་དམ་བཅའ་ཙམ་འཛིན་པའི་རྟོག་པ་ཡིན་པའི་ཕྱིར། གལ་ཏེ་རྟགས་ལ་ལྟོས་ན་རྟགས་ཡང་དག་ལྟར་སྣང་གང་ལ་ལྟོས། དང་པོ་ལྟར་ན་ཚད་མར་ཐལ་ཏེ། རྟགས་ཡང་དག་ལ་བརྟེན་ནས་ལྐོག་གྱུར་གྱི་དོན་བདེན་པ་གསར་དུ་ངེས་པའི་བློ་ཡིན་པའི་ཕྱིར། མ་ཁྱབ་ན། རྗེས་དཔག་ཡང་ཚད་མ་མིན་པར་ཐལ་ལོ། །གཉིས་པ་ལྟར་ན། མ་རྟོགས་ལོག་རྟོགས་ཐེ་ཚོམ་གསུམ་གང་རུང་དུ་ཐལ། རྟགས་ལྟར་སྣང་ལ་བརྟེན་པའི་བློ་གང་ཞིག རྟགས་ལྟར་སྣང་ལ་འགལ་བ་མ་ངེས་པ་མ་གྲུབ་པ་གསུམ་པོ་གང་རུང་ལས་འདའ་བ་མེད་པའི་ཕྱིར། གཉིས་པ་ནི། གལ་ཏེ་རྒྱུ་མཚན་ཅན་གྱི་ཡིད་དཔྱོད་གཉིས་གཏན་ཚིགས་ལྟར་སྣང་གསུམ་པོ་གང་རུང་ལ་བརྟེན་པའི་བློར་མི་འདུའོ་ཞེ་ན། ཡིད་དཔྱོད་ཀྱི་རྟེན་གཞིར་གྱུར་པའི་གཏན་ཚིགས་ལྟར་སྣང་བཞི་པ་ཡོད་པར་འགྱུར་ཏེ། རྟགས་ལྟར་སྣང་ལ་བརྟེན་པ་གང་ཞིག་ཁས་ལེན་དེའི་ཕྱིར། གཞན་ཡང་ཡིད་དཔྱོད་གཉིས་པོ་རྟགས་ལྟར་སྣང་གསུམ་པོ་གང་རུང་ལ་བརྟེན་པ་མིན་ན། མངོན་རྗེས་གཉིས་ལས་གཞན་པའི་ཚད་མ་གསུམ་པ་སྲིད་པར་འགྱུར་ཏེ། དེ་གཉིས་ཚད་མ་གཉིས་པོ་གང་རུང་མིན་ཞིང་། རྟགས་ལ་བརྟེན་ནས་སྔར་མ་རྟོགས་པའི་དོན་བདེན་པ་གསར་དུ་ངེས་པའི་བློ་ཡིན་པའི་ཕྱིར། གལ་ཏེ་དོན་བདེན་པ་གསར་དུ་ངེས་ཀྱང་ཚད་མ་མིན་ཏེ། དེས་སྒྲོ་འདོགས་མི་གཅོད་པའི་ཕྱིར་ཞེ་ན། འོ་ན་རྗེས་སུ་དཔག་པའང་ཚད་མ་མིན་པར་འགྱུར་ཏེ། སྔ་མའི་དམ་བཅའ་དེའི་ཕྱིར། གཞན་ཡང་ངེས་ཤེས་དང་སྒྲོ་འདོགས་གཉིས་ཀྱང་གནོད་བྱ་དང་གནོད་བྱེད་མིན་པར་འགྱུར་ཏེ། དོན་བདེན་པ་གསར་དུ་ངེས་ཀྱང་སྒྲོ་འདོགས་མི་གཅོད་པ་སྲིད་པའི་ཕྱིར། འདོད་ན། ངེས་པ་དང་ནི་སྒྲོ་འདོགས་ཡིད། །ཅེས་སོགས་དང་འགལ་ལོ། །གལ་ཏེ་དོན་བདེན་པ་གསར་དུ་ངེས་པ་མེད་ཀྱང་ཁྲོན་པ་རྙིང་པ་ན་ཆུ་ཡོད་དམ་སྙམ་པ་བདེན་པ་སྟེ་ཡིད་དཔྱོད་དང་། མེད་དམ་སྙམ་པ་རྫུན་པ་སྟེ་ལོག་ཤེས་དང་གཉིས་ཀར་འཛིན་པ་སོམ་ཉི་སྟེ་ཐེ་ཚོམ་གྱི་བློ་གསུམ་དུ་འཇོག་པ་མི་འགལ་ལོ་ཞེ་ན། མི་འཐད་དེ། མཚན་གཞི་དང་པོ་དེ་ཆོས་ཅན། ཡིད་དཔྱོད་མིན་པར་ཐལ། དོན་བདེན་པ་གསར་དུ་ངེས་པ་མེད་པའི་ཕྱིར་ནའོ། །མ་ཁྱབ་ན། ཡིད་དཔྱོད་ཀྱི་མཚན་ཉིད་ཉམས་སོ། །གཞན་ཡང་ཐེ་ཚོམ་གྱི་མཚན་གཞི་རྙེད་པར་དཀའ་བར་ཐལ། ཡོད་དམ་སྙམ་པ་དང་མེད་དམ་སྙམ་པའི་བློ་གཉིས་ཐེ་ཚོམ་མིན་པར་ཏེ། རིམ་བཞིན་ཡིད་དཔྱོད་དང་ལོག་ཤེས་གཉིས་སུ་འགྱུར་བའི་ཕྱིར་ནའོ། །ཁྱབ་པ་ཁས། གསུམ་པ་ནི། ཡང་ན་རྟགས་ལ་མ་ལྟོས་པར་སྔར་མ་རྟོགས་པའི་ལྐོག་གྱུར་དོན་དང་མཐུན་པར་ངེས་པ་བདེན་པའི་ཡིད་དཔྱོད་ཀྱི་མཚན་ཉིད་ཡིན་པ་ལྟར། རྟགས་ལ་མ་ལྟོས་པར་སྔར་མ་རྟོགས་པའི་ལྐོག་གྱུར་དོན་དང་མི་མཐུན་པར་ངེས་པའི་ལོག་པའི་ཡིད་དཔྱོད་གཅིག་ཅིས་མི་འཐད་དེ་འཐད་པར་ཐལ། རྒྱུ་མཚན་མཚུངས་པའི་ཕྱིར། འདོད་ན། ཡིད་དཔྱོད་ཡིན་ན་དོན་བདེན་པ་ངེས་པས་ཁྱབ་པ་ཉམས་སོ། །གལ་ཏེ་འདི་ཡིད་དཔྱོད་མིན་ན། སྔ་མའང་ཡིད་དཔྱོད་མིན་པར་རྒྱུ་མཚན་མཚུངས་སོ། །གལ་ཏེ་ཆུ་མེད་དམ་སྙམ་པའི་ལོག་པའི་ཡིད་དཔྱོད་མཐའ་གཉིས་ཀར་དོགས་པས་ཐེ་ཚོམ་དུ་འདོད་ན། ཆུ་ཡོད་དམ་སྙམ་པའི་བདེན་པའི་ཡིད་དཔྱོད་ཀྱང་ཐེ་ཚོམ་དུ་འགྱུར་ཏེ། མཐའ་གཉིས་ཀར་དོགས་པའི་ཕྱིར་ནའོ། །གལ་ཏེ་གཉིས་ཀ་ཡིད་དཔྱོད་དུ་བདེན་པར་འདོད་ན། འགལ་བ་ལ་མི་འཁྲུལ་བའི་ཚད་མ་སྲིད་པར་ཐལ་ཏེ། ཆུ་ཡོད་མེད་གཉིས་ཆར་དུ་ངེས་པར་ཡོད་པའི་ཕྱིར། གཞན་ཡང་ལོག་པའི་ཡིད་དཔྱོད་དེ་ཚད་མ་མིན་པ་དྲུག་པར་ཐལ། ལྔ་པོ་ལས་གཞན་པའི་ཚད་མིན་གྱི་བློ་ཡིན་པའི་ཕྱིར། འདོད་ན་ཚད་མིན་གྱི་བློ་ལ་ལྔར་ངེས་པའི་གྲངས་ངེས་འཇིག་གོ །གལ་ཏེ་ཆུ་མེད་དམ་སྙམ་པའི་བློ་ལོག་ཤེས་ཡིན་ན་ཆུ་ཡོད་དམ་སྙམ་པའི་ཡིད་དཔྱོད་ཀྱང་ཚད་མ་ཉིད་དུ་འགྱུར་ཏེ། རྒྱུ་མཚན་མཚུངས་པའི་ཕྱིར། དེ་ཉིད་ཀྱི་ལུང་གསུམ་དང་སྦྱར་རོ། །གཉིས་པ་སོ་སོར་དགག་པ་ལ། རྒྱུ་མཚན་མེད་པ་དགག རྒྱུ་མཚན་ཕྱིན་ཅི་ལོག་དགག ལུང་གི་ཆོས་ཡིད་དཔྱོད་དུ་འདོད་པ་དགག་པའོ། །གལ་ཏེ་རྒྱུ་མཚན་མེད་པའི་ཡིད་དཔྱོད་དེས་དོན་བདེན་པ་ངེས་ན་རང་གི་འོག་ན་རིན་པོ་ཆེ་ཡོད་དམ་སྙམ་པ་ལ་སོགས་པའི་ཚོད་དཔག་གི་བློ་ཀུན་གྱིས་དོན་བདེན་པ་ངེས་པར་འགྱུར་ཏེ་རྒྱུ་མཚན་མཚུངས་པའི་ཕྱིར། གལ་ཏེ་ཐེ་ཚོམ་ཟའོ་སྙམ་ན། རྒྱུ་མཚན་མེད་པའི་ཡིད་དཔྱོད་ཀྱིས་ཀྱང་བདེན་པ་ངེས་པ་ཉམས་སོ། །ཁྲོན་པར་ཆུ་ཡོད་པར་འཛིན་པ་ཡང་རྒྱུ་མཚན་གཏན་མེད་མིན་ཏེ། སྔར་ཆུ་མཐོང་བ་ཙམ་རྒྱུ་མཚན་དུ་བྱས་པའི་ཕྱིར། གལ་ཏེ་རྒྱུ་མཚན་དེ་མ་ངེས་པ་ཡིན་ནོ་ཞེ་ན། མ་ངེས་པ་ཉིད་ཀྱིས་ཐེ་ཚོམ་དུ་འགྱུར་རོ། །གཉིས་པ་ནི། གལ་ཏེ་ལོག་པའི་རྒྱུ་མཚན་ཅན་གྱི་མཚན་གཞི་དེ་ཡིད་དཔྱོད་ཡིན་ན་མཉན་བྱས་སྒྲ་མི་རྟག་པར་སྒྲུབ་པ་ལྟ་བུ་ཐུན་མོང་མིན་པ་དང་། གཞལ་བྱས་དེ་སྒྲུབ་པ་ལྟ་བུ་དངོས་ཀྱི་མ་ངེས་པ་དང་། ལྷས་བྱིན་གྱིས་བུ་ལས་སྔོ་བསངས་སྒྲུབ་པ་ལྟ་བུ་ཡང་དག་ལྷག་ལྡན་དང་། མིག་གི་གཟུང་བྱས་སྒྲ་མིག་རྟག་པར་སྒྲུབ་པ་ལྟ་བུ་མ་གྲུབ་པའི་རྟགས་ལ་བརྟེན་པའི་བློ་རྣམས་ཀྱང་ཡིད་དཔྱོད་དུ་འགྱུར་ཏེ། རྒྱུ་མཚན་མཚུངས་པའི་ཕྱིར། འདོད་ན། སྔ་མ་གསུམ་ཐེ་ཚོམ་དང་ཕྱི་མ་མ་རྟོགས་པར་བཤད་པའི་སློབ་དཔོན་གྱི་གཞུང་དང་འགལ་ལོ། །གསུམ་པ་ནི། ལུང་ཐོས་པ་ལས་བྱུང་བའི་ཤེས་རབ་ཡིད་དཔྱོད་ཡིན་ནོ་ཞེ་ན། རང་སྡེ་དང་གཞན་གྱི་སྡེ་པའི་ལུང་གང་རུང་ལས་བརྗོད་དོན་རྟོགས་ཤིང་འཛིན་པའི་བློ་ཆོས་ཅན། ཡིད་དཔྱོད་མིན་པར་ཐལ། བློ་རིགས་བཞི་པོ་གང་རུང་དུ་འདུས་པའི་ཕྱིར་ཏེ། རང་གི་ལུང་ལ་དྲང་ངེས་གཉིས། གཞན་གྱི་ལུང་ལ་འཐད་མི་འཐད་གཉིས་ལས། བདེན་བཞི་སྟོན་པའི་ལུང་ལྟ་བུ་སྒྲུབ་བྱེད་ཡོད་པའི་ལུང་ལས་དོན་ངེས་པའི་བློ་རྗེས་དཔག་ཚད་མ། ཁྲུས་སོགས་ཀྱིས་སྡིག་པ་འདག་པར་སྟོན་པ་ལྟ་བུ་གནོད་བྱེད་ཡོད་པ་ལས་དོན་འཛིན་པའི་བློ་ལོག་ཤེས། གནོད་སྒྲུབ་གང་ཡང་མེད་པ་ལ་བརྗོད་དོན་ཡོད་པའི་ལུང་ལས་དོན་འཛིན་པའི་བློ་ཐེ་ཚོམ། མ་གྲུབ་པའི་ལུང་ལས་དོན་འཛིན་པའི་བློ་མ་རྟོགས་པའི་བློ་ཡིན་པའི་ཕྱིར། དེ་དག་ཀྱང་རིམ་བཞིན། ཡིད་ཆེས་ཚིག་ནི་མི་སླུ་བའི། །ཞེས་སོགས་དང་། བླང་དང་དོར་བྱའི་དེ་ཉིད་ནི། །སོགས་དང་། ཚད་མས་མ་གྲུབ་དོན་ཅན་གྱི། །ཞེས་སོགས་དང་། དེས་ན་ལུང་དང་དངོས་པོ་རྣམས། །ཞེས་སོགས་དང་། འགལ་བ་ཀུན་ཏུ་མ་བསལ་ཞིང་། །ཞེས་སོགས་དང་སྦྱར་རོ། །ཚད་མིན་གྱི་ལུང་ལ་འཇུག་ལྡོག་ནི་ཐེ་ཚོམ་གྱི་སྒོ་ནས་བྱེད་པར་གསུངས་པས་མི་འགལ་ལོ། །གཉིས་པ་སྣང་ལ་མ་ངེས་པ་དགག་པ་ལ། ཕྱོགས་སྔ་མ་དང་། དེ་དགག་པའོ། །དང་པོ་ལ། མཚན་ཉིད་ནི་སྒྲོ་འདོགས་དང་མི་འགལ་བར་དོན་རང་གི་མཚན་ཉིད་སྣང་བའོ། །དབྱེ་ན་ཡུལ་རྣམ་པ་མི་གསལ་བ། ཡིད་ཉེ་བར་མ་གཏད་པ། འཁྲུལ་པའི་རྒྱུ་མཚན་གྱིས་ཟིན་པ་གསུམ། དང་པོ་ནི། རྟག་འཛིན་གྱི་འཁྲུལ་རྒྱུ་དང་བཅས་པའི་རྒྱུ་ཉིད་བུམ་པའི་སྐད་ཅིག་མ་མཐོང་བའི་མིག་ཤེས་དང་། གཉིས་པ་ནི། རྟོག་པ་ནང་དུ་བསྡུས་པའི་གནས་སྐབས་ཀྱི་གཟུགས་འཛིན་མིག་ཤེས་དང་། གསུམ་པ་ནི། ཉ་ཕྱིས་ལ་དངུལ་དུ་འཁྲུལ་དུས་ཀྱི་ཉ་ཕྱིས་འཛིན་པའི་མིག་ཤེས་ལྟ་བུའོ་ཞེས་ཟེར་རོ། །གཉིས་པ་ལ། སྤྱིར་དགག་ན། གལ་ཏེ་སྣང་ལ་མ་ངེས་པ་ཡིན་པས་ཚད་མ་མིན་ན། མངོན་སུམ་ཀུན་ཆོས་ཅན། ཚད་མ་མིན་པར་འགྱུར་ཏེ། སྣང་ལ་མ་ངེས་པ་ཡིན་པའི་ཕྱིར་ཏེ། མངོན་སུམ་ལ་ངེས་པ་ཉིད་ནི་སློབ་དཔོན་གྱིས་བཀག་པའི་ཕྱིར་རོ། །ཇི་སྐད་དུ། ད་ནི་ཇི་ལྟར་མ་ངེས་པ་མངོན་སུམ་གྱིས་ཀྱང་གཟུང་བ་ཡིན་ཞེ་ན། མངོན་སུམ་ནི་གང་གི་ཡང་ངེས་པར་བྱེད་པ་མིན་ཏེ། དེས་གང་ཞིག་འཛིན་པ་དེ་ཡང་ངེས་པས་ནི་མིན་ནོ། །འོ་ན་ཅི་ཡིན་ཞེ་ན་དེར་སྣང་བས་སོ། །དེས་ན་ངེས་པ་དང་མ་ངེས་པའི་དབང་གིས་མངོན་སུམ་གྱིས་འཛིན་པ་དང་མི་འཛིན་པ་དག་མིན་ནོ། །ངེས་པ་རྣམས་ཀྱིས་ནི་དེ་ལྟ་མིན་ནོ། །འགའ་ཞིག་ངེས་ཀྱང་གཞན་མ་ངེས་པས་འཇུག་པ་ཐ་དད་པས་འཛིན་པ་དང་མི་འཛིན་པ་ཡིན་ནོ་ཞེས་སོ། །བྱེ་བྲག་ཏུ་ཡུལ་རྣམ་པ་མི་གསལ་བའི་སྣང་ལ་མ་ངེས་པ་མི་འཐད་དེ། རྫས་གཅིག་ལ་རྣམ་པ་གསལ་མི་གསལ་འགལ་བའི་ཕྱིར་རོ། །གསུམ་པ་བཅད་པའི་ཡུལ་ཅན་དགག་པ་ལ། ཕྱོགས་སྔ་མ་དང་། དེ་དགག་པའོ། །དང་པོ་ལ་མཚན་ཉིད་ནི། སྔར་རྟོགས་ཟིན་གྱི་བྱེད་པ་མ་ཉམས་པ་ལ་ལོག་ཕྱོགས་ཀྱི་སྒྲོ་འདོགས་དང་འགལ་བར་འཇུག་པའོ། །དབྱེ་བ་ལ་མངོན་སུམ་བཅད་ཤེས་དང་། རྟོག་པ་བཅད་ཤེས་གཉིས། དང་པོ་ནི། དབང་མངོན་སྐད་ཅིག་གཉིས་པ་ལྟ་བུ་དང་། གཉིས་པ་ནི། མངོན་སུམ་གྱི་རྗེས་སུ་སྐྱེས་པའི་ངེས་ཤེས་དང་། རྗེས་དཔག་གིས་དྲང་བའི་དྲན་ཤེས་ལྟ་བུའོ་ཞེས་ཟེར་རོ། །གཉིས་པ་ལ། སྤྱིར་དགག མངོན་སུམ་བཅད་ཤེས་བྱེ་བྲག་ཏུ་དགག་པ་གཉིས། དང་པོ་ནི། བཅད་ཤེས་ནི། རིགས་པས་མཐའ་བཅད་ན་མ་རྟོགས་པ་དང་ལོག་རྟོགས་དང་ཡང་ན་ཚད་མ་ཉིད་དུ་འགྱུར་གྱི་གསུམ་པོ་དེ་ལས་གཞན་པའི་བློ་ཡིན་པ་མི་སྲིད་དེ། འདི་ལྟར་མངོན་རྗེས་གཉིས་ཀྱིས་དྲངས་པའི་བཅད་ཤེས་ནི་མ་རྟོགས་པ་ཡིན་ཏེ། ཚད་མའི་ཡུལ་ནི་སྐད་ཅིག་མ་ཡིན་པ་ཉིད་ཀྱིས་འགགས་ཟིན་པའི་ཕྱིར་དང་། མ་འགགས་སུ་ཟིན་ཡང་། བློས་སྔར་རྟོགས་ཟིན་པས། ཕྱིས་རྟོགས་པར་བྱ་རྒྱུ་མེད་དེ། ཤིང་བཅད་ཟིན་པའི་སཏྭ་རེ་གཅོད་བྱེད་མིན་པ་དང་། གྲུབ་ཟིན་སྒྲུབ་པས་མ་གྲུབ་པར་འདུ་བ་བཞིན་ནོ། །ཡང་སྔར་རྟོགས་པ་དེ་ཉིད་ད་ལྟར་གྱི་འདིའོ་སྙམ་པའི་འཛིན་པ་ལ་བྱེད་ན། དེ་མིན་ལ་དེར་འཛིན་པའི་ལོག་ཤེས་ཡིན་ལ། ད་ལྟར་དྲན་པའི་རྟགས་ཀྱིས་སྔར་གྱི་མྱོང་བ་དཔོག་པའི་བློ་ལ་བྱེད་ནའང་། ད་ལྟ་དྲན་པ་ཡོད་པ་ཉིད་ནི་རང་ལ་རང་རིག་པའི་མངོན་སུམ་མོ། །གཉིས་པ་ལ། དགག་པ་དངོས། བཀག་པ་ལ་མི་འཐད་པ་སྤང་བའོ། །དང་པོ་ལ། འགལ་བ་ལ་གཞི་མཐུན་དགག དབང་ཤེས་རིགས་ལ་ཚད་མ་ཡིན་པ་དགག བཀག་པའི་གྲུབ་དོན་བསྡུས་ཏེ་བསྟན་པའོ། །དང་པོ་ནི། མངོན་སུམ་དང་བཅད་ཤེས་གཉིས་ལ་གཞི་མཐུན་པ་ནི་ག་ལ་སྲིད་དེ་མི་སྲིད་པར་ཐལ། དེ་གཉིས་ངོ་བོར་ཡུལ་དུས་འཛིན་སྟངས་འགལ་བའི་ཕྱིར་ཏེ། མངོན་སུམ་ནི་ངོ་བོ་རྟོགས་བྲལ། ཡུལ་རང་མཚན། དུས་ད་ལྟར་བ་འཛིན་སྟངས་གསལ་བ་མ་འདྲེས་པ་ཡིན་ལ། བཅད་ཤེས་ནི་ངོ་བོ་རྟོག་པ། ཡུལ་སྒྲ་དོན། དུས་འདས་པ་དྲན་པ། འཛིན་སྟངས་མི་གསལ་བ་འདྲེས་པ་འཛིན་པ་ཡིན་པའི་ཕྱིར་ཏེ། བརྡ་དྲན་པ་ཡི་རྒྱུ་ཅན་གྱིས། །ཞེས་སོགས་དང་སྦྱར་རོ། །གཉིས་པ་ནི། སྔོན་པོ་ལ་སོགས་པའི་རིགས་རྒྱུན་འཛིན་པ་ནི་མངོན་སུམ་ཡིན་ཏེ། དེ་སྐད་ཅིག་མ་དང་པོ་ཚད་མ། དེའི་རྗེས་ཀྱི་ཤེས་པ་སྐད་ཅིག་མ་གཉིས་པ་སོགས་ནི་བཅད་ཤེས་ཡིན་ནོ་ཞེ་ན། རིགས་ནི་ཚུར་མཐོང་མངོན་སུམ་གྱི་ཡུལ་མ་ཡིན་ཏེ། རིགས་དེ་སྐད་ཅིག་གིས་ཕྲེང་བ་དང་། མུ་སྟེགས་འདོད་པའི་སྤྱི་དང་། གཞན་སེལ་གང་ལ་བྱེད། དང་པོ་ལྟར་ན་དེ་རྫས་ཡིན་གྱི་རིགས་མིན་ལ། གཉིས་པ་མི་སྲིད་ཅིང་། གསུམ་པ་ཡང་དངོས་མེད་ཡིན་པའི་ཕྱིར། ཡང་དབང་མངོན་སྔ་མས་མཐོང་བའི་དོན་ལ་རྗེས་ཀྱི་ཤེས་པ་དབང་མངོན་ཕྱི་མ་འཇལ་བྱེད་དུ་འཇུག་པ་མེད་དེ། དེ་ལ་དགོས་ནུས་མེད་པར་བཤད་ཟིན་པའི་ཕྱིར། གསུམ་པ་ནི། མངོན་སུམ་དང་བཅད་ཤེས་ཀྱི་གཞི་མཐུན་མེད་དེ། དེ་གཉིས་ཀྱི་ངོ་བོ་ལ་སོགས་པ་འགལ་བའི་ཕྱིར་ནའོ། །ཡང་དབང་མངོན་ཕྱི་མ་རྣམས་ཆོས་ཅན། དྲན་པ་བཅད་ཤེས་མིན་ཏེ། མངོན་སུམ་ཡིན་པའི་ཕྱིར། སྔོ་སོགས་ཀྱི་རིགས་ཆོས་ཅན། དབང་པོའི་མངོན་སུམ་ཁྱོད་ལ་ཚད་མ་མིན་ཏེ། ཁྱོད་དངོས་པོར་མེད་པས་དེའི་ཡུལ་དུ་འགལ་བའི་ཕྱིར། ཡུལ་ཅན་དབང་མངོན་དང་། ཡུལ་སྔོ་སོགས་སྔ་ཕྱི་ཁྱད་པར་མེད་པར་ཐལ། དབང་མངོན་སྔ་མའི་གཟུང་ཡུལ་ཕྱི་མས་ཀྱང་མཐོང་བའི་ཕྱིར་ནའོ། །གལ་ཏེ་སྐད་ཅིག་དེ་ལྟར་མི་འབྱེད་པར་ཡུལ་དེ་རྟོགས་ཙམ་གྱིས་ཚད་མའི་བྱ་བ་རྫོགས་ལ། ཕྱིས་ཀྱི་རྟོག་པ་སྔོན་པོའོ་སྙམ་དུ་ངེས་པ་ཐམས་ཅད་བཅད་ཤེས་སོ་ཞེ་ན། ཕྱིས་སྔོན་པོའོ་སྙམ་དུ་ངེས་པའི་བློ་ཆོས་ཅན། མངོན་སུམ་མིན་ཏེ། ངེས་པ་ཡོད་པའི་ཕྱིར་ནའོ། །གལ་ཏེ་སྔོན་པོ་སྔ་ཕྱི་འདྲ་བར་མཐོང་བའི་བློ་བཅད་ཤེས་སོ་ཞེ་ན། འདྲ་བར་འཛིན་པ་ནི་རྟོག་པ་ཡིན་གྱིས་མངོན་སུམ་མིན་ཏེ། འདྲ་བ་དོན་ལ་མེད་པར་སྤྱི་འགོག་པར་འཆད་པར་འགྱུར་བའི་ཕྱིར། དེས་ན་མངོན་སུམ་དང་བཅད་ཤེས་ལ་གཞི་མཐུན་མེད་དེ་རིགས་པ་ཤེས་པ་རྣམ་པ་གཉིས་ཀྱིས་བཀག་པའི་ཕྱིར། ཞེས་བྱ་བ་ནི་མཇུག་བསྡུ་བའི་ཚིགས་སུ་བཅད་པའོ། །གཉིས་པ་བཀག་པ་ལ་མི་འཐད་པ་སྤང་བ་ནི། འོ་ན་མངོན་སུམ་ཐམས་ཅད་རང་ཡུལ་རྫས་སྐད་ཅིག་རེ་རེ་ཁོ་ན་ལ་འཇུག་པས་སོ་སྐྱེ་ལ་མངོན་སུམ་ཚད་མ་མི་སྲིད་པར་འགྱུར་ཞེ་ན། སོ་སོ་སྐྱེ་བོའི་མངོན་སུམ་གྱིས་ཁྱད་པར་ཅན་མིན་པའི་རྡུལ་ཕྲན་སོ་སོ་བ་ལ་མི་འཇུག་གི་ཁྱད་པར་ཅན་ལ་འཇུག་སྟེ་རྡུལ་ཕྲན་དུ་མ་ཚོགས་པའི་ཁྱད་པར་ཅན་གྱི་ཡུལ་དང་དབང་པོ་དང་ཡིད་ལ་བྱེད་པ་སྔ་མ་རྣམས་ཀྱི་སྐད་ཅིག་མ་ཇི་སྙེད་ཚོགས་པ་རྣམས་ཀྱི་བསྐྱེད་པའི་མྱོང་བའི་རྣམ་ཤེས་གང་ཡིན་པ་ཐམས་ཅད་སོ་སོ་སྐྱེ་བོའི་མངོན་སུམ་ཡིན་ཞིང་། དེ་ཐམས་ཅད་ཚད་མ་ཡིན་ཏེ། རྟོག་བྲལ་མ་འཁྲུལ་བའི་རིག་པ་ཡིན་པའི་ཕྱིར། དེས་ན་རྡུལ་ཕྲན་བསགས་པ་ལ་དམིགས་ཞེས་གསུངས་པ་ཡང་དེ་ལ་དགོངས་སོ། །གཉིས་པ་ནི། ཚད་མ་མིན་པའི་གསལ་བའི་དབྱེ་བ་ཅུང་ཟད་ཙམ་ལ་བརྟེན་ནས་བློ་རིགས་ཐ་དད་དུ་འཇོག་ན། སློབ་དཔོན་བཞེད་པའི་ཚད་མ་དང་། ཚད་མ་མིན་པ་དང་། གཏན་ཚིགས་ཡང་དག་དང་། ལྟར་སྣང་བའི་གྲངས་ངེས་ཐམས་ཅད་འཇིག་སྟེ། ནང་ཚན་གྱི་དབྱེ་བ་ཅུང་ཟད་ལ་བརྟེན་ནས་སྤྱི་རིགས་ཐ་དད་དུ་འཇོག་པའི་ཕྱིར། ཁྱབ་སྟེ། གྲངས་ཀྱི་དབྱེ་བསྡུ་ཇི་སྙེད་ཡོད་པ་ཐམས་ཅད་རིགས་ཀྱི་དབྱེ་བས་བྱས་པ་ཡིན་ལ། ནང་སེལ་གྱི་དབྱེ་བསྡུ་ཇི་སྙེད་ཡོད་པ་ནི་གྲངས་ཀྱི་དབྱེ་བསྡུ་དེ་ཡི་ཁོངས་སུ་གཏོགས་པར་སློབ་དཔོན་གཉིས་ལ་སོགས་པ་མཁས་པ་རྣམས་བཞེད་པའི་ཕྱིར། གཉིས་པ་རང་ལུགས་ལ། སྤྱིའི་མཚན་ཉིད། གྲངས་ཀྱི་དབྱེ་བསྡུ། སོ་སོའི་རྣམ་གཞག་གོ །དང་པོ་ནི། མི་སླུ་བ་མ་གྲུབ་པའི་ཤེས་པ་ནི་ཚད་མ་མིན་པའི་བློའི་མཚན་ཉིད་དོ། །གཉིས་པ་ནི། མ་རྟོགས་ལོག་རྟོགས་ཐེ་ཚོམ་སྟེ། །ཚད་མའི་འགལ་ཟླ་ཚད་མིན་གྱི་བློ་རྣམ་པ་གསུམ་ཡོད་ཅིང་། དེ་ཡང་འཇུག་ཚུལ་གྱི་སྒོ་ནས་ཕྱེ་བ་ཡིན་ལ། གསུམ་ཀའང་ངོ་བོའི་སྒོ་ནས་བསྡུ་ན་རང་ཡུལ་མ་རྟོགས་པའི་བློ་གཅིག་པུར་འདུའོ། །གསུམ་དུ་ཕྱེ་བའི་མ་རྟོགས་པའི་བློ་ཡིན་ཞེས་པ་ནི་མིན་ཏེ། ཡིན་ན་ནང་སེལ་གྱི་དབྱེ་བར་སོང་བས། གྲངས་ཀྱི་དབྱེ་བར་གསུངས་པ་དང་འགལ་ཏེ། གྲངས་ཀྱི་དབྱེ་བསྡུ་ཇི་སྙེད་པ། །ཞེས་སོགས་གསུངས་པའི་ཕྱིར། གཞན་དུ་སྒྲ་ཇི་བཞིན་ཡིན་ན། སྔར་བློ་ཐམས་ཅད་རང་རིག་དང་། འོག་ཏུ་ཚད་མ་གཉིས་ཀྱང་རང་རིག་ཏུ་བཤད་པས་ཤེས་པ་ཐམས་ཅད་རང་རིག་ཏུ་འགལ་བའི་ཕྱིར་རོ། །དེས་ན་གསུམ་པོ་འདི་ནི་ཕན་ཚུན་རྣམ་པར་བཅད་པ་ཁོ་ནའོ་སྙམ་དུ་ཁོ་བོའི་རྣམ་དཔྱོད་དང་མཚུངས་ལྡན་གྱི་སེམས་དཔའ་ཁོ་ན་སེམས་སོ། །དེ་ལྟ་བུ་ཚད་མིན་གྱི་བློ་གསུམ་དང་རྟགས་ཀྱི་སྐྱོན་གསུམ་རིགས་པའི་གནད་གཅིག་སྟེ། ཕྱོགས་ལ་མཐུ་མེད་སོམ་ཉིད་དང་། །མི་འདོད་འདོད་པའི་ངེས་སྒྲུབ་བྱེད། །ཅེས་གསུངས་པ་ལྟར། མ་གྲུབ་པས་བསྒྲུབ་བྱ་ལ་མཐུ་མེད་པ་ལྟར། མ་རྟོགས་པ་ལ་གང་དུའང་འཇུག་པའི་མཐུ་མེད། མ་ངེས་པས་སོམ་ཉི་སྐྱེས་པ་ལྟར། ཐེ་ཚོམ་ཡང་མཐའ་གཞན་དུ་དོགས་པར་བྱེད། འགལ་བས་མི་འདོད་པ་སྒྲུབ་པ་ལྟར་ལོག་རྟོག་གིས་ཀྱང་གང་མིན་པ་དེ་རྟོགས་པར་བྱེད། རྟགས་ཡང་དག་གིས་འདོད་པའི་དོན་སྒྲུབ་པ་ལྟར། ཚད་མས་ཀྱང་དོན་ཡིན་པར་རྟོགས་པར་བྱེད་དོ། །དེས་ན་རྟགས་སུ་བཀོད་ཚད་ལ་བཞིར་ངེས་ཤིང་གཅིག་སྐྱོན་མེད་ཡིན་པས་སྐྱོན་ཅན་གསུམ་ལས་མི་སྲིད་པ་ལྟར། བློ་ཡི་འཇུག་ཚུལ་མཐའ་དག་བཞིར་ངེས་ཤིང་གཅིག་ཚད་མ་ཡིན་པས་ཚད་མ་མིན་པ་གསུམ་ཁོ་ནར་ངེས་སོ། །གསུམ་པ་ལ་གསུམ་ལས། དང་པོ་ལའང་གཉིས་ལས། དང་པོ་མཚན་ཉིད་ནི། དོན་བདེན་པ་རྟོགས་པ་དེ་དང་དེ་མིན་པ་མཐའ་གཅིག་ཏུ་ཕྱིན་ཅི་ལོག་ཏུ་འཛིན་པ་དང་། མཐའ་གཉིས་སུ་འཛིན་པས་སྟོང་པའི་རིག་པ་ནི་མ་གཏོགས་པའི་བློ་ཡི་མཚན་ཉིད་ཡིན་ནོ། །གཉིས་པ་དབྱེ་ན་གསུམ་སྟེ། ཡུལ་དེ་ལ་གཏན་མ་ཞུགས་ནས་མ་རྟོགས་པ་དེ་ལ་བློ་ཁ་མ་ཕྱོགས་པ་སྟེ། རྟོག་གེ་མི་ཤེས་པའི་རྒྱུད་ཀྱི་ཚུལ་གསུམ་འཛིན་པའི་བློ་ལྟ་བུ་དང་། ཞུགས་ཀྱང་ཚོལ་བའི་བྱ་བ་མ་རྫོགས་ནས་མ་རྟོགས་པ་སྒྲ་རྟག་མི་རྟག་དྲིས་པ་ན་སླར་དཔྱོད་པའི་བློ་ལྟ་བུ་དང་། །ཚོལ་བའི་བྱ་བ་རྫོགས་པར་གྱུར་ཀྱང་མ་རྙེད་ནས་མ་རྟོགས་པ་དཔྱད་ཀྱང་བློ་ཡུལ་དུ་མ་བྱུང་བ་སྟེ། འདི་ལ་གསུམ་ལས་རྟོགས་བྱའི་ཡུལ་མེད་ནས་མ་རྟོགས་པ་བཅད་ཤེས་ལྟ་བུ། རྟོགས་བྱེད་ཀྱི་བློ་བསླད་ནས་མ་རྟོགས་པ་གྲངས་ཅན་ལ་ལྟོས་ནས་སྒྲའི་སྐད་ཅིག་མ་ལྟ་བུ་དང་། ཤེས་བྱེད་ཀྱི་ཡུལ་མིན་ནས་མ་རྟོགས་པ་ཡུལ་དུས་རང་བཞིན་གྱིས་བསྐལ་པའི་དངོས་པོ་འཛིན་པའི་རྟོག་པ་ལྟ་བུའོ། །གཉིས་པའི་མཚན་ཉིད་ནི། རང་ཡུལ་དེར་མཐའ་གཅིག་ཏུ་འཛིན་པའམ་སྣང་བ་ལ་དེ་མིན་དུ་འཛིན་པའི་ཡུལ་དང་ཡུལ་ཅན་གཉིས་ཀྱིས་དངོས་བརྒྱུད་ཅི་རིགས་ནས་གནོད་པའི་བློ་ལོག་ཤེས་ཀྱི་མཚན་ཉིད་དོ། །དེ་ལ་རིགས་ཀྱི་སྒོ་ནས་དབྱེ་ན་གཉིས་ཏེ། རྟོག་པ་དང་ནི་རྟོག་མེད་ལོག་ཤེས་སོ། །ནང་སེལ་གྱི་སྒོ་ནས་སོ་སོར་ཕྱེ་ན་རྣམ་པ་ལྔ་སྟེ། དང་པོ་ལ། ཐག་པ་ལ་སྦྲུལ་དུ་འཁྲུལ་པ་ལྟ་བུའི་རྣམ་པ་དང་། ད་ལྟར་གྱི་སྔོན་པོ་ལ་འདས་པའི་སྔོན་པོའོ་སྙམ་པ་དུས་ལ་དང་། ཤ་བ་དང་ཙནྡན་གྱི་སྤྱི་གཉིས་གཅིག་ཏུ་འཛིན་པ་ཡུལ་ལ་ལོག་པར་རྟོག་པ་གསུམ། གཉིས་པ་ལ་དབང་ཤེས་འཁྲུལ་པ་དང་། རྟོག་མེད་ཡིད་ཤེས་འཁྲུལ་པ་གཉིས་སོ། །གསུམ་པ་ལ་མཚན་ཉིད་ནི། རང་ཡུལ་དེར་འཛིན་ན་ཡང་དེར་འཛིན་པའི་བྱེད་པ་མ་ཉམས་བཞིན་དུ་དེ་མིན་དུ་འཛིན་པ་སྲིད་པའི་བློ་ནི། ཐེ་ཚོམ་ཉིད་དུ་མཚོན་བྱེད་ཡིན་ནོ། །དབྱེ་ན་གཉིས་ཡོད་དེ་མངོན་དུ་གྱུར་པ་དང་། བག་ལ་ཉལ་གྱི་ཐེ་ཚོམ་གཉིས་སོ། །དང་པོ་ནི། ཐེ་ཚོམ་དངོས་སུ་ཞུགས་པ་སྟེ། འདི་ལ་ཆ་མཉམ་པ་དང་ཤས་ཆེར་འཛིན་པ་གཉིས་སོ། །བག་ལ་ཉལ་ནི། སྒྲོམ་ནང་གི་ས་བོན་ལྟ་བུ་རྐྱེན་དང་ཕྲད་ན་དེར་འགྱུར་བའི་ནུས་པ་ཡོད་པ་སྟེ། རྟགས་ལ་ལྟོས་པ་མ་ངེས་པའི་རྟགས་ལ་བརྟེན་པའི་བློ་ཐམས་ཅད་དང་། མ་ལྟོས་པ་ཁྲོན་པ་རྙིང་པ་ན་ཆུ་ཡོད་སྙམ་པ་དང་། མེད་སྙམ་པའི་བློ་ལ་སོགས་པའོ། །གཉིས་པ་ནི། ཚད་མའི་དབྱེ་བ་གཉིས་པོ་ཡང་སྤྱིར་རང་གི་ངོ་བོ་ལ་རང་རིག་ཏུ་འདུ་བར་མཛད། བྱེ་བྲག་ཚད་མ་ཁོ་ནར་འདུས་ཏེ། མི་སླུ་བའི་ཤེས་པ་ཡིན་པའི་ཕྱིར། ཚད་མ་མིན་པའི་དབྱེ་བ་གསུམ་པོ་ཡང་ངོ་བོའི་སྒོ་ནས་མ་རྟོགས་པ་ལས་དོན་གཞན་མིན་ཏེ། གསུམ་ཆར་ཡང་མི་སླུ་བར་མ་གྲུབ་པར་གཅིག་པའི་ཕྱིར། ཞེས་བྱ་བ་ནི་བསྡུ་བའི་ཚིགས་སུ་བཅད་པའོ། །ཡང་སྒྲ་གཉིས་ནི། ཚད་མ་གཉིས་དང་། ཚད་མིན་གསུམ་པོ་ཕན་ཚུན་སྡུད་པའི་ཚིག་ཡིན་ལ། རྐང་པ་དང་པོ་གཉིས། ཤེས་པའི་སྒོ་ནས་རང་རིག་གཅིག །ཅེས་པ་དང་མི་ཟློས་ཏེ། དེས་མངོན་རྗེས་གཉིས་ལ་ཚད་མིན་མི་སྲིད་པར་བསྟན་པས་མངོན་སུམ་ལ་ཚད་མིན་གཉིས་དང་། སྔར་མ་རྟོགས་པའི་དོན་རང་མཚན་ངེས་པ་ཚད་མིན་ཡིན་པ་ལས་ཁྱད་པར་དུ་བྱས་ཏེ་ཁོ་ནའི་དོན་ནོ། །རྐང་པ་ཕྱི་མ་གཉིས་ཀྱིས་ཚད་མིན་གསུམ་ལ་རང་ཡུལ་རྟོགས་པ་མི་སྲིད་པར་བསྟན་པས། བཅད་ཤེས་དང་མི་སླུ་བའི་གཞི་མཐུན་ཡོད་པ་བཅད་པ་ཡིན་པས། ངོ་བོའི་སྒོ་ནས་བསྡུ་ན་གཅིག །ཅེས་པ་དང་མི་ཟློས་སོ། །ཁོ་བོའི་ལེགས་བཤད་དོ། །གཞན་དག་ནི་རྟོག་པ་ཙམ་ཡང་མ་ཞུགས་ན་ཇི་ལྟ་བ་བཞིན་རྟོགས་ནས་གཞན་ལ་སྟོན་པ་ལྟ་ཅི་སྨོས་དགོངས་སོ། །ཚད་མ་རིགས་པའི་གཏེར་ལས་བློ་བརྟགས་པའི་རབ་ཏུ་བྱེད་པ་གཉིས་པའི་རྣམ་པར་བཤད་པའོ།། ༈ །།གསུམ་པ་བློས་ཡུལ་རྟོགས་ཚུལ་ལ་བཞི་ལས། དང་པོ་སྤྱི་དང་བྱེ་བྲག་གི་རྟོགས་ཚུལ་ལ་གསུམ་སྟེ། ཡུལ་དང་ཡུལ་ཅན་གྱི་རྣམ་གཞག་སྤྱིར་བསྟན། རྫས་ལྡོག་དོན་ལ་གྲུབ་པར་འདོད་པ་དགག སྤྱི་དང་བྱེ་བྲག་གི་རྟོགས་ཚུལ་ཁྱད་པར་དུ་དཔྱད་པའོ། །དང་པོ་ལའང་། ཐོག་མར་དངོས་པོའི་གནས་ཚུལ་དཔྱད་པ། དེ་གཏན་ལ་འབེབས་པའི་ཚུལ་གཉིས། དང་པོ་ནི། རང་མཚན་སྣང་བའི་སྒོ་ནས་འཛིན་པའི་བློ་རྟོག་མེད་ཀྱི་མཚན་ཉིད་དེ། དེ་དག་གི་དངོས་འགལ་གཅོད་པའི་དོན་ལྡོག་གྲུབ་པ་ཡིན་པའི་ཕྱིར། སྤྱི་སེལ་བའི་སྒོ་ནས་འཛིན་པའི་བློ་ནི་རྟོག་པའི་མཚན་ཉིད་ཡིན་ཏེ། རྟགས་འགྲེ། རང་སྤྱི་གཉིས་ཡོད་པ་དེ་ལ། རང་མཚན་སོགས་དྲུག་ནི་དངོས་པོའི་དོན་དུ་གཅིག་སྟེ། དོན་བྱེད་ནུས་པ་ལ་སོགས་པ་བཞི་པའི་ཕྱིར་རོ། །དེའང་རྣམ་འགྲེལ་ལས། སྣང་བའང་གཞན་ལ་མི་བརྟེན་པས། །ཞེས་སོགས་དང་སྦྱར་རོ། །གལ་ཏེ་དེ་ལའང་གཞན་ལས་ལྡོག་པ་དང་། །ཞེས་སོགས་དང་། ཀུན་ལ་རྫས་དང་དངོས་བརྗོད་པའི། །ཞེས་སོགས་དང་འགལ་ལོ་ཞེ་ན་སྐྱོན་མེད་དེ། གཞུང་གི་ཚིག་ཟིན་ལ་ཡོད་པའི་ལོག་པ་སོགས་ལ་དོན་ལ་གནས་པ་དང་སེལ་བའི་ཡུལ་གཉིས་ཡོད་པའི་ཕྱིར་རོ། །སྤྱི་ལ་སོགས་པ་བརྒྱད་ནི། དངོས་པོར་གྲུབ་པ་མེད་དེ། དོན་ལ་མི་གནས་པ་ལ་སོགས་པའི་ཕྱིར་ཏེ། རྣམ་འགྲེལ་ལས། ལྡོག་པ་ངོ་བོ་ཉིད་མེད་ཕྱིར། །ཞེས་སོགས་དང་སྦྱར་རོ། །གཉིས་པ་ནི། རྫས་དང་ལྡོག་པ་དང་སྤྱི་དང་བྱེ་བྲག་དང་སྒྲུབ་པ་སྟེ་སྣང་བ་དང་གཞན་སེལ་དང་རྟོག་པ་དང་མི་རྟོག་པ་སྟེ་རྟོག་མེད་ཀྱི་ཤེས་བྱའི་ཡུལ་དང་ཡུལ་ཅན་གྱི་རྣམ་གཞག་རྣམས་ནི་གཞན་བོད་དག་གཞུང་གི་དགོངས་པ་ལས་གཞན་དུ་འཆད་དེ། རྫས་སོགས་གསུམ་རྟོག་མེད་དང་། ལྡོག་སོགས་གསུམ་རྟོག་པའི་ཡུལ་དུ་རེས་འགའ་མཚུངས་པ་ལྟར་འཆད། རེས་འགའ་མི་མཚུངས་པ་ལྟར་འཆད། རེས་འགའ་བློ་ཆོས་ལྟར་འཆད། རེས་འགའ་དོན་ཆོས་ལྟར་འཆད། རེས་འགའ་སྤྱི་སྒྲུབ་པ་ལྟར་བྱེད། རེས་འགའ་སྤྱི་འགོག་པ་ལྟར་བྱེད་པའི་ཕྱིར། དེས་ན་སྤྱིར་བྱེ་བྲག་ལྡོག་པ་ཡིན་ཡང་། འདིའི་བྱེ་བྲག་ལོག་པ་ཡིན་པ་ནི། བྱེ་བྲག་རྣམས་ལས་འདི་དག་འབྱུང་། །ཞེས་པ་དང་། དེས་ན་བྱེ་བྲག་སྤྱི་ཆོས་ཐ། །ཞེས་གསུངས་པ་མཚུངས་ལ། འདི་ལ་འཁྲུལ་ནས་བྱེ་བྲག་རང་མཚན་དུ་འཇོག་པས་ནི་ཕྱོགས་ཙམ་དུ་ཡང་མ་ཕྱིན་ཏེ། སྒྲུབ་པ་རང་མཚན་ལ་འཇོག་དགོས་པར་ཐལ་བའི་ཕྱིར་རོ། །ཁོ་བོ་ནི་སྔར་ཡུལ་ཡུལ་ཅན་གྱི་རྣམ་གཞག་གི་སྐབས་སུ་བཤད་པ་ལྟར་གཞུང་གི་དགོངས་པ་ཇི་ལྟ་བ་བཞིན་དུ་འཆད་པར་འདོད་དོ། །དེ་ལྟར་ན་རྫས་སོགས་གསུམ་དང་ལྡོག་སོགས་གསུམ་ནི་ཤེས་བྱའི་ཡུལ། རྟོག་མེད་དང་རྟོག་པ་ནི་ཡུལ་ཅན་གྱི་བློ། སྣང་བ་དང་སེལ་བའི་སྒོ་ནས་ཡུལ་གཉིས་འཛིན་ཚུལ་ནི་བློ་གཉིས་ཀྱི་འཛིན་སྟངས་སོ། །གཉིས་པ་ལ། བོད་ཁ་ཅིག་ལྡོག་པ་དུ་མ་འབྲལ་མི་ཤེས་པར་འདུས་པ་རྫས་དང་། འདུས་པ་ཅན་གྱི་ཆོས་ཁ་ཡར་བ་ལྡོག་པའི་མཚན་ཉིད་ཡིན་ནོ། །དེ་ཡང་གཞི་སོ་སོར་ངེས་པ་གཅིག་གི་སྟེང་དུ་རྫས་ཁྱབ་ཆེ་ལ། དེ་ལས་གཞན་དུ་ལྡོག་པ་ཁྱབ་ཆེ་སྟེ། དཔེར་ན་ཁྲབ་དང་ཁྲབ་ཀྱི་བྱང་བུ་བཞིན་ནོ་ཞེས་ཟེར་རོ། །མི་འཐད་དེ་ལྡོག་པ་དོན་ལ་མི་གནས་པས་ལྡོག་པ་དུ་མ་བྲལ་མི་ཤེས་པར་འདུ་རྒྱུ་མེད་པའི་ཕྱིར་དང་། གལ་ཏེ་འདུ་ན་མུ་སྟེགས་ཅན་གྱི་འདོད་པ་དང་མཚུངས་ཤིང་། དེ་ལྟར་ཡིན་དུ་ཆུག་ནའང་རྫས་ལྡོག་རྟོགས་པ་ཕན་ཚུན་རྟེན་པའི་སྐྱོན་ཡོད་དོ། །ཡང་རྫས་དང་ལྡོག་པའི་ཆོས་ཀྱི་མཚན་ཉིད་རིམ་བཞིན། དངོས་འགལ་རྫས་གཅིག་ལ་མི་འདུ་བ་དང་། ལྡོག་པ་གཅིག་ལ་མི་འདུ་བ་ཡིན་ལ། མཚན་གཞི་རིམ་བཞིན། རྟག་མི་རྟག་བུམ་པ་ལ་མི་འདུ་བ་དང་། མེ་དགག་མ་ཡིན་དགག་གཉིས་ཤེས་བྱ་ཙམ་ལྡོག་གི་སྟེང་དུ་མི་འདུ་ཡང་རྫས་བུམ་པའི་སྟེང་དུ་འདུ་བ་བཞིན་ཡིན་ཞིང་། དེ་དག་རྗེས་དཔག་གི་དངོས་ཡུལ་ཡིན་ཞེས་སྨྲའོ། །རྗེས་དཔག་དེ་ལ་རྫས་ཆོས་དངོས་ཡུལ་དུ་འཐད་པ་མ་ཡིན་ཏེ་རྗེས་དཔག་གིས་དངོས་པོ་རང་མཚན་དངོས་སུ་མི་འཛིན་པས་སོ། །གལ་ཏེ་འཛིན་ན་དེས་བྱས་པ་རྟོགས་པ་ན་མི་རྟག་པའང་རྟོགས་པར་ཐལ། བྱས་མི་རྟག་བུམ་པའི་སྟེང་དུ་རྫས་གཅིག་པའི་ཕྱིར། གལ་ཏེ་དེ་གཉིས་ལྡོག་པ་ཐ་དད་པས་གཅིག་རྟོགས་ཀྱང་ཅིག་ཤོས་མི་རྟོགས་སོ་ཞེ་ན། རྗེས་དཔག་ནི་ལྡོག་པའི་སྒོ་ནས་རང་ཡུལ་སྒྲུབ་ཅིང་འཇལ་བར་བཞེད་ཀྱི་རྫས་འཛིན་པ་ཉམས་ཏེ། རང་ཡུལ་ལ་སེལ་བས་འཇུག་པ་ཡིན་པའི་ཕྱིར། དེའང་རྗེས་སུ་དཔག་པ་ལས་ཀྱང་དངོས། །ཞེས་སོགས་ཚིགས་བཅད་གཉིས་དང་སྦྱར་རོ། །གསུམ་པ་ལ་མཚན་ཉིད། རབ་དབྱེ། དེའི་དོན་གཏན་ལ་དབབ་པ་གསུམ། དང་པོ་ནི། གཞན་རིགས་མི་མཐུན་ལས་ལྡོག་ཅིང་རིགས་མཐུན་དུ་མ་ལ་ཁྱབ་པར་བྱེད་པའི་ལྡོག་པ་ཆིག་རྐྱང་ནི་སྤྱིའི་མཚན་ཉིད་དང་། དེ་ཡིན་པའི་ཕྱིར་རང་དང་རིགས་མཐུན་གྱི་དངོས་པོ་ནང་ལས་ཀྱང་ལྡོག་པའི་ལྡོག་པ་ཉིས་ཚོགས་ནི་བྱེ་བྲག་གི་མཚན་ཉིད་ཡིན་ནོ། །གཉིས་པ་ནི། སྤྱི་ལ་དབྱེ་ན། ཐད་ཀའི་སྤྱི་དང་། གོང་མའི་སྤྱི་གཉིས། བྱེ་བྲག་ལ། ཐད་ཀའི་བྱེ་བྲག་དང་། གོང་མའི་བྱེ་བྲག་གཉིས་ཡོད་ལ། དེ་ཡང་ཤར་ནུབ་ཀྱི་ཤ་པ་ལྟ་བུའི་སྟེང་གི་ལྡོག་པ་ཉིས་ཚོགས་ནི་ཐད་ཀའི་བྱེ་བྲག ཤ་པ་ལྟ་བུའི་སྐད་ཅིག་སྔ་ཕྱིའི་སྟེང་གི་ལྡོག་པ་ཉིས་ཚོགས་ནི་གོང་མའི་བྱེ་བྲག་ཡིན་ལ། དེ་གཉིས་དང་འབྲེལ་བའི་སྤྱི་གཉིས་ནི་རིམ་བཞིན། ཐད་ཀ་དང་གོང་མའི་སྤྱི་གཉིས་སོ། །ཐད་ཀའི་བྱེ་བྲག་འཇོག་པའི་གཞི་རྫས་ཐ་དད་པ་གཅིག་དགོས་ཏེ། ཕྱོགས་ལ་ལྟོས་པའི་དུས་མཉམ་པའི་དངོས་པོ་ཡིན་པའི་ཕྱིར། གོང་མའི་བྱེ་བྲག་འཇོག་པའི་གཞི་གཅིག་པ་བཀག་པ་ཞིག་དགོས་ཏེ། དུས་ལ་ལྟོས་པས་འདས་སོགས་དངོས་པོར་མེད་པའི་ཕྱིར་རོ། །གཞན་དག་གིས་ཇི་ལྟ་བ་བཞིན་བཤད་པར་མ་ནུས་སོ། །གསུམ་པ་ལ་གཞན་ལུགས་དགག རང་ལུགས་བརྗོད། རྩོད་པ་སྤང་བ་གསུམ། དང་པོ་ལ་རིགས་པ་དང་། ལུང་གིས་དགག་པའོ། །དང་པོ་ལ་རྫས་ཐ་དད་དང་། གཅིག་པ་དགག་པ་གཉིས། དང་པོ་ལ་གཉིས་ལས་ཕྱོགས་སྔ་མ་ནི། ཁ་ཅིག་སྟེ་བྱེ་བྲག་པ་དག་ཡོད་པ་ཉིད་ལྟ་བུའི་སྤྱི་ཆེན་པོ་དང་། བ་གླང་ཉིད་ལྟ་བུའི་ཉི་ཚེ་བའི་སྤྱི་ནི། རང་གི་གསལ་བ་རྣམས་དང་རྫས་ཐ་དད་ཡིན་ཞིང་། དེ་གཉིས་ཀ་ཡང་གསལ་བ་ཐམས་ཅད་ལ་ཁྱབ་པ། རྟག་པ། མི་སྣང་བ། གསལ་བ་རྣམས་དང་འདུ་བའི་འབྲེལ་བ་ཐག་པ་ལྟ་བུས་སྦྲེལ་ནས་ཡོད་ཅེས་ཟེར་རོ། །འདི་ནི་མི་འཐད་དེ་གསལ་བ་རྣམས་ཆོས་ཅན། རང་ལས་རྫས་ཐ་དད་པའི་སྤྱི་མེད་དེ། དེ་སྣང་རུང་མ་དམིགས་པའི་ཕྱིར། རི་བོང་གི་རྭ་བཞིན་ཞེས་པས་ཁེགས་སོ། །སྣང་དུ་མི་རུང་ཡང་ཡོད་པར་ངེས་ན་ཧ་ཅང་ཐལ་ལོ། །གཉིས་པ་ལ་སྤྱི་གཅིག་བྱེ་བྲག་དུ་མ་དང་གཅིག་པ་དགག སྤྱི་དུ་མ་བྱེ་བྲག་དུ་མ་དང་གཅིག་པ་དགག མཚུངས་པའི་སྤྱི་དགག་པའོ། །དང་པོ་ལ་ཕྱོགས་སྔ་མ་ནི། ལ་ལ་སྟེ་གྲངས་ཅན་པ་ན་རེ། རྡུལ་མུན་པ་སྙིང་སྟོབས་གསུམ་ཆ་མཉམ་པའི་གཙོ་བོ་ཞེས་བྱ་བ་དེ་གསལ་བ་བུམ་སོགས་དང་རྫས་གཅིག་ཡིན་ཞེས་ཟེར། ཡང་བོད་རྣམས། ཤ་པ་དང་ཙནྡན་ལ་སོགས་པའི་བྱེ་བྲག་རྣམས་ལ་ཤིང་ཙམ་ཞེས་བྱ་བའི་སྤྱི་ངོ་བོ་དབྱེར་མེད་ཀྱི་གཅིག་ཏུ་ཡོད་ཅེས་ཁ་མཐུན་པར་སྒྲོག་གོ །གཉིས་པ་དེ་དགག་པ་ལ། སྣང་རུང་མ་དམིགས་པ། རྣམ་པར་བརྟགས་པ། ཧ་ཅང་ཐལ་བའོ། །དང་པོ་ནི། རྫས་གཞན་དུ་མེད་སྤྱི་དང་བྱེ་བྲག་རྫས་གཅིག་ཏུ་འདོད་ནའང་ཤིང་གསལ་ཆོས་ཅན། ཁྱོད་དང་རྫས་གཅིག་པའི་སྤྱི་ཡོད་པ་མིན་ཏེ། དེ་ཁྱོད་འཛིན་མངོན་སུམ་གྱི་སྣང་རུང་མ་དམིགས་པའི་ཕྱིར། གཉིས་པ་ནི། ཤིང་ལྟ་བུའི་སྤྱི་གཅིག་ཤར་ནུབ་ཀྱི་ཤ་པ་ལྟ་བུ་ཡུལ་དང་། སྔ་དྲོ་དང་ཕྱི་དྲོའི་ཤ་པ་ལྟ་བུ་དུས་དང་། ཤ་ཤུག་ལྟ་བུའི་རྣམ་པ་འགལ་བའི་བྱེ་བྲག་རྣམས་དང་རྫས་གཅིག་པའི་སྒོ་ནས་དེ་དག་ལ་རྗེས་སུ་འབྲེལ་བ་སྟེ་འགྲོ་ན། ཤིང་གསལ་གཅིག་སྐྱེས་པའམ་ཞིག་པའི་ཚེ་ཤིང་སྤྱི་དེ་སྐྱེ་འཇིག་བྱེད་དམ་མི་བྱེད། མི་བྱེད་ན་རྫས་གཅིག་ཏུ་མི་འགྱུར་ལ། བྱེད་ན་ཤིང་གསལ་ཡུལ་དུས་རྣམ་པ་འགལ་བ་རྣམས་ཡུལ་གོ་ས་གཅིག་དང་དུས་གཅིག་དང་ངོ་བོ་སྟེ་རྣམ་པ་གཅིག་ཏུ་སྐྱེ་བ་དང་འཇིག་པ་ཉིད་དུ་འགྱུར་ཏེ། དེ་དག་དང་རྫས་གཅིག་པའི་ཤིང་སྤྱི་དེ་གོ་ས་གཅིག་དང་དུས་གཅིག་དང་རྣམ་པ་གཅིག་པ་ཉིད་དུ་སྐྱེ་འཇིག་བྱེད་པའི་ཕྱིར། གལ་ཏེ་སྐྱེ་འཇིག་བྱེད་པ་དེ་ལྟར་མིན་ན་སྤྱི་གཅིག་གི་ངོ་བོར་རྫས་གཅིག་པས་དེ་དག་ལ་གཅིག་སྐྱེ་བའི་ཚེ་ཅིག་ཤོས་མི་སྐྱེ་བ་ལ་སོགས་པའི་ཆ་གཉིས་འགལ་ཏེ། རྣམ་ངེས་ལས་དེ་གྲུབ་ན་མ་གྲུབ་པའམ་རྒྱུ་ཐ་དད་པ་ནི་དེའི་རང་བཞིན་དུ་རིགས་པ་མིན་ནོ། །ཞེས་སོགས་དང་སྦྱར་རོ། །གསུམ་པ་ལ་གསུམ་ལས། དང་པོ་ཡན་ལག་མི་ཁེགས་པར་ཐལ་བ་ནི། མགོ་བོ་ལ་སོགས་ལ་ཁྱབ་པའི་ཡན་ལག་ཅན་གྱི་རྫས་གཅིག་ཡོད་པ་ཡང་ཇི་ལྟར་དགག་སྟེ་དགག་མི་ནུས་པར་ཐལ། སྤྱི་ཤིང་ཙམ་དང་བྱེ་བྲག་ཤ་ཤུག་སོགས་རྫས་གཅིག་ཡིན་པའི་ཕྱིར་ནའོ། །དེ་ལ་འདི་སྐད་དུ། གང་དུ་མ་དང་རྫས་གཅིག་ཡིན་ན། རྫས་གཅིག་མིན་པས་ཁྱབ། དཔེར་ན་སྣོད་ཐ་དད་ཀྱི་རྒྱ་ཤུག་བཞིན། ཡན་ལག་ཅན་གྱི་རྫས་ཀྱང་དུ་མ་དང་རྫས་གཅིག་པར་ཁྱོད་ཉིད་ཀྱིས་ཁས་བླངས་སོ་ཞེས་པའི་ཐལ་བ་དང་། བཟློག་པ་རང་རྒྱུད་ཀྱིས་ཡན་ལག་ཅན་རྫས་གཅིག་ཁེགས་སོ་ཞེ་ན་སྤྱི་ལ་ཡང་མཚུངས་སོ། །གཉིས་པ་དབང་ཤེས་རྟོག་བཅས་སུ་ཐལ་བ་ནི། ཤ་པ་འཛིན་པའི་དབང་པོའི་ཤེས་པའང་རྟོག་པ་དང་བཅས་པ་ཉིད་དུ་ཐལ་ཏེ། ཤིང་ཙམ་གྱི་སྤྱི་སྣང་རུང་ཡུལ་དུ་བྱེད་པའི་བློ་ཡིན་པའི་ཕྱིར། མ་ཁྱབ་སྟེ། དོན་སྤྱི་འཛིན་ན་རྟོག་པ་ཡིན་གྱི། རིགས་སྤྱི་འཛིན་པ་མིན་ནོ་ཞེ་ན། དོན་སྤྱིར་མ་འདུས་པའི་རིགས་སྤྱི་འདོད་པ་ནི་ཆུ་མིན་པའི་རྒྱ་མཚོ་འདོད་པ་ལྟར་མི་འཐད་དོ། །གསུམ་པ་འགལ་བ་རྫས་གཅིག་ཏུ་ཐལ་བ་ནི། དཀར་སྔོ་སོགས་རྫས་ཐ་དད་དང་། སྣང་མུན་སོགས་འགལ་བ་ཀུན་ཀྱང་རྫས་གཅིག་ཏུ་འགྱུར་ཏེ། དེ་དག་གཅིག་དང་རྫས་གཅིག་ཡིན་ན། ཅིག་ཤོས་དང་རྫས་གཅིག་བཞི་པས་མ་ཁྱབ་པའི་ཕྱིར། འདོད་ན། སྔོན་པོར་འདོད་ཀྱང་དཀར་པོ་ཡིན་པ་སོགས་ཐམས་ཅད་དུ་འཆོལ་བར་འགྱུར་རོ། །གཉིས་པ་ལ་ཕྱོགས་སྔ་མ་ནི་ཁ་ཅིག བྱེ་བྲག་ཐམས་ཅད་རྫས་གཅིག་པའི་སྤྱི་གཅིག་མེད་ཀྱང་། ཤ་པ་སོགས་བྱེ་བྲག་རེ་རེ་དང་རྫས་གཅིག་གཅིག་ཏུ་འབྲེལ་བའི་སྤྱི་ཡང་དུ་མ་ཡོད་དོ་ཞེ་ན། གཉིས་པ་དེ་དགག་པ་ནི། སྤྱི་དུ་མ་ཡིན་ན། ཤ་པའི་སྤྱི་དེ་ལྡོག་པ་ཉིས་ཚོགས་སུ་འགྱུར་ལ། དེ་ལྟར་ན། དེ་ཆོས་ཅན་ཁྱོད་ཀྱི་སྟེང་དུ་སྤྱིའི་མཚན་ཉིད་ལྡོག་པ་ཆིག་རྐྱང་དེ་མི་འགྲུབ་པར་ཐལ་ལོ། །དེར་མ་ཟད་དགག་སྒྲུབ་ཀྱི་རྣམ་པར་གཞག་པའང་འཇིག་པར་འགྱུར་ཏེ། ཤ་པ་གྲུབ་ཀྱང་ཤིང་གཞན་གྱི་སྤྱི་མི་འགྲུབ། ཤ་པའི་སྤྱི་ཁེགས་ཀྱང་ཤིང་གཞན་མི་ཁེགས་པའི་ཕྱིར། གསུམ་པ་ལ། དོན་ལ་མཚུངས་པ་དགག བློ་ངོར་མཚུངས་པ་དགག་པ་གཉིས། དང་པོ་ནི། ཁ་ཅིག་སྤྱི་གཅིག་དང་དུ་མ་མི་འདོད་ཀྱི། ཤ་པ་དང་ཙནྡན་སོགས་ཡལ་ག་ལོ་འདབ་དང་ལྡན་པར་མཚན་ཉིད་མཚུངས་པའི་སྤྱི་གཅིག་དང་བྱེ་བྲག་ཤ་པ་སོགས་རྫས་གཅིག་ཡིན་ནོ་ལོ། །མཚུངས་སྤྱི་དང་བྱེ་བྲག་རྫས་གཅིག་མ་ཡིན་ཏེ། དེ་རྟོག་པའི་བློ་ངོའི་ཆོས་ཡིན་པས་དོན་ལ་མེད་པའི་ཕྱིར་ཏེ། ཕན་ཚུན་མཚུངས་པར་སྦྱར་བ་ནི་རྟོག་པ་ཡིན་པས་སོ། །གཞན་དུ་ན་སྔོན་མེད་པའི་པདྨ་རཱ་ག་གཅིག་མཐོང་བའི་ཚེ་ནའང་འདི་ནི་པདྨ་རཱ་ག་གཞན་དང་འདྲའོ་སྙམ་པའི་བློ་སྐྱེ་བར་འགྱུར་ཏེ། འདྲ་བ་དོན་ལ་ཡོད་ན་ནི་སྟེ་ཡོད་པའི་ཕྱིར་རོ། །དེའང་། མཐོང་དང་མཚུངས་པར་དེ་འཛིན་ཕྱིར། །ཞེས་སོགས་དང་སྦྱར་རོ། །གཉིས་པ་ནི། ཁ་ཅིག་དོན་ལ་མཚུངས་པའི་སྤྱི་མེད་ཀྱང་རྟོག་པས་མཚུངས་པར་བཟུང་བའི་སྤྱི་ཡོད་དོ་ཞེ་ན། དེ་ལྟར་ན་སྤྱི་བྱེ་བྲག་རྫས་གཅིག་ཡིན་པ་ཉམས་སོ། །བདེན་མོད། རྟོག་པས་མཚུངས་པར་བཟུང་བ་ཙམ་ལ་སྤྱི་གཅིག་ཏུ་བྱས་ན་ཅིར་འགྱུར་ཞེ་ན་མི་འཐད་དེ། རང་ཉིད་རང་དང་མཚུངས་པ་མི་སྲིད་པས་མཚུངས་པ་ནི་དུ་མ་ཁོ་ན་ཡིན་ལ། དངོས་པོ་དུ་མ་གཅིག་ཡིན་པ་མི་སྲིད་པའི་ཕྱིར་དང་། གཅིག་མིན་པ་ལ་སྤྱི་ཡིན་ཞེས་པའི་སྒྲ་བློ་དོན་མཐུན་འཇུག་པ་མེད་པའི་ཕྱིར། གཅིག་ཏུ་མ་ཤར་ཡང་མཚུངས་པར་བཟུང་བ་ཉིད་སྤྱི་ཡིན་ནོ་ཞེ་ན། བློ་ལ་སྤྱི་གཅིག་ཏུ་མ་ཤར་ན་མཚུངས་པར་རྟོག་པས་བཟུང་ཡང་སྤྱིར་མི་རུང་སྟེ། གལ་ཏེ་རུང་ན་སྤྱི་ཡུལ་དུ་བྱས་ནས་ཐ་སྙད་སྦྱོར་བའི་ཚེ་ཤིང་འོན་ཅིག་ཅེས་མི་ཟེར་བར་ཤིང་ཤ་པ་དང་འདྲ་བར་འོན་ཅིག་ཅེས་སོགས་ཟེར་བར་འགྱུར་ལ། དེ་ལྟར་བརྗོད་པས་དོན་མི་གྲུབ་སྟེ། ཤ་པ་དང་ཕྱོགས་རེས་འདྲ་བ་ཀུན་ལ་ཡོད་ལ། ཆ་ཤས་ཐམས་ཅད་ནས་འདྲ་བ་གང་ནའང་མེད་པའི་ཕྱིར་རོ། །གཉིས་པ་ལུང་གི་དགག་པ་ནི། སྤྱི་དངོས་པོ་བ་མེད་ཅིང་དེ་བྱེ་བྲག་རྣམས་དང་རྫས་གཅིག་ཡིན་པ་རིགས་པའི་རྒྱལ་པོས་གསུངས་པ་ཡི་རིགས་པའི་རྣམ་གཞག་རྣམས་དང་ཡང་འགལ་བར་སྣང་སྟེ། སྤྱི་ཡི་བློ་ཡང་བསླད་པ་ཡིན། །ཞེས་སོགས་རྩ་བ་གསུམ་དང་། གང་དག་རིགས་ནི་གསལ་བ་ལས། །ཞེས་པའི་རང་འགྲེལ་སོགས་གསུམ་གྱིས་གནོད་པའི་ཕྱིར་རོ། །གཉིས་པ་རང་ལུགས་ནི། འོ་ན་རིགས་པ་དང་ལུང་གཉིས་ཀྱིས་སྤྱི་དོན་ལ་ཡོད་པ་འགོག་ན། ཁྱེད་འདོད་པའི་སྤྱི་གང་། དེ་ལ་དགག་སྒྲུབ་ཇི་ལྟར་བྱེད་ཅེ་ན། རྟོག་ངོར་ཤིང་དེ་ཤིང་མིན་པའི་རང་བཞིན་ཙམ་ལས་ལོག་པའི་ལྡོག་པ་ཆིག་རྐྱང་དུ་སྣང་བ་ཤིང་གསལ་གྱི་དངོས་པོ་ཀུན་ལ་ཐུན་མོང་དུ་གྲུབ་པ་དེ་གཞན་སེལ་བའི་སྤྱི་ཡིན་ཞིང་། དེ་དང་རང་མཚན་གཅིག་ཏུ་འཁྲུལ་པ་དེ་ལ་དགག་སྒྲུབ་བྱེད་ཅིང་དེ་ལྟར་བྱས་པས་རང་མཚན་རྟོགས་པར་འགྱུར་ཞིང་། དེ་ལྟ་བུའི་སྤྱི་ཁེགས་པས་བྱེ་བྲག་ཁེགས་པ་དང་། བྱེ་བྲག་གྲུབ་པས་སྤྱི་གྲུབ་པའི་རྣམ་གཞག་བྱེད་པའི་ཕྱིར། འཁྲུལ་པས་དངོས་པོ་གཅིག་ལྟར་རྟོགས། །ཞེས་གསུངས་པ་ལྟར་རོ། །གསུམ་པ་རྩོད་སྤང་ནི། གལ་ཏེ་དོན་ལ་སྤྱི་མེད་ན། བྱེ་བྲག་གྲུབ་པས་སྤྱི་འགྲུབ་པ་རང་བཞིན་གྱི་རྟགས་དང་། སྤྱི་ཁེགས་པས་བྱེ་བྲག་ཁེགས་པ་ཁྱབ་བྱེད་མ་དམིགས་པ་སོགས་རྟོག་གེའི་ཐ་སྙད་དང་། འཇིག་རྟེན་གྱི་ཐ་སྙད་ཐམས་ཅད་འཇིག་པར་ཐལ་ལོ། །དོན་ལ་སྤྱི་མེད་པ་གང་ཞིག གཞན་སེལ་གྱི་སྤྱི་གྲུབ་ཀྱང་དེ་ལ་དགག་སྒྲུབ་བྱས་པས་རང་མཚན་མི་ཁེགས་པའི་ཕྱིར་རོ། །དེ་སྒྲོ་བཏགས་དངོས་མེད་ཡིན་པས་དོན་རང་མཚན་དང་མ་འབྲེལ་བའི་ཕྱིར་ཞེ་ན། ཐ་སྙད་རྣམས་འཐད་པ་ཡིན་ཏེ། རྟོག་པ་ངོ་བོས་འཁྲུལ་པས་དོན་རང་མཚན་དང་སེལ་བ་གཅིག་ཉིད་དུ་འཁྲུལ་ནས་འཇུག་ཡུལ་རང་མཚན་ལ་འཇུག་པ་ན་ཇི་ལྟར་ཞུགས་པ་བཞིན་དོན་རང་གི་མཚན་ཉིད་ཐོབ་པ་ཡོད་ལ། དེ་ཙམ་གྱིས་ཚད་མའི་བྱ་བ་གྲུབ་པ་ཡིན་པའི་ཕྱིར། གཉིས་པ་སྤྱིའི་འདོད་ཚུལ་བསྟན་པའི་སྒོ་ནས་དོན་བསྡུ་བ་ནི། གསལ་བ་དང་རྫས་ཐ་དད་པའི་སྤྱི་འདོད་པ་འུག་ཕྲུག་པ་ཡིན་ཞིང་། སྤྱི་གསལ་རྫས་གཅིག་ཡིན་ཞེས་གྲངས་ཅན་པ་འདོད། གངས་ཅན་གྱི་རྟོག་གེ་པ་རྣམས་ཕལ་ཆེར་གྲངས་ཅན་དེའི་རྗེས་སུ་འབྲང་ལ། སེལ་བ་ཁོ་ནར་འདོད་པ་ནི་རིགས་པའི་དབང་ཕྱུག་སོགས་མཁས་པའི་ལུགས་སོ། །འདི་ནི་བསྡུ་བའི་ཚིགས་བཅད་དོ། །ཚད་མ་རིག་པའི་གཏེར་ལས་སྤྱི་དང་བྱེ་བྲག་བརྟགས་པའི་རབ་ཏུ་བྱེད་པ་གསུམ་པའི་རྣམ་བཤད་དོ།། ༈ །།གཉིས་པ་སྣང་བ་དང་སེལ་བའི་རྟོགས་ཚུལ་ལ་གཉིས། འཇུག་ཚུལ་སྤྱིར་བསྟན་པ། སོ་སོའི་རྣམ་གཞག་ངེས་པར་བྱ་བའོ། །དང་པོ་ནི། རྟོག་མེད་ཀྱི་ཤེས་པ་རྣམས་སྣང་བའི་སྒོ་ནས་འཇུག་ཅིང་། རྗོད་བྱེད་ཀྱི་སྒྲ་དང་རྟོག་པ་ཐམས་ཅད་གཞན་སེལ་བའི་སྒོ་ནས་འཇུག་པ་ཡིན་ལ། དེ་དག་རེ་རེ་ལ་གཉིས་གཉིས་ཏེ་རྣམ་པ་བཞི་ཡོད་དེ། སྣང་བ་ལ་འཁྲུལ་པ་དང་མ་འཁྲུལ་པ་གཉིས། སེལ་བ་ལ་ཕྱིན་ཅི་ལོག་མ་ལོག་པའི་དབྱེ་བས་སོ། །གཉིས་པ་ལ་རྣམ་གཞག་རྒྱས་པར་བཤད་པ་དང་། ཤེས་པའི་ཆེ་བ་བསྟན་པའི་སྒོ་ནས་དོན་བསྡུ་བའོ། །དང་པོ་ལ་སྣང་བ་དང་སེལ་བ་གཉིས། དང་པོ་ལ་གཉིས་ལས། སྤྱིའི་མཚན་ཉིད། རྟོག་མེད་ཀྱི་ཤེས་པས་རང་ཡུལ་མཐོང་ཚུལ་གྱི་ཁྱད་པར་དེ་རྟོག་མེད་ཤེས་པའི་སྣང་བའི་མཚན་ཉིད་དོ། །གཉིས་པ་སོ་སོའི་དོན་ལ། རྟོག་མེད་འཁྲུལ་མ་འཁྲུལ་གྱི་སྣང་བ་གཉིས། དང་པོའི་མཚན་ཉིད། དེས་རང་ཡུལ་མཐོང་ཚུལ་གྱི་ཁྱད་པར་རོ། །དབྱེ་ན། དབང་ཤེས་དང་ཡིད་ཤེས་འཁྲུལ་པའི་སྣང་བ་གཉིས་སོ། །གཉིས་པ་རྟོགས་མེད་མ་འཁྲུལ་པའི་སྣང་བ་ལ་གསུམ་ལས། མཚན་ཉིད་ནི། དེས་རང་ཡུལ་མཐོང་ཚུལ་གྱིས་ཁྱད་པར་རོ། །གཉིས་པ་དབྱེ་ན། རང་རིག་དང་། དོན་རིག་གཉིས་སོ། །གསུམ་པ་མཚན་གཞི་ལ་མཚན་ཉིད་ངེས་པར་སྒྲུབ་པ་ལ། ཡུལ་གྱི་གནས་ལུགས། བློའི་འཛིན་སྟངས། བློ་དོན་མཐུན་པར་སྒྲུབ་པ་གསུམ། དང་པོ་ནི། དོན་ལ་གནས་པའི་དངོས་པོ་བཻ་ཌཱུརྻ་ལ་སྔོན་པོ་དང་བྱས་མི་རྟག་ལ་སོགས་པ་རྣམས་དོན་ལ་རྫས་ཐ་དད་ལྟ་ཞོག་དོན་ལ་ལྡོག་པ་དུ་མ་མི་སྲིད་དེ། རྫས་གཅིག་ཏུ་གནས་པའི་ཕྱིར། ཅིང་ནི་ཕྱི་མ་སྡུད་པའི་ཚིག་གོ །བཻ་ཌཱུརྻ་དང་ཨུཏྤལ་ལ་སོགས་པའི་སྔོན་པོ་རྫས་དུ་མ་རྣམས་རྫས་གཅིག་ཏུ་གནས་པ་མི་སྲིད་དེ། སྔོ་ཙམ་གྱི་སྤྱི་རྫས་གཅིག་མེད་པས་སོ། །སྒྲའི་བྱས་མི་རྟག་ལྟ་བུ་རྫས་གཅིག་མངོན་སུམ་ལ་གསལ་མི་གསལ་གྱི་ཁྱད་པར་མེད་དེ། དེ་གཉིས་རྫས་གཅིག་ཏུ་གནས་པའི་ཕྱིར་རོ། །གཉིས་པ་ནི། མངོན་སུམ་ཐམས་ཅད་ལ། དོན་ཇི་ལྟར་གནས་པ་བཞིན་སྣང་སྟེ་བཻ་ཌཱུརྻ་དང་དེའི་སྔོན་པོ་ལྟ་བུ་རྫས་གཅིག་པ་རྣམས་མངོན་སུམ་ལ་རྫས་ཐ་དད་དུ་སྣང་བ་མེད་པར་རྫས་གཅིག་ཁོ་ནར་སྣང་། སྔོ་སེར་ལྟ་བུ་རྫས་ཐ་དད་པ་རྣམས་མངོན་སུམ་ལ་གཅིག་ཏུ་སྣང་བ་མི་སྲིད་པའི་ཕྱིར། རྫས་གཅིག་པ་རྣམས་མངོན་སུམ་ལ་རེས་འཇོག་མེད་པར་སྣང་སྟེ། དེ་སྣང་བས་འཇུག་པས་སོ། །གསུམ་པ་བློ་དོན་མཐུན་པར་སྒྲུབ་པ་ལ། ཇི་ལྟར་མཐུན་པའི་ཚུལ། དེས་ན་མངོན་སུམ་མ་ངེས་པར་སྒྲུབ་པའོ། །དང་པོ་ནི། བློ་མངོན་སུམ་དང་། དོན་དེའི་ཡུལ་གཉིས་ཕན་ཚུན་འཆོལ་བ་མེད་དེ། དོན་མེད་ན་མངོན་སུམ་མི་འབྱུང་བར་ངེས་པའི་ཕྱིར་ཏེ། ཡུལ་དོན་ལ་ཇི་ལྟར་གནས་པའི་སྟོབས་ཀྱིས་དབང་ཤེས་ཡང་དེའི་རྣམ་པར་སྐྱེ་བས་ནའོ། །གཉིས་པ་ལ་མ་ངེས་པར་འགྱུར་བའི་འཐད་པ་དངོས། དེ་ལ་མི་འཐད་པ་སྤང་བ། སྣང་ཡུལ་ལ་སྒྲ་རྟོག་མི་འཇུག་པའི་ཚུལ་གསུམ། དང་པོ་ནི། མངོན་སུམ་ལ་བྱས་མི་རྟག་ལྟ་བུ་ཐ་དད་དུ་མི་སྣང་། སྔོ་སེར་ལྟ་བུ་གཅིག་ཏུ་མི་སྣང་བ་དེས་ན། མངོན་སུམ་ཚད་མར་འགྲོ་བ་ཡང་རང་ཡུལ་ངེས་པ་ལ་ལྟོས་མི་དགོས་ཏེ་རྟོག་མེད་ཡིན་པའི་ཕྱིར། གཉིས་པ་ལ། ལུང་དང་འགལ་བ་སྤང་། དངོས་སུ་མ་ངེས་ན་ཚད་མ་འགལ་བ་སྤང་བའོ། །དང་པོ་ནི། ཡོད་མེད་ངེས་པའི་འབྲས་ཅན་མིན། །ཞེས་སོགས་དང་འགལ་ལོ་ཞེ་ན། མི་འགལ་ཏེ། རང་སྟོབས་དང་གཞན་སྟོབས་གང་རུང་གིས་ངེས་པ་འདྲེན་པ་ལ་དགོངས་པའི་ཕྱིར། གཉིས་པ་ལ། རྩོད་ལན་གཉིས་ལས། དང་པོ་ནི་དངོས་སུ་ངེས་པ་མེད་ན་ཚད་མར་འགལ་ལོ་ཞེ་ན། ལན་ལ། མངོན་སུམ་གྱིས་དགག་སྒྲུབ་བྱེད་པའི་ཚུལ། ངེས་ན་མངོན་སུམ་དུ་འགལ་བ་གཉིས། དང་པོ་ནི། འོ་ན་མངོན་སུམ་ཚད་མ་གང་། དེས་དགག་གྲུབ་ཇི་ལྟར་བྱེད་ཅེ་ན། མངོན་སུམ་ཆོས་ཅན། རང་ཡུལ་གྱི་རྫས་ཐམས་ཅད་ལ་ཚད་མར་གྲུབ་པ་ཡིན་ཏེ། དེ་ལ་རྟོག་བྲལ་མ་འཁྲུལ་པ་ཡིན་པ་ཉིད་ཀྱིས་སོ། །མངོན་སུམ་དེ་ཆོས་ཅན། ཁྱོད་ཀྱིས་དགག་སྒྲུབ་བྱེད་པའི་ཚུལ་ཡོད་དེ། ཁྱོད་དེའམ་ཚད་མ་གཞན་གྱི་སྟོབས་ཉིད་ལས་ངེས་པ་འདྲེན་ཞིང་། ངེས་པའི་དབང་གིས་དགག་སྒྲུབ་བྱེད་པའི་ཕྱིར་རོ། །དེ་ཡང་ཁ་དོག་ལ་འཁྲུལ་རྒྱུ་མེད་པ་དང་། རྟོགས་པའི་རྐྱེན་གོམས་པ་གསལ་བ་དང་། ཡིད་གཏད་པ་ཡོད་པས་རང་སྟོབས་ཀྱིས་འདྲེན་ཏེ། ཁྱད་པར་ཆ་ཤས་རྣམས་སྤངས་པ། །ཞེས་གསུངས་སོ། །དེའི་མི་རྟག་པ་ལ་འདྲ་བ་གཞན་འབྱུང་སོགས་འཁྲུལ་རྒྱུ་ཡོད་པའི་ཚེ་རང་སྟོབས་ཀྱིས་མི་ནུས་པས་གཞན་ལས་ངེས་ཏེ། གཟུགས་ཆོས་མཐུན་པ་མཐོང་བ་ལ། །ཞེས་སོགས་སོ། །གཉིས་པ་ངེས་ན་མངོན་སུམ་དུ་འགལ་བ་ལ། སྔོ་ལྡོག་ངེས་པ་རྟོག་པར་སྒྲུབ། ངེས་པས་སྒྲོ་འདོགས་བཅད་པའི་ཚུལ། དེ་སློབ་དཔོན་གྱི་དགོངས་པ་ཡིན་པའོ། །དང་པོ་ནི། སྐད་ཅིག་ལ་གཞན་སེལ་འཇུག་མོད། སྔོན་པོ་ངེས་པ་འདི་རྟོག་པ་ཡིན་པས་མངོན་སུམ་མིན། རྟགས་ལ་མ་ལྟོས་པས་རྗེས་དཔག་ཀྱང་མིན་ཞིང་། འགལ་ཟླ་མ་བཅད་པས་སེལ་འཇུག་ཏུའང་མི་རུང་ངོ་ཞེ་ན། སྔོན་པོའི་རྫས་ཐམས་ཅད་མངོན་སུམ་གྱི་མཐོང་ནས་དེའི་རྗེས་སུ་འདི་སྔོན་པོའོ་སྙམ་དུ་སྔོན་པོའི་ལྡོག་པ་སྤྱིའི་ཚུལ་གྱིས་ངེས་པ་ནི་ཆོས་ཅན། གཞན་སེལ་བས་འཇུག་པ་ཡིན་ཏེ། སྔོན་པོ་སྔོ་མིན་དུ་སྒྲོ་མ་བཏགས་པའི་ཡུལ་ལ་འཇུག་པའི་རྟོག་པ་ཡིན་པའི་ཕྱིར། དེའང་། མཐོང་བ་འགལ་ལའང་ཤེས་པ་གང་། །ཞེས་སོགས་གསུངས་སོ། །དེས་འཇུག་ཡུལ་སྔོན་པོ་རང་མཚན་ཐོབ་སྟེ། སྔོན་པོའི་དོན་སྤྱི་ལ་སྔོན་པོར་འཁྲུལ་ནས་འཇུག་པའི་ཕྱིར། ཁ་ནང་དུ་བལྟས་པའི་ཚེ་མངོན་སུམ་གྱི་ཚད་མར་འདོད་དེ་རང་རིག་ཡིན་པའི་ཕྱིར། དེའང་། རྟོག་པའང་རང་རིག་ཉིད་དུ་འདོད། །ཅེས་གསུངས་སོ། །གཉིས་པ་ནི། བློ་གང་ལ་ངེས་པ་ཡོད་པ་དེས་སྒྲོ་འདོགས་གཅོད་པར་ཤེས་པར་བྱ་སྟེ། དེ་གཉིས་ལྷན་ཅིག་མི་གནས་འགལ་ཡིན་པའི་ཕྱིར། ངེས་པ་དང་ནི་སྒྲོ་འདོགས་ཡིད། །ཅེས་གསུངས་སོ། །གསུམ་པ་ནི། ངེས་པ་དང་ནི་སྒྲོ་འདོགས་ཀྱི་ཡིད་གཉིས་ཀ་སེལ་བས་འཇུག་པའི་ཕྱིར་ན། དེ་དག་མངོན་སུམ་སྟེ་སྒྲུབ་པའི་ཚུལ་གྱིས་འཇུག་པ་མིན་ནོ་ཞེས་རིགས་པ་མཁྱེན་པས་གསུངས་པ་ཡིན་ནོ། །གསུམ་པ་སྣང་ཡུལ་ལ་སྒྲ་རྟོག་མི་འཇུག་པ་ལ་གསུམ་ལས། དང་པོ་སྣང་ན་དགག་སྒྲུབ་གཅིག་ཅར་རྟོགས་པར་ཐལ་བ་ནི། བུམ་པའི་སྟེང་དུ་མ་བྱས་པ་བཀག་པ་ན་རྟག་པའང་དགག་པ་དང་། བྱས་པ་སྒྲུབ་པ་ན་མི་རྟག་པའང་སྒྲུབ་པ་གཉིས་ཅིག་ཆར་དུ་རྟོགས་པར་འགྱུར་ཏེ། སྒྲ་དང་རྟོག་པས་སྣང་བའི་སྒོ་ནས་ཡུལ་འཇལ་ན་ནི་འཇལ་བ་གང་ཞིག བུམ་པའི་བྱས་མི་རྟག་རྫས་གཅིག་ཡིན་པའི་ཕྱིར། གཉིས་པ་དོན་གཅིག་གི་མིང་ཐམས་ཅད་རྣམ་གྲངས་པ་ཡིན་པ་ནི། དོན་བུམ་པ་ལྟ་བུ་གཅིག་ལ་བྱས་པ་དང་མི་རྟག་པ་ལ་སོགས་པ་མིང་དུ་མ་བཏགས་ན་ཡང་མིང་ངམ་སྒྲ་རྣམ་གྲངས་པ་ཡིན་གྱི་དགོས་པ་ཐ་དད་ཡོད་པ་མིན་པར་ཐལ། བུམ་པ་བྱས་ཞེས་པའི་མིང་དེས་ཀྱང་བུམ་པ་མི་རྟག་པ་བརྗོད་པ་ཡིན་པའི་ཕྱིར། དེའང་། གཞན་དུ་དངོས་པོ་གཅིག་པུ་ལ། །ཞེས་གསུངས་སོ། །གསུམ་པ་ལྡོག་པས་འབྱེད་ན་སེལ་བར་འགྱུར་བ་ནི། གལ་ཏེ་སྒྲ་གཉིས་པོ་དེ་རྣམ་གྲངས་པར་མི་འགྱུར་ཏེ། བྱས་མི་རྟག་ལྡོག་པ་ཐ་དད་པའི་ཕྱིར་རོ་ཞེ་ན། བྱས་མི་རྟག་ལྡོག་པ་ཐ་དད་པས་སྒྲ་སོ་སོས་བརྗོད་བྱར་འབྱེད་ན་སྒྲའི་དངོས་ཡུལ་སེལ་བ་ཡིན་པར་གྲུབ་ལ། དེས་ན་སྒྲའི་དངོས་ཡུལ་དེ་ལ་སྣང་བར་རློམ་པ་ནི་འཁྲུལ་ཏེ། སེལ་བ་ལ་དངོས་པོའི་མིང་གིས་བཏགས་པ་ཙམ་ཡིན་པར་ཟད་པའི་ཕྱིར། གཉིས་པ་སེལ་བ་ལ་མཚན་ཉིད། དེའི་རང་བཞིན་ངེས་པར་བྱ་བ། སེལ་བ་ལ་རྩོད་པ་སྤང་བ་གསུམ། དང་པོ་ནི། ཡུལ་དེའི་དངོས་འགལ་བཅད་པ་ལ་ལྟོས་ནས་ཡུལ་དེར་འཇུག་པ་ནི། ཡུལ་དེའི་གཞན་སེལ་བའི་ཡུལ་ཅན་ཏེ་སེལ་འཇུག་གི་མཚན་ཉིད་ཡིན་པར་བཞེད་ལ། དེའི་དངོས་འགལ་བཅད་ནས་དེར་སྣང་བའི་སྒྲོ་བཏགས་ནི། དེའི་གཞན་སེལ་གྱི་མཚན་ཉིད་དོ། །གཉིས་པ་ལ། སེལ་བའི་རྣམ་གཞག དེའི་རབ་ཏུ་དབྱེ་བའོ། །དང་པོ་ལ། ཡུལ་གྱི་གནས་ལུགས། བློའི་འཛིན་སྟངས་སོ། །དང་པོ་ནི། རྟོག་པའི་དངོས་ཡུལ་དོན་ལ་མེད་དེ། གཞན་སེལ་བ་ནི་རྟོག་པས་སྒྲོ་བཏགས་པ་ཡིན་པས་དོན་ལ་མེད་པའི་ཕྱིར། འོན་ཀྱང་དེ་ལ་རང་མཚན་དུ་འཁྲུལ་ནས་འཇུག་པ་ན་ཐོབ་པའི་འཇུག་ཡུལ་རང་མཚན་ཡིན་ནོ། །རང་མཚན་དེ་ཡང་བྱས་མི་རྟག་སོགས་དོན་ལ་ཐ་དད་མེད་པར་གཅིག་ཏུ་གནས་ཤིང་། སྔོ་སེར་སོགས་ཐ་དད་རྣམས་ཕན་ཚུན་འདྲེ་བ་མེད་པར་ཐ་དད་ཉིད་དུ་གནས་སོ། །འོ་ན་དམ་བཅའ་བའི་ཕྱོགས་གཅིག་རྟགས་སུ་འགྱུར་བ་དང་། རྟགས་རྗེས་འགྲོ་མེད་པའི་སྐྱོན་དུ་འགྱུར་རོ་ཞེས་བྱེ་བྲག་པས་བརྗོད་པའི་སྐྱོན་ཇི་ལྟར་སྤང་ཞེ་ན། འདི་ཡི་ལན་ལ་བློའི་འཛིན་སྟངས་ཤེས་དགོས་པས་དེ་བཤད་ན། དོན་རང་མཚན་དེ་ལྟར་གནས་ཀྱང་རྟོག་པས་སྒྲོ་བཏགས་ནས། གཅིག་ལ་ཐ་དད་དང་། ཐ་དད་ལ་གཅིག་དང་། གཅིག་ལ་གཅིག་དང་། ཐ་དད་ལ་ཐ་དད་དུ་འཛིན་པ་སྟེ་སེལ་བའི་འཛིན་སྟངས་ལ། མུ་བཞི་སྲིད་པ་ལས་ཕྱི་མ་གཉིས་གོ་སླ་ལ་སྔ་མ་གཉིས་བཤད་དོ། །དེ་དག་ལ་གསུམ་གསུམ་ལས། དང་པོ་ཐ་དད་ལ་གཅིག་ཏུ་སྒྲོ་འདོགས་པའི་རྒྱུ་ནི་མེ་ཆུ་ལ་སོགས་པ་སྲེག་པ་དང་ངོམས་པ་སོགས་ཀྱི་བྱ་བ་གཅིག་པ་དང་ཙནྡན་དང་ཤ་པ་སོགས་ཡལ་ག་དང་ལྡན་པར་མཚན་ཉིད་གཅིག་པ་ནི། དེ་དག་ལ་གཅིག་ཏུ་འཁྲུལ་པའི་རྒྱུ་ཡིན་ཏེ། དེ་ཕྱིར་གང་དང་གང་ལས་དོན། །ཞེས་སོགས་སོ། །གཉིས་པ་སྒྲོ་འདོགས་པའི་བློའི་རྣམ་པ་ལ་གཉིས་ཏེ། ཐ་དད་ལ་གཅིག་ཏུ་འཁྲུལ་ཚུལ། དེ་ལ་མི་འཐད་པ་སྤང་བ་གཉིས། དང་པོ་ནི། ཡལ་ག་ལ་སོགས་པ་གཞན་སེལ་གཅིག་པའི་ཡུལ་རྣམས་ལ་ཐོག་མ་མེད་པའི་བག་ཆགས་ཀྱི་སྟོབས་ཀྱིས་འཁྲུལ་ནས་སྤྱི་གཅིག་ཏུ་བཟུང་བ་ཡིན་ཏེ། ཐ་དད་དངོས་རྣམས་ལ་བརྟེན་ནས། །ཞེས་སོགས་གསུངས་སོ། །གཉིས་པ་ནི། འོ་ན་དཀར་ཟལ་དང་ནག་སྒུར་ལ་གཅིག་ཏུ་འཛིན་པའི་འབྲས་བུའི་བློ་དང་། རྟ་དང་བ་གླང་ལ་གཅིག་གི་བློ་མི་སྐྱེ་བར་ཐ་དད་དུ་འཛིན་པའི་བློ་སྐྱེ་བ་འགལ་ཏེ། དེ་དག་དོན་ལ་ཐ་དད་པར་མཚུངས་པའི་ཕྱིར་ཞེ་ན། དེ་རྣམས་ལ་རྫས་ཐ་དད་ཡིན་པར་མཚུངས་ན་ཡང་སྔ་མ་གཉིས་ཀྱིས་བ་ལང་གི་སྤྱིའི་བློ་གཅིག་སྐྱེ། ཕྱི་མ་གཉིས་ཀྱིས་མི་སྐྱེད་པའི་ཁྱད་པར་ཡོད་དེ། ཆོས་ཉིད་ཀྱིས་དེ་ལྟར་ངེས་པའི་ཕྱིར། དཔེར་ན་དབང་ཤེས་ཀྱི་རྐྱེན་བཞི་པོ་ཐ་དད་ཡིན་ཡང་རྣམ་ཤེས་གཅིག་སྐྱེད་པ་དང་། སྨན་སླེ་ཏྲེས་དང་པར་པ་ཏ་ལ་སོགས་པས་རིམས་ནད་གཅིག་ཞི་བར་བྱེད་ཀྱི་ཞོ་དང་ག་གོན་ལ་སོགས་པས་མིན་པ་བཞིན་ནོ། །དེའང་། གཅིག་རྟོགས་དོན་ཤེས་ལ་སོགས་པ། །ཞེས་སོགས་དང་། དཔེར་སྨན་ཁ་ཅིག་ཐ་དད་ཀྱང་། །ཞེས་སོགས་སོ། །གསུམ་པ་དགོས་པ་ནི་ཡུལ་དུས་རྣམ་པ་ཐ་དད་ཀྱི་གསལ་བ་རྣམས་ལ་སྤྱི་གཅིག་ཏུ་གོ་ནས་དགག་སྒྲུབ་ཀྱི་བྱ་བ་ཕྱོགས་གཅིག་ཏུ་རྟོགས་པར་འགྱུར་བ་ཉིད་དགོས་པ་ཡིན་ཏེ། དེ་ཡི་ཁྱད་པར་གྱིས། ཞེས་སོགས་གསུངས་སོ། །གཉིས་པ་གཅིག་ལ་ཐ་དད་དུ་སྒྲོ་བཏགས་པ་ལའང་གསུམ་ལས། དང་པོ་རྒྱུ་ནི། སྒྲ་བྱས་མི་རྟག་ལྟ་བུ་རྫས་གཅིག་པ་རྣམས་ལའང་བདེ་བར་གཤེགས་པས་ཕུང་པོའི་ལྡོག་པ་ཐ་དད་དུ་གསུངས་པ་དང་། རིགས་པ་སྨྲ་བས་རྟགས་ཆོས་དོན་གསུམ་གྱི་ལྡོག་པ་ཐ་དད་པ་དབྱེ་རུང་བར་གསུངས་པའི་རྒྱུ་ནི། ལོག་པ་ཐ་དད་ལས་ལོག་པས་གཞན་སེལ་བའི་ཡུལ་ཅན་རྟོགས་པའི་སྤྱོད་ཡུལ་ཐ་དད་དུ་བཞག་པ་དེའོ། །དེའང་། མིང་དོན་གང་ལྡན་ཕན་ཚུན་དུ། །ཞེས་སོགས་སོ། །མི་ཤེས་པ་དག་བདེ་བར་གཤེགས་པས་ཕུང་པོ་ཐ་དད་དུ་གསུངས་པ་དང་། ཞེས་པའི་ཚིག་ཙམ་ལ་བརྟེན་ནས་སྒྲའི་མི་རྟག་པ་ལྡན་མིན་འདུ་བྱེད་དུ་སྨྲ་བ་ནི། དེའི་ཚེ་སྒྲ་དང་སྒྲའི་མི་རྟག་པ་རྫས་ཐ་དད་དུ་གསུངས་པ་དང་། བདག་ཡོད་པ་དང་མེད་པར་གསུངས་པས་འགལ་བ་ཐམས་ཅད་ཁྱོད་ལ་ཁས་ལེན་དགོས་པས་བག་ཡོད་པར་གྱིས་ཤིག གཉིས་པ་བློའི་རྣམ་པ་ནི། སྒྲས་ཐ་དད་རྟོག་པས་ཐ་དད་དུ་བཟུང་ནས་འཇུག་པའི་འཇུག་ཚུལ་ལྟར་དོན་གཅིག་ཉིད་ལའང་དོན་ཐ་དད་ཉིད་དུ་སྒྲོ་བཏགས་ནས་ཞེན་པར་བྱེད་དེ། དེ་ཕྱིར་ཁྱད་པར་གང་ཞིག་ཆོས། །ཞེས་སོགས་སོ། །གསུམ་པ་དགོས་པ་ནི། གསུམ་པོ་དོན་ལ་གཅིག་ཡིན་པ་ལ་གཅིག་ཏུ་མ་རྟོགས་པ་རྟོགས་པར་བྱ་བའི་ཕྱིར་དུ་གཞན་སེལ་གྱི་སྒོ་ནས་ལོག་པ་ཐ་དད་ལས་ལོག་པའི་ཆ་ནས་ཐ་དད་དུ་རྣམ་པར་ཕྱེ་སྟེ་རྟགས་ཆོས་དོན་གསུམ་དུ་སྦྱར་ནས་བསྒྲུབས་པས་མི་རྟག་པ་ལ་སོགས་པ་གོ་བའི་ཆེད་དོ། །ཆོས་དང་ཆོས་ཅན་རྣམ་གཞག་དང་། །ཞེས་སོགས་གསུངས་སོ། །འདི་དག་གི་དངོས་ལ་གནོད་བྱེད་ནི་སྤྱི་དང་ལྡོག་པ་ཐ་དད་དོན་ལ་འགོག་པའི་རིགས་པ་བཞིན་ནོ། །གཉིས་པ་སེལ་བའི་རབ་དབྱེ་ལ། དབྱེ་བ་དངོས། དོན་ལ་གཞན་སེལ་དགག སོ་སོའི་རྣམ་གཞག་གོ །དང་པོ་ནི། གཞན་སེལ་ལ། དངོས་པོར་ཡོད་པ་དང་། དེར་མེད་པར་འཛིན་པའི་འཛིན་སྟངས་ཀྱིས་སྒོ་ནས་དབྱེ་ན་རྣམ་པ་གཉིས་ཡོད་དེ། ཡོད་པ་གཞན་སེལ་དང་། མེད་པ་གཞན་སེལ་གཉིས་ཡོད་པས་སོ། །ཡོད་མེད་ཀྱི་སེལ་བ་དེ་གཉིས་པོ་རེ་རེ་ལ་ཡང་ཡུལ་ཅན་གྱི་སྒོ་ནས་གཉིས་གཉིས་སུ་ཡོད་པ་ཡིན་ཏེ། ཡུལ་ཅན་སྒྲ་དང་རྟོག་པའི་བློ་ཡི་དབྱེ་བ་ཡིས་ཡོད་པ་སྒྲ་སེལ་དང་། བློ་སེལ་གཉིས། མེད་པ་སྒྲ་སེལ་དང་། བློ་སེལ་གཉིས་རྣམས་སུ་ཡོད་པའི་ཕྱིར། དེའང་། ཆ་ཤས་སྒྲོ་འདོགས་ཇི་སྙེད་པ། །ཞེས་སོགས་གསུངས་སོ། །དེ་ལྟར་ན་རི་བོང་རྭ་དང་། མོ་གཤམ་གྱི་བུའི་གཞན་སེལ་ལྟ་བུ་ནི་དངོས་པོ་དང་ཡོད་པ་གཞན་སེལ་ཏེ། དེ་དག་འཛིན་པའི་རྟོག་པ་ལ་དེ་དག་དངོས་པོར་སྣང་བའི་ཕྱིར། འོན་ཀྱང་ཤེས་བྱའི་གཞན་སེལ་སོགས་ནི་སེལ་བའི་སྒྲུབ་པ་ཡིན་ཡང་དངོས་པོའི་སེལ་བ་མིན་ནམ་སྙམ་སྟེ་དཔྱད་པར་བྱའོ། །གང་དག་འདི་གཉིས་བསལ་གཞི་དངོས་པོ་ཡིན་མིན་གྱི་སྒོ་ནས་ཕྱེ་བར་འདོད་པ་ནི་རྟོག་པའི་འཇུག་ཚུལ་མ་ཤེས་པར་རང་དགར་སྨྲ་བའོ། །གཉིས་པ་ལ་དོན་ལ་གཞན་སེལ་མི་འཐད་པའི་ཚུལ། དེའི་རྒྱུ་མཚན་གཉིས། དང་པོ་ནི་བོད་ཁ་ཅིག་དོན་གྱི་གཞན་སེལ་ཞེས་བེམས་པོ་ཉིད་ལ་འཇོག་པ་འགོག་པ་ནི་བེམས་པོའི་དོན་ལ་གཞན་སེལ་མེད། གཞན་སེལ་ནི་བློའི་འཇུག་ཚུལ་ལ་ལྟོས་པའི་ཆོས་ཡིན་པས་དོན་ལ་མེད་པའི་ཕྱིར་རོ། །གཉིས་པ་ལ། སེལ་བ་སྣང་བར་འགྱུར་བ་དང་། སྣང་བ་ལ་མཚུངས་པ་གཉིས། དང་པོ་ནི། དོན་གྱི་གཞན་སེལ་གྱི་མཚན་གཞི་གཟུགས་ཆོས་ཅན། ཚུར་མཐོང་དབང་མངོན་གྱི་ཡུལ་དུ་འགྱུར་བར་ཐལ། གཟུངས་ཡུལ་ཡིན་པའི་ཕྱིར། འདོད་ན། སེལ་བ་ཉམས་སོ། །གཉིས་པ་ནི། དོན་རང་མཚན་ལ་སྣང་བའང་ཡོད་པར་ཐལ། དེ་ལ་སེལ་བ་ཡོད་པ་གང་ཞིག རྒྱུ་མཚན་མཚུངས་པའི་ཕྱིར། འདོད་ན། ལོང་བ་རྒྱུན་ཆད་པར་འགྱུར་ཏེ། དེ་དབང་ཤེས་ལ་གཟུགས་གསལ་བར་སྣང་བ་དེ་གཟུགས་ཀྱི་གནས་ལུགས་ཡིན་པའི་ཕྱིར། སྣང་བ་རྟོག་མེད་ཀྱི་འཛིན་སྟངས་ཡིན་པས་དོན་ལ་མེད་དོ་ཞེ་ན། སེལ་བའང་རྟོག་པའི་འཛིན་སྟངས་དེ་མིན་བཅད་ནས་དེར་སྣང་བའི་ཆ་ཡིན་པས་དོན་ལ་མེད་དོ། །གསུམ་པ་ལ། ཡོད་པ་གཞན་སེལ་དང་། མེད་པ་གཞན་སེལ་གཉིས། དང་པོ་ལ་གཉིས་ལས། མཚན་ཉིད་ནི་དོན་བྱེད་མི་ནུས་པའི་རྣམ་པར་གཅོད་པར་ལྟ་བུར་སྣང་བའི་སྒྲོ་འདོགས་དེ་དངོས་པོའི་གཞན་སེལ་གྱི་མཚན་ཉིད་དོ། །གཉིས་པ་དབྱེ་བ་ནི། དེ་ལ་དབྱེ་ན་མངོན་གྱུར་ལ་ངེས་པ་དང་ལྐོག་གྱུར་ལ་ངེས་པའི་སེལ་བ་གཉིས་ཡོད་དེ། སྣང་བ་མངོན་གྱུར་དང་མི་སྣང་བ་ལྐོག་གྱུར་ལ་ངེས་པའི་བློའི་ཡུལ་གྱི་སྒོ་ནས་ཕྱེ་བ་ཡིན་པའི་ཕྱིར། དེ་ལྟར་གཉིས་ལས་དང་པོའི་དབང་ཤེས་ལ་སྣང་བའི་སྔོན་པོའི་རང་གི་མཚན་ཉིད་ནི་མངོན་སུམ་སྟེ་མངོན་གྱུར་ཡིན་ལ། དབང་ཤེས་དེའི་རྗེས་ཀྱི་སྒྲ་དང་ངེས་ཤེས་ཇི་སྙེད་པ་ནི། སེལ་བའམ་ཆ་ཤས་སུ་ཕྱེ་བའི་ཡུལ་ཅན་དུ་འགྱུར་ཏེ། འཁྲུལ་རྒྱུ་མེད་པའི་ཚེ་སྔོན་པོ་དང་མི་རྟག་པ་སོགས་སུ་རྗོད་བྱེད་ཀྱི་སྒྲ་དང་རྟོག་པས་སོ་སོར་ཕྱེ་སྟེ་བརྗོད་ཅིང་ངེས་པར་བྱེད། འཁྲུལ་རྒྱུ་ཡོད་པའི་ཚེ་སྔོ་མིན་དང་རྟག་པ་སོགས་སུ་སྒྲ་དང་ངེས་པས་སོ་སོར་ཕྱེ་སྟེ་བརྗོད་ཅིང་ངེས་པར་བྱེད་པས་ན། སྒྲ་རྟོག་དེ་དག་གི་དངོས་ཡུལ་ལ་སྤྱིར་སེལ་བ། དེའི་ནང་ནས་དབང་ཤེས་ཀྱི་འཇུག་ཡུལ་གྱི་གཙོ་བོ་སྔོན་པོ་དང་མི་རྟག་པའི་ཡུལ་ཅན་གྱི་སྒྲ་རྟོག་གིས་དངོས་ཡུལ་ལ་མངོན་གྱུར་ལ་ངེས་པའི་སེལ་བར་འཇོག་གོ །དེའང་། མཐོང་བ་འགལ་ལའང་ཤེས་པ་གང་། །ཞེས་སོགས་སོ། །མ་བཅོལ་བ་དག་གིས་ངོ་ཚ་བོར་བའི་སྨྲ་བ་ལ་དགའ་བར་མ་བྱེད་ཅིག ཁོ་བོའི་ལེགས་བཤད་དོ། །གཉིས་པ་ལ་གཉིས་ལས། མཚན་ཉིད་ནི། དབང་ཤེས་ལ་མི་སྣང་བའི་རང་གི་མཚན་ཉིད་སྦྱིན་པ་ལས་ལོངས་སྤྱོད་འབྱུང་བ་ལྟ་བུ་དང་། རྟགས་ལ་ལྟོས་པ་ལ་རྒྱབ་ཀྱི་མེ་ལྟ་བུའམ་མ་ལྟོས་ཀྱང་རུང་དེ་དག་རྗོད་པའི་སྒྲ་དང་ངེས་པའི་བློའི་དངོས་ཡུལ་དེ་ཡང་གཞན་སེལ་ཡིན་ཏེ། རྗོད་བྱེད་ཀྱི་སྒྲ་དང་རྟོག་པའི་དངོས་ཡུལ་ཡིན་པས་སོ། །གཉིས་པ་དབྱེ་བ་ནི། ལྐོག་གྱུར་འཛིན་པའི་རྟོག་པའི་འཇུག་ཚུལ་གྱི་དབྱེ་བས་རྣམ་པ་གསུམ་སྟེ། བདེན་པ་ལ་འཇུག་པ་རྗེས་དཔག་གི་གཞན་སེལ་དང་། མི་བདེན་པ་ལ་འཇུག་པ་ལོག་ཤེས་ཀྱིས་གཞན་སེལ། མཐའ་གཉིས་སུ་དོགས་པ་ཐེ་ཚོམ་གྱི་གཞན་སེལ་བའོ། །འདིས་ཡོད་པ་གཞན་སེལ་འཇོག་པའི་གཞི་དངོས་པོར་འདོད་པ་ལེགས་པར་བཀག་གོ །གཉིས་པ་མེད་པ་གཞན་སེལ་ལ། མཚན་ཉིད། དབྱེ་བ། དངོས་མེད་སྣང་ཡུལ་མིན་པའོ། །དང་པོ་ནི། མེད་པ་གཞན་སེལ་གྱི་མཚན་ཉིད་ནི། ཡོད་པ་སྟེ་དོན་བྱེད་ནུས་པ་རྣམ་པར་གཅོད་པ་ལྟ་བུར་སྣང་བའི་སྒྲོ་བཏགས་སོ། །གཉིས་པ་ནི། བསལ་བྱའི་སྒོ་ནས་དབྱེ་ན་སེལ་བའི་རྣམ་པ་གཉིས་ཏེ། དགག་བྱ་སྟེ་བསལ་བྱ་ཤེས་བྱ་ལ་ཡོད་པ་བུམ་པ་མེད་སོགས་དང་། མེད་པ་རི་བོང་རྭ་མེད་ལྟ་བུ་ཡི་སེལ་བ་གཉིས་སོ། །འདི་ལ་ལྐོག་གྱུར་ལ་ངེས་པའི་སེལ་བ་མེད་ནས་མ་བཤད་པ་མིན་ཏེ། ནམ་མཁའ་དངོས་མེད་དུ་རྟོགས་པའི་རྗེས་དཔག་དང་། སྒྲ་རྟག་པར་འཛིན་པའི་ལོག་རྟོག་དང་། ཐེ་ཚོམ་གྱི་ཡུལ་དུ་གྱུར་པའི་བསལ་བ་ལྟ་བུའོ། །དངོས་སུ་མ་གསུངས་པ་ནི་གྲོགས་མངོན་གྱུར་ལ་ངེས་པའི་སེལ་བ་མེད་པར་བསྟན་པའི་ཆེད་དུའོ། །གལ་ཏེ་དག་པའི་ས་ཕྱོགས་འཛིན་པའི་དབང་མངོན་གྱིས་དྲངས་པའི་ས་ཕྱོགས་སུ་བུམ་པ་མ་དམིགས་པར་ངེས་པའི་ངེས་ཤེས་ཀྱི་དངོས་ཡུལ་ལྟ་བུ་མངོན་གྱུར་ལ་ངེས་པའི་སེལ་བ་ཡིན་ནོ་སྙམ་ན། མིན་ཏེ། དབང་དོན་གྱི་སྣང་ཡུལ་དང་ངེས་ཤེས་ཀྱི་ཞེན་ཡུལ་ཐ་དད་པའི་ཕྱིར་རོ། །གསུམ་པ་ལ་གཉིས་ཏེ། སྣང་ཡུལ་དུ་མི་རུང་བའི་འཐད་པ་དང་། དེ་ལ་མི་འཐད་པ་སྤང་བ་གཉིས། དང་པོ་ནི། དངོས་མེད་ཆོས་ཅན། སྣང་བའི་སྒོ་ནས་ཤེས་བྱ་མིན་ཏེ། ངོ་བོའི་སྒོ་ནས་མེད་པ་ཡིན་པས་སོ། །རང་གི་ངོ་བོའི་སྒོ་ནས་མེད་པས་སྣང་བའི་སྒོ་ནས་ཤེས་བྱ་མིན་པ་དེས་ན་བསལ་བྱ་དངོས་པོ་བསལ་བའི་ཆ་ཙམ་ལ་དངོས་མེད་ཅེས་ནི་བཏགས་ནས་རྟོགས་པས་བཟུང་ཞིང་སྒྲས་བརྗོད་པར་ཟད་དེ། ཕྱི་རོལ་ན་གཟུགས་ཀྱི་གོ་བསལ་བ་ལ་ནམ་མཁའ་ཞེས་སེལ་བའི་སྒོ་ནས་བཏགས་པ་བཞིན་ནོ། །འདི་ལྟ་བུའི་འཆད་པར་མ་ཤེས་པ་དག་གིས་རྩ་བ་ལ་ཟློས་པའི་སྐྱོན་སྨྲའོ། །གཉིས་པ་ལ་དངོས་པོ་དང་མཚུངས་པ་སྤང་། ཚད་མ་དང་འགལ་བ་སྤང་། གྲགས་པ་དང་འགལ་བ་སྤང་། ལུང་དང་འགལ་བ་སྤང་བའོ། །དང་པོ་ནི། བོད་ཁ་ཅིག དངོས་མེད་ལ་དངོས་པོའི་ངོ་བོ་མ་གྲུབ་ཀྱང་དངོས་མེད་རང་གི་ངོ་བོ་གྲུབ་ལ། དངོས་པོའི་ངོ་བོ་མ་གྲུབ་པས་ངོ་བོ་མ་གྲུབ་པར་འགྱུར་ན། དངོས་པོ་ལའང་ངོ་བོ་མ་གྲུབ་པར་འགྱུར་ཏེ། དེ་ལ་དངོས་མེད་ཀྱི་ངོ་བོ་མ་གྲུབ་པའི་ཕྱིར་ཞེ་ན། མི་མཚུངས་ཏེ། དངོས་པོ་རང་གི་རྒྱུ་ལས་གྲུབ་པ་ནི་དངོས་པོ་མེད་པ་བཀག་པ་ལ་ལྟོས་མི་དགོས་པར་རྟོག་མེད་ཀྱི་ངོར་སྣང་བ་དང་། རྟོག་ངོར་སེལ་བས་གྲུབ་ལ། དངོས་མེད་རྒྱུ་ཡིས་མ་སྐྱེས་པས་ངོ་བོ་མ་གྲུབ་པའི་ཕྱིར་རྟོག་མེད་ཀྱི་ངོར་སྣང་བས་ངོ་བོར་མི་གྲུབ་ཅིང་དགག་བྱའི་དངོས་པོ་བཀག་ནས་རྟོག་བློའི་ངོར་སེལ་བས་བསྒྲུབ་དགོས་པའི་ཕྱིར། གཉིས་པ་ནི། རི་བོང་རྭ་དང་མོ་གཤམ་གྱི་བུ་ལ་སོགས་པ་ལ་ངོ་བོ་མེད་མོད་ཀྱི་འདུས་མ་བྱས་ནམ་མཁའ་ལྟ་བུ་དང་། འཁྲུལ་ཡུལ་ཟླ་གཉིས་དང་དོན་སྤྱི་གཉིས་རྣམས་ནི་དེ་དང་དེར་སྣང་བའི་བློ་མྱོང་བའི་རང་རིག་གི་སྟོབས་ཏེ་ཤུགས་ཉིད་ལས་གྲུབ་པས། བློ་དེ་དག་གི་ཡུལ་རྣམས་དོན་ལ་ཡོད་པར་གྲུབ་བོ་ཅེ་ན། དངོས་པོ་བཀག་པའི་ཆ་ཙམ་ལ་དངོས་མེད་དུ་འཇོག་པ་དེས་ན་འདུས་མ་བྱས་གསུམ་དང་འཁྲུལ་ཡུལ་གཉིས་ནི་དོན་ལ་འགྲུབ་པར་རྟོགས་པའི་ཚད་མ་མེད་དེ། བློ་ལ་དེ་དང་དེ་སྣང་བའི་རྣམ་པ་དེ་རྣམས་ནི་ཤེས་པ་ཡིན་ལ། ཕྱི་རོལ་གྱི་དོན་དུ་འདོད་པའི་ཟླ་བ་གཉིས་ལ་སོགས་པ་རྣམས་ནི་མངོན་སུམ་ཚད་མས་གཞལ་བར་མི་ནུས་པའི་ཕྱིར། གལ་ཏེ་ནམ་མཁའ་དོན་ལ་མེད་ན། ནམ་མཁའ་སྔོན་པོར་སྣང་བ་དང་། ཁ་ནང་གི་བུ་ག་ནམ་མཁར་སྣང་བ་འདི་དག་མངོན་སུམ་གྱིས་མཐོང་བ་འགལ་ལོ་ཞེ་ན། རྒྱན་དང་བུ་ག་ཡི་ནམ་མཁའ་མངོན་སུམ་གྱིས་མཐོང་བ་ནི། ནམ་མཁའ་དོན་ལ་ཡོད་པའི་སྒྲུབ་བྱེད་དུ་རིགས་པ་མིན་ཏེ། སྔོན་པོར་སྣང་བ་ནི་ཁ་དོག་ཡིན་པས་ནམ་མཁར་མི་རུང་ལ། ཁང་པ་ལ་སོགས་པའི་བུ་ག་ནི་གྱང་སོགས་ཐོགས་བཅས་ཀྱི་གཟུགས་མ་མཐོང་བ་ཙམ་ཡིན་གྱི་ནམ་མཁའ་ནི་གཟུགས་སོགས་གང་དུ་ཡང་གྲུབ་པ་མེད་ལ་གྲུབ་ན་སྔར་གྱི་སྐྱོན་ལས་མི་འདའ་བ་དེས་ནའི་ཕྱིར། དེའང་། དངོས་མེད་ངོ་བོ་མེད་པའི་ཕྱིར། །ཅེས་སོགས་གསུངས་སོ། །གསུམ་པ་ནི། གལ་ཏེ་ནམ་མཁའ་དོན་ལ་མེད་ན། འཇིག་རྟེན་ན་ནམ་མཁའ་སྣང་ཙམ་དང་། བསྟན་བཅོས་ལས་དཔེར་བཤད་པ་གཉིས་དང་འགལ་ལོ་ཞེ་ན། ནམ་མཁའ་དོན་ལ་ཡོད་དོ་ཞེས་སྒྲུབ་པར་བྱེད་པ་ལ་ཚད་མ་མེད་དེ། ཤེས་པ་དང་དོན་རང་མཚན་གང་རུང་དུ་མེད་པའི་ཕྱིར་ན་རང་རིག་དང་དོན་རིག་མངོན་སུམ་གྱིས་གྲུབ་པ་མིན་ཅིང་། དོན་ལ་མེད་པའི་ནམ་མཁའ་དང་ཆོས་གང་ལའང་འབྲེལ་བ་གཉིས་མེད་པའི་ཕྱིར། རྗེས་དཔག་གིས་ཀྱང་གྲུབ་པ་མེད་པ་དེས་ནའི་ཕྱིར། བཞི་པ་ནི། གལ་ཏེ་འདུས་མ་བྱས་རྣམས་ངོ་བོའི་སྒོ་ནས་མ་གྲུབ་ན་དེ་དག་རྟག་པར་བཤད་པ་དང་འགལ་ལོ་ཞེ་ན། མི་འགལ་ཏེ། བྱེ་བྲག་པ་སོགས་མུ་སྟེགས་བྱེད་དང་ཉན་ཐོས་ཀྱི་ནང་མཚན་བྱེ་བྲག་སྨྲ་བ་སྟེ། རྟག་སྨྲ་གཉིས་པོ་སྐྱེ་མཆེད་ཀྱི་ཆོས་ཐམས་ཅད་རྫས་སུ་གྲུབ་པར་འདོད་པས་ནམ་མཁའ་ཡང་རྟག་པའི་རྫས་ཡིན་པར་འདོད་ལ། ཆོས་ཀྱི་གྲགས་པས་སྐབས་འགའ་ཞིག་ཏུ་ནམ་མཁའ་རྟག་པར་གསུངས་པ་ནི། མི་རྟག་པ་ལས་ལོག་པ་ཙམ་ལ་རྟག་པའི་ཐ་སྙད་འདོགས་ཀྱི་དོན་ལ་གྲུབ་པར་མི་བཞེད་པའི་ཕྱིར་རོ། །གཉིས་པ་བར་སྐབས་ཀྱི་དོན་བསྟན་པ་ནི། དབང་ཤེས་ནི་ལྐུགས་པ་མིག་ཅན་དང་འདྲ་སྟེ། དོན་མངོན་སུམ་དུ་མཐོང་ཡང་མཐོང་བའི་དོན་ལ་བརྡ་སྤྲོད་པར་མི་ནུས་པའི་ཕྱིར། རྟོག་པ་ནི་ལོང་བ་སྨྲ་མཁས་དང་འདྲ་སྟེ། སྤྱིར་ཐ་སྙད་ཙམ་འདོགས་པར་ནུས་ཤིང་དོན་མ་མཐོང་བས་བརྡ་ཇི་ལྟ་བ་བཞིན་སྦྱོར་མི་ཤེས་པའི་ཕྱིར། རང་རིག་དབང་པོ་ཚང་བ་ལྟ་བུ་དེ་ཡིས་དོན་གྱི་གཟུགས་བརྙན་གཉིས་པོ་མྱོང་བ་ཡི་སྒོ་ནས་འདི་དང་འདི་ལྟ་བུའོ་ཞེས་ཡུལ་གཉིས་པོ་དེའི་བརྡ་ལེགས་པར་སྤྲོད་པར་བྱེད་དོ། །ཞེས་བྱ་བ་ནི་བར་སྐབས་ཀྱིས་ཚིགས་བཅད་དོ། །གསུམ་པ་སེལ་བ་ལ་རྩོད་པ་སྤང་བ་ལ་ལྔ་སྟེ། སྤྱི་མེད་ན་བརྡ་སྦྱོར་བ་མི་སྲིད་པ་སྤང་བ། གཞན་སེལ་ཡིན་ན་ཕན་ཚུན་བརྟེན་པར་ཐལ་བ་སྤང་བ། གཅད་བྱ་མེད་ལ་གཞན་སེལ་མི་འཇུག་པ་སྤང་བ། སེལ་བ་དངོས་པོར་གྲུབ་མ་གྲུབ་བརྟགས་ན་མི་འཐད་པ་སྤང་བ། སེལ་བ་ལ་སྤྱི་མེད་ན་གཞི་མཐུན་མི་སྲིད་པའི་རྩོད་སྤང་ངོ་། །དང་པོ་ནི། བྱེ་བྲག་པ་ན་རེ། སྤྱི་དངོས་པོར་མེད་པའི་ཕྱིར་ན་དེས་བཞག་པ་ཡི་སྒྲ་མི་སྲིད་པས་སྤྱིའི་ཐ་སྙད་ཐམས་ཅད་རྒྱུན་ཆད་པར་འགྱུར་ཏེ། དེའི་རྒྱུ་མེད་པ་ཅན་ཡིན་པའི་ཕྱིར། དཔེར་ན་རྒྱུ་མེད་པར་འབུར་བཞིན་ནོ་ཞེ་ན། རྗོད་བྱེད་ཀྱི་སྒྲ་རྣམས་ཆོས་ཅན། ཡུལ་ལ་དངོས་སུ་ལྟོས་པ་མེད་དེ། བརྗོད་འདོད་ཙམ་གྱི་དབང་གིས་ཡུལ་ལ་འཇུག་པའི་ཕྱིར། གལ་ཏེ་སྒྲ་རྣམས་དོན་གྱི་སྒོ་ནས་མ་བཞག་པ་དེ་ལྟ་ཡིན་ན། བརྡ་སྤྲོད་པ་བདག་གིས་ཆོས་དང་ཆོས་ཅན་བརྗོད་པའི་སྒྲ་གཉིས་དངོས་པོ་དང་རྫས་བརྗོད་པའི་སྒོ་ནས་སྦྱོར་བ་དོན་མེད་དུ་འགྱུར་ཏེ། དོན་ཐམས་ཅད་སྤྱི་དང་བྲལ་བའི་སོ་སོ་བ་ཡིན་པའི་ཕྱིར་ཞེ་ན་མི་འགལ་ཏེ། དོན་གྱི་ངོ་བོ་ནོག་ལྐོག་ཤལ་ལྟ་བུ་གཅིག་ཉིད་ལ་བ་གླང་མིན་པའི་ཁྱད་པར་གཞན་ཐམས་ཅད་སྤོང་བ་དང་མི་སྤོང་བའི་བརྗོད་འདོད་ཀྱི་སྟོབས་ཀྱིས་སྦྱོར་བས་ན་ཆོས་དང་ཆོས་ཅན་བརྗོད་པའི་སྒྲ་གཉིས་དང་། བ་གླང་ཉིད་དང་། བ་གླང་ཞེས་པ་ལ་སོགས་པ་དངོས་པོ་དང་རྫས་བརྗོད་པའི་སྒྲ་གཉིས་སྦྱོར་བའི་ཕྱིར་རོ། །གཉིས་པ་ལ་རྩོད་པ་དང་ལན་གཉིས། དང་པོ་ནི། རྒྱལ་དཔོག་པ་ན་རེ། གཞན་སེལ་ལ་བརྡ་སྦྱོར་བ་མི་སྲིད་དེ། སྦྱོར་ན་ཤིང་དང་ཤིང་མིན་དེ་ནི་ཕན་ཚུན་རྟོགས་པ་བརྟེན་པའི་ཕྱིར་ན་གང་རུང་གཅིག་མ་གྲུབ་པས་གཉིས་ཀ་འཛིན་པ་མེད་པའི་སྐྱོན་ཡོད་པ་དེས་ནའི་ཕྱིར་ཏེ། སྒྲ་ནི་ཤིང་གི་དངོས་འགལ་གཅོད་པའི་སྒོ་ནས་གཞན་ཤིང་མིན་སེལ་ཞིང་། ཤིང་ལ་འཇུག་པའི་ཕྱིར་རོ། །དེའང་། ཤིང་མ་ཡིན་ལས་ལྡོག་པ་ཡིས། །ཞེས་སོགས་གསུངས་སོ། །འདི་ཡི་ལན་ལ་མགོ་མཚུངས་ཀྱིས་དགག་པ་དང་། དངོས་པོའི་ལན་གཉིས། དང་པོ་ནི། ཤིང་སྤྱི་དངོས་པོ་བ་ལ་བརྡ་སྦྱོར་བ་ཁྱེད་ཀྱི་ལུགས་ལ་ཡང་། ཤིང་བརྡ་དེས་ཤིང་གི་དངོས་འགལ་ཤིང་མིན་གཅོད་དམ་མི་གཅོད། མི་གཅོད་ན་བརྡ་དེ་ལ་བརྟེན་ནས་ཤིང་དེའི་ངོ་བོ་རྟོགས་པ་མི་སྲིད་པར་ཐལ་ཏེ། ཁས་ལེན་དེའི་ཕྱིར། དཔེར་ན་ཤིང་འོན་ཅིག་ཅེས་བརྗོད་པས་ཙནྡན་སོགས་ལ་འཇུག་པ་བཞིན་ནོ། །གཅོད་ན་ཤིང་བརྡའི་སྔ་རོལ་དུ་ཤིང་གི་དོན་འཛིན་ན། ཤིང་བརྡ་སྦྱར་མི་དགོས་པར་འགྱུར་ལ། མི་འཛིན་ན། འགལ་ཟླ་ཤིང་མིན་མི་རྟོགས་པར་འགྱུར་རོ། །ཤིང་མིན་གོ་བ་ཤིང་ལ་རགས་ལས་པས་སོ། །དེས་ན་ཤིང་བླང་དོར་གྱི་ཐ་སྙད་ཐམས་ཅད་ཁྱེད་ལ་མེད་པར་འགྱུར་རོ། །དེ་ལ་སྤྱི་དངོས་སྨྲ་བ་ན་རེ། དངོས་འགལ་ཤིང་མིན་བསལ་ནས་ཤིང་གི་དངོས་པོ་དེ་མི་སྒྲུབ་ལ། འོན་ཀྱང་ཡལ་ག་ལོ་འདབ་དང་ལྡན་པ་གཅིག་མཐོང་བའི་སྒོ་ནས་དེ་ལ་འདི་ཤིང་ཡིན་ནོ་ཞེས་བརྡ་བྱེད་ལ། ཕྱིས་ཐ་སྙད་ཀྱི་དུས་ནའང་ཡལ་ག་དང་ལྡན་པ་དེ་ཉིད་རྟོགས་སོ་ཞེ་ན། འོ་ན་བརྡའི་དུས་ན་འདི་ཡང་ཤིང་ཡིན་གཞན་ཡང་ཤིང་ཡིན་ནོ་ཞེས་མི་ལྡན་རྣམ་གཅོད་དུ་སྦྱོར་རམ། འདི་ཁོ་ན་ཤིང་ཡིན་ཞེས་གཞན་ལྡན་རྣམ་གཅོད་དུ་སྦྱོར། དང་པོ་ལྟར་ན་ཐ་སྙད་ཀྱི་དུས་སུ་རྡོ་ལ་སོགས་པའང་ཤིང་དུ་དོགས་ནས་འདོད་བྱའི་ཤིང་མི་འགྲུབ་པར་ཐལ། བརྡ་དུས་སུ་ཤིང་མ་ཡིན་མ་བཀག་ན་སྟེ་དེ་ཕྱིར་རོ། །གལ་ཏེ་གཉིས་པ་ལྟར་ན་ཤིང་མིན་བཀག་པའི་ཕྱིར། ཐ་སྙད་ཀྱི་ཚེ་དེ་དང་འདྲ་བ་ཐམས་ཅད་ཤིང་དུ་འགྲུབ་བོ། །འོན་ཀྱང་དེ་ནི་གཞན་སེལ་བའི་སྒོ་ནས་བརྡ་སྦྱར་བ་ཡིན་ནོ། །གཉིས་པ་ནི། བརྡའི་སྔ་རོལ་དུ་ཡལ་ག་ལོ་མ་དང་ལྡན་མི་ལྡན་གྱི་དོན་སོ་སོར་མཐོང་ནས་ལྡན་པ་དེ་རྣམས་ལ་རྟོག་པས་རིགས་གཅིག་ཏུ་ཞེན་ཅིང་། ཤིང་མིན་ལས་ཐ་དད་དུ་ཤེས་ཏེ་སེལ་བའི་སྒོ་ནས་ཤིང་གི་བརྡ་བྱེད་ལ། བརྡ་དེ་ཡང་དངོས་སུ་ན་ལོ་འདབ་དང་མི་ལྡན་པའི་དོན་ལས་ལོག་པར་སྣང་བའི་རིགས་ལ་སྦྱོར་བར་བྱེད་ཅིང་། རིགས་དེ་ནི་གཞན་སེལ་ལས་གཞན་མིན་པས་སྒྲོ་བཏགས་ཡིན་མོད། འོན་ཀྱང་རྟོག་པ་ངོ་བོ་ཉིད་ཀྱིས་འཁྲུལ་པས་རང་གི་སྣང་བ་ལ་དོན་དུ་ཞེན་ནས་བརྡ་སྦྱར་ཞིང་ཕྱིས་ཐ་སྙད་ཀྱི་ཚེ་ནའང་དེ་གཉིས་གཅིག་ཏུ་འཁྲུལ་ནས་ཡལ་ག་ལོ་འདབ་དང་ལྡན་པ་ལ་འཇུག་སྟེ། དེ་དང་དེ་མིན་རྒྱུ་དོན་རྣམས། །ཞེས་སོགས་ནས། འཁྲུལ་པས་དངོས་པོ་གཅིག་ལྟར་རྟོགས། །ཞེས་པའི་བར་དང་སྦྱར་རོ། །འོ་ན་སྒྲ་ཐམས་ཅད་གཞན་སེལ་ཁོ་ནས་སྟོན་ན་སྒྲ་ཐམས་ཅད་གཞན་ལྡན་རྣམ་གཅོད་ཁོ་ནས་སྦྱར་དགོས་སོ་ཞེ་ན། རྗོད་བྱེད་ཀྱི་ཚིག་ཀུན་ཆོས་ཅན། ངེས་བཟུང་གི་སྙིང་པོ་ཅན་ཡིན་ཏེ། གཞན་ཤིང་མིན་སོགས་ལས་བཟློག་ནས་ཤིང་སོགས་དེར་འཇུག་པའི་ཕྱིར། དཔེར་ན་བུམ་པར་ཆུ་འོན་ཅིག་ཅེས་བརྗོད་པ་ན། བུམ་པ་ཁོ་ནར་ཆུ་ཁོ་ན་ཁྱེར་ནས་འོང་དགོས་པ་ལྟ་བུའོ། །དེའང་། བློ་དོན་འགའ་ལས་རྣམ་བཟློག་ནས། །ཞེས་སོགས་སོ། །གསུམ་པ་ནི། ཤེས་བྱ་དང་ཡོད་པ་སོགས་ཀྱི་སྒྲའི་གཅད་བྱ་ཤེས་བྱ་མིན་པ་སོགས་མེད་པས་སྒྲ་དེ་ལ་རྣམ་གཅོད་དང་སེལ་འཇུག་ཡོད་པ་འགལ་ལོ་ཞེ་ན། མི་འགལ་ཏེ། ཤེས་བྱ་དེ་ལས་གཞན་ཤེས་བྱ་མིན་པའི་དངོས་པོ་མེད་ན་ཡང་རྟོག་པས་སྒྲོ་བཏགས་པའི་སྒོ་ནས་ཤེས་བྱ་མིན་པ་རྣམ་པར་གཅོད་པ་ཡོད་པའི་ཕྱིར། དེས་ན་ཤེས་བྱ་ལ་སོགས་ཚིག །ཅེས་སོགས་སོ། །བཞི་པ་ནི། གལ་ཏེ་ཁྱེད་ཀྱི་ལྡོག་པའམ་གཞན་སེལ་དེ་དངོས་པོ་ཡིན་ན་སྤྱི་དངོས་པོ་དང་ཉེས་པ་མཚུངས་ལ། དངོས་མེད་ཡིན་ན་ཅི་ཡང་མེད་པས་དེ་ལ་བརྡ་སྦྱར་བ་ལ་དགོས་ནུས་མེད་དོ། །དེས་ན་ལྡོག་པ་སྒྲའི་ཡུལ་དུ་མི་དགོས་སོ། །འདི་ཡི་ལན་ལ། གཞན་ལན་དགག་པ། རང་ལན་བཤད་པ་གཉིས། དང་པོ་ནི། ལྡོག་པ་དངོས་པོར་གྲུབ་མ་གྲུབ་དཔྱོད་པ་འདི་ལ། བོད་རྣམས་ཕལ་ཆེར་ནི། དངོས་པོའི་ལྡོག་པ་སྟེ་དངོས་པོ་མིན་པ་ལས་ལྡོག་པ་དེ་དངོས་པོར་ཡོད་པ་ཡིན་ཏེ། དངོས་པོ་དང་དབྱེར་མེད་གཅིག་ཡིན་པའི་ཕྱིར་ཞེས་འདོད་དོ། །མི་འཐད་དེ། དེ་ལྟ་ཡིན་ན་སྤྱི་དངོས་པོ་བ་ལ་བརྗོད་པའི་སྐྱོན་འདི་ནི་རང་ལ་འཇུག་པ་གདོན་པར་དཀའ་བའི་ཕྱིར། ཇི་ལྟར་ཞེ་ན། ཤིང་མིན་ལས་ལྡོག་པ་དེ། དངོས་པོ་ཡིན་ན་ཤིང་ལས་འོས་མེད་པས་དེ་ཤ་པ་དང་རྫས་གཅིག་གམ་ཐ་དད། གཅིག་ཡིན་ན་གཞན་ཙནྡན་ལ་སོགས་པ་ཤིང་མིན་པར་ཐལ་ཏེ། ཤིང་དེ་ཡི་རང་བཞིན་ཤིང་མིན་ལས་ལྡོག་པ་ནི་ཤ་པ་ལས་གཞན་མིན་པ་སྟེ་ཤ་པའི་རྫས་ཡིན་པའི་ཕྱིར། གཉིས་པ་ལྟར་ཤ་པ་ལས་རྫས་གཞན་པ་ཤིང་ཡིན་ན། ཤ་པ་ཤིང་མིན་པར་ཐལ་ཏེ། ཤིང་དེ་ཡི་རང་བཞིན་ཤིང་མིན་ལས་ལྡོག་པ་ནི་ཙནྡན་ལས་རྫས་གཞན་མིན་པར་ཙནྡན་གྱིས་རྫས་ཡིན་པའི་ཕྱིར། རྡོའི་དུམ་བུ་བཞིན་ནོ། །དེའང་། དེ་ཉིད་ཕྱིར་འདི་དོན་དམ་མིན། །ཞེས་སོགས་གསུངས་སོ། །དེས་ན་ཆོས་ཀྱི་གྲགས་པའི་གཞུང་བཟུང་ནས་བདག་ཉིད་ཆེན་པོའི་ལྡོག་པ་དངོས་མེད་ཀྱི་རིགས་པ་འགོག་པ་ནི་ནགས་ལ་གནས་པའི་སྤྲེའུ་དག་ལྗོན་པའི་ཤིང་ལ་མི་གཙང་བ་འཐོར་བ་དང་མཚུངས་ཞེས་བྱ་བ་བར་སྐབས་ཀྱིས་ཚིགས་སུ་བཅད་པའོ། །གཉིས་པ་རང་ལན་ནི། གཞན་སེལ་ལ་ནི་སྤྱི་དང་བྱེ་བྲག་གཅིག་དང་ཐ་དད་དཔྱད་པའི་སྐྱོན་འདི་མེད་དེ་གཞན་སེལ་ལམ་ལྡོག་པ་དངོས་པོར་མ་གྲུབ་ཅིང་། རྟོག་བློ་ཡི་འཇུག་ཚུལ་དཔྱད་པ་ན་གསལ་བའི་དངོས་པོ་ཀུན་ལ་དེ་མིན་ལས་ལྡོག་པ་དེ་ཡོད་པའི་ཕྱིར། དཔེར་ན་སྐྱེས་བུའི་ཁ་དོག་ཐ་དད་ཀྱང་གྲིབ་མའི་ཁ་དོག་གཅིག་ཏུ་སྣང་བ་བཞིན་ནོ། །དེའང་། ལྡོག་པ་ངོ་བོ་ཉིད་མེད་ཕྱིར། །ཞེས་སོགས་གསུངས་སོ། །སྒྲ་ཐམས་ཅད་སེལ་བས་འཇུག་པ་དེས་ན་ཤིང་ཞེས་པའི་སྒྲ་གཅིག་བརྗོད་ན་ཡང་དེ་ལ་ཤིང་མིན་དགག་པ་དང་ཤིང་སྒྲུབ་པའི་ནུས་པ་རྣམ་པ་གཉིས་ཡོད་ཀྱི་བྱ་བ་དོན་གཞན་གཉིས་ནི་མེད་དོ། །དེའང་ཕྱེད་དང་བཞི་པ་ལས། དེ་ཉིད་ཀྱི་ཕྱིར་སྒྲ་དེ་ལས་གཞན་པ་ལྡོག་པ་དང་རང་གི་དོན་བརྗོད་པ་དང་བྱ་བ་གཉིས་ནི་མེད་དོ་ཞེས་གསུངས་སོ། །འོ་ན་ནུས་པ་གཉིས་པོ་དེས་ལོག་ལྡོག་སྟོན་པའི་སྒྲ་གཉིས་དངོས་སུ་བྱེད་པའི་བྱེད་པ་པོར་མི་འགྱུར་རམ་ཞེ་ན། མི་འགྱུར་ཏེ། ལོག་ལྡོག་གི་ཆོས་གཉིས་ངོ་བོ་གཅིག་པ་མི་སྲིད་ཅིང་། ལྡོག་པ་ལ་ངོ་བོ་མ་གྲུབ་པས་སོ། །དེས་ན་བློ་ཆོས་དང་དོན་ཆོས་གཅིག་ཏུ་འཁྲུལ་ནས་ལྡོག་པ་བརྗོད་པའི་སྒྲ་དེ་ཉིད་ཀྱིས་ནི་ལོག་པའི་དངོས་པོ་གྲུབ་པ་སྟེ་གོ་བར་གསུངས་ཏེ། སྒྲ་གཉིས་བྱེད་པའང་མ་ཡིན་ཏེ། །ཞེས་སོགས་གསུངས་སོ། །ལྔ་པ་ནི། བྱེ་བྲག་པ་ན་རེ། གསལ་བ་ཐ་དད་པ་རྣམས་ལ་གཞི་གཅིག་གི་སར་སྦྲེལ་བར་བྱེད་པའི་སྤྱི་དངོས་པོ་བ་མེད་ན། ཨུཏྤལ་སྔོན་པོ་ལ་སོགས་པ་གཞི་མཐུན་མེད་པར་འགྱུར་ཏེ། ཨུཏྤལ་དང་སྔོན་པོ་སོགས་ཀྱི་ཆོས་ཐ་དད་པ་རྣམས་གཞི་གཅིག་ལ་མི་འདུ་བས་སོ་ཞེ་ན། ཨུཏྤལ་ལས་གཞན་པའི་སྔོན་པོ་དོན་ལ་ཡོད་པ་མིན་ཡང་སྔོན་པོ་དང་ཨུཏྤལ་ལ་ནི་རྟོག་པའི་ངོར་གཞི་མཐུན་ཉིད་དུ་འགྱུར་ཏེ། སེལ་བའི་ངོར་སྔོ་མིན་གཅོད་པའི་སྔོ་སོགས་ཀྱི་སྒྲས་ཨུཏྤལ་ལ་མི་གཅོད་པས་ཨུཏྤལ་ལའི་སྟེང་དུ་སྔོན་པོའི་ལྡོག་པ་དབྱེ་ཞིང་། ཨུཏྤལ་ལ་ནི་སྔོན་པོའི་རྟེན་བྱེད་པའི་ཆོས་ཅན་གཅིག་ཏུ་བསྡུས་ཏེ་སྣང་བའི་ཕྱིར། གཞི་མཐུན་དེ་དབང་པོའི་ཤེས་པའི་སྤྱོད་ཡུལ་མིན་ཏེ། དེ་སྒྲོ་བཏགས་གང་ཞིག་དབང་ཤེས་ནི་དོན་རང་མཚན་ཁོ་ན་ལ་འཇུག་པའི་ཕྱིར། དེའང་། དེ་ཚེ་བློ་ཡི་ངོར་བྱས་ནས། །ཞེས་སོགས་གསུངས་སོ། །གཉིས་པ་ཤེས་པའི་ཆེ་བ་བརྗོད་པའི་སྒོ་ནས་དོན་བསྡུ་བ་ནི། སྒྲུབ་པ་དང་གཞན་སེལ་རྣམ་དག་གི་ཡུལ་ཅན་གྱི་བློ་གྲོས་ཤིན་ཏུ་གསལ་བ་མིག་ལྟ་བུ་དང་ལྡན་པའི་རྟོག་གེ་པ་དེ་ཤེས་བྱ་ཡི་དེ་ཉིད་ལྟ་བ་ལ་ཀུན་མཁྱེན་དང་འདྲ། ཞེས་བྱ་བ་བར་སྐབས་ཀྱི་ཚིགས་སུ་བཅད་པའོ། །ཚད་མ་རིག་པའི་གཏེར་ལས་སྒྲུབ་པ་དང་གཞན་སེལ་བརྟགས་པའི་རབ་ཏུ་བྱེད་པ་བཞི་པའི་རྣམ་བཤད་དོ།། ༈ །།གསུམ་པ་བརྗོད་བྱ་རྗོད་བྱེད་རྟོགས་པའི་ཚུལ་ལ། རྣམ་གཞག་རྒྱས་པར་བཤད་པ། མི་སླུ་བར་བསྟན་པས་དོན་བསྡུ་བ་གཉིས། དང་པོ་ལ། དགག་གཞག་སྤང་གསུམ་ལས། དང་པོ་ལ་རང་མཚན་བརྗོད་བྱར་འདོད་པ། སྤྱི་བརྗོད་བྱར་འདོད་པ་དགག་པའོ། །དང་པོ་ལའང་ཕྱི་རོལ་གྱི་དོན་དང་། ཤེས་པ་རང་མཚན་བརྗོད་བྱར་འདོད་པ་གཉིས། དང་པོ་ནི། བརྡ་སྤྲོད་པ་ལ་སོགས་པ་འགའ་ཞིག་ན་རེ། བུམ་པ་ལ་སོགས་པ་དོན་རང་མཚན་དངོས་ཀྱི་བརྗོད་བྱ་ཡིན་ཏེ། བུམ་པ་འོན་ཅིག་ཅེས་བརྗོད་པ་ན་ཆུ་སྐྱོར་བའི་བྱ་བ་བྱེད་པ་དེ་ཉིད་ལེན་པའི་ཕྱིར་ཞེས་སྨྲའོ། །རང་མཚན་ལ་བརྡ་དངོས་སུ་སྦྱར་མི་ནུས་ཏེ། དོན་རང་མཚན་ཡུལ་དུས་རྣམ་པ་སོ་སོར་ངེས་པ་ནི་མཐའ་ཡས་པའི་ཕྱིར་ནའོ། །ཡང་དེ་ལ་མིག་གིས་ལྟ་བ་དང་། ལུས་ཀྱིས་རེག་པའི་སྒོ་ནས་བརྡ་དངོས་སུ་སྦྱོར་བ་ལ་དགོས་པ་ཡང་མེད། ཕྱིས་ཐ་སྙད་བྱེད་པའི་ཚེ་ན་དང་པོ་བརྡའི་དུས་ཀྱི་རང་མཚན་དེ་རྙེད་པར་དཀའ་སྟེ་དེ་མེད་པའི་ཕྱིར་ཏེ། ཡུལ་དུས་རྣམ་པ་འཆོལ་བའི་ཕྱིར། དེའང་། སྒྲ་རྣམས་ཀྱིས་ནི་བརྡར་བཏགས་སྟོན། །ཞེས་སོགས་གསུངས་སོ། །ཡང་བུམ་པ་འདས་པ་དང་མ་འོངས་པ་སྒྲའི་བརྗོད་བྱ་མིན་པར་ཐལ། གཉིས་པོ་དེ་ལ་རང་མཚན་མེད་པའི་ཕྱིར་རོ། །དེའང་། གལ་ཏེ་དོན་དང་འབྲེལ་ལྡན་ན། །ཞེས་སོགས་གསུངས་སོ། །གཞན་ཡང་། སྒྲ་ཡིས་དོན་རང་གི་མཚན་ཉིད་དངོས་སུ་བརྗོད་པ་ཡིན་ན། མིག་དབང་དང་སྣང་བ་དང་ཡིད་བྱེད་ལ་སོགས་པ་དགོས་པ་མེད་པར་འགྱུར་ཏེ། བརྗོད་པ་ཉིད་ཀྱིས་དོན་རང་མཚན་དངོས་སུ་རྟོགས་པའི་ཕྱིར། དེའང་། དབང་པོའི་བྱ་བ་མེད་པ་ལ། །ཞེས་སོགས་སོ། །གཞན་ཡང་། དབང་པོའི་ཤེས་པས་བརྗོད་བྱ་རྗོད་བྱེད་ཀྱི་འབྲེལ་བ་འཛིན་པ་མི་སྲིད་དེ། དོན་ལ་དེ་གཉིས་ཀྱི་འབྲེལ་བ་མེད་པའི་ཕྱིར། ཡང་དོན་འདིའི་མིང་འདིའོ་ཞེས་སྦྲེལ་བ་ན་གཞན་སེལ་གྱི་བློ་ཡིན་ཏེ། རྣམ་པར་དཔྱོད་པའི་བློ་ཡིན་པའི་ཕྱིར། དེའང་། དེ་འདི་ཞེས་ནི་འབྲེལ་བ་ལ། །ཞེས་སོགས་གསུངས་སོ། །ཡང་དང་པོ་བརྡ་དོན་གྱི་འབྲེལ་བ་བྱེད་པའི་ཚེ་རང་གི་མཚན་ཉིད་བསྟན་མ་བསྟན་གང་ཡིན་ན་ཡང་རུང་བརྡ་ནི་སྤྱི་ལ་སྦྱོར་བར་བྱེད་དེ། ཕྱིས་ཐ་སྙད་ཀྱི་ཚེ་དོན་གོ་བའི་དོན་དུ་བརྡ་འདོགས་ལ། བརྡ་དུས་ཀྱི་རང་མཚན་ཐ་སྙད་ཀྱི་དུས་སུ་མེད་པའི་ཕྱིར་རོ། །དེའང་། མིག་ལ་དོན་སྣང་བ་ལ་ཡང་། །ཞེས་སོགས་གསུངས་སོ། །ཡང་། ལྟོ་ལྡིར་བ་ལ་བུམ་པར་བརྡ་སྦྱར་བ་མེད་ཀྱང་ལྟོ་ལྡིར་བ་མཐོང་ཙམ་གྱིས་དེ་བུམ་པར་རྟོགས་པར་འགྱུར་ཏེ། དབང་པོའི་ཤེས་པས་སྒྲ་དང་འདྲེས་པའི་དོན་འཛིན་པའི་ཕྱིར་ནའོ། །དེའང་། འབྲེལ་པ་མ་བྱས་ཅན་མིན་ཏེ། །ཞེས་སོགས་གསུངས་སོ། །གལ་ཏེ་སྒྲ་དོན་འདྲེས་པ་མེད་ཀྱང་། དབང་པོའི་སྒོ་ལ་རྗེས་སུ་འབྲང་བའི་ཡིད་ཤེས་དེ་བུམ་པ་མཐོང་བ་དང་བུམ་པ་ཞེས་བརྡ་སྦྱོར་བར་བྱེད་པ་གཉིས་འདྲེས་པའི་ཚུལ་གྱིས་རྒྱུན་མ་ཆད་པར་འབྱུང་བས་རྟོག་པ་ཡིན་ལ། འོན་ཀྱང་རྟོག་མེད་དང་འདྲ་བར་མངོན་སུམ་ཡིན་ནོ། །གཞན་དུ་ན་དོན་རྟོགས་པའམ་ངེས་པར་མི་སྲིད་པར་ཐལ་ཏེ། དོན་མཐོང་བ་དང་རྟོག་པ་གཉིས་ཡུལ་ཐ་དད་ཁོ་ན་ལ་འཇུག་པ་ཡིན་པའི་ཕྱིར་རོ། །དེས་ན་མཐོང་བ་ལ་ངེས་པ་མྱོང་བས་གྲུབ་པས་མཐོང་བ་ཉིད་རྟོག་པ་ཡིན་ནོ་ལོ། །འདི་ཡི་ལན་ལ། རྣམ་ཤེས་ཅིག་ཆར་འཇུག་པའི་ལུགས་ལ་བརྟན་པ་དང་། རིམ་གྱིས་འཇུག་པའི་ལུགས་སོ། །དང་པོ་ནི། རྟོག་བཅས་དང་རྟོག་པ་མེད་པའི་ཡིད་གཉིས་ལ་བླུན་པོ་རྣམས་ཀྱིས་གཅིག་ཏུ་ཞེན་ཅིང་འཁྲུལ་པའི་རྒྱུ་ཡོད་དེ། དེ་གཉིས་འཇུག་ཡུལ་གཅིག་ལ་དུས་ཅིག་ཆར་དུ་འཇུག་པའི་ཕྱིར་རོ། །གཉིས་པ་ནི། ཡང་ཁྱེད་རང་ལྟར་ན་ཡང་དེ་གཉིས་ལ་བླུན་པོ་རྣམས་ཀྱིས་གཅིག་ཏུ་ཞེན་པའི་རྒྱུ་ཡོད་དེ། དེ་གཉིས་ཡུལ་ལ་རིམ་གྱིས་འཇུག་ཀྱང་འཇུག་པ་མྱུར་བའི་ཕྱིར། དེའང་། རྟོག་བཅས་རྟོག་པ་མེད་པའི་ཡིད། །ཅེས་སོགས་གསུངས་སོ། །གཉིས་པ་ནི། དོན་ལ་བརྡ་མི་སྦྱོར་ཡང་ཤེས་པ་རང་མཚན་ལ་སྦྱོར་རོ་ཞེ་ན། ཤེས་པ་རང་མཚན་དེ་ལ་བརྡ་དངོས་སུ་སྦྱར་མི་རུང་སྟེ། དོན་རང་མཚན་བརྗོད་བྱར་འདོད་པ་ལ་བཀོད་པའི་སྐྱོན་རྣམས་མཚུངས་པའི་ཕྱིར་ཏེ། དེ་གཉིས་རང་གི་མཚན་ཉིད་དུ་མཚུངས་པ་ཡིན་པ་དེས་ནའི་ཕྱིར་རོ། །གཉིས་པ་སྤྱི་བརྗོད་བྱར་འདོད་པ་ལ་དོན་སྤྱི་དང་། སྒྲ་དོན་གྱི་སྤྱི་བརྗོད་པར་འདོད་པ་འགག་པ་གཉིས། དང་པོ་ནི། བྱེ་བྲག་པ་ན་རེ། རང་མཚན་ལ་སྒྲ་སྦྱོར་ན་སྐྱོན་དེ་ཡོད་ཀྱང་སྒྲ་ཡིས་གསལ་བ་རང་མཚན་མི་བརྗོད་ཀྱི་རིགས་སྤྱི་དོན་གཞན་བརྗོད་པའི་ཕྱིར་ན་གོང་གི་སྐྱོན་དེ་རྣམས་མེད་དོ་ཞེ་ན། དེ་ཡང་མི་འཐད་དེ། གསལ་བ་དེ་ལ་སྤྱི་དོན་གཞན་མེད་པའི་ཕྱིར་དང་། ཡོད་དུ་ཆུག་ནའང་སྤྱི་མི་གསལ་བ་དོན་བྱེད་མི་ནུས་པ་དེ་ལ་བརྡ་སྦྱར་ཡང་དགོས་པ་མེད་དེ། དེ་གསལ་བ་རྣམས་དང་འབྲེལ་བ་མེད་པས་གོ་བར་མི་ནུས་པའི་ཕྱིར་དང་། སྤྱི་དངོས་པོ་ཡིན་ན་རང་མཚན་དང་འདྲ་བར་བརྡ་སྦྱོར་བའི་ནུས་པ་མེད་པའི་ཕྱིར་རོ། །གལ་ཏེ་སྤྱི་རྐྱང་པ་ལ་བརྡ་མི་སྦྱོར་གྱི་སྤྱི་དང་འབྲེལ་བའི་རང་མཚན་ལ་བརྡ་སྦྱོར་བས་རང་མཚན་གོ་བར་འགྱུར་རོ་ཞེ་ན། རང་མཚན་ཉིད་ལ་བརྡ་སྦྱོར་ན་སྤྱི་མི་དགོས་ལ། མ་སྦྱར་ན་སྤྱི་ལ་སྦྱར་ཡང་རང་མཚན་གོ་བའི་ནུས་པ་མེད་པའི་ཕྱིར་ན། ལམ་སྟོན་པ་ལ་སྡོང་དུམ་ལ་འདྲི་བ་ལྟར་དགོས་ནུས་མེད་པའི་སྤྱི་བོར་ལ་རང་གི་མཚན་ཉིད་ལ་བརྡ་དངོས་སུ་སྦྱོར་ཅིག གལ་ཏེ་རང་མཚན་རྣམས་མཐའ་ཡས་པའི་ཕྱིར་བརྡ་དངོས་སུ་སྦྱར་མི་ནུས་སོ་ཞེ་ན། སྤྱི་དང་འབྲེལ་བའི་རང་མཚན་འདི་ལའང་བརྡ་དངོས་སུ་སྦྱོར་མི་ནུས་པར་ཐལ། མཐའ་ཡས་པར་མཚུངས་པའི་ཕྱིར། གཉིས་པ་ནི། དོན་ཤེས་རང་མཚན་དང་དོན་ལ་གནས་པའི་སྤྱི་དངོས་ཀྱི་བརྗོད་བྱར་བྱེད་ན་མུ་སྟེགས་བྱེད་ལ་བཀོད་པའི་སྐྱོན་ཡོད་པས་རྟོགས་པའི་ཡུལ་དོན་གྱི་སྤྱི་ཉིད་དངོས་ཀྱི་བརྗོད་བྱར་གངས་ཅན་པ་འདོད་ལ། ཉན་ཐོས་མང་བཀུར་བ་སོགས་ནི་མིང་དང་མཚན་མ་ཞེས་བྱ་བ་སྒྲ་དང་དོན་དང་ཤེས་པ་ལས་ཐ་དད་པ་བུམ་སོགས་སུ་བརྡ་བཏགས་པ་དང་། དོན་བརྗོད་པའི་རྟེན་དུ་རུང་བ་མི་ལྡན་པའི་འདུ་བྱེད་དངོས་ཀྱི་བརྗོད་བྱར་འདོད་དོ། །འདི་གཉིས་དོན་གཅིག་པས་ཕྱོགས་གཅིག་ཏུ་དགག་སྟེ། མི་ལྡན་པའི་འདུ་བྱེད་ལ་སོགས་ལ་བརྡ་སྦྱར་བས་གཟུགས་ལ་སོགས་པའི་རང་མཚན་རྣམས་ཇི་ལྟར་རྟོགས་ཏེ་མི་རྟོགས་པར་ཐལ། དེ་གཉིས་འབྲེལ་མེད་རྫས་གཞན་ཡིན་པའི་ཕྱིར། དཔེར་ན་བུམ་པ་ཞེས་ནི་བརྗོད་པ་ལས་དེ་དང་འབྲེལ་མེད་ཀྱི་བ་གླང་མི་རྟོགས་པ་བཞིན་ནོ། །དེའང་། མིང་སོགས་འབྲེལ་བ་མེད་པ་ཅན། །ཞེས་སོགས་གསུངས་སོ། །གལ་ཏེ་བུམ་པ་དང་བུམ་པའི་མིང་དང་མཚན་མ་མི་ལྡན་པའི་འདུ་བྱེད་གཉིས་ལ་འབྲེལ་བ་མེད་ཀྱང་གཉིས་ཀ་ལྟོ་ལྡིར་ཞབས་ཞུམ་སོགས་སུ་རྣམ་པ་འདྲ་བ་ལ་གཅིག་ཏུ་འཁྲུལ་ནས་དོན་བུམ་པ་ལ་འཇུག་གོ་ཞེ་ན། བུམ་པ་དང་བུམ་པའི་མིང་མཚན་གཉིས་ཆོས་ཅན། ཡུལ་འགའ་ཞིག་ཏུ་གཅིག་ཏུ་འཁྲུལ་བ་སྲིད་ཀྱི་ཡུལ་ཀུན་ཏུ་གཅིག་ཏུ་འཁྲུལ་བ་མིན་པར་ཐལ། འདྲ་བའི་སྒོ་ནས་གཅིག་ཏུ་འཁྲུལ་བ་ཙམ་ཡིན་པའི་ཕྱིར། དཔེར་ན་ལྷ་བྱིན་འདྲ་བ་གཉིས་ཡོད་ཀྱང་མདུན་མ་ལ་བྱིན་ཅིག་ཅེས་བརྗོད་པ་ན་རྒྱབ་མ་ལ་མི་འཁྲུལ་བ་བཞིན་ནོ། །ཡང་དེ་གཉིས་ཆོས་ཅན། དུས་རེས་འགའ་ཞིག་ཏུ་འཁྲུལ་བ་སྲིད་ཀྱང་། དུས་ཀུན་ཏུ་འཁྲུལ་བ་མིན་པར་ཐལ། རྟགས་སྔ་མའི་ཕྱིར། ལྷ་མཆོད་ལྟ་བུ་ཚེ་མ་གཉིས་ལའང་འདྲ་བས་འཁྲུལ་བས་རེས་འགའ་ལྷ་བྱིན་དང་། རེས་འགའ་མཆོད་སྦྱིན་ལ་འཇུག་པ་ལྟར། འདིར་ཡང་འདྲ་བས་འཁྲུལ་བས་རེས་འགའ་དོན་རང་མཚན། རེས་འགའ་མིང་མཚན་ལ་འཇུག་པར་ཐལ་བའི་ཕྱིར་རོ། །དེས་ན་འདི་གཉིས་ནི་འདྲ་བ་ཙམ་གྱི་སྒོ་ནས་འཁྲུལ་བ་མིན་པར་ཐལ། བུམ་པ་ལ་བརྡ་སྦྱོར་བའི་ཡུལ་དུས་རྟག་ཏུ་གཅིག་ཏུ་འཁྲུལ་བར་འགྱུར་བས་སོ། །དེའང་། གལ་ཏེ་དོན་ལ་མཚུངས་འདྲ་ལས། །ཞེས་སོགས་གསུངས་སོ། །གཉིས་པ་རང་ལུགས་ལ། མཚན་ཉིད། རབ་ཏུ་དབྱེ་བ། དེའི་དོན་གཏན་ལ་དབབ་པའོ། །དང་པོ་ནི། བརྡ་ལས་གོ་བར་བྱ་བ་ནི་བརྗོད་བྱ་དང་། དོན་གོ་བར་བྱེད་པའི་བརྡ་ནི་རྗོད་བྱེད་ཀྱི་མཚན་ཉིད་ཡིན་ནོ། །གཉིས་པ་ནི། འཆད་པ་དང་འཇུག་པའི་དུས་ཀྱི་གང་ཟག་གི་དབྱེ་བས་ཕྱེ་ན་རྣམ་པ་བཞི་ཡོད་དེ། འཆད་དུས་ཀྱི་བརྗོད་བྱ་བརྗོད་བྱེད་གཉིས། འཇུག་དུས་ཀྱི་དེ་གཉིས་ཡོད་པའི་ཕྱིར་རོ། །འཆད་པའི་ཚེ་སྒྲའི་དངོས་ཀྱི་བརྗོད་བྱ་སྒྲ་དོན་དང་། ཞེན་པའི་བརྗོད་བྱ་དོན་རང་མཚན་ཡིན་ལ། དངོས་ཀྱི་བརྗོད་བྱེད་སྒྲ་སྤྱི་དང་། ཞེན་པའི་བརྗོད་བྱེད་སྒྲ་རང་མཚན་ཡིན་ནོ་ཞེས་དེ་ལྟར་རྣམ་པར་ཕྱེ་བས་གནས་ལུགས་ལ་མཁས་པར་འགྱུར་རོ། །དེས་ན་དངོས་ཀྱི་བརྗོད་བྱ་དངོས་མེད་ཁོ་ན་ཡིན་པ་བཞིན་དུ་དངོས་ཀྱི་རྗོད་བྱེད་ཡང་དངོས་མེད་ཉིད་དང་། ཞེན་པའི་རྗོད་བྱེད་རང་མཚན་ཡིན་པ་ལྟར་ཞེན་པའི་བརྗོད་བྱ་ཡང་དངོས་པོ་ལ་འཇོག་པ་ནི་གསུང་རབ་ཀྱི་དགོངས་པར་སྣང་ངོ་། །འཇུག་པའི་ཚེ་དེ་ལྟ་བུའི་དབྱེ་བ་མེད་དེ། དེའི་ཚེ་རང་མཚན་དང་སྤྱི་སོ་སོར་མ་ཕྱེ་བར་གཅིག་ཏུ་འཁྲུལ་བ་ལ་བརྡ་སྦྱར་བས་ཐ་སྙད་ཀྱི་ཚེ་དོན་རང་མཚན་ཐོབ་པ་ཡིན་པའི་ཕྱིར་རོ། །གསུམ་པ་ལ་གསུམ་ལས། དང་པོ་སྒྲའི་དངོས་ཀྱི་བརྗོད་བྱ་མེད་པར་སྒྲུབ་པ་ནི། དམ་པའི་དོན་དུ་ན་བརྗོད་བྱ་ཞེས་བྱ་བ་ཅི་ཡང་མེད་དེ། དོན་དང་ཤེས་པ་ནི་རང་མཚན་ཡིན་པས་བརྗོད་པར་མི་ནུས་ཤིང་། གཞན་འདོད་པའི་དོན་སྤྱི་དང་སྒྲ་དོན་གྱི་སྤྱི་གཉིས་པོ་ནི་དོན་ལ་མེད་པ་ཡིན་པས་དེ་བཞི་བརྗོད་བྱ་མིན་ལ། དེ་དག་ལས་གཞན་པའི་ཤེས་བྱ་མི་སྲིད་པས་སོ། །དེའང་། དོན་རྣམས་ཀྱིས་ནི་སྤྱི་གང་ཡིན། །ཞེས་སོགས་གསུངས་སོ། །གཉིས་པ་གཞི་མེད་ལ་འཁྲུལ་ནས་བརྡ་སྦྱོར་བའི་ཚུལ་ནི། འོ་ན་བརྗོད་བྱ་གང་ཞེ་ན། རྟོག་པ་ངོ་བོ་ཉིད་ཀྱིས་འཁྲུལ་བ་ལ་སྒྲའི་དོན་གྱི་ཚུལ་དུ་ཕྱི་རོལ་གྱི་གཟུགས་བརྙན་ནམ་འོལ་སྤྱི་ཤར་བ་དེ་ལ་ཕྱི་རོལ་དོན་དུ་ཞེན་ཅིང་སྒྲོ་བཏགས་པའི་ཆ་དེ་ནི་སྒྲའི་དངོས་ཀྱི་བརྗོད་བྱར་རྟོག་པས་བཏགས་སོ། །གསུམ་པ་འཁྲུལ་བ་ལ་སྦྱར་བས་རང་མཚན་གོ་བའི་འཐད་པ་ནི། འོ་ན་བཏགས་པ་ལ་སྦྱར་བས་རང་མཚན་ཐོབ་པ་ཅི་ཞེ་ན། བརྡ་སྦྱོར་བའི་རྟོག་པ་འཁྲུལ་ཡང་བརྡ་ལས་དོན་བདེན་པ་ཐོབ་པ་འཐད་དེ། བཏགས་པ་ལ་སྣང་བར་འཁྲུལ་བའི་ཐོག་མ་མེད་པའི་བག་ཆགས་གོམས་པ་ཡིས་བརྡ་ཡི་དུས་ན་སྤྱི་དང་རང་མཚན་སོ་སོར་མ་ཕྱེ་བར་བསྲེས་ནས་བརྡ་སྦྱར་ཞིང་། ཐ་སྙད་དུས་ནའང་སྤྱི་དང་རང་མཚན་སོ་སོར་མ་ཕྱེ་བར་བསྲེས་ནས་འཇུག་པ་དེ་ལྟར་རང་མཚན་གོ་བ་དེའི་ཕྱིར། དེའང་། དེ་ལ་ངོ་བོར་སྣང་བའམ། །ཞེས་གསུངས་སོ། །གསུམ་པ་རྩོད་སྤོང་ལ་ལྔ་ལས། དངོས་པོའི་སྤྱི་བརྗོད་བྱར་འདོད་པ་དང་མཚུངས་པ་སྤང་། ཤེས་པ་རང་མཚན་བརྗོད་བྱར་འདོད་པ་དང་མཚུངས་པ་སྤང་། ལྡན་མིན་འདུ་བྱེད་བརྗོད་བྱར་འདོད་པ་དང་མཚུངས་པ་སྤང་། བརྗོད་བྱ་མེད་ན་ཐ་སྙད་རྒྱུན་ཆད་པར་འགྱུར་བ་སྤང་། ཆད་བྱས་ཀྱིས་གོ་བས་འཁྲུལ་བ་མི་དགོས་པ་སྤང་བའོ། །དང་པོ་ནི། བུམ་པའི་སྒྲ་དོན་དེ་གཞན་བུམ་མིན་ལས་མི་ལྡོག་ན་ལྡོག་པ་བརྗོད་པར་འགལ་ལ། ལྡོག་ན་ནི་དངོས་པོ་བརྗོད་བྱར་འགྱུར་བས་སྤྱི་དངོས་པོ་བ་བརྗོད་པ་དང་མཚུངས་སོ་ཞེ་ན། གཉིས་པོ་དེ་དག་ག་ལ་མཚུངས་ཏེ་མི་མཚུངས་པར་ཐལ། རྣམ་རྟོག་གི་གཟུགས་བརྙན་ནི་དམ་པའི་དོན་ལ་བུམ་མིན་ལས་མི་ལྡོག་ཀྱང་། རྟོག་པ་ལ་ལྡོག་པར་སྣང་བ་ནི་འཁྲུལ་བ་ཡིན་ལ། མུ་སྟེགས་བྱེད་བརྗོད་བྱའི་སྤྱི་ནི་འཁྲུལ་བའི་སྣང་བར་མི་འདོད་པས་སོ། །དེས་ན་མི་མཚུངས་སོ། །དེའང་། རྗེས་འགྲོ་ཅན་སྒྲ་རྗེས་འགྲོ་ཅན། །ཞེས་སོགས་གསུངས་སོ། །གཉིས་པ་ནི། རྟོག་པ་ལ་སྣང་བའི་གཟུགས་བརྙན་སྒྲས་དངོས་སུ་བརྗོད་ན་ནི། དེ་ཤེས་པ་ལས་ཐ་མི་དད་པའི་ཕྱིར་ཤེས་པ་རང་མཚན་བརྗོད་བྱར་འདོད་པ་ལ་བཀོད་པའི་སྐྱོན་རྣམས་འབྱུང་བར་འགྱུར་རོ་ཞེ་ན། མིན་ཏེ། རྟོག་པ་ལ་སྣང་བའི་དོན་གྱི་གཟུགས་བརྙན་ལ་གཉིས་ཡོད་པ་ལས་རྟོག་པ་ལ་སྣང་བའི་རྣམ་པ་ནི་རང་མཚན་ཡིན་ཡང་དེའི་རང་གི་ལྡོག་པ་དངོས་ཀྱི་བརྗོད་བྱ་མིན་ལ། འཁྲུལ་པས་དེ་ལ་དོན་དུ་ཞེན་ཅིང་བརྟགས་པའི་ཆ་དངོས་སུ་བརྗོད་ཀྱང་དངོས་མེད་ཡིན་པའི་ཕྱིར་རོ། །དེས་ན་དངོས་ཀྱི་བརྗོད་བྱ་དངོས་པོར་མེད་མོད། འོན་ཀྱང་རྟོག་པ་ལ་སྣང་བའི་དོན་གྱི་གཟུགས་བརྙན་ལ་བརྡ་སྦྱར་བ་ནི་འཇིག་རྟེན་པ་རྣམས་དོན་རང་མཚན་ལ་འཇུག་པའི་ཕྱིར་དུ་སྦྱོར་བར་ཟད་དོ། །དེའང་། ཕྱི་རོལ་ནུས་པ་རྣམ་དཔྱོད་ལ། །ཞེས་སོགས་གསུངས་སོ། །གསུམ་པ་ནི། སེལ་བའི་སྤྱི་ལ་བརྡ་སྦྱོར་ན། ལྡན་པ་མིན་པའི་འདུ་བྱེད་ལ་བརྡ་སྦྱོར་བ་དང་མཚུངས་སོ་ཞེ་ན། མིན་ཏེ། དོན་སྤྱི་གལ་ཏེ་རྫས་སུ་གྲུབ་ན། མི་ལྡན་པའི་འདུ་བྱེད་ལ་བརྗོད་པའི་སྐྱོན་ཡོད་པས་ཁྱེད་བདེན་མོད་འོན་ཀྱང་དོན་སྤྱི་ནི་དངོས་མེད་ཡིན་པའི་ཕྱིར། དེས་ན་དོན་སྤྱི་དོན་ལ་མེད་པ་དེའི་ཕྱིར་སེལ་བས་འཇུག་པའི་དངོས་ཡུལ་དོན་ལ་མེད་ཅེས་ཤེས་ན་དོན་དམ་པར་བརྗོད་བྱ་རྗོད་བྱེད་མེད་པ་འདི་ཤེས་པར་འགྱུར་རོ། །བཞི་པ་ནི། བརྗོད་བྱ་རྗོད་བྱེད་དོན་ལ་མེད་ན་དོན་སྤྱི་ལ་རང་མཚན་དུ་འཁྲུལ་ནས་བརྡ་སྦྱོར་བར་འདོད་པ་ནི་གསོག་གསོབ་ཡིན་ཏེ། བློ་ཆོས་རྣམས་དོན་ལ་མི་བརྟེན་པར་གསུང་བའི་ཕྱིར། དེས་ན་འཁྲུལ་པ་ལ་ཡིད་བརྟན་དུ་མེད་པ་ཡིན་པའི་ཕྱིར། ཐ་སྙད་མ་ནོར་བ་ཐམས་ཅད་འཇིག་ཅིང་རྒྱུན་ཆད་པར་འགྱུར་རོ་ཞེ་ན་ཐ་སྙད་མ་ནོར་བའི་རྣམ་གཞག་འཐད་པ་ཡིན་ཏེ། འཇིག་རྟེན་པ་རྣམས་དོན་སྤྱི་ལ་རང་མཚན་དུ་འཁྲུལ་པའི་སྒོ་ནས་རང་མཚན་ཉིད་བླང་དོར་ལ་འཇུག་པའི་ཕྱིར། ལྔ་པ་ནི། བོད་རྣམས་ན་རེ། འཁྲུལ་པའི་འབྲེལ་བ་མི་དགོས་ཏེ། དོན་འདིའི་མིང་འདིའོ་ཞེས་ཆད་བྱས་པའི་འབྲེལ་བས་གོ་བའི་ཕྱིར་ལོ། །མིན་ཏེ། ཆད་བྱས་ཀྱིས་འབྲེལ་པ་དེ་ཅི་རང་མཚན་དང་ནི་དོན་སྤྱི་དང་། དེ་གཉིས་གཅིག་ཏུ་འཁྲུལ་པ་སྟེ་གསུམ་པོ་གང་ལ་བརྡ་ཆད་བྱེད། དང་པོ་ལྟར་ན་མུ་སྟེགས་བྱེད་ལ་བརྗོད་པའི་སྐྱོན་འབྱུང་ལ། གཉིས་པ་ལྟར་ན་ཉན་ཐོས་ལ་བརྗོད་པའི་སྐྱོན་ཡོད་ཅིང་། གསུམ་པ་ལྟར་ན་ཁོ་བོའི་འདོད་པ་གྲུབ་ལ། གང་ལྟར་ཡང་མ་འཁྲུལ་བའི་ཆད་བྱས་ཀྱི་འབྲེལ་པ་མུན་སྤྲུལ་ཡིན་ཏེ། གསུམ་པོ་གང་ལ་བརྡ་ཆད་བྱས་ཀྱང་འཁྲུལ་པ་མེད་ན་བརྡ་མི་འབྱོར་བའི་ཕྱིར། འོ་ན་ཁྱེད་ཀྱང་བརྡ་ཆད་བྱེད་པ་མིན་ནམ་ཞེ་ན། བྱེད་མོད་ཀྱི་ངེད་ཀྱི་ལུགས་འདིར་ནི་རང་མཚན་དང་དོན་གྱི་གཟུགས་བརྙན་གཉིས་གཅིག་ཏུ་འཁྲུལ་དུ་གཞུག་པའི་ཕྱིར། རྒན་པོ་རྣམས་ཀྱིས་བརྡ་ཆད་བྱེད་ལ་དེ་ལྟར་འཁྲུལ་ནས་དོན་རང་མཚན་ལ་འཇུག་པར་འགྱུར་ཏེ། དཔེར་ན་སྒྱུ་མའི་མཁན་པོ་དག་འཇིག་རྟེན་དོན་ལ་གཞུག་པའི་རིགས་སྔགས་ཀྱིས་འཁྲུལ་དུ་འཇུག་པ་ལྟར་རོ། །གཉིས་པ་བསྡུ་བ་ནི། སྒྲ་ཡི་དངོས་ཀྱི་བརྗོད་བྱ་སྒྲོ་བཏགས་ཡིན་པས་དོན་ལ་མེད་ལ། ཞེན་པའི་བརྗོད་བྱ་ནི་བླང་དོར་གྱི་ཡུལ་ཡིན་པས་རང་མཚན་ཁོ་ན་ཡིན་ལ། སྒྲ་དོན་གྱི་འབྲེལ་པ་རྟོག་པ་འཁྲུལ་པས་བྱས་པ་ཡིན་ན་ཡང་རང་མཚན་ལ་འཇུག་པའི་སྐྱེས་བུ་སླུ་བ་མེད་དེ། འཇུག་པ་དེ་ལ་བརྟེན་ནས་རང་མཚན་འགྲོ་བའི་ཕྱིར་རོ་ཞེས་བྱ་བ་ནི་བསྡུ་བའི་ཚིགས་སུ་བཅད་པའོ། །ཚད་མ་རིག་པའི་གཏེར་ལས་བརྗོད་བྱ་དང་རྗོད་བྱེད་བརྟག་པའི་རབ་ཏུ་བྱེད་པ་ལྔ་པའི་རྣམ་བཤད་དོ།། ༈ །།བཞི་པ་འབྲེལ་པ་དང་འགལ་བའི་རྟོགས་ཚུལ་ལ། ཚད་མའི་སྔོན་དུ་འགལ་འབྲེལ་འཆད་པའི་རྒྱུ་མཚན། རྒྱུ་མཚན་ཅན་གྱི་འགལ་འབྲེལ་ཉིད་བཤད་པའོ། །དང་པོ་ནི། ཚད་མའི་མཚན་ཉིད་དེ་རང་བཞིན་དཔྱོད་པ་ཡི་སྔོན་དུ་འགལ་འབྲེལ་གཉིས་པོ་དཔྱད་པར་བྱ་སྟེ། ཚད་མ་ཡིན་མིན་ལ་སོགས་པ་དགག་པ་དང་སྒྲུབ་པ་ཇི་སྙེད་པ་ཐམས་ཅད་འགལ་འབྲེལ་ཉིད་ལ་ལྟོས་པས་ནའོ། །གཉིས་པ་ལ་འབྲེལ་པ་དཔྱད། འགལ་བ་དཔྱད་པ་གཉིས། དང་པོ་ལ། དོན་ལ་འབྲེལ་པ་དགག བློ་ངོར་འབྲེལ་པ་བསྒྲུབ། འབྲེལ་པ་སྒྲུབ་པའི་ཚད་མའོ། །དང་པོ་ལ་འབྲེལ་པ་སྤྱིར་དགག་པ་དང་། སོ་སོར་དགག་པ་གཉིས། དང་པོ་ནི། འབྲེལ་པ་དོན་ལ་མེད་དེ། ཤེས་བྱ་ཐམས་ཅད་དངོས་དངོས་མེད་གཉིས་སུ་ངེས་པ་ལས། དངོས་པོ་ཐམས་ཅད་ལ་དོན་ལ་འབྲེལ་པ་མེད་པ་ཡིན་ཏེ། དངོས་པོ་ལ་རང་གཞན་གཉིས་ལས་རང་གི་ངོ་བོ་ལ་གཞན་མ་འདྲེས། གཞན་གྱི་ངོ་བོ་ལ་རང་མ་འདྲེས་པར་གནས་ཤིང་བར་ན་ཕུང་གསུམ་མེད་པའི་ཕྱིར། དེས་ན་རང་མཚན་རེ་རེ་བ་རྣམས་ལ་དོན་ལ་འབྲེལ་པ་མེད་དེ། གྲངས་ཅན་ལྟར་ཆོས་གཉིས་ལ་སོགས་པ་དུ་མ་གཅིག་ཏུ་འདྲེས་པ་མི་སྲིད་ཅིང་། ཆོས་གཅིག་ལ་རང་ཉིད་རང་དང་འབྲེལ་པ་མི་སྲིད་པས་སོ། །དེའང་འབྲེལ་བརྟགས་ལས། གཞན་དབང་ཁོ་ནར་འབྲེལ་པ་ནི། །གྲུབ་ན་གཞན་དབང་ཅི་ཞིག་ཡིན། །དེ་ཕྱིར་དངོས་པོ་ཐམས་ཅད་ཀྱི། །འབྲེལ་པ་ཡང་དག་ཏུ་ན་མེད། །ཅེས་སོགས་གསུངས་སོ། །བླུན་པོ་འགའ་ཞིག དངོས་པོར་མ་ཟད་དངོས་མེད་ལ་ཡང་དངོས་འབྲེལ་ནི་ཡོད་དེ། གཞན་དུ་ན་གཅིག་དུ་བྲལ་གྱི་རྟགས་ལ། སྒྲུབས་ཆོས་དངོས་པོར་མེད་པས་དངོས་འབྲེལ་མི་སྲིད་ཅིང་། དགག་ཆོས་དོན་ལ་མེད་པས་བཟློག་འབྲེལ་ཡང་མེད་པས་འབྲེལ་པ་གཏན་མེད་ཀྱི་རྟགས་ཡོད་པར་འགྱུར་རོ། །དེས་ན་དངོས་མེད་ལ་དངོས་འབྲེལ་ཡོད་ལ་འོན་ཀྱང་དེ་ངེས་མི་ནུས་པས་བཟློག་འབྲེལ་ངེས་པ་ལ་ལྟོས་སོ་ཞེས་སྨྲའོ། །འདི་ནི་མི་འཐད་དེ། དངོས་མེད་ངོ་བོ་མེད་པ་ལ་བདག་གཅིག་པའི་དངོས་འབྲེལ་ཡོད་ན་རང་བཞིན་གྱིས་དངོས་པོ་དང་། དེ་ལས་བྱུང་བའི་དངོས་འབྲེལ་ཡོད་ན་འབྲས་བུའི་དངོས་པོར་འགྱུར་བའི་ཕྱིར་རོ། །ཡང་དངོས་པོ་དང་དངོས་མེད་གཉིས་ཀ་ལ་འབྲེལ་བའི་མཚན་ཉིད་དོན་དམ་པར་མ་གྲུབ་སྟེ། ཆོས་གང་ཞིག་ཆོས་གཞན་དེ་མི་འདོར་བ་ནི། ཆོས་གཞན་དེ་དང་འབྲེལ་པ་རྣམས་ཀྱི་སྤྱིའི་མཚན་ཉིད་ཡིན་ལ། དེ་དངོས་པོ་དངོས་མེད་གཉིས་ཀ་ལ་མེད་པའི་ཕྱིར་ཏེ། དངོས་པོ་རྣམས་ནི་ཕན་ཚུན་འདྲེ་བ་མེད་པའི་ཕྱིར་དང་། དངོས་མེད་རྣམས་ནི་ངོ་བོ་མེད་པའི་ཕྱིར་ན་དེ་མེད་དོ། །དེའང་འབྲེལ་བརྟག་ལས། འགའ་ཡང་འབྲེལ་པའི་མཚན་ཉིད་ནི། །གཉིས་ལ་གནས་ཀྱི་གཞན་དུ་མིན། །ཞེས་སོགས་གསུངས་སོ། །འབྲེལ་པའི་སྒྲ་དོན་ཡང་དོན་ལ་མེད་དེ། སངས་རྒྱས་པ་དང་ཕྱི་རོལ་པ་གཉིས་ཀས་འབྲེལ་པའི་སྒྲ་སམ་བྷནྡྷ་ཞེས་བྱ་བ་ཡང་དག་པར་བཅིངས་པའམ། པྲ་ཏི་བྷནྡྷ་ཞེས་བྱ་བ་ཡང་སོ་སོར་བཅིངས་ཤིང་གཉིས་ཕན་ཚུན་མི་གཏོང་བ་ལ་འདོད་ལ། དེ་དག་ཀྱང་དངོས་པོ་དངོས་མེད་གཉིས་ཀ་ལ་མ་གྲུབ་བོ། །གལ་ཏེ་སྒྲ་དོན་མ་གྲུབ་མོད། མཚན་ཉིད་གྲུབ་བོ་ཞེ་ན། འདིར་བདེན་གཉིས་ཀྱི་མིང་དོན་དང་མཚན་ཉིད་ལྟར་འབྲེལ་བའི་མིང་དོན་དང་མཚན་ཉིད་གཅིག་པའི་སྐབས་ཡིན་ནོ། །འདི་ལ་དགོངས་ནས་མདོ་ལས། ཆོས་ཐམས་ཅད་འབྲེལ་པ་མེད་པ་ཞེས་གསུངས་སོ། །གཉིས་པ་སོ་སོར་དགག་པ་ལ་བདག་གཅིག་པའི་འབྲེལ་པ་དགག དེ་ལས་བྱུང་བའི་འབྲེལ་པ་དགག འབྲེལ་པ་གཞན་བཀག་པར་གྲུབ་པ་དང་གསུམ། དང་པོ་ནི། བྱས་པ་དང་མི་རྟག་པ་གཉིས་ལ་དོན་གྱི་སྟེང་ན་འབྲེལ་པ་མེད་དེ། གང་བདག་ཉིད་གཅིག་ཡིན་པ་རྣམས་ལ་དོན་ལ་ཆོས་གཉིས་མེད། གང་ཆོས་གཉིས་མེད་པ་རེ་རེ་བ་རྣམས་ལ་འབྲེལ་པ་མི་སྲིད་པ་དེས་ནའི་ཕྱིར། དེ་ཡི་ཚུལ་ཡང་། ཤེས་བྱ་ཐམས་ཅད་དངོས་པོ་དངོས་མེད་དུ་ཁ་ཚོན་ཆོད་པ་ལས་དངོས་མེད་ནི་རང་ཉིད་དོན་ལ་མེད་པས་དེ་ལ་བདག་གཅིག་གི་འབྲེལ་པ་དོན་ལ་མ་གྲུབ། དངོས་པོ་ལ་རྫས་གཅིག་དང་ཐ་དད་གཉིས་ལས་ཐ་དད་ལ་བདག་གཅིག་གི་འབྲེལ་པའི་དོན་མི་གནས། རྫས་གཅིག་ལ་ཡང་ལྡོག་པ་གཅིག་དང་ཐ་དད་གཉིས་ལས་དང་པོ་ལ་འབྲེལ་པའི་དོན་མི་གནས། ཕྱི་མ་ལ་འབྲེལ་པ་དོན་ལ་ཡོད་ན་ལྡོག་པ་ཐ་དད་དོན་ལ་ཡོད་དགོས་ལ་དེ་ལྟར་ན་ལྡོག་པ་རྫས་སུ་གྲུབ་པར་ཐལ་བའི་ཕྱིར་རོ། །ཡང་གྲངས་ཅན་དང་། བོད་འགའ་ཞིག་ཁ་མཐུན་པར། སྒྲ་བྱས་མི་རྟག་པ་གསུམ་དོན་ལ་བདག་གཅིག་དུ་འབྲེལ་ཏེ། གལ་ཏེ་སྒྲ་ལ་བྱས་པ་མི་རྟག་པའི་ལྡོག་པ་ཐ་དད་དོན་ལ་མ་གྲུབ་ན། ཚུལ་གསུམ་གྲུབ་པ་མི་སྲིད་པས་དོན་ལ་དགག་སྒྲུབ་མི་ནུས་ཏེ། བློའི་ཆོས་རང་དགའ་བ་རྣམས་དོན་དང་མ་འབྲེལ་པའི་ཕྱིར་ཞེ་ན། བྱས་མི་རྟག་རྫས་གཅིག་པར་ནི་དོན་མཐུན་མོད། ལྡོག་པ་རྣམས་དོན་ལ་ཡོད་པ་མི་འཐད་དེ། གལ་ཏེ་ཡོད་ན་བྱས་མི་རྟག་ལྡོག་པ་ནང་ཕན་ཚུན་རྣམས་འབྲེལ་ལམ་མ་འབྲེལ། མ་འབྲེལ་ན་བྱས་པ་སྒྲ་ལ་མི་རྟག་པ་སྒྲུབ་པའི་རྟགས་མིན་པར་འགྱུར་ལ། འབྲེལ་ན་ཡང་བདག་གཅིག་ཏུ་འབྲེལ་ན་རྫས་དང་ལྡོག་པ་གཉིས་ཀ་ཡང་གཅིག་པས་ཐ་དད་དུ་འདོད་ཀྱང་དོན་ལ་ཁྱད་པར་མེད་ལ། ཁྱད་པར་མེད་པ་ལ་མིང་དུ་མ་བཏགས་ན་མིང་རྣམ་གྲངས་པར་སོང་གི་ལྡོག་པ་ཐ་དད་དུ་མ་སོང་ངོ་། །གལ་ཏེ་དེ་བྱུང་དུ་འབྲེལ་ན་རང་བཞིན་གྱི་རྟགས་སུ་མི་འགྱུར་གྱི་འབྲས་བུའི་རྟགས་སུ་འགྱུར་རོ། །གཉིས་པ་དེ་བྱུང་གི་འབྲེལ་པ་དོན་ལ་དགག་པ་ལ། རྒྱུ་འབྲས་ཀྱི་རྫས་ལ་འབྲེལ་པ་དགག རིགས་ལ་འབྲེལ་པ་དགག་པ་གཉིས། དང་པོ་ལ། རྒྱུ་འབྲས་རིམ་གྱིས་པ་ལ་དགག རྐྱང་པ་ལ་དགག ལྟོས་པ་ལ་དགག་པའོ། །དང་པོ་ལ་གཉིས་ལས། དང་པོ་སྔ་ཕྱི་ལ་མི་འཐད་པ་ནི། དོན་དམ་པར་ན་དངོས་པོ་དང་དངོས་མེད་གང་ལའང་དེ་ལས་བྱུང་བའི་འབྲེལ་པ་མེད་དེ། སྔ་ཕྱི་མིན་པ་དུས་མཉམ་པ་རྣམས་ལ་དེ་ལས་བྱུང་བའི་འབྲེལ་པ་མེད་ཅིང་། མེ་དུ་ལྟ་བུ་སྔ་ཕྱི་ཡོད་ནའང་གཅིག་གི་དུས་ན་གང་རུང་གཅིག་མེད་པ་དེས་ནའི་ཕྱིར། དེའང་འབྲེལ་བརྟག་ལས། རྒྱུ་དང་འབྲས་བུའི་དངོས་པོ་ཡང་། །དེ་གཉིས་ལྷན་ཅིག་མི་གནས་པས། །གཉིས་ལ་གནས་པ་ཇི་ལྟར་གྲུབ། །གཉིས་ལ་མི་གནས་ཇི་ལྟར་འབྲེལ། །ཞེས་གསུངས་སོ། །གཉིས་པ་བར་གྱི་སྦྱོར་འབྲེལ་མི་འཐད་པ་ནི། མུ་སྟེགས་བྱེད་ན་རེ། རྒྱུ་མེ་འགག་པ་དང་ནི་འབྲས་བུ་དུ་བ་སྐྱེས་པ་གཉིས་ལ་བར་དེར་སྦྱོར་བའི་འབྲེལ་པ་ཡོད་དོ་ཞེ་ན། མི་འཐད་དེ། བར་གྱི་སྦྱོར་འབྲེལ་དེ་རྟག་ན་ནི་དངོས་པོ་མིན་ལ། དངོས་པོར་མེད་པ་དེ་བྱ་བྱེད་ལས་གྲོལ་བའི་ཕྱིར་གཉིས་སྦྱོར་བའི་བྱེད་པ་པོ་མི་རུང་ངོ་། །གལ་ཏེ་མི་རྟག་ན་ནི། དུ་བ་དང་སྦྲེལ་བར་མི་ནུས་ཏེ། མེ་འགགས་པ་ན་སྦྱོར་འབྲེལ་ཡང་འགགས་ཟིན་པའི་ཕྱིར། གལ་ཏེ་མེ་འགགས་ལ་དུ་བ་མ་སྐྱེས་པའི་བར་དེར་སྦྱོར་འབྲེལ་ཡོད་པར་འདོད་ན། རྒྱུ་འབྲས་མ་འབྲེལ་བ་གཉིས་ཀྱི་འབྲེལ་བྱེད་དུ་མི་འཐད་དེ་འབྲེལ་བྱེད་དེ་ཆོས་གསུམ་པར་ཡོད་པའི་ཕྱིར། ཆོས་གསུམ་པར་ཡོད་ཀྱང་མེ་དུད་ཀྱི་སྦྲེལ་བྱེད་ཡིན་ན་མེ་དུད་གཉིས་སྦྲེལ་བས་ཆོག་གི འབྲེལ་པས་སྦྲེལ་ཅི་དགོས། གལ་ཏེ་མེ་དུད་སྦྱོར་འབྲེལ་གྱི་བར་དུའང་འབྲེལ་པ་གཞན་ཞིག་དགོས་ན་ཐུག་མེད་དུ་འགྱུར་ཏེ། མེ་དང་སྦྱོར་འབྲེལ་དང་། སྦྱོར་འབྲེལ་སྔ་ཕྱི་དང་། སྦྱོར་འབྲེལ་དང་དུ་བའི་བར་དུའང་སྦྱོར་འབྲེལ་གཞན་དགོས་པའི་ཕྱིར། དེའང་འབྲེལ་བརྟག་ལས། ཐ་དད་ཡིན་ན་ཅི་ཞིག་འབྲེལ། །ཐ་དད་མིན་ན་རྒྱུ་འབྲས་གང་། །གཞན་ཞིག་ཡོད་ན་མ་འབྲེལ་གཉིས། །དེ་གཉིས་འབྲེལ་པར་ཇི་ལྟར་བྱེད། །ཅེས་གསུངས་སོ། །གཉིས་པ་ནི། གལ་ཏེ། འབྲེལ་པ་ནི་ཆོས་གཉིས་ལ་ལྟོས་མི་དགོས་ཀྱི་ཕན་ཚུན་མ་ལྟོས་པའི་མེ་དུད་ལ་སོགས་པ་རེ་རེ་བ་རྣམས་གཉིས་ཆར་གྱི་འབྲེལ་པ་གྲུབ་པ་ཡིན་ནོ་ཞེ་ན། མི་འཐད་དེ། འབྲེལ་མེད་ཀྱི་ཆོས་མེད་པར་ཐལ་བ་དང་། ཕན་ཚུན་ལྟོས་མེད་ཀྱི་མེ་དུ་རྐྱང་པ་རེ་རེ་མཐོང་བས་ཀྱང་གཉིས་ཀའི་འབྲེལ་པ་ངེས་པར་འགྱུར་བ་དང་། ཕན་ཚུན་ལྟོས་པ་མེད་ཀྱང་རྒྱུ་འབྲས་ཡིན་ན་འབྲས་རྟགས་དང་། རྒྱུ་མ་དམིགས་པ་ཡང་གོ་བྱེད་མིན་པར་ཐལ་བའི་ཕྱིར་རོ། །དེའང་འབྲེལ་བརྟག་ལས། དེ་མེད་པར་ཡང་ཡོད་པའི་ཕྱིར། །གཅིག་ལ་འདུག་པ་འབྲེལ་པ་མེད། །ཅེས་གསུངས་སོ། །གསུམ་པ་ལ་ཕན་འདོགས་པ་ལ་འབྲེལ་པ་དགག མེད་ན་མི་འབྱུང་བའི་འབྲེལ་པ་དགག་པའོ། །དང་པོ་ནི། ཆོས་གཉིས་ལ་ལྟོས་པའི་འབྲེལ་པ་ཞིག་དོན་དམ་པ་གྲུབ་པ་མི་འགལ་ཏེ། རྒྱུ་འབྲས་གཉིས་ཕན་ཚུན་ལྟོས་ནས་ཕན་འདོགས་བྱེད་དང་གདགས་བྱ་ཡིན་པའི་ཕྱིར་ཞེ་ན། དོན་དམ་པར་རྒྱུ་འབྲས་གཉིས་ལ་ཕན་བྱ་ཕན་བྱེད་འཐད་པ་དཀའ་སྟེ། དེ་གཉིས་གཅིག་དངོས་པོར་ཡོད་པའི་ཚེ་ཅིག་ཤོས་དངོས་པོར་མེད་པ་ཡིན་པས་དུས་མི་མཉམ་པའི་ཕྱིར། ཐུབ་པ་དང་རིང་འཕུར་བཞིན་ནོ། །དེའང་འབྲེལ་བརྟག་ལས། འདི་ནི་གཞན་དུ་འདུག་པ་ན། །ཅི་སྟེ་དེ་གཉིས་གཅིག་ལ་ལྟོས། །ལྟོས་ལས་ཕན་པ་བྱེད་པར་འགྱུར། །མེད་ན་ཇི་ལྟར་ཕན་པར་བྱེད། །ཅེས་གསུངས་སོ། །གཉིས་པ་ནི། གལ་ཏེ་རྒྱུ་མེད་ན་འབྲས་བུའི་ཐ་སྙད་མི་འབྱུང་བ་ཙམ་ལ་འབྲེལ་པར་འདོད་པ་ཡིན་ནོ་ཞེ་ན། རྭ་གཡས་གཡོན་དང་སོགས་པ་ཕ་རོལ་ཚུ་རོལ་དང་རིང་ཐུང་རྣམས་ཀྱང་འབྲེལ་བར་འགྱུར་ཏེ། རྭ་གཡས་པ་སོགས་ལ་མ་ལྟོས་པར་གཡོན་པར་སོགས་ཀྱི་ཐ་སྙད་མི་འབྱུང་བའི་ཕྱིར་ཏེ། འབྲེལ་བརྟག་ལས། ཅི་སྟེ་དོན་གཅིག་འབྲེལ་བའི་ཕྱིར། །དེ་གཉིས་རྒྱུ་འབྲས་ཉིད་ཡིན་ན། །གཉིས་ཉིད་ལ་སོགས་འབྲེལ་བའི་ཕྱིར། །གཡས་གཡོན་རྭ་ཡང་དེ་གཉིས་འཐོབ། །ཅེས་སོགས་གསུངས་སོ། །ཐ་སྙད་ལྟོས་པ་ཙམ་མིན་གྱི་དོན་ཉིད་ལ་མེད་ན་མི་འབྱུང་བའི་འབྲེལ་པ་ཡོད་དོ་ཞེ་ན། དོན་ལ་མེད་ན་མི་འབྱུང་བའི་འབྲེལ་པ་རྫས་དང་ལྡོག་པ་བརྟགས་པས་ཁེགས་ཏེ། འདི་ལྟར་མེའི་རྫས་མེད་ན་དུ་བའི་རྫས་མི་འབྱུང་བ་ཡིན་ནམ། མེ་ཙམ་གྱི་ལྡོག་པ་མེད་ན་དུ་ཙམ་གྱི་ལྡོག་པ་མི་འབྱུང་བ་གང་ཡིན། དང་པོ་ལྟར་ན། མེའི་རྫས་ལ་གསུམ་ལས་མི་འདའ་བས། ད་ལྟར་མཐོང་བའི་དུ་བ་དེ་འདས་པའི་མེ་མེད་ན་མི་འབྱུང་བ་ཡིན་མོད། འབྲེལ་པ་ལས་དོན་ཐོབ་བྱེད་མིན་ཏེ་འགགས་པའི་ཕྱིར། མ་འོངས་པའི་མེ་ཐོབ་དུ་ཆུག་ནའང་རྒྱུ་མིན་པས་མེད་ན་མི་འབྱུང་བ་མིན་པར་ཐལ། ད་ལྟ་བ་ལ་མེད་ན་མི་འབྱུང་བ་དང་ཐོབ་པ་གཉིས་ཀ་མེད་དེ། དུས་མཉམ་པའི་ཕྱིར་རོ། །གཉིས་པ་ལྟར་མེ་དུད་ཀྱི་རྫས་སོ་སོར་མ་ཕྱེ་བར་ལྡོག་པ་མེད་ན་མི་འབྱུང་བ་ལ་འདོད་ན། དེ་རྟོག་པས་སྦྲེལ་བ་ཡིན་གྱི་དོན་གྱི་འབྲེལ་པར་མི་འཐད་དོ། །གཉིས་པ་ནི། རྒྱུ་འབྲས་རང་གི་མཚན་ཉིད་ལ་འབྲེལ་པ་མེད་ཀྱང་དེའི་རིགས་ལ་འབྲེལ་པ་ཡོད་དོ་ཞེ་ན། རིགས་དེ་ཅི་རྒྱུ་འབྲས་རང་མཚན་ཉིད་ཡིན་ན། སྔར་གྱི་སྐྱོན་ལས་འདས་པ་མེད་དེ། རང་མཚན་དུས་གསུམ་དུ་བརྟགས་ནས་བཀག་ཟིན་པའི་ཕྱིར། དེ་ལས་གཞན་པའི་རིགས་དངོས་པོ་བ་ཡོད་ན་བྱེ་བྲག་ལས་རྫས་ཐ་དད་ན་བྱེ་བྲག་པ་དང་། རྫས་གཅིག་ན་གྲངས་ཅན་ལ་བརྗོད་པའི་སྐྱོན་ཡོད་པའི་ཕྱིར་ཞེས་སྤྱི་དངོས་པོ་བ་འགོག་པའི་སྐབས་སུ་བཀག་ཟིན་ཏོ་སྟེ་དེ་ཕྱིར། གསུམ་པ་ལ་མདོར་བསྟན་པ་དང་། རྒྱས་པར་བཤད་པ་གཉིས། དང་པོ་ནི། འབྲེལ་པ་དོན་ལ་ཡོད་པ་འགོག་པའི་རིགས་པ་འདིས་ནི་ལྡན་པ་དང་། འདུ་བ་དང་། ཁྱད་པར་དང་ནི་ཁྱད་པར་ཅན་དང་། བྱེད་པ་དང་། ཕྲད་པའི་འབྲེལ་པ་ལ་སོགས་པ་རྫས་སུ་གྲུབ་པར་འདོད་པ་བཀག་པ་ཡིན་ནོ། །གཉིས་པ་ལ་ཕྱོགས་སྔ་མ་བརྗོད་པ་དང་། དེ་ཐམས་ཅད་ཕྱོགས་གཅིག་ཏུ་དགག་པ་གཉིས། དང་པོ་ནི། འཁར་གཞོང་ལ་ནི་རྒྱ་ཤུག་བརྟེན་པ་ལྟ་བུ་ངོ་བོ་ཐ་དད་རྒྱུ་འབྲས་སུ་མ་གྱུར་པའི་རྟེན་བརྟེན་པས་སྦྲེལ་བ་དེ་ནི་ལྡན་པའི་འབྲེལ་པའོ་ཞེས་ཟེར་རོ། །སྤྱི་ཤིང་ཙམ་ལ་སོགས་པ་རྟག་པ་གཅིག་པུའི་རྟེན་ལ་ཙནྡན་ལ་སོགས་པའི་མི་རྟག་པ་བརྟེན་པའི་འབྲེལ་པ་ནི་འཕྲོད་པ་འདུ་བའི་འབྲེལ་པ་ཞེས་གྲག་གོ །བྱས་པ་དང་མི་རྟག་པ་ལ་སོགས་པ་ཐ་དད་སྒྲ་དང་འབྲེལ་བའམ། ནོག་ལྐོག་ཤལ་རྭ་དང་རྨིག་བཞི་ལ་སོགས་པ་དཀར་ཟལ་སོགས་དང་འབྲེལ་པའམ། ཐགས་ཀྱི་རྒྱུ་སྤུན་སྣམ་བུ་སོགས་དང་འབྲེལ་པ་སོགས་ཆོས་ཐ་དད་མི་འདྲ་བ་ཐམས་ཅད་དོན་གཅིག་ལ་ནི་འདུ་བའི་འབྲེལ་པ་ཡིན་ཞེས་སྨྲ། དབྱུག་པས་དབྱུག་པ་ཅན་དུ་གོ་བ་ལ་སོགས་པ་ཐ་དད་གཞན་གྱིས་གཞན་གོ་བ་ལ་སོགས་པ་ཐམས་ཅད་ཁྱད་པར་བྱེད་ཆོས་ཀྱི་འབྲེལ་པ་ཞེས་འདོད། འགགས་པའི་རྒྱུ་དང་ད་ལྟར་གྱི་འབྲས་བུ་གཉིས་འབྲེལ་པ་ནི་སྦྱོར་བའི་འབྲེལ་པ་ཡིན་ནོ་ལོ། །བདག་རྟག་པ་དང་བྱ་བ་མི་རྟག་པ་རྣམ་པ་གཉིས་ལ་བྱེད་པའི་འབྲེལ་པ་ཡོད་དོ་ལོ། །མིག་གིས་གཟུགས་ལ་ལྟ་བ་དང་ལུས་ཀྱིས་རེག་བྱ་འཛིན་པ་ལ་ཕྲད་པའི་འབྲེལ་པ་ཡིན་ཞེས་ཟེར། ཁུ་བྱུག་དང་ཁུ་རྟའམ་འཕྱི་བ་དང་བྱ་རྒོད་སོགས་རྗེ་ཁོལ་དང་། ངུར་པ་བཟའ་ཚོལ་ལ་ཁྱོ་ཤུག་དང་ལ་སོགས་པ་སྒྲ་དང་དོན་ལ་བརྗོད་བྱ་རྗོད་བྱེད་ཀྱི་འབྲེལ་པ་སོགས་རྣམ་པར་རྟོག་པས་སྤྲུལ་པའི་འབྲེལ་པ་རྣམས་ཀྱང་དོན་ལ་ཡོད་པ་ཡིན་ཞེས་རྨོངས་པ་སྨྲའོ། །གཉིས་པ་ལ། དོན་ལ་མ་གྲུབ་པ། བློ་ངོར་གྲུབ་ཀྱང་གཞན་དུ་མི་འཐད་པ་གཉིས། དང་པོ་ནི། དེ་དག་མི་འཐད་དེ། དོན་ལ་གྲུབ་པའི་འབྲེལ་པ་འདོད་པ་ནི་གཅིག་དང་ཐ་དད་བརྟགས་པས་ཁེགས་པའི་ཕྱིར་ཏེ། ལྡན་པ་དང་འདུ་བ་ལ་སོགས་པ་དེ་དག་དངོས་པོར་མེད་ན་དངོས་འབྲེལ་མི་སྲིད་ཅིང་། དངོས་པོར་ཡོད་ནའང་གཅིག་ཡིན་ན་ཐ་དད་མེད་ལ་ཐ་དད་ཡིན་ན་འདྲེ་བ་མེད་པས་འབྲེལ་པ་དོན་ལ་བཀག་ཟིན་པས་འདི་དག་ཀྱང་ཁེགས་ཟིན་ཏོ། །གཉིས་པ་ནི། ལྡན་པ་ཅན་ལ་སོགས་པ་ལའང་དོན་ལ་མེད་ཀྱང་ཁྱེད་རང་ལྟར་གཞན་སེལ་གྱིས་སྦྲེལ་ན་བློ་ངོར་བསྒྲུབ་བྱ་གོ་བྱེད་ཀྱི་འབྲེལ་པ་ཡིན་ནོ་ཞེ་ན། མི་འཐད་དེ། ལྡན་པ་ཅན་སོགས་ལ་གནོད་བྱེད་ཡོད་པས་འབྲེལ་པར་མི་རུང་ལ། གལ་ཏེ་གནོད་བྱེད་མེད་ན་འབྲེལ་པ་བློ་ངོར་གྲུབ་མོད་བདག་གཅིག་དེ་བྱུང་གི་འབྲེལ་པ་གཉིས་པོར་འདུས་པས་གཞན་དུ་མི་འཐད་དོ། །གནོད་བྱེད་ཇི་ལྟར་ཡོད་ཅེ་ན། འཁར་གཞོང་དང་རྒྱ་ཤུག་དུས་མཉམ་པ་ལ་ནི་འབྲེལ་པ་མེད་ཅིང་། སྐད་ཅིག་སྔ་མའི་འཁར་གཞོང་ལས་སྐད་ཅིག་ཕྱི་མའི་རྒྱ་ཤུག་སྐྱེ་བ་ནི་དེ་བྱུང་གི་འབྲེལ་པར་འདུས་པའི་ཕྱིར་དང་། བྱས་མི་རྟག་སོགས་སྒྲ་དང་འབྲེལ་པ་ནི་བདག་གཅིག་དང་། ནོག་ལྐོག་ཤལ་སོགས་སྔ་མ་ལས་ཚོགས་པ་ཅན་གྱི་ཕྱི་མ་སྐྱེ་བ་ནི་དེ་བྱུང་དང་། རྒྱུ་སྤུན་གྱི་དུས་སུ་སྣམ་བུ་ནི་སྣང་རུང་མ་དམིགས་པས་ཁེགས་ཤིང་། རྒྱུ་སྤུན་སྔ་མ་ལས་སྣམ་བུ་ཕྱི་མ་སྐྱེ་བ་ནི་དེ་བྱུང་དང་། སྐྱེས་བུ་དང་དབྱུག་པ་དུས་མཉམ་པ་ལ་འབྲེལ་པ་མེད་ཅིང་། སྐད་ཅིག་སྔ་མའི་སྐྱེས་བུ་དང་དབྱུག་པ་ལས་དབྱུག་པ་ཅན་ཕྱི་མ་སྐྱེ་བ་ནི་དེ་བྱུང་གི་འབྲེལ་པར་སྐྱེ་བའི་ཕྱིར་དང་། རྒྱུ་འགགས་པ་དང་འབྲས་བུ་ད་ལྟ་བ་ལ་འབྲེལ་པ་དོན་ལ་མ་གྲུབ་ཅིང་། གཞན་སེལ་གྱི་བློས་སྦྲེལ་བ་ནི་དེ་བྱུང་གི་འབྲེལ་པར་འདུས་ཤིང་། དེ་ལས་གཞན་རྣམས་ལ་ནི་སེལ་ངོར་ཡང་འབྲེལ་པ་མེད་པའི་ཕྱིར་རོ། །གཉིས་པ་ནི། ཆོས་ཀྱི་གྲགས་པས་བོར་པ་ཡི། །ཞེས་སོགས་ཚིགས་བཅད་གཅིག་ནི། བར་སྐབས་ཀྱི་ཚིགས་སུ་བཅད་པའོ། །གཉིས་པ་བློ་ངོར་འབྲེལ་པ་བསྒྲུབ་པ་ལ། བློས་ཇི་ལྟར་སྦྲེལ་བའི་ཚུལ་དང་། དེ་ལ་རྩོད་སྤང་གཉིས། དང་པོ་ནི། དོན་ལ་འབྲེལ་པ་མི་སྲིད་མོད། བློ་ངོར་འབྲེལ་པ་གྲུབ་པར་འཐད་དེ། དཔེར་ན་བུམ་པའི་རང་མཚན་གཅིག་ཉིད་ལ་ཐ་དད་དུ་འབྱེད་པའི་གཞན་སེལ་གྱིས། ལྟོ་ལྡིར་བ་མིན་པ་དང་། སྐད་ཅིག་མ་མིན་པ་དང་། རྒྱུ་རྐྱེན་གྱིས་སྐྱེད་པ་མིན་པ་སྤོང་བའི་རྣམ་པ་ཅན་གྱི་སྒྲ་དང་རྣམ་རྟོག་གི་ཡུལ་ལ་བུམ་པ་དང་མི་རྟག་པ་དང་བྱས་པའི་ལྡོག་པ་གསུམ་དུ་དབྱེ་ལ། དེ་དག་གཅིག་ཏུ་སྡུད་པའི་གཞན་སེལ་གྱིས་གཅིག་ཏུ་བཟུང་བ་ལ་བདག་གཅིག་པའི་འབྲེལ་པ་ཞེས་བཏགས་ལ། དེ་བཞིན་དུ་སྔར་མཐོང་བའི་མེ་དང་། ཕྱིས་མཐོང་བའི་དུ་བ་གཉིས་མེད་ན་མི་འབྱུང་བར་མངོན་སུམ་དང་མ་དམིགས་པ་སྔོན་འགྲོའི་རྟོག་པས་སྦྲེལ་བ་ཡིས་ཆ་ལ་དེ་བྱུང་གི་འབྲེལ་པར་བཏགས་ལ། འབྲེལ་པ་གཉིས་པོ་ལ་བརྟེན་པའི་རྟགས་རྣམས་ཀྱིས་འཇུག་ཡུལ་སྒྲུབ་པའི་ཕྱིར་ཏེ། དེའང་འབྲེལ་བརྟག་ལས། མངོན་སུམ་མ་དམིགས་པ་དག་ལས། །རྒྱུ་དང་འབྲས་བུའི་སྤྱོད་ཡུལ་རྣམས། །འབྲེལ་པའི་དོན་བཞིན་ཡང་དག་དོན། །སྟོན་པའི་རྣམ་རྟོག་ལོག་པ་ཡིན། །ཞེས་གསུངས་སོ། །དེ་དག་ཀྱང་བློའི་ཆོས་རང་དགའ་བས་རྒྱུ་མཚན་མེད་པར་དབྱེ་བསྡུ་བྱས་པ་ནི་མིན་ཏེ། སྒྲ་དང་རྣམ་རྟོག་གི་ཡུལ་ཐ་དད་དང་འཇིག་རྟེན་ལ་ཇི་ལྟར་གྲགས་པའི་ཐ་སྙད་བཞིན་དུ་བྱས་པའི་ཕྱིར་ཏེ། འཇིག་རྟེན་ཇི་ལྟར་གྲགས་དེ་ལ། །ཞེས་སོགས་གསུངས་སོ། །གཉིས་པ་ལ་བློས་བདག་གཅིག་པར་སྦྲེལ་བ་ལ་རྩོད་པ་སྤང་བ། དེ་ལས་བྱུང་བ་ལ་རྩོད་པ་སྤང་བའོ། །དང་པོ་ནི། བྱས་པ་དང་མི་རྟག་པ་དེ་དག་བློས་སྦྲེལ་བ་ལྟར་དོན་ལ་གྲུབ་ན། དོན་ལ་འབྲེལ་བ་མེད་ཅེས་བརྗོད་ཀྱང་ཡོད་པ་ཡིན་པར་འགྱུར་ལ། བློས་སྦྲེལ་བ་དེ་དག་དོན་ལ་མ་གྲུབ་ན་བྱས་པ་དེ་སྒྲ་མི་རྟག་པ་ལྟ་བུ་དོན་གྱི་སྒྲུབ་བྱེད་མིན་པར་འགྱུར་རོ་ཞེ་ན་སྐྱོན་མེད་དེ། རྟོག་པས་བཏགས་པ་ལ་སྒྲ་ལ་བྱས་མི་རྟག་ལྟ་བུ་བློ་ཆོས་དེ་མཐོང་བས་དོན་ཆོས་ལ་འཇུག་ཏུ་རུང་བ་དང་སྒྲ་མ་བྱས་རྟག་པ་ལྟ་བུ་དོན་ཆོས་ལ་མི་འཇུག་པ་སྟེ་རྣམ་པ་གཉིས་ཡོད་པ་ལས་འཇུག་པས་འཇུག་ཡུལ་རང་མཚན་ཐོབ་པ་ཡིན་པས་ན་དེ་ལ་འབྲེལ་བ་ཉིད་དུ་རུང་ཞིང་། ཅིག་ཤོས་མི་ཤེས་པས་འཇུག་ཡུལ་མི་ཐོབ་པས་འབྲེལ་བ་རུང་བ་མིན་པའི་ཕྱིར་ཏེ། ནོར་བུ་སྒྲོན་མེའི་འོད་དག་ལས། །ཞེས་གསུངས་སོ། །གཉིས་པ་ནི། འབྲེལ་ཡུལ་མེའི་སྟེང་ན་འབྲེལ་བ་མེད་ཀྱང་འབྲེལ་ཆོས་དུ་བའི་སྟེང་ན་འབྲེལ་བ་ཡོད་དེ་དུ་བ་འདི་མེ་དེ་མེད་ན་མི་འབྱུང་བ་དོན་ལ་མེད་ན་དུ་བ་དེ་ནི་རྒྱུ་མེད་དུ་འགྱུར་ལ་ཡོད་ན་དེ་ཉིད་དངོས་པོ་ཡི་འབྲེལ་བ་ཉིད་དུ་འགྱུར་བའི་ཕྱིར་ཏེ་ཞེ་ན། དོན་རང་མཚན་གྱི་དུ་བ་དེ་མེ་མེད་ན་མི་བྱུང་བ་ཙམ་ཞིག་ཡོད་མོད་ཀྱི། དེ་ཙམ་གྱིས་འབྲེལ་བ་དོན་ལ་ཡོད་པར་མི་འགྲུབ་སྟེ། སྔར་གྱི་མེ་མེད་ན་ཕྱིས་ཀྱི་དུ་བ་མི་འབྱུང་ཞེས་གཟུང་ནས་སྦྲེལ་བ་ནི་རྟོག་པ་མིན་པས་སྦྲེལ་མི་ནུས་པའི་ཕྱིར་ཏེ། རྣམ་བརྟགས་འབྲེལ་ལ་ཉེས་འདི་མེད། །ཅེས་གསུངས་སོ། །གསུམ་པ་འབྲེལ་བ་སྒྲུབ་བྱེད་ཀྱི་ཚད་མ་ལ། མཚན་ཉིད་སྒྲུབ་ལ། མཚན་གཞི་ངོས་གཟུང་བ། དེ་དག་གང་གིས་ངེས་པའི་ཚུལ་གསུམ་མོ། །དང་པོ་ལ། བདག་གཅིག་པ་དང་། དེ་བྱུང་གི་འབྲེལ་བ་སྒྲུབ་པ་གཉིས། དང་པོ་ནི། ལྡོག་པ་ཐ་དད་དོན་ལ་གཅིག་ཏུ་ཡོད་པར་ཚད་མ་གང་གིས་འགྲུབ་ཅེ་ན། འདི་ལ་ཐ་སྙད་བསྒྲུབ་པ་དང་། དོན་བསྒྲུབ་ཀྱི་འབྲེལ་བ་སྒྲུབ་པ་གཉིས། དང་པོ་ནི། མཚན་ཉིད་ནོག་ལྐོག་ཤལ་དང་མཚོན་བྱ་བ་གླང་གི་མཚན་ཉིད་ཀྱི་བདག་གཅིག་གི་འབྲེལ་བ་ཡང་ནོག་ལྐོག་ཤལ་དང་ལྡན་པ་འདི་ཉིད་བ་གླང་ངོ་ཞེས་མིང་དོན་གཅིག་ཏུ་འཁྲུལ་པས་དངོས་པོ་བདག་གཅིག་པ་ཉིད་དུ་བརྟགས་པས་འགྲུབ་ཀྱི་དེ་ལས་གཞན་དུ་དོན་ལ་མཚན་མཚོན་གཉིས་གཅིག་ཏུ་ཡོད་པ་མིན་ཏེ། མཚོན་བྱ་སྒྲོ་བཏགས་དོན་ལ་མེད་པའི་ཕྱིར། སྤྱི་ཤིང་དང་བྱེ་བྲག་ཤ་པའི་འབྲེལ་བ་ཡང་ལྡོག་པ་ཆིག་རྐྱང་དང་ཉིས་ཚོགས་གཅིག་ཏུ་འཁྲུལ་པས་དེ་གཉིས་དངོས་པོ་སྟེ་བདག་གཅིག་པ་ཉིད་དུ་བརྟགས་པ་སྟེ་བརྡ་ཆད་བྱས་པས་འགྲུབ་ཀྱི་གཞན་དུ་དོན་ལ་སྤྱི་བྱེ་བྲག་རྫས་གཅིག་པ་མིན་ཏེ། དེ་བཀག་ཟིན་པའི་ཕྱིར། གཉིས་པ་ནི། བྱས་ཡོད་དང་མི་རྟག་པ་གཅིག་ཡིན་པར་གང་གིས་འགྲུབ་ཅེ་ན། འདི་ལ་གསུམ་སྟེ། རྩ་བའི་རྟགས་བཀོད་པ། སྦྱོར་བའི་དོན་བཟུང་བ། མ་ངེས་པ་སྤོང་བའོ། །དང་པོ་ནི། གང་ཡོད་པ་དེ་དངོས་པོ་ཡིན་པ་དེ་སྐད་ཅིག་གིས་འཇིག་སྟེ། བུམ་པ་བཞིན། སྒྲ་ཡང་ཡོད་པ་ཡིན་ནོ་ཞེས་པ་ནི་རང་བཞིན་གྱི་རྟགས་སོ། །གཉིས་པ་སྦྱོར་བའི་དོན་ངེས་པར་བྱ་བ་ལ་གསུམ་ཡོད་པ་ནི་རང་འགྲེལ་ལས་ཤེས་སོ། །གསུམ་པ་མ་ངེས་པ་སྤོང་བ་ལ། ལྟོས་མེད་དང་། གནོད་པ་ཅན་གྱི་རྟགས་སོ། །དང་པོ་ལ་རྟགས་དགོད་པ་དང་། དེ་ལ་གནོད་པ་སྤང་བ་གཉིས། དང་པོ་ནི། གང་སྐྱེས་པ་རྣམས་ཁོ་ན་སྐད་ཅིག་གཉིས་པར་མི་སྡོད་པའི་ངང་ཅན་ཡིན་པས་འཇིག་པ་ཡིན་གྱི། དེ་ལ་འཇིག་པར་བྱེད་པའི་རྒྱུ་གཞན་མི་དགོས་ཏེ། སྐད་ཅིག་གཉིས་པ་སྐྱེས་པ་ན་སྐད་ཅིག་དང་པོ་ལ་ཞིག་པ་ཞེས་མིང་གདགས་ཀྱི་བཤིག་ནས་ཞིག་ཅེས་བྱ་བའི་ཆོས་གྲུབ་པ་ཅི་ཡང་མེད་དོ། །རྒྱུ་མེད་ཕྱིར་ན་འཇིག་པ་ནི། །ཞེས་སོགས་གསུངས་སོ། །རྟགས་ནི། ངོ་བོ་གང་རྒྱུ་གཞན་ལ་ལྟོས་པ་མེད་པ་སྟེ། དེའི་ངོ་བོ་ལ་ངེས་པ་ཡིན་ཏེ། རྒྱུ་ཚོགས་པ་ཐ་མས་འབྲས་བུ་སྐྱེས་པ་གཞན་ལ་མི་ལྟོས་པ་བཞིན་ནོ། །དངོས་པོ་འཇིག་པའང་རྒྱུ་གཞན་ལ་ལྟོས་པ་མེད་དོ་ཞེས་བྱ་བ་རང་བཞིན་གྱི་རྟགས་སོ། །གཉིས་པ་ལ་མ་གྲུབ་པ་སྤང་། མ་ངེས་པ་སྤང་། ཧ་ཅང་ཐལ་བ་སྤང་བའོ། །དང་པོ་ནི། བུམ་པའམ་ཤིང་ཡོད་པ་ཙམ་གྱིས་རྒྱུ་དོན་གཞན་ལ་ལྟོས་མེད་ཀྱི་འཇིག་པ་འདི་ནི་མ་གྲུབ་སྟེ། ཐོ་བའམ་མེ་ལྟ་བུ་རྒྱུ་གཞན་ལ་ལྟོས་ནས་དེ་དག་འཇིག་པའི་ཕྱིར་རོ་ལོ། །འཇིག་པར་བྱ་རྒྱུའི་དངོས་པོ་བུམ་སོགས་དང་། ཞིག་ནས་མེད་པ་དངོས་མེད་གཉིས་ཀ་ལ་འཇིག་པའི་སྒྲ་དོན་འཇུག་མོད་ཀྱི་གཉིས་ཀ་ལའང་འཇིག་རྒྱུ་དོན་གཞན་མི་དགོས་ཏེ། དང་པོ་ནི་དངོས་པོ་ཉིད་ཡིན་པས་དངོས་པོའི་རྒྱུ་ལས་གཞན་ལ་མི་ལྟོས་སོ། །གཉིས་པ་ནི། དངོས་མེད་ཡིན་པས་རྒྱུ་གཏན་མེད་ཡིན་པའི་ཕྱིར་རོ། །འདིར་རྣམ་པར་བརྟགས་ལ་དགག་སྟེ། ཐོ་བ་ལ་སོགས་པའི་རྒྱུས་བུམ་པ་འཇིག་པར་བྱེད་ན། འཇིག་པ་དེ་ཅི་དངོས་མེད་ཡིན་ནམ་དངོས་པོ་ཡིན། དང་པོ་ལྟར་ན་རྒྱུ་ལ་མི་ལྟོས་ལ། གལ་ཏེ་ལྟོས་ན་དངོས་མེད་དུ་འདོད་ཀྱང་དངོས་པོར་འགྱུར་ཏེ་མྱུ་གུ་བཞིན་ནོ། །གཉིས་པ་ལྟར་དངོས་པོ་ཡིན་ནའང་། བུམ་པ་རང་ངམ་གཞན་ཡིན། དང་པོ་ལྟར་ན་བུམ་པ་བྱེད་པ་ལ་རྒྱུ་གཞན་ཅི་ཞིག་དགོས་ཏེ་མི་དགོས་པར་ཐལ། རང་གྲུབ་ཟིན་པའི་ཕྱིར་གཉིས་པ་ལྟར་ན་འཇིག་རྒྱུ་ཐོ་བ་དེས་བུམ་པ་ལས་གཞན་ཐོ་བའམ། གྱོ་མོའམ། དེ་གཉིས་ལས་གཞན་ཞིག་བྱེད་པ་རྟགས་གྲང་ངོ་། །ཐོ་བ་རང་ཐོ་བས་བྱེད་པ་མི་སྲིད་ལ། གཉིས་པ་ལྟར་ན་བུམ་པའི་ཉེར་ལེན་དང་། ཐོ་བའི་ལྷན་ཅིག་བྱེད་རྐྱེན་ལས་གྱོ་མོ་སྐྱེ་བར་ཁོ་བོའང་འདོད་ལ། གསུམ་པ་ལྟར་ན་ཕྱིས་རྒྱུ་ཐོ་བ་དེས་བུམ་པ་དེ་མི་འཇིག་པར་ཐལ། གཉིས་ལས་གཞན་ཞིག་བྱས་པས་སོ། །དེས་ན་བུམ་པ་འཇིག་པར་ནི་ཡུ་བུ་གཉིས་ཀ་འདོད་ལ། འཇིག་པ་ལ་རྒྱུ་གཞན་མི་དགོས་པར་ཚད་མས་གྲུབ་པས་འཇིག་པ་རྒྱུ་ལ་ལྟོས་མེད་དུ་གྲུབ་བོ། །དེའང་། དེས་ན་འབྲས་གནས་མེད་པའི་ཕྱིར། །ཞེས་གསུངས་སོ། །གཞན་ཡང་། འཇིག་པ་ཞེས་བྱ་བ་དངོས་པོའི་ངོ་བོ་མེད་པར་བྱེད་པ་ལ་བསམས་ནས་མེད་པ་རྒྱུས་བྱེད་དོ་ཞེས་སྨྲ་ན། དེས་འཇིག་པ་རྒྱུ་གཞན་ལ་ལྟོས་པ་མེད་པར་ཤུགས་ལ་གྲུབ་སྟེ། འདི་ལྟར་དངོས་མེད་རྒྱུ་ཡིས་བྱེད་པ་དང་རྒྱུ་ཡིས་ཅི་ཡང་མི་བྱེད་པ་དོན་མཚུངས་པའི་ཕྱིར་དཔེར་ན་མེད་པ་ལ་ལྟ་བ་དང་བལྟ་རྒྱུ་མེད་པ་བཞིན། དེའང་། དེ་རྒྱུ་ནུས་པ་མེད་ཕྱིར་ཡང་། །ཞེས་གསུངས་སོ། །གཉིས་པ་ལ་རྒྱུ་འབྲས་རིགས་མཐུན་གྱིས་མ་ངེས་པ་སྤང་བ། རྒྱུ་འབྲས་རིགས་མི་མཐུན་གྱི་མ་ངེས་པ་སྤང་བ་གཉིས། དང་པོ་ནི། ལྟོས་མེད་ཀྱི་གཏན་ཚིགས་འདི་ཡང་མ་ངེས་པ་ཡིན་ཏེ། ས་བོན་དང་ཆུ་ལུད་ཀྱི་ཚོགས་པ་ཚང་ན་རྒྱུ་གཞན་ལ་ལྟོས་མེད་དུ་ཟིན་ཡང་མྱུ་གུ་མི་སྐྱེད་པ་མཐོང་བ་བཞིན་ནོ་ལོ། །དཔེ་དེས་མ་ངེས་པ་མིན་ཏེ། ས་བོན་སོགས་ཀྱི་ཚོགས་པ་དེ་དག་ནུས་པ་ཁྱད་པར་ཅན་དུ་འགྱུར་བ་ལ་ལྟོས་པས་ལྟོས་མེད་ཀྱི་རྟགས་མ་ཞུགས་པའི་ཕྱིར། འོ་ན་བྱས་པ་ལའང་འཇིག་པ་ཡོད་དུ་ཟིན་ཡང་དེ་དུས་གཞན་ལ་ལྟོས་སོ་ཞེ་ན། དུས་ལ་ལྟོས་ན་བྱས་པ་དེ་རང་གི་ངང་གིས་འགྱུར་ན་ནི་འཇིག་པ་ཕྱིས་རྒྱུ་གཞན་ལ་ལྟོས་མེད་དུ་གྲུབ་ལ། དེ་ལྟར་མི་འགྱུར་བར་དུས་གཞན་གྱི་བར་དུ་གནས་ན་ནི་སྔར་བཞིན་ཕྱིས་ཀྱང་འཇིག་མེད་དུ་གནས་པར་ཐལ། སྐད་ཅིག་གཉིས་པར་མ་ཞིག་པར་གནས་ན་རྟག་པ་ལས་མ་འདས་པའི་ཕྱིར། གལ་ཏེ་ས་དང་ས་བོན་སོགས་ཀྱི་ཚོགས་པ་འགྱུར་མེད་གཅིག་ཡིན་པས་འགྱུར་བ་ལ་ལྟོས་པའི་གཏན་ཚིགས་འདི་ནི་མ་གྲུབ་པ་ཡིན་ནོ་ལོ། །ཚོགས་པས་ཕྱི་ནས་མྱུ་གུ་སྐྱེད་པ་ལྟར་དང་པོ་ནས་སྐྱེ་བར་འགྱུར་ཏེ། ཚོགས་པ་སྔ་ཕྱི་གཅིག་ཡིན་པའི་ཕྱིར། གལ་ཏེ་ཚོགས་པ་སྔ་ཕྱི་གཅིག་ཉིད་ཡིན་ན་ཡང་དང་པོ་ཚོགས་ཙམ་ནས་མྱུ་གུ་སྐྱེད་པར་མ་ངེས་ཏེ། དེ་ལ་གེགས་ཡོད་པའི་ཕྱིར་ཞེ་ན། ཚོགས་པ་སྔ་ཕྱི་གཉིས་གཅིག་ཏུ་འདོད་ཀྱང་གཉིས་སུ་འགྱུར་ཏེ། གེགས་ཅན་དང་གེགས་མེད་ཐ་དད་ཡིན་པའི་ཕྱིར། གཉིས་པ་ནི། ལྟོས་མེད་ཀྱི་གཏན་ཚིགས་འདི་ནི་མ་ངེས་པ་སྟེ། ནས་མྱུག་གི་རྒྱུ་ཚོགས་སཱ་ལུ་ཡི་མྱུ་གུ་སྐྱེད་པ་ལ་ལྟོས་ནས་ལྟོས་མེད་ཀྱི་རྟགས་ཞུགས་ཀྱང་དེས་སཱ་ལུ་ཡི་མྱུ་གུ་མི་སྐྱེད་པས་ལོ་ཞེ་ན། ལྟོས་མེད་ཡིན་པའི་རྟགས་མ་གྲུབ་སྟེ། ནས་ཀྱི་ས་བོན་དང་ཆུ་ལུད་སོགས་ཀྱི་ཁྲོད་དུ་སཱ་ལུ་ཡི་མྱུ་གུ་སྐྱེ་བ་སཱ་ལུ་ཡི་ས་བོན་ལ་ལྟོས་པའི་ཕྱིར། འོ་ན་བྱས་པའམ་ཡོད་པ་སྟེ་དངོས་པོ་ཡང་སྐད་ཅིག་རེ་རེ་ལ་འཇིག་པ་མིན་ཏེ། འཇིག་པའི་རྒྱུ་ཐོ་བ་སོགས་ལ་ལྟོས་པའི་ཕྱིར་ཞེ་ན། དེ་གཉིས་མི་མཚུངས་ཏེ་ནས་དང་སཱ་ལུ་ཡི་མྱུ་གུ་སྐྱེ་བ་ནི་རང་རང་གི་རྒྱུ་ལ་ལྟོས་ལ། འཇིག་པ་དངོས་པོ་ཡིན་ན་རང་རྒྱུ་ལས་སྐྱེ་བས་རྒྱུ་གཞན་ལ་མི་ལྟོས་སོ། །འཇིག་པ་དངོས་མེད་ཡིན་ན་རྒྱུ་གཞན་མི་དགོས་སོ། །དེས་ན་འཇིག་པ་ལ་བྱེད་པ་པོ་གཞན་མི་དགོས་སོ། །གསུམ་པ་ནི། འཇིག་པ་རྒྱུ་མེད་ཅན་ཡིན་ནའང་། །ཞེས་སོགས་གསུངས་པ་ལྟར་རོ། །རིག་བྱེད་པ་ན་རེ། འཇིག་པ་ལ་རྒྱུ་མེད་ན་དངོས་མེད་དུ་འགྱུར་ལ། དེ་ལྟར་རྟག་པར་འགྱུར་ཞིང་། དེ་ལྟར་ན་བུམ་པ་མི་རྟག་པ་དང་འཇིག་པ་རྒྱུ་མེད་རྟག་པ་དངོས་འགལ་གཉིས་བུམ་པའི་སྟེང་དུ་རྫས་ཏེ་ངོ་བོ་གཅིག་ཏུ་ཡོད་པར་འགྱུར་བ་དང་། རྒྱལ་དཔོག་པ་ན་རེ། གལ་ཏེ་འཇིག་པ་རྒྱུ་མེད་ཡིན་ན་སྔར་ངེད་ལ་བཀོད་པ་ལྟར། འཇིག་པ་དེ་དངོས་པོ་དེ་ཉིད་དུ་ཡོད་དམ། གཞན་ཉིད་དུ་ཡོད། གཉིས་ཀ་ཡང་མི་འཐད་དེ། དང་པོ་ལྟར་ན་ཞིག་པ་དངོས་པོ་ཡིན་པའི་ཕྱི་མ་ཞིག་པར་འགྱུར་ལ། གཉིས་པ་ལྟར་ན་ཤིང་བསྲེགས་པ་དང་། བུམ་པ་བཅོམ་པའི་འོག་ཏུ་དེ་དག་མཐོང་བར་ཐལ་བའི་ཕྱིར་རོ་ཞེས་པ་དང་། བྱས་པའམ་དངོས་པོར་མཚུངས་པ་ལ་རྟག་མི་རྟག་གཉིས་མི་སྲིད་ན། དངོས་པོ་མཉམ་པ་ལ། རང་གི་ཡུལ་དུ་དངོས་པོ་གཞན་སྐྱེ་བའི་གེགས་བྱེད་པའི་བུམ་པ་ལྟ་བུ་ཐོགས་བཅས་དང་། གེགས་མི་བྱེད་པའི་བློ་ཐོགས་མེད་གཉིས་མེད་པར་མཚུངས་ཞེས་པ་ཡིས་ཐལ་བ་གསུམ་གྱིས་ལྟོས་མེད་ཀྱི་སྐབས་འདིར་མི་གནོད་དེ་འདི་ལྟར་ཞིག་པ་ལ་རྒྱུ་མེད་པས་དངོས་མེད་ཡིན་ཡང་ངོ་བོ་ཉིད་ཀྱིས་གྲུབ་པའི་རྟག་པར་མི་འདོད་དེ། དངོས་མེད་ལ་ངོ་བོ་མེད་ལ། ངོ་བོ་ཉིད་ཀྱིས་གྲུབ་པའི་རྟག་མི་རྟག་གི་དཔྱད་པ་དངོས་པོ་ཁོ་ན་ལ་འཇུག་པའི་ཕྱིར། དེས་ན་རྟག་མི་རྟག་ངོ་བོ་གཅིག་པའི་སྐྱོན་ལས་གྲོལ་ལོ། །མེད་པ་རྟག་ཉིད་གང་ལས་ཡིན། །ཞེས་གསུངས་སོ། །ཡང་ཞིག་པ་དངོས་པོར་འདོད་ན་དངོས་པོ་ལ་གཅིག་དང་ཐ་དད་གཉིས་ལས་མི་འདའ་བས་བརྟག་པ་དེ་འཇུག་གི འདིར་འཇིག་པ་ངོ་བོ་མེད་པ་ལ་གཅིག་གམ་ཐ་དད་ཀྱི་སྐྱོན་མི་འབྱུང་སྟེ། དེ་ཡི་ཅུང་ཟད་འགྱུར་མེད་དེ། །ཞེས་སོགས་གསུངས་སོ། །ཡང་མི་མཚུངས་ཏེ། བྱས་པར་སྐྱེས་ཙམ་ཉིད་མི་རྟག་པ་ཉིད་ཡིན་གྱི། དེ་ལ་རྟག་མི་རྟག་ཏུ་སྐྱེད་པའི་རྒྱུ་ཐ་དད་མེད་ལ། ཐོགས་བཅས་ཐོགས་མེད་གཉིས་རྒྱུ་ཐ་དད་ལས་སྐྱེས་པའི་ཕྱིར་ཏེ། ཇི་ལྟར་སྐྱེ་ལྡན་དགའ་ཞིག་ཉིད། །ཅེས་སོགས་དང་། རྒྱུ་ཡི་རང་བཞིན་ངེས་པ་ལས། །ཞེས་སོགས་གསུངས་སོ། །གཉིས་པ་གནོད་པ་ཅན་གྱི་རྟགས་ལ། ཕྱོགས་སྔ་མ་དང་། དེ་དགག་པ་གཉིས། དང་པོ་ནི། དབང་ཕྱུག་པ་ལ་སོགས་པ་ཁ་ཅིག བྱ་རོག་ཕལ་ཆེར་ནག་པོར་མཐོང་ཡང་བརྒྱ་ལ་དཀར་པོ་སྲིད་པ་ལྟར། དངོས་པོའི་ནུས་པ་སྣ་ཚོགས་པས་བུམ་པ་ལ་སོགས་པའི་དངོས་པོར་ཕལ་ཆེར་མི་རྟག་ཀྱང་དབང་ཕྱུག་ལ་སོགས་པའི་དངོས་པོ་འགའ་ཞིག་རྟག་པར་སྐྱེ་བ་མི་འགལ་ལ། དེ་ཕྱིར་བུམ་པ་ལ་སོགས་པ་རྒྱུན་གྱི་མཐར་འཇིག་པར་མཐོང་བ་འདི་དག་ལ་ལྟོས་མེད་ཀྱིས་འགྲུབ་ཀྱང་། དབང་ཕྱུག་སོགས་རང་བྱུང་ཡིན་པས་བྱས་པའི་རྟགས་མ་གྲུབ་ལ་རྟག་པ་ཡིན་པས་ཐ་མར་འཇིག་པ་མ་མཐོང་བའི་ཕྱིར་ལྟོས་མེད་ཀྱིས་མི་རྟག་པར་མི་འགྲུབ་པས་ཡོད་པའི་རྟགས་གྲུབ་ཀྱང་མི་རྟག་པའི་བསྒྲུབ་བྱ་མི་འགྲུབ་བོ། །དེས་ན་མི་མཐུན་ཕྱོགས་ལ་རྟགས་ཞུགས་པས་མ་ངེས་པ་ཡིན་ནོ་ཞེས་ཟེར་རོ། །གཉིས་པ་ལ་བརྟགས་ན་མི་འཐད་པ། དེ་རྟགས་ཀྱིས་སྒྲུབ་པ། རྟགས་དགོད་པའི་རིམ་པའོ། །དང་པོ་ནི། ཁྱེད་རྟག་པར་འདོད་པའི་དབང་ཕྱུག་དེས་དོན་བྱེད་མི་ནུས་ན་ཡོད་པར་མིང་བཏགས་ཀྱང་དངོས་མེད་ཡིན་པའི་ཕྱིར། མིང་ལ་མི་བརྩོད་དེ། ཡོད་པ་དང་རྟག་པའི་གཞི་མཐུན་མེད་པའི་དོན་ལ་མཐུན་པའི་ཕྱིར། གལ་ཏེ་ནུས་ན་དེས་བྱ་བ་བྱེད་པའི་ཚེ་སྔར་གྱི་རང་བཞིན་ལས་འགྱུར་རམ་མི་འགྱུར། འགྱུར་ན་རྟག་པ་ཡིན་པ་ཉམས་ལ། འགྱུར་བ་མེད་ན་བྱ་བ་བྱེད་པ་འགལ་ཏེ། དོན་མི་བྱེད་པའི་སྐབས་ལས་མ་འགྱུར་བའི་ཕྱིར། གཉིས་པ་ལ་རྟགས་དགོད་པ། སྦྱོར་བའི་དོན་ངོས་བཟུང་བ། རྟགས་ཀྱི་རིགས་ངོས་བཟུང་བའོ། །དང་པོ་ནི། གང་དང་གང་དོན་བྱེད་ནུས་པ་མིན་པ་དེ་དངོས་མེད་ཡིན་པས་ཁྱབ། དཔེར་ན་ནམ་མཁའ་བཞིན། དབང་ཕྱུག་ལ་སོགས་པའི་རྟག་པའང་དོན་བྱེད་ནུས་པས་སྟོང་ངོ་ཞེས་པའོ། །གཉིས་པ་ལ་ཆོས་ཅན། བསྒྲུབ་བྱ། གཏན་ཚིགས་སོ། །དང་པོ་ལ་གཉིས་ལས་རང་ལུགས་ནི། ཆོས་ཅན་ནི་དབང་ཕྱུག་རྟག་པ་ལ་སོགས་པའི་སྒྲ་དོན་ལ་རང་མཚན་དུ་བཟུང་བའི་ཆ་གཞན་སེལ་བ་ཡིན་ནོ། །གཉིས་པ་ནི། དངོས་པོའམ་བྱས་པ་བཀག་པའི་མེ་དགག་ཉིད་བསྒྲུབ་བྱའི་ཆོས་ཡིན་ནོ། །གསུམ་པ་ལ། ཕྱོགས་ཆོས་དང་། ཁྱབ་པ་སྒྲུབ་པ་གཉིས། དང་པོ་ལ་དགག་གཞག་སྤང་གསུམ། དང་པོ་ལ། མངོན་སུམ་གྱིས་གྲུབ་པ་དགག རང་རིག་གཅིག་པུས་གྲུབ་པ་དགག་པའོ། །དང་པོ་ནི། ལོ་ཙཱ་བ་ན་རེ། རྟག་པ་ལ་རིམ་དང་ཅིག་ཆར་གྱིས་དོན་བྱེད་ནུས་པས་སྟོང་པའི་ཕྱོགས་ཆོས་མངོན་སུམ་གྱིས་འགྲུབ་སྟེ། དགག་གཞི་རྟག་པ་འགྱུར་མེད་ལ་རྟོག་པ་དང་། དགག་བྱ་དོན་བྱེད་པ་ལ་རྟོག་པའི་རྟོག་པ་གཉིས་འཛིན་སྟངས་འགལ་བར་སྣང་བའི་རང་རིག་གིས་མྱོང་བའི་ཤུགས་ལས་ཡུལ་གཉིས་འགལ་བར་གྲུབ་པས་རྟག་པ་ལ་དོན་བྱེད་ནུས་པ་ཁེགས་པའི་ཕྱིར་ཞེས་ཟེར་རོ། །མི་འཐད་དེ། དགག་པ་བྱེད་པ་ལ་དགག་བྱ་འཛིན་པའི་ཚད་མ་སྐྱེ་བས་ཁྱབ་པ་མི་དགོས་པའི་ཕྱིར་རོ། །གཉིས་པ་ནི། ལ་ལ་སྟེ་གཙང་ནག་པ་ན་རེ། རྟག་པ་ལ་དོན་བྱེད་ནུས་པས་སྟོང་པའི་ཕྱོགས་ཆོས་ནི་རྟག་པ་འགྱུར་མེད་དུ་ངེས་པའི་རྟོག་པ་མྱོང་བའི་རང་རིག་མངོན་སུམ་གཅིག་ཉིད་ཀྱིས་གྲུབ་པ་ཡིན་ཏེ། དེས་རང་གི་ཡུལ་འགྱུར་མེད་ཀྱི་རྣམ་པར་གྲུབ་པས་འགྱུར་བ་ཙམ་ཁེགས་པ་ན་རིམ་དང་ཅིག་ཆར་གྱི་དོན་བྱེད་པ་ཡང་ཁེགས་པའི་ཕྱིར་ལོ། །དེ་ལྟར་ན། མུ་སྟེགས་བྱེད་ལ་རྟག་པ་བྱེད་པ་པོར་འཛིན་པའི་ལོག་པར་རྟོག་པ་ཉིད་ཀྱང་སྐྱེ་མི་སྲིད་པར་འགྱུར་ཏེ། བློ་གཅིག་ཉིད་ཀྱིས་རྟག་པ་ལ་དོན་བྱེད་པ་ཁེགས་པའི་ཕྱིར། གཉིས་པ་རང་ལུགས་ལ་རྟགས་དགོད་པ་ནི། མངོན་སུམ་གྱིས་མ་གྲུབ་པ་དེས་ན་གང་སྐད་ཅིག་གིས་འཇིག་པས་སྟོང་པ་དེ་ལ་དོན་བྱེད་འགོག་པའི་རྟགས་གང་འགྱུར་བ་མེད་པ་དེ་རིམས་དང་ཅིག་ཆར་གྱི་དོན་བྱེད་པ་མེད་དེ་ནམ་མཁའ་བཞིན། དབང་ཕྱུག་ལ་སོགས་པའི་རྟག་པའང་སྐད་ཅིག་གིས་སྟོང་པའི་འགྱུར་མེད་ཡིན་ནོ་ཞེས་བྱ་བའི་རྟགས་འགྲུབ་བོ། །འདིའི་ཕྱོགས་ཆོས་ནི་ཕྱི་རྒོལ་གྱིས་རྟག་པ་འགྱུར་མེད་དུ་ཁས་བླངས་པ་ཉིད་ཡིན་ལ། ཁྱབ་པ་ནི་མཐའ་གཞན་བཀག་པས་འགྲུབ་སྟེ། འདི་ལྟར་ཅིག་ཆར་དོན་བྱེད་ན་གཅིག་ཆར་ལན་གཅིག་བྱས་ནས་འཇོག་ན་བྱེད་པ་དང་འཇོག་པའི་གནས་སྐབས་གཉིས་ལ་ཁྱད་པར་ཡོད་ན་མི་རྟག་པར་ཐལ་ཏེ། འགྱུར་བའི་ཕྱིར་རོ། །ཡང་ལན་གཅིག་ཐམས་ཅད་བྱེད་ན་མ་འོངས་པ་ཐམས་ཅད་ད་ལྟར་གྲུབ་པར་ཐལ། གཅིག་ཆར་བྱས་པའི་ཕྱིར། ཡང་ཕྱིས་བྱེད་ན་གཅིག་ཆར་བྱེད་པ་ཉམས་སོ། །དེ་ཉིད། དོན་བྱེད་ནུས་པ་གང་ཡིན་པ། །ཞེས་སོགས་དང་། དེ་ལ་རིམ་དང་རིམ་མིན་མེད། །འགལ་ཕྱིར་སྐད་ཅིག་མིན་པ་མེད། །ཅེས་སོགས་གསུངས་སོ། །གསུམ་པ་རྩོད་སྤོང་ལ་རྟག་པའི་གནས་སྐབས་ལ་མི་ཁེགས་པ་སྤང་བ། རྟག་པའི་རང་བཞིན་ལ་མི་ཁེགས་པ་སྤང་བ་གཉིས། དང་པོ་ནི། དབང་ཕྱུག་ལ་སོགས་པ་རྟག་པའི་རང་བཞིན་མི་འགྱུར་ཡང་གནས་སྐབས་རྣམས་འགྱུར་བའི་ཕྱིར་ན་དོན་བྱེད་པ་འཐད་དོ་ཞེ་ན། མི་འཐད་དེ། རྟག་པའི་རང་བཞིན་དང་གནས་སྐབས་གཉིས་པོ་གཅིག་ཡིན་ན་འགྱུར་མི་འགྱུར་གྱི་ཆ་གཉིས་འགལ་ལ། ཐ་དད་ཡིན་ན་གནས་སྐབས་མི་རྟག་པས་དོན་བྱེད་ཀྱང་རང་བཞིན་རྟག་པས་དོན་བྱེད་པ་འགལ་ལོ། །གཉིས་པ་ལ། རྟག་པ་སྐད་ཅིག་གིས་འཇིག་པ་མེད་ན་ཡང་རགས་པའི་འགྱུར་བ་ཡོད་ཕྱིར་བྱ་བ་བྱེད་པ་ཡིན་ནོ་ཞེ་ན། རྟག་པ་དེ་དང་པོ་ཉིད་ནས་སྐད་ཅིག་གཅིག་གིས་མི་འཇིག་ན་ཕྱིས་འཇིག་པའི་རགས་པའི་འགྱུར་བ་ག་ལ་སྲིད་དེ་མི་སྲིད་དེ་སྐད་ཅིག་དང་པོ་སྐྱེས་པ་དེ་གཉིས་སུ་སྡོད་ཅིང་གསུམ་དུ་མི་སྡོད་པའི་རང་བཞིན་གཉིས་པར་ཉམས་ན་གཉིས་ཆར་སྡོད་པའི་རང་བཞིན་འགག་པས་སྐད་ཅིག་ཏུ་གྲུབ་ལ། མ་ཉམས་ན་གསུམ་པར་སྡོད་པར་འགྱུར་བ་ལས་མི་སྡོད་པའི་ཕྱིར་གཉིས་པར་སྡོད་པ་གྲུབ་པ་མ་ཡིན་ནོ། །གཉིས་པ་ཁྱབ་པ་སྒྲུབ་པ་ནི། དོན་བྱེད་ནུས་པ་དངོས་པོའི་མཚན་ཉིད་ཡིན་པ་དེ་བཀག་པ་ལ་དངོས་པོ་མེད་པའི་ཁྱབ་པ་འགྲུབ་སྟེ་དཔེར་ན་ནམ་མཁའ་བཞིན་ནོ། །གསུམ་པ་རྟགས་ཀྱི་རིགས་ངོས་བཟུང་བ་ལ། རིགས་གང་ཡིན་པ་དང་། གཉིས་མི་དགོས་པ་སྤང་བ་གཉིས། དང་པོ་ནི། བྱས་ཡོད་ཀྱིས་མཚན་ཉིད་འགོག་ན་དོན་དང་། མཚོན་བྱ་འགོག་ན་ཐ་སྙད་འགོག་པ་ཡིན་ནོ། །གཉིས་པ་ནི། ལྟོས་མེད་དམ་གནོད་པ་ཅན་གང་རུང་གིས་ཁྱབ་པ་བསྒྲུབ་པས་གཉིས་དོན་མེད་དོ་ཞེ་ན། བོད་ཁ་ཅིག་གནོད་པ་ཅན་གྱི་ལམ་སྦྱོང་དུ་ལྟོས་མེད་འཆད་པ་ནི་སློབ་དཔོན་གྱི་དགོངས་པ་མིན་ནོ། །དགོངས་པ་མིན་པ་དེས་ན། མུ་སྟེགས་ཁ་ཅིག་དངོས་པོ་རྣམས་འཇིག་རྒྱུ་དང་ཕྲད་ན་འཇིག་མ་ཕྲད་ན་མི་འཇིག་པར་འདོད་པ་དང་། དབང་ཕྱུག་དང་རིག་བྱེད་ལ་སོགས་པའི་དངོས་པོ་འགའ་ཞིག་གཏན་མི་འཇིག་པར་འདོད་པའི་ལོག་རྟོག་རྣམ་པ་གཉིས་ཀྱི་གཉེན་པོར་རིམ་བཞིན་ལྟོས་མེད་དང་གནོད་པ་ཅན་གྱི་གཏན་ཚིག་རྣམ་པ་གཉིས་གསུངས་ཏེ། སྔ་མ་ལ་འཇིག་པར་ཁས་ལེན་ན་རྒྱུ་གཞན་ལ་ལྟོས་མེད་དུ་རང་གི་ངང་གིས་འཇིག་པར་སྒྲུབ་པ་ཡིན་ཅིང་། གཉིས་པ་ལ་དངོས་པོ་འཇིག་མེད་དེས་དོན་བྱེད་ནུས་མི་ནུས་བརྟགས་ནས་འགོག་པའི་ཕྱིར་རོ། །དེས་ན་འཇིག་པར་ཁས་ལེན་པ་ལ་གནོད་པ་ཅན་མི་འཇུག་མི་འཇིག་པར་ཁས་ལེན་པ་ལ་ལྟོས་མེད་མི་འཇུག་པས་ཡུལ་ཐ་དད་དོ། །གཉིས་པ་དེ་ལས་བྱུང་བའི་འབྲེལ་བ་ངེས་པར་བྱེད་པ་ལ་གཞན་ལུགས་དགག རང་ལུགས་གཞག རྩོད་པ་སྤོང་བ་གསུམ། དང་པོ་ནི། ལོ་ཙཱ་བ་ན་རེ། རྒྱུ་འབྲས་མངོན་སུམ་ཕྲུགས་ལྔ་ལས་ངེས་པར་བྱེད་དེ། དང་པོ་རྒྱུ་འབྲས་གཉིས་ཀ་མ་དམིགས། དེ་ནས་རྒྱུ་དམིགས། དེ་ནས་འབྲས་བུ་དམིགས། དེ་ནས་རྒྱུ་ལོག་པས་རྒྱུ་མ་དམིགས། དེ་ནས་འབྲས་བུ་ལོག་པས་འབྲས་བུ་མ་དམིགས་པས་ངེས་ཞེས་ཟེར། འདི་ཙམ་གྱིས་མི་ངེས་ཏེ། གནས་སྐབས་རྗེས་སུ་འགྲོ་ལྡོག་རྔ་སྒྲ་དང་ཉི་མའི་འོད་ཟེར་ལ་ཡང་ཡོད་པས་དེ་དག་རྒྱུ་འབྲས་སུ་ཧ་ཅང་ཐལ་བ་དང་། རང་བཞིན་རྗེས་སུ་འགྲོ་ལྡོག་གིས་ངེས་ན་ཕྲུགས་གསུམ་དུ་འདུས་པའི་ཕྱིར་ན་འདི་མི་འཐད་པ་ཁོ་ནའོ། །རྒྱུ་ཁ་ཅིག་རྒྱུ་འབྲས་གཉིས་ཀ་མཐོང་བ་ལས་རྒྱུ་མ་མཐོང་། དེ་ནས་འབྲས་བུ་མ་མཐོང་བའི་ཚད་མ་གསུམ་གྱིས་ངེས་ཞེས་ཟེར། མི་འཐད་དེ། རྒྱུ་འབྲས་གཉིས་དུས་གཅིག་ཏུ་མཐོང་བ་མི་སྲིད་ལ། རེས་འཇོག་ཏུ་མཐོང་ན་མཐོང་བ་གཉིས་དང་མ་མཐོང་བ་གཉིས་ཏེ་བཞིར་འགྱུར་བའི་ཕྱིར། གཉིས་པ་ལ་གསུམ་སྟེ། རྒྱུ་འབྲས་སྤྱིའི་མཚན་ཉིད། དེ་ངེས་པར་བྱེད་པའི་ཚད་མ། དེ་དག་ལ་རྩོད་པ་སྤང་བའོ། །དང་པོ་ནི། རྒྱུ་ཡི་མཚན་ཉིད་ཕན་འདོགས་བྱེད་དང་། འབྲས་བུའི་མཚན་ཉིད་ཕན་གདགས་བྱ་ཡིན་ལ། རྒྱུ་ལའང་གཉིས་ལས་ཉེར་ལེན་ནི་འབྲས་བུའི་ངོ་བོ་ལ་གཙོ་བོར་ཕན་འདོགས་བྱེད་དང་། ལྷན་ཅིག་བྱེད་པའི་རྐྱེན་ནི་དེའི་ཁྱད་པར་ལ་གཙོ་བོར་ཕན་འདོགས་བྱེད་དོ། །དེས་ན་ས་བོན་གྱི་མཚན་ཉིད་ཀྱང་རྐྱེན་དང་ཕྲད་ན་འབྲས་བུ་སྐྱེད་ནུས་སོ། །གཉིས་པ་ནི། དེ་བྱུང་འབྲེལ་ངེས་བྱེད་དེ་ཡང་རྗེས་སུ་འགྲོ་ལྡོག་གི་སྒོ་ནས་ཕྲུགས་གསུམ་རྣམ་པ་གཉིས་སུ་ངེས་པར་བྱེད་ལ། དེ་ལ་མ་དམིགས་པ་སྔོན་འགྲོའི་ཕྲུགས་གསུམ་ཁྱད་པར་ཅན་ནི་དང་པོ་ས་ཕྱོགས་དག་པར་མེ་དུད་གཉིས་ཀ་སྣང་རུང་མ་དམིགས་པ་ལས། མེ་མཐོང་བའི་ཚེ་རྟོག་པས་མེའི་གཞན་སེལ་བཟུང་། དེ་ནས་དུ་བ་མཐོང་བའི་རྗེས་སུ་རྟོག་པས་དུ་བའི་གཞན་སེལ་བཟུང་ནས། ད་ལྟར་གྱི་དུ་བ་འདི་སྔར་གྱི་མེ་མེད་ན་མི་འབྱུང་ཞེས་རྟོག་བཅས་ཀྱི་བློས་འབྲེལ་བ་ངེས་པར་བྱེད་དོ། །ཡང་དམིགས་པ་སྔོན་འགྲོའི་ཕྲུགས་གསུམ་ནི། དང་པོ་དུ་བ་སྐྱེ་བ་མཐོང་། དེ་ནས་སྐྱེད་བྱེད་ཀྱི་རྒྱུ་མ་མཐོང་། དེ་ནས་བསྐྱེད་པའི་འབྲས་བུ་མ་མཐོང་བ་སྟེ་གསུམ་མོ། །འདི་ནི་སྔོན་མཐའ་མི་ངེས་པ་དང་། སྔ་མ་ནི་ཕྱི་མཐའ་མ་ཤེས་པ་ལ་འཇུག་གོ །དེའང་རྣམ་ངེས་ལས། གང་ཞིག་མཐོང་ན་མ་མཐོང་མཐོང་། །དེ་མ་མཐོང་ན་མ་མཐོང་བ། །འབྲས་བུ་ཡིན་པ་ཉིད་དུ་ནི། །སྟོན་པའི་སྐྱེ་བོ་མེད་ཀྱང་ཤེས། །ཞེས་གསུངས་པ་ནི། རྗེས་སུ་འགྲོ་ལྡོག་གཉིས་ཀ་ལ་དགོངས་ཏེ། མཐའ་གཉིས་ཀ་ངེས་པ་ལ་སྔ་མས་ངེས་ཟིན་པའི་རྗེས་སུ་ཕྱི་མས་ཀྱང་ངེས་པར་བྱེད་ལ། སེམས་དང་ལྗོན་པའམ་ཡུལ་དང་རྣམ་ཤེས་སོགས་ཕྲུགས་གསུམ་གྱིས་ངེས་མི་ནུས་པ་རྣམས་གཞན་སེལ་ངེས་པ་ཉིད་ཀྱིས་ངེས་ཏེ། རིགས་གང་གང་ལ་གྲུབ་པ་དེ། །ཁྱད་པར་མེད་དེ་མེ་ཤིང་བཞིན། །ཞེས་གསུངས་སོ། །དེ་ལྟར་སྔར་མི་དམིགས་པས་རྒྱུ་གཞན་ལས་སྐྱེ་བ་ཁེགས་ཤིང་འབྲས་བུའི་ལྡོག་པ་གྲུབ་ལ། སྔར་མེད་པ་དང་ཕྱིས་སྐྱེ་བ་དམིགས་པ་གཉིས་ཀྱིས་གཏན་མི་སྐྱེ་བ་དང་། རྒྱུ་མེད་ལས་སྐྱེ་བ་ཁེགས་ཤིང་འབྲས་བུའི་རྗེས་འགྲོ་གྲུབ་པས་རྒྱུའི་མཐའ་གསུམ་ཁེགས་ལ། འབྲས་བུའི་མཚན་ཉིད་རྗེས་སུ་འགྲོ་ལྡོག་གཉིས་གྲུབ་པས་རྗེས་འགྲོ་ཕྲུགས་གསུམ་དང་། དེ་བཞིན་དུ་ལྡོག་པའི་ཕྲུགས་གསུམ་གྱིས་གྲུབ་བོ། །གསུམ་པ་ལ་གཉིས་ལས། དང་པོ་ནི། རྒྱུ་འབྲས་སུ་ངེས་པར་མཚན་ཉིད་སྔར་མ་དམིགས་པས་འབྲས་བུའི་ལྡོག་པ་མི་འགྲུབ་སྟེ། འབྲས་བུ་བལྟར་མི་རུང་བ་སྲིད་པའི་ཕྱིར། དེ་ཙམ་གྱིས་སྐྱེད་པར་མཐོང་བས་ཀྱང་རྒྱུ་གཞན་མི་ཁེགས་ཏེ། རྒྱུ་བལྟར་མི་རུང་བ་སྲིད་པའི་ཕྱིར། བདེ་སྡུག་ལ་ལས་སམ་ནད་སྐྱེད་པ་དང་འཚོ་བ་ལ་གདོན་དང་ལྷ་བཞིན་ནོ་ཞེ་ན། སྣང་མི་རུང་གི་མེ་དུད་སོགས་ལ་དེ་ལྟར་དོགས་པ་མི་ཁེགས་ཀྱང་འདིར་རང་བཞིན་གྱིས་མ་བསྐལ་བའི་མེ་དུད་རྒྱུ་འབྲས་སུ་སྒྲུབ་པས་མི་གནོད་པ་ཡིན་ནོ། །གཉིས་པ་ཧ་ཅང་ཐལ་བ་ནི། སྡོང་བུའི་རྣམ་འགྱུར་དང་མུན་པའམ། དུ་ཙམ་དང་ཙནྡན་གྱི་མེ་རྒྱུ་འབྲས་སུ་ཐལ། དེ་དག་རྗེས་སུ་འགྲོ་ལྡོག་བྱེད་པའི་ཕྱིར། འདོད་ན་ཧ་ཅང་ཐལ་ལོ་ཞེ་ན། མ་གྲུབ་སྟེ། འདིར་མུན་པ་ནི་སྡོང་བུའི་རྣམ་འགྱུར་ལྡོག་པའི་སྣང་བ་དང་རྗེས་སུ་འགྲོ་ལྡོག་བྱེད་པ་ལ་དེ་དང་རྗེས་སུ་འགྲོ་ལྡོག་བྱེད་པ་ལྟར་མཐོང་བ་དང་། ཙནྡན་གྱི་མེ་ལོག་པས་དུ་བ་ལྡོག་པ་མེད་པའི་ཕྱིར། དེས་ན་དེས་ཀྱང་མི་གནོད་དོ། །གསུམ་པ་ལ་གཉིས་ཏེ། རྒྱུ་མིན་ལས་མི་སྐྱེ། སྐྱེ་ན་སྔ་ཕྱིའི་རྒྱུ་འབྲས་གྲུབ་པའོ། །དང་པོ་ལ་སྐྱེ་བར་འདོད་པ་དགག བཀག་པ་ལ་མི་འཐད་པ་སྤང་བ་གཉིས། དང་པོ་ནི། རྒྱུ་འབྲས་སུ་འགྲོ་བ་ལ་ལྡོག་པ་མི་དགོས་ཏེ། བརྒྱ་བྱིན་གྱི་སྤྱི་བོ་ལས་དུ་བ་སྐྱེ་བ་ལ་སོགས་པ་མཐོང་བའི་ཕྱིར་ཞེ་ན། ཆོས་གང་དག་དུ་བ་མིན་པ་དེ་ནི་མེ་དེ་ཡི་འབྲས་བུ་མིན་པར་ཐལ། མེ་འབྲས་རྣམས་ཀྱི་རྒྱུ་མིན་པ་བརྒྱ་བྱིན་གྱི་སྤྱི་བོ་ལས་སྐྱེས་པའི་ཕྱིར་ཏེ། དེས་ན་བརྒྱ་བྱིན་གྱི་སྤྱི་བོ་དང་འདྲ་བའི་གྲོག་མཁར་ལས་འབྱུང་བའི་སྔོ་ཕྱུར་བ་དེ་དུ་བ་མིན་ཏེ། དུ་བ་དང་རྣམ་པ་འདྲ་བས་དུ་བར་འཁྲུལ་པ་ལ་དུ་བ་དེ་ཡི་མིང་གིས་བཏགས་པར་ཟད་པའི་ཕྱིར་རོ། །གཉིས་པ་ནི། གལ་ཏེ་རྒྱུ་མིན་པ་ལས་གྲུབ་པ་དེའི་འབྲས་བུ་མིན་ན། རྡོ་གཙུབས་པའི་མེ་མེ་མིན་པར་ཐལ་ཏེ། བུད་ཤིང་ལས་མི་འབྱུང་བའི་ཕྱིར། མ་ཁྱབ་ན། བརྒྱ་བྱིན་གྱི་སྤྱི་བོའི་སྔོ་ཕྱུར་བ་དེ་རྒྱུ་མེ་ལས་མ་བྱུང་ཡང་དུ་བར་མཚུངས་སོ་ཞེ་ན། མི་མཚུངས་ཏེ། རྡོ་དང་ཤིང་སོགས་མེའི་ཉེར་ལེན་གྱི་རྒྱུར་འདོད་ན་བདེན་པ་ཞིག་ན་དེ་ལྟར་མིན་ལ། མེའི་ཉེར་ལེན་གྱི་རྒྱུ་ནི་མེའི་རྡུལ་ཕྲན་ཉིད་ཡིན་ཏེ། ཚོགས་པ་རྣམ་པར་འཇོག་པ་ཡི། །རྒྱུ་ནི་ཚོགས་པ་ཅན་ཡིན་པས། །ཞེས་གསུངས་པ་ལྟར་རོ། །རྡོ་དང་ཤིང་ལ་སོགས་པ་ནི་མེའི་རྡུལ་ཕྲན་རྣམས་ཕྱོགས་གཅིག་ཏུ་སྡུད་པའི་བདག་པོའི་རྒྱུ་ཡིན་གྱི་ཉེར་ལེན་དུ་མི་རུང་སྟེ། དཔེར་ན་མིག་གི་རྣམ་ཤེས་ཀྱི་ཉེར་ལེན་རྣམ་ཤེས་སྔ་མ་ཡིན་ལ་བདག་རྐྱེན་དབང་པོ་ཡིན་པ་བཞིན་ནོ། །ཁོ་བོ་ཅག་གིས་བེམས་པོ་ཐམས་ཅད་རྡུལ་རྫས་བརྒྱད་འདུས་ཀྱི་གོང་བུར་འདོད་ཀྱི་རྐྱང་པ་ཡན་གར་བ་རགས་པར་མི་འདོད་པས་རྡོ་ཤིང་ལ་མེ་རྡུལ་ཡང་ཡོད་དོ། །དེས་ན་མེ་མིན་པ་མེའི་ཉེར་ལེན་དང་། རྣམ་ཤེས་མིན་པ་རྣམ་ཤེས་ཀྱི་ཉེར་ལེན་དུ་མི་འཐད་དོ། །གཉིས་པ་ནི། ཡང་ན་སྔོན་དང་ཕྱི་མ་ཡི་ཉེར་ལེན་གྱི་རྒྱུ་དང་འབྲས་བུ་ཐ་དད་ཡོད་དེ། མེ་དང་དུ་བས་བསྐྱེད་པ་ཡི་འབྲས་བུ་དུ་བའི་ཁྱད་པར་ཐ་དད་པ་བཞིན་ཏེ། དུ་བ་དང་པོའི་རྒྱུ་མེ་དང་དུ་བ་ཕྱི་མའི་རྒྱུ་དུ་བ་ཡིན་པ་སོགས་སོ། །གཉིས་པ་མཚན་གཞི་ངོས་བཟུང་བ་ལ་དགག་གཞག་སྤང་གསུམ་ལས། དང་པོ་ནི། བོད་རྣམས་འབྲེལ་བ་དོན་ལ་ཡོད་པར་འདོད་པ་ལྟར་ན་མཚན་གཞི་རང་མཚན་ལ་བརྩི་དགོས་ལ། དེ་འདོད་ན་རང་མཚན་རྣམས་ནི་ཕན་ཚུན་རྗེས་འགྲོ་མེད་པར་གོ་བྱེད་མ་ཡིན་པར་བཤད་ཟིན་པའི་ཕྱིར་རོ། །འགའ་ཞིག་དུ་བ་དང་བྱས་པ་ལ་སོགས་པའི་སྒྲ་དོན་ལ་འབྲེལ་བའི་མཚན་གཞིར་རྩི་བ་མི་འཐད་དེ། སྒྲ་དོན་དངོས་མེད་ལ་འབྲེལ་བ་བྱས་པས་རང་མཚན་གོ་མི་ནུས་པའི་ཕྱིར། གཉིས་པ་ནི། རྟོག་པས་སྒྲའི་དོན་ལ་རང་མཚན་དུ་འཁྲུལ་པའི་གཞན་སེལ་གྱིས་དུ་བ་དང་མེ་དང་བྱས་པ་མི་རྟག་པ་ལ་སོགས་པའི་ལྡོག་པ་གཅིག་ཏུ་བཟུང་བ་ཉིད་ཡིན་ཏེ། དེ་ཚེ་གོ་བྱེད་རྗེས་འགྲོ་བ། །ཞེས་གསུངས་སོ། །གསུམ་པ་ནི། ལྡོག་པ་གཅིག་འདོད་ན་རྫས་ཀྱི་སྤྱི་དང་བརྟག་པ་མཚུངས་པའི་སྐྱོན་ཡོད་དོ་ཞེ་ན། ལྡོག་པ་དངོས་མེད་ཡིན་པས་གཅིག་དང་ཐ་དད་ཀྱི་སྐྱོན་ལས་གྲོལ་ལོ་ཞེས་སེལ་བའི་སྐབས་སུ་བཤད་ཟིན་ཏོ། །གསུམ་པ་དེ་དག་གང་གིས་ངེས་པའི་ཚུལ་ལ། ཕྱོགས་རེས་ངེས་པ་གཞན་གྱི་ལུགས། གཉིས་ཀ་དགོས་པ་རང་གི་ལུགས། དེ་ལ་མི་འཐད་པ་སྤང་བའོ། །དང་པོ་ལ་གཉིས་ལས། དང་པོ་དཔྱོད་པས་ངེས་པ་ནི། ཁ་ཆེ་བདེ་བྱེད་དགའ་བ་ན་རེ། གནས་སྐབས་ཀྱི་འབྲེལ་བ་ཚད་མས་ངེས་ཀྱང་རང་བཞིན་གྱི་འབྲེལ་བ་དཔྱོད་པ་ཡིས་ངེས་པར་བྱེད་ཅེས་གྲག ཉི་འོག་པ་རྣམས་ནི་ཚད་མ་ཁོ་ན་ཡིས་འབྲེལ་བ་ངེས་པར་བྱེད་པར་འདོད་དེ། དཔེ་ལ་རྟགས་ཀྱི་མཚན་གཞི་འཛིན་པའི་ཚད་མ་དང་། དེ་མི་མཐུན་ཕྱོགས་ལ་འགོག་པའི་ཚད་མ་གཉིས་ཀྱིས་རྗེས་འགྲོ་དང་ལྡོག་པ་གྲུབ་པས་སྤྱི་ཁྱབ་གྲུབ་ཅེས་ཟེར་རོ། །གཉིས་པ་རང་ལུགས་ནི། ཚད་མ་ལ་མ་ལྟོས་པའི་དཔྱོད་པའང་གཞན་སེལ་ཕྱིན་ཅི་ལོག་སྲིད་པས་མི་ངེས་ལ། མངོན་སུམ་ཡང་མ་ངེས་ན་འཇུག་ལྡོག་གི་ཐ་སྙད་མི་འགྲུབ་ཅིང་། ངེས་ན་རྟོག་དཔྱོད་ལས་མ་འདས་ལ། རྗེས་དཔག་གིས་མི་མཐུན་ཕྱོགས་ལ་ཁེགས་ཀྱང་རྟོག་དཔྱོད་མེད་ན་མཐུན་ཕྱོགས་དང་འབྲེལ་བ་མི་འགྲུབ་པས། ཚད་མའི་སྟོབས་ཀྱིས་བསྐྱེད་པ་ཡི་ངེས་པ་གཞན་དེ་མིན་སེལ་བའི་ཆ་ནས་ཡུལ་ངེས་པའི་བདག་ཉིད་ཅན་རྟོག་དཔྱོད་དེ་ཡི་འབྲེལ་བ་ངེས་པ་ཡིན་ནོ། །དེ་ཡང་བློ་འཁྲུལ་པས་སྒྲ་དོན་དང་དངོས་པོ་རང་མཚན་གཉིས་གཅིག་ཉིད་དུ་བཟུང་བ་ལས་རང་མཚན་ལ་འཇུག་པར་འགྱུར་ཏེ། འཁྲུལ་པས་དངོས་པོ་གཅིག་ལྟར་རྟོགས། །ཞེས་གསུངས་སོ། །གསུམ་པ་ནི། དཔྱོད་པ་ཡིད་དཔྱོད་དམ་བཅད་ཤེས་སུ་འགྱུར་ལ། མིན་ན་ཚད་མ་མིན་པ་བཞི་པར་འགྱུར་རོ་ཞེ་ན། ཡིད་དཔྱོད་མི་སྲིད་ལ། བཅད་ཤེས་ཡིན་ཡང་བཞི་པར་མི་འགྱུར་ཏེ། བཅད་ཤེས་ཉིད་ཁ་ཕྱི་ལྟས་ལོགས་ཤེས་དང་ནང་ལྟས་རང་རིག་ཡིན་པའི་ཕྱིར། དེས་ན་དཔྱོད་པ་མེད་པར་འཇུག་ལྡོག་མི་ངེས་ལ། ཚད་མ་མེད་ན་དཔྱོད་པ་འཁྲུལ་སྲིད་པས་འབྲེལ་བ་ངེས་པ་ལ་གཉིས་ཀ་དགོས་སོ། །གཉིས་པ་དོན་བསྡུ་བ་ནི། དངོས་པོའི་དོན་ལ་འབྲེལ་བ་མེད་དེ། དེ་གོང་དུ་བཀག་ཟིན་པའི་ཕྱིར། འབྲེལ་པ་གཉིས་དོན་ལ་མེད་ཀྱང་བློ་ངོར་གྲུབ་སྟེ། ཐ་དད་དུ་འབྱེད་པའི་སྒྲ་རྟོག་གིས་སྒྲ་བྱས་མི་རྟག་པ་གསུམ་སོ་སོར་ཕྱེ་སྟེ། གཅིག་ཏུ་སྡུད་པའི་སྒྲ་རྟོག་གིས་གསུམ་པོ་གཅིག་ཏུ་བཟུང་བའི་སྒྲ་རྟོག་ལ་བདག་གཅིག་གི་འབྲེལ་པར་འཇོག་པ་སོགས་ཡིན་པའི་ཕྱིར། སྒྲའི་དོན་ལ་རང་མཚན་དུ་འཁྲུལ་ནས་རང་མཚན་ལ་ཞུགས་པས་འབྲེལ་པའི་རྟོགས་པ་སྐྱེ་སྟེ། གོང་དུ་བསྒྲུབས་ཟིན་པའི་ཕྱིར་རོ། །ཞེས་བྱ་བ་བསྡུ་བའི་ཚིགས་སུ་བཅད་པའོ། །ཚད་མ་རིག་པའི་གཏེར་ལས་འབྲེལ་བ་བརྟག་པའི་རབ་ཏུ་བྱེད་པ་དྲུག་པའི་རྣམ་བཤད་བསྟན་ཟིན་ཏོ།། ༈ །།གཉིས་པ་འགལ་བའི་རྟོགས་ཚུལ་ལ། འགལ་བ་སྤྱིའི་མཚན་ཉིད། མཚན་གཞིའི་རབ་དབྱེ་གཉིས། དང་པོ་ནི། ཆོས་གང་ཞིག་ཆོས་གཞན་གང་ལ་གནོད་པར་བྱེད་པ་དེ་ནི་ཆོས་གཞན་དེའི་འགལ་ཟླའི་མཚན་ཉིད་ཡིན་ནོ། །གཉིས་པ་ལ། སྤྱིར་བསྟན་པ། སོ་སོར་བཤད་པ་གཉིས། དང་པོ་ནི། འགལ་ཟླ་གཉིས་ཀ་དངོས་པོ་དང་། གང་རུང་གཅིག་དངོས་མེད་ཀྱི་ཡུལ་གྱི་དབྱེ་བ་ལ་ལྟོས་ནས་འགལ་བ་གཉིས་སུ་བཞེད་དེ། དང་པོ་ལ་ལྟོས་ནས་ལྷན་ཅིག་མི་གནས་པའི་འགལ་བ་དང་། གཉིས་པ་ལ་ལྟོས་ནས་ཕན་ཚུན་སྤངས་པའི་འགལ་བ་གཉིས་དག་ཏུ་ཡོད་པའི་ཕྱིར། གཉིས་པ་ལ། ལྷན་ཅིག་མི་གནས་འགལ་དང་། ཕན་ཚུན་སྤངས་འགལ་གཉིས། དང་པོ་ལྷན་ཅིག་མི་གནས་པའི་མཚན་ཉིད། འགལ་བ་གནས་པའི་ཡུལ། གནོད་བྱ་ལྡོག་པའི་དུས། འགལ་བ་ངེས་བྱེད་ཀྱི་ཚད་མའོ། །དང་པོ་ལའང་གཉིས་ལས། དང་པོ་གཞན་ལུགས་དགག་ན། ཁ་ཅིག་ལྷན་ཅིག་མི་གནས་པའི་མཚན་ཉིད། དངོས་པོ་གཉིས་ལ་གནས་པའི་གནོད་བྱ་གནོད་བྱེད་ཅེས་འདོད་པ་ནི། དཔྱད་ན་འཐད་པ་མིན་ཏེ། གནོད་བྱ་གནོད་བྱེད་ཚོགས་པའི་སྤྱི་མི་སྲིད་ཅིང་། ཡ་གྱལ་འགོད་ན་རྒྱུ་འབྲས་ཀྱི་མཚན་ཉིད་ལྟར་མ་ཁྱབ་པའི་ཕྱིར། གཉིས་པ་རང་ལུགས་ནི། དེས་ན་གནོད་བྱ་གནོད་བྱེད་གཉིས་པོ་རྒྱུ་འབྲས་བཞིན་དུ་ཐ་དད་དུ་མཚོན་པར་བྱ་བ་ཡིན་ལ། དེ་ཡང་གནོད་བྱའི་མཚན་ཉིད། རྒྱུན་མ་གཏུགས་པར་འབྱུང་བ་ཅན་ཆོས་གཞན་ཉེ་བ་ན་ནུས་མེད་དུ་སྐྱེ་བའོ། །རྒྱུན་མ་གཏུགས་པར་འབྱུང་བ་ཅན་གྱི་ཆོས་གང་གིས་ཆོས་གཞན་ནུས་མེད་དུ་སྐྱེད་པའི་ལྷན་ཅིག་བྱེད་པའི་རྒྱུ་ལ་གནོད་བྱེད་ཅེས་ཟེར་རོ། །དངོས་པོ་གང་ཞིག དངོས་པོ་གཞན་དེ་ཡོད་པ་ལ་གནོད་པར་བྱེད་པ་ནི་དངོས་པོ་གཞན་དེ་དང་ལྷན་ཅིག་མི་གནས་འགལ་གྱི་མཚན་ཉིད་དོ། །གཉིས་པ་ལ་འགལ་བ་ངོས་བཟུང་བ། དེ་ལ་རྩོད་སྤོང་གཉིས། དང་པོ་ནི། ལྷན་ཅིག་མི་གནས་པའི་འགལ་བ་ཇི་སྙེད་པ་ནི་གནོད་བྱ་གནོད་བྱེད་གཉིས་དངོས་པོའི་ཆོས་ཁོ་ན་ལ་འཇུག་སྟེ། དེ་ནི་རྒྱུན་གཉིས་འགྲོགས་སུ་མི་རུང་བ་ཡིན་ལ། དེ་ཡང་ངོ་བོ་གཅིག་པ་དང་ཡ་གྱལ་དངོས་མེད་ལ་མི་འཇུག་པའི་ཕྱིར་རོ། །དེ་ཡང་རྒྱུན་ཡིན་གྱི་སྐད་ཅིག་ལ་མིན་ཏེ། འདི་ཡི་གནོད་བྱ་གནོད་བྱེད་གཉིས་བསྐྱེད་བྱ་བསྐྱེད་བྱེད་ཡིན་པའི་ཕྱིར་ན་དེ་སྐད་ཅིག་ལ་གཞག་ཏུ་མེད་པའི་ཕྱིར་རོ། །གཉིས་པ་ལ། ཡུལ་ལ་བརྟགས་ན་མི་འཐད་པ་དང་། རྫས་ལ་བརྟགས་ན་མི་འཐད་པ་སྤོང་བ་གཉིས། དང་པོ་ནི། སྐད་ཅིག་ལ་འགལ་བ་མི་སྲིད། རྒྱུན་རྫས་སུ་མ་གྲུབ་པ་དེས་ན། འགལ་བ་གནས་པའི་ཡུལ་གཉིས་པོ་འདི་མི་འཐད་དོ་ལོ། སྐྱོན་མེད་དེ། སྐད་ཅིག་སྔ་མ་སྔ་མའི་ཉེར་ལེན་ལས་སྔོན་མེད་པའི་ཕྱི་མ་ཕྱི་མ་སྐྱེ་ཞིང་དེ་ལ་རྒྱུན་དུ་སྒྲོ་བཏགས་པ་བཟློག་བྱ་དང་ཟློག་པར་བྱེད་པ་པོར་འཇོག་ལ། དེས་ན་སྔར་གྱི་ཉེས་པ་མེད་དོ། །གཉིས་པ་ནི། ཚ་གྲང་གི་རྡུལ་ཕྲན་འགལ་བ་གཉིས་ལྷན་ཅིག་ཏུ་གནས་ན་ལྷན་ཅིག་མི་གནས་པ་འགལ་ཞིང་། ལྷན་ཅིག་མི་གནས་ན་ནི་དང་པོ་ཕྲད་ཙམ་ནས་གཅིག་བཅོམ་པས་དུས་མཉམ་པའི་རྒྱུ་འབྲས་སུ་འགྱུར་རོ་ཞེ་ན། འདི་ཡི་ལན་ལ་གཉིས་ལས་གཞན་ལན་དགག་ན། ལ་ལ་སྟེ་གྲངས་ཅན་པ་ནི་གྲང་རེག་གི་རྡུལ་ཉིན་མོའི་སྐར་མ་བཞིན་ཚ་རེག་གི་ཁོངས་ན་ཉེ་བར་ཞ་བར་འདོད། ཁ་ཅིག་སྟེ་བྱེ་བྲག་པ་ནི་གྲང་རེག་གི་འདུ་བའི་འབྲེལ་བ་ཞིག་ཀྱང་རྫས་ཕན་ཚུན་རྟག་པས་གནོད་པ་མ་བྱས་པ་དང་། བྱེ་བྲག་པ་ཁ་ཅིག་གྲང་རེག་གི་རྡུལ་ཕྲན་དེ་ཚ་རེག་གི་རྡུལ་ཕྲན་དང་ཕྲད་ནས་ཚ་རེག་གི་རྡུལ་ཕྲན་དུ་བསྒྱུར་བར་འདོད་པ་དང་། ཉན་ཐོས་འགའ་ཞིག་བསྐོར་བ་བར་དང་བཅས་པས་ཕྲད་པ་མེད་པར་ཡོད་ལ་གྲང་རེག་གི་རྡུལ་གཞན་འོང་བའི་གོ་ཚ་རེག་གིས་བཀག་པས་རགས་པ་བརྩོམ་མི་ནུས་པར་འདོད་དོ། །རྡུལ་ཕྲན་རྟག་པར་སྨྲ་བའི་ཕྱོགས་དེ་དག་འཁྲུལ་པ་ཡིན་ཏེ། འདི་ལྟར་ཕྱོགས་དང་པོ་གཉིས་ལྟར་རྟག་ཏུ་ལྷན་ཅིག་ཏུ་གནས་ན་ལྷན་ཅིག་མི་གནས་པའི་འགལ་བ་ཉམས་ལ། གསུམ་པ་ལྟར་བསྒྱུར་ན་རྡུལ་ཕྲན་རྟག་པར་འདོད་པ་འགལ་ལོ། །གཞན་ལན་རྣམས་མི་འཐད་པ་དེས་ན་རང་ལན་ནི། འགལ་ཟླའི་རྡུལ་ཕྲན་གཉིས་སྐད་ཅིག་སྔ་མ་ལས་ཕྱི་མ་སྐྱེ་བ་ན་རྡུལ་ཕྲན་གང་མང་བ་ནུས་ལྡན་དང་ཉུང་བ་ནུས་མེད་དུ་སྐྱེ་བའི་ཕྱིར་ན་འགལ་བ་མེད་དོ། །གསུམ་པ་གནོད་བྱ་ལྡོག་པའི་དུས་ལ། དགག་གཞག་སྤོང་གསུམ་ལས། དང་པོ་ནི། ལ་ལ་སྤང་གཉེན་གཉིས་བྱ་བ་རྫོགས་པའི་སྐད་ཅིག་མ་གསུམ་ལ་ལྡོག་པ་དང་། འགའ་ཞིག་ད་ལྟ་ནས་རྡོ་རྗེ་ལྟ་བུའི་ཏིང་ངེ་འཛིན་གྱི་བར་དུ་ཡུན་རིང་སྟེ་བསྐལ་པ་དཔག་མེད་དུ་གནོད་བྱ་གནོད་བྱེད་དུ་འགྲོགས་པ་ཡིན་ཞེས་ཟེར་བ་མི་འཐད་དེ། ཡུན་རིང་འགྲོགས་པའི་ལྷན་ཅིག་ཏུ་མི་གནས་པའི་འགལ་བ་དེ་ངོ་མཚར་ཆེ་ཞེས་སྟིང་བའི་ཚིག་གོ །གཉིས་པ་ནི། ཚ་གྲང་ལྟ་བུ་དོན་གྱི་འགལ་བ་རྣམས་དུས་གཅིག་ལ་འདུར་རུང་བས་དེ་གཉིས་སྐད་ཅིག་དང་པོ་ལ་ཕྲད། སྐད་ཅིག་གཉིས་པ་ལ་གནོད་བྱ་ནུས་མེད་སྐྱེས། སྐད་ཅིག་གསུམ་པ་ལ་གནོད་བྱ་རྒྱུན་ལྡོག་པ་ཡིན་ནོ། །འདི་ནི་དངོས་སུ་ཕྲད་ནས་གནོད་པའི་དབང་དུ་བྱས་ལ། དངོས་སུ་གནོད་པ་མིན་པ་སྣང་མུན་ལྟ་བུ་ལ་སྐད་ཅིག་དང་པོ་ལ་སྣང་བའི་དངོས་རྒྱུ་དང་མུན་པ་ནུས་མེད་གཉིས་དངོས་སུ་ཕྲད། སྐད་ཅིག་གཉིས་པ་ལ་སྣང་བ་སྐྱེས་པ་དང་མུན་པ་འགགས་པ་གཉིས་དུས་མཉམ་མོ། །བློ་ཡི་ཆོས་དུས་ལ་ལྟོས་པ་རྣམས་ཕྲད་པ་མི་སྲིད་པས་སྐད་ཅིག་དང་པོ་ལ་ངེས་ཤེས་ཀྱི་དངོས་རྒྱུ་དང་། སྒྲོ་འདོགས་ནུས་མེད་གཉིས་དངོས་སུ་ཕྲད། སྐད་ཅིག་གཉིས་པ་ལ་ངེས་པ་སྐྱེས་པའི་སྟོབས་ཀྱིས་བྱེད་པ་མ་ཉམས་ཀྱི་བར་དུ་སྒྲོ་བཏགས་ཕྱིས་མི་སྐྱེ་བར་བྱེད་པ་ཉིད་གནོད་པའི་དོན་ཡིན་ནོ། །གསུམ་པ་ལ། དོན་གྱི་འགལ་བ་ལ་རྩོད་པ་སྤོང་བ། བློའི་འགལ་བ་ལ་རྩོད་པ་སྤོང་བའོ། །དང་པོ་ལ་གཉིས་ལས། དང་པོ་ཆ་ཡོད་མེད་བརྟགས་ན་མི་འཐད་པ་སྤོང་བ་ནི། སྐད་ཅིག་མ་གསུམ་ཞེས་པའི་སྐད་ཅིག་མ་དང་པོ་ལ་སྔ་ཕྱིའི་ཆ་མེད་ན་རགས་པའི་རྒྱུན་རྣམས་རྩོམ་པ་མེད་པར་འགྱུར་ལ། ཆ་ཤས་ཡོད་ན་དེ་ལ་སྐད་ཅིག་མ་གསུམ་དང་དེའི་སྐད་ཅིག་རེ་རེ་ལའང་སྐད་ཅིག་གསུམ་ལ་སོགས་པ་ཐུག་པ་མེད་པས་སྐད་ཅིག་གསུམ་ལ་ལྡོག་པའི་མཚམས་ཟིན་པ་དཀའ་ཞེ་ན། སྐད་ཅིག་གསུམ་པ་ཉིད་ལ་ལྡོག་པ་ལ་ཉེས་པ་མེད་པ་ཡིན་ཏེ། སྐད་ཅིག་དང་པོ་ལ་ནི་ཆ་ཤས་མེད་ལ་རྒྱུན་ཡང་སྐད་ཅིག་སྔ་མ་ལས་ཕྱི་མ་སྐྱེས་ཙམ་ཀྱི་ཕྲེང་བ་ཡིན་ཞིང་། རྡུལ་ནི་ཕྱོགས་ལ་ལྟོས་པས་ཆ་བཅས་དང་། སྐད་ཅིག་དུས་ལ་ལྟོས་པས་ཆ་མེད་ཡིན་པའི་ཕྱིར་ན་མི་མཚུངས་པར་བཤད་ཟིན་པས་སོ། །གཉིས་པ་ནུས་པ་ཐོགས་མེད་ལ་བརྟགས་ན་མི་འཐད་པ་སྤང་བ་ནི། ཚ་རེག་དང་དུས་མཉམ་པའི་གྲང་རེག་ནུས་པ་ཐོགས་མེད་དེས་གྲང་རེག་ནུས་ཅན་དུ་བསྐྱེད་དམ་ནུས་མེད་བསྐྱེད། གཉིས་ཀ་ལྟར་ཡང་མི་འཐད་དེ། དང་པོ་ལྟར་ན་ཚ་རེག་ནུས་མེད་དུ་འགྱུར་ཏེ། མ་ཚང་མེད་རྒྱུ་དེ་ལ་ནི། །ཞེས་སོགས་གསུངས་པ་ལྟར་རོ། །ཕྱི་མ་ལྟར་ན་ཚ་རེག་ལ་དགོས་པ་མེད་པར་འགྱུར་ཏེ། རང་ཉིད་འགགས་པའི་ཕྱིར་ཞེ་ན། ཚ་རེག་དང་དུས་མཉམ་པའི་གྲང་རེག་ནུས་པ་ཐོགས་མེད་དེ་གྲང་རེག་སྐད་ཅིག་གཉིས་པའི་ཉེར་ལེན་ཡིན་ལ། དེའི་འབྲས་བུ་ནུས་ཅན་ནུས་མེད་འབྱིན་པ་ལྷན་ཅིག་བྱེད་རྐྱེན་གང་དང་གང་ཕྲད་པའི་དབང་གིས་ཡིན་ཏེ། ཚ་རེག་སྟོབས་ཆེ་ན་ནུས་མེད་དང་། གྲང་རེག་སྟོབས་ཆེ་ན་ནུས་ལྡན་དུ་སྐྱེ་སྟེ། དཔེར་ན་འཇིམ་པ་ལས་སྟོབས་ཆེ་ན་སྐ་བ་དང་། ཆུ་སྟོབས་ཆེ་ན་སླ་བར་སྐྱེ་བ་བཞིན་ནོ། །གཉིས་པ་བློ་ཡི་འགལ་བ་ལ་རྩོད་སྤང་ནི། ངེས་ཤེས་ཀྱིས་སྤང་བྱ་སྒྲོ་འདོགས་ཀྱི་ངོ་བོའམ་ས་བོན་སྤོང་། གཉིས་ཀ་ལྟར་ཡང་མི་འཐད་དེ། ངོ་བོ་ཙམ་མེད་པར་བྱེད་པ་གཞན་ལ་ཡིད་གཏད་པས་ཀྱང་ལྡོག་པས་ཚད་མ་མི་དགོས། ས་བོན་འཇོམས་པའི་ནུས་པ་ཚད་མ་ལ་ཡང་མེད་པའི་ཕྱིར་ཞེས་ཟེར་ན་རྡོ་རྗེ་ལྟ་བུའི་ཏིང་ངེ་འཛིན་ལ་སོགས་པ་ས་བོན་སྤོང་བའི་གཉེན་པོའང་ཡོད་མོད་ཀྱི། ངེས་པས་སྒྲོ་འདོགས་སྤོང་བ་ནི་དེ་གཉིས་ཀ་མ་ཡིན་གྱི་ངེས་པ་ཇི་སྲིད་ཡོད་པ་དེ་སྲིད་དུ་སྒྲོ་འདོགས་མི་སྐྱེ་བ་ཉིད་ཡིན་ནོ། །བཞི་པ་འགལ་བ་ངེས་བྱེད་ཀྱི་ཚད་མ་ལ་གསུམ་སྟེ། དོན་ལ་འགལ་བ་དགག བློ་ངོར་ཚད་མས་སྒྲུབ། གྲུབ་པ་ལ་རྩོད་པ་སྤང་བའོ། །དང་པོ་ནི། འབྲེལ་བ་བཞིན་དུ་འགལ་བ་ཡང་དངོས་པོའི་དོན་ལ་གྲུབ་པ་མེད་དེ། གནོད་བྱེད་ཡོད་པ་ན་གནོད་བྱ་མེད། གནོད་བྱ་ཡོད་པ་ན་གནོད་བྱེད་འགགས་ཤིང་དུས་མཉམ་པའི་ཚ་གྲང་ལྟ་བུ་ལ་འགལ་འབྲེལ་གང་ཡང་མེད་པའི་ཕྱིར་དང་། ཆོས་གཅིག་གིས་གཅིག་འགོགས་པའམ་རྒྱུན་མཐུད་ནས་སྐྱེ་བ་ལ་གནོད་པར་བྱེད་པའི་ཆ་ལ་རྣམ་པར་རྟོག་པས་སྒྲོ་བཏགས་ནས་འགལ་བ་ཉིད་དུ་རྣམ་པར་རྟོག་པ་ཙམ་ཡིན་པའི་ཕྱིར། གཉིས་པ་ནི། རྒྱུ་འབྲས་བཞིན་དུ་སྣང་བ་དང་མི་སྣང་བ་མ་གཏོགས་པ་འགལ་བ་ངེས་བྱེད་གཞན་ཡོད་པ་མིན་ཏེ། དང་པོར་གནོད་བྱ་ནུས་མེད་དང་གནོད་བྱེད་སྟོབས་ལྡན་གཉིས་ཀ་མ་དམིགས། དེ་ནས་གནོད་བྱེད་ནུས་ལྡན་དམིགས། དེ་ནས་གནོད་བྱ་ནུས་མེད་དམིགས་པའི་ཚད་མས་ངེས་པའི་ཕྱིར་རོ། །གསུམ་པ་ནི། ཁ་ཅིག་གྲང་རེག་འགོག་པ་ལ་མེ་ཙམ་རྟགས་སུ་བཀོད་ན་ནི་ཁྱབ་པ་མ་ངེས། མེ་སྟོབས་ལྡན་འགོད་ན་དེའི་ཚེ་གྲང་རེག་སྣང་དུ་རུང་ན་སྣང་རུང་མ་དམིགས་པས་ཁེགས་ཤིང་སྣང་དུ་མི་རུང་ན་དེ་བས་མེ་སྟོབས་ཆེ་བའི་ཕྱོགས་ཆོས་མི་འགྲུབ་བོ་ལོ། །ཁ་ཅིག་མེ་སྟོབས་ལྡན་རྟགས་སུ་འགོད་ལ། དགག་བྱ་གྲང་རེག་མེ་བས་སྟོབས་ཆེ་བའམ་མཉམ་པ་སྣང་རུང་མ་དམིགས་པས་ཁེགས་ཤིང་། དེ་བས་སྟོབས་ཆུང་བའི་གྲང་རེག་ཡོད་ཀྱང་སྣང་དུ་མི་རུང་བས་དེ་འགོག་པ་ལ་འགལ་དམིགས་ཀྱི་སྦྱོར་བ་ཡིན་ཞེས་ཟེར་རོ། །འདི་མི་འཐད་དེ། གྲང་རེག་སྟོབས་ཅན་ཡིན་ན་ཚ་རེག་མེད་ལ། སྟོབས་མཉམ་ན་གཉིས་ཀ་མེད་པར་འགྱུར་ཏེ་ལྷན་ཅིག་མི་གནས་པའི་ཕྱིར། དེས་ན་རྟགས་རང་གི་ངོ་བོ་མེ་ཙམ་གྱིས་འགྲུབ་པ་ཡིན་ཏེ་མེ་སྣང་བ་ཉིད་ཀྱིས་དེའི་འགལ་ཟླ་གྲང་རེག་མེད་པར་གྲུབ་པའི་ཕྱིར། འོ་ན་སྐད་ཅིག་དང་པོ་ལ་ལྷན་ཅིག་གནས་པས་དེ་འགོག་པ་ལ་འཁྲུལ་ལོ་ཞེ་ན། སྐད་ཅིག་དེ་ཉིད་ལ་འགོག་པ་མིན་པར་དེའི་རྒྱུན་འགོག་པར་བཤད་ཟིན་པའི་ཕྱིར། གཉིས་པ་ཕན་ཚུན་སྤང་འགལ་ལ་རྣམ་གཞག་རྒྱས་པར་བཤད་པ་དང་། བསྡུས་ཏེ་བསྟན་པ་གཉིས། དང་པོ་ལ་དགག་གཞག་གཉིས། དང་པོ་ལ་ཁས་བླངས་བརྗོད་པ་དང་། དེ་དག་མི་འཐད་པར་བསྟན་པ་གཉིས། དང་པོ་ནི། བོད་ཕལ་ཆེར་ལྷན་ཅིག་མི་གནས་པའང་། ཕན་ཚུན་སྤངས་འགལ་གྱི་བྱེ་བྲག་ཏུ་འདོད་ཅིང་། ཁ་ཅིག རྒྱུན་མི་བཟློག་ཀྱང་ཆོས་གང་ཞིག་ཆོས་གཞན་གྱིས་དབེན་པ། ཕན་ཚུན་སྤང་འགལ་གྱི་མཚན་ཉིད་ཡིན་ཞིང་། རྒྱུན་མི་ལྡོག་ཅེས་པས་ལྷན་ཅིག་མི་གནས་པ་གཅོད་པ་ཡིན་ལ། དབྱེ་ན་དངོས་འགལ་དང་བརྒྱུད་འགལ་གཉིས། དང་པོ་ནི། གང་ཞིག་གང་གིས་དབེན་ཞིང་དགག་བྱ་རྣམ་པར་བཅད་ལྡོག་ཙམ་དུ་གནས་པ་ཕན་ཚུན་སྤངས་པའི་དངོས་འགལ་གྱི་མཚན་ཉིད། བརྒྱུད་འགལ་ཡང་དངོས་འགལ་གྱིས་ཁྱད་པར་དུ་བྱས་མ་བྱས་རྣམ་པ་གཉིས་ཡོད་པར་འདོད་ལ། གསུམ་པོ་རེ་རེ་ལ་ཡང་རྫས་དང་ལྡོག་པ་འགལ་བ་ཡི་སྒོ་ནས་གཉིས་གཉིས་རྣམ་པ་དྲུག་ཏུ་འདོད་དོ། །དེ་ལ་རྫས་འགལ་བ་གསུམ་ནི། རྟག་མི་རྟག་དང་། སྔོ་མིན་དང་ཨུཏྤལའི་སྔོན་པོ་དང་། སྔོ་སེར་ལྟ་བུའོ། །ལྡོག་པ་འགལ་བ་གསུམ་ནི། མེད་དགག་ཡིན་མིན་དང་། མེད་དགག་དང་ཤེས་བྱའི་ལྡོག་པ་དང་། བྱས་ལྡོག་དང་མི་རྟག་པའི་ལྡོག་པ་གསུམ་མོ་ཞེས་ཟེར་རོ། །གཉིས་པ་ལ། ཧ་ཅང་ཐལ་བ། ཉེས་སྤོང་གི་ལན་དགག་པ། ཐ་དད་ལ་འགལ་བར་གསུངས་པའི་དགོངས་པའོ། །དང་པོ་ནི། ཆོས་གང་ཞིག་ཆོས་གཞན་གྱིས་དབེན་པ་ཙམ་འགལ་བར་འདོད་པ་ཡིན་ན་མེ་དུ་ལ་སོགས་པ་རྫས་ཐ་དད་དང་། བྱས་མི་རྟག་ལ་སོགས་པའི་འབྲེལ་བ་དང་། སྨྲ་བ་དང་ཐམས་ཅད་མཁྱེན་པ་ལ་སོགས་པ་ལྡོག་པ་ཐ་དད་རྣམས་ཀྱང་འགལ་བར་འགྱུར་ཏེ། ཕན་ཚུན་དབེན་པའི་ཕྱིར། འདོད་ན། འགལ་ན་འགོག་པ་དང་། འབྲེལ་ན་སྒྲུབ་པའི་རྣམ་གཞག་ཐམས་ཅད་འཇིག་གོ །གཉིས་པ་ནི། རྫས་ཐ་དད་མེ་དུད་དམ་ལྡོག་པ་ཐ་དད་བྱས་སོགས་འབྲེལ་ལམ། རྫས་ལྡོག་གཉིས་ཀ་ཐ་དད་སྔོ་སེར་སོགས་མ་འབྲེལ་ཡང་རུང་། ཕན་ཚུན་ཐ་དད་ལྡན་པ་དང་ངོ་བོ་ཡིན་པ་འགོག་ལ། དེ་ཉིད་འགལ་སྟོབས་ཀྱིས་ཡིན་པས་འགལ་འབྲེལ་གཉིས་ཀ་ཡིན་པ་ཡོད་ཅེ་ན། མེ་ཏོག་སྔོན་པོ་སེར་པོ་ཡིན་པ་འགོག་པ་ལ་སེར་པོར་སྣང་རུང་མ་དམིགས་པའི་རྟགས་ནུས་མེད་དུ་འགྱུར་ཏེ། ཐམས་ཅད་དུ་སྔོན་པོ་ཡིན་པའི་འགལ་བ་དམིགས་པས་འགོག་དགོས་པའི་ཕྱིར། གསུམ་པ་ནི། རྟོག་གེའི་སྐབས་འགར་སྔོ་སེར་སོགས་ཐ་དད་རྣམས་ཕན་ཚུན་འགལ་བར་གསུངས་པ་ནི་བཏགས་པ་བའི་རྣམ་གཞག་ཡིན་གྱི། མཚན་ཉིད་པ་མིན་ཏེ་རྟ་དང་འབྲེལ་བའི་བ་གླང་ཞེས་ལྷན་ཅིག་འདུག་པ་ལ་འབྲེལ་བར་འདོགས་པ་བཞིན་ནོ། །གཉིས་པ་རང་ལུགས་ལ། གཅིག་དང་ཐ་དད་ཀྱི་རྣམ་གཞག ཐ་དད་ལ་འགལ་འབྲེལ་འཇོག་པའི་ཚུལ། ཕན་ཚུན་སྤང་འགལ་ཉིད་བཤད་པའོ། །དང་པོ་ནི། རྒྱུ་ཐ་དད་དང་ཐ་མི་དད་ཀྱིས་བསྐྱེད་པ་དང་། ཤེས་པ་ལ་རྣམ་པ་ཐ་དད་དང་ཐ་དད་མིན་པ་གཅིག་ཏུ་ཤར་བའི་དབྱེ་བ་ཡིས་རིམ་བཞིན་ནང་ཤེས་པའི་རྫས་ཐ་དད་དང་ཐ་དད་མིན་པ་རྫས་གཅིག་དང་། ཕྱི་རོལ་དངོས་པོ་དང་དངོས་མེད་ཀྱི་ལྡོག་པ་ཐ་དད་དང་ཐ་དད་མིན་པ་གཅིག་གི་རྣམ་གཞག་བྱེད་དོ། །གཉིས་པ་ནི། ཐ་དད་དེ་དག་ཀྱང་དེས་ཕན་འདོགས་ན་དེ་དང་འབྲེལ་ཞིང་དེ་ལ་གནོད་ན་དེ་དང་འགལ་བ་ཡིན་ལ། གཉིས་ཀ་མིན་ན་ཐ་དད་པ་ཙམ་དུ་རྣམ་པར་གཞག་གོ །གསུམ་པ་ལ་གསུམ་ལས། དང་པོ་དངོས་འགལ་ནི། རང་མིན་འགོག་པ་ནི་རང་མིན་དང་དངོས་འགལ་གྱི་མཚན་ཉིད་ཡིན་ཏེ། དཔེར་ན་རྟག་མི་རྟག་ལ་སོགས་པ་བཞིན་ནོ། །གཉིས་པ་དེས་ཁྱད་པར་དུ་བྱས་པའི་བརྒྱུད་འགལ་ནི་རང་མིན་གྱི་ཁྱབ་བྱེད་འགོག་པ་དེ་བརྒྱུད་འགལ་གྱི་མཚན་ཉིད་ཡིན་ནོ། །དཔེར་ན་བྱས་པ་དང་རྟག་པ་ལྟ་བུའོ། །འདི་ལ་ཁ་ཅིག མེ་ལྟ་བུ་ཆོས་ཅན། ཆུ་དེ་ཁྱོད་མིན་པའི་ཁྱབ་བྱེད་དུ་ཐལ། ཁྱོད་དེ་དང་བརྒྱུད་འགལ་ཡིན་པའི་ཕྱིར། ཁྱབ་པ་ཁས། དེས་ན། བརྒྱུད་འགལ་རང་མིན་ཁྱབ་བྱ་འགོག་ཅེས་འདོན་པ་ནི་རང་ཉིད་ནོར་ཏེ། ལུགས་འདི་ལ་མེ་གྲང་རེག་དང་བརྒྱུད་འགལ་མིན་ཏེ། དེ་དང་ཕན་ཚུན་སྤང་འགལ་དུ་འགྱུར་ཞིང་། འདོད་ན། དེ་གཉིས་གང་རུང་གཅིག་དངོས་མེད་དུ་ཐལ། འདོད་པའི་ཕྱིར། འཁོར་གསུམ། གཞན་ཡང་། དེ་ཆོས་ཅན་ཆུ་མིན་འགོག་བྱེད་དུ་ཐལ། ཆུ་དང་བརྒྱུད་འགལ་ཡིན་པའི་ཕྱིར། ཁྱབ་པ་ཁྱེད་ལྟར་ན་དོན་གྱི་དངོས་འགལ་ལོ། །དེས་ན་དགོངས་པ་ནི། བྱས་པའི་རང་མིན་མ་བྱས་པའི་ཁྱབ་བྱེད་རྟག་པ་འགོག་ཅེས་པ་ཡིན་པས་ལེགས་བཤད་ལ་གཡང་མ་ཟ་ཅིག གསུམ་པ་རྩོད་སྤང་ནི། སྔོ་སེར་སོགས་གཅིག་གྲུབ་པས་ཅིག་ཤོས་མི་ཁེགས་པར་ཐལ། དེ་གཉིས་དངོས་འགལ་དང་བརྒྱུད་འགལ་གཉིས་གང་ཡང་མིན་པའི་ཕྱིར་ཞེ་ན། དེ་གཉིས་ཕན་ཚུན་སྤངས་པ་ཡིན་གྱི་ཕན་ཚུན་སྤངས་པའི་འགལ་བ་མིན་ལ། སྤངས་པ་སྣང་རུང་ཡོད་པའམ་ཡིན་པ་ནི་སྣང་རུང་མ་དམིགས་པས་ཁེགས་ལ། སྤང་འགལ་ནི་དགག་བྱ་སྣང་དུ་མི་རུང་བའི་སར་འགལ་དམིགས་ཀྱི་སྦྱོར་བས་འགོག་གོ །གཉིས་པ་བསྡུས་ཏེ་བསྟན་པ་ནི། ཕན་ཚུན་སྤང་འགལ་ནི་ཡུལ་འགལ་ཟླ་གང་རུང་ཞིག་དངོས་པོར་མེད་པ་ལ་གནས་པས་གཅིག་པ་བཀག་པའི་ཐ་དད་ཁོ་ནར་ངེས་ལ། སྒྲ་རྟག་པ་དེ་ཡིན་པ་ནི། དེ་མིན་གྱི་ཁྱབ་བྱེད་བྱས་པ་ཡིས་འགོག་ལ། ཕན་ཚུན་སྤངས་པའི་དངོས་པོ་སྔོ་སེར་ལྟ་བུ་གཉིས་ནི་གཅིག་ཅིག་ཤོས་ཡིན་པ་སྣང་རུང་དམིགས་པ་མེད་པས་ཁེགས་ཞེས་བྱ་བ་ནི་བསྡུ་བའི་ཚིགས་སུ་བཅད་པའོ། །ཚད་མ་རིག་པའི་གཏེར་ལས་འགལ་བ་བརྟག་པའི་རབ་ཏུ་བྱེད་པ་བདུན་པའི་རྣམ་བཤད་བསྟན་ཟིན་ཏོ།། ༈ །།གཉིས་པ་ཤེས་བྱེད་ཚད་མའི་རང་བཞིན་ངེས་པར་བྱ་བ་ལ་གཉིས་ཏེ། མཚན་ཉིད་ཀྱི་རྣམ་གཞག མཚན་གཞི་སོ་སོའི་དོན་གཏན་ལ་དབབ་པའོ། །དང་པོ་ལ། སྤྱིར་མཚན་མཚོན་གཞི་གསུམ་གྱི་རང་བཞིན། བྱེ་བྲག་ཏུ་ཚད་མའི་མཚན་ཉིད་ངེས་པར་བྱ་བ། མཚན་ཉིད་ཀྱིས་མཚོན་པའི་དོན་གཏན་ལ་དབབ་པའོ། །དང་པོ་ལ་ཤེས་བྱ་ལ་ཆོས་གསུམ་གྱིས་ཁྱབ་པར་བསྒྲུབ་པ། ཁྱབ་བྱེད་ཆོས་གསུམ་གྱི་རང་བཞིན་ངེས་པར་བྱ་བ། ཆོས་གསུམ་སོ་སོའི་རྣམ་གཞག་གོ །དང་པོ་ནི། ཤེས་བྱ་ཀུན་ལ་མཚན་ཉིད་མཚོན་བྱ་མཚན་གཞི་ཞེས་བྱ་བའི་ཆོས་གསུམ་གྱིས་ཁྱབ་སྟེ། ཤེས་བྱའི་རྣམ་པ་གང་རུང་ཞིག་བློ་ལ་འཆར་བ་ན། གཞན་དང་མི་འདྲ་བའི་རྣམ་པ་དང་། དེ་ཉིད་ལ་སྒྲ་བློ་མ་འཁྲུལ་བས་ཞེན་དུ་རུང་བ་དང་། དེའང་གཞི་དང་བཅས་པར་འཆར་བའི་ཕྱིར་རོ། །རྒྱུ་མཚན་དེའི་ཕྱིར་ན་ཆོས་གསུམ་པོ་དེའི་རྣམ་གཞག་བཤད་པར་བྱའོ། །གཉིས་པ་ལ་ངོ་བོ་ངོས་བཟུང་བ། དེར་འཇོག་པའི་འཐད་པ། སོ་སོའི་མཚན་ཉིད་དང་གསུམ་མོ། །དང་པོ་ནི། མཚན་ཉིད་ནི་འདིས་གོ་བར་བྱེད་པ་རྣམ་འཇོག་གི་རྒྱུ་སྟེ་ནོག་ལྐོག་ཤལ་ལྟ་བུ་དོན་གྱི་ཆོས་སོ། །མཚོན་བྱ་ནི་འདི་གོ་བར་བྱ་བ་རྣམ་གཞག་གི་འབྲས་བུ་སྟེ་བ་གླང་གི་ཐ་སྙད་ལྟ་བུ་བློའི་ཆོས་སོ། །མཚན་གཞི་ནི་འདི་ལ་གོ་བར་བྱ་བ་རྟེན་གྱི་ཆོས་ཏེ་དཀར་ཟལ་ལྟ་བུའོ། །གསུམ་པོ་དེ་དག་རྣམ་པར་གཞག་བྱ་དང་། རྣམ་པར་འཇོག་བྱེད་ཡིན་པས་དོན་རང་མཚན་གྱི་ཆ་ནས་མི་འགྱུར་གྱི་གཞན་སེལ་ཉིད་ཡིན་ནོ། །གཉིས་པ་ནི། དཀར་ཟལ་བ་གླང་དུ་མཚོན་པ་ལ་ནོག་ལྐོག་ཤལ་མཚན་ཉིད་དུ་བཀོད་པའི་ཚེ་ཆོས་གསུམ་པོ་སོ་སོ་ལ་ཡང་དེ་དང་དེ་ཡི་རྒྱུ་མཚན་དགོས་ཏེ། རྒྱུ་མཚན་མེད་བཞིན་དུ་དེ་དང་དེར་བཞག་ན་གསུམ་པོ་ཐམས་ཅད་ཕན་ཚུན་འཆོལ་བར་འགྱུར་བའི་ཕྱིར་རོ། །གསུམ་པ་ལ་མཚན་ཉིད། མཚོན་བྱ། མཚན་གཞི་དང་གསུམ། དང་པོ་ལ། མཚན་ཉིད་ལ་མཚན་ཉིད་མི་དགོས་པར་འདོད་པ་དགག དགོས་པའི་མཚན་ཉིད་གཞག་པ། དེའི་བསལ་བྱ་སྐྱོན་ཅན་གྱི་རབ་ཏུ་དབྱེ་བའོ། །དང་པོ་ལ་དགག་གཞག་སྤོང་གསུམ། དང་པོ་ནི། སྔ་རབས་པ་ཁ་ཅིག་མཚན་ཉིད་ལ་མཚན་ཉིད་གཞན་མི་དགོས་ཏེ། དོན་ལྡོག་རྫས་ཡོད་ཡིན་པའི་ཕྱིར་དང་། དགོས་ན་ཐུག་མེད་དུ་འགྱུར་རོ་ཞེས་ཟེར་རོ་ཁ་ཅིག་སྟེ་ཆ་པ་ན་རེ། མཚན་ཉིད་ལའང་མཚན་ཉིད་ཀྱི་དོན་དང་ཐ་སྙད་གཉིས་ལས་དོན་ཏེ་གཞི་ལྡོག་ནོག་ལྐོག་ཤལ་ལྟ་བུ་ལ་མཚན་ཉིད་གཞན་མི་དགོས་ཀྱང་། དོན་དེ་མཚན་གཞིར་བཞག་ནས་མཚན་ཉིད་ཀྱི་ཐ་སྙད་དུ་སྒྲུབ་པ་ལ་མཚན་ཉིད་དགོས་ལ། དེ་རྫས་ཡོད་ཡིན་པའི་གཏན་ཚིགས་མ་གྲུབ་བོ་ཞེས་ཟེར་བ་དང་། གཞན་དག་སྟེ་གཙང་ནག་ནི་མཚན་ཉིད་ཀྱི་དོན་ནམ་གཞི་ལྡོག་ལའང་མཚན་ཉིད་དགོས་ཏེ་ཐ་སྙད་གཉིས་པའི་མཚན་ཉིད་བ་གླང་གི་ཐ་སྙད་ལ་ནོག་ལྐོག་ཤལ་དགོས་པ་བཞིན་ནོ། །བ་གླང་གི་ཐ་སྙད་ཐ་སྙད་གཉིས་པའི་མཚན་ཉིད་ཇི་ལྟར་ཡིན་ཞེ་ན། ནོག་ལྐོག་ཤལ་ཡང་བ་གླང་གི་མཚན་ཉིད་ཇི་ལྟར་ཡིན། དེ་བ་གླང་གི་ཞེན་ཡུལ་ཡིན་པས་སོ་ཞེ་ན། བ་གླང་གི་ཐ་སྙད་ཀྱང་ཐ་སྙད་གཉིས་པའི་ཞེན་ཡུལ་ཡིན་པས་སོ། །འོན་ཀྱང་ནོག་ལྐོག་ཤལ་ལ་མཚན་ཉིད་གཞན་མི་དགོས་པས་ཐུག་མེད་དུ་མི་འགྱུར་རོ། །དེ་དང་འདྲ་བར་མཚོན་བྱ་ལའང་མཚོན་བྱ་གཞན་ཡོད་དོ། །དེས་ན་མཚན་ཉིད་ཀྱི་དོན་ལ་ཐུག་པ་ཡོད་ཀྱང་ཐ་སྙད་ཐུག་མེད་ཡིན་ཏེ། ནོག་ལྐོག་ཤལ་བ་གླང་གི་མཚན་ཉིད་དུ་མཚོན་པ་ལ་བ་གླང་གི་ཆོས་གསུམ་ཚང་བ་འགོད་པ་ལྟ་བུ་སྔ་མ་སྔ་མ་ལ་ལྟོས་པའི་ཆོས་གསུམ་མཚན་གཞི་དང་། ཕྱི་མ་ཕྱི་མ་ལ་ལྟོས་པའི་ཆོས་གསུམ་མཚན་ཉིད་ཡིན་ཏེ། དཔེར་ན་དུ་བ་གཏན་ཚིགས་སུ་མཚོན་པ་ལ་ཚུལ་གསུམ་ཚང་བ་རྟགས་སུ་བཀོད་ཅིང་། ཚུལ་གསུམ་དང་པོ་གཏན་ཚིགས་སུ་སྒྲུབ་པ་ལ་ཚུལ་གསུམ་གཉིས་པ་བཀོད་པ་སོགས་རྟགས་ཐུག་མེད་ཡིན་པ་བཞིན་ནོ་ཞེས་ཟེར་རོ། །མི་འཐད་དེ། རྣམ་འཇོག་གི་རྒྱུ་མཚན་ཉིད་ནི་མ་ངེས་པར་རྣམ་པར་གཞག་བྱའི་འབྲས་བུ་མཚོན་བྱ་ངེས་སམ་མི་ངེས། ངེས་ན་ནི་མཚན་ཉིད་དགོས་པ་མེད་པར་འགྱུར་ཏེ། མཚན་ཉིད་མེད་ཀྱང་མཚོན་བྱ་གོ་བའི་ཕྱིར། མི་ངེས་ན་ནི་མཚན་ཉིད་ཐུག་མེད་འཇིག་སྟེ། འདིའི་ཐུག་མེད་ཀྱི་ཕྱི་མ་ངེས་པ་མི་སྲིད་པས་རྩ་བའི་མཚན་ཉིད་མི་ངེས་ལ། དེས་ན་མཚོན་བྱ་ཡང་མི་ངེས་པར་འགྱུར་བའི་ཕྱིར་རོ། །གལ་ཏེ་ཐུག་མེད་ཀྱི་ཕྱི་མ་མ་ངེས་ཀྱང་སྐྱོན་མེད་དེ། མཚོན་བྱ་དང་བསྒྲུབ་བྱའི་དོན། མཚན་ཉིད་དང་རྟགས་ཀྱི་མཚན་གཞིས་སྒྲུབ་པའི་ཕྱིར་ཞེ་ན། དེ་ལྟར་ན་ཚུལ་གསུམ་མ་ངེས་ཀྱང་བྱས་པ་ངེས་པ་ཙམ་གྱིས་སྒྲ་མི་རྟག་པ་རྟོགས་པ་དང་། ནོག་ལྐོག་ཤལ་མ་ངེས་ཀྱང་དཀར་ཟལ་ངེས་ཙམ་གྱིས་བ་གླང་རྟོགས་པར་འགྱུར་རོ། །འདོད་ན། སྒྲ་བྱས་པར་མཐོང་བ་ལ་རྟག་པའི་སྒྲོ་འདོགས་སྐྱེ་མི་སྲིད་པ་དང་། ནོག་ལྐོག་ཤལ་མེད་པའི་གོང་བུ་གཞན་ལའང་བ་གླང་དུ་ངེས་པར་འགྱུར་རོ། །ཡང་བ་གླང་གི་ཐ་སྙད་ཐ་སྙད་གཉིས་པའི་མཚན་ཉིད་ཡིན་ཏེ། བ་གླང་གི་ཐ་སྙད་དེ་ཉིད་ལ་ཡང་སྒྲ་བློ་མ་འཁྲུལ་བའི་ཞེན་རུང་ཞིག་མེད་ན་ནི་དེ་ནི་ཤེས་བྱ་མིན་པར་ཐལ་ཏེ། ཤེས་བརྗོད་ལས་འདས་པའི་ཕྱིར། ཡོད་ན་དེ་ཐ་སྙད་གཉིས་པ་ཡིན་པས་བ་གླང་གི་ཐ་སྙད་དེ་ཉིད་ཐ་སྙད་ཕྱི་མ་ཡི་མཚན་ཉིད་ཡིན་ཏེ། དེའི་ཞེན་ཡུལ་ཡིན་པའི་ཕྱིར། དེས་ན་ཐ་སྙད་སྔ་མ་སྔ་མ་ནི་མཚན་ཉིད་དང་། དེ་ཉིད་ལ་སྒྲ་བློས་ཞེན་རུང་གི་ཐ་སྙད་ཕྱི་མ་ཕྱི་མ་ནི་མཚོན་བྱ་ཡིན་པས་ཤེས་བྱ་ལ་མཚན་ཉིད་དུ་མི་རུང་བའི་ཆོས་མི་སྲིད་ཞེས་ལ་ལ་སྟེ་གཙང་ནག་པ་འདོད་དོ། །འདི་དགག་སྟེ། དེ་ལྟར་ཡིན་ན་ཤིང་གི་མཚན་ཉིད་དུ་འདོད་པའི་ཡལ་ག་ལ་ཡལ་ག་གཉིས་པ་མེད་ན་ཡལ་ག་ཤིང་མ་ཡིན་པར་འགྱུར་ལ། དེ་ལ་ཡལ་ག་གཞན་ཡོད་ན་དེ་ལ་ཡང་ཡལ་ག་གསུམ་པ་དང་བཞི་པ་སོགས་དགོས་པས་ཤིང་ལའང་མཚན་ཉིད་ཐུག་པ་མེད་པར་འགྱུར་རོ་ཞེས་མཚུངས་སོ། །གལ་ཏེ་ཙནྡན་ཤིང་དུ་སྒྲུབ་པ་ལ་ཡལ་ག་བཀོད་པའི་ཚེ་མཚན་ཉིད་ཚོལ་བ་ཐུག་མེད་མི་དགོས་ཏེ། དེའི་ཚེ་ཡལ་ག་ལ་ནི་ཡལ་ག་གཞན་མེད་ཀྱང་ཡལ་ག་ཤིང་མིན་པར་མི་འགྱུར་བའི་ཕྱིར་ཏེ། ཡལ་ག་དེ་ཉིད་ཀྱི་ཙནྡན་ཤིང་དང་ཐ་དད་ལྡན་པར་མི་སྒྲུབ་ཀྱི་ངོ་བོ་དབྱེར་མེད་སྒྲུབ་པའི་ཕྱིར་ཞེ་ན། བ་གླང་གི་ཐ་སྙད་སྒྲུབ་པ་ཐུག་མེད་ག་ལ་དགོས་ཏེ་ཐ་སྙད་ལ་ཐ་སྙད་གཉིས་པ་མེད་ན་ཡང་ཐ་སྙད་སྔ་མ་དེ་ཤེས་བརྗོད་ལས་འདས་པར་མི་འགྱུར་བའི་ཕྱིར། ནོག་ལྐོག་ཤལ་ལ་སོགས་པའི་མཚན་ཉིད་ཀྱིས་བ་གླང་ལ་སོགས་པའི་ཐ་སྙད་དེ་ཉིད་ཐ་དད་ལྡན་པར་མི་སྒྲུབ་པར་ཤེས་བྱ་བ་གླང་གི་ངོ་བོར་སྒྲུབ་པའི་ཕྱིར་ན། ནོག་ལྐོག་ཤལ་ཤེས་བརྗོད་ཅན་དུ་གྲུབ་པ་ན་དེ་དང་དབྱེར་མེད་ཀྱི་བ་གླང་གི་ཐ་སྙད་ཀྱང་ཤེས་བརྗོད་ཅན་དུ་གྲུབ་སྟེ། དཔེར་ན་ཙནྡན་ཤིང་དུ་གྲུབ་པ་ན་དེ་དང་དབྱེར་མེད་ཀྱི་ཡལ་ག་ཤིང་དུ་གྲུབ་པ་བཞིན་ནོ། །གཉིས་པ་རང་ལུགས་ནི། བ་གླང་ཞེས་པའི་བརྡ་དང་ནོག་ལྐོག་ཤལ་གྱི་དོན་འབྲེལ་པར་ནམ་ཞིག་རྟོགས་པ་དེའི་ཚེ་ན་ནོག་ལྐོག་ཤལ་གྱིས་བ་གླང་གི་ཐ་སྙད་འགྲུབ་བོ། །བརྡ་དོན་འབྲེལ་བར་ནམ་གྱི་ཚེ་རྟོགས་ཞེ་ན། མཁས་པས་གཏན་ཚིགས་དང་མཚན་ཉིད་ཀྱི་དོན་མཐོང་བ་ཙམ་གྱིས་དེ་དག་གི་ཐ་སྙད་འགྲུབ་ལ། བླུན་པོ་ལ་དེ་དག་གི་མཚན་ཉིད་རྟགས་སུ་བཀོད་པའི་ཐ་སྙད་སྒྲུབ་ཀྱིས་འགྲུབ་ཅིང་། ཤིན་ཏུ་བླུན་པོ་ལ་ཚུལ་གསུམ་སོ་སོའི་ངོ་བོ་དང་། ནོག་ལྐོག་ཤལ་གྱི་དོན་གཉའ་བར་ཤ་འཕུངས་པ་དང་། མགྲིན་པར་ལྤགས་པ་འཕྱང་བ་ལ་སོགས་པ་བརྡ་དོན་སྦྲེལ་དགོས་པ་སྲིད་དོ། །དེ་ཙམ་བརྗོད་ཀྱང་མི་གོ་བ་ནི་ཐ་སྙད་སྒྲུབ་ཀྱི་ཡུལ་མིན་ནོ། །འོ་ན་བླུན་པོ་ལ་ཐ་སྙད་ཇི་ལྟར་སྒྲུབ་སྙམ་ན། རྟགས་དང་མཚན་ཉིད་གཉིས་ཀ་ལ་སྤྱི་དང་བྱེ་བྲག་སྦྱོར་བ་འདིར་གཏོགས་གཉིས་གཉིས་ཡིན་ལ། རྟགས་དང་མཚན་ཉིད་རེ་རེའི་སྦྱོར་བ་གཉིས་ཀའང་སྦྱོར་བ་གསུམ་པར་ཐ་སྙད་མཐར་ཐུག་པས་བཞི་པ་འགོད་མི་དགོས་ཏེ། བཞི་པ་ཕན་ཆད་ལ་ཐ་སྙད་མ་གྲུབ་པ་སྒྲུབ་པའི་དགོས་ནུས་གང་ཡང་མེད་པའི་ཕྱིར་རོ། །བརྡ་དྲན་གྱི་སྦྱོར་བ་བཞི་པོ་སྦྱོར་བ་དེ་དང་དེའི་སྦྱོར་བ་གསུམ་པ་ཡིན་ནོ། །འོ་ན་དང་པོ་རྣམས་གང་ཞེ་ན། རྟགས་ཀྱི་སྦྱོར་བ་གཉིས་ཀྱི་དང་པོ་ནི། གང་དུ་བ་ཡོད་ན་མེ་ཡོད་པས་ཁྱབ། དཔེར་ན་ཚང་བང་བཞིན། ལ་ལ་ཡང་དུ་བ་ཡོད་དོ་ཞེས་པ་སྟེ། འདིས་དུ་བ་སྤྱི་རྟགས་ཙམ་དང་། བྱེ་བྲག་ལ་ལ་མེ་ཡོད་པར་སྒྲུབ་པའི་རྟགས་སུ་བཀོད་པའི་ཕྱིར། མཚན་ཉིད་ཀྱི་སྦྱོར་བ་གཉིས་ཀྱི་དང་པོ་ནི། ནོག་ལྐོག་ཤལ་མཚན་གཞི། བ་གླང་གི་མཚན་ཉིད་ཡིན་པར་མཚོན། དེའི་དངོས་འགལ་གཅོད་པའི་དོན་ལྡོག་གྲུབ་པ་ཞེས་བྱ་སྟེ། འདིས་ནོག་ལྐོག་ཤལ་སྤྱིར་མཚན་ཉིད། བྱེ་བྲག་བ་གླང་གི་མཚན་ཉིད་དུ་བཀོད་པའི་ཕྱིར། དེ་དག་ལ་དུ་བ་གཏན་ཚིགས་ཡིན་ཏེ། ཅི་ཕྱིར་ཞེས་དྲིས་པ་ན་སྤྱིར་གཏན་ཚིགས་ཙམ་དང་། བྱེ་བྲག་སྦྱོར་བ་འདིར་གཏོགས་ཀྱི་ཐ་སྙད་སྒྲུབ་པ་གཉིས་ལས། དང་པོ་ནི། ཚུལ་གསུམ་ཚང་བ་དེ་གཏན་ཚིགས་ཡིན་ཏེ་བྱས་པ་བཞིན། དུ་བ་ཡང་ཚུལ་གསུམ་ཚང་བ་ཡིན་ནོ་ཞེས་འགོད། དེ་ལྟ་བུའི་ཚུལ་གསུམ་ཚང་བ་དེ་གཏན་ཚིགས་ཡིན་ཏེ། ཅི་ཕྱིར་ཞེ་ན། གང་ཚུལ་གསུམ་ཚང་བ་ལ་གཏན་ཚིགས་ཀྱི་བརྡ་སྦྱར་ཏེ། ཡལ་ག་དང་ལྡན་པ་ལ་ཤིང་གི་བརྡ་སྦྱར་བ་བཞིན་ཞེས་བརྡ་དྲན་པར་བྱས་པས་འགྲུབ་བོ། །སྦྱོར་བ་འདིར་གཏོགས་ཀྱང་གོ་སླའོ། །དེ་བཞིན་དུ་ནོག་ལྐོག་ཤལ་མཚན་ཉིད་དུ་སྒྲུབ་པ་ལ་ཡང་སྤྱི་དང་སྦྱོར་བ་འདིར་གཏོགས་གཉིས་ལས། དང་པོ་ནི། གང་དངོས་འགལ་གཅོད་པའི་དོན་ལྡོག་གྲུབ་པ་མཚན་ཉིད་ཡིན་ཏེ། ལྟོ་ལྡིར་ཞབས་ཞུམ་བཞིན། ནོག་སོགས་འདུས་པ་ཡང་དངོས་འགལ་གཅོད་པའི་དོན་ལྡོག་གྲུབ་པ་ཡིན་ནོ་ཞེས་པས་འགྲུབ་ཅིང་། དེ་ཉིད་མཚན་ཉིད་ཡིན་པ་ཡང་གང་དངོས་འགལ་གཅོད་པའི་དོན་ལྡོག་གྲུབ་པ་ལ་མཚན་ཉིད་ཀྱི་བརྡ་སྦྱར་ཏེ། ཡལ་ག་དང་ལྡན་པ་ལ་ཤིང་བཞིན་ཞེས་པས་འགྲུབ་ལ། སྦྱོར་བ་འདིར་གཏོགས་ཀྱང་བྱེ་བྲག་ལ་བཀར་ཏེ་རྗོད་པ་ཉིད་ཀྱིས་ཤེས་པར་སླའོ། །འདི་ལྟ་བུའི་འཆད་ཚུལ་མི་ཤེས་པར་སྤྲང་པོ་ཙམ་པ་ལ་ཐུག་པ་དཔེར་བྱས་ནས་འདིར་སྦྱོར་བ་གསུམ་པ་མེད་པར་སྨྲ་བ་ནི། བཟའ་འདོད་ཀྱི་སྤྲང་པོ་དང་འཆད་འདོད་སློབ་དཔོན་མཚུངས་པར་སྣང་ངོ་། །གསུམ་པ་རྩོད་སྤོང་ནི། ཕྱ་གཙང་ན་རེ། ཚུལ་གསུམ་ཚང་བ་ལ་ཚུལ་གསུམ་ཚང་བ་མེད་ན་ཚུལ་གསུམ་ཚང་བ་རྟགས་མིན་པར་འགྱུར་ལ། ཡོད་ན་དེ་ཉིད་ཚུལ་གསུམ་གཉིས་པ་ཡིན་པས་དེ་ཉིད་ལ་ལྟོས་ནས་ཚུལ་གསུམ་གསུམ་པ་དང་བཞི་པ་ལ་སོགས་པ་ཁྱེད་ལའང་ཐུག་མེད་དུ་འགྱུར་རོ་ལོ། །སྐྱོན་གཉིས་མེད་དེ། དུ་བ་བཞིར་བཞག་ནས་དེའི་སྟེང་དུ་ཚུལ་གསུམ་གཞན་ཞིག་རྩི་ན་བདེན་ཡང་། དཔྱད་བྱའི་ཚུལ་གསུམ་ཚང་བ་དེ་དུ་བ་ཁོ་ནའི་ཆོས་སུ་ཡོད་པའི་ཚུལ་གསུམ་ཚང་བ་དེ་ལ་དབྱེར་མེད་པ་ཡིན་གྱི་དུ་བའི་ཆོས་སུ་གྱུར་པའི་ཚུལ་གསུམ་ཚང་བ་དེ་ལས་གཞན་པའི་ཚུལ་གསུམ་གཉིས་པ་དང་གསུམ་པ་སོགས་མེད་པའི་ཕྱིར། འདིས་དུ་བ་ལ་མེ་སྒྲུབ་པའི་ཚུལ་གསུམ་དུ་བསྟན་པར་འདོད་པ་དག་གིས་ཕྱོགས་ཙམ་དུ་ཡང་མ་ཕྱིན་པས་ལོག་པར་བཤད་པར་མ་བྱེད་ཅིག ལན་འདི་ཡིས་དངོས་འགལ་གཅོད་པའི་དོན་ལྡོག་ལ་མཚན་ཉིད་མེད་ན་དེ་མཚན་ཉིད་མིན་པར་འགྱུར་ལ། ཡོད་ན་ཐུག་མེད་དུ་ཐལ་ལོ་ཞེས་པའི་སྐྱོན་ཡང་བསལ་བ་ཡིན་ཏེ། ནོག་ལྐོག་ཤལ་གཞིར་བཞག་ནས་དངོས་འགལ་གཅོད་པའི་དོན་ལྡོག་གྲུབ་པ་གཞན་ཞིག་རྩི་བ་མིན་པར། ནོག་ལྐོག་ཤལ་ཉིད་དངོས་འགལ་གཅོད་པའི་དོན་ལྡོག་སྒྲུབ་པའི་ཕྱིར་རོ། །གཉིས་པ་དགོས་པའི་མཚན་ཉིད་གཞག་པ་ལ། གཞན་ལུགས་དགག་པ། རང་ལུགས་གཞག་པ་གཉིས། དང་པོ་ནི། ལོ་ཙཱ་བ་ལ་སོགས་པ་ལ་ལ་མཚན་ཉིད་ཀྱི་མཚན་ཉིད་མཚོན་བྱ་རྣམ་འཇོག་གི་རྒྱུ་མཚན་ཞེས་ཟེར་བ་འཐད་པ་མིན་ཏེ། དེ་ལྟར་ན་བསྒྲུབ་བྱ་གོ་བྱེད་ཅེས་པ་གཏན་ཚིགས་ཀྱི་མཚན་ཉིད་ལའང་མཚུངས་པའི་ཕྱིར། འགའ་ཞིག་ཕྱྭ་པ་ནི་ཆོས་གསུམ་ཚང་བ་དང་། གཙང་ནག་པ། མཚོན་བྱའི་དོན་ལྡོག་གཞི་ལ་གྲུབ་པ་ཡིན་པར་འདོད་དོ། །གཉིས་པོ་འདི་མི་འཐད་དེ་མཚན་ཉིད་དུ་གོ་བ་མཚོན་བྱ་གོ་བ་ལ་ལྟོས་པའི་ཕྱིར་རོ། །གཉིས་པ་ནི། དངོས་འགལ་རྣམ་པར་གཅོད་པའི་དོན་ལྡོག་གྲུབ་པ་ཡིན་ཏེ། མཚོན་བྱ་དང་མཚན་གཞིའི་ལྡོག་པ་གཉིས་བཅད་ནས་གང་འདོད་པ་དེ་ཡི་དོན་ལྡོག་གྲུབ་པའི་ཕྱིར་རོ། །གསུམ་པ་དེའི་བསལ་བྱ་སྐྱོན་ཅན་གྱི་རབ་དབྱེ་ལ། དགག་གཞག་སྤོང་གསུམ་ལས། དང་པོ་ནི། མཚན་ཉིད་དེ་ཡི་སྐྱོན་རྣམས་བསྡུ་ན་གསུམ་སྟེ། རང་ལྡོག་རྫས་མ་གྲུབ། དོན་ལྡོག་གཞན་དུ་གྱུར། མཚན་གཞི་ལ་མི་གནས་པའོ། །དང་པོ་ནི། མཚན་ཉིད་གང་ཞིག རང་གི་ཐ་སྙད་ལས་རང་དབང་དུ་མ་གྲུབ་པ་ཡིན་ལ། དབྱེ་ན་བ་གླང་གི་མཚན་ཉིད་དུ་བ་གླང་ཉིད་ལྟ་བུ་རང་གི་ཐ་སྙད་དང་། དེའི་མགོ་བོ་ལྟ་བུ་རང་གི་ཐ་སྙད་ཀྱིས་ཁྱད་པར་དུ་བྱས་པ་མཚན་ཉིད་དུ་བཀོད་པ་གཉིས། གཉིས་པ་ནི། རང་གི་ཐ་སྙད་ལས་རང་དབང་དུ་གྲུབ་ཀྱང་གང་དུ་མཚོན་བྱའི་དོན་ལྡོག་མིན་པའོ། །དབྱེ་ན། མི་སྲིད། མ་ཁྱབ། ཁྱབ་ཆེས་པ། ཁྱབ་མཉམ་པ་བཞིའོ། །གསུམ་པའི་མཚན་ཉིད། མཚན་ཉིད་གང་ཞིག རང་གི་ཐ་སྙད་ལས་རང་དབང་དུ་གྲུབ་ཀྱང་གང་མཚོན་པར་བྱ་བའི་གཞི་ལ་ཇི་ལྟར་དགོད་བྱ་ལྟར་མ་གྲུབ་པའོ། །དབྱེ་ན། འགལ་ནས། ལྡོག་པ་ཐ་དད་མེད་ནས། དོན་ལྡོག་ཐ་དད་མེད་ནས། མཚན་གཞིའི་ཕྱོགས་གཅིག་ལ་མ་ཁྱབ་ནས་མི་གནས་པ་དང་བཞིའོ་ཞེས་བྱང་ཕྱོགས་པའི་རྟོག་གེ་ཕྱི་རབས་པ་རྣམས་འདོད་དོ། །འདི་དགག་པ་ལ། རིགས་པས་མི་འཐད་པ། གཞུང་གི་དགོངས་པ་མིན་པའོ། །དང་པོ་ནི། གལ་ཏེ་འདི་དག་སྦྱོར་བ་བཀོད་ནས་སྐྱོན་རྩི་ན། མཚན་ཉིད་མཚོན་བྱ་ལས་དོན་ལྡོག་གཞན་དུ་གྱུར་པ་སྐྱོན་མེད་ཡིན་པར་འགྱུར་ཏེ། བསྒྲུབ་ཆོས་དོར་བས་སྟོང་ཉིད་མེད་དགག་ཏུ་མཚོན་པའི་ཚེ་དོན་ལྡོག་གཞན་འགྱུར་དུ་ཐལ་ཏེ། དེ་མེད་དགག་གི་ཐ་སྙད་ལ་མི་སྲིད་པའི་ཕྱིར། རྟགས་གསལ་ཁས་སོ། །གལ་ཏེ་མཚན་ཉིད་མཚོན་བྱ་ལ་སྲིད་མི་སྲིད་ཀྱི་དོན་མཚན་གཞི་ལ་སྲིད་མི་སྲིད་ལ་རྗོད་ཀྱི། མཚོན་བྱ་ཉིད་ཀྱི་ལྡོག་པ་ལ་བརྟེན་མི་བརྟེན་ལ་མི་འདོད་དེ། དེ་ལྟར་མི་དགོས་པ་དང་མི་ཕན་པའི་ཕྱིར་རོ་ཞེ་ན། འོ་ན་དོན་ལྡོག་གཞན་གྱུར་དུ་འདོད་ཀྱང་མཚན་གཞི་ལ་མི་གནས་པར་འགྱུར་ཏེ། མི་སྲིད་ནས་དོན་ལྡོག་གཞན་གྱུར་གྱི་སྐྱོན་ཡང་མཚན་གཞི་ལ་མི་སྲིད་པ་ལ་འཇོག་པའི་ཕྱིར། གལ་ཏེ་སྦྱོར་བ་མ་བཀོད་པ་ལས་སྐྱོན་རྩི་ན། མཚན་གཞི་ལ་མི་གནས་པ་སྐྱོན་དུ་བརྩི་བ་དོན་མེད་དུ་འགྱུར་ཏེ། མེད་དགག་གི་མཚན་ཉིད་བསྒྲུབ་ཆོས་དོར་བ་བཀོད་པ་སྐྱོན་མེད་ཡིན་པའི་ཕྱིར། གལ་ཏེ་མཚན་གཞིར་འཇོག་ཚུལ་ལ་རགས་ལས་ཏེ། སྟོང་ཉིད་ལྟ་བུ་བཞག་ན་སྐྱོན་མེད་དང་། ཤེས་བྱ་ལྟ་བུ་བཞག་ན་སྐྱོན་ཅན་ཡིན་ནོ་ཞེ་ན། འོ་ན་སྦྱོར་བ་མ་བཀོད་པ་ལ་སྐྱོན་བརྩི་བ་ཉམས་ཏེ། ཆོས་གསུམ་ཀ་བཀོད་པ་ལ་སྐྱོན་ལྟོས་དགོས་པའི་ཕྱིར་རོ། །དེ་ལ་མཚོན་བྱའི་སྐྱོན་ནི་མཚན་གཞིར་བཀོད་དམ་མ་བཀོད་ཀྱང་རུང་མཚོན་བྱ་ལ་བརྩི་ལ། མཚན་གཞིའི་སྐྱོན་ནི་མཚོན་ཆོས་དང་ལྡན་ནམ་མི་ལྡན་ཡང་རུང་སྟེ། མཚན་གཞིར་བཀོད་པ་ལ་བརྩི་བས་སྐྱོན་མེད་དོ་ཞེ་ན། མི་འཐད་དེ། མཚན་གཞི་ལ་བརྩི་ན་མ་བཀོད་པ་འགལ་ལ། བཀོད་ན་མཚན་གཞིའི་སྐྱོན་མིན་པ་འགལ་ལོ། །ཡང་མཚན་གཞིའི་སྐྱོན་རྩི་ཚུལ་ཡང་མི་འཐད་དེ། རྟ་བ་གླང་དུ་མཚོན་པ་ལ་རང་ལྡོག་རྫས་སུ་མ་གྲུབ་པ་བཀོད་ཀྱང་མཚན་གཞི་ལ་མི་གནས་པར་འགྱུར་རོ། །འདོད་ན། སྐྱོན་ཐམས་ཅད་མཚན་གཞི་ལ་མི་གནས་པར་འདུས་པས་སྐྱོན་གཉིས་དོན་མེད་དོ། །གཉིས་པ་ནི། གསུམ་པོ་འདི་དག་མཚན་ཉིད་ཀྱི་སྐྱོན་དུ་མི་འཐད་དེ། འཐད་ན་ནི་མཁས་པའི་གཙུག་རྒྱན་གཉིས་སྐྱོན་དུ་ཅིས་མི་བཞེད་དེ་བཞེད་དགོས་པ་ལ། ཀུན་བཏུས་དང་། སྡེ་བདུན་དུ་མ་གསུངས་པའི་ཕྱིར། གཉིས་པ་རང་གི་འདོད་པ་ནི། མ་ཁྱབ་ཁྱབ་ཆེས་མི་སྲིད་པ་གསུམ་ནི་མཚན་ཉིད་ཐམས་ཅད་ཀྱི་ནི་སྤྱི་སྐྱོན་ཡིན་པས། གསུམ་པོ་འདིར་འདུས་ཏེ། སྔར་གྱི་རང་ལྡོག་རྫས་སུ་མ་གྲུབ་པ་ལ་སོགས་པ་གསུམ་པོའང་སྐྱོན་དུ་འགྲོ་བའི་ཆ་ཐམས་ཅད་གསུམ་པོ་འདིར་འདུས་ཀྱི་ལོགས་པ་མེད་པའི་ཕྱིར་དང་། མཚན་ཉིད་ལ་དོན་གྱི་སྒོ་ནས་རྣམ་གཅོད་གསུམ་ཡོད་པ་བཞིན་དུ། རྗོད་བྱེད་ཀྱི་སྒྲ་དང་དོན་གྱི་བཅད་བྱ་རྣམ་པར་གཅོད་ཚུལ་ཀུན་མ་ཁྱབ་པ་གཅོད་པ་སོགས་གསུམ་དུ་འདུས་ཀྱི་གསུམ་པོ་འདི་ལས་གཅོད་ཚུལ་གཞན་ཡོད་པ་མིན་པའི་ཕྱིར་ཏེ། ཆོས་ཀྱི་ཚིག་ཕྲད་ཐ་དད་པ། །ཞེས་སོགས་གསུངས། རྣམ་གཅོད་གསུམ་གྱིས་རིམ་བཞིན་མ་ཁྱབ་པ་སོགས་གསུམ་གཅོད་པའི་ངག་ཡིན་ལ། སྒྲས་ཇི་ལྟར་གཅོད་པ་ལྟར་དོན་ཡང་རྣམ་པར་བཅོད་པས་མཚན་ཉིད་ཀྱི་སྐྱོན་གསུམ་ལས་མི་འདའོ། །དེ་ཉིད་སློབ་དཔོན་གྱིས་མཚན་ཉིད་ཀྱི་རྣམ་བཅོད་ཀྱི་སྐབས་སུ། རང་ཉིད་ཚིག་ཕྲད་ངོ་བོའི་སྒྲ། །ཞེས་སོགས་གསུངས་པས་ཁྱབ་ཆེས་པ་གཅོད། འདོད་སྒྲས་མ་ཁྱབ་སེལ་བར་བྱེད། །ཅེས་གསུངས་པས་མ་ཁྱབ་པ་གཅོད། བསྒྲུབ་བྱར་ཁས་བླངས་ཕྱོགས་མཚན་ཉིད། །ཅེས་སོགས་ཀྱིས་མི་སྲིད་པ་གཅོད་པ་ལ་དགོངས་སོ། །དེ་ལྟ་བུའི་སྐྱོན་ཅན་གསུམ་པོ་རེ་རེ་ལའང་མཚན་ཉིད་དང་དབྱེ་བ་གཉིས་གཉིས་ཡོད་པ་ནི་རང་འགྲེལ་ལས་ཤེས་སོ། །གསུམ་པ་རྩོད་པ་སྤོང་བ་ནི། གལ་ཏེ་མཚན་ཉིད་ཀྱི་སྐྱོན་འདི་དག་མཚན་གཞི་བཀོད་པ་དང་མ་བཀོད་པ་གང་ལ་བརྩི། དང་པོ་ལྟར་ན་བ་གླང་གི་མཚན་ཉིད་ལྐོག་ཤལ་ཁྲ་བོ་བཀོད་པ་འདི་མ་ཁྱབ་པར་མི་གྱུར་ཏེ། དཀར་ཟལ་ལ་བཀོད་ན་སྐྱོན་མེད་དང་། ནག་སྒུར་ལ་བཀོད་ན་མི་སྲིད་པར་འགྱུར་བའི་ཕྱིར་རོ། །གཉིས་པ་ལྟར་ན་མཚན་གཞིའི་སྐྱོན་ཐམས་ཅད་མི་འཐད་པར་འགྱུར་ཏེ། སྲོག་ཆགས་ཙམ་བ་གླང་དུ་མཚོན་པའི་མཚན་ཉིད་ནོག་ལྐོག་ཤལ་བཀོད་པའང་སྐྱོན་མེད་ཁོ་ན་ཡིན་པའི་ཕྱིར་ཞེས་དང་། ཡང་མཚན་ཉིད་མི་སྲིད་པའི་གཞིར་མཚོན་བྱ་ཁེགས་སམ་མི་ཁེགས། ཕྱི་མ་ལྟར་ན་མཚོན་བྱ་ལ་མཚན་ཉིད་ཀྱིས་མ་ཁྱབ་པར་འགྱུར་ལ། དང་པོ་ལྟར་ན་ནོག་ལྐོག་ཤལ་བ་གླང་དུ་མཚོན་པ་ལ། ལྐོག་ཤལ་བཀོད་པའི་ཚེ་དེ་ལ་བ་གླང་ཁེགས་པར་ཐལ། དེ་ལ་ལྐོག་ཤལ་ཐ་དད་མེད་ནས་མི་སྲིད་པའི་ཕྱིར། ཞེས་རྣམ་པར་བརྟགས་པའི་རྩོད་པ་གཉིས་ཀྱིས་སྐྱོན་ཡོན་བརྩི་བའི་སྐབས་འདིར་མི་གནོད་དེ། འདི་ལྟར་སྐྱོན་ཐམས་ཅད་མཚན་གཞི་བཀོད་པ་ལ་བརྩི་ལ། འོན་ཀྱང་དཀར་ཟལ་བ་གླང་དུ་མཚོན་པ་ལ་ལྐོག་ཤལ་ཁྲ་བོ་བཀོད་པ་འདི་མ་ཁྱབ་པ་ཡིན་ཏེ། དེའི་ཚེ་དཀར་ཟལ་མཚན་གཞི་ཙམ་ཡིན་གྱི་མཚོན་པར་བྱ་བ་བ་གླང་ཡིན་པའི་ཕྱིར། དེས་ན་མ་བཀོད་ན་བ་གླང་གི་མཚན་ཉིད་ནོག་ལྐོག་ཤལ་སྐྱོན་མེད་མིན་ཏེ། དུ་བ་མེ་འབྲས་ཡིན་ཡང་རྩོད་གཞི་ལས་གཞན་དུ་བཀོད་ན་གོ་བྱེད་དུ་མི་རུང་བ་ལྟར། ནོག་ལྐོག་ཤལ་བ་གླང་གི་མཚན་ཉིད་ཡིན་ཡང་མཚན་གཞི་རྟ་སོགས་ལ་བཀོད་ན་མཚོན་མི་ནུས་པས་སྐྱོན་ཅན་ཡིན་ནོ། །ཡང་མཚན་ཉིད་མི་སྲིད་པ་ལ་མཚོན་བྱ་ཁེགས་ཀྱང་ལྐོག་ཤལ་ལ་མི་སྲིད་པ་མ་གྲུབ་ཅིང་། ལྐོག་ཤལ་ཁྲ་བོ་མ་སྲིད་པའི་ཕྱིར། དཀར་ཟལ་མི་སྲིད་པར་ཐལ་བ་འདོད་དོ། །གཉིས་པ་མཚོན་བྱ་ལ་དགག་གཞག་སྤང་གསུམ། དང་པོ་ནི། ཁ་ཅིག་སྟེ་གཙང་ནག་པ་ནི། མཚན་མཚོན་རྫས་གཅིག་ཡིན་ཏེ། ཐ་སྙད་བསྒྲུབ་པ་རང་བཞིན་གྱི་རྟགས་ཡིན་པའི་ཕྱིར་ཞེས་ཟེར། ཐ་སྙད་ཀྱི་མཚན་ཉིད་དོན་ལྡོག་ལ་སྒྲ་བློ་མ་འཁྲུལ་བའི་ཞེན་རུང་ཡིན་ཞིང་། དེ་མཚོན་བྱའི་མཚན་གཞིར་འདོད་དོ། །འདི་མི་འཐད་དེ། མཚན་ཉིད་ལྐོག་ཤལ་མཐོང་བ་ཡི་དབང་ཤེས་རྟོག་བཅས་ཉིད་དུ་འགྱུར་ཏེ། མིང་གིས་ཁྱད་པར་དུ་བྱས་པའི་མཚོན་བྱ་བ་གླང་གི་ཐ་སྙད་འཛིན་པའི་བློ་ཡིན་པའི་ཕྱིར། རྟགས་ཁས། ཁྱབ་སྟེ་མཚན་མཚོན་རྫས་གཅིག་གང་ཞིག རྫས་གཅིག་ལ་སྣང་མི་སྣང་གི་ཆ་གཉིས་མེད་པའི་ཕྱིར། རྟོག་བྲལ་ཡིན་པས་མིང་མི་འཛིན་ན་མཚན་ཉིད་བཟུང་། མཚོན་བྱ་མ་བཟུང་བས་དེ་རྫས་གཅིག་པ་ཉམས་སོ། །ཡང་ལྐོག་ཤལ་གྱིས་དཀར་ཟལ་བ་གླང་དུ་སྒྲུབ་པ་དོན་བསྒྲུབ་ཏུ་འགྱུར་གྱི་ཐ་སྙད་བསྒྲུབ་ཏུ་མི་རུང་སྟེ་རྫས་གཅིག་པའི་ཕྱིར། དཔེར་ན་བྱས་པས་མི་རྟག་པ་སྒྲུབ་པ་བཞིན་ནོ། །ཡང་དེར་མ་ཟད་བ་གླང་གི་ཐ་སྙད་དོན་མཐུན་འཇུག་པ་དེ་རྫས་ཡོད་དུ་འགྱུར་ཏེ། མཚན་ཉིད་རྫས་ཡོད་དང་རྫས་གཅིག་ཡིན་པའི་ཕྱིར། ཡང་མཚོན་བྱའི་མཚན་གཞི་ཐ་སྙད་ལ་བྱེད་པ་དགོངས་པ་མིན་ཏེ། བརྡ་དུས་སུ་མཚན་ཉིད་རྒྱུ་མཚན་དུ་བྱས་ནས་མཚོན་བྱའི་བརྡ་བརྟགས་པ་དེ་ཕྱིས་ཐ་སྙད་ཀྱི་དུས་སུ་མཚན་ཉིད་མཐོང་བས་བརྡ་དྲན་པར་བྱས་ནས་ཡིད་ཀྱིས་ཤིང་ངོ་སྙམ་པ་དང་། ངག་གིས་ཤིང་བརྗོད་པ་དང་ལུས་ཀྱིས་ཤིང་ལེན་པ་ལ་འཇུག་པ་རྣམས་ཐ་སྙད་དུ་གསུངས་པའི་ཕྱིར་ཏེ། གྲགས་པའི་བརྡ་ཡི་རྗེས་འགྲོ་བ། །ཞེས་གསུངས་སོ། །གཉིས་པ་ནི། རྒྱུ་མཚན་ཅན་གྱི་སྒྲ་ཤེས་གྲུབ་པ་ནི་མཚོན་བྱའི་མཚན་ཉིད་ཡིན་ལ། དེ་ཡི་མཚན་གཞི་ནི་རྒྱུ་མཚན་ཏེ་དོན་ལྡོག་ཉིད་ལ་བརྡ་སྦྱར་བའོ། །སྔར་བཤད་པ་དེ་ལྟར་རྟོགས་ནས་སྒོ་གསུམ་གྱི་ཐ་སྙད་ནི་རང་གཞན་གྱི་བ་གླང་བླང་དོར་ལ་འཇུག་པ་ཡིན་མིན་རྗོད་པ་ཡོད་མེད་དཔྱོད་པ་ལ་སོགས་པ་ཡིན་ལ། དེ་ལྟ་བུ་ཡི་སྒོ་ནས་འཇིག་རྟེན་གྱི་བྱ་བ་སྒྲུབ་པ་ནི་ཐ་སྙད་བསྒྲུབ་པ་ཡིན་ནོ། །སྒྲ་རང་མཚན་དང་། སྒྲ་སྤྱི་དང་། མིང་དངོས་སུ་བཏགས་པ་ཙམ་མཚོན་བྱ་མིན་ཏེ། ལྷ་བྱིན་སོགས་མིང་གི་སྒྲ་ཐམས་ཅད་དེར་ཐལ་བའི་ཕྱིར་རོ། །གདགས་རུང་ཙམ་ཡང་མིན་ཏེ། དེ་ཤེས་བྱ་ཐམས་ཅད་ལ་ཡོད་པའི་ཕྱིར། དེས་ན་རིགས་ཀྱི་སྒྲ་དོན་ལྡོག་ལ་ལྟོས་པ་རྒྱུ་མཚན་ཅན་གྱི་མིང་སྤྱི་དེ་མཚོན་བྱ་ཡིན་པས་བཏགས་ཡོད་ཉིད་ཡིན་ལ། སྒྲོ་བཏགས་ཡིན་ཏེ་དངོས་པོ་ལ་མ་གྲུབ་པའི་ཕྱིར་ནའོ། །གསུམ་པ་ནི། མཚན་མཚོན་རྫས་གཅིག་མ་ཡིན་ན། མཚན་ཉིད་ཀྱིས་མཚོན་བྱ་སྒྲུབ་པ་རང་བཞིན་གྱི་རྟགས་སུ་མི་འཐད་པར་ཐལ་ཟེར་ལོ། །ནོག་ལྐོག་ཤལ་གྱི་རྟགས་ཀྱིས་བ་གླང་དཀར་ཟལ་གྱི་ཐ་སྙད་དོན་མཐུན་འཇུག་རུང་དུ་སྒྲུབ་པའི་གྲགས་པའི་རྗེས་དཔག་སྟེ་རྟགས་སུ་ག་ལ་འགལ་ཏེ། རྟོག་པ་འཁྲུལ་པས་ནོག་སོགས་དང་བ་གླང་གི་སྒྲའི་དོན་ཏེ་རྣམ་པ་ལ་གཅིག་ཉིད་དུ་བཟུང་བ་དེ་ལ་གཞན་སེལ་ཕྱིན་ཅི་མ་ལོག་པས་ལྡོག་པ་སོ་སོར་ཕྱེ་སྟེ་ངོ་བོ་གཅིག་ཏུ་སྒྲུབ་པ་ལ་ཐ་སྙད་བསྒྲུབ་ཀྱི་རང་བཞིན་གྱི་རྟགས་སྦྱོར་བས་ན་འཇིག་རྟེན་གྱི་དོན་ཀུན་ཏུ་ཐ་སྙད་པའི་ཚད་མ་ལ་མི་སླུ་བ་འགྲུབ་པའི་ཕྱིར། རྩ་འགྲེལ་འདིས་ཐ་སྙད་འབའ་ཞིག་བསྒྲུབ་ཀྱི་རྟགས་ཐམས་ཅད་གྲགས་རྟགས་སུ་བསྟན་པས་རང་བཞིན་མ་དམིགས་པའི་རྟགས་སུ་བཞེད་པར་གསལ་ཞིང་། མཚན་མཚོན་གཉིས་ལྡོག་པ་གཅིག་པ་ཡང་བཀག་གོ །གསུམ་པ་མཚན་གཞི་ལ། མཚན་ཉིད་ཀྱི་རྟེན་བྱེད་པ་མཚན་གཞིའི་མཚན་ཉིད་ཡིན་ལ། མཚན་ཉིད་བརྟེན་པར་གྲུབ་པ་ཉིད་ཀྱིས། མཚོན་བྱ་དེས་འཇོག་པ་ཡིན་ནོ། །དབྱེ་ན་མཚན་ཉིད་པ་བ་གླང་གི་མཚན་གཞི་དཀར་ཟལ་ལྟ་བུ་དང་། བཏགས་པ་བ་སྐྱོན་ཡོན་བརྩི་བའི་གཞི་བ་གླང་གི་མཚན་གཞི་རྟ་ལྟ་བུ་གཉིས་ཡོད། གསུམ་པ་ཆོས་གསུམ་སོ་སོའི་རྣམ་གཞག་ལ་གསུམ་སྟེ། རང་ལྡོག་ངོས་བཟུང་བ། ཇི་ལྟར་འབྲེལ་བའི་ཚུལ། མཚན་ཉིད་དང་འབྲེལ་ནས་སོ་སོར་མཚོན་པའི་རྣམ་གཞག་གོ །དང་པོ་ལ་གཉིས་ལས། གཞན་ལུགས་དགག་པ་ནི། སྣང་བ་དང་སེལ་བའི་སྒྲུབ་པ་མ་ཕྱེད་པའི་བོད་འགའ་ཞིག་ཆོས་གསུམ་གྱི་རང་ལྡོག་ནི་སྒྲུབ་པ་ཁོ་ན་ཡིན་ཏེ། རང་གི་རྣམ་པ་རང་དབང་དུ་འཆར་བས་ངེས་སུ་རུང་བའི་ཕྱིར་ཞེས་ཟེར་རོ། །གསུམ་པོ་རང་གི་རྣམ་པར་རང་དབང་དུ་འཆར་བ་དེ་ལྟ་ཡིན་ན་ཆོས་གསུམ་པོ་སེལ་བ་ལ་མི་ལྟོས་པར་རྟོག་མེད་ཤེས་པའི་ཡུལ་དུ་ཐལ་བར་འགྱུར་རོ། །འདོད་ན་སྒྲ་རྟོག་ཐམས་ཅད་སེལ་བར་གསུངས་པ་དང་འགལ་ལོ། །གཉིས་པ་རང་གི་འདོད་པ་ནི། དེས་ན་སྣང་བའི་ལྡོག་པ་འདི་ནི་ཆོས་གསུམ་ཉིད་དུ་འཇོག་པ་མིན་ལ། སེལ་བ་ཡི་ཆོས་གསུམ་གྱི་ནི་རང་ལྡོག་ལ་སྒྲུབ་པ་དང་དགག་པ་གཉིས་ཀ་ཡོད་དེ། དངོས་པོའི་ཆ་བསྒྲུབ་ན་མ་ཡིན་དགག དངོས་མེད་ཀྱི་ཆ་སྒྲུབ་ན་མེད་དགག་གོ །གཉིས་པ་ལ་འབྲེལ་ཚུལ་དངོས་དང་། འབྲེལ་པ་ངེས་བྱེད་ཀྱི་ཚད་མ་གཉིས། དང་པོ་ནི། མཚན་མཚོན་གཉིས་རང་བཞིན་འབྲེལ་བ་ཡིན་ཞིང་། དེ་གཉིས་དང་མཚན་གཞི་ནི་ཕལ་ཆེར་གནས་སྐབས་འབྲེལ་ལ། རང་བཞིན་འབྲེལ་པའང་ཡོད་དེ་དངོས་པོ་མི་རྟག་པར་མཚོན་པ་ལ་སྐད་ཅིག་མ་བཀོད་པ་ལྟ་བུའོ། །གཉིས་པ་ནི། མཚན་ཉིད་ཀྱི་དོན་སྤྱི་དང་། མཚོན་བྱའི་སྒྲ་སྤྱི་གཅིག་ཏུ་བརྡ་ཆད་བྱས་པའི་སྟོབས་ཀྱིས་རྟོག་པ་ངོ་བོ་ཉིད་ཀྱིས་འཁྲུལ་པས་དེ་གཉིས་གཅིག་ཏུ་འཛིན་པ་ཉིད་ཡིན་ལ། དེ་མྱོང་བའི་རང་རིག་གིས་སྟོབས་ཀྱིས་མཚན་མཚོན་གྱི་འབྲེལ་བ་གྲུབ་བོ། །མཚན་ཉིད་དང་མཚོན་བྱ་ཡི་འབྲེལ་བ་ནི། མཁས་པས་མཚན་ཉིད་མངོན་སུམ་གྱིས་མཐོང་བས་བརྡ་དྲན་པས་འགྲུབ་སྟེ། བློ་གྲོས་ཆེན་པོས་མཐོང་ཉིད་ལས། །ཞེས་སོགས་གསུངས་སོ། །རྨོངས་པ་ལ་ནི་བརྡ་དྲན་པར་བྱེད་པ་ཐ་སྙད་བསྒྲུབ་ཀྱི་རྗེས་དཔག་དགོས་ཏེ། ཡུལ་ཡོད་ན་ཡང་རྨོངས་པས་འདིར། །ཞེས་གསུངས་སོ། །གསུམ་པ་ལ། ཇི་ལྟར་མཚོན་པའི་ཚུལ་དང་། ཕན་ཚུན་ངེས་པའི་རྣམ་གཞག་གཉིས། དང་པོ་ལ་སྦྱོར་བའི་དབྱེ་བ། དེ་ལ་རྩོད་པ་སྤོང་བ་གཉིས། དང་པོ་ནི། ཆོས་གསུམ་པོ་དེ་ལ་སྤྱི་དང་བྱེ་བྲག་སྦྱོར་བ་འདིར་གཏོགས་ཀྱི་མཚོན་སྦྱོར་གཉིས་གཉིས་ཏེ་དྲུག་ནི་རིམ་བཞིན་ནོག་སོགས་འདུས་པ་དང་། བ་གླང་གི་ཐ་སྙད་དང་། དཀར་ཟལ་གསུམ་མཚན་གཞིར་བཟུང་ནས་སྤྱིར་མཚན་མཚོན་གཞི་གསུམ་དུ་མཚོན་པ་གསུམ། བྱེ་བྲག་སྦྱོར་བ་འདིར་གཏོགས་ཀྱི་མཚན་མཚོན་གཞི་གསུམ་དུ་མཚོན་པ་གསུམ་སྟེ་དྲུག་པོ་དེ་ཡང་དག་གོ །དེ་དག་ལས་བཟློག་པ་མིན་པར་མཚོན་པ་ལའང་མཚོན་སྦྱོར་དྲུག་སྟེ། བ་གླང་གི་ཐ་སྙད་དང་དཀར་ཟལ་མཚན་གཞིར་བཟུང་ནས་སྤྱིར་མཚན་ཉིད་མིན་པ་དང་། བྱེ་བྲག་སྦྱོར་བ་འདིར་གཏོགས་ཀྱི་མཚན་ཉིད་མིན་པར་མཚོན་པ་གཉིས། དེ་བཞིན་དུ་ནོག་སོགས་འདུས་པ་དང་དཀར་ཟལ་མཚན་གཞིར་བཟུང་ནས་སྤྱིར་མཚོན་བྱ་མིན་པ་དང་། བྱེ་བྲག་སྦྱོར་བ་འདིར་གཏོགས་ཀྱི་མཚོན་བྱ་མིན་པར་མཚོན་པ་གཉིས། ནོག་སོགས་འདུས་པ་དང་བ་གླང་གི་ཐ་སྙད་མཚན་གཞིར་བཟུང་བས་སྤྱི་མཚན་གཞི་མིན་པ་དང་། བྱེ་བྲག་སྦྱོར་བ་འདིར་གཏོགས་ཀྱི་མཚན་གཞི་མིན་པར་མཚོན་པ་གཉིས་ཏེ་དྲུག་ལས། བཞི་ནི་སྐྱོན་མེད་ཡིན་ལ། མཚན་ཉིད་མིན་པར་མཚོན་བྱེད་ཀྱི་ཆ་དང་། མཚན་གཞི་མིན་པའི་ཆ་གཉིས་སྐྱོན་ཅན་སྲིད་དེ། བ་གླང་ཁྲ་བོ་མཚོན་པ་ལ་དཀར་ཟལ་བཀོད་པ་སྐྱོན་མེད་ཡིན་པའི་ཕྱིར་དང་། སྐབས་ཐོབ་ཀྱིས་མཚན་གཞིར་མི་རུང་བ་མི་སྲིད་པའི་ཕྱིར། དེས་ན་སྐྱོན་མེད་ཅེས་པ་དང་། སྲིད་ཅེས་པ་སོ་སོར་སྦྱར་བ་འགྲེལ་པར་སྣང་ཡང་མིག་གིས་མ་མཐོང་ཞིང་རང་ཉིད་ཀྱི་རྣམ་དཔྱོད་ཀྱིས་སྦྱོར་མ་ཤེས་པར་དྲི་མ་མེད་པའི་ཚིག་ལ་ལོག་པ་རྟོག་པའི་དྲི་མས་མ་ཕུག་ཅིག གཉིས་པ་ལ་རང་ལྡོག་ཡིན་པར་མཚོན་ཚུལ་ལ་རྩོད་པ་སྤོང་བ། གཞན་ལྡོག་མིན་པར་མཚོན་ཚུལ་ལ་རྩོད་པ་སྤོང་བ། འགལ་མཚུངས་ཀྱི་སྦྱོར་བ་དཔེར་བརྗོད་པའོ། །དང་པོ་ནི། ནོག་ལྐོག་ཤལ་མཚན་གཞིར་གཞག་ནས་སྦྱོར་བ་འདིར་གཏོགས་ཀྱི་བ་གླང་གི་མཚན་ཉིད་དུ་མཚོན་པ་ལ་དེའི་དངོས་འགལ་གཅོད་པའི་དོན་ལྡོག་གྲུབ་པ་བཀོད་པ་ན། མཚན་ཉིད་དེ་མཚན་གཞི་དཀར་ཟལ་དང་མཚོན་བྱ་བ་གླང་གི་ཐ་སྙད་གཉིས་ལ་ཁེགས་ན་ནི་དེ་ལ་མཚན་གཞི་ནོག་ལྐོག་ཤལ་ཁེགས་པར་འགྱུར་ལ། གལ་ཏེ་མཚན་ཉིད་དངོས་འགལ་གཅོད་པའི་དོན་ལྡོག་ཁེགས་ཀྱང་མཚན་གཞི་ནོག་ལྐོག་ཤལ་མ་ཁེགས་ན་མཚན་གཞི་ལ་མཚན་ཉིད་ཀྱིས་མ་ཁྱབ་པར་ཐལ་ལོ། །གལ་ཏེ་མ་ཁེགས་ན་ནི་ཁྱབ་ཆེས་ཏེ། དེ་གཉིས་བ་གླང་གི་མཚན་གཞི་མིན་ཕྱིར་ཞེས་ཕྱ་པས་ཟེར་རོ། །བ་གླང་གི་དངོས་འགལ་གཅོད་པའི་དོན་ལྡོག་དེས་བ་གླང་དང་དཀར་ཟལ་གྱི་དོན་ལྡོག་ལ་ཁྱབ་སྟེ། དོན་ལྡོག་གཅིག་ཡིན་པའི་ཕྱིར། དེས་ན་མཚན་གཞི་ལ་མ་ཁྱབ་པའི་ཉེས་པ་མེད་དོ། །རང་ལྡོག་ལ་མ་ཁྱབ་སྟེ། རང་ལྡོག་ཐ་དད་པས་སོ། །དེས་ན་ཁྱབ་ཆེས་པའི་ཉེས་པ་མེད་དོ། །གཉིས་པ་ནི། མཚོན་བྱ་མིན་པ་དེ་མཚོན་བྱ་ཡིན་ནམ་མིན། ཡིན་ན་མཚོན་བྱའི་མཚན་ཉིད་བཀག་པས་མཚོན་པ་འགལ་ཏེ། ལྐོག་ཤལ་བཀག་པས་བ་གླང་དུ་མཚོན་པ་བཞིན་ནོ། །མིན་ན་རྣམ་འཇོག་གི་རྒྱུ་ལ་མི་ལྟོས་པར་ཐལ་ཞེ་ན། རྩོད་པ་འདི་ཡི་ཉེས་པ་མེད་དེ། མཚོན་བྱ་མིན་པ་མཚོན་བྱའི་མཚན་གཞི་ཡིན་གྱི་རང་ལྡོག་མིན་ཏེ། དཔེར་ན་ཡོད་པ་ཆོས་ཅན། བསྒྲུབ་བྱ་མིན་ཏེ། གྲུབ་བསལ་མེད་ལ་དཔག་འདོད་དང་མི་ལྡན་པའི་ཕྱིར་ཞེས་བཀོད་པ་ན། བསྒྲུབ་བྱ་མིན་པའི་ཐ་སྙད་བསྒྲུབ་བྱའི་མཚན་གཞི་ཡིན་པས་རྟགས་ལ་ལྟོས་ལ། བསྒྲུབ་བྱའི་རང་ལྡོག་མིན་པས་མཚན་ཉིད་བཀག་པས་སྒྲུབ་པ་མི་འགལ་བ་བཞིན་ནོ། །ཡང་ནོག་ལྐོག་ཤལ་ལ་སྤྱིར་རྒྱུ་མཚན་ཅན་གྱི་སྒྲ་བློ་གྲུབ་པ་ཁེགས་ན་མཚན་ཉིད་ཀྱི་རང་ལྡོག་ལའང་དེ་ཁེགས་པ་དང་། མཚོན་བྱའི་མཚན་ཉིད་བཀག་པའི་རང་ལྡོག་ལ་མཚོན་བྱའི་སྒྲ་བློ་ཡང་ཁེགས་པས། མཚན་ཉིད་ཀྱི་ཐ་སྙད་དང་མཚོན་བྱ་མིན་པའི་ཐ་སྙད་ཐམས་ཅད་ཁེགས་པར་འགྱུར་ལ། མ་ཁེགས་ན་མཚོན་བྱའི་མཚན་ཉིད་ཁྱབ་ཆེས་པར་ཐལ་ཏེ། དེ་ཉིད་མཚོན་བྱའི་མཚན་ཉིད་ཡིན་པའི་ཕྱིར་རོ་ཞེ་ན། རྩོད་པ་འདི་ཡི་ཉེས་པ་མེད་དེ། ནོག་ལྐོག་ཤལ་གྱི་དོན་ལྡོག་སྟེ། མཚན་ཉིད་ཡིན་པ་ལ་མཚོན་བྱའི་མཚན་ཉིད་མ་ཁེགས་པས་ཐ་སྙད་རྒྱུན་ཆད་པ་མེད་ལ། རང་ལྡོག་ལ་ཁེགས་པས་ཁྱབ་ཆེས་པ་མེད་དོ། །ཡང་མཚོན་བྱ་མིན་པ་མཚོན་བྱའི་མཚན་གཞི་ཡིན་ན། དངོས་པོའི་དངོས་འགལ་དངོས་མེད་ཀྱང་དངོས་པོ་མཚོན་པའི་མཚན་གཞི་ཡིན་པའི་ཕྱིར་མཚུངས་སོ་ཞེ་ན། རྩོད་པ་འདི་ཡི་ཉེས་པ་མེད་དེ། དངོས་མེད་ལ་དོན་བྱེད་ནུས་པ་མ་བརྟེན་ལ། མཚོན་བྱ་མིན་པ་ལ་རྒྱུ་མཚན་ཅན་གྱི་སྒྲ་བློ་གྲུབ་པ་བརྟེན་པའི་ཕྱིར་རོ། །གསུམ་པ་ནི། མཚན་གཞི་ཐ་དད་ལ་ལྟོས་ནས་འགལ་བ་དང་མཚུངས་པར་མངོན་པ་མེད་པ་དེས་ན་ལ་ལར་འགལ་བར་མངོན་པའི་སྦྱོར་བ་སྲིད་དེ། ཚུལ་གསུམ་མ་ཚང་བ་མཚན་གཞིར་བཞག་ནས་གཏན་ཚིགས་སུ་མཚོན་པ་ལ། ཚུལ་གསུམ་ཚང་བ་བཀོད་པ་ལྟ་བུའོ། །ལ་ལར་མཚུངས་པར་མངོན་པའི་སྦྱོར་བ་སྲིད་དེ། ཤེས་བྱའི་ལྡོག་པ་ཤེས་བྱར་མཚོན་པ་ལ་བློའི་ཡུལ་དུ་བྱར་རུང་བ་བཀོད་པ་ལྟ་བུའོ། །གཉིས་པ་ཕན་ཚུན་ངེས་པའི་རྣམ་གཞག་ལ། རྣམ་གཞག་སྤྱིར་བརྗོད་པ་དང་། དེ་ལས་གཞན་དུ་རྟོག་པ་དགག་པ། མིང་དོན་བཟློག་པའི་རྩོད་པ་སྤང་བ་གསུམ་མོ། །དང་པོ་ནི། དོན་ལྡོག་གི་དབང་དུ་བྱས་ནས་མཚན་མཚོན་གཉིས་གྲངས་མཉམ་ཏེ་མཚན་ཉིད་གཅིག་ལ་མཚོན་བྱ་དུ་མ་དང་། མཚོན་བྱ་གཅིག་ལ་མཚོན་ཉིད་དུ་མ་མི་སྲིད་པའི་ཕྱིར། རང་ལྡོག་ལ་མིན་ཏེ། མི་སླུ་མ་ཤེས་དོན་གསལ་གཉིས་རང་ལྡོག་ཐ་དད་པ་དང་། ཚད་མ་དང་ཡང་དག་ཤེས་པ་ཡང་དེ་ཕྱིར་ངོ་བོ་གཅིག་ཡིན་ཏེ། གཅིག་ཏུ་སྡུད་པའི་རྟོག་པས་ལྟོ་ལྡིར་བ་འདི་ནི་བུམ་པའོ་སྙམ་དུ་འཛིན་པའི་ཕྱིར། རྫས་ཡོད་དང་བཏགས་ཡོད་ཉིད་དུ་སོ་སོར་ངེས་ཏེ། ཐ་དད་དུ་འབྱེད་པའི་རྟོག་པའི་ངོར་ལྟོ་ལྡིར་བ་ལྟ་བུ་དོན་དང་བུམ་པ་ལྟ་བུ་མིང་དུ་སྣང་བའི་ཕྱིར། དེ་དག་ཀྱང་སོང་ཚོད་ཀྱི་དབང་དུ་བྱས་ལ། རློམ་ཚོད་ལ་དེ་ལྟ་བུའི་རྣམ་དབྱེ་མེད་དེ། རློམ་ཚོད་ལ་དེ་གཉིས་གཅིག་ཉིད་ཡིན་པའི་ཕྱིར། གཉིས་པ་ནི། བོད་ཕལ་ཆེར་མཚན་མཚོན་གཉིས་དོན་ལ་རྫས་གཅིག་པར་འདོད་པ་དང་། ཉན་ཐོས་སྡེ་པ་ཁ་ཅིག་བུམ་པ་འདུས་བྱས་སུ་མཚོན་པའི་མཚན་ཉིད་སྐྱེ་སོགས་བཞི་བུམ་པ་ལས་རྫས་ཐ་དད་དུ་འདོད་པ་དང་། ཁ་ཅིག་ས་བོན་གཅིག་གིས་འབྲས་བུ་དུ་མ་བསྐྱེད་པ་དང་བསྒྲུབ་བྱ་གཅིག་ལ་རྟགས་དུ་མ་རུང་བ་ལྟར་མཚན་ཉིད་གཅིག་གིས་མཚོན་བྱ་དུ་མ་མཚོན་པ་དང་། མཚན་ཉིད་དུ་མས་མཚོན་བྱ་གཅིག་མཚོན་པས་གྲངས་མི་མཉམ་པར་འདོད་པ་རྣམས་འཁྲུལ་ཏེ། ལུགས་དང་པོ་བཀག་ཟིན་ཅིང་། གཉིས་པ་ལྟར་ན་བུམ་པ་མི་རྟག་པ་དང་ལྡན་པ་ཙམ་དུ་འགྱུར་གྱི་མི་རྟག་པ་ཡིན་པར་མི་འགྱུར་རོ། །གསུམ་པ་མི་འཐད་དེ། རྒྱུ་འབྲས་ནི་བསྐྱེད་བྱ་སྐྱེད་བྱེད་པ་ཡིན་པས་རྐྱེན་སྟོབས་ཀྱིས་འབྲས་བུ་དུ་མ་སྐྱེད་པ་ཡིན་ལ། མཚན་མཚོན་གཉིས་རྣམ་པར་གཞག་འཇོག་ཡིན་པས་གཅིག་གིས་གཉིས་འཇོག་མི་ནུས་པ་དང་། བསྒྲུབ་བྱ་ནི་གང་ལ་འབྲེལ་བ་ཡོད་པས་སྒྲུབ་ཀྱི་རྟགས་ཀྱིས་བཞག་བྱས་མིན་པས་ག་ལ་མཚུངས། གསུམ་པ་ནི། མཚན་མཚོན་དེ་དག་ཕན་ཚུན་བཟློག་པ་ཡི་རྣམ་པར་གཞག་པས་འདིར་མི་གནོད་དེ། དཔེར་ན་རྒོལ་བས་རྗེས་དཔག་མི་སླུ་བས་ཚད་མར་སྒྲུབ་པ་ལ། ཕྱིར་རྒོལ་གྱིས་དངོས་པོར་འཛིན་པ་ལ་བཏགས་ཏེ་རྗེས་དཔག་ཚད་མ་ཡིན་པ་འགོག་པའི་གནོད་པ་མེད་དོ། །དངོས་པོ་འཛིན་པ་ལ་ཚད་མའི་བརྡ་བྱེད་ན། རྗེས་དཔག་ལ་ངེད་ཀྱང་མི་འདོད་ལ། མི་སླུ་བ་ལ་ཚད་མའི་བརྡ་བྱེད་ན་ཁྱེད་ཀྱིས་ཀྱང་དགག་མི་ནུས་སོ། །ཡང་བུམ་པ་དཔྱད་མི་བཟོད་པས་ཀུན་རྫོབ་པར་མཚོན་པ་ལ། བུམ་པ་དོན་བྱེད་ནུས་པས་དོན་དམ་ཡིན་ནོ་ཞེས་དོན་དེའི་མིང་གཞན་དུ་བཏགས་ནས་རྩོད་ན་ཉེས་པ་མེད་དེ། སྤྲོས་བྲལ་ལ་དོན་དམ་དུ་བྱས་པ་བུམ་པ་ལ་མི་སྲིད། དོན་བྱེད་ནུས་པ་ལ་དོན་དམ་དུ་བྱས་པ་ཁོ་བོ་ཡང་འདོད། གཉིས་པ་བྱེ་བྲག་ཏུ་ཚད་མའི་མཚན་ཉིད་ངེས་པར་བྱ་བ་ལ། མཚན་ཉིད་ངོས་བཟུང་བ། དེས་སྒྲོ་འདོགས་ཇི་ལྟར་གཅོད་པའི་ཚུལ་ལོ། །དང་པོ་ལ་གཞན་གྱི་བཏགས་པ་དགག རང་གི་ལུགས་གཞག རྩོད་པ་སྤོང་བའོ། །དང་པོ་ནི། མི་སླུ་མ་ཤེས་དོན་གསལ་གཉིས་འདམ་ཀ་ཅན་གྱི་རྣམ་གྲངས་པའམ། མཚན་མཚོན་སོགས་ཕྱེ་སྟེ་སྨྲ་བའི་ཕྱོགས་གཉིས་པ་དང་། དང་པོ་ནི། ལྷའི་བཞེད་པ་སྟེ་ཕྱི་མ་སྔ་མ་ལས་མཚན་ཉིད་གཞན་དུ་འདོད་དོ། །ཕྱི་མ་ནི་རྒྱན་ལ་སོགས་པ་གསུམ་གྱི་བཞེད་པ་སྟེ། རྒྱན་མཛད་པས་འཕགས་པའི་མཉམ་གཞག་ཡེ་ཤེས་ནི་དོན་དམ་པ་དང་ཚད་མའི་གཞི་མཐུན་ཡིན་པས་དོན་དམ་པའི་ཚད་མ་ཡིན་ལ། དེའི་མཚན་ཉིད་མ་ཤེས་དོན་གསལ་ཡིན་གྱི་མི་སླུ་བ་མིན་ཏེ་བཅད་དོན་ཐོབ་པ་མེད་པའི་ཕྱིར་རོ། །སོ་སྐྱེའི་རྒྱུད་ཀྱི་གཟུང་འཛིན་གཉིས་སུ་སྣང་བའི་ཚད་མ་ནི་ཐ་སྙད་པའི་ཚད་མ་ཡིན་ལ། དེའི་མཚན་ཉིད་གཉིས་པོ་ཚོགས་པ་ཡིན་ཏེ་བཅད་དོན་ཐོབ་པ་ཡོད་པའི་ཕྱིར་ཞེས་གསུངས་པའི་ཕྱིར། སློབ་དཔོན་ཆོས་མཆོག་ན་རེ། འདི་དག་གིས་དོན་ཡོངས་སུ་བཅད་ནས་འཇུག་པ་ན་དོན་བྱ་བ་ལ་སླུ་བ་མེད་པའི་ཕྱིར་རོ། །ཞེས་པའི་ཚིགས་གསུམ་གྱིས་མཚོན་པའི་ཁྱད་པར་གསུམ་ལྡན་ཏེ། ཁྱད་པར་གསུམ་ལྡན་ནི། ངོ་བོའི་ཁྱད་པར་དོན་ཐོབ་བྱེད་ཀྱི་ནུས་པ། ཡུལ་གྱི་ཁྱད་པར་སྔར་བཟུང་བའམ་མ་བཟུང་བའི་དོན་ཅི་རུང་རུང་ཐོབ་པ་མིན་གྱི་ཡོངས་སུ་བཅད་པའི་འཇུག་ཡུལ་ཐོབ་པའོ། །བྱེད་པའི་ཁྱད་པར་དོན་ཡོངས་སུ་གཅོད་བྱེད་ལ་གནས་པའི་ནུས་པའོ། །དེ་ལ་ཁྱད་པར་དང་པོས་དངོས་པོ་འཛིན་པ་ཚད་མའི་མཚན་ཉིད་ཡིན་པ་གཅོད། གཉིས་པས་མི་སྲིད་པ་གཅོད། གསུམ་པས་ཁྱབ་ཆེས་པ་གཅོད་ལ། མ་ཁྱབ་པ་གཅོད་པ་ཞིག་ཁ་བསྐང་ངོ་། །བདེན་པའི་དོན་རྟོགས་ཚད་མའི་བྱེད་པ་ཡིན་གྱི་མཚན་ཉིད་ནི་མིན་ནོ་ཞེས་གསུངས་སོ། །བྲམ་ཟེའི་རྗེས་འབྲང་རྣམས་ནི། བདེན་པའི་དོན་རྟོགས་ཆོས་གསུམ་ལྡན་ཏེ། སྔར་མ་རྟོགས་པའི་དོན་ལ་འཛིན་སྟངས་མ་འཁྲུལ་བ་སྒྲོ་འདོགས་སེལ་བ་ཞེས་བྱའོ། །དེ་ཡང་ཁྱད་པར་གསུམ་ལྡན་ནི། ངོ་བོའི་ཁྱད་པར་ལོག་ཕྱོགས་ཀྱི་སྒྲོ་འདོགས་སེལ་བ་ཙམ་ཡིན་གྱི་ཚད་མས་སྒྲོ་འདོགས་དངོས་སུ་གཅོད་པ་ནི་མིན་ནོ་ཞེས་གསུངས་སོ། །ཡུལ་གྱི་ཁྱད་པར་སྔར་མ་རྟོགས་པའི་དོན་ཡིན་ལ། འཛིན་སྟངས་ཀྱི་ཁྱད་པར་དོན་ལ་མི་འཁྲུལ་བའོ། །ཁྱད་པར་གསུམ་ལ་བྱེད་པ་ཡང་གསུམ་ཡོད་དོ་ཞེས་སྤྲོས་པ་དང་བཅས་ཏེ་གསུང་ངོ་། །དེ་དག་ལས་མི་འཐད་པའི་ཆ་དགག་ན། དང་པོ་མི་འཐད་དེ། མཚོན་བྱ་ཚད་མ་དེ་ཡང་ཆོས་ཅན། གཉིས་སུ་འགྱུར་ཏེ། མཚན་ཉིད་འདམ་ཀ་ཅན་གཉིས་ཀྱིས་འཇོག་ན་ནི་སྟེ་དེའི་ཕྱིར་རོ། །རྒྱན་གྱི་ལུགས་ཀྱང་མི་འཐད་དེ། མཚན་ཉིད་གཉིས་དང་མཚོན་བྱ་གཉིས་སུ་ཕྱེ་སྟེ་བཞི་ཀར་འདོད་ན་ཡང་མི་འཐད་དེ། སྤྱིའི་མཚན་ཉིད་ཅི་ཡིན་ཞེས་དྲིས་པ་ན། སོ་སོའི་མཚན་ཉིད་འདི་ཡིན་ཞེས་བརྗོད་པ་མ་འབྲེལ་བ་དང་། གཞན་དུ་ཚད་མ་སྤྱིའི་མཚན་ཉིད་གང་ཡིན་དྲིས་པ་ན་མངོན་རྗེས་སུ་ཕྱེ་ནས་མཚན་ཉིད་བཞག་པ་ཡང་སྐྱོན་མེད་དུ་ཐལ་ལོ། །ཡང་ཚད་མ་ཞེས་མཚོན་བྱ་གཅིག་མི་སྲིད་པར་འགྱུར་ཏེ། སྤྱིའི་མཚན་ཉིད་གཅིག་མེད་པའི་ཕྱིར། ཆོས་མཆོག་གི་བཞེད་པ་མ་ཁྱབ་པ་གཅོད་ཚུལ་གཞན་ནས་ཁ་བསྐོང་ཞེས་པ་འདི་མི་འཐད་དེ། མཚན་ཉིད་དུ་བཞག་པའི་ཚིག་དེ་ལ་མ་ཁྱབ་པ་གཅོད་པའི་ནུས་པ་ཡོད་ན་གཞན་ནས་ཁ་བསྐོང་བ་དོན་མེད་ཅིང་མེད་ན་ཚིག་སྔ་མ་སྐྱོན་ཅན་དུ་འགྱུར་བའི་ཕྱིར། བདེན་པའི་དོན་རྟོག་ཚད་མའི་བྱེད་པ་ཡིན་གྱི་མཚན་ཉིད་མིན་ཞེས་གཉིས་སུ་འབྱེད་པ་གཞུང་གི་དགོངས་པ་མིན་ཏེ། དོན་བྱེད་ནུས་པར་གནས་པ་ནི། །ཞེས་སོགས་དང་། རང་གི་མཚན་ཉིད་མི་ངེས་པ། །ཞེས་གསུངས་པའི་ཕྱིར་རོ། །བྲམ་ཟེའི་བཞེད་པ་བདེན་པའི་དོན་རྟོགས་ཆོས་གསུམ་ལྡན་ཚད་མའི་མཚན་ཉིད་དུ་འདོད་པ་མི་འཐད་དེ། དེ་ལྟར་ན་མི་དགོས་པ་དང་། མ་ཁྱབ་པ་དང་། མི་སྲིད་པའི་སྐྱོན་གསུམ་ཡོད་པའི་ཕྱིར་ཏེ། དེ་ཡང་ཡུལ་གྱི་ཁྱད་པར་སྔར་མ་རྟོགས་པ་ལ་རིགས་མི་མཐུན་སེལ་བའི་དབང་དུ་བྱས་ནས་མི་དགོས་ཏེ། རྣམ་གཅོད་མེད་པའི་ཕྱིར་ཏེ་འཛིན་སྟངས་དོན་ལ་མ་འཁྲུལ་བ་དེ་ཡིན་ན་རྟོགས་ཟིན་ལ་མི་འཇུག་པས་ཁྱབ་པའི་ཕྱིར། འདིས་བཅད་ཤེས་རྟོགས་ཟིན་ལ་འཇུག་པར་གསུངས་པས་རིགས་མི་མཐུན་སེལ་བྱེད་ལ་དགོངས་པར་གསལ་ལོ། །ངོ་བོའི་ཁྱད་པར་གྱིས་མངོན་སུམ་ལ་མ་ཁྱབ་སྟེ། དེས་སྒྲོ་འདོགས་གཅད་པ་མེད་པའི་ཕྱིར། དོན་བདེན་པ་རྟོགས་པའི་དོན་དོན་ཇི་ལྟ་བ་བཞིན་རྟོགས་པ་ལ་བྱེད་ན་མི་སྲིད་དེ། མངོན་སུམ་གྱིས་དོན་དང་འདྲ་བ་རྟོགས་པ་ལ་དོན་རྟོགས་པར་འཇོག་པ་དང་། འབྲས་རྟགས་ལ་བརྟེན་པའི་རྗེས་དཔག་གིས་དུ་བའི་རྒྱུར་གྱུར་པའི་མེ་བཟུང་བར་རློམ་ཡང་མེ་ཙམ་བཟུང་བའི་ཕྱིར། གཉིས་པ་ནི། མི་སླུ་བའི་ཤེས་པ་ཚད་མའི་མཚན་ཉིད་ཡིན་པ་ནི་མདོའི་དགོངས་པ་ཡིན་ཏེ། མདོར་ཚད་མའི་གྲངས་ངེས་ཀྱི་སྐབས་སུ་མི་སླུ་བའི་ཤེས་པ་རྣམས་གྲངས་ངེས་ཀྱི་ཁོངས་སུ་གཏོགས་ཤིང་སླུ་བའི་ཤེས་པ་རྣམས་དེའི་ཁོངས་སུ་མ་གཏོགས་པར་གསུངས་པ་དང་། མངོན་སུམ་གྱི་སྐབས་སུ་རྟོག་མེད་ཀྱི་ཤེས་པ་གཞིར་བཞག་ལ་མི་སླུ་བའི་ཤེས་པ་རྣམས་མངོན་སུམ་ཡང་དག་དང་། སླུ་བའི་ཤེས་པ་རྣམས་དེ་ལྟར་དུ་གསུངས་པའི་ཕྱིར་རོ། །འདིར་རིག་གཏེར་གྱི་དགོངས་པ་བླ་ན་མེད་པ་ཡིན་ཏེ། སློབ་དཔོན་ཕྱོགས་ཀྱི་གླང་པོས་གཞུང་གི་ཆ་འགའ་ཞིག་ཏུ་མི་བསླུ་བ་དང་འགའ་ཞིག་ཏུ་མ་ཤེས་དོན་གསལ་དུ་གསུངས་ལ། དཔལ་ལྡན་ཆོས་ཀྱི་གྲགས་པས་དེ་གཉིས་དགོངས་པ་གཅིག་ཏུ་མཛད་ནས་བློ་དེ་དོན་དེ་ལ་མི་བསླུ་བ་ཉིད་ལ་བཞེད་པ་ཡིན་ནོ་ཞེས་གསུངས་པའི་གཞུང་གི་ཆ་འགའ་ཞིག་ཏུ་ཞེས་པའི་ཚིག་གི་ནུས་པས་བསྟན་བཅོས་ལུས་རྫོགས་པ་ཞིག་ཏུའང་ཚད་མའི་མཚན་ཉིད་བཤད་པ་དང་དེ་གཉིས་ཞེས་སོགས་ཚིག་གིས་གོང་དུ་བཤད་པའི་སྒོ་ནས་མཚན་ཉིད་གཉིས་ཡོད་པར་གྲུབ་ལ། བཤད་པ་གཉིས་ཀྱང་ཕྱོགས་གླང་གི་གཞུང་དུ་གསལ་ཏེ། དཔལ་ལྡན་ཆོས་ཀྱི་གྲགས་པས་དེ་གཉིས་དགོངས་པ་གཅིག་ཏུ་མཛད་ནས་ཞེས་འབྱུང་བའི་ཕྱིར། ཆོས་གྲགས་ཀྱི་བཤད་ཚུལ་དེ་གཉིས་ཕྱོགས་གླང་གི་དགོངས་པ་གཅིག་ཉིད་དུ་མཛད་ནས་རྣམ་འགྲེལ་འདིར་ཚད་མའི་བསྟན་བཅོས་ལུས་རྫོགས་པ་རེ་རེ་བཤད་པའི་མི་བསླུ་བའི་ཤེས་པ་ཉིད་ལ་བཞེད་དེ་མདོའི་དོན་གཙོ་བོར་འཆད་པའི་སྐབས་ཡིན་པའི་ཕྱིར། འདིས་བསྟན་བཅོས་ལུས་རྫོགས་པ་དང་གཞུང་གི་ཆ་འགའ་ཞིག་ལས་གཞན་པའི་གཞུང་དུ་བཤད་པའི་མཚན་ཉིད་དེ་ཡང་མི་བསླུ་བའི་ཤེས་པ་ཡིན་པར་གྲུབ་སྟེ། མི་བསླུ་བ་ཉིད་ལ་བཞེད་དོ་ཞེས་འབྱུང་བའི་ཕྱིར་ཁོ་བོའི་ལེགས་བཤད་དོ། །མ་ཤེས་དོན་གསལ་གྱི་རིག་པ་ཚད་མའི་མཚན་ཉིད་ཡིན་པ་གཞུང་གི་ཆ་འགའ་ཞིག་ཏུ་བཤད་ལ། དེ་གཉིས་ཀའང་རང་མཚན་ཡོད་མེད་གང་རུང་རྟོགས་པར་དོན་ལ་མཐུན་ཏེ། དོན་བྱེད་ནུས་པར་གནས་པ་ནི། མི་བསླུ་ཞེས་དང་། རང་གི་མཚན་ཉིད་མི་ཤེས་པ། །ཤེས་པ་གང་ཡིན་ཞེས་གསུངས་པའི་ཕྱིར། འདི་ནི་ཆོས་མཆོག་གིས་ངོ་བོའི་ཁྱད་པར་དོན་ཐོབ་བྱེད་ཀྱི་ནུས་པ་ཞེས་གསུངས་པ་ལས་ཁྱད་པར་དུ་བྱས་ཏེ། དོན་ཡོད་མེད་གང་རུང་ཐོབ་ཀྱི་དོན་ཐོབ་པར་མ་ངེས་ཏེ། འོག་ཏུ་འབྱུང་ངོ་། །ཐ་སྙད་པ་དང་དོན་དམ་པའི་ཚད་མ་གཉིས་ཀ་ལ་མི་བསླུ་མ་ཤེས་དོན་གསལ་གཉིས་པོ་རེ་རེ་ལའང་འཇུག་སྟེ། དེ་དོན་ལྡོག་གཅིག་ཡིན་པའི་ཕྱིར། འདི་ནི་རྒྱན་གྱི་བཞེད་པ་ལས་ཁྱད་པར་དུ་བྱེད་པའི་ཚིག་གོ །མི་བསླུ་བ་དེའང་ལས་གང་དང་། བྱེད་པ་པོ་གང་གིས་དང་། བྱ་བ་ཚུལ་ཇི་ལྟར་མི་བསླུ་བ་གསུམ་གྱི་བདག་ཉིད་ཅན་ཡིན་པ་ལས། དང་པོ་ནི། ཤེས་བྱ་ལ་དོན་རང་མཚན་ཡོད་ན་དོན་བྱེད་ནུས་པ་དང་མེད་ན་མི་ནུས་པ་ཉིད་མི་བསླུ་བའོ། །གཉིས་པ་ནི། ཤེས་པ་འཛིན་སྟངས་མ་འཁྲུལ་བ་དོན་ཇི་ལྟར་གནས་པ་ལྟར་ཡོད་པ་ལ་ཡོད་པར་དང་མེད་པ་ལ་མེད་པར་ཤེས་པ་དེ་མི་བསླུ་བའོ། །གསུམ་པ་ནི། རང་མཚན་ལ་ཞུགས་ན་དེ་ཐོབ་པ་ལ་མི་བསླུ་རང་མཚན་མེད་པས་དེ་ལ་མི་འཇུག་ན་ལྡོག་པ་པོ་མེད་པ་ཉིད་ལ་མི་བསླུ་བ་ཡིན་ཏེ། དོན་བྱེད་ནུས་པར་གནས་པ་ནི། མི་བསླུ་ཞེས་གསུངས་ཤིང་། འདིས་དོན་བྱེད་མི་ནུས་གནས་པ་ནི། མི་བསླུ་ཞེས་པ་མཚོན་ནས་བསྟན་ཏོ། །མ་ཤེས་དོན་གསལ་ཅེས་པའི་དོན་རང་མཚན་ཡིན་ཡང་། གསལ་བྱེད་ནི་དེ་ཡོད་མེད་གང་རུང་རྟོགས་པ་ལ་འགྲེལ་པར་བཤད་དོ། །དེས་ན་རིགས་མི་མཐུན་སེལ་བའི་དབང་དུ་བྱས་ན་མི་བསླུ་བའི་ཤེས་པ་ཚད་མའི་མཚན་ཉིད་ཡིན་ཏེ། འདི་ཡི་མི་བསླུ་བ་ལ་ཆོས་གསུམ་ལྡན་དགོས་པའི་བྱེད་པ་པོ་ལ་མི་བསླུ་བ་ལ་གསར་དུའི་དོན་ཚང་པའི་ཕྱིར་རོ། །དེས་ན་གསར་དུའི་ཚིག་བསྣན་མི་དགོས་ཏེ། རྣམ་བཅད་མེད་ཅིང་བཟློས་པར་འགྱུར་བའི་ཕྱིར། དཔེར་ན་མ་འཁྲུལ་བའི་རིག་པ་མངོན་སུམ་གྱི་མཚན་ཉིད་དང་། བསྒྲུབ་བྱར་ཁས་བླང་དུ་རུང་བ་ཕྱོགས་ཀྱི་མཚན་ཉིད་དུ་གསུངས་པ་བཞིན་ནོ། །འདི་ལ་དགོངས་ནས། རྣམ་འགྲེལ་ལས། ཚད་མ་བསླུ་མེད་ཅན་ཤེས་པ། །ཞེས་གསུངས་སོ། །གཞུང་དུ་མ་ཞིག་ཏུ་གསར་དུ་མ་སྨོས་པར་མི་བསླུ་བ་ཙམ་གསུངས་པའི་ཕྱིར། གལ་ཏེ་དེ་དག་ཚིགས་བཅད་སྦྱར་བདེ་བའི་དབང་དུ་བྱས་སོ་སྙམ་ན། མིན་ཏེ། ཚིགས་བཅད་སྦྱར་བ་ལ་མ་ལྟོས་པའི་རྣམ་ངེས་སུའང་། གསར་དུ་མ་སྨོས་པའི་ཕྱིར། ལོག་རྟོག་སེལ་བའི་དབང་དུ་བྱས་ན་གསར་དུའི་ཚིག་བསྣན་ཀྱང་འགལ་བ་མེད་དེ། དཔེར་ན་མངོན་སུམ་དང་བསྒྲུབ་བྱའི་མཚན་ཉིད་ཀྱི་ཟུར་དུ་རྟོག་བྲལ་དང་། ངོ་བོ་ལ་སོགས་པ་ལྔ་སྨོས་པ་བཞིན་ནོ། །འདི་ལ་དགོངས་ནས། ཚད་མའི་མཚན་ཉིད་ཀྱི་ཟུར་དུ། མ་ཤེས་དོན་ཞེས་པ་དང་། ཚད་མའི་སྐད་དོད་ཀྱི་ཟུར་དུ་པྲ་སྨོས་སོ། །མཐའ་གཅིག་ཏུ་གསར་དུའི་ཚིག་མི་དགོས་ན། མངོན་སུམ་དང་བསྒྲུབ་བྱའི་མཚན་ཉིད་ལའང་མཚུངས་སོ། །གལ་ཏེ་གོང་འོག་རྣམས་སུ་སྔར་མ་རྟོགས་པ་ལ་རྣམ་བཅད་མེད་པར་གསུངས་པ་དང་འགལ་ལོ་སྙམ་ན་སྐྱོན་མེད་དེ། གོང་དུ་གསུངས་པའི་དོན་བཤད་ཟིན་ཅིང་། འོག་ཏུ་གསུངས་པ་ནི་རྟོགས་ཟིན་ལ་འཇུག་པའི་མངོན་སུམ་ཡོད་པ་དེ་སེལ་བའི་ཕྱིར་མངོན་སུམ་ཚད་མའི་མཚན་ཉིད་སྔར་མ་རྟོགས་པ་སྨོས་ལ་རྣམ་བཅད་མེད་པར་སྟོན་པ་ཡིན་ཏེ། བཅད་བྱ་དེ་མེད་པའི་ཕྱིར་ཞེས་པའི་དོན་ཏེ་ཁོ་བོ་འབའ་ཞིག་གི་སྤྱོད་ཡུལ་ལོ། །གསུམ་པ་ནི། མི་བསླུ་མ་ཤེས་དོན་གསལ་གཉིས་རང་མཚན་རྟོགས་པར་དོན་ལ་མཐུན་ན། ནམ་མཁའ་རྟག་པ་ལྟ་བུ་དངོས་མེད་འཇལ་བའི་ཚད་མ་ལ་མ་ཁྱབ་ཅིང་། ཉེ་བར་བསླད་པ་དུང་སེར་འཛིན་དང་ལྗོན་ཤིང་འགྲོར་སྣང་ལ་སོགས་པའང་རང་མཚན་དཀར་པོ་དང་སྡོད་པ་ལ་མི་བསླུ་བས་ཚད་མར་འགྱུར་ལ། དེ་ལྟར་ན་མཚན་ཉིད་ཁྱབ་ཆེས་པ་ཡིན་ནོ་ལོ། །སྐྱོན་དང་པོ་མེད་དེ། བློ་དེ་ཡང་དགག་གཞི་ནམ་མཁའི་སྟེང་དུ་རང་མཚན་ཡོད་མེད་དཔྱོད་པར་བྱེད་དེ་མེད་པར་རྟོགས་པའི་ཕྱིར་ན་ཚད་མར་འཐད་དོ། །སྐྱོན་གཉིས་པ་མེད་དེ། ཉེ་བར་བསླད་པ་གཉིས་ནི་སེར་པོ་དང་འགྲོ་བར་འཛིན་སྣང་དེར་མ་གྲུབ་པའི་ཕྱིར་ན་སླུ་བར་རྣམ་ངེས་སུ་བཤད་དེ་ཉེ་བར་བསླད་པ་སླུ་བའི་ཕྱིར། མངོན་སུམ་ལྟར་སྣང་ཞེས་གསུངས་པའི་ཕྱིར་རོ། །གཉིས་པ་དེས་སྒྲོ་འདོགས་ཇི་ལྟར་གཅོད་པའི་ཚུལ་ལ། ཇི་ལྟར་ངེས་པ་དང་། དེ་ལ་རྩོད་པ་སྤོང་བ་གཉིས། དང་པོ་ནི། ཀུན་ཏུ་ཐ་སྙད་པའི་ཚད་མའི་སྟོབས་ཀྱིས་རང་མཚན་ཡོད་མེད་ལ་འཇུག་ལྡོག་བྱེད་པ་ན་ངེས་པ་འདྲེན་པའི་སྒོ་ནས་བྱེད་པ་ཡིན་ཏེ། ཡོད་མེད་ངེས་པའི་འབྲས་ཅན་མིན། །ཞེས་གསུངས་པའི་ཕྱིར། ངེས་པའི་འགལ་ཟླ་ནི་སྒྲོ་འདོགས་ཡིན་ཏེ། དེ་གཉིས་གནོད་བྱ་གནོད་བྱེད་ཡིན་པའི་ཕྱིར། ངེས་པའི་མཚན་ཉིད་ནི་ཐེ་ཚོམ་ཆོད་པ་ཡིན་ཞིང་། དབྱེ་ན་ཡང་དག་པ་དང་ལོག་པའི་ངེས་པ་གཉིས། བསལ་བྱ་སྒྲོ་འདོགས་དེ་ཡི་མཚན་ཉིད་ནི་གནས་ལུགས་ཀྱི་དོན་ལས་མཐའ་གཞན་དུ་རྟོག་པའི་ཞེན་བློའོ། །དབྱེ་ན་གཉིས་ཏེ། རྟོག་པ་ལོག་ཤེས་དང་། ཐེ་ཚོམ་མོ། །རྟོག་མེད་ལོག་ཤེས་ནི་ངེས་པས་བསལ་བྱའི་སྒྲོ་འདོགས་མིན་ཏེ། ངེས་ཤེས་དང་སྒྲོ་འདོགས་གཉིས་རྒྱུད་གཅིག་ལ་ཅིག་ཆར་དུ་མི་འཇུག་པ་གང་ཞིག ཟླ་བ་གཉིས་སྣང་གི་དབང་ཤེས་དང་། ཟླ་གཉིས་མེད་པར་ངེས་པའི་ངེས་ཤེས་གཉིས་རྒྱུད་གཅིག་ལ་གཅིག་ཆར་དུ་འཇུག་པ་ཡོད་པའི་ཕྱིར། འདིར་རྟོག་མེད་ལོག་ཤེས་དང་། འོག་ཏུ་རྗེས་དཔག་གི་གཟུང་ཡུལ་གྱི་ཐ་སྙད་གསུངས་པས་རིམ་བཞིན་ཟླ་བ་གཉིས་ལྟ་བུ་དང་། དེ་ན་དོན་སྤྱི་རང་མཚན་ཡིན་པ་ལྟ་བུ་ལ་བྱའོ། །ཁ་ཅིག་ལའི་མེ་རྟོགས་པའི་གློ་བུར་བའི་རྗེས་དཔག་གིས་སྒྲོ་འདོགས་མ་བཅད་དེ། ལའི་མེ་སྔར་མ་རྟོགས་པ་ལས་གློ་བུར་དུ་རྟོགས་པ་ཙམ་ཡིན་པས། དེའི་སྔ་རོལ་ན་མེ་མེད་པར་འཛིན་པའི་སྒྲོ་འདོགས་མེད་པའི་ཕྱིར་རོ། །དེ་ལྟ་བུའི་རྗེས་དཔག་དེ་སེལ་བས་འཇུག་པ་ཉིད་ཡིན་ཏེ། དེ་སྣང་བས་མི་འཇུག་པས་སོ། །དེའི་སྔ་རོལ་གྱི་བློ་འགའ་ཞིག་ལོག་ཤེས་ཡིན་པར་བཞེད་དེ། དེ་ཡི་ཡུལ་དེ་མེ་མེད་ཀྱི་ས་ཕྱོགས་རྐྱང་པ་གཞན་དང་མཚུངས་པ་རུ་འཛིན་པའི་ཕྱིར། གཉིས་པ་ནི། ངེས་པ་དང་སྒྲོ་འདོགས་གཉིས་ཡུལ་གཅིག་གམ་ཐ་དད། ཐ་དད་ན་བསལ་བྱ་སེལ་བྱེད་མིན་པར་འགྱུར་ཏེ་ཕྱི་ནང་གི་སྣང་མུན་བཞིན་ནོ། །གཅིག་ན་ཡུལ་དེ་གྲུབ་ན་བསལ་བྱ་མ་འཁྲུལ་བར་འགྱུར་ཏེ་ཚད་མ་བཞིན་ནོ། །མ་གྲུབ་ན། སེལ་བྱེད་ཚད་མར་མི་འགྱུར་ཏེ་སྒྲོ་འདོགས་བཞིན་ནོ། །ཡང་དེ་གཉིས་ངོ་བོ་གཅིག་གམ་ཐ་དད། གཅིག་ན་བསལ་བྱ་སེལ་བྱེད་དུ་མི་འཐད་དེ་རལ་གྲིའི་སོས་རང་མི་གཅོད་པ་བཞིན། མི་གཅིག་ན་ཡང་དེར་མི་འཐད་དེ། སངས་རྒྱས་ཀྱི་ཡེ་ཤེས་དང་སེམས་ཅན་གྱི་མི་ཤེས་པ་བཞིན་ནོ། །ཡང་དེ་གཉིས་དུས་གཅིག་ན་རྟོག་གཉིས་ཅིག་ཆར་འཇུག་པར་འགྱུར་ལ། མི་གཅིག་ན་ཡང་བསལ་བྱ་སེལ་བྱེད་དུ་མི་འཐད་དེ། ཉི་མའི་འོད་ཟེར་དང་མཚན་མོའི་མུན་པ་བཞིན་ནོ་ཞེས་བརྟགས་པ་ཡི་རྩོད་པ་གསུམ་གྱིས་འདིར་མི་གནོད་དོ། །ཇི་ལྟར་ཞེ་ན་སྐྱོན་དང་པོ་མེད་དེ། ངེས་ཤེས་དང་སྒྲོ་འདོགས་གཉིས་ཞེན་ཡུལ་ལ་མ་དམིགས་པར་བྱ་བའི་ཡུལ་གཅིག་ལ་འཇུག་ཅིང་། ཞེན་སྟངས་ཀྱི་ཡུལ་ཐ་དད་པས་སོ། །སྒྲོ་འདོགས་འཁྲུལ་ཚད་མ་མ་འཁྲུལ་བ་འཐད་དེ། ཚད་མ་ཡུལ་ཡོད་ཅིག་ཤོས་ཀྱི་དེ་མེད་པའི་ཕྱིར། སྐྱོན་གཉིས་པ་མེད་དེ། དེ་གཉིས་བློའི་རྒྱུན་གཅིག་གི་ལྡོག་པ་ཐ་དད་པའི་ཕྱིར། སྐྱོན་གསུམ་པ་མེད་དེ། ཕྲད་ན་སེལ་བ་མེད་ཀྱང་རྒྱུད་གཅིག་ལ་དང་པོ་སྒྲོ་འདོགས་སྐྱེས་ནས་ཕྱིས་ངེས་པ་སྐྱེས་པས་སྒྲོ་འདོགས་སྐྱེ་བའི་གོ་བཀག་པ་ཙམ་ལ་ངེས་ཤེས་ཀྱིས་སྒྲོ་འདོགས་སེལ་བར་འཇོག་པའི་ཕྱིར་ན་ངེས་པས་སྒྲོ་འདོགས་སེལ་བ་འཐད་དོ། །གསུམ་པ་མཚན་ཉིད་ཀྱིས་མཚོན་པའི་དོན་གཏན་ལ་དབབ་པ་ལ་བཞི་སྟེ། མཚོན་བྱའི་རབ་དབྱེ། མཚན་གཞི་ལ་ལོག་རྟོག་དགག་པ། མཚན་གཞི་ལ་མཚན་ཉིད་ངེས་བྱེད་བཤད་པ། དེས་དགག་བསྒྲུབ་ཇི་ལྟར་བྱེད་པའི་ཚུལ་ལོ། །དང་པོ་ལ་བཞི་སྟེ། དབྱེ་གཞི། དབྱེ་བའི་དོན། གྲངས་ངེས་པ། སྒྲའི་དོན་ནོ། །དང་པོ་ལ་གཉིས་ལས། གཞན་ལུགས་དགག་ན། བོད་རྣམས་ཡང་དག་ཤེས་པ་ཙམ་དབྱེ་གཞི་མིན་ཏེ། བཅད་ཤེས་དང་ཡིད་དཔྱོད་ཚད་མ་མིན་ཡང་ཡང་དག་ཤེས་པ་ཡིན་པའི་ཕྱིར་ཞེས་ཟེར། མི་འཐད་དེ། ཚད་མ་མིན་པ་ལ་ཡང་དག་ཤེས་པ་ཡོད་པ་རིགས་པ་དང་དགོངས་པ་དང་འགལ་བ་གཉིས་ཀྱིས་བློ་བརྟག་པར་བཀག་ཟིན་པའི་ཕྱིར། ཆོས་མཆོག་ན་རེ། ཚད་མའམ་ཡང་དག་ཤེས་པ་ལ་དོན་བྱེད་སྣང་དང་། དོན་བྱེད་ནུས་པ་ལ་རབ་ཏུ་འཇུག་པ་གཉིས་སུ་ཕྱེ་ནས་དང་པོ་ནི་མེས་བཙོ་སྲེག་བྱེད་བཞིན་པར་སྣང་བ་ལྟ་བུ་སྐྱེས་བུའི་དོན་གྲུབ་ཀྱི་དངོས་རྒྱུར་གྱུར་པ་ཡིན་ལ། གཉིས་པ་ནི། མེ་ལ་སོགས་པ་རྐྱང་བ་སྣང་བ་སྐྱེས་བུའི་དོན་གྲུབ་ཀྱི་བརྒྱུད་རྒྱུར་གྱུར་པའོ། །དེ་ལ་དང་པོ་དབྱེ་གཞི་མིན་ཏེ། མི་བསླུ་བར་རང་ཉིད་ཀྱིས་ངོས་ཟིན་པས་བསྟན་བཅོས་སུ་དཔྱད་བྱ་མིན་པའི་ཕྱིར་དང་། མངོན་སུམ་གཅིག་པུར་ངེས་པས་གཉིས་མེད་པའི་ཕྱིར། དེས་ན་ཕྱི་མ་གཅིག་པུ་ཡིན་ཞེས་འཆད་པ་འཁྲུལ་ཏེ། སྤྱི་དབྱེ་གཞི་མི་རུང་བར་བྱེ་བྲག་ཕྱེ་ནས་དེར་འཇོག་ན་མངོན་སུམ་ལ་སོགས་པ་ཐམས་ཅད་ལ་དེ་ལྟར་དགོས་པས་ཧ་ཅང་ཐལ་བ་ཁོ་ནའོ། །གཉིས་པ་རང་གི་འདོད་པ་ནི། གཞན་གྱི་འདོད་པ་གཉིས་པོ་མི་འཐད་པ་དེས་ན་ཡང་དག་པའི་ཤེས་པ་ཙམ་ཉིད་དབྱེ་གཞིར་འཐད་དེ། ཚད་མ་དང་ཡང་དག་ཤེས་པ་གཉིས་རྣམ་གྲངས་ཡིན་པའི་ཕྱིར། གཉིས་པ་ནི། དེ་ལ་དབྱེ་ན་མངོན་སུམ་དང་རྗེས་དཔག་གཉིས་སོ། །གཉིས་པོ་དེ་དག་གཅིག་དང་ཐ་དད་བརྟགས་པར་བྱ་སྟེ། བུམ་སྣམ་ལྟར་དངོས་པོ་ཐ་དད་དམ། དངོས་པོ་དངོས་མེད་ལྟར་གཅིག་པ་བཀག་པའམ། བྱས་མི་རྟག་ལྟར་ངོ་བོ་གཅིག་ལ་ལྡོག་པ་ཐ་དད་དམ། ཟླ་བ་དང་བསིལ་ཟེར་བྱེད་ལྟར་དོན་གཅིག་ལ་མིང་ཐ་དད་གང་ཡིན་ཞེ་ན། འདི་ལ་དགག་གཞག་སྤང་གསུམ། དང་པོ་ནི། ཡེ་ཤེས་དཔལ་ན་རེ། གཉིས་པ་ཡིན་ཏེ། རྗེས་དཔག་གི་གཟུང་ཡུལ་དངོས་མེད་ཡིན་པས། རང་ཡང་དངོས་མེད་ཡིན་པའི་ཕྱིར་ཞེས་ཟེར་ན། ཚད་མ་གཉིས་པོ་གཅིག་པ་བཀག་པ་མིན་ཏེ། དེ་གཉིས་ཀ་དངོས་པོ་ཉིད་ཡིན་པའི་ཕྱིར་ཏེ། རྗེས་དཔག་གཟུང་ཡུལ་མེད་པ་གཟུང་བས་འཁྲུལ་ཤེས་ཡིན་པའི་ཕྱིར། ཡུལ་གཅིག་ལ་ལྟོས་ནས་ངོ་བོ་གཅིག་པ་མིན་ཏེ། རྟོག་པ་དང་རྟོག་མེད་ཡུལ་ཐ་དད་པའི་ཕྱིར་རོ། །ཡུལ་ཐ་དད་ལ་ལྟོས་ནས་ངོ་བོ་ཐ་དད་ཀྱང་མིན་ཏེ། རྗེས་དཔག་མངོན་སུམ་ཙམ་དང་ངོ་བོ་ཐ་དད་ན་རང་རིག་དང་ཐ་དད་པས་ཤེས་པ་མིན་པ་ཐལ་བའི་ཕྱིར་རོ། །གཉིས་པ་ནི། དེས་ན་གཉིས་པོ་བློ་ཡི་ངོ་བོ་གཅིག་ཡིན་ཏེ། རྗེས་དཔག་ཉིད་ལ་མངོན་སུམ་ངོ་བོ་གཅིག་ཏུ་ལྡན་པའི་ཕྱིར། ཡུལ་སོ་སོ་ལ་ལྟོས་ནས་ངོ་བོ་ཐ་དད་ཡིན་ཏེ། ལ་མེ་ཡོད་དུ་རྟོགས་པའི་རྗེས་དཔག་དེ་ལའི་མེ་ལ་རྗེས་དཔག་རང་གི་ངོ་བོ་ལ་མངོན་སུམ་ཡིན་པའི་ཕྱིར། འདིས་རང་རིག་ལ་ཡུལ་མེད་པ་བཀག་གོ །གསུམ་པ་ནི། གལ་ཏེ་དེ་གཉིས་ཡུལ་ལ་ལྟོས་ནས་ཐ་དད་ན་རྗེས་དཔག་ཡུལ་ལས་ཤེས་པ་མིན་པར་ཐལ་ཏེ། དེ་རང་རིག་མིན་པའི་ཕྱིར། ཡུལ་ཅན་ལ་ལྟོས་ནས་རང་རིག་དང་གཅིག་ཡིན་པའི་ཕྱིར། སྤྱི་མངོན་སུམ་ཙམ་དང་གཅིག་ན། དབང་མངོན་དང་ཐ་དད་པས་སྤྱི་མངོན་སུམ་ཙམ་དང་ཐ་དད་པར་འགྱུར་རོ་ཞེས་དེ་ལྟར་རྩོད་པའི་སྐྱོན་གཉིས་ལས། དང་པོ་ལས་གྲོལ་ཏེ། ཡུལ་ལ་ལྟོས་ནས་ཐ་དད་ཡིན། །ཞེས་པའི་དོན། བློ་གང་ཞིག་རྗེས་དཔག་ཏུ་སོང་བའི་ཡུལ་དང་མངོན་སུམ་དུ་སོང་བའི་ཡུལ་འགལ་བར་བཤད་པ་ཡིན་ལ་རྗེས་དཔག་ནི་རྗེས་དཔག་རྟོག་ངོར་སྣང་བའི་ཡུལ་གྱི་ལྡོག་པ་མིན་པའི་ཕྱིར་ཏེ། དེ་ཡུལ་ལ་རྟོག་པའི་བློ་ཡིན་པའི་ཕྱིར་རོ། །བྱེ་བྲག་དབང་མངོན་དང་ཐ་དད་ཀྱང་རང་རིག་དང་གཅིག་པའི་ཕྱིར་ན་བརྩད་པའི་སྐྱོན་གཉིས་པ་ལས་ཀྱང་གྲོལ་ཏེ། ཙནྡན་དང་ཐ་དད་པས་ཤིང་ཙམ་དང་ཐ་དད་པར་མི་འགྱུར་ལ་ཤ་པ་དང་གཅིག་པས་ཤིང་ཙམ་དང་གཅིག་པ་འདོད་པས་ག་ལ་མཚུངས། འདིས་ཤ་པ་ཤིང་དང་རྫས་གཅིག་ཏུ་བསྟན་ཏོ། །གསུམ་པ་གྲངས་ངེས་ནི། གཞལ་བྱ་ལ་གཉིས་ཁོ་ནར་ངེས་པའི་ཕྱིར་དེ་འཇལ་བྱེད་ཀྱི་ཚད་མ་ཡང་གཉིས་ཁོ་ནར་ངེས་སོ། །གཉིས་པོ་དེ་ལས་ཉུང་བ་རྗེས་དཔག་གཅིག་ཏུ་དང་། མང་བ་གསུམ་དང་བཞི་དང་ལྔ་ལ་སོགས་པ་འདོད་པ་རྣམས་ནི་ཚད་མ་ལ་གྲངས་གཞན་དང་། གྲངས་གཞན་ལ་ཚད་མ་འགོག་པའི་རིགས་པ་སྡེ་བདུན་དུ་གསུངས་པས་བཀག་པའི་ཕྱིར། བཞི་པ་སྒྲ་དོན་ནི། སྤྱིར་མིང་ལ་བཤད་པ་རྒྱུ་མཚན་ཅན་ཐམས་ཅད་མཁྱེན་པ་ལ་སོགས་པའི་མིང་དང་། འཇུག་པ་རྒྱུ་མཚན་ཅན་ཤིང་ལ་སོགས་པའི་མིང་རྣམ་པ་གཉིས་སོ། །གཉིས་པོ་དེ་ལ་བཤད་འཇུག་འགལ་བ་དང་། མི་འགལ་བ་དང་། འགལ་ཞིང་མི་འགལ་བའི་རྣམ་པར་དབྱེ་བ་རྣམ་པ་གསུམ་མོ། །དང་པོ་ནི། བྱེའུ་ཏིལ་འཐུང་ངམ་བྱ་ལུག་རྫི་མོ་ལ་སོགས་པའོ། །གཉིས་པ་ནི། ཐམས་ཅད་མཁྱེན་པ་རྣམ་པར་ཤེས་པ་ལ་སོགས་པའོ། །གསུམ་པ་འདི་ནི་འགལ་འདུ་མུ་གསུམ་པ་སྟེ། དཔེར་ན་མཚོ་སྐྱེས་ཀྱི་སྒྲ་ལྟ་བུ་སྟེ། འཇུག་པ་ནི་པདྨོ་ལ་འཇུག་ལ་བཤད་ན་མཚོ་ལས་སྐྱེས་པའི་ཕྱིར་མཚོ་སྐྱེས་སོ། །དེ་ལའང་མུ་གསུམ་སྟེ། མཚོ་ལས་སྐྱེས་པའི་པདྨོ་ལ་མུ་དང་པོ། སྐམ་ལས་སྐྱེས་པའི་པདྨོ་ལ་གཉིས་པ། མཚོ་ལས་སྐྱེས་པའི་སྲོག་ཆགས་ལ་གསུམ་པ་འབའ་ཞིག་གོ །འོ་ན་སྐམ་སའི་སྡོང་དུམ་ལ་བཤད་འཇུག་གཉིས་ཀ་མེད་པས་མུ་བཞི་པ་ཡིན་ནམ་ཞེ་ན། ཡིན་མོད་ཀྱི་མཚོ་སྐྱེས་ཞེས་པའི་མིང་ལ་མི་ལྟོས་པས་མུ་བཞི་པར་མི་བགྲང་ངོ་། །མིང་དེ་དག་ཀྱང་མཁས་པ་རྣམས་ཀྱིས་མིང་གི་སྒྲ་དང་རིགས་ཀྱི་སྒྲ་གཉིས་སུ་ཕྱེ་བ་ལས་དང་པོ་ནི། ལྷ་བྱིན་དང་མཆོད་སྦྱིན་ལ་སོགས་པའོ། །གཉིས་པ་ནི། ཤིང་དང་བ་གླང་ལ་སོགས་པའོ། །སྔ་མ་ནི་རིགས་ལ་མི་ལྟོས་ལ། ཕྱི་མ་ནི་རིགས་ལ་ལྟོས་པའོ། །འདིར་མངོན་སུམ་གྱི་སྒྲ་བཤད་པའི་སྐབས་སུ་མངོན་སུམ་ཕྱི་མ་གཉིས་དབང་པོ་ལ་མི་བརྟེན་པར་གསུངས་པ་ནི། རང་རིག་ཡིད་མངོན་འདོད་པ་དང་། དབང་མངོན་མྱོང་བྱེད་དབང་པོ་དང་། ཡིད་མངོན་མྱོང་བྱེད་ཡིད་དབང་ལ་བརྟེན་པར་འདོད་པ་རྣམས་ལ་གནོད་བྱེད་ཡིན་ནོ། །གཉིས་པ་མཚན་གཞི་ལ་ལོག་རྟོག་དགག་པ་ལ་གཉིས་ཏེ། མངོན་སུམ་དང་། རྗེས་དཔག་ལ་དགག་པའོ། །དང་པོ་ལ་གསུམ་སྟེ། མིན་པ་ལ་ཡིན་པར་རྟོག་པ། ཡིན་པ་ལ་མིན་པར་རྟོག་པ། ཡིན་མིན་མཚུངས་པར་རྟོག་པ་དགག་པའོ། །དང་པོ་ནི། ཡུལ་ལ་འཁྲུལ་པའི་ཆ་མངོན་སུམ་ཚད་མར་འདོད་པ་ཡོད་དེ། ནོར་བུའི་འོད་ལ་ནོར་བུར་འཛིན་པའི་བློ་ཡུལ་གྱི་ཁྱད་པར་སྒོ་ཕུགས་ལ་འཁྲུལ་ཡང་ནོར་བུ་ཙམ་ལ་མངོན་སུམ་ཚད་མ་ཡིན་ཏེ། བཅད་པའི་དོན་ཐོབ་པའི་ཕྱིར་ཞེས་རྒྱན་བཞེད་དོ། །དུས་ལ་འཁྲུལ་པའི་ཆ་མངོན་སུམ་ཚད་མར་འདོད་པ་ཡོད་དེ། ནམ་གུང་ལ་ཉིན་ཕྱེད་དུ་འཁྲུལ་པའི་རྨི་ལམ་གྱི་ཤེས་པའང་ཉིན་ཕྱེད་ཀྱི་བུ་ལ་མངོན་སུམ་ཚད་མ་ཡིན་ཞེས་དུ་ལྷ་བཞེད་དོ། །རྣམ་པ་ལ་འཁྲུལ་པའི་ཆ་མངོན་སུམ་ཚད་མར་འདོད་པ་ཡོད་དེ། དུང་སེར་པོ་སྣང་བ་ཁ་དོག་ལ་འཁྲུལ་ཡང་དབྱིབས་ལ་ཚད་མ་ཡིན་ཞེས་ལོ་ཙཱ་བ་བཞེད་དོ། །དེ་དག་མངོན་སུམ་མིན་ཏེ། ནོར་བུ་རང་མཚན་པས་རྣམ་པ་གཏད་པ་མེད་པའི་ཕྱིར་དང་། བུའི་གཟུགས་རང་མཚན་དང་། དུང་གི་དབྱིབས་རང་མཚན་པ་སྣང་བ་མེད་པའི་ཕྱིར། གལ་ཏེ་སྣང་ན་དེ་དག་དང་རྫས་གཅིག་པའི་ཁ་དོག་དང་ཉིན་མོའི་གཟུགས་སོགས་ཀྱང་སྣང་བར་ཐལ་བའི་ཕྱིར་རོ། །ཡང་ནོར་བུའི་འོད་ཀྱི་རྟགས་ལས་གཞི་དེར་ནོར་བུ་ངེས་པའི་བློ་ཡིན་ན་རྗེས་དཔག་སྲིད་པར་འོག་ཏུ་འབྱུང་ལ། གཞན་གཉིས་ལ་ཡང་འབྲས་རྟགས་སྲིད་ཚུལ་འགྲེལ་པར་གསལ་ལོ། །ཡང་དུང་དང་མེ་དང་ཆུ་ལ་སོགས་པའི་ཁ་དོག་འཛིན་པའི་མིག་ཤེས་རིམ་བཞིན། རེག་བྱ་འཇམ་པ་དང་ཚ་བ་དང་གཤེར་བ་ལ་མངོན་སུམ་ཚད་མ་ཡིན་ཞེས་ལོ་ཙཱ་བ་ལ་སོགས་པ་ལ་ལ་སྨྲའོ། །མི་འཐད་དེ། དབང་ཤེས་ལྔ་པོ་ཕྱིའི་སྐྱེད་མཆེད་ལྔ་ལ་སོ་སོར་འཇུག་པའི་རྣམ་དབྱེ་མི་ཤེས་པར་གཅིག་གི་ཡུལ་ལ་གཞན་འཇུག་པས་དབང་པོ་གཞན་དུ་མ་དོན་མེད་དུ་ཐལ་བ་དང་། ཁ་དོག་གི་རྟགས་ལས་རེག་བྱ་རྟོགས་པའི་རྒྱུ་ཆོས་རྗེས་དཔག་གི་འབྲས་རྟགས་ལ་བརྟེན་པའི་བློ་ལ་མངོན་སུམ་དུ་འཁྲུལ་པ་ཡིན་པའི་ཕྱིར། གཉིས་པ་ནི། རྟོག་པ་སྒོ་རྒྱབ་ཀྱི་བུམ་པ་ལ་ཁང་ཕུགས་ཀྱི་བུམ་པའོ་ཞེས་ཡུལ་ལ་འཁྲུལ་པའི་ཚེ་སྒོ་རྒྱབ་ཀྱི་བུམ་པ་འཛིན་པའི་མིག་ཤེས་དང་། རྟོག་པ་སྔ་དྲོའི་སྲོག་ཆགས་ལ་ཕྱི་དྲོའི་སྲོག་ཆགས་སོ་ཞེས་དུས་ལ་འཁྲུལ་པའི་ཚེ་ཕྱི་དྲོའི་སྲོག་ཆགས་འཛིན་པའི་དབང་ཤེས་དང་། རྟོག་པ་སྣམ་བུའི་དམར་པོ་ལ་བུམ་པའི་དམར་པོའོ། །ཞེས་རྣམ་པ་ལ་འཁྲུལ་པའི་ཚེ་སྣམ་བུའི་དམར་པོ་འཛིན་པའི་དབང་ཤེས་རྣམས་འཁྲུལ་པ་གསུམ་པོ་དེས་མངོན་སུམ་ཡིན་པ་འགོག་སྟེ། དུང་སེར་པོར་སྣང་བ་དབྱིབས་ལ་ཚད་མ་ཡིན་པ་ཞེས་ཟེར་བ་མི་འཐད་དེ། དེའི་ཚེ་རྟོག་པ་ཡུལ་དུས་རྣམ་པ་ལ་འཁྲུལ་པས་ལོག་ཤེས་ཡིན་ཡང་། དེས་དབང་ཤེས་གསུམ་ཚད་མ་ཡིན་པ་ལ་མི་སྒྲིབ་པའི་ཕྱིར་ཏེ། དབང་ཤེས་གསུམ་པོ་དོན་རང་མཚན་ལ་ཚད་མ་ཡིན་པའི་ཕྱིར། དཔེར་ན་བུམ་པ་ལ་རྟག་འཛིན་གྱི་སྒྲོ་འདོགས་ཡོད་ཀྱང་སྔོན་འཛིན་དབང་ཤེས་ཚད་མ་ཡིན་པ་བཞིན་ནོ། །གསུམ་པ་ནི། འགའ་ཞིག་རྟོག་པ་སྣམ་བུའི་དམར་པོ་ལ་བུམ་པའི་དམར་པོར་འཁྲུལ་དུས་ཀྱི་སྣམ་བུའི་དམར་པོ་འཛིན་པའི་དབང་ཤེས་དམར་པོ་ལ་ཚད་མ་ཡིན་ན། དུང་སེར་པོར་འཁྲུལ་པ་ཡང་དབྱིབས་ལ་ཚད་མ་མིན་པ་དེ་མེད་དེ། དེ་གཉིས་མཚུངས་པའི་ཕྱིར་ཞེས་ཟེར། མཚུངས་པ་མིན་ཏེ། དུང་སེར་འཛིན་གྱི་དབང་ཤེས་ནི་དབྱིབས་ལ་ཚད་མར་མི་རིགས་པར་བཤད་ཟིན་ལ། ཅིག་ཤོས་ལ་ནི་རྟོག་པ་འཁྲུལ་པའི་ཡུལ་དང་དབང་ཤེས་ཚད་མར་སོང་བའི་ཡུལ་ཐ་དད་པའི་ཕྱིར་རོ། །གཉིས་པ་རྗེས་དཔག་ལ་ལོག་རྟོག་དགག་པ་ལ་གཉིས་ཏེ། ཡིན་པ་ལ་མིན་པར་རྟོག་པ་དགག་པ། མིན་པ་ལ་ཡིན་པར་རྟོག་པ་དགག་པའོ། །དང་པོ་ནི། ཁ་ཅིག་ནོར་བུའི་འོད་ཀྱི་རྟགས་ལས་གཞི་འགར་ནོར་བུ་ཉིད་རྟོགས་པའི་བློ་རྗེས་དཔག་མིན་ཏེ། ནོར་བུ་རྟགས་སུ་བཀོད་ན་རྟགས་དང་རྟགས་ཅན་མེད། ནོར་བུའི་འོད་མི་འགྲུབ། འོད་ཙམ་མ་ངེས་སོ་ཞེ་ན། སཱ་ལུའི་མྱུ་གུའི་རྟགས་ལ་སཱ་ལུའི་ས་བོན་དཔོག་པ་སོགས་འབྲས་རྟགས་ཕལ་ཆེར་འཁྲུལ་པར་འགྱུར་ཏེ། སཱ་ལུའི་ས་བོན་བཀོད་ན་རྟགས་དང་རྟགས་ཅན་མེད་པ་སོགས་མཚུངས་པའི་ཕྱིར། གཉིས་པ་ནི། དུ་བས་ལ་ལ་རྟག་པའི་མེ་དཔག་པ་དང་། ཡན་ལག་ཅན་གྱི་ལ་ཆོས་ཅན། རྟག་པའི་མེ་ཡོད་དེ། དོན་དམ་པའི་དུ་བ་ཡོད་པའི་ཕྱིར། དབང་ཕྱུག་གིས་བྱས་པའི་ཚང་མང་བཞིན་ཞེས་བཀོད་པ་ན་སྨྲས་ཙམ་གྱི་རྟགས་དང་བསྒྲུབ་བྱ་གཉིས་ལ་འཁྲུལ་ན་ཡང་ལ་མེ་ཙམ་ཞེ་འདོད་ཀྱི་དོན་བསྒྲུབ་བྱ་དང་སྨྲས་ཙམ་དེའི་ཆ་ཤས་ཡིན་པས་དེ་ལ་ཚད་མ་འཕེན་ཞེས་ཟེར། དེ་ལྟ་བུའི་རྟགས་ལ་ཚུལ་གསུམ་ཚང་བ་མེད་དེ། དེ་ལྟ་བུ་མི་སྲིད་པའི་ཕྱིར། བཀོད་པ་དེ་ལྟར་བཀོད་ཀྱང་སོང་ཚོད་ལ་མི་རྟག་པའི་མེ་དང་། དུ་ཙམ་སོང་ངོ་ཞེ་ན་མིན་ཏེ། ཚུལ་གསུམ་གྲུབ་པའི་དུ་ཙམ་གྱིས་ལ་ལ་མེ་ཙམ་གྲུབ་ཀྱང་ལ་ལ་ཆོས་ཀྱི་ཁྱད་པར་རྟག་པ་དང་ཡན་ལག་ཅན་གྱི་ལ་ལ་རྟགས་ཀྱི་ཁྱད་པར་དོན་དམ་པ་རྣམས་གྲུབ་པ་མེད་པའི་ཕྱིར་ཏེ། མེ་ཙམ་དང་དུ་ཙམ་གྲུབ་བོ་ཞེ་ན་མིན་ཏེ། དབྱུག་པ་ཅན་འདོད་པ་ལ་མི་རྐྱང་གྲུབ་པས་ཅི་ཞིག་ཕན། གསུམ་པ་མཚན་གཞི་ལ་མཚན་ཉིད་ངེས་བྱེད་བཤད་པ་ལ་གཉིས་ལས། དང་པོ་དྲི་བ་དགོད་པ་ནི། སྔར་བཤད་པའི་ཚད་མ་དེ་དག་མི་བསླུ་བའི་ཤེས་པ་ཡིན་པ་ནི་རང་ཉིད་དམ་ཕྱིས་ཀྱི་ཚད་མ་གཞན་གང་ལས་རྟོགས་ཤིང་ངེས་པ་ཡིན། དང་པོ་ལྟར་ན་ཚད་མའི་མཚན་ཉིད་ལ་མི་མཐུན་པ་མེད་པས་བསྟན་བཅོས་ལས་མཚན་ཉིད་བསྟན་པ་དོན་མེད་པར་འགྱུར་ཞིང་། ཕྱི་མ་ལྟར་ན་ཐུག་མེད་དུ་འགྱུར་རོ་ཞེ་ན། གཉིས་པ་ལན་ལ་གསུམ་སྟེ། གཞན་ལན་དགག་པ། རང་ལན། དེ་ལ་རྩོད་པ་སྤོང་བའོ། །དང་པོ་ནི། གངས་ཤེལ་སོགས་པ་ལ་ལ་ནི་རང་ཁོ་ན་ལས་ངེས་ཞེས་འདོད། བྲམ་ཟེ་སོགས་འགའ་ཞིག་གཞན་ཁོ་ན་ལས་ངེས་ཞེས་ཟེར། མི་འཐད་དེ། དེ་དག་གཉིས་ཀས་དངོས་སྟོབས་ཀྱི་རིག་པ་དང་རིག་པར་སྨྲ་བའི་བཞེད་པ་དོར་བའི་སྐྱོན་ཡོད་པའི་ཕྱིར། དང་པོ་གྲུབ་སྟེ། སྔ་མ་ལྟར་ན་ཚད་མ་ཕྱི་མ་དོན་མེད་དང་། ཕྱི་མ་ལྟར་ན་ངེས་བྱེད་ཐུག་མེད་དུ་འགྱུར་བའི་ཕྱིར། གཉིས་པ་གྲུབ་སྟེ། རང་ལས་རང་གི་ངོ་བོ་རྟོགས། །ཞེས་གསུངས་པའི་ཕྱིར་རོ། །གཉིས་པ་ནི། དོན་བྱེད་སྣང་དང་གོམས་པ་ཅན་ཏེ་དོན་རིག་གཉིས་དང་། ཀུན་ཏུ་ཐ་སྙད་པའི་ཚད་མས་བསྡུས་པའི་རྒྱུད་ཀྱི་རང་རིག་མངོན་སུམ་དང་། རྣལ་འབྱོར་མངོན་སུམ་ལ་འཕགས་པ་རྟོག་མེད་ཀྱི་ནི་གཉིས་པོ་གང་ཡང་མིན་ལ། རྟོག་བཅས་ཀྱི་རྣལ་འབྱོར་མངོན་སུམ་དང་རྗེས་སུ་དཔག་པ་རྣམས་ནི་རང་ཉིད་ཀྱི་སྟོབས་ལས་མི་སླུ་བ་དང་ཤེས་པ་གཉིས་ཆར་དུ་ངེས་ཏེ། གཞན་ལ་ལྟོས་ན་ངེས་བྱེད་ཐུག་མེད་དུ་ཐལ་བའི་ཕྱིར་རོ། །མངོན་སུམ་དང་པོ་པ་དང་ཡིད་མ་གཏད་པ་དང་འཁྲུལ་པའི་རྒྱུ་མཚན་གྱིས་ཟིན་པ་ཅན་རྣམས་ནི་ཕྱིས་ཀྱི་ཚད་མ་གཞན་གྱི་སྟོབས་ལས་ངེས་ཏེ། རང་གིས་ངེས་ན་ཕྱི་མ་རྣམས་དོན་མེད་དུ་ཐལ་བའི་ཕྱིར་རོ། །ཕྱི་མ་འདི་ལའང་གསུམ་ཡོད་པའི་མཚན་གཞི་རྣམས་འགྲེལ་པར་གསལ་ལོ། །དེ་ངེས་པར་བྱེད་པའི་ཚད་མ་ཡང་། མེའི་རྣམ་པ་སྣང་ནས་བདེན་རྫུན་ལ་ཐེ་ཚོམ་ཟ་བ་ན། བཙོ་སྲེག་ལ་སོགས་པའི་དོན་བྱེད་པར་མཐོང་ནས་མེར་ངེས་པ་དང་། ཡང་དོན་བྱེད་པར་མ་མཐོང་ཡང་བར་དུ་སྐྱེས་པ་དོན་གྱི་རྣམ་པ་གསལ་བར་འཛིན་པ་མངོན་སུམ་གོམས་པ་ཅན་དང་། དུ་བ་སྐྱེ་བར་མཐོང་བའི་རྟགས་ལས་མེ་ཡོད་པར་རྟོགས་པའི་རྗེས་སུ་དཔོག་པའམ། མེའི་དྲི་ལ་སོགས་པ་སྐྱེད་མཆེད་ཀྱི་རྫས་གཞན་གྱི་རྟགས་ལས་མེ་རྟོགས་པའི་རྗེས་སུ་དཔག་པ་ལས་ངེས་པར་བྱེད་དོ། །འདི་ནི་དཔལ་ལྡན་གྲགས་པའི་དགོངས་པ་བླ་ན་མེད་དེ། རྣམ་འགྲེལ་ལས། རང་ལས་རང་གི་ངོ་བོ་རྟོགས། །ཞེས་པའི་རང་ནི་སྔར་བཤད་པའི་རང་ངེས་ཀྱི་མཚན་གཞི་རྣམས་སོ། །རང་གི་ངོ་བོ་ནི་མི་སླུ་བ་དང་ཤེས་པ་གཉིས་ཆར་རོ། །རྟོགས་པ་ངེས་པ་དྲངས་པའང་ངེས་པའི་སྒོ་ནས་སོ། །གཞན་དུ་རང་ལས་ཞེས་པ་རང་རིག་མངོན་སུམ་ཁོ་ནར་ངེས་ན། འདི་ལའང་མཚུངས་ཤིང་རྗེས་དཔག་གི་རང་ཡུལ་མ་ངེས་པར་ཐལ་ལོ། །རང་གི་ངོ་བོ་ཞེས་པའང་ཤེས་པའི་དོན་ཁོ་ནར་མ་ངེས་ཏེ། དེ་ལྟར་ན་མི་སླུ་བ་ངོ་བོ་མིན་པར་ཐལ་ལོ། །དེ་གཉིས་ལ་ངོ་བོ་ཡིན་མིན་ཁྱད་པར་བྱེད་པའི་ཕྱིར་རོ། །ཐ་སྙད་ལས་ནི་ཚད་མ་ཉིད། །ཅེས་པའི་ཐ་སྙད་ནི་ཕྱིས་བྱུང་གི་ངེས་བྱེད་ཡིན་གྱི། ངེས་ཤེས་ཁོ་ན་མིན་ཏེ། གཞན་དུ་ན་འདི་ངེས་ཤེས་ཁོ་ནར་ཐལ་ལོ། །ཚད་མ་ཞེས་པ་ནི་ཚད་མའི་དོན་ལྡོག་མི་སླུ་བའི་ཤེས་པའོ། །ཉིད་ཅེས་པ་ནི་གཞན་ལྡན་རྣམ་གཅོད་ཀྱི་ཚིག་གོ །དེས་ན་རྣམ་འགྲེལ་དང་འདི་གཉིས་ཆར་གྱི་རྐང་པ་དང་པོ་གཉིས་ཀྱི་དངོས་བསྟན་རང་ངེས་ཁོ་ན་ཡིན་ཞིང་། རྐང་པ་ཕྱི་མ་གཉིས་ཀྱིས་བསྟན་བྱའི་གཙོ་བོ་ནི་གཞན་ངེས་དང་། བསྟན་པ་ཙམ་ལ་རང་ངེས་ཡོད་མེད། ངེས་བྱེད་ཀྱི་ཚད་མ་དངོས་སུ་བསྟན་པའི་ཕྱིར། བསྟན་པ་དང་སེམས་ཅན་དཔག་ཏུ་མེད་པ་ལ་ཕན་པར་གྱུར་ཅིག གསུམ་པ་ནི། ཁྱུང་དང་གངས་ཤེལ་སོགས་ཁ་ཅིག་ངེས་བྱ་དང་ངེས་བྱེད་ཀྱི་ཚད་མ་གཉིས་ཡུལ་གཅིག་གམ་མི་གཅིག གཅིག་ན་ངེས་བྱེད་ཀྱི་ཚད་མ་གཉིས་པ་གཅད་ཤེས་སུ་འགྱུར་ལ། མི་གཅིག་ན་ཡུལ་གཞན་དངོས་པོར་གྲུབ་པས་གཞན་ཇི་ལྟར་དངོས་པོར་གྲུབ་ཅེས་ཡུལ་ལ་བརྟགས་པ་དང་། གཞན་ངེས་འདོད་པའི་ཚད་མ་དེ་དག་གིས་སྒྲོ་འདོགས་གཅོད་དམ་མི་གཅོད། དང་པོ་ལྟར་ན་རང་ངེས་སུ་འགྱུར་ལ། གཉིས་པ་ལྟར་ན་ཚད་མ་མིན་པས་གཞན་ངེས་སུའང་མི་འཐད་ཞེས་ངོ་བོ་ལ་བརྟགས་ནས་གཞན་ངེས་ཚད་མ་མི་སྲིད་དོ་ཟེར་རོ། །མི་འཐད་དེ། དེ་དག་གིས་མངོན་སུམ་ནི་རྟོག་བྲལ་མ་འཁྲུལ་པ་ཙམ་གྱིས་ཚད་མ་འགྲོ་ལ། དེས་ན་རང་སྟོབས་ཀྱིས་དེ་མ་ཐག་ཏུ་ངེས་པ་འདྲེན་ན་རང་ངེས་དང་། དེ་མི་ནུས་པར་གཞན་གྱིས་ངེས་དགོས་ན་གཞན་ངེས་ཡིན་པའི་རྣམ་གཞག་མ་ཤེས་པར་མུ་སྟེགས་བྱེད་ལྟར་མངོན་སུམ་དང་རྟོག་པའི་བྱེད་པ་འདྲེས་ཏེ་མངོན་སུམ་ཉིད་ངེས་པའི་བདག་ཉིད་དུ་བསམས་ནས་གཅོད་པར་ཟད་པའི་ཕྱིར་རོ། །བཞི་པ་དེས་དགག་སྒྲུབ་ཇི་ལྟར་བྱེད་པའི་ཚུལ་ལ། དགག་སྒྲུབ་སྤྱིའི་རྣམ་གཞག དེའི་རང་བཞིན་གཏན་ལ་དབབ་པའོ། །དང་པོ་ནི། སྣང་བ་ལ་དགག་སྒྲུབ་དངོས་སུ་བྱར་མེད་དེ་མངོན་སུམ་དངོས་པོའི་ཡུལ་ཅན་ཡིན་པས་དོན་ལ་ལྟ་བ་ཙམ་མ་གཏོགས་པ་དགག་སྒྲུབ་མི་བྱེད་པའི་ཕྱིར་རོ། །དེས་ན་སེལ་བ་ལ་ནི་དགག་སྒྲུབ་གཉིས་བྱེད་དེ། སེལ་བའི་ཡུལ་ཅན་མངོན་སུམ་གྱིས་དྲངས་པའི་ངེས་པ་དང་རྗེས་དཔག་གིས་དགག་སྒྲུབ་བྱེད་པའི་ཕྱིར་ན། འདིར་དངོས་བསྟན་གྱི་སྒྲུབ་པ་ནི་སེལ་བའི་སྒྲུབ་པ་སྣང་བ་རང་མཚན་ཁོ་ནའོ། །གཉིས་པ་ལ་མཚན་ཉིད། དེས་དོན་རྟོགས་པའི་ཚུལ་གཉིས། དང་པོ་ལ། དགག་པའི་མཚན་ཉིད་བློས་རྣམ་གཅོད་ཙམ་རྟོགས་པར་བྱ་བའོ། །སྒྲུབ་པའི་མཚན་ཉིད། བློས་ཡོངས་གཅོད་དུ་རྟོགས་པར་བྱ་བའོ། །དགག་པ་ལ་དབྱེ་ན་མེད་དགག མ་ཡིན་དགག་གཉིས་ལས། མཚན་ཉིད་རིམ་བཞིན་དགག་བྱ་བཀག་ཤུལ་དུ་སྒྲུབ་པ་སྤོང་བ་སྟེ་མི་འཕེན་པ་དང་། མི་སྤོང་བ་སྟེ་འཕེན་པ་ཡི་སྒོ་ནས་ཕྱེའོ། །གཉིས་པ་ལ་གསུམ་ལས། དང་པོ་གཞན་ལུགས་དགག་ན། ཕྱྭ་པ་སོགས་ཁ་ཅིག་དངོས་རྟོགས་དང་ཤུགས་རྟོགས་ཀྱི་མཚན་ཉིད་རིམ་བཞིན། དོན་དེ་ཉིད་ཀྱི་རྣམ་པ་སྣང་བའི་སྒོ་ནས་སྒྲོ་འདོགས་གཅོད་པ་དང་། གཞན་གྱི་རྣམ་པར་སྣང་བའི་སྒོ་ནས་སྒྲོ་འདོགས་གཅོད་པའོ། །དེའི་སྒོ་ནས་སྒྲུབ་པའི་ཚུལ་ནི་རྗེས་དཔག་གིས་ལ་མེ་ལྡན་དུ་དངོས་སུ་རྟོགས་པ་ན་བདག་ཉིད་མེ་འཇལ་དུ་ཤུགས་ལ་རྟོགས་པ་དང་། རྟག་པ་ལ་བྱས་པ་དགག་པ་དངོས་སུ་རྟོགས་པ་ན་བྱས་པ་ལ་མི་རྟག་པ་ཤུགས་ལ་རྟོགས་པ་ཡིན་ལ། མངོན་སུམ་ལའང་། རང་རིག་གིས་བློ་དེར་འཛིན་དུ་གྲུབ་པས་ཡུལ་དེ་སྣང་དུ་ཤུགས་ལས་འགྲུབ་སྟེ། བློ་ཟླ་བ་གཉིས་དང་སྔོན་པོ་འཛིན་བྱེད་དུ་དངོས་སུ་གྲུབ་པས་ཡུལ་ཟླ་གཉིས་དང་སྔོན་པོའི་རྣམ་པ་ཤུགས་ལ་འགྲུབ་པ་དང་། གཞན་རིག་གིས་ཡུལ་དེར་སྣང་དུ་དངོས་སུ་གྲུབ་པས་བློ་དེར་འཛིན་ཤུགས་ལ་འགྲུབ་སྟེ། གཟུང་ཡུལ་སྔོན་པོར་དངོས་སུ་གྲུབ་པས་བློ་རང་ཉིད་སྔོ་འཛིན་དུ་ཤུགས་ལ་གྲུབ་པ་དང་། དུ་བ་ལ་མེ་ཡོད་དང་། ཤ་པ་ཤིང་ཡིན་པའི་ཁྱབ་པ་དངོས་སུ་གྲུབ་པས་མེ་མེད་ལ་དུ་མེད་དང་ཤིང་མེད་ལ་ཤ་པ་མེད་པས་ཁྱབ་པ་ཤུགས་ལ་གྲུབ་པ་ལྟ་བུའོ། །འགོག་པའི་ཚུལ་ཡང་ལྡོག་པ་ཉིས་ཚོགས་འཛིན་པ་ལ་ཆིག་རྐྱང་འཛིན་པས་ཁྱབ་པས་རིགས་ཀྱི་སྤྱི་ཆིག་རྐྱང་འཛིན་པ་ཁེགས་ན་བྱེ་བྲག་ཉིས་ཚོགས་འཛིན་པ་ཤུགས་ལ་ཁེགས་པ་ལྟ་བུའོ་ཞེས་ཟེར་རོ། །འདི་ཡང་དཔྱད་དེ། རྗེས་དཔག་ཤུགས་རྟོགས་ཉིད་དུ་འགྱུར་ཏེ། མཚན་ཉིད་ཚང་བའི་ཕྱིར་རོ། །གལ་ཏེ་དོན་གཞན་ལ་སྒྲོ་འདོགས་གཅོད་པའི་ཚད་མ་རྗེས་དཔག་མིན་ཏེ། རྗེས་དཔག་གིས་དོན་གཞན་ལ་སྒྲོ་འདོགས་གཅོད་པ་རྟགས་ལ་ལྟོས་ལ། ཤུགས་རྟོགས་འདི་རྟགས་ལ་མ་ལྟོས་པར་དོན་གཞན་ལ་སྒྲོ་འདོགས་གཅོད་པའི་ཕྱིར་ཞེ་ན། ཤུགས་རྟོགས་འདི་ཚད་མ་གསུམ་པར་འགྱུར་ཏེ། རྟགས་ལ་མ་ལྟོས་པར་སྒྲོ་འདོགས་གཅོད་པའི་ཚད་མ་ཡིན་པའི་ཕྱིར། དགག་སྒྲུབ་བྱེད་ཚུལ་དེ་དག་ཀྱང་མི་འཐད་དེ། མངོན་རྗེས་གཉིས་ཆར་ལ་ཤུགས་རྟོགས་མི་སྲིད་པའི་ཕྱིར། གཉིས་པ་རང་ལུགས་ལ། ཡུལ་དགག་སྒྲུབ་གྱི་དབྱེ་བ། དེ་ཚད་མས་རྟོགས་ནས་དགག་བྱ་འགོག་ཚུལ་ལོ། །དང་པོ་ནི། འདིར་སེལ་བའི་དགག་སྒྲུབ་ཁོ་ན་འཆད་པས་སྒྲུབ་པ་ལ་དོན་དང་ཤེས་པ་གཉིས། དེ་རེ་རེ་ལའང་ཡིན་པ་དང་ཡོད་པའི་དབྱེ་བས་གཉིས་གཉིས་ཏེ་བཞིའོ། །དགག་པ་ལ་དེ་ཉིད་བཟློག་པ་དོན་དགག་པ་དང་། ཤེས་པ་དགག་པ་གཉིས། དེ་རེ་རེ་ལ་ཡང་མིན་པ་དང་། མེད་པའི་དབྱེ་བས་གཉིས་གཉིས་ཏེ་བཞིའོ། །གཉིས་པ་ནི། དགག་སྒྲུབ་དེ་ཡང་ཚད་མའམ་དེའི་སྟོབས་ཀྱིས་འགྲུབ་སྟེ། མངོན་སུམ་གྱིས་དྲངས་པའི་ངེས་ཤེས་སམ། སྒྲུབ་རྟགས་ལ་བརྟེན་པའི་རྗེས་དཔག་གིས་སྒྲུབ་པ་དང་། མིན་དགག་གྲུབ་པའི་ཕྱིར་ཏེ། སྒྲ་རྟག་འཛིན་གྱི་འཁྲུལ་རྒྱུ་མེད་ན་མངོན་སུམ་གྱིས་རང་སྟོབས་ཀྱིས་དྲངས་པའི་ངེས་ཤེས་དེས་སྒྲ་མི་རྟག་པར་ངེས་པའི་ཚེ་སྒྲ་མི་རྟག་པ་གྲུབ་པ་དང་། འཁྲུལ་རྒྱུ་ཡོད་ན་ཕྱིས་རྟགས་ལས་སྒྲ་མི་རྟག་པ་ངེས་པའི་ཚེ་དེའི་ཐ་སྙད་བྱེད་པའི་ཕྱིར། ཡང་མངོན་སུམ་གྱིས་དྲངས་པའི་ངེས་ཤེས་དང་། དགག་རྟགས་ལ་བརྟེན་པའི་རྗེས་དཔག་གིས་དགག་པ་གྲུབ་པ་ཡིན་ཏེ། རྒོལ་བ་མཁས་པས་དག་འཛིན་དབང་མངོན་མྱོང་བྱེད་ཀྱི་རང་རིག་གིས་དྲངས་པའི་ངེས་ཤེས་དེས་ས་ཕྱོགས་སུ་བུམ་པ་མེད་པར་ངེས་པའི་ཚེ་བུམ་པ་དགག་པ་དང་། རྨོངས་པས་བུམ་པ་ཚད་མས་མ་དམིགས་པའི་ས་ཕྱོགས་སུ་རྟགས་ཀྱིས་བུམ་པ་མེད་པར་ངེས་པའི་ཚེ་དེའི་ཐ་སྙད་བྱེད་པའི་ཕྱིར། དེ་བཞིན་དུ་བདེ་བ་དུཿཁ་དང་། གཟུགས་འཛིན་སྒྲ་འཛིན་གྱི་ངོ་བོ་ཡིན་པ་སོགས་རང་རིག་གིས་བྱེད་པས་ཁེགས་ཚུལ་ནི་རང་འགྲེལ་ལས་གསལ་ལོ། །གསུམ་པ་རྩོད་སྤོང་ནི། ཤུགས་རྟོགས་ཚད་མ་མིན་ན་སློབ་དཔོན་གྱིས་གཞུང་གི་ཆ་འགར་ཤུགས་ལ་རྟོགས་པའམ་དོན་གྱིས་གོ་བ་ཞེས་གསུངས་པ་དང་འགལ་ལོ་ཞེ་ན། སྐྱོན་མེད་དེ། དེ་ལྟར་གསུངས་པ་ཡང་མངོན་སུམ་གྱི་སྟོབས་ཀྱིས་ཡུལ་ངེས་པར་བྱེད་པའམ་ཚུལ་གསུམ་གོམས་པའི་སྟོབས་ཀྱིས་གློ་བུར་བའི་རྗེས་དཔག་སྐྱེས་པ་ཉིད་ལ་དགོངས་ཏེ། རྣམ་ངེས་ལས་རང་གིས་གྲུབ་པ་མིན་པ་ཐམས་ཅད་ནི་བདག་ཉིད་དང་འབྲེལ་བའི་སྒྲུབ་པར་བྱེད་པ་མི་འཁྲུལ་བ་གཞན་ལ་ལྟོས་པའི་ཕྱིར་མངོན་སུམ་མིན་པའི་ཚད་མ་ནི་རྗེས་སུ་དཔག་པ་ལས་གཞན་ཡོད་པ་མིན་ཏེ། ཞེས་གསུངས་སོ། །ཚད་མ་རིགས་པའི་གཏེར་ལས་མཚན་ཉིད་བརྟག་པའི་རབ་ཏུ་བྱེད་པ་བརྒྱད་པའི་རྣམ་བཤད་བསྟན་ཟིན་ཏོ།། ༈ །།གཉིས་པ་མཚན་གཞི་སོ་སོའི་དོན་ལ། མངོན་སུམ་དང་། རྗེས་དཔག་གོ །དང་པོ་ལ། མངོན་སུམ་ཡང་དག བཟློག་པ་ལྟར་སྣང་། ཚད་མ་དང་འབྲས་བུའོ། །དང་པོ་ལ་མཚན་ཉིད། མཚོན་བྱའི་དབྱེ་བ། མཚན་གཞི་སོ་སོའི་དོན་ནོ། །དང་པོ་ལ་གཉིས་ལས། གཞན་ལུགས་དགག་ན། བོད་རྣམས་མངོན་སུམ་དང་དེའི་ཚད་མ་སོ་སོར་ཕྱེ་ནས། དང་པོའི་མཚན་ཉིད་རྟོག་བྲལ་མ་འཁྲུལ་བ་དང་། གཉིས་པའི་མཚན་ཉིད་སྔར་མ་རྟོགས་པའི་དོན་ལ་མྱོང་སྟོབས་ཀྱིས་སྒྲོ་འདོགས་གཅོད་པ་ཞེས་ཟེར་བ་མི་འཐད་དེ། གཉིས་སུ་ཕྱེ་བ་གཞུང་ལས་མ་བཤད་ཅིང་། སྔར་མ་རྟོགས་པ་ལ་རྣམ་བཅད་མེད་ལ། མྱོང་བ་མངོན་སུམ་གྱིས་སྒྲོ་འདོགས་གཅོད་པར་འདོད་པ་འཁྲུལ་པར་བཤད་ཟིན་པའི་ཕྱིར་རོ། །གཉིས་པ་རང་གི་འདོད་པ་ནི། མངོན་སུམ་གྱི་མཚན་ཉིད་ནི་རྟོག་བྲལ་མ་འཁྲུལ་བའོ། །དེ་ནི་མིང་ལ་བརྟེན་ནས་དོན་ཚོལ་བ་ཡིན་པས། རྟོག་བྲལ་དང་མ་འཁྲུལ་བ་གཉིས་དཔྱད་དོ། །དེའང་རྟོག་པའི་མཚན་ཉིད་ལུང་ལས་བཤད་པ་ཀུན་ཏུ་རྟོག་པ་དང་སེམས་རྩིང་བར་འཇུག་པ་ཙམ་མིན་གྱི་སྒྲ་དོན་འཛིན་པ་ཡིན་ནོ། །བྲལ་བའི་དོན་ནི་རང་ལྡོག་ལ་མཚན་ཉིད་དེ་མི་བརྟེན་པ་ཡིན་ནོ། །མ་འཁྲུལ་བ་ནི། དབང་པོ་དང་། ཡུལ་དང་བྱ་བ་ལ་སོགས་པའི་འཁྲུལ་པའི་རྒྱུ་དེ་དག་དང་བྲལ་བའོ། །འདི་གཉིས་ཀ་རིགས་མི་མཐུན་སེལ་བ་ལ་དགོས་སམ་ཞེ་ན། མིན་ཏེ། རྟོག་པ་ཐམས་ཅད་འཁྲུལ་པས་མ་འཁྲུལ་བ་ཉིད་ཀྱིས་རྟོག་བྲལ་དུའང་གྲུབ་མོད་ཀྱི། དཔྱོད་པ་པ་སོགས་རྟོག་པ་དང་བཅས་བཞིན་དུ་གཟུང་དོན་མ་འཁྲུལ་པ་དང་། རྗེས་དཔག་ལ་མ་འཁྲུལ་བ་ཡིན་ནམ་སྙམ་པའི་ལོག་རྟོག་བཟློག་པའི་ཕྱིར་རྟོག་བྲལ་སྨོས་སོ། །འདིར་སེམས་ཙམ་པའི་ལུགས་ལ་རྗེས་དཔག་མ་འཁྲུལ་པ་ཡིན་པས་དེ་ལྟར་ན་ཡང་རིགས་མི་མཐུན་སེལ་ལ། མདོ་སྡེ་པ་ལྟར་ན་རྗེས་དཔག་མ་འཁྲུལ་བར་མི་འདོད་པས་ལོག་རྟོག་ཁོ་ན་སེལ་བ་ནི་ཁྱད་པར་རོ། །རྣམ་རིག་པའི་ལུགས་ལ། རྗེས་དཔག་མ་འཁྲུལ་བའི་དོན་གང་ཞེ་ན། སྤྱིར་མདོ་སེམས་གཉིས་ཆར་གྱི་ལུགས་ལ་ཚད་མ་ལ་གཉིས་སུ་ངེས་པར་མཚུངས་པ་ལས་མདོ་སྡེ་པ་ནི། གང་དེ་འཁྲུལ་པ་ཐོག་མེད་པའི། །ཞེས་སོགས་དང་། རྗེས་དཔག་གཟུང་ཡུལ་མེད་པ་བཟུང་བས་འཁྲུལ་པ་ཡིན་ཞིང་། ཞེས་སོགས་གསུངས་པ་ལྟར་དུ་ཐོག་མ་མེད་པའི་བག་ཆགས་ཀྱིས་བསླད་པ་ཞུགས་པ་དང་། གཟུང་ཡུལ་དངོས་མེད་གཟུང་བའི་ཆ་ནས་འཁྲུལ་པ་དང་། མངོན་སུམ་ནི་རྒྱུ་མཚན་གཉིས་པོ་དེ་ལས་ལོག་པས་མ་འཁྲུལ་བར་འདོད། སེམས་ཙམ་པ་ནི་མ་འཁྲུལ་པར་འདོད་དེ། གཞན་དུ་ན་སྔར་གྱི་རྒྱུ་མཚན་གཉིས་པོ་དེའི་ཆ་ནས་འཁྲུལ་པར་འདོད་དགོས་ལ། དེ་ལྟར་ན། མིག་གིས་བསླད་པ་བདག་ཉིད་ལས། །ཞེས་སོགས་དང་། ཤེས་བྱ་ནང་གིས་ཞུགས་པ་ན། །ཞེས་སོགས་གསུངས་པ་ལྟར་ཚུར་མཐོང་གི་རྒྱུད་ཀྱི་དབང་ཡིད་ཀྱི་མངོན་སུམ་འཁྲུལ་པར་ཐལ་བ་ལས་མ་འཁྲུལ་པར་འདོད་པའི་ཕྱིར་ཏེ། རྣམ་ངེས་ལས། མངོན་སུམ་རྟོག་བྲལ་མ་འཁྲུལ་བ། །ཞེས་གསུངས་པ། མདོ་སེམས་གཉིས་ཆར་གྱི་ལུགས་ཡིན་པའི་ཕྱིར། དེས་ན་མི་སླུ་བའི་ཆ་ནས་བཞག་དགོས་ལ་དེ་རྗེས་དཔག་ལའང་ཡོད་པའི་ཕྱིར་རོ་ཞེས་དགོངས་པ་སྟེ་བསྟན་པ་ལ་ཕན་པར་གྱུར་ཅིག གཉིས་པ་ལ་དབྱེ་གཞི་ནི། མ་འཁྲུལ་བའམ། ལོག་རྟོག་ལ་ལྟོས་ཏེ་རྟོག་བྲལ་མ་འཁྲུལ་བ་ཙམ་མོ། །དེ་ལ་དབྱེ་ན་དབང་མངོན་ལ་སོགས་པ་རྣམ་པ་བཞིའོ། །མངོན་སུམ་དེའང་ཡུལ་གྱི་སྒོ་ནས་ཡུལ་གཞན་མཐོང་བ་དོན་རིག་གཉིས། རང་མཐོང་བ་རང་རིག རང་གཞན་མེད་པར་མཐོང་བ་རྣལ་འབྱོར་མངོན་སུམ་བཞིར་རྣམ་པར་དབྱེ་བ་ཡིན་ནོ། །འདིས་ཀྱང་རང་རིག་ལ་ཡུལ་མེད་པ་བསལ་ལོ། །རྟེན་གྱི་སྒོ་ནས་དབང་པོ་ལ་བརྟེན་པ་དོན་རིག་གཉིས། གཞན་དབང་ལ་བརྟེན་པ་རང་རིག ཏིང་ངེ་འཛིན་ལ་བརྟེན་པ་རྣལ་འབྱོར་མངོན་སུམ་བཞིར་རྣམ་པར་དབྱེ་བ་དང་། གང་ཟག་གྱི་སྒོ་ནས་སོ་སྐྱེའི་དང་། འཕགས་པའི་མངོན་སུམ་གཉིས་སུ་རྣམ་པར་དབྱེའོ། །འདིས་དངོས་བསྟན་གྱི་མངོན་སུམ་དང་པོ་གསུམ་སོ་སྐྱེའི་ཡིན་ནམ་སྙམ་སྟེ་དཔྱད་དོ། །འོ་ན་རང་རིག་མངོན་སུམ་གཞན་དབང་ལ་བརྟེན་ཞེས་གསུངས་པའི་གཞན་དབང་ནི་གང་། བརྟེན་ཚུལ་ཇི་ལྟ་བུ་ཞེ་ན། ཁོ་བོས་བཤད་པར་བྱ་ཡི་སྣོད་ལྡན་དག་རྣ་བ་གཏད་དེ་ཉན་པར་གྱིས་ཤིག གཞན་དབང་ནི་མཚན་ཉིད་གསུམ་གྱི་ནང་ཚན་ཡིན་ལ། བརྟེན་ཚུལ་ནི་རྫས་གཅིག་པའི་ཚུལ་གྱིས་བརྟེན་པ་ཡིན་ཏེ། རང་རིག་གི་དོན་ནོ། །འོ་ན་མངོན་སུམ་གཞན་གསུམ་ལ་ཡང་གཞན་དབང་ལ་བརྟེན་ཞེས་ཅིའི་ཕྱིར་མི་བརྗོད་ཅེ་ན། མངོན་སུམ་འདི་མདོ་སེམས་གཉིས་ཆར་གྱི་ཁས་ལེན་པས་དེ་གཉིས་ཆར་ལ་མཐུན་སྣང་གྲུབ་པའི་གཞན་དབང་ལ་བརྟེན་དགོས་པ་དང་གཞན་དབང་དེ་ཡང་སེམས་སེམས་བྱུང་རེ་རེ་བ་མིན་པར་གཉིས་ཀ་ལ་ཁྱབ་པ་ཞིག་དགོས་པ་ལ་དགོངས་ནས་གཞན་དབང་ལ་བརྟེན་ཞེས་གསུངས་པ་ཡིན་ལ། བདག་རྐྱེན་གཞན་དབང་ལ་བརྟེན་པའི་དོན་དུ་བཤད་ན་འདིའི་དོན་བསྐལ་པར་བཙལ་ཀྱང་མི་རྙེད་དོ། །འོ་ན་ཡུལ་གྱི་སྒོ་ནས་དབྱེ་བའི་སྐབས་སུ་མྱོང་བྱ་ཡུལ་དུ་བཞག་པ་དང་བཟློས་སོ་སྙམ་ན་མིན་ཏེ། ཡུལ་དང་བརྟེན་ལྡོག་པའི་སྒོ་ནས་ཕྱེ་བ་ཙམ་མོ། །མདོར་ན་མངོན་སུམ་ཐོག་མཐའ་གསུམ་ནི་རྟེན་མྱོང་བྱའི་སྒོ་ནས་ཕྱེ་བའི་གནད་ཤེས་ན་འབད་མེད་དུ་རྟོགས་པར་མ་ཟད། ཤེས་པ་ཐམས་ཅད་རང་གི་ངོ་བོ་ལ་རང་རིག་མངོན་སུམ་དུ་བཤད་པ་དང་། ཚད་འབྲས་གཉིས་པ་དང་གསུམ་པར་དབང་མངོན་གྱི་ཚད་འབྲས་བསྟན་པའི་ཚེ་ཡང་རང་རིག་འབྲས་བུར་བཤད་པའི་དོན་ཡང་རྟོགས་པར་འགྱུར་རོ། །རྩོམ་པ་པོ་ཉིད་ཀྱི་ཟག་མེད་ཀྱི་ཐུགས་དགོངས་རྫོགས་པའི་ཕྱིར་བསྔོའོ། །གྲངས་ངེས་པ་ནི། འོ་ན་གོང་གི་དབྱེ་སྒོ་གསུམ་པོ་དེ་དག་གྲུབ་མཐའ་གང་གི་ལུགས་ཡིན་ཞེ་ན། ཡུལ་དང་རྟེན་གྱི་སྒོ་ནས་ཕྱེ་བའི་མངོན་སུམ་བཞི་པོ་ནི་མདོ་སྡེ་པ་ཁོ་ནའི་ལུགས་ཏེ། དེའི་ཚེ་ཕྱི་དོན་ཁས་ལེན་དགོས་ལ་དེ་ཡང་མདོ་སྡེ་པའི་ལུགས་ལ་བརྟེན་པའི་དབང་དུ་བྱས་པའི་ཕྱིར། དེའི་ལུགས་ལའང་ངོ་བོའི་སྒོ་ནས་མིན་ཏེ། བཞི་ཀའང་ངོ་བོའི་སྒོ་ནས་རང་རིག་ཏུ་གཅིག་པའི་ཕྱིར། བྱེ་བྲག་སྨྲ་བ་ལྟར་ན་ཡུལ་དང་ངོ་བོ་གཉིས་ཀའི་སྒོ་ནས་མངོན་སུམ་གསུམ་ཡིན་ཏེ། རང་རིག་མི་འདོད་པས་སོ། །རྣམ་རིག་པའི་ལྟར་ནའང་ཡུལ་དང་ངོ་བོ་གཉིས་ཀའི་སྒོ་ནས་རང་རིག་དང་རྣལ་འབྱོར་མངོན་སུམ་གཉིས་ཡིན་ཏེ། དང་པོ་གསུམ་ཡུལ་ཤེས་པར་གཅིག ངོ་བོ་རང་རིག་ཏུ་གཅིག་པའི་ཕྱིར་ཏེ། སངས་རྒྱས་ཀྱི་སར་དབང་པོ་ལྔ་གནས་གྱུར་ཅིང་གཉིས་སྣང་གི་བག་ཆགས་སྤངས་པས་དབང་མངོན་དང་ཡིད་མངོན་མེད་ལ། སེམས་ཅན་ལ་ཡོད་པ་ནི་རང་དང་རྫས་གཅིག་པའི་ཡུལ་ཁོ་ན་རིག་པའི་མངོན་སུམ་དུ་ངེས་པའི་ཕྱིར་ཏེ། རིག་བྱ་ཕྱི་དོན་མེད་པའི་ཕྱིར། དབྱེ་སྒོ་གསུམ་པ་ནི་གྲུབ་མཐའ་སྨྲ་བ་གསུམ་ཆར་གྱི་ལུགས་ཡིན་ལ་འདིར་དབྱེ་སྒོ་དང་པོ་དེ་ཉིད་གཞིར་གཞག་ནས་རྩི་བ་ཁོ་ན་ཡིན་ལ། དེ་ཡང་ཡུལ་གྱི་སྒོ་ནས་ཕྱེ་བའི་མངོན་སུམ་བཞི་པོ་དེ་མདོ་སྡེ་པ་ཁོ་ནའི་ལུགས་ཡིན་ཏེ། དེའི་ལུགས་ལ་བརྟེན་ནས། དགེ་སློང་དག་གཟུགས་ཤེས་པ་ནི་རྣམ་པ་གཉིས་ཏེ་མིག་དང་ཡིད་དོ་ཞེས་པའི་དགོངས་པ་འགྲེལ་པའི་དབང་དུ་བྱས་པའི་ཕྱིར། དེ་ཉིད་ལས། བྱེ་བྲག་སྨྲ་བའི་ལུགས་ལ། རང་རིག་མི་འདོད་པས། གཞན་གསུམ་དུ་ངེས་པའི་ཕྱིར་དང་། དེ་ཉིད་ལས། རྣམ་རིག་པ་ལྟར་ན། ཕྱི་མ་གཉིས་ལས་གཞན་དབང་མངོན་དང་ཡིད་མངོན་མི་སྲིད་པ་དཔལ་ལྡན་གྲགས་པའི་དགོངས་པ་ཡིན་ནོ། །གང་དག་ལུགས་འདི་ལ་དབང་མངོན་གཏན་མེད་དུ་འདོད་པ་ལྟར་ན། ཐ་སྙད་དུ་ཕན་གནོད་ཀྱི་མེ་ཆུ་ལ་བླང་དོར་བྱེད་པའི་རྒྱུ་ཡང་དག་ཤེས་པ་མེད་པར་འགྱུར་ཞིང་། གལ་ཏེ་ཡོད་ན་དབང་ཡིད་ཀྱི་མངོན་སུམ་ཡོད་པ་ལས་མ་འདས་ཏེ། རྗེས་དཔག་ཏུ་མ་ངེས་ཤིང་། རང་རིག་ལ་དེ་དག་སྣང་བ་མེད་པར་ཁས་བླངས་པའི་ཕྱིར་དང་། མེ་ཆུ་སོགས་སྣང་བའི་དབང་ཤེས་ལས་ཐ་སྙད་དུ་མེ་ཆུ་སོགས་ལ་བླང་དོར་བྱེད་པ་ན་བླང་དོར་གྱི་གནས་ཕན་ཚུན་འཆོལ་བར་འགྱུར་ཏེ། དབང་ཤེས་དེ་དག་ལོག་ཤེས་ཁོ་ནར་ངེས་པའི་ཕྱིར་དང་། དེ་ཡི་ངོ་བོ་ལས་དོན་ངེས། །ཞེས་པ་དང་། ཡུལ་དང་སྣང་བ་ཉིད་མེད་འདིའི། །ཞེས་སོགས། རྩ་འགྲེལ་གྱི་ཚད་འབྲས་ཐམས་ཅད་ཚད་འབྲས་མིན་པར་ལོག་འབྲས་སུ་འགྱུར་པ་དང་། སོ་སོ་རིག །མངོན་སུམ་གང་ཡིན་འདི་ཉིད་དོ། །ཞེས་པའི་རྣཾམཾ་རིཾགཾ་མཾངོཾནཾ་སུཾམཾ་རྣཾམཾ་རིཾགཾ་པཾའིཾ་ཁཾསཾ་ལེཾནཾ་པཾརཾ་ལྷའིཾ་འཾགྲེཾལཾ་པཾརཾ་བཾཤད་པཾའིཾ་ཕྱིཾར་རོཾ། །བཤད་ཚུལ་འདིས་ཀྱང་རྩོམ་པ་པོའི་ཡེ་ཤེས་ཀྱི་གཟིགས་པ་སེམས་ཅན་ཐམས་ཅད་ལ་འཇུག་པར་གྱུར་ཅིག གསུམ་པ་མཚན་གཞི་སོ་སོའི་དོན་ལ་བཞི་ལས། དང་པོ་དབང་མངོན་ལ། མཚན་ཉིད། དེ་སྒྲུབ་པ། སྒྲ་དོན་ངེས་པར་བྱ་བའོ། །དང་པོ་ལ་གཉིས་ལས་གཞན་ལུགས་དགག་ན། བོད་ཕལ་ཆེར་དབང་མངོན་དང་། དེའི་ཚད་མ་སོ་སོར་ཕྱེ་ནས་མཚན་ཉིད་རིམ་བཞིན། བདག་རྐྱེན་དབང་པོ་གཟུགས་ཅན་པ་ལ་བརྟེན་ནས་སྐྱེས་ཤིང་གཟུང་དོན་ལ་མ་འཁྲུལ་བ་དང་། བདག་རྐྱེན་དེ་ལྟ་བུ་ལ་བརྟེན་ནས་སྔར་མ་རྟོགས་པའི་དོན་ལ་མྱོང་སྟོབས་ཀྱིས་སྒྲོ་འདོགས་གཅོད་པ་ཞེས་འཇོག་པ་འཁྲུལ་ཏེ། དགག་པ་སྔར་བཤད་ཟིན་ཏོ། །རང་ལུགས་ནི། དེས་ན་ཐུན་མོང་མ་ཡིན་པའི་བདག་རྐྱེན་དབང་པོ་གཟུགས་ཅན་པ་ལ་བརྟེན་པའི་ཤེས་པ་མ་འཁྲུལ་བའོ། །གཉིས་པ་ལ་གཉིས་ལས། དང་པོ་དབང་པོ་ལས་སྐྱེས་པར་སྒྲུབ་པ་ནི། དབང་པོའི་མཚན་གཞི་ནི་གྲུབ་མཐའ་འགའ་ཞིག་སྟེ་མུ་སྟེགས་དང་ཉན་ཐོས་ལ་གྲགས་པ་ལྟར་དོན་མཐོང་བ་སོགས་ཀྱི་དབང་པོ་རིགས་པས་མ་གྲུབ་ཀྱང་། དབང་བརྟེན་གཟུགས་ཅན་འདི་དག་ལ་བརྟེན་ནས་ཡོད་པའི་ཡུལ་གཟུགས་སོགས་ལ་དམིགས་ཤིང་འཛིན་པའི་དབང་ཤེས་རང་དབང་དུ་བསྐྱེད་པའི་ནུས་པ་ཞིག་ཡིན་ཏེ། ལྷན་ཅིག་བྱེད་དབང་ནུས་པ་ཡི། །ཞེས་གསུངས་པས་སོ། །ལུང་དེ་འདིར་དྲངས་པ་ནི། མདོ་སེམས་གཉིས་ཀའང་དབང་པོའི་མཚན་གཞི་ནུས་པ་ལ་འཇོག་པར་འདྲ་བ་ཙམ་གྱི་དོན་དུ་ཡིན་གྱི་ཇི་ལྟ་བ་བཞིན་དུ་སྟོན་པར་མཚུངས་པ་ནི་མིན་ནོ། །ཁྱད་པར་ནི་སྔ་མས་ནུས་པ་དེ་ཉིད་བེམས་པོ་དང་ཕྱི་མས་ཤེས་པར་འདོད་པའོ། །འོ་ན་རྣལ་འབྱོར་མངོན་སུམ་གྱི་སྐབས་སུ་ནུས་པ་དེ་ཤེས་པར་བཤད་པ་མིན་ནམ་ཞེ་ན། དེ་ཉིད་ཀྱིས་དོན་འདི་གསལ་བར་བྱས་ཏེ། དབང་མངོན་སྐབས་སུ་བྱེ་བྲག་སྨྲ་བ་འདོད་པའི་དབང་པོ་བཀག་ནས་མདོ་སྡེ་པ་ལྟར་མཛད། རྣལ་འབྱོར་མངོན་སུམ་གྱི་སྐབས་སུ་དེ་ཡང་བཀག་སྟེ་བསྟན་བཅོས་འདི་ཡི་མཐར་ཐུག་གི་གྲུབ་མཐའ་ལ་གནས་ཏེ་སྐྱེ་བ་སྔ་མ་སྒྲུབ་པར་མཛད་དེ། རྣལ་འབྱོར་པ་ཡང་བློ་ཁྱད་ཀྱིས། །ཞེས་སོགས་དང་། འདི་ཉིད་དུ་སློབ་དཔོན་གྱིས་ཕྱི་རོལ་གྱི་དོན་ཞལ་གྱིས་བཞེས་པ་ན་མདོ་སྡེ་པ་ལྟར་མཛད་ལ། ཞེས་སོགས་དང་ཚུལ་མཚུངས་པར་བཞེད་པའོ། །དོན་ལ་རྟོག་ཅིང་སྟོན་པའི་རྣམ་དཔྱོད་དོ། །དེ་ལས་སྐྱེས་པར་རྗེས་འགྲོ་ངེས་པའི་སྒོ་ནས་འགྲུབ་སྟེ། འདི་ལྟར་དབང་དོན་བར་མ་ཆོད་དང་འབྲས་བུ་དབང་ཤེས་གཉིས་ཀ་མ་དམིགས་པ་ལས་དབང་དོན་བར་མ་ཆོད་དམིགས་པའི་རྗེས་སུ་ཡུལ་དམིགས་པའི་རྣམ་ཤེས་དམིགས་པས་དེ་ལ་ཡོད་པའི་ནུས་པ་ཞིག་ལ་བརྟེན་པར་གྲུབ་སྟེ། མེ་དུད་བཞིན་ནོ། །ཡང་ན་ལྡོག་པ་ངེས་པས་འགྲུབ་སྟེ། དབང་བརྟེན་འདི་ལ་ཡོད་པའི་ནུས་པ་ཞིག་མ་ཚང་ཡང་དབང་ཤེས་མི་འབྱུང་བའི་རྟགས་ལས་ནུས་པ་དེ་ཡོད་པར་གྲུབ་ཅིང་། ནུས་པ་དེ་ཡང་བེམས་ཤེས་གཉིས་ལས་ཤེས་པར་མི་འཐད་པའི་ཕྱིར་རོ། །གཉིས་པ་རྟོག་བྲལ་མ་འཁྲུལ་བར་བསྒྲུབ་པ་ནི། དོན་རང་མཚན་གསལ་བར་སྣང་བའི་ཕྱིར། ཟླ་བ་གཉིས་ལ་སོགས་པ་སྣང་བ་བཞིན་ཞེས་བྱ་བ་ཁྱབ་བྱེད་འགལ་དམིགས་ཀྱི་རྟགས་ཀྱིས་རྟོག་མེད་འགྲུབ་ལ། དོན་རང་མཚན་གཟུང་དོན་དུ་འཛིན་པའི་ཕྱིར་ཞེས་པས་འཁྲུལ་པ་མེད་པ་ཉིད་དུ་གྲུབ་བོ། །སྒྲུབ་བྱེད་དང་པོ་ནི། དེ་ཕྱིར་དབང་པོ་ལས་སྐྱེས་བློ། །ཞེས་པའི་རིགས་པ་ཡིན་པས། དེ་དབང་མངོན་འཆད་བྱེད་དུ་གྲུབ་བོ། །གསུམ་པ་ནི། ཤེས་པ་གང་ཞིག་བདག་རྐྱེན་དབང་པོ་དང་དམིགས་རྐྱེན་ཡུལ་དང་དེ་མ་ཐག་རྐྱེན་ཡིད་བྱེད་གསུམ་ལས་སྐྱེས་པར་འདྲ་བ་ལ། ཡུལ་དང་ཡིད་བྱེད་ཀྱི་སྒོ་ནས་ཐ་སྙད་མི་བྱེད་པར་བདག་རྐྱེན་གྱི་སྒོ་ནས་སྤྱིར་དབང་ཤེས་བྱེ་བྲག་དབང་མངོན་གྱི་ཐ་སྙད་བྱེད་པ་ཅི་ཞེ་ན། ཡུལ་དང་ཡིད་བྱེད་ནི་ཤེས་པ་གཞན་བསྐྱེད་པ་ཡིའང་རྒྱུ་ཡིན་པས་དང་པོ་བདེ་བླག་ཏུ་མི་གོ་བས་ཡུལ་ཤེས་ལ་སོགས་པར་ཐ་སྙད་མ་མཛད་ལ། དབང་པོ་ནི་ཤེས་པ་དེའི་ཐུན་མོང་མིན་པའི་རྒྱུ་ཡིན་པའི་ཕྱིར་ན་དབང་ཤེས་ཞེས་ཐ་སྙད་མཛད་པ་ཡིན་ཏེ། དཔེར་ན་རྔ་སྒྲ་ལ་སྐྱེས་བུ་དང་དབྱུག་གུའང་དགོས་ལ། མྱུ་གུ་ལ་ས་དང་ཆུ་ལ་སོགས་པ་དགོས་ཀྱང་། དབྱུག་གུའི་སྒྲ་དང་སའི་མྱུ་གུ་ཞེས་མི་བརྗོད་པར་ཐུན་མོང་མིན་པའི་རྒྱུ་ལ་ལྟོས་ནས་རྔའི་སྒྲ་དང་ནས་ཀྱི་མྱུ་གུ་ཞེས་བརྗོད་པ་བཞིན་ནོ། །དེའང་ཐུན་མོང་མིན་ཡིན་རྒྱུ་ཡི་ཕྱིར། །སོགས་དང་། གལ་ཏེ་མངོན་སུམ་སྐྱེད་བྱེད་ལ། །ཞེས་སོགས་གསུངས་སོ། །གཉིས་པ་ཡིད་མངོན་ལ་ངོ་བོ་ངོས་བཟུང་བ། རང་བཞིན་གཏན་ལ་དབབ་པ། དེ་ལ་གཞན་གྱི་རྩོད་པ་སྤང་བའོ། །དང་པོ་ནི། །ཡུལ་སྐད་ཅིག་གཉིས་པ་དང་དེ་དང་དུས་མཉམ་པའི་དབང་ཤེས་རྣམ་པ་གཉིས་ཀྱི་ནང་ནས་དང་པོ་དམིགས་པ་དང་། ཕྱི་མས་དེ་མ་ཐག་པའི་རྐྱེན་བྱས་པ་ལས་སྐྱེས་པའི་ཡིད་ཀྱི་མངོན་སུམ་གྱི་དུས་སུ་འགགས་མ་ཐག་པའི་དབང་པོའི་རྣམ་ཤེས་ནི་ཡིད་དབང་ཡིན་ལ། དེའི་ཐུན་མོང་མིན་པའི་བདག་རྐྱེན་བྱས་པ་ལ་བརྟེན་ནས་སྐྱེས་པའི་མ་འཁྲུལ་བའི་ཤེས་པ་ནི་ཡིད་ཀྱི་མངོན་སུམ་གྱི་མཚན་ཉིད་དོ། །གཞུང་འདིའི་འབྲུ་མནོན་ལ་གཞན་ཕལ་ཆེར་རྨོངས་པར་གྱུར་ཏོ། །གཉིས་པ་ལ། སྐྱེ་བའི་ཚུལ་ཚད་མར་སྒྲུབ་པ། སྐྱེ་བའི་གནས་སྐབས་དཔྱད་པའོ། །དང་པོ་ནི། གལ་ཏེ་དབང་མངོན་ལྔ་ཅིག་ཆར་འགགས་པའི་རྗེས་སུ་ཡིད་མངོན་གཅིག་སྐྱེ་ན་རྒྱུའི་ཁྱད་པར་གྱིས་འབྲས་བུའི་ཁྱད་པར་མི་སྐྱེད་པར་འགྱུར་ལ། ལྔ་སྐྱེ་ན་གང་ཟག་གཅིག་རྒྱུད་དུ་མར་འགྱུར་རོ་ཞེ་ན། རྒྱུ་ཐ་དད་པས་ཁ་ཕྱི་ལྟའི་ཡིད་ཀྱི་མངོན་སུམ་དུ་མ་རྒྱུད་ཅིག་ལ་གཅིག་ཆར་སྐྱེ་ཡང་སྐྱོན་གཉིས་པ་མེད་དེ། དེའི་ཚེ་གང་ཟག་དེའི་རྒྱུད་ལ་ཡིད་ཀྱི་རྣམ་ཤེས་ཀྱི་སྟེང་ན་ཁ་ནང་ལྟས་ལ་རང་རིག་གི་རྒྱུན་གཅིག་ལས་མེད་པའི་ཕྱིར། དཔེར་ན་དབང་ཤེས་དུ་མ་ཡོད་ཀྱང་རྒྱུད་དུ་མར་མི་འགྱུར་བ་བཞིན་དུའོ། །གཉིས་པ་ནི། དེ་ཚད་མ་ཡིན་ནམ་འོན་ཏེ་མིན་ཞེ་ན། དོན་བདེན་པ་ལ་འཁྲུལ་བ་མེད་པའི་ཕྱིར་ཚད་མ་ཡིན་ཡང་། རྒྱུན་མེད་པའི་ཕྱིར་ན་གཞན་ངེས་བཞིན་ངེས་པ་རང་སྟོབས་ཀྱིས་འདྲེན་མི་ནུས་པའི་ཕྱིར་རང་སྟོབས་ཀྱིས་དྲངས་པའི་ངེས་ཤེས་ཀྱིས་ཀུན་ནས་བསླངས་ཏེ་ཚད་མ་ཡིན་ནོ་ཞེས་པའི་ཐ་སྙད་མ་ཐོབ་པ་ཡིན་ཏེ། དབང་ཤེས་ཀྱི་ཡུལ་རྡུལ་ཕྲ་རབ་ཡིན་ཡང་དེར་མི་སྣང་བས་རྗེས་ཀྱི་ངོར་ཡུལ་དུ་མི་འཇོག་པ་བཞིན་ནོ། །གལ་ཏེ་དབང་ཤེས་དང་ཡིད་ལ་རྒྱུན་ཡོད་མེད་ལས་རང་ལས་ངེས་ནུས་པ་དང་མི་ནུས་པ་ཅིའི་ཕྱིར་ཞེ་ན། དབང་ཤེས་ཀྱི་དེ་མ་ཐག་རྐྱེན་ལས་རྫས་ལོགས་སུ་གྱུར་པའི་དབང་པོ་གཟུགས་ཅན་སྔ་མའི་ཉེར་ལེན་བྱས་པ་ལས། དབང་པོ་གཟུགས་ཅན་ཕྱི་མ་སྐྱེ་བ་དེས་ན། དབང་ཤེས་ནི་རྒྱུན་དང་བཅས་པ་ཡིན་ལ། ཡིད་མངོན་གྱི་དེ་མ་ཐག་རྐྱེན་གྱི་རྫས་ལོགས་སུ་གྱུར་པའི་ཡིད་དབང་སྔ་མའི་ཉེར་ལེན་བྱས་པ་ལས་ཡིད་དབང་ཕྱི་མ་སྐྱེ་བ་མིན་པ། དེའི་ཕྱིར་ན་ཡིད་མངོན་དེ་ལ་རྒྱུན་མེད་དོ། །ཁྱབ་སྟེ། ཡིད་མངོན་གྱི་དེ་མ་ཐག་རྐྱེན་གྱི་རྒྱུན་དེ་དབང་མངོན་ཁོ་ནའི་རྒྱུན་ཡིན་པའི་ཕྱིར། སྔ་མའི་རྟགས་གྲུབ་སྟེ། ཡིད་མངོན་གྱི་རྐྱེན་ཕྱི་མ་གཉིས་རྫས་གཅིག་ཡིན་པའི་ཕྱིར། ཡོངས་འཛིན་དམ་པའི་ལེགས་བཤད་དོ། །མདོར་ན་དབང་མངོན་སྔ་མས་ཉེར་ལེན་བྱས་ཏེ་ཕྱི་མ་སྐྱེ་བ་ཡོད་ཅིང་། ཡིད་མངོན་ནི་དེ་ལས་ལོག་པས་རྒྱུན་ཡོད་པ་དང་མེད་པའི་དོན་ནོ། །གསུམ་པ་ལ་སྐྱེ་ཚུལ་ངོས་བཟུང་བ་དང་། མངོན་སུམ་གྱི་འགྲོས་རྩི་བ་གཉིས། དང་པོ་ནི། དབང་མངོན་གྱི་རྒྱུན་རྫོགས་རྗེས་སུ་ཡིད་མངོན་གཅིག་སྐྱེའམ་སྤེལ་མར་འབྱུང་ཞེ་ན། རྒྱན་མཛད་པ་དབང་མངོན་རེ་དང་ཡིད་མངོན་རེ་སྤེལ་མར་སྐྱེ་བས་འགོ་དབང་མངོན་གྱི་འཛིན་ལ་མཇུག་ཡིད་མངོན་གྱིས་རྟུལ་ལོ་ཞེས་གསུངས་པ་དང་། ཆོས་མཆོག་དབང་མངོན་གྱི་རྒྱུན་གྱི་མཐའ་ཁོ་ནར་ཡིད་མངོན་གཅིག་སྐྱེ་བ་བཞེད་དོ། །ལུགས་གཉིས་ཀ་ལ་ཡང་གནོད་བྱེད་ཡོད་དེ། དང་པོ་ལྟར་ན། དེ་གཉིས་ལ་ངེས་དཀའ་སླའི་ཁྱད་པར་མི་འཐད་ལ། གཉིས་པ་མི་འཐད་དེ་དབང་མངོན་དང་པོ་དང་ཐ་མའི་དུས་ན་ཡིད་མངོན་གྱི་རྐྱེན་གསུམ་ཚོགས་པ་སྲིད་པ་ལ་ཁྱད་པར་མེད་པའི་ཕྱིར། ལུགས་གཉིས་པོ་མི་འཐད་པ་དེས་ན། དབང་པོའི་རྣམ་པར་ཤེས་པ་སྐད་ཅིག་དང་པོ་ཟླ་མེད་དུ་སྐྱེ་ལ། དེ་དབང་ཤེས་ཀྱི་སྐད་ཅིག་གཉིས་པ་དང་ཡིད་མངོན་སྐད་ཅིག་དང་པོ་གཉིས་ཀའི་ཉེར་ལེན་གྱི་རྒྱུ་ཡིན་ཞིང་། ཡིད་མངོན་གྱི་ལྷན་ཅིག་བྱེད་པའི་རྐྱེན་དུ་འགྱུར་བས་དབང་མངོན་ལས་རྫས་ལོགས་ཤིག་ཏུ་དབང་མངོན་དང་དུས་མཉམ་དུ་ཡིད་མངོན་སྐད་ཅིག་དང་པོ་སྐྱེའོ། །དེ་ལྟར་ན་རྒྱུད་གཅིག་ལ་མངོན་སུམ་ཇི་སྙེད་ཅིག་གཅིག་ཅར་སྐྱེས་ཀྱང་གང་ཟག་དེ་རྒྱུད་གཞན་ཏེ་ཐ་དད་པ་དུ་མར་འགྱུར་བའི་སྐྱོན་མེད་དེ། དེའི་ཚེ་གང་ཟག་དེའི་རྒྱུད་ལ་ཡིད་ཀྱི་རྣམ་ཤེས་རྒྱུན་གཅིག་ལས་མེད་པས་དེ་མྱོང་བྱེད་རང་རིག་ཡང་རྒྱུན་གཅིག་ལས་མེད་པ་ཡིན་པའི་ཕྱིར། འདི་ནི་མངོན་སུམ་དུ་མ་རྒྱུད་གཅིག་ལ་གཅིག་ཅར་སྐྱེ་ཡང་རྒྱུད་དུ་མ་དང་། སྔ་མ་ནི་ཡིད་མངོན་དུ་མ་རྒྱུད་གཅིག་ལ་གཅིག་ཅར་སྐྱེ་ཡང་རྒྱུད་དུ་མར་འགྱུར་བའི་སྐྱོན་མེད་པར་བསྟན་ཏོ། །དེ་ནས་བཟུང་དབང་མངོན་གྱི་རྒྱུན་མ་རྫོགས་པ་དེ་སྲིད་དུ་སྤེལ་མར་མི་སྐྱེ་བར་ལོགས་ཤིག་ཏུ་སྐྱེ་བས་དེ་གཉིས་རྒྱུན་ཡོད་མེད་ཀྱིས་ངེས་མ་ངེས་སྲིད་པས་རྒྱུན་ལ་བརྗོད་པའི་སྐྱོན་མེད་ལ། གྲངས་མཉམ་པར་སྐྱེ་སྲིད་པས་ཆོས་མཆོག་ལ་བརྗོད་པའི་སྐྱོན་ལས་གྲོལ་ལོ། །གཉིས་པ་ནི། དེས་ན་ཁ་ཕྱི་བལྟས་ལ་དོན་རིག་མངོན་སུམ་གཉིས་དང་ནང་བལྟ་ལ་རང་རིག་གཅིག་སྟེ་འགྲོས་གསུམ་པ་ཞེས་བྱ་བ་ཤངྐར་ནནྡའི་དགོངས་པ་འདི་ཁོ་ན་འཐད་དོ། །བདག་རྐྱེན་དབང་པོ་བྱེད་པ་ཉམས་ཤིང་དམིགས་རྐྱེན་རྒྱུན་ལྡན་དུ་འབྱུང་བའི་ཚེ་ཡིད་མངོན་སྐད་ཅིག་མ་གཅིག་ཟླ་མེད་དུ་སྐྱེ་བ་སྲིད་དེ། རྐྱེན་གསུམ་ཚོགས་པ་སྲིད་པའི་ཕྱིར། གཞན་དུ་ན་གྲངས་མཉམ་དུ་སྐྱེ་བའི་དོན་བཤད་པར་དཀའ་བའི་ཕྱིར། བླ་མ་དམ་པའི་གསུང་རྒྱུན་དྲི་མ་མེད་པའོ། །གསུམ་པ་རྩོད་སྤོང་ནི། རྣ་བ་མ་ཕུག་པ་ན་རེ། དབང་པོས་བཟུང་ཟིན་འཛིན་ན་བཅད་ཤེས་སུ་འགྱུར་ལ། མ་བཟུང་བ་འཛིན་ན་ལོང་བས་མཐོང་བར་འགྱུར་རོ་ཞེ་ན། དབང་ཤེས་ཀྱི་ཡུལ་ལས་གཞན་འཛིན་པས་བཅད་ཤེས་སུ་མི་འགྱུར་ལ། དབང་པོའི་མངོན་སུམ་དེ་མ་ཐག་རྐྱེན་དུ་ཡོད་པ་ལ་ལྟོས་པའི་ཕྱིར་ན་ལོང་བ་ལ་སོགས་པས་མི་མཐོང་བས་ཡིད་མངོན་ཚད་མ་ཡིན་པ་འདི་ལ་སྐྱོན་གཉིས་ཀ་མེད་དོ། །དེའང་། དེ་ཕྱིར་དབང་པོའི་རྣམ་པར་ཤེས། །ཞེས་སོགས་གསུངས་སོ། །གསུམ་པ་རང་རིག་མངོན་སུམ་ལ་གསུམ་ལས། དང་པོ་མཚན་ཉིད་ནི། རང་གི་ངོ་བོ་རིག་པ་སྟེ་མྱོང་བའི་འཛིན་རྣམ་ནི། རང་རིག་མངོན་སུམ་གྱི་མཚན་ཉིད་ཡིན་པར་མཁས་པ་རྣམས་བཞེད་དོ། །གཉིས་པ་རྩོད་སྤོང་ནི། ཁ་ཅིག་རང་རིག་པ་མི་འཐད་དེ། རིག་བྱ་རིག་བྱེད་གཉིས་མེད་པའི་ཕྱིར་རོ། །གལ་ཏེ་གཉིས་མེད་ཀྱང་རིག་ན་གྲངས་ཅན་ལྟར་རང་ལས་སྐྱེ་བ་དང་མཚུངས་སོ་ཞེ་ན། རང་རིག་རང་སྐྱེ་གཉིས་མཚུངས་པའི་གོ་སྐབས་ཡོད་པ་མིན་ཏེ། རང་སྐྱེ་ནི་རང་ལས་སྔོན་གསལ་པོར་མེད་པ་གསལ་བར་སྐྱེ་བ་ཙམ་ཡིན་པས་རང་ཉིད་གྲུབ་ན་བསྐྱེད་མི་དགོས་ཤིང་མ་གྲུབ་ན་བསྐྱེད་མི་ནུས་ལ། རང་རིག་ནི་བེམས་པོ་ལས་བཟློག་ནས་རང་ཉིད་རིག་པར་སྐྱེས་པ་ཙམ་ཡིན་པ་དེས་ན་སྟེ་དེའི་ཕྱིར་རོ། །གསུམ་པ་ཚད་མ་ཡིན་མིན་དཔྱད་པ་ནི། འོ་ན་རང་རིག་ཐམས་ཅད་ཚད་མ་ཡིན་ནམ་ཞེ་ན། མངོན་སུམ་ཐམས་ཅད་ལ་ཚད་མ་མིན་པ་མི་སྲིད་དོ་ཞེས་བཤད་ཟིན་ཏོ། །བཞི་པ་རྣལ་འབྱོར་མངོན་སུམ་ལ་རང་བཞིན་ངོས་བཟུང་བ། ཡུལ་ལ་ཚད་མར་འགྱུར་ཚུལ། དེ་སྒྲུབ་བྱེད་ཀྱི་ཚད་མའོ། །དང་པོ་ལ་མཚན་ཉིད་དང་། དབྱེ་བ། རྒྱུ་བསམ་པའོ། །དང་པོ་ལ་གཉིས་ལས་དང་པོ་གཞན་ལུགས་དགག་ན། བོད་རྣམས་རྣལ་འབྱོར་མངོན་སུམ་དང་། དེའི་ཚད་མ་སོ་སོར་ཕྱེ་ནས་ཕྱི་མའི་མཚན་ཉིད་བདག་རྐྱེན་དེ་ཁོ་ན་ཉིད་གོམས་པའི་ཡིད་ལས་སྐྱེས་ཤིང་སྔར་མ་རྟོགས་པའི་ཡང་དག་པའི་དོན་ལ་མྱོང་སྟོབས་ཀྱི་སྒྲོ་འདོགས་གཅོད་པ་ཞེས་འཇོག་པ་འཁྲུལ་ཏེ། རྒྱུ་མཚན་སྔར་བཞིན་ནོ། །གཉིས་པ་ནི། བསྒོམ་པ་ལས་བྱུང་བའི་འཁྲུལ་མེད་ཀྱི་ཤེས་པ་རྣལ་འབྱོར་མངོན་སུམ་གྱི་མཚན་ཉིད་ཡིན་ཏེ། ཟད་པར་སའི་ཏིང་ངེ་འཛིན་ལ་སོགས་པ་འཁྲུལ་པ་ཅན་རྣམས་དེ་ལྟར་ཡང་ཡིན་ནོ། །གཉིས་པ་ལ་རྟེན་གྱིས་དབྱེ་ན། ཉན་ཐོས་རང་རྒྱལ་ཐེག་ཆེན་ཏེ་འཕགས་པ་གསུམ་གྱི་རྣལ་འབྱོར་མངོན་སུམ་གསུམ། དེ་ཉིད་ལ་ཉན་ཐོས་སློབ་པ་དང་མི་སློབ་པ་གཉིས། རང་རྒྱལ་སློབ་པ་མེད་པས་མི་སློབ་པ་གཅིག་པུ་དང་། ཐེག་ཆེན་སློབ་མི་སློབ་པའི་སྒོ་ནས་ལྔའོ། །གཉིས་པ་ངོ་བོའི་སྒོ་ནས་དབྱེ་ན། ལྔ་པོ་དེ་དག་རྣམ་པ་བཅུར་དབྱེ་སྟེ། རེ་རེ་ལ་སྣང་བཅས་སྣང་མེད་ཀྱི་དབྱེ་བས་གཉིས་གཉིས་ཡོད་པས་སོ། །གསུམ་པ་ལ། ཡེ་ཤེས་གཉིས་ཀྱི་རྒྱུ། དེ་དག་མཐར་ཕྱིན་པའི་དུས། ཐབས་ལ་ལྟོས་ནས་འབྲས་བུའི་ཁྱད་པར་གསུམ། དང་པོ་ནི། བསམ་གཏན་དང་སྨོན་ལམ་ལ་སོགས་པ་ཐབས་རྣམ་པ་སྣ་ཚོགས་པ་དང་། ཤེས་རབ་སྟོང་པ་ཉིད་ལེགས་པར་སྦྱངས་པ་གཉིས་འབྲས་བུ་སོ་སོ་ལ་ལྟོས་ནས་ཕན་ཚུན་ཉེར་ལེན་གྱི་རྒྱུ་དང་ལྷན་ཅིག་བྱེད་པའི་རྐྱེན་དུ་གྱུར་པས་ཇི་ལྟ་བ་དང་ཇི་སྙེད་པའི་ཡེ་ཤེས་གཟིགས་པ་འགྲུབ་པར་འགྱུར་ཏེ། ཤེས་རབ་ཀྱིས་ཉེར་ལེན་དང་ཐབས་ཀྱིས་རྐྱེན་བྱས་པས་ཇི་ལྟ་བ་དང་། ཐབས་ཀྱིས་ཉེར་ལེན་དང་ཤེས་རབ་ཀྱིས་ལྷན་ཅིག་བྱེད་རྐྱེན་ལས་ཇི་སྙེད་པའི་ཡེ་ཤེས་འགྲུབ་པའི་ཕྱིར་རོ། །གཉིས་པ་ནི། ཚེ་གསུམ་གྱི་བསོད་ནམས་དང་གང་ཟག་གི་བདག་མེད་པ་བསྒོམས་པས་དགྲ་བཅོམ་པ་དང་། བསྐལ་པ་བརྒྱའི་ཚོགས་དང་བདག་མེད་ཕྱེད་དང་གཉིས་ཀྱིས་རང་རྒྱལ་དབང་པོ་རྣོན་པོ་དང་། བསྐལ་པ་གྲངས་མེད་གསུམ་གྱི་ཚོགས་དང་། སྟོང་ཉིད་སྙིང་རྗེའི་སྙིང་པོ་ཅན་གྱིས་ཐེག་ཆེན་གྱི་བྱང་ཆུབ་དེ་མཐར་ཕྱིན་པ་ཡིན་ནོ། །གསུམ་པ་ནི། ཉན་རང་གཉིས་ནི་ཆོས་ཐམས་ཅད་སྟོན་པའི་གཞན་དོན་ཆེན་པོ་ལ་འཇུག་པ་མིན་ཏེ། རྣམ་གྲོལ་གཉིས་པོ་ཤེས་རབ་གཙོ་བོར་བསྒོམས་པས་རང་རང་གི་རྟོགས་བྱའི་བདག་མེད་རྟོགས་སུ་ཟིན་ཡང་ཤེས་བྱ་ལ་སེམས་མི་གསལ་བའི་བག་ཆགས་དང་བཅས་པའི་ཕྱིར་ཏེ། ཐབས་ལ་སྦྱངས་པ་ཞེན་པས་སོ། །མ་གོམས་པའི་རིག་པ་ལྟར་རོ། །སངས་རྒྱས་ནི་ཤེས་བྱ་ཐམས་ཅད་ལ་ཀུན་མཁྱེན་ཡིན་ཏེ། ཐབས་ལ་མཁས་ཤིང་ཤེས་རབ་གོམས་པའི་བཟོའི་གནས་གོམས་པ་ལྟར་ཤེས་བྱའི་དངོས་པོ་ཀུན་ལ་ཐུགས་གསལ་བ་མཐར་ཕྱིན་པ་སྟེ། མི་ཤེས་པའི་བག་ཆགས་མ་ལུས་པ་སྤངས་པའི་ཕྱིར་རོ། །དེ་ལྟར་མཁྱེན་བརྩེ་གཉིས་དང་ལྡན་པས་གཞན་དོན་ལ་འཇུག་པའི་ཕྱིར་འདི་ནི་གཉིས་པོ་ལས་ཁྱད་པར་དུ་འཕགས་པའི་ཚུལ་ལོ། །གཉིས་པ་ཡུལ་ལ་ཚད་མར་འགྱུར་ཚུལ་ནི། འོ་ན་རྣལ་འབྱོར་མངོན་སུམ་ཐམས་ཅད་ཚད་མ་ཡིན་ནམ་ཞེ་ན་འདི་ཡི་ལན་ལ། རྣལ་འབྱོར་མངོན་སུམ་ཐམས་ཅད་ཚད་མར་སྒྲུབ་པ། ཚད་མ་དེས་འཇུག་ལྡོག་བྱེད་པའི་ཚུལ། དུས་གསུམ་མཁྱེན་པའི་ཡེ་ཤེས་དཔྱད་པ་གསུམ། དང་པོ་ནི། རྣལ་འབྱོར་མངོན་སུམ་ཀུན་ཚད་མར་གྲུབ་སྟེ་མངོན་སུམ་ཡིན་པའི་ཕྱིར། ཁྱབ་སྟེ། བཅད་ཤེས་དང་ནི་ངེས་པ་གཉིས་རྟོག་པ་ཡིན་པའི་ཕྱིར་ན་མངོན་སུམ་མིན་པ་དེས་ནའོ། །གཉིས་པ་ནི། སོ་སོ་སྐྱེ་བོའི་མངོན་སུམ་ཚད་མ་ནི་ངེས་པ་དྲངས་པ་ཉིད་ཀྱི་སྒོ་ནས་ཡུལ་ལ་འཇུག་ལྡོག་བྱེད་ཅིང་། འཕགས་པ་རྟོག་པའི་བག་ཆགས་མ་སྤངས་པ་རྣམས་ནི་རང་བཞིན་དུ་གནས་པ་ན་འཇིག་རྟེན་པ་དང་འདྲ་ལ། སྨོན་གནས་ཤེས་པ་ལ་མཉམ་པར་གཞག་ན་ཏིང་ངེ་འཛིན་ལས་འཇུག་ལྡོག་བྱེད་པ་དང་། འཕགས་པ་རྟོག་པའི་བག་ཆགས་དང་བྲལ་བ་རྣམས་སྨོན་ལམ་ལས་གྲུབ་པའི་དཔའ་བར་འགྲོ་བ་ལ་སོགས་པ་ཏིང་ངེ་འཛིན་ཁྱད་པར་ཅན་གྱི་སྟོབས་ལས་ཡུལ་ལ་འཇུག་ལྡོག་བྱེད་པར་གསུངས་སོ། །གསུམ་པ་ནི། འོ་ན་སངས་རྒྱས་ཀྱིས་འདས་མ་འོངས་མི་མཁྱེན་ན་ཐམས་ཅད་མཁྱེན་པར་འགལ་ལ། མཁྱེན་ན་སྣང་ནས་མཁྱེན་ན་དུས་གསུམ་རྫས་སུ་གྲུབ་པར་འགྱུར་ཞིང་། མི་སྣང་ན་མངོན་སུམ་གྱི་ཡུལ་ཅན་དུ་མི་རུང་ངོ་ཞེ་ན། གཉིད་ཀྱིས་བསླད་པ་ཙམ་གྱིས་ཀྱང་སད་པའི་བློ་དཔག་པར་མི་ནུས་ན་གཟུང་འཛིན་གྱི་བསླད་པའི་ཚུར་མཐོང་གིས་གནས་གྱུར་པའི་ཡེ་ཤེས་ཅན་དེ་ཡི་ཡུལ་མཁྱེན་པའི་ཚུལ་དཔག་པ་མི་ནུས་ཏེ། གནས་གྱུར་པའི་ཕྱིར་དུས་གསུམ་ལ་སོགས་པ་མཁྱེན་ཚུལ་བསམ་གྱིས་མི་ཁྱབ་པའི་ཕྱིར་རོ། །གསུམ་པ་སྒྲུབ་བྱེད་ཀྱི་ཚད་མ་ལ། ངོ་བོ་སྒྲུབ་པ། མཚན་ཉིད་སྒྲུབ་པ། གྲུབ་པ་ལ་མི་འཐད་པ་སྤོང་བའོ། །དང་པོ་ལ་གཉིས་ལས་འདས་པ་སྒྲུབ་ན། རྒྱན་གྱིས་གང་གཞན་ལ་འཆད་པ་ལ་དོན་དང་མཐུན་ཞིང་འགལ་བ་མེད་པའི་ཚིག་གི་ཁྱད་པར་ངེས་པར་གྱུར་པ་ཡིན་ན་རང་གི་ཀུན་སློང་གཞལ་བྱ་དེ་མངོན་སུམ་དུ་མཐོང་བའི་ཡེ་ཤེས་སྔོན་རོལ་དུ་བྱུང་བའང་དཔག་ནུས་པས་ཁྱབ་སྟེ། རང་རང་གི་ཡུལ་བཤད་པ་བཞིན། གཞུང་འབུམ་པ་ལ་སོགས་པ་འཆད་པ་པོ་དེས་ཀྱང་དོན་དང་མཐུན་ཞིང་འགལ་བར་མེད་དོ་ཞེས་བྱ་བས་སྒྲུབ་པར་ནུས་སོ་ཞེས་གསུངས་སོ། །གཉིས་པ་མ་འོངས་པ་འབྱུང་རུང་སྒྲུབ་པ་ལ། རྟགས་དགོད་པ། དེའི་ཚུལ་སྒྲུབ་པ་གཉིས། དང་པོ་ནི། གང་རྟེན་བརྟན་ཞིང་གོམས་པ་ངང་གིས་རྫོགས་ནས་ཏེ་ཁྱད་པར་དུ་འགྱུར་བ་སྒོམ་པ་དེ་ལ་གསལ་བར་སྣང་བ་འབྱུང་སྟེ། འདོད་འཇིགས་གོམས་པ་བཞིན། སྟོང་ཉིད་སྒོམ་པའང་བརྟེན་བརྟན་ཞིང་གོམས་པ་ངང་གིས་ཁྱད་པར་དུ་འགྱུར་བ་སྒོམ་པར་བྱེད་དོ་ཞེས་བྱ་བ་མཐའ་གཞན་བཀག་པའི་ངེས་པ་སྒྲུབ་པའི་རང་བཞིན་གྱི་རྟགས་ཀྱིས་འགྲུབ་བོ། །རྟགས་དེའི་ཆོས་ཅན་ནི་རང་རྒྱུད་ལ་མངོན་སུམ་དང་གཞན་ལ་ལུས་ངག་གི་རྣམ་འགྱུར་ཁྱད་པར་ཅན་གྱིས་རྟགས་ཀྱིས་འགྲུབ་བོ། །བསྒྲུབ་བྱ་ནི་འབྱུང་རུང་ཙམ་དང་། འབྱུང་ངེས་པ་ཉིད་མིན་ཏེ། རྐྱེན་དང་ཕྲད་ན་རུང་བ་ཙམ་མི་སྒོམ་པ་ལའང་ཡོད་ཅིང་དེས་བསྒོམ་པ་ལ་ཡང་མེད་པའི་ཕྱིར་རོ། །འོན་ཀྱང་སྒོམ་པའི་ཡན་ལག་དང་ལྡན་ཞིང་འགལ་རྐྱེན་མེད་ན་གསལ་སྣང་འབྱུང་ངེས་ཡིན་ཏེ། རྒྱུ་ཚོགས་པ་ཚང་ཞིང་འགལ་རྐྱེན་མེད་ན་འབྲས་བུ་འབྱུང་ངེས་དཔོག་པ་བཞིན་ནོ། །གཉིས་པ་ལ་ཕྱོགས་ཆོས་དང་། ཁྱབ་པ་སྒྲུབ་པའོ། །དང་པོ་ལ་རྟེན་བརྟན་པ། གོམས་པ་རང་གི་ངང་གིས་ཁྱད་པར་དུ་འགྱུར་བ་དེ་བསྒོམ་པའོ། །དང་པོ་ལ་གཉིས་ལས། གཞན་ལུགས་དགག་ན། འདི་ལ་ཕྱ་གཙང་སོགས་ཁ་ཅིག་རྟེན་བརྟན་པ་མངོན་སུམ་ཉིད་ཀྱིས་འགྲུབ་སྟེ། རིག་པའི་ཐོག་མཐའ་དང་མ་མཐའ་རྣམ་པ་གཉིས་ཐུག་པ་རང་རིག་གིས་ཁེགས། དབུས་ཀྱི་རིག་པ་རང་རིག་གིས་གྲུབ་པས་རིག་པའི་རྒྱུན་ཐོག་མཐའ་མེད་པར་གྲུབ་སྟེ། རང་རྒྱུད་ལ་རང་རིག་གིས་རིག་པ་ཙམ་རིག་པ་སྔ་མ་ལས་བྱུང་བར་གྲུབ་པས་རིག་པ་སྔ་མ་སྔོན་དུ་མ་སོང་བའི་རིག་པ་ཙམ་དངོས་སུ་ཁེགས་པ་ན་རིག་པ་སྔ་མ་སྔོན་དུ་མ་སོང་བའི་རིག་པའི་བྱེ་བྲག་ཤུགས་ལ་ཁེགས་ཏེ། དུ་བ་ཙམ་མེ་ལས་བྱུང་བ་མངོན་སུམ་གྱིས་གྲུབ་པ་དཔེར་བྱས་ནས་མེ་སྔོན་དུ་མ་སོང་བའི་དུ་བའི་བྱེ་བྲག་ཤུགས་ལ་ཁེགས་པ་བཞིན་ནོ། །ཡང་རང་རྒྱུད་ལ་རང་རིག་གིས་རིག་པ་ཙམ་གྱིས་རིག་པ་ཕྱི་མ་སྐྱེད་པར་གྲུབ་པས་རིག་པ་ཕྱི་མ་མི་སྐྱེད་པའི་རིག་པ་ཙམ་དངོས་སུ་ཁེགས་པ་ན་རིག་པ་ཕྱི་མ་མི་སྐྱེད་པའི་རིག་པའི་བྱེ་བྲག་ཤུགས་ལ་ཁེགས་ཏེ། སྒྲོན་མ་ཙམ་གྱིས་འོད་འབྱིན་པར་གྲུབ་པ་དཔེར་བྱས་ནས་འོད་མི་འབྱིན་པའི་སྒྲོན་མའི་བྱེ་བྲག་ཐམས་ཅད་ཤུགས་ལ་ཁེགས་པ་བཞིན་ཞེས་ཟེར་མི་འཐད་དེ། རང་རིག་གིས་ད་ལྟར་གྱི་ཤེས་པ་ཙམ་འབྲེལ་པ་ཅན་དུ་གྲུབ་ཀྱང་སྐྱེ་འཆིའི་ཐོག་མཐའ་ཐུག་མེད་དུ་མི་འགྲུབ་སྟེ། ཚུར་རོལ་མཛེས་པ་བ་ལྟར་དང་པོའི་སེམས་འཇིག་རྟེན་ཕ་རོལ་གྱི་སེམས་ལས་མི་སྐྱེ་བར་ཕ་མའི་ལུས་ལས་སྐྱེ་བར་འདོད་པས་རྒྱུ་གཞན་དོགས་པའི་ཕྱིར་དང་། འཆི་བའི་སེམས་ཀྱིས་ཀྱང་སེམས་ཕྱི་མ་མི་སྐྱེད་པར་མེ་རྣལ་བ་ལྟར་རྒྱུན་ཆད་པར་དོགས་པའི་ཕྱིར་རོ། །གལ་ཏེ་ད་ལྟ་རིག་ཙམ་རྒྱུ་འབྲས་སུ་གྲུབ་པའི་ཤུགས་ལ་འཇིག་རྟེན་སྔ་ཕྱི་ངེས་ན་ཆད་པར་ལྟ་བའི་ལོག་རྟོག་ཀྱང་མི་སྲིད་པར་ཐལ་བའི་ཕྱིར་རོ། །ཡང་མེ་དང་སྒྲོན་མ་དཔེར་མི་རུང་སྟེ། དུ་བའི་དང་པོ་དུ་བ་ལས་སྐྱེ་བ་ཞིག་དཔེར་དགོས་ཀྱི། དུ་བ་དང་པོ་རིགས་མི་མཐུན་མེ་ལས་སྐྱེ་བ་དེ་སྐྱེས་མ་ཐག་པའི་སེམས་ལུས་ལས་སྐྱེས་པའི་དཔེར་འགྱུར་བའི་ཕྱིར་དང་། སྒྲོན་མ་རྣལ་ཁ་མས་སྒྲོན་མ་གཞན་བསྐྱེད་པ་ཞིག་དཔེར་དགོས་ཀྱི་སྒྲོན་མ་ལ་འོད་འབྱིན་པས་ཁྱབ་པ་ནི་སེམས་ལ་གསལ་བས་ཁྱབ་པའི་དཔེར་རུང་གི ཕྱི་མ་སྐྱེད་པ་ལ་དཔེ་ཉིད་མིན་པའི་ཕྱིར་རོ། །གཉིས་པ་རང་གི་འདོད་པ་ལ། འདས་པ་དང་མ་འོངས་པ་ཐུག་མེད་དུ་སྒྲུབ་པའོ། །དང་པོ་ལ་གཉིས་ལས་རྟགས་དགོད་ན། ཉེར་ལེན་གྱི་རྒྱུ་སེམས་ལས་གཞན་ལ་ལྟོས་མེད་ཀྱི་རྟགས་ཀྱིས་རིག་པའི་སྔོན་མཐའ་ཐུག་མེད་དུ་འགྲུབ་སྟེ། ཇི་ལྟར་ཞེ་ན། སྐྱེས་མ་ཐག་པའི་སེམས་ཆོས་ཅན། ཉེར་ལེན་གྱི་རྒྱུ་སེམས་སྔ་མ་སྔོན་དུ་སོང་སྟེ། རིག་པ་ཙམ་ཡིན་པའི་ཕྱིར། ད་ལྟར་གྱི་རིག་པ་བཞིན་ཞེས་བྱ་བའི་འབྲས་རྟགས་སོ། །གཉིས་པ་ཚུལ་སྒྲུབ་པ་ལ། ཕྱོགས་ཆོས་ནི་མྱོང་བའམ་རྟགས་ཀྱིས་འགྲུབ་ལ། ཁྱབ་པ་རྣམ་པར་བརྟགས་པས་འགྲུབ་སྟེ། འགྲེལ་པར་བཤད་དོ། །གཉིས་པ་མ་འོངས་པ་སྒྲུབ་པ་ལའང་གཉིས་ཏེ། བདག་འཛིན་དང་བཅས་པ་དང་། བདག་འཛིན་མེད་པའི་གསལ་བ་ཐུག་མེད་དུ་སྒྲུབ་པའོ། །དང་པོ་ལ་རྟགས་དགོད་པ། ཚུལ་སྒྲུབ་པའོ། །དང་པོ་ནི། འཆི་ཁའི་སེམས་ཆོས་ཅན། སེམས་ཕྱི་མ་སྐྱེད་ངེས་ཡིན་ཏེ། དེའི་རྒྱུ་ཚོགས་ཚང་ཞིང་གེགས་མེད་པའི་ཕྱིར། ཚོགས་པ་ཐ་མའི་མྱུ་གུ་བཞིན་ཞེས་པའི་རྟགས་ཀྱིས་རིག་པའི་ཕྱི་མཐའ་ཐུག་མེད་དུ་འགྲུབ་བོ། །གཉིས་པ་ལ་ཕྱོགས་ཆོས་དང་ཁྱབ་པ་བསྒྲུབ་པ་གཉིས། དང་པོ་ལའང་གཉིས་ལས་དང་པོ་དངོས་ནི། སྐྱེ་བའི་རྒྱུ་ཚོགས་ཚང་བ་ནི་བདག་འཛིན་ཡིན་ཞིང་། གེགས་ནི་བདག་མེད་ཡིན་ལ། དེ་མེད་པ་ནི་བདག་མེད་རྟོགས་པ་ཉིད་དོ། །གཉིས་པ་དེ་གཏན་ལ་དབབ་པ་ལ་འཁོར་བའི་འཇུག་ལྡོག་ཤེས་དགོས་པས་དེ་ལ་དགག་གཞག་སྤང་གསུམ། དང་པོ་ནི། གཅེར་བུ་པ་ན་རེ། ལས་ལུས་གཉིས་པོ་སྤང་བའི་ཕྱིར་དུ་དཀའ་བ་སྤྱོད་དགོས་ཏེ། སེམས་སུ་མ་ཟད་ལས་དང་ལུས་ཀྱང་འཁོར་བའི་རྒྱུ་ཡིན་པས། དེ་གཉིས་གང་རུང་ལ་གནོད་པ་བྱས་པས་ཀྱང་སྐྱེ་བ་ལྡོག་ཏེ། ས་བོན་ཡོད་ཀྱང་ཆུ་ལུད་ལོག་ན་མྱུ་གུ་མི་སྐྱེ་བ་བཞིན་ནོ། །དེས་ན་དཀའ་ཐུབ་ཀྱིས་ལས་ཟད་ན་ཡང་སྲིད་མིན་ནོ་ཞེས་ཟེར་ན། ལས་དང་ལུས་འཛད་པའི་དཀའ་ཐུབ་ནི་ལམ་མིན་ཏེ། ལས་ནི་མཐའ་ཡས་པས་སྤང་མི་ནུས་པ་དང་། གཉེན་པོ་ཤེས་པར་མི་ནུས་པའི་ཕྱིར་དང་། མ་རིག་པ་ལས་བྱུང་བའི་སྲེད་པ་མ་སྤངས་ན་ལས་ལུས་སྔར་གྱི་སྤངས་ཀྱང་ཕྱིས་སྐྱེ་བས་མི་ཕན་པའི་ཕྱིར་དང་། བདག་སྲེད་སྤངས་ན་ལས་ལུས་མ་སྤང་ཀྱང་བུད་ཤིང་ཟད་པའི་མེ་ལྟར་ཡང་སྲིད་མི་ལེན་པས་མི་དགོས་པའི་ཕྱིར་རོ། །གཉིས་པ་རང་ལུགས་ལ་འཁོར་བར་སྐྱེ་བའི་རྒྱུ་ངོས་བཟུང་བ། དེའི་གཉེན་པོ་དཔྱད་པའོ། །དང་པོ་ལ། སྤྱིར་ཡང་སྲིད་ཙམ་སྐྱེ་བའི་རྒྱུ། བྱེ་བྲག་དབང་ཤེས་སྐྱེ་བའི་རྒྱུའོ། །དང་པོ་ནི། འཁོར་བར་སྐྱེ་བའི་རྒྱུ་ནི་བདག་ཏུ་འཛིན་པའི་མ་རིག་པ་འཇིག་ལྟ་ཡིན་ཏེ། དེ་ཡོད་ན་བདག་གིར་འཛིན་པ་གཞན་འབྱུང་དེ་ལས་ཀྱང་ཆགས་སྡང་འབྱུང་ཞིང་ཉོན་མོངས་དེ་དག་གིས་ལས་བསགས་ནས། དགེ་བ་ལས་འཁོར་བ་མཐོ་རིས་གསུམ་དང་། མི་དགེ་བ་ལས་ངན་སོང་གསུམ་དང་། མི་གཡོ་བ་ལས་ཁམས་གོང་མ་འབྱུང་བའི་ཕྱིར་ཏེ། དེ་ཉིད། བདག་ཡོད་ན་ནི་གཞན་དུ་ཤེས། །ཞེས་གསུངས་སོ། །གཉིས་པ་ནི། ཚེ་འདིའི་འཆི་ཀའི་མིག་ལ་སོགས་པའི་སྐྱེ་མཆེད་ཀྱིས་ཉེར་ལེན་དང་། སེམས་ཀྱིས་ལྷན་ཅིག་བྱེད་རྐྱེན་བྱས་པ་ལས་སྐྱེ་མཆེད་གཞན་ཕྱི་མའི་མིག་སོགས་དང་འཆི་ཀའི་སེམས་ཀྱིས་ཉེར་ལེན་དང་དབང་པོས་ལྷན་ཅིག་བྱེད་རྐྱེན་བྱས་པ་ལས་ཕྱི་མའི་དབང་ཤེས་སྐྱེ་ལ། དེ་གཉིས་ཀ་བཟང་ངན་གྱི་ཁྱད་པར་དུ་སྐྱེད་པའི་བདག་རྐྱེན་ནི་ལས་ཀྱིས་བྱེད་དེ། ཚེ་འདི་ཉིད་ཀྱི་སྐྱེ་མཆེད་ལྔ། །ཞེས་གསུངས་པའི་ཕྱིར། གཉིས་པ་ལ། ཕྱོགས་རེ་མགོ་མནོན་དང་། མཐའ་དག་དཔྱིས་འབྱིན་གཉིས། དང་པོ་ནི། ཞེས་སྡང་གི་གཉེན་པོར་བྱམས་པ་ལ་སོགས་པ་ཕྱོགས་རེ་མགོ་མནོན་ནམ་རྒྱང་སྲིང་བ་ཙམ་དུ་ནུས་ཀྱི་འཁོར་བའི་རྩ་བ་གཅོད་ནུས་མིན་ཏེ། རྒྱུ་བདག་འཛིན་དང་མི་འགལ་བའི་ཕྱིར། དེའང་། བྱམས་སོགས་རྨོངས་དང་འགལ་མེད་ཕྱིར། །ཞེས་སོགས་གསུངས་སོ། །གཉིས་པ་ནི། བདག་མེད་ནི་བདག་དང་གནོད་བྱ་གནོད་བྱེད་ཀྱི་འགལ་བ་ཡིན་ཏེ། རྟག་མི་རྟག་གམ་ཚ་གྲང་བཞིན་ནོ། །དེ་བས་ན་བདག་མེད་མཐོང་བས་བདག་འཛིན་དེ་སུན་འབྱིན་པར་བྱས་ཏེ་འབྲས་བུ་སྐྱེ་བ་ལས་གྲོལ་ཏེ། སྟོང་ཉིད་ལྟ་དང་དེ་འགལ་ཕྱིར། །ཞེས་སོགས་གསུངས་སོ། །གསུམ་པ་དེ་ལ་རྩོད་སྤོང་ལ། སྐྱེ་རྒྱུ་དང་། གཉེན་པོ་ལ་རྩོད་པ་སྤང་བ་གཉིས། དང་པོ་ལ་གསུམ་གསུངས་པ་ནི་འགྲེལ་པར་གསལ་ལོ། །གཉིས་པ་ལ་གཉིས་ལས། དང་པོ་འགྲེལ་པར་གསལ་ཞིང་། གཉིས་པ་མྱ་ངན་ལས་འདས་ན་རྟེན་མི་བརྟན་པར་ཐལ་བ་སྤང་བ་ནི། ལྷན་སྐྱེས་ཀྱི་བདག་འཛིན་སྤངས་པས་ཡང་སྲིད་མི་ལེན་ན་རྟེན་བརྟན་པ་མི་འགྲུབ་བོ་ཞེ་ན། ས་བོན་ལ་ཐོག་མ་ཡོད་པ་མིན་ཡང་མེས་བསྲེགས་པ་ན་ཕྱི་མཐའ་མཐོང་ལ། མ་བསྲེགས་ཤིང་མཐུན་རྐྱེན་འཛོམ་འགལ་རྐྱེན་མེད་ན་འབྲས་བུ་ཕྱི་མ་འབྱིན་པར་ངེས་པ་དེ་བཞིན་དུ་འཁོར་བ་ལ་ཐོག་མ་མེད་ཀྱང་བདག་མེད་མཐོང་བའི་མེས་བདག་འཛིན་གྱི་ས་བོན་བསྲེགས་པ་ན་འཁོར་བའི་ཕྱི་མཐའ་འགྲུབ་ལ། སྲེད་པའི་མཐུན་རྐྱེན་ཚང་ཞིང་སྟོང་ཉིད་ཀྱིས་འགལ་རྐྱེན་མེད་ན་ཡང་སྲིད་ཕྱི་མ་འབྱིན་པར་ངེས་པ་ཡིན་ནོ། །དེས་ན་སྟོང་ཉིད་མངོན་སུམ་དུ་མ་རྟོགས་ཀྱི་བར་དུ་རྟེན་བརྟན་པས་ཆོག་མོད། སྟོང་ཉིད་རྟོགས་ཀྱང་སྲིད་པ་ཕྱི་མ་ལེན་པའི་རྟེན་བརྟན་ན་འཁོར་བའི་རྒྱུན་མི་ཆད་པས་ལམ་བསྒོམ་པ་དོན་མེད་དུ་འགྱུར་རོ། །གཉིས་པ་བདག་འཛིན་མེད་པའི་གསལ་བ་ཐུག་མེད་དུ་སྒྲུབ་པ་ནི། འཆི་ཁའི་སེམས་ཆོས་ཅན། སེམས་གསལ་བ་ཕྱི་མ་སྐྱེད་པར་ངེས་ཏེ། དེ་སྐྱེད་པ་ལ་རྒྱུ་ཚང་ཞིང་གེགས་མེད་པའི་ཕྱིར་ཏེ། སེམས་ལས་གཞན་གློ་བུར་གྱི་དྲི་མར་གྱུར་པའི་རྒྱུ་གཞི་མི་དགོས་པ་དང་། བདག་འཛིན་གྱི་གེགས་བདག་མེད་ལྟ་བུ་གཞན་མེད་པས་སོ། །དེས་ན་གང་གེགས་མེད་ཅིང་རྒྱུ་གཞན་ལ་ལྟོས་པ་མེད་པ་དེ་འབྲས་བུ་ཕྱི་མ་སྐྱེད་ངེས་ཏེ། གེགས་མེད་ཅིང་ཚོགས་པ་ཚང་བའི་ས་བོན་བཞིན། སེམས་གསལ་བ་ཡང་གེགས་མེད་ཅིང་གསལ་བ་ལས་རྒྱུ་གཞན་ལ་ལྟོས་པ་མེད་དོ་ཞེས་བྱ་བ་རང་བཞིན་གྱིས་རྟོགས་སོ། །གཉིས་པ་གོམས་པ་ངང་གིས་ཁྱད་པར་དུ་འགྱུར་བ་དང་། གསུམ་པ་དེ་བསྒོམ་པ་ནི་རང་རིག་གིས་འགྲུབ་བོ། །གཉིས་པ་ཁྱབ་པ་སྒྲུབ་པ་ནི། ཁྱབ་པ་ནི་དཔེ་འདོད་འཇིགས་སོགས་གོམས་པ་ལས་གསལ་སྣང་སྐྱེ་བར་མཐོང་བས་འགྲུབ་བོ། །གཉིས་པ་མཚན་ཉིད་སྒྲུབ་པ་ནི། སྒོམ་པས་གཟུང་འཛིན་དུ་སྣང་བ་མེད་པའི་ཕྱིར་ན་འཁྲུལ་མེད་དུ་འགྲུབ་ལ། འཁྲུལ་པ་དང་བྲལ་ན་རྟོག་པ་དང་ཡང་དོན་གྱིས་བྲལ་བ་ཡིན་ནོ། །གསུམ་པ་གྲུབ་པའི་དོན་ལ་མི་འཐད་པ་སྤོང་བ་ལ་སྤངས་པ་དང་ཡེ་ཤེས་ཕུན་ཚོགས་མི་འཐད་པ་སྤང་བ་གཉིས། དང་པོ་ནི། ཕྱི་རོལ་པ་ཁ་ཅིག་སྤངས་པ་ཕུན་སུམ་ཚོགས་པའི་གྲོལ་བ་མེད་དེ། དྲི་མ་སེམས་ཀྱི་རང་བཞིན་ཡིན་པས་སྤང་མི་ནུས་ལ། ནུས་ཀྱང་སོ་སོ་སྐྱེ་བོས་སྤོང་ཐབས་མི་ཤེས་ཤིང་། ཤེས་ན་ལན་གཅིག་སྤངས་ཀྱང་ལུས་ཀྱི་དྲི་མ་ལྟར་སླར་ལྡོག་པས་སྤངས་པ་མི་བརྟན་པའི་ཕྱིར་ཞེ་ན། ཉེས་པ་སྤངས་པའི་རྣམ་གྲོལ་འཐད་དེ། ཇི་ལྟར་ཞེ་ན། དྲི་མ་གློ་བུར་བ་ཡིན་པས་སེམས་ཀྱི་རང་བཞིན་མིན་ཏེ། སེམས་ཀྱི་རང་བཞིན་འོད་གསལ་བ་ཡིན་པའི་ཕྱིར་དང་། ཉོན་མོངས་ཀྱི་རྒྱུ་བདག་འཛིན་ཡིན་ལ་དེ་དང་འགལ་བ་བདག་མེད་པའི་ཐབས་ཡོད་པའི་ཕྱིར་དང་། རྒྱུ་སྤངས་པ་ཉིད་ཀྱིས་སླར་མི་ལྡོག་སྟེ་བུད་ཤིང་ཟད་པའི་མེ་བཞིན་དུ་འབྲས་བུ་བསྐྱེད་མི་ནུས་པའི་ཕྱིར་རོ། །གཉིས་པ་ལ། གོམས་པ་མི་འཐད་པ་སྤང་བ། ཐམས་ཅད་མཁྱེན་པ་མི་སྲིད་པ་སྤང་བ་གཉིས། དང་པོ་ནི། དཔེ་གསུམ་གྱིས་བརྩེ་བ་དང་ཤེས་རབ་ལ་སོགས་པ་གོམས་ཀྱང་ཐུག་མེད་དུ་འཕེལ་བ་སྲིད་པ་མིན་ཏེ། མཆོངས་པ་གོམས་པ་ལྟར་ཅུང་ཟད་འཕེལ་ཡང་མཐའ་མེད་དུ་མི་འཕེལ་བ་དང་ཆུ་ཇི་ལྟར་བསྲོས་ཀྱང་མེར་མི་འབར་བ་ལྟར་སྟོང་ཉིད་བརྩེ་བ་ལ་སོགས་པ་གོམས་ཀྱང་ཅུང་ཟད་རྟོགས་པ་སྲིད་ཀྱི་དེའི་ངང་དུ་འགྲོ་བ་མི་སྲིད་པ་དང་། གསེར་གཞུ་ཡང་མེ་དང་འབྲལ་བ་ན་སྲ་བར་འགྱུར་བ་ལྟར་ལན་གཅིག་སྟོང་ཉིད་སོགས་རྟོགས་ཀྱང་འབད་པ་དང་བྲལ་ན་སླར་ལྡོག་པའི་ཕྱིར་རོ་ཞེ་ན། གསུམ་པོ་དེ་དག་ནི་བརྩེ་སོགས་དེ་གསུམ་གྱི་ཆོས་གོམས་པ་ལས་མཐའ་མེད་དུ་མི་འཕེལ་བའི་དཔེར་མི་རུང་སྟེ། མཆོངས་པ་ནི་ལུས་ཀྱིས་འབད་རྩོལ་ལ་ལྟོས་ཀྱི་མཆོངས་པ་སྔ་མའི་ཉེར་ལེན་ལས་མཆོངས་པ་ཕྱི་མ་མི་སྐྱེ་བའི་ཕྱིར་དང་། ཆུ་བསྐོལ་བ་མེར་འབར་བའི་སྔོན་དུ་རྟེན་མི་བརྟན་པའི་ཕྱིར་དང་། སྤྱིར་ནད་གསོ་བ་ལ་གཉེན་པོའི་རིགས་གཉིས་ཏེ། སླར་ལྡོག་པ་དང་མི་ལྡོག་པ་གཉིས་སོ། །དང་པོ་ནི་བད་ཀན་ལ་སེའུ་འབྲུའི་སྦྱོར་བ་ལྟར། གསེར་ལ་མེ་སོགས་ནི་སླར་ཡང་སྲ་བའི་བདག་ཉིད་དུ་འབྱུང་བ་སྐྱེད་པའི་གཉེན་པོ་ཡིན་ལ། བད་ཀན་ལ་འཁྲུ་སྐྱུགས་ལྟར་ཤིང་མེས་བསྲེགས་པ་ལ་སོགས་པ་ནི་སླར་མི་ལྡོག་པའི་གཉེན་པོ་ཡིན་པའི་ཕྱིར་རོ། །གཉིས་པ་ལ་རྩོད་པ་འགོད་པ་དང་། དེའི་ལན་གཉིས། དང་པོ་ནི། མུ་སྟེགས་ཁ་ཅིག་སྟོང་ཉིད་གོམས་པ་ལས་དེ་ཡི་ངང་དུ་འགྱུར་སྲིད་པས་འཁོར་བར་མི་སྐྱེ་བ་དང་། སྙིང་རྗེ་གོམས་པ་ལས་དེ་ཡི་ངང་དུ་འགྱུར་སྲིད་པས་གཞན་དོན་ལ་འཇུག་པ་དངོས་སྟོབས་ཀྱིས་འགྲུབ་མོད། ཡུལ་དུས་རྣམ་པ་ཀུན་ལ་མཐའ་མེད་པའི་ཕྱིར་ཤེས་བྱ་མིན་ཏེ། ནམ་མཁའི་མཐའ་དང་སེམས་ཅན་གྱི་གྲངས་བཞིན། དེ་མི་ཤེས་ན་ཐམས་ཅད་མཁྱེན་པར་མི་འགྱུར་ལ། ཤེས་ན་ལོག་ཤེས་ཅན་དུ་འགྱུར་ཏེ། ཤེས་བྱ་མིན་པ་ཤེས་པའི་ཕྱིར། རི་བོང་རྭ་མཐོང་བ་བཞིན་ནོ། །དེས་ན་ཤེས་བྱ་ཐམས་ཅད་ཤེས་པའི་ཀུན་མཁྱེན་རིགས་པས་སྒྲུབ་པ་དཀའ་ཞེས་ཟེར་རོ། །གཉིས་པ་ལ། དགོས་པའི་དོན་ཀུན་ཤེས་པའི་ཐམས་ཅད་མཁྱེན་པ་དང་། ཤེས་བྱའི་དོན་ཀུན་ཤེས་པའི་ཐམས་ཅད་མཁྱེན་པ་གཉིས། དང་པོ་ནི། བདེན་བཞི་ཇི་ལྟ་བ་བཞིན་ཤེས་པ་དེ་དགོས་པའི་དོན་ཀུན་མཁྱེན་པའི་ཐམས་ཅད་མཁྱེན་པ་ཡིན་ཏེ། འཁོར་བར་འཇུག་ལྡོག་གི་རྒྱུ་འབྲས་ཀྱི་གཙོ་བོ་བདེན་བཞིའི་དོན་ལ་མི་སླུ་བར་ཚད་མས་གྲུབ་པས་སོ། །མི་ཀུན་ཚོགས་སྨན་ཀུན་འཛོམ་ཞེས་བརྗོད་པ་བཞིན་ནོ། །དེའང་བླང་དང་དོར་བྱའི་དེ་ཉིད་ནི། །ཞེས་སོགས་གསུངས་སོ། །དེས་ན་འཁོར་བ་ལས་གྲོལ་བར་འདོད་པས་དེའི་ཐབས་ཀུན་ཤེས་པས་ཆོག་སྟེ། དགོས་པའི་དོན་ཀུན་མཁྱེན་པ་ལ་མཁས་པ་རྣམས་ཐམས་ཅད་མཁྱེན་པ་ཞེས་ཟེར་བའི་ཕྱིར། ཉེ་བར་མི་མཁོ་བ་སྲིན་བུའི་གྲངས་ལ་སོགས་པ་མཁྱེན་པ་ཅི་དགོས་ཏེ། ཐམས་ཅད་འདུས་ནས་ཞེས་སོགས་ཀྱི་ཕྱིར་རོ། །བར་སྐབས་ཀྱིས་ཚིགས་བཅད་དོ། །གཉིས་པ་ནི། ཡང་ན་ཤེས་བྱ་ཐམས་ཅད་མཁྱེན་པ་ཉིད་ཀྱང་རྗེས་སུ་དཔག་པ་ཡིས་གྲུབ་པ་ཡིན་ཏེ། གང་ཕྲ་ཞིང་དཀའ་བ་མཐོང་བ་དེས་ཡིད་གཏད་ན་རགས་ཤིང་སླ་བ་མཐོང་སྟེ། ཉི་ཟེར་གྱི་རྡུལ་མཐོང་བ་དེས་ཡིད་གཏད་ན་བུམ་པ་མཐོང་བ་བཞིན། ཐམས་ཅད་མཁྱེན་པས་ཀྱང་ཕྲ་ཞིང་དཀའ་བ་བདེན་པ་བཞིའི་དོན་གཟིགས་སོ་ཞེས་བྱ་བའི་རྟགས་ཀྱིས་འགྲུབ་སྟེ། བླང་དང་དོར་བྱའི་དེ་ཉིད་ནི། །ཐབས་བཅས་རབ་ཏུ་ངེས་པ་ཡིས། །ཞེས་སོགས་གསུངས་སོ། །བསྐལ་པའི་བར་དུ་བརྗོད་པར་བྱ་རྒྱུ་ཡང་མེ་ལོང་ནང་དུ་ཅིག་ཆར་དུ་འཆར་བ་ལྟར། དེ་བཞིན་དུ་ཤེས་བྱ་མཐའ་མེད་པ་རྣམས། གནས་གྱུར་པའི་མཁྱེན་པ་སྐད་ཅིག་མ་གཅིག་གིས་ཅིག་ཆར་དུ་མཁྱེན་ཞེས་བྱ་བ་ནི་བར་སྐབས་ཀྱི་ཚིགས་བཅད་དོ། །གཉིས་པ་མངོན་སུམ་ལྟར་སྣང་ལ་གཉིས་ལས། དང་པོ་མཚན་ཉིད་ནི། རྟོག་པ་དང་རྟོག་མེད་འཁྲུལ་པ་ཐམས་ཅད་ནི་མངོན་སུམ་ལྟར་སྣང་ཉིད་དུ་འདོད་དེ། འཁྲུལ་པའི་ཤེས་པ་ཡིན་པའི་ཕྱིར་རོ། །གཉིས་པ་དེ་ལ་རིགས་ཀྱིས་དབྱེ་ན། རྟོག་པ་དང་རྟོག་མེད་གཉིས། རྟོག་མེད་ལའང་ཡིད་ཤེས་དང་དབང་ཤེས་འཁྲུལ་པ་གཉིས། རྟོག་པ་ལ་གསུམ་ཡོད་པ་ཡིན་ཏེ། བརྡ་རྟེན་ཅན། དོན་གཞན་ལ་སྒྲོ་འདོགས་པ། ལྐོག་གྱུར་དུ་གྱུར་པའི་དོན་ཅན་གྱི་རྟོག་པའོ། །ཀུན་བཏུས་ལས་དྲུག་ཏུ་ཕྱེ་སྟེ་གསུངས་པ། འདིར་གསུམ་དུ་བསྡུས་ནས་བཤད་པ་ནི། ལོག་རྟོག་བཟློག་ཕྱིར་ཡིན་ཏེ། འཁྲུལ་པ་དང་། ཀུན་རྫོབ་པའི་རྟོག་པ་གཉིས་ཕྱི་རོལ་པས་དབང་ཤེས་སུ་འདོད་པ་དགག་པའི་ཕྱིར་ཕྱོགས་གཅིག་ཏུ་གསུངས་ལ། རྗེས་དཔག་དང་རྗེས་སུ་དཔག་པ་ལས་བྱུང་བའི་རྟོག་པ་གཉིས་རྟགས་ལ་བརྟེན་པ་ཡིན་ལ། དྲན་པ་དང་མངོན་འདོད་ཀྱི་རྟོག་པ་གཉིས་མངོན་སུམ་དང་རྟགས་གཉིས་ཀ་ལ་མ་ལྟོས་པ་ཡིན་ནོ། །གསུམ་པ་ཚད་མ་དང་འབྲས་བུ་དཔྱད་པ་ལ། མངོན་སུམ་དང་། རྗེས་དཔག་གི་ཚད་འབྲས་སོ། །དང་པོ་ལ་གསུམ་ལས། དང་པོ་གཞན་ལུགས་དགག་ན། དཔྱོད་པ་བ་དོན་ལ་ལྟ་བ་ཞེས་བྱ་བ་ཐོག་མར་དོན་སྣང་བའི་ཤེས་པ་རྟོག་མེད་ཚད་མ། དེའི་འོག་ཏུ་དོན་གྱི་ངོ་བོ་དང་ཁྱད་པར་ངེས་པའི་རྟོག་པ་ཚད་མའི་འབྲས་བུར་འདོད་དེ། ཇི་སྐད་དུ། དང་པོར་དོན་ལ་ལྟ་བ་པོ། །ཞེས་སོགས་ནས། དེ་ནི་འབྲས་བུ་ཉིད་དུ་འདོད། །ཅེས་ཟེར་རོ། །དེ་མི་འཐད་དེ། དོན་དང་མི་འདྲ་ན་དོན་ལ་ལྟ་བར་མི་གྲུབ་པའི་ཕྱིར་རོ། །རིགས་པ་ཅན་པ། དབང་པོ་དང་དོན་ཕྲད་པ་ཚད་མ། དེ་ལས་དོན་རྟོགས་པ་འབྲས་བུར་འདོད་དེ། ཇི་སྐད་དུ། དབང་པོ་དང་དོན་ཕྲད་པ་ལས་སྐྱེས་པའི་འཕྲོད་པ་འདུ་བ་ཅན་ཚད་མའི་འབྲས་བུ་ཡིན་ནོ་ཞེས་ཟེར་བའང་མི་འཐད་དེ། དབང་པོ་དོན་གྱི་བདག་ཉིད་ཀུན་དང་ཕྲད་པས་ཀུན་རྟོག་པར་ཐལ་བའི་ཕྱིར་རོ། །བྱེ་བྲག་པ། ཚིག་གི་དོན་དྲུག་ལས། ཡོན་ཏན་ལ་སོགས་པ་ཁྱད་པར་འཛིན་པ་ཚད་མ། ཁྱད་པར་ཅན་གྱི་ཤེས་པ་ཞེས་བྱ་བ་རྫས་རྟོགས་པ་དེ་འབྲས་བུར་འདོད་དེ། ཇི་སྐད་དུ། ཡོན་ཏན་མཐོང་བ་ལས་རྫས་རྟོགས་པར་འགྱུར་རོ་ཞེས་ཟེར་བའང་མི་འཐད་དེ། ཚད་འབྲས་གཉིས་ཡུལ་ཐ་དད་ན་ཡོན་ཏན་གཞལ་བས་རྫས་རྟོགས་པ་མི་འཐད་དེ། སྔོན་པོ་གཞལ་བས་སེར་པོ་བཞིན་ནོ། །ལ་ལ་སྟེ་བྱེ་བྲག་སྨྲ་བ་ནི་རྟེན་བཅས་ཀྱི་དབང་པོ་ཉིད་ཡུལ་རྣམ་འཇོག་གིས་ཚད་མ། དེ་ལས་བྱུང་བའི་ཤེས་པ་འབྲས་བུར་འདོད་དེ། ཇི་སྐད་དུ། མིག་གི་གཟུགས་རྣམ་མཐོང་རྟེན་བཅས། །ཞེས་ཟེར་བའང་མི་འཐད་དེ། དབང་པོ་ཙམ་དོན་སོ་སོར་རྟོགས་པ་ལ་ཉེ་རིང་མེད་ཅིང་། བེམས་པོས་ཡུལ་རིག་པ་མི་འཐད་པའི་ཕྱིར་རོ། །གཉིས་པ་རང་གི་ཚད་འབྲས་ངོས་བཟུང་བ་ནི་བསྐྱེད་བྱ་སྐྱེད་བྱེད་ཀྱི་ཚད་འབྲས་མི་འཐད་པ་དེས་ན། འོག་ནས་འབྱུང་བ་ལྟར་རྣམ་པར་གཞག་བྱའི་འབྲས་བུ་ཉིད་ལ་འབྲས་བུ་དང་རྣམ་པར་འཇོག་བྱེད་ཀྱི་རྒྱུ་ཉིད་ལ་ཚད་མར་བཞེད་དེ། རང་ཉིད་བྱེད་པོ་མིན་ན་ཡང་། །དེ་ཡི་དབང་གི་དེ་བཞག་ཕྱིར། །ཞེས་གསུངས་པས་སོ། །གསུམ་པ་དེ་གྲུབ་མཐའ་བཞི་དང་སྦྱར་བ་ནི། རྣམ་པར་འཇོག་བྱེད་ཉིད་ལ་ཚད་འབྲས་འཇོག་པ་དེ་ལ་ཞེས་པའམ། མངོན་སུམ་བཞི་ཡོད་པ་དེ་ལ་རང་རིག་གི་ཚད་འབྲས་ཀྱི་རྣམ་གཞག་ནི་འོག་ཏུ་འབྱུང་བའི་གྲུབ་མཐའ་བཞི་པོ་ཕལ་ཆེར་དེ་གསུམ་མཐུན་པར་སྨྲ་སྟེ། ཤེས་པ་རང་ཉིད་གཞལ་བྱ། མྱོང་ཙམ་དུ་སྐྱེས་པ་ཚད་མ། རང་རིག་མཚན་ཉིད་པའི་ཐ་སྙད་འབྲས་བུ་ཡིན་ཏེ། དཔེར་ན་འདོད་ཆགས་སོགས་ཚོར་བཞིན། །ཞེས་གསུངས་སོ། །འོན་ཀྱང་དོན་རིག་གི་ཚད་འབྲས་མི་མཚུངས་ཏེ། དོན་རིག་གི་ཚད་འབྲས་ནི་གྲུབ་མཐའ་སྨྲ་བ་བཞི་པོ་དེས་རང་རང་གི་གྲུབ་མཐའ་མི་འདྲ་བའི་སྟོབས་ཀྱིས་སོ་སོར་འཇོག་སྟེ། བྱེ་བྲག་སྨྲ་བ་གཟུགས་ལ་སོགས་པ་ཐུག་ཕྲད་སྣང་བའི་དོན་དངོས་གཞལ་བྱ། དོན་མཐོང་བ་ཚད་མ། དོན་རྟོགས་མཚན་ཉིད་པའི་ཐ་སྙད་འབྲས་བུར་སྨྲ་བས། གཞལ་བྱ་དང་ཚད་འབྲས་གཉིས་རྫས་ཐ་དད་དུས་མཉམ་པར་འདོད། མདོ་སྡེ་པས་དོན་ལྐོག་ན་མོ་གཞལ་བྱ། དོན་དང་འདྲ་བར་སྐྱེས་པའི་ཤེས་པ་ཚད་མ། དོན་རྟོགས་བཏགས་པ་བའི་ཐ་སྙད་འབྲས་བུར་འདོད་པས་གཞལ་བྱ་དང་ཚད་འབྲས་གཉིས་དུས་དང་ངོ་བོ་ཐ་དད་ཡིན་ཏེ། སེམས་ཙམ་པའི་ལྟར་ན། གཟུང་བ་འཛིན་པ་རིག་པ་དག །ཅེས་སོགས་གསུངས་པ་ལྟར། རྣམ་བཅས་པ་དག་གཟུང་བར་སྣང་བའི་རང་རིག་གཞལ་བྱ། དེ་འཛིན་པར་སྣང་བ་ཚད་མ། རང་རིག་མཚན་ཉིད་པ་འབྲས་བུར་འདོད་པས་གཞལ་བྱ་དང་ཚད་འབྲས་བདེ་སྡུག་མྱོང་བ་ལྟར་དུས་དང་ངོ་བོ་གཅིག་ཏུ་འདོད་དོ། །རྣམ་རྫུན་པ་དོན་དུ་སྣང་བའི་སྒྲོ་བཏགས་གཞལ་བྱ། དེ་འཛིན་པའི་ཤེས་པ་ཚད་མ། རང་རིག་བཏགས་པ་བའི་ཐ་སྙད་འབྲས་བུར་འདོད་པས་གཞལ་བྱ་དང་ཚད་འབྲས་གཉིས་སྐྲ་སོགས་སྣང་བ་ལྟར་གཅིག་པ་བཀག་པར་འདོད་དོ། །དེ་ལྟར་གྲུབ་མཐའ་བཞི་ལས་སློབ་དཔོན་ནི་ཕྱི་རོལ་གྱི་དོན་ཁས་ལེན་པ་ན་མདོ་སྡེ་པ་ལྟར་མཛད་ལ། ཤེས་བྱ་ནང་ལ་འཇུག་པ་ན་རྣམ་མེད་ཞལ་གྱིས་བཞེས་སོ། །གཉིས་ཀ་ལྟར་ཡང་དོན་དམ་པར་རང་རིག་ཚད་འབྲས་ཡིན་ཏེ། རྣམ་འགྲེལ་ལས། རང་གི་ངོ་བོ་དཔྱོད་པ་ན། །རང་རིག་འབྲས་བུ་ཡིན་པར་བཤད། །ཅེས་གསུངས་པས་སོ། །ཐ་སྙད་ཀུན་རྫོབ་ཏུ་མདོ་སྡེ་པ་ལྟར་དོན་རིག་ཚད་འབྲས་ཡིན་ཏེ། དོན་འཇོག་དེ་ཡི་བདག་ཉིད་ཕྱིར། །རང་རིག་ཡིན་ཡང་དོན་རིག་འདོད། །ཅེས་གསུངས་ལ། གང་ལྟར་ཡང་བློ་ཚུལ་གཉིས་པ་ཡིན་ཏེ། དོན་རིག་ལྟར་ན་ཡང་། ཕྱི་རོལ་དོན་ལ་བརྟེན་ནས་སུ། །ཚུལ་གཉིས་བརྗོད་ཡིན། །ཞེས་གསུངས་པས་དོན་ཤེས་པ་དང་བློ་ཤེས་པའི་ཚུལ་གཉིས་ཡིན་ལ། རྣམ་རིག་ལྟར་ན། ཕྱི་རོལ་དོན་ལྟོས་མ་ཡིན་ནོ། །དེ་ཕྱིར་གཅིག་ལ་ཚུལ་གཉིས་ཡོད། །ཅེས་གསུངས་པ་བློ་གཅིག་ལ་མ་རིག་པས་བསླད་པས་ཡུལ་དང་ཤེས་པའི་ཚུལ་གཉིས་ཡིན་ནོ། །ཁོ་བོ་ཅག་ཀྱང་ཆོས་ཀྱི་གྲགས་པའི་ཚུལ་འདི་ཡི་རྗེས་སུ་འབྲང་ངོ་། །བོད་ཕལ་ཆེར་བྱེ་བྲག་ཏུ་སྨྲ་བའི་རྗེས་སུ་འབྲང་མོད། དེ་ནི་དངོས་པོ་སྟོབས་ཞུགས་ཀྱི་རིགས་པ་མ་ཤེས་པར་ཟད་དོ། །གཉིས་པ་ལ་གཉིས་ལས། དང་པོ་དོན་རིག་པའི་ལུགས་ནི། གཞན་སེལ་ལ་མེ་ཡི་རང་མཚན་དུ་འཁྲུལ་པ་གཞལ་བྱ་ཡིན་ལ། དུ་བའི་རྟགས་ལས་བྱུང་བའི་མེའི་གཞན་སེལ་རྟོགས་པའི་བློ་ནི་ཚད་མ་ཡིན་ཏེ། རྣམ་པར་འཇོག་བྱེད་ཀྱི་རྒྱུ་ཡིན་པའི་ཕྱིར། དུ་བའི་རྟགས་ལས་མེའི་རང་མཚན་དེ་རྟོགས་པའི་རྗེས་དཔག་གི་ཐ་སྙད་ནི་འབྲས་བུ་ཡིན་ཏེ་རྣམ་པར་གཞག་བྱའི་འབྲས་བུ་ཡིན་པའི་ཕྱིར། ཞེས་མཁས་པ་རྣམས་བཞེད་དོ། །གཉིས་པ་རྣམ་རིག་པའི་ལུགས་ལ། ཉན་མུ་ཁ་ཅིག་འབྲས་རྟགས་མི་སྲིད་དེ། ལ་ལ་དུ་བ་མཐོང་བའི་ཚེ་ལ་རྒྱབ་ན་མེ་ཡོད་ན་ཤེས་པ་མེད་པའི་ཡུལ་ཡིན་པས་བེམས་པོར་འགྱུར་ལ། དེ་མེད་ན་རྟགས་ལས་རྟོགས་པ་ལོག་ཤེས་སུ་འགྱུར་རོ། །གལ་ཏེ་ད་ལྟར་མེ་མེད་ཀྱང་དུ་བར་སྣང་བའི་ཤེས་པ་ལ་ཕྱིས་སྐྱེས་བུ་ཕྱིན་པ་ན་མེར་སྣང་བ་སྐྱེ་བ་ནི་དུ་བ་རྒྱུ་དང་མེ་འབྲས་བུར་འགྱུར་བས་རྒྱུ་འབྲས་གོ་ལོག་པ་མི་སྲིད་ལ། དེས་ན་སེམས་ཙམ་པའི་འབྲས་རྟགས་ལ་ཚད་འབྲས་མི་སྲིད་དོ་ཞེ་ན། མེར་སྣང་བའི་བག་ཆགས་ཀྱི་སྙིང་པོ་ཅན་དེ་དང་རྗེས་སུ་འབྲེལ་པ་སྐད་ཅིག་མ་གཞན་ཡོངས་སུ་གྱུར་པ་ལས་དུ་བར་སྣང་བའི་བག་ཆགས་ཀྱི་འབྲས་བུ་དུ་སྣང་གི་བློ་སྐྱེ་བ་དེས་ན་དུ་ལྡན་གྱི་ལར་སྣང་བ་ཆོས་ཅན། མེར་སྣང་བ་ཡོད་དེ། དུ་བར་སྣང་བ་ཡོད་པའི་ཕྱིར་ཞེས་པའི་རྟགས་དེས་ཐ་སྙད་དུ་སྐྱེས་བུ་མི་བསླུ་བའི་ཕྱིར་ན། རྟགས་དེ་ལ་བརྟེན་པའི་བློ་རྗེས་དཔག་ཡིན་ཞེས་མཁས་པ་རྣམས་བཞེད་དེ། དེ་ལ་དུ་བར་སྣང་བའི་བློས་ཞེས་སོགས་རྐང་པ་དགུ་གསུངས་སོ། །ཚད་མ་རིགས་པའི་གཏེར་ལས་མངོན་སུམ་བརྟགས་པའི་རབ་ཏུ་བྱེད་པ་དགུ་པའི་རྣམ་བཤད་བསྟན་ཟིན་ཏོ།། ༈ །།གཉིས་པ་རྗེས་དཔག་བཤད་ན་རྗེས་དཔག་ལ་རྣམ་པ་གཉིས་ཏེ། རང་དོན་དང་གཞན་དོན་ནོ། །དང་པོ་ལ་མཚན་ཉིད་དང་། དེའི་རང་བཞིན་ངེས་པར་བྱ་བ་གཉིས། དང་པོ་ནི། རང་དོན་རྗེས་དཔག་ནི་ཚུལ་གསུམ་ཚང་བའི་རྟགས་ལས་དོན་ཏེ་བསྒྲུབས་བྱ་མཐོང་བའི་ཞེན་བློའོ། །གཉིས་པ་ལ་གང་གིས་རྟོགས་པའི་རྟགས་དང་། དེས་རྟོགས་པའི་བསྒྲུབ་བྱ་གཉིས། དང་པོ་ལ་རྟགས་ཀྱི་ལྟོས་གཞི་ངོས་བཟུང་བ། དེ་ལ་ལྟོས་པའི་རྟགས་ཀྱི་རབ་ཏུ་དབྱེ་བའོ། །དང་པོ་ལ་ཚུལ་དང་པོའི་ལྟོས་གཞི་ཕྱོགས་དང་། རྗེས་སུ་འགྲོ་ལྡོག་གི་ལྟོས་གཞི་མཐུན་ཕྱོགས་མི་མཐུན་ཕྱོགས་དང་། དེ་དག་ལྟོས་གཞིར་འཇོག་པའི་འཐད་པའོ། །དང་པོ་ལ་རྗེས་སུ་དཔག་པའི་སྒྲ་དོན་སྤྱིར་བསམ་པ་དང་། སྐབས་སུ་བབ་པའི་དོན་གྱི་ཁྱད་པར་ངེས་པར་བྱ་བའོ། །དང་པོ་ལ་རྗེས་སུ་དཔག་པའི་སྒྲ་འཇུག་པའི་ཡུལ་ངོས་བཟུང་བ། གང་དུ་འཇུག་པའི་གནས་སྐབས་ཀྱི་ངེས་པ། ཇི་ལྟར་འཇུག་པའི་སྒྲའི་མཚན་ཉིད་དོ། །དང་པོ་ནི། རྟོག་གེའི་གཞུང་དུ་ཕྱོགས་དང་བསྒྲུབ་བྱ་དང་། རྗེས་སུ་དཔག་བྱ་ཞེས་འབྱུང་བ་རྣམས་ནི་རྣམ་གྲངས་སོ། །དེ་འཇུག་པའི་ཡུལ་ཡང་གསུམ་སྟེ། དེ་དག་བརྗོད་པའི་སྒྲ་ནི་ཆོས་དང་ཆོས་ཅན་གྱི་ཚོགས་པ་ལ་དངོས་མིང་ཡིན་ཏེ། ཕྱོགས་སོགས་མཚན་ཉིད་པ་ཡིན་པའི་ཕྱིར། ཡ་གྱལ་ཆོས་དང་ཆོས་ཅན་གཉིས་ལ་བཏགས་ནས་འཇུག་སྟེ། ཚོགས་པ་དེ་ཡི་ཕྱོགས་རེས་ཟིན་པའི་ཕྱིར་ཏེ། མདོར། རྟགས་ཀྱི་བསྒྲུབ་བྱ་ཚོགས་པ་ཉིད། །ཅེས་གསུངས་པས་སོ། །གསུམ་པོ་དེ་ལས་གཞན་ལ་མི་འཇུག་སྟེ། སྒྲའི་དོན་ངེས་པ་ལ་གྲགས་པ་ཚད་མ་ཡིན་པའི་ཕྱིར་རོ། །གཉིས་པ་ནི། འོ་ན་ཕྱོགས་ཆོས་ཞེས་བརྗོད་པ་ན། ཆོས་ཅན་གྱི་ཆོས་སམ་ཆོས་ཀྱི་ཆོས་སམ་ཚོགས་དོན་གྱི་ཆོས་ཡིན་ཞེས་འཇུག་པ་འཆོལ་བར་འགྱུར་རོ་ཞེ་ན། མི་འགྱུར་ཏེ་སྒྲ་ཐམས་ཅད་སྐབས་སྟོབས་ཀྱིས་གོ་བའི་ཕྱིར་རོ། །དེ་ཡང་སྒྲ་གསུམ་པོ་འཇུག་པའི་སྐབས་གསུམ་ལས། གཏན་ཚིགས་ཀྱི་མཚན་ཉིད་གཏན་ལ་འབེབས་པའི་ཚེ་ཤེས་འདོད་ཆོས་ཅན་ལ་འཇུག་ལ། ཁྱབ་པའི་སྐབས་སུ་ཆོས་ལ་འཇུག་ཅིང་། བསྒྲུབ་བྱའི་སྐབས་སུ་ཚོགས་དོན་ལ་འཇུག་པས་མི་འཁྲུལ་ཏེ། སེན་བྷ་བའི་སྒྲ་བཞིན་ནོ། །གསུམ་པ་ལ་དངོས་མིང་དང་བཏགས་མིང་གི་ཁྱད་པར། དངོས་དང་བཏགས་ཆོས་བསམ་པའོ། །དང་པོ་ནི། དོན་ལ་དངོས་པོ་གྲུབ་པའི་མིང་གང་ཡང་མེད་མོད་ཀྱི། འོན་ཀྱང་དགོས་པ་དང་རྒྱུ་མཚན་གཞན་ལ་མ་ལྟོས་པར་བརྗོད་པར་འདོད་པས་སྔོན་བརྡ་དུས་སུ་བརྡ་སྦྱར་བའི་མིང་དེ་ཉིད་དངོས་མིང་ཡིན་ཞིང་། དེས་དོན་གོ་བ་ན་ཡང་དེ་ཉིད་ཀྱི་རྣམ་པ་འཆར་ལ། དོན་དེ་ལ་བརྟེན་ཅིང་གྲགས་པའི་མིང་དགོས་པ་དང་རྒྱུ་མཚན་འགའ་ལས་གཞན་ལ་བརྡ་སྦྱར་བས་དོན་གཞན་དེ་འཁྲུལ་བཅས་སུ་རྟོགས་པའི་མིང་ནི་བཏགས་པའི་མིང་དུ་འདོད་ཅིང་། དེས་དོན་གོ་བ་ན་ཡང་གཞན་ལ་ལྟོས་ནས་རྣམ་པ་འཆར་ཏེ། དཔེར་ན་ནོག་སོགས་ལ་བ་གླང་དུ་བཏགས་པ་དངོས་མིང་དང་། མི་བླུན་པོ་ལ་བཏགས་མིང་དུ་འགྱུར་བ་བཞིན་ནོ། །གཉིས་པ་ལ། ཚོགས་དོན་ལ་དངོས་ཆོས་བསམ་པ། ཡ་གྱལ་གཉིས་ལ་བཏགས་ཆོས་བསམ་པའོ། །དང་པོ་ནི། ཚོགས་དོན་ལ་ནི་ཕྱོགས་ཀྱི་སྒྲ་དངོས་མིང་དུ་འཇུག་སྟེ། ཕྱི་ནང་གི་མཁས་པ་རྣམས་ལ་གདོད་མ་ནས་གྲུབ་པའི་ཕྱིར། གཉིས་པ་ལ་འདོགས་པའི་རྒྱུ་མཚན། བཏགས་པའི་དགོས་པ། དངོས་ལ་གནོད་བྱེད་གསུམ། དང་པོ་ནི། མིང་དེ་དོན་གཞན་ལ་བཏགས་མིང་དུ་འཇུག་པ་ལ་ནི། འདྲ་བ་དང་འབྲེལ་པ་གང་རུང་གི་རྒྱུ་མཚན་ལ་ལྟོས་ཏེ། སྨན་བྱ་རོག་རྐང་ཞེས་བྱ་བ་དང་། ཉི་མའི་འོད་ཟེར་ལ་ཉི་མ་ཞེས་པ་དང་། ཆང་ལ་མྱོས་པ་ཞེས་བཏགས་པ་ལྟ་བུའོ། །འདིར་ཡ་གྱལ་གཉིས་ལ་ཕྱོགས་ཀྱི་མིང་བཏགས་པ་ནི་རས་ཡུག་གི་ཕྱོགས་གཅིག་ཚིག་པ་ལ་རས་ཡུག་ཚིག་ཅེས་པ་ལྟར་ཚོགས་པའི་མིང་ཡ་གྱལ་ལ་བཏགས་པའོ། །གཉིས་པ་ལ། དགོས་པ་མེད་པར་གཞན་གྱི་མིང་གཞན་ལ་འདོགས་པ་མི་འཐད་དོ་ཞེ་ན། འདི་ལ་གསུམ་སྟེ། ཆོས་ལ་བསྒྲུབ་བྱར་བཏགས་པའི་དགོས་པ། ཆོས་ཅན་ལ་བསྒྲུབ་བྱར་བཏགས་པའི་དགོས་པ། བཏགས་པ་ལ་མ་བཏགས་པའི་ཕྱོགས་དང་མཚུངས་པའི་རྩོད་སྤང་ངོ་། །དང་པོ་ནི། ཆོས་ལ་བསྒྲུབ་པར་བྱ་བའི་མིང་བཏགས་པ་ནི་དགོས་པ་དང་བཅས་ཏེ། དེ་ལྟར་མ་བཏགས་པར། གཏན་ཚིགས་ཆོས་ཀྱི་རྗེས་འགྲོ་བ་ཞེས་བརྗོད་ན། ཆོས་ལ་བསྒྲུབ་བྱ་དང་དགག་བྱའི་ཆོས་ཡོད་པས་འགལ་བའི་གཏན་ཚིགས་ལ་ཡང་རྗེས་འགྲོ་གྲུབ་བོ་སྙམ་ནས་རྟགས་ཡང་དག་ཏུ་ལོག་པར་རྟོག་པ་ཡོད་པས་དེ་སྤང་བའི་ཕྱིར་རམ། དེ་འགའ་ཞིག་ཏུ་སྡེབ་སྦྱོར་བཟང་བའི་ངོར་བྱས་ནས་བཏགས་པ་ཡིན་པའི་ཕྱིར། གཉིས་པ་ནི། ཆོས་ཅན་ལ་ཕྱོགས་ཞེས་བཏགས་པ་ལ་ཡང་དགོས་པ་ཡོད་དེ། ཆོས་ཅན་གྱི་ཆོས་ཞེས་བརྗོད་ན་ཆོས་ཅན་ལ་གསུམ་ཡོད་པས་མི་མཐུན་པ་དཔེའི་ཆོས་ཅན་ལ་ཡོད་པ་མིག་ཤེས་ཀྱི་གཟུང་བྱ་ཡང་སྒྲ་མི་རྟག་པར་སྒྲུབ་པའི་ཚུལ་དང་པོ་ཡིན་ནམ་སྙམ་པའི་འཁྲུལ་གཞི་ཡོད་ལ། ཆོས་ཅན་གྱི་ཆོས་སུ་གྲུབ་པ་ཕྱོགས་ཆོས་ཡིན་ལ་ཆོས་ཅན་ནི་རྩོད་གཞི་ལ་ཟེར་རོ་ཞེས་མཐའ་རྣམས་བཀག་ན་ཡུན་རིང་འགོར་ཞིང་། ཤེས་འདོད་ཆོས་ཅན་གྱི་ཆོས་ཞེས་དངོས་མིང་བརྗོད་ན་ཚུལ་གསུམ་བརྗོད་པས་ཡི་གེ་མི་མཉམ་པས་མི་བདེ་ཞིང་། ཕྱོགས་ཆོས་མཐུན་ཕྱོགས་ཡོད་མེད་དང་། །ཞེས་སོགས་ཀྱི་སྡེབ་སྦྱོར་ཉམས་པར་འགྱུར་བའི་ཕྱིར་རོ། །དེས་ན་དེ་ལྟ་བུའི་སྐྱོན་མི་འབྱུང་ཞིང་ཚུལ་དང་པོ་བདེ་བླག་ཏུ་རྟོགས་པའི་ཕྱིར་དུ་ཆོས་ཅན་ལ་ཕྱོགས་ཞེས་གསུངས་སོ། །གསུམ་པ་ནི། ཕྱོགས་དང་ཆོས་ཅན་གཉིས་ལོག་རྟོག་སྐྱེ་མི་སྐྱེ་མཚུངས་དེ། ཕྱོགས་ཀྱི་སྒྲ་འཇུག་པའི་ཡུལ་གསུམ་ཡོད་པས་གསུམ་པོ་ལ་རྟགས་ཡོད་པའང་ཚུལ་དང་པོ་ཡིན་ནམ་སྙམ་པའི་ལོག་རྟོག་སྐྱེ་ཞིང་། དེ་སྐྱེས་ན་མིག་གི་གཟུང་བྱས་སྒྲ་མི་རྟག་པར་སྒྲུབ་པའང་རྟགས་ཕྱོགས་ཆོས་རྗེས་སུ་དཔག་བྱ་ལ་ཡོད་པའི་ཚུལ་དང་པོ་དང་རྗེས་སུ་འགྲོ་ལྡོག་གཉིས་ཀ་ཚང་བས་རྟགས་ཡང་དག་ཡིན་ནམ་སྙམ་པའི་ལོག་རྟོག་སྔ་མ་བཞིན་དུ་སྐྱེའོ་ཞེ་ན། མི་མཚུངས་ཏེ་ཕྱོགས་ཀྱི་སྒྲ་སྤྱི་སྒྲ་ཡིན་པ་བདེན་ཡང་། གྲགས་པ་དང་མ་གྲགས་པའི་སྒོ་ནས་ཁྱད་པར་ཡོད་དེ། ཕྱོགས་ཀྱི་ཆོས་ཞེས་པའི་ཚིག་དང་འབྲེལ་བའི་ཕྱོགས་སྒྲ་སྤྱི་ལ་མི་འཇུག་པར་བྱེ་བྲག་རྩོད་གཞི་ཉིད་ལ་འཇུག་པ་ཡིན་པའི་ཕྱིར། དཔེར་ན་ལག་པ་མི་སོགས་གཞན་ལའང་ཡོད་ཀྱང་ལྡན་པ་ཞེས་པའི་ཚིག་དང་འབྲེལ་པ་ན་ལག་ལྡན་གྱི་སྒྲ་མི་སོགས་ལ་མི་འཇུག་པར་གླང་ཆེན་ཉིད་ལ་འཇུག་པ་བཞིན་ནོ། །ཡང་ཆོས་ཅན་གྱི་སྒྲ་སྤྱི་སྒྲ་ཡིན་ཡང་ཆོས་ཞེས་པའི་ཚིག་དང་འབྲེལ་ཡང་ཆོས་ཅན་གྱི་སྒྲས་ཚུལ་དང་པོ་ཉིད་ངེས་པར་མི་ནུས་ཏེ། དཔེར་ན་མགོ་བོ་ཞེས་པའི་སྤྱི་སྒྲ་དེ་ལྡན་པའི་ཚིག་དང་འབྲེལ་ཡང་བྱེ་བྲག་གླང་ཆེན་ཉིད་ལ་མི་འཇུག་པར་མགོ་ཡོད་ཐམས་ཅད་ལ་འཇུག་པ་བཞིན་ཏེ། ཐམས་ཅད་ལ་དེ་ལྟར་གྲགས་པའི་ཕྱིར། གསུམ་པ་ནི། ཆོས་དང་ཆོས་ཅན་ནི་བསྒྲུབ་བྱ་ཉིད་མིན་ཏེ། དེའི་མཚན་ཉིད་གྲུབ་བསལ་མེད་ལ་དཔག་བྱར་བཟུང་བ་ཡིན་ལ་དེ་མེད་པའི་ཕྱིར་རོ། །གཉིས་པ་ནི། ཚད་མས་གྲུབ་བསལ་མེད་ལ་བསྒྲུབ་བྱའི་ཆོས་ཀྱི་དཔག་གཞིར་བཟུང་བ་ནི་ཤེས་འདོད་ཆོས་ཅན་གྱི་མཚན་ཉིད་ཡིན་ནོ། །བྱེ་བྲག་ཏུ་རང་དོན་གྱི་ཤེས་འདོད་ནི་རྒོལ་བས་བཟུང་བ་ཡིན་ཞིང་། གཞན་དོན་ནི་ཕྱིར་རྒོལ་གྱིས་བཟུང་བ་ཡིན་ནོ། །ཤེས་འདོད་དེ་ལ་རྟགས་མངོན་རྗེས་གང་རུང་གིས་འགོད་ཚུལ་ལྟར་གྲུབ་པ་ནི་ཕྱོགས་ཆོས་ཀྱི་མཚན་ཉིད་ཡིན་ནོ། །གཉིས་པ་ལ། དགག་གཞག་སྤང་གསུམ་མོ། །དང་པོ་ལ་གསུམ་ལས། དང་པོ་ཕྱོགས་སྔ་མ་བརྗོད་ན། ཤཱནྟིའི་རྗེས་འབྲང་ལོ་ཕྱ་ཙ་ནི། བསྒྲུབ་བྱའི་ཆོས་དང་ལྡན་པ་ལ་མཐུན་ཕྱོགས་དེ་དང་མི་ལྡན་པ་ལ་མི་མཐུན་ཕྱོགས་ཡིན་ཞེས་ཟེར་ཞིང་ཕྱོགས་གཉིས་པོ་དངོས་འགལ་དུ་བསམས་ནས། ཤེས་བྱ་ཐམས་ཅད་ཕྱོགས་གཉིས་སུ་རྫས་སམ་ལྡོག་པ་ལ་ཁ་ཚོན་ཆོད། དང་པོ་ལྟར་ན་སྟོང་ཉིད་མེད་དགག་དུ་སྒྲུབ་པའི་ཚེ། བུམ་པའི་རྫས་མཐུན་ཕྱོགས་ཡིན་ན་བུམ་པའི་བྱས་སོགས་ཀྱང་མེད་དགག་དུ་འགྱུར་ལ། མི་མཐུན་ཕྱོགས་ཡིན་ན་བུམ་པའི་བདེན་དངོས་ཀྱིས་སྟོང་པའང་མེད་དགག་གི་ཐ་སྙད་དང་མི་ལྡན་པར་འགྱུར་བས་གཉིས་ཀ་མི་འཐད་དོ། །གལ་ཏེ་བུམ་པའི་རྫས་ཕུང་པོ་གསུམ་པ་ཡིན་ན་གང་རུང་དུ་ཁ་ཚོན་ཆོད་པ་འགལ་ལོ། །ཡང་ལྡོག་པ་ལ་ཆོད་ན། བྱས་པས་མི་རྟག་པ་སྒྲུབ་པའི་ཚེ་ཤེས་བྱ་ཙམ་མཐུན་ཕྱོགས་ཡིན་ན་རྟག་པ་ཤེས་བྱ་ལ་མི་སྲིད། མི་མཐུན་ཕྱོགས་ཡིན་ན་མི་རྟག་པ་མི་སྲིད་པར་འགྱུར་རོ། །ཕུང་པོ་གསུམ་པ་ཡིན་ན་ལྡོག་པ་ལ་ཁ་ཚོན་ཆོད་པ་ཉམས་སོ། །ཕུང་གསུམ་བྱུང་བར་དོགས་པ་ལ་ཚད་མའི་ཡུལ་མི་ཤེས་པའི་བོད་འགའ་ཞིག་མེ་དང་མི་རྟག་པ་སོགས་རྫས་ལ་བརྟེན་པའི་ཆོས་སྒྲུབ་པ་ན་རྫས་ལ་ཁ་ཚོན་ཆོད་དོ། །ལྡོག་པ་ལ་ཕུང་གསུམ་སྲིད་ཀྱང་སྐྱོན་མེད་དེ་ལྡོག་པ་ལ་དགག་སྒྲུབ་མི་ཕྱེད་པའི་ཕྱིར། གཏན་ཚིགས་དང་མེད་དགག་གི་ཐ་སྙད་སོགས་ལྡོག་པ་ལ་བརྟེན་པའི་ཆོས་སྒྲུབ་པའི་ཚེ་ལྡོག་པ་ལ་ཁ་ཚོན་ཆོད་དོ། །རྫས་ལ་ཕུང་གསུམ་སྲིད་ཀྱང་སྐྱོན་མེད་དེ་རྫས་ལ་དགག་སྒྲུབ་མི་བྱེད་པའི་ཕྱིར་ཞེས་རྣམ་པར་ཕྱེ་སྟེ་སྨྲ་ལ། སྒྲུབ་ཚུལ་ཡང་རྫས་ཀྱི་ཆོས་སྒྲུབ་པ་ན་ངོ་བོ་གཅིག་ཏུ་སྒྲུབ་པ་དང་ཐ་དད་ལྡན་པར་སྒྲུབ་པ་གཉིས་ཡོད། ལྡོག་ཆོས་ནི་རང་ལྡོག་ལ་བརྟེན་པ་ཙམ་སྒྲུབས་ཏེ་གསུམ་ཞེས་ཟེར་རོ། །གཉིས་པ་དེ་དགག་པ་ལ་ཕྱོགས་གཉིས་སུ་ཁ་ཚོན་ཆོད་པ་མི་འཐད། རྫས་ལྡོག་ཕྱེ་སྟེ་སྒྲུབ་པ་མི་འཐད། བྱེ་བྲག་ཏུ་རང་ལྡོག་ལ་བརྟེན་ཏེ་སྒྲུབ་པ་མི་འཐད་པའོ། །དང་པོ་ལ་གཉིས་ལས་ཕྱོགས་གཉིས་སུ་ཁ་ཚོན་མི་ཆོད་པ་ནི། རྫས་དང་ལྡོག་པ་སོ་སོར་ཇི་ལྟར་ཕྱེ་ན་ཡང་ཕྱོགས་གཉིས་ཉིད་དུ་ངེས་མི་ནུས་ཏེ། ཕྱོགས་གཉིས་ཀ་ལ་འཇུག་པའི་རྫས་ལྡོག་ཡང་མཁས་པ་རྣམས་ལ་གྲུབ་པར་མཐོང་བའི་ཕྱིར། འདི་ལྟར་རྫས་ལ་བརྟེན་པའི་ཆོས་སྒྲུབ་པ་ན་རྫས་ལ་ཁ་ཚོན་ཆོད་ན། ལ་མེ་ལྡན་དུ་སྒྲུབ་པ་ལ་སྐྱ་རྫས་རྟགས་སུ་བཀོད་པའི་ཚེ་སྐྱ་རྫས་མཐུན་ཕྱོགས་ཡིན་ན་རླངས་པའང་མེ་ཡོད་དུ་འགྱུར་ལ། མི་མཐུན་ཕྱོགས་ཡིན་ན་དུ་བ་ཡང་མེ་མེད་དུ་འགྱུར་རོ། །སྐྱ་རྫས་ལ་གཉིས་ཀ་སྲིད་ན་གཉིས་སུ་ཁ་ཚོན་ཆོད་པ་ཉམས་སོ། །དེ་བཞིན་དུ་དུང་སྒྲ་རྩོལ་བྱུང་དུ་སྒྲུབ་པ་ལ་དོན་བྱེད་ནུས་པ་རྟགས་སུ་བཀོད་པའི་ཚེ། དོན་བྱེད་ནུས་པ་མཐུན་ཕྱོགས་ཡིན་ན། གློག་སོགས་ཀྱང་རྩོལ་བྱུང་དང་ལྡན་པར་འགྱུར་ལ། མི་མཐུན་ཕྱོགས་ཡིན་ན་བུམ་སོགས་ཀྱང་རྩོལ་བྱུང་མིན་པར་འགྱུར་རོ། །གཉིས་ཀ་ཡིན་ན་གཉིས་སུ་ཁ་ཚོན་ཆོད་པ་ཉམས་སོ། །ཡང་ལྡོག་པ་ལ་ཁ་ཚོན་ཆོད་ན་བྱས་པ་གཏན་ཚིགས་སུ་སྒྲུབ་པ་ལ་ཚུལ་གསུམ་ཚང་བ་བཀོད་པའི་ཚེ། ཤེས་བྱ་ཙམ་མཐུན་ཕྱོགས་ཡིན་ན། ཤེས་བྱ་ཙམ་དེ་སྒྲུབ་ཀྱི་རྟགས་ཡང་དག་ཏུ་འགྱུར་ལ། མི་མཐུན་ཕྱོགས་ཡིན་ན་ཤེས་བྱས་ཚུལ་གསུམ་ལ་ཁྱབ་ན་འགལ་རྟགས་དང་། མ་ཁྱབ་ན་ཚུལ་གསུམ་ཤེས་བྱ་མིན་པར་འགྱུར་རོ། །གཉིས་པ་དཔྱད་ན་རྣམ་གཞག་འཇིག་པ་ལ་བརྟགས་ན་མི་འཐད་པ། ཧ་ཅང་ཐལ་བ། རྣམ་གཞག་འགལ་བ། སློབ་དཔོན་གྱི་དགོངས་པ་མིན་པའོ། །དང་པོ་ནི། དོན་ལ་དགག་སྒྲུབ་བྱེད་ན་ནི་རྗེས་དཔག་ཚད་མའི་ཡུལ་གྱི་དབྱེ་བ་མི་ཤེས་པར་འགྱུར་ཏེ། ཕྱི་རོལ་བརྟེན་མིན་སྒྲ་དོན་ལ། །ཞེས་གསུངས་པའི་ཕྱིར། བློ་ངོར་དགག་སྒྲུབ་བྱེད་ན་ནི་ཡོད་པར་ངེས་པའི་མཐུན་ཕྱོགས། མེད་པར་ངེས་པའི་མི་མཐུན་ཕྱོགས་གཉིས་ཀར་མ་ངེས་པའི་ཕྱོགས་རྐྱང་པ་སྟེ་གསུམ་དུ་འགྱུར་རོ། །གཉིས་པ་ནི། ལྟོས་གཞི་གསུམ་གྱི་དང་པོ་མེད་པར་འགྱུར་ཏེ། ཤེས་འདོད་ཆོས་ཅན་ནི་གཉིས་ལས་གཞན་པའི་ཕྱོགས་སུ་མི་འདོད་པའི་ཕྱིར། འདོད་ན། ལྟོས་གཞི་གསུམ་གྱི་དང་པོ་མི་འདོད་པའི་ལུགས་འདི་ལ་ཕྱོགས་ཆོས་ཀྱི་མཚན་ཉིད་བཞག་དཀའ་སྟེ། ཕྱོགས་ཆོས་ཀྱི་མཚན་ཉིད་ཅི་ཡིན་དྲིས་པ་ན། ཁྱེད་ལྟར་ན་ཕྱོགས་མེད་པས་ཕྱོགས་ཆོས་ཞེས་མི་བརྗོད་ཀྱི། ཚུལ་དང་པོའི་མཚན་ཉིད་ཡང་དག་གི་སྐབས་སུ་ཤེས་འདོད་མཐུན་ཕྱོགས་ལ་ཇི་ལྟར་དགོད་བྱ་ལྟར་གྲུབ་པ་དང་། འགལ་བའི་སྐབས་སུ་ཤེས་འདོད་མི་མཐུན་ཕྱོགས་ལ་ཇི་ལྟར་འགོད་བྱ་ལྟར་གྲུབ་པ་ཞེས་བརྗོད་དགོས་པས་སོ། །ཡང་ལྟོས་གཞི་གསུམ་གྱི་དང་པོ་ཕྱོགས་གཉིས་པོ་གང་རུང་དུ་ངེས་ན་ལྟོས་གཞི་གཞན་གཉིས་ཀྱི་ནང་ནས་མཐུན་ཕྱོགས་ལ་ཡོད་པར་ངེས་པ་རྗེས་འགྲོ་ཞེས་ཀྱང་བརྗོད་པར་རབ་ཏུ་དཀའ་བ་ཡིན་ཏེ། རྩོད་གཞི་ཡང་མཐུན་ཕྱོགས་ཡིན་པས། མཐུན་དཔེའི་མི་མཐུན་ཕྱོགས་ལ་ཡོད་པ་རྗེས་འགྲོ་ཞེས་བརྗོད་དགོས་པའི་ཕྱིར་དང་། དེ་གཉིས་ཀྱི་ནང་ནས་མི་མཐུན་ཕྱོགས་ལ་མེད་པར་ངེས་པ་ལྡོག་པ་ཞེས་ཀྱང་བརྗོད་པར་རབ་ཏུ་དཀའ་བ་ཡིན་ཏེ། འགལ་བའི་རྩོད་གཞི་མི་མཐུན་ཕྱོགས་ཡིན་པས་མི་མཐུན་དཔེའི་མི་མཐུན་ཕྱོགས་ལ་མེད་པ་ལྡོག་པ་ཞེས་བརྗོད་དགོས་པའི་ཕྱིར། ཡང་བྱས་པ་ལྟ་བུ་གཅིག་ཉིད་ལ་ཤེས་འདོད་ལ་དགོད་བྱ་ལྟར་གྲུབ་པས་ཕྱོགས་ཆོས་དང་ནི། ཡང་དག་གི་སྐབས་སུ་སྒྲུབ་ཆོས་དང་ལྡན་པས་མཐུན་ཕྱོགས་དང་། འགལ་བའི་སྐབས་སུ་སྒྲུབ་ཆོས་དང་མི་ལྡན་པས་མི་མཐུན་ཕྱོགས་ཞེས་གཉིས་པོ་ལྡོག་པས་འབྱེད་ན་ནི། མ་ངེས་པའི་གཏན་ཚིགས་ག་ལ་སྲིད་དེ། རྟགས་ཀུན་ཕྱོགས་གཉིས་པོ་གང་རུང་གཅིག་ཏུ་ལྷུང་བར་འགྱུར་བས་སོ། །ཡང་བསྒྲུབ་བྱའི་ཆོས་མི་མཐུན་ཕྱོགས་སུ་འགྱུར་ཏེ། རང་ཉིད་རང་དང་ལྡན་པ་མི་སྲིད་པའི་ཕྱིར་རོ། །དེ་ལ་ཁ་ཅིག ཚོགས་དོན་མཐུན་ཕྱོགས་ཉིད་ཡིན་ན། །དེ་ཡི་ཡན་ལག་དེ་ལྡན་ཉིད། །ཅེས་ཟེར་བ་ལྟར་ཚོགས་དོན་མཐུན་ཕྱོགས་ཡིན་པས་དེའི་ཡན་ལག་བསྒྲུབ་བྱའི་ཆོས་ཀྱང་མཐུན་ཕྱོགས་སུ་འདུའོ་ཞེ་ན། དེ་ལྟར་ན་དབྱུག་པ་གྲུབ་པས་དབྱུག་པ་ཅན་འགྲུབ་པར་འགྱུར་ཏེ། རྒྱུ་མཚན་མཚུངས་པའི་ཕྱིར་རོ། །གསུམ་པ་ནི། ཤེས་བྱ་ཐམས་ཅད་ཕྱོགས་གཉིས་པོ་གང་རུང་དུ་ངེས་པ་དང་། ཚུལ་དང་པོའི་ལྟོས་གཞི་ཕྱོགས་ཞེས་སོགས་ལྟོས་གཞི་གསུམ་དུ་འདོད་པ་འགལ་ལོ། །ཡང་དག་པར་ན་ལྟོས་གཞི་གཉིས་སུ་ངེས་པར་འདོད་ན་ནི། དེ་ལ་ལྟོས་པའི་རྟགས་ཀྱི་ཚུལ་ཀྱང་ཡང་དག་ལ་མཐུན་ཕྱོགས་ལ་ཡོད་པ་ཚུལ་དང་པོ། མི་མཐུན་ཕྱོགས་ལ་ལྡོག་པ་ཚུལ་གཉིས་པ་ཞེས་སོགས་གཉིས་སུ་ངེས་པར་འགྱུར་ཏེ། ཤེས་འདོད་ཕྱོགས་གཉིས་སུ་ངེས་པས་རྟགས་ཕྱོགས་ཀྱི་ཆོས་སུ་གྲུབ་པ་ཚུལ་དང་པོ་ཞེས་བརྗོད་མི་དགོས་པའི་ཕྱིར། བཞི་པ་ནི། ཤེས་བྱ་ཐམས་ཅད་མཐུན་ཕྱོགས་དང་མི་མཐུན་ཕྱོགས་གཉིས་སུ་ངེས་པ་སློབ་དཔོན་མི་བཞེད་དེ། རྣམ་ངེས་ལས། གཉིས་ཀར་ཡང་སྲིད་པ་མི་འགལ་ན། དེ་དེ་ལྟར་འགྱུར་གྱི་དེ་ལྟར་མིན་ན་ནི་དེ་སྒྲ་ལ་མ་གྲུབ་པ་ཉིད་དོ། །འདི་ལྟར་རྣམ་པ་དེ་ལྟ་བུའི་སྒྲ་དེ་ནི་ཕྱོགས་ཉིད་ཡིན་གྱི། ཕྱོགས་དང་མཐུན་པའི་ཕྱོགས་དག་ལས་གང་ཡང་རུང་བ་ནི་མིན་ཏེ། རྣམ་པར་བརྟགས་པ་དང་གཅིག་ཏུ་སོ་སོར་ངེས་པ་འགལ་བའི་ཕྱིར་རོ་ཞེས་གསུངས་པ་དང་འགལ་ལོ། །གཉིས་པ་ནི། རྫས་ཆོས་དང་ལྡོག་ཆོས་སོ་སོར་ཕྱེ་བ་ཡི་རྗེས་སུ་འཇུག་ན་འཇིག་རྟེན་གྱི་ཐ་སྙད་ཐམས་ཅད་འཇིག་སྟེ། དོན་རང་མཚན་རྟོག་པའི་དངོས་ཡུལ་མིན་ལ་རྟོག་པའི་དངོས་ཡུལ་གཞན་སེལ་ལ་ཐོབ་པ་མེད་པས་སོ། །གསུམ་པ་ནི། རང་ལྡོག་ལ་བརྟེན་ནས་སྒྲུབ་ཞེས་བྱ་བའི་ཚུལ་འདི་ཅི་ཞེས་བརྟགས་ན་སྙིང་པོ་མེད་དེ། ངོ་བོ་དབྱེར་མེད་དམ་ཐ་དད་ལྡན་པའམ་དེ་གཉིས་ཀ་མིན་པར་བརྟེན་པ་གཅིག་ཡིན། དང་པོ་གཉིས་ནི་རྫས་ཀྱི་རང་བཞིན་དང་འབྲས་བུ་སྒྲུབ་པ་དང་ཁྱད་པར་མེད་ཅིང་། གསུམ་པ་མི་སྲིད་དེ་དངོས་པོ་ལ་གཅིག་དང་ཐ་དད་གཉིས་ལས་མི་འདའ་ལ། དངོས་མེད་ཡིན་ན་རྟེན་པར་ཡང་མི་འཐད་དེ། རྟག་ལ་ཕན་འདོགས་མེད་པའི་ཕྱིར། །རྟེན་མིན། །ཞེས་སོགས་གསུངས་སོ། །གསུམ་པ་ནི། ཕྱོགས་གཉིས་པོ་དངོས་འགལ་མིན་པའི་ཕྱིར་ན་དགག་བྱ་ཁེགས་པས་བསྒྲུབ་བྱ་འགྲུབ་པ་དང་། བསྒྲུབ་བྱ་གྲུབ་པས་དགག་བྱ་ཁེགས་པའི་དགག་སྒྲུབ་ཀྱི་རྣམ་གཞག་འཇིག་གོ་ཞེ་ན། སྐྱོན་མེད་དེ་དགག་བྱ་ཁེགས་པ་དང་བསྒྲུབ་བྱ་འགྲུབ་པའི་གནད་ནི་ཕྱོགས་གཉིས་ཀྱིས་བྱེད་པས་མིན་གྱི་ཚད་མའི་སྟོབས་ལས་བྱུང་བའི་འགལ་འབྲེལ་ངེས་པས་འགྲུབ་པའི་ཕྱིར་རོ། །གཉིས་པ་རང་ལུགས་ལ། གང་ལྟོས་པའི་རྗེས་སུ་འགྲོ་ལྡོག གང་ལ་ལྟོས་པའི་ལྟོས་གཞི་ངོས་བཟུང་བའོ། །དང་པོ་ནི། རྟགས་དང་བསྒྲུབ་བྱའི་ཆོས་ཀྱི་འབྲེལ་པ་ཚད་མས་ངེས་པའི་སྟོབས་ཀྱི་རྟགས་མཐུན་ཕྱོགས་ཁོ་ན་ལ་ཡོད་པར་ངེས་པ་རྗེས་འགྲོ་དང་། དེའི་སྟོབས་ཀྱིས་རྟགས་མི་མཐུན་ཕྱོགས་ལ་མེད་པར་ངེས་པ་ལྡོག་པའི་ཚུལ་ལོ། །དེ་དག་ཀྱང་དང་པོ་ཉིད་ནས་ཤེས་འདོད་ཀྱི་སྟེང་དུ་ངེས་མི་ནུས་པས་དཔེའི་སྟེང་དུ་ངེས་པར་བྱེད་དོ། །གཉིས་པ་ལ། མཐུན་ཕྱོགས་མི་མཐུན་ཕྱོགས་དཔྱད་པ། རྟགས་ཀྱི་དགག་སྒྲུབ་ཀྱི་ཡུལ་ངོས་བཟུང་བ། གཞན་སེལ་གྱི་དགག་སྒྲུབ་ཀྱི་རབ་ཏུ་དབྱེ་བའོ། །དང་པོ་ལ་གསུམ་ལས། དང་པོ་མཚན་ཉིད་ནི། ཕྱོགས་དང་བསྒྲུབ་བྱའི་ཆོས་ཀྱི་སྤྱི་ཡིས་དོན་མཚུངས་པ་དང་མི་མཚུངས་པ་ནི་རིམ་བཞིན་མཐུན་ཕྱོགས་དང་མི་མཐུན་ཕྱོགས་གཉིས་ཀྱི་མཚན་ཉིད་ཡིན་ནོ། །གཉིས་པ་མཐུན་ཡུལ་ངོས་བཟུང་བ་ནི། འོ་ན་མཐུན་ཡུལ་གྱི་ཕྱོགས་དེ་བརྟགས་པ་བ་ཤེས་འདོད་དང་མཐུན་པ་ཡིན་ནམ། མཚན་ཉིད་པ་ཚོགས་དོན་ནམ། གཉིས་ཀའི་སྒྲ་དོན་ཡིན་ཞེ་ན། མཐུན་ཡུལ་གྱི་ཕྱོགས་ཀྱང་བཏགས་པ་བ་ཤེས་འདོད་ཆོས་ཅན་དེའི་སྒྲ་དོན་ལ་རང་མཚན་དུ་འཁྲུལ་བའི་གཞན་སེལ་ཉིད་ཡིན་གྱི་ཕྱི་མ་གཉིས་པོ་མིན་ནོ། །དེ་ཡང་སོང་ཚོད་ཀྱི་དབང་དུ་བྱས་སོ། །འདི་ལ་གཞན་གྱིས་ཁྱབ་པ་གྲུབ་དུས་སུ་བསྒྲུབ་བྱ་གྲུབ་པར་འགྱུར་ཏེ། རྟགས་མཐུན་ཕྱོགས་ལ་ཡོད་པའི་རྗེས་འགྲོའི་ཁྱབ་པ་ངེས་པ་ལ་ཡོད་པ་མཐུན་ཕྱོགས་ངེས་པ་ལ་ལྟོས། དེ་གྲུབ་པ་ལ་ཕྱོགས་བཏགས་པ་བ་དང་། བསྒྲུབ་བྱའི་ཆོས་ཡོད་དུ་མཐུན་པ་ལ་ལྟོས། དེའང་བསྒྲུབ་བྱའི་ཆོས་ཡོད་གྲུབ་པ་ལ་ལྟོས་པའི་ཕྱིར་ཞེས་པ་དང་། ཐུན་མོང་གི་མ་ངེས་པ་འགལ་བར་ཐལ་བ་སྤང་བ་ནི། གཞལ་བྱའི་རྟགས་ཀྱིས་སྒྲ་མི་རྟག་པར་སྒྲུབ་པའི་ཚེ་འགལ་རྟགས་སུ་འགྱུར་ཏེ། སྒྲ་དང་རྟག་པར་ཆོས་མཐུན་པ་མི་སྲིད་པའི་ཕྱིར་དང་། མི་མཐུན་ཕྱོགས་ལ་འཇུག་པའི་ཕྱིར་ཞེས་དང་། ཡང་དག་གི་རྩོད་གཞི་མི་མཐུན་ཕྱོགས་སུ་ཐལ་བ་སྤང་བ་ནི་དེར་འགྱུར་ཏེ། རང་ཉིད་དང་རང་མི་འདྲ་བའི་ཕྱིར། འདོད་ན། དེ་ལ་རྟགས་ཞུགས་པས་ལྡོག་པ་མ་གྲུབ་པར་འགྱུར་ཞེས་པའི་ཀླན་ཀ་གསུམ་ལས་དང་པོས་གནོད་པ་མེད་དེ། དེ་ནི་བསྒྲུབ་བྱའི་ཆོས་ལྡན་ལའང་མཚུངས་པའི་ཕྱིར་དང་། ཚང་མང་དུ་མེ་དུ་བའི་འབྲེལ་པ་ངེས་ནས་ལ་ལའང་དུ་བས་མེ་གྲུབ་པ་ན་མཐུན་དཔེ་མཐུན་ཕྱོགས་ཀྱི་ཐ་སྙད་དུ་འཇོག་གོ །དེས་ན་མེ་དུ་འབྲེལ་པ་གྲུབ་པའི་ཚང་མང་འདི་དང་ལ་གཉིས་མེ་ཡོད་དུ་མཐུན་ནོ་ཞེས་སྔ་རྒོལ་བསྒྲུབ་ནས་ཕྱི་རྒོལ་ལ་སྟོན་པའི་ཕྱིར་རོ། །གཉིས་པས་ཀྱང་གནོད་པ་མེད་དེ། སྒྲ་རྟག་པ་མེད་ཀྱང་དེའི་གཞན་སེལ་སྲིད་པས་དེ་དང་མཐུན་པ་ནམ་མཁའ་དང་། མི་མཐུན་པ་བུམ་པ་གཉིས་ཀ་ལ་གཞལ་བྱས་ཁྱབ་པའི་ཕྱིར་ན་མ་ངེས་པ་ཉིད་ཡིན་ནོ། །གསུམ་པས་ཀྱང་གནོད་པ་མེད་དེ། རྩོད་གཞི་མཐུན་ཡུལ་ཡིན་པས་མི་མཐུན་ཕྱོགས་སུ་ག་ལ་འགྱུར། སློབ་དཔོན་གྱིས། མཐུན་ཕྱོགས་ཉིད་ལ་ཡོད་པའི་ངེས་བཟུང་གིས་མི་མཐུན་ཕྱོགས་ལ་ཡོད་པ་འགོག་གི ཆོས་ཅན་ལ་ཡོད་པ་མི་འགོག་པར་གསུངས་པའི་གཞུང་གི་དགོངས་པའང་འདི་ཉིད་ཡིན་ནོ། །གཉིས་པ་ནི། ཆོས་དུ་མ་གཅིག་ཏུ་འདུས་པའི་རྫས་མུ་སྟེགས་ལ་གྲགས་པ་མི་སྲིད་པའི་ཕྱིར་རྫས་ནི་དངོས་པོ་ལས་གཞན་མིན་པས་རྫས་ལ་དགག་སྒྲུབ་དངོས་སུ་བྱར་མེད་གཞན་སེལ་ལས་གཞན་པའི་ལྡོག་པ་མེད་པས་ལྡོག་པ་རྐྱང་པ་ལ་དགག་སྒྲུབ་བྱས་ཀྱང་མི་ཕན་པའི་ཕྱིར་ན། དེས་ན་རྫས་དང་ལྡོག་པ་གཅིག་ཉིད་དུ་འཁྲུལ་པའི་ཆ་ཉིད་ལ་དགག་སྒྲུབ་བྱེད་དེ། དེ་ལ་དགག་སྒྲུབ་བྱས་པས་རང་མཚན་གོ་བའི་འཐད་པ་གཞན་སེལ་བརྟག་པར་བཤད་ཟིན་ཏོ། །གསུམ་པ་ནི། སྒྲ་དོན་གསུམ་གྱིས་ཆོས་དོན་དང་ཐ་སྙད་གཉིས་སྒྲུབ་པ་ལ་ཕྱེ་ན་དོན་ཡོད་པ་དང་མེད་པ་གཉིས། ཐ་སྙད་ཡོད་པ་དང་མེད་པ་གཉིས་སྒྲུབ་པ་སྟེ་གཉིས་གཉིས་བཞིའོ། །སྒྲ་དོན་གསུམ་གང་ཞེ་ན། ཡོད་པའི་ཆོས་བུམ་པ་ལ་སོགས་པ་དང་། མེད་པའི་ཆོས་རི་བོང་རྭ་ལ་སོགས་པ་དང་། གཉིས་ཀའི་ཆོས་ཤེས་བྱ་ལ་སོགས་པ་ལ་བརྟེན་ནས་བཞག་པའི་སྒྲ་དོན་ནོ། །ཇི་སྐད་དུ། ཐོགས་མེད་བག་ཆགས་ལས་བྱུང་བའི། །ཞེས་གསུངས་པ་ལྟར་རོ། །གསུམ་པ་རྩོད་སྤང་ལ་རིགས་པས་མི་འཐད་པ་སྤང་བ། ལུང་དང་འགལ་བ་སྤང་བའོ། །དང་པོ་ལ་ཕྱོགས་གཉིས་སུ་དཔྱད་ན་མི་འཐད་པ་སྤང་བ། རྟགས་དང་དགག་བྱ་ལ་བརྟགས་ན་མི་འཐད་པ་སྤང་བའོ། །དང་པོ་ནི། རྫས་ལྡོག་མ་ཕྱེ་བར་སྒྲུབ་པ་ལྟར་ན། དུ་བའི་རྟགས་ལས་མེ་སྒྲུབ་པའི་ཚེ་སྐྱ་བོའི་རྫས་དང་། ཚུལ་གསུམ་ཚང་བའི་རྟགས་ལས་བྱས་པ་རྟགས་སུ་སྒྲུབ་པའི་ཚེ་ཤེས་བྱ་ཙམ་མཐུན་ཕྱོགས་མི་མཐུན་ཕྱོགས་གཉིས་པོ་གང་དུ་གཏོགས་དཔྱད་ན་ཁྱེད་ཀྱི་ལུགས་ཚད་མས་འཇིག་ཅེ་ན། ངེད་ཀྱི་ལུགས་འཐད་དེ། དུ་བའི་གཞན་སེལ་སྐྱ་བོའི་ལོག་པ་དང་ལྡོག་པ་གཉིས་ལ་འབྲེལ། ཚུལ་གསུམ་གྱི་གཞན་སེལ་ཤེས་བྱའི་ལོག་པ་དང་ལྡོག་པ་གཉིས་ལ་འབྲེལ་བའི་ཕྱིར། དེའི་དོན་བློ་ངོར་ཕུང་པོ་གསུམ་པ་མི་སྐྱོན་པས་དུ་བས་མེ་སྒྲུབ་པ་ན་དུ་བའི་སྐྱ་བོ་མཐུན་ཕྱོགས་དུ་མིན་གྱི་སྐྱ་བོ་མི་མཐུན་ཕྱོགས་གཉིས་ཀས་ཁྱད་པར་དུ་མ་བྱས་པའི་སྐྱ་བོའི་རྫས་ཙམ་གྱི་ལྡོག་པ་ནི་གཉིས་ཀའི་ཆོས་སོ། །དེ་བཞིན་དུ་གཏན་ཚིགས་སུ་སྒྲུབ་པ་ལའང་ཚུལ་གསུམ་ཚང་བའི་ཤེས་བྱ་མཐུན་ཕྱོགས། མ་ཚང་བའི་ཤེས་བྱ་མི་མཐུན་ཕྱོགས། གཉིས་ཀར་མ་ངེས་པའི་ཤེས་བྱ་ཙམ་གཉིས་ཀ་ཡིན་ནོ། །གཉིས་པ་ནི། རྟགས་དགག་བྱའི་ཆོས་ལྡན་ལས་ལྡོག་ན་སྟོང་ཉིད་མེད་དགག་ཏུ་སྒྲུབ་པ་ལ་དགག་བྱ་བཀག་ནས་ཆོས་གཞན་མི་འཕེན་པ་བཀོད་པ་ན། རྟགས་འདི་བསྒྲུབ་བྱའི་ཆོས་མེད་དགག་གི་ཐ་སྙད་ལས་ལྡོག་པར་ཐལ། ཆོས་མེད་དགག་གི་ཐ་སྙད་དེ་ཉིད་དགག་བྱའི་ཆོས་མེད་དགག་གི་ཐ་སྙད་ཀྱིས་སྟོང་པ་དང་ལྡན་པའི་ཕྱིར། མེད་དགག་གི་ཐ་སྙད་མེད་དགག་མིན་པའི་ཕྱིར། འདོད་ན་རྗེས་འགྲོ་མེད་དེ། རྟགས་གྲུབ་པའི་ཆོས་ལ་མ་ཞུགས་པའི་ཕྱིར་རོ། །གལ་ཏེ་རྟགས་དགག་བྱའི་ཆོས་ལས་ལོག་ན། མེད་དགག་མེད་དགག་མིན་པར་སྒྲུབ་པ་ལ་དགག་བྱ་བཀག་ནས་ཆོས་གཞན་འཕེན་པ་བཀོད་པའི་ཚེ། རྟགས་འདི་རང་གི་ཆོས་ཅན་ལས་ལོག་པར་ཐལ་ཏེ། མེད་དགག་གི་ཐ་སྙད་དེ་ཉིད་དགག་བྱའི་ཆོས་ཡིན་པའི་ཕྱིར། འདོད་ན། རྟགས་ཕྱོགས་ཆོས་མ་གྲུབ་པར་འགྱུར་ཏེ་རྟགས་ཆོས་ཅན་ལ་མ་ཞུགས་པའི་ཕྱིར་རོ་ཞེས་པ་དང་། ཡང་རྟགས་ཀྱིས་དགག་བྱའི་ཆོས་ལྡན་འགོག་ན་སྔར་གྱི་རང་བཞིན་གྱི་རྟགས་དེས་བསྒྲུབ་བྱའི་ཆོས་མེད་དགག་གི་ཐ་སྙད་འགོག་པར་ཐལ། དེ་ཉིད་དགག་བྱའི་ཆོས་ལྡན་ཡིན་པའི་ཕྱིར། འདོད་ན་ཆོས་འགོག་པའི་འགལ་བར་འགྱུར་རོ། །གལ་ཏེ་དགག་བྱའི་ཆོས་འགོག་ན་སྔར་བཤད་པའི་འགལ་ཁྱབ་དམིགས་པའི་རྟགས་དེས་རང་གི་ཆོས་ཅན་འགོག་པར་ཐལ། ཆོས་ཅན་མེད་དགག་གི་ཐ་སྙད་དེ་དགག་བྱའི་ཆོས་ཡིན་པའི་ཕྱིར། འདོད་ན་ཆོས་ཅན་འགོག་པའི་འགལ་བར་འགྱུར་རོ་ཞེས་པ་དང་། ཡང་སྟོང་ཉིད་མེད་དགག་ཏུ་སྒྲུབ་པ་ན་བསྒྲུབ་བྱའི་ཆོས་མེད་དགག་གི་ཐ་སྙད་དེ་ཉིད་ཕྱོགས་གཉིས་ཀྱི་ནང་ནས་མཐུན་ཕྱོགས་ཡིན་ན། མེད་དགག་གི་རང་ལྡོག་ལ་སྒྲུབ་ཆོས་དོར་བ་བརྟེན་པར་ཐལ་ལོ། །མི་མཐུན་ཕྱོགས་ཡིན་ན་དེ་ལ་རྟགས་ཞུགས་ན་ལྡོག་པ་མ་གྲུབ་པར་འགྱུར་ཞིང་། མ་ཞུགས་ན་རྗེས་འགྲོ་མེད་པར་འགྱུར་རོ་ཞེས་པ་དང་། ཡང་ཚུལ་གསུམ་ཚང་བས་བྱས་པ་གཏན་ཚིགས་སུ་སྒྲུབ་པ་ན་རྟགས་ཚུལ་གསུམ་ཚང་བ་དེ་ཉིད་མཐུན་ཕྱོགས་ཡིན་ན། ཚུལ་གསུམ་དེ་ཉིད་ལ་སྒྲ་མི་རྟག་པར་སྒྲུབ་པའི་ཚུལ་གསུམ་ཡང་ཚང་བར་ཐལ་ལ། མི་མཐུན་ཕྱོགས་ཡིན་ན། མཚན་ཉིད་ལ་མཚོན་བྱ་མི་སྲིད་པར་འགྱུར་རོ་ཞེས་པའི་རྩོད་པ་བཞིའི་ལན་ལ་གཉིས་ལས་གཞན་ལན་ནི། གཙང་ཁ་ཅིག རྟགས་དགག་བྱའི་ཆོས་ལྡན་ལས་ལྡོག་ལ་འོན་ཀྱང་རྗེས་འགྲོ་མེད་པར་མི་འགྱུར་ཏེ། རྗེས་འགྲོ་ནི་རྟགས་ཤེས་འདོད་ལ་ཇི་ལྟར་དགོད་བྱ་ལྟར་བསྒྲུབ་བྱའི་ཆོས་ལྡན་ལ་འཇུག་པའི་ཕྱིར་ཞེས་པ་དང་། རྩོད་པ་གཉིས་པ་ལ་སྔ་མ་ལྟར་ལན་འདེབས་པ་དང་། རྩོད་པ་གསུམ་པ་ལ་མེད་དགག་གི་མི་མཐུན་ཕྱོགས་ཡིན་ལ། དེ་ལ་རྟགས་སྒྲུབ་ཆོས་དོར་བ་མི་འཇུག་ཀྱང་། རྗེས་འགྲོ་མེད་པར་མི་འགྱུར་ཏེ་ཆོས་ལྡན་གྱི་གཞི་ལ་འཇུག་པའི་ཕྱིར་ཞེས་པ་དང་། བཞི་པ་ལ། བྱས་པ་གཏན་ཚིགས་ཙམ་གྱི་ཐ་སྙད་སྒྲུབ་པ་ན་ཚུལ་གསུམ་ཚང་བ་ཡང་མཐུན་ཕྱོགས་ཡིན་ལ། སྒྲ་མི་རྟག་པར་སྒྲུབ་པའི་གཏན་ཚིགས་སུ་བཀོད་ན་མི་མཐུན་ཕྱོགས་ཡིན་ཏེ། ཚུལ་གསུམ་ལ་སྒྲ་མི་རྟག་པར་སྒྲུབ་པའི་གཏན་ཚིགས་ཀྱི་ཐ་སྙད་དང་མི་ལྡན་པའི་ཕྱིར་ཞེས་པ་རྣམས་ནི་འཁྲུལ་ཏེ། རྟགས་བསྒྲུབ་བྱའི་ཆོས་ལ་ངོ་བོ་དབྱེར་མེད་དུ་ཞུགས་ན་རྟགས་དེ་མེད་དགག་ཡིན་ལ། ཐ་དད་ལྡན་པར་ཞུགས་ཀྱང་རང་བཞིན་རྟགས་ཀྱི་རྗེས་འགྲོ་མ་གྲུབ་པའི་ཕྱིར། ལན་གཉིས་པ་མི་འཐད་དེ། གཞན་སེལ་མ་མཁྱེན་པར་ཟད་དོ་ཞེས་གསུངས་པའི་དོན་ནི། མེད་དགག་འཛིན་པའི་རྟོག་པ་མེད་དགག་གི་རྣམ་པ་ཅན་དུ་མ་ངེས་པའི་ཕྱིར་ཞེས་པའོ། །གསུམ་པ་འཁྲུལ་ཚུལ་དེ་བཞིན་དུ་གསུངས་པའང་དེ་ཉིད་དོ། །བཞི་པའང་འཁྲུལ་ཏེ། དེ་ལྟར་སྐབས་བྱེ་ནས་ལན་བཏབ་པ་ཉིད་ཀྱིས་ཚུལ་གསུམ་གྱི་རང་ལྡོག་ཕུང་པོ་གསུམ་པར་གྲུབ་པ་ཡིན་ནོ། །རང་ལན་ནི། རྩོད་པ་དང་པོ་གསུམ་ནི་མེད་དགག་མ་ཡིན་དགག་ཏུ་རློམ་ནས་རྩོད་པ་ཡིན་པས་མེད་དགག་གི་ཐ་སྙད་མེད་དགག་ཡིན་པའི་ཕྱིར། དེ་ལས་གྲོལ་བ་འཐད་དོ། །གལ་ཏེ་མེད་དགག་གི་ཐ་སྙད་མ་ཡིན་དགག་ཡིན་ན། དགག་སྒྲུབ་ངོ་བོ་གཅིག་ཏུ་འགྱུར་ཞིང་། འདོད་ན་མཐར་དངོས་པོ་དངོས་མེད་ངོ་བོ་གཅིག་ཏུ་འགྱུར་རོ། །དེས་ན་འདི་མེད་པ་གཞན་སེལ་ཡིན་པས་ཅི་ཡང་མེད་པ་ལ་མེད་དགག་གི་ཐ་སྙད་བཏགས་པའི་ཕྱིར་རོ། །དེ་ཕྱིར་རྟགས་དགག་བྱ་ལས་ལྡོག་གམ་འགོག་ཀྱང་རུང་སྟེ་དགག གཞི་ལ་དགག་བྱའི་ཆོས་ལྡོག་པའམ་འགོག་པ་ཡིན་ནོ། །བྱས་པ་རྟགས་སུ་སྒྲུབ་པའི་ཚུལ་གསུམ་ཡང་ལྡོག་པས་ཕྱེ་ན་ཕྱོགས་གསུམ་ཀར་འགྲོ་བ་མི་འགལ་བས་ཚུལ་གསུམ་གྱི་སྤྱི་ལྡོག་ཕྱོགས་གཉིས་པོ་གང་ཡང་མིན་པའི་ཕུང་པོ་གསུམ་པ་ཡིན་པའི་ཕྱིར་ན། རྩོད་པ་བཞི་པ་ལས་གྲོལ་བ་ཡང་འཐད་དོ། །གཉིས་པ་ལུང་འགལ་སྤང་བ་ནི། རྣམ་ངེས་ལས། དེ་ལྟར་ན་བསྒྲུབ་པར་བྱ་བའི་ཆོས་ལ་ཐེ་ཚོམ་ཟ་བ་ཡང་མི་མཐུན་ཕྱོགས་ཡིན་པར་འགྱུར་ཏེ། ཞེས་སོགས་གསུངས་པ་དང་འགལ་ལོ་ཞེ་ན། སྐྱོན་མེད་དེ། དེ་ནི་མུ་སྟེགས་བྱེད་དགག་སྒྲུབ་དོན་ལ་བྱེད་པར་འདོད་ལ། བསྒྲུབ་བྱའི་ཆོས་ཀྱིས་སྟོང་མི་སྟོང་དོན་ལ་དངོས་འགལ་དུ་འདོད་པ་དང་། བློ་ངོར་ཐེ་ཚོམ་ཟ་བ་དོན་ལ་མི་མཐུན་ཕྱོགས་སུ་འདོད་པས་དེ་དག་འགལ་བར་དགོངས་ནས་ཐལ་བར་བརྗོད་པ་ཡིན་པའི་ཕྱིར། གསུམ་པ་ནི། རྟགས་ཐམས་ཅད་ལ་ཕྱོགས་གསུམ་པོ་དེ་གང་རུང་དངོས་སུ་མ་ཚང་ཡང་གསུམ་པོ་ལྟོས་གཞི་ཉིད་དུ་འདོད་པ་ཡིན་ཏེ། རྟགས་སུ་བཀོད་པ་ཇི་སྙེད་ཡོད་པ་དེ་སྙེད་ཀྱི་སྐྱོན་ཡོན་རྩི་བ་ཕྱོགས་གསུམ་ལ་ལྟོས་པས་སོ། །དགག་སྒྲུབ་ཅེས་སོགས་ནི་བར་སྐབས་ཀྱི་ཚིགས་བཅད་དོ། །གཉིས་པ་དེ་ལ་ལྟོས་པའི་རྟགས་ཀྱི་རབ་དབྱེ་ལ་ཡང་དག་དང་། ལྟར་སྣང་། དེ་དག་གི་ངེས་པའོ། །དང་པོ་ལ་མཚན་ཉིད། མཚན་གཞི། མཚོན་བྱའི་རབ་དབྱེའོ། །དང་པོ་ལ་མཚན་ཉིད་ངོས་བཟུང་། དེ་མཚན་ཉིད་དུ་ཇི་ལྟར་འགྲོ་ཚུལ་ལོ། །དང་པོ་ལ་དགག་གཞག་སྤོང་གསུམ་མོ། །དང་པོ་ནི། སྣོད་ཀྱི་རྗེས་གཞན་དུ་མི་འཐད་པའི་ཡན་ལག་ཅེས་པའི་ཚུལ་གཅིག་དང་། ཁ་ཅིག་ཕྱོགས་ཆོས་དང་རྗེས་འགྲོའམ་ཕྱོགས་ཆོས་དང་ལྡོག་པ་གང་རུང་གི་ཚུལ་གཉིས་དང་། རིགས་པ་ཅན་པ་ཁ་ཅིག་ཆོས་ཅན་ལ་ཡོད་པ་སྔ་མ་ཅན། མཐུན་ཕྱོགས་ལ་ཡོད་པ་ལྷག་མ་ཅན། མི་མཐུན་ཕྱོགས་ལ་མེད་པ་སྤྱི་ལ་མ་མཐོང་བ། མངོན་སུམ་དང་ལུང་གིས་མི་གནོད་པ་འགལ་བ་མེད་པ་སྟེ་ཚུལ་བཞི་དང་། ཁ་ཅིག་ཚུལ་གསུམ་དང་དེ་ཤེས་པ་སྟེ་ཚུལ་བཞི་དང་། ཡང་ཁ་ཅིག་ཚུལ་གསུམ་དང་། གྲངས་སོ་སོར་ངེས་པ་དང་། གནོད་པ་མེད་པའི་ཡུལ་ཅན་དང་ལྔར་འདོད་པ་དང་། ཁ་ཅིག་ཚུལ་གསུམ་གྱི་སྟེང་དུ་བསྒྲུབ་བྱ་ལ་གནོད་པ་འབབ་པའི་རྟགས་གཅོད་པ་ལ་གནོད་པ་མེད་པའི་ཡུལ་ཅན་དང་། འགལ་བ་ལ་མི་འཁྲུལ་བ་གཅོད་པ་ལ་བརྗོད་པར་འདོད་པའི་གྲངས་གཅིག་པ། ཚུལ་གསུམ་བློས་མ་ངེས་པ་གཅོད་པ་ལ་ངེས་པ་ཉིད་ཅེས་བྱ་བ་སྟེ། ཚུལ་གཅིག་ནས་དྲུག་གི་བར་གྱི་ཉི་ཚེའི་ཚུལ་གཞན་རྟགས་ཡང་དག་གི་མཚན་ཉིད་དུ་འདོད་པ་དེ་དག་ནི་འཁྲུལ་ཏེ། དང་པོ་ནི། གཞན་དུ་མི་འཐད་པ་བརྟགས་ན་འཇིག་པའི་ཕྱིར་དང་། གཉིས་པའང་རྗེས་འགྲོ་ཁྱད་པར་ཅན་དུ་ལྡོག་པ་འདུས་པས་ཚུལ་གསུམ་ཉིད་ཡིན་པའི་ཕྱིར་དང་། བར་པ་གསུམ་གྱི་ནི་ཚུལ་གསུམ་མ་ཤེས་པའི་རྣམ་འགྱུར་ཡིན་པའི་ཕྱིར་དང་། དྲུག་པའི་ཡང་ཚུལ་ཕྱི་མ་གསུམ་མི་འཐད་པའི་ཚུལ་འགྲེལ་པར་བཤད་དོ། །གཉིས་པ་ནི། ཕྱོགས་ཆོས་གྲུབ་ཅིང་འབྲེལ་པ་སྟེ་ཡོད་ན་ཡོད་པའི་རྗེས་འགྲོ་དང་། ལོག་ན་ལྡོག་པའི་ལྡོག་ཁྱབ་ཀྱི་ཚུལ་རྣལ་མར་ངེས་པའི་གཏན་ཚིགས་ནི་རྟགས་ཡང་དག་གི་མཚན་ཉིད་ཡིན་ཏེ། མཚན་ཉིད་སྤྱིའི་སྐྱོན་གསུམ་མེད་པའི་ཕྱིར་རོ། །གསུམ་པ་ནི། རྒྱ་ཁ་ཅིག་ཕྱོགས་ཆོས་གྲུབ་པ་ཚུལ་དང་པོ་དང་རྗེས་འགྲོ་ཁྱད་པར་ཅན་ནམ། དེ་དང་ལྡོག་པ་ཁྱད་པར་གཉིས་དང་། དེ་དང་འབྲེལ་པ་གྲུབ་པ་གཉིས་སུ་འདུས་པས་རྟགས་ཚུལ་གཉིས་པ་ཁོ་ནར་འགྱུར་རོ་ཞེ་ན། སྐྱོན་མེད་དེ། མཐུན་ཕྱོགས་ལ་སྒྲུབ་པ་དང་མི་མཐུན་ཕྱོགས་ལ་འགོག་པའི་ཚད་མ་གཉིས་མེད་ན་འབྲེལ་པ་མི་གྲུབ་ཅིང་འབྲེལ་པ་གྲུབ་ན་རྗེས་སུ་འགྲོ་ལྡོག་གི་ཚུལ་གསུམ་གྲུབ་པ་ཉིད་དོ། །ཡང་རྗེས་འགྲོ་ཙམ་པོ་འཁྲུལ་ཞིང་ཁྱད་པར་ཅན་དུ་ལྡོག་པ་འདུས་ན་རྗེས་འགྲོ་ཡིས་ལྡོག་པ་འཕེན་པ་མི་འཐད་དོ་ཞེས་པའི་སྐྱོན་ཡང་མེད་དེ། ཡོད་ན་ཡོད་པའི་རྗེས་འགྲོ་དེ་ཉིད་ལོག་ན་ལྡོག་པའི་ལྡོག་པ་ལ་མི་འཁྲུལ་བའི་ཕྱིར་རོ། །གཉིས་པ་ནི། རྟགས་ཡང་དག་ཚུལ་གསུམ་ངེས་པའམ་ངེས་རུང་ཙམ་ཡིན་ཞེ་ན། འདི་ལ་གསུམ་ལས་གཞན་ལུགས་དགག་ན། ཚུལ་གསུམ་ངེས་རུང་ཙམ་རྟགས་ཡང་དག་མིན་ཏེ། དེ་ནི་མ་ངེས་པ་ཐེ་ཚོམ་ཟ་བའི་ཕྱིར་དང་། ཐེ་ཚོམ་ཟ་བ་སོགས་བཀོད་ན་མ་གྲུབ་པ་ཡིན་ཏེ། རྣམ་ངེས་ལས། རང་ཉིད་དམ་དེའི་གཞི་ལ་ཐེ་ཚོམ་ཟ་ན་རྟགས་མ་གྲུབ་པ་ཡིན་ཏེ། དཔེར་ན་མེ་སྒྲུབ་པ་ལ་རླངས་པ་ལ་སོགས་པར་ཐེ་ཚོམ་ཟ་བའི་འབྱུང་བ་འདུས་པ་ལྟ་བུ་དང་ཞེས་གསུངས་པའི་ཕྱིར་རོ། །རང་ལུགས་ནི། ཚུལ་གསུམ་ངེས་པ་རྟགས་ཡང་དག་ཡིན་ཏེ། བསྒྲུབ་བྱ་གོ་བྱེད་ཡིན་པའི་ཕྱིར། དཔེར་ན་དབང་ཤེས་ཀྱི་སྒྲ་ཡུལ་འཛིན་ནུས་ལ་མི་ཟེར་བར་འཛིན་པ་ལ་ཟེར་བ་ལྟར་རོ། །གསུམ་པ་རྩོད་པ་སྤང་བ་ནི། ངེས་པ་རྟགས་ཀྱི་མཚན་ཉིད་ཡིན་པ་འདི་ལ་མ་ངེས་པ་རྟགས་མིན་ན། སྒྲོམ་ནང་གི་ས་བོན་ཡང་ས་བོན་མིན་པར་ཐལ་ལོ་ཞེས་པའི་གཞན་གྱི་ཀླན་ཀ་འཇུག་པ་མེད་དེ། ངེས་པ་ནི་ཐེ་ཚོམ་ཟ་བའི་དུ་སོགས་གཅོད་ལ། སྒྲོམ་ནང་ས་བོན་ཡང་རྐྱེན་དང་མ་ཕྲད་ན་ས་བོན་དུ་མི་རུང་ཞིང་། རྟགས་ཀྱང་མ་ངེས་ན་གོ་བྱེད་ཀྱི་རྒྱུ་མིན་པའི་ཕྱིར་རོ། །འདིར་རང་འགྲེལ་ལས་ཚུལ་གསུམ་མ་ངེས་པའི་སྔར་རྟགས་མིན་པས། དེ་ལས་རྟགས་འཛིན་སྐྱེས་པ་དེ་རྟགས་མིན་པ་ལས་རྟགས་འཛིན་སྐྱེས་པར་འགྱུར་རོ། །འདོད་ན། འདི་ལྟར་དངོས་གང་ཅི་འདྲ་བ། །ཞེས་སོགས་གསུངས་པ་དང་འགལ་ལོ་ཞེ་ན། ཁོ་བོ་ཅག་རྟགས་སུ་དགོད་བྱའི་ངོ་བོ་དུ་བ་དང་བྱས་པ་ལ་སོགས་པ་ལས་རྟགས་འཛིན་སྐྱེ་བར་འདོད་ཀྱི། རྟགས་ཀྱི་མཚན་ཉིད་ཚུལ་གསུམ་ངེས་པ་ལས་སྐྱེ་བར་མི་འདོད་ཅེས་གསུངས་པའི་དོན་ནི། ཚུལ་གསུམ་ངེས་པ་ཉིད་རྟགས་འཛིན་ཡིན་པས་དེ་རྟགས་སུ་དགོད་བྱ་ལས་སྐྱེ་ཡི་དེ་ལས་རྟགས་འཛིན་མི་སྐྱེ་ཞེས་པར་སྣང་བས་རྟགས་འཛིན་སེམས་བྱས་ཙམ་དང་དུ་ཙམ་འཛིན་པའི་རྟོག་པ་ཡིན་ཞེས་པ་སྟེ། ཁོ་བོའི་ལེགས་བཤད་དེ་བསྟན་པ་དར་བའི་རྒྱུར་གྱུར་ཅིག གཉིས་པ་མཚན་གཞི་ལ་གསུམ་ལས། དང་པོ་གཞན་ལུགས་དགག་ན། རྒྱ་ཁ་ཅིག་རྩོད་གཞིའི་ཁྱད་པར་དུ་བྱས་པའི་དུ་བ་རྟགས་ཀྱི་མཚན་གཞིར་རུང་སྟེ། ལའི་དུ་བ་དཔེ་ལ་རྗེས་སུ་མི་འགྲོ་ཡང་མཚན་ཉིད་ངེས་པའི་ཚད་མས་དུ་ཙམ་གྱི་སྤྱི་ལ་མེས་ཁྱབ་པ་གྲུབ་ན་ཡུལ་དུས་རྣམ་པའི་བྱེ་བྲག་གི་དུ་བ་ཡིན་ཡང་མེས་མ་ཁྱབ་པའི་དོགས་པ་ཆོད་པས་གྲུབ་པའི་ཕྱིར་ཞེས་འདོད་པ་མི་འཐད་དེ། རྟགས་དུ་བ་སོགས་རྩོད་གཞི་ཡིས་ཁྱད་པར་དུ་བྱས་པ་མི་ལྡན་རྣམ་པར་གཅོད་པ་ཡིན་ན་ཡུ་བུ་རྩོད་པ་མེད་དེ། ཁོ་བོ་ཅག་ཡང་འདོད་པའི་ཕྱིར་རོ། །གཞན་ལྡན་རྣམ་གཅོད་དུ་འདོད་ན་རྟགས་དཔེ་ལ་རྗེས་འགྲོ་མེད་པར་འགྱུར་རོ། །ཆོས་ཀྱང་རྟགས་དེ་དང་འདྲ་བར་རྩོད་གཞི་ལས་མི་ལྡན་རྣམ་གཅོད་ཀྱི་ཁྱད་པར་དུ་བྱས་ཀྱི། གཞན་ལྡན་རྣམ་གཅོད་ཀྱི་ཁྱད་པར་དུ་བྱས་ན་དཔེ་ལ་རྗེས་འགྲོ་མེད་པར་འགྱུར་ཞིང་། རྟགས་ཆོས་གཉིས་ཀ་ཡང་ཆོས་ཅན་དང་འདྲ་བར། བསྒྲུབ་བྱ་ཡིས་མི་ལྡན་རྣམ་གཅོད་ཀྱི་ཁྱད་པར་དུ་བྱས་ཀྱི་གཞན་ལྡན་རྣམ་གཅོད་ཀྱི་ཁྱད་པར་དུ་བྱས་ན་དཔེ་ལ་རྗེས་འགྲོ་མེད་པར་འགྱུར་རོ། །གཉིས་པ་རང་ལུགས་ནི། སོང་ཚོད་ཀྱི་རྟགས་ཀྱི་མཚན་གཞི་ནི། གཞན་སེལ་ཡིན་ལ། རློམ་ཚོད་དམ་བཀོད་ཚོད་ནི་ཡུལ་དུས་རྣམ་པས་ཁྱད་པར་དུ་མ་བྱས་པའི་དུ་བ་དང་བྱས་པ་སོགས་ཀྱི་སྤྱི་ལྡོག་གོ །དེའི་དོན་ཡང་དུ་བ་དང་བྱས་པ་ཉིད་འགོད་པར་བྱེད་པ་སྟེ། བྱས་པ་དང་དུ་བ་གཉིས་དུས་དང་རྣམ་པས་ཁྱད་པར་མ་བྱས་པའི་ཕྱིར། ཚུལ་འདི་མ་ཤེས་པ་ཁ་ཅིག་རྩ་འགྲེལ་གཉིས་ཀྱི་དོན་བྱས་པའི་དོན་སྤྱི་རྟགས་ཡང་དག་དང་། བྱས་པ་གཞན་སེལ་བར་སྨྲ་བ་རྣམས་ལྟར་ན་བྱས་པ་ཡུལ་དུས་རྣམ་པས་ཁྱད་པར་དུ་བྱས་པར་ཐལ། ཤར་ན་ཡོད་པའི་ད་ལྟ་བའི་སྔོན་པོ་ལ་ཡོད་པའི་དངོས་པོ་ཡིན་པའི་ཕྱིར་རོ། །གསུམ་པ་རྩོད་སྤང་ནི། སོང་ཚོད་ཀྱི་མཚན་གཞི་འདི་ལ་རྟགས་ཀྱི་སྤྱི་མི་སྲིད་དོ། །སྲིད་ཀྱང་སྤྱི་གཅིག་པོ་དེ་ལ་ཚུལ་གཉིས་མི་འཐད་དོ་ཞེས་པའི་གཞན་གྱི་ཀླན་ཀ་འཇུག་པ་མེད་དེ། རྫས་ཀྱི་སྤྱི་མེད་ཀྱང་སེལ་བའི་སྤྱི་ཡོད་ལ་དེ་ཉིད་ཕྱོགས་དང་མཐུན་ཕྱོགས་ལ་འཇུག་པའི་ཕྱིར་རོ། །གསུམ་པ་དབྱེ་བ་ལ། ཇི་ལྟར་འབྱེད་པའི་ཚུལ། ཕྱེ་བའི་རང་བཞིན་ངེས་པར་བྱ་བ། དེ་དག་གི་འབྲེལ་པ་ལ་ལོག་རྟོག་དགག་པའོ། །དང་པོ་གསུམ་ལས། དང་པོ་དངོས་པོའི་སྒོ་ནས་དབྱེ་བ་ནི། བཤད་ཟིན་གྱི་མཚན་ཉིད་དེ་དང་ལྡན་པ་ཡི་གཏན་ཚིགས་དེ་ལ་དབྱེ་སྒོ་དུ་མར་འགྱུར་ཏེ། རྟགས་སུ་དགོད་བྱའི་སྒོ་ནས་མེད་དགག་དང་མ་ཡིན་དགག་བཀོད་པ་གཉིས། བསྒྲུབ་བྱའི་ཆོས་ཀྱི་སྒོ་ནས་མེད་དགག་དང་མ་ཡིན་དགག་བསྒྲུབ་པ་གཉིས། འབྲེལ་བའི་སྒོ་ནས་བདག་གཅིག་པ་དང་དེ་ལས་བྱུང་བ་གཉིས། སྒྲུབ་ཚུལ་གྱིས་དབྱེ་ན་དོན་དང་ཐ་སྙད་བསྒྲུབ་པ་གཉིས། སྒྲུབ་བྱེད་ཀྱིས་དབྱེ་ན་གྲགས་པ་དང་དངོས་པོ་སྟོབས་ཞུགས་གཉིས་སོ། །གཉིས་པ་སྦྱོར་བའི་སྒོ་ནས་དབྱེ་ན། མ་དམིགས་པ། རང་བཞིན་འབྲས་བུའི་རྟགས་གསུམ་མོ། །གསུམ་པ་རྩོད་སྤོང་ནི། ཁ་ཅིག་བསྒྲུབ་རྟགས་གཉིས་སུ་འབྱེད་ན་དགག་རྟགས་ཀྱང་གཉིས་སུ་ཕྱེ་བས་བཞིར་འགྱུར་ལ། དགག་པ་གཅིག་ཏུ་སྡུད་ན་སྒྲུབ་པའང་གཅིག་ཏུ་འདུ་བས་ཡང་ན་བཞིའམ་མིན་ན་གཉིས་སུ་ངེས་སོ་ཞེ་ན། འདི་ཡི་ལན་ལ། གཞན་དག་རྟགས་གསུམ་དུ་སྒྲུབ་པ་ལ་གཉིས་དང་བཞིའི་གྲངས་ངེས་བྱེད་པ་ནི་མ་འབྲེལ་བ་ཡིན་ནོ། །ཆོས་ཀྱི་གྲགས་པ་ནི། སྦྱོར་བ་ཡི་སྒོ་ནས་རྟགས་གསུམ་དུ་ངེས་པ་མཛད་དེ། དགག་རྟགས་ཐམས་ཅད་སྣང་རུང་མ་དམིགས་པར་འདུ་བའི་ཕྱིར་རོ། །དཔེ་གཅིག་གི་སྟེང་དུ་གཏན་ལ་དབབ་ཏུ་རུང་བས་གཅིག་ཏུ་འདུ་ལ། སྒྲུབ་རྟགས་ཀྱི་སྦྱོར་བ་དཔེ་གཅིག་གི་སྟེང་དུ་སྦྱར་དུ་མི་རུང་བའི་ཕྱིར་གཉིས་སུ་ཕྱེ་བའི་ཕྱིར་རོ། །གཉིས་པ་ལ་མ་དམིགས་པ། རང་བཞིན། འབྲས་བུའོ། །དང་པོ་ལ་མཚན་ཉིད། དབྱེ་བ། འབྲེལ་པ་ངེས་ཚུལ་ལོ། །དང་པོ་ནི། དགག་བྱ་འགོག་ལ་ཚུལ་གསུམ་ཚང་བའོ། །གཉིས་པ་ལ་གཉིས་ལས་དང་པོ་ངོ་བོ་མ་དམིགས་པ་ལ་བཞི་སྟེ། རྒྱུ་ཁྱབ་བྱེད་རང་བཞིན་འབྲས་བུ་མ་དམིགས་པའོ། །གཉིས་པ་འགལ་བ་དམིགས་པ་རྣམ་པ་གཉིས་ཏེ། དེ་ཡང་ལྷན་ཅིག་མི་གནས་པ་དང་། ཕན་ཚུན་སྤང་བའི་འགལ་བ་དམིགས་པའོ། །དང་པོ་ལའང་གཉིས་ལས། གཞན་ལུགས་དགག་ན། ཁ་ཅིག་མེ། འབྲས་བུ་དུ་བ། མེའི་ཁྱབ་བྱ་ཙནྡན་གྱི་མེ། མེ་རྒྱུ་ནུས་པ་ཐོགས་མེད། ཚ་རེག་བསྐོར་བཞི་པོ་རེ་རེས། གྲང་རེག་ལའང་གྲང་རེག དེའི་རྒྱུ་ནུས་པ་ཐོགས་མེད། དེའི་འབྲས་བུ་སྤུ་ལོང་། དེའི་ཁྱབ་བྱ་བ་མོའི་རེག་པ་སྟེ་བཞི་བཞི་བཀག་པས་སྦྱོར་བ་བཅུ་དྲུག་ཡོད་ཟེར། འགལ་བའི་རྒྱུ་དམིགས་པ་བཞིས་དགག་བྱ་འགོག་མི་ནུས་ཏེ་ནུས་པ་ཐོགས་མེད་ནི་བུད་ཤིང་ཉིད་ཡིན་པས་མེ་མིན་ཞིང་། མེ་མིན་པ་དེས་གྲང་རེག་མི་ཁེགས་པའི་ཕྱིར་དང་། ཐོགས་མེད་མེས་ཁྱད་པར་དུ་བྱེད་ན་མེ་ཉིད་རྟགས་ཡིན་པའི་ཕྱིར་དང་། གལ་ཏེ་ནུས་པ་ཐོགས་མེད་དུ་འཇོག་པ་སྐད་ཅིག་གི་ལྡོག་པ་ཡིན་ལ། མེར་འཇོག་པ་རྒྱུན་ལ་བྱེད་ན། སྐད་ཅིག་གི་མེ་ལ་རྒྱུན་མེད་པས་གྲང་རེག་མི་ཁེགས་པའི་ཕྱིར་ན་རྟགས་མིན་ནོ། །གཉིས་པ་རང་ལུགས་ནི། སློབ་དཔོན་གྱི་གཞུང་ལས་གསུམ་དང་བཞི་ལ་སོགས་པ་རྣམ་གཞག་མང་དུ་བཤད་ཀྱང་སྔར་བཤད་པའི་བཅུ་དྲུག་གི་ནང་ནས་དགག་བྱ་འགོག་ནུས་ཀྱི་རྟགས་ནི་འགལ་བའི་རྒྱུ་དམིགས་པ་བཞི་མ་གཏོགས་པའི་སྔ་མ་བཅུ་གཉིས་པོ་ཡིན་ནོ། །གཉིས་པ་ཕན་ཚུན་སྤང་འགལ་ནི། ཕན་ཚུན་སྤངས་པ་དངོས་བུམ་པ་དང་བུམ་མིན་ལྟ་བུ་ལ་ནི་གཅིག་གིས་ཅིག་ཤོས་འགོག་པའི་རྟགས་དང་རྟགས་ཅན་ཡོད་པ་མིན་ཏེ། རྣམ་གཅོད་ཡོངས་གཅོད་ཡིན་པས་སོ། །དངོས་འགལ་དེ་ཡིས་ཁྱད་པར་དུ་བྱས་པ་དང་རྟག་པ་ལྟ་བུ་བརྒྱུད་འགལ་ལ་ནི་གཅིག་གིས་ཅིག་ཤོས་འགོག་པ་ཁྱབ་བྱེད་འགལ་བ་དམིགས་པ་ཡིན་ཏེ། དེའི་ཚེ་རྟག་པ་ལ་མ་བྱས་པས་ཁྱབ། མ་བྱས་པ་དང་དངོས་འགལ་བྱས་པ་རྟགས་སུ་དམིགས་པའི་ཕྱིར་རོ། །ཚད་མས་གནོད་པའི་འགལ་བ་ལྟོས་པས་ངེས་པ་འགོག་པ་ལྟ་བུ་ཡང་ཁྱབ་བྱེད་འགལ་བ་དམིགས་པར་འདུས་ཏེ། དེའི་བོར་ངེས་པ་ལ་མི་ལྟོས་པས་ཁྱབ། དེ་དང་དངོས་འགལ་ལྟོས་པ་བཀོད་པའི་ཕྱིར་རོ། །གསུམ་པ་ནི། གཞན་ལུགས་དགག་ན་དགག་སྒྲུབ་གཉིས་ཀ་ལ་དངོས་པོའི་འབྲེལ་པ་འདོད་པ་ནི་བཀག་ཟིན་ཅིང་། གཙང་ཁ་ཅིག་ལྷན་ཅིག་ན་མི་གནས་པའི་འགལ་དམིགས་བཟློག་པ་དེ་བྱུང་འབྲེལ་པ་ལ་བརྟེན་ཏེ། དགག་བྱ་གྲང་རེག་སྐོར་བཞི་པོ་རྟགས་མེ་སྟོབས་ལྡན་ལ་སོགས་པ་བཞི་པོ་མེད་པའི་ཚོགས་པས་སྐྱེད་པའི་ཕྱིར་ཞེས་སྨྲ་བ་འཁྲུལ་ཏེ། རེག་བྱ་བཏང་སྙོམས་པ་སྲིད་པའི་ཕྱིར་དང་། ཧ་ཅང་ཐལ་བའི་ཕྱིར་རོ། །རང་ལུགས་ནི། ངོ་བོ་མ་དམིགས་པའི་སྒྲུབ་རྟགས་ཀྱི་འབྲེལ་ཡུལ་རྒྱུ་དང་ཁྱབ་བྱེད་ལོག་པས་འབྲེལ་ཆོས་འབྲས་བུ་དང་ཁྱབ་བྱ་ཉིད་ལྡོག་པས་ལྡོག་འབྲེལ་བློ་ངོར་འགྲུབ་ལ། འགལ་བ་དམིགས་པ་ནི། འགལ་ཟླ་གྲུབ་ན་ཅིག་ཤོས་ལ་གནོད་པས་ཁེགས་ཀྱི་འབྲེལ་ཟླ་འགོག་པ་ལ་མི་ལྟོས་པས་བཟློག་འབྲེལ་དཔྱད་མི་དགོས་སོ། །གཉིས་པ་རང་བཞིན་གྱི་རྟགས་ལ་མཚན་ཉིད་ནི། ཆོས་ཅན་གྱི་སྟེང་དུ་ཆོས་ཡིན་པ་སྒྲུབ་པ་ལ་ཚུལ་གསུམ་ཚང་བའི་རྟགས་སོ། །གཉིས་པ་དབྱེ་བ་ལ་རྟགས་དངོས་ནི། རྟགས་ཆོས་ངོ་བོ་དབྱེར་མེད་པའི་སྒྲུབ་རྟགས་ཐམས་ཅད་ནི་རང་བཞིན་གྱི་རྟགས་ཡིན་ནོ། །གཉིས་པ་ཁོངས་སུ་འདུ་བ་ནི། མུ་སྟེགས་པ་རྟགས་ལོག་པར་འདོད་པ་རྒྱུ་ཚོགས་པ་ལས་འབྲས་བུ་སྐྱེ་རུང་དཔོག་པ་དང་། དུ་རྒྱུ་ནུས་པ་ཐོགས་མེད་ཀྱིས་འདུས་བྱས་ཀྱི་དུ་བ་སྒྲུབ་པ་སོགས་ཀྱང་རང་བཞིན་གྱི་རྟགས་ཀྱི་ཁོངས་སུ་བསྡུས་ཏེ། དེ་ཡི་ཆ་མཐུན་པའི་ཕྱིར། གསུམ་པ་རྩོད་སྤོང་ནི། ཕྱི་མ་དེ་རང་བཞིན་གྱི་རྟགས་མིན་ཏེ། རྟགས་ཆོས་རྫས་ཐ་དད་པའི་ཕྱིར་ཞེ་ན། རྫས་ཐ་དད་པའི་སྐྱོན་མི་འགོ་སྟེ། དེའི་རྟགས་ཆོས་རྫས་མི་གཅིག་ཀྱང་དུ་བ་སྐྱེ་བཞིན་པ་རྟགས་ཆོས་གསུང་ལ། དེ་དང་མི་རྟག་པའི་དུ་བ་རྫས་གཅིག་པའི་ཕྱིར། གསུམ་པ་འབྲས་རྟགས་ལའང་གསུམ་ལས། མཚན་ཉིད་ནི། ཆོས་ཅན་དང་ངོ་བོ་ཐ་དད་པའི་ཆོས་ཡོད་པར་སྒྲུབ་པ་ལ་ཚུལ་གསུམ་ཚང་བའི་རྟགས་ཆོས། གཉིས་པ་དབྱེ་བ་ལ་རྟགས་དངོས་ནི། ཆོས་དེ་ལས་བྱུང་བ་བཀོད་པའི་རྟགས་ཐམས་ཅད་ལ་འབྲས་བུའི་རྟགས་སུ་འདོད་དོ། །གཉིས་པ་ཁོངས་སུ་འདུ་བ་ནི། ཆུ་སྐྱར་ལས་ཆུ་དཔོག་པ་སོགས་ཀྱང་འབྲས་རྟགས་དེ་ཡི་ཆ་མཐུན་ཡིན་པས་ཁོངས་སུ་བསྡུའོ། །གསུམ་པ་རྩོད་སྤོང་ནི། རྒྱུ་སྔོན་སོང་སྒྲུབ་པ་འབྲས་རྟགས་སུ་མི་འཐད་དེ། མེ་སྔོན་སོང་དང་དུ་བ་རྫས་གཅིག་པའི་ཕྱིར་ཞེ་ན། དེའི་སྐྱོན་ལས་གྲོལ་ཏེ། རྫས་གཅིག་པའི་ཆ་སྒྲུབ་ན་བདེན་ཡང་། སྔར་གྱི་མེ་དུ་བ་དང་རྫས་ཐ་དད་ཡིན་ལ་དེ་ཉིད་སྒྲུབ་པའི་ཕྱིར་རོ། །གསུམ་པ་དེ་དག་གི་འབྲེལ་པ་ལ་ལོག་རྟོག་དགག་པ་ནི། གཙང་ཁ་ཅིག སྤྱིར་འབྲེལ་པ་མུ་དགུ་སྟེ། འབྲེལ་ཆོས་ལ་འབྲེལ་ཆོས་དངོས། དེ་ཁྱད་པར་བྱེད་ཆོས། དེས་ཁྱད་པར་བྱས་ཆོས་གསུམ། འབྲེལ་ཡུལ་ལ་ཡང་དེ་ལྟར་གསུམ་ལས། འབྲེལ་ཆོས་གསུམ་པོ་རེ་རེའང་འབྲེལ་ཡུལ་གསུམ་པོ་ལ་འབྲེལ་བའི་དབྱེ་བས་སོ། །དགུ་པོ་དེ་ལ་གོ་བྱེད་ལ་ཕན་པའི་འབྲེལ་པ་བཞི་ཡོད་དེ། དེ་འབྲེལ་ཆོས་དང་དེ་ཁྱད་པར་དུ་བྱེད་ཆོས་གཉིས་འབྲེལ་ཡུལ་དངོས་དང་དེས་ཁྱད་པར་བྱས་ཆོས་གཉིས་པོ་རེ་རེ་ལ་འབྲེལ་བ་བཞི་པོ་དེ་ཉིད་དོ་ལོ། །འདི་མི་འཐད་དེ། མེ་སྔོན་སོང་གི་ཁྱད་པར་བྱེད་ཆོས་མེ་ཡིན་ལ་དེ་དང་དུ་བ་འབྲེལ་པས་གོ་བྱེད་ལ་ཕན་པ་དང་། འབྲེལ་ཡུལ་གྱི་ཁྱད་པར་བྱེད་ཆོས་ལ་འབྲེལ་པས་གོ་བྱེད་ལ་མི་ཕན་པའི་རྣམ་གཞག་འདི་ནི་འགལ་བའི་ཕྱིར་དང་མུ་དགུ་པོ་འདི་སློབ་དཔོན་གྱི་གཞུང་གི་དགོངས་པར་ཡང་འཐད་པ་མིན་ཏེ། ཁྱད་པར་བྱ་བྱེད་ཀྱི་འབྲེལ་པས་གོ་ཆོད་ན་ཧ་ཅང་ཐལ་བའི་ཕྱིར་དང་། འབྲེལ་པ་གཉིས་ལས་གཞན་བཀག་པའི་ཕྱིར་རོ། །དེས་ན་ཁྱད་པར་བྱ་བྱེད་འབྲེལ་པ་ཡི་སྟོབས་ཀྱི་བསྒྲུབ་བྱ་གོ་བ་མིན་ཏེ། དེའི་ངོ་བོ་བདག་གཅིག་གི་འབྲེལ་པའམ་དོན་གཞན་དེ་བྱུང་གི་འབྲེལ་བའི་སྟོབས་ཀྱིས་བསྒྲུབ་བྱ་རྟོགས་པར་བཤད་དོ། །བར་སྐབས་ཀྱི་ཚིགས་བཅད་དོ། །གཉིས་པ་རྟགས་ལྟར་སྣང་ལ་གསུམ་ལས། དང་པོ་མཚན་ཉིད་ནི། རྟགས་གང་ཞིག་ཚུལ་གསུམ་མ་གྲུབ་པའོ། །གཉིས་པ་དབྱེ་བ་ལ། མ་གྲུབ་པ། མ་ངེས་པ། འགལ་བའོ། །དང་པོ་ལ་མཚན་ཉིད་ནི། ཕྱོགས་བཏགས་པ་བ་ཤེས་འདོད་ཆོས་ཅན་ལ་རྟགས་འགོད་ཚུལ་ལྟར་མེད་པ་ནི་མ་གྲུབ་པའི་རྟགས་ཀྱི་མཚན་ཉིད་དོ། །དབྱེ་ན། དོན་དང་། བློ་དང་། རྒོལ་བ་ལ་ལྟོས་ནས་མ་གྲུབ་པ་གསུམ། དང་པོ་ནི། ཕྱོགས་ཆོས་དོན་ལ་མི་གནས་ནས་མ་གྲུབ་པ་ཉིད་ཡིན་ལ། གཉིས་པ་ནི། དེ་བློ་དེ་ལ་མི་གནས་ནས་མ་གྲུབ་པ་ལ་ཉིད་ཡིན་ཞིང་། དང་པོ་ལ་ཆོས་ཅན་གྱི་ངོ་བོ་མ་གྲུབ་པ། རྟགས་ཀྱི་ངོ་བོ་མ་གྲུབ་པ། དེ་དག་གི་ཕྱོགས་རེ་ལ་མ་གྲུབ་པ་གསུམ། འདིར་རྟགས་ཆོས་ཅན་གྱི་ཕྱོགས་གཅིག་ལ་མ་གྲུབ་པ་ལ་རིགས་སྤྱི་ཆོས་ཅན་དུ་གཞག་པ་དང་། ཚོགས་སྤྱི་ཆོས་ཅན་དུ་གཞག་པ་གཉིས་ལས། དང་པོ་ལ་མཚན་གཞི་གཉིས་བཤད་པའི་ཕྱི་མ་སྐྱོན་མེད་དེ་དང་། གཉིས་པའི་མཚན་གཞི་དེ་ཡང་སྐྱོན་མེད་དུ་གསུངས་པའི་དོན་ནི། མཚན་གཞི་དང་པོ་རྒོལ་བའི་ཞེ་འདོད་ཡིན་པས་ཆོས་ཅན་གྱི་ཕྱོགས་གཅིག་ལ་མ་གྲུབ་པ་སྐྱོན་ཅན་ཡིན་ལ། ཕྱི་མའི་ཚེ་རྩོལ་བྱུང་གི་རྟགས་ཀྱིས་སྒྲ་ཐམས་ཅད་མི་རྟག་པར་སྒྲུབ་པ་རྒོལ་བའི་ཞེ་འདོད་མིན་པས། ཆོས་ཅན་གྱི་ཕྱོགས་གཅིག་ལ་མ་གྲུབ་པ་སྐྱོན་ཅན་མིན་པ་དང་། རྒོལ་བ་ཚུལ་གསུམ་ཀར་ཚོགས་པ་དེ་ལྟར་སྒྲུབ་འདོད་ཀྱི་རེ་རེ་བསྒྲུབ་པར་མི་འདོད་པས་རེ་རེ་ལ་མ་གྲུབ་པ་སྐྱོན་ཅན་མིན་པར་མངོན་ནོ་ཞེས་ཡོངས་འཛིན་དམ་པ་གསུང་ངོ་། །རྟགས་ཀྱི་ཕྱོགས་གཅིག་ཆོས་ཅན་ལ་མ་གྲུབ་པའི་སྐབས་སུ་རྩོལ་བྱུང་དེའང་སྒྲ་ཙམ་གྱི་ཕྱོགས་གཅིག་ལ་གྲུབ་ཕྱོགས་གཅིག་ལ་མ་གྲུབ་པ་སྐྱོན་མེད་དུ་གསུངས་པ་ནི་སྔ་མའི་གཞུང་འཛུགས་པར་མཛད་པའོ། །བློ་ངོར་མ་གྲུབ་པ་ལ་ཆོས་ཅན་དང་། རྟགས་དང་། དེ་གཉིས་ཀྱི་འབྲེལ་པ་ལ་ཐེ་ཚོམ་ཟ་ནས་མ་གྲུབ་པ་གསུམ་མོ། །གསུམ་པ་ནི། རྒོལ་བ་རྣམ་པ་གཉིས་ལ་མ་གྲུབ་པའི་དབྱེ་བ་གཉིས་སུ་རྣམ་པར་ཕྱེ་སྟེ་བཤད་དོ་ཞེས་པ་ནི་བསྡུ་བའི་ཚིགས་བཅད་དོ། །ཕྱོགས་རེའམ་ཞེས་པ་རྒོལ་བ་ལ་སྦྱར་བ་མ་ཤེས་པར་ཟད་དོ། །དེ་ལྟར་ན་དོན་ལ་མ་གྲུབ་པ་ལ་ཆོས་ཅན་དང་རྟགས་ཀྱི་ངོ་བོ་མ་གྲུབ་པ་གཉིས་ལས་ཕྱེ་བའི་དྲུག བློ་ངོར་མ་གྲུབ་པ་ལ་གསུམ་ལས་ཕྱེ་བའི་དྲུག་སྟེ་བཅུ་གཉིས་སུ་འདུས་ཏེ། ཆོས་ཆོས་ཅན་གྱི་ཕྱོགས་རེ་ལ་མ་གྲུབ་པ་ལས་ཕྱེ་བའི་སྐྱོན་དུ་འགྲོ་བའི་ཆ་རྣམས་ནི་རྟགས་ཀྱི་ངོ་བོར་མ་གྲུབ་པར་འདུས་ལ། གཞན་ནི་ཕྱོགས་ཆོས་སྐྱོན་མེད་ཡིན་ཞིང་། གྲུབ་མཐའ་ལ་ལྟོས་པའི་སྐྱོན་ནི་གྲུབ་མཐའ་ཁས་བླངས་པ་ལ་དགོངས་ཀྱི་ཡང་དག་པར་ན་དོན་ཆོཾས་ཅཾན་ནམ་རྟགས་ཀྱི་ངོ་བོ་མ་གྲུབ་པར་འདུས་པའི་ཕྱིར་རོ། །གཉིས་པ་མ་ངེས་པ་ལ་གསུམ་ལས། མ་ངེས་པའི་མཚན་ཉིད་ནི། ཕྱོགས་ཆོས་གྲུབ་ཅིང་ལྡོག་པ་ལ་ཐེ་ཚོམ་སྐྱེད་པའི་རྟགས་སོ། །གཉིས་པ་མཚོན་བྱའི་དབྱེ་བ་ལ་ཐུན་མོང་མིན་པ་དང་། ཐུན་མོང་བ་གཉིས། དང་པོ་ལ་མཚན་ཉིད་ནི། ཕྱོགས་བརྟགས་པ་ཤེས་འདོད་ཆོས་ཅན་ལས་གཞན་ཕྱོགས་གཉིས་པོ་གང་རུང་ལ་མ་གྲུབ་པའི་མི་ཤེས་པའི་རྟགས་ནི་ཐུན་མོང་མ་ཡིན་པའི་མ་ངེས་པའི་མཚན་ཉིད་དོ། །དབྱེ་ན་བཞི་ཡོད་དེ། གཉིས་ཀ་ལ་མེད་ནས་མ་མཐོང་བ་སྒྲ་རྟག་པ་གྲུབ་པ་ལ་མཉན་བྱ་ལྟ་བུ་དང་། ཡོད་ཀྱང་མ་མཐོང་བ་སྐྱེས་བུ་འདི་ལྷ་ལས་ཚེ་འཕོས་པར་སྒྲུབ་པ་ལ་མིག་དང་ལྡན་པ་དང་། མཐུན་ཕྱོགས་ལ་ཡོད་ཀྱང་མ་མཐོང་བ་སྒྲ་མི་རྟག་པར་སྒྲུབ་པ་ལ་བྱས་པ་རྟགས་དང་རིག་བྱེད་ཀྱི་སྒྲ་དཔེར་བཟུང་བ་དང་མི་མཐུན་ཕྱོགས་ལ་ཡོད་ཀྱང་མ་མཐོང་བ་གང་བྱས་པ་དེ་མི་རྟག་སྟེ། རིག་བྱེད་བཞིན། ནམ་མཁའ་ནི་མ་བྱས་སོ། །ཞེས་པའོ། །གཉིས་པ་ཐུན་མོང་བ་ལ་གཉིས་ལས། མཚན་ཉིད་ནི། ཕྱོགས་ལས་གཞན་ཕྱོགས་གཉིས་པོ་གང་རུང་ལ་འཇུག་པ་ཐུན་མོང་བའི་མཚན་ཉིད་དོ། །གཉིས་པ་དབྱེ་ན་དངོས་དང་ལྷག་ལྡན་གྱི་མ་ངེས་པ་གཉིས། དང་པོ་ལ་མཚན་ཉིད་ནི། ཕྱོགས་ཆོས་གྲུབ་ཕྱོགས་གཉིས་ཀ་ལ་མཐོང་ཡང་བཟློག་པ་མི་ཆོད་པའོ། །དབྱེ་ན་བཞི་ཡོད་ཅིང་། གཉིས་པ་ལ་ཡང་དག་དང་འགལ་བའི་ལྷག་ལྡན་གཉིས། ལྷག་ལྡན་གྱི་མཐུན་ཕྱོགས་ལ་མཐོང་ཞིང་ཅིག་ཤོས་མི་མཐུན་ཕྱོགས་ལ་མ་མཐོང་བ་ཡང་དག་ལྷག་ལྡན་ཡིན་ལ། གང་ཞིག་མི་མཐུན་ཕྱོགས་ལ་མཐོང་ཞིང་མཐུན་ཕྱོགས་ལ་མ་མཐོང་བ་འགལ་བའི་ལྷག་ལྡན་ཡིན་ནོ། །དེ་གཉིས་པོ་རེ་རེ་ལ་གསུམ་གསུམ་ཡོད་པའི་མཚན་གཞི་འགྲེལ་པར་བཞུགས་སོ། །གསུམ་པ་འགལ་བ་ལ་གསུམ་ལས། དང་པོ་ནི། རྟགས་ཏེ་ཕྱོགས་ཆོས་གྲུབ་ཅིང་། ལྡོག་པས་ཁྱབ་ན་འགལ་རྟགས་སོ། །གཉིས་པ་རབ་ཏུ་དབྱེ་བ་ལ། དངོས་པོའི་སྒོ་ནས་དབྱེ་བ། བརྗོད་འདོད་ཀྱི་སྒོ་ནས་དབྱེ་བ། དབྱེ་བ་གཞན་དུ་འདོད་པ་དགག་པའོ། །དང་པོ་ལ་འབྲེལ་པའི་དབང་གིས་གཉིས་སུ་དབྱེ། སྦྱོར་བ་ལ་ལྟོས་ནས་གསུམ་དུ་དབྱེ་བའོ། །དང་པོ་ལ་གཉིས་ལས། གཉིས་སུ་འགྲོ་བའི་ཚུལ་ནི། འབྲེལ་པ་ལ་ལྟོས་ནས་འགལ་བའི་རྟགས་གཉིས་ཉིད་ཡིན་ཏེ། མ་དམིགས་པ་ཐམས་ཅད་རང་བཞིན་མ་དམིགས་པར་འདུས་ཤིང་དེ་རྣམ་འཇོག་གི་རྒྱུ་ལས་རྣམ་གཞག་གི་འབྲས་བུའི་ཐ་སྙད་བྱ་རུང་དུ་སྒྲུབ་པས་གྲགས་རྟགས་ཡིན་ལ། དེ་རང་བཞིན་གྱི་གཏན་ཚིགས་སུ་བསྡུས་པས་འབྲས་རང་གི་རྟགས་སུ་འགྱུར་ལ་དེ་གཉིས་བཟློག་པའི་འགལ་བའང་གཉིས་ཡིན་པའི་ཕྱིར་རོ། །དང་པོ་ནི། སྒྲ་རྟག་སྟེ། བྱས་པའི་ཕྱིར་དང་། གཉིས་པ་ནི། རིག་བྱེད་ཀྱི་སྒྲ་རྟག་སྟེ། རྩོལ་བྱུང་ཡིན་པའི་ཕྱིར་ཞེས་པའོ། །གཉིས་པ་འབྲས་བུའི་འགལ་བ་ལ་རྩོད་པ་སྤོང་བ་ལ། རྩོད་པ་དང་ལན་གཉིས། དང་པོ་ནི། རྟགས་དེ་འགལ་བ་མིན་ཏེ། རྩོལ་འབྱུང་རྟག་པའི་འབྲས་བུ་ཡིན་པའི་ཕྱིར་ཞེ་ན། ལན་ལ་བཞི་ལས། དང་པོ་ཉན་ཤེས་སྒྲ་མི་རྟག་པའི་འབྲས་བུར་སྒྲུབ་པ་ནི། རིག་སྒྲ་ཐོས་པའི་ཉན་ཤེས་ཆོས་ཅན། སྒྲ་མི་རྟག་པའི་འབྲས་བུ་ཡིན་ཏེ། རྩོལ་བས་བཙལ་མ་ཐག་ཏུ་བྱུང་བའི་ཕྱིར། གཉིས་པ་དེ་རྟག་པའི་འབྲས་བུར་མི་འཐད་པ་ནི། གལ་ཏེ་ཉན་ཤེས་སྒྲ་རྟག་པའི་འབྲས་བུ་ཡིན་ན། མ་རྩོལ་བའི་སྔ་རོལ་དུའང་ཐོས་པར་འགྱུར་ཏེ། རྟག་པ་ལ་འགྱུར་བ་མེད་པའི་ཕྱིར། འདོད་ན། བཙལ་མ་ཐག་ཏུ་བྱུང་བ་འགལ་ལོ། །གསུམ་པ་རང་ལ་མཚུངས་པ་སྤང་བ་ནི། འོ་ན་ཁྱེད་རང་ལྟར་ན་ཡང་བུམ་འཛིན་གྱི་རྣམ་ཤེས་ལ་རྩིག་པ་ལ་སོགས་པས་བསྒྲིབས་པ་འགལ་ལོ་ཞེ་ན། རྩོད་པ་འདི་ནི་མི་མཚུངས་ཏེ། བུམ་པ་རྟག་པ་རྐྱེན་གྱིས་བསྒྲིབས་པར་འདོད་ན་བདེན་ཡང་བུམ་པ་མི་རྟག་པ་རྐྱེན་གྱིས་རྣམ་ཤེས་ཀྱི་རྒྱུར་འགྱུར་བའི་ཕྱིར། བཞི་པ་འགྱུར་མེད་ལ་དེ་མི་མཚུངས་ཏེ། ངེད་ཀྱང་དེ་ལྟར་འདོད་དོ་ཞེ་ན། རྐྱེན་གྱིས་འགྱུར་བ་དེ་འདྲ་བ་རིག་བྱེད་ལ་མི་འཐད་དེ། འགྱུར་བ་མེད་པའི་ཕྱིར། གཉིས་པ་ནི། སྦྱོར་བའི་དབྱེ་བས་ཡང་དག་གི་སྐབས་སུ་མ་དམིགས་པ་གསུམ་པར་འབྱེད་ན་ནི་དེ་དག་བཟློག་པ་ཉིད་འགལ་བ་ཡིན་པས་འགལ་བའང་གསུམ་དུ་འགྱུར་རོ། །གཉིས་པ་ལ་གསུམ་ལས། གཞན་ལུགས་དགག་པ་ནི་རྟོག་གེ་པ་འགའ་ཞིག སློབ་དཔོན་གྱིས་དེ་ནི་རེས་འགའ་ཆོས་ཀྱི་སྒོ་ནས་སམ། རེས་འགའ་ཆོས་ཅན་གྱི་སྒོ་ནས་སམ། དེའི་ཁྱད་པར་གྱི་སྒོ་ནས་བྱེད་པའི་ཕྱིར་དེས་ཐ་སྙད་དུ་བྱེད་དོ་ཞེས་གསུངས་པ་ལ་བརྟེན་ནས། ཆོས་དང་ཆོས་ཅན་གྱི་ངོ་བོ་དང་། དེ་གཉིས་ཀྱི་ཁྱད་པར་འགོག་པའི་དབྱེ་བས་འགལ་བ་བཞི་སྟེ། ཆོས་ཅན་གྱི་ངོ་བོ་འགོག་པ་ནི་ཆོས་ཅན་གྱི་ཁྱད་པར་ལ་ཕྱོགས་ཆོས་གྲུབ་ཅིང་། ངོ་བོ་དང་འགལ་བས་ཚོགས་དོན་གྱི་སྤྱི་ཕྱིནཾ་ཅིཾ་ལོགཾ་ཏུ་བྱེད་པ་ཡིན་ལ། མཚན་གཞི་ནི། དངོས་གྱུར་གྱི་ནམ་མཁའ་ཆོས་ཅན། རྟག་སྟེ། མ་བྱས་པའི་ཕྱིར་ཞེས་པའོ་ཞེས་ཟེར་མི་འཐད་དེ། ཆོས་ཅན་གྱི་ངོ་བོ་འགོག་ན་ཕྱོགས་ཆོས་མི་གྲུབ། ཕྱོགས་ཆོས་གྲུབ་ན་ཆོས་ཅན་མི་ཁེགས་ཤིང་། བསྒྲུབ་བྱ་ནམ་མཁའ་དངོས་པོར་ཡོད་པ་ལ་བྱེད་ན་ཆོས་ཀྱི་ངོ་བོ་འགོག་པར་འགྱུར་བའི་ཕྱིར། གཉིས་པ་རང་ལུགས་ནི། སྤྱིར་འགལ་བ་བཞི་སྟེ། ལ་ལ་དངོས་སུ་འགལ་བ་བརྗོད་པ་དང་། ལ་ལ་བརྗོད་པའི་ཤུགས་ཀྱི་འགལ་བར་འགྱུར་བ་དང་། ལ་ལ་ཆོས་བརྗོད་པ་དང་། ཆོས་ཅན་བརྗོད་པའི་འགལ་བའོ། །དེ་དག་ཀྱང་བརྗོད་འདོད་ཀྱི་སྟོབས་ཀྱིས་ཕྱེ་བ་ཡིན་གྱི་དོན་གྱི་སྦྱོར་བ་ཐ་དད་པ་ལས་ནི་མིན་ནོ། །མཚན་གཞི་ནི་རིམ་བཞིན། མི་རྟག་པའི་སྒྲ་རྟག་ཅེས་པ་དང་། རྟག་པ་བྱེད་པ་པོ་ཡིན་ཞེས་པ་དང་། མིག་ལ་སོགས་པ་གཞན་དོན་བྱེད་ཅེས་པ་དང་། གཞན་དོན་བྱེད་པ་མིག་ལ་སོགས་པ་ཞེས་བརྗོད་པ་ལྟ་བུའོ། །གསུམ་པ་རྩོད་སྤོང་ནི། ཡང་དག་ལ་ཡང་དངོས་སུ་སྒྲུབ་པ། ཤུགས་ལ་སྒྲུབ་པ། ཆོས་དང་ཆོས་ཅན་སྒྲུབ་པ་བཞིར་འབྱེད་དགོས་པར་མཚུངས་སོ་ཞེ་ན། ཕྱེ་ནའང་སྐྱོན་མེད་མོད། བྱེད་པ་ཆུང་བའི་ཕྱིར་ན་བཏང་སྙོམས་སུ་མཛད་ནས་དངོས་སུ་མ་ཕྱེ་སྟེ། རྣམ་ངེས་ལས། འགལ་བ་བཞིན་དུ་གཏན་ཚིགས་ལའང་། །ཅི་སྟེ་ཐ་མི་དད་ཅེ་ན། །རྣམ་པར་དབྱེ་བ་ལ་སུས་འགོག །ཅེས་གསུངས་སོ། །གསུམ་པ་ནི། འབྲེལ་པས་ཕྱེ་བ་གཉིས་པོའི་སྟེང་དུ། གྲངས་ཅན་པ་དག་མིག་སོགས་ཆོས་ཅན། གཞན་དོན་བྱེད་དེ། འདུས་པ་ཡིན་པའི་ཕྱིར་ཞེས་པའི་གཞན་དོན་སྒྲུབ་པ་འགལ་བ་གསུམ་པར་འགྱུར་རོ་ཞེ་ན། བདག་གི་དོན་སྒྲུབ་པ་ལ་བསམས་ནས་གཞན་དོན་བྱེད་པར་བསྒྲུབ་པའི་འགལ་བ་སོགས་འགལ་བ་གསུམ་པ་ནི་འདིར་མི་བཞེད་དེ། ཞེ་འདོད་དང་ནི་སྨྲས་པ་གཉིས། བསྒྲུབ་བྱ་ཉིད་དུ་མཚུངས་པས་སྔ་མའི་ཁོངས་སུ་འདུས་པ་ཡིན་པའི་ཕྱིར། གསུམ་པ་དེ་དག་གི་ངེས་པ་བསམ་པ་ལ་མཐའ་འགོག་གི་ངེས་པ་དང་། དེ་དག་གི་ནུས་པ་ངེས་པ་གཉིས། དང་པོ་ནི། མཐའ་གཞན་འགོག་པའི་ངེས་པ་ཡི་སྒོ་ནས་རྟགས་སུ་བཀོད་པ་ཐམས་ཅད་བཞི་རུ་ངེས་ཏེ། རྟགས་ཀྱི་ཕྱོགས་ཆོས་གྲུབ་མ་གྲུབ་གཉིས་ལས། མ་གྲུབ་ན་མ་གྲུབ་པའི་རྟགས་ལྟར་སྣང་ངོ་། །གྲུབ་པ་ལ་བསྒྲུབ་བྱ་སྒྲུབ་ངེས། འགོག་ངེས། གཉིས་ཀར་མ་ངེས་པ་གསུམ་ལས་རིམ་བཞིན། ཡང་དག འགལ་བ། མ་ངེས་པ་ཡིན་པའི་ཕྱིར་རོ། །གཉིས་པ་ནི། རྟགས་སུ་བཀོད་པ་བཞི་པོ་ལ་ནུས་པ་དེའང་རྣམ་པ་བཞི་ཡོད་དེ། དང་པོས་ཆོས་ཅན་གྱི་སྟེང་དུ་ཐེ་ཚོམ་ཙམ་ཡང་བསྐྱེད་མི་ནུས། བཞི་པས་ཐེ་ཚོམ། གསུམ་པས་མི་འདོད་པའི་ངེས་པ། གཉིས་པས་འདོད་པའི་ངེས་པ་བསྐྱེད་པ་ཡིན་ཏེ། མཁས་པ་རྣམས་ཀྱི་གཙུག་གི་ནོར་བུས། ཕྱོགས་ལ་མཐུ་མེད་སོམ་ཉིད་དང་། །མི་འདོད་འདོད་པའི་ངེས་བསྒྲུབ་བྱེད། །ཅེས་གསུངས་པ་ལྟར་རོ། །གཉིས་པ་རྟགས་དེས་རྟོགས་པའི་བསྒྲུབ་བྱ་ལ། མཚན་ཉིད་འགོད་པ། མཚན་གཞི་ངོས་བཟུང་བ། ཕྱོགས་ལ་གནོད་པའི་བསལ་བ་བརྗོད་པའོ། །དང་པོ་ལ་མཚན་ཉིད་ཀྱི་རྣམ་གཅོད་ལ་ལྟོས་ཏེ་ལྔར་བསྟན། ཡོངས་གཅོད་ལ་ལྟོས་ཏེ་གཅིག་ཏུ་སྒྲུབ་པ། དེ་དག་ལ་རྩོད་པ་སྤང་བའོ། །དང་པོ་ནི། མདོ་ལས། སྤྱིར་བསྒྲུབ་བྱ་ཡང་དག བྱེ་བྲག་གཞན་དོན་བསྒྲུབ་བྱ་ཡང་དག་མཚན་ཉིད་ལྔ་ལྡན་དུ་གསུངས་ཏེ། གང་ལ་རྟགས་སུ་སོང་བའི་རྒོལ་བས་མ་གྲུབ་པ་དེའི་ངོར་བསྒྲུབ་པར་བྱ་བའི་རང་གི་ངོ་བོ་ཡིན་གྱི། དེ་ཚད་མས་ཤེས་ཟིན་པ་ད་ལྟ་དྲན་ལམ་ན་མེད་ཀྱང་ཚིག་ཙམ་གྱིས་དྲན་རུང་མིན་པ་དང་། བསྒྲུབ་བྱ་བསྒྲུབ་བྱེད་གཉིས་ཀྱི་ནང་ནས་བསྒྲུབ་བྱ་ཉིད་དེ་ཁོ་ན་ཡིན་གྱི། དཔེ་རྟགས་མ་གྲུབ་པ་ལྟ་བུ་སྒྲུབ་བྱེད་དུ་བཀོད་བཞིན་པ་མིན་པ་དང་། རྒོལ་བ་རང་ཉིད་ཀྱིས་བསྒྲུབ་བྱར་ཁས་བླངས་པ་ཡིན་གྱི། བསྟན་བཅོས་མཁན་པོའི་འདོད་པ་ལུང་དོན་ལྟ་བུ་མིན་པ་དང་། རྒོལ་བས་ངག་ཏུ་དངོས་སུ་སྨྲས་པ་མེད་ཀྱང་ཞེ་བས་དེར་འདོད་པར་འགྱུར་བ་ཡིན་གྱི། ཞེ་བས་མི་འདོད་པ་མིག་སོགས་གཞན་དོན་བྱེད་པ་ལྟ་བུ་མིན་པ་དང་། ཚད་མས་མ་བསལ་བ་ཡིན་གྱི། སྒྲ་རྟག་པ་ལྟ་བུ་དེས་བསལ་བ་རྣམས་མིན་པ་ལྟ་བུའོ། །ལྔ་ལྡན་དེ་ཡང་རྟགས་ཡང་དག་གིས་བསྟན་པར་བྱ་བ་ནི་སྔ་མ་དང་། སྒྲུབ་ངག་ཡང་དག་གི་དོན་གྱི་བསྟན་པར་བྱ་བ་ནི་ཕྱི་མ་སྟེ། འདི་དག་རིག་པའི་གཞུང་ལུགས་བརྒྱད་ཀྱིས་དྲི་མ་མེད་པའི་དོགས་སེལ་དང་དགོངས་པར་སོང་མ་སོང་གཟུར་གནས་ཀྱི་རྣམ་དཔྱོད་ཀྱིས་དཔྱད་དེ་སྐལ་ལྡན་རྣམས་ཀྱི་དགའ་སྟོན། རིགས་པའི་དབང་ཕྱུག་རྣམས་ཀྱི་མཆོད་པའི་རྫས་དམ་པར་འབུལ་ལོ། །མདོར། བསྟན་བྱ་བ་ཁོ་ནའི་དེ་མ་ཐག་འབྱུང་ཞིང་། འདོད་པའི་མཐར་གྱུར་ཅེས་པའི་ཚིག་འབྱུང་ཡང་འདོད་པ་ལ་བསྟན་བྱ་བ་ཁྱད་གཞིར་མ་འབྲེལ་བ་དང་གྱུར་པ་ངེས་བཟུང་དང་བཟློས་པའི་སྐྱོན་མེད་དེ། ངོ་བོ་ཁོ་ནར་བསྟན་པར་བྱ་བ་ནི་ཁྱད་གཞི་ཡིན་ལ་དེ་མ་འོངས་པ་ལ་འཇུག་པའི་སྒྲ་ཡིན་ཞིང་འདོད་གྱུར་ནི་ཁྱད་ཆོས་ཡིན་ལ། དེ་འདོད་འགྱུར་དུ་སོང་ནས་མ་འོངས་པ་ལ་འཇུག་སྟེ་དེས་གྱུར་པའི་ནུས་པ་གཅོད་པའི་ཕྱིར་དང་། གཞི་ཆོས་ཡ་བྲལ་མི་རུང་བའི་ཕྱིར་རོ། །བཤད་ཟིན་པའི་ཟབ་དོན་རྣམས་མ་རྟོགས་པའི་རྟོག་གེ་པ་ཕལ་ཆེར། མདོ་ཚིག་གིས་གཞན་དོན་བསྒྲུབ་བྱ་ཁོ་ནའི་མཚན་ཉིད་བསྟན་པར་སྨྲ་བ་དང་། བསྟན་བྱ་བ་ཚིག་ལྔ་ཆར་གྱི་མཐར་མ་སྟོན་ན། འདོད་ཚིག་ལ་བསྟན་བྱ་བ་ཁྱད་བཞིར་མ་འབྲེལ་ཞེས་སྨྲ་བ་རྣམས་རང་བློའི་སྐྱོན་དུ་ཤེས་པར་གྱིས་ཤིག གཉིས་པ་ནི། རིགས་པའི་སྒོར་རིགས་མི་མཐུན་ནམ་ཡོངས་གཅོད་ལ་ལྟོས་ནས་སྐབས་སུ་བབ་པའི་རྒོལ་བ་རྣམ་དག་གི་བསྒྲུབ་བྱར་འདོད་པར་གྱུར་པ་ཞེས་གསུངས་ཤིང་། རྣམ་འགྲེལ་དུ་དེ་དག་ལ་མ་བསལ་བ་ཚང་བར་དགོངས་ཏེ་མདོའི་ལྔ་པོ་བཞི་དང་བཞི་པོ་གཅིག་ཏུ་བསྡུས་སོ། །གསུམ་པ་ནི། མཚན་ཉིད་གཉིས་པོ་འདི་ལ་གསུམ་ལས། དང་པོ་མ་ཁྱབ་པ་སྤང་བ་ནི། གློ་བུར་བའི་བསྒྲུབ་བྱ་ལ་མ་ཁྱབ་ཁས་བླངས་པ་མེད་པའི་ཕྱིར་རོ་ཞེ་ན། སྐྱོན་མེད་དེ། དེའི་ཚེ་དངོས་སུ་ཁས་བླངས་པ་མེད་ཀྱང་། སྒྲུབ་བྱེད་གློ་བུར་བ་ཡིན་པས་བསྒྲུབ་བྱ་ཡང་གློ་བུར་དུ་འདོད་པ་ཉིད་ཡིན་ཏེ། དུ་བ་གློ་བུར་བ་མཐོང་བས་བསྒྲུབ་བྱ་མེ་ཁས་ལེན་པ་བཞིན་ནོ། །གཉིས་པ་ཁྱབ་ཆེས་པ་སྤང་བ་ནི། སྐབས་སུ་མ་བབ་པ་དམ་བཅས་པ་ལ་ཁྱབ་ཆེས་ཏེ། དཔེར་ན་སྒྲ་རྟག་མི་རྟག་དྲིས་པ་ན་ལ་མེ་དང་ལྡན་ནོ་ཞེས་དམ་འཆའ་བའང་བསྒྲུབ་བྱར་ཐལ་ལོ། །འདོད་ན། ཚར་གཅད་པར་མི་འགྱུར་རོ་ཞེ་ན། དེ་ལྟ་བུའི་རྩོད་པ་འཇུག་པ་མེད་དེ། བསྒྲུབ་བྱར་ཁས་བླངས་པ་ན་བསྒྲུབ་བྱ་ཡིན་མོད་ཀྱི་ཆ་གཞན་གྱི་སྒོ་ནས་ཚར་བཅད་དུ་འགྱུར་བ་ཡིན་པའི་ཕྱིར་རོ། །གསུམ་པ་རྟགས་ལ་མཚུངས་པ་སྤང་བ་ནི། བསྒྲུབ་བྱ་ལ་ཁས་བླངས་པ་དགོས་པ་ལྟར་རྟགས་ལའང་ཁས་བླང་པ་ཅི་སྟེ་མི་དགོས་ཏེ་དགོས་པར་མཚུངས་པ་ཡིན་ནོ་ཞེ་ན། རྩོད་པ་འདིའང་འཇུག་པ་མེད་དེ། ཚུལ་གསུམ་གྲུབ་ན་ཁས་མ་བླངས་ཀྱང་རྟགས་སུ་འགྱུར་ལ། མ་གྲུབ་ན་ཁས་བླངས་ཀྱང་མི་འགྱུར་ཞིང་། བསྒྲུབ་བྱ་ལ་དངོས་སམ་སྐབས་ཀྱིས་ཁས་བླང་ནས་རྟགས་ཀྱིས་སྒྲུབ་པའི་ཕྱིར་རོ། །འོ་ན་བསྒྲུབ་བྱ་འདི་རྒོལ་བ་གཉིས་པོ་གང་ལ་ལྟོས་ནས་འཇོག་ཅེ་ན། གཉིས་ཀ་ལ་ལྟོས་ཏེ་སྐབས་སུ་བབ་པའི་བསྒྲུབ་བྱར་འོས་པ་ཞིག་ལ་ཕྱི་རྒོལ་གྱིས་རྣ་བ་གཏད་པར་འོས་ལ་དེ་ལས་གཞན་དུ་ཚར་བཅད་པར་འགྱུར་བའི་ཕྱིར་རོ། །གཉིས་པ་ལ་གསུམ་ལས། དང་པོ་གཞན་ལུགས་དགག་ན། ཕྱྭ་པ་ནི། བསྒྲུབ་བྱའི་མཚན་གཞི་ནི་སྒྲ་མི་རྟག་པ་ལྟ་བུ་དངོས་པོ་ཡིན་གྱི་སྒྲ་རྟག་པ་སོགས་མིན་ཏེ། ཚད་མས་བསལ་བ་འཇུག་པའི་ཕྱིར་དང་། རྟགས་ཀྱི་ནུས་ཡུལ་མིན་པའི་ཕྱིར། ལོ་ཆེན་ནི། བཏགས་པ་དངོས་མེད་ཁོ་ན་ཡིན་ཏེ། གྲུབ་བསལ་མེད་པ་ཞིག་བསྒྲུབ་བྱར་ཁས་བླངས་ན་སྒྲ་རྟག་པར་དམ་བཅས་པའང་སྐྱོན་མེད་དུ་འགྱུར་བའི་ཕྱིར་ཞེས་གསུངས་ཏེ། དེ་ལྟར་དངོས་པོ་དང་སྒྲ་དོན་སོ་སོར་ཕྱེ་སྟེ་བསྒྲུབ་བྱའི་མཚན་གཞིར་འདོད་པ་འཁྲུལ་ཏེ། རང་མཚན་ལ་དགག་སྒྲུབ་དངོས་སུ་བྱེད་མི་ནུས་ཤིང་། སྒྲ་དོན་ལ་དགག་སྒྲུབ་བྱེད་པར་གསུངས་པའི་ཕྱིར་དང་། སྒྲ་དོན་རྐྱང་པ་བསྒྲུབས་པས་རང་མཚན་མི་གྲུབ་པར་བཤད་ཟིན་པའི་ཕྱིར་རོ། །གཉིས་པ་རང་ལུགས་ནི། སྒྲའི་དོན་ལ་རང་མཚན་དུ་འཁྲུལ་པ་སྟེ་སྒྲ་མི་རྟག་པ་ལྟ་བུ་བསྒྲུབ་བྱའི་མཚན་གཞི་ཡིན་ནོ། །གསུམ་པ་རྩོད་སྤོང་ནི། མཚན་གཞི་འདི་ལ། དངོས་པོ་སྒྲ་མི་རྟག་པའི་ཚོགས་པ་བསྒྲུབ་བྱར་འདོད་པ་དེ་མི་འཐད་དེ། ཚོགས་པ་མ་གྲུབ་པའི་ཚེ་མཚོན་རྒྱུ་མེད་ཅིང་། གྲུབ་པའི་ཚེ་མཚན་ཉིད་མེད་པའི་ཕྱིར་རོ་ཞེས་རྩོད་པའི་གོ་སྐབས་མེད་དེ། སྔར་རྒོལ་གྱི་གྲུབ་ཀྱང་ཕྱིར་རྒོལ་གྱིས་མ་གྲུབ་པའི་ངོར་སྒྲུབ་དགོས་པའི་ཕྱིར་རོ། །ཡང་དངོས་མེད་སྒྲ་རྟག་པ་བསྒྲུབ་བྱར་འདོད་པ་དེ་མི་འཐད་དེ། དེ་གཉིས་སོ་སོ་བ་བསྒྲུབ་བྱ་མིན་ཞིང་། ཚོགས་པ་མི་སྲིད་པའི་ཕྱིར་རོ་ཞེས་རྩོད་པའི་གོ་སྐབས་ཡང་མེད་དེ་རྟོག་པ་ལ་སྒྲར་སྣང་བ་དེ་སྒྲུབ་པའི་ཕྱིར་རོ། །གསུམ་པ་ལ། སྤྱིའི་རྣམ་གཞག་དང་། སོ་སོའི་རང་བཞིན་ནོ། །དང་པོ་ལ། མཚན་ཉིད། དབྱེ་བསྡུ། རྩོད་སྤོང་ངོ་། །དང་པོ་ནི། ཚད་མའི་བསལ་བའི་མཚན་ཉིད་ནི། དེའི་ཕྱོགས་སུ་དམ་བཅས་ཙམ་ཉིད་ནས་དེ་དངོས་སུ་སེལ་ནུས་ཀྱི་འགལ་བ་ཚད་མས་གྲུབ་པའོ། །གཉིས་པ་ནི། བསལ་བ་ལ་རིགས་སྒོར་རང་ལུང་སོ་སོར་ཕྱེ་ནས་ལྔར་གསུངས་ལ། ལྔ་པོ་དེ་ཀུན་བཏུས་སུ་རང་ལུང་གཉིས་ཡིད་ཆེས་ཞེས་གཅིག་ཏུ་བྱས་ནས་བཞི་རུ་བསྡུས་ཏེ་བཤད་དོ། །འདི་ཡི་རྒྱུ་མཚན་གཅིག་དང་དགོས་པ་གཉིས་ནི་རྣམ་འགྲེལ་དུ་ཚིགས་བཅད་གསུམ་གྱིས་རིམ་བཞིན་བཤད་དོ། །འདིར་ཡང་དེ་བཞིན་དུ་བཤད་ན། བསལ་བ་ལ་བཞི་རུ་གསུངས་པ་ནི་ཡུལ་གྱི་སྒོ་ནས་རྗེས་དཔག་ལ་གསུམ་དུ་ཕྱེ་སྟེ་སེལ་བྱེད་བཞི་ཡོད་པའི་དབྱེ་བ་ཡིན་པའི་ཕྱིར་ཏེ། རྗེས་དཔག་ལ་རྟགས་ཀྱིས་ཁྱབ་པ། ཁས་བླངས་དང་དངོས་སྟོབས་ཀྱིས་གྲུབ་པ་གཉིས། དང་པོ་ལ་རང་གིས་དང་ཐམས་ཅད་ཀྱིས་ཁས་བླངས་པ་གཉིས་སུ་ཡོད་པའི་ཕྱིར་རོ། །དེ་ཡང་བསྡུ་ན་དངོས་སྟོབས་དང་ཁས་བླངས་ཀྱི་བསལ་བ་གཉིས་སུ་འདུས་ཏེ། སེལ་བྱེད་བཞིའི་ནང་ནས་མངོན་སུམ་དང་དངོས་སྟོབས་རྗེས་དཔག་ནི་དངོས་སྟོབས་ཀྱི་ཚད་མ་ཡིན་ཞིང་། ཁས་བླངས་དང་གྲགས་པ་གཉིས་ནི་ཁས་བླངས་པ་ཙམ་གྱིས་དེ་ལས་བྱུང་བ་དང་དེའི་བདག་ཉིད་དུ་སྒྲོ་བཏགས་ནས་བཞག་པ་ཙམ་ཡིན་པའི་ཕྱིར་ན། དེའི་བསལ་བ་ལའང་ཁས་བླངས་ཀྱི་བསལ་བར་བཞག་པ་ཙམ་ཡིན་པའི་ཕྱིར། གཞན་དུ་དངོས་པོ་སྟོབས་ཞུགས་ཡིན་ན་ཁོངས་སུ་བསྡུ་བར་གསུངས་པའང་མི་འཐད་པར་འགྱུར་རོ། །གསུམ་པ་ནི། རྗེས་དཔག་བཞིན་དུ་མངོན་སུམ་ལའང་ཟླ་གཉིས་མེད་དོ་ཞེས་ཟེར་བ་ལ་གཉིས་སྣང་མངོན་སུམ་དུ་ཁས་བླངས་པས་གནོད་པ་ལྟ་བུ་ཁས་བླངས་ཀྱི་བསལ་བ་དང་། བརྗོད་རུང་འཛིན་པའི་མངོན་སུམ་གྱིས་བརྗོད་མི་རུང་ལ་གནོད་པ་ལྟ་བུ་གྲགས་པའི་བསལ་བ་གཉིས་པོ་འཇུག་པའི་ཕྱིར་དྲུག་ཏུ་འགྱུར་རོ་ཞེ་ན། མིན་ཏེ་གཉིས་སྣང་མངོན་སུམ་དུ་བརྗོད་པའམ་ཁས་བླངས་པ་ཙམ་གྱིས་མངོན་སུམ་གྱི་ཚད་མ་མི་འཕེན་ལ། འཕེན་ན་ཡང་ཚིག་ལས་དོན་གྱི་རྣམ་པར་དཔོག་པའི་འབྲས་རྟགས་ལ་བརྟེན་པའི་རྗེས་དཔག་ལས་གཞན་མིན་ལ། སྒྲས་བརྗོད་དུ་རུང་བ་མངོན་སུམ་གྱིས་མི་གྲུབ་པས་མངོན་སུམ་གྱི་གྲགས་བསལ་མི་འཐད་པའི་ཕྱིར་རོ། །གཉིས་པ་ལ་བཞི་ལས། དང་པོ་མངོན་སུམ་གྱི་བསལ་བ་བཤད་ན། དམ་བཅས་ཙམ་ཉིད་ན་དངོས་སུ་སེལ་ནུས་ཀྱི་འགལ་བ་མྱོང་བའི་སྟོབས་ཀྱིས་གྲུབ་པ་མངོན་སུམ་གྱི་བསལ་བའི་མཚན་ཉིད་ཡིན་ནོ། །གཉིས་པ་རྗེས་དཔག་གི་བསལ་བ་ནི། དམ་བཅས་ཙམ་ཉིད་ན་དེ་དངོས་སུ་སེལ་ནུས་ཀྱི་འགལ་བ་ཚུལ་གསུམ་དངོས་པོ་སྟོབས་ཞུགས་ཀྱིས་གྲུབ་ན། དངོས་པོ་སྟོབས་ཞུགས་ཀྱི་རྟགས་ལ་བརྟེན་པའི་རྗེས་དཔག་གི་བསལ་བ་ཡིན་ནོ། །གསུམ་པ་ཡིད་བྱེད་ཀྱི་བསལ་བ་ལ་མཚན་ཉིད། དབྱེ་བ། དེ་དག་གི་དོན་ལ་དཔྱད་པ་གསུམ། དང་པོ་ནི། དམ་བཅས་ཙམ་ཉིད་ན་དངོས་སུ་སེལ་ནུས་པའི་འགལ་བ་ཡིད་ཆེས་པའི་ཚིག་གིས་གྲུབ་པ་ཁས་བླངས་ཀྱི་བསལ་བའི་མཚན་ཉིད་ཡིན་ནོ། །གཉིས་པ་ནི། དེ་ལ་དབྱེ་ན་རིགས་སྒོར་གསུངས་པ་ལྟར་ཁས་བླངས་ཀྱི་དང་རང་ཚིག་གི་བསལ་བ་གཉིས་སོ། །གསུམ་པ་ལ། ལུང་དང་རང་ཚིག་གི་ཁྱད་པར། དེ་དང་འགལ་ན་དམ་བཅའ་འཇིག་པ། དེས་ན་གཞན་དོན་ལ་སྒྲ་སྐྱོན་དུ་འགྱུར་བའོ། །དང་པོ་ལའང་གསུམ་ལས། སྔ་རབས་པའི་ལུགས་དཔྱད་ན། གཞན་སྔ་རབས་པ་དག དེ་གཉིས་ཀྱི་ཁྱད་པར་ཡིད་ཆེས་པའི་ལུང་དང་འགལ་བ་དང་། རྒོལ་བ་རང་གི་ཚིག་དང་འགལ་བ་ཡིན་ནོ་ཞེས་ཟེར། གཉིས་པ་སློབ་དཔོན་གྱི་དགོངས་པ་བརྗོད་པ་ལ་ངག་གི་དབྱེ་བར་འགྱུར་ཚུལ། ལུང་དང་འགལ་བ་བྱེ་བྲག་ཏུ་དཔྱད་པ་གཉིས། དང་པོ་ནི། སློབ་དཔོན་ནི་དེ་གཉིས་རྒོལ་བ་ཉིད་ཀྱི་ངག་གི་དབྱེ་བར་བཞེད་དེ། ངག་གི་དབྱེ་བ་སྟེ་ཞེས་གསུངས་པས་སོ། །དེ་ལ་དང་པོ་ནི་སྔར་དམ་བཅས་པ་དང་ཕྱིས་བརྗོད་པ་གཉིས་འགལ་བ་སྟེ། དཔེར་ན་སྔ་མར་དམ་བཅས་ནས་ཕྱིས་མོ་བཤམ་དུ་བརྗོད་པ་བཞིན་ནོ། །ཕྱི་མ་ནི་དམ་བཅས་པའི་དོན་དེ་ཉིད་ལ་དཔག་ན་འགལ་བ་སྟེ། དཔེར་ན་རྗེས་དཔག་ཚད་མ་མིན་ཞེས་བརྗོད་པའི་ཚེ་སྤྱི་གཞལ་བྱ་བདེན་པ་བཀག་ནས་རྗེས་དཔག་ཚིག་དེ་ཉིད་ཀྱི་བརྗོད་བྱར་གྱུར་པའི་གཞལ་བྱ་ཁས་ལེན་པས་སྔ་མ་དང་འགལ་བས་གཞལ་བྱ་ཕྱི་མ་རང་ཚིག་གི་བསལ་བར་འགྱུར་བ་ལྟ་བུའོ། །ཀུན་ལས་བཏུས་སུ་གཉིས་ཀ་ཡང་གཞལ་བྱའི་དོན་ཅན་གྱི་ཚད་མ་དག་མེད་དོ་ཞེས་དཔེ་གཅིག་གིས་བསྟན་པ་ནི་ཕྱོགས་མཚོན་དང་རྣམ་གསལ་གྱི་དཔེར་རིམ་བཞིན་ནོ། །རིགས་པའི་སྒོར་ལུང་དང་འགལ་བ་ལ་རྣམ་གསལ་གྱི་དཔེར་བརྗོད་གཞན་དུ་གསུང་སྟེ། ཆོས་ནི་ཚེ་འཕོས་ནས་བདེ་བ་སྟེར་བར་བྱེད་པ་མིན་ནོ་ཞེས་པའོ། །གཉིས་པ་ལ་ལུང་ཁྱད་པར་བ་རྗེས་དཔག་ཏུ་འདུ་བ། ལུང་ཕལ་པ་རང་ཚིག་དང་མཚུངས་པའོ། །དང་པོ་ནི། གཞལ་བྱ་དང་པོ་གཉིས་བརྗོད་བྱར་སྟོན་པ་ལ་ཚད་མ་དང་པོ་གཉིས་དང་། བསྐལ་པའི་དོན་ཤིན་ལྐོག་སྟོན་པ་ལ་རང་ཚིག་འགལ་བ་ཡིས་མི་གནོད་པའི་ལུང་ངམ་གསུང་རབ་ནི་ངེད་ཀྱི་ལུང་ཡིན་ལ། དེ་ལ་བརྟེན་ནས་བརྗོད་དོན་རྟོགས་པའི་བློ་རྗེས་སུ་དཔག་པར་བསྡུས་ཏེ་གསུངས་པ་ཡིན་ཏེ། ཡིད་ཆེས་ཚིག་ནི་མི་བསླུ་བའི་སོགས་སོ། །གཉིས་པ་ནི། དེས་ན་ཞེ་འདོད་དངོས་སྟོབས་རིགས་པས་གྲུབ་པའི་ལུང་ནི་ལུང་ཚད་མ་ཉིད་ཡིན་པས་ལོག་ཕྱོགས་ལ་གནོད་བྱེད་ཡིན་ལ། རིགས་པས་མ་གྲུབ་ན་ལོག་ཕྱོགས་ལ་གེགས་བྱེད་ཉིད་དུ་བཤད་པ་ཡིན་ཏེ། དེ་ཁས་བླངས་ནས་འགལ་ཡང་རང་ཚིག་འགལ་བ་དང་ཕན་ཚུན་སྟོབས་མཚུངས་པས་གནོད་བྱེད་མིན་པའི་ཕྱིར། ལུང་དུ་གྲགས་ཚད་ལུང་ཚད་མ་མིན་ལ། ཞེ་འདོད་ཚད་མས་གྲུབ་པ་དེ་ལུང་ཚད་མ་ཡིན་ཅིང་། ལུང་ལ་འཇུག་ཚུལ་ཡང་སྔར་ལུང་ཁས་བླངས་ནས་ནི་ཕྱིས་དོན་ལ་དཔྱོད་པ་བླུན་པ་ཡིན་པས། སྔར་དཔྱད་ནས་ཕྱིས་ཁས་ལེན་པ་ནི་མཛངས་པའི་ལུགས་ཏེ། བར་སྐབས་ཀྱི་ཚིགས་བཅད་དོ། །གསུམ་པ་རྩོད་སྤོང་ལ། གཞན་གྱི་ལུང་ལ་མཚུངས་པ་སྤང་བ། གེགས་བྱེད་བསྒྲུབ་བྱའི་སྐྱོན་དུ་མི་འགྱུར་བའི་རྩོད་པ་སྤོང་བ་གཉིས། དང་པོ་ནི། ལུང་གཞན་ཁྲུས་ཀྱིས་སྡིག་པ་འདག་པར་སྟོན་པའི་རིག་བྱེད་ཀྱི་ལུང་དང་འགལ་བ་ཡང་ལུང་དང་འགལ་བ་དེར་འགྱུར་ལོ། མ་ཡིན་ཏེ། ཆགས་སོགས་ཆོས་མིན་པ་སྡིག་པའི་རྩ་བ་དང་། ཆགས་བྲལ་སོགས་ཆོས་སུ་ཆད་པར་ལྟ་བ་རྣམས་མིན་པ་གྲུབ་མཐའ་སྨྲ་བ་རྣམས་འཆད་ལ། ཁྲུས་དང་ཆགས་སོགས་སྡིག་པའི་རྒྱུ་མི་འགལ་བས་ཁྲུས་ཀྱིས་སྡིག་པ་འདག་པར་སྟོན་པ་དེ་ལྟ་བུའི་ལུང་རྣམས་ལུང་མིན་པའི་ཕྱིར། གཉིས་པ་ནི། གལ་ཏེ་རང་གི་ཚིག་དང་བསྟན་བཅོས་དང་འགལ་བ་ཕྱོགས་སྐྱོན་ཅན་མིན་ཏེ། དེ་གཉིས་ཀྱིས་གེགས་བྱས་པ་ལས་བསྒྲུབ་བྱ་ལ་ཐེ་ཚོམ་ཙམ་སྐྱེ་བ་ཡིན་ལ། ཐེ་ཚོམ་ཟ་བ་དེ་ནི་བསྒྲུབ་བྱ་སྐྱོན་མེད་ཉིད་ཡིན་པའི་ཕྱིར་ཞེ་ན། མིན་ཏེ། ཚིག་ཕན་ཚུན་གྱི་གེགས་ཀྱིས་ཐེ་ཚོམ་སྐྱེད་པ་ཡི་སྒོ་ནས་སྐྱོན་དུ་སོང་བ་མིན་གྱི། ཚིག་ཕན་ཚུན་གྱི་གེགས་དེས་བསྒྲུབ་བྱ་མི་གྲུབ་པའི་སྒོ་ནས་སྐྱོན་དུ་འཇོག་པ་ཡིན་པའི་ཕྱིར། གཉིས་པ་ནི། དམ་བཅས་རང་གི་བསམ་པ་སྟོན་པ་ཡིན་ལ་དེ་ལས་འགལ་བ་མེད་པ་དགོས་ཏེ། རང་ལུང་གི་འགལ་བ་གཞི་གཅིག་ལ་འདུས་ན་རྩི་ངན་པའི་ཞོ་ལྟར་རང་གི་དམ་བཅའ་འཇིག་པའི་ཕྱིར། གསུམ་པ་ནི། དེས་ན་རྩོད་པའི་སྐབས་སུ་བརྗོད་པ་ལ་སྐྱོན་མ་ཆགས་པ་གལ་ཆེ་སྟེ། བརྗོད་པ་སྐྱོན་ཅན་གྱིས་རྩོད་པའི་སྐབས་སུ་ཕམ་བསྐྱེད་པའི་ཕྱིར་རོ། །བཞི་པ་གྲགས་པའི་བསལ་བ་ལ་མཚན་ཉིད། དེའི་རང་བཞིན་ངེས་པར་བྱ་བ་གཉིས། དང་པོ་ནི། དམ་བཅས་ཙམ་ཉིད་ན་དེ་དངོས་སུ་སེལ་ནུས་ཀྱི་འགལ་བ་འཇིག་རྟེན་ན་གྲགས་པས་གྲུབ་པ་གྲགས་པའི་བསལ་བའི་མཚན་ཉིད་དོ། །གཉིས་པ་ལ་བསྡུས་ཏེ་བཤད། ཕྱེ་སྟེ་བཤད་པ་གཉིས། དང་པོ་ནི། བརྡ་སྤྲོད་པ་དག་སྒྲ་དང་དོན་ལ་དངོས་འབྲེལ་འདོད་པ་སྔར་བརྗོད་བྱ་རྟགས་པར་བཀག་ཟིན་ཅིང་། སེལ་བ་བརྟག་པར་སྒྲ་ཐམས་ཅད་བརྗོད་འདོད་དབང་གིས་འཇུག་པ་ཡང་གྲུབ་ཟིན་པ་དེས་ན་སེལ་འཇུག་ཏུ་མཛད་བརྗོད་རུང་གི་གྲགས་པའང་འགྲུབ་བོ། །གཉིས་པ་ལ་གཉིས་ལས། ཐོག་མར་མདོའི་ཚིག་འགོད་ན། གང་ལ་ཐུན་མོང་མ་ཡིན་པའི་ཕྱིར་རྗེས་སུ་དཔག་པ་ནི་མེད་ལ་སྒྲ་ལས་བྱུང་བའི་གྲགས་པ་དང་འགལ་བའི་དོན་གྱིས་ན་བསལ་བ་དེའང་ཕྱོགས་མིན་ནོ་ཞེས་གསུངས་སོ། །གཉིས་པ་དེའི་དོན་གཏན་ལ་དབབ་པ་ལ། བཤད་ཚུལ་དང་པོ་དང་། གཉིས་པ་དང་། དེ་དག་གི་དགོངས་པའོ། །དང་པོ་ལ་གཞན་གྱིས་བཏགས་པ་དགག་པ། རང་གི་འཐད་པ་བརྗོད་པའོ། །དང་པོ་ལ་ཕྱོགས་སྔ་མ་བརྗོད་ན་བརྡ་སྤྲོད་པ་དག་ཡོད་པའི་རྟགས་ཀྱིས་རི་བོང་ཅན་ཟླ་བ་ཡིན་པ་འགོག་པ་ལ་གནོད་པ་མེད་ཅེས་ཟེར་རོ། །གཉིས་པ་དེ་དགག་པ་ལ་ཐུན་མོང་མིན་པར་འགྱུར་བ་དང་། འགལ་བར་འགྱུར་བའོ། །དང་པོ་ནི། རྟགས་འདི་ལ་དཔེ་མེད་པས་ཐུན་མོང་མིན་པ་ཡིན་ཏེ། དཔེར་གང་བཞག་པ་རྣམས་ལ་སྒྲ་ཀུན་བརྗོད་དུ་རུང་བའི་ཕྱིར་རོ། །དེས་ན་རྟགས་ཀྱི་གཙོ་བོ་ཡོད་པ་ལའང་རྗེས་འགྲོ་མེད་ན་རྟགས་ཕལ་བ་གང་བཀོད་ཀྱང་རྗེས་འགྲོ་མེད་པས་ཐུན་མོང་མིན་པར་འགྱུར་བ་ལྟ་ཅི་སྨོས། གཉིས་པ་ནི། སྒྲ་དོན་གྱི་ཡོད་པ་སྟེ་རྟོག་པ་ལ་སྣང་བའི་ཡོད་པ་ཐམས་ཅད་ལ་ཟླ་བའི་སྒྲས་བརྗོད་དུ་རུང་བའི་ཕྱིར། ཡོད་པ་ནི་འགལ་བ་ཡིན་ནོ། །གཉིས་པ་ལ་བརྗོད་དུ་རུང་བའི་གྲགས་པ་དང་། སྒྲ་ལས་བྱུང་བའི་གྲགས་པའོ། །དང་པོ་ལ་གསུམ་ལས། དང་པོ་དེ་ངོས་བཟུང་ན། འཇིག་རྟེན་ཡུལ་ལུགས་ཀྱི་དཔྱད་པ་ལས་བྱུང་བའི་སྒྲའི་བརྗོད་རུང་དེ་ཉིད་ལ་གྲགས་པ་ཡིན་པར་བཞེད་དེ། ཐ་སྙད་ལས་ནི་བསྐྱེད་པ་ཡི། །ཞེས་གསུངས་སོ། །གཉིས་པ་དེ་ཐམས་ཅད་ལ་ཁྱབ་པར་སྒྲུབ་པ་ནི། འཇིག་རྟེན་གྱི་སྒྲ་དེ་ཡང་ཤེས་བྱ་ཐམས་ཅད་ལ་འཇུག་ཏུ་རུང་བའི་ཕྱིར་ན་བརྗོད་རུང་གྲགས་པས་དོན་ཀུན་ལ་ཁྱབ་པ་ཡིན་ནོ། །གསུམ་པ་རྩོད་སྤོང་ནི། བརྗོད་རུང་ལ་གྲགས་པའི་སྒྲ་སྟེ་མིང་འདོགས་པ་འཇིག་རྟེན་པ་དང་འགལ་ཏེ། བུམ་སོགས་ལ་འཇིག་རྟེན་ན་ཟླ་བར་མ་གྲགས་པའི་ཕྱིར་ཞེ་ན་མིན་ཏེ། དངོས་སུ་མེད་ཀྱང་ཤེས་བྱ་ཀུན་ལ་ནུས་པ་ཡོད་པས་འཇུག་ཏུ་རུང་བ་ལ་གྲགས་པའི་སྒྲ་སྟེ་ཐ་སྙད་མཛད་དེ། འཚེད་པའི་ནུས་པ་ཡོད་པ་ལ་འཚེད་པ་ཞེས་བརྗོད་པ་བཞིན་ནོ། །གཉིས་པ་ལ། སྒྲ་བྱུང་གི་གྲགས་པ་ངོས་བཟུང་། དེ་རྗེས་དཔག་ཏུ་བསྡུ་བའོ། །དང་པོ་ནི། སྒྲ་ལས་བྱུང་བའི་གྲགས་པ་དང་། །ཞེས་གསུངས་པའི་དགོངས་པ་ཡང་གྲགས་པ་སྟེ་ཟླ་སྒྲས་བརྗོད་རུང་དོན་ཐམས་ཅད་ལ་གྲུབ་ན་ཡང་སྒྲ་ནི་བརྡ་ལ་བརྟེན་པ་དང་བརྡ་ཡང་བརྗོད་འདོད་ལ་བརྟེན་པའི་ངང་ཚུལ་ཅན་དུ་གྲུབ་ན་ནི་གྲགས་པ་བདེ་བླག་ཏུ་འགྲུབ་བོ་ཞེས་བསྟན་པའི་ཕྱིར་ཡིན་ནོ། །གཉིས་པ་ནི། བརྗོད་རུང་གི་ལོག་ཕྱོགས་འཇལ་བའི་འགལ་བ་ལ་མི་འཁྲུལ་པ་མི་སྲིད་དེ། བརྗོད་རུང་གྲགས་པའི་རྗེས་དཔག་གིས་གྲུབ་པས་སོ། །གཉིས་པ་ལ། རྗེས་དཔག་ལས་གྲགས་པ་ཡུལ་ཐ་དད་པར་སྒྲུབ། དེ་ལ་གཞན་གྱིས་བརྟགས་པ་དགག སློབ་དཔོན་ཉིད་ཀྱི་དགོངས་པ་དཔྱད་པའོ། །དང་པོ་ནི། གང་ལ་ཐུན་མོང་མིན་པའི་ཕྱིར་རྗེས་སུ་དཔག་པ་ནི་མེད་ལ་ཞེས་གསུངས་པའི་དོན། བརྗོད་མི་རུང་ལ་དངོས་སྟོབས་ཀྱི་རྗེས་དཔག་མེད་པར་སྟོན་པས། དངོས་སྟོབས་རྗེས་དཔག་ལས་གྲགས་པ་ཡུལ་ཐ་དད་པར་གསུངས་ཏེ། འདི་ལྟར་གྲགས་པ་སྟེ་སྒྲ་རྣམས་དངོས་པོས་སྐྱེད་ན་ནི་དངོས་སྟོབས་རྗེས་དཔག་བཞིན་དུ་ཡུལ་ངེས་པ་ཅན་དུ་འགྱུར་བ་ཞིག་ན་བརྗོད་འདོད་ཀྱི་དབང་གིས་ཕར་སྦྱར་བ་ལ་སྒྲ་རྣམས་དོན་གང་ལའང་མི་འཇུག་པ་མེད་དོ། །གཉིས་པ་ལ། བརྡ་སྤྲོད་པའི་རྟགས་ཐུན་མོང་མིན་པར་འགྱུར་བ། རང་གི་སྡེ་པའི་འཆད་ཚུལ་མི་འཐད་པའོ། །དང་པོ་ནི། དེས་ན་ཡོད་པའི་རྟགས་ཀྱིས་རི་བོང་ཅན་ཟླ་སྒྲས་བརྗོད་མི་རུང་དུ་སྒྲུབ་པའི་རྟགས་འདི་མཐུན་དཔེ་དང་ཐུན་མོང་ཉིད་མིན་ཏེ། ཀུན་ལ་འཇུག་ཏུ་རུང་བ་ཡི་གྲགས་པ་ཡུལ་འདིར་མི་འཇུག་ཅེས་བརྗོད་པའི་དཔེ་གཞན་རྙེད་དཀའ་བས་སོ། །དཔེར་ན་མཉན་བྱའི་རྟགས་ཀྱིས་སྒྲ་མི་རྟག་པར་སྒྲུབ་པ་བཞིན་ནོ། །གཉིས་པ་ནི། །ཊཱིཀ་བྱེད་པ་དག་ལུང་དོན་ནི་བརྗོད་རུང་དཔོག་པའི་གྲགས་པ་ཉིད་ལ་དཔེ་མེད་པར་སྟོན་ཏེ། འཇིག་རྟེན་ན་ཟླ་བ་གཅིག་ལས་མེད་པ་ཆོས་ཅན་ཡིན་ལ། ཟླ་བ་མིན་པ་ལ་ཟླ་སྒྲ་མི་འཇུག་པའི་ཕྱིར་ཞེ་ན། མིན་ཏེ། གྲགས་པ་སྤྱིའི་མཚན་ཉིད་འཆད་པའི་སྐབས་ཡིན་པས། རི་བོང་ཅན་ལ་དཔེར་མཛད་ནས་ཤེས་བྱ་ཀུན་ལ་གྲགས་པས་ཁྱབ་པར་བསྟན་པའི་ཕྱིར་དང་། ད་ཏྲིཀ་ཤིང་མིན་པ་སོགས་ལའང་གྲགས་པས་གནོད་པར་མཚུངས་པའི་ཕྱིར། གསུམ་པ་སློབ་དཔོན་གྱི་དགོངས་པ་དཔྱད་པ་ལ། ཟླ་བའི་སྒྲ་ཐུན་མོང་བར་སྒྲུབ། དེ་དངོས་པོ་སྟོབས་ཞུགས་སུ་འགྱུར་བ་བརྗོད་རུང་འགོག་ན་གྲགས་པ་དང་འགལ་བའོ། །དང་པོ་ནི། བསིལ་ཟེར་ཅན་ཟླ་བར་སྒྲུབ་པ་དཔེ་དང་ཐུན་མོང་བའི་རྟགས་ཡིན་ཏེ། ག་བུར་དང་ནི་དངུལ་ཆུ་སོགས་ལ་ཟླ་བའི་སྒྲ་ནི་གཞན་དུ་སྟེ་སྤོས་སྦྱོར་དང་བཅུད་ལེན་གྱི་བསྟན་བཅོས་སུ་གྲགས་ལ། དེ་ཉིད་དཔེར་བྱས་ནས་སོ། །གཉིས་པ་ནི། བརྡ་ལ་བརྟེན་པའི་སྒྲ་རྣམས་ཐམས་ཅད་ལ་འཇུག་པས་ཐུན་མོང་བ་ཉིད་ཡིན་ལ། ཁྱབ་སྟེ། བརྡ་ཡུལ་གཅིག་ལ་འཇུག་པར་གྲུབ་ནའང་ཀུན་ལ་འཇུག་རུང་དུ་གྲུབ་པ་འདི་ནི་དངོས་པོ་སྟོབས་ཞུགས་ཡིན་པའི་ཕྱིར། བརྗོད་འདོད་ཀྱི་གྲགས་པ་འགོག་ན་ཁྱེད་ཀྱིའང་རི་བོང་ཅན་ཟླ་བ་ཡིན་པ་སོགས་འཇིག་གོ །གསུམ་པ་ནི། དེས་ན་འདོད་པས་ཕར་སྦྱར་བའི་བརྡ་དོན་ཀུན་ལ་འཇུག་ཏུ་རུང་བཞིན་དུ་བརྗོད་རུང་འགོག་ན་གྲགས་པ་དག་དང་འགལ་བར་དགོངས་ཏེ་འཇིག་རྟེན་གྱིས་གནོད་པས་སོ། །གསུམ་པ་དེ་དག་གི་དགོངས་པ་བཤད་པ་ལ། གཞན་ལུགས་དགག རང་གི་འདོད་པ་བརྗོད་པའོ། །དང་པོ་ལ་གསུམ་ལས། ཐོག་མར་བརྡ་དང་ཐ་སྙད་དུ་འབྱེད་པ་དགག་ན། གཙང་ལ་ལ་མིང་གི་རྣམ་པ་ཙམ་གྱི་ཞེན་རུང་ནི་བརྡ་དང་། དོན་ལྡོག་ངེས་པ་ལ་སྒྲ་བློས་ཞེན་རུང་ནི་ཐ་སྙད་ཀྱི་གྲགས་པ་གཉིས་སུ་འབྱེད་པ་ཡོད་དོ། །འདི་མི་འཐད་དོ། །མཚོན་བྱ་ལ་ཐ་སྙད་དུ་བྱེད་པ་ནི་གྲགས་པ་འཆད་པ་འདི་ཡི་སྐབས་དོན་མིན་ལ། འཇིག་རྟེན་དཔྱོད་པའི་ལུགས་ལ་བྱེད་ན་སྒོ་གསུམ་གྱི་བྱ་བ་ལ་འཇུག་པས་འགའ་ཞིག་གི་ཡིན་ལ་འགའ་ཞིག་མིན་པའི་ཕྱིར་དང་། ཐ་སྙད་ཀྱི་མཚན་ཉིད་དེ་འདྲ་སྔར་མཚན་ཉིད་བརྟགས་པར་བཀག་ཟིན་པའི་ཕྱིར། གཉིས་པ་བརྡ་ལ་དངོས་དང་ཞེན་པར་འབྱེད་པ་དགག་ན། བརྡའི་གྲགས་པ་ལའང་དངོས་དང་ཞེན་པའི་བརྗོད་རུང་གི་དབྱེ་བ་གཉིས་ཡོད་དོ་ཞེས་ཟེར། དེའང་དང་པོ་ནི་དོན་སྤྱི་དང་ཕྱི་མ་དངོས་པོར་བྱས་ནས། ཟླ་སྒྲས་དངོས་སམ་ཞེན་པའི་སྒོ་ནས་བརྗོད་དུ་རུང་སྟེ། རྟོག་ངོར་ཡོད་པའམ་རང་མཚན་དུ་ཡོད་པའི་ཕྱིར། བུམ་པའི་དོན་སྤྱི་དང་རང་མཚན་བཞིན། བཤད་ཚུལ་དང་པོས་ཞེན་པ་དང་ཕྱི་མས་དངོས་ཀྱི་བརྗོད་རུང་འཆད་པ་ཡིན་ཟེར་མི་འཐད་དེ། འཆད་པའི་ཚེ་ན་དངོས་ཞེན་གཉིས་སུ་དབྱེར་ཡོད་མོད་ཀྱི། འཇུག་པའི་ཚེ་དེ་འདྲའི་རྣམ་དབྱེ་མེད་པར་བཤད་ཟིན་པའི་ཕྱིར། གསུམ་པ་དེས་ན་བཤད་ཚུལ་གཉིས་ལ་སྦྱར་བ་འཁྲུལ་པ་ནི། དེས་ན་མདོའི་བཤད་ཚུལ་ཕྱི་མ་དང་དང་པོ་རྣམ་པ་གཉིས་རིམ་བཞིན་དངོས་པོ་དང་ཞེན་པའི་བརྗོད་རུང་གི་གྲགས་པར་འཆད་པ་འཁྲུལ་པ་ཡིན་ནོ། །གཉིས་པ་རང་གི་འདོད་པ་ནི། དེས་ན་འཆད་ཚུལ་སྔ་མས་ནི་སྒྲ་བྱུང་གྲགས་པ་གང་གིས་ཀྱང་མི་ཁེགས་པ་ཡིན་ཏེ། དེའི་ལོག་ཕྱོགས་སྒྲུབ་པ་ལ་རྟགས་སམ་རྗེས་དཔག་མེད་པའི་ཕྱིར་ཞེས་པའམ་ཡང་ན་དེ་ལ་འགལ་ཟླ་མེད་པ་ངེས་པའི་ཕྱིར། ལོག་ཕྱོགས་ལ་གནོད་བྱེད་ཡིན་ཏེ། དེ་ལ་འགལ་ཟླ་མེད་པའི་ཕྱིར་རོ་ཞེས་བསྟན་ཏོ། །འཆད་ཚུལ་ཕྱི་མ་ནི། གྲགས་པའི་རྗེས་དཔག་ལས་དངོས་སྟོབས་རྗེས་དཔག་ཡུལ་གྱི་དབྱེ་བ་ཐ་དད་པར་བསྟན་པའི་ཕྱིར་ཡིན་ཏེ། རྗེས་དཔག་གི་ཡུལ་དངོས་པོ་ཡིན་ལ། འདི་ཡི་ཡུལ་སྒྲོ་བཏགས་ཡིན་པའི་ཕྱིར་རོ། །སྔར་བཤད་པ་དེ་ལྟར་སེལ་བའི་སྒོ་ནས་བརྗོད་བྱ་རྗོད་བྱེད་ཤེས་ན་གྲགས་པ་ཡི་བསལ་བ་མཁས་པའི་དགོངས་པ་བཞིན་འགྲུབ་པ་ཡིན་ནོ། །ཚད་མ་རིག་པའི་གཏེར་ལས་རང་དོན་རྗེས་དཔག་བརྟག་པའི་རབ་ཏུ་བྱེད་པ་བཅུ་པའི་རྣམ་བཤད་བསྟན་ཟིན་ཏོ།། ༈ །།གཉིས་པ་གཞན་དོན་རྗེས་དཔག་ལ། མཚན་ཉིད། སྨྲ་བ་པོའི་གང་ཟག རྩོད་པའི་སྐབས་ཀྱི་ངག་གི་རབ་དབྱེའོ། །དང་པོ་ནི། གཞན་དོན་རྗེས་དཔག་གི་མཚན་ཉིད་ནི། སྔར་རྒོལ་རང་ཉིད་ཀྱིས་མཐོང་བའི་ཚུལ་གསུམ་གཞན་ཕྱི་རྒོལ་ལ་སྒྲ་སྐྱོན་དང་བྲལ་བར་སྟོན་པའི་ངག་གོ །གཉིས་པ་ལ་སོ་སོའི་མཚན་ཉིད། དེ་དག་རྒྱལ་ཕམ་གྱི་རྣམ་གཞག དེ་ལ་དབང་པོས་ཇི་ལྟར་སྒྲུབ་པའི་ཚུལ་ལོ། །དང་པོ་ནི། སྒྲུབ་བྱེད་བརྗོད་པར་ཁས་ལེན་པ་དང་། སུན་འབྱིན་བརྗོད་པར་ཁས་ལེན་པ་དང་། དེ་རྒྱལ་ཕམ་བརྡ་སྤྲོད་པར་ཁས་ལེན་པའི་གང་ཟག་ནི། རྒོལ་བ་དང་། ཕྱིར་རྒོལ་བ་དང་། དབང་པོ་གསུམ་གྱི་མཚན་ཉིད་དུ་རིམ་བཞིན་ནོ། །གཉིས་པ་ནི། རྒོལ་བ་གཉིས་པོ་ལ་གང་སྐྱོན་ཅན་བརྗོད་པ་དང་། ཡོན་ཏན་ཏེ་སྐྱོན་མེད་བརྗོད་པ་ཡི་སྒོ་ནས་ཚར་བཅད་པ་དང་རྗེས་སུ་འཛིན་པ་འཇུག་ལ། སྐྱོན་ཡོན་དང་ལྡན་པ་དེ་ལྟར་སྟོན་ན་རྒྱལ་ཕམ་ཡོད་དེ། རྒོལ་བས་སྒྲུབ་བྱེད་ཡང་དག་བཀོད་པ་ལ་ཕྱིར་རྒོལ་གྱིས་སྐྱོན་མ་བརྗོད་ན་ཕྱིར་རྒོལ་ཕམ་ལ། རྒོལ་བས་སྒྲུབ་བྱེད་ལྟར་སྣང་བཀོད་པ་ལ་ཕྱིར་རྒོལ་གྱིས་སྐྱོན་ཡང་དག་བརྗོད་ན་རྒོལ་བ་ཕམ་ཞིང་། དེ་ལྟར་མིན་པར་རྒོལ་བས་སྒྲུབ་བྱེད་ལྟར་སྣང་བཀོད་ཀྱང་ཕྱིར་རྒོལ་གྱིས་སྐྱོན་མ་བརྗོད་པའམ་སྐྱོན་ལྟར་སྣང་ཞིག་བརྗོད་ཀྱང་རྒོལ་བས་ཚེར་མ་འབྱིན་མ་ཤེས་ན་གཉིས་ཀ་ལ་རྒྱལ་ཕམ་གཉིས་ཀ་མེད་པར་རྩོད་རིགས་ལས་གསུང་སྟེ། སྐྱོན་ཅན་ཡིན་ཡང་སྒྲུབ་པ་དང་སུན་འབྱིན་པ་མ་ཤེས་པའི་ཕྱིར་དང་། རྒྱལ་ཕམ་གྱི་རྣམ་གཞག་རྒོལ་བ་གཉིས་ཀྱི་སྤོབས་པ་འཇོམས་ནུས་མ་ནུས་ལ་རགས་ལས་པའི་ཕྱིར་དང་། རྫུན་དང་གཡོ་དང་ཚིག་དོར་ལ་སོགས་པ་གཡོ་སྒྱུས་བསླུས་ཤིང་ཚར་བཅད་ཀྱང་དེ་ལ་རྒྱལ་ཕམ་ཡོད་པར་མི་བཞེད་དེ། གྲུབ་མཐའ་སྲུང་མི་ནུས་པས་སོ། །གསུམ་པ་ལ། སྤྱིར་ཚར་བཅད་པ་དང་རྗེས་སུ་བཟུང་བའི་ཚུལ། བྱེ་བྲག་ཏུ་ཚར་བཅད་ཀྱི་གནས་གཏན་ལ་ཕབ་པའི་ཚུལ་ལོ། །དང་པོ་ནི། འཇིག་རྟེན་པ་རྣམས་ནི་སྲོག་དང་ནོར་ལ་སོགས་པ་འཕྲོག་པས་ཚར་བཅད་པ་དང་། གོ་འཕངས་སྦྱིན་པ་ལ་སོགས་པས་རྗེས་སུ་འཛིན་པར་འདོད་ལ། དམ་པ་མཁས་པའི་གྲྭ་སར་ནི་གྲུབ་མཐའ་ནོར་བ་དོར་བ་དང་། བདེན་པ་ལེན་པ་དང་། དེ་ལྟར་སྒྲོགས་པར་བྱེད་པ་ལ། ཚར་བཅད་པ་དང་། རྗེས་འཛིན་དུ་འདོད་དོ། །གཉིས་པ་ལ་འཐད་པ་བརྗོད་པ་དང་། འཁྲུལ་བ་དགག་པ་གཉིས། དང་པོ་ནི། ཚར་བཅད་ཀྱི་རྩ་བའི་དབྱེ་བ་གཉིས་ཡིན་ལ། དེ་ལས་ཕྱེ་བའི་བཞི་ཡོད་དེ་རྒོལ་བ་ལ་སྒྲུབ་པའི་ཡན་ལག་མི་བརྗོད་པ་དང་། ཡན་ལག་མིན་པ་བརྗོད་པ་དང་། ཕྱིར་རྒོལ་ལ་སྐྱོན་མི་བརྗོད་པ་དང་། སྐྱོན་མིན་པ་བརྗོད་པ་གཉིས་སོ། །འདི་ནི་རིག་པ་མཁྱེན་པའི་དགོངས་པ་ཡིན་ཏེ། རྩོད་རིག་ལས། སྒྲུབ་པའི་ཡན་ལག་མི་བརྗོད་ཅིང་། །ཞེས་སོགས་གསུངས་སོ། །གཉིས་པ་ལ། གངས་ཅན་པའི་ལུགས་དང་། རྐང་མིག་གི་ལུགས་དགག་པ་གཉིས། དང་པོ་ནི། གངས་ཅན་པ་རྣམས་རྒོལ་བ་ལ་དྲིས་པའི་ཚེ་ལན་མི་བརྗོད་པ། སྐྱོན་ཅན་བརྗོད་པ། མ་དྲིས་པ་བརྗོད་པ་སྟེ་གསུམ་དང་། སྐྱོན་སྤོང་བའི་ཚེ། སྐྱོན་མི་སྤོང་བ། ལན་ལྟར་སྣང་བ། སྐབས་སུ་མ་བབ་པའི་ལན་བརྗོད་པ་སྟེ་གསུམ་གཉིས་སྡོམ་པས་དྲུག ཕྱིར་རྒོལ་ལ་ཡང་འདྲི་བའི་ཚེ་མི་འདྲི་བ། མི་འོས་པ་འདྲི་བ། མ་འབྲེལ་བ་འདྲི་བ་གསུམ། སྐྱོན་བརྗོད་པ་སྐབས་སུ་བབ་པའི་ཚེ་སྐྱོན་མི་བརྗོད་པ། སྐྱོན་ལྟར་སྣང་བརྗོད་པ། སྐབས་སུ་མ་བབ་པའི་སྐྱོན་བརྗོད་པ་གསུམ་གཉིས་སྡོམ་པས་དྲུག དཔང་པོ་ལ་ཤན་མི་འབྱེད་པ། ཕྱིན་ཅི་ལོག་ཏུ་འབྱེད་པ། སྐབས་མིན་པར་འབྱེད་པ་གསུམ། ཀུན་ལ་ཐུན་མོང་དུ་རྣ་བ་མི་གཏོད་པ་གཅིག་དང་བཅུ་དྲུག་འདོད་དོ། །མི་འཐད་དེ། ཚར་བཅད་ཡིན་ན་སྔ་མ་གཉིས་སམ་བཞིར་འདུས་ལ། དེར་འདུས་པ་མིན་ན་ཚར་བཅད་ཉིད་མིན་པའི་ཕྱིར་དང་། དཔང་པོ་ལ་ནི་ཚར་བཅད་མེད་ལ། ཅི་ནས་བྱེད་ན་ཧ་ཅང་ཐལ་བའི་ཕྱིར་རོ། །གཉིས་པ་ནི། དམ་བཅའ་ལ་གནོད་དམ་བཅའ་གཞན། །དམ་བཅའ་འགལ་དང་དམ་བཅའ་སེལ། །གཏན་ཚིགས་གཞན་དང་དོན་གཞན་དང་། །དོན་མེད་པ་དང་དོན་མི་ཤེས། །དོན་བྲལ་དུས་ལ་མ་བབ་དང་། །མ་ཚང་ལྷག་དང་ཡང་བརྗོད་དང་། །རྗེས་སུ་མི་སྨྲ་མི་ཤེས་དང་། །སྤོབས་པ་མེད་དང་རྣམ་གཡེང་དང་། །འདོད་པ་ཁས་ལེན་བརྒལ་བརྟག་འདོར། །རྗེས་སུ་སྦྱོར་མེད་ལ་སྦྱོར་དང་། །གྲུབ་མཐའ་ཉམས་དང་རྟགས་ལྟར་སྣང་། །ཞེས་པ་ལྟར་ཐུབ་པ་རྐང་མིག་གིས་བཤད་པ་ཚར་བཅད་ཉི་ཤུ་རྩ་གཉིས་ཡིན་ནོ། །གྲངས་ངེས་དེ་མི་འཐད་དེ། ཉེར་གཉིས་པོ་དེ་ལ་དཔལ་ལྡན་གྲགས་པ་ཡིས་འགའ་ཞིག་ཚར་བཅད་མ་ཡིན་པར་བཤད་ལ། གང་ཚར་བཅད་ཡིན་ན་གཉིས་པོའམ་བཞི་པོར་སྡུད་པའི་ཕྱིར། དེ་དག་ཕྱེ་སྟེ་བཤད་ན། མི་མཐུན་པའི་ཆོས་རང་གི་དཔེ་ལ་ཁས་ལེན་པ་ནི་དམ་བཅའ་ལ་གནོད་པའི་ཚར་བཅད་དེ། དཔེར་ན་སྒྲ་མི་རྟག་སྟེ། དབང་པོས་གཟུང་བྱ་ཡིན་པའི་ཕྱིར་ཞེས་བརྗོད་པ་ལ། ཕྱིར་རྒོལ་གྱིས་སྤྱིའི་སྒོ་ནས་ལྡོག་སྟེ། དབང་པོས་གཟུང་བྱ་ཡིན་པའི་ཕྱིར་སྒྲ་རྟག་ཅེས་བརྗོད་ན་སྔར་གྱི་དམ་བཅའ་ལ་གནོད་པས་སོ་ཞེས་ཟེར་རོ། །དེ་ནི་ཚར་བཅད་གཞན་མིན་ཏེ། སྒྲུབ་པའི་ཡན་ལག་མིན་པ་བརྗོད་པ་ཡིན་པའི་ཕྱིར། དམ་བཅས་པ་བཀག་པ་ལ་ཆོས་རྣམ་པར་བརྟགས་ནས་དེའི་དོན་སྟོན་པ་ནི་དམ་བཅའ་གཞན་པའི་ཚར་བཅད་དེ། དཔེར་ན་སྒྲ་མི་རྟག་པར་དམ་བཅས་པ་ལ་དབང་པོས་གཟུང་བྱ་ཉིད་ཀྱི་རྟགས་བརྗོད་པའི་ཚེ། རྟགས་དེ་མ་ངེས་པར་བསྟན་ཏེ་བཀག་པ་ལ། ཆོས་ཀྱི་བྱེ་བྲག་སྤྱི་དང་བུམ་པ་གཉིས་ཐམས་ཅད་དུ་འགྲོ་བ་མིན་པ་ལྟར་སྒྲ་ཡང་ཐམས་ཅད་དུ་འགྲོ་བ་མིན་ཞེས་དམ་བཅའ་གཉིས་པ་སྟོན་པ་བཞིན་ནོ། །དེ་ཡང་དམ་བཅའ་གཞན་གྱིས་སྒྲུབ་མི་ནུས་པས་སྐྱོན་ཡིན་ནོ་ཞེས་ཟེར་བ་ལ། དེ་ནི་དམ་བཅའ་གཞན་གྱིས་སྒྲུབ་པ་མིན་གྱི། འདིར་ནི་བསྒྲུབ་བྱ་མ་བསྟན་པར་སྒྲུབ་བྱེད་བསྟན་ནས་རྒོལ་བས་སུན་འབྱིན་ཤེས་ན་མ་ངེས་པ་བརྗོད་པར་འདུས་སོ། །དམ་བཅའ་རྟགས་དང་འགལ་བ་ནི་ཡོན་ཏན་ལས་མ་རྟོགས་པ་རྫས་དམ་བཅས་ནས་གཟུགས་སོགས་ལས་དོན་གཞན་མ་དམིགས་པའི་ཕྱིར་ཞེས་བཀོད་པ་ལྟ་བུའོ། །སོགས་པ་དམ་བཅའ་དང་དཔེ་འགལ་བ་ནི། སྒྲ་རྟག་སྟེ་དཔེར་ན་བུམ་པ་བཞིན་ཞེས་པ་དང་། དམ་བཅའ་དང་རང་ཚིག་འགལ་བ་དཔེར་ན་དགེ་སྦྱོང་མ་སྦྲུམ་མའམ། བདག་མེད་དོ་ཞེས་པ་ལྟ་བུའོ་ཟེར། དེ་ནི་སྦྱོར་བ་ལ་དམ་བཅའ་བརྗོད་ན་ལྷག་པའི་སྐྱོན་ཡིན་པས་དེ་ཉིད་ཀྱི་སྒོ་ནས་ཚར་བཅད་དུ་འགྱུར་གྱི། གཞན་དོན་མེད་དེ་དམ་བཅའ་ཚིག་ཏུ་མ་བརྗོད་པར་ཞེ་འདོད་ཀྱི་དམ་བཅའ་དང་གཏན་ཚིགས་འགལ་ན་རྟགས་སྐྱོན་གསུམ་དུ་འགྱུར་ལ། རྟགས་ལ་སྐྱོན་མེད་ན་ཚར་བཅད་མིན་པའི་ཕྱིར། དམ་བཅའ་སེལ་བ་ནི་ཕྱོགས་ལ་དམ་བཅའ་བའི་དོན་སེལ་བ་སྟེ། དཔེར་ན་སྒྲ་མི་རྟག་སྟེ། དབང་པོས་གཟུང་བར་བྱ་བའི་ཕྱིར་ཞེས་བཀོད་པ་ན། རྟགས་སྤྱི་ལ་ཡང་འཇུག་པས་མ་ངེས་སོ་ཞེས་བཀག་པའི་ཚེ་སྒྲ་མི་རྟག་པར་སུ་སྨྲ་ཞེས་སྔར་གྱི་དམ་བཅའ་འདོར་བའོ་ཞེ་ན། སྔ་མ་དེ་མ་ངེས་པ་བརྗོད་པའི་ཚར་གཅད་དུ་འདུས་པས་ངག་གཉིས་པ་ལ་ཚར་བཅད་འཇོག་པ་དོན་མེད་ཡིན་ནོ། །རྟགས་ཁྱད་པར་མེད་པ་བཀག་ནས་ཁྱད་པར་འདོད་པ་གཏན་ཚིགས་གཞན་པ་ཡིན་ཏེ། དཔེར་ན་གསལ་བ་འདི་དག་རང་བཞིན་གཅིག་ཡིན་ཏེ། ཚད་ཡོད་པའི་ཕྱིར་ཞེས་བཀོད་པ་ན། རྟགས་དེ་མ་ངེས་པར་བསྟན་ནས་བཀག་པ་ན་གཏན་ཚིགས་ཁྱད་པར་གཞན་ཡོད་པར་འདོད་པ་ལྟ་བུའོ་ཞེ་ན་མི་འཐད་དེ། སྔ་མའི་ངག་རྫོགས་ན་མ་ངེས་པའི་སྐྱོན་ཡིན་པས་གཉིས་པ་དཔྱད་ཅི་དགོས། ངག་མ་རྫོགས་ཤིང་ལན་གྱི་སྐབས་མི་སྟེར་ན་ཚར་བཅད་ཉིད་མིན་པའི་ཕྱིར་རོ། །རྣལ་མའི་དོན་དང་མ་འབྲེལ་བ་ནི་དོན་གཞན་ཞེས་བྱ་བ་ཡིན་ཏེ། དཔེར་ན་སྒྲ་རྟག་སྟེ། རེག་བྱ་མིན་པའི་ཕྱིར་ཞེས་བཀོད་པ་ལ། རྟགས་ཀྱི་སྒྲ་དོན་ཅི་ཞེས་བྱ་བ་ལས་བརྩམས་ཏེ། རྟགས་ཀྱི་སྐད་དོད་ཀྱི་སྒྲ་སྒྲུབ་འཆད་པ་ལྟ་བུའོ་ཞེ་ན་མི་འཐད་དེ། འདི་ཡང་རྒོལ་བ་མ་ངེས་པ་བརྗོད་པས་ཚར་བཅད་དང་། ཕྱིར་རྒོལ་སྐྱོན་མིན་པ་བརྗོད་པའི་སྒོ་ནས་ཚར་བཅད་ཡིན་གྱི་གཉིས་པོ་དེ་ལས་གཞན་པའི་ཚར་བཅད་མིན་ནོ། །ཡི་གེའི་གོ་རིམ་སྟོན་པ་དང་འདྲ་བ་ནི་དོན་མེད་པའོ། །དཔེར་ན་སྒྲ་རྟག་སྟེ། ཛ་ཝ་ག་ཌ་ད་ཉིད་ཀྱིས་ཕྱིར། ཛྙཱ་བྷ་གྷ་ཌྷ་དྷ་བཞིན་ནོ་ཞེས་སྒྲུབ་བྱེད་མ་བསྟན་པ་ཚར་བཅད་ཡིན་ནོ་ཞེས་ཟེར། འདི་ཡང་མི་འཐད་དེ། དེ་ནི་སྒྲུབ་པའི་ཡན་ལག་མིན་པ་བརྗོད་པ་ལས་གཞན་མིན་ནོ། །ཚོགས་པ་དང་ཕྱིར་རྒོལ་ལ་ལན་གསུམ་བརྗོད་ཀྱང་མ་གོ་ན་དོན་མི་ཤེས་པ་སྟེ། དེ་གཉིས་ལ་ལན་གསུམ་བརྗོད་ཀྱང་མི་ཤེས་པ་དང་། དྲི་མ་ཅན་གྱི་སྒྲ་དང་། མ་གྲགས་པ་དང་། མྱུར་ཆེས་པ་ལ་སོགས་པའི་རྒྱུས་དོན་མི་ཤེས་པ་སྒྲུབ་པར་འདོད་ན་ཚར་བཅད་པའོ་ཞེས་ཟེར་རོ། །མི་འཐད་དེ། དོན་མེད་པའི་སྒྲ་ལན་གསུམ་བརྗོད་པ་ནི་སྒྲུབ་པའི་ཡན་ལག་མིན་པ་བརྗོད་པར་འདུས་ལ། དོན་ལྡན་ལན་གསུམ་བརྗོད་ཀྱང་ཕྱིར་རྒོལ་གྱིས་མ་རྟོགས་ན་ཡང་ཕ་རོལ་པོ་བླུན་པས་ཡིན་གྱི་རྒོལ་བ་ཚར་བཅད་པའི་གནས་མིན་ནོ། །སྙོན་ཚིག་ལྟ་བུ་སྔ་ཕྱི་མ་འབྲེལ་བ་དོན་དང་བྲལ་བའོ་ཞེའོ། །མི་འཐད་དེ། འདིའང་སྒྲུབ་པའི་ཡན་ལག་མིན་པ་བརྗོད་པར་འདུས་སོ། །དམ་བཅའ་ལ་སོགས་པའི་ཡན་ལག་ལྔ་པོ་གོ་རིམ་བཟློག་སྟེ་སྟོན་པ་ནི་དུས་ལ་མ་བབ་པའོ་ཞེའོ། །མི་འཐད་དེ། དེ་ལས་འདོད་དོན་གོ་ན་ཚར་བཅད་མིན་ལ། དོན་མ་གོ་ན་སྒྲུབ་པའི་ཡན་ལག་མིན་པ་བརྗོད་པར་འདུས་སོ། །ཡན་ལག་ལྔ་པོ་གང་རུང་ཞིག་མ་བརྗོད་ན་མ་ཚང་བའོ་ཞེའོ། །མི་འཐད་དེ། ཡན་ལག་གཉིས་པའི་ཆ་མ་བརྗོད་ན་སྐྱོན་ཡིན་གྱི་དམ་བཅའ་བརྗོད་པ་མེད་པ་སོགས་ཚར་བཅད་ཀྱི་གནས་མིན་ནོ། །རྟགས་དང་དཔེ་ལྷག་པ་བརྗོད་པ་ནི་སྔ་མས་གྲུབ་པ་ལ་ཕྱིས་བསྣན་པས་ལྷག་པ་བརྗོད་པའོ་ཞེའོ། །དེ་ཡང་མི་འཐད་དེ། ངེད་ལྟར་ན་སྒྲུབ་བྱེད་མིན་པར་བརྗོད་པར་འདུས་ལ། ཁྱོད་ཀྱི་ལུགས་ལ་ཚར་བཅད་མིན་ཏེ། མི་དགོས་པ་སྐྱོན་དུ་མི་རྩི་བའི་ཕྱིར་རོ། །རྗེས་སུ་སྨྲ་བ་ལས་གཞན་སྒྲ་དང་དོན་དག་བཟློས་པ་ནི་ཡང་བརྗོད་པ། དཔེར་ན་སྒྲ་མི་རྟག་པ་མི་རྟག་ཅེས་པ་སྒྲ་བཟློས་པ་དང་། སྒྲ་མི་རྟག་སྒྲ་འགག་པའི་ཆོས་ཅན་ཡིན་ཞེས་དོན་བཟློས་པའོ་ཞེའོ། །འདིར་སྒྲ་བཟློས་པ་ལོགས་སུ་བརྗོད་མི་དགོས་ཏེ། དོན་ཟློས་སུ་འདུས་པའི་ཕྱིར་དང་། དོན་མི་ཟློས་ན་སྒྲ་ཟློས་པ་སྐྱོན་མེད་དེ། ཁྱོད་དགའ་ན་ང་དགའ་ཞེས་སོགས་ལྟ་བུའོ། །དོན་བཟློས་པ་སྐྱོན་ཡིན་ཡང་སྒྲུབ་བྱེད་མིན་པ་བརྗོད་པར་འདུས་ཤིང་། དེ་ཡང་སྒྲུབ་པའི་ངག་ལ་སྐྱོན་ཡིན་གྱི་གཏམ་རྒྱུད་རྒྱས་པའི་ཚེ་འདི་སྐྱོན་མིན་ཏེ། ཕ་རོལ་པོས་མ་གོ་བར་དོགས་པའི་ཚེ་དཔང་པོ་སོགས་ལ་ཡང་ཡང་དགོས་པའི་ཕྱིར། ཚོགས་པ་ལ་རྒོལ་བས་ལན་གསུམ་བརྗོད་པས་ངག་གོ་ཡང་ཕྱིར་རྒོལ་གྱིས་རྗེས་སུ་མི་བརྗོད་ན་རྗེས་སུ་མི་སྨྲ་བའོ་ཞེའོ། །ཕྱིར་རྒོལ་གྱིས་རྒོལ་བའི་ངག་ཀུན་མ་བརྗོད་པ་ནི་སྐྱོན་མིན་ལ། དགོས་པ་མ་བརྗོད་ན་སྤོབས་པ་མེད་པའི་ནང་དུ་འདུས་པས་སོ་སོར་མི་དགོས་སོ། །དཔང་པོས་གོ་ཡང་ཕྱིར་རྒོལ་གྱིས་མ་གོ་ན་དོན་མི་ཤེས་པའོ་ཞེའོ། །འདི་ཡང་སྔ་མ་དང་འདྲ་བར་ཕྱིར་རྒོལ་གྱིས་མ་གོ་བ་ནི་སྤོབས་པ་མེད་པའི་ནང་དུ་འདུས་པས་དེ་ལས་གཞན་དུ་རིགས་པ་མིན་ནོ། །ལན་རྟོགས་པ་མེད་པ་ནི་མི་སྤོབས་པའམ་སྤོབས་པ་མེད་པའོ་ཞེའོ། །དེ་ནི་རྒོལ་བ་ལ་བྱུང་ན་སྒྲུབ་པའི་ཡན་ལག་མི་བརྗོད་པའམ་ཕྱིར་རྒོལ་ལ་བྱུང་ན་སྐྱོན་མི་བརྗོད་པའི་ཁོངས་སུ་འདུས་སོ། །བྱ་བ་ལ་ཆགས་ནས་རྩོད་པ་འདོར་བ་ནི་རྣམ་གཡེང་སྟེ། དཔེར་ན་ཕ་རོལ་གྱིས་ངག་བཀོད་པ་ན་སྔོན་ལ་འདི་བྱས་ལ་ཕྱིས་བརྩད་ཀྱིས་ཞེས་པ་ལྟ་བུའོ་ཞེའོ། །དེ་ལྟར་བྱ་དགོས་པའི་ཕྱིར་དྲང་པོ་ནི་ཚར་བཅད་མིན་ལ། གཡོ་ཅན་ནི་སྤོབས་པ་མེད་པར་འདུས་པས་སོ་སོར་མི་རིགས་སོ། །རང་ཕྱོགས་ཀྱི་སྐྱོན་ཁས་བླངས་ནས་གཞན་སྐྱོན་ཞར་ལ་འཇུག་པར་བྱེད་པ་འདོད་པ་ཁས་ལེན་ཏེ། དཔེར་ན་ཁྱེད་རྐུན་མ་ཡིན་ཏེ། སྐྱེས་བུ་ཉིད་ཡིན་པའི་ཕྱིར་ཞེས་པ་ལ། དེས་ཁྱེད་ཀྱང་ངོ་ཞེས་ཕྱིར་སྨྲ་བ་ལྟ་བུའོ་ཞེའོ། །མི་འཐད་དེ། དེའི་ཚེ་རྟགས་ལྟར་སྣང་དུ་ཤེས་སམ་མི་ཤེས་རིམ་པ་བཞིན་དུ་ཤེས་ན་སྐྱོན་མིན་ཏེ། སྐྱེས་བུ་ཡིན་པས་རྐུན་མར་འགྱུར་ན་ཁྱེད་ཀྱང་འགྱུར་རོ་ཞེས་རྟགས་མ་ངེས་པར་སྟོན་པའི་ཕྱིར་རོ། །མ་ངེས་ན་ནི་སྐྱོན་མི་བརྗོད་པའི་ཚར་བཅད་ཡིན་ནོ། །ཚར་བཅད་ཐོབ་པ་ལ་མི་གཅོད་པ་ནི་རྒལ་བརྟགས་འདོར་བའོ་ཞེའོ། །འདི་ཡང་རྒོལ་བ་གཉིས་ཀྱིས་ངག་སྐྱོན་ཅན་སུན་འབྱིན་མ་ཤེས་པས་སྤོབས་པ་མེད་པའི་ནང་དུ་འདུས་སོ། །ཚར་བཅད་ཀྱི་གནས་མིན་པ་ལ་དེར་སྦྱོར་བ་ནི་རྗེས་སུ་སྦྱོར་བ་མེད་པ་ལ་རྗེས་སུ་སྦྱོར་བ་ཞེའོ། །དེ་ཡང་རྒོལ་བས་ཡང་དག་བརྗོད་པ་ལ་ཕྱིར་རྒོལ་གྱིས་སྐྱོན་ལྟར་སྣང་བརྗོད་པ་སྤོབས་པ་མེད་པའི་ནང་དུ་འདུས་པས་དེ་ལས་གཞན་མིན་ལ། ཕྱིར་རྒོལ་གྱིས་སྐྱོན་ཡང་དག་བརྗོད་པ་ལ་རྒོལ་བས་ལྟར་སྣང་དུ་སྒྲོ་བཏགས་ནས་ཚར་གཅོད་ན་རྟགས་ལྟར་སྣང་བརྗོད་པར་འདུ་བས་ཚར་བཅད་ལོགས་པ་མེད་དོ། །གྲུབ་མཐའ་ཁས་བླངས་ནས་ངེས་པ་མེད་པའི་ཕྱིར་ཚིག་ཞར་ལ་འོངས་པ་ནི་གྲུབ་མཐའ་ཉམས་པའོ་ཞེའོ། །མི་འཐད་དེ། འདི་ཡང་སྒྲུབ་པའི་ཡན་ལག་མི་བརྗོད་པའི་ཚར་བཅད་ཉིད་ཡིན་གྱི། ངེས་པ་མེད་པའི་ཕྱིར་ཚིག་ཞར་ལ་འོངས་པས་ཚར་བཅད་པ་མིན་ནོ། །གཏན་ཚིགས་ལྟར་སྣང་བརྗོད་པ་ནི་ཚར་བཅད་ཀྱི་གནས་སུ་འདོད་དེ། དཔེར་ན་ཕྱིར་རྒོལ་བས་ལྟག་ཆོད་བརྗོད་པ་བཞིན་ནོ། །ལྟག་ཆོད་ཇི་ལྟ་བུ་ཞེ་ན། ཕྲད་པ་དང་མ་ཕྲད་པ་མཚུངས་པའི་ལྟག་ཆོད་ནས་དུས་འདས་མཚུངས་པའི་ལྟག་ཆོད་ཀྱི་བར་ཉི་ཤུ་རྩ་བཞི་ཡོད་ལ། ཕྲད་མ་ཕྲད་སོ་སོར་ཕྱེ་ན་ཉི་ཤུ་རྩ་ལྔ་ཡོད་མོད་ཀྱི་གཅིག་ཏུ་འདུ་བས་སོ། །མཚུངས་པའི་ལྟག་ཆོད་ཞེས་རེ་རེ་ལ་སྦྱར་རོ། །དེ་ཡང་དང་པོ་བཅུ་བཞི་ཀུན་བཏུས་སུ་བཤད་ལ། ཕྱི་མ་བཅུ་རིགས་པ་བརྟག་པར་བཤད་དོ། །འདི་དག་ཕྱོགས་གླང་གིས་དེ་གཉིས་སུ་བཀག་ལ་ཆོས་ཀྱི་གྲགས་པས་དགག་པའི་རྩོམ་པ་མ་མཛད་པར་བཏང་སྙོམས་སུ་མཛད་དེ། ཕྱོགས་གླང་གིས་བཀག་ཟིན་པ་དང་། ལྟག་ཆོད་དེ་དག་སྤྲོས་ན་ཉུང་ལ། བསྡུས་ན་མང་བར་དོགས་པའི་ཕྱིར། འདི་དག་སོ་སོའི་རྣམ་གཞག་འགྲེལ་པར་གསལ་བ་དང་ཁོ་བོ་ཡི་གེའི་འཇིགས་ནས་འདིར་མ་བྲིས་སོ། །རང་འགྲེལ་ལས། གསལ་ཞིང་རྒྱས་པར་བཤད་པའི་དགོས་པ་ནི། ལྟག་ཆོད་འདི་དག་མ་ཤེས་ན། །ཞེས་སོགས་བར་སྐབས་ཀྱི་ཚིགས་བཅད་དོ། །གསུམ་པ་ངག་གི་དབྱེ་བ་ལ། གང་ཟག་དང་། དགོས་པ་དང་། བརྗོད་ཚུལ་གྱི་སྒོ་ནས་དབྱེ་བའོ། །དང་པོ་ནི། གང་ཟག་གསུམ་ལ་བརྗོད་ཚུལ་དྲུག་ཡོད་དེ། རྒོལ་བ་ལ་དོན་གྱི་དངོས་པོ་འཇོག་པ་དང་། སྐྱོན་སྤོང་གི་ངག་གཉིས། ཕྱིར་རྒོལ་ལ་འདོད་པ་འདྲི་བ་དང་སྐྱོན་བརྗོད་པའི་ངག་གཉིས། དཔང་པོ་ལ་རྗེས་སུ་བརྗོད་པ་དང་རྣམ་པར་དབྱེ་བའི་ངག་གཉིས་སོ། །གཉིས་པ་ལ། སྒྲུབ་པ་དང་། སུན་འབྱིན་པའི་ངག་གོ །དང་པོ་ལ་ཡང་དག་དང་ལྟར་སྣང་གཉིས། དང་པོ་ལ་མཚན་ཉིད། ངག་འགོད་པའི་ཚུལ། ངག་གི་བྱེད་པ་གསུམ། དང་པོ་ནི། ཚུལ་གསུམ་སྟོན་པ་ནི་སྒྲུབ་པའི་ངག་སྟེ་བཤད་ཟིན་ཏོ། །གཉིས་པ་ལ། དགག་གཞག་སྤོང་གསུམ་མོ། །དང་པོ་ལ། སྔ་རབས་པའི་ལུགས་དང་། གངས་ཅན་པའི་ལུགས་དགག་པའོ། །དང་པོ་ནི། གྲངས་ཅན་པ་སོགས་ལ་ལ་མེ་ཡོད་དེ། དུ་བ་ཡོད་པའི་ཕྱིར། ཚང་བང་བཞིན། ལ་ལ་ཡང་དུ་བ་ཡོད་པས་མེ་ཡོད་ཅེས་ལྔ་ལྡན་དུ་སྦྱོར་བ་མི་འཐད་དེ། ཡན་ལག་ལྔ་པོ་ལ་དམ་བཅའ་དང་ཉེར་སྦྱོར་དང་མཇུག་སྡུད་བརྗོད་པ་གསུམ་པོ་ལྷག་པ་དང་། འདི་ངག་རྒྱས་པ་ཡིན་པས་སྤྱི་ཁྱབ་བརྗོད་པ་མ་ཚང་བའི་ཕྱིར་རོ། །གཉིས་པ་ནི། བོད་ཁ་ཅིག་ཡན་ལག་གཉིས་ལྡན་པ་ལའང་ལ་ལ་དུ་བ་ཡོད་པས་ཞེས་པ་དང་། སྒྲ་ཡང་བྱས་པས་ཞེས་རྣམ་དབྱེ་གསུམ་པ་དང་། འགའ་ཞིག་ལ་ལ་དུ་བ་ཡོད་པའི་ཕྱིར་ཞེས་པའམ། སྒྲ་ཡང་བྱས་པའི་ཕྱིར་ཞེས་རྣམ་དབྱེ་ལྔ་པ་སྦྱོར་རོ། །དེ་མི་འཐད་དེ། དེ་ལྟར་སྦྱར་ན་ངག་འཕྲོ་ཅན་དེས་དམ་བཅའ་འདྲེན་ཏེ། དུ་བ་ཡོད་པས་མེ་ཡོད། བྱས་པའི་ཕྱིར་མི་རྟག་ཅེས་བརྗོད་དགོས་པར་འགྱུར་བའི་ཕྱིར་རོ། །གལ་ཏེ་རྣམ་དབྱེ་གསུམ་པ་དང་ལྔ་པ་སྦྱར་ཡང་དམ་བཅའ་བརྗོད་མི་དགོས་ཏེ། དེའི་ཚེ་དམ་བཅའ་དོན་གྱིས་གོ་བའི་ཕྱིར་རོ་སྙམ་ན། དོན་གྱིས་གོ་ཡང་དམ་བཅའ་མ་བརྗོད་ན་ངག་དེའི་ནུས་པ་མ་རྫོགས་པའི་ཕྱིར། དུ་བ་ཡོད་པ་ཅི་ཡིན། བྱས་པའི་ཕྱིར་ཅི་ཡིན་ཞེས་སླར་དྲིས་ལ་བསམ་པ་བླང་དགོས་པར་འགྱུར་ལ། རྒོལ་བའི་ངག་མ་རྫོགས་པ་ལ་ཕྱིར་གྲོལ་གྱི་ངག་ཞུགས་ན་སྨྲ་བ་པོའི་སྐྱོན་དུ་རྩོད་རིགས་ལས་གསུངས་པའི་ཕྱིར། གཉིས་པ་ལ་གཉིས་ལས། དང་པོ་མི་མཁས་པ་ལ་སྦྱོར་བའི་ཚུལ་ནི། ཚུལ་གསུམ་ཀ་དྲན་ལམ་ན་མེད་པའི་རྒོལ་བ་བླུན་པོ་ལ་ནི་ཚིག་ཉུང་ཞིང་དོན་རྒྱས་པའི་ངག་ཡན་ལག་གཉིས་ལྡན་པ་ཆོས་མཐུན་སྦྱོར་དང་མི་མཐུན་སྦྱོར་གཉིས་སྦྱར་ཏེ། ངག་གཉིས་པོ་གང་སྦྱར་ཡང་ཁྱད་པར་མེད་དེ། གཅིག་དངོས་སུ་བརྗོད་པས་ཅིག་ཤོས་ལ་དྲན་པ་སྐྱེད་ནུས་པའི་ཕྱིར། ཕྱོགས་ཆོས་དང་ཁྱབ་པ་གཉིས་སྔ་ཕྱི་གང་བརྗོད་ཀྱང་ཁྱད་པར་མེད་ལ། དེ་ཐམས་ཅད་ལ་ཡང་མཐའ་རྟེན་རྫོགས་པའི་ཚིག་ཏུ་སྦྱར་དགོས་ཏེ། མ་སྦྱར་ན་ཚིག་འཕྲོ་ཅན་གྱི་སྐྱོན་ཡོད་པའི་ཕྱིར། གཉིས་པ་མཁས་པ་ལ་སྦྱར་བའི་ཚུལ་ནི། བྱས་པ་ཡིན་ན་མི་རྟག་པ་ཡིན་པས་ཁྱབ་པ་དྲན་ལམ་ན་ཡོད་པ་ངག་ཏུ་སྨྲ་བའི་རྒོལ་བ་མཁས་པ་ལ་ནི། འོ་ན་སྒྲ་ཡང་བྱས་སོ་ཞེས་པ་ལྟ་བུ་གཏན་ཚིགས་ཉིད་ཚིག་ཟིན་ལ་བརྗོད་པས་འགྲུབ་བོ། །ཚོགས་སུ་ཁྱབ་པ་ངག་ཏུ་མི་བརྗོད་ན་མཁས་སུ་ཟིན་ཡང་སྐབས་དེར་སྒྲུབ་པའི་ངག་རྫོགས་པར་སྦྱར་ཏེ། མ་རྫོགས་ན་ཀླན་ཀར་འགྱུར་བའི་ཕྱིར་རོ། །དེས་མཚོན་ནས་ཕྱོགས་ཆོས་དྲན་ལམ་ན་ཡོད་པ་ཁར་འབྱིན་པ་ལ་ཁྱབ་པ་ཙམ་ཚིག་ཟིན་ལ་བརྗོད་པའང་སྐྱོན་མེད་པར་ཤེས་པར་བྱའོ། །ཡོངས་འཛིན་དམ་པའི་ལེགས་བཤད་དོ། །དེས་ན་ཕྱིར་རྒོལ་ལ་བློ་ཡི་བྱེ་བྲག་གིས་གསུམ་དུ་ཡོད་ཅིང་། །གསུམ་པ་ལ་ཕྱོགས་ཁྱབ་གཉིས་ཀ་མ་དྲན་པ་ལ་ཆོས་མཐུན་མི་མཐུན་དང་། ཕྱོགས་ཆོས་མི་དྲན་པ་ལ་ཕྱོགས་ཆོས་ཙམ་དང་། ཁྱབ་པ་མ་དྲན་པ་ལ་ཁྱབ་པ་ཙམ་ཚིག་ཟིན་ལ་བརྗོད་པའི་ངག་བརྗོད་པའང་དོན་གྱིས་ཤེས་པར་བྱའོ། །གསུམ་པ་ནི། ཀུན་ལས་བཏུས་ལས། རང་ཉིད་ངེས་བཞིན་གཞན་དག་ལའང་། །ངེས་པ་བསྐྱེད་པར་འདོད་པ་ཡིས། །ཕྱོགས་ཆོས་དང་ནི་འབྲེལ་པ་དང་། །བསྒྲུབ་བྱ་བརྗོད་བྱ་གཞན་རྣམས་ཀྱང་། །ཞེས་པའི་ཚིག་བསྡུ་བ་དེ། བསྒྲུབ་བྱ་དང་འབྲེལ་བ་ཞེས་ཟླས་དབྱེར་བཤད་ནས་བསྒྲུབ་བྱ་བརྗོད་དགོས་པར་བཤད་པ་དང་འགལ་ཞེས་ཟེར་ན། འགལ་བ་མེད་དེ། ཁོ་བོ་ཅག་འབྲེལ་པ་ཡི་བསྒྲུབ་བྱ་ཞེས་རྣམ་དབྱེ་གསུམ་པ་དེ་ཡི་སྐྱེས་བུ་ཡི་བསྡུ་བ་ཡིན་པར་འཆད་པའི་ཕྱིར་རོ། །གསུམ་པ་ནི། སྒྲུབ་པའི་ངག་དེས་ཕ་རོལ་ལ་འབྲས་བུ་རྗེས་དཔག་སྐྱེད་པ་ཉིད་ཡིན་ནོ། །གཉིས་པ་སྒྲུབ་པ་ལྟར་སྣང་ལ་གཉིས་ལས། དང་པོའི་མཚན་ཉིད་ནི་སྒྲུབ་བྱེད་ཡང་དག་མ་ཡིན་པ་བཀོད་པའི་ངག་ནི་སྒྲུབ་པའི་ངག་ལྟར་སྣང་གི་མཚན་ཉིད་དོ། །གཉིས་པ་དབྱེ་ན། སྒྲུབ་པ་ལྟར་སྣང་དེ་ཡང་རྣམ་པ་གསུམ་སྟེ། ཚུལ་གསུམ་མ་ཚང་བའི་རྟགས་བརྗོད་པ་དོན་དང་དེ་ཚང་ཡང་ཚད་མས་མ་ངེས་པ་བརྗོད་པ་བློ་དང་། དེ་ཚང་ཞིང་ཚད་མས་ངེས་ཀྱང་བརྗོད་པ་མ་ཤེས་པ་སྒྲ་ཡི་སྐྱོན་ཆགས་པའི་དབྱེ་བ་ཡིས་སོ། །གཉིས་པ་སུན་འབྱིན་ལ། ཡང་དག་དང་། ལྟར་སྣང་གཉིས། དང་པོ་ལ་གཉིས་ལས་མཚན་ཉིད་ནི། སྐྱོན་ལ་སྐྱོན་དུ་བརྗོད་པའི་སྒོ་ནས་ལོག་རྟོག་སེལ་བྱེད་ཀྱི་ངག་གོ །གཉིས་པ་དབྱེ་ན། སུན་འབྱིན་རྣམ་པ་གསུམ་སྟེ། ཡུལ་གྱི་དབྱེ་བས་ཕྱེ་ན། མཚན་ཉིད། གཏན་ཚིགས། བསྒྲུབ་བྱའི་སྐྱོན་ལ་སྐྱོན་དུ་བརྗོད་པ་གསུམ། ངོ་བོའི་དབྱེ་བས་ཕྱེ་ན། དོན་བློ་སྒྲ་སྐྱོན་ལ་དེ་བརྗོད་པ་གསུམ། བརྗོད་ཚུལ་གྱི་དབྱེ་བས་ཕྱེ་ན། རྣལ་མ་དང་ཐལ་བ་བརྗོད་པ་གཉིས་སོ། །གཉིས་པ་ལ་གཉིས་ལས་མཚན་ཉིད་ནི། ལྟར་སྣང་ནི་སྐྱོན་ལ་སྐྱོན་དུ་མི་བརྗོད་པས་སྐྱོན་ཅན་གོ་བར་མི་ནུས་པའི་ངག་གོ །གཉིས་པ་དབྱེ་བ་ལ་གཉིས་ལས། གཞན་ལུགས་དགག་ན། མུ་སྟེགས་བྱེད་འགའ་ཞིག་ཚར་བཅད་ཉེར་གཉིས་ལྟག་ཆོད་ཉེར་བཞིའི་གྲངས་བྱེད་པ་དང་། བོད་འགའ་ཞིག་མཚན་ཉིད། གཏན་ཚིགས་སྒྲུབ་བྱའི་སྐྱོན་མིན་པ་སྐྱོན་དུ་བརྗོད་པ་དང་། དོན་བློ་སྒྲའི་སྐྱོན་མིན་པ་སྐྱོན་དུ་བརྗོད་པ་སྟེ་གསུམ་ཞེས་གྲངས་ངེས་བྱེད་མོད། དེ་དག་མི་འཐད་དེ། རྒོལ་བས་སྒྲུབ་བྱེད་ཡང་དག་བཀོད་པ་ལ་དེ་ལ་ཕྱོགས་སྣ་ཚོགས་ནས་སྨད་དམ། རང་ལ་བསྟོད་དམ་འབྲེལ་མེད་གཞན་འཆད་ན་ཡང་དེ་དག་ཏུ་མི་འདུ་བའི་ཕྱིར་རོ། །གཉིས་པ་རང་ལུགས་ནི། རྩ་བའི་དབྱེ་བ་རྩོད་རིགས་ལས་གསུངས་པ་ལྟར། མ་ཚང་བ་ལ་སོགས་པའི་སྐྱོན་མི་བརྗོད་པ་དང་། མ་ཚང་བ་ལ་སོགས་པ་མིན་པ་ལ་དེར་བརྗོད་པའམ་བདག་ལ་བསྟོད་ཅིང་གཞན་ལ་སྨོད་པ་ལ་སོགས་པ་སྐྱོན་མིན་པ་བརྗོད་པ་གཉིས་ཡིན། དེ་གཉིས་ཀྱི་ནང་སེལ་གྱི་དབྱེ་བ་བསམ་གྱིས་མི་ཁྱབ་པས་མ་ཕྱེ་སྟེ། ལོག་པའི་ལན་ལ་མཐའ་མེད་ཕྱིར། །དེ་དག་འདིར་ནི་སྤྲོ་བྱ་མིན། །ཞེས་གསུངས་པ་ལྟར་རོ། །གསུམ་པ་བརྗོད་ཚུལ་གྱིས་སྒོ་ནས་དབྱེ་བ་ལ། རང་རྒྱུད་དང་ཐལ་འགྱུར་གཉིས་ཡིན་པ་ལས་རང་རྒྱུད་ནི་བསྒྲུབ་ངག་ཡང་དག་ཡིན་པས་བཤད་ཟིན་ཏོ། །ཐལ་འགྱུར་ལ། ཐལ་བའི་རྣམ་གཞག་དང་། ལན་འདེབས་པའི་ཚུལ་གཉིས། དང་པོ་ལ་གསུམ་སྟེ། དགག་གཞག་སྤོང་བ་གསུམ། དང་པོ་ལ་གཉིས་ལས། དང་པོ་ཕྱོགས་སྔ་བརྗོད་ན། གངས་ཅན་གྱི་རྟོག་གེ་པ་དག ཐལ་འགྱུར་དུ་བཀོད་ཚད་ཀྱི་དབྱེ་བ་ལ་བཞིར་འདོད་དེ། ཐལ་བའི་རྟགས་ཁྱབ་གཉིས་ཀ་མ་གྲུབ་པ། རྟགས་འབའ་ཞིག་མ་གྲུབ་པ། ཁྱབ་པ་འབའ་ཞིག་མ་གྲུབ་པ། གཉིས་ཀ་གྲུབ་པའོ། །དང་པོ་ནི། སངས་རྒྱས་པ་ལ་སྒྲ་རྟག་པའི་ཕྱིར་གཞལ་བྱ་མིན་པར་ཐལ་ཞེས་བརྗོད་ན། གཉིས་ཀ་ཚད་མས་ཀྱང་མ་གྲུབ་ཅིང་ཁས་ཀྱང་མི་ལེན་པའོ། །གཉིས་པ་ནི། སྒྲ་མི་རྟག་པའི་ཕྱིར་མ་བྱས་པར་ཐལ་ལོ་ཞེས་བརྗོད་ན་རྟགས་སྔ་མ་བཞིན་ནོ། །གསུམ་པ་ནི། སྒྲ་གཞལ་བྱ་ཡིན་པའི་ཕྱིར་རྟག་པར་ཐལ་ལོ་ཞེས་བརྗོད་ན། ཁྱབ་པ་སྔར་བཞིན་ནོ། །བཞི་པ་ལའང་བཞི་སྟེ། གཉིས་ཀ་ཚད་མ། གཉིས་ཀ་ཁས་བླངས། རྟགས་ཚད་མ་ལ་ཁྱབ་པ་ཁས་བླངས། རྟགས་ཁས་བླངས་ལ་ཁྱབ་པ་ཚད་མས་གྲུབ་པའོ། །དང་པོ་ནི། སངས་རྒྱས་པ་ལ་སྒྲ་བྱས་པའི་ཕྱིར་མི་རྟག་པར་ཐལ་ཞེས་པ་ལྟ་བུ་འདོད་ལན་ཐེབས་པ་ལྟར་སྣང་དང་། འགའ་ཞིག་རྟག་པར་ཁས་ལེན་པ་ལ་འཕངས་ན་རྟགས་དང་ཁྱབ་པ་གཉིས་ཀ་ཚད་མ། དམ་བཅའ་ལ་ཁས་བླངས་ཀྱི་བསལ་བ་ཞུགས་པའི་ཐལ་བ་ཡང་དག་སྟེ་གནས་སྐབས་གཉིས་དང་། གཉིས་པ་ནི། སྒྲ་མིག་གིས་གཟུང་བྱ་དང་དེ་ལ་རྟག་པས་ཁྱབ་པར་སྨྲ་བ་ལ། སྒྲ་མིག་གིས་གཟུང་བྱ་ཡིན་པའི་ཕྱིར་རྟག་པར་ཐལ་ཞེས་པ་ལྟ་བུ་སྟེ་འདི་སྒྲ་མི་རྟག་པར་ཚད་མས་ངེས་པ་ལ་འཕངས་ན་དམ་བཅའ་ལ་ཚད་མས་བསལ་བ་ཞུགས་པ་དང་། དེ་ལྟར་ཁས་བླངས་པ་ལ་འཕངས་ན་དམ་བཅའ་ལ་ཁས་བླངས་ཀྱི་བསལ་བ་དང་། དེ་གཉིས་གང་ཡང་མེད་པ་ལ་འཕངས་ནས་བསལ་བ་ཡེ་མེད་ཀྱི་ཐལ་འགྱུར་ཏེ་གནས་སྐབས་གསུམ་མོ། །གསུམ་པ་ནི། བྱས་པ་ལ་རྟག་པས་ཁྱབ་པར་སྨྲ་བ་ལ་སྒྲ་བྱས་པའི་ཕྱིར་རྟག་པར་ཐལ་ལོ་ཞེས་པ་ལྟ་བུ་སྟེ། འདི་ཡང་རྒོལ་བའི་བྱེ་བྲག་གིས་སྔར་བཞིན་གནས་སྐབས་གསུམ་མོ། །བཞི་པ་ནི། སྒྲ་རྟག་པར་སྨྲ་བ་ལ་སྒྲ་རྟག་པའི་ཕྱིར་མ་བྱས་པར་ཐལ་ལོ་ཞེས་པ་ལྟ་བུ་སྟེ། འདི་ཡང་སྔར་བཞིན་གསུམ་མོ། །དེ་ལྟར་ན་སྔ་མ་གསུམ་དང་བཞི་པ་ལས་ཕྱེ་བའི་བཅུ་གཅིག་སྟེ་བཅུ་བཞིའོ་ཞེས་སྨྲ་ལ། དེ་དག་ཡང་དག་ལྟར་སྣང་དུ་དབྱེ་ན། རྩ་བའི་དབྱེ་བ་དང་པོ་གསུམ་བསལ་བ་ཡེ་མེད་བཞི་སྟེ་བདུན་ནི་ལྟར་སྣང་ཡིན་ཏེ་ལན་གྱིས་བཟློག་པར་ནུས་པའི་ཕྱིར། ཁས་བླངས་ཀྱི་བསལ་བ་ཞུགས་པ་བཞི་ཚད་མས་བསལ་བ་ཞུགས་པ་གསུམ་སྟེ་བདུན་ནི། ཡང་དག་ཡིན་ཏེ་ལན་གྱིས་བཟློག་པར་མི་ནུས་པ་ལས་སོ། །ཡང་དག་བདུན་ལ་བསྒྲུབ་བྱེད་འཕེན་མི་འཕེན་གཉིས་སུ་ཕྱེ་ན། སྔ་མ་དྲུག་དང་བདུན་པའི་ཕྱེད་རྟག་པའི་སྒྲ་བྱས་པར་ཁས་ལེན་པ་ལ་བྱས་པའི་ཕྱིར་མི་རྟག་པར་ཐལ་ཞེས་པ་རྣམས་ཀྱིས་མི་འཕེན་ཏེ། བཟློག་ན་ཚུལ་གསུམ་མ་ཚང་བའི་ཕྱིར་རོ། །བདུན་པའི་ཕྱེད་ཀྱིས་འཕེན་ཏེ་བཟློག་ན་ཚུལ་གསུམ་ཚང་བའི་ཕྱིར་ཞེས་ཟེར། ཕྱེད་ཀྱིས་མི་འཕེན་པའི་མཚན་གཞི་ལ་རྟག་པའི་ཕྱིར་མ་བྱས་པར་ཐལ་ཞེས་པ་ལ་འདོད་པ་རྣམས་ལ་ཐལ་བ་བདུན་པའི་མཚན་ཉིད་དྲིས་ན་མཛུབ་མོས་ནམ་མཁའ་མཚོན་པ་ཟད་དོ། །གཉིས་པ་དེ་དགག་ན་ཐལ་བར་བཀོད་ཚད་ལ་སྔར་བཤད་ལྟར་བཞིར་ངེས་ན་རང་རྒྱུད་ཀྱི་གཏན་ཚིགས་ལའང་བཞིར་ཅིའི་ཕྱིར་མི་འབྱེད། རང་རྒྱུད་ལ་ཡང་དག་དང་ལྟར་སྣང་གཉིས་སུ་ངེས་པས་གཞན་གྱིས་ཅི་བྱ་ཞེ་ན། ཐལ་འགྱུར་ལའང་ཅི་སྟེ་མི་མཚུངས་ཏེ་མཚུངས་པའི་ཕྱིར་དང་། ཡང་རྟགས་ཁྱབ་གཉིས་ཀ་མ་གྲུབ་པ་མི་འཐད་དེ། རྟགས་མ་གྲུབ་ན་ཕྱོགས་ལ་མཐུ་མེད་པས་དེ་ཉིད་ཀྱི་སྐྱོན་དུ་སོང་བའི་ཕྱིར། ཁྱབ་པ་གྲུབ་མ་གྲུབ་དཔྱོད་པ་འགལ་བ་སྟེ་མི་འཐད་པ་ཡིན་ཏེ། བླུན་པོའི་རྣམ་ཐར་ཡིན་པའི་ཕྱིར། དཔེར་ན་སྲོག་མེད་པ་ལ་དབང་པོ་ཡོད་མེད་དཔྱོད་པ་བཞིན་ནོ། །ཁོ་བོ་འབའ་ཞིག་གི་ལེགས་བཤད་དེ། རྩོམ་པ་པོའི་བྱིན་རླབས་ཀྱིས་བྱུང་ངོ་། །གཞན་དག་ལ་བཅོལ་བ་དང་གཏོགས་པ་མེད་དོ། །ཡང་རྟགས་མ་གྲུབ་ལ་ཁྱབ་པ་གྲུབ་པ་ལ་སོགས་པར་འབྱེད་ན། ལྟག་ཆོད་ཀྱི་དབྱེ་བ་ལྟར་རྟགས་ཕྱེད་མ་གྲུབ་པ་ལ་སོགས་པའང་དབྱེ་བར་འགོད་རིགས་པར་ཐལ་ལོ། །འདོད་ན། བཞི་དང་བཅུ་བཞིའི་ངེས་པ་མི་རུང་སྟེ། དེའི་ཕྱིར་རོ། །དེས་ན་ཐལ་འགྱུར་གྱི་རྩ་བའི་དབྱེ་བ་ལ་བཞིར་དབྱེ་བ་དེ་མི་འཐད་དོ། །ཡང་རྟགས་ཀྱང་མ་གྲུབ་པ་མ་གྲུབ་པ་ཡིན་མོད། ཁྱབ་པ་གྲུབ་མ་གྲུབ་དཔྱོད་པ་ལ་དགོས་ནུས་མེད་པས་མ་གྲུབ་པ་ལ་གཉིས་སུ་ཕྱེ་བ་ལྷག་པ་དང་། ཁྱབ་པ་འགལ་བའི་ལན་ཐེབས་པའི་ཐལ་འགྱུར་ལྟར་སྣང་མ་སྨོས་པས་ཆད་པ་དང་། རྟགས་གྲུབ་པ་མེད་ཀྱང་ཁྱབ་པ་གྲུབ་པ་སྲིད་དོ་ཞེས་ཟེར་ཞིང་དཔྱོད་པ་འཁྲུལ་པ་ཡིན་ཏེ། སྲོག་མེད་ཀྱང་དབང་པོ་གཞན་ཚང་མ་ཚང་དཔྱོད་པ་ལྟར་རོ། །རྒྱུ་མཚན་དེས་ན་ཐལ་འགྱུར་དུ་བཀོད་ཚད་ལ་བཅུ་བཞིར་ངེས་པ་ནི་འཐད་པ་མིན་ནོ། །གཉིས་པ་རང་གི་འདོད་པ་ལ། ཐལ་འགྱུར་ཡང་དག་དང་། ལྟར་སྣང་ངོ་། །དང་པོ་ལ་གཉིས་ལས། མཚན་ཉིད་ནི། འདོད་པ་སྟེ་ཁས་བླངས་རྟགས་སུ་བརྗོད་ནས་མི་འདོད་པ་བསྒྲུབ་བྱ་འཕེན་ནུས་པའི་ངག་གོ །གཉིས་པ་དབྱེ་བ་ལ་སྒྲུབ་བྱེད་འཕེན་པ་དང་། མི་འཕེན་པ་དང་། དེ་དག་གི་དབྱེ་བ་དཔེར་བརྗོད་པའོ། །དང་པོ་ལ་གསུམ་ལས། མཚན་ཉིད་ནི། སྒྲུབ་བྱེད་འཕེན་པའི་ཐལ་འགྱུར་ནི་དངོས་སུ་ཐལ་བ་འཕངས་པས་བཟློག་ན་ཚུལ་གསུམ་ཚང་བའོ། །དེ་ལྟར་འཕེན་པ་ལ་ཆོས་གསུམ་ལྡན་དགོས་ཏེ། རྟགས་ཕྱིར་རྒོལ་གྱིས་བདེན་ཞེན་གྱིས་ཁས་ལེན་པ། བཟློག་ཁྱབ་ཚད་མས་གྲུབ་པ། གཞི་གྲུབ་ཅིང་དམ་བཅའ་ལ་ཚད་མས་བསལ་རུང་ངོ་། །གཉིས་པ་བཟློག་ན་སྒྲུབ་པའི་ངག་ཏུ་འགྱུར་བའི་འཐད་པ་ནི། དངོས་སུ་རྟགས་ཚད་མས་མ་གྲུབ་པའི་ཕྱིར་སྒྲུབ་པའི་ངག་མིན་ཡང་བཟློག་ན་སྒྲུབ་པའི་མཚན་ཉིད་ཡོད་དེ་ཚུལ་གསུམ་ཚང་བའི་ཕྱིར། གསུམ་པ་ཐལ་བའི་ངག་ལས་རང་རྒྱུད་འཕེན་པའི་ཚུལ་ལ་གཉིས་ལས། དང་པོ་གཞན་ལུགས་དགག་ན། ཐལ་བའི་ཁྱབ་པས་རང་རྒྱུད་ཀྱི་ཁྱབ་པ་འཕེན་མོད། རང་རྒྱུད་ཀྱི་ཕྱོགས་ཆོས་ཐལ་བའི་ངག་གིས་འཕེན་ཞེ་ན། ཁ་ཅིག་དུ་བ་མེད་པར་ཐལ་ཞེས་ཐལ་བའི་དམ་བཅའ་ཡི་ངག་གི་ཆོས་བཟློག་པས་སྒྲུབ་པའི་ངག་གི་ཕྱོགས་ཆོས་ཉིད་འཕེན་ཞེས་ཟེར། ཐལ་བའི་དམ་བཅའི་ངག་གིས་རང་རྒྱུད་ཀྱི་ཕྱོགས་ཆོས་འཕེན་ན་སྦྱོར་བ་འཇིག་སྟེ། སྒྲུབ་ངག་ཡང་དག་ལྟར་དམ་བཅའ་བརྗོད་ན་ལྷག་པས་ཐལ་བའི་ངག་ལའང་དམ་བཅའ་བརྗོད་པ་མི་རུང་བའི་ཕྱིར། གཉིས་པ་རང་གི་འདོད་པ་ནི། ཐལ་བའི་ངག་ལས་རང་རྒྱུད་ཀྱི་དོན་འཕེན་མོད་ངག་ཇི་ལྟར་བཟློག་པ་བཞིན་འཕེན་པ་མིན་ཏེ། འདི་ལྟར་མེ་མེད་པར་ཁས་བླངས་པའི་རྟགས་མ་བརྗོད་ན་ཐལ་འགྱུར་གྱི་ཕྱོགས་ཆོས་མི་འགྲུབ་ལ། བརྗོད་ན་རང་རྒྱུད་ཀྱི་བསྒྲུབ་བྱ་བརྗོད་པས་ངག་ལྷག་པར་འགྱུར་ཏེ། མེ་མེད་པར་ངེད་ཁས་ལེན་ཞེས་བཟློག་དགོས་པའི་ཕྱིར་རོ། །གཉིས་པ་ནི། ཐལ་བ་ཡང་དག་གང་ཞིག བཟློག་ན་རང་དོན་གྱི་རྟགས་ཡང་དག་མི་འཕེན་པའོ། །གསུམ་པ་ལ་གཉིས་ལས། དང་པོ་སྒྲུབ་བྱེད་འཕེན་པ་དང་མི་འཕེན་པར་དབྱེ་བ་ནི། རང་བཞིན་མི་དམིགས་པ། འབྲས་བུ་མི་དམིགས་པ། མཚན་ཉིད་མི་དམིགས་པ་གསུམ་པོ་རེ་རེ་ལ་དམ་བཅའ་ལ་ཚད་བསལ་ཞུགས་པ་དང་། མ་ཞུགས་པ་གཉིས་གཉིས་ཡོད་པ་ལས་དེ་རྣམས་ཀྱིས་གཅིག་ཏུ་སྒྲུབ་བྱེད་མི་འཕེན་ཏེ། དང་པོ་གསུམ་གྱིས་འཕངས་པའི་རྟགས་ལ་རྟགས་ཀྱི་མཚན་ཉིད་ཕྱོགས་ཆོས་མ་ཚང་ཕྱི་མ་གསུམ་ལ་ཐལ་བ་ཉིད་ཀྱི་མཚན་ཉིད་མེད་པའི་ཕྱིར། མི་འཕེན་པ་གསུམ་གྱི་ལྷག་མ་སྒྲུབ་བྱེད་འཕེན་པ་ལ་ཉི་ཤུ་ཡོད་པར་ཤེས་པར་བྱ་སྟེ། རང་དོན་ལེའུར་བཤད་པའི་ཡང་དག་གི་རྟགས་ཉི་ཤུ་པོ་ཀུན་གྱིས་ཆོས་ཅན་གྱི་སྟེང་དུ་རྟགས་ལོག་ཐལ་དང་ཆོས་ལོག་རྟགས་སུ་བཀོད་པའི་ཚེ་ཐལ་བ་ཉི་ཤུ་པོས་བསྒྲུབ་བྱེད་འཕེན་པ་ཡིན་པའི་ཕྱིར་ཏེ། དེའི་ཚེ་ཐལ་འགྱུར་ཉི་ཤུ་པོ་ལ་ཐལ་བའི་ཆོས་མཚུངས་པའི་ཕྱིར། འདིར་རང་འགྲེལ་ཁ་ཅིག་ཏུ་སྔར་བཤད་པའི་ཡང་དག་གི་རྟགས་ཉི་ཤུ་པོ་སྒྲུབ་བྱེད་འཕེན་པར་ཤེས་པར་བྱའོ་ཞེས་པའི་དོན་དང་། རང་འགྲེལ་ཁ་ཅིག་ཏུ་སྔར་བཤད་པའི་ཡང་དག་གི་རྟགས་ཉི་ཤུ་ལས་རང་བཞིན་མ་དམིགས་པ་དང་ཅེས་སོགས་ཀྱི་དོན་ནི། རྟགས་ཉི་ཤུ་ཡོད་པ་ལས་རང་བཞིན་མ་དམིགས་པའི་གཏན་ཚིགས་སོགས་གསུམ་གྱི་སྔར་གྱི་ཐལ་འགྱུར་གསུམ་གྱིས་སྒྲུབ་བྱེད་མི་འཕེན་ལ་དེའི་ལྷག་མ་སྒྲུབ་བྱེད་འཕེན་པའི་ཐལ་འགྱུར་ཉི་ཤུ་ཡོད་དེ་རྟགས་སྔར་བཞིན་ནོ་ཞེས་པ་ནི་ཁོ་བོའི་འབའ་ཞིག་གི་བློ་གྲོས་ལས་བྱུང་བའོ། །གཉིས་པ་སྒྲུབ་བྱེད་འཕེན་པ་ལ་རང་རིག་དང་གཞན་རིག་གཉིས་སུ་དབྱེ་ན། བཟློག་པ་རང་རིག་འཕེན་པ་བཞི་ཡོད་དེ། རང་བཞིན་དང་འགལ་བའི་རང་བཞིན་དམིགས་པའི་ཐལ་འགྱུར་གྱི་ཐལ་བ་ལས་དེའི་རང་རྒྱུད་འཕེན་པ། ཁྱབ་བྱེད་དང་འགལ་བའི་ཁྱབ་བྱ་དམིགས་པའི་ཐལ་འགྱུར་གྱིས་དེའི་རང་རྒྱུད་འཕེན་པ། རྒྱུ་དང་འགལ་བའི་འབྲས་བུ་དམིགས་པའི་ཐལ་འགྱུར་གྱི་དེའི་རང་རྒྱུད་འཕེན་པ། འགལ་བའི་ཁྱབ་བྱ་དམིགས་པའི་ཐལ་འགྱུར་གྱིས་དེའི་རང་རྒྱུད་འཕེན་པ་བཞིའོ། །མཚན་གཞི་རྣམས་ནི་གོ་སླའོ། །གཞན་རིག་འཕེན་པ་བཅུ་དྲུག་ཡོད་དེ། རྒྱུ་མ་དམིགས་པའི་ཐལ་འགྱུར་གྱིས་འབྲས་རྟགས་དང་། འབྲས་བུའི་ཐལ་འགྱུར་གྱིས་རྒྱུ་མ་དམིགས་པའི་རྟགས་དང་། ཁྱབ་བྱེད་མ་དམིགས་པའི་ཐལ་འགྱུར་གྱིས་རང་བཞིན་གྱི་རྟགས་དང་རང་བཞིན་གྱི་ཐལ་འགྱུར་གྱིས་ཁྱབ་བྱེད་མ་དམིགས་པའི་རྟགས་དང་། རང་བཞིན་དམིགས་པའི་ཐལ་འགྱུར་གྱིས་རང་བཞིན་མ་དམིགས་པའི་རྟགས་དང་། རྒྱུ་དམིགས་པའི་ཐལ་འགྱུར་གྱིས་འབྲས་བུ་མ་དམིགས་པའི་རྟགས་འཕེན་པའི་ཐལ་འགྱུར་དྲུག ལྷན་ཅིག་མི་གནས་འགལ་གྱི་སྐོར་དགུ། ཕན་ཚུན་སྤངས་འགལ་གྱི་སྐོར་གཅིག་སྟེ་མཚན་གཞི་དང་ཐ་སྙད་རྣམས་ནི་སྤྱི་དང་མཐུན་ནོ། །གཉིས་པ་ལ། མཚན་ཉིད་དང་དབྱེ་བ་གཉིས་ལས། དང་པོ་ནི། འདོད་པ་སྟེ་ཁས་བླངས་རྟགས་སུ་བརྗོད་ན་མི་འདོད་པའི་བསྒྲུབ་བྱ་འཕེན་པ་མེད་པའོ། །གཉིས་པ་ལ་བཞི། རྟགས་མ་གྲུབ་པ་དང་། འགལ་ནས་ཁྱབ་པ་མེད་པ་དང་། མ་ངེས་ནས་ཁྱབ་པ་མེད་པ་དང་། འདོད་པས་ལན་ཐེབས་པ་བཞིའོ། །གསུམ་པ་རྩོད་པ་སྤང་བ་ནི། གྲངས་ཅན་ན་རེ་རང་རྒྱུད་ལ་གཞན་གྱིས་ཁས་བླངས་གཏན་ཚིགས་ཡིན་ན་ནི། གཏན་ཚིགས་བཞི་པ་སྲིད་པར་འགྱུར་ལ། གཞན་གྱི་ཁས་བླངས་རྟགས་སུ་མི་རུང་ན། ཐལ་འགྱུར་གྱི་ཕྱོགས་ཆོས་མི་འགྲུབ་པས་མི་འདོད་པ་བསྒྲུབ་བྱར་འཕེན་པ་མི་འཐད་ལོ། །གཞན་ཕྱིར་རྒོལ་གྱིས་སྤྱི་གཅིག་གསལ་བ་དུ་མ་དང་དོན་ལ་འབྲེལ་བར་ཀུན་ཏུ་བཏགས་པ་ལ་གསལ་བ་དུ་མ་དང་དོན་ལ་འབྲེལ་པ་རྟགས་སུ་བཀོད་པའི་ཐལ་བས་མི་འདོད་པའི་སྒྲུབ་བྱ་དུ་མར་ཐལ་བ་འཕེན་པ་སྐྱོན་ཡོད་པ་མིན་ཏེ། དུ་མ་མིན་པ་དེ་གསལ་བ་དུ་མ་དང་དོན་ལ་མ་འབྲེལ་བ་མེད་ན་དུ་མ་ཡོད་པ་དགག་པའི་ཕྱིར་དུའོ། །གཉིས་པ་ལ་གཉིས་ལས་དང་པོ་གཞན་ལུགས་དགག་ན། ཐལ་འགྱུར་གྱི་ལན་ལ་ནི་རྟགས་མ་གྲུབ་པ། ཁྱབ་པ་མ་གྲུབ་པ། འདོད་ཐོག་དང་སྒོ་གསུམ་དུ་ངེས་ཞེས་ཁ་བ་ཅན་པ་རྣམས་དེ་སྐད་དུ་སྨྲའོ། །མི་འཐད་དེ། འགལ་བ་དང་མ་ངེས་པ་གཉིས་ཀ་ཁྱབ་པ་མ་གྲུབ་པའི་ལྟར་སྣང་གཅིག་ཏུ་འགྱུར་ཏེ། དེ་གཉིས་ཀའི་ཐལ་འགྱུར་ལ་ཁྱབ་པ་མ་གྲུབ་ཅེས་པའི་ལན་གཅིག་གིས་ཆོག་པའི་ཕྱིར། འདོད་ན་རྟགས་ལྟར་སྣང་ཐམས་ཅད་རྟགས་དང་ཁྱབ་པ་མ་གྲུབ་པ་གཉིས་སུ་འདུ་བར་འགྱུར་ལ། དེ་འདོད་ན་གཏན་ཚིགས་ལྟར་སྣང་ཀུན་མ་གྲུབ་པ་གཅིག་ཏུ་འདུ་བར་འགྱུར་བས་མཐར་ཐལ་འགྱུར་གྱི་སྐྱོན་ཅན་ཐམས་ཅད་ལ་མ་གྲུབ་ཅེས་བརྗོད་པས་ལན་ཐེབས་པར་འགྱུར་རོ། །གལ་ཏེ་ཐམས་ཅད་རྟགས་དང་ཁྱབ་པ་མ་གྲུབ་པ་ཡིན་མོད། རྟགས་དང་ཁྱབ་པ་མ་གྲུབ་པ་གཉིས་སུ་མ་ཕྱེ་ན་ངོས་མི་ཟིན་པས་རྩོད་པ་མི་བདེ་བའི་ཕྱིར་གཉིས་སུ་འབྱེད་ན། འགལ་བ་དང་མ་ངེས་པའི་ལན་ཡང་སོ་སོར་འབྱེད་དགོས་ཏེ། མ་ཕྱེ་ན་ངོས་མི་ཟིན་པས་རྩོད་པ་མི་བདེ་བ་མཚུངས་པའི་ཕྱིར། ཡང་ན་ཁྱབ་པ་འགལ་བ་ལ་མ་གྲུབ་ཅེས་བརྗོད་ན་དེ་འཁྲུལ་པ་འགྱུར་ཏེ། དཔེར་ན་སྒྲ་བྱས་པར་འདོད་པ་ལ་བྱས་པའི་ཕྱིར་རྟག་པར་ཐལ་ལོ་ཞེས་པ་ལ། བྱས་ཀྱང་མི་རྟག་ན་ཅི་ཏོ་ཁྱབ་པ་མ་གྲུབ་ཞེས་བརྗོད་ན་བྱས་པ་ལ་རྟག་པ་སྲིད་པར་ཤུགས་ལ་ཁས་ལེན་དགོས་ཏེ། ཤེས་བྱ་རྟགས་སུ་བཀོད་པ་བཞིན་ནོ། །གཉིས་པ་རང་ལུགས་ནི་དེས་ན་མཁས་པས་ཐལ་འགྱུར་གྱི་ལན་ནི་རྣམ་པར་ཐར་པའི་སྒོ་བཞི་ཡོད་པ་ལྟར། འགལ་མ་ངེས་མ་གྲུབ་པ་དང་། འདོད་པ་གྲུབ་པ་སྟེ་བཞིས་གདབ་བོ། །གལ་ཏེ་ལན་གྱིས་བཟློག་པར་མི་ནུས་ན། ཁྲོ་བ་དང་ཁོན་དུ་འཛིན་པ་དང་། བདག་བསྟོད་གཞན་སྨོད་དང་། གླུ་གར་དང་བཞད་གད་སོགས་ཀྱིས་རིགས་པ་བསུབ་པ་ནི་ཐབས་རྡུགས་པ་ཡིན་པས། བདེན་པ་དེའི་རྗེས་སུ་འབྲང་བ་དེ་དམ་པའི་ལུགས་སོ། །གསུམ་པ་དེ་ལྟར་ཤེས་པའི་ཆེ་བ་ནི། དེ་ལྟར་སྒྲུབ་དང་སུན་འབྱིན་གྱི། །ཞེས་སོགས་ཚིགས་བཅད་གཅིག་གོ །ཚད་མ་རིག་པའི་གཏེར་ལས་གཞན་དོན་རྗེས་སུ་དཔག་པ་བརྟག་པའི་རབ་ཏུ་བྱེད་པ་བཅུ་གཅིག་པའི་རྣམ་བཤད་བསྟན་ཟིན་ཏོ།། །།གསུམ་པ་བཤད་པ་མཐར་ཕྱིན་པའི་བྱ་བ་ལ། རྩོམ་པ་པོ་གང་གིས་བརྩམས་པ། ཚུལ་ཇི་ལྟར། དེ་ལྟར་བརྩམས་པའི་དགོས་པ། བརྩམས་པའི་བསྟན་བཅོས་ཀྱི་ཆེ་བ། བརྩམས་པའི་དགེ་བ་བསྔོ་བ་དང་ལྔའོ། །དང་པོ་ནི། སྐྱེ་བ་སོགས་ཚིགས་བཅད་གཅིག་གོ །གཉིས་པ་ནི། ཕྱོགས་ལས་སོགས་གཅིག་གོ །གསུམ་པ་ལ་སྨྲ་ངན་འཇོམས་པའི་ཆེད་དུ་བརྩམས་པ། འཇོམས་ནུས་པའི་རྒྱུ་གཉིས་ནི་རིམ་བཞིན། ཐུབ་པ་སོགས་དང་། བློ་ཡི་སོགས་སོ། །བཞི་པ་ནི་སྡེ་བདུན་སོགས་སོ། །ལྔ་པ་ནི་ལེགས་པར་བཤད་པས་སོགས་སོ། །རྣམ་མང་རིག་པའི་གཞུང་བཟང་རྒྱ་མཚོ་ལས། །ལེགས་འོངས་རིག་པའི་གཏེར་ཆེན་གཏེར་མཆོག་གི །རྣམ་བཤད་རིག་པའི་ལམ་མཆོག་གསལ་བྱེད་པ། །རྒྱ་ཆེན་རིག་པའི་ཚ་ཟེར་ལྡན་པ་འདི། །དོན་ལ་དངོས་སུ་འཇུག་པའི་སེལ་འཇུག་དང་། །ངེས་དང་སྒྲོ་འདོགས་གཅོད་པའི་སྣང་འཇུག་དང་། །ཡུལ་དུས་རང་བཞིན་འདྲེས་པའི་རང་དངོས་དང་། །རྣམ་རིག་སྨྲ་ཡང་རྡུལ་ཕྲན་ཁས་ལེན་དང་། །ཡུལ་སྣང་ཡུལ་དང་ཡུལ་སྣང་བདེན་སྨྲ་སོགས། །ལོག་ལྟའི་ཚང་ཚིང་མ་ལུས་སྲེག་པ་དང་། །རིན་ཆེན་རིག་པའི་གཏེར་གཟུགས་གསལ་བ་དང་། །བློ་གསལ་བློ་ཡི་པད་ཚལ་རྒྱས་ཕྱིར་སྦྱར། །འདི་སྦྱར་དགེ་བས་བདག་གཞན་འགྲོ་བ་ཀུན། །འདི་དང་གཞན་པའི་ཚེ་རབས་ཐམས་ཅད་དུ། །རིག་པའི་ནོར་མཆོག་མཐའ་ཡས་དང་ལྡན་ཞིང་། །རིག་པའི་དཔལ་འབྱོར་ཀུན་ལ་སྟེར་བར་ཤོག །རྒྱལ་བའི་ཞིང་ཁམས་ཀུན་ཏུ་གཅིག་ཅར་ཡང་། །རྒྱལ་བའི་དམ་ཆོས་ཀུན་འཛིན་སྲུང་བྱེད་ཅིང་། །རྒྱལ་བའི་ཕྲིན་ལས་ཀུན་ལ་དབང་ཐོབ་ནས། །རྒྱལ་བའི་ཆོས་ཚུལ་ཀུན་གྱི་བདག་པོར་ཤོག །གནས་སྐབས་ཀུན་ཏུ་ཚེ་རིང་ནད་མེད་ཅིང་། །འཁོར་མང་གྲགས་དང་ཕུན་ཚོགས་འབྱོར་པར་ལྡན། །བསྟན་དང་འགྲོ་བའི་དོན་ལ་ཆེར་བརྩོན་པས། །འགྲོ་ཀུན་ཕན་བདེའི་ས་ལ་མྱུར་འགོད་ཤོག །ཚད་མ་རིག་པའི་གཏེར་གྱི་རྣམ་པར་བཤད་པའི་རིག་ལམ་རབ་ཏུ་གསལ་བའི་ཉི་མ་ཞེས་བྱ་བ་འདི་ནི། རྒྱལ་བའི་རིང་ལུགས་མ་ལུས་པའི་གསལ་བྱེད་དམ་པ་བྱམས་ཆེན་རབ་འབྱམས་པ་ཞེས་སྙན་པའི་བ་དན་དཀར་པོ་སྲིད་པ་གསུམ་ན་གཡོ་བ་དེ་དང་། དེ་ཡི་སྲས་ཀྱི་མཐུ་བོ་དམ་པ་མདོ་རྒྱུད་མ་ལུས་པའི་འབྱུང་གནས་རྒྱལ་བ་བསོད་ནམས་སེངྒེ་ལ་སོགས་པ་ཡོངས་འཛིན་དམ་པ་རྣམས་ཀྱི་ཞབས་རྡུལ་ཡན་ལག་མཆོག་གིས་བླངས་པ། ཤཱཀྱའི་དགེ་སློང་བྱམས་པ་ཐུགས་རྗེ་དཔལ་བཟང་གིས་ཐུབ་བསྟན་རྣམ་པར་རྒྱལ་བའི་དགོན་པར་ས་ཕོ་སྤྲེའུའི་ལོ་སྨིན་དྲུག་ཟླ་བའི་ཡར་ངོའི་ཚེས་བརྒྱད་ལ་ལེགས་པར་གྲུབ་པར་བྱས་ཏེ་བྲིས་པའོ། །འདིས་བསྟན་པ་དང་སེམས་ཅན་མཐའ་ཡས་པ་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག །འདི་བསྒྲུབས་པ་ལས་བྱུང་བ་ཡི། །དགེ་བའི་རྩ་བ་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་བསྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ།། །།

འདུལ་བ་མདོ་རྩ་བའི་སྤྱི་དོན་ལེགས་བཤད་འོད་ཀྱི་སྣང་བ་ཚིག་དོན་རབ་གསལ།

འདུལ་བ་མདོ་རྩ་བའི་སྤྱི་དོན་ལེགས་བཤད་འོད་ཀྱི་སྣང་བ་ཚིག་དོན་རབ་གསལ་ཞེས་བྱ་བ་བཞུགས་སོ།། ཨོཾ་སྭ་སྟི་སིདྡྷཾ། འདུལ་བ་མདོ་རྩ་བའི་སྤྱི་དོན་ལེགས་བཤད་འོད་ཀྱི་སྣང་བ་ཚིག་དོན་རབ་གསལ་ཞེས་བྱ་བ། ཁམས་གསུམ་ཆོས་ཀྱི་རྒྱལ་པོ། ཆོས་ཀྱི་རྗེ། ཆོས་འདུལ་བ་ཐམས་ཅད་མཁྱེན་པ་ལ་སྒོ་གསུམ་གུས་པའི་སྒོ་ནས་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ། ཤེས་བྱ་ཀུན་ལ་མུན་པ་གཏན་བཅོམ་ཞིང་། །སྲིད་པའི་མཚོ་ལས་འགྲོ་བ་མ་ལུས་པ། །དོན་བཞིན་སྟོན་པས་རབ་ཏུ་འདྲེན་མཛད་པ། །ཀུན་མཁྱེན་ཤཱཀྱའི་གཙོ་ལ་ཕྱག་བགྱིའོ། །བསླབ་གསུམ་ཡོན་ཏན་དཀྱིལ་འཁོར་ཡོངས་གང་ཞིང་། །འདུལ་བ་འབུམ་སྡེའི་འོད་དཀར་རབ་སྤྲོས་པས། །འཆལ་ཚུལ་གདུང་བ་མ་ལུས་སེལ་མཛད་པ། །བཙུན་པ་ཡོན་ཏན་འོད་ཀྱིས་འགྲོ་འདི་སྐྱོངས། །རྣམ་དཔྱོད་བརྩོན་པའི་གྲུ་གཟིངས་ཆེར་ཞུགས་ནས། །ཆོས་འདུལ་རྒྱ་མཚོའི་ཕ་རོལ་མཐར་སོན་ཏེ། །ཚུལ་ཁྲིམས་རིན་ཆེན་དགའ་སྟོན་འགྱེད་མཛད་པ། །དཔལ་ལྡན་བླ་མའི་ཞབས་ལ་ཕྱག་འཚལ་ནས། །བསྟན་པའི་རྩ་བ་སོ་སོ་ཐར་པ་ཡི། །ཐོག་མཐའ་བར་གྱི་རྣམ་གཞག་གསལ་བར་ནི། །རང་ཉིད་དྲན་པ་གསོ་དང་གཞན་དག་ལ། །ཕན་པར་བྱ་ཕྱིར་སྟོན་ལ་སྤྲོ་བ་སྐྱེས། །དེ་ལ་བཅོམ་ལྡན་འདས་ཀྱིས་བླ་ན་མེད་པའི་བྱང་ཆུབ་བརྙེས་པ་ནི་སེམས་ཅན་ཁོ་ནའི་ཆེད་དུ་ཡིན་པས་དེ་བརྙེས་ནས་སེམས་ཅན་གྱི་དོན་མཛད་དགོས་ལ། དེ་ཡང་གདུལ་བྱ་མྱང་འདས་སུ་ཁྲིད་པར་བྱེད་པའི་ལམ་རྣམ་དག་སྟོན་པར་བྱེད་པའི་སྒོ་ནས་ཡིན་གྱི། གཞན་གྱིས་མ་ཡིན་ཏེ། ལངྐར་གཤེགས་པ་ལས། ཐུབ་རྣམས་སྡིག་པ་ཆུ་ཡིས་མི་བཀྲུ་ཞིང་། །འགྲོ་བའི་སྡུག་བསྔལ་ཕྱག་གིས་མི་སེལ་ལ། །ཉིད་ཀྱི་རྟོགས་པ་གཞན་ལ་སྤོ་མིན་ཏེ། །ཆོས་ཉིད་བདེན་པ་བསྟན་པས་གྲོལ་བར་མཛད། །ཅེས་གསུངས་པ་ལྟར་རོ། །དེ་ཡང་གདུལ་བྱ་བསླབ་པ་གསུམ་ལ་འགོད་པ་ཉིད་ཡིན་ཏེ། ཉོན་མོངས་མ་སྤངས་པར་མྱང་འདས་མི་འཐོབ་ལ། ཉོན་མོངས་སྤོང་བ་ལ་ལྷག་པ་ཤེས་རབ་ཀྱི་བསླབ་པ་དགོས་ཤིང་དེའི་རྒྱུར་ཏིང་ངེ་འཛིན་སེམས་ཀྱི་བསླབ་པ་དགོས་ལ། དེའི་རྒྱུར་ཡང་ཚུལ་ཁྲིམས་ཀྱི་བསླབ་པ་ལ་འགོད་དགོས་པའི་ཕྱིར་ཏེ། ཚུལ་ཁྲིམས་དང་ལྡན་ན་འགྱོད་པ་མེད་པ་ལ་སོགས་པའི་རིམ་གྱིས་ཏིང་ངེ་འཛིན་སྐྱེ་ཞིང་། ཏིང་ངེ་འཛིན་དང་ལྡན་པའི་ཤེས་རབ་ནི་ཉོན་མོངས་སྤོང་བ་ལ་མཐུ་ཆེ་བས་སོ། །ཚུལ་ཁྲིམས་ཀྱི་བསླབ་པ་ལ་འགོད་པ་ལ། སྡོམ་པ་མ་ཐོབ་པ་ཐོབ་པར་བྱེད་པའི་ཐབས། ཐོབ་པ་མི་ཉམས་པར་བསྲུང་བའི་ཐབས། ཉམས་ན་ཕྱིར་བཅོས་པའི་ཐབས་རྣམས་བསྟན་དགོས་པས། འདིར་དེ་དག་གི་རྣམ་གཞག་འཆད་པ་ལ་གསུམ་སྟེ། བཤད་བྱ་སྟོན་པའི་གསུང་རབ། འཆད་བྱེད་དགོངས་འགྲེལ་གྱི་བསྟན་བཅོས་དང་དེའི་འགྲེལ་པ་ཇི་ལྟར་བྱུང་ཚུལ། སྐབས་ཀྱི་བསྟན་བཅོས་ཀྱི་དོན་ལ་འཇུག་པའོ། །དང་པོ་ལ་གསུང་རབ་ངོས་གཟུང་བ་དང་། ལུང་གིས་སོ་ཐར་ཇི་ལྟར་འགྲེལ་པའི་ཚུལ་གཉིས། དང་པོ་ནི། རྩ་བའི་མདོ་སོ་སོར་ཐར་པ་རྣམ་པ་གཉིས་དང་། དེའི་འགྲེལ་པ་ལུང་གཞི་དང་། རྣམ་འབྱེད། ཕྲན་ཚེགས། གཞུང་དམ་པ་སྟེ་བཞིའོ། །འདི་ལ་ཁ་ཅིག་གདུལ་བྱ་དབང་པོ་རྣོན་པོའི་དབང་དུ་བྱས་ནས་སོ་སོ་ཐར་པ་རྣམ་པ་གཉིས། འབྲིང་གི་དབང་དུ་བྱས་ནས་གཞི་དང་རྣམ་འབྱེད་གཉིས། རྟུལ་པོའི་དབང་དུ་བྱས་ནས་ཕྲན་ཚེགས་དང་གཞུང་དམ་པ་གཉིས་གསུངས་ཞེས་ཟེར་བ་མི་འཐད་དེ། མཆོག་ཟུང་གཉིས་ལ་སོགས་པ་དབང་རྣོན་ལ་བརྟེན་ནས་ཀྱང་ལུང་སྡེ་བཞི་ཀའི་སྐབས་ཀྱི་བཅས་པ་གསུངས་པ་ཡོད་པའི་ཕྱིར། ཡང་ཕྲན་ཚེགས་ལ་གྲགས་པའི་ཕྲན་ཚེགས་དང་། མ་གྲགས་པའི་ཕྲན་ཚེགས་གཉིས་ཡོད་དེ། གཞུང་དམ་པ་ལ་ལུང་ཞུ་བ། འདུལ་བྱེད། གཅིག་ལས་འཕྲོས་པ། ལྔ་ཚན། བཅུ་དྲུག་པ། གླེང་གཞི། མ་མོ། བཀའ་ལུང་གཏམ་གྱི་གཞི་རྐྱང་པའམ། སིལ་བུ། བྲམ་ཟེའི་བུ་མོས་ཞུས་པ་སྟེ་ལེའུ་བཅུ་ཡོད་པ་ལས། དང་པོ་གཉིས་གཞུང་དམ་པ་དང་། ཕྱི་མ་བརྒྱད་མ་གྲགས་པའི་ཕྲན་ཚེགས་ཡིན་པའི་ཕྱིར་ཏེ། བརྒྱད་པོ་དེ་ཕྲན་ཚེགས་ཀྱི་ནང་དུ་བསྡུས་ནས་གསུངས་པའི་ཕྱིར་ཟེར་བ་མི་འཐད་དེ། ལུང་བདུན་པོ་ནི་གཞུང་དམ་པའི་ལེའུ་ཡིན་ལ། ལུང་སིལ་བུ་ནི་ལུང་སྡེ་བཞིས་མ་བསྡུས་པར་མཛོད་ཀྱི་འགྲེལ་བཤད་གཉིས་ལས་བཤད་པའི་ཕྱིར། གླེང་གཞི། མ་མོ། བྲམ་ཟེའི་བུ་མོས་ཞུས་པ་གསུམ་ཕྲན་ཚེགས་སུ་འདོད་པ་མི་འཐད་དེ། གླེང་གཞི་སོགས་སུ་གཏོགས་པའི་དབྱར་གྱི་གཞི་ཞེས་ཕྲན་ཚེགས་ཀྱི་མིང་གིས་མ་བསྟན་པར་གླེང་གཞི་རང་མིང་གིས་བསྟན་པའི་ཕྱིར་དང་། གོས་ཀྱི་གཞི་ཕྲན་ཚེགས་ལ་སོགས་པ་ཞེས་པའི་སོགས་སྒྲས་ལུང་མ་མོ་ལ་སོགས་པ་བསྡུས་པའི་ཕྱིར། ལས་བྱེ་བའི་གཞི་ཞུ་བ་དང་བྲམ་ཟེའི་བུ་མོའི་སྐབས་སོ་ཞེས་བྲམ་ཟེའི་བུ་མོས་ཞུས་པ་ཞུ་བའི་ནང་དུ་བསྡུས་ན་སྡུད་པ་པོ་མི་མཁས་པར་འགྱུར་ཏེ། བརྒྱད་པོ་དེ་གཞུང་དམ་པ་མ་ཡིན་བཞིན་དུ་དེའི་ནང་དུ་བསྡུས་པའི་ཕྱིར་རོ། །ཞུ་བ་དང་འདུལ་བྱེད་ཀྱི་ཁྱད་པར་ནི། ཁ་ཅིག མཚན་ཉིད་ལ་དོགས་པ་གཅོད་པ་ཞུ་བ། བྱ་བ་ལ་དོགས་པ་གཅོད་པ་འདུལ་བྱེད་ཅེས་སྨྲ་མོད། རང་ལུགས་ནི། གང་ཟག་སྤྱིའི་དབང་དུ་བྱས་ནས་བྱ་བ་འདི་དང་འདི་བྱས་ན་ཅི་འགྱུར་ཞུས་པའི་ལན་དུ་གསུངས་པ་ཞུ་བ་དང་། གང་ཟག་སོ་སོའི་བྱ་བ་ལ་དོགས་གཅོད་ཞུས་པའི་ལན་དུ་གསུངས་པ་འདུལ་བྱེད་དུ་འཇོག་གོ །གཉིས་པ་ནི། ལུང་སྡེ་བཞིས་སོ་ཐར་གྱི་མདོའི་དགོངས་པ་འགྲེལ་ཚུལ་ཅི་ལྟ་བུ་ཞེ་ན། ལུང་རྣམ་འབྱེད་ཀྱིས་སོ་ཐར་གྱི་མདོའི་ཚིག་དོན་གཉིས་ཀ་རྒྱས་པར་འགྲེལ་པར་བྱེད་དེ། ཚིག་འགྲེལ་ཚུལ་ནི། རྩ་བར་དགེ་སློང་གང་བསླབ་པ་མ་ཕུལ་བསླབ་པ་ཉམས་པར་མ་བྱས་པ་ཞེས་པའི་ཚིག་འགྲེལ་པ་ལ། རྣམ་འབྱེད་དུ་དགེ་སློང་ནི་ལྔ་སྟེ། མིང་གི་དགེ་སློང་དང་། སློང་བའི་དགེ་སློང་དང་། ཁས་འཆེ་བའི་དགེ་སློང་དང་། དོན་དམ་པའི་དགེ་སློང་དང་། གསོལ་བ་དང་བཞིའི་ལས་ཀྱིས་བསྙེན་པར་རྫོགས་པའི་དགེ་སློང་སྟེ་ལྔའོ། །འདིར་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པའི་དགེ་སློང་གཟུང་ངོ་ཞེས་གསུངས་པ་ལྟ་བུའོ། །དོན་གྱི་ཆ་ཡང་རྒྱས་པར་འགྲེལ་ཏེ། རྣམ་འབྱེད་ལས། བསླབ་པ་འཆའ་བའི་རྒྱུ་གླེང་གཞི། བསླབ་པ་མ་བཅས་པའི་ཉེས་དམིགས། བཅས་པའི་ཕན་ཡོན། བཅས་པ་དང་འགལ་བའི་ལྟུང་བ། དམིགས་བསལ་ལྟུང་མེད། བསླབ་བྱ། ཕྱིར་བཅོས་པའི་ཚུལ་རྣམས་བསྟན་པའི་ཕྱིར་རོ། །ལུང་གཞིས་སོ་ཐར་གྱི་མདོའི་ཚིག་དོན་གཉིས་ཀའི་ཆ་ཡང་རྒྱས་པར་འགྲེལ་ཏེ། ལོ་ཉི་ཤུ་མ་ལོན་པ་ལ་བསྙེན་རྫོགས་ཀྱི་སྡོམ་པ་མི་ཆགས་པར་གསུངས་པ་དེས་ལོ་ཉི་ཤུ་ལོན་པ་མཐུན་རྐྱེན་དང་། མ་ལོན་པ་འགལ་རྐྱེན་དུ་བསྟན་པས་དེས་མཚོན་ནས་རང་བྱུང་བསྙེན་རྫོགས་བསྒྲུབ་པའི་འགལ་རྐྱེན་དང་བྲལ་ཞིང་མཐུན་རྐྱེན་ཚང་བའི་རྣམ་གཞག་རྒྱས་པར་འགྲེལ་པ་ལ། རབ་བྱུང་གི་གཞི་དང་། གླེང་གཞི་གསོ་སྦྱོང་གི་གཞིས་འགྲེལ། བརྟད་བྱུང་གི་སྤང་བའི་སྐབས་སུ་སྟོན་ཟླ་ཐ་ཆུང་གི་ཉར་ཞག་བཅུས་མ་ཚང་བ་ཚུན་ཆད་ཅེས་གསུངས་པ་ནི་དབྱར་ཁས་བླངས་ནས་དགག་དབྱེ་བྱེད་པ་ལ་ཞག་བཅུ་མ་ཚང་བ་ཚུན་ཆད་ཅེས་པའི་དོན་ཡིན་ལ། དེས་ན་དབྱར་དང་དགག་དབྱེའི་རྣམ་གཞག་རྒྱས་པར་འགྲེལ་པ་ལ་དབྱར་གྱི་གཞི་དང་། དགག་དབྱེའི་གཞི་གཉིས། སྤང་ལྟུང་དང་པོ་གསུམ་གྱི་སྐབས་སུ་གོས་ཟིན་པ་སྲ་བརྐྱང་མ་བཏིང་པ་ཞེས་གསུངས་པའི་སྲ་བརྐྱང་གི་རྣམ་གཞག་རྒྱས་པར་སྟོན་པ་ལ་སྲ་བརྐྱང་གི་གཞི། ཟླ་འཇོག་གི་སྤང་བའི་སྐབས་སུ་གོས་རྙེད་པ་དེས་གོས་ལྡང་ན་གོས་བྱེད་པ་དང་། མ་ལྡང་ན་རེ་བ་དང་བཅས་ཏེ་འཇོག་པར་གསུངས་པའི་གོས་ཀྱི་རྣམ་གཞག་རྒྱས་པར་སྟོན་པ་ལ། སྤྱིར་བཏང་ལ་གོས་གཞི་དང་། དམིགས་བསལ་ལ་ཀོ་ལྤགས་ཀྱི་གཞི། བཅོམ་ལྡན་འདས་ཀྱིས་དགེ་སློང་ནད་པ་རྣམས་ལ་ཕན་པ་སོ་སོར་བསྟན་པར་བྱ་བའི་སྨན་གསུངས་པ་འདི་ལྟ་སྟེ་ཞེས་སོགས་གསུངས་པའི་སྨན་གྱི་རྣམ་གཞག་རྒྱས་པར་འགྲེལ་པ་ལ་སྨན་གཞི། བསྒོ་གྱུར་གྱི་ལས་ཞེས་སོགས་ལས་ཀྱི་རྣམ་གཞག་ཟུར་ཙམ་གསུངས་པ་དེ་རྒྱས་པར་འགྲེལ་པ་ལ་ལས་གཞི། རྩ་བར་དབྱུང་བ་དང་མགུ་བའི་རྣམ་གཞག་ཟུར་ཙམ་གསུངས་པ་དེ་རྒྱས་པར་འགྲེལ་པ་ལ་ཀཽ་ཤམྦཱི་དང་། དམར་སེར་ཅན་གྱི་དང་། སྤོ་བའི་དང་། གང་ཟག་གི་གཞི་སྟེ་བཞི་དང་། མ་ངེས་པ་གཉིས་ཀྱི་སྐབས་སུ་ལྟུང་བ་གླེང་དྲན་བྱ་བའི་ཚུལ་གསུངས་པ་དེ་ལ། ལྟུང་བ་གླེང་བ་དང་། གླེང་ནས་ཇི་ལྟར་བྱ་བའི་ཚུལ་རྒྱས་པར་འགྲེལ་པ་ལ་གསོ་སྦྱོང་གཞག་པའི་གཞི། དབྱེན་བྱེད་ལྷག་མའི་སྐབས་སུ་དགེ་འདུན་གྱི་དབྱེན་ཞེས་གསུངས་པའི་དབྱེན་ལ་ལས་བྱེ་བ་དང་འཁོར་ལོ་བྱེ་བ་གཉིས་ལས་དང་པོ་རྒྱས་པར་འགྲེལ་པ་ལ་ཀཽ་ཤམྦཱིའི་གཞི་དང་། གཉིས་པ་རྒྱས་པར་འགྲེལ་པ་ལ་དབྱེན་གྱི་གཞི་གཉིས། རྩོད་པ་ཞི་བྱེད་ཀྱི་ཆོས་བདུན་གསུངས་པ་དེ་རྒྱས་པར་འགྲེལ་པ་ལ་རྩོད་པའི་གཞི། གནས་མལ་གྱི་ལྟུང་བྱེད་ཀྱི་སྐབས་སུ་གནས་མལ་གྱི་རྣམ་གཞག་གསུངས་པ་དེ་རྒྱས་པར་འགྲེལ་པ་ལ་གནས་མལ་གྱི་གཞི་གསུངས་སོ། །དེ་ལྟར་འཐད་པའི་རྒྱུ་མཚན་ཡང་སོ་ཐར་གྱི་མདོའི་འགྲེལ་བྱེད་རྣམས་ཀྱིས་རྩ་བའི་མདོའི་དོན་དེ་དང་དེ་འཆད་པ་ན་ལུང་གཞིའི་དོན་དེ་དང་དེ་འཆད་པའི་ཕྱིར་རོ། །ཕྲན་ཚེགས་ཀྱིས་ནི་ལུང་གཞི་དང་རྣམ་འབྱེད་དུ་མ་ངེས་པའི་ཕྲན་ཚེགས་ཁ་བསྐངས་ནས་འགྲེལ་བར་བྱེད། གཞུང་དམ་པས་སྔར་བཤད་པ་རྣམས་ལ་དོགས་པ་གཅོད་པའི་སྒོ་ནས་འགྲེལ་བར་བྱེད་དོ། །ལུང་སྡེ་བཞི་པོ་སོ་སོའི་གཞུང་ཚད་ཇི་ཙམ་ཞེ་ན། ལུང་གཞི་ལ་བམ་པོ་བརྒྱ་དང་དགུ། རྣམ་འབྱེད་ལ་བརྒྱ་དང་བཅུ་གཅིག་ཡོད་ཅིང་། དེ་ཡང་ཕ་རྣམས་ལ་བརྒྱད་ཅུ་རྩ་གསུམ། མ་རྣམས་ལ་ཉི་ཤུ་རྩ་བརྒྱད་ཡོད་དོ། །ཕྲན་ཚེགས་ལ་ལྔ་བཅུ་རྩ་དྲུག གཞུང་དམ་པ་ལ་བཞི་བཅུ་རྩ་བརྒྱད་ཡོད་ལ། གཎྜིའི་མདོ་དང་འཁར་གསིལ་བསྟན་པ་དང་བཅང་བའི་མདོ་ནི་ཐེག་ཆེན་གྱི་མདོ་ཡིན་ནོ། །གཉིས་པ་ལ་དགོངས་འགྲེལ་གྱི་བསྟན་བཅོས། དེ་དག་གི་འགྲེལ་པ་བྱུང་ཚུལ། འདིར་ཁས་བླང་བར་བྱ་བ་གང་ཡིན་པ་དང་གསུམ། དང་པོ་ལ་སྡེ་ལྔ་ཆར་གྱི་བླང་དོར་བསྟན་པ་དང་། སོ་སོའི་བླང་དོར་བསྟན་པ་དང་། མདོ་ཉིད་ཀྱི་དཀའ་བའི་དོན་སྟོན་པའི་བསྟན་བཅོས་དང་གསུམ་ལས། དང་པོ་ནི། སློབ་དཔོན་ཡོན་ཏན་འོད་ཀྱིས་མཛད་པའི་མདོ་རྩ་བ་དང་། ཀརྨ་ཤ་ཏཾ་གཉིས་སོ། །གཉིས་པ་ལ་དགེ་སློང་གི་བླང་དོར་སྟོན་པ་དང་། དགེ་ཚུལ་གྱི་ཐུན་མོང་གི་བླང་དོར་སྟོན་པའི་བསྟན་བཅོས་གཉིས་ལས། དང་པོ་ནི། དགྲ་བཅོམ་པ་ས་གའི་ལྷས་མཛད་པའི་འདུལ་བ་མེ་ཏོག་ཕྲེང་བརྒྱུད་དང་། སློབ་དཔོན་པདྨས་མཛད་པའི་དགེ་སློང་གི་ལོ་དྲི་བ་གཉིས་སོ། །གཉིས་པ་ནི། སློབ་དཔོན་ཤཱཀྱ་འོད་ཀྱིས་མཛད་པའི་འདུལ་བ་སུམ་བརྒྱ་པ་དང་། སློབ་དཔོན་དགེ་འདུན་བཟང་པོས་མཛད་པར་གྲགས་པའི་ཀཱ་རི་ཀ་ལྔ་བཅུ་པ་དང་། སློབ་དཔོན་པདྨས་མཛད་པའི་དགེ་ཚུལ་གྱི་ལོ་དྲི་བ་དང་གསུམ་མོ། །དགེ་སློང་མ་དང་། དགེ་སློབ་མ་དང་། དགེ་ཚུལ་མའི་ཐུན་མོང་མ་ཡིན་པའི་བླང་དོར་སྟོན་པའི་བསྟན་བཅོས་བོད་དུ་འགྱུར་བ་མ་མངོན་ནོ། །གསུམ་པ་ནི། སློབ་དཔོན་དགེ་ལེགས་བཤེས་གཉེན་གྱིས་མཛད་པའི་དྲི་བ་ཚིག་ལེའུར་བྱས་པའོ། །པཎྜི་ཏ་པུཎྱ་ཤྲཱིས་མཛད་པའི་དགེ་བསྙེན་གྱི་བསླབ་བྱ་སྟོན་པའི་སྡོམ་པ་བརྒྱད་པ་རྩ་འགྲེལ་ནི་ཐེག་ཆེན་གྱི་སྡེ་སྣོད་ཀྱི་ནང་དུ་གཏོགས་ཀྱི། ཐེག་དམན་གྱི་སྡེ་སྣོད་དང་མི་མཐུན་ནོ། །གཉིས་པ་ནི། ཕའི་སོ་ཐར་གྱི་འགྲེལ་པ་ལ་དགེ་སློང་ཆུ་འཐུང་ཞེས་བྱ་བས་མཛད་པའི་བམ་པོ་བརྒྱ་དང་བཅུ་ཡོད་པ་དང་། དྲི་མེད་བཤེས་གཉེན་གྱིས་མཛད་པའི་བམ་པོ་ལྔ་བཅུ་པ་དང་། དཔའ་བོས་མཛད་པའི་འདུལ་བའི་གཞུང་འགྲེལ་བམ་པོ་ཉེར་བདུན་པ། དགེ་ལེགས་བཤེས་གཉེན་གྱིས་མཛད་པའི་བམ་པོ་ཉེར་ལྔ་པ། ཁྱད་པར་བཤེས་གཉེན་གྱིས་མཛད་པའི་འདུལ་བ་བསྡུས་པ་བམ་པོ་བཅུ་བདུན་པ། སྦྲང་བུའི་རྐང་ཅན་གྱིས་མཛད་པའི་འགྲེལ་པ་བམ་པོ་བརྒྱད་མ་དང་། ཚིག་གི་བརྗེད་བྱང་སྟེ་འགྲེལ་པ་བདུན་ཡོད་དོ། །མའི་སོ་ཐར་ལ་དགེ་ལེགས་བཤེས་གཉེན་གྱིས་མཛད་པར་གྲགས་པའི་འགྲེལ་པ་གཅིག་སྣང་བ་འདི་བོད་ཀྱི་ཡིན་པར་མངོན་ཏེ། དེ་ན་འདས་ཞེས་བྱ་བའི་ཚིག་བླ་དྭགས་སུ་བསྣན་པའོ་ཞེས་སོགས་བོད་ཚིག་མང་དུ་སྣང་བའི་ཕྱིར་རོ། །ལུང་གཞི་ལ་དགེ་ལེགས་བཤེས་གཉེན་གྱིས་མཛད་པའི་འགྲེལ་པ་ཡོད་ཅིང་། དེ་ལས་རབ་བྱུང་དང་གསོ་སྦྱོང་དང་དགག་དབྱེའི་གཞིའི་འགྲེལ་པ་ཕལ་ཆེར་བོད་དུ་འགྱུར་རོ། །རྣམ་འབྱེད་ལ་དུལ་བ་ལྷས་མཛད་པའི་འགྲེལ་པ། ཕྲན་ཚེགས་ལ་ཆོས་མཆོག་གི་སློབ་མ་ཚུལ་ཁྲིམས་སྐྱོང་གིས་མཛད་པའི་འགྲེལ་པ། གཞུང་དམ་པའི་ལེའུ་ཉེ་བ་འཁོར་གྱིས་ཞུས་པ་ལ། མདོ་སྡེ་འཛིན་པ་དགེ་བའི་བཤེས་གཉེན་གྱིས་མཛད་པའི་འགྲེལ་པ་ཡོད། གཞུང་དམ་པ་རིལ་པོའི་འགྲེལ་པ་དགེ་ལེགས་བཤེས་གཉེན་གྱིས་མཛད་པ་ཡོད་པར་ནི་དྲི་བའི་ཚིག་ལེའུར་བྱས་པ་ལས་བཤད་མོད་བོད་དུ་མ་འགྱུར་རོ། །བསྟན་བཅོས་ཀྱི་འགྲེལ་པའི་དབང་དུ་བྱས་ན། མདོ་རྩ་ལ། ཆོས་བཤེས་ཀྱིས་མཛད་པའི་རྒྱ་ཆེར་འགྲེལ་དང་། ཚུལ་ཁྲིམས་འབྱུང་གནས་ཀྱིས་བསྒྱུར་བའི་རང་འགྲེལ་དུ་གྲགས་པ་དང་། ཤེས་རབ་བྱེད་ཀྱིས་མཛད་པའི་འགྲེལ་པ་དང་། འགྲེལ་ཆུང་བི་མ་ལ་མི་ཏྲ་རྣམས་ཡོད། ཀརྨ་ཤ་ཏཾ། མེ་ཏོག་ཕྲེང་བརྒྱུད། དགེ་སློང་དང་དགེ་ཚུལ་གྱི་ལོ་དྲི་བ་རྣམས་ལ་འགྲེལ་པ་བོད་དུ་འགྱུར་བ་མེད་དོ། །སུམ་བརྒྱ་པ་ལ་རང་འགྲེལ་འོད་ལྡན་དང་། དུལ་བ་ལྷས་མཛད་པའི་སློབ་ཕན་གཉིས་ཡོད་ལ། སློབ་ཕན་ལྟར་ན་འོད་ལྡན་རང་འགྲེལ་མིན་པར་འདོད་དོ། །ཀཱ་རི་ཀ་ལྔ་བཅུ་པ་ལ་ཀ་མ་ལ་ཤཱི་ལས་མཛད་པར་གྲགས་པའི་དོན་བརྒྱད་མ་བྱ་བ་ཡོད་དོ། །བམ་པོ་ལྔ་བཅུ་པ་འདི་སོ་ཐར་གྱི་འགྲེལ་པ་ཡིན་ཀྱང་མདོ་རྩ་བའི་ཚིག་དོན་གཉིས་ཀ་རྒྱས་པར་འགྲེལ་པས་མདོ་རྩ་བའི་འགྲེལ་པ་གལ་ཆེ་ཤོས་ཅིག་ཏུ་སྣང་ངོ་། །གསུམ་པ་ནི། འོ་ན་མདོ་འགྲེལ་དེ་དག་གི་ནང་ནས་སྐབས་འདིར་གང་ཁས་བླང་བར་བྱ་ཞེ་ན། མདོ་རྣམས་ཀྱི་ནང་ནས་སོ་ཐར་དང་། འགྲེལ་བ་རྣམས་ཀྱི་ནང་ནས་གཞི་འགྲེལ་དང་རྒྱ་ཆེར་འགྲེལ་གཉིས་སྒྲ་ཇི་བཞིན་དུ་ཁས་བླང་བར་བྱ་བ་ཡིན་གྱི་གཞན་རྣམས་ནི་མ་ཡིན་ཏེ། གཞན་རྣམས་ན་མདོ་རྩ་ནས་བཤད་པ་དང་མི་མཐུན་པ་དུ་མ་སྣང་བའི་ཕྱིར། དེས་ན་བོད་དུ་འགྱུར་བའི་ཀརྨ་ཤ་ཏཾ་ནི་སྐབས་འདིར་སྒྲ་ཇི་བཞིན་དུ་ཁས་བླང་དུ་མི་རུང་སྟེ་རྒྱུ་མཚན་སྔར་བཞིན་ནོ།། ༈ །།གསུམ་པ་སྐབས་ཀྱི་བསྟན་བཅོས་ཀྱི་དོན་ལ་འཇུག་པ་ལ་འདིར་བཤད་པར་བྱ་བ་ནི་འདུལ་བ་མདོ་རྩ་བ་སྟེ། འདི་ལ་སྤྱིའི་ཁོག་བསྒྲིག་པ་དང་། གཞུང་སོ་སོའི་དོན་ལ་དཔྱད་པ་གཉིས། དང་པོ་ནི། རྟོག་ལྡན་བསྟན་བཅོས་ལ་འཇུག་པའི་ཡན་ལག་ཏུ་དགོས་འབྲེལ་སྔོན་དུ་བཏང་ནས་བསྟན་བཅོས་དངོས་ལ་འཇུག་པ་ལ་སྡོམ་པ་མ་ཐོབ་པ་ཐོབ་པར་བྱེད་པའི་ཐབས། ཐོབ་ནས་ཚུལ་ཁྲིམས་ཕུན་སུམ་ཚོགས་པར་བྱ་བའི་ཚུལ། དེ་དག་གཞི་གང་ལ་གནས་ནས་བྱ་བ་དང་གསུམ་ལས། དང་པོ་རབ་བྱུང་གི་གཞི་དང་། གསུམ་པ་གནས་མལ་གྱི་གཞིས་བསྟན། གཉིས་པ་ལ་ལྟུང་བས་མི་གོས་པར་བྱ་བའི་ཕྱིར་མི་མཐུན་ཕྱོགས་ལྟུང་བ་ངོས་གཟུང་བ་དང་། ངོས་ཟིན་ནས་ཚུལ་ཁྲིམས་རྣམ་པར་དག་པར་བྱེད་པའི་ཚུལ་གཉིས་ལས། དང་པོ་ནི། རྣམ་འབྱེད་གཉིས་སྤྱིར་བསྟན་དང་བཅས་པས་བསྟན་ལ། དེ་ཡང་རྣམ་འབྱེད་གཉིས་ཀྱིས་ལྟུང་བ་སོ་སོ་སྟོན་ཅིང་སྤྱིར་བསྟན་གྱིས་ཐུན་མོང་དུ་བསྟན་ནོ། །གཉིས་པ་ལ་དགེ་འདུན་མཐུན་པ་ལས་ཚུལ་ཁྲིམས་རྣམ་པར་དག་པར་འགྱུར་བས་དག་བྱེད་ཀྱི་ཐབས་དང་། མི་མཐུན་པ་ལ་ཚུལ་ཁྲིམས་དག་པར་མི་འགྱུར་བས་མི་མཐུན་པ་ཞི་བར་བྱེད་པའི་ཐབས་གཉིས། དང་པོ་ལ་ལྟུང་བ་སྔར་མ་བྱུང་བ་མི་འབྱུང་ཞིང་བྱུང་ཟིན་གཞན་གྱིས་བཤགས་སུ་གཞུག་པའི་སྒོ་ནས་དག་པའི་ཐབས་དང་། རྣམ་པ་ཐམས་ཅད་དུ་རྐྱེན་ཁྱད་པར་ཅན་བསྟེན་པའི་སྒོ་ནས་དག་པའི་ཐབས་དང་། ལྟུང་བ་བྱུང་ཟིན་ཕྱིར་བཅོས་པའི་སྒོ་ནས་དག་པའི་ཐབས་དང་གསུམ། དང་པོ་ལ་ལྟུང་བ་མི་འབྱུང་བར་གསོ་སྦྱོང་གིས་བྱེད་པས་དེའི་རྣམ་གཞག་གསོ་སྦྱོང་གི་གཞིས་བསྟན། བྱུང་ཟིན་གཞན་གྱིས་བཤགས་སུ་གཞུག་པའི་སྒོ་ནས་ཚུལ་ཁྲིམས་དག་པར་དགག་དབྱེས་བྱེད་ཅིང་། དེའི་རྒྱུར་དབྱར་ཁས་བླངས་དགོས་པས་དེ་གཉིས་ཀྱི་རྣམ་གཞག་དབྱར་གྱི་གཞི་དང་དགག་དབྱེའི་གཞི་གཉིས་ཀྱིས་བསྟན་ནོ། །གཉིས་པ་ལ་ཡང་ཟང་ཟིང་གི་རྐྱེན་བསྟེན་པ་དང་། ཆོས་ཀྱི་རྐྱེན་བསྟེན་པའི་སྒོ་ནས་ཚུལ་ཁྲིམས་དག་པའི་ཐབས་གཉིས་ལས། དང་པོ་གོས་གཞི་ལེའུ་གསུམ་དང་སྨན་གཞིས་བསྟན་ནོ། །གཉིས་པ་ནི། མ་ཐོབ་པ་ཐོབ་པར་བྱེད་པའི་ཐབས། ཐོབ་པ་མི་ཉམས་པར་བསྲུང་བའི་ཐབས། ཉམས་ན་ཕྱིར་བཅོས་པའི་ཐབས་རྣམས་ཡིན་ལ། དེ་ཐམས་ཅད་ལས་ཀྱི་བྱེད་དགོས་པས་དེའི་རྣམ་གཞག་ལས་གཞི་བསྟན་ནོ། །གསུམ་པ་ལ་ལུས་ལྟ་བུ་ཕྱིར་བཅོས་དངོས་དང་། དེའི་ཡན་ལག་གཉིས་ལས། དང་པོ་ཕྱིར་བཅོས་ཀྱི་གཞིས་སྟོན་ལ། གཉིས་པ་ལ་འཆབ་ཉེས་གང་ལ་འབྱུང་བ་དང་། ལྟུང་བ་ལས་ལྡང་བ་དང་ལྡང་བ་མ་ཡིན་པའི་དུས་ཤེས་དགོས་པས་དེའི་རྣམ་གཞག་དུས་དང་དུས་མ་ཡིན་པ་བསྡུས་པ་འབྱུང་བའི་གཞིས་བསྟན། ཡང་ཕྱིར་བཅོས་སྐབས་སུ་སྤོ་མགུ་སྤྱོད་པ་སོགས་བྱ་དགོས་པས་དེའི་རྣམ་གཞག་ས་གཞན་ན་གནས་པ་སྤྱོད་པའི་གཞིས་སྟོན། སྡིག་པ་ནན་ཏུར་སོགས་ཀྱི་སྐབས་སུ་ལྟུང་བ་གླེང་དྲན་བྱེད་དགོས་པས་ལྟུང་བ་དེ་དག་གླེང་བ་དང་། གླེང་ནས་ཇི་ལྟར་བསྒྲུབ་པའི་ཚུལ་རྣམས་བསླབ་པ་ཡོངས་སུ་སྦྱང་བའི་གཞིས་བསྟན། གཉིས་པ་ལ་མི་མཐུན་པ་ངོས་གཟུང་བ་དང་། དེའི་རྒྱུ་ངོས་གཟུང་ནས་དེ་ཞི་བྱེད་དང་སྦྱར་ནས་བཤད་པ་གཉིས། དང་པོ་ལ་ལས་བྱེ་བ་དང་། འཁོར་ལོ་བྱེ་བ་གཉིས་ལས། དེ་གཉིས་རིམ་བཞིན་ལས་བྱེ་བ་དང་འཁོར་ལོ་བྱེ་བའི་གཞིས་བསྟན་ནོ། །གཉིས་པ་ནི། རྩོད་གཞིས་བསྟན་ནོ། །ཁ་ཅིག་གཞུང་གི་བསྡུ་ཚོམས་འདི་ལྟར་འཆད་དེ། སྡོམ་པ་མ་ཐོབ་པ་ཐོབ་པར་བྱེད་པའི་ཐབས། ཐོབ་པ་མི་ཉམས་པར་བསྲུང་བའི་ཐབས། ཉམས་ན་ཕྱིར་བཅོས་པའི་ཚུལ་གསུམ་ལས། དང་པོ་ནི། རབ་བྱུང་གི་གཞིས་བསྟན། གཉིས་པ་ལ་ཕྱིའི་རྐྱེན་དགེ་བའི་བཤེས་གཉེན་བསྟེན་པའི་སྒོ་ནས་དང་། མི་མཐུན་ཕྱོགས་ངོ་ཤེས་པའི་སྒོ་ནས་དང་། བསླབ་པ་ཡོངས་སུ་སྦྱོང་བའི་སྒོ་ནས་དང་། བདེ་བར་གནས་པའི་རྐྱེན་བསྟེན་པའི་སྒོ་ནས་དང་། ནང་གི་ཉེར་ལེན་བསམ་སྦྱོར་ཕུན་སུམ་ཚོགས་པའི་སྒོ་ནས་བསྲུང་བ་དང་ལྔ་ལས། དང་པོ་ནི། གནས་དང་གནས་པའི་ཚུལ་ཁྲིམས་དང་གནས་དང་གནས་པའི་མཚན་ཉིད་སོགས་ཀྱིས་སྟོན་པས་རབ་བྱུང་གི་གཞིས་འཆད་དོ། །གཉིས་པ་རྣམ་འབྱེད་གཉིས་སྤྱིར་བསྟན་དང་བཅས་པས་འཆད་དོ། །གསུམ་པ་ལ་རང་སྟོབས་ཀྱིས་སྦྱོང་བ་ནི་གསོ་སྦྱོང་གི་གཞི་དང་། གཞན་སྟོབས་ཀྱིས་སྦྱོང་བ་ནི་དབྱར་དང་དགག་དབྱེའི་གཞིས་འཆད། བཞི་པ་ལ་བདེ་བར་གནས་པའི་རྐྱེན་གོས་དང་། སྨན་དང་། གནས་མལ་དང་། སྣོད་སྤྱད་བསྟེན་པ་བཞི་ལས། དང་པོ་གོས་གཞི་ལེའུ་གསུམ་དང་། གཉིས་པ་སྨན་གཞིས་འཆད། དེ་ཡང་གོས་ཡོ་བྱད་ཀྱི་གཙོ་བོ་ཡིན་པས་དང་པོར་བསྟན། སྨན་ཕལ་པ་ཡིན་པས་དེའི་རྗེས་སུ་བསྟན་ནོ། །གསུམ་པ་ནི། གནས་མལ་གྱི་གཞི་དང་། བཞི་པ་ནི། རབ་བྱུང་གི་གཞི་དང་རྣམ་འབྱེད་གཉིས་ཀྱི་ཞར་ལ་འཆད། ལྔ་པ་ནི། ངོ་ཚ་ཁྲེལ་ཡོད་དང་དྲན་ཤེས་བཞིན་སོགས་ཀྱི་སྒོ་ནས་བསྲུང་བ་སྟེ་དེ་ཡང་རབ་བྱུང་གི་གཞིའི་ཞར་ལ་འཆད་དོ། །གསུམ་པ་ཉམས་ན་ཕྱིར་བཅོས་པའི་ཚུལ་ལ་ལྟུང་བ་ཕྱིར་བཅོས་པ་དང་། རྩོད་པ་ཕྱིར་བཅོས་པ་གཉིས་ལས། དང་པོ་ཕྱིར་བཅོས་ཀྱི་གཞི་ལེའུ་བཞིས་འཆད། གཉིས་པ་རྩོད་གཞིས་འཆད་དེ་ཐམས་ཅད་ལས་ལ་རག་ལས་པས། ལས་ཀྱི་རྣམ་གཞག་ནི་ལས་གཞིས་འཆད་པ་ཡིན་ནོ་ཞེས་གསུང་ངོ་།། ༈ །།གཉིས་པ་གཞུང་སོ་སོའི་དོན་ལ་དཔྱད་པ་ལ་གཉིས་ཏེ། འཇུག་པའི་ཡན་ལག་དགོས་འབྲེལ་དང་། དགོས་པ་ཅན་གྱི་བསྟན་བཅོས་ཀྱི་ལུས་དངོས་སོ། །དང་པོ་ནི། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་ཞེས་པ་སྟེ། འདི་ལ་དགོས་དོན། བསྡུས་དོན། ཚིག་དོན། བརྒལ་ལན་དང་བཞི་ལས། དང་པོ་ནི། བསྟན་བཅོས་ཀྱི་ཐོག་མར་དགོས་འབྲེལ་གྱི་ངག་དགོད་པ་ལ་དགོས་པ་ཅི་ཡོད་ཅེ་ན། རྣམ་བཅད་ལ་བསྟན་བཅོས་འདི་ལ་དགོས་སོགས་ཆོས་བཞི་མེད་པར་དོགས་པ་བསལ་ནས། ཡོངས་གཅོད་ལ་དགོས་སོགས་ཆོས་བཞི་ཡོད་པར་ངེས་པའམ་ཡོད་དམ་སྙམ་པའི་དོན་འགྱུར་གྱི་ཐེ་ཚོམ་གྱི་སྒོ་ནས་རྒོལ་བ་རྟོག་ལྡན་བསྟན་བཅོས་ལ་འཇུག་པར་བྱ་བའི་དོན་དུ་ཡིན་ཏེ། ཊཱི་ཀར་མདོ་དང་པོ་འདིས་ནི་འདུལ་བའི་མདོ་འདིའི་འབྲེལ་པ་དང་། བརྗོད་པར་བྱ་བ་དང་། དགོས་པ་དང་། དགོས་པའི་ཡང་དགོས་པ་རྣམས་བརྗོད་དེ། འདི་ལྟར་རྟོག་པ་སྔོན་དུ་བཏང་བ་དག་ནི་འབྲེལ་བ་མེད་པ་དང་། བརྗོད་པར་བྱ་བ་མེད་པ་དང་། དགོས་པ་མེད་པའི་ཚིག་ཀྱང་ཁས་མི་ལེན་ན། བསྟན་བཅོས་ལ་སོགས་པ་གཞན་ལྟ་སྨོས་ཀྱང་ཅི་དགོས་ཏེ། དེ་བས་ན་འདུལ་བའི་མདོ་ལ་བརྗོད་པར་བྱ་བ་མེད་པར་དོགས་པ་བསལ་བའི་ཕྱིར་བརྗོད་པར་བྱ་བ་བསྙད་དོ། །འབྲས་བུ་མེད་པར་དོགས་པ་བཟློག་པའི་ཕྱིར་དགོས་པ་བརྗོད་དོ། །ཐབས་མེད་པར་དོགས་པ་སྤང་བའི་ཕྱིར་འབྲེལ་པ་བཤད་དོ། །འདོད་པའི་དོན་གྲུབ་པར་བྱ་བའི་ཕྱིར་དགོས་པའི་ཡང་དགོས་པ་བསྟན་ཏོ་ཞེས་གསུངས་པས་སོ། །གཉིས་པ་ནི། བརྗོད་བྱ། དགོས་པ། ཉིང་དགོས། འབྲེལ་པ་དང་བཞི་ལས། འདི་ལ་སྤྱིར་ངག་ཙམ་ལ་ཡོད་པ་དང་། དགོས་འབྲེལ་གྱི་ངག་ལ་ཡོད་པ་དང་། བསྟན་བཅོས་ལུས་ལ་ཡོད་པ་གསུམ་ལས། དང་པོ་ནི། ངག་དོན་མཐུན་ཐམས་ཅད་ལ་ཆོས་བཞི་ཚང་སྟེ། དཔེར་ན་བུམ་པར་ཆུ་འོན་ཅིག་ཅེས་པ་ལྟ་བུ་ལ་མཚོན་ན་བུམ་པར་ཆུ་ལེན་པ་ནི་ངག་དེའི་བརྗོད་བྱ། ལེན་པར་གོ་བ་ནི་ངག་དེའི་དགོས་པ། ཆུ་བླངས་ནས་ཁྲུས་དང་བཏུང་བ་སོགས་ཀྱི་སྐྱེས་བུ་ཚིམ་པར་བྱས་པ་ནི་ཉིང་དགོས། ཉིང་དགོས་དགོས་པ་ལ་རག་ལས། དགོས་པ་ངག་ལ་རག་ལས་པ་ནི་འབྲེལ་པའོ། །གཉིས་པ་ནི། བསྟན་བཅོས་འདིའི་བརྗོད་བྱ་སོགས་བཞི་ནི་དགོས་འབྲེལ་ངག་གི་བརྗོད་བྱ། དགོས་འབྲེལ་ངག་ལ་བརྟེན་ནས་བསྟན་བཅོས་འདིའི་བརྗོད་བྱ་སོགས་བཞི་རྟོགས་པ་ནི་དགོས་པ། དེ་ལ་བརྟེན་ནས་བསྟན་བཅོས་འདི་ལ་རྟོག་ལྡན་འཇུག་པ་ནི་ཉིང་དགོས། ཕྱི་མ་ཕྱི་མ་སྔ་མ་སྔ་མ་ལ་རག་ལས་པ་ནི་འབྲེལ་པའོ། །གསུམ་པ་ནི། སྤོང་བདུན་འཁོར་བཅས་ཀྱི་ཚུལ་ཁྲིམས་ནི་བསྟན་བཅོས་འདིའི་བརྗོད་བྱ། བསྟན་བཅོས་འདི་ལ་བརྟེན་ནས་དེ་རྟོགས་པ་ནི་དེའི་དགོས་པ། བསྟན་བཅོས་འདིས་བསྟན་པའི་ཚུལ་ཁྲིམས་ཉམས་སུ་བླངས་པ་ལ་བརྟེན་ནས་ལྷག་མེད་ཀྱི་མྱང་འདས་ཐོབ་པ་ནི་དེའི་ཉིང་དགོས། ཉིང་དགོས་དགོས་པ་ལ་རག་ལས། དགོས་པ་བསྟན་བཅོས་ལ་རག་ལས་པ་ནི་འབྲེལ་པའོ། །ཡང་ན་མདོ་འདི་ནི་ཚུལ་ཁྲིམས་སོགས་རྗོད་བྱེད་ཡིན་པས་ཐབས་དང་། ཚུལ་ཁྲིམས་སོགས་རྟོགས་པ་ནི་མདོ་འདི་ལས་བྱུང་བ་ཡིན་པས་ཐབས་ལས་བྱུང་བ་ཡིན་པས་ན། ཐབས་དང་ཐབས་ལས་བྱུང་བའི་ཚུལ་གྱིས་འབྲེལ་བ་སྟེ། ཊཱི་ཀར་དེ་བས་ན་མདོ་འདི་ནི་ཐབས་ཡིན་ལ། ཚུལ་ཁྲིམས་བསྟན་པ་ནི་ཐབས་ལས་བྱུང་བ་ཡིན་ཏེ། ཐབས་དང་ཐབས་ལས་བྱུང་བའི་མཚན་ཉིད་ནི་འབྲེལ་བ་ཡིན་ནོ་ཞེས་སོ། །དེ་ལ་ཇི་ལྟར་བསྟན་ན། ཉིང་དགོས་དང་བརྗོད་བྱ་དངོས་སུ་བསྟན་ཏེ། ངེས་པར་འབྱུང་བ་ཞེས་པས་ཉིང་དགོས་དང་། ཚུལ་ཁྲིམས་ཞེས་པས་བརྗོད་བྱ་དངོས་སུ་བསྟན་པའི་ཕྱིར། དགོས་པ་དང་འབྲེལ་པ་ཤུགས་ལས་བསྟན་ཏེ། ཚུལ་ཁྲིམས་བསྟན་པའི་དོན་དུ་མདོ་བརྩམས་ཞེས་དམ་བཅས་པ་ཡིན་པའི་ཕྱིར། ཊཱི་ཀར་དེ་ལྟ་བས་ན་བརྗོད་པར་བྱ་བ་དང་དགོས་པའི་ཡང་དགོས་པ་ལ་ནི་ཚུལ་ཁྲིམས་དང་ངེས་པར་འབྱུང་བའི་སྒྲ་གཉིས་ཀྱིས་གོ་རིམ་བཞིན་དུ་མངོན་སུམ་དུ་བསྟན་ལ། འབྲེལ་པ་དང་དགོས་པ་ནི་ཤུགས་ཀྱིས་བསྟན་ཏེ། ཚུལ་ཁྲིམས་བསྟན་པའི་དོན་དུ་མདོ་རྩོམ་པའི་ཕྱིར་རོ་ཞེས་དང་། ཁ་ཅིག་ནི་མངོན་སུམ་དུའོ། །ཁ་ཅིག་ནི་བརྒྱུད་པས་སོ་ཞེས་སོ། །གལ་ཏེ་ཚུལ་ཁྲིམས་ལ་བརྟེན་ནས་ཉོན་མོངས་སྤངས་པའི་མྱང་འདས་ཐོབ་ན་ཟག་མེད་ཀྱི་ཡེ་ཤེས་ཀྱིས་ཉོན་མོངས་སྤོང་བར་བཤད་པ་དང་འགལ་ལོ་ཞེ་ན། སྐྱོན་མེད་དེ། སྤོང་བ་བདུན་པའི་མཚན་ཉིད་ཅན་གྱི་ཚུལ་ཁྲིམས་ལ་བརྟེན་ནས་ཟག་མེད་ཀྱི་ཡེ་ཤེས་ཀྱིས་ཉོན་མོངས་སྤོང་བར་འགྱུར་བའི་ཕྱིར། འདི་ལ་དགོངས་ནས་མདོ་ལས། ཚུལ་ཁྲིམས་ལ་གནས་ཚུལ་ཁྲིམས་ལ་བརྟེན་ནས་འཕགས་པའི་བདེན་པ་བཞི་པོ་དག་ཡང་དག་པ་ཇི་ལྟ་བ་བཞིན་དུ་མཐོང་བར་འགྱུར་རོ་ཞེས་གསུངས་སོ། །གསུམ་པ་ནི། ངེས་པར་འབྱུང་བ་ཞེས་པ་ལ། ངེས་པ་ནི་གདོན་མི་ཟ་བ། འབྱུང་བའི་སྒྲ་རྐང་པ་དང་གཞོན་པ་དང་ཐོབ་པ་ལ་འཇུག་པ་ལས། འདིར་ནི་ཐོབ་པ་ཁོ་ན་ལ་འཇུག་སྟེ། ངེས་པར་ཞེས་པའི་ཚིག་སྨོས་པའི་ཕྱིར་རོ། །དེས་ན་གདོན་མི་ཟ་བར་ཐོབ་པར་བྱ་བ་ནི་ལྷག་མེད་ཀྱི་མྱང་འདས་ཏེ་ཉིང་དགོས་མཐར་ཐུག་གོ །ལམ་བདེན་དང་ལྷག་བཅས་མྱང་འདས་ནི་གནས་སྐབས་ཀྱི་ཉིང་དགོས་ཙམ་ཡིན་ཀྱང་ཉིང་དགོས་མཐར་ཐུག་མ་ཡིན་ཏེ། ལྷག་བཅས་ནི་གདོན་མི་ཟ་བར་ཐོབ་པར་བྱ་བ་མ་ཡིན་པའི་ཕྱིར་དང་། ལམ་ནི་མྱང་འདས་དེ་ཐོབ་པའི་རྒྱུ་ཡིན་པའི་ཕྱིར། ངེས་པར་འབྱུང་བ་མྱང་འདས་དེ་ཐོབ་པའི་ཐབས་སུ་གྱུར་པའི་ཚུལ་ཁྲིམས་ནི་ངེས་པར་འབྱུང་བའི་ཚུལ་ཁྲིམས་ཏེ། སྤོང་བདུན་འཁོར་དང་བཅས་པའོ། །དེ་ཡང་ལུས་ཀྱི་མི་ཚངས་སྤྱོད་མ་བྱིན་ལེན་སྲོག་གཅོད་སྤོང་བ་སྟེ་གསུམ་དང་། ངག་གི་བརྫུན་ཕྲ་མ་ཚིག་རྩུབ་ངག་རྐྱལ་སྤོང་བ་བཞི་སྟེ་སྤོང་བ་བདུན་ཡིན་ལ། འཁོར་དང་བཅས་པ་ནི་ཆང་སྤོང་བ་ལ་སོགས་པའོ། །དབང་དུ་བྱས་ཏེ་ཞེས་པའི་སྐད་དོད་ལ་ཨ་ཐ་ཞེས་འབྱུང་ལ། དེ་ཡང་བཀྲ་ཤིས་པ་དང་དེ་ནས་ཞེས་པའི་ཚིག་ཕྲད་དང་དེ་མ་ཐག་པ་དང་། དབང་དུ་བྱ་བ་ལ་འཇུག་པ་ལས། འདིར་ནི་ཐ་མ་ཁོ་ན་ཡིན་ཏེ། འདི་ནས་བཟུང་ཏེ་མདོ་ཡོངས་སུ་རྫོགས་པའི་བར་ཐམས་ཅད་ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ནས་བསྟན་པར་བྱའོ་ཞེས་རྩོམ་པར་དམ་བཅའ་བ་ཡང་བསྟན་པ་ཡིན་ནོ། །བཞི་པ་ནི། ཁོ་ན་རེ། སྤོང་བདུན་འཁོར་བཅས་ཀྱི་ཚུལ་ཁྲིམས་རྟོགས་པའི་ཕྱིར་དུ་བསྟན་བཅོས་འདི་རྩོམ་པ་མི་རིགས་ཏེ། ལུང་སྡེ་བཞིར་སྤོང་བདུན་འཁོར་བཅས་ཀྱི་ཚུལ་ཁྲིམས་བསྟན་ཟིན་པའི་ཕྱིར་རོ་ཞེ་ན། སྐྱོན་མེད་དེ། གཞུང་རྒྱས་པ་ཉན་པས་འཇིགས་ནས་དེ་ལ་འཇུག་མི་ནུས་པའི་གདུལ་བྱ་རྗེས་སུ་གཟུང་བའི་ཕྱིར་དང་། ལུང་དོན་བདེ་བླག་ཏུ་རྟོགས་པར་བྱ་བའི་ཕྱིར་དང་། ལུང་དོན་ཕྱིན་ཅི་ལོག་ཏུ་འཆད་པ་བསལ་བའི་དགོས་པ་ཡོད་པའི་ཕྱིར་རོ། །དང་པོ་ནི་གོ་བར་སླ་ལ། གཉིས་པ་གྲུབ་སྟེ། སྟོན་པས་གཞི་གཅིག་ལ་སྦྱར་ནས་གསུངས་པ་དེ་སློབ་དཔོན་གྱིས་གཞི་དུ་མ་ལ་སྦྱར་ནས་གསུངས་པས་སོ། །དཔེར་ན་ལུང་ལས་ཕམ་པ་དང་པོའི་སྐབས་སུ། དགེ་སློང་གང་བསླབ་པ་མ་ཕུལ་བསླབ་པ་ཉམས་པར་མ་བྱས་པར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཕམ་པར་འགྱུར་གྱི་ཞེས་གསུངས་པ་ལ། འདིར་སློབ་དཔོན་གྱིས་ལྟུང་བ་སྡེ་ལྔ་སྤྱོད་པའི་རྟེན་གྱི་ཡན་ལག་ལ་བསླབ་པ་མ་ཕུལ་བ་བསླབ་པ་ཉམས་པར་མ་བྱས་པ་དགོས་པར་བསྟན་པ་ལྟ་བུའོ། །གསུམ་པ་གྲུབ་སྟེ། ཁ་ཅིག་རྫས་སྦྱིངས་ཏེ་བརྐུས་པ་ཕྱིས་ལེན་པ་དེ་བརྐུས་ཟིན་བླང་བའི་བློ་མ་ཡིན་པར་མ་བརྐུས་པ་རྐུ་བའི་བློ་ཡིན་ནོ་ཞེས་ཟེར་བ་དེ་འགོག་པར་བྱེད་པ་ལ། དེ་ཕྱིས་དབྱུང་ངོ་སྙམ་པའི་བློས་གང་ཡིན་པ་བཀུར་བའི་འོ་ཞེས་པ་དང་། ཡང་ཁ་ཅིག་གིས་བུར་ཁུ་བྱིན་རླབས་ཅན་རོ་སླར་གྱུར་ན་ལོངས་སྤྱོད་དུ་མི་རུང་བ་དེ་བཞིན་དུ། བྱིན་གྱིས་མ་བརླབས་པའི་བུར་ཁུ་རོ་སླར་གྱུར་པ་ལོངས་སྤྱོད་དུ་མི་རུང་ཞེས་ཟེར་བ་འགོག་པ་ལ། དེ་ནི་མ་ཡིན་ཏེ་ཞེས་སོགས་གསུངས་པ་དང་། ཡང་ཁ་ཅིག་ངོ་བོ་ཉིད་ཚོལ་བ་དང་མཐུན་པར་སྦྱིན་པ་ནན་ཏུར་གྱི་ཚུལ་དུ་བསྟན་པ་ཡིན་ཏེ། མི་འདོད་བཞིན་དུ་སྦྱིན་པ་བྱ་བ་ཡིན་པའི་ཕྱིར་ཟེར་བ་ལ། སློབ་དཔོན་གྱིས་དགེ་འདུན་ལ་གསོལ་བ་བྱ་དགོས་པས་ནན་ཏུར་དུ་མི་འཐད་ཅེས་འགོག་པ་ནི་དེ་ནི་མི་བཟང་སྟེ་ཞེས་སོགས་གསུངས་པའི་ཕྱིར་རོ། །དེ་ལྟར་ཡང་ཊཱི་ཀར་འདིར་དགོས་པ་ནི་ཚུལ་ཁྲིམས་བསྟན་པའོ་ཞེས་སྨྲས་ན། འོ་ན་རྣམ་པར་འབྱེད་པ་ལ་སོགས་པའི་གཞུང་གིས་ཚུལ་ཁྲིམས་དེ་བསྟན་ཟིན་པས་དེའི་ཕྱིར་མདོ་འདི་བརྩམ་པར་མི་བྱ་བ་ཁོ་ནའོ་ཞེ་ན། དེ་ནི་དེ་ལྟ་མ་ཡིན་ཏེ། འདི་ལྟར་གཞུང་གཞན་གྱིས་དེ་བསྟན་མོད་ཀྱི། འོན་ཀྱང་གཞུང་རྒྱས་པ་ཉན་པས་འཇིགས་པ་རྣམས་ཀྱི་དོན་དང་། རྣམ་པར་འབྱེད་པ་ལ་སོགས་པ་དེ་དག་ཉིད་ཡང་དག་པར་བསྟན་པར་བྱ་བའི་ཕྱིར་དང་། ལོག་པར་རྣམ་པར་འཆད་པ་བསལ་བའི་དོན་དུ་སློབ་དཔོན་གྱིས་བརྩམས་སོ་ཞེས་གསུངས་སོ།། ༈ །།གཉིས་པ་དགོས་པ་ཅན་གྱི་བསྟན་བཅོས་ཀྱི་ལུས་དངོས་ལ་གཉིས་ཏེ། སློབ་པ་པོ་རྟེན་གྱི་གང་ཟག་གི་མཚན་ཉིད་དང་། དེས་བསླབ་པར་བྱ་བའི་མཚན་ཉིད་དོ། །དང་པོ་ལ་ལུང་གཞི་དང་། ཕྲན་ཚེགས་དང་། ཞུ་བའི་སྐབས་གསུམ་ལས། དང་པོ་ལ་སྔོན་གྱི་ཆོ་ག་དང་། ད་ལྟར་གྱི་ཆོ་ག་གཉིས། དང་པོ་ལ་ཚིག་གི་དོན་དང་། དོགས་པ་གཅོད་པ་གཉིས། དང་པོ་ལ་སྐྱེ་བ་རྒྱུའི་ཁྱད་པར། སྐྱེ་ཚུལ་གྱི་ཁྱད་པར། ཆོ་ག་གཞན་ཡིན་པར་བསྟན་པ་དང་གསུམ་ལས། དང་པོ་ནི། སྔོན་བཅོམ་ལྡན་འདས་ཀྱིས་ཚུར་ཤོག་གི་སྒོ་ནས་ཕལ་ཆེར་བསྙེན་པར་རྫོགས་པར་མཛད་པས་དགེ་སློང་ཞིག་གི་དྲུང་དུ་རབ་ཏུ་བྱུང་བའི་ཕྱིར་དུ་འོངས་པ་ཚུར་ཤོག་དོན་དུ་གཉེར་ནས་བཅོམ་ལྡན་འདས་ཀྱི་དྲུང་དུ་བཏང་བ་བར་སྐབས་སུ་སྲོག་གི་བར་ཆད་དུ་གྱུར་པ་ལ་བརྟེན་ནས་དགེ་འདུན་འདུས་པས་རབ་ཏུ་བྱུང་བ་དང་བསྙེན་པར་རྫོགས་པའི་ཆོ་ག་གསུངས་པ་ཡིན་ལ། དེ་ཚུལ་ཇི་ལྟར་བྱ་ན། མཚམས་ནང་དེར་གཏོགས་པའི་དགེ་འདུན་ཐམས་ཅད་འདུས་པ་ན་བསྒྲུབ་བྱ་དེ་སྐྲ་དང་ཁ་སྤུ་བྲེགས། ཆོས་གོས་གསུམ་བགོས་པའི་རབ་ཏུ་བྱུང་བའི་ཆ་ལུགས་འདི་བཞིན་དུ་རྫོགས་པར་བྱས་ཏེ། ལུས་ཀྱི་སྤྱོད་ལམ་དགེ་འདུན་རྒན་རིམ་ལ་ཡན་ལག་ལྔས་ཕྱག་འཚལ། ཐལ་མོ་སྦྱར། སྟན་མེད་པར་ཙོག་ཙོག་པུར་འདུག་སྟེ། དགེ་འདུན་ལ་རབ་ཏུ་བྱུང་བ་དང་བསྙེན་པར་རྫོགས་པར་མཛད་དུ་གསོལ་ཞེས་གསོལ་བ་བཏབ་པར་གྱུར་པ་ལན་གསུམ་དང་། ཆོ་ག་གོ་བར་བྱེད་པའི་གསོལ་བ་གཅིག་དང་བརྗོད་པ་གསུམ་སྟེ་བཞིའི་ལས་ཀྱི་ཉེ་བར་བསྒྲུབ་པའོ། །གཉིས་པ་སྐྱེ་ཚུལ་ནི་དུས་ཅིག་ཆར་དུ་བར་མ་རབ་ཏུ་བྱུང་བ་དང་བསྙེན་པར་རྫོགས་པར་ཉེ་བར་བསྒྲུབས་པར་གྱུར་པ་དེ་ཐོབ་པར་བྱས་པའོ། །སྐབས་འདིའི་རབ་ཏུ་བྱུང་བ་ནི་བར་མ་རབ་བྱུང་ཡིན་ཏེ། གཞི་ཊཱིཀ་ལས། རབ་ཏུ་བྱུང་བ་ཞེས་བྱ་བ་ནི་སྡོམ་པ་ཡང་མ་ཡིན་སྡོམ་པ་མ་ཡིན་པ་ཡང་མ་ཡིན་པའི་ངོ་བོ་ཉིད་ཀྱི་རབ་ཏུ་བྱུང་བ་ཐོབ་པར་མཛད་པའོ། །རྫོགས་པར་བསྙེན་པ་ནི་སྡིག་པ་ཐམས་ཅད་སྤོང་བའི་མཚན་ཉིད་དགེ་སློང་གི་དངོས་པོ་ལ་རྣམ་པར་གཞག་པར་མཛད་པའོ་ཞེས་གསུངས་པའི་ཕྱིར། དགེ་ཚུལ་ལ་བྱེད་པ་མ་ཡིན་ཏེ། དགེ་ཚུལ་ནི་བསྟན་པ་ལ་རིམ་གྱིས་སློབ་པའི་དོན་དུ་བསྟན་པ་ཡིན་ལ། འདིར་བསྟན་པ་ལ་རིམ་གྱིས་སློབ་མི་དགོས་པའི་ཕྱིར་རོ། །གསུམ་པ་ཆོ་ག་གཞན་ཡིན་པར་བསྟན་པ་ནི། རྣམ་པ་དེ་ལྟ་བུ་ནི་སྟེ་ཁོ་ན་ད་ལྟར་གྱི་ཆོ་ག་ལས་གཞན་སྔོན་གྱི་ཆོ་ག་ཡིན་ཞེས་པའི་དོན་ཏེ། ཊཱི་ཀར། ལྟ་བུ་ནི་ཞེས་བྱ་བའི་སྒྲ་ནི་རྣམ་པའི་ཚིག་ཡིན་ཏེ། སྔོན་གྱི་ཆོ་གའི་རྣམ་པ་ནི་དེ་ལྟ་བུར་རིག་པར་བྱའི། རྣམ་པར་གཞན་ནི་མ་ཡིན་ནོ་ཞེས་བྱ་བའི་ཐ་ཚིག་གོ་ཞེས་གསུངས་པའི་ཕྱིར་རོ། །གཉིས་པ་ལ་དགག་གཞག་སྤང་གསུམ་ལས། དང་པོ་ལ་འདོད་པ་བརྗོད་པ་དང་། དེ་དགག་པ་གཉིས། དང་པོ་ནི། ཁ་ཅིག་སྔོན་ཆོ་ག་ལ་བཅུ་ཡོད་པ་ཡིན་ཏེ། ལུང་མ་མོར། དེ་བཞིན་གཤེགས་པ་རང་བྱུང་དང་། རང་སངས་རྒྱས་ནི་སློབ་དཔོན་མེད་པར་བསྙེན་པར་རྫོགས་པ་དང་། ལྔ་པོ་རྣམས་ཡེ་ཤེས་ཁོང་དུ་ཆུད་པས་དང་། ཚེ་དང་ལྡན་པ་འོད་སྲུང་ཆེན་པོ་སྟོན་པར་ཁས་བླངས་པས་དང་། ཚེ་དང་ལྡན་པ་ལེགས་སྦྱིན་དྲིས་ནས་ལུང་བསྟན་པས་དང་། དགེ་སློང་ཚུར་ཤོག་ཅེས་གསུངས་པས་དང་། སྐྱབས་སུ་འགྲོ་བའི་ཚིག་གསུམ་གྱིས་དང་། ཡུལ་མཐའ་འཁོབ་ན་འདུལ་བ་འཛིན་པ་ལྔའི་དགེ་འདུན་ལས་དང་། ཡུལ་དབུས་སུ་བཅུ་འདུས་པའམ་དེ་ལས་ལྷག་པ་ལས་དང་། བླ་མའི་ཆོས་ཁས་བླངས་པ་ལས་དང་། ཕོ་ཉས་དང་། དགེ་འདུན་སྡེ་གཉིས་ལས་བསྙེན་པར་རྫོགས་པའོ་ཞེས་དང་། མཛོད་འགྲེལ་ལས། བྱེ་བྲག་ཏུ་སྨྲ་བའི་འདུལ་བ་པ་རྣམས་ན་རེ། རྣམ་པ་བཅུས་བསྙེན་པར་རྫོགས་སོ་ཞེས་ཟེར་བ་བསྡུ་བའི་ཕྱིར་སོགས་པའི་སྒྲ་སྨོས་ཏེ། རང་བྱུང་གིས་ནི་སངས་རྒྱས་དང་རང་སངས་རྒྱས་གཉིས་སོ། །ངེས་པ་ལ་ཞུགས་པ་ནི་རྟེན་ལྔ་པོ་རྣམས་སོ། །དགེ་སློང་ཚུར་ཤོག་ཅེས་བྱ་བས་ནི་གྲགས་པ་ལ་སོགས་པ་རྣམས་སོ། །སྟོན་པར་ཁས་བླངས་པས་ནི་འོད་སྲུང་ཆེན་པོའོ། །དྲི་བས་མཉེས་པ་ནི་ལེགས་སྦྱིན། བླ་མའི་ཆོས་ཁས་བླངས་པས་ནི་སྐྱེ་དགུའི་བདག་མོ་ཆེན་མོའོ། །ཕོ་ཉས་ནི་མཆོད་སྦྱིན་ནོ། །འདུལ་བ་འཛིན་པར་གཏོགས་པ་ལྔས་ནི་མཐའ་འཁོབ་ཀྱི་མི་རྣམས་སོ། །བཅུའི་ཚོགས་ཀྱིས་ནི་དབུས་ཀྱི་མི་རྣམས་སོ། །སྐྱབས་སུ་འགྲོ་བ་ལན་གསུམ་བཟླས་པས་ནི་བཟང་སྡེ་དྲུག་ཅུའི་ཚོགས་ཀྱི་བསྙེན་པར་རྫོགས་པར་བྱས་པ་རྣམས་ཏེ། དེ་དག་གི་སོ་སོ་ཐར་པའི་སྡོམ་པ་ནི་གདོན་མི་ཟ་བར་རྣམ་པར་རིག་བྱེད་ལ་རག་ལས་པ་མ་ཡིན་ནོ་ཞེས་དང་། འདུལ་བ་ཚིག་ལེའུར་བྱས་པ་ལས། འདྲེན་པ་རང་རྒྱལ་རབ་བྱུང་གིའོ། །འཕགས་པ་ཀོའུ་ཌི་ཎྱ་སོགས། །ལྔ་སྡེ་རྣམས་ནི་ངེས་པ་ལས། །གང་ཞིག་སློབ་མ་བཟང་སྡེ་རྣམས། །ཐམས་ཅད་སྐྱབས་སུ་འགྲོ་བས་ཐོབ། །ཕོ་ཉ་ཡིས་ནི་མཆོད་སྦྱིན་མ། །ཚུར་ཤོག་དགེ་སློང་ཞེས་བྱས་ཀྱང་། །སྟོན་པར་ཁས་བླངས་པ་ལས་ནི། །དགེ་སློང་འོད་སྲུང་བདག་ཉིད་ཆེ། །དྲི་བས་མཉེས་པ་ཉིད་ཀྱིས་ནི། །སློབ་མ་ལེགས་སྦྱིན་དེ་བཞིན་ནོ། །དབུས་དང་མཐའ་འཁོབ་པ་དག་ལ། །བསྙེན་རྫོགས་ཡང་དག་བསྟན་པ་ནི། །བཅུ་དང་ལྔ་ཡི་ཚོགས་ཀྱིས་སམ། །དེ་བས་ལྷག་པས་ཀྱང་ནི་རུང་། །དེ་བཞིན་འཁོར་ཚོགས་བཅས་པ་ཡི། །གོའུ་ཏ་མ་ལྕི་ཆོས་ཀྱིས། །ཞེས་གསུངས་པའི་དོན་དུ་བསམས་ནས། སྟོན་པ་སངས་རྒྱས་རང་བྱུང་གི་བསྙེན་རྫོགས་དང་། རང་སངས་རྒྱས་མཁན་སློབ་མེད་པར་དང་། ལྔ་སྡེ་བཟང་པོ་ཡེ་ཤེས་ཁོང་དུ་ཆུད་པས་དང་། གྲགས་པ་སོགས་ཚུར་ཤོག་གིས་དང་། བཟང་སྡེའི་ཚོགས་དྲུག་ཅུ་སྐྱབས་སུ་འགྲོ་བར་ཁས་བླངས་པས་དང་། འོད་སྲུང་ཆེན་པོ་སྟོན་པར་ཁས་བླངས་པས་དང་། ལེགས་སྦྱིན་དྲི་བས་དང་། སྐྱེ་དགུའི་བདག་མོ་སོགས་ཤཱཀྱ་མོ་ལྔ་བརྒྱ་ལྕི་བའི་ཆོས་ཁས་བླངས་པས་དང་། མཆོད་སྦྱིན་མོ་འཕྲིན་གྱིས་དང་། ལྷོ་ལམ་པ་གསོལ་བཞིའི་ལས་ཀྱིས་བསྙེན་པར་རྫོགས་པ་སྟེ་སྔོན་ཆོག་བཅུའོ་ཞེས་གསུང་ངོ་། །དེ་ལ་མཚོ་སྣ་བ་ན་རེ། མཛོད་འགྲེལ་ལས། རང་བྱུང་གི་ནི་སངས་རྒྱས་དང་རང་སངས་རྒྱས་གཉིས་སོ་ཞེས་གསུངས་པས་སྟོན་པ་དང་རང་སངས་རྒྱས་གཉིས་ཀ་རང་བྱུང་གི་བསྙེན་རྫོགས་ཡིན་ལ། མཆོད་སྦྱིན་མ་ད་ལྟར་གྱི་ཆོ་གས་བསྙེན་པར་རྫོགས་པ་ཡིན་པས་སྔོན་ཆོག་བརྒྱད་ཅེས་བཞེད་དོ། །དེ་རྣམས་ཀྱང་བསྡུ་ན། ཡུལ་དགེ་འདུན་ལ་བརྟེན་པ་དང་མ་བརྟེན་པ་གཉིས་སམ། ལས་ལ་བརྟེན་པ་དང་མ་བརྟེན་པ་གཉིས་སུ་ཡང་འདུ་ཞིང་། རྟེན་སྐྱེས་པ་ཁོ་ན་ལ་བརྟེན་པ་དང་། བུད་མེད་ཁོ་ན་ལ་བརྟེན་པ་དང་། གཉིས་ཀ་ལ་བརྟེན་པ་གསུམ་དུ་ཡང་འདུའོ། །དེ་ཡང་ལྕི་ཆོས་ཁས་བླངས་པས་བསྙེན་པར་རྫོགས་པ་ནི་བུད་མེད་ཁོ་ན་ལ་བརྟེན་པ་དང་། གསོལ་བཞིའི་བསྙེན་པར་རྫོགས་པ་དང་འཕྲིན་གྱི་བསྙེན་རྫོགས་ནི་གཉིས་ཀ་ལ་བརྟེན་པ་ཡིན་ལ། གཞན་རྣམས་ནི་སྐྱེས་པ་ཁོ་ན་ལ་བརྟེན་ནོ། །ཁ་ཅིག་ཚུར་ཤོག་བུད་མེད་ལ་ཡང་གནང་ངོ་ཞེས་འདོད་དོ། །དེའི་མཚན་ཉིད་ནི། མཁན་སློབ་མེད་པར་རབ་བྱུང་བསྙེན་རྫོགས་ཀྱི་སྡོམ་པ་ཅིག་ཅར་དུ་ཐོབ་པར་བྱེད་པའི་ཐབས་སོ། །དེ་གང་ལ་གནང་ན་དབང་པོ་དང་། རྒྱུད་དང་། དགེ་རྩ་གསུམ་སྨིན་པ་ཤས་ཆེ་ཞིང་། ཉོན་མོངས་པ་དང་། ལས་དང་། རྣམ་སྨིན་གྱི་སྒྲིབ་པ་གསུམ་ཤས་ཆུང་བའི་གང་ཟག་ལ་གནང་ལ། ཁྱད་པར་དུ་རང་བྱུང་དང་མཁན་སློབ་མེད་པ་ནི་སངས་རྒྱས་དང་རང་སངས་རྒྱས་ཁོ་ན་ལ་གནང་། ལྕི་ཆོས་ཁས་བླང་པ་ནི་ཤཱཀྱའི་བུ་མོ་ལྔ་བརྒྱ་པོ་ཁོ་ན་ལ་གནང་། གསོལ་བཞི་དང་འཕྲིན་གྱི་བསྙེན་རྫོགས་ནི་གང་ཟག་སྤྱི་ལ་གནང་། གཞན་རྣམས་རང་རང་ལ་གནང་ངོ་། །དེ་རྣམས་དུས་ནམ་གྱི་ཚེ་བྱུང་ཞེ་ན། རང་བྱུང་གི་བསྙེན་རྫོགས་ནི་སྟོན་པ་སངས་མ་རྒྱས་གོང་དུ་བྱུང་། ཚུར་ཤོག་ནི་སྟོན་པ་སངས་རྒྱས་ནས་མྱ་ངན་ལས་མ་འདས་ཀྱི་བར་དུ་བྱུང་། གཞན་རྣམས་སྟོན་པ་སངས་རྒྱས་ནས་ལོ་བཅུ་གཉིས་ཀྱི་བར་དུ་བྱུང་ངོ་། །འོ་ན་སྔོན་ཆོག་མང་པོར་གཞག་པ་ལ་དགོས་པ་ཅི་ཡོད་ཅེ་ན། དེའི་དགོས་པ་ནི། གདུལ་བྱ་རྣམས་ཀྱི་སྨོན་ལམ་གྱི་དབང་གིས་སྟོན་པས་གདུལ་བྱ་འདུལ་བའི་ཐབས་མང་བར་བསྟན་པའི་ཕྱིར་ཡིན་ནོ། །འོ་ན་སྐབས་འདིར་གསོལ་བཞིའི་སྔོན་ཆོག་གཅིག་པུ་སྨོས་པ་ལ་དགོས་པ་ཅི་ཡོད་ཅེ་ན། སྔོན་གྱི་གསོལ་བཞིའི་ལས་ད་ལྟ་ཡང་རུང་ངམ་སྙམ་པའི་དོགས་པ་ཤས་ཆེ་བས་དེ་བཟློག་པའི་ཕྱིར་དུ་ཡིན་ནོ། །ཅིའི་ཕྱིར་སྔོན་གྱི་ཆོ་ག་ཞེས་བྱ་ཞེ་ན། མཁན་སློབ་དང་བཅས་པའི་ད་ལྟར་གྱི་ཆོ་གའི་སྔ་རོལ་གྱི་ཆོ་གའི་རིགས་ཡིན་པས་སྔོན་ཆོག་གོ །འོ་ན་སྔོན་ཆོག་དང་ད་ལྟར་གྱི་ཆོ་ག་ལ་ཁྱད་པར་ཅི་ཡོད་ཅེ་ན། སྔོན་གྱི་གདུལ་བྱ་རྣམས་སྨིན་པ་ཤས་ཆེ་སྒྲིབ་པ་ཤས་ཆུང་བས་ཚེ་དེ་ལ་མཐོང་ལམ་དངོས་སུ་སྐྱེ་བར་ངེས་པ་དགེ་རྩ་རླབས་པོ་ཆེ་བསགས་པས་བར་ཆད་མེད་པར་ཤས་ཆེ་བས་བར་ཆད་འདྲི་བའི་སྐབས་རྣམས་མེད། སྟོན་པའི་བཀའ་རྫོགས་པར་ནུས་ཤིང་ནད་ཀྱང་ཤས་ཆུང་བས་ན་མཁན་པོ་དང་སློབ་དཔོན་གྱི་སྐོར་རྣམས་མེད། རང་ཤུགས་ཀྱིས་བྱ་བ་རིགས་པ་ལ་འཇུག་པས་རྣམ་འབྱེད་གཉིས་ཀྱི་སྐོར་རྣམས་མེད། སྨན་དང་གོས་མཐའ་གཉིས་དང་བྲལ་བ་ལ་ཤུགས་ཀྱིས་འཇུག་པས་གོས་གཞི་དང་སྨན་གཞིའི་སྐོར་རྣམས་མེད་ལ། ད་ལྟར་གྱི་གདུལ་བྱ་རྣམས་རྒྱུ་མཚན་དེ་རྣམས་ལས་བཟློག་པས་བར་ཆད་འདྲི་བ་སོགས་ཡོད་ཅེས་བཞེད་དོ། །གཉིས་པ་དེ་དགག་པ་ནི། སྔོན་ཆོག་བཅུ་དང་བརྒྱད་དུ་དབྱེ་བ་མི་འཐད་དེ། དེ་ལྟར་ལུང་ཁུངས་ཐུབ་ལས་མ་གསུངས་པའི་ཕྱིར་རོ། །འོ་ན་ལུང་མ་མོ་སོགས་ལས་བསྙེན་རྫོགས་བཅུར་བཤད་པ་མ་ཡིན་ནམ་ཞེ་ན། བཤད་མོད་དེ་ནི་སྔོན་ཆོག་གི་དབྱེ་བ་མ་ཡིན་གྱི། བསྙེན་པར་རྫོགས་ཚུལ་གྱི་དབྱེ་བ་ཡིན་པའི་ཕྱིར་དང་། ཡུལ་དབུས་སུ་བཅུའི་ཚོགས་དང་། མཐའ་འཁོབ་ཏུ་ལྔ་ཚོགས་གསུངས་པ་ནི་ད་ལྟར་གྱི་ཆོ་ག་ལ་ཡང་ཡོད་པའི་ཕྱིར་དང་ད་ལྟར་གྱི་ཆོ་ག་གནང་བའི་རྗེས་ལ་ལྕི་ཆོས་དང་ལྔ་ཚོགས་བྱུང་བས་ན་སྔོན་ཆོག་ཡིན་པ་ཡང་མི་འཐད་ལ། རང་བྱུང་དང་ཡེ་ཤེས་ཁོང་ཆུད་ལ་རིག་བྱེད་ཀྱང་མི་དགོས་པས་ཆོ་ག་ཡིན་པ་ཡང་མི་འཐད་པའི་ཕྱིར་རོ། །མཚོ་སྣ་བ་ན་རེ། སྔོན་ཆོག་བརྒྱད་དུ་དབྱེ་བ་འཐད་དེ། རང་འགྲེལ་དུ་གྲགས་པ་ལས། སྔོན་གྱི་ཆོ་ག་ཞེས་བྱ་བ་ནི་དེ་ལྟ་བུའི་རབ་ཏུ་དབྱེ་བ་ཅན་རབ་ཏུ་བྱུང་བ་དང་བསྙེན་པར་རྫོགས་པའི་ཆོ་གའོ་ཞེས་གསུངས་པའི་ཕྱིར་ཞེས་གསུང་བ་ཡང་མི་འཐད་དེ། རབ་ཏུ་དབྱེ་བ་ཅན་ཞེས་པའི་དོན་དེ་ལྟ་བུའི་ཁྱད་པར་ཅན་ཞེས་པའི་དོན་ཡིན་གྱི། གཞན་དུ་ན་དེ་དབྱེ་གཞིར་བྱེད་དགོས་པར་འགྱུར་ལ། འདོད་ན་སྔོན་ཆོག་ཏུ་འདོད་པ་གཞན་རྣམས་གསོལ་བཞིའི་སྔོན་ཆོག་གི་དབྱེ་བར་འགྱུར་བའི་ཕྱིར་རོ། །གཉིས་པ་རང་ལུགས་ནི། འདིར་བཤད་པའི་གསོལ་བཞིའི་སྔོན་ཆོག་འདི་ཉིད་ཁོ་ན་སྔོན་ཆོག་ཡིན་ཏེ། ལུང་གཞི་སོགས་ལས་ཚུར་ཤོག་ལ་སོགས་པ་གསུང་ཀྱང་། དེ་དག་ལ་སྔོན་ཆོག་གི་ཐ་སྙད་མ་གསུངས་པར་འདི་ཁོ་ན་ལ་སྔོན་ཆོག་གི་ཐ་སྙད་གསུངས་པའི་ཕྱིར་དང་། ཊཱི་ཀར་ལྟ་བུ་ནི་ཞེས་བྱ་བའི་སྒྲ་ནི་རྣམ་པའི་ཚིག་ཡིན་ཏེ། སྔོན་གྱི་ཆོ་གའི་རྣམ་པ་ནི་དེ་ལྟ་བུར་རིག་པར་བྱའི། རྣམ་པ་གཞན་ནི་མ་ཡིན་ནོ་ཞེས་བྱ་བའི་ཐ་ཚིག་གོ་ཞེས་གསུངས་པའི་ཕྱིར་རོ། །དུས་ཇི་ཙམ་ན་བྱུང་ཞེ་ན། སྟོན་པ་སངས་རྒྱས་ནས་ལོ་བཅུ་གཉིས་ཕན་དུ་སྔོན་ཆོག་བྱུང་ལ། བཅུ་གསུམ་པ་ནས་ད་ལྟར་གྱི་ཆོ་ག་བྱུང་སྟེ། འགྲེལ་ཆུང་ལས། སྔོན་གྱི་ཆོ་ག་ཞེས་པ་ནི་བཅོམ་ལྡན་འདས་ཞལ་བཞུགས་པའི་ཚེ་ཀོའུ་ཌི་ཎྱ་ལ་སོགས་པའི་ཨ་ཤི་ཕལ་མོ་ཆེ་ཞུགས་ནས་ཝཱ་ར་ཎ་སཱིར་འཁོར་ལོ་བསྐོར་བ་ཚུན་ཆད་ལོ་བཅུ་གཉིས་ཀྱི་བར་དུ་གསོལ་བ་གཅིག་དང་བརྗོད་པ་གསུམ་སྟེ་བཞིའི་ལས་ཀྱི་རབ་ཏུ་བྱུང་བ་དང་བསྙེན་པར་རྫོགས་པ་བྱེད་དོ་ཞེས་གསུངས་པའི་ཕྱིར་རོ། །གསུམ་པ་ནི། ཁོ་ན་རེ་རང་བྱུང་གི་བསྙེན་རྫོགས་ལ་སོགས་པ་དེ་དག་སྔོན་ཆོག་མིན་ན། སྡོམ་གསུམ་ལས། དེ་བས་དགེ་སློང་བྱེད་པ་ལ། །རང་བྱུང་གི་ནི་བསྙེན་རྫོགས་དང་། །ཞེས་པ་ནས། འདི་རྣམས་སྔོན་གྱི་ཆོ་གར་བཤད། །ཞེས་གསུངས་པ་དང་འགལ་ལོ་ཞེ་ན། སྐྱོན་མེད་དེ། སྔོན་གྱི་འདུལ་འཛིན་རྣམས་ལ་སྔོན་ཆོག་བཅུ་གྲགས་ཆེ་བས་དེ་དག་གི་བཞེད་པ་དང་སྒོ་བསྟུན་པ་ཡིན་པའི་ཕྱིར་རོ། །གཉིས་པ་ད་ལྟར་གྱི་ཆོ་ག་ལ་གསུམ་སྟེ། མ་ཐོབ་པ་ཐོབ་པར་བྱེད་པའི་ཐབས། ཐོབ་པ་མི་ཉམས་པར་བསྲུང་བའི་ཐབས། འགལ་རྐྱེན་བར་ཆད་ཀྱི་མཚན་ཉིད་དོ། །དང་པོ་ལ་ཚིགས་སྔ་མ་དགེ་ཚུལ་དུ་སྒྲུབ་པ་དང་། ཚིགས་ཕྱི་མ་བསྙེན་རྫོགས་སུ་སྒྲུབ་པ་གཉིས། དང་པོ་ལ། སྔོན་ཆོག་ལ་མེད་ཅིང་ད་ལྟར་གྱི་ཆོ་ག་ལ་ཡོད་པའི་ཁྱད་པར་ལ། མཁན་པོ་ལ་བརྟེན་པ་དང་། བར་ཆད་དྲི་བ་དང་། བསྟན་པ་ལ་རིམ་གྱིས་སློབ་པ་གསུམ་ཡོད་པས་དེ་གསུམ་རིམ་བཞིན་སྟོན་པ་ནི། རབ་ཏུ་བྱུང་བ་དང་ཞེས་པ་དང་། དང་པོའི་མཁན་པོ་ཉིད་ཀྱིས་ཞེས་པ་དང་། དགེ་བསྙེན་ཉིད་དང་། དགེ་ཚུལ་ཉིདདང་། དགེ་སློང་ཉིད་དག་གིས་སྔ་མ་བསྙེན་པར་མ་རྫོགས་པ་ལ་ཕྱི་མ་མི་བྱའོ་ཞེས་གསུངས་པ་འདིའི་སྐབས་སུ་དགོས་དོན་དང་བསྡུས་དོན་གཉིས་ལས། དང་པོ་ནི། དགེ་བསྙེན་ལ་སོགས་པའི་སྡོམ་པ་གསུམ་རིམ་གྱིས་སྦྱིན་པ་ལ་དགོས་པ་ཡོད་དེ། སྡོམ་པ་བརྟན་པ་དང་། བསྟན་པ་རིམ་གྱིས་མི་སྤོང་བ་དང་། རབ་བྱུང་བསྙེན་རྫོགས་བྱེད་པ་པོ་ལ་ཚིག་འདས་ཀྱི་ལྟུང་བ་མི་འབྱུང་བའི་དགོས་པ་ཡོད་པའི་ཕྱིར། གཉིས་པ་ལ་གསུམ་སྟེ། མེད་ན་མི་འབྱུང་བའི་རྒྱུ་དང་རྣམ་གཞག་གི་རྒྱུ་གང་ཡིན་དཔྱད་པ། སྔ་མ་སྔ་མའི་འཇུག་ཐོག་ཏུ་ཕྱི་མ་ཕྱི་མ་རུང་མི་རུང་དཔྱད་པ། སོ་སོའི་དོན་ནོ། །དང་པོ་ནི། སྡོམ་པ་སྔ་མ་སྔ་མ་ཕྱི་མ་ཕྱི་མའི་མེད་ན་མི་འབྱུང་གི་རྒྱུ་དང་བཅས་པ་རྣམ་གཞག་ཡིན་ཞེ་ན། ཁ་ཅིག་མེད་ན་མི་འབྱུང་གི་རྒྱུ་ཡིན་ཏེ། བར་མ་རབ་བྱུང་གི་སྡོམ་པ་མེད་པར་དགེ་ཚུལ་དང་དགེ་ཚུལ་གྱི་སྡོམ་པ་མེད་པར་བསྙེན་རྫོགས་ཀྱི་སྡོམ་པ་མི་སྐྱེ་བའི་ཕྱིར། བར་མ་རབ་བྱུང་མེད་པར་དགེ་ཚུལ་གྱི་སྡོམ་པ་མི་སྐྱེ་སྟེ་ལུང་ལས། ཁྱིམ་པ་རབ་ཏུ་བྱུང་བ་ཞིག་བསྙེན་པར་རྫོགས་པར་བྱེད་ན། རྫོགས་ཞེས་བགྱིའམ། རྫོགས་ཞེས་བྱའོ་ཞེས་གསུངས་པའི་ཕྱིར་དང་། ཊཱི་ཀར་དགེ་ཚུལ་ནི་རབ་ཏུ་བྱུང་བ་ཁོ་ན་ལ་བྱའོ་ཞེས་གསུངས་པའི་ཕྱིར། རིགས་པ་ནི། ཚངས་སྤྱོད་ལ་ཉེར་གནས་ཀྱི་སྡོམ་པ་མེད་པར་དགེ་སློང་མའི་སྡོམ་པ་སྐྱེ་བར་ཐལ། བར་མ་མེད་པར་དགེ་ཚུལ་གྱི་སྡོམ་པ་སྐྱེ་བའི་ཕྱིར་ཞེས་ཟེར་རོ། །བར་མ་མེད་པར་དགེ་ཚུལ་གྱི་སྡོམ་པ་དང་བསྙེན་རྫོགས་ཀྱི་སྡོམ་པ་སྐྱེ་བར་ཐལ། ལུང་བར་སྡོམ་ལས། རབ་ཏུ་མ་བྱུང་བསྙེན་རྫོགས་དང་། །ཞེས་གསུངས་ཤིང་། ལུང་ལས་ཀྱང་། ཁྱིམ་པ་རབ་ཏུ་མ་བྱུང་བ་ཞིག་བསྙེན་པར་རྫོགས་པར་བྱེད་ན་བསྙེན་པར་རྫོགས་པ་ཞེས་བགྱིའམ། བསྙེན་པར་རྫོགས་ཞེས་བྱ་ལ། རྫོགས་པར་བྱེད་པ་པོ་དག་ལ་འགལ་ཚབས་ཅན་དུ་འགྱུར་རོ་ཞེས་དང་། ཊཱི་ཀར་ཡང་། དེ་ནི་རྣམ་པར་གཞག་པ་བསྟན་པ་ཡིན་གྱི། འབྱུང་བའི་རྒྱུ་བསྟན་པ་མིན་ཏེ། འདི་ལྟར་དགེ་བསྙེན་གྱི་སྡོམ་པ་མེད་པར་ཡང་དགེ་ཚུལ་གྱི་སྡོམ་པ་ཡང་དག་པར་ལེན་ན་རུང་བ་ཉིད་ཡིན་ལ། དེ་བཞིན་དུ་དགེ་ཚུལ་གྱི་སྡོམ་པ་མེད་པར་དགེ་སློང་གི་སྡོམ་པ་ཡང་དག་པར་ལེན་ན་རུང་བ་ཉིད་ཡིན་པའི་ཕྱིར་རོ། །དེ་ལྟར་ན་གོ་རིམ་འདིས་ནི་སྡོམ་པ་ཐམས་ཅད་ཀྱི་ཡང་དག་པར་བླང་བ་བསྟན་པ་ཡིན་ཏེ། འདི་ལྟར་བཙུན་པ་ཁྱིམ་པ་རབ་ཏུ་མ་བྱུང་བ་ཞིག་རྫོགས་པར་བསྙེན་པར་བགྱིད་ན། རྫོགས་པར་བསྙེན་ཞེས་བགྱིའམ་རྫོགས་པར་མ་བསྙེན་ཞེས་བགྱི། ཉེ་བ་འཁོར་རྫོགས་པར་བསྙེན་ཞེས་བགྱིའོ་ཞེས་གསུངས་པའི་ཕྱིར། ཁ་ཅིག་ཚངས་སྤྱོད་ལ་ཉེར་གནས་མེད་པར་དགེ་སློང་མའི་སྡོམ་པ་སྐྱེ་བའི་ཤེས་བྱེད་དུ་དགེ་སློང་དང་དགེ་སློང་མ་རྣམས་ཀྱི་ལས་གཞན་མ་ཡིན་ཞེས་པ་འདྲེན་པ་ཡང་མ་འབྲེལ་བ་ཡིན་ནོ། །གཉིས་པ་ལ་སྔ་མ་སྔ་མའི་འཇུག་ཐོག་ཏུ་ཕྱི་མ་ཕྱི་མ་བྱར་རུང་སྟེ། གཞུང་ལས། དགེ་བསྙེན་དང་དགེ་ཚུལ་གྱི་སྡོམ་པ་བླངས་ནས་དུས་གོ་མ་བརྗོད་པར་བསླབ་པ་བརྗོད་པར་གསུངས་པའི་ཕྱིར། ཁོ་ན་རེ་དུས་གོ་བརྗོད་ནས་བསླབ་པ་བརྗོད་པའི་དབང་དུ་བྱས་པའི་ཕྱིར་ཞེ་ན་མི་འཐད་དེ། ཊཱི་ཀར། དགེ་བསྙེན་དང་དགེ་ཚུལ་དུ་ཁས་བླངས་པའི་དེ་མ་ཐག་ཅེས་གསུངས་པའི་ཕྱིར་རོ།། ༈ །།གསུམ་པ་སོ་སོའི་དོན་ལ་གསུམ་ལས། དགེ་བསྙེན་ལ་མཚན་ཉིད། ངེས་ཚིག དབྱེ་བ་དང་གསུམ་ལས། དང་པོ་ནི། རབ་ཏུ་མ་བྱུང་བའི་གང་ཟག་གང་ཞིག སྤང་བྱ་ལྔ་ཇི་སྲིད་འཚོའི་བར་དུ་སྤོང་བར་ཁས་འཆེ་བའོ། །གཉིས་པ་ནི། ཁ་ཅིག་དགེ་འདུན་ལ་བསྙེན་བཀུར་ཚུལ་བཞིན་དུ་བྱེད་པས་ན་དགེ་བསྙེན་ཞེས་ཟེར་རོ། །རང་ལུགས་ནི། དགེ་བསྙེན་གྱི་སྐད་དོད་དུ་ཨུ་པ་སི་ཀ་ཞེས་འབྱུང་ལ། ཨུ་པ་ནི་ཉེ་བ། སི་ཀ་ནི་དགེ་བ་སྟེ་དོན་དམ་པའི་དགེ་བ་མྱ་ངན་ལས་འདས་པ་དང་ཉེ་བར་གནས་པས་ན་དགེ་བསྙེན་ཞེས་བྱ་སྟེ། ཕྲན་ཚེགས་འགྲེལ་པ་ལས། དགེ་བསྙེན་ཞེས་བྱ་བ་ནི་མྱ་ངན་ལས་འདས་པ་ལ་ཉེ་བར་གནས་པ་ཉིད་ཀྱི་ཕྱིར་རོ་ཞེས་གསུངས་པའི་ཕྱིར་རོ། །གསུམ་པ་ནི། གཞུང་གཞན་དུ་སྐྱབས་གསུམ་འཛིན་པའི་དགེ་བསྙེན། སྣ་གཅིག་སྤྱོད་པ། སྣ་འགའ་སྤྱོད་པ། ཕལ་ཆེར་སྤྱོད་པ། ཡོངས་རྫོགས། ཚངས་སྤྱོད། གོ་མིའི་དགེ་བསྙེན་དང་བདུན་དུ་གསུངས་མོད་འདིར་ནི་ཡོངས་རྫོགས་དང་ཚངས་སྤྱོད་ཀྱི་དགེ་བསྙེན་གཉིས་སོ། །དགེ་ཚུལ་ལ་གསུམ་ལས། དང་པོ་མཚན་ཉིད་ནི། རབ་ཏུ་བྱུང་ཞིང་བསྙེན་པར་མ་རྫོགས་པའི་གང་ཟག་གང་ཞིག སྤང་བྱ་བཅུ་ཇི་སྲིད་འཚོའི་བར་དུ་སྤོང་བར་ཁས་འཆེ་བའོ། །ངེས་ཚིག་ནི། དགེ་ཚུལ་གྱི་སྐད་དོད་དུ་ཤྲ་མ་ཎྱ་ར་ཞེས་འབྱུང་ལ། དེ་ངལ་བར་བྱེད་པ་ལ་འཇུག་པས་ན། བླ་མའམ་དགེ་འདུན་གྱི་བྱ་བ་ལ་ངལ་བར་བྱེད་པས་ན་དགེ་ཚུལ་ཞེས་བྱའོ། །ཁ་ཅིག་དགེ་སྦྱོང་གི་ཆོས་བཞི་སྒྲུབ་པའི་ངང་ཚུལ་ཅན་ཡིན་པས་དགེ་ཚུལ་ཞེས་ཀྱང་ཟེར་རོ། །དབྱེ་ན་ཕ་མ་གཉིས་སུ་ཡོད་དེ། དགེ་ཚུལ་གཉིས་ཀྱང་ངོ་ཞེས་གསུངས་པའི་ཕྱིར་རོ། །གསུམ་པ་དགེ་སློང་ལ་མཚན་ཉིད་ནི། བསྟན་པ་ལ་ཞུགས་ལ་རྫོགས་པའི་གང་ཟག་གང་ཞིག ལུས་ངག་གི་ཁ་ན་མ་ཐོ་བ་མཐའ་དག་སྤོང་བར་ཁས་འཆེ་བའོ། །ངེས་ཚིག་ནི། དགེ་སློང་གི་སྐད་དོད་དུ་བྷིཀྵུ་ཞེས་འབྱུང་ལ། དེ་སློང་བ་ལ་འཇུག་པས་ན་སློང་བས་ན་དགེ་སློང་སྟེ། དགེ་སློང་ལ་རབ་ཏུ་གཅེས་པའི་མདོར། སྒྲ་འཇུག་རྣམ་པར་ཟད་ཕྱིར་དང་། །དགེ་བ་སློང་དང་ཟས་སློང་དང་། །ཉེ་བར་ཞི་དང་ལམ་ཞུགས་དང་། །ལེགས་པར་འཚོ་དང་ཆགས་སྤངས་དང་། །ཡིད་འོང་ཕྱིར་ན་དགེ་སློང་ཞེས་སོ། །དབྱེ་ན་ཕ་མ་གཉིས་སོ། །དང་པོ་གཉིས་ཀྱི་སྡོམ་པ་ནོད་པའི་ཚུལ་ནི། སྐྱབས་སུ་འགྲོ་བ་ཁས་བླང་བའི་ཚིག་རྩོམ་པ་དང་ཞེས་པའི་སྐབས་སུ་དགེ་བསྙེན་གྱི་སྡོམ་པ་ནོད་པའི་ཚུལ་དང་། དོགས་པ་གཅད་པ་གཉིས་ལས། དང་པོ་ནི། རབ་བྱུང་དོན་དུ་གཉེར་བའི་བསྒྲུབ་བྱ་དེ་མཁན་པོ་ཉིད་དུ་འོས་པའི་དགེ་སློང་དེའི་དྲུང་དུ་ཙོག་ཙོག་པུར་འདུག་སྟེ་གུས་པའི་སྤྱོད་ལམ་བསྙེན་པ་ལ་དགེ་སློང་དེས་བར་ཆད་ལེགས་པར་དྲིས་ཏེ་བར་ཆད་མེད་པར་ཤེས་པ་ན་ཁོ་བོས་ཁྱོད་རབ་ཏུ་དབྱུང་ངོ་ཞེས་སྐབས་ཕྱེ་སྟེ། དེ་ནས་སྟོན་པ་དང་དགེ་སློང་རང་ལ་ཕྱག་གསུམ་འཚལ་དུ་བཅུག་སྟེ་སྐྱབས་འགྲོ་རྩོམ་བྱེད་དུ་བྱས་ཏེ་ཁས་ལེན་ལན་གསུམ་གྱིས་སྒོ་ནས་འབོགས་པར་བྱའོ། །དེ་ཡང་བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་རྐང་གཉིས་རྣམས་ཀྱི་མཆོག་ཅེས་པ་ནས། དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་བསྙེན་དུ་བཙུན་པས་བཟུང་དུ་གསོལ་ཞེས་པའི་རྗེས་ཟློས་ལན་གསུམ་བྱ་སྟེ། རྣམ་གྲངས་ཐ་མ་ལ་སློབ་དཔོན་གྱིས་ཞེས་བརྗོད་པར་བྱའོ། །སྐབས་འདིའི་དཀོན་མཆོག་གསུམ་གྱི་མཚན་གཞི་གང་ཞེ་ན། སངས་རྒྱས་དཀོན་མཆོག་ནི་སངས་རྒྱས་སུ་བྱེད་པའི་ཆོས་མི་སློབ་པའི་ལམ་གྱི་བདེན་པ། ཆོས་དཀོན་མཆོག་ནི་མྱ་ངན་ལས་འདས་པ་སོ་སོར་བརྟགས་འགོག དགེ་འདུན་དཀོན་མཆོག་ནི་དགེ་འདུན་དུ་བྱེད་པའི་ཆོས་སློབ་པ་དང་མི་སློབ་པའི་ལམ་གྱི་བདེན་པ་སྟེ། མཛོད་ལས། གང་ཞིག་གསུམ་ལ་སྐྱབས་འགྲོ་དེ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་སོ། །གཉིས་པ་ནི། ཁ་ཅིག་འདིར། སྐྱབས་འགྲོ་ལན་གསུམ་སྔོན་དུ་བརྗོད་ནས་དེའི་འོག་ཏུ་དགེ་བསྙེན་དང་དགེ་ཚུལ་དུ་ཁས་བླངས་པའི་ཚིག་བརྗོད་པ་ནི་མི་འཐད་དེ། སྐྱབས་འགྲོ་ནི་མྱ་ངན་ལས་འདས་པའི་བསམ་པ་བརྟན་པོ་སྒྲུབ་བྱེད་ཡིན་ལ། དེ་ཡང་སྐྱབས་འགྲོ་དང་ཁས་ལེན་གྱི་ཚིག་རེ་རེ་ནས་སྤེལ་ནས་བརྗོད་ན་སྐྱེ་སླ་བའི་ཕྱིར། དང་པོ་གྲུབ་སྟེ། ཊཱི་ཀར་མྱ་ངན་ལས་འདས་པའི་བསམ་པ་བརྟན་པོ་མེད་པར་སྡོམ་པ་མི་སྐྱེ་བས་སྐྱབས་སུ་འགྲོ་བས་མྱ་ངན་ལས་འདས་པའི་བསམ་པ་བརྟན་པོ་སྒྲུབ་པར་བྱེད་དེ། ཇི་ལྟར་ཞེ་ན། རྐང་གཉིས་རྣམས་ཀྱི་མཆོག སངས་རྒྱས་ལ་སྐྱབས་སུ་མཆིའོ་ཞེས་བྱ་བ་འདིས་ནི་ལམ་ཉེ་བར་སྟོན་པར་མཛད་པ་ལ་ཡང་དག་པར་བརྟེན་པར་བྱེད། འདོད་ཆགས་དང་བྲལ་བ་རྣམས་ཀྱི་མཆོག ཆོས་ལ་སྐྱབས་སུ་མཆིའོ་ཞེས་བྱ་བ་འདིས་ནི་ཆོས་ཀྱི་མཆོག་མྱ་ངན་ལས་འདས་པ་ལ་ཡང་དག་པར་བརྟེན་པར་བྱེད། ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ་ཞེས་བྱ་བ་འདིས་ནི་མྱ་ངན་ལས་འདས་པའི་གྲོང་ཁྱེར་དུ་འགྲོ་བའི་ཟླ་གྲོགས་ལ་ཡང་དག་པར་བརྟེན་པར་བྱེད་པའི་ཕྱིར་ཏེ། མྱ་ངན་ལས་འདས་པའི་བསམ་པ་བརྟན་པོ་མེད་པར་སུ་ཡང་སྐྱབས་སུ་འགྲོ་བ་བསྒྲུབ་པར་མི་བྱེད་དོ་ཞེས་གསུངས་པའི་ཕྱིར། འོ་ན་བསྙེན་རྫོགས་ཀྱི་སྐབས་སུ་སྐྱབས་འགྲོ་མེད་པས་ངེས་འབྱུང་གི་བསམ་པ་གང་གིས་བསྒྲུབ་ཞེ་ན། བསྙེན་པར་རྫོགས་ཞེས་པའི་ཚིག་དེ་ཉིད་ཀྱིས་ངེས་འབྱུང་གི་བསམ་པ་རྟོགས་པར་བྱེད་དེ། བསྙེན་པར་རྫོགས་ཞེས་པའི་རྫོགས་པ་ནི་མྱ་ངན་ལས་འདས་པ་ཡིན་ལ། བསྙེན་པ་ནི་ཉེ་བའི་དོན་ཡིན་པའི་ཕྱིར། ཊཱི་ཀར་རྫོགས་པར་བསྙེན་པའི་དུས་ན་ནི་རྫོགས་པར་བསྙེན་ཞེས་པའི་སྒྲ་ཁོ་ན་ལས་མྱ་ངན་ལས་འདས་པའི་བསམ་པ་བརྟན་པོར་རྟོགས་པར་བྱ་སྟེ། འདི་ལྟར་རྫོགས་པར་བསྙེན་པ་ཞེས་བྱ་བ་ལ་རྫོགས་པ་ཞེས་བྱ་བ་ནི་གནོད་པ་ཐམས་ཅད་དང་བྲལ་བའི་དངོས་པོ་ལ་བྱ་སྟེ། མྱ་ངན་ལས་འདས་པ་ཡང་དེ་ལྟ་བུའི་རང་བཞིན་ཡིན་ནོ། །བསྙེན་པ་ཞེས་བྱ་བ་ནི་ཉེ་བའི་ཚིག་ཡིན་ཏེ། དེའི་ཕྱིར་བསམ་པ་ཐམས་ཅད་ཀྱིས་མྱ་ངན་ལས་འདས་པ་དང་ཉེ་བར་གྱུར་པ་ནི་རྫོགས་པར་བསྙེན་པ་ཡིན་ནོ་ཞེས་གསུངས་པའི་ཕྱིར་རོ། །འདུལ་འཛིན་ཁ་ཅིག་ན་རེ་སོ་ཐར་གྱི་སྡོམ་པ་སྐྱེ་བ་ལ་ངེས་འབྱུང་གི་བསམ་པ་མི་དགོས་ཏེ། འཆར་ཀ་དང་གཅུང་མཛེས་དགའ་བོ་གཉིས་སྟོན་པའི་ངོ་མ་ཆོག་པར་རབ་ཏུ་བྱུང་ལ་ཀུན་དགའ་བོའི་དབོན་པོ་གཉིས་ལྟོ་ཕྱིར་དུ་རབ་ཏུ་བྱུང་བའི་ཕྱིར་དང་། སོ་ཐར་གྱི་སྡོམ་པ་ལེན་པའི་སྔ་རོལ་ཏུ་འཁོར་བ་ལས་ཡིད་འབྱུང་བའི་ལམ་གྱི་རིམ་པའང་མ་གསུངས་པའི་ཕྱིར་དང་། ད་ལྟའི་རབ་བྱུང་ཕལ་ཆེ་བ་ལ་སོ་ཐར་གྱི་སྡོམ་པ་མ་སྐྱེས་པར་ཐལ། ལེན་པའི་སྔ་རོལ་དུ་ངེས་འབྱུང་གིས་བསམ་པ་མེད་པའི་ཕྱིར། ཁྱབ་པ་ཁས་བླངས། འདོད་ན། སོ་ཐར་གྱི་སྡོམ་པའི་ཉམས་ལེན་བྱེད་མི་དགོས་པར་ཐལ་ལོ་ཞེས་ཟེར་རོ། །དང་པོ་མི་འཐད་དེ། གང་ཟག་དེ་རྣམས་སྲིད་པ་ཐ་མ་པ་ཡིན་པས་ཐར་པ་ཆ་མཐུན་གྱི་དགེ་རྩ་དང་ལྡན་པས་ངེས་འབྱུང་གི་བསམ་པ་མེད་པར་མི་འགྲུབ་པའི་ཕྱིར་དང་། ཕྱོགས་སྔ་གཉིས་པ་ལྟར་ན། འདུལ་བ་མདོ་རྩས་དངོས་སུ་བསྟན་པའི་སོ་ཐར་གྱི་སྡོམ་པ་སྐྱེ་བ་ལ་ངེས་འབྱུང་གི་བསམ་པ་མི་དགོས་པར་ཐལ། དེ་ལེན་པའི་སྔ་རོལ་དུ་འཁོར་བ་ལ་ཡིད་འབྱུང་བའི་ལམ་གྱི་རིམ་པ་མ་གསུངས་པའི་ཕྱིར། འཁོར་གསུམ། གསུམ་པ་ལ། ད་ལྟའི་རབ་བྱུང་སྒྲུབ་པའི་དུས་སུ་མཁན་པོས་འཁོར་བའི་ཉེས་དམིགས་དང་ཐར་པའི་ཕན་ཡོན་བཤད་པ་དོན་མེད་པར་ཐལ། མཁན་པོས་དེ་ལྟར་བཤད་ཀྱང་བསྒྲུབ་བྱ་རྣམས་ཀྱི་རྒྱུད་ལ་ངེས་འབྱུང་གི་བསམ་པ་མི་སྐྱེ་བའི་ཕྱིར། རྟགས་ཁས་བླངས། སོ་ཐར་གྱི་སྡོམ་པ་མ་སྐྱེས་ན་ཉམས་ལེན་མི་དགོས་པར་ཐལ། ཞེས་པ་ཡང་མ་ངེས་པ་ཡིན་ཏེ། མ་སྐྱེས་པ་ལྟུང་བ་ལ་སྦྱར་ན་ཉེས་བྱས་སུ་གསུངས་པའི་ཕྱིར། སྐྱབས་འགྲོ་མ་བྱས་པར་དགེ་ཚུལ་གྱི་སྡོམ་པ་སྐྱེ་བར་ཐལ། མྱང་འདས་ཀྱི་བསམ་པ་མེད་པར་དགེ་ཚུལ་གྱི་སྡོམ་པ་སྐྱེ་བའི་ཕྱིར། རྟགས་ཁས་བླངས། ཁྱབ་སྟེ། ཊཱི་ཀར་སྐྱབས་སུ་འགྲོ་བ་ནི་མྱ་ངན་ལས་འདས་པའི་བསམ་པ་བརྟན་པོ་སྒྲུབ་པར་བྱེད་ཅེས་གསུངས་པའི་ཕྱིར། རང་ལུགས་ནི་སོ་ཐར་གྱི་སྡོམ་པ་སྐྱེ་བ་ལ་ངེས་འབྱུང་གི་བསམ་པ་དགོས་ཏེ། ཊཱི་ཀར་མྱ་ངན་ལས་འདས་པའི་བསམ་པ་བརྟན་པོ་མེད་པར་སྡོམ་པ་མི་སྐྱེ་ཞེས་གསུངས་ཞིང་། གཞི་འགྲེལ་ལས་ཀྱང་དེ་དང་མཐུན་པར་བཤད་ལ། ཕྲན་ཚེགས་འགྲེལ་པ་ལས་ཐར་པའི་བསམ་པ་མེད་པར་སྡོམ་པ་མི་སྐྱེ་ཞེས་གསུངས་པའི་ཕྱིར་དང་། མཛོད་འགྲེལ་ལས། ཕྱི་རོལ་པ་རྣམས་ལ་ཡང་དག་པར་བླངས་པའི་ཚུལ་ཁྲིམས་མེད་དམ་ཞེ་ན། ཡོད་མོད་ཀྱི་སོ་སོར་ཐར་པའི་སྡོམ་པ་ནི་མ་ཡིན་ཏེ། ཅིའི་ཕྱིར་ཞེ་ན། དེ་ནི་སྲིད་པ་ལ་བརྟེན་པའི་ཕྱིར། གཏན་ཏུ་སྡིག་པ་ལས་སོ་སོར་ཐར་པ་བྱེད་པ་མ་ཡིན་ནོ་ཞེས་གསུང་ངོ་། །དེང་སང་ཁ་ཅིག་དགེ་བསྙེན་གྱི་སྡོམ་པ་ལ་སོགས་པ་གསུམ་ཀ་ལ་འཇིགས་སྐྱོབ། ལེགས་སྨོན། ངེས་འབྱུང་གི་ཚུལ་ཁྲིམས་གསུམ་གསུམ་ཡོད་མོད་ཀྱི། སྔར་གྱི་ལུང་དེ་དག་དང་མི་འགལ་ཏེ། རྒྱུ་དུས་ཀྱི་ཀུན་སློང་གི་སྒོ་ནས་འཇིགས་སྐྱོབ་སོགས་གསུམ་དུ་ཕྱེ་ཡང་དེ་དུས་ཀྱི་ཀུན་སློང་ལ་ངེས་འབྱུང་གི་བསམ་པ་ངེས་པར་དགོས་པའི་ཕྱིར་ཞེས་གསུངས་པ་ནི་མི་འཐད་དེ། འཇིགས་སྐྱོབ་ཀྱི་ཚུལ་ཁྲིམས་ཀྱི་མཚན་གཞི་དེ་ཆོས་ཅན། འཇིགས་སྐྱོབ་ཀྱི་ཚུལ་ཁྲིམས་མ་ཡིན་པར་ཐལ། ངེས་འབྱུང་གི་ཚུལ་ཁྲིམས་ཡིན་པའི་ཕྱིར། གཏན་ཚིགས་ཁས་བླངས་ཏེ། མྱང་འདས་ཀྱི་བསམ་པ་བརྟན་པོས་ཀུན་ནས་བསླངས་པའི་ཚུལ་ཁྲིམས་ཡིན་པའི་ཕྱིར། གཞན་ཡང་དགེ་ཚུལ་དང་དགེ་སློང་གི་སྡོམ་པའི་དེ་དུས་ཀྱི་ཀུན་སློང་ཡིན་ན་དགེ་བ་ཡིན་པས་ཁྱབ་སྟེ། མཛོད་ལས། དགེ་བ་བཅུ་ཡི་བར་དག་དང་། །སེམས་པ་ཅིག་ཆར་ལྷན་ཅིག་འབྱུང་། །ཞེས་དང་། དེའི་རང་འགྲེལ་དུ། མི་དགེ་བ་དང་ལུང་མ་བསྟན་གྱི་སེམས་ལ་གནས་ནས་དགེ་ཚུལ་དང་དགེ་སློང་གི་སྡོམ་པ་ལེན་པར་བཤད་པའི་ཕྱིར་དང་། རབ་ཏུ་འཇུག་བྱེད་དགེ་སོགས་ལས། །རྗེས་འཇུག་བྱེད་ཀྱང་རྣམ་གསུམ་འགྱུར། །ཞེས་རྒྱུ་དུས་དང་དེ་དུས་ཀྱི་ཀུན་སློང་ལ་མུ་དགུ་གསུངས་པའི་ཕྱིར་དང་། དགེ་ཚུལ་གྱི་སྡོམ་པ་སྐྱེ་བའི་རྒྱུ་ཚོགས་ཚང་ནས་སྐྱེ་བ་ལ་མངོན་དུ་ཕྱོགས་པའི་ཚེ་དགེ་ཚུལ་གྱི་སྡོམ་པ་གཟུགས་ཅན་སྐྱེ་བ་ལ་མི་དགེ་བ་དང་ལུང་མ་བསྟན་གྱི་སེམས་གང་གིས་ཀྱང་གེགས་བྱེད་མི་ནུས་པའི་ཕྱིར་ཏེ། མ་ཚང་མེད་རྒྱུ་དེ་ལ་ནི། །འབྲས་བུ་གང་གིས་བཟློག་པར་བྱེད། །ཅེས་གསུངས་པ་ལྟར་རོ། །རྗེ་བླ་མའི་ཞལ་སྔ་ནས། སྤྱིར་རིགས་བདུན་ཀ་ལ་འཇིགས་སྐྱོབ་ལ་སོགས་པ་གསུམ་གསུམ་ཡོད་མོད་ཀྱི། དང་པོ་གཉིས། སོ་ཐར་གྱི་སྡོམ་པ་མ་ཡིན་ཏེ། མྱང་འདས་ཀྱི་བསམ་པས་མ་ཟིན་པའི་ཕྱིར། མདོ་རྩ་ནས་དངོས་སུ་བསྟན་པའི་དགེ་བསྙེན་གྱི་སྡོམ་པ་སོགས་ཀྱང་མ་ཡིན་ཏེ། མྱ་ངན་ལས་འདས་པའི་བསམ་པ་བརྟན་པོས་མ་ཟིན་པའི་ཕྱིར། ཁྱབ་པ་ཡོད་དེ། མདོ་རྩ་ནས་དངོས་སུ་བསྟན་པའི་སྡོམ་པ་ཐམས་ཅད་ངེས་འབྱུང་གི་ཚུལ་ཁྲིམས་ཀྱི་དབང་དུ་བྱས་པ་ཡིན་པའི་ཕྱིར་ཏེ། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་ཞེས་གསུངས་པའི་ཕྱིར། སྔར་གྱི་ལུང་འདི་དག་བྱ་བ་འདིའི་དབང་དུ་བྱས་པ་ཡིན་ནོ། །འཇིགས་སྐྱོབ་དང་ལེགས་སྨོན་གཉིས་ཀྱང་ནམ་ཞིག་མྱང་འདས་ཀྱི་བསམ་པས་ཟིན་པའི་ཚེ། སོ་ཐར་དང་ངེས་འབྱུང་གི་ཚུལ་ཁྲིམས་སུ་གནས་འགྱུར་བ་ཡིན་ནོ་ཞེས་གསུངས་པ་ནི། རྗེ་བཙུན་ས་སྐྱ་པ་རྣམས་ཀྱི་དགོངས་པ་དཔྱིས་ཕྱིན་པའོ། །དགེ་བསྙེན་བསྒྲུབས་ནས་དེའི་འོག་ཏུ་བསླབ་པ་བརྗོད་པར་བྱའོ། །དགེ་ཚུལ་དུ་སྒྲུབ་པ་ལ་དགོས་དོན་དང་བསྡུས་དོན་གཉིས་ལས། དང་པོ་ནི། དེ་ལ་དགོས་པ་ཡོད་དེ། དགེ་ཚུལ་གྱི་སྡོམ་པ་སྐྱེ་བ་དང་། བསྙེན་རྫོགས་ཀྱི་སྣོད་རུང་དུ་འགྱུར་བ་དང་། མཐར་མྱང་འདས་ཐོབ་པར་འགྱུར་བའི་ཕྱིར་རོ། །གཉིས་པ་ལ་བཞི་ཏེ། ཡུལ་གང་ལ། རྟེན་གང་གིས། དངོས་པོ་གང་། ཚུལ་ཇི་ལྟར་སྦྱིན་པའོ། །དང་པོ་ནི། ཕུན་སུམ་ཚོགས་པ་གསུམ་དང་ལྡན་པའི་བསྒྲུབ་བྱ་ལ་སྟེ། དེ་ཡང་ལུས་ཕུན་སུམ་ཚོགས་པ་ནི་ལོ་བདུན་ལོན་ཞིང་བྱ་རོག་སྐྲོད་ནུས་པའམ་བསམ་པའི་སྒོ་ནས་ལོ་བདུན་ལོན་པར་འདུ་ཤེས་པའོ། །རྟགས་ཕུན་སུམ་ཚོགས་པ་ནི་སྐྲ་དང་ཁ་སྤུ་བྲེགས་པ་སོགས་ཁྱིམ་པའི་རྟགས་སྤངས་ཤིང་རབ་ཏུ་བྱུང་བའི་རྟགས་དང་ལྡན་པའོ། །བསམ་པ་ཕུན་སུམ་ཚོགས་པ་ནི་སྡོམ་པ་ལེན་འདོད་དང་ཐོབ་ཤེས་དང་ངེས་འབྱུང་གི་བསམས་པ་དང་ལྡན་པའོ། །སྡོམ་པ་སྐྱེ་བ་ལ་བསམ་པ་དེ་གསུམ་དགོས་ཏེ། བཞད་གད་ཀྱི་དངོས་པོས་ནི་གང་གིར་ཡང་མི་འགྱུར་རོ་ཞེས་གསུངས་པའི་ཕྱིར་དང་། སྡོམ་པ་ཐོབ་པར་ཤེས་པའི་ཡུལ་ལ་ལེན་འདོད་སྐྱེ་བར་ལྟར་མི་ཐོབ་པར་ཤེས་པའི་ཡུལ་ལས་དེ་མི་སྐྱེ་བ་ཡིན་པའི་ཕྱིར་དང་། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་ཞེས་གསུངས་པའི་ཕྱིར། གཉིས་པ་ནི། བསྙེན་པར་རྫོགས་པའི་སྡོམ་པ་རྣམ་དག་དང་ལྡན་པ། ལྟ་བ་དང་མཚན་མཐུན་པ། ཐ་སྙད་གསུམ་དང་ལྡན་པ། ལུས་ཐ་མལ་དུ་གནས་པ། ས་རང་བཞིན་དུ་གནས་པ། མཚམས་ནང་ན་གནས་པ། དགེ་ཚུལ་གྱི་སྡོམ་པ་འབོགས་པའི་ཆོ་ག་ལ་མཁས་པའོ། །གསུམ་པ་ནི་དགེ་ཚུལ་གྱི་སྡོམ་པའོ། །བཞི་པ་ལ་གསུམ་ལས། སྦྱོར་བ་ནི། བར་ཆད་དྲི་བ་དང་། དགེ་བསྙེན་དུ་བསྒྲུབ་པ་དང་། བར་མ་རབ་བྱུང་དུ་བསྒྲུབ་པའོ། །དངོས་གཞི་ནི། སྐྱབས་སུ་འགྲོ་བའི་ཚིག་རྩོམ་པ་དང་། དགེ་ཚུལ་ཉིད་དུ་ཁས་བླང་བའི་ཚིག་བྱའོ་ཞེས་པ་སྟེ་དགེ་བསྙེན་གྱི་སྐབས་དང་འདྲའོ། །མཇུག་ནི་དུས་གོ་དང་བསླབ་པ་བརྗོད་པ་གཉིས་ལས། དང་པོ་ལ་ཡང་དགོས་དོན་དང་། བསྡུས་དོན་གཉིས། དང་པོ་ནི། དེ་ལ་དགོས་པ་ཡོད་དེ། སྡོམ་པ་ཐོབ་དུས་རྟོགས་ནས་རྒན་གཞོན་གྱི་བསྙེན་བཀུར་ཚུལ་བཞིན་དུ་བྱེད་པར་འགྱུར་བའི་དགོས་པ་ཡོད་པའི་ཕྱིར། གཉིས་པ་ལ་བཞི་སྟེ། ཡུལ་གང་ལ། རྟེན་གང་གིས། དངོས་པོ་གང་། ཚུལ་ཇི་ལྟར་བརྗོད་པའོ། །དང་པོ་ནི། དགེ་ཚུལ་གྱི་སྡོམ་པ་ཐོབ་མ་ཐག་པ་དེ་ལའོ། །འོ་ན་དེའི་འོག་ཏུ་བསླབ་པ་བརྗོད་པ་ཁས་བླངས་པའི་ཚུལ་གྱིས་བྱའོ་ཞེས་པ་དང་འགལ་ལོ་ཞེ་ན། མི་འགལ་ཏེ། དེ་ལྟར་གསུངས་པ་དེ་ནི་སྡོམ་པ་གསུམ་སྔ་མ་སྔ་མའི་མཇུག་ཐོག་དེ་མ་ཐག་ཏུ་ཕྱི་མ་ཕྱི་མ་ལེན་པའི་དབང་དུ་བྱས་ནས་གསུངས་པའི་ཕྱིར། གཉིས་པ་ནི། དགེ་ཚུལ་གྱི་སློབ་དཔོན་ལས་གཞན་པའི་དགེ་སློང་ཞིག་གིས་བརྗོད་པར་བྱ་སྟེ། བསླབ་པ་བརྗོད་པའི་སྔར་གྲིབ་ཚོད་འཇལ་པའི་ཆེད་དུ་སྟན་ལས་ལྡང་དུ་མི་རུང་བའི་ཕྱིར། གསུམ་པ་ནི། གསུང་རབ་ལས་གྲིབ་ཚོད་དང་། ཉིན་མཚན་གྱི་ཆ་དང་། ཚེས་གྲངས་དང་། ཟླ་བའི་ངོ་དང་། དུས་ཚོད་རྣམས་བརྗོད་པར་བཤད་ལ། ད་ལྟའི་ཕྱག་ལེན་པ་ཁ་ཅིག་ཟླ་བ་དངོས་རབ་འབྲིང་ཐ་མ་ལོ་རྣམས་བརྗོད་དགོས་ཏེ། ལོ་བརྗོད་པ་དགེ་ཚུལ་གྱི་ལོ་དྲི་བ་ལས་བཤད་ཅེས་གསུངས་ཀྱང་མི་འཐད་དེ། ཟླ་བ་དངོས་མ་བརྗོད་ཀྱང་གསུང་རབ་ལས་བཤད་པ་ལྟར་བརྗོད་པས་ཀྱང་བསླབ་པ་རྒན་གཞོན་རྟོགས་པར་འགྱུར་བའི་ཕྱིར་དང་། དགེ་ཚུལ་གྱིས་ལོ་དྲི་བ་ལས། ལོ་རྒན་གཞོན་བརྩི་བའི་ཚུལ་ཙམ་བཤད་ཀྱི། དུས་གོའི་རྣམ་གཞག་ཅུང་ཟད་ཀྱང་མ་བཤད་པའི་ཕྱིར། བཞི་པ་ནི། ཁ་ཅིག་འདུལ་བའི་མདོ་དང་ཀརྨ་ཤ་ཏཾ་ལས་ཕྲ་རིམ་ནས་བརྗོད་པར་གསུངས་ཀྱང་རགས་རིམ་ནས་བརྗོད་དགོས་ཏེ། གཞི་འགྲེལ་ལས་དེ་ལྟར་གསུངས་པའི་ཕྱིར་དང་། རགས་རིམ་ནས་བརྗོད་ན་འཆད་ཉན་སླ་བའི་ཕྱིར་ཟེར་བ་མི་འཐད་དེ། ལུང་ལས་ཕྲ་རིམ་ནས་བརྗོད་པར་གསུངས་པའི་ཕྱིར་ན་གསུང་བ་པོ་མི་མཁས་པའི་སྐྱོན་ཡོད་པའི་ཕྱིར། རང་ལུགས་ནི། ལུང་ལས་གསུངས་པ་ལྟར་ཕྲ་རིམ་ནས་བརྗོད་དགོས་སོ། །གཞི་འགྲེལ་ལས་གསུངས་པ་ནི་བརྗོད་བྱའི་དངོས་པོ་བསྟན་པ་ཡིན་གྱི་བརྗོད་ཚུལ་བསྟན་པ་ནི་མ་ཡིན་ནོ་ཞེས་གསུང་ངོ་། །གཉིས་པ་བསླབ་པ་བརྗོད་པ་ནི་གོ་སླའོ། །དེ་ནི་སློབ་དཔོན་ཡིན་ནོ་ཞེས་སོགས་ཀྱི་སྐབས་སུ། བླ་མའི་རྣམ་གཞག་ལ་གསུམ་སྟེ། བླ་མ་རྣམས་ཀྱི་དབྱེ་བ། བླ་མར་གྱུར་པའི་དུས། མཚན་ནས་སྨོས་པའི་རིམ་པའོ། །དང་པོ་ནི། སློབ་དཔོན་ལ་ལྔ་ཡོད་དེ། དགེ་ཚུལ་གྱི་སྡོམ་པ་སྦྱིན་པའི་སློབ་དཔོན། གསང་སྟེ་སྟོན་པའི་སློབ་དཔོན། ལས་ཀྱི་སློབ་དཔོན། གནས་སྦྱིན་པའི་སློབ་དཔོན། ཀློག་པའི་སློབ་དཔོན་ནོ། །དེ་ཡང་གཞུང་གི་འབྲུ་དང་སྦྱར་ན། བསྒྲུབ་བྱ་ལ་ཆོ་གའི་སྒོ་ནས་དགེ་ཚུལ་གི་སྡོམ་པ་སྦྱིན་པར་བྱེད་པའི་དགེ་སློང་དེ་ནི་བསྒྲུབ་བྱ་དེའི་དགེ་ཚུལ་གྱི་སློབ་དཔོན་ཡིན་ནོ། །བསྒྲུབ་བྱའི་བར་ཆད་ཀྱི་ཆོས་རྣམས་ལྐོག་ཏུ་གསང་སྟེ་དྲི་བར་བྱེད་པའི་དགེ་སློང་དེ་ནི་བསྒྲུབ་བྱ་དེའི་གསང་སྟེ་སྟོན་པའི་སློབ་དཔོན་དང་། དགེ་འདུན་གྱི་དབུས་སུ་བསྙེན་པར་རྫོགས་པའི་གསོལ་བཞིའི་ལས་བྱེད་པའི་དགེ་སློང་དེ་ནི་དེའི་ལས་ཀྱི་སློབ་དཔོན་དང་། བསྒྲུབ་བྱའི་གནས་མེད་ཀྱི་ཉེས་པ་འགོག་པར་བྱེད་པའི་དགེ་སློང་དེ་ནི་དེའི་གནས་སྦྱིན་པའི་སློབ་དཔོན་དང་། བསྒྲུབ་བྱ་ལ་བདེ་བར་གཤེགས་པའི་བཀའ་ཀློག་པར་བྱེད་པའི་དགེ་སློང་དེ་ནི་དེའི་ཀློག་པའི་སློབ་དཔོན་ཡིན་ནོ། །ཅིའི་ཕྱིར་སློབ་དཔོན་ལྔར་བཤད་ཅེ་ན། སྡོམ་པ་ཐོབ་པར་བྱེད་པ་དང་། མི་ཉམས་པར་བསྲུང་བར་བྱེད་པ་དང་། ཆོས་ཤེས་པར་བྱེད་པ་དང་གསུམ་གྱི་དབང་དུ་བྱས་ནས་ལྔར་གཞག་པ་ཡིན་ཏེ། དང་པོ་ནི། དགེ་ཚུལ་གྱི་སྡོམ་པ་ཐོབ་པར་བྱེད་པ་དང་། གསང་སྟོན་ནི་བསྙེན་རྫོགས་ཀྱི་སྡོམ་པ་བརྒྱུད་ནས་ཐོབ་པར་བྱེད་ཅིང་། ལས་སློབ་ནི་བསྙེན་རྫོགས་ཀྱི་སྡོམ་པ་དངོས་སུ་ཐོབ་པར་བྱེད་པ་དང་། གནས་སྦྱིན་པ་ནི་མི་ཉམས་པར་སྲུང་བར་བྱེད་པ་དང་། ཀློག་པའི་སློབ་དཔོན་ནི་ཆོས་ཤེས་པར་བྱེད་པ་ཡིན་པའི་ཕྱིར་རོ། །གཉིས་པ་ནི། དོན་གྲུབ་ན་གྱུར་པ་ཉིད་དོ་ཞེས་པ་སྟེ། སློབ་མའི་དགོས་པ་གང་གིས་སློབ་དཔོན་དུ་འགྱུར་བའི་དོན་ཏེ་དགོས་པ་གྲུབ་ཅིང་རྫོགས་པ་ན་སློབ་དཔོན་དུ་གྱུར་པ་ཉིད་ཡིན་ཏེ། དེར་འགྱུར་བའི་རྒྱུ་མཐར་ཐུག་པ་ཡིན་པའི་ཕྱིར། དཔེར་ན་དགེ་ཚུལ་གྱི་སྡོམ་པ་སྐྱེས་པ་ན་དེའི་སློབ་དཔོན་དུ་འགྱུར་བ་བཞིན་ནོ། །ཁ་ཅིག་བསྒྲུབ་བྱའི་རྒྱུད་ལ་བསྙེན་རྫོགས་ཀྱི་སྡོམ་པ་སྐྱེས་པ་ན་དེའི་གསང་སྟེ་སྟོན་པའི་སློབ་དཔོན་དུ་འགྱུར་བ་ཡིན་ཏེ། མ་ཐོབ་པ་ཐོབ་པར་བྱེད་པའི་སློབ་དཔོན་ཡིན་པའི་ཕྱིར་ཏེ། ཊཱི་ཀར་གལ་ཏེ་གསང་སྟེ་སྟོན་པའི་དགོས་པ་ཡོངས་སུ་རྫོགས་པ་ན། གསང་སྟེ་སྟོན་པའི་སློབ་དཔོན་དུ་འགྱུར་བ་ཡིན་ནོ་ཞེས་གསུངས་པའི་ཕྱིར་ཞེས་པ་མི་འཐད་དེ། གསང་སྟོན་གྱིས་བསྒྲུབ་བྱ་ལ་བར་ཆད་དྲིས་ནས་བར་ཆད་མེད་པར་རྟོགས་པ་དེ་དགོས་པ་ཡིན་ལ། དེ་ལ་བརྟེན་ནས་སྡོམ་པ་སྐྱེས་པ་དེ་དགོས་པའི་ཡང་དགོས་པ་ཡིན་པས། དགོས་པ་དང་དགོས་པའི་དགོས་པ་མ་ཕྱེད་པའི་སྐྱོན་ནོ། །རང་ལུགས་ནི། གསང་སྟེ་སྟོན་པའི་དགེ་སློང་དེས་བསྒྲུབ་བྱ་ལ་བར་ཆད་དྲིས་ནས་བར་ཆད་ཀྱིས་དག་པར་རྟོགས་པ་ན་བསྒྲུབ་བྱ་དེའི་གསང་སྟེ་སྟོན་པའི་སློབ་དཔོན་དུ་འགྱུར་བ་ཡིན་ཏེ། སྔར་གྱི་ཊཱི་ཀའི་ལུང་དེ་ཉིད་དང་། འགྲེལ་ཆུང་ལས། གསང་སྟེ་སྟོན་པ་ནི་བར་ཆད་དྲིས་ནས་འགྱུར་ཞེས་དང་། ཤེས་རབ་བྱེད་པར་གསང་སྟེ་སྟོན་པའི་སློབ་དཔོན་ནི་བར་ཆད་དྲི་བའི་ལས་བྱས་ཟིན་ནས་གསང་སྟེ་སྟོན་པའི་སློབ་དཔོན་དུ་འགྱུར་རོ་ཞེས་གསུངས་པའི་ཕྱིར་རོ། །ཁ་ཅིག་འོང་བ་ཞུས་པ་ན་འགྱུར་རོ་ཞེས་གསུངས་ཏེ། འདི་དང་ཁྱད་ཆེར་མི་སྣང་ངོ་། །གསང་སྟོན་ལ་རྒྱས་བཤད་མེད་པས་འདིར་སྨོས་པ་ཡིན་ནོ། །འོ་ན་སློབ་དཔོན་དུ་འགྱུར་བའི་དོན་གྲུབ་ན་སློབ་དཔོན་དེ་དང་དེར་འགྱུར་བ་ཡིན་ན། མཁན་པོར་འགྱུར་བའི་དུས་ཡང་དེ་དང་འདྲའམ་ཞེ་ན་མི་འདྲ་སྟེ། མཁན་པོར་གསོལ་བ་ལན་གསུམ་བཏབ་ནས། མཁན་པོར་ཁས་བླངས་པ་ན་མཁན་པོ་དེར་གྱུར་པ་ཡིན་ནོ། །དེ་ཉིད་རྒྱས་པར་བཤད་པ་ལ་གསུམ་སྟེ། ཐོབ་པར་བྱེད་པའི་བླ་མར་འགྱུར་བའི་དུས་དང་། མི་ཉམས་པར་བསྲུང་བའི་དང་། ཆོས་ཤེས་པར་བྱེད་པའི་བླ་མར་འགྱུར་བའི་དུས་སོ། །དང་པོ་ལ་གཉིས་ལས། དང་པོ་སློབ་དཔོན་དུ་འགྱུར་བའི་དུས་ནི། དགེ་ཚུལ་དུ་སྒྲུབ་པ་ལ་བརྗོད་པ་གསུམ་ཡོད་པའི་ཐ་མ་གང་ཡིན་པའི་ཆ་གསུམ་པ་ལ་དགེ་ཚུལ་གྱི་སྡོམ་པ་སྐྱེས་པ་ལས་དགེ་ཚུལ་གྱི་སློབ་དཔོན་དུ་འགྱུར་བའི་དོན་གྲུབ་པ་དང་། དགེ་སློང་དུ་སྒྲུབ་པའི་ཚེ་བརྗོད་པ་གསུམ་གྱི་ཐ་མ་གང་ཡིན་པའི་ཆ་གསུམ་པ་ལ་དགེ་སློང་གི་སྡོམ་པ་སྐྱེས་པས་ལས་ཀྱི་སློབ་དཔོན་དུ་འགྱུར་བའི་དོན་གྲུབ་པ་སྟེ། དཔེར་ན་དགེ་ཚུལ་དུ་བསྒྲུབ་པ་ན་གཞན་བརྗོད་པའི་དུས་སུ་དགེ་ཚུལ་གྱི་སྡོམ་པ་སྐྱེས་པས་དགེ་ཚུལ་དུ་གྱུར་པ་བཞིན་ནོ། །དགེ་ཚུལ་གྱི་ཆོ་ག་ལ་ཆ་གསུམ་ནི། སྐྱབས་བརྗོད། བདག་བརྗོད། གཞན་བརྗོད་པ་དང་གསུམ་ཡིན་ལ། བསྙེན་རྫོགས་ཀྱི་སྐབས་སུ་ཆ་གསུམ་ནི། ངོ་བོ་བརྗོད་པ། བྱ་བ་བརྗོད་པ། བྱེད་པ་བརྗོད་པ་གསུམ་སྟེ་ལས་ཆོག་ལས་ཤེས་པར་བྱའོ། །གཉིས་པ་མཁན་པོར་འགྱུར་བའི་དུས་ནི་གཞན་བརྗོད་པའི་དུས་འདིར་མཁན་པོར་འགྱུར་བའི་དོན་གྲུབ་པ་ཡིན་ནོ། །གང་གི་གཞན་བརྗོད་པ་ཡིན་ཞེ་ན། ཆ་ཐ་མའི་གཞན་བརྗོད་པ་སྟེ། མཁན་པོ་མཛད་དུ་གསོལ་ཞེས་པའི་ཚིག་རྫོགས་ནས། མཁན་པོ་མཁན་པོས་ཞེས་པའི་དུས་སུ་མཁན་པོར་འགྱུར་བའི་དོན་གྲུབ་པ་ཡིན་ནོ། །དེས་ན་རྣམ་གྲངས་ཐ་མ་ལ་གཞན་བརྗོད་པ་ན། བཙུན་པ་མཁན་པོས་ཞེས་པ་དང་། སློབ་དཔོན་མཁན་པོས་ཞེས་མི་བརྗོད་པར། མཁན་པོ་མཁན་པོས་ཞེས་བརྗོད་པའི་རྒྱུ་མཚན་ཡང་དེ་ཡིན་ནོ། །གཉིས་པ་ནི། གནས་སྦྱིན་པའི་སློབ་དཔོན་ནི། དུས་ཞག་གཅིག ཆེད་དུ་བྱ་བ་གནས་ཀྱི་སློབ་དཔོན་དུ་འཛིན་པ་ཉིད་ཀྱི་ཕྱིར། མཚམས་ནང་གཅིག་ཏུ་ཉེ་བར་གནས་པ་མཐར་ཐུག་པ་སྟེ་ཞག་ཕྱི་མའི་སྐྱ་རེངས་ཤར་བ་ན་དེར་འགྱུར་རོ། །གསུམ་པ་ནི། ཀློག་པའི་སློབ་དཔོན་ནི་དངོས་པོ་སངས་རྒྱས་ཀྱི་བཀའ་ཚིགས་སུ་བཅད་པ་གཅིག་གམ་དེའི་ཚད་ཀྱི་རྐྱང་པ་གང་ཡང་རུང་བ། ཀུན་སློང་དཔོན་སློབ་ཀྱི་འདུ་ཤེས་ཉེ་བར་གཞག་པའི་སྒོ་ནས། བྱ་བ་སློབ་དཔོན་གྱིས་བརྗོད་པའི་རྗེས་སུ་སློབ་མས་ལན་གསུམ་བཟླས་ན་ཀློག་པ་མཐར་ཐུག་པས་ཀློག་པའི་སློབ་དཔོན་དུ་འགྱུར་རོ། །གསུམ་པ་མཚན་ནས་སྨོས་པའི་རིམ་པ་ནི། མཁན་སློབ་དེ་གཉིས་ལ་མཁན་པོ་དང་སློབ་དཔོན་ཞེས་པ་ལས་གཞན་བཙུན་པ་ཞེས་སོགས་ཉེ་བར་མི་བརྗོད་དོ། །མཁན་པོ་དང་སློབ་དཔོན་དེ་ལས་གཞན་པའི་གང་ཟག་ལ་མཁན་པོ་དང་སློབ་དཔོན་ཞེས་པའི་མིང་གིས་བརྗོད་པར་མི་བྱའོ། །མཁན་པོའི་མཚན་བརྗོད་པའི་ཚེ་དོན་གྱི་སླད་དུ་མཚན་ནས་སྨོས་ཏེ་ཞེས་བྱ་བ་དང་བཅས་པ་མ་སྨྲས་པར་མཁན་པོའི་མིང་འབའ་ཞིག་མི་གཟུང་ངོ་། །གཞན་ཡང་རྒན་པ་ལ་བཙུན་པ་དང་། གནས་བརྟན་དང་། ཚེ་དང་ལྡན་པ་ཞེས་པའི་ཉེ་ཚིག་གི་བརྗོད་པར་བྱ། བཙུན་པ་ཞེས་པ་ནི་སངས་རྒྱས་ཀྱི་ཉེ་ཚིག་ཏུ་ཡང་རུང་ལ། གནས་བརྟན་དང་ཚེ་དང་ལྡན་པ་ནི་མཉམ་པ་དང་གཞོན་པ་ལ་ཡང་རུང་ཞིང་། ཚེ་དང་ལྡན་པ་ནི་ཁྱིམ་པ་ལ་ཡང་རུང་ངོ་། །གཞན་ཡང་དགེ་བའི་བཤེས་གཉེན་ལ་སོགས་པ་ཉེ་ཚིག་གིས་བརྗོད་པ་ཡང་ཆོས་དང་མཐུན་ནོ།། ༈ །།གཉིས་པ་ཚིག་ཕྱི་མ་བསྙེན་རྫོགས་སུ་བསྒྲུབ་པ་ནི། དགེ་འདུན་ལས་བསྙེན་པར་རྫོགས་པར་བྱའོ་ཞེས་པའི་སྐབས་སུ། དགོས་དོན་དང་། བསྡུས་དོན་གཉིས་ལས། དང་པོ་ནི། བསྙེན་རྫོགས་ཀྱི་ཆོ་ག་བྱས་པ་ལ་དགོས་པ་ཡོད་དེ། བསྒྲུབ་བྱ་ལ་བསྙེན་རྫོགས་ཀྱི་སྡོམ་པ་སྐྱེ་བ་དང་། མཆོག་ཏུ་དགའ་བའི་ཆོས་ཐོབ་པ་ལ་སོགས་པ་ཕན་ཡོན་བཅུ་ཐོབ་པ་ལ་སོགས་ཀྱི་ཆེད་ཡིན་པའི་ཕྱིར་རོ། །གཉིས་པ་ལ། ཡུལ་གང་ལས། རྟེན་གང་གིས། དངོས་པོ་གང་ཞིག ཆོ་ག་གང་གིས་ནོད་པའོ། །དང་པོ་ནི། ཉེས་མེད་ཕུན་ཚོགས་ཀྱི་དབང་དུ་བྱས་ན་མཁན་པོར་འོས་པ་དང་། སློབ་དཔོན་དུ་འོས་པ་གཉིས་དང་། དགེ་འདུན་ཆོས་གསུམ་ལྡན་ལས་ཐོབ་དགོས་ལ། མཁན་པོ་དང་གསང་སྟོན་མེད་པར་མི་སྐྱེ་བ་ནི་མ་ཡིན་ཏེ། དེ་དང་ལྡན་པའི་ལྟར་མཁན་པོ་མེད་པ་ཉིད་ལ་ཡང་ངོ་ཞེས་དང་། མཁན་པོར་མ་གསོལ་བར་ཡང་ངོ་ཞེས་དང་། བར་ཆད་མ་དྲིས་པར་ཡང་ངོ་ཞེས་གསུངས་པའི་ཕྱིར། དགེ་འདུན་ཆོས་གསུམ་ལྡན་ནི། གྲངས་ཚང་བ། ཁ་སྐོང་གི་ཆོས་དང་ལྡན་པ། མི་མཐུན་པ་གཉིས་དང་བྲལ་བའོ། །གཉིས་པ་རྟེན་ནི་ལུས་ཕུན་ཚོགས། བསམ་པ་ཕུན་ཚོགས། རྟགས་ཕུན་ཚོགས་གསུམ་དང་ལྡན་པ་སྟེ། དང་པོ་ནི། སྐྱེས་ནས་ལོ་ཉི་ཤུ་ལོན་པའམ། ལོན་པར་འདུ་ཤེས་པ་བར་ཆད་དང་བྲལ་བའོ། །གཉིས་པ་ནི། ལེན་པར་འདོད། ཐོབ་པར་ཤེས། མྱང་འདས་ཀྱི་བསམ་པ་དང་ལྡན་པའོ། །གསུམ་པ་ནི། ལུས་བྱི་བྱད་ཀྱི་རྟགས། གོས་ཀྱི་རྟགས། སྣོད་སྤྱད་ཀྱི་རྟགས་གསུམ་ཚང་བའོ། །གསུམ་པ་དངོས་པོ་ནི་བསྙེན་རྫོགས་ཀྱི་སྡོམ་པ་རྣམ་པར་དག་པའོ། །བཞི་པ་ཆོ་ག་ལ་སྦྱོར་བ་དང་། དངོས་གཞི་དང་། མཇུག་གི་ཆོ་ག་གསུམ་ལས། དང་པོ་ནི། བསྙེན་པར་རྫོགས་པའི་ལས་གྲལ་དུ་འདུ་བར་འོས་པའི་དགེ་འདུན་རྣམས་ལས་གྲལ་ལ་མ་འདུས་པའི་གོང་དུ་ཟླ་བ་ཕྱེད་ཚུན་ཆད་ཀྱི་རང་གི་རྒྱུད་ལ་ལེགས་པར་བརྟགས་ཏེ། ལྟུང་བ་བཤགས་པར་འོས་པ་རྣམས་བཤགས། བསྡམ་པར་འོས་པ་རྣམས་བསྡམས། བྱིན་གྱིས་བརླབ་པར་འོས་པ་རྣམས་བྱིན་གྱིས་བརླབས་ཏེ་དག་པར་བྱས་ནས་ལས་གྲལ་དུ་འདུས་པ་ན་མཁན་པོ་ཉིད་དུ་ཕྱོགས་པར་གྱུར་པའི་དགེ་སློང་དེས། ལས་བྱེད་པ་དང་གསང་སྟེ་སྟོན་པར་འོས་པའི་དགེ་སློང་ལ་གསོལ་བ་བཏབ། དེ་ནས་བསྒྲུབ་བྱས་མཁན་པོར་གསོལ་བ་ལན་གསུམ་དུ་བཏབ་ནས། མཁན་པོ་དེས་ཆོས་གོས་གསུམ་བྱིན་གྱིས་བརླབས་ནས་བསྒྲུབ་བྱ་ལ་བཀོན། ལྷུང་བཟེད་ཀྱང་དགེ་འདུན་ལ་བསྟན་ནས་བྱིན་གྱིས་བརླབས་ཏེ་བྱིན། དེ་ནས་བསྒྲུབ་བྱ་ཐོས་པའི་ཉེ་འཁོར་ལས་བཀར། མཐོང་བའི་ཉེ་འཁོར་དུ་ལངས་ནས་ཚོགས་ལ་ཐལ་མོ་སྦྱར་ནས་གུས་པའི་སྤྱོད་ལམ་དང་ལྡན་པར་གཞག་སྟེ། དེ་ནས་ལས་ཀྱི་སློབ་དཔོན་དུ་འོས་པ་དེས་དྲི་བས་སྤྲོ་བར་བྱས་ནས་གསང་སྟོན་དུ་བསྐོ་བའི་ཆེད་དུ་དགེ་འདུན་ལ་གསོལ་བ་འབའ་ཞིག་པའི་ལས་བྱ། དེ་ནས་གསང་སྟོན་དུ་བསྐོས་པ་དེས་བསྒྲུབ་བྱའི་གན་དུ་སོང་སྟེ། ལྐོག་ཏུ་བར་ཆད་དྲིས་ནས་དགེ་འདུན་ལ་ཡོངས་སུ་དག་པ་གོ་བར་བྱས་ཏེ་འོང་བ་ཞུ་བར་བྱའོ། །དེ་ནས་བསྒྲུབ་བྱ་དེ་ཕ་གུའི་སྟེང་དུ་རྩྭ་བཏིང་བ་ལ་ཙོག་ཙོག་པུར་འདུག་ཏུ་བཅུག་སྟེ། དགེ་འདུན་ལ་བསྙེན་པར་རྫོགས་པར་གསོལ་བ་ལན་གསུམ་འདེབས་སུ་གཞུག་གོ །དེ་ནས་ལས་བྱེད་པས་བར་ཆད་དྲི་བའི་ཕྱིར་གསོལ་བ་འབའ་ཞིག་པའི་ལས་བྱས་ནས་བར་ཆད་དྲི་བར་བྱ་བའོ། །དངོས་གཞི་ནི། ལས་སློབ་ཏུ་འོས་པ་དེས་གསོལ་བ་དང་བཞིའི་ལས་ཚིག་ཕྱེད་ཀྱང་མ་འཁྲུགས་པར་སྟོན་པའི་སྒོ་ནས་བསྒྲུབ་བྱ་དེ་བསྙེན་པར་རྫོགས་པར་ཉེ་བར་བསྒྲུབ་པར་བྱ་བའོ།། ༈ །།གསུམ་པ་མཇུག་གི་ཆོ་ག་ལ་དུས་གོ་བརྗོད་པ་དང་། གདམས་ངག་བརྗོད་པ་གཉིས་ལས། དང་པོ་ལ་དགོས་དོན་བསྡུས་དོན་གཉིས་ལས། དང་པོ་ནི། དེ་ལ་དགོས་པ་ཡོད་དེ། དེས་སྡོམ་པ་ཐོབ་པའི་དུས་ཤེས་ནས་རྒན་གཞོན་བར་མའི་ཚུལ་དང་བཀུར་སྟི་བྱེད་ཚུལ་ཤེས་པར་འགྱུར་བའི་ཕྱིར་རོ། །གཉིས་པ་ལ་གསུམ་སྟེ། ལོ་འགོ་ངོས་བཟུང་བ་དང་། དངོས་པོ་གང་བརྗོད་པ་དང་། ཚུལ་ཇི་ལྟར་བརྗོད་པའོ། །དང་པོ་ལ་དགག་གཞག་གཉིས་ལས། དང་པོ་ལ། འདོད་པ་བརྗོད་པ་དང་། དེ་དགག་པ་གཉིས་ཀྱི། དང་པོ་ནི། དྲོ་ཁ་ཅིག་ཧོར་ཟླ་བརྒྱད་པའི་ཚེས་བཅུ་དྲུག་ནས་ལོ་འགོ་འཛིན་པར་རིགས་ཏེ། མཛོད་ལས། དགུན་རྣམས་ཀྱི་ནི་བཞི་པ་ལ། །ཐུང་དུ་འགྱུར་རོ་ཉིན་མོ་བཟློག །ཅེས་གསུངས་ཤིང་། ཧོར་ཟླ་བཅུ་གཉིས་པ་ལ་ཉི་མ་ལྡོག་པའི་ཕྱིར་རོ། །ཁྱབ་སྟེ། མཛོད་ཀྱི་འགྲེལ་བཤད་དུ། སངས་རྒྱས་པའི་དུས་ཀྱི་དང་པོ་དགུན་གྱི་དུས་སོ་ཞེས་གསུངས་པའི་ཕྱིར་ཞེས་དང་། སམ་་་་་་ཁ་ཅིག་དམ་བཅའ་དེ་ཉིད་རིགས་པ་ཡིན་ཏེ། གདགས་པ་ལས་ལོ་གཅིག་ལ་མཚན་མོ་ཡུད་ཙམ་བཅོ་བརྒྱད་ཉིན་མོ་ཡུད་ཙམ་བཅུ་གཉིས་པའི་དུས་ཡོད་དེ། དེ་གང་ཞེ་ན། དགུན་ཟླ་ཐ་ཆུང་གི་ཡར་གྱི་ངོའི་ཚེས་བརྒྱད་ལ་མཚན་མོ་ཡུད་ཙམ་བཅོ་བརྒྱད་ཉིན་མོ་ཡུད་ཙམ་བཅུ་གཉིས་ཡོད་དོ་ཞེས་གསུངས་པའི་ཕྱིར་ཞེས་ཟེར། ཡང་བུ་ཁ་ཅིག་ཧོར་ཟླ་དགུ་པའི་ཚེས་བཅུ་དྲུག་ནས་ལོ་འགོ་འཛིན་པ་རིགས་ཏེ། ཉ་ཚེས་དབྱུག་པ་གང་ཡིན་པ། །སྟོན་ཟླ་ཐ་ཆུང་བྱ་བར་བརྗོད། །ཅེས་རྟེན་འབྲེལ་མདོ་འགྲེལ་ལས་བཤད་པའི་ཕྱིར་ཞེས་གསུང་ངོ་། །གཉིས་པ་ནི། ཧོར་ཟླ་བརྒྱད་པ་ནས་ལོ་འགོ་འཛིན་པ་མི་འཐད་དེ། གདགས་པའི་ལུང་མདོ་འགྲེལ་དུ་དྲངས་པ་ལས། རྟ་རྣམས་ནི་སོས་ཀ་འཁྲིག བ་གླང་རྣམས་ནི་དབྱར་གྱི་དུས་སུ་འཁྲིག ཁྱི་རྣམས་ནི་སྟོན་གྱི་དུས་སུ་འཁྲིག་ཅེས་བཤད་པ་དང་མི་འགྲིག་ཅིང་། འགྲེལ་བཤད་རྒྱལ་སྲས་ལས། སྟོན་ནི་ཆར་འབབ་པར་འདྲ་བའི་ཕྱིར་དབྱར་དུ་བྱས། དགུན་སྟོད་ནི་གྲང་བར་འདྲ་བའི་ཕྱིར་དགུན་དུ་བྱས། སོས་ཀ་ནི་ཚ་བར་འདྲ་བའི་ཕྱིར་དཔྱིད་དུ་བྱས་ཞེས་གསུངས་པ་དང་མི་འགྲིག་པའི་ཕྱིར་རོ། །བརྒྱད་པ་ནས་འཛིན་པའི་སྒྲུབ་བྱེད་ཕྱི་མ་ཡང་མི་འཐད་དེ། མཛོད་ལས་དགུན་ཟླ་བཞི་པ་ལ་ཉི་མ་བཟློག་པར་བཤད་ཟེར་བ་དང་། གདགས་པ་ལས། དགུན་ཟླ་གསུམ་པ་ལ་ཉི་མ་ལྡོག་པར་བཤད་པ་མཐུན་པ་ཁས་ལེན་ན་བཞད་གད་ཀྱི་གནས་ཡིན་པའི་ཕྱིར་རོ། །མཛོད་ལས། དགུན་རྣམས་ཀྱི་ནི་ཞེས་སོགས་ཀྱི་དོན་ནི། མཚན་མོ་ཐུང་དུ་འགྱུར་བ་ལས་གོ་བཟློག་ནས་ཉིན་མོ་རིང་དུ་འགྲོ་བ་ལ་བྱ་ཡི། འཇིག་རྟེན་ན་གྲགས་པ་ལྟར་གྱི་ཉི་མ་ལྡོག་པ་ནི་མ་ཡིན་ནོ། །དབྱར་གྱི་ཟླ་བ་གཉིས་པ་ཡི། །ཐ་མའི་ཚེས་དགུ་ནས་མཚན་རིང་། །དགུན་རྣམས་ཀྱི་ནི་བཞི་པ་ལ། །ཐུང་དུ་འགྱུར་རོ་ཉིན་མོ་ཟློག །ཅེས་གསུངས་པའི་དོན་ལ། སྤང་ལོ་ཆེན་པོས། དབྱར་གྱི་ཟླ་བ་གཉིས་པ་ནི་ཁྲུམས་ཀྱི་ཟླ་བ་ཡིན་ལ། དེ་ལ་མར་ངོ་དང་ཡར་ངོ་གཉིས་ཡོད་པའི་ཐ་མ་ཡར་ངོའི་ཚེས་བརྒྱད་ལ་ཉིན་མཚན་མཉམ་པ་ལས་ཚེས་དགུ་ནས་མཚན་མོ་རིང་དུ་འགྱུར་ཞིང་ཉིན་མོ་དེ་ལས་གོ་བཟློག་སྟེ་ཐུང་དུ་འགྱུར་ལ། དགུན་རྣམས་ཀྱི་ནི་བཞི་པ་ནི་དབོའི་ཟླ་བ་ཡིན་ལ། དེ་ལ་མར་ངོ་དང་ཡར་ངོ་གཉིས་ཡོད་པའི་ཐ་མ་ཡར་ངོའི་ཚེས་བརྒྱད་ལ་ཉིན་མཚན་མཉམ་པ་ལས། ཚེས་དགུ་ནས་མཚན་མོ་ཐུང་དུ་འགྱུར་ཞིང་ཉིན་མོ་དེ་ལས་གོ་བཟློག་སྟེ་རིང་དུ་འགྱུར་ཞེས་པའི་དོན་སྟེ། གཞུང་འདིས་སྟོན་ཉིན་མཉམ་མཚན་མཉམ་དང་། དཔྱིད་ཉིན་མཉམ་མཚན་མཉམ་དངོས་སུ་བསྟན་ནས། དབྱར་ཉི་དང་དགུན་ཉི་ལྡོག་ཚུལ་ཤུགས་ལ་བསྟན་པ་ཡིན་ནོ་ཞེས་གསུངས་པ་ནི་ལེགས་བཤད་དོ། །གདགས་པ་ལས། དགུན་ཟླ་ཐ་ཆུང་ཞེས་པ་ནི་འགྱུར་གྱི་སྐྱོན་ཡིན་གྱི། གཞན་དུ་ན་ནང་འགལ་བར་འགྱུར་རོ། །གཉིས་པ་ཡང་མི་འཐད་དེ། མདོ་ཉི་མའི་སྙིང་པོ་ལས་སྨིན་དྲུག་ཟླ་བ་སྟོན་ཟླ་ཐ་ཆུང་དུ་གསུངས་པའི་ཕྱིར་ཏེ། བདག་གི་རྒྱུ་སྐར་སྨིན་དྲུག་བརྗོད། །ཟླ་བ་ཉ་ཚེས་ཟླ་རངས་འགྱུར། །སྟོན་ཟླ་ཐ་ཆུང་ཞེས་བྱ་བར། །འདིར་ནི་རབ་ཏུ་གྲགས་པ་ཡིན། །ཞེས་གསུངས་པའི་ཕྱིར། ཧོར་ཟླ་བཅུ་པའི་གནམ་སྟོང་ལ་གསོ་སྦྱོང་བཅུ་བཞི་པ་འབྱུང་རིགས་པར་ཐལ། དུས་ཚིགས་རྣམས་ཀྱི་ཟླ་བ་ཕྱེད་ལུས་པ་ཉིད་ལའོ་ཞེས་གསུངས་པ་གང་ཞིག ཧོར་ཟླ་དགུ་པའི་ཚེས་བཅུ་དྲུག་ནས་ལོ་འགོ་འཛིན་རིགས་པའི་ཕྱིར། འདོད་ན། ལོ་དྲི་བ་ལས། རྒྱལ་དང་དབོ་དང་ས་ག་དང་། །ཆུ་སྟོད་ཁྲུམས་སྨད་སྨིན་དྲུག་ཅན། །འདི་རྣམས་ཀྱི་ནི་ནག་པོའི་ཕྱོགས། །ཟླ་ཕྱེད་གསོ་སྦྱོང་བཅུ་བཞི་པ། །ཞེས་གསུངས་པ་དང་འགལ་ལོ། །ཉ་ཚེས་དབྱུག་པ་གང་ཡིན་པ། །ཞེས་པའི་གཞུང་འདི་རྟེན་འབྲེལ་མདོ་འགྲེལ་ལ་སོགས་པའི་གཞུང་ཚད་ལྡན་གང་ལས་ཀྱང་བཤད་པ་མ་མཐོང་ངོ་། །གཉིས་པ་ནི། ཧོར་ཟླ་བཅུ་པའི་ཚེས་བཅུ་དྲུག་ནས་ལོ་འགོ་འཛིན་པར་རིགས་ཏེ། འགོའི་ཟླ་བའི་མར་ངོའི་ཚེས་གཅིག་ནས་ལོ་འགོ་འཛིན་དགོས་པའི་ཕྱིར་ཏེ། མེ་ཏོག་ཕྲེང་རྒྱུད་ལས། གྲོ་བཞིན་ཟླ་བའི་ཚེས་གཅིག་ནི། །སྔ་མའི་དབྱར་ཏེ་གཙོ་བོ་ཡིན། །ཞེས་གསུངས་ཤིང་། གྲོ་བཞིན་ཟླ་བ་ནི་ཧོར་ཟླ་དྲུག་པའི་ཚེས་བཅུ་དྲུག་ནས་བདུན་པའི་ཚེས་བཅོ་ལྔའི་བར་ལ་བྱ་དགོས་པའི་ཕྱིར་དང་། མདོ་ཉི་མའི་སྙིང་པོ་ལས། ཧོར་ཟླ་དགུ་པའི་ཚེས་བཅུ་དྲུག་ནས། བཅུ་པའི་ཚེས་བཅོ་ལྔའི་བར་ལ་སྨིན་དྲུག་གི་ཟླ་བ་སྟོན་ཟླ་ཐ་ཆུང་དུ་གསུངས་པའི་ཕྱིར་དང་། ལོ་དྲི་བ་ལས། གསོ་སྦྱོང་བཅུ་བཞི་པའི་ཐོག་མ་རྒྱལ་གྱི་ཟླ་བའི་བཅུ་བཞི་པ་སྨོས་པའི་ཕྱིར། གལ་ཏེ་ལོ་འགོ་དེ་ལྟར་འཛིན་ན། ཊཱི་ཀར་དབྱར་དགུན་འབྲིང་ཐུབ་སྟོན་དཔྱིད་འབྲིང་མི་ཐུབ་པར་བཤད་པ་དང་འགལ་ལོ་ཞེ་ན། སྐྱོན་མེད་དེ། འདིར་ཡར་ངོ་སྔོན་འགྲོའི་དབང་དུ་བྱས་པ་ཡིན་པའི་ཕྱིར། སྤྱིར་བསྟན་བཅོས་ཀྱི་ལུགས་ལ་མར་ངོ་སྔོན་འགྲོ་ཡིན་ཏེ། རྒྱལ་སྲས་ལས། ཟླ་བ་ཐམས་ཅད་མར་གྱི་ངོ་སྔའོ་ཞེས་གསུངས་པའི་ཕྱིར། སྐབས་འགའ་ཞིག་ཏུ་ཡར་ངོ་སྔོན་འགྲོ་བཤད་པ་ནི། རྒྱལ་པོའམ་འཇིག་རྟེན་པ་དང་སྒོ་བསྟུན་པ་ཡིན་པར་ཤེས་པར་བྱའོ། །གཉིས་པ་དངོས་པོ་གང་བརྗོད་པ་ནི། གྲིབ་ཚོད་དང་། ཉིན་མཚན་གྱི་ཆ་དང་། ཚེས་གྲངས་དང་། ཟླ་བའི་ངོ་དང་། དུས་ཚོད་དེ་ལྔ་བརྗོད་པར་བྱའོ། །ཁ་ཅིག་རབ་འབྲིང་ཐ་ཆུང་གི་རྣམ་གཞག་བརྗོད་དགོས་ཞེས་པ་མི་འཐད་དེ། གཞུང་ཚད་ལྡན་ལས་མ་བཤད་ཅིང་། གཞན་ལྔ་པོ་ཇི་ལྟ་བ་བཞིན་བརྗོད་ན་མི་རྟོགས་པའི་གནས་མེད་པའི་ཕྱིར་རོ། །ཁ་ཅིག་དགེ་ཚུལ་གྱི་ལོ་དྲི་བ་ལས། ལོ་ཡང་བརྗོད་དགོས་པར་གསུངས་ཞེས་གསུངས་པ་ཡང་མི་འཐད་དེ། དེ་ལས་དུས་གོ་བརྗོད་པར་མ་བཤད་པའི་ཕྱིར། ཇི་ལྟར་བརྗོད་པའི་ཚུལ་ནི། བསྙེན་པར་རྫོགས་པའི་དེ་མ་ཐག་ཏུ་ལས་བྱེད་པ་ལས་གཞན་པའི་དགེ་སློང་ཞིག་གིས་དུས་གོ་བརྗོད་པར་བྱ་སྟེ། དེ་ཡང་ཐོག་མར་གྲིབ་ཚོད་རིག་པར་བྱ་སྟེ། དེ་ཡང་ཤིང་བུ་ལ་སོགས་པ་ཐུར་མ་སོར་བཞི་པས་འཇལ་ན་བཟང་སྟེ། རྟོགས་པར་སླ་བའི་ཕྱིར་ཐུར་མ་སོར་བཞི་པ་དེ་ལ་སྐྱེས་བུ་ཉིད་ཅེས་ཐ་སྙད་དུ་བྱ་ལ། དེའི་གྲིབ་མ་ས་ལ་ཕོག་པའི་སོར་རེ་ལ་རྐང་པ་ཞེས་པའི་ཐ་སྙད་བྱའོ། །ཉིན་མཚན་གྱི་ཆ་ཉི་ཤུ་རྩ་གཉིས་ནི། སྔ་དྲོ། གུང་། གུང་ཚིགས་མ་ཡོལ་བ། ཕྱི་དྲོ། ཉི་མ་བཞི་ཆ་ལུས་པ། ཉི་མ་བརྒྱད་ཆ་ལུས་པ། ཉི་མ་མ་ནུབ་པ། ཉི་མ་ནུབ་པ། རྒྱུ་སྐར་རྣམས་མ་ཤར་བ། རྒྱུ་སྐར་རྣམས་ཤར་བ། ཐུན་དང་པོ། ཐུན་དང་པོའི་ཕྱེད། ཐུན་བར་པ། ཐུན་བར་པའི་ཕྱེད། ཐུན་ཐ་མ། ཐུན་ཐ་མའི་ཕྱེད། སྐྱ་རེངས་མ་ཤར་བ། སྐྱ་རེངས་ཤར་བ། ཉི་མ་མ་ཤར་བ། ཉི་མ་ཤར་བ། ཉི་མའི་བརྒྱད་ཆ་ཤར་བ། ཉི་མའི་བཞི་ཆ་ཤར་བར་རྣམས་སོ། །དུས་ཚོད་ནི་ལྔ་སྟེ། གྲང་བ་དགུན་གྱི་དུས་དང་། ཚ་བ་དཔྱིད་ཀྱི་དུས་དང་། ཆར་བབས་པ་དབྱར་གྱི་དུས་དང་། དུས་ཐུང་ངུར་གནས་པ་དབྱར་ཐུང་ངུའི་དུས་དང་། དབྱར་ཡང་ཡིན་ལ་རིང་པོ་ཡང་ཡིན་པས་དབྱར་རིང་པོའི་དུས་རྣམས་སོ། །དང་པོ་གཉིས་ནི་ཟླ་བ་བཞི་བཞི་སྟེ། མགོའི་ཟླ་བའི་མར་ངོའི་ཚེས་གཅིག་ནས་ལོ་འགོ་གཟུང་བའི་དགུན་ཟླ་རྭ་བ་དང་། འབྲིང་པོ་དང་། ཐ་ཆུང་དང་། དཔྱིད་ཟླ་རྭ་བ་དང་བཞི་ནི་དགུན་གྱི་དུས། དེའི་ཉ་ནས་དཔྱིད་ཟླ་འབྲིང་པོ་དང་། ཐ་ཆུང་དང་། དབྱར་ཟླ་རྭ་བ་དང་། འབྲིང་པོ་བཞི་ནི་དཔྱིད་ཀྱི་དུས་སོ། །དབྱར་གྱི་དུས་ནི་ཟླ་བ་གཅིག་སྟེ། དབྱར་ཟླ་ཐ་ཆུང་ངོ་། །དབྱར་ཐུང་ངུའི་དུས་ནི་ཉིན་ཞག་གཅིག་སྟེ། ཡར་ངོའི་སྔོན་འགྲོ་ལྟར་ན། དབྱར་ཟླ་ཐ་ཆུང་གི་ཚེས་བཅུ་དྲུག་ཡིན་ལ། མར་ངོ་སྔོན་འགྲོ་ལྟར་ན་གྲོ་བཞིན་ཟླ་བའི་ཚེས་གཅིག་གོ །དབྱར་རིང་པོ་ནི་ཟླ་བ་གསུམ་དུ་ཉིན་ཞག་གཅིག་པོ་དེས་མ་ཆོག་པ་སྟེ། སྟོན་ཟླ་རྭ་བའི་མར་ངོ་ཚེས་གཉིས་ནས་བཟུང་སྟེ། སྟོན་ཟླ་རྭ་བ་ཞག་ཉི་ཤུ་རྩ་དགུ་དང་། འབྲིང་པོ་དང་། ཐ་ཆུང་རྣམས་སོ། །གསུམ་པ་ཇི་ལྟར་བརྗོད་པ་ནི། བུ་ཁ་ཅིག་ཕྲ་རིམ་ནས་གསུངས་ཀྱང་རགས་རིམ་ནས་བརྗོད་དགོས་ཏེ། ལོ་དྲི་བ་དང་གཞི་འགྲེལ་ལས་རགས་རིམ་ནས་བརྗོད་པར་གསུངས་ཤིང་། རགས་རིམ་ནས་བརྗོད་ན་འཆད་པ་པོ་འཆད་སླ་བ་དང་། ཉན་པ་པོ་ཉན་སླ་བའི་དགོས་པ་ཡོད་པའི་ཕྱིར་ཞེས་གསུངས་པ་མི་འཐད་དེ། ལོ་དྲི་བ་ལས་དུས་གོ་བརྗོད་པ་མ་བཤད་ཅིང་། གཞི་འགྲེལ་གྱིས་ནི་ལུང་ནས་ཕྲ་རིམ་ནས་བཤད་པའི་དོན་བསྡུས་པ་ཡིན་གྱི་གོ་རིམ་བསྒྱུར་བའི་བརྗོད་ཚུལ་བཤད་པ་མ་ཡིན་ནོ། །གཞན་དུ་ན། སྟོན་པ་ཤཱཀྱ་ཐུབ་པ་དང་སློབ་དཔོན་ཡོན་ཏན་འོད་ཀྱི་དུས་གོ་བརྗོད་ཚུལ་ལ་སྐྱོན་ཆགས་པར་ཐལ། རགས་རིམ་དང་ཕྲ་རིམ་གང་ནས་བརྗོད་ཀྱང་རུང་བ་གང་ཞིག རགས་རིམ་ནས་བརྗོད་ན་དགོས་པ་ཆེ་ཞིང་། ཕྲ་རིམ་ནས་བརྗོད་ན་དགག་བྱ་ཆེ་ལ། དེ་གཉིས་ཀྱིས་ཕྲ་རིམ་ནས་གསུངས་པའི་ཕྱིར་ཞེས་གསུང་མོད། འོན་ཀྱང་ལོ་མ་བརྗོད་ན་ལོ་འདི་ལ་བསྙེན་པར་རྫོགས་སོ་ཞེས་པའི་དུས་མི་ཤེས་པའི་སྐྱོན་བྱུང་གི་དོགས་ཤིང་། ཕྲ་རིམ་ནས་བཙལ་ནས་རགས་རིམ་ནས་བརྗོད་ན་འཇུག་པ་བདེ་བ་ནི་མྱོང་བས་ཀྱང་གྲུབ་པར་སེམས་སོ། །དུས་ཚིགས་ཀྱི་རྣམ་གཞག་རྒྱས་པ་ནི་འོག་ནས་འབྱུང་ངོ་། །གཉིས་པ་གདམས་ངག་བརྗོད་པ་ལ་དགོས་དོན་དང་། བསྡུས་དོན་གཉིས་ལས། དང་པོ་ནི། དེ་ལ་དགོས་པ་ཡོད་དེ། སྡོམ་པ་མི་ཉམས་ཤིང་འཕེལ་བར་བྱ་བའི་ཆེད་ཡིན་པའི་ཕྱིར། གཉིས་པ་ལ་ལྔ་སྟེ། ཡུལ་གང་ལ། རྟེན་གང་གིས། དངོས་པོ་གང་། དུས་ནམ་གྱི་ཚེ། ཚུལ་ཇི་ལྟར་བརྗོད་པའོ། །དང་པོ་ནི། བསྙེན་པར་རྫོགས་མ་ཐག་པའི་དགེ་སློང་དེ་ལའོ། །གཉིས་པ་ནི། ལས་སློབ་ཀྱིས་བརྗོད་དེ། གདམས་ངག་བརྗོད་པ་ནི་དེའི་ལས་ཡིན་པའི་ཕྱིར། གསུམ་པ་ནི་གདམས་ངག་གོ །བཞི་པ་ནི། དུས་གོ་བརྗོད་པའི་དེ་མ་ཐག་ཏུའོ། །ལྔ་པ་ལ་དབྱེ་བ། བསྡུ་བ། གྲངས་ངེས། གོ་རིམ་ངེས་པ། འདི་རྣམས་ཁོ་ན་བརྗོད་པའི་འཐད་པ་དང་ལྔ། དང་པོ་ནི། གདམས་ངག་ཆེ་ལོང་ཙམ་དུ་བརྗོད་ན་བཅུ་གཅིག་དང་། ཞིབ་ཏུ་ཕྱེ་ན་དང་པོ་གསུམ་ལ་བཞི་བཞིར་ཕྱེ་བས་ཉི་ཤུའོ། །གཉིས་པ་ནི། ཉི་ཤུ་པོ་དེ་ཡང་སྤང་བྱ་སྤོང་བ་ལ་གདམས་པ་དང་། བླང་བྱ་ལེན་པ་ལ་གདམས་པ་གཉིས་སོ། །གསུམ་པ་ནི། གདམས་ངག་ལ་བཅུ་གཅིག་ཏུ་གྲངས་ངེས་ཏེ། ཚུལ་ཁྲིམས་ཀྱི་བསླབ་པ་རྫོགས་པའི་དབང་དུ་བྱས་ནས་གདམས་ངག་བརྗོད་པ་གང་ཞིག བཅུ་གཅིག་པོ་དེ་ཙམ་བརྗོད་པས་ཚུལ་ཁྲིམས་ཀྱི་བསླབ་པ་དག་པའི་ཐབས་རྫོགས་པར་འགྲུབ་པའི་ཕྱིར། བཞི་པ་ནི། ཁ་ཅིག་སྤང་བྱ་ཡུལ་ལ་གདམས་པ་དང་། སྤོང་བྱེད་གཉེན་པོ་ལ་གདམས་པ་གཉིས་དེ་ཡང་སྤང་བྱ་ལས་གཉིས་པོ་འབྱུང་བས་དང་པོ་སྔར་བསྟན། གཉིས་པ་ཕྱིས་བསྟན་ནོ། །དང་པོ་ལ་རང་མ་སྨིན་པ་སྨིན་པར་བྱེད་པའི་གདམས་པ་དང་། གཞན་སྨིན་ཟིན་རྗེས་སུ་གཟུང་བའི་གདམས་པ་ཞེས་སོགས་སྨྲ་བ་ནི་མི་འཐད་དེ། གཞུང་དང་མི་འགྲིག་པའི་ཕྱིར། རང་ལུགས་ནི། སྡོམ་པ་ཐོབ་ནས་བསྲུང་བ་ལ་སྲུང་ཚུལ་ཤེས་དགོས་པས། དང་པོ་འཚོ་བ་རྣམ་དག་ལ་བརྟེན་ནས་སྲུང་དགོས་སོ་ཞེས་གདམས་པ་ནི། གནས་རྣམས་བརྗོད་པར་བྱའོ་ཞེས་ཏེ། ཚངས་པར་སྤྱོད་པའི་གནས་ཡིན་པས་ན་གནས་ཞེས་བྱ་སྟེ། ཟས་བསོད་སྙོམས་པ་དང་། གོས་ཕྱག་དར་ཁྲོད་པ་དང་། གནས་ཤིང་དྲུང་པ་དང་། སྨན་བཀུས་ཏེ་བོར་བའོ། །ཕམ་པས་གོས་ན་སྡོམ་པ་མ་བླངས་པ་དང་འདྲ་བར་འགྱུར་བས། དེའི་འོག་ཏུ་ཕམ་པས་མ་གོས་པར་གྱིས་ཤིག་ཅེས་གདམས་པ་ནི། ལྟུང་བར་འགྱུར་བའི་ཆོས་རྣམས་ཞེས་སོ། །དེ་ཡང་དགེ་སྦྱོང་གི་ཆོས་བཞི་ལ་གནས་ན། སྲོག་གཅོད་པའི་ཕམ་པ་ལ་སོགས་པ་སྤོང་སླ་བས་དེའི་འོག་ཏུ་དགེ་སྦྱོང་དུ་བྱེད་པའི་ཆོས་ཁྲོ་ཡང་སླར་མི་ཁྲོ་བ་ལ་སོགས་པ་བཞི་ལ་གདམས་པ་ནི། དགེ་སྦྱོང་དུ་བྱེད་པའི་ཆོས་རྣམས་ཀྱང་ངོ་ཞེས་པས་བསྟན་ནོ། །འོ་ན་འཚོ་བ་བྱ་དཀའ་བ་དགེ་སྦྱོང་གི་ཆོས་བཞི་ལ་གནས་པ་སོགས་ཀྱི་སྒོ་ནས་ཚུལ་ཁྲིམས་བསྲུང་བ་དེ་བདག་གིས་བྱ་མི་ནུས་སོ་སྙམ་ན། ཁྱེད་རང་འདོད་པ་ལྟར་བསྒྲུབ་པ་ཡིན་གྱི་ངེད་ཀྱིས་དབང་མེད་དུ་སྒྲུབ་ཏུ་བཅུག་པ་མ་ཡིན་པས་དེ་ལྟར་སྒྲུབ་དགོས་སོ་ཞེས་གདམས་པ་ནི། མཆོག་ཏུ་འདོད་པར་བྱ་བ་ཡང་དག་པ་ཉིད་ཀྱིས་རྫོགས་པ་ཉིད་བརྗོད་ནས་ཞེས་སོ། །བདག་བསྙེན་པ་རྫོགས་མ་ཐག་པ་ཡིན་པས་དེ་ལྟར་མི་དགོས་སོ་སྙམ་པ་ལ། བསྙེན་པར་རྫོགས་ནས་ལོ་བརྒྱ་ལོན་པ་དང་ཚུལ་ཁྲིམས་མཉམ་པས་དེ་དང་མཚུངས་པར་བསླབ་དགོས་སོ་ཞེས་འདོམས་པ་ནི། ཚུལ་ཁྲིམས་མཉམ་པར་ཞེས་སོགས་སོ། །འོ་ན་བདག་ཁྱིམ་ན་གནས་པའི་ཚེ་ཕ་མ་སོགས་ཀྱིས་ནད་གཡོག་དང་མི་རིགས་པ་ལས་བཟློག རིགས་པ་ལ་སྦྱོར་བར་བྱེད་ན། རབ་ཏུ་བྱུང་ནས་དེ་དག་སུས་བྱེད་སྙམ་ན། མཁན་པོ་དང་མཁན་བུ་གཉིས་ཕ་བུའི་འདུ་ཤེས་འཇུག་པར་བྱའོ་ཞེས་འདོམས་པ་ནི། ཚུལ་དང་འབྲེལ་བའི་གཟུགས་བརྙན་དང་ཞེས་སོ། །འོ་ན་མཁན་པོ་ཁོ་ན་ལ་གུས་པར་བྱའམ་སྙམ་ན། རབ་ཏུ་བྱུང་བ་ཐམས་ཅད་ལ་གུས་པར་བྱ་ཞེས་འདོམས་པ་ནི། དུལ་བར་གནས་པ་ཉིད་དང་ཞེས་སོ། །འོ་ན་ཚུལ་ཁྲིམས་ཁོ་ནའི་འཇུག་ལྡོག་ལ་བསླབ་པར་བྱའམ་སྙམ་ན། བསླབ་པ་གསུམ་ཀ་རྫོགས་པར་བྱ་དགོས་པས་དེ་གསུམ་བརྗོད་པའི་ལུང་ལ་ཁ་ཏོན་བྱེད་པ་དང་བསྒོམ་པ་ལ་སོགས་ལ་འཇུག་པར་བྱ་དགོས་ཞེས་འདོམས་པ་ནི། དགོས་པ་རྗེས་སུ་སྒྲུབ་པ་ལ་ཡང་ངོ་ཞེས་སོ། །དགེ་སློང་གི་སྤང་བྱ་དེ་ཙམ་དུ་ཟད་དམ་སྙམ་ན། འདིར་བརྗོད་པ་དེ་རྣམས་ཆེ་ལོང་ཙམ་ཡིན་གྱི་བསླབ་པའི་གཞི་ཕྲ་མོ་རྣམས་གསོ་སྦྱོང་གི་དུས་སུ་མཁན་སློབ་དང་འགྲོགས་བཤེས་ལ་བརྟེན་ནས་ཤེས་པར་འགྱུར་བས་དེ་རྣམས་ཤེས་དགོས་སོ་ཞེས་འདོམས་པ་ནི། མ་བརྗོད་པར་ཡང་དག་པར་བླངས་པ་ཞེས་སོ། །ཚུལ་ཁྲིམས་རྣམ་དག་དེ་རྒྱུ་གང་ལ་བརྟེན་ནས་བསྒྲུབ་སྙམ་ན། ཁྱད་དུ་གསོད་པའི་གཉེན་པོར་གུས་པ་ལ་སྦྱར་བ་དང་། བསྒྲུབ་པར་བྱ་བའི་ཐབས་སྦྱོར་བ་བག་ཡོད་ལ་སྦྱོར་བ་གཉིས་ཀྱི་དང་པོ་ནི། ཐོབ་པར་དཀའ་བའི་དལ་འབྱོར་ཐོབ་ཅིང་སངས་རྒྱས་ཀྱི་བསྟན་པ་དང་མཇལ་ནས་བསྙེན་པར་རྫོགས་པའི་སྡོམ་པ་ཐོབ་པས་གུས་པས་སྦྱོར་བའི་བརྩོན་འགྲུས་ཀྱིས་རྗེས་སུ་བསྒྲུབ་པ་ལྷུར་ལོངས་ཤིག་ཅེས་འདོམས་པ་ནི། གུས་པ་ལ་ཡང་ངེས་པར་སྦྱར་བར་བྱའོ་ཞེས་སོ། །གཉིས་པ་ནི། བག་ཡོད་པ་ལ་བརྟེན་ནས་བསྒྲུབ་པས་བག་ཡོད་པར་གྱིས་ཤིག་ཅེས་འདོམས་པ་ནི། བསྒྲུབ་པར་བྱ་བ་ཐབས་བརྗོད་པ་དང་བཅས་པ་ལ་ཡང་ངོ་ཞེས་གསུངས་སོ། །ལྔ་པ་ནི། བཅུ་གཅིག་པོ་འདི་ཙམ་ཞིག་འདིར་སྨོས་པ་ལ་རྒྱུ་མཚན་ཡོད་དེ། འདི་ཙམ་གྱིས་འདུལ་བ་རྒྱས་པའི་དོན་མདོར་བསྡུས་བརྗོད་པ་དེ་འགྲུབ་པའི་ཕྱིར་རོ།། ༈ །།གཉིས་པ་མི་ཉམས་པར་བསྲུང་བའི་ཐབས་ལ་གཉིས་ཏེ། གནས་དང་གནས་པའི་ཚུལ་ཁྲིམས་དང་། གནས་དང་གནས་པའི་མཚན་ཉིད་དོ། །དང་པོ་ནི། གནས་པས་གནས་ལ་མ་ཞུས་པར་བྱ་བ་མི་བྱའོ་ཞེས་སོགས་སོ། །གཉིས་པ་ལ། བཅས་པའི་སྐབས་ནས་འབྱུང་བ་དང་། རྗེས་བཅས་ཀྱི་སྐབས་ནས་འབྱུང་བ་གཉིས། དང་པོ་ལ་གཉིས་ཏེ། གཞུང་གི་དོན་དང་། དཀའ་བའི་གནས་ལ་དཔྱད་པའོ། །དང་པོ་ལ། ལྔ་ཕྲུགས་ཉི་ཤུ་རྩ་གཅིག་སྟེ། ལུང་བར་སྡོམས་ལས། ལོ་བཅུ་ལོན་དང་འཛིན་དང་མཁས། །རིགས་དང་གསལ་དང་འཛིན་འཇུག་དང་། །སློབ་དང་སློབ་འཇུག་རྣམ་པ་གཉིས། །ཕུན་སུམ་ཚོགས་གཉིས་རྣམ་པ་གསུམ། །སློབ་དང་མི་སློབ་བྱུང་ཤེས་དང་། །གནས་འཆའ་འཆར་འཇུག་ལྟུང་བ་ཤེས། །ལྷོ་ཡི་རི་ལ་རྒྱུ་བ་ཡི། །སྡེ་ཚན་ཡང་དག་བསྡུས་པ་ཡིན། །ཞེས་གསུངས་ཏེ། བསྡུ་ན་གཉིས་ཏེ། བཙུན་པ་བརྟན་པའི་ཡན་ལག་དང་། མཁས་ཤིང་ཕན་འདོགས་པའི་ཡན་ལག་གོ །དང་པོ་ནི། གནས་པས་གནས་ལ་མ་ཞུས་པར་བྱ་བ་མི་བྱའོ་ཞེས་བཤད་ན། གནས་དང་གནས་པའི་མཚན་ཉིད་ཇི་ལྟ་བུ་ཞེ་ན། དེ་འཆད་ཅེས་པའམ། ཡང་ན་དེ་ལྟར་བཤད་ན་བསྙེན་པར་རྫོགས་ནས་ལོ་ཇི་ཙམ་ནས་གཞན་གྱི་མཁན་པོ་སོགས་གསུམ་བྱར་རུང་ཞེ་ན། བསྙེན་པར་རྫོགས་ནས་སྡོམ་རྒྱུན་བར་མ་ཆད་དུ་ལོ་བཅུ་མ་ལོན་པར་གཞན་གྱི་རབ་ཏུ་བྱུང་བ་དང་བསྙེན་པར་རྫོགས་པའི་མཁན་པོ་ཉིད་དང་། གཞན་གྱི་གནས་མེད་ཀྱི་ཉེས་པ་འགོག་པའི་གནས་ཀྱི་བླ་མ་ཉིད་དང་། རང་ཉིད་ཀྱང་གནས་ཀྱི་བླ་ལ་མ་བརྟེན་པར་འདུག་པར་མི་བྱ་སྟེ། དེ་གསུམ་བྱེད་དུ་རུང་བའི་བཙུན་པ་བརྟན་པའི་ཡན་ལག་མ་ཚང་བ་ཡིན་པའི་ཕྱིར། དེས་ན་གསུམ་པོ་དེ་ནུས་པ་ལ་བརྟན་པའི་ཡན་ལག་ཏུ་ལོ་བཅུ་ལོན་པ་དགོས་ལ། མ་ལོན་པ་ནི་གནས་པའི་རིགས་ཡིན་པར་དོན་གྱིས་བསྟན་ནོ། །གཉིས་པ་ལ་བསྟན་བཤད་གཉིས་ལས། དང་པོ་ནི། འོ་ན་བསྙེན་པར་རྫོགས་ནས་ལོ་བཅུ་ལོན་པ་ཙམ་གྱིས་མཁན་སོགས་གསུམ་པོ་བྱར་རུང་ངམ་ཞེ་ན། ལོ་བཅུ་ལོན་ཀྱང་འོག་ནས་འབྱུང་བའི་ལྔ་ཚན་ལྷན་ཅིག་ཏུ་སྦྱར་བ་ཉི་ཤུ་རྩ་གཅིག་དག་ལས་ལྷན་ཅིག་སྦྱར་བ་གང་དང་ཡང་མི་ལྡན་པས་ནི་གཞན་གྱི་མཁན་སོགས་གསུམ་པོ་བྱར་རུང་བ་མ་ཡིན་ཏེ། དེ་གསུམ་བྱར་རུང་བའི་མཁས་པའི་ཡན་ལག་མ་ཚང་བའི་ཕྱིར། གཉིས་པ་ལ་བཞི་སྟེ། སྡེ་སྣོད་གཉིས་ཤེས་པའི་ཡོན་ཏན་དང་། སྡེ་སྣོད་གསུམ་ཤེས་པའི་དང་། དགེ་སྦྱོང་ཚུལ་གྱིས་དང་། འདུལ་བའི་སྡེ་སྣོད་ཤེས་པའི་ཡོན་ཏན་ནོ། །དང་པོ་ནི། ལྷན་ཅིག་སྦྱར་བ་དེ་རྣམས་གང་ཡིན་ཞེ་ན། ནད་གཡོག་རང་གི་བྱེད་དམ་གཞན་བྱེད་དུ་འཇུག་ནུས་པ། འགྱོད་པ་བསལ་བ་རང་གིས་བྱེད་དམ་བྱེད་དུ་འཇུག་ནུས་པ། སྡིག་པ་ཅན་གྱི་ལྟ་བའི་རྣམ་པ་སྤང་བ་རང་གིས་བྱེད་དམ་བྱེད་དུ་འཇུག་ནུས་པ། གནས་མངོན་པར་མི་དགའ་བ་འདོར་བ་རང་གིས་བྱེད་དམ་བྱེད་དུ་འཇུག་ནུས་པ་སྟེ། བཞི་པོ་དེའི་སྟེང་དུ་ལོ་བཅུ་ལོན་པ་བསྣན་པའི་ལྔ་པ་དེ་ནི་ལྔ་ཚན་དང་པོའོ། །དེ་ཡང་འབྲས་བུ་ལ་གཞག་ན། སྡུག་བསྔལ་ལ་ཇི་མི་སྙམ་པའི་བཟོད་པ་དང་ལྡན་པའི་སྒོ་ནས་ནད་གཡོག་རང་གི་བྱེད་དམ་བྱེད་དུ་འཇུག་ནུས་པ། འདུལ་བ་ཤེས་པའི་སྒོ་ནས་ལྟུང་བ་བྱུང་བ་ཡིད་ལ་གཅགས་པའི་འགྱོད་པ་བསལ་བ་རང་གིས་བྱེད་དམ་བྱེད་དུ་འཇུག་ནུས་པ། མངོན་པར་ཤེས་པའི་སྒོ་ནས་སྡིག་པ་ཅན་གྱི་ལྟ་བའི་རྣམ་པ་སྤང་བ་རང་གིས་བྱེད་དམ་བྱེད་དུ་འཇུག་ནུས་པ། བསམ་པ་ཤེས་པའི་སྒོ་ནས་སློབ་མ་དེ་གནས་སམ་ཡུལ་མངོན་པར་མི་དགའ་བ་འདོར་བ་དག་ལ་རང་གི་བྱེད་དམ་གཞན་བྱེད་དུ་འཇུག་ནུས་པའོ། །གཉིས་པ་ལ་གཉིས་ཏེ། ཡན་ལག་ཐུན་མོང་བ་དང་། ཐུན་མོང་མ་ཡིན་པའོ། །དང་པོ་ནི། ལྔ་པ་ལྷག་མ་རྣམས་ཀྱི་ཡན་ལག་གང་ཞེ་ན། སློབ་པ་ཉིད་ཅེས་པ་ཡན་ཆད་དངོས་སུ་ལྔ་པ་ཚང་བ་མ་ཡིན་པ་རྣམས་ལ་ཚུལ་ཁྲིམས་དང་ལྡན་པ་ཉིད་དང་། མང་དུ་ཐོས་པ་ཉིད་ཡན་ལག་ཏུ་སྦྱར་རོ། །དེ་ལ་ཚུལ་ཁྲིམས་དང་ལྡན་པ་ནི་བསམ་བཞིན་དུ་ཉེས་བྱས་ཙམ་ཡང་མི་བྱེད་པ་ཡིན་ལ། མང་དུ་ཐོས་པ་ནི་ལྔ་པ་དེའི་གཞི་འདིང་ལ་ནང་པའི་སྡེ་སྣོད་མང་དུ་ཐོས་པ་ཡོད་པ་ཡིན་ན། ཕྱི་རོལ་པའི་བསྟན་བཅོས་མང་དུ་ཐོས་པ་ལ་བྱེད་ལ། ནང་པའི་སྡེ་སྣོད་མང་དུ་ཐོས་པ་ཡོད་པ་མ་ཡིན་ན། ནང་པའི་སྡེ་སྣོད་མང་དུ་ཐོས་པ་ཉིད་ལ་བྱེད་དོ། །གཉིས་པ་ལ་གཉིས་ཏེ། ཚིག་དོན་གཉིས་ཀ་ཤེས་པའི་དང་། དོན་ཤེས་པའི་ཡོན་ཏན་ནོ། །དང་པོ་ལ་རང་འཛིན་པ་དང་། གཞན་འཛིན་དུ་འཇུག་པ་གཉིས་ལས། དང་པོ་ནི། དེ་གཉིས་གང་དང་སྦྱོར་ཞེ་ན། སྡེ་སྣོད་མངོན་པར་ཤེས་པ་ཉིད་དོ་ཞེས་ཏེ། མདོ་སྡེ་དང་། འདུལ་བ་དང་། མངོན་པའི་སྡེ་སྣོད་གསུམ་མངོན་པར་ཤེས་པ་སྟེ། དེ་གསུམ་ཀ་ལ་འཛིན། མཁས། རིག་གསལ་བཞི། ཚུལ་ལྡན་མང་ཐོས་གཉིས་སྦྱར་བས་ལྔ་པ་བཞི་སྟོན་ནོ། །དེ་ཡང་འཛིན་པ་ནི་སྡེ་སྣོད་གསུམ་གྱི་ཚིག་དོན་མི་བརྗེད་པར་འཛིན་པ། མཁས་པ་ནི་སྡེ་སྣོད་གསུམ་ཕན་ཚུན་འབྲེལ་བས་འདྲེས་པར་གནས་པ་ལ་སོ་སོར་འབྱེད་ནུས་པ། རིག་པ་ནི་སྡེ་སྣོད་གསུམ་པོ་དེ་ཚད་མ་གསུམ་དང་མི་འགལ་བར་རྩོམ་ནུས་པ། གསལ་བ་ནི་སྡེ་སྣོད་གསུམ་པོ་དེ་ལུང་རིགས་དང་སྦྱར་ནས་གཞན་ལ་གསལ་བར་སྟོན་ནུས་པའོ། །གཉིས་པ་ནི། དེ་དག་འཛིན་དུ་འཇུག་ནུས་པ་ཉིད་དོ་ཞེས་ཏེ། མདོ་སྡེ་འཛིན་དུ་འཇུག་ནུས། འདུལ་བ་འཛིན་དུ་འཇུག་ནུས། མ་མོ་འཛིན་དུ་འཇུག་ནུས། དེའི་སྟེང་དུ་ཚུལ་ལྡན་མང་ཐོས་གཉིས་བསྣན་པའི་ལྔ་པ་དེ་ནི་ལྔ་ཚན་དྲུག་པའོ། །དེ་ལྟར་ན་འདུལ་བ་ལ་གནས་པ་མ་ཚང་བར་འགྱུར་རོ་ཞེ་ན། སྐྱོན་མེད་དེ། སྡེ་སྣོད་གསུམ་པོ་དེ་རང་གིས་བསྟན་པའི་སྒོ་ནས་གཞན་འཛིན་དུ་འཇུག་ནུས་པ་ཉིད་ཡིན་པའི་ཕྱིར་རོ། །གཉིས་པ་དོན་ཤེས་པའི་ཡོན་ཏན་ལ་བཞི་སྟེ། བསླབ་པ་གསུམ་ཤེས་པའི་ཡོན་ཏན། ཚུལ་ཁྲིམས་ཤེས་པའི་ཡོན་ཏན། ཕུན་ཚོགས་གཉིས་ཀྱི་ཡོན་ཏན། ཚོགས་སྦྱོར་གཉིས་ཀྱི་ཡོན་ཏན་ནོ། །དང་པོ་ལ་གཉིས་ཏེ། རང་སློབ་པ་དང་། གཞན་སློབ་ཏུ་འཇུག་པའི་ཡོན་ཏན་ནོ། །དང་པོ་ནི། ལྷག་པའི་ཚུལ་ཁྲིམས་ལ་སློབ། ལྷག་པའི་སེམས་ལ་སློབ། ལྷག་པའི་ཤེས་རབ་ལ་སློབ་པ་ཉིད་དེ། དེའི་སྟེང་དུ་ཡན་ལག་ཐུན་མོང་བ་གཉིས་བསྣན་པའི་ལྔ་པ་དེ་ནི་ལྔ་ཚན་བདུན་པའོ། །དེ་ལ་ལྷག་པའི་ཚུལ་ཁྲིམས་ལ་སློབ་པ་ནི་འདུལ་བར་གཏོགས་པའི་བསླབ་པའི་གཞི་མཐའ་དག་ལ་སློབ་པ་དང་། ལྷག་པའི་སེམས་ནི་བསམ་གཏན་བཞིར་གཏོགས་པའི་སེམས་ལ་སློབ་པ་དང་། ལྷག་པའི་ཤེས་རབ་ཅེས་པ་ནི་ལམ་བདེན་ལ་སློབ་པའོ། །གཉིས་པ་ནི། བསླབ་པ་གསུམ་པོ་དེ་ལ་རང་སློབ་པར་མ་ཟད། དེའི་སྟེང་དུ་གཞན་ལྷག་པའི་ཚུལ་ཁྲིམས་ལ་སློབ་ཏུ་འཇུག་ནུས། ལྷག་པའི་སེམས་ལ་སློབ་ཏུ་འཇུག་ནུས། ལྷག་པའི་ཤེས་རབ་ལ་སློབ་ཏུ་འཇུག་ནུས་པ། དེའི་སྟེང་དུ་ཡན་ལག་ཐུན་མོང་བ་གཉིས་བསྣན་པའི་ལྔ་པ་དེ་ནི་ལྔ་ཚན་བརྒྱད་པའོ། །གཉིས་པ་ནི། བསླབ་པ་གསུམ་ལ་སློབ་པ་དང་སློབ་ཏུ་འཇུག་ནུས་པའི་ལྔ་པ་གཉིས་སུ་ཕྱེ་བ་དེ་བཞིན་དུ་འདིར་ཡང་ལྔ་ཚན་གཉིས་སྦྱར་རོ། །ཇི་ལྟར་ཞེ་ན། ལྷག་པའི་སྤྱོད་པ་ལ་སློབ། ལྷག་པའི་འདུལ་བ་ལ་སློབ། ལྷག་པའི་སོ་སོ་ཐར་པ་ལ་སློབ། དེའི་སྟེང་དུ་ཚུལ་ལྡན་མང་ཐོས་གཉིས་བསྣན་པའི་ལྔ་པ་དེ་ནི་ལྔ་ཚན་དགུ་པའོ། །གསུམ་པོ་དེ་ལ་སློབ་ཏུ་འཇུག་ཀྱང་ནུས་པའི་སྟེང་དུ་ཚུལ་ལྡན་མང་ཐོས་གཉིས་བསྣན་པའི་ལྔ་པ་དེ་ནི་ལྔ་ཚན་བཅུ་པའོ། །ལྷག་པའི་སྤྱོད་པ་ནི་བསྟན་བཅོས་ནས་བཤད་པའི་འགྲོ་འཆག་ཉལ་འདུག་གི་སྤྱོད་པ། ལྷག་པའི་འདུལ་བ་ནི་ལུང་སྡེ་བཞི་ནས་བཤད་པའི་བསླབ་པ། ལྷག་པའི་སོ་སོར་ཐར་པ་ནི་རྩ་བའི་ལུང་སོ་སོར་ཐར་པ་ནས་བཤད་པའི་བསླབ་པའི་གཞི་རྣམས་ལ་སློབ་པ་ཉིད་དོ། །གསུམ་པ་ཕུན་ཚོགས་གཉིས་ཀྱི་ཡོན་ཏན་ལ་གཉིས་ལས། ཕུན་ཚོགས་དང་པོ་ནི་དད་པ་ཕུན་ཚོགས། ཚུལ་ཁྲིམས་ཕུན་ཚོགས། ཐོས་པ་ཕུན་ཚོགས། གཏོང་བ་ཕུན་ཚོགས། ཤེས་རབ་ཕུན་སུམ་ཚོགས་པའི་ལྔ་ཚན་འདི་ནི་ལྔ་ཚན་བཅུ་གཅིག་པའོ། །དེ་ལ་དད་པ་ཕུན་སུམ་ཚོགས་པ་ནི་དྭང་བའི་དད་པ་དང་། འདོད་པའི་དད་པ་དང་། ཡིད་ཆེས་པའི་དད་པ་ཕུན་སུམ་ཚོགས་པ་སྟེ་ཕྱིར་ནུར་བ་མེད་པའི་མཚན་ཉིད་ཅན་ནོ། །ཚུལ་ཁྲིམས་ཕུན་སུམ་ཚོགས་པ་ནི་བཅས་རང་གི་ཉེས་པས་མ་གོས་པའི་ཚུལ་ཁྲིམས་སོ། །ཐོས་པ་ནི་འདུལ་བ་ཐོས་པ། གཏོང་བ་ནི་མ་ཆགས་པར་གཏོང་བའོ། །ཤེས་རབ་ནི་ཆོས་རབ་ཏུ་རྣམ་པར་འབྱེད་པའི་ཤེས་རབ་བོ། །ཕུན་ཚོགས་གཉིས་པ་ནི་ཀྱང་ཞེས་པ་ཕུན་ཚོགས་གོང་མ་ལ་བསྙེགས་པས་ཚུལ་ཁྲིམས་ཕུན་ཚོགས། ཏིང་ངེ་འཛིན་ཕུན་ཚོགས། ཤེས་རབ་ཕུན་ཚོགས། རྣམ་པར་གྲོལ་བ་ཕུན་ཚོགས། རྣམ་གྲོལ་དེ་ཤེས་པ་དང་མཐོང་བ་ཕུན་སུམ་ཚོགས་པའི་ཡན་ལག་ལྔ་པ་གཅིག་ཏུ་སྦྱར་བ་དེ་ནི་ལྔ་ཚན་བཅུ་གཉིས་པའོ། །དེ་ཡང་ཚུལ་ཁྲིམས་ནི་དགེ་སློང་གི་རྒྱུད་ཀྱི་ཚུལ་ཁྲིམས། ཏིང་ངེ་འཛིན་ནི་མི་སློབ་པའི་རྒྱུད་ཀྱི་ཟག་པ་མེད་པའི་ཏིང་ངེ་འཛིན། ཤེས་རབ་ནི་དེའི་རྒྱུད་ཀྱི་སྡུག་ཀུན་དང་ལམ་བདེན་ལ་དམིགས་པའི་ཟག་མེད་ཀྱི་ཤེས་རབ་བོ། །རྣམ་པར་གྲོལ་བ་ནི་དེའི་རྒྱུད་ཀྱི་སྤང་བྱ་མཐའ་དག་ལས་གྲོལ་བའི་རྣམ་གྲོལ་ལོ། །རྣམ་གྲོལ་དེ་ཤེས་པ་ནི་འགོག་བདེན་ལ་དམིགས་པའི་ཟད་མི་སྐྱེ་ཤེས་པ། དེ་མཐོང་བ་ནི་འགོག་བདེན་ལ་དམིགས་པའི་མི་སློབ་པའི་ཡང་དག་པའི་ལྟ་བའོ། །བཞི་པ་ལ་གཉིས་ཏེ། ཡན་ལག་ཐུན་མོང་བ་དང་། ཐུན་མོང་མ་ཡིན་པའོ། །དང་པོ་ནི། སློབ་པ་ཉིད་ཡན་ཆད་ལྔ་པ་མ་ཚང་བ་རྣམས་ལ་ཚུལ་ལྡན་མང་ཐོས་གཉིས་བསྣན་པར་མ་ཟད་བརྩོན་འགྲུས་རྩོམ་པ་ཉིད་དང་ཤེས་རབ་དང་ལྡན་པ་ཉིད་དང་ཡང་སྦྱར་བས་ཐུན་མོང་གི་ཡན་ལག་བཞིའོ། །དེ་ལ་བརྩོན་འགྲུས་རྩོམ་པ་ཉིད་ནི་སྡིག་པ་མི་དགེ་བ་སྐྱེས་པ་སྤོང་བ་དང་། མ་སྐྱེས་པ་མི་བསྐྱེད་པའི་ཕྱིར་དང་། གཉེན་པོ་དགེ་བའི་ཆོས་མ་སྐྱེས་པ་བསྐྱེད་པའི་ཕྱིར་དང་། སྐྱེས་ཟིན་འཕེལ་བའི་ཕྱིར་དུ་བརྩོན་འགྲུས་རྩོམ་པའོ། །ཤེས་རབ་དང་ལྡན་པ་ནི་རྒྱུ་རྐྱེན་ཤེས་ཤིང་གཅིག་ལས་མང་དུ་སྤྲོ་ནུས་པ་དང་ཕྱིས་འབྱུང་བ་སྔ་ནས་ཤེས་པ་དང་ལྡན་པའོ། །གཉིས་པ་ནི། དེ་གང་དང་སྦྱོར་ཞེ་ན། དྲན་པ་དང་ལྡན་པ་གཞིར་བྱས་ཏེ་དེའི་སྟེང་དུ་ཚུལ་ལྡན་མང་ཐོས་གཉིས། བརྩོན་འགྲུས་རྩོམ་ཤེས་གཉིས་ཏེ་བཞི་བསྣན་པའི་ལྔ་པ་དེ་ནི་ལྔ་ཚན་བཅུ་གསུམ་པའོ། །ནང་དུ་ཡང་དག་པར་གཞག་པ་གཞིར་བྱས་ལ་དེའི་སྟེང་དུ་སྔར་གྱི་བཞི་པོ་དེ་བསྣན་པ་དེ་ནི་ལྔ་ཚན་བཅུ་བཞི་པ་དང་། མཉམ་པར་གཞག་པ་གཞིར་བཟུང་ནས་དེའི་སྟེང་དུ་སྔར་གྱི་བཞི་པོ་དེ་བསྣན་པའི་ལྔ་པ་དེ་ནི་ལྔ་ཚན་བཅོ་ལྔ་པའོ། །དེ་ལ་དྲན་པ་དང་ལྡན་པ་ནི་སྔར་བཟུང་ཟིན་གྱི་དོན་མི་བརྗོད་པར་འཛིན་ནུས་པའི་དྲན་པ་དང་ལྡན་པ་དང་། ནང་དུ་ཡང་དག་པར་གཞག་པ་ནི་ལུས་འདུ་འཛི་ལས་དབེན། སེམས་མི་དགེ་བའི་རྣམ་རྟོག་ལས་དབེན་པ་དང་། མཉམ་པར་གཞག་པ་ནི་སེམས་རྩེ་གཅིག་ཏུ་དམིགས་པ་ལ་འཇོག་ནུས་པའོ། །གསུམ་པ་དགེ་སྦྱོང་ཚུལ་གྱི་ཡོན་ཏན་ལ། སློབ་པ་དང་མི་སློབ་པ་གཉིས་ལས། དང་པོ་ནི། སློབ་པའི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་གྲོལ་དེ་ཤེས་མཐོང་གི་ཡན་ལག་ལྔ་ཚང་བ་དེ་ནི་ལྔ་ཚན་བཅུ་དྲུག་པའོ། །དེ་ཡང་འབྲས་བུ་ཕྱི་མ་ཐོབ་ཕྱིར་དུ་སློབ་པས་ན་སློབ་པ་ཉིད་ཡིན་ལ། དེའི་ཚུལ་ཁྲིམས་ནི་སློབ་པའི་རྒྱུད་ཀྱི་ཟག་མེད་ཀྱི་སྡོམ་པ་དང་། ཏིང་ངེ་འཛིན་ནི་དེའི་རྒྱུད་ཀྱི་ཟག་མེད་ཀྱི་ཏིང་ངེ་འཛིན་དང་། ཤེས་རབ་ནི་དེའི་རྒྱུད་ཀྱི་སྡུག་ཀུན་དང་ལམ་བདེན་ལ་དམིགས་པའི་ཟག་མེད་ཀྱི་ཤེས་རབ་དང་། རྣམ་པར་གྲོལ་བ་ནི་དེའི་རྒྱུད་ཀྱི་སྤང་བྱ་ཕྱོགས་གཅིག་ལས་གྲོལ་བའི་རྣམ་གྲོལ་དང་། དེ་ཤེས་པ་ནི་འགོག་བདེན་ལ་དམིགས་པའི་ཆོས་ཤེས་དང་རྗེས་ཤེས་དང་། བར་ཆད་མེད་ལམ་ལས་གཞན་པའི་ཁྱད་པར་ཅན་གྱི་ལམ་མོ། །དེ་མཐོང་བ་ནི་འགོག་བདེན་ལ་དམིགས་པའི་ཆོས་བཟོད་དང་། རྗེས་བཟོད་དང་། དེ་འདྲེན་པར་བྱེད་པའི་སྦྱོར་བའི་ལམ་དང་བར་ཆད་མེད་པའི་ལམ་མོ། །གཉིས་པ་ནི། འབྲས་བུ་ཕྱི་མ་ཐོབ་པའི་ཕྱིར་དུ་མི་སློབ་པས་ན་མི་སློབ་པ་ཉིད་དེ། དེའི་རྒྱུད་ཀྱི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། དེ་ཤེས་མཐོང་གི་ཡན་ལག་ལྔ་ཚང་བ་དེ་ནི་ལྔ་ཚན་བཅུ་བདུན་པའོ། །དེ་ལ་མི་སློབ་པའི་ཚུལ་ཁྲིམས་ནི་མི་སློབ་པའི་རྒྱུད་ཀྱི་ཟག་མེད་ཀྱི་སྡོམ་པ་ཡིན་ལ། གཞན་རྣམས་ཕུན་ཚོགས་འོག་མ་དང་འདྲའོ། །བཞི་པ་འདུལ་བ་ཤེས་པའི་ཡོན་ཏན་ལ་གསུམ་སྟེ། དོན་ཤེས་པའི་དང་། འཁོར་ལ་མ་ཆགས་པའི་དང་། ཚིག་དོན་གཉིས་ཀ་ཤེས་པའི་ཡོན་ཏན་ནོ། །དང་པོ་ནི། བྱུང་བ་མངོན་པར་ཤེས། བཅས་པ་མངོན་པར་ཤེས། རྗེས་སུ་བཅས་པ་མངོན་པར་ཤེས། བཀག་པ་མངོན་པར་ཤེས། གནང་བ་མངོན་པར་ཤེས་པའི་ཡན་ལག་ལྔ་ཚང་བ་དེ་ནི་ལྔ་ཚན་བཅོ་བརྒྱད་པའོ། །དེ་ཡང་བྱུང་བ་ནི་གླེང་གཞི། བྱེད་རྒྱུ། རྒྱུ་མཚན་དང་བཅས་པ་དང་། བཅས་པ་ནི་སྟོན་པའི་གསུང་གིས་མཚམས་དང་པོ་གཞག་པ་དང་། རྗེས་སུ་བཅས་པ་ནི་སྟོན་པའི་གསུང་གིས་མཚམས་དང་པོར་གཞག་པའི་གཞི་དེ་ལ་གསུང་གིས་མཚམས་གཉིས་པ་རྣམ་པར་གཞག་པ་དང་། བཀག་པ་ནི་སྲོག་ལ་བབས་ཀྱང་མི་བྱའོ་ཞེས་བཀག་པ་དང་། གནང་བ་ནི་གཞི་དེ་བྱས་ན་ཕན་ཡོན་ཡོད་ཅིང་མ་བྱས་ན་ཉེས་པ་མེད་པས་ཅི་དགར་གནང་བ་སྟེ། ཉི་མའི་སུམ་ཆ་བདེ་བ་མ་ཡིན་པ་ལ་ཕྱི་རོལ་པའི་བསྟན་བཅོས་བཀླག་པར་གནང་བ་ལྟ་བུའོ། །མངོན་པར་ཤེས་པ་ནི་གསལ་བར་ངེས་པའོ། །གཉིས་པ་ལ་ཡན་ལག་ཐུན་མོང་བ་དང་། ཐུན་མོང་མ་ཡིན་པ་གཉིས་ལས། དང་པོ་ནི། བར་དུ་གཅོད་པ་མངོན་པར་ཤེས་པ་དང་། བར་དུ་གཅོད་པ་མ་ཡིན་པར་མངོན་པར་ཤེས་པ་དང་། སྨྲ་བ་པོ་ཉིད་དང་། རྗེས་སུ་སྟོན་པ་ཉིད་དེ་བཞི་པོ་དེ་ཐུན་མོང་གི་ཡན་ལག་ཏུ་སྦྱར་རོ། །གཉིས་པ་ནི། བཞི་པོ་དེ་གཏན་དུ་གནས་འཆར་འཇུག་ནུས་པ་དང་སྦྱར་བའི་ལྔ་པ་དེ་ནི་ལྔ་ཚན་བཅུ་དགུ་པའོ། །ཡན་ལག་བཞི་པོ་དེ་རེ་ཞིག་གནས་འཆའ་ནུས་པ་དང་སྦྱར་བ་ནི་ལྔ་ཚན་ཉི་ཤུ་པའོ། །དེ་ལ་སྲོག་གཅོད་པ་ལ་སོགས་པ་ནི་བར་དུ་གཅོད་པ་ཡིན་པར་མངོན་པར་ཤེས་པ་དང་། གནང་བ་དང་བསྒྲུབ་པའི་བྱ་བ་ནི་བར་དུ་གཅོད་པ་མ་ཡིན་པ་མངོན་པར་ཤེས་པ་ཉིད་དང་། བླང་དོར་གྱི་གནས་གཞན་ལ་སྨྲ་བར་བྱེད་པ་པོ་ཉིད་དང་། གཞན་བླང་དོར་ལ་འགོད་པའི་སྒོ་ནས་སྤྲོ་བ་བསྐྱེད་ནུས་པ་ནི་རྗེས་སུ་སྟོན་པ་ཉིད་དང་། རང་གི་སློབ་མ་གཞན་ལ་གཏན་དུ་གནས་འཆར་འཇུག་ནུས་པ་ཉིད་དང་། རང་གི་སློབ་མ་རེ་ཞིག་གཞན་ལ་གནས་འཆར་འཇུག་ནུས་པ་ཉིད་དོ། །གསུམ་པ་ནི་ལྟུང་བ་མངོན་པར་ཤེས། ལྟུང་བ་མ་ཡིན་པ་མངོན་པར་ཤེས། ཡང་བ་མངོན་པར་ཤེས། ལྕི་བ་མངོན་པར་ཤེས། སོ་སོར་ཐར་པ་དང་རྒྱས་པ་ཐོན་པའི་ལྔ་པ་དེ་ནི་ལྔ་ཚན་ཉེར་གཅིག་པའོ། །དེ་ཡང་སྲོག་གཅོད་པ་ལ་སོགས་པ་ནི་ལྟུང་བ། གསོ་སྦྱོང་ལ་སོགས་པ་ནི་ལྟུང་བ་མ་ཡིན་པ་དང་། ཀུན་སློང་ཞན་པས་བྱས་པའི་ལྟུང་བ་ནི་ཡང་བ་དང་། ཀུན་སློང་དྲག་པོས་བྱས་པའི་ལྟུང་བ་ནི་ལྕི་བ་མངོན་པར་ཤེས་པ་དང་། རྩ་བའི་ལུང་སོ་སོ་ཐར་པ་ཁ་ཏོན་ཏུ་ཐོན་པ་དང་། རྒྱས་པ་ལུང་སྡེ་བཞི་ཁ་ཏོན་དུ་ཐོན་པ་ཉིད་དོ།། ༈ །།གཉིས་པ་དཀའ་བའི་གནས་ལ་དཔྱད་པ་ལ་དྲུག་སྟེ། ལོ་བཅུ་ལོན་པ་དང་པོར་བསྟན་པའི་དགོས་པ། ལྔ་ཕྲུགས་ཀྱི་བསྡུ་བ། རང་དབང་ཅན་ཡིན་མིན་གྱི་ཁྱད་པར། ལྔ་པ་ཁ་སྡུས་ཀྱིས་ཆོག་མི་ཆོག ལྔ་པ་ཉི་ཤུ་རྩ་གཅིག་ཚང་དགོས་མི་དགོས། ཡོན་ཏན་གྱི་ཆ་ཙམ་གྱིས་ཆོག་མི་ཆོག་དཔྱད་པའོ། །དང་པོ་ནི། དེ་ལ་དགོས་པ་ཡོད་དེ། མཁན་སོགས་གསུམ་པོ་བྱར་རུང་བའི་རྒྱུའི་གཙོ་བོ་ཡིན་པ་དང་། ལྔ་པ་ལྷག་མ་རྣམས་ཀྱི་ཡུལ་ཉིད་ཡིན་པར་བསྟན་པ་དང་། འདུལ་བ་ལ་གནས་པའི་དོན་ཉིད་ཀྱང་བསྟན་པ་དང་། ལྔ་པ་དང་པོའི་ཡན་ལག་བདེ་བླག་ཏུ་རྟོགས་པའི་ཆེད་ཡིན་པའི་ཕྱིར། དེ་ལྟར་ཡང་ཊཱི་ཀར། དེ་ལ་ལོ་བཅུ་ལོན་པ་ཉིད་འདི་ནི་ལྔ་པ་དང་པོའི་ཡན་ལག་ལྔ་པ་ཡིན་པར་རིག་པར་བྱ་སྟེ། འདུལ་བ་ལ་གནས་པའི་དོན་ཉིད་ཀྱང་བསྟན་པ་ཡིན་དེ་ལྔ་པ་ལྷག་མ་རྣམས་ཀྱི་ནི་ཡུལ་ཡིན་པར་སྟོན་ཏེ། གང་ལ་ལོ་བཅུ་ལོན་པ་ཉིད་དང་འདུལ་བ་ལ་གནས་པའི་དོན་ཉིད་གཉིས་པོ་དེ་དག་ཡོད་པ་དེས་ནི་མཁན་པོ་ཉིད་ལ་སོགས་པ་གསུམ་པོ་དག་ཀྱང་བྱ་སྟེ། འདི་ལྟར་དེ་ནི་མཁན་པོ་ཉིད་ལ་སོགས་པ་དག་གི་གཙོ་བོའི་རྒྱུ་ཡིན་པའི་ཕྱིར་རོ་ཞེས་དང་། དེའི་ཕྱིར་ལོ་བཅུ་ལོན་པ་ཉིད་དང་། འདུལ་བ་ལ་གནས་པའི་དོན་ཉིད་ནི་བཟླ་བར་བྱ་བ་མ་ཡིན་པའི་ཡན་ལག་ཡིན་ནོ། །དོན་འདི་བསྟན་པའི་ཕྱིར་དང་པོར་ལོ་བཅུ་ལོན་པ་སྨོས་སོ་ཞེས་སོ། །ལྔ་པ་ལྷག་མ་རྣམས་ཀྱི་ཡུལ་ཡིན་པར་བསྟན་ཞེས་པའི་དོན་ནི། ལྔ་པ་ལྷག་མ་དང་ལྡན་པ་རྣམས་ཀྱིས་མཁན་སོགས་གསུམ་པོ་བྱེད་པ་ལ་ལོ་བཅུ་ལོན་པ་གཞིར་གཟུང་དགོས་ཞེས་པའི་དོན་ཡིན་ནོ། །གཉིས་པ་ནི། ཁ་ཅིག་ན་རེ། ཉེར་གཅིག་པོ་དེ་ཡང་ལྔ་པ་ཁྱད་པར་ཅན་ཡིན་མིན་གཉིས་སུ་འདུ་ལ། དེ་ཡང་སྡེ་སྣོད་གསུམ་ཤེས་པའི་ཡོན་ཏན་ནམ། འཕགས་རྒྱུད་ཀྱི་ལམ་ཡན་ལག་ཏུ་ཡོད་པ་ནི་ཁྱད་པར་ཅན་དང་། དེ་ལས་གཞན་པ་ནི་ཁྱད་པར་ཅན་མ་ཡིན་པའི་ལྔ་པ་ཡིན་ཞིང་། ཁྱད་པར་ཅན་མ་ཡིན་པའི་མཚན་གཞི་ནི་བྱུང་བཅས་ཀྱི་ལྔ་པ་སོགས་ཕྱི་མ་བཞིའོ་ཞེས་ཟེར། མཚོ་་་་་་ཁ་ཅིག་ཚིག་དོན་གཉིས་ཀ་ཤེས་པ་ཡན་ལག་ཏུ་ཡོད་པ་ནི་ཁྱད་པར་ཅན་དང་། ཚིག་དོན་རེ་རེ་ཤེས་པ་ཡན་ལག་ཏུ་ཡོད་པ་ནི་ཁྱད་པར་ཅན་མ་ཡིན་པ་ཡིན་ལ། ལྟུང་ཤེས་ཀྱི་ལྔ་པ་ནི་ཁྱད་པར་ཅན་མ་ཡིན་པའོ་ཞེས་ཟེར། དེ་གཉིས་ཀ་མི་འཐད་དེ། ལྔ་པ་ཁྱད་པར་ཅན་དང་ཁྱད་པར་ཅན་མ་ཡིན་པའི་ཐ་སྙད་གཞུང་ཁུངས་ཐུབ་གང་ལས་ཀྱང་མ་བཤད་པའི་ཕྱིར། རང་ལུགས་ལ། ལྔ་པ་རང་དབང་ཅན་ཡིན་མིན་གཉིས་སུ་འདུ་ལ། དང་པོ་ནི། ལྔ་པ་རང་ཉིད་དང་ལྡན་པར་འཇོག་པ་ལྔ་ཚན་གཞན་ལྡན་པ་ལ་མི་ལྟོས་པ་སྟེ་སྡེ་སྣོད་འཛིན་པའི་ལྔ་པ་ལྟ་བུའོ། །ལྔ་པ་རང་དབང་ཅན་མ་ཡིན་པ་ནི་རང་ཉིད་དང་ལྡན་པར་འཇོག་པ་ལྔ་ཚན་གཞན་ལ་ལྟོས་པའི་ལྔ་པ་སྟེ། འཛིན་འཇུག་གི་ལྔ་པ་ལྟ་བུའོ། །ལོ་བཅུ་ལོན་པ་དང་འདུལ་བ་ཤེས་པ་གཉིས་པོ་མཁན་སོགས་གསུམ་པོ་བྱེད་པའི་གཙོ་བོའི་རྒྱུར་མཚུངས་ན་སློབ་པ་དང་མི་སློབ་པའི་སྐབས་སུ་འདུལ་བ་ཤེས་པ་དེ་གང་གིས་བསྟན་ཞེ་ན། ལོ་བཅུ་ལོན་པས་བསྟན་པ་ཡིན་ཏེ། ལོ་བཅུ་ལོན་པའི་འཕགས་པ་ཡིན་ན་འདུལ་བ་ཤེས་པས་ཁྱབ་པའི་ཕྱིར་ཏེ། དེ་བསླབ་པ་ལ་གུས་པས་བསྙེན་པར་རྫོགས་ནས་ལོ་བཅུའི་བར་དུ་འདུལ་བ་ངེས་པར་སློབ་ཅིང་། དེ་ཙམ་གྱིས་འདུལ་བ་ཤེས་པར་ཡང་འགྱུར་བའི་ཕྱིར་དང་། བསྙེན་པར་རྫོགས་ནས་ལོ་བཅུའི་བར་དུ་ལྟུང་བས་མ་གོས་ན་འདུལ་བ་ཤེས་པར་གྲུབ་ལ། ལྟུང་བས་གོས་ན་འཕགས་ལམ་མི་ཐོབ་པའི་ཕྱིར་རོ། །ཊཱི་ཀར་དེ་ལ་ཉེས་པ་མེད་དེ། ལོ་བཅུ་ལོན་པ་ཉིད་ཅེས་སྨོས་པའི་ཕྱིར་ཏེ། འདི་ལྟར་དེ་གཉིས་ནི་འཕགས་པ་ཡིན་པས། ལོ་བཅུ་པོ་དག་ལ་འདུལ་བ་ལ་གདོན་མི་ཟ་བར་འབད་པ་ཡིན་པའི་ཕྱིར་ཞེས་སོ། །གསུམ་པ་ལ་གསུམ་སྟེ། ལྔ་པ་རང་དབང་ཅན་ཡིན་མིན་གྱི་ཁྱད་པར། ཡན་ལག་རང་དབང་ཅན་ཡིན་མིན་གྱི་ཁྱད་པར། གང་ཟག་རང་དབང་ཅན་ཡིན་མིན་གྱི་ཁྱད་པར་རོ། །དང་པོ་ནི། བཤད་ཟིན་ལ། དེའི་ཐ་སྙད་ནི་ཊཱི་ཀར་གཞན་དུ་ལྔ་པ་རང་དབང་ཅན་ཁོ་ནར་འགྱུར་ལ་ཞེས་པས་བསྟན་ནོ། །གཉིས་པ་ནི། ཁ་ཅིག་རང་གི་ལྔ་པའི་གཞི་འདིང་བྱེད་ཅིང་ལྔ་པ་གཞན་གྱི་ཁ་སྐོང་དུ་འགྲོ་བ་ནི་ཡན་ལག་རང་དབང་ཅན་གྱི་དོན་ཡིན་ཏེ། དཔེར་ན་ཕུན་ཚོགས་གོང་མའི་ཡན་ལག་ལྟ་བུའོ། །རང་གི་ལྔ་པའི་གཞི་འདིང་མི་བྱེད་པར་ལྔ་པ་གཞན་གྱི་ཁ་སྐོང་དུ་འགྲོ་བ་ནི་ཡན་ལག་རང་དབང་ཅན་མ་ཡིན་པ་སྟེ། དཔེར་ན་ཚུལ་ལྡན་མང་ཐོས་དང་བརྩོན་འགྲུས་རྩོམ་ཤེས་ལྟ་བུའོ་ཞེས་ཟེར་བ་མི་འཐད་དེ། གནས་དང་རེ་ཞིག་གི་གནས་ཤེས་པ་རྩ་འགྲེལ་ལ་བརྟེན་ནས། ཡན་ལག་རང་དབང་ཅན་ཡིན་མིན་གྱི་ཐ་སྙད་བྱེད་པ་གང་ཞིག དེའི་འགྲེལ་པར་དེ་ལྟར་མ་བཤད་པའི་ཕྱིར་ཏེ། གཏན་དུ་གནས་འཆར་འཇུག་ནུས་པ་དང་། རེ་ཞིག་གནས་འཆར་འཇུག་ནུས་པ་གཉིས་བསྡོམས་ནས་ཡན་ལག་གཅིག་ཏུ་མི་བྱ་བར་ཡན་ལག་རེ་རེ་བྱ་བའི་དོན་ལ་བཤད་པའི་ཕྱིར་ཏེ། ཊཱི་ཀར་དེ་ལ་གནས་དང་རེ་ཞིག་གི་གནས་ཞེས་བྱ་བ་ལ་དང་ཞེས་བྱ་བའི་སྒྲ་ནི་གནས་དང་རེ་ཞིག་གི་གནས་གཉིས་རང་དབང་ཡོད་པར་བསྟན་པའི་ཕྱིར་རོ། །འདི་སྐད་བསྟན་ཏེ། གནས་དང་རེ་ཞིག་གི་གནས་ཞེས་བྱ་བའི་ཡན་ལག་གཉིས་པོ་ནི་ལྔ་པ་གཅིག་ཏུ་གཞག་པར་མི་བྱའི། མདོ་སྔ་མར་བསྟན་མ་ཐག་པའི་ཡན་ལག་བཞི་དང་སོ་སོར་སྦྱར་ཏེ། ལྔ་པ་གཉིས་སུ་བྱའོ་ཞེས་བྱ་བའི་ཐ་ཚིག་གོ་ཞེས་གསུངས་པའི་ཕྱིར། རང་ལུགས་ནི། གནས་འཆར་འཇུག་ནུས་པ་ལྟ་བུ་ནི་ཡན་ལག་རང་དབང་ཅན་དང་། དེ་མཐོང་བའི་ཡན་ལག་དང་སོ་སོར་ཐར་པ་འདོན་པའི་ཡན་ལག་ལྟ་བུ་ནི་རང་དབང་ཅན་མ་ཡིན་པའོ། །གསུམ་པ་ནི། བརྟན་མཁས་ཀྱི་ཡོན་ཏན་དང་ལྡན་པ་ནི་གང་ཟག་རང་དབང་ཅན་དང་། མི་ལྡན་པ་ནི་རང་དབང་ཅན་མ་ཡིན་པའོ། །དེ་ལྟར་ཡང་མི་སློབ་པ་ཉིད་དོ་ཞེས་པའི་ཊཱི་ཀར་བཅོམ་ལྡན་འདས་ཀྱིས་ལོ་བཅུ་ལོན་པ་ཉིད་ཅེས་གསུངས་པ་ནི་རང་དབང་ཡོད་པར་བསྟན་པ་ཡིན་པས། གལ་ཏེ་དེ་གཉིས་ལ་འདུལ་བ་ལ་གནས་པའི་དོན་མེད་པར་གྱུར་ན་དེ་ཉིད་ཇི་ལྟར་རང་དབང་ཅན་དུ་འགྱུར་ཞེས་གསུངས་པའི་ཕྱིར། བཞི་པ་ཁ་བསྡུས་ཀྱི་ཆོག་མི་ཆོག་ནི། ཁ་ཅིག་ན་རེ་ཁ་བསྡུས་ཀྱིས་ཆོག་སྟེ། སུམ་བརྒྱ་པར། ཚུལ་ཁྲིམས་ལྡན་ཞིང་འདུལ་བའི་ཆོ་ག་ཤེས། །ནད་པར་སྙིང་བརྩེ་འཁོར་ནི་དག་པ་དང་། །ཆོས་དང་ཟང་ཟིང་ཕན་འདོགས་ཀྱིས་བརྩོན་པ། །དུས་སུ་འདོམས་པ་དེ་དག་བླ་མར་བསྔགས། །ཞེས་གསུངས་པའི་ཕྱིར་ཟེར་བ་མི་འཐད་དེ། འོ་ན་བསྙེན་པར་རྫོགས་ནས་ལོ་བཅུ་མ་ལོན་པར་མཁན་སོགས་གསུམ་བྱེད་རུང་བར་ཐལ། ལུང་དེར། ཚུལ་ཁྲིམས་དང་ལྡན་པ་སྨོས་ཀྱི་ལོ་བཅུ་ལོན་པ་མ་སྨོས་པའི་ཕྱིར། ཁྱབ་པ་ཁས་བླངས་སོ། །གཞན་ཡང་མཁན་སོགས་གསུམ་བྱེད་པ་ལ་ཁ་བསྡུས་ཀྱི་ཆོག་པའི་ཤེས་བྱེད་དུ་ལུང་འདི་འདྲེན་པ་མ་འབྲེལ་ཏེ། ལུང་དེས་ཡོན་ཏན་དེ་རྣམས་དང་ལྡན་ན་གནས་བླ་མ་བྱེད་རུང་བས་ཁྱབ་པར་མ་བསྟན་གྱི། གནས་བླ་མ་འཚོལ་བ་རྣམས་ཀྱིས་ཡོན་ཏན་དེ་རྣམས་དང་ལྡན་པ་བཙལ་བར་བྱ་ཞེས་བསྟན་པའི་ཕྱིར་རོ། །ལྔ་པ་ནི། མཁན་སོགས་གསུམ་བྱེད་པ་ལ་ལྔ་ཕྲུགས་ཉི་ཤུ་རྩ་གཅིག་ཚང་མི་དགོས་ཏེ། ལོ་བཅུ་ལོན་པའི་སྟེང་དུ་ལྔ་ཕྲུགས་གང་རུང་ཅིག་དང་ལྡན་པས་ཆོག་པའི་ཕྱིར་ཏེ། འོག་ནས་འབྱུང་བ་དག་ལས་ལྷན་ཅིག་སྦྱར་བ་གང་དང་ཡང་མི་ལྡན་པས་ནི་མ་ཡིན་ནོ་ཞེས་གསུངས་པའི་ཕྱིར་དང་། གང་ཟག་གཅིག་ལ་ཉི་ཤུ་རྩ་གཅིག་ཚང་བ་མི་སྲིད་པའི་ཕྱིར་ཏེ། སློབ་མི་སློབ་འགལ་བའི་ཕྱིར་རོ། །དྲུག་པ་ཡོན་ཏན་གྱི་ཆ་ཙམ་གྱིས་ཆོག་མི་ཆོག་ནི། བརྟན་མཁས་ཀྱི་ཆ་ཙམ་གྱིས་མི་ཆོག་སྟེ། གལ་ཏེ་ཆོག་ན་བསྙེན་པར་རྫོགས་ནས་ཞག་གཅིག་ཙམ་ལོན་པ་དང་། སོ་ཤིང་འདོར་ཤེས་པ་ཙམ་གྱིས་བརྟན་མཁས་ཀྱི་ཡོན་ཏན་དང་ལྡན་པར་འགྱུར་བའི་ཕྱིར་རོ། །བྱུང་བ་དང་བཅས་པ་དང་ཞེས་སོགས་ཀྱི་སྐབས་སུ། རྗེས་བཅས་ལ་དབྱེ་ན་དགུ་སྟེ། མཚན་ཉིད་མི་འདོར་བ་གསུམ་དང་། འདོར་བ་དྲུག་གོ །དང་པོ་ནི། དགག་པའི་རྗེས་སུ་དགག་པ་བཅས་པ། སྒྲུབ་པའི་རྗེས་སུ་སྒྲུབ་པ་བཅས་པ། གནང་བའི་རྗེས་སུ་གནང་བ་བཅས་པ་དང་གསུམ། དང་པོ་ནི། བཟང་བྱིན་གྱིས་མི་ཚངས་སྤྱོད་བྱས་པ་བཀག་པ་ལས་དེའི་རྗེས་སུ་པྲ་མོ་ལ་མི་ཚངས་སྤྱོད་བཀག་པ་དང་། གཉིས་པ་ནི། དབྱར་ཁས་བླང་པར་བྱའོ་ཞེས་བསྒྲུབས་ནས། དབྱར་སྔ་མའི་ཁས་ལེན་མ་གྲུབ་ན་དབྱར་ཕྱི་མ་ཁས་ལེན་དགོས་པར་བསྟན་པ་ལྟ་བུའོ། །གསུམ་པ་ནི། མཆིལ་ལྷྭམ་གནང་བའི་རྗེས་སུ་ཡུ་རིང་དང་ཡུ་ཕྱེད་གནང་བ་ལྟ་བུའོ། །གཉིས་པ་མཚན་ཉིད་འདོར་བ་དྲུག་ནི། དགག་པའི་རྗེས་སུ་སྒྲུབ་པ་དང་། དགག་པའི་རྗེས་སུ་གནང་བ། སྒྲུབ་པའི་རྗེས་སུ་དགག་པ། སྒྲུབ་པའི་རྗེས་སུ་གནང་བ། གནང་བའི་རྗེས་སུ་དགག་པ། གནང་བའི་རྗེས་སུ་སྒྲུབ་པ་བཅས་པའོ། །དང་པོ་ནི། ཕྱི་བཞིན་འབྲང་བའི་དགེ་སྦྱོང་མདུན་དུ་འགྲོ་བ་བཀག་པའི་རྗེས་སུ་ཉམས་ང་བ་ལ་སོགས་པའི་ཚེ་སྔོན་དུ་འགྲོ་བ་སྒྲུབ་པ་ལྟ་བུའོ། །གཉིས་པ་ནི། དུས་མ་ཡིན་པའི་ཁ་ཟས་བཀག་པའི་རྗེས་སུ་ནད་པ་ལ་གནང་བ་ལྟ་བུའོ། །གསུམ་པ་ནི། གསོ་སྦྱོང་བྱའོ་ཞེས་བསྒྲུབས་ནས་གནས་མཛེས་པ་འདོད་པས་གསོ་སྦྱོང་བྱ་བ་བཀག་པ་ལྟ་བུའོ། །བཞི་པ་ནི། ཚེས་བཅུ་བཞི་དང་བཅོ་ལྔ་ལ་ཆོས་བཤད་ཉན་བྱའོ་ཞེས་བསྒྲུབས་ནས་ནད་པས་དེ་མ་བྱས་ཀྱང་ཉེས་པ་མེད་པར་གནང་བ་ལྟ་བུའོ། །ལྔ་པ་ནི། མཆིལ་ལྷྭམ་གནང་བའི་རྗེས་སུ་སྒྲ་ཀྲོག་ཀྲོག་ཟེར་བ་བཀག་པ་ལྟ་བུའོ། །དྲུག་པ་ནི། ལམ་གྲོགས་དང་བཅས་ཏེ་ལམ་དུ་འགྲོ་བར་གནང་བའི་རྗེས་སུ་ལམ་དུ་གྲོགས་ན་ན་ནད་གཡོག་བྱེད་དགོས་སོ་ཞེས་སྒྲུབ་པ་ལྟ་བུའོ། །གཉིས་པ་རྗེས་བཅས་ཀྱི་སྐབས་ནས་འབྱུང་བ་ལ་གཉིས་ལས། དང་པོ་མཚན་ཉིད་མི་འདོར་བ་ནི་རང་ཉིད་གནས་ལ་བརྟེན་དགོས་ཤིང་གནས་དེ་བརྟན་མཁས་ཀྱི་ཡོན་ཏན་དང་ལྡན་པ་རང་ལས་རྒན་པ་མེད་ན་ཇི་ལྟར་བྱ་ཞེ་ན། རང་ལས་གཞོན་པ་བརྟན་མཁས་ཀྱི་ཡོན་ཏན་དང་ལྡན་པ་ལ་གནས་བཅའ་བར་བྱའོ། །དེ་ལ་གནས་པ་སློབ་མའི་བྱ་བ་ཐམས་ཅད་བྱ་དགོས་སམ་ཞེ་ན། བྱ་བ་གཞན་ཐམས་ཅད་ནི་དགོས་ལ། འདུད་པ་སྟེ་ཕྱག་ནི་བྱ་མི་དགོས་སོ། །གཉིས་པ་མཚན་ཉིད་འདོར་བ་ནི། བརྟན་མཁས་དང་མི་ལྡན་པའི་གཉུག་མར་གནས་པ་རྣམས་ཀྱིས་གནས་ཀྱི་བླ་མ་ལ་བརྟེན་དགོས་ན་ལམ་དུ་འགྲོ་བས་ཀྱང་དེ་ལྟར་དགོས་སམ་ཞེ་ན། བསྙེན་པར་རྫོགས་ནས་སྡོམ་རྒྱུན་བར་མ་ཆད་དུ་ལོ་ལྔ་ལོན་ཞིང་ལྷན་ཅིག་སྦྱར་བ་ཐ་མ་ལྟུང་ཤེས་ཀྱི་ལྔ་པ་དང་ལྡན་ན་གནས་མ་བཅས་པར་ལྗོངས་རྒྱུ་འགྲོ་བར་བྱར་རུང་ངོ་། །འོ་ན་ལོ་ལྔ་ལོན་པ་དང་ལྟུང་ཤེས་ཀྱི་ལྔ་པ་དང་ལྡན་པ་གང་གཙོ་བ་ཡིན་ཞེ་ན། གཉིས་ཀ་གཙོ་བ་ཡིན་ཏེ། ལོ་ལྔ་ལོན་པ་དང་ལྟུང་ཤེས་ཀྱི་ལྔ་པ་དང་ལྡན་པ་ལས་གཞན་དུ་མི་ལྡན་ན་དགྲ་བཅོམ་པ་སྔོན་གྱི་གནས་རྗེས་སུ་དྲན་པས་འདས་པ་རིག་པ་དང་། འཆི་འཕོ་བ་དང་སྐྱེ་བ་ཤེས་པས་མ་འོངས་པ་རིག་པ་དང་། ཟག་པ་ཟད་པ་ཤེས་པས་ད་ལྟར་བ་སྟེ་དུས་གསུམ་རིག་པ་ཡིན་ཡང་གནས་མ་བཅས་པར་ལྗོངས་རྒྱུར་འགྲོ་བར་མི་བྱའོ། །སྐབས་འདིར་ལོ་ལྔ་ལོན་ཞིང་ལྟུང་ཤེས་ཀྱི་ལྔ་པ་དང་ལྡན་པས་གནས་མ་བཅས་པར་ལྗོངས་རྒྱུར་རུང་བར་བཤད་པ་དེ་ངེས་གཟུང་ཡིན་ནམ་མཚོན་དོན་ཡིན་ཞེ་ན། ཁ་ཅིག་་་་་་ཤ མཚོན་དོན་ཡིན་ཏེ། གཞན་དུ་ན་བསྙེན་པར་རྫོགས་ནས་ལོ་ལྔ་ལོན་ཞིང་སྡེ་སྣོད་འཛིན་པའི་ལྔ་པ་དང་ལྡན་པའི་དགེ་སློང་དེས་གནས་ལ་མ་བརྟེན་པར་ལྗོངས་རྒྱུ་འགྲོར་མི་རུང་བར་ཐལ། དེ་ངེས་གཟུང་བའི་ཕྱིར། འདོད་ན། ཡོན་ཏན་ལྷག་པ་སྐྱོན་དུ་འགྱུར་ཏེ། ལོ་ལྔ་ལོན་ཞིང་ལྟུང་ཤེས་ཀྱི་ལྔ་པ་དང་ལྡན་པའི་དགེ་སློང་དེ་གནས་ལ་མ་བརྟེན་པར་ལྗོངས་རྒྱུར་འགྲོར་རུང་། ལོ་ལྔ་ལོན་ཞིང་སྡེ་སྣོད་འཛིན་པའི་ལྔ་པ་དང་ལྡན་པས་གནས་ལ་མ་བརྟེན་པར་དེ་ལྟར་མི་རུང་བ་ཡིན་པའི་ཕྱིར། ཞེས་གསུངས། གྲོ་་་་་་ཁ་ཅིག་མཚོན་དོན་ཡིན་ཏེ། ཐ་མ་ཞེས་སྨོས་པ་ནི་ལྔ་པ་དེ་ཉེ་བའི་དབང་དུ་བྱས་ནས་སྨོས་པ་ཡིན་ཏེ། དཔེར་ན་ཁྱིམ་ཚེས་ཉེ་བ་ནས་མེ་ལེན་ཞེས་པ་བཞིན་ནོ། །དེ་ལྟ་མ་ཡིན་ན། སྐབས་འདིར་དེ་བག་ཡངས་སུ་གནང་བ་མིན་པར་ཐལ། བསྙེན་པར་རྫོགས་ནས་ལོ་ལྔ་ལོན་ཞིང་ལྟུང་ཤེས་ཀྱི་ལྔ་པ་དང་ལྡན་པ་ནི་སྒྲུབ་པར་བཀའ་བའི་ཕྱིར་ཞེས་གསུང་། དང་པོ་མི་འཐད་དེ། ལྟུང་ཤེས་ཀྱི་ལྔ་པ་དང་ལྡན་པའི་སྡེ་སྣོད་འཛིན་པའི་ལྔ་པ་དང་ལྡན་པ་ཟེར་རམ། ལྟུང་ཤེས་ཀྱི་ལྔ་པ་དང་མི་ལྡན་པའི་སྡེ་སྣོད་འཛིན་པའི་ལྔ་པ་དང་ལྡན་པ་ཟེར་བ་ཡིན་བརྟག་གྲང་། དང་པོ་ལྟར་ན་འབྲེལ་མེད་ལ། གཉིས་པ་ལྟར་ན་འདོད་པ་ཡིན་ནོ། །གཉིས་པ་ཡང་མི་འཐད་དེ། དགེ་སློང་བསླབ་བྱིན་དེས་དགྲ་བཅོམ་ཐོབ་པ་ན་ཆད་ལས་ལས་གྲོལ་བར་འགྱུར་བ་དེས་མཚོན་ནས་ཕྱིར་འོང་སོགས་ཐོབ་པ་ན་ཆད་ལས་ལས་གྲོལ་བར་འགྱུར་བར་ཐལ། དེས་དགྲ་བཅོམ་ཐོབ་པ་ན་ཆད་ལས་ལས་གྲོལ་བ་དེ་བག་ཡངས་སུ་གནང་བ་གང་ཞིག ལྟུང་ཤེས་ཀྱི་ལྔ་པ་དང་ལྡན་པ་ལས་ཕྱིར་འོང་ཐོབ་པ་དཀའ་བ་ཡིན་པའི་ཕྱིར། དེས་ན་ངེས་གཟུང་ཡིན་ཏེ། མཚོན་དོན་ཡིན་ན་གཞན་དུ་ན་ཞེས་པའི་ཚིག་དོན་གྱིས་སྟོང་པའི་ཕྱིར་རོ།། ༈ །།གསུམ་པ་འགལ་རྐྱེན་བར་ཆད་ཀྱི་མཚན་ཉིད་ནི། རབ་ཏུ་བྱུང་བའི་ཕྱིར་ཉེ་བར་འོངས་པ་ལ་ཞེས་སོགས་ཏེ། དགོས་དོན་དང་། བསྡུས་དོན་གཉིས་ལས། དང་པོ་ནི། བར་ཆད་དྲི་བ་ལ་དགོས་པ་ཡོད་དེ། བར་ཆད་དྲིས་ནས་ཡོངས་སུ་དག་པར་མ་ཤེས་པར་བསྒྲུབ་བྱ་རབ་བྱུང་དང་བསྙེན་པར་རྫོགས་པར་བྱས་ན་རྒྱུད་དེ་ལ་སྡོམ་པ་མི་སྐྱེ་བའམ། སྐྱེས་ཀྱང་རྒྱུན་མི་གནས་པ་ལ་སོགས་པའི་སྒོ་ནས་བསྒྲུབ་བྱ་དེ་ལ་མི་ཕན་ཞིང་བསྟན་པ་ལ་གནོད། བྱེད་པ་པོ་ལ་ཉེས་བྱས་སུ་འགྱུར་བའི་ཕྱིར་དང་། བར་ཆད་དྲིས་ནས་ཡོངས་སུ་དག་པ་ལ་རབ་ཏུ་བྱུང་བ་སོགས་བྱས་ན། སྔར་ཇི་སྐད་བཤད་པ་ལས་བཟློག་སྟེ་འབྱུང་བ་ཡིན་པའི་ཕྱིར། གཉིས་པ་ལ་བཞི་སྟེ། ཡུལ་གང་ལ། རྟེན་གང་གིས། དངོས་པོ་གང་། ཚུལ་ཇི་ལྟར་འདྲི་བའོ། །དང་པོ་ནི། རབ་ཏུ་འབྱུང་བ་དང་བསྙེན་པར་རྫོགས་པར་འདོད་པའི་བསྒྲུབ་བྱ་ལའོ། །གཉིས་པ་ནི། འབྲས་བུའི་མིང་རྒྱུ་ལ་བཏགས་ཏེ་རབ་ཏུ་འབྱུང་བའི་ཚེ་མཁན་པོས་དང་། བསྙེན་པར་རྫོགས་པའི་ཚེ་གསང་སྟོན་གྱིས་ལྐོག་ཏུ་དང་། ལས་སློབ་ཀྱིས་དགེ་འདུན་གྱི་དབུས་སུ་འདྲིའོ། །གསུམ་པ་ལ་སྡོམ་པ་སྐྱེ་བའི་དང་། གནས་པའི་དང་། ཁྱད་པར་དུ་འགྲོ་བའི་དང་། མཛེས་པའི་བར་ཆད་དང་བཞི་ལས། དང་པོ་ནི། ངན་སོང་གསུམ། སྒྲ་མི་སྙན། མི་མ་ཡིན་པ། སྤྲུལ་པ་རྣམས་ནི་རྣམ་སྨིན་གྱི་སྒྲིབ་པ་ཅན་དང་། མཚམས་མེད་ལྔ་བྱས་པ། རྐུ་ཐབས་སུ་གནས་པ། མུ་སྟེགས་ཅན། མུ་སྟེགས་ཅན་ཞུགས་པ། དགེ་སློང་མ་སུན་ཕྱུང་བ། སྔོན་རབ་ཏུ་བྱུང་བ་རྣམས་ལས་ཀྱི་སྒྲིབ་པ་ཅན་དང་། ཟ་མ། མ་ནིང་། བླང་དོར་གཏན་མི་ཤེས་པའི་གླེན་ལྐུགས་དང་། ལོ་ཉི་ཤུ་མ་ལོན་པ་ལ་མ་ལོན་པར་ཤེས་པའམ་ཐེ་ཚོམ་ཟ་བ་ནི་སྐྱེ་བའི་བར་ཆད་དོ། །གཉིས་པ་ནི། ཕ་མ་དང་རྒྱལ་པོས་མ་གནང་བ་དང་། བྲན་དང་བུ་ལོན་ཅན་ནོ། །གསུམ་པ་ནི། མཛེ་དང་། འབྲས་དང་། ཕོལ་མིག་ལ་སོགས་པ་ནད་ཀྱི་རིགས་ཅན་རྣམས་སོ། །བཞི་པ་ནི། རིགས་ལ་སྐྱོན་ཆགས་པ་ལྷྭམ་མཁན། གདོལ་པ། གཡུང་མོ་སོགས་དང་། ལུས་ལ་སྐྱོན་ཆགས་པ་ལག་རྡུམ་རྐང་རྡུམ་ལ་སོགས་པ་ལྟ་བུ། དབྱིབས་ལ་སྐྱོན་ཆགས་པ་དང་། སྐྲ་སེར་དང་། སྐྲ་སེར་སྐྱ་ལ་སོགས་པ་མདོག་ལ་སྐྱོན་ཆགས་པའོ། །བཞི་པ་ཚུལ་ཇི་ལྟར་འདྲི་བ་ནི། འགལ་རྐྱེན་རྣམས་དགག་པའི་ཚུལ་དང་། མཐུན་རྐྱེན་རྣམས་བསྒྲུབ་པའི་ཚུལ་གྱིས་དྲི་བར་བྱའོ།། ༈ །།གཉིས་པ་ཕྲན་ཚེགས་ཀྱི་སྐབས་ནས་འབྱུང་བ་ལ། ཐུན་མོང་བའི་ཆོ་གའི་སྤྲོས་པ་དང་། ཐུན་མོང་མ་ཡིན་པ་བུད་མེད་ཀྱི་ཆོ་གའི་སྤྲོས་པ་གཉིས། དང་པོ་ནི། བཀོལ་བ་རྒྱལ་པོས་བཀྲབས་པའོ་ཞེས་སོགས་ཏེ། འདིར་སྣོད་སྤྱད་ཀྱི་རྟགས་ཀྱི་སྐབས་སུ་ལྷུང་བཟེད་མེད་པར་རབ་ཏུ་འབྱུང་བ་དང་བསྙེན་པར་རྫོགས་པར་མི་བྱའོ། །ཆུང་ངུ་དང་། ཆེན་པོ་དང་། སྐྱབས་ཀྱང་མི་བྱའོ་ཞེས་བཤད་ན། ལྷུང་བཟེད་ཀྱི་ཚད་ཇི་ལྟ་བུ་ཞེ་ན། ཁའི་ཆའི་ཞེས་སོགས་གསུངས་ཏེ། ཁ་ཅིག་མ་ག་དྷའི་བྲེའུ་ཆུང་གང་ལ་བོད་ཀྱི་ཕུལ་དོ། དེ་གསུམ་འཕེལ་དུ་སོང་བས་ཕུལ་དྲུག ཚོད་མ་ལྷུང་བཟེད་ཀྱི་སུམ་ཆ་ཡིན་པས་ཕུལ་གསུམ། མཐེ་བོའི་ལྟོའི་ཤུལ་ཕུལ་གང་ཡིན་པས་ཕུལ་བཅུ་ཤོང་བ་ཆུང་ཚད། དེ་ཉིས་འགྱུར་ཆེ་ཚད། དེའི་བར་འབྲིང་ཚད་ཡིན་ནོ་ཞེས་ཟེར། འོ་ན་བསོད་སྙོམས་ཕུལ་དགུ་གསུམ་ཉི་ཤུ་རྩ་བདུན་ལས་ལྷག་པ་ལེན་རུང་བར་ཐལ། ལྷུང་བཟེད་ཆུང་ཚད་གསུམ་ལེན་རུང་བ་གང་ཞིག ཆུང་ཚད་ཀྱི་ནང་དུ་ཕུལ་བཅུ་ཤོང་བ་དེ་རིགས་པའི་ཕྱིར། འདོད་ན་གཞུང་དང་འགལ་ལོ། །ཁ་ཅིག་མ་ག་དྷའི་བྲེའུ་ཆུང་གང་ལ་བོད་ཀྱི་ཕུལ་དོ། དེ་སུམ་འཕེལ་དུ་སོང་བས་ཕུལ་དྲུག ཚོད་མ་འབྲས་ཆེན་གྱི་སུམ་ཆ་ཡིན་པས་ཕུལ་དོ། མཐེ་བོའི་ལྟོ་ཤུལ་ཕུལ་གང་དང་ཕུལ་དགུ་ཤོང་བ་ཆུང་ཚད། དེ་ཉིས་འགྱུར་ཆེ་ཚད། དེ་གཉིས་ཀྱི་བར་འབྲིང་ཚད་ཡིན་ནོ་ཞེས་ཟེར་བ་ཡང་མི་འཐད་དེ། ཡུལ་གང་གི་བྲེའི་ཕུལ་ཡིན་པ་མི་རྟོགས་པའི་ཕྱིར་དང་། ལྷུང་བཟེད་ཆུང་ཚད་ཀྱི་ཁའི་མཐེ་བོའི་ལྟོ་ཤུལ་ཕུལ་གང་། ཆ་ཚད་ཀྱི་ཁའི་མཐེ་བོའི་ལྟོ་ཤུལ་ཕུལ་དོ་ཡོད་ཟེར་མི་རིགས་ཏེ། ལྷུང་བཟེད་ཆེ་བས་ཁ་རྒྱ་ཆེ་བ་དང་། ལྷུང་བཟེད་ཆུང་བས་རྒྱ་ཆུང་བའི་ངེས་པ་མེད་པའི་ཕྱིར། མཁས་པ་ཁ་ཅིག་ཆུང་ཚད་ཚོང་དུས་འགུར་མོའི་གསེར་བྲེའི་འབྲས་ཆན་བྲེ་ལྔ། ཚོད་མ་བྲེ་གང་དང་སུམ་གཉིས། མཐེ་བོའི་ལྟོའི་གོ་ས་ལ་བཞི་གསུམ། བསྡོམས་ན་བྲེ་བདུན་དང་ལྔ་ཕུལ་དོ་འབྱུང་ལ། ཆེ་ཚད་དེ་ཉིས་འགྱུར། དེ་གཉིས་ཀྱི་བར་འབྲིང་པོ་ཞེས་གསུང་བའང་མི་འཐད་དེ། མཆན་ཁུང་གི་བཀུར་བར་གསུངས་པ་དང་མི་འགྲིག་པའི་ཕྱིར་རོ། །རང་ལུགས་ནི། མ་ག་དྷའི་བྲེའུ་ཆུང་གང་ལ་བོད་ཀྱི་བདུན་ཕུལ་དོ་དང་ཁྱོར་བ་གང་ཡོད། བདུན་ཕུལ་རེ་ལ་ཁྱོར་བ་གསུམ་རེ་ཡོད་པས་ཁྱོར་བ་ཉི་ཤུ་རྩ་གཅིག་གི་འབྲས་ཆན། དེ་སྦགས་པར་ནུས་པའི་ཚོད་མ་ཁྱོར་བ་ལྔའམ་དྲུག་ཤོང་བ་ཆུང་ཚད། དེ་ཉིས་འགྱུར་ཆེ་ཚད། དེ་གཉིས་ཀྱི་བར་འབྲིང་ཚད་དུ་འགྱུར་བའོ། །དེ་ལྟར་ཡང་བམ་ལྔ་ལས། མ་ག་དྷའི་བྲེའུ་ཆུང་གང་ལ་བོད་ཀྱི་བདུན་ཕུལ་དོ་དང་ཁྱོར་བ་གང་ཡོད་དོ། །མ་ག་དྷའི་བྲེའུ་ཆུང་ཕྱེད་དང་དོ་ལ་བདུན་ཕུལ་ཕྱེད་དང་བཞི་ཡོད་དོ། །ཞེས་གསུངས་པའི་ཕྱིར། དེས་ན་ལྷུང་བཟེད་ཆུང་ཚད་ཀྱི་ཁའི་ཆའི་མཐེ་བོའི་ལྟོ་གང་གི་ལྷག་མ་ལ་འབྲས་དྲུས་བསྐམས་ཁྱོར་བ་ཉི་ཤུ་རྩ་བདུན་ཡོད་པར་གྲུབ་བོ། །མཐེ་བོའི་ལྟོ་གང་ནི་མཐེ་བོ་འཕྲེད་དུ་གཞག་པའི་ལྟོ་ལ་བྱེད་རིགས་ཏེ། བམ་ལྔར་མཐེབ་སོར་གཅིག་སྟེ་མཐེ་བོའི་ཚིགས་དང་པོའི་ཟུར་ཡ་གཅིག་ནས། ལྟོ་རོལ་དུ་བཀྲིས་ཏེ་ཟུར་ཡ་གཅིག་ལ་ཐུག་པའོ་ཞེས་གསུངས་པའི་ཕྱིར། དགེ་སློང་གི་ལྷུང་བཟེད་ཆུང་ངུ་ནི་དགེ་སློང་མའི་ལྷུང་བཟེད་ཆེ་ཚད་ཡིན་ལ། ཆུང་ཚད་ནི་ལྟོ་འགྲངས་བ་ཙམ་ཤོང་བ་དང་། དེ་དག་གི་བར་ནི་འབྲིང་ཚད་ཡིན་པར་གསུངས་སོ།། ༈ །།གཉིས་པ་ཐུན་མོང་མ་ཡིན་པ་བུད་མེད་ཀྱི་ཆོ་གའི་ཁྱད་པར་ནི། དགེ་སློང་གི་གནས་སུ་དགེ་སློང་མའོ་ཞེས་སོགས་ཏེ། སྤྱིར་བཏང་ལ་སྔར་སྐྱེས་པ་རབ་ཏུ་འབྱུང་བ་དང་། བསྙེན་པར་རྫོགས་པའི་ཆོ་ག་དེ་ཉིད་བུད་མེད་རྣམས་ཀྱི་ཡང་ཡིན་ནོ་ཞེས་བསྟན་ནས། ཁྱད་པར་ཅུང་ཟད་ཀྱང་མེད་དམ་སྙམ་ན། སྔར་སྐྱེས་པ་རབ་ཏུ་བྱུང་བ་སོགས་ཀྱི་སྐབས་སུ། དགེ་སློང་ཞེས་སྨོས་པའི་སྐབས་སུ་འདིར་དགེ་སློང་མ་ཞེས་བརྗོད་པར་བྱ་སྟེ། རབ་ཏུ་བྱུང་བ་དང་བསྙེན་པར་རྫོགས་པ་དེའི་ཚེ་དགེ་སློང་མ་འགའ་ཞིག་མཁན་མོ་ཉིད་དུ་གནས་པ་ལའོ་ཞེས་དང་། རང་གིས་དགེ་བསྙེན་མ་ཉིད་དུ་ཉེ་བར་སྒྲུབས་ནས་དགེ་སློང་མའི་དགེ་འདུན་ལ་ཞུ་བའི་དགེ་སློང་མ་ལ་གཏད་པར་བྱའོ་ཞེས་པ་ལྟ་བུའོ། །དེ་ལྟར་བརྗོད་དགོས་པར་ངེས་སམ་ཞེ་ན། འདི་ལ་རབ་ཏུ་འབྱུང་བ་དང་། བསྙེན་པར་རྫོགས་པའི་སྐབས་གཉིས་ལས། རབ་ཏུ་བྱུང་བའི་སྐབས་ཐམས་ཅད་དུ་དགེ་སློང་གི་གནས་སུ་དགེ་སློང་མ་ཞེས་བརྗོད་དགོས་ཏེ། བུད་མེད་རབ་ཏུ་འབྱུང་བའི་ཚེ་མཁན་སློབ་དང་། རང་བྱུང་ཞུ་བ་པོ་དང་། དགེ་འདུན་ཡང་ཡང་དགེ་སློང་མ་ཁོ་ནས་བྱེད་དགོས་པའི་ཕྱིར། གཉིས་པ་ལ་དགེ་སློང་མ་ཁོ་ནས་བྱ་བ་དང་། གཉིས་ཀ་ཚོགས་ནས་བྱ་བའི་སྐབས་གཉིས་ལས། དང་པོ་ནི། དགེ་སློང་མའི་དགེ་འདུན་ཚོགས་ནས་མཁན་མོར་གསོལ་བ་བཏབ་ནས། བསྒྲུབ་བྱ་དེ་སྟན་ནང་ཚང་ཅན་ལ་སྤྱོད་ལམ་ཅི་བདེ་བར་གཞག་སྟེ། དགེ་སློབ་མའི་སྡོམ་པ་སྦྱིན་པར་བྱའོ། །འདི་ལ་ལྔ་སྟེ། ཡུལ་གང་ལ། རྟེན་གང་གིས། དངོས་པོ་གང་། དུས་ནམ་གྱི་ཚེ། ཚུལ་ཇི་ལྟར་སྦྱིན་པའོ། །དང་པོ་ནི་བསྙེན་པར་རྫོགས་པར་འདོད་པའི་དགེ་ཚུལ་མ་ལའོ། །གཉིས་པ་ནི། ཆོས་གསུམ་ལྡན་གྱི་དགེ་སློང་མའི་དགེ་འདུན་གྱིས་སོ། །གསུམ་པ་ནི། དགེ་ཚུལ་གྱི་བསླབ་གཞིའི་སྟེང་དུ་རྩ་བའི་ཆོས་དྲུག་དང་རྗེས་སུ་མཐུན་པའི་ཆོས་དྲུག་ལ་སློབ་པའི་དགེ་སློབ་མའི་སྡོམ་པའོ། །བཞི་པ་ནི། ཁྱིམ་སོ་བཟུང་བ་ཡིན་ན་ལོ་བཅུ་ཡན་ཆད་དང་། ཁྱིམ་སོ་མ་བཟུང་བ་ཡིན་ན་ལོ་བཅོ་བརྒྱད་ཡན་ཆད་ལོན་པའི་དུས་སུ་སྦྱིན་པར་བྱ་བ་ཡིན་ཏེ། བསྙེན་པར་རྫོགས་པའི་དུས་ཀྱི་དང་པོར་ལོ་གཉིས་ཀྱིས་མ་ལོན་པའི་དང་པོ་ལ་སྦྱིན་པར་བཤད་པ་གང་ཞིག ཁྱིམ་སོ་གཟུང་བ་བསྙེན་པར་རྫོགས་པའི་དུས་ཀྱི་དང་པོ་ལོ་བཅུ་གཉིས་དང་། ཁྱིམ་སོ་མ་བཟུང་བ་བསྙེན་པར་རྫོགས་པའི་དུས་ཀྱི་དང་པོ་ནི་ལོ་ཉི་ཤུ་ལོན་པ་ལ་བཤད་པའི་ཕྱིར། ལྔ་པ་ལ་སྦྱོར་བ་དང་། དངོས་གཞི་དང་། མཇུག་གསུམ་ལས། དང་པོ་ནི། དགེ་སློང་མའི་དགེ་འདུན་གྱི་དབུས་སུ་ལས་བྱེད་པའི་དགེ་སློང་མ་དེས་གསོལ་བ་ལན་གསུམ་འདེབས་སུ་གཞུག་པའོ། །གཉིས་པ་ནི། ལས་བྱེད་པའི་དགེ་སློང་མ་དེས་དགེ་སློང་མའི་དགེ་འདུན་གྱི་དབུས་སུ་གསོལ་བ་དང་གཉིས་ཀྱི་ལས་ཀྱི་བསླབ་པའི་སྡོམ་པ་ཞེས་པའི་མིང་གིས་སྦྱིན་པར་བྱའོ། །གསུམ་པ་ནི། ལས་བྱེད་པའི་དགེ་སློང་མ་དེས་དེའི་བསླབ་པ་རྩ་བའི་ཆོས་དྲུག་དང་རྗེས་སུ་མཐུན་པའི་ཆོས་དྲུག་བརྗོད་པར་བྱ་བའོ། །དེ་ནས་དགེ་སློབ་མ་དེས་ལོ་གཉིས་ཀྱི་བར་དུ་ཆོས་བཅུ་གཉིས་པོ་དེ་ལ་ལེགས་པར་བསླབས་ཏེ། ལོ་བཅུ་གཉིས་སམ་ཉི་ཤུ་ལོན་པ་ན་དགེ་སློང་མའི་དགེ་འདུན་ཚོགས་ཏེ་གསང་སྟོན་གྱིས་ལྐོག་ཏུ་བར་ཆད་དྲིས་པའི་རྗེས་ལ་དགེ་སློང་མའི་དགེ་འདུན་ཚོགས་པ་ལ་གསོལ་བ་ལན་གསུམ་བཏབ་སྟེ། དགེ་སློང་མའི་དགེ་འདུན་གྱི་དབུས་སུ་བར་ཆད་དྲིས་ནས་གསོལ་བ་དང་གཉིས་ཀྱི་ལས་ཀྱིས་ཚངས་སྤྱོད་ལ་ཉེ་བར་གནས་པའི་སྡོམ་པ་སྦྱིན་པར་བྱ་སྟེ། ཚངས་སྤྱོད་ལ་ཉེར་གནས་ཀྱི་སྡོམ་པ་མ་ཐོབ་པར་བུད་མེད་བསྙེན་པར་རྫོགས་པར་མི་འགྱུར་བའི་ཕྱིར་རོ། །དེས་ན་འདི་དག་གི་སྐབས་སུ་ཡང་དགེ་སློང་གི་གནས་སུ་དགེ་སློང་མ་ཞེས་བརྗོད་པར་བྱའོ། །གཉིས་པ་གཉིས་ཀ་ཚོགས་ནས་བྱ་བ་ལ་སྦྱོར་བ་དང་། དངོས་གཞི་དང་། རྗེས་གསུམ་ལས། དང་པོ་ནི། ཚངས་སྤྱོད་ལ་ཉེར་གནས་ཀྱི་སྡོམ་པ་བྱིན་ནས། དགེ་སློང་མའི་དགེ་འདུན་གྱི་སྟེང་དུ་དགེ་སློང་གི་དགེ་འདུན་བསྣན་ཏེ་གཉིས་ཀའི་དགེ་འདུན་ཚོགས་པའི་དབུས་སུ་ལས་བྱེད་པའི་དགེ་སློང་གི་བསྒྲུབ་བྱ་དེ་བསྙེན་པར་རྫོགས་པའི་ཆེད་དུ་གཉིས་ཀའི་དགེ་འདུན་ལ་གསོལ་བ་ལན་གསུམ་འདེབས་སུ་གཞུག གསོལ་བ་འབའ་ཞིག་པའི་ལས་བྱས་ནས་བར་ཆད་འདྲི་བའོ། །གཉིས་པ་ནི། ལས་བྱེད་པའི་དགེ་སློང་དེས་གཉིས་ཀའི་དགེ་འདུན་གྱི་དབུས་སུ་གསོལ་བ་དང་བཞིའི་ལས་ཀྱི་བསྒྲུབ་བྱ་དེ་བསྙེན་པར་རྫོགས་པར་ཉིད་དུ་བསྒྲུབ་པར་བྱའོ། །གསུམ་པ་ནི། དེའི་རྗེས་སུ་ལས་བྱེད་པའི་དགེ་སློང་དེས་གདམས་ངག་བརྗོད་པར་བྱའོ། །དེ་ཡང་དགེ་སློང་གི་སྐབས་དང་མི་འདྲ་བའི་ཁྱད་པར་ནི། གནས་རྣམས་བརྗོད་པའི་སྐབས་སུ་ཤིང་དྲུང་པ་མ་གཏོགས་གཞན་སྔར་དང་འདྲའོ། །ཕམ་པར་འགྱུར་བ་ལ་བརྒྱད་བརྗོད་པར་བྱ་སྟེ་ཐུན་མོང་བ་བཞིའི་སྟེང་དུ། རེག་པ་དང་ནི་ལུས་བཀན་དང་། །འཆབ་པ་དང་ནི་བཟློག་པའོ། །ཞེས་པ་བཞི་བསྣན་པའོ། །ཕམ་པ་དང་དགེ་སྦྱོང་ཆོས་བཞིའི་བར་དུ་ལྕི་བའི་ཆོས་བརྒྱད་པོ་རྣམས་བརྗོད་པར་བྱའོ། །ཆོས་བརྒྱད་ནི། དགེ་སློང་མས་དགེ་སློང་རྣམས་ལ་བསྙེན་པར་རྫོགས་པར་གསོལ་བ་དང་། ཟླ་བ་ཕྱེད་ཕྱེད་ཅིག་གདམས་ངག་བཙལ་བ་དང་། དགེ་སློང་མེད་པའི་གནས་སུ་དབྱར་ཁས་མི་བླང་བ་སྟེ་ཕའི་དགེ་འདུན་དང་འབྲེལ་བ་གསུམ། དགེ་སློང་ལ་ཚུལ་ཁྲིམས་ཉམས་པ་ལ་སོགས་པས་གླེང་བར་མི་བྱ་བ་དང་། སྤྱོ་བར་མི་བྱ་བ་དང་། དགེ་སློང་གསར་བུ་ལ་ཡང་ཕྱག་བྱ་བ་སྟེ་ཕ་ཡན་འགར་བ་དང་འབྲེལ་བ་གསུམ། གཉིས་ཀའི་དགེ་འདུན་ལ་མགུ་བ་སྤྱད་པར་བྱ་བ་དང་། དགག་དབྱེ་བྱ་བ་སྟེ། གཉིས་ཀའི་དགེ་འདུན་དང་འབྲེལ་པ་གཉིས་ཏེ་བརྒྱད་དོ། །བུད་མེད་བསྙེན་པར་རྫོགས་པའི་སྐབས་འདིར་བར་ཆད་འདྲི་བའི་གནས་སྐབས་གསུམ་ཡོད་དེ། གསང་སྟེ་སྟོན་པའི་དགེ་སློང་མས་ལྐོག་ཏུ་བར་ཆད་འདྲི་བ་དང་། ལས་བྱེད་པའི་དགེ་སློང་མས་དགེ་སློང་མའི་དགེ་འདུན་གྱི་དབུས་སུ་བར་ཆད་འདྲི་བ་དང་། ལས་བྱེད་པའི་དགེ་སློང་གིས་གཉིས་ཀའི་དགེ་འདུན་གྱི་དབུས་སུ་བར་ཆད་དྲི་བ་རྣམས་སོ། །ཕྱི་མ་འདི་གཉིས་ལ་ནི་འདྲི་བ་པོ་དང་བསྒྲུབ་བྱའི་བར་དུ་དགེ་སློང་མ་གཞན་ཞིག་གིས་བསྒྲིགས་ནས་དེའི་རྗེས་ཟློས་བྱེད་པའི་སྒོ་ནས་ལན་འདེབས་པར་བྱ་བ་ཡིན་ལ། གསང་སྟོན་གྱིས་དྲི་བའི་ཚེ་ན་དེ་ལྟར་མི་དགོས་སོ། །འདིར་དགེ་སློབ་མའི་སྡོམ་པ་དེ་སྡོམ་པ་དང་བར་མ་གང་ཡིན་དཔྱད་པ་ལ། མཁས་པ་ཁ་ཅིག་ན་རེ་བར་མ་མཚན་ཉིད་པ་ཡིན་ཏེ། འདི་རང་བཞིན་གྱི་མི་དགེ་བ་སྤོང་བྱེད་མ་ཡིན་ལ། རང་བཞིན་གྱི་མི་དགེ་བ་སྤོང་བ་དེ་དང་འགྲོགས་ནས་ཀྱང་མ་སྐྱེས་པའི་ཕྱིར། དགེ་ཚུལ་གྱི་སྡོམ་པ་དང་རྫས་གཅིག་ཅེས་པ་ཡང་རྫས་ལོགས་སུ་མ་གྲུབ་པ་ཙམ་ལ་བཏགས་པ་ཡིན་ལ། གཞན་དུ་ན་མཚན་གྱུར་པའི་ཚེ་གཏོང་བར་འགྱུར་ཏེ། སྐྱེས་པ་ལ་དེ་མེད་པའི་ཕྱིར། ཁྱབ་པ་ཁས་བླངས། སོ་ཐར་རིགས་བརྒྱད་ཅེས་པ་ཡང་བཏགས་པ་ཙམ་ཡིན་ནོ་ཞེས་གསུང་ངོ་། །དེ་ནི་མི་འཐད་དེ། མཛོད་ལས། སོ་སོར་ཐར་ཅེས་བྱ་རྣམ་བརྒྱད། །ཅེས་གསུངས་པའི་ཕྱིར་དང་། བུད་མེད་ལ་ནི་དགེ་སློབ་མ་ཞེས་བྱ་བའི་ཚིགས་གཞན་ཡོད་དོ་ཞེས་བསླབ་ཚིགས་སུ་བཤད་པའི་ཕྱིར། གཞན་ཡང་དགེ་སློབ་མའི་སྡོམ་པ་དེས་རང་བཞིན་གྱི་ཁ་ན་མ་ཐོ་བ་སྤོང་བར་ཐལ། དགེ་སློབ་མ་དེས་རང་བཞིན་གྱིས་ཁ་ན་མ་ཐོ་བ་སྤོང་བའི་ཕྱིར། དེང་སང་ཤ་་་་་་ཁ་ཅིག་དགེ་སློབ་མའི་སྡོམ་པ་སོ་ཐར་རིགས་བརྒྱད་གང་རུང་མ་ཡིན་ཏེ་ཇི་སྲིད་འཚོའི་མཐའ་ཅན་དང་། ཉིན་ཞག་གི་མཐའ་ཅན་གང་རུང་མ་ཡིན་པའི་ཕྱིར། དེས་ན་ཚངས་སྤྱོད་ལ་ཉེར་གནས་ཀྱི་སྡོམ་པ་ནི་རིགས་བརྒྱད་ཀྱི་གཅིག་ཏུ་བགྲང་བ་ཡིན་ནོ་ཞེས་གསུངས་པ་ཤིན་ཏུ་མི་འཐད་དེ། མཛོད་དང་བྱང་ས་སོགས་ལས་སོ་ཐར་རིགས་བརྒྱད་བཤད་པའི་གནས་སྐབས་ཐམས་ཅད་དུ་དགེ་སློབ་མའི་སྡོམ་པ་བགྲང་གི་ཚངས་སྤྱོད་ལ་ཉེར་གནས་མ་བགྲངས་པའི་ཕྱིར་དང་། ཚངས་སྤྱོད་ལ་ཉེར་གནས་ལ་སྤང་བྱ་ཟུར་པ་མེད་པས་སྡོམ་པའི་དོན་མེད་པའི་ཕྱིར། གཞན་ཡང་དགེ་སློབ་མའི་སྡོམ་པ་ཇི་སྲིད་འཚོའི་མཐའ་ཅན་མ་ཡིན་པ་ཡང་མི་འཐད་དེ། དགེ་སློབ་མའི་སྡོམ་པ་ལོ་གཉིས་སུ་སྤྱད་ནས་བསྙེན་པར་རྫོགས་པའི་ཚེ་ན་ཡང་མི་གཏོང་བ་ཡིན་པའི་ཕྱིར་ཏེ། ཊཱི་ཀར་ལོ་གཉིས་ལས་ལྷག་ན་ཡང་དེ་ཕྱིན་ཆད་བརྟུལ་ཞུགས་དེ་ཉམས་པར་ཡང་མི་འགྱུར་ལ། དེ་ཕྱིན་ཆད་མི་རུང་བར་བྱ་བ་ཡང་མ་ཡིན་ནོ་ཞེས་གསུངས་པའི་ཕྱིར། གཞན་ཡང་དེ་ཇི་སྲིད་འཚོའི་མཐའ་ཅན་གྱི་སྡོམ་པ་ཡིན་པར་ཐལ། དེ་རྟེན་གྱི་གང་ཟག་ཤི་མ་འཕོས་ཀྱི་བར་དུ་མི་གཏོང་བའི་སྡོམ་པ་ཡིན་པའི་ཕྱིར། གཞན་དུ་ན་དགེ་སློང་མའི་སྡོམ་པ་དེ་ཇི་སྲིད་འཚོའི་མཐའ་ཅན་ཡིན་པར་མི་འགྲུབ་བོ།། ༈ །།གསུམ་པ་ཞུ་བ་ཕལ་ཆེ་བའི་སྐབས་ནས་འབྱུང་བ་ལ་ལྔ་སྟེ། སྡོམ་པ་སྐྱེ་བ་དང་མི་སྐྱེ་བའི་བར་ཆད་བསྟན་པ་དང་། སྐྱེ་ལ་ཉེས་བྱས་ཀྱི་དང་། བར་ཆད་ཀྱི་མཚོན་དོན་དང་། བར་ཆད་ཀྱི་མཚན་ཉིད་དང་། སྐྱེ་མི་སྐྱེ་དོགས་གཅོད་དང་བཅས་པའོ། །དང་པོ་ནི། ལྷ་ལ་སོགས་པ་མི་མ་ཡིན་པའི་འགྲོ་བ་པ་དང་། མི་ཡིན་ཀྱང་བྱང་གི་སྒྲ་མི་སྙན་པ་ནི་སྡོམ་པའི་ཞིང་མ་ཡིན་ཏེ་སྡོམ་པ་མི་སྐྱེ་བའི་ཕྱིར། མཚན་ལན་གསུམ་དུ་གྱུར་པ་ཡང་དེའི་ཞིང་མ་ཡིན་ཏེ་མ་ནིང་གི་རིགས་ཡིན་པའི་ཕྱིར། མཚན་གྱུར་ཐབས་དང་པོ་གཉིས་ལ་ནི་སྡོམ་པ་མི་ཉམས་ཤིང་གསར་དུ་ལེན་ན་ཡང་སྐྱེའོ། །མཁན་པོ་དེ་དང་ལྡན་པའི་སྡོམ་པ་སྐྱེ་བ་ལྟར་མཁན་པོ་མེད་པ་ཉིད་ལ་ཡང་སྐྱེའོ། །མཁན་པོ་དེ་བསྙེན་པར་མ་རྫོགས་པ་ཉིད་ཡིན་ན་ཡང་སྐྱེའོ། །དེ་དགེ་སློང་མ་ཡིན་པར་ཤེས་ན་ནི་མི་སྐྱེ་སྟེ། ལུང་ལས། བསྙེན་པར་རྫོགས་པར་འཚལ་བ་མཁན་པོ་རྐུ་ཐབས་སུ་གནས་པས་བསྙེན་པར་རྫོགས་པར་བགྱིད་ན། བསྙེན་པར་རྫོགས་ཞེས་བགྱི་འམ། བསྙེན་པར་མ་རྫོགས་ཞེས་བགྱི། བཀའ་སྩལ་པ། གལ་ཏེ་བདག་གི་མཁན་པོ་རྐུ་ཐབས་སུ་གནས་པ་ཡིན་ནོ་ཞེས་ཤེས་ན་ནི་བསྙེན་པར་མ་རྫོགས་ཞེས་བྱའོ་ཞེས་སོ། །དེ་ལ་ཁ་ཅིག་འདིར་མཁན་པོ་མེད་ཀྱང་སྡོམ་པ་སྐྱེ་བར་བཤད་ན། གོང་དུ་དགེ་སློང་འགའ་ཞིག་མཁན་པོ་ཉིད་དུ་གནས་པ་ལའོ་ཞེས་གསུངས་པ་དང་འགལ་ལོ་ཞེ་ན། འདིའི་ལན་ལ་ཁ་ཅིག མཁན་པོ་རང་གི་བྱ་བ་བྱེད་པའི་དུས་སུ་མཁན་པོ་ཡོད་ན་དངོས་གཞིའི་དུས་སུ་མཁན་པོ་མེད་ཀྱང་སྡོམ་པ་སྐྱེ་བའི་དོན་ཡིན་ནོ་ཞེས་གསུངས་པ་མི་འཐད་དེ། མཁན་པོ་རང་གི་བྱ་བ་བྱེད་པའི་དུས་སུ་ཡོད་ན་མཁན་པོ་ཡོད་པ་ཉིད་ཡིན་པའི་ཕྱིར། ཁ་ཅིག་དོན་ལ་མཁན་པོ་མེད་ཀྱང་བསྒྲུབ་བྱ་དེའི་བསམ་ངོ་ལ་ཡོད་ན་སྐྱེ་ཞེས་པ་ཡང་མི་འཐད་དེ། བསམ་ངོ་ལ་མཁན་པོ་ཡོད་ན་ཡང་ཡོད་པ་ཉིད་ཡིན་པའི་ཕྱིར་དང་། དོན་ལ་མཁན་པོ་མེད་པ་ཞེས་པའི་དོན་ལ་བརྟགས་ན་མི་འཐད་པའི་ཕྱིར། ཁ་ཅིག་མཁན་པོ་ཡོད་ཀྱང་མཁན་པོ་མཚན་ཉིད་དང་ལྡན་པ་མེད་ཀྱང་སྡོམ་པ་སྐྱེ་ཞེས་པའི་དོན་ཡིན་ནོ་ཞེས་པ་ཡང་མི་འཐད་དེ། བསྙེན་པར་མ་རྫོགས་པ་ལ་ཡང་ཞེས་པ་དང་ཟློས་པའི་སྐྱོན་དུ་འགྱུར་བ་ཡིན་པའི་ཕྱིར། དེས་ན་མཁན་པོ་མེད་པར་བསྙེན་རྫོགས་ཀྱི་སྡོམ་པ་སྐྱེ་བ་ཡོད་དེ། གསང་སྟོན་མེད་པར་བསྙེན་རྫོགས་ཀྱི་སྡོམ་པ་སྐྱེ་བ་ཡོད་པའི་ཕྱིར་ཏེ་བར་ཆད་མ་དྲིས་པར་བསྙེན་རྫོགས་ཀྱི་སྡོམ་པ་སྐྱེ་བ་ཡོད་པའི་ཕྱིར་ཏེ། བར་ཆད་མ་དྲིས་པར་ཡང་ངོ་ཞེས་གསུངས་ཤིང་། གཞན་ཡང་། དེ་ཡོད་དེ། མཁན་པོར་གསོལ་བ་མ་བཏབ་པར་ཡང་བསྙེན་རྫོགས་ཀྱི་སྡོམ་པ་སྐྱེ་བ་ཡོད་པ་གང་ཞིག མཁན་པོར་གསོལ་བ་མ་བཏབ་པར་མཁན་པོར་འགྱུར་བ་མེད་པའི་ཕྱིར། དང་པོ་གྲུབ་སྟེ། མཁན་པོར་མ་གསོལ་བར་ཡང་ངོ་ཞེས་གསུངས་པའི་ཕྱིར། འོ་ན་བསྙེན་པར་རྫོགས་པའི་ཚེ་དགེ་འདུན་ལ་གསོལ་བ་འདེབས་ན། མཁན་པོ་དང་། བསྒྲུབ་བྱ་དང་། དགེ་འདུན་གྱི་མིང་མ་བརྗོད་ན་སྡོམ་པ་མི་སྐྱེ་བར་བཤད་པ་དང་། འདིར་ཡང་དེ་གཉིས་ཀྱི་མིང་མ་བརྗོད་ན་ཡང་མི་སྐྱེའོ་ཞེས་གསུངས་པ་དང་འགལ་ལོ་ཞེ་ན། སྐྱོན་མེད་དེ། མཁན་པོ་དང་བཅས་ཏེ་བསྙེན་པར་རྫོགས་པའི་ཚེ་མཁན་པོའི་མིང་མ་བརྗོད་ན་སྡོམ་པ་མི་སྐྱེ་ཞེས་པའི་དོན་ཡིན་པའི་ཕྱིར། དེས་ན་གོང་དུ་མཁན་པོ་དགོས་པར་བཤད་པ་ནི་ཉེས་མེད་ཕུན་ཚོགས་ཀྱི་དབང་དུ་བྱས་པ་ཡིན་ལ་འདིར་མེད་ཀྱང་སྐྱེ་བར་བཤད་པ་ནི་སྐྱེ་ལ་ཉེས་བྱས་ཀྱི་དབང་དུ་བྱས་པ་ཡིན་ཏེ་མཁན་པོ་མེད་ཀྱང་བསྒྲུབ་བྱའི་རྒྱུད་ལ་སྡོམ་པ་ནི་སྐྱེ་ལ། བྱེད་པ་པོ་ལ་ཉེས་བྱས་སུ་འགྱུར་བའི་ཕྱིར། གཉིས་པ་ནི། ཚིག་སྔ་མ་མེད་པ་ལ་ནི་ཞེས་སོགས་སོ། །གསུམ་པ་ནི། སྐྱེས་པ་འདྲ་བའི་བུད་མེད་ཞེས་སོགས་སོ། །བཞི་པ་བར་ཆད་ཀྱི་མཚན་ཉིད་ནི། དེ་ཉིད་ལ་ཞེས་སོགས་སོ། །ལྔ་པ་སྐྱེ་མི་སྐྱེའི་དོགས་པ་བཅད་པ་ལ་བཞི་སྟེ། སྔོན་རབ་ཏུ་བྱུང་བ་ལ་དོགས་པ་བཅད། སྔོན་ལྟུང་བ་བྱུང་བ་ལ་དོགས་པ་བཅད། བུད་མེད་ཀྱི་ལས་ཀྱི་ཁ་སྐོང་ལ་དོགས་པ་བཅད། འགལ་རྐྱེན་གྱིས་མི་སྐྱེ་བར་བསྟན་པའོ། །དང་པོ་ནི། བུད་མེད་བསླབ་པ་ཕུལ་བ་མཚན་མ་གྱུར་ན་རབ་བྱུང་བསྙེན་རྫོགས་བྱར་མི་རུང་བ་ལས་བསླབ་པ་ཕུལ་ནས་སྐྱེས་པ་ཉིད་དུ་མཚན་གྱུར་པ་ན་སླར་རབ་ཏུ་བྱུང་བ་དང་བསྙེན་པར་རྫོགས་པ་རུང་བ་ཉིད་དོ། །འདི་ནི་བཀོལ་བ་དྲུག་པོ་དག་གོ་ཞེས་པའི་སྐབས་སུ་སྔོན་རབ་ཏུ་བྱུང་བ་བུད་མེད་ལ་སྡོམ་པ་སྐྱེ་བའི་བར་ཆད་དུ་གསུངས་པ་དེའི་དམིགས་བསལ་སྟོན་པའོ། །གཉིས་པ་ནི། བུད་མེད་ཕམ་པར་འགྱུར་བ་ཐུན་མོང་མ་ཡིན་པ་རེག་པ་ལ་སོགས་པ་ལྷག་པར་སྤྱད་པ་ཅན་སྐྱེས་པ་ཉིད་དུ་མཚན་གྱུར་པ་ཡང་རབ་ཏུ་བྱུང་བ་དང་བསྙེན་པར་རྫོགས་པ་རུང་བ་ཉིད་དོ། །འདི་ནི་གོང་དུ་ཕམ་པ་འབྱུང་བ་སྡོམ་པ་སྐྱེ་བའི་བར་ཆད་དུ་གསུངས་པའི་དམིགས་བསལ་ལོ། །གསུམ་པ་ནི། གོང་དུ་དགེ་འདུན་གྱིས་བསྣན་པར་བྱའོ་ཞེས་གསུངས་ན། དགེ་སློང་གི་དགེ་འདུན་གང་ཡང་རུང་བས་བསྣན་པས་ཆོག་གམ་སྙམ་ན། བུད་མེད་བསྙེན་པར་རྫོགས་པར་བྱ་བ་ལ་གཉུག་མར་གནས་པའི་དགེ་སློང་གི་དགེ་འདུན་རྣམས་ཡན་ལག་ཉིད་ཡིན་གྱི་འགྲོ་བར་ཆས་པ་དང་། གློ་བུར་དུ་འོངས་པ་རྣམས་མ་ཡིན་ཏེ་དེ་ལ་མི་དབང་བའི་ཕྱིར། བཞི་པ་ནི། སྡོམ་པ་སྐྱེ་བཞིན་པ་སྐྱེ་བའི་སྐད་ཅིག་དུ་མས་བར་ཆོད་པའི་ཚེ་ཉིད་ན་ལེན་སེམས་བཟློག་པའི་སྒོ་ནས་ཕུལ་ལམ། མཚན་གཉིས་སྐྱེས་པ་ལ་སོགས་པའི་སྐྱོན་གྱིས་རྟེན་ཉམས་ན་སྡོམ་པ་མི་སྐྱེ་སྟེ། བསམ་པ་མཐུན་པའི་རྐྱེན་མ་ཚང་བ་དང་སྐྱེ་བའི་འགལ་རྐྱེན་བར་ཆད་མ་སྤངས་པའི་ཕྱིར། དེའི་ཤུགས་ལ་སྐྱེ་བ་ལ་མངོན་དུ་གྱུར་པའི་སྐད་ཅིག་མ་རྒྱུ་མ་ཚང་བ་མེད་པའི་ཕྱི་མ་ལ་སྡོམ་པ་སྐྱེ་བ་ལ་ནི་གང་གིས་ཀྱང་གེགས་བྱ་བར་མི་ནུས་ཏེ། རྒྱུ་ནུས་པ་ཐོགས་མེད་སྔོན་དུ་སོང་བའི་ཕྱིར། རྣམ་འགྲེལ་ལས། མ་ཚང་མེད་རྒྱུ་དེ་ལ་ནི། །འབྲས་བུ་གང་གིས་བཟློག་པར་ནུས། །ཞེས་དང་། ཊཱི་ཀར་འདིར་སྐྱེ་བ་ལ་མངོན་དུ་གྱུར་པ་ནི་སྐྱེ་བའི་ཚེ་ཉིད་མ་ཡིན་པར་རིག་པར་བྱ་སྟེ། དེ་ལ་ནི་སྐྱེ་བའི་ཕྱིར་གང་གིས་ཀྱང་གེགས་བྱ་བར་མི་ནུས་པས་འདི་ལྟར་སྐད་ཅིག་མ་དུ་མས་ཚོད་པ་ལ་སྐྱེ་བའི་ཚེ་ཉིད་ཅེས་བྱའོ་ཞེས་གསུངས་པ་ཡིན་ནོ་ཞེས་གསུང་ངོ་། །གལ་ཏེ་སྡོམ་པ་སྐྱེ་བ་དང་མཚན་གཉིས་དུས་མཉམ་དུ་འབྱུང་བ་སྲིད་པར་འགྱུར་ཏེ། ནུས་པ་ཐོག་མེད་སྔོན་དུ་སོང་བའི་ཕྱིར་རོ་ཞེ་ན། སྐྱོན་མེད་དེ། དེའི་ཚེ་མཚན་གཉིས་ཅིག་ཅར་དུ་འབྱུང་བའི་དངོས་རྒྱུ་ཡོད་ན་སྡོམ་པ་སྐྱེ་བའི་ནུས་པ་ཐོགས་མེད་འགལ་བའི་ཕྱིར། ༈ །གཉིས་པ་དེས་བསླབ་པར་བྱ་བའི་མཚན་ཉིད་ལ་གཉིས་ཏེ། སྤང་བའི་བསླབ་པ་དང་། ཉམས་སུ་བླང་བའི་བསླབ་པའོ། །དང་པོ་ལ་གཉིས་ཏེ། སྡེ་ལྔ་སོ་སོའི་མཚན་ཉིད་དང་། ཞུ་བ་སྤྱིར་བསྟན་པའོ། །དང་པོ་ལ་གཉིས་ཏེ། དགེ་སློང་གི་སྡེ་ལྔ་སྤྱིར་བཤད་པ་དང་། དགེ་སློང་མའི་སྡེ་ལྔ་བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ། ཐུན་མོང་བ་བསླབ་པ་ཕུལ་བའི་ཆོ་ག་དང་། སྡེ་ལྔ་སོ་སོ་བཤད་པའོ། །དང་པོ་ལ་སྤྱིར་སྡོམ་པའི་གཏོང་རྒྱུ་དང་། བྱེ་བྲག་བསླབ་པ་འབུལ་བའི་ཆོ་ག་གཉིས་ལས། དང་པོ་ནི། མཛོད་ལས། བསླབ་པ་ཕུལ་དང་ཤི་འཕོས་དང་། །མཚན་གཉིས་དག་ནི་འབྱུང་བ་དང་། །རྩ་བ་ཆད་དང་མཚན་འདས་ལས། །སོ་སོར་ཐར་པའི་འདུལ་བ་གཏོང་། །ཞེས་གསུངས་པའི་དང་པོ་བཞི་ནི་རིགས་སྤྱིའི་གཏོང་རྒྱུ་ཡིན་ལ། མཚན་མོ་འདས་པ་ནི་བསྙེན་གནས་ཁོ་ནའི་ཡིན་ནོ། །གཞན་ཡང་མཚན་ལན་གསུམ་དུ་གྱུར་པ་དང་། ལོ་ཉི་ཤུ་མ་ལོན་པར་བསྙེན་པར་རྫོགས་ནས་ཉི་ཤུ་མ་ལོན་པར་ཤེས་པ་ནི་གཏོང་བ་ནི། ཉི་ཤུ་མ་ལོན་པའི་དུས་དེ་ཉིད་ལ་དེ་ལྟར་ཤེས་ན་སྡོམ་པར་གཏོང་བ་ཡིན་གཞན་དུ་ན་མི་གཏོང་བར་མངོན་ནོ། །གཉིས་པ་ལ་ཡུལ་དང་། དངོས་པོ་དང་། རྟེན་དང་། བསམ་པ་དང་། མཐར་ཐུག་གོ །དང་པོ་ནི། རང་ལས་རྒྱུད་ཐ་དད་པ་ལུས་ཐ་མལ་པར་གནས་པ། སྨྲ་ཤེས་ཤིང་དོན་གོ་བའི་མིའོ། །དངོས་པོ་ནི། བདག་ཉིད་ཀྱི་རྒྱུད་དུ་གཏོགས་པའི་བསླབ་པ་ཡིན་པ། རྟེན་ནི་བདག་ཉིད་ཤེས་པ་རང་བཞིན་དུ་གནས་པ། གཟུགས་གཞན་དུ་མ་བསྒྱུར་ཞིང་མི་སྣང་བར་མ་བྱས་པ། བསམ་པ་འདུ་ཤེས་མ་འཁྲུལ་ཞིང་ཀུན་སློང་བསླབ་པ་གཏོང་བར་འདོད་པས་སྦྱོར་བ་ལུས་ངག་གང་ཡང་རུང་བས་བརྡ་སྤྲད་པར་བྱས་ཏེ། མཐར་ཐུག་ཡུལ་གྱིས་དོན་གོ་བ་ན་གཏོང་བར་འགྱུར་རོ། །འོ་ན་སྡོམ་པའི་གཏོང་རྒྱུ་དུ་མ་ཡོད་ན་འདིར་འདི་ཁོ་ན་གསུངས་པའི་རྒྱུ་མཚན་ཅི་ཡིན་ཞེ་ན། རྣམ་འབྱེད་དུ། བསླབ་པ་མ་ཕུལ་བསླབ་པ་ཉམས་པར་མ་བྱས་པ་ཞེས་ལྟུང་བའི་དངོས་གཞི་བསྐྱེད་པ་ལ་བསླབ་པ་མ་ཕུལ་བསླབ་པ་ཉམས་པར་མ་བྱས་པ་ཞེས་གསུངས་པའི་རྟེན་གྱི་དོན་དེ་སྒྲུབ་པའི་ཕྱིར་ཡིན་ལ། གཞན་རྣམས་སྐབས་འདིར་རྣམ་འབྱེད་ལས་མ་གསུངས་པའི་ཕྱིར་དང་། སྡེ་ལྔའི་དངོས་གཞི་བསྐྱེད་པའི་རྟེན་དང་ཡང་མ་འབྲེལ་བའི་ཕྱིར་རོ། །འོ་ན་བསླབ་པ་ཉམས་པར་བྱས་པ་དེ་གང་ཡིན་ཞེ་ན། མ་མོར་དེ་གཉིས་ལ་ཁྱད་པར་མེད་པར་བཤད་ལ། བམ་ལྔར་བསླབ་པ་ཕུལ་བ་དང་བསླབ་པ་ཉམས་པ་གཉིས་ཀ་ལ་སྡོམ་པ་མེད་པ་ཉིད་དུ་འདྲ་སྟེ། བསླབ་པ་ཕུལ་བས་ནི་བཏང་བའི་སྒོ་ནས་སྡོམ་པ་མེད་པར་བྱས་ལ། བསླབ་པ་ཉམས་པར་བྱས་པ་ནི་བསླབ་པའི་ཡུལ་མཐུ་མེད་པར་བྱས་པའི་སྒོ་ནས་སྡོམ་པ་མེད་པར་བྱས་པ་ཡིན་ནོ་ཞེས་གསུངས་སོ། །སོ་ཐར་གྱི་འགྲེལ་པར་དངོས་སུ་ལྟུང་བའི་དངོས་གཞི་བསྐྱེད་པའི་གཞི་ལ་མ་ཞུགས་ཀྱང་དགེ་སློང་སོགས་ཀྱི་འདུ་ཤེས་བོར་ནས་ཁྱིམ་པ་དང་མཐུན་པའི་རྟགས་ཆ་ལུགས་འཛིན་ཅིང་སྤྱོད་པ་བྱེད་པས་སྡོམ་པ་གཏོང་བ་ལྟ་བུ་ལ་བཤད་དོ། །འོ་ན་བསླབ་པ་ཕུལ་བ་ལ་དགོས་པ་ཅི་ཡོད་ཅེ་ན། སྲོག་གི་བར་ཆད་དུ་འགྱུར་བ་ལ་སོགས་པའི་ཉེས་དམིགས་ཆེན་པོ་བྱུང་ན་ཡང་ཡུལ་ངན་དང་གྲོགས་ངན་སྤངས་པའི་སྒོ་ནས་སྡོམ་པ་གཅེས་པར་གཟུང་དགོས་ཏེ། བསླབ་པ་ཕུལ་ན་སོ་ཐར་གྱི་སྡོམ་པ་གཏོང་བས་ཡོན་ཏན་ཐམས་ཅད་ཀྱི་རྩ་བ་དང་བྲལ་བར་འགྱུར་བའི་ཕྱིར་དང་། ཕྱི་མར་ཡང་རྒྱུ་མཐུན་གྱི་འབྲས་བུ་ཚུལ་ཁྲིམས་མཐར་མ་ཕྱིན་པ་ལ་སོགས་པའི་ཉེས་པ་དུ་མ་འབྱུང་བའི་ཕྱིར་རོ། །བསྟན་པ་དང་སེམས་ཅན་མང་པོ་ལ་ཕན་པའི་དགག་དགོས་ཆེན་པོ་བྱུང་ན་ཕུལ་བ་ལ་དགོས་པ་ཡོད་དེ། སྔར་བསྲུངས་པའི་ཕན་ཡོན་ཆེན་པོ་འབྱུང་བ་དང་། ད་ལྟར་ལྟུང་བས་མི་གོས་པ་དང་། ཕྱིས་ལེན་ན་སྐྱེ་བའི་ཕན་ཡོན་ཡོད་པའི་ཕྱིར། ཇི་སྐད་དུ། དགེ་སློང་ལ་རབ་ཏུ་གཅེས་པའི་མདོ་ལས། གང་ཞིག་བསླབ་ལ་མི་གནས་པ། །བདེ་གཤེགས་རྒྱལ་མཚན་འཛིན་པ་བས། །བསླབ་ལ་མི་གནས་སྐད་ཅིག་ལ། །གཟུགས་བོར་ཁྱིམ་པར་གནས་པ་བཟང་། །ཞེས་གསུངས་སོ། །གཉིས་པ་ལ་གཉིས་ཏེ། སྤྱིའི་དོན་དང་། སོ་སོའི་དོན་ནོ། །དང་པོ་ལ་ལྔ་སྟེ། བསླབ་པ་བཅས་པའི་ཕན་ཡོན། ཕན་ཡོན་ཅན་གྱི་བཅས་པ། བཅས་པ་དང་འགལ་བའི་ལྟུང་བའི་རྣམ་གཞག དེའི་རྟེན་གྱི་ཡན་ལག བསྡུས་པའི་དོན་བཤད་པའོ། །དང་པོ་ལ་ལུང་ལས་བསླབ་པ་བཅས་པའི་ཕན་ཡོན་འདི་ལྟ་སྟེ། དགེ་འདུན་བསྡུ་བར་བྱ་བའི་ཕྱིར་དང་། དགེ་འདུན་ལེགས་པར་གནས་པར་བྱ་བའི་ཕྱིར་དང་། དགེ་འདུན་བདེ་བར་གནས་པར་བྱ་བའི་ཕྱིར་དང་། གནོང་མི་ཁུར་བའི་གང་ཟག་རྣམས་ཚར་གཅད་པའི་ཕྱིར་དང་། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང་། མངོན་པར་མ་དད་པ་རྣམས་དད་པར་བྱ་བའི་ཕྱིར་དང་། མངོན་པར་དད་པ་རྣམས་ཕྱིར་ཞིང་འབྱུང་བར་བྱ་བའི་ཕྱིར་དང་། ཚེ་འདིའི་ཟག་པ་རྣམས་རྣམ་པར་བསྡམ་པར་བྱ་བའི་ཕྱིར་དང་། ཚེས་རབས་ཕྱི་མའི་ཟག་པ་རྣམས་བཟློག་པར་བྱ་བའི་ཕྱིར་དང་། དེའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་དང་ཡངས་པར་འགྱུར་བ་དང་། ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་འགྱུར་བའོ་ཞེས་གསུངས་སོ། །དེ་ཡང་དགེ་འདུན་བསྡུ་བའི་ཕྱིར་ཞེས་པ་ནི། རིགས་བཞི་ལས་བྱུང་བ་རྣམས་རབ་བྱུང་བསྙེན་རྫོགས་ཀྱི་སྒོ་ནས་བསྡུ་བར་བྱེད་ཅེས་པའོ། །ལེགས་པར་གནས་པ་ཞེས་པ་ནི། འདོད་པ་བསོད་ཉམས་ཀྱི་མཐའ་ལ་བརྩོན་པ་བཟློག་ནས་ཆོ་ག་ཤེས་པ་སོགས་ཀྱི་ཆོས་བསྟན་པའི་རྗེས་སུ་འཇུག་པས་ལེགས་པར་གནས་པར་འགྱུར་བའོ། །བདེ་བར་གནས་པའི་ཕྱིར་ཞེས་པ་ནི། ངལ་ཞིང་དུབ་པའི་མཐའ་ལ་བརྩོན་པ་བཟློག་ནས་བདེ་བར་འགྱུར་བའོ། །དེ་གསུམ་གྱིས་མདོར་བསྟན་ནས། ལྷག་མ་རྣམས་ཀྱིས་རྒྱས་པར་འཆད་པ་ནི། གནོང་མི་ཁུར་བ་ཞེས་སོགས་ནི། ལྟུང་བ་བྱེད་པ་རྣམས་ནན་ཏུར་གྱིས་ཚར་གཅད་པའོ། །ངོ་ཚ་དང་ལྡན་པ་ཞེས་པ་ནི། ཕྱི་མའི་ཉོན་མོངས་པ་སྤོང་བ་དང་རྗེས་སུ་མཐུན་པའོ། །མངོན་པར་མ་དད་པ་རྣམས་ཞེས་སོགས་ནི། ཡོ་བྱད་རྐྱེན་དུ་བབ་པ་དག་ཡོད་པས་སོ། །མངོན་པར་དད་པ་རྣམས་ཞེས་སོགས་ནི། ཞུགས་པ་རྣམས་ཡོངས་སུ་སྨིན་པར་བྱ་བའི་ཕྱིར་རོ། །ཚེ་འདིའི་ཟག་པ་ཞེས་སོགས་ནི། ཀུན་དཀྲིས་མགོ་མནན་པས་སོ། །ཚེ་རབས་ཕྱི་མའི་ཞེས་སོགས་ནི། ཀུན་དཀྲིས་ཀྱི་བག་ལ་ཉལ་སྤོང་བས་སོ། །དེའི་ཚངས་པར་ཞེས་སོགས་ཀྱི་སྒྲ་ནི། ཚངས་པ་ནི་མྱ་ངན་ལས་འདས་པ་ཡིན་ལ། དེ་དང་མཐུན་པར་སྤྱོད་པ་འདུལ་བ་སྟེ་བསྙེན་པར་རྫོགས་པའོ། །རིགས་རུས་ཐ་དད་པའི་སྐྱེ་བོ་མང་པོ་ལ་ཕན་པ་དང་ཡངས་པ་སྟེ་གོང་ནས་གོང་དུ་ཁྱད་པར་དུ་འགྱུར་བའོ། །རྟེན་ལྷ་མི་གཉིས་ལ་ཡང་དག་པ་ཇི་ལྟ་བ་བཞིན་དུ་རབ་ཏུ་བསྟན་པ་ཞེས་པ་ནི། ངོ་བོ་ཇི་ལྟར་ཡོད་པ་དང་གྲངས་ཇི་སྙེད་ཡོད་པའོ། །ཡུན་རིང་དུ་གནས་ཞེས་པ་ནི། གཅིག་ནས་གཅིག་ཏུ་བརྒྱུད་དེ་ཡུན་རིང་དུ་གནས་པའོ། །གཉིས་པ་ཕན་ཡོན་ཅན་གྱི་བཅས་པ་ནི། ཚུལ་ཁྲིམས་ཀྱི་དབང་དུ་བྱས་པའི་བླང་དོར་སྟོན་པའི་འདུལ་བ་སྟེ། བམ་ལྔ་ལས། གླེང་གཞི་དང་། བསླབ་པ་བཅས་པ་དང་། ལྟུང་བ་རྣམ་པར་གཞག་པ་གསུམ་གྱིས་རིག་པར་བྱའོ། །ཞེས་དང་། ཡང་དེ་ཉིད་ལས། བསླབ་པ་བཅས་པ་ནི་འཇིག་རྟེན་དང་འགལ་བ་དང་འདུལ་བ་དང་འགལ་བ་བཟློག་པའི་ཕྱིར་རང་བཞིན་གྱི་ཁ་ན་མ་ཐོ་བ་དང་བཅས་པ་དང་། བཅས་པའི་ཁ་ན་མ་ཐོ་བ་དགག་པའི་ལྟུང་བ་སྡེ་ལྔའོ་ཞེས་གསུངས་པའི་ཕྱིར། འོ་ན་བླང་དོར་སྟོན་པའི་འདུལ་བ་དེའི་མཚན་གཞི་ཇི་ལྟ་བུ་ཡིན་ཞེ་ན། འདི་ལ་བྱེ་བྲག་ཏུ་སྨྲ་བའི་ལུགས་ཀྱིས་ཡིད་ཀྱི་ཤེས་པ་ལ་ཚུལ་ཁྲིམས་ཀྱི་བླང་དོར་སྟོན་པའི་མིང་ཚིག་ཡི་གེའི་ཚོགས་སུ་སྣང་བའི་སྒྲ་སྤྱི་ལྡན་མིན་འདུ་བྱེད་དེ་ལ་མིང་ཞེས་བྱ་སྟེ། དེ་ལས་དོན་ལ་འཇུག་པའི་ཕྱིར་རོ། །དེ་ཉིད་རྗོད་བྱེད་ལུང་གི་འདུལ་བའི་མཚན་གཞི་ཡིན་ཏེ། མཛོད་ལས། ཆོས་ཀྱི་ཕུང་པོ་བརྒྱད་ཁྲི་དག །གང་རྣམས་ཐུབ་པས་གསུངས་དེ་དག །ཚིག་གམ་མིང་ཡིན་དེ་དག་ཀྱང་། །གཟུགས་དང་འདུ་བྱེད་དག་ཏུ་འདུས། །ཞེས་གསུངས་སོ། །དེས་ན་འདིའི་མིང་དང་། མིང་ཚིག་ཡི་གེ་གསུམ་གྱི་ནང་ཚན་དུ་གྱུར་པའི་མིང་ལ་ཁྱད་པར་ཡོད་དོ། །བཅས་པ་དེ་བསྲུང་དགོས་ཀྱི་གང་ཟག་ནི་བཅས་ལྡན་ནོ། །གསུམ་པ་བཅས་འགལ་གྱི་ལྟུང་བའི་རྣམ་གཞག་ལ་གཉིས་ཏེ། བསྙེན་པར་མ་རྫོགས་པའི་ལྟུང་བ་དང་། རྫོགས་པའི་ལྟུང་བའོ། །དང་པོ་ནི། ཉེས་བྱས་སུ་ངེས་ཏེ། མ་རྫོགས་པའི་སྡོམ་པ་ནི་སྡོམ་པའི་ཐ་མ་ཡིན་པའི་ཕྱིར་ཞེས་དགྲ་བཅོམ་པ་ཟླ་བ་ནོར་བུ་བཞེད། རྫོགས་མ་རྫོགས་ཀྱི་བྱེ་བྲག་བསྟན་པའི་ཕྱིར་ཞེས་དགྲ་བཅོམ་པ་ཉེར་སྦས་བཞེད་དོ། །བསྙེན་པར་མ་རྫོགས་པའི་རྒྱུད་ཀྱི་ལྟུང་བ་ལ་དབྱེ་ན། ཕམ་འདྲའི་ཉེས་བྱས། དེ་ལས་གཞན་པའི་བཤགས་བྱའི་ཉེས་བྱས། བསྡམ་བྱའི་ཉེས་བྱས་དང་གསུམ་མོ།། ༈ །།གཉིས་པ་བསྙེན་པར་རྫོགས་པའི་ལྟུང་བ་ལ་བཅུ་སྟེ། དབྱེ་བ་དང་། བསྡུ་བ་དང་། ངོ་བོ་དང་། མཚན་ཉིད་དང་། རྒྱུ་དང་། གྲངས་ངེས་དང་། གོ་རིམ་དང་། སྒྲ་དོན་དང་། བསྲུངས་པའི་ཕན་ཡོན་དང་། མ་བསྲུངས་པའི་ཉེས་དམིགས་སོ། །དང་པོ་ལ་དབྱེ་གཞི་དང་། དབྱེ་སྒོ་གཉིས་ལས། དང་པོ་ནི་བསྙེན་པར་རྫོགས་པའི་རྒྱུད་ལ་འབྱུང་བའི་ལྟུང་བ་ཙམ་མོ། །གཉིས་པ་ནི། གསལ་བའི་དབྱེ་བ་མཐའ་ཡས་ཀྱང་སྡེ་ཚན་གྱི་སྒོ་ནས་དབྱེ་ན། ཕམ་པར་འགྱུར་བའི་སྡེ་ཚན་སོགས་ལྔ་ཡོད་དེ། ཊཱི་ཀར་ལྟུང་བྱེད་སྡེ་ལྔ་པོ་ཕམ་པར་འགྱུར་བའི་སྡེ་དང་། དགེ་འདུན་ལྷག་མའི་སྡེ་དང་། ལྟུང་བྱེད་ཀྱི་སྡེ་དང་། སོ་སོར་བཤགས་པའི་སྡེ་དང་། བསླབ་པའི་སྡེ་ཞེས་དང་། བསྡུ་བ་ལས། ལྟུང་བའི་སྡེ་ཚན་རྣམ་ལྔ་སྟེ། །དེ་ལ་བསླབ་བྱ་རྣམ་པ་བཞི། །ཞེས་གསུངས་པའི་ཕྱིར། དེ་ལྟར་ཡིན་ན་སྦོམ་པོ་དང་ཉེས་བྱས་ཀྱི་དབྱེ་བ་མ་བྱས་པར་འགྱུར་རོ་ཞེ་ན། སྐྱོན་མེད་དེ། ཕམ་པས་ཀུན་ནས་བསླངས་པའི་སྦོམ་པོ་ནི་ཕམ་པའི་སྡེ་ཚན་དུ་གཏོགས་ལ། ལྷག་མས་ཀུན་ནས་བསླངས་པའི་སྦོམ་པོ་ནི་ལྷག་མའི་སྡེ་ཚན་ཏུ་གཏོགས་ཤིང་སྦོམ་པོ་ཐམས་ཅད་དེ་གཉིས་སུ་འདུས་པའི་ཕྱིར་ཏེ། རྣམ་འབྱེད་དུ་ཉེས་པ་སྦོམ་པོ་ནི་གཉིས་ཏེ། ཕམ་པ་ལས་བྱུང་བ་དང་། དགེ་འདུན་ལྷག་མ་ལས་བྱུང་བའོ་ཞེས་དང་། འདུལ་བྱེད་དུ། བཙུན་པ་ཉེས་པ་སྦོམ་པོ་ཇི་ལྟར་བཤགས་པར་བགྱི། ཉེ་བ་འཁོར་ཉེས་པ་སྦོམ་པོ་ནི་བཞི་པོ་འདི་དག་ཡིན་ཏེ། ཕམ་པར་འགྱུར་བས་ཀུན་ནས་བསླངས་པ་ལྕི་བ་དང་། ཕམ་པར་འགྱུར་བས་ཀུན་ནས་བསླངས་པ་ཡང་བ་དང་། དགེ་འདུན་ལྷག་མས་ཀུན་ནས་བསླངས་པ་ལྕི་བ་དང་། དགེ་འདུན་ལྷག་མས་ཀུན་ནས་བསླངས་པ་ཡང་བའོ་ཞེས་གསུངས་པའི་ཕྱིར། གཉིས་པ་ལ་གཉིས་ཏེ། བསྡུ་བ་དངོས་དང་། བཅས་རང་གི་ཁྱད་པར་རོ། །དང་པོ་ནི། འདུ་ཤེས་གཙོ་བོ་དང་། དངོས་པོ་གཙོ་བོའི་ལྟུང་བ་གཉིས་སུ་འདུས་ཏེ། འོད་ལྡན་ལས། བསླབ་པའི་གཞི་ནི་གཉིས་ཏེ། འདུ་ཤེས་གཙོ་བོར་བྱ་བ་དང་། དངོས་པོ་གཙོ་བོར་བྱ་བའོ་ཞེས་གསུངས་པས་སོ། །སྦྱོར་བའི་ཆ་ནས་རྒྱུན་དང་ལྡན་པ་དང་མི་ལྡན་པ་གཉིས་སུ་འདུས་ཏེ། དང་པོ་ནི། སྦྱོར་བ་དང་མཐར་ཐུག་གི་བར་དུ་དུས་གཞན་གྱིས་ཆོད་དུ་བཏུབ་པ་སྟེ་སྲོག་གཅོད་ལྟ་བུའོ། །གཉིས་པ་ནི། སྦྱོར་མཐའི་བར་དུ་དུས་གཞན་གྱིས་ཚོད་དུ་མི་བཏུབ་པ་སྟེ་རེག་པ་ལྟ་བུའོ། །མཐར་ཐུག་གི་ཆ་ནས་འཕེན་པས་འགྲུབ་པ་དང་མི་འགྲུབ་པ་གཉིས། དང་པོ་ནི། སྦྱོར་བ་བརྩམས་ནས་སྦྱོར་བ་གཞན་གྱིས་མཐར་ཐུག་གྲུབ་པ་རང་ཉིད་ཀྱིས་ཤེས་པ་ལ་མི་ལྟོས་པའི་ལྟུང་བ་སྟེ་མ་བྱིན་ལེན་དང་སྲོག་གཅོད་ཀྱི་ཕམ་པ་ལྟ་བུའོ། །གཉིས་པ་ནི། དེ་ལས་བཟློག་པ་སྟེ་ཕམ་ལྷག་དང་པོ་གཉིས་ལྟ་བུའོ། །ཕྱིར་བཅོས་ཀྱི་སྒོ་ནས་ལྷག་མ་མེད་པ་དང་ལྷག་མ་དང་བཅས་པའི་ལྟུང་བ་གཉིས། དང་པོ་ནི། ཕམ་པ་བཞིའོ། །གཉིས་པ་ནི། ཕམ་པ་ལས་གཞན་པའི་ལྟུང་བ་རྣམས་སོ། །གཞིའི་སྒོ་ནས་སེམས་ཅན་ལ་བརྟེན་པ་དང་སེམས་ཅན་མ་ཡིན་པ་ལ་བརྟེན་པ་གཉིས་སོ། །བྱེད་པའི་སྒོ་ནས་རང་གིས་བསྒྲུབ་དགོས་པ་དང་བཅོལ་བས་རྫོགས་པ་གཉིས་སོ། །འབྱུང་བའི་སྒོ་ནས་ལུས་དང་ངག་ལས་འབྱུང་བ་གཉིས་སོ། །བྱ་བའི་སྒོ་ནས་བྱ་བ་མི་བྱེད་པའི་ཕྱིར་མི་སྦྱོར་བ་དང་མི་བྱ་བ་བྱེད་པའི་སྦྱོར་བ་དང་བཅས་པ་གཉིས་ཏེ། བསྡུ་བར། བྱ་བ་མི་བྱེད་པ་དང་ནི། །མི་བྱ་བ་ནི་བྱེད་པའི་ཕྱིར། །མི་སྦྱོར་བ་དང་སྦྱོར་བཅས་ལས། །ལྟུང་བའི་ཉེས་པ་འབྱུང་བར་འགྱུར། །ཞེས་གསུངས་སོ། །ངོ་བོའི་ཆ་ནས་མི་དགེ་བ་དང་ལུང་མ་བསྟན་གྱི་ལྟུང་བ་གཉིས་སམ། རང་བཞིན་དང་བཅས་པའི་ལྟུང་བ་གཉིས་སུ་འདུས་སོ། །དང་པོ་ནི། སྲོག་གཅོད་ཀྱི་ཕམ་པ་ལྟ་བུ། གཉིས་པ་ནི་ས་རྐོ་མེ་རེག་གི་ལྟུང་བྱེད་ལྟ་བུའོ། །གཉིས་པ་ལ་གསུམ་སྟེ། བཅས་རང་གཉིས་ཁྱབ་ཆེ་ཆུང་དཔྱད། དེ་གཉིས་ཀྱི་ཁྱད་པར་ལ་དཔྱད། ཞར་ལ་སྡིག་ལྟུང་ངོ་བོ་གཅིག་དང་ཐ་དད་ལ་དཔྱད་པའོ། །དང་པོ་ནི། ཁ་ཅིག་རྟེན་སྤྱི་ལ་ལྟོས་ཏེ་རང་བཞིན་གྱི་ཁ་ན་མ་ཐོ་བ་ཁྱབ་ཆེ་སྟེ། དེ་བཅས་པས་བསྡམས་པ་དང་མ་བསྡམས་པ་གཉིས་ཀའི་རྒྱུད་ལ་འབྱུང་། བཅས་ལྟུང་བསྡམས་པ་ཁོ་ནའི་རྒྱུད་ལ་འབྱུང་བའི་ཕྱིར། རྟེན་རབ་བྱུང་ལ་ལྟོས་ནས་བཅས་པའི་ཁ་ན་མ་ཐོ་བ་ཁྱབ་ཆེ་སྟེ། དེ་ཡོད་པར་རང་བཞིན་གྱི་ཁ་ན་མ་ཐོ་བ་ཡོད་པས་མ་ཁྱབ། རང་བཞིན་གྱི་ཁ་ན་མ་ཐོ་བ་ཡོད་པར་བཅས་པའི་ལྟུང་བ་ཡོད་པས་ཁྱབ་པའི་ཕྱིར་ཟེར་བ་མི་འཐད་དེ། ཤེས་པ་རང་བཞིན་དུ་མི་གནས་པ་དང་། ལས་དང་པོ་པ་ལ་རང་བཞིན་གྱི་ཁ་ན་མ་ཐོ་བ་འབྱུང་ཡང་བཅས་ལྟུང་མི་འབྱུང་བའི་ཕྱིར་དང་། དགེ་སློང་སོ་སྐྱེ་ལ་འཇིག་ལྟ་མངོན་དུ་གྱུར་པའི་ཚེ་བཅས་ལྟུང་འབྱུང་བར་མ་ངེས་པའི་ཕྱིར། གཉིས་པ་ལ་ཁ་ཅིག་གཞི་དེ་ལ་རྐྱེན་ལ་ལྟོས་ཏེ་གནང་བ་འབྱུང་བའི་ཁ་ན་མ་ཐོ་བ་དེ་བཅས་པའི་ཁ་ན་མ་ཐོ་བ་དང་། དེ་ལས་བཟློག་པ་རང་བཞིན་གྱི་ཁ་ན་མ་ཐོ་བ་ཡིན་ཟེར་བ་མི་འཐད་དེ། འོ་ན་ཆང་འཐུང་བ་རྐྱེན་ལ་ལྟོས་ཏེ་གནང་བ་ཡོད་པར་ཐལ། དེ་བཅས་པའི་ཁ་ན་མ་ཐོ་བ་ཡིན་པའི་ཕྱིར། རྟགས་གྲུབ་སྟེ། མཛོད་ལས། བཅས་པའི་ཁ་ན་མ་ཐོ་བ། །མྱོས་འགྱུར་ལས་གཞན་བསྲུང་ཕྱིར་རོ། །ཞེས་གསུངས་པའི་ཕྱིར། འདོད་མི་ནུས་ཏེ། ཊཱི་ཀར་བཀག་པ་ཞེས་བྱ་བ་ནི་སྲོག་ལ་བབས་ཀྱང་གཞི་འདི་རྣམ་པ་ཐམས་ཅད་དུ་མི་བྱའོ་ཞེས་བྱ་བ་སྟེ། དཔེར་ན་ང་ལ་སྟོན་པར་སྨྲ་བ་རྣམས་ཀྱིས་ཆང་ནི་རྩའི་མཆོག་མས་ཀྱང་མི་གླུད་མི་འཐུང་ངོ་ནས་གསུངས་པའི་ཕྱིར། གལ་ཏེ་ལུས་ལ་བཀུད་པ་དང་མཁུར་བར་བསྲེལ་བ་སོགས་གནང་བ་ཆང་གི་གཞི་ལ་ཡོད་པ་མ་ཡིན་ནམ་ཞེ་ན། འོ་ན་སྲོག་གཅོད་པའི་གཞི་ལ་གནང་བ་ཡོད་པར་ཐལ། ལུས་གཏར་བ་དང་བསྲེག་པ་གནང་བ་ཡིན་པའི་ཕྱིར། ཁྱབ་པ་ཁས་བླངས། འདོད་ན་སྲོག་གཅོད་ཀྱི་ཁ་ན་མ་ཐོ་བ་དེ་བཅས་པའི་ཁ་ན་མ་ཐོ་བ་ཡིན་པར་ཐལ་ལོ། །མཚན་ཉིད་དེ་ལ་ཁ་ཅིག དགེ་སེམས་ཀྱིས་ཀུན་ནས་བསླངས་ཏེ་སྲོག་གཅོད་པའི་གཞི་ལ་གནང་བ་ཡོད་པར་ཐལ། དེ་བཅས་པའི་ཁ་ན་མ་ཐོ་བ་ཡིན་པའི་ཕྱིར་ཏེ། དགེ་སེམས་ཀྱིས་ཀུན་ནས་བསླངས་པའི་རང་བཞིན་གྱི་ཁ་ན་མ་ཐོ་བ་གཞག་ཏུ་མེད་པའི་ཕྱིར་ཞེས་པ་མི་འཐད་དེ། དགེ་སེམས་ཀྱིས་ཀུན་ནས་བསླངས་པའི་མ་བསད་པའི་མཚམས་མེད་དེ་བཅས་པའི་ཁ་ན་མ་ཐོ་བ་ཡིན་པར་ཐལ། དེ་རང་བཞིན་གྱི་ཁ་ན་མ་ཐོ་བ་མ་ཡིན་པའི་ཕྱིར། རྟགས་ཁས་བླངས། འདོད་མི་ནུས་ཏེ། དེ་སྲོག་གཅད་ཀྱི་ལས་ལམ་གང་ཞིག བསྟན་པ་ལ་མ་ཞུགས་པའི་ཁྱིམ་པ་ལ་འབྱུང་བའི་ཕྱིར། ཁ་ཅིག་དེ་གཉིས་ཀྱི་མཚན་ཉིད་རིམ་བཞིན། ཉོན་མོངས་ཀྱིས་ཀུན་ནས་བསླངས་པའི་ཁ་ན་མ་ཐོ་བ་དང་། དགེ་བ་དང་ལུང་མ་བསྟན་གང་རུང་གིས་ཀུན་ནས་བསླངས་པའི་ཁ་ན་མ་ཐོ་བ་ཞེས་ཟེར། དེ་ལ་ཁ་ཅིག་ལྟུང་བ་ཡིན་ན་རང་བཞིན་གྱི་ཁ་ན་མ་ཐོ་བ་ཡིན་པས་ཁྱབ་པར་ཐལ། དེ་ཡིན་ན་ཉོན་མོངས་ཀྱིས་ཀུན་ནས་བསླངས་པས་ཁྱབ་པའི་ཕྱིར་ཏེ། དེ་ཡིན་ན་འདི་དང་འདི་བྱའོ་ཞེས་པའི་བདག་འཛིན་ཉོན་མོངས་ཅན་གྱིས་ཀུན་ནས་བསླངས་པས་ཁྱབ་པའི་ཕྱིར་ཟེར་བ་མི་འཐད་དེ། ཉན་ཐོས་དགྲ་བཅོམ་པའི་རྒྱུད་ལ་ལྟུང་བ་འབྱུང་བ་ཡོད་ཀྱང་ཉོན་མོངས་མེད་པའི་ཕྱིར། མཚན་ཉིད་ཀྱང་མི་འཐད་དེ། དགེ་སེམས་ཀྱིས་ཀུན་ནས་བསླངས་པའི་སྲོག་གཅོད་ཀྱི་ལས་ལམ་ཆོས་ཅན། བཅས་པའི་ཁ་ན་མ་ཐོ་བ་ཡིན་པར་ཐལ། མཚན་ཉིད་དེའི་ཕྱིར། སྲོག་གཅོད་ཀྱི་ཕམ་པ་ཆོས་ཅན། རང་བཞིན་གྱི་ཁ་ན་མ་ཐོ་བ་ཡིན་པར་ཐལ། མཚན་ཉིད་དེའི་ཕྱིར་ཏེ། ཞེ་སྡང་གིས་ཀུན་ནས་བསླངས་པའི་ཁ་ན་མ་ཐོ་བ་ཡིན་པའི་ཕྱིར། གཏན་ཚིགས་གྲུབ་སྟེ། གསོད་དང་གནོད་སེམས་ཚིག་རྩུབ་པོ། །ཞེ་སྡང་གིས་ནི་མཐར་ཕྱིན་བྱེད། །ཅེས་གསུངས་པའི་ཕྱིར། འདོད་ན། འོག་ནས་འགོག་གོ །ཁ་ཅིག་རྒྱུ་མི་དགེ་བས་ཀུན་ནས་བསླངས་ཤིང་ངོ་བོ་མི་དགེ་བ་ཡིན་པ། འབྲས་བུ་རྣམ་སྨིན་འབྱིན་ནུས་ཀྱི་ཁ་ན་མ་ཐོ་བ་དང་། རྒྱུ་དགེ་བ་དང་ལུང་མ་བསྟན་གང་རུང་གིས་ཀུན་ནས་བསླངས་ཤིང་ངོ་བོ་ལུང་མ་བསྟན་ཡིན་པ། འབྲས་བུ་རྣམ་སྨིན་འབྱིན་མི་ནུས་པའི་ཁ་ན་མ་ཐོ་བ་ཞེས་པ་མི་འཐད་དེ། ཁམས་གོང་མའི་ཁ་ན་མ་ཐོ་བ་ཡིན་ན་བཅས་པའི་ཁ་ན་མ་ཐོ་བ་ཡིན་དགོས་པར་ཐལ། དེ་ཡིན་ན་རང་བཞིན་གྱི་ཁ་ན་མ་ཐོ་བ་མིན་དགོས་པའི་ཕྱིར། རྟགས་ཁས་བླངས། འདོད་མི་ནུས་ཏེ། རྩ་ཉོན་དང་བཅས་པའི་ཁ་ན་མ་ཐོ་བའི་གཞི་མཐུན་མེད་པའི་ཕྱིར་ཏེ། རྩ་ཉོན་ནི་བཅས་པ་ལ་མི་ལྟོས་པར་ངོ་བོ་ཉིད་ཀྱི་སྐྱོན་ཆགས་པ་ཡིན་པའི་ཕྱིར། གཞན་ཡང་བཅས་པའི་ཁ་ན་མ་ཐོ་བ་ཡིན་ན་མི་དགེ་བ་ཡིན་པས་ཁྱབ་པར་ཐལ། བཅས་པའི་ཁ་ན་མ་ཐོ་བའི་རྣམ་སྨིན་ངན་སོང་གསུམ་དུ་སྐྱེ་བར་བཅོམ་ལྡན་འདས་ཀྱིས་གསུངས་པའི་ཕྱིར། རང་ལུགས་ནི། བཅས་པ་ལ་མི་ལྟོས་པར་སྐྱེས་པའི་ཁ་ན་མ་ཐོ་བ་དེ་རང་བཞིན་གྱི་ཁ་ན་མ་ཐོ་བའི་མཚན་ཉིད། བཅས་པ་གཞག་པའི་དབང་གིས་བསྐྱེད་པའི་ཁ་ན་མ་ཐོ་བ་དེ་བཅས་པའི་ཁ་ན་མ་ཐོ་བའི་མཚན་ཉིད་དོ། །དེ་ལ་ཁོ་ན་རེ་སྲོག་གཅོད་ཀྱི་ཕམ་པ་ཆོས་ཅན། བཅས་པའི་ཁ་ན་མ་ཐོ་བར་ཐལ། མཚན་ཉིད་དེའི་ཕྱིར། འདོད་ན། རང་བཞིན་གྱི་ལྟུང་བ་མ་ཡིན་པར་འགྱུར་ཞིང་། དེ་ཡང་འདོད་ན། རང་བཞིན་གྱི་ལྟུང་བ་གཞི་མ་གྲུབ་པར་ཐལ་ལོ་ཞེ་ན། འདོད་པ་ཡིན་ཏེ། རང་བཞིན་གྱི་ལྟུང་བ་འདོད་པ་ནི་ལས་ལམ་དང་ལྟུང་བ་ངོ་བོ་གཅིག་ཏུ་འདོད་པའི་ལུགས་ཡིན་ལ། འདི་ནི་འོག་ནས་འགོག་གོ །རང་བཞིན་གྱི་ལྟུང་བ་མེད་དེ། བཅས་པ་ལ་མི་ལྟོས་པར་ངོ་བོ་ཉིད་ཀྱི་སྐྱོན་ཆགས་པའི་ཆ་ནས་རང་བཞིན་གྱི་ཁ་ན་མ་ཐོ་བར་འཇོག་པ་ཡིན་པའི་ཕྱིར་ཏེ། རྣམ་འབྱེད་ལས། ཉོན་མོངས་ཀྱིས་ཀུན་ནས་བསླངས་པ་ནི་རང་བཞིན་གྱི་ཡིན་ཏེ། ངོ་བོ་ཉིད་ཀྱིས་སྐྱོན་ཆགས་པའི་ཕྱིར་ཞེས་གསུངས་པའི་ཕྱིར། གསུམ་པ་ལ་གང་ལ་དཔྱོད་པའི་གཞི་དང་། དེ་ལ་དཔྱོད་པའི་ཚུལ་གཉིས་ལས། དང་པོ་ནི། རང་བཞིན་གྱི་ཁ་ན་མ་ཐོ་བ་དང་། བཅས་པའི་ལྟུང་བ་ལྟ་བུའོ། །དེའང་དུད་འགྲོ་བསད་པའི་ལྟུང་བ་དང་། དེའི་ལས་ལམ་ལྟ་བུ་ངོ་བོ་གཅིག་དང་ཐ་དད་གང་ཡིན་ཞེས་དཔྱད་པར་བྱའོ། །གཉིས་པ་ལ་དགག་གཞག་གཉིས་ལས། དང་པོ་ལ་ཁ་ཅིག་དུད་འགྲོ་བསད་པའི་ལྟུང་བྱེད་དང་། དེའི་སྡིག་པ་གཉིས་ངོ་བོ་ཐ་དད་ཡིན་ཏེ། ལྟུང་བྱེད་ནི་རབ་ཏུ་བྱུང་བ་ཁོ་ནའི་རྒྱུད་ལ་འབྱུང་བ་དང་། དེ་འབྱུང་བ་བཅས་པ་ལ་ལྟོས་པ་དང་། མིང་དང་རིགས་བརྗོད་པའི་བཤགས་པས་ཕྱིར་བཅོས་པར་བྱ་བ་ཡིན་ལ། དུད་འགྲོ་བསད་པའི་སྡིག་པ་ནི་རྟེན་ཁྱིམ་པ་དང་རབ་བྱུང་གཉིས་ཀའི་རྒྱུད་ལ་འབྱུང་བ་དང་། དེ་འབྱུང་བ་བཅས་པ་ལ་མི་ལྟོས་པ་དང་། སྟོབས་བཞིའི་བཤགས་པས་ཕྱིར་བཅོས་པར་བྱ་བ་ཡིན་པའི་ཕྱིར་ཞེས་གསུངས། དེ་ལ་གཞན་དག་ཐལ་བ་གསུམ་གྱི་དགག་པ་བརྗོད་དེ། དང་པོ་ནི། ལྟུང་བ་ཐམས་ཅད་ལུང་མ་བསྟན་དུ་ཐལ། ལྟུང་བ་ཐམས་ཅད་མི་དགེ་བ་ལས་ངོ་བོ་ཐ་དད་གང་ཞིག དགེ་བར་གཞག་ཏུ་མེད་པའི་ཕྱིར། དང་པོ་ཁས་བླངས། འདོད་མི་ནུས་ཏེ། ལུང་ལས། བཙུན་པ་ནོངས་པ་མི་དགེ་བས་ཀུན་ནས་བསླངས་པ་མཆིས་སམ། མི་དགེ་བའམ་ལུང་མ་བསྟན་གྱིས་ཀུན་ནས་བསླངས་པ་མཆིས་སམ། བཙུན་པ་ནོངས་པ་མི་དགེ་བ་མཆིས་སམ། དགེ་བ་མཆིས་སམ། ལུང་དུ་མ་བསྟན་པ་མཆིས་སམ། ཞེས་ཞུས་པའི་ལན་དུ་མི་དགེ་བ་དང་ལུང་མ་བསྟན་ཡོད་པར་གསུངས་ཤིང་། བཙུན་པ་ནོངས་པ་རྣམ་པར་སྨིན་པ་དང་བཅས་པ་ཞིག་གམ། ནོངས་པ་རྣམ་པར་སྨིན་པ་མེད་པ་ཞིག་ཅེས་པའི་ལན་དུ་གཉིས་ཀ་ཡོད་པར་གསུངས་པའི་ཕྱིར་དང་། ལྟུང་བྱེད་ཀྱི་སྐབས་རེ་རེའི་མཐར་ཡང་། ལྟུང་བར་བྱེད། སྲེག་པར་བྱེད། འཚེད་པར་བྱེད་ཅེས་གསུངས་པའི་ཕྱིར། གཞན་ཡང་བཅས་པའི་ལྟུང་བ་དང་རང་བཞིན་གྱི་ཁ་ན་མ་ཐོ་བ་དང་བཅས་པའི་ལྟུང་བ་གཉིས་ལ་རྐྱེན་ལ་ལྟོས་ནས་གནང་བ་ཡོད་མེད་ཀྱི་ཁྱད་པར་མེད་པར་ཐལ། ལྟུང་བ་ཐམས་ཅད་ལུང་མ་བསྟན་ཡིན་པའི་ཕྱིར། ཐལ་བ་གཉིས་པ་ནི། བཅས་པའི་ལྟུང་བ་ལུང་མ་བསྟན་དང་ངོ་བོ་ཐ་དད་དུ་ཐལ། རང་བཞིན་གྱི་ལྟུང་བ་མི་དགེ་བ་དང་ངོ་བོ་ཐ་དད་ཡིན་པའི་ཕྱིར། རྟགས་ཁས་བླངས། ཐལ་བ་གསུམ་པ་ནི། ལྷག་མ་ཕྱིར་བཅོས་བྱས་པས་དེའི་ཆའི་སྡིག་པ་མི་འདག་པ་ཐལ། དེ་གཉིས་ངོ་བོ་ཐ་དད་ཡིན་པའི་ཕྱིར། འདོད་ན། ལྷག་མ་ཕྱིར་བཅོས་མ་བྱས་ན་ངན་སོང་དུ་ལྟུང་བ་དང་ཕྱིར་བཅོས་བྱས་ན་ལྷ་མིར་སྐྱེ་བར་བཤད་པ་དེ་མི་འཐད་པར་ཐལ་ལོ། །གཞན་ཡང་དགེ་སློང་གི་ལོ་དྲི་བ་ལས། ཕམ་པ་དང་། ལྷག་མ་དང་། སྦོམ་པོ་དང་། ལྟུང་བྱེད་དང་། སོར་བཤགས་དང་། ཉེས་བྱས་རྣམས་བསྲུངས་ན་གཞན་འཕྲུལ་དབང་བྱེད་ནས་རྒྱལ་ཆེན་རིགས་བཞིའི་བར་རིམ་བཞིན་སྐྱེ་ཞིང་། མ་བསྲུངས་པའི་ཉེས་དམིགས་ཚ་བ་ནས་ཡང་སོས་ཀྱི་བར་དྲུག་ཏུ་རིམ་བཞིན་སྐྱེ་བར་བཤད་པ་དང་འགལ་ལོ་ཞེས་གསུང་། གཉིས་པ་དེ་དགག་པ་ནི། ལྟུང་བ་ཐམས་ཅད་ལུང་མ་བསྟན་དུ་ཐལ། མི་དགེ་བ་དང་ངོ་བོ་ཐ་དད་ཡིན་པའི་ཕྱིར། ཞེས་པ་ནི། དུད་འགྲོ་གསོད་པའི་སྡིག་པ་དང་དེའི་ལས་ལམ་གཉིས་ཤན་མ་ཕྱེད་པའི་སྐྱོན་དུ་སྣང་བས་རྟགས་མི་འགྲོའོ། །བཅས་ལྟུང་ལུང་མ་བསྟན་དང་ངོ་བོ་ཐ་དད་དུ་ཐལ་ཞེས་པ་ཡང་མ་འབྲེལ་ཏེ། རང་བཞིན་གྱི་ལྟུང་བ་ལུང་མ་བསྟན་ཡིན་ན་བཅས་ལྟུང་ལུང་མ་བསྟན་ཡིན་པ་ཤིན་ཏུ་རིགས་པའི་ཕྱིར། ཐལ་བ་གསུམ་པ་ཡང་མ་ངེས་ཏེ། ལྟུང་བ་དེའི་དངོས་གཞི་ཕྱིར་བཅོས་བྱས་པས་དེའི་སྦྱོར་ལྟུང་མི་འདག་པར་ཐལ། དེ་གཉིས་ངོ་བོ་ཐ་དད་ཡིན་པའི་ཕྱིར་ཏེ། དུས་སྔ་ཕྱིར་སྐྱེས་པའི་ལྟུང་བ་ཐ་དད་ཡིན་པའི་ཕྱིར། ལྟུང་བ་ཐམས་ཅད་ལུང་མ་བསྟན་ཡིན་པར་འདོད་པ་ཡང་མི་འཐད་དེ། ལྟུང་བྱེད་འབའ་ཞིག་པ་རེ་རེའི་སྐབས་སུ་ལྟུང་བར་བྱེད། སྲེག་པར་བྱེད་ཅེས་སོགས་དང་། འདུལ་བ་ལ་བསྟོད་པ་ལས། གང་ཞིག་སྟོན་པ་ཐུགས་རྗེའི་བསྟན་པ་ལས། །ཡལ་བར་སེམས་ཤིང་ཅུང་ཟད་འདའ་བྱེད་ན། །དེ་ནི་དེ་ལ་སྡུག་བསྔལ་གཞན་དབང་ཐོབ། །སྨྱུག་ཚལ་བསྲེགས་པས་ཨ་སྨྲའི་ཚལ་ཉམས་བཞིན། །འདི་ན་ལ་ལ་རྒྱལ་པོའི་ཚུལ་ཅན་འགའ། །ལན་འགའ་འདས་ཀྱང་ཆད་པ་ཐོབ་མི་འགྱུར། །ཐུབ་པའི་བཀའ་ལས་ཚུལ་མིན་འདའ་བྱེད་ན། །དུད་འགྲོར་སྐྱེ་འགྱུར་ཨེ་ལའི་འདབ་ཀླུ་བཞིན། །ཞེས་གསུངས་སོ། །གཉིས་པ་རང་ལུགས་ནི། སྡིག་ལྟུང་ངོ་བོ་གཅིག་ཡིན་ཅིང་། དུད་འགྲོ་གསོད་པའི་ལྟུང་བ་དང་དེའི་ལས་ལམ་ངོ་བོ་ཐ་དད་ཡིན་ལ། དེ་བཞིན་དུ་བསམས་བཞིན་དུ་བཅས་མཚམས་ལས་འདས་པའི་ལྟུང་བ་ཐམས་ཅད་ལུང་མ་བསྟན་དང་ངོ་བོ་ཐ་དད་ཡིན་ཏེ། མི་དགེ་བར་ངེས་པའི་ཕྱིར། ཁོ་ན་རེ་ལྟུང་བ་ཕྱིར་བཅོས་བྱས་པས་དེའི་ཆའི་སྡིག་པ་མི་འདག་པར་ཐལ། ལྟུང་བྱེད་དང་དེའི་ལས་ལམ་ངོ་བོ་ཐ་དད་ཡིན་པའི་ཕྱིར། འདོད་ན། འདག་པར་བཤད་པ་དང་འགལ་ལོ་ཞེ་ན། དུད་འགྲོ་གསོད་པའི་ལྟུང་བྱེད་ཕྱིར་བཅོས་བྱས་པས་ལས་ལམ་ཡང་བར་འགྱུར་གྱི་འདག་པར་ནི་མ་ངེས་སོ། །དུད་འགྲོ་གསོད་པའི་ལྟུང་བྱེད་དང་དེའི་ལས་ལམ་ངོ་བོ་ཐ་དད་ཡིན་ཏེ། དུད་འགྲོ་གསོད་པའི་ལས་ལམ་ནི་དུད་འགྲོ་གསོད་པའི་སྦྱོར་བ་བྱས་ནས་དུད་འགྲོ་ཤི་བ་དང་དུས་མཉམ་དུ་སྐྱེས་པའི་རིག་བྱེད་དང་རིག་བྱེད་མ་ཡིན་པའི་གཟུགས་ཤིག་ལ་འཇོག་ལ། དེའི་ལྟུང་བྱེད་ནི་དུད་འགྲོ་ཤི་བ་དེ་ལ་མཐར་ཐུག་ཏུ་བྱས་པའི་སྐད་ཅིག་ཕྱི་ལོགས་སུ་འབྱུང་བའི་ཕྱིར། དེ་བཞིན་དུ་བརྫུན་དུ་སྨྲ་བའི་ཕམ་པ་དང་དེའི་ལས་ལམ་ཡང་ངོ་བོ་ཐ་དད་ཡིན་ཏེ། བརྫུན་སྨྲའི་ཕམ་པ་ནི་བརྫུན་ཚིག་དེ་ཕ་རོལ་པོས་ཡིད་ཤེས་ཀྱི་གོ་བའི་སྐབས་སུ་འབྱུང་ལ། ལས་ལམ་ནི་དེའི་སྔ་ལོགས་བརྫུན་ཚིག་ཉན་ཤེས་ཀྱིས་ཐོས་པའི་སྐབས་ཀྱི་རིག་བྱེད་དང་རིག་བྱེད་མ་ཡིན་པའི་གཟུགས་ལ་འཇོག་པའི་ཕྱིར། གཞན་ཡང་ལྟུང་བ་དང་ལས་ལམ་ངོ་བོ་ཐ་དད་ཡིན་ཏེ། ལྟུང་བ་ནི་གསུང་རབ་ནས་བཤད་པའི་མིང་རིགས་བརྗོད་པའི་བཤགས་པས་འདག་ལ། ལས་ལམ་ནི་དེ་ཙམ་གྱིས་འདག་པར་མ་ངེས་པའི་ཕྱིར་ཏེ། གང་ཟག་དམ་པ་ལ་ཚིག་ངན་སྨྲས་པའི་རྣམ་སྨིན་ཚེ་རབས་དུ་མར་མྱོང་བ་སོགས་བཤད་པའི་ཕྱིར་རོ། །གསུམ་པ་ངོ་བོ་ལ་དངོས་དང་། ལྟུང་བ་གྲུབ་པ་ལ་རིག་བྱེད་དགོས་མི་དགོས་དཔྱད་པ་གཉིས། དང་པོ་ནི། རིག་བྱེད་མ་ཡིན་པའི་གཟུགས་མི་དགེ་བའམ་རིག་བྱེད་ཀྱི་གཟུགས་ལུང་དུ་མ་བསྟན་པ་སྟེ། གཏམ་གྱི་གཞིར། ཉེ་བ་འཁོར་ལྟུང་བ་ནི་རྣམ་པར་རིག་བྱེད་ཅེས་ཀྱང་བྱ་ལ། རྣམ་པར་རིག་བྱེད་མ་ཡིན་པ་ཞེས་ཀྱང་བྱའོ་ཞེས་དང་། དགེ་བའམ་མི་དགེ་བའམ་ལུང་དུ་མ་བསྟན་པ་ཡིན་ཞེས་དྲིས་པ་ལ། མི་དགེ་བ་དང་ལུང་དུ་མ་བསྟན་པར་བརྗོད་པར་བྱའོ་ཞེས་སོགས་གསུངས་སོ། །དེའང་རང་གཞན་གྱི་ཁ་ན་མ་ཐོ་བ་དང་། བཅས་པ་ལས་བསམ་བཞིན་དུ་འདས་པ་ནི་མི་དགེ་བ་ཡིན་ལ། བཅས་པ་ལས་མ་བསམས་པར་འདས་པ་ནི་ལུང་མ་བསྟན་ཏེ། གཏམ་གཞིར། མི་དགེ་བ་གང་ཞེ་ན། གང་བཅོམ་ལྡན་འདས་ཀྱིས་བསླབ་པ་བཅས་པ་ལས་བསམ་བཞིན་དུ་འདའ་བར་བྱེད་པ་ནི་མི་དགེ་བའོ། །ལུང་དུ་མ་བསྟན་པ་གང་ཞེ་ན། གང་བཅོམ་ལྡན་འདས་ཀྱིས་བསླབ་པ་བཅས་པ་ལས་མ་བསམས་པར་འདས་པ་ནི་ལུང་དུ་མ་བསྟན་པའོ་ཞེས་གསུངས་སོ། །གཉིས་པ་ནི། འདི་ལ་ཁ་ཅིག་ལྟུང་བ་ནི་གཉིས་ཏེ། བྱ་བ་མི་བྱེད་པའི་ལྟུང་བ་དང་། མི་བྱ་བ་བྱེད་པའི་ལྟུང་བའོ། །དང་པོ་ལ་རིག་བྱེད་མི་དགོས་ཏེ། བྱ་བ་མ་བྱས་པ་ཙམ་གྱིས་ལྟུང་བར་འགྱུར་བའི་ཕྱིར་ཏེ། ལུང་དུ་བཙུན་པ་ལུས་སུ་ཡང་མ་ཐོན་ངག་ཏུ་ཡང་མ་ཐོན་པར་དགེ་སློང་མར་མི་རུང་བ་མཆིས་སམ། ཡོད་དེ་དགེ་སློང་མ་ཟླ་མོའི་ཕམ་པ་འཆབ་ནའོ་ཞེས་དང་། སེམས་འབའ་ཞིག་ལ་ལྟུང་བ་འགྱུར་བ་མཆིས་སམ། ཡོད་དེ་གསོ་སྦྱོང་མི་བྱེད་པའོ་ཞེས་གསུངས་པའི་ཕྱིར་ཞེས་པ་མི་འཐད་དེ། འདོད་པའི་རིག་བྱེད་མ་ཡིན་པ་གྲུབ་པ་ལ་རིག་བྱེད་ངེས་པ་དགོས་པའི་ཕྱིར་ཏེ། མཛོད་འགྲེལ་ལས། གཉིས་ཀ་ཡང་མི་བྱེད་ན་འདོད་པ་ན་སྤྱོད་པའི་རྣམ་པར་རིག་བྱེད་མེད་པ། རྣམ་པར་རིག་བྱེད་མེད་པ་ཅན་ཡང་མེད་པས་ཇི་ལྟར་ན་དེ་གཉིས་ཀྱི་ལམ་དུ་འགྱུར་ཏེ་འདི་ལ་འབད་པར་བྱའོ་ཞེས་དང་། ཊཱི་ཀར་ཉེས་བྱས་ཡོངས་སུ་རྫོགས་པ་ཡིན་གྱི་ན་སྨད་ཀྱི་ནི་མ་ཡིན་ཏེ། ཁ་རྣམ་པར་འགྱུར་བ་ལ་སོགས་པའི་རྣམ་པར་རིག་བྱེད་དེ་དེ་ལ་ཡོད་པའི་ཕྱིར་ཞེས་གསུངས་པའི་ཕྱིར། ལུང་སྔ་མའི་དོན་ནི་རྣམ་པར་རིག་བྱེད་ཅུང་ཟད་ལས་མེད་པས་དམན་པ་ལ་དགག་སྒྲ་སྦྱོར་བའོ་ཞེས་གསུང་ངོ་། །བཞི་པ་མཚན་ཉིད་ལ་ལྟུང་བའི་མཚན་ཉིད་ནི། རབ་བྱུང་གིས་སྟོན་པས་བཅས་པ་ལས་འདས་པའི་ཁ་ན་མ་ཐོ་བའོ། །དེ་ཡང་ལྔ་ལས་ཕམ་པའི་མཚན་ཉིད། བསྙེན་པར་རྫོགས་པའི་རྒྱུད་ཀྱི་དངོས་གཞིའི་ལྟུང་བ་གང་ཞིག ཁྱོད་ཀྱི་དག་བྱེད་ཆད་པའི་བསླབ་པ་ལ་ལྟོས་པའི་རིགས་ཡིན་པ། དགེ་འདུན་ལྷག་མའི་མཚན་ཉིད་གང་ཞིག ངོ་བོའི་ཆ་ནས་དབྱུང་བས་ཁྱོད་ལས་བསླང་དུ་རུང་བའི་རིགས་ཡིན་པ། ཡང་ན་གང་ཞིག་ངོ་བོའི་ཆ་ནས་ཕམ་པ་ལས་ཡང་ཞིང་། སྤང་ལྟུང་སོགས་ལས་ལྕི་བའི་རིགས་ཡིན་པ། འོག་མ་རྣམས་ཀྱང་དེ་ལས་དཔགས་ཏེ་ཤེས་པར་བྱའོ། །ལྔ་པ་རྒྱུ་ནི། མི་ཤེས་པ་ལ་སོགས་པ་བཞི་སྟེ། བསྡུ་བར། དེ་ཡི་རྒྱུ་ཡང་རྣམ་བཞི་སྟེ། །མི་ཤེས་པ་དང་བག་མེད་དང་། །ཉོན་མོངས་མང་དང་མ་གུས་པ། །ཞེས་གསུངས་པ་ལྟར་རོ། །དྲུག་པ་གྲངས་ངེས་ནི། བཅས་པ་མི་འདྲ་བ་ལྔ་ཡོད་པའི་རྒྱུ་མཚན་གྱིས་སྡེ་ཚན་ལྔར་བསྟན་པ་ཡིན་ལ། བཅས་པ་ལྔར་འཇོག་པའི་རྒྱུ་མཚན་ཡང་དེ་ཙམ་གྱིས་དགག་བྱ་ཁེགས་པ་དང་། བསྒྲུབ་བྱ་སྒྲུབ་ནུས་པར་སངས་རྒྱས་བཅོམ་ལྡན་འདས་ཀྱིས་དགོངས་ནས་གསུངས་པའོ། །བདུན་པ་གོ་རིམ་ནི། སྡེ་ཚན་སྔ་མ་སྔ་མ་ཆད་པ་ལྕི་བའི་རིམ་པ་ཡིན་ལ་ཕམ་པ་བཞི་ནི་འདིར་བཅས་པའི་རིམ་པ་དང་། བསྐལ་པ་དང་པོའི་དུས་སུ་ལས་ལམ་འདི་དག་ཇི་ལྟར་འབྱུང་བའི་རིམ་པ་དང་། ཉོན་མོངས་པ་འདི་དག་གི་རིམ་པ་དང་། གཞན་ནི་ཕལ་ཆེར་བཅས་པའི་རིམ་པའོ། །བརྒྱད་པ་སྒྲ་དོན་ནི། འདིས་ལྟུང་བར་བྱེད་པས་ལྟུང་བ་དང་། དམ་པས་སྨད་པའི་ཕྱིར་ཁ་ན་མ་ཐོ་བ་དང་། ཚུལ་ཁྲིམས་ཀྱི་མི་མཐུན་ཕྱོགས་ཡིན་པས་འཆལ་བའི་ཚུལ་ཁྲིམས་དང་། འབྲས་བུ་ཡིད་དུ་མི་འོང་བ་འབྱིན་པའི་ཕྱིར་ཉེས་པ་ཞེས་བྱ་བ་ནི་རྣམ་གྲངས་སོ། །ཕམ་པའི་སྒྲ་དོན་ནི། གཞན་སྤང་བྱ་རྒྱལ་བར་བྱེད་ཅིང་གཉེན་པོ་ཕམ་པར་བྱེད་པར་འགྱུར་བའི་ཕྱིར་ཕམ་པའོ། །དགུ་པ་ཕན་ཡོན་ནི། བཅས་པའི་ཕན་ཡོན་སྔར་བཤད་ཟིན་ལ། བསླབ་པ་བསྲུངས་པའི་ཕན་ཡོན་ནི། བམ་ལྔར། ཚུལ་ཁྲིམས་ཀྱི་ཕན་ཡོན་རྣམ་པ་བཅུ་སྟེ། འགྱོད་པ་མེད་པའི་རིམ་གྱིས་མཆོག་ཏུ་དགའ་བ་སྔོན་དུ་འགྲོ་བའི་ཆོས་ཐོབ་པར་འགྱུར་བ་དང་། འགྱོད་པ་མེད་པར་འཆི་བའི་དུས་བྱེད་པར། ཕྱོགས་བཅུར་སྙན་པའི་སྒྲ་གྲག་པར། བདེ་བར་གཉིད་ལོག་ཅིང་བདེ་བར་སད་པར། གཉིད་ལོག་པ་ན་ལྷ་རྣམས་བསྲུང་བར། གཞན་ལས་སྡིག་པའི་བག་ཚ་བ་དང་འཇིགས་པ་དང་ཡ་ང་བ་མེད་པར། དགྲ་བོ་རྣམས་ཀྱིས་གླགས་ཞིག་རྙེད་ན་ཡང་ཚུལ་ཁྲིམས་རྣམ་པར་དག་པའི་དབང་གིས་དེ་དག་བསྲུང་བ་ལ་སོགས་པའི་ཕན་འདོགས་པར། གནོད་སྦྱིན་དང་མི་མ་ཡིན་པ་དང་གདུག་པ་ཅན་གཉུག་མར་གནས་པ་རྣམས་ཀྱིས་གླགས་ཞིག་རྙེད་ན་ཡང་ཚུལ་ཁྲིམས་རྣམ་པར་དག་པའི་དབང་གིས་དེ་དག་བསྲུང་བ་ལ་སོགས་པའི་ཕན་འདོགས་པར། གཞན་ལས་ཆོས་གོས་ལ་སོགས་པ་དག་ཆོས་ཀྱིས་ཚེགས་ཆུང་ངུས་ཐོབ་པར། གང་དུ་སྐྱེ་བར་འདོད་པ་ལ་སོགས་པའི་སྨོན་ལམ་ཡང་དག་པར་འགྲུབ་པར་འགྱུར་བའོ་ཞེས་སོ། །བཅུ་པ་མ་བསྲུངས་པའི་ཉེས་དམིགས་ནི། སྟོན་པས་སྨོད་པ་དང་། ལྷས་དང་། མཁན་སློབ་ལ་སོགས་པ་གྲོགས་དམ་པས་དང་། དེས་མ་སྨད་ཀྱང་ཆོས་ཉིད་ཀྱིས་སྨད་པ་དང་། དམ་པའི་ཆོས་མ་ཐོས་པ་ཐོས་པར་མི་འགྱུར་བ་དང་། ཐོས་པ་བརྗེད་པ་དང་། མ་རྟོགས་པ་མི་རྟོགས་པ་དང་། ཕྱོགས་དང་ཕྱོགས་མཚམས་རྣམས་སུ་སྡིག་པའི་སྒྲ་གྲག་པ་དང་། འགྱོད་པ་དང་བཅས་ཏེ་འཆི་བར་འགྱུར་བ་དང་། ངན་སོང་གསུམ་དུ་སྐྱེ་བ་ལ་སོགས་པའོ། །བཞི་པ་རྟེན་གྱི་ཡན་ལག་ནི། སྡོམ་པ་གསོར་རུང་ཡན་ཆད་དང་ལྡན་པ་དང་། བསླབ་པ་བཅས་པ་དང་འབྲེལ་བ་དང་། ཤེས་པ་རང་བཞིན་དུ་གནས་པ་གསུམ་ནི་ཐམས་ཅད་ཀྱི་ཡན་ལག་ཡིན་ལ། གཟུགས་གཞན་དུ་མ་བསྒྱུར་བ་དང་། མི་སྣང་བར་མ་བྱས་པ་དང་། མཚན་མ་གྱུར་པ་གསུམ་ནི་འགའ་ཞིག་གི་ཡན་ལག་ཡིན་ནོ།། ༈ །།ལྔ་པ་བསྡུས་པའི་དོན་བཤད་པ་ནི། རྣམ་པར་འབྱེད་པའི་དཀྱུས་འདི་རྣམས་ལ་རྣམ་པ་གསུམ་གྱིས་ས་གཅོད་པར་མཛད་དེ། ལྟུང་བ་རྣམ་པར་གཞག་པ་དང་། ལྟུང་བ་མེད་པ་དང་། བསླབ་བྱའོ། །དང་པོ་ནི། དངོས་གཞི་དང་། སྦྱོར་བ་དང་། སྦྱོར་བའི་སྦྱོར་བ་རྣམ་པར་གཞག་པ་སྟེ། བམ་ལྔར། ལྟུང་བ་རྣམ་པར་གཞག་པ་ནི་བསམ་པ་དང་སྦྱོར་བའི་སྒོ་ནས་དངོས་གཞི་དང་། སྦྱོར་བ་དང་། སྦྱོར་བའི་སྦྱོར་བ་ཅི་རིགས་པར་རྣམ་པར་གཞག་པའོ་ཞེས་པ་ལྟར་རོ། །དེ་ལ་མདོར་བསྟན་པ་དང་། རྒྱས་པར་བཤད་པ་གཉིས་སམ། ཡན་ལག་གི་མཚན་ཉིད་དང་། སེལ་བ་གཉིས་ཅི་རིགས་པས་འཆད་དོ། །ཡན་ལག་གི་མཚན་ཉིད་ནི་བཞི་སྟེ། གཞི་དང་། བསམ་པ་དང་། སྦྱོར་བ་དང་། མཐར་ཐུག་གི་ཡན་ལག་གོ །གཞིའི་ཡན་ལག་ལ་ཡུལ་དང་རྟེན་ལ་སོགས་པ་དུ་མ་ཡོད་ཅིང་། བསམ་པའི་ཡན་ལག་ལ་ཀུན་སློང་དང་འདུ་ཤེས་གཉིས་སོ། །འདུ་ཤེས་དང་སྦྱོར་བའི་ཡན་ལག་མ་ཚང་བ་ལའང་དངོས་གཞི་འབྱུང་བ་ཡོད་དོ། །གཉིས་པ་སེལ་བ་ལ་གསུམ་སྟེ། དབྱེ་བ། མཚན་ཉིད། སེལ་བ་ལ་ཅིར་འགྱུར་བའོ། །དང་པོ་ལ་ཐུན་མོང་བའི་སེལ་བ་དང་། ཐུན་མོང་མ་ཡིན་པའི་སེལ་བ་གཉིས། དང་པོ་ལ་བཞིར་ཡོད་དེ། སྡོམ་པ་གཏན་ནས་མ་བླངས་པ་ལྟ་བུའི་བསླབ་པའི་ཡན་ལག་གི་སེལ་བ་དང་། སྨྱོ་བ་ལ་སོགས་པ་རང་བཞིན་དུ་གནས་པའི་སེལ་བ་དང་། རང་རང་གི་ཀུན་སློང་མེད་པ་བསམ་པའི་སེལ་བ་དང་། རང་རང་གི་ལས་དང་པོ་པ་ནི་བཅས་པའི་སེལ་བའོ། །བསླབ་རྒྱུན་གཅིག་པ་ལྟུང་བ་དངོས་གཞི་ཀུན་གྱི་ཐུན་མོང་གི་ཡན་ལག་ཡིན་ཀྱང་། བསླབ་རྒྱུན་ཐ་དད་པ་ལྟུང་བ་དངོས་གཞི་ཀུན་གྱི་ཐུན་མོང་གི་སེལ་བ་མ་ཡིན་ཏེ། བསླབ་རྒྱུན་ཐ་དད་པའི་སེལ་བ་དེ་ཁང་པ་ཁང་ཆེན་གྱི་ལྟུང་བ་ལྟ་བུ་སྦྱོར་བ་རྒྱུད་ལྡན་རྣམས་ལ་འཇུག་ཀྱང་རེག་པའི་ལྷག་མ་ལྟ་བུ་སྦྱོར་བ་རྒྱུད་མི་ལྡན་རྣམས་ལ་མི་འཇུག་སྟེ། བསླབ་རྒྱུན་སྔ་མ་ལ་བུད་མེད་ལ་རེག་པའི་སྦྱོར་བ་བྱས་ནས་ཁྱིམ་པར་བབ། སླར་བསྙེན་པར་རྫོགས་པ་བྱས་པའི་ཚེ་སྔར་རེག་པའི་དབང་གིས་བསླབ་རྒྱུན་ཕྱི་མ་ལ་རེག་པའི་ན་སྨད་བསྐྱེད་པ་མེད་པའི་ཕྱིར། གཉིས་པ་ཐུན་མོང་མ་ཡིན་པའི་སེལ་བ་ལ་བཞི་སྟེ། གཞིའི་ཡན་ལག་མ་ཚང་བ་གཞིའི་སེལ་བ། བསམ་པའི་ཡན་ལག་མ་ཚང་བ་བསམ་པའི་སེལ་བ། སྦྱོར་བའི་ཡན་ལག་མ་ཚང་བ་སྦྱོར་བའི་སེལ་བ། མཐར་ཐུག་གི་ཡན་ལག་མ་ཚང་བ་མཐར་ཐུག་གི་སེལ་བའོ། །གཉིས་པ་སེལ་བའི་མཚན་ཉིད་ནི། ལྟུང་བ་རང་རང་གི་དངོས་གཞི་རྫོགས་པར་བསྐྱེད་པ་ལ་ངེས་གཟུང་དུ་དགོས་པའི་ཡན་ལག་མ་ཚང་བའོ། །གཅིག་ལ་མཚོན་ན་མ་བྱིན་ལེན་གྱི་ཕམ་པ་བསྐྱེད་པ་ལ་ངེས་གཟུང་དུ་དགོས་པའི་ཡན་ལག་མ་ཚང་བ་དེ་མ་བྱིན་ལེན་གྱི་ཕམ་པའི་སེལ་བའི་མཚན་ཉིད། གཞན་ལ་འགྲེའོ། །གསུམ་པ་སེལ་བ་ལ་ཅིར་འགྱུར་བ་ལ་གཉིས་ཏེ། དངོས་དང་། དེ་ལས་འཕྲོས་པའི་སྦོམ་པོའི་དོན་བཤད་པའོ། །དང་པོ་ལ་བཞིར་ཡོད་དེ། ན་སྨད་དུ་འགྱུར་བ། ཆེས་ན་སྨད་དུ་འགྱུར་བ། ལྟུང་བ་གཞན་དུ་འགྱུར་བ། ལྟུང་མེད་དུ་འགྱུར་བའོ། །དང་པོ་ནི། མ་བྱིན་ལེན་གྱི་ཕམ་པ་བསྐྱེད་པའི་ཡན་ལག་མ་ཚང་བ་མིའི་རྫས་རིན་ཐང་མ་ཚང་བ་ལྟ་བུའམ། སྐྱོན་ནས་སྨྲ་བའི་ལྟུང་བྱེད་བསྐྱེད་པའི་ཡན་ལག་མ་ཚང་བ་མཚན་མཐུན་མ་ཚང་བ་ལྟ་བུ་ཡན་ལག་གཅིག་མ་ཚང་བ་ལ་ལྟུང་བ་ན་སྨད་དུ་འགྱུར་ཏེ། དགག་བྱ་མ་རྫོགས་པའི་ཕྱིར། ཁྱབ་པ་ཡོད་དེ། མ་ཆོག་པ་རྐུས་ནའོ་ཞེས་དང་། འོག་མ་དག་ལ་ནི་གཞན་ལ་ན་སྨད་པ་ཉིད་དོ། །ཞེས་གསུངས་པའི་ཕྱིར། དེ་ཡང་ཕམ་ལྷག་གི་ན་སྨད་སྦོམ་པོ་དང་། ལྟུང་བྱེད་སོར་བཤགས་གསུམ་གྱི་ན་སྨད་ཉེས་བྱས། ཉེས་བྱས་ཀྱི་ན་སྨད་ཉེས་བྱས་ཕྲ་མོར་འགྱུར་ཏེ། ཁ་ན་མ་ཐོ་བ་ན་སྨད་པ་དག་གི་ཆ་ཉིད་ནི་ན་སྨད་པ་ཉིད་དོ་ཞེས་གསུངས་པའི་ཕྱིར། གཉིས་པ་ཆེས་ན་སྨད་ནི། མ་བྱིན་ལེན་གྱི་ཕམ་པའི་སྐབས་སུ་མི་མ་ཡིན་པའི་རྫས་རིན་ཐང་མ་ཚང་བ་དང་། སྐྱོན་སྨྲའི་ལྟུང་བྱེད་ཀྱི་སྐབས་སུ་ལྟ་བ་མཐུན་པ་དང་མཚན་མཐུན་པའི་ཡན་ལག་གཉིས་མ་ཚང་བ་ལ་ཆེས་ན་སྨད་དུ་འགྱུར་ཏེ། དགག་བྱ་ཆེས་མ་རྫོགས་པའི་ཕྱིར། ཁྱབ་སྟེ། དུ་མ་མ་ཚང་བ་ལ་ནི་དེ་བས་ཀྱང་ངོ་ཞེས་གསུངས་པའི་ཕྱིར། ཕམ་ལྷག་གཉིས་ཀྱི་ཆེས་ན་སྨད་ལ་ཉེས་བྱས། སྦོམ་པོ་ལྟུང་བྱེད་སོར་བཤགས་གསུམ་གྱི་ཆེས་ན་སྨད་ལ་ཉེས་བྱས་ཕྲ་མོ། ཉེས་བྱས་ཀྱི་ཆེས་ན་སྨད་ལ་ཉེས་བྱས་ཕྲ་མོའི་ཕྲ་མོ། ཉེས་བྱས་ཕྲ་མོའི་ཆེས་ན་སྨད་ལ་ཉེས་བྱས་ཆེས་ཕྲ་མོའི་ཕྲ་མོར་འགྱུར་ཏེ། སྒྲུབ་བྱེད་སྔར་བཞིན་ནོ། །ཆེས་ན་སྨད་དུ་འགྱུར་བ་ལ་ཡན་ལག་གཉིས་མ་ཚང་བ་ངེས་པར་མི་དགོས་ཏེ། མི་ཡུལ་དུ་དགོས་པའི་འཁྲིག་ཚིག་བསྙེན་བཀུར་རེག་པའི་ལྷག་མའི་སྐབས་སུ་དུད་འགྲོ་མོ་ལ་དེ་བྱས་ན་ཡང་ཡན་ལག་གཅིག་མ་ཚང་ཡང་ཆེས་ན་སྨད་དུ་འགྱུར་བའི་ཕྱིར་ཏེ། མི་ལ་དུད་འགྲོ་ཡང་ངོ་ཞེས་གསུངས་པའི་ཕྱིར། གསུམ་པ་ལྟུང་བ་གཞན་དུ་འགྱུར་བ་ལ་གསུམ་སྟེ། སྡེ་ཚན་གཞན་དུ་འགྱུར་བ། སྡེ་ཚན་གཞན་དུ་མ་གྱུར་ཀྱང་བཅས་པ་གཞན་དུ་འགྱུར་བ། གནས་སྐབས་གཞན་དུ་འགྱུར་བའོ། །དང་པོ་ནི། མི་གསོད་པའི་ཡན་ལག་མ་ཚང་བ་དུད་འགྲོ་གསོད་ན་ཕམ་པའི་སྡེ་ཚན་ལས་གཞན་ལྟུང་བྱེད་བསྐྱེད་པ་ལྟ་བུའོ། །གཉིས་པ་ནི། གཞི་མེད་ཀྱི་སྐུར་འདེབས་ཀྱི་ལྷག་མའི་ཡན་ལག་མ་ཚང་བ་སྦྱོར་བ་མི་གསལ་བས་སྐུར་པ་བཏབ་ན་བག་ཙམ་གྱིས་ལྷག་མ་བསྐྱེད་པ་ལྟ་བུའོ། །གསུམ་པ་ནི། རེག་པའི་ལྷག་མའི་ཡན་ལག་མ་ཚང་བ་རེག་པའི་བདེ་བ་མྱོང་འདོད་མེད་པར་རེག་འདོད་ཙམ་གྱིས་བུད་མེད་ལ་རེག་པས་ལྟུང་བ་རྣམ་གཞག་གི་གནས་སྐབས་ལས་གཞན་བསླབ་བྱའི་ཉེས་བྱས་སུ་འགྱུར་བ་ལྟ་བུ་ཡིན་ཏེ། དེས་ལྟུང་བ་རྣམ་གཞག་གི་ལྟུང་བ་མི་བསྐྱེད་པར་བསླབ་བྱའི་ཉེས་བྱས་བསྐྱེད་པའི་ཕྱིར། བཞི་པ་ལྟུང་མེད་དུ་འགྱུར་བ་ལ་བཞི་སྟེ། ལྟུང་བའི་དངོས་གཞི་མེད་པ་ལ་དགོངས་ནས་ལྟུང་བ་མེད་པ། ལྟུང་བ་རྣམ་གཞག་གི་ལྟུང་བ་མེད་པ་ལ་དགོངས་ནས་ལྟུང་བ་མེད་པ། སྐབས་དེར་གཏོགས་ཀྱི་ལྟུང་བ་མེད་པ་ལ་དགོངས་ནས་ལྟུང་བ་མེད་པ། ལྟུང་བ་གཏན་མེད་པའི་ལྟུང་བ་མེད་པའོ། །དང་པོ་ནི། ལུང་འདུལ་བྱེད་ལས། ཚེ་དང་ལྡན་པ་ཚུར་ཤོག་རྫས་ཉུང་ངུ་ཉུང་ངུ་ནས་བརྐུས་ན་ལྟུང་བ་མེད་དོ་ཞེས་གསུངས་པ་ལྟ་བུའོ། །གཉིས་པ་ནི། ཉེ་སྡེས། གསོད་འདོད་མེད་པར་མངལ་བླུག་པ་ལ་ལུང་རྣམ་འབྱེད་ལས་ཉེ་སྡེ་ལ་ལྟུང་བ་མེད་དོ་ཞེས་གསུངས་པ་ལྟ་བུའོ། །གསུམ་པ་ནི། ལྷུང་བཟེད་དོ་གསུམ་ཙམ་ལས་ལྷག་པ་ལེན་པའི་སྐབས་སུ་འབྲུ་རྗེན་པ་ལྷུང་བཟེད་དོ་གསུམ་ཙམ་ལས་ལྷག་པ་ལེན་པ་ལ་ལྟུང་བ་མེད་དེ། ལས་སུ་མ་བྱས་པ་ལ་ཡང་ངོ་ཞེས་ལྟུང་མེད་དུ་གསུངས་པ་ལྟ་བུའོ། །བཞི་པ་ལ་གཉིས་ཏེ། རང་བཞིན་དང་བཅས་པ་མཐའ་དག་གི་ལྟུང་བ་མེད་པ་དང་། བཅས་པ་འབའ་ཞིག་གི་ལྟུང་བ་མེད་པའོ། །དང་པོ་ནི། ཤེས་པ་རང་བཞིན་དུ་མི་གནས་པ་དང་། རང་རང་གི་ཀུན་སློང་མེད་པ་དང་། རང་རང་གི་ལས་དང་པོ་པ་དང་། བསླབ་པའི་སེལ་བ་སྡོམ་པ་གཏན་མ་བླངས་པ་ལྟ་བུའོ། །གཉིས་པ་ལ་བཞི་སྟེ། དགག་བྱ་ཉེས་དམིགས་མེད་པ་དང་། རྣམ་གཞག་བག་ཡངས་དང་འབྲེལ་བས་དང་། འགལ་རྐྱེན་བར་ཆད་དང་ལྡན་པས་དང་། སྒྲུབ་པར་མི་ནུས་པ་ཕྱོགས་གཅིག་ལ་ཞུགས་པས་ལྟུང་བ་མེད་པའོ། །ལྟུང་མེད་བཞི་པོ་བཅས་པ་འབའ་ཞིག་གི་སྐབས་སུ་ཡིན་གྱི། རང་བཞིན་གྱི་ཁ་ན་མ་ཐོ་བའི་སྐབས་སུ་ལྟུང་མེད་བཞི་པོ་མི་སྲིད་པའི་ཕྱིར་ཏེ། རང་བཞིན་གྱི་ཁ་ན་མ་ཐོ་བ་ངོ་བོ་ཉིད་ཀྱི་དགག་བྱར་གྱུར་པས་དགག་བྱ་ཉེས་དམིགས་མེད་པས་ལྟུང་བ་མི་སྲིད་པའི་ཕྱིར་དང་། སྲོག་ལ་བབས་ཀྱང་གནང་བ་མེད་པས་རྣམ་གཞག་བག་ཡངས་དང་འབྲེལ་བའི་ལྟུང་བ་མེད་པ་ཡང་མི་སྲིད་པའི་ཕྱིར། རང་བཞིན་གྱི་ཁ་ན་མ་ཐོ་བ་དེ་ཉིད་ཚུལ་ཁྲིམས་ཀྱི་བར་ཆད་ཡིན་པས་འགལ་རྐྱེན་བར་ཆད་སྤོང་བའི་དོན་དུ་གནང་བ་མི་སྲིད་པའི་ཕྱིར། རང་བཞིན་གྱི་ཁ་ན་མ་ཐོ་བ་སྤོང་བའི་དོན་དུ་སྲོག་འདོར་བར་གསུངས་པས་སྒྲུབ་པར་མི་ནུས་པ་ཕྱོགས་གཅིག་ལ་ཞུགས་པས་ལྟུང་བ་མེད་པ་ཡང་མི་སྲིད་པའི་ཕྱིར། དེ་ལ་དང་པོ་དགག་བྱ་ཉེས་དམིགས་མེད་པས་ལྟུང་བ་མེད་པ་ནི། ཉི་མ་གཅིག་ལ་རྡོའམ་སོ་ཕག་རིམ་པ་གསུམ་ལས་ལྷག་པ་རྩིག་པ་དང་། བྱེ་མ་འབའ་ཞིག་བརྐོ་བ་ལ་ལྟུང་མེད་དུ་གསུངས་པ་ལྟ་བུའོ། །དེས་ལྟུང་བ་མི་བསྐྱེད་པ་ནི་བཅས་པ་རྣམ་གཞག་གི་དགག་བྱ་མེད་པས་ལྟུང་བ་བསྐྱེད་པའི་བཅས་པ་མ་མཛད་པའོ། །གཉིས་པ་ལ་གཉིས་ཏེ། བག་ཡངས་ཆེན་པོ་དང་འབྲེལ་བའི་ལྟུང་བ་མེད་པ་དང་། བག་ཡངས་ཁ་འཐོར་བ་དང་འབྲེལ་བའི་ལྟུང་བ་མེད་པའོ། །དང་པོ་ལ་ལྔ་སྟེ། ལུང་གང་ལས་གསུངས་པ། གཞི་གང་ལ་བྱ་བ། ཆེད་དུ་བྱ་བ་གང་གི་ཕྱིར་བྱ་བ། ཆོ་ག་གང་གིས་བྱ་བ། སྡེ་པ་གང་གི་ལུགས་ཡིན་པའོ། །དང་པོ་ནི། ལུང་ཕྲན་ཚེགས་ལས། དགེ་སློང་དག་བསླབ་པའི་གཞི་ཕྲ་མོ་དང་ཕྲན་ཚེགས་གང་ཡིན་པ་དེ། དགེ་འདུན་ཚོགས་ལ་སྐབས་དབྱེ་ཞིང་བདེ་བ་ལ་རེག་པར་གནས་པར་བྱའོ། །ཞེས་གསུངས་སོ། །གཉིས་པ་ནི། བསླབ་པའི་གཞི་ཕྲ་མོ་རྣམས་ལ་བྱ་བ་ཡིན་ལ། དགྲ་བཅོམ་པ་འོད་སྲུང་གིས་དོག་མཐའ་གཞི་བསྡུས་ཀྱི་ཉེས་བྱས་ཁོ་ན་དང་། ཡང་མཐའ་ཕམ་ལྷག་མན་ལ་མཛད་ཀྱང་། རང་བཞིན་གྱི་ཁ་ན་མ་ཐོ་བའི་སྤང་ལྟུང་མན་ལ་བག་ཡངས་མེད་དོ། །དེས་ན་ཆང་མ་གཏོགས་པའི་སྤང་ལྟུང་མན་གྱི་བཅས་པའི་ཁ་ན་མ་ཐོ་བ་རྣམས་ལ་བྱ་སྟེ། རྣམ་པར་གཏན་ལ་དབབ་པ་བསྡུ་བ་ལས། ལྟུང་བ་ཕྲན་ཚེགས་ཞེས་བྱ་བ་ནི་རང་བཞིན་གྱི་ཁ་ན་མ་ཐོ་བ་དང་བཅས་པ་མ་གཏོགས་སོ་ཞེས་གསུངས་སོ། །གསུམ་པ་ལ་བཞི་སྟེ། རྣམ་པར་གཏན་ལ་དབབ་པ་བསྡུ་བ་ལས། དགེ་འདུན་གྱི་དབྱེན་སྤང་བ་དང་། གང་ཟག་རླབས་པོ་ཆེ་བསྟན་པ་ལ་འཇུག་པའི་དོན་དང་། བསྟན་པ་འཕེལ་བར་བྱ་བ་དང་། དཀའ་བས་འཚོ་བ་སྤང་བའོ། །ཞེས་གསུངས་སོ། །དེའི་དོན་ཡང་དང་པོ་ནི། དགེ་སློང་འགའ་ཞིག་ལ་ལྟུང་བ་བྱུང་བ་ལ། རང་ཉིད་ཀྱིས་མ་བྱུང་བར་འདུ་ཤེས། ཁ་ཅིག་གིས་བྱུང་བར་ཤེས་ཏེ་གླེངས་པས་འཐབ་རྩོད་དུ་འགྱུར་བ་ཞི་བའི་ཕྱིར་དང་། གཉིས་པ་ནི་གང་ཟག་རིགས་རྒྱུད་མཐོན་པོ་བསྟན་པ་ལ་ཞུགས་ན་ཕན་འདོགས་ཆེན་པོ་འབྱུང་བ་བསླབ་པའི་གནས་ཕྲ་མོ་བསྲུང་མི་ནུས་པ་དེ་བསྟན་པ་ལ་འཇུག་པ་དང་། གསུམ་པ་དང་བཞི་པ་ནི། དུས་ཀྱི་མཐའ་སྙིགས་མ་ལྔ་བདོ་བའི་དུས་སུ་རབ་ཏུ་བྱུང་བ་རྣམས་ཟས་གོས་མ་རྙེད་པར་འཚོ་དཀའ་བར་འགྱུར་བ་དང་། བསྟན་པ་སྙིགས་མའི་དུས་སུ་བསླབ་པ་ཕྲ་མོ་རྣམས་བསྲུང་དགོས་པས་བསྟན་པ་ལ་ཞུགས་པ་རྣམས་སྒྱིད་ལུགས་ཅིང་མ་ཞུགས་པ་རྣམས་འཇིག་ནས་གསར་དུ་འཇུག་པ་མེད་པར་འགྱུར་བས་ཉེས་དམིགས་དེ་རྣམས་སྤང་བའི་དོན་དུ་དགེ་འདུན་ཚོགས་ནས་བསླབ་པའི་གཞི་ཕྲ་མོ་དང་ཕྲན་ཚེགས་འགའ་ཞིག་མ་བསྲུངས་ཀྱང་ཉེས་པ་མི་འབྱུང་བའི་ཕྱིར་དུ་བག་ཡངས་སུ་བྱེད་དོ། །བཞི་པ་ཆོ་ག་གང་གིས་བྱ་བ་ནི། གསོལ་བཞིའི་ལས་ཀྱིས་བྱ་བ་ཡིན་ཏེ། དེ་ཉིད་ལས། གསོལ་བ་དང་བཞིའི་ལས་ཀྱིས་བསླབ་པའི་གཞིའི་ཕྲན་ཚེགས་ལ་བག་ཡངས་སུ་བྱེད་པའོ་ཞེས་གསུངས་པའི་ཕྱིར་རོ། །ཆོ་ག་འདི་ནི་རྒྱ་གར་མཁན་པོ་སྣ་སྒ་པ་ནས་བརྒྱུད་པ་ལས་འབྱུང་ངོ་། །ལྔ་པ་སྡེ་པ་གང་གི་ལུགས་ཡིན་པ་ནི། ཐམས་ཅད་ཡོད་པ་སྨྲ་བའི་ལུགས་ཡིན་གྱི། སྡེ་པ་གཞན་འགའ་ཞིག་ནི་མི་འདོད་དེ། བཙུན་པ་ངོ་བོ་ཉིད་མེད་པས་མཛད་པའི་འགྲེལ་པ་ལས། ཐམས་ཅད་ཡོད་པར་སྨྲ་བའི་སྡེ་པ་ལ་ནི་བསླབ་པའི་གཞི་ཕྲན་ཚེགས་ཕྲ་མོ་ཁ་ཅིག་ལ་གལ་ཏེ་དགེ་འདུན་ཚོགས་པས་བག་ཡངས་སུ་བྱས་ན་བག་ཡངས་སུ་བྱས་པ་ཡིན་ནོ་ཞེས་གྲག་གོ །འདིར་ཡང་གྲག་པ་ཙམ་དུ་ཟད་ཀྱི། བསླབ་པའི་གཞི་གང་ལ་ཡང་བག་ཡངས་སུ་དགེ་འདུན་གྱིས་བྱས་པའམ་བྱེད་པ་ནི་མེད་དོ་ཞེས་གསུངས་སོ། །གཉིས་པ་བག་ཡངས་ཁ་འཐོར་བ་དང་འབྲེལ་བས་ལྟུང་བ་མེད་པ་ནི། སྲ་བརྐྱང་བཏིང་ན་འཆང་འབྲལ་འཇོག་གསུམ་གྱི་ལྟུང་བ་དང་། ཁང་པ་ཁང་ཆེན་གྱི་གནང་བ་བྱིན་ན་དེ་དག་བརྩིགས་ཀྱང་ཉེས་པ་མི་འབྱུང་བ་ལྟ་བུའོ། །གསུམ་པ་ལ་གཉིས་ཏེ། གཙོ་བོའི་བར་ཆད་དང་། གཙོ་བོ་མ་ཡིན་པའི་བར་ཆད་ཀྱི་རྐྱེན་དང་ལྡན་པས་ལྟུང་བ་མེད་པའོ། །དང་པོ་ལ་གཉིས་ཏེ། རང་གི་གཙོ་བོའི་བར་ཆད་དང་ལྡན་པས་ལྟུང་བ་མེད་པ་དང་། གཞན་གྱི་གཙོ་བོའི་བར་ཆད་དང་ལྡན་པས་ལྟུང་བ་མེད་པའོ། །དང་པོ་ལ་གསུམ་སྟེ། རང་གི་སྲོག་གི་དང་། རང་གི་ཚུལ་ཁྲིམས་ཀྱི་དང་། རང་གི་དགེ་སྦྱོང་ཚུལ་གྱི་བར་ཆད་དང་ལྡན་པས་ལྟུང་བ་མེད་པའོ། །དང་པོ་ནི། དགེ་སློང་གིས་བཅས་པ་འགའ་ཞིག་བསྲུངས་ན་རང་གི་སྲོག་གི་བར་ཆད་དུ་འགྱུར་ལ། མ་བསྲུངས་པར་གློད་ན་སྲོག་གི་བར་ཆད་དུ་མི་འགྱུར་བ་ནང་འདོམས་ན་རང་གི་སྲོག་གི་བར་ཆད་སྤོང་བའི་དོན་དུ་ཆང་འཐུང་བ་སོགས་འགའ་ཡར་མ་གཏོགས་བཅས་པའི་ཁ་ན་མ་ཐོ་བ་རྣམས་གནང་བ་ཡིན་ཏེ། ཕྲན་ཚེགས་ལས། རང་བཞིན་གྱི་ཁ་ན་མ་ཐོ་བ་དང་བཅས་པ་དག་མ་གཏོགས་པ་གཞན་གྱིས་ནད་པ་བསྐྱང་བར་བྱའོ་ཞེས་གསུངས་པའི་ཕྱིར། གཉིས་པ་ལ་གཉིས་ཏེ། དངོས་དང་། ཞར་ལས་བྱུང་བའོ། །དང་པོ་ནི། དགེ་སློང་གིས་བཅས་པ་འགའ་ཞིག་བསྲུང་བ་དང་རང་བཞིན་གྱི་ཁ་ན་མ་ཐོ་བ་བསྲུང་བ་ཐབས་གཞན་མེད་པར་ནང་འདོམས་ན་ཆང་འཐུང་བ་སོགས་འགའ་རེ་མ་གཏོགས་པའི་བཅས་རྐྱང་ཐམས་ཅད་གནང་སྟེ། སྲོག་གི་བར་ཆད་སྤོང་བའི་དོན་དུ་བཅས་པ་གནང་བ་ནི་གང་ཞིག སྲོག་གི་བར་ཆད་སྤོང་བ་བས་རང་བཞིན་གྱི་ཁ་ན་མ་ཐོ་བ་སྤོང་བ་དགོས་པ་ཆེ་བའི་ཕྱིར་ཏེ། ལུང་ཕྲན་ཚེགས་ལས། སྲོག་ཉིད་སྤང་བར་བྱ་ཞིང་སྲོག་ཆགས་གསད་པར་མི་བྱའོ། །ཞེས་གསུངས་པའི་ཕྱིར། གཉིས་པ་ཞར་ལས་བྱུང་བ་ལ་གཉིས་ཏེ། རང་བཞིན་གྱི་ཁ་ན་མ་ཐོ་བ་ནང་འདོམས་ན་ཇི་ལྟར་བྱ་བ། བཅས་པ་ཆེ་ཆུང་དང་དགག་དགོས་ཆེ་ཆུང་འབྲེལ་མ་འབྲེལ་བསམ་པའོ། །དང་པོ་ནི། ཁ་ཅིག་མི་གསོད་པ་དང་། དུད་འགྲོ་གསོད་པ་དང་། རང་ཉིད་གསོད་པ་གསུམ་འདོམས་ན། དུད་འགྲོ་གསོད་པ་གནང་སྟེ། ལྟུང་བ་ཆེ་བའི་ངོར་ཆུང་བ་གནང་བ་ཡོད་པ་གང་ཞིག བདག་ཉིད་གསོད་ན་སྦོམ་པོ་བསྐྱེད། མི་གསོད་ན་ཕམ་པ་བསྐྱེད། དུད་འགྲོ་གསོད་ན་ལྟུང་བྱེད་ལས་མི་བསྐྱེད་ཅིང་ཆུང་བ་བཤགས་པས་འདག་པའི་ཕྱིར་ཞེས་ཟེར་བ་མི་འཐད་དེ། རང་བཞིན་གྱི་ཁ་ན་མ་ཐོ་བ་ལ་གནང་བ་མེད་པའི་ཕྱིར། དེའི་ཚེ་བདག་ཉིད་གསོད་དུ་འཇུག་པར་བྱ་བ་ཡིན་ཏེ། ལུང་ལས། སྲོག་ཉིད་སྤང་བར་བྱ་ཞིང་སྲོག་ཆགས་གསད་པར་མི་བྱའོ་ཞེས་གསུངས་པའི་ཕྱིར། དུད་འགྲོ་གསོད་པ་གནང་བ་ཡང་མི་འཐད་དེ། དེའི་ལྟུང་བ་བཤགས་དགོས་པའི་ཕྱིར། གཞན་ཡང་། དེ་གསུམ་འདོམས་པ་ན་བདག་ཉིད་གསོད་པས་སྦོམ་པོ་བསྐྱེད་པ་མ་ཡིན་པར་ཐལ། དེའི་ཚེ་རང་ཉིད་གསོད་འདོད་ཀྱིས་རང་ཉིད་གསོད་པའི་སྦྱོར་བ་ལ་ཞུགས་པ་མ་ཡིན་གྱི། ཚུལ་ཁྲིམས་བསྲུང་འདོད་ཀྱི་བསམ་པས་བདག་ཉིད་ཀྱི་སྲོག་འདོར་བ་ལ་ཞུགས་པ་ཡིན་པའི་ཕྱིར། བཅས་པའི་ཁ་ན་མ་ཐོ་བ་ནང་འདོམས་ན་བཅས་པ་ཆེ་བའི་ངོར་ཆུང་བ་གནང་བས་ཁྱབ་བམ་མ་ཁྱབ་ཅེ་ན། མ་ཁྱབ་སྟེ། ཆུང་བའི་ངོར་ཆེ་བ་གནང་བ་ཡོད་པའི་ཕྱིར་ཏེ། དགེ་ཚུལ་གྱི་དབྱར་རལ་བའི་ཉེས་པ་སྤོང་བའི་དོན་དུ་ནུབ་ལྷག་ཉལ་གྱི་ལྟུང་བྱེད་གནང་བ་ཡོད་པའི་ཕྱིར་ཏེ། དགེ་ཚུལ་དང་ལྡན་པས་སོ་ཞེས་གསུངས་པའི་ཕྱིར། གཉིས་པ་ལ་ཁ་ཅིག་བཅས་པ་ཆེ་ཆུང་དང་དགག་དགོས་ཆེ་ཆུང་ལ་ངེས་པ་མེད་དེ། དགག་བྱ་ཆེ་ལ་བཅས་པ་ཆུང་བ་ཡང་ཡོད། དགག་བྱ་ཆུང་ལ་བཅས་པ་ཆེ་བ་ཡང་ཡོད་པའི་ཕྱིར། དང་པོ་གྲུབ་སྟེ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ལ་སྡིག་པ་མཚམས་མེད་འབྱུང་བས་གདགས་བྱ་ཆེ་ལ། ལྟུང་བ་ནི་ན་སྨད་པ་ལས་མི་བསྐྱེད་པས་བཅས་པ་ཆུང་བ་ཡིན་པའི་ཕྱིར། དགག་བྱ་ཆུང་ལ་བཅས་པ་ཆེ་བ་ཡང་ཡོད་དེ། དགེ་སློང་མས་ཟླ་མོའི་ཕམ་པ་འཆབ་པ་དགག་བྱ་ཆུང་བ་གང་ཞིག བཅས་པ་ཆེ་བ་ཡིན་པའི་ཕྱིར། དང་པོ་གྲུབ་སྟེ། ཟླ་མོའི་ལྟུང་བ་འཆབ་པ་ལ་ཉེས་པ་ཆེར་མེད་པའི་ཕྱིར། གཉིས་པ་གྲུབ་སྟེ། དེ་ལ་ཕམ་པ་བཅས་པའི་ཕྱིར་ཞེས་ཟེར་ན། དེ་བཞིན་གཤེགས་པ་ལ་ངན་སེམས་ཀྱི་ཁྲག་ཕྱུང་བ་ནི་བྱ་བ་དེ་འབྲེལ་གྱི་དགག་བྱ་ཆེ་ཡང་བཅས་པ་རྣམ་འཇོག་གི་དགག་བྱ་ཆེ་བ་མ་ཡིན་ཏེ། དེ་བཞིན་གཤེགས་པ་མཐོང་ན་དད་པ་སྐྱེ་བ་འབྱུང་ཉེ། ངན་སེམས་ཀྱི་ཁྲག་ཕྱུང་བ་བྱུང་རིང་ཞིང་འབྲེལ་ཆུང་བས་དགག་བྱ་གནས་སྐབས་ཀྱི་སྒོ་ནས་མ་རྫོགས་པའི་ཕྱིར་དང་། དགེ་སློང་མའི་འཆབ་པའི་ཕམ་པ་བྱ་བ་དེ་འབྲེལ་གྱི་དགག་བྱ་ཆུང་ཡང་བཅས་པ་རྣམ་འཇོག་གི་དགག་བྱ་ཆེ་བ་ཡིན་ཏེ། བུད་མེད་ཆགས་པའི་སྲེག་པ་ཆེ་བས་འཆབ་པའི་ཕམ་པ་མ་བཅས་ན། གཅིག་གིས་གཅིག་གི་ལྟུང་བ་གསང་སྟེ་དགེ་སློང་མ་ཀུན་མ་དག་པར་འགྱུར་བའི་ཕྱིར། དེས་ན་བཅས་པ་རྣམ་འཇོག་གི་དགག་བྱ་ཆེ་ཆུང་དང་ལྟུང་བ་ཆེ་ཆུང་ཡང་འབྲེལ་ལ་བཅས་པ་ཆེ་ཆུང་ཡང་འབྲེལ་ལོ། །གསུམ་པ་རང་གི་དགེ་སྦྱོང་ཚུལ་གྱི་བར་ཆད་དང་ལྡན་པས་ལྟུང་བ་མེད་པ་ནི། བྱིན་ལེན་ལ་སོགས་པའི་བཅས་པ་བསྲུང་བ་དང་། དབེན་པར་གནས་ཏེ་བདག་མེད་བསྒོམས་པ་ལས་ལམ་གོང་མ་སྐྱེ་བའི་ཐབས་གཞན་མེད་པར་ནང་འདོམས་ན་ཇི་ལྟར་བྱ་སྙམ་ན། ཆང་འཐུང་བ་ལ་སོགས་པ་འགའ་ཡང་མ་གཏོགས་བཅས་པ་རྣམས་གནང་སྟེ། རང་གི་ཚུལ་ཁྲིམས་ཀྱི་བར་ཆད་སྤང་བའི་དོན་དུ་བཅས་པ་གནང་བ་གང་ཞིག ཚུལ་ཁྲིམས་བསྲུང་བ་དེ་ལམ་གོང་མ་སྐྱེ་བའི་དོན་དུ་ཡིན་པས། བཅས་པ་དེ་བསྲུང་བ་བས་རང་གི་ལམ་གོང་མ་སྐྱེ་བའི་བར་ཆད་བསྲུང་བ་དགོས་པ་ཆེ་བའི་ཕྱིར། དགོན་པ་བས་ཆོས་གོས་ཞག་དྲུག་འབྲལ་དུ་གནང་བ་ཡང་དེའི་ཕྱིར་ཡིན་ནོ། །གཉིས་པ་གཞན་གྱི་གཙོ་བོའི་བར་ཆད་ཀྱི་རྐྱེན་དང་ལྡན་པས་ལྟུང་བ་མེད་པ་ལ་གསུམ་སྟེ། གཞན་གྱི་སྲོག་གི་བར་ཆད་དང་། གཞན་གྱི་ཚུལ་ཁྲིམས་ཀྱི་བར་ཆད་དང་། གཞན་གྱི་དགེ་སྦྱོང་ཚུལ་གྱི་བར་ཆད་ཀྱི་རྐྱེན་དང་ལྡན་པས་ལྟུང་བ་མེད་པའོ། །དང་པོ་ནི། དགེ་སློང་གིས་བཅས་པ་བསྲུངས་ན་གཞན་གྱི་སྲོག་གི་བར་ཆད་སྤོང་མི་ནུས་ལ། མ་བསྲུངས་ན་སྤོང་ནུས་པ་ཡིན་ན་ཆང་འཐུང་བ་ལ་སོགས་པ་འགའ་རེ་མ་གཏོགས་པ་བཅས་པ་རྣམས་གནང་སྟེ། བུད་མེད་ཆུས་ཁྱེར་བ་གཟུང་དུ་གནང་བའི་ཕྱིར་ཏེ། སྙིང་བརྩེ་བས་སྡུག་བསྔལ་ལས་ཐར་བར་བྱ་བའི་ཕྱིར་ལྟུང་བ་མེད་ཅེས་གསུངས་པའི་ཕྱིར། རིགས་པས་ཀྱང་གྲུབ་སྟེ། བཅས་པ་དེ་བསྲུང་བ་བས་གཞན་གྱི་སྲོག་གི་བར་ཆད་བསྲུང་བ་དགོས་པ་ཆེ་བའི་ཕྱིར། ཁོ་ན་རེ་བུད་མེད་ཆུས་ཁྱེར་བ་གཟུང་བ་དེ་གནང་བ་མ་ཡིན་པར་ཐལ། གཞན་གྱི་སྲོག་གི་བར་ཆད་སྤོང་བའི་ཕྱིར་རྐུན་པོའི་ལག་ནས་མི་གཏོང་བས་ཉེས་བྱས་བསྐྱེད་པའི་ཕྱིར་ཏེ། སྙིང་རྗེ་དང་ལྡན་པའི་སེམས་ཀྱིས་ན་ཉེས་བྱས་སོ་ཞེས་གསུངས་པའི་ཕྱིར་རོ། །གཞན་ཡང་དེ་ཡིན་ཏེ། བུད་མེད་གསོད་པར་ངེས་པ་རབ་ཏུ་འབྱིན་པར་བྱེད་པ་ལ་ལྷག་མ་བསྐྱེད་པར་བཤད་པའི་ཕྱིར་ཏེ། རབ་ཏུ་འབྱིན་པའི་ལྷག་མའོ་ཞེས་གསུངས་པའི་ཕྱིར་ཞེས་ཟེར་ན་སྐྱོན་མེད་དེ། སྙིང་རྗེ་དང་ལྡན་པའི་སེམས་ཀྱིས་ན་ཉེས་བྱས་ཞེས་པ་ནི་རྐུ་སེམས་ཀྱི་དབང་གིས་ཉེས་བྱས་བསྐྱེད་པའི་དོན་ཡིན་ལ། རྐུ་སེམས་ཀྱི་ཉེས་བྱས་ནི་རང་བཞིན་གྱི་ཁ་ན་མ་ཐོ་བ་ཡིན་པའི་ཕྱིར་དང་། བུད་མེད་སྐྱོན་གསུམ་ལྡན་རབ་ཏུ་བྱུང་བས་ལྷག་མ་བསྐྱེད་པ་ནི་སྲོག་སྐྱོབ་མི་ནུས་ཤིང་བསྟན་པ་ལ་རྨ་འབྱིན་པས་ལྷག་མར་བཅས་པ་ཡིན་པའི་ཕྱིར། སྲོག་སྐྱོབ་མི་ནུས་ཏེ། ཕྱིས་བཙུན་མོ་ཕྲེང་ལྡན་མ་ལ་སྲོག་སྐྱོབ་ཞུ་དགོས་བྱུང་བར་གསུངས་པའི་ཕྱིར། གཉིས་པ་ནི། དགེ་སློང་གིས་བཅས་པ་འགའ་ཞིག་བསྲུངས་ན་གཞན་རྒྱུད་སྡིག་པས་གོས་པར་འགྱུར་ཞིང་མ་བསྲུངས་ན། གོས་པར་མི་འགྱུར་བ་ལྟ་བུ་འདོམས་ན། ཆང་སོགས་འགའ་རེ་མ་གཏོགས་བཅས་པ་རྣམས་གནང་བ་ཡིན་ཏེ། དབྱར་ཕྱི་མ་ཟླ་བ་གཉིས་ལ་བབ་པ་ན་དགེ་སློང་སྡིག་ཅན་རང་གི་གནས་སུ་སླེབ་ནས་དགེ་ཚུལ་སུན་འབྱིན་པའམ། སྡིག་ལྟ་ལ་འགོད་པར་འགྱུར་ན་དེ་སྤང་བའི་དོན་དུ་ནུབ་ལྷག་ཉལ་གནང་བ་ཡིན་ཏེ། དགེ་སློང་སྡིག་ཅན་ཉེ་བར་གནས་པར་གྱུར་ནའོ་ཞེས་གསུངས་པའི་ཕྱིར། རིགས་པས་ཀྱང་གྲུབ་སྟེ། བཅས་པ་དེ་བསྲུང་བ་བས་གཞན་གྱི་ཚུལ་ཁྲིམས་ཀྱི་བར་ཆད་བསྲུང་བ་དགོས་པ་ཆེ་བའི་ཕྱིར། གསུམ་པ་ནི། བཙུན་མོའི་འཁོར་དུ་མཚན་མོ་མི་གནས་ན་གཞན་རྒྱུད་ལ་ལམ་གོང་མ་མི་སྐྱེ་ལ། གནས་ན་ལམ་གོང་མ་སྐྱེ་བ་ནང་འདོམས་ན། མཚན་མོ་གནས་ཏེ་ཆོས་སྟོན་པ་གནང་བ་ཡིན་ཏེ། ཤཱ་རིའི་བུས་བཙུན་མོ་དཔལ་ལྡན་མ་ལ་མཚན་ཐོག་ཐག་ཏུ་ཆོས་བསྟན་པས་མཐོང་ལམ་སྐྱེས་པ་ལྟ་བུའོ། །རིགས་པས་ཀྱང་གྲུབ་སྟེ། བཅས་པ་བསྲུང་བ་བས་གཞན་གྱི་ལམ་གོང་མ་སྐྱེ་བའི་བར་ཆད་བསྲུང་བ་དགོས་པ་ཆེ་བའི་ཕྱིར། གཉིས་པ་གཙོ་བོ་མ་ཡིན་པའི་བར་ཆད་ཀྱི་རྐྱེན་དང་ལྡན་པས་ལྟུང་བ་མེད་པ་ལ་གསུམ་སྟེ། ལུས་ཀྱི་བར་ཆད་དང་། ལོངས་སྤྱོད་ཀྱི་བར་ཆད་དང་། བསོད་ནམས་ཀྱི་བར་ཆད་ཀྱི་རྐྱེན་དང་ལྡན་པས་ལྟུང་བ་མེད་པའོ། །དང་པོ་ནི། བཅས་པ་འགའ་རེ་བསྲུངས་ན་རང་གཞན་གྱི་ལུས་ཆུད་ཟོས་སུ་འགྲོ་ལ། མ་བསྲུངས་ན་མི་འགྲོ་བ་ཐབས་གཞན་མེད་པར་ནང་འདོམས་ན། དེ་གཉིས་དགག་དགོས་གང་ཆེ་བརྟགས་ཏེ་བཅས་པ་སྲུང་བ་དགོས་པ་ཆེ་ན་མི་གནང་། ལུས་ཀྱི་བར་ཆད་བསྲུང་བ་དགོས་པ་ཆེ་ན་གནང་སྟེ། ནད་པ་དང་ནད་གཡོག་མར་མེའི་སྣང་བ་དང་བཅས་པ་ལ་ཉལ་དུ་གནང་བའི་ཕྱིར་ཏེ། དེ་སྒྲུབ་པར་བྱེད་པའི་ནད་པ་དང་ནད་གཡོག་ལྷན་ཅིག་གནས་པ་ལ་ཉེས་པ་མེད་དོ་ཞེས་གསུངས་པའི་ཕྱིར། གཉིས་པ་ནི། དམག་དང་ཆོམ་རྐུན་བྱུང་བའི་ཚེ་རིན་པོ་ཆེ་ལ་སོགས་པ་ལ་རེག་པའི་བཅས་པ་འགའ་ཞིག་བསྲུང་ན་རང་གཞན་གྱི་ལོངས་སྤྱོད་ཆུད་ཟོས་པར་འགྱུར་ལ། མ་བསྲུངས་ན་མི་འགྱུར་བ་ཐབས་གཞན་མེད་པ་ནང་འདོམས་ན། དེ་ལ་ཡང་སྔར་ལྟར་བརྟགས་ནས་བཅས་པ་བསྲུང་བ་དགོས་པ་ཆེ་ན་མ་གནང་ལ། ལོངས་སྤྱོད་ཀྱི་བར་ཆད་བསྲུང་བ་དགོས་པ་ཆེ་ན་གནང་སྟེ། འཇིགས་པར་གྱུར་ན་རང་གི་ལ་མི་གནོད་ན་མཆོད་རྟེན་ནམ་དགེ་འདུན་གྱི་དབྱིག་གམ་གསེར་སྦས་པ་ཁྱེར་ཏེ་འགྲོ་བར་བྱའོ་ཞེས་གསུངས་པའི་ཕྱིར། གསུམ་པ་ནི། བཅས་པ་འགའ་ཞིག་བསྲུངས་ན་རང་གཞན་གྱི་བསོད་ནམས་གསོག་པ་དེ་མི་འགྲུབ་ལ། མ་བསྲུངས་ན་འགྲུབ་པ་ལྟ་བུ་ཐབས་གཞན་མེད་པར་ནང་འདོམས་ན་དེ་གཉིས་དགག་དགོས་གང་ཆེ་བརྟགས་ཏེ་བཅས་པ་བསྲུང་བ་དགོས་པ་ཆེ་ན་མ་གནང་ལ། བསོད་ནམས་ཀྱི་བར་ཆད་བསྲུང་བ་དགོས་པ་ཆེ་ན་གནང་སྟེ་དཀོན་མཆོག་མཆོད་པའི་དོན་དུ་གླུ་ལེན་པ་གནང་བ་དང་། སྦྱིན་བདག་གི་བསོད་ནམས་ཀྱི་བར་ཆད་བསྲུངས་པའི་དོན་དུ་རྐང་པ་གཉིས་པ་དྲིས་བསྐུ་བ་གནང་བའི་ཕྱིར་ཏེ། དཀོན་མཆོག་མཆོད་པའི་དོན་དུ་དབྱངས་ཀྱི་ང་རོ་བྱའོ་ཞེས་དང་། བསོད་ནམས་འདོད་པས་རྐང་པ་གཉིས་ལ་ལུས་སྐུད་པའི་དྲིས་བསྐུད་པ་བསྟེན་པར་བྱའོ་ཞེས་གསུངས་པའི་ཕྱིར། བཞི་པ་སྒྲུབ་པར་མི་ནུས་པས་ཕྱོགས་གཅིག་ལ་ཞུགས་པས་ལྟུང་བ་མེད་པ་ལ་གསུམ་སྟེ། ཤེས་པ་རང་དབང་མེད་པས་སྒྲུབ་པར་མི་ནུས་པ་ལ་ལྟུང་བ་མེད་པ་དང་། བྱ་དཀའ་བས་སྒྲུབ་པར་མི་ནུས་པ་ལ་ལྟུང་བ་མེད་པ་དང་། ལྟུང་བ་ནང་འདོམས་པས་སྒྲུབ་པར་མི་ནུས་པ་ལ་ལྟུང་བ་མེད་པའོ། །དང་པོ་ནི། སྨྱོ་བ་ལ་སོགས་པ་ལ་ལྟུང་བ་མེད་པའོ། །གཉིས་པ་ནི། མཐའ་འཁོབ་ཏུ་བསྙེན་པར་རྫོགས་པ་ལ་དགེ་སློང་བཅུ་བཙལ་དུ་མེད་ན་ལྔའི་ཚོགས་ཀྱིས་བསྙེན་པར་རྫོགས་པ་གནང་བ་ལྟ་བུའོ། །གསུམ་པ་ནི། བཅས་པ་མཉམ་ཞིང་དགག་དགོས་ཀྱང་མཉམ་ན་བཅས་པ་གཅིག་མ་བསྲུངས་པ་ལ་ལྟུང་བ་མེད་པ་སྟེ། དགེ་སློང་མས་ཉིན་མོ་འབྲལ་བ་དང་གཅིག་པུ་ལམ་དུ་འགྲོ་བ་གཉིས་ཐབས་གཞན་མེད་པར་ནང་འདོམས་ན་གཅིག་པུ་ལམ་དུ་འགྲོ་བ་ལ་ལྟུང་བ་མེད་པ་ལྟ་བུའོ། །གཉིས་པ་དེ་ལས་འཕྲོས་པ་སྦོམ་པོའི་དོན་བཤད་པ་ལ། སྒྲའི་བརྗོད་རིགས་ཀྱི་དབྱེ་བ་དང་། མཚན་ཉིད་པའི་དབྱེ་བ་གཉིས་སོ། །དང་པོ་ནི། སྤྱིར་ཕམ་ལྷག་གཉིས་ལ་སྦོམ་པོ་ཞེས་གསུངས་ཏེ། མ་མོར། ཉེས་པ་སྦོམ་པོའི་ཉེས་པ་གང་ཞེ་ན། ཕས་ཕམ་པ་དང་། དགེ་འདུན་ལྷག་མའོ། །ཅིའི་ཕྱིར་ཉེས་པ་སྦོམ་པོ་ཞེས་བྱ་ཞེ་ན། རྣམ་པ་གཉིས་ཀྱི་ཕྱིར་ཉེས་པ་སྦོམ་པོའོ་ཞེས་གསུངས་ཏེ། ཉེས་པ་སྦོམ་པོ་ཡིན་པས་ན་སྦོམ་པོ་དང་། རང་བཞིན་གྱི་ཉེས་པ་སྦོམ་པོ་ཡིན་པས་ན་ཉེས་པ་སྦོམ་པོ་སྟེ། དེ་ནི་ཉེས་པ་སྦོམ་པོ་ཞེས་བྱའོ་ཞེས་གསུངས་པའི་ཕྱིར། འདིར་ནི་དམན་པ་སྦོམ་པོ་སྟོན་པར་བྱེད་པ་ལ། འོད་ལྡན་དུ་དེ་ལྟར་བྱས་ན་ཉེས་པ་སྦོམ་པོ་ཞེས་བྱ་བའི་སྒྲ་ནི་རྣམ་པ་གཉིས་སུ་སྟོན་ཏེ། མིང་དུ་ཆགས་པའི་སྒྲ་དང་། ཡོན་ཏན་གྱི་སྒྲའོ། །དེ་ལ་མིང་དུ་ཆགས་པའི་སྒྲ་ནི་ཉེས་པ་ཆུང་ངུའོ་ཞེས་བྱ་བ་ཡིན་ནོ། །ཡོན་ཏན་གྱི་སྒྲ་ནི་ཉེས་པ་མང་པོ་ཞེས་བྱ་བ་ཡིན་ནོ་ཞེས་སོ། །དེ་གཉིས་ཀྱི་ཁྱད་པར་ལ་མཁས་པ་ཁ་ཅིག སྔ་མ་ནི་རྟེན་དགེ་སློང་དང་། སྡེ་ཚན་ཕམ་ལྷག་ཁོ་ན་དང་། གནས་སྐབས་སྦྱོར་དངོས་དང་། གདགས་གཞི་དང་ཕྱིར་བཅོས་སྦོམ་པོའི་མིང་གིས་བྱེད་པ་སྟེ་སྦོམ་པོ་མཚན་ཉིད་པ་ཡིན་ནོ། །ཕྱི་མ་ནི་རྟེན་རབ་བྱུང་སྡེ་ལྔ་ཐམས་ཅད་དང་། སྡེ་ཚན་སྡེ་ལྔ་ཐམས་ཅད་དང་། གནས་སྐབས་སྦྱོར་བའི་སྦྱོར་བ་སོགས་ཐམས་ཅད་དང་། གདགས་གཞི་གཅིག་གམ་དུ་མ་དང་། ཕྱིར་བཅོས་གང་ལ་བཏགས་པ་དེ་ཉིད་ཀྱིས་མིང་གིས་བྱེད་དེ་བཏགས་པ་བ་ཡིན་ནོ། །གཉིས་པ་སྦོམ་པོ་མཚན་ཉིད་པའི་དབྱེ་བ་ལ། དབྱེ་བ་དངོས། བསྡུ་བ། ངོ་བོ། སྒྲ་དོན་དང་བཞི། དང་པོ་ནི། སྦོམ་པོ་མཚན་ཉིད་པ་དབྱེ་གཞིར་བྱས་ནས་དབྱེ་ན་བཞི་སྟེ། ཕམ་པར་གཏོགས་པའི་སྦོམ་པོ་ལྕི་ཡང་གཉིས། ལྷག་མར་གཏོགས་པའི་སྦོམ་པོ་ལྕི་ཡང་གཉིས་སོ། །ཤིན་ཏུ་ལྕི་བ་ལ་སོགས་པའི་བྱེ་བྲག་གིས་བརྒྱད་དུ་ཡང་ཡོད་དེ། འདུལ་བ་ཚིག་ལེའུར་བྱས་པ་ལས། ལྕི་དང་ཤིན་ཏུ་ལྕི་བ་ཉིད། །ཡང་དང་ཤིན་ཏུ་ཡང་བ་སྟེ། །ཕས་ཕམ་པ་ནི་ཀུན་བསླངས་པའི། །སྦོམ་པོ་རྣམ་པ་བཞི་ཡིན་ནོ། །སྒྲག་པར་མི་བྱེད་ལྕི་བ་སྟེ། །གཞན་གྱིས་དེ་ལ་འབད་པ་ཡིས། །བཟློག་ཀྱང་མི་ཉན་རབ་ལྕིར་ཤེས། །གཞན་ལ་ཁྲེལ་ཡོད་ཡང་བ་སྟེ། །རང་ཉིད་ངོ་ཚས་ཤིན་ཏུ་ཡང་། །བསམ་པའི་དབྱེ་བས་འགྱུར་བ་ཡིན། །དེ་བཞིན་དགེ་འདུན་ལྷག་མ་ཡི། །ཀུན་སློང་སྦོམ་པོ་རྣམ་པ་བཞི། །ཞེས་སོ། །གཉིས་པ་ནི། ཕམ་པས་ཀུན་ནས་བསླངས་པ་དང་། ལྷག་མས་ཀུན་ནས་བསླངས་པའི་སྦོམ་པོ་གཉིས་སུ་འདུས་སོ། །གསུམ་པ་ནི། སྦོམ་པོའི་རྒྱུ་ཚོགས་ཚང་བ་ལས་སྐྱེས་པའི་རིག་བྱེད་གང་ཞིག སྦོམ་པོའི་མིང་གིས་ཕྱིར་བཅོས་པར་བྱ་བའི་རིགས་ཡིན་པའོ། །བཞི་པ་ནི། ཕམ་ལྷག་དངོས་གཞི་ལས་དམན་ཞིང་ལྟུང་བ་གཞན་ལས་ཁ་ན་མ་ཐོ་བ་ཆེ་བས་ན་དམན་པ་སྦོམ་པོ་ཞེས་བྱའོ། །གཉིས་པ་ལྟུང་མེད་ནི་སེལ་བའི་ཞར་ལ་བསྟན་ཟིན་ཏོ། །གསུམ་པ་བསླབ་བྱ་ནི། ལྟུང་བ་རྣམ་གཞག་དེ་མི་འབྱུང་བར་བྱ་བའི་ཕྱིར་བསླབ་པས་ན་བསླབ་བྱ་སྟེ། གཉིས་པ་སོ་སོའི་སྐབས་སུ་འཆད་པར་འགྱུར་རོ།། ༈ །།གཉིས་པ་སོ་སོའི་དོན་ལ་ལྔ་སྟེ། གཅོད་པར་བྱེད་པ་ཕམ་པའི་སྡེ་དང་། གསོ་བ་དགེ་འདུན་ལ་རག་ལས་པས་དགེ་འདུན་ལྷག་མའི་སྡེ་དང་། ལྟུང་བར་བྱེད་པ་ལྟུང་བྱེད་ཀྱི་སྡེ་དང་། སྨྲེ་སྔགས་འདོན་པའི་སྒོ་ནས་སོ་སོར་བཤགས་པར་བྱ་བ་སོར་བཤགས་ཀྱི་སྡེ་དང་། བསླབ་བྱའི་སྡེའོ། །དང་པོ་ལ་སྡོམ་ནི། མི་ཚངས་སྤྱོད་དང་རྐུ་བ་དང་། །མི་ལ་གསད་པར་མི་བྱ་དང་། །བརྫུན་དུ་སྨྲ་དང་བཅས་པ་ཡི། །ཆོས་བཞི་འདིར་ནི་གསུངས་པ་ཡིན། །ཞེས་གསུངས་པའི་དོན་ནི་བཞི་སྟེ། རང་གཞན་གཉིས་ཀ་ལ་གནོད་པ་མི་ཚངས་པར་སྤྱོད་པའི་དང་། གཞན་གྱི་ལོངས་སྤྱོད་ལ་གནོད་པ་མ་བྱིན་ལེན་གྱི་དང་། གཞན་གྱི་སྲོག་ལ་གནོད་པ་སྲོག་གཅོད་ཀྱི་དང་། གཞན་གྱི་དོན་འགྲུབ་པ་ལ་གནོད་པ་བརྫུན་དུ་སྨྲ་བའི་ཕམ་པའོ། །དང་པོ་ལ་སྤྱིའི་དོན་དང་། གཞུང་གི་དོན་ལ་སྦྱར་བ་གཉིས་ལས། དང་པོ་ནི། བམ་ལྔར། གླེང་གཞི་དང་། བསླབ་པ་བཅས་པ་དང་། ལྟུང་བ་རྣམ་པར་གཞག་པའི་དོན་སྟོན་ཏེ། དེ་ལ་གླེང་གཞི་ནི་ཡུལ་དང་། གང་ཟག་དང་། ཉོན་མོངས་པ་དང་། ཉེས་པའི་གཞིའི་བྱེ་བྲག་གིས་རྣམ་པ་བཞིའོ། །བསླབ་པ་བཅས་པ་ནི། འཇིག་རྟེན་དང་འགལ་བ་དང་འདུལ་བ་དང་འགལ་བ་བཟློག་པའི་ལྟུང་བ་སྡེ་ལྔའོ། །ལྟུང་བ་རྣམ་པར་གཞག་པ་ནི། བསམ་པ་དང་སྦྱོར་བའི་སྒོ་ནས་དངོས་གཞི་དང་། སྦྱོར་བ་དང་། སྦྱོར་བའི་སྦྱོར་བ་རྣམ་པར་གཞག་པའོ་ཞེས་གསུངས་པའི་དོན་ནི་གསུམ་སྟེ། བསླབ་པ་འཆའ་བའི་གླེང་གཞི་དང་། བཅས་པ་འཇོག་པའི་རྒྱུ་མཚན་དགག་བྱ་དང་། ལྟུང་བའི་རྒྱུ་ཚོགས་ཡན་ལག་བརྩི་བའོ། །དང་པོ་ནི་སྟོན་པ་མངོན་པར་རྫོགས་པར་སངས་རྒྱས་ནས་ལོ་བཅུ་གསུམ་ལོན་པ་ན། བཟང་སྦྱིན་གྱིས་སྔོན་གྱི་ཆུང་མ་ལ་ལོག་པར་སྤྱད་པ་ལ་བརྟེན་ནས། ཆོས་ཀྱི་རྗེས་བསླབ་པ་བཅས་པའི་ཕན་ཡོན་བཅུ་གཟིགས་ཏེ། ཡུལ་སྤོང་བྱེད་དུ་གང་ཟག་བཟང་སྦྱིན་གྱིས། ཉོན་མོངས་པ་འདོད་ཆགས་ཀྱིས་ཀུན་ནས་བསླངས་ཏེ་ཉེས་པ་མི་ཚངས་པར་སྤྱོད་པ་ལ་བརྟེན་ནས་མི་ཚངས་སྤྱོད་སྤོང་བའི་བསླབ་པའི་གཞི་འདི་བཅས་སོ། །གཉིས་པ་བཅས་པ་འཇོག་པའི་རྒྱུ་མཚན་དགག་བྱ་ལ། མཐོང་བའི་ཉེས་དམིགས་དང་། མ་མཐོང་བའི་ཉེས་དམིགས་གཉིས་ལས། དང་པོ་ནི། ཚེ་འདི་ལ་ལུས་དང་། སྲོག་དང་། ཚངས་པར་སྤྱོད་པ་དང་། དགེ་སྦྱོང་གི་ཚུལ་དང་། ལོངས་སྤྱོད་དང་བསོད་ནམས་ཀྱི་བར་ཆད་དུ་འགྱུར་ཞིང་གཞན་མ་དད་པ་ལ་སོགས་པའོ། །མ་མཐོང་བའི་ཉེས་དམིགས་ནི་མི་དགེ་བའི་ལས་ལམ་བཅུ་པོ་རྣམས་ཀྱིས་འབྲས་བུ་གསུམ་གསུམ་འབྱིན་པ་ཡིན་ཏེ། མཛོད་ལས། ཐམས་ཅད་བདག་པོ་རྒྱུ་མཐུན་དང་། །རྣམ་སྨིན་འབྲས་བུ་འབྱིན་པར་འདོད། །ཅེས་སོ། །དེ་ཡང་མི་ཚངས་སྤྱོད་ཀྱི་རྣམ་སྨིན་གྱི་འབྲས་བུ་ནི་དེ་ཆེ་འབྲིང་ཆུང་གསུམ་ལ་བརྟེན་ནས་རིམ་པ་ལྟར། དམྱལ་བ་དང་། ཡི་དྭགས་དང་། དུད་འགྲོར་སྐྱེ་བའོ། །རྒྱུ་མཐུན་གྱི་འབྲས་བུ་ལ་གཉིས་ཡོད་པ་ལས། མྱོང་བ་རྒྱུ་མཐུན་ནི། ལུས་མི་སྡུག་པ་དང་། ཆུང་མ་དགྲ་ཟླ་ཅན་དུ་འགྱུར་བ་ལ་སོགས་པའོ། །བྱེད་པ་རྒྱུ་མཐུན་ནི། དེར་ཡང་མི་ཚངས་པར་སྤྱོད་པ་ལ་དགའ་བའི་ངང་ཚུལ་ཅན་དུ་འགྱུར་བའོ། །བདག་པོའི་འབྲས་བུ་ནི། ཡུལ་ཕྱོགས་རྡུལ་འཁྲིགས་པ་སོགས་སུ་སྐྱེ་བའོ། །གསུམ་པ་ཡན་ལག་ལ་ཐུན་མོང་གི་ཡན་ལག་ནི་བསྙེན་པར་རྫོགས་པའི་སྡོམ་པ་གསོ་རུང་ཡན་ཆད་དུ་ཡོད་པ། ཤེས་པ་རང་བཞིན་དུ་གནས་པ། ལས་དང་པོ་པ་མ་ཡིན་པ་ཞེས་པ་ནི་ཀུན་ལ་སྦྱར་རོ། །ཐུན་མོང་མ་ཡིན་པའི་ཡན་ལག་ལ་བཞི་སྟེ། གཞིའི་ཡན་ལག་དང་། ཀུན་སློང་གི་དང་། སྦྱོར་བའི་དང་། མཐར་ཐུག་གི་ཡན་ལག་གོ །དང་པོ་ལ། གང་ལ་རྩལ་བར་བྱ་བའི་ཡན་ལག་དང་། དེ་ལ་རྩལ་བརྟེན་གྱི་ཡན་ལག་གཉིས་ལས། དང་པོ་ནི། མི་དང་། མི་མ་ཡིན་པ་དང་། སྐྱེས་པ་དང་། བུད་མེད་དང་། མ་ནིང་དང་། རང་དང་གཞན་གང་ཡང་རུང་བའི་ལུས་ཕྱེད་དུ་ལངས་པ་ཡན་ཆད་ཀྱི་རྨའི་སྒོ་གསུམ་གང་ཡང་རུང་བ་མ་ཉམས་པ་དང་བགྲོད་དུ་རུང་བའོ། །གཉིས་པ་ནི། རང་རྒྱུད་དུ་གཏོགས་པའི་ནོར་བུ་ནད་མེད་པ་དང་ལས་སུ་རུང་བའོ། །ཀུན་སློང་ནི་རིག་པའི་བདེ་བ་ཉམས་སུ་མྱོང་བར་འདོད་པའོ། །སྦྱོར་བ་རེག་ཅིང་རྩོལ་བར་ཞུགས་པའོ། །མཐར་ཐུག་དེའི་རེག་པའི་བདེ་བ་ཉམས་སུ་མྱོང་བའི་ཚེ་མི་ཚངས་པར་སྤྱོད་པའི་ཕམ་པའི་དངོས་གཞིར་འགྱུར་ལ། དགེ་ཚུལ་ལ་ནི་ཕམ་འདྲའི་ཉེས་བྱས་སོ། །ཁ་ཅིག་འདིར་འདུ་ཤེས་མ་འཁྲུལ་པ་ཞེས་འདོད་པ་ནི་ནོར་བ་ཡིན་ནོ། །གཉིས་པ་གཞུང་དོན་ལ་སྦྱར་བ་ནི། གང་ཞིག་བྱས་ན་ལྟུང་བ་འདིར་འགྱུར་བ་ཡིན་ཞེ་ན། བཅུག་རེག་ཉམས་སུ་མྱོང་བ་བྱས་ནའོ། །ཟག་བྱེད་དོ། །དེར་རོ། །མ་ཉམས་པར་རོ། །ཁའམ་བཤང་བའི་ལམ་དུའོ། །ཉམས་པ་དག་ལ་ནི་སྦོམ་པོའོ། །མི་རུང་བ་ཉིད་ལ་ནི་ན་སྨད་དོ། །ཞེས་གསུངས་ཏེ། ཡན་ལག་གི་མཚན་ཉིད་དང་། སེལ་བ་གཉིས་ལས། དང་པོ་ནི། བཅུག་ཞེས་པའི་སྒྲ་བྱེད་པར་བསྒྲུབ་ན་དེས་འཛུད་པར་བྱེད་པས་ན་བཅུག་པ་སྟེ་ཕོའི་ཟག་བྱེད་དོ། །བཅུག་ཞེས་པའི་སྒྲ་གནས་སུ་བསྒྲུབ་ན་དེར་བཅུག་པར་བྱ་བ་ཡིན་པས་ན་བཅུག་པ་སྟེ་རྨའི་སྒོ་གསུམ་མོ། །གནས་སུ་བསྒྲུབ་པ་ལ་སྦྱར་བ་ཐོག་མར་བཤད་ན། བཅུག་པར་བྱ་བ་དགེ་སློང་རང་གི་རྨའི་སྒོ་གཉིས་སམ་གཞན་གྱི་སྒོ་གསུམ་གང་ཡང་རུང་བ་དགེ་སློང་རང་གིས་ཟག་བྱེད་བཅུག་སྟེ་བཅུག་པར་བྱ་བ་དེའི་རེག་པའི་བདེ་བ་དགེ་སློང་རང་གིས་ཉམས་སུ་མྱོང་ན་དགེ་སློང་དེ་ཕམ་པར་འགྱུར་ལ། བཅུག་པའི་སྒྲ་བྱེད་པ་པོ་བསྒྲུབ་པ་དང་སྦྱར་ན་དགེ་སློང་མའི་རྨའི་སྒོ་སོགས་གསུམ་གང་རུང་དུ་འཛུད་པར་བྱེད་པ་སྐྱེས་པའི་ཟག་བྱེད་བཅུག་སྟེ་དེའི་རེག་པའི་བདེ་བ་དགེ་སློང་མས་ཉམས་སུ་མྱོང་ན་དགེ་སློང་མ་དེ་ཕམ་པར་འགྱུར་ཞིང་། དགེ་སློང་གི་རྨའི་སྒོ་གཉིས་གང་རུང་དུ་སྐྱེས་པ་གཞན་གྱི་ཟག་བྱེད་བཅུག་སྟེ། དེའི་རེག་པའི་བདེ་བ་དགེ་སློང་གིས་ཉམས་སུ་མྱོང་ན་དགེ་སློང་དེ་ཕམ་པར་འགྱུར་རོ་ཞེས་ཊཱི་ཀར་བཤད་དེ། བཅུག་པའི་སྒྲ་བྱེད་པ་པོར་བསྒྲུབ་པའི་ཕྱོགས་ལ་བརྟེན་ནས་ནི་བརྟེན་པར་བྱ་བ་དགེ་སློང་དང་དགེ་སློང་མ་རྣམས་ཀྱི་ཁ་དང་བཤང་བའི་ལམ་དང་མོའི་དབང་པོར་འཛུད་པར་བྱེད་པས་བཅུག་པ་ལ་ཕམ་པར་འགྱུར་བ་རྣམ་པར་འཇོག་པར་བྱེད་དོ། །ཕོའི་དབང་པོའི་བཅུག་པ་དེའི་རེག་པ་ནི་བརྟེན་པར་བྱ་བ་ཁ་དང་བཤང་བའི་ལམ་དང་མོའི་དབང་པོ་དང་ལྡན་པའི་ཕྱོགས་དེར་རེག་པའོ། །རེག་པ་དེ་ཉམས་སུ་མྱོང་བར་བྱས་པ་ནི་ཉམས་སུ་མྱོང་བར་འགྱུར་བ་གང་ཡིན་པའོ། །དེ་ཉམས་སུ་མྱོང་བར་གྱུར་ན་དེའི་ཚེ་བརྟེན་པར་བྱ་བ་དགེ་སློང་དང་དགེ་སློང་མ་དེ་ཕམ་པར་འགྱུར་ཏེ་ཞེས་གསུངས་སོ། །འཛུད་པར་བྱེད་པས་བཅུག་པ་དེ་གང་ཡིན་ཞེ་ན་ཕོའི་ཟག་བྱེད་དོ། །བཅུག་པར་བྱ་བ་དེ་གང་ཞེ་ན་མོའི་ཟག་བྱེད་དེའོ། །བཅུག་པ་ཙམ་གྱིས་ཕམ་པར་འགྱུར་རམ་སྙམ་ན། མ་ཉམས་པར་བཅུག་ན་འགྱུར་གྱི་གཞན་དུ་ན་མ་ཡིན་ནོ། །དེར་མ་ཟད་ཁའམ་བཤང་བའི་ལམ་དུ་བཅུག་ན་ཡང་འགྱུར་རོ། །འདིར་མ་ཉམས་པ་ཞེས་པ་མོའི་དབང་པོ་ཁོ་ན་ལ་སྦྱར་ཡང་དོན་གྱིས་བཅུག་བྱ་གསུམ་དང་། འཇུག་བྱེད་དེ་བཞི་ཀ་ལ་མ་ཉམས་པ་ཞེས་སྦྱར་དགོས་སོ། །གཉིས་པ་སེལ་བ་ནི། རྨའི་སྒོ་མ་ཉམས་པ་དགོས་ན། ཉམས་པ་ལ་ཅིར་འགྱུར་ཞེ་ན། ཡན་ལག་གཞན་ཚང་ན་ཉམས་པ་དག་ལ་སྦོམ་པོར་འགྱུར་རོ། །བགྲོད་དུ་མི་རུང་བ་ལ་བཅུག་པ་ལ་ནི་ན་སྨད་དུ་འགྱུར་ཏེ། མ་ཉམས་ཤིང་བགྲོད་དུ་རུང་བ་གང་ལ་དངོས་གཞི་དང་། སྦོམ་པོ་དང་། ཉེས་བྱས་སུ་འགྱུར་བ་དེ་ལ་བགྲོད་དུ་མི་རུང་བའི་ཡུལ་ལ་རིམ་པ་ལྟར། སྦོམ་པོ་དང་། ཉེས་བྱས་དང་། ཉེས་བྱས་ཕྲ་མོར་འགྱུར་རོ་ཞེས་པའི་དོན་ཏོ། །རྨའི་སྒོ་གསུམ་གྱི་མཐའ་ལ་ཁའི་ནི་སོའི་ནང་ངོས་ཕན་ཆད། བཤང་བའི་ལམ་གྱི་ནི་བུ་གུའི་སྦུབས་ཀྱི་མཐའ་ཡན་ཆད། ཟག་བྱེད་མོའི་དབང་པོའི་ནི་པགས་རིམ་དང་པོ་ཡན་ཆད་ལ་བཤད་ཅིང་། ཕོའི་ཟག་བྱེད་ཀྱི་ནོར་བུ་རྨའི་སྒོ་དེ་དག་དང་ཕྲད་པ་ནི་བཅུག་པའི་མཐའ་ཡིན་ཏེ། རྨའི་མཐའ་དེ་དག་ལས་ནོར་བུ་འདས་དགོས་པ་ནི་མ་ཡིན་ནོ་ཞེས་ཊཱི་ཀར་བཤད་དོ། །གཉིས་པ་གཞན་གྱི་ལོངས་སྤྱོད་ལ་གནོད་པ་མ་བྱིན་ལེན་གྱི་ཕམ་པ་ལ་གསུམ་སྟེ། སྤྱིའི་དོན་དང་། གཞུང་དང་སྦྱར་བ་དང་། དོགས་པ་གཅད་པའོ། །དང་པོ་ལ་གསུམ་ལས། གླེང་གཞི་ནི། ཡུལ་རྒྱལ་པོའི་ཁབ་ཏུ་གང་ཟག་དགེ་སློང་ནོར་ཅན་གྱིས་ཉོན་མོངས་པ་འདོད་ཞེན་གྱིས་ཀུན་ནས་བསླངས་ཏེ་ཉེས་པ་ཤིང་བརྐུས་པ་ལ་བརྟེན་ནས་བསླབ་པའི་གཞི་འདི་བཅས་སོ། །གཉིས་པ་རྒྱུ་མཚན་ལ་མཐོང་བའི་ཉེས་དམིགས་སྔར་བཞིན་ནོ། །མ་མཐོང་བའི་ཉེས་དམིགས་ལ་རྣམ་སྨིན་གྱི་འབྲས་བུ་སྔར་དང་འདྲ་ལ། མྱོང་བ་རྒྱུ་མཐུན་ཕྱི་མ་ལ་ལོངས་སྤྱོད་ཆུང་བར་འགྱུར་བ་དང་། བྱེད་པ་རྒྱུ་མཐུན་རྐུ་བ་ལ་དགའ་བ་དང་། བདག་པོའི་འབྲས་བུ་ཡུལ་ཕྱོགས་སད་སེར་སོགས་གནོད་པ་མང་པོར་འགྱུར་བའོ། །གསུམ་པ་བྱེད་རྒྱུ་ཡན་ལག་བརྩི་བ་ལ་བཞི་ལས། རྟེན་གྱི་ཡན་ལག་ཐུན་མོང་བ་སྔར་བཞིན་ཡིན་པ་ལ་ཡུལ་ནི་མིའི་འགྲོ་བ་པ་བདག་ཉིད་ལས་རྫས་ཐ་དད་པ། དངོས་པོ་སྔར་མ་བྱིན་ཞིང་རིན་ཐང་ཚང་བ། བསམ་པ་ལ་གཉིས་ལས། འདུ་ཤེས་མ་འཁྲུལ་བ་ཀུན་སློང་རྐུ་སེམས་ཀྱིས། སྦྱོར་བ་ལུས་ངག་ཏུ་གྲུབ་ཅིང་མ་འཁྱོགས་པས་རྐུ་བར་རྩོམ་པ། མཐར་ཐུག་གནས་ནས་གནས་སུ་སྤགས་པ་ན་མ་བྱིན་ལེན་གྱི་ཕམ་པར་འགྱུར་རོ། །དེ་ཡང་ལུང་དུ། དགེ་སློང་བདག་ཉིད་ཀྱིས་རྐུ་བར་བྱེད། རྐུར་འཇུག་པར་བྱེད། གནས་ནས་གནས་སུ་སྤགས་པར་བྱེད། བང་ཆེན་པས་རྐུ་བར་བྱེད། རྐུར་འཇུག་པར་བྱེད། གནས་ནས་གནས་སུ་སྤགས་པར་བྱེད། བྱིན་གྱིས་བརླབས་ཏེ་རྐུ་བར་བྱེད། རྐུར་འཇུག་པར་བྱེད། གནས་ནས་གནས་སུ་སྤགས་པར་བྱེད་ཅེས་གསུངས་ལ། དེའི་དོན་ལ་འཕགས་པ་ཉེར་སྦས་ཀྱིས། ལུང་དང་པོ་དྲུག་གིས་མ་བྱིན་ལེན་གྱི་སྦྱོར་བ་བསྟན། ཐ་མ་གསུམ་གྱིས་མ་བྱིན་ལེན་གྱི་མཐར་ཐུག་བསྟན་ཞེས་གསུངས་ལ། ཡོན་ཤཱཀ་རྣམ་གཉིས་ཀྱང་དེའི་རྗེས་སུ་འབྲངས་ནས་འཆད་དོ། །གཉིས་པ་གཞུང་དོན་ལ་སྦྱར་བ་ནི། རྐུའམ་རྐུར་བཅུག་པ་དག་གིས་སོ། །མངགས་པས་ཀྱང་ངོ་། །མ་བྱིན་པའོ། །མ་ཤ་ཀ་ལྔ་ལ་སོགས་པའོ། །རྐུ་སེམས་ཀྱིས་སོ། །མིའི་རྒྱུད་ཀྱིས་ཡོངས་སུ་བཟུང་བའོ། །དེར་འདུ་ཤེས་པས་སོ་ཞེས་གསུངས་ཏེ། གང་ཞིག་བྱས་ན་ལྟུང་བ་འདིར་འགྱུར་ཞེ་ན། རང་གིས་རྐུ་བའམ་གཞན་རྐུར་བཅུག་པ་དག་གིས་བརྐུས་ན་འགྱུར་རོ། །རྐུར་བཅུག་པ་དེ་ཉིད་ཀྱིས་དངོས་སུ་རྐུས་པ་ཞིག་དགོས་སམ་ཞེ་ན། རྐུར་བཅུག་པ་དེས་ཀྱང་གཞན་མངགས་ཏེ་རྐུར་བཅུག དེས་ཀྱང་གཞན་མངགས་ཏེ་རྐུར་བཅུག་ན་ཡང་འགྱུར་རོ། །ཇི་ལྟ་བུ་ཞིག་བརྐུས་ན་འགྱུར་ཞེ་ན། སྐྱེས་པ་བུད་མེད་སོགས་སུས་ཀྱང་མ་བྱིན་པ་བརྐུས་ན་འགྱུར་རོ། །ཇི་ཙམ་ཞིག་བརྐུས་ན་འགྱུར་ཞེ་ན། མ་ཤ་ཀ་ལྔ་དང་སོགས་པ་དྲུག་ལ་སོགས་པ་བརྐུས་ན་འགྱུར་རོ། །ཀུན་སློང་ཇི་ལྟ་བུས་ཞེ་ན། རྐུ་སེམས་ཀྱིས་བརྐུས་ན་འགྱུར་ཏེ། རྐུ་སེམས་ཀྱི་མཚན་ཉིད་ལ་ཁ་ཅིག་གཞན་གྱི་ཡིན་ཏེ་མ་གནང་ཡང་རང་ཉིད་འཚོ་བའི་དོན་དུ་གཏན་དུ་དབྲལ་བར་འདོད་པ་ཞེས་གསུངས་པ་མི་འཐད་དེ། ཡིད་གཅུགས་ཀྱི་སེམས་ཀྱིས་ཕ་རོལ་པོའི་རྫས་ལེན་པའི་ཀུན་སློང་ཆོས་ཅན། རྐུ་སེམས་སུ་ཐལ། མཚན་ཉིད་དེའི་ཕྱིར། གཞན་ཡང་། གཞན་དོན་དུ་རྫས་རྐུ་བའི་རྐུ་སེམས་ཆོས་ཅན། མཚན་ཉིད་དེར་ཐལ། རྐུ་སེམས་ཡིན་པའི་ཕྱིར། གཏན་ཚིགས་གྲུབ་སྟེ། གཞན་དོན་དུ་རིན་ཐང་ཚང་བའི་རྫས་བརྐུས་པས་མ་བྱིན་ལེན་དུ་གཏོགས་པའི་སྦོམ་པོ་བསྐྱེད་པའི་ཕྱིར། རང་ལུགས་ནི། མི་རིགས་པའི་སྦྱོར་བས་གཞན་གྱིས་བདག་ཏུ་གཟུང་བའམ། དེར་འདུ་ཤེས་ཏེ་དབྲལ་བར་འདོད་པའི་མཚུངས་ལྡན་ནོ། །སུས་བདག་ཏུ་གཟུང་བ་བརྐུས་ན་འགྱུར་ཞེ་ན། མིའི་རྒྱུད་ཀྱི་རྫས་བདག་ཏུ་གཟུང་བ་བརྐུས་ན་འགྱུར་རོ། །དེ་ཙམ་གྱིས་འགྱུར་རམ་ཞེ་ན། མིས་བདག་ཏུ་གཟུང་བ་ལ་དེར་འདུ་ཤེས་པས་བརྐུས་ན་འགྱུར་རོ། །གསུམ་པ་དོགས་པ་བཅད་པ་ལ་བཞི་སྟེ། བདག་པོ་དང་། དངོས་པོ་དང་། རིན་ཐང་དང་། མཐར་ཐུག་ལ་དོགས་པ་གཅོད་པའོ། །དང་པོ་ནི། མ་བྱིན་ལེན་གྱི་རྫས་བདག་ལ་དབྱེ་ན་བཞི་སྟེ། དབྱར་རྙེད་དགེ་འདུན་ལ་དབང་བ་ལྟ་བུ་བཀའ་སྩལ་གྱིས་བདག་པོར་གཞག་པ་དང་། ཤོ་གམ་རྒྱལ་པོར་དབང་བ་ལྟ་བུ་ཡུལ་ཆོས་ཀྱིས་དང་། ཕ་ནོར་བུར་དབང་བ་ལྟ་བུ་རིགས་རྒྱུད་ཀྱིས་དང་། རི་དྭགས་ལིངས་བཏབ་པ་ལིངས་པར་དབང་བ་ལྟ་བུ་བསམ་སྦྱོར་གྱི་བདག་པོར་གཞག་པའོ། །དེ་གཞི་ཀ་རྒན་ཞུགས་ལྟ་བུ་གཅིག་ལ་ཚང་བ་སྲིད་པས་གང་གཙོ་ཆེ་ཞེ་ན། སྔ་མ་སྔ་མ་གཙོ་ཆེའོ་ཞེས་གསུངས་སོ། །གཉིས་པ་ནི། ཁ་ཅིག་སུམ་བརྒྱ་པར། དེ་བཞིན་མི་དབང་བསོད་སྙོམས་ལེན་པ་དང་། །ཞེས་པ་དང་། ཟན་དྲོན་དང་འབྲས་ཆན་ཞེས་སོགས་ཀྱི་དོན་དུ་བསམས་ནས་མ་བྱིན་ལེན་གྱི་ཕམ་པ་བསྐྱེད་པ་ལ་བརྐུ་བྱའི་དངོས་པོ་དུར་ཁྲོད་ཀྱི་རྫས་སོགས་དམན་པ་མ་ཡིན་པ་དང་། གཡོས་སུ་བྱས་པའི་ཁ་ཟས་མ་ཡིན་པར་དགོས་ཟེར་བ་མི་འཐད་དེ། དུད་འགྲོའི་ཁ་ཟས་རིན་ཐང་ཚང་བ་བརྐུས་པའི་སྦོམ་པོ་བསྐྱེད་པ་ལ་གཡོས་སུ་མ་བྱས་པ་དགོས་པར་ཐལ། དམ་བཅས་དེའི་ཕྱིར། འདོད་མི་ནུས་ཏེ། རིན་ཐང་བརྩི་བར་བྱའོ་ཞེས་གསུངས་པའི་ཕྱིར། གཞན་ཡང་ཀཱ་རི་ཀཱ། གདོང་བུ་འབྲས་བུ་ཤུན་པ་ཆུ། །ཞེས་པའི་འགྲེལ་པ་དོན་བརྒྱད་མར། མྱ་ངམ་གྱི་ཐང་དུ་མགུལ་དུ་བཏུང་བའི་ཆུ་བརྐུས་ན་ཕམ་པར་གསུངས་པའི་ཕྱིར། གསུམ་པ་ནི། ཞུ་བའི་སྐབས་སུ། ཀ་ཀ་ནི་བཞི་ལ་མ་ཤ་ཀའོ། །ལྔ་ཉིད་ནི་ཀཱརྵཱ་པ་ཎི་བཞི་ཆའི་དཔེ་ཡིན་ནོ། །གང་ན་དེའི་ཚིགས་ཉིད་ཉི་ཤུ་ཡིན་པ་དེ་ལ་བརྟེན་ནས་སོ། །ཞེས་གསུངས་པའི་དོན་བཤད་པར་བྱ་སྟེ། ཀཱརྵཱ་པ་ཎ་ནི་མ་བྱིན་ལེན་གྱི་རིན་ཐང་གི་མ་མཐའི་ཚད་ཡིན་པས་དེའི་ཚད་ཇི་ལྟ་བུ་ཞེ་ན། ཀ་ཀ་ནི་ཞེས་བྱ་བ་ནི་བུན་ཀྲི་ཀ་ཞེས་བྱ་བ་སྟེ། མགྲོན་བུ་ཉི་ཤུའི་རིན་ཐང་གི་མིང་ཡིན་ནོ། །དེ་ནི་ཟོང་གི་ཁྱད་པར་ཞིག་ཡིན་ཏེ། ཊཱི་ཀར་ཟོང་ཞེས་བྱ་བ་ནི་ཀ་ཀ་ནི་དང་བ་ར་ས་ཀ་ལ་སོགས་པའོ་ཞེས་གསུངས་པའི་ཕྱིར། དེ་བཞི་ཀ་ལ་མ་ཤ་ཀ་གཅིག་གོ་དེ་ཡང་མགྲོན་བུ་བརྒྱད་ཅུའི་རིན་ཐང་གི་མིང་ཡིན་ནོ། །འོ་ན་མ་ཤ་ཀ་ལྔ་བརྐུས་ན་ཕམ་པར་འགྱུར་བ་ངེས་གཟུང་ཡིན་ནམ་ཞེ་ན། རྣམ་འབྱེད་ལས། མ་ཤ་ཀ་ཉིད་གསུངས་པ་ནི་ཀཱརྵཱ་པ་ཎ་བཞི་ཆའི་དཔེ་ཡིན་པས་དེའི་བཞི་ཆ་བརྐུས་ན་ཕམ་པར་འགྱུར་གྱི་མ་ཤ་ཀ་ལྔ་ལ་མ་ངེས་སོ། ཀཱརྵཱ་པ་ཎ་ནི་སེར་རམ་དངུལ་ལས་བྱས་པའི་ཟོང་ཞིག་ཡིན་ཏེ། ཞུ་ཊཱིཀ་ཏུ་ཀཱརྵཱ་པ་ཎ་ནི་ཟོང་གི་ཁྱད་པར་དངུལ་ལས་བྱས་པ་གཟུགས་དོད་པ་གཅོད་དུ་རུང་བའོ་ཞེས་གསུངས་སོ། །འོ་ན་མ་ཤ་ཀ་ལྔ་ཀཱརྵཱ་པ་ཎ་བཞི་ཆའི་དཔེ་ཡིན་པའི་རྒྱུ་མཚན་ཅི་ཡིན་ཞེ་ན། བསླབ་པ་འཆའ་བའི་ཡུལ་དུས་གང་ན་ཀཱརྵཱ་པ་ཎ་དེའི་ཚིགས་སམ་ཚད་མ་ཤ་ཀའི་གྲངས་ཉི་ཤུ་ཡིན་པ་དེ་ལ་བརྟེན་ནས་གཞག་པ་ཡིན་ནོ། །རྒྱ་ཆེར་འགྲེལ་པ་བརྩམས་པའི་དུས་ན་ཀཱརྵཱ་པ་ཎ་གཅིག་ལ་མ་ཤ་ཀ་བཅུ་དྲུག་ཏུ་བྱེད་པ་ཡིན་པས་མ་ཤ་ཀ་བཞི་བརྐུས་ན་ཕམ་པར་འགྱུར་བ་སོགས་གཞན་ལ་ཡང་སྦྱར་ཏེ་ཤེས་པར་བྱའོ། །ཇི་སྐད་དུ་གཏམ་གྱི་གཞིར། བཙུན་པ་མ་ཤ་ཀ་གསུམ་བརྐུས་པས་ཕམ་པར་འགྱུར་བ་མཆིས་སམ། བཀའ་སྩལ་པ་ཡོད་དེ། གང་ན་མ་ཤ་ཀ་བཅུ་གཉིས་ལ་ཀཱརྵཱ་པ་ན་གཅིག་ཏུ་འགྱུར་བ་ནའོ། །མ་ཤ་ཀ་ལྔ་ལས་ལྷག་པ་བརྐུས་ན་ཕམ་པར་མི་འགྱུར་བ་མཆིས་སམ། བཀའ་སྩལ་པ་ཡོད་དེ། གང་ན་མ་ཤ་ཀ་བཞི་བཅུ་ལ་ཀཱརྵཱ་པ་ཎ་གཅིག་ཏུ་འགྱུར་བ་ནའོ། །ཞེས་གསུངས་སོ། །བོད་ན་ཀཱརྵཱ་པ་ཎ་ལ་སོགས་པའི་རྣམ་གཞག་མེད་པས་མ་བྱིན་ལེན་གྱི་རིན་ཐང་གི་ཚད་ཇི་ལྟ་བུ་ཞེ་ན། རྒྱ་ན་རེ་རྟ་རྒོད་མ་རེ་ཙམ་ཡིན་ཏེ་གསོད་པའི་ཆད་པ་དང་སྒོ་བསྟུན་པའི་ཕྱིར་དང་། དེ་ཙམ་གྱིས་དགག་བྱ་རྫོགས་པའི་ཕྱིར་རོ་ཞེས་གསུངས། ཤ་མི་ན་རེ་རྒྱལ་ཁྲིམས་ཆོས་དང་མཐུན་པ་ཡོད་ན་གང་ཞིག་བརྐུས་ན་སྲོག་གཅོད་པའི་ནག་ཐོབ་པའི་མ་མཐའི་རྫས་ཙམ་རིན་ཐང་གི་ཚད་ཡིན་ལ་ཆོས་དང་མཐུན་པ་མེད་ན་བསླབ་པ་འཆའ་བའི་དུས་ཀྱི་རིན་ཐང་རྩི་བ་ཡིན་ཟེར་བ་མི་འཐད་དེ། རྒྱལ་ཁྲིམས་ཆོས་དང་མཐུན་པ་ཡོད་ན་སྲོག་གཅོད་པའི་ཆད་པ་བྱེད་མི་རིགས་པའི་ཕྱིར་དང་། ཆོས་དང་མཐུན་པ་མེད་ན་བསླབ་པ་འཆའ་བའི་དུས་ཀྱི་རིན་ཐང་བརྩི་བ་མི་འཐད་པར་ཐལ། རིན་ཐང་ནི་རྐུ་བའི་གནས་དང་དུས་ཀྱི་སོ་ཞེས་གསུངས་པའི་ཕྱིར། ཁ་ཅིག་ནས་ཁལ་བཞི་ཙམ་ལ་བྱེད་དེ། འོད་ལྡན་དུ་ཆུ་གཏོང་འགོག་གི་སྐབས་སུ་དེ་ལ་དཔེ་བྱེད་པའི་ཕྱིར་ཞེས་དང་། ཁ་ཅིག་གསེར་མགུར་ཞོ་ཕྱེད་ཙམ་ལ་བྱེད་པ་ཡིན་ཏེ། རང་འགྲེལ་ལས། མང་བ་སེ་བ་བརྒྱད་ཅེས་གསུངས་པའི་ཕྱིར་ཞེས་པ་ཡང་མི་འཐད་དེ། སྟོན་པ་འཁོར་བཅས་ལ་གདུགས་ཚོད་འདྲེན་པ་ལ་ཀཱརྵཱ་པ་ཎ་ལྔ་བརྒྱ་ཙམ་དགོས་པར་བཤད་པ་ལ། ཁྱེད་ལྟར་ན་གསེར་མགུར་མོ་ཞོ་ཉིས་སྟོང་དུ་འགྱུར་བས་དེ་མི་འགྲིག་ཅིང་། སྨད་འཚོང་མ་ལ་ནུབ་རེ་ལ་ཀཱརྵཱ་པ་ཎ་ལྔ་བརྒྱ་རེ་སྟེར་བ་ཡོད་པར་བཤད་པས་དེ་དང་མི་འགྲིགས་པའི་ཕྱིར། གཞན་དག་ན་རེ་གསོད་པའི་ཆད་པ་ཁོ་ན་དང་སྒོ་བསྟུན་པའི་རྟགས་ཀྱང་མ་གྲུབ་སྟེ། ཆད་པ་གཅོད་པ་ཙམ་དང་སྒོ་བསྟུན་པའི་ཕྱིར་ཏེ། ལུང་དུ་ཇི་ཙམ་མ་བྱིན་པར་བླངས་ན་དེ་རྒྱལ་པོའམ། བློན་པོ་ཆེན་པོས་བཟུང་ནས། དེ་ལ་འདི་སྐད་ཅེས། ཀྱེ་མི་ཁྱོད་ནི་རྐུན་མའོ། །བྱིས་པའོ་ཞེས་སོགས་གསུངས་པས་ན་འཇིག་རྟེན་ཕལ་གྱི་རྐུན་མའི་ཐ་སྙད་དང་ཆད་པས་གཅོད་པ་རིགས་པ་ཙམ་དུ་བྱེད་པ་ཡན་ཆད་ལ་འཐད་དོ། །དེས་ན་སེ་བ་གསུམ་ཙམ་ལ་དངོས་པོ་ཚང་སྟེ། དོན་བརྒྱད་མར། རྒྱ་གར་གྱི་རིན་ཐང་དང་སྦྱར་ན་དངུལ་ཞོ་གཅིག་ཙམ་བརྐུས་ན་ཕས་ཕམ་པར་བརྩིའོ་ཞེས་གསུངས་པའི་ཕྱིར་ཞེས་དམར་སྟོན་གསུང་ངོ་། །ཁ་ཅིག་བྲེ་དོ་ཙམ་ལ་བྱེད་དོ། །དངུལ་ཞོའི་བརྒྱད་ཆ་བརྐུས་ན་ཕམ་ཞེས་གསུངས་པའི་ཕྱིར་ཞེས་ཟེར་བ་ལ། ཆོས་རྗེ་གནས་བརྟན་པའི་གསུང་གིས་དེ་མི་འཐད་དེ། ལུང་ལས། གསེར་གྱི་ཕྲེང་བ་བརྐུས་ན་ཕམ་པར་མི་འགྱུར་བ་མཆིས་སམ། ཡོད་དེ་རིན་ཐང་མ་ཚང་བའམ། མི་མིན་གྱིས་བདག་གིར་བྱས་པའོ་ཞེས་གསུངས་པའི་ཕྱིར་དང་། དེ་ལྟ་ན་ཀཱརྵཱ་པ་ཎ་གཅིག་ལ་བྲེ་བརྒྱད་དུ་འགྱུར་ལ། འདོད་ན་བྲམ་ཟེའི་རས་ཡུག་གི་གཏམ་རྒྱུད་སོགས་དང་མི་འགྲིག་གོ །རང་ལུགས་ནི། གསེར་ཞོ་གང་གི་བརྒྱད་ཆ་ཙམ་ལ་རིན་ཐང་གི་ཚད་དུ་རིགས་ཏེ། དོན་བརྒྱད་མར། དངུལ་ཞོ་གཅིག་བརྐུས་ན་ཕམ་ཞེས་པ་དང་། ཤེས་རབ་བྱེད་པར། དེང་སང་གི་དུས་དང་སྦྱར་ན་རྒྱ་གར་ཡུལ་གྱི་མ་ཤ་ལ་བོད་ཀྱི་དངུལ་གྱི་ཐང་དུ་བརྩིས་ན་དངུལ་གསེར་ཞོའི་བརྒྱད་ཆ་གཅིག་ཡོད་དེ། བརྒྱད་ཆ་གཅིག་ཡན་ཆད་བརྐུས་ན་ཕམ་ཞེས་གསུངས་པའི་ཕྱིར། འཁྲུལ་སྤོང་དུ། མི་གཅིག་གིས་ཟ་མ་གཟབ་པ་ཅིག་ཙམ་ལ་ཆ་གཞག་པ་ཡིན་པར་གསུངས་ལ། དེ་ཡང་སྔ་མ་དང་དོན་གྱི་ཁོག་གཅིག་ཏུ་འགྲིག་པར་སྣང་སྟེ་འདི་ལ་ཡང་ནས་ཁལ་ཕྱེད་ཙམ་དགོས་པའི་ཕྱིར། བཞི་པ་མཐར་ཐུག་ལ་དོགས་པ་གཅད་པ་ནི། མ་བྱིན་ལེན་གྱི་མཐར་ཐུག་གནས་སྤགས་ལ་འཇོག་གམ་གྲུབ་བློ་ལ་འཇོག་ཅེ་ན། ཁ་ཅིག་གྲུབ་བློ་ལ་འཇོག་དགོས་ཏེ། གནས་སྤགས་ལ་འདོད་ན་ཞིང་ཁང་བརྐུས་པ་སོགས་ཀྱིས་ཕམ་པ་གཞག་ཏུ་མི་རུང་བར་འགྱུར་རོ་ཞེས་ཟེར་བ་མི་འཐད་དེ། གནས་སྤགས་ཀྱི་དོན་རྫས་གཞག་པ་སྤོ་བ་ལ་ཟེར་བ་མ་ཡིན་གྱི། གནས་སྐབས་འདི་ཙམ་ལས་འདས་ནས་གནས་སྐབས་འདི་ཙམ་དུ་གྱུར་པ་ན་ཕམ་པར་འགྱུར་རོ་ཞེས་གསུངས་པའི་ཚད་ལས་འདས་པ་ལ་འཇོག་པ་ཡིན་པའི་ཕྱིར། དེས་ན་ཞིང་ཁང་བརྐུས་པ་ལ་གནས་སྤགས་ཀྱི་དོན་ཚང་སྟེ། རིབ་མ་ལ་སོགས་པས་བསྐོར་ནས་རྐུ་བའི་ཚེ་མ་བསྐོར་བའི་གནས་ནས་བསྐོར་བའི་གནས་སུ་སྤགས་པ་ཡིན་པའི་ཕྱིར་དང་། ཕུར་པ་བཏབ་ནས་རྐུ་བའི་ཚེ་སྔར་ཕུར་པ་མ་བཏབ་པའི་གནས་ནས་ཕུར་པ་བཏབ་བའི་གནས་སུ་སྤགས་པ་ཡིན་པའི་ཕྱིར། དེས་ན་མཐར་ཐུག་གནས་སྤགས་ལ་འཇོག་རིགས་པ་ཡིན་ཏེ། བམ་ལྔར་གནས་ནས་གནས་སུ་སྤོས་པ་ན་བརྐུས་པ་དེ་བྱེ་བྲག་ཏུ་བྱས་ནས་བསྟན་པའི་ཕྱིར་ཞེས་དང་། སུམ་བརྒྱ་པར། དེ་ལྟར་བརྐུ་བྱའི་དབྱེ་བས་རྐུ་དབྱེ་བ། །དེ་ནི་འདུལ་བརྒྱ་མཚོ་ལ་བལྟས་ཡིན། །ཞེས་གསུངས་པའི་ཕྱིར། མ་བྱིན་ལེན་གྱི་མཐར་ཐུག་གནས་སྤགས་ལ་འཇོག་ན་ཞིང་ལ་ཆུ་གཏོང་འགོག་གི་སྒོ་ནས་རྐུ་བའི་ཚེ་གནས་སྤགས་ཇི་ལྟར་ཚང་ཞེ་ན། གཞན་གྱི་ལས་ཀྱི་མཐའ་དག་ལ་ཆུ་གཏོང་བའམ་འགོག་པ་ལ་ནི་རང་གི་ལས་ཀྱི་མཐའ་གྲུབ་པ་སྐྱེད་མ་གཏོགས་པ་དེའི་ཆེད་དུ་དེར་འདུན་པས་གཞན་དུ་གྱུར་ནའོ་ཞེས་གསུངས་ཏེ། གྲུབ་ན་བརྐུས་པ་ཡིན་ནོ་ཞེས་སྦྱར་རོ། །གང་ན་དགེ་སློང་རང་གི་ཞིང་ལས་ཀྱི་མཐའ་ལོ་ཐོག་འཕེལ་བའོ། །གང་གི་ཚེ་ཞེ་ན་ཆུ་ཡོད་པའི་ཚེ་གཏོང་བའམ་དཀོན་པའི་ཚེ་འགོག་སྟེ་རྐུ་བ་ལ་ནི་སྟེ་དེའི་ཚེ་ནའོ། །གང་དུ་ན་གཞན་གྱི་ལས་ཀྱི་མཐའ་ལའོ། །ཅིའི་ཆེད་དུ་ཞེ་ན། རང་གི་ལས་ཀྱི་མཐའ་གྲུབ་པ་དེའི་ཆེད་དུའོ། །གྲུབ་པའི་ཁྱད་པར་ཇི་ལྟ་བུ་ཞེ་ན། རྒྱུན་པའི་ཞིང་གི་ཡོན་ཏན་གྱི་སྐྱེད་མ་གཏོགས་པ་སྟེ། དེ་མི་རྩི་བར་ཆུ་གཏོང་འགོག་ལས་གསར་དུ་བྱུང་བ་དེ་བརྩི་བར་བྱའོ། །གཞན་གྱི་ལས་ཀྱི་མཐའ་གྲུབ་ན་ཡང་དེ་ལྟར་ཡིན་ནམ་ཞེ་ན། གྲུབ་པ་ལས་གཞན་དུ་སྟེ་ཕུང་པར་གྱུར་ནའོ། །བསམ་པ་གང་གིས་ཞེ་ན་བདག་གི་དེ་གྲུབ་པར་བྱ་བ་དང་། གཞན་གྱི་དེ་ཕུང་བར་བྱ་བའི་དེར་འདུན་པས་སོ། །དེ་གཉིས་ནི་རྐུ་སེམས་ཡིན་ལ། མཐར་ཐུག་ལ་གནས་སྤགས་ཚང་སྟེ། རང་གི་ཞིང་ལ་སྐྱེད་མ་གྲུབ་པའི་གནས་ནས་གྲུབ་པའི་གནས་སུ་སྤགས་པའི་ཕྱིར་དང་། གཞན་གྱི་ཞིང་ལ་མ་ཕུང་བའི་གནས་ནས་ཕུང་བའི་གནས་སུ་སྤགས་པའི་ཕྱིར། ཤགས་ཀྱིས་གལ་ཏེ་བླའི་གྲྭར་རྒྱལ་ནའོ། །གལ་ཏེ་འོག་ཟུར་ན་ཕ་རོལ་པོའི་སྦྱོར་བ་ཉིད་བཏང་ནའོ་ཞེས་གསུངས་པའི་རྐུ་བ་ལ་གནས་སྤགས་ཚང་སྟེ། བླ་སྟེ་རྒྱལ་པོའི་གྲྭར་ཤགས་འགྱེད་པའི་སྒོ་ནས་ཕ་རོལ་གྱི་རྫས་རྐུ་བ་ན་ཤགས་རྒྱལ་བའི་ཚེ་དང་། འོག་ཟུར་བློན་པོའི་དྲུང་དུ་ཤགས་འགྱེད་པའི་སྒོ་ནས་རྐུ་བ་ན་ཕ་རོལ་པོས་རྩོད་པའི་སྦྱོར་བ་ཉིད་གཏོང་བ་ན་བརྐུས་པ་ཡིན་ཏེ། རིམ་པ་ལྟར་ཤགས་མ་རྒྱལ་བའི་གནས་ནས་རྒྱལ་བའི་གནས་སུ་སྤགས་པའི་ཕྱིར་དང་། རྩོད་པའི་སྦྱོར་བ་མ་བཏང་བའི་གནས་ནས་བཏང་བའི་གནས་སུ་སྤགས་པའི་ཕྱིར་ཞེས་འོད་ལྡན་ལས་བཤད་དོ། །གལ་ཏེ་གྲུབ་བློ་ཁོ་ན་ལ་འདོད་ན། གཏམས་པ་སྦས་པ་ལ་གལ་ཏེ་སྤོ་བ་དང་ལྷན་ཅིག་ཏུ་དང་། སྤོས་པའི་འོག་ཏུ་དང་། གལ་ཏེ་སྔར་ན་ནི་སྦྱོར་བ་གཞན་ཉིད་དོ་ཞེས་པའི་སྐབས་སུ། གཞན་གྱི་རྫས་བཅོལ་བ་དེ་ཞལ་ལྟ་བས་རྫས་སྤོས་པ་དང་ལྷན་ཅིག་གྲུབ་བློ་སྐྱེས་པ་དང་། སྤོས་པའི་འོག་ཏུ་གྲུབ་བློ་སྐྱེས་དང་། སྤོས་པའི་སྔར་གྲུབ་བློ་སྐྱེས་པ་དང་གསུམ་ལས། དང་པོ་གཉིས་ཀྱི་ཚེ་དངོས་གཞི་དང་། གསུམ་པའི་ཚེ་ན་སྦྱོར་སྦོམ་བསྐྱེད་པར་བཤད་པ་དང་འགལ་ཏེ། དེའི་ཚེ་ན་གྲུབ་བློ་སྐྱེས་པའི་ཕྱིར་རོ། །ཁྱབ་པ་ཁས་བླངས་སོ། །ཁོ་ན་རེ་མ་བྱིན་ལེན་གྱི་ཕམ་པའི་མཐར་ཐུག་གྲུབ་པ་ལ་གྲུབ་བློ་མི་དགོས་ན་གསང་སྔགས་དག་གིས་འདྲེན་པ་ནི་སྣང་བ་ནའོ་ཞེས་པའི་ཊཱི་ཀར། ཅི་སྟེ་ཤིན་ཏུ་ཐག་རིང་པོ་ནས་དྲངས་ཏེ་རྐང་པའི་དྲུང་དུ་འོངས་ཀྱང་ཇི་སྲིད་སྣང་བར་མ་གྱུར་ན་ཡང་བརྐུས་པར་མི་འགྱུར་ཏེ། གྲུབ་པའི་བློ་མེད་པའི་ཕྱིར་རོ། །གལ་ཏེ་རྐུན་མ་མང་པོ་ཞིག་ཡོད་པ་ལས་གཅིག་ཁོ་ན་ཞིག་གིས་གལ་ཏེ་མཐོང་ན་ཡང་དེའི་ཚེ་ཐམས་ཅད་ཀྱིས་མཐོང་བ་ཁོ་ན་ཡིན་ནོ། །ཞེས་གསུངས་པའི་ཕྱིར་ཞེ་ན། སྐྱོན་མེད་དེ། གྲུབ་པའི་བློ་མེད་པའི་ཕྱིར་རོ་ཞེས་པ་ནི། བྱུང་བར་ཤེས་པའི་བློ་མེད་པའི་ཕྱིར་ཞེས་པའི་དོན་ཡིན་པའི་ཕྱིར། ཁྱེད་ལྟར་ན་དེའི་ཚེ་གནས་སྤགས་ཚང་ཡང་གྲུབ་བློ་མ་ཚང་ཞེས་པའི་དོན་དུ་འཆད་དགོས་ལ། དེའི་ཚེ་གནས་སྤགས་ནི་ཚང་སྟེ་རྫས་དེ་མི་སྣང་བའི་གནས་ནས་སྣང་བའི་གནས་སུ་སྤགས་པ་ཡིན་པའི་ཕྱིར། ཁ་ཅིག་གྲུབ་བློས་ཁྱད་པར་དུ་བྱས་པའི་གནས་སྤགས་ལ་བྱེད་གསུང་བ་ཡང་མི་འཐད་པར་སྣང་སྟེ། རྐུན་མ་མང་པོ་ཞིག་གིས་ཐག་རིང་པོ་ནས་རྫས་དེ་རྐང་པའི་དྲུང་དུ་དྲངས་ཏེ་རྐུན་པོ་གཅིག་ཁོ་ནས་མཐོང་བའི་ཚེ་རྐུན་པོ་གཞན་རྣམས་ཀྱི་རྒྱུད་ལ་གྲུབ་བློ་སྐྱེས་པ་ཐལ། དེའི་ཚེ་ན་རྐུན་པོ་དེ་ཐམས་ཅད་ལ་མ་བྱིན་ལེན་གྱི་ཕམ་པ་བྱུང་བའི་ཕྱིར་ཏེ། ལུང་དྲངས་མ་ཐག་དེའི་ཕྱིར། སྔ་མའི་ཁྱབ་པ་ཁས་བླངས། དབྲལ་བར་བྱ་བ་དུ་མ་ཉིད་ཡིན་ན་དེའི་ཆ་སོ་སོའོ། །རྐུན་པོ་རྣམས་ཀྱང་ངོ་ཞེས་པའི་དོན། དབྲལ་བར་བྱ་བ་དེ་རྫས་བདག་མི་དུ་མ་ཉིད་ཡིན་ན་དེའི་ཆ་སོ་སོ་ལ་རིན་ཐང་བརྩི། རྐུན་པོ་རྣམས་ཀྱང་དགེ་སློང་དུ་མ་ཉིད་ཡིན་ན་ཆ་སོ་སོའི་རིན་ཐང་བརྩི་དགོས་པས། རྫས་བདག་ཐ་དད་པ་བཅུའི་ནོར་དགེ་སློང་གཅིག་གིས་བརྐུས་ན་རིན་ཐང་ཚང་བ་བཅུ་ལ་དངོས་གཞིར་འགྱུར་ལ། རྫས་བདག་བཅུ་ལ་རྐུན་མ་དགེ་སློང་བཅུས་བརྐུས་པའི་ཚེ་རིན་ཐང་ཚང་བ་བརྒྱ་ལ་དངོས་གཞིར་འགྱུར་ཞེས་པའི་དོན་ཡིན་ལ། འདི་ལ་ཁ་ཅིག་བརྐུ་བྱ་དང་རྐུ་བྱེད་གཉིས་ཀའི་འགོད་རྫས་དང་འཇོག་རྫས་གཉིས་ཡོད་པ་ལས། འགོད་རྫས་ཡིན་ན་དེ་ལྟར་ཡིན་ཀྱང་འཇོག་རྫས་ཡིན་ན་རིན་ཐང་ཚང་བ་གཅིག་བརྐུས་ནའང་ཕམ་པར་འགྱུར་བ་ཡིན་ནོ་ཞེས་གསུངས་མོད་ཤེས་བྱེད་ཡོད་པར་མ་མཐོང་ངོ་། །གསུམ་པ་གཞན་གྱི་སྲོག་ལ་གནོད་པ་སྲོག་གཅོད་ཀྱི་ཕམ་པ་ལ་གསུམ་སྟེ། སྤྱིའི་དོན་དང་། གཞུང་ལ་སྦྱར་བ། དོགས་པ་གཅད་པའོ། །དང་པོ་ལ་གླེང་གཞི་ནི་ཡུལ་སྤོང་བྱེད་དུ་གང་ཟག་དགེ་སློང་རབ་ཏུ་མང་པོས། ཉོན་མོངས་པ་མི་བཟོད་པས་ཀུན་ནས་བསླངས་ཏེ། ཉེས་པ་མི་བསད་པ་ལ་བརྟེན་ནས་བསླབ་པའི་གཞི་འདི་བཅས་སོ། །རྒྱུ་མཚན་ནི། མཐོང་བའི་ཉེས་དམིགས་སྔར་བཞིན་ཡིན་ལ། མ་མཐོང་བའི་ཉེས་དམིགས་ལ་རྣམ་སྨིན་སྔར་དང་འདྲ། རྒྱུ་མཐུན་ལ་མྱོང་བ་རྒྱུ་མཐུན་ཚེ་ཐུང་བ་དང་། བྱེད་པ་རྒྱུ་མཐུན་སྲོག་གཅོད་པ་ལ་དགའ་བ་དང་། བདག་པོའི་འབྲས་བུ་ས་ཕྱོགས་གཟི་བརྗིད་ཆུང་བར་སྐྱེ་བའོ། །ཡན་ལག་ལ་རྟེན་གྱི་ཡན་ལག་སྔར་བཞིན། ཡུལ་གྱི་ཡན་ལག་མིའི་འགྲོ་བ་པ་ཡིན་པ། བདག་ཉིད་ལས་རྒྱུད་ཐ་དད་པའོ། །བསམ་པ་ལ་འདུ་ཤེས་མ་འཁྲུལ་ཞིང་། ཀུན་སློང་གསོད་པར་འདོད་པའི་བསམས་པའོ། །སྦྱོར་བ་རང་ངམ་བསྐོས་པས་ལུས་ངག་ཏུ་གྲུབ་ཅིང་མ་འཁྱོགས་པར་རྩོམ་པའོ། །མཐར་ཐུག་དེའི་རྐྱེན་གྱིས་རང་ཉིད་ཀྱི་སྔར་སྲོག་འགགས་པའོ། །གཉིས་པ་གཞུང་དོན་ལ་སྦྱར་བ་ནི། སྲོག་བཅད་ནའོ། །དེ་ལྟར་བསམས་པས་སོ། །མིར་གྱུར་པའི་འོ། །དེ་ལྟར་འདུ་ཤེས་པས་སོ། །གང་ཡང་རུང་བས་སོ་ཞེས་གསུངས་ཏེ། གང་ཞིག་བྱས་ན་སྲོག་གཅོད་པའི་ཕམ་པར་འགྱུར་ཞེ་ན། སྲོག་ནི་ཚེ་ཡིན་དྲོད་དང་ནི། །རྣམ་ཤེས་རྟེན་གང་ཡིན་པའོ། །ཞེས་པ་ལྟར་གྱི་སྲོག་གི་དབང་པོ་མ་འོངས་པ་སྐྱེ་བ་དགག་པའི་སྒོ་ནས་བཅད་ནའོ། །ཁ་ཅིག་སྲོག་ནི་ལུས་ལ་རྣམ་ཤེས་འཇུག་པའི་རྟེན་རླུང་ཁྱད་པར་ཅན་ཡིན་གསུང་བ་མི་འཐད་དེ། རླུང་ནི་བེམས་པོ་ཡིན་ལ་སྲོག་ནི་ལྡན་མིན་འདུ་བྱེད་ཡིན་པའི་ཕྱིར། ཀུན་སློང་ནི་སྲོག་གཅོད་པ་དེ་ལྟར་བསམ་པས་སོ། །གང་གི་ཞེ་ན་མིར་གྱུར་པའམ་མིར་ཆགས་པའི་འོ། །དེ་ལ་མིར་ཆགས་པ་ནི། དང་པོར་མེར་མེར་པོ་ཡིན་ཏེ། །མེར་མེར་པོ་ལས་ནུར་ནུར་པོ། །ནུར་ནུར་པོ་ལས་སྒོར་སྒོར་པོ། །སྒོར་སྒོར་པོ་ལས་མཁྲང་འགྱུར་ཏེ། །མཁྲང་ལས་རྐང་ལག་འགྱུས་པ་དང་། །སྐྲ་སྤུ་སེན་པོ་རྣམས་དང་ནི། །དབང་པོ་གཟུགས་ཅན་ལ་སོགས་པ། །མཚོན་རྣམས་ཡོངས་སུ་རྫོགས་པར་འགྱུར། །ཞེས་མངལ་གྱི་གནས་སྐབས་ལྔ་གསུངས་པའི་མཁྲང་འགྱུར་གྱི་བར་གྱི་གནས་སྐབས་བཞི་ལ་འཇོག་སྟེ། ལུས་དང་སྲོག་དང་ཡིད་ཀྱི་དབང་པོ་གསུམ་འདུས་པའོ། །མིར་གྱུར་པ་ནི་རྐང་ལག་འགྱུས་པ་ལ་སོགས་པའི་མངལ་གྱི་གནས་སྐབས་ལྔ་པ་དང་། བཙས་པའི་གནས་སྐབས་ཀྱི་བྱིས་པ་དང་གཞོན་ནུ་དང་། དར་བབ་དང་། དར་ཡོལ་དང་། རྒན་པོའི་གནས་སྐབས་ལྔ་རྣམས་ཏེ་དབང་པོ་དྲུག་འདུས་པའོ། །འདུ་ཤེས་ནི་མི་ལ་མི་དེ་ལྟར་དུ་འདུ་ཤེས་པ་སྟེ་འདུ་ཤེས་མ་འཁྲུལ་བའོ། །སྦྱོར་བ་ཇི་ལྟ་བུས་ཞེ་ན། དུག་དང་མཚོན་ལ་སོགས་པ་གང་ཡང་རུང་བའི་སྦྱོར་བས་སོ། །གསུམ་པ་དོགས་པ་གཅོད་པ་ལ་གཉིས་ཏེ། ཡུལ་ལ་དོགས་པ་གཅོད་པ་དང་། སྦྱོར་བ་ལ་དོགས་པ་གཅོད་པའོ། །དང་པོ་ནི། འོ་ན་འགྲོ་བར་མཚུངས་པ་ལ་མི་བསད་ན་ཕམ་པ་དང་། མི་མིན་བསད་ན་སྦོམ་པོ་དང་། དུད་འགྲོ་བསད་ན་ལྟུང་བྱེད་དུ་འཚལ་བའི་རྒྱུ་མཚན་ཅི་ཡིན་ཞེ་ན། འགྲོ་བ་རབ་འབྲིང་ཐ་མ་གསུམ་གྱི་དབང་དུ་བྱས་པ་ཡིན་ཏེ། འོད་ལྡན་ལས། མི་རྣམས་ཁོ་ན་ལ་དཀོན་མཆོག་གསུམ་རྣམ་པར་འཇོག་པ་དང་། སྡོམ་པ་གསུམ་གནས་ལ། མི་མ་ཡིན་པ་རྣམས་ལ་ཡང་བསམ་གཏན་དང་ཟག་མེད་ཀྱི་སྡོམ་པ་གཉིས་གནས་ཤིང་། དུད་འགྲོ་རྣམས་ལ་སྡོམ་པ་མེད་པ་ཡིན་ཞེས་གསུངས་པས་མི་རྣམས་གཙོ་བོ་ཡིན། མི་མིན་རྣམས་འབྲིང་ཡིན། དུད་འགྲོ་རྣམས་ཐ་ཆད་པ་ཡིན་པས་ལྟུང་བ་ཐ་དད་པར་ཁོང་དུ་ཆུད་པར་བྱའོ་ཞེས་སོ། །གཉིས་པ་ལ་གསུམ་སྟེ། སྦྱོར་བ་ཐ་མ་ལ་རྩོད་པ་སྤོང་བ་དང་། སྦྱོར་བ་དང་པོ་ལ་རྩོད་པ་སྤོང་བ་དང་། དགྲ་བཅོམ་པ་ཆོས་དགའི་འདོད་པ་བསྟན་པའོ། །དང་པོ་ནི། གལ་ཏེ་མི་བཅུས་ཉིན་གཅིག་ལ་གསོད་པའི་སྦྱོར་བ་བྱས་ཏེ། དང་པོས་མི་དེ་ཞག་བཅུ་ནས་འཆི་བར་འགྱུར་བའི་མཚོན་བསྣུན། གཉིས་པས་ཞག་དགུ་ནས་འཆི་བར་འགྱུར་བའི་མཚོན་བསྣུན་པ་ནས། ཐ་མས་ད་ལྟ་རང་འཆི་བར་འགྱུར་བའི་མཚོན་བསྣུན་ན་བཅུ་ཆར་ལ་ཕམ་པ་བསྐྱེད་དམ་མི་བསྐྱེད། བསྐྱེད་ན་དེ་ཤི་བ་ཐ་མ་ཁོ་ན་ལ་སྣང་བ་འགལ་ལ་མི་བསྐྱེད་ན་བྱེ་བྲག་བཤད་པར། དགུ་པོ་དག་གིས་ཕམ་པའི་རྣམ་པར་རིག་བྱེད་མ་ཡིན་པ་གཟུང་ལ། བཅུ་པས་ནི་ཕམ་པའི་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་ཡང་གཟུང་བ་ཡིན་ནོ། །ཞེས་གསུངས་པ་དང་འགལ་ལོ་ཞེ་ན། འདིའི་ལན་ལ་འོད་ལྡན་དུ་འགལ་བ་མེད་དེ། བཅུ་ཚན་གྱི་ཡང་སྦྱོར་བ་མཐུན་པའི་ཕྱིར་དང་། འབྲས་བུ་གཅིག་པའི་ཕྱིར་རོ་ཞེས་གསུངས་ཏེ། དེའི་དོན་ལ་རྨ་ཚོ་ལ་སོགས་པ་སྦྱོར་བ་གྲོས་བྱས་གཅིག་པའི་དོན་ཡིན་གསུང་པ་མི་འཐད་དེ། བཅུ་པོ་རང་རང་གི་མཚོན་བསྣུན་པ་ལ་མི་ལྟོས་པར་འགྱུར་ཏེ། དམག་ལ་སོགས་པ་དོན་གཅིག་ཕྱིར་ཞེས་གསུངས་པའི་ཕྱིར། སློབ་དཔོན་རྒྱ་ན་རེ་ནུས་པའི་མཐུ་སྡོམ་པ་ཡིན་གསུང་བ་ལ། གཞན་དག་ན་རེ་སྦྱོར་བ་རེ་རེས་འཆི་ངེས་སུ་བྱས་པ་མ་ཡིན་པར་ཐལ། ཕྱི་མ་ཕྱི་མས་སྔ་མ་སྔ་མ་ལ་མ་ལྟོས་པར་འཆི་བར་ངེས་པ་དེ་མེད་པའི་ཕྱིར་ཞེས་གསུངས་སོ། །རང་ལུགས་མི་བཅུ་པོ་རང་གི་སྟེང་ན་འཆི་ངེས་ཀྱི་སྦྱོར་བ་རེ་རེ་ཡོད་པས་སྦྱོར་བ་མཐུན་པའི་ཕྱིར་དང་། འབྲས་བུ་མི་དེ་ཤི་བར་གཅིག་པའི་ཕྱིར། ཐམས་ཅད་ལ་སྦྱོར་བ་དེས་ཤི་བ་ཡོད་པའི་ཕྱིར་ཞེས་པ་དམར་སྟོན་གསུང་བ་ནི་ལེགས་བཤད་དོ། །འཆི་བའི་སྐད་ཅིག་མ་ཐ་མ་ལ་གསོད་པའི་སྦྱོར་བ་བྱས་པས་ནི་ཕམ་པར་མི་འགྱུར་ཏེ། འོད་ལྡན་དུ་དབུགས་རྒྱུ་བ་ཐ་མར་གྱུར་པ་ནི་འཇིག་པའི་གནས་སྐབས་ཉིད་ཡིན་པའི་ཕྱིར་ག་ལ་མཚུངས་ཞེས་གསུངས་སོ། །གཉིས་པ་ནི། ཚེས་གཅིག་གི་ཉིན་ཚེས་བཅུ་ནས་འཆི་བར་འགྱུར་བའི་མཚོན་བསྣུན་པ་ནས་ཐ་མས་བཅུའི་ཉིན་ད་ལྟ་རང་འཆི་བར་འགྱུར་བའི་མཚོན་བསྣུན་ན་ཐམས་ཅད་ལ་ཕམ་པ་བསྐྱེད་དམ་མི་བསྐྱེད། བསྐྱེད་ན་དེ་ཤི་བའི་དང་པོ་ཁོ་ན་ལ་སྣང་བ་འགལ་ལ་མི་བསྐྱེད་ན་བྱེ་བྲག་བཤད་པ་དང་འགལ་ལོ་ཞེ་ན། ལན་སྔར་བཞིན་ནོ། །གསུམ་པ་ནི། བཙུན་པ་ཆོས་དགའ་ན་རེ་ཡང་ཚེའི་སྐད་ཅིག་མ་གཅིག་ལུས་པ་ལ་ཡང་གསོད་པ་གང་ཡིན་པ་དེ་མཐར་འགྱུར་ལ། གཞན་རྣམས་ལ་ནི་སྦོམ་པོར་འགྱུར་ཞེས་ཟེར་རོ་ཞེས་འོད་ལྡན་ལས་གསུངས་སོ། །བཞི་པ་གཞན་གྱི་དོན་འགྲུབ་པ་ལ་གནོད་པ་བརྫུན་དུ་སྨྲ་བའི་ཕམ་པ་ལ་སྤྱིའི་དོན་དང་། གཞུང་དང་སྦྱར་བ་གཉིས། དང་པོ་ལ། གླེང་གཞི་ནི་ཡུལ་ཡངས་པ་ཅན་དུ་གང་ཟག་ཉ་པའི་རིགས་ལས་རབ་ཏུ་བྱུང་བའི་དགེ་སློང་ལྔ་བརྒྱས་ཉོན་མོངས་པ་གྲགས་པ་འདོད་པས་ཀུན་ནས་བསླངས་ཏེ། ཉེས་པ་མིའི་ཆོས་བླ་མ་ཡང་དག་པ་མ་ཡིན་པར་སྨྲས་པ་ལ་བརྟེན་ནས་བསླབ་པའི་གཞི་འདི་བཅས་སོ། །རྒྱུ་མཚན་ནི། མཐོང་ཆོས་ཀྱི་ཉེས་དམིགས་དང་རྣམ་སྨིན་གྱི་འབྲས་བུ་སྔར་དང་འདྲ། རྒྱུ་མཐུན་ལ་མྱོང་བ་རྒྱུ་མཐུན་སྐུར་བ་མང་བ་དང་། བྱེད་པ་རྒྱུ་མཐུན་བརྫུན་དུ་སྨྲ་བ་ལ་དགའ་བའོ། །བདག་པོའི་འབྲས་བུ་ས་ཕྱོགས་དྲི་ང་བར་སྐྱེ་བའོ། །བྱེད་རྒྱུ་ལ་ཐུན་མོང་གི་ཡན་ལག་སྔར་གྱི་སྟེང་དུ་བདག་ཉིད་མིའི་ཆོས་བླ་མ་དང་མི་ལྡན་པ། ཡུལ་གྱི་ཡན་ལག་ཐ་སྙད་ལྔ་ལྡན་ཏེ་རང་ལས་རྒྱུད་ཐ་དད་པའི་མི་སྨྲ་ཤེས་དོན་གོ་བ་ཤེས་པ་རང་བཞིན་དུ་གནས་པ་མ་ནིང་དང་མཚན་གཉིས་པ་མ་ཡིན་པ། དངོས་པོ་མིའི་ཆོས་བླ་མའི་མཚན་ཉིད་ཅན། བསམ་པ་ལ་གཉིས་ལས་འདུ་ཤེས་མ་འཁྲུལ་བ། ཀུན་སློང་འདུ་ཤེས་བསྒྱུར་བའི་དོན་ཅན་སྨྲ་བར་འདོད་པ། སྦྱོར་བ་ངག་མཚན་ཉིད་དྲུག་ལྡན་ཏེ་རང་གི་ཡིན་པ་དང་། ངག་ཡིན་པ་དང་བདག་ཉིད་དང་འབྲེལ་བ་དང་། བསམས་པའི་དོན་དང་། གསལ་པོར་དང་། མངོན་སུམ་དུ་སྨྲས་པའོ། །མཐར་ཐུག་དེའི་རྐྱེན་གྱིས་དོན་གོ་བའོ། །འདི་ལ་གནས་བརྟན་ཆེན་པོའི་གསུང་གིས་ཡུལ་གྱི་ཡན་ལག་ཐ་སྙད་ལྔ་ལྡན་མི་དགོས་ཏེ། བམ་ལྔ་ལས་མ་ནིང་དང་མཚན་གཉིས་པ་གང་ཡང་རུང་བ་ལ་ནི་ན་སྨད་པ་མེད་དོ་ཞེས་གསུངས་པའི་ཕྱིར། གསལ་བར་སྨྲས་པ་དགོས་ཟེར་བ་ལ་ཡང་དཔྱད་པར་བྱའོ་ཞེས་གསུང་ངོ་། །གཉིས་པ་གཞུང་དོན་ལ་སྦྱར་བ་ནི། འདུ་ཤེས་བསྒྱུར་ཏེ་བདག་ཉིད་མིའི་ཆོས་བླ་མ་དང་ལྡན་པ་ཉིད་དུ་སྨྲས་ནའོ་ཞེས་ཏེ། གང་ཞིག་བྱས་ན་སྨྲ་བའི་ཕམ་པར་འགྱུར་ཞེ་ན། བདེན་པའི་འདུ་ཤེས་བསྒྱུར་བ་སྟེ་སྦས་ཏེ་བརྫུན་པའི་འདུ་ཤེས་ཀྱིས་དགེ་སློང་རང་ཉིད་མིའི་ཆོས་བླ་མ་དང་མི་ལྡན་བཞིན་དུ་དེ་དང་ལྡན་ཞེས་སྨྲས་ན་བརྫུན་དུ་སྨྲ་བའི་ཕམ་པར་འགྱུར་རོ། །མིའི་ཆོས་བླ་མ་གང་ཞེ་ན། འདོད་ཡོན་ལྔ་ནི་མི་རྣམས་ཀྱི་ཆོས་ཡིན་ལ་དེ་ལས་བླ་མའམ་གོང་མའམ་མཆོག་ཏུ་གྱུར་པས་ན་མིའི་ཆོས་བླ་མ་ཞེས་བྱའོ། །ཡང་ན་མིའི་ཆོས་ནི་སྒྲིབ་པ་ལྔ་སྟེ་འདོད་པ་ལ་འདུན་པ་དང་། གནོད་སེམས་དང་། རྨུགས་པ་དང་གཉིད་གཅིག་ཏུ་བྱས་པ་དང་། རྒོད་འགྱོད་གཉིས་གཅིག་ཏུ་བྱས་པ་དང་། ཐེ་ཚོམ་སྟེ་ལྔ་ཡིན་ལ་དེ་དང་བྲལ་བས་ན་མིའི་ཆོས་བླ་མ་ཞེས་བྱའོ། །ཡང་ན་མི་རྣམས་ཀྱི་བརྟེན་པར་བྱ་བའི་ཆོས་ཀྱང་ཡིན་ལ་བླ་མ་ཡང་ཡིན་པས་ན་མིའི་ཆོས་བླ་མ་ཞེས་བྱ་སྟེ། མདོར་ན་བསམ་གཏན་དང་པོའི་ཉེར་བསྡོགས་ཀྱིས་ཐོབ་པའི་དགེ་བའམ་དེ་ཐོབ་པ་སྔོན་དུ་འགྲོ་དགོས་པའི་ཡོན་ཏན་ཁྱད་པར་བ་ནི་མིའི་ཆོས་བླ་མ་ཡིན་ནོ། །མི་ཆོས་བླ་མ་བརྗོད་པའི་ཚུལ་ལ་འབྲས་བུའི་སྒོ་ནས་དང་། ངོ་བོའི་དང་། ཁྱད་པར་གྱི་ཆོས་ཀྱི་དང་། གཞན་ལ་སྙད་བཏགས་པའི་དང་། ཉམས་པའི་དང་། ནོར་བའི་དང་། ཟུར་གྱི་དང་། ལུས་ཀྱི་སྒོ་ནས་བརྗོད་པ་དང་བརྒྱད་དུ་ཡོད་དེ་རྒྱས་པར་གཞུང་དོན་ལས་ཤེས་པར་བྱའོ།། ༈ །།གཉིས་པ་གསོ་བ་དགེ་འདུན་ལ་རག་ལས་པ་དགེ་འདུན་ལྷག་མའི་སྡེ་ལ་གཉིས་ཏེ་དངོས་དང་། མ་ངེས་པའི་སྡེ་བཤད་པའོ། །དང་པོ་ལ་སྡོམ་ནི། ཁུ་བ་འཛིན་དང་འཁྲིག་ཚིག་བསྙེན་བཀུར་སྨྱན། །ཁང་པ་ཁང་ཆེན་དང་ནི་གཞི་མེད་དང་། །བག་ཙམ་དགེ་འདུན་དབེན་དང་དེའི་རྗེས་ཕྱོགས། །ཁྱིམ་སུན་འབྱིན་དང་བཀའ་བློ་མི་བདེ་བའོ། །ཞེས་ཏེ། བཅུ་གསུམ་ཡོད་པ་བསྡུ་ན། དངོས་པོ་ལས་གྱུར་པ་དང་། བསྒོ་བ་ལས་གྱུར་པ་གཉིས། དང་པོ་ལ་གཉིས་ཏེ། འདོད་པ་ལས་གྱུར་པ་དང་། གནོད་པ་ལས་གྱུར་པའོ། །དང་པོ་ལ་གཉིས་ཏེ། རང་འདོད་པ་བསྟེན་པ་དང་། གཞན་འདོད་པ་བསྟེན་དུ་འཇུག་པ་ལས་གྱུར་པ་གཉིས། དང་པོ་ལ་གཉིས་ཏེ། རེག་བྱའི་བདེ་བ་ལས་གྱུར་པ་དང་། སྨྲ་བའི་བདེ་བ་ལས་གྱུར་པའོ། །དང་པོ་ལ་གཉིས་ཏེ། རང་གི་ལུས་ཀྱི་རེག་བྱའི་བདེ་བ་ལས་གྱུར་པ་དང་། གཞན་གྱི་ལུས་ཀྱི་རེག་བྱའི་བདེ་བ་ལས་གྱུར་པའོ། །དང་པོ་ནི། འབྱིན་པའི་དགེ་འདུན་ལྷག་མ་སྟེ་འདི་ལ་གླེང་གཞི་རྒྱུ་མཚན་བྱེད་རྒྱུ་དང་གསུམ། དང་པོ་ནི། ཡུལ་མཉན་ཡོད་དུ་གང་ཟག་འཆར་ཀས་ཉོན་མོངས་པ་འདོད་ཆགས་ཀྱིས་ཉེས་པ་རང་གི་ཁུ་བ་བྱུང་བ་ལ་བརྟེན་ནས་བསླབ་པའི་གཞི་འདི་བཅས་སོ། །གཉིས་པ་ནི། རང་གི་ལུས་ལ་གནོད་པ་དང་ཕམ་པ་དང་པོའི་རྒྱུར་འགྱུར་བའོ། །གསུམ་པ་ལ་བཞི་ལས་གཞིའི་ཡན་ལག་གང་དབྱུང་བར་བྱ་བ་རང་གི་ཁུ་བ་ཡིན་པ་དང་པོའི་གནས་ན་གནས་པ་ཐ་སྙད་དུ་བྱར་ཡོད་པའི་ཚད་དུ་ལོངས་པའོ། །གང་ལས་དབྱུང་བ་ནི་སྐྱེས་པའི་ཡན་ལག་གི་རྣམ་པ་ཡིན་པ། གང་གིས་འབྱིན་པ་ནི་སེམས་ཅན་དུ་བགྲང་བ་དང་དེའི་རྣམ་པར་གནས་པའོ། །གཉིས་པ་ཀུན་སློང་ཁུ་བ་ཕྱུང་བའི་འདུན་པ་རྒྱུན་ལྡན། གསུམ་པ་སྦྱོར་བ་ནི་རེག་ཅིང་རྩལ་བར་ཞུགས་པའོ། །བཞི་པ་མཐར་ཐུག་ནི་ཁུ་བ་སྦུབས་སུ་འོང་ཞིང་བདེ་བ་མྱོང་བའོ། །གཉིས་པ་ནི། འཛིན་དང་ཞེས་པ་རེག་པའི་དགེ་འདུན་ལྷག་མ་སྟེ། འདི་ལ་གསུམ་ལས་གླེང་གཞི་ཡུལ་མཉན་ཡོད་དུ། གང་ཟག་འཆར་ཀས་ཉོན་མོངས་པ་འདོད་ཆགས་ཀྱིས། ཉེས་པ་བུད་མེད་ཀྱི་ལུས་ལ་རེག་པ་ལ་བརྟེན་ནས་བསླབ་པའི་གཞི་འདི་བཅས་སོ། །གཉིས་པ་རྒྱུ་མཚན་ནི། བདག་ཉིད་ཉོན་མོངས་པའི་བསམ་པ་སྐྱེ་བ་དང་། ཕམ་པ་དང་པོའི་རྒྱུར་འགྱུར་བ་དང་། གཞན་མ་དད་པ་ལ་སོགས་པའི་རྒྱུར་འགྱུར་བའོ། །གསུམ་པ་བྱེད་རྒྱུ་ལ་བཞི་ལས། ཡུལ་ནི་མིའི་བུད་མེད་ཤེས་པ་རང་བཞིན་དུ་གནས་པ་མཚན་དོན་བྱེད་ནུས་པ། ལུས་བསྟེན་རུང་མ་ཉམས་པའི་རྨའི་སྒོ་གསུམ་ལས་གཞན་པའི་ལུས་དངོས་སམ་སྐྲའམ་དེ་དང་འབྲེལ་བའི་གོས་ཡིན་པའོ། །རེག་བྱེད་ནི་རང་གི་ལུས་མ་ཉམས་པ། ཟག་བྱེད་ལས་གཞན་པ་མིག་ནས་པུས་མོའི་བར་གང་ཡང་རུང་བ་ཡིན་པའོ། །བསམ་པ་ལ་གཉིས་ལས་འདུ་ཤེས་འདྲ། ཀུན་སློང་རེག་པ་ལས་བྱུང་བའི་བདེ་བ་ཉམས་སུ་མྱོང་བར་འདོད་པའི་འདུན་པ་ཀུན་ཏུ་འདོད་ཆགས་དང་ལྡན་པའོ། །སྦྱོར་བ་རེག་པར་རྩོམ་པ། མཐར་ཐུག་རེག་པ་ལས་བྱུང་བའི་བདེ་བ་ཉམས་སུ་མྱོང་བའོ། །གཉིས་པ་སྨྲ་བའི་བདེ་བ་ལས་རྒྱུར་པ་ལ་གཉིས་ཏེ་འཁྲིག་ཚིག་སྨྲ་བ་དང་། བསྙེན་བཀུར་བསྔགས་པའོ། །དང་པོ་ལ་གསུམ་ལས་གླེང་གཞི་གསུམ་སྔ་མ་དང་འདྲ། ཉེས་པ་འཁྲིག་ཚིག་སྨྲས་པའོ། །རྒྱུ་མཚན་སྔ་མ་དང་འདྲ། ཡན་ལག་ལ་བཞི་ལས་གཞིའི་ཡན་ལག་ལ་ཡུལ་མིའི་བུད་མེད། མཚན་དོན་བྱེད་ནུས་ཐ་སྙད་བཞི་དང་ལྡན་པ། རྫུ་འཕྲུལ་མ་ཐོབ་པའོ། །གང་བརྗོད་པའི་དངོས་པོ་ནི་ཡུལ་དེར་འཁྲིག་པར་གྲགས་པའོ། །ཀུན་སློང་འཁྲིག་ཚིག་སྨྲས་པ་ལས་བྱུང་བའི་བདེ་བ་ཉམས་སུ་མྱོང་བར་འདོད་པའི་འདུན་པ་ཀུན་ཏུ་འདོད་ཆགས་དང་ལྡན་པའོ། །སྦྱོར་བ་ངག་དྲུག་ལྡན། མཐར་ཐུག་ཡུལ་དེས་དོན་གོ་བའོ། །གཉིས་པ་ལ་གླེང་གཞི་ནི་ཡུལ་མཉན་ཡོད་དུ། གང་ཟག་འཆར་ཀས་ཉོན་མོངས་པ་འདོད་ཆགས་ཀྱིས། ཉེས་པ་རྒྱལ་བྱེད་ཚལ་བསྐོར་བའི་བུད་མེད་ལ་ང་ལྟ་བུ་ཚུལ་ཁྲིམས་དང་ལྡན་པ་ལ་འཁྲིག་པའི་བསྙེན་བཀུར་བྱས་ན་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་སྨྲས་པ་ལ་བརྟེན་ནས་འདི་བཅས་སོ། །རྒྱུ་མཚན་དང་། སྦྱོར་བ་དང་། མཐར་ཐུག་ནི་སྔར་དང་འདྲ་ལ། ཀུན་སློང་ནི་བསྙེན་བཀུར་བསྔགས་པ་ལས་བྱུང་བའི་བདེ་བ་ཉམས་སུ་མྱོང་བར་འདོད་པའི་འདུན་པ་ཀུན་ཏུ་ཆགས་པ་དང་ལྡན་པའོ། །གཉིས་པ་གཞན་འདོད་པ་བསྟེན་དུ་བཅུག་པ་ལས་གྱུར་པ་ནི་སྨྱན་བྱེད་ལྷག་མ་སྟེ། གླེང་གཞི་ནི་ཡུལ་མཉན་ཡོད་དུ། གང་ཟག་དྲུག་སྡེས་ཉོན་མོངས་པ་འདོད་ཆགས་ཀྱིས། ཉེས་པ་སྨྱན་བྱས་པ་ལ་བརྟེན་ནས་འདི་བཅས་སོ། །བྱེད་རྒྱུ་ལ་བཞི་ལས་ཡུལ་སྤྲད་བྱ་མཚན་དོན་བྱེད་ནུས་པ། ཐ་སྙད་བཞི་དང་ལྡན་པ། ལུས་བསྟེན་དུ་རུང་བ། མི་མཐུན་པར་གནས་པ། བདག་ཉིད་ལས་རྒྱུད་ཐ་དད་པའོ། །བདག་པོ་ལྟ་བུ་ལ་སྨྱན་བྱེད་ན་དེ་གཉིས་ཐ་སྙད་ལྔ་དང་ལྡན་པའོ། །བསམ་པ་ལ་འདུ་ཤེས་མ་འཁྲུལ་ཞིང་སྤྲད་བྱ་མི་མཐུན་པར་མཐུན་པར་བསྒྲུབ་པའི་ཆེད་དུ་ཕྲིན་གྱི་སྦྱོར་བ་ལན་གསུམ་བྱེད་པར་འདོད་པ། སྦྱོར་བ་རང་ངམ་བསྐོས་པས་ཕྲིན་ལན་གསུམ་བྱེད་པའོ། །མཐར་ཐུག་དེ་གཉིས་ཀྱི་བསྟེན་བྱ་བསྟེན་བྱེད་ཕྲད་པའི་ཚེ་སྨྱན་བྱེད་པའི་ལྷག་མར་འགྱུར་རོ། །ཁ་ཅིག་འདིའི་གཞིའི་ཡན་ལག་ལ་སྐྱེས་པ་དང་བུད་མེད་དགོས་ཞེས་པ་མི་འཐད་དེ། སྐྱེས་པ་ནང་གི་སྨྱན་བྱས་པས་སྨྱན་བྱེད་ལྷག་མ་བསྐྱེད་པ་ཡིན་པའི་ཕྱིར་ཏེ། འགྲེལ་ཆུང་ལས། སྐྱེས་པ་ནང་གི་སྨྱན་བྱེད་ན་སྡིག་པ་ཤིན་ཏུ་ཆེ་བའི་ཕྱིར་ལྷག་མ་ཉིད་དུ་འགྱུར་ཞེས་གསུངས་པའི་ཕྱིར་དང་། སྐྱེས་པ་ནང་གི་སྨྱན་བྱས་པས་ལྷག་མ་མི་བསྐྱེད་ན་བུད་མེད་སྤྱིས་བསྐྱེད་ཀྱི་ལྟུང་བའི་སྐབས་སུ་སྨྱན་བྱེད་པ་ནི་མ་གཏོགས་པ་ཞེས་སྨོས་རིགས་པ་ལས་མ་སྨོས་པའི་ཕྱིར་རོ། །གཉིས་པ་གནོད་པ་ལས་གྱུར་པ་ལ་གཉིས་ཏེ། སེམས་ཅན་སྤྱི་ལ་གནོད་པ་དང་། བྱེ་བྲག་ཏུ་བསྙེན་པར་རྫོགས་པ་ལ་གནོད་པ་གཉིས་ལས། དང་པོ་ལ་གཉིས་ཏེ། ཁང་པ་ཁང་ཆེན་གྱི་ལྷག་མའོ། །དང་པོ་ལ་གླེང་གཞི་ནི་ཡུལ་མཉན་ཡོད་དུ། གང་ཟག་དགེ་སློང་རབ་ཏུ་མང་པོས་ཉོན་མོངས་པ་འདོད་ཞེན་གྱིས། ཉེས་པ་ཁང་པ་བརྩིགས་པ་ལ་བརྟེན་ནས། ཁང་པའི་ལྷག་མ་འདི་བཅས་སོ། །རྒྱུ་མཚན་ནི། སྲོག་ཆགས་ལ་གནོད་པ་དང་། འཐབ་རྩོད་དུ་འགྱུར་བ་དང་གནས་ཚེ་ཐུང་བ་དང་། རང་གི་བསམ་གཏན་དང་གློག་པ་ལ་གནོད་པ་སོགས་སོ། །བྱེད་རྒྱུ་ལ་གཞིའི་ཡན་ལག་ས་གཞི་དང་ཡོ་བྱད་གཞན་ལས་བཙལ་བའམ་དེ་གནང་བ་གཞི་མ་དག་པ་དང་མ་བསྟན་པའོ། །གང་རྩིག་པར་བྱ་བ་ནི་གཅིག་གི་ཆེད་ཡིན་པ་ཚད་ལས་ལྷག་པ། སྤྱོད་ལམ་བཞི་ཤོང་བ། སྔར་གཞན་གྱིས་བརྩམས་པ་མ་ཡིན་པའོ། །དེ་ལ་ཚད་ནི་འཇལ་བྱེད་ཀྱི་ཁྲུ་ཕྱེད་དང་དོ་ལ་བདེ་བར་གཤེགས་པའི་མཐོ་གང་ཡིན་པས་ནང་རོལ་གྱི་སྲིད་དུ་བདེ་བར་གཤེགས་པའི་མཐོ་བཅུ་གཉིས་ཏེ། འཇལ་བྱེད་ཀྱི་ཁྲུ་བཅོ་བརྒྱད་དང་། ཞེང་དུ་བདེ་བར་གཤེགས་པའི་མཐོ་བདུན་ཏེ་འཇལ་བྱེད་ཀྱི་ཁྲུ་ཕྱེད་དང་བཅུ་གཅིག་གོ །སྤྱོད་ལམ་བཞི་ཤོང་བ་ནི་འདུག་པའི་གནས་ལ་སྐྱིལ་ཀྲུང་དོག་པ་མེད་པ་དང་། འགྲེང་བའི་ཚེ་མགོ་བོ་ཐོག་ལ་མི་རེག་པ་དང་། འཆག་པའི་གནས་ལ་གོམ་པ་གསུམ་འདོར་དུ་ཡོད་པ་དང་། ཉལ་བའི་གནས་ལ་རྐང་ལག་བརྐྱངས་ཏེ་ཉལ་དུ་རུང་བའོ། །བསམ་པའི་ཡན་ལག་ལ་འདུ་ཤེས་མ་འཁྲུལ་ཞིང་ཀུན་སློང་རྩིག་འདོད་རྒྱུན་མ་ཆད་པ། སྦྱོར་བ་རང་ངམ་གཞན་ལ་བཅོལ་བས་རྩིག་པར་ཞུགས་པ། མཐར་ཐུག་ཕལ་ཆེར་བསྐོར་བ་དང་ཕལ་ཆེར་བཀབ་པ་ན་ལྷག་མར་འགྱུར་རོ། །གཉིས་པ་ཁང་ཆེན་ལ་གླེང་གཞི་ནི། ཡུལ་ཀོའུ་ཤམྦཱིར་གང་ཟག་དྲུག་སྡེས། ཉོན་མོངས་པ་མི་བཟོད་པས། ཉེས་པ་གཙུག་ལག་ཁང་བརྩིགས་པ་ལ་བརྟེན་ནས་འདི་བཅས་སོ། །རྒྱུ་མཚན་འདྲ། བྱེད་རྒྱུ་ཕལ་ཆེར་སྔ་མ་དང་འདྲ་བ་ལ་ས་གཞི་དང་ཡོ་བྱད་གཞན་ལ་བཙལ་བ་ཞེས་པ་དང་། ཚད་ལྷག་ཞེས་པ་དང་། གཅིག་ཆེད་དུ་ཞེས་པ་གསུམ་པོ་དེ་མི་སྦྱོར་ལ། ཚོགས་ཆེད་དུ་ཞེས་པའམ་བཞི་ཡན་ཆད་ཀྱིས་ཆེད་དུ་ཞེས་པ་སྦྱར་རོ། །ཁ་ཅིག་ཁང་ཆེན་གྱི་ལྷག་མ་བསྐྱེད་པ་ལ་དཀོན་མཆོག་གསུམ་པོ་གང་རུང་གི་ཆེད་བརྩིག་པ། དངོས་ཀྱི་བདག་པོ་ཁྱིམ་པ་ཡིན་པ་དགོས་ཏེ། རྣམ་འབྱེད་ལས་ཆེན་པོ་ཞེས་བྱ་བ་ནི་སྦྱིན་པར་བྱ་བའི་ཆོས་ཀྱིས་ཡིན་གྱི་ཚད་ཀྱིས་ནི་མ་ཡིན་ནོ་ཞེས་དང་འོད་ལྡན་ལས་ཁང་པ་དང་ལྷ་ཁང་དུ་གཏོགས་པ་ཞེས་གསུངས་པའི་ཕྱིར་ཞེས་པ་མི་འཐད་དེ། མདོ་རྩ་འདིར་ཁང་ཆེན་གྱི་ཡན་ལག་ཚང་བ་མ་བསྟན་པར་ཐལ། དཀོན་མཆོག་གསུམ་པོ་གང་རུང་གི་ཆེད་དུ་རྩིག་པ་ཡན་ལག་ཏུ་དགོས་པ་གང་ཞིག དེ་འདིར་མ་བསྟན་པའི་ཕྱིར། ལུང་གི་དོན་ནི། ཆེན་པོ་དང་མང་པོ་ཞེས་པ་ནི་འགྱུར་ཁྱད་ཡིན་པས་ཆེད་དུ་བྱ་བ་མང་པོའི་ཆེད་དུ་ཞེས་པའི་དོན་དང་། ལྷ་ཁང་ཞེས་པའི་ལྷའི་སྒྲ་དེ་དགེ་འདུན་ལ་ཡང་འཇུག་ལ། སཾ་གྷ་ཞེས་པའི་སྒྲ་དགེ་འདུན་དང་ཚོགས་གཉིས་ཀ་ལ་འཇུག་པས་བོད་དུ་དགེ་འདུན་དང་ཚོགས་གཉིས་ཀ་ལ་བསྒྱུར་བ་མང་པོ་ཡོད་པའི་ཕྱིར། དེས་ན་འདིར་ཚོགས་ཞེས་པ་ནི་ཁྱིམ་པའམ་རབ་བྱུང་ཡིན་ཀྱང་རུང་སྟེ་བཞི་ཡན་ཆད་འདུས་པ་ལ་ཚོགས་ཞེས་བྱ་བར་ཤེས་པར་བྱའོ། །གཉིས་པ་ལ་གཞི་མེད་ཀྱི་སྐུར་འདེབས་དང་། བག་ཙམ་གི་སྐུར་འདེབས་ཀྱི་དགེ་འདུན་ལྷག་མ་གཉིས། དང་པོ་ལ་གླེང་གཞི་ནི་ཡུལ་རྒྱལ་པོའི་ཁབ་ཏུ། གང་ཟག་མཛའ་བོ་དང་ས་ལས་སྐྱེས་གཉིས་ཀྱིས། ཉོན་མོངས་པ་མི་བཟད་པས་ཀུན་ནས་བསླངས་ཏེ། ཉེས་པ་མཐོང་ཐོས་དོགས་པའི་གཞི་མེད་བཞིན་དུ་གྱད་བུ་ནོར་ལ་མི་ཚངས་སྤྱོད་བྱས་སོ་ཞེས་སྐུར་པ་བཏབ་པ་ལ་བརྟེན་ནས་འདི་བཅས་སོ། །རྒྱུ་མཚན་ནི་སྐུར་འདེབས་ཀྱི་ཚིག་བདེན་པར་བཟུང་ན་ཡུལ་དེ་ལ་གནོད་པ་དང་། བདེན་པར་མ་བཟུང་ན་ཡང་སྐུར་འདེབས་མཁན་དུ་འཛིན་པ་དང་། ལྷ་དང་བཅས་པའི་འཇིག་རྟེན་གྱིས་སྤོང་བ་དང་། ངན་སོང་དུ་སྐྱེ་བར་འགྱུར་ཏེ། ཡང་དག་སྡོམ་དང་དཀའ་ཐུབ་ཅན། །དྲང་སྲོང་རྣམས་ལ་སྐུར་འདེབས་པ། །དེ་དག་སྤྱིའུ་ཚུགས་སུ་ནི། །དམྱལ་བ་ཁོ་ནར་འགྲོ་བར་འགྱུར། །ཞེས་གསུངས་སོ། །བྱེད་རྒྱུ་ལ་བཞི་ལས་གཞིའི་ཡན་ལག་ནི་ཡུལ་བསྙེན་པར་རྫོགས་པའི་སྡོམ་པ་དང་ལྡན་པ་དང་། ཐ་སྙད་གསུམ་དང་ལྡན་པ། རང་ལས་རྒྱུད་ཐ་དད་པའོ། །གོ་བྱའི་ཡུལ་ཐ་སྙད་ལྔ་དང་ལྡན་ཞིང་རང་ལས་རྒྱུད་ཐ་དད་པའོ། །དངོས་པོ་ནི་ཕམ་པ་བཞིའམ་བརྒྱད་ལས་གང་ཡང་རུང་བ། བསམ་པ་འདུ་ཤེས་མ་འཁྲུལ་ཞིང་ཀུན་སློང་འདུ་ཤེས་བསྒྱུར་བའི་དོན་ཅན། ཉམས་པར་འདུན་པས་སྐུར་བར་འདོད་པ། སྦྱོར་བ་དེའི་མིང་གིས་ངག་མཚན་ཉིད་བཞི་ལྡན་གྱིས་སྐུར་པ་བཏབ་པའོ། །ངག་མཚན་ཉིད་དྲུག་ལྡན་མི་དགོས་ཏེ། བམ་ལྔར་བརྡ་ཕྲད་པའི་ཐབས་མངོན་སུམ་མམ། བརྒྱུད་པའམ་ཕྲིན་དང་སྤྲིང་ཡིག་དང་བརྡ་ལ་སོགས་པས་གོ་བར་བྱེད་པ་གང་ཡང་རུང་བ་ལ་ན་སྨད་པ་མེད་དོ། །ཞེས་གསུངས་པའི་ཕྱིར། མཐར་ཐུག་གང་ལ་སྨྲ་བའི་ཡུལ་དེས་དོན་གོ་བའོ། །གཉིས་པ་བག་ཙམ་ལ་གླེང་གཞི་གསུམ་འདྲ་བ་ལ། ཉེས་པ་གྱད་བུ་ནོར་དང་ཨུཏྤལའི་མདོག་ཅན་དང་མི་ཚངས་པར་སྤྱོད་པ་མཐོང་ཞེས་པ་ལྟ་བུ་གཞན་གྱི་ཆ་དང་མི་མཐུན་པ་དང་མཐུན་པས་སྐུར་བའོ། །རྒྱུ་མཚན་སོགས་འདྲ་ལ་སྦྱོར་བ་མིང་ནས་སྨོས་ཤིང་གཞན་ལ་སྨོས་པའི་ཚིག་མི་གསལ་བ་མཚན་ཉིད་དྲུག་ལྡན། མཐར་ཐུག་དོན་གོ་བའོ། །འདི་དང་གཞི་མེད་ཀྱི་ཁྱད་པར་ནི་སྐུར་འདེབས་གཞིར་བྱས་པ་ལ་སྔ་མས་བྱེད་པ་པོ་དང་བྱ་བ་སྦྱར་ནས་གསལ་བར་སྨོས་པ་ཡིན་ལ། འདིར་ནི་བྱ་བྱེད་མ་སྦྱར་བར་མི་གསལ་བར་སྨོས་པའོ། །གཉིས་པ་བསྒོ་བ་ལས་གྱུར་པ་ལ་གཉིས་ཏེ། བསྒོ་གྱུར་ཐུན་མོང་བ་དང་། ཐུན་མོང་མ་ཡིན་པའོ། །དང་པོ་ནི། བཟློག་པའི་ཚུལ་གྱིས་མི་གཏོང་བར་རྗེས་སུ་བསྒྲུབ་པའི་རང་བཞིན་ནི་རྗེས་སུ་མཐུན་ནོ། །གསོལ་བ་ནི་བཟློག་པ་དང་འདྲ་བ་ཉིད་དོ། །ཚིག་གི་སྐད་ཅིག་མ་གཅིག་ཉིད་དོ། །བཟླས་པ་ནི་ཐ་དད་པ་ཉིད་དོ། །མཇུག་སྡུད་པ་ནི་མ་ཡིན་ནོ། །བསྐྲད་པ་དང་གླེང་བ་དང་དྲན་པར་མ་བྱས་པ་ནི་དེའིའོ། །དེ་ལ་ནི་བསྒོ་བར་མི་བྱ་བ་ཉིད་དོ། །དེ་དག་ལ་བཞམ་པ་དང་ལས་ཀྱི་མི་བསྒོ་བར་མི་བྱའོ། །དེའི་མཐའ་ལ་མི་གཏོང་ནའོ་ཞེས་གསུངས་ཏེ། འདི་ལ་དགོས་དོན་དང་། ཚིག་དོན་གཉིས་ལས། དང་པོ་ནི། བསྒོ་གྱུར་བཞིའི་ཐུན་མོང་གི་མདོ་འདི་གསུངས་པ་ལ་དགོས་པ་ཅི་ཡོད་ཅེ་ན། འདི་ལ་དགོས་པ་ཡོད་དེ་སྒོ་བ་ལས་གྱུར་པའི་ལྟུང་བ་འདི་དག་རྐྱེན་བཟློག་པ་ལ་ལྟོས་པ་དང་། བཟློག་ཚུལ་མཚུངས་པ་དག་འདིར་བསྡུས་ཏེ་བསྟན་པས་ཚིག་ཚེགས་ཆུང་བ་དང་། དེའི་དོན་བདེ་བླག་ཏུ་རྟོགས་པར་འགྱུར་བ་ཡིན་པའི་ཕྱིར་རོ། །གཉིས་པ་ནི། བསྒོ་གྱུར་གྱི་ལྟུང་བ་རྣམས་ཚུལ་ཇི་ལྟར་བསྐྱེད་ཅེ་ན། དགེ་འདུན་གྱི་དབྱེན་ལ་སོགས་པ་ལ་འཇུག་པ་ན་བཞམ་སྟེ་བསྒོ་བ་ལ་སོགས་པ་བཟློག་ཚུལ་ལྔའི་ཚུལ་གྱིས་བཟློག་ཀྱང་མི་གཏོང་བ་སྟེ་ཉེས་སྤྱོད་དེ་མི་སྤོང་བར་ལུས་ངག་གི་རྗེས་སུ་བསྒྲུབ་པའམ་ཅང་མི་སྨྲ་བའི་རང་བཞིན་གང་ཡིན་པ་དེ་ནི་བསྒོ་གྱུར་གྱི་ལྟུང་བ་བསྐྱེད་པར་རྗེས་སུ་མཐུན་ཏེ། བཟློག་པའི་གྲངས་ཇི་སྙེད་པའི་ལྟུང་བ་ཡང་དེ་སྙེད་བཟློག་པ་སྦྱོར་བར་གྱུར་པ་ན་ལྟུང་བ་ཡང་སྦྱོར་བ། བཟློག་པ་མཐར་ཐུག་པ་ན་ལྟུང་བ་ཡང་མཐར་ཐུག བཟློག་པ་གཅིག་ཏུ་གྱུར་པ་ན་ལྟུང་བ་ཡང་གཅིག་ཏུ་འགྱུར་བའི་ཕྱིར། གསོལ་བ་ནི་བཟློག་བྱེད་དངོས་མ་ཡིན་པས་གསོལ་བའི་མཐའ་ལ་མ་བཏང་བ་ལ་བསྒོ་གྱུར་གྱི་ལྟུང་བ་མི་སྐྱེད་དམ་ཞེ་ན། འདྲ་བ་ཉིད་དོ་ཞེས་པ་བཤད་པའི་གཞིར་གཞག གང་འདྲ་ན་དབྱེན་ལ་སོགས་པ་བཟློག་དོན་དུ་བྱས་པའི་གསོལ་བ་ནི་འདྲ། གང་དང་འདྲ་ན་དབྱེན་སོགས་བཟློག་དོན་དུ་བྱས་པའི་བརྗོད་པ་དང་པོ་དང་འདྲ། གང་ལ་འདྲ་ན་བསྒོ་གྱུར་གྱི་ལྟུང་བ་བསྐྱེད་པ་ལ་འདྲ། ཇི་ལྟར་འདྲ་ན་བརྗོད་པ་དང་པོའི་མཐའ་ལ་མ་བཏང་བ་ལ་སྦོམ་པོ་བསྐྱེད་པ་བཞིན་དུ་གསོལ་བའི་མཐའ་ལ་མ་བཏང་ན་སྦོམ་པོ་བསྐྱེད་པར་འདྲ། གསོལ་བ་དེ་ལ་ཚིག་སྐད་ཅིག་སྔ་ཕྱི་དུ་མ་ཡོད་པས་ལྟུང་བ་ཐ་དད་བསྐྱེད་དམ་ཞེ་ན། གསོལ་བའི་ཚིག་གི་སྐད་ཅིག་མ་རྣམས་ནི་ལྟུང་བ་གཅིག་སྐྱེད་པར་བྱེད་པ་ཡིན་ནོ། །བརྗོད་པ་ནི་ཡང་ནས་ཡང་དུ་བསྐྱར་བ་ཡིན་པས་ལྟུང་བ་གཅིག་ཁོ་ན་བསྐྱེད་དམ་ཞེ་ན། བཟླས་པ་སྟེ་བརྗོད་པ་རྣམས་ནི་ལྟུང་བ་ཐ་དད་བསྐྱེད་པའི་བྱེད་པ་པོ་ཉིད་ཡིན་ནོ། །བརྗོད་པ་གསུམ་པོའི་མཇུག་སྡུད་དེ་བརྗོད་པ་གསུམ་ལས་ལོགས་སུ་ལྟུང་བ་སྐྱེད་བྱེད་ཡིན་ནམ་ཞེ་ན། བརྗོད་པ་གསུམ་པོའི་མཇུག་སྡུད་པ་ནི་ལྟུང་བ་བསྐྱེད་པའི་བྱེད་པ་པོ་མ་ཡིན་ཏེ་ལས་བྱས་ཟིན་དགེ་འདུན་ལ་གོ་བར་བྱེད་པ་ཙམ་ཡིན་པའི་ཕྱིར། བཞམ་བསྒོའི་འོག་ཏུ་སྔ་རོལ་ཏུ་དབྱེན་ལ་སོགས་པ་རྩོམ་པ་ལ་འཇུག་པ་དེ་ལ་ལྟུང་བ་ཅིར་འགྱུར་ཞེ་ན། བཞམ་བསྒོ་བྱས་པ་ཕྱིན་ཆད་དབྱེན་ལ་སོགས་པ་བརྩམ་པ་ལ་འཇུག་པ་ནི་སྦྱོར་བ་ཉིད་ཡིན་པས་སྦོམ་པོར་འགྱུར་རོ། །དེར་ངེས་སམ་ཞེ་ན་ཁྱིམ་སུན་འབྱིན་པའི་དགེ་སློང་བསྐྲད་པ་ནན་ཏུར་མ་བྱས་པར་དགེ་འདུན་ལ་སྐུར་པ་འདེབས་པ་དང་། བཀའ་བློ་མི་བདེ་བའི་དགེ་སློང་ལྟུང་བ་གླེང་བ་དང་དྲན་པར་མ་བྱས་པར་དགེ་འདུན་ལ་ངག་མི་སྙན་པར་བརྗོད་པ་ནི་སྦྱོར་བ་དེའི་སྦྱོར་བ་ཡིན་པས་ཉེས་བྱས་སུ་འགྱུར་རོ། །དེའི་ཤུགས་ལ་ཁྱིམ་སུན་འབྱིན་པ་བསྐྲད་པ་ནན་ཏུར་བྱས་ནས་དགེ་འདུན་ལ་སྐུར་པ་འདེབས་པ་དང་། བཀའ་བློ་མི་བདེ་བ་ལྟུང་བ་གླེང་དྲན་བྱས་ནས་དགེ་འདུན་ལ་ངག་མི་སྙན་པ་བརྗོད་པ་ལ་ནི་སྦོམ་པོར་འགྱུར་བར་བསྟན་ནོ། །སྔ་མ་དེ་གཉིས་ལ་བཞམ་བསྒོ་བྱར་རུང་ངམ་ཞེ་ན། ཁྱིམ་སུན་འབྱིན་པ་བསྐྲད་པ་ནན་ཏུར་མ་བྱས་པར་དགེ་འདུན་ལ་སྐུར་པ་འདེབས་པ་དང་། བཀའ་བློ་མི་བདེ་བ་ལྟུང་བ་གླེང་དྲན་མ་བྱས་པར་དགེ་འདུན་ལ་ངག་མི་སྙན་པ་བརྗོད་པ་དེ་ལ་ནི་བཞམ་བསྒོ་མི་བྱ་སྟེ། གཞམ་བསྒོ་མ་རན་ཅིང་མི་ཆགས་པའི་ཕྱིར། དེ་ལྟར་བྱས་ནས་དགེ་འདུན་ལ་སྐུར་པ་འདེབས་པ་དང་ངག་མི་སྙན་པ་བརྗོད་པ་དེ་གཉིས་ལ་བཞམ་བསྒོ་ངེས་པར་བྱ་དགོས་སམ་ཞེ་ན། བསྐྲད་པ་ནན་ཏུར་དང་གླེང་དྲན་བྱས་པའི་རྗེས་སུ་དགེ་འདུན་ལ་དེ་ལྟར་བརྗོད་པ་དེ་དག་ལ་ཡིད་གཅུགས་པའི་གང་ཟག་གི་བཞམ་པ་དང་། དགེ་འདུན་གྱི་ལས་ཀྱི་མི་བསྒོ་བར་མི་བྱ་སྟེ་བསྒོ་རན་ཞིང་བསྒོ་བ་ཆགས་པའི་ཕྱིར། གང་གི་མཐའ་ལ་མི་གཏོང་བ་ལ་ལྷག་མར་འགྱུར་ཞེ་ན། བརྗོད་པ་གསུམ་པ་དེའི་མཐའ་ལ་མི་གཏོང་ན་དགེ་འདུན་ལྷག་མར་འགྱུར་རོ། །རྒྱ་གར་བ་ཁ་ཅིག་བརྗོད་པ་གསུམ་མཇུག་སྡུད་དང་བཅས་པའི་མཐའ་ལ་མ་བཏང་ན་དགེ་འདུན་ལྷག་མར་འགྱུར་ཞེས་གསུང་ངོ་། །ཁ་ཅིག་བསྒོ་གྱུར་གི་ལྟུང་བ་ལ་བཟློག་པ་ལྔའི་མཐའ་ལ་མ་བཏང་བའི་ལྟུང་བ་ལྔ་པོ་འདིར་ངེས་ཞེས་གསུང་བ་མི་འཐད་དེ། དབྱེན་རྩོམ་འཇུག་གི་སྦོམ་པོ་དེ་ལྔ་པོ་དེ་གང་གིས་ཀྱང་མ་བསྡུས་པའི་ཕྱིར། གཉིས་པ་ཐུན་མོང་མ་ཡིན་པ་ལ་བཞི་ཡོད་པ་ལས། དང་པོ་དགེ་འདུན་དབྱེན་གྱི་ལྷག་མ་ལ་གླེང་གཞི་ནི། ཡུལ་རྒྱལ་པོའི་ཁབ་ཏུ་གང་ཟག་ལྷས་བྱིན་གྱིས། ཉོན་མོངས་པ་རྙེད་བཀུར་འདོད་པས། ཉེས་པ་དགེ་འདུན་གྱི་དབྱེན་བྱས་པ་ལ་བརྟེན་ནས་འདི་བཅས་སོ། །རྒྱུ་མཚན་དགེ་འདུན་སྡེ་གཉིས་ལ་ཤིན་ཏུ་གནོད་པ་དང་། བསྐལ་པར་མནར་མེད་དུ་སྐྱེ་བ་ལ་སོགས་པའོ། །བྱེད་རྒྱུ་ལ་བཞི་ལས་སྦྱོར་བ་རྩམ་པའི་གཞི་ནི་བདག་ཉིད་འཁོར་ལོའི་དབྱེན་གྱི་སྦྱོར་བ་མཚན་ཉིད་པ་ལ་ཞུགས་པ་ཡིན་པ། རྫོགས་པར་བྱེད་པའི་རྐྱེན་དགེ་འདུན་མཚན་ཉིད་པ་ལས་ངོ་བོ་ཉིད་ཆོས་དང་ལྡན་པ། བསམ་པ་ལ་འདུ་ཤེས་མ་འཁྲུལ་ཞིང་ཀུན་སློང་ཆོས་ལས་ཆོས་མ་ཡིན་པ་དབྱེ་བར་འདོད་པ། སྦྱོར་བ་འབྱེད་པར་རྩོམ་པ། མཐར་ཐུག་བརྗོད་པ་གསུམ་པའི་མཐའ་ལས་འདས་པའོ། །སྤྱིར་དགེ་འདུན་གྱི་དབྱེན་དང་། དབྱེན་གྱི་མཚམས་མེད་དང་། དབྱེན་གྱི་ལྷག་མ་གསུམ་གསུངས་པ་ལ་ཁྱད་པར་ཡོད་དེ། དགེ་འདུན་དབྱེན་ངོ་བོ་ལྡན་མིན་འདུ་བྱེད་ལུང་མ་བསྟན་ཡིན་ཞིང་དགེ་འདུན་ཕྱོགས་གཉིས་ལ་ལྡན་པ་ཡིན་ཏེ། མཛོད་ལས། དགེ་འདུན་དབྱེན་ནི་མི་འཕྲོད་པའི། །རང་བཞིན་ལྡན་པ་མ་ཡིན་ཆོས། །ཉོན་མོངས་ཅན་མིན་ལུང་བསྟན་མིན། །དེ་དང་དགེ་འདུན་ཡང་དག་ལྡན། །ཞེས་གསུངས་སོ། །དབྱེན་གྱི་མཚམས་མེད་ནི་མནར་མེད་དུ་འཕེན་པའི་མི་དགེ་བ་ཡིན་ཞིང་། དབྱེན་གྱི་ལྷག་མ་ནི་བཅས་པ་ལས་འདས་པའི་ལྟུང་བའི་དངོས་གཞི་ཡིན་ལ། དེ་གཉིས་ནི་བྱེད་པ་པོའི་གང་ཟག་ལ་ལྡན་པ་ཡིན་ཏེ། དེ་ལ་ཁ་ན་མ་ཐོ་བརྫུན། །དེ་དང་འབྱེད་པོ་ཡང་དག་ལྡན། །ཞེས་གསུངས་པའི་ཕྱིར། ལས་དང་པོ་པ་ལ་འབྱུང་མི་འབྱུང་གི་ཁྱད་པར་ཡང་ཡོད་དེ། ལྷས་བྱིན་ལ་དགེ་འདུན་ཕྱེ་བས་དབྱེན་དང་དབྱེན་གྱི་མཚམས་མེད་བྱུང་ཡང་དབྱེན་གྱི་དགེ་འདུན་ལྷག་མ་ནི་མ་བྱུང་སྟེ། མ་བཅས་པ་ཉིད་ལའོ་ཞེས་གསུངས་པའི་ཕྱིར། དགེ་སློང་མ་ལ་དབྱེན་གྱི་ལྷག་མ་དང་། ལས་ཀྱི་དབྱེན་འབྱུང་ཡང་འཁོར་ལོའི་དབྱེན་དང་དབྱེན་གྱི་མཚམས་མེད་མི་འབྱུང་སྟེ། དེ་གཉིས་བྱེད་པ་པོ་དགེ་སློང་ཡན་ལག་ཏུ་དགོས་པའི་ཕྱིར། གཞན་ཡང་འདི་དག་ལ་ཁྱད་པར་མང་དུ་ཡོད་དོ། །གཉིས་པ་དེའི་རྗེས་སུ་ཕྱོགས་པའི་དགེ་འདུན་ལྷག་མ་ལ་གླེང་གཞི་ནི། ཡུལ་རྒྱལ་པོའི་ཁབ་ཏུ་གང་ཟག་དགེ་སློང་ཀོ་ཀ་ལི་ཀ་ལ་སོགས་པ་བཞིས། ཉོན་མོངས་པ་རྙེད་བཀུར་འདོད་པས། ཉེས་པ་ལྷས་བྱིན་གྱིས་དགེ་འདུན་གྱི་དབྱེན་བྱེད་པའི་གྲོགས་བྱས་པ་ལ་བརྟེན་ནས་འདི་བཅས་སོ། །རྒྱུ་མཚན་སྔར་དང་འདྲ། བྱེད་རྒྱུ་ལ་བཞི་ལས་གཞི་གང་ལ་གང་གིས་གྲོགས་བྱས་པའི་ཡུལ་ནི་དབྱེན་མཚན་ཉིད་པའི་སྦྱོར་བ་ལ་ཞུགས་པ། རྐྱེན་ནི་འདྲ། བསམ་པ་འདུ་ཤེས་མ་འཕྲུལ་ཞིང་། ཀུན་སློང་དེའི་གྲོགས་བྱ་བར་འདོད་པ། སྦྱོར་བ་སྒྲུབ་པར་རྩོམ་པ། མཐར་ཐུག་འདྲའོ། །གསུམ་པ་ཁྱིམ་སུན་འབྱིན་པའི་ལྷག་མ་ལ་གླེང་གཞི་ནི། ཡུལ་མཉན་ཡོད་དུ། གང་ཟག་འགྲོ་འགྱོགས་དང་ནབ་སོ་གཉིས་ཀྱིས། ཉོན་མོངས་པ་ཕྲག་དོག་གིས་ཀུན་ནས་བསླངས་ཏེ། ཉེས་པ་ཁྱིམ་པ་སུན་འབྱིན་པ་ལ་བརྟེན་ནས་འདི་བཅས་སོ། །རྒྱུ་མཚན་སྐུར་འདེབས་བཞིན་ནོ། །བྱེད་རྒྱུ་ལ་བཞི་ལས་གཞི་ལ་ཡུལ་ནི་མཚན་ཉིད་དང་ལྡན་པའི་དགེ་འདུན་རང་ལ་སྐྲོད་པར་བྱེད་པ་པོ་ཡིན་པ། གོ་བྱའི་ཡུལ་ཐ་སྙད་ལྔ་དང་ལྡན་པ་རྒྱུད་ཐ་དད་པའོ། །བདག་ཉིད་བསྐྲད་པར་བྱས་ལ་ཆགས་པ། རྐྱེན་འདྲའོ། །བསམ་པ་འདུ་ཤེས་མ་འཁྲུལ་ཞིང་ཀུན་སློང་དགེ་འདུན་ལ་སྐུར་པ་འདེབས་པར་འདོད་པ། སྦྱོར་བ་ངག་མཚན་ཉིད་དྲུག་ལྡན་གྱིས་རྩོམ་པ། མཐར་ཐུག་འདྲའོ། །བཞི་པ་བཀའ་བློ་མི་བདེ་བའི་ལྷག་མ་ལ་གླེང་གཞི་ནི། ཡུལ་ཀོའུ་ཤམྦཱིར། གང་ཟག་འདུན་པས། ཉོན་མོངས་པ་གླེང་བར་མི་འདོད་པས་ཀུན་ནས་བསླངས་ཏེ། ཉེས་པ་ལྟུང་བ་གླེང་དུ་མ་སྟེར་བ་ལ་བརྟེན་ནས་བསླབ་པའི་གཞི་འདི་བཅས་སོ། །རྒྱུ་མཚན་ནི་ལྟུང་བ་གླེང་མཁན་སྤངས་པས་གླེང་བའི་བྱ་བ་རྒྱུན་ཆད་པ་དང་དགེ་འདུན་སྤངས་པའོ། །བྱེད་རྒྱུ་ཡན་ལག་བརྩི་བ་ལ་བཞི་ལས་གཞི་ལ་ཡུལ་གྱི་ཡན་ལག་གང་སྤང་བའི་དངོས་པོ་བདག་ཉིད་ཀྱི་བསླབ་པའི་གཞི་དང་གླེང་བྱེད་དགེ་འདུན་མཐའ་དག་གོ །གོ་བྱ་ནི་གླེང་བྱེད་མཚན་ཉིད་དང་ལྡན་པ་བདག་ཉིད་ལ་གླེང་བ་པོ་ཡིན་པའོ། །བདག་ཉིད་གླེང་དྲན་བྱས་ལ་ཆགས་པ་ཡིན་པ། རྐྱེན་སྔ་མ་དང་འདྲ། བསམ་པ་འདུ་ཤེས་མ་འཁྲུལ་ཞིང་ཀུན་སློང་སྤོང་བར་འདོད་པ། སྦྱོར་བ་ཁྱེད་ཅག་དགེ་ཡང་རུང་མི་དགེ་ཡང་རུང་ཞེས་སོགས་སྤོང་བའི་ཚིག་མཚན་ཉིད་དྲུག་ལྡན། མཐར་ཐུག་བརྗོད་པ་གསུམ་པའི་མཐའ་ལ་མ་བཏང་ན་བཀའ་བློ་མི་བདེ་བའི་དགེ་འདུན་ལྷག་མར་འགྱུར་རོ། །ཤ་་་་་་ཁ་ཅིག་གླེང་བྱེད་དགེ་སློང་གིས་གླེངས་པ་ན་ཁྱེད་ཅག་དགེ་ཡང་རུང་སྡིག་ཀྱང་རུང་ཁོ་བོ་ཅག་ལ་ཅང་མ་སྨྲ་ཞིག ཁོ་བོ་དགེ་ཡང་རུང་སྡིག་ཀྱང་རུང་ཁྱེད་ཅག་ལ་ཅང་མི་སྨྲའོ། །ཞེས་གླེང་བ་པོ་རེ་རེ་བ་འགོག་པ་ལ་དང་པོར་བརྗོད་བཅས་བྱ། དེ་ལ་མི་གཏོང་ན་དེའི་རྗེས་སུ་གདམས་ངག་འཇོག་པ་དང་། གཏམ་སྨྲ་བ་འགོག་པ་དང་། གསོ་སྦྱོང་འཇོག་པ་དང་དགག་དབྱེ་འཇོག་པར་བྱ། དེ་ལ་མི་གཏོང་ན་ཕྱིར་འགྱེད་ནན་ཏུར་བྱེད། གླེང་བྱེད་དགེ་འདུན་གྱིས་གླེངས་པ་ན་ཁྱེད་རྣམས་དགེ་ཡང་རུང་ཞེས་སོགས་ཀྱི་སྒོ་ནས་གླེང་བ་པོ་མཐའ་དག་འགོག་པར་བྱེད་པ་ལ། དང་པོར་བརྗོད་བཅས་བྱ། མཉན་པ་མ་ཡིན་པའི་སྒོ་ནས་སྐབས་མི་འབྱེད་ན་ཕུར་བཅས་བྱ། དེ་ལ་མི་གཏོང་ན་གདམས་ངག་འཇོག་པ་ནས་དགག་དབྱེ་འཇོག་པའི་བར་བྱ། དེ་ལ་མི་གཏོང་ན་བཞམ་སྟེ་བསྒོ་བ་ལ་སོགས་པ་བཟློག་པ་ལྔ་བྱ། དེའི་མཐའ་ལ་མི་གཏོང་ན་དངོས་གཞིར་འགྱུར་རོ་ཞེས་གསུངས་པ་མི་འཐད་དེ། བམ་ལྔར་གླེང་བ་པོ་རེ་རེ་འགོག་པ་དང་མཐའ་དག་གང་འགོག་ཀྱང་དང་པོར་བརྗོད་བཅས་བྱ་བ་ནས་དགག་དབྱེ་འཇོག་པའི་བར་བྱ། དེ་ལ་མི་གཏོང་ན་བཞམ་སྟེ་བསྒོ་བ་ལ་སོགས་པ་བཟློག་པ་ལྔ་བྱ། དེའི་མཐའ་ལ་མི་གཏོང་ན་ལྷག་མར་འགྱུར་བར་གསུངས་པའི་ཕྱིར། མཚོ་་་་་་ཁ་ཅིག་དེ་ལྟར་ན་བཀའ་བློ་མི་བདེ་བའི་དགེ་འདུན་ལྷག་མ་མི་སྲིད་པར་ཐལ་བའི་སྐྱོན་ཡོད་དེ། དང་པོ་ལྟུང་བ་གླེང་བའི་སྐབས་ཕྱེ་ཤིག་ཞེས་བརྗོད་པ་ན། སྐབས་འགོག་པ་ལ་ནི་བཞམ་བསྒོ་སོགས་བཟློག་པ་བྱས་ཀྱང་མི་འཆགས་པའི་ཕྱིར། ཞེས་བཀག་ནས་ཁོང་རང་གི་ལུགས་ལ་དང་པོར་སྐབས་ཕྱེ་བ་ཡིན་ལ། གླེང་པའི་ཚེ་ན་སྐབས་འགོག་པར་བྱེད་པ་ལ་བཞམ་བསྒོ་སོགས་བཟློག་པ་ལྔ་བྱ། དེའི་མཐའ་ལ་མ་གཏང་ན་བཀའ་བློ་མི་བདེ་བའི་ལྷག་མར་འགྱུར་བའི་ཕྱིར་ཞེས་གསུངས་པ་མི་འཐད་དེ། ལྟུང་བ་གླེང་བའི་ཚེ་ལྟུང་བ་ཕྱིར་བཅོས་གྱིས་ཤིག་ཅེས་བརྗོད་པར་བྱ་བ་ཡིན་པའི་ཕྱིར་ཏེ། ལུང་དུ་ཡང་འཕགས་པ་ཤཱ་རིའི་བུས་དྲུག་སྡེ་ལ་ལྟུང་བ་ཕྱིར་བཅོས་གྱིས་ཤིག་ཅེས་བརྗོད་པ་ན་ལྟུང་བ་མ་མཐོང་ཞེས་སྨྲས་པའི་ཕྱིར་དང་། དགེ་སློང་འདུན་པས་སྲོག་ཆགས་དང་བཅས་པའི་ཆུ་ལ་རྩྭ་དང་ལོ་མ་བཏབ་པའི་ཚེ་ན་ཡང་ཚེ་དང་ལྡན་པ་འདུན་པ་ལྟུང་བ་ཕྱིར་བཅོས་གྱིས་ཤིག་ཅེས་གླེང་བའི་ཕྱིར། དེས་ན་ལྟུང་བ་ཕྱིར་བཅོས་གྱིས་ཤིག་ཅེས་པ་ལྟ་བུ་ཕྱོགས་གཅིག་ནས་གླེང་བ་ཡིན་ལ། ལྟུང་བའི་ངོ་བོ་ནས་གཟུང་སྟེ་ཕྱིར་བཅོས་གྱིས་ཤིག་ཅེས་པ་ནི་མཐའ་དག་དྲན་པར་བྱེད་པའོ།། ༈ །།གཉིས་པ་མ་ངེས་པའི་སྡེ་ལ་སྡོམ་ནི། དབེན་པ་སྐྱབས་ཡོད་འདུག་པའོ། །ཞེས་ཏེ། མ་ངེས་པ་དང་པོ་ནི། གླེང་གཞི་སྟོན་པ་མཉན་ཡོད་ན་བཞུགས་པའི་ཚེ་ན། འཆར་ཀ་དང་དགེ་སློང་མ་སྦེད་མ་གཉིས། གནས་དབེན་པ་སྐྱབས་དང་བཅས་པ་པུས་མོ་སྤྲད་དེ་ཆོས་སྟོན་པ་དགེ་བསྙེན་མ་ས་ག་མས་མཐོང་སྟེ། འདི་དག་མ་དད་པས་མཐོང་ན་མི་རུང་ངོ་སྙམ་ནས་སྟོན་པ་ལ་གསོལ་བ་ལ་བརྟེན་ནས་འདི་བཅས་སོ། །དེ་ཡང་དབེན་པ་སྐྱབས་དང་བཅས་པར་དགེ་སློང་ཕོ་མོ་པུས་མོ་སྤྲད་དེ་ཆོས་སྟོན་པ་ནི། ཕམ་ལྷག་གང་རུང་འབྱུང་ལ་ཕམ་པར་ཡང་མ་ངེས་ལྷག་མར་ཡང་མ་ངེས་པས་མ་ངེས་པ་ཞེས་བྱ་སྟེ་འདོམ་གང་ཚུན་ཚད་དུ་གནས་པའོ། །གཉིས་པ་ནི། དགེ་སློང་མ་ཤི་རི་ཥ་དང་དགེ་སློང་གསོ་སྦྱོང་འཕགས་གཉིས་དབེན་པ་སྐྱབས་དང་བཅས་པར་འདོམ་གང་ཕན་ཆད་དུ་ཐ་དད་དུ་གནས་ནས་ཆོས་སྟོན་པ་ལེགས་སྐྱེས་མས་མཐོང་ནས་མ་དད་པས་མཐོང་ན་མི་ལེགས་སོ་སྙམ་ནས། སྟོན་པ་ལ་གསོལ་བ་ལ་བརྟེན་ནས་འདི་བཅས་སོ། །དེ་ཡང་དབེན་པ་སྐྱབས་དང་བཅས་པར་དགེ་སློང་ཕོ་མོ་ཕན་ཚུན་ཐ་དད་དུ་བསྡད་དེ་ཆོས་སྟོན་པ་ནི། ལྟུང་བྱེད་དང་སོར་བཤགས་ཉེས་བྱས་གསུམ་པོ་གང་རུང་དུ་འགྱུར་ལ། ལྟུང་བྱེད་ཁོ་ནར་ཡང་མ་ངེས་སོར་བཤགས་དང་ཉེས་བྱས་ཁོ་ན་འབྱུང་བར་ཡང་མ་ངེས་པས་ན་མ་ངེས་པའི་སྡེར་གཞག་པའོ།། ༈ །།གསུམ་པ་ལྟུང་བར་བྱེད་པ་ལྟུང་བྱེད་ཀྱི་སྡེ་ལ་གཉིས་ཏེ། ཞག་གི་ཆད་ལས་དང་འབྲེལ་བ་སྤང་བའི་ལྟུང་བྱེད་དང་། ལྟུང་བྱེད་འབའ་ཞིག་པའོ། །དང་པོ་ལ་ཐུན་མོང་དང་། ཐུན་མོང་མ་ཡིན་པ་གཉིས་ལས། དང་པོ་ནི། ཉིན་མཚན་གྱི་དང་པོ་མ་ཡིན་པ་ལ་ཐ་མ་མ་ཡིན་པ་མེད་པ་ཉིད་དོ་ཞེས་སོགས་ཏེ། འདི་ལ་ལྔ་སྟེ། དུས་དང་འབྲེལ་བའི་ཐུན་མོང་བ། བདག་པོ་དང་འབྲེལ་བའི་ཐུན་མོང་བ། ཤན་དང་འབྲེལ་བའི་ཐུན་མོང་བ། ཕྱིས་བཅོས་དང་འབྲེལ་བའི་ཐུན་མོང་བ། དང་པོ་གསུམ་དང་འབྲེལ་བའི་ཐུན་མོང་བའོ། །དང་པོ་ནི། ཞག་གི་རྒྱུན་དང་འབྲེལ་བའི་སྤང་བའི་ལྟུང་བྱེད་རྣམས་བསྐྱེད་པའི་ཞག་དང་པོ་ལྔ་སྟེ། དེ་ལོན་པ་ལ་ཉིན་མཚན་གཉིས་ཀ་འདས་པ་ཡན་ལག་ཏུ་དགོས་སམ་ཞེ་ན། དེའི་ཞག་དང་པོ་དེ་ལོན་པ་ལ་ཉིན་མཚན་གྱི་དང་པོ་མ་ཡིན་པ་སྟེ། ཐ་མ་དེ་འདས་པས་ཞག་ལོན་པ་ཡིན་གྱི། ཐ་མ་མ་ཡིན་པ་གོང་གི་ཐུན་བརྒྱད་པོ་རྣམས་དེའི་ཉིན་ཞག་ཏུ་མེད་པ་ཡིན་ཏེ་དེའི་ཉིན་ཞག་ཏུ་མི་བརྩི་བའི་ཕྱིར་རོ། །ཁ་ཅིག་ཞག་འདའ་མི་ནུས་པ་དེ་ཉིན་གྱི་དང་པོ་མ་ཡིན་པ་ལ་ཡོད་ཀྱི། མཚན་གྱི་ཐ་མ་མ་ཡིན་པ་ལ་མེད་ཟེར་བ་མི་འཐད་དེ། མཚན་གྱི་ཐ་མ་དེ་ཁོ་རང་གིས་ཁོ་རང་འཇིག་པར་ཐལ། ཁོ་རང་གིས་ཁོ་རང་འདའ་བའི་ཕྱིར། རྟགས་ཁས་བླངས། གཞན་ཡང་ཚེས་གཅིག་གི་ཉིན་གྱི་དང་པོ་དེ་ལ་ཚེས་གཅིག་གི་མཚན་མོ་འདའ་བའི་ནུས་པ་ཡོད་པར་ཐལ། ས་བོན་ལ་མྱུ་གུ་བསྐྱེད་པའི་ནུས་པ་ཡོད་པའི་ཕྱིར། བསལ་བ་ཁས་བླངས། ཞག་གིས་རྒྱུན་དང་འབྲེལ་བའི་སྤང་ལྟུང་ནི། གོས་ཞག་བཅུ་འཆད་སྤང་། ལྷུང་བཟེད་ཞག་བཅུ་འཆད་སྤང་། ཆོས་གོས་དང་འབྲལ་སྤང་། གསོག་འཇོག་གི་སྤང་བ་རྣམས་སོ། །གོང་གི་ཐུན་དེ་རྣམས་ལ་ལྟུང་བ་གཏན་མི་སྐྱེད་དམ་ཞེ་ན། བུད་མེད་དང་ལྷན་ཅིག་ཉལ་བ་ལ་སོགས་པ་ཡུལ་རྟེན་ལྷན་ཅིག་པ་ལས་བྱུང་བའི་ལྟུང་བ་དངོས་གཞི་རྣམས་ལ་ནི། མཚན་མོ་དེའི་མདུན་རོལ་གྱི་ཐུན་དེ་རྣམས་སྦྱོར་བའི་ལྟུང་བ་བསྐྱེད་པའི་སྣོད་ཡིན་ནོ། །ཁ་ཅིག་སྤང་ལྟུང་རྣམས་ལ་སྦྱོར་ལྟུང་མེད་དེ། ཞག་རྒྱུན་ལྡན་གྱི་སྤང་ལྟུང་རྣམས་བསྐྱེད་པའི་རྒྱུར་འགྱུར་གྱི་དངོས་པོ་དེ་སྐྱ་རེངས་འཆར་ཁ་ཚུན་ཆད་དུ་རུང་ལ། སྐྱ་རེངས་ཤར་ནས་སྤང་ལྟུང་བསྐྱེད་པའི་ཕྱིར་ཟེར་བ་མི་འཐད་དེ། འགྲེལ་ཆུང་དུ་གོས་ཞག་བཅུ་འཆད་སྤང་ལ་ནི་དང་པོ་ནས་ལྷོད་ཡངས་སུ་འཇོག་ན་འཆད་ཙམ་ནས་ལྟུང་བ་བསྐྱེད་པར་བཤད་པའི་ཕྱིར། བམ་ལྔར་ཞག་བཅུ་འདས་པས་བསྐྱེད་པའི་སྤང་བའི་ལྟུང་བྱེད་རྣམས་ལ་ནི་མཐར་ཐུག་པར་ན་དངོས་གཞི། སྔ་རོལ་དུ་ནི་ཉེས་བྱས་སོ་ཞེས་གསུངས་པའི་ཕྱིར། དེས་ན་སྐྱ་རེངས་ཤར་བའི་མགོ་བརྩམས་པ་ནས་གསལ་བ་ལ་ཐུག་གི་བར་དུ་སྦྱོར་བའི་ལྟུང་བ་བསྐྱེད་ལ་གསལ་བ་ཤར་བ་ན་དངོས་གཞིར་འགྱུར་རོ། །ཉིན་མཚན་གྱི་དང་པོ་དེ་གང་ཡིན་ཞེ་ན། སྐྱ་རེངས་དང་པོའི་སྐད་ཅིག་མ་དང་པོ་དེ་ནི་ཉིན་མཚན་དེའི་དང་པོ་ཡིན་ནོ། །ལུང་རྣམ་འབྱེད་ལས། སྐྱ་རེངས་དང་པོ་ཤར་བ་ན་ནམ་མཁའ་སྔོ་སྐྱར་འགྱུར། སྐྱ་རེངས་བར་པ་ཤར་བ་ན་ནམ་མཁའ་སེར་པོར་འགྱུར། སྐྱ་རེངས་ཐ་མ་ཤར་བ་ན་ནམ་མཁའ་དམར་པོར་འགྱུར་ཞེས་གསུངས་པའི་དོན་ལ། ཁ་ཅིག་མཚོ་མ་དྲོས་པའི་ནང་ན་ཤིང་འཛམ་བུ་ཞེས་བྱ་བ་ཡོད་དེའི་རྩེ་མོ་བཻཌཱུརྻ་སྐེད་པ་གསེར་རྩ་བ་པདྨ་རཱ་ག་ལས་བྱས་པ་ཡིན་པས། ཤིང་དེའི་རྩེ་མོ་ལ་ཉི་མ་ཤར་བ་དང་དེའི་མདངས་ཆུ་ལ་ཕོག དེའི་མདངས་ནམ་མཁའ་ལ་ཕོག་པས་སྔོན་པོར་འགྱུར་བ་སོགས་ཡིན་ནོ་ཞེས་གསུངས་པ་མི་འཐད་དེ། ཤིང་རིལ་པོ་ལ་ཉི་མ་ཕོག་པ་ན་ནམ་མཁའ་ཁྲ་བོར་འགྱུར་བར་ཐལ། དམ་བཅའ་དེའི་ཕྱིར། གཞན་ཡང་། འདི་ནས་བྱང་དུ་རི་ནག་པོ། །དགུ་འདས་གངས་རིའོ་དེ་ནས་ནི། །སྤོས་ངད་ལྡན་པའི་ཚུ་རོལ་ན། །ཆུ་ཞེང་ལྔ་བཅུ་ཡོད་པའི་མཚོ། །ཞེས་སོགས་བཤད་པས་མཚོ་དེ་རྡོ་རྗེ་གདན་གྱི་བྱང་ཕྱོགས་ན་ཡོད་ལ། དེར་ནམ་མཁའ་སྔོ་སོགས་སུ་གྱུར་པས་འཛམ་གླིང་ཀུན་ཏུ་ནམ་མཁའ་སྔོ་སོགས་ཡོད་པ་ལ་འབྲེལ་མེད་པའི་ཕྱིར། དེས་ན་ལུང་དེའི་དོན་ནི་ཉི་མའི་ངོ་བོ་མེ་ཤེལ་ཡིན་པ་དམར་པོར་ཡོད་ལ། འོད་ཟེར་དཀར་པོར་ཡོད་པས་ཐག་རིང་པོ་ནས་ནམ་མཁའ་ལ་ཕོག་པས་སྔོ་སྐྱར་འགྱུར་ལ། དེ་བས་ཉེ་བར་ཕོག་པ་ན་སེར་པོར་འགྱུར། དེ་བས་ཉེ་བ་ན་དམར་པོར་འགྱུར་ཞིང་། ཤིན་ཏུ་ཉེ་བ་ན་འོད་ཟེར་འཁྲུགས་པས་དཀར་པོར་གྱུར་པ་ཡིན་ནོ། །སྐྱ་རེངས་དེ་ནམ་གྱི་ཚེ་འཆར་ཞེ་ན། ཤ་་་་་་ཁ་ཅིག་མཚན་མོ་ལ་ཐུན་གསུམ་དུ་བྱས་པའི་ཐུན་ཐ་མའི་ཕྱེད་ན་འཆར། ཐུན་དགུར་བྱས་པའི་ཐུན་བདུན་པའི་ཕྱེད་ནས་འཆར་ཏེ། དགེ་སློང་མའི་སོ་ཐར་འགྲེལ་པར་ཐུན་ཐ་མའི་ཕྱེད་རྒྱལ་པོ་རྔ་བརྡུང་དུ་ཉེ་བ་ན་ཞེས་གསུངས་པའི་ཕྱིར་ཞེས་གསུང་བ་མི་འཐད་དེ། ཁྱེད་ཀྱི་དུས་གོ་བརྗོད་པའི་སྐབས་སུ་ཐུན་ཐ་མ་མཐུན་ཐ་མའི་ཕྱེད། སྐྱ་རེངས་མ་ཤར་བ་སྐྱ་རེངས་ཤར་བ་ཞེས་པ་དང་འགལ་བའི་ཕྱིར། དེས་ན་མཚན་མོ་ལ་ཐུན་དགུར་བྱས་པའི་ཐུན་བརྒྱད་པའི་ཕྱེད་ནས་འཆར་ཏེ། ལུང་དུ། ཆ་བརྒྱད་པ་ལུས་པ་ན་འཆར་ཞེས་པ་དང་། ཐུན་ཐ་མའི་དང་པོའི་ཕྱེད་རྒྱལ་པོ་རྔ་བརྡུང་དུ་ཉེ་བ་ན་ཞེས་གསུངས་པའི་ཕྱིར་དང་ཆ་དགུར་བྱས་པའི་ཆ་དགུ་པ་དེ་ཐུན་ཐ་མ་ཡིན་ལ། དེའི་དང་པོའི་ཕྱེད་ཆ་བརྒྱད་པ་དེ་ཡིན་པའི་ཕྱིར། ཉིན་མཚན་གྱི་དང་པོ་དེར་ངེས་སམ་ཞེ་ན། གསོ་སྦྱོང་དང་དགག་དབྱེ་ལ་སོགས་པའི་ལས་ལ་ཆོས་ལྡན་གྱི་དགོས་པའི་དབང་གིས་དུས་ལས་འདས་ཤིང་ཡོལ་བ་ལ་ནི། ཉི་མ་ཤར་བའི་སྐད་ཅིག་དང་པོ་ཚུན་ཆད་ཉིན་མཚན་གྱི་དང་པོ་ཡིན་པས་ཉི་མ་འཆར་ཁ་ཚུན་ཆད་དུ་གྲུབ་ན་ལེགས་པར་གྲུབ་པ་ཡིན་ནོ། །གཉིས་པ་བདག་པོ་དང་འབྲེལ་བའི་ཐུན་མོང་བ་ནི། བདག་འབྲེལ་གྱི་སྤང་ལྟུང་རྣམས་ལ་རྒྱུར་གྱུར་གྱི་དངོས་པོ་དེ་རང་གི་ཡིན་པ་ལ་རང་གི་ཡིན་པར་འདུ་ཤེས་པའམ། ཐེ་ཚོམ་ཟ་བ་གང་རུང་ཡན་ལག་ཏུ་དགོས་ལ། རང་གི་ལ་གཞན་གྱིར་འདུ་ཤེས་པ་དང་གཞན་གྱི་ལ་རང་གིར་འདུ་ཤེས་པ་མི་བསྐྱེད་དོ། །ནི་ཞེས་པ་ནི་མ་བྱིན་ལེན་དང་ཤི་བའི་ཡོ་བྱད་གཉིས་ལས་དགར་བའི་ཚིག་ཡིན་པས་དེ་གཉིས་ལ་རང་གི་ཡིན་པ་ལ་ཡིན་པར་འདུ་ཤེས་པའམ་ཐེ་ཚོམ་ཟ་བ་མི་དགོས་སོ། །བདག་འབྲེལ་གྱི་ལྟུང་བ་དེ་གང་ཡིན། ཇི་ཙམ་གྱིས་རང་གི་ཡིན་པ་དང་བྲལ་བར་འགྱུར་ཞེ་ན། འབྲལ་སྤང་མ་གཏོགས་པའི་སྤང་ལྟུང་ཐམས་ཅད་བདག་འབྲེལ་གྱི་ལྟུང་བ་ཡིན་ཅིང་། རང་གི་ཡིན་པ་དེ་ནི་བསམ་པ་ཐག་པ་ནས་གཞན་ལ་བསྔོས་པ་ཉིད་ན་བྲལ་བ་ཉིད་དོ། །དེར་མ་ཟད་མ་འོངས་པ་ན་རབ་ཏུ་བྱུང་བ་ལ་སྦྱིན་པར་བྱ་སྙམ་དུ་རབ་ཏུ་བྱུང་བའི་དོན་དུ་ངེས་པར་བྱས་པ་ཡང་རང་གི་ཡིན་པ་དང་བྲལ་བ་ཉིད་ཡིན་ནོ། །དེར་མ་ཟད་ཆོས་གོས་ལས་ཀྱང་རྣམ་པར་བརྟགས་པ་སྟེ་མཁན་པོ་དང་སློབ་དཔོན་གྱི་མིང་གིས་རུང་བ་རྣམ་དག་བྱས་པ་ལས་ཀྱང་རང་གི་ཡིན་པ་དེ་དང་བྲལ་ལོ། །གསུམ་པ་ཤན་དང་འབྲེལ་བའི་ཐུན་མོང་བ་ནི། བསྔོས་པ་དང་། ངེས་པར་བྱས་པ་དང་། རུང་བ་རྣམ་དག་བྱས་པ་དེས་རང་གི་ཉིད་ཅེས་བྱ་བའི་དངོས་པོ་འདི་ལ་རྗེས་སུ་ཞུགས་པ་སྟེ་ཤན་བརྡེག་པར་བྱས་པ་ཉིད་ཀྱང་ཉམས་པ་ཡིན་ནོ། །ཤ་་་་་་ཁ་ཅིག་ཚེས་གཅིག་ལ་གོས་ཞིག་རྙེད་ནས་བྱིན་གྱིས་བརླབ་པ་སོགས་མ་བྱས་པར་བཞག ཚེས་བཞི་ལ་གོས་ཤིག་རྙེད་ན་སྔ་མ་དེ་ཞག་བཅུ་འདས་ཀར་ཤན་རྡེག་པ་ཡིན་གྱི་དེའི་སྔ་རོལ་ཏུ་མི་རྡེག་གསུང་། གྲོ་་་་་་ཁ་ཅིག་ཕྱི་མ་དེ་རྙེད་མ་ཐག་ཏུ་ཤན་བརྡེག་ལ། ཚེས་ལྔ་ལྟ་བུ་ལ་གོས་སྔ་མ་དེ་གཞན་ལ་བསྔོ་བ་སོགས་བྱས་ཀྱང་ཤན་དེ་མི་ཉམས་པ་ཡིན་ཞེས་གསུང་། དང་པོ་མི་འཐད་དེ་ཤན་སྟོབས་ཀྱི་ཞག་བཅུ་འཆང་སྤང་མེད་པར་ཐལ། ཞག་བཅུ་འདའ་ཀ་ཚུན་ཆད་དུ་ནི་ཤན་མི་རྡེག་ལ་ཞག་བཅུ་འདས་ནས་ཀྱང་མི་རྡེག་པའི་ཕྱིར། སྔ་མ་ཁས་བླངས། གཉིས་པ་ཡང་མི་འཐད་དེ། འདི་ལ་རྗེས་སུ་ཞུགས་པ་ཉིད་ཀྱང་ཉམས་པ་ཡིན་ནོ་ཞེས་གསུངས་པའི་ཕྱིར། དེར་མ་ཟད་ཤེས་པ་རང་བཞིན་དུ་གནས་པ་ལས་ཉམས་ན་ཡང་ཤན་རྗེས་སུ་ཞུགས་པ་དེ་ཉམས་པ་ཡིན་ནོ། །ཅི་ལྟ་བུ་ལ་ཤན་བརྡེག་ཅེ་ན། ཤན་རྡེག་བྱེད་གོས་དེ་ཡོད་ན་དངོས་པོ་དེ་ལྟ་བུ་དེ་གོས་གཞན་ལ་ཤན་འབྱུང་སྨན་དང་ལྷུང་བཟེད་ལ་ཡང་དེས་མཚོན། དེ་བཞིན་དུ་ཞག་བཅུ་འཆང་སྤང་གི་ཤན་རྡེག་བྱེད་དེ་ཞག་བཅུ་འཆང་སྤང་གཞན་ལ་ཤན་རྡེག་གི་ཟླར་འཇོག་གི་སྤང་བའི་ཤན་མི་རྡེག ཟླར་འཇོག་གི་སྤང་བ་ལ་ཡང་དེས་མཚོན་ནོ། །དེར་ངེས་སམ་ཞེ་ན་སྨན་ཞག་བདུན་པ་ལ་ནི། ནང་རིགས་མཐུན་ཁོ་ན་ལ་ཤན་རྡེག་གི་གཞན་ལ་མི་བརྡེག་སྟེ། འབྲུ་མར་གྱིས་འབྲུ་མར་ལ་ཤན་རྡེག་གི་བུ་རམ་སོགས་ལ་མི་རྡེག་པ་བཞིན་ནོ། །ཤ་་་་་་ཁ་ཅིག་རྡེག་བྱེད་ཁྱད་པར་ཅན་དང་། ཁྱད་པར་ཅན་མ་ཡིན་པ་གཉིས་དང་། བརྡེག་བྱ་ཁྱད་པར་ཅན་དང་། ཁྱད་པར་ཅན་མ་ཡིན་པ་གཉིས་ལས། གོས་ཀྱི་ཤན་རྡེག་བྱེད་ཡིན་ན་བྱིན་གྱིས་མ་བརླབས་པས་ཁྱབ། སྨན་གྱི་ཤན་རྡེག་བྱེད་ཡིན་ན་བྱིན་བརླབས་ཅན་ཡིན་པས་ཁྱབ། ཤན་རྡེག་བྱེད་གོས་དེ་བརྡེག་བྱ་བྱིན་གྱིས་བརླབས་པ་ལ་རྡེག་པའི་ཆ་ནས་རྡེག་བྱེད་ཁྱད་པར་ཅན་དང་། བྱིན་གྱིས་མ་བརླབས་པ་ལ་རྡེག་པའི་ཆ་ནས་རྡེག་བྱེད་ཁྱད་པར་ཅན་མ་ཡིན་པའོ། །བརྡེག་བྱ་བྱིན་བརླབས་ཅན་དེ་རྡེག་བྱ་ཁྱད་པར་ཅན་དང་། བྱིན་གྱིས་མ་བརླབས་པ་དེ་བརྡེག་བྱ་ཁྱད་པར་ཅན་མ་ཡིན་པའོ་ཞེས་གསུངས་པ་མི་འཐད་དེ། ཤན་རྡེག་བྱེད་ཀྱི་གོས་དེ་རྡེག་བྱེད་ཁྱད་པར་ཅན་དང་ཁྱད་པར་ཅན་མ་ཡིན་པའི་གཞི་མཐུན་ཡིན་པར་ཐལ། བྱིན་བརླབ་ཅན་ལ་རྡེག་པའི་ཆ་ནས་རྡེག་བྱེད་ཁྱད་པར་ཅན་དང་། བྱིན་གྱིས་མ་བརླབས་པ་ལ་རྡེག་པའི་ཆ་ནས་ཁྱད་པར་ཅན་མ་ཡིན་པ་ཡིན་པའི་ཕྱིར་དང་། ཤན་རྡེག་བྱེད་ཁྱད་པར་ཅན་དང་ཁྱད་པར་ཅན་མ་ཡིན་པའི་ཁྱད་པར་རྒྱ་གར་གྱི་མཁས་པ་སུས་ཀྱང་མ་བཤད་པའི་ཕྱིར་རོ། །བཞི་པ་ཕྱིར་བཅོས་དང་འབྲེལ་བའི་ཐུན་མོང་བ་ནི། སྤང་བའི་ལྟུང་བྱེད་དེ་ཡོད་ན་ཕྱིར་བཅོས་བྱེད་པའི་ཚེ་ཕྱིས་རྙེད་ཀྱི་ཡོ་བྱད་རིགས་མཐུན་པ་དང་མི་མཐུན་པ་བདག་གིར་བྱས་པ་ཙམ་ལ་སྤང་བར་བྱ་དགོས་པ་ཉིད་དོ། །དེ་ལྟར་ངེས་སམ་ཞེ་ན་གོས་ཁྲུ་གང་བས་ཆུང་བ་ནི་སྤང་མི་དགོས་ཏེ། དམ་དུམ་ལྟ་བུར་ཡིད་ལ་སྣང་བས་གོས་ཀྱི་མངོན་ཞེན་མི་སྐྱེ་བའི་ཕྱིར། དགེ་འདུན་དབང་བ་དེ་ཡང་སྤང་མི་དགོས་སོ། །དེའི་ཚེ་སྤང་རྒྱུའི་དངོས་པོ་མེད་ན། བཙལ་ནས་སྤང་དགོས་སམ་སྙམ་ན། སྤང་ལྟུང་ཕྱིར་བཅོས་བྱེད་པ་འདི་ལ་སྤང་རྒྱུའི་དངོས་པོ་མེད་པ་དེ་སྤང་བའི་གཙོ་བོ་ཡིན་པས་བཙལ་ནས་སྤང་མི་དགོས་སོ། །ལྔ་པ་དང་པོ་གསུམ་དང་འབྲེལ་བའི་ཐུན་མོང་བ་ནི། འཆང་འབྲལ་འཇོག་གསུམ་གྱི་སྤང་བ་འདི་གསུམ་ནི་སྲ་བརྐྱང་བཏིང་བའི་དགེ་སློང་ལ་མི་འབྱུང་སྟེ། སྲ་བརྐྱང་བཏིང་བའི་སྟོབས་ཀྱིས་བག་ཡངས་སུ་བྱས་པའི་ཕྱིར། དེ་ལ་སློང་བའི་སྤང་བ་སོགས་ཀྱང་མི་འབྱུང་བ་ལ་དེ་འདིར་མི་སྟོན་པའི་རྒྱུ་མཚན་ཅི་ཡིན་ཞེ་ན། འདིར་ལུང་རྣམ་འབྱེད་ཀྱི་སྐབས་ནས་བསྟན་པའི་གསུམ་པོ་བཤད་པ་ཡིན་ལ། སློང་བའི་སྤང་བ་སོགས་མི་འབྱུང་བ་ཞུ་བའི་སྐབས་སུ་འབྱུང་བས་སྲ་བརྐྱང་གི་སྐབས་སུ་འཆད་དོ།། ༈ །།གཉིས་པ་ཐུན་མོང་མ་ཡིན་པ་ལ་བཅུ་ཚན་གསུམ་ལས། དང་པོ་ལ་སྡོམ་ནི། འཆང་བ་འབྲལ་བ་འཇོག་པ་དང་། །ཁྲུར་འཇུག་པ་དང་ལེན་པ་དང་། །སློང་དང་སྟོད་གཡོགས་སྨད་གཡོགས་བཅས། །རིན་ཐང་སོ་སོར་བསྐུར་བའོ། །ཞེས་ཏེ། དང་པོ་ནི། གང་ཞིག་བྱས་ན་གོས་འཆང་བའི་སྤང་བར་འགྱུར་ཞེ་ན། གཞི་གང་འཆང་བའི་དངོས་པོ་ནི་གོས་རུང་བ་ཚད་དང་ལྡན་པ་རང་གི་ཡིན་པ། བྱིན་གྱིས་མ་བརླབས་པའམ་བརླབས་ཀྱང་ཤན་གྱིས་གོས་པ། རྟེན་གྱི་གང་ཟག་སྲ་བརྐྱང་མ་བཏིང་བའི་དགེ་སློང་གིས། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་འཆང་བར་འདོད་པས། སྦྱོར་བ་རང་སྟོབས་སམ་ཤན་སྟོབས་གང་རུང་གིས་ཞག་བཅུར་བཅངས་ནས། མཐར་ཐུག་ཞག་བཅུ་གཅིག་པའི་སྐྱ་རེངས་ཤར་བའི་ཚེ་འཆང་བའི་སྤང་བར་འགྱུར་རོ། །གཞན་ལ་ཞེ་ཐག་པ་ནས་བསྔོས་པ་དང་། ལྷག་པ་དང་མཁོ་བའི་ཡོ་བྱད་དུ་བྱིན་གྱིས་བརླབས་པ་དང་སྲ་བརྐྱང་བཏིང་བ་ལ་འདི་མི་འབྱུང་ངོ་། །ལྷག་པའི་ཡོ་བྱད་བྱིན་གྱིས་བརླབ་པ་ནི། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་ཆོས་གོས་ལྷག་པ་རུང་བ་མ་བགྱིས་པ་རུང་བ་བགྱི་བར་འོས་པ་འདི་མཁན་པོའི་ལགས་པར་རུང་བར་བགྱིའོ། །མཁན་པོ་ལ་ཡིད་གཏད་ནས་བཅང་བར་བགྱིའོ། །རྐྱེན་ཇི་ལྟ་བ་བཞིན་དུ་བགྱིའོ། །ཞེས་ལན་གསུམ་དུ་བརྗོད་སློབ་དཔོན་སོགས་ལ་འདོན་པ་པོ། མཁོ་བའི་ཡོ་བྱད་བྱིན་གྱིས་བརླབ་པ་ནི། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བའི་གོས་འདི་བདག་དང་ཚངས་པར་མཚུངས་པར་སྤྱོད་པ་རྣམས་ཀྱི་མཁོ་བའི་ཡོ་བྱད་ཀྱི་གོས་སུ་བྱིན་གྱིས་བརླབ་བོ། །ཞེས་ལན་གསུམ་བརྗོད་དོ། །དེ་ཉིད་ལྷུང་བཟེད་ལྷག་པ་ལ་ཡང་མཚུངས་སོ། །ཤན་ལ་དབྱེ་ན་བཞི་སྟེ། ཞག་ཤན་ཡིན་ལ་བྱིན་གྱིས་མ་བརླབས་པའི་ཤན་མ་ཡིན་པ་དང་། བྱིན་གྱིས་མ་བརླབས་པའི་ཤན་ཡིན་ལ་ཞག་ཤན་མ་ཡིན་པ་དང་། གཉིས་ཀ་ཡིན་པ་དང་། གཉིས་ཀ་མ་ཡིན་པའི་ཤན་ནོ། །དང་པོ་ལ་གཉིས་ལས། དང་པོ་བརླབས་པས་བརླབས་པ་ལ་བརྡེག་པའི་ཤན་ནི། ཞག་བདུན་པའི་སྨན་བུ་རམ་ལྟ་བུ་གཅིག་ཚེས་གཅིག་ལ་བྱིན་གྱིས་བརླབས། ཚེས་གཉིས་ལ་རིགས་འདྲ་ཕྱི་མ་གཅིག་བྱིན་གྱིས་བརླབས་ནས་བཅངས་ན་སྔ་མས་ཞག་བདུན་འདས་པ་ནི། ཕྱི་མས་ཞག་བདུན་མ་ལོན་ན་ཡང་ལོན་པའི་དོད་བྱས་ནས་གཉིས་ཀ་ལ་བརྟེན་པའི་ལྟུང་བ་འབྱུང་བ་ལྟ་བུའོ། །གཉིས་པ་མ་བརླབས་པས་མ་བརླབས་པ་ལ་བརྡེག་པའི་ཤན་ནི། འཆང་བ་གཉིས་ཀྱི་སྐབས་སུ་ཚེས་གཅིག་ལ་གོས་སམ་ལྷུང་བཟེད་གཅིག་རྙེད། ཚེས་བརྒྱད་ལྟ་བུ་ལ་གཞན་གཅིག་རྙེད་དེ་སྔ་ཕྱི་གཉིས་ཀ་བྱིན་གྱིས་མ་བརླབས་པར་བཅངས་ན། སྔར་རྙེད་པ་དེ་ཞག་བཅུ་འདས་པ་ན་ཕྱི་མས་ཞག་བཅུ་མ་ལོན་ཡང་ལོན་པའི་དོད་བྱས་ནས་གཉིས་ཀ་ལ་ལྟུང་བ་འབྱུང་བ་ལྟ་བུའོ། །ལྟུང་བ་འདི་སྨན་ལ་མེད་དེ་ཕྱི་མ་མེད་གོང་དུ་སྔ་མ་ལ་ལྟུང་བ་བྱུང་ཟིན་པའི་ཕྱིར། མུ་གཉིས་པ་ནི། ཚེས་གཅིག་ལ་སྨན་ནམ་གོས་སམ་ལྷུང་བཟེད་གཉིས་རྙེད་པ་ལས་གཅིག་བྱིན་གྱིས་བརླབས། གཅིག་བྱིན་གྱིས་མ་བརླབས་པར་རང་རང་གི་ཞག་དུས་འདས་པར་བཅངས་ན། བྱིན་གྱིས་མ་བརླབས་པ་དེས་བརླབས་པ་ཤན་གྱིས་གོས་ནས་ལྟུང་བ་གཉིས་འབྱུང་བ་ལྟ་བུའོ། །འདི་བརླབས་པའི་ཤན་ཡིན་གྱི་ཞག་ཤན་མ་ཡིན་ནོ། །མུ་གསུམ་པ་ནི། ཚེས་གཅིག་ལ་གོས་སམ་ལྷུང་བཟེད་གཅིག་རྙེད། དེ་བྱིན་གྱིས་མ་བརླབས་པར་ཚེས་གཉིས་ལ་ཕྱི་མ་གཅིག་རྙེད་དེ། བྱིན་གྱིས་བརླབས་ན་སྔ་མས་ཞག་བཅུ་ལོན་པ་ན་ཕྱི་མ་བྱིན་གྱིས་བརླབས་པས་ཞག་བཅུ་མ་ལོན་ཡང་ལོན་པའི་དོད་བྱས་ནས་ཤན་གྱིས་གོས་པས་བྱིན་གྱིས་བརླབས་པའི་ཤན་དང་ཞག་ཤན་གཉིས་ཀ་ཡིན་པ་ལྟ་བུའོ། །འདི་སྨན་ལ་མེད་དེ་སྔ་མ་བྱིན་ལེན་བྱས་ན་ལྟུང་བ་བྱུང་ཟིན་པའི་ཕྱིར་རོ། །མུ་བཞི་པ་ནི། སྤང་ལྟུང་སུམ་ཅུ་ལས་གང་ཡང་རུང་བ་ཞིག་བྱུང་སྟེ་མ་བཤགས་པའི་བར་ལ་གོས་ལ་སོགས་པ་རུང་བ་ཚད་ལྡན་ཞིག་རྙེད་ན་སྔ་མའི་ཤན་གྱིས་ཕྱི་མ་ཡང་ཕྱིར་བཅོས་བྱེད་པའི་ཚེ་སྤོང་དགོས་པའོ། །མུ་དང་པོ་གསུམ་ནི་ལྟུང་བའི་ཤན་ཡིན་ལ་ཐ་མ་ནི་སྤོང་བའི་ཤན་ཡིན་ནོ། །གཉིས་པ་འབྲལ་བའི་སྤང་བ་ནི། གང་ཞིག་བྱས་ན་ཆོས་གོས་དང་འབྲལ་བའི་སྤང་བར་འགྱུར་ཞེ་ན། རང་གི་ཆོས་གོས་གསུམ་པོ་གང་ཡང་རུང་བ་ཚད་ལྡན་བྱིན་གྱིས་བརླབས་པ། འཇིགས་པ་དང་བཅས་པའི་དགོན་པ་ལས་གཞན་པའི་གནས་སུ། རྟེན་གྱི་གང་ཟག་སྲ་བརྐྱང་བཏིང་བ་དང་སྣམ་སྦྱར་དང་མི་འབྲལ་བའི་གནང་བ་ཐོབ་པ་མ་ཡིན་པའི་དགེ་སློང་གིས། འདུ་ཤེས་མ་འཁྲུལ་ཞིང་ཀུན་སློང་གནས་དེ་ལས་འདའ་འདོད་ཀྱི་བསམ་པ་དང་ལྡན་པས། སྦྱོར་བ་ཆོས་གོས་གཞག་པའི་གནས་ཉེ་འཁོར་དང་བཅས་པ་ལས་ཕྱི་རོལ་དུ་མཚན་མོ་འདས་ནས། མཐར་ཐུག་ཞག་ཕྱི་མའི་སྐྱ་རེངས་དང་པོ་ཤར་བ་ན་འབྲལ་བའི་སྤང་བའོ། །སྣམ་སྦྱར་གཞག་སྟེ་ཉི་མ་དེ་ཉིད་ལ་ཕྱིར་ལྡོག་པར་བྱའོ་སྙམ་པའི་བསམ་པས་ཆུ་ཀླུང་སོགས་བརྒལ་ནས་སོང་བ་ལ། རྐྱེན་དབང་གིས་ལྡོག་མ་ནུས་ན་དེའི་བྱིན་བརླབས་ཡིད་ཀྱིས་ཕྱུང་སྟེ་ཁྱིམ་པའི་གོས་ཡན་ཆད་གང་རུང་ལ་བྱིན་གྱིས་བརླབས་པ་ནི། ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བའི་གོས་འདི་སྣམ་སྦྱར་དུ་བྱིན་གྱིས་བརླབ་བོ། །ཞེས་ལན་གསུམ་བརྗོད་ནས་ཐབས་ལེགས་བྱའོ། །བླ་གོས་མཐང་གོས་ལ་ཡང་འདོན་པ་བསྒྱུར་རོ། །ཡུལ་གཞན་མེད་ན་རང་གིས་ཀྱང་རུང་ངོ་། །གསུམ་པ་ཟླར་འཇོག་གི་སྤང་བ་ནི། རྟེན་སྲ་བརྐྱང་མ་བཏིང་ཞིང་ཆོས་གོས་གསུམ་པོ་གང་རུང་མེད་པའི་དགེ་སློང་གིས་འཇོག་པའི་དངོས་པོ་གོས་སུ་བྱར་རུང་བ་ཁྲུ་གང་དུ་ལོངས་ཤིང་འཁོར་གསུམ་མི་ཁེབས་པ་ཁ་སྐོང་ལ་རེ་བ་དང་བཅས་པ་བྱིན་གྱིས་བརླབས་པའམ་མ་བརླབས་པ་ཤན་གྱིས་གོས་པ། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་ཞག་སུམ་ཅུར་འཆང་བར་འདོད་པས། སྦྱོར་བ་དེ་ལྟར་བཅངས་ཏེ། མཐར་ཐུག་ཞག་སུམ་ཅུ་འདས་ནས་སོ་གཅིག་པའི་སྐྱ་རེངས་ཤར་བ་ན་སྤང་བའོ། །འདིར་ཁ་ཅིག་བཅུ་ཚན་དང་པོས་བཅུ་ཚན་གཉིས་པའི་ཞག་བཅུ་འཆང་སྤང་བསྐྱེད་པ་ཡིན་ལ། བཅུ་ཚན་གསུམ་པ་ལ་ཡང་ཡིན་ཟེར་བ་མི་འཐད་དེ། བཅུ་པ་དང་པོ་དང་གཉིས་པ་དང་གསུམ་པ་དག་ནི་ཤན་གྱི་ཕྱིར་ཕན་ཚུན་ལྟོས་པ་མེད་དོ་ཞེས་གསུངས་པའི་ཕྱིར། དེས་ན་འདིར་རིགས་ལྡོག་ལ་ཤན་མི་འབྱུང་བ། ཤན་འབྱུང་བ་རིགས་མི་ལྡོག་པ། ཤན་ཡང་འབྱུང་ལ་རིགས་ཀྱང་ལྡོག་པ། ཤན་ཡང་མི་འབྱུང་རིགས་ཀྱང་མི་ལྡོག་པ་དང་མུ་བཞི་ལས། དང་པོ་ནི། ཚེས་གཅིག་ལྟ་བུ་ལ་རེ་བ་དང་བཅས་པའི་ཁ་སོག་གི་གོས་གཞག ཚེས་ལྔ་ལྟ་བུ་ལ་རེ་བའི་ཡུལ་མེད་པར་སོང་བ་ལྟ་བུའོ། །གཉིས་པ་ནི། ཚེས་གཅིག་ལྟ་བུ་ལ་རེ་བ་དང་བཅས་ཏེ་ཁ་སོག་གི་གོས་གཞག ཚེས་ལྔ་ལྟ་བུ་ལ་ཁ་སྣོན་དང་བཅས་ཏེ་འཁོར་གསུམ་མི་ཁེབས་པ་རྙེད་པ་ལྟ་བུའོ། །གསུམ་པ་ནི། ཚེས་གཅིག་ལ་ཁ་སོག་གི་གོས་རེ་བ་དང་བཅས་པ་གཞག ཚེས་ལྔ་ལྟ་བུ་ལ་རིགས་མཐུན་ཚད་ཆོག་རྙེད་པ་ལྟ་བུའོ། །བཞི་པ་ནི། རེ་བ་དང་བཅས་ཏེ་བཅངས་པ་ན་ཁ་སྣོན་མ་རྙེད་པ་ལྟ་བུའོ། །ལྟུང་བ་བསྐྱེད་ཚུལ་ཁ་ཅིག་ནག་འབྱམས་སུ་བསྐྱེད་པ་ཡིན་ཏེ། དེ་ཡང་ཚེས་གཅིག་ལྟ་བུ་ལ་གོས་གཅིག་རྙེད་དེ་བྱིན་གྱིས་མ་བརླབས་པར་གཞག ཚེས་ལྔ་ལ་གོས་གཞན་ཞིག་རྙེད་པ་ན་སྔ་མས་ཞག་བཅུ་འདས་ཏེ་བཅུ་གཅིག་པའི་སྐྱ་རེངས་ཤར་བ་ན་དེ་གཉིས་ཀའི་གཞི་ལས་སྤང་ལྟུང་འབྱུང་ལ། དེ་ཕྱིན་ཆད་ཞག་རེ་རེ་འདས་པ་ན་སྤང་ལྟུང་རེ་རེ་བསྐྱེད་པའི་ཕྱིར་ཏེ། གྲོང་དུ་རྒྱུ་བའི་སྐབས་སུ་གྲོང་བཞི་ཕན་ཆད་ནས་གྲོང་རེ་རེ་འདས་པ་ན་ལྟུང་བྱེད་རེ་རེ་བསྐྱེད་པའི་ཕྱིར་ཞེས་པ་མི་འཐད་དེ། ཞག་བཅུ་འདས་པ་ན་ཡང་སྤང་ལྟུང་རེ་རེ་བསྐྱེད་པའི་ཕྱིར། དེ་ལྟ་མ་ཡིན་ན་ལམ་དུ་ཕྱིན་པས་བསྐྱེད་པའི་ལྟུང་བ་རྣམས་ཀྱི་སྐབས་སུ་རྒྱང་གྲགས་གཅིག་འདས་ནས་གོམ་པ་རེ་རེ་འདས་པ་ན་ལྟུང་བྱེད་རེ་རེ་བསྐྱེད་པར་ཐལ། ཞག་བཅུ་འཆང་སྤང་གི་སྐབས་སུ་ཞག་བཅུ་འདས་པ་ཕན་ཆད་ཞག་རེ་རེ་འདས་པ་ན་སྤང་ལྟུང་རེ་རེ་བསྐྱེད་པའི་ཕྱིར། འདོད་མི་ནུས་ཏེ། ལམ་དུ་འགྲོ་བ་ལས་རྒྱང་གྲགས་ཀྱི་བདག་ཉིད་དོ་ཞེས་གསུངས་པའི་ཕྱིར་རོ། །དེས་ན་ཁྲིའུ་རྩེ་ཁས་བླང་བར་བྱའོ། །ཞར་ལ་བཟོ་སྒྲུབ་པའི་བསླབ་བྱ་ནི། སྣམ་སྦྱར་དང་གདིང་བ་གཉིས་རྒྱུ་གསར་པ་ལ་ཉིས་རིམ་དུ་བྱ། བླ་གོས་མཐང་གོས་གཉིས་ལ་ཆིག་རྐྱང་། ཟླ་བ་བཞིའི་དུས་ཚིགས་སུ་སྤྱད་པ་ལ་ནི་དེ་དག་ཉིས་འགྱུར་བྱ་ཞིང་ལྷག་པ་མི་སྦྱར། སྣམ་སྦྱར་གྱི་སྣམ་ཕྲན་དགུ་ཡན་ཆད་ཉི་ཤུ་རྩ་ལྔ་མན་ཆད་ཟུང་མི་བྱ། སྣམ་ཕྲན་དགུ་པ་བཅུ་གཅིག་པ་བཅུ་གསུམ་པ་གསུམ་ལ་གླེགས་བུ་ཕྱེད་དང་གསུམ་པ་བྱ། སྣམ་ཕྲན་བཅོ་ལྔ་པ་བཅུ་བདུན་པ་བཅུ་དགུ་པ་གསུམ་ལ་གླེགས་བུ་ཕྱེད་དང་བཞི་པ་བྱ། སྣམ་ཕྲན་ཉེར་གཅིག་པ་ཉེར་གསུམ་པ་ཉེར་ལྔ་པ་གསུམ་ལ་གླེགས་བུ་ཕྱེད་དང་ལྔ་པ་བྱ། གླེགས་བུ་དང་གླེགས་བུ་ཕྱེད་པ་མཉམ་དུ་མི་བསྒྲིག་པར་ཕན་ཚུན་བསྣོལ་མར་བྱའོ། །གླེགས་བུ་རྣམས་ཚད་མཉམ་པ་གླེགས་བུ་ཕྱེད་པ་རྣམས་ཀྱང་ཚད་མཉམ་དུ་བྱ། ཚལ་བུ་རྣམས་ཀྱི་ཁ་དབུས་ནས་གཡས་གཡོན་དུ་བལྟ་བར་བྱ། མཐའ་སྐོར་དང་ཚལ་བུའི་ཚད་རབ་སོར་བཞི། འབྲིང་སོར་ཕྱེད་དང་གསུམ། ཐ་མ་སོར་གཉིས་སམ་མཐེབ་སོར་གང་བྱའོ། །སྣམ་སྦྱར་དང་བླ་གོས་ཆེ་ཚད་སྲིད་དུ་ཁྲུ་ལྔ་དང་ཞེང་དུ་ཁྲུ་གསུམ། ཆུང་ཚད་སྲིད་དུ་ཁྲུ་ཕྱེད་དང་ལྔ་དང་ཞེང་དུ་ཕྱེད་དང་གསུམ་པ། འབྲིང་ཚད་དེ་དག་གི་བར་དུ་བྱ་ཞིང་། མཐང་གོས་ནི་དོ་དང་བཞི་ཡང་ཡིན་ལ། དོ་དང་ལྔ་ཡང་ཡིན་ནོ། །བླ་གོས་ལ་སྣམ་ཕྲན་བདུན་དང་གླེགས་བུ་ཕྱེད་དང་གསུམ་པ། མཐང་གོས་ལ་སྣམ་ཕྲན་ལྔ་དང་གླེགས་བུ་ཕྱེད་དང་གཉིས་པ་བྱའོ། །དེ་གཉིས་ལ་སྣམ་ཕྲན་དང་གླེགས་བུ་ངེས་པར་དགོས་པ་ནི་མ་ཡིན་ཏེ། ཚིག་ལེའུར་བྱས་པ་ལས། སྣམ་སྦྱར་ངེས་པར་དྲས་ཏེ་བྱ། །གཞན་ནི་མ་ངེས་གང་གི་ཕྱིར། །འདོད་ཆུང་རང་གི་ཆོས་གོས་ཀྱི། །ལས་ཀྱི་སྐྱོ་བར་འགྱུར་ཕྱིར་རོ། །ཞེས་གསུངས་པའི་ཕྱིར། སྣམ་སྦྱར་གྱི་སྣོད་གཏུར་བུའི་ཚད་ནི། སྲིད་དུ་ཁྲུ་གསུམ་པ་ཞེང་དུ་ཁྲུ་ཕྱེད་དང་གསུམ་པ་ཉིས་ལྟེབ་ཏུ་བྱས་ནས་བརྩེམས་ཤིང་དབུས་སུ་ཁ་བཏོད། ཁ་རྒྱུན་བུ་གུ་ཅན་ལ་ཐི་གུས་བརྒྱུད་པར་བྱའོ། །བཞི་པ་ཁྲུར་འཇུག་པའི་སྤང་བ་ནི། རྟེན་དགེ་སློང་གིས་ཡུལ་དགེ་སློང་མ་བདུན་བརྒྱུད་ཚུན་ཆད་ཀྱི་ཉེ་དུ་མ་ཡིན་པ་ལ། དངོས་པོ་ཆོས་གོས་གསུམ་བྱིན་གྱིས་བརླབས་པ་དང་གདིང་བ་དག་ལས་གང་ཡང་རུང་བ་འདུ་ཤེས་མ་འཁྲུལ་བའམ་ཐེ་ཚོམ་ཟ་བས། སྦྱོར་བ་མངོན་སུམ་དུ་ཁྲུར་འཇུག་གམ། འཚེད་དུ་འཇུག་གམ། འཆག་ཏུ་འཇུག་པས། མཐར་ཐུག་གོས་ཀྱི་ཕྱོགས་གཅིག་ཆུར་བཅུག་པ་ན་སྤང་བའོ། །ལྔ་པ་ལེན་པའི་སྤང་བ་ནི། རྟེན་དང་ཡུལ་གོང་དང་འདྲ་ཞིང་། དངོས་པོ་གོས་སམ་དེས་མཚོན་པའི་ལྷུང་བཟེད་རུང་བ་ཚད་དང་ལྡན་པ། སྦྱོར་བ་ངག་མཚན་ཉིད་དྲུག་ལྡན་གྱིས་བསླངས་ཏེ། མཐར་ཐུག་ལག་ཏུ་ཐོབ་ན་སྤང་བའོ། །དྲུག་པ་སློང་བའི་སྤང་བ་ནི། རྟེན་དགེ་སློང་རང་གི་ཆོས་གོས་ཚང་མ་ཡོད་པ། ཡུལ་ཁྱིམ་པ་ཉེ་དུ་མ་ཡིན་པ་ལ་དངོས་པོ་གོས་རུང་བ་ཚད་ལྡན། འདུ་ཤེས་མ་འཁྲུལ་ཞིང་ཀུན་སློང་སློང་འདོད་ཀྱི་བསམ་པས། སྦྱོར་བ་ངག་མཚན་ཉིད་དྲུག་ལྡན་གྱིས་བསླངས་ཏེ། མཐར་ཐུག་ལག་ཏུ་ཐོབ་ན་སྤང་བའོ། །བདུན་པ་སློང་བར་རིགས་པའི་སྤང་བ་ནི། གཞིའི་ཡན་ལག་ལ་རྟེན་ཆོས་གོས་ཚང་མ་མེད་པའི་དགེ་སློང་གིས། ཡུལ་ཁྱིམ་པ་ཉེ་དུ་མ་ཡིན་པ་ལ་དངོས་པོ་ཁྱིམ་པའམ་རབ་ཏུ་བྱུང་བའི་གོས་སྟོད་གཡོགས་སྨད་གཡོགས་ལས་ལྷག་པ། འདུ་ཤེས་མ་འཁྲུལ་ཞིང་ཀུན་སློང་སློང་འདོད་ཀྱི་བསམ་པས། སྦྱོར་བ་ངག་མཚན་ཉིད་དྲུག་ལྡན་གྱིས་བསླངས་ཏེ། མཐར་ཐུག་ལག་ཏུ་ཐོབ་པ་ན་སྤང་བའོ། །རང་ལ་འཚོ་བའི་ཡོ་བྱད་ཀྱི་གོས་གང་མེད་པ་དེ་སློང་བར་རིགས་ཀྱི་ལྷག་པོ་བསླངས་ན་ལྟུང་བར་འགྱུར་ཞེས་པའི་དོན་ཏོ། །འདིར་ཁ་ཅིག་་་་་་ཤ་སློང་བའི་སྤང་བ་བསྐྱེད་པ་ལ་གོས་ཚང་མ་ཡོད་པ་དགོས། སློང་རིགས་ཀྱི་སྤང་བ་བསྐྱེད་པ་ལ་གོས་གསུམ་ཡན་ཆད་མ་ཚང་བ་དགོས་གསུངས་པ་མི་འཐད་དེ། གོས་གཅིག་མ་ཚང་བའི་དགེ་སློང་དེས་གོས་གཉིས་བསླངས་ན་སྤང་བ་སྐྱེད་དམ་མི་སྐྱེད། མི་བསྐྱེད་ན་ཚད་ལས་ལྷག་པ་སློང་ན་ཉེས་བྱས། ཐོབ་ན་དངོས་གཞིར་གསུངས་པ་དང་འགལ། སྐྱེད་ན་སློང་བའི་སྤང་བ་སྐྱེད་དམ། སློང་རིགས་ཀྱི་སྤང་བ་སྐྱེད། དང་པོ་ལྟར་ན་སློང་བའི་སྤང་བ་སྐྱེད་པ་ལ་གོས་ཚང་བ་ཡོད་དགོས་པ་དང་འགལ། གཉིས་པ་ལྟར་ན་སློང་རིགས་ཀྱི་སྤང་བ་བསྐྱེད་པ་ལ་གོས་གསུམ་ཡན་ཆད་མ་ཚང་བ་དགོས་པ་དང་འགལ་ལོ། །དེ་བཞིན་དུ་གོས་གཉིས་མ་ཚང་བའི་དགེ་སློང་དེས་གོས་གསུམ་བསླངས་ན་ཅིར་འགྱུར་ཞེས་བརྟགས་ནས་འགོག་པར་བྱའོ། །ཁ་ཅིག་སློང་བའི་སྤང་བ་བསྐྱེད་པ་ལ། གོས་གཉིས་ཡན་ཆད་ཚང་བ་དགོས་ཞེས་རང་ལུགས་བཞག་ནས། གཞན་དག་སློང་རིགས་ཀྱི་སྤང་བ་བསྐྱེད་པ་ལ་གོས་བཞི་ཚང་བ་དགོས་ཟེར་བ་ལ་གནོད་བྱེད་འདི་ལྟར་བརྗོད་དེ། གོས་གསུམ་མ་ཚང་བའི་དགེ་སློང་དེས་སྦྱིན་བདག་གཅིག་གི་ཡུལ་ལ་གོས་གསུམ་བསླངས་པ་ལ་སློང་བའི་སྤང་བ་སྐྱེད་དམ། སློང་རིགས་ཀྱི་སྤང་བ་སྐྱེད། ཕྱི་མ་ལྟར་ན་དེས་གོས་གསུམ་སློང་རིགས་པར་ཐལ། དེའི་ཕྱིར་ཞེས་གསུངས་པ་ནི་ཁྱེད་རང་ལ་ཡང་མཚུངས་ཏེ། གོས་གསུམ་མ་ཚང་བའི་དགེ་སློང་དེས་སྦྱིན་བདག་གཅིག་གི་ཡུལ་ལ་སྦྱོར་བ་གཅིག་གིས་གོས་གསུམ་སློང་རིགས་པར་ཐལ། དེ་ལྟར་སློང་བ་ལ་སློང་རིགས་ཀྱི་སྤང་བ་བསྐྱེད་པའི་ཕྱིར། དེས་ན་ལུགས་གཉིས་ཀ་མི་འཐད་དེ། སྣམ་སྦྱར་མ་ཚང་བའི་དགེ་སློང་དེས་ཁྱིམ་པ་ཉེ་དུ་མ་ཡིན་པ་ལ་སྣམ་སྦྱར་བསླངས་ཏེ་དེ་ལས་ལྷག་པ་ཐོབ་ན་སྤང་ལྟུང་བསྐྱེད་པའི་ཕྱིར་ཏེ། བམ་ལྔར་ཡ་བ་ཐོབ་ན་ན་སྨད་པ་མེད། ཡ་བ་ལས་ལྷག་པ་ཐོབ་ན་ཡང་ན་སྨད་པ་མེད་ཅེས་གསུངས་པའི་ཕྱིར། དེས་ན་སློང་བའི་སྤང་བ་བསྐྱེད་པ་ལ་གོས་ཚང་མ་ཡོད་དགོས། སློང་རིགས་ཀྱི་སྤང་བ་བསྐྱེད་པ་ལ་གོས་མ་ཚང་བ་དགོས་ཏེ། གོས་གཅིག་མ་ཚང་བའི་དགེ་སློང་དེ་ཡང་སློང་རིགས་ཀྱི་སྤང་བ་སྐྱེད་པའི་བྱེད་པ་པོ་ཡིན་པའི་ཕྱིར་ཏེ། དེས་གོས་གཅིག་སློང་བ་རིགས་པའི་ཕྱིར་རོ། །བརྒྱད་པ་སྤགས་པ་སློང་བའི་སྤང་བ་ནི། རྟེན་དགེ་སློང་སྲ་བརྐྱང་མ་བཏིང་བས། ཡུལ་ཁྱིམ་པ་ཉེ་དུ་མ་ཡིན་པས་རང་ལ་བསྔོས་པའི་གོས། འདུ་ཤེས་མ་འཁྲུལ་ཞིང་ཀུན་སློང་རང་ལ་བསྔོས་པར་ཤེས་པ། དངོས་སུ་འབུལ་ལོང་མེད་པར་སྔ་ཚོམས་སུ་སློང་འདོད་པས། སྦྱོར་བ་ངག་དྲུག་ལྡན་གྱིས་བསླངས་ཏེ། མཐར་ཐུག་དེའི་རྐྱེན་གྱིས་ཐོབ་པ་ན་སྤང་བའོ། །དགུ་པ་སོ་སོ་ནས་སྤགས་པ་སློང་བའི་སྤང་བ་ནི་གཞན་སྔ་མ་དང་འདྲ་བ་ལ། རང་ལ་ཁྱིམ་བདག་བཟའ་མི་གཉིས་ཀྱིས་སོ་སོ་ནས་བསྔོས་པའི་གོས་ཞེས་སྦྱར་རོ། །བཅུ་པ་བསྐུར་བའི་སྤང་བ་ནི། རྟེན་དགེ་སློང་གིས་ཡུལ་ཞལ་ཏ་བ་ལ་དངོས་པོ་ཁྱིམ་པ་ཉེ་དུ་མ་ཡིན་པས་བསྐུར་བའི་གོས་ཀྱི་རིན། འདུ་ཤེས་མ་འཁྲུལ་ཞིང་ཀུན་སློང་སློང་འདོད་ཀྱི་བསམ་པས། སྦྱོར་བ་བསྐུལ་བསྡད་དྲུག་ལས་ལྷག་པས་བསླངས་ཏེ། མཐར་ཐུག་ཐོབ་པ་ན་སྤང་བའོ། །བཅུ་ཚན་གཉིས་པ་ལ་སྡོམ་ནི། སྲིན་བལ་འབའ་ཞིག་ཆ་གཉིས་དང་། །དྲུག་དང་མཐོ་གང་ལམ་དང་ནི། །ཁྲུ་བ་དང་ནི་གསེར་དངུལ་ལེན། །མངོན་མཚན་ཅན་དང་ཉོ་ཚོང་ངོ་། །ཞེས་གསུངས་ཏེ། སྲིན་བལ་གྱི་སྟན་གྱི་སྤང་བ་དང་། བལ་ནག་པོ་འབའ་ཞིག་པ་དང་། ཆ་གཉིས་བསྲེས་པའི་སྟན་གྱི་སྤང་བ་གསུམ་ནི་རིམ་པ་ལྟར། རྟེན་དགེ་སློང་གིས། དངོས་པོ་ཡུལ་དུས་དེར་དཀོན་པའི་སྲིན་བལ་དང་བལ་རང་བཞིན་གྱིས་ནག་པོ་དང་། ཆ་གཉིས་བསྲེས་ཏེ་འདུ་ཤེས་མ་འཁྲུལ་ཞིང་ཀུན་སློང་སྟན་བྱེད་འདོད་ཀྱིས། སྦྱོར་བ་རང་ངམ་གཞན་བསྐོས་པས་སྟན་བྱེད་པར་བརྩམས་ཏེ། མཐར་ཐུག་སྲིན་བལ་ལ་སོགས་པ་དེ་དག་བཀྲམ་པ་ཙམ་ན་སྤང་བའོ། །བཞི་པ་ལོ་དྲུག་གི་ནང་དུ་སྟན་བྱེད་པའི་སྤང་བ་ནི། རྟེན་དགེ་སློང་གིས་དངོས་པོ་ལོ་དྲུག་གི་ནང་དུ་སྟན་གཉིས་པ། འདུ་ཤེས་མ་འཁྲུལ་ཞིང་ཀུན་སློང་སྟན་གསར་པ་བྱེད་འདོད་ཀྱིས། སྦྱོར་བ་ལོ་དྲུག་གི་ནང་དུ་སྟན་གཉིས་པ་བརྩམས་ཏེ། མཐར་ཐུག་ཟིན་པ་ན་སྤང་བའོ། །ལྔ་པ་མཐོ་གང་གི་སྤང་བ་ནི། རྟེན་དགེ་སློང་གིས་རང་དབང་བའི་གདིང་བ་གསར་པ་ལ་གདིང་བ་རྙིང་པ་བཅོས་སུ་རུང་བ་ཚུན་ཆད་ཡོད་བཞིན་དུ་དེ་ལས་བདེ་བར་གཤེགས་པའི་མཐོ་གང་གིས་མ་སླན་པར། འདུ་ཤེས་མ་འཁྲུལ་ཞིང་ཀུན་སློང་རང་དགར་སྤྱོད་པར་འདོད་པས། སྦྱོར་བ་ལོངས་སྤྱོད་པར་བརྩམས་ཏེ། མཐར་ཐུག་ལོངས་སྤྱོད་པ་ན་སྤང་བའོ། །ཤ་་་་་་ཁ་ཅིག་གདིང་བ་རྙིང་པ་ལས་བདེ་བར་གཤེགས་པའི་མཐོ་གང་གི་མ་སླན་པའི་གདིང་བ་གསར་པ་བཅོས་ན་སྤང་བ་འདི་ལྟར་འགྱུར་ཏེ། དེའི་དགག་བྱ་ནི་གདིང་བ་གསར་པ་ལ་འདོད་ཞེན་སྐྱེ་བའི་དགག་བྱ་ཡོད་པས་དེ་དགག་པའི་ཆེད་ཡིན་པའི་ཕྱིར་ཏེ། སོ་སོ་ཐར་པ་ལས་ཁ་དོག་མི་སྡུག་པར་བྱ་བའི་ཕྱིར་ཞེས་གསུངས་པའི་ཕྱིར་ཞེས་གསུངས་པ་མི་འཐད་དེ། གདིང་བ་གསར་པ་ལ་རྙིང་པ་མ་གླན་ན་སྦྱིན་བདག་སྔ་མའི་བསོད་ནམས་སྤེལ་བ་རྒྱུན་ཆད་པའི་དགག་བྱ་དང་། སྦྱིན་བདག་ཕྱི་མའི་བསོད་ནམས་ཡུན་རིང་དུ་མི་འཕེལ་བའི་དགག་བྱ་ཡོད་པས་དེ་དགག་པའི་ཆེད་ཡིན་པའི་ཕྱིར་ཏེ། ལུང་དུ་ངའི་ཉན་ཐོས་དྲིན་མི་ཤེས་པ་ཁྱིམ་པ་དང་བྲམ་ཟེ་དད་པ་ཅན་ཞེས་སོགས་གསུངས་པའི་ཕྱིར། ཁ་ཅིག་གདིང་བ་རྙིང་པ་ཡོད་ཀྱང་འདྲ་ལ་མེད་ཀྱང་འདྲ་གླན་དགོས་ཀྱི་མ་གླན་ན་ལྟུང་བར་འགྱུར་རོ་ཞེས་ཟེར་བ་མི་འཐད་དེ། གལ་ཏེ་ཡོད་ན་ཞེས་གསུངས་པའི་ཕྱིར་དང་གཞན་དུ་ན་རབ་བྱུང་བྱས་མ་ཐག་པའི་གང་ཟག་གི་གདིང་བ་གསར་པ་ལ་ལོངས་སྤྱོད་དུ་མི་རུང་བར་འགྱུར་རོ། །དྲུག་པ་བལ་ཁུར་བའི་སྤང་བ་ནི། རྟེན་དགེ་སློང་གིས་དངོས་པོ་བལ་གྱི་ཁུར་རང་གི་ཡིན་པ་ལམ་རྒྱང་གྲགས་གཅིག་འདས་པར། འདུ་ཤེས་མ་འཁྲུལ་ཞིང་ཀུན་སློང་རང་དགར་དུ་སྤྱོད་པར་འདོད་པས། སྦྱོར་བ་བལ་གྱི་ཁུར་ཁྱེར་བ་གཞན་མེད་ན་དཔག་ཚད་གསུམ་ཚུན་ཆད་ལ་ལྟུང་བ་མེད། དེ་ནས་བརྩམས་ནས་རྒྱང་གྲགས་གཅིག་གི་མཐར་ཕྱིན་པའམ། ཁུར་ཁྱེར་བ་ཡོད་ན་དང་པོ་ནས་བརྩམས་ཏེ་རྒྱང་གྲགས་རེ་རེའི་མཐར་སྤང་ལྟུང་རེ་རེ་དེའི་ཕྱེད་རེ་ལ་ཉེས་བྱས་རེའོ། །སླ་་་་་་ཁ་ཅིག་བལ་ཁུར་གྱི་སྤང་བ་བསྐྱེད་པ་ལ་བལ་ཁུར་དུ་ལོངས་པ་དགོས་གསུང་བ་མི་འཐད་དེ། དགོས་མེད་དུ་ཞྭ་དང་ལྷྭམ་སྒྲོག་གུ་ཅན་དང་། སྟོད་སྐོར་ནང་ཚངས་ཅན་དང་། རྒྱ་ཅང་དང་། ལྕག་པོད་དང་། ཤུར་བུ་ཁྲི་འུར་ལྡང་བའི་བལ་ཁྱེར་ན་སྤང་བར་འགྱུར་བའི་ཕྱིར། དེས་ན་དགོས་པ་ཡོད་ན་ཞྭ་དང་ལྷྭམ་སྒྲོག་གུ་ཅན་སོགས་ལྡང་བའི་བལ་ཁྱེར་དུ་རུང་ངོ་། །བདུན་པ་བལ་རྨེལ་དུ་འཇུག་པའི་སྤང་བ་ནི། རང་གིས་བྱིན་གྱིས་བརླབས་པའི་ཆོས་གོས་ཞེས་པའི་དོད་དུ་ལུག་གི་བལ་ཁྲུར་འཇུག་གམ། འཚེད་དུ་འཇུག་གམ། འཆག་ཞེས་པའི་ཚབ་ཏུ་རྨལ་དུ་འཇུག་ཅེས་འདོན་པ་བསྒྱུར་ཏེ་ལྟུང་བའི་རྣམ་གཞག་འཁྲུར་འཇུག་གི་སྐབས་དང་འདྲའོ། །བརྒྱད་པ་རིན་པོ་ཆེ་བདག་གིར་བྱེད་པའི་སྤང་བ་ནི། རྟེན་དགེ་སློང་རུང་བ་གསུམ་པོ་གང་དང་ཡང་མི་ལྡན་པས། དངོས་པོ་གསེར་དངུལ་ལ་སོགས་པའི་རིན་པོ་ཆེ་ཡིན་པ། ཉོ་ཚོང་ལ་སོགས་པའི་ཐ་སྙད་གདགས་སུ་རུང་བ་རང་གི་ཡིན་པ་ལག་པས་སླེབ་པའི་མངོན་སུམ་དུ་གནས་པ་ལ། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་རང་གར་རེག་གམ་རེག་ཏུ་འཇུག་འདོད་པས། སྦྱོར་བ་རང་ངམ་གཞན་མངོན་སུམ་དུ་བསྐོས་ཏེ་རེག་པར་རྩོམ་ཞིང་། མཐར་ཐུག་རེག་པ་རྫོགས་པ་ན་སྤང་བའོ། །རིན་པོ་ཆེའི་རུང་བ་བྱ་ཚུལ་ལ་གསུམ་སྟེ། སྦྱིན་བདག་བདག་པོ་ཡིན་སྙམ་དུ་རང་གི་བསམ་པས་མོས་སུ་གཞུག་པ་དང་། ཞལ་ཏ་བའམ་གཉེར་བྱེད་པའི་དགེ་བསྙེན་ལྟ་བུ་བདག་པོ་ཉིད་དུ་ཁས་ལེན་དུ་འཇུག་པ་དང་། བྱིན་གྱིས་བརླབ་པ་ནི། བསྙེན་པར་མ་རྫོགས་པ་ཞིག་ལ་ཟུར་གྱིས་གོས་ཏེ་མདུན་དུ་གཞག་ཏུ་བཅུག་ནས། རྟེན་དང་ཡུལ་གཉིས་ཀ་འགྲེངས་ཏེ་མི་རེག་པར་ལག་པ་བརྐྱངས་ཏེ་འཛིན་པའི་ཚུལ་དུ་བྱས་ནས། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བས། དངོས་པོ་རུང་བ་མ་ལགས་པ་འདི་རྙེད་དེ། བདག་དགེ་སློང་མིང་འདི་ཞེས་བགྱི་བས་དངོས་པོ་རུང་བ་མ་ལགས་པ་འདི་བྱིན་གྱིས་བརླབ་བོ། །དངོས་པོ་རུང་བ་མ་ལགས་པ་འདི་དངོས་པོ་རུང་བར་བསྒྲུབ་པར་བགྱིའོ། །ཞེས་ལན་གསུམ་བརྗོད་ལ་ཐབས་ལེགས་བྱའོ། །དགུ་པ་མངོན་མཚན་ཅན་གྱི་སྤང་བ་ནི། རྟེན་རྐྱེན་ཁྱད་པར་ཅན་དང་མི་ལྡན་པའི་དགེ་སློང་གིས། ཡུལ་ཁྱིམ་པ་ཉེ་དུ་མ་ཡིན་པ། རང་དང་ནོར་མི་གཅིག་པ་ལ། དངོས་པོ་རིན་པོ་ཆེའམ་འབྲུ་ལ་སོགས་པའི་ནོར་རང་དབང་བ། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་སྐྱེད་ཀྱི་ཁེ་འདོད་པས། སྦྱོར་བ་བུན་སྐྱེད་བྱེད་པ་ལ་ཞུགས་ཏེ། མཐར་ཐུག་སྐྱེད་ཐོབ་པ་ན་སྤང་བའོ། །བཅུ་པ་ཉོ་ཚོང་གི་སྤང་བ་ནི། རྟེན་སྔོན་གྱི་བུ་ལོན་ཆགས་པས་ཉོ་ཚོང་མ་བྱས་ན་བུ་ལོན་མི་ཁྱེར་ཞིང་བུ་ལོན་མ་ཁྱེར་ན་མ་བྱིན་ལེན་གྱི་ཕམ་པར་འགྱུར་བ་ལ་སོགས་པའི་རྐྱེན་ཁྱད་པར་ཅན་དང་མི་ལྡན་པ་སྟེ། འདི་རྟེན་གོང་མ་ལ་ཡང་མཚུངས་སོ་དངོས་པོ་འབྲུ་དང་གོས་ལ་སོགས་པ། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་རང་དགར་ཉོ་ཚོང་བྱེད་པར་འདོད་པས། སྦྱོར་བ་མོད་པའི་ཚེ་ཉོ་ཞིང་དཀོན་པའི་ཚེ་ཚོང་བར་བརྩམས་པས། མཐར་ཐུག་དེའི་རྐྱེན་གྱིས་ཁེ་སྤོགས་གྲུབ་པའི་ཚེ་སྤང་བའོ། །བཅུ་ཚན་གསུམ་པ་ལ་སྡོམ་ནི། ལྷུང་བཟེད་གཉིས་དང་ཐ་ག་གཉིས། །བྱིན་ཕྲོག་སྟོན་ཟླ་ཐ་ཆུང་དང་། །དགོན་པ་བ་དང་རས་ཆེན་དང་། །བསྔོས་པ་དང་ནི་གསོག་འཇོག་གོ །ཞེས་ཏེ། དང་པོ་ལྷུང་བཟེད་ལྷག་པོ་འཆང་བའི་སྤང་བ་ནི། རྟེན་དགེ་སློང་གིས་དངོས་པོ་ལྷུང་བཟེད་རུང་བ་ཚད་དང་ལྡན་པ་ལྷག་པོ། ལྷག་པའི་ཡོ་བྱད་དུ་བྱིན་གྱིས་བརླབ་པ་སོགས་ཀྱིས་རུང་བ་མ་བྱས་པ། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་རྒྱུན་དུ་འཆང་འདོད་ཀྱི་བསམ་པས། སྦྱོར་བ་ཞག་བཅུ་བཅངས་ཏེ། མཐར་ཐུག་བཅུ་གཅིག་པའི་སྐྱ་རེངས་ཤར་བའི་ཚེ་སྤང་བའོ། །གཉིས་པ་ལྷུང་བཟེད་ལྷག་པོ་ཚོལ་བའི་སྤང་བ་ནི། རྟེན་ལྷུང་བཟེད་རུང་བ་ཚད་ལྡན་ཡོད་པའི་དགེ་སློང་གིས། ཡུལ་ཁྱིམ་པ་ཉེ་དུ་མ་ཡིན་པ་ལ། དངོས་པོ་ལྷུང་བཟེད་རུང་བ་ཚད་ལྡན། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་སློང་འདོད་ཀྱི་བསམ་པས། སྦྱོར་བ་ངག་མཚན་ཉིད་དྲུག་ལྡན་གྱིས་བསླངས་ཏེ། མཐར་ཐུག་ལག་ཏུ་ཐོབ་པ་ན་སྤང་བའོ། །གསུམ་པ་འཐག་ཏུ་འཇུག་པའི་སྤང་བ་ནི། རྟེན་དགེ་སློང་གིས་ཡུལ་ཐ་ག་པ་ཉེ་དུ་མ་ཡིན་པ་ལ། དངོས་པོ་གོས་ཀྱི་རྒྱུ་རུང་བ་ཚད་ལྡན་རང་གི་ཡིན་པ། བསམ་པ་འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་འཐབ་ཏུ་འཇུག་འདོད་ཀྱི་བསམ་པས། སྦྱོར་བ་རང་ངམ་བསྐོས་པར་རྔན་པ་མ་བྱིན་པར་འཐགས་སུ་བཅུག་སྟེ། མཐར་ཐུག་ལག་ཏུ་ཐོབ་པ་ན་སྤང་བའོ། །བཞི་པ་འཐག་པ་བསྐྱེད་པའི་སྤང་བ་ནི། འཐག་པ་བསྐྱེད་པའི་དངོས་པོ་ནི་སྦྱིན་བདག་གིས་རང་ལ་བསྔོས་པའི་དོགས་པ་རུང་བ་ཚད་ལྡན་ལས་ལྷག་པ་སྦྱིན་བདག་ལས་བསླངས་ཏེ། རང་ངམ་བསྐོས་པས་འཐག་ཏུ་གཞུག་པ་སོགས་སྔར་བཞིན་ནོ། །ལྔ་པ་བྱིན་ཕྲོག་གི་སྤང་བ་ནི། རྟེན་དགེ་སློང་གིས་ཡུལ་དགེ་སློང་ཆོས་བརྒྱད་ལྡན་ལ་དངོས་པོ་རང་གིས་བྱིན་པའི་ཆོས་གོས། འདུ་ཤེས་མ་འཁྲུལ་ཞིང་ཀུན་སློང་རང་ངམ་གཞན་གྱི་དོན་དུ་འཕྲོག་འདོད་ཀྱི་བསམ་པས། སྦྱོར་བ་རང་ངམ་གཞན་བསྐོས་པས་ཕྲོག་སྟེ། མཐར་ཐུག་དབྲལ་བར་བྱ་བའི་དགེ་སློང་གི་ལུས་ལས་ཆོས་གོས་དེ་བྲལ་བ་ན་སྤང་བའོ། །ཤ་་་་་་ཁ་ཅིག་ལྷུང་བཟེད་ཕྲོག་པས་བྱིན་ཕྲོག་གི་སྤང་བ་སྐྱེད་དེ། འགྲེལ་པར་གོས་ཞེས་པ་མཚོན་པ་སྟེ། དགེ་སྦྱོང་གི་ཡོ་བྱད་གང་ཡང་རུང་བ་ཕྲོག་པ་ལ་དངོས་གཞིར་འགྱུར་རོ་ཞེས་གསུངས་པའི་ཕྱིར་ཟེར་བ་མི་འཐད་དེ། གོས་ཞེས་པ་ནི་འགྱུར་སྐྱོན་ཡིན་པས་དག་པར་བསྒྱུར་ན་ཆོས་གོས་ཞེས་པ་མཚོན་པ་སྟེ། དགེ་སྦྱོང་གི་ཡོ་བྱད་གང་ཡང་རུང་བ་ཕྲོག་པ་ལ་དངོས་གཞིར་འགྱུར་ཞེས་འབྱུང་ལ། དེའི་དོན་ཡང་ཆོས་གོས་ཞེས་པ་མཚོན་པ་སྟེ། ལྷག་པའི་ཡོ་བྱད་དང་འཚོ་བའི་ཡོ་བྱད་ཀྱི་གོས་གང་ཡང་རུང་བ་ཕྲོག་ན་སྤང་ལྟུང་སྐྱེད་ཅེས་པའི་དོན་ཡིན་ཏེ། བམ་ལྔར་གོས་ཉིད་དུ་གཏོགས་པའི་ཡོ་བྱད་གང་ཡང་རུང་བ་ཕྲོག་པ་ལ་ན་སྨད་པ་མེད་དོ་ཞེས་གསུངས་པའི་ཕྱིར་དང་། རྩ་བར་དེ་གོས་ཉིད་ཡིན་ནའོ་ཞེས་གསུངས་པའི་ཕྱིར། ཁྱེད་ལྟར་ན་ཕོར་པ་སོགས་ཕྲོག་པས་ཀྱང་ཕྲོག་པའི་སྤང་བ་སྐྱེད་པར་ཐལ། ཡོ་བྱད་གང་ཡང་རུང་བ་ཞེས་སྨོས་པའི་ཕྱིར། ཁྱབ་པ་ཁས་བླངས་སོ། །ཊཱི་ཀར་རྐུ་སེམས་ཀྱིས་ཕྲོག་ན་མ་བྱིན་ལེན་གྱི་ལྟུང་བར་འགྱུར་ཞེས་གསུངས་པའི་དོན་ནི། ཁོ་རང་དབང་བའི་བསམ་པས་ཕྲོགས་ན་མ་བྱིན་ལེན་གྱི་ལྟུང་བར་འགྱུར་གྱི། སྐབས་འདིའི་ལྟུང་བར་མི་འགྱུར་ཞེས་པའི་དོན་ནོ། །དྲུག་པ་བརྟད་པ་ལས་བྱུང་བའི་སྤང་བ་ནི། རྟེན་དབྱར་གནས་པའི་དགེ་སློང་གིས། དངོས་པོ་དབྱར་གནས་པར་ཁས་བླངས་པ་ལས་བྱུང་བའི་གོས་ཀྱི་རྙེད་པ་རུང་བ་ཚད་ལྡན། དུས་དབྱར་ཁས་བླངས་ནས་དགག་དབྱེ་མ་བྱས་པའི་གོང་དུ། རྐྱེན་དབང་མ་གཏོགས་པར་འདུ་ཤེས་མ་འཁྲུལ་ཞིང་ཀུན་སློང་དབྱར་ནང་དུ་བདག་གིར་བྱེད་འདོད་པ་དང་། དབྱར་ནང་དུ་རང་དགར་བགོད་འདོད་པ་དང་དགག་དབྱེ་མཐོན་པའི་ཕྱི་དེ་ཉིན་པར་མི་བགོ་བར་འདོད་པས། སྦྱོར་བ་དེ་དང་དེ་ལྟར་བྱེད་པས་སྔ་མ་ནི་དགག་དབྱེའི་ནང་དུ་བདག་གིར་བྱས་པ་དང་བགོས་པ་དང་། ཕྱི་མ་སྦྱིན་བདག་གིས་ཁོ་བོ་མ་སླེབ་ཀྱི་བར་དུ་མ་བགོ་ཞིག་ཅེས་པའི་ཚིག་གི་དབང་མེད་ན་སྦེད་པ་མ་བསྐོས་པར་གཞག་པ་དུས་དེ་དང་དེ་ལས་འདས་ན། རིམ་བཞིན་དབྱར་གྱི་རྙེད་པ་བདག་གིར་བྱེད་སྔས་པ་དང་བགོད་སྔས་པ་དང་། བགོད་འཕྱིས་པའི་སྤང་བར་འགྱུར་རོ། །རྐྱེན་དབང་མ་གཏོགས་ཞེས་པ་ནི་བརྟད་པ་གློ་བུར་གྱི་དགོས་པའི་དབང་གིས་མཐའ་དགག་དབྱེ་འབྱུང་བ་ལ་ཞག་བཅུ་ཙམ་ན་རྙེད་པ་ནི་བདག་གིར་བྱེད་དུ་མི་རུང་བ་མ་གཏོགས་པ་སྟེ་རུང་ངོ་ཞེས་པའི་དོན་ནོ། །མཚོ་་་་་་ཁ་ཅིག་བརྟད་པའི་དབང་གིས་ཞེས་སོགས་ཀྱི་དོན་ནི་བཅུ་ཚམས་སུ་བདག་གིར་བྱེད་དུ་རུང་ཞེས་པ་ཡིན་ལ། དེ་བགོས་ན་ཞེས་པའི་དོན་ནི་སོ་སོའི་སྐལ་བ་བགོས་ན་སྤང་བར་འགྱུར་ཞེས་པའི་དོན་ཡིན་གསུངས་པ་མི་འཐད་དེ། འགྲེལ་པར་གཙུག་ལག་ཁང་གང་དག་ན་ཆོས་གོས་ཀྱི་ཟོང་ངེས་པར་གྱུར་པ་ཡོད་པ་ནི་ཇི་སྲིད་དུ་མ་ཐོབ་པ་དེ་སྲིད་དུ་དེ་ལ་བདག་གིར་བྱ་བ་མི་འབྱུང་ལ་ཞེས་གསུངས་པའི་ཕྱིར། དེས་ན་གཞུང་སྔ་མས་སོ་སོའི་སྐལ་བ་ངོ་རིགས་སུ་བྱེད་རུང་བར་བསྟན། ཕྱི་མས་སོ་སོའི་སྐལ་བ་དབང་བྱར་ཡོད་པ་བགོས་ན་སྤང་བར་འགྱུར་ཞེས་པའི་དོན་ནོ། །བདུན་པ་དགོན་པ་བའི་འབྲལ་སྤང་ནི། རྟེན་སྣམ་སྦྱར་དང་མི་འབྲལ་བའི་གནང་བ་མ་ཐོབ་པ་དང་སྲ་བརྐྱང་མ་བཏིང་བའི་དགེ་སློང་གིས། དངོས་པོ་རང་གི་ཆོས་གོས་གསུམ་པོ་གང་རུང་དངོས་ཀྱི་བྱིན་བརླབས་ཅན་དགོན་པར་འཇིགས་པའི་དབང་གིས་སྤྱོད་ཡུལ་གྱི་གྲོང་དུ་འཇིགས་པ་མ་བྲལ་བར་དུ་གཞག་ཏུ་རུང་བ་ལ། འདུ་ཤེས་མ་འཁྲུལ་ཞིང་ཀུན་སློང་རང་དགར་ཞག་དྲུག་འབྲལ་འདོད་ཀྱི་བསམ་པས། སྦྱོར་བ་བར་ཆད་ཀྱི་རྐྱེན་མེད་པར་རང་གི་གནས་དང་ཆོས་གོས་གཞག་པའི་གནས་གཉིས་ཉེ་འཁོར་དང་བཅས་པ་ལས་གཞན་དུ་གནས་ལ། མཐར་ཐུག་ཞག་དྲུག་འདས་ཏེ་བདུན་པའི་སྐྱ་རེངས་ཤར་བ་ན་སྤང་བའོ། །ཁ་ཅིག་དགོན་པ་བའི་འབྲལ་སྤང་བསྐྱེད་པ་ལ། སྣམ་སྦྱར་དང་འབྲལ་བ་ཡན་ལག་ཏུ་དགོས་གསུངས་པ་མི་འཐད་དེ། ཆོས་གོས་གསུམ་ལས་གང་ཡང་རུང་བ་དང་བྲལ་ན་འདིའི་འབྲས་སྤང་བསྐྱེད་པའི་ཕྱིར་ཏེ། སོ་སོ་ཐར་པ་ལས་དགེ་སློང་དགོན་པ་བ་དེ་འདོད་ན་ཆོས་གོས་གསུམ་པོ་གང་ཡང་རུང་བ་ཞིག་སྤྱོད་ཡུལ་གྱི་གྲོང་དུ་གཞག་པར་བྱའོ་ཞེས་དང་། ཊཱི་ཀར་ཆོས་གོས་གསུམ་ལས་གང་ཡང་རུང་བ་གཅིག་ཅེས་གསུངས་པའི་ཕྱིར། བརྒྱད་པ་རས་ཆེན་བཙལ་སྔས་གཞག་འཕྱིས་པའི་སྤང་བ་ནི། རྟེན་དབྱར་གནས་དང་འབྲེལ་བའི་དགེ་སློང་གིས། དངོས་པོ་རས་ཆེན་རུང་བ་ཚད་ལྡན་ཆར་ཆུ་སྐྱོབ་ནུས་པ་ཟླ་བ་བཞིར་སྤྱད་པའི་རྙིང་པ་མ་ཡིན་པ། བཙལ་བའི་དུས་དབྱར་ཁས་ལེན་པའི་སྔ་རོལ་ཟླ་བ་གཅིག་གི་ནང་དུ་བཙལ་དུ་རུང་ཞིང་། འཇོག་པའི་དུས་དགག་དབྱེ་ཐོན་ནས་ཟླ་བ་ཕྱེད་ཀྱི་བར་དུ་གཞག་ཏུ་རུང་བ་ལ། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་དབྱར་ཁས་ལེན་པའི་ཟླ་བ་གཅིག་གི་གོང་དུ་ཚོལ་འདོད་པའམ། དགག་དབྱེ་གྲོལ་ནས་ཟླ་བ་ཕྱེད་ཀྱི་འོག་ཏུ་ཡང་རས་ཆེན་སྦེད་པ་མ་བསྐོས་པར་འཇོག་འདོད་ཀྱི་བསམ་པས་སྦྱོར་བ་དེ་ལྟར་བྱེད་ཅིང་། མཐར་ཐུག་དེའི་རྐྱེན་གྱིས་ཟླ་བ་གཅིག་གི་གོང་དུ་བཙལ་ནས་རྙེད་པ་ན་བཙལ་སྔས་ཀྱི་སྤང་བ་དང་། དགག་དབྱེ་གྲོལ་ནས་སྦེད་པ་མ་བསྐོས་པར་ཟླ་བ་ཕྱེད་ལས་ལྷག་པ་བཅངས་ན་གཞག་འཕྱིས་པའི་སྤང་བའོ། །ཁ་ཅིག་རས་ཆེན་བཙལ་སྔས་དང་དབྱར་རྙེད་བདག་གིར་བྱེད་པའི་སྤང་ལྟུང་བསྐྱེད་པ་ལ་ཁྱིམ་པའི་ཡུལ་ལ་བཙལ་བ་ཡན་ལག་ཏུ་དགོས་གསུངས་པ་མི་འཐད་དེ། རས་ཆེན་བཙལ་སྔས་ཀྱི་སྤང་ལྟུང་འདི་དོན་མེད་པའི་ཡོ་བྱད་གསོག་པ་དགག་བྱར་བྱས་པ་ཡིན་ཞིང་། དབྱར་རྙེད་བདག་གིར་བྱས་པའི་སྤང་བ་ནི་དབྱར་རལ་བ་དགག་བྱར་བྱས་པ་གང་ཞིག ཁྱིམ་པ་དང་རབ་ཏུ་བྱུང་བ་གང་གི་ཡུལ་ལས་རྙེད་ཀྱང་དགག་བྱ་དེ་གཉིས་ཁྱད་པར་མེད་པའི་ཕྱིར། དགུ་པ་བསྔོས་བསྒྱུར་གྱི་སྤང་བ་ནི། རྟེན་དགེ་སློང་གི་ཡུལ་ཁྱིམ་པའམ་རབ་ཏུ་བྱུང་བས་དགེ་སློང་གི་གང་ཟག་གམ་དགེ་འདུན་ལ་བསྔོས་པའི་གོས། འདུ་ཤེས་མ་འཁྲུལ་ཞིང་ཀུན་སློང་རྐུ་སེམས་མེད་པར་རང་དགར་བསྒྱུར་འདོད་ཀྱི་བསམ་པས་རང་ལ་བསྒྱུར་ཏེ། མཐར་ཐུག་ལག་ཏུ་ཐོབ་པ་ན་སྤང་བའོ། །ཁ་ཅིག་བསྔོས་བསྒྱུར་གྱི་སྤང་བ་བསྐྱེད་པ་ལ། སྦྱིན་པར་བྱེད་པའི་སྤྱིན་བདག་ཁྱིམ་པ་ཉེ་དུ་མ་ཡིན་པ་ཡན་ལག་ཏུ་དགོས་ཤིང་། བསྒྱུར་རྒྱུའི་དངོས་པོ་ལ་གོས་དང་ལྷུང་བཟེད་གཉིས་ཡོད་ལ། སྦྱོར་བ་ངག་མཚན་ཉིད་ལྔ་ལྡན་དགོས་གསུང་བ་དང་པོ་མི་འཐད་དེ། རབ་བྱུང་གིས་བསྔོས་པ་བསྒྱུར་ན་ཡང་སྤང་ལྟུང་བསྐྱོད་པའི་ཕྱིར་ཏེ། བམ་ལྔར་སྦྱིན་པར་བྱེད་པ་ཁྱིམ་པ་དང་རབ་ཏུ་བྱུང་བ་མཚན་དང་ལྟ་བ་མཐུན་པ་དང་མི་མཐུན་པ་གང་ཡང་རུང་བ་ལ་ན་སྨད་པ་མེད་དོ་ཞེས་གསུངས་པའི་ཕྱིར། གཉིས་པ་མི་འཐད་དེ་ལྷུང་བཟེད་བསྒྱུར་བས་བསྔོས་བསྒྱུར་གྱི་སྤང་བ་མི་བསྐྱེད་པའི་ཕྱིར་ཏེ། ལུང་ལས་རྙེད་པ་ནི་གཉིས་ཏེ། གོས་ཀྱི་རྙེད་པ་དང་ཟས་ཀྱི་རྙེད་པའོ། །འདིར་ནི་གོས་ཀྱི་རྙེད་པ་ཡིན་པར་ངེས་དགོངས་སོ་ཞེས་དང་། དེའི་དོན་ཊཱི་ཀར་གོས་ཀྱི་རྙེད་པ་ཡིན་པར་ངེས་དགོཾངཾས་སོ་ཞེས་པས་ཟས་ཀྱི་རྙེད་པ་བསལ་ཏོ་ཞེས་གསུངས་པའི་ཕྱིར། ཁོ་ན་རེ་ལྷུང་བཟེད་བསྒྱུར་བས་བསྔོས་བསྒྱུར་གྱི་སྤང་བ་བསྐྱེད་དེ། ཟས་ཀྱི་རྙེད་པ་བསལ་ཏོ་ཞེས་གསུངས་པའི་ཕྱིར་ཞེ་ན། འོ་ན་གནས་ཁང་གི་རྙེད་པ་བསྒྱུར་བས་ཀྱང་བསྔོས་བསྒྱུར་གྱི་སྤང་བ་བསྐྱེད་པར་ཐལ། ཟས་གྱི་རྙེད་པ་བསལ་ཏོ་ཞེས་གསུངས་པའི་ཕྱིར། ཁྱབ་པ་ཁས་བླངས། ངག་མཚན་ཉིད་ལྔ་ལྡན་གྱིས་བསྒྱུར་དགོས་པ་ཡང་མི་འཐད་པར་ཐལ། ལུས་ཀྱིས་བསྒྱུར་ན་ཡང་བསྔོས་བསྒྱུར་གྱི་སྤང་བ་བསྐྱེད་པའི་ཕྱིར་ཏེ། ཊཱི་ཀར་ཉེ་དུ་མ་ཡིན་པ་ཡན་ལག་ཏུ་མི་དགོས་པ་དེ་བཞིན་དུ། འདིར་ཚིག་ཉིད་ཀྱང་དེ་དང་འདྲའོ་ཞེས་གསུངས་པའི་ཕྱིར། བཅུ་པ་གསོག་འཇོག་གི་སྤང་བ་ནི། རྟེན་དགེ་སློང་ནད་པ་མ་ཡིན་པས་དངོས་པོ་ལྷའི་བདུད་རྩི་དང་སྣར་བླུག་པ་ཙམ་ལས་གཞན་པ། དགེ་སློང་གི་རྟེན་རུང་གི་སྨན་བཞི་པོ་གང་རུང་བྱིན་ལེན་བྱས་པ། འདུ་ཤེས་མ་འཁྲུལ་ཞིང་ཀུན་སློང་ཕྱིས་ལོངས་སྤྱོད་འདོད་ཀྱི་བསམ་པས། སྦྱོར་བ་རང་རང་གི་གསོག་འཇོག་གི་དུས་ལས་འདས་པ་སྟེ། སྤྱིའི་དུས་སྨན་བཞི་པོ་བྱིན་ལེན་བྱས་པ་ཉི་མ་ཕྱེད་ཡན་དུ་བསྟེན་དུ་རུང་ཞིང་། ཕྱེད་ཡོལ་ནས་བྱིན་ལེན་མ་བཤིག་པར་བཅངས་ན་དགེ་སློང་དེ་ལ་གསོག་འཇོག་གི་སྤང་བའོ། །སོ་སོའི་དུས་ནི་བུ་རམ་ལྟ་བུ་ཞག་བདུན་པའི་སྨན། ཞག་བདུན་པར་བྱིན་གྱིས་བརླབས་པ་སླར་ཡང་བྱིན་གྱིས་མ་བརླབས་པའམ་བྱིན་ལེན་མ་བཤིག་པར་ཞག་བདུན་ལས་འདས་ཏེ་བརྒྱད་པའི་སྐྱ་རེངས་དང་པོ་ཤར་བ་དང་། ཐུན་ཚོད་དུ་རུང་བའི་བཏུང་བ་སྨན་བཞི་པོ་གང་རུང་ལས་སྦྱར་བ། ཕྱི་དྲོ་བྱིན་ལེན་བྱས་པ་ཉི་མ་མ་ནུབ་བར་བསྟེན་དུ་རུང་ཞིང་། དེ་ནས་བྱིན་ལེན་མ་བཤིག་པར་བཅངས་ན་ཉིན་མཚན་གྱི་དུས་མཚམས་ལས་འདས་ཏེ་མཚན་མོའི་ཐུན་དང་པོ་ཤར་བ་ན་སྤང་བའོ་ཞེས་གསུང་ངོ་། །འདིར་མཐའ་དཔྱད་པ་ལ་རྒྱ་གར་མཁས་པའི་ལུགས། བོད་སྔ་མའི་ལུགས། རང་གི་ལུགས་དང་གསུམ་ལས། དང་པོ་ཁ་ཅིག་སྨན་ཞག་བདུན་པར་བྱིན་གྱིས་བརླབས་པ་ཁོ་ནའི་གཞི་ལས་གསོག་འཇོག་གི་སྤང་ལྟུང་བསྐྱེད་པ་ཡིན་གྱི་སྨན་གཞན་གྱི་གཞི་ལས་གསོག་འཇོག་གི་ཉེས་བྱས་སུ་འགྱུར་གྱི་སྤང་ལྟུང་མི་སྐྱེད་གསུང་ངོ་། །སློབ་དཔོན་ཆོས་བཤེས་ནི་སྨན་བཞི་ཀའི་གཞི་ལས་སྤང་ལྟུང་སྐྱེད་པར་བཤད་དོ། །གཉིས་པ་ནི། ཤ་སླ་་་་་་བོད་ཁ་ཅིག་སྨན་རྣམ་པ་བཞི་ཀ་སྔ་དྲོ་བྱིན་ལེན་བྱས་བྱིན་གྱིས་མ་བརླབས་པར་གུང་ཡོལ་བ་ན། སྨན་དེ་གསོག་འཇོག་ཏུ་སོང་ལ་དགེ་སློང་དེ་ལ་གསོག་འཇོག་གི་སྤང་ལྟུང་སྐྱེད། དེ་བཞིན་དུ་སྨན་བཞི་པོ་གང་རུང་ཕྱི་དྲོ་བྱིན་ལེན་བྱས་བྱིན་གྱིས་མ་བརླབས་པར་ཐུན་ཚོད་འདས་པ་ན། སྨན་དེ་གསོག་འཇོག་ཏུ་སོང་བས་དགེ་སློང་དེ་ལ་གསོག་འཇོག་གི་སྤང་ལྟུང་སྐྱེད་གསུང་བ་མི་འཐད་དེ། དེ་ལྟར་སྐྱེད་པ་རྒྱ་གར་བ་སུས་ཀྱང་མ་བཤད་པའི་ཕྱིར་དང་གནོད་བྱེད་ཡོད་པའི་ཕྱིར་རོ། །མཚོ་་་་་་ཁ་ཅིག་སྨན་སྔ་དྲོ་བྱིན་ལེན་བྱས་ཤིང་བྱིན་གྱིས་མ་བརླབས་པར་གུང་ཡོལ་བ་ན་དགེ་སློང་དེ་ལ་གསོག་འཇོག་གི་སྤང་ལྟུང་སྐྱེད་དེ། དགེ་སློང་མའི་སོ་ཐར་ལས་གུང་ཡོལ་བ་ན་སྤང་བར་འགྱུར་རོ་ཞེས་གསུངས་པའི་ཕྱིར་ཞེས་པ་མི་འཐད་དེ། དེའི་དོན་ནི་གུང་ཡོལ་བ་ན་བཟར་མི་རུང་བས་སྤང་དགོས་པར་འགྱུར་ཞེས་པའི་དོན་ཡིན་པའི་ཕྱིར། གསུམ་པ་རང་ལུགས་ནི། སྨན་བཞི་པོ་སྔ་དྲོ་བྱིན་ལེན་བྱས་བྱིན་གྱིས་མ་བརླབས་པར་གུང་ཡོལ་བ་ན་སྨན་དེ་གསོག་འཇོག་དུ་སོང་། དེ་བཞིན་དུ་སྨན་བཞི་པོ་ཕྱི་དྲོ་བྱིན་ལེན་བྱས་བྱིན་གྱིས་མ་བརླབས་པ་ཐུན་ཚོད་འདས་པ་ན་སྨན་དེ་གསོག་འཇོག་ཏུ་སོང་ངོ་། །དེས་ན་སྨན་ཞག་བདུན་བར་བྱིན་གྱིས་བརླབས་པ་ཡང་ཞག་བདུན་པའི་ཐུན་ཐ་མ་ཚུན་དུ་བྱིན་གྱིས་བརླབས་པ་ཡིན་ཏེ། ཉི་མ་འདས་སོ་ཅོག་བརྗོད་པར་བྱའོ་ཞེས་དང་། ཊཱི་ཀར་དགེ་སློང་དེས་ཉི་མ་བདུན་པ་དེ་ཉིད་ཀྱི་ནང་དུ་སྨན་སྔ་མ་ཤོས་ཡོངས་སུ་ལོངས་སྤྱོད་པར་བྱ་ཞིང་། ཞེས་སོགས་གསུངས་པའི་ཕྱིར། ཞག་བདུན་པར་བྱིན་གྱིས་བརླབས་པ་ཡང་ཞག་བདུན་པའི་ཐུན་ཚོད་ཀྱི་མཐའ་འདས་པ་ན་གསོག་འཇོག་ཏུ་སོང་ངོ་། །ཡང་ཊཱི་ཀར་རུང་བའི་ཕྱིར་གསེར་ལ་སོགས་པ་དང་འདྲའོ་ཞེས་གསུངས་པའི་དོན་ལ། ཁ་ཅིག་བུ་རམ་ལྟ་བུ་བཟའ་བའི་ཕྱིར་མ་ཡིན་པ་ཡོ་བྱད་ཀྱི་ཕྱིར་འཆང་ན་རིན་པོ་ཆེའི་རུང་བ་གསུམ་པོ་གང་རུང་གཅིག་བྱས་ཏེ་འཆང་དུ་རུང་བ་ཡིན་ཏེ། དཔེར་ན་གསེར་རུང་བ་བྱས་ནས་ཇི་ཙམ་འདོད་པ་འཆང་དུ་རུང་བ་བཞིན་ཞེས་གསུང་བ་མི་འཐད་དེ། དེའི་དོན་ནི་བུ་རམ་བཟའ་བའི་ཕྱིར་མ་ཡིན་པར་གོས་སོགས་ཀྱི་དོན་དུ་ཞག་བདུན་ལས་ལྷག་པ་བཅང་དུ་རུང་སྟེ། དཔེར་ན་གསེར་ཆོས་ལྡན་གྱི་དགོས་པའི་ཕྱིར་ཇི་ཙམ་དུ་འདོད་པ་བཅད་དུ་རུང་བ་བཞིན་ཞེས་པའི་དོན་ཡིན་པའི་ཕྱིར། ཁ་ཅིག་ཚེས་གཅིག་ལྟ་བུ་ལ་སྨན་ཞག་བདུན་པར་བྱིན་གྱིས་བརླབས་པ་དེ་ཚེས་དགུའི་སྐྱ་རེངས་ཤར་བ་ན་སྨན་དེ་གསོག་འཇོག་ཏུ་འགྱུར་ཏེ། ཞག་བདུན་པར་བྱིན་གྱིས་བརླབས་པའི་སྨན་དེ་གསོག་འཇོག་ཏུ་འགྱུར་བ་ལ་བྱིན་གྱིས་བརླབས་ནས་སྐྱ་རེངས་བརྒྱད་པ་ཤར་བ་དགོས་པའི་ཕྱིར་སྟེ། སྐྱ་རེངས་བརྒྱད་པ་ཤར་ནའོ་ཞེས་གསུངས་པའི་ཕྱིར། གཞན་དུ་ན་དབྱར་ཞག་བདུན་བྱིན་གྱིས་བརླབས་པ་དེ་ཞག་བདུན་འདས་ཏེ་བརྒྱད་པའི་སྐྱ་རེངས་ཤར་བ་ན་དབྱར་རལ་བར་ཐལ། སྨན་ཞག་བདུན་པར་བྱིན་གྱིས་བརླབས་པ་དེ་ཞག་བདུན་འདས་ཏེ་བརྒྱད་པའི་སྐྱ་རེངས་ཤར་བ་ན་གསོག་འཇོག་ཏུ་འགྱུར་བའི་ཕྱིར་ཞེས་གསུངས་པ་ནི་མི་མཚུངས་ཏེ། དབྱར་ཞག་བདུན་བྱིན་གྱིས་བརླབས་པ་ནི་ཞག་བདུན་འདས་མ་ཐག་ཏུ་དབྱར་རལ་བ་དགག་བྱར་བྱས་པ་ཡིན་ལ། སྨན་ཞག་བདུན་པར་བྱིན་གྱིས་བརླབས་པ་ནི་ཞག་བདུན་གྱི་ནང་དུ་གསོག་འཇོག་ཏུ་འགྱུར་བ་དགག་པའི་ཆེད་ཡིན་པའི་ཕྱིར། སྐྱ་རེངས་བརྒྱད་པ་ཤར་ནའོ་ཞེས་པ་ནི་འགྱུར་སྐྱོན་ཡིན་ཏེ། འགྲེལ་ཆུང་དུ་བརྒྱད་པའི་སྐྱ་རེངས་ཤར་བ་ནའོ་ཞེས་པ་དང་། ཊཱི་ཀར་ཡང་ཉི་མ་བརྒྱད་པའི་སྐྱ་རེངས་ཤར་བ་ན་སྤང་བའི་ལྟུང་བྱེད་དུ་འགྱུར་ཞེས་གསུངས་པའི་ཕྱིར། དེས་ན་གསོག་འཇོག་གི་སྤང་བ་ནི་གསོག་འཇོག་ཏུ་སོང་ཟིན་བཟའ་བའི་ཕྱིར་ཞག་འདས་པར་བཅངས་པའི་གཞི་ལས་བྱུང་བའི་སྤང་ལྟུང་དང་། གསོག་འཇོག་གི་ལྟུང་བྱེད་འབའ་ཞིག་པ་ནི་གསོག་འཇོག་ཏུ་སོང་ཟིན་ཟོས་པའི་གཞི་ལས་བྱུང་བའི་ལྟུང་བྱེད་ཡིན་ནོ།། ༈ །།གཉིས་པ་ལྟུང་བྱེད་འབའ་ཞིག་ལ་སྤྱིའི་སྡོམ་ནི། ཤེས་བཞིན་དང་ནི་ས་བོན་དང་། །མ་བསྐོས་པ་དང་ཡང་ཡང་དང་། །ཆུ་དང་ཁྱིམ་དང་བསམ་བཞིན་དང་། །འགྲོན་ལམ་རྐུན་མ་ཆོས་སྟོན་ནོ། །ཞེས་གསུངས་ཏེ། བཅུ་ཚན་དགུ་ལས་དང་པོ་ལ་སྡོམ་ནི། བརྫུན་སྐྱོན་དགེ་སློང་ཕྲ་མ་དང་། །སྐྱོ་སྔོགས་བྱེད་དང་སྟོན་པ་དང་། །འདོན་དང་གནས་ངན་ལེན་དང་ཆོས། །བཤེས་ངོར་བྱེད་དང་ཁྱད་དུ་གསོད། །ཅེས་ཏེ། དང་པོ་བརྫུན་དུ་སྨྲ་བའི་ལྟུང་བྱེད་ནི། རྟེན་དགེ་སློང་གིས་དངོས་པོ་གོང་དུ་བསྟན་པའི་ཕམ་པར་འགྱུར་བའི་བརྫུན་དང་། ལྷག་མར་འགྱུར་བའི་བརྫུན་དང་། ཤེས་བཞིན་དུ་ཆོས་མ་ཡིན་པར་ཆོས་དང་། ཆོས་ཆོས་མ་ཡིན་པར་སྟོན་པ་སྦོམ་པོར་འགྱུར་བའི་བརྫུན་དང་། གསོ་སྦྱོང་གི་ཚེ་ཅི་འདི་ལ་ཁྱེད་ཡོངས་སུ་དག་གམ་ཞེས་ལན་གསུམ་དུ་དྲིས་པ་ན་ཅང་མི་སྨྲ་བས་འདའ་བར་བྱེད་པ་ལྟ་བུ་ཉེས་བྱས་སུ་འགྱུར་བའི་བརྫུན་དང་། འོག་ནས་འབྱུང་བ་ལྟར་དགེ་འདུན་ལྷག་མས་སྐུར་པ་འདེབས་པའི་ལྟུང་བྱེད་ཀྱི་བརྫུན་རྣམས་ལས་གཞན་པའི་ཤེས་བཞིན་གྱི་བརྫུན། བསམ་པ་འདུ་ཤེས་མ་འཁྲུལ་ཞིང་ཀུན་སློང་སྨྲ་འདོད་ཀྱི་བསམ་པས། སྦྱོར་བ་རང་གིས་སྨྲས་ཏེ། མཐར་ཐུག་ཉན་པ་པོས་བརྡ་འཕྲོད་ཅིང་དོན་གོ་བ་ན་ལྟུང་བྱེད་དོ། །གཉིས་པ་སྐྱོན་ནས་བརྗོད་པའི་ལྟུང་བྱེད་ནི། རྟེན་དགེ་སློང་གིས། ཡུལ་དགེ་སློང་ཕ་རོལ་པོ་ལ། བསམ་པ་འདུ་ཤེས་མ་འཁྲུལ་ཞིང་ཀུན་སློང་སྐྱོན་གདགས་འདོད་ཀྱི་བསམ་པས། སྦྱོར་བ་ཡུལ་དུས་དེར་སྐྱོན་དུ་གྲགས་པ་ཚིག་འཇམ་རྩུབ་གང་གིས་སྨྲས་ཀྱང་རུང་། མཐར་ཐུག་དོན་གོ་བ་ན་ལྟུང་བྱེད་དོ། །གསུམ་པ་ཕྲ་མ་བྱེད་པའི་ལྟུང་བྱེད་ནི། རྟེན་དགེ་སློང་གིས་ཡུལ་དགེ་སློང་མཐུན་པ་དག་ལ། འདུ་ཤེས་མ་འཁྲུལ་ཞིང་ཀུན་སློང་ཕྲ་མ་བྱེད་འདོད་ཀྱི་བསམ་པས། སྦྱོར་བ་ངག་དྲུག་ལྡན་གྱིས་མིང་ནས་སྨོས་ཏེ་ཕྲ་མའི་ཚིག་སྨྲས་པས། མཐར་ཐུག་དོན་གོ་བ་ན་ལྟུང་བྱེད་དོ། །བཞི་པ་སྐྱོ་སྔོགས་བྱེད་པའི་ལྟུང་བྱེད་ནི། རྟེན་རྩོད་པའི་རྒྱུས་ཤེས་ཤིང་ཞི་བྱེད་ལ་གཏོགས་པའི་དགེ་སློང་གིས། ཡུལ་དགེ་སློང་ཕ་རོལ་པོ་དག་གི་ཆོས་ཀྱི་རྩོད་པ་བཞི་པོ་གང་རུང་དགེ་འདུན་གྱིས་ཆོས་ཕྱོགས་སུ་ཞི་བར་བྱས་པ་ལ། འདུ་ཤེས་མ་འཁྲུལ་ཞིང་ཀུན་སློང་རྩོད་པ་དཀྲུགས་འདོད་ཀྱི་བསམ་པས། སྦྱོར་བ་ཁྱེད་ཀྱི་རྩོད་པ་དེ་ལེགས་པར་ཞི་བར་བྱས་པ་མ་ཡིན་ནོ་ཞེས་སོགས་སྐྱོ་སྔོགས་ཀྱི་ཚིག་བརྗོད་པས། མཐར་ཐུག་ཡུལ་གྱིས་དོན་གོ་བ་ན་ལྟུང་བྱེད་དོ། །ལྔ་པ་ཁྱིམ་པ་མོ་ལ་ཆོས་སྟོན་པའི་ལྟུང་བྱེད་ནི། རྟེན་དགེ་སློང་གིས་ཡུལ་ཁྱིམ་པ་མོ་ཉེ་དུ་མ་ཡིན་པ་ལུས་བསྟན་རུང་སྨྲ་ཤེས་དོན་གོ་རྫུ་འཕྲུལ་ཅན་དང་མཁས་པའི་རང་བཞིན་ཅན་མ་ཡིན་པ་ལ། འདུ་ཤེས་མ་འཁྲུལ་ཞིང་ཀུན་སློང་ཆོས་བསྟན་འདོད་ཀྱི་བསམ་པས། སྦྱོར་བ་གནས་གཅིག་ཏུ་ཁྲིམས་གྲོགས་མེད་པར་བཀར་གཏོགས་པའི་ཆོས་ཚིག་ལྔའམ་དྲུག་ལས་ལྷག་པར་སྟོན་པ། མཐར་ཐུག་དོན་གོ་བ་ན་ལྟུང་བའོ། །དྲུག་པ་བསྙེན་པར་མ་རྫོགས་པ་དང་ལྷན་ཅིག་འདོན་པའི་ལྟུང་བྱེད་ནི། རྟེན་དགེ་སློང་གིས། འདོན་པར་བྱ་བའི་དངོས་པོ་སྟོན་བྱེད་དུ་གྱུར་པའི་ཆོས་དང་ཡི་གེ་གང་རུང་། འདུ་ཤེས་མ་འཁྲུལ་ཞིང་ཀུན་སློང་རང་དགར་བསྙེན་པར་མ་རྫོགས་པ་དང་ཅིག་ཅར་རམ་མཇུག་ཐོག་ཏུ་འདོན་པར་འདོད་པས། སྦྱོར་བ་མི་འདོད་བཞིན་དུ་གྲུབ་པ་མ་གཏོགས་པར་བསྙེན་པར་མ་རྫོགས་པ་དང་ཅིག་ཅར་རམ་འཇུག་ཐོག་ཏུ་འདོན་པས། མཐར་ཐུག་དོན་གོ་བ་ན་ལྟུང་བའོ། །བདུན་པ་གནས་ངན་ལེན་བརྗོད་པའི་ལྟུང་བྱེད་ནི། རྟེན་ཁྱིམ་པ་མ་དད་པ་བཟློག་པའི་ཕྱིར་གནས་ངན་ལེན་བརྗོད་པར་མ་བསྐོས་པའི་དགེ་སློང་གིས། བརྗོད་པའི་ཡུལ་ཕམ་པ་དང་ལྷག་མའི་མཚན་ཉིད་མི་ཤེས་པའི་གང་ཟག་ལ། འདུ་ཤེས་མ་འཁྲུལ་ཞིང་ཀུན་སློང་བསྙེན་རྫོགས་ཀྱི་སྡོམ་པ་གསོར་རུང་ཡན་ཆད་དང་ལྡན་པའི་གནས་ངན་ལེན་བརྗོད་པར་འདོད་པས། སྦྱོར་བ་ཕམ་ལྷག་གང་རུང་གི་གནས་ངན་ལེན་སྨྲས་པས། མཐར་ཐུག་དོན་གོ་བ་ན་ལྟུང་བའོ། །བརྒྱད་པ་མི་ཆོས་བླ་མ་བདེན་པར་སྨྲ་བའི་ལྟུང་བྱེད་ནི། རྟེན་དགེ་སློང་གིས་ཡུལ་བསྙེན་པར་མ་རྫོགས་པ་དང་བདེན་པ་མ་མཐོང་བ་ལ། དངོས་པོ་རང་གིས་ཐོབ་པའི་སྒོམ་བྱུང་གི་ཡོན་ཏན། འདུ་ཤེས་མ་འཁྲུལ་ཞིང་ཀུན་སློང་དེ་སྨྲ་འདོད་ཀྱི་བསམ་པས། སྦྱོར་བ་རང་གིས་ཐོབ་པའི་མི་ཆོས་བླ་མ་འདུ་ཤེས་མ་བསྒྱུར་བར་སྨྲས་ཏེ། མཐར་ཐུག་དོན་གོ་བ་ན་ལྟུང་བའོ། །དགུ་པ་བཤེས་ངོར་བྱེད་པའི་ལྟུང་བྱེད་ནི། རྟེན་དགེ་སློང་སྔར་རྙེད་པ་དེ་ཡུལ་ལ་བསྔོས་པ་ལ་དད་པས་ཕུལ་བས་དངོས་པོ་དགེ་འདུན་གྱི་ཟས་ལས་གཞན་པའི་རྙེད་པ་རུང་བ་ཚད་ལྡན། འདུ་ཤེས་མ་འཁྲུལ་ཞིང་ཀུན་སློང་འདུ་ཤེས་བསྒྱུར་ཏེ་སྐུར་པ་འདེབས་འདོད་ཀྱི་བསམ་པས། སྦྱོར་བ་རྙེད་པ་སྦྱིན་པར་མི་རིགས་པ་ལ་བསྔོས་སོ་ཞེས་སྨྲས་ཏེ། མཐར་ཐུག་དོན་གོ་བ་ན་ལྟུང་བའོ། །བཅུ་པ་ཁྱད་དུ་གསོད་པའི་ལྟུང་བྱེད་ནི། རྟེན་དགེ་སློང་གིས་ཡུལ་དགེ་སློང་དག་ལ་གསོ་སྦྱོང་གི་ཚེ། འདུ་ཤེས་མ་འཁྲུལ་ཞིང་ཀུན་སློང་ཁྱད་དུ་གསོད་འདོད་ཀྱི་བསམ་པས། སྦྱོར་བ་བསླབ་པ་འདི་ལྟ་བུ་འདོན་པས་ཅི་ཞིག་བྱ་ཞེས་ཁྱད་དུ་གསོད་པའི་ཚིག་བརྗོད་ཅིང་། མཐར་ཐུག་དོན་གོ་བ་ན་ལྟུང་བའོ། །བཅུ་ཚན་གཉིས་པ་ལ་སྡོམ་ནི། ས་བོན་འཕྱ་བ་བསྒོ་བ་དང་། །ཁྲི་དང་གདིང་དང་སྐྲོད་པ་དང་། །ཕྱིས་གནོན་འབྱུང་བ་འདེབས་པ་དང་། །རིམ་པ་གཉིས་སུ་རྩིག་པའོ། །ཞེས་ཏེ། དང་པོ་ས་བོན་དང་སྐྱེ་བ་འཇིག་པའི་ལྟུང་བྱེད་ནི། རྟེན་དགེ་སློང་རྫུ་འཕྲུལ་དང་སྤྲུལ་པའི་གནས་སྐབས་མ་ཡིན་པ་བར་ཆད་དང་མི་ལྡན་པ་དོན་ཁྱད་པར་ཅན་སྒྲུབ་པའི་སྐབས་མ་ཡིན་པས། དངོས་པོ་ས་བོན་དང་སྐྱེ་བ་རང་གི་ཆོས་སུ་གྲུབ་པ་དང་མ་ཉམས་པ་རུང་བར་མ་བྱས་པ། འདུ་ཤེས་མ་འཁྲུལ་ཞིང་ཀུན་སློང་ཉམས་པར་འདུན་པས། སྦྱོར་བ་རང་ངམ་གཞན་གྱིས་བཅོམ་པས། མཐར་ཐུག་ཉམས་པ་ན་ལྟུང་བའོ། །གཉིས་པ་འཕྱ་བའི་ལྟུང་བྱེད་ནི། རྟེན་དགེ་སློང་གསོལ་བ་འབའ་ཞིག་པའི་ལས་ཀྱིས་དམན་པའི་གྲངས་སུ་བགྲངས་པས། ཡུལ་གང་ཟག་བཅུ་གཉིས་པོ་བསྐོས་པའམ་མ་བསྐོས་ཀྱང་རུང་ལ་བསྐོས་པ་བག་ཡངས་སུ་བྱས་པ་ལ་ཡང་། འདུ་ཤེས་མ་འཁྲུལ་ཞིང་ཀུན་སློང་འཕྱ་འདོད་ཀྱི་བསམ་པས་འདུ་ཤེས་བསྒྱུར་ཏེ། སྦྱོར་བ་བདག་ཉིད་དང་འབྲེལ་བའི་དོན་གྱིས་ཡུལ་དེས་ཐོས་པར་མིང་ནས་སྨོས་ཏེ་གསལ་པོར་འཕྱ་བའམ། མིང་ནས་མ་སྨོས་པར་ཁ་ཅིག་དག་འདི་ལྟར་བྱེད་དོ་ཞེས་ཟུར་གྱི་བཞོགས་འཕྱས་བྱེད་ཀྱང་རུང་། མཐར་ཐུག་དོན་གོ་བ་ན་ལྟུང་བའོ། །གང་ཟག་བཅུ་གཉིས་ནི། གནས་ཁང་ཟས་ལ་བསྐོ་བ་གཉིས། །ཐུག་པ་བག་ཚོས་འགྲིམ་པ་གཉིས། །ཕྲན་ཚེགས་འགྲིམ་པར་བྱེད་པ་དང་། །སྣོད་སྤྱད་འགྲུབ་དང་གོས་ཀྱི་གཉིས། །དབྱར་གྱི་རས་ཆེན་སྦེད་དང་འགེད། །མངག་གཞུག་པ་དང་མཛེས་ཆོས་ཏེ། །གང་ཟག་བཅུ་དང་གཉིས་པོ་དག །སྟོན་པས་ཡང་དག་བཤད་པ་ཡིན། །ཞེས་གསུངས་པ་ལྟར་རོ། །གསུམ་པ་བསྒོ་བ་རྣ་ལ་གཟོན་པའི་ལྟུང་བྱེད་ནི། རྟེན་གཞན་གྱི་སྲོག་སྐྱོབ་པ་ལ་སོགས་པའི་རྐྱེན་དང་མི་ལྡན་པའི་དགེ་སློང་གིས། ཡུལ་དགེ་སློང་ཕ་རོལ་པོས་རང་ལ་ཆོས་མཐུན་གྱི་བསྒོ་བ་དང་དྲིས་པ་ལ། འདུ་ཤེས་མ་འཁྲུལ་ཞིང་ཀུན་སློང་རྣ་ལ་གཟོན་འདོད་ཀྱི་བསམ་པས། སྦྱོར་བ་ལན་ལོག་པར་འདེབས་པའི་ཚིག་སྨྲ་བར་བརྩམས་ཏེ། མཐར་ཐུག་ཡུལ་དེས་དོན་གོ་བ་ན་ལྟུང་བའོ། །བཞི་པ་གནས་མལ་གྱི་ལྟུང་བྱེད་ནི། རྟེན་དགེ་སློང་གིས་ཡུལ་དགེ་འདུན་གྱི་གནས་མལ་ལ་ལོངས་སྤྱོད་ནས་བླ་གབ་མེད་པར་གཞག་པ་རང་གིས་མ་བསྡུས་པའམ་གཞན་སྡུད་དུ་མ་བཅུག་པར། འདུ་ཤེས་མ་འཁྲུལ་ཞིང་ཀུན་སློང་རང་གར་འདུག་པའམ་འགྲོ་འདོད་ཀྱི་བསམ་པས། སྦྱོར་བ་དེ་ལྟར་བཞག་ནས་དེ་ཉིད་དུ་འདུག་པའམ་འགྲོ་བར་བརྩམས་ཏེ། མཐར་ཐུག་དེའི་རྐྱེན་གྱིས་གནས་མལ་ཕན་ཕུན་དུ་གྱུར་རམ་མ་གྱུར་ཀྱང་གནས་མལ་ནས་འདོམ་བཞི་བཅུ་རྩ་དགུ་འདས་ནས་ཕྱིན་ན་ལྟུང་བའོ། །ལྔ་པ་གདིང་བའི་ལྟུང་བྱེད་ནི། རྟེན་དགེ་སློང་གིས་གནས་གཙུག་ལག་ཁང་དུ་སྲོག་ཆགས་ཕྲ་མོ་སྐྱེ་བའི་སར། དངོས་པོ་རྩ་དང་ལོ་མ་ལ་སོགས་པའི་གདིང་བ་བཏིང་བ་དེ། འདུ་ཤེས་མ་འཁྲུལ་ཞིང་ཀུན་སློང་རང་དགར་འདོར་འདོད་ཀྱི་བསམ་པས། སྦྱོར་བ་རང་དེར་འདུག་པའམ་གཞན་དུ་འགྲོ་བའི་ཚེ་རང་ངམ་བསྐོས་པས་མ་བསྡུས་པས། མཐར་ཐུག་ཕན་ཕུན་དུ་གྱུར་པའམ་འདོམ་བཞི་བཅུ་རྩ་དགུ་ལས་འདས་པར་ཕྱིན་ན་ལྟུང་བའོ། །དྲུག་པ་སྐྲོད་པའི་ལྟུང་བྱེད་ནི། རྟེན་དགེ་སློང་གིས་གནས་གཙུག་ལག་ཁང་ནས་ཡུལ་དགེ་སློང་ཕ་རོལ་པོ། འདུ་ཤེས་མ་འཁྲུལ་ཞིང་ཀུན་སློང་རང་དགར་སྐྲོད་འདོད་ཀྱི་བསམ་པས། སྦྱོར་བ་ཡུལ་དེ་ལ་གནོད་པ་བསལ་བའམ་དགེ་འདུན་འཁྲུག་ལོང་ཞི་བ་ལ་སོགས་པའི་དོན་མ་ཡིན་པར་རང་ངམ་གཞན་དངོས་སུ་བསྐོས་པས་སྐྲོད་པར་བརྩམས་ཏེ། མཐར་ཐུག་དེའི་རྐྱེན་གྱིས་གཙུག་ལག་ཁང་ཉེ་འཁོར་དང་བཅས་པ་ལས་འདས་པ་ན་ལྟུང་བའོ། །བདུན་པ་ཕྱིས་གནོན་བྱེད་པའི་ལྟུང་བ་ནི། རྟེན་དགེ་སློང་གིས་གནས་དགེ་འདུན་གྱི་གཙུག་ལག་ཁང་དུ་དགེ་སློང་སྔར་ཞུགས་པ་ལ། བསམ་པ་འདུ་ཤེས་མ་འཁྲུལ་ཞིང་ཀུན་སློང་མཐོ་འཚམ་པར་འདུན་པས། སྦྱོར་བ་ན་བ་དང་འཇིགས་པའི་དབང་མ་གཏོགས་པར་ལུས་ངག་གང་ཡང་རུང་བས་ཕྱིས་གནོན་བྱེད་པར་བརྩམས་ཏེ། མཐར་ཐུག་གནོད་པས་ཟིལ་གྱིས་མནན་པ་ན་ལྟུང་བའོ། །བརྒྱད་པ་རྩ་བ་འབྱུང་བ་ལ་འདུག་པའི་ལྟུང་བྱེད་ནི། རྟེན་དགེ་སློང་གིས་གནས་དགེ་འདུན་གྱི་གཙུག་ལག་ཁང་གི་སྟེང་གི་ཐོག་རྡོལ་བའི་ཉེན་དང་བཅས་པ་ལ་ཁྲིའམ་ཁྲིའུ་ཡི་རྩ་བ་རྣོན་པོ་ཕུར་བུ་ལྟར་བཀན་པའམ་རྐང་རྟེན་མ་བཅུག་པར། འདུ་ཤེས་མ་འཁྲུལ་ཞིང་ཀུན་སློང་རང་དགར་འདུག་འདོད་པའི་བསམ་པས། སྦྱོར་བ་དེ་ལ་འདུག་པ་ལ་སོགས་པ་བྱེད་པར་བརྩམས་ཏེ། མཐར་ཐུག་འདུག་པའམ་ཉལ་བའི་བྱ་བ་རྫོགས་པ་ན་ལྟུང་བའོ། །དགུ་པ་སྲོག་ཆགས་དང་བཅས་པ་ལ་འདེབས་པའི་ལྟུང་བྱེད་ནི། རྟེན་དགེ་སློང་གིས་ཆུ་དང་རྩ་དང་ཤིང་ལ་སོགས་པ་ལ་སྲོག་ཆགས་མིག་ལམ་དུ་སྣང་བཞིན་དུ། འདུ་ཤེས་མ་འཁྲུལ་ཞིང་ཀུན་སློང་རང་དོན་མ་ཡིན་པར་ལོངས་སྤྱོད་ཀྱི་བསམ་པས། སྦྱོར་བ་རང་ངམ་གཞན་བསྐོས་པས་ལོངས་སྤྱོད་པར་བརྩམས་ཏེ། མཐར་ཐུག་དེའི་རྐྱེན་གྱིས་སྲོག་ཆགས་ཇི་སྙེད་ཤི་བ་དེ་སྙེད་ཀྱི་ལྟུང་བའོ། །བཅུ་པ་རིམ་པ་ལྷག་པ་བརྩིག་པའི་ལྟུང་བྱེད་ནི། རྟེན་དགེ་སློང་གིས་སྤྱོད་ལམ་བཞི་ཤོང་བ་ཡན་ཆད་ཀྱི་གཙུག་ལག་ཁང་རྩིག་པའི་ཉི་མ་དེ་ཉིད་དམ། ཉི་མ་གཞན་ལ་ཡང་འཇིམ་པ་མེད་པར་ཕ་གུ་རིམ་པ་གསུམ་ལས་ལྷག་པར་བརྩིགས། ཆུ་ཁུང་མ་གཏོད་བརྐོས་ཏེ་རྨང་མ་བཅུག སྒོ་ཆ་གོང་མ་མ་བཅུག་པ་ལ། འདུ་ཤེས་མ་འཁྲུལ་ཞིང་ཀུན་སློང་རིམ་པ་གསུམ་ལས་ལྷག་པ་རྩིག་འདོད་ཀྱི་བསམ་པས། སྦྱོར་བ་སྦྱིན་བདག་རིངས་པའི་རྐྱེན་མེད་པར་རང་ངམ་བསྐོས་པས་རིམ་པ་གསུམ་ལས་ལྷག་པ་བརྩིག་པར་བརྩམས་ཏེ། མཐར་ཐུག་རིམ་པ་ལྷག་གཅིག་མྱུར་དུ་འཇིག་པའི་ཉེན་དང་བཅས་པ་ན་ལྷུང་བའོ། །བཅུ་ཚན་གསུམ་པ་ལ་སྡོམ་ནི། མ་བསྐོས་ཉི་མ་ནུབ་པ་དང་། །ཟས་དང་ཆོས་གོས་གཉིས་དག་དང་། །དོན་མཐུན་གྲུ་དང་དབེན་པ་གཉིས། །དགེ་སློང་མ་ཡིས་སྦྱོར་བཅུག་པའོ། །ཞེས་ཏེ། དང་པོ་མ་བསྐོས་པར་ཆོས་སྟོན་པའི་ལྟུང་བྱེད་ནི། རྟེན་མི་ཆོས་བླ་མའི་མཐུ་དང་མི་ལྡན་ཞིང་དགེ་སློང་མའི་སྟོན་པར་མ་བསྐོས་པའམ་བསྐོས་ཀྱང་མཚན་ཉིད་དང་མི་ལྡན་པའི་དགེ་སློང་གིས། འདུ་ཤེས་མ་འཁྲུལ་ཞིང་ཀུན་སློང་དགེ་སློང་མ་ལ་ཆོས་སྟོན་འདོད་ཀྱི་བསམ་པས། སྦྱོར་བ་ལུང་གི་དམ་པའི་ཆོས་ཤླཽ་ཀ་གཅིག་ཡན་ཆད་སྟོན་པར་བརྩམས་ཏེ། མཐར་ཐུག་དོན་གོ་བ་ན་ལྟུང་བའོ། །གཉིས་པ་ཉི་མ་ནུབ་ཀྱི་བར་དུ་ཆོས་སྟོན་པའི་ལྟུང་བྱེད་ནི། རྟེན་དགེ་སློང་དགེ་སློང་མའི་སྟོན་པར་བསྐོས་ཀྱང་དུས་ཉི་མ་ནུབ་ཀྱི་བར་དུ། འདུ་ཤེས་མ་འཁྲུལ་ཞིང་ཀུན་སློང་ཉི་མ་ནུབ་ནས་ཀྱང་ཆོས་སྟོན་འདོད་ཀྱི་བསམ་པས། སྦྱོར་བ་ཆོས་སྟོན། མཐར་ཐུག་དོན་གོ་བ་ན་ལྟུང་བའོ། །གསུམ་པ་ཟས་ཅུང་ཟད་ཙམ་གྱི་ཕྱིར་ཆོས་སྟོན་པའི་ལྟུང་བྱེད་ནི། རྟེན་དགེ་སློང་གིས་དགེ་སློང་ཕ་རོལ་པོ་ཟས་གོས་ཀྱི་ཕྱིར་ཆོས་སྟོན་པ་མ་ཡིན་པ་ལ། འདུ་ཤེས་བསྒྱུར་ཏེ་ཀུན་སློང་སྐུར་པ་གདབ་འདོད་ཀྱི་བསམ་པས། སྦྱོར་བ་ཟས་ཅུང་ཟད་ཙམ་གྱི་ཕྱིར་ཆོས་སྟོན་ཏོ་ཞེས་སྐུར་པ་འདེབས་པར་བརྩམས་ཏེ། མཐར་ཐུག་དོན་གོ་བ་ན་ལྟུང་བའོ། །བཞི་པ་གོས་བྱེད་པའི་ལྟུང་བྱེད་ནི། རྟེན་དགེ་སློང་གིས་ཡུལ་དགེ་སློང་མ་ཉེ་དུ་མ་ཡིན་པའི་གོས། འདུ་ཤེས་མ་འཁྲུལ་ཞིང་ཀུན་སློང་རང་དགར་བཟོ་བྱེད་འདོད་ཀྱི་བསམ་པས། སྦྱོར་བ་བཟོ་བྱེད་པར་བརྩམས་ཏེ། མཐར་ཐུག་བཟོ་ཟིན་པ་ན་ལྟུང་བའོ། །ལྔ་པ་གོས་བྱིན་པའི་ལྟུང་བྱེད་ནི། རྟེན་དགེ་སློང་གིས་དགེ་སློང་མའི་དགེ་འདུན་ལ་གོས་འབུལ་བའམ། ཕོངས་པ་ལ་སྦྱིན་པ་ལ་སོགས་པ་མ་གཏོགས་པར། ཡུལ་དགེ་སློང་མ་ཉེ་དུ་མ་ཡིན་པ་ལ། འདུ་ཤེས་མ་འཁྲུལ་ཞིང་ཀུན་སློང་མཛའ་བོ་བཤེས་ངོ་ཙམ་གྱིས་སྟེར་འདོད་པའི་བསམ་པས། སྦྱོར་བ་སྟེར་བར་བརྩམས་ཏེ། མཐར་ཐུག་ཡུལ་གྱིས་གོས་དེ་ཐོབ་པ་ན་ལྟུང་བའོ། །དྲུག་པ་དགེ་སློང་མ་དང་ལྷན་ཅིག་འགྲོན་ལམ་དུ་འགྲོ་བ་དང་། བདུན་པ་དགེ་སློང་མ་དང་ལྷན་ཅིག་གྲུར་འཇུག་པའི་ལྟུང་བྱེད་ནི། རྟེན་དགེ་སློང་གིས་ན་བ་ལ་སོགས་པའི་རྐྱེན་མེད་པར་དགེ་སློང་མ་ཉེ་དུ་མ་ཡིན་པ་དང་ལྷན་ཅིག་པའི་ལམ་རྒྱང་གྲགས་ལས་འདས་པར་འགྲོ་བ་དང་། ཆུ་ལ་བརྟེན་པའི་ལམ་ལ་ཐད་ཀར་ཕ་རོལ་ཏུ་འགྲོ་བ་དང་། གྲུར་ཞུགས་པ་དང་ཡོ་བ་དང་སྟིམ་ཆད་པ་ལ་སོགས་པའི་རྐྱེན་མེད་ཅིང་ཁྲིམས་གྲོགས་མེད་པར་རྒྱུན་ནམ་རྒྱུན་ལས་བཟློག་པས། རྒྱང་གྲགས་ལས་འདས་པ་འགྲོ་བ་ལ། འདུ་ཤེས་མ་འཁྲུལ་ཞིང་ཀུན་སློང་ལྷན་ཅིག་འགྲོ་འདོད་ཀྱི་བསམ་པས། སྦྱོར་བ་རྒྱང་གྲགས་ལས་འདས་པར་འགྲོ་བར་བརྩམས་ཏེ། མཐར་ཐུག་རྒྱང་གྲགས་རེ་རེ་འདས་པ་ན་ལྟུང་བྱེད་རེ་རེ། རྒྱང་གྲགས་ཕྱེད་ཕྱེད་འདས་པ་ན་ཉེས་བྱས་རེ་རེ་བསྐྱེད་པའོ། །བརྒྱད་པ་དབེན་པར་བུད་མེད་དང་ལྷན་ཅིག་འདུག་པ་དང་། དགུ་པ་འགྲེང་བའི་ལྟུང་བྱེད་གཉིས་ནི། རྟེན་དགེ་སློང་གིས་ཡུལ་བུད་མེད་ཉེ་དུ་མ་ཡིན་པ་དང་དབེན་པ་སྐྱབས་ཡོད་པར་འདོམ་གང་གི་བར་དུ་འདུག་པ་དང་། དགེ་སློང་མ་ཉེ་དུ་མ་ཡིན་པ་དང་ལྷན་ཅིག་དབེན་པ་སྐྱབས་ཡོད་པར་བར་འདོམ་གང་ཙམ་དུ་གཉིས་ཀ་འགྲེང་བ་སྟེ་གཉིས་ཀ་ལ། འདུ་ཤེས་མ་འཁྲུལ་ཞིང་ཀུན་སློང་རང་དགར་བུད་མེད་དང་ལྷན་ཅིག་འདུག་པ་དང་འགྲེང་བར་འདོད་པའི་བསམ་པས། སྦྱོར་བ་ཁྲིམས་གྲོགས་མེད་པར་དེ་ལྟར་བྱེད་པར་བརྩམས་ཏེ། མཐར་ཐུག་སྔ་མ་ལ་ཡུལ་རྟེན་གཉིས་ཀ་འདུག་པ་དང་། ཕྱི་མ་ལ་གཉིས་ཀ་འགྲེང་བའི་སྤྱོད་ལམ་རྫོགས་པ་ན་ལྟུང་བའོ། །བཅུ་པ་སྦྱོར་དུ་བཅུག་པའི་ལྟུང་བྱེད་ནི། རྟེན་དགེ་སློང་གིས་ཡུལ་དགེ་སློང་མ་ཉེ་དུ་མ་ཡིན་པ་སྦྱིན་བདག་ཁྱིམ་པ་ཉེ་དུ་མ་ཡིན་པ་ལ། རང་ཐོས་བསམ་སོགས་ཀྱི་ཡོན་ཏན་དང་མི་ལྡན་པ་ལ་ལྡན་ནོ་ཞེས་བརྫུན་གྱི་སྒོ་ནས་དུས་རུང་གི་ཟས་སྦྱོར་དུ་བཅུག་པ། འདུ་ཤེས་མ་འཁྲུལ་པའམ་ཐེ་ཚོམ་ཟ་བས་ཀུན་སློང་དགེ་སློང་མས་ཡང་དག་པ་མ་ཡིན་པས་ཡོན་ཏན་གྱི་སྒོ་ནས་སྦྱོར་དུ་བཅུག་པ་ཟ་འདོད་པའི་བསམ་པས། སྦྱོར་བ་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །བཅུ་ཚན་བཞི་པ་ལ་སྡོམ་ནི། ཡང་ཡང་དང་ནི་འདུག་གནས་གཅིག །ཕྱེ་དང་བཅའ་དང་སྟོབས་པ་དང་། །འདུས་དང་དུས་མིན་གསོག་འཇོག་དང་། །ཁ་ནས་མིད་དང་བསོད་པ་ཉིད། །ཅེས་ཏེ། དང་པོ་ཡང་ཡང་ཟ་བའི་ལྟུང་བྱེད་ནི། རྟེན་དགེ་སློང་ན་བ་དང་དགེ་འདུན་དང་མཆོད་རྟེན་གྱི་དོན་དུ་ཕྱག་དར་རེ་ལྡེའི་རྒྱ་ཙམ་གྱི་ལས་བྱས་པ་དང་། ལམ་དཔག་ཚད་ཕྱེད་དུ་ཕྱིན་པ་མ་ཡིན་ཞིང་སྲ་བརྐྱང་མ་བཏིང་བས། དུས་ཉི་མ་གཅིག་ལ་མགྲོན་དུ་བོས་པ་གཉིས་ལས། ཕྱི་མ་ལ་ཁྲུ་གང་དུ་ལོངས་པའི་གོས་ཀྱི་རྙེད་པ་མེད་པར་བཟའ་བ་ལྔ་དང་བཅའ་བ་ལྔའི་ཁོངས་སུ་གཏོགས་པའི་དུས་རུང་གི་ཟས་ཚད་དུ་ལོངས་པ། འདུ་ཤེས་མ་འཁྲུལ་ཞིང་ཀུན་སློང་ཟས་གཉིས་པ་ཟ་འདོད་པའི་བསམ་པས། སྦྱོར་བ་མུ་གེའི་དུས་མ་ཡིན་པར་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །གཉིས་པ་འདུག་གནས་སུ་ཟ་བའི་ལྟུང་བྱེད་ནི། རྟེན་དགེ་སློང་མིན་པས་གནས་མུ་སྟེགས་ཅན་ཤ་སྟག་གི་འདུག་གནས་སུ། མུ་སྟེགས་ཅན་གྱི་སྦྱིན་བདག་ཉེ་དུ་མ་ཡིན་པས་ཅི་བདེར་མ་བསྟབས་བཞིན་དུ། འདུ་ཤེས་མ་འཁྲུལ་ཞིང་ཀུན་སློང་འདུག་གནས་སུ་ཞག་ལོན་པའི་ཟས་ཟ་འདོད་པའི་བསམས་པས། སྦྱོར་བ་ཟས་གཉིས་པ་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །གསུམ་པ་ལྷུང་བཟེད་དོ་གསུམ་ཙམ་ལས་ལྷག་པ་ལེན་པའི་ལྟུང་བྱེད་ནི། རྟེན་དགེ་སློང་གིས་སྦྱིན་བདག་ཁྱིམ་པ་རང་ལ་ཟས་སྟོབས་ཅིང་ཅི་བདེར་སྟོབས་པ་པོ་མ་ཡིན་པ་ལ། དུས་རུང་གིས་ཟས་ལས་སུ་བྱས་པ་ལྷུང་བཟེད་འབྲིང་ཚད་དོའམ་གསུམ་སྟེ། འབྲས་མ་ཐུག་པོ་ཆེ་དྲུས་པ་སྐམ་པོ་མ་ག་དྷའི་བྲེའུ་ཆུང་ཕྱེད་དང་ལྔ་བཙོས་པས་དེ་གསུམ་འཕེལ་དུ་གྱུར་པ་དེ་སྦག་པར་ནུས་པའི་ཚོད་མ་དང་བཅས་པ་བསླང་དུ་རུང་ལ། དེ་བས་ལྷག་པ་འདུ་ཤེས་མ་འཁྲུལ་ཞིང་ཀུན་སློང་རང་དགར་བསླངས་པ་གཞན་དུ་ཟ་འདོད་པའི་བསམ་པས། སྦྱོར་བ་གཞན་དུ་ཁྱེར་ནས་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །ཤ་སླ་་་་་་ཁ་ཅིག ལྷུང་བཟེད་དོ་ལེན་ན་ཆེ་ཚད་གང་དང་ཆུང་ཚད་གང་ཡིན། གསུམ་ལེན་ན་ཆུང་ཚད་གསུམ་ལེན་པ་ཡིན་གསུང་བ་མི་འཐད་དེ། ལྷུང་བཟེད་དོ་ལེན་ཀྱང་འབྲིང་ཚད་དོ་ལེན་ལ་གསུམ་ལེན་ན་ཡང་འབྲིང་ཚད་གསུམ་བླང་བར་བྱ་བ་ཡིན་ཏེ། སོ་སོ་ཐར་པ་ལས། དགེ་སློང་འདོད་ན་ལྷུང་བཟེད་གང་བ་དོའམ་གསུམ་བླང་བར་བྱའོ་ཞེས་དང་། བམ་ལྔ་དང་འདུལ་བ་བསྡུས་པ་ལས་མཁན་པོས་འབྲིང་ཚད་ལ་བྱེད་པར་བཤད་པའི་ཕྱིར་རོ། །བཞི་པ་སྟན་གཅིག་པའི་ཟས་ཀྱི་ལྟུང་བྱེད་ནི། རྟེན་དགེ་སློང་ནད་པ་མ་ཡིན་པས་བཟའ་བར་བྱ་བའི་ཁོངས་སུ་གཏོགས་པའི་དུས་རུང་གི་ཟས་བཅའ་བར་བྱ་བ་དང་། སྐྱོ་མ་མ་ཡིན་པ་དེ་རིང་ད་མི་ཟའོ་སྙམ་པའི་སྤངས་པ་རྫོགས་པ་ལྷག་པོར་མ་བྱས་པ། འདུ་ཤེས་མ་འཁྲུལ་ཞིང་ཀུན་སློང་སྤངས་པ་རྫོགས་པ་ལྷག་པོར་མ་བྱས་པ་བཟའ་འདོད་པའི་བསམ་པས། སྦྱོར་བ་མུ་གེའི་དུས་མ་ཡིན་པར་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །སླ་་་་་་ཁ་ཅིག་བཟའ་བར་བྱ་བ་དང་བཅའ་བར་བྱ་བ་གང་རུང་སྤངས་པས་སྤངས་པ་རྫོགས་པ་ཡིན་ཏེ། ཟས་ཙམ་མོ་ཞེས་གསུངས་པའི་ཕྱིར་ཞེས་པ་མི་འཐད་དེ། སྤང་རྒྱུའི་ཟས་དེ་ལ་བཟའ་བར་བྱ་བ་དང་བཅའ་བར་བྱ་བ་གང་རུང་གིས་ཆོག་པའི་སྒྲུབ་བྱེད་དུ་ཟ་རྒྱུའི་ཟས་ལ་བཟའ་བར་བྱ་བ་དང་འཆའ་བར་བྱ་བ་གང་རུང་གིས་ཆོག་པའི་ཕྱིར་ཞེས་པ་འབྲེལ་མེད་པའི་ཕྱིར། དེས་ན་སྤངས་པ་རྫོགས་པའི་སྤང་རྒྱུའི་ཟས་ལ་བཟའ་བར་བྱ་བ་དགོས་ཏེ། བཅའ་བར་བྱ་བ་དག་དང་ཐུག་པ་ལས་གཞན་པ་ཞེས་གསུངས་པའི་ཕྱིར། ཟས་སྤངས་པ་ཟ་ན་ལྷག་པོར་བྱ་དགོས་པས། དེའི་ཚུལ་ནི་བྱིན་ལེན་བྱས་ནས་ཟས་ལག་ཏུ་བཟུང་ཏེ་ལྷག་པོར་གསོལ་བའི་ཡུལ་དགེ་སློང་ཟས་ཀྱི་གནས་མ་བཏང་བའི་མདུན་དུ་ཙོག་པུར་འདུག་སྟེ། ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་འཚལ་མ་འཚལ་ལགས་ཏེ་སྤངས་ཞིང་འཚལ་བར་བགྱིས་པ་ལས་བཟའ་བ་དང་བཅའ་བ་རྙེད་ནས་འཚལ་བར་འཚལ་ན། ཚེ་དང་ལྡན་པས་ལྷག་པོར་བགྱིས་ཏེ་བདག་ལ་སྩལ་དུ་གསོལ་ཞེས་གསོལ་བ་ལན་གཅིག་གདབ་བོ། །དེ་ནས་ཡུལ་དེས་ཟས་དེ་ལག་ཏུ་བཟུང་ནས་དེས་ཟས་མ་སྤངས་ན་ཁམ་གཉིས་སམ་སུམ་ཙམ་ཟ་ཞིང་སྤངས་ན་ཟ་མི་དགོས། དེ་ནས་ཁྱོད་ཀྱིས་འགྱུར་གྱི་བཞུད་ཅིག་ཅེས་སམ་ཅི་བདེར་གསོལ་ཅིག་ཅེས་སྨྲས་ནས་ཟ་བ་པོ་ལ་གཏད་པས་བཟར་རུང་ངོ་། །ལྔ་པ་སྤངས་པ་སྟོབ་པའི་ལྟུང་བྱེད་ནི། མུ་གེའི་དུས་མ་ཡིན་པར་རྟེན་དགེ་སློང་གིས་ཟས་རུང་བ་ཚད་ལྡན། འདུ་ཤེས་མ་འཁྲུལ་ཞིང་ཀུན་སློང་ཟས་སྤངས་པ་ལྷག་པོར་མ་བྱས་པར་སྟོབ་འདོད་ཀྱི་བསམ་པས། སྦྱོར་བ་ལྷག་པོར་བྱས་སོ་ཞེས་སྟོབས་པར་བརྩམས་ཏེ། མཐར་ཐུག་ཡུལ་དགེ་སློང་གིས་ཟོས་པ་ན་སྟོབ་པ་པོ་ལ་ལྟུང་བའོ། །དྲུག་པ་འདུས་ཤིང་ཟ་བའི་ལྟུང་བྱེད་ནི། རྟེན་དགེ་སློང་གིས་འདུས་པ་ཆེན་པོའི་དུས་མ་ཡིན་པར་མཚམས་ནང་གཅིག་ཏུ། དགེ་འདུན་སྤྱི་ལས་ལོགས་སུ་དགེ་སློང་གསུམ་ཡན་ཆད་དང་ལྷན་ཅིག་ཏུ་དུས་རུང་གི་ཟས་ཚད་ལྡན། འདུ་ཤེས་མ་འཁྲུལ་ཞིང་ཀུན་སློང་འདུས་ཤིང་ཟ་འདོད་ཀྱི་བསམ་པས། སྦྱོར་བ་ཅིག་ཅར་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །ལྟུང་བ་འདི་ཡང་ཡང་ཟ་བའི་སྐབས་བཞིན་དུ་ན་བ་དང་། ལས་བྱས་པ་དང་། ལམ་དུ་ཞུགས་པ་དང་། སྲ་བརྐྱང་བཏིང་བ་ལ་མི་བྱུང་ངོ་། །བདུན་པ་དུས་མ་ཡིན་པར་ཟ་བའི་ལྟུང་བྱེད་ནི། རྟེན་དགེ་སློང་གིས་ན་བ་ལ་སོགས་པའི་རྐྱེན་མེད་པར་དུས་རུང་གི་ཟས་རང་གི་གླིང་གི་ཉི་མ་ཕྱེད་ཡོལ་ནས་སྐྱ་རེངས་མ་ཤར་བར་ལ་དེར་འདུ་ཤེས་པའམ་ཐེ་ཚོམ་ཟ་བས། ཀུན་སློང་ཟ་འདོད་ཀྱི་བསམ་པས། སྦྱོར་བ་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །ཁ་ཅིག་དགེ་སློང་རང་ཉིད་གནས་པའི་གླིང་ལ་བྱེད་དེ། ལུང་དུ་བཙུན་པ་དུས་མ་ཡིན་པ་བཅའ་བར་བགྱི་བ་དང་བཟའ་བར་བགྱི་བ་འཚལ་བ་ལ་ལྟུང་བར་མི་འགྱུར་བ་མཆིས་སམ། བཀའ་སྩལ་པ། ཡོད་དེ་འཛམ་བུ་གླིང་པའི་དགེ་སློང་གིས་གླིང་གཞན་གསུམ་དུའོ་ཞེས་གསུངས་པའི་ཕྱིར། དེའི་དོན་ནི་འཛམ་བུ་གླིང་པའི་དགེ་སློང་གིས་ལུས་འཕགས་གླིང་དུ་དུས་སུ་ཟོས་པ་ན་འཛམ་བུ་གླིང་དུ་དུས་མ་ཡིན་པར་ཟོས་པས་ལྟུང་བར་འགྱུར་རམ་ཞེ་ན་མི་འགྱུར་ཞེས་པའོ། །ཞེས་གསུངས་པ་ཡང་མི་འཐད་དེ། དེ་ལྟར་ན་རྫས་ཀྱི་ནུས་པ་ལ་བརྟེན་ནས་གླིང་ཐམས་ཅད་དུ་བགྲོད་ནུས་པའི་དགེ་སློང་གིས་དུས་ཐམས་ཅད་དུ་ཟས་ཟ་རུང་བར་ཐལ་བའི་ཕྱིར་རོ། །དེས་ན་རང་སྐྱེས་པའི་གླིང་ལ་བྱ་དགོས་ཏེ་ལུང་སྔ་མ་དེ་ཉིད་ཀྱི་ཕྱིར་དང་། སློབ་མ་ལ་ཕན་པ་ལས། འཛམ་བུ་གླིང་པའི་དགེ་སློང་གིས་འཛམ་བུ་གླིང་གི་དུས་ཀྱི་ལུས་འཕགས་གླིང་དུ་ཉི་མ་ནུབ་པ་ན་ཟས་ཟོས་པ་ལ་ལྟུང་བ་མེད་དོ་ཞེས་གསུངས་པའི་ཕྱིར། བརྒྱད་པ་གསོག་འཇོག་གི་ལྟུང་བྱེད་ནི། རྟེན་དགེ་སློང་གི་ན་བ་ལ་སོགས་པའི་རྐྱེན་མེད་པར་སྨན་བཞི་པོ་གང་རུང་བྱིན་ལེན་བྱས་ནས་གསོག་འཇོག་བྱས་འདུ་ཤེས་མ་འཁྲུལ་ཞིང་ཀུན་སློང་རང་དགར་ཟ་འདོད་པའི་བསམ་པས། སྦྱོར་བ་མུ་གེའི་དུས་མ་ཡིན་པར་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བྱེད་དོ། །གསོག་འཇོག་ལས་འཕྲོས་ནས་ལག་ཉ། མཚམས་བཙོས། ཞག་ལོན། དགེ་སློང་གིས་བཙོས་པ་དང་བཞི་ཡོད་པའི་དང་པོ་ལག་ཉ་ནི། དགེ་སློང་མིན་པས་ངལ་བ་དང་བརྗེད་པ་དང་ཆུད་ཟ་བའི་རྐྱེན་མེད་པར་མྱུར་དུ་ལོངས་སྤྱོད་པའི་ཟས་འབྲུ་ལ་སོགས་པ་ལ་རེག་ན་ལག་ཉར་འགྱུར་རོ། །གཉིས་པ་མཚམས་བཙོས་ནི། ཁྱིམ་པ་དང་མི་ལྡན་ཞིང་རུང་ཁང་མ་ཡིན་པའི་དགེ་སློང་རང་དབང་བའི་མཚམས་དངོས་སམ། དེའི་ཉེར་འཁོར་གྱི་ནང་དུ་ཟས་དང་འབྲུ་ལ་སོགས་པ་རྗེན་པ་བཙོས་པ་ལས་འགྱུར་རོ། །གསུམ་པ་ཞག་ལོན་ནི། གཞག་པའི་གནས་དང་འཇོག་པའི་དངོས་པོ་ཕལ་ཆེ་བ་མཚམས་བཙོས་དང་འདྲ་ལ། ཞག་ལོན་པ་རྗེན་པ་ཡན་ལག་ཏུ་མི་དགོས་དེ་ལྟར་ཞག་གཅིག་འདས་པ་ན་ཞག་ལོན་དུ་འགྱུར་རོ། །བཞི་པ་དགེ་སློང་གིས་བཙོས་པ་ནི། རྟེན་དགེ་སློང་གིས་ན་བ་ལ་སོགས་པའི་རྐྱེན་མེད་པར་མྱུར་དུ་ལོངས་སྤྱོད་པའི་ཟས་དང་འབྲུ་ལ་སོགས་པ་རྗེན་པ་མཚམས་ཀྱི་ཕྱི་ནང་གང་དུ་བཙོས་ཀྱང་དེར་འགྱུར་རོ། །བཞི་པོ་དེ་ནད་ལ་ཕན་པའམ་མུ་གེའི་དུས་མ་ཡིན་པར་དགེ་སློང་གིས་ཟོས་ན་ཉེས་བྱས་སོ། །དགུ་པ་བྱིན་ལེན་མ་བྱས་པར་ཟ་བའི་ལྟུང་བྱེད་ནི། རྟེན་དགེ་སློང་གིས་གནས་བྱང་གི་སྒྲ་མི་སྙན་མ་ཡིན་པར་ནད་ལ་ཕན་པ་ལ་སོགས་པའི་རྐྱེན་མེད་པར་སྨན་བཞི་པོ་གང་རུང་བྱིན་ལེན་མ་བྱས་པ་ལ། འདུ་ཤེས་མ་འཁྲུལ་ཞིང་ཀུན་སློང་བྱིན་ལེན་མ་བྱས་པར་ཟ་འདོད་ཀྱི་བསམ་པས། སྦྱོར་བ་དེ་ལྟར་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །བྱིན་ལེན་ནི། ལེན་པའི་ཡུལ་བསླབ་པ་བྱིན་པ་དང་དགེ་སློབ་མ་དང་དགེ་ཚུལ་མན་ཆད་བསྙེན་པར་མ་རྫོགས་པ། སྦྱིན་འདོད་དང་ལྡན་པ་མི་མིན་ཡན་ཆད་ཟས་གྱེན་དུ་འདེགས་ནུས་པ། ཁྲུ་གང་ལས་མཐོ་བར་གནས་པ་མ་ཡིན་པས་ཐོབ་པའི་ཕྱོགས་དང་མདུན་དྲང་པོ་ནས། ལག་པ་གཉིས་གན་རྐྱལ་དུ་བཀན་པའི་ལུས་དངོས་སམ་དེ་དང་འབྲེལ་བས་མཚམས་གཞན་གྱིས་བར་མ་ཆོད་པར་གནས་པས། ལེན་པ་པོ་དགེ་སློང་མ་ཡན་ཆད་བསླབ་པ་གསོ་རུང་དང་ལྡན་པ་ལ་དངོས་པོ་སྨན་བཞི་པོ་གང་རུང་བྱིན་ལེན་མ་བྱས་པར་དྲངས་པའོ། །ཐོབ་པའི་ཕྱོགས་ལ་གནས་པའི་དམིགས་བསལ་ནི། སྤྲེའུ་ཤིང་གི་ཡལ་ག་ལ་གནས་པས་ཤིང་ཐོག་སྦྱིན་པ་ལྟ་བུ་བླང་དུ་རུང་ངོ་། །ལུང་དུ་བྱིན་ལེན་ལ་ལྔ་གསུངས་ཏེ། ལག་པས་ལག་པར་ནོད་པ། ལག་པ་དང་འབྲེལ་པས་ལག་པ་དང་འབྲེལ་པར་ནོད་པ། ལག་པས་ལག་པ་དང་འབྲེལ་པར་ནོད་པ། ལག་པ་དང་འབྲེལ་པས་ལག་པར་ནོད་པ། གཞག་པའི་བྱིན་ལེན་དང་ལྔའོ། །ཕྱི་མ་ནི་ཡུལ་དེས་བྱིན་ལེན་བྱས་པ་བླངས་ན་ཡུལ་ཆོས་ཀྱི་དབང་གིས་མི་སྨད་པར་བྱ་བ་ཡིན་ན་རི་མོ་བྲིས་པའི་སྟེང་དུ་ཞོ་གཅིག་ཅེས་བསྟན་ན་ཡང་བྱིན་ལེན་ཡིན་ནོ། །རེག་པ་མཚམས་གཞན་གྱི་དོན་ལ། ཤ་ལ་་་་་་ཁ་ཅིག་སོར་བཞིས་བར་མ་ཆོད་པ་དགོས་ཏེ། འགྲེལ་པར་སྒོ་འཕར་ལ་སོགས་པས་བར་མ་ཆོད་པར་ཞེས་གསུངས་པའི་ཕྱིར། ཞེས་པ་མི་འཐད་དེ་སོ་ཐར་གྱི་འགྲེལ་པ་སྦྲང་བུའི་རྐང་པ་ཅན་ལས། མཁར་སིལ་གྱི་ཡུ་བ་ཙམ་གྱིས་བར་མ་ཆོད་པ་ཞེས་གསུངས་པའི་ཕྱིར། འགྲེལ་པར་སྒོ་འཕར་ཞེས་པ་གླིང་བཞིའི་དབང་གིས་ཡིན་ནོ། །བྱིན་ལེན་བྱེད་པའི་ཀུན་སློང་ལ། འདི་ནི་སྦྱིན་པ་པོའོ་བདག་ནི་ལེན་པ་པོའོ་སྙམ་པའི་བསམ་པས་བླང་དགོས་ཏེ། ཕྲན་ཚེགས་འགྲེལ་པར་བདག་ནི་བླང་བ་པོའོ་འདི་ནི་སྦྱིན་པ་པོའོ་སྙམ་པའི་སེམས་ནི་བྱིན་ལེན་ནོ་ཞེས་གསུངས་པའི་ཕྱིར། བྱིན་ལེན་འཇིག་པ་ལ་རྒྱུ་དགུ་སྟེ། ཞོ་ལས་མར་དུ་གྱུར་པ་ལྟ་བུ་དངོས་པོ་གཞན་དུ་གྱུར་པ་དང་། ས་བོན་ལས་མྱུ་གུ་འབྱུང་བ་ལྟ་བུ་སྐྱེ་བ་གཞན་དུ་གྱུར་པ་དང་། བདག་ཉིད་དགེ་སློང་མ་ཡིན་པར་གྱུར་པ་དང་། དངོས་པོ་དེ་མ་རྫོགས་པས་ཕྲོགས་པ་དང་། མ་རྫོགས་པ་ལ་བསྔོས་པ་དང་། ལག་པས་ལེན་མི་ནུས་པར་འདྲིལ་བ་དང་། ནམ་མཁའ་ལ་ལག་པས་མི་སླེབ་པར་འཕངས་པ་དང་། རང་གིས་མ་གཟུང་བར་མ་རྫོགས་པས་རེག་པ་དང་། ལྟུང་བ་བྱུང་ནས་སྤངས་པའོ། །བཅུ་པ་བསོད་པ་སློང་བའི་ལྟུང་བྱེད་ནི། རྟེན་དགེ་སློང་ན་བ་མ་ཡིན་པས་དངོས་པོ་འོ་མ་དང་ཞོ་ལ་སོགས་པ་ཡུལ་དུས་དེར་བསོད་པར་གྲགས་པ་ཁྱིམ་པ་ཉེ་དུ་མ་ཡིན་པས་ཅི་བདེར་མ་བསྟབས་པ་ལ། འདུ་ཤེས་མ་འཁྲུལ་ཞིང་ཀུན་སློང་བསླངས་ཏེ་ཟ་བར་འདོད་པས། སྦྱོར་བ་དེ་ལྟར་བརྩམས་ནས། མཐར་ཐུག་མགུལ་དུ་མིད་པ་ན་ལྟུང་བའོ། །བཅུ་ཚན་ལྔ་པ་ལ། སྡོམ་ནི། སྲོག་ཆགས་བཅས་དང་ཉལ་སར་འདུག །འགྲེང་དང་གཅེར་བུ་དམག་དང་ནི། །ཞག་གཉིས་གཤོམ་དཀྲུགས་འགྲོ་བ་དང་། །བརྡེག་དང་གཟས་དང་གནས་ངན་ལེན། །ཞེས་ཏེ། དང་པོ་སྲོག་ཆགས་དང་བཅས་པའི་ཆུ་ལ་སྤྱོད་པའི་ལྟུང་བྱེད་ནི། རྟེན་དགེ་སློང་གིས་རང་དོན་དུ་སྲོག་ཆགས་དང་བཅས་པའི་ཆུ་ལ་ཁྲུས་དང་བཏུང་བ་སོགས་ལུས་ཀྱི་ཆེད་དང་། ཆོས་གོས་དང་ལྷུང་བཟེད་ལ་སོགས་པ་ཡོ་བྱད་ཀྱི་ཆེད་དུ་ལོངས་སྤྱོད་པ་དང་། སྲོག་ཆགས་ཅན་གྱི་ཆུ་འབབ་པ་དང་། འགོག་པ་དང་གཞན་དུ་བསྒྱུར་བ་དང་། རྩ་དང་ཤིང་གཅོད་པ་དང་མེར་འཇུག་པ་ལ་སོགས་པ་ལ། འདུ་ཤེས་མ་འཁྲུལ་ཞིང་ཀུན་སློང་སྲོག་ཆགས་དང་བཅས་པར་ཤེས་བཞིན་དུ། སྦྱོར་བ་རང་ངམ་བསྐོས་པས་ལོངས་སྤྱོད་པར་བརྩམ་ཏེ། མཐར་ཐུག་སྲོག་ཆགས་ཇི་སྙེད་ཅིག་ཤི་བ་དེ་སྙེད་ཀྱི་ལྟུང་བར་འགྱུར་རོ། །འདིར་ཆུ་འཚག་དགོས་པས་འདི་ལ་ལྔ་སྟེ། སྤྱད་འཚག་དང་། བུམ་འཚག་ལྕེའུ་ཅན་དང་། གྲུ་གསུམ་འཚག་དང་། རིལ་བ་ཞབས་འཚག་ཅན་དང་། གསལ་འཚག་དང་ལྔའོ། །ཆུ་རུང་བ་ལྔ་སྟེ། དགེ་འདུན་དང་། གང་ཟག་དང་། ཆུ་འཚག་དང་། ཆུ་རུང་བ་དང་། ཆུ་བརྟགས་ཏེ་རུང་བའོ། །གཉིས་པ་ཉལ་པོ་བྱེད་པར་ཤོམ་པའི་ཁྱིམ་ན་འདུག་པའི་ལྟུང་བྱེད་ནི། རྟེན་དགེ་སློང་གིས་བར་ཆད་ཀྱི་ཆོས་དང་མི་ལྡན་བཞིན་དུ་ཁྱིམ་པ་ཕོ་མོ་སྤྲོད་པ་ལ་ཞུགས་པའམ་ཕྱོགས་པ་ལ། འདུ་ཤེས་མ་འཁྲུལ་ཞིང་ཀུན་སློང་དེ་དག་དང་གནས་གཅིག་ཏུ་འདུག་པར་འདོད་པས། སྦྱོར་བ་མངོན་སུམ་དང་བརྟགས་ཏེ་འདུག་པར་བརྩམས་ནས། མཐར་ཐུག་དེ་དག་གིས་ཚོར་སར་འདུག་པ་ན་ལྟུང་བའོ། །གསུམ་པ་ཉལ་པོ་བྱེད་པར་ཤོམ་པའི་ཁྱིམ་ན་འགྲེང་བའི་ལྟུང་བྱེད་ནི། ཁྱིམ་དེར་ཤེས་བཞིན་དུ་དབེན་པ་སྐྱབས་ཡོད་པར་འགྲེངས་ཏེ་འདུག་པ་སྟེ། རྟེན་ལ་སོགས་པ་གོང་བཞིན་ནོ། །བཞི་པ་གཅེར་བུ་ལ་ཟོས་བྱིན་པའི་ལྟུང་བྱེད་ནི། རྟེན་དགེ་སློང་གིས་མུ་སྟེགས་གཅེར་བུ་ཕོ་མོ་གང་རུང་ཉེ་དུའམ་ནད་པའམ་དགེ་བ་ལ་སྦྱོར་བའི་དོན་མ་ཡིན་པར་དུས་རུང་གི་ཟས་རང་དང་དེ་གཉིས་ཀས་བཟར་རུང་བ། འདུ་ཤེས་མ་འཁྲུལ་ཞིང་རང་དགར་སྦྱིན་པར་འདོད་པས། སྦྱོར་བ་རང་གི་ལག་གིས་སྟེར་བར་བརྩམས་ཏེ། མཐར་ཐུག་དེས་ཐོབ་པ་ན་ལྟུང་བའོ། །ལྔ་པ་དམག་ལ་བལྟ་བའི་ལྟུང་བྱེད་ནི། བར་ཆད་ཀྱི་རྐྱེན་དང་མི་ལྡན་པའི་དགེ་སློང་གིས་ཁྱིམ་པའི་དམག་མཚན་ཉིད་དང་ལྡན་པ་འཐབ་པའམ་འཐབ་པའི་ཆས་སུ་ཞུགས་པ་ལ། འདུ་ཤེས་མ་འཁྲུལ་ཞིང་ཀུན་སློང་བལྟ་འདོད་ཀྱི་བསམ་པས། སྦྱོར་བ་རྒྱལ་པོ་ལ་སོགས་པས་བཀུག་པ་མ་ཡིན་པར་རང་གི་གནས་ཉེ་འཁོར་དང་བཅས་པ་ལས་འདས་ནས་བལྟ་བར་བརྩམས་ཏེ། མཐར་ཐུག་མཐོང་བ་ན་ལྟུང་བྱེད་དོ། །དྲུག་པ་དམག་གི་ནང་ན་གནས་པའི་ལྟུང་བྱེད་ནི། རྟེན་དང་ཡུལ་སྔ་མ་བཞིན་ལ་གནས་དམག་གི་ནང་དུ་དགོས་པ་དང་མི་ལྡན་པར། འདུ་ཤེས་མ་འཁྲུལ་ཞིང་ཀུན་སློང་དམག་གི་ནང་དུ་གནས་འདོད་ཀྱི་བསམ་པས། སྦྱོར་བ་ཞག་གཉིས་ལས་འདས་པར་གནས་པར་བརྩམས་ཏེ། མཐར་ཐུག་མཚན་མོ་གཉིས་པ་འདས་ནས་ཕྱི་མའི་སྐྱ་རེངས་ཤར་བ་ན་ལྟུང་བའོ། །བདུན་པ་དཔུང་གི་ཡན་ལག་ཉམས་སུ་མྱོང་བའི་ལྟུང་བྱེད་ནི། རྟེན་དང་ཡུལ་གོང་བཞིན་ལ། འདུ་ཤེས་མ་འཁྲུལ་ཞིང་ཀུན་སློང་དཔུང་གི་ཡན་ལག་ཉམས་སུ་མྱོང་བར་འདོད་པས། སྦྱོར་བ་དཀྲུགས་པར་བརྩམས་ཏེ། མཐར་ཐུག་རེག་པའམ་གཡུལ་གཤོམ་པ་དཀྲུགས་པ་ལ་སོགས་པའི་བྱ་བ་རྫོགས་པ་ན་ལྟུང་བའོ། །བརྒྱད་པ་བརྡེག་པའི་ལྟུང་བྱེད་ནི། རྟེན་དགེ་སློང་གིས་ཡུལ་དགེ་སློང་ཕ་རོལ་པོ་ལ་ཕན་པའི་དོན་མ་ཡིན་པར་ལུས་སམ་དེས་འཕངས་པའམ། དེ་དང་འབྲེལ་བའི་དབྱུག་པ་ལ་སོགས་པའམ་ཡུངས་ཀར་ཙམ་ཡང་། འདུ་ཤེས་མ་འཁྲུལ་ཞིང་ཀུན་སློང་རྙོག་པ་ཅན་གྱི་སེམས་ཀྱིས། སྦྱོར་བ་བརྡེག་པར་བརྩམས་ཏེ། མཐར་ཐུག་ཕོག་པ་ན་རྡེག་སྤྱད་རེ་རེ་ལ་ལྟུང་བ་རེ་རེའོ། །དགུ་པ་བརྡེག་པར་གཟས་པའི་ལྟུང་བྱེད་ནི། གོང་གི་བརྡེག་ཅེས་པའི་གནས་སུ་བརྡེག་པར་གཟས་པ་ཞེས་པ་བཅུག་སྟེ་ཡན་ལག་གཞན་ཐམས་ཅད་སྔ་མ་བཞིན་ནོ། །གཟས་པའི་ཚུལ་ནི་བརྡེག་ཚུལ་བྱེད་པའོ། །བཅུ་པ་གནས་ངན་ལེན་འཆབ་པའི་ལྟུང་བྱེད་ནི། རྟེན་དགེ་སློང་གིས་ཡུལ་སྡོམ་པ་གསོར་རུང་ཡན་ཆད་ཀྱི་ཕམ་ལྷག་གང་རུང་གི་ལྟུང་བ། འདུ་ཤེས་མ་འཁྲུལ་ཞིང་ཀུན་སློང་བདེ་བ་ལ་མི་རེག་པ་དང་། དགེ་སྦྱོང་གི་ཚུལ་དང་། སྲོག་དང་ཚངས་སྤྱོད་ཀྱི་བར་ཆད་དང་། དགེ་འདུན་འཁྲུགས་ཀྱི་དོགས་པའི་དབང་མ་གཏོགས་པར་འཆབ་འདོད་ཀྱི་བསམ་པས། སྦྱོར་བ་དེ་ལྟར་འཆབ་པར་བརྩམས་ཏེ། མཐར་ཐུག་མཚན་མོ་འདས་པ་ན་ལྟུང་བའོ། །བཅུ་ཚན་དྲུག་པ་ལ་སྡོམ་ནི། བདེ་དང་མེད་དང་འདུན་པ་དང་། །བསྙེན་པར་མ་རྫོགས་ཆོས་དང་སྨྲ། །དགེ་ཚུལ་ཁ་དོག་བསྒྱུར་བ་དང་། །རིན་པོ་ཆེ་དང་ཚ་བའི་དུས། །ཞེས་ཏེ། དང་པོ་ཟས་གཅོད་པའི་ལྟུང་བྱེད་ནི། རྟེན་དགེ་སློང་གིས་ཡུལ་ཟན་བཅད་པས་ཕན་པའི་ནད་པ་མ་ཡིན་པའི་དགེ་སློང་ལ། སྦྱིན་བདག་གིས་དུས་རུང་གི་ཟས་རུང་བ་ཚད་ལྡན་འདྲེན་པར་བསྔོས་པ། འདུ་ཤེས་མ་འཁྲུལ་ཞིང་ཀུན་སློང་ཟན་བཅད་འདོད་ཀྱི་བསམ་པས། སྦྱོར་བ་ཟན་གཅོད་པའི་ཚིག་སྨྲ་བར་བརྩམས་ནས། མཐར་ཐུག་ཡུལ་དེའི་ཟན་ཆད་ནས་གུང་ཚིགས་ཡོལ་བ་ན་ལྟུང་བའོ། །གཉིས་པ་མེ་ལ་རེག་པའི་ལྟུང་བྱེད་ནི། རྟེན་དགེ་སློང་གིས་དཀོན་མཆོག་དང་ཚངས་པར་མཚུངས་པ་རྣམས་ཀྱི་ཆོས་ལྡན་གྱི་དོན་དང་ལྷུང་བཟེད་དང་ཚོན་གྱི་ལས་ལ་སོགས་པ་ལ་དུས་བྱིན་གྱིས་བརླབས་པ་མ་གཏོགས་པ། འདུ་ཤེས་མ་འཁྲུལ་ཞིང་ཀུན་སློང་མེ་ལ་རེག་འདོད་ཀྱི་བསམ་པས། སྦྱོར་བ་རང་ངམ་གཞན་ལ་མངོན་སུམ་དུ་བསྐོས་ཏེ། མཐར་ཐུག་མེ་ལ་རེག་པ་དང་སྦར་བ་དང་གསོད་པ་ལ་སོགས་པ་བྱས་ན་ལྟུང་བའོ། །འདིར་དུས་དྲན་བྱེད་ཚུལ་ལ་ཁ་ཅིག་གཞི་གང་ལ་བྱ་བ། ཚུལ་ཇི་ལྟར་བྱ་བ་གཉིས་ལས། དང་པོ་ནི། སྔར་བཀག་ལ་ཕྱིས་གནང་བའི་གཞི་ལ་དུས་དྲན་བྱེད་ལ་དམིགས་བསལ་ཡུལ་ངེས་པ། དུས་ངེས་པ། ཕྱོགས་ངེས་པ། གཞི་ངེས་པ་དང་བཞི། སླ་་་་་་ཁ་ཅིག་དེའི་སྟེང་དུ་རྟེན་ངེས་པ་དང་ལྔ། དང་པོ་ནི། ཨ་སྨ་པ་རནྟའི་ཡུལ་དུ་རྟག་ཏུ་ཁྲུས་བྱེད་པ་དང་། གཉིས་པ་ནི། སོས་ཀ་རྣམས་ཀྱི་ཟླ་བ་ཕྱེད་དང་གཉིས་དང་དབྱར་རྣམས་ཀྱི་ཟླ་བ་དང་པོ་གཉིས་ཀྱི་དུས་སུ་ཉི་མ་རེ་རེ་ཞིང་ཁྲུས་བྱེད་པ་དང་། གསུམ་པ་ནི། ནང་མ་རེ་རེ་བཞིན་གདོང་ཁྲུ་བ་ལ་དུས་དྲན་མི་དགོས་ཏེ། ཀཱ་རི་ཀ་ལྔ་བཅུ་པར། ནངས་པར་སྔར་ལངས་ཏེ། །གདོང་དང་སོ་ཡི་དྲི་བཀྲུས་ནས། །ཞེས་དང་། སུམ་བརྒྱ་པར། ཁ་དང་གདོང་གི་དྲི་བཀྲུས་ནས། །ཞེས་དང་། གདོང་ཕྱིས་བཅང་བར་བྱའོ། །ཞེས་གསུངས་པའི་ཕྱིར། ཞེས་གསུངས་པ་ནི་མི་འཐད་དེ་སྒྲ་མི་སྙན་དུ་དགེ་སློང་གིས་བྱིན་ལེན་མ་བྱས་པར་ཟས་ཟ་བ་ལ་དུས་དྲན་བྱེད་མི་དགོས་པར་ཐལ། དམ་བཅའ་སྔ་མ་དེའི་ཕྱིར། འདོད་མི་ནུས་ཏེ། ལུང་ལས་སྒྲ་མི་སྙན་དུ་དུས་བྱིན་གྱིས་མ་བརླབས་པར་ཁའི་སྒོ་ནས་ཟས་མིད་ན་ཉེས་བྱས་སུ་འགྱུར་ཞེས་གསུངས་པའི་ཕྱིར། ཨ་སྨ་པ་རནྟའི་ཡུལ་དུ་རྟག་ཏུ་ཁྲུས་བྱེད་པ་ལ་དུས་དྲན་མི་དགོས་པ་མ་གྲུབ་སྟེ། ཊཱི་ཀར་དེར་ཡང་བློ་གྲོས་དེ་ཉེ་བར་བཞག་སྟེ་ཁྲུས་བྱ། ཞེས་གསུངས་པའི་ཕྱིར། གཉིས་པ་ཡང་མི་འཐད་དེ་སོས་ཀ་རྣམས་ཀྱི་ཟླ་བ་ལྷག་མ་ཕྱེད་དང་གཉིས་དང་། དབྱར་རྣམས་ཀྱི་ཟླ་བ་དང་པོ་གཉིས་ཀྱི་དུས་སུ་ཉི་མ་རེ་རེ་བཞིན་ཁྲུས་བྱེད་པ་སྔར་མ་བཀག་པའི་ཕྱིར། གསུམ་པ་མི་འཐད་དེ་གླེང་གཞིར་རིགས་ཀྱི་འཚོ་བའི་མནའ་མ་དང་སྨད་འཚོང་མ་དག་ནངས་མ་རེ་རེ་བཞིན་ཁྲུས་བྱེད་མོད། འཕགས་པ་རྣམས་ནངས་མ་རེ་རེ་བཞིན་ཁྲུས་མཛད་དེ་ཅི་ཞིག་བགྱི། ཞེས་སྨྲས་པ་ལ་བརྟེན་ནས་ནངས་མ་རེ་རེ་བཞིན་ཁྲུས་བྱེད་པ་བཀག་པ་ཡིན་ལ། ནངས་མ་རེ་རེ་བཞིན་གདོང་འཁྲུ་དགོས་ན་དགག་བྱ་དེ་སོ་ན་གནས་པའི་ཕྱིར། གཞན་ཡང་ནངས་མ་རེ་རེ་བཞིན་ལུས་འཁྲུ་དགོས་པར་ཐལ། ལུས་ཕྱིས་བཅང་བར་བྱའོ། །ཞེས་གསུངས་པའི་ཕྱིར། ཁྱབ་པ་ཁས། ཀཱ་རི་ཀཱའི་དོན་ནི་ཁ་ལ་གདོང་དུ་བསྒྱུར་བ་ཡིན་ཏེ། མུ་ཁ་ཞེས་པའི་སྒྲ་ཁ་དང་གདོང་གཉིས་ཀ་ལ་འཇུག་པའི་ཕྱིར། དེས་ན་ཁ་དང་སོ་ཡི་དྲི་བཀྲུས་ནས། །ཞེས་པའི་དོན་ཡིན་ནོ། །བཞི་པ་ཡང་མི་འཐད་དེ། སུམ་བརྒྱ་པར། མི་མ་ཡིན་པ་དང་གནོད་སྦྱིན་གྱི་གནས་སུ་རིན་པོ་ཆེའི་ཁྲི་དང་ཐེམ་སྐས་སོགས་ལ་ལོངས་སྤྱོད་པའི་ཚེ་མྱུར་དུ་འཇིག་པ་ཡིན་བསམ་པས་མི་རྟགས་པས་ཉེན་པར་ཡིད་ལ་བྱ་སྟེ་འདུག་པ་སོགས་བྱེད་པར་བཤད་པའི་ཕྱིར། ལྔ་པ་ཡང་མི་འཐད་དེ་ཁྱེད་ཀྱི་རྟེན་ངེས་པ་དེ་ལྟ་ན་སྒྲ་མི་སྙན་དུ་དགེ་སློང་གིས་ཟས་བྱིན་ལེན་མ་བྱས་པར་ཟ་བ་དང་། ཟན་ཆད་པའི་གང་ཟག་གིས་བྱིན་ལེན་མ་བྱས་པར་ཟ་བ་ལ་ཡང་དུས་དྲན་མི་དགོས་པར་འགྱུར་ལ། འདོད་ན་སྒྲ་མི་སྙན་པའི་དུས་དྲན་དགོས་པའི་གཞི་མེད་པར་འགྱུར་རོ། །རང་ལུགས་ལ་སྔར་བཀག་པ་ཕྱིས་གནང་བའི་གཞི་ལ་དུས་དྲན་བྱེད་པ་ཡིན་ཏེ། དེས་ན་མེ་ལ་དུས་དྲན་དགོས་པའི་དུས་སུ་དུས་དྲན་མ་བྱས་པར་རེག་ན་དུས་དྲན་མ་བྱས་པའི་ཉེས་བྱས་དང་། མེ་ལ་རེག་པའི་ལྟུང་བྱེད་གཉིས་སྐྱེད་ལ། དེ་བཞིན་དུ་རིན་པོ་ཆེ་ལས་བྱས་པའི་དེ་བཞིན་གཤེགས་པའི་སྐུ་གཟུགས་ལ་དུས་དྲན་མ་བྱས་པར་རེག་ན་དུས་དྲན་མ་བྱས་པའི་ཉེས་བྱས་དང་། རིན་པོ་ཆེ་ལ་རེག་པའི་ལྟུང་བྱེད་གཉིས་སྐྱེད་པ་སོགས་སྤྲོས་ཏེ་ཤེས་པར་བྱའོ། །དུས་དྲན་བྱེད་པའི་ཚུལ་ལ་ནད་པ་སོགས་ལ་ཕྱི་དྲོའི་ཁ་ཟས་ཟ་བའི་ཚེ་སྒྲ་མི་སྙན་པའི་དུས་དྲན་ཏེ། སྟོན་པས་གནང་བས་དངོས་པོ་འདི་རྣམས་ལ་བདག་དང་བདག་གིར་འཛིན་པ་ཡང་མེད། འཛིན་པ་པོ་དང་བསྔོ་བ་པོ་ལ་སོགས་པ་ཡང་ཡང་དག་པར་མེད་པའི་དོན་དྲན་པ་དང་། རིན་པོ་ཆེ་ལས་བྱས་པའི་དེ་བཞིན་གཤེགས་པའི་སྐུ་གཟུགས་ལ་རེག་པའི་ཚེ་འདི་ནི་བདག་གི་སྟོན་པའི་སྐུའོ་སྙམ་པའི་དྲན་པ་དང་ཆོས་ལྡན་གྱི་དགོས་པ་ཡིན་པའི་ཕྱིར་མེ་ལ་སོགས་པ་ལ་རེག་པའི་བྱ་བ་འདི་ནི་སྟོན་པས་གནང་བས་རུང་སྙམ་པས་དུས་དྲན་པ་ལ་སོགས་པ་དུ་མ་ཡོད་དོ། །གསུམ་པ་འདུན་པ་ཕྱིར་བསྒྱུར་གྱི་ལྟུང་བྱེད་ནི། རྟེན་དགེ་སློང་གིས་དགེ་འདུན་གི་ཆོས་ལྡན་གྱི་ལས་མཚན་ཉིད་པ་རང་གི་འདུན་པ་ཕུལ་བ་ལ། འདུ་ཤེས་མ་འཁྲུལ་ཤིང་ཀུན་སློང་འདུན་པ་ཕྱིར་བསྒྱུར་འདོད་ཀྱི་བསམ་པས་སྦྱོར་བ་བདག་འདུན་པ་མི་འབུལ་གྱི་ཕྱིར་འོན་ཅིག་ཅེས་པའི་ཚིག་སྨྲ་བར་བརྩམས་ཏེ། མཐར་ཐུག་དོན་གོ་བ་ན་ལྟུང་བའོ། །བཞི་པ་བསྙེན་པར་མ་རྫོགས་པ་དང་ལྷན་ཅིག་ཉལ་བའི་ལྟུང་བྱེད་ནི། རྟེན་ན་བ་དང་ནད་གཡོག་མ་ཡིན་པའི་དགེ་སློང་གིས། དགེ་སློང་སྡིག་ཅན་ཉེ་བར་གནས་པ་དང་དགེ་ཚུལ་ལམ་གྱིས་དུབ་པ་སོགས་ཀྱི་རྐྱེན་དང་མི་ལྡན་པར། འདུ་ཤེས་མ་འཁྲུལ་ཞིང་ཀུན་སློང་རང་དགར་མ་རྫོགས་པ་དང་ལྷན་ཅིག་ཉལ་འདོད་ཀྱི་བསམ་པས། སྦྱོར་བ་མཚམས་གཞན་གྱིས་བར་མ་ཆོད་པར་ཁྲུ་ཕྱེད་དང་དགུའི་ནང་རོལ་གྱི་གནས་གཅིག་ཏུ་ནུབ་གསུམ་བསྟུད་མར་རང་དང་མ་རྫོགས་པ་གཉིས་ཀ་ཉལ་ཞིང་གཉིད་ལོག་པ་ནས་བརྩམས་ཏེ། མཐར་ཐུག་སྤྱོད་ལམ་དེས་ནུབ་གསུམ་པའི་མཚན་མོ་དེའི་སྐད་ཅིག་མ་འདས་པ་ན་ལྟུང་བའོ། །ལྔ་པ་སྡིག་ལྟ་མི་གཏོང་བའི་ལྟུང་བྱེད་ནི། རྟེན་དགེ་སློང་གི་ཆང་འཐུང་བ་ལྟ་བུ་བཅོམ་ལྡན་འདས་ཀྱིས་མཐོ་རིས་དང་ཐར་པའི་བར་ཆད་དུ་གསུངས་པ་དེ་དག་བསྟེན་ཡང་བར་ཆད་དུ་མི་འགྱུར་རོ་ཞེས། འདུ་ཤེས་མ་འཁྲུལ་བར་རློམ་པས་ཀུན་སློང་སྐུར་པ་གདབ་འདོད་ཀྱི་བསམ་པས། སྦྱོར་བ་སྐུར་པ་འདེབས་པ་ལ་ཞུགས་པའི་ཚེ་དགེ་འདུན་གྱི་བཞམ་བསྒོ་དང་གསོལ་བཞིའི་ལས་ཀྱིས་བཟློག་ཀྱང་། མཐར་ཐུག་བརྗོད་པ་གསུམ་པའི་མཐའ་ལ་མི་གཏོང་ན་ལྟུང་བའོ། །དྲུག་པ་སྤངས་པའི་རྗེས་ཕྱོགས་ཀྱི་ལྟུང་བྱེད་ནི། རྟེན་དགེ་སློང་གིས་སྡིག་ལྟ་ཅན་བཟོད་པར་མ་གསོལ་བ་དགེ་འདུན་གྱིས་གནས་ནས་ཕྱུང་བ་ལ། འདུ་ཤེས་མ་འཁྲུལ་ཞིང་ཀུན་སློང་གནས་དབྱུང་དེ་དང་ལྷན་ཅིག་གཏམ་འདྲེ་བ་དང་ཉལ་འདོད་སོགས་ཀྱི་བསམ་པས། སྦྱོར་བ་ན་བ་དང་ཆོས་ལྡན་གྱི་དོན་མ་གཏོགས་པར་ལྷན་ཅིག་གཏམ་འདྲེ་བ་སོགས་བྱེད་པ་བརྩམས་ཏེ། མཐར་ཐུག་དེ་དང་ལྷན་ཅིག་གཏམ་འདྲེ་བ་སོགས་དང་ཉལ་བ་སོགས་བྱས་ནས་མཚན་མོ་དེའི་མཐའི་སྐད་ཅིག་མ་འདས་པ་ན་ལྟུང་བའོ། །བདུན་པ་དགེ་ཚུལ་བསྙིལ་བ་སྡུད་པའི་ལྟུང་བྱེད་ནི། རྟེན་དགེ་སློང་གིས་དགེ་ཚུལ་སྡིག་ལྟ་ཅན་བཟོད་པར་མི་གསོལ་བ་བསྙིལ་བ་ན་བ་དང་འདུལ་བ་ལ་སོགས་པའི་དོན་མ་ཡིན་པར་འདུ་ཤེས་མ་འཁྲུལ་ཞིང་ཀུན་སློང་བསྙིལ་བ་སྡུད་འདོད་ཀྱི་བསམ་པས། སྦྱོར་བ་གཉིས་ཀ་ལྷན་ཅིག་གཏམ་འདྲེ་བ་དང་ཉལ་བ་ལ་སོགས་པ་བྱེད་པར་བརྩམས་ཏེ། མཐར་ཐུག་དེ་དང་ལྷན་ཅིག་དེ་ལྟར་བྱས་ནས་དེའི་མཚན་མོ་མཐའི་སྐད་ཅིག་མ་འདས་པ་ན་ལྟུང་བའོ། །བརྒྱད་པ་ཁ་མ་བསྒྱུར་བའི་གོས་གྱོན་པའི་ལྟུང་བྱེད་ནི། རྟེན་དགེ་སློང་གིས་ཆུ་འཚག་མ་གཏོགས་ལྷུང་བཟེད་ཀྱི་ཁ་གཡོགས་ཙམ་གྱིས་གོས་དཀར་པོ་ལ། འདུ་ཤེས་མ་འཁྲུལ་ཞིང་ཀུན་སློང་ཁ་མ་བསྒྱུར་བའི་གོས་དཀར་པོ་ལོངས་སྤྱོད་འདོད་ཀྱི་བསམ་པས། སྦྱོར་བ་དེ་ལྟར་ལོངས་སྤྱོད་པར་བརྩམས་ཏེ། མཐར་ཐུག་ལོངས་སྤྱོད་པ་ན་ལྟུང་བའོ། །འདིར་ཚོས་ཆེན་བརྒྱད་ཀྱིས་ཁ་བསྒྱུར་བའི་གོས་བགོ་བ་ལ་ཉེས་བྱས་སུ་གསུངས་པའི་ཚོས་ཆེན་བརྒྱད་ནི། སུམ་བརྒྱ་པ། མཚལ་དང་དེ་བཞིན་རྒྱ་སྐྱེགས་བརྩོད་རྣམས་དང་། །གུར་གུམ་དང་ནི་ཐང་ཤིང་ལི་ཁྲི་དང་། །སྨ་ཤིང་ལེ་བརྒན་རྩི་རྣམས་མི་རུང་སྟེ། །བརྒྱད་པོ་ཚོན་ཆེན་ཡིན་པས་བཀག་ཕྱིར་རོ། །ཞེས་སོ། །དགུ་པ་ལོངས་པའི་གཞིར་གཏོགས་ཀྱི་ལྟུང་བྱེད་ནི། རྟེན་དགེ་སློང་གིས་ཆུད་འཛའ་བའི་རྐྱེན་མེད་ཅིང་སྦྱིན་བདག་བསོད་ནམས་འདོད་པས་བསྟབས་པའམ། མི་མ་ཡིན་པའི་གནས་སུ་བསོད་ནམས་ལས་གྲུབ་པ་ལྟ་བུ་མ་ཡིན་པ་རང་མི་དབང་བའི་རིན་པོ་ཆེའམ། རིན་པོ་ཆེར་སྨོས་པ་རོལ་མོར་སྤྱད་པའི་ལག་ཆའམ་གཡུལ་དུ་སྤྱད་པའི་མཚོན་ཆ་དགོས་པ་སྒྲུབ་ནུས་ལ། འདུ་ཤེས་མ་འཁྲུལ་ཞིང་དགོད་བག་གིས་རེག་འདོད་ཀྱི་བསམ་པས། སྦྱོར་བ་རང་ངམ་བསྐོས་པས་མངོན་སུམ་དུ་རེག་པར་བརྩམས་ཏེ། མཐར་ཐུག་རེག་པ་ན་ལྟུང་བའོ། །བཅུ་པ་ཁྲུས་བྱེད་པའི་ལྟུང་བྱེད་ནི། རྟེན་ཁྲུས་ཀྱིས་ཕན་པའི་ནད་པ་དང་ལས་བྱས་པ་དང་ལམ་དུ་ཞུགས་པ་མ་ཡིན་པའི་དགེ་སློང་གིས། དུས་དབྱར་ཟླ་རྭ་བའི་ཚེས་གཅིག་ནས་དབྱར་ཟླ་ཐ་ཆུང་གི་ཉའི་བར་ཟླ་བ་ཕྱེད་དང་གསུམ་མ་གཏོགས་པ་རྐྱེན་དང་མི་ལྡན་པར། འདུ་ཤེས་མ་འཁྲུལ་ཞིང་ཀུན་སློང་རང་དགར་ཁྲུས་བྱེད་འདོད་ཀྱི་བསམ་པས། སྦྱོར་བ་ཟླ་བ་ཕྱེད་ཕྱེད་ཀྱི་ནང་དུ་ཁྲུས་བྱེད་པར་བརྩམས་ཏེ། མཐར་ཐུག་ལུས་རིལ་པོ་ཁྲུས་བྱེད་ན་ལྟུང་བའོ། །བཅུ་ཚན་བདུན་པ་ལ། སྡོམ་ནི། དུད་འགྲོ་འགྱོད་པ་སོར་མོ་དང་། །རྩེ་དང་ལྷན་ཅིག་སྔངས་བྱེད་དང་། །སྦེད་དང་གདེང་མེད་གཞི་མེད་དང་། །སྐྱེས་པ་མེད་པར་ལམ་འགྲོ་བའོ། །ཞེས་ཏེ། དང་པོ་དུད་འགྲོ་གསོད་པའི་ལྟུང་བྱེད་ནི། རྟེན་དགེ་སློང་གིས་དུད་གྲོར་གཏོགས་པའི་སྲོག་ཆགས། འདུ་ཤེས་མ་འཁྲུལ་ཞིང་ཀུན་སློང་གསོད་སེམས་ཀྱིས། སྦྱོར་བ་རང་ངམ་གསོད་པར་བསྐོས་པས་གསོད་པར་བརྩམས་ཏེ། མཐར་ཐུག་དེའི་རྐྱེན་གྱིས་ཤི་ན་ཇི་སྙེད་ཤི་བ་དེ་སྙེད་ཀྱི་ལྟུང་བའོ། །གཉིས་པ་འགྱོད་པ་བསྐྱེད་པའི་ལྟུང་བྱེད་ནི། རྟེན་དགེ་སློང་གིས་དགེ་སློང་ཕ་རོལ་ལ། འདུ་ཤེས་མ་འཁྲུལ་ཞིང་ཀུན་སློང་ཡིད་མི་བདེ་བ་སྐྱེད་འདོད་ཀྱི་བསམ་པས། སྦྱོར་བ་བཞད་གད་ཡན་ཆད་ཀྱིས་ཁྱོད་ལ་སྡོམ་པ་མ་སྐྱེས་སོ་ཞེའམ། སྐྱེས་ཀྱང་ཕམ་པ་བྱུང་བའོ་ཞེས་སོགས་ཀྱིས་འགྱོད་པ་སྐྱེད་པའི་ཚིག་སྨྲ་བར་བརྩམས་ཏེ། མཐར་ཐུག་དོན་གོ་བ་ན་ལྟུང་བའོ། །གསུམ་པ་ག་ག་ཚིལ་བྱེད་པའི་ལྟུང་བྱེད་ནི། རྟེན་དགེ་སློང་གིས་དགེ་སློང་ཕ་རོལ་ལ་སྐྱི་གཡའ་བའི་གནས་རྣམས་སུ། འདུ་ཤེས་མ་འཁྲུལ་ཞིང་ཀུན་སློང་སྐྱི་གཡའ་བར་བྱ་བའི་བསམ་པས། སྦྱོར་བ་རེག་པར་བརྩམས་ཏེ། མཐར་ཐུག་རེག་ནས་སྐྱི་གཡའ་བར་བྱས་པ་ན་ལྟུང་བའོ། །བཞི་པ་ཆུ་ལ་རྩེ་བའི་ལྟུང་བྱེད་ནི། རྟེན་དགེ་སློང་གིས་འཇིག་རྟེན་ན་གྲགས་པའི་ཆུ་ལ། འདུ་ཤེས་མ་འཁྲུལ་ཞིང་ཀུན་སློང་དགོད་བག་གི་དགའ་བ་ཉམས་སུ་མྱོང་བར་བྱ་བའི་བསམ་པས། སྦྱོར་བ་རང་ངམ་བསྐོས་པས་རྩེ་བར་བརྩམས་ཏེ། མཐར་ཐུག་ལྟེ་བ་ནུབ་པའི་ཚད་དུ་ཆུར་ཞུགས་ཏེ་རྩེ་བ་ན་ལྟུང་བའོ། །ལྔ་པ་བུད་མེད་དང་ལྷན་ཅིག་ཉལ་བའི་ལྟུང་བྱེད་ནི། རྟེན་དགེ་སློང་གིས་བུད་མེད་ཉེ་དུ་མ་ཡིན་པ་ལུས་རྟེན་རུང་དང་གནས་གཅིག་ཏུ་བར་དུ་མཚམས་ཆོད་ན་འདོམ་གང་གི་ནང་དང་། མཚམས་མ་ཆོད་ན་འདོམ་དགུའི་ནང་དུ། འདུ་ཤེས་མ་འཁྲུལ་ཤིང་ཀུན་སློང་ལྷན་ཅིག་ཉལ་འདོད་ཀྱི་བསམ་པས། སྦྱོར་བ་ཁྲིམས་གྲོགས་མེད་པར་གཉིས་ཀ་ཉལ་ནས་གཉིད་ལོག་པར་བརྩམས་ཏེ། མཐར་ཐུག་མཚན་མོ་དེའི་སྐད་ཅིག་མ་འདས་པ་ན་ལྟུང་བའོ། །དྲུག་པ་སྔངས་པར་བྱེད་པའི་ལྟུང་བྱེད་ནི། རྟེན་དགེ་སློང་གིས་དགེ་སློང་ཕ་རོལ་ལ་འཇིགས་པའི་རྒྱུ་ཡིད་དུ་མི་འོང་བའི་གཟུགས་དང་སྒྲ་དང་དྲི་དང་རེག་བྱ་ལྟ་བུ་དང་། ཡི་དྭགས་དང་ཤ་ཟ་ལ་སོགས་པའི་ཚུལ་གྱིས། འདུ་ཤེས་མ་འཁྲུལ་ཞིང་ཀུན་སློང་སྤངས་པར་བྱེད་འདོད་ཀྱི་བསམ་པས། སྦྱོར་བ་བཞད་གད་ཡན་ཆད་ཀྱིས་འཇིགས་པ་སྟོན་པར་བརྩམས་ཏེ། མཐར་ཐུག་སྔངས་སྐྲག་སྐྱེས་པ་ན་ལྟུང་བའོ། །བདུན་པ་སྦེད་པའི་ལྟུང་བྱེད་ནི། རྟེན་དགེ་སློང་གིས་དངོས་པོ་རབ་བྱུང་བ་སྡེ་ལྔའི་ལྷུང་བཟེད་ཆོས་གོས་སོགས་འཚོ་བའི་ཡོ་བྱད་གང་ཡང་རུང་བ་ཆུད་འཛའ་བ་སོགས་ཀྱི་རྐྱེན་མེད་པར། འདུ་ཤེས་མ་འཁྲུལ་ཞིང་ཀུན་སློང་རྐུ་སེམས་དང་ཕན་འདོད་ལས་གཞན་པས། སྦྱོར་བ་རང་ངམ་བསྐོས་པས་སྦེད་པར་བརྩམས་ཏེ། མཐར་ཐུག་སྦས་ཟིན་པ་ན་ལྟུང་བའོ། །བརྒྱད་པ་གདེང་མེད་པར་སྤྱོད་པའི་ལྟུང་བྱེད་ནི། རྟེན་དགེ་སློང་གིས་དགེ་སློང་གཞན་རང་དང་ནོར་མི་གཅིག་པ་ལ་བྱིན་པ། འདུ་ཤེས་མ་འཁྲུལ་ཞིང་ཀུན་སློང་རྐུ་སེམས་དང་མི་ལྡན་ཡང་དེས་གནང་བའི་གདེང་མེད་བཞིན་དུ་ཅི་དགར་ལོངས་སྤྱོད་འདོད་ཀྱི་བསམ་པས། སྦྱོར་བ་དེ་ལྟར་ལོངས་སྤྱོད་པར་བརྩམས་ཏེ། མཐར་ཐུག་ལོངས་སྤྱོད་པ་ན་ལྟུང་བའོ། །དགུ་པ་སྐུར་འདེབས་ཀྱི་ལྟུང་བྱེད་ནི། རྟེན་དགེ་སློང་གིས་དགེ་སློང་ཕ་རོལ་པོ་ལ་མཐོང་ཐོས་དོགས་པའི་གཞི་མེད་པར། འདུ་ཤེས་མ་འཁྲུལ་ཞིང་ཀུན་སློང་ཉམས་པར་འདུན་པས་འདུ་ཤེས་བསྒྱུར་ཏེ་སྐུར་པ་འདེབས་འདོད་ཀྱི་བསམ་པས། སྦྱོར་བ་མིང་ནས་སྨོས་ཏེ། དགེ་འདུན་ལྷག་མ་བྱུང་ངོ་ཞེས་སྐུར་པ་འདེབས་པར་བརྩམས་ཏེ། མཐར་ཐུག་དོན་གོ་བ་ན་ལྟུང་བའོ། །བཅུ་པ་བུད་མེད་དང་ལྷན་ཅིག་ལམ་དུ་འགྲོ་བའི་ལྟུང་བྱེད་ནི། རྟེན་དགེ་སློང་གིས་བུད་མེད་ལུས་རྟེན་རུང་ཐ་མལ་པ་ཉེ་དུ་མ་ཡིན་པ་དང་ལྷན་ཅིག་ཁྲིམས་གྲོགས་མེད་པར་རྒྱང་གྲགས་ལས་འདས་པར་ལམ་དུ་འགྲོ་བ་ལ། འདུ་ཤེས་མ་འཁྲུལ་ཞིང་ཀུན་སློང་ལྷན་ཅིག་ལམ་དུ་འགྲོ་འདོད་ཀྱི་བསམ་པས། སྦྱོར་བ་དེ་ལྟར་བརྩམས་ཏེ། མཐར་ཐུག་རྒྱང་གྲགས་ལས་འདས་པ་ན་ལྟུང་བའོ། །རྒྱང་གྲགས་རེ་རེ་ལ་ལྟུང་བ་རེ་རེ། ཕྱེད་རེ་ལ་ཉེས་བྱས་རེའོ། །བཅུ་ཚན་བརྒྱད་པ་ལ་སྡོམ་ནི། རྐུ་དང་ཉི་ཤུ་མ་ལོན་དང་། །བརྐོ་དང་མགྲོན་དང་བསླབ་པ་དང་། །འཐབ་དང་མི་སྨྲ་འགྲོ་བ་དང་། །མི་གུས་ཆང་འཐུང་དུས་མིན་པའོ། །ཞེས་ཏེ། དང་པོ་རྐུན་མ་དང་ལྷན་ཅིག་ལམ་དུ་འགྲོ་བའི་ལྟུང་བྱེད་ནི། རྟེན་དགེ་སློང་གིས་ཆོམ་རྐུན་དང་ལྷན་ཅིག་འདུ་ཤེས་མ་འཁྲུལ་ཞིང་། ཀུན་སློང་རང་དགར་ལྷན་ཅིག་འགྲོ་འདོད་ཀྱི་བསམ་པས། སྦྱོར་བ་དེ་ལྟར་འགྲོ་བར་བརྩམས་ཏེ། མཐར་ཐུག་རྒྱང་གྲགས་རེ་རེ་འདས་པ་ན་ལྟུང་བ་རེ་རེ། དེའི་ཕྱེད་རེ་འདས་པ་ལ་ཉེས་བྱས་རེའོ། །གཉིས་པ་ཉི་ཤུ་མ་ལོན་པར་བསྙེན་པར་རྫོགས་པར་བྱེད་པའི་ལྟུང་བྱེད་ནི། རྟེན་བསྒྲུབ་བྱའི་མཁན་པོ་བྱེད་པའི་དགེ་སློང་གིས་བསྒྲུབ་བྱ་བསྙེན་པར་རྫོགས་པར་འདོད་པ་སྐྱེས་ནས་མངལ་བཤོལ་བརྩིས་ཀྱང་ཉི་ཤུ་མ་ལོན་པར། འདུ་ཤེས་པའམ་ཐེ་ཚོམ་ཟ་བར་ཀུན་སློང་རང་དགར་མཁན་པོ་བྱེད་འདོད་ཀྱི་བསམ་པས། སྦྱོར་བ་བསྙེན་རྫོགས་བྱེད་པར་བརྩམས་ཏེ། མཐར་ཐུག་བརྗོད་པ་གསུམ་པའི་ངོ་བོ་བརྗོད་པ་རྫོགས་ནས་བྱེད་པ་བརྗོད་པའི་འགོ་རྩོམ་པའི་ཚེ། མཁན་པོ་ལ་ལྟུང་བྱེད་སློབ་དཔོན་དང་དགེ་འདུན་ལ་ཉེས་བྱས་སོ། །མངལ་བཤོལ་དང་བཅས་ཏེ་ཉི་ཤུ་མ་ལོན་ཡང་བསྒྲུབ་བྱ་རང་ཉིད་ཀྱིས་ལོན་པར་འདུ་ཤེས་ན་བསམ་པའི་སྒོ་ནས་ནར་སོན་པ་ཡིན་པས་བསྙེན་པར་རྫོགས་པ་ཆགས་ལ། དེ་བསྙེན་པར་རྫོགས་པའི་རྗེས་ལ་མངལ་བཤོལ་དང་བཅས་པའི་ཉི་ཤུ་མ་ལོན་པའི་ཚེ་གོང་དུ་བསྙེན་རྫོགས་ལེན་དུས་ལོ་ཉི་ཤུ་མ་ལོན་པར་འདུག་སྙམ་དུ་འདུ་ཤེས་ན་དེའི་ཚེ་བསྙེན་རྫོགས་ཀྱི་སྡོམ་པ་འཇིག་སྟེ། དེའི་ཚེ་ལུས་སེམས་གང་ཡང་ནར་མ་སོན་པས་སྡོམ་པའི་རྟེན་ཉམས་པའི་ཕྱིར་རོ། །མ་ལོན་ཡང་ལོན་པར་འདུ་ཤེས་པས་བསྙེན་རྫོགས་ཆགས་ནས་མངལ་བཤོལ་དང་བཅས་པའི་ཉི་ཤུ་ལོན་པའི་ཚེ་ལེན་དུས་ལོ་ཉི་ཤུ་མ་ལོན་འདུག་སྙམ་དུ་ཤེས་ཀྱང་སྡོམ་པ་མི་འཇིག་སྟེ། སྡོམ་པ་བསྐྱེད་ཤིང་གཏོང་རྒྱུ་གཞན་མ་བྱུང་ན་ལུས་ཀྱི་སྒོ་ནས་ནར་སོན་པས་སྡོམ་པའི་རྟེན་དུ་རུང་བས་སོ། །སྐྱེས་ནས་ཉི་ཤུ་མ་ལོན་ཡང་མངལ་བཤོལ་དང་བཅས་པས་ཉི་ཤུ་ལོན་ན་བསྙེན་རྫོགས་ཆགས་ལ། མཁན་སློབ་དང་དགེ་འདུན་ལ་ཉེས་བྱས་སྐྱེད་དོ། །ཉི་ཤུ་ལོན་པ་ལ་མ་ལོན་པར་འདུ་ཤེས་ཀྱང་ལུས་ཀྱི་སྒོ་ནས་སྡོམ་པའི་རྟེན་དུ་རུང་བས་སྡོམ་པ་སྐྱེའོ། །དགེ་ཚུལ་དུ་བསྒྲུབས་པའི་ཚེ་ཡང་ལོ་དྲུག་ལོན་ནས་མངལ་བཤོལ་དང་བཅས་པས་བདུན་དུ་འགྱུར་བས་སྐྱེ་ལ་ཉེས་བྱས་སོ། །གསུམ་པ་ས་བརྐོ་བའི་ལྟུང་བྱེད་ནི། རྟེན་དགེ་སློང་གིས་ན་བ་ལ་སོགས་པའི་རྐྱེན་མེད་པར་འཇིག་རྟེན་ན་གྲགས་པའི་ས་མཐས་པར་གནས་པ། འདུ་ཤེས་མ་འཁྲུལ་ཞིང་ཀུན་སློང་རང་དགར་བརྐོ་འདོད་ཀྱི་བསམ་པས། སྦྱོར་བ་རང་ངམ་གཞན་བསྐོས་པས་མངོན་སུམ་དུ་བརྐོ་བར་བརྩམས་ཏེ། མཐར་ཐུག་སོར་བཞི་ཡན་ཆད་བརྐོས་ན་ལྟུང་བའོ། །བཞི་པ་མགྲོན་དུ་གཉེར་བ་ལས་རིང་དུ་འདུག་པའི་ལྟུང་བྱེད་ནི། རྟེན་དགེ་སློང་གིས་ན་བ་ལ་སོགས་པའི་རྐྱེན་མེད་པར་སྦྱིན་བདག་གིས་དུས་ཇི་ཙམ་མགྲོན་དུ་བོས་པ་ལ་འདུ་ཤེས་མ་འཁྲུལ་ཞིང་ཀུན་སློང་མགྲོན་དུ་བོས་པ་ལས་རིང་དུ་འདུག་སྟེ་ཟ་འདོད་པའི་བསམ་པས། སྦྱོར་བ་སྦྱིན་བདག་གིས་དུས་ཇི་ཙམ་བཞེད་པར་བཞུགས་ཤིག་ཅེས་པ་ལྟ་བུ་མེད་པར་ཟླ་བ་བཞི་མགྲོན་དུ་བོས་པ་ལྟ་བུ་ལ་དེ་རྫོགས་པའི་འོག་ཏུ་ཡང་འདུག་ནས་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །ལྔ་པ་བསླབ་པ་ལ་ཉེར་འཇོག་སྤོང་བའི་ལྟུང་བྱེད་ནི། རྟེན་དགེ་སློང་གིས་དགེ་སློང་ཕ་རོལ་པོས་འདུལ་བར་གཏོགས་པའི་རང་གི་བསླབ་པར་བསླབ་པར་བྱའོ་ཞེས་བརྗོད་པ་ན། འདུ་ཤེས་མ་འཁྲུལ་ཞིང་ཀུན་སློང་འདུ་ཤེས་བསྒྱུར་ཏེ་བསླབ་པ་ལ་མི་སློབ་པའི་ཚིག་སྨྲ་འདོད་ཀྱི་བསམ་པས། སྦྱོར་བ་བསླབ་པ་ལ་ཉེར་བར་འཇོག་པ་པོ་ལ་ཁྱོད་ཀྱིས་མི་ཤེས་པས་གཞན་ཤེས་པ་ལ་འདྲིའི་བར་དུ་བསླབ་པ་འདི་ལ་མི་སློབ་བོ་ཞེས་གང་ཟག་ལ་མི་ཤེས་པ་དང་བསླབ་པ་ལ་མི་སློབ་པའི་ཚིག་སྨྲ་བར་བརྩམས་ཏེ། མཐར་ཐུག་དོན་གོ་བ་ན་ལྟུང་བའོ། །དྲུག་པ་ཉན་རྣ་ལས་གྱུར་པའི་ལྟུང་བྱེད་ནི། རྟེན་དགེ་སློང་དགེ་སློང་ཕ་རོལ་པོ་རྩོད་ཟླར་གྱུར་པ་དག་རྩོད་པ་བཞི་ལས་གང་ཡང་རུང་བའི་རྩོད་པ་བྱེད་པ་ལ། འདུ་ཤེས་མ་འཁྲུལ་ཞིང་ཀུན་སློང་ནོར་བ་དང་རྩོད་པ་ཞི་འདོད་མ་ཡིན་པར་རྩོད་པ་དཀྲུགས་པའི་ཆེད་དུ་ཉན་འདོད་ཀྱི་བསམ་པས། སྦྱོར་བ་ཉན་པའི་ཕྱིར་རྣ་བ་གཏོད་པར་བརྩམས་ཏེ་མཐར་ཐུག་དོན་གོ་བ་ན་ལྟུང་བའོ། །བདུན་པ་མི་སྨྲ་བར་འགྲོ་བའི་ལྟུང་བྱེད་ནི། རྟེན་དགེ་སློང་ཁ་སྐོང་བར་འོས་པ་དགེ་འདུན་གྱི་ནང་དུ་གསོལ་བ་ལ་སོགས་པའི་ལས་ལ་འདུས་པ། གསོལ་བ་ཙམ་ཡང་མ་བྱས་པར་ལས་ཀྱི་གནས་དེ་ནས་དེ་ན་འཁོད་པ་ལ་མ་སྨྲས་པ། འདུ་ཤེས་མ་འཁྲུལ་ཞིང་ཀུན་སློང་མ་སྨྲས་པར་འགྲོ་འདོད་ཀྱི་བསམ་པས། སྦྱོར་བ་འགྲོ་བར་བརྩམས་པས། མཐར་ཐུག་ལས་ཐོས་པའི་ཉེ་འཁོར་ལས་འདས་པར་ཕྱིན་པ་ན་ལྟུང་བའོ། །བརྒྱད་པ་མ་གུས་པའི་ཚུལ་ལས་གྱུར་པའི་ལྟུང་བྱེད་ནི། རྟེན་དགེ་སློང་གིས་སྟོན་པ་དང་དགེ་འདུན་དང་ཞལ་ཏ་བས་ཆོས་ལྡན་གྱི་བཀའ་བསྒོ་བ་རང་གི་སྒྲུབ་ནུས་པ་ལ། འདུ་ཤེས་མ་འཁྲུལ་ཞིང་ཀུན་སློང་དེ་དང་འགལ་བར་བྱེད་འདོད་ཀྱི་བསམ་པས། སྦྱོར་བ་ཤད་ཀྱིས་སྦྱངས་པ་མ་བྱས་པར་འགལ་བ་བྱེད་པར་བརྩམས་ཏེ། མཐར་ཐུག་འགལ་བའི་བྱ་བ་རྫོགས་པ་ན་ལྟུང་བའོ། །དགུ་པ་མྱོས་འགྱུར་འཐུང་བའི་ལྟུང་བྱེད་ནི། རྟེན་རབ་ཏུ་བྱུང་བས་ཕབ་བཏབ་པའི་འབྲུའི་ཆང་དང་། ཕབ་མ་བཏབ་པའི་རྒུན་ཆང་ལ་སོགས་པ་བཅོས་པའི་ཆང་དངོས་སམ་སྦང་མ་དང་ཚིག་མ་ལ་སོགས་པ་སྨྱོས་པའི་ནུས་པ་ཅན་ལ། འདུ་ཤེས་མ་འཁྲུལ་ཞིང་ཀུན་སློང་འཐུང་བ་དང་སྦང་མ་སོགས་ཟ་འདོད་ཀྱི་བསམ་པས། སྦྱོར་བ་དེ་ལྟར་ལོངས་སྤྱོད་པར་བརྩམས་ཏེ། མཐར་ཐུག་མགུལ་དུ་མིད་པ་ན་དགེ་སློང་ལ་ལྟུང་བྱེད་དང་དགེ་ཚུལ་ལ་ཉེས་བྱས་སོ། །བཅུ་པ་དུས་མ་ཡིན་པར་འགྲོ་བའི་ལྟུང་བྱེད་ནི། རྟེན་སྲ་བརྐྱང་མ་བཏིང་ཞིང་བར་ཆད་ཀྱི་རྐྱེན་དང་མི་ལྡན་པའི་དགེ་སློང་གིས། གནས་ན་འཁོད་པའི་རབ་ཏུ་བྱུང་བ་ལ་མ་སྨྲས་པར་རབ་ཏུ་བྱུང་བའི་གནས་ནས་ཁྱིམ་པའི་གནས་སུ་ཉི་མ་ཕྱེད་ནས་སྐྱ་རེངས་མ་ཤར་བའི་དུས་སུ། འདུ་ཤེས་དུས་མ་ཡིན་པ་ལ་མ་ཡིན་པར་ཤེས་པའམ་ཐེ་ཚོམ་ཟ་བས། ཀུན་སློང་འཁོད་པ་ལ་མ་སྨྲས་པར་རང་དགར་དུས་མིན་དུ་འགྲོ་འདོད་ཀྱི་བསམས་པས། སྦྱོར་བ་དེ་ལྟར་འགྲོ་བར་བརྩམས་ཏེ། མཐར་ཐུག་དེའི་རྐྱེན་གྱིས་རང་གི་གནས་ཉེ་འཁོར་དང་བཅས་པ་ལས་འདས་ན་ལྟུང་བའོ། །བཅུ་ཚན་དགུ་པ་ལ་སྡོམ་ནི། ཟས་བཅས་སྐྱ་རེང་ད་གདོད་དང་། །ཁབ་རལ་དང་ནི་ཁྲི་རྐང་དང་། །བརྡ་དང་གདིང་དང་གཡོན་པ་དང་། །རས་ཆེན་བདེ་གཤེགས་ཆོས་གོས་སོ། །ཞེས་ཏེ། དང་པོ་གྲོང་དུ་རྒྱུ་བའི་ལྟུང་བྱེད་ལ་སྔ་དྲོ་གྲོང་རྒྱུ་དང་ཕྱི་དྲོ་གྲོང་རྒྱུ་གཉིས་ལས། དང་པོ་ནི། རྟེན་དགེ་སློང་དེའི་ཚིག་གིས་དགེ་འདུན་སྦྱིན་བདག་ཁྱིམ་པའི་ཁྱིམ་དུ་ཟོས་ལ་སྤྱན་དྲངས་པ་ལ་སྦྱིན་བདག་ལ་དུས་ལས་མ་ཡོལ་བར་བྲིམས་ཤིག་ཅེས་མ་བསྒོས་པར། འདུ་ཤེས་མ་འཁྲུལ་ཞིང་ཀུན་སློང་གྲོང་དུ་རྒྱུ་འདོད་ཀྱི་བསམ་པས། སྦྱོར་བ་བར་ཆད་ཀྱི་རྐྱེན་དང་མི་ལྡན་བཞིན་དུ་དེ་ལྟར་འགྲོ་བར་བརྩམས་ཏེ། མཐར་ཐུག་གྲོང་གསུམ་ལ་སོགས་པར་རྒྱུ་བ་ན་ལྟུང་བའོ། །གཉིས་པ་ཕྱི་དྲོ་གྲོང་རྒྱུ་ནི་ཉི་མ་ཕྱེད་ནས་སྐྱ་རེངས་མ་ཤར་བར་ཁྱིམ་བཞི་ལ་སོགས་པར་འགྲོ་ན་དགེ་སློང་འཁོད་པ་ལ་སྨྲས་ཀྱང་ལྟུང་བའོ། །གཉིས་པ་རྒྱལ་པོའི་ཕོ་བྲང་དུ་ནུབ་མོ་འགྲོ་བའི་ལྟུང་བྱེད་ནི། རྟེན་དགེ་སློང་གིས་བར་ཆད་ཀྱི་རྐྱེན་དང་མི་ལྡན་པ་དང་རྒྱལ་པོ་སོགས་ཀྱིས་ཆོས་ལྡན་གྱི་དོན་ལ་བོས་པ་དང་། དགོས་པ་ཁྱད་པར་ཅན་དང་མི་ལྡན་པ་རྒྱལ་པོའི་ཕོ་བྲང་དུ་བཙུན་མོའི་གནས་སུ་ཉི་མ་དམར་ཐག་ཆོད་ནས་སང་སྐྱ་རེངས་ཐ་མ་མ་ཤར་གྱི་བར་ལ། དེར་འདུ་ཤེས་པའམ་ཡིད་གཉིས་ཟ་བས་ཀུན་སློང་རྒྱལ་པོའམ་བཙུན་མོའི་གནས་སུ་མཚན་མོ་འགྲོ་འདོད་ཀྱི་བསམ་པས། སྦྱོར་བ་དེ་ལྟར་འགྲོ་བར་བརྩམས་ཏེ། མཐར་ཐུག་གནས་དེའི་སྒོ་བཅད་ན་གཏན་པའི་གནས་དང་མ་བཅད་ན་གཏན་པ་གཉིས་འགྱུར་འདས་པ་ན་ལྟུང་བའོ། །གསུམ་པ་བསླབ་པའི་གཞི་ཁྱད་དུ་གསོད་པའི་ལྟུང་བྱེད་ནི། རྟེན་སོ་ཐར་གྱི་མདོ་གཉིས་ཡན་ཆད་ཐོས་ཤིང་དོན་གོ་བའི་དགེ་སློང་གིས་གསོ་སྦྱོང་གི་དུས་སུ། འདུ་ཤེས་མ་འཁྲུལ་ཞིང་ཀུན་སློང་བཞད་གད་ཡན་ཆད་ཀྱིས་མདོའི་དོན་ལ་ས་བརྐོ་བ་སོགས་ལྟུང་བར་འགྱུར་བ་ད་གདོད་ཤེས་སོ་ཞེས་བསླབ་པ་ཁྱད་དུ་གསོད་འདོད་ཀྱི་བསམ་པས། སྦྱོར་བ་དེ་ལྟར་ཁྱད་དུ་གསོད་པའི་ཚིག་སྨྲ་བར་བརྩམས་ཏེ། མཐར་ཐུག་འདུལ་བར་གཏོགས་པའི་བསླབ་པ་ཁྱད་དུ་གསོད་ན་ལྟུང་བའོ། །བཞི་བ་ཁབ་རལ་འཆོས་པའི་ལྟུང་བྱེད་ནི། རྟེན་དགེ་སློང་གིས་བ་སོ་དང་རུས་པ་དང་རིན་པོ་ཆེ་ལ་སོགས་པ་ཡུལ་དུས་དེར་དཀོན་ཞིང་རིན་ཆེ་བར་གྱུར་པའི་རྒྱུ་ལ། འདུ་ཤེས་མ་འཁྲུལ་ཞིང་ཀུན་སློང་ཁབ་རལ་བྱེད་འདོད་ཀྱི་བསམ་པས། སྦྱོར་བ་རང་ངམ་བསྐོས་པས་ཁབ་རལ་བྱེད་པར་བརྩམས་ཏེ། མཐར་ཐུག་ཁབ་རལ་ཟིན་པ་ན་ལྟུང་བའོ། །ལྔ་པ་ཁྲི་རྐང་འཆོས་པའི་ལྟུང་བྱེད་ནི། རྟེན་དགེ་སློང་གིས་དགེ་འདུན་གྱི་ཁྲིའམ་ཁྲིའུའི་རྐང་པ་བུ་གར་གཞུག་པ་མན་ཆད་ཁྲུ་གང་ཚད་ཡིན་ལ། དེ་ལས་ལྷག་པར་འདུ་ཤེས་མ་འཁུལ་ཞིང་ཀུན་སློང་དེ་བྱེད་འདོད་ཀྱི་བསམ་པས། སྦྱོར་བ་རང་ངམ་བསྐོས་པས་དེ་བྱེད་པར་བརྩམས་ཏེ། མཐར་ཐུག་ལྷག་པོ་ཟིན་པ་ན་ལྟུང་བའོ། །དྲུག་པ་ཤིང་བལ་གྱིས་གོས་པར་བྱས་པའི་ལྟུང་བྱེད་ནི། རྟེན་དགེ་སློང་གིས་དགེ་འདུན་གྱི་གནས་མལ་ཤིང་བལ་གྱིས་གོས་པར་བྱས་པ་ལ། འདུ་ཤེས་མ་འཁྲུལ་ཞིང་ཀུན་སློང་དེ་ལྟར་བྱེད་འདོད་ཀྱི་བསམ་པས། སྦྱོར་བ་རང་ངམ་བསྐོས་པས་དེ་བྱེད་པར་བརྩམས་ཏེ། མཐར་ཐུག་དགེ་འདུན་གྱིས་གནས་མལ་ཤིང་བལ་གྱིས་གོས་པར་བྱས་པ་ན་ལྟུང་བའོ། །བདུན་པ་གདིང་བ་དང་། བརྒྱད་པ་གཡན་པ་དང་། དགུ་པ་རས་ཆེན་ཞེས་གསུངས་པ་ལ་གདིང་བའི་ཚད་སྲིད་དུ་ཁྲུ་གསུམ། ཞེང་དུ་ཁྲུ་དོ་དང་སོར་དྲུག སྲིད་དུ་མི་ཆོག་ན་ཁྲུ་ཕྱེད་དང་དོ་མན་ཆད་བསྐྱེད་དོ། །གཡན་པ་དགབ་པའི་ཚད་སྲིད་དུ་ཁྲུ་དྲུག་དང་། ཞེང་དུ་ཁྲུ་གསུམ་མོ། །རས་ཆེན་གྱི་ཚད་སྲིད་དུ་ཁྲུ་དགུ་ཞེང་དུ་ཁྲུ་གསུམ་དང་སོར་བཅོ་བརྒྱད་དོ། །འདི་རྣམས་རྡུལ་ཁྲུ་ཡིན་པས་ལོ་བདུན་ལོན་པའི་དགེ་ཚུལ་དང་ནར་སོན་པའི་དགེ་སློང་གཉིས་གདིང་བ་ཚད་མཉམ་དུ་ཤེས་པར་བྱའོ། །དེ་ཡང་རྟེན་དགེ་སློང་གིས་གདིང་བ་དང་། གཡན་པ་དགབ་པ་དང་། རས་ཆེན་རྣམས་ཚད་ལྷག་པ་ལ་ལྷག་པར་ཤེས་ཤིང་། ཀུན་སློང་ལྷག་པ་བྱེད་འདོད་ཀྱི་བསམ་པས། སྦྱོར་བ་རང་ངམ་བསྐོས་པས་དེ་ལྟར་བྱེད་པར་བརྩམས་སྟེ། མཐར་ཐུག་ལྷག་པོ་ཟིན་པ་ན་ལྟུང་བའོ། །བཅུ་པ་བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་ནི། སྟོན་པའི་སྣམ་སྦྱར་དང་བླ་གོས་ཀྱི་ཚད་ནི་སྲིད་དུ་སྟོན་པ་རང་གི་ཁྲུ་ལྔ་དང་ཞེང་དུ་ཁྲུ་གསུམ་མོ། །སྟོན་པའི་ཁྲུ་རེ་ལ་འཇལ་བྱེད་ཀྱི་ཁྲུ་གསུམ་ཡིན་པས་སྟོན་པའི་ཆོས་གོས་ཀྱི་ཚད་ལ་སྲིད་དུ་འཇལ་བྱེད་ཀྱི་ཁྲུ་བཅོ་ལྔ་དང་། ཞེང་དུ་ཁྲུ་དགུ་འབྱུང་ངོ་། །དེ་ཡང་རྟེན་དགེ་སློང་གིས་སྟོན་པའི་སྐུ་ལུས་ཙམ་མེད་པར་དེའི་ཆོས་གོས་ཀྱི་ཚད་ཙམ་མམ་དེ་ལས་ལྷག་པར། འདུ་ཤེས་མ་འཁྲུལ་ཞིང་ཀུན་སློང་དེ་ལྟར་བྱེད་འདོད་ཀྱི་བསམ་པས། སྦྱོར་བ་རང་ངམ་བསྐོས་པས་དེ་ལྟར་བྱེད་པར་བརྩམས་ཏེ། མཐར་ཐུག་བདེ་བར་གཤེགས་པའི་ཆོས་གོས་ཀྱི་ཚད་དེ་ལས་ལྷག་པ་ཟིན་པ་ན་ལྟུང་བའོ།། ༈ །།བཞི་པ་སོར་བཤགས་ཀྱི་སྡེ་ཚན་ལ་སྡོམ་ནི། གྲོང་དང་ཁྱིམ་གཞན་ཉིད་དང་ནི། །བསླབ་པ་དང་ནི་དགོན་པ་སྟེ། །སངས་རྒྱས་ཕན་པར་མཛད་པ་ཡིས། །སོ་སོར་བཤགས་པར་བྱ་བར་གསུངས། །ཞེས་ཏེ། དང་པོ་དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བ་ནི། རྟེན་དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ། དེར་ཤེས་བཞིན་དུ་ཀུན་སློང་རང་དོན་དུ་དགེ་སློང་མ་ཉེ་དུ་མ་ཡིན་པ་ལས་ཟས་བླངས་ཏེ་ཟ་འདོད་པའི་བསམ་པས། སྦྱོར་བ་རང་དང་དགེ་སློང་མ་གཉིས་ཀ་གྲོང་ངམ་ལམ་པོ་ཆེ་ན་འདུག་སྟེ་དེ་ལས་ཟས་བླངས་སྟེ་བཟའ་བར་བརྩམས་ཏེ། མཐར་ཐུག་མགུལ་དུ་མིད་པ་ན་སོར་བཤགས་དང་པོའོ། །གཉིས་པ་གྲལ་རིམ་དུ་མ་ཕེབས་པར་འབྲིམ་དུ་འཇུག་པ་མ་བཟློག་པར་ཟ་བའི་སོར་བཤགས་ནི། སྦྱིན་བདག་ཁྱིམ་པས་དགེ་འདུན་གདུགས་ཚོད་ལ་སྤྱན་དྲངས་པ་ན་དགེ་སློང་མས་བསྐོ་བཤམ་གྱི་ངོས་མགྲོན་བྱས་པ་ལ། རྟེན་དགེ་སློང་རང་ངམ་ཟས་གཅིག་པའི་དགེ་སློང་གཞན་གྱིས། སྲིང་མོ་ཁྱོད་དགེ་སློང་རྣམས་ཟན་ཟོས་ཀྱི་བར་དུ་རེ་ཞིག་སྡོད་ཅིག་ཅེས་མ་བསྒོ་བ་ལ། འདུ་ཤེས་མ་འཁྲུལ་ཞིང་ཀུན་སློང་རང་དགར་བསྐོ་བཤམ་བྱས་པ་ཟ་འདོད་ཀྱི་བསམ་པས། སྦྱོར་བ་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་སོར་བཤགས་གཉིས་པའོ། །གསུམ་པ་བསླབ་པ་དྲལ་ཏེ་ཁྱིམ་དུ་འཇུག་པའི་སོར་བཤགས་ནི། རྟེན་བསླབ་པའི་སྡོམ་པ་བཅས་པར་གཏོགས་པའི་དགེ་སློང་གིས། ཟས་མི་སློང་བའི་ཁྱིམ་གྱི་བསླབ་པའི་སྡོམ་པ་བཅས་པའི་ཁྱིམ་དུ། འདུ་ཤེས་མ་འཁྲུལ་ཞིང་ཁྱིམ་དེ་ནས་ཟས་བླངས་ཏེ་ཟ་འདོད་ཀྱི་བསམ་པས། སྦྱོར་བ་དེ་ལྟར་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་སོར་བཤགས་གསུམ་པའོ། །བཞི་པ་ནགས་བརྟག་པ་ལས་གྱུར་པའི་སོར་བཤགས་ནི། རྟེན་དགེ་སློང་གིས་དགེ་འདུན་གྱིས་ནགས་ཉུལ་བར་བསྐོས་པ་ན་འཇིགས་པ་དང་བཅས་པའི་གནས་མ་ཉུལ་བར་ཁྱིམ་པ་ཉེ་དུ་མ་ཡིན་པའི་ཟས་བླངས་ཏེ། འདུ་ཤེས་མ་འཁྲུལ་ཞིང་ཀུན་སློང་ནགས་མ་ཉུལ་བར་ཤེས་བཞིན་དུ། སྦྱོར་བ་ཟས་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་སོར་བཤགས་བཞི་པའོ། །ལྔ་པ་བསླབ་བྱ་ཉེས་བྱས་ཀྱི་སྡེ་ལ་དགུ་ཡོད་པ་ལས། དང་པོ་གོས་བགོ་བའི་སྡེ་ནི། ཤམ་ཐབས་ལ་ཡང་རྣམས་བདུན་དང་། །ཞེས་པ་ནི། ཤམ་ཐབས་པུས་གོང་ཡན་ཆད་དུ་ཧ་ཅང་རྩིང་པ་དང་། ལོང་བུར་སླེབ་པའི་འཇོལ་བ་དང་། གྲྭ་གླང་པོ་ཆེའི་སྣ་ལྟར་ནར་བ་དང་། ལྟེ་བའི་སྟེང་དུ་མགོ་ལྟེབ་པ་ཏ་ལའི་ལོ་མ་ལྟར་དང་། སྐེ་རགས་ཀྱི་བར་དུ་མངོན་པའི་ཕུར་མ་ལྟ་བུ་དང་། སྦྲུལ་མགོའི་གདེང་ཀ་ལྟར་ཕྱིར་ཕྱུང་བ་མ་ཡིན་པར་ཟླུམ་པོར་བགོའོ། །སྟོད་གཡོག་ལ་ཡང་རྣམ་གསུམ་ནི། རྩེངས་འཇོལ་ནར་གསུམ་དང་བྲལ་བ་ཟླུམ་པོར་བགོའོ། །གཉིས་པ་ཁྱིམ་དུ་འགྲོ་བའི་སྡེ་ལ། ཤིན་ཏུ་བསྡམས་ལ་སོགས་པ་ལྔ་ནི། དྲན་ཤེས་བཞིན་གྱིས་བསྡམས་ཤིང་ཁྱིམ་གཞན་དུ་འགྲོ་བ་དང་། ཆོས་གོས་ལེགས་པར་བགོ་བ་དང་། སྒྲ་བསྐྱུངས་བ་དང་། མིག་མི་གཡེང་བ་དང་། གཉའ་ཤིང་གང་ཙམ་དུ་བལྟ་ཞིང་འགྲོ་བའོ། །མགོ་གཡོགས་ལ་སོགས་རྣམ་པ་ལྔ་ནི། མགོ་གོས་ཀྱིས་མི་གཡོགས། གོས་མི་བརྫེ། གོས་དཔུང་པ་གཉིས་སུ་མི་གཟར། ལག་པ་གཡས་གཡོན་བསྣོལ་ཏེ་གཉའ་གོང་དུ་མི་བསྣོལ་བ་དང་ལྟག་པར་མི་བསྣོལ་བའོ། །མཆོང་ལ་སོགས་པ་རྣམ་པ་ལྔ་ནི། རྐྱེན་ལ་མི་ལྟོས་པར་མི་མཆོང་། རྐང་པ་མི་བརྐྱང་། ཙོག་པུས་མི་འགྲོ། བྲང་པ་རྐྱང་པ་བཙུགས་སྟེ་མི་འགྲོ། གྲུ་བརྒྱང་མི་བྱའོ། །ལུས་ལ་སོགས་པ་རྣམ་པ་ལྔ་ནི། ལུས་གཅུས་ཏེ་མི་འགྲོ། མགོ་མི་བསྒྱུར། ལག་པ་མི་དཀྲུགས། གཉིས་ཕྲག་པ་སྤྲད་དེ་མི་འགྲོ། གཉིས་ལག་པ་མི་སྦྲེལ་ལོ། །གསུམ་པ་ཁྱིམ་དུ་འདུག་པའི་སྡེ་ལ། འདུག་པར་བྱ་བ་དགུ་དག་ནི། ཁྱིམ་དུ་སྟན་ལ་མི་བསྒོ་བར་མི་འདུག མ་བརྟགས་པར་མི་འདུག ལུས་ཐམས་ཅད་ལྗིད་ཀྱིས་ཕབ་སྟེ་མི་འདུག རྐང་པ་བརྐྱངས་ཏེ་མི་བསྣོལ། བརླའི་སྟེང་དུ་བརླ་མི་གཞག ལོང་བུའི་སྟེང་དུ་ལོང་བུ་མི་གཞག རྐང་པ་ཁྲིའི་འོག་ཏུ་མི་དགུག རྐང་པ་མི་གདངས། འདོམ་མི་སྣང་བར་བྱ་བ་དང་དགུའོ། །དེའི་བསླབ་བྱ་ནི། ལག་པ་འགྲམ་པ་ལ་མི་བརྟེན། སྟན་ཕྲག་པ་ལ་མི་བསྐུར་རོ། །བཞི་པ་ཟས་བླང་བའི་སྡེ་ཚན་ལ། བྱིན་ལེན་བྱ་བ་བརྒྱད་རྣམས་སོ། །ཞེས་པ་ནི། ལྷུང་བཟེད་ཀྱི་མུ་དང་ཁ་ད་ཆད་དུ་ཟས་མི་བླང་། ཚོད་མ་དང་འབྲས་ཆན་མཉམ་དུ་མི་བླང་། གྲལ་རིམ་བཞིན་དུ་བླང་། ལྷུང་བཟེད་ལ་བལྟ་ཞིང་བླང་། ཟས་མ་འོངས་པར་ལྷུང་བཟེད་མི་བཟེད། ཚོད་མ་འདོད་པའི་ཕྱིར་འབྲས་ཆན་གྱིས་ཚོད་མ་མི་དགབ་པ་དང་ཚོད་མས་འབྲས་ཆན་མི་དགབ། ཟས་ཀྱི་སྟེང་དུ་ལྷུང་བཟེད་མི་བཟེད། སྐྱོན་དེ་རྣམས་དང་བྲལ་བས་ཟས་ལེགས་པར་བླང་ངོ་། །ལྔ་པ་ཟས་ཟ་བའི་སྡེ་ཚན་ལ། ཟས་ལ་ལེགས་པར་བྱ་བ་དྲུག་ནི། ཁམ་ཧ་ཅང་ཆུང་བ་དང་། ཆེས་པ་མ་ཡིན་པ་དང་། ཁམ་རན་པར་བཟའ་བ་དང་། ཁམ་མ་བཟས་པར་ཁ་མི་གདངས་པ་དང་། ཁ་ཁམ་གྱིས་བཀང་ནས་མི་སྨྲ་བ་དང་། ལེགས་པར་ཟས་བཟའ་བར་བྱའོ། །ཙུག་ཙུག་ལ་སོགས་པ་རྣམ་པ་ལྔ་ནི། ཟས་ཟ་བའི་ཚེ་ཙུག་ཙུག་དང་། ཅག་ཅག་དང་། ཧུ་ཧུ་དང་། ཕུ་ཕུ་མི་བྱ། ལྕེ་ཡང་ཡང་ཕྱུང་ཏེ་ཟས་མི་བཟའོ། །འབྲུ་ནས་ཐ་དད་བྱེད་པ་ལྔ་ནི། འབྲུ་རེ་རེ་ནས་མི་བཟའ། ཟས་ལ་འཕྱས་མི་གདགས། མཁུར་བ་མི་སྤོ། རྐན་མི་གཏོགས། ཁམ་འཕྲོར་མི་བཅད་དོ། །ལག་པ་བལྡག་ལ་སོགས་པ་ལྔ་ནི། ལག་པ་མི་བལྡོག ལྷུང་བཟེད་མི་འབྱོག ལག་པ་མི་སྤྲུགས། ལྷུང་བཟེད་མི་སྐྱོམ། མཆོད་རྟེན་ལྟ་བུའི་གཟུགས་བྱས་ཏེ་མི་གཞོམ་མོ། །དྲུག་པ་ལྷུང་བཟེད་དུ་སྤྱད་པའི་སྡེ་ལ། འཕྱ་ལ་སོགས་པའི་རྣམ་པ་བཞི་ནི། དྲུང་ན་འདུག་པའི་དགེ་སློང་གི་ལྷུང་བཟེད་ལ་འཕྱ་བའི་ཕྱིར་མི་བལྟ། ལག་པ་འབགས་པས་ཆུའི་སྣོད་ལ་མི་བཟུང་། དྲུང་ན་འདུག་པའི་དགེ་སློང་ལ་ཟས་དང་སྦགས་པའི་ཆུས་མི་གཏོར། ཁྱིམ་བདག་ལ་མ་དྲིས་པར་འབགས་ཆུ་མི་དབོའོ། །ལྷུང་བཟེད་ལ་ཡང་རྣམ་པ་བཅུ་ནི། ལྷུང་བཟེད་དུ་ཟས་ལྷག་མ་བླུགས་ཏེ་མི་འདོར། ལྷུང་བཟེད་གཙང་མར་གཙུག་ལག་གི་ཚིགས་སུ་བཅད་དེ་ཆུ་སྦྱིན། འོག་གཞི་མེད་པར་གད་ཁར་གཡང་སར། དཀན་གཟར་པོར་ལྷུང་བཟེད་མི་གཞག འགྲེངས་ཏེ་ལྷུང་བཟེད་མི་བཀྲུ། གད་ཀར་གཡང་སར་དཀན་གཟར་པོར་མི་བཀྲུ། དེས་འབབ་ཆུའི་རྒྱུན་ལས་བཟློག་སྟེ་མི་བཅུ། ལམ་གྱི་བཞི་མདོར་མི་གཞག་གོ །བདུན་པ་ཆོས་སྟོན་པའི་སྡེ་ལ། འགྲེང་ལ་སོགས་པ་རྣམ་པ་ལྔ་ནི། ཉན་པ་པོ་མི་ན་བར་འདུག་པ་ལ་འཆད་པ་པོ་འགྲེངས་ཏེ་མི་འཆད་པ་དང་། དེ་བཞིན་དུ་ཉལ་བ་ལ་འདུག་པས་དང་། སྟན་མཐོན་པོའམ་བཟང་པོ་ལ་འདུག་པ་ལ་སྟན་དམའ་བའམ་ངན་པ་ལ་འདུག་པས་དང་། མདུན་དུ་འགྲོ་བ་ལ་ཕྱི་ནས་འགྲོ་བས་དང་། ལམ་ནས་འགྲོ་བ་ལ་ལམ་གྱི་འགྲམ་ནས་འགྲོ་བས་ཆོས་མི་འཆད་པའོ། །མགོ་གཡོགས་ལ་སོགས་རྣམ་པ་ལྔ་ནི། ཉན་པ་པོ་མི་ན་བར་མགོ་གཡོགས་པ་དང་། གོས་བརྫེས་པ་དང་། གཟར་བ་དང་། ལག་པ་གཉའ་གོང་དུ་བསྣོལ་བ་དང་། ལྟག་པར་བསྣོལ་བ་ལ་ཆོས་མི་བཤད་དོ། །དོ་ཀེར་ཅན་ལ་སོགས་པ་ལྔ་ནི། ཉན་པ་པོ་མིན་པར་དོ་ཀེར་ཅན་དང་། ཞྭ་གྱོན་པ་དང་། ཅོད་པཎ་དང་། ཕྲེང་བ་ཅན་དང་། མགོ་དཀྲིས་པ་ལ་ཆོས་མི་བཤད་དོ། །གླང་ཆེན་ལ་སོགས་བཞོན་པ་ལྔ་ནི། ཉན་པ་པོ་མི་ན་བར་གླང་པོ་ཆེ་དང་། རྟ་ཞོན་པ་དང་། ཁྱོགས་དང་། བཞོན་པའི་སྟེང་ན་འདུག་པ་དང་། མཆིལ་ལྷྭམ་གྱོན་པ་ལ་ཆོས་མི་བཤད་དོ། །ལག་ན་མཁར་བ་ལ་སོགས་དྲུག་ནི། ཉན་པ་པོ་མི་ན་བར་ལག་ན་མཁར་བ་དང་། གདུགས་དང་། མཚོན་ཆ་དང་། རལ་གྲི་དང་། དགྲ་སཏྭ་ཐོགས་པ་དང་། གོ་ཆ་གྱོན་པ་ལ་ཆོས་མི་བཤད་དོ། །བརྒྱད་པ་སྒྲུབ་པའི་ཚུལ་ལས་གྱུར་པའི་སྡེ་ལ། ན་བ་རྣམ་པ་བཞི་རྣམས་སོ། །ཞེས་པ་ནི། མི་ན་བར་འགྲེངས་ཏེ་དང་། ཆུའི་ནང་དུ་དང་། རྩ་སྔོན་གྱི་ཕྱོགས་སུ་བཤང་གཅི་མི་བྱ་མི་འདོར། མཆིལ་མ་དང་སྣབས་དང་སྐྱུགས་པ་དང་བླུགས་པ་ཡང་དེ་བཞིན་དུ་མི་འདོར་རོ། །དགུ་པ་རྒྱུ་བ་དགག་པའི་བསླབ་བྱ་ནི། གནོད་པ་མེད་ན་ཤིང་ལ་མི་གང་ཙམ་ལས་མཐོ་བ་ལ་མི་འཛེགས་པ་ལ་བསླབ་པར་བྱ་སྟེ་དེ་ལས་འདས་ན་ཉེས་བྱས་སོ། །དེ་ལྟར་ན་ཉེས་བྱས་བརྒྱ་དང་བཅུ་གཉིས་སོ།། ༈ །།གཉིས་པ་དགེ་སློང་མའི་སྡེ་ལྔ་བྱེ་བྲག་ཏུ་བཤད་པ་ལ་གཉིས་ཏེ། དགོས་པ་དང་། དགེ་སློང་མའི་སྡེ་ལྔ་སོ་སོའི་གྲངས་བསྟན་པའོ། །དང་པོ་ནི། ཊཱི་ཀར་དགེ་སློང་གི་རྣམ་པར་འབྱེད་པར་སྨྲས་ནས། ད་ནི་དགེ་སློང་མའི་རྣམ་པར་འབྱེད་པ་བརྗོད་པར་བྱ་སྟེ། གང་གི་ཕྱིར་ལུས་ཀྱི་བྱེ་བྲག་གིས་བསམ་པའི་བྱེ་བྲག་ཏུ་འགྱུར་ལ། བསམ་པའི་བྱེ་བྲག་གིས་ལྟུང་བའི་བྱེ་བྲག་ཏུ་འགྱུར་ཞིང་། ལྟུང་བའི་བྱེ་བྲག་གིས་བཅས་པའི་བྱེ་བྲག་ཏུ་འགྱུར་བས་དགེ་སློང་མ་རྣམས་ཀྱི་འདུལ་བ་ལོགས་ཤིག་ཏུ་རྣམ་པར་གཞག་པ་དེའི་ཕྱིར། དགེ་སློང་མ་རྣམས་ཀྱི་བསླབ་པའི་གཞི་དགེ་སློང་རྣམས་དང་མཐུན་པ་གང་ཡིན་པ་དེ་ནི་དགེ་སློང་གི་རྣམ་པར་འབྱེད་པར་བཤད་པ་ཉིད་ཀྱིས་རྣམ་པར་ཕྱེ་བ་ཡིན་ནོ། །མི་མཐུན་པ་གང་ཡིན་པ་དེའི་བྱེ་བྲག་གི་རྣམ་པ་འདིར་བརྗོད་པར་བྱ་སྟེ། དེ་ལ་དགེ་སློང་ལ་ཚུལ་ཁྲིམས་རྣམ་པར་གཞག་པ་ལ་ལ་དགེ་སློང་མ་རྣམས་ཀྱི་མ་ཡིན་པ་ཡང་ཡོད་དེ། དཔེར་ན་ཀུན་ཏུ་སྤྱོད་པ་བསྔགས་པ་ལྟ་བུ་དང་། ལ་ལ་ཉེས་པ་ཆུང་བ་ཉིད་དུ་རྣམ་པར་གཞག་པ་ཡང་ཡོད་དེ། དཔེར་ན་དགེ་སློང་ལ་ཁུ་བ་འབྱིན་པ་དགེ་འདུན་ལྷག་མར་འགྱུར་བ་དགེ་སློང་མ་རྣམས་ཀྱི་ལྟུང་བྱེད་དུ་འགྱུར་བ་ལྟ་བུ་དང་། ལ་ལ་ཉེས་པ་ཆེ་བ་ཉིད་དུ་རྣམ་པར་གཞག་པ་ཡང་ཡོད་དེ། དཔེར་ན་དགེ་སློང་རྣམས་ཀྱི་ལུས་ཀྱིས་རེག་པའི་དགེ་འདུན་ལྷག་མ་རྣམས་དགེ་སློང་མ་རྣམས་ཀྱི་ཕམ་པར་འགྱུར་བ་ལྟ་བུ་སྟེ་དེ་དག་གི་བྱེ་བྲག་བརྗོད་པར་བྱའོ། །ཞེས་གསུངས་པའི་དོན། དགེ་སློང་གི་རྣམ་འབྱེད་ལས་ལོགས་སུ་དགེ་སློང་མའི་རྣམ་འབྱེད་བསྟན་པ་ལ་དགོས་པ་ཅི་ཡོད་ཅེ་ན། སྡེ་ལྔ་ཐུན་མོང་བ་རྣམས་ནི་སྔར་བཤད་པ་ལས་རྟོགས་པར་ནུས་ཀྱང་། དགེ་སློང་མའི་སྡེ་ལྔའི་ཐུན་མོང་མ་ཡིན་པའི་ཁྱད་པར་རྣམས་ལོགས་ཤིག་ཏུ་འཆད་ཅེས་པའོ། །གཉིས་པ་ལ་སྡེ་ལྔ་ལས། དགེ་སློང་མའི་ཕམ་པ་ལ་བརྒྱད་དུ་ཡོད་དེ་ཐུན་མོང་བ་བཞི་དང་། ཐུན་མོང་མིན་པ་བཞི་རྣམས་སུ་ཡོད་པའི་ཕྱིར། གཉིས་པ་དགེ་འདུན་ལྷག་མ་ལ་ཉི་ཤུར་ཡོད་དེ་ཐུན་མོང་བ་བདུན་དང་། ཐུན་མོང་མ་ཡིན་པ་བཅུ་གསུམ་དུ་ཡོད་པས་སོ། །གསུམ་པ་སྤང་ལྟུང་ལ་སུམ་ཅུ་སོ་གསུམ་ཡོད་དེ། ཐུན་མོང་བ་བཅུ་དགུ་དང་། ཐུན་མོང་མིན་པ་བཅུ་བཞི་ཡོད་པས་སོ། །ལྟུང་བྱེད་འབའ་ཞིག་པ་ལ་བརྒྱ་དང་བརྒྱད་ཅུ་ཡོད་དེ་ཐུན་མོང་བ་བདུན་བཅུ་རྩ་གཉིས་དང་། ཐུན་མོང་མ་ཡིན་པ་བརྒྱ་དང་བརྒྱད་རྣམས་སུ་ཡོད་པས་སོ། །བཞི་པ་སོར་བཤགས་ལ་བཅུ་གཅིག་ཡོད་དེ་ཐུན་མོང་བ་གཅིག་དང་། ཐུན་མོང་མ་ཡིན་པ་བཅུ་ཡོད་པས་སོ། །ལྔ་པ་བསླབ་བྱ་ཉེས་བྱས་ལ་བརྒྱ་དང་བཅུ་གཉིས་ཡོད་དེ་ཐུན་མོང་བ་བརྒྱ་དང་བཅུ། ཐུན་མོང་མ་ཡིན་པ་གཉིས་ཡོད་པས་སོ། །ཐམས་ཅད་བསྡོམས་ན་དགེ་སློང་མའི་ཁྲིམས་སུམ་བརྒྱ་དྲུག་ཅུ་རྩ་བཞིའོ། །གཉིས་པ་ཞུ་བ་སྤྱིར་བསྟན་པ་འཆད་པ་ལ་གཉིས་ཏེ། སྤྱིའི་དོན་དང་། ཡན་ལག་གི་དོན་ནོ། །དང་པོ་ལ་བཞི་སྟེ། གོ་རིམ་ལ་སྐྱོན་ཆག་པ་སྤང་བའི་ཕྱིར་སྤྱིར་བསྟན་ཕྱིས་བསྟན་པའི་འཐད་པ། རང་དགའི་ཉེས་པ་སྤང་བའི་ཕྱིར་དུ་ལུང་གང་ནས་འབྱུང་བ། འབྲས་བུ་མེད་པར་དོགས་པ་བཟློག་པའི་ཕྱིར་དགོས་དོན་བཤད་པ། བདེ་བླག་ཏུ་རྟོགས་པར་བྱ་བའི་ཕྱིར་བསྡུས་དོན་བཤད་པའོ། །དང་པོ་ལ་བཞི་སྟེ། རྒོལ་བ། བསམ་པ། རྩོད་པའི་ཚུལ། ལན་ནོ། །དང་པོ་ནི། རྩ་འགྲེལ་གྱི་དགོངས་པ་ལེགས་པར་མི་ཤེས་པའི་རྒོལ་བ་ཁ་ཅིག་གིའོ། །གཉིས་པ་ནི། རྣམ་འབྱེད་གཉིས་སྔར་བསྟན་ནས་སྤྱིར་བསྟན་ཕྱིས་བསྟན་པའི་གོ་རིམ་ལ་སྐྱོན་ཆགས་སྙམ་པའོ། །གསུམ་པ་ནི། ཤེས་བྱ་ཆོས་ཅན། རྣམ་འབྱེད་གཉིས་སྔར་བསྟན་ནས་སྤྱིར་བསྟན་ཕྱིས་བསྟན་པའི་གོ་རིམ་དེ་མི་འཐད་པར་ཐལ། སྤྱིར་བསྟན་ཡི་གེ་ཉུང་བས་མདོར་བསྟན་ནམ་རྩ་བ་ལྟ་བུ་ཡིན་ལ། རྣམ་འབྱེད་ནི་ཡི་གེ་མང་བས་རྒྱས་བཤད་དམ་འགྲེལ་པ་ལྟ་བུ་ཡིན་པའི་ཕྱིར། ཁྱབ་སྟེ། ཀ་ལཱ་པ་ལས། གཉིས་ལས་དང་པོ་མཆོད་འོས་སམ། །ཡང་ན་ཡི་གེ་རབ་ཉུང་བ། །ཞེས་བཤད་ཅིང་། རྩ་བ་ལས་འགྲེལ་པ་ལས། མདོར་བསྟན་ལས་རྒྱས་བཤད་འབྱུང་བའི་ཕྱིར་རོ་ཞེས་ཟེར་རོ། །བཞི་པ་ལན་ནི། གོ་རིམ་མི་མཐུན་པའི་སྐྱོན་མེད་དེ། བཅོམ་ལྡན་འདས་ཀྱིས་དང་པོར་ལུང་རྣམ་འབྱེད་གསུངས་ཤིང་། དེའི་རྗེས་སུ་དེ་ལ་དོགས་གཅོད་ཀྱི་ཞུ་བ་འབྱུང་བས་ལུང་དང་མཐུན་པར་བསྟན་པ་ཡིན་པའི་ཕྱིར། གཉིས་པ་རང་དགའི་ཉེས་པ་སྤང་བ་ལ་བཞི་སྟེ། རྒོལ་བ། བསམ་པ། རྩོད་པ། ལན་ནོ། །དང་པོ་ནི། ལུང་གི་དོན་ལེགས་པར་མི་ཤེས་པའི་རྒོལ་བའོ། །གཉིས་པ་ནི། ལུང་དུ་སྤྱིར་བསྟན་གྱི་ལེའུ་མ་གསུངས་པས་འདིར་སྤྱིར་བསྟན་གྱི་ལེའུ་བཤད་པར་རང་བཟོ་ཡིན་པས་མི་འཐད་སྙམ་པའོ། །གསུམ་པ་ནི། འདིར་སྤྱིར་བསྟན་གྱི་ལེའུ་བཤད་པ་རང་བཟོར་ཐལ། ལུང་ལས་སྤྱིར་བསྟན་གྱི་ལེའུ་ཞེས་པ་མ་བཤད་པའི་ཕྱིར་ཞེས་ཟེར་བའོ། །བཞི་པ་ལན་ལ་ཁ་ཅིག་འདིར་ལེའུ་དེ་བཤད་པ་རང་བཟོ་མ་ཡིན་ཏེ། རྫས་བཀག་པ་བས་ཞེས་སོགས་དང་། འདྲ་བ་ལ་ཡང་ངོ་ཞེས་པ་དང་། མི་ལ་དུད་འགྲོ་ཡང་ངོ་ཞེས་པ་རྣམས་ལུང་རྣམ་འབྱེད་ལས་བསྡུས་པ་ཡིན་ལ། རྫུ་འཕྲུལ་གྱི་ཆོས་ཅན་མ་ཡིན་པ་རེག་པ་མ་ཡིན་པའི་ཡན་ལག་ཡིན་ནོ། །ཞེས་པ་ལུང་འདུལ་བྱེད་ལས་བསྡུས། གཞན་རྣམས་ནི་ལུང་ཞུ་བ་ལས་བསྡུས་པའི་ཕྱིར་ཞེས་གསུངས་སོ། །རང་ལན་ནི། འདིར་སྤྱིར་བསྟན་གྱི་ལེའུ་ལོགས་སུ་འཆད་པ་ལ་རང་བཟོའི་སྐྱོན་མེད་དེ། ལུང་ཞུ་བ་ལས་ལྟུང་བ་དུ་མའམ་སྤྱི་གཏན་ལ་འབེབས་བྱེད་ཀྱི་ལུང་ཞུ་བ་དང་། རེ་རེ་བ་གཏན་ལ་འབེབས་བྱེད་ཀྱི་ལུང་ཞུ་བ་གཉིས་ལས། དུ་མའམ་སྤྱིའི་གཏན་ལ་འབེབས་བྱེད་ཀྱི་ཞུ་བ་རྣམས་ཕྱོགས་གཅིག་ཏུ་བསྡུས་ནས་འདིར་ལེའུ་གཅིག་ཏུ་མཛད་པའི་ཕྱིར། གསུམ་པ་དགོས་དོན་བཤད་པ་ནི། འདིར་སྤྱིར་བསྟན་གྱི་ལེའུ་ལོགས་སུ་བཤད་པ་ལ་དགོས་པ་ཡོད་དེ། ཚིག་ཚོགས་བསྐྱུང་བ་དང་། རུང་མཐུན་རྟོགས་པའི་དགོས་པ་ཡོད་པའི་ཕྱིར། ཊཱི་ཀར་ཉེ་བར་འཁོར་གྱིས་ཞུས་པ་ལས་ལྟུང་བའི་མཚན་ཉིད་རྣམ་པ་གཉིས་སུ་གསུངས་ཏེ། ཕམ་པར་འགྱུར་བ་ལ་སོགས་པ་དག་ལ་སོ་སོར་ངེས་པ་དང་སྤྱིར་བསྟན་པའོ། །དེ་ལ་སོ་སོར་ངེས་པ་གང་ཡིན་པ་དེ་ནི་དེ་དག་ཉིད་དང་ཅིག་ཅར་རྣམ་པར་བཞག་ཟིན་ཏོ། །སྤྱིར་བསྟན་པ་གང་ཡིན་པ་འདི་མན་ཆད་དུ་རྣམ་པར་བཤད་པར་བྱའོ། །དེ་ནི་རྣམ་པར་འབྱེད་པའི་ཤན་ཡིན་པའི་ཕྱིར། རྣམ་པར་འབྱེད་པ་བསྟན་པའི་འོག་ཏུ་སྤྱིར་བསྟན་པ་ཉིད་ཀྱིས་རྣམ་པར་བཀོད་དེ། ཞེས་གསུངས་པའི་ཕྱིར། ཚིག་ཚོགས་བསྐྱུང་བའི་དགོས་པ་ཅི་ལྟ་བུ་ཞེ་ན། བཅོམ་ལྡན་འདས་ཀྱིས་སྐབས་དུ་མར་ལྟུང་བ་དུ་མ་ལ་སྦྱར་ནས་གསུངས་པ་དེ། འདིར་སློབ་དཔོན་གྱིས་མདོའི་ཚིག་གིས་བསྡུས་ནས་སྟོན་པ། དཔེར་ན་བསླབ་པ་བྱིན་པ་ནི་འདྲ་བ་ཉིད་དོ་ཞེས་པ་ལྟ་བུའོ། །རུང་མཐུན་རྟོགས་པའི་དགོས་པ་ནི། ལུང་དུ་ལྟུང་བ་གཅིག་གམ་ཕྱོགས་འགའི་ཡན་ལག་ཏུ་གསུངས་པ་དེ། འདིར་ལྟུང་བ་གཞན་ནམ་མཐའ་དག་གི་ཡན་ལག་ཏུ་ཚིག་གཅིག་གིས་བསྡུས་ནས་སྟོན་པ། དཔེར་ན་ལུང་དུ་འཁྲིག་ཚིག་སྨྲ་བ་དང་བསྙེན་བསྐུར་བསྔགས་པ་གཉིས་སྨྲ་བའི་ཡུལ་ལ་རྫུ་འཕྲུལ་གྱི་ཆོས་ཅན་མ་ཡིན་པར་དགོས་པ་བསྟན་པ་བཞིན་དང་། ལུང་དུ་མ་བྱིན་ལེན་ལ་གཞི་ཆུང་ངུ་དུ་མ་བསྡོམས་ནས་ཕམ་པ་མི་བསྐྱེད་པར་བཤད་པ་དེ། འདིར་བྱ་བ་དུ་མའི་འབྲས་བུ་ལྟུང་བ་རྣམ་པར་མི་གཞག་ཅེས་སྤྱི་ལ་སྦྱར་ནས་བཤད་པ་ཡིན་ནོ། །བཞི་པ་བསྡུས་དོན་བཤད་པ་ལ་བཞི་སྟེ། སྒྲ་དོན། ཡན་ལག་གི་མཚན་ཉིད། སེལ་བའི་མཚན་ཉིད། ལྟུང་བ་ཐ་དད་བསྐྱེད་པའི་ཚུལ་ལོ། །དང་པོ་ནི། ལྟུང་བ་མཐའ་དག་ལ་སྤྱིར་བསྟན་པས་སམ་གཉིས་སམ་གསུམ་ལ་སྤྱིར་བསྟན་པས་སམ། སྤྱིར་བསྟན་གྱི་ཞར་བྱུང་ཡིན་པས་སྤྱིར་བསྟན་ནོ། །གཉིས་པ་ལ་གཉིས་ཏེ། འདིར་འགྱུར་གྱི་ཡན་ལག་དང་། ཁ་སྐོང་གི་ཡན་ལག་གོ །དང་པོ་ནི། ལྟུང་བ་དེ་བསྐྱེད་པ་ལ་ཡན་ལག་དེ་ངེས་པར་མི་དགོས་ཀྱང་དེས་ལྟུང་བ་དེ་བསྐྱེད་པ་སྟེ། དཔེར་ན་བསླབ་པ་བྱིན་པ་ནི་འདྲ་བ་ཉིད་དོ་ཞེས་དང་། འགྲོ་བ་གཞན་གྱི་རྣམ་པ་བསྟེན་པ་ན་དགེ་སློང་གི་འདུ་ཤེས་ཡོད་པ་ལ་ཡང་ངོ་། །ཞེས་བཤད་པ་བཞིན་ནོ། །གཉིས་པ་ནི། ལྟུང་བ་དེ་བསྐྱེད་པ་ལ་ཡན་ལག་དེ་ངེས་པར་དགོས་པ་སྟེ། འདི་ལ་ཐུན་མོང་གི་ཡན་ལག་དང་། ཐུན་མོང་མ་ཡིན་པའི་ཡན་ལག་གཉིས། དང་པོ་ལ། མཐའ་དག་གི་ཡན་ལག་དང་། ཕལ་ཆེ་བའི་ཡན་ལག་གཉིས། དང་པོ་ལ་བསླབ་པའི་ཡན་ལག་དང་། བསམ་པའི་ཡན་ལག་གཉིས། དང་པོ་ལ་བཞི་སྟེ། བསྙེན་རྫོགས་ཀྱི་སྡོམ་པ་གསོ་རུང་དང་ལྡན་པ། ཚིག་གཅིག་པ། རྒྱུན་གཅིག་པ། བཅས་པ་གཞག་པའོ། །དང་པོ་ནི། སྤྱིར་བསྟན་གྱི་གཞུང་སྔ་མ་གསུམ་གྱིས་བསྟན་ནོ། །གཉིས་པ་ནི། ཚིག་སྔ་མ་སྦྱོར་བ་བྱས་པ་ལ་ཡང་ངོ་། །ཞེས་པས་བསྟན་ཏོ། །གསུམ་པ་ནི། ཉེས་པ་དེ་མེད་པ་ཉིད་ལ་འོང་བ་ནི་ཐ་དད་ཅེས་པས་བསྟན། བཞི་པ་ནི་ཁ་ཅིག་སྤྱིར་བསྟན་དུ་མ་བཤད་པར་བསྡུས་འབྱུང་གཞི་ནས་འཆད་ཟེར་ཡང་། གཞི་གཅིག་ལ་དུ་མ་ཉིད་ལ་ཅེས་སོགས་ཀྱིས་བསྟན་ཏོ། །གཉིས་པ་བསམ་པའི་ཡན་ལག་ནི། བསམ་པ་རང་བཞིན་དུ་གནས་པ་དགོས་ལ། ཁ་ཅིག་འགྲོ་བ་གཞན་གྱི་རྣམ་པ་བསྟན་པ་ན་ཞེས་པས་བཤད་པར་འདོད་ཀྱང་། རང་ལུགས་ལ། ཐ་སྙད་དུ་རུང་བའི་འདུ་ཤེས་ལས་ཉམས་པ་ལ་ནི་ཕམ་པར་འགྱུར་བ་མན་ཆད་ཀྱི་ལྟུང་བ་མི་འབྱུང་ཞེས་བཤད་པས་བསྡུས་འབྱུང་གཞིས་བསྟན། གཉིས་པ་ཕལ་ཆེ་བའི་ཡན་ལག་ལ་གཉིས་ཏེ། ལུས་ཀྱི་ཡན་ལག་དང་། མཚན་གྱི་ཡན་ལག་གོ །དང་པོ་ནི། ཁ་ཅིག་ན་རེ་སྲོག་གཅོད་བཞི་མ་བྱིན་ལེན་ཕམ་ལྷག་དང་པོ་གཉིས་ལས་གཞན་པའི་ལྟུང་བ་བསྐྱེད་པ་ལ། ལུས་གཞན་དུ་མ་བསྒྱུར་བ་དགོས་དེ་ཡང་འགྲོ་བ་གཞན་གྱི་རྣམ་པ་བསྟེན་པ་ཞེས་སོགས་ཀྱིས་བསྟན་ཞེས་ཟེར་རོ། །རང་ལུགས་ནི། འཁྲིག་ཚིག་སྨྲ་བའི་ལྷག་མ་བསྐྱེད་པ་ལ་ལུས་མི་སྣང་བ་མ་བྱས་པ་དགོས་ཤིང་། བལ་ཁུར་གྱི་ལྟུང་བ་བསྐྱེད་པ་ལ་ལུས་གཞན་དུ་མ་བསྒྱུར་བ་ཡན་ལག་ཏུ་དགོས་ཏེ། དེ་ཡང་འགྲོ་བ་གཞན་གྱི་རྣམ་པ་བསྟེན་པ་ན། ཞེས་སོགས་ཀྱིས་ཤུགས་ལ་བསྟན་ནོ། །གཉིས་པ་མཚན་གྱི་ཡན་ལག་ནི། ཁ་ཅིག་རྗེས་སུ་མཐུན་པ་མིང་ཙམ་དང་ཐུན་མོང་མ་ཡིན་པའི་ལྟུང་བ་བསྐྱེད་པ་ལ་མཚན་དེ་ལ་སྦྱོར་བ་བྱས་ཏེ་དེ་ལ་མཐར་ཐུག་གྲུབ་པ་དགོས་ལ། དེ་ཡང་མཚན་གྱུར་གྱི་གཞུང་རྣམས་ཀྱིས་བསྟན་པར་འདོད་དོ། །རང་ལུགས་ནི། མཚན་ཕྱི་མ་དེ་ལ་ལྟུང་བ་ཆེ་བའི་བཅས་པ་བཞག་པའི་ལྟུང་བ་དེ་བསྐྱེད་པ་ལ་མཚན་ཕྱི་མ་དེ་ལ་སྦྱོར་བ་བྱས་ཏེ་དེ་ལ་མཐར་ཐུག་གྲུབ་དགོས་པར་མཚན་གྱུར་གྱི་གཞུང་རྣམས་ཀྱིས་བསྟན་ནོ། །གཉིས་པ་ཐུན་མོང་མ་ཡིན་པའི་ཡན་ལག་ལ་བཞི་སྟེ། གཞི། བསམ། སྦྱོར་བ། མཐར་ཐུག་གོ །དེ་ཡང་གཞི་ནི། ལྟུང་བ་བསྐྱེད་པའི་རྒྱུ་ཚོགས་སུ་གྱུར་ཅིང་། འདུ་ཤེས་ཀྱི་དམིགས་ཡུལ་དུ་གྱུར། སྦྱོར་བ་བྱེད་པའི་གཞིར་གྱུར་པའོ། །བསམ་པ་ནི། ལྟུང་བའི་རྒྱུ་ཚོགས་སུ་གྱུར་ཅིང་། བློ་ཡི་ཆོས་སུ་གྱུར་པའོ། །སྦྱོར་བ་ནི། ལྟུང་བའི་རྒྱུ་ཚོགས་སུ་གྱུར་ཅིང་། མཐར་ཐུག་ལ་སྦྱོར་བའོ། །མཐར་ཐུག་ནི། ལྟུང་བའི་རྒྱུ་ཚོགས་མཐར་ཐུག་པའོ། །དང་པོ་གཞིའི་ཡན་ལག་ལ་སེམས་ཅན་གྱི་གཞི་ལས་གྱུར་པ་དང་། སེམས་ཅན་མ་ཡིན་པའི་གཞི་ལས་གྱུར་པ་གཉིས། དང་པོ་ལ། སེམས་ཅན་ཙམ་གྱི་གཞི་ལས་གྱུར་པ་དང་། སེམས་ཅན་སོ་སོའི་གཞི་ལས་གྱུར་པ་གཉིས། དང་པོ་ནི། ཕམ་ལྷག་དང་པོ་གཉིས་ཏེ། དེ་ཡང་མི་ཚངས་པར་སྤྱོད་པ་དང་ཁུ་བ་འབྱིན་པ་གཉིས་ལ་ནི་དེར་མ་ཟད་དོ་ཞེས་པས་བསྟན། གཉིས་པ་སོ་སོ་ལས་གྱུར་པ་ལ། མི་མ་ཡིན་གྱིས་བསྐྱེད་པའི་ལྟུང་བ་དངོས་གཞི་རྣམ་པར་མ་གཞག་པས་དུད་འགྲོས་བསྐྱེད་པ་དང་། མིས་བསྐྱེད་པ་གཉིས་ལས། དང་པོ་ནི། དུད་འགྲོ་འདེབས་སྤྱོད་གཉིས། དུད་འགྲོ་གསོད་པའི་ལྟུང་བྱེད་དེ་གསུམ་མོ། །མིས་བསྐྱེད་པ་ལ་མི་སྤྱིས་བསྐྱེད་པ། བྱེ་བྲག་པས་བསྐྱེད་པ་གཉིས། དང་པོ་ནི། སྲོག་གཅོད་དང་། མ་བྱིན་ལེན་གྱི་ཕམ་པ་གཉིས་སོ། །མི་བྱེ་བྲག་པས་བསྐྱེད་པ་ལ། དགེ་སློང་གིས་བསྐྱེད་པ། དགེ་སློང་མས་བསྐྱེད་པ། བསྙེན་པར་རྫོགས་པ་སྤྱིས་བསྐྱེད་པ། སྡེ་ལྔ་སྤྱིས་བསྐྱེད་པ། དགེ་ཚུལ་ཁོ་ནས་བསྐྱེད་པ། མུ་སྟེགས་པས་བསྐྱེད་པ། ཁྱིམ་པ་སྤྱིས་བསྐྱེད་པ། ཁྱིམ་པ་ཕོ་ཁོ་ནས་བསྐྱེད་པ། མོ་ཁོ་ནས་བསྐྱེད་པ། གཉིས་ཀས་བསྐྱེད་པ། མ་རྫོགས་པ་སྤྱིས་བསྐྱེད་པ། ཐ་སྙད་སྤྱིས་བསྐྱེད་པ་སྟེ་བཅུ་གཉིས་སོ། །དང་པོ་ནི། བརྡེག་པའི་ལྟུང་བྱེད་སོགས་ཞེ་དྲུག་གོ །གཉིས་པ་ནི། འཁྲུར་འཇུག་གི་སྤང་བ་སོགས་བཅུ་བཞིའོ། །གསུམ་པ་ནི། སྐུར་འདེབས་ཀྱི་ལྟུང་བ་གསུམ་མོ། །བཞི་པ་ནི། སྦེད་པ་དང་གྲོང་རྒྱུའི་ལྟུང་བྱེད་གཉིས་སོ། །ལྔ་པ་ནི། བསྙིལ་བ་སྡུད་པའི་ལྟུང་བྱེད་དོ། །དྲུག་པ་ནི་འདུག་གནས་སུ་ཟ་བ་དང་གཅེར་བུ་ལ་ཟས་བྱིན་པའི་ལྟུང་བྱེད་གཉིས་སོ། །བདུན་པ་ནི། གོས་སློང་བ་སོགས་ཉི་ཤུ་རྩ་བདུན་ནོ། །བརྒྱད་པ་ནི། དམག་ནང་ན་གནས་པ་སོགས་ཀྱི་ལྟུང་བྱེད་གསུམ་དང་། རྐུན་མ་དང་ལྷན་ཅིག་ལམ་དུ་འགྲོ་བའི་ལྟུང་བྱེད་དེ་བཞིའོ། །དགུ་པ་ནི། ཁྱིམ་པ་མོ་ལ་ཆོས་སྟོན་པ། བུད་མེད་དང་ལྷན་ཅིག་ཉལ་བ། བུད་མེད་དང་ལྷན་ཅིག་ལམ་དུ་འགྲོ་བའི་ལྟུང་བྱེད་དང་གསུམ་མོ། །བཅུ་པ་ནི་ཉལ་པོ་བྱེད་པར་ཤོམ་པའི་ཁྱིམ་ན་འདུག་པ་དང་འགྲེང་བའི་ལྟུང་བྱེད་གཉིས་སོ། །བཅུ་གཅིག་པ་ནི། འདོན་པའི་ལྟུང་བྱེད། གནས་ངན་ལེན་བརྗོད་པ། མིའི་ཆོས་བླ་མ་བདེན་པར་བརྗོད་པ། མ་རྫོགས་པ་དང་ནུབ་གསུམ་ལྷག་པར་ཉལ་བའི་ལྟུང་བྱེད་དང་བཞིའོ། །བཅུ་གཉིས་པ་ནི་རྫུན་དུ་སྨྲ་བའི་ཕམ་པ་སོགས་བཅུ་གཉིས་སོ། །གཉིས་པ་སེམས་ཅན་མ་ཡིན་པའི་གཞི་ལས་གྱུར་པ་ལ་འབྱུང་བ་ལས་གྱུར་པ་དང་། འབྱུང་གྱུར་ལས་གྱུར་པ་གཉིས་ལས། དང་པོ་ནི། ཁ་ཅིག་རླུང་གིས་བསྐྱེད་པའི་ལྟུང་བ་དངོས་གཞི་རྣམ་པར་མ་བཞག་ལ། སས་བསྐྱེད་པ། ཆུས་བསྐྱེད་པ། མེས་བསྐྱེད་པ་གསུམ། དང་པོ་ནི། ས་རྐོ་བའི་ལྟུང་བྱེད། གཉིས་པ་ནི། ཆུ་ལ་རྩེ་བ་དང་། ཁྲུས་བྱེད་པའི་ལྟུང་བྱེད་གཉིས། གསུམ་པ་ནི་མེ་རེག་གི་ལྟུང་བྱེད་ཡིན་གསུང་བ་མི་འཐད་དེ། དེ་གསུམ་ནི། འཇིག་རྟེན་ན་གྲགས་པའི་ས་ཆུ་མེ་གསུམ་གྱིས་བསྐྱེད་པའི་དབང་དུ་བྱས་པ་ཡིན་ལ། དེ་གསུམ་འབྱུང་བ་མ་ཡིན་པའི་ཕྱིར་རོ། །གཉིས་པ་འབྱུང་གྱུར་གྱིས་བསྐྱེད་པ་ལ་ལྔ་སྟེ། གནས་ཁང་ལས་གྱུར་པ། ཟས་ལས་གྱུར་པ། གོས་ལས་གྱུར་པ། སྣོད་སྤྱད་ལས་གྱུར་པ། བཏུང་བ་ལས་གྱུར་པའོ། །ཁ་ཅིག་གནས་ཁང་ལས་གྱུར་པ་རྣམས་འདིར་མི་སྟོན་ཏེ། རྣམ་འབྱེད་ཀྱི་སྐབས་ནས་འཆད་གསུང་བ་མི་འཐད་དེ། གནས་ཁང་གིས་བསྐྱེད་པའི་ལྟུང་བ་རྣམས་ཀྱི་བསླབ་པའི་ཡན་ལག་དང་བསམ་པའི་ཡན་ལག་འདིར་བསྟན་པའི་ཕྱིར་དང་། ཀུན་སློང་གིས་སེལ་བ་ནི་བཏང་བ་ཡང་ངོ་ཞེས་པ་དང་། ཚད་ཀྱི་སེལ་བ་ནི་ཕྱེད་བྱས་པ་ལ་བྱེད་པ་ནི་ཕྱེད་ཉིད་དོ་ཞེས་པས་བསྟན་པའི་ཕྱིར་རོ། །གཉིས་པ་བསམ་པའི་ཡན་ལག་ལ། འདུ་ཤེས་དང་ཀུན་སློང་གཉིས་དང་པོ་ལ་ཐེ་ཚོམ་ཟ་བ་དང་། དེར་འདུ་ཤེས་པ་གཉིས་ལས། དང་པོ་ནི། ཐམས་ཅད་ལ་ཐེ་ཚོམ་ཟ་བས་ཞུགས་པ་ནི་བསམ་པ་དང་བཅས་པ་ཡིན་ནོ་ཞེས་དང་། ཕྱི་མ་ནི། སྦྱོར་བ་ལ་ནི་འདུ་ཤེས་ཡན་ལག་ཡིན་ནོ། །བསམ་པ་ལ་ནི་དེ་ཉིད་དོ་ཞེས་པས་བསྟན། གཉིས་པ་ཀུན་སློང་ལ་རྒྱུན་མ་ཆད་པ་དང་། ལྟུང་བ་གང་བཅས་པའི་གཞི་དེས་ཀུན་ནས་བསླང་བ་དང་རང་དོན་དུ་བྱེད་པ་རྣམས་ལས་རང་ཁོ་ནའི་དོན་དུ་བྱེད་འདོད་པ་དགོས་པ་རྣམས་རིམ་པ་བཞིན་བཏང་བ་ཡང་ངོ་ཞེས་དང་། དེའི་ཆ་ནི་དེར་གཏོགས་སོ་ཞེས་དང་། རང་གི་དོན་ཉིད་གཙོ་ཆེར་ཡོད་པའོ་ཞེས་པས་བསྟན་ནོ། །གསུམ་པ་སྦྱོར་བའི་ཡན་ལག་ལ། བཅོལ་ཡང་རྫོགས་པས་བསྐྱེད་པའི་གཞི་ཕལ་ཆེར་ལ་ནི་ཐ་སྙད་ལྔ་ལྡན་དགོས་པས་ཐ་སྙད་ལྔ་ནི་སྨྲ་ཤེས་དོན་གོ ཤེས་པ་རང་བཞིན་དུ་གནས་པ། མ་ནིང་དང་། མཚན་གཉིས་པ་མ་ཡིན་པའོ། །ཕལ་ཆེར་ཞེས་པས་སྲོག་གཅོད་དང་མ་བྱིན་ལེན་གྱི་ཕམ་པ་གཉིས་མ་གཏོགས་སོ། །སྦྱོར་བ་རང་གི་བྱེད་པ་ལ་ངག་ཁོ་ནས་བྱེད་པ་དང་། ལུས་ཀྱི་བྱེད་པ་གཉིས། དང་པོ་ལ་ངག་མཚན་ཉིད་ལྔ་ལྡན་དགོས་ལ། ལྔ་ནི། ངག་ཡིན་པ། རང་གི་ཡིན་པ། བདག་ཉིད་དང་འབྲེལ་བ། མ་ནོར་བ། གསལ་བའོ། །དེ་ཡང་ངག་གིའོ། །རང་གིའོ་བདག་ཉིད་དང་འབྲེལ་པའོ་ཞེས་དང་། ནོར་ན་ཡང་ངོ་ཞེས་དང་། གཞོག་ཕྱེས་བྱེད་ན་ཡང་ངོ་ཤེས་པས་བསྟན་ནོ། །བཞི་པ་མཐར་ཐུག་གི་ཡན་ལག་ནི། རྣམ་འབྱེད་ཀྱི་སྐབས་སུ་བསྟན་ཏེ། དཔེར་ན་བཅུག་རེག་ཉམས་སུ་མྱོང་བ་བྱས་ནའོ་ཞེས་དང་། སྲོག་བཅད་ནའོ་ཞེས་དང་། ཤི་ནའོ་ཞེས་དང་། གོ་བར་བྱས་པ་ལ་བརྡ་ཕྲད་ན་མཐའོ་ཞེས་སོགས་ཀྱིས་བསྟན་ནོ། །གསུམ་པ་སེལ་བའི་མཚན་ཉིད་ནི། ཡན་ལག་གི་ལོག་ཕྱོགས་ནི་སེལ་བའོ། །སེལ་བ་དེ་དག་ལས། ཁ་ཅིག་ལས་ནི་ལྟུང་མེད་དུ་འགྱུར། ཁ་ཅིག་ལ་ནི་ན་སྨད་དུ་འགྱུར། ཁ་ཅིག་ལ་ནི་གཞི་གཞན་འགྱུར་གྱི་ལྟུང་བར་འགྱུར་རོ། །བཞི་པ་ལྟུང་བ་ཐ་དད་དུ་བསྐྱེད་པའི་ཚུལ་ལ་དྲུག་སྟེ། བསླབ་རྒྱུན་ཐ་དད་པ། བསམ་རྒྱུན་ཐ་དད་པ། བཅས་པ་ཐ་དད་པ། ཀུན་སློང་ཐ་དད་པ། གཞི་ཐ་དད་པ། བྱ་བ་ཐ་དད་པས་ལྟུང་བ་ཐ་དད་དུ་བསྐྱེད་པའོ། །དེ་རྣམས་ནི་གཞུང་སོ་སོའི་སྟེང་དུ་རྟོགས་པར་བྱའོ། །གཉིས་པ་ཡན་ལག་གི་དོན་ལ་ལྔ་སྟེ། རྒྱུད་ཀྱི་ཡན་ལག་དང་། ཡུལ་གྱི་ཡན་ལག་དང་། ལྟུང་བ་ཐ་དད་པའི་རྒྱུ་ཞར་བྱུང་དང་བཅས་པ་དང་། འདུ་ཤེས་བསམ་པའི་མཚན་ཉིད་དང་། ཡན་ལག་གི་སེལ་བའོ། །དང་པོ་ལ་བཞི་སྟེ། བསླབ་པའི་ཡན་ལག་ཞར་བྱུང་དང་བཅས་པ་དང་། བསམ་པའི་ཡན་ལག་སེལ་བ་དང་བཅས་པ་དང་། ཚིགས་ཀྱི་ཡན་ལག་ཞར་བྱུང་དང་བཅས་པ་དང་། མཚན་གྱི་ཡན་ལག་ཞར་བྱུང་དང་བཅས་པའོ། །དང་པོ་ལ་དངོས་དང་། ཞར་བྱུང་གཉིས་ལས། དང་པོ་ནི། གོང་དུ་རྟེན་དགེ་སློང་གི་སྡེ་ལྔའི་གཞི་ལ་སྦྱོར་བ་ལ་ལྔ་ཀ་རྫོགས་པར་བསྐྱེད་པར་བཤད་པ་ལ་དགེ་སློང་གང་ཡང་རུང་བས་བསྐྱེད་དམ་སྙམ་ན། ཉམས་པ་ལྟུང་བ་ལ་སྦྱར་ན་ཉེས་བྱས་སོ་ཞེས་གསུངས་ཏེ། ཉམས་ཞེས་པ་བཤད་པའི་གཞིར་གཞག གང་ཉམས། གང་ལས་ཉམས། གང་གིས་ཉམས། ཇི་ལྟར་ཉམས། ཉམས་བྱེད་ལ་ཕམ་པར་འཇོག་པའི་རྒྱུ་མཚན། ཉམས་པས་ལྟུང་བ་ལ་སྦྱར་ན་ཅིར་འགྱུར། དགག་སྒྲུབ་གང་ཡིན། བརྡའི་དོན་མདོ་དང་སྦྱར་བ་དང་བརྒྱད་དོ། །དང་པོ་ནི། ཕམ་པ་ཀུན་ཏུ་སྤྱོད་པའི་རྟེན་དེའོ། །གཉིས་པ་ནི། སྡོམ་པ་དགོས་པ་སྒྲུབ་ནུས་པ་ལས་སོ། །གསུམ་པ་ནི། ཕམ་པ་འཆབ་བཅས་ཀྱིས་ཉམས་སོ། །བཞི་པ་ལ་བྱེ་བྲག་ཏུ་སྨྲ་བའི་ལུགས། མདོ་སྡེ་པའི་ལུགས། སྔ་རབས་པའི་ལུགས་དང་གསུམ་ལས། དང་པོ་ནི། ཕམ་པ་འཆབ་བཅས་འཆབ་མེད་གཉིས་ཡོད་པ་ལས། འཆབ་བཅས་བྱུང་ན་སྡིག་ལྟུང་བཤགས་པས་མི་འདག སྡོམ་པ་བླངས་ཀྱང་མི་སྐྱེ་བའི་ཚུལ་དུ་ཉམས། ཁ་ཅིག་འཆབ་མེད་བྱུང་ན་སྡིག་ལྟུང་བཤགས་པས་འདག སྡོམ་པ་བླངས་ཀྱང་སྐྱེ་ཞེས་ཟེར། ཕམ་པ་ཐུན་མོང་བ་བྱུང་ན་སྡོམ་པ་སྐྱེ་བ་མི་འཐད་དེ། ཤེས་བྱེད་མེད་ཅིང་གནོད་བྱེད་ཡོད་པའི་ཕྱིར། ཕམ་པ་བྱུང་བས་སྡོམ་པ་མི་གཏོང་སྟེ། མ་དག་པའི་གཞི་བཅུ་གཅིག་ལ་སྐུར་འདེབས་བྱེད་པ་ལ་ལྟུང་བྱེད་དུ་གསུངས་པའི་ཕྱིར། གཉིས་པ་མདོ་སྡེ་པའི་ལུགས་ནི། ཕམ་པ་ལ་འཆབ་བཅས་ཁོ་ནར་ངེས། ཕམ་པ་བྱུང་ན་སྡིག་ལྟུང་བཤགས་པས་མི་འདག སྡོམ་པ་བླངས་ཀྱང་མི་སྐྱེ། ཕམ་པས་སྡོམ་པ་གཏོང་སྟེ། ལུང་ལས་དེ་བྱས་ན་བྱས་མ་ཐག་ཏུ་དགེ་སློང་དུ་མི་རུང་། དགེ་སྦྱོང་དུ་མི་རུང་། ཤཱཀྱའི་སྲས་སུ་མི་རུང་ཞེས་གསུངས་པའི་ཕྱིར། ཕམ་པ་བྱུང་ན་སྡོམ་པ་མི་སྐྱེ་སྟེ། ཕྱིས་བླང་དུ་མི་རུང་བའི་ཕྱིར་ཞེས་གསུངས་པའི་ཕྱིར། འཆབ་སེམས་ཕམ་པའི་ཡན་ལག་ཏུ་མི་དགོས་ན་བསམ་གཏན་པ་དགའ་བྱེད་ལ་ཕམ་པ་བྱུང་བར་ཐལ། འཆབ་སེམས་མ་གཏོགས་པའི་ཕམ་པའི་ཡན་ལག་གཞན་ཚང་གི་བསྒྲུབ་པའི་ལྟུང་བ་བྱུང་བའི་ཕྱིར། འདོད་ན། དེས་ལྟུང་བ་ཕྱིར་བཅོས་པའི་རྣམ་གཞག་གསུངས་པ་མི་འཐད་པར་ཐལ་ལོ། །གསུམ་པ་སྔ་རབས་པའི་ལུགས་ནི། ཕམ་པ་འཆབ་བཅས་འཆབ་མེད་གཉིས་སུ་ཡོད་ལ་འཆབ་བཅས་བྱུང་ན་སྡིག་ལྟུང་བཤགས་པས་མི་འདག་ཅིང་སྡོམ་པ་བླངས་ཀྱང་མི་སྐྱེ། འཆབ་མེད་ཀྱིས་ཉམས་ཀྱང་སྡིག་ལྟུང་བཤགས་པས་འདག སྡོམ་པ་བླངས་ན་སྐྱེ། ཕམ་པས་སྡོམ་པ་གཏོང་བར་བྱེད་ཟེར་རོ། །ཕམ་པས་སྡོམ་པ་གཏོང་ན་བསམ་གཏན་པ་དགའ་བྱེད་དགྲ་བཅོམ་ཐོབ་ནས་སྔར་གྱི་གྲལ་དུ་གནས་པར་བཤད་པ་དང་འགལ་ལོ་ཞེ་ན། དེ་ནི་གཟེངས་བསྟོད་པའི་ཕྱིར་མཛད་ཀྱི། སྡོམ་ལྡན་ཡིན་པའི་སྒོ་ནས་མ་ཡིན་ནོ་ཞེས་འདོད་དོ། །འདིར་ནི་དང་པོ་ཉིད་ཁས་བླངས་པར་བྱ་བ་ཡིན་ཏེ། ཊཱི་ཀར་དགེ་སློང་ཕམ་པར་འགྱུར་བ་ལ་ནི་སྡོམ་པ་ཡོད་དུ་ཟིན་ཀྱང་དེ་ལྟ་མོད་ཀྱི་དགོས་པ་མེད་པ་ཉིད་དུ་འགྱུར་ཏེ། ཚངས་པར་མཚུངས་པར་སྤྱོད་པ་རྣམས་དང་ལྷན་ཅིག་གནས་པ་དང་སྤྱོད་པ་དག་མེད་པའི་ཕྱིར་རོ། །སྡོམ་པ་ཡང་དག་པར་བླང་བ་ནི་རྣམ་པར་གྲོལ་བའི་ཕྱིར་ཡིན་ན། དེས་རྣམ་པར་གྲོལ་བ་འཐོབ་པ་ཐག་རིང་དུ་སྤངས་པའི་ཕྱིར། དེས་ན་དེའི་སྡོམ་པ་ནི་མེད་པ་དང་འདྲ་བ་ཡིན་ནོ་ཞེས་གསུངས་པའི་ཕྱིར། ལྔ་པ་ཉམས་བྱེད་ལ་ཕམ་པར་འདོགས་པའི་རྒྱུ་མཚན་ནི། ཕམ་པས་གཉེན་པོ་ཕམ་པར་བྱེད་པས་ན་ཕམ་པའོ། །དྲུག་པ་ཉམས་པས་བྱས་ན་ཅིར་འགྱུར་བ་ནི། ཉམས་པ་དེ་སྡེ་ལྔ་ལ་སྦྱར་ན་ཉེས་བྱས་སུ་འགྱུར་རོ། །བདུན་པ་དགག་སྒྲུབ་གང་ཡིན་པ་ནི། ཉེས་བྱས་ལས་མི་བསྐྱེད་ཅེས་དགག་པ་ཡིན་ནམ། ཉེས་བྱས་བསྐྱེད་ཅེས་སྒྲུབ་པ་ཡིན་ཞེ་ན། ཕམ་པ་འཆབ་བཅས་བྱུང་བའི་དགེ་སློང་དེ་སྡོམ་ལྡན་ཡིན་པས་དེ་ལ་སྡེ་ལྔའི་དངོས་གཞི་བསྐྱེད་དམ་སྙམ་པའི་དོགས་པ་ཡོད་པ་ལ་ཉེས་བྱས་ཡིན་གྱི་ལྟུང་བ་བསྐྱེད་པ་དགག་པའི་དོན་ནོ། །བརྒྱད་པ་བརྡ་དོན་མདོ་དང་སྦྱར་བ་ནི། ཤེས་བྱེད་ཀྱི་ཁུངས་མེད་དམ་སྙམ་པ་ལ། ལུང་ལས་སྔོན་ལྟུང་བ་བྱུང་བ་དང་། རྐུ་ཐབས་སུ་གནས་པ་དང་། དང་པོ་འཁྲུགས་པ་དང་། མ་ནིང་དང་དགེ་སློང་མ་སུན་ཕྱུང་བས་ཉམས་པར་བྱས་ན་ཉེས་བྱས་སོ་ཞེས་གསུངས་པའི་སྔོན་ལྟུང་བ་བྱུང་བ་ཞེས་པ་འདི་ལ་དགོངས་པའི་ཕྱིར་རོ། །སྡོམ་པ་གཏན་མ་སྐྱེས་པ་དེ་ཁྱིམ་པ་དང་འདྲ་བས་ལྟུང་བ་གཏན་མེད་པར་འགྱུར་རོ་སྙམ་ན། མ་སྐྱེས་པ་ལྟུང་བ་ལ་སྦྱར་ན་ཉེས་བྱས་སོ་ཞེས་གསུངས་ཏེ། མ་སྐྱེས་པ་ཞེས་པ་བཤད་པའི་གཞིར་བཞག་ནས། འདི་ལ་བརྒྱད་ལས། གང་མ་སྐྱེས་ན་རབ་ཏུ་བྱུང་བའི་ཕྱོགས་ཀྱི་སྡོམ་པ་ནི་མ་སྐྱེས། གང་ལ་ན་ལེན་པའི་རྟེན་དེ་ལ་མ་སྐྱེས། གང་གིས་མ་སྐྱེས་ན་འགལ་རྐྱེན་བྱུང་བའམ་མཐུན་རྐྱེན་མ་ཚང་བའི་དབང་གིས་མ་སྐྱེས། ཇི་ལྟར་མ་སྐྱེས་ན་ལེན་ཆོག་བྱས་ཀྱང་སྐྱེ་མ་ཉན་པའི་ཚུལ་གྱིས་མ་སྐྱེས། མ་སྐྱེས་པ་དེས་ལྟུང་བ་ལ་སྦྱར་ན་ཅིར་འགྱུར་ན་ཉེས་བྱས་སུ་འགྱུར་རོ། །དགག་སྒྲུབ་གང་ཡིན་ན་སྒྲུབ་པ་ཡིན་ཏེ་སྡོམ་པ་གཏན་མ་སྐྱེས་པས་ཁྱིམ་པ་དང་འདྲ་བས་དེས་ལྟུང་བ་གཏན་མི་བསྐྱེད་དམ་སྙམ་ན་ཉེས་བྱས་བསྐྱེད་ཅེས་སྒྲུབ་པ་ཡིན་པའི་ཕྱིར། དེ་ལ་ཉེས་བྱས་བསྐྱེད་པའི་རྒྱུན་མཚན་ནི། དེ་རབ་ཏུ་བྱུང་བའི་བསྙེན་པར་རྫོགས་པ་ཉིད་དུ་ཁས་བླང་བ་དང་དེ་དག་གི་རྒྱུད་ལ་བར་མ་རབ་བྱུང་ཡོད་པའི་ཕྱིར་ཞེས་ཊཱི་ཀར་གསུངས་སོ། །བརྡ་དོན་མདོ་དང་སྦྱར་བ་ནི། དེ་ལ་ཤེས་བྱེད་ཡོད་དེ། ལུང་ལས་རྐུ་ཐབས་སུ་གནས་པ་དང་། དང་པོ་འཁྲུགས་པ་དང་། མ་ནིང་དང་། དགེ་སློང་མ་སུན་ཕྱུང་ནས་ཉམས་པར་བྱས་ན་ཉེས་བྱས་སོ་ཞེས་གསུངས་པའི་དང་པོ་འཁྲུགས་པས་ཉམས་པར་བྱས་ན་ཉེས་བྱས་སོ་ཞེས་པ་འདི་ལ་དགོངས་པའི་ཕྱིར། ངག་དོན་ནི། དང་པོ་སྲོག་གཅོད་ཀྱི་ཕམ་པ་འཆབ་བཅས་ཀྱི་ཉམས་པའི་དགེ་སློང་ཆོས་ཅན། ཁྱོད་ཀྱིས་ལྟུང་བ་ལ་སྦྱར་བས་ཉེས་བྱས་ལས་ལྷག་པ་མི་བསྐྱེད་དེ། ཁྱོད་ཕམ་པ་འཆབ་བཅས་ཀྱིས་ཉམས་པའི་དགེ་སློང་ཡིན་པའི་ཕྱིར། ཕྱི་མ་ལ། སྡོམ་པ་བླངས་ནས་མ་སྐྱེས་པའི་བར་མ་རབ་བྱུང་གི་རྟགས་ཅན་ཆོས་ཅན། ཁྱོད་ཀྱིས་ལྟུང་བ་ལ་སྦྱར་བས་ཉེས་པ་གཏན་ནས་མི་བསྐྱེད་པ་མ་ཡིན་ཏེ། ཉེས་བྱས་ཙམ་ཞིག་བསྐྱེད་པའི་ཕྱིར། འོ་ན་རབ་བྱུང་ཕྱོགས་ཀྱི་སྡོམ་པ་སྐྱེས་པ་རྣམས་ལ་ཅིར་འགྱུར་ཞེ་ན། བསྙེན་པར་མ་རྫོགས་ཤིང་རབ་ཏུ་བྱུང་བ་དགེ་ཚུལ་ཕ་མ་གཉིས་དགེ་སློབ་མ་དང་གསུམ་གྱིས་ཡང་དག་པར་བླངས་པ་བསླབ་པའི་གཞི་བཅུ་དང་། དགེ་སློབ་མས་དེའི་སྟེང་དུ་རྩ་བའི་ཆོས་དྲུག་དང་རྗེས་སུ་མཐུན་པའི་ཆོས་དྲུག་ལས་འདས་པ་ལ་ཡང་ངོ་སྟེ་ཉེས་བྱས་སུ་འགྱུར་རོ། །འོ་ན་བླངས་པ་མ་ཡིན་པ་ལས་འདས་པ་ལ་ཅིར་འགྱུར་ཞེ་ན། བསྙེན་པར་མ་རྫོགས་ཤིང་རབ་ཏུ་བྱུང་བ་གསུམ་པོ་དེས་དངོས་སུ་བླངས་པའི་བསླབ་པ་དེའི་ཕྱོགས་དང་མཐུན་ཏེ་ཕྱོགས་ལ་བརྟེན་པ་ལས་འདས་པ་ལ་ནི་ཡིད་ཀྱི་བསྡམ་བྱའི་ཉེས་བྱས་སུ་འགྱུར་རོ། །འདིར་བླངས་འདས་ཀྱི་མཐའ་དཔྱད་པ་ལ་བརྒྱད་དེ། དབྱེ་བ། བསྡུ་བ། མཚན་ཉིད། གྲངས་ངེས། གོ་རིམ་ངེས་པ། སྒྲ་བཤད་པ། བསྲུངས་པའི་ཕན་ཡོན། མ་བསྲུངས་པའི་ཉེས་དམིགས་སོ། །དང་པོ་ལ་གཉིས་ཏེ། འཐད་པ་འགོད་པ་དང་། འཁྲུལ་པ་དགག་པའོ། །དང་པོ་ནི། དགེ་ཚུལ་ཕ་མ་གཉིས་ལ་ནི་བསླབ་པའི་གཞི་བཅུ་དང་། ཁྱིམ་པའི་རྟགས་སྤོང་བ་དང་། རབ་ཏུ་བྱུང་བའི་རྟགས་བླངས་པ་ལས་འདས་པའི་བླངས་འདས་བཅུ་གཉིས། དགེ་སློབ་མ་ལ་དེའི་སྟེང་དུ་རྩ་བའི་ཆོས་དྲུག་དང་རྗེས་མཐུན་གྱི་ཆོས་དྲུག་ལས་འདས་པའི་བླངས་འདས་བཅུ་གཉིས་ཏེ་ཉི་ཤུ་རྩ་བཞིའོ། །གཉིས་པ་ལ་འདོད་པ་བརྗོད་པ་དང་། སུན་འབྱིན་བཤད་པ་གཉིས། དང་པོ་ལ་ཁ་ཅིག་བླངས་འདས་སོ་དྲུག་ཏུ་དབྱེ་སྟེ། སྲོག་གཅོད་བཞི་དང་མ་བྱིན་ལེན། །མི་ཚངས་སྤྱོད་དང་བརྫུན་དུ་སྨྲ། །གཞི་མེད་བག་ཙམ་དགེ་འདུན་དབྱེན། །དེར་རྗེས་ཕྱོགས་དང་ཁྱིམ་སུན་འབྱིན། །བཤེས་ངོར་བྱེད་དང་འཕྱ་བ་དང་། །ཟས་ཅུང་ལྷག་མས་སྐུར་འདེབས་དང་། །བསླབ་པ་སྤོང་དང་འབྲས་ཆན་འགེབས། །ཆང་དང་གླུ་གར་རོལ་མོ་བྱེད། །བརྒྱན་དང་ཁ་དོག་སྤོས་བྱུག་ཕྲེང་། །ཁྲི་དང་བསྟན་ནི་ཆེ་མཐོ་དང་། །ཕྱི་དྲོའི་ཁ་ཟས་གསེར་དངུལ་ལེན། །ཉམས་པ་རྣམ་པ་གསུམ་དག་སྟེ། །སུམ་ཅུ་དྲུག་ནི་བླངས་ལས་འདས། །ཞེས་གསུངས་སོ། །ཁ་ཅིག་དེའི་སྟེང་དུ་ཁྱད་གསོད་གཉིས། ཙུག་ཙུག་ལ་སོགས་བཞི། ཁང་པ་ཁང་ཆེན་གཉིས་ཏེ་བརྒྱད་བསྣོན་ལ། ཁྱད་གསོད་གཉིས་ལ་བཤགས་བྱའི་ཉེས་བྱས་སུ་འགྱུར་ཏེ། བསླབ་པའི་དངོས་པོ་ལ་ཉེ་བར་འཇོག་པ་སྤོང་བ་ཡང་ཁྱད་གསོད་ཡིན་པས་ཁྱད་གསོད་མཚུངས་པའི་ཕྱིར། ཙུག་ཙུག་སོགས་བཞི་ལ་བཤགས་བྱའི་ཉེས་བྱས་སུ་འགྱུར་ཏེ། ཚོད་མས་འབྲས་ཆན་འགེབས་པ་དང་རྫུན་དུ་མཚུངས་པའི་ཕྱིར། ཁང་པ་ཁང་ཆེན་གཉིས་ལས་བཤགས་བྱའི་ཉེས་བྱས་སུ་འགྱུར་ཏེ། ཊཱི་ཀར་ཁ་ཅིག་ནི་བཤགས་པར་བྱ་བའི་ཉེས་བྱས་སུ་འགྱུར་ལ་ཞེས་གསུངས་པའི་ཕྱིར་ཞེས་འདོད། གྲོ་་་་་་ཁ་ཅིག་དེའི་སྟེང་དུ་མཁན་པོར་གསོལ་བར་བཏབ་པ་ཉམས་པ་བོར་ནས་གསོ་སྦྱོང་མ་བྱས་པ། དགག་དབྱེ་མ་བྱས་པ། དབྱར་ཁས་མ་བླངས་པ། གནས་བླ་མ་ལ་མ་བརྟེན་པ། དཀོན་མཆོག་ལ་མ་གུས་པ་དང་ལྔ་བསྣན་ཏེ། ཊཱི་ཀར་མ་གུས་པའི་གཞི་ལས་བྱུང་བ་གང་གི་ཕྱོགས་དང་མཐུན་པ་ཉིད་ཡིན་ཞེ་ན། མ་གུས་པའི་གཞི་ལས་བྱུང་བ་ཞེས་བྱ་བ་ནི། སངས་རྒྱས་དང་ཆོས་དང་དགེ་འདུན་ལ་མ་གུས་པ་ལས་གྱུར་པ་སྟེ། དེ་ལ་དཀོན་མཆོག་གསུམ་ལ་མ་གུས་པ་ནི། གསུམ་ལ་སྐྱབས་སུ་སོང་བས་སྡོམ་པ་ཡང་མིན། སྡོམ་པ་མ་ཡིན་པ་ཡང་མ་ཡིན་པའི་ངོ་བོ་ཉིད་ཀྱིས་རབ་ཏུ་བྱུང་བ་དང་། དགེ་ཚུལ་དང་དགེ་སློབ་མའི་སྡོམ་པ་ཡང་དག་པར་བླངས་པ་ལས་འདས་པ་ཉིད་ཡིན་པས་དེ་ལ་བཤགས་པར་བྱ་བའི་ཉེས་བྱས་སུ་འགྱུར་རོ་ཞེས་དང་། མི་སྦྱོང་བའི་གཞི་ལས་བྱུང་བ་གང་གི་ཕྱོགས་དང་མཐུན་པ་ཉིད་ཡིན་ཞེ་ན། མི་སྦྱོང་བ་ཞེས་བྱ་བ་ནི་གསོ་སྦྱོང་དང་དགག་དབྱེ་མི་བྱ་བ་དང་། མི་གནས་པར་འདུག་པ་ལ་སོགས་པ་བདག་ཉིད་ཀྱི་ཚུལ་ཁྲིམས་རྣམ་པར་དག་པ་མི་བྱེད་པ་སྟེ། གཞི་དེ་ལས་བྱུང་བའི་ཉེས་པ་ནི་མི་སྦྱོང་བའི་གཞི་ལས་བྱུང་བ་ཞེས་བྱའོ། །དེ་ལ་གཞི་དེས་བསླབ་པའི་གཞི་ཡང་དག་པར་བླངས་པ་འདྲལ་བར་བྱེད་པ་ནི་བསླབ་པ་ཡང་དག་པར་བླངས་པ་ལས་འདའ་བ་ཉིད་ཡིན་པས། དེ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་རོ་ཞེས་གསུངས་པའི་ཕྱིར་རོ། །ཞེས་གསུངས་སོ། །གཉིས་པ་ནི། འདེབས་སྤྱོད་གཉིས་བླངས་འདས་སུ་འདྲེན་པ་མི་རིགས་ཏེ། དགེ་སློང་ལ་འདེབས་སྤྱོད་ཀྱི་ལྟུང་བ་བསྐྱེད་པའི་གསོད་སེམས་ལ་ལྟོས་མི་དགོས་པའི་ཕྱིར་ཏེ། སྲོག་ཆགས་ལ་ལྟོས་མེད་ཀྱི་སེམས་ཀྱིས་ཞུགས་པ་ཙམ་གྱིས་འགྲུབ་པའི་ཕྱིར། གལ་ཏེ་ལྟོས་མེད་ཀྱི་སེམས་ཉིད་བསོད་སེམས་ཡིན་ནོ་ཞེ་ན། འོ་ན་ལམ་དུ་སྲོག་ཆགས་ལ་གནོད་པ་ཡོད་དམ་མེད་སྙམ་པའི་བློ་སྐྱེ་བའི་དགེ་སློང་ལམ་དུ་འགྲོ་བར་གནང་བའི་སྐབས་མེད་པར་ཐལ། དེ་ལམ་དུ་འགྲོ་བའི་ཚེ་ལྟོས་མེད་ཀྱི་སེམས་སྐྱེ་བའི་ཕྱིར། དགེ་ཚུལ་གྱིས་དུད་འགྲོ་ཕྲ་མོས་གང་བར་ཤེས་བཞིན་དུ་མི་ལ་འཆི་བའི་སེམས་ཀྱིས་ནགས་མེས་གཏོང་བ་ཕྱོགས་མཐུན་དུ་བཤད་པ་མི་རིགས་པར་ཐལ། དེ་ལ་ལྟོས་མེད་ཀྱི་སེམས་སྐྱེ་བའི་ཕྱིར། གཉིས་ཀའི་ཁྱབ་པ་ཁས། བཤེས་ངོར་བྱེད་པ་དང་། འཕྱ་བ་དང་། ཟས་ཅུང་སོགས་བརྫུན་ལས་ལོགས་སུ་འདྲེན་པ་མི་འཐད་པར་ཐལ། དགེ་སློང་ལ་གཞི་དེ་རྟེན་གྱི་བརྫུན་དུ་སྨྲ་བའི་ལྟུང་བྱེད་དང་། དེ་ལས་གཞན་པའི་ལྟུང་བ་གཉིས་ལས་རྣམ་པར་མ་བཞག དགེ་ཚུལ་ལ་བརྫུན་དུ་སྨྲ་བའི་ལྟུང་བ་ལས་གཞན་པའི་གཞི་དེ་རྟེན་གྱི་ལྟུང་བར་རྣམ་པར་མ་བཞག་པའི་ཕྱིར། འབྲས་ཆན་འགེབས་པ་བརྫུན་དུ་འདྲེན་པ་མི་འཐད་དེ། གཡོ་སྒྱུས་ཀུན་ནས་བསླངས་པ་ཙམ་ཡིན་གྱི་བརྫུན་གྱི་མཚན་ཉིད་མ་ཚང་བའི་ཕྱིར། མཁན་པོར་གསོལ་བ་བཏབ་པ་ལས་ཉམས་པ་བླངས་འདས་སུ་འདྲེན་པ་མི་འཐད་དེ། འདིར་ནི་ཕྱོགས་མཐུན་མ་ཡིན་པའི་བླངས་འདས་འདྲེན་དགོས་ལ། ཊཱི་ཀར། མཁན་པོ་དང་སློབ་དཔོན་རྣམས་དང་ཚངས་པར་མཚུངས་པར་སྤྱོད་པ་གཞན་ལ་མ་གུས་པ་ལ་སོགས་པ་ནི་སྡོམ་པ་ཐམས་ཅད་འཇིག་པའི་ཕྱོགས་དང་མཐུན་པ་ཡིན་པས་དེ་ལ་ནི་བསྡམས་པར་བྱ་བའི་ཉེས་བྱས་སུ་འགྱུར་རོ་ཞེས་དང་། སུམ་བརྒྱ་པ་རྩ་འགྲེལ་ལས་ཀྱང་བླ་མར་གསོལ་བཏབ་ལས་ཉམས་པ་ཕྱོགས་མཐུན་དུ་གསུངས་པའི་ཕྱིར། ཁྱད་གསོད་གཉིས་བརྫུན་དུ་འདྲེན་པ་མི་འཐད་དེ། ལྟུང་བ་དེ་ཉིད་སྐྱེས་པ་ལ་བརྫུན་གྱི་ཀུན་སློང་མི་དགོས་པའི་ཕྱིར། ཙུག་ཙུག་ལ་སོགས་བཞི་བརྫུན་དུ་འདྲེན་པ་མི་འཐད་དེ། ཀུན་སྤྱོད་མ་བསྡམ་པ་ཙམ་གྱིས་བཞག་པ་ཡིན་པའི་ཕྱིར། ཁང་པ་ཁང་ཆེན་ལོགས་སུ་འདྲེན་པ་མི་འཐད་དེ། ཤེས་བྱེད་མེད་པའི་ཕྱིར། ཁ་ཅིག་མ་བྱིན་ལེན་འདོད་ཀྱིས་ཀུན་ནས་བསླངས་པ་ལ་དགོངས་ཞེས་པ་དང་། ཁ་ཅིག་མི་ཚངས་པ་སྤྱོད་འདོད་ཀྱིས་ཀུན་ནས་བསླངས་པ་ལ་དགོངས་ཞེས་དང་། ཁ་ཅིག་འདེབས་སྤྱོད་ཀྱི་ལྟུང་བ་བསྐྱེད་པ་ལ་དགོངས་ཞེས་པ་ཡང་འཐད་པར་མ་མཐོང་ངོ་། །དེས་ན་ཁྱིམ་པའི་རྟགས་སྤངས་པ་ལས་འདས་པའི་བླངས་འདས་སུ་བསྡུ་བར་བྱ་སྟེ། ཊཱི་ཀར་ཁྱིམ་བྱེད་པ་ནི་ཁྱིམ་ནས་ཁྱིམ་མེད་པར་རབ་ཏུ་བྱུང་བའི་བསླབ་པའི་གཞི་ཡང་དག་པར་བླངས་པ་ལས་འདས་པའི་ཕྱིར། འདི་ལ་ཁ་ཅིག་ནི་བཤགས་པར་བྱ་བའི་ཉེས་བྱས་སུ་འགྱུར་བའང་ཡོད་དོ། །ཁ་ཅིག་ནི་བསྡམ་པར་བྱ་བའི་ཉེས་བྱས་སུ་འགྱུར་བའང་ཡོད་ཅེས་གསུངས་པའི་ཕྱིར། དཀོན་མཆོག་གསུམ་ལ་མ་གུས་པ་བླངས་འདས་སུ་འདྲེན་པ་ཡང་མི་རིགས་སྟེ། ཊཱི་ཀར་དཀོན་མཆོག་གསུམ་ལ་མ་གུས་པ་ནི་སྡོམ་པ་ཐམས་ཅད་འཇིག་པའི་ཕྱོགས་དང་མཐུན་པ་ཡིན་པས་དེ་ལ་ནི་བསྡམ་པར་བྱ་བའི་ཉེས་བྱས་སུ་འགྱུར་ཞེས་གསུངས་ཤིང་། ཕྱོགས་མཐུན་གྱི་སྡོམ་དུ། དབྱར་གནས་གཅིག་ཏུ་བྱ་བ་དང་། །གསོ་སྦྱོང་དགག་དབྱེར་བཅས་པ་དང་། །ཞེས་གཉེན་པོ་ཕྱོགས་མཐུན་དུ་གསུངས་པའི་ཕྱིར། སྔར་གྱི་ལུང་གཉིས་ཀྱང་ཤེས་བྱེད་དུ་མ་འབྲེལ་ཏེ། དེ་གཉིས་ཀྱིས་རིམ་པ་བཞིན་དཀོན་མཆོག་གསུམ་ལ་མ་གུས་པའི་རྒྱུས་བར་མ་རབ་བྱུང་དང་། དགེ་ཚུལ་དང་། དགེ་སློབ་མའི་སྡོམ་པ་ལས་འདས་པ་བཤགས་བྱར་གསུངས་ཀྱི། གསུམ་ལ་མ་གུས་པ་ཙམ་བཤགས་བྱར་གསུངས་པ་མ་ཡིན་པའི་ཕྱིར་དང་། གསོ་སྦྱོང་དང་དགག་དབྱེ་མ་བྱས་པའི་རྒྱུས་སྡོམ་པ་ལས་འདས་པ་བཤགས་བྱར་བསྟན་པ་ཡིན་པའི་ཕྱིར། ཁ་ཅིག་ཉམས་པ་གསུམ་བླངས་འདས་སུ་འདྲེན་པ་མི་རིགས་ཏེ། སུམ་བརྒྱ་པར་ཕྱོགས་མཐུན་དུ་བཤད་པའི་ཕྱིར། ཞེས་ཟེར་ཡང་སྐྱོན་མེད་དེ། ཁྱིམ་པ་དང་མུ་སྟེགས་བྱེད་ཀྱི་གོས་དང་སྣོད་སྤྱོད་ཀྱི་རྟགས་འཆང་བ་བླངས་འདས་སུ་ཊཱི་ཀར་གསལ་བར་གསུངས་པའི་ཕྱིར། གཉིས་པ་བསྡུ་བ་ནི། ལྷག་མ་དང་བཅས་པ་དང་། ལྷག་མ་མེད་པའི་ལྟུང་བ་གཉིས་སུ་འདུ་ཞིང་། རང་བཞིན་གྱིས་ཁ་ན་མ་ཐོ་བ་དང་། བཅས་པའི་ལྟུང་བ་དང་། བཅས་རྐྱང་གི་ལྟུང་བ་གསུམ་དུ་ཡང་འདུ་ལ། ཚུལ་ཁྲིམས་ཀྱི་དང་། བག་ཡོད་ཀྱི་དང་། བརྟུལ་ཞུགས་ཀྱི་མི་མཐུན་ཕྱོགས་ཀྱི་ལྟུང་བ་གསུམ་དུ་ཡང་འགྱུར་རོ། །གསུམ་པ་མཚན་ཉིད་ནི། བསྙེན་པར་མ་རྫོགས་པའི་རབ་བྱུང་གིས་ཡུལ་ཁྱད་པར་ཅན་གྱི་དྲུང་དུ་ཁས་བླངས་པ་ལས་འདས་པའི་ལྟུང་བ་གང་ཞིག ཕྱོགས་མཐུན་ལས་གཞན་དུ་གྱུར་བ་དེ་བླངས་འདས་ཀྱི་ལྟུང་བའི་མཚན་ཉིད་དོ། །བཞི་པ་གྲང་ངེས་ནི། དགེ་ཚུལ་གྱི་སྡོམ་པ་ལས་འདས་པའི་ལྟུང་བ་བཅུར་ངེས་ཏེ། བཅུ་ལས་མང་ན་མི་འདུ་ལ་ཉུང་ན་དོན་རྟོགས་དཀའ་བས་བཅུར་བསྟན་པའི་ཕྱིར། ལྔ་པ་གོ་རིམ་ངེས་པ་ནི། རྩ་བ་བཞི་ནི་ལྕི་རིམ་ནས་བསྟན་ལ། ཡན་ལག་རྣམས་ཀྱི་ནང་ནས་མྱོས་འགྱུར་ལྕི་བས་སྔར་བསྟན་ཅིང་། གཞན་རྣམས་འཇིག་རྟེན་གྱི་བྱ་བའི་རིམ་པ་དང་མཐུན་པར་བསྟན་ཅེས་ཁ་ཅིག་གསུངས་སོ། །རང་ལུགས་ནི། ལུང་གི་གོ་རིམ་བཞིན་དུ་བསྟན་པ་ཡིན་ནོ། །དྲུག་པ་སྒྲ་བཤད་པ་ནི། ཡུལ་ཁྱད་པར་ཅན་གྱི་དྲུང་དུ་ཁས་བླངས་པ་ལས་འདས་པས་ན་བླངས་འདས་སོ། །བདུན་པ་ཕན་ཡོན་ནི། འདི་བསྲུངས་པས་ཕན་ཡོན་བཅུ་ཐོབ་སྟེ། བམ་ལྔ་ལས། ཕན་ཡོན་བཅུ་འདི་ལྟ་སྟེ། ཚུལ་ཁྲིམས་རྣམ་པར་དག་པ་ལ་བརྟེན་ནས་འགྱོད་པ་མེད་པ་ལ་སོགས་པའི་རིམ་གྱིས་ཏིང་ངེ་འཛིན་གྱི་བསླབ་པ་དང་། དེ་ལས་ཤེས་རབ་ཀྱི་བསླབ་པ་དང་དེ་ལས་མཐར་མྱ་ངན་ལས་འདས་པ་འཐོབ་པར་འགྱུར་བ་དང་། འགྱོད་པ་མེད་པར་འཆི་བའི་དུས་བྱེད་པ་དང་། ཕྱོགས་བཅུར་སྙན་པའི་སྒྲ་བསྒྲགས་པ་དང་། བདེ་བར་གཉིད་ལོག་ཅིང་སད་པ་དང་། གཉིད་ལོག་པ་ན་ལྷ་རྣམས་ཀྱིས་བསྲུང་བར་འགྱུར་བ་དང་། འཇིགས་པ་རྣམས་ཀྱི་ནང་དུ་འགྲོ་བ་ན་བག་ཚ་བ་དང་འཇིགས་པ་སོགས་སུ་མི་འགྱུར་བ་དང་། དགྲ་བོས་གླགས་རྙེད་ཀྱང་གླགས་ལྟ་བར་མི་བྱེད་ཀྱི་སྲུང་བ་ལ་སོགས་པའི་སྒོ་ནས་ཕན་འདོགས་པ་དང་། གནོད་སྦྱིན་དང་མི་མ་ཡིན་ལ་སོགས་པ་གཉུག་མར་གནས་པ་ལ་སོགས་ཀྱི་གླགས་རྙེད་ཀྱང་གླགས་ལྟ་བར་མི་བྱེད་ཀྱི་ཚུལ་ཁྲིམས་རྣམ་པར་དག་པ་དེའི་དབང་གིས་དེ་ལ་ཕན་འདོགས་པ་དང་ཆོས་གོས་ལ་སོགས་པ་དག་ཀྱང་ཆོས་དང་མཐུན་པར་ཚེགས་ཆུང་ངུས་གཞན་ལས་འཐོབ་པར་འགྱུར་བ་དང་། གང་དུ་སྐྱེ་བར་འདོད་པ་ལ་སོགས་པའི་སྨོན་ལམ་ཡང་དག་པར་འགྲུབ་པར་འགྱུར་བའོ། །ཞེས་གསུངས་པ་ལྟ་བུའོ། །བརྒྱད་པ་མ་བསྲུངས་པའི་ཉེས་དམིགས་ནི། ལུང་དམ་པའི་གླེང་གཞིའི་ལེའུ་ལས། སྟོན་པ་སངས་རྒྱས་ཀྱིས་སྨད་པ་དང་། ལྷ་རྣམས་ཀྱིས་ཆོམ་རྐུན་ལ་སོགས་པའི་ཐ་སྙད་ཀྱིས་དང་། གྲོགས་དམ་པ་རྣམས་ཀྱིས་དང་ཚུལ་མིན་ཡིད་ལ་བྱེད་པའི་ཚེ་བདག་ཉིད་ཀྱིས་དང་། ཉེས་པ་དང་བཅས་ཤིང་སྨད་པར་འོས་པའི་ཆོས་ཉིད་ཀྱིས་སྨད་པ་དང་། ཕྱོགས་དང་ཕྱོགས་མཚམས་རྣམས་སུ་སྡིག་པའི་སྒྲ་དང་ཚིགས་སུ་བཅད་པ་མ་ཡིན་པར་གྲགས་པར་འགྱུར་བ་དང་། ཆོས་མ་ཐོས་པ་ཐོས་པར་མི་འགྱུར་བ་དང་། སྔར་ཐོས་པ་བརྗེད་པར་འགྱུར་བ་དང་། ལམ་གྱི་རྟོགས་པ་སྐྱེ་བར་མི་འགྱུར་བ་དང་། འགྱོད་བཞིན་དུ་འཆི་ཞིང་ཤི་ནས་ངན་འགྲོར་འགྲོ་བར་གསུངས་པ་ལྟ་བུའོ། །ཕྱོགས་མཐུན་ཅི་ལྟ་བུ་ཞེ་ན། འདི་ལ་གཉིས་ཏེ། ཕྱོགས་མཐུན་བདེ་བླག་ཏུ་རྟོགས་པའི་ཕྱིར་དུ་ཉེས་མེད་དུ་གནང་བ་དང་། ཕྱོགས་མཐུན་དངོས་བཤད་པའོ། །དང་པོ་ལ་གཉིས་ལས། དབྱེ་བ་ནི། འདུལ་བ་བྱེ་བྲག་ཏུ་བཤད་པ་འོད་ལྡན་དུ་གྲགས་པ་ལས། འཆང་བ་དང་ནི་འབྲལ་བ་དང་། །དེ་བཞིན་ས་ནི་བརྐོ་བ་དང་། །རིན་ཆེན་རེག་དང་མེ་ལ་རེག །བཏང་ནས་ཟ་བར་བྱེད་པ་དང་། །བྱིན་ལེན་མ་བྱས་ཟ་བ་དང་། །དེ་བཞིན་གསོག་འཇོག་ཟ་བ་དང་། །ལྗོན་ཤིང་འཛེགས་དང་ཤིང་གཅོད་དང་། །རྩ་སྔོན་མི་གཙང་འདོར་བ་དང་། །ས་བོན་འཇོམས་དང་བསླབ་པའི་གཞི། །བཅུ་པོ་རྣམས་ནི་མ་གཏོགས་པ། །སོ་སོར་ཐར་པ་བསྟན་པ་དག །བླངས་པའི་ཕྱོགས་མཐུན་ཤེས་པར་བྱ། །ཞེས་འཆད་པ་ལ་ཆོས་གོས་དང་ལྷུང་བཟེད་གཉིས་སུ་ཕྱེ་ནས་ཉེས་མེད་བཅུ་གསུམ་བཤད་པའོ། །ཁ་ཅིག་དེའི་སྟེང་དུ་དགེ་ཚུལ་ལ་འབྲེལ་སྤང་མེད་པས། དགོན་པའི་འབྲེལ་སྤང་གི་ཕྱོགས་མཐུན་དང་། ཞག་བཅུ་འཆང་སྤང་མེད་པས། ཟླར་འཇོག་སྤང་བའི་ཕྱོགས་མཐུན་མེད། ལས་གྲལ་དུ་གནས་ན་རྐུ་ཐབས་ཀྱི་བར་ཆད་དུ་འགྱུར་བས་ལས་གྲལ་ནས་མ་སྨྲས་པར་འགྲོ་བ་ལ་ལྟུང་བ་མེད། གསོག་འཇོག་སོང་ཟིན་ཟོས་པའི་ཉེས་པ་མེད་པས་གསོག་འཇོག་བྱེད་པ་ལ་ལྟུང་བ་མེད། དགེ་ཚུལ་ནང་ཕན་ཚུན་ལྷན་ཅིག་ཉལ་བ་ལ་ལྟུང་བ་མེད་དེ་ཉེས་མེད་ཕྱེད་དང་བཅོ་བརྒྱད་དུ་འདོད་དོ། །མཁས་པ་བྱ་ནི་ཕྱེད་འཇོག་ཚུལ་མི་འཐད་པས་བཅུ་བདུན་ཞེས་བཞེད་དོ། །དེ་ལ་དང་པོ་དགོན་པའི་ཕྱོགས་མཐུན་མེད་པ་མི་འཐད་དེ། དགེ་སློང་ལ་དགོན་པའི་གནས་དང་ཆོས་གོས་གཉིས་གང་རུང་དང་བྲལ་བས་ལྟུང་བ་གཉིས་རྣམ་པར་བཞག་ལ། དགེ་ཚུལ་ལ་གང་དུ་གནས་པར་ཡིད་དམ་བཅས་པའི་དགོན་པར་མི་གནས་པ་ལ་ལྟུང་བར་འགྱུར་བའི་ཕྱིར། གཉིས་པ་ཟླར་འཇོག་གི་ཕྱོགས་མཐུན་མེད་པ་མི་འཐད་དེ། བསླབ་པའི་གཞི་བཅུ་དང་ཉེས་མེད་བཅུ་གསུམ་ལས་གཞན་པའི་སོ་ཐར་གྱི་མདོ་ལས་ལྟུང་བར་བསྟན་པ་ཐམས་ཅད་དགེ་ཚུལ་ལ་ཕྱོགས་མཐུན་དུ་གསུངས་པའི་ཕྱིར། ལས་གྲལ་ནས་མ་སྨྲས་པར་འགྲོ་བའི་ཉེས་པ་མེད་པ་ཡང་མི་འཐད་དེ། དགེ་ཚུལ་གྱིས་ལས་གྲལ་ནས་སྨྲས་ནས་འགྲོ་བ་ལ་དགག་བྱ་མེད་ཅིང་དགོས་པ་ཡོད་པའི་ཕྱིར་དང་། བསྒྲུབ་བྱས་ལས་གྲོལ་ལ་མ་སྨྲས་པར་འགྲོ་མི་འོས་པའི་ཕྱིར། གསོག་འཇོག་བྱེད་པ་ལ་ལྟུང་བ་མེད་པ་མི་འཐད་དེ། དགེ་ཚུལ་གྱིས་སྒོག་པ་དང་རྨིག་པ་གཅིག་པའི་ཤ་ཟ་བའི་ཕྱིར་འཆང་བ་ལ་ཉེས་བྱས་འབྱུང་བ་ཡོད་པའི་ཕྱིར། དེས་ན་ཉེས་མེད་བཅུ་གསུམ་དུ་ངེས་སོ། །གཉིས་པ་ངོ་བོ་ནི། དགེ་སློང་ཕ་མའི་སོ་སོ་ཐར་པའི་མདོ་ལས་ལྟུང་བར་བཅས་པ་རྣམས་ཀྱི་ནང་ནས་དགེ་ཚུལ་ཕ་མ་ལ་གང་གནང་བ་རྣམས་འདིར་ཉེས་པ་མེད་དོ། །གཉིས་པ་ཕྱོགས་མཐུན་དངོས་ལ་བཞི་སྟེ། དབྱེ་བ། བསྡུ་བ། མཚན་ཉིད། གང་གི་ཕྱོགས་མཐུན་དུ་འགྱུར་བའོ། །དང་པོ་ནི། ཊཱི་ཀར། རྟགས་དང་སློང་དང་སྣོད་དང་ནི། །ལོངས་སྤྱོད་འཕྱར་གཡེང་འདོད་པ་དང་། །གནོད་པ་དང་ནི་གནས་པ་དང་། །མ་གུས་མི་སྦྱོང་གཞི་ལས་བྱུང་། །ཞེས་གསུངས་པའི་མཐུན་ཡུལ་བཅུའི་ཕྱོགས་མཐུན་བཅུར་འགྱུར་རོ། །གཉིས་པ་ནི། བར་མ་བླངས་པའི་ཕྱོགས་མཐུན་དང་སྡོམ་པ་བླངས་པའི་ཕྱོགས་མཐུན་གཉིས་སམ། བླངས་པ་སྤྱིའི་ཕྱོགས་མཐུན་དང་བླངས་པ་སོ་སོའི་ཕྱོགས་མཐུན་གཉིས་སུ་ཡང་འདུའོ། །གསུམ་པ་ནི། ལྟུང་བ་རྣམ་གཞག་དང་མཐུན་པ་གསུམ་པོ་གང་རུང་གིས་མཐུན་ཞིང་། རང་རིགས་ལྟུང་བ་རྣམ་གཞག་གི་ཀུན་ནས་མ་བསླངས་ལ། བསླབ་པ་གཞན་དུ་མ་བཅས་ཀྱང་ཉེས་པ་དང་བཅས་པ་དེ་ཕྱོགས་མཐུན་གྱི་ལྟུང་བའི་མཚན་ཉིད་དོ། །མཐུན་པ་གསུམ་ནི། དགག་བྱ་ཉེས་དམིགས་མཐུན་པ། སྦྱོར་བ་རྗེས་གྲུབ་མཐུན་པ། བརྒྱུད་པ་རྒྱུར་འགྲོ་མཐུན་པའོ། །དཔེར་ན་དགེ་སློང་གིས་རྐུན་པོར་མ་གྲགས་པ་ལས་ཟས་ལེན་པ་ནི་མ་བྱིན་ལེན་དང་དགག་བྱ་མཐུན་པ་ལྟ་བུ་དང་། དགེ་སློང་གིས་སྔ་དྲོ་སྒོག་པ་ཟ་བ་ནི་དུས་མ་ཡིན་པར་ཁ་ཟས་ཟ་བ་དང་སྦྱོར་བ་རྗེས་གྲུབ་མཐུན་པ་ལྟ་བུ་དང་། ཉིན་མོ་བློས་ཕབ་ནས་ཉལ་བ་ནི་མི་ཚངས་སྤྱོད་དང་བརྒྱུད་པ་རྒྱུར་འགྲོ་མཐུན་པ་ལྟ་བུའོ། །བཞི་པ་ནི། རྟགས་ཀྱི་གཞི་ལས་བྱུང་བའི་བླངས་འདས་དང་ཕྱོགས་མཐུན་གཉིས་ལས། མུ་སྟེགས་ཅན་དང་ཁྱིམ་པའི་གོས་དང་སྣོད་སྤྱད་ཀྱི་རྟགས་འཆང་བ་ནི་དེའི་བླངས་འདས་ཡིན་ཏེ། ཊཱི་ཀར་མུ་སྟེགས་ཅན་གྱི་རྟགས་འཆང་བ་དེ་བཞིན་དུ་རབ་ཏུ་བྱུང་བའི་རྟགས་ཡང་དག་པར་བླངས་པ་ལས་འདས་པ་ཡིན་པས་དེ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་རོ་ཞེས་དང་། ལྷུང་བཟེད་ཀྱང་མི་རུང་བ་ཐོགས་ཏེ་བསོད་སྙོམས་ལ་རྒྱུ་བ་ནི་རབ་ཏུ་བྱུང་བ་གཞན་གྱི་རྟགས་དང་འདྲ་བ་དང་། ཁྱིམ་པའི་ལྷུང་བཟེད་འཆང་བ་ནི་རྟགས་ཡང་དག་པར་བླངས་པ་ལས་འདས་པ་ཡིན་པས་དེ་ལ་བཤགས་པ་བྱ་བའི་ཉེས་བྱས་སུ་འགྱུར་རོ་ཞེས་གསུངས་པའི་ཕྱིར། དེའི་ཕྱོགས་མཐུན་ནི་རྔ་བལ་ལས་བྱས་པའི་ཆོས་གོས་འཆང་བ་དང་། ཆོས་གོས་ཚད་ལས་ལྷག་པར་འཆང་བ་དང་། བྱེད་དུ་འཇུག་པ་དང་། སྐྲ་འཆན་པས་བྲེགས་པ་ལྟ་བུའོ། །རིན་པོ་ཆེ་བླངས་ནས་བདག་གིར་བྱེད་པ་ནི་སློང་བའི་གཞི་ལས་བྱུང་བའི་བླངས་འདས་ཡིན་ལ། མི་དགོས་བཞིན་དུ་གོས་སློང་བ་དང་། པགས་པ་སློང་བ་སོགས་ནི་སློང་བའི་གཞི་ལས་བྱུང་བའི་ཕྱོགས་མཐུན་ནོ། །རིན་པོ་ཆེ་ལས་བྱས་པའི་ཁབ་རལ་བྱེད་དུ་བཅུག་ནས་བདག་གིར་བྱེད་པ་ནི་སྣོད་ཀྱི་གཞི་ལས་བྱུང་བའི་བླངས་འདས་ཡིན་ལ། བ་སོ་དང་རྭ་སོགས་ལས་ཁབ་རལ་བྱེད་དུ་བཅུག་ནས་འཆང་བ་ལྟ་བུ་ནི་སྣོད་ཀྱི་གཞི་ལས་བྱུང་བའི་ཕྱོགས་མཐུན་ནོ། །དུས་མ་ཡིན་པའི་ཁ་ཟས་ཟ་བ་དང་། མྱོས་འགྱུར་ཐུང་བ་ལྟ་བུ་ནི་ལོངས་སྤྱོད་ཀྱི་གཞི་ལས་བྱུང་བའི་བླངས་འདས་དང་། སྔ་དྲོ་སྒོག་པ་ཟ་བ་ལྟ་བུ་ནི་དེའི་ཕྱོགས་མཐུན་ནོ། །གླུ་གར་དང་རོལ་མོ་བྱེད་པ་ནི་འཕྱར་གཡེང་གི་གཞི་ལས་བྱུང་བའི་བླངས་འདས་དང་། རྒྱུག་མཆོངས་དང་ཀུན་ཏུ་རྩེ་བ་ལྟ་བུ་ནི་དེའི་ཕྱོགས་མཐུན་ནོ། །མི་ཚངས་པར་སྤྱོད་པ་ནི་འདོད་པའི་གཞི་ལས་བྱུང་བའི་བླངས་འདས་དང་། འབྱིན་པ་རེག་པ་འཕྲིག་ཚིག་བསྙེན་བཀུར་བསྔགས་པ་རྣམས་ནི་དེའི་ཕྱོགས་མཐུན་ནོ། །སྲོག་གཅོད་པ་དང་། མ་བྱིན་པར་ལེན་པ་གཉིས་ནི་གནོད་པའི་གཞི་ལས་བྱུང་བའི་བླངས་འདས་དང་། བརྡེག་པ་དང་། བརྡེག་པར་གཟས་པ་དང་། ཟན་གཅོད་དུ་འཇུག་པ་རྣམས་ནི་དེའི་ཕྱོགས་མཐུན་ནོ། །མི་ཚངས་པར་སྤྱོད་འདོད་ཀྱི་བུད་མེད་དང་ལྷན་གཅིག་ཉལ་བ་ནི་གནས་པའི་གཞི་ལས་བྱུང་བའི་བླངས་འདས་དང་། མི་ཚངས་པར་སྤྱོད་འདོད་མེད་པར་བུད་མེད་དང་ལྷན་གཅིག་ཉལ་བ་དང་། དགེ་ཚུལ་བསྙིལ་བ་དང་ལྷན་ཅིག་ཉལ་བ་ནི་དེའི་ཕྱོགས་མཐུན་ནོ། །མཁན་པོ་དང་སློབ་དཔོན་ལ་མ་གུས་པ་ནི་མ་གུས་པའི་གཞི་ལས་བྱུང་བའི་ཕྱོགས་མཐུན་དང་། གསོ་སྦྱོང་དང་དགག་དབྱེ་མི་བྱེད་པ་ནི་མི་སྦྱོང་བའི་གཞི་ལས་བྱུང་བའི་ཕྱོགས་མཐུན་ཡིན་ལ། འདི་གཉིས་ནི་སྡོམ་པ་ཐ་དག་འཇིག་པའི་ཕྱོགས་དང་མཐུན་པའོ། །འོ་ན་ཕམ་པས་ཉམས་པ་དེ་ལྟུང་བ་སྡེ་ལྔའི་གཞི་ལ་སྦྱར་བས་ཉེས་བྱས་ལས་ལྷག་པར་མི་བསྐྱེད་པ་ངེས་སམ་སྙམ་ན། བསླབ་པ་བྱིན་པ་ནི་འདྲ་བ་ཉིད་དོ་ཞེས་ཏེ། འདྲ་བ་ཞེས་པ་གཞིར་བཞག་ནས། གང་འདྲ་ན། བསླབ་པ་སྦྱིན་བྱ་སྤྱོད་བཞིན་པའི་དགེ་སློང་ནི་འདྲ། གང་དང་འདྲ་ན་དགེ་སློང་རྣམ་དག་དང་འདྲ། གང་ལ་འདྲ་ན་སྡེ་ལྔ་བསྐྱེད་པའི་རྟེན་ལ་འདྲ། ཇི་ལྟར་འདྲ་ན་དགེ་སློང་རྣམ་དག་དེས་སྡེ་ལྔའི་གཞི་ལ་སྦྱོར་བ་ལས་སྦྱོར་བའི་ལྟུང་བ་དང་། དངོས་གཞི་དང་། མཐར་ཐུག་གི་ལྟུང་བ་གསུམ་གསུམ་བསྐྱེད་པ་བཞིན་དུ། བསླབ་བྱིན་དགེ་སློང་གིས་ཀྱང་སྡེ་ལྔའི་གཞི་ལ་སྦྱོར་བ་ལས་ལྟུང་བ་དེ་གསུམ་བསྐྱེད་པའོ། །དེའི་དམིགས་བསལ་ནི། དབྱེན་བྱེད་དང་དེ་རྗེས་ཕྱོགས་པའི་ལྟུང་བ་མི་བསྐྱེད་དེ། བསླབ་བྱིན་ལས་ཀྱི་ཁ་སྐོང་དུ་མི་རུང་བའི་ཕྱིར་རོ། །ཁ་ཅིག་ལས་གྲལ་ནས་མ་སྨྲས་པར་འགྲོ་བའི་ལྟུང་བ་ཡང་མེད་ཞེས་གསུངས་སོ། །འོ་ན་བསླབ་པ་བྱིན་པའི་དོན་གང་ཞེ་ན། སྔ་རབ་པ་ནི་ཕམ་པ་འཆབ་མེད་ཀྱིས་སྡོམ་པ་གཏོང་བས། ཡང་སྡོམ་པ་བླངས་ནས་སྔར་གི་སྡོམ་པ་གཏོང་བྱེད་ཀྱི་ཕམ་པ་འདག་ཕྱིར་དུ་ཇི་སྲིད་འཚོའི་བར་དུ་བསླབ་པ་མནོས་ནས་སྤྱོད་དགོས་པར་བཞེད། མདོ་སྡེ་པས་ནི་འཆབ་སེམས་མ་གཏོགས་པའི་ཡན་ལག་གཞན་ཚང་གིས་བསྐྱེད་པའི་ཕམ་པར་གཏོགས་པའི་སྦོམ་པོ་ལྕི་བ་འདག་ཕྱིར་ཚེ་ཇི་སྲིད་འཚོའི་བར་དུ་བསླབ་པ་ནོད་པར་བཞེད། འདིར་ཁ་ཆེ་བྱེ་བྲག་ཏུ་སྨྲ་བ་ནི་ཕམ་པ་འཆབ་བཅས་དང་འཆབ་མེད་གང་བྱུང་ཀྱང་སྡོམ་པ་མི་གཏོང་ཞིང་། འཆབ་མེད་ལ་ཕྱིར་བཅོས་རུང་བས་ཕམ་པ་འདག་ཕྱིར་དུ་ཚེ་ཇི་སྲིད་བར་དམན་སྤྱོད་དང་དུ་ལེན་ཅིང་ཁྱད་པར་ཅན་གྱི་སྤྱོད་པ་སྤོང་བའི་བསླབ་པར་ནོས་ནས་སྤྱོད་པར་བཞེད་དོ། །བསླབ་བྱིན་དགེ་སློང་ཞེས་པ་ནི་མཚོན་པ་སྟེ། དགེ་ཚུལ་དང་དགེ་སློབ་མ་བསླབ་པ་བྱིན་པ་ཡང་ཡོད་དོ། །འོད་ལྡན་ལས། འོ་ན་ཅི་དགེ་ཚུལ་ལ་བསླབ་པ་བྱིན་པ་ཡང་ཡོད་དོ་ཅེ་ན། ཡོད་དོ་ཞེས་དང་། ཕྲན་ཚེག་ཊཱི་ཀ་ལས་དགེ་སློང་དག་ཇི་ལྟ་བུ་གཞན་ལ་ཡང་བསླབ་པ་བྱིན་ཅིག་ཞེས་གསུངས་སོ། །འདིའི་ཊཱི་ཀར་ཇི་ལྟར་དགེ་སློང་གིས་དགེ་སློང་ལ་བརྡེགས་པ་དང་། གཟས་པ་དང་། འགྱོད་པ་བསྐྱེད་པ་དང་། སྐྲོད་པ་ལ་སོགས་པ་བྱེད་པ་ལ་ལྟུང་བྱེད་དུ་འགྱུར་བ་དེ་བཞིན་དུ། དགེ་སློང་གིས་བསླབ་པ་བྱིན་པ་ལ་དེ་དག་བྱས་ན་ཡང་དགེ་སློང་ལ་ལྟུང་བྱེད་དུ་འགྱུར་རོ་ཞེས་པའི་དོན་ལ། ཁ་ཅིག་སྒྲ་ཇི་བཞིན་པར་འཆད་པ་མི་འཐད་དེ། བསྙེན་པར་མ་རྫོགས་པ་དང་ལྡན་པ་ཞེས་སོགས་དང་འགལ་བའི་ཕྱིར། ཁ་ཅིག་རྣམ་དག་གིས་རྣམ་དག་ལ་དེ་དག་བྱས་པ་ལ་ལྟུང་བྱེད་དུ་འགྱུར་བ་དེ་བཞིན་དུ། བསླབ་བྱིན་གྱིས་བསླབ་བྱིན་ལ་དེ་དག་བྱས་པ་ལ་ལྟུང་བྱེད་དུ་འགྱུར་བའི་དོན་དུ་བཞེད་པ་ཡང་མི་འཐད་དེ། དེ་ལ་ནི་མ་ཡིན་ནོ་ཞེས་པ་དང་ཟློས་པར་འགྱུར་བའི་ཕྱིར། རང་ལུགས་ནི་བསླབ་བྱིན་དང་རྣམ་དག་ལྟུང་བ་བསྐྱེད་ཚུལ་འདྲ་སྟེ། རང་འགྲེལ་ལས་དགེ་སློང་གཞན་དག་ལྟུང་བ་ལ་སྦྱོར་བ་བཞིན་དུ་འདིས་ཀྱང་ལྷག་པར་སྤྱད་པས་དགེ་སློང་ལ་བརྡེག་པ་དང་། གཟས་པ་དང་། འགྱོད་པ་བསྐྱེད་པ་དང་། སྐྲོད་པར་བྱེད་ན་ལྟུང་བྱེད་དུ་འགྱུར་ཞེས་གསུངས་པའི་ཕྱིར། འོ་ན་རྣམ་དག་གི་ཡུལ་གྱི་དགེ་སློང་ལ་རྣམ་དག་དགོས་པ་བཞིན་དུ། བསླབ་བྱིན་གྱི་ཡུལ་གྱི་དགེ་སློང་ལ་བསླབ་བྱིན་ངེས་པར་དགོས་སམ་སྙམ་ན། བསླབ་བྱིན་གྱི་ཡུལ་ལ་རྣམ་དག་གིས་ཀྱང་བསྐྱེད་ཅེས་དོགས་སྤོང་ཡིན་པས། དེས་ན་རྣམ་དག་གིས་རྣམ་དག་ལ་བརྡེག་གཟས་སོགས་བྱས་པས་ལྟུང་བྱེད་དུ་འགྱུར་བ་བཞིན་དུ། བསླབ་བྱིན་གྱིས་དགེ་སློང་རྣམ་དག་ལ་དེ་དག་བྱས་ན་ཡང་ལྟུང་བྱེད་དུ་འགྱུར་ཞེས་འདོན་པ་བསྒྱུར་བར་བྱ་བ་ཡིན་ཏེ། བརྡེག་གཟས་ཀྱི་ལྟུང་བྱེད་བཤད་པའི་སྐབས་ཀྱི་འགྲེལ་པ་ལ། བྱ་འདུལ་ཆེན་པོས་དེ་ལྟར་མཛད་ཅིང་དཔེ་དོན་དེ་ལྟར་སྦྱོར་བ་གཞུང་གི་སྐབས་དང་ཡང་འགྲིག་གོ །འདྲ་བའི་རྒྱུ་མཚན་ནི་བསྙེན་པར་རྫོགས་པའི་སྡོམ་པ་དགོས་པ་སྒྲུབ་ནུས་དང་ལྡན་པའི་ཕྱིར་འདྲ་བ་བསྟན་པའི་དགོས་པ་ནི། བསླབ་བྱིན་ནི་རྣམ་གྲངས་ཀྱི་བསྙེན་པར་མ་རྫོགས་པ་ཡིན་པས་སྡེ་ལྔའི་དངོས་གཞི་མི་བསྐྱེད་དོ་སྙམ་པའི་དོགས་པ་བསལ་བ་དང་། བསླབ་པ་བྱིན་པ་ཡང་བསྙེན་པར་རྫོགས་པ་ཡིན་པས་དགེ་སློང་དང་འདྲ་བར་བསླབ་དགོས་པ་གོ་བ་དང་། ལུང་དུ་གཞི་དུ་མ་ལ་སྦྱར་བ་འདིར་སྤྱིར་བསྟན་ནས། ཚིག་ཚོགས་ཀྱུང་བའི་དགོས་པ་ཡང་ཡོད་དོ། །ཞར་བྱུང་ནི་འོ་ན་བསླབ་བྱིན་དེས་སྡེ་ལྔ་ཀ་བསྐྱེད་པའི་རྟེན་དུ་དགེ་སློང་རྣམ་དག་དང་འདྲ་ན། ཡུལ་ལ་ཡང་རྣམ་དག་དང་འདྲའམ་སྙམ་ན། བསྙེན་པར་མ་རྫོགས་པ་དང་ལྡན་པའམ་འདྲ་བ་ཉིད་ཀྱང་ཡིན་ནོ་ཞེས་ཏེ། འདྲ་ཞེས་པ་གཞིར་གཞག གང་འདྲ་ན་བསླབ་བྱིན་ནི་འདྲ། གང་དང་འདྲ་ན་བསྙེན་པར་མ་རྫོགས་པ་དགེ་ཚུལ་སོགས་དང་འདྲ། གང་ལ་འདྲ་ན་རྣམ་དག་གི་ཡུལ་ལ་འདྲ། ཇི་ལྟར་འདྲ་ན་རྣམ་དག་ལ་མ་རྫོགས་པས་འགྲུབ་པ་བྱིན་ལེན་སོགས་བསླབ་བྱིན་གྱིས་ཀྱང་འགྲུབ། མ་རྫོགས་པ་ཡུལ་དུ་བྱས་པས་བསྐྱེད་པ་འདོན་པའི་ལྟུང་བྱེད་སོགས་མ་རྫོགས་པ་སྤྱིས་བསྐྱེད་བཞི་ནི་བསླབ་བྱིན་གྱིས་ཀྱང་བསྐྱེད། རྣམ་དག་གིས་ཡུལ་དུ་མ་རྫོགས་པ་བྱས་པས་མི་བསྐྱེད་པ་ཕྲ་མ་བྱེད་པའི་ལྟུང་བྱེད་སོགས་བསླབ་བྱིན་གྱིས་ཀྱང་མི་བསྐྱེད་པའི་ཕྱིར། དམིགས་བསལ་ནི་སྐུར་འདེབས་ཀྱི་ལྟུང་བ་དངོས་གཞི་གསུམ་དང་། གནས་ངན་ལེན་བརྗོད་པ་དང་གནས་ངན་ལེན་འཆབ་པའི་ལྟུང་བྱེད་གཉིས་དང་ལྔ་པོ་བསླབ་བྱིན་ཡུལ་དུ་བྱས་པས་ཀྱང་བསྐྱེད་དོ། །འདྲ་བའི་རྒྱུ་མཚན་ནི། རྩ་བའི་ལྟུང་བ་བྱུང་ཞིང་དེའི་ཆད་ལས་ལ་གནས་དུ་ཚེ་བའི་ཕྱིར། འདྲ་བར་བསྟན་པའི་དགོས་པ་ནི། བསླབ་པ་བྱིན་པ་དེ་ཐམས་ཅད་དུ་དགེ་སློང་གཞན་དང་འདྲའོ་སྙམ་པའི་དོགས་པ་བསལ་ནས་བྱིན་ལེན་བསོག་འཇོག་སོགས་ལ་དགེ་སློང་རང་བཞིན་དུ་གནས་པ་གཞན་དང་མི་འདྲ་བར་གོ་བའི་ཆེད་ཡིན་ནོ། །ཊཱི་ཀར་མདོ་འདིས་ནི། དགེ་སློང་གཞན་གྱི་ཡུལ་ལ་དགེ་སློང་ཐ་མལ་པ་གཞན་དང་མི་འདྲ་བར་བསྟན་ནོ་ཞེས་སོ། །འོ་ན་བསླབ་བྱིན་དེས་བསླབ་བྱིན་གཞན་ལ་ལྟོས་ནས་ཀྱང་བསྙེན་པར་མ་རྫོགས་པ་དང་འདྲའམ་ཞེ་ན། དེ་ལ་ནི་མ་ཡིན་ནོ་ཞེས་ཏེ་བསླབ་བྱིན་དེ་ལྟར་མཚན་མཐུན་པའི་བསླབ་བྱིན་གཞན་ལ་ལྟོས་ནས་བསྙེན་པར་མ་རྫོགས་པ་དང་འདྲ་བ་མ་ཡིན་ཏེ། མ་རྫོགས་པས་བསླབ་བྱིན་གཞན་ལ་འགྲུབ་པ་བྱིན་ལེན་སོགས་བསླབ་བྱིན་གྱིས་མི་འགྲུབ། མ་རྫོགས་པ་ཡུལ་དུ་བྱས་པས་བསྐྱེད་པ་འདོན་པའི་ལྟུང་བྱེད་སོགས་བསླབ་བྱིན་གྱིས་མི་བསྐྱེད། བསླབ་བྱིན་གཞན་གྱིས་མ་རྫོགས་པ་ཡུལ་དུ་བྱས་པས་མི་བསྐྱེད་པ་ཕྲ་མ་བྱེད་པའི་ལྟུང་བྱེད་སོགས་བསླབ་བྱིན་ཡུལ་དུ་བྱས་པས་བསྐྱེད་པའི་ཕྱིར། འདི་དག་གི་ཁུངས་ནི་བཙུན་པ་རེ་ཞིག་དགེ་སློང་ལ་རྒྱུ་དུས་གསོག་འཇོག་བགྱིས་པར་འགྱུར། གསུམ་གྱིས་ཏེ་གསུམ་གང་ཞེ་ན་བདག་ཉིད་ཀྱིས་གསོག་འཇོག་བྱས་པ་དང་། དགེ་སློང་གིས་གསོག་འཇོག་བྱས་པ་དང་། དགེ་སློང་གི་དགེ་འདུན་གྱིས་གསོག་འཇོག་བྱས་པའོ། །བཙུན་པ་རེ་ཞིག་དགེ་སློང་མ་ལ་རྒྱུ་དུས་གསོག་འཇོག་བགྱིས་པར་འགྱུར། གསུམ་གྱིས་ཏེ་གསུམ་གང་ཞེ་ན་བདག་ཉིད་ཀྱིས་གསོག་འཇོག་བྱས་པ་དང་། དགེ་སློང་མས་གསོག་འཇོག་བྱས་པ་དང་། དགེ་སློང་མའི་དགེ་འདུན་གྱིས་གསོག་འཇོག་བྱས་པའོ། །བཙུན་པ་རེ་ཞིག་བསླབ་པ་བྱིན་པ་ལ་རྒྱུ་དུས་གསོག་འཇོག་བགྱིས་པར་འགྱུར། བཞིས་ཏེ་བཞི་གང་ཞེ་ན་བདག་ཉིད་ཀྱིས་གསོག་འཇོག་བྱས་པ་དང་། བསླབ་པ་བྱིན་པས་གསོག་འཇོག་བྱས་པ་དང་། དགེ་སློང་གིས་གསོག་འཇོག་བྱས་པ་དང་། དགེ་སློང་གིས་དགེ་འདུན་གྱིས་གསོག་འཇོག་བྱས་པའོ། །བཙུན་པ་རེ་ཞིག་བསླབ་པ་བྱིན་པ་མོ་ལ་རྒྱུ་དུས་གསོག་འཇོག་བགྱིས་པར་འགྱུར། བཞིས་ཏེ་བཞི་གང་ཞེ་ན་བདག་ཉིད་ཀྱིས་གསོག་འཇོག་བྱས་པ་དང་། བསླབ་པ་བྱིན་པ་མོས་གསོག་འཇོག་བྱས་པ་དང་། དགེ་སློང་མས་གསོག་འཇོག་བྱས་པ་དང་། དགེ་སློང་མའི་དགེ་འདུན་གྱིས་གསོག་འཇོག་བྱས་པའོ་ཞེས་ཊཱི་ཀར་དྲངས་སོ། །འོ་ན་བསླབ་བྱིན་མོ་དེ་ཉམས་པ་ཡིན་ཞིང་། དགེ་སློབ་མ་དེ་རྣམ་དག་ཡིན་པས་བསླབ་བྱིན་མོ་དེ་དགེ་སློབ་མ་ལ་ལྟོས་ཏེ་བསྙེན་པར་མ་རྫོགས་པ་དང་ལྡན་པ་ཡིན་ནམ་སྙམ་ན། དགེ་སློབ་མ་ལ་ཡང་ངོ་ཞེས་ཏེ་བསླབ་བྱིན་མོ་དེ་དགེ་སློབ་མ་ལ་ལྟོས་ཏེ་བསྙེན་པར་མ་རྫོགས་པ་དང་འདྲ་བ་མ་ཡིན་ཏེ། བསླབ་བྱིན་མོས་བྱིན་ལེན་དང་གསོག་འཇོག་བྱས་པས་དགེ་སློབ་མས་བྱིན་ལེན་དང་གསོག་འཇོག་བྱས་པར་འགྱུར་ལ། འདོན་པའི་ལྟུང་བྱེད་སོགས་དགེ་སློབ་མ་ཡུལ་དུ་བྱས་པས་ཀྱང་བསྐྱེད་པའི་ཕྱིར། ལུང་ཞུ་བ་ལས་བཙུན་པ་རེ་ཞིག་དགེ་སློབ་མ་ལ་རྒྱུ་དུས་གསོག་འཇོག་བགྱིས་པར་འགྱུར། ལྔས་ཏེ་ལྔ་གང་ཞེ་ན་བདག་ཉིད་ཀྱིས་གསོག་འཇོག་བྱས་པ་དང་། དགེ་སློབ་མས་གསོག་འཇོག་བྱས་པ་དང་། བསླབ་པ་བྱིན་པ་མོས་གསོག་འཇོག་བྱས་པ་དང་། དགེ་སློང་མས་གསོག་འཇོག་བྱས་པ་དང་། དགེ་སློང་མའི་དགེ་འདུན་གྱིས་གསོག་འཇོག་བྱས་པའོ་ཞེས་གསུངས་སོ། །འདིར་ལྡན་པའི་དོན་འདྲ་བར་བཤད་པ་ནི། ལྡན་པ་དང་འདྲ་བ་གཉིས་ཀའི་སྐད་དོད་ཝ་ཏུ་ཅེས་འབྱུང་ལ། དེ་ཉིད་ཝ་ཏུ་རྐྱེན་ཅན་དུ་བཤད་པའི་ཚེ་དང་ལྡན་པ་དང་། ཝ་ཏིའི་ཀྱི་རྐྱེན་ཅན་དུ་བཤད་པའི་ཚེ་འདྲ་བ་ལ་འཇུག་སྟེ། རྣམ་འགྲེལ་དུ་ཏཾ་དྭཾ་ཏྲ་ཅེས་པའི་སམ་སྐྲྀ་ཏའི་སྒྲ་གཅིག་ཉིད་ལ། དེ་ལྡན་བཅོམ་ལྡན་ཚད་མ་ཉིད། །ཅེས་དང་། དེ་བཞིན་བཅོམ་ལྡན་ཚད་མ་ཉིད། །ཅེས་པའི་འགྱུར་གཉིས་འབྱུང་བ་བཞིན་ནོ། །གཉིས་པ་བསམ་པའི་ཡན་ལག་སེལ་བ་དང་བཅས་པ་ལ་གསུམ་སྟེ། གཞན་འདོད་དགག སྐབས་དོན་ལ་སྦྱར། རྟོགས་པར་བྱ་བའི་དོན་བཤད་པའོ། །དང་པོ་ནི། ཁ་ཅིག་འགྲོ་བ་གཞན་གྱི་རྣམ་པ་ཞེས་སོགས་ཀྱི་གཞུང་འདིས་བསམ་པའི་ཡན་ལག་སྟོན་པ་མ་ཡིན་གྱི། སྡེ་ལྔ་བསྐྱེད་པའི་རྟེན་སྡོམ་པ་གསོ་རུང་དང་ལྡན་པ་ལ་ལྡན་པར་འདུ་ཤེས་པ་དགོས་པར་སྟོན་ཏེ། འདིར་འགྲོ་བ་གཞན་གྱི་རྣམ་པ་བསྟེན་པ་ན་དགེ་སློང་གི་འདུ་ཤེས་ཡོད་པ་ལའོ་ཞེས་དང་། སུམ་བརྒྱ་པར། སྡོམ་བརྩོན་སྡོམ་བརྩོན་ཉིད་དུ་འདུ་ཤེས་ན། །དངོས་གཞིའོ་ཞེས་གསུངས་ཤིང་། སྡོམ་ལྡན་དུ་འདུ་ཤེས་ནས་ཉེས་སྤྱོད་ལ་འཇུག་པ་ན་ཁྱད་གསོད་འབྱུང་བའི་ཕྱིར་ཟེར་བ་ནི་མི་འཐད་དེ། བདག་ནི་ཉམས་པའོ་སྙམ་པའི་བསམ་པ་ཅན་ལ་ཡང་མེད་དོ་ཞེས་གསུངས་ཤིང་། དེད་དཔོན་འཆང་བ་ཅན་གྱིས་བདག་ནི་ཉམས་པའོ་སྙམ་ནས་མི་ཚངས་པར་སྤྱོད་པ་ལས་ཕམ་པར་འགྱུར་བར་གསུངས་པའི་ཕྱིར། ལྟུང་བ་བསྐྱེད་པའི་རྒྱུར་ཁྱད་གསོད་དགོས་པ་ཡང་མི་འཐད་དེ། མི་ཤེས་པ་དང་བག་མེད་པ་ཡང་ལྟུང་བ་འབྱུང་བའི་རྒྱུར་བཤད་པའི་ཕྱིར། གཉིས་པ་སྐབས་དོན་ལ་སྦྱར་བ་ནི། ཁ་ཅིག་ལྟུང་བ་སྡེ་ལྔ་བསྐྱེད་པ་ལ་ཤེས་པ་རང་བཞིན་དུ་གནས་པ་དགོས་ཟེར་བ་མི་འཐད་དེ། འདིར་འགྲོ་བ་གཞན་གྱི་རྣམ་པ་བརྟེན་པ་དང་དགེ་སློང་གི་འདུ་ཤེས་ཡོད་པ་གཉིས་སྦྱར་ནས་གསུངས་པའི་ཕྱིར་དང་། འདི་བསྡུས་པའི་ཞུ་བར་བཙུན་པ་དགེ་སློང་བདག་ཉིད་དུད་འགྲོའི་སྐྱེ་གནས་སུ་བསྒྱུར་བར་འགྱུར་ཏེ། མིའི་སྲོག་དང་བྲལ་བར་བྱས་ན་ཅིར་འགྱུར། ཉེ་བར་འཁོར་བདག་ནི་དགེ་སློང་ཡིན་ལ་བྱ་བ་མ་ཡིན་པ་བྱེད་སྙམ་དུ་འདུ་ཤེས་ན་མཐར་འགྱུར་རོ་ཞེས་གཟུགས་གཞན་དུ་བསྒྱུར་བ་ལ་དོགས་པ་བཅད་པའི་ཕྱིར་རོ། །འོ་ན་ཤེས་པ་རང་བཞིན་དུ་མི་གནས་པས་ལྟུང་བ་ལ་སྦྱར་ན་ཅིར་འགྱུར་ཞེ་ན། ཤེས་པ་རང་བཞིན་དུ་མི་གནས་པ་ལ་བརྒྱད་དེ། སྨྱོ་བ། སེམས་འཁྲུགས་པ། ཚོར་བས་གཟིར་བ། འགྲོ་བ་གཞན་གྱི་རྣམ་པ་བསྟེན་པ་ན་དགེ་སློང་གི་འདུ་ཤེས་བརྗེད་པ་དང་བཞི། གཉིད་ལོག་པ། སྙོམས་པར་ཞུགས་པ། ར་རོ་བ། དེའི་དོད་ཐུབ་དང་བཞིའོ། །དང་པོ་བཞིའི་སྐབས་སུ་སྦྱོར་ལྟུང་དང་དངོས་གཞིའི་ལྟུང་བ་གཏན་མེད། ཕྱི་མ་བཞིའི་སྐབས་སུ་ལྟུང་བ་གསར་དུ་ཀུན་ནས་སློང་བ་མེད་ཀྱང་སྐབས་གཞན་དུ་སྦྱོར་བ་བྱས་ཏེ། དེ་རྣམས་ཀྱི་སྐབས་སུ་མཐར་ཐུག་འགྲུབ་པ་ཡོད་དེ། བུད་མེད་དང་གནས་གཅིག་ཏུ་ལྷན་ཅིག་གཉིད་ལོག་ནའོ་ཞེས་དང་། ཁང་པ་བྱེད་དུ་བཅུག་ནས་སྙོམས་པར་ཞུགས་པའི་ཚེ་ཁང་པ་གྲུབ་ན་དགེ་འདུན་ལྷག་མར་གསུངས་པའི་ཕྱིར། གསུམ་པ་རྟོགས་བྱའི་དོན་བཤད་པ་ནི། ཁ་ཅིག་སྲོག་གཅོད་བཞི། མ་བྱིན་ལེན་ཕམ་ལྷག་དང་པོ་གཉིས་ལས་གཞན་པའི་ལྟུང་བ་བསྐྱེད་པ་ལ་གཟུགས་གཞན་དུ་མ་བསྒྱུར་བ་དགོས་ཤིང་། བདུན་པོ་དེ་ལ་གཟུགས་བསྒྱུར་མ་བསྒྱུར་འདྲ་ཞེས་ཟེར་བ་མི་འཐད་དེ། བམ་ལྔ་ལས་ཕམ་པ་བཞི་དང་ལྷག་མ་བཅུ་གསུམ་པོ་ཐམས་ཅད་ལ་དགེ་སློང་གིས་འགྲོ་བ་གཞན་གྱི་རྣམ་པ་བསྟེན་པ་ན་དགེ་སློང་གི་འདུ་ཤེས་ཡོད་ན་ན་སྨད་པ་མེད་ཅེས་རེ་རེ་ལ་སྦྱར་ནས་གསུངས་པའི་ཕྱིར། གཞན་ཡང་བདུན་པོ་ལས་གཞན་པའི་ལྟུང་བ་བསྐྱེད་པ་ལ་གཟུགས་གཞན་དུ་མ་བསྒྱུར་བ་མི་དགོས་པར་ཐལ། འགྲོ་བ་གཞན་གྱི་རྣམ་པ་བསྟན་པ་དགེ་སློང་གི་འདུ་ཤེས་ཡོད་པ་དེ་ལྟུང་བ་ལ་སྦྱོར་བས་དགེ་སློང་གཞན་དང་འདྲ་བར་ལྟུང་བ་རྫོགས་པར་བསྐྱེད་པའི་ཕྱིར་ཏེ། ཊཱི་ཀར་དགེ་སློང་སྔགས་དང་སྨན་ལ་སོགས་པའི་དབང་གིས་འགྲོ་བ་གཞན་གྱི་རྣམ་པ་ཞེས་བྱ་བ་དུད་འགྲོ་ལ་སོགས་པའི་གཟུགས་སུ་བསྒྱུར་བས་གཟུགས་དེས་མི་ཚངས་པར་སྤྱོད་པ་ལ་སོགས་པའི་བྱ་བ་མ་ཡིན་པ་བྱེད་པ་དེའི་ཚེ་བདག་ནི་དགེ་སློང་ཡིན་ནོ་སྙམ་དུ་འདུ་ཤེས་པར་གྱུར་ནས་ལྟུང་བ་ལ་སྦྱོར་བ་ནི་དགེ་སློང་གཞན་དང་འདྲ་བ་ཉིད་དེ། ཇི་ལྟར་དགེ་སློང་གཞན་ལྟུང་བ་ལ་སྦྱོར་བ་ལ་གཞི་ཇི་ལྟར་བ་ལས་ཁ་ན་མ་ཐོ་བར་འགྱུར་བ་བཞིན་དུ་དེ་ལ་ཡང་འགྱུར་རོ་ཞེས་སྡེ་ལྔ་ཀ་བསྐྱེད་པ་ལ་སྦྱར་ནས་གསུངས་པའི་ཕྱིར། འོན་ཀྱང་བལ་ཁུར་བ་དང་ས་བོན་འཇོམས་པའི་ལྟུང་བྱེད་སོགས་གཟུགས་བསྒྱུར་བས་ལྟུང་བ་མི་རྫོགས་པ་འགའ་ཞིག་ལ་དམིགས་བསལ་དགོས་སོ། །འོ་ན་མི་མིན་མིར་སྤྲུལ་པ་དེས་སྡོམ་པ་བླངས་ཀྱང་མི་སྐྱེ་བས་དགེ་སློང་གིས་མི་མ་ཡིན་དུ་སྤྲུལ་པའི་ཚེ་སྡོམ་པ་འཇིག་ཅིང་དེའི་དབང་གིས་ལྟུང་བ་ཡང་མེད་དམ་སྙམ་ན་ཞེས་པའམ། ཡང་གཟུགས་མ་བསྒྱུར་བ་ལ་ལྟུང་བ་རྫོགས་མོད་བསྒྱུར་བ་ལ་ཅིར་འགྱུར་ཞེ་ན། འགྲོ་བ་ཞེས་སོགས་སྨོས་ཏེ་དགེ་སློང་གིས་སྔགས་རྫས་སོགས་ཀྱི་མཐུས་མིའི་འགྲོ་བ་ལས་གཞན་དུ་དུད་འགྲོ་ལྟ་བུའི་རྣམ་པའམ་དབྱིབས་བསྟེན་པ་ན་བདག་ནི་དགེ་སློང་ཡིན་ནོ་སྙམ་དུ་དགེ་སློང་གི་འདུ་ཤེས་ཡོད་པ་ན། དགེ་སློང་གཞན་དུ་འདྲ་བར་ལྟུང་བ་རྫོགས་པར་བསྐྱེད་དོ། །དེའི་ཚེ་དགེ་སློང་གི་འདུ་ཤེས་མེད་ན་ཅིར་འགྱུར་སྙམ་ན། མེད་ན་ནི་ན་སྨད་པ་ཉིད་དོ་ཞེས་ཏེ་དགེ་སློང་གིས་སྔགས་རྫས་སོགས་ཀྱིས་དུད་འགྲོར་བསྒྱུར་བའི་ཚེ་བདག་ནི་དགེ་སློང་ངོ་སྙམ་པའི་འདུ་ཤེས་མེད་ཅིང་དུད་འགྲོ་དེ་ཉིད་དུ་འདུ་ཤེས་ན་ན་སྨད་པ་ཉིད་དོ་སྔར་གི་སྦྱོར་ལྟུང་ཙམ་དུ་འགྱུར་གྱི། མཐར་ཐུག་གི་ལྟུང་བ་མེད་དེ་དེའི་ཚེ་ཤེས་པ་རང་བཞིན་མི་གནས་པར་སོང་བའི་ཕྱིར་རོ། །གསུམ་པ་ཚིགས་ཀྱི་ཡན་ལག་ཞར་བྱུང་དང་བཅས་པ་ལ་གཉིས་ཀྱི། དང་པོ་སྤྱི་དོན་ལ་གཉིས་ཏེ། གཙོ་བོ་མ་ཡིན་པའི་དོན་དང་། གཙོ་བོའི་དོན་ནོ། །དང་པོ་ལ། སྡོམ་གསུམ་རིམ་གྱིས་མནོས་པའི་དགེ་སློང་དེ་ལ་སྡོམ་པ་གསུམ་ཇི་ལྟར་ལྡན་པའི་ཚུལ་དང་། དེས་ལྟུང་བ་ཇི་ལྟར་བསྐྱེད་པའི་ཚུལ་གཉིས་ལས། དང་པོ་ནི། ཁ་ཅིག་སྡོམ་པ་སྤོང་སེམས་ཡིན་པས་སྡོམ་པ་གཞན་གཉིས་བག་ལ་ཞ་བའི་ཚུལ་དུ་ལྡན་ཞེས་ཟེར་བ་མི་འཐད་དེ། བསྟན་བཅོས་འདིའི་ལུགས་ཀྱི་སྡོམ་པ་གཟུགས་ཅན་དུ་ཁས་ལེན་དགོས་པའི་ཕྱིར་ཏེ། མཛོད་དུ། དང་པོའི་རྣམ་རིག་རྣམ་རིག་མིན། །ཞེས་དང་། རྣམ་རིག་མིན་རྣམ་གསུམ་ཞེས་བྱ། །ཞེས་དང་། བམ་ལྔ་ལས་དགེ་སློང་གི་སྡོམ་པ་རིག་བྱེད་མ་ཡིན་པའི་གཟུགས་སུ་གསུངས་པའི་ཕྱིར། རང་ལུགས་ནི། སྡོམ་པ་གཟུགས་ཅན་ཡིན་པས་དེའི་རྒྱུད་ལ་སྡོམ་གསུམ་ངོ་བོ་ཐ་དད་དུ་ཡོད་དེ། མཛོད་དུ། ཐ་དད་དེ་དག་འགལ་བ་མེད། །ཅེས་གསུངས་པའི་ཕྱིར། དཔེར་ན་དགེ་སློང་གི་སྤོང་བདུན་ངོ་བོ་ཐ་དད་དུ་གནས་པ་བཞིན་ནོ། །གཉིས་པ་དེས་ལྟུང་བ་ཇི་ལྟར་བསྐྱེད་པའི་ཚུལ་ལ་ཁ་ཅིག་སྡོམ་གསུམ་རིམ་གྱིས་མནོས་པའི་དགེ་སློང་དེས་མི་གསད་ན་དགེ་སློང་གི་བསླབ་པ་དང་འགལ་བའི་ཆ་ནས་ཕམ་པ། དགེ་ཚུལ་གྱི་བསླབ་པ་དང་འགལ་བའི་ཆ་ནས་ཕམ་འདྲའི་ཉེས་བྱས། དགེ་བསྙེན་གྱི་བསླབ་པ་དང་འགལ་བའི་ཆ་ནས་བསོད་ནམས་མ་ཡིན་པ་དང་གསུམ་བསྐྱེད་ཅིང་། དགེ་ཚུལ་གྱི་རྟེན་ལ་མི་གསོད་པའི་སྦྱོར་བ་བྱས་ནས་དགེ་སློང་གི་དུས་སུ་མཐར་ཐུག་གྲུབ་ན་དགེ་ཚུལ་གྱི་སྡོམ་པ་དང་འགལ་བའི་ཕམ་འདྲའི་ཉེས་བྱས་དང་། དགེ་སློང་གི་སྡོམ་པ་དང་འགལ་བའི་སྦོམ་པོ་གཉིས་འབྱུང་ཞེས་ཟེར་བ་ལ། གཞན་དག་ན་རེ་དེ་ལ་ཕམ་པ་སོགས་གསུམ་བསྐྱེད་པ་མི་འཐད་དེ། དེ་ལྟར་བསྐྱེད་པའི་བཅས་པ་མ་མཛད་པའི་ཕྱིར་ཏེ། དེ་འདྲའི་བཅས་པ་མཛད་པ་ལ་དགོས་པ་མེད་པའི་ཕྱིར་ཏེ། མི་བསད་པས་ཕམ་པ་བསྐྱེད་པའི་བཅས་པ་མཛད་པས་ཉེས་སྤྱོད་ལས་བཟློག་མི་ནུས་ན་ཕམ་འདྲའི་ཉེས་བྱས་དང་བསོད་ནམས་མ་ཡིན་པར་འགྱུར་ཞེས་བཅས་པས་བཟློག་མི་ནུས་པའི་ཕྱིར། གཞན་ཡང་། ཕམ་པ་འཆབ་མེད་བྱུང་བའི་དགེ་སློང་དེས། ཕམ་པ་འཆབ་མེད་འདག་ཕྱིར་དུ་བསླབ་པ་སྤྱོད་པ་ལས་ལོགས་སུ་ཕམ་འདྲའི་ཉེས་བྱས་འཆབ་མེད་འདག་ཕྱིར་དུ་ཡང་བསླབ་པ་སྤྱོད་དགོས་པར་ཐལ། དེ་ལ་ཕམ་པ་འཆབ་མེད་དང་ཕམ་འདྲའི་ཉེས་བྱས་འཆབ་མེད་གཉིས་ཀ་བྱུང་བའི་ཕྱིར། རྟགས་ཁས། ཁྱབ་སྟེ། མིང་དང་རིགས་དང་ལྡན་པར་བརྗོད་ན་ལྟུང་བ་ལས་སོ། །ཞེས་གསུངས་པའི་ཕྱིར། འདོད་ན་ཕམ་པའི་བསླབ་པ་སྤྱོད་པའི་ཆ་ནས་དགེ་སློང་རྣམས་ཀྱི་གྲལ་ཞབས་སུ་འཁོད་པར་བྱ་བ་དང་། ཕམ་འདྲའི་ཉེས་བྱས་ཀྱི་བསླབ་པ་སྤྱོད་པའི་ཆ་ནས་དགེ་ཚུལ་རྣམས་ཀྱི་གྲལ་ཞབས་སུ་འཁོད་རིགས་པར་འགྱུར་རོ། །གཞན་ཡང་། དགེ་ཚུལ་གྱི་དུས་སུ་མི་གསོད་པའི་སྦྱོར་བ་བྱས་ནས་དགེ་སློང་གི་དུས་སུ་མཐར་ཐུག་གྲུབ་པའི་དགེ་སློང་དེ་རྣམ་དག་ཡིན་ནམ་མ་ཡིན། དང་པོ་ལྟར་ན་མ་ཡིན་པར་ཐལ། རྩ་ལྟུང་བྱུང་བའི་ཕྱིར། ཕྱི་མ་ལྟར་ན་ཕམ་པ་བྱུང་བར་ཐལ། རྩ་ལྟུང་བྱུང་བའི་ཆ་ནས་དགེ་སློང་རྣམ་དག་མ་ཡིན་པའི་ཕྱིར། ཕམ་པ་མ་བྱུང་བ་དགོས་མེད་དུ་ཐལ། དགེ་སློང་རྣམ་དག་མིན་པའི་ཕྱིར། ཞེས་ཟེར་བ་ལ་ལན་རིམ་པ་བཞིན། དགེ་སློང་གིས་མི་བསད་པས་ཕམ་པ་དང་། ཉེས་བྱས་དང་། སྦོམ་པོ་གསུམ་བསྐྱེད་པའི་བཅས་པ་གསུམ་མཛད་པ་དོན་མེད་པར་ཐལ། མི་བསད་པའི་ཕམ་པར་འགྱུར་བའི་བཅས་པ་མཛད་པས་ཉེས་སྤྱོད་ལས་བཟློག་མ་ནུས་ན་སྦོམ་པོ་དང་ཉེས་བྱས་ཀྱི་བཅས་པ་མཛད་པས་བཟློག་མི་ནུས་པར་མཚུངས་པའི་ཕྱིར། གཞན་ཡང་། དགེ་སློང་གིས་དེ་བཞིན་གཤེགས་པ་ལ་ངན་སེམས་ཀྱི་ཁྲག་ཕྱུང་བས་སྦོམ་པོར་འགྱུར་བའི་བཅས་པ་དོན་མེད་པར་ཐལ། མཚམས་མེད་དུ་འགྱུར་བར་བསྟན་པས་བཟློག་མ་ནུས་ན། སྦོམ་པོའི་བཅས་པ་མཛད་པས་བཟློག་མི་ནུས་པའི་ཕྱིར། གཞན་ཡང་། སྡོམ་གསུམ་རིམ་གྱིས་མནོས་པའི་དགེ་སློང་དེས་དགེ་སློང་གི་བསླབ་པའི་གནས་རྣམས་ལས་མི་འདའ་བར་བྱའོ་སྙམ་པའི་བསྲུང་སེམས་ལས་ལོགས་སུ་དགེ་ཚུལ་གྱི་བསླབ་པ་བསྲུང་སེམས་བསྟེན་དགོས་པར་ཐལ། དེས་སྡོམ་པ་གསུམ་ཆར་བསྲུང་དགོས་པའི་ཕྱིར། ཁྱབ་པ་ཁས། འདོད་ན་དེ་དགེ་ཚུལ་གྱི་སྡོམ་པ་བསྲུང་བའི་ཆ་ནས་དགེ་ཚུལ་གྱི་བསླབ་གྲལ་དང་། དགེ་སློང་གི་སྡོམ་པ་བསྲུང་བའི་ཆ་ནས་དགེ་སློང་གི་བསླབ་གྲལ་དུ་འཇོག་རིགས་པར་ཐལ་ལོ། །ཡང་ཁྱེད་ལྟར་ན། ཕམ་འདྲའི་ཉེས་བྱས་འཆབ་མེད་བྱུང་བའི་དགེ་ཚུལ་བསྙེན་པར་རྫོགས་པའི་དགེ་སློང་དེ་རྣམ་དག་ཡིན་ནམ་མ་ཡིན་དྲིས་ན་སྔར་གྱི་སྐྱོན་དེ་ཁྱེད་ལ་ཡང་མཚུངས་སོ། །དེས་ན་རང་ལུགས་ནི། དེས་རྒྱུད་ལ་སྡོམ་པ་གསུམ་ཀ་མངོན་གྱུར་དུ་ཡོད་ཀྱང་འོག་མ་གཉིས་ཀྱི་ཕྱེད་པ་བག་ལ་ཞ་བའི་ཚུལ་དུ་གནས་ཏེ། ཉི་མ་དང་ཟླ་བའི་འོད་བཞིན་ནོ། །དེས་ན་དགེ་སློང་གིས་མི་བསད་པའི་ཚེ་ཕམ་པ་ཁོ་ན་བསྐྱེད་ཀྱི། ཕམ་འདྲའི་ཉེས་བྱས་དང་། བསོད་ནམས་མ་ཡིན་པ་ནི་མི་བསྐྱེད་དོ། །གཉིས་པ་གཙོ་བོའི་དོན་བཤད་པ་ལ་ལྔ་སྟེ། ཁྱབ་པ། ངོ་བོ། སེལ་བ། ཅིར་འགྱུར། རྒྱུ་མཚན་ནོ། །དང་པོ་ནི། ཁ་ཅིག་ལྟུང་བ་རྒྱུན་ལྡན་རྣམས་ལ་ཁྱབ་པ་ཡིན་གྱི། རེག་པའི་ལྷག་མ་ལྟ་བུ་རྒྱུན་དང་མི་ལྡན་པ་རྣམས་ལ་ཁྱབ་པ་མ་ཡིན་ཏེ། དེ་ལ་ཚིག་ཐ་དད་ཀྱི་སེལ་བ་མེད་པའི་ཕྱིར། ཚིགས་འཕོ་བ་ལ་ཡུན་རིང་དུ་འགོར་ཞིང་རེག་པའི་ལྷག་མ་ལྟ་བུ་ལ་མེད་མི་རུང་གི་སྦྱོར་བ་བྱས་ནས་མཐར་ཐུག་གྲུབ་པ་ཆེས་མྱུར་བའི་ཕྱིར་ཞེས་ཟེར་བ་ལ། གཞན་དག་ན་རེ་དེ་ལ་ཚིགས་ཐ་དད་ཀྱི་སེལ་བ་མེད་པ་མི་འཐད་དེ། བརྗོད་པ་གསུམ་པ་རྫོགས་པ་དང་རེག་པ་ཉམས་སུ་མྱོང་བ་དུས་མཉམ་པ་སྲིད་པའི་ཕྱིར་དང་། ཚིགས་མར་འཕོ་བ་ལ་ཚིགས་ཐ་དད་ཀྱི་སེལ་བ་ཡོད་དེ། བསླབ་པ་ཕུལ་བ་དང་རེག་པ་མྱོང་བ་དུས་མཉམ་པ་ཡོད་པའི་ཕྱིར་ཏེ། བསླབ་པ་ཕུལ་བའི་དོན་གོ་བ་དང་རེག་པ་མྱོང་བ་དུས་མཉམ་པ་སྲིད་པའི་ཕྱིར་ཟེར་བ་ལ། ཁ་ཅིག་རེག་པའི་དུས་སུ་རེག་པ་སྤོང་འདོད་ཡོད་དམ་མེད། ཡོད་ན་ཚིགས་ཕྱི་མ་ལ་སྦོམ་པོར་འགྱུར་བ་འགལ། མེད་ན་ཡན་ལག་ངེས་པའི་བར་ཆད་ཡོད་པས་སྡོམ་པ་མི་སྐྱེའོ་ཞེས་ཟེར་རོ། །རང་ལུགས་ལ་བརྗོད་པ་གསུམ་པ་རྫོགས་ཁ་མར་རེག་པ་མྱོང་བའི་དུས་སུ་ཆགས་སེམས་དྲག་པོ་སྐྱེས་ན་སྡོམ་པ་མི་སྐྱེ་སྟེ། སྒྲེན་མོ་དང་། འཁྲུགས་པ་དང་། མཚན་དུག་མ་དག་ལ་ཡང་མི་སྐྱེ་ཞེས་གསུངས་པའི་ཕྱིར། ཕྲན་ཚེགས་འགྲེལ་དུ་གཅུང་མཛེས་དགའ་ལ་སྡོམ་པ་སྐྱེས་པ་དང་། ཆགས་སེམས་ཀྱིས་འཁྲུགས་པ་ལ་སྡོམ་པ་མི་སྐྱེ་བར་བཤད་པའི་འགལ་སྤོང་དང་བཅས་པ་གསུངས་པའི་ཕྱིར། ཁྱབ་པའི་དོན་ཡང་ལྟུང་བ་རྒྱུན་དང་ལྡན་མི་ལྡན་མཐའ་དག་ལ་ཁྱབ་པ་ཡིན་ཏེ། དངོས་གཞིའི་ལྟུང་བ་བསྐྱེད་པ་ལ་ཚིག་གཅིག་པ་ཡན་ལག་ཏུ་དགོས་པའི་ཕྱིར། གཉིས་པ་ངོ་བོ་ནི། སྡོམ་པའི་ཚིག་གཅིག་གི་སྟེང་དུ་མེད་མི་རུང་གི་སྦྱོར་བ་བྱས་ནས་མཐར་ཐུག་གྲུབ་པ་ནི་ངོ་བོ་ཡིན་ནོ། །གསུམ་པ་སེལ་བ་ལ། ཁ་ཅིག་འདིར་ཚིགས་ཀྱི་སེལ་བ་མི་འཐད་དེ། ལྟུང་བ་བསྐྱེད་པ་ལ་ཚིག་གཅིག་པ་ཡན་ལག་ཏུ་མི་དགོས་པའི་ཕྱིར་ཏེ། ལུང་ཞུ་བ་ལས་ཕམ་པ་དང་པོ་གསུམ་དང་འབྱིན་པ། འཁྲིག་ཚིག་བསྙེན་བཀུར་བསྔགས་པ་སྨྱན། ཁ་མ་བསྒྱུར་བའི་གོས་གྱོན་པའི་ལྟུང་བྱེད་སོགས་ལ་ཚིགས་སྔ་མ་ལ་སྦྱོར་བ་བྱས་ནས་ཕྱི་མ་ལ་མཐར་ཐུག་གྲུབ་པ་ཡོད་པར་གསུང་པའི་ཕྱིར། ཡང་དགེ་ཚུལ་གྱི་རྟེན་ལ་མི་གསོད་པའི་སྦྱོར་བ་བྱས་ནས་དགེ་སློང་གི་རྟེན་ལ་མཐར་ཐུག་གྲུབ་པ་ན་ཕམ་པར་འགྱུར་བ་ཡིན་ཏེ། ཕམ་པ་དང་ཕམ་འདྲའི་ཉེས་བྱས་གཉིས་མིང་ཐ་དད་མ་གཏོགས་བྱེད་ལས་གཅིག་པས་ལྟུང་བ་མཉམ་པའི་ཕྱིར་བྱེད་པ་གཅིག་སྟེ་བསླབ་པ་སྤྱད་པའི་སྒོ་ནས་ཕྱིར་བཅོས་བྱ་དགོས་པར་མཚུངས། སྡོམ་པ་ཕྱིས་བླངས་ཀྱང་མི་སྐྱེ་བར་མཚུངས་པའི་ཕྱིར་ཞེས་ཟེར། འོ་ན་ས་རྐོ་བའི་ལྟུང་བྱེད་དང་ས་ཉམས་པ་བསྐོས་པའི་ཉེས་བྱས་གཉིས་བྱེད་པ་གཅིག་པས་ལྟུང་བ་མཉམ་པར་ཐལ། དེ་གཉིས་ཆོས་བརྒྱད་ལ་ཕྱིར་བཅོས་བྱེད་དགོས་པར་མཚུངས། ལས་ལམ་ལ་སྒྲིབ་པར་མཚུངས་པའི་ཕྱིར་ཏེ། གལ་ཏེ་ལྟུང་བྱེད་དང་ཉེས་བྱས་གཉིས་མིང་རིགས་ཐ་དད་པས་མི་མཚུངས་སོ་ཞེ་ན། ཕམ་པ་དང་ཕམ་འདྲའི་ཉེས་བྱས་ཀྱང་མིང་རིགས་ཐ་དད་པ་མིན་ནམ། གཞན་ཡང་། དགེ་སློང་གི་རྟེན་ལ་མི་གསོད་པའི་སྦྱོར་བ་བྱས་ནས། དགེ་སློང་གི་བསླབ་རྒྱུན་གཞན་ལ་མཐར་ཐུག་གྲུབ་པ་ལ་ཕམ་པར་འགྱུར་བར་ཐལ། དགེ་ཚུལ་གྱི་རྟེན་ལ་མི་གསོད་པའི་སྦྱོར་བ་བྱས་ནས་སྦྱོར་བ་དེའི་དབང་ཙམ་གྱིས་དགེ་སློང་གི་རྟེན་ལ་མཐར་ཐུག་གྲུབ་པ་ན་ཕམ་པར་འགྱུར་བའི་ཕྱིར། རྟགས་ཁས། འདོད་ན། ཉེས་པ་དེ་མེད་པ་ལ་འོང་བ་ནི་ཐ་དད་ཅེས་གསུངས་པ་དང་འགལ་ལོ། །གཞན་ཡང་། ལུང་དུ་བསྙེན་པར་མ་རྫོགས་པས་རྐུ་བ་ལ་སྦྱོར་ཞིང་བསྙེན་པར་རྫོགས་པའི་ཕྱིར་རྐུ་བར་བྱེད་ན་སྦོམ་པོར་འགྱུར་རོ། །ཞེས་གསུངས་པ་མི་འཐད་པར་ཐལ། དེ་ལ་ཚིགས་ཀྱི་སེལ་བ་མེད་པའི་ཕྱིར། རྟགས་ཁས། ལུང་ཞུ་བར་ཕམ་པ་དང་པོ་གསུམ་སོགས་ཚིགས་སྔ་མ་ལ་སྦྱོར་བ་བྱས་ནས་ཕྱི་མ་ལ་མཐར་ཐུག་གྲུབ་པ་གསུངས་པས་མི་གནོད་དེ། དེ་ནི་ཚིག་སྔ་མ་ལ་རང་གི་སྦྱོར་བ་ཡོད་ཅིང་ཕྱི་མ་ལ་མེད་མི་རུང་གི་ཉེ་སྦྱོར་ཡོད་པ་ལ་དགོངས་པས་སོ། །ཁ་ཅིག་འདིའི་སེལ་བ་ནི་འདུན་པ་ལོག་པའི་སེལ་བ་ཡིན་ཏེ། བསྙེན་པར་རྫོགས་འདོད་བུད་མེད་ལ་རེག་པའི་ཚེ་རེག་པ་སྤོང་བའི་སེམས་ཡོད་དམ་མེད། མེད་ན་ཡན་ལག་མེད་པའི་བར་ཆད་དུ་འགྱུར་བས་སྡོམ་པའི་ཚིགས་འཕོ་བ་མི་འཐད་པས་ཚིགས་ཀྱི་སེལ་བར་མི་འགྱུར་ཞིང་། ཡོད་ན་འདུན་པ་ལོག་པའི་སེལ་བ་འགྱུར་གྱི། ཚིགས་ཀྱི་སེལ་བར་བྱེད་པ་མི་འཐད་དོ་ཞེ་ན། སྤྱིར་སྤང་བྱ་སྤོང་སེམས་སྐྱེས་པ་ཙམ་གྱིས་ཉེས་སྤྱོད་ཀྱི་བྱ་བ་ལ་ཞུགས་པའི་འདུན་པ་ལོག་པ་མ་ཡིན་ཏེ། མཛོད་འགྲེལ་ལས་ལས་ཀྱི་ལམ་གྱི་སྦྱོར་བ་བྱས་ནས་འཕགས་ལམ་སྐྱེས་ན་ལས་ཀྱི་ལམ་དུ་མི་འགྱུར་ཏེ། རྟེན་འགལ་བའི་ཕྱིར་ཞེས་གསུངས་པས་དེའི་ཤུགས་ལ་དུད་འགྲོ་གསོད་པའི་སྦྱོར་བ་བྱས་པའི་ཚོགས་སྦྱོར་བ་ལྟ་བུའི་རྒྱུད་ལ་དུད་འགྲོ་བསད་པའི་ལས་ལམ་སྐྱེ་བར་བསྟན་པའི་ཕྱིར། སྤང་བྱ་རེ་རེ་ནས་སྤོང་སེམས་རེ་རེ་དགོས་ན། འོ་ན་ད་ལྟ་སྡོམ་པ་སྐྱེ་བ་མི་སྲིད་པར་ཐལ། སྤང་བྱ་མཐའ་ཡས་པའི་ཕྱིར། རང་ལུགས་འདིའི་སེལ་བ་ནི་ཚིགས་ཀྱི་སེལ་བ་ཡིན་ནོ། །བཞི་པ་ཅིར་འགྱུར་ལ། ལྟུང་བ་སྡེ་བཞི་ལ་སྦྱོར་བ་འཕེན་པས་འགྲུབ་ལ། མཐར་ཐུག་འཕེན་པས་མི་འགྲུབ་པ། མཐར་ཐུག་འཕེན་པས་འགྲུབ་ལ། སྦྱོར་བ་འཕེན་པས་མི་འགྲུབ་པ། གཉིས་ཀ་འཕེན་པས་མི་འགྲུབ་པ། གཉིས་ཀ་འཕེན་པས་འགྲུབ་པ་དང་མུ་བཞི་སྟེ། དང་པོ་ནི། སློང་བ་དང་སློང་རིགས་ཀྱི་སྤང་བ་ལྟ་བུའོ། །གཉིས་པ་ནི། ཁང་པ་དང་ཁང་ཆེན་གྱི་ལྷག་མ་དང་སྟན་བྱེད་པའི་སྤང་བ་ལྟ་བུའོ། །གསུམ་པ་ནི། འབྱིན་པའི་ལྷག་མ་དང་ཉན་རྣ་ལས་གྱུར་པའི་ལྟུང་བྱེད་ལྟ་བུའོ། །བཞི་པ་ནི་སྲོག་གཅོད་པའི་ཕམ་པ་ལྟ་བུའོ། །འོ་ན་དེ་དག་གི་དོན་གང་ཞེ་ན། ལྟུང་བ་དེའི་མཐར་ཐུག་གི་སྔ་ལོགས་དེ་མ་ཐག་དེར་མེད་མི་རུང་གི་སྦྱོར་བ་མི་དགོས་པར་ལྟུང་བ་བསྐྱེད་པ་ནི་སྦྱོར་བ་འཕེན་པས་འགྲུབ་པ་ཡིན་ལ། སྔ་ལོགས་དེ་མ་ཐག་དེར་ངེས་པར་མེད་མི་རུང་གི་སྦྱོར་བ་དགོས་པ་ནི་སྦྱོར་བ་འཕེན་པས་མི་འགྲུབ་པ་དང་། མཐར་ཐུག་འགྲུབ་པ་རང་ཉིད་ཀྱིས་ཤེས་པ་ལ་མ་ལྟོས་པར་གཞན་ལ་གྲུབ་པས་ལྟུང་བ་བསྐྱེད་པ་ནི་མཐར་ཐུག་འཕེན་པས་འགྲུབ་པ་དང་། མཐར་ཐུག་གྲུབ་པ་རང་ཉིད་ཀྱིས་ངེས་པར་ཤེས་དགོས་པ་ནི་མཐར་ཐུག་འཕེན་པས་མི་འགྲུབ་པའོ། །དེ་ལྟར་བཞི་ཡོད་པ་ལས་ཁ་ཅིག་སྦྱོར་མཐར་གཉིས་ཀ་འཕེན་པས་མི་འགྲུབ་པར་མི་ཚངས་སྤྱོད་སོགས་དང་། མཐར་ཐུག་འཕེན་པས་འགྲུབ་ལ་སྦྱོར་བ་འཕེན་པས་མི་འགྲུབ་པ་ཁང་པ་ཁང་ཆེན་སོགས་ལ་ལྟུང་བ་ན་སྨད་དུ་འགྱུར་ཏེ། ཚིགས་ཕྱི་མ་ལ་སྦྱོར་བ་མེད་ཀྱང་ལུས་ངག་གི་བྱེད་པ་ཡོད་པའི་ཕྱིར། སྦྱོར་བ་འཕེན་པས་འགྲུབ་ལ་མཐར་ཐུག་འཕེན་པས་མི་འགྲུབ་པ་སློང་དང་སློང་རིགས་སོགས་ཀྱི་སྤང་བ་ལ་བསྡམ་བྱའི་ཉེས་བྱས་ཙམ་དུ་འགྱུར་ཏེ། ལུས་ངག་གི་བྱེད་པ་མེད་པར་ཡིད་ཉེས་སྤྱོད་ལ་ཞུགས་པ་ཙམ་ཡོད་པའི་ཕྱིར། ཁྱབ་སྟེ། སུམ་བརྒྱ་པར། སེམས་བསྐྱེད་པ་ནི་བསྡམ་བྱ། །ཞེས་གསུངས་པའི་ཕྱིར། སྦྱོར་མཐར་གཉིས་ཀ་འཕེན་པས་འགྲུབ་པ་སྲོག་གཅོད་ལྟ་བུ་ལ་ལྟུང་བ་གཏན་མེད་དུ་འགྱུར་ཏེ། བསྙེན་པར་རྫོགས་པའི་ཚེ་ལུས་ངག་གི་བྱེད་པ་དང་བསམ་པ་གང་ཡང་མེད་པའི་ཕྱིར་ཞེས་ཟེར་རོ། །བསྡམ་བྱའི་ཉེས་བྱས་སུ་འགྱུར་བ་དང་ལྟུང་མེད་དུ་འགྱུར་བ་མི་འཐད་དེ། སྦྱོར་མཐར་གཉིས་ཀ་འཕེན་པས་འགྲུབ་པ་མ་བྱིན་ལེན་ལྟ་བུའི་དབང་དུ་བྱས་ནས་བསྙེན་པར་མ་རྫོགས་པས་རྐུ་བ་ལ་སྦྱོར་ཞིང་བསྙེན་པར་རྫོགས་པར་བྱ་བའི་ཕྱིར་རྐུ་བར་བྱེད་ན་སྦོམ་པོར་འགྱུར་རོ་ཞེས་གསུངས་པའི་ཕྱིར། ཁོ་ན་རེ་བསྡམ་བྱའི་ཉེས་བྱས་སུ་འགྱུར་བ་ལ་དགོངས་སོ་ཞེས་ཟེར་ན། མི་འཐད་དེ་དེ་ལྟར་ཡིན་ན་སྐབས་འདིར་ལྟུང་བ་ན་སྨད་དུ་འགྱུར་བའི་ཤེས་བྱེད་དུ་ལུང་དེ་དྲངས་པ་ལ་འབྲེལ་མེད་པའི་ཕྱིར། ཁོ་ན་རེ་མ་བྱིན་ལེན་གྱི་སྦྱོར་མཐར་གཉིས་ཀ་འཕེན་པས་འགྲུབ་པ་མ་གྲུབ་སྟེ། མ་བྱིན་ལེན་གྱི་མཐར་ཐུག་འགྲུབ་པ་ཐོབ་བློ་སྐྱེ་བ་ལ་ལྟོས་པའི་ཕྱིར། ཞེས་པ་ཡང་མི་འཐད་དེ། ཁྱེད་ཀྱིས་ཐོབ་བློ་རྐུ་སེམས་སུ་ཁས་བླངས་ལ། ཊཱི་ཀ་ལས་དེའི་ཕྱིར་རམ་དེའི་རྒྱུར་བརྐུས་པ་ཡིན་གྱི། བསྙེན་པར་རྫོགས་པར་བྱེད་པའི་དུས་ན་བརྐུ་བའི་བྱ་བ་ཡང་མེད་པ་ལ་ནི་སྦྱོར་བ་སྔ་མ་དེ་ན་སྨད་པ་ཉིད་དོ་ཞེས་གསུངས་པའི་ཕྱིར་རོ། །བུ་དྲོ་་་་་་ཁ་ཅིག་སྦྱོར་བ་སྔ་མ་ན་སྨད་ཞེས་པའི་དོན་དུ་བསམས་ནས། དགེ་ཚུལ་གྱི་རྟེན་ལ་མིའི་རྫས་རིན་ཐང་ཚང་བ་རྐུ་བའི་སྦྱོར་བ་བྱས། དགེ་སློང་གི་དུས་སུ་མཐར་ཐུག་གྲུབ་པ་ན་སྔར་གྱི་སྦྱོར་བའི་ཉེས་བྱས་དེ་སྦོམ་པོར་སོང་བར་བཞེད་པ་ཡང་མི་འཐད་དེ། སྐབས་འདིའི་ལྟུང་བ་དེ་ན་སྨད་པ་མ་ཡིན་པར་ན་སྟོད་པ་ཡིན་པར་ཐལ། སྐབས་འདིའི་ན་སྨད་དེ་ཉེས་བྱས་སྦོམ་པོར་སོང་བ་ལ་བྱེད་རིགས་པའི་ཕྱིར། ལྔ་པ་རྒྱུ་མཚན་ནི། ལུང་དུ་བསྙེན་པར་མ་རྫོགས་པས་རྐུ་བ་ལ་སྦྱོར་ཞིང་། བསྙེན་པར་རྫོགས་པའི་ཕྱིར་རྐུ་བར་བྱེད་ན་སྦོམ་པོར་འགྱུར་རོ་ཞེས་གསུངས་པའི་ཕྱིར། གཉིས་པ་ཡན་ལག་གི་དོན་ནི། འོ་ན་ལུས་བསྒྱུར་བ་ལ་དེ་ལྟར་ཡིན་མོད། ཚིགས་སྔ་ཕྱི་ལ་ཇི་ལྟར་ཡིན་ཞེ་ན། ཚིགས་སྔ་མ་དགེ་ཚུལ་གྱི་རྟེན་ལ་ལྟུང་བ་འབྱུང་རུང་གི་སྦྱོར་བ་བྱས་ནས་སྦྱོར་བ་དེའི་རྐྱེན་ཙམ་གྱིས་དགེ་སློང་གི་རྟེན་ལ་མཐར་ཐུག་གྲུབ་ན་ཡང་ངོ་སྟེ་ན་སྨད་དུ་འགྱུར་རོ། །དཔེར་ན་དགེ་ཚུལ་ལམ་དགེ་སློབ་མའི་དུས་སུ་མི་གསོད་པའི་སྦྱོར་བ་བྱས་ནས་དེའི་རྐྱེན་ཙམ་གྱིས་དགེ་སློང་གི་དུས་སུ་མི་དེ་ཤི་ན་སྲོག་གཅོད་ཀྱི་སྦོམ་པོར་འགྱུར་བ་ལྟ་བུའོ། །འོ་ན་དགེ་སློང་གི་རྟེན་ལ་སྦྱོར་བ་བྱས་ནས་དགེ་ཚུལ་གྱི་རྟེན་ལ་མཐར་ཐུག་གྲུབ་པ་ལ་ཅིར་འགྱུར་ཞེ་ན། ཕྱི་མ་དགེ་སློང་གི་ཚིགས་ནི་སྔ་མ་དགེ་ཚུལ་གྱི་ཚིགས་དེ་དང་ལྡན་པ་ཉིད་ཡིན་པས་དགེ་སློང་གི་རྟེན་ལ་སྦྱོར་བ་བྱས་ནས་དགེ་ཚུལ་གྱི་དུས་སུ་མཐར་ཐུག་གྲུབ་ན་མཐར་ཐུག་གི་རྟེན་དེ་ལ་བཅས་རིགས་གང་ཡོད་ཀྱི་ལྟུང་བ་རྫོགས་པར་བསྐྱེད་དོ། །དཔེར་ན་དགེ་སློང་གི་རྟེན་ལ་མི་གསོད་པའི་སྦྱོར་བ་བྱས་ནས་བསླབ་པ་ཕུལ་ཏེ་དགེ་ཚུལ་དུ་བབས་པའི་ཚེ་མཐར་ཐུག་གྲུབ་ན་ཕམ་འདྲའི་ཉེས་བྱས་བསྐྱེད་པ་བཞིན་ནོ། །ཞར་བྱུང་ནི་སྔར་རྣམ་འབྱེད་ཀྱི་སྐབས་སུ་ལྟུང་བ་བསྐྱེད་པའི་གཞིའི་ཡན་ལག་ཏུ་བཤད་པ་དེའམ། དེ་དང་འདྲ་བ་ལ་སྤྱད་པས་ལྟུང་བར་འགྱུར་གྱི་དེ་ལས་བཟང་བ་ལ་མི་འགྱུར་རམ་སྙམ་ན། སྲིན་བལ་ལ་སྟན་བྱས་ན་སྤང་བར་འགྱུར། ཞེས་སྔར་རྫས་བཀག་པ་དེ་བས་བཟང་བ་མོན་དར་ལ་སྟན་བྱེད་ན་ཡང་བཀག་པ་ཡང་དེ་དང་ལྡན་པ་ཉིད་ཡིན་པས་སྤང་ལྟུང་དུ་འགྱུར་རོ། །སྲིན་བལ་དང་རིན་ཐང་འདྲ་བ་དུ་གུ་ལའི་རས་བལ་ལ་སྟན་བྱས་ན་ཡང་ངོ་སྟེ་སྤང་བར་འགྱུར་རོ། །རྫས་བཀག་པ་ཞེས་པའི་གཞུང་ཚན་གཉིས་པོ་འདི་ལ་ཁ་ཅིག སྲིན་བལ་འབའ་ཞིག་ཆ་གཉིས་དང་། །བལ་ཁུར་རྨེལ་དང་གསེར་དངུལ་རེག །མངོན་མཚན་ཉོ་ཚོང་བསོད་པ་སློང་། །ཁབ་རལ་ལས་གྱུར་ཁྱབ་པ་འོ། །ཞེས་ལྟུང་བ་བཅུ་གཅིག་ཁོ་ན་ལ་སྦྱོར་བ་མི་འཐད་དེ། བམ་ལྔ་ལས་དེས་ན་ལྟུང་བའི་ཕྱིར་ནི་རྫས་བཟང་པོ་ཡང་ངན་པ་དང་འདྲ་བས་བཟང་པོ་ལ་མི་ཚངས་པར་སྤྱོད་པ་ཡང་ངན་པ་ལ་སྤྱོད་པ་དང་འདྲ་ལ། བཟང་པོ་བརྐུས་པ་ཡང་ངན་པ་བརྐུས་པ་དང་འདྲ། རྫུན་བཟང་པོ་སྨྲས་པ་ཡང་ངན་པ་སྨྲས་པ་དང་འདྲ་བར་ལྟུང་བར་འགྱུར་བ་ལ་སོགས་པའི་ཚུལ་དུ་རིགས་པར་བྱའོ་ཞེས་དང་། འདྲ་བ་ལ་ཡང་ངོ་ཞེས་པའི་སྐབས་སུ། དེ་ཉིད་ལས། དེས་ན་ལྟུང་བའི་ཕྱིར་ན་རྫས་འདྲ་བ་གཅིག་བཀག་ན་དེ་དང་འདྲ་བ་གཞན་དགག་པའི་ཕྱིར་ཏེ། ལྟུང་བ་སྡེ་ལྔ་ལ་སོགས་པ་བསླབ་པའི་གཞི་ཐམས་ཅད་ལ་འདྲ་བ་གཅིག་བཀག་ན་འདྲ་བ་གཞན་བཀག་པར་འགྱུར་ཞིང་། རྫས་འདྲ་བ་གཅིག་ལས་འདས་ན་ལྟུང་བར་འགྱུར་བ་བཞིན་དུ་རྫས་འདྲ་བ་གཞན་ལས་འདས་ན་ཡང་ལྟུང་བ་དེ་ཉིད་དུ་འགྱུར་བར་ཤེས་པར་བྱའོ་ཞེས་གསུངས་པའི་ཕྱིར། རང་ལུགས་ནི་ཡུལ་ཁྱད་པར་ཅན་རྙེད་དཀའ་ཞིང་འབྱུང་རིང་བས་དེ་ལ་ལྟུང་བ་རྫོགས་པར་མི་འགྱུར་རམ་ཞེ་ན། རྫས་ཞེས་པའི་གཞུང་ཚན་གཉིས་ནི་སྡེ་ལྔ་ཀ་ལ་སྦྱོར་ཏེ། རྒྱལ་པོའི་བཙུན་མོ་རིན་པོ་ཆེ་ལ་མི་ཚངས་པར་སྤྱད་ན་ཡང་ཕམ་པར་འགྱུར་བ་དང་། དེ་བཞིན་དུ་ནོར་བུ་དོན་ཞགས་བརྐུས་ན་ཡང་ཕམ་པ། མི་མཚན་དཔེས་བརྒྱན་པ་བསད་ན་ཡང་ཕམ་པ། ང་ནི་སངས་རྒྱས་ཡིན་ནོ་ཞེས་པ་ལྟ་བུའི་བརྫུན་སྨྲས་ཀྱང་ཕམ་པར་འགྱུར་བ་སོགས་ལ་སྦྱོར། ཁོ་ན་རེ་བཙུན་མོ་རིན་པོ་ཆེ་ལ་མི་ཚངས་པར་སྤྱོད་པས་ཕམ་པར་འགྱུར་བ་འདིར་བསྟན་མི་དགོས་པར་ཐལ། རྣམ་འབྱེད་ལས་བུད་མེད་ལ་མི་ཚངས་པར་སྤྱོད་པས་ཕམ་པར་འགྱུར་བ་བསྟན་ཟིན་ལ། བཙུན་མོ་རིན་པོ་ཆེ་ཡང་བུད་མེད་ལས་མ་འདས་པའི་ཕྱིར་ཞེ་ན། འོ་ན་འདུལ་བྱེད་ཀྱི་སྐབས་སུ་གསང་སྔགས་ཀྱིས་ཆུད་གསོན་པ་སྦོམ་པོར་འཆད་མི་རིགས་པར་ཐལ། གོང་དུ་རྣམ་འབྱེད་ཀྱི་སྐབས་སུ་ཆུད་གཟོན་པ་སྦོམ་པོར་བཤད་ལ། གསང་སྔགས་ཀྱིས་ཆུད་གཟོན་ཀྱང་ཆུད་གཟོན་པ་ལས་མ་འདས་པའི་ཕྱིར། འདྲ་བ་ལ་ཡང་ངོ་ཞེས་པའི་དོན་ཡང་སྒྲ་མི་སྙན་པའི་བུད་མེད་ལ་མི་ཚངས་པར་སྤྱད་ཀྱང་ཕམ་པར་འགྱུར་བ་སོགས་དང་། ལྷའི་རིན་པོ་ཆེ་ལ་རེག་ཀྱང་ལྟུང་བྱེད་དུ་འགྱུར་བ་སོགས་ལ་སྦྱོར། ལུང་ཞུ་བ་ལ་ལྷའི་རིན་པོ་ཆེ་ལ་རེག་པ་ཉེས་བྱས་སུ་བཤད་པ་ནི་ལྷའི་གནས་སུ་དུས་དྲན་མ་བྱས་པར་དེ་ལ་རེག་པའི་ཉེས་བྱས་ལ་དགོངས་པར་མངོན་ནོ། །བཞི་པ་མཚན་གྱི་ཡན་ལག་ཞར་བྱུང་དང་བཅས་པ་ལ་གཉིས་ཏེ། སྤྱིའི་དོན་དང་། གཞུང་དོན་ནོ། །དང་པོ་ལ་གཉིས་ཏེ། ལྟུང་བ་ཐུན་མོང་དང་ཐུན་མོང་མ་ཡིན་པའི་ཁྱད་པར་དང་། ལྟུང་བའི་དབྱེ་བའོ། །དང་པོ་ལ་གཉིས་ལས། གཞན་ལུགས་དགག་པ་ནི། ཁ་ཅིག་དགེ་སློང་ཕ་མའི་དགེ་འདུན་གཉིས་ཀ་བསགས་ནས་བཅས་པའམ། གཅིག་ལ་བཅས་ནས་གཞན་ལ་བསྒྲགས་པ་ནི་བཅས་པ་ཐུན་མོང་བ་ཡིན་ཅིང་། དེ་ལས་འདས་པའི་ལྟུང་བ་ནི་ལྟུང་བ་ཐུན་མོང་བ་དང་། དེ་ལས་གཞན་པའི་ལྟུང་བ་རྣམས་ཐུན་མོང་མིན་པའོ་ཞེས་ཟེར་བ་མི་འཐད་དེ། གཞི་མེད་ཀྱི་སྐུར་འདེབས་དང་། བག་ཙམ་མི་གསལ་བ་དང་། དབྱེན་ལ་སོགས་པ་རྣམས་དགེ་སློང་མ་ལ་ཡང་ལོགས་སུ་བཅས་པའི་ཕྱིར། གཉིས་པ་རང་ལུགས་ནི། དགེ་སློང་ཕ་མ་གཉིས་ཀྱི་ཐུན་མོང་བའི་སྡོམ་གྱིས་བསྡུས་ཤིང་། དགེ་སློང་ཕ་མ་གཉིས་ལ་ལྟུང་བ་མིང་མཐུན་པ་དང་། ཆེ་ཆུང་མཐུན་པར་བཅས་པ་རྣམས་ནི་བཅས་པ་ཐུན་མོང་བ་ཡིན་ཞིང་། དེ་ལས་འདས་པའི་ལྟུང་བ་ནི་ལྟུང་བ་ཐུན་མོང་བ་ཡིན་ལ། དེ་ལས་གཞན་དུ་གྱུར་པའི་ལྟུང་བ་རྣམས་ཐུན་མོང་མ་ཡིན་པའོ། །གཉིས་པ་ལྟུང་བའི་དབྱེ་བ་ལ་གསུམ་སྟེ། མཚན་ཉིད་ཅི་འདྲ་བའི་ལྟུང་བ་དང་། རྗེས་སུ་མཐུན་པ་མིང་ཙམ་གྱི་ལྟུང་བ་དང་། ཐུན་མོང་མ་ཡིན་པའི་ལྟུང་བའོ། །དང་པོ་ནི། ལྟུང་བ་ཐུན་མོང་བ་ཡིན་ཞིང་ཡན་ལག་ཐུན་མོང་དུ་བཞག་པའོ། །གཉིས་པ་ནི། ལྟུང་བ་ཐུན་མོང་མ་ཡིན་ཞིང་ཐུན་མོང་མིན་པ་གཞིའི་ཡན་ལག་མི་མཐུན་པའོ། །དང་པོ་ལ་གསུམ་སྟེ། དབྱེ་བ། མཚན་གྱུར་ན་ཅིར་འགྱུར་བ། རྒྱུ་མཚན་ནོ། །དང་པོ་ལ་དགག་གཞག་གཉིས་ལས། དང་པོ་ནི། ཁ་ཅིག་ཕམ་པ་བཞི་དང་སྨྱན་ལ་སོགས་པ་ལྔ་བཅུ་རྩ་ལྔར་བཞེད། ཁ་ཅིག་དེའི་སྟེང་དུ་སྦེད་པའི་ལྟུང་བྱེད་དང་མ་གུས་པའི་ཕྱོགས་གཅིག་བསྣན་ནས་ལྔ་བཅུ་རྩ་བདུན་དུ་བཞེད་དེ། དེ་ཡང་། ཕམ་པ་བཞི་དང་སྨྱན་དང་གཞི་མེད་དང་། །བག་ཙམ་འཆང་བ་དང་ནི་འཇོག་པ་དང་། །སློང་ལ་སོགས་པ་ལྔ་དང་གསེར་དངུལ་དང་། །མངོན་མཚན་ཉོ་ཚོང་ལྷུང་བཟེད་ཚོང་སྤོགས་གསུམ། །བརྫུན་དང་འདོན་དང་མི་ཆོས་བདེན་སྨྲ་དང་། །ས་བོན་འདེབས་དང་རིམ་གཉིས་ཕྱོགས་གཅིག་དང་། །འདུག་གནས་ལ་སོགས་གསུམ་དང་དུས་མིན་ཟས། །བྱིན་ལེན་མ་བྱས་སྲོག་ཆགས་བཅས་སྤྱོད་དང་། །གཅེར་བུ་དམག་གསུམ་མེ་རེག་མ་རྫོགས་དང་། །ཁ་མ་བསྒྱུར་དང་ལོངས་པ་ཁྲུས་བྱེད་དང་། །དུད་འགྲོ་རྩེ་དང་སྦེད་དང་གཞི་མེད་དང་། །རྐུན་མ་བསྐོ་དང་མགྲོན་གཉེར་རིང་འདུག་དང་། །མ་གུས་ཕྱོགས་གཅིག་ཆང་དང་དུས་མིན་འགྲོ། །ཕྱི་དྲོ་གྲོང་རྒྱུ་རྒྱལ་པོའི་ཕོ་བྲང་འཇུག །ཁབ་རལ་གདིང་དང་གཡན་པ་བདེ་གཤེགས་གོས། །ཞེས་པའི་སྡོམ་མཛད་དོ། །མ་གུས་ཕྱོགས་གཅིག་འདྲེན་པ་མི་རིགས་ཏེ། དེ་ལྟར་ན་སྐྲོད་པའི་ཕྱོགས་གཅིག་དང་ཉི་ཤུ་མ་ལོན་པར་བསྙེན་པར་རྫོགས་པར་བྱེད་པའི་ལྟུང་བྱེད་ཀྱི་ཕྱོགས་གཅིག་ཀྱང་རྗེས་སུ་མཐུན་པའི་མིང་ཙམ་དུ་འདྲེན་རིགས་པར་འགྱུར་རོ། །དེའི་དམིགས་བསལ་ལ་ཁ་ཅིག་དགེ་སློང་གི་ཕོའི་དབང་པོས་རེག་པ་མྱོང་བ་དང་། དགེ་སློང་མས་ཟག་བྱེད་ཀྱིས་རེག་པ་མྱོང་བ་གཉིས་མཚན་ཉིད་ཅི་འདྲ་བ་མ་ཡིན་ཞིང་། དགེ་སློང་གིས་དགེ་སློང་ཉམས་པ་ལ་སྐུར་པ་བཏབ་པའི་ལྷག་མ་དེ་མཚན་ཉིད་ཅི་འདྲ་བ་མ་ཡིན་ཏེ། ལྷག་མ་དེ་རྒྱུད་ལྡན་གྱི་དགེ་སློང་དེ་དགེ་སློང་མར་མཚན་གྱུར་པ་ན་སྦོམ་པོར་འགྱུར་བའི་ཕྱིར་ཞེས་ཟེར་བ་མི་འཐད་དེ། དགེ་སློང་མས་དགེ་སློང་ཉམས་པ་ལ་ཕམ་པས་སྐུར་བ་བཏབ་པ་ལ་ལྷག་མར་མི་འགྱུར་བའི་ཤེས་བྱེད་མེད་པའི་ཕྱིར། གཉིས་པ་རང་ལུགས་ནི། མ་གུས་པའི་ཕྱོགས་གཅིག་མ་གཏོགས་པའི་ལྔ་བཅུ་རྩ་དྲུག་ཏུ་དབྱེ་ཞིང་། སྦོད་པའི་ལྟུང་བྱེད་འདྲེན་རིགས་ཏེ། རབ་ཏུ་བྱུང་བའི་སྡེ་ལྔའི་ཡོ་བྱད་གང་ཡང་རུང་བ་སྦས་པ་ལས་དགེ་སློང་དང་དགེ་སློང་མ་ལ་ལྟུང་བྱེད་དུ་བསྟན་པའི་ཕྱིར། དམིགས་བསལ་ནི། དགེ་སློང་གི་ལྷུང་བཟེད་ཕུལ་དགུ་ཤོང་བ་ལས་ལྷག་པ་བཙལ་བའི་སྤང་ལྟུང་དེ་མཚན་ཉིད་ཅི་འདྲ་བ་མ་ཡིན་ཏེ། དེ་རྒྱུད་ལྡན་གྱི་དགེ་སློང་དགེ་སློང་མར་མཚན་གྱུར་པ་ན་ཉེས་བྱས་སུ་འགྱུར་བའི་ཕྱིར། དགེ་སློང་མས་ལྷུང་བཟེད་ཕུལ་དགུ་ཤོང་བ་ལས་ཆུང་བ་བཙལ་བའི་སྤང་བ་དེ་ཡང་མཚན་ཉིད་ཅི་འདྲ་བ་མིན་ཏེ། དེ་རྒྱུད་ལྡན་གྱི་དགེ་སློང་མ་དགེ་སློང་དུ་མཚན་གྱུར་པ་ན་ཉེས་བྱས་སུ་འགྱུར་བའི་ཕྱིར། གཉིས་པ་མཚན་གྱུར་ན་ཅིར་འགྱུར་བ་ནི། མཚན་ཉིད་ཅི་འདྲ་བའི་ལྟུང་བའི་སྦྱོར་བ་བྱེད་བཞིན་པ་མཚན་གྱུར་ན་ལྟུང་བ་དེ་ཉིད་དུ་འགྱུར་ཞིང་། དེ་རྒྱུད་ལྡན་མཚན་གྱུར་ན་ཡང་སོ་ན་གནས་སོ། །གསུམ་པ་རྒྱུ་མཚན་ནི། དེ་ལྟར་འགྱུར་ཏེ་དགག་བྱ་དང་བཅས་པ་མཚུངས་ཤིང་། ཡན་ལག་ཐུན་མོང་དུ་ཚང་བར་མཚུངས་པའི་ཕྱིར། གསུམ་པ་ཐུན་མོང་མ་ཡིན་པའི་ལྟུང་བ་ལ། ཤ་སླ་་་་་་ཁ་ཅིག་ཐུན་མོང་མ་ཡིན་པའི་ལྟུང་བ་བསྐྱེད་པ་ལ། མཚན་དེ་ཉིད་ལ་སྦྱོར་བ་བྱས་ནས་མཚན་དེ་ཉིད་ལ་མཐར་ཐུག་གྲུབ་པ་དགོས་པས་ཐུན་མོང་མིན་པའི་ལྟུང་བའི་སྦྱོར་བ་བྱེད་བཞིན་པ་མཚན་གྱུར་པ་དང་། རྒྱུད་ལྡན་མཚན་གྱུར་ན་ལྟུང་བ་ཆུང་བའམ་མེད་པར་འགྱུར་ཞེས་གསུངས་པ་མི་འཐད་དེ། དགེ་སློང་མ་འབྱིན་པའི་སྦྱོར་བ་བྱེད་བཞིན་མཐར་ཐུག་གྲུབ་པ་དང་མགོ་མཉམ་དུ་དགེ་སློང་དུ་མཚན་གྱུར་ན་འབྱིན་པའི་ལྟུང་བྱེད་དུ་འགྱུར་ཏེ། འབྱིན་པའི་ལྟུང་བྱེད་རྒྱུད་ལྡན་གྱི་དགེ་སློང་མ་དགེ་སློང་དུ་མཚན་གྱུར་ན་ལྟུང་བྱེད་དེ་ཉིད་སོ་ན་གནས་པའི་ཕྱིར། ཁྱབ་རྟགས་གྲུབ་སྟེ། ན་སྨད་པའི་དོན་གྱི་སྦྱོར་བ་གང་ཡིན་པ་དེ་ཉིད་ལས་སོ་ཞེས་དང་། ན་སྨད་པ་ནི་རང་གི་ཉིད་དོ་ཞེས་དང་། ཊཱི་ཀར། འདི་ལྟ་སྟེ་དཔེར་ན་དགེ་སློང་མ་ཁུ་བ་འབྱིན་པའི་ལྟུང་བ་བྱེད་བཞིན་དུ་དེ་མཚན་གྱུར་ཏེ་དགེ་སློང་དུ་གྱུར་ན་ཁུ་བ་འབྱིན་པ་དེ་དགེ་སློང་ལ་ཡང་ལྟུང་བྱེད་ཁོ་ནར་འགྱུར་གྱི། དགེ་འདུན་ལྷག་མ་ཉིད་དུ་མི་འགྱུར་བ་ལྟ་བུའོ་ཞེས་གསུངས་པའི་ཕྱིར། ཡང་ཁ་ཅིག་མཚན་གྱུར་པ་ནི་དེའི་ཞིང་ཉིད་ཡིན་ནོ་ཞེས་པ་ནི་མཚན་ཉིད་ཅི་འདྲ་བའི་ལྟུང་བ་ཁོ་ནའི་དབང་དུ་བྱས་ནས་བྱེད་བཞིན་པ་མཚན་གྱུར་ན་ཅིར་འགྱུར་བ་དང་། རྒྱུད་ལྡན་མཚན་གྱུར་ན་ཅིར་འགྱུར་བ་དཔྱོད་པ་ཡིན་གསུང་བ་མི་འཐད་དེ། ན་སྨད་པའི་དོན་གྱིས་ཞེས་པའི་སྔ་འགྲེལ་དུ། དེ་ལྟར་སྤྱིར་བཏང་བ་བྱས་ནས་དེའི་དམིགས་ཀྱིས་བསལ་བ་བསྟན་པའི་ཕྱིར། ན་སྨད་པའི་དོན་གྱིས་སྦྱོར་བ་གང་ཡིན་པ་ཉིད་ལས་སོ། །ཞེས་བྱ་བ་སྨྲས་ཏེ་ཞེས་མཚམས་སྦྱར་བའི་ཕྱིར། གཞན་ཡང་གཞུང་དེ་མཚན་ཉིད་ཅི་འདྲ་བའི་ལྟུང་བ་ཁོ་ནའི་དབང་དུ་བྱས་པ་མ་ཡིན་པར་ཐལ། འདིའི་སྐབས་སུ་ཐུན་མོང་མ་ཡིན་པའི་ལྟུང་བ་གཉིས་དཔེར་བྱས་ནས་བཤད་པའི་ཕྱིར་ཏེ། དེ་ལས་གལ་ཏེ་ན་ལྟུང་བ་ན་སྨད་པའི་ཞིང་ཉིད་དུ་འགྱུར་བ་ཡང་ཡོད་དེ། འདི་ལྟ་སྟེ། དཔེར་ན་དགེ་སློང་ཁུ་བ་འབྱིན་པའི་སྦྱོར་བ་ལ་ཞུགས་པའི་ཚེ་སྦྱོར་བ་དེའི་མཐར་ཐུག་གྲུབ་པ་དང་མགོ་མཉམ་དུ་དེ་དགེ་སློང་མར་མཚན་གྱུར་ན་དེ་ལ་སྦྱོར་བ་དེའི་དངོས་གཞི་ལྟུང་བྱེད་དུ་འགྱུར་བ་ལྟ་བུ་དང་། དགེ་སློང་མས་ལུས་བརྐན་པའི་སྦྱོར་བ་ལ་ཞུགས་པའི་ཚེ་སྦྱོར་བ་དེའི་མཐར་ཐུག་དང་མགོ་མཉམ་དུ་དེ་དགེ་སློང་དུ་གྱུར་ན་སྦྱོར་བ་དེའི་དངོས་གཞི་ཉེས་པ་སྦོམ་པོར་འགྱུར་བ་ལྟ་བུའོ་ཞེས་གསུངས་པའི་ཕྱིར། གཉིས་པ་གཞུང་དོན་ལ་གསུམ་སྟེ། སྤྱིར་བསྟན་པའི་ཚུལ་གྱིས་མདོར་བསྟན་པ་དང་། དམིགས་ཀྱིས་བསལ་བའི་ཚུལ་གྱིས་རྒྱས་པར་བཤད་པ་དང་། དེ་དག་གི་རྒྱུ་མཚན་བསྟན་པའོ། །དང་པོ་ནི། ཚིགས་སྔ་མ་སྦྱོར་བ་བྱས་ཕྱི་མ་མཐར་ཐུག་གྲུབ་ན། ན་སྨད་དུ་འགྱུར་ན་མཚན་སྔ་མ་ལ་སྦྱོར་བ་བྱས། ཕྱི་མ་ལ་མཐར་ཐུག་གྲུབ་པ་ལ་ཅིར་འགྱུར་ཞེ་ན། མཚན་སྔ་མ་ལ་སྦྱོར་བ་བྱེད་བཞིན་པ་མཚན་འགྱུར་བ་ནི་མཚན་ཕྱི་མ་དེ་ལ་གང་གཞག་པའི་ལྟུང་བ་བསྐྱེད་པའི་ཞིང་ཡིན་ནོ། །དཔེར་ན་དགེ་སློང་མི་གསོད་པའི་སྦྱོར་བ་བྱེད་བཞིན་པ་དགེ་སློང་མར་མཚན་གྱུར་ན་ཕམ་པ་དང་། དགེ་སློང་ཁུ་བ་འབྱིན་པའི་སྦྱོར་བ་བྱེད་བཞིན་པ་དགེ་སློང་མར་མཚན་གྱུར་ན་ལྟུང་བྱེད་དུ་འགྱུར་བ་དང་། དགེ་སློང་མ་ལུས་བཀན་གྱི་སྦྱོར་བ་བྱེད་བཞིན་པ་དགེ་སློང་དུ་མཚན་གྱུར་ན་སྦོམ་པོར་འགྱུར་བ་བཞིན་ནོ། །གཉིས་པ་ནི། དེར་ངེས་སམ་ཞེ་ན། མཚན་སྔ་མ་ལ་ན་སྨད་པ་སྟེ་ལྟུང་བ་ཆུང་བའི་དོན་གྱི་སྦྱོར་བ་བྱེད་བཞིན་པ་མཚན་ཕྱི་མ་ལྟུང་བ་ཆེ་བའི་བཅས་པ་ཅན་དུ་མཚན་འགྱུར་ན་མཚན་སྔ་མའི་ལྟུང་བ་ཆུང་བ་དེ་ཉིད་དུ་འགྱུར་གྱི། མཚན་ཕྱི་མ་ལ་གཞག་པའི་ལྟུང་བ་ཆེ་བར་མི་འགྱུར་ཏེ། དཔེར་ན་དགེ་སློང་མ་འབྱིན་པའི་སྦྱོར་བ་བྱེད་བཞིན་པ་དགེ་སློང་དུ་མཚན་གྱུར་ན་ལྟུང་བྱེད་དུ་འགྱུར་བ་བཞིན་ནོ། །འོ་ན་རྒྱུད་ལྡན་མཚན་གྱུར་པ་ལས་ཅིར་འགྱུར་ཞེ་ན། ལྟུང་བ་བྱས་པ་རྒྱུད་ལྡན་མཚན་གྱུར་པ་ནི་མཚན་ཕྱི་མ་དེ་ལ་ལྟུང་བ་གང་གཞག་དེ་ཉིད་དུ་འགྱུར་བ་ཡིན་ཏེ། དཔེར་ན་དགེ་སློང་མ་རེག་པའི་ཕམ་པ་རྒྱུད་ལྡན་དགེ་སློང་དུ་མཚན་གྱུར་ན་སྦོམ་པོར་འགྱུར་བ་དང་། དགེ་སློང་མ་འཆབ་པའི་ཕམ་པ་རྒྱུད་ལྡན་དགེ་སློང་དུ་མཚན་གྱུར་ན་ཉེས་བྱས་སུ་འགྱུར་བ་བཞིན་ནོ། །བྱས་པ་ནི་དེ་ཉིད་ཡིན་ནོ་ཞེས་པ་དེ་ལྟར་ངེས་སམ་ཞེ་ན། ལྟུང་བ་ན་སྨད་པ་སྟེ་ཆུང་བ་རྒྱུད་ལྡན་གྱི་ལྟུང་བ་ཆེ་བའི་བཅས་རིགས་ཅན་དུ་མཚན་གྱུར་ན་རང་གི་ཉིད་དེ་ལྟུང་བ་ཆུང་བ་དེ་ཉིད་སོ་ན་གནས་སོ། །དཔེར་ན་དགེ་སློང་མ་འབྱིན་པའི་ལྟུང་བྱེད་རྒྱུད་ལྡན་དགེ་སློང་དུ་མཚན་གྱུར་ན་ལྟུང་བྱེད་དེ་ཉིད་སོ་ན་གནས་པ་བཞིན་ནོ། །མཚན་གྱུར་པ་ནི་དེའི་ཞིང་ཉིད་ཡིན་ནོ་ཞེས་བཤད་ན་དགེ་སློང་ལྷུང་བཟེད་ལྷག་པོ་བཅངས་ནས་ཞག་བཅུ་འདས་པར་མ་ལོན་པ་དགེ་སློང་མ་མཚན་གྱུར་ན་ལྷུང་བཟེད་འཆང་བའི་སྤང་བར་འགྱུར་རམ་སྙམ་ན། དགེ་སློང་ལྷུང་བཟེད་ལྷག་པོ་བཅངས་ནས་ཞག་བཅུ་འདས་པར་མ་ལོན་པ་དགེ་སློང་མར་མཚན་གྱུར་པ་ནི་དགེ་སློང་མ་དེས་ཉི་མ་དེ་ལ་ལྷུང་བཟེད་རྙེད་པའི་ཆ་ཉིད་ཡིན་པས་སྤང་བར་མི་འགྱུར་རོ། །གོས་ཀྱི་སེལ་བ་ནི། འདིས་དོགས་པ་བཅད་མི་དགོས་ཏེ་ཆོ་ག་འདྲ་བའི་ཕྱིར། འོ་ན་རྒྱུད་ལྡན་ལྟུང་བ་དེའི་བཅས་རིགས་མེད་པར་མཚན་གྱུར་པ་ལ་ཇི་ལྟར་ཡིན་ཞེ་ན། འཁོར་དང་འཁོར་མང་ཉེ་བར་འཇོག་པའི་ལྟུང་བྱེད་རྒྱུད་ལྡན་གྱི་དགེ་སློང་མ་ལྟུང་བ་དེའི་ཞིང་ཉིད་མ་ཡིན་པ་དགེ་སློང་ཉིད་དུ་མཚན་གྱུར་པ་ལ་ནི་ལྟུང་བ་དེ་ཉམས་ཤིང་ཞིག་གོ །གོས་བྱེད་པ་དང་མ་བསྐོས་པར་ཆོས་སྟོན་པའི་ལྟུང་བྱེད་རྒྱུད་ལྡན་གྱི་དགེ་སློང་དགེ་སློང་མར་མཚན་གྱུར་པ་ལ་ཡང་དེ་ལྟར་སྦྱར་རོ། །བཅས་རིགས་ཅན་དུ་མཚན་གྱུར་ན་མི་ཉམས་པར་ངེས་སམ་ཞེ་ན། མཚན་གྱུར་པ་དེ་ལ་ལྷག་མ་སོགས་ཉེས་པ་བཅབ་པ་ཉམས་པ་མ་ཡིན་པ་མ་ཡིན་སྟེ། ཉམས་པ་ཡིན་ཏེ་དགེ་སློང་གིས་དགེ་སློང་མ་ལ་བཅབ་པ་ལ་ཡང་ལྟུང་བ་མེད་ཅིང་། དགེ་སློང་མས་དགེ་སློང་ལ་བཅབ་པ་ལ་ཡང་ལྟུང་བ་མེད་པའི་ཕྱིར། འོ་ན་ཕམ་པ་བཅབ་པའི་ཉེས་པ་ཡང་ཉམས་སམ་ཞེ་ན། རྒྱ་་་་་་ཁ་ཅིག་ཉམས་ཞེས་བཞེད་པ་ལ་གཞན་དག་ན་རེ། སྲོག་གཅོད་པ་ཕམ་པ་འཆབ་བཅས་བྱུང་བའི་དགེ་སློང་མ་དགེ་སློང་དུ་མཚན་གྱུར་པ་དེ་བསླབ་པ་ཕུལ་ནས་སྡོམ་པ་བླངས་ན་སྐྱེ་བར་ཐལ། དེ་ལ་ཕམ་པ་འཆབ་བཅས་ཀྱིས་ཉམས་པའི་ཕྱིར་ཞེས་བྱ་བ་མི་འཐད་དེ། ཕམ་པ་འཆབ་བཅས་བྱུང་བའི་དགེ་སློང་བསླབ་པ་ཕུལ་ནས་ཁྱིམ་པར་བབས་པའི་ཁྱིམ་པ་དེས་སྡོམ་པ་བླངས་ན་སྐྱེ་བར་ཐལ། དེ་ལ་ཕམ་པ་འཆབ་བཅས་མེད་པའི་ཕྱིར། ཁྱབ་པ་ཁས་སོ། །འཆབ་སེམས་བསྐྱེད་ཚུལ་ལ། བམ་ལྔར་མཚམས་ནང་དེ་ན་མཐོལ་ཡུལ་གྱི་དགེ་སློང་ཡོད་ན་འཆབ་སེམས་སྐྱེས་པ་ཙམ་གྱིས་འཆབ་བཅས་སུ་འགྱུར་ལ། མེད་ན་འཆབ་སེམས་སྐྱེས་ཀྱང་མི་འགྱུར་བར་གསུངས་སོ། །འོ་ན་ལྷག་མ་བཅབ་པའི་ཉེས་པ་རྒྱུད་ལྡན་མཚན་གྱུར་པ་ན་འཆབ་ཉེས་དེ་ཉམས་པས་དེ་འདག་པའི་ཕྱིར་དུ་སྔར་མནོས་པའི་སྤོ་བ་ཞིག་ཀྱང་ལྷག་མ་ཐུན་མོང་བ་རྒྱུད་ལྡན་མཚན་གྱུར་པ་ན་ལྷག་མ་དེ་མི་ཉམས་པར་ཡོད་པས་དེ་འདག་པའི་ཕྱིར་དུ་སྤྱོད་པའི་མགུ་བ་མི་ཉམས་སམ་ཞེ་ན། མགུ་བ་སྤྱོད་བཞིན་པ་མཚན་གྱུར་ན་ལྷག་མ་མ་ཉམས་ཀྱང་སྔར་མགུ་བ་རིལ་གྱིས་སམ་ཆ་ཤས་ཀྱི་སྤྱད་པ་དོན་མེད་པ་ཉིད་ཡིན་ཏེ། དེ་མ་སྤྱད་པ་དང་འདྲ་བས་ཡང་མགུ་བ་མནོས་ནས་སྤྱོད་དགོས་པའི་ཕྱིར། གསུམ་པ་ནི། མཚན་གྱུར་པ་ན་ལྟུང་བ་ཡོད་པ་མེད་པར་འགྱུར་བ་དང་། མེད་པ་དེ་ཡོད་པར་མི་འགྱུར་བ་དང་། ཆེ་བ་ཆུང་བར་འགྱུར་བ་དང་། ཆུང་བ་ཆེ་བར་མི་འགྱུར་བ་དང་། མགུ་བ་སྤྱོད་པ་དོན་མེད་པ་སོགས་སུ་འགྱུར་བའི་རྒྱུ་མཚན་ཇི་ལྟར་ཡིན་ཞེ་ན། མཚན་གྱུར་པ་འདི་ལ་ཆོ་ག་སྟེ། བཅས་པ་རྣམས་གྱུར་ཅིང་འཕོས་པ་ཡིན་པའི་ཕྱིར། སྐབས་འདིར་ཁ་ཅིག་ན་སྨད་པའི་དོན་གྱི་ཞེས་པའི་གཞུང་ཚན་འདི་སྦྱོར་བ་ཆུང་ཆེའི་མུ་ཁོ་ན་འཆད་པ་ཡིན་ཞེས་པ་དང་། བྱས་པ་ནི་དེ་ཉིད་ཡིན་ཞེས་པ་འདི་ཐུན་མོང་མ་ཡིན་པ་དང་རྗེས་སུ་མཐུན་པའི་མིང་ཁོ་ནའི་དབང་དུ་བྱས་ནས་སྟོན་ལ། དེ་ཡང་ཆེ་ཆུང་གི་མུ་ཁོ་ན་སྟོན་ནོ་ཞེས་ཟེར་བ་མི་འཐད་དེ། བྱས་པ་ནི་ཞེས་པའི་གཞུང་འདིས་ཆེ་ཆུང་གི་མུ་ཁོ་ན་སྟོན་པ་ལ་མ་ཡིན་པར་ཐལ། ན་སྨད་པ་ནི་རང་གི་ཉིད་དོ་ཞེས་པ་ནི། བྱས་པ་ནི་ཞེས་པའི་དམིགས་བསལ་དུ་སྦྱར་བའི་ཕྱིར། ན་སྨད་པ་ནི་རང་གི་ཉིད་དུ་ཞེས་པའི་སྔ་འགྲེལ་དུ་རྣམ་པ་དེའི་དམིགས་ཀྱིས་བསལ་བ་བསྟན་པའི་ཕྱིར་ཞེས་མཚམས་སྦྱར་བའི་ཕྱིར། བྱས་པ་ནི་དེ་ཉིད་ཅེས་པས་ཐུན་མོང་མ་ཡིན་པའི་ལྟུང་བ་དང་རྗེས་སུ་མཐུན་པ་མི་ཙམ་ཁོ་ནའི་དབང་དུ་བྱས་པ་མ་ཡིན་པར་ཐལ། ན་སྨད་པ་ནི་རང་གི་ཞེས་པའི་འགྲེལ་པའི་མཇུག་སྡུད་ཀྱི་སྐབས་སུ། ཁ་ཅིག་ནི་མཉམ་པར་འགྱུར་བའང་ཡོད་དེ། དཔེར་ན་སྲོག་གཅོད་པ་ལ་སོགས་པ་ལྟ་བུའོ་ཞེས་གསུངས་པའི་ཕྱིར། དྲོ་་་་་་ཁ་ཅིག་བྱས་པ་ནི་ཞེས་པའི་གཞུང་འདི་ཐུན་མོང་མ་ཡིན་པའི་དབང་དུ་བྱས་ནས་བྱེད་བཞིན་པ་ལ་ཅིར་འགྱུར་དཔྱོད་པ་ཡིན་ཞེས་གསུང་བ་མི་འཐད་དེ། དེ་མཚན་གྱུར་པ་ནི་ཞེས་པའི་སྐབས་སུ་དཔྱད་ཟིན་པའི་ཕྱིར། དེས་ན་འགྲེལ་པར་སྦྱོར་བ་དང་དངོས་གཞིའི་ཞིང་དུ་སྤྱིར་སྦྱར་ཞེས་པའི་སྦྱོར་བའི་ཞིང་ནི། ལྟུང་བ་ཆུང་བའི་ཞིང་ལ་བྱེད་ཀྱི། སྦྱོར་ལྟུང་མཚན་ཉིད་པའི་ཞིང་མ་ཡིན་ཏེ། འགྲེལ་པར་གལ་ཏེ་ན་ལྟུང་བ་ན་སྨད་པའི་ཞིང་ཉིད་དུ་འགྱུར་བའང་ཡོད་དེ་ཞེས་གསུངས་པའི་ཕྱིར། དངོས་གཞིའི་ཞིང་ཡང་ལྟུང་བ་རྫོགས་ཟིན་གྱི་ཞིང་ལ་བྱའོ། །དེའི་འོག་ཏུ་སྦྱོར་བའི་ཞིང་ཉིད་ཡིན་པ་སྟོན་ཞེས་གསུངས་པ་ནི་སྦྱོར་བ་མཚན་ཉིད་པའི་མ་ཡིན་གྱི། སྦྱོར་བ་དེས་མཚན་སྔ་མ་ལྟུང་བ་གང་བསྐྱེད་པའི་ཞིང་དུ་འགྱུར་བ་ལ་བྱེད་དགོས་ཏེ། སྦྱོར་ལྟུང་མཚན་ཉིད་པ་ཡིན་པ་ལ་སྒྲུབ་བྱེད་མེད་ཅིང་གནོད་བྱེད་ཡོད་པའི་ཕྱིར་དང་། དེའི་འོག་ཏུ་དངོས་གཞིའི་ཞིང་ཡིན་པ་སྟོན་ཞེས་གསུངས་པ་ནི་ལྟུང་བ་གྲུབ་ཟིན་གྱི་ཞིང་ལ་བྱ་དགོས་ཏེ། སྒྲ་ཇི་བཞིན་པར་ཁས་ལེན་ན་འགྲེལ་པར་སྦྱོར་ལྟུང་དཔེར་བཤད་པར་མི་འཐད་པར་འགྱུར་རོ། །གཉིས་པ་ཡུལ་གྱི་ཡན་ལག་ནི། ལྟུང་བ་ཆུང་བའི་སྦྱོར་བ་བྱེད་བཞིན་པ་མཚན་གྱུར་ན། ཆུང་བ་དེ་ཉིད་བསྐྱེད་པར་ངེས་སམ་ཞེ་ན། མེད་མི་རུང་གི་སྦྱོར་བ་བྱེད་བཞིན་པ་དེའི་ཚེའམ། དེའི་གནས་སྐབས་ཀྱི་ཕོ་མོའི་ལུས་དེ་ལྟུང་བ་བསྐྱེད་པའི་བྱེད་པ་པོ་ཡིན་ཏེ། དཔེར་ན་དགེ་སློང་གིས་སྐྱེས་པ་ལ་རེག་པའི་སྦྱོར་བ་བྱེད་བཞིན་པ་དགེ་སློང་མར་མཚན་གྱུར་ན་སྐྱེས་པའི་ལུས་ལ་རེག་པའི་སྦྱོར་བ་བྱེད་པ་ཡོད་ན་དེའི་ཚེ་སྐྱེས་པའི་ལུས་དེ་དགེ་སློང་མ་དེ་ལ་རེག་པའི་ཕམ་པ་བསྐྱེད་པའི་བྱེད་པ་པོ་ཡིན་གྱིས་སྦོམ་པོ་ཙམ་གྱི་བྱེད་པ་པོ་མ་ཡིན་པ་དང་། དགེ་སློང་གིས་སྐྱེས་པ་ལ་རེག་པའི་ཚེ་སྐྱེས་པ་བུད་མེད་དུ་མཚན་གྱུར་ནས་དགེ་སློང་དེས་བུད་མེད་ལ་རེག་པའི་སྦྱོར་བ་ཡོད་ན་དེའི་ཚེ་བུད་མེད་ཀྱི་ལུས་དེ་དགེ་སློང་དེ་ལ་རེག་པའི་ལྷག་མ་བསྐྱེད་པའི་བྱེད་པ་པོ་ཡིན་གྱི་སྦོམ་པོ་ཙམ་གྱི་བྱེད་པ་པོ་མ་ཡིན་པ་དང་། དགེ་སློང་མས་བུད་མེད་ཀྱི་ལུས་ལ་རེག་པའི་སྦྱོར་བ་བྱེད་བཞིན་པའི་ཚེ་དགེ་སློང་མ་དེ་དགེ་སློང་དུ་མཚན་གྱུར་ནས་དེས་བུད་མེད་ཀྱི་ལུས་ལ་རེག་པའི་སྦྱོར་བ་ཡོད་ན་དེའི་གནས་སྐབས་ཀྱི་བུད་མེད་ཀྱི་ལུས་དེ་དགེ་སློང་དེ་ལ་རེག་པའི་ལྷག་མ་བསྐྱེད་པའི་བྱེད་པ་པོ་ཡིན་གྱི་སྦོམ་པོ་ཙམ་གྱིས་བྱེད་པ་པོ་མ་ཡིན་པ་དང་། དགེ་སློང་མས་བུད་མེད་ལ་རེག་པའི་སྦྱོར་བ་བྱེད་བཞིན་པའི་ཚེ་བུད་མེད་སྐྱེས་པར་མཚན་གྱུར་ནས་དགེ་སློང་མ་དེས་སྐྱེས་པའི་ལུས་ལ་རེག་པའི་སྦྱོར་བ་བྱེད་པ་ཡོད་ན་དེའི་གནས་སྐབས་ཀྱི་སྐྱེས་པའི་ལུས་དེ་དགེ་སློང་མ་དེ་ལ་རེག་པའི་ཕམ་པ་བསྐྱེད་པའི་བྱེད་པ་པོ་ཡིན་གྱི་སྦོམ་པོ་ཙམ་གྱི་བྱེད་པ་པོ་མ་ཡིན་པ་ལྟ་བུའོ། །མིས་བསྐྱེད་པའི་ལྟུང་བ་རྣམས་བསྐྱེད་ནུས་ཀྱི་ཡན་ལག་ཏུ་གྱུར་པའི་མི་དེ་ལ་མིའི་ཕ་མ་ལས་སྐྱེས་པ་དགོས་སམ་སྙམ་ན། མིའི་འགྲོ་བ་ལས་གཞན་ཕ་མ་དུད་འགྲོ་སོགས་ལས་སྐྱེས་པའི་མི་ནི་མི་རང་གི་འགྲོ་བ་ཉིད་མ་ཡིན་པ་མ་ཡིན་པར་ཡིན་པས་མིས་བསྐྱེད་པའི་ལྟུང་བ་རྣམས་རྫོགས་པར་བསྐྱེད་དོ། །དེ་བཞིན་དུ་དུད་འགྲོ་དང་མི་མིན་ལ་ཡང་སྦྱོར་རོ། །རེག་པའི་ཕམ་པ་རྒྱུད་ལྡན་གྱི་དགེ་སློང་མ་དགེ་སློང་དུ་མཚན་གྱུར་ན་རིག་པའི་ཕམ་པ་སྦོམ་པོར་འགྱུར་བ་སོགས་ཀྱི་དོན་ནི་ངོ་བོ་འགྱུར་བ་མ་ཡིན་གྱི། རྟེན་དགེ་སློང་དང་ཕྲད་པའི་དབང་གིས་ཕམ་པའི་ཕྱིར་བཅོས་མི་འཇུག་པར་སྦོམ་པོའི་མིང་རིགས་ཀྱི་ཕྱིར་བཅོས་འཇུག་པ་ལྟ་བུ་ཡིན་པ་འགྲེལ་པ་ལས་བཤད་དོ། །དེའི་ཚེ་ལུས་བྱེད་པ་པོ་ཉིད་ཡིན་ཞེས་པའི་འགྲེལ་པར། དགེ་སློང་གིས་ཡུལ་དགྲ་བཅོམ་མ་ཡིན་པའི་དུས་སུ་གསོད་པའི་སྦྱོར་བ་བྱས་པའི་འོག་ཏུ་དགྲ་བཅོམ་ཐོབ། འདུན་པ་ལོག་པའི་འོག་ཏུ་སྔར་གྱི་སྦྱོར་བའི་རྐྱེན་གྱིས་ཤི་ན་དགྲ་བཅོམ་གྱི་ལུས་དེ་དགེ་སློང་དེ་ལ་སྲོག་གཅོད་པའི་ལྟུང་བ་ཉི་ཚེའི་བྱེད་པ་པོར་གསུངས་པ་ནི། ཤ་མིས་སྦྱོར་ལྟུང་ལ་དགོངས་པ་གསུང་ཡང་མཐར་ཐུག་སྲོག་གཅོད་ཀྱི་ཕམ་པ་མི་འབྱུང་ཡང་སྦོམ་པོར་འགྱུར་བ་ལ་དགོངས་སོ། །འོ་ན་དགེ་སློང་འགྲོ་བ་གཞན་གྱི་རྣམ་པ་བསྟེན་པ་དགེ་སློང་གི་འདུ་ཤེས་ཡོད་པ་དེ་ལྟུང་བ་བསྐྱེད་པའི་རྟེན་ལ་གཟུགས་མ་བསྒྱུར་བའི་དགེ་སློང་དང་འདྲ་ན་ཡུལ་གཟུགས་བསྒྱུར་བ་དེས་ཀྱང་མ་བསྒྱུར་བ་དང་འདྲ་བར་ལྟུང་བ་རྫོགས་པར་བསྐྱེད་དམ་ཞེ་ན། མི་འགའ་ཞིག་གི་སྔགས་རྫས་ཀྱིས་མིའི་འགྲོ་བ་ལས་གཞན་གྱི་རྣམ་པ་བསྟེན་པ་ཡང་མིའི་འགྲོ་བ་མ་ཡིན་པ་མ་ཡིན་པས་མི་དེར་འདུ་ཤེས་བསམ་གཞན་དུ་འདུ་ཤེས་པས་བསད་ཀྱང་མཐར་ཐུག་ལ་ཕམ་པ། སྦྱོར་བ་ལ་མིང་ཤེས་ཡོད་ན་སྦོམ་པོ། གཞན་དུ་འདུ་ཤེས་ན་ཉེས་བྱས་སུ་འགྱུར་རོ། །དུད་འགྲོ་ལ་མཐར་ཐུག་ལྟུང་བྱེད་དང་། མི་མིན་ལ་མཐར་ཐུག་སྦོམ་པོར་འགྱུར་ལ། སྦྱོར་བ་ལ་མིའི་འདུ་ཤེས་ཡོད་ན་སྦོམ་པོ། མེད་ན་ཉེས་བྱས་སུ་འགྱུར་རོ་ཞེས་སྦྱར་རོ། །འགྲོ་བ་གཞན་གྱི་རྣམ་པ་བསྟེན་ལ་བསད་པ་ལ་ཡང་ངོ་ཞེས་པའི་གཞུང་འདིས། མདོ་གང་གི་དོན་འཆད་པའི་མདོ་དེའི་དོན་གཞན་ཡང་གསལ་བར་བསྟན་པའི་ཕྱིར་བཤད་པ་ནི། སོ་སོ་སྐྱེ་བོའི་གནས་སྐབས་དེས་འཕགས་པའི་གནས་སྐབས་གཞན་ཐོབ་པ་ནི་རྒྱུད་གཞན་ཉིད་མ་ཡིན་པས་ཡུལ་སོ་སོའི་སྐྱེ་བོའི་དུས་སུ་གསོད་པའི་སྦྱོར་བ་བྱས། འཕགས་པའི་དུས་སུ་མཐར་ཐུག་གྲུབ་ནའང་ལྟུང་བ་རྫོགས་པར་འགྱུར་རོ། །གསུམ་པ་ལྟུང་བ་ཐ་དད་དུ་བསྐྱེད་ཚུལ་ཞར་བྱུང་དང་བཅས་པ་ལ་ལྔ་སྟེ། བསླབ་རྒྱུན་ཐ་དད་པས་ལྟུང་བ་ཐ་དད། བསམ་རྒྱུད་ཐ་དད་པས་ལྟུང་བ་ཐ་དད། བཅས་པ་ཐ་དད་པས་ལྟུང་བ་ཐ་དད། ཉེར་ལེན་ཐ་དད་པས་ལྟུང་བ་ཐ་དད། གཞི་དང་བྱ་བ་ཐ་དད་པས་ལྟུང་བ་ཐ་དད་དུ་འགྱུར་ཚུལ་ལོ། །དང་པོ་ནི། ལྟུང་བའི་སྦྱོར་བ་བྱས་ནས་ཁྱིམ་པར་བབས་ཡང་བསྙེན་རྫོགས་བྱས་ནས་སྔར་གྱི་བྱ་བའི་འཕྲོ་ཟིན་པར་བྱས་ནས་གཞི་གཅིག་ལ་བྱས་པ་ཡིན་པས་ཕྱིར་བཅོས་གཅིག་གིས་འདག་གམ་ཞེ་ན། སྔར་ལྟུང་བའི་སྦྱོར་བ་བྱས་ནས་ཉེས་པ་དེ་མེད་པ་ཉིད་ཀྱིས་ཁྱིམ་པར་བབས། ཡང་ཉེས་པ་དེ་འོང་པ་དགེ་སློང་དུ་གྱུར་ནས་སྔར་གྱི་བྱ་བའི་འཕྲོ་ཟིན་པར་བྱས་ན་ཕྱིར་བཅོས་ཐ་དད་དུ་འཇུག་དགོས་པའི་ལྟུང་བ་ཐ་དད་དུ་འགྱུར་རོ། །དཔེར་ན་དགེ་སློང་གིས་མ་གནང་བའི་སྟན་བྱེད་པར་བརྩམས་ནས་ཁྱིམ་པར་བབས། སླར་བསྙེན་པར་རྫོགས་ནས་སྟན་གཅིག་བྱས་པའི་རྗེས་སུ་སྔར་གྱིས་སྟན་གྱིས་འཕྲོ་ཟིན་པར་བྱས་ན་ལྟུང་བ་སྔ་ཕྱི་ཐ་དད་དུ་འགྱུར་བ་བཞིན་ནོ། །གཉིས་པ་ནི། བསླབ་རྒྱུན་གཅིག་གིས་གཞི་གཅིག་ལ་བསྟེན་པའི་ལྟུང་བ་ཕྱིར་བཅོས་གཅིག་གིས་འདག་གམ་ཞེ་ན། ལྟུང་བ་བྱེད་པར་བརྩམས་ཏེ་འདུན་པ་ལོག་པའི་དབང་གིས་བྱ་བ་དེ་བཏང་ནས་སྔར་གྱི་སྦྱོར་བའི་འཕྲོ་ཟིན་པར་བྱས་ན་ཕྱིར་བཅོས་ཐ་དད་འཇུག་པའི་ལྟུང་བ་ཐ་དད་དུ་འགྱུར་རོ། །གསུམ་པ་ནི། བསླབ་རྒྱུན་དང་བསམ་རྒྱུན་གཅིག་པའི་གཞི་གཅིག་གི་ལྟུང་བ་རྣམས་ཕྱིར་བཅོས་གཅིག་གིས་འདག་གམ་ཞེ་ན། བྱ་བའི་གཞི་གཅིག་ལ་བསླབ་པ་དུ་མ་ཉིད་བཅས་པ་ལ་ནི་དེ་ལས་འདས་ན་བཅས་པ་ཇི་སྙེད་ཡོད་པ་དེ་སྙེད་ཀྱི་ཉེས་པར་འགྱུར་རོ། །དཔེར་ན་བསྙེན་པར་མ་རྫོགས་པ་དང་ནུབ་གཉིས་ལྷན་ཅིག་ཉལ་ནས་ནུབ་གསུམ་པ་ལ་བུད་མེད་དང་ལྷན་ཅིག་ཉལ་ན་བུད་མེད་དང་ལྷན་ཅིག་ཉལ་བའི་ལྟུང་བྱེད་དང་མ་རྫོགས་པ་དང་ལྷན་ཅིག་པར་ཉལ་བའི་ལྟུང་བྱེད་གཉིས་འབྱུང་བ་དང་། དགེ་སློང་ཞར་བ་མ་ཡིན་པ་ལ་སྐྱོན་དང་བརྫུན་སྨྲ་འདོད་ཀྱི་བསམ་པས་ཞར་བ་ཞེས་བརྗོད་ན་སྐྱོན་སྨྲ་བའི་ལྟུང་བྱེད་དང་བརྫུན་སྨྲ་བའི་བྱང་བྱེད་གཉིས་འབྱུང་བ་བཞིན་ནོ། །བཞི་པ་ནི་ཆའི་ལྟུང་བ་དང་ཆ་ཅན་གྱི་ལྟུང་བ་རྣམས་ཕྱིར་བཅོས་གཅིག་གིས་འདག་གམ་ཞེ་ན། ཁ་ན་མ་ཐོ་བ་ལྕི་བ་མི་ཚངས་པར་སྤྱོད་པ་ལྟ་བུ་དེའི་ཆའམ། ཤན་ནམ་ལྷག་མ་སྟེ་དེའང་གཉིས་ཏེ། ཆ་ཤས་ཀྱི་ཆར་གྱུར་པ་སྦྱོར་བའི་ལྟུང་བ་ལྟ་བུ་དང་། ཆར་གཏོགས་པས་ཆར་གྱུར་པ་འབྱིན་པ་དང་རེག་པ་ལྟ་བུ་སྟེ། ཊཱི་ཀར་ཆའི་ངོ་བོ་ཉིད་ཅེས་བྱ་བ་ནི་མི་ཚངས་པར་སྤྱོད་པ་སྤྱད་པའི་ཕྱིར་འགྲོ་བ་གང་ཡིན་པ་དེ་ནི་ཉེས་བྱས་སོ། །བདག་ཉིད་ཀྱིས་བསྙེན་བཀུར་བསྔགས་པ་གང་ཡིན་པ་དེ་ནི་དགེ་འདུན་ལྷག་མའོ། །གནས་ངན་ལེན་སྨྲ་བ་གང་ཡིན་པ་དེ་ནི་གཞན་ཡིན་ནོ། །བདག་ཉིད་ཀྱི་དོན་དུ་བུད་མེད་ལ་གཞོལ་བ་གང་ཡིན་པ་དེ་ནི་ཕམ་པར་འགྱུར་བར་གཏོགས་པའི་སྦོམ་པོའོ། །ཆ་དང་ཆ་ཅན་སྦྱར་བ་ནི། མི་ཚངས་པར་སྤྱོད་པ་ནི་ཆ་ཅན་ཡིན་ལ། འབྱིན་པ་དང་རེག་པ་དང་འཁྲིག་པ་སྨྲ་བ་ལ་སོགས་པ་ཆ་ཡིན་ནོ། །དེ་བཞིན་དུ་མ་བྱིན་ལེན་ནི་ཆ་ཅན་ཡིན་ལ། བྱིན་པ་འཕྲོག་པ་དང་བསྡོས་སྐྱུར་དང་སྐྲོད་པ་དང་སྦེད་པ་ལ་སོགས་པ་ནི་ཆ་ཡིན་ནོ། །སྲོག་གཅོད་པ་ནི་ཆ་ཅན་ཡིན་ལ། རྩོད་པ་དང་བཅས་པའི་གཞི་མི་གཏོང་བ་དང་ས་བོན་དང་སྐྱེ་བའི་ཚོགས་འཇིག་པ་དག་ནི་ཆ་ཡིན་ནོ། །མི་ཆོས་བླ་མ་སྨྲ་བ་ཆ་ཅན་ཡིན་ལ། ཕམ་པ་དང་ལྷག་མའི་སྐུར་འདོད་བྱེད་པ་སོགས་ཆ་ཡིན་ནོ། །ཆ་དང་ཆ་ཅན་སྦྱར་བ་ནི་རྒྱས་པར་ཊཱི་ཀ་ལས་ཤེས་པར་བྱའོ། །དེར་ན་ཆར་གཏོགས་པས་ཆ་གྱུར་པ་འབྱིན་པ་ལྟ་བུ་དེ་ནི་ཁ་ན་མ་ཐོ་བ་ལྕི་བ་དེ་དང་དགག་བྱ་རིགས་མཐུན་པའི་ལྟུང་བ། མི་ཚངས་སྤྱོད་ལྟ་བུ་ལ་ལྟོས་པའི་ཡང་བ་འབྱིན་པའི་ལྷག་མ་ལྟ་བུ་དེར་གཏོགས་པ་སྟེ། མི་ཚངས་པར་སྤྱོད་པ་ལ་སོགས་པའི་ཆར་གཏོགས་པའི་ཁ་ན་མ་ཐོ་བ་རང་གི་ལྕི་བ་འབྱིན་ལྷག་ལྟ་བུ་དང་འབྲེལ་བ་ཡིན་གྱི། རིགས་མི་མཐུན་པར་མི་ཚངས་པར་སྤྱོད་པའི་སྦྱོར་བ་ལྟ་བུར་ཡང་མི་གཏོགས་ལ། དགག་བྱ་ཙམ་རིགས་མཐུན་པའི་ཕམ་པར་ཡང་མི་གཏོགས་ཏེ་ཆ་ཅན་དང་ཆར་གཏོགས་རྣམས་ཀུན་སློང་གི་རྣམ་པ་ཐ་དད་ལས་སྐྱེས་པའི་ཕྱིར། ཁུ་བ་འབྱིན་པ་ལ་འབྱིན་པའི་ལྷག་མར་གོང་དུ་བསྟན་ཟིན་པའི་ཕྱིར་འདིར་བསྟན་པའི་དགོས་པ་ཅི་ཡིན་ཞེ་ན། དེ་ལྟར་ཡིན་མོད་ཀྱི་ཧ་ཅང་ཐལ་བ་སེལ་བའི་དགོས་པ་ཡོད་པའི་ཕྱིར། རང་ཊཱིཀ་ཏུ་མདོ་འདིས་མ་བརྗོད་པ་ནི་ཅུང་ཟད་ཀྱང་མི་བརྗོད་ཀྱི་ཧ་ཅང་ཐལ་བར་འགྱུར་བ་སེལ་བར་བྱེད་དོ་ཞེས་གསུངས་སོ། །ཇི་ལྟར་སེལ་ན་ཁུ་བ་འབྱིན་པའི་འདུན་པས་ཁུ་བ་ཕྱུང་བ་མི་ཚངས་པ་སྤྱོད་པའི་སྦོམ་པོ་ཡིན་ན་ཧ་ཅང་ཐལ་ཏེ། ཀུན་སློང་གི་རྣམ་པར་ཐ་དད་པའི་ལྟུང་བ་གཞན་གྱི་ཀུན་སློང་གིས་ལྟུང་བ་གཞན་ཀུན་ནས་སློང་བར་འགྱུར་བའི་ཕྱིར་རོ། །དེས་ན་དེ་ནི་འབྱིན་པའི་ལྷག་མ་ཡིན་གྱི་ཕམ་པའི་སྦོམ་པོ་མ་ཡིན་ནོ་ཞེས་པའི་ཚུལ་གྱིས་སོ། །མདོ་སྔ་མ་དེའི་སྤྲོས་པ་བསྟན་པར་བྱ་བའི་ཕྱིར་བཤད་པ་ནི། ཁུ་བ་དབྱུང་སེམས་ཀྱིས་རྨའི་ནང་དུ་ཁུ་བ་དབྱུང་ན་བྱ་བ་གཞན་ཡིན་པས་ལྷག་མར་མི་འགྱུར་རོ་ཞེ་ན། དབྱུང་སེམས་ཀྱིས་ཁུ་བ་ཕྱུང་བ་ཐམས་ཅད་ལ་མཐའ་ཕམ་པ་ཉིད་མ་གཏོགས་པ་དགེ་འདུན་ལྷག་མར་འགྱུར་ཏེ། དབྱུང་སེམས་ཀྱིས་རྨ་མ་ཉམས་པའི་ནང་དུ་ཁུ་བ་ཕྱུང་ནས་རེག་པ་མྱོང་ན་ཕམ་པ། དེ་ལྟར་ཕྱུང་ནས་རེག་པ་མ་མྱོང་ན་ལྷག་མར་འགྱུར་བ་དང་། རྨ་ཉམས་པར་དབྱུང་སེམས་ཀྱིས་ཁུ་བ་ཕྱུང་ན་ལྷག་མར་འགྱུར་རོ། །ལྔ་པ་ནི། ཕུང་པོ་ལས་བརྐུས་ན་ལན་རེ་རེ་བཞིན་བླངས་པ་ཐ་དད་ཅེས་པའི་གཞུང་དེས་མདོ་གང་གི་དོན་བཤད་པའི་མདོའི་དོན་གཞན་ཡང་བསྟན་པར་བྱ་བའི་ཕྱིར་བཤད་པ་ནི། མཐར་ཐུག་ཐ་དད་པས་བར་དུ་ཆོད་པའི་བྱ་བའམ་སྦྱོར་བ་དུ་མས་མཐར་ཐུག་གཅིག་གྲུབ་པའི་ཚད་དུ་ཆོག་པ་ནི་འབྲས་བུ་མཐར་ཐུག་གི་ལྟུང་བ་གཅིག་ཏུ་རྣམ་པར་མི་གཞག་གོ །དཔེར་ན་སྦྱོར་བ་ཆུང་ངུ་དུ་མས་ཡང་ནས་ཡང་དུ་ས་སོར་ཕྱེད་ལས་ལྷག་པ་བརྐོས་ཀྱང་ས་བརྐོ་བའི་ལྟུང་བྱེད་དུ་མི་འགྱུར་བ་དང་། ཁང་པའི་གཞི་སོ་སོ་ལ་རྩིག་པའི་བྱ་བ་བྱས་ནས་བསྡོམས་པ་ན་ཁང་པའི་ཚད་དུ་ཆོག་ཀྱང་ལྷག་མར་མི་འགྱུར་བ་བཞིན་ནོ། །འོ་ན་གང་ཟག་གཞན་གྱིས་བྱས་པའི་བཟོ་ལ་སོགས་པའི་འཕྲོ་བྱེད་པ་ལ་ཅིར་འགྱུར་ཞེ་ན། གཞན་གྱིས་ཁང་པ་དང་སྟན་གྱི་ཕྱེད་བྱས་ཟིན་པ་ལ་དེའི་འཕྲོ་བྱེད་པ་ནི་ཕྱེད་ཉིད་དེ་ན་སྨད་དུ་འགྱུར་ཏེ། དེ་ཡང་སྟན་འཕྲོ་བྱས་ན་ཉེས་བྱས་ཁང་པའི་འཕྲོ་བྱས་ན་སྦོམ་པོར་འགྱུར་རོ། །ཤུགས་ལ་གཞན་གྱིས་ཅུང་ཟད་བྱས་པའི་འཕྲོ་ཟིན་པར་བྱེད་ན་ལྟུང་བ་རྫོགས་པར་བསྐྱེད་ཅེས་སྟོན་ནོ། །སྔར་རྣམ་འབྱེད་དུ་ཕམ་པས་སྐུར་པ་བཏབ་ན་ལྷག་མ་དང་། ལྷག་མས་སྐུར་པ་བཏབ་ན་ལྟུང་བྱེད་དུ་འགྱུར་བར་བསྟན་ནས་དེ་ལས་གཞན་པའི་ལྟུང་བས་སྐུར་བ་འདེབས་ན་ཅིར་འགྱུར་མ་བསྟན་པས་དེ་ལ་ཅིར་འགྱུར་ཞེ་ན། ཁ་ན་མ་ཐོ་བ་ཕམ་པ་དང་ལྷག་མ་དེ་བས་ན་སྨད་པ་སྦོམ་པོ་ལྟུང་བྱེད་སོར་བཤགས་ཉེས་བྱས་དག་གིས་སྐུར་བ་བཏབ་པའི་ཆ་འབྲས་བུ་ནི་ན་སྨད་པ་སྟེ་ཉེས་བྱས་སུ་འགྱུར་རོ། །བཞི་པ་འདུ་ཤེས་བསམ་པའི་མཚན་ཉིད་ནི། གོང་དུ་ཡིད་གཉིས་ནི་འདུ་ཤེས་དང་འདྲ་ཞེས་བསྟན་ན། དེ་ལ་སྦྱོར་བ་དེ་བྱའོ་སྙམ་པའི་ཀུན་སློང་མེད་པའི་ལྟུང་བ་མི་རྫོགས་པར་འགྱུར་རམ་ཞེ་ན། སྲོག་གཅོད་ལ་སོགས་པ་བསླབ་པའི་གཞི་ཐམས་ཅད་ལ་མི་ཡིན་མིན་ཐེ་ཚོམ་ཟ་བས་གསོད་པ་ལྟ་བུའི་བྱ་བ་ལ་ཞུགས་པ་ལ་གང་ཡིན་ཡང་བྱའོ་སྙམ་པའི་བསམ་པ་སྤྱི་ཞུགས་དང་བཅས་པ་ཡིན་པས་ལྟུང་བ་རྫོགས་པར་བསྐྱེད་དོ། །ལྟུང་བ་བསྐྱེད་པ་ལ་འདུ་ཤེས་དང་དོན་གང་གཙོ་ཆེ་བ་ཡིན་ཞེ་ན། སྦྱོར་བའི་ལྟུང་བ་བསྐྱེད་པ་ལ་ནི་འདུ་ཤེས་ཡན་ལག་གམ་རྒྱུའི་གཙོ་བོ་ཡིན་ཏེ། ཤིང་སྐམ་ལ་མིར་འདུ་ཤེས་ནས་གསོད་པའི་སྦྱོར་བ་བྱས་ན་ཉེས་པ་སྦོམ་པོ་དང་། མི་ལ་དུད་འགྲོར་འདུ་ཤེས་ཏེ་གསོད་པའི་སྦྱོར་བ་བྱས་ན་ཉེས་བྱས་སུ་འགྱུར་བའི་ཕྱིར། མཐར་ཐུག་གི་ལྟུང་བ་བསྐྱེད་པ་ལ་གང་བསམ་པའི་དོན་དང་འདུ་ཤེས་འཕྲད་པ་དེ་ཉིད་ཡན་ལག་ཏུ་དགོས་པ་ཡིན་ནོ། །དེར་ངེས་སམ་ཞེ་ན་མི་ཚངས་པར་སྤྱོད་པ་དང་ཁུ་བ་འབྱིན་པ་གཉིས་ལ་ནི་དེར་མ་ཟད་པ་སྟེ། འདུ་ཤེས་དོན་དང་ཕྲད་པ་མི་དགོས་ཏེ་མི་ལ་མི་ཚངས་པར་སྤྱོད་སྙམ་ནས་ཀླུ་ལ་སྤྱོད་ཀྱང་ཕམ་པ་དང་། མི་ལ་ཁུ་བ་དབྱུང་བསམས་ནས་དུད་འགྲོ་ལ་འབྱིན་པར་བྱེད་ནའང་ལྷག་མར་འགྱུར་རོ། །དེར་མ་ཟད་མི་བདེན་པ་བརྫུན་ཏུ་སྨྲ་བའི་ལྟུང་བ་བསྐྱེད་པ་ལ་ཉན་པ་པོ་འདུ་ཤེས་དོན་དང་ཕྲད་པ་ཡང་མི་དགོས་ཏེ། ལྷས་བྱིན་ལ་སྨྲའོ་བསམ་ནས་མཆོད་སྦྱིན་ལ་སྨྲས་ཀྱང་ལྟུང་བ་རྫོགས་པར་བསྐྱེད་དོ། །འགྲོ་བ་གཞན་གྱི་རྣམ་པ་བསྟེན་པ་བསད་པ་ལ་ཡང་ངོ་ཞེས་པའི་སྐབས་སུ། ཆོས་བཤེས་ཀྱིས་མི་སྟག་གི་རྣམ་པ་བསྟེན་པ་དེ་ལ་སྟག་ཏུ་འདུ་ཤེས་པས་བསད་པས་ཕམ་པར་འགྱུར་ཞེས་སྲོག་གཅོད་ཀྱི་ཕམ་པ་བསྐྱེད་པ་དེ་ལ་མིར་ཤེས་དང་མིར་ཐེ་ཚོམ་ཟ་བ་མི་དགོས་པར་གསུངས་པ་ལ། ཤ་མི་སོགས་བོད་སྔ་མ་ཁ་ཅིག་ན་རེ། འོ་ན་མི་སྟག་གི་རྣམ་པ་ཅན་ལ་སྟག་ཏུ་འདུ་ཤེས་ནས་གསོད་པའི་སྦྱོར་བ་ལ་སྦོམ་པོར་འགྱུར་བར་ཐལ། དེའི་མཐར་ཐུག་ལ་ཕམ་པར་འགྱུར་བའི་ཕྱིར། གལ་ཏེ་སྦྱོར་བ་ལ་སྦོམ་པོར་མི་འགྱུར་ཏེ་མིར་ཤེས་མེད་པས་སོ་ཞེ་ན། མཐར་ཐུག་ལ་ཡང་མཚུངས་སོ་ཞེས་དང་། གཞན་ཡང་། མི་སྟག་གི་རྣམ་པ་ཅན་དེའི་རྫས་ལ་སྟག་གི་རྫས་སུ་འདུ་ཤེས་ནས་བརྐུས་ན་ཕམ་པར་འགྱུར་བར་ཐལ། མི་སྟག་གི་རྣམ་པ་ཅན་རྟག་ཏུ་འདུ་ཤེས་ནས་བསད་པས་ཕམ་པར་འགྱུར་བའི་ཕྱིར། གཞན་ཡང་ལྷས་བྱིན་ལ་མཆོད་སྦྱིན་དུ་འདུ་ཤེས་ནས་བསད་པས་ཕམ་པར་འགྱུར་བར་ཐལ། གཏན་ཚིགས་སྔ་མ་དེའི་ཕྱིར། མི་སྟག་གི་རྣམ་པ་ཅན་ལ་སྟག་ཏུ་འདུ་ཤེས་ནས་བསད་པས་ཕམ་པ་མི་བསྐྱེད་པར་ཐལ། དེར་འདུ་ཤེས་པས་སོགས་ཞེས་དང་། འོད་ལྡན་ལས་མི་གཞན་ཡིན་ལ་མིར་འདུ་ཤེས་པས་ཞེས་པའི་འགྲེལ་པར། མི་མིན་པའི་འདུ་ཤེས་ཀྱིས་མིའི་སྲོག་དང་བྲལ་བ་ལ་ནི་མཐར་ཐུག་འགྱུར་བ་མེད་པར་བསྟན་ཏོ་ཞེས་གསུངས་པའི་ཕྱིར་ཞེས་དང་། བུ་སྟོན་གྱིས་དེ་ལ་སྟག་ཏུ་འདུ་ཤེས་ནས་བསད་ན་ཕམ་པར་མི་འགྱུར་ཏེ། འདི་གང་ལས་བཏུས་པའི་ཞུ་བར་མི་ལ་མི་མ་ལགས་པའི་འདུ་ཤེས་ཀྱིས་གུམ་པར་བྱེད་ན་ཅིར་འགྱུར། བཀའ་སྩལ་པ་ཉེས་པ་སྦོམ་པོར་འགྱུར་རོ་ཞེས་གསུངས་པའི་ཕྱིར་དང་། གཏམ་གྱི་གཞི་ལས་གང་གིས་གཞན་གྱི་འདུ་ཤེས་ཀྱིས་མ་འཚོ་བ་དང་བྲལ་བ་དེ་བསྙེན་པར་རྫོགས་པར་བྱེད་ན་བསྙེན་པར་རྫོགས་པར་བགྱི་འམ། བསྙེན་པར་རྫོགས་པར་བྱ་བ་ལ་ཞེས་གསུངས་པའི་ཕྱིར། རྒྱལ་ཚབ་པ་ན་རེ་ཕྱོགས་སྔ་སྔར་ལྟར་བྱས་ན་བོད་ཀྱི་སྐྱོན་འཇུག་ཀྱང་བོད་རྣམས་ཀྱིས་ཕྱོགས་སྔ་མ་ལོངས་པ་ཡིན་ཏེ། ཊཱི་ཀར་མིར་འདུ་ཤེས་ཀྱང་རུང་གཞན་དུ་འདུ་ཤེས་ཀྱང་རུང་ཞེས་པའི་དོན་ནི། མིར་ཤེས་པའམ་དེ་ལས་གཞན་མི་ཡིན་མིན་ཐེ་ཚོམ་ཟ་ཡང་རུང་ཞེས་པའི་དོན་ཡིན་གསུང་། བོ་དོང་པས་དེར་འདུ་ཤེས་པས་ཞེས་པས་སྤྱིར་བཏང་དང་། འགྲོ་བ་གཞན་གྱི་རྣམ་པ་ཞེས་སོགས་དམིགས་བསལ་ལོ་ཞེས་སྐྱོན་སྤོང་མཛད་དོ། །དེ་ཐམས་ཅད་ཀྱིས་བརྗོད་པའི་སྐྱོན་རིམ་པར་སྤངས་ནས། ཆོས་བཤེས་ཀྱི་འགྲེལ་པའི་གཞུང་འཛུགས་པར་བྱ་སྟེ། འདི་ལྟར་བོད་ཀྱི་ཐལ་འགྱུར་སྔ་མ་མི་འཐད་དེ། ཊཱི་ཀར་སྦྱོར་བ་ནི་འདུ་ཤེས་ལོག་པའི་དབང་གིས་ཁ་ན་མ་ཐོ་བ་ཆེ་ཆུང་དུ་འགྱུར་གྱི། དངོས་གཞི་ལ་ནི་དངོས་པོ་ཇི་ལྟ་བ་ལ་ཁ་ན་མ་ཐོ་བར་འགྱུར་རོ་ཞེས་པས་ལན་བཏབ་ཟིན་པའི་ཕྱིར་དང་། རྩ་བར་ཡང་སྦྱོར་བ་ལ་ནི་འདུ་ཤེས་ཡན་ལག་ཡིན་ནོ། །བསམ་པ་ལ་ནི་དེ་ཉིད་དོ། །ཞེས་སྦྱོར་མཐའ་ལ་འདུ་ཤེས་དང་། དངོས་པོ་གང་གཙོ་བསལ་བར་བཤད་པ་ངེས་པར་མཛད་དུ་གསོལ། ཐལ་འགྱུར་གཉིས་པ་མི་འཐད་དེ། ཊཱི་ཀར་མདོ་འདི་ནི་མ་བྱིན་པར་ལེན་པ་ལ་སོགས་པ་ལྟུང་བྱེད་ཀྱི་སྡེ་ཐམས་ཅད་ལ་སྦྱར་བ་མ་ཡིན་གྱི་སྲོག་གཅོད་པའི་སྐབས་འབའ་ཞིག་དང་སྦྱོར་རོ་ཞེས་གསུངས་ཤིང་། རྩ་བར་ཡང་བསད་པ་ལ་ཡང་ངོ་ཞེས་སྲོག་གཅོད་ལ་བཀར་ནས་གསུངས་པའི་ཕྱིར། ཐལ་འགྱུར་གསུམ་པ་མི་འཐད་དེ། ལྷ་མཆོད་རྒྱུད་ཐ་དད་ཡིན་པས་མི་མཚུངས་པའི་རྩོད་སྤོང་ཊཱི་ཀ་ལས་བཤད་ཟིན་ཅིང་། སྟག་གི་རྣམ་ལྡན་འདི་གསོད་སྙམ་པའི་དུས་ཀྱི་བསད་བྱ་དེ་སྟག་གི་རྣམ་ལྡན་དུ་ཡོད་ཅིང་། ལྷས་བྱིན་གྱིས་རྣམ་ལྡན་འདི་གསད་པར་བྱའོ་སྙམ་པའི་དུས་ཀྱི་གསད་བྱ་མཆོད་སྦྱིན་དེ་ལྷས་བྱིན་གྱིས་རྣམ་ལྡན་དུ་མེད་པའི་ཕྱིར། ཐལ་འགྱུར་བཞི་པ་ཡང་མི་འཐད་དེ། དེར་འདུ་ཤེས་པས་སོ་ཞེས་པའི་སྐབས་སུ་གསད་བྱ་དེ་ཉིད་མ་ནོར་བར་བསད་པ་དགོས་ཞེས་པའི་དོན་དུ་འགྲེལ་པས་བཤད་ཅིང་། འོད་ལྡན་གྱི་ལུང་གིས་ཆོས་བཤེས་འགོག ཁོ་བོས་ཀྱང་ཆོས་ཤེས་ཀྱི་ལུང་གིས་འོད་ལྡན་འགོག་ན་མཚུངས་པར་འགྱུར་ཏེ། རྒྱ་ཆེར་འགྲེལ་དང་འོད་ལྡན་མི་མཐུན་པ་དུ་མ་ཡོད་པ་ཁྱེད་རྣམས་ཀྱིས་ཀྱང་ཁས་བླངས་པའི་ཕྱིར་རོ། །བུས་མདོ་འདི་ཞུ་བ་ལས་བཏུས་གསུང་བའང་མི་འཐད་དེ། ཁྱེད་ཀྱིས་དྲངས་པའི་ལུང་དེས་འདུ་ཤེས་ཁོ་ན་ལ་དོགས་པ་གཅོད་ལ། འདིར་གཟུགས་བསྒྱུར་བ་ལ་དོགས་པ་གཅོད་པའི་ཕྱིར། ཊཱི་ཀར་འདིར་གཞུང་ནི་ཨུ་དྲ་ཡ་ནའི་རྟོགས་པ་བསྟན་པར་བྱ་སྟེ་ཞེས་གསུང་ཞིང་། རྟོགས་བརྗོད་དེ་ལུང་རྣམ་འབྱེད་ཀྱི་བཙུན་མོའི་འཁོར་སྡུད་ཀྱི་གླེང་གཞིའི་སྐབས་ན་ཡོད་པའི་ཕྱིར། གཏམ་གྱི་གཞིའི་ལུང་དྲངས་པ་དེས་ཀྱང་མི་གནོད་དེ། རྒྱུད་ཐ་དད་པ་དང་རྣམ་པ་ལྡན་མི་ལྡན་སྔར་བཤད་པས་ལན་བཏབ་ཟིན་པའི་ཕྱིར། རྒྱལ་ཚབ་པའི་སྐྱོན་སྤོང་དེ་ཡང་ཆོས་བཤེས་ཀྱི་འགྲེལ་པ་རས་སུ་མི་བོར་བའི་བཤད་པར་སྣང་མོད། ལུང་དོན་མ་ཡིན་ཏེ་གཞན་དུད་འགྲོ་མ་ཡིན་པ་དང་། སྤྲུལ་པ་བསད་པ་ལ་ཡང་ངོ་ཞེས་པའི་འགྲེལ་པར། དུད་འགྲོར་འདུ་ཤེས་ནས་མི་བསད་པ་ལ་ཕམ་པར་འགྱུར་བར་གསལ་བར་བཤད་པས་ད་དུང་སྐྱོན་སྤོང་དགོས་སོ། །དེས་ན་ཆོས་བཤེས་ཀྱི་ལུགས་འདི་ནི་མཛོད་འགྲེལ་དུ། དགྲ་བཅོམ་པ་མ་ཡིན་པའི་འདུ་ཤེས་ཀྱིས་དགྲ་བཅོམ་པ་གསོད་པར་བྱེད་ན་མཚམས་མེད་པ་ཁོ་ནར་འགྱུར་ཏེ། འདི་གསོད་སྙམ་དུ་རྟེན་ངེས་པར་གཟུང་བའི་ཕྱིར་ཞེས་གསུངས་པ་དང་ཡང་ལེགས་པར་འགྲིག་པ་ཡིན་ནོ། །གོང་དུ་བསྟན་པའི་ཕྱིར་མཐུ་དང་ལྡན་པ་ཉིད་ཡིན་ན་དངོས་གཞིའོ་ཞེས་བཤད་ན། མཐུ་དང་ལྡན་པ་དེ་གང་ཞེ་ན། ཡན་ལག་ཐམས་ཅད་དང་དུ་བླང་དུ་རུང་བ་ཉིད་དེ། ལག་པས་ལག་པར་དང་། རྐང་པས་རྐང་པར་དང་། འདོམས་ཀྱིས་འདོམས་སུ་དང་། ཚིགས་ཀྱིས་ཚིགས་སུ་སྤྲད་དུ་རུང་བ་ནི་འཁྲིག་པ་བསྟན་པའི་ཕྱིར་མཐུ་དང་ལྡན་པ་ཉིད་ཡིན་ནོ། །ལྔ་པ་ཡན་ལག་གི་སེལ་བ་ལ་གཉིས་ཏེ། ཅིར་འགྱུར་གྱི་མདོ་དང་། ཡན་ལག་སོ་སོའི་མཚན་ཉིད་དོ། །དང་པོ་ནི། ཡན་ལག་མ་ཚང་བ་ལ་ཅིར་འགྱུར་ཞེ་ན། འོག་མ་སྟེ་འོག་ནས་འཆད་པའི་ལྟུང་བ་དག་གི་ཡན་ལག་ཚང་བ་ལས་གཞན་གཅིག་མ་ཚང་བ་ལ་ན་སྨད་དུ་འགྱུར་རོ། །དཔེར་ན་དགེ་སློང་གི་ལུས་མ་ཉམས་པས་བུད་མེད་ཀྱི་ལུས་ཉམས་པ་ལ་རེག་ན་སྦོམ་པོར་འགྱུར་བ་བཞིན་ནོ། །ཡན་ལག་དུ་མ་མ་ཚང་བ་ལ་ཅིར་འགྱུར་ཞེ་ན། འོག་ནས་དེ་ཆད་འགྱུར་གྱི་ཡན་ལག་དུ་མ་མ་ཚང་བ་ལ་ནི་ན་སྨད་པ་དེ་བས་ཀྱང་ན་སྨད་པ་སྟེ་ཆེས་ན་སྨད་དུ་འགྱུར་རོ། །དཔེར་ན་དགེ་སློང་གིས་ལུས་ཉམས་པས་བུད་མེད་ཀྱི་ལུས་ཉམས་པ་ལ་རེག་ན་ཉེས་བྱས་སུ་འགྱུར་བ་བཞིན་ནོ། །ཆེས་ན་སྨད་དུ་འགྱུར་བ་དེ་ཁོ་ནར་ངེས་སམ་ཞེ་ན། མི་ཡུལ་དུ་དགོས་པའི་ལྟུང་བ་ལ་དུད་འགྲོ་ཡུལ་དུ་བྱས་ན་ཡང་ངོ་སྟེ་ཆེས་ན་སྨད་དུ་འགྱུར་རོ། །དཔེར་ན་གོ་བྱའི་ཡུལ་དུད་འགྲོ་ལ་མི་ཆོས་བླ་མའི་བརྫུན་སྨྲས་ན་ཉེས་བྱས་སུ་འགྱུར་བ་བཞིན་ནོ། །གཉིས་པ་ཡན་ལག་སོ་སོའི་མཚན་ཉིད་ལ་གསུམ་སྟེ། གཞིའི་ཡན་ལག བསམ་པའི་ཡན་ལག སྦྱོར་བའི་ཡན་ལག་གོ །དང་པོ་ལ་གཉིས་ཏེ། སེམས་ཅན་ལས་གྱུར་པ་དང་སེམས་ཅན་མ་ཡིན་པ་ལས་གྱུར་པའོ། །དང་པོ་ལ་བཞི་སྟེ། ཆགས་པ་དགག་བྱར་བྱས་པའི་ལྟུང་བའི་ཡན་ལག ཐ་སྙད་ཀྱིས་བསྐྱེད་པའི། ཁྱིམ་པས་བསྐྱེད་པའི། བསྙེན་པར་རྫོགས་པས་བསྐྱེད་པའི་ལྟུང་བའི་ཡན་ལག་ཞར་བྱུང་དང་བཅས་པའོ། །དང་པོ་ནི་ཡན་ལག་ཚང་མ་ཚང་གི་ལྟུང་བ་ཆེ་ཆུང་དུ་འགྱུར་བ་ཡིན་ན་ཡན་ལག་དེ་གང་ཞེ་ན། ཡུལ་རྫུ་འཕྲུལ་གྱི་ཆོས་ཅན་ཉིད་མ་ཡིན་པ་ནི་རེག་པའི་ཕམ་ལྷག་གཉིས་དང་མི་ཚངས་སྤྱོད་ཀྱི་ཕམ་པ་ལས་གཞན་དེ་མ་ཡིན་པའི་ཆགས་པ་དགག་བྱར་བྱས་པའི་ལྟུང་བ་རྣམས་བསྐྱེད་པའི་ཡན་ལག་ཡིན་ནོ། །དཔེར་ན་འཁྲིག་ཚིག་དང་བསྙེན་བསྐུར་བསྔགས་པ་སྨྲ་བའི་ཡུལ་རྫུ་འཕྲུལ་གྱི་ཆོས་ཅན་མ་ཡིན་པ་དགོས་པ་བཞིན་ནོ། །འདིའི་སྐབས་ཀྱི་རྫུ་འཕྲུལ་གྱི་ཆོས་ཅན་ནི། ཤ་མིས་རྫུ་འཕྲུལ་གྱི་ཆོས་ཐོབ་པ་ཙམ་ལ་བཞེད་ཀྱང་། བྱ་འདུལ་གྱིས་རྫུ་འཕྲུལ་གྱི་ཆོས་ལ་གནས་བཞིན་པ་ལ་བཞེད་པ་ལྟར་ལེགས་སོ། །འོ་ན་རེག་པའི་ཕམ་ལྷག་བསྐྱེད་པ་ལ་གང་ཡན་ལག་ཡིན་ཞེ་ན། རེག་པའི་ཕམ་ལྷག་བསྐྱེད་པ་ལ་ཡུལ་རྟེན་གཉིས་ཀའི་ལུས་མ་ཉམས་པ་ཡན་ལག་ཏུ་དགོས་སོ། །རོ་མ་ཉམས་པ་ལ་རེག་པས་རེག་པའི་ཕམ་ལྷག་རྫོགས་པ་བསྐྱེད་པ་ཁས་ལེན་དགོས་ཏེ། ལུང་ལས། རོ་ལ་རེག་ན་ལྷག་མར་འགྱུར་རོ་ཞེས་དང་། ཊཱི་ཀར་དང་། རོ་མ་ཉམས་པ་ལ་ན་སྨད་པ་མེད་དོ་ཞེས་འབྱུང་བའི་ཕྱིར་རོ། །གལ་ཚིལ་བྱེད་པ་ལ་ཡུལ་རྟེན་གཉིས་ཀའི་ལུས་མ་ཉམས་པ་ཡན་ལག་ཏུ་དགོས་སོ། །གསར་དུ་མ་ཉམས་པ་ཁོ་ན་ལ་འགྱུར་རམ་ཞེ་ན། སེན་མོ་དང་། སོ་དང་། ཤ་མེད་པའི་རུས་པ་དང་། མཆན་ཁུང་ལྟ་བུའི་སྤུ་དག་ནི་མ་ཉམས་པ་ལས་གཞན་ཉམས་པ་དང་ལྡན་པའམ་འདྲ་བ་ཉིད་ཡིན་ནོ། །གཉིས་པ་ཐ་སྙད་ཀྱིས་བསྐྱེད་པའི་ལྟུང་བའི་ཡན་ལག་ནི། བརྫུན་དུ་སྨྲ་བ་སོགས་ལ་གང་ཡན་ལག་ཏུ་འགྱུར་བ་ཡིན་ཞེ་ན། བརྫུན་དུ་སྨྲ་བའི་ལྟུང་བ་སོགས་ཐ་སྙད་ཀྱིས་བསྐྱེད་པའི་ལྟུང་བ་རྣམས་ཀྱི་དངོས་གཞི་བསྐྱེད་པ་ལ་ཡུལ་མིའི་འགྲོ་བ་ཡན་ལག་ཏུ་དགོས་སོ། །མི་གང་ཡང་རུང་བས་བསྐྱེད་དམ་ཞེ་ན། མི་ཡིན་ཡང་ཤེས་པ་རང་བཞིན་དུ་གནས་པ་ལས་ཉམས་པ་ལ་ནི་མ་ཡིན་ནོ། །དཔེར་ན་གོ་བྱའི་ཡུལ་སྨྱོན་པ་ལ་དགེ་སློང་ཕ་རོལ་པོ་ལ་ཕམ་པས་སྐུར་པ་བཏབ་ན་སྦོམ་པོར་འགྱུར་བ་བཞིན་ནོ། །མ་ནིང་དང་མཚན་གཉིས་ནི་ཉམས་པ་དེ་དང་ལྡན་པའི་འདྲ་བ་ཉིད་ཡིན་པས། དེ་ཡུལ་དུ་བྱས་ནས་གོས་སློང་བ་སོགས་བྱས་ན་ཉེས་བྱས་སུ་འགྱུར། ཆགས་པ་དགག་བྱར་བྱས་པའི་ཕོ་མོ་ཡུལ་དུ་བྱེད་པའི་ལྟུང་བ་ཐམས་ཅད་འདིར་མི་སྐྱེད་དེ། མ་ནིང་མོ་དང་མ་ནིང་ཕོ། །སྤྲུལ་པ་མོ་ལ་ཡང་ངོ་ཞེས་དང་། རྣམ་པ་དེ་ལྟ་བུ་ལ་ནི་མཚན་གཅིག་ཤོས་དོན་མེད་དོ་ཞེས་གསུངས་པའི་ཕྱིར། སྤགས་པ་སློང་བ་ལྟ་བུ་མ་ནིང་མཚན་གཉིས་པ་ལས་རྫོགས་པར་མི་སྐྱེད་དེ། གདོན་གྱིས་བརླམས་པ་དང་འདྲ་བར་ཤེས་པས་རང་གཞན་མི་གསལ་ཞིང་། ལུས་ཀྱང་རོ་དང་འདྲ་བར་དོར་བར་བྱ་བ་ཡིན་པའི་ཕྱིར། ཟ་མ་ནི་མ་གཏོགས་ཏེ། དེ་ལ་མི་ཁྱད་པར་ཅན་གྱི་ཐ་སྙད་ཐོབ་པའི་ཕྱིར། དཔེར་ན་ལྟ་ཤིང་ལྟ་བུའོ། །རང་བཞིན་གྱི་མ་ནིང་ངམ་སྐྱེས་ནས་མ་ནིང་ནི་འགྲེལ་པར་མཚན་གཉིས་ཀ་ཡོད་པ་ལ་བཤད་ཀྱང་། མཛོད་ཀྱི་འགྲེལ་བཤད་གཉིས་ལས་མཚན་གང་ཡང་མེད་པ་ལ་བཤད་ཅིང་། མེ་ཏོག་ཕྲེང་རྒྱུད་ལས། གང་སྐྱེས་ཉིད་ནས་མཚན་མ་ནི། །གཉིས་ཀ་མེད་པ་མཚན་མེད་ཡིན། །ཞེས་གསུངས་པ་ལྟར་འཐད་པར་མངོན་ནོ། །རེག་པའི་ཕམ་ལྷག་གི་ཡན་ལག་མ་ཚང་བ་ཇི་ལྟ་བུ་ཞེ་ན། རེག་པའི་ཕམ་ལྷག་ནི་ཐ་སྙད་ཀྱིས་བསྐྱེད་པའི་ལྟུང་བ་དང་འདྲ་བར་ཏེ། མི་མ་ཡིན་པ་ཡུལ་དུ་བྱས་པ་བཞིན་དུ་མི་རང་བཞིན་ཉམས་པ་ཡུལ་དུ་བྱས་ན་སྦོམ་པོ་འགྱུར་རོ། །གསུམ་པ་ཁྱིམ་པས་བསྐྱེད་པའི་ལྟུང་བའི་ཡན་ལག་ནི། ཁྱིམ་པ་ཡུལ་དུ་དགོས་པའི་ལྟུང་བ་རྣམས་ལ་གང་ཡན་ལག་ཏུ་འགྱུར་བ་ཡིན་ཞེ་ན། ཕྱི་རོལ་པའི་རབ་ཏུ་བྱུང་བ་དང་། སྡོམ་པ་བླངས་ཀྱང་མ་ཆགས་པ་དང་། ཕམ་པས་ཉམས་པ་དག་ནི་ཕྱེད་ཉིད་ཁྱིམ་པར་གྱུར་པ་ཡིན་པས་ཁྱིམ་པ་ཡུལ་དུ་བྱེད་དགོས་ཀྱི་སྐབས་སུ་དེ་རྣམས་ཡུལ་དུ་བྱས་ནས་སྤགས་པ་སློང་བ་སོགས་བྱེད་པ་ལ་ཉེས་བྱས་སུ་འགྱུར་བ་བཞིན་ནོ། །བཞི་པ་བསྙེན་པར་རྫོགས་པས་བསྐྱེད་པའི་ལྟུང་བའི་ཡན་ལག་ཞར་བྱུང་དང་བཅས་པ་ནི། དགེ་སློང་ཕ་མ་ཡུལ་དུ་བཞག་པའི་ལྟུང་བ་རྣམས་ལ་གང་ཡན་ལག་ཏུ་འགྱུར་བ་ཡིན་ཞེ་ན། བསྙེན་པར་རྫོགས་པ་བྱས་ཤིང་བསྙེན་རྫོགས་ཀྱི་སྡོམ་པ་སྐྱེས་པ་ཅན་ཕམ་པས་མ་ཉམས་པ་ཉིད་ནི་དགེ་སློང་དང་། དགེ་སློང་མ་ཡུལ་དུ་གཞག་པའི་བསླབ་པའི་ལྟུང་བ་རྣམས་ཀྱི་དངོས་གཞི་བསྐྱེད་པ་དག་ལ་ཡན་ལག་ཡིན་པས་བསླབ་པ་བྱིན་པ་དང་མ་འབྲེལ་བའི་ཕམ་པ་བྱུང་བ་དང་། ཕྱི་རོལ་པའི་རབ་བྱུང་དང་སྡོམ་པ་མ་སྐྱེས་པའི་རྟགས་ཅན་དང་། མ་རྫོགས་པའི་རབ་ཏུ་བྱུང་བ་གསུམ་པོ་ཡུལ་དུ་བྱས་ནས་བརྡེག་གཟས་སོགས་བྱས་ན་ན་སྨད་དུ་འགྱུར་རོ། །དམིགས་བསལ་ནི་བསླབ་པ་མ་བྱིན་པའི་ཕམ་པ་འཆབ་མེད་བྱུང་བ་ཡུལ་དུ་བྱས་ནས་སྐུར་འདེབས་དངོས་གཞི་གསུམ་དང་། གནས་ངན་ལེན་བརྗོད་འཆབ་གཉིས་དང་ལྔ་རྫོགས་པར་བསྐྱེད་དོ། །དེའི་ནང་གསེས་ཀྱི་ཁྱད་པར་བསྟན་པའི་ཕྱིར་བཤད་པ་ནི། མཚན་མཐུན་པ་དང་ལྟ་བ་ཁས་བླངས་པ་སྟེ་ལྟ་བ་མཐུན་པ་དག་ནི་རང་གི་ཕྱོགས་ཉིད་ཀྱི་ཁོངས་སུ་གཏོགས་པ་སྟེ་རང་གི་ཕྱོགས་སུ་གཅིག་པ་ཡིན་པས་རང་ཕྱོགས་ལ་བརྟེན་པའི་ལྟུང་བ་རྣམ་པར་བཞག་པའི་དངོས་གཞི་བསྐྱེད་པ་ལ་མཚན་དང་ལྟ་བ་མཐུན་པ་ཡན་ལག་ཏུ་དགོས་སོ། །གཞན་ཕྱོགས་དགེ་སློང་མ་ཡུལ་དུ་གཞག་པའི་དགེ་སློང་ལ་ལྟུང་བ་བསྐྱེད་པ་ལ་ལྟ་མཐུན་ཡན་ལག་ཏུ་དགོས་སོ། །དམིགས་བསལ་ནི། སྐུར་འདེབས་ཀྱི་དངོས་གཞིའི་ལྟུང་བ་གསུམ་ནི། མཚན་མི་མཐུན་ཡན་ལག་ཏུ་བྱས་པས་ཀྱང་སྐྱེད་ལ། སྐུར་འདེབས་དངོས་གཞི་གསུམ། དབྱེ་ན། དེར་རྗེས་ཕྱོགས། སྡིག་ལྟ་མི་གཏོང་བ། སྤངས་པའི་རྗེས་ཕྱོགས་དང་བདུན་ནི། ལྟ་བ་མི་མཐུན་པ་ཡུལ་དུ་བྱས་པས་ཀྱང་རྫོགས་པར་བསྐྱེད་དེ། འོ་ན་བསྙེན་པར་རྫོགས་པ་ཡུལ་དུ་བྱེད་དགོས་ཀྱི་སྐབས་སུ། ཁྱིམ་པ་ཡུལ་དུ་བྱས་ན་ཅིར་འགྱུར་ཞེ་ན། བསྙེན་པར་རྫོགས་པ་ཡུལ་དུ་བྱེད་དགོས་ཀྱི་དངོས་གཞི་འདིར་གཏོགས་པ་ལ་ཁྱིམ་པ་ཡུལ་དུ་བྱས་པ་ནི་རྟགས་ཅན་ཡུལ་དུ་བྱས་པ་ཉིད་ཀྱི་བས་ན་སྨད་སྟེ་ཆེས་ན་སྨད་པ་འགྱུར་སྟེ། དཔེར་ན་རྟགས་ཅན་ལ་བརྡེབ་གཟས་སོགས་བྱས་ན་ཉེས་བྱས། ཁྱིམ་པ་ལ་དེ་བྱས་ན་ཕྲ་མོར་འགྱུར་བ་ལྟ་བུའོ། །གཉིས་པ་སེམས་ཅན་མ་ཡིན་པ་ལས་གྱུར་པ་ནི། རབ་ཏུ་བྱུང་བའི་རྫས་ཀྱིས་བསྐྱེད་པའི་ལྟུང་བ་རྣམས་ལ་གང་ཡན་ལག་ཏུ་འགྱུར་བ་ཡིན་ཞེ་ན། རབ་ཏུ་བྱུང་བའི་རྫས་ཀྱིས་བསྐྱེད་པའི་ལྟུང་བའི་དངོས་གཞི་དག་བསྐྱེད་པ་ལ་ནི་རྫས་དེ་རུང་བ་ཉིད་དང་ཚད་དང་ལྡན་པས་བསྐྱེད་ཅིང་། ལ་སོགས་པ་ཞེས་པས་ནི་ཚད་བས་ཆེ་བས་ཀྱང་བསྐྱེད་པར་སྟོན་ཏོ། །འདིར་ཁ་ཅིག་གོས་ལ་ནག་པོ་མ་ཡིན་པའི་ཁ་དོག་རུང་བ་དང་། ཟླུམ་པོ་སོགས་མ་ཡིན་པའི་དབྱིབས་རུང་བ་དགོས་ཟེར་བ་མི་འཐད་དེ། བལ་ནག་པོ་འབའ་ཞིག་ལ་སྟན་བྱས་པས་སྤང་ལྟུང་མི་བསྐྱེད་པར་ཐལ། ནག་པོ་ཁ་དོག་མི་རུང་བ་ཡིན་པའི་ཕྱིར། ཁོ་ན་རེ་སྤང་ལྟུང་དེ་ཁ་དོག་མི་རུང་བས་གཞག་པ་ཡིན་ནོ་ཞེ་ན། འོ་ན་བལ་ནག་པོ་མོད་ཅིང་རིན་ཆུང་། དཀར་པོ་དཀོན་ཞིང་རིན་ཆེ་བའི་ཚེ་དཀར་པོ་འབའ་ཞིག་ལ་སྟན་བྱེད་པ་ལ་སྤང་ལྟུང་དུ་མི་འགྱུར་བར་ཐལ། ཁས་ལེན་དེའི་ཕྱིར། དབྱིབས་ཀྱང་དེ་ལྟར་མི་འཐད་དེ། ལྷུང་བཟེད་ལ་ཁ་གཡོགས་ཟླུམ་པོར་མི་རུང་བའི་ཤེས་བྱེད་མེད་པའི་ཕྱིར། རང་ལུགས་ནི། གོས་ལ་རྒྱུ་རུང་བ་དགོས་ཤིང་། སྣོད་ལ་ལྷུང་བཟེད་ལྕགས་སམ་ས་ལས་བྱས་པ་ཁ་དོག་ནག་པོ་ས་ལྷུང་ཚོས་པ་དགོས་ལ། ཕོར་པ་ཡང་རིན་པོ་ཆེ་ལས་མ་བྱས་པ་དགོས་སོ། །ཟས་ལ་བྱིན་ལེན་མ་བྱས་པར་ཟ་བའི་ལྟུང་བ་དང་གསོག་འཇོག་གི་ལྟུང་བ་རྫོགས་པར་བསྐྱེད་པ་ལ་གཞི་གཞན་ལ་བརྟེན་པའི་རུང་བ་དགོས་ལ། བསོད་པ་སློང་བའི་ལྟུང་བ་རྫོགས་པར་བསྐྱེད་པ་ལ་ཟས་རུང་བ་དགོས་སོ། །འདིར་རབ་ཏུ་བྱུང་བའི་རྫས་ཞེས་སྨོས་པ་ནི་སྡེ་ལྔ་ཆར་གྱི་ཡོ་བྱད་གང་ཡང་རུང་བ་སྦས་ཀྱང་ལྟུང་བྱེད་དུ་འགྱུར་བར་ངེས་པའི་ཆེད་ཡིན་ལ། འདིར་ཊཱི་ཀར་ལྷུང་བཟེད་ཚད་ལྷག་སྡུད་ཅེས་འབྱུང་བར་འགྱུར་སྐྱོན་ཡིན་ནམ། ཆེ་བ་དང་དཀར་བ་ཞེས་ཀྱང་བཤད་པས་དཔྱད་པར་བྱའོ་ཞེས་གསུངས་སོ། །གཉིས་པ་བསམ་པའི་ཡན་ལག་ནི་རང་དོན་དུ་བྱེད་པའི་ལྟུང་བ་རྣམས་ལ་རང་གཞན་གཉིས་ཀའི་དོན་བྱེད་ན་རང་དོན་དུ་བྱེད་པ་ཡོད་པས་ལྟུང་བ་རྫོགས་པར་འགྱུར་རམ་ཞེ་ན། འཁྲིག་ཚིག་སྨྲ་བ་དང་། བསྙེན་བཀུར་བ་སྔགས་པ་སོགས་རང་དོན་དུ་བྱེད་པའི་ལྟུང་བའི་དངོས་གཞི་བསྐྱེད་པ་ལ་རང་ཁོ་ནའི་དོན་ཉིད་དུ་བྱེད་པ་གཙོ་ཆེར་ཡོད་པ་སྟེ། ཡན་ལག་ཏུ་དགོས་པས་རང་གཞན་གཉིས་ཀའི་དོན་ནམ། གཞན་ཁོ་ནའི་དོན་དུ་དེ་དག་བྱེད་ན་ལྟུང་བ་ན་སྨད་དུ་འགྱུར་རོ། །གསུམ་པ་སྦྱོར་བའི་ཡན་ལག་ནི། ཐ་སྙད་ཀྱིས་བསྐྱེད་པའི་ལྟུང་བ་མིའི་འགྲོ་བས་བསྐྱེད་ན་རང་བཞིན་ཉམས་པ་མ་ཡིན་པའི་མི་གང་ཡང་རུང་བས་བསྐྱེད་དམ་ཞེ་ན། ངག་གི་རྣམ་པར་རིག་བྱེད་ཀྱིས་བསྐྱེད་པའི་ལྟུང་བ་རྣམས་ལ་ནི་ཡུལ་དོན་གོ་བ་ཡན་ལག་ཏུ་དགོས་པས་དོན་མི་གོ་བ་ལ་འཁྲིག་ཚིག་དང་བསྙེན་བཀུར་བསྔགས་པ་སྨྲས་ཀྱང་ན་སྨད་དུ་འགྱུར་བ་བཞིན་ནོ། །དོན་གོ་བ་གང་ཞེ་ན། སྨྲ་བ་པོ་ཉིད་ལ་ཡོད་པ་སྟེ། ངག་སྨྲ་ནུས་པ་ཉིད་ལ་ཡོད་པའི་དོན་གོ་བ་ནི་ཡན་ལག་ཡིན་ནོ། །ཐམས་ཅད་དགོས་སམ་ཞེ་ན། གསོད་པ་དང་རང་གི་དོན་དུ་རྐུ་བ་སྟེ་དེ་མ་བྱིན་ལེན་གྱི་ཕམ་པ་མ་གཏོགས་དེ་དག་ལས་གཞན་པའི་ལྟུང་བའི་ཡན་ལག་ཡིན་གྱི། དེ་གཉིས་ནི་སྨྲ་མི་ཤེས་པའི་དོན་གོ་བས་ཀྱང་འགྲུབ་བོ། །ངག་གི་རིག་བྱེད་ཀྱིས་བསྐྱེད་པ་གཞན་ལ་སྨྲ་ཤེས་དོན་གོ་དགོས་སམ་ཞེ་ན། སྡོམ་པའམ་ཡི་དམ་ཡང་དག་པར་ལེན་པར་བྱེད་པ་དག་ལ་ནི། སྨྲ་ཤེས་དོན་གོ་དགོས་པ་དེར་མ་ཟད་པ་སྟེ། སྨྲ་མི་ཤེས་པའི་དོན་གོ་བས་ཀྱང་གྲུབ་པ་ཡོད་དོ། །བོད་སྔ་མ་ཁ་ཅིག་རྟེན་གྱི་དབང་དུ་བྱས་པ་ཡིན་གསུངས་ཡང་ཁ་སྐོང་བྱེད་པའི་ཡུལ་གྱི་དབང་དུ་བྱས་པ་ཡིན་ནམ་དཔྱད་པར་བྱའོ། །འོ་ན་མཐོལ་བཤགས་བྱ་བ་ཡང་སྨྲ་མི་ཤེས་པའི་དོན་གོ་བས་འགྲུབ་བམ་ཞེ་ན། སྨྲ་ཤེས་ལ་ཡོད་པའི་དོན་གོ་བ་དེ་ནི་མཐོལ་བཤགས་བྱ་བའི་སྣོད་དམ་རྟེན་ཡིན་པས་སྨྲ་མི་ཤེས་པ་ལ་མཐོལ་བཤགས་བྱས་ཀྱང་བྱས་པར་མི་འགྱུར་ཞིང་། དེ་ལ་མ་མཐོལ་ཀྱང་འཆབ་པའི་ཉེས་པར་མི་འགྱུར་རོ། །འདིར་ཊཱི་ཀར་མཐོལ་བ་གཅིག་པུ་ལ་དངོས་སུ་བཤད་པ་ནི་མཚོན་པ་ཙམ་སྟེ། མཐོལ་བཤགས་གཉིས་ཀ་ལ་སྦྱར་རོ། །འོ་ན་ངག་གིས་བསྐྱེད་པའི་ལྟུང་བ་རྣམས་ཀྱི་དོན་ལུས་ཀྱི་རིག་བྱེད་ཀྱིས་ཀྱང་གོ་ནུས་ཤིང་ལག་ཡིག་དང་འཕྲིན་ཡིག་གིས་ཀྱང་གོ་ནུས་པས་དེ་རྣམས་ཀྱིས་ཀྱང་ལྟུང་བ་རྫོགས་པར་བསྐྱེད་དམ་ཞེ་ན། སྨྲ་བའི་ཕམ་པ་སོགས་ཀྱིས་བསྐྱེད་པའི་ལྟུང་བ་རྣམས་ལ་ངེས་པར་ངག་གི་རིག་བྱེད་ཀྱིས་བསྐྱེད་དགོས་སོ། །གཞན་གྱིས་སྨྲས་པས་འགྱུར་རམ་ཞེ་ན། རང་གི་ངག་ཁོ་ནས་བསྐྱེད་དགོས་སོ། །གཞན་ལ་སྙད་བཏགས་པས་འགྲུབ་བམ་སྙམ་ན། བདག་ཉིད་དང་འབྲེལ་པ་སྟེ་རང་ངོས་ནས་སྨྲས་པ་ངེས་པར་དགོས་སོ་གཞན་བྱེད་དུ་བཅུག་པས་བསྐྱེད་པའི་ལྟུང་བ་རྣམས་ལ་རང་གི་བཅོལ་བ་དེས་བརྒྱུད་ནས་གཞན་ལ་བཅོལ་བས་ཀྱང་འགྲུབ་བམ་ཞེ་ན། རང་གིས་དངོས་སུ་བསྐོས་པ་ཉིད་བྱེད་དུ་བཅུག་པ་ཡིན་པས་བསྐོས་པ་དེས་བཅོལ་ཡང་རང་ལ་ལྟུང་བ་མི་རྫོགས་ལ། འོན་ཀྱང་སྲོག་གཅོད་དང་མ་བྱིན་ལེན་གཉིས་ནི་མ་གཏོགས་སོ། །དེ་དག་གིས་ནི་རྣམ་པར་འབྱེད་པའི་ཞུ་བར་གཏོགས་པ་ཕལ་ཆེ་བ་སྟེ། ལུང་གཞན་ནས་འབྱུང་བ་ཡང་ཡོད་ཅེས་པ་དོན་གྱིས་བསྟན་ཏེ། བསླབ་པའི་གཞི་ཐམས་ཅད་སྤྱིར་བསྟན་པའི་མདོ་རྣམས་རྫོགས་པར་བཤད་ཟིན་ཏོ།། །།འདིར་ཉེ་བར་མཁོ་བའི་སྡོམ་ཚིགས་བསྟན་པར་བྱ་སྟེ། མཚན་གྱུར་གྱི་སྐབས་སུ་མཚན་ཉིད་ཅི་འདྲ་བའི་སྡོམ་ནི་བཤད་ཟིན་ལ། རྗེས་སུ་མཐུན་པའི་རབ་དབྱེ་གསུམ་ལས། མཚན་མཐུན་ཡན་ལག་ཏུ་དགོས་པ་ནི། བསྒོ་གྱུར་གཞི་དང་འཕྲོག་པ་དང་། །བསྔོས་བསྒྱུར་སྐྱོན་དང་ཕྲ་མ་དང་། །སྐྱོ་སྔོགས་གནས་ངན་ལེན་ཤེས་ངོ་། །ཁྱད་གསོད་འཕྱ་བསྒོ་ཁྲི་དང་གདིང་། །ཕྱིས་གནོད་འབྱུང་བ་སྤངས་པ་སྟོབས། །འདུས་ཟ་བརྡེག་གཟས་གནས་ངན་ལེན། །བདེ་དང་འདུན་པ་ཆོས་དང་སྨྲ། །དགེ་ཚུལ་འགྱོད་པ་སོ་མོ་སྔངས། །ཉེས་འཇོག་ཉན་རྣ་མ་སྨྲས་འགྲོ། །མ་གུས་ཟས་བཅས་ད་གདོད་ཁྲི། །བརྡལ་དང་སེངྒེ་ལས་གྱུར་ཏེ། །དེ་ལྟར་བཞི་བཅུ་ཐམ་པའོ། །མཚན་མི་མཐུན་ཡན་ལག་ཏུ་དགོས་པ་ནི། འཁྲུར་འཇུག་པ་དང་ལེན་པ་དང་། །ཁྱིམ་པ་མོ་ལ་ཆོས་སྟོན་དང་། །དེ་དང་ལམ་འགྲོ་བུད་མེད་ཉལ། །དེ་ལྟར་དེ་ནི་ལྔ་ཡིན་ནོ། །ཆོ་ག་འཇིག་པ་ནི། འབྲལ་བ་སྤངས་པ་ཟ་བ་དང་། །གསོག་འཇོག་བྱེད་དང་ཟ་བ་བཞི། །འཕྲོ་ཟིན་པ་ལ་ཉེས་བྱས་སུ་འགྱུར་བ་བཅུ་དགུ་ནི། ཁང་པ་ཁང་ཆེན་འཁྲུར་འཇུག་དང་། །སྲིན་བལ་འབའ་ཞིག་ཆ་གཉིས་དང་། །རིན་ལྷག་བཟོ་བྱེད་ཁབ་རལ་བདུན། །བུད་མེད་ཡན་ལག་ཏུ་དགོས་པའི་ལྟུང་བ་ཉེར་བཞི་ནི། རེག་པ་འཁྲིག་ཚིག་བསྙེན་བཀུར་སྨྱན། །འཁྲུ་ལེན་བལ་རྨེལ་ཆོས་སྟོན་དང་། །མ་བསྐོས་སོགས་དང་ཉལ་ཤོམ་གཉིས། །ཉལ་འགྲོ་སོར་བཤགས་དང་པོ་གཉིས། །ཐ་སྙད་སྦྱིན་བསྐྱེད་བཅུ་གཉིས་ནི། །གཉེན་གྱི་སྤྲད་བྱའི་བདག་པོ་དང་། །ཁང་པའི་བཙལ་བྱ་ཁང་ཆེན་ཕྱེ། །མི་ཆོས་བླ་མ་སྐུར་འདེབས་གསུམ། །ཁྱིམ་སུན་ཤེས་བཞིན་བཤེས་དོ་དང་། །ཟས་ཅུང་སྡིག་ལྟ་བརྗོད་པ་ཡི། །གོ་བྱའི་ཡུལ་ཕྱིས་བཅུ་གཉིས་སོ། །མ་རྫོགས་པ་སྤྱིས་བསྐྱེད་པ་ནི། །འདོན་དང་གནས་ངན་ལེན་དང་ཆོས། །ནུབ་ལྷག་མ་ལེན་པ་དང་ལྔ། །བུད་མེད་སྤྱིས་བསྐྱེད་པ་ནི། འཛིན་དང་འཁྲིག་ཚིག་བསྙེན་བཀུར་སྨྱན། །དབེན་པར་འདུག་དང་ཉལ་དང་དྲུག །ཁྱིམ་པས་བསྐྱེད་པ་སོ་ལྔ་དང་། །རྐུ་གསོད་ལྔ་པོ་མ་གཏོགས་པ། །བཅོལ་རྫོགས་ཕོ་ཉ་རྣམས་ཞེས་སྦྱར། །ཁྱིམ་པས་བསྐྱེད་པ་སོ་ལྔ་ལ། །ཁྱིམ་པ་ཕོ་ཡིས་བསྐྱེད་པ་ནི། །ཉལ་ཤོམ་གཉིས་དང་དམག་གསུམ་དང་། །རྐུན་མ་དང་འགྲོ་དྲུག་ཡིན་ནོ། །ཁྱིམ་པ་མོ་ཡིས་བསྐྱེད་པ་ནི། །ཆོས་སྟོན་པ་དང་ཉལ་ཤོམ་གཉིས། །ལམ་དུ་འགྲོ་དང་རྣམ་པ་བཞི། །གང་ཡང་རུང་བས་བསྐྱེད་པ་ནི། །ཁྱིམ་སུན་འབྱིན་དང་སློང་སོགས་ལྔ། །མངོན་མཚན་ཉོ་ཚོང་ལྷུང་བཟེད་ཚོལ། །འཐག་གཉིས་རས་ཆེན་བདག་གིར་བྱེད། །སྦྱོར་བཅུག་ཡང་ཡང་ཟ་བ་དང་། །འདུག་གནས་ཕྱེ་དང་གསོད་པ་དང་། །ཟན་གཅོད་འགྲོན་གཉེར་མ་སྨྲས་འགྲོ། །གྲོང་རྒྱུ་ཕོ་བྲང་འགྲོ་བ་དང་། །སོར་བཤགས་བཞི་སྟེ་ཉི་ཤུ་བདུན། །དགེ་སློང་ཕ་མས་བསྐྱེད་པ་ལ། །དགེ་སློང་ཕ་ཡིས་བསྐྱེད་པ་ནི། །མཚན་མཐུན་དགོས་པ་བཞི་བཅུ་སྟེ། །སྐྲོད་དང་ཟས་ཅུང་གདེང་མ་ལེན། །གྲལ་རིམ་ནགས་བརྟགས་བཞི་བཅུ་དྲུག །དགེ་སློང་མ་ཡིས་བསྐྱེད་པ་ནི། །འཁྲུ་དང་ལེན་དང་རྨེལ་བ་དང་། །མ་བསྐོས་སོགས་དགུ་འདུག་མ་གཏོགས། །སོ་སོར་བཤགས་པ་དང་པོ་གཉིས། །དེ་ལྟར་དེ་ནི་གཞི་བཅུ་བཞིའོ། །རྫོགས་པ་སྤྱིས་བསྐྱེད་སྐུར་འདེབས་གསུམ། །རབ་བྱུང་སྤྱིས་བསྐྱེད་རྣམ་གཉིས་ཏེ། །སྦེད་དང་མ་སྨྲས་འགྲོ་བའོ། །དགེ་ཚུལ་སྤྱིས་བསྐྱེད་བསྙིལ་བའོ། །རྫས་དང་ཡོ་བྱད་ཀྱིས་བསྐྱེད་པ་ལ། གོས་ཀྱིས་བསྐྱེད་པ་སོ་དྲུག་ནི། །འཆང་ནས་རྨེལ་འཇུག་བར་བཅུ་བདུན། །འཐག་ནས་དངོས་བསྒྱུར་བར་བདུན་དང་། །བཤེས་ངོར་ཁྲི་དང་ཆོས་གོས་གཉིས། །ཁ་དོག་སྦེད་པ་གདེང་མེད་དང་། །བརྡལ་ལ་སོགས་པ་རྣམ་ལྔའོ། །བསྐུར་དང་གཏད་པ་དངོས་བསྒྱུར་དང་། །བཤེས་ངོར་ལྷུང་བཟེད་མཚུངས་གསུང་མོད། །འཕྲོག་པ་སྦེད་པ་ཡོ་བྱད་ཙམ། །ཡིན་ལ་ཁྲི་ནི་ཁྲི་ལས་དང་། །སྣོད་སྤྱད་ལ་བརྟེན་དེ་གསུམ་དང་། །ལྷུང་བཟེད་གཉིས་དང་གདིང་བ་དང་། །རྩ་དབྱུང་ཁས་རལ་ཁྲི་རྐང་དགུ། །ཟས་ལ་བརྟེན་པ་ཉེར་གཅིག་སྟེ། །གསོག་འཇོག་སྦྱོར་བཅུག་ཡང་ཡང་གསོག །གཅེར་བུ་བདེ་དང་མགྲོན་གཉེར་དང་། །ཆང་དང་ཟས་བཅས་སོར་བཤགས་བཞི། །བྱེ་བྲག་ཚད་དང་ལྡན་པ་དགོས་པ་ནི། འབྲལ་བ་འཁྲུར་འཇུག་སློང་སོགས་བཞི། །སྲིན་བལ་ལ་སོགས་རྣམ་པ་དྲུག །དགོས་པ་རས་ཆེན་ཁྲི་གོས་བྱེད། །སྦེད་པ་གདེང་མེད་བརྡལ་སོགས་ལྔ། །དེ་ལྟར་ཉི་ཤུ་རྩ་ལྔའོ། །ཀུན་སློང་རང་ཁོ་ནའི་དོན་དུ་དགོས་པ་ནི། བླ་མ་འཁྲིག་ཚིག་བསྙེན་བཀུར་དང་། །འབྲལ་བ་གཉིས་དང་བྱིན་འཕྲོག་དང་། །གཏད་པ་མ་གཏོགས་ཉི་ཤུ་དྲུག །བླ་མ་འཕྱ་བ་སྦྱོར་བཅུག་དང་། །ཡང་ཡང་འདུག་ནས་ཕྱེ་དང་ནི། །གསོད་པ་མེད་དང་མགྲོན་གཉེར་དང་། །ཁབ་རལ་བདལ་ལ་སོགས་པ་ལྔ། །སོ་སོར་བཤགས་བཞི་གཞི་བཅུ་བརྒྱད། །མཐར་ཐུག་དོན་གོ་དགོས་པ་ནི། །བླ་མ་འཁྲིག་ཚིག་བསྙེན་བཀུར་དང་། །གཞི་མེད་བག་ཙམ་ཤེས་བཞིན་བཅུ། །འཕྱ་བ་བསྒོ་བ་ཕྱིས་གནོན་དང་། །མ་བསྐོས་ཉི་ནུབ་ཟས་ཅུང་དང་། །སྟོབ་པ་བདེ་དང་འདུན་པ་སྨྲ། །དགེ་ཚུལ་འགྱོད་པ་སྔངས་བྱེད་དང་། །གཞི་མེད་བསླབ་པ་ཉན་རྣ་དང་། །མ་གུས་ད་གདོད་སུམ་ཅུ་གསུམ། །སྦྱོར་བ་ངག་ཁོ་ནས་བྱེད་པ་ཅན་ནི། དེ་ལས་ཕྱིས་གནོན་སྤངས་པ་གཉིས། །སྡངས་བྱེད་ཉན་རྣ་མ་གུས་པ། །མ་གཏོགས་ཉི་ཤུ་རྩ་བདུན་དང་། །བསྒོ་གྱུར་བཞི་དང་འཁྲུ་བ་ནས། །སོ་སོའི་བར་དྲུག་རྨེལ་བ་དང་། །མངོན་མཚན་ཉོ་ཚོང་ལྷུང་བཟེད་ཚོལ། །རས་ཆེན་ཚོལ་དང་སྡིག་ལྟ་དང་། །མ་ལོན་པ་སྟེ་བཞི་བཅུ་བཞི། །ལུས་ངག་གང་རུང་གིས་བྱེད་པ་ཅན་ནི། བསྐུར་པ་བརྟད་པ་དངོས་བསྒྱུར་དང་། །ཕྱིས་གནོན་གོས་སྟེར་བཤམས་དཀྲུགས་དང་། །སྤངས་པ་ཉིད་དང་མ་གུས་པའོ། །ལུས་ངག་གཉིས་ཀ་དགོས་པ་ནི། །དེ་གསུམ་གསོད་སློང་ཟས་ལེན་པའོ། །བཅོལ་ཡང་རྫོགས་པ་ནི། རྐུ་དང་གསོད་པ་གཞི་དང་སྨྱན། །ཁང་པ་ཁང་ཆེན་སྲིན་བལ་དང་། །འབའ་ཞིག་ཆ་གཉིས་དྲུག་དང་གསེར། །འཐག་གཉིས་བྱིན་འཕྲོག་ས་བོན་སྤྲོད། །རིམ་ལྷག་མེ་རེག་རིན་ཆེན་རེག །ཆུ་དང་སྔངས་བྱེད་སྦེད་པ་དང་། །ས་བརྐོ་ཁབ་རལ་ལ་སོགས་བདུན། །སུམ་ཅུ་གཉིས་སྟེ་ཁྲི་གདེང་གི །འདིངས་པ་སོར་བཤགས་ཐ་གསུམ་གྱི། །ཟས་ལེན་བཅོལ་ཡང་འགྲུབ་པ་ཡིན། །ཞེས་པའོ། །གཉིས་པ་ཉམས་སུ་བླང་བའི་བསླབ་པ་ལ་གཉིས་ཏེ། སྤྱིའི་དོན་དང་། སོ་སོའི་དོན་ནོ། །དང་པོ་ལ་ལྔ་སྟེ། དབྱེ་བ་དང་། སྒྲ་འཇུག་པའི་རྒྱུ་མཚན་དང་། བསྡུ་བ་དང་། གྲངས་ངེས་དང་། གོ་རིམ་ངེས་པའོ། །དང་པོ་ནི། གཞི་བཅུ་བདུན་ཏེ་ལུང་གཞིར་སྡོམ་ནི། རབ་བྱུང་གསོ་སྦྱོང་གཞི་དང་ནི། །དགག་དབྱེ་དབྱར་དང་ཀོ་ལྤགས་དང་། །སྨན་དང་གོས་དང་སྲ་བརྐྱང་དང་། །ཀཽ་ཤམྦཱི་དང་ལས་ཀྱི་གཞི། །དམར་སེར་ཅན་དང་གང་ཟག་དང་། །སྤོ་དང་གསོ་སྦྱོང་གཞག་པ་དང་། །གནས་མལ་དང་ནི་རྩོད་པ་སྟེ། །དགེ་འདུན་དབྱེན་རྣམས་བསྡུས་པ་ཡིན། །ཞེས་གསུངས་སོ། །འོ་ན་གཞུང་དམ་པར་གཞི་བཅོ་བརྒྱད་དུ་བཤད་པ་དང་འགལ་ཞེ་ན། འདིའི་ལན་དུ་འགྲེལ་ཆུང་ལས་རབ་བྱུང་གི་གཞི་ལ་རབ་བྱུང་དང་བསྙེན་རྫོགས་དང་། གནས་ཀྱི་སྐབས་གསུམ་ཐ་དད་དུ་བྱེད་པ་ཡིན་ཞེས་པ་མི་འཐད་དེ། དེ་ལྟར་ན་གཞི་བཅུ་དགུར་འགྱུར་བའི་ཕྱིར་དང་། དེ་ལྟར་བཤད་པ་མེད་པའི་ཕྱིར། རང་ལུགས་ནི་ཀཽ་ཤམྦཱིའི་གཞི་ལ། ཕྱིར་བཅོས་ཀྱི་གཞི་དང་། ལས་བྱེད་པའི་གཞི་གཉིས་སུ་ཕྱེ་བ་ཡིན་ཏེ། ཀཽ་ཤམྦཱིའི་གཞིའི་སྡོམ་ལ། ཀཽ་ཤམ་བར་གྱི་འཐབ་ཀྲོལ་གྱིས། །དགེ་སློང་རྩོད་པ་སྣ་ཚོགས་དང་། །ཁྲིའུ་དང་རྩོད་པར་བྱེད་པ་དང་། །རིང་པོ་ལེན་གྱི་སྤྱོད་པ་དང་། །ངན་སྤོང་ལན་ཚྭ་ཁང་པ་དང་། །བསྲུང་དང་ཚལ་སྡུག་གླང་ཆེན་དང་། །མ་འགགས་པས་ནི་དེ་བྱས་དང་། །མཉན་ཡོད་དུ་ནི་ཞི་བར་བྱས། །ཞེས་པའི་སྡོམ་གྱི་རིང་པོ་ལེན་གྱི་ནས། མ་འགགས་པས་ནི་དེ་བྱས་ཀྱི་བར་ལུང་བར་མར་ཁ་འཕངས་ཏེ། དགེ་སློང་དག་སྔོན་བྱུང་བ་ཡུལ་ཀ་ཤའི་རྒྱལ་པོ་ཚངས་བྱིན་ཞེས་བྱ་བ་དང་། ཡུལ་ས་ལའི་རྒྱལ་པོ་རིང་པོ་ལེན་གཉིས་ཕན་ཚུན་རྩོད་པར་འགྱུར་ཏེ། རྒྱས་པར་ནི་ལུང་བར་མའི་ཏིང་ངེ་འཛིན་དང་ལྡན་པའི་ལེའུ་ལས་རིང་པོར་ལེན་གྱི་མདོ་འབྱུང་བ་བཞིན་ནོ། །ཞེས་བཤད་པས། དེར་ཁ་འཕངས་པ་བསྡུས་པ་ནི་ཕྱིར་བཅོས་ཀྱི་གཞི་དང་། སྡོམ་ལྷག་མ་རྣམས་ཀྱིས་བསྡུས་པ་ནི་ལས་བྱེ་བའི་གཞི་ཡིན་ལ། ད་ལྟ་ལུང་ན་དེ་ལས་མེད་ཀྱང་ཁ་འཕངས་རྣམས་ཕྱིར་བཅོས་ཀྱི་བྱེ་བྲག་ཡིན་པས་དམར་སེར་ཅན་གྱི་གཞི་དང་གཉིས་གཅིག་ཏུ་བསྡོམས་ནས་ཕྱིར་བཅོས་ཀྱི་གཞི་ཞེས་བཏགས་པ་སྟེ། རྒྱ་ཆེར་འགྲེལ་ལས། ཀཽ་ཤམྦཱི་བ་དང་དམར་སེར་ཅན་གྱི་གཞི་གཉིས་ལ་ཕྱིར་བཅོས་ཀྱི་གཞི་ཞེས་བྱ་བའི་མིང་གཞན་དུ་བྱ་སྟེ་ཕྱིར་བཅོས་པར་བྱ་བར་གང་ཟག་གི་བྱེ་བྲག་ཐམས་ཅད་བསྟན་པའི་ཕྱིར་རོ། །འཐབ་ཀྲོལ་བྱེད་པ་ལ་སོགས་པའི་གང་ཟག་ཇི་སྙེད་ཕྱིར་བཅོས་པར་བྱ་བ་དེ་དག་ཐམས་ཅད་དེ་གཉིས་ཀྱིས་ཕྱིར་བཅོས་པར་གསུངས་པས་དེའི་ཕྱིར་དོན་དང་མཐུན་པའི་མིང་བསྟན་པར་བྱ་བའི་ཕྱིར་དེ་གཉིས་ལ་ཕྱིར་བཅོས་པའི་གཞི་ཞེས་བྱ་བའི་མིང་གཞན་དུ་བྱ་སྟེ། དེས་ན་མིང་བརྗོད་པ་ཁོ་ནས་བརྡ་འཕྲོད་སླ་བར་འགྱུར་རོ་ཞེས་གསུངས་སོ། །སྲ་བརྐྱང་གི་གཞིའི་མིང་དོན་ཡན་ཆད་བརྡ་འཕྲོད་པ་སླ་ལ། ཀཽ་ཤམྦཱིའི་དགེ་སློང་གིས་ཡངས་པ་ཅན་པའི་དགེ་སློང་ལ་གནས་དབྱུང་བྱས་པས་རྩོད་པ་ཆེན་པོར་གྱུར་ནས་ལས་བྱེ་བར་གྱུར་པ་ལ་ཀཽ་ཤམྦཱིའི་གཞི་ཞེས་བཏགས་སོ། །དམར་སེར་ཅན་གྱི་གཞི་ནི། དམར་སེར་ཅན་འཐབ་ཀྲོལ་བྱེད་པ་ལ་བསྡིགས་པ་ནན་ཏུར་བྱ་བ་དང་། དེ་བཞིན་དུ་སྨད་པ་དང་། བསྐྲད་པ་དང་། ཕྱིར་འགྱེད་ནན་ཏུར་དང་། མ་མཐོང་བར་གནས་ནས་དབྱུང་། ཕྱིར་མི་འཆོས་པ་གནས་ནས་དབྱུང་། སྡིག་ལྟ་ཅན་གནས་ནས་དབྱུང་། སྤོ་བ་དང་གཞི་ནས་སྤོ་བ་དང་། ཡང་གཞི་ནས་བསླང་བའི་སྤོ་བ་དང་། མགུ་བ་དང་དབྱུང་བའི་ཆོ་ག་རྣམས་བསྟན་པ་ལ་ཐོག་མའི་མིང་ནས་སྨོས་ཏེ། དམར་སེར་ཅན་གྱི་གཞི་ཞེས་བཏགས་སོ། །གང་ཟག་གི་གཞི་ནི། གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་ནས་མ་བཅབས་པ་དང་། གང་ཟག་གཞན་ཞིག་ལྟུང་བ་གཉིས་བྱུང་ནས་ཟླ་བ་གཉིས་སུ་མ་ཤེས། ཤེས་ནས་ཟླ་བ་གཉིས་སུ་བཅབས་པ་ལ་སོགས་པ་བཅབས་པ་དང་། མ་བཅབས་པའི་བྱེ་བྲག་མང་པོ་བྱུང་བའི་ཁྱད་པར་གཏན་ལ་འབེབས་པ་ལ་གང་ཟག་བྱེ་བྲག་པའི་མིང་མ་སྨོས་པར་གང་ཟག་འབའ་ཞིག་ཅེས་སྨོས་ནས་བསྟན་པས་ན་གང་ཟག་གི་གཞི་ཞེས་བཏགས་སོ། །སྤོ་བ་དང་གཞི་ནས་སྤོ་བ་དང་། ཡང་གཞི་ནས་བསླངས་ཏེ་སྤོ་བ་དང་། མགུ་བ་སྤྱོད་ཚུལ་སྟོན་པ་ལ་ཕྱོགས་གཅིག་གི་མིང་བཏགས་ནས་སྤོ་བའི་གཞི་ཞེས་བཏགས་སོ། །གསོ་སྦྱོང་བཞག་པའི་གཞི་སྡོམ་ནི། མ་དག་གསོ་སྦྱོང་དགེ་སློང་དག །མཽའུ་འགལ་བུ་ཡིས་ཉམས་པ་དང་། །དེ་ནས་སྟོན་པས་སྨད་པ་དང་། །དགེ་འདུན་གྱིས་བོར་གསོ་སྦྱོང་ངོ་། །ཞེས་པའི་སྡོམ་གྱི་ཚིགས་སུ་བཅད་པ་འདི་ནི་ཡུལ་ཙམ་པར་གསོ་སྦྱོང་གི་མདོ་རྒྱས་པར་གསུང་སྟེ། གསོ་སྦྱོང་གི་མདོ་དེ་ཡང་ལུང་བར་མ་ཡང་དག་འགྲོ་བའི་ལེའུ་ལས་འབྱུང་ངོ་ཞེས་ཁ་འཕངས་པ་རྣམས་དང་། ལུང་འདི་ན་ཡོད་པ་ལ་ལྟུང་བ་གླེང་པའི་ཕྱིར་སྐབས་འབྱེད་གཞུག་པ་དང་། མི་འབྱེད་ན་མི་སྨྲ་བ་དང་། གདམས་ངག་གཞག་པ་དང་། གསོ་སྦྱོང་གཞག་པ་དང་། དགག་དབྱེ་གཞག་པ་དང་། གསོ་སྦྱོང་གཞག་པ་དང་། དགག་དབྱེ་གཞག་པ་ཆོས་དང་ལྡན་མི་ལྡན་གྱི་རྣམ་གཞག་རྒྱས་པར་སྟོན་པ་ལ་གསོ་སྦྱོང་གཞག་པའི་གཞི་ཞེས་ཕྱོགས་གཅིག་ནས་མིང་བཏགས་པའོ། །གནས་མལ་གྱི་གཞི་ལ་སོགས་པའི་ཚིག་གི་དོན་ནི་རྟོགས་པར་སླའོ། །གཉིས་པ་ནི། དེ་རྣམས་ལ་གཞི་ཞེས་བྱ་བ་ནི། གཞིའི་སྐད་དོད་ཝསྟུ་ཞེས་བྱ་བ་དོན་ལྔ་ལ་འཇུག་པར་བཤད་ཀྱང་། འདིར་དེ་དང་དེའི་རྟེན་བྱེད་པས་ན་གཞི་ཞེས་བྱ་སྟེ། བརྗོད་བྱ་དེ་སྟོན་པས་ན་རྗོད་བྱེད་ལ་ཡང་གཞིར་གདགས་ཏེ། གཞི་འགྲེལ་ལས། གཞི་ཞེས་བྱ་བ་ནི་རྟེན་ཏེ་དེའི་རབ་ཏུ་བྱུང་བ་ལ་སོགས་པའི་རྟེན་དུ་གྱུར་པ་ཉེ་བར་སྟོན་པའི་གཞུང་ནི་རབ་ཏུ་བྱུང་བའི་གཞི་ལ་སོགས་པའི་སྒྲར་གསུངས་སོ། །ཞེས་སོ། །གསུམ་པ་ནི། མདོ་འདི་ཐར་པ་དོན་དུ་གཉེར་བའི་གང་ཟག་རྣམས་ལ་མྱ་ངན་ལས་འདས་པའི་གཞིར་ལྷག་པ་ཚུལ་ཁྲིམས་ཀྱི་བསླབ་པ་དགོས་ཤིང་། དེ་ལེན་པ་དང་། བསྲུང་བ་དང་། ཉམས་ན་ཕྱིར་བཅོས་པའི་ཐབས་གསུམ་བསྟན་ཚུལ་སྔར་བཤད་ཟིན་ཏོ། །བཞི་པ་ནི་དོན་དེ་བསྟན་པ་ནི་དེ་ཙམ་གྱི་གྲུབ་པའི་ཕྱིར་རོ། །ལྔ་པ་ནི་ཕལ་ཆེར་ལུང་ལས་བཤད་པའི་གོ་རིམ་ཡིན་ལ། དབྱར་དགག་གཉིས་ནི་རྒྱུ་འབྲས་ཀྱི་རིམ་པ་ཡིན་ལ། གོས་དང་སྨན་ནི་གོས་ཡོ་བྱད་ཀྱི་གཙོ་བོ་ཡིན་ལ་སྨན་གཙོ་བོ་མ་ཡིན་པ་དང་། གོས་གཞི་གསུམ་སྲ་བརྐྱང་རྒྱུ་ལྟ་བུ་དང་། དགག་དབྱེ་དང་དུས་འབྲེལ་བའི་ཕྱིར་དང་པོར་བསྟན་ལ། གཉིས་པོ་ཡང་གོས་སྤྱིར་བསྟན་ལྟ་བུ་ཡིན་ལ་ཀོ་ལྤགས་དམིགས་བསལ་ཡིན་པའི་ཕྱིར་རོ། །ལས་ཀྱི་གཞི་ནི་ཐམས་ཅད་ལ་དགོས་པའི་ཕྱིར་དབུས་སུ་བསྟན་ནོ། །རྩོད་པའི་གཞི་གསུམ་བརྗོད་བྱ་མཐུན་པས་ཕྱོགས་གཅིག་ཏུ་བསྟན་ལ་འཁོར་ལོ་བྱེ་བ་རྗོད་བྱ་ཉུང་བའི་ཕྱིར་རྩོད་གཞིའི་གོང་དུ་བསྟན་ནོ། །གནས་མལ་ནི་ཐམས་ཅད་བྱ་བའི་རྟེན་ཡིན་པས་ཐ་མར་བསྟན་ནོ། །གཉིས་པ་སོ་སོའི་དོན་ལ་ལྔ་སྟེ། བསླབ་པ་ཡོངས་སུ་སྦྱོང་བའི་དང་། བདེ་བར་གནས་པའི་རྐྱེན་བསྟེན་པའི་དང་། བྱ་བའི་ཐབས་ལས་ཀྱི་དང་། གསོ་བ་ཕྱིར་བཅོས་པའི་དང་། དེ་ཐམས་ཅད་ཀྱི་རྟེན་གནས་མལ་གྱི་གཞིའོ། །དང་པོ་ལ་གསུམ་སྟེ། གསོ་སྦྱོང་གི་སྒོ་ནས་དང་དབྱར་གྱི་སྒོ་ནས་དང་། དགག་དབྱེའི་སྒོ་ནས་བསླབ་པ་ཡོངས་སུ་སྦྱོང་བའོ། །དང་པོ་ལ་གཉིས་ཏེ། ཞི་གནས་ཀྱི་གསོ་སྦྱོང་དང་། མཐུན་པའི་གསོ་སྦྱོང་ངོ་། །དེ་སྐད་དུ་ཡང་ཀརྨ་ཤ་ཏམ་ལས། གསོ་སྦྱོང་ཞེས་བྱ་བ་ནི་བསླབ་པ་གསུམ་པོ་དག་གསོ་ཞིང་སྦྱོང་བར་བྱེད་པ་དག་སྟེ། དེ་ཡང་རྣམ་པ་གཉིས་ཏེ། མཐུན་པའི་གསོ་སྦྱོང་དང་། ཞི་གནས་ཀྱི་གསོ་སྦྱོང་ངོ་ཞེས་སོ། །ཞི་གནས་ཀྱི་གསོ་སྦྱོང་ལ་ལྔ་སྟེ། གང་དུ་སྒྲུབ་པའི་གནས། གང་གིས་སྒྲུབ་པའི་རྟེན། གང་བསྒྲུབ་པའི་དངོས་པོ། ཇི་ལྟར་སྒྲུབ་པའི་ཚུལ། དེ་ལྟར་བསྒྲུབས་པའི་དགོས་པའོ། །དང་པོ་ནི། ཉིན་མོ་སྐྱེ་བོའི་རྒྱུ་འགྲུལ་དང་། མཚན་མོ་སྒྲའི་རླག་ཅོར་དང་གཅན་ཟན་དང་ཆོན་རྐུན་པ་ལ་སོགས་པས་གནོད་པ་མེད་ཅིང་། ལོག་འཚོ་དང་བྲལ་བའི་ཡོ་བྱད་མོད་ཅིང་རྣལ་འབྱོར་དང་མཐུན་པའོ། །གཉིས་པ་ནི། ཚུལ་ཁྲིམས་རྣམ་པར་དག་པ་དང་ལྡན་ཞིང་སྡེ་སྣོད་ལ་ཐོས་བསམ་གྱིས་རྒྱུད་སྦྱངས་པ། ལུས་འདུ་འཛི་ལས་བསྲིང་བ་དང་སེམས་རྣམ་རྟོག་ལས་བསྲིང་བ་གཉིས་དང་ལྡན་པ། འདོད་པ་ཆུང་ཞིང་། ཆོག་ཤེས་པ། ཐར་པ་དོན་དུ་གཉེར་བའོ། །ཇི་སྐད་དུ་མཛོད་ལས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་སོ། །གསུམ་པ་ནི། ཞི་གནས་དང་ལྷག་མཐོང་གཉིས་ཡིན་ལ། དེ་ཡང་དང་པོ་ཞི་གནས་སྒྲུབ་དགོས་ཏེ། ཞི་གནས་དང་ལྡན་པའི་ལྷག་མཐོང་ནི། ཉོན་མོངས་པ་སྤོང་བ་ལ་མཐུ་ཆེ་བ་ཡིན་པའི་ཕྱིར། འདི་ལ་དགོངས་ནས། སྤྱོད་འཇུག་དུ། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱས་ནས། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ། །ཅེས་སོ། །ཞི་གནས་སྒོམ་པ་ལ་གཉིས་ཏེ། འདོད་ཆགས་ཤས་ཆེ་བའི་གང་ཟག་གིས་མི་སྡུག་པ་དང་། རྣམ་རྟོག་ཤས་ཆེ་བའི་གང་ཟག་གིས་དབུགས་དབྱུང་རྔུབ་སྒོམ་ཚུལ་གཉིས་མཛོད་ལས་བཤད་ལ། དེ་རེ་རེ་ཡང་སེམས་གནས་པའི་ཐབས་དགུ་དགུའི་སྒོ་ནས་ཉམས་སུ་བླང་བར་བྱ་སྟེ། སེམས་གནས་དགུ་པའི་ཚེ་ལུས་སེམས་ཤིན་ཏུ་སྦྱངས་པའི་བདེ་བ་ཁྱད་པར་ཅན་སྐྱེས་པའི་ཞི་གནས་མཚན་ཉིད་པ་ཐོབ་པར་མདོ་སྡེ་རྒྱན་ལས་བཤད་པ་ལྟར་ཁས་བླང་བར་བྱའོ། །ལྷག་མཐོང་སྒོམ་པའི་ཚུལ་ནི། ཞི་གནས་གྲུབ་པར་གྱུར་པ་ཡིས། །དྲན་པ་ཉེར་གཞག་བསྒོམ་པར་བྱ། །ཞེས་གསུངས་པ་ལྟར་ཞི་གནས་གྲུབ་ནས་ལྷག་མཐོང་དྲན་པ་ཉེར་གཞག་ལ་སོགས་པ་བྱང་ཕྱོགས་སོ་བདུན་ལ་འཇུག་སྟེ། དེ་ཡང་། མཚན་ཉིད་རབ་ཏུ་རིག་པ་ཡིད་ལ་བྱེད་པ་སོགས་ཡིད་བྱེད་བདུན་གྱི་སྒོ་ནས་འཇུག་སྟེ། ཟད་པ་ཤེས་པ་ཐོབ་པའི་ཚེ་སྦྱོར་བ་མཐའི་འབྲས་བུ་ཡིད་ལ་བྱེད་པ་སྐྱེས་པ་ཡིན་པས་ཐར་པ་ཐོབ་པ་ཡིན་ནོ། །ལྔ་པ་ནི། དེ་ལྟ་བུའི་ཚུལ་གྱིས་སྤང་བྱ་རྣམས་སྤངས་ནས་མྱ་ངན་ལས་འདས་པ་འཐོབ་པར་འགྱུར་བའོ། །འདིར་སྤོང་བ་པའི་ཞལ་ཏ་བས་བསྡུ་བའི་ཕྱིར་གཎྜི་བརྡུང་ངོ་། །ཞེས་བཤད་པའི་གཎྜིའི་རྒྱུ་དང་ཚད་ལ་སོགས་པ་ཇི་ལྟ་བུ་ཞེ་ན། རྒྱུ་ནི། གཎྜིའི་མདོ་ལས། ཙནྡན་བིལ་བ་པ་ལ་ཤ །ཨ་ཤྭད་ཐ་དང་ཙནྡན་དམར། །རྒྱ་སྟར་ཧ་ལ་ཀིངྴུ་ཀ །ཤིཾ་ཤ་པ་དང་ཧ་མ་ལ། །ཨ་སྨྲ་སྟར་བུ་སྐྱུ་རུ་ར། །ཏནྟི་ས་ར་ཨ་ཤྭ་ཀམ། །འདི་དག་ཐམས་ཅད་མེད་ན་ཡང་། །ཝོ་སེ་ལ་ནི་འབད་དེ་བྱ། །ཞེས་དང་། ཚད་ཡང་། ཚད་ནི་ཆུ་རུ་སོར་ཚད་ཀྱི། །བརྒྱད་ཅུ་རྩ་བཞི་ཉིད་བྱ་ཞིང་། །ཞེང་དུ་སོར་དྲུག་བྱ་བ་སྟེ། །དཔངས་སུ་ཡང་ནི་གཉིས་བྱའོ། །སོར་མོའི་ཚིགས་ཀྱི་ཚད་དག་གིས། །ཟུར་བཞི་ཚད་ནི་གཉིས་པ་ཡིན། །ལེགས་མཉམ་ཉིད་དང་ཤིན་ཏུ་གསལ། །རྩེ་གཉིས་སྦལ་པའི་མགོ་བཞིན་ནོ། །དེ་ནས་རྡུང་བར་བྱེད་པ་ཡང་། །ཤིང་དེ་ཉིད་ལས་འབད་དེ་བྱ། །སོར་བཅུ་གཉིས་ཀྱི་ཚད་དག་ལ། །ཟླུམ་ཞིང་རྩེ་གཉིས་ནེའུ་ལེའི་མགོ །ཆང་གཟུང་ཚད་ཀྱང་དེ་བཞིན་ནོ། །ཤིན་ཏུ་འཇམ་དང་རྩིབས་མཉམ་པར། །ཞེས་སོ། །གཎྜི་དེ་བརྡུང་བའི་གནས་ནི། ཁང་སྟེང་གིས་མཚོན་པའི་ས་ཕྱོགས་མཐོ་བ་ནས་སོ། །གྲངས་ཇི་ཙམ་ཞེ་ན། ཚོགས་པ་ཆེན་པོའི་ཚེ། དགེ་འདུན་བསྡུ་བའི་ཕྱིར་ནི་རྒྱུད་གསུམ་དང་རྒྱུད་དེ་སྙེད་ཀྱི་ཏོག་སྟེ་རྒྱུད་གསུམ་ཏོག་གསུམ་མོ། །དེ་ཡང་རྒྱུད་གསུམ་ནི། ཐོག་མར་གཅིག་ནས་བཟུང་སྟེ་བཅོ་བརྒྱད་ཀྱི་བར་དུ་སྒྲ་ཇེ་ཆེར་གཏོང་། དེ་ནས་བཅུ་བདུན་གྱི་བར་སྒྲ་ཇེ་ཆུང་དུ་གཏོང་བ་ནི་རྒྱུད་གཅིག་ཡིན་ལ། རྒྱུད་གཉིས་པ་དང་གསུམ་པ་ནི་དེ་དང་འདྲའོ། །དེ་ལྟར་ན་རྒྱུད་རེ་རེ་ལ་སུམ་ཅུ་རྩ་ལྔ་རྩ་ལྔ་སྟེ་བརྒྱ་དང་ལྔ། མཇུག་གི་ཏོག་གསུམ་བསྣན་པས་བརྒྱ་རྩ་བརྒྱད་དུ་འགྱུར་རོ། །གཎྜི་བརྡུང་ཚུལ་ཐམས་ཅད་ཀྱི་ཐོག་མར་དཀོན་མཆོག་གསུམ་ལ་ཕྱག་འཚལ་བ་དང་། ཤངས་འཚལ་ལན་གསུམ་སྔོན་དུ་འགྲོ་དགོས་པ་ཡིན་ནོ། །མཇུག་ཏུ་སྒྲ་ཆེན་པོ་གསུམ་རྒྱུད་གསུམ་པོ་དེའི་ཏོག་དང་འདྲ་བ་ཡིན་པས་ན་ཏོག་ཅེས་བྱ་སྟེ་མཆོད་རྟེན་གྱི་ཏོག་བཞིན་ནོ། །ཏོག་ཅེས་པ་སྒྲའི་གདངས་ལ་འདོད་པ་ནི་ཤིན་ཏུ་ནོར་ཏེ། བོད་ཡིག་གི་བརྡ་དག་ཀྱང་འཁྲུག་འདུག་པའི་ཕྱིར་རོ། །ཏོག་མེད་པའི་རྒྱུད་རྣམས་ལ་བྱི་བོ་ཞེས་བྱ་སྟེ། ཏོག་མེད་ཀྱི་མཆོད་རྟེན་ལ་མཆོད་རྟེན་བྱི་བོ་ཞེས་གྲགས་པ་བཞིན་ནོ། །ལུང་ཁ་ཅིག་ལས་སྔར་བཤད་པའི་རྒྱུད་གསུམ་དང་ཏོག་གཉིས་ཞེས་བཤད་དོ། །ཚངས་པར་མཚུངས་པ་ཤི་བ་ལ་འཕྲག་པ་སྟེ་ཕུང་པོ་དབྱུང་བའི་དོན་དུ་རྒྱུད་གཅིག་ཏོག་མེད་པའི་བྱི་བོའོ། །ལུང་ཁ་ཅིག་ལས་ནི་རྒྱུད་གཅིག་དང་ཏོག་གཅིག་གི་ཞེས་བཤད། སྤོང་བ་པ་བསྡུ་བའི་དོན་དུ་འཁར་གསིལ་ལོ། །ལུང་ཁ་ཅིག་ལས་ནི་དེའི་དོན་དུ་གཎྜི་ཆུང་ངུ་བརྡུང་ཞེའོ། །སེར་བ་ལ་སོགས་པའི་གནོད་པ་བྱུང་བ་ལ་ནི། གནོད་པ་སེལ་བ་ལ་ཇི་ཙམ་གྱིས་ཆོག་པ་བརྡུང་ངོ་། །དགེ་འདུན་ཟས་ཀྱི་ཕྱིར་འདུ་བའི་དོན་དུ་ནི་གཎྜི་དང་གཎྜི་ཆུང་བ་གཉིས་ཀ་བརྡུང་ངོ་། །ཇི་ལྟར་ཞེ་ན་དེ་གཉིས་བར་དུ་བཅད་དེའོ། །ཇི་ཙམ་དུ་ཞེ་ན། རྒྱང་པ་སྟེ་ཐོག་མར་ཆུང་ངུ་བརྡུང་སྟེ་ཁང་སྐྱོང་དང་གཙང་སྦྱོར་ལ་སོགས་པས་སངས་རྒྱས་མཆོད་པ་དང་། ལྷུང་བཟེད་བཀྲུ་བ་ལ་སོགས་པའི་ལས་བྱས་ཟིན་པ་ཙམ་དེའི་འོག་ཏུ་ཆེན་པོ་བརྡུང་བའོ་ལྷག་མ་ནི་གོ་བར་ཟད་དོ། །གཎྜི་ཆུང་ངུ་ནི་རྒྱུད་གཅིག་ཏོག་གཅིག་པ་ཡིན་ལ། ཆེན་པོ་ནི་རྒྱུད་གསུམ་ཏོག་གསུམ་པ་ཡིན་ནོ་ཞེས་བླ་མ་གསུང་ངོ་། །ཐེག་ཆེན་གྱི་སྡེ་སྣོད་ལས་ནི་གཎྜི་ལ་ཡུམ་ཆེན་མོའི་འདུ་ཤེས་ཉེ་བར་གཞག་པ་དང་། ཕན་ཡོན་ཡང་། རྒྱལ་པོ་གང་ཚེ་ཡུལ་འཁོར་དུ། །གཎྜི་འདི་ནི་གྲག་གྱུར་པ། །དེར་ནི་དཔལ་དང་གྲགས་པ་དང་། །འདོད་པ་འདི་ནི་ལོངས་སྤྱོད་འགྱུར། །ཞེས་སོགས་རྒྱས་པར་གསུངས་སོ། །གཉིས་པ་མཐུན་པའི་གསོ་སྦྱོང་ལ་ལྔ་སྟེ། བཅུ་བཞི་པ་དང་། བཅོ་ལྔ་པ་དང་། བཀྲ་ཤིས་ཀྱི་དང་། གནོད་པ་ལས་བཟློག་པའི་དང་། དགེ་འདུན་བྱེ་བ་འདུམས་པའི་གསོ་སྦྱོང་ངོ་། །འདི་དག་ལ་བཞི་ལས། གང་དུ་བྱ་བའི་གནས། གང་གི་ཚེ་བྱ་བའི་དུས། གང་དག་བྱ་བའི་ཚོགས་པ། ཇི་ལྟར་བྱ་བའི་ཆོ་གའི་ཁྱད་པར་རོ། །དང་པོ་ནི། ལས་ཐམས་ཅད་མཚམས་ཀྱི་ནང་དུ་བྱ་དགོས་ལ། དེ་ཡང་གནས་ལ་བློ་མཐུན་བྱས་ལ་མ་ཞིག་པ་གཅིག་དགོས་ཏེ། གཞན་དུ་ན་མི་ཆགས་པའི་ཕྱིར། གསོ་སྦྱོང་ལྟ་བུ་གཅིག་ལ་གནས་ལ་བློ་མཐུན་བྱས་ལ་མ་ཞིག་པ་གཅིག་ཡིན་ན། དེར་ལས་གཞན་བྱ་བ་ལ་ཡང་བློ་མཐུན་བྱ་མི་དགོས་ཏེ། ལས་གཞན་གྱི་གནས་ཀྱང་དེ་ཡིན་ནོ། །ཞེས་གསུངས་པའི་ཕྱིར། མཚམས་ལ་ལས་ཀྱི་མཚམས་དང་། རང་བཞིན་གྱི་མཚམས་གཉིས། དང་པོ་ལ་མཚམས་པོ་ཆེ་དང་། མཚམས་བུ་ཆུང་དཀྱིལ་འཁོར་བ་གཉིས་ཡོད་ལ། རང་བཞིན་གྱི་མཚམས་ནི་རྩིག་པ་ལ་སོགས་པས་བསྐོར་བའོ། །གཉིས་པ་ནི། བཅོ་ལྔ་པ་དང་བཅུ་བཞི་པ་བྱ་བའི་དུས་གཉིས་བཤད་པར་བྱ་སྟེ། ཕྱི་མ་གསུམ་གྱི་དུས་ནི་སྐབས་སུ་བབ་པའི་དུས་དེ་དང་དེར་བྱ་བ་གོ་སླ་བའི་ཕྱིར་རོ། །སྤྱིར་ལོ་གཅིག་ལ་གསོ་སྦྱོང་ཉི་ཤུ་རྩ་བཞི་ཡོད་དོ། །དགེ་སློང་གི་ལོ་དྲི་བར་གསོ་སྦྱོང་དུ་ཡོད། ཉི་ཤུ་རྩ་བཞི་སྟེ་དགུན་ཟླ་འབྲིང་པོ་དང་། དཔྱིད་ཟླ་རྭ་བ་དང་། ཐ་ཆུང་དང་། དབྱར་ཟླ་འབྲིང་པོ་དང་། སྟོན་ཟླ་རྭ་བ་དང་ཐ་ཆུང་རྣམས་ཀྱི་མར་གྱི་ངོའི་གསོ་སྦྱོང་རྣམས་ནི་བཅུ་བཞི་པའོ། །ལྷག་མ་རྣམས་ནི་བཅོ་ལྔ་པའོ། །ཞེས་གསུངས་ཏེ། ཕྱེད་ཚེས་པའི་ལུགས་ཡིན་ནོ། །མཛོད་འགྲེལ་ལས། དགུན་དང་དཔྱིད་དང་དབྱར་རྣམས་ཀྱི། །ཟླ་བ་ཕྱེད་དང་གཉིས་འདས་ཤིང་། །ཟླ་བ་ཕྱེད་ནི་ལུས་པ་ན། །མཁས་པས་ཞག་མི་ཐུབ་པ་དོར། །ཞེས་པ་དང་། འདིར་ཡང་དུས་ཚིགས་རྣམས་ཀྱི་ཟླ་བ་ཕྱེད་ལུས་པ་ཉིད་ལའོ་ཞེས་དང་། རྒྱལ་སྲས་སུ་གསུང་རབ་ལས་ནི་དུས་གསུམ་ཁོ་ན་ཡིན་གྱི། འཇིག་རྟེན་པའི་ལྟར་དྲུག་ནི་མ་ཡིན་ཏེ། དགུན་སྟོད་ནི་གྲང་བར་འདྲ་བའི་ཕྱིར་དགུན་དུ་བཤད་དོ། །སོ་ཀ་ནི་ཚ་བར་འདྲ་བའི་ཕྱིར་དཔྱིད་དུ་བཤད། སྟོན་ནི་ཆར་འབབ་ཏུ་འདྲ་བའི་ཕྱིར་དབྱར་དག་ཡིན་ནོ་ཞེས་གསུངས་ཏེ། དེ་དག་གི་དོན་ནི། འདིར་དུས་ཚིགས་གསུམ་སྟེ། དགུན་དང་། དཔྱིད་དང་། དབྱར་གྱི་དུས་སོ། །དང་པོ་ལ་དགུན་དང་དགུན་སྟོད་གཉིས། གཉིས་པ་ལ་དཔྱིད་དང་སོས་ཀ་གཉིས། གསུམ་པ་ལ་དབྱར་དང་སྟོན་གྱི་དུས་གཉིས་སུ་ཕྱེ་ནས་དེ་དག་གི་ཟླ་བ་ཕྱེད་དང་གཉིས་འདས་ནས་ཟླ་བ་ཕྱེད་ལུས་པ་ན་གསོ་སྦྱོང་བཅུ་བཞི་པ་འབྱུང་བར་བསྟན་ཏེ། ཟླ་བའི་ངོས་འཛིན་ཡང་ཚིག་ལེར། ཁ་བ་སོས་ཀ་དབྱར་རྣམས་ཀྱི། །ཟླ་བ་གཉིས་དང་བཞི་ཡི་ནི། །མར་ངོ་ལ་ནི་བཅུ་བཞི་པའི། །གསོ་སྦྱོང་སྡོམ་བརྩོན་དག་གིས་བྱ། །ས་ག་དང་ནི་ཆུ་སྟོད་དང་། །དེ་བཞིན་ཁྲུམས་སྨད་སྨིན་དྲུག་ཅན། །རྒྱལ་དང་དབོ་ཞེས་བྱ་བ་ཉིད། །དྲུག་པོའི་མར་ངོ་བཅུ་བཞིར་བརྗོད། །ཅེས་དང་། དགེ་ཚུལ་གྱི་ལོ་དྲི་བར། རྒྱལ་དང་དབོ་དང་ས་ག་ཅན། །ཆུ་སྟོད་ཁྲུམས་སྨད་སྨིན་དྲུག་ཅན། །འདི་རྣམས་ཀྱི་ནི་ནག་པོའི་ཕྱོགས། །ཟླ་ཕྱེད་གསོ་སྦྱོང་བཅུ་བཞི་པ། །ཞེས་གསུངས་ཏེ། སྟོན་ཟླ་ཐ་ཆུང་སྨིན་དྲུག་གིས་ཉ་བའི་ཚེས་བཅུ་དྲུག་ནི་མར་ངོ་སྔོན་འགྲོའི་དབང་དུ་བྱས་པའི་དགུན་ཟླ་རྭ་བ་མགོའི་ཟླ་བའི་ཚེས་གཅིག་ཡིན་ལ། དེ་ནས་ཟླ་བ་ཕྱེད་དང་གཉིས་འདས་ནས་ཟླ་བ་ཕྱེད་ལུས་པའི་དུས་ནི་རྒྱལ་གྱི་ཟླ་བའི་གནམ་སྟོང་ཡིན་པས་དེར་ཞག་མི་ཐུབ་གཅིག་འབྱུང་ཞིང་། དེ་ནས་ཟླ་བ་ཕྱེད་དང་གཉིས་འདས་ནས་ཕྱེད་ལུས་པའི་དུས་ནི་དབོའི་ཟླ་བའི་གནམ་སྟོང་ཡིན་པས། ཞག་མི་ཐུབ་འབྱུང་བ་སོགས་རིགས་པས་དཔྱད་པས་འགྲུབ་སྟེ། འདིས་ལོ་འགོ་མགོ་ཟླ་ནས་འཛིན་པ་ཡང་གྲུབ་བོ། །དུས་ཚིགས་དྲུག་པོ་དེ་ལ་གསོ་སྦྱོང་བཅུ་བཞི་པ་བྱ་བར་བཤད་པས། ལྷག་མ་བཅོ་བརྒྱད་པོ་དེ་གསོ་སྦྱོང་བཅོ་ལྔ་པ་ཡིན་པར་གྲུབ་སྟེ། གསོ་སྦྱོང་བྱའོ། །ཚེས་བཅོ་ལྔ་ལའོ། །ཞེས་གསུངས་པའི་ཕྱིར། གསོ་སྦྱོང་མི་ཐུབ་པ་དྲུག་པོ་དེ་ཚེས་བཅོ་ལྔ་ལ་བྱེད་པ་ཡིན་ཀྱང་། དེ་ལ་བཅུ་བཞི་པ་ཞེས་བརྗོད་པའི་རྒྱུ་མཚན་ཡོད་དེ། གསོ་སྦྱོང་སྔ་མ་བྱས་པའི་ཉིན་མོ་ནས་འདིའི་བར་ལ་ཉི་མ་གཅིག་ཆད་པས་ཞག་བཅུ་བཞི་ལས་མེད་པའི་ཕྱིར་རོ། །ཊཱི་ཀ་ལས་འདི་ལྟར་ཚེས་གཅིག་ནས་བཅོ་ལྔའི་བར་གྱི་ཉི་མ་གང་ཡང་རུང་བ་ལས་ཉི་མ་གཅིག་ཆད་པས་སྤྱིར་ཞག་བཅུ་བཞི་ཡོད་པའི་ཕྱིར་འཇིག་རྟེན་པའི་དབང་དུ་བྱས་ནས་བཅོམ་ལྡན་འདས་ཀྱིས་ཀྱང་སོ་སོ་ཐར་པའི་མདོ་ལས་གསོ་སྦྱོང་བཅུ་བཞི་པ་ཞེས་གསུངས་པར་ཟད་ཀྱི། དངོས་སུ་ན་ཟླ་བའི་ངོ་དེའི་ཚེས་གྲངས་གང་ལ་ཉི་མ་གཅིག་ཆད་པ་དེ་ཉིད་ས་སྟོང་དུ་དོར་བར་ཟད་ཀྱི། གསོ་སྦྱོང་ནི་ཉི་མ་འདི་ལ་ཆད་པ་མ་ཡིན་ལ། གསོ་སྦྱོང་བཅུ་བཞི་པ་ཞེས་བྱ་བའི་ཉི་མ་དེ་ཉིད་ཚེས་བཅོ་ལྔ་པ་ཡིན་པའི་ཕྱིར་རོ་ཞེས་དང་། བམ་ལྔར་གསོ་སྦྱོང་ཉི་ཤུ་རྩ་བཞི་ཡོད་དེ། དེ་དག་ཚེས་གྲངས་ཀྱི་ཡང་དག་པ་ལ་ལྟོས་ནས་ཐམས་ཅད་གསོ་སྦྱོང་བཅོ་ལྔ་པ་ཡིན་ནོ། །འཇིག་རྟེན་པའི་ཐ་སྙད་ཀྱི་དུས་ལ་ལྟོས་ནས་ནི་དྲུག་ནི་གསོ་སྦྱོང་བཅུ་བཞི་པ་ཡིན་ཏེ་ཞེས་གསུངས་པའི་ཕྱིར། ཁ་ཅིག་འདི་ལ་བརྟེན་ནས་གསོ་སྦྱོང་ཉི་ཤུ་རྩ་བཞི་པོ་ཐམས་ཅད་གསོ་སྦྱོང་བཅོ་ལྔ་པ་ཡིན་ནོ། །ཞེས་ཟེར་བ་ནི་མི་རིགས་ཏེ། འོ་ན་གསོ་སྦྱོང་བཅུ་བཞི་པ་གཞི་མ་གྲུབ་པར་ཐལ། དམ་བཅའ་དེའི་ཕྱིར། འདོད་ན། ཟླ་ཕྱེད་གསོ་སྦྱོང་བཅུ་བཞི་པ། །ཞེས་གསུངས་པ་དང་འགལ་ལོ། །འོ་ན་ལོ་གཅིག་ལ་ཞག་མི་ཐུབ་དྲུག་འབྱུང་བའི་རྒྱུ་མཚན་ཅི་ཡིན་ཞེ་ན། ཚེས་ཞག་གིས་ཉིན་ཞག་གི་དོད་མ་ཐུབ་པའི་རྒྱུ་མཚན་གྱིས་ཡིན་ཏེ། ཉིན་ཞག་ནི་ཐམས་ཅད་དུ་ཡུད་ཙམ་སུམ་ཅུ་ཚང་བ་ཡིན་ལ། ཚེས་ཞག་ཡུད་ཙམ་ཕྱེད་དང་སུམ་ཅུ་ཙམ་རེ་ལ་འཇོག་པའི་ཕྱིར། འདི་ལ་སྤྱིར་ཞག་ནི་གསུམ་སྟེ་ཚེས་ཞག་ཉིན་ཞག་ཁྱིམ་ཞག་གོ །དང་པོ་ནི། ཟླ་བ་འཕེལ་འགྲིབ་ལ་ཆ་སུམ་ཅུར་བྱས་པའི་ཆ་གཅིག་དང་། གཉིས་པ་ནི། ཚེས་གཅིག་གི་ནམ་ལངས་པ་ནས་ཚེས་གཉིས་ཀྱི་ནམ་ལངས་ཁའི་བར་ལྟ་བུའོ། །གསུམ་པ་ནི། ལུག་གླང་འཁྲིག་པ་ཀར་ཀ་ཊ། །སེངྒེ་བུ་མོ་སྲང་སྡིག་པ། །གཞུ་དང་ཆུ་སྲིན་བུམ་པ་ཉ། །ཞེས་པའམ་ཁྱིམ་རེ་རེ་ཉི་མ་ཅི་ཙམ་གནས་པའི་སུམ་ཅུ་ཆ་གཅིག་གོ །དེ་ཡང་ལོ་གཅིག་ལ་ཉིན་ཞག་སུམ་བརྒྱ་དང་དོན་གཅིག ཚེས་ཞག་སུམ་བརྒྱ་རེ་ལྔ། ཁྱིམ་ཞག་སུམ་བརྒྱ་དྲུག་ཅུ་ཡོད་དོ། །དེས་ན་ཉིན་ཞག་པས་ཚེས་ཞག་ཡུད་ཙམ་ཕྱེད་ཕྱེད་ཀྱིས་མྱུར་བར་འདའ་བས་ཚེས་ཞག་དྲུག་ཅུ་ནས་ཉིན་ཞག་ང་དགུ་ཡིན་པས་ཞག་མི་ཐུབ་གཅིག་འབྱུང་ངོ་། །གསོ་སྦྱོང་བཅོ་ལྔ་པ་ལ་ཡར་ངོའི་གསོ་སྦྱོང་བཅུ་གཉིས་དང་། མར་ངོའི་གསོ་སྦྱོང་དྲུག་ཡོད་པ་དུས་གང་ལ་འབྱུང་བ་ནི་དཔྱད་པས་ཤེས་སོ། །གསོ་སྦྱོང་བྱའོ། །ཟླ་བ་ཕྱེད་ཕྱེད་ཀྱི་ཚེས་བཅོ་ལྔ་ལའོ། །ཞེས་དང་། ཉིན་ཞག་གིས་མི་ཆོག་པར་བྱའོ། །དུས་ཚིགས་རྣམས་ཀྱི་ཟླ་བ་ཕྱེད་ལུས་པ་ཉིད་ནའོ། །ཞེས་པའི་དོན་བཤད་ཟིན་ཏོ།། །།གསུམ་པ་ནི་རབ་ཏུ་བྱུང་བའི་སྡེ་ལྔ་ཆར་རོ། །བཞི་པ་ལ་སྦྱོར་དངོས་མཇུག་གསུམ་ལས། སྦྱོར་བ་ལ་སྟན་ཐབས་ཉམས་པར་མི་བྱ་བ་དང་། ཆོས་བཤད་ཉན་ཉམས་སུ་མྱོང་བར་བྱ་བ་དང་། རང་གཞན་གྱི་ལྟུང་བ་ཕྱིར་བཅོས་པ་དང་གསུམ། དང་པོ་ནི། ཕྱག་དར་བྱ་བ་དང་། སྟན་འདིང་བ་དང་། གཎྜི་བརྡུངས་ཏེ་འདི་ཅིའི་ཕྱིར་ཞེས་འདྲི་བ་ལ། གསོ་སྦྱོང་གིའོ་ཞེས་ལན་བཏབ་པའོ། །གཉིས་པ་ནི། གཙུག་ལག་ཁང་གི་བདག་པོ་དང་། གཙུག་ལག་ཁང་གི་ལྷ་རྣམས་ཀྱི་དོན་དུ་མདོ་འདོན་པར་བསྐུལ་ནས། ལྷ་མི་ཀུན་ཆོས་ཉན་པ་ལ་བསྐུལ་བའི་ཕྱིར་དུ་ཆོས་བསྒྲགས་པའི་མདོ་ཚིགས་སུ་བཅད་པ་བཞི་པ་འདོན། དེ་ནས་ཐོག་མར་ཕྱག་འཚལ་བའི་རྒྱུད། བར་དུ་མདོ་འདོན་པའི་རྒྱུད། ཐ་མར་བསྔོ་བའི་རྒྱུད་གསུམ་གྱིས་ཚུལ་ཁྲིམས་རྣམ་པར་དག་པའི་མདོ་འདོན་པ་ཕྱག་ལེན་ལ་མཛད་དོ། །གསུམ་པ་ལ་གསུམ་སྟེ། རང་གི་དང་། གཞན་གྱི་དང་། གཉིས་ཀའི་ལྟུང་བ་ཕྱིར་བཅོས་པའོ། །དང་པོ་ནི། གསོ་སྦྱོང་སྔ་མ་འདས་ཚུན་ཆད་རང་ལ་ལྟུང་བ་བྱུང་མ་བྱུང་ལེགས་པར་བརྟགས་ལ། བྱུང་བར་ཤེས་ན་བསྡམ་བྱ་རྣམས་བསྡམས་ལ། བཤགས་པར་ནུས་པ་རྣམས་བཤགས། བཤགས་པར་མི་ནུས་པ་རྣམས་ཀྱི་ལྟུང་བ་རྣམས་བྱིན་གྱིས་བརླབས་ལ་ལས་གྲལ་དུ་འདུ། འདུས་ནས་དྲན་ན་དྲུང་ན་མོ་ལ་བྱིན་གྱིས་བརླབ་ལས་བྱེད་པས་དྲན་ན་ཡིད་ཀྱིས་བྱིན་གྱིས་བརླབ་བོ། །གཉིས་པ་ནི། དེའི་ཚེ་རང་གཅིག་པུ་ལྟུང་བ་དང་མི་ལྡན་པར་ཤེས་ན། གྲོགས་བཀའ་བློ་བདེ་ཞིང་ཤེས་པ་གཅིག་ལ་བསྐུལ་ལ། ཀུན་གྱིས་མཐོང་བར་ཕྱིར་བཅོས་བྱེད་དུ་གཞུག དེའི་ཐབས་ཀྱིས་གཞན་ལའང་བསྐུལ་མ་བྱའོ། །གསུམ་པ་ནི། དེའི་ཚེ་རང་གཞན་ཐམས་ཅད་ལྟུང་བ་མཐུན་པར་གྱུར་ན། དགེ་སློང་གཅིག་ནས་གཞན་དུ་ལྟུང་བ་ཕྱིར་བཅོས་སུ་བཏང་ལ། དེའི་མདུན་དུ་ཕྱིར་བཅོས་བྱ་མ་གྲུབ་ན་བྱིན་གྱིས་བརླབ་བོ། །གཉིས་པ་དངོས་གཞི་ནི། གནས་བརྟན་གྱིས་སོ་སོ་ཐར་པའི་མདོ་འདོན་པར་བྱ་བ་ཡིན་ལ། འདིར་གདོན་པར་བྱ་བ་ནི་ལྔ་སྟེ། གླེང་གཞི་དང་། ཕམ་པ་དང་། ལྷག་མ་དང་། མ་ངེས་པ་དང་། ལྟུང་བྱེད་ཀྱི་སྡེ་ཚན་རྣམས་སུ་ཡོད་པ་ལས། ནུས་ན་རིལ་གྱིས་འདོན་པར་བྱ་བ་ཡིན་ལ། མ་ནུས་ན་གླེང་གཞི་ཚིག་ཏུ་བརྗོད་པ་ཉིད་ཀྱིས་བཏོན་ནས། ལྷག་མ་རྣམས་ཐོས་པར་བསྒྲགས་པས་ཀྱང་རུང་ངོ་། །དེ་བཞིན་དུ་མ་ངེས་པའི་སྡེ་ཚན་ཡན་ཆད་བཏོན་ནས། ལྷག་མ་ཐོས་པར་བསྒྲགས་པས་ཀྱང་རུང་ངོ་། །སྡེ་ཚན་བཞི་པ་སྤང་ལྟུང་ལ་རེག་ནས་རྫོགས་པར་འདོན་དགོས་ཏེ། ཕལ་ཆེར་བྱས་ནས་ལྷག་མ་བཞག་པ་ནི་མི་མཛེས་པའི་ཕྱིར། འདིར་བཞི་པ་ཞེས་པ་སོ་ཐར་གྱི་མདོ་འདོན་པ་ལྔའི་བཞི་པ་ཡང་མ་ཡིན། ལྟུང་བ་སྡེ་ལྔའི་བཞི་པ་ཡང་མིན་གྱི། སོ་ཐར་གྱི་མདོ་ལས་ཕམ་ལྷག མ་ངེས་པ། ལྟུང་བྱེད། སོར་བཤགས། བསླབ་བྱ་ཉེས་བྱས་ཀྱི་སྡེ་དང་དྲུག་གི་ནང་གི་བཞི་པ་ཡིན་པར་ཊཱི་ཀ་ལས་བཤད་དོ། །སོ་ཐར་གྱི་མདོ་འདོན་པ་ནི་གནས་བརྟན་གྱི་ལས་ཡིན་པས། དེས་ཚིག་ཕྱེད་ཀྱང་མ་འཁྲུལ་བར་ལེགས་པར་འཐོན་པས་བཏོན་ལ། དེས་མ་ནུས་ན་གནས་བརྟན་གཉིས་པས་བཏོན། དེས་ཀྱང་མ་ནུས་ན་གསུམ་པ་སོགས་རེ་མོས་ཀྱིས་འདོན་པ་སོགས་བྱ་བ་ཡིན་ནོ། །དེ་ཡང་ཇི་ལྟར་འདོན་ན། གསོལ་བ་དང་རྣམ་པར་བཞག་པ་འཛིན་དུ་འཇུག་པར་སྔར་བྱས་ཏེ་རྣམ་པར་གཞག་པ་ནི། ཚེ་དང་ལྡན་པ་དག བདག་ཅག་གསོ་སྦྱོང་བྱ་སྟེ། སོ་སོར་ཐར་པའི་མདོ་འདོན་པ་འདོན་གྱི། ཁྱེད་ཅག་སུ་ལ་ལྟུང་བ་ཡོད་པ་དེས་མཐོལ་ཅིག ལྟུང་བ་མེད་ན་ཅང་མ་སྨྲ་ཞིག་ཅེས་སོགས་བརྗོད་པའོ། །དགེ་ཚུལ་སོགས་བསྙེན་པར་མ་རྫོགས་པ་ལ་ཡང་གསོ་སྦྱོང་ཡོད་དེ། སུམ་བརྒྱ་པ་ལས། གལ་ཏེ་མངོན་སུམ་གསུངས་པ་མེད་གྱུར་ཀྱང་། །དགག་དབྱེ་གསུངས་ཕྱིར་འདིར་ནི་གསོ་སྦྱོང་ཡོད། །ཅེས་གསུངས་པས་སོ། །དེ་བྱེད་པར་འདོད་ན། ཚུལ་ཁྲིམས་ཡང་དག་པར་ལྡན་པའི་མདོ་བཏོན་ནས། དགེ་ཚུལ་རྣམས་དགེ་སློང་གི་མདུན་དུ་ཙོག་པུར་འདུག་སྟེ། གསོ་སྦྱོང་གི་ཚིག་ལན་གསུམ་ལས། ཐབས་ལེགས་བྱས་ནས་ཐོས་པའི་ཉེ་འཁོར་ལས་ལོགས་སུ་བཀར་ཏེ། དེ་ནས་དགེ་སློང་གིས་གསོ་སྦྱོང་བྱའོ། །དམིགས་བསལ་ལ། འགྲོན་པོ་མི་སྡོད་ན་འགྲོ་བཞིན་དུ་བྱའོ། །སྒྲ་མི་འདོད་ན་མདོར་བསྡུ་བས་སོ། །དེ་ཙམ་ཡང་མི་ནུས་ན་བྱིན་གྱིས་བརླབ་པར་བྱའོ། །ཞེས་པའི་དོན་ཡང་ངེས་པར་བྱའོ། །གསུམ་པ་མཇུག་ནི། བསྔོ་བ་སྨོན་ལམ་གྱིས་རྒྱས་གདབ་པར་བྱའོ། །དེ་དག་གིས་ནི་ཚུལ་ཁྲིམས་གསོ་ཞིང་སྡིག་པ་སྦྱོང་བར་བྱེད་པས་ན་གསོ་སྦྱོང་སྟེ། ཇི་སྐད་དུ། དགེ་བ་མཐའ་དག་ཡང་དག་གསོ་བྱེད་ཅིང་། །སྡིག་པ་མཐའ་དག་ཡང་དག་འདིར་སྦྱོང་བ། །དགེ་གསོ་ཕྱིར་དང་སྡིག་པ་རྣམ་སྦྱོང་ཕྱིར། །དེ་བཞིན་གཤེགས་པས་གསོ་སྦྱོང་ཞེས་གསུངས་སོ། །ཞེས་སོ། །གཉིས་པ་དབྱར་གྱི་སྒོ་ནས་བསླབ་པ་ཡོངས་སུ་སྦྱོང་བ་ནི། མདོར་དབྱར་གནས་པར་ཁས་བླང་བར་བྱའོ། །ཟླ་བ་གསུམ་དུའོ། །ཚེས་བཅུ་དྲུག་ལའོ། །དབྱར་ཟླ་འབྲིང་པོའི་ཉའི་ཕྱི་དེ་ཉིན་པར་བགྱིའོ། །དབྱར་ཟླ་ཐ་ཆུང་གི་ཉའིའོ་ཞེས་གསུང་སྟེ། འདི་ལ་དྲུག་སྟེ། དགོས་པ། རྟེན། དུས། གནས། ཆོ་ག དམ་ཚིག་བསྲུང་བའི་ཚུལ་ལོ། །དང་པོ་ནི། འཕྱ་དང་སྲོག་ཆགས་གནོད་པ་དང་། །ལུས་སྲོག་གནོད་སྤོང་རལ་གྲུམ་འཆོས། །དོན་བྱ་ཉུང་དང་ཐོས་སོགས་འཕེལ། །དགག་དབྱེ་སྲ་བརྐྱང་འབྱུང་བའོ། །ཞེས་པ་ལྟར་རོ། །གཉིས་པ་ནི་རབ་ཏུ་བྱུང་བ་སྡེ་ལྔ་ཆར་རོ། །གསུམ་པ་ནི། དུས་ནམ་གྱི་ཚེ་ཁས་ལེན་ཞེ་ན། དབྱར་སྔ་མ་ནི་དབྱར་ཟླ་འབྲིང་པོའི་ཉ་ལ་སྦྱོར་བ་ཚུལ་འཇུག་བྱས་ནས་དེའི་ཚེས་བཅུ་དྲུག་ལ་དབྱར་ཁས་ལེན་བྱ་བ་ཡིན་ལ། དབྱར་ཕྱི་མ་ལ་དབྱར་ཟླ་ཐ་ཆུང་གི་ཉ་ལ་སྦྱོར་བ་བྱས་ནས། དེའི་ཕྱི་དེ་ཉིན་ཚེས་བཅུ་དྲུག་ལ་དབྱར་ཁས་ལེན་བྱ་བ་ཡིན་ནོ། །ཡུན་ཇི་སྲིད་དུ་ཞེ་ན། ཟླ་བ་གསུམ་དུ་བྱ་བ་ཡིན་ཏེ་དུས་དེ་ཙམ་གྱིས་དགག་བྱ་ཁེགས་ཤིང་དགོས་པ་འགྲུབ་པའི་ཕྱིར་རོ། །ལུང་དུ་ཟླ་བ་བཞིར་གསུངས་པ་དང་འགལ་ལོ་ཞེ་ན། སྐྱོན་མེད་དེ། དེ་ནི་དབྱར་སྔ་ཕྱི་དུས་བསྡོམས་པའི་དབང་དུ་བྱས་པའི་ཕྱིར་རོ། །ཚིག་ལེར། གྲོ་བཞིན་ཟླ་བའི་ཚེས་གཅིག་ནི། །སྔ་མའི་དབྱར་ཏེ་གཙོ་བོ་ཡིན། །དེ་ཉིད་ཁྲུམས་སྟོད་ཟླ་བ་ཡི། །ཚེས་གཅིག་ཞེས་ནི་ཕྱི་མར་གྲགས། །ཞེས་གསུངས་པ་དང་འགལ་ལོ་ཞེ་ན། སྐྱོན་མེད་དེ་སྔར་བཤད་པ་ནི་ཡར་ངོ་སྔོན་འགྲོ་འཇིག་རྟེན་པའི་དབང་དུ་བྱས་པ་ཡིན་ལ། འདི་ནི་མར་ངོ་སྔོན་འགྲོ་བསྟན་བཅོས་ལས་གྲགས་པའི་དབང་དུ་བྱས་པའི་ཕྱིར་རོ། །བཞི་པ་ནི། མཚམས་གྱི་ནང་ཡིན་པ་དང་། བདེ་བར་གནས་པའི་རྐྱེན་ཡོད་ཅིང་མི་མཐུན་པའི་རྐྱེན་མེད་པ། གཙུག་ལག་ཁང་ལ་སོགས་པ་མཛེས་ཤིང་ཡིད་དུ་འོང་བ་གཡོགས་མ་དང་བཅས་པའོ། །ལྔ་པ་ལ་གཉིས་ཏེ། སྦྱོར་བ་དང་། དངོས་གཞིའོ། །དང་པོ་ལ་གསུམ་སྟེ། གནས་བྱི་དོར་བྱ་བའི་ཚུལ། གནས་མལ་སྟ་གོན་བྱ་བའི་ཚུལ། བྱེད་པ་པོ་བསྐོ་ཞིང་དེ་ལྟར་བྱ་བའི་ཚུལ་ལོ། །དང་པོ་ནི། ཞག་བཅུའམ་ཟླ་བ་ཕྱེད་ཀྱིས་ཁས་ལེན་འབྱུང་བར་འགྱུར་བའི་དུས་ཉིད་ན་གཙུག་ལག་ཁང་གི་རི་མོ་སོགས་དང་། རྒྱན་གདགས་པ་ལ་སོགས་པ་བྱི་དོར་བྱ་བའོ། །གཉིས་པ་ནི། དེའི་ཉི་མ་སྔ་མ་ཚེས་བཅོ་ལྔ་ལ་དགེ་འདུན་ལ་བསྟབ་རྒྱུ་གནས་མལ་ལ་སོགས་པ་སྟ་གོན་བྱ་བའོ། །གསུམ་པ་ལ་གསུམ་སྟེ་སྦྱོར་དངོས་མཇུག་གསུམ་མོ། །དང་པོ་ནི། གནས་མལ་སྟོབས་པ་པོ་གསོལ་བ་དང་གཉིས་ཀྱི་ལས་ཀྱིས་བསྐོ་བར་བྱའོ། །གང་ཟག་གཅིག་གིས་སྟོབ་མི་ནུས་ན་གཉིས་གསུམ་ལ་སོགས་པ་དུ་དགོས་པ་བསྐོ་བར་བྱའོ། །དེའི་བྱ་བའི་ལས་ནི་བསྐོས་པའི་དགེ་སློང་དེས་དྲི་དག་གིས་བསྐུས་པའི་ཚུལ་ཤིང་སྟ་གོན་བྱས་ནས། གཟེབ་ཀྱི་སྤྲོག་མར། རས་དཀར་པོ་བཏིང་པས་དཀྲིས་པ་དག་རྒན་རིམ་དུ་བཞག་ནས། ཚེ་དང་ལྡན་པ་དག་གནས་འདི་ན་ཁྲིམས་སུ་བྱ་བ་འདི་དང་འདི་ཡོད་དོ། །ཞེས་སོགས་ཁྲིམས་སུ་བྱ་བ་བརྗོད་པར་བྱའོ། །གཉིས་པ་ནི། དེ་ནས་གཞན་གྱིས་ཚུལ་ཤིང་བླང་བ་དང་། དབྱར་ཁས་བླང་བའི་ཕྱིར་དགེ་འདུན་ལ་གསོལ་བ་འབའ་ཞིག་པའི་ལས་བྱས་ནས་ཚུལ་ཤིང་ལེགས་པར་འགྲིམ་པར་བྱའོ། །གསུམ་པ་མཇུག་ནི་ཚུལ་ཤིང་བགྲངས་ནས། གནས་འདིར་དགེ་སློང་འདི་སྙེད་ཀྱིས་ཚུལ་ཤིང་བླངས་སོ་ཞེས་གོ་བར་བྱའོ། །དེ་བཞིན་དུ་གནས་མལ་བསྟབས་ཏེ་ལོངས་སྤྱོད་ཚུལ་ཡང་གོ་བར་བྱའོ། །གཉིས་པ་དངོས་གཞི་ནི། དགེ་སློང་གི་མདུན་དུ་འདུག་སྟེ། ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བ། མཚམས་ཀྱི་ནང་དང་བཅས་པའི་གནས་འདིར། འདི་ལྟ་སྟེ། གནས་རལ་བ་དང་གྲུམ་པ་བཅོས་པའི་སླད་དུ། སྦྱིན་བདག་མིང་འདི་ཞེས་བགྱི་བ་དང་། ཞལ་ཏ་བ་མིང་འདི་ཞེས་བགྱི་བ་དང་། སྤྱོད་ཡུལ་གྱི་གྲོང་ཆེ་གེ་མོ་ཞེས་བགྱི་བ་དང་། བྲོ་གཡོག་པ་ཆེ་གོ་མོ་ཞེས་བགྱི་བ་ལ་བརྟེན་ནས། དབྱར་སྔ་མ་ཟླ་བ་གསུམ་དུ་གནས་པར་ཁས་བླང་ངོ་། །བདག་དབྱར་འདི་ན་མཆིས་ཤིང་། བདག་གི་དབྱར་གྱི་གནས་ནི་འདི་ལགས་སོ། །ཞེས་ལན་གསུམ་དང་ཐབས་ལེགས་བྱའོ། །ཕྱི་མ་ལ་ཕྱི་མ་ཟླ་བ་གསུམ་དུ་ཞེས་འདོན་པ་བསྒྱུར་རོ། །ཡུལ་མེད་ན་བསམ་པས་འགྲུབ་ཅིང་། དམ་བཅས་པས་ཀྱང་གནས་པར་འགྱུར། བྱེད་པ་པོ་ལ་ཉེས་བྱས་ཙམ་བསྐྱེད་དོ། །དྲུག་པ་དམ་ཚིག་སྲུང་བའི་ཚུལ་ལ་གཉིས་ཏེ། དབྱར་རལ་བ་སྤང་བ་དང་། རལ་ཡང་ཉེས་པ་མེད་པའོ། །དང་པོ་ནི། བྱིན་གྱིས་མ་བརླབས་པར་མཚམས་ཀྱི་ཕྱི་རོལ་ཏུ་སྐྱ་རེངས་ཤར་བར་མི་བྱའོ་ཞེས་པའི་ཤུགས་ལ། ཆོས་ལྡན་གྱི་བྱ་བའི་དོན་དུ་དབྱར་བྱིན་གྱིས་བརླབས་ནས་འགྲོར་རུང་ཞེས་བསྟན་པ་ལ། འོ་ན་ཞག་ཇི་ཙམ་དུ་བྱིན་གྱིས་བརླབ་ཏུ་རུང་བ་ཡིན་ཞེ་ན། ཞག་བདུན་དུ་བྱིན་གྱིས་བརླབས་ཏེ་དེ་ཡང་མཚམས་ནང་དུ་དགེ་སློང་ཆོས་དགུ་ལྡན་གྱི་དྲུང་དུ་ཙོག་པུར་འདུག་སྟེ། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་ནང་མཚམས་དང་བཅས་པའི་གནས་འདིར། དབྱར་སྔ་མའམ་ཕྱི་མ་ཟླ་བ་གསུམ་དུ་གནས་པར་ཁས་བླངས་པ་ལས། བདག་མིང་འདི་ཞེས་བགྱི་བ་ཆོས་ལྡན་གྱི་བགྱི་བ་ཞིག་གི་སླད་དུ་དགུང་བདུན་མཚམས་ཀྱི་སླད་རོལ་དུ་མཆི་བ་དང་། དེ་ཚུན་ཆད་སླར་མཆི་བར་བྱིན་གྱིས་རློབ་བོ། །བདག་དབྱར་འདི་ན་མཆིས་ཤིང་བདག་གི་དབྱར་གྱི་གནས་ནི་འདི་ལགས་སོ། །ཞེས་ལན་གསུམ་དང་ཐབས་ལེགས་བྱའོ། །གལ་ཏེ་ཞག་བདུན་ཕན་ཆོད་བཞི་བཅུ་ཚུན་ལ་མཚམས་ཀྱི་ཕྱི་རོལ་དུ་འགྲོ་དགོས་པ་བྱུང་ན། དགེ་འདུན་ལ་ཞག་བཞི་བཅུའི་གནང་བ་གསོལ་ཏེ། དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་གནང་བ་བྱིན་པས་ཞག་བཞི་བཅུར་བག་ཡངས་སུ་འགྱུར་རོ། །དབྱར་ཟླ་བ་གསུམ་དུ་གནས་པའི་ཐའི་ཞག་དྲུག་ལ་བྱིན་གྱིས་བརླབས་པ་མི་ཆགས་ཏེ་དུས་ཧ་ཅང་ཐུང་བ་ཡིན་པའི་ཕྱིར་རོ། །གཉིས་པ་ནི། ཟས་དང་། སྨན་དང་། ནད་གཡོག་དག་མེད་ལ། དེ་དག་མེད་པར་འཚོ་མི་ནུས་ན། དེ་ལས་འདའ་བར་བྱའོ། །དགེ་སྦྱོང་གི་ཚུལ་དང་སྲོག་དང་ཚངས་པར་སྤྱོད་པའི་བར་ཆད་ཡོད་ན་ཡང་ངོ་ཞེས་གསུང་བ་ལྟར་རོ། །རྐྱེན་དབང་གིས་གསོ་སྦྱོང་གཉིས་སམ་གསུམ་ཐལ་ནས་དགག་དབྱེ་བྱར་རུང་བ་ཡོད་དེ། མདོར་གལ་ཏེ་གནས་པ་ཁས་བླངས་པ་དག་གིས་དགེ་སློང་འཐབ་ཀྲོལ་བྱེད་པ་དག་འོང་བར་ཐོས་པར་གྱུར་ན། གལ་ཏེ་གསོ་སྦྱོང་གཉིས་སམ་གསུམ་ཐལ་བར་གྱུར་ན་དགག་དབྱེ་བྱའོ། །ཞེས་གསུངས་པའི་ཕྱིར། གསུམ་པ་དགག་དབྱེའི་སྒོ་ནས་བསླབ་པ་ཡོངས་སུ་སྦྱོང་བ་ནི། དབྱར་གནས་པས་དགེ་འདུན་ལ་མཐོང་བ་དང་། ཐོས་པ་དང་། དོགས་པ་དག་གིས་དགག་དབྱེ་བྱའོ། །དབྱར་རྣམས་ཀྱི་ཐ་མའི་ཉི་མ་ལའོ། །ཞེས་སོགས་གསུངས་ཏེ། སྔར་དབྱར་གྱི་ནང་དུ་ལྟུང་བ་གླེང་བར་མི་བྱའོ་ཞེས་དགག་པ་ལས། འདིར་ལྟུང་བ་གླེངས་ཤིག་ཅེས་གླེང་པའི་སྐབས་དབྱེ་བས་ན་དགག་དབྱེ་ཞེས་བྱ་སྟེ། འདི་ལ་གཉིས་སྤྱིར་བཏང་དང་། དམིགས་བསལ་ལོ། །དང་པོ་ལ་ལྔ་སྟེ། གནས་དང་། དུས་དང་། གང་ཟག་དང་། ཆོ་ག་དང་། དགོས་པའོ། །དང་པོ་ནི། དབྱར་གང་དུ་ཁས་བླངས་པའི་གནས་དེ་ཉིད་དམ་གཞན་དུ་ཡང་རུང་ངོ་། །གཉིས་པ་ནི། དབྱར་སྔ་ཕྱིའི་བྱེ་བྲག་གིས་སྟོན་ཟླ་འབྲིང་པོའི་ཉའམ་སྟོན་ཟླ་ཐ་ཆུང་གྱི་ཉའོ། །གསུམ་པ་ནི། རབ་ཏུ་བྱུང་བ་སྡེ་ལྔ་པོ་དབྱར་རལ་བ་དང་མ་རལ་བ་ཐམས་ཅད་དོ། །བཞི་པ་ལ་སྦྱོར་དངོས་རྗེས་གསུམ་ལས། དང་པོ་ནི། དགག་དབྱེ་འབྱུང་བའི་ཞག་བདུན་ནས། ཟླ་བ་ཕྱེད་ཀྱི་བར་གང་རུང་ལ་ཞེ་འཁོན་ཡོད་ན་བཟོད་གསོལ་དང་། གཙུག་ལག་ཁ་བརྒྱན་པ་ལ་སོགས་པ་བྱས་ལ། ཉའི་ཉིན་པར་རྩྭ་དར་བྷ་སྟ་གོན་བྱ། དགེ་འདུན་ཐམས་ཅད་འདུས་ནས་ཕྱག་ཟིང་པོར་བྱས་ལ་འགྲེངས་ཏེ་འདུད་པ་དང་བཅས་པས། དབྱར་གྱི་ནང་དུ་ཐུགས་དང་འགལ་བ་ཐམས་ཅད་བཟོད་པར་གསོལ་ཞེས་བྱས་ལ་འདུག་སྟེ། རྒྱུན་བཤགས་ནས་ཚུལ་ཁྲིམས་རྣམ་དག་གིས་མདོ་འདོན་པ་ཡན་ཆད་གསོ་སྦྱོང་བཞིན་བྱས་པའི་རྗེས་སུ་དགེ་ཚུལ་རྣམས་ལོགས་སུ་བཀར་ཏེ། འདུན་པ་དང་ཡོངས་དག་ལེན་དགོས་པ་ཡོད་ན་ལེན་པ་དང་ལྟུང་བ་བཤགས་བསྡམས་བྱིན་གྱིས་བརླབས་པ་དང་། ལས་མཚམས་གཅོད་པ་གྲུབ་ན་གསོ་སྦྱོང་གི་སྐབས་བཞིན་བྱས་ལ། གནས་ལ་བློ་མཐུན་བྱའོ། །གཉིས་པ་དངོས་གཞི་ནི། ལས་བྱེད་པས་དགེ་སློང་དགག་དབྱེ་བྱེད་པར་བསྐོ་བར་འོས་པ་ལ་སྤྲོ་བ་དྲིས་ཏེ་གསོལ་བ་དང་གཉིས་ཀྱི་ལས་ཀྱིས་བསྐོའོ། །གཅིག་གིས་མི་ནུས་ན་དུ་མ་ཀོས་ཏེ་དགག་དབྱེ་བྱ་བའི་ཕྱིར་གསོལ་བའི་ལས་བྱས་པའི་རྗེས་ལ་བསྐོས་པའི་དགེ་སློང་གིས་རྒན་རིམ་གྱིས་ཙྭ་དར་བྷ་བྲིམ་མོ། །དེ་ནས་དགེ་སློང་གཞན་རྣམས་གསུམ་གསུམ་མན་ཆད་ཀྱིས་བསྐོས་པ་དེ་རྒན་ན་ཕྱག་བྱས་ཙོག་པུར་འདུག་སྟེ། ཡུལ་དང་བྱེད་པ་པོའི་ལག་པས་རྩྭ་དར་བྷ་བཟུང་རྐང་པས་ཀྱང་ཅུང་ཟད་མནན་ཏེ། དགག་དབྱེའི་ཆོ་ག་ལན་གསུམ་བརྗོད་པར་བྱའོ། །ནད་པ་ངལ་བ་ལ་སོགས་ཀྱི་གནོད་པ་བྱུང་དོགས་ཡོད་ན་གཉིས་སམ་གཅིག་བརྗོད་པས་ཀྱང་འགྲུབ་བོ། །བསྐོས་པས་བསྐོས་པ་གཞན་ཡོད་ན་ཕན་ཚུན་དགག་དབྱེ་བྱེད། མེད་ན་དེར་གནས་པའི་དགེ་སློང་གཞན་ལ་དགག་དབྱེ་གོ་བར་བྱའོ། །གསུམ་པ་མཇུག་ནི་དེ་ནས་རྩྭ་ཆུན་བགྲངས་ཏེ། གནས་འདིར་དགེ་སློང་འདི་སྙེད་ཀྱིས་དགག་དབྱེ་མཛད་དོ། །ཤིན་ཏུ་དགག་དབྱེ་མཛད་དོ་ཞེས་གོ་བར་བྱས་ནས། གཞན་རྣམས་ཀྱིས་ཀྱང་ལེགས་པར་དགག་དབྱེ་མཛད་དོ། །ཤིན་ཏུ་དགག་དབྱེ་མཛད་དོ་ཞེས་བརྗོད་པར་བྱའོ། །དེ་ནས་རྫས་ཀྱི་དགག་དབྱེ་བྱ་སྟེ། བསྐོས་པའི་དགེ་སློང་དེ་དག་གི་རྫས་གང་ཡང་རུང་བ་ཐ་ན་ཁབ་ཙམ་གྱི་ཀྱང་དགེ་འདུན་ལ་རྫས་ཀྱི་དགག་དབྱེ་བརྩམ་པར་བྱ་སྟེ། རྫས་དེ་བླངས་ཏེ་ཚིག་གིས་གོ་བར་བྱ་སྟེ། བཙུན་པ་རྫས་འདི་ལྟ་བུས་ཀྱང་དབྱར་གནས་པའི་དགེ་སློང་ལ་དགག་དབྱེ་བགྱིད་རུང་ངོ་ཞེས་པའོ། །དགེ་སློང་གིས་དགག་དབྱེ་བྱས་པ་དེའི་འོག་ཏུ་དགེ་ཚུལ་རྣམས་ལ་དགག་དབྱེ་གོ་བར་བྱའོ། །དེའི་འོག་ཏུ་དགེ་སློང་མ་སོགས་ལའོ། །ལྔ་པ་དགོས་པ་ནི། ལྟུང་བའི་དགག་དབྱེས་ཆོས་རྣམ་པར་དག་པ་དང་། རྫས་ཀྱི་དགག་དབྱེས་རྙེད་པའི་སྒོ་འདུ་བའི་དགོས་པ་འགྲུབ་པའོ། །གཉིས་པ་དམིགས་བསལ་ལ། དགག་དབྱེའི་དུས་ཚོགས་པའི་དམིགས་བསལ་དང་། བྱ་བའི་དངོས་པོའི་དམིགས་བསལ་གཉིས་ལས། དང་པོ་ནི། གནས་པར་མི་ནུས་པ་ཉིད་ཡིན་ན། སྤྱོད་ཡུལ་དུ་གྱུར་པའི་དགེ་སློང་ལ་ཚོགས་ཀྱི་དགག་དབྱེ་གོ་བར་བྱའོ། །དབྱར་གྱི་ནང་དུ་བྱ་བས་འགྲོ་དགོས་ན་དགག་དབྱེ་བྱའོ་ཞེས་པའོ། །གཉིས་པ་ནི། གཞིའམ་གང་ཟག་གམ་གཉིས་ཀ་བཞག་ནས་དགག་དབྱེ་བྱེད་པར་ཁས་བླང་བའོ། །དེ་ལ་གཞི་གཞག་པ་ནི། ལྟུང་བའི་གཞི་འདི་དང་འདི་མ་གཏོགས་པ་གཞན་གྱིས་གླེངས་ཤིག་ཅེས་པ་དང་། གང་ཟག་གཞག་པ་ནི། གང་ཟག་འདི་མ་གཏོགས་པ་གཞན་གྱིས་གླེངས་ཤིག་ཅེས་པ་ལྟ་བུའོ། །དེ་ཡང་རེག་པ་ལྟ་བུ་གང་ལས་བྱུང་བའི་ཡུལ་གྱི་གང་ཟག་ཡིན་གྱི། གླེང་བྱེད་ནི་མ་ཡིན་ནོ།། ༈ །།གཉིས་པ་བདེ་བར་གནས་པའི་རྐྱེན་བསྟེན་པ་ལ་གཉིས་ཏེ། གོས་བསྟེན་པ་དང་། སྨན་བསྟེན་པའོ། །དང་པོ་ལ་གསུམ་སྟེ། གོས་ཐམས་ཅད་ཀྱི་གཏེར་ལྟ་བུ་སྲ་བརྐྱང་གི་གཞི། གོས་རུང་བ་ཕལ་ཆེ་བ་གོས་ཀྱི་གཞི། མི་རུང་བ་ཕལ་ཆེ་བ་ཀོ་ལྤགས་ཀྱི་གཞིའོ། །དང་པོ་ལ། གཞིའི་སྐབས་ནས་འབྱུང་བ་དང་། ཞུ་བ་ལ་སོགས་པའི་སྐབས་ནས་འབྱུང་བ་གཉིས་ལས། དང་པོ་ལ་གསུམ་སྟེ། སྲ་བརྐྱང་གདིང་བའི་ཚུལ། བསྐྱང་བའི་ཚུལ། དབྱུང་བའི་ཚུལ་ལོ། །དང་པོ་ལ་བསྟན་བཤད་གཉིས་ལས། དང་པོ་ནི། སྲ་བརྐྱང་གདིང་བར་བྱའོ། །ཞེས་སོགས་ཏེ། སྲ་བརྐྱང་དང་གཏན་པ་ནི་མིང་གི་རྣམ་གྲངས་ཡིན་ལ། དེ་ཡང་ཆོས་གོས་གང་ལ་གདིང་བར་བྱ་བའི་པང་ལེབ་ལྟ་བུ་ལ་དངོས་སུ་འཇུག་ཅིང་། ཆོས་གོས་ལའང་སྲ་བརྐྱང་ངམ་གཏན་པའི་མིང་གིས་བཏགས་པ་ཡིན་ལ། དེ་ཆོས་གོས་གསུམ་ལ་འདོགས་པའི་རྒྱུ་མཚན་ནི་དེ་དང་འདྲ་བའི་ཕྱིར། དཔེར་ན་སྨན་བྱ་རོག་རྐང་ཞེས་པ་ལྟ་བུའོ། །བཏགས་པའི་དགོས་པ་ནི། འདྲ་བའི་ཆོས་བཞི་པོ་ཡོད་པ་དེ་གོ་བའི་ཆེད་དུའོ། །དེ་དག་གང་ཞེ་ན། གཏན་པའི་སྟེང་དུ་ཆོས་གོས་བཏིང་བས་ཁ་དོག་གཅིག་ཏུ་འགྱུར་བ་ལྟར་འདིས་ཀྱང་འདིང་བ་པོ་རྣམས་བློ་གཅིག་ཏུ་འདུས་པས་དབྱེར་མེད་པ་དང་། གཏན་པའི་སྟེང་དུ་སྣམ་ཕྲན་དང་གླེགས་བུ་དུ་མ་གནས་པ་ལྟར། འདི་ལའང་འདིང་བ་པོ་དུ་མའི་བྱིན་རླབས་གནས་པས་རོ་གཅིག་པ་དང་། གཏན་པས་ཆོས་གོས་མི་འཁུམས་པར་བྱེད་པ་ལྟར། འདིས་ཀྱང་འདིང་བ་པོ་བག་ཡངས་སུ་བྱེད་པས་མི་འཁུམས་པར་བྱ་བ་གཅིག་པ་དང་། གཏན་པས་ཆོས་གོས་དག་ལ་ཁྱབ་པ་ལྟར། འདིས་ཀྱང་འདིང་བ་པོ་དག་རྙེད་པ་དང་ཕན་ཡོན་འདྲ་བར་སྒྲུབ་པས་ཁྱབ་པར་འདྲ་བའོ། །དངོས་ལ་གནོད་བྱེད་ནི་གོས་འདིང་བའི་གཞིར་གྱུར་པའི་པང་ལེབ་མ་ཡིན་པའི་ཕྱིར་རོ། །དེས་ན་སྲ་བརྐྱང་དང་ཆོས་གོས་སྲ་བརྐྱང་གཅིག་དུ་མ་འཁྲུལ་བ་གལ་ཆེའོ། །དེས་ན་དགེ་འདུན་རྣམས་ཆོས་ཅན། ཆོས་གོས་སྲ་བརྐྱང་འདིང་བར་གནང་སྟེ། དེས་ཁྱད་པར་དུ་བྱས་པའི་དགོས་པ་མཐོང་བའི་ཕྱིར་རོ། །འདི་ནི་གནང་བའི་བསླབ་པའོ། །གཉིས་པ་ལ་བཞི་སྟེ་གང་གི་དོན་དུ་གདིང་བ་ཕན་ཡོན་གྱི་རྣམ་གཞག གང་གིས་གདིང་བ་གང་ཟག་གི་རྣམ་གཞག གང་གདིང་བ་དངོས་པོའི་རྣམ་གཞག ཇི་ལྟར་གདིང་བ་ཆོ་གའི་རྣམ་གཞག་གོ །དང་པོ་ནི། སྲ་བརྐྱང་བཏིང་ཆགས་དང་ལྡན་པའི་དགེ་སློང་དེ་ལ་འཆང་འབྲལ་འཇོག་པའི་ལྟུང་བ་གསུམ་པོ་དག་མི་འབྱུང་བ་ཇི་ལྟ་བ་དེ་བཞིན་དུ། སྲ་བརྐྱང་བཏིང་ན་ནི་ཡང་ཡང་ཟ་བ་དང་། འདུས་ཤིང་ཟ་བ་དང་། ཤོག་ཅིག་ཅེས་མ་སྨྲས་པར་གོས་ཐོབ་ཏུ་རེ་བའི་བསམ་པས་གྲོང་དུ་འགྲོ་བ་དང་། ཕྱིན་ནས་གོས་སློང་བ་ལ་ཡང་ཉེས་པ་མེད་ལ། སྲ་བརྐྱང་བཏིང་ཆགས་དང་ལྡན་པ་དེས་མཚམས་ཀྱི་ཕྱི་རོལ་ན་གནས་ཀྱང་ལྷག་མ་མཚམས་ནང་ན་གནས་པ་དག་དང་རྙེད་པ་ཐུན་མོང་དུ་དབང་བ་ཉིད་དུ་འགྱུར། མ་སྨྲས་པར་གྲོང་དུ་འགྲོ་བ་ཞེས་པས་སློང་བའི་སྦྱོར་ལྟུང་མེད་པར་བསྟན། གོས་སློང་བ་ལ་ཉེས་པ་མེད་ཅེས་པས་སློང་བའི་དངོས་གཞིའི་ལྟུང་བ་མེད་པ་བསྟན་ནོ། །གཉིས་པ་ནི། ཆོ་གའི་སྒོ་ནས་དབྱར་གནས་པར་ཁས་མ་བླངས་པ་དང་། ཁས་བླངས་ནས་དབྱར་རལ་བ་དང་དབྱར་ཕྱི་མར་གནས་པར་ཁས་བླངས་པ་དང་། དབྱར་གནས་གཞན་དུ་གནས་པར་ཁས་བླངས་པ་དག་ལ་མཚམས་འདིར་སྲ་བརྐྱང་གདིང་བ་དེ་མི་འབྱུང་ངོ་། །དེར་མ་ཟད་སྤོ་བ་སྤྱོད་པ་ལ་སོགས་པ་ས་གཞན་ན་གནས་པ་དག་ལ་ཡང་སྲ་བརྐྱང་གདིང་བ་དེ་མི་འབྱུང་ངོ་། །སྲ་བརྐྱང་གདིང་བའི་འོག་ཏུ་ས་གཞན་ན་གནས་པ་ཉིད་ཐོབ་པ་ཉིད་ཡིན་ན་སྲ་བརྐྱང་གདིང་བ་དེ་མི་འབྱུང་ངོ་། །དེ་རྣམས་ལ་སྲ་བརྐྱང་གི་ཕན་ཡོན་ཡང་མི་འབྱུང་ངམ་ཞེ་ན། ཐ་མ་དབྱར་གནས་གཞན་དུ་ཁས་བླངས་པ་མ་གཏོགས་དབྱར་ཁས་མ་བླངས་པ་དང་། དབྱར་རལ་བ་དང་། དབྱར་ཕྱི་མར་ཁས་བླངས་པ་དང་། ས་གཞན་ན་གནས་པ་དག་དང་། དགེ་ཚུལ་ནི་དབྱར་གྱི་རྙེད་པ་དབང་ངོ་། །གནས་ནས་དབྱུང་བ་ནི་དབྱར་གྱི་རྙེད་པ་མི་དབང་སྟེ། ཆོས་དང་ཟང་ཟིང་གཉིས་ཀྱི་སྒོ་ནས་སྤངས་པའི་ཕྱིར། དགེ་འདུན་དང་འཁོར་ལོ་བྱེ་བ་ན་ཆོས་མིན་པའི་ཕྱོགས་དང་མཐུན་པ་དག་ཏུ་སོང་བ་ནི། གནས་དབྱུང་ནན་ཏུར་བྱས་པ་དེ་དང་རྙེད་པ་ཐོབ་ཚུལ་འདྲ་བས་རྙེད་པ་མི་དབང་ངོ་། །གསུམ་པ་ནི། དངོས་གཞི་སྟེ་དབྱར་སྔ་མའི་ཟླ་བ་གསུམ་གྱི་དགག་དབྱེའི་མཐའ་ཡན་ཆད་དུ་རྙེད་པ་དབྱར་བསྡུས་པའམ་སོ་སོའི་རྒྱུ་ལས་བྱུང་བ། སྲ་བརྐྱང་གདིང་བའི་ཉི་མ་ཡན་ཆད་དུ་ལག་ཏུ་གྲུབ་པ་གོས་ཀྱི་རྙེད་པར་བགྲང་བ་སྟེ། གོས་དངོས་སམ་གོས་ཀྱི་དོན་དུ་ཕུལ་བའི་རིན་པོ་ཆེ་ལྟ་བུས་སྒྲུབ་པའི་ཆོས་གོས་གཙོ་བོ་གསུམ་པོ་གདིང་ངོ་། །དེ་སྐད་དུ་ཡང་ལུང་ལས། བཙུན་པ་གང་ཟག་གི་ཆོས་གོས་གདིང་རུང་ངམ། ཉེ་བ་འཁོར་མི་རུང་ངོ་། །དགེ་འདུན་ལ་ཕུལ་ན་རུང་ངོ་། །བཙུན་པ་གང་ཟག་གི་བླ་གོས་གདིང་དུ་རུང་ངམ། ཉེ་བ་འཁོར་མི་རུང་ངོ་། །དགེ་འདུན་ལ་ཕུལ་ན་རུང་ངོ་། །བཙུན་པ་གང་ཟག་གི་མཐང་གོས་གདིང་དུ་རུང་ངམ། ཉེ་བ་འཁོར་མི་རུང་ངོ་། །དགེ་འདུན་ལ་ཕུལ་ན་རུང་ངོ་། །ཞེས་གསུངས་སོ། །མཚོ་་་་་་ཁ་ཅིག་གདིང་བའི་ཉིན་མོའི་མཐར་གྲུབ་པ་ཞེས་པའི་དོན། གཟོ་ཚེམས་ལེགས་པར་གྲུབ་པ་ཞེས་པ་ལ་འཆད་པ་མི་འཐད་དེ། དེ་ནི་ཟིན་པའོ་ཞེས་པས་བསྟན་པའི་ཕྱིར། སུ་དབང་བ་གདིང་ཞེ་ན་དགེ་འདུན་གྱི་དབང་བྱར་ཡོད་པའི་ཆོས་གོས་གདིང་ངོ་། །གོས་ཀྱི་ཁྱད་པར་ནི། སྣམ་བུ་ལྟར་སྤུ་བཤད་ཅིང་། དབྱུག་པས་གདབ་པར་མ་བྱས་པ་དང་། ཡ་ཡོ་སྟེ་ཁ་གླེང་པོར་མ་གྱུར་པ་དང་། སྲིལ་ལ་སོགས་པས་མ་རྨུགས་པ་དང་། ཁ་མ་ཟེགས་པ་དེ་གདིང་བར་བྱའོ། །རུང་བའི་ཚོན་གྱིས་ཁ་བསྒྱུར་བ་དང་། སྔར་དུས་ཚིགས་སུ་ཡོངས་སུ་མ་སྤྱད་པ་དེ་གདིང་བར་བྱའོ། །དུས་ཚིགས་སུ་མ་སྤྱད་ཀྱང་མི་སྲ་བ་དེ་མི་རུང་བས་སྲ་བ་དེ་གདིང་བར་བྱའོ། །སྲ་བ་ཡིན་ཀྱང་མཐུད་མ་ཅན་དང་། ལྷན་རིང་ཅན་དང་ལྷན་པ་ཅན་དང་། ཆོས་གོས་དག་གི་མཐའ་ཐོག་དག་ཏུ་སྐུད་པའི་ཚོམ་གྱི་ཆ་ག་རྟབས་པའི་ཆ་ག་ཅན་དང་། མཐའ་ཟེགས་པ་ལ་ཟུང་བཏབ་པའི་ཟུང་ཅན་མ་ཡིན་པ་དེ་གདིང་བར་བྱའོ། །སྤང་ལྟུང་ཕྱིར་བཅོས་བྱས་པའི་སྤངས་པ་དང་། རྒྱུ་མ་བརྟགས་པ་རྔ་བལ་ལ་སོགས་པ་དང་། བདག་པོ་སྔ་མ་དང་བྲལ་ཞིང་ཕྱི་མ་དང་ཕྲད་པ་མ་ཡིན་པ་དེ་གདིང་། མཚོན་གྱིས་དྲས་ཤིང་ཁབ་ཀྱིས་དྲུབ་པ་དེ་གདིང་། བཟོ་ཚེམས་ལེགས་པར་ཟིན་པ་དེ་གདིང་ངོ་། །སྲིད་དུ་ཁྲུ་ལྔ་ཞིང་དུ་ཁྲུ་གསུམ་ཡོད་པ་དེ་གདིང་ངོ་། །དེར་ངེས་སམ་ཞེ་ན། ཚད་ལྷག་པ་དང་སུམ་ཕྲུག་ལྷག་པ་གཉིས་ཀ་གདིང་ངོ་། །ལོ་སྔ་མར་མ་བཏིང་བ་གདིང་བར་བྱའོ། །ད་ལྟ་སྤྲོག་མ་འཇོང་མོར་གདིང་བ་དེ་གདིང་བར་བྱའོ། །སྤྲོག་མ་གཅིག་ཏུ་སུམ་ཕྲུག་དུ་མ་ཡང་གདིང་བར་བྱའོ། །གཅིག་ཁོ་ནས་གདིང་བར་བྱ་བ་ཡིན་ནམ་ཞེ་ན། སུམ་ཕྲུག་ཇི་སྙེད་ཡོད་པ་གདིང་བར་བྱེད་པ་ཡང་དེ་སྙེད་བསྐོ་བར་བྱའོ། །སྲ་བརྐྱང་གདིང་བའི་ཚེ་དགེ་འདུན་རྣམས་ཀྱིས་ཇི་ལྟར་འཇུག་ཅེ་ན། སྲ་བརྐྱང་གདིང་བ་དེ་ནི་རེ་རེ་བའི་ཆོས་གོས་ཀྱི་བྱིན་བརླབས་ལས། གཞན་དགེ་འདུན་གྱིས་བྱིན་གྱིས་བརླབས་པ་ཡིན་པ་རྒྱུ་མཚན་དེའི་ཕྱིར། གང་ཟག་གི་བྱིན་གྱིས་བརླབས་པ་དག་ཕྱུང་ནས་འཇུག་པར་བྱའོ། །བཞི་པ་ལ་གསུམ་སྟེ། སྦྱོར་བའི་ཆོ་ག་དང་། དངོས་གཞིའི་ཆོ་ག་དང་། མཇུག་གི་ཆོ་གའོ། །དང་པོ་ལ་གཉིས་ཏེ། དགེ་འདུན་གྱི་བྱ་བ་དང་། བརྐོས་པའི་གང་ཟག་གི་བྱ་བའོ། །དང་པོ་ནི། སྲ་བརྐྱང་གདིང་རྒྱུ་རྙེད་པའི་ཚེ་ཞག་མ་ལོན་པར་ཚོགས་པས་སྲ་བརྐྱང་གདིང་བར་བྱའོ་སྙམ་དུ་མོས་པ་བསྐྱེད་པར་བྱའོ། །མཚམས་ཀྱི་ནང་དུ་གསོལ་བ་དང་གཉིས་ཀྱི་ལས་ཀྱིས་སྲ་བརྐྱང་གདིང་བར་བློ་མཐུན་བྱའོ། །སྲ་བརྐྱང་གདིང་བ་བསྐོ་བ་དེ་ཡང་མཚམས་ཀྱི་ནང་ཁོ་ནར་བྱའོ། །གང་ཟག་ཇི་ལྟ་བུ་བསྐོ་ཞེ་ན། གང་ཟག་གང་ལ་སྲ་བརྐྱང་གདིང་བ་འབྱུང་བ་དབྱར་སྔ་མ་ཁས་བླངས་ཤིང་མ་རལ་བ་ལ་སོགས་པ་དེ་བསྐོ་བར་བྱའོ། །བསྐོས་པའི་གང་ཟག་དེ་ལ་དགེ་འདུན་གྱི་སྲ་བརྐྱང་གདིང་རྒྱུའི་དངོས་པོ་རྣམས་གཏད་པར་བྱའོ། །དེ་ཡང་གསོལ་བ་འབའ་ཞིག་པའི་ལས་བྱས་ནས་གཏད་པར་བྱའོ། །གཉིས་པ་ནི། །བསྐོས་པའི་གང་ཟག་དེས་སྲ་བརྐྱང་གདིང་བའི་སྔོན་དུ་སྲ་བརྐྱང་གདིང་རྒྱུ་དེ་ལ་བཀྲུ་བ་དང་། དྲུབ་པ་དང་། ཚོན་གྱིས་ཁ་སྒྱུར་བ་སོགས་ལ་འཇུག་པར་བྱའོ། །ལན་གཅིག་ཙམ་བྱ་བའམ་ཞེ་ན། བཀྲུ་བ་ལ་སོགས་པ་ལན་གཉིས་སམ་གསུམ་གྱི་བར་དུ་བསྒྲུབ་པར་བྱའོ། །ངེས་པར་བྱ་དགོས་སམ་ཞེ་ན། བཟོ་ཚེམས་ལེགས་པར་ཟིན་པ་ཞིག་རྙེད་ན་གདིང་བར་སྐོས་པ་པོ་རང་གིས་ཁབ་སྲུབ་གཉིས་སམ་གསུམ་བསྒྲུབ་པར་བྱའོ། །སེམས་ཇི་ལྟར་བསྐྱེད་པར་བྱ་ཞེ་ན། སྲ་བརྐྱང་གི་རྒྱུའི་དངོས་པོ་དེ་མནོས་པའི་ཚེ་ན། འདི་ལ་སྲ་བརྐྱང་གདིང་བར་འགྱུར་རོ་སྙམ་པ་དང་། རང་གིས་འདིང་བར་བྱེད་པའི་ཚེ་གདིང་ངོ་སྙམ་པ་དང་། བཏིང་ཟིན་པའི་མཇུག་ཏུ་བཏིང་ངོ་སྙམ་པའི་སེམས་བསྐྱེད་པར་བྱའོ། །སེམས་བསྐྱེད་པ་ཉམས་ན་གདིང་བ་མི་འབྱུང་ངམ་སྙམ་ན། དང་པོ་གདིང་བར་འགྱུར་རོ་སྙམ་པའི་སེམས་བསྐྱེད་པ་ཉམས་ན་སྲ་བརྐྱང་གདིང་བ་མི་འབྱུང་བ་མ་ཡིན་ལ། གཉིས་པ་ཉམས་ན་མི་འབྱུང་ངོ་། །དེ་ནས་སྲ་བརྐྱང་འདིང་བར་བསྐོས་པ་དེས། ཚེ་དང་ལྡན་པ་དག་བདག་སང་སྲ་བརྐྱང་འདིང་བར་འགྱུར་གྱི། ཁྱེད་ཅག་གིས་རང་རང་གི་ཆོས་གོས་ཀྱི་བྱིན་བརླབས་དབྱུང་བར་བྱའོ། །ཞེས་དགེ་འདུན་ཚོགས་པ་ལ་བརྗོད་པར་བྱའོ། །བསྐོས་པའི་གང་ཟག་དེས་དགེ་འདུན་འདུ་བའི་ཐབས་གཎྜི་བརྡུང་བ་དང་། གནས་མལ་བཤམ་པ་སོགས་རྗེས་སུ་བསྒྲུབ་པར་བྱའོ། །གཉིས་པ་དངོས་གཞི་ནི། སྲ་བརྐྱང་ལ་དྲི་དང་མེ་ཏོག་གིས་མཆོད་ཅིང་། བདུག་སྤོས་དྲི་ཞིམ་པོས་བདུགས་པའི་སུམ་ཕྲུག་དུ་མ་བཟེབ་ཀྱི་སྤྲོག་མར་ལྷན་ཅིག་བཞག་པ་པང་པར་ཐོགས་ཏེ། དགེ་སློང་རྒན་རིམ་དུ་འདུག་པ་ལ། སྲ་བརྐྱང་གདིང་བ་བསྒྲུབ་པར་བྱའོ། །དུས་ནམ་གྱི་ཚེ་ཞེ་ན། ཚེས་བཅུ་དྲུག་གི་ནངས་པར་རོ། །ཟླ་བ་གང་གི་ཞེ་ན་སྟོན་ཟླ་འབྲིང་པོའོ། །ཅི་ཞིག་གིས་བསྒྲུབ་པར་བྱ་ཞེ་ན། ལན་གསུམ་བཟླས་པས་སོ། །ཅི་ཞིག་ལན་གསུམ་བཟླས་པས་ཞེ་ན། གདིང་ངོ་ཞེས་པའི་ཆོ་གས་སོ། །དེ་ཡང་ཇི་ལྟར་ཞེ་ན། རེ་ཞིག་དང་པོར་དགེ་འདུན་ཐམས་ཅད་ལ་གདིང་ངོ་ཞེས་པའི་སྔགས་ལན་གསུམ་བཟླས་པས་བསྒྲུབ་པར་བྱ་སྟེ། འདིའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། ཆོས་གོས་འདི་ནི་དགེ་འདུན་གྱི་སྲ་བརྐྱང་དུ་བློ་མཐུན་པར་བགྱིས་པ་ལགས། བདག་དགེ་སློང་མིང་འདི་ཞེས་བགྱི་བ་སྲ་བརྐྱང་འདིང་བར་བསྐོས་པ་ལགས་ཏེ། འདི་ལྟར་གནས་བསྡུ་བ་དང་། དགེ་སློང་རྣམས་བདེ་བར་གནས་པར་བགྱི་བ་དང་། སྦྱིན་པ་པོ་རྣམས་ཀྱིས་སྦྱིན་པར་བྱ་བའི་ཆོས་ཡོངས་སུ་སྤྱད་པའི་སླད་དུ་བདག་སྲ་བརྐྱང་འདིང་བ་དགེ་སློང་མིང་འདི་ཞེས་བགྱི་བས། ཆོས་གོས་འདིས་དགེ་འདུན་གྱི་སྲ་བརྐྱང་གདིང་བར་བགྱིའོ། །གནས་གང་དུ་སྲ་བརྐྱང་བཏིང་བར་ཆོས་གོས་རྙིང་པ་རྣམས་དང་ཡང་མི་འབྲལ་ན། གསར་པ་རྣམས་དང་ལྟ་ཅི་སྨོས་ཞེས་ལན་གསུམ་བཟླའོ། །གསུམ་པ་འཇུག་ནི། དེ་ནས་དགེ་སློང་རེ་རེའི་མདུན་དུ་འདུག་སྟེ། དགེ་སློང་རེ་རེ་ལ་ཡང་གདིང་ངོ་ཞེས་བྱ་བའི་སྔགས་ལན་གསུམ་གསུམ་བཟླས་པས་བསྒྲུབ་པར་བྱའོ། །འདིའི་སྔགས་ནི། གནས་བརྟན་ནམ་བཙུན་པའམ་ཚེ་དང་ལྡན་པ་དགོངས་སུ་གསོལ། ཆོས་གོས་འདི་ནི་དགེ་འདུན་གྱི་སྲ་བརྐྱང་དུ་བློ་མཐུན་པར་བགྱིས་པ་ལགས། བདག་དགེ་སློང་མིང་འདི་ཞེས་བགྱི་བ་ནི་སྲ་བརྐྱང་འདིང་བར་བསྐོས་པ་ལགས་ཏེ། དེའི་སླད་དུ་འདི་ལྟར་གནས་བསྡུ་བ་དང་། དགེ་སློང་རྣམས་བདེ་བར་གནས་པར་བགྱི་བ་དང་། སྦྱིན་པ་པོ་རྣམས་ཀྱིས་སྦྱིན་པར་བྱ་བའི་ཆོས་ཡོངས་སུ་སྤྱོད་པའི་སླད་དུ་བདག་སྲ་བརྐྱང་འདིང་ན། དགེ་སློང་མིང་འདི་ཞེས་བགྱི་བས་ཆོས་གོས་འདི་དགེ་འདུན་གྱི་སྲ་བརྐྱང་གདིང་ལགས་ཏེ། གནས་གང་དུ་སྲ་བརྐྱང་བཏིང་བ་ཆོས་གོས་རྙིང་པ་རྣམས་དང་ཡང་མི་འབྲལ་ན། གསར་པ་རྣམས་དང་ལྟ་ཅི་སྨོས་ཞེས་ལན་གསུམ་བཟླས་པས་སོ། །དེ་ནས་འདིང་བར་བྱེད་པ་ལས་གཞན་ཡུལ་དེས་ནི་ལེགས་པར་ཏེ་ཁ་ན་མ་ཐོ་བ་མེད་པར་བཏིང་ངོ་། །ཤིན་ཏུ་སྟེ་ཐེ་ཚོམ་མེད་པར་བཏིང་ངོ་། །སྲ་བརྐྱང་འདི་ལ་རྙེད་པ་དང་ཕན་ཡོན་གང་ཡོད་པ་དེ་བདག་གི་ཡིན་ནོ་བརྗོད་པར་བྱའོ། །ཆོ་གས་གདིང་དགོས་པར་ངེས་སམ་ཞེ་ན། སྲ་བརྐྱང་གདིང་བ་འདི་ལ་རྗེས་སུ་ཡི་རང་བས་ལེགས་པར་བཏིང་ངོ་། །ཤིན་ཏུ་བཏིང་ངོ་། །འདི་ལ་ཕན་ཡོན་དང་རྙེད་པ་གང་ཡོད་པ་དེ་བདག་གི་ཡིན་ནོ། །ཞེས་པ་དེ་ཉམས་སུ་མྱོང་ན་སྲ་བརྐྱང་བཏིང་བ་འབྱུང་ངོ་། །དེ་ཡང་སྲ་བརྐྱང་བཏིང་བའི་དགེ་འདུན་མངོན་སུམ་དུ་འདུས་པར་གྱུར་པས། དེ་ལྟར་མྱོང་ན་གདིང་བ་འབྱུང་གི་གཞན་དུ་ན་མ་ཡིན་ནོ། །སྲ་བརྐྱང་གི་ཕན་ཡོན་ལ་གནས་བསྡུ་བ་ཞེས་གསུངས་པ་ནི། འབྲས་བུ་སྲ་བརྐྱང་གི་ཕན་ཡོན་མཐོང་ནས་རྒྱུ་དབྱར་གནས་པ་ལ་གུས་པས་འཇུག་པའོ། །གཞན་གཉིས་ནི་གོ་བར་ཟད་དོ། །གཉིས་པ་བསྐྱང་བའི་ཚུལ་ནི། སྲ་བརྐྱང་དེ་ཕྱིས་དུས་དུས་སུ་སེར་བུ་ལ་བསྲང་བ་དང་། ཉི་མ་ལ་བསྲང་བ་དང་། རྡུལ་སྤྲུག་པར་བྱའོ། །ཁྱིམ་དུ་བ་ཅན་དང་རྡུལ་ཅན་དུ་གཞག་པར་མི་བྱའོ། །རྒྱལ་པོའི་ཕོ་བྲང་དུ་གཞག་པར་མི་བྱ། སྲ་བརྐྱང་གདིང་བར་བསྐོས་པའི་དགེ་སློང་དེ་སྲ་བརྐྱང་དང་བྲལ་བར་མི་བྱ་ཞིང་། སྲ་བརྐྱང་དེ་ཁྱེར་ཏེ་གཞན་དུ་འགྲོ་བར་ཡང་མི་བྱ་སྟེ། སྲ་བརྐྱང་གི་བྱིན་བརླབས་འཇིག་པའི་དགག་བྱ་ཡོད་པའི་ཕྱིར། དེ་ཁྱེར་ནས་མི་གཙང་བའི་སྐྱབས་གཉིས་སུ་འཇུག་པར་མི་བྱ། དེ་ཁྱེར་ནས་བླ་གབ་མེད་པར་ཅུང་ཟད་ཀྱང་འདུག་པར་མི་བྱའོ། །གསུམ་པ་དབྱུང་བའི་ཚུལ་ལ་བསྟན་བཤད་གཉིས་ལས། དང་པོ་ནི། སྲ་བརྐྱང་དབྱུང་བ་ཆོས་ཅན། རྣམ་པ་གཉིས་སུ་ཡོད་དེ། རང་འཇུག་བྲལ་གྱི་དབྱུང་བ་དང་། བཅོས་མའི་དབྱུང་བ་གཉིས་ཡོད་པའི་ཕྱིར། ལས་ལ་ལྟོས་མེད་དུ་སྲ་བརྐྱང་གི་བྱིན་བརླབས་མེད་པར་སོང་བ་ནི་རང་འཇུག་བྲལ་གྱི་དབྱུང་བ་ཡིན་ལ་ལས་ལ་ལྟོས་ནས་སྲ་བརྐྱང་གི་བྱིན་བརླབས་མེད་པར་སོང་བ་ནི་བཅོས་མའི་དབྱུང་བའོ། །གཉིས་པ་ལ་གཉིས་ལས། རང་འཇུག་བྲལ་གྱི་དབྱུང་བ་ནི། སྲ་བརྐྱང་གིས་སྲ་བརྐྱང་བཏིང་མཚམས་ལས་མཚམས་ཀྱི་ཕྱི་རོལ་དུ་ཕྱིན་པ་དང་། བྱིན་གྱིས་རློབ་པར་བྱེད་པ་མེད་པ་སྟེ་སྲ་བརྐྱང་སྲུང་བ་པོ་མེད་པར་མཚམས་ཀྱི་ནང་དུ་སྐྱ་རེངས་ཤར་བ་དང་། དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་རྣམས་ལའང་རང་འཇུག་པ་དང་བྲལ་བ་དེ་འགྲུབ་བོ། །དང་པོ་གཉིས་ཀྱིས་ནི་དགེ་འདུན་སྤྱིའི་རང་འཇུག་བྲལ་དང་། ཕྱི་མས་ནི་གང་ཟག་སོ་སོའི་རང་འཇུག་བྲལ་འགྲུབ་བོ། །འདིང་བར་བསྐོས་པ་དེས་སྲུང་བ་པོ་དགེ་སློང་གཞན་མེད་པར་མཚམས་ཀྱི་ཕྱི་རོལ་ཏུ་སྐྱ་རེངས་ཤར་བར་གནས་ན། དེ་ལ་སྲ་བརྐྱང་དང་བྲལ་བའི་འབྲལ་སྤང་འབྱུང་ཞིང་སྲ་བརྐྱང་གི་བྱིན་བརླབས་མེད་པར་ཡང་འགྱུར་རོ། །དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་དེ་གང་ཟག་གང་ལ་འགྲུབ་ཅེ་ན། སྦྱོར་བས་འགྲོ་བ་ལ་སོགས་པའི་གང་ཟག་དེ་ལ་དེའི་དཀྱིལ་འཁོར་གྱི་ཁོངས་སུ་གཏོགས་པར་ཆད་པར་དེར་འགྲུབ་བོ། །དེ་ལ་མ་དྲུག་སྟེ། སྦྱོར་བས་འགྲོ་བའི་མ། ངེས་པར་བྱེད་པའི་མ། མཐར་ཐུག་པའི་མ། བརྩམས་པ་ཞིག་པའི་མ། བསམ་པ་རྒྱུན་ཆད་པའི་མ། མཚམས་འདས་ཀྱི་མའོ། །དེའང་སྲ་བརྐྱང་གི་བྱིན་བརླབས་ལ་ཡང་མི་བརྟེན། སྲ་བརྐྱང་གི་ཕན་ཡོན་ལ་ཡང་མི་བརྟེན། མཚམས་ཀྱི་ནང་དུ་མི་འོང་སྙམ་པའི་བློ་སྐྱེས་པའམ། མཚམས་ཀྱི་ནང་དུ་འོང་ངམ་མི་འོང་ཐེ་ཚོམ་ཟ་བཞིན་དུ་མཚམས་ཀྱི་ནང་ནས་ཕྱི་རོལ་དུ་འདས་པ་ནི་སྦྱོར་བས་འགྲོ་བའི་མའོ། །མཚམས་ཀྱི་ཕྱི་རོལ་དུ་སྲ་བརྐྱང་འདི་ལ་མི་བརྟེན། མཚམས་ཀྱི་ནང་དུ་མི་འོང་སྙམ་པའི་བློ་སྐྱེས་པའི་བརྟེན་ནམ་མི་བརྟེན། འོང་ངམ་མི་འོང་སྙམ་པའི་ཐེ་ཚོམ་ཟ་བ་ནི་ངེས་འབྱེད་ཀྱི་མ། རང་གི་ཆོས་གོས་མ་གྲུབ་བར་དུ་སྲ་བརྐྱང་འདི་ལ་བརྟེན་ལ། རང་གི་ཆོས་གོས་གྲུབ་ནས་སྲ་བརྐྱང་ལ་མི་བརྟེན་སྙམ་པའི་བློ་སྐྱེས་པ་ན། རང་གི་ཆོས་གོས་ཀྱི་བཟོ་ལེགས་པར་ཟིན་པ་ནི་མཐར་ཐུག་པའི་མ། དེ་འདྲའི་བློ་སྐྱེས་པ་ན་ཆོས་གོས་བྱ་རྒྱུའི་དངོས་པོ་དེ་མེས་ཚིག་པའམ། ཆོམ་རྐུན་པ་སོགས་ཀྱིས་ཁྱེར་བ་ནི་བརྩོམས་པ་ཞིག་པའི་མ། དེ་འདྲའི་བློ་སྐྱེས་ཏེ་སྦྱིན་བདག་གི་ཡུལ་ལ་ཆོས་གོས་ཀྱི་རེ་བ་བྱས་པ་ན། སྦྱིན་བདག་དེ་ཤི་བ་ལྟ་བུ་ནི་བསམ་པ་རྒྱུན་ཆད་པའི་མ། སྲ་བརྐྱང་འདི་ལ་བརྟེན་ནམ་མི་རྟེན་སྙམ་པའི་ཐེ་ཚོམ་ཟ་བཞིན་དུ་མཚམས་ཀྱི་ཕྱི་རོལ་དུ་འདས་པ་ནི་མཚམས་འདས་ཀྱི་མའོ། །དེ་ཉིད་གཞུང་དོན་དུ་འཆད་པ་ལ། སྲ་བརྐྱང་བཏིང་མཚམས་ལས། མཚམས་ཀྱི་ཕྱི་རོལ་དུ་འདས་པ་ན་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པར་འགྲུབ། དེ་ཙམ་གྱིས་འགྲུབ་བམ་ཞེ་ན་མཚམས་ཀྱི་ནང་དུ་ཕྱིར་མི་འོང་སྙམས་པའི་སེམས་སྐྱེས་པའམ། འོང་མི་འོང་ཐེ་ཚོམ་ཟ་བའི་བློ་སྐྱེས་ཏེ་མཚམས་ལས་འདས་པ་ན་དེ་འགྲུབ་བོ། །དེ་ཡང་ཆོས་གོས་སྲ་བརྐྱང་ལ་ཆོས་གོས་བྱ་སྙམ་པའི་བསམ་པ་རྗེས་སུ་འབྲེལ་པ་མེད་ན་དེའི་ཚེ་འགྲུབ་སྟེ། འདིས་ནི་སྦྱོར་འགྲོའི་མ་དེ་བསྟན་ནོ། །མཚམས་ཀྱི་ཕྱི་རོལ་དུ་མཚམས་ནང་དུ་མི་འོང་སྙམ་པའི་བློ་སྐྱེས་ན་ཡང་ངོ་སྟེ་དེའི་དཀྱིལ་འཁོར་གྱི་ཁོངས་སུ་གཏོགས་པར་འཆད་པ་དེ་འགྲུབ། བསམ་པ་ཇི་ལྟ་བུས་འགྲུབ་ཅེ་ན། སྲ་བརྐྱང་འདི་ལ་ཆོས་གོས་བྱ་སྙམ་པའི་བསམ་པ་རྗེས་སུ་འབྲེལ་བ་མེད་ན་དེའི་ཚེ་འགྲུབ་སྟེ་འདིས་ནི་ངེས་འབྱེད་ཀྱི་མ་བསྟན་ནོ། །ཡོད་ན་མི་འགྲུབ་བམ་ཞེ་ན། གུད་དུ་རང་གི་ཆོས་གོས་མ་གྲུབ་ཀྱི་བར་སྲ་བརྐྱང་འདི་ལ་བརྟེན་སྙམ་པའི་བསམ་པ་རྗེས་སུ་འབྲེལ་བ་ཡོད་ན། མཚམས་ཀྱི་ཕྱི་རོལ་དུ་ཕྱིན་པ་ན་བྱེད་པར་འགྱུར་བ་ཉིད་ཆད་ན་རང་འཇུག་བྲལ་གྱི་དབྱུང་བ་དེ་འགྲུབ་བོ། །མཚམས་ནང་དུ་མི་འགྲུབ་བམ་ཅེ་ན། མཚམས་ཀྱི་ཕྱི་ནས་ནང་དུ་འོང་བའི་ཚེ་བྱེད་པར་འགྱུར་བ་ཆད་ན་ཡང་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པར་འགྲུབ་བོ། །བྱེད་པར་འགྱུར་བ་ཆད་པ་དེ་གང་ཞེ་ན། རང་གི་ཆོས་གོས་ཀྱི་བཟོ་ཚེམས་ལེགས་པར་ཟིན་པ་ན་བྱེད་པར་འགྱུར་བ་མཐར་ཐུག་པ་དང་། ཆོས་གོས་ཀྱི་རྒྱུ་དེ་མེས་ཚིག་པ་སོགས་ཀྱི་སྒོ་ནས་བརྩམས་པ་ཞིག་པ་དང་། ཆོས་གོས་དེ་གང་ལས་རེ་བའི་ཡོན་བདག་ལྟ་བུ་ཤི་ནས་རེ་བ་ཆད་པ་ལྟ་བུ་བསམ་པ་རྒྱུན་ཆད་པ་སྟེ། དེ་གསུམ་ལ་བྱེད་པར་འགྱུར་བ་ཆད་པ་སྟེ་གནས་སོ། །མཚམས་ཀྱི་ནང་དུ་སྲ་བརྐྱང་འདི་ལ་བརྟེན་ནམ་མི་བརྟེན། མཚམས་ནང་དུ་འོང་ངམ་མི་འོང་སྙམ་པའི་ཐེ་ཚོམ་ཟ་བཞིན་དུ་མཚམས་ལས་འདས་པ་དེ་ཆོས་ཅན། ཁྱོད་ལས་དེའི་དཀྱིལ་འཁོར་གྱི་ཁོངས་སུ་གཏོགས་པར་ཆད་པ་འབྱུང་སྟེ། དེའི་རྒྱུ་ཚོགས་ཚང་བའི་ཕྱིར། དཔེར་ན་ཕྱིར་མི་འོང་ངོ་སྙམ་དུ་མཐའ་གཅིག་ཏུ་ངེས་པས་འབྱིན་པ་སྟེ། དེའི་དཀྱིལ་འཁོར་གྱི་ཁོངས་སུ་གཏོགས་པར་ཆད་པ་དང་འདྲའོ། །དེ་བཞིན་དུ་མཚམས་ཀྱི་ཕྱི་རོལ་ལ་ཡང་སྦྱར་རོ། །གཉིས་པ་བཅོས་མའི་དབྱུང་བ་ནི། རང་འཇུག་བྲལ་གྱི་དབྱུང་བ་དེ་བྱར་རུང་ངམ་ཞེ་ན། གསོལ་བཞིའི་ལས་ལས་གཞན་པའི་སྦྱོར་འགྲོ་ལ་སོགས་པས་སྲ་བརྐྱང་དབྱུང་བར་བྱ་བ་རྗེས་སུ་བསྒྲུབ་པར་མི་བྱའོ། །དུས་ནམ་གྱི་ཚེ་དབྱུང་ཞེ་ན། སྲ་བརྐྱང་དེ་དབྱུང་བའི་དུས་ནི་དཔྱིད་ཟླ་རྭ་བའི་ཉ་ལའོ། །དེ་ཡང་ལོ་དེ་ཉིད་ཀྱི་མོད་ལ་འབྱུང་བ་ཉ་དེ་ཉིད་ལ་དབྱུང་ངོ་། །དེར་ངེས་སམ་ཞེ་ན། ཆོམ་རྐུན་པས་བཅོམ་པའི་དོན་ཉིད་དུ་ནི་དཔྱིད་ཟླ་རྭ་བའི་ཉའི་སྔར་ཡང་དབྱུང་དུ་རུང་ངོ་། །གསུམ་པ་ཞར་ལ་ཐོས་བྱུང་གི་མ་བཤད་པ་ནི། སྲ་བརྐྱང་དབྱུང་ཟིན་ནས་དེའི་ཕན་ཡོན་འབྱུང་བ་མེད་དམ་ཞེ་ན། སྲ་བརྐྱང་དུས་ཀྱི་སྔ་རོལ་དུ་ཕྱུང་བའི་དུས་དེར་སྲ་བརྐྱང་འདིང་བ་མཚམས་དེའི་ཕྱི་རོལ་ན་གནས་པ་དེ་མཚམས་ཀྱི་ནང་དུ་སྲ་བརྐྱང་ཕྱུང་བའི་གཏམ་མ་ཐོས་ཀྱི་བར་དུ་སྲ་བརྐྱང་གི་ཕན་ཡོན་རྗེས་སུ་འཇུག་གོ །གུད་དུ་ཆོས་གོས་མ་གྲུབ་ཀྱི་བར་དུ་སྲ་བརྐྱང་འདི་ལ་བརྟེན་སྙམ་པའི་བསམ་པ་རྗེས་སུ་འབྲེལ་བ་མེད་ན། མ་བྲོས་ཀྱི་བར་དུ་ཕན་ཡོན་རྗེས་སུ་འཇུག་གོ །དེ་འདྲའི་བསམ་པ་རྗེས་སུ་འབྲེལ་བ་ཡོད་ན་བྱེད་པར་འགྱུར་བ་མ་ཆད་ཅིང་མ་ཐོབ་ཀྱི་བར་དུ་ཕན་ཡོན་འཇུག་གོ །སྲ་བརྐྱང་གི་བྱིན་བརླབས་མ་ཕྱུང་བར་ཆོམ་རྐུན་པས་བཅོམ་པ་དང་། མ་བཅོས་པ་ཐམས་ཅད་ཀྱིས་སྲ་བརྐྱང་དེའི་དུས་ཀྱི་རྙེད་པ་བགོ་བར་མི་བྱའོ། །གཉིས་པ་ཞུ་བའི་སྐབས་ནས་འབྱུང་བ་ལ་བཞི་སྟེ། གང་གི་ཚེ་གདིང་བ་དུས་ཀྱི་མཚན་ཉིད། གདིང་དབྱུང་ངོ་བོ་ཉིད་ཀྱི་མཚན་ཉིད། གང་དུ་གདིང་བ་གནས་ཀྱི་མཚན་ཉིད། ཁ་སྐོང་དང་ཕན་ཡོན་གྱི་མཚན་ཉིད་དོ། །དང་པོ་ནི། ལོ་དེ་ལ་སྟོན་ཟླ་འབྲིང་པོ་གཉིས་ཡོད་ན་སྲ་བརྐྱང་གང་ལ་གདིང་ཞེ་ན། དགག་དབྱེ་ཇི་ལྟར་བ་བཞིན་དུ་སྟེ། དབྱར་ཟླ་བ་གསུམ་དུ་ཁས་བླངས་ཏེ། སྟོན་ཟླ་འབྲིང་པོ་ལ་སྲ་བརྐྱང་གདིང་ངོ་། །དེས་མཚོན་ནས་འཐབ་ཀྲོལ་ཅན་གྱི་རྐྱེན་དབང་གིས་དགག་དབྱེ་དུས་ཀྱི་སྔ་རོལ་དང་། ཕྱིས་བྱེད་པ་ན་ཡང་དགག་དབྱེ་ཇི་ལྟ་བ་བཞིན་དུ་གདིང་ངོ་། །ཁ་ཅིག་སྟོན་ཟླ་འབྲིང་པོ་གཉིས་བྱུང་བ་ན་སྔ་མ་ཤོལ་ཟླར་བྱེད་ཟེར་བ་ཡང་མི་འཐད་དེ། འདིའི་སྐབས་ཀྱི་འགྲེལ་བར་སྟོན་ཟླ་འབྲིང་པོ་ངོ་གཉིས་སུ་གྱུར་པ་ན། ཚེས་བཅུ་དྲུག་ཅེས་བྱ་བའི་ཉི་མ་སྔ་མ་ལ་གདིང་བ་ཞེས་པ་དང་། འགྲེལ་ཆུང་ལས་ཀྱང་སྟོན་ཟླ་འབྲིང་པོ་གཉིས་དང་། ཚེས་གྲངས་མི་མཐུན་པ་ལ་ནི། དགག་དབྱེ་ཇི་ལྟ་བ་བཞིན་དུ་གདིང་ཞེས་གསུངས་པའི་ཕྱིར། དགག་དབྱེ་རྐྱེན་དབང་གིས་སྔ་ཕྱིར་བྱས་པའི་ཚེ། གསོ་སྦྱོང་གི་མཐའ་མ་ཡིན་པ་ལ་སྲ་བརྐྱང་གདིང་དུ་རུང་ངམ་ཞེ་ན། གསོ་སྦྱོང་བྱས་པའི་མཐའ་མ་ཡིན་པ་ལ་སྲ་བརྐྱང་གདིང་བར་མི་བྱའོ། །སྲ་བརྐྱང་དབྱུང་བ་ལ་གསོ་སྦྱོང་གི་མཐའ་མ་ཡིན་པ་ལ་མི་བྱའོ། །ཆོམ་རྐུན་པས་བཅོམ་པའི་དབང་གིས་སྲ་བརྐྱང་དུས་ཀྱི་སྔ་རོལ་དུ་དབྱུང་བ་འདི་ནི་གསོ་སྦྱོང་བྱས་པའི་ཉི་མ་དེ་ཉིད་ཀྱི་མཐའ་ལ་བྱའོ། །རང་འཇུག་བྲལ་དང་བཅོས་མའི་དབྱུང་བ་མ་ཡིན་པའི་སྲ་བརྐྱང་དབྱུང་བ་གཞན་མེད་དམ་ཞེ་ན། སྲ་བརྐྱང་བཏིང་ཟིན་པའི་འོག་ཏུ་དགེ་སློང་གློ་བུར་བ་མང་པོ་ལྷགས་ནས་གསོ་སྦྱོང་བྱས་ན་སྲ་བརྐྱང་གི་བྱིན་བརླབས་ཕྱུང་བ་ཉིད་ཡིན་ཏེ། དེའི་ཚེ་སྲ་བརྐྱང་འདིང་བ་པོ་རྣམས་ལ་དུས་མ་ཡིན་པར་སྲ་བརྐྱང་གདིང་ངོ་སྙམ་པའི་བློ་སྐྱེ་བའི་ཕྱིར། གཉིས་པ་ནི། སྲ་བརྐྱང་བཏིང་བའི་འོག་ཏུ་དགེ་འདུན་ཕྱོགས་གཉིས་སུ་བྱེ་བ་ན་སྲ་བརྐྱང་ལྷན་ཅིག་བཏིང་བ་ཡིན་པས་ལྷན་ཅིག་དབྱུང་དགོས་སམ་སྙམ་ན། སྲ་བརྐྱང་བཏིང་ནས་དགེ་འདུན་ཆོས་ཕྱོགས་པ་དང་། ཆོས་མིན་ཕྱོགས་པ་གཉིས་སུ་བྱེ་བ་དག་ལ་ནི་སྲ་བརྐྱང་དབྱུང་བ་དེ་ཐ་དད་པར་གྲུབ་པས་ཐ་དད་དུ་དབྱུང་བར་བྱ། སྲ་བརྐྱང་མ་བཏིང་བར་ཕྱོགས་གཉིས་སུ་བྱེ་བ་ན་སྲ་བརྐྱང་བཏིང་བ་དེ་སུས་བྱ་ཞེ་ན། དེའི་ཚེ་ན་ཆོས་སྨྲ་བ་དག་ཡོད་པས་ཆོས་ཕྱོགས་པས་གདིང་བར་བྱ་སྟེ། ཆོས་ཕྱོགས་པས་བྱས་ན་ལེགས་པར་བྱས་པའི་ཕྱིར། ཆོས་མིན་ཕྱོགས་པས་སྲ་བརྐྱང་བཏིང་བའི་ཚེ་དབྱར་གྱི་རྙེད་པ་དེ་སུ་དབང་ཞེ་ན། མཚམས་ནང་དུ་ཆོས་ཕྱོགས་པ་ལས་གཞན་ཆོས་མ་ཡིན་པ་དག་གིས་སྲ་བརྐྱང་བཏིང་ཀྱང་དབྱར་རྙེད་པའི་རྙེད་པ་ནི་ཆོས་ཕྱོགས་པ་ལ་འོས་པ་ཡིན་ལ། སྲ་བརྐྱང་གི་རྙེད་པ་ནི་ཐུན་མོང་དུ་དབང་བ་ཡིན་ནོ། །ཕལ་ཆེར་ལྷན་ཅིག་ཏུ་གནས་ནས་དེའི་འོག་ཏུ་བྱེ་བ་ན་ཆོས་མ་ཡིན་པའང་དབྱར་རྙེད་དབང་སྟེ། དབྱར་ཕལ་ཆེར་གནས་ནས་དེའི་འོག་ཏུ་ཤི་བ་དང་བབ་པའང་དབྱར་རྙེད་དབང་བའི་ཕྱིར། འོ་ན་ཆོས་མིན་ཕྱོགས་པ་དང་གནས་དབྱུང་ནན་ཏུར་བྱས་པ་གཉིས་སྤངས་པར་མཚུངས་པས་ཆོས་མ་ཡིན་པ་ཉི་ཚེས་སྲ་བརྐྱང་བཏིང་ན། གཏིང་བའི་གོ་ཆོད་པ་བཞིན་དུ་གནས་དབྱུང་ནན་ཏུར་བྱས་པ་ཉི་ཚེས་སྲ་བརྐྱང་བཏིང་ན་ཡང་བཏིང་བའི་གོ་ཆོད་དམ་ཞེ་ན། རང་བཞིན་དུ་གནས་པས་སྤངས་པ་གནས་དབྱུང་ནན་ཏུར་བྱས་པ་ཉི་ཚེ་ལ་སྲ་བརྐྱང་གདིང་བར་མི་འགྱུར་ཏེ། གནས་དབྱུང་ནན་ཏུར་བྱས་པ་ཉི་ཚེས་ལས་བྱས་པས་ལས་མི་འཆགས་པའི་ཕྱིར། བསམ་པ་ཇི་ལྟ་བུས་སྲ་བརྐྱང་གདིང་བ་འགྲུབ་ཅེ་ན། སྲ་བརྐྱང་འདི་ལ་རྙེད་པ་དང་ཕན་ཡོན་འགྲུབ་སྙམ་པའི་བསམ་པ་གནས་པ་ནི་སྲ་བརྐྱང་བཏིང་བ་འཆགས་པ་ཡིན་ནོ། །གདིང་དབྱུང་ལྷན་ཅིག་ཏུ་བྱ་བ་ལ་འདུན་པ་ཕུལ་བའི་དབང་གི་ལྷག་མ་རྣམས་ཀྱིས་གདིང་དབྱུང་གི་བྱ་བ་བྱས་ན། འདུན་པ་ཕུལ་བ་དེས་ཀྱང་དེ་བྱས་པ་ཉིད་ཡིན་ནོ། །བསམ་པ་ཇི་ལྟ་བུ་ཡོད་ན་སྲ་བརྐྱང་ཕྱུང་བར་འགྱུར་སྙམ་ན། སྲ་བརྐྱང་འདི་ལ་རྙེད་པ་དང་ཕན་ཡོན་འགྲུབ་སྙམ་པའི་བསམ་པ་དང་བྲལ་བས་དེ་མི་འགྲུབ་སྙམ་ན་སྲ་བརྐྱང་ཕྱུང་བ་ཡིན་ནོ། །བསམ་པ་གནས་པ་ནི་བཏིང་བ་ཡིན་ལ། དེ་དང་བྲལ་བ་ནི་ཕྱུང་བ་ཡིན་པ་དེའི་ཕྱིར། གདིང་དབྱུང་ལ་འདུན་པ་མ་ཕུལ་བ་ནི་གྲལ་དུ་འདུག་ཏུ་ཟིན་ཀྱང་། གཉིད་ལོག་གམ། ཏིང་ངེ་འཛིན་ལ་སྙོམས་པར་ཞུགས་ན། གདིང་དབྱུང་གི་གཏམ་མ་ཐོས་ཀྱི་བར་དུ་སྲ་བརྐྱང་བཏིང་བ་དང་། ཕྱུང་བ་མི་འབྱུང་ངོ་། །བཏིང་བ་ལ་ནི་རྗེས་སུ་ཡི་རང་ཉམས་སུ་མྱོང་དགོས་པར་གོང་དུ་བསྟན་ཟིན་ཏོ། །གསུམ་པ་ནི། སྲ་བརྐྱང་བཏིང་བ་གཅིག་ལ་བཏིང་བའི་གནས་དེ་ཁོ་ན་ཉིད་དུ་གནས་པ་གཅིག་དགོས་སམ་ཞེ་ན། སྲ་བརྐྱང་གདིང་བའི་ཚེ་མཚམས་གཅིག་པ་ཉིད་ཡིན་ན། དབྱར་གྱི་དུས་དེར་གནས་གཞན་དུ་སྟེ་མཚམས་ཐ་དད་པར་གནས་པ་རྣམས་ཀྱང་སྲ་བརྐྱང་བཏིང་བའི་ཕྱིར་གནས་གཅིག་པ་ཉིད་ཡིན་ནོ། །སྲ་བརྐྱང་བཏིང་བའི་འོག་ཏུ་མཚམས་གཅིག་པ་ཉིད་ཡིན་ན། སྲ་བརྐྱང་གཏིང་བ་གནས་གཅིག་པ་གྲུབ་བམ་ཞེ་ན། གནས་གཞན་དུ་གནས་པ་རྣམས་ཀྱང་བཏིང་བའི་ཕྱིར། གནས་གཅིག་པ་ཡིན་པ་དེ་ནི་བཏིང་བའི་ཚེ་མཚམས་དེ་ན་གནས་པ་དེ་ཉིད་ཡིན་ནོ། །བཏིང་ནས་མཚམས་ཐ་དད་པར་སོང་ནས། སྲ་བརྐྱང་དེ་དང་པོ་བཏིང་བའི་གནས་དེ་ཁོ་ནར་འཇོག་དགོས་སམ་ཞེ་ན། སྲ་བརྐྱང་བཏིང་ཟིན་ནས་མཚམས་ཐ་དད་པར་བྱས་ན་མཚམས་དེའི་ནང་གི་གནས་གང་ཡང་རུང་བ་དེ་སྲ་བརྐྱང་གི་ལས་དེའི་གནས་ཡིན་པས་གང་འདོད་པ་གཅིག་ཏུ་གཞག་པར་བྱ་སྟེ། བཏིང་མཚམས་ལས་ཐ་དད་པར་ཕྱིན་པ་མེད་པའི་ཕྱིར། གདིང་བའི་མཚམས་གཅིག་ལ་བཏིང་ཟིན་ནས་མཚམས་ཐ་དད་པར་བྱས་ན་བཏིང་བའི་ཚེ་མཚམས་གཅིག་པས་དབྱུང་བ་ཡང་ལྷན་གཅིག་ཏུ་བྱའམ་ཞེ་ན། སྲ་བརྐྱང་བཏིང་ནས་མཚམས་ཐ་དད་པར་བྱས་པ་ཉིད་ཡིན་ན་གནས་སོ་སོར་སྲ་བརྐྱང་དེ་དབྱུང་ངོ་། །གནས་གཅིག་པ་ཉིད་ཡིན་ན་ལྷན་ཅིག་ཏུ་དབྱུང་ངམ་ཞེ་ན། བཏིང་ཟིན་པའི་འོག་ཏུ་དགེ་འདུན་ལས་དང་འཁོར་ལོ་བྱེ་བ་ཉིད་ན་གནས་གཅིག་ཀྱང་ཕྱོགས་སོ་སོར་དབྱུང་ངོ་། །འདི་ནི་གནས་གཅིག་པའི་གཞི་ལ་དོགས་པ་དཔྱད། བཏིང་ནས་ཕྱེ་བ་ཞེས་སོགས་ཀྱིས་ལྷན་ཅིག་ཏུ་བཏིང་བའི་གཞི་ལ་དོགས་པ་དཔྱད་པ་ཡིན་ནོ། །བཞི་པ་ནི། སྲ་བརྐྱང་མ་བཏིང་བས་སྲ་བརྐྱང་ཕྱུང་བ་ནི་སྲ་བརྐྱང་མ་ཕྱུང་བ་མ་ཡིན་ཏེ་ཕྱུང་བ་ཡིན་ནོ། །སྲ་བརྐྱང་དབྱུང་བའི་ཁ་སྐོང་དུ་འོས་པ་ལ་སྲ་བརྐྱང་གདིང་བ་འབྱུང་བ་གཅིག་དགོས་སམ་ཞེ་ན། སྲ་བརྐྱང་གདིང་བ་མི་འབྱུང་བ་ཉིད་ཀྱིས་སྲ་བརྐྱང་དབྱུང་བ་ཁ་སྐོང་དུ་མི་རུང་བ་ཉིད་མ་ཡིན་ནོ། །མ་བཏིང་བ་ཉིད་ཀྱིས་ཕྱུང་ན་ཕྱུང་བའི་གོ་ཆོད་མོད། དབྱུང་བར་མི་རུང་ངམ་ཞེ་ན། སྲ་བརྐྱང་མ་བཏིང་བ་ཉིད་ཀྱིས་སྲ་བརྐྱང་དབྱུང་བར་མི་རུང་བ་ཉིད་མིན་ཏེ་རུང་ངོ་། །སྲ་བརྐྱང་བཏིང་བའི་ཕན་ཡོན་སྔར་བཤད་པ་དེ་ཙམ་དུ་ཟད་དམ་ཞེ་ན། སྲ་བརྐྱང་བཏིང་ན་ནི་སྣམ་སྦྱར་མེད་པར་གྲོང་དུ་འཇུག་པ་དང་། ལ་སོགས་པ་གྲོང་ཆེར་དུ་འཇུག་པ་དང་། ལམ་གྱི་སུམ་མདོ་དང་། བཞི་མདོ་ལ་སོགས་པ་ཚུན་ཆད་དུ་འདུག་པ་ལ་ཡང་ཉེས་པ་མེད་དོ། །སྣམ་སྦྱར་དང་བྲལ་བའི་འབྲལ་སྤང་མི་འབྱུང་བར་གོང་དུ་བསྟན་ལ། འདིས་སྣམ་སྦྱར་ཁྱེར་བའི་དཀའ་ཚེགས་མེད་པར་བསྟན་ནོ། །སྟོད་གཡོགས་དང་སྨད་གཡོགས་མེད་པར་གྲོང་དུ་འགྲོར་རུང་ངམ་ཞེ་ན། སྟོད་ཀྱི་གོས་གཅིག་དང་སྨད་ཀྱི་གོས་གཅིག་མེད་པར་གྲོང་དུ་ཕྱིན་ན་རབ་ཏུ་བྱུང་བའི་རྟགས་ཉམས་པའི་ཉེས་པ་ཡོད་ལ་འབྲལ་བའི་ཉེས་པ་མེད་དོ། །དགེ་འདུན་ཐམས་ཅད་དབྱར་ཕྱི་མར་ཁས་བླངས་ན། དེ་ལ་སྲ་བརྐྱང་གདིང་བ་འབྱུང་བར་གསུངས་པ་སྒྲ་ཇི་བཞིན་དུ་ཁས་བླངས་ན་དབྱར་ཕྱི་མར་ཁས་བླངས་པ་དང་ཞེས་པ་ལ་དབྱར་སྔ་མ་ཁས་བླངས་པ་དང་ཞེས་དང་། དངོས་གཞིའི་དུས་ཀྱི་ཞེས་པ་ལ་དབྱར་ཕྱི་མའི་དུས་ཀྱི་ཞེས་པ་དང་། སྟོན་ཟླ་འབྲིང་པོ་ཞེས་པ་ལ་སྟོན་ཟླ་ཐ་ཆུང་ཞེས་པ་དང་། དཔྱིད་ཟླ་རྭ་བ་ཞེས་པ་ལ་དཔྱིད་ཟླ་འབྲིང་པོ་ཞེས་སྦྱར་རོ། །དགེ་སློང་མ་ལ་ཆོས་གོས་གསུམ་ཞེས་པའི་དོད་དུ་ཆོས་གོས་ལྔ་ཞེས་སྦྱར་རོ། །སྤྱི་དོན་རགས་པ་ཙམ་གྱིས་སྲ་བརྐྱང་གི །རྣམ་གཞག་བདེ་བླག་རྟོགས་པ་མེད་མཐོང་ནས། །གཞུང་དོན་ཞིབ་ཏུ་བཀོད་པའི་ལེགས་བཤད་འདི། །དོན་གཉེར་བློ་གསལ་ཚོགས་རྣམས་གུས་པས་ལོངས།། ༈ །།གཉིས་པ་གོས་ཀྱི་གཞི་ལ་བཅུ་སྟེ། གོས་སྒྲུབ་པའི་ཚུལ། དབྱེ་བ། སོ་སོའི་མཚན་ཉིད། བྱིན་རླབས་ཀྱི་ཆོ་ག བྱིན་རླབས་འཇིག་པའི་རྒྱུ། བཅང་བའི་བསམ་པ། ལོངས་སྤྱོད་པའི་གང་ཟག ལོངས་སྤྱོད་པའི་ཆོ་ག དགོས་པ། མཇུག་ཏུ་ཇི་ལྟར་བྱ་བའོ། །དང་པོ་ལ། དྲ་བ་དང་། དྲུབ་པ་དང་། ཁ་སྒྱུར་བའི་ཚུལ་རྣམས་གཞུང་བཞིན་དུ་ཤེས་པར་བྱའོ། །གཉིས་པ་དབྱེ་བ་ལ་འཚོ་བའི་ཡོ་བྱད། མཁོ་བའི་ཡོ་བྱད། ལྷག་པའི་ཡོ་བྱད་དང་གསུམ་མོ། །དང་པོ་ལ། འཚོ་བའི་ཡོ་བྱད་དངོས་དང་། ཡོ་བྱད་ཀྱི་གོས་གཉིས་ཀྱི། དང་པོ་ལ་བཅུ་གསུམ་སྟེ། སྣམ་སྦྱར། བླ་གོས། མཐང་གོས། ཤམ་ཐབས། ཤམ་ཐབས་ཀྱི་གཟན། རྔུལ་གཟན། རྔུལ་གཟན་གྱི་གཟན། གདོང་ཕྱིས། རྣག་གཟན། གཡན་པ་དགབ་པ། སྐྲ་བཟེད། གདིང་བ། དབྱར་གྱི་རས་ཆེན་ནོ། །གཉིས་པ་ཡོ་བྱད་ཀྱི་གོས་ནི་སྟན་ལ་སོགས་པའོ། །གསུམ་པ་སོ་སོའི་མཚན་ཉིད་ལ་གསུམ་ལས། དང་པོ་འཚོ་བའི་ཡོ་བྱད་ནི། རྒྱུ་རུང་བ་རྔ་བལ་ལ་སོགས་པ་ཧ་ཅང་རྒྱུ་ངན་པ་མ་ཡིན་པ། དཔག་བསམ་གྱི་ཤིང་ལས་བྱུང་བ་སོགས་ཧ་ཅང་རྒྱུ་བཟང་བ་མ་ཡིན་པ། སྲིན་བལ་དང་དར་སོགས་རྒྱུ་རུང་བ་བདུན་པོ་རྣམས་ལས་གྲུབ་པ། ཁ་དོག་ངུར་སྨྲིག་དང་སྔོན་པོ་དང་། ཙག་གིས་བསྒྱུར་བ། དབྱིབས་སྤུ་ཅན་དང་། ལུག་རུ་འཁྱིལ་བ་ལྟ་བུ་སོགས་མ་ཡིན་པ་མ་བཀག་ཅིང་གནང་བའོ། །ཚད་ལ་ཆོས་གོས་གསུམ་དང་ཤམ་ཐབས་ཀྱི་ཚད་འབྲལ་སྤང་གི་སྐབས་སུ་བཤད་ཟིན། ཤམ་ཐབས་ཀྱི་གཟན་ནི་ཤམ་ཐབས་དང་མཉམ་པ། གདོང་ཕྱིས་ཁྲུ་གང་པ། རྣག་གཟན་བླ་གོས་དང་མཉམ་པ། གཡན་པ་དགབ་པ་སྲིད་དུ་ཁྲུ་དྲུག་དང་ཞེང་དུ་ཁྲུ་གསུམ་མོ། །སྐྲ་བཟེད་ཞེང་དུ་ཁྲུ་ཕྱེད་དང་གཉིས་སྲིད་དུ་ཁྲུ་གསུམ་ཡིན་ནོ། །རྔུལ་གཟན་དང་རྔུལ་གཟན་གྱི་གཟན་བླ་གོས་དང་མཉམ་ལ། གདིང་བ་སྲིད་དུ་ཁྲུ་གསུམ་ཞེང་དུ་ཁྲུ་དོ་སོར་དྲུག རས་ཆེན་སྲིད་དུ་ཁྲུ་དགུ་ཞེང་དུ་ཁྲུ་གསུམ་དང་སོར་བཅོ་བརྒྱད་དོ། །འཚོ་བའི་ཡོ་བྱད་ནི་རེ་རེ་གནང་གི་གཉིས་མ་གནང་ཞིང་། སོ་སོ་རང་མིང་གིས་བྱིན་གྱིས་རླབས་དགོས་པའོ། །གཉིས་པ་མཁོ་བའི་ཡོ་བྱད་ནི། ཚད་ཁྲུ་གང་ཡན་ཆད་ཡིན་པ་དང་། ཡ་མཐའ་མ་ངེས་པ་དང་རང་གཞན་ཐུན་མོང་གི་མིང་གིས་བྱིན་གྱིས་རླབས་དགོས་པའོ། །གསུམ་པ་ལྷག་པའི་ཡོ་བྱད་ནི། བྱིན་གྱིས་རླབས་བྱ་གཉིས་ལས། ལྷག་པ་གཞན་ཁོ་ནའི་མིང་གིས་བྱིན་གྱིས་རླབས་དགོས་པའམ། གཞན་ལ་ཡིད་གཏད་དེ་བཅང་བར་བྱ་བའོ། །བཞི་པ་བྱིན་གྱིས་རླབས་པའི་ཆོ་ག་ལ་གསུམ་ལས་དང་པོ་འཚོ་བའི་ཡོ་བྱད་བྱིན་གྱིས་བརླབ་པ་ནི། དགེ་སློང་ཆོས་ལྔ་ལྡན་གྱི་མདུན་དུ་ལྷྭམ་ཕུད་བསླབ་པ་རྒན་ན་ཕྱག་བྱས་ལ་འགྲེང་སྟེ་གཉིས་ཀའི་ལག་པས་སྣམ་སྦྱར་བཟུང་སྟེ། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་ཆོས་གོས་བགྱིས་ལགས་པ་རུང་བ་སྤྱད་པར་འོས་པ་འདི་ཆོས་གོས་སྣམ་སྦྱར་དུ་བྱིན་གྱིས་བརླབ་བོ། །ཞེས་ལན་གསུམ་དང་ཐབས་ལེགས་བྱའོ། །རྐྱེན་དབང་གིས་བྱིན་གྱིས་བརླབ་ན། དགོངས་གསོལ་འདྲ། བདག་དགེ་སློང་མིང་འདི་ཞེས་བགྱི་བའི་ཆོས་གོས་འདི་ཆོས་གོས་སྣམ་སྦྱར་དུ་བྱིན་གྱིས་བརླབ་བོ། །ཞེས་པ་ལན་གསུམ་དང་ཐབས་ལེགས་བྱའོ། །བླ་གོས་སོགས་འཚོ་བའི་ཡོ་བྱད་གཞན་རྣམས་ཀྱང་བྱིན་རླབས་དེ་གཉིས་ཀ་ལ་སྣམ་སྦྱར་ཞེས་པའི་ཐད་དུ་བླ་གོས་སོགས་འདོན་པ་བསྒྱུར་རོ། །རྒྱུའི་བྱིན་རླབས་བྱེད་ན། གཉིས་ཀས་སྣམ་སྦྱར་གྱི་རྒྱུ་བཟུང་སྟེ་དགོངས་གསོལ་སྔར་བཞིན། བདག་དགེ་སློང་མིང་འདི་ཞེས་བགྱི་བའི་གོས་འདི་ཆོས་གོས་སྣམ་སྦྱར་དུ་བྱིན་གྱིས་བརླབ་བོ། །འཚལ་ན་སྣམ་ཕྲན་དགུ་པ་ལ་སོགས་པར་བགྱིས་ཏེ། གླེགས་བུ་ཕྱེད་དང་གསུམ་པ་ལ་སོགས་པར་བགྱིའོ། །བར་ཆད་མ་བྱུང་ན་བཀྲུའོ། །བསྐྱང་ངོ་། །དྲའོ། །བརྡེབ་བོ། །ཟུང་གདབ་བོ། །དྲུབ་བོ། །ཁ་བསྒྱུར་རོ། །ཡང་ན་འདི་ལ་ལྷན་ཐབས་སུ་གླན་ནོ། །རྐྱེན་ཇི་ལྟ་བ་བཞིན་དུ་བགྱིས་སྟེ། ཆོས་གོས་འདི་ནི་རུང་བ་སྤྱད་པར་འོས་པའོ། །ཞེས་ལན་གསུམ་འདས་ཐབས་ལེགས་བྱའོ། །ཆོས་གོས་གཞན་གཉིས་ཀྱི་རྒྱུའི་བྱིན་བརླབས་བྱེད་ན། བླ་གོས་ལ་སྣམ་ཕྲན་བདུན་པ་གླེགས་བུ་ཕྱེད་དང་གསུམ་པ་ཞེས། མཐང་གོས་ལ་སྣམ་ཕྲན་ལྔ་པ་གླེགས་བུ་ཕྱེད་དང་གཉིས་པ་ལ་སོགས་པ་ཞེས་སྦྱར་གཞན་རྣམས་སྣམ་སྦྱར་དང་འདྲའོ། །ཡོ་བྱད་ཀྱི་གོས་སྟན་ལ་སོགས་པ་བྱིན་གྱིས་བརླབ་ན་དགོངས་གསོལ་སྔར་བཞིན། བདག་མིང་འདི་ཞེས་བགྱི་བའི་ཡོ་བྱད་ཀྱི་གོས་འདི་སྟན་དུ་བྱིན་གྱིས་བརླབ་བོ། །ཞེས་བརྗོད། སྐ་རགས་སོགས་ལ་འདོན་པ་བསྒྱུར་རོ། །ཡང་ན་སྦྱིན་བདག་སོགས་ལ་ཡིད་གཏད་དེ་བཅང་བར་བྱའོ། །གཉིས་པ་མཁོ་བའི་ཡོ་བྱད་བྱིན་གྱིས་བརླབ་པ་ནི། དགོངས་གསོལ་སྔར་བཞིན། གོས་འདི་བདག་དང་ཚངས་པ་མཚུངས་པར་སྤྱོད་པའི་མཁོ་བའི་ཡོ་བྱད་ཀྱི་གོས་སུ་བྱིན་གྱིས་བརླབ་བོ། །ཞེས་པ་གསུམ་དང་ཐབས་ལེགས་བྱའོ། །གསུམ་པ་ལྷག་པའི་ཡོ་བྱད་བྱིན་གྱིས་བརླབ་པ་ནི། ཆོས་གོས་ལྷག་པོ་ཡོད་ན། བདག་མིང་འདི་ཞེས་བགྱི་བའི་གོས་ལྷག་པ་རུང་བ་བགྱིད་པ། རུང་བ་བགྱིད་པར་འོས་པ་འདི་མཁན་པོའི་ལགས་པར་རུང་བར་བགྱིའོ། །ཞེས་སོགས་བྱའོ། །ཡང་ན་དགེ་སློང་ཆོས་གསུམ་ལྡན་ལ་ཡིད་བརྟེན་པར་བྱའོ། །ལྔ་པ་བྱིན་བརླབས་འཇིག་པའི་རྒྱུ་ནི། དགེ་སློང་ལས་ཉམས་པ་དང་། སྤངས་པ་དང་། བསྔོས་པ་དང་། ཕྲོགས་པ་དང་། བརླག་པ་དང་། ཕྱུང་བ་དང་། ཡིད་བརྟེན་པ་ནི་ཤི་བ་ལ་ཤི་བར་ཤེས་པས་འཇིག་གོ །དྲུག་པ་བཅང་བའི་བསམ་པ་ནི། སྣམ་སྦྱར་ནི་མུ་སྟེགས་དང་བསྙེན་པར་མ་རྫོགས་པ་ལས་ཁྱད་པར་དུ་བྱ་བའི་ཕྱིར་བཅང་བསམ་པ་དང་། བླ་གོས་མཐང་གོས་ནི་སྟོད་སྨད་གཅེར་བ་སྤངས་སྙམ་པའི་བསམ་པ་དང་། ཡོ་བྱད་ཐམས་ཅད་མི་རྟག་པས་ཉེན་པའི་བསམ་པས་བཅང་བར་བྱའོ། །མཁོ་བའི་ཡོ་བྱད་ནི་དཀོན་མཆོག་མཆོད་པའམ། ཆོས་ཕྱིར་དུ་ལུས་གསོ་བའི་དོན་དུ་བཅང་སྙམ་པ་དང་། ལྷག་པའི་ཡོ་བྱད་ནི། གོས་གཉིས་པ་ལྟ་བུ་མཁན་པོ་སོགས་གཞན་གྱི་ཡིན་སྙམ་པའི་བསམས་པས་བཅང་ངོ་། །ཁྲུ་གང་དུ་མ་ལོངས་པའི་ཕྲན་ཚེགས་ཐམས་ཅད་ལ་སེམས་ཀྱིས་བརྟག་པར་བྱའོ། །བདུན་པ་ལོངས་སྤྱོད་པའི་གང་ཟག་ནི་སྤྱིར་རབ་ཏུ་བྱུང་བ་ཚུལ་ཁྲིམས་དང་ལྡན་པས་བཅང་ཞིང་། ཁྱད་པར་སྣམ་སྦྱར་ནི་དགེ་སློང་གིས་བཅང་བར་བྱའོ། །བརྒྱད་པ་ལོངས་སྤྱོད་པའི་ཆོ་ག་ནི། ཆུད་ཟ་བ་དང་། མ་གུས་པ་དང་། སྟོད་གཡོགས་སྨད་དུ་བགོ་བ་ལ་སོགས་པ་དང་། རྟགས་གཞན་དུ་བསྒྱུར་བ་ལ་སོགས་པ་སྤང་སྟེ་བཅང་བར་བྱའོ། །དགུ་པ་བྱིན་གྱིས་བརླབ་པའི་དགོས་པ་ནི། དངོས་སུ་གོས་ལྷག་པོ་བཅང་བའི་ལྟུང་བ་མི་འབྱུང་ཞིང་། བརྒྱུད་ནས་མངོན་ཞེན་དང་འབྲལ་བའི་ཕན་ཡོན་འབྱུང་བའོ། །བཅུ་པ་མཇུག་ཏུ་ཇི་ལྟར་གྲུབ་པ་ནི། རྙིངས་ཤིང་ཟད་ན་ལྷན་པས་གླན་པ་དང་། ཟུང་གདབ་པ་དང་རལ་ན་བཙེམས་པ་ལ་སོགས་པས་བཅོས་པར་བྱ་ཞིང་། བཅོས་སུ་མི་རུང་བར་གྱུར་ན་སྦྱིན་བདག་གིས་བསོད་ནམས་སྤེལ་བ་ལ་སོགས་པའི་ཆེད་དུ་ས་དང་ལྕི་བ་ལ་སོགས་པ་དང་བསྲེ་ནས་གཙུག་ལག་ཁང་ངམ་མཆོད་རྟེན་གྱི་སེར་ཁ་ལ་གླན་པ་སོགས་བྱའོ།། ༈ །།གསུམ་པ་ཀོ་ལྤགས་ཀྱི་གཞི་ལ་གཉིས་ཏེ། ཡུལ་དབུས་དང་མཐའ་འཁོབ་ཀྱི་བྱེ་བྲག་བསྟན་པ། མཐའ་འཁོབ་ཏུ་ཀོ་ལྤགས་བསྟན་པའི་ཚུལ་ལོ། །དང་པོ་ནི། མདོར་ཤར་དུ་ལི་ཁ་ར་ཤིང་འཕེལ་གྱི་མདུན་གྱི་ནགས་ལི་ཁ་རའི་ཤིང་ཚང་ཚིང་ཅན་ཞེས་བྱ་བའོ། །ལྷོར་ནི་འདམ་བུ་ཅན་གྱི་ལྷོ་ན་ཆུ་ཀླུང་དེ་ཞེས་བྱ་བའོ། །ནུབ་ཏུ་ནི་བྲམ་ཟེའི་གྲོང་ཀ་བ་དང་ཉེ་བའི་ཀ་བ་ཞེས་བྱ་བ་གཉིས་སོ། །བྱང་དུ་ནི་ཨུ་ཤི་རའི་རི་ཞེས་བྱའོ་ཞེས་གསུང་སྟེ། དེ་དག་གི་ཡུལ་དབུས་མ་ག་དྷ་ལ་ལྟོས་པའི་ནང་གི་ཕྱོགས་ཀྱི་ཆ་རྣམས་ནི་ཡུལ་དབུས་ཡིན་ལ། དེ་དག་གི་ཕྱི་རོལ་གྱི་དོན་ཕྱོགས་ཆ་ཕན་ཆད་ནི་མཐའ་འཁོབ་ཡིན་ནོ། །གཉིས་པ་ནི་ཡུལ་མཐའ་འཁོབ་ཏུ་མཆིལ་ལྷྭམ་དང་ཀོ་ལྤགས་བསྟན་དུ་རུང་ཞིང་དེའི་ཁྱད་པར་ནི་ཁ་དོག་ཁྲ་བོ་དང་། དབྱིབས་གསེར་སོགས་ཀྱིས་སྤྲས་པ་དང་། སྒྲ་ཀྲོག་ཀྲོག་ཟེར་བ་སོགས་ཀྱི་མཆིལ་ལྷྭམ་མི་རུང་ཞིང་། གླང་པོ་ཆེ་དང་རྟ་བོང་སོགས་ཀྱི་ཀོ་ལྤགས་མི་རུང་ལ་ཆུ་ལ་ཆབ་རོམ་ཆགས་པའི་ཡུལ་དུ་ནི་ཞྭ་དང་ལྷྭམ་སྒྲོག་གུ་ཅན་ཡང་གནང་བ་ཡིན་ནོ།། །།གཉིས་པ་བདེ་བར་གནས་པའི་རྐྱེན་སྨན་བསྟེན་པའི་གཞི་ལ་གཉིས་ཏེ། སྤྱིའི་དོན་དང་། གཞུང་དོན་ལ་དོགས་པ་གཅོད་པའོ། །དང་པོ་ལ། དགོས་དོན་དང་བསྡུས་དོན་གཉིས་ལས། དང་པོ་ནི། སྨན་བསྟེན་པ་ལ་དགོས་པ་ཡོད་དེ། ཚེ་རིང་ཞིང་དགེ་བའི་བྱ་བ་ཡུན་རིང་དུ་འཕེལ་བར་འགྱུར་བའི་ཕྱིར་ཏེ། དེ་ལས་ནད་ཞི་ཞིང་བདེ་བར་འཚོ་བར་འགྱུར་བའི་ཕྱིར། གཞན་ཡང་སྦྱིན་པ་པོའི་བསོད་ནམས་མངོན་པར་སྤེལ་བ་དང་། སངས་རྒྱས་ཀྱི་བཅས་པ་བསྲུང་བའི་དགོས་པ་ཡང་ཡོད་དོ། །གཉིས་པ་ལ་དྲུག་སྟེ། རྒྱུ། དབྱེ་བ། མཚན་ཉིད། བྱིན་གྱིས་བརླབ་པའི་ཚུལ། བཙོ་ཞིང་གཞག་པའི་གནས་རུང་བའི་ཁང་པར་བློ་མཐུན་བྱ་བ། ལོངས་སྤྱོད་པའི་ཚུལ་ལོ། །དང་པོ་ནི། ལོག་འཚོ་དང་བྲལ་ཞིང་ཡང་དག་པའི་འཚོ་བ་དང་ལྡན་པའི་གཞི་ལས་སྨན་དེ་སྒྲུབ་པར་བྱའོ། །གཉིས་པ་ནི། སྨན་ལ་མཚན་ཉིད་ཐ་དད་པའི་སྒོ་ནས་དབྱེ་ན། དུས་རུང་། ཐུན་ཚོད་དུ་རུང་བ། ཞག་བདུན་པ། འཚོ་བཅང་གི་སྨན་དང་བཞི། བཞི་པོ་དེར་གྲངས་ངེས་པའི་རྒྱུ་མཚན་ནི། བཅོམ་ལྡན་འདས་ཀྱི་སྨན་བཞིར་གསུངས་ཀྱི། དེ་ལས་གཞན་མ་གསུངས་པའི་ཕྱིར་དང་། དེར་མ་འདུས་པའི་སྨན་ཡང་མེད་པའི་ཕྱིར་རོ། །གསུམ་པ་ལ་གཉིས་ཏེ། སྤྱིའི་མཚན་ཉིད་དང་། སོ་སོའི་མཚན་ཉིད་དོ། །དང་པོ་ནི། དྲི་རོ་རེག་བྱའི་སྐྱེ་མཆེད་གསུམ་འདུས་ཀྱི་ཟས་དེ་སྨན་གྱི་མཚན་ཉིད། གཉིས་པ་ལ་སྨན་གང་ཞིག་བཀྲེས་པའི་ནད་སེལ་བ་ལ་གཙོ་བོར་གྱུར་པ་དེ་དང་པོའི་མཚན་ཉིད། དེ་གང་ཞིག་སྐོམ་པའི་ནད་སེལ་བ་ལ་གཙོ་བོར་གྱུར་པ་བཏུང་བ་ཆོས་གསུམ་ལྡན་དེ་གཉིས་པའི་མཚན་ཉིད། ཆོས་གསུམ་ནི། རྒྱུ་སྨན་གསུམ་པོ་གང་རུང་ལས་སྦྱར་བ། ངོ་བོ་བཏུང་བ་ཡིན་པ། ཤིན་ཏུ་སླ་བའོ། །དེ་གང་ཞིག་བཀྲེས་འདུས་གཉིས་ཀའི་ནད་སེལ་བ་ལ་གཙོ་བོར་གྱུར་པ་དེ་གསུམ་པའི་མཚན་ཉིད། དེ་གང་ཞིག་འདུས་པའི་ནད་སེལ་བ་ལ་གཙོ་བོར་གྱུར་པ་དེ་བཞི་པའི་མཚན་ཉིད་དོ། །བཞི་པ་བྱིན་གྱིས་བརླབ་པའི་ཚུལ་ལ་གཉིས་ཏེ། དགོས་དོན་དང་། བསྡུས་དོན་ནོ། །དང་པོ་ནི། སྨན་བྱིན་གྱིས་བརླབ་པ་ལ་དགོས་པ་ཡོད་དེ། བདེ་བ་ལ་རེག་པར་གནས་པ་དང་། གསོག་འཇོག་མི་འབྱུང་བ་དང་། བཅས་པའི་མཚམས་ཟིན་པའི་དགོས་པ་ཡོད་པའི་ཕྱིར། དང་པོ་གྲུབ་སྟེ། སྨན་བྱིན་གྱིས་བརླབས་ནས་བཅང་པ་ཡང་ནས་ཡང་དུ་བྱིན་ལེན་མི་དགོས་པ་སོགས་ཀྱི་དགོས་པ་ཡོད་པའི་ཕྱིར། གཉིས་པ་གྲུབ་སྟེ། བྱིན་གྱིས་རླབས་པ་ལ་གསོག་འཇོག་མི་འབྱུང་ངོ་ཞེས་གསུངས་པའི་ཕྱིར། གསུམ་པ་གྲུབ་སྟེ། བྱིན་གྱིས་བརླབས་པས་འདི་ཚུན་ཆད་དུ་ལོངས་སྤྱོད་དུ་རུང་ལ། དེ་ཕན་ཆད་དུ་ལོངས་སྤྱོད་དུ་མི་རུང་ངོ་ཞེས་མཚམས་ཟིན་པར་འགྱུར་བའི་ཕྱིར། གཉིས་པ་བསྡུས་དོན་ལ་བདུན་ཏེ། ཡུལ་གང་གི་དྲུང་དུ། དངོས་པོ་གང་། རྟེན་གང་གིས། དུས་ནམ་གྱི་ཚེ། ཡུན་ཇི་སྲིད། ཆོ་ག་གང་གིས་རློབ། བྱིན་རླབས་ཀྱི་འཇིག་རྒྱུའོ། །དང་པོ་ནི། བསྙེན་པར་རྫོགས་པའི་སྡོམ་པ་རྣམ་པར་དག་པ་དང་ལྡན་པ། ལྟ་བ་མཐུན་པ། མཚན་མཐུན་པ། ཐ་སྙད་གསུམ་དང་ལྡན་པ། ལུས་ཐ་མལ་པར་གནས་པ། ས་རང་བཞིན་དུ་གནས་པ། མཚམས་ཀྱི་ནང་ན་གནས་པ་སྟེ། ཆོས་བདུན་ལྡན་གྱི་དྲུང་དུ་བྱིན་གྱིས་བརླབ་བོ། །གཉིས་པ་ནི། དུས་རུང་ལས་གཞན་ཡིན་པ། རུང་བ་ཡིན་པ། ཚད་དང་ལྡན་པ། རང་གི་ཡིན་པ། བྱིན་ལེན་བྱས་ནས་ཆགས་པ། སྔར་བྱིན་གྱིས་བརླབས་པ་དང་མ་འབྲེལ་བ། ཆོ་ག་རྫོགས་པ་དེ་བྱིན་གྱིས་བརླབ་བོ། །དང་པོ་དགོས་ཏེ། ཕྱི་དྲོ་ལོངས་སྤྱོད་ཕྱིར་དུ་བྱིན་གྱིས་རློབ་པ་ཡིན་ལ། དུས་རུང་ཕྱི་དྲོར་ལོངས་སྤྱད་དུ་མི་རུང་བའི་ཕྱིར། གཉིས་པ་དགོས་ཏེ། ལོངས་སྤྱོད་དུ་མི་རུང་བ་ལ། བྱིན་རླབས་མི་ཆགས་པའི་ཕྱིར། གསུམ་པ་དགོས་ཏེ། ཤིན་ཏུ་ཆུང་བ་ལ་སྨན་གྱི་མངོན་ཞེན་མི་རྫོགས་པའི་ཕྱིར། བཞི་པ་དགོས་ཏེ། གཞན་གྱི་ཟས་རང་གིས་བྱིན་གྱིས་བརླབ་པ་དོན་མེད་པའི་ཕྱིར། ལྔ་པ་དགོས་ཏེ། བྱིན་རླབས་ཀྱི་རྟེན་མེད་པར་བྱིན་རླབས་མི་ཆགས་པའི་ཕྱིར། དྲུག་པ་དགོས་ཏེ། བྱིན་གྱིས་བརླབས་ཟིན་པ་ལ་བྱིན་གྱིས་བརླབ་པ་གཉིས་པ་མི་ཆགས་པའི་ཕྱིར། བདུན་པ་ཆོ་ག་རྫོགས་པ་ལ། སྤྱིར་ཆོ་ག་རུང་ཆུ་བཏབ་པ་དགོས་ཏེ། རུང་ཆུ་མ་བཏབ་པ་ཕྱི་དྲོ་ལོངས་སྤྱད་དུ་མི་རུང་བའི་ཕྱིར། བཏུང་བ་རྣམས་ཚགས་ཀྱིས་བཙགས་པ་དགོས་ཏེ། མ་བཙགས་ན་དུས་རུང་སོགས་དང་འདྲེས་པར་འགྱུར་བའི་དགག་བྱ་ཡོད་པའི་ཕྱིར། གསུམ་པ་རྟེན་གང་གིས་རློབ་ན། བསྙེན་རྫོགས་དང་དགེ་སློབ་མའི་སྡོམ་པ་གསོ་རུང་མན་ཆད་དང་ལྡན་པ། ལྟ་བ་མཐུན་པ། མཚན་མཐུན་པ་དེས་བརླབ་བོ། །ཁ་ཅིག་གནས་དབྱུང་མ་བྱས་པ་དགོས་ཟེར་བ་མི་འཐད་དེ། གནས་དབྱུང་ནད་པ་དགེ་སློང་རྣམས་ཀྱིས་བསྐྱང་དགོས་པར་གསུངས་པའི་ཕྱིར། ཁ་ཅིག་ནད་པ་ཡིན་པ་དགོས་ཏེ། དང་པོ་མ་ཡིན་པ་དག་ནི་ནད་པའི་ཕྱིར་རོ། །ཞེས་དང་། ནད་པའི་ཆེད་དུ་ཡོངས་སུ་ལོངས་སྤྱོད་པའི་ཕྱིར་ཞེས་གསུངས་པའི་ཕྱིར། ཞེས་དང་། ཁ་ཅིག་ཐུན་ཚོད་དུ་རུང་བ་དང་འཚོ་བཅང་གཉིས་ནད་པ་ཁོ་ནས་བྱིན་གྱིས་རློབ་ལ། ཞག་བདུན་པ་ནི་གང་ཟག་ལྔ་ཆར་གྱིས་བྱིན་གྱིས་རློབ་ཏུ་རུང་སྟེ། ཁྱིམ་བདག་ལུག་སྐྱེས་ཀྱི་གཏམ་རྒྱུད་ལས་ལམ་ཞུགས་ཀྱི་དབང་དུ་བྱས་ཏེ། བུ་རམ་ཞག་བདུན་པར་བྱིན་གྱིས་རླབས་ཏེ་བསྐུར་བར་བྱའོ། །ཞེས་གསུངས་པའི་ཕྱིར་ཞེས་ཟེར། དེ་ལ་གཞན་དག་ན་རེ། དེ་ནི་བུ་རམ་ཞག་བདུན་པར་བྱིན་ལེན་བྱས་ཏེ་བསྐུར་ཞེས་པའི་དོན་ཡིན་པས་བྱིན་ལེན་ལ་བྱིན་རླབས་ཀྱི་སྒྲས་བསྟན་པ་ཡིན་ཏེ། དཔེར་ན་ལྷུང་བཟེད་བྱིན་གྱིས་བརླབས་ཏེ་ལག་པ་དག་མཉལ་དུ་བཅུག་ནས་ཞེས་ཟེར་རོ། །དེའི་དོན་མི་འཐད་དེ། ལུག་སྐྱེས་ཀྱི་གཏམ་རྒྱུད་དུ་བྱིན་གྱིས་རློབ་པའི་ཆོ་ག་ཡང་གསུངས་པའི་ཕྱིར། དཔེ་ཡང་མི་འཐད་དེ། དེ་ལྟར་ན་གཞུང་སྔ་ཕྱིར་འབྲེལ་མེད་དུ་འགྱུར་བའི་ཕྱིར་རོ། །དེས་ན་མིན་པས་ཞག་བདུན་པའི་སྨན་བྱིན་གྱིས་རློབ་ཏུ་རུང་སྟེ། ཞག་བདུན་པའི་ལག་རྒྱགས་འབའ་ཞིག་ལ་བརྟེན་ནས་ཞག་དུ་མར་བགྲོད་པའི་དགེ་སློང་ལྟུང་མེད་སྒྲུབ་པའི་ཐབས་ཡོད་པའི་ཕྱིར། བཞི་པ་དུས་ནམ་གྱི་ཚེ་བརླབ་པ་ནི་སྔ་དྲོ་བརླབ་སྟེ། ཟས་སྔ་མའི་ཚེ་ཞེས་གསུངས་པའི་ཕྱིར། ལྔ་པ་ཡུན་ཇི་སྲིད་དུ་བྱིན་གྱིས་བརླབ་པ་ལ། ཐུན་ཚོད་དུ་རུང་བ་ནི་མཚན་མོའི་མཐུན་དང་པོ་ཚུན་ཆད་དང་། ཞག་བདུན་པ་ནི་ཞག་བདུན་གྱི་མཐའ་ཚུན་ཆད་དུ་བྱིན་གྱིས་བརླབ་ཅིང་། འཚོ་བཅང་ནི་ཇི་སྲིད་མཚོའི་བར་དུ་བྱིན་གྱིས་བརླབ་བོ། །དེ་ཡང་ཞག་བདུན་ཞེས་པ་ཞག་བདུན་པའི་སྨན་གྱི་རིང་མཐའ་གཟུང་བ་ཡིན་གྱིས། ལྔ་པའམ་དྲུག་པར་བྱིན་གྱིས་བརླབ་ཏུ་མི་རུང་བ་ནི་མ་ཡིན་ཏེ། ཊཱི་ཀར་བུ་རམ་དེ་ཞག་བདུན་པ་ལ་སོགས་པར་བྱིན་གྱིས་བརླབས་ཏེ་ཞེས་གསུངས་པའི་ཕྱིར། དེས་མཚོན་ནས་འཚོ་བཅང་གི་སྨན་དེ་ཟླ་བ་ཕྱེད་ལ་སོགས་པར་བྱིན་གྱིས་བརླབ་ཏུ་རུང་ངམ་སྙམ་སྟེ་ཤེས་ལྡན་རྣམས་ཀྱིས་དཔྱད་པར་བྱའོ། །ཁ་ཅིག་འཚོ་བཅང་ཞེས་པ་ནད་ཇི་སྲིད་འཚོ་བར་ཡིན་གྱི། ཇི་སྲིད་འཚོའི་བར་དུ་མ་ཡིན་ཞེས་པ་མི་འཐད་དེ། དེ་ལ་ཤེས་བྱེད་མེད་པའི་ཕྱིར་དང་། སུམ་བརྒྱ་པ་ལས། དེ་དག་མ་ཤི་བར་བཅང་སྨན་དུ་གསུངས། །ཞེས་དང་། འགྲེལ་ཆུང་ལས། ཚེ་གཅིག་པའི་སྔགས་ཀྱིས་བརྟགས་ཏེ་ཞེས་གསུངས་པའི་ཕྱིར། དྲུག་པ་བྱིན་གྱིས་རླབས་ཀྱི་ཆོ་ག་ལ། སྦྱོར་དངོས་རྗེས་གསུམ་ལས། དང་པོ་ནི། མཆིལ་ལྷྭམ་ཕུད། བསླབས་པ་རྒན་ན་ཕྱག་བྱ། ཐུགས་གཏད་པར་ཞུ་ཞེས་གསོལ་ནས་འགྲེང་བའི་སྤྱོད་ལམ་བསྟན་ནོ། །དངོས་གཞིའི་སྐབས་སུ་སྔགས་ཚིག་ལན་གསུམ་བརྗོད། མཇུག་ཏུ་ཐབས་ལེགས་བྱའོ། །བདུན་པ་བྱིན་བརླབས་ཀྱི་འཇིག་རྒྱུ་ནི། བྱིན་ལེན་གྱི་འཇིག་རྒྱུ་ཐམས་ཅད་ཀྱིས་འཇིག་ལ་ལག་ཉ་སོགས་མི་རུང་བ་དང་འདྲེས་པ་དང་། རོ་སླ་གྱུར་པ་དང་དུས་ཀྱི་འཕན་པ་ཟད་པས་ཀྱང་འཇིག་གོ །ལྔ་པ་རུང་ཁང་གཅོད་ཚུལ་ལ་གཉིས་ཏེ། དགོས་དོན་དང་། བསྡུས་དོན་ནོ། །དང་པོ་ལ་དེ་ལ་དགོས་པ་ཡོད་དེ། ཞག་ལོན་དང་མཚམས་བཅོས་མི་འབྱུང་བའི་དགོས་པ་ཡོད་པའི་ཕྱིར། གཉིས་པ་ལ་བདུན་ཏེ། གནས་གང་དུ། རྟེན་གང་གིས། དུས་ནམ་གྱི་ཚེ། ཆོ་ག་གང་གིས་གཅད། རུང་ཁང་གི་བྱེད་ལས། སྒྲ་བཤད། འཇིག་རྒྱུའོ། །དང་པོ་ལ་ཁ་ཅིག་རང་བཞིན་གྱི་མཚམས་ཡིན་པ་གཅིག་དགོས་ཏེ། ཊཱི་ཀར་མཚམས་ཞེས་པ་གནས་ཀྱི་གཞི་བརྗོད་དེ། གསོལ་བ་ལ་སོགས་པ་ལས་ཀྱིས་གཅད་པ་ཉི་ཚེ་མི་གཟུང་ཞེས་གསུངས་པའི་ཕྱིར། རིགས་པས་ཀྱང་གྲུབ་ཏེ། གལ་ཏེ་དཀོན་མཆོག་ལ་མ་གུས་པ་འགོག་པ་ཡིན་པས། དཀོན་མཆོག་གི་ཕོ་བྲང་ཡོད་པའི་གནས་སུ་རུང་ཁང་མ་བཅད་པ་ལ་ཉེས་པ་ཡོད་ཀྱི། ལས་མཚམས་ཙམ་དུ་རུང་ཁང་མ་བཅད་པ་ལ་ཉེས་པ་མེད་པའི་ཕྱིར་ཟེར་རོ། །རུང་ཁང་དེ་རང་བཞིན་གྱིས་མཚམས་ཡིན་པ་ཁོ་ནར་གཅོད་དགོས་པ་མི་འཐད་དེ། བམ་ལྔ་ལས་མཚམས་ཀྱི་ནང་དུ་བཙོས་པ་དང་། མཚམས་ཀྱི་ནང་དུ་ཞག་ལོན་པ་ཞེས་དེ་གཉིས་ཀའི་སྐབས་སུ་མཚམས་སྨོས་པ་སྤྱིར་འདྲ་སྟེ། ཀུན་དགའ་རྭ་བའི་ནང་དུ་དགེ་འདུན་གྱི་མཚམས་གསོལ་བ་ལ་སོགས་པའི་ལས་ཀྱིས་བཅད་པ་དང་། རྩིག་པ་ལ་སོགས་པའི་རང་མཚམས་དང་། དགེ་སློང་གི་གནས་དང་། དེ་དག་གི་གནས་ཉེ་འཁོར་དང་བཅས་པ་སྟེ། ཇི་སྐད་དུ། ཆོས་གོས་མཚམས་བསྟན་པ་དེ་དག་ལས་རུང་བའི་ཁང་པ་དང་། རུང་བའི་ས་གཞིར་མ་བྱས་པ་གང་ཡང་རུང་བ་དེ་དག་ཐམས་ཅད་སྤྱིར་གཟུང་ངོ་ཞེས་གསུངས་པའི་ཕྱིར། དེས་ན་ཉི་ཚེ་མི་བཟུང་ཞེས་པས་ལས་མཚམས་དང་རང་བཞིན་གྱི་གནས་གཉིས་ཀར་རུང་ཁང་གཅོད་པར་གྲུབ་ཅིང་། རུང་ཁང་གཅོད་པའི་གནས་ལ་སྟེང་གཡོག་དང་བཅས་པ་དགོས་ཏེ། བླ་གབ་མེད་པར་རུང་ཁང་གཅད་པ་བཀག་པའི་ཕྱིར། རང་ངམ་རང་དང་འདྲ་བའི་གང་ཟག་གི་གནས་སྐབས་དབང་བྱར་ཡོད་པར་དགོས་ཏེ། མུ་སྟེགས་ཅན་གྱི་གནས་དང་། དགེ་སློང་མའི་གནས་སུ་རུང་ཁང་གཅོད་པ་བཀག་པའི་ཕྱིར། དགེ་ཚུལ་འབྱུང་འཇུག་བྱར་ཡོད་པའི་དགེ་ཚུལ་དབང་བའི་གནས་སུ་རུང་ཁང་གཅད་དུ་མི་རུང་སྟེ། ཊཱི་ཀར་དགེ་ཚུལ་གྱི་གང་ཟག་གམ་དགེ་ཚུལ་གྱི་ཚོགས་སྤྱིར་དབང་བའི་གནས་ནི་དགེ་སློང་གི་གནས་མ་ཡིན་ནོ་ཞེས་གསུངས་པའི་ཕྱིར། ཁྱིམ་པའི་གྲོང་ན་དགེ་འདུན་དབང་བའི་མཛོད་ཡོད་པར་ཡང་རུང་ཁང་གཅོད་དུ་མི་རུང་སྟེ། ཁྱིམ་བདག་གི་གཞིར་ཡང་ཞེས་གསུངས་པའི་ཕྱིར། བཙོག་པོ་མ་ཡིན་པ་དགོས་ཏེ། ཤིང་དྲུང་དང་། གླང་པོ་ཆེའི་རྭ་བར་རུང་ཁང་གཅོད་པ་བཀག་པའི་ཕྱིར་རོ། །ཀུན་ལ་མཁོ་བའི་གནས་མ་ཡིན་པ་དགོས་ཏེ། བང་རིམ་དང་སྒོ་ཁང་དུ་དེ་གཅོད་པ་བཀག་པའི་ཕྱིར། དཀོན་མཆོག་གི་གནས་དང་མཆོད་རྟེན་གྱི་གཞི་མ་ཡིན་པ་དགོས་ཏེ། དེ་གཉིས་དགེ་འདུན་གྱི་གནས་ཡིན་པའི་ཕྱིར་དང་། དེར་རུང་ཁང་བཅད་ན་དཀོན་མཆོག་ལ་མ་གུས་པར་འགྱུར་བའི་ཕྱིར། སྔར་རུང་ཁང་བཅད་ཟིན་མ་ཡིན་པ་དགོས་ཏེ། བཅད་ཟིན་ལ་གཉིས་པ་མི་འཆགས་པའི་ཕྱིར། གཉིས་པ་རྟེན་གང་གིས་གཅད་པ་ལ། ཁ་ཅིག་ན་རེ་རྡོ་བ་བཏེག་པའི་མཐའ་ལས་བྱུང་བའི་རུང་ཁང་ནི། བསྙེན་རྫོགས་ཀྱི་སྡོམ་པ་རྣམ་པར་དག་པ་དང་ལྡན་པ། ལྟ་བ་མཐུན་པ། མཚན་མཐུན་པ། ཐ་སྙད་གསུམ་དང་ལྡན་པ། ལུས་ཐ་མལ་དུ་གནས་པ། ས་རང་བཞིན་དུ་གནས་པ། མཚམས་ཀྱི་ནང་ན་གནས་པ། ལག་གི་གླར་གྱུར་པ་དེས་གཅོད་ཟེར་བ་མི་འཐད་དེ། བསླབ་པ་བྱིན་ཆགས་སྤྱོད་བཞིན་པའི་དགེ་སློང་ལ་ཞག་ལོན་དང་མཚམས་བཙོས་ཀྱི་ཉེས་པ་འབྱུང་བ་ཡོད་པས་དེ་འགོག་པའི་ཐབས་བསྟན་དགོས་པའི་ཕྱིར། དེས་ན་སྤྱིར་དགེ་འདུན་ཆོས་སུམ་ལྡན་གྱིས་གཅོད་ལ། ཁྱད་པར་དུ་རྡོ་བ་བཏེག་པའི་མཐའ་ལས་བྱུང་བའི་རུང་ཁང་ནི། བསྙེན་རྫོགས་ཀྱི་སྡོམ་པ་གསོ་རུང་ཡན་ཆད་དང་ལྡན་པ། ས་རང་བཞིན་དུ་གནས་པ་མ་གཏོགས་གཞན་སྔར་དང་འདྲ་བ་དེས་གཅོད་དོ། །སེམས་བསྡུས་པ་ལས་བྱུང་བའི་རུང་ཁང་ནི། ཆོས་དེ་ལྡན་གྱི་དགེ་སློང་ལག་གི་གླར་གྱུར་མ་གྱུར་ཐམས་ཅད་ཀྱིས་གཅོད་ཅིང་། འཕྲལ་ལས་བྱུང་བའི་རུང་ཁང་ནི། གནས་དེར་ཕྱིན་པའི་དགེ་སློང་ཇི་སྙེད་ཡོད་པ་དེས་གཅོད་དོ། །གསུམ་པ་དུས་ནི། རྡོ་བཏེག་རུང་ཁང་ནི། སོ་ཕག་དང་པོར་འཇོག་པའི་ཚེ་གཅོད། སེམས་བསྡུས་རུང་ཁང་ནི་སོ་ཕག་འགྲེམས་པ་ནས་མཁར་ལས་མ་ཟིན་གྱི་བར་དེར་གཅོད་ཅིང་། འཕྲལ་བྱུང་རུང་ཁང་ནི་གནས་དེར་ཕྱིན་ནས་བྱ་བ་གཞན་མ་བརྩམས་གོང་དེར་གཅོད་དོ། །བཞི་པ་ཆོ་ག་ནི། སྤྱིར་དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་གཅོད་ལ། ཁྱད་པར་རྡོ་བཏེགས་རུང་ཁང་ནི་གཞི་འདི་ནི་དགེ་འདུན་གྱི་རུང་བའི་ཁང་པར་འགྱུར་བའོ་ཞེས་ཆོ་ག་ལན་གསུམ་བརྗོད་པས་གཅོད་པ་དང་། སེམས་བསྡུས་རུང་ཁང་ནི་གཞི་འདི་ནི་དགེ་འདུན་གྱི་རུང་བའི་ཁང་པར་འགྱུར་བར་སེམས་བསྡུས་ཤིག་ཅེས་པའི་ཆོ་ག་ལན་གསུམ་བརྗོད་པས་གཅོད་ལ། འཕྲལ་བྱུང་རུང་ཁང་ནི་དེར་འདུས་ཀྱི་དགེ་འདུན་ཐམས་ཅད་ཀྱིས་གཞི་འདི་ནི་དགེ་འདུན་གྱི་རུང་བའི་ཁང་པར་འགྱུར་བའོ་ཞེས་ཆོ་ག་ཅིག་ཆར་བརྗོད་པས་གཅོད་དོ། །སོ་ཐར་གྱི་འགྲེལ་པ་འདུལ་བ་བསྡུས་པ་ལས། ཤེས་པ་ཆུང་ངུའི་རུང་ཁང་དང་འཇུག་པ་ཞན་པའི་རུང་ཁང་གཉིས་ཀྱང་གསུངས་སོ། །ལྔ་པ་བྱེད་ལས་ནི། མཚམས་གཅིག་གི་ནང་དུ་རུང་ཁང་གཅིག་བཅད་པས། མཚམས་དེར་གཏོགས་པའི་གཙུག་ལག་ཁང་དུ་མ་ཡང་རུང་ཁང་དང་ལྡན་པར་འགྱུར་སྟེ། གཅིག་གི་གཙུག་ལག་ཁང་དུ་མའི་བྱ་བ་བྱེད་པ་ལ་མི་མཛེས་པ་མེད་དོ། །དེ་ནི་ཐ་དད་པར་གྱུར་པའི་རུང་བ་ཉིད་དུ་མ་རྟེན་ཏོ་ཞེས་གསུངས་པའི་ཕྱིར་རོ། །དྲུག་པ་སྒྲ་བཤད་པ་ནི། མཚམས་ནང་ཡིན་ཡང་ཟས་ཞག་ཏུ་བཞག་རུང་བ་དང་། རྗེན་པ་བཙོར་རུང་བས་རུང་ཁང་ཞེས་བྱའོ། །བདུན་པ་འཇིག་རྒྱུ་ནི། མཚམས་ཀྱི་འཇིག་རྒྱུ་ཐམས་ཅད་ཀྱིས་འཇིག་ལ། ལས་ཀྱི་འཇིག་པ་ཡང་ཡོད་དོ། །དྲུག་པ་སྨན་ལོངས་སྤྱོད་པའི་ཚུལ་ལ་ལྔ་སྟེ། རྟེན། དངོས་པོ། དུས། སྣོད། ལོངས་སྤྱོད་པའི་ཆོ་ག་དངོས་སོ། །དང་པོ་ནི། རང་གི་ཟས་ལ་སྤྱོད་པ་ལ། གོས་གཅིག་པ་ལ་སོགས་པ་དང་བྲལ་བས་སྤྱོད་ཅིང་། དགེ་འདུན་གྱི་ནང་དུ་ཞུགས་ཏེ་ཟས་ལ་སྤྱོད་པ་དང་། གང་གིས་གོས་སྟོང་ཕྲག་བརྒྱ་པ། ཟས་རོ་བརྒྱ་པ། ཁང་པ་བརྩེགས་པ་ལྔ་བརྒྱ་པ་ལ་སྤྱོད་པ་ནི་སྡེ་ལྔའི་སྡོམ་པ་གསོ་རུང་ཡན་ཆད་དང་ལྡན་པ། མྱ་ངན་ལས་འདས་པའི་བསམ་པ་རྣམ་པར་དག་པ་དང་ལྡན་པ། དགེ་བའི་བྱ་བ་ལ་བརྩོན་པ། གོས་གཅིག་པ་སོགས་དང་བྲལ་བ་དེས་སྤྱོད་དོ། །ཁ་ཅིག་གནས་དབྱུང་མ་བྱས་པ་དགོས་ཟེར་བ་མི་འཐད་དེ། གནས་དབྱུང་ནད་པ་གྲོགས་རྣམས་ཀྱིས་བསྐྱང་བར་གསུངས་པའི་ཕྱིར། གཉིས་པ་དངོས་པོ་ནི། ངོ་བོ་གནས་སྐབས་ཆོ་གའི་སྒོ་ནས་རུང་བའོ། །དེའི་ལྡོག་ཕྱོགས་མི་རུང་བ་ལ་ངོ་བོའི་སྒོ་ནས་མི་རུང་བ་ནི། ཆང་དང་སྒོག་པ་དང་རྨིག་པ་གཅིག་པའི་ཤ་ལྟ་བུའོ། །གནས་སྐབས་ཀྱི་སྒོ་ནས་མི་རུང་བ་ནི། ཤ་རློན་པ་མ་བཙོས་པ་དང་། ཨ་སྨྲ་རུས་པ་མ་ཆག་པ་ལྟ་བུ། ཆོ་གའི་སྒོ་ནས་མི་རུང་བ་ནི། ཞག་ལོན་དང་མཚམས་བཙོས་སུ་གྱུར་པའི་ཟས་ལྟ་བུའོ། །གསུམ་པ་དུས་ནི། དུས་རུང་རྣམས་ནི་རྐྱེན་དང་མི་ལྡན་པའི་གང་ཟག་གིས་སྐྱ་རེངས་ཤར་ནས་གུང་མ་ཡོལ་གྱི་བར་དུ་སྤྱོད་ལ། སྨན་ཕྱི་མ་གསུམ་བྱིན་གྱིས་བརླབ་པ་ནི། རང་རང་གི་བྱིན་བརླབས་ཀྱི་མཐའ་ཚུན་ཆད་དུ་སྤྱད་དུ་རུང་ཞིང་། མ་བརླབས་པ་ནི་སྔ་དྲོ་ཕྱི་དྲོ་གཉིས་ཀར་ན་མི་ན་ཐམས་ཅད་ཀྱིས་སྤྱད་པར་བྱ་བ་དང་། སྨན་ཕྱི་མ་གསུམ་བྱིན་བརླབས་བྱས་པ་ནི་ཕྱི་མ་ཕྱི་མ་སྔ་མ་དང་བསྲེས་སྟེ་ལོངས་སྤྱོད་པར་མི་བྱའོ། །བཞི་པ་སྣོད་ནི། རིན་པོ་ཆེའི་སྣོད་ལས་གཞན་ཡིན་པ་དང་། གཙང་བ། སོ་སོ་བ་ཡིན་པ། ཀོ་ལྤགས་ཀྱི་སྣོད་མ་ཡིན་པ་དེར་སྤྱོད་པར་བྱའོ། །ལྔ་པ་ལོངས་སྤྱོད་པའི་ཆོ་ག་དངོས་ལ་སྦྱོར་དངོས་རྗེས་གསུམ་གྱི་བྱ་བ་གསུམ། དང་པོ་ནི། ལུས་ཀྱིས་ལེགས་པར་འདུག་པ་དང་ཆོས་གོས་ལེགས་པར་བགོ་བ་སོགས་བྱ། ངག་གི་འདི་དང་འདི་ལས་སྦྱིན་ཞེས་པ་ལྟ་བུ་ཀླག་ཅོར་དང་བྲལ་བར་བྱ། ཡིད་ཀྱིས་བདག་ནི་ལེན་པ་པོའོ། །འདི་ནི་སྦྱིན་པ་པོའོ། །སྙམ་དུ་བྱིན་ལེན་གྱི་སེམས་ཀྱིས་བླང་བར་བྱའོ། །གཉིས་པ་ནི། ལུས་ཀྱིས་ཁམ་ཆེ་ཆུང་སོགས་དང་བྲལ་བ་དང་། ངག་གིས་སྒྲ་ཅག་ཅག་སོགས་དང་བྲལ་བ་དང་། ཡིད་ཀྱིས་རྒྱགས་པའི་གཉེན་པོར་བདག་ལ་ནད་པ་དང་། ཟས་ལ་སྨན་གྱི་འདུ་ཤེས་ཉེ་བར་གཞག ཟས་ལ་ཆགས་པའི་གཉེན་པོར་འདུ་ཤེས་བཅུ་བསྟེན། ལྟུང་བའི་གཉེན་པོར་བསླབ་པའི་གནས་དྲན་པ་དང་ཤེས་བཞིན་གྱིས་ཟིན་བཞིན་དུ་བཟའ་བར་བྱའོ། །གསུམ་པ་མཇུག་གི་ཆོ་ག་ནི། ཟས་ཟོས་ཟིན་པའི་རྗེས་སུ་ཁ་དང་ལག་པ་སོགས་བཀྲུ་བ་དང་གཙུག་ལག་གི་ཚིགས་སུ་བཅད་པ་གཉིས་ཡན་ཆད་འདོན་ཞིང་བསྔོ་བ་ཡང་བྱའོ། །གཉིས་པ་གཞུང་དོན་ལ་དོགས་པ་བཅད་པ་དེ་ལ་ལུང་གི་བྱེ་བྲག་གི་གཉིས་ལས། གཞིའི་སྐབས་ནས་འབྱུང་བ་ལ་གསུམ་སྟེ། སྨན་བསྟན་པའི་ཚུལ། རུང་ཁང་བློ་མཐུན་བྱ་བ། འཕངས་པའི་ཚེའི་དམིགས་བསལ་ལོ། །དང་པོ་ལ་གསུམ་སྟེ། སྨན་བསྟེན་ཚུལ་དངོས། བྱིན་གྱིས་རླབས་པའི་ཆོ་ག སྨན་གྱི་མཚོན་དོན་ནོ། །དང་པོ་ལ་བསྟན་བཤད་གཉིས་ལས། དང་པོ་ནི། ཁ་ཅིག་སྨན་བསྟེན་པར་བྱའོ། །ཞེས་པས་རབ་བྱུང་ཐམས་ཅད་ཀྱིས་བཟའ་ཞིང་བཏུང་བའི་ཕྱིར་སྨན་བསྟེན་པ་སྤྱིར་བསྟན་གསུང་བ་མི་འཐད་དེ། གཞུང་དེས་རབ་བྱུང་ནད་པ་འབའ་ཞིག་གིས་སྨན་བསྟེན་པར་བསྟན་པའི་ཕྱིར་ཏེ། ལུང་ལས་དགེ་སློང་ནད་པ་རྣམས་ལ་ཕན་པ་སོ་སོ་བསྟན་པའི་སྨན་གསུངས་པ་གང་དག་ཡིན་པ་དེ་དག་འདི་ལྟ་སྟེ། ཞུན་མར་དང་། འབྲུ་མར་དང་། སྦྲང་རྩི་དང་། བུ་རམ་གྱི་དབུ་བ་དག་གོ་ཞེས་དང་། འདིར་ཡང་དང་པོ་མ་ཡིན་པ་ཉིད་དག་ནི་ནད་པའི་ཕྱིར་རོ། །ཞེས་གསུངས་པའི་ཕྱིར། འོ་ན་སྨན་དེ་ལ་དུ་ཡོད་ཅེ་ན། སྨན་ཆོས་ཅན། རྣམ་པ་བཞིར་ཡོད་དེ། སྐྱ་རེངས་ཤར་ནས་ཉི་མ་གུང་གི་བར་བྱེ་བྲག་མེད་པར་ལོངས་སྤྱོད་དུ་རུང་བ་དུས་སུ་རུང་བ་དང་། ཐུན་ཚོད་ཀྱི་མཐའི་བར་བྱིན་གྱིས་བརླབས་ནས་ལོངས་སྤྱོད་དུ་རུང་བ་ཐུན་ཚོད་དུ་རུང་བ་དང་། ཞག་བདུན་གྱི་བར་དུ་ལོངས་སྤྱོད་དུ་རུང་བའི་ཞག་བདུན་པར་བྱིན་གྱིས་བརླབས་པའི་སྨན་དང་། ཇི་སྲིད་འཚོའི་བར་དུ་ལོངས་སྤྱོད་དུ་རུང་བ་ཇི་སྲིད་འཚོའི་བར་བྱིན་གྱིས་བརླབས་པའི་སྨན་རྣམས་སུ་ཡོད་པའི་ཕྱིར། ནད་པ་འབའ་ཞིག་གིས་བསྟེན་བྱ་ཡིན་པ་འདིས་གྲུབ་སྟེ། སྨན་ཕྱི་མ་གསུམ་བྱིན་གྱིས་བརླབས་པ་ཅན་ལ་བཤད་པའི་ཕྱིར་ཏེ། ཊཱི་ཀར་ཐུན་ཚོད་དུ་རུང་བ་ཞེས་བྱ་བ་ནི་ཐུན་ཚོད་ཀྱི་མཐའི་དུས་ཚུན་ཆད་དུ་རང་གིས་བྱིན་གྱིས་བརླབས་ཏེ་བསྟེན་པར་བྱ་བ་གང་ཡིན་པའོ། །ཞག་བདུན་པ་ཞེས་བྱ་བ་ནི་ཞག་བདུན་གྱི་མཐའ་ཚུན་ཆད་དུ་མཚན་མོ་དང་ཉིན་མོའི་ངོ་བོ་ཉིད་ཀྱི་དུས་སུ་རང་གི་བྱིན་གྱིས་བརླབས་ཏེ་བསྟེན་པར་བྱ་བ་གང་ཡིན་པའོ། །འཚོ་བའི་བར་དུ་བཅང་བ་ཞེས་བྱ་བ་ནི་ཇི་སྲིད་འཚོའི་དུས་ཀྱི་མཐའ་ཚུན་ཆད་དུ་རང་གིས་བྱིན་གྱིས་བརླབས་ཏེ་བསྟེན་པར་བྱ་བ་གང་ཡིན་པའོ་ཞེས་གསུངས་པའི་ཕྱིར། དང་པོ་དུས་རུང་མ་ཡིན་པ་སྨན་ཕྱི་མ་གསུམ་བྱིན་གྱིས་བརླབས་པ་ཉིད་དག་ནི་ནད་པའི་ཕྱིར་ཏེ་ནད་པ་འབའ་ཞིག་གིས་ལོངས་སྤྱོད་པར་བྱ་བ་ཡིན་གྱི། མི་ན་བས་ལོངས་སྤྱོད་དུ་མི་རུང་ངོ་། །སྨན་ཕྱི་མ་གསུམ་བྱིན་གྱིས་བསླབས་ནས་ནད་པ་འབའ་ཞིག་གིས་ལོངས་སྤྱོད་བྱར་གཞུང་འདིས་བསྟན་ཏེ། འདིའི་མདོ་སྦྱོར་དུ། ལུང་ལས་བཙུན་པ་ཐུན་ཚོད་དུ་རུང་བ་དང་། ཞག་བདུན་པ་དང་འཚོའི་བར་དུ་བཅང་བའི་སྨན་བྱིན་ལེན་བགྱིས་པ་དང་། བྱིན་གྱིས་བརླབས་པ་གང་དག་ལགས་པ་དེ་དག་བྲོ་མ་འཚལ་བས་ཡོངས་སུ་སྤྱད་དུ་རུང་ངམ་ཉེ་བ་འཁོར་མི་རུང་ངོ་། །བྱིན་ལེན་བགྱིས་པ་དང་བྱིན་གྱིས་རླབས་པ་དེ་དག་བྲོ་འཚལ་བས་ཡོངས་སུ་སྤྱད་དུ་རུང་ངམ། ཉེ་བ་འཁོར་རུང་ངོ་ཞེས་གསུངས་པའི་ཕྱིར། དང་པོ་མ་ཡིན་པ་ན་མི་ན་གཉིས་ཀས་ལོངས་སྤྱོད་དུ་རུང་བ་དེ་གང་ཞེ་ན། རྩོ་རྩ་སྟེ་ཀུ་ཤུ་དང་། ཆུ་ཤིང་གི་འབྲས་བུ་དང་། རྒྱ་ཤུག་དང་། ཨ་ཤྭཏྛྀ་དང་། ཨུ་དུམ་ཝ་དང་། རྩུ་པ་རུ་ཤ་ག་དང་། རྒུན་འབྲུམ་གྱི་ཆུ་དང་། ཤིང་ཐོག་འབྲ་གོ་ལས་སྦྱར་བའི་བཏུང་བ་སོགས་འཚགས་ཀྱིས་བཙགས་པ་རུང་བའི་ཆུས་བཏབ་པ་ནི་ན་མི་ན་གཉིས་ཀས་དུས་སྔ་དྲོ་ཕྱི་དྲོར་ལོངས་སྤྱོད་དུ་རུང་ངོ་། །དེར་མ་ཟད་བཅོས་པའི་ཆང་ཚྭར་གྱུར་པ་དང་། འབྲུའི་ཆང་ཚྭར་གྱུར་པ་དང་། ཞོ་ཁ་ཆུ་ཞོའི་དྭངས་མ་དང་། དར་བའི་དྭངས་མ་ཆུར་ཁུ་དང་། འབྲུ་སོགས་ཕབས་མེད་པར་མནན་པའི་རྩབས་མོ་སྐྱུར་བག་དང་ལྡན་པ་ཚགས་ཀྱིས་བཙགས་པ་རུང་བའི་ཆུས་བཏབ་པ་ཤིན་ཏུ་སླ་བ་གཞན་སྣང་བ་འདམ་བུའི་ཉག་མའི་མདོ་ལྟ་བུ་ཁ་དོག་ཅུང་ཟད་སེར་བ་དག་ཀྱང་དེ་དང་འདྲ་བར་ན་མི་ན་གཉིས་ཀས་དུས་ཐམས་ཅད་དུ་ལོངས་སྤྱོད་དུ་རུང་ངོ་། །དུས་རུང་ལས་སྦྱར་བའི་བཏུང་བ་སྦྱར་བཙགས་བྱས་ཏེ་ལོངས་སྤྱོད་པའི་ཕྱིར་སྦྱར་བཙགས་མ་བྱས་པ་དེ་དགེ་སློང་རང་ཉིད་ཀྱི་བྱིན་ལེན་བྱེད་དུ་རུང་ངམ་ཞེ་ན། དུས་རུང་ལས་སྦྱར་བའི་བཏུང་བ་ཚགས་ཀྱིས་བཙགས་པ་རུང་བའི་ཆུས་བཏབ་པ། ཤན་དང་བྱེ་བ་དེ་ལྟ་བུ་ཉིད་ཀྱི་མདུན་རོལ་དུ་སྟེ། སྦྱར་བཙགས་མ་བྱས་པ་དེ་ལ་བསྙེན་པར་རྫོགས་པ་མཚན་མཐུན་པས་རེག་པ་སྟེ་བྱིན་ལེན་བྱེད་དུ་མི་རུང་སྟེ། དགོས་པ་མེད་ཅིང་དགག་བྱ་དང་ལྡན་པའི་ཕྱིར། དང་པོ་གྲུབ་སྟེ། སྦྱར་བཙགས་བྱས་པ་ན་བྱིན་ལེན་ཞིག་པའི་ཕྱིར། གཉིས་པ་གྲུབ་སྟེ། ལག་ཉར་འགྱུར་བའི་དགག་བྱ་ཡོད་པའི་ཕྱིར། དེར་མ་ཟད་ཨ་རུ་ར་དང་། སྐྱུ་རུ་ར་སོགས་འབྲས་བུ་ལྔ་བྱིན་གྱིས་མ་བརླབས་པ་དེ་ཡང་ན་མི་ན་གཉིས་ཀས་དུས་ཐམས་ཅད་དུ་ལོངས་སྤྱོད་དུ་རུང་ངོ་། །དེས་འཚོ་བཅང་གི་རྩ་བ་སྡོང་བུ། འབྲས་བུ། མེ་ཏོག འདབ་མ་ལ་སོགས་པ་ཡང་མཚོན་ནོ། །བུ་རམ་བྱིན་གྱིས་མ་བརླབས་པ་དེ་ཡང་ན་མི་ན་གང་ཟག་གཉིས་ཀས་དུས་ཐམས་ཅད་དུ་ལོངས་སྤྱོད་དུ་རུང་ངོ་། །དེས་ཞག་བདུན་པ་གཞན་ཡང་མཚོན་ནོ། །སྨན་བྱིན་གྱིས་བརླབས་པ་དེ་མི་ན་བས་ལོངས་སྤྱད་དུ་མི་རུང་བར་ངེས་སམ་ཞེ་ན། དམིགས་བསལ་གྱི་བུ་རམ་བྱིན་གྱིས་བརླབས་པ་དེ་གཟའ་བ་ལ་ལམ་དཔག་ཚད་དུ་ཞུགས་པ་དང་། དགེ་བསྐོས་དང་ལག་གི་གླ་རྣམས་ནི་ནད་པ་དང་འདྲ་བར་ལོངས་སྤྱད་དུ་རུང་བ་ཉིད་དོ། །དེར་མ་ཟད་ཟན་ཆད་པའི་དགེ་སློང་གིས་ཀྱང་བུ་རམ་བྱིན་གྱིས་བརླབས་པ་དེ་བཟར་རུང་ངོ་། །གཞན་དུས་སུ་རུང་བ་མ་ཡིན་པ་སྟེ། དུས་མ་ཡིན་པར་རུང་བ་མར་དང་འབྲུ་མར་དུས་སུ་ཡང་བཟར་རུང་སྟེ། རང་འགྲེལ་ལས། ནད་པ་ཉིད་ཀྱི་སོགས་ཞེས་གསུངས་ཏེ། ནད་པ་དང་འདྲ་བའི་ཕྱིར་ཞེས་པའི་དོན་ནོ། །དེས་ན་གང་ཟག་བཞི་པོ་དེ་བུ་རམ་བྱིན་གྱིས་བརླབས་པ་དང་མར་དང་འབྲུ་མར་བྱིན་གྱིས་བརླབས་པ་དེ་དུས་མ་ཡིན་པར་བཟར་རུང་བར་མ་ཟད་དུས་སུ་ཡང་བཟར་རུང་ངོ་། །གཉིས་པ་རྒྱས་བཤད་ལ་ལྔ་སྟེ། ཐུན་ཚད་དུ་རུང་བ། ཞག་བདུན་པ། འཚོ་བཅང་གི་སྨན། དུས་རུང་དུས་མ་ཡིན་པ་ལ་བརྟེན་པའི་ཚུལ། འདྲེས་པ་ལ་ཆོ་ག་སྔ་མས་འཇུག་པའོ། །དུས་རུང་མ་སྨོས་པར་ཕྱི་མ་གསུམ་སྨོས་པ་ནི་ལོངས་སྤྱོད་པའི་དུས་ཀྱི་ཁྱད་པར་མི་འདྲ་བ་ཡོད་པས་སོ། །དང་པོ་ཐུན་ཚོད་རུང་བའི་སྨན་ནི་ངོ་བོ་བཏུང་བ་དགོས། དེ་ཡང་ཤིན་ཏུ་སླ་བའོ། །རྒྱུ་དུས་རུང་ལས་སྦྱར་བའི་བཏུང་བ་དེའི་སྦྱར་བཙགས་སུས་བྱེད་ཅེ་ན། བཏུང་བ་དེའི་རྫས་སམ་རྒྱུ་བཏུང་བ་དེ་ཉིད་མིན་པའི་ཕྱིར། གལ་ཏེ་དུས་སུ་རུང་བ་ཡིན་ན་བསྙེན་པར་མ་རྫོགས་པས་བསྐོལ་བ་ལ་སོགས་པས་སྦྱར་ཞིང་འཚགས་ཀྱིས་ཀྱང་བཙགས་པར་བྱའོ། །བསྙེན་པར་རྫོགས་པས་སྦྱར་བཙགས་བྱེད་མི་རུང་སྟེ། སྦྱར་བཙགས་བྱས་པ་ན་བྱིན་ལེན་འཇིག་པའི་ཕྱིར་ཏེ། བཏུང་བའི་ངོ་བོར་གྱུར་པའི་ཕྱིར་ཏེ། དུས་རུང་དུས་མི་རུང་དུ་སོང་བའི་ཕྱིར། དེའི་ཤུགས་ལ་དུས་མི་རུང་ལས་སྦྱར་བའི་ལྟུང་བའི་སྦྱར་བཙགས་བསྙེན་པར་རྫོགས་པས་བྱེད་དུ་རུང་བར་བསྟན་ནོ། །བསྐོལ་དུ་མི་རུང་སྟེ། དགེ་སློང་གིས་བཙོས་པར་འགྱུར་བའི་ཕྱིར། ལུང་ལས་འབྲས་བུ་བརྒྱུད་ལས་སྦྱར་བའི་བཏུང་བ་ཐུན་ཚོད་དུ་བཏུང་བར་བཤད་པ་དེ་ངེས་གཟུང་ཡིན་ནམ་མཚོན་དོན་ཡིན་ཞེ་ན། མཚོན་དོན་ཡིན་ནོ་ཞེས་སྟོན་པ་ནི་ཐུན་ཚོད་དུ་རུང་བའི་བཏུང་བ་དེ་དག་ཏུ་འབྲས་བུ་བརྒྱུད་ལ་སྦྱར་བའི་བཏུང་བ་ལས། གཞན་བལ་པོ་སེའུ་ལ་སོགས་པ་སྟེ་དུས་རུང་གི་ཙ་བ་སྡོང་བུ་འདབ་མ་ལ་སོགས་པ་ལས་སྦྱར་བའི་བཏུང་བ་དེ་ཡང་ཐུན་ཚོད་དུ་རུང་བའི་རྫས་ཡིན་ནོ། །འདིས་ནི་བལ་པོ་སེའུ་སོགས་དུས་རུང་ཡིན་པར་གྲུབ་བོ། །ལུང་ལས་དགེ་སློང་དག་གིས་བུ་རམ་ཟོས་པ་དང་། དེ་དག་ལ་སྐོམ་པའི་གནོད་པ་བྱུང་ནས། བཅོམ་ལྡན་འདས་ཀྱིས་བཀའ་སྩལ་པ། བུ་རམ་ཆུར་བྱས་སྟེ་བཏུང་བར་བྱའོ་ཞེས་གསུངས་ཏེ། དེས་མཚོན་ནས་ཇི་སྲིད་འཚོ་བཅང་ལས་སྦྱར་བའི་བཏུང་བ་ཤིན་ཏུ་སླ་བ་ཡང་བསྙེན་པར་རྫོགས་པས་བཏུང་དུ་རུང་བར་གྲུབ་བོ། །དེ་རྣམས་ཀྱིས་ལོངས་སྤྱོད་ཀྱི་མཐའ་གང་ཞེ་ན། བཏུང་བ་དེའི་རྒྱུ་དུས་རུང་ལས་སྦྱར་བ་ཡིན་ན་ཐུན་ཚོད་གྱི་མཐའ་སྟེ་ལོངས་སྤྱོད་གྱི་མཐའ་ཡིན་ནོ། །ཐུན་ཚོད་ཀྱི་མཐའ་དེ་གང་ཞེ་ན། ཁ་ཅིག་མཚན་མོའི་ཐུན་དང་པོའི་སྐད་ཅིག་མ་དང་པོ་ལ་བྱེད་པ་དང་ལ་ལ་མཚན་ཐུན་དང་པོ་ལ་བྱེད་པ་དང་། གཞན་དག་མཚན་ཐུན་ཐ་མ་ལ་འདོད་པ་དང་། སྲོད་ཐུན་ཐ་མ་ལ་འདོད་པ་སོགས་དུ་མ་སྣང་ཡང་ལུང་རིགས་དང་འགལ་བས་མི་འཐད་དོ། །རང་ལུགས་ནི། སྲོད་ཐུན་དང་པོ་ལ་བྱེད་ལ་དེ་ཡང་འོད་དམར་འཆར་བ་ལ་བྱེད་པ་ཡིན་ཏེ། ཊཱི་ཀར་མཚན་མོའི་ཐུན་ཚོད་ཀྱི་ཆའི་ཚད་ཀྱི་མཐའ་གང་ཡིན་པ་དེ་ཞེས་དང་། འགྲེལ་ཆུང་ལས་ཞག་བདུན་པ་དང་ཚེས་གཅིག་གི་སྔགས་ཀྱིས་བཏང་བ་ལས་སྐོམ་དུ་བྱས་ཏེ་བཏུང་ན་དམར་ཐག་ཆོད་ཀྱི་བར་དུའོ་ཞེས་གསུངས་པའི་ཕྱིར། བཏུང་བ་དེ་རྒྱུ་དུས་རུང་ལས་དུས་མི་རུང་ལས་སྦྱོར་བ་ཡིན་ན་བཏུང་བ་དེའི་རྒྱུ་དེའི་ལོངས་སྤྱོད་ཀྱི་མཐའ་གང་ཡིན་པ་བཏུང་བ་དེའི་ལོངས་སྤྱོད་ཀྱི་མཐའ་ཡིན་ནོ། །དེས་ན་བུ་རམ་ལ་སྦྱར་བའི་བཏུང་བའི་ལོངས་སྤྱོད་ཀྱི་མཐའ་ཞག་བདུན་པ་དང་། ཨ་རུ་ར་ལ་སྦྱར་བའི་ལོངས་སྤྱོད་ཀྱི་མཐའ་ཇི་སྲིད་འཚོའི་བར་ཡིན་ཏེ། བུ་རམ་ཞག་བདུན་པ་ཡིན་པ་གང་ཞིག ཨ་རུ་ར་ཇི་སྲིད་འཚོའི་སྨན་ཡིན་པའི་ཕྱིར། དེས་ན་སྨན་ཕྱི་མ་གསུམ་མི་འགལ་སྟེ། ཐུན་ཚོད་ཀྱི་མཐའ་དང་ལྷན་ཅིག་འགལ་བ་མེད་དོ་ཞེས་གསུངས་པའི་ཕྱིར། གཞན་ཉིད་ཡིན་ན་དེའི་གང་ཡིན་པའོ་ཞེས་པ་ལ། རྒྱ་གར་བ་ཁ་ཅིག་ན་རེ་བཏུང་བའི་རོ་སླ་བར་མ་གྱུར་ན་གཞན་ཉིད་ཡིན་ན་དེའི་གང་ཡིན་པའོ་ཞེས་པ་ལྟར་ཡིན་གྱི། རོ་སླར་གྱུར་ན་རོ་སླར་ནམ་གྱུར་གྱི་སྐད་ཅིག་དང་པོ་ཚུན་ཆད་ལྟུང་བ་དེའི་ལོངས་སྤྱོད་ཀྱི་མཐའ་ཡིན་ཞེས་ཟེར་རོ། །དེ་འགོག་པ་ནི། ཞག་ལྔ་ན་རོ་སླ་བར་གྱུར་པའི་བུར་ཁུ་དེའི་ལོངས་སྤྱོད་ཀྱི་མཐའ་དེ་ཞག་ལྔ་པ་ཡིན་པ་དེ་ནི་འཐད་པ་མ་ཡིན་ཏེ། དེ་ཞག་བདུན་བར་བྱིན་གྱིས་བརླབ་རུང་གི་བཏུང་བ་གང་ཞིག་བཏུང་བ་དེ་ལོངས་སྤྱོད་པའི་དུས་ལས་ལྷག་པ་ལ་བསྟེན་པ་དེ། དེ་གཞིར་བཟུང་ནས་བྱིན་རླབས་བྱས་པ་བྱིན་རླབས་མི་ཆགས་པའི་ཕྱིར་རོ། །བྱིན་གྱིས་བརླབས་པ་ནི་ལོངས་སྤྱོད་རུང་སྤྱོད་མི་རུང་དུ་མི་འགྱུར་བའི་ཕྱིར་བྱིན་གྱིས་བརླབ་པ་ཡིན་པའི་ཕྱིར། གལ་ཏེ་ཞག་ལྔ་པར་བྱིན་གྱིས་རློབ་བོ་སྙམ་ན། མངོན་ཤེས་མེད་པའི་དགེ་སློང་རྣམས་ཀྱིས་བུར་ཁུ་དེ་བྱིན་གྱིས་བརླབ་པར་བྱ་བ་མ་ཡིན་པར་འགྱུར་ཏེ། མངོན་ཤེས་མེད་པའི་དགེ་སློང་ཕལ་པ་རྣམས་ཀྱིས་བུར་ཁུ་དེ་ཇི་ཙམ་ན་རོ་སླ་བར་འགྱུར་བ་དེ་བགྲོད་ཅིང་ཁོང་དུ་ཚུད་པ་མ་ཡིན་པའི་ཕྱིར། ཁྱབ་པ་ཁས་སོ། །ལྷག་མ་རྣམས་ནི་གཞུང་དོན་ལས་ཤེས་པར་བྱའོ།། ༈ །།གསུམ་པ་བྱ་བའི་ཐབས་ལས་ཀྱི་གཞི་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། བར་ཆད་འདྲི་བའི་གསོལ་བ་འབའ་ཞིག་པ་དང་། བསྙེན་རྫོགས་སུ་བསྒྲུབ་པའི་གསོལ་བཞིའི་ལས་སོགས་དུ་མ་བཤད་ན། ལས་དེ་རྣམས་རྒྱུ་གང་ལ་བརྟེན་ནས་འགྲུབ་ཅེ་ན་ཆོ་ག་ལས་འདས་ན་ལས་མི་འཆགས་སོ་ཞེས་སོགས་གསུངས་ཏེ། རྒྱུ་ཆོ་ག་ལས་འདས་ཤིང་མ་ཚང་ན་འབྲས་བུ་ལས་གཏན་མི་འཆགས་པའམ། ཉེས་མེད་ཕུན་ཚོགས་མི་འཆགས་སོ། །འོ་ན་ཆོ་ག་ནི་གང་། ལས་ནི་གང་ཞེ་ན། ད་ལྟར་གྱི་ཆོ་གའི་སྐབས་འདིར་ལས་རང་རང་གི་སྐབས་སུ་དགེ་འདུན་གྲངས་ཚང་བ་དང་། ལས་ལྷག་ཆད་ནོར་གསུམ་མེད་པར་གསལ་བར་བརྗོད་པ་དང་། ལས་བྱེད་པ་པོ་བསྙེན་པར་རྫོགས་པ་ཚུལ་ཁྲིམས་རྣམ་དག་དང་ལྡན་པ་ནི་ཆོ་ག་ཉིད་དོ། །ལས་དང་བརྗོད་པ་གང་ཞེ་ན། གསོལ་བ་འབའ་ཞིག་པ་དང་། གསོལ་བ་དང་གཉིས་ཀྱི་ལས་ཀྱིས་གསོལ་བ་དང་། གསོལ་བ་དང་བཞིའི་ལས་ཀྱིས་གསོལ་བ་སྟེ་གསོལ་བ་གསུམ་དང་། གསོལ་བ་དང་གཉིས་ཀྱི་ལས་ཀྱིས་བརྗོད་པ་དང་། གསོལ་བ་དང་བཞིའི་ལས་ཀྱིས་བརྗོད་པ་སྟེ་བརྗོད་པ་གཉིས་དང་། སོ་སོར་ཐར་པའི་མདོ་འདོན་པ་ལྔ་དང་། དགེ་འདུན་ལ་དགག་དབྱེ་ལན་གསུམ་དུ་གོ་བའི་སྔགས་རྣམས་ནི་ལས་ཏེ། དང་པོ་གཉིས་ལས་མཚན་ཉིད་པ་ཡིན་ལ། ཕྱི་མ་གཉིས་ལས་བཏགས་པ་བ་ཡིན་ནོ། །ལས་དང་བརྗོད་པའི་ཁྱད་པར་གང་ཞེ་ན། གསོལ་བ་ལ་སོགས་པ་ངག་ཏུ་བརྗོད་པའི་སྒྲ་རང་མཚན་པ་ནི་བརྗོད་པ་ཡིན་ལ། བརྗོད་པ་དེ་ལ་བསྟན་ནས་ཡིད་ཀྱི་བློ་ལ་མིང་ཚིག་ཡི་གེར་སྣང་བའི་སྒྲ་སྤྱི་ནི་ལས་སོ། །ལས་ཐོས་པར་བྱ་བ་མ་ཡིན་པ་དགེ་ཚུལ་ལ་སོགས་པས་ཐོས་པས་ནི་ལས་དེ་མི་འཆགས་པར་མི་འགྱུར་རོ། །དགེ་འདུན་གྱིས་མི་ཆགས་པའི་ལས་མི་བྱ་སྟེ། ལྟུང་བར་འགྱུར་བའི་ཕྱིར་རོ། །གཉིས་པ་ལ་གསུམ་སྟེ་མི་འཆག་པ་སོ་སོར་ཕྱེ་སྟེ་བཤད་པ། བྱེད་པ་པོ་དགེ་འདུན་གྱི་རྣམ་གཞག དེས་བྱ་བའི་ལས་ཀྱི་དབྱེ་བའོ། །དང་པོ་ནི། མི་འཆགས་པས་མི་བྱ་བ་གང་ཞེ་ན། ཆོས་མ་ཡིན་པ་སྟེ། སྦྱིན་ལས་ལ་གསོལ་བ་མ་བཏབ་པ། བསྐོ་ལས་ལ་སྤྲོ་བ་མ་དྲིས་པ། ཆད་ལས་ལ་གླེང་དྲན་མ་བྱས་པ་སོགས་ཆོ་ག་མ་ཚང་བ་ལ་ལས་མི་བྱའོ། །ཆོ་ག་ཚང་ཡང་བྱེད་པ་པོ་དགེ་འདུན་མི་མཐུན་པ་གཉིས་དང་ལྡན་པས་ལས་མི་བྱའོ། །ཡུལ་གང་ལ་བྱ་ཞེ་ན། ཚོགས་ཀྱི་མི་བྱའོ་ཞེས་གསུངས་ཏེ། ཡུལ་བཞིར་མ་ལོངས་པ་ལ་བྱ་བ་ཡིན་གྱི། ཚོགས་ལོངས་ཀྱི་ཡུལ་ལ་ལས་མི་བྱ་སྟེ། མི་འཆགས་པའི་ཕྱིར། འོན་ཀྱང་རྣམ་གཞག་གི་ལས་ལ་ནི་ཆགས་པ་ཡོད་དོ་ཞེས་གསུངས་མོད་དཔྱད་པར་བྱའོ། །གཉིས་པ་ལ་གཉིས་ཏེ། དགེ་འདུན་གྱི་གྲངས་དང་། ཁ་སྐོང་གི་རྣམ་གཞག་གོ །དང་པོ་ནི། དགེ་འདུན་དུ་མ་གྱུར་པ་དག་གིས་མི་བྱའོ་ཞེས་བཤད་ན། ཇི་ཙམ་གྱིས་དགེ་འདུན་དུ་ལོངས་པ་ཡིན་ཞེ་ན། དགེ་སློང་དང་དགེ་སློང་མ་རྣམས་ཀྱི་དབྱུང་བའི་ལས་ལ་ནི་དགེ་སློང་ཉི་ཤུ་ལ་སོགས་པ་ཡན་ཆད་དགེ་སློང་གི་དགེ་འདུན་ཉིད་དོ། །ཡུལ་དབུས་སུ་སྐྱེས་པ་བསྙེན་པར་རྫོགས་པ་ལ་ནི་དགེ་སློང་བཅུ་ལ་སོགས་པ་ཡན་ཆད་དགེ་སློང་གི་དགེ་འདུན་ཉིད་དོ། །ཐམས་ཅད་དུ་བཅུ་ངེས་པར་དགོས་སམ་ཞེ་ན། ཡུལ་མཐའ་འཁོབ་དག་ཏུ་དགེ་སློང་བཅུ་བསག་ཏུ་མེད་ན་འདུལ་བ་འཛིན་པ་སྟེ། ལས་བྱེད་པ་པོ་དང་བཅས་པའི་ལྔ་ལ་སོགས་པ་ཡན་ཆད་དོ། །དབྱུང་བ་དང་བསྙེན་པར་རྫོགས་པའི་ལྷག་མར་གྱུར་པའི་དགེ་སློང་གི་ལས་རྣམས་ལ་དགེ་སློང་བཞི་ལ་སོགས་པ་ཡན་ཆད་དགེ་སློང་གི་དགེ་འདུན་ནོ། །སྤྱིར་དགེ་འདུན་གྲངས་ཚང་བ་ལ་བཅུ་གཅིག་ཡོད་དེ། དགེ་སློང་མའི་དབྱུང་བའི་ལས་ལ་དགེ་སློང་ཕ་ཉི་ཤུ། མ་ཉི་ཤུ་སྟེ་བཞི་བཅུ། ཡུལ་དབུས་སུ་བུད་མེད་བསྙེན་པར་རྫོགས་པ་ལ་ཕ་བཅུ། མ་བཅུ་གཉིས་ཏེ་ཉེར་གཉིས། ཕའི་དབྱུང་བའི་ལས་ལ་དགེ་སློང་ཉི་ཤུ། ཡུལ་དབུས་སུ་སྔོན་རོལ་གྱི་སྡོམ་པ་གཉིས་དང་། འཁོར་དང་འཁོར་མང་པོའི་གནང་བ་བྱིན་པའི་ལས་ལ་དགེ་སློང་མ་བཅུ་གཉིས། མཐའ་འཁོབ་ཏུ་བུད་མེད་བསྙེན་པར་རྫོགས་པ་ལ་ཕ་ལྔ་དང་། མ་དྲུག་སྟེ་བཅུ་གཅིག ཡུལ་དབུས་སུ་སྐྱེས་པ་བསྙེན་པར་རྫོགས་པ་ལ་དགེ་སློང་བཅུ། དགེ་འདུན་གྱི་དབྱེན་ལ་རང་ཕྱོགས་བཞི། གཞན་ཕྱོགས་བཞི། འབྱེད་པ་པོ་རང་དང་བཅས་པའི་དགུ། མའི་དགག་དབྱེ་དང་། མའི་མགུ་བ་སྤྱོད་པའི་ལས་ལ་ཕ་མ་བཞི་བཞི་སྟེ་བརྒྱད། མཐའ་འཁོབ་ཏུ་སྔོན་རོལ་གྱི་སྡོམ་པ་གཉིས་སྦྱིན་པ་ལ་མ་དྲུག ཕམ་པར་གཏོགས་པའི་སྦོམ་པོ་ལྕི་བ་བཤགས་པའི་ཡུལ་ལ་ཕ་དྲུག་སྟེ། འདི་གཉིས་སྡེ་ཚན་གཅིག་ཏུ་བྱའོ། །མཐའ་འཁོབ་ཏུ་སྐྱེས་པ་བསྙེན་པར་རྫོགས་པ་ལ་ཕ་ལྔ། དབྱུང་བ་དང་བསྙེན་རྫོགས་ཀྱི་ལྷག་མའི་ལས་ལ་ཕ་བཞི་གྲངས་ཚང་རྣམས་སུ་ཡོད་པས་སོ། །གཉིས་པ་ལ་གཉིས་ཏེ། སྤྱིར་བསྟན་པ་དང་། འཁྲུལ་བཅས་བྱེ་བྲག་ཏུ་བཤད་པའོ། །དང་པོ་ནི། གོང་དུ་དགེ་འདུན་གྲངས་ཚང་བ་ཞེས་བཤད་ན། དེ་ལ་དགེ་སློང་ཇི་ལྟ་བུ་ཚང་དགོས་ཞེ་ན། མི་འདུག་པར་འགྲེང་བ་ནི་ལས་དེའི་ཁ་སྐོང་དུ་འོས་པ་མ་ཡིན་ཏེ། དགེ་འདུན་དང་སྤྱོད་ལམ་མི་མཐུན་པའི་ཕྱིར། དེར་མ་ཟད་གང་ཟག་གང་ལ་སྦྱིན་ལས། ཆད་ལས། བསྐོ་ལས་བྱ་བའི་ཡུལ་དེ་ཡང་ལས་དེའི་ཁ་སྐོང་དུ་འོས་པ་མ་ཡིན་ནོ། །དེའི་དམིགས་བསལ་ནི། གསོ་སྦྱོང་སོགས་རྣམ་གཞག་གི་ལས་ལ་ནི་རུང་ངོ་། །འདུན་པ་དང་ཡོངས་དག་ཕུལ་བས་དགེ་འདུན་དང་མཐུན་པ་འགྲུབ་པས་དེ་ལས་དེའི་ཁ་སྐོང་དུ་རུང་ངམ་སྙམ་ན། ལས་དེའི་ཕྱིར་དུ་འདུན་པ་དང་ཡོངས་སུ་དག་པ་ཕུལ་བའི་ཆོ་ག་ལས་དགེ་སློང་དེ་ལས་དེ་ལ་དངོས་སུ་མ་འདུས་པར་ལས་ཀྱི་ཁ་སྐོང་དུ་འོས་པ་མ་ཡིན་པ་ཉིད་དོ། །ནད་པ་དང་ཚངས་སྤྱོད་ལ་བར་དུ་གཅོད་པའི་རྐྱེན་དང་ལྡན་པ་ལས་གཞན་གྱིས་འདུན་པ་དང་ཡོངས་དག་དེ་གཉིས་འབུལ་བར་བྱ་བ་ཉིད་མ་ཡིན་ཏེ། ངེས་པར་ལས་ལ་འཇུག་དགོས་པའི་ཕྱིར། ལྷག་མ་ནི་བཞི་ལ་སོགས་པའོ་ཞེས་བཤད་ན་དགེ་སློང་བཞིས་དགག་དབྱེ་བྱར་རུང་ངམ་སྙམ་ན། གནས་དེ་ན་དགེ་སློང་བཞི་ལས་མེད་ན་གསུམ་གྱིས་གཅིག་དགག་དབྱེ་བྱེད་པ་ཉིད་དུ་མི་བསྐོ་སྟེ། དགག་དབྱེ་གོ་བར་བྱ་བའི་ཡུལ་དེ་ལ་དགེ་འདུན་ཚང་དགོས་པའི་ཕྱིར། དེར་མ་ཟད་དགེ་ཚུལ་ལ་སོགས་པ་བསྙེན་པར་མ་རྫོགས་པ་དང་། ཕམ་པས་ཉམས་པ་དང་། མཚམས་མེད་བྱས་པ་དང་། མདོ་སྡེ་ཚངས་པའི་དྲྭ་བ་ནས་གསུངས་པའི་ལྟ་བའི་རྣམ་པ་དྲུག་ཅུ་རྩ་གཉིས་པོ་དག་ལས་གང་ཡང་རུང་བ་ཀུན་ཏུ་སྤྱོད་པའི་སྡིག་པའི་ལྟ་བ་ཅན་དང་། ས་གཞན་ན་གནས་པ་ཉི་ཤུ་རྩ་ལྔ་དང་། ཆོས་མ་ཡིན་པའི་ཕྱོགས་ལས་ཐ་དད་དུ་གནས་པ་ཆོས་ཕྱོགས་པ་རྣམས་ཀྱང་ཁ་སྐོང་བ་ཉིད་མ་ཡིན་ནོ། །དེ་ཡང་སྡིག་པའི་ལྟ་བ་ཅན་ནི་ཆོས་ཕྱོགས་པའི་ལས་ཀྱི་ཁ་སྐོང་དུ་མི་འོས་པ་ཡིན་གྱི། ཆོས་མ་ཡིན་པའི་ཕྱོགས་ཀྱི་ལས་ཀྱི་ཁ་སྐོང་དུ་རུང་ལ། ཆོས་ཕྱོགས་པ་ནི་ཆོས་མིན་པའི་ལས་ཀྱི་ཁ་སྐོང་དུ་མི་རུང་བ་ཡིན་གྱི། ཆོས་ཕྱོགས་པའི་ལས་ཀྱི་ཁ་སྐོང་དུ་རུང་ངོ་། །ཤ་མཚོ་་་་་་ཁ་ཅིག་ཐ་དད་པ་ཆོས་ཕྱོགས་པ་ལ་བྱེད་པ་མི་རིགས་ཏེ། ཆོས་མིན་པའི་ལས་ཀྱི་ཁ་སྐོང་དཔྱོད་པའི་སྐབས་མིན་པའི་ཕྱིར། ཞེས་སྒྲུབ་བྱེད་དང་བཅས་ཏེ་གསུངས་པ་མི་འཐད་དེ། རང་ཊཱིཀ་ལས་དེ་ལས་ཐ་དད་པ་ཆོས་ཕྱོགས་པ་ལ་གཟུང་ཞེས་བཤད་པའི་ཕྱིར། གཉིས་པ་ནི། བསླབ་པ་འཁྲུལ་པ་དང་བཅས་པས་ཀྱང་ལས་ཀྱི་ཁ་སྐོང་བ་མ་ཡིན་ནོ། །འོ་ན་གང་གིས་འཁྲུལ་བཅས་སུ་འགྱུར་ཞེ་ན། བསྡམ་བྱའི་ཉེས་བྱས་ཀྱིས་ཀྱང་འཁྲུལ་པ་དང་བཅས་པ་ཡིན་གྱི། བཤགས་བྱའི་ལྟུང་བ་འབའ་ཞིག་གིས་འཁྲུལ་པ་དང་བཅས་པ་ཡིན་པར་མ་ཟད་དོ། །འདི་ལ་རྒྱ་གར་བ་ཁ་ཅིག་ཕམ་པ་གང་ཡང་རུང་བ་བྱུང་བས་བསླབ་པ་འཁྲུལ་བཅས་ཡིན་པས་ཁ་སྐོང་བར་འོས་པ་ཉིད་མ་ཡིན་གྱི། ལྟུང་བ་གཞན་བྱུང་བས་ཁ་སྐོང་དུ་མི་འོས་པ་མ་ཡིན་ནོ། །དེ་ཡང་ལུང་ལས་བཙུན་པ་ཇི་ཙམ་གྱིས་དགེ་སློང་མཚན་ཉིད་གཙང་བར་གྱུར་པ་ལགས། བཀའ་སྩལ་པ་ཉེ་བར་འཁོར་ཕམ་པར་འགྱུར་བ་བཞི་ལས་གང་ཡང་རུང་བ་མ་བྱུང་བའོ་ཞེས་གསུངས་པའི་ཕྱིར། ལྟུང་བ་གཞན་བྱུང་བས་འཁྲུལ་བཅས་སུ་འགྱུར་ན། ད་ལྟར་གྱི་གནས་སྐབས་སུ་སོ་སོར་ཐར་པའི་སྡོམ་པ་དྲུང་ཕྱུང་བ་ཡིན་པར་ཐལ། བསྡམ་བྱའི་ཉེས་བྱས་ཙམ་གྱིས་ཀྱང་བསླབ་པ་འཁྲུལ་བཅས་སུ་འགྱུར་ཞིང་། འཁྲུལ་བཅས་ཡིན་ན་ལས་ཀྱི་ཁ་སྐོང་དུ་མི་རུང་བས་ཁྱབ་པ་གང་ཞིག བསྡམ་བྱའི་ཉེས་བྱས་ཙམ་གྱིས་མ་གོས་པའི་དགེ་སློང་ཤ་སྟག་གི་ཁ་སྐོང་ཚང་བ་ད་ལྟ་མི་སྲིད་པའི་ཕྱིར། རྟགས་དང་པོ་ཁས་བླངས་སོ་ཞེ་ན། བསླབ་པ་འཁྲུལ་བཅས་སུ་འགྱུར་བ་ལ་ཕམ་པ་བྱུང་མི་དགོས་ཏེ། ལུང་སིལ་བུ་ལས་ཇི་ཙམ་གྱིས་རང་བཞིན་དུ་གནས་པ་མ་ལགས་པར་འགྱུར། བཀའ་སྩལ་པ་ཉེ་བར་འཁོར་ཇི་ཙམ་གྱིས་ལྷག་པར་བྱ་བ་མ་ཡིན་པ་ལྷག་པར་སྤྱོད་ཅིང་དགེ་སློང་གི་བསླབ་པ་ལ་མི་སློབ་པ་སྟེ། ཉེ་བར་འཁོར་དེ་ཙམ་གྱིས་རང་བཞིན་དུ་གནས་པ་མ་ཡིན་པར་འགྱུར་ཞེས་དང་། དགག་དབྱེའི་གཞི་ཞུ་བ་ལས་གལ་ཏེ་བསྡམ་པར་བྱ་བ་ཤེས་ན་བསྡམ་པར་བྱས་ལ་དགག་དབྱེ་བྱ། གལ་ཏེ་བཤགས་པར་བྱ་བར་ཤེས་ན་བཤགས་ཏེ་དགག་དབྱེ་བྱའོ་ཞེས་གསུངས་པའི་ཕྱིར། ལྟུང་བ་གཞན་བྱུང་བས་བསླབ་པ་འཁྲུལ་བཅས་སུ་འགྱུར་ཏེ། ངོ་ཚ་མེད་པ་ལས་ཐ་དད་དུ་རང་བཞིན་དུ་གནས་པ་མ་ཡིན་པའི་དགེ་སློང་དེས་འདུན་པ་ཕྱིར་བཟློག་གི་མི་མཐུན་པ་མི་འཆགས་པར་གསུངས་པ་ནི། ལས་ཀྱི་ཁ་སྐོང་དུ་མི་འོས་པའི་རྒྱུ་མཚན་གྱིས་ཡིན་པའི་ཕྱིར་ཏེ། ལུང་ལས་བཙུན་པ་གང་དག་གིས་སླར་བཟློག་པ་མི་འཆགས། ཉེ་བར་འཁོར་བཅུ་གཉིས་ཀྱིས་ཏེ། བྱིས་པ་དང་། རྨོངས་པ་དང་། ཞེས་པ་ནས། རང་བཞིན་དུ་གནས་པ་མ་ཡིན་པ་དང་། བསླབ་པ་བྱིན་པའོ་ཞེས་གསུངས་པའི་ཕྱིར། དེས་ན་ཚུལ་ཁྲིམས་ཡོངས་སུ་དག་པ་ཞེས་གསུངས་པའི་ལྟུང་བ་ཐམས་ཅད་ཀྱིས་ཡོངས་སུ་དག་པ་ཡིན་གྱི། ཕམ་པ་ཉི་ཚེས་དག་པ་ནི་མ་ཡིན་ནོ། །འཁྲུལ་བཅས་སུ་འགྱུར་བའི་ལྟུང་བ་ཕྱིར་བཅོས་བྱས་ནས་ལས་ལ་འཇུག་དགོས་སམ་ཞེ་ན། ལྟུང་བ་བྱིན་གྱིས་བརླབས་པས་ལས་ལ་སྒྲིབ་པའི་ཆ་དེ་དག་པ་ཉིད་དུ་འགྱུར་རོ། །ལྟུང་བ་ཐམས་ཅད་བྱིན་གྱིས་བརླབས་པས་འདག་གམ་ཞེ་ན། ཉི་མ་དེ་ཉིད་ལ་ཕྱིར་བཅོས་ནུས་པ་ཉིད་ཡིན་ན་དག་པར་མི་འགྱུར་རོ། །ནུས་པ་དེ་གང་ཞེ་ན། ལས་བྱེད་པའི་ཉི་མ་དེའི་ཚེ་བཤགས་པ་དེ་ལེན་པ་སྟེ་བཤགས་ཡུལ་ཡོད་ན་ལྟུང་བྱེད་འབའ་ཞིག་ཏུ་འགྱུར་བ་དང་། སོ་སོར་བཤགས་པར་བྱ་བ་དང་། འཕྲལ་ལ་བཤགས་པ་ཙམ་གྱིས་འདག་པའི་ཉེས་པ་རྣམས་ཉི་མ་དེ་ཉིད་ལ་ཕྱིར་བཅོས་བྱས་པས་འདག་པའི་ལྟུང་བ་ཡིན་ཏེ། བཤགས་ཡུལ་ཁྱད་པར་ཅན་ཡོད་ཅིང་དེའི་དྲུང་དུ་མིང་རིགས་ཀྱི་སྒོ་ནས་བཤགས་པ་བྱས་པས་འདག་པའི་ལྟུང་བའི་རིགས་སུ་གནས་པ་ཡིན་པའི་ཕྱིར། ཞིབ་ཏུ་གཞུང་གི་སྟེང་དུ་རྟོགས་པར་བྱའོ། །གསུམ་པ་ནི། བཟློག་པའི་ཕྱིར་བསྒོ་བ་དང་། ཞེས་པའི་སྐབས་སུ། གསོལ་བཞིའི་ལས་སུམ་ཅུ་གསུངས་ལ། སྤྱིར་ལས་བརྒྱ་རྩ་གཅིག་ཏུ་གསུངས་ཏེ། གཏམ་གྱི་གཞི་ལས་བཙུན་པ་ལས་དུ་དག་ཏུ་མཆིས། ཉེ་བར་འཁོར་བརྒྱ་རྩ་གཅིག་གོ །བཙུན་པ་ལས་དུ་དག་གིས་ལས་ཐམས་ཅད་བསྡུས། ཉེ་བར་འཁོར་གསུམ་གྱིས་ཏེ། གསོལ་བའི་ལས་དང་། གསོལ་བ་དང་གཉིས་ཀྱི་ལས་དང་། གསོལ་བ་དང་བཞིའི་ལས་ཀྱིས་སོ། །བཙུན་པ་ལས་བརྒྱ་རྩ་གཅིག་པོ་གང་དག་ལགས་པ་དེ་དག་ལ་གསོལ་བའི་ལས་ནི་དུ། གསོལ་བ་དང་གཉིས་ཀྱི་ལས་ནི་དུ། གསོལ་བ་དང་བཞིའི་ལས་དག་ནི་དུ་མཆིས། བཀའ་སྩལ་པ་ཉེ་བར་འཁོར། གསོལ་བའི་ལས་ནི་ཉི་ཤུ་རྩ་བཞིའོ། །གསོལ་བ་དང་གཉིས་ཀྱི་ལས་ནི་བཞི་བཅུ་རྩ་བདུན་ནོ། །གསོལ་བ་དང་བཞིའི་ལས་ནི་སུམ་ཅུའོ་ཞེས་གསུང་ལ། རྒྱ་ཆེར་འགྲེལ་དུ་དེ་དག་སྡོམ་གྱི་ཚིགས་སུ་བཅད་པས་གསུངས་པ་ནི། གསང་དང་ནང་དུ་དྲི་ཕྱིར་དང་། །གསོ་སྦྱོང་དེ་ལ་ལྟུང་བཅས་དང་། །དེ་ལ་དགེ་འདུན་ཡིད་གཉིས་དང་། །རྩོད་དང་དེས་ཉིད་མ་ཡིན་དང་། །དེ་ཡི་དོན་དུ་ལྔ་པོ་དག །ཐམས་ཅད་དགག་དབྱེར་གཏོགས་པ་ཡིན། །དབྱར་གནས་ཁས་བླང་ཉིད་དང་ནི། །འཆི་བའི་རྫས་དང་ནོར་འདྲ་དང་། །ཆོས་གོས་སྲ་བརྐྱང་གཏད་པ་དང་། །ཆོས་གོས་སྦྱིན་པར་བྱ་བ་དང་། །གནས་ངན་ལེན་ནི་བརྗོད་པ་དང་། །གྲངས་སུ་གཞུག་པ་བཞི་དག་དང་། །ཁྱིམ་གྱི་སྡོམ་དང་དེ་གཞིག་དང་། །ལྷུང་བཟེད་ཁ་དབུབ་བྱ་བ་དང་། །དེ་ཉིད་བཟློག་པར་བྱ་བ་དག །གསོལ་བ་འབའ་ཞིག་ལས་ཡིན་ནོ། །གནས་དང་མཚམས་ནི་གསུམ་པོ་དག །མི་འབྲལ་སྨྱོས་དང་དགག་དབྱེ་དང་། །གནས་མལ་སྟོབ་པར་བྱེད་པ་དང་། །རུང་བའི་ས་གཞི་བརྐོ་བ་དང་། །སྲ་བརྐྱང་དང་ནི་དེ་འདིང་དང་། །སྤོང་དང་ལག་གི་གླ་དང་ནི། །གནས་ཁང་བསྐོ་ལ་སོགས་པ་དང་། །གཟུ་དང་གསལ་དང་སྦེད་པ་དང་། །ཚུལ་ཤིང་འབྲིམས་པར་བྱེད་པ་དང་། །ཁང་པ་ཁང་ཆེན་བསྟན་པ་དང་། །གླེང་དང་འབྲལ་བར་མི་འགྱུར་དང་། །སྟན་དང་ལྷུང་བཟེད་འབྲིམས་པ་དང་། །མ་དད་གོ་བར་བྱ་བ་དང་། །སྟོན་པ་དང་ནི་ནགས་ཉུལ་དང་། །ཕྱག་མི་བྱ་དང་མང་ཕྱིར་དང་། །འཁར་བ་དྲྭ་བའི་ཕྱིར་དང་ནི། །རྙེད་པ་གཅིག་ཏུ་བྱ་ཕྱིར་དང་། །བསླབ་པ་སྦྱིན་དང་ཉེར་གནས་དང་། །བུ་དང་ཉེ་དུའི་ཕྱིར་འགྲོ་བ། །གསོལ་དང་གཉིས་ཀྱི་ལས་ཡིན་ནོ། །བསྙེན་པར་རྫོགས་པར་བྱ་བ་དང་། །མུ་སྟེགས་གནས་དང་མཚམས་འགྲོལ་དང་། །མཐུན་སྦྱིན་གསོ་སྦྱོང་བདུན་པོ་དང་། །བརྒྱད་དང་དྲན་དང་མ་མྱོས་དང་། །དེ་ཉིད་འཚོལ་དུ་གཞུག་པ་དང་། །བསྒོ་བར་བྱ་བ་རྣམས་དང་ནི། །ཉམས་པ་བྱིན་པར་བྱ་བ་དག །གསོལ་དང་བཞི་ཡི་ལས་ཡིན་ནོ། །ཞེས་གསུང་སྟེ། འདི་དག་གི་ནང་གསེས་ཀྱི་དབྱེ་དུ་དང་མཚན་ཉིད་ནི་འགྲེལ་པ་ལས་ཤེས་པར་བྱའོ།། ༈ །།བཞི་པ་གསོ་བ་ཕྱིར་བཅོས་ཀྱི་གཞི་ལ་གཉིས་ཏེ། ལྟུང་བ་ཕྱིར་བཅོས་དང་། རྩོད་པ་ཕྱིར་བཅོས་གཉིས། དང་པོ་ནི། ཕྱིར་བཅོས་ཀྱི་གཞི། དུས་དང་དུས་མ་ཡིན་པ་བསྡུས་པ་འབྱུང་བའི་གཞི། ས་གཞན་ལ་གནས་པ་སྤྱོད་པའི་གཞི། ཡོངས་སུ་སྦྱོང་བའི་གཞི་སྟེ་བཞིས་འཆད་ལ། འདི་ལ་ཡང་རང་ཉིད་མི་སྤྲོ་བ་ནན་ཏུར་གྱིས་ཕྱིར་བཅོས་པ་དང་། རང་ཉིད་སྤྲོ་བ་མཐོལ་བཤགས་ཀྱིས་ཕྱིར་བཅོས་པ་གཉིས། དང་པོ་ལ་སྤྱིའི་རྣམ་གཞག་དང་། སོ་སོའི་དོན་ཞིབ་ཏུ་བཤད་པ་གཉིས་ལས། དང་པོ་ལ། བྱ་བ་ངན་པ་འཕྲོ་གཅོད་དུ་གཞུག་པ་དང་། ལྟུང་བ་ཕྱིར་བཅོས་སུ་གཞུག་པ་གཉིས། དང་པོ་ལ། ཚུལ་ཁྲིམས་དང་འགལ་བའི་སྒོ་ནས་ཁྱིམ་པ་སུན་འབྱིན་པར་བྱེད་པ་ལ་བསྐྲད་པ་ནན་ཏུར། དགེ་འདུན་ལ་འཐབ་ཀྲོལ་རྒྱུན་མ་ཆད་པར་བྱེད་པ་ལ་བསྡིག་པ་ནན་ཏུར། དགེ་འདུན་ལྷག་མའི་ལྟུང་བ་རིགས་འདྲ་བཞི་བཏུད་དེ་བྱེད་པ་ལ་སྨད་པ་ནན་ཏུར། ཁྱིམ་པ་ལ་བརྙས་འཐབ་བྱེད་པ་ལ་ཕྱིར་འགྱེད་ནན་ཏུར་དང་བཞི་སྟེ། དེ་རྣམས་སྡེ་སྣོད་འཛིན་པ་ལ་སོགས་པའི་དམིགས་བསལ་ཅན་མ་གཏོགས་པ་ལ་དགེ་འདུན་གྱིས་ལྟུང་བ་གླེང་བའི་གང་ཟག་བསྐོ་ཞིང་། དེས་ལྟུང་བ་གླེང་བ་ན་སྐབས་མི་འབྱེད་དམ། ཕྱེ་ནས་མི་མཉན་ནམ། ཚོགས་སུ་འདུ་བ་མི་སྟེར་རམ། ལྟུང་བ་མ་མཐོང་ངོ་ཞེས་ཟེར་རམ། ཁས་བླངས་ནས་ཕྱིར་མི་འཆོས་པ་གང་ཡིན་ཡང་རུང་སྟེ། བཞམ་བསྒོ་སྔོན་དུ་འགྲོ་བས་གསོལ་བཞིའི་ལས་ཀྱིས་གཞི་གང་ཡིན་གྱི་ནན་ཏུར་བྱ་སྟེ། གཞན་གྱིས་དགོས་པ་མི་འགྲུབ་པའི་ཕྱིར། དེ་ལ་བསྐྲད་པ་ནན་ཏུར་ནི། སུན་འབྱིན་པའི་གནས་དེ་གནས་སུ་མི་གཞུག་གོ །བསྡིག་པ་ནན་ཏུར་ནི་འཐབ་ཀྲོལ་རྒྱུན་མི་གཅོད་ན་གནས་ནས་འབྱིན་ནོ་ཞེས་བསྡིག་པའོ། །སྨད་པ་ནན་ཏུར་ནི། ཉེས་པ་དེ་ལས་སླར་མ་ལོག་བར་དུ་གཞན་ལ་གནས་འཆའ་ཞིང་འདུག་ཅིག་ཅེས་པའོ། །ཕྱིར་འགྱེད་ནན་ཏུར་ནི། ཁྱོད་ཁྱིམ་པ་ལ་བཟོད་པ་མི་གསོལ་ན། ངེད་ཀྱང་ཁྱོད་ལས་ཕྱིར་འགྱེད་པར་བྱའོ་ཞེས་པའོ། །དེ་དག་ནན་ཏུར་བྱས་པས་བཟོད་པར་གསོལ་ན། གསོལ་བཞིའི་ལས་ཀྱིས་བཟོད་པ་བླང་ངོ་། །དེ་དག་ཕྱིར་མི་འཆོས་ཤིང་བཟོད་པ་གསོལ་དུ་མ་འདོད་ན་གནས་དབྱུང་བྱ་སྟེ། འཐབ་ཀྲོལ་ལ་འབད་པ་མ་ལོག་ན་གནས་ནས་དབྱུང་བར་གསུངས་པ་དེ་གཞན་ལ་ཡང་རིགས་པ་མཚུངས་པའི་ཕྱིར། གཉིས་པ་ནི། གང་ཟག་དམན་པ་ལྟུང་བ་བྱས་ནས། རང་ཉིད་ཕྱིར་མི་འཆོས་པ་ལ་གང་ཟག་གཞན་གྱིས་ཕྱིར་འཆོས་སུ་གཞུག་པའི་ཕྱིར་དུ། གླེང་བྱེད་མཚན་ཉིད་དང་ལྡན་པས། བརྟག་རྣམ་པར་བརྟགས། དཔྱད་རྣམ་པར་དཔྱད་ནས་དང་པོར་སྐབས་འབྱེད་དུ་གཞུག སྐབས་མི་འབྱེད་ན། ཁྱེད་ལ་བརྗོད་རྒྱུ་ཞིག་ཡོད་པས། གཞན་དུ་མ་འགྲོ་ཞིག་ཅེས་བརྗོད་བཅས་བྱ། བྱས་ཀྱང་སྐབས་འབྱེད་དུ་མ་འདོད་ན། དེ་ལ་གདམས་ངག་མི་སྦྱིན། གཏམ་མི་བྱ། དེས་ཀྱང་འབྱེད་དུ་མི་འདོད་ན། གསོལ་བཞིའི་ལས་ཀྱིས་གསོ་སྦྱོང་གཞག དེས་ཀྱང་འབྱེད་པར་མ་འདོད་ན་དགག་དབྱེ་གཞག དེས་ཀྱང་འབྱེད་དུ་མ་འདོད་ན་བཀའ་བློ་མི་བདེ་བ་ཡིན་པས་བཟློག་པའི་ཕྱིར་བསྒོ་བའི་ལས་བྱ། དེས་ཀྱང་གཏང་དུ་མ་འདོད་ན་དགེ་འདུན་ལྷག་མར་འགྱུར་རོ། །སྐབས་ཕྱེ་ནས་མཉན་པར་མི་བྱེད་ན། རྟ་དམུ་རྒོད་ཕུར་པས་བཏགས་པ་བཞིན། ཁྱོད་ལ་ལྟུང་བ་འདི་བྱུང་ངོ་ཞེས་ལྟུང་བ་བཀལ་ཏེ་གཏང་བ་ཕུར་བཅས་བྱའོ། །སྐབས་ཕྱེ་ནས་ལྟུང་བ་བྱུང་མ་བྱུང་ལ་མ་འཆམས་ན་དཔང་པོ་ཡོད་ན་དཔང་པོ་ལ་དྲི། དཔང་པོ་བདེན་པ་མཐོང་བའམ། ཡོན་ཏན་ཆེར་མཆོག་ཏུ་གྱུར་པས་གླེང་བྱ་བདེན་པར་བཅད་ན་གླེང་བྱ་ལ་དག་པ་སྦྱིན། ད་དུང་གླེང་ན་གླིང་བྱེད་ལ་ཕྱིར་འགྱེད་ནན་ཏུར་བྱ། གླེང་བྱེད་བདེན་པར་བཅད་ནས་ལྟུང་བ་མ་མཐོང་ངོ་ཞེས་ཟེར་ན། མ་མཐོང་བ་གནས་དབྱུང་བྱ། ལྟུང་བ་དེ་འདྲས་ཐར་པ་ལ་མི་སྒྲིབ་ཟེར་ན། སྡིག་ལྟ་ལས་བཟློག་པའི་ཕྱིར་བསྒོ་བའི་ལས་བྱ། དེས་མ་བཏང་ན་སྡིག་ལྟ་ཅན་གནས་ནས་དབྱུང་བར་བྱ། ལྟུང་བ་ཡོད་པར་ཁས་བླངས་ནས་བཤགས་བྱ་ཡན་ཆད་ཕྱིར་མི་འཆོས་ན་ཕྱིར་མི་འཆོས་པ་གནས་ནས་དབྱུང་བར་བྱ། ཁས་བླངས་ནས་བརྗོད་པས་ཁྱད་དུ་གསོད་ན་དེའི་ངོ་བོ་ཉིད་འཚོལ་བ་དང་མཐུན་པ་སྦྱིན། ཁས་བླངས་ནས་ཕྱིར་འཆོས་ནས་ལྟུང་བ་གང་ཡིན་པ་དེའི་ཕྱིར་བཅོས་བྱེད་དུ་གཞུག འཐབ་ཀྲོལ་བྱེད་པ་ལ་བསྡིག་པ་ལ་སོགས་པས་བཟློག་ཀྱང་མ་ལོག་ན་གནས་ནས་དབྱུང་། རྩོད་པ་རྣམ་པར་གཏན་ལ་དབབ་པས་མ་ཞི་ན་གནས་ནས་དབྱུང་། འཐབ་ཀྲོལ་གྱི་རྒྱུ་ཉེ་བར་སྒྲུབ་པ་གནས་ནས་དབྱུང་། དགེ་སློང་མ་དང་འདྲེ་ཞིང་གནས་པ་གནས་ནས་དབྱུང་སྟེ། འདི་བཞི་བྱ་བ་དམན་པ་འཕྲོ་གཅོད་དུ་འཇུག་པའི་ནན་ཏུར་རོ། །དེར་གནས་ནས་ཕྱུང་བ་དེ་དག་གིས་དབྱེ་བའི་སེམས་ཀྱིས་མཚམས་ཀྱི་ནང་དུ་ལས་ཐ་དད་དུ་བྱས་ན་ལས་བྱེ་བ་ཡིན་པས། དེ་གཉིས་ཀྱི་ཕྱོགས་སུ་མ་ལྷུང་བའི་དགེ་འདུན་གཟུ་བོར་རྣམས་ཀྱིས་ཕྱག་དང་མངོན་ལྡང་སོགས་ཀྱི་གུས་པ་དང་གཏམ་མི་བྱ། དགེ་སློང་མས་མངོན་ལྡང་ཙམ་དང་དགེ་བསྙེན་གྱིས་བསོད་སྙོམས་སྟེར་བ་ཙམ་མ་གཏོགས། ཕྱག་དང་གཏམ་སྨྲ་བ་སོགས་མི་བྱ་བར་ཚར་གཅད་དོ། །གལ་ཏེ་བཟོད་པར་གསོལ་ན། གསོལ་བ་དང་བཞིའི་ལས་ཀྱིས་བཟོད་པ་བླངས་ཏེ། མཐུན་པ་དང་མཐུན་པའི་གསོ་སྦྱོང་བྱིན་ནས་གསོ་སྦྱོང་ལྷན་ཅིག་བྱས་པས་རང་བཞིན་དུ་གནས་པ་ཐོབ་བོ། །དེ་རྣམས་ལ་བརྟེན་ནས་རྩོད་པར་གྱུར་ན་རྩོད་པ་ཞི་བྱེད་ཀྱིས་ཞི་བར་བྱ་སྟེ། དཔེར་ན་ཆང་འཐུང་བ་ལྟུང་བ་ཡིན་མིན་རྩོད་ན། འགྱེད་ཕྱིར་རྩོད་པ་ཡིན་པས་མངོན་སུམ་དང་གང་མང་གིས་ཞི་བར་བྱའོ། །དེ་ལ་ནན་ཏུར་བྱས་པས་རིགས་མི་རིགས་ལ་རྩོད་པ་བྱུང་ན། མངོན་སུམ་དང་དྲན་པས་འདུལ་བ་དང་། མ་སྨྱོས་པས་འདུལ་བ་སྦྱིན། ཆང་འཐུང་མ་འཐུངས་ལ་བརྟེན་ནས་རྩོད་པ་བྱུང་ན། ལྟུང་ཕྱིར་གྱི་རྩོད་པ་ཞི་བྱེད་ཀྱིས་ཕྱིར་བཅོས་ཏེ། རྒོལ་ཕྱི་རྒོལ་གཉིས་ལས་གཞན་དུ་མ་འཕྲོས་ན་ཁས་བླངས་པས་ཕྱིར་བཅོས། འཕྲོས་ན་བཅས་པའི་ཉི་ཚེ་བ་ལ་མངོན་སུམ་གྱིས་ཕྱིར་བཅོས། དགེ་འདུན་མཐའ་དག་དང་འབྲེལ་ན་རྩྭ་བཀྲམ་པ་ལྟ་བུ་ཕན་ཚུན་གཅིག་གིས་གཅིག་ལ་བཤགས་པའི་ཕྱིར་བཅོས་པ་བྱའོ། །སྡེ་སྣོད་འཛིན་པ་ལ་སོགས་པའི་གང་ཟག་བདུན་ལ་ནན་ཏུར་མི་བྱ་སྟེ། ས་གའི་ལྷས། མདོ་སྡེ་འདུལ་བ་མངོན་པ་རྣམས། །མཁས་ཤིང་གྲགས་དང་ལྡན་པ་དང་། །བསོད་ནམས་ལྡན་པ་ལ་སོགས་ནི། །བསྐྲད་ཅིང་བཀར་བར་འོས་པ་མིན། །གང་ཕྱིར་འདི་དག་མུ་སྟེགས་ཀྱི། །རིག་དྭགས་སྐྲག་བྱེད་སེངྒེའི་བུ། །འདི་དག་ཁྱིམ་པར་གྱུར་ན་ཡང་། །སྟོན་པའི་བློ་ཡིས་རབ་དྭངས་བསྐྱེད། །འདི་དག་རྣམས་ཀྱིས་གཙུག་ལག་ཁང་། །མཛེས་བྱེད་ཁྱུ་མཆོག་སྒྲ་སྒྲོགས་བཞིན། །དེ་བས་འདི་དག་སྨད་ན་ནི། །རང་གི་བསྟན་པ་སྨད་པ་ཡིན། །ཞེས་གསུངས་པ་ནི་བུ་སྟོན་གྱི་ལེགས་བཤད་དོ། །གཉིས་པ་སོ་སོའི་དོན་ཞིབ་ཏུ་བཤད་པ་ལ་དོན་བརྒྱད་དེ། དབྱེ་བ། བསྡུ་བ། མཚན་ཉིད། སྔོན་འགྲོའི་ཆོས། མཇུག་གི་ཆོ་ག ནན་ཏུར་གང་བྱ་བའི་རྒྱུར་འགྲོ་བ། སྒྲ་བཤད་ལ། ནན་ཏུར་བྱ་བའི་ཚུལ་ལོ། །དང་པོ་ལ། ཁ་ཅིག་ནན་ཏུར་ལ་དབྱེ་ན་བཅོ་ལྔ་སྟེ། བསྡིག་པ་ལ་སོགས་པ་བཞི། གནས་དབྱུང་བདུན། ལྷུང་བཟེད་ཁ་དབུབ། དགེ་ཚུལ་བསྙིལ་བ། གསོ་སྦྱོང་གཞག་པ། དགག་དབྱེ་གཞག་པའོ་ཞེས་གསུངས་པ་མི་འཐད་དེ། ལྷུང་བཟེད་ཁ་དབུབ་དང་དགེ་ཚུལ་བསྙིལ་བ་ནི་ནན་ཏུར་དུ་མི་འཐད་པའི་ཕྱིར་ཏེ། ཊཱི་ཀར་འདི་དག་ནི་ཡང་དག་པར་བསྡམ་པར་བྱ་བ་ཙམ་ཡིན་གྱི། གཞན་ལ་བཅོལ་བར་བྱ་བ་ཉིད་མ་ཡིན་པས་མངོན་སུམ་དུ་མ་གྱུར་པར་བྱའོ་ཞེས་སོ། །གཞན་ཡང་དགེ་ཚུལ་བསྙིལ་བའི་ལས་དེ་གནས་དབྱུང་དུ་ཐལ། ཆོས་དང་ཟང་ཟིང་གཉིས་ཀས་སྤང་འོས་ཀྱི་ནན་ཏུར་ཡིན་པའི་ཕྱིར། རྟགས་ཁས། འདོད་ན། དགེ་ཚུལ་བསྙིལ་བའི་གང་ཟག་དེ་བསྟན་པ་ལ་ཞུགས་རྫོགས་ཀྱི་གང་ཟག་ཏུ་ཐལ། གནས་དབྱུང་ནན་ཏུར་བྱས་པའི་གང་ཟག་ཡིན་པའི་ཕྱིར། གཞན་ཡང་ལྷུང་བཟེད་ཁ་དབུབ་དེ་ནན་ཏུར་མིན་པར་ཐལ། དེ་ཁྱིམ་པ་ལ་བྱེད་དགོས་པ་གང་ཞིག་ཁྱིམ་པ་ལ་ནན་ཏུར་བྱ་བ་བཀག་པའི་ཕྱིར་ཏེ། ཁྱིམ་པ་ལ་མི་བྱའོ་ཞེས་གསུངས་པའི་ཕྱིར། གཉིས་པ་བསྡུ་བ་ལ། ཁ་ཅིག རྟེན་གྱི་སྒོ་ནས་བསྡུ་ན་ཁྱིམ་པ་ལ་བྱ་བ་དང་རབ་བྱུང་ལ་བྱ་བ་གཉིས། ངོ་བོའི་སྒོ་ནས་བསྡུ་ན། བསྐྲད་པ་ནན་ཏུར། རྣམ་དག་ནན་ཏུར། སྨད་པ་ནན་ཏུར་གསུམ། ཆོ་གའི་སྒོ་ནས་བསྡུ་ན་གསོལ་བཞིས་བསྒྲུབ་པ་དང་། གསོལ་བ་འབའ་ཞིག་པས་བསྒྲུབ་པ་གཉིས་ཞེས་གསུངས་སོ། །གསུམ་པ་མཚན་ཉིད་ནི། རང་མི་འདོད་བཞིན་དུ་ལས་ཀྱི་ཆད་པས་བཅད་ལ། མཇུག་ཏུ་བཟོད་པར་གསོལ་དགོས་སུ་འདུག་པའོ། །དེ་ཡང་རང་མི་འདོད་བཞིན་དུ་ཞེས་པས་ངོ་བོ་ཉིད་འཚོལ་བ་དང་མཐུན་པ་སྦྱིན་པ་བསལ་ཏེ། དེ་འདོད་བཞིན་དུ་བྱ་བའི་ཕྱིར། ལས་ཀྱིས་ཞེས་པས་ནི་གནས་བླ་མས་སློབ་མ་ཆད་པས་གཅོད་པ་བསལ་ཏེ། དེ་ལས་ལ་མ་ལྟོས་པར་ཆད་པས་གཅོད་པའི་ཕྱིར། ཆད་པས་བཅད་པ་ཞེས་པས་དམན་པའི་གནས་སུ་བགྲང་བ་བསལ་ཞེས་གསུངས། མཇུག་བཟོད་པར་གསོལ་དགོས་སུ་འདུག་པ་ཞེས་པ་ནི། ནན་ཏུར་ཕྱིས་བྱས་པའི་སྟོབས་ཀྱིས་སྔར་བྱས་འཇིག་པའི་ནན་ཏུར་དེ་ནན་ཏུར་ཡིན་པར་བསྡུ་བའི་དོན་ནོ་ཞེས་གསུངས་སོ། །བཞི་པ་སྔོན་འགྲོའི་ཆོས་ལ་ཁ་ཅིག་ན་རེ། ཕྱིར་མི་འཆོས་གནས་དབྱུང་ལ་གླེང་དྲན་དང་ཁས་བླངས་པ་སྔོན་དུ་འགྲོ་དགོས་ལ། སྡིག་ལྟ་མི་གཏོང་བ་གནས་དབྱུང་ལ་བཞམས་བསྒོ་དང་། འཐབ་ཀྲོལ་ལ་འབད་པས་མ་ལོག་པ་ལ་བསྡིག་པ་ནན་ཏུར་དང་། རྣམ་པར་གཏན་ལ་འབབ་པ་ལས་གྱུར་པའི་གནས་དབྱུང་ལ། མངོན་སུམ་བརྒྱད་སྔོན་དུ་འགྲོ་དགོས་པར་གསུངས་པས་དེ་ལས་གཞན་པའི་ནན་ཏུར་ལ་ཡང་སྔོན་འགྲོའི་ཆོས་ཤིག་དགོས་པས་དེ་ལ་བཞམས་བསྒོ་སྔོན་དུ་གཏོང་དགོས་པར་གྲུབ་པ་ཡིན་ཏེ། སྡིག་ལྟ་མི་གཏོང་པ་དང་དགེ་ཚུལ་བསྙིལ་བ་གཉིས་ལ་དེ་སྔོན་དུ་འགྲོ་དགོས་པར་གསུངས་པས་རྒྱུ་མཚན་མཚུངས་པའི་ཕྱིར་དང་། རྩ་བ་ལས་ཀྱང་། གནས་ནས་ཕྱུང་བ་ཡང་དེ་བཞིན་ནོ། །ཞེས་གནས་དབྱུང་སྤྱི་ལ་བཤད་པའི་ཕྱིར་ཞེས་གསུངས། ཤ་་་་་་ཁ་ཅིག་དགེ་སློང་མ་དང་འདྲེ་ཞིང་གནས་པའི་རྒྱུར་གནས་ནས་དབྱུང་བ་ལ་ཡང་སྨད་པ་ནན་ཏུར་སྔོན་དུ་འགྲོ་དགོས་པ་ཡིན་ཏེ། དགེ་འདུན་ལྷག་མའི་ལྟུང་བ་རྒྱུན་དུ་བྱེད་པ་ལ་སྨད་པ་ནན་ཏུར་བྱེད་རིགས་པ་གང་ཞིག དེ་གཉིས་རྒྱུ་ངོ་བོ་ཆོ་ག་དོད་ཐུབ་པ་ཡིན་པའི་ཕྱིར། འཐབ་ཀྲོལ་གྱི་རྒྱུ་ཉེ་བར་བསྒྲུབ་པ་ལ་ཡང་བསྡིག་པ་ནན་ཏུར་སྔོན་དུ་འགྲོ་དགོས་པ་ཡིན་ཏེ། འཐབ་ཀྲོལ་ལ་འབད་པས་མ་ལོག་པ་གནས་ནས་དབྱུང་བ་ལ་བསྡིག་པ་ནན་ཏུར་སྔོན་དུ་འགྲོ་དགོས་པ་གང་ཞིག དེ་གཉིས་རྒྱུ་ངོ་བོ་ཆོ་ག་དོད་ཐུབ་པ་ཡིན་པའི་ཕྱིར་ཞེས་གསུངས་སོ། །ལྔ་པ་མཇུག་གི་ཆོས་ལ། ཁ་ཅིག་ན་རེ་སྨད་པ་བསྐྲད་པ་ཕྱིར་འགྱེད་ནན་ཏུར་བྱས་ནས་དེའི་མཐའ་ལ་མི་གཏོང་ན་གནས་དབྱུང་བྱ་བ་ཡིན་ཏེ། བསྡིག་པ་ནན་ཏུར་བྱས་ནས་དེའི་མཐའ་ལ་མི་གཏོང་ན་གནས་དབྱུང་བྱ་བ་གང་ཞིག དེ་དག་རྒྱུ་ངོ་བོ་ཆོ་ག་དོད་ཐུབ་ཡིན་པའི་ཕྱིར་ཞེས་གསུངས་མོད། དཔྱད་པར་བྱའོ། །དྲུག་པ་ནན་ཏུར་གང་ལྟུང་བའི་རྒྱུར་འགྲོ་བ་ལ་ཁ་ཅིག་ན་རེ། བསྡིག་པ་སྨད་པ་ཕྱིར་འགྱེད་ནན་ཏུར་བྱས་ནས་དགེ་འདུན་ལ་སྐུར་འདེབས་བྱེད་ན་བཞམས་བསྒོ་ལ་སོགས་པ་ལྔ་བྱས་པ་དེའི་མཐའ་ལ་མི་གཏོང་ན་ལྷག་མར་འགྱུར་ཏེ། བསྐྲད་པ་ནན་ཏུར་བྱས་པའི་དགེ་སློང་གིས་དགེ་འདུན་ལ་སྐུར་འདེབས་བྱེད་པ་ལ་བཞམས་བསྒོ་སོགས་བྱས་ནས་དེའི་མཐའ་ལ་མ་བཏང་བ་ལ་ལྷག་མ་བསྐྱེད་པ་གང་ཞིག རྒྱུ་མཚན་མཚུངས་པའི་ཕྱིར། འོ་ན་ལྷག་མ་བཅུ་གསུམ་དུ་མ་ངེས་པར་ཐལ། ཞེས་པ་ལ་དངོས་བཅས་དང་རུང་མཐུན་གཉིས་ཀའི་དབང་དུ་བྱས་ན་འདོད་ལ། དངོས་བཅས་ཀྱི་དབང་དུ་བྱས་ན་ཁྱབ་པ་མེད་ཅེས་གསུངས་སོ། །ཁ་ཅིག་གསོ་སྦྱོང་དང་དགག་དབྱེ་གཞག་པའི་གང་ཟག་དགེ་འདུན་ལ་སྐུར་འདེབས་བྱེད་པ་ལ་ཡང་བཞམས་བསྒོ་སོགས་ལྔ་བྱས་པའི་མཐའ་ལ་མི་གཏང་བ་ལ་ལྷག་མར་འགྱུར་ཏེ། དེ་གཞན་དང་རྒྱུ་མཚན་མཚུངས་པའི་ཕྱིར་ཞེས་པ་ཡང་མི་འཐད་དེ། ཧ་ཅང་ཐལ་བའི་ཕྱིར་དང་གཏན་ཚིགས་ཀྱང་མ་གྲུབ་པའི་ཕྱིར་རོ། །བདུན་པ་སྒྲ་བཤད་པ་ནི། འོག་ཏུ་འཇུག་ཅིང་ལྟུང་བའི་དོན་གྱིས་ན་ནན་ཏུར་ཞེས་བྱའོ། །བརྒྱད་པ་བྱ་བའི་ཚུལ་ལ། དགོས་དོན་བསྡུས་དོན་གཉིས་ལས། དང་པོ་ནི། ཉེས་སྤྱོད་ལ་མ་ཞུགས་པ་རྣམས་མི་འཇུག་པ་དང་། ཞུགས་ཟིན་པ་རྣམས་བཟློག་པ་དང་། ཁྱིམ་པ་རྣམས་མ་དད་པ་སྤོང་བའི་དགོས་པ་ཡང་ཡོད་དོ། །གཉིས་པ་ལ་དྲུག་སྟེ། ཡུལ་གང་ལ། རྟེན་གང་གིས་དུས་ནམ་གྱི་ཚེ། ཆོ་ག་གང་གིས། ནན་ཏུར་བྱས་པའི་བསླབ་བྱ། གྲོལ་རྒྱུའོ། །དང་པོ་ནི། སྡེ་ལྔའི་སྡོམ་པ་གསོ་རུང་ཡན་ཆད་དང་ལྡན་པ། བསམ་པ་རང་བཞིན་དུ་གནས་པ། ལུས་ཐ་མལ་དུ་གནས་པ་ལྟ་བ་དང་སྤྱོད་པ་ཆོས་མིན་པའི་ཕྱོགས་སུ་མ་སོང་བ་ཡིན་པ། གནས་དབྱུང་མ་ཡིན་པ། ཚོགས་ལོངས་མིན་པ། ནད་པ་མིན་པ། འབྱེད་ནུས་པ་མིན་པ། གླེང་དྲན་སྔོན་དུ་སོང་བ་ཡིན་པ། རང་རང་གི་གཞི་ལེགས་པ་དང་ལྡན་པ་སྟེ་ཆོས་དགུ་ལྡན་གཅིག་ལ་བྱའོ། །དཔེར་ན་ཕྱིར་མི་འཆོས་གནས་དབྱུང་བྱེད་པ་ལ། དེ་ལ་ལྟུང་བ་དེ་གླེང་ཞིང་ཁས་བླངས་ནས་ཕྱིར་མི་འཆོས་པར་རང་དགར་འཇོག་པ་ལ་བྱ་བར་གསུངས་པ་ལྟ་བུའོ། །གཉིས་པ་རྟེན་གང་གིས་བྱ་བ་ནི། ནན་ཏུར་བྱེད་དགོས་དང་ལྡན་ཞིང་གྲངས་ཚང་བ། ཁ་སྐོང་བར་འོས་པ་མི་མཐུན་པ་གཉིས་དང་བྲལ་བའི་དགེ་འདུན་གྱིས་སོ། །གསུམ་པ་དུས་ནམ་གྱི་ཚེ་བྱ་བ་ནི། ཕ་རོལ་པོས་སེམས་གཏད་པར་མི་ནུས་པ་དང་། དབྱར་ཁས་བླངས་པའི་དུས་མ་ཡིན་པར་བྱའོ། །བཞི་པ་ཆོ་ག་གང་གིས་བྱ་བ་ལ། སྦྱོར་བ་དང་། དངོས་གཞི། མཇུག་རྣམས་སོ། །དང་པོ་ནི། སྟན་བཏིང་བ་ལ་སོགས་པ་འདུ་བའི་སྐབས་རྗེས་སུ་སྒྲུབ་པའོ། །གཉིས་པ་ནི། གསོལ་བ་དང་བཞིའི་ལས་བྱ་བའོ། །གསུམ་པ་ནི། མཇུག་བསྡུ་བརྗོད་པ་དང་། འདི་ཉིད་དུ་ལྟུང་བ་འདི་ཕྱིར་བཅོས་པར་གྱིས་ཤིག དགེ་འདུན་འདི་ཉིད་ཀྱིས་ཁྱོད་བག་ཡངས་སུ་བྱེད་པར་འགྱུར་རོ་ཞེས་བརྗོད་པར་བྱའོ། །ལྔ་པ་ནན་ཏུར་བྱས་པའི་བསླབ་བྱ་ནི། སྡིག་སྨད་བསྐྲད་ཕྱིར་འགྱེད་ནན་ཏུར་བྱས་པའི་གང་ཟག་རྣམས་ཀྱིས་ཁྱད་པར་ཅན་གྱི་སྤྱོད་པ་སྤོང་ཞིང་། འགྲོགས་ཤེས་དགེ་སློང་ལ་བརྟེན་ནས་གནས་པར་བྱའོ། །ཁྱད་པར་བསྐྲད་པ་ནན་ཏུར་བྱས་པའི་གང་ཟག་གིས་ནི་གང་དུ་ཁྱིམ་པ་སུན་ཕྱུང་བའི་གནས་ཉེ་འཁོར་དང་བཅས་པ་ཉིད་དུ་མི་འདུག་པར་བསླབ་པར་བྱའོ། །དྲུག་པ་གྲོལ་རྒྱུ་ལ་ཐུན་མོང་བ་དང་། བྱེ་བྲག་པ་དང་། ཞར་ལ་བཟོད་པར་གསོལ་བའི་ཚུལ་དང་གསུམ། དང་པོ་ནི། བཟོད་པར་གསོལ་བ་དང་། དགྲ་བཅོམ་པ་ཐོབ་པ་གཉིས་ཏེ། དེ་ཡང་ཁྱིམ་སུན་འབྱིན་པའི་གང་ཟག་དེས་ཁྱིམ་པ་དེ་ཉིད་ལ་བཟོད་གསོལ་བྱས་པས། དེ་ཉིད་ལས་གྲོལ་བ་ཡིན་གྱི། ལས་ཀྱིས་བཟོད་པ་གསོལ་བ་ལ་ལྟོས་པ་ནི་མ་ཡིན་ཏེ། ཊཱི་ཀར་ཁྱིམ་པས་བཟོད་པ་དེ་ནི་བཟོད་པ་ཡིན་ཞེས་གསུངས་པའི་ཕྱིར། གཉིས་པ་བྱེ་བྲག་གི་གྲོལ་རྒྱུ་ནི། གསོ་སྦྱོང་གཞག་པ་དང་། དགག་དབྱེ་གཞག་པའི་ནན་ཏུར་ནི། གང་གིས་འཇོག་པར་བྱེད་པའི་དགེ་འདུན་ནམ། དེས་བསྐོས་པའི་དགེ་སློང་དང་ལྷན་ཅིག་ཏུ་གསོ་སྦྱོང་དང་། དགག་དབྱེ་བྱས་ན་དེ་ལས་གྲོལ་བ་ཉིད་དུ་འགྱུར་རོ། །བསྡིག་སྨད་བསྐྲད་ཕྱིར་འགྱེད་པ་རྣམས་ནི་ཕྱིར་བཅོས་བྱས་པའི་སྟོབས་ཀྱིས་ཀྱང་གྲོལ་བ་ཉིད་དུ་འགྱུར་རོ། །ཁ་ཅིག་གནས་དབྱུང་བྱས་པའི་གང་ཟག་ལ་ནན་ཏུར་གཞན་བྱས་ན་ཡང་གྲོལ་བར་འགྱུར་རོ་ཞེས་པ་མི་འཐད་དེ་གནས་དབྱུང་དེ་ཆད་ལས་ཀྱི་མཐའ་ཡིན་པས་དེའི་སྟེང་དུ་ནན་ཏུར་གཉིས་པ་མི་འཆགས་པའི་ཕྱིར། གསུམ་པ་ཞར་ལ་བཟོད་པར་གསོལ་ཚུལ་ལ་དགོས་དོན་དང་། བསྡུས་དོན་གཉིས་ལས། དང་པོ་ནི། བྱེད་པ་པོ་ཆད་ལས་ལས་གྲོལ་བ་དང་། རང་ཉིད་ཀྱིས་སངས་རྒྱས་ཀྱི་བསྟན་པ་སྡུད་པའི་དགོས་པ་ཡོད་དོ། །གཉིས་པ་ལ་གསུམ་སྟེ། ཡུལ་གང་ལས། རྟེན་གང་གིས། ཆོ་ག་གང་གིས་བཟོད་པ་བླང་བའོ། །དང་པོ་ནི། ལོག་པ་སྤངས་ཤིང་ཡང་དག་པའི་བསམ་པ་དང་ལྡན་པ་ཞིག་དགོས་ཏེ། གཤེ་བ་ཞེས་སོགས་གསུངས་པའི་ཕྱིར། ལོག་པའི་རྟེན་སྤངས་ཤིང་ཡང་དག་པའི་རྟེན་ལ་བརྟེན་པ་ཞིག་དགོས་ཏེ། བླའི་གྲྭ་ཞེས་སོགས་གསུངས་པའི་ཕྱིར་རབ་བྱུང་གི་རྟགས་དང་ལྡན་ཞིང་ཁྱིམ་པའི་རྟགས་དང་མི་ལྡན་པ་ཞིག་དགོས་ཏེ། ཁྱིམ་པ་དང་མུ་སྟེགས་ཅན་གྱི་རྒྱལ་མཚན་ཅན་ལ་མི་བརྟེན་ཞེས་གསུངས་པའི་ཕྱིར། སྤང་བྱ་རྣམས་སྤོང་ཞིང་བླང་བྱ་ལེན་པ་ཞིག་དགོས་ཏེ། ཆོས་མ་ཡིན་པ་དང་། དགེ་སློང་གི་བསླབ་པ་དག་ལ་མི་སློབ་པར་མི་བྱེད་ཅེས་འབྱུང་བའི་ཕྱིར། དམའ་དབབ་པའི་ཚུལ་ཞིག་དགོས་པ་ཡིན་ཏེ། སྐྲ་འགྲེང་བར་གྱུར་པ་དང་ཞེས་སོགས་འབྱུང་བའི་ཕྱིར། ང་རྒྱལ་དང་གྱང་གྱིང་སྤངས་པ་ཞིག་དགོས་ཏེ། དགེ་འདུན་ལ་སྤུ་བསྙོལ་བར་བྱེད་པ་ཞེས་འབྱུང་བའི་ཕྱིར། ལུས་ངག་ཡིད་གསུམ་གུས་པས་འཇུག་པ་ཞིག་དགོས་ཏེ། མཚུངས་པ་ཉེ་བར་སྟོན་པ་ཞེས་འབྱུང་བའི་ཕྱིར། ནན་ཏུར་གྱི་རྒྱུ་ལས་ལོག་པ་ཞིག་དགོས་ཏེ། རྒྱུ་ལས་བཟློག་པ་ཞེས་འབྱུང་བའི་ཕྱིར། གསོལ་བ་ལན་གསུམ་གྱི་བར་དུ་འདེབས་པ་ཞིག་དགོས་ཏེ། བཟོད་པར་གསོལ་བའོ་ཞེས་འབྱུང་བའི་ཕྱིར། ཚོགས་ལོངས་མིན་པ་ཞིག་དགོས་ཏེ། ཚོགས་ཀྱིས་མ་ཡིན་ཞེས་འབྱུང་བའི་ཕྱིར། ནན་ཏུར་བྱས་པ་ཞིག་དགོས་ཏེ། དེ་མེད་ན་གཞི་མེད་པར་འགྱུར་བའི་ཕྱིར། གཉིས་པ་རྟེན་གང་གིས་བླང་བ་ནི། བཟོད་པ་ལེན་དགོས་དང་ལྡན་ཞིང་གྲངས་ཚང་བ། ཁ་སྐོང་བར་འོས་པ། མི་མཐུན་པ་གཉིས་དང་བྲལ་བ། ནན་ཏུར་བྱེད་པའི་དགེ་འདུན་ནམ་དེས་བསྐོས་པའི་དགེ་སློང་གིས་བླང་ངོ་། །གསུམ་པ་ཆོ་ག་གང་གིས་བླང་བའི་ཚུལ་ནི། སྦྱོར་དངོས་རྗེས་གསུམ་རིམ་པ་ལྟར་གསོལ་བ་ལན་གསུམ་འདེབས་པ། གསོལ་བཞིའི་ལས་བྱ་བ། ཐབས་ལེགས་བརྗོད་པའོ། །གཉིས་པ་རང་སྤྲོ་བ་བཤགས་པ་ལ་སོགས་པའི་སྒོ་ནས་ཕྱིར་བཅོས་པའི་ཚུལ་ལ། དགོས་དོན་དང་བསྡུས་དོན་གཉིས་ལས། དང་པོ་ནི། ལྟུང་བ་དག་པར་འགྱུར་བ་སྟེ། མིང་དང་རིགས་དང་ལྡན་པར་བརྗོད་ན་ལྟུང་བ་ལས་ལྡང་ངོ་ཞེས་དང་། སོ་ཐར་ལས་ཀྱང་མཐོལ་ན་བདེ་བ་ལ་རེག་པར་གནས་པར་འགྱུར་ཞེས་དང་། བམ་ལྔ་ལས་མཐོལ་ཞིང་བཤགས་ན་ཚུལ་ཁྲིམས་བསྲུངས་པའི་ཕན་ཡོན་བཅུ་ཐོབ་ཅིང་། མངོན་མཐོ་དང་ངེས་པར་ལེགས་པའི་བདེ་བ་ཡང་ཉམས་སུ་མྱོང་བར་འགྱུར་བའི་ཕྱིར་རོ་ཞེས་གསུངས་པའི་ཕྱིར། དག་པའི་ཚུལ་ཡང་འགའ་ཞིག་ཕྱིར་བཅོས་བྱས་པས་ལྟུང་བའི་ངོ་བོ་མི་འདག་སྟེ། སྒོམ་སྤང་ཡིན་པའི་ཕྱིར་དང་། ལུང་ལས་ངག་སྨྲས་ཀྱིས་ལྟུང་བ་ཕྱིར་བཅོས་བྱས་ཀྱང་གཏུན་ལྟ་བུའི་སེམས་ཅན་དམྱལ་བར་སྐྱེ་བར་གསུངས་པའི་ཕྱིར་དང་། ངག་སྨྲས་ཀྱིས་ཕྱིར་བཅོས་བྱས་ཀྱང་སྐྱེ་བ་ལྔ་བརྒྱར་བ་གླང་དུ་སྐྱེ་བར་གསུངས་པའི་ཕྱིར་དང་། ཕྱིར་བཅོས་བྱས་པ་དགོས་པ་མེད་པ་ཡང་མིན་ཏེ། འཕེལ་བ་རྒྱུན་གཅོད་པའི་དགོས་པ་ཡོད་པའི་ཕྱིར་ཞེས་གསུངས་པ་ཡང་མི་འཐད་དེ། ལྟུང་བའི་འཕེལ་བ་རྒྱུན་གཅོད་པ་ཙམ་གྱི་ཕྱིར་དུ་ཕྱིར་བཅོས་བྱེད་པ་མི་འཐད་དེ། མཐོལ་བ་བྱས་པས་ཀྱང་འཕེལ་བ་རྒྱུན་གཅོད་ནུས་པའི་ཕྱིར། དེས་ན་ལྟུང་བ་ཕྱིར་བཅོས་བྱས་པས་ལྟུང་བ་འདག་པ་ཡིན་ཏེ། ཕྱིར་བཅོས་མ་བྱས་ན་ངན་འགྲོར་སྐྱེ་བར་གསུངས་པའི་ཕྱིར། ཕྱིར་བཅོས་བྱས་ན་བདེ་འགྲོར་སྐྱེ་བར་གསུངས་པའི་ཕྱིར། ཡང་ཁ་ཅིག་ལྟུང་བ་ཕྱིར་བཅོས་བྱས་པས་མངོན་གྱུར་བྱེད་པ་དང་བཅས་པ་འདག་ཅིང་། བག་ཆགས་ས་བོན་དང་བཅས་པ་མི་འདག་སྟེ། གདུག་པ་རྣམས་སེལ་སྨན་འདི་ཡིན། །ཞེས་པའི་བམ་ལྔར་གདུག་པ་ནི་ལྟུང་བ་དེ་སྦྲུལ་དང་འདྲ་བ་དེ་སེལ་བའི་སྨན་ཞེས་རྣམ་པར་གསོན་པ་སྟེ་ཀུན་ཏུ་གཅོད་པ་སེལ་བའོ། །ཞེས་བཤད་པའི་ཕྱིར་ཞེས་དང་། ཁ་ཅིག་ལས་མྱོང་ངེས་མ་ཡིན་པའི་སྡིག་པ་དང་ངོ་བོ་གཅིག་ཏུ་གྱུར་པའི་ལྟུང་བ་རྣམས་ནི་མངོན་གྱུར་བྱེད་པ་དང་བཅས་པ་འདག་ཅིང་། ལས་མྱོང་ངེས་དང་ངོ་བོ་གཅིག་ཏུ་གྱུར་པའི་ལྟུང་བ་རྣམས་ནི་མངོན་གྱུར་པ་མགོ་གནོན་པ་ཙམ་ཡིན་གྱི། གཏན་དག་པ་ནི་མ་ཡིན་ཏེ། གཞན་དུ་ན་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའི་ལྟུང་བ་སྦོམ་པོ་ཕྱིར་བཅོས་བྱས་པ་ན་དེའི་མཚམས་མེད་ཀྱང་དག་པར་ཐལ་བའི་ཕྱིར། ཞེས་གསུང་བ་ཡང་མི་འཐད་དེ་སྡིག་ལྟུང་ངོ་བོ་གཅིག་མ་ཡིན་པའི་ཕྱིར་དང་། ལུང་ལས་བཤད་པ་ལྟར་གྱི་ཕྱིར་བཅོས་བྱས་ཀྱང་ལྟུང་བ་དག་པར་མ་ངེས་ན། ལུང་ལ་ཡིད་བརྟན་མི་རུང་བར་འགྱུར་བས་སོ། །དེས་ན་ལྟུང་བ་ནི་ཇི་ལྟར་བཤད་པ་ལྟར་གྱི་ཕྱིར་བཅོས་བྱས་ན་འདག་ལ། ལྟུང་བ་དེའི་སྟོབས་ཀྱིས་བཞག་པའི་སྡིག་པ་ནི་འདག་པར་མ་ངེས་ཏེ། དག་བྱེད་ཀྱི་རྒྱུ་དེ་ལ་མིང་རིགས་བརྗོད་པའི་སྟོབས་ཀྱིས་དག་པ། མཐར་བཙལ་བས་རྐྱེན་མ་འབྱོར་བས་དག་པ། མཚན་གྱུར་པས་དག་པ། དགྲ་བཅོམ་པ་ཐོབ་པས་དག་པ། སྟོང་ཉིད་བསྒོམས་པས་དག་པ་རྣམས་སུ་ཡོད་པའི་ཕྱིར། དེ་ལས་དང་པོ་གཉིས་དག་བྱེད་མཚན་ཉིད་པ་ཡིན་ཏེ། མིང་རིགས་བརྗོད་པས་ལྡང་ཞེས་དང་། མཐར་བཙལ་བས་རྐྱེན་མ་འབྱོར་བ་ཞེས་སོགས་གསུངས་པའི་ཕྱིར། མཚན་གྱུར་པས་ལྟུང་བ་དག་པར་གསུངས་པ་ནི། མངོན་གྱུར་བྱེད་ལས་ཙམ་མེད་པ་ལ་དགོངས་ནས་ལྟུང་བ་དག་ཅེས་གསུངས་པ་ཡིན་གྱི། ལྟུང་བ་དག་པ་མཚན་ཉིད་པ་མ་ཡིན་ཏེ། ཐུན་མོང་མ་ཡིན་པའི་ལྟུང་བ་བྱུང་བ་མཚན་གྱུར་པ་དེ་ཡང་མཚན་གྱུར་པ་ན་ལྟུང་བ་དེ་སོ་ན་གནས་པར་གསུངས་པའི་ཕྱིར། དགྲ་བཅོམ་པ་ཐོབ་པ་ན་ལྟུང་བ་དག་པར་གསུངས་པ་ནི། ཁ་ཅིག་དག་བྱེད་ཀྱི་རྒྱུ་ཙམ་ཡིན་ཟེར་བ་ནི་མི་རིགས་ཏེ། ལྟུང་བ་མ་དག་པར་དགྲ་བཅོམ་ཐོབ་པ་མི་སྲིད་པའི་ཕྱིར། དེས་ན་དག་པའི་ངོ་བོ་ཡིན་ནོ། །སྟོང་ཉིད་བསྒོམས་པས་དག་པ་ནི། མདོ་སྡེ་རྒྱན་ལས། ལྟུང་དང་འབྱུང་དང་ལྡང་བ་དང་། །ཞེས་པའི་འགྲེལ་པར་ཆོས་ཀྱི་སྡོམ་ལ་ཡང་དག་པར་ཇི་ལྟ་བ་བཞིན་སོ་སོར་རྟོག་པས་ལྟུང་བ་ཕྲ་མོ་ལས་ལྡང་བར་གསུངས་པ་ལྟ་བུའོ། །གཉིས་པ་བསྡུས་པའི་དོན་ལ། བསམ་པ་དག་པས་དང་། སྦྱོར་བ་དག་པས་ཕྱིར་བཅོས་གཉིས་ལས། དང་པོ་ནི། སྔར་བྱས་པ་ལ་འགྱོད་སེམས། ཕྱིན་ཆད་སྡོམ་སེམས། ཕྱིར་བཅོས་འདོད། ངེས་འབྱུང་གི་བསམ་པ་སྟེ་བཞི་དང་ལྡན་པའོ། །དང་པོ་གཉིས་དགོས་ཏེ། ལུང་ལས། ཉེས་པ་མཐོང་སྡོམ་འདྲི་བར་གསུངས་པའི་ཕྱིར། ཕྱིར་བཅོས་འདོད་དགོས་ཏེ། བཞད་གད་ཀྱི་དངོས་པོས་ནི་གང་གི་ཡང་མི་འགྱུར་རོ་ཞེས་གསུངས་པའི་ཕྱིར། གཞན་ཡང་དེ་གཉིས་ངེས་པར་དགོས་ཏེ། ཊཱི་ཀར་སྡོམ་པ་མེད་ན་བཤགས་པ་ཅི་ཡང་མི་འགྱུར་ཏེ། གཞན་དུ་ན་བརྫུན་འབའ་ཞིག་ཏུ་འགྱུར་རོ་ཞེས་གསུངས་ཞིང་། ཕྱིར་བཅོས་འདོད་མེད་ན་ཕྱིར་བཅོས་ཀྱི་ཆོ་ག་མི་འཆགས་པའི་ཕྱིར། ངེས་འབྱུང་གི་བསམ་པ་དགོས་ཏེ། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་ཞེས་གསུངས་པའི་ཕྱིར། གཉིས་པ་སྦྱོར་བ་དག་པས་ཕྱིར་བཅོས་པའི་ཐབས་ལ་གཉིས་ཏེ། འཆབ་ཉེས་མི་འབྱུང་བར་བྱ་བའི་ཕྱིར་མཐོལ་བས་ཕྱིར་བཅོས་པ་དང་། ཉེས་པ་དངོས་ཕྱིར་བཅོས་པའི་ཚུལ་ལོ། །དང་པོ་ལ་དགོས་དོན་དང་བསྡུས་དོན་གཉིས། དང་པོ་ནི། འཆབ་ཉེས་མ་བྱུང་བ་རྣམས་མི་འབྱུང་བར་བྱ་བའི་ཕྱིར་དང་། བྱུང་བ་རྣམས་རྒྱུན་གཅོད་པའི་ཆེད་དུ་ཡིན་ཏེ། གཞི་འགྲེལ་ལས། བཅབས་ན་ཉེས་པ་ཆར་བཞིན་འབབ། །མ་བཅབས་ཆར་བཞིན་དེ་མི་འབབ། །ཅེས་སོ། །གཉིས་པ་བསྡུས་དོན་ལ། ཡུལ་གང་ལ། རྟེན་གང་གིས། དངོས་པོ་གང་། ཆོ་ག་གང་གིས་མཐོལ་བ་དང་བཞི་ལས་དང་པོ་ནི། བསྙེན་རྫོགས་ཀྱི་སྡོམ་པ་རྣམ་པར་དག་པ་དང་ལྡན་པ། ལྟ་བ་མཐུན་པ། མཚན་མཐུན་པ། ཐ་སྙད་གསུམ་དང་ལྡན་པ། ལུས་ཐ་མལ་པར་གནས་པ། ཤེས་པ་རང་བཞིན་དུ་གནས་པ། མཚམས་ཀྱི་ནང་ན་གནས་པ་སྟེ་ཆོས་བདུན་ལྡན་ལའོ། །གཉིས་པ་ནི། བསྙེན་རྫོགས་ཀྱི་སྡོམ་པ་གསོ་རུང་ཡན་ཆད་དང་ལྡན་པ། བསམ་པ་རང་བཞིན་དུ་གནས་པ། ལུས་ཐ་མལ་དུ་གནས་པ། གནས་ནས་ཕྱུང་བ་མ་ཡིན་པ་དེ་བཞི་ལྡན་གྱིས་སོ། །གསུམ་པ་ནི། བསྡམ་བྱའི་ཉེས་བྱས་ལས་གཞན་པའི་ལྟུང་བ་ཡིན་པ། རང་རྒྱུད་ལ་བྱུང་བ། ངོ་བོ་དྲན་པའམ་ཡིད་གཉིས་ཟ་བ་ཡིན་པ། སྔར་བཤགས་ཟིན་མ་ཡིན་པའོ། །བཞི་པ་ལ་སྦྱོར་དངོས་མཇུག་གསུམ་ལས། དང་པོ་ནི། མཆིལ་ལྷྭམ་གཉིས་ཕུད། ཕྱག་འཚལ་བའི་འོས་ཡིན་ན་ཕྱག་འཚལ། ཐལ་མོ་སྦྱར་བ་སོགས་བྱའོ། །གཉིས་པ་ནི། སྔགས་ཚིག་ལན་གསུམ་གྱི་བར་དུ་བརྗོད། གསུམ་པ་ནི། མཐོང་སྡོམ་དྲི་བ་སོགས་བྱའོ། །བསྒོ་གྱུར་དངོས་གཞིའི་ལྟུང་བ་མཐོལ་བ་ནི། མཚམས་དེར་གཏོགས་པའི་ཐམས་ཅད་ལ་མཐོལ་ལོ། །སོར་བཤགས་ནི། གནས་དེར་འདུས་ཀྱི་དགེ་འདུན་ཐམས་ཅད་ལ་བྱ་ལ་སྔགས་ཚིག་ནི་གཅིག་གིས་ཆོག་གོ །དེ་ཉིད་ལ་འདི་དང་འོག་མ་དང་བཅས་ཏེ། ཞེས་པའི་སྐབས་སུ་བསྙེན་པར་མ་རྫོགས་པའི་མཐོལ་བཤགས་བསྟན་པས། འདི་ལ་གཉིས་ལས་དང་པོ་དགོས་དོན་ནི། ལྟུང་བ་དག་པ་དང་། ཚུལ་ཁྲིམས་བསྲུངས་པའི་ཕན་ཡོན་བཅུ་ཐོབ་པའོ། །བསྡུས་དོན་ལ་བཞི་ལས་ཡུལ་གང་ལ་མཐོལ་བ་ནི། བསྙེན་རྫོགས་ཀྱི་སྡོམ་པ་རྣམ་པར་དག་པ་ལ་སོགས་པའི་ཆོས་བདུན་གྱི་སྟེང་དུ། ཁ་ན་མ་ཐོ་བ་མི་མཐུན་པ་དང་ལྡན་པའི་ཡུལ་ལའོ། །རྟེན་གང་གིས་མཐོལ་བ་ནི། རབ་ཏུ་བྱུང་ཞིང་བསྙེན་པར་མ་རྫོགས་པའི་སྡོམ་པ་གསུམ་པོ་གསོ་རུང་ཡན་ཆད་དང་ལྡན་པ། བསམ་པ་རང་བཞིན་དང་། ལུས་ཐ་མལ་དུ་གནས་པ། དགེ་ཚུལ་བསྙིལ་བ་མ་ཡིན་པས་སོ། །དངོས་པོ་གང་མཐོལ་ན། ཕམ་འདྲའི་ཉེས་བྱས་ལས་གཞན་རང་གི་རྒྱུད་ལ་འབྲེལ་བར་འབྱུང་བ། ངོ་བོ་དྲན་ནམ་ཡིད་གཉིས་ཟ་བ། སྔར་མཐོལ་མ་ཟིན་པའོ། །ཆོ་ག་གང་གིས་མཐོལ་བ་ནི་སྔ་མ་བཞིན་ནོ། །གཞན་ལ་ནི་དེ་དང་བཅས་པའི་བཤགས་པས་སོ། །ཞེས་པའི་སྐབས་སུ་དགེ་སློང་གི་ལྟུང་བ་དངོས་དང་། འཆབ་ཉེས་ཕྱིར་བཅོས་པའི་ཐབས་གཉིས་བསྟན་པ་ལ། འཆབ་ཉེས་ཕྱིར་བཅོས་པའི་ཚུལ་ལ། འཆབ་པ་མི་འབྱུང་བར་བྱ་བའི་ཕྱིར་མཐོལ་བ་དང་། འཆབ་ཉེས་དངོས་ཕྱིར་བཅོས་པའི་ཐབས་གཉིས་ལས། དང་པོ་ལ་གཉིས་ལས་དགོས་དོན་ནི་འཆབ་ཉེས་མི་འབྱུང་བར་བྱ་བའི་ཕྱིར་དང་། བཅབས་ཉེས་དངོས་ཕྱིར་བཅོས་པའི་ཐབས་སྣོད་རུང་དུ་སྒྲུབ་པའི་ཆེད་ཡིན་ནོ། །བསྡུས་དོན་ལ་ཡང་བཞི་ལས། གང་ལ་མཐོལ་བའི་ཡུལ་ནི། བསྙེན་རྫོགས་ཀྱི་སྡོམ་པ་གསོ་རུང་ཡན་ཆད་ཆོས་བདུན་ལྡན་གྱི་ཡུལ་ལའོ། །རྟེན་གང་གིས་མཐོལ་བ་ནི། བསྙེན་རྫོགས་ཀྱི་སྡོམ་པ་རྣམ་པར་དག་པ་དང་ལྡན་པ། བསམ་པ་རང་བཞིན་དང་། ལུས་ཐ་མལ་དུ་གནས་པ། གནས་དབྱུང་མ་ཡིན་པ་དེས་སོ། །གང་མཐོལ་བའི་དངོས་པོ་ནི། བསྡམ་བྱའི་ཉེས་བྱས་ལས་གཞན་ཡིན་པ། རང་རྒྱུད་ལ་བྱུང་བ། དྲན་ནམ་ཡིད་གཉིས་ཟ་བ། སྔར་མཐོལ་མ་ཟིན་པའོ། །ཆོ་ག་གང་གིས་མཐོལ་བ་ནི་སྔར་བཞིན་ནོ། །གཉིས་པ་བཅབས་ཉེས་དངོས་ཕྱིར་བཅོས་པའི་ཚུལ་ལ་གཉིས་ལས། དགོས་དོན་ནི་བཅབས་ཉེས་དག་པ་དང་། ལྟུང་བ་དངོས་ཕྱིར་བཅོས་པའི་སྣོད་རུང་དུ་བསྒྲུབ་པའི་ཆེད་ཡིན་ནོ། །བསྡུས་དོན་ལ་བཞི། ཡུལ་གང་ལ་བཤགས་པ་ནི། བསྙེན་རྫོགས་ཀྱི་སྡོམ་པ་རྣམ་པར་དག་པ་ལ་སོགས་པའི་ཆོས་བདུན་ལྡན་གྱི་སྟེང་དུ་ལྟུང་བ་ནང་རིགས་མི་མཐུན་པའི་ཡུལ་ལ་བཤགས་དགོས་ཏེ་ཁ་ན་མ་ཐོ་བ་མི་མཐུན་པའོ། །སྡེ་ཚན་ལས་ཞེས་འབྱུང་བའི་ཕྱིར། རྟེན་གང་གིས་བཤགས་ན། བསྙེན་རྫོགས་གསོ་རུང་སོགས་ཆོས་བདུན་དང་ལྡན་པ། དེའི་སྟེང་དུ་གནས་ནས་ཕྱུང་བ་མ་ཡིན་པ་དགོས་ཏེ། གནས་དབྱུང་བྱས་པའི་བཤགས་ཡུལ་མེད་པའི་ཕྱིར། ངོ་བོ་གང་བཤགས་ན་བསྡམ་བྱའི་ཉེས་བྱས་དང་། ཕམ་ལྷག་བཅབས་པའི་ཉེས་པ་ལས་གཞན་ཡིན་པ། ངོ་བོ་དྲན་རྣམ་ཡིད་གཉིས་ཟ་བ། བཤགས་ཟིན་མ་ཡིན་པ་དེ་བསྡམ་བྱའི་ཉེས་བྱས་བཅབས་པའི་ཉེས་པ་ནི་བསྡམས་པས་འདག ཕམ་པ་བཅབས་པའི་ཉེས་པ་ཕྱིར་བཅོས་སུ་མེད། ལྷག་མའི་བཅབས་ཉེས་འདག་པ་ལ་སྤོ་བ་སྤྱད་དགོས་པའི་ཕྱིར། ཆོ་ག་གང་གིས་བཤགས་པ་ནི། སྦྱོར་དངོས་མཇུག་གསུམ་ནི་སྔ་མ་བཞིན་ནོ། །མི་འདྲ་བའི་ཁྱད་པར་ནི། ལྟུང་བ་དངོས་དེ་ལ་གཅིག་བྱུང་བ། གཉིས་བྱུང་བ། ཚད་མེད་བྱུང་བ་ཞེས་དང་། བཅབས་པ་དེ་ལ་ཡང་ཞག་གཅིག་བཅབས་པ། གཉིས་བཅབས་པ། གསུམ་ནས་གྲངས་ཤེས་པའི་བར་བཅབས་པ། དཔག་ཏུ་མེད་པ་བཅབས་སོ་ཞེས་བཤགས་སོ། །ལྟུང་བ་གཅིག་ཕྱིར་བཅོས་བྱེད་པའི་ཚེ། ལྟུང་བ་དེ་བྱུང་ནས་ཞག་གཅིག་ལོན་ན་ཞག་གཅིག་བཅབས་ཞེས་པ་དང་། ཟླ་བ་ཕྱེད་ལོན་ན་ཟླ་བ་ཕྱེད་བཅབས་ཞེས་དང་། གྲངས་མི་ཤེས་པའི་བར་དུ་བཅབས་ན་དཔག་ཏུ་མེད་པ་བཅབས་སོ་ཞེས་སོ། །དེ་བཞིན་དུ་གཉིས་བྱུང་བ་དང་། ཚད་མེད་པ་བྱུང་བ་དང་། དཔག་ཏུ་མེད་པ་བྱུང་བ་ལ་ཡང་དེ་བཞིན་དུ་ཤེས་པར་བྱ་སྟེ། བཤགས་པས་འདག་པ་བཅུ་དྲུག་གོ །ཁ་ཅིག་ལྟུང་བ་གཅིག་བྱུང་ན་ལྟུང་བ་བྱུང་ཞེས་པ་དང་། གཉིས་བྱུང་ན་ལྟུང་བ་དག་བྱུང་ཞེས་པ་དང་། གསུམ་བྱུང་ན་ལྟུང་བ་མང་པོ་བྱུང་ཞེས་པ་དང་། བཞི་ནས་གྲངས་ཤེས་པའི་བར་དུ་བྱུང་ན་ཚད་མེད་པ་བྱུང་ཞེས་པ་དང་། གྲངས་མི་ཤེས་པ་བྱུང་ན་ལྟུང་བ་དཔག་ཏུ་མེད་པ་བྱུང་ཞེས་བརྗོད་པར་བྱ་ཞེས་གསུངས་པ་མི་འཐད་དེ། མང་པོ་ལ་ཚད་ཤིན་ཏུ་མང་པོ་ཞེས་གསུངས་ཀྱི། ཚད་ཤིན་ཏུ་མང་པོ་ལས་ལོགས་སུ་མང་པོ་ཞེས་མ་གསུངས་པའི་ཕྱིར། གཉིས་པ་ལྟུང་བ་དངོས་ཀྱི་ཕྱིར་བཅོས་ལ་གཉིས་ལས། དགོས་དོན་ནི། ལྟུང་བ་དག་པར་བྱ་བའི་ཕྱིར་དུའོ། །བསྡུས་དོན་ལ་བཞི་ལས། ཡུལ་ནི་བསྙེན་པར་རྫོགས་པའི་སྡོམ་པ་རྣམ་དག་ལ་སོགས་པ་ཆོས་བདུན་ལྡན་གྱི་སྟེང་དུ་ལྟུང་བ་མི་མཐུན་པ་ལའོ། །དེ་ཡང་མཚམས་ནང་དུ་བཤགས་ན་ཕམ་པར་གཏོགས་པའི་སྦོམ་པོ་ལྕི་བ་ནི་དགེ་སློང་དྲུག་ཡན་ཆད། ཡང་བ་ནི་བཞི་ཡན་ཆད་གུད་དུ་མ་ཆད་པ་དང་། ལྷག་མར་གཏོགས་པའི་སྦོམ་པོ་ལྕི་བ་ནི་དགེ་སློང་ལྔ་ཡན་ཆད་གུད་དུ་མ་ཆད་པ་དེའི་ཡུལ་ལ་བཤགས། མཚམས་ཀྱི་ཕྱི་རོལ་དུ་བཞི་དང་ལྔ་དང་དྲུག་གུད་དུ་བཅད་པའི་ཡུལ་ཉིད་ལ་བཤགས་ཀྱང་རུང་ངོ་། །དེ་ལས་གཞན་པའི་བཤགས་བྱའི་ལྟུང་བ་ཐམས་ཅད་དགེ་སློང་གཅིག་གིས་མདུན་དུ་བཤགས་པས་ཀྱང་འདག་གོ །རྟེན་ནི་བསྙེན་རྫོགས་ཀྱི་སྡོམ་པ་གསོ་རུང་ཡན་ཆད་དང་ལྡན་པ། བསམ་པ་རང་བཞིན་དུ་གནས་པ། ལུས་ཐ་མལ་དུ་གནས་པ། གནས་དབྱུང་མ་ཡིན་པའོ། །དངོས་པོ་ནི་སྦོམ་པོ་ལྕི་ཡང་། སྤང་བའི་ལྟུང་བྱེད། ལྟུང་བྱེད་འབའ་ཞིག་པ། སོར་བཤགས། ལྷག་མ་བཅབས་ཉེས་ལས་གཞན་པའི་ཉེས་པ་སོགས་གང་རུང་ཡིན་པ། ངོ་བོ་ཤེས་སམ་དྲན་པར་ནུས་པ། བཤགས་ཟིན་མ་ཡིན་པའོ། །ཆོ་ག་ནི་སྦྱོར་དངོས་མཇུག་གསུམ་ལས། དང་པོ་ནི་སྤང་བའི་ལྟུང་བ་ཕྱིར་བཅོས་པའི་ཚེ་ཞག་གཅིག་སྤང་བྲལ་སྔོན་དུ་གཏང་བ་དང་། ཡུལ་འོས་པ་ལ་ཕྱག་འཚལ། ཙོག་བུར་འདུག ཐལ་མོ་སྦྱར་བ་སོགས་དང་། དངོས་གཞི་སྔགས་ཚིག་ལན་གསུམ་དུ་བརྗོད་པ་སོགས་བྱའོ། །གང་ཟག་ཁྱད་པར་ཅན་ལྔ་པོ་དེའི་ལྷག་མ་ཡང་གཅིག་གི་མདུན་དུ་བཤགས་པས་འདག དེའི་སྤང་ལྟུང་ཡང་ཞག་གཅིག་གི་སྤང་བྲལ་སྔོན་དུ་གཏང་མི་དགོས་ཤིང་། སྦོམ་པོ་ལྕི་ཡང་རྣམས་ཀྱང་གཅིག་གི་མདུན་དུ་བཤགས་པས་འདག སྔགས་ཚིག་ཀྱང་ལྟུང་བ་གཅིག་བྱུང་ངོ་ཞེས་དང་། གཉིས་བྱུང་ན་གཉིས་བྱུང་ངོ་ཞེས་དང་། གསུམ་ནས་གྲངས་ཤེས་པའི་བར་བྱུང་ན་ཚད་མེད་པ་བྱུང་ངོ་ཞེས་བརྗོད་པར་བྱའོ། །དགེ་འདུན་ལྷག་མ་ལ་ནི་དུས་འདི་སྲིད་ཅིག་བཅབས་པ་དང་། མ་བཅབས་པ་གཅིག་ཤེས་པས་ལྷག་མ་དངོས་དང་། བཅབས་ཉེས་ཕྱིར་བཅོས་པའི་ཚུལ་བསྟན་པས། འདི་ལ་གསུམ་སྟེ། ལྷག་མའི་བཅབས་ཉེས་ཕྱིར་བཅོས་པའི་ཚུལ་དང་། འཆབ་ཉེས་མི་འབྱུང་བར་བྱ་བའི་ཕྱིར་མཐོལ་བ། ཉེས་པ་དངོས་ཕྱིར་བཅོས་པའི་ཚུལ་ལོ། །གཉིས་པ་ནི། མཐོལ་བའི་རྣམ་གཞག་སྤྱིར་བསྟན་པ་ཤེས་པར་བྱའོ། །ལྷག་མའི་བཅབས་ཉེས་ཕྱིར་བཅོས་པའི་ཚུལ་ལ་གཉིས་ལས། དགོས་དོན་ནི། བཅབས་ཉེས་དག་པས་ཚུལ་ཁྲིམས་བསྲུངས་པའི་ཕན་ཡོན་བཅུ་ཐོབ་པར་འགྱུར་བའོ། །བསྡུས་དོན་ལ། སྤོ་བ་ནོད་པའི་ཚུལ་དང་། སྤྱད་པའི་ཚུལ་གཉིས། དང་པོ་ལ་དྲུག་ལས། ཡུལ་གང་ལས་ནོད་པ་ནི། དགེ་སློང་བཞི་ཡན་ཆད་གྲངས་ཚང་བ། ཁ་སྐོང་བར་འོས་པ། མི་མཐུན་པ་གཉིས་དང་བྲལ་བ། ཆོ་ག་ཤེས་པ་དང་ལྡན་པའི་ཆོས་བཞི་ཚང་བ་ལའོ། །རྟེན་ནི། ཕམ་པ་མ་བྱུང་བའི་བསྙེན་རྫོགས་ཀྱི་སྡོམ་པ་དང་ལྡན་པ། གཞན་ཕྱོགས་སུ་མ་སོང་བ། མཚན་མཐུན་པ། ཐ་སྙད་གསུམ་དང་ལྡན་པ། བསམ་པ་རང་བཞིན་དུ་གནས་པ། ལུས་ཐ་མལ་དུ་གནས་པ། མཚམས་ནང་དུ་གནས་པ་ཚོགས་ལོངས་མིན་པ། སྤོ་བ་མནོས་ཤིང་ཆགས་ལ་མ་ཞིག་པ་དང་ལྡན་པ་མ་ཡིན་པ། གནས་དབྱུང་མ་ཡིན་པ་སྟེ། ཆོས་བཅུ་ལྡན་དེས་སོ། །ཁ་ཅིག་ཕམ་པའི་སྡོམ་པ་གསོ་རུང་དང་ལྡན་པ་ཞེས་གསུངས་པ་མི་འཐད་དེ། ལྷག་མ་འཆབ་བཅས་རྒྱུད་ལྡན་གྱི་ཕམ་པ་འཆབ་མེད་བྱུང་བའི་གང་ཟག་དེ་ལ་དང་པོ་ནས་བསླབ་པ་སྦྱིན་པར་བྱའི། སྤོ་བ་སྦྱིན་དགོས་པ་མ་ཡིན་པའི་ཕྱིར། ཁ་ཅིག་གང་ཟག་ཁྱད་པར་ཅན་མ་ཡིན་པ་ཞེས་པའང་མི་རིགས་ཏེ། གང་ཟག་ཁྱད་པར་ཅན་དེས་སྤོ་བ་སྤྱད་མི་དགོས་པར་བསྟན་པ་ཡིན་གྱི། སྤྱོད་དུ་མི་རུང་བ་བསྟན་པ་མིན་པའི་ཕྱིར། ལྟུང་བ་གང་གི་དོན་དུ་ནོད་པ་ནི། ལྷག་མ་བཅབས་པའི་ཉེས་པ་ཡིན་པ། རང་རྒྱུད་ལ་བྱུང་བ། ངོ་ཤེས་ཤིང་དྲན་པར་ནུས་པ། བཤགས་ཟིན་མ་ཡིན་པ་དེའི་དོན་དུ་ནོད་པའོ། །ཡུན་ཇི་སྲིད་ནོད་པ་ནི། ལྷག་མ་ཡུན་ཇི་སྲིད་དུ་སྤྱད་པ་དེ་སྲིད་དུ་ནོད་པར་བྱའོ། །ཆོ་ག་གང་གིས་ནོད་པའི་ཚུལ་ལ་སྦྱོར་དངོས་མཇུག་གསུམ་རིམ་པ་ལྟར། དགེ་འདུན་སྡུད་པ་སོགས་དང་། གསོལ་བཞིའི་ལས་བྱ་བ་དང་། མཇུག་སྡུད་བརྗོད་པ་སོགས་སོ། །སྒྲ་བཤད་ནི། རང་བཞིན་དུ་གནས་པའི་ས་ནས་ས་གཞན་དུ་སྤོ་བར་བྱེད་པ་ན་སྤོ་བ་ཞེས་བྱའོ། །གཉིས་པ་སྤོ་བ་སྤྱོད་པའི་ཚུལ་ལ་དྲུག་སྟེ། ཡུལ་གང་ལ། གནས་གང་དུ། རྟེན་གང་གིས། ལྟུང་བ་གང་གི་དོན་དུ། ཡུན་ཇི་སྲིད་ཅིག ཇི་ལྟར་སྤྱོད་པའི་ཚུལ་ལོ། །དང་པོ་ནི། བསྙེན་རྫོགས་ཀྱི་སྡོམ་པ་རྣམ་དག་དང་ལྡན་པ། ལྟ་བ་མཐུན་པ། མཚན་མཐུན་པ། ཐ་སྙད་གསུམ་དང་ལྡན་པ། བསམ་པ་རང་བཞིན་དུ་གནས་པ། ལུས་ཐ་མལ་དུ་གནས་པ། མཚམས་ཀྱི་ནང་ན་གནས་པ་བཞི་ཡན་ཆད་ཀྱི་དགེ་སློང་གི་དགེ་འདུན་དུ་ལོངས་པ། མང་པོའི་ནང་ནས་གུད་དུ་བཅད་པ་མ་ཡིན་པ་དེའི་ཡུལ་ལ་སྤྱོད་པར་བྱའོ། །གནས་གང་དུ་སྤྱོད་པ་ནི་གནས་བརྟན་དང་བཅས་སོ་སོ་ཐར་པའི་མདོ་འདོན་ནུས་པ་དང་བཅས། ཕྱིར་བཅོས་བྱེད་པའི་ཟླ་བོ་མིང་མཐུན་པ་གསུམ་དུ་མ་ལོངས་པ་ཡིན་པ། སྤོ་བ་མནོས་པའི་གནས་གང་ཡིན་པ་དེར་རོ། །རྟེན་ནི་སྤོ་བ་མནོས་པ་ལ་མ་ཞིག་པའི་རྟེན་དེས་སོ། །ལྟུང་བ་གང་གི་དོན་དུ་སྤྱོད་ན། ལྷག་མ་བཅབས་པའི་ཉེས་པ་འདག་པའི་ཕྱིར་དུའོ། །ཡུན་ཇི་སྲིད་དུ་སྤྱོད་ན། ལྷག་མ་ཇི་ཙམ་བཅབས་པ་དེ་ཙམ་ཞིག་སྤྱོད་དོ། །ཚུལ་ཇི་ལྟར་སྤྱོད་ན། ཁྱད་པར་ཅན་གྱི་སྤྱོད་པ་སྤོང་བ་དང་། དམན་སྤྱོད་དང་དུ་ལེན་པ་དང་། སྤོ་བའི་འདས་པ་དང་འབྱུང་འགྱུར་བརྗོད་པ་དང་། འཐབ་ཀྲོལ་ཅན་གྱི་རྐྱེན་དབང་གིས་བཏང་ཞིང་བྲལ་ན་ཡང་བླང་བའི་ཚུལ་དུ་བསླབ་པར་བྱའོ། །ཁྱད་པར་ཅན་གྱི་སྤྱོད་པ་ལ་རང་བཞིན་དུ་གནས་པའི་ཡུལ་ལ། གུས་པའི་སྤྱོད་པ་སྤོང་བ་དང་། ལྷག་པའི་སྤྱོད་པ་དང་། བླ་མའི་གནས་སྤོང་བ་སོགས་པ་ལ་བསླབ་པར་བྱའོ། །གཉིས་པ་ལྷག་མ་དངོས་ཀྱི་ཕྱིར་བཅོས་དབྱུང་བར་བྱ་བ་ལ་གཉིས་ལས། དགོས་དོན་ནི། ལྷག་མ་དངོས་འདག་པ་དང་། དམན་པའི་གནས་ནས་འདོན་པའི་དོན་དུ་ཡིན་ནོ། །བསྡུས་དོན་ལ་བཞི་ལས། ཡུལ་གང་ལ་བྱ་བ་ནི། བསྙེན་རྫོགས་སྡོམ་པ་གསོ་རུང་ཡན་ཆད་དང་ལྡན་པ། ཤེས་པ་རང་བཞིན་དུ་གནས་པ། ལུས་ཐ་མལ་དུ་གནས་པ། ཆོས་མ་ཡིན་པའི་ཕྱོགས་སུ་མ་སོང་བ། གནས་ནས་མ་ཕྱུང་བ། མཚན་མཐུན་པ། ཚོགས་ལོངས་མ་ཡིན་པ། གསོལ་བ་ལན་གསུམ་དུ་འདེབས་པ་ཡིན་པ། མགུ་བ་གསུམ་ལས་གང་རུང་སྤྱོད་ཟིན་པ་ཡིན་པ་དེ་ལའོ། །དགེ་སློང་མའི་དབྱུང་བ་ལ་ནི་མཚན་མཐུན་པ་ཡན་ལག་དུ་མི་དགོས་ཏེ། ཕ་མ་གཉིས་ཀའི་དགེ་འདུན་གྱིས་དབྱུང་བ་བྱེད་དགོས་པའི་ཕྱིར། རྟེན་གང་གིས་བྱ་ན། དགེ་སློང་ཉི་ཤུའམ་བཞི་བཅུ་ཡན་ཆད་གྲངས་ཚང་བ། ཁ་སྐོང་བར་འོས་པ། མི་མཐུན་པ་གཉིས་དང་བྲལ་བ། ལས་ཀྱི་ཆོ་ག་ཤེས་པ་དེས་སོ། །ལྟུང་བ་གང་གི་དོན་དུ་བྱ་ན། ལྷག་མ་ཡིན་པ། ངོ་བོ་དྲན་ནམ་ཡིད་གཉིས་ཟ་བ། རང་རྒྱུད་ལ་འབྲེལ་པར་འབྱུང་བ། ལྷག་མའི་བཅབས་ཉེས་དང་མི་ལྡན་པ་དེའི་དོན་དུའོ། །ཆོ་ག་སྦྱོར་དངོས་རྗེས་གསུམ་ལས། དང་པོ་སྔར་དང་འདྲ། དངོས་གཞིའི་སྐབས་སུ་གསོལ་བ་དང་བཞིའི་ལས་བྱ་བ་དང་། གསོལ་བ་དང་བརྗོད་པ་དང་པོའི་བར་དུ་སྨད་པར་བྱ། བརྗོད་པ་གསུམ་པ་བྱས་མ་ཐག་ཏུ་ཟེངས་བསྟོད་པར་བྱའོ། །མཇུག་ནི། མཇུག་སྡུད་བྱ་བའོ། །ལྷུང་བཟེད་ཁ་དབུབ་དང་སྲང་བ་གཉིས་ལས། དང་པོ་ལ། དགོས་དོན་ནི། ཉེས་སྤྱོད་ལ་མ་ཞུགས་པ་མི་འཇུག་པའི་ཕྱིར་དང་། ཞུགས་ཟིན་བཟློག་པའི་ཕྱིར་དུའོ། །བསྡུས་དོན་ལ་བཞི་ལས། ཡུལ་གང་ལ་བྱ་བ་ནི། ཁྱིམ་པ་ཡིན་པ། ཤེས་པ་རང་བཞིན་དུ་གནས་པ། ལུས་ཐ་མལ་དུ་གནས་པ། རབ་ཏུ་བྱུང་བ་ལ་སྤྱོ་བ་དང་གཤེ་བ་དང་། སྐུར་པ་འདེབས་པར་བྱེད་པ་ཡིན་པ། རང་ཕྱོགས་དང་མཐུན་པ། ཚོགས་ལོངས་མ་ཡིན་པ། སྔར་ལྷུང་བཟེད་ཁ་དབུབ་བྱས་པ་དང་མ་འབྲེལ་བ་ཡིན་པ་དེ་ལའོ། །རྟེན་གང་གིས་བྱ་ན། གྲངས་ཚང་བ། ཁ་སྐོང་བར་འོས་པ། མི་མཐུན་པ་གཉིས་དང་བྲལ་བ། ལས་བྱེད་པའི་ཆོ་ག་ཤེས་པ་སྟེ་མཚན་ཉིད་བཞི་ལྡན་གྱིས་སོ། །ཆོ་ག་གང་གིས་བྱ་བ་སྦྱོར་དངོས་མཇུག་གསུམ་ལས། དང་པོ་ནི་དགེ་འདུན་བསྡུ་བ་དང་། སྟན་བཤམ་པ་སོགས་བྱ། གཉིས་པ་ནི་གསོལ་བ་འབའ་ཞིག་པའི་ལས་ཀྱིས་བྱའོ། །མཇུག་ནི། དེ་ལྟར་བྱས་པ་དེ་གཞན་ལ་ཡང་གོ་བར་བྱའོ། །བསླབ་བྱ་ནི། ཁྱིམ་དེར་མི་འགྲོ་བ་ལ་སོགས་པའོ། །ལྷུང་བཟེད་ཁ་སྲང་བ་ལ་གཉིས་ཏེ། དང་པོ་དགོས་དོན་ནི། རབ་ཏུ་བྱུང་བ་རྣམས་འཚོ་བས་མི་ཕོངས་པར་བྱ་བའི་ཕྱིར་དང་། ཁྱིམ་པ་དེ་ཡང་བསོད་ནམས་འཕེལ་བར་བྱ་བའི་དོན་དུ་ཡིན་ནོ། །བསྡུས་དོན་ལ་གསུམ་ལས། ཡུལ་ནི་ལྷུང་བཟེད་ཁ་བུབ་བྱས་པ་དང་འབྲེལ་བ་ཡིན་པ། གང་ལ་མི་རིགས་པ་བསྒྲུབ་པའི་ཡུལ་ལ་བཟོད་པར་གསོལ་ཟིན་ཅིང་། དགེ་འདུན་ལ་ཡང་བཟོད་པའི་ཕྱིར་གསོལ་བ་ལན་གསུམ་འདེབས་པ་དེ་ལའོ། །རྟེན་ནི། སྔར་གྱི་སྟེང་དུ་ལྷུང་བཟེད་ཁ་འབུབ་བྱེད་པ་པོའི་དགེ་འདུན་ནམ། དེས་སྐོས་པའི་དགེ་སློང་ངོ་། །ཆོ་ག་སྦྱོར་དངོས་མཇུག་གསུམ་ལས། དང་པོ་གཉིས་སྔར་བཞིན་མཇུག་ཁས་བླངས་པ་དགེ་འདུན་གཞན་ལ་གོ་བར་བྱའོ། །བཅབས་པའི་སེམས་མ་སྐྱེས་ན་མཐའ་ལས་ལྡང་ཞེས་པའི་སྐབས་སུ། བསླབ་པ་སྦྱིན་པའི་རང་བཞིན། སྦྱིན་པའི་ཚུལ། སྤྱོད་པའི་ཚུལ་དང་གསུམ་ལས། དང་པོ་ལ། མདོ་སྡེ་པ་ལྟར་ན་འཆབ་སེམས་མ་གཏོགས་པའི་ཕམ་པའི་ཡན་ལག་ཀུན་ཚང་གིས་བསྐྱེད་པའི་ཕམ་པར་གཏོགས་པའི་སྦོམ་པོ་ལྕི་བ་འདག་པའི་ཕྱིར་དུ་ཁྱད་པར་ཅན་གྱི་སྤྱོད་པ་སྤོང་དམན་སྤྱོད་དང་དུ་ལེན་པའི་བར་མ་དགེ་བའི་རང་བཞིན་སྦྱིན་པ་ཉིད་དོ་ཞེས་འདོད། སྔ་རབས་པ་རྣམས་ནི། ཕམ་པ་བྱུང་བའི་ཚེ་སྡོམ་པ་གཏོང་བས་ཡང་སྡོམ་པ་བླངས་ལ་སྔར་གྱི་སྡོམ་པ་གཏོང་བྱེད་ཀྱི་ཕམ་པ་འདག་ཕྱིར་དུ་ཁྱད་པར་ཅན་གྱི་སྤྱོད་པ་སྤོང་། དམན་སྤྱོད་དང་དུ་ལེན་པའི་བར་མ་དགེ་བའི་རང་བཞིན་སྦྱིན་པར་བྱའོ་ཞེས་བཞེད། བྱེ་བྲག་ཏུ་སྨྲ་བའི་ལུགས་ལ་ཕམ་པ་འཆབ་བཅས་དང་། འཆབ་མེད་གང་བྱུང་ཡང་སྡོམ་པ་མི་གཏོང་ལ། འཆབ་བཅས་བྱུང་ན་ཕྱིར་བཅོས་སུ་མེད་ཅིང་ཕམ་པ་འཆབ་མེད་བྱུང་བ་ལ་ཁྱད་པར་ཅན་གྱི་སྤྱོད་པ་སྤོང་། དམན་སྤྱོད་དང་དུ་ལེན་པའི་བར་མ་དགེ་བའི་རང་བཞིན་སྦྱིན་པར་བྱའོ། །སྦྱིན་པའི་ཚུལ་ལ་དྲུག་ལས། ཡུལ་ནི་བསྙེན་པར་རྫོགས་པའི་སྡོམ་པ་གསོ་རུང་ཡན་ཆད་དང་ལྡན་པ། ལྟ་བ་མཐུན་པ། མཚན་མཐུན་པ། ཐ་སྙད་གསུམ་དང་ལྡན་པ། བསམ་པ་རང་བཞིན་དུ་གནས་པ། ལུས་ཐ་མལ་དུ་གནས་པ། མཚམས་ནང་ན་གནས་པ། ཚོགས་ལོངས་མ་ཡིན་པ། གནས་དབྱུང་མ་ཡིན་པ། ལྟུང་བ་དེ་དག་ཕྱིར་བསླབ་པ་དེ་བྱིན་པ་དང་མ་འབྲེལ་བ་སྟེ་བཅུ་ལྡན་དེ་ལའོ། །རྟེན་ནི། གྲངས་ཚང་བ། ཁ་སྐོང་བར་འོས་པ། མི་མཐུན་པ་གཉིས་དང་བྲལ་བ། ལས་ཀྱི་ཆོ་ག་ཤེས་པ་སྟེ་བཞི་ལྡན་དེས་སོ། །ལྟུང་བ་གང་གི་དོན་དུ་བྱ་བ་ནི། ཕམ་པ་འཆབ་མེད་དམ་ཕམ་འདྲའི་ཉེས་བྱས་འཆབ་མེད་གང་རུང་ཡིན་པ། བདག་རྒྱུད་ལ་འབྲེལ་བར་འབྱུང་བ། ངོ་བོ་དྲན་ནམ་ཡིད་གཉིས་ཟ་བ་དེའི་དོན་དུའོ། །ཡུན་ནི་ཇི་སྲིད་འཚོའི་བར་དུ་སྦྱིན་ནོ། །ཆོ་ག་ནི་སྦྱོར་དངོས་མཇུག་གསུམ་གྱི། དང་པོ་ནི། གཎྜི་བརྡུང་། སྟན་བཤམ་པར་བྱ་བ་དང་། གསོལ་བ་ལན་གསུམ་གྱི་བར་དུ་འདེབས། དངོས་གཞི་ནི་གསོལ་བ་དང་བཞིའི་ལས་བྱའོ། །མཇུག་ནི། མཇུག་སྡུད་བརྗོད་པ་དང་། ཁྱད་པར་ཅན་གྱི་སྤྱོད་པ་སྤང་བ་སོགས་ཀྱི་བསླབ་བྱ་བརྗོད་པར་བྱའོ། །གསུམ་པ་ནི། ཁྱད་པར་ཅན་གྱི་སྤྱོད་པ་སྤོང་བ་སོགས་སོ། །ས་གཞན་ན་གནས་པའི་སྤྱིའི་དོན་ལ་དྲུག་སྟེ། དབྱེ་བ། བསྡུ་བ། མཚན་ཉིད། བསླབ་བྱ། སྒྲ་བཤད་པ། གྲོལ་རྒྱུའོ། །དང་པོ་ལ་དབྱེ་གཞི་དང་། དབྱེ་ངོ་གཉིས། དང་པོ་ནི། ལུང་ལས་གསུངས་པའི་ས་གཞན་ན་གནས་པ་ཙམ་མོ། །གཉིས་པ་ལ་རགས་པའི་དབྱེ་བ་དང་། ཞིབ་ཏུ་དབྱེ་བ་གཉིས། དང་པོ་ལ་སྤོ་སྤྱོད་གསུམ། མགུ་སྤྱོད་གསུམ། སྤོ་ལྡན་གསུམ། མགུ་ལྡན་གསུམ། བསྡིག་པ་སོགས་བཞི། གནས་དབྱུང་བདུན། བསླབ་པ་སྦྱིན་པ། ངོ་བོ་ཉིད་འཚོལ་བ་དང་མཐུན་པར་སྦྱིན་པ་སྟེ་ཉི་ཤུ་རྩ་ལྔའོ། །ཁ་ཅིག་དགེ་ཚུལ་བསྙིལ་བ་དང་རྩ་དྲུག་ཏུ་འདོད་དོ། །ཞིབ་ཏུ་དབྱེ་བ་ལ་ཁ་ཅིག་སྤོ་སྤྱོད་གསུམ། མགུ་སྤྱོད་གསུམ། སྤོ་བ་སྤྱད་ནས་མགུ་བ་སྤྱོད་པ། གཞི་མགུ་སྤྱོད་པ། ཡང་མགུ་སྤྱོད་པ་གསུམ། གཞི་སྤོ་སྤྱད་ནས་མགུ་བ་སྤྱོད་པ་སོགས་གསུམ། གླེང་བྱེད་དེས་བསམ་པར་འོས་པ་རྣམས་བསམ། བརྟག་པར་འོས་པ་རྣམས་བརྟག ཡང་སྤོ་སྤྱོད་ནས་མགུ་བ་སྤྱོད་པ་སོགས་གསུམ། སྤོ་ལྡན་གསུམ། མགུ་ལྡན་གསུམ། སྤོ་བ་སྤྱད་པའི་གཞི་ལས་མགུ་ལྡན་གཞི་ལྡན་ཡང་ལྡན་གསུམ། གཞི་སྤོ་སྤྱད་པའི་གཞི་ལས། མགུ་ལྡན་གཞི་ལྡན་ཡང་ལྡན་གསུམ། ཡང་སྤོ་སྤྱད་པའི་གཞི་ལས། མགུ་ལྡན་གཞི་ལྡན་ཡང་ལྡན་གསུམ་སྟེ་བསྡོམས་པས་སུམ་ཅུ། དེའི་སྟེང་དུ་བསྡིག་པ་སོགས་བཞི། གནས་དབྱུང་བདུན། བསླབ་སྦྱིན། ངོ་བོ་ཉིད་འཚོལ་བ་དང་མཐུན་པར་སྦྱིན་པ་སྟེ་བཞི་བཅུ་ཞེ་གསུམ་མོ་ཞེས་གསུངས་པ་མི་འཐད་དེ། སྤོ་བ་སྤྱོད་པའི་གཞི་ལ་མགུ་བ་སྤྱོད་པ་སོགས་གསུམ། གཞི་སྤོ་སྤྱོད་པའི་གཞི་ལས་མགུ་སྤྱོད་སོགས་གསུམ། ཡང་སྤོ་སྤྱོད་པའི་གཞི་ལས་མགུ་སྤྱོད་སོགས་གསུམ་བགྲངས་ནས་དེ་ལས་ལོགས་སུ་གྱུར་པའི་མགུ་སྤྱོད་སོགས་གསུམ་བགྲང་རྒྱུ་མེད་པའི་ཕྱིར་དང་། ཡང་མགུ་སྤྱད་པའི་གཞི་ལས་མགུ་ལྡན་སོགས་གསུམ། ཡང་སྤོ་སྤྱད་པའི་གཞི་ལས་མགུ་ལྡན་སོགས་གསུམ་བགྲངས་ནས་དེ་ལས་ལོགས་སུ་གྱུར་པའི་མགུ་ལྡན་གསུམ་བགྲང་རྒྱུ་མེད་པའི་ཕྱིར་རོ། །གཉིས་པ་བསྡུ་བ་ལ། ངོ་བོའི་སྒོ་ནས་བསྡུ་ན། སྤངས་པ་ས་གཞན་ན་གནས་པ། སྨད་པ་ས་གཞན་ན་གནས་པ། དག་བྱེད་ས་གཞན་ན་གནས་པ་དང་གསུམ་མོ། །རྣམ་གྲངས་ཀྱི་སྒོ་ནས་བསྡུ་ན། ས་གཞན་ན་གནས་པ་ནན་ཏུར་བྱས་པ་དང་མ་བྱས་པ་གཉིས་སུ་འདུས་ཏེ། ནན་ཏུར་བཅུ་གཅིག་པོ་བྱས་པ་ནི་ས་གཞན་ན་གནས་པ་ནན་ཏུར་བྱས་པ་ཡིན་ལ། དེ་ལས་གཞན་པའི་ས་གཞན་ན་གནས་པ་རྣམས་ནི་ནན་ཏུར་མ་བྱས་པ་དེ་ཡིན་པའི་ཕྱིར། བསླབ་བྱའི་སྒོ་ནས་བསྡུ་ན་ས་གཞན་ན་གནས་པ་ཆེན་པོ་དང་ཆུང་ངུ་གཉིས་ཏེ། དང་པོ་ནི། སྤོ་སྤྱོད་གསུམ། མགུ་སྤྱོད་གསུམ། བསླབ་སྦྱིན། ངོ་བོ་ཉིད་འཚོལ་བ་དང་མཐུན་པར་སྦྱིན་པ་རྣམས་ཡིན་ལ། གཉིས་པ་ནི། དེ་ལས་གཞན་པའི་ས་གཞན་ན་གནས་པ་རྣམས་སོ། །གསུམ་པ་མཚན་ཉིད་ནི། སྨད་པ་བྱེད་པའི་ཆོ་གའི་སྒོ་ནས་ཁྱད་པར་ཅན་གྱི་སྤྱོད་པ་ལྔ་སྤོང་བའི་བདག་ཉིད་དོ། །བཞི་པ་བསླབ་བྱ་ནི་བསྙིལ་བ་དང་ནན་ཏུར་བྱས་པའི་གང་ཟག་རྣམས་ཀྱིས་བཟོད་པར་གསོལ་བར་བྱ། ཁྱད་པར་བསྡིག་པ་ལ་སོགས་པ་བཞི་ནི་འགྲོགས་བཤེས་དགེ་སློང་ལ་བརྟེན་ནས་གནས་པ་སོགས་བྱའོ། །སྤོ་སྤྱོད་གསུམ། མགུ་སྤྱོད་གསུམ། བསླབ་སྦྱིན། ངོ་བོ་ཉིད་འཚོལ་བ་དང་མཐུན་པར་སྦྱིན་པ་སོགས་ཀྱིས་ནི་ཁྱད་པར་ཅན་གྱི་སྤྱོད་པ་སྤོང་བ་དང་། དམན་སྤྱོད་དང་དུ་ལེན་པར་བྱ་ཞིང་། དེ་ལས་གཞན་པ་རྣམས་ཀྱིས་ཁྱད་པར་ཅན་གྱི་སྤྱོད་པ་སྤོང་བ་ལ་བསླབ་པར་བྱའོ། །ལྔ་པ་སྒྲ་བཤད་ནི། རང་བཞིན་དུ་གནས་པའི་ས་ལས་གཞན་ན་གནས་པས་ས་གཞན་ན་གནས་པ་ཞེས་བྱའོ། །དྲུག་པ་གྲོལ་རྒྱུ་ལ། བསྙིལ་བ་དང་ནན་ཏུར་བྱས་པ་དང་ངོ་བོ་ཉིད་འཚོལ་བ་དང་མཐུན་པར་སྦྱིན་པ་རྣམས་ནི་བཟོད་པར་གསོལ་བ་ནས་རང་བཞིན་དུ་གནས་པ་ཐོབ་བོ། །ཕྱིར་འགྱེད་ནན་ཏུར་བྱས་པའི་གང་ཟག་ནི་བཟོད་པར་གསོལ་བའི་ཕྱིར་དགེ་འདུན་ལ་གསོལ་ནས་གང་ལ་བརྙས་པར་བྱས་པའི་ཡུལ་དེ་ལ་བཟོད་གསོལ་བྱས་ཤིང་། དེས་བཟོད་པ་ན་རང་བཞིན་དུ་གནས་པ་ཡིན་ཏེ། རྩ་བ་ལས་འདི་བཟོད་པར་གསོལ་བའི་ལས་ཀྱི་གནས་སུ་དེ་ལ་བཟོད་པ་གསོལ་དུ་གཞུག་གོ་ཞེས་དང་། རང་ཊཱིཀ་ལས་ཁྱིམ་པ་ལ་བཟོད་པར་གསོལ་བར་བྱ་བ་ཡིན་གྱི། འདིར་ལས་ཀྱིས་ནི་མི་བྱ་ཞེས་གསུངས་པའི་ཕྱིར། འོ་ན་ཀརྨ་ཤ་ཏམ་ལས་འདི་ལ་ལས་བྱེད་པར་བཤད་པ་དང་འགལ་ལོ་ཞེ་ན། སྐྱོན་མེད་དེ་དེ་ལྟར་གསུངས་པ་དེ་རྩ་འགྲེལ་དང་མི་མཐུན་པས་ཁས་མི་ལེན་པའི་ཕྱིར་རོ། །སྤོ་སྤྱོད་མགུ་སྤྱོད་རྣམས་ཀྱིས་ནི་རང་རང་གི་ཉེས་པའི་གཞི་ལས་གྲོལ་བས་ན་རང་བཞིན་དུ་གནས་པ་ཐོབ། སྤོ་ལྡན་རྣམས་ཀྱིས་ནི་མགུ་བ་མནོད་པ་དང་། མགུ་ལྡན་རྣམས་ཀྱིས་ནི་དབྱུང་བ་བྱས་པས་རང་བཞིན་དུ་གནས་པ་ཐོབ་བོ། །བསླབ་བྱིན་གྱིས་དགྲ་བཅོམ་པའི་འབྲས་བུ་ཐོབ་པ་ན་རང་བཞིན་དུ་གནས་པ་ཐོབ་ལ། གཞན་རྣམས་ཀྱིས་ཀྱང་དགྲ་བཅོམ་གྱི་འབྲས་བུ་ཐོབ་པ་ན་རང་བཞིན་དུ་གནས་པ་ཐོབ་སྟེ། བསླབ་བྱིན་ལ་རྩ་བས་དངོས་སུ་གསུངས་ཤིང་། སྤོ་སྤྱོད་དང་མགུ་སྤྱོད་རྣམས་ལ་འགྲེལ་བས་དངོས་སུ་གསུངས་པའི་ཕྱིར་རོ།། ༈ །།བསྡུས་འབྱུང་གི་གཞིའི་སྐབས་སུ། འཆབ་པའི་རྣམ་གཞག་ལ་བཞི་སྟེ། གཞི། བསམ་པ། སྦྱོར་བ། མཐར་ཐུག་རྣམས་སོ། །དང་པོ་ལ་གང་དུ་འཆབ་པའི་གནས་དང་། གང་འཆབ་པའི་ལྟུང་བ་གཉིས། དང་པོ་ནི་མཐོལ་ཡུལ་དུ་འོས་པའི་དགེ་སློང་སྤོང་བའི་གནས་ཡིན་པ། མཚམས་ནང་ཡིན་པ་ཞིག་དགོས་ཏེ། གནས་གཞན་དུ་འཆབ་པ་མི་འབྱུང་བའི་ཕྱིར། གང་འཆབ་པའི་ངོ་བོ་ནི། དགེ་འདུན་ལྷག་མ་ཡིན་པ་རང་རྒྱུད་ལས་བྱུང་བ། ངོ་བོ་དྲན་ནམ་ཡིད་གཉིས་ཟ་བའོ། །རང་རྒྱུད་ལ་བྱུང་བ་ཞིག་དགོས་ཏེ། གཞན་རྒྱུད་ཀྱི་ལྷག་མ་བཅབས་པས་ལྟུང་བྱེད་དུ་གསུངས་པའི་ཕྱིར། བསམ་པ་ལ་འདུ་ཤེས་དང་ཀུན་སློང་གཉིས་ལས། དང་པོ་ནི་གཞི་དེ་ལ་མ་འཁྲུལ་བ་ཞིག་དགོས་ལ། ཀུན་སློང་ནི་ལྷག་མ་འཆབ་འདོད་དང་ལྡན་པའམ། མཐོལ་བའི་སེམས་མེད་པ་ཡན་ལག་ཏུ་རུང་སྟེ། མཐོལ་སེམས་མེད་པ་ཡང་འཆབ་སེམས་དང་འདྲ་སྟེ། འཆབ་པའི་སེམས་མ་བཏང་བ་ནི་དེའི་སེམས་ཉིད་ཡིན་ཞེས་གསུངས་པའི་ཕྱིར། སྦྱོར་བ་ནི་འཆབ་པར་རྩོམ་པའོ། །འདིར་ལུས་ངག་ཏུ་ཐོན་པ་ནི་མི་དགོས་ཏེ། བྱ་རྒྱུ་མ་བྱས་པའི་ལྟུང་བ་ཡིན་པའི་ཕྱིར། མཐར་ཐུག་ནི་ཉིན་ཞག་ཕྱི་མའི་སྐྱ་རེངས་ཤར་བ་སྟེ། སྐྱ་རེངས་མ་ཤར་བར་བཅབས་ཀྱང་ལྷག་མ་བཅབས་པའི་ཉེས་པ་སྤོ་བ་སྤྱོད་དགོས་མི་འབྱུང་བའི་ཕྱིར། བསླབ་པ་ཡོངས་སུ་སྦྱང་བའི་སྐབས་སུ་ལྟུང་བ་གླེང་བའི་སྤྱིའི་དོན་ལ་གཉིས་ལས་དགོས་དོན་ནི། ལྟུང་བ་དྲན་པ་དང་། དེ་ལ་བརྟེན་ནས་ཕྱིར་བཅོས་འབྱུང་བ་དང་། དེ་ལས་ལྟུང་བ་དག་པ་དང་། ཚུལ་ཁྲིམས་བསྲུངས་པའི་ཕན་ཡོན་བཅུ་ཐོབ་པའི་དགོས་པ་ཡོད་དོ། །བསྡུས་དོན་ལ་བདུན་ལས། དང་པོ་ཡུལ་གང་ལ་གླེང་བ་ནི། སྡེ་ལྔའི་སྡོམ་པ་གསོ་རུང་དང་ལྡན་པ། ཤེས་པ་རང་བཞིན་དུ་གནས་པ། ལུས་ཐ་མལ་དུ་གནས་པ། གནས་དབྱུང་མ་ཡིན་པ། ཆོས་མ་ཡིན་པའི་ཕྱོགས་སུ་མ་སོང་བ། ནད་པ་མ་ཡིན་པ། འབྱེད་ནུས་མ་ཡིན་པ་སྟེ་བདུན་ལྡན་པའོ། །རྟེན་ནི། བསྙེན་རྫོགས་ཀྱི་སྒོམ་པ་རྣམ་པར་དག་པ་དང་ལྡན་པ། ལྟ་བ་མཐུན་པ། མཚན་མཐུན་པ། ཐ་སྙད་གསུམ་དང་ལྡན་པ། ས་རང་བཞིན་དུ་གནས་པ། ལུས་ཐ་མལ་དུ་གནས་པ། ནད་པའམ་དེས་བསྐོས་པ་མ་ཡིན་པ། ཡུལ་དེ་ལ་ལྟུང་བ་བྱུང་བ་ལེགས་པར་ཤེས་པ་སྟེ་བརྒྱད་ལྡན་གྱིས་སོ། །གནས་ནི། སྤྱིར་བཏང་ལ་དབེན་པའི་ཕྱོགས་སུ་གླེང་བར་བྱ་བ་ཡིན་ཏེ། མཐའ་མ་ཡིན་པ་ལ་མི་བྱའོ། །ཞེས་གསུངས་པའི་ཕྱིར། འོ་ན་ལུང་ལས་ཆོས་བཞིན་ལྟུང་བ་གང་གིས་གླེང་བར་བགྱི། ཉེ་བར་འཁོར་དགེ་འདུན་གྱི་ནང་དུའོ། །ཞེས་དང་། ཆོས་བཞིན་ལྟུང་བ་དེ་གང་དུ་དྲན་པར་བགྱི། ཉེ་བར་འཁོར་དགེ་འདུན་གྱི་ནང་དུའོ། །ཞེས་པ་དང་། གླེང་བ་པོ་ཉིད་ཀྱང་དེ་བཞིན་ནོ། །ཞེས་གསུངས་པ་དང་འགལ་ལོ་ཞེ་ན། སྐྱོན་མེད་དེ། ནན་ཏུར་བྱེད་པ་དང་མ་འབྲེལ་བའི་ལྟུང་བ་རྣམས་དབེན་པར་གླེང་། ནན་ཏུར་བྱེད་པ་དང་འབྲེལ་བའི་ལྟུང་བ་རྣམས་དགེ་འདུན་གྱི་ནང་དུ་གླེང་ཞེས་པའི་དོན་ཡིན་པའི་ཕྱིར། དུས་ནམ་གྱི་ཚེ་གླེང་བ་ནི། དབྱར་གནས་པའི་དུས་མ་ཡིན་པ་སེམས་གཏད་བཟོད་པའི་དུས་སུ་བྱའོ། །ཇི་ལྟར་བྱ་བའི་ཚུལ་ནི། གླེང་བྱེད་དེས་བསམ་པར་འོས་པ་རྣམས་བསམས། བརྟགས་པར་འོས་པ་རྣམས་བརྟགས། དྲན་པ་དང་ཤེས་བཞིན་སྔོན་དུ་གཏང་། བྱམས་པ་དང་སྙིང་རྗེའི་སེམས་ཀྱིས་གླེང་བར་བྱའོ། །དེ་ལ་བསམ་པར་འོས་པ་རྣམས་བསམས་ཞེས་པའི་དོན་ནི། རང་ཉིད་ཚུལ་དང་མཐུན་པར་གླེང་མི་གླེང་བརྟག་པའོ། །བརྟག་པར་འོས་པ་བརྟགས་ཅེས་པ་ནི། གང་ཟག་དེ་ལ་གླེང་རིགས་མི་རིགས། དུས་དེར་གླེང་རིགས་མི་རིགས། གནས་དེར་གླེང་རིགས་མི་རིགས་བརྟག་པའོ། །དེའི་དུས་སུ་གླེང་བྱ་དེས་ཀྱང་གླེང་བྱེད་དེ་ཚུལ་དང་མཐུན་པར་གླེང་མི་གླེང་བརྟགས་ནས་ཚུལ་དང་མཐུན་པར་གླེང་ན་གླེང་བ་པོ་འདི་བདག་གིས་ལེགས་པར་རྙེད་དོ་སྙམ་པའི་བསམ་པས་གླེང་བ་དེ་ཁས་བླང་བར་བྱའོ། །གླེང་ནས་ཇི་ལྟར་བྱ་བའི་ཚུལ་ལ་ཁ་ཅིག་ན་རེ། གླེང་བའི་སྐབས་འབྱེད་མི་འབྱེད་གཉིས་ལས། སྐབས་མི་འབྱེད་པ་དེ་ལ། མཐའ་དག་ལ་སྐབས་མི་འབྱེད་པ་དང་། ཕྱོགས་འགའ་ལ་སྐབས་མི་འབྱེད་པ་གཉིས། དང་པོ་ལ་བཞམས་བསྒོ་སོགས་བཟློག་པ་ལྔ་བྱེད། དེས་མ་བཏང་ན་བཀའ་བློ་མི་བདེ་བའི་ལྷག་མར་འགྱུར་རོ། །ལྷག་མ་བཞི་བཏུད་བྱེད་པའི་དགེ་སློང་ལ་སྨད་པ་ནན་ཏུར་བྱེད། དེས་མ་བཏང་ན་གནས་དབྱུང་བྱེད་དེ། འཐབ་ཀྲོལ་ལ་འབད་པས་མ་ལོག་པ་ལ་གནས་དབྱུང་བྱེད་པའི་འདུལ་བ་མདོར་བསྡུས་སྦྱར། ཕྱོགས་འགའ་ལ་སྐབས་མི་འབྱེད་ན་དང་པོ་བརྗོད་བཅས་བྱེད། དེའི་རྗེས་ལ་གདམས་ངག་གཞག དེའི་མཐའ་ལ་མ་བཏང་ན་གསོ་སྦྱོང་གཞག དེ་ནས་དགག་དབྱེ་གཞག་པར་བྱེད། དེས་ཀྱང་མ་བཏང་ན་དགེ་འདུན་ལ་བརྙས་པ་ཡིན་པས་ཕྱིར་འགྱེད་ནན་ཏུར་བྱེད། དེས་མ་བཏང་ན་གནས་དབྱུང་བྱེད་དེ། བསྡིག་པ་ནན་ཏུར་བྱས་ནས་མ་བཏང་བ་ལ་གནས་དབྱུང་བྱེད་པ་གང་ཞིག རྒྱུ་མཚན་མཚུངས་པའི་ཕྱིར། སྐབས་ཕྱེ་བ་དེ་ལ་མཉན་པ་དང་མི་མཉན་པ་གཉིས། མི་མཉན་པ་དེ་ལ་དང་པོར་ཕུར་བཅས་བྱེད། དེ་ལ་མ་བཏང་ན་གདམས་ངག་གཞག་པ། གསོ་སྦྱོང་གཞག་པ། དགག་དབྱེ་གཞག་པ་བྱེད་ཅེས་གསུངས། བམ་ལྔ་ལས་ནི། ཕྱོགས་འགའ་དང་ཐ་དད་གང་ལ་སྐབས་མ་ཕྱེ་ཡང་དང་པོར་གདམས་ངག་གཞག དེས་མ་བཏང་ན་གསོ་སྦྱོང་གཞག དེས་མ་བཏང་ན་དགག་དབྱེ། དེས་ཀྱང་སྐབས་མི་འབྱེད་ན། བཞམས་བསྒོ་སོགས་བཟློག་པ་ལྔ་བྱ་སྟེ། དེའི་མཐའ་ལ་མི་གཏོང་ན་བཀའ་བློ་མི་བདེ་བའི་དགེ་འདུན་ལྷག་མར་འགྱུར་རོ་ཞེས་གསུངས་སོ། །གཉིས་པ་རྩོད་པ་ཞི་བྱེད་ལ་གསུམ་ལས། ལས་བྱེད་པའི་དབྱེན་ནི། མཛོད་ལས། ལས་ཀྱི་དབྱེན་ནི་གླེང་གསུམ་ན། །དེ་ནི་བརྒྱད་དག་ཡན་ཆད་ཀྱིས། །ཞེས་ཏེ། གཞི་བསམ་སྦྱོར་བ་མཐར་ཐུག་གི་ཡན་ལག་བཞི་ལས། དང་པོ་ལ། གང་དུ་དབྱེ་བའི་གནས་ནི། གླིང་གསུམ་པོ་གང་རུང་ཡིན་པ་མཚམས་ནང་ཡིན་པ་ཞིག་དགོས་ཏེ། ལས་ཀྱི་དབྱེན་ནི་གླིང་གསུམ་ན། །ཞེས་དང་། ཊཱི་ཀར་དབྱེ་བའི་སེམས་ཀྱིས་མཚམས་ཀྱི་ནང་དུའོ། །ཞེས་གསུངས་པའི་ཕྱིར། གང་དབྱེ་བའི་ཡུལ་ནི། ཆོས་ཕྱོགས་པ་བཞི་ཡན་ཆད་གྲངས་ཚང་བ། ཆོས་མིན་ཕྱོགས་ལ་རང་ཉིད་མ་གཏོགས་པའི་བཞི་ཡན་ཆད་གྲངས་ཚང་བའོ། །གཉིས་ཀ་ཡང་ཁ་སྐོང་དུ་འོས་པ་ཞིག་དགོས་ཏེ། ཁ་སྐོང་དུ་མི་འོས་པས་ལས་བྱས་ཀྱང་མི་འཆགས་པའི་ཕྱིར། གང་གིས་དབྱེ་བའི་གང་ཟག་ནི་ཆོས་མིན་པ་སྟེ། ཆོས་ཕྱོགས་པའི་གང་ཟག་གིས་ལས་བྱས་ན་ལེགས་པར་བྱས་པ་ཡིན་པའི་ཕྱིར། བསམས་པ་ལ་འདུ་ཤེས་དང་། ཀུན་སློང་གཉིས་ལས། དང་པོ་ནི། གཞི་དེ་ལ་མ་འཁྲུལ་བ་ཡིན་ལ། ཀུན་སློང་ནི་ཆོས་དང་འདུལ་བ་ལ་དེ་དང་མི་མཐུན་པར་ཤེས་བཞིན་དུ་ཆོས་མ་ཡིན་པ་ལ་མངོན་པར་ཞེན་ཅིང་། འབྱེད་འདོད་རྒྱུན་མ་ཆད་པའོ། །སྦྱོར་བ་ནི། ལས་འབྱེད་པར་བརྩོན་པ། མཐར་ཐུག་ནི་ལས་བརྒྱ་རྩ་གཅིག་ལས་གང་ཡང་རུང་བ་བྱས་པའོ། །གཉིས་པ་འཁོར་ལོའི་དབྱེན་ལ་གསུམ་སྟེ། རང་གཞན་ངོས་གཟུང་ཞིང་གང་དང་ལྡན་པ། ཇི་ལྟར་འབྱེད་པའི་ཚུལ། དེ་མི་འབྱུང་བའི་དུས་སོ། །དང་པོ་ནི་མཛོད་ལས། དགེ་འདུན་དབྱེན་ནི་མི་འཕྲོད་པའི། །རང་བཞིན་ལྡན་པ་མ་ཡིན་ཆོས། །ཉོན་མོངས་ཅན་མིན་ལུང་བསྟན་མིན། །དེ་དང་དགེ་འདུན་ཡང་དག་ལྡན། །དེ་ཡི་ཁ་ན་མ་ཐོ་བརྫུན། །དེ་དང་འབྱེད་པོ་ཡང་དག་ལྡན། །བསྐལ་པར་མནར་མེད་པར་སྨིན་འགྱུར། །ཞེས་ཏེ། དགེ་འདུན་གྱི་དབྱེན་ནི་དགེ་འདུན་སྡེ་གཉིས་ཐུགས་རྩེ་མི་འཕྲོད་པའི་རང་བཞིན་ལྡན་པ་མ་ཡིན་པའི་འདུ་བྱེད་མ་བསྒྲིབས་ལུང་མ་བསྟན་ཡིན་གྱི། དགེ་མི་དགེ་གང་རུང་མ་ཡིན་ལ་དེ་དང་ཕྱོགས་གཉིས་ཀྱི་དགེ་འདུན་ཡང་དག་པར་ལྡན། དགེ་འདུན་གྱི་དབྱེན་དེའི་ཁ་ན་མ་ཐོ་བའི་བརྫུན་དེ་དང་འབྱེད་པ་པོ་ལྷས་བྱིན་ལྟ་བུ་དང་ཡང་དག་པར་ལྡན། དེའི་རྣམ་སྨིན་ནི་བར་གྱི་བསྐལ་པར་མནར་མེད་སྨིན་པར་འགྱུར་བའོ། །སྔ་མ་ལ། དབྱེན་ལྡན་དང་། ཕྱི་མ་ལ་བརྫུན་ལྡན་ཞེས་བྱའོ། །གཉིས་པ་ནི། དགེ་སློང་ལྟ་སྤྱོད་ཚུལ་ལྡན་པས། །འབྱེད་དོ་གཞན་དུའོ་བྱིས་པ་རྣམས། །སྟོན་དང་ལམ་གཞན་ལ་བཟོད་པ། །བྱེ་བའོ་དེ་ནི་མི་གནས་སོ། །དེ་ནི་འཁོར་ལོའི་དབྱེན་དུ་འདོད། །འཛམ་བུའི་གླིང་ནའོ་དགུ་སོགས་ཀྱིས། །ཞེས་ཏེ། གང་ཟག་གང་གིས་འབྱེད་ན། དགེ་སློང་ཉིད་ཀྱིས་འབྱེད་ཀྱི། དགེ་སློང་མ་སོགས་ཀྱིས་མིན་ཏེ། དེས་འབྱེད་མི་ནུས་པའི་ཕྱིར། དེ་ལྟ་བ་སྤྱད་པས་ཡིན་གྱི། སྲེད་པ་སྤྱད་པས་མ་ཡིན་ཏེ། བསམ་པ་གཡོ་བས་མི་བརྟན་པའི་ཕྱིར། དེ་ཡང་ཚུལ་ཁྲིམས་དང་ལྡན་པས་ཡིན་གྱི། མི་ལྡན་པས་མ་ཡིན་ཏེ། དེའི་ཚིག་མི་བཙན་པའི་ཕྱིར། གནས་གང་དུ་འབྱེད་ན། སྟོན་པ་མངོན་སུམ་བཞུགས་པའི་གནས་ལས་གཞན་དུ་སྟེ། སྟོན་པ་ནི་གཟི་བྱིན་ཆེ་བས་སོ། །གང་འབྱེད་ན་བྱིས་པ་རྣམས་འབྱེད་ཀྱི་ཆོས་མངོན་སུམ་དུ་མཐོང་བའི་འཕགས་པ་དང་། དེ་དང་འདྲ་བའི་སོ་སྐྱེ་མཁས་པ་རྣམས་ནི་མ་ཡིན་ནོ། །ཅི་ཙམ་གྱིས་དབྱེ་བ་ཡིན་ཞེ་ན། ལྷས་བྱིན་ལྟ་བུ་སྟོན་པ་གཞན་དང་དེས་བསྟན་པའི་ལམ་གཞན་བརྟུལ་ཞུགས་ལྔ་པོ་ལ་བཟོད་པ་སྟེ་འདོད་པས་ཁས་ལེན་པའམ། ཚུལ་ཤིང་བླངས་པའི་ཚེ་ན་དབྱེ་བའོ། །འཁོར་ལོའི་དབྱེན་འདི་ཉིད་ཉིན་ཞག་གི་བར་དུ་མི་གནས་ཏེ། དེའི་གོང་དུ་མཆོག་ཟུང་གིས་ངེས་པར་འདུམས་པའི་ཕྱིར་རོ། །སྒྲ་དོན་ནི། ཅིའི་ཕྱིར་འཁོར་ལོའི་དབྱེན་ཞེས་བྱ་ཞེ་ན། མཛོད་ལས། ཆོས་ཀྱི་འཁོར་ལོ་མཐོང་བའི་ལམ། །མྱུར་བར་འགྲོ་སོགས་རྩིབས་སོགས་ཀྱིས། །ཞེས་གསུངས་པ་ལྟར། མཐོང་ལམ་ནི་རྒྱལ་པོའི་འཁོར་ལོ་རིན་པོ་ཆེ་དང་ཆོས་མཚུངས་པས་ན། ཆོས་ཀྱི་འཁོར་ལོ་ཞེས་བྱ་ལ། དེ་སྐྱེ་བ་ལ་གེགས་བྱེད་པས་ན་འཁོར་ལོའི་དབྱེན་ཞེས་བྱ་སྟེ། ལུང་མ་མོ་ལས་འཕགས་པའི་ལམ་ལས་ཐ་དད་དུ་འབྱེད་པས། དེ་སྤངས་ནས་ལམ་གཞན་དུ་འཇོག་པ་ནི་འཁོར་ལོའི་དབྱེན་ནོ་ཞེས་གསུངས་པའི་ཕྱིར། ཡུལ་གང་དུ་འབྱུང་ན་འཛམ་བུའི་གླིང་ཁོ་ན་ན་འབྱུང་ངོ་། །གྲངས་དུ་ཞིག་འབྱེད་ཞེ་ན། ཆོས་ཕྱོགས་པ་བཞི་དང་། རང་མ་གཏོགས་པའི་ཆོས་མིན་ཕྱོགས་པ་བཞི་སྟེ། དགུ་ཡན་ཆད་ཀྱིས་འབྱེད་པར་བྱེད་དོ། །གསུམ་པ་ནི། དང་པོ་མཐའ་སྐྱོན་ཟུང་གཅིག་གི །སྔ་རོལ་ཐུབ་པ་ནོངས་པ་དང་། །མཚམས་མ་བཅད་པ་དག་ཏུ་ཡང་། །འཁོར་ལོའི་དབྱེན་ནི་མི་འབྱུང་ངོ་། །ཞེས་གསུངས་པ་ལྟར་ཤེས་པར་བྱའོ། །གསུམ་པ་རྩོད་པ་ཞི་བྱེད་དངོས་ལ། དགོས་བསྡུས་གཉིས་ལས། དང་པོ་ནི། རྩོད་པ་དང་རྩོད་པ་ཞི་བྱེད་བསྟན་པ་ལ་དགོས་པ་ཡོད་དེ། ཇི་སྐད་བཤད་པ་ལྟར་གྱི་རྩོད་པ་ཞི་བྱེད་ཀྱིས་དགེ་འདུན་མཐུན་པར་འགྱུར་ལ། དེ་ལ་བརྟེན་ནས་དགེ་བའི་ཕྱོགས་འཕེལ་བར་འགྱུར་བའི་ཕྱིར་རོ། །བསྡུས་དོན་ལ་བདུན་ཏེ། རྩོད་པའི་རྒྱུ། རྩོད་པའི་ངོ་བོ། རྩོད་པའི་དབྱེ་བ། རྩོད་པའི་ཞི་བྱེད། རྩོད་པ་འཕྲུལ་མ། ཞི་བྱེད་འཕྲུལ་མ། རྩོད་པ་མཐར་སྐྱེལ་བའོ། །དང་པོ་ལ་ནང་གི་རྒྱུ་དང་། ཕྱིའི་རྒྱུ་གཉིས། དང་པོ་ནི། འདོད་ཆགས་ཁོང་ཁྲོ་སོགས་རྩ་བའི་ཉོན་མོངས་པ་རྣམས་ཡིན་ལ། དེའི་གཙོ་བོ་ཡང་བདག་འཛིན་ཡིན་ནོ། །ཚོར་འདུ་གཉིས་ཀྱང་རྩོད་པའི་རྒྱུ་ཡིན་ཏེ། མཛོད་ལས། རྩོད་པའི་རྩ་བར་གྱུར་ཕྱིར་དང་། །ཞེས་གསུངས་པའི་ཕྱིར། ཕྱིའི་རྒྱུ་ནི། དངོས་པོའི་དེ་བཞིན་ཉིད་ལ་ལོག་པར་སྒྲུབ་པ་སོགས་བཞི་ཀ་ཡོད་དོ། །དངོས་པོའི་དོན་ནི། སྒྲ་མི་རྟག་པ་ཡིན་པ་ལ་སྒྲ་རྟག་གོ་ཞེས་པ་ལྟ་བུ་དང་། ཆོས་ཐམས་ཅད་བདག་མེད་པ་ཡིན་པ་ལ། ཉེར་ལེན་གྱི་ཕུང་པོ་བདག་དང་བཅས་པ་ཡིན་ནོ་ཞེས་རྩོད་པ་ལྟ་བུའོ། །གདམས་ངག་སོགས་གཞག་པའི་དོན་ནི། བམ་ལྔ་ལས་གདམས་ངག་གཞག་པ་དང་། གསོ་སྦྱོང་གཞག་པ་དང་། དགག་དབྱེ་གཞག་པའི་རིམ་གྱིས་ལྟུང་བ་འབྱིན་པ་པོའི་གང་ཟག་གཞག་སྟེ། དགེ་འདུན་རང་བཞིན་དུ་གནས་པ་ལས་ལོགས་སུ་སྤང་བའོ་ཞེས་བཤད་དོ། །ལྟུང་བ་བཅས་པའི་རྩོད་པ་ནི། སྡོམ་པ་གསོ་བའི་ལྷག་མ་ཡོད་པའི་ལྟུང་བ་དེ་ཉིད་རྩོད་གཞི་ཉིད་དུ་རུང་གི ཕམ་པ་བཅབ་པ་ནི་རྩོད་གཞིར་མི་རུང་སྟེ། ཕམ་པ་འཆབ་བཅས་བྱུང་བའི་གང་ཟག་དེ་རྩོད་ཟླ་ཉིད་དུ་མི་རུང་བའི་ཕྱིར་ཏེ། ཊཱི་ཀར་སྤངས་པ་ཉིད་ནས་གཞན་གྱི་ཕྱོགས་ཉིད་ཀྱི་བར་དུ་གྱུར་ན་ཡང་ཞེས་དང་། བམ་ལྔར་ལྟུང་བ་དང་བཅས་པ་ནི་ལྟུང་བ་སྡེ་ལྔའི་ལྷག་མ་དག་ལས་ལྷག་མར་གྱུར་པའི་ལྟུང་བའོ། །ཞེས་གསུངས་པའི་ཕྱིར། ལས་ལ་མི་མཐུན་པའི་རྩོད་པ་ནི། ལས་ལ་འདུ་བ་མི་སྟེར་བའམ་འདུས་ཀྱང་འདི་ལྟ་བུའི་ལས་མ་བྱེད་ཅིག་ཅེས་ཟློག་པར་བྱེད་པའོ། །གཉིས་པ་རྩོད་པའི་ངོ་བོ་ནི། དགྲ་བོས་མི་མཐུན་པར་སྨྲས་པའི་ཚིག་གི་ཕྱིར་སེམས་གཞོལ་བས་ལན་འདེབས་པར་འདོད་པས་རྒྱུད་འཁྲུག་པ་དང་བཅས་པའི་ཀུན་སློང་ངོ་། །ཁ་ཅིག་ལུང་ལས་དེ་ལ་བརྟེན་ནས་འདིར་འཐབ་པ་དང་། རྩོད་པ་དང་། མཚང་འབྲུ་བ་དང་། འགྱེད་པ་གང་ཡིན་པ་ཉིད་འགྱེད་པའི་ཕྱིར་རྩོད་པའོ། །ཞེས་པ་དང་འགལ་བར་ཐལ་ལོ་ཞེ་ན། སྐྱོན་མེད་དེ། རྩོད་པའི་འབྲས་བུ་ལ་རྩོད་པར་བཏགས་པའི་ཕྱིར་རོ། །ཡང་ལུང་ལས། འགྱེད་པའི་ཕྱིར་རྩོད་པ་གང་ཡིན་པ་དེ་ནི་མི་དགེ་བ་དང་བཅས་ལུང་མ་བསྟན་དང་བཅས་པའོ། །ཞེས་གསུངས་པ་དང་འགལ་ལོ་ཞེ་ན། སྐྱོན་མེད་དེ། རྒྱུ་ལ་དགོངས་པའི་ཕྱིར་ཞེས་གསུངས་སོ། །གསུམ་པ་དབྱེ་བ་ལ། རགས་པའི་དབྱེ་བ་དང་། ཞིབ་ཏུ་དབྱེ་བ་གཉིས། དང་པོ་ལ་བཞི་སྟེ། འགྱེད་ཕྱིར་གྱི་རྩོད་པ། མི་གདམས་ཕྱིར་གྱི་རྩོད་པ། ལྟུང་ཕྱིར་གྱི་རྩོད་པ། བྱ་ཕྱིར་གྱི་རྩོད་པའོ། །གཉིས་པ་ནི་བཅུ་གཅིག་ཏུ་ཡོད་དེ། འགྱེད་ཕྱིར་གྱི་རྩོད་པ་གཅིག མི་གདམས་ཕྱིར་གྱི་རྩོད་པ་ལྔ། ལྟུང་ཕྱིར་གྱི་རྩོད་པ་བཞི། བྱ་ཕྱིར་གྱི་རྩོད་པ་གཅིག་རྣམས་སུ་ཡོད་པའི་ཕྱིར་རོ། །མི་གདམས་ཕྱིར་གྱི་རྩོད་པ་ལྔར་འགྱུར་བའི་རྒྱུ་མཚན་ནི། དེ་ལ་རྒྱུ་བཅས་དང་རྒྱུ་མེད་གཉིས། དང་པོ་ནི། གང་གིས་གླེང་བའི་ལྟུང་བ་དེ་ཡོད་པའོ། །རྒྱུ་མེད་ནི་གང་གིས་གླེང་བའི་ལྟུང་བ་དེ་ཉིད་མེད་པའོ། །དེ་ལ་བཞི་སྟེ། གཞི་མེད་པ་དང་། གཞི་རྗེས་སུ་སྒྲུབ་པའི་དབང་ཉིད་དང་། ཕྱིར་བཅོས་པ་ལ་མི་ལྟོས་པ་དང་། སྨྱོས་པས་བྱས་པ་རྣམས་སོ། །ལྟུང་ཕྱིར་གྱི་རྩོད་པ་བཞི་ནི། འདི་ལ་ཉེས་པ་རང་གི་ངོ་བོ་མི་ཤེས་པ་དང་། ཤེས་པ་གཉིས་ལས། ཤེས་པ་ལ་གསུམ་སྟེ། ཕྱིར་མ་འཕྲོས་པ་དང་། ཉི་ཚེ་བ་དང་། དགེ་འདུན་མཐའ་དག་དང་འབྲེལ་པས་སོ། །ཞི་བྱེད་གང་རྩོད་པ་ཐམས་ཅད་ཀྱི་ཞི་བྱེད་དུ་འགྱུར་བ། རྩོད་པ་གང་ཞི་བྱེད་ཐམས་ཅད་འཇུག་པའི་གཞིར་གྱུར་པ། རྩོད་པ་སོ་སོ་ལ་ཞི་བྱེད་སོ་སོར་བསྟན་པའོ། །དང་པོ་ནི། བབས་པ་དང་ཤི་བ་ལྟ་བུ་སྟེ། དེས་རྩོད་པ་རང་ཞིར་འགྱུར་བའི་ཕྱིར། གཉིས་པ་ནི། བྱ་ཕྱིར་རྩོད་པ་ཡིན་ཏེ། ཞི་བ་ཐམས་ཅད་ནི་བྱ་བའི་ཕྱིར་རྩོད་པ་འཇུག་ཅེས་གསུངས་པའི་ཕྱིར། གསུམ་པ་ལ་སྡོམ་ནི། མངོན་སུམ་དྲན་པ་མ་མྱོས་དང་། །གང་མང་དང་ནི་ངོ་བོ་ཉིད། །རྩྭ་རྣམས་བཀྲམ་པ་ལྟ་བུ་དང་། །ཁས་བླངས་པ་ནི་བྱ་བའོ། །ཞེས་པ་ལྟར་བདུན་ལས། འགྱེད་ཕྱིར་རྩོད་པ་ལ་མངོན་སུམ་གྱི་ཞི་བྱེད། གང་མང་གི་ཞི་བྱེད་གཉིས་འཇུག་ལ། དང་པོ་ལ་བརྒྱད་དེ། རྒོལ་དང་གཟུ་དང་དགེ་འདུན་གཞི་པོ་དང་། །གསལ་བ་དང་ནི་གསལ་བའི་གསལ་བ་དང་། །དགེ་འདུན་གཞན་དང་སྡེ་སྣོད་འཛིན་པ་དང་། །གནས་བརྟན་མཐུ་དང་ལྡན་པའི་མངོན་སུམ་མོ། །ཞེས་པ་ལྟར། ཚོགས་པར་དབྱུང་བའི་མངོན་སུམ། གཟུ་བོའི་མངོན་སུམ། དགེ་འདུན་གཞི་པོའི་མངོན་སུམ། གསལ་བའི་མངོན་སུམ། གསལ་བའི་གསལ་བའི་མངོན་སུམ། དགེ་འདུན་གྱི་སྡེ་གཞན་གྱི་མངོན་སུམ། སྡེ་སྣོད་འཛིན་པའི་མངོན་སུམ། གནས་བརྟན་མཐུ་ལྡན་གྱི་མངོན་སུམ་རྣམས་ཏེ་སྔ་མ་སྔ་མས་མ་ཞི་ན་ཕྱི་མ་ཕྱི་མས་ཞི་བར་བྱེད་དོ། །གང་མང་གི་ཞི་བྱེད་ནི། མངོན་སུམ་གྱིས་ཞི་བར་མ་ནུས་ན། དགེ་འདུན་གཞི་པོས་ཕྱོགས་གཉིས་ཀ་ལ་ཚུལ་ཤིང་བྲིམས་ནས་ཚུལ་ཤིང་བགྲངས་ཏེ་གང་མང་བྱ་བ་གསུངས་སོ། །མི་གདམས་པའི་རྩོད་པ་ལ་རྒྱུ་བཅས་རྒྱུ་མེད་གཉིས་ལས། རྒྱུ་བཅས་ནི་གླེང་བྱེད་དང་རྟོགས་པ་གཅིག་ཏུ་བྱས་པའི་སྒོ་ནས་རྩོད་པ་དེ་ཞི་བར་བྱེད། རྒྱུ་མེད་ཡིན་ན། གླེང་བྱ་ལ་དག་པ་བྱིན་པའི་སྒོ་ནས་ཞི་བར་བྱེད་དེ། དེ་ཡང་རྒྱུ་མེད་ཀྱི་དང་པོ་གསུམ་ལ་གང་ཟག་འདི་ནི་དྲན་པ་དང་ལྡན་པ་ཡིན་པས། འདི་ལ་ལྟུང་བ་བྱུང་བ་མ་དྲན་པས་འདི་ལ་ལྟུང་བ་མེད་དོ་ཞེས་དགེ་འདུན་གྱིས་གསོལ་བཞིའི་ལས་ཀྱིས་དག་པར་སྟེར་བ་དང་། བཞི་པ་སྨྱོས་པས་བྱས་པ་ལ། གང་ཟག་འདི་མ་སྨྱོས་པའི་དུས་སུ་ཉེས་པ་མ་བྱས་པས་སྨྱོས་པ་འདི་ལ་ལྟུང་བ་མེད་དོ་ཞེས་དགེ་འདུན་གྱིས་གསོལ་བཞིའི་ལས་ཀྱིས་དག་པ་སྟེར་བའོ། །ལྟུང་ཕྱིར་རྩོད་པ་ཞི་བྱེད་ལ་གཉིས་ཡོད་པའི་ཉེས་པ་རང་གི་ངོ་བོ་ཤེས་པའི་རྩོད་པ་ཞི་བྱེད་ལ་གསུམ་ལས། དང་པོ་ཕྱིར་འཕྲོས་པ་མེད་པའི་རྩོད་པ་ཞི་བྱེད་ལ་ཡང་ལྟུང་བ་ཁས་མི་ལེན་ཞིང་ཕྱིར་མི་བཅོས་པས་རྩོད་པ་ནི། ལྟུང་བ་ཁས་བླངས་པ་དང་། ལྟུང་བ་ཕྱིར་བཅོས་བྱ་བས་རྩོད་པ་དེ་ཞི་བར་བྱེད་དོ། །ལྟུང་བ་ཁས་མི་ལེན་པ་ཁོ་ནའི་རྩོད་པ་ནི། གླེང་བྱེད་ལ་ཁས་བླངས་པས་ཞི་བར་བྱེད་དོ། །གཉིས་པ་ཕྱིར་འཕྲོས་པ་དང་བཅས་པ་རྣམ་པ་གཉིས་པོ་ཉི་ཚེ་བའི་རྩོད་པ་ནི་མངོན་སུམ་གྱིས་འདུལ་བས་སོ། །གསུམ་པ་དགེ་འདུན་མཐའ་དག་དང་འབྲེལ་བའི་རྩོད་པ་ནི། རྩྭ་བཀྲམ་པ་ལྟར་ཕྱོགས་གཉིས་པོ་ཕན་ཚུན་འདུད་ཅིང་བཤགས་པའི་སྒོ་ནས་ཞི་བར་བྱའོ། །ཡང་ན་ལྟུང་ཕྱིར་རྩོད་པ་ལ་གཉིས་ལས། ཉེས་པ་རང་གི་ངོ་བོ་མི་ཤེས་པ་ལ་ངོ་བོ་ཉིད་འཚོལ་བ་དང་མཐུན་པར་བྱིན་པར་ཁས་བླངས་པའི་སྒོ་ནས་ཞི་བར་བྱེད། གཉིས་པ་ནི་ཕྱིར་བཅོས་པར་ཁས་བླངས་པའི་སྒོ་ནས་ཞི་བར་བྱེད། བྱ་ཕྱིར་རྩོད་པ་ནི་ལས་ལ་མཐུན་པ་སྦྱིན་པའི་སྒོ་ནས་སམ་ཞི་བྱེད་གཞན་ཡང་འཇུག་གོ །ལྔ་པ་རྩོད་པ་འཕྲུལ་མ་ལ་ཁ་ཅིག་ན་རེ། ལྟུང་ཕྱིར་རྩོད་པ་ལ་ཕྱིར་འཕྲོས་པ་མེད་པ་དང་། འཕྲོས་པ་དང་བཅས་པ་གཉིས་པོ་ཉི་ཚེ་བ་དང་། དགེ་འདུན་མཐའ་དག་དང་འབྲེལ་བ་གསུམ་ཡོད་པ་བཞིན་དུ་མི་གདམས་པའི་ཕྱིར་རྩོད་པ་ལ་ཡང་དེ་གསུམ་ཡོད་དེ། རྒྱུ་མཚན་མཚུངས་པའི་ཕྱིར། མི་གདམས་པའི་ཕྱིར་རྩོད་པ་ལ། གཞི་མེད་པ་དང་། གཞན་རྗེས་སུ་སྒྲུབ་པའི་དབང་ཉིད་དང་། ཕྱིར་བཅོས་ལ་མི་ལྟོས་པ་དང་། སྨྱོས་པས་བྱས་པ་བཞི་ཡོད་པ་ལྟར་ལྟུང་ཕྱིར་རྩོད་པ་ལ་ཡང་བཞི་ཡོད་དེ། རྒྱུ་མཚན་མཚུངས་པའི་ཕྱིར་ཞེས་གསུངས་པ་མི་འཐད་དེ། ལྟུང་ཕྱིར་རྩོད་པ་གང་གིས་གླེང་བའི་ལྟུང་བ་དེ་ཡོད་དགོས་པའི་ཕྱིར། དྲུག་པ་ཞི་བྱེད་འཕྲུལ་མ་ལ་ཁ་ཅིག ཕྱིར་འཕྲོས་པ་མེད་པའི་རྩོད་པ་ལ་ཕྱིར་བཅོས་བྱེད་པར་ཁས་བླངས་པས་ཞི་བ་བཞིན་མངོན་སུམ་གྱིས་ཀྱང་ཞི་བྱེད་འཇུག་སྟེ། རྒྱུ་མཚན་མཚུངས་པའི་ཕྱིར། ཕྱིར་འཕྲོས་པ་དང་བཅས་པ་རྣམ་པ་གཉིས་པོ་ཉི་ཚེ་བའི་རྩོད་པ་དེ་ལ། མངོན་སུམ་གྱི་ཞི་བྱེད་འཇུག་པ་བཞིན་དུ་ཕྱིར་བཅོས་པར་ཁས་བླངས་པའི་སྒོ་ནས་ཀྱང་ཞི་བྱེད་འཇུག་སྟེ་རྒྱུ་མཚན་མཚུངས་པའི་ཕྱིར་ཞེས་གསུངས་སོ། །བདུན་པ་རྩོད་པ་མཐར་བསྐྱལ་བ་ནི་འགྱེད་ཕྱིར་རྩོད་པ་ལ་མངོན་སུམ་དང་གང་མང་གིས་མ་ཞི་ན་གནས་དབྱུང་བྱེད་པ་བཞིན་དུ། ཞི་བྱེད་གཞན་རྣམས་ཀྱིས་མ་ཞི་ན་ཡང་གནས་དབྱུང་བྱེད་དེ། རྒྱུ་མཚན་མཚུངས་པའི་ཕྱིར། ལྟུང་ཕྱིར་གྱི་རྩོད་པའི་གཞི་ལ་བརྟེན་ནས་འཐབ་པ་དང་མཚང་འབྲུ་བ་སོགས་ཀྱི་རྩོད་པ་བྱུང་ན་དེ་ཞི་བར་བྱ་བའི་ཕྱིར་བསྡིགས་པ་ནན་ཏུར་བྱེད། དེས་མ་ཞི་ན་གནས་དབྱུང་བྱེད་དོ། །དགེ་འདུན་གྱིས་རྩོད་པ་ཞི་བྱེད་ལ་ཞུགས་པ་དེའི་ཚེ་གང་ཟག་འགའ་ཞིག་ཆེད་དུ་བྱས་ནས་ཞི་བྱེད་ལ་མ་འདུས་ན་ཕྱིར་འགྱེད་ནན་ཏུར་བྱ། དེས་ཀྱང་མ་འདུས་ན་གནས་དབྱུང་བྱ་ཞེས་གསུངས་སོ། །ལྔ་པ་དེ་ཐམས་ཅད་ཀྱི་རྟེན་གནས་མལ་གྱི་གཞི་ལ། ཕྱག་བྱ་བ་དང་མི་བྱ་བའི་རིམ་པ་མཚན་ནས་བརྗོད་པའི་ཚུལ། གནས་མལ་བསྟེན་པ་དངོས། འདུལ་བ་མདོར་བསྡུས་ཏེ་བསྟན་པ་དང་གསུམ་ལས། དང་པོ་གཉིས་ནི་གཞུང་ལས་ཤེས་པར་བྱའོ། །གསུམ་པ་འདུལ་བ་མདོར་བསྡུ་བ་བསྟན་པ་ནི། མི་རུང་བ་དང་མཐུན་ལ་རུང་བ་དང་འགལ་བ་ནི་རུང་བ་མིན་པར་བསྡུའོ། །ཕྱི་མ་དང་མཐུན་ལ་སྔ་མ་དང་འགལ་བ་ནི་རུང་བར་རོ། །ཞེས་པའི་སྐབས་སུ། མཁས་པ་གཞན་གྱི་ལུགས་འགོད་པ་དང་། བླ་མའི་བཞེད་པ་བསྟན་པ་གཉིས་ལས། དང་པོ་ལ་ཁ་ཅིག་ན་རེ། འདི་ལ་བཞི་སྟེ། གཞི་གང་ལ་རུང་མཐུན་བཅས་པ། རུང་མཐུན་རང་གི་ངོ་བོ། རུང་མཐུན་བཅས་པའི་དགོས་པ། རུང་མཐུན་སྦྱར་བ་ལས་དངོས་གཞི་དང་ན་སྨད་པ་ཇི་ལྟར་འགྱུར་བའི་ཚུལ་ལོ། །དང་པོ་ནི། ཁ་ཅིག་ལུང་ལས་གནང་མེད་བཀག་མེད་ལ་རུང་མཐུན་བྱ་བར་གསུངས་པའི་ཕྱིར་དེ་ལ་བྱའོ་ཞེས་ཟེར་ཏེ། དེ་ནི་མི་འཐད་དེ། དེ་འདྲའི་གཞི་མི་སྲིད་ཅིང་། སྟོན་པས་གནང་བཀག་མ་བྱས་ཀྱང་གནང་བཀག་གི་བསླབ་པ་འཆའ་ན་ཁྱེད་སངས་རྒྱས་སུ་ཐལ་ལོ། །དེས་ན་ལུང་གི་དགོངས་པ་ནི། རུང་མཐུན་བཅའ་བའི་གོང་ཡན་ཆད་དུ་གནང་མེད་བཀག་མེད་ལ་དགོངས་པ་ཡིན་གྱི། རུང་མཐུན་བཅས་ནས་མི་རུང་བ་ཐམས་ཅད་བཀག་ཚར་བ་ཡིན་པའི་ཕྱིར་རོ། །ཡང་ཁ་ཅིག་རུང་མཐུན་མ་གསུང་གོང་དུའང་གནང་བཀག་གི་རྒྱུ་མཚན་དང་ལྡན་པ་ལ་གནང་བཀག་བཅས་པས་ཁྱབ་སྟེ། དགོན་པ་བ་ཕམ་པར་གྱུར་ཟིན་ཞེས་དང་། ངས་གནང་བ་གང་ཡིན་པ་ཁྱོད་ཀྱིས་ཤེས་སོ་ཞེས་སོགས་གསུངས་པའི་ཕྱིར། དེས་ན་ས་བརྐོ་བ་བཀག་པས་དགག་བྱ་དང་ལྡན་པའི་བྱེ་མ་བརྐོ་བ་བཀག་ཟིན་པ་ཡིན་ནོ་ཞེ་ན། ལུང་གི་དགོངས་པ་སྔར་བཤད་ཚར་རོ། །རྒྱུ་མཚན་མཚུངས་པ་ཐམས་ཅད་གཅིག་བཀག་པས་ཐམས་ཅད་དགག་པར་འགྱུར་ན། དུད་འགྲོ་གསོད་པ་སོགས་བཀག་པས་འདེབས་སྤྱོད་ཡང་དགག་པར་འགྱུར་ལ། བརྫུན་བཀག་པས་བཞི་མེད་དང་། བག་ཙམ་གྱི་སྐུར་འདེབས་དང་། བརྫུན་དུ་སྨྲ་བའི་ལྟུང་བྱེད་ཀྱང་དགག་པར་འགྱུར་ལ། འདོད་ན། དེ་དག་ལ་ལས་དང་པོ་པ་མི་སྲིད་པར་ཐལ་ཞིང་། རུང་མཐུན་བཅས་པའང་དགོས་པ་མེད་པར་འགྱུར་རོ། །དེས་ན་རུང་མཐུན་གསུངས་པའི་གོང་ཡན་ཆད་དུ་རུང་ངོ་ཞེས་དངོས་སུ་གནང་བ་ཡང་མེད། མི་རུང་བས་མི་བྱའོ་ཞེས་དངོས་སུ་བཀག་པ་ཡང་མེད་པ་དོན་ལ་གནང་བཀག་གི་རྒྱུ་མཚན་ཡོད་པའི་གཞི་དེ་ལ་བརྩིའོ། །རུང་མཐུན་བཅས་རྟིང་མི་རུང་བ་ཐམས་ཅད་རུང་མཐུན་གྱིས་བཀག རུང་བ་ཐམས་ཅད་རུང་མཐུན་གྱིས་གནང་བ་ཡིན་པས་དེའི་གཞི་དེ་ལ་བྱའོ། །གཉིས་པ་རུང་མཐུན་རང་གི་ངོ་བོ་ནི། སྔར་སྒྲུབ་པའི་བསླབ་པ་འཆའ་བའི་རྒྱུ་མཚན་ཡོད། དགག་པའི་བསླབ་པ་འཆའ་བའི་རྒྱུ་མཚན་མེད་ན་རུང་བར་བསྒྲུབ་བཟློག་ན་མི་རུང་བར་བསྒྲུབ་སྟེ། དཔེར་ན་མིག་སྨན་མིག་ལ་ཕན་པའི་ཕྱིར་དུ་བསྟེན། སྒེག་རྫས་སུ་མི་བསྟེན་ཞེས་གསུངས་པས། སྔར་ཏམ་བུ་ལ་རུང་བས་ཟོ་ཞིག མི་རུང་བས་མ་ཟ་གཅིག་ཅེས་གང་ཡང་མ་གསུངས་ཀྱང་སྨན་རྣམས་ཁ་ཤོལ་བའི་དོན་དུ་རུང་ལ། སྒེག་རྫས་སུ་མི་རུང་བར་སྒྲུབ་པ་དང་། སྔར་འགྲེང་ཏེ་བཤང་བ་མི་བྱའོ་ཞེས་མི་རུང་བར་བསྟན་པས་ཉལ་ཏེ་བཤང་གཅི་བྱེད་པའང་མི་རུང་བར་བསྒྲུབ་པ་དང་། སྔར་རྡོའི་ཡོལ་གོར་དུ་ཟས་ཟ་བ་གནང་བས་ཁམ་ཕོར་དུའང་ཟས་ཟ་བ་གནང་བར་སྒྲུབ་པ་སྟེ། མདོར་ན་ཆོས་ཅན་རུང་མཐུན་མ་བཅས་གོང་གི་གནང་མེད་བཀག་མེད་དེ་ལ། རྟགས་དགོས་པ་ཡོད་པས་རུང་བ་དང་མཐུན། དགག་བྱ་མེད་པས་མི་རུང་བ་དང་འགལ་བ་རྟགས་སུ་བཀོད་ནས་རུང་བར་བསྒྲུབ། ཡང་དགག་བྱ་ཡོད་པས་མི་རུང་བ་དང་མཐུན་དགོས་པ་མེད་པས་རུང་བ་དང་འགལ་བ་རྟགས་སུ་བཀོད་ནས་མི་རུང་བར་བསྒྲུབ་པ་ཡིན་ལ། སྟོན་པས་རུང་མཐུན་བཅས་པས་ཆོས་ཅན་དེའི་སྟེང་དུ་རྟགས་དེས་བསྒྲུབ་བྱའི་ཆོས་དེ་སྒྲུབས་ཤིག་ཅེས་གསུངས་པས། རྟགས་དེ་ལ་ཆོས་ཀྱིས་ཁྱབ་པར་སྟོན་པས་བཅས་པ་ཡིན་ལ། ཕྱིས་རུང་མཐུན་སྦྱོར་བ་པོས་རྟགས་དེས་ཆོས་ཅན་དེ་ལ་བསྒྲུབ་བྱའི་ཆོས་དེ་བསྒྲུབས་ནས་འཇུག་ཟློག་བྱེད་པ་ཡིན་ནོ། །གསུམ་པ་རུང་མཐུན་བཅས་པའི་དགོས་པ་ནི། སྔར་དགག་དགོས་དང་ལྡན་ཡང་། དགག་སྒྲུབ་ཀྱི་བསླབ་པ་དངོས་སུ་མ་བཅས་པ་རྣམས་ལ། ཕྱི་རབས་ཀྱི་སྐྱེ་བོས་བཅས་པ་ནི་མེད་སྙམ་ནས་དགག་བྱ་དང་ལྡན་པ་ལ་ཞུགས། དགོས་པ་དང་ལྡན་པ་ལས་ལོག་པས་ཉེས་དམིགས་ཆེན་པོ་འབྱུང་བས་དེ་དགག་པའི་ཕྱིར་དུ་མྱ་ངན་ལས་འདས་པའི་གེགས་སུ་གྱུར་པ་རྣམས་ནི་དགག་དགོས། གྲོགས་སུ་གྱུར་པ་རྣམས་ནི་སྒྲུབ་དགོས་པས་དགག་དགོས་དང་ལྡན་པ་ལ་བཅས་པས་ཁྱབ་པར་མཛད་པ་ཡིན་ལ། རྗེས་འཇུག་གིས་ཀྱང་དེ་ལྟར་འཇུག་ཟློག་བྱས་པས་མྱ་ངན་ལས་འདས་པའི་གེགས་སུ་གྱུར་པ་སྤངས་ཤིང་གྲོགས་སུ་གྱུར་པ་བསྟེན་པས་མྱ་ངན་ལས་འདས་པ་ཐོབ་པའི་ཐབས་སུ་འགྱུར་བའི་ཕྱིར་རོ། །བཞི་པ་རུང་མཐུན་སྦྱར་བ་ལ་དངོས་གཞི་དང་ན་སྨད་དུ་ཇི་ལྟར་འགྱུར་ཚུལ་ནི། གཞི་ལ་སོགས་པའི་ཡན་ལག་ཐམས་ཅད་མཉམ་ན་མཉམ་པར་འགྱུར་ཏེ་ལུག་བལ་དཀོན་ཞིང་རིན་ཆེ་བར་དེའི་སྟན་བྱས་ན་ལྟུང་བ་དངོས་བཞིར་འགྱུར་བ་བཞིན་ནོ། །ཆུ་ལ་རྩེ་བའི་ལྟུང་བ་ཆུ་མ་ཡིན་པ་ལ་རྩེས་ན་ན་སྨད་པའམ། རང་གིས་བྱ་དགོས་པའི་ལྟུང་བ་གཞན་ལ་བཅོལ་ན་ན་སྨད་པ་ལྟར། གཞིའི་ཡན་ལག་ལ་སོགས་པའི་སྒོ་ནས་ན་སྨད་ན་ལྟུང་བའང་ན་སྨད་དེ། བོན་པོའི་འདུག་གནས་སུ་ཟ་བ་དང་། བོན་པོ་ལ་ཟས་བྱིན་པའམ་ན་སྨད་པར་འགྱུར་བར་ཤེས་པར་བྱའོ། །དེའི་རྗེས་སུ་འབྲངས་ནས་ཕྱིར་བཅོས་པའི་ཚུལ་ཡང་ཤེས་པར་བྱའོ། །ཞེས་གསུངས་སོ།། ༈ །།གཉིས་པ་ནི། འདུལ་བ་མདོར་བསྡུས་ལ་གཉིས་ཏེ། སྤྱིའི་དོན་དང་ཡན་ལག་གི་དོན་ནོ། །དང་པོ་ལ་གསུམ་སྟེ། བཤད་བྱའི་མདོ་དགོད་པ། གོ་རིམ་ལ་སྐྱོན་ཆགས་པ་སྤོང་བ། བསྡུས་པ་རྒྱས་པར་བཤད་པའོ། །དང་པོ་ནི། འདུལ་བ་འོད་ལྡན་དུ་ཕྲན་ཚེགས་དྲངས་པ་ལས། དེ་ནས་བཅོམ་ལྡན་འདས་ཀྱིས་ཡོངས་སུ་མྱ་ངན་ལས་འདས་པའི་དུས་དེའི་ཚེ་དགེ་སློང་རྣམས་ལ་བཀའ་སྩལ་པ། དགེ་སློང་དག་ངས་ཁྱེད་ལ་འདུལ་བར་རྒྱ་ཆེར་ནི་བསྟན་གྱི། མདོར་བསྡུས་པ་མ་བསྟན་པས་འོན་ཀྱང་མདོར་བསྡུས་པ་ཡང་ཉོན་ཅིག དགེ་སློང་དག་ངས་ཁྱེད་ལ་གང་ཞིག་གནང་བ་ཡང་མེད་ལ། བཀག་པ་ཡང་མེད་ལ། རུང་བ་དང་ཉེ་ཞིང་བྱ་བ་མ་ཡིན་པ་ཟློག་པར་བྱེད་པ་ནི་བྱ་བ་ཡིན་པར་གཟུང་བར་བྱའོ། །མི་རུང་བ་དང་ཉེ་ཞིང་། རུང་བ་དང་འགལ་བ་ནི་བྱ་བ་མ་ཡིན་པས་སྤྱད་པར་མི་བྱའོ། །ཞེས་གསུངས་སོ། །གཉིས་པ་ནི། ཁ་ཅིག་ན་རེ་དངོས་བཅས་སྔར་བསྟན་ནས། རུང་མཐུན་ཕྱིས་སྟོན་པ་འདི་གོ་རིམ་ལ་སྐྱོན་ཆགས་པ་ཡིན་ཏེ། དངོས་བཅས་རྒྱས་བཤད་དང་། རུང་མཐུན་མདོར་བསྟན་ལྟ་བུ་ཡིན་པའི་ཕྱིར། ཁྱབ་སྟེ། སྒྲའི་བསྟན་བཅོས་ལས། དང་པོ་གཉིས་ལས་མཆོད་འོས་སམ། །ཡང་ན་ཡི་གེ་རབ་ཉུང་བ། །ཞེས་བཤད་པའི་ཕྱིར་ཞེ་ན། སྐྱོན་མེད་དེ། ལུང་ལས་དངོས་བཅས་སྔར་བསྟན། རུང་མཐུན་ཕྱིས་བསྟན་པ་ལྟར་འདིར་ཡང་དེ་དང་མཐུན་པར་བསྟན་པ་དང་། དངོས་བཅས་ལ་བརྟེན་ནས། མདོར་བསྡུས་ཀྱི་སྤང་བླང་ལ་འཇུག་དགོས་པའི་ཕྱིར། གསུམ་པ་ལ་ལྔ་སྟེ། དབྱེ་བ། ངོ་བོ། མཚན་ཉིད། ངེས་ཚིག་སྦྱོར་བའི་ཚུལ། རྒྱུ་མཚན་ནོ། །དང་པོ་ལ་གསུམ་སྟེ། རྒྱུ་མཚན་གྱི་སྒོ་ནས། ངོ་བོའི་སྒོ་ནས། གནས་སྐབས་ཀྱི་སྒོ་ནས་དབྱེ་བའོ། །དང་པོ་ལ་གསུམ་སྟེ། དགག་པའི། སྒྲུབ་པའི། གནང་བའི་འདུལ་བ་མདོར་བསྡུས་པའོ། །དང་པོ་ནི། བྱེ་མ་འཐས་པར་གནས་པའི་སྲོག་ཆགས་དང་བཅས་པ་བརྐོས་པ་བཀག་པ་ལྟ་བུའོ། །གཉིས་པ་ནི། དགེ་ཚུལ་གྱིས་གསོ་སྦྱོང་བྱེད་དགོས་པ་ལྟ་བུ་སྟེ། སུམ་བརྒྱ་པར། གལ་ཏེ་མངོན་སུམ་གསུངས་པ་མེད་གྱུར་ཀྱང་། །དགག་དབྱེ་གསུངས་ཕྱིར་འདིར་ནི་གསོ་སྦྱོང་ཡོད། །དགག་དབྱེ་དག་པ་གོ་བར་བྱ་ཕྱིར་ཏེ། །དེ་ལས་གསོ་སྦྱོང་དོན་ནི་ཐ་དད་མིན། །ཞེས་པ་ལྟར་རོ། །གསུམ་པ་ནི། ཁམ་ཕོར་དུ་ཟས་ཟ་བ་གནང་བ་ལྟ་བུའོ། །གཉིས་པ་ངོ་བོའི་སྒོ་ནས་འདུལ་བ་མདོར་བསྡུས་ལ་གཉིས་ཏེ། རྒྱུ་ཚོགས་དང་བཅས་པའི་འདུལ་བ་མདོར་བསྡུས་དང་། བཅས་པ་ངོ་བོ་ཡན་ལག་གི་འདུལ་བ་མདོར་བསྡུས་སོ། །དང་པོ་ནི་སྲོག་ཆགས་དང་བཅས་པའི་བྱེ་མ་བརྐོ་བ་བཀག་པ་ལྟ་བུའོ། །གཉིས་པ་ནི། འཁྲིག་ཚིག་སྨྲ་བའི་ལྷག་མ་བསྐྱེད་པ་ལ་རྫུ་འཕྲུལ་གྱི་ཆོས་ཅན་མ་ཡིན་པ་དགོས་པ་བཞིན་དུ་བསྙེན་བསྐུར་བསྔགས་པའི་ལྷག་མ་བསྐྱེད་པ་ལ་ཡང་རྫུ་འཕྲུལ་གྱི་ཆོས་ཅན་མ་ཡིན་པ་དགོས་པ་ལྟ་བུའོ། །གསུམ་པ་གནས་སྐབས་ཀྱི་སྒོ་ནས་དབྱེ་ན། ངོ་བོ་ཉིད་ཀྱི་མདོར་བསྡུས་དང་། བྱེད་པའི་མདོར་བསྡུས་གཉིས་སོ། །གཉིས་པ་ངོ་བོ་ནི། གསལ་ཁ་མ་དོད་པ་སྟེ། འདུལ་བའི་བསླབ་པ་རྣམ་པར་གཞག་པའི་བདག་ཉིད་བྱ་བ་དང་སྦྱར་ནས་གསལ་ཁ་མ་དོད་པའོ། །གསུམ་པ་མཚན་ཉིད་ནི། འདུལ་བའི་བསླབ་པ་རྣམ་པར་གཞག་པའི་བདག་ཉིད་གང་ཞིག་བྱ་བ་དང་སྦྱར་ནས་གསལ་ཁ་མ་དོད་པའོ། །བཞི་པ་ངེས་ཚིག་ནི། ཚུལ་ཁྲིམས་སྟོན་པར་བྱེད་པས་འདུལ་བ། དགག་དགོས་ཀྱི་རྒྱུ་མཚན་ལ་བརྟེན་ནས་གཞི་དང་མ་སྦྱར་བར་བླང་དོར་མདོར་བསྡུས་ཏེ་སྟོན་པར་བྱེད་པས་མདོར་བསྡུས་ཞེས་བྱའོ། །གང་ལ་སྦྱར་བའི་ཚུལ་ནི། སྤྱིར་གནང་བཀག་མཛད་ལ་གསལ་ཁ་དོད་པའི་སྒོ་ནས་གནང་བཀག་མ་མཛད་པ་དེ་ལ་བྱའོ། །འདུལ་བ་མདོར་བསྡུས་ཞེས་པའི་ཐ་སྙད་ནི་རྒྱ་ཆེར་འགྲེལ། རང་འགྲེལ། བམ་ལྔ། འགྲེལ་ཆུང་། འགྲེལ་པ་བར་མ། སུམ་བརྒྱ་པ་རྩ་འགྲེལ་རྣམས་ལས་བཤད་དེ། སུམ་བརྒྱ་པ་ལས། འདུལ་བ་མདོར་བསྡུས་ཞེས་བྱ་སྒྲོན་མ་དང་། །འདྲ་བ་གཞན་ནི་བདེ་བར་གཤེགས་པའི་གསུང་། །ཞེས་སོ། །ལྔ་པ་རྒྱུ་མཚན་ལ་གསུམ་སྟེ། དགག་པའི་རྒྱུ་མཚན། སྒྲུབ་པའི་རྒྱུ་མཚན། གནང་བའི་རྒྱུ་མཚན་ནོ། །ཁ་ཅིག་འདུལ་བ་མདོར་བསྡུས་ལ་རྒྱུ་ཚོགས་དང་བཅས་པ་དང་། ཡན་ལག་གི་འདུལ་བ་མདོར་བསྡུས་དང་། ངོ་བོ་ཉིད་ཀྱི་འདུལ་བ་མདོར་བསྡུས་དང་། བྱེད་པའི་འདུལ་བ་མདོར་བསྡུས་བཞིར་དབྱེ་བ་མི་འཐད་དེ། འདུལ་བ་མདོར་བསྡུས་ཀྱི་བསྟན་དོན་འདུལ་བ་མདོར་བསྡུས་མ་ཡིན་པའི་ཕྱིར་ཏེ། འདུལ་བ་མདོར་བསྡུས་དང་རྒྱས་པ་གཉིས་ཀ་ཡང་འདུལ་བའི་གསུང་རབ་ལ་བྱེད་དགོས་པའི་ཕྱིར་རོ། །ཁ་ཅིག་འདུལ་བ་མདོར་བསྡུས་ཡིན་ན་འདུལ་བ་རུང་མཐུན་ཡིན་དགོས་ཟེར་བ་ཡང་མི་འཐད་དེ། འདུལ་བ་མདོར་བསྡུས་དེ་ལ་རུང་མཐུན་དང་མི་རུང་མཐུན་གཉིས་ཡོད་པའི་ཕྱིར་ཏེ། མི་རུང་བ་དང་མཐུན་ལ་རུང་བ་དང་འགལ་བ་ནི་རུང་བ་མ་ཡིན་པར་བསྡུ། ཕྱི་མ་དང་མཐུན་ལ་སྔ་མ་དང་འགལ་བ་ནི་རུང་བར་རོ། །ཞེས་གསུངས་པའི་ཕྱིར། གཉིས་པ་ཡན་ལག་གི་དོན་ནི། སྤྱི་དོན་རྒྱས་པར་བཤད་པ་ཉིད་ཀྱིས་ལེགས་པར་གྲུབ་པ་ཡིན་ནོ། །ཡོན་ཏན་ཀུན་གྱི་རྩ་བ་ངེས་འབྱུང་གི །ཚུལ་ཁྲིམས་ཡིན་པ་དམ་པ་རྣམས་ཀྱིས་གསུངས། །དེ་ཕྱིར་དེ་ཉིད་མ་ཐོབ་ཐོབ་པ་དང་། །ཐོབ་པ་བསྲུང་དང་ཉམས་ན་ཕྱིར་བཅོས་པའི། །ཚུལ་འདི་བླ་མའི་གསུང་བཞིན་བདག་དང་ནི། །གཞན་ལ་ཕན་ཕྱིར་ཚིག་དོན་རབ་གསལ་བར། །རང་བཟོ་སྤངས་ཏེ་གཟུ་བོའི་བློ་ཡིས་བསྒྲུབས། །བདག་བློ་རྣམ་དཔྱོད་སྦྱངས་པ་ཞན་པ་དང་། །བརྗོད་བྱ་ཟབ་རྒྱས་རྟོགས་པར་དཀའ་བའི་ཕྱིར། །ནོངས་པ་མཆིས་གང་འཕགས་དང་མཁས་པ་ཡིས། །བཟོད་མཛོད་སླར་ཡང་བློ་གྲོས་སྩལ་དུ་གསོལ། །འདི་ལས་སྐྱེས་པའི་རྣམ་དཀར་དགེ་བ་གང་། །ལྷག་བསམ་སྐལ་ལྡན་ཤིང་རྟ་ལ་བཅིབས་ནས། །ཀུན་མཁྱེན་རྒྱ་མཚོ་ཆེན་པོར་འདྲེས་གྱུར་ཏེ། །བགྲང་ཡས་ལུས་ཅན་ཚིམ་པའི་རྒྱུ་རུ་བསྔོ། །བདག་ཀྱང་དེང་ནས་ཚེ་རབས་ཐམས་ཅད་དུ། །ཡོན་ཏན་གཞི་ལྡན་ཚུལ་ཁྲིམས་ལྷག་བསམ་ཅན། །འདུལ་བ་རྒྱ་མཚོའི་ཚིག་དོན་ཀུན་རྟོགས་ནས། །ཐར་འདོད་འགྲོ་ལ་རྟག་ཏུ་སྟོན་པར་ཤོག །འདུལ་བ་མདོ་རྩ་བའི་སྤྱིའི་རྣམ་པར་གཞག་པ་བདག་གཞན་རབ་ཕན་ཚིག་དོན་རབ་གསལ་ཞེས་བྱ་བ་འདི་ནི། ཐོག་མར་དཔལ་ལྡན་ས་སྐྱ་པའི་གདུང་བརྒྱུད་དྲི་མ་མེད་པར་སྐུ་འཁྲུངས་ཤིང་། མཁྱེན་རབས་དང་ཐུགས་རྗེ་ཚད་མེད་པ་དང་ལྡན་པ། སློབ་དཔོན་ཆེན་པོ་ངག་གི་དབང་ཕྱུག་གྲགས་པ་རྒྱལ་མཚན་དཔལ་བཟང་པོའི་བཀས་བསྐུལ་ཞིང་། གཞན་ཡང་བློ་གསལ་ཞིང་ཡིད་གཞུངས་པའི་སྡེ་སྣོད་འཛིན་པ་དུ་མས་ཡང་ཡང་བསྐུལ་བའི་ངོར། ཤར་ཀོང་པོའི་ཆོས་སྨྲ་བའི་དགེ་སློང་དབང་ཕྱུག་གྲུབ་པ་དཔལ་བཟང་པོས། དངོས་པོ་ཞེས་བྱ་བ་ཤིང་ཕོ་ཁྱིའི་ལོ། ཧོར་ཟླ་བཅུ་གཅིག་པ། མགོ་ཡིས་ཉ་བའི་ཡར་ཚེས་ལྔ་ལ་ཐུབ་བསྟན་རྣམ་པར་རྒྱལ་བའི་ཆོས་གྲྭ་ཆེན་པོར་ལེགས་པར་གྲུབ་པའི་ཡི་གེ་པ་ནི། ལྷན་སྐྱེས་ཀྱི་བློ་གྲོས་མི་དམན་པ་དཀོན་མཆོག་དཔལ་གྱིས་བགྱིས་སོ། །འདིས་ཀྱང་བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག། ༈ །།འདི་བསྒྲུབས་པ་ལས་བྱུང་བ་ཡི། །དགེ་བ་བདག་གིས་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ། །དགེའོ། །དགེའོ།། །