སྒྲོལ་མའི་བསྟོད་པ་ཕྱག་འཚལ་ཉེར་གཅིག་གི་འགྲེལ་བ།

བརྒྱུད།

མཛད་པ་པོ། སྐྱོ་བྲག་དགའ་དབང་།

Palchen Choeling Publication

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

སྒྲོལ་མའི་ལོ་རྒྱུས།

༄༅། །སྒྲོལ་མའི་བསྟོད་པ་ཕྱག་འཚལ་ཉེར་གཅིག་གི་འགྲེལ་བ་བཞུགས་སོ། །

ན་མོ་གུ་རུ།

སྲིད་པ་ཇི་སྲིད་མ་ཡི་ཚུལ་བཟུང་ནས། །

མཐའ་ཡས་འགྲོ་རྣམས་སྡུག་བསྔལ་རྒྱ་མཚོ་ལས། །

འདོན་པའི་དམ་བཅའ་བརྟན་པའི་རྗེ་བཙུན་མར། །

གུས་པས་འདུད་དོ་ཡེ་ཤེས་སྤྱན་གྱིས་གཟིགས། །

གང་གི་ཡོན་ཏན་ཟབ་ཅིང་རྒྱ་ཆེ་རྣམས། །

བསྟོད་པའི་ཚུལ་གྱིས་བརྗོད་པའི་རྒྱུད་གཞུང་འདི། །

སྔོན་རབས་མཁས་པའི་གསུང་གསང་ལ་བརྟེན་ནས། །

གོ་བདེ་ཉུང་ངུའི་ཚིག་གིས་བཤད་པར་བྱ། །

དེ་ཡང་དུས་གསུམ་གྱི་རྒྱལ་བ་སྲས་དང་བཅས་པའི་ཕྲིན་ལས་ཀྱི་ངོ་བོ་ལྷ་མོའི་རྣམ་པར་བསྟན་ཏེ་རིས་མེད་པའི་སེམས་ཅན་རྣམས་སྡུག་བསྔལ་མཐའ་དག་ལས་སྒྲོལ་བས་སྲིད་ཞིའི་སྐྱབས་གནས་གཅིག་ཆོག་ཏུ་གྱུར་པ་འཕགས་མ་སྒྲོལ་མ་ལ་ཡང་དག་པར་རྫོགས་པའི་སངས་རྒྱས་ཀྱིས་བསྟོད་པའི་ཕྱག་འཚལ་ཉེར་གཅིག་ཕན་ཡོན་དང་བཅས་པ་གོ་བདེར་བཤད་པ་ལ་གསུམ། སྒྲོལ་མའི་ལོ་རྒྱུས། རྒྱུད་ཀྱི་ཚིག་དོན། ཉམས་ལེན་བྱ་ཚུལ་ལོ། །

དང་པོ་ནི།

སྔོན་ཐོག་མ་མེད་པའི་དུས་ཤིག་ན། འཇིག་རྟེན་གྱི་ཁམས་སྣ་ཚོགས་པའི་འོད་ཅེས་བྱ་བར། བཅོམ་ལྡན་འདས་དེ་བཞིན་གཤེགས་པ་རྔ་སྒྲ་ཞེས་བྱ་བ་བྱུང་སྟེ། དེའི་བསྟན་པ་ལ་མཆོག་ཏུ་གུས་པའི་རྒྱལ་པོའི་བུ་མོ་ཡེ་ཤེས་ཟླ་བ་ཞེས་བྱ་བ་དེས། སངས་རྒྱས་རྔ་སྒྲ་འཁོར་བྱང་སེམས་ཉན་ཐོས་དང་བཅས་པའི་དགེ་འདུན་གྲངས་མེད་པ་ལ་ལོ་དུ་མར་མཆོད་པ་དང་བཀུར་སྟི་གྱ་ནོམ་པ་བྱས་ཏེ་བྱང་ཆུབ་མཆོག་ཏུ་སེམས་དང་པོར་བསྐྱེད་པ་ཡིན་ནོ། །དེའི་ཚེ་དགེ་སློང་རྣམས་ཀྱིས་ཁྱེད་དགེ་བའི་རྩ་བ་འདི་ཉིད་ཀྱིས་ལུས་འདི་ཉིད་ལ་སྐྱེས་པར་གྱུར་ཏེ། བསྟན་པ་ལ་བྱ་བ་བྱེད་པར་སྨོན་ལམ་བཏབ་ན་དེ་བཞིན་དུ་འགྱུར་བའི་ཕྱིར། དེ་ལྟར་རིགས་སོ་ཞེས་བསྐུལ་བའི་ལན་དུ།

འདི་ན་སྐྱེས་པ་མེད་ཅིང་བུད་མེད་མེད། །

བདག་མེད་གང་ཟག་མེད་ཅིང་རྣམ་རིག་མེད། །

ཕོ་མོར་བཏགས་པ་འདི་ནི་ཡ་མ་བརླ། །

འཇིག་རྟེན་བློ་ངན་རྣམ་པར་འཁྲུལ་པར་གྱུར། །

ཅེས་པ་ལ་སོགས་པ་བརྗོད་དེ། སྐྱེས་པའི་རྟེན་ལ་བྱང་ཆུབ་འདོད་པ་ནི་མང་གི །བུད་མེད་ཀྱི་ལུས་ཀྱིས་འགྲོ་བའི་དོན་སྤྱོད་པ་ནི་འགའ་ཡང་མེད་དོ། །དེ་བས་ན་འཁོར་བ་མ་སྟོངས་ཀྱི་བར་དུ་བུད་མེད་ཀྱི་གཟུགས་ཀྱིས་འགྲོ་བའི་དོན་བྱའོ་ཞེས་དམ་བཅས་སོ། །དེ་ནས་རྒྱལ་པོའི་ཕོ་བྲང་དུ་བཞུགས་ཏེ། འདོད་པའི་ཡོན་ཏན་ལྔ་ལ་ཐབས་མཁས་པས་སྤྱོད་བཞིན་དུ་ཏིང་ངེ་འཛིན་སྒོམ་པས་མི་སྐྱེ་བའི་ཆོས་ལ་བཟོད་པ་ཐོབ་ཅིང་འགྲོ་བ་ཐམས་ཅད་སྒྲོལ་བ་ཞེས་བྱ་བའི་ཏིང་ངེ་འཛིན་བསྒྲུབས་པ་དེའི་ནུས་པས་ཉིན་རེ་བཞིན་སྔ་དྲོའི་དུས་ཀྱི་ཚེ་སེམས་ཅན་བྱེ་བ་བརྒྱ་སྟོང་རེ་འཇིག་རྟེན་པའི་སེམས་ལས་བསྒྲལ་ཏེ་བཟོད་པ་ལ་མ་བཀོད་ཀྱི་བར་དུ་ཟས་ཟ་བར་མི་བྱེད་ཅིང་། ཕྱི་དྲོ་ཡང་དེ་ཙམ་རེ་འགོད་པར་བྱེད་དོ། །

དེ་ནས་སྔར་གྱི་མིང་དེ་འགྱུར་ནས་སྒྲོལ་མ་ཞེས་བྱ་བར་གྱུར་པ་ལ་དེ་བཞིན་གཤེགས་པ་རྔ་སྒྲས་ཀྱང་། ཇི་སྲིད་བླ་ན་མེད་པའི་བྱང་ཆུབ་མངོན་དུ་བྱས་པ་དེ་སྲིད་དུ་མིང་ལྷ་མོ་སྒྲོལ་མས་མཚན་པ་འབའ་ཞིག་ཏུ་འགྱུར་བར་ལུང་བསྟན་ཏོ། །དེ་ནས་བསྐལ་པ་རྣམ་པར་རྒྱས་པ་ཞེས་བྱ་བ་ལ། དེ་བཞིན་གཤེགས་པ་དོན་ཡོད་གྲུབ་པའི་དྲུང་དུ་ཕྱོགས་བཅུའི་ཞིང་རབ་འབྱམས་ཀྱི་སེམས་ཅན་ཐམས་ཅད་ཉེ་བར་འཚེ་བ་ལས་སྐྱོབ་པར་དམ་བཅས་ཤིང་། བདུད་ཐམས་ཅད་རྣམ་པར་འཇོམས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པས། ཉིན་རེ་བཞིན་འགྲོ་བའི་གཙོ་བོ་བྱེ་བ་བརྒྱ་སྟོང་འབུམ་ཕྲག་རེ་བསམ་གཏན་གྱི་ཏིང་ངེ་འཛིན་ལ་བཀོད། མཚན་རེ་བཞིན་གཞན་འཕྲུལ་དབང་བྱེད་ཀྱི་བདག་པོ་བྱེ་བ་བརྒྱ་སྟོང་རེ་བརྟུལ་བས་མྱུར་མ་དང་དཔའ་མོ་ཞེས་མཚན་དུ་གྲགས་སོ། །དེ་ནས་བསྐལ་པ་ཐོགས་པ་མེད་པ་ཞེས་བྱ་བ་ལ། དགེ་སློང་དྲི་མ་མེད་པའི་འོད་ཀྱི་སྣང་བ་ཞེས་བྱ་བ་ལ་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་ཐུགས་རྗེ་ཆེན་པོའི་འོད་ཟེར་གྱི་དབང་བསྐུར་བས་འཕགས་པ་སྤྱན་རས་གཟིགས་སུ་གྱུར། ཡང་དེ་ཉིད་ལ་སངས་རྒྱས་དང་བྱང་སེམས་ཐམས་ཅད་ཀྱིས་མཁྱེན་པའི་ཡེ་ཤེས་ཀྱི་ངོ་བོར་གྱུར་པའི་འོད་ཟེར་ཆེན་པོའི་དབང་བསྐུར་བས། འོད་ཟེར་སྔ་ཕྱི་གཉིས་པོ་ཕ་མ་ལྟ་བུའི་ཚུལ་གྱིས་འདྲེས་པར་གྱུར་པ་ལས་སྒྲོལ་མར་གྱུར་པ་སྤྱན་རས་གཟིགས་ཀྱི་ཐུགས་ཀ་ནས་བྱུང་བས་སེམས་ཅན་རྣམས་འཇིགས་པ་མཐའ་དག་ལས་སྐྱོབ་པར་མཛད་པ་ཡིན་ནོ། །ད་ལྟར་གྱི་བསྐལ་པ་འདི་ཉིད་ལ། སྒྲོལ་མའི་མཚན་བརྒྱ་རྩ་བརྒྱད་པ་ལས།

དཔལ་ལྡན་ཡིད་འོང་པོ་ཊ་ལ། །

སྣ་ཚོགས་ཁམས་ཀྱིས་རྣམ་པར་སྤྲས། །

སྣ་ཚོགས་ལྗོན་པ་བཀྲམ་པ་སྟེ། །

གཉིས་སྐྱེས་དུ་མ་སྒྲ་འབྱིན་པ། །

འབབ་ཆུ་སྣ་ཚོགས་ཀུ་ཅོ་ཆེ། །

རི་དྭགས་སྣ་ཚོགས་འཁྲུགས་པ་སྟེ། །

མེ་ཏོག་སྣ་ཚོགས་རིགས་རྣམས་ཀྱིས། །

ཀུན་ཏུ་དྲི་ཡིས་བཀང་བ་སྟེ། །

སྣ་ཚོགས་ཡིད་འོང་འབྲས་བུ་ལྡན། །

རྐང་པ་དྲུག་པའི་གླུ་ཡི་སྒྲ། །

མིའམ་ཅི་ནི་གླུ་སྙན་ལེན། །

གླང་ཆེན་སྨྱོན་པས་ཡང་དག་ཁེངས། །

རིག་འཛིན་གྲུབ་པའི་ཚོགས་རྣམས་དང་། །

དྲི་ཟ་རྣམས་ཀྱང་གླུ་ལེན་པ། །

ཐུབ་པ་འདོད་ཆགས་བྲལ་རྣམས་དང་། །

བྱང་ཆུབ་སེམས་དཔའི་ཚོགས་གཞན་དང་། །

ས་བཅུའི་དབང་ཕྱུག་རྣམས་དང་ནི། །

འཕགས་མ་སྒྲོལ་སོགས་ལྷ་མོ་རྣམས། །

རིག་པའི་རྒྱལ་མོ་སྟོང་རྣམས་ཀྱིས། །

རྟག་ཏུ་ལེགས་པར་བསྟེན་པའོ། །

ཁྲོ་བོའི་རྒྱལ་པོའི་ཚོགས་གཞན་དང་། །

རྟ་མགྲིན་ལ་སོགས་ཀྱིས་བསྐོར་བ། །

སེམས་ཅན་ཀུན་ལ་ཕན་པར་བརྩོན། །

བཅོམ་ལྡན་འདས་ནི་སྤྱན་རས་གཟིགས། །

བཞུགས་ཏེ་དེ་ཕྱིར་དཔལ་དང་ལྡན། །

ཞེས་གསུང་པའི་གནས་མཆོག་ཁྱད་པར་ཅན་དེར་བཞུགས་ནས་ལྷ་ཀླུ་མི་ལ་སོགས་པ་འགྲོ་བ་གྲངས་མེད་པའི་ཕན་བདེའི་དོན་རྒྱ་ཆེན་པོ་སྒྲུབ་ཀྱིན་ཡོད་པས་རང་རེས་གསོལ་བ་བཏབ་ནའང་རྗེས་སུ་འཛིན་པར་ཐེ་ཚོམ་མེད་དོ། །

རྒྱུད་ཀྱི་ཚིག་དོན།

བསྟོད་པ།

གཉིས་པ་རྒྱུད་ཀྱི་ཚིག་དོན་ལ་གཉིས། བསྟོད་པ་དང་ཕན་ཡོན་ནོ། །དང་པོ་ལ་ཚིགས་བཅད་ཉེར་གཅིག་ལས།

ཚིགས་བཅད་དང་པོ།

དང་པོ་ནི།

ཕྱག་འཚལ་སྒྲོལ་མ་མྱུར་མ་དཔའ་མོ། །

སྤྱན་ནི་སྐད་ཅིག་གློག་དང་འདྲ་མ། །

འཇིག་རྟེན་གསུམ་མགོན་ཆུ་སྐྱེས་ཞལ་གྱི། །

གེ་སར་བྱེ་བ་ལས་ནི་བྱུང་མ། །

ཞེས་པ་སྟེ། འཇིག་རྟེན་གསུམ་མགོན་ནམ་འཕགས་པ་སྤྱན་རས་གཟིགས་ཀྱི་ཞལ་ཆུ་སྐྱེས་པདྨའི་གེ་སར་བྱེ་བ་ལས་བྱུང་ཞིང་། བརྩེ་བའི་སྙིང་རྗེ་ཆེན་པོས་སེམས་ཅན་གྱི་དོན་མྱུར་དུ་མཛད་པ་དང་། འཇིགས་པ་ཐམས་ཅད་ལས་སྐྱོབ་པར་དཔའ་བའི་ནུས་མཐུ་ཐོགས་པ་མེད་པ་དང་། ཇི་ལྟ་ཇི་སྙེད་ཀྱི་ཆོས་རྣམས་ཡེ་ཤེས་ཀྱི་སྤྱན་གློག་དང་འདྲ་བས་སྐད་ཅིག་མ་གཅིག་ལ་མཁྱེན་པ་སྟེ་མཁྱེན་བརྩེ་ནུས་པའི་ཡོན་ཏན་ཕུལ་བྱུང་དེ་དག་གིས་སེམས་ཅན་ཐམས་ཅད་འཁོར་བ་ལས་སྒྲོལ་བའི་ཕྲིན་ལས་ཁྱད་པར་ཅན་གྱི་ལྷ་མོ་དེ་ལ་ཕྱག་འཚལ་ལོ། །ཕྱག་གི་ངོ་བོ་ནི་སྒོ་གསུམ་འདུད་པ་སྟེ་ང་རྒྱལ་སྤངས་པ་མཚོན་པའི་ཆེད་ཡིན་ཞིང་། ཕྱག་འོག་མ་རྣམས་ཀྱང་འདིས་ཤེས་པར་བྱའོ། །

ཚིགས་བཅད་གཉིས་པ།

གཉིས་པ་ནི།

ཕྱག་འཚལ་སྟོན་ཀའི་ཟླ་བ་ཀུན་ཏུ། །

གང་བ་བརྒྱ་ནི་བརྩེགས་པའི་ཞལ་མ། །

སྐར་མ་སྟོང་ཕྲག་ཚོགས་པ་རྣམས་ཀྱིས། །

རབ་ཏུ་ཕྱེ་བའི་འོད་རབ་འབར་མ། །ཞེས་པ་སྟེ།

སྟོན་དུས་ཀྱི་ཟླ་བ་ཉ་གང་བ་བརྒྱ་ཕྲག་བརྩེགས་པ་ལྟ་བུའི་ཞལ་རས་རབ་ཏུ་མཛེས་ཤིང་དྭངས་པ་དང་། སྐར་མ་སྟོང་ཕྲག་ཚོགས་པ་བཞིན་དུ་སྐུ་ལས་འོད་ཟེར་རབ་ཏུ་འབར་བའོ། །

ཚིགས་བཅད་གསུམ་པ།

གསུམ་པ་ནི།

ཕྱག་འཚལ་གསེར་སྔོན་ཆུ་ནས་སྐྱེས་ཀྱི། །

པདྨས་ཕྱག་ནི་རྣམ་པར་བརྒྱན་མ། །

སྦྱིན་པ་བརྩོན་འགྲུས་དཀའ་ཐུབ་ཞི་བ། །

བཟོད་པ་བསམ་གཏན་སྤྱོད་ཡུལ་ཉིད་མ། །ཞེས་པ་སྟེ།

གསེར་སྔོན་པོའི་ཆུ་སྐྱེས་པདྨ་ཕྱག་ན་བསྣམས་པའི་ལྷ་མོས་འདོད་པའི་དོན་གཏོང་བའི་སྦྱིན་པ་དང་། དགེ་བ་ལ་སྤྲོ་བའི་བརྩོན་འགྲུས་དང་། དཀའ་ཐུབ་སྟེ་ཉེས་སྤྱོད་སྡོམ་པའི་ཚུལ་ཁྲིམས་དང་། ཞི་བ་སྟེ་ཆོས་རབ་ཏུ་རྣམ་འབྱེད་ཀྱི་ཤེས་རབ་དང་། འགའ་རྐྱེན་གྱིས་མི་འཁྲུགས་པའི་བཟོད་པ་དང་། དགེ་བའི་དམིགས་པར་སེམས་རྩེ་གཅིག་ཏུ་གནས་པའི་བསམ་གཏན་ཏེ་ཕྱིན་དྲུག་མཐའ་དག་ཁོང་དུ་ཆུད་པའོ། །

ཚིགས་བཅད་བཞི་པ།

བཞི་པ་ནི།

ཕྱག་འཚལ་དེ་བཞིན་གཤེགས་པའི་གཙུག་ཏོར། །

མཐའ་ཡས་རྣམ་པར་རྒྱལ་བར་སྤྱོད་མ། །

མ་ལུས་ཕ་རོལ་ཕྱིན་པ་ཐོབ་པའི། །

རྒྱལ་བའི་སྲས་ཀྱིས་ཤིན་ཏུ་བསྟེན་མ། །ཞེས་པ་སྟེ།

དེ་བཞིན་གཤེགས་པ་རྣམ་པར་སྣང་མཛད་ཀྱི་གཙུག་ཏོར་ལས། ཕན་ཡོན་མཐའ་ཡས་ཤིང་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་བའི་རིག་སྔགས་སྤྲུལ་པ་ལ་ལོངས་སྤྱོད་པའི་ལྷ་མོར་སྦྱིན་ཚུལ་བཟོད་བརྩོན་བསམ་ཤེས་ཐོག་ཐབས་སྨོན་ལམ་སྟོབས་ཡེ་ཤེས་བསྣན་པའི་ཕར་ཕྱིན་བཅུ་པོ་མ་ལུས་པ་ཐོབ་པའི་རྒྱལ་སྲས་བྱང་ཆུབ་སེམས་དཔའ་ས་བཅུ་པ་ལ་གནས་པ་རྣམས་ཀྱིས་ཀྱང་ཤིན་ཏུ་གུས་པས་བསྟེན་པའོ། །

ཚིགས་བཅད་ལྔ་པ།

ལྔ་པ་ནི།

ཕྱག་འཚལ་ཏུཏྟཱ་ར་ཧཱུྃ་ཡི་གེས། །

འདོད་དང་ཕྱོགས་དང་ནམ་མཁའ་གང་མ། །

འཇིག་རྟེན་བདུན་པོ་ཞབས་ཀྱིས་མནན་ཏེ། །

ལུས་པ་མེད་པ་འགུགས་པར་ནུས་མ། །ཞེས་པ་སྟེ།

ཏུཏྟཱ་ར་དང་ཧཱུྃ་ཡིག་གི་སྔགས་སྒྲས། འཇིག་རྟེན་འདིའི་འདོད་ཁམས་ཀྱི་གནས་ཐམས་ཅད་དང་། ནམ་མཁར་གནས་པའི་གཟུགས་གཟུགས་མེད་ཀྱི་ཁམས་ཐམས་ཅད་དང་། ཕྱོགས་བཅུའི་འཇིག་རྟེན་གྱི་ཁམས་གཞན་དག་ཐམས་ཅད་ཀྱང་ཁྱབ་ཅིང་གང་བ་དང་། ཀླུ་དང་། ཡི་དྭགས་དང་། ལྷ་དང་། ལྷ་མ་ཡིན་དང་། མི་དང་། རིག་འཛིན་དང་། མིའམ་ཅི་སྟེ་མཐུ་དང་ལྡན་པའི་འཇིག་རྟེན་བདུན་པོ་ཞབས་འོག་ཏུ་མནན་པ་ལྟར་དབང་དུ་མཛད་པ་དང་། དབང་ཕྱུག་ཆེན་པོ་ལ་སོགས་པའི་ལྷ་ཆེན་པོ་རྣམས་ཀྱང་བྲན་དུ་འགུགས་པར་ནུས་ན་ཕྲ་མོ་གཞན་དག་སྨོས་དགོས་པ་མ་ཡིན་ནོ། །

ཚིགས་བཅད་དྲུག་པ།

དྲུག་པ་ནི།

ཕྱག་འཚལ་བརྒྱ་བྱིན་མེ་ལྷ་ཚངས་པ། །

རླུང་ལྷ་སྣ་ཚོགས་དབང་ཕྱུག་མཆོད་མ། །

འབྱུང་པོ་རོ་ལང་དྲི་ཟ་རྣམས་དང་། །

གནོད་སྦྱིན་ཚོགས་ཀྱིས་མདུན་ནས་བསྟོད་མ། །ཞེས་པ་སྟེ།

ལྷའི་དབང་པོ་བརྒྱ་བྱིན་དང་། དྲང་སྲོང་གི་གཙོ་བོ་མེ་ལྷ་དང་། འཇིག་རྟེན་བྱེད་པོ་ཚངས་པ་དང་། འཇིག་རྟེན་བཟོ་གནས་དང་བཀོད་པའི་ཁྱད་པར་བྱེད་པོ་རླུང་ལྷ་དང་། གཞན་ཡང་དྲག་པོ་དང་ཁྱབ་འཇུག་སོགས་འཇིག་རྟེན་ན་དབང་ཕྱུག་ཏུ་གྲགས་པ་རྣམས་ནི་སྣ་ཚོགས་དབང་ཕྱུག་སྟེ། དེ་ལྟ་བུའི་ཆེས་ཆེ་བ་རྣམས་ཀྱིས་ཀྱང་མཆོད་པའི་གནས་སུ་གྱུར་ཅིང་། ཚོགས་བདག་སོགས་འབྱུང་པོ་དང་། རོ་ལངས་ཀྱི་ལས་བྱེད་པའི་འཇིགས་བྱེད་དང་། སྣ་ཚོགས་ཤིང་རྟ་སོགས་དྲི་ཟ་དང་། རྣམ་ཐོས་བུ་སོགས་གནོད་སྦྱིན་དང་། མདངས་འཕྲོགས་པའི་ལྷ་མ་སྲིན་རྣམས་ཏེ། འདུལ་བར་དཀའ་བའི་ཚོགས་དེ་རྣམས་ཀྱིས་ཀྱང་མདུན་ནས་བསྟོད་པར་བྱེད་པ་སྟེ་འགྲོ་བ་ཐམས་ཅད་ཀྱི་བླ་མར་གྱུར་པའོ། །

ཚིགས་བཅད་བདུན་པ།

བདུན་པ་ནི།

ཕྱལ་འཚལ་ཏྲཊ་ཅེས་བྱ་དང་ཕཊ་ཀྱིས། །

ཕ་རོལ་འཁྲུལ་འཁོར་རབ་ཏུ་འཇོམས་མ། །

གཡས་བསྐུམ་གཡོན་བརྐྱང་ཞབས་ཀྱིས་མནན་ཏེ། །

མེ་འབར་འཁྲུགས་པ་ཤིན་ཏུ་འབར་མ། །ཞེས་པ་སྟེ།

མེ་འབར་ཤིན་ཏུ་འབར་བའི་ཁྲོ་མོ་ཁྲོས་ཤིང་འཁྲུགས་པའི་སྐུར་བསྟན་ཏེ། ཏྲཊ་དང་ཕཊ་ཀྱི་སྔགས་སྒྲས་ཕ་རོལ་བྱད་མ་རྣམས་ཀྱི་འཁྲུལ་འཁོར་དང་སྔགས་ཀྱི་སྟོབས་འཇོམས་པ་དང་། ཞབས་གཡས་བསྐུམ་གཡོན་བརྐྱང་སྟབས་ཀྱིས་གདུག་པ་ཅན་རྣམས་མནན་པའི་ཚུལ་གྱིས་རིམས་ནད་ལ་སོགས་པ་ཞི་བར་མཛད་དོ། །

ཚིགས་བཅད་བརྒྱད་པ།

བརྒྱད་པ་ནི།

ཕྱག་འཚལ་ཏུ་རེས་འཇིགས་པ་ཆེན་མོ། །

བདུད་ཀྱི་དཔའ་བོ་རྣམ་པར་འཇོམས་མ། །

ཆུ་སྐྱེས་ཞལ་ནི་ཁྲོ་གཉེར་ལྡན་མཛད། །

དགྲ་བོ་ཐམས་ཅད་མ་ལུས་གསོད་མ། །ཞེས་པ་སྟེ།

ཏུ་རེའི་སྔགས་ཀྱིས་བསྐུལ་བས་ཞལ་རས་ཁྲོ་གཉེར་ལྡན་པའི་འཇིགས་པ་ཆེན་མོའི་སྐུར་བསྟན་ནས་བདུད་ཀྱི་དཔའ་བོ་དམག་དཔོན་རྣམས་འཇོམས་པ་དང་། བསྟན་ལ་སྡང་བ་དང་། སེམས་ཅན་ལ་འཚེ་བ་དང་། སྒྲུབ་པ་པོ་ལ་བར་དུ་གཅོད་པའི་དགྲ་བོ་མ་ལུས་པ་རྣམས་ཀྱི་གནོད་པའི་བསམ་སྦྱོར་མཚམས་བཅད་དེ་ཞི་བ་ཐར་པའི་ལམ་དུ་འཁྲིད་པར་མཛད་པའོ། །

ཚིགས་བཅད་དགུ་པ།

དགུ་པ་ནི།

ཕྱག་འཚལ་དཀོན་མཆོག་གསུམ་མཚོན་ཕྱག་རྒྱའི། །

སོར་མོས་ཐུགས་ཀར་རྣམ་པར་བརྒྱན་མ། །

མ་ལུས་ཕྱོགས་ཀྱི་འཁོར་ལོ་བརྒྱན་པའི། །

རང་གི་འོད་ཀྱི་ཚོགས་རྣམས་འཁྲུགས་མ། །ཞེས་པ་སྟེ།

དཀོན་མཆོག་གསུམ་མཚོན་པར་བྱེད་པའི་ཕྱག་རྒྱ། སྙིམ་པ་ཁ་སྦྱར་གྱི་གོང་མོ་སྦྱར་ཞིང་མཛུབ་མོས་བརྟེན་ནས་མཐེ་བོང་གཤིབས་ཏེ་རྩ་བར་བཀོད་པ་ཐུགས་ཀར་གཏོད་པས་རྣམ་པར་བརྒྱན་པ་དང་། རང་གི་སྐུ་ལས་བྱུང་བའི་འོད་ཟེར་གྱི་ཚོགས་རབ་ཏུ་འཁྲུགས་ཤིང་འཕྲོས་པས་ཕྱོགས་བཅུའི་ཞིང་ཁམས་མ་ལུས་པ་ཁྱབ་ཅིང་བརྒྱན་པར་མཛད་པའོ། །

ཚིགས་བཅད་བཅུ་པ།

བཅུ་པ་ནི།

ཕྱག་འཚལ་རབ་ཏུ་དགའ་བ་བརྗིད་པའི། །

དབུ་རྒྱན་འོད་ཀྱི་ཕྲེང་བ་སྤེལ་མ། །

བཞད་པ་རབ་བཞད་ཏུཏྟཱ་ར་ཡིས། །

བདུད་དང་འཇིག་རྟེན་དབང་དུ་མཛད་མ། །ཞེས་པ་སྟེ།

བརྗིད་ཅིང་མཛེས་པའི་དབུ་རྒྱན་གྱི་འོད་ཀྱི་ཕྲེང་བ་སྤེལ་ཞིང་འཕྲོ་བས་འགྲོ་བ་རྣམས་རབ་ཏུ་དགའ་བ་བསྐྱེད་པ་དང་། བཞད་པ་དང་། རབ་ཏུ་ཆེར་བཞད་པ་དང་། ཏུཏྟཱ་རའི་སྔགས་སྒྲས་བདུད་དང་འཇིག་རྟེན་ཐམས་ཅད་དབང་དུ་མཛད་ནས་ཐར་པ་དང་ཐམས་ཅད་མཁྱེན་པར་འགོད་པར་མཛད་དོ། །

ཚིགས་བཅད་བཅུ་གཅིག་པ།

བཅུ་གཅིག་པ་ནི།

ཕྱག་འཚལ་ས་གཞི་སྐྱོང་བའི་ཚོགས་རྣམས། །

ཐམས་ཅད་འགུགས་པར་ནུས་པ་ཉིད་མ། །

ཁྲོ་གཉེར་གཡོ་བའི་ཡི་གེ་ཧཱུྃ་གིས། །

ཕོངས་པ་ཐམས་ཅད་རྣམ་པར་སྒྲོལ་མ། །ཞེས་པ་སྟེ།

ཁྲོ་གཉེར་གཡོ་བའི་ཧཱུྃ་སྒྲས་ས་གཞི་སྐྱོང་བ་རྒྱལ་པོའི་ཚོགས་ཐམས་ཅད་འགུགས་པར་ནུས་པ་དང་། སེམས་ཅན་དབུལ་བའི་སྡུག་བསྔལ་མཐའ་དག་ལས་བསྒྲལ་ནས་འདོད་པའི་ལོངས་སྤྱོད་སྟེར་བར་མཛད་པའོ། །

ཚིགས་བཅད་བཅུ་གཉིས་པ།

བཅུ་གཉིས་པ་ནི།

ཕྱག་འཚལ་ཟླ་བ་དུམ་བུས་དབུ་བརྒྱན། །

བརྒྱན་པ་ཐམས་ཅད་ཤི་ཏུ་འབར་མ། །

རལ་པའི་ཁྲོད་ན་འོད་དཔག་མེད་ལས། །

རྟག་པར་ཤིན་ཏུ་འོད་ནི་མཛད་མ། །ཞེས་པ་སྟེ།

ཟླ་བ་ཕྱེད་པའི་དབུ་རྒྱན་དང་། རྒྱན་གྱི་ཁྱད་པར་གཞན་དང་། རལ་པའི་ཁྲོད་ན་བཞུགས་པའི་འོད་དཔག་མེད་པའི་སྐུ་བཅས་ལས་རྟག་པར་འོད་ཟེར་ཤིན་ཏུ་རབ་ཏུ་འཕྲོ་བའོ། །

ཚིགས་བཅད་བཅུ་གསུམ་པ།

བཅུ་གསུམ་པ་ནི།

ཕྱག་འཚལ་བསྐལ་པ་ཐ་མའི་མེ་ལྟར། །

འབར་བའི་ཕྲེང་བའི་དབུས་ན་གནས་མ། །

གཡས་བརྐྱང་གཡོན་བསྐུམ་ཀུན་ནས་བསྐོར་དགས། །

དགྲ་ཡི་དཔུང་ནི་རྣམ་པར་འཇོམས་མ། །ཞེས་པ་སྟེ།

བསྐལ་པ་འཇིག་དུས་ཀྱི་མེ་ལྟར་འབར་བའི་དབུས་ན་བཞུགས་ཤིང་། ཞབས་གཡས་གཡོན་བརྐྱང་བསྐུམ་གྱིས་ཀུན་ནས་བསྐོར་བའི་དྲག་པོའི་སྟངས་སྟབས་དང་དགའ་བའི་ཉམས་ཀྱིས་མི་དང་མི་མ་ཡིན་པའི་དགྲ་བོའི་དཔུང་ཚོགས་ཐམས་ཅད་རྣམ་པར་འཇོམས་པའོ། །

ཚིགས་བཅད་བཅུ་བཞི་པ།

བཅུ་བཞི་པ་ནི།

ཕྱག་འཚལ་ས་གཞིའི་ངོས་ལ་ཕྱག་གི །

མཐིལ་གྱིས་བསྣུན་ཅིང་ཞབས་ཀྱིས་བརྡུང་མ། །

ཁྲོ་གཉེར་ཅན་མཛད་ཡི་གེ་ཧཱུྃ་གིས། །

རིམ་པ་བདུན་པོ་རྣམས་ནི་འགེམས་མ། །ཞེས་པ་སྟེ།

ཞལ་རས་ཁྲོ་གཉེར་ཅན་དུ་མཛད་ཅིང་འཇིགས་པའི་ཧཱུྃ་སྒྲ་བཅས་ཕྱག་ཞབས་ཀྱི་མཐིལ་རྣམས་ས་གཞིའི་ངོས་ལ་བསྣུན་པས་ས་ཆེན་པོ་འདི་ཉིད་ཀྱི་འོག་ཏུ་ཐོག་ཕུབས་རིམ་པ་བདུན་བཞིན་གནས་པའི་མི་མ་ཡིན་གྱི་སྣོད་བཅུད་དག་དུམ་བུར་འཐོར་བར་མཛད་པའོ། །

ཚིགས་བཅད་བཅོ་ལྔ་པ།

བཅོ་ལྔ་པ་ནི།

ཕྱག་འཚལ་བདེ་མ་དགེ་མ་ཞི་མ། །

མྱ་ངན་འདས་ཞི་སྤྱོད་ཡུལ་ཉིད་མ། །

སྭཱ་ཧཱ་ཨོཾ་དང་ཡང་དག་ལྡན་པས། །

སྡིག་པ་ཆེན་པོ་འཇོམས་པ་ཉིད་མ། །ཞེས་པ་སྟེ།

ཞི་བ་མྱ་ངན་ལས་འདས་པའི་གོ་འཕང་ལྷ་མོའི་སྤྱོད་ཡུལ་དུ་གྱུར་པས་རྟག་ཏུ་བདེ་བ་དང་དགེ་བ་དང་ཞི་བའི་ངང་ཚུལ་དུ་གནས་ཏེ་གདུལ་བྱ་རྣམས་ཀྱང་དེ་དག་ཏུ་འགོད་པ་དང་། མགོ་མཇུག་ཏུ་ཨོཾ་དང་སྭཱ་ཧཱ་ལྡན་པའི་རིག་སྔགས་བཟླས་པས་སྡིག་པ་དང་སྡུག་བསྔལ་ཆེན་པོ་དག་ཀྱང་འཇོམས་པར་བྱེད་དོ། །

ཚིགས་བཅད་བཅུ་དྲུག་པ།

བཅུ་དྲུག་པ་ནི།

ཕྱག་འཚལ་ཀུན་ནས་བསྐོར་རབ་དགའ་བའི། །

དགྲ་ཡི་ལུས་ནི་རབ་ཏུ་འགེམས་མ། །

ཡི་གེ་བཅུ་པའི་ངག་ནི་བཀོད་པའི། །

རིག་པ་ཧཱུྃ་ལས་སྒྲོལ་མ་ཉིད་མ། །ཞེས་པ་སྟེ།

རྩ་སྔགས་ཡི་གེ་བཅུ་པ་དང་ས་བོན་ཧཱུྃ་ཡིག་ལས་བྱུང་བའི་ལྷ་མོ་སྒྲོལ་མ་ནི་བྱང་ཆུབ་སེམས་དཔའ་དགའ་བའི་ཐུགས་ལྡན་རྣམས་ཀྱིས་བསྐོར་ཞིང་། སེམས་ཅན་རྣམས་ལ་འཚེ་བའི་དགྲ་ཡི་ལུས་ནི་རབ་ཏུ་འགེམས་པའོ། །

ཚིགས་བཅད་བཅུ་བདུན་པ།

བཅུ་བདུན་པ་ནི།

ཕྱག་འཚལ་ཏུ་རེའི་ཞབས་ནི་བརྡབས་པས། །

ཧཱུྃ་གི་རྣམ་པའི་ས་བོན་ཉིད་མ། །

རི་རབ་མན་དཱ་ར་དང་འབིགས་བྱེད། །

འཇིག་རྟེན་གསུམ་རྣམས་གཡོ་བ་ཉིད་མ། །ཞེས་པ་སྟེ།

ཧཱུྃ་ཡིག་ས་བོན་དུ་གྱུར་པའི་ལྷ་མོ་ཏུ་རེའམ་མྱུར་མས་ཞབས་གཉིས་བརྡབས་པས་རིའི་རྒྱལ་པོ་རི་རབ་དང་། མན་དཱ་ར་ཞེས་བྱ་བའི་རི་དང་། རི་བོ་འབིགས་བྱེད་དང་བཅས་པའི་འཇིག་རྟེན་གསུམ་སྟེ་ས་འོག་ས་སྟེང་ས་བླ་རྣམས་གཡོ་བར་བྱེད་དོ། །

ཚིགས་བཅད་བཅོ་བརྒྱད་པ།

བཅོ་བརྒྱད་པ་ནི།

ཕྱག་འཚལ་ལྷ་ཡི་མཚོ་ཡི་རྣམ་པའི། །

རི་དྭགས་རྟགས་ཅན་ཕྱག་ན་བསྣམས་མ། །

ཏཱ་ར་གཉིས་བརྗོད་ཕཊ་ཀྱི་ཡི་གེས། །

དུག་རྣམས་མ་ལུས་པ་ནི་སེལ་མ། །ཞེས་པ་སྟེ།

ལྷ་ཡི་མཚོ་དང་འདྲ་བའི་ཟླ་བ་དཀར་ཟླུམ་ཕྱག་ན་བསྣམས་པའི་ལྷ་མོའི་རིག་སྔགས་ཏཱ་ར་གཉིས་བརྗོད་ཀྱི་མཐའ་བརྟེན་ཕཊ་ཡིག་བཏགས་པས་ནི་བརྟན་གཡོའི་དུག་རྣམས་མ་ལུས་སེལ་བར་བྱེད་དོ། །

ཚིགས་བཅད་བཅུ་དགུ་པ།

བཅུ་དགུ་པ་ནི།

ཕྱག་འཚལ་ལྷ་ཡི་ཚོགས་རྣམས་རྒྱལ་པོ། །

ལྷ་དང་མིའམ་ཅི་ཡིས་བསྟེན་མ། །

ཀུན་ནས་གོ་ཆ་དགའ་བའི་བརྗིད་ཀྱིས། །

རྩོད་དང་རྨི་ལམ་ངན་པ་སེལ་མ། །ཞེས་པ་སྟེ།

འདོད་ལྷའི་ཚོགས་དང་མིའི་རྒྱལ་པོ་དང་། ས་ཆུ་ཤིང་སོགས་ལ་གནས་པའི་ལྷ་དང་། མིའམ་ཅི་སོགས་ཀྱིས་ཞབས་པད་ལ་གུས་པར་བསྟེན་པའི་ལྷ་མོ་ཡི་དམ་གྱི་ལྷར་བཟུང་བའི་གོ་ཆ་བགོས་ན་རྣམ་ཀུན་དགའ་བདེར་གནས་པའི་གཟི་བརྗིད་ཀྱིས་ཕ་རོལ་པོའི་རྩོད་པ་དང་རྨི་ལམ་ངན་པ་སོགས་སེལ་བར་བྱེད་དོ། །

ཚིགས་བཅད་ཉི་ཤུ་པ།

ཉི་ཤུ་པ་ནི།

ཕྱག་འཚལ་ཉི་མ་ཟླ་བ་རྒྱས་པའི། །

སྤྱན་གཉིས་པོ་ལ་འོད་རབ་གསལ་མ། །

ཧ་ར་གཉིས་བརྗོད་ཏུཏྟཱ་ར་ཡིས། །

ཤིན་ཏུ་དྲག་པོའི་རིམས་ནི་སེལ་མ། །ཞེས་པ་སྟེ།

སྤྱན་གཉིས་པོ་ལས་འོད་རབ་འཕྲོས་པས་སྡིག་སྡུག་སྲེག་པ་དང་། ཚེ་བསོད་དཔལ་འབྱོར་རྒྱས་པར་བྱེད་པའི་ལྷ་མོའི་རིག་སྔགས་ཧ་ར་གཉིས་བརྗོད་དེ། ཨོཾ་ན་མཿཏཱ་རེ་ན་མོ་ཧ་རེ་ཧཱུྃ་ཧ་རེ་སྭཱ་ཧཱ་དང་། ཏུ་ཏྟཱ་ར་ཡི་སྔགས་བཅས་བཟླས་ན་གསོ་བར་དཀའ་བའི་རིམས་ནད་དྲག་པོ་རྣམས་ཀྱང་སེལ་བར་བྱེད་དོ། །

ཚིགས་བཅད་ཉེར་གཅིག་པ།

ཉེར་གཅིག་པ་ནི།

ཕྱག་འཚལ་དེ་ཉིད་གསུམ་རྣམས་བཀོད་པས། །

ཞི་བའི་མཐུ་དང་ཡང་དག་ལྡན་མ། །

གདོན་དང་རོ་ལངས་གནོད་སྦྱིན་ཚོགས་རྣམས། །

འཇོམས་པ་ཏུ་རེ་རབ་མཆོག་ཉིད་མ། །ཞེས་པ་སྟེ།

གདུལ་བྱ་སེམས་ཅན་རྣམས། རྒྱུ་མཚན་མ་མེད་པ། འབྲས་བུ་སྨོན་པ་མེད་པ། ངོ་བོ་སྟོང་པ་ཉིད་དེ་དེ་ཁོ་ན་ཉིད་གསུམ་གྱི་ལམ་ལ་བཀོད་པས་སྡུག་བསྔལ་གཏན་དུ་ཞི་བའི་ཐར་པ་ལ་འཁྲིད་པར་མཛད་པའི་མཐུ་དང་ལྡན་ཞིང་། གདོན་དང་རོ་ལངས་གནོད་སྦྱིན་སོགས་གདུག་པ་ཅན་མཐའ་དག་ཏུ་རེ་སྟེ་མྱུར་དུ་འཇོམས་པའི་ལྷ་མོ་ནི་ཡི་དམ་གྱི་ལྷ་ཀུན་ལས་ཀྱང་རབ་ཀྱི་མཆོག་ཏུ་གྱུར་པ་ཡིན་ནོ། །གཞུང་འདི་བླ་མེད་རྒྱུད་སྡེ་ཡིན་ཕྱིར་སྔགས་ཀྱི་བཤད་པ་སྣ་ཚོགས་ཡོད་མོད། རང་རེ་དམན་པ་རྣམས་ཀྱི་བློ་ཡུལ་དུ་འགྱུར་དཀའ་བར་བརྟེན་ཚིག་དོན་འོལ་སྤྱི་ཙམ་གྱིས་ཆོག་པར་བྱས་སོ། །

ཕན་ཡོན།

མཚན་བསྟན་པ།

གཉིས་པ་ཕན་ཡོན་ལ་གཉིས། མཚན་བསྟན་པ་དང་། ཕན་ཡོན་དངོས་སོ། །

དང་པོ་ནི།

རྩ་བའི་སྔགས་ཀྱིས་བསྟོད་པ་འདི་དང་། །

ཕྱག་འཚལ་བ་ནི་ཉི་ཤུ་རྩ་གཅིག །ཅེས་པ་སྟེ།

རྩ་སྔགས་ཡི་གེ་བཅུ་པ་ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ་སྟེ་དོན་ནི་སྒྲོལ་མ་སྡུག་བསྔལ་ལས་སྒྲོལ་མ་གཞི་ཚུགས་ཞེས་བྱའོ། །སྔགས་འདིའི་སྒོ་ནས་བསྟོད་པའང་འདི་ཉིད་ཡིན་ལ། ཕྱག་འཚལ་ལོ་ཉེར་གཅིག་ལྡན་པའི་བསྟོད་པའང་འདི་ཉིད་ཡིན་ནོ། །

ཕན་ཡོན་དངོས།

ལྷར་བསྙེན་པའི་ཕན་ཡོན།

གཉིས་པ་ལ་གསུམ། ལྷར་བསྙེན་པའི་ཕན་ཡོན། རིག་སྔགས་དྲན་པའི་ཕན་ཡོན། རྒྱུད་ཀློག་པའི་ཕན་ཡོན་ནོ། །

དང་པོ་ནི།

ལྷ་མོ་ལ་གུས་ཡང་དག་ལྡན་པའི། །

བློ་ལྡན་གང་གིས་རབ་ཏུ་བརྗོད་པས། །

སྲོད་དང་ཐོ་རངས་ལངས་པར་བྱས་ནས། །

དྲན་པས་མི་འཇིགས་ཐམས་ཅད་རབ་སྟེར། །

སྡིག་པ་ཐམས་ཅད་རབ་ཏུ་ཞི་བ། །

ངན་འགྲོ་ཐམས་ཅད་འཇོམས་པ་ཉིད་དོ། །

རྒྱལ་བ་བྱེ་བ་ཕྲག་བདུན་རྣམས་ཀྱིས། །

མྱུར་དུ་དབང་ནི་བསྐུར་བར་འགྱུར་ལ། །

འདི་ལས་ཆེ་བ་ཉིད་ནི་ཐོབ་ཅིང་། །

སངས་རྒྱས་གོ་འཕང་མཐར་ཐུག་དེར་འགྲོ། །ཞེས་པ་སྟེ།

དད་བརྩོན་ཤེས་རབ་ལྡན་པའི་གང་ཟག་དག་གིས་སྐུ་གསུང་ཐུགས་ཀྱི་ཡོན་ཏན་དྲན་པའི་སྒོ་ནས་སྲོད་དང་ཐོ་རངས་ཀྱི་དུས་སུ་བསྟོད་ཕྱག་འདི་ཉིད་བརྗོད་པས་འཕགས་མ་སྒྲོལ་མ་བསྒྲུབ་ན་མི་འཇིགས་པའི་གནས་དབང་ཕྱུག་ཕུན་སུམ་ཚོགས་པ་ཐོབ་པ་དང་། རྒྱུ་སྡིག་པ་མི་དགེ་བ་ཐམས་ཅད་རབ་ཏུ་ཞི་ནས་འབྲས་བུ་ངན་འགྲོར་སྐྱེ་བ་ཐམས་ཅད་འཇོམས་པར་བྱེད་པ་དང་། སྒྲོལ་མ་ཉིད་དང་ལྷན་དུ་གཤེགས་པའི་རྒྱལ་བ་བྱེ་བ་ཕྲག་བདུན་རྣམས་ཀྱི་ཞལ་མྱུར་དུ་མཐོང་སྟེ། དབང་བསྐུར་བ་ཐོབ་པས་ཡོན་ཏན་གྱི་ཆེ་བ་དུ་མ་ལྡན་པའི་ཕྱག་རྒྱ་ཆེན་པོའི་དངོས་གྲུབ་འཕགས་པའི་ས་རྣམས་རིམ་གྱིས་ཐོབ་ནས་མཐར་ཐུག་སངས་རྒྱས་ཀྱི་གོ་འཕང་བླ་ན་མེད་པ་དེར་འགྲོ་བར་འགྱུར་རོ། །

རིག་སྔགས་དྲན་པའི་ཕན་ཡོན།

གཉིས་པ་ནི།

དེ་ཡི་དུག་ནི་དྲག་པོ་ཆེན་པོ། །

བརྟན་གནས་པའམ་གཞན་ཡང་འགྲོ་བ། །

ཟོས་པ་དང་ནི་འཐུངས་པ་ཉིད་ཀྱང་། །

དྲན་པས་རབ་ཏུ་སེལ་བ་ཉིད་ཐོབ། །

གདོན་དང་རིམས་དང་དུག་གིས་བཟིར་བའི། །

སྡུག་བསྔལ་ཚོགས་ནི་རྣམ་པར་སྤོང་སྟེ། །

སེམས་ཅན་གཞན་པ་རྣམས་ལ་ཡང་ངོ་། །ཞེས་པ་སྟེ།

ལྷ་མོའི་རིག་སྔགས་བཅོས་མིན་གྱི་དད་པས་དྲན་པའི་གང་ཟག་དེའི་རྒྱུད་ལ་ཟོས་འཐུངས་རེག་པ་སོགས་ཀྱིས་རྒྱུ་བ་དང་མི་རྒྱུ་བའི་དུག་སྡུག་བསྔལ་ཚབས་ཆེན་བསྐྱེད་པའི་དྲག་པོ་ཞུགས་པ་ཡང་སེལ་བ་དང་། གདོན་དང་རིམས་ཀྱིས་གཟིར་བའི་སྡུག་བསྔལ་སྣ་ཚོགས་པ་རྣམས་ཀྱང་སྤོང་བར་འགྱུར་ཞིང་། རིག་སྔགས་ཀྱི་སྦྱོར་བ་བསྟེན་ན་སེམས་ཅན་གཞན་གྱི་དུག་དང་སྡུག་བསྔལ་ཡང་མེད་པར་བྱེད་དོ། །

རྒྱུད་ཀློག་པའི་ཕན་ཡོན།

གསུམ་པ་ནི།

གཉིས་གསུམ་བདུན་དུ་མངོན་པར་བརྗོད་ན། །

བུ་འདོད་པས་ནི་བུ་ཐོབ་འགྱུར་ཞིང་། །

ནོར་འདོད་པས་ནི་ནོར་རྣམས་ཉིད་ཐོབ། །

འདོད་པ་ཐམས་ཅད་ཐོབ་པར་འགྱུར་ཏེ། །

བགེགས་རྣམས་མེད་ཅིང་སོ་སོར་འཇོམས་འགྱུར། །ཞེས་པ་སྟེ།

བུ་ནོར་ལ་སོགས་པ་འདོད་པའི་དོན་རྣམས་བསྒྲུབ་པར་འདོད་པ་དག་གིས་བསྟོད་ཕྱག་གི་རྒྱུད་ཉིད་གཉིས་གསུམ་བདུན་ལ་སོགས་པ་དད་པས་མངོན་པར་བརྗོད་ན་གེགས་མེད་ཡིད་བཞིན་འགྲུབ་པར་འགྱུར་རོ། །གཞུང་ནས་བསྟན་པ་བཞིན་ལྷ་མོ་སྒྲོལ་མར་གསོལ་བ་རྩེ་གཅིག་ཏུ་བཏབས་པས་ཉམ་ངའི་གནས་ནས་ཐར་བའི་ལོ་རྒྱུས་ཀྱང་ཡོད་དེ། ཁ་ཆེའི་སློབ་དཔོན་ཐམས་ཅད་མཁྱེན་པའི་བཤེས་གཉེན་མི་བརྒྱ་དང་བདུན་གྱིས་བསྐོར་བ་ཙན་ལྡན་གྱི་མེས་སྲེག་པའི་ཚེ་སྨྲེ་སྔགས་ཀྱིས་གསོལ་བ་བཏབ་པའི་སྐད་ཅིག་དེར་འཕགས་མའི་ཕྱག་ནས་ཆར་རྒྱུན་གཉའ་ཤིང་ཙམ་བབས་ནས་མཚོ་ནང་གི་པདྨ་ལྟར་གྱུར་པ་དང་། ཙནྡྲ་གོ་མི་རྒྱལ་པོའི་ཆད་པས་གངྒཱའི་ཆུར་བསྐྱུར་བ་ན་གསོལ་བ་བཏབ་པས་སིང་ག་ལའི་གླིང་དུ་བཞག་པས་མཚོན་ནོ། །

ཉམས་ལེན་བྱ་ཚུལ།

གསུམ་པ་ཉམས་ལེན་བྱ་ཚུལ་ནི། སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཏེ་དཀོན་མཆོག་ཀུན་འདུས་ཀྱི་ངོ་བོ་རྗེ་བཙུན་འཕགས་མ་སྒྲོལ་མ་ལ་བདག་ཅག་རྣམས་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་སྐྱོབ་པའི་ནུས་མཐུ་མངའ་བས། རེ་ལྟོས་ལིང་སྐྱུར་གྱི་དད་པ་དང་། བསྐྱབ་ཏུ་གསོལ་སྙམ་པའི་འདུན་པ་དང་། སྐྱོབ་ངེས་པའི་ཡིད་ཆེས་ཏེ་གསུམ་དང་ལྡན་པའི་སྒོ་ནས་སྐྱབས་སུ་འགྲོ་ཞིང་། དེང་ཕྱིན་བདག་དང་སེམས་ཅན་ཐམས་ཅད་སྐྱབས་འོག་ཏུ་ཚུད་ཡོད་སྙམ་པའི་ངེས་ཤེས་བརྟན་པོའང་བྱ། མཐའ་ཡས་པའི་སེམས་ཅན་ཐམས་ཅད་བདག་གི་ཕ་མར་མ་གྱུར་པ་ནི་གཅིག་ཀྱང་མེད་པའི་དྲིན་ཅན། བདེ་བ་སྒྲུབ་འདོད་དང་སྡུག་བསྔལ་སྤོང་འདོད་ཤ་སྟག་ཡིན་ཀྱང་། སྡུག་བསྔལ་གྱི་རྒྱུ་འབའ་ཞིག་བསྒྲུབས་པས། འབྲས་བུ་འཁོར་བ་དང་ངན་སོང་གི་སྡུག་བསྔལ་དོས་དྲག་པོས་ཐར་དུས་མེད་པར་མནར་བ་འདི་རྣམས། བདག་གིས་བདེ་བ་ཐམས་ཅད་ཀྱི་མཆོག་བླ་ན་མེད་པའི་སངས་རྒྱས་ཀྱི་གོ་འཕང་ལ་ཅི་ནས་ཀྱང་འགོད་པར་བྱ། དེ་ལྟ་བུ་སྒྲུབ་པའི་ནུས་པ་ད་ལྟ་བདག་ལ་མེད་པས། བདག་གིས་འཕགས་མ་སྒྲོལ་མའི་སྒོམ་ཟླས་ཟབ་མོ་ཉམས་སུ་བླངས་ནས་འཕགས་མའི་གོ་འཕང་དམ་པ་བསྒྲུབས་ཏེ་འཁོར་བ་ཇི་སྲིད་བར་འགྲོ་བའི་དོན་ལ་འཕགས་མའི་རྣམ་ཐར་དང་མཚུངས་པར་འཇུག་པར་བགྱིའོ་སྙམ་པའི་བཅོས་མིན་གྱི་འདུན་པ་དྲག་པོས་བྱང་ཆུབ་མཆོག་ཏུ་སེམས་བསྐྱེད་པའི་ལྷག་བསམ་དང་མ་བྲལ་བའི་ངང་ནས། མདུན་གྱི་ནམ་མཁའ་འཇའ་སྤྲིན་མེ་ཏོག་འཁྲིགས་པའི་དབུས་སུ་སྣ་ཚོགས་པདྨ་དང་ཟླ་བའི་གདན་ལ་རྗེ་བཙུན་འཕགས་མ་སྒྲོལ་མ་སྐུ་མདོག་ལྗང་གུ་མརྒད་ཀྱི་ཕུང་པོ་ལྟ་བུ། ཞལ་གཅིག་ཕྱག་གཉིས་མ་གཡས་སྐྱབས་སྦྱིན་གྱི་ཕྱག་རྒྱ་མཛད་ཅིང་། གཡོན་མཐེབ་སྲིན་སྦྱར་བས་ཨུཏྤལ་སྔོན་པོ་མེ་ཏོག་རབ་ཏུ་རྒྱས་པ་ཡིད་དུ་འོང་བ་སྡོང་བུ་དང་བཅས་པ་ཐུགས་ཀར་འཛིན་པ། བཅུ་དྲུག་ལོན་པའི་ལང་ཚོ་རྒྱས་ལ་དར་བ། ནུ་མའི་དཀྱི་འཁོར་རྒྱས་ཤིང་མཁྲེགས་པ། འཛུམ་པའི་ཞལ་དང་། པདྨའི་འདབ་མ་ལྟར་ཡངས་པའི་སྤྱན་དང་ལྡན་ཞིང། རྣམ་པར་བཀྲ་བའི་ལྷའི་དར་གྱི་ཤམ་ཐབས་དང་སྟོད་གཡོག་གསོལ་བ། དབུ་སྐྲ་མཐོན་མཐིང་སྤྱི་བོར་བཅིངས་ཤིང་རིན་པོ་ཆེའི་དབུ་རྒྱན། སྙན་རྒྱན། མགུལ་རྒྱན། སྐ་རགས། དོ་ཤལ་རྣམས་དང་གསེར་གྱི་གདུ་བུས་མཛེས་པ་ཡིད་དུ་འོང་ཞིང་འོད་ཟེར་འཕྲོ་བ། ཞབས་གཉིས་གཡས་བརྐྱང་བའི་སྐྱིལ་ཀྲུང་ཕྱེད་པས་བཞུགས་ཤིང་། ཕྱོགས་བཅུ་དུས་གསུམ་གྱི་སྐྱབས་གནས་ཀུན་འདུས་ཀྱི་ངོ་བོར་གྱུར་པ་དེའི་སྐྱབས་སྦྱིན་གྱི་ཕྱག་རྒྱའི་འོག་ཏུ་བདག་དང་བསྲུང་བྱ་རྣམས་ཚུད་པར་མོས་ལ་བསྟོད་པ་ཅི་ནུས་འདོན། བསྟོད་པའི་ནུས་པ་འགྲུབ་བྱེད་སྔགས་ཡིན་པས་བསྟོད་པ་གྲུབ་མཚམས་ལྷ་མོའི་ཐུགས་ཀར་ཟླ་བའི་སྟེང་དུ་ཏཱྃ་ཡིག་ལྗང་ཁུ་ལ་སྔགས་ཀྱིས་བསྐོར་བར་བསམས་ཏེ་རྩ་སྔགས་ཡི་གེ་བཅུ་པ་ཅི་འགྲུབ་བཟླ། ཐུན་མཐར་ལྷ་མོ་འོད་དུ་ཞུ་ནས་རང་ཉིད་ལ་ཐིམ་པས་བྱིན་རློབ་དངོས་གྲུབ་ཐམས་ཅད་ཐོབ་སོང་སྙམ་པའི་ངེས་ཤེས་བསྐྱེད། འདིས་མཚོན་དུས་གསུམ་བསགས་ཡོད་ཀྱི་དགེ་བ་རྣམས་བདག་གཞན་སེམས་ཅན་ཐམས་ཅད་ཀྱིས་མྱུར་དུ་བླ་ན་མེད་པ་རྫོགས་པའི་སངས་རྒྱས་ཀྱི་གོ་འཕང་འཐོབ་པའི་རྒྱུར་འགྱུར་བའི་བསྔོ་སྨོན་བྱ། ལྷ་མོའི་སྐུ་མདོག་ཞལ་ཕྱག་དང་ཞི་ཁྲོ་སྣ་ཚོགས་ཡོད་པ་ནི། ཉི་མ་སྦས་པའི་བསྟོད་སྒྲུབ་ལས། འཕགས་མ་སྒྲོལ་མ་ཆེ་ཉིད་སྐུ། །ཡོངས་གྱུར་འདོད་སྦྱིན་སྣ་ཚོགས་གཟུགས། །སྣ་ཚོགས་ནོར་བུའི་ཚུལ་བཞིན་དུ། །གདུལ་བྱའི་དབང་ཅན་ཡོངས་གྱུར་བལྟ། །ཞེས་པ་བཞིན་གདུལ་བྱའི་དབང་གིས་ཡིན་གྱི་ངོ་བོ་ཐ་དད་པ་ནི་མིན་ནོ། །

དེ་ལྟར་སྦྱོར་དངོས་མཇུག་གསུམ་ཚང་བར་ཉམས་སུ་བླང་ན་དགེ་ཚོགས་གོང་འཕེལ་གྱིས་འགལ་རྐྱེན་བར་ཆད་ཞི་ཞིང་། མཐུན་རྐྱེན་བསམ་དོན་ཡིད་བཞིན་འགྲུབ་པར་འགྱུར་རོ། །འོན་ཏེ་ཡིད་ཆེས་པའི་དད་པ་བརྟན་པོ་ནི་མེད་དུ་མི་རུང་སྟེ། གཤེད་ནག་རྒྱུད་རྟོག་པ་གསུམ་པ་ལས།

སྔགས་དང་རྫས་ཀྱི་སྦྱོར་བ་ལ། །

དཔྱད་ན་དངོས་གྲུབ་མི་འགྲུབ་སྟེ། །

གལ་ཏེ་ཡི་གཉིས་ཟ་གྱུར་ཏམ། །

བསམ་པར་འགྱུར་རམ་དད་པ་ཉམས། །

དེ་ཚེ་དངོས་གྲུབ་ཉེ་བ་ཡང་། །

ཕྱིར་ལྡོག་འགྱུར་བར་གདོན་མི་ཟ། །

དད་པ་བརྟན་པོས་བསྒྲུབ་པ་ན། །

ནམ་མཁའ་མེད་པར་གྱུར་ན་ཡང་། །

སྔགས་ཀྱི་དངོས་གྲུབ་མེད་མི་སྲིད། །

ལྷ་དང་དྲང་སྲོང་གིས་བཤད་པའི། །

རིག་སྔགས་བསླུ་བ་མི་སྲིད་ན། །

འདོད་ཆགས་བྲལ་བས་བཤད་པ་ཡི། །

གསང་སྔགས་སྦྱོར་བས་བསླུ་བ་ནི། །

མ་བྱུང་འབྱུང་བར་མི་འགྱུར་རོ། །

ཆོས་ཉིད་བསམ་གྱིས་མི་ཁྱབ་པའི། །

དོན་ལ་ཐེ་ཚོམ་མེད་པ་ཡི། །

མཁས་པ་ལ་ནི་དངོས་གྲུབ་ཉེ། །

ཡང་ན་བླུན་པོ་དད་པ་བརྟན། །

དེ་ལ་སྦྱོར་བའི་དངོས་གྲུབ་ཉེ། །

རྟོག་ཅིང་དཔྱོད་པའི་རྟོག་གེ་པ། །

དེ་ལ་སྦྱོར་བའི་དངོས་གྲུབ་རིང་། །

བླ་མས་མན་ངག་བསྟན་བྱས་ཀྱང་། །

སློབ་མ་ཡིད་གཉིས་ཡོད་པ་ན། །

དེ་ལ་དངོས་གྲུབ་རིང་བར་བཤད། །

བླ་མས་མན་ངག་སྦས་བྱས་ཀྱང་། །

སློབ་མ་ཡིད་གཉིས་མི་ཟ་ཞིང་། །

བླ་མའི་མན་ངག་དམ་པ་ཞེས། །

གཅེས་སྤྲས་བྱས་ན་འགྲུབ་པར་ངེས། །ཞེས་སོ། །

སྨྲས་པ།

འཕགས་བོད་མཁས་པའི་རྣམ་དཔྱོད་ཉི་ཟེར་གྱིས། །

ཕྱེས་པའི་གཞུང་འགྲེལ་ཉམས་ལེན་པདྨོའི་ཚལ། །

རྒྱུ་སྐར་གྲངས་བཞིན་ཕ་མཐའ་ཡས་པའི་ཕྱིར། །

རྨོངས་པའི་གཏམ་ལ་དགོས་པ་མ་མཆིས་ཀྱང་། །

ཕྲིན་ལས་ཀུན་སྒྲུབ་ཨཪྱ་ཏཱ་རེ་མས། །

བྱང་ཆུབ་བར་དུ་རྗེས་འཛིན་རྟེན་འབྲེལ་དང་། །

སྙིགས་དུས་སྐྱེས་པའི་བློ་དམན་བདག་འདྲ་ལ། །

ཅུང་ཟད་ཕན་པའི་བསམ་པས་ངས་འདི་བཀོད། །

བརྗོད་བྱའི་དོན་ནི་ཟབ་ཅིང་རྒྱ་ཆེ་ལ། །

ཁོ་བོ་སྐྱེས་སྦྱངས་བློ་གྲོས་ཕྲ་བའི་ཕྱིར། །

ཚིག་དོན་ནོར་བའི་ཉེས་པ་ཡོད་ངེས་དག །

ལྷ་མོའི་བརྩེ་བས་དག་ཚངས་མཛད་དུ་གསོལ། །

འདིར་འབད་ལས་བྱུང་དགེ་བའི་ལོངས་སྤྱོད་ཀྱིས། །

སེམས་ཅན་གནས་མཐར་རྒུད་པའི་དབུལ་བ་ཀུན། །

ཞི་ནས་གཏན་བདེ་ཐར་པའི་གོ་འཕང་མཆོག །

རིང་མིན་འཐོབ་པའི་བཀྲ་ཤིས་དཔལ་འབར་ཤོག །

ཅེས་པ་ཇོ་ནང་རྗེ་བཙུན་ཏཱ་ར་ནཱ་ཐའི་ཡིག་ཆ་ཁག་དང་། མངའ་བདག་མར་པ་ལོ་ཙཱ་ནས་བརྒྱུད་པའི་སྒྲོལ་མའི་སྒྲུབ་ཐབས་སོགས་ལ་ཁུངས་བཅོལ་ཏེ་ལས་དང་པོ་པ་རྣམས་ལ་གོ་སླ་གཙོར་བཟུང་གིས་རབ་རྒྱན་ཤིང་བྱ་ཟླ་ ༢ ཚེས་ ༡༦ ཉིན་རིགས་གཟུགས་ནོར་གྱིས་དབེན་པའི་རྒྱལ་ཁམས་པ་སྐྱོ་བྲག་དགའ་དབང་གིས་གདན་ས་དཔལ་ཆེན་ཆོས་གླིང་གི་རང་ཤག་ཏུ་སུག་ལས་བགྱིས་པ་དགེ་བར་གྱུར་ཅིག། །།