 སྔ་འགྱུར་སྨིན་གླིང་དཔེ་ཚོགས།པོད་བཅོ་ལྔ་པ།ལོ་ཆེན་དྷརྨ་ཤྲཱི།འོག་མིན་ཨོ་རྒྱན་སྨིན་གྲོལ་གླིང་།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། ཐུགས་རྗེ་ཆེ་ཞུ།༈ སྐྱེ་རྒུའི་བདེ་སྐྱིད་ཀྱི་འབྱུང་གནས་རྒྱལ་བ་མཉམ་མེད་དོན་ཀུན་གྲུབ་པ་ཆེན་པོའི་གསང་གསུམ་ཡེ་ཤེས་ཀྱི་སྒྱུ་འཕྲུལ་ངོ་མཚར་ཆོས་སྐུའི་རིང་བསྲེལ་གྱི་གཟུགས་སུ་བལྟམས་པ་གསུང་རབ་རྒྱལ་བའི་བཀའ་འགྱུར་རིན་པོ་ཆེ་དང་། ཐུབ་པའི་དགོངས་པ་རང་སྟོབས་ཀྱི་བཀྲལ་ནུས་པའི་འཕགས་ཡུལ་པཎ་གྲུབ་རྣམས་ཀྱི་མཛད་པའི་བསྟན་འགྱུར་རིན་པོ་ཆེ་སྟེ་མདོ་སྔགས་གཉིས་ལྡན་གྱི་ཡོངས་རྫོགས་བསྟན་པ་རྒྱ་མཚོ་འདི་ཉིད། དེང་གི་ཆར་གངས་རིའི་ལྗོངས་ཀྱི་ཡེ་གེ་ཁོ་ནའི་གཟུགས་སུ་བཞུགས་པ་ནི་སྤྲུལ་པའི་མཁན་སློབ་ཆོས་གསུམ་གྱི་ཐུགས་བསྐྱེད་ཉག་གཅིག་ལས་བྱུང་བ་དང་། དེ་དག་མི་ནུབ་བརྒྱུད་འཛིན་ཡུན་གནས་ཀྱི་ཆེད་དུ་གངས་ལྗོངས་ཆོས་བརྒྱུད་ཁག་ལས་བྱོན་པའི་རིས་སུ་མ་ཆད་པའི་སྐྱེས་ཆེན་རྣམས་ཀྱིས་བཀའ་བསྟན་རིན་པོ་ཆེའི་དགོངས་སྙིང་ཅན་གྱི་གསང་རབ་གླེགས་བམ་སྟོང་ཕྲག་མང་པོ་མཛད་ཅིང་། དཀའ་སྤྱད་ཐུགས་བརྩོན་སྣ་ཚོགས་གྱིས་མ་ཕྱི་གསར་བསྐྲུན་དང་བསྐྱར་བསྐྲུན་སོགས་ཀྱིས་འཇིག་རྟེན་གྱི་ཁམས་སུ་བཞུགས་པ་མཛད་མུས་བཞིན། དེང་གི་ཆར་གློག་རྡུལ་འཕྲུལ་ཆ་དང་དྲྭ་རྒྱའི་དུས་རབས་ཀྱི་འགྲོས་དང་བསྟུན་ནས་རྒྱལ་སྤྱིའི་རིག་གཞུང་སྤྱི་མཚུངས་ལྟར། རྒྱལ་བའི་གསུང་རབ་རིན་པོ་ཆེ་གཙོ་བོར་གྱུར་པའི་འཕགས་བོད་མཁས་པའི་གཞུང་ལུགས་རྣམས་དྲྭ་ཐོག་ནས་བཤེར་འཚོར་དང་འདྲ་བཤུས་སྒྲིག་གཟོ་སོགས་སྟབས་བདེའི་ལམ་ནས་བཀོལ་སྤྱོད་ཐུབ་པའི་གཞི་རྒྱ་ཆེ་བའི་འཆར་འགོད་དངོས་སུ་ལས་བཞིན་པར། བསྟན་པ་རིན་པོ་ཆེའི་གསལ་བྱེད་དམ་པ་གྱུར་པ་མཁན་རིན་པོ་ཆེ་ཤེས་བྱ་ཀུན་གཟིགས་སོགས་ཀྱིས་བླ་ན་མེད་པའི་མཛད་རྒྱས་ལ་བརྟེན་ནས་པར་དུ་བསྐྲུན་གནང་བའི་སྔ་འགྱུར་སྨིན་གླིང་དཔེ་ཚོགས་ཞེས་པའི་དེབ་ཕྲེང་ཉི་ཤུ་རྩ་ལྔའི་གྲངས་ལྡན་མཐའ་མའི་ཞུ་དག་ཅན་འདིར་གནང་འབྱོར་བྱུང་བ་ལགས་ན། སྙིང་ནས་ཐུགས་རྗེ་དང་བཀའ་དྲིན་བླ་ལྷག་ཏུ་ཆེ་ཞུ་བ་དང་ཆབ་གཅིག་སླད་ནས་ཀྱང་གསུང་རབ་རིན་པོ་ཆེ་ཅི་རིགས་དཔེ་སྐྲུན་གནང་ན་འདི་གར་འདྲ་བཤུས་གནང་སྩོལ་ཡོང་བར་ཅི་ནས་ཀྱང་བཀའ་དྲིན་མི་ཆུང་བ་ཞུ། ཞེས་དྲྭ་རྒྱའི་དཔེ་མཛོད་འགན་འཛིན་པ་རྫོགས་ཆེན་བསྟན་འཛིན་རྣམ་དག་ནས་ཕུལ།། སྙིང་པོའི་རྒྱུད་བཀླག་ཐབས་ཀྱི་མན་ངག་ཟབ་དོན་སྣང་བ།༄༅། །སྙིང་པོའི་རྒྱུད་བཀླག་ཐབས་ཀྱི་མན་ངག་ཟབ་དོན་སྣང་བ་ཞེས་བྱ་བ་བཞུགས་སོ། ། ༀ་སྭསྟི། རིགས་བདག་དྲུག་པའི་གནས་ཐོབ་རྒྱུར་གྱུར་པའི། །བླ་མའི་ཞབས་ཀྱི་པདྨོར་ཕྱག་བྱས་ཏེ། །དང་པོའི་ལས་ཅན་རྣམས་ལ་ཉེར་མཁོ་བའི། །ཟབ་མོའི་རྒྱུད་ཀྱི་བཀླག་ཐབས་མན་ངག་བཤད། །དེ་ཡང་ཚེ་འདི་ཁོ་ན་ལ་སངས་རྒྱས་ཐོབ་པར་འདོད་པས། ཟབ་མོའི་རྒྱུད་རྣམས་ལ་རྟོགས་གོམས་ཀྱི་སྦྱོར་བས་འབད་པར་བྱ་ཞིང་། གལ་ཏེ་དེ་ཙམ་མི་ནུས་པའི་བློ་ཆུང་བ་དག་གིས་ཀྱང་། རྒྱུད་ལ་མོས་པའི་སྒོ་ནས། ལྟ་བ་དང་། འདྲི་བ་དང་། ཀློག་པ་སོགས་ལ་ཅི་ནས་ཀྱང་འབད་པར་བྱ་སྟེ། ཕན་ཡོན་བསམ་གྱིས་མི་ཁྱབ་པ་གསུངས་པའི་ཕྱིར་རོ། །དེ་སྐད་དུའང་། རྩ་རྒྱུད་ལས། གང་གིས་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ནས་ཐམས་ཅད་དུ། །ཉེ་བའི་སྲས་སུ་དགོངས་པར་འགྱུར། །ཞེས་དང་། བཤད་རྒྱུད་རྒྱ་མཚོ་ལས། བཤད་རྒྱུད་རྒྱ་མཚོའི་རྒྱུད་ཆེན་འདི། །མོས་དང་མཐོང་དང་བྲིས་པ་དང་། །བཀླག་པ་ཙམ་གྱིས་འགྲུབ་འགྱུར་ན། །རྟོགས་དང་གོམས་པའི་སྦྱོར་བ་ཡིས། །འབྲས་བུ་ཐོབ་པ་སྨོས་ཅི་དགོས། །ཞེས་གསུངས་སོ། །དེ་དག་ལས། འདིར་རེ་ཞིག་རྒྱུད་བཀླག་པའི་མན་ངག་གི་རིམ་པ་ནི། ཐོག་མར་མཆོད་གཏོར་སོགས་ཉེ་བར་མཁོ་བའི་ཡོ་བྱད་རྣམས་ཚོགས་པར་བྱས་ལ། སྔོན་འགྲོ་རྒྱུད་སྦྱང་བའི་ཡན་ལག་ནི། བཛྲ་ས་མཱ་ཛཿས་ཚོགས་ཞིང་རྣམས་མཁའ་ཁྱབ་ཀྱི་འཁོར་ལོར་སད་པ་ལ། བདག་དང་མཁའ་མཉམ་སེམས་ཅན་རྣམས། །རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་བའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་བྱང་ཆུབ་སེམས་དཔའ་ལ། །དག་པ་གསུམ་གྱི་ལུས་འབུལ་ལོ། །ཚེ་རབས་བགྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །ཞེས་ལན་གསུམ་བརྗོད་ནས། ཚོགས་ཞིང་རྣམས་རང་ལ་བསྟིམ་མོ། །དེ་ནས་བསྲུང་བའི་འཁོར་ལོར་བསྒོམ་པ་ནི། བཛྲ་མ་ཧཱ་ཤྲཱི་ཧེ་རུ་ཀ །རང་ཉིད་སྐད་ཅིག་དྲན་རྫོགས་སུ། །རྡོ་རྗེ་ཁྲག་འཐུང་ཀྲོ་དྷིར་བཅས། །ཁྲོ་གཏུམ་མི་བཟད་སྲིན་པོའི་གཟུགས། །བསྐལ་པའི་མེ་དཔུང་ཀློང་ན་གསལ། །ཧཱུཾ་ཧཱུཾ་ཧཱུཾ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ་ཧ་ལ་ཧ་ལ་ཧ་ལ་ཧཱུཾ། ཁྲག་འཐུང་ཡབ་ཡུམ་སྦྱོར་མཚམས་ནས། །ཁྲོ་ཚོགས་དཔག་མེད་སྤྲོས་པ་ཡིས། །གསང་སྤྱོད་ལྟ་བར་མི་དབང་བའི། །ལོག་འདྲེན་གདོན་བགེགས་མཐར་བསྐྲད་གྱུར། །ༀ་བཛྲ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་དཱ་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། སླར་འདུས་ཁྲོ་བོའི་རང་བཞིན་གྱིས། །རྡོ་རྗེའི་གུར་གྱུར་དེ་ཡི་ཕྱིར། །མེ་རླུང་རྒྱ་མཚོའི་ར་བས་གཏམས། །གཞོམ་མེད་བསྲུང་བའི་གུར་དུ་གྱུར། །བཛྲ་པཉྩ་ར། རཾ་ཡཾ་ཁཾ། དེ་ནས་སེམས་བསྐྱེད་པ་ནི། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགག་པ་མེད་ལས་ཐམས་ཅད་འགག །འགག་པ་ཉིད་ན་འགག་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །དེ་ནས་སྣོད་བཅུད་དག་པའི་འཁོར་ལོ་བསྒོམ་པ་ལ། ཐོག་མར་ཏིང་འཛིན་གསུམ་ནི། ཧཱུཾ། མི་དམིགས་ཆོས་ཉིད་དེ་བཞིན་ཉིད། །རང་བཞིན་འོད་གསལ་ཀུན་ཏུ་སྣང་། །ཨ་ཡིག་རྒྱུ་ལས་དཀྱིལ་འཁོར་འབྱུང་། །ཞེས་པའི་དོན་སྒོམ་མོ། །དེ་ནས་རྟེན་དང་བརྟེན་པའི་དཀྱིལ་འཁོར་བསྐྱེད་པ་ནི། རྒྱུ་ཡི་ཡི་གེ་ཨ་དཀར་ལས། །ཨེ་ཡཾ་བཾ་ལཾ་སུཾ་རཾ་ཆད། །མཁའ་རླུང་ཆུ་ས་རི་རབ་སྟེང་། །མེ་དཀྱིལ་ཁོར་ཡུག་དབུས་སུ་བྷྲུཾ། །བྷྲུཾ་བི་ཤྭ་བི་ཤུདྡྷེ། ཡོངས་གྱུར་རིན་ཆེན་གཞལ་ཡས་ཁང་། །མཚན་ཉིད་ཀུན་རྫོགས་ལྟེ་བ་རུ། །སེང་གེེས་བཏེགས་པའི་རིན་ཆེན་ཁྲི། །དེ་སྟེང་པད་ཉི་ཟླ་བར་བཅས། །རང་རིག་ཨ་དཀར་གདན་སྟེང་བབས། །དེ་ཉིད་ཧཱུཾ་ལས་རྡོ་རྗེར་གྱུར། །ཧཱུཾ་བཛྲ་དྷྲིཀ྄འཕྲོ་འདུས་ཡོངས་གྱུར་བཅོམ་ལྡན་འདས། །རྡོར་སེམས་ཨིནྡྲ་ནཱི་ལའི་མདོག །ཕྱག་གཡས་རྡོ་རྗེ་ཐུགས་ཀར་འཛིན། །གཡོན་དྲིལ་དཀུར་བརྟེན་ཡུམ་ལ་འཁྱུད། །ཞབས་གཉིས་མཉམ་པའི་སྐྱིལ་ཀྲུང་ཅན། །ཐུགས་ལས་མཱུཾ་ཆད་དྲིལ་བུར་གྱུར། །མཱུཾ་དྷཱ་ཏྭཱེ་ཤྭ་རཱི། ཡོངས་གྱུར་ཕང་གཡོན་དབྱིངས་ཕྱུག་སྔོ། །གཡས་པའི་དྲིལ་བུས་ཡབ་མགུལ་འཁྱུད། །གཡོན་པས་རྡོ་རྗེ་ཐུགས་ཀར་གཏོད། །བརྟུལ་ཞུགས་སྐྱིལ་མོ་ཀྲུང་གིས་འཁྲིལ། །གཉིས་ཀ་རྒྱན་ཆས་བཅུ་གསུམ་གྱིས། །རབ་བརྒྱན་ཞི་བའི་ཚུལ་དགུས་བརྗིད། །བྱེ་བ་དྲུག་ཕྲག་དྲུག་འཕྲོ་བའི། །འོད་ཟེར་ཀློང་བཞུགས་གཉིས་ཀ་ཡིས། །སྲོག་སྒོར་རང་འདྲའི་ཡེ་ཤེས་སེམས། །དེ་ཐུགས་རང་རང་ཕྱག་མཚན་དབུས། །ཐུགས་སྲོག་དྭངས་མའི་ཡི་གེ་གསལ། །དེ་ནས་དབང་བསྐུར་ཞིང་བྱིན་གྱིས་རློབ་པ་ནི། ༀ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་བཞིན་དུ། ཨ་དཪྴ། ས་མ་ཏཱ། པྲ་ཏྱཱ་བེཀྵ་ཎཱ། ཀྲྀ་ཏྱཱ་ནུཥྛཱ་ན་རྣམས་ལ་སྦྱར་བའི་སྔགས་ཚན་ལྔ་དང་། ཡེ་ཤེས་ལྔ་ཡི་བདུད་རྩིའི་ཆུས། །དབང་བསྐུར་རིགས་ལྔས་དབུ་བརྒྱན་གྱུར། །ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་བཞིན་དུ་ཝཱཀྐ་དང་ཙིཏྟ་ལའང་སྦྱར་བས། སྤྱི་མགྲིན་སྙིང་གའི་གནས་གསུམ་དུ། །བྱིན་རླབས་རྡོ་རྗེ་གསུམ་དུ་གསལ། །དེ་ནས་སྤྱན་དྲངས་ཤིང་བསྟིམ་པ་ནི། རང་གི་ཐུགས་སྲོག་ཧཱུཾ་ཡིག་ལས། །འོད་འཕྲོས་ཡེ་ཤེས་འཁོར་ལོར་དབབ། །ལྕགས་ཀྱུའི་ཕྱག་རྒྱ་དང་བཅས་པས། ༀ་ཨེ་ཧྱེ་ཧི་བྷ་ག་ཝན་མ་ཧཱ་ཀཱ་རུ་ཎཱི་ཀ་དྲྀ་ཤྱ་ཧོཿས་མཱ་ཡ་སྟྭཾ་ཞེས་པས་སྙན་གསན་དབབ། རང་གི་ཐུགས་ཀ་ནས་འཕྲོས་པའི། །ཛཿཧཱུཾ་བཾ་ཧོཿས་སྤྱན་དྲངས་ནས། མདུན་མཁར་དམ་ཚིག་འཁོར་ལོ་དང་། །མེ་རི་འདབ་འབྱོར་ཚུལ་གྱིས་བཞུགས། །ཛཿཧཱུཾ་བཾ་ཧོཿཞེས་ཕྱག་རྒྱ་དང་བཅས་ཏེ་སྤྱན་དྲང་ངོ་། །ༀ་བཛྲ་ས་མ་ཡ་ༀ། ཨཱཿབཛྲ་ས་མ་ཡ་ཨཱཿཧཱུཾ་བཛྲ་ས་མ་ཡ་ཧཱུཾ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ཞེས་རིག་པའི་མེ་ཏོག་དོར་ལ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་གཉིས་སུ་མེད་པར་བསམ། དངོས་གྲུབ་སྐུལ་བ་ནི། ༀ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བས། །ཕྱག་རྒྱ་ཆེན་པོར་བདག་སྦྱོར་ཅིག །ༀ་བཛྲ་ས་མ་ཡ་ཧཱུཾ། ༀ་བཛྲ་ས་མ་ཡ་སྟྭཾ། ༀ་བཛྲ་ས་མ་ཡ་ཧོཿཛཿཧཱུཾ་བཾ་ཧོཿཞེས་རྒྱ་བཞིས། ཆུ་ལ་ཆུ་བཞག་ཇི་བཞིན་དུ། །དམ་ཚིག་ཡེ་ཤེས་གཉིས་མེད་གྱུར། །སྐབས་འདིར་སྤྲོ་ན་མཆོད་བསྟོད་སོགས་བྱས་པས་ཆོག་ལ། མ་བྱས་ཀྱང་མི་འགལ་ལོ། །དེ་ནས། ཡང་དག་དོན་གྱི་སྙིང་པོ་ནི། །ཇི་སྙེད་བརྗོད་པའི་ཁ་བརྒྱུད་ཀྱང་། །གང་ནས་བཙལ་ཀྱང་མི་རྙེད་པས། །རང་རིག་དྲི་མེད་དག་པ་ཡིན། །དེ་ལ་རྟག་ཏུ་མོས་པ་ནི། །བསྙེན་པའི་དམ་པ་མཆོག་ཡིན་ནོ། །སེམས་ཉིད་ཐེག་པར་རང་མོས་ན། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲ་བའི་དཀྱིལ་འཁོར་མངོན་རྫོགས་པ། །ད་ལྟ་ཉིད་དུ་མངོན་གྱུར་ཅིག །ཅེས་བརྗོད་ནས་བཟླས་པ་ལ་འཇུག་སྟེ། བདག་ཉིད་དམ་ཚིག་སེམས་དཔའ་ལས། །ཡེ་ཤེས་འཁོར་ལོ་མདུན་དུ་དབྱེ། །གཉིས་ཀའི་ཐུགས་སྲོག་ཡི་གེའི་མཐར། །སྔགས་ཕྲེང་གཡས་སུ་འཁོར་བ་ལས། །འོད་ཟེར་མགལ་མེའི་འཁོར་ལོ་ལྟར། །ཕར་འཕྲོས་མཆོད་ཅིང་ཚུར་བྱུང་བའི། །ཡེ་ཤེས་འོད་ཟེར་བདག་ལ་ཐིམ། །དེ་ལྟར་དམིགས་ལ་བཟླ་བྱའི་སྔགས་ནི། ཧཱུཾ་བཛྲ་དྷྲིཀ྄མཱུཾ་དྷཱ་ཏི་ཤྭཱ་རཱི། ཞེས་ཡབ་ཡུམ་གྱི་སྔགས་དང་། ཞི་བ་སྤྱིའི་སྔགས། བོ་དྷི་ཙིཏྟ་ཡང་ཅི་རིགས་པ་བཟླས་པའི་མཐར། ཛཿཧཱུཾ་བཾ་ཧོཿཞེས་ཕྱག་རྒྱ་དང་བཅས་པས་སླར་ཡང་དམ་ཡེ་དབྱེར་མེད་དུ་བྱའོ། །དེ་ནས་སྐབས་འདིར་རྒྱུད་གཏོར་བསྔོ་བ་ནི། རཾ་ཡཾ་ཁཾ། རྣམ་དག་ཆོས་དབྱིངས་ངང་ཉིད་ལས། །རང་བྱུང་མཆོད་པའི་ཕུང་པོ་ནི། །ཀུན་བཟང་མཆོད་པའི་སྤྲིན་ལྟ་བུས། །དཔག་ཡས་ནམ་མཁའ་གང་བར་གྱུར། །ན་མསྶ་མནྟ་བུདྡྷ་ནཱཾ་ག་ག་ན་ཁཾ་ས་མ་ཡེ་སྭཱཧཱ། ༀ་ཤྲཱི་བཛྲ་རཱ་ག་དྷུ་པེ་དྷུ། དེ་བཞིན་སྦྱར་བས། པུཥྤེ་པུ། ཨ་ལོ་ཀེ་ཧྲཱིཿགནྡྷེ་གན། དང་། ༀ་སརྦ་པཉྩ་ཨ་མྲྀ་ཏ་ཧཱུཾ་ཧྲཱི་ཋ། ༀ་མ་ཧཱ་བ་ལིཾ་ཏ་ཏེ་ཛྭ་བ་ལིཾ་ཏ་བ་ལ་བཱ་དྱ་གུ་ཧྱ་ས་མ་ཡ་སྭཱཧཱ། ༀ་མཧཱ་རཀྟ་ཛྭ་ལ་མཎྜ་ལ་ཧཱུཾ་ཧྲཱི་ཋ། ཞེས་པས་བྱིན་གྱིས་བརླབས་ནས། མཆོད་ཡུལ་རྣམས། དམིགས་མེད་མཁའ་ལྟར་ཁྱབ་ཅིང་དག་པའི་སྐུ། །སྤྱན་འདྲེན་གཤེགས་སུ་གསོལ་བར་མི་དམིགས་ཀྱང་། །ཐུགས་རྗེའི་ངང་ཉིད་ཆོས་སྐུར་དག་པ་ལས། །ཡེ་ཤེས་སྒྱུ་མར་རོལ་ཅིང་གཤེགས་སུ་གསོལ། །ཨེ་ཧྱེ་བྷ་ག་ཝཱན་མ་ཧཱ་ཀཱ་རུ་ཎི་ཀ་དྲི་ཤྱ་ཧོཿས་མ་ཡ་སྟྭཾ། ཞེས་པས་སྤྱན་དྲངས་ལ། ན་མསྶརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿསརྦ་ཏཏྑཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ཞེས་པས་ཀུན་བཟང་། ༀ་ཨཱ་ཧ་ར་ཨཱ་ཧ་ར་སརྦ་བིདྱཱ་དྷ་ར་པཱུ་ཛི་ཏེ་ན་མསྶ་མནྟ་བུདྡྷ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། ཞེས་པས་ཞབས་བསིལ། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། ༀ་ཤྲཱི་བཛྲ་རཱ་ག་པུཥྤེ་པུ། ༀ་ཤྲཱི་བཛྲ་རཱ་ག་ཨཱ་ལོ་ཀེ་ཧྲཱིཿༀ་ཤྲཱི་བཛྲ་རཱ་ག་གནྡྷེ་གན། ཞེས་པས་བཞི་བསྣོལ། ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ༀ་སརྦ་ཏ་ཐཱ་ག་ཏ་མ་ཧཱ་རཀྟ་ཁ་རཾ་ཁཱ་ཧི། ཞེས་པས་སྨན་རཀ་དབུལ་ཞིང་། གཏོར་མ་ནི། ལྷ་རྣམས་ཀྱི་ལྗགས་ཧཱུཾ་ལས་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ནས་གསོལ་བར་བསམ་ལ། ༀ་གུ་རུ་མཎྜལ་དེ་བ་ག་ཎ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁཱ་ཧི་ཁཱ་ཧི། ཞེས་པས་བླ་མ་ཡི་དམ་སྤྱི་དང་། ༀ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿཨི་དཾ་སོགས་དང་། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཨི་དཾ་སོགས་ཀྱིས་ཞི་ཁྲོ་ལ་སྒོས་སུ་འབུལ། དེ་ནས། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེར་རོལ་པའི་ལྷ། །ཞི་ཁྲོ་སྤྲུལ་བའི་སྐུ་ལ་ཕྱག་འཚལ་ལོ། །ཞེས་པས་བསྟོད། མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་བ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱི་སྡོང་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཕྱུགས་འཕེལ་བ། །བདེ་ལེགས་ཐམས་ཅད་འབྱུང་བའི་གནས། །ཡིད་ལ་འདོད་པ་ཀུན་འགྲུབ་མཛོད། །ཅེས་འདོད་དོན་གསོལ། དེ་ནས་ཆོས་སྐྱོང་དང་གཞི་བདག་གི་གཏོར་མ་སོགས་སོ་སོའི་གཞུང་བཞིན་དུ་བྱའོ། ། ༈ དེ་ནས་རྒྱུད་བཀླག་པའི་མན་ངག་དངོས་ནི། རང་གི་ལྕེ་ཡི་འདོམ་རྩའི་དབུས། །བྷྲཱུཾ་ལས་འཁོར་ལོ་རྩིབས་བཞི་པ། །གྲུ་བཞི་སྒོ་ལྡན་གཞལ་ཡས་ཁང་། །ལྟེ་བ་རྩིབས་སྟེང་པདྨ་དང་། །ཉི་ཟླ་སྒོ་བཞིར་ཉི་མའི་གདན། །དབུས་སུ་ཧྲཱི་ཡིག་ཡོངས་གྱུར་ལས། །སྣང་མཐའ་གོས་དཀར་མ་དང་སྦྱོར། །རྩིབས་བཞིར་ཤར་ནས་རིམ་པ་བཞིན། །ཧྲཱི་ཡིག་ཟུང་རེ་ཞུ་བ་ལས། །རྡོ་རྗེ་ཆོས་དང་པི་ཝཾ་མ། །རྡོ་རྗེ་རྣོན་པོ་མེ་སྒྲོན་དང་། །རྡོ་རྗེ་འཁོར་ལོ་ལྕགས་སྒྲོག་སྟེ། །རྡོ་རྗེ་སྨྲ་བ་གསལ་བཀྲར་བཅས། །ཀུན་ཀྱང་མཉམ་སྦྱོར་པད་རག་མདོག །སྒོ་བཞིར་རང་རང་ས་བོན་ལས། །གཤིན་རྗེ་གཤེད་དང་སྟོབས་པོ་ཆེ། །རྟ་མགྲིན་བདུད་རྩི་འཁྱིལ་བ་བཞི། །ལྕགས་ཀྱུ་མ་སོགས་ཡུམ་དང་འཁྲིལ། །དེ་ནས། ༀ་མ་ཧཱ་པྲ་ཏྱཱ་བེཀྵ་ཎ་དང་པོར་བྱས་པའི་ཨ་དཪྴ་༴ ས་མ་ཏཱ༴ ཤུ་ནྱ་ཏཱ༴ ཀྲྀ་ཏྱ་ནུཥྛ་ན་རྣམས་ལ་འགྲེས་སྦྱར་བའི་སྔགས་ཚན་ལྔས་དབང་བསྐུར། ༀ་སརྦ་ཏ་ཐཱ་ག་ཏ་ཀ་ཡ་སོགས་གསུམ་གྱིས་བྱིན་གྱིས་བརླབས། བཛྲ་ས་མཱ་ཛཿས་སྙན་གསན་དབབ། ༀ་ཨེ་ཧྱེ་ཧིས་སྤྱན་དྲངས། ཛཿཧཱུཾ་བཾ་ཧོཿས་བསྟིམ། ཀཱ་ཡ་ཝཀྐ་ཙིཏྟ་ཏིཥྛ་བཛྲ་གྱིས་བརྟན་པར་བྱས། ཀུན་བཟང་། ཞབས་བསིལ། བཞི་བསྣོལ་གྱིས་མཆོད་ནས། ས་མ་ཡ་ཧོཿས་མ་ཡ་སྟྭཾ། ཞེས་བསྐུལ་ཏེ། ལྷ་ཚོགས་ཡབ་ཡུམ་རྣམས་སྙོམས་པར་ཞུགས་པས་རྗེས་ཆགས་ཀྱི་མེས་འོད་དུ་ཞུ་ནས་རང་ལ་ཐིམ། དེའི་རྐྱེན་གྱིས་རང་ཡང་འོད་དུ་ཞུ་བའི་འོད་ཕུང་དམར་པོ་ལས། བདེ་བར་གཤེགས་པ་ཐམས་ཅད་ཀྱི་གསུང་རྡོ་རྗེའི་བདག་ཉིད་སྣང་བ་མཐའ་ཡས་ཀྱི་སྐུར་གྱུར་པའི་ང་རྒྱལ་དང་བཅས་ཏེ། གང་དག་རབ་འབྱམས་ཕྱོགས་བཅུའི་འཇིག་རྟེན་ན། །བདེ་གཤེགས་སློབ་མར་གྱུར་པ་གང་སུ་དག །དེང་འདིར་སྟོན་པས་ཆོས་ཀྱི་ཆར་འབེབས་ཀྱིས། །ཉན་པར་འདོད་པ་ཐམས་ཅད་འདིར་གཤེགས་ཤིག །ཅེས་ལྷ་དང་རིག་པ་འཛིན་པ་སོགས་དད་པས་ཆོས་ཀྱི་གཏམ་མཉན་པར་འདོད་པ་རྣམས་བསྡུས་ཏེ། སྒོ་གསུམ་ལྷ་སྔགས་ཡེ་ཤེས་ཀྱི་འཁོར་ལོ་ལས་མི་འདའ་བའི་སྒོ་ནས་རྒྱུད་བཀླག་པར་བྱའོ། །ཚུལ་འདི་ནི་རྒྱུད་ལས། སྨྲ་བྱེད་འཁོར་ལོའི་གཞལ་ཡས་སུ། ཞེས་སོགས་འཆད་དབང་གི་བསམ་རྒྱུད་དུ་གསུངས་པའི་རིགས་པ་སྦྱར་བ་སྟེ། གསང་འདུས་ལས་ཀྱང་། མདོ་འདོན་ཆོ་གའི་རིམ་པ་ལ། །རྟག་པར་རྡོ་རྗེ་ཆོས་སུ་བྱ། །ཞེས་གསུངས་པ་དང་ཡང་དོན་གྱི་གནད་གཅིག་གོ །གཞན་དུ་ན། ཐོག་མ་ནས་བསྲུང་འཁོར་གྱི་རྗེས་སུ། རྒྱུ་ཏིང་ངེ་འཛིན་གསུམ་ལས་འབྲས་བུ་པདྨ་རིགས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་བསྐྱེད་དེ། ཆོ་གའི་བྱ་བ་གཞན་རྣམས་ཆིངས་སྔར་ལྟར་ལས། གཏོར་འབུལ་ཐོན་ནས་རྒྱུད་ཉན་པར་བསྐུལ་བ་ལ་འཇུག་སྟེ། འདི་ཡང་གོང་མ་དང་གནད་གཅིག་པ་ཡིན་ནོ། །ཡང་རྣམ་པ་གཅིག་ཏུ་ན། སྔོན་བྱུང་ཇི་ལྟ་བ་བཞིན་དུ་བགྱིས་ཀྱང་མི་འགལ་བར་སེམས་ཏེ། དེའི་ཚུལ་ནི། ཐུབ་པ་དྲུག་མ་གཏོགས་པ་རང་སྣང་ཞི་བའི་དཀྱིལ་འཁོར་སུམ་ཅུ་རྩ་དྲུག་གི་རྟེན་དང་བརྟེན་པར་བཅས་པ་དྲ་བའི་གཞུང་ལྟར་ལས། གཙོ་བོ་གོ་འཕོ་སྟེ། ཐལ་བ་ལས། འཁོར་ལོའི་ལྟེ་བར་མི་འཇིགས་སྟེང་། །བདག་པོ་ཀུན་བཟང་འཁོར་རྣམས་ལ། །ཀུན་འབྱུང་སྒྱུ་འཕྲུལ་སྟོན་པའི་ཚེ། །མི་སྐྱོད་རྒྱལ་པོ་མདུན་ན་གནས། །ཞེས་གསུངས་པས། དབུས་ཀྱི་ཁྲིར་ཀུན་བཟང་ཡབ་ཡུམ་བཞུགས་པའི་མདུན་ན། མི་བསྐྱོད་པ་ཡབ་ཡུམ་བཀའ་སྡོད་ཀྱི་ཚུལ་དུ་བཞུགས་པ་དང་། ཐུབ་པ་དྲུག་ནི་སྟོན་པའི་ཐུགས་ལས་སྤྲོས་ཏེ། རང་རང་གི་གདུལ་ཞིང་རིགས་དྲུག་གི་གནས་རིགས་སོ་སོར་འགྲོ་བའི་དོན་མཛད་པ་དང་། ཁྲོ་བོའི་དཀྱིལ་འཁོར་ནི། གདུལ་དཀའ་དྲག་པོ་འདུལ་བར་བྱ་བའི་ཕྱིར་ཞི་བ་ཉིད་ཁྲོ་བོར་སྣང་བར་མཛད་པ་སྟེ་དེ་ལྟར་མོས་པའི་སྒོ་ནས་རྒྱུད་ཀློག་པར་བྱ་ཞིང་། མཐར་རྒྱུད་ཀྱི་མཇུག་ཏུ། སྐུ་གསུང་ཐུགས་ལྷུན་སྟུག་པོ་བཀོད་པའི་རྒྱན་ཉིད་དུ་བཞུགས་སོ། །ཞེས་རྒྱུད་རྫོགས་ནས་མཛད་པ་ཆོས་ཉིད་དུ་བཞུགས་ཚུལ་གྱི་ཚིག་ཕྱིར་སེམས་གཞོལ་ཏེ་མཉམ་པར་འཇོག་པ་ལས། དཀྱིལ་འཁོར་ལ་ཉེར་བསྡུ་སོགས་སྤྲོས་པའི་ཆོ་ག་གཞན་བྱ་མི་དགོས་ལ། འོན་ཀྱང་བསྲུང་མའི་གཏོར་འབུལ་དང་། མཐར་ཤིས་བརྗོད་དང་བསྔོ་སྨོན་སོགས་འོག་ནས་འབྱུང་བ་ལྟར་བྱས་ཀྱང་མི་འགལ་ལོ། །འདོན་ཐབས་ཀྱི་མན་ངག་སྔ་མ་གཉིས་ཀྱི་དབང་དུ་བྱས་ན། རྒྱུད་རྫོགས་པའི་རྗེས་སུ། བསྲུང་མའི་གཏོར་མ་གཤེགས། སླར་ཡང་མཆོད་ཅིང་བསྟོད་ནས། ཡིག་བརྒྱ་དང་། མ་རྙེད་ཡོངས་སུ་ཡོངས་སུ་མ་ཚང་དང་། །གང་ཡང་ནུས་པ་མ་མཆིས་པས། །འདིར་ནི་བགྱི་བ་གང་ནོངས་པ། །དེ་ཀུན་ཁྱོད་ཀྱིས་བཟོད་མཛད་རིགས། །ཞེས་ལྷག་ཆད་ཁ་གསོ། ༀ། ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླ་ཡང་འབྱོན་པར་མཛད་དུ་གསོལ། །བཛྲ་མུཿས་ཡེ་ཤེས་ཀྱི་འཁོར་ལོ་དང་། གཏོར་མགྲོན་རྣམས་རང་བཞིན་གྱི་གནས་སུ་གཤེགས་པར་བསམ། སྣོད་བཅུད་འོད་ཞུ་དམ་ཚིག་འཁོར་ལོ་ལ། །རིམ་བཞིན་ཐུགས་སྲོག་ནཱ་དའི་བར་དུ་བསྡུ། །ཧཱུཾ་བཛྲ་དྷྲིཀ྄དེ་ལས་སླར་ཡང་སྐད་ཅིག་དྲན་རྫོགས་སུ། །མི་བསྐྱོད་སྣང་སྟོང་སྒྱུ་མའི་སྐུ་རུ་ལངས། །དེ་ཡི་གནས་གསུམ་ༀ་དང་ཨཱཿཧཱུཾ་ལས། །སྒོ་གསུམ་རྡོ་རྗེ་གསུམ་གྱི་ངོ་བོར་བཅིངས། །རྒྱ་གྲམ་གྱི་ཕྱག་རྒྱ་སྤྱི་བོར་བཞག་སྟེ། བཛྲ་རཀྵ་ཧཾ། སྤྱི་བོའི་ཧཾ་ཞུ་རྡོ་རྗེའི་འོད་ཟེར་གྱིས། །རང་ལུས་ཀུན་ཁྱབ་རྡོ་རྗེའི་གོ་ཆར་གྱུར། །དེ་ནས་བསྔོ་བ་དང་ཤིས་བརྗོད་ནི། བླ་མ་ཡི་དམ་ལྷ་ཚོགས་དགོངས་སུ་གསོལ། །ཞེས་སོགས་དོང་སྤྲུགས་ལྟར་དང་། ཕུན་སུམ་ཚོགས་པ་ལ་སོགས་པའི་བཀྲ་ཤིས་ཅི་རིགས་ཀྱང་རྒྱ་ཆེར་བརྗོད་པར་བྱའོ། །སྒོ་གསུམ་ལྷ་སྔགས་ཏིང་འཛིན་རོལ་པ་ཡི། །རྣལ་འབྱོར་ངང་ནས་གསང་ཆེན་ཟབ་མོའི་རྒྱུད། །འཆད་དང་ཉན་ནམ་འདྲི་ཀློག་འཆང་རྣམས་ལ། །རྡོ་རྗེ་འཛིན་རྣམས་ལྷག་པར་གཟིགས་པར་འགྱུར། །དེ་སྐད་བཀའ་དྲིན་མཉམ་མེད་ཆོས་ཀྱི་རྗེའི། །བཀའ་ཡི་གནང་བ་ཐོབ་ནས་རྗེ་བཙུན་དེའི། །བཀའ་འབངས་ཆར་གཏོགས་དྷརྨས་ཟིན་བྲིས་སུ། །སྤེལ་བའི་དགེ་བའང་འགྲོ་ཕན་རྒྱུ་རུ་བསྔོ།། །། བཀླག་ཐབས་འདི་སྔ་འགྱུར་བཀའ་མའི་ཁྲོད་བཞུགས་པའི་མ་ཡིག་ལྟར་བསྒྲིགས་པ་ཡིན། གསང་བའི་སྙིང་པོ་དེ་ཁོ་ན་ཉིད་ངེས་པ།ལེའུ་དང་པོ།༄༅། །རྒྱུད་ཐམས་ཅད་ཀྱི་རྒྱལ་པོ་དཔལ་སྒྱུ་འཕྲུལ་རྩ་བའི་རྒྱུད་གསང་བ་སྙིང་པོ་བཞུགས། བོད་སྐད་དུ། གསང་བའི་སྙིང་པོ་དེ་ཁོ་ན་ཉིད་ངེས་པའོ། །བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་བཤད་པའི་དུས་ན། དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས། ལོངས་སྤྱོད་ཆེན་པོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་ཉིད། མ་ལུས་མི་ལུས་ལུས་པ་མེད་པ་ཐམས་ཅད་དང་། སོ་སོ་མ་ཡིན་ཐ་མི་དད་དབྱེར་མེད་པའི་རང་བཞིན་ཏེ། འོག་མིན་གྱི་གནས་མཐའ་དང་དབུས་མེད་པ་ན། གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལ། ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་། རྒྱ་ཕྱོགས་བཅུར་ཡོངས་སུ་མ་ཆད་པ། ཡོན་ཏན་དཔག་ཏུ་མེད་པར་རྒྱས་པའི་ཕྱིར་གྲུ་བཞིར་གྱུར་པ། ལྷག་པའི་ཡེ་ཤེས་རིན་པོ་ཆེའི་གློ་འབུར་གྱིས་མཛེས་པ། རྩེ་མོ་ཕྱོགས་བཅུ་དུས་བཞིའི་སངས་རྒྱས་ཀྱི་དཀྱིལ་འཁོར་མ་ལུས་པ་ཐམས་ཅད། སོ་སོ་མ་ཡིན་ངོ་བོ་ཉིད་གཅིག་པའི་ཡེ་ཤེས་ཀུན་ཏུ་འཁྱིལ་བ། ཡེ་ཤེས་བསམ་གྱིས་མི་ཁྱབ་པའི་ཡེ་ཤེས་རིན་པོ་ཆེའི་དབྱིབས་དང་། ཁ་དོག་ལ་སོགས་པ་རྣམ་པ་ཐ་དད་པའི་བྱེ་བྲག་དང་ཁྱད་པར་དུ་གྱུར་པ། སྤགས་པ། ཚད་དཔག་ཏུ་མེད་པ། ཡེ་ཤེས་རིན་པོ་ཆེ་སྣ་ཚོགས་ཀྱི་ཕྲེང་བ་དང་། ཆུན་འཕྱང་དང་། ཤར་བུའི་རྒྱན་དང་། གཟུགས་སྣ་ཚོགས་དང་། སྒྲ་སྣ་ཚོགས་དང་། དྲི་སྣ་ཚོགས་དང་། རོ་སྣ་ཚོགས་དང་། རེག་བྱ་སྣ་ཚོགས་ཀྱིས་ཕྱོགས་བཅུར་འཁྲིགས་པར་རང་བྱུང་ལ། མི་སྒྲིབ་པར་གསལ་བའི་རྒྱན་བསམ་གྱིས་མི་ཁྱབ་པས་བཀླུབས་པ། རྣམ་པར་ཐར་པ་བཞིའི་སྒོ་ནས་འཇུག་པའི་སྒོ་ཁྱུད་ཅན། རྣམ་པར་ཐར་པ་བརྒྱད་ཀྱི་རྟ་བབས་དང་ལྡན་པ། ཕྱི་དང་ནང་མེད་པ་ཀུན་ཏུ་ཡང་ནང་དུ་གྱུར་པ་ན། མི་འཇིགས་པ་སེང་གེའི་ཁྲི་དང་། སྟོབས་གླང་པོ་ཆེའི་ཁྲི་དང་། རྫུ་འཕྲུལ་རྟའི་ཁྲི་དང་། དབང་རྨ་བྱའི་ཁྲི་དང་། ཐོགས་པ་མེད་པ་ནམ་མཁའ་ལྡིང་གི་ཁྲི་དང་། རང་བཞིན་གྱིས་འོད་གསལ་བ་ཉི་ཟླའི་དཀྱིལ་འཁོར་དང་། གོས་པ་མེད་པ་པདྨ་རིན་པོ་ཆེའི་གདན་ལ། སྐུ་མདུན་དང་རྒྱབ་མེད་པ། ཐམས་ཅད་དུ་ཞལ་ཐལ་ལེ་བར་གསལ་ཞིང་མཚན་དང་དཔེ་བྱད་དང་ལྡན་པ། བསམ་གྱིས་མི་ཁྱབ་པ་ཐམས་ཅད་དུ། སྐུ་གསུང་ཐུགས་སྣ་ཚོགས་པར་ཀུན་ཏུ་སྣང་བ། ཐབས་དང་ཤེས་རབ་ཀྱི་ཞབས་གཉིས་མཉམ་པའི་བརྟུལ་ཞུགས་ཀྱི་སྐྱིལ་མོ་ཀྲུང་དུ་བཞུགས་པ། ཡེ་ཤེས་དྲུག་གི་ཕྱག་ཡེ་ཤེས་རིན་པོ་ཆེའི་ཕྱག་རྒྱ་འབར་བ་ཅན། སྐུ་གསུང་ཐུགས་བསམ་གྱིས་མི་ཁྱབ་པའི་དབུ་གསུམ་དང་ལྡན་པ། བཅོམ་ལྡན་འདས་དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་དང་། དེ་བཞིན་གཤེགས་པ་གཟུགས་ཀྱི་རྒྱལ་པོ་དང་། དེ་བཞིན་གཤེགས་པ་ཚོར་བའི་རྒྱལ་པོ་དང་། དེ་བཞིན་གཤེགས་པ་འདུ་ཤེས་ཀྱི་རྒྱལ་པོ་དང་། དེ་བཞིན་གཤེགས་པ་འདུ་བྱེད་ཀྱི་རྒྱལ་པོ་དང་། དེ་དག་ཀུན་ཀྱང་མཐིང་ག་དང་། དཀར་པོ་དང་། སེར་པོ་དང་། ལེ་བརྒན་དང་། ལྗང་གུའི་མདོག་ཏུ་འཚེར་བ། བཙུན་མོ་དམ་པ་སྣང་བའི་དབྱིངས་དང་། སྲ་བའི་དབྱིངས་དང་། མཉེན་པའི་དབྱིངས་དང་། དྲོ་བའི་དབྱིངས་དང་། བསྐྱོད་པའི་དབྱིངས་ལ་སོགས་པ་བཙུན་མོའི་ཚོགས་དང་གཉིས་སུ་མེད་པར་ཆོས་ཀྱི་དབྱིངས་ཀུན་ཏུ་མཐའ་ཡས་པར་ཁྱབ་པ་ནི། འདི་ལྟ་སྟེ། དཔེར་ན་ཏིལ་གྱི་གོང་བུ་བཞིན་དུ་གང་ནས་ཁྱབ་པར་བཞུགས་སོ། །དེ་ནས་བྱང་ཆུབ་ཆེན་པོ་རྡོ་རྗེ་མཐོང་བ་དང་། བྱང་ཆུབ་ཆེན་པོ་རྡོ་རྗེ་ཐོས་པ་དང་། བྱང་ཆུབ་ཆེན་པོ་རྡོ་རྗེ་སྣོམ་པ་དང་། བྱང་ཆུབ་ཆེན་པོ་རྡོ་རྗེ་མྱོང་བ་དང་། བཙུན་མོ་མཐོང་བར་བྱ་བ་དང་། མཉན་པར་བྱ་བ་དང་། བསྣམ་པར་བྱ་བ་དང་། མྱོང་བར་བྱ་བའི་ཚོགས་དང་། བྱང་ཆུབ་ཆེན་པོ་རྡོ་རྗེ་མཐོང་བྱེད་དང་། བྱང་ཆུབ་ཆེན་པོ་རྡོ་རྗེ་ཐོས་བྱེད་དང་། བྱང་ཆུབ་ཆེན་པོ་རྡོ་རྗེ་སྣོམ་བྱེད་དང་། བྱང་ཆུབ་ཆེན་པོ་རྡོ་རྗེ་མྱོང་བྱེད་དང་། བཙུན་མོ་འདས་པ་དང་། ད་ལྟར་དང་། འབྱུང་བ་དང་། མ་བྱོན་པའི་ཚོགས་དང་། འཇོམས་པ་ཆེན་པོ་རྡོ་རྗེ་རེག་པ་དང་འཇོམས་པ་ཆེན་པོ་རྡོ་རྗེ་རེག་བྱེད་དང་། འཇོམས་པ་ཆེན་པོ་རྡོ་རྗེ་རེག་བྱ་དང་། འཇོམས་པ་ཆེན་པོ་རྡོ་རྗེ་རེག་ཤེས་དང་། བཙུན་མོ་རྟག་པར་མ་ཡིན་པ་དང་། ཆད་པར་མ་ཡིན་པ་དང་། བདག་ཏུ་མ་ཡིན་པ་དང་། མཚན་མར་མ་ཡིན་པ་ལ་སོགས་པ། དེ་ལྟ་བུའི་ཚོགས་བརྗོད་ཀྱིས་མི་ལང་བ་དང་གཉིས་སུ་མེད་པར་བཞུགས་སོ། །དེ་ནས་དེ་བཞིན་གཤེགས་པ་བཙུན་མོའི་ཚོགས་དང་གཉིས་སུ་མེད་པའི་གསང་བའི་དཀྱིལ་འཁོར་དེ་དག་ཉིད་ཀྱི་གསང་བ་འདི་ཉིད་སྐུ་དང་གསུང་དང་ཐུགས་དང་ཡོན་ཏན་དང་ཕྲིན་ལས་རྡོ་རྗེ་ལས་ཕྱུང་ངོ་། །ཨེ་ཨེ་མ་ཨེ་མ་ཧོཿདེ་བཞིན་ཉིད་ཀྱི་དབྱིངས་ཉིད་དབང་སྒྱུར་ཡེ་ཤེས་དཀྱིལ་འཁོར་ཐུགས་རྗེའི་ངང་། །རང་སྣང་བ་ཉིད་ཏིང་འཛིན་གཟུགས་བརྙན་སྒྱུ་མ་རྣམ་དག་གསལ་བ་ནི། །སྐུ་གསུང་ཐུགས་དང་ཡོན་ཏན་ཕྲིན་ལས་སེལ་མེད་པ་ཡི་ཡོན་ཏན་ཡིད་བཞིན་རིན་པོ་ཆེ། །མི་ཟད་པར་ལྡན་རྒྱན་གྱི་འཁོར་ལོ་རྡོ་རྗེ་མཆོག་གི་གནས་ཉིད་དོ། །ཞེས་རྡོ་རྗེ་གསང་བའི་ཚིག་ཏུའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་གླེང་གཞིའི་ལེའུ་སྟེ་དང་པོའོ།། །། ལེའུ་གཉིས་པ།༈ དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་ཡིད་ཀུན་ཏུ་བཟང་པོ། ཐམས་ཅད་མ་ལུས་པའི་རང་བཞིན་གྱི་ཚུལ་རྡོ་རྗེས། བཙུན་མོ་བྱ་བ་མོ་ཆོས་ཀུན་ཏུ་བཟང་མོ་ལ་འཇུག་པར་གྱུར་ཏོ། །ཞུགས་པས་ཕྱོགས་བཅུ་དུས་བཞིའི་དེ་བཞིན་གཤེགས་པ་མ་ལུས་པ་ཐམས་ཅད་གཅིག་གི་རང་བཞིན་དབྱེར་མེད་པས་དེ་བཞིན་གཤེག་པ་ཉིད། དེ་བཞིན་གཤེགས་པ་ཉིད་ལ་ཆེད་དུ་བརྗོད་པ་འདི་བརྗོད་དོ། །ཨེ་མ་ཧོཿརྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་བརྗོད་པས། དེ་བཞིན་གཤེགས་པ་ཐམས་ཅད་མཉེས་པར་གྱུར་ཏོ། །དེ་ནས་བཙུན་མོ་བྱ་བ་མོ་ཆོས་ཀུན་ཏུ་བཟང་མོ། བཅོམ་ལྡན་འདས་ཡིད་ཀུན་ཏུ་བཟང་པོ་དང་གཉིས་སུ་མེད་པར་གྱུར་ནས། ཆེད་དུ་བརྗོད་པ་འདི་བརྗོད་དོ། །ཀྱེ་མའོ་ཕྱོགས་བཅུ་སྟོང་ཁམས་ཡེ་ནས་དབེན། །སྲིད་པ་གསུམ་ཉིད་དག་པའི་ཞིང་། །སྙིགས་མ་ལྔ་ཉིད་བདེ་ལྡན་གནས། །ཕུང་པོ་ལྔ་ཉིད་རྫོགས་སངས་རྒྱས། །ཐམས་ཅད་མཆོག་གི་སྙིང་པོ་ལས། །གཞན་དུ་རྒྱལ་བས་ཆོས་མི་བཙལ། །ཉིད་ལས་གཞན་ཞེས་བྱ་བའི་ཆོས། །བཙལ་ཀྱང་རྒྱལ་བས་མི་བརྙེས་སོ། །ཞེས་བརྗོད་པས། ཐམས་ཅད་ཡེ་ནས་སངས་རྒྱས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏོ། །དེ་ནས་གཉིས་སུ་མེད་པའི་བདག་ཉིད་ཆེན་པོས་ཡེ་ནས་སངས་རྒྱས་པའི་སེམས་ཡེ་ཤེས་སུ་བསྐྱེད་པ་འདི་གསུངས་སོ། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགག་པ་མེད་ལས་ཐམས་ཅད་འགག །འགག་པ་ཉིད་ན་འགག་པ་མེད། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །ཅེས་བརྗོད་པས། དེ་བཞིན་གཤེགས་པ་ཐམས་ཅད་དང་བཙུན་མོའི་ཚོགས་ཐམས་ཅད་ཀྱང་མཉེས་པས་ཁྱབ་པར་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་དང་། བཙུན་མོའི་ཚོགས་ཐམས་ཅད་དང་བཅས་པས་ཆེད་དུ་བརྗོད་པ་འདི་བརྗོད་དོ། །ཨེ་མ་ཧོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མིན་ལས་ཤིན་ཏུ་གསང་། །ཞེས་བརྗོད་པས། དེ་བཞིན་གཤེགས་པ་ཐམས་ཅད་དང་། ཆོས་ཐམས་ཅད་ཡེ་ནས་སངས་རྒྱས་པའི་ངོ་བོ་ཉིད་དུ་གཅིག་པའི་མཚན་ཉིད་ཡིན་པས་དབྱེར་མེད་ནའང་། འགྲོ་བའི་རྣམ་པར་རྟོག་པ་མ་རིག་པ་ལས། འགྲོ་བ་ལྔའི་རིས་བསམ་གྱིས་མི་ཁྱབ་པར་སྨིན་པ་ལ། ཐུགས་རྗེ་ཆེན་པོ་སངས་རྒྱས་ཀྱི་ཡེ་ཤེས་ཆེན་པོ་སྐྱེས་ནས། ཆེད་དུ་བརྗོད་པ་འདི་བརྗོད་དོ། །ཨེ་མ་ཧོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོ་སོར་འཛིན། །སུས་ཀྱང་མ་བཅིངས་བཅིངས་མེད་དེ། །བཅིང་བར་བྱ་བ་ཡོད་མ་ཡིན། །རྣམ་རྟོག་བདག་ཏུ་འཛིན་པ་ཡིས། །ནན་གྱིས་མཁའ་ལ་མདུད་པ་འདོར། །བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །བསྟན་ཕྱིར་སྤྲོ་བ་སྣ་ཚོགས་མཛད། །ཅེས་དེ་བཞིན་གཤེགས་པ་ཉིད་དེ་བཞིན་གཤེགས་པ་ཉིད་ལ་ཆེད་དུ་གླེང་ངོ་། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དོན་དམ་པ་དང་ཀུན་རྫོབ་ཀྱི་བྱང་ཆུབ་སེམས་ཡེ་ཤེས་སུ་བསྐྱེད་པའི་ལེའུ་སྟེ་གཉིས་པའོ།། །། ལེའུ་གསུམ་པ།༈ དེ་ནས་དེ་བཞིན་གཤེགས་པ་ཐམས་ཅད་ལས། ཐུགས་རྗེ་ཆེན་པོའི་བྱིན་གྱིས་བརླབས་ཞེས་བྱ་བའི། རིག་པའི་སྐྱེས་བུ་ཐུབ་པ་དྲུག །དེ་བཞིན་གཤེགས་པའི་སྐུ་དང་གསུང་དང་ཐུགས་རྡོ་རྗེ་ལས་འཐོན་ཏོ། །འཐོན་ནས་ཀྱང་ལས་ཀྱི་དབང་གིས་སྣྲེལ་གཞི་དང་ཡན་མན་གྱི་འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པའི་སྟོང་གསུམ་གྱི་སྟོང་ཆེན་པོ་རེ་རེར། ཐུབ་པ་ཆེན་པོ་བཅོམ་ལྡན་འདས་རེ་རེས་འདུལ་བ་རྣམ་པ་བཞིས་འགྲོ་བ་ལྔའི་དོན་མཛད་དེ། བལྟམས་པ་དང་། རབ་ཏུ་བྱུང་བ་དང་། དཀའ་ཐུབ་མཛད་པ་དང་། སངས་རྒྱས་པ་དང་། བདུད་བཏུལ་བ་དང་། ཆོས་ཀྱི་འཁོར་ལོ་བསྐོར་བ་དང་། ཆོ་འཕྲུལ་ཆེན་པོ་བསྟན་པ་དང་། མྱ་ངན་ལས་འདས་པ་ལ་སོགས་པར་སྟོན་པའི་ཐུབ་པས། དུས་གཞི་ཀུན་ཏུ་མཁྱེན་པ་དང་། ཐམས་ཅད་ཀྱི་སེམས་ཀྱི་རྒྱུད་ཀུན་ཏུ་མཁྱེན་པ་དང་། རྫུ་འཕྲུལ་གྱི་སྤྱན་གྱིས་ཐམས་ཅད་ཀུན་ཏུ་གཟིགས་པ་དང་། རྫུ་འཕྲུལ་གྱི་སྙན་གྱིས་ཀུན་ཏུ་གསན་པ་དང་། རྫུ་འཕྲུལ་གྱི་ཆོ་གས་ཀུན་ཏུ་དོན་སྤྱོད་པ་དང་། ཟག་པ་མེད་པ་ཀུན་ཏུ་བཟང་པོའི་སྤྱོད་པ་རྫོགས་པའི་མངོན་པར་ཤེས་པ་ཆེན་པོ་དྲུག་དང་། ཀུན་ཏུ་སྐུ་བསམ་གྱིས་མི་ཁྱབ་པ་དང་། ཀུན་ཏུ་ཐུགས་བསམ་གྱིས་མི་ཁྱབ་པ་དང་། ཀུན་ཏུ་ཞལ་བསམ་གྱིས་མི་ཁྱབ་པ་དང་། ཀུན་ཏུ་གསུང་བསམ་གྱིས་མི་ཁྱབ་པ་དང་ལྡན་པ། བསམ་གྱིས་མི་ཁྱབ་པ་གྲངས་མེད་པ་ཕྱོགས་བཅུར་སྣང་བར་གྱུར་ཏོ། །ཐམས་ཅད་ཀྱང་འདི་ལྟ་སྟེ། འདུལ་བའི་དབང་གིས་ལྷ་དང་མིའི་ཐེག་པ་དང་། ཉན་ཐོས་ཀྱི་ཐེག་པ་དང་། རང་བྱང་ཆུབ་ཀྱི་ཐེག་པ་དང་། བྱང་ཆུབ་སེམས་དཔའི་ཐེག་པ་དང་། བླ་ན་མེད་པའི་ཐེག་པ་དང་། མ་རིག་པའི་རྣམ་པར་རྟོག་པ་ཉོན་མོངས་པ་སྟོང་ཕྲག་བརྒྱད་ཅུ་རྩ་བཞིའི་གཉེན་པོར། ཆོས་སྟོང་ཕྲག་བརྒྱད་ཅུ་རྩ་བཞི་གསུངས་སོ། །གསུང་ངོ་། །གསུང་བར་འགྱུར་རོ། །དེ་དག་ཐམས་ཅད་ཀྱང་གཟུང་བ་དང་འཛིན་པའི་ཕྱི་ནང་གི་རྟེན་ཅིང་འབྲེལ་བར་འབྱུང་བ་འཛིན་པ་འཁྲུལ་པ་ལས་འདོགས་པ་དང་། ལས་དང་ལས་ཀྱི་འབྲས་བུ་ཆུད་མི་ཟ་བ་དང་། ལས་དང་ལས་ཀྱི་འབྲས་བུས་མི་གོས། གོས་པར་མི་འགྱུར། གོས་སུ་མེད་པར་སྟོན་པའི་མཐར་ཐུག་གོ །དེ་ནས་དེ་བཞིན་གཤེགས་པ་ཐམས་ཅད་ཀྱིས་ཆེད་དུ་བརྗོད་པ་འདི་བརྗོད་དོ། །ཇི་སྙེད་འཇིག་རྟེན་འཁྲུལ་པའི་ཆོས། །མ་རིག་རྟོག་པའི་གཟུང་འཛིན་གྱིས། །ཕྱི་ནང་རྟེན་འབྲེལ་གཉིས་སུ་འཁོར། །མི་མཐུན་བདེ་སྡུག་མྱོང་བར་འགྱུར། །རང་བཞིན་ཉིད་ལས་ཉམས་པ་མེད། །ཡང་དག་སྒྱུ་མའི་ཚུལ་གཉིས་སུ། །བདག་དང་བདག་གི་གཞན་མེད་དེ། །རྣམ་དག་དབྱིངས་ཉིད་ཚུལ་གཅིག་གོ །བདག་དང་བདག་གི་གཞན་རྣམས་ནི། །ལོག་པར་རྟོག་པ་ཙམ་ཉིད་ལས། །ཕྲ་ཞིང་ཟབ་པའང་ཡོད་མ་ཡིན། །ལོག་རྟོག་ཉིད་ལ་ཉིད་སྤྱོད་པས། །གཞན་དུ་གཡོ་བ་ཅི་ཡང་མེད། །ལོག་རྟོག་རྒྱུ་འབྲས་རྒྱུན་ཉིད་ཀྱང་། །གཞི་རྩ་མེད་དབྱིངས་སྐད་ཅིག་མ། །རྣམ་པར་དག་པའི་དབྱིངས་ཉིད་ཚུལ། །ཉིད་ལ་དབང་སྒྱུར་ཉིད་སྤྱོད་ཕྱིར། །བདག་དང་གཞན་དང་རྟོག་པའི་རྒྱུན། །རྣམ་དག་བླ་མེད་ཐེག་པའི་མཆོག །ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཡང་དག་རྟོགས་པས་རབ་བརྟགས་ན། །རང་བཞིན་མེད་ལས་ཅིར་ཡང་འགྲུབ། །སངས་རྒྱས་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་ཏེ། །མ་རིག་སྨིན་མཛད་འདུལ་བའི་ཕྱིར། །བྱུང་ནས་མྱ་ངན་འདའ་བར་སྟོན། །འདུལ་བ་མདོ་སྡེ་ཆོས་མངོན་དང་། །དམ་ཚིག་སྒྲུབ་དང་གྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །ཕྱོགས་བཅུ་ཀུན་ཏུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །རང་བཞིན་གསང་བའི་སྙིང་པོ་འདི། །སྡེ་སྣོད་ཀུན་དང་རྒྱུད་ཀུན་གྱི། །འབྱུང་གནས་གཏན་ལ་ངེས་པར་འབེབས། །ཆོས་རྣམས་མིང་དུ་བཏགས་པ་ཙམ། །སྟོན་པས་དོན་དང་མཐུན་ཕྱོགས་སུ། །མིང་དང་ཚིག་ཏུ་བཏགས་ནས་བསྟན། །སྟོན་མིང་ཚིག་ལ་དངོས་པོ་མེད། །ཅེས་བརྗོད་དོ། །དེ་ནས་དེ་བཞིན་གཤེགས་པ་གཉིས་སུ་མེད་པའི་དཀྱིལ་འཁོར་དེ་དག་ཉིད་ཀྱིས་གསང་བ་འདི་ཉིད། སྐུ་དང་གསུང་དང་ཐུགས་ཡོན་ཏན་ཕྲིན་ལས་རྡོ་རྗེ་ལས་ཕྱུང་ངོ་། །ཨ་ཧོཿསྲིད་རྩའི་ཉེས་དམིགས་བདག་ཏུ་རྟོག་ལས་འཕྲོས། །རྒྱུད་དྲུག་སྐྱེ་འགག་ལུས་དང་ལོངས་སྤྱོད་དང་། །གནས་དང་སྡུག་བསྔལ་འཁྲུལ་འཁོར་ལ་སོགས་པ། །ལོག་རྟོག་ཉིད་ལས་གཞན་དུ་ཅི་ཡང་མེད། །སྟོང་ཉིད་བདག་མེད་ཡེ་མཁྱེན་རང་རིག་ཐུགས། །དམིགས་བྱ་དམིགས་བྱེད་མེད་པར་དྲན་དབང་སྒྱུར། །ངོ་མཚར་སྐུ་གསུང་ཡོན་ཏན་ཞིང་ཁམས་ལས། །གཞན་ན་མེད་དེ་དེ་ཉིད་དེ་ལྟར་ཡིན། །ཞེས་རྡོ་རྗེ་གསང་བའི་ཚིག་ཏུའོ། །ཞེས་བརྗོད་པས། ཐུབ་པ་དྲུག་གི་སྤྲུལ་པ་གྲངས་མེད་པ་དང་། དེ་བཞིན་གཤེགས་པ་ཐམས་ཅད་ཀྱིས་གསུངས་པ་ཡང་དེ་དག་ཏུ་འདུས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཆོས་ཐམས་ཅད་གཏན་ལ་ཕབ་པའི་ལེའུ་སྟེ་གསུམ་པའོ།། །། ལེའུ་བཞི་པ།༈ དེ་ནས་དེ་བཞིན་གཤེགས་པ་ཐམས་ཅད་དགོངས་པ་གཅིག་ཏུ་གྱུར་ནས། མཉམ་པ་ཆེན་པོའི་ཚུལ་རྡོ་རྗེའི་དབྱིངས་སུ། ཆོས་ཐམས་ཅད་ཡེ་ནས་སངས་རྒྱས་པའི་ཏིང་ངེ་འཛིན་ལས་མི་གཡོ་བར། ཆོས་ཐམས་ཅད་མིང་ཙམ་དུ་གནས་པའི་ཡི་གེ་ཕྲེང་བའི་འཁོར་ལོ་ཞེས་བྱ་བ་འདི། སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨཿརབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཕྱོགས་བཅུ་གང་བར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བརྟན། །དེ་ལས་མིང་ཚོགས་གསལ་འབར་ཀུན། །སྤྲོ་ཞིང་བསྡུ་བའང་དེ་བཞིན་ནོ། །འདི་ནི་རྡོ་རྗེ་དངོས་གྲུབ་ཀྱི། །བརྟན་བྱུང་ཡེ་ཤེས་རྒྱུ་ཡིན་ནོ། །ཨཿཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ཝ་ར་ལ། ཤ་ཥ་ས་ཧ། ཀྵཿཨི་ཨཱི། ཨུ་ཨཱུ། ཨེ་ཨཻ། ཨོ་ཨཽ། འདི་དག་ཕྱུང་བས། འཇིག་རྟེན་དྲུག་གི་ཕྱོགས་བཅུ་མཐའ་ཡས་པ། རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་གཡོས་ནས། ཆོས་ཐམས་ཅད་མིང་གི་མཚན་ཉིད་ཙམ་དུ་གྱུར་ཏོ། །ཧོཿདེ་ནས་དེ་བཞིན་གཤེགས་པ་ཐམས་ཅད་ཀྱིས་ཆེད་དུ་བརྗོད་པ་འདི་བརྗོད་དོ། །ཨ་ནི་སྟོང་དང་མི་སྟོང་གི །དབུ་མའང་དམིགས་སུ་ཡོད་མ་ཡིན། །ཐམས་ཅད་མིང་ཙམ་སངས་རྒྱས་ཀུན། །ཡི་གེ་ཕྲེང་བ་ཉིད་ལ་གནས། །ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་བཞི་བཅུ་གཉིས། །སྒྲ་ཡི་མིང་གིས་ཐམས་ཅད་བསྡུས། །མངོན་རྫོགས་རྒྱལ་པོར་དེ་ཉིད་ངེས། །ཨེ་མ་ཧོ་ངོ་མཚར་ཡ་མཚན་གྱི། །འཕྲུལ་ཆེན་བཞི་བཅུ་རྩ་ལྔའི་མིང་། །ཚིག་རྣམས་མ་ལུས་འཛིན་པའི་གནས། །སྣ་ཚོགས་དོན་ཆེན་སྨྲ་ཞིང་སྟོན། །དངོས་མེད་ཡི་གེའི་རང་བཞིན་སེམས། །བདག་མེད་མཐའ་བྲལ་མི་དམིགས་ཀྱང་། །དབྱིབས་དང་ཁ་དོག་མིང་ཚོགས་ཀྱི། །རོལ་པ་ཅིར་ཡང་སྤྲུལ་ཅིང་སྟོན། །ཕྱོགས་བཅུ་དུས་བཞིར་གཤེགས་པ་ཡི། །ཡེ་ཤེས་སེམས་དཔའི་སྐུ་གསུང་ཐུགས། །དཀྱིལ་འཁོར་བཞི་བཅུ་རྩ་ལྔ་ཉིད། །ཡི་གེ་མགོ་ནས་ཀྵ་ལ་རྫོགས། །སེམས་ཀྱི་རང་བཞིན་ཡི་གེ་སྟེ། །ཡི་གེ་དངོས་པོ་ཡོད་མ་ཡིན། །དམིགས་མེད་དེ་ཉིད་སྣ་ཚོགས་པའི། །སྐུ་གསུང་ཐུགས་ཀྱི་འཁོར་ལོ་ཆེ། །སྐུ་གསུང་ཐུགས་ནི་ངོ་མཚར་གྱི། །ཡ་མཚན་འཕྲུལ་ཆེན་རབ་འགུགས་པའོ། །དབྱིངས་ལ་དབྱིངས་ཀྱིས་བྲིས་པ་སྟེ། །ཡི་གེ་ཞེས་ནི་དེ་ཕྱིར་བརྗོད། །མགོ་ནི་མ་ནོར་ལམ་ཡིན་ཏེ། །ཏིག་ནི་ཤེས་རབ་མིང་དུ་སྨྲ། །ཤད་ནི་ཐབས་ཆེན་ཚིགས་སུ་གཅོད། །ཨ་ནི་སྐྱེ་མེད་དེ་བཞིན་ཉིད། །ཋ་ནི་སྒྱུ་འཕྲུལ་རྡོ་རྗེ་ཉིད། །ཊ་ནི་སྣང་བའི་སྒྱུ་འཕྲུལ་ཉིད། །ཌ་ནི་སྒྱུ་འཕྲུལ་ཡིད་བཞིན་ཉིད། །ཌྷ་ནི་སྒྱུ་འཕྲུལ་རྣམ་དག་ཉིད། །ཎ་ནི་ཀུན་ཏུ་སྒྱུ་འཕྲུལ་ཉིད། །ཐ་ནི་དྲྭ་བ་མངོན་རྫོགས་ཉིད། །ཏ་ནི་དྲྭ་བས་བརྟན་པ་ཉིད། །ད་ནི་དྲྭ་བས་ལྷམ་མེ་ཉིད། །དྷ་ནི་དྲྭ་བས་འཁྲིལ་བ་ཉིད། །ན་ནི་དྲྭ་བས་ཀུན་ཏུ་འགྱུར། །ཀ་ནི་སྤྱན་གྱི་ཐུགས་ཀྱི་མཆོག །ཁ་ནི་སྙན་གྱི་ཐུགས་ཀྱི་མཆོག །ག་ནི་ཤངས་ཀྱི་ཐུགས་ཀྱི་མཆོག །གྷ་ནི་ལྗགས་ཀྱི་ཐུགས་ཀྱི་མཆོག །ང་ནི་ཐུགས་ཀྱང་འཇིག་བྱེད་པའོ། །ཙ་ནི་སྤྱན་གྱི་སྐུ་ཡི་མཆོག །ཚ་ནི་སྙན་གྱི་སྐུ་ཡི་མཆོག །ཛ་ནི་ཤངས་ཀྱི་སྐུ་ཡི་མཆོག །ཛྷ་ནི་ལྗགས་ཀྱི་སྐུ་ཡི་མཆོག །ཉ་ནི་སྐུ་ཡང་འཇིག་བྱེད་པའོ། །པ་ནི་སྤྱན་གྱི་གསུང་གི་མཆོག །ཕ་ནི་སྙན་གྱི་གསུང་གི་མཆོག །བ་ནི་ཤངས་ཀྱི་གསུང་གི་མཆོག །བྷ་ནི་ལྗགས་ཀྱི་གསུང་གི་མཆོག །མ་ནི་གསུང་ཡང་འཇིག་པར་བྱེད། །ཡ་ནི་སྐྱེ་བ་རྣམ་པར་དག །ཝ་ནི་གནས་པ་དག་པ་ཡིན། །ར་ནི་འཇིག་པ་དག་པ་སྟེ། །ལ་ནི་སྟོང་པ་དག་པའོ། །ཤ་ནི་རྟག་པ་དག་པ་སྟེ། །ཥ་ནི་ཆད་པའང་ཡོད་མ་ཡིན། །ས་ནི་མཐའ་བྲལ་བདག་མེད་པ། །ཧ་ནི་མཚན་མ་མེད་པ་ཉིད། །ཀྵ་ནི་ཡེ་ཤེས་ཐུགས་ཀྱི་ཐུགས། །ཨི་ནི་རྡུལ་སྙེད་ལྷ་རྣམས་སུ། །ཨཱི་ནི་རྡུལ་སྙེད་ལྷ་མ་ཡིན། །ཨུ་ནི་རྡུལ་སྙེད་མི་རྣམས་སུ། །ཨཱུ་ནི་རྡུལ་སྙེད་བྱོལ་སོང་རྣམས། །ཨེ་ནི་རྡུལ་སྙེད་ཡི་དྭགས་སུ། །ཨཻ་ནི་རྡུལ་སྙེད་དམྱལ་བ་རྣམས། །ཨོ་ནི་ཐམས་ཅད་འཇིག་པར་བྱེད། །ཨཽ་ནི་ཐམས་ཅད་ཞིག་པ་ཡིན། །ཡི་གེ་འཁོར་ལོ་ཚོགས་ཆེན་འདིས། །སྐུ་གསུང་ཐུགས་ཀྱི་ཕྲེང་བ་བསྡུས། །ཞེས་བརྗོད་དོ། །ཨ་ཧོཿདེ་ནས་དེ་བཞིན་གཤེགས་པ་བཙུན་མོའི་ཚོགས་དང་གཉིས་སུ་མེད་པའི་དཀྱིལ་འཁོར་དེ་དག་ཉིད་ཀྱི་གསང་བ་འདི་ཉིད། སྐུ་གསུང་ཐུགས་ཡོན་ཏན་ཕྲིན་ལས་རྡོ་རྗེ་ལས་ཕྱུང་ངོ་། །ཨ་ཧོཿཐབས་དང་ཤེས་རབ་དགྱེས་སྤྲིན་བྱང་ཆུབ་སེམས་ཚོགས་རྒྱུ་འཁོར་ལོ། །འབྲས་བུ་རྒྱལ་བ་སྨིན་གྲུབ་ངོ་མཚར་མིང་ཚོགས་བཞི་བཅུ་གཉིས། །འདུས་མ་བྱས་ཉིད་འདུས་བྱས་རྡོ་རྗེ་དཀྱིལ་འཁོར་འབྱིན་པའི་དམ། །འདའ་བར་མི་མཛད་དབང་མེད་རྒྱུ་རྐྱེན་འཚོགས་པའི་མཐུ་ཆེན་ཡིན། །ཨ་ཧོཿརྡོ་རྗེ་གསང་བའི་ཚིག་ཏུའོ། །ཞེས་བརྗོད་པས། དེ་བཞིན་གཤེགས་པ་ཐམས་ཅད་ཡི་གེའི་འཁོར་ལོར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཡི་གེ་ཕྲེང་བའི་འཁོར་ལོ་བཀོད་པའི་ལེའུ་སྟེ་བཞི་པའོ།། །། ལེའུ་ལྔ་པ།༈ དེ་ནས་ཡི་གེ་འཁོར་ལོའི་སྤྲིན་བཀོད་པ་ལས་སྒྱུ་འཕྲུལ་རྣམ་པར་འཕྲོ་བ་འདི་ཆེད་དུ་བརྗོད་དོ། །རྩ་བ་མེད་པའི་སེམས་ཉིད་ནི། །ཆོས་རྣམས་ཀུན་ཀྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པས། །ཕྱོགས་བཅུ་དུས་བཞི་རྫོགས་པ་ཡི། །དཀྱིལ་འཁོར་ཐམས་ཅད་འགྲུབ་པར་འགྱུར། །བདུད་རྩིར་འགྱུར་ཞིང་འབྱུང་བ་དང་། །བཞི་བརྒྱ་རྩ་བཞིའི་ནད་སེལ་ཅིང་། །ལོངས་སྤྱོད་འབྱུང་ཞིང་ངན་སོང་སྦྱོང་། །ཅི་ཡང་གཞན་དུ་འགྱུར་བ་འགྲུབ། །ནམ་མཁའ་རྡོ་རྗེ་སྲ་འབྱུང་ཞིང་། །འབར་ནས་མེ་ཡང་འཚིག་པ་དང་། །ཆུར་འགྱུར་འབབ་པའང་དེ་བཞིན་ཏེ། །འཇིག་རྟེན་ཁམས་ནི་འཐོར་བ་དང་། །ཐམས་ཅད་སྟོངས་ཤིང་ལྟུང་བར་འགྱུར། །དགུག་དང་བཏང་དང་བཅིང་དང་དགྲོལ། །གསོ་དང་བསད་དང་འཕམ་དང་རྒྱལ། །ཏིང་འཛིན་འདི་ཡིས་བྱེད་པར་འགྱུར། །དེ་ཉིད་ཡེ་ཤེས་རང་སྣང་བའི། །མིང་ཚིག་གཟུགས་སོགས་ཡིད་བཞིན་གྱིས། །མུན་ལ་སྣང་བྱུང་ཇི་བཞིན་དུ། །འགྱུར་བ་གསེར་འགྱུར་སྨན་གྱི་ཚུལ། །སྟོན་པ་མཆོད་བརྩོན་རྟོགས་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །འགྲུབ་འགྱུར་མི་ལྡན་དོན་མེད་བརླག །དུས་གསུམ་རྒྱལ་བས་ཐུགས་ཆུད་པའི། །དངོས་གྲུབ་མཆོག་གི་སྙིང་པོ་ནི། །ཟད་པའི་དུས་མེད་ཡིད་བཞིན་མཛོད། །འཕེལ་འགྲིབ་མེད་པར་འབྱུང་བ་སྟེ། །དངོས་པོ་མེད་ལས་དངོས་པོའི་སྤྲིན། །སྣ་ཚོགས་རྣམ་པར་འབྱུང་ཞིང་འགྱུར། །དངོས་རྣམས་ཉིད་ན་དངོས་མེད་པར། །རྟོགས་པའི་དབང་སྒྱུར་ཏིང་འཛིན་ཡིན། །གང་གིས་དམིགས་མེད་མི་ཤེས་པ། །དེ་ཡིས་ཆོས་ཀྱི་དབྱིངས་མི་ཤེས། །དེ་ཕྱིར་དངོས་དང་དངོས་མེད་པ། །འཇིག་པས་དམིགས་མེད་ཤེས་པར་གྱིས། །གཞི་རྩ་མེད་པའི་སེམས་ཉིད་ནི། །ཕོ་མོ་མ་ཡིན་མ་ནིང་མིན། །མཚན་མེད་མ་ཡིན་རིགས་བརྒྱུད་མིན། །ཁ་དོག་མ་ཡིན་དབྱིབས་མ་ཡིན། །གནས་སུ་མ་ཡིན་གང་ཡང་མིན། །དེ་བཞིན་ཉིད་དབྱིངས་ཡེ་ཤེས་ཏེ། །ཐབས་ཀྱི་ཕྱག་རྒྱ་ཀུན་གྱི་རྒྱུ། །ཐབས་ལས་ཐབས་བྱུང་ཐབས་བསམ་ཡས། །ཐ་དད་མིན་ལས་ཐ་དད་པའི། །ནང་དང་ནང་གི་ཕྱི་རོལ་གྱི། །དཀྱིལ་འཁོར་བསམ་ཡས་ཡེ་ཤེས་རོལ། །འཇིགས་མེད་ཀུན་བཟང་ཕྱག་རྒྱའི་མཆོག །གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་བརྗོད་པས་དེ་བཞིན་གཤེགས་པ་ཉིད་གཟིགས་མོས་མཉེས་པར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་སྒྱུ་འཕྲུལ་དྲྭ་བ་བསྒྲུབ་པའི་ཏིང་ངེ་འཛིན་གྱི་ལེའུ་སྟེ་ལྔ་པའོ།། །། ལེའུ་དྲུག་པ།༈ དེ་ནས་དེ་བཞིན་གཤེགས་པ་ཐམས་ཅད་ཀྱི་རང་བཞིན་གཅིག་དང་དུ་མ་མེད་པའི་བདག་ཉིད་ཐམས་ཅད་ཀྱིས། འཇིག་རྟེན་དྲུག་གི་ཕྱོགས་བཅུ་ཐམས་ཅད་ལ། ཉིད་ཀྱི་ཆེ་བའི་དཀྱིལ་འཁོར་དབྱུང་བར་བཞེད་ནས། ཆེད་དུ་བརྗོད་པ་འདི་བརྗོད་དོ། །ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །འཁོར་ལོ་རྩིབས་བཞི་མུ་ཁྱུད་བཅས། །གྲུ་ཆད་བཞིས་བརྒྱན་བར་ཁྱམས་དང་། །ཀུན་ཏུ་གྲུ་བཞི་སྒོ་ཁྱུད་ལྡན། །རོལ་མོ་སྣ་ཚོགས་སྤྲིན་ཕུང་བཞིན། །དཀྱིལ་འཁོར་བཞི་བཅུ་གཉིས་ཀྱིས་བརྒྱན། །སེང་གེ་གླང་ཆེན་རྟ་དང་ཁྱུང་། །ནམ་མཁའ་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །གདན་ལ་རྫོགས་དང་སེམས་དཔའི་ཚུལ། །འཁོར་ལོ་རྒྱལ་པོ་རྒྱལ་མོ་དང་། །གཡས་ནས་མཐོང་ཐོས་སྣོམ་པ་དང་། །མྱོང་དང་བཙུན་མོའི་ཚོགས་སུ་བཅས། །གྲུ་ཆད་ལ་ནི་མཐོང་བྱེད་དང་། །ཐོས་བྱེད་སྣོམ་བྱེད་མྱོང་བྱེད་རྣམས། །བཙུན་མོའི་ཚོགས་དང་བཅས་པར་གནས། །བར་ཁྱམས་ལ་ནི་ཐུབ་དྲུག་དང་། །མདུན་དང་རྒྱབ་ཏུ་བྱེད་པ་དང་། །བྱ་བ་དག་ནི་གནས་པར་བསྟན། །སྒོ་ཁྱུད་བཞི་ལ་འཇོམས་པ་ནི། །བཙུན་མོའི་ཚོགས་དང་ལྡན་པར་གནས། །རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲི་དྲིལ་བུ་འབར། །ཨུཏྤལ་ཀླུ་ཤིང་ལ་སོགས་མཚན། །མཛེས་ཚུལ་མཉེས་པའི་ཡོ་བྱད་འཛིན། །མཐིང་ག་དཀར་པོ་སེར་ལེ་བརྒན། །ལྗང་གུ་ལ་སོགས་སྣ་ཚོགས་པའི། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུན་སྡུག་གཟི་བྱིན་ལྡན། །འོད་ཟེར་འཕྲོ་བའི་ཚོགས་ཆེན་པོ། །འབར་བའི་ཕྲེང་བས་འཁྲིགས་པ་སྟེ། །མཐའ་དབུས་མེད་པར་ཁྱབ་པ་ཡི། །དཀྱིལ་འཁོར་བསམ་ཡས་ལྷུན་གྱིས་གྲུབ། །སྐུ་ཡི་ཕྱག་རྒྱ་ཆེ་མཆོག་ནི། །དེ་བཞིན་དབྱིངས་ལས་མ་གཡོས་ཀྱང་། །ཡང་དག་ཐར་པའི་གཟུགས་སྐུ་དང་། །འགྲོ་བ་མ་ལུས་འདུལ་བའི་ཕྱིར། །མཐུན་བྱས་སྐུ་ནི་སྣ་ཚོགས་སྟོན། །སྟོན་ཉིད་སྒྱུ་མ་མིག་ཡོར་ཚུལ། །ཚུལ་ཉིད་དབྱིངས་ལས་གཡོས་པ་མེད། །མ་གཡོས་བཞིན་དུ་སྣ་ཚོགས་པའི། །དེའི་ཚེ་མི་མཐུན་སྣ་ཚོགས་ལ། །སོ་སོ་འདྲ་བར་སྣང་བ་ནི། །དེ་བཞིན་ཉིད་ཀྱིས་མ་བཅོས་ཀྱང་། །ལས་འཕྲོའི་དབང་གིས་སོ་སོར་སྣང་། །དཔེར་ན་མེ་ལོང་ཆུ་ཟླ་བཞིན། །དེ་ཚེ་འགྲོ་དྲུག་ཐམས་ཅད་ལ། །སྡིག་སྤོང་གཟུགས་སུ་སྣང་བར་བསྟན། །ཉན་ཐོས་རྣམས་ལ་དགྲ་བཅོམ་གཟུགས། །རང་རྒྱལ་རྣམས་ལ་བསེ་རུའི་ཚུལ། །གཞན་ཡང་ཐེག་མཆོག་རིམ་པ་བཞིན། །འོག་མིན་བླ་མེད་གནས་མཆོག་ཏུ། །སྐུ་ནི་རྣམ་པར་སྣང་མཛད་ཚུལ། །བྱང་ཆུབ་སེམས་དཔའི་འཁོར་རྣམས་ལ། །དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་མཇལ་བར་སྟོན། །མེ་ལོང་བསྟན་པའི་ཚུལ་བཞིན་དུ། །དངོས་ཀྱི་མདོག་ངན་ཐམས་ཅད་སེལ། །འཁོར་གྱིས་དེ་བཞིན་སྐུ་བལྟས་ན། །བྱང་ཆུབ་སྒྲིབ་པ་གཏིང་དཔག་མེད། །མེ་ལོང་བཞིན་དུ་སྐུ་ལ་སྣང་། །དེ་ནས་ས་བཅུ་རིམ་གྱིས་འབྱང་། །བླ་མེད་བྱང་ཆུབ་ཡང་དག་ཐོབ། །ཆོས་སྐུ་དཔག་མེད་བརྗོད་དུ་མེད། །ལོངས་སྐུ་ཟད་མེད་ཡིད་བཞིན་གཏེར། །སྤྲུལ་པ་བྱེ་བ་བསམ་མི་ཁྱབ། །མཚན་དང་དཔེ་བྱད་ཐམས་ཅད་རྫོགས། །སྤྱོད་ཡུལ་ཀུན་ཏུ་མཎྜ་ལ། །ཚོགས་ཆེན་གཉིས་ཀྱང་རྫོགས་པར་རོལ། །ཐབས་དང་ཤེས་རབ་ས་ཡི་མཆོག །དེ་ལ་སོགས་པ་བསམ་ཡས་མཆོག །སྐྱེ་ཤི་མེད་པའི་གཡུང་དྲུང་སྐུ། །ཉོན་མོངས་ཀུན་གྱི་ཞིང་དུ་གནས། །ཟད་མི་ཤེས་པའི་གཏེར་དུ་འགྱུར། །རྡོ་རྗེ་རིག་པ་འཛིན་པའི་སྐུ། །ཐམས་ཅད་དབྱེར་མེད་མཉམ་པའི་སྐུ། །ཐམས་ཅད་མཁྱེན་པའི་ཡེ་ཤེས་སྐུ། །དེ་ཚེ་སྐུ་ལྔ་ཀུན་ཀྱང་རྫོགས། །ཞེས་བརྗོད་པས། འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པ་ཐམས་ཅད་དུ་དཀྱིལ་འཁོར་བརྗོད་ཀྱིས་མི་ལང་བ། ཞིང་གི་རྡུལ་སྙེད་དུ་གསལ་བར་གྱུར་ཏོ། །དེ་ནས་དེ་བཞིན་གཤེགས་པ་བཙུན་མོའི་ཚོགས་དང་གཉིས་སུ་མེད་པའི་དཀྱིལ་འཁོར་དེ་དག་ཉིད་ཀྱི་གསང་བ་འདི་ཉིད་སྐུ་གསུང་ཐུགས་ཡོན་ཏན་ཕྲིན་ལས་རྡོ་རྗེ་ལས་ཕྱུང་ངོ་། །ཨ་ཧོཿདམིགས་བྱ་དམིགས་བྱེད་མི་དམིགས་དཔག་མེད་བསམ་མི་ཁྱབ། །ཡེ་ཤེས་རང་རིག་དཀྱིལ་འཁོར་སྣ་ཚོགས་བརྗོད་མི་ལང་། །མཉམ་དང་མི་མཉམ་ཀུན་ཁྱབ་ཁྱབ་མེད་ཁྱབ་པའི་དབྱིངས། །ཡེ་ནས་ཀུན་གསལ་དཀྱིལ་འཁོར་རྣམ་སྤྲོས་སྤྲོས་པ་མེད། །ཧོཿཞེས་རྡོ་རྗེ་གསང་བའི་ཚིག་ཏུའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དཀྱིལ་འཁོར་སྤྲོས་པའི་ལེའུ་སྟེ་དྲུག་པའོ།། །། ལེའུ་བདུན་པ།༈ དེ་ནས་དེ་བཞིན་གཤེགས་པ་བཙུན་མོའི་ཚོགས་དང་བཅས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ལས་འདི་དག་ཕྱུང་ངོ་། །བྷྲཱུཾ་བི་ཤྭ་བི་ཤྭ་དྡྷེ། ཧཱུཾ་བཛྲ་དྷྲྀཀ །ༀ་ཛི་ན་ཛིཀ །སྭཱཾ་རཏྣ་དྷྲྀཀ །ཨཱཾ་ཨ་རོ་ལིཀ །ཧཱཾ་པྲ་ཛྙཱ་དྷྲྀཀ །མཱུ་དྷཱ་ཏྭཱི་ཤྭ་རཱི། ལཱཾ་དྭེ་ཥ་ར་ཏི། མཱཾ་མོ་ཧ་ར་ཏི། པྱཱཾ་རཱ་ག་ར་ཏི། ཏཱཾ་བཛྲ་ར་ཏི། ཀྵཱིཾ་ཧི་རཱ་ཛ་ཡཿཏྲཾ་ཨཱ་གརྦྷ་ཡཿཧྲི་ཧ་ཧཱུཾ་པདྨ་པ་ད་མཿ ཛིཾ་ཀུ་རུ་པཱ་ཎ་ཧྲཱིཿཧཱུཾ་ལཱ་སྱེ་ས་མ་ཡ་སྟྭཾཿཏྲཱཾ་མཱ་ལྱེ་ས་མ་ཡ་ཧོཿཧྲཱི་གཱི་ཏི་རཱ་ཀོ྅ཧཾ། ཨ་ནྲྀ་ཏི་རཱ་ག་ཡཱ་མི། མཻ་དྷཱ་ར་ཎེ་སྭཱ་ཧཱ། ཐླྷིཾ་ནིསྶ་རཾ་བྷ་ཡ་སྭཱ་ཧཱ། ཧཱུཾ་ས་རཱ་ཛ་ཡ་སྭ་ཧཱ། མུཾ་ཤྲཱི་ཨཾ་རཱ་གཱ་ཡ་སྭཱ་ཧཱ། ཛཿདྷཱུ་པེ་པྲ་བེ་ཤ །ཧཱུཾ་པུཥྤེ་ཨ་བེ་ཤ །བཾ་དཱི་པ་སུ་ཁི་ནཱི། ཧོཿགནྡྷེ་ཙིཏྟ། ཧཱུཾ་ཡ་༼༡༽མཱནྟ་ཀྲྀཏ་ཕཊ། ཧཱུཾ་བིགྷྣཱནྟ་༼༤༽ཀྲྀཏ་ཕཊ། ཧཱུཾ་པདྨཱནྟ་༼༣༽ཀྲྀཏ་ཕཊ། ཧཱུཾ་པྲཛྙཱནྟ་༼༢༽ཀྲྀཏ་ཕཊ། ༀ་མ་ཧཱ་བཛྲ་༼༥༽དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནཱི་ཧཱུཾ་ཕཊ། ༀ་མ་ཧཱ་རཏྣ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནཱི་ཧཱུཾ་ཕཊ། ༀ་མ་ཧཱ་པདྨ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནཱི་ཧཱུཾ་ཕཊ། ༀ་མ་ཧཱ་ཀརྨ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནཱི་ཧཱུཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཙིཏྟ་ༀ། ཨ་ཨ་ཨ་བཛྲཱི་བྷ་དྲ་ས་མནྟ་ཨཿༀ་མུ་ནེ་ཀྲེཾ་སྭཱ་ཧཱ། ༀ་མུ་ནེ་ཧཱུཾ་ཏྲཱུཾ་སྭཱ་ཧཱ། ༀ་མུ་ནེ་སྲུཾ་སྭཱ་ཧཱ། ༀ་མུ་ནེ་བྲཾ་སྭཱ་ཧཱ། ༀ་མུ་ནེ་ཀྵཾ་སྭཱ་ཧཱ། ༀ་མུ་ན་ཡེ་སྭཱ་ཧཱ། ༀ་ཨེ་ཧྱེ་ཧི་བྷ་ག་ཝཱན། མ་ཧཱ་ཀཱ་རུ་ཎི་ཀཱ་དྲྀ་ཤྱ་ཧོཿས་མ་ཡ་སྟྭཾ། ཛཿཧཱུཾ་བཾ་ཧོཿༀ་ཨཱ་ཧཱུཾ་སྭཱ་ཧཱ། བ་བ་བ་བ་བ། ཛྲ་ཛྲ་ཛྲ་ཛྲ་ཛྲ། ས་ས་ས་ས་ས། མ་མ་མ་མ་མ། ཡ་ཡ་ཡ་ཡ་ཡ། ༀ་ཨཱ་ཧཱུཾ་སྭཱ་ཧཱ། ༀ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བས། །ཕྱག་རྒྱ་ཆེན་པོར་བདག་སྦྱོར་ཅིག །ༀ་བཛྲ་ས་མ་ཡ་ཧཱུཾ། ༀ་བཛྲ་ས་མ་ཡ་སྟྭཾ། ༀ་བཛྲ་ས་མ་ཡ་ཧོཿཛཿཧཱུཾ་བཾ་ཧོཿཞེས་བརྗོད་པས། གསུང་གི་དཀྱིལ་འཁོར་འདི་དག་གིས། འཇིག་རྟེན་དྲུག་གི་ཕྱོགས་བཅུ་ཐམས་ཅད་ཁྱབ་པར་གྲགས་སོ། །རབ་ཏུ་གྲགས་སོ། །ཀུན་ཏུ་གྲགས་སོ། །དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་དང་། བྱ་བ་མོ་རྡོ་རྗེ་གཉིས་སུ་མེད་པའི་དཀྱིལ་འཁོར་ལ་ཐིམ་པར་མཛད་དོ། །དེ་ནས་ཕྱོགས་བཅུ་དུས་བཞིའི་དེ་བཞིན་གཤེགས་པའི་བདག་ཉིད་ཆེན་པོས་བདག་ཉིད་ཆེན་པོའི་ཡེ་ཤེས་དང་བྱིན་བསྡུ་བ་ཞེས་བྱ་བ་འདི་སྐུ་དང་གསུང་དང་ཐུགས་རྡོ་རྗེ་སྒྱུ་འཕྲུལ་དྲྭ་བ་ལས་ཕྱུང་ངོ་། །ༀ་མ་ཧཱ་ཤཱུ་ནྱ་ཏཱ་ཛྙཱ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ༀ་མ་ཧཱ་ཨཱ་དཪྴ་ཛྙཱ་ན་བཛྲ་སྭ་བྷཱ་ཝ་ཨཱཏྨ་༼༡༽ཀོ྅ཧཾ། ༀ་མ་ཧཱ་པྲཏྱ་བེཀྵ་ཎ་ཛྙཱ་ན་བཛྲ་སྭ་བྷཱ་བ་ཨཱཏྨ་༼༣༽ཀོ྅ཧཾ། ༀ་མ་ཧཱ་ས་མ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་༼༢༽ཀོ྅ཧཾ། ༀ་མ་ཧཱ་ཀྲྀ་ཏྱཱ་ནུཥྛཱ་ན་ཛྙཱ་ན་བཛྲ་སྭ་བྷཱ་ཝ་ཨཱཏྨ་༼༤༽ཀོ྅ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་བྷཱ་ཝ་ཨཱཏྨ་ཀོ྅ཧཾ། ༀ་སརྦ་ཏ་ཐཱ་ག་ཏ་མ་ཧཱ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་པས། ཐིམ་པར་གྱུར་གསལ་བར་གྱུར་འབར་བར་གྱུར་ཏོ། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསུང་། །སྒྲ་དང་མིང་ཚིག་ཀུན་ལས་འདས། །སྣ་ཚོགས་སྒྲ་རྣམས་གསལ་བར་འབྱུང་། །གསུང་གཅིག་དཀྱིལ་འཁོར་ཡན་ལག་ནི། །བསམ་གྱིས་མི་ཁྱབ་ཀུན་ཏུ་ཁྱབ། །སྒྲ་དང་མིང་ཚིག་སོ་སོར་གྲགས། །ཐམས་ཅད་གསུང་གི་ཕྱག་རྒྱའི་མཆོག །རྒྱུད་མཆོག་སྒྱུ་འཕྲུལ་དྲྭ་བ་ལས། །བདེ་ལྡན་གསུང་གི་དོན་འབྱུང་བའང་། །ཐམས་ཅད་པདྨའི་ངང་གྱུར་ན། །གྲོལ་ཐར་ལམ་དང་འཁོར་བའི་སྒྲ། །ཇི་སྐད་བརྗོད་ཀྱང་གསུང་མཆོག་སྟེ། །ཐེག་པ་མཐོ་དམན་ཐམས་ཅད་དང་། །ལོག་འགྲོ་མ་ལུས་ཐམས་ཅད་སྐད། །བྱང་ཆུབ་རྡོ་རྗེའི་གསུང་དུ་བསྡུས། །བསྡུས་ཉིད་ཕྱོགས་བཅུར་རྣམ་པར་གྲགས། །སྒྲ་ཉིད་མ་ཆགས་ངང་དུ་གསུངས། །གསུངས་པ་ཉིད་ན་བརྗོད་དུ་མེད། །བརྗོད་མེད་དེ་ཉིད་སྣ་ཚོགས་སྒྲ། །ཀུན་ལ་གྲགས་ཤིང་སོ་སོར་མཇལ། །དཔེར་ན་དེ་བཞིན་སྦྲིད་སངས་བཞིན། །གསུང་གཅིག་སྒྲ་ཡིས་སོ་སོར་གོ །དེ་ནི་གསུང་མཆོག་རྒྱལ་པོ་ཡིན། །ཐེག་པ་མཐོ་དམན་བསམ་ཡས་ཀྱང་། །དེ་བཞིན་ཉིད་ལས་མ་གསུངས་ཏེ། །གདུལ་བྱའི་ཐབས་སུ་སོ་སོར་ཐོས། །ཇི་ལྟར་གསུང་རབ་ཀུན་བརྗོད་ཀྱང་། །དེ་བཞིན་ཉིད་ཀྱིས་གསུངས་པ་མེད། །ཡི་གེ་མེད་དང་རིག་པའི་གསུང་། །ལྗགས་ཀྱི་རྩེ་མོར་མ་ཕྱུང་ཡང་། །ཐུགས་རྗེ་གསུང་གི་བྱིན་རླབས་ཀྱིས། །འགྲོ་དོན་སྣ་ཚོགས་སོ་སོར་གསལ། །གསལ་ཉིད་གསུང་གི་རྡོ་རྗེའི་མཆོག །དེ་བཞིན་གསུང་གི་འགྲོ་དོན་རྣམས། །དེ་བཞིན་ངང་ལས་མ་གཡོས་ཀྱང་། །དཔེར་ན་བྲག་ཅའི་སྒྲ་བཞིན་ནོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དཀྱིལ་འཁོར་འདུས་པ་དང་གསང་སྔགས་ཀྱི་ལེའུ་སྟེ་བདུན་པའོ།། །། ལེའུ་བརྒྱད་པ།༈ དེ་ནས་དེ་བཞིན་གཤེགས་པ་ཐམས་ཅད་ཀྱི། ཡན་ལག་ཐམས་ཅད་དཀྱིལ་འཁོར་དུ་ལྷུན་གྱིས་གྲུབ་པར་བྱིན་གྱིས་རློབ་པ་ཞེས་བྱ་བ་འདི་ཆེད་དུ་བརྗོད་དོ། །སྒྱུ་འཕྲུལ་དྲྭ་བས་མངོན་རྫོགས་པ། །ཐམས་ཅད་བྱང་ཆུབ་མཆོག་གི་རྒྱ། །གསང་བ་དེ་ཉིད་ངེས་པ་ཡི། །སྙིང་པོའི་ཕྱག་རྒྱ་འདའ་དཀའོ། །མི་བསྐྱོད་ཉི་མའི་དཀྱིལ་ཡི་གེ ། རིན་ཆེན་ཟླ་བའི་དཀྱིལ་ཡི་གེ ། ལྔ་གཉིས་ཟུང་དུ་སྤྲད་པ་ལས། །སྦྱར་བས་ཕྱག་རྒྱ་འབྱུང་བའི་རྒྱུ། །ༀ་དང་མཱུཾ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པ། །རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །འབྲུ་བཞི་སྦས་ནས་ཐུགས་ཀར་བཀན། །ཧཱུཾ་སྒྲེང་རྩེ་མོར་རྡོ་རྗེ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །མཱུཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ༀ་སྒྲེང་རྩེ་མོར་འཁོར་ལོ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྤས་ནས་ཐུགས་ཀར་བཀན། །ལཱཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །སྭཱཾ་སྒྲེང་རྩེ་མོར་རིན་ཆེན་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །མཱཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ཨཱཾ་སྒྲེང་རྩེ་མོར་པད་མ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །པྱཱཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །འབྲུ་བཞི་སྦས་ནས་ཐུགས་ཀར་བཀན། །ཧཱཾ་སྒྲེང་རྩེ་མོར་རལ་གྲི་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །འབྲུ་བཞི་སྦས་ནས་ཐུགས་ཀར་བཀན། །ཏཱཾ་སྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །ཨུཏྤལ་ཀླུ་ཤིང་ལ་སོགས་མཚན། །རིན་ཆེན་མྱུ་གུ་རལ་གྲི་འབར། །པདྨ་དཀར་པོ་རྡོ་རྗེ་འབར། །ཆོས་ཀྱི་འཁོར་ལོ་རིན་ཅེན་སྙེ། །གཟུགས་མཛེས་རིན་ཅེན་ཕྲེང་བ་དང་། །པི་ཝང་གར་མཁན་མཆོག་ཉིད་དེ། །མེ་ཏོག་ཕྲེང་དང་སྤོས་མཆོད་མ། །མར་མེ་བྱུག་པ་ལ་སོགས་པའི། །ལས་ལ་འཁྲིལ་ཞིང་ཆོས་ལ་བརྟེན། །དབུ་རྣམས་འབྱོ་ཞིང་འདུད་པའི་ཚུལ། །གོང་གི་ཕྱག་རྒྱ་ཆེན་པོ་བཞིན། །གཉིས་མེད་དབྱིངས་ཀྱི་ངང་དུ་འཁྲིལ། །སྒོ་བཞིའི་ཁྲོ་བོའི་ཕྱག་རྒྱ་ནི། །ནྲྀ་མགོ་གདེངས་དང་རྡོ་རྗེ་གནོན། །ཐོད་སྤྲུལ་ཆེན་པོ་གནོན་པ་དང་། །རྡོ་རྗེ་རྒྱ་གྲམ་ལས་ཀྱིས་གནོན། །ལྕགས་ཀྱུ་ཞགས་པ་སྥོ་ཊ་ཧོཿསྒོ་བཞིར་གནས་པ་དེ་དག་ཀྱང་། །འདུད་ཚུལ་འཁྲིལ་བ་གོང་མ་བཞིན། །ཐུབ་དྲུག་ཕྱག་རྒྱ་སྣ་ཚོགས་ཏེ། །མདོར་བསྡུས་ཕྱག་རྒྱ་དྲུག་ཡིན་ནོ། །ཡུམ་ནི་དམིགས་མེད་ཆོས་ཀྱི་དབྱིངས། །ཀུན་བཟང་མཉམ་གཞག་ཡེ་ཤེས་འཕྲོ། །ཡུམ་འགྱུར་མཉམ་རྫོགས་པདྨའི་སྐྱིལ། །གཞན་ཡང་ཕྱག་རྒྱ་སྣ་ཚོགས་ཏེ། །ཡང་ན་དེ་བཞིན་གཤེགས་ཉིད་དམ། །ཡང་ན་རྡོ་རྗེ་ཐལ་མོ་ཉིད། །ཕྱག་རྒྱ་ཆེན་པོའི་ཚོགས་མཆོག་ནི། །ཐབས་དང་ཤེས་རབ་ལྡན་འབྱོར་ན། །མ་བསྐྱོད་མ་བསྒུལ་ཐམས་ཅད་ཀུན། །ཕྱག་རྒྱ་ཆེན་པོའི་ངང་དུ་གནས། །ཡན་ལག་བཞི་བཅུ་རྩ་གཉིས་ལྡན། །དེ་ཉིད་ཡན་ལག་སྤྲོས་བདག་སྟེ། །བཞི་བཅུ་རྩ་གཉིས་གསུམ་འཕྲོར་འགྱུར། །དེ་ལྟར་ལྡན་པའི་གཙོ་མཆོག་གིས། །རྒྱལ་བ་རྒྱལ་མཆོག་དེ་བཞིན་དུ། །བཅུ་གཉིས་དྲུག་གི་འོད་འཕྲོ་འབར། །དེ་ལ་སོགས་ཏེ་བསམ་མི་ཁྱབ། །ཕྱོགས་བཅུ་དུས་བཞི་བསམ་ཡས་སུ། །འདུལ་བའི་དོན་རྣམས་སོ་སོར་སྟོན། །ཐེག་པ་མཐོ་དམན་ཐམས་ཅད་དང་། །ཕྱིན་ཅི་ལོག་རྣམས་བསམ་ཡས་དང་། །ཞི་ཁྲོའི་ཚོགས་ཆེན་ཐམས་ཅད་ལ། །སོ་སོར་མཐུན་བྱས་ཀུན་ཏུ་སྣང་། །དཔེར་ན་གར་མཁན་ཉིད་འདྲ་བ། །ལུས་ལ་མ་བཀོད་སྣ་ཚོགས་སྟོན། །མདོར་ན་ཕྱག་རྒྱ་ཐམས་ཅད་ནི། །འདི་ཞེས་གཅིག་ཅེས་བརྗོད་དུ་མེད། །གཉིས་དང་གསུམ་དུ་རྣམ་པར་འཕྲོ། །བསྐྱོད་དང་སྤྲོ་བའང་དེ་བཞིན་ཏེ། །མདོར་ན་བསྒུལ་བསྐྱོད་ཐམས་ཅད་ཀུན། །ཕྱག་རྒྱ་ཆེན་པོའི་ངང་དུ་གནས། །གནས་ཉིད་མི་གནས་གནས་པའང་མིན། །དེ་སྐད་དག་མཆོག་ཉིད་ཀྱིས་བཤད། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཡན་ལག་ཐམས་ཅད་དཀྱིལ་འཁོར་དུ་བྱིན་གྱིས་བརླབས་ནས་ཕྱག་རྒྱ་སྤྲོས་པའི་ལེའུ་སྟེ་བརྒྱད་པའོ།། །། ལེའུ་དགུ་པ།༈ དེ་ནས་དེ་བཞིན་གཤེགས་པ་དགྱེས་པ་ཆེན་པོས། རྡོ་རྗེ་གསང་བའི་དམ་ཚིག་བཀོད་པ་ལ་སྙོམས་པར་ཞུགས་ནས། ཆེད་དུ་བརྗོད་པ་འདི་བརྗོད་དོ། །ཤིན་ཏུ་ཕྲ་བའི་དམ་ཚིག་མཆོག །ཕྱག་རྒྱ་ཆེན་པོའི་ཕྱག་མཐིལ་དུ། །ཐུགས་ཀྱི་དཀྱིལ་འཁོར་དམ་པ་དེ། །སོར་ནི་བཞི་ཡི་ཚད་དུ་བྱ། །འབྲུ་ལྔ་སྤོས་ལྔ་རིན་ཅེན་ལྔ། །སྙིང་པོ་ལྔ་དང་སྨན་ལྔ་དང་། །བདུད་རྩི་ལྔ་ཉིད་རབ་མཉམ་ལ། །རིག་པས་ཐིག་ནི་གདབ་པར་བྱ། །ལྟེ་བ་རྩིབས་དང་ལྡན་པ་ཡི། །རྩིབས་བཞི་འཁོར་ལོ་མུ་ཁྱུད་བཅས། །གྲུ་ཆད་བཞི་དང་གྲུ་བཞི་པ། །བར་ཁྱམས་སྒོ་ཁྱུད་ལྡན་པར་བྱ། །སེན་ཟླུམ་ཙམ་གྱི་ཉི་ཟླ་ལ། །ཙ་ནའི་འབྲུ་ཙམ་པདྨའི་གདན། །ཡུངས་འབྲུ་ཙམ་གྱི་ཡི་གེ་ལས། །ཕྱག་རྒྱ་ཏིལ་འབྲུ་ཙམ་དུ་བྲི། །བཅོས་བུའི་རས་ནི་སྣ་ཚོགས་དང་། །རྒྱན་ཕྲེང་བཏུང་དང་བྲོ་བས་བསྐོར། །གླུ་ཚིག་བྲོ་གར་རོལ་མོ་ཡི། །སྤྲིན་ཕུང་ཚོགས་ཀྱིས་རབ་ཏུ་མཆོད། །ཡུམ་དང་འཇོ་མ་སེམས་མ་ཡིས། །ཇི་ལྟར་འདོད་པའི་ལས་བཞིན་མཆོད། །དབྱིབས་དང་ཁ་དོག་མཚན་ལྡན་པར། །ཞལ་དུ་གྱུར་པའི་མེ་བོས་ལ། །བཟའ་བཏུང་བྲོ་བའི་ཚོགས་རྣམས་ཀྱིས། །ལས་བཞིའི་མཆོད་པ་རབ་ཏུ་སྦྱིན། །ཁྲོ་བོའི་དཀྱིལ་འཁོར་དེ་བཞིན་ཏེ། །ཤིན་ཏུ་ཕྲ་ལ་སྦྱངས་པ་ཡིས། །བསམ་ཡས་དག་ལའང་དེ་བཞིན་བྱ། །རིག་པས་དཔག་པ་ཙམ་དུའོ། །མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །མཉེན་འཇམ་རེག་ན་བདེ་བ་ཡི། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲིས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོར་འབར། །དབྱིབས་ལེགས་རྫིང་བུ་བྲོ་མཆོག་བསིལ། །རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་བྲེ་རྒྱལ་མཚན་ན་བཟའ་གདུགས། །དོ་ཤལ་དཔུང་རྒྱན་སེ་མོ་དོ། །བཟའ་དང་བཏུང་བའི་མཆོག་རྣམས་དང་། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱིས། །བྲོ་གར་ལ་སོགས་བསམ་ཡས་ཀྱིས། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ཀུན་ལ་རྒྱས་པར་དབུལ། །སྐལ་ལྡན་གསལ་བའི་ཁྱད་པར་གྱིས། །རིམ་གྱིས་ཡང་ན་ཅིག་ཅར་དུ། །ཆོས་ཀྱི་དབྱིངས་དང་མཉམ་སྦྱོར་ཞིང་། །མཆོད་པའི་ཕྱག་རྒྱ་ཆེན་པོར་བསྒོམ། །གསལ་ལྡན་མའམ་བྱིན་བརླབས་ལ། །སྟོང་གསུམ་ཡུངས་འབྲུར་གཞུག་ཚུལ་དུ། །དབྱིངས་ནས་དཀྱིལ་འཁོར་སྤྱན་དྲངས་མཆོད། །མཉེས་ནས་གྲུབ་པའི་དམ་ཚིག་མཆོག །བདག་ཉིད་ཆེན་པོ་མཆོད་པ་ཡིས། །སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་འགྲོ་བ་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །སྒྱུ་འཕྲུལ་དྲྭ་བ་བརྟན་པ་ཡིས། །ཕྱོགས་བཅུ་དུས་བཞིར་གཤེགས་པ་ཡི། །སངས་རྒྱས་དཀྱིལ་འཁོར་མ་ལུས་དང་། །ཁམས་གསུམ་འགྲོ་རྣམས་མངོན་དུ་འགྱུར། །ལུས་ངག་སེམས་དང་ཆོས་ཐམས་ཅད། །གང་ནའང་མི་གནས་མི་དམིགས་པ། །མིག་ཡོར་ཚུལ་དུ་སྦྱོར་བ་ཡིས། །ནམ་མཁའ་ལ་ནི་ནམ་མཁའ་བསྒོམ། །ཀུན་བྱས་དབང་ཕྱུག་རིག་པས་འཇུག །དེ་ནས་སློབ་མ་གཞུག་པར་བྱ། །དེ་ནས་རིགས་ཀྱི་བུ་མཆོག་དེས། །རྒྱལ་སྲིད་དང་ནི་རང་གི་ལུས། །བུ་དང་ཆུང་མ་ནོར་གྱི་དབྱིག །རབ་ཏུ་གཅེས་དང་ཡིད་འཐད་དབུལ། །དབང་ཕྱུག་ལོངས་སྤྱོད་ལྔས་མཆོད་ན། །དཀྱིལ་འཁོར་ཐམས་ཅད་མཆོད་པ་ཡིན། །ཉེ་བའི་དཀྱིལ་འཁོར་སྨོས་ཅི་དགོས། །ཉེས་པ་ཐམས་ཅད་དག་པར་འགྱུར། །དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །སྙིང་རྗེས་ཆུད་མ་ཟོས་པར་བཟུང་། །ཡང་ན་ཐལ་མོ་རབ་བསྣོལ་ནས། །ཕྱག་རྒྱ་ཆེན་པོའི་འཕང་དུ་ནི། །དཀྱིལ་འཁོར་མཛུབ་གང་ཚད་དུ་ཡང་། །མཁས་པས་ཆོ་ག་ཇི་བཞིན་བྱ། །ཡང་ན་ས་གཞི་རབ་མཉམ་ལ། །དཀྱིལ་འཁོར་ཁྲུ་གང་ཚད་དུ་བྱ། །ཡང་ན་ལུས་གང་ཚད་དུ་སྟེ། །ཡང་ན་ལུས་ནི་གསུམ་གྱི་ཚད། །ཕུར་བུ་སྲད་བུ་ཚོན་ཕྱེ་དང་། །གོས་རྒྱན་མཛེས་པའི་ཡིད་འོང་གྲོགས། །ཐིག་གདབ་ཆོ་ག་ཕུན་སུམ་ཚོགས། །མཁས་ལྡན་ཆེན་པོས་བསྒྲིམས་ཏེ་བྱ། །ཡང་ན་ཁྲུ་ནི་བཅུ་དྲུག་དང་། །ཉི་ཤུའམ་ཉི་ཤུ་རྩ་ལྔར་བྱ། །རིགས་ཀྱི་དཀྱིལ་འཁོར་ལྔ་རྣམས་བསྒོམ། །སྐུ་གསུང་ཐུགས་ལྡན་གཟུགས་ཀྱང་དགོད། །ཡང་ན་རྒྱང་གྲགས་དཔག་ཚད་དམ། །ནམ་མཁའི་དབྱིངས་ནི་བསམ་ཡས་པར། །སངས་རྒྱས་དཀྱིལ་འཁོར་སྣ་ཚོགས་བསྒོམ། །མ་མཐོང་རྨོངས་ལ་བསྟན་ཕྱིར་ཚོན། །ཁ་དོག་ཉི་ཤུ་རྩ་ལྔའམ། །ལྔ་ཡི་ཚོན་གྱི་བྲི་བར་བྱ། །འདུལ་བའི་ཆོ་ག་བཞིན་དུ་དགྱེ། །ཏིང་འཛིན་རོལ་མོ་མཐའ་ཡས་མཆོག །ཡི་གེའམ་གདན་ནམ་སྙིང་པོའམ། །ཕྱག་རྒྱའམ་སྐུ་གསུང་ཐུགས་ལྡན་པར། །བྱིན་རླབས་ཡ་མཚན་རྨད་པོ་ཆེ། །འགྲུབ་འགྱུར་སངས་རྒྱས་ཀུན་གྱི་དམ། །ས་ལ་སོགས་ལས་ཕྱག་རྒྱར་བྱས། །རྣམ་གྲོལ་རིམ་པ་ཐོབ་པར་འགྱུར། །དག་པའི་ཡེ་ཤེས་ཀྱིས་སྦྱངས་པས། །སྨོས་ཅི་དགོས་ཏེ་དེ་ཉིད་ཡིན། །ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ལས། །དཀྱིལ་འཁོར་ཐམས་ཅད་སྤྱན་དྲང་ངོ་། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པའི་དམ་ཚིག་མཆོག །དཔག་བསམ་ཤིང་དང་ཡིད་བཞིན་གྱི། །རིན་པོ་ཆེ་དང་འབྱུང་བ་ཀུན། །དེ་དག་རྫས་ཡོད་མ་ཡིན་ཏེ། །རང་སེམས་བསོད་ནམས་བརྟན་པ་ཡིན། །ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ན་ཡོད་འོངས་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་འབྱུང་། །ཤེས་རབ་དབྱིངས་ཀྱི་དེ་བཞིན་ཉིད། །ཐབས་ཀྱི་ཕྱག་རྒྱར་གྱུར་པའི་ཕྱིར། །ཡེ་ཤེས་ལ་ནི་ཡེ་ཤེས་རོལ། །ཡེ་ཤེས་རོལ་པ་ཉིད་ཀྱང་གསོག །རྒྱལ་བ་སྔོན་བྱུང་སྐྱོབ་པ་དང་། །བྱིན་རླབས་སྟོན་པའང་དེ་བཞིན་ཏེ། །བྱ་བྱེད་ནུས་པའི་གཟི་བྱིན་གྱིས། །སྒྱུ་མ་རྡོ་རྗེ་བཙན་པོའི་མཆོག །ཆོ་ག་ལྔ་ནི་རྫོགས་བྱས་ཤིང་། །ཡོ་བྱད་ལྔ་ནི་རྫོགས་པར་ལྡན། །སྔགས་ཀྱི་ཡན་ལག་ལྔ་རྫོགས་པས། །མ་ཉམས་འཇུག་ལ་རབ་བརྩོན་ན། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་སྒྱུར་རིགས་ཀྱི་དམ་པ་འགྲུབ། །དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་རྫོགས་པ་ནི། །ཡེ་ཤེས་ཐིག་ལེ་དེ་ཉིད་ལ། །ཡེ་ཤེས་ཐིག་ལེ་ཉིད་སྣང་བ། །བསམ་གྱིས་མི་ཁྱབ་མཐའ་ཡས་མཆོག །ཕྱོགས་བཅུ་དུས་བཞི་མངོན་རྫོགས་པའི། །ཞིང་ཁམས་རྣམ་དག་བསམ་ཡས་དང་། །རྒྱ་དང་བྲལ་བའི་གཞལ་ཡས་ཁང་། །འཁོར་ལོའི་རྒྱན་དང་རོལ་མོའི་ཚོགས། །དཀྱིལ་འཁོར་མ་ལུས་བསམ་ཡས་ཀུན། །མཐོང་ནས་ཉེ་བར་བརྙེས་པ་དང་། །རྒྱ་ཆེན་གསུང་ལ་དོན་བྱུང་བའང་། །མཐུན་པའི་ཡེ་ཤེས་རང་སྣང་བའོ། །གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ལོག་པར་རྟོག་བརྟགས་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །བདེ་བ་ཆེན་པོའི་དཀྱིལ་འཁོར་ལ། །སྟངས་དཔྱལ་གཉིས་སམ་ཡང་ན་ལྔ། །བྱས་ཏེ་བདེ་ལྡན་རབ་ཞུགས་ན། །འདོད་པ་ཡིད་འོང་མཉམ་པར་འགྱུར། །སྐལ་བ་མཉམ་པའི་ཡེ་ཤེས་དེ། །གཉེར་ན་ཉེ་བར་འབྱུང་བ་ཡི། །ཡ་མཚན་ཆེན་པོ་འབྱུང་བར་ངེས། །དད་མེད་ཉམས་ན་ཕུང་བར་འགྱུར། །ཞེས་ཆེད་དུ་བརྗོད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་རྡོ་རྗེ་བཀོད་པའི་གསང་བའི་དམ་ཚིག་གི་ལེའུ་སྟེ་དགུ་པའོ།། །། ལེའུ་བཅུ་པ།༈ དེ་ནས་བཅོམ་ལྡན་འདས་དགྱེས་པ་ཆེན་པོ་རྒྱལ་པོ་སྦྱིན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །ཤེས་རབ་ཐབས་ཀྱི་ཕྱག་རྒྱ་ལས། །བདེ་བའི་འབྲུ་ཚོགས་གསལ་བའི་རྒྱུན། །རྡོ་རྗེའི་ལམ་ནས་པདྨོར་འཁྱིལ། །རྩེ་ནས་བསྟིམ་ཞིང་དཀྱིལ་འཁོར་བསྒྱུར། །ཉན་བྱེད་འཁོར་ལོའི་གཞལ་ཡས་སུ། །གསལ་བའི་ཐིག་ལེ་ངོ་བོ་ཉིད། །ཏྲཱཾ་གི་ཕྱག་རྒྱའི་ཚོགས་མཆོག་ལས། །རིན་ཆེན་དཀྱིལ་འཁོར་གསལ་སྤྲོ་ཐིམ། །ཏྲཱཾ། གསང་བ་གསང་ཆེན་གསང་མཆོག་གང་། །གསང་བ་ཀུན་ལའང་མཉན་པར་བྱ། །གསང་བའི་དོན་ཉིད་བརྟག་པ་ལས། །གཞན་དུ་སྨྲ་བར་བྱ་བ་མིན། །གསལ་བའི་འཁོར་ལོའི་གཞལ་ཡས་སུ། །གསལ་བའི་ཐིག་ལེའི་ངོ་བོ་ཉིད། །ཡི་གེ་ཕྲེང་བའི་ཚོགས་མཆོག་ལས། །རིགས་ཀྱི་དཀྱིལ་འཁོར་གསལ་འཕྲོ་ཐིམ། །ༀ། དུས་གསུམ་རྒྱལ་བའི་སྲས་ཆེན་པོ། །སྐུ་གསུང་ཐུགས་ཀྱི་རྡོ་རྗེ་གཟུང་། །རྒྱལ་བ་ཐམས་ཅད་མཉེས་མཆོད་ལ། །རྒྱལ་བ་ཀུན་དང་མཉམ་པར་སྦྱོར། །ལག་པའི་འཁོར་ལོའི་གཞལ་ཡས་སུ། །གསལ་བའི་ཐིག་ལེའི་ངོ་བོ་ཉིད། །ཧཱཾ་གི་ཕྱག་རྒྱའི་ཚོགས་མཆོག་ལས། །ལས་ཀྱི་དཀྱིལ་འཁོར་གསལ་འཕྲོ་ཐིམ། །ༀ། ཁྱོད་ནི་རྡོ་རྗེ་ལས་ཡིན་གྱིས། །ལས་རྣམས་མ་ལུས་ཀུན་གྱིས་ཤིག །ཕོ་ཉ་མང་པོའི་འདུ་འཕྲོ་ཀུན། །ཁྱོད་ཀྱི་དགོས་པ་བྱེད་པ་ཡིན། །སྨྲ་བྱེད་འཁོར་ལོའི་གཞལ་ཡས་སུ། །གསལ་བའི་ཐིག་ལེའི་ངོ་བོ་ཉིད། །ཧྲཱིཿཡིག་ཕྱག་རྒྱའི་ཚོགས་མཆོག་ལས། །ཆོས་ཀྱི་འཁོར་ལོ་གསལ་སྤྲོ་ཐིམ། ༀ། ཆོོས་ཀྱི་བདུད་རྩི་བླ་མེད་ཀྱིས། །དད་ལྡན་སྐྱེས་བུ་ངོམས་པར་བྱོས། །རབ་འབྲིང་ཐ་མའི་བློ་ཅན་ལ། །མཐུན་པར་གསང་བསྒྲགས་གཞན་དུ་མིན། །བསྐྱོད་ཆེན་འཁོར་ལོའི་གཞལ་ཡས་སུ། །གསལ་བའི་ཐིག་ལེའི་ངོ་བོ་ཉིད། །ཧཱུྃ་ༀ་སྭཱ་ཨཱཾ་ཧཱ་རྣམས་ལས། དཀྱིལ་འཁོར་ལྔ་དང་ཁྲོ་ཕྲེང་བསྒོམ། །ༀ། ཕྱོགས་བཅུ་དུས་བཞི་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་ཆེ། །དཀྱིལ་འཁོར་ཀུན་གྱི་བྱེད་པ་པོ། །དཀྱིལ་འཁོར་ཀུན་གྱི་སྦྱིན་པ་སྤྱོད། །སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་རྩོམ་པ་རྣམས། །འབྲས་བུ་མེད་ཅིང་བརླག་པར་འགྱུར། །དབུ་རྒྱན་ཅོད་པན་ཕྲེང་བ་དང་། །གོ་ཆ་རྒྱལ་མཚན་ཕྱག་རྒྱ་དང་། །གདུགས་དང་བུམ་པ་བཟའ་བཏུང་དང་། །སྙིང་པོ་ལྔ་ཡིས་དབང་བསྐུར་ན། །དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་བརྗོད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དབང་སྦྱིན་པའི་ལེའུ་སྟེ་བཅུ་པའོ།། །། ལེའུ་བཅུ་གཅིག་པ།༈ དེ་ནས་དེ་བཞིན་གཤེགས་པ་དགྱེས་པ་ཆེན་པོ་སྒྱུ་འཕྱུལ་དྲྭ་བའི་རྒྱལ་པོ་བསྒྱུར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཆེད་དུ་བརྗོད་པ་འདི་བརྗོད་དོ། །རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པར། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །ཡན་ལག་དབང་པོ་རྣམ་ཤེས་ཀུན། །རྣམ་སྨིན་ༀ་དུ་ཤེས་པར་བྱ། །རྫོགས་པའི་དཀྱིལ་འཁོར་ཉིད་དུ་བསྒོམ། །ཡང་ན་ཁྲོ་བོའི་དཀྱིལ་འཁོར་བསྒོམ། །གཟུགས་སྒྲ་དྲི་རོ་རེག་ལ་སོགས། །རྣམ་སྨིན་མཱུཾ་དུ་ཤེས་པར་བྱ། །ཡུམ་གྱི་དཀྱིལ་འཁོར་ཉིད་དུ་བསྒོམ། །ཡང་ན་ཁྲོ་མོའི་དཀྱིལ་འཁོར་བསྒོམ། །གོས་རྒྱན་བཟའ་བཏུང་གླུ་དང་ཚིག །བྲོ་གར་ཚོགས་ཀྱི་སྤྲིན་ཕུང་ལ། །ཧཱུཾ་དུ་ཤེས་པས་རབ་སྤྱད་ན། །ངོ་མཚར་འབྱུང་བའི་དཀྱིལ་འཁོར་མཉེས། །ལྷ་མོ་ཀླུ་མོ་རིགས་ངན་མོ། །དབྱེའམ་ཡང་ན་མི་དབྱེ་བར། །བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་པོ། །ཡུམ་གྱི་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །སངས་རྒྱས་སྤྲིན་ཚོགས་མ་ལུས་ལ། །དགྱེས་མཉམ་མཆོག་གི་སྦྱིན་པས་བསྟིམ། །བསྒྲུབས་པའི་ཉི་ཟླའི་སྙིང་པོ་དེ། །དཀྱིལ་འཁོར་རྡོ་རྗེ་ལྕེ་ཡིས་བླང་། །མཁའ་འགྲོ་གསལ་འབར་ཚེ་ལ་སོགས། །ཡིད་བཞིན་སྤྲིན་གྱི་བདག་པོར་འགྱུར། །ཞིང་གྱུར་མཆོག་དང་མཆོག་ཕྲན་རྣམས། །ཉི་ཟླའི་སྟེང་དུ་མཁས་པས་བཞག །ང་རྒྱལ་ལག་གི་འདུ་བྱེད་བསྒོམ། །ཧཱུཾ་དུ་གྱུར་པས་རྣམ་པར་དག །དབྱིངས་སུ་ཐིམ་ནས་ཕྱག་རྒྱ་འབར། །སྐུར་གྱུར་འོད་ཟེར་འཕྲོ་བས་བརྗིད། །གཙུག་ཏུ་རྣམ་པར་རྒྱལ་བ་བསྒོམ། །ངོ་མཚར་ངན་འགྲོ་ཐར་པའི་ཐབས། །ཡེ་ནས་སྐྱེ་མེད་དེ་བཞིན་ཉིད། །སྒྱུ་མར་སྣང་བ་མིག་ཡོར་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །སྣོད་བཅུད་རྒྱུད་རྣམས་དག་རྟོགས་ཤིང་། །མཉམ་གཉིས་ལྷག་པའི་མཉམ་གཉིས་ཀྱིས། །དཀྱིལ་འཁོར་ཀུན་ཏུ་བཟང་པོའི་ཞིང་། །བྱེད་སྤྱོད་ཚོགས་ཆེན་གཉིས་གྱུར་ནས། །ཡན་ལག་མ་ཉམས་ཡོ་བྱད་ལྡན། །ཆོ་ག་རྫོགས་པར་ཤེས་པ་ཡི། །རྣལ་འབྱོར་ཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོས་པ་འགྲུབ། །ལྔ་དང་ལྔ་ཡི་སྦྱོར་བ་ཡི། །ཚོམ་བུ་ལྔ་ཡི་ལྷ་བཀོད་ལ། །ཁྲོ་བོ་བཅུ་དང་ཁྲོ་མོ་བཅུ། །འཁོར་ལོའི་ཚུལ་དུ་རྣམ་པར་བསྒོམ། །དེ་བཞིན་རིགས་དང་རྡོ་རྗེའི་རིགས། །པདྨའི་རིགས་ཏེ་སྐུ་གསུང་ཐུགས། །ཁྲོ་བོ་ཚོགས་དང་ལྡན་པ་ཡི། །ཚོམ་བུ་གསུམ་གྱི་ལྷ་རྣམས་བསྒོམ། །རིགས་ཀྱི་རིགས་ཏེ་རིགས་ཀྱི་གཙོ། །ཐུགས་ཀྱི་ཐུགས་ཏེ་ཐུགས་ཀྱི་མཆོག །ཁྲོ་བོ་ཚོགས་དང་ལྡན་པ་ཡི། །ཚོམ་བུ་གཅིག་པའི་ལྷ་རྣམས་བསྒོམ། །ཁྲོ་བོ་ཁྲོ་མོའི་ཚོགས་ཆེན་པོ། །ཕོ་ཉ་ཕྱག་བརྙན་བཀའ་ཉན་ཚོགས། །ཅི་བགྱི་ལ་སོགས་ཚོགས་རྣམས་ཀྱིས། །དངོས་གྲུབ་ལས་རྣམས་རྫོགས་པར་བྱེད། །རྣལ་འབྱོར་སྔགས་འཆང་དངོས་གྲུབ་ནི། །མཉམ་རྫོགས་ལྷུན་གྲུབ་ངང་གནས་ཤིང་། །སྤྱོད་པས་ཅི་ལའང་ཐོགས་མེད་པའི། །ཐམས་ཅད་ཡེ་ནས་དབྱེར་མེད་པའོ། །རྡོ་རྗེའི་རིགས་སུ་ཐམས་ཅད་དཀྱིལ། །འོད་འཕྲོ་འབར་བར་རབ་ཏུ་བསྒོམ། །ཆགས་མེད་ཚུལ་གྱིས་བསྟིམ་པར་བྱ། །གཉིས་མེད་གྱུར་ནས་ཕྱག་རྒྱ་ཆེ། །ཡང་ན་སྐུ་གསུང་ཐུགས་ཉིད་དེ། །ཐམས་ཅད་མ་ལུས་སྐུ་གསུང་ཐུགས། །ཏིང་འཛིན་གསལ་འབར་འོད་ཟེར་འཕྲོ། །གཉིས་མེད་དབྱིངས་ཀྱི་ངང་དུ་ཐིམ། རིག་འཛིན་དངོས་གྲུབ་མཆོག་ཐོབ་འགྱུར། །དཀྱིལ་འཁོར་མ་ལུས་འབར་བ་འགྲུབ། །ཉོན་མོངས་སྡུག་བསྔལ་སེལ་བར་བྱེད། །རྡོ་རྗེའི་རིགས་སུ་སྐྱེ་བའི་གནས། །སྔགས་འཆང་དངོས་གྲུབ་ཡང་དག་ནི། །ཐབས་དང་ཤེས་རབ་ཐམས་ཅད་ཀྱིས། །དཀྱིལ་འཁོར་ལྔ་དང་ཁྲོ་ཕྲེང་བསྒོམ། །ཆགས་པ་མེད་པའི་ཚུལ་གྱིས་ནི། །འོད་ཟེར་རྣམ་པ་མང་པོ་འཕྲོ། །གཉིས་སུ་མེད་པར་བསྟིམ་པར་བྱ། །དངོས་གྲུབ་མཆོག་གི་སྙིང་པོ་འགྲུབ། །རྣལ་འབྱོར་ཐབས་དང་ཤེས་རབ་ཀྱིས། །དེ་བཞིན་གཤེགས་དང་ཡུམ་དུ་བསྒོམས། །སེམས་དཔའ་སེམས་མ་ཉིད་དུ་བསྒོམ། །སོ་སོའི་སྔགས་དང་ཕྱག་རྒྱ་དང་། །ཏིང་འཛིན་ཡང་དག་སོ་སོར་གསལ། །གནས་དང་ལོངས་སྤྱོད་ཅི་བདེ་དང་། །མ་ཉམས་བློ་ནི་རབ་ལྡན་པས། །དང་པོར་དམ་ནོས་བཞིན་དུ་བྱ། །ལེ་ལོ་སྒྱིད་སྙོམས་མེད་པ་ཡི། །ཐེ་ཚོམ་མེད་པར་བསྒྲུབས་བྱས་ན། །དཀྱིལ་འཁོར་ཐམས་ཅད་འགྲུབ་པར་འགྱུར། །རྡོ་རྗེ་གསང་མཆོག་དམ་པ་འཐོབ། །སྒྲུབ་པའི་ཞག་དང་ཚེས་གྲངས་ནི། །རྒྱུད་ལས་སྨོས་པ་བཞིན་དུ་བཤད། །རྡོ་རྗེ་གསང་བའི་ཚིག་ཏུའོ། །ཞེས་དེ་བཞིན་གཤེགས་པ་ཉིད་ལ་དེ་བཞིན་གཤེགས་པ་ཉིད་ཆེད་དུ་གླེང་ངོ་། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཚོགས་ཀྱི་དཀྱིལ་འཁོར་གྱི་ལེའུ་སྟེ་བཅུ་གཅིག་པའོ།། །། ལེའུ་བཅུ་གཉིས་པ།༈ དེ་ནས་དེ་བཞིན་གཤེགས་པ་དགྱེས་པ་ཆེན་པོ་རོལ་མོའི་སྤྲིན་རྣམ་པར་སྤྲོས་ཏེ། རྒྱན་བཀོད་པའི་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །སྒྱུ་འཕྲུལ་དྲྭ་བས་མངོན་རྫོགས་པའི། །དཀྱིལ་འཁོར་བརྟན་པའི་ཏིང་ངེ་འཛིན། །བྲོ་གར་ཕྱག་རྒྱའི་འདུ་འཕྲོ་ཡིས། །འཛུལ་ལམ་ནམ་མཁའ་འགྲོ་བར་འགྱུར། །གླུ་ཚིག་སྒྲ་ཡི་ཕྱག་རྒྱ་ཡིས། །ཆོས་ཀྱི་དངོས་གྲུབ་ཐོབ་པར་འགྱུར། །རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐུབ་མེད་འགྲུབ། །བཟའ་དང་བཏུང་བའི་ཕྱག་རྒྱ་ཡིས། །ཡིད་བཞིན་སྐུ་དང་བདུད་རྩི་འགྲུབ། །ཨཱ་ལི་ཀཱ་ལིའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །མི་དང་ལྷ་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ཀྱང་། །ཁྱད་པར་ས་ལ་གནས་འགྱུར་ཡིན། །ཕ་རོལ་ཕྱིན་པ་ཀུན་ཏུ་རྫོགས། །ཐབས་དང་ཤེས་རབ་ཐབས་ཀྱི་མཆོག །ཤེས་རབ་མཆོག་གི་མཆོག་གྱུར་པའི། །ས་ཡི་ཁྱད་པར་བཅུ་དང་གསུམ། །རྒྱུ་འབྲས་ཁྱད་པར་ལྷུན་གྱིས་རྫོགས། །མཁའ་དཀྱིལ་དྭངས་པའི་དབྱིངས་ཉི་ཟླ། །ཡེ་ཤེས་རྒྱལ་པོ་སྟངས་དཔྱལ་བསྒོམ། །རྒྱལ་བའི་དཀྱིལ་འཁོར་ཐམས་ཅད་ཀུན། །མ་ལུས་པར་ནི་བསྒོམ་པར་འགྱུར། །དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་ཚོལ་ཅིག །དཀྱིལ་འཁོར་ཀུན་ཏུ་རབ་སྦྱོར་བས། །དཀྱིལ་འཁོར་ཐམས་ཅད་འགྲུབ་པར་འགྱུར། །ཆོ་ག་ལྷག་གམ་མ་ཚང་ན། །སྐྱོན་ཉིད་དག་སྟེ་ཉེས་པ་མེད། །ཅེས་ཆེད་དུ་བརྗོད་པས་རོལ་མོའི་སྤྲིན་གྱིས་མཉེས་པར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཚོགས་བསྒྲུབ་པའི་ལེའུ་སྟེ་བཅུ་གཉིས་པའོ།། །། ལེའུ་བཅུ་གསུམ་པ།༈ དེ་ནས་དེ་བཞིན་གཤེགས་པ་ཕྱོགས་བཅུ་དུས་བཞིའི་སྐུ་དང་གསུང་དང་ཐུགས་རྡོ་རྗེའི་དཀྱིལ་འཁོར་ཐམས་ཅད་གཅིག་ཏུ་བསྡུས་ནས་དགྱེས་པ་ཆེན་པོས། ཆོས་ཐམས་ཅད་ཡེ་ནས་རྫོགས་པ་ཆེན་པོར་ལྷུན་གྱིས་གྲུབ་པའི་དམ་ཚིག་ཤིན་ཏུ་གསང་བའི་སྙིང་པོ་སྤྲིན་བཀོད་པའི་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །མ་རྟོགས་པ་དང་ལོག་པར་རྟོགས། །ཕྱོགས་རྟོགས་ཡང་དག་ཉིད་མ་རྟོགས། །འདུལ་བ་དགོངས་པ་གསང་བ་དང་། །རང་བཞིན་གསང་བའི་དོན་རྣམས་ནི། །ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམ། །དཀྱིལ་འཁོར་དཀྱིལ་འཁོར་ལས་བྱུང་བའི། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །གསང་བའི་ཐིག་ལེ་དཀྱིལ་འཁོར་དབྱིངས། །འབྱུང་བ་ཤེས་རབ་རིགས་ཀྱི་ཡུམ། །ཆེན་པོ་རིགས་ཀྱི་དེ་བཞིན་ཏེ། །བྱང་ཆུབ་སེམས་ནི་རྡོ་རྗེའི་ཚོགས། །དབང་པོ་ཡུལ་དུས་རིག་པ་རྣམས། །ཀུན་ཏུ་བཟང་པོའི་དཀྱིལ་འཁོར་ལ། །བདག་ཉིད་ཆེན་པོ་ལྷག་པ་ཡི། །ཐུགས་ཀྱི་ཡེ་ཤེས་ལྔས་བལྟ་ཞིང་། །སྙིང་པོ་ཐིག་ལེ་མཉམ་སྦྱོར་བས། །བདེ་བའི་ཡེ་ཤེས་རོལ་མོ་ཡིས། །ཡེ་ཤེས་དགྱེས་ལ་མཆོད་པ་འབུལ། །ཟག་པ་མེད་པའི་བསོད་ནམས་ཀྱིས། །ཡེ་ཤེས་སྒྱུ་མར་རང་སྣང་བ། །རོལ་མོའི་དཀྱིལ་འཁོར་མཐའ་ཡས་མཆོག །གསང་བའི་ཐིག་ལེ་ཉིད་ཀྱི་དབྱིངས། །དེ་ནི་སངས་རྒྱས་ཀུན་གྱི་དངོས། །ཕྱོགས་བཅུ་དུས་བཞིར་མངོན་རྫོགས་པའི། །སྐུ་གསུང་ཡོན་ཏན་ཕྲིན་ལས་ཐུགས། །མ་ལུས་བདག་ཉིད་ཞལ་མཐོང་བ། །དབང་སྒྱུར་མཆོག་ཉིད་དམ་པ་ཡིན། །དཀྱིལ་འཁོར་ལ་གནས་དཀྱིལ་འཁོར་ཉིད། །རྫོགས་པའི་དཀྱིལ་འཁོར་ལྷུན་གྱིས་གྲུབ། །རྒྱན་དུ་དཀྱིལ་འཁོར་མ་ལུས་ཐོགས། །རྫོགས་པའི་དཀྱིལ་འཁོར་མཉམ་སྦྱོར་བས། །ཐུགས་རྗེའི་དཀྱིལ་འཁོར་ཡོངས་ཀྱིས་འབྱུང་། །ཕྱོགས་དུས་དཀྱིལ་འཁོར་འདུལ་བའི་མགོན། །སྒྱུ་མའི་དཀྱིལ་འཁོར་སྒྲོལ་བ་ཡིས། །བྱ་བྱེད་མེད་པར་དཀྱིལ་འཁོར་སྤྱོད། །ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །འདི་ནི་སངས་རྒྱས་ཐམས་ཅད་ཀྱིས། །འདའ་བར་མི་མཛད་དམ་ཚིག་མཆོག །གང་ཞིག་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ནས་ཐམས་ཅད་དུ། །དཀྱིལ་འཁོར་མ་ལུས་བསྙེན་པ་ཡི། །ཉེ་བའི་སྲས་སུ་དགོངས་པར་འགྱུར། །བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་ཤིང་། །དཀྱིལ་འཁོར་མ་ལུས་བསྙེན་པ་ཡི། །འབྲས་བུ་གསང་ཆེན་འདི་ཡིན་ཏེ། །འཇིག་རྟེན་དྲུག་གི་ཕྱོགས་བཅུ་ན། །འདས་དང་ད་ལྟར་བྱུང་བ་ཡི། །རྒྱལ་བའི་དཀྱིལ་འཁོར་མ་ལུས་པ། །བསྙེན་ནས་སྐུ་ལྔ་ལྷུན་གྱིས་རྫོགས། །འབྱུང་དང་མ་འོངས་ཐམས་ཅད་ཀྱང་། །འདི་ཡིས་ལྷུན་གྱིས་གྲུབ་པར་འགྱུར། །འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །བཙལ་ཀྱང་རྒྱལ་བས་མི་བརྙེས་སོ། །ཀུན་གྱི་ཕྱག་རྒྱ་ཆེན་པོའི་མཆོག །ཐོས་བསམ་བསྒོམ་ལ་རབ་སྦྱངས་པའི། །ཤེས་རབ་མིག་ལྡན་རྣམས་ཀྱིས་ཟུང་། །སྣོད་ལྡན་ངང་ཚུལ་བཟང་ལ་བརྟན། །ལུས་དང་ལོངས་སྤྱོད་གཏོང་ལ་སྦྱིན། །གཞན་དུ་ནམ་ཡང་སྦྱིན་མི་བྱ། །རྨོངས་ལ་འཕྱར་བས་གལ་ཏེ་སྦྱིན། །དུས་མིན་པར་ནི་སྲོག་ཟད་ནས། །བསྲེག་དང་སྦྲེབས་ལ་ཡུན་རིང་གནས། །ཞེས་དེ་བཞིན་གཤེགས་པ་ཉིད་ཀྱིས་དེ་བཞིན་གཤེགས་པ་ཉིད་ལ་ཆེད་དུ་བརྗོད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཤིན་ཏུ་གསང་བ་མན་ངག་གི་སྙིང་པོའི་ལེའུ་སྟེ་བཅུ་གསུམ་པའོ།། །། ལེའུ་བཅུ་བཞི་པ།༈ དེ་ནས་དེ་བཞིན་གཤེགས་པ་ཐམས་ཅད་ཉིད་ཀྱི་དཀྱིལ་འཁོར་ལ་དགྱེས་པ་ཆེན་པོའི་གླུ་འདི་བླངས་སོ། །ༀ་ཕྱོགས་བཅུ་དུས་བཞི་རྫོགས་པ་ཡི། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུ་ཡི་ཚོགས། །སྣང་སྟོང་ཐིག་ལེ་ཀུན་ཏུ་རྫོགས་ཧོཿༀ་རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ་ཧོཿༀ་སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་བཟང་། །འདུས་པའི་ཚོགས་ཆེན་ཐིག་ལེ་ཆེ་ཧོཿༀ་མི་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ནས་སྣ་ཚོགས་སྤྲོ། །མཐའ་ཡས་ཀུན་ནས་ལྷུན་གྱིས་ཐིམ། །སྣ་ཚོགས་སྐུ་གསུང་ཐུགས་ཆེན་པོ་ཧོཿༀ་ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པའི་རྡུལ་ཕྲན་བསམ་ཡས་ཀྱིས། །སྐད་ཅིག་ཡུད་ལ་ལྷུན་གྱིས་གྲུབ་ཧོཿༀ་ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱིས་ཀུན་ཏུ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ་ཧོཿཞེས་བསྒྲགས་སོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་མཉེས་པའི་མཆོད་པའི་ལེའུ་སྟེ་བཅུ་བཞི་པའོ།། །། ལེའུ་བཅོ་ལྔ་པ།༈ དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་སངས་རྒྱས་ཐམས་ཅད་ཀྱི་ངོ་བོ་ཉིད་ཀྱིས་ཁྲོ་བོའི་དཀྱིལ་འཁོར་མངོན་པར་འདུ་མཛད་དེ། དེ་ཅིའི་ཕྱིར་ཞེ་ན། བདག་ཏུ་རྨོངས་པའི་རྟོག་པ་དང་། བརྟགས་པ་ལ་མངོན་པར་ཞེན་པས། ཡང་དག་པའི་ལམ་དང་བྲལ་བ་དག །གབ་པའི་གསང་བ་མ་རྟོགས་པར་སྦས་པའི་གསང་བ་ལ་མངོན་པར་འཆེལ་ནས། རྒྱུ་དང་འབྲས་བུ་ལ་རྨོངས་པས། སྲིད་པའི་ས་བོན་རྩུབ་མོས་འཕངས་ནས། མཚམས་མེད་པའི་རབ་ཏུ་ཚ་བའི་དམྱལ་བར་སྐྱེས་སོ། །དེ་རབ་ཏུ་ཚ་བའི་སྡུག་བསྔལ་དྲག་པོས་གདུངས་པ་དང་། འདི་བས་ཤིན་ཏུ་གྲང་ཡང་ཅི་མ་རུང་སྙམ་པའི་མོད་ལ། རབ་ཏུ་སྦྲེབས་པ་དང་། པདྨ་ལྟར་གས་པའི་སྡུག་བསྔལ་དྲག་པོ་དག་གིས་རབ་ཏུ་གདུངས་པ་དེ་ལྟ་བུའི་སྡུག་བསྔལ་རབ་ཏུ་ཚ་བ་ལ་སོགས་པ་བརྒྱད་དང་། ཤིན་ཏུ་གྲང་བ་ལ་སོགས་པ་བརྒྱད་པོ་དག་ཏུ། འཇིག་རྟེན་གྱི་ཁམས་བརྒྱུད་ཅིང་བསྐལ་པ་ཆེན་པོ་སྟོང་ཕྲག་བཅུ་གཉིས་སུ་མྱོང་ངོ་། །དེ་ནས་རྣམ་པར་སྨིན་པ་དེ་ཟད་པ་དང་། ཡི་དྭགས་ལྟོགས་པ་དང་། སྐོམ་པའི་སྡུག་བསྔལ་གྱིས་རབ་ཏུ་ཉེན་པ་དང་། འདོད་པའི་དངོས་པོ་རྣམས་ཡིད་དུ་མི་འོང་བ་དང་། གདུག་ཅིང་རྩུབ་པའི་དངོས་པོ་སྣ་ཚོགས་སུ་གྱུར་པ་དང་། ཡོད་མེད་པར་ཡང་འགྱུར་ཞིང་། ཤིན་ཏུ་རིད་ཅིང་བསྐམས་པ་དང་། ལུས་དང་ཡན་ལག་དང་དབང་པོ་མི་འཚམས་པར་གྱུར་པར་བསྐལ་པ་ཆེན་པོ་དྲུག་ཏུ་སྐྱེས་སོ། །དེ་ནས་ལས་ཀྱི་སྒྲིབ་པ་རྩུབ་མོའི་རྣམ་པར་སྨིན་པ་དེ་ཁད་ཀྱིས་བསྲབས་པ་དང་། སྔོན་གྱི་སྲིད་པས་མཚམས་སྦྱར་ནས། ཡི་དྭགས་སྲིན་པོ་ཆེན་པོ་རབ་ཏུ་གདུག་པ་གཏུབ་པོ་ལུས་གཅིག་ལ་མགོ་བོ་བརྒྱ་པ་དང་། མགོ་སྣ་ཚོགས་པ་དང་། ལུས་བརྒྱ་ལ་མགོ་བོ་གཅིག་པ་དང་། ལུས་སྣ་ཚོགས་པ་དང་། ཡན་ལག་མང་པོ་དང་། ཡན་ལག་སྣ་ཚོགས་པ་དང་། གདུག་པའི་ལག་ཆ་སྣ་ཚོགས་པ་ཐོགས་པ། འཁོར་རབ་ཏུ་མང་པོ་དང་། འཇིགས་པའི་གཟུགས་སྣ་ཚོགས་དང་། འཇིགས་པའི་སྒྲ་སྣ་ཚོགས་སྒྲོགས་པ། གཟུགས་དང་ང་རོ་དང་། དྲི་དང་ཁ་རླངས་ཀྱིས་ཐམས་ཅད་སྐྱི་བུང་ཞེས་བྱེད་པ། རབ་ཏུ་འཇིགས་པའི་རླུང་ནག་དང་། གྲང་བ་དང་། ཚ་བའི་དབུགས་ཀྱིས་ཕྱོགས་བཅུ་ཀུན་ཏུ་ཁམས་འཁྲུག་པར་བྱེད་པ། ནད་བཞི་བརྒྱ་རྩ་བཞི་འདེབས་པར་བྱེད་པ། མྱོས་ཤིང་ཉམས་པར་བྱེད་པའི་མཐུས། ཀླུའི་རིས་དང་། ལྷ་མ་ཡིན་གྱི་རིས་དང་ལྷའི་རིས་དང་། ཚངས་པའི་རིས་དང་། འོད་གསལ་དང་། དགེ་རྒྱས་དང་། འབྲས་བུ་ཆེ་བ་མན་ཆད་དབང་དུ་བསྡུས་སོ། །དེ་སྔོན་བསྟེན་པའི་སྟོབས་ཀྱིས་ཐམས་ཅད་མཁྱེན་པས་གཟིགས་ནས་ཐུགས་རྗེས་འདུལ་བར་གྱུར་ཏོ། །དེ་ནས་དེ་བཞིན་གཤེགས་པ་ཆེ་བའི་རྡོ་རྗེ་བཀོད་པའི་སྒྱུ་འཕྲུལ་དྲྭ་བས། འཇིག་རྟེན་དྲུག་གི་ཕྱོགས་བཅུ་སྲིད་པ་གསུམ་གྱི་བདག་པོ་འདུལ་བའི་ང་རྒྱལ་ཆེན་པོའི་གཟི་བརྗིད་སྟོན་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་བདག་པོ། བཅོམ་ལྡན་འདས་དགྱེས་པ་ཆེན་པོས་ཁྲོ་བོའི་རྒྱལ་པོའི་དཀྱིལ་འཁོར་གྱི་སྤྲིན་ཆེན་པོ་རྣམ་པར་འཕྲོ་བའི། སྒྱུ་འཕྲུལ་དྲྭ་བའི་རྒྱལ་པོའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་བཞིན་ཉིད་ཀྱི་དབྱིངས་ཉིད་ནས། ཁྲོ་མོ་དབང་ཕྱུག་ཆེན་མོ་མངོན་དུ་ཕྱུང་སྟེ། ཧི་ཧི་ཞེས་དགྱེས་པའི་གཟི་མདངས་ཀྱིས། རིན་ཅེན་པདྨ་རྒྱས་པར་མཛད་ནས། གཉིས་སུ་མེད་པར་འཁྲིལ་བའི་དགྱེས་པས་ཐིམ་ནས། བྱང་ཆུབ་སེམས་ཀྱི་སྤྲིན་ལས། ཧཱུཾ་ཧཱུཾ་ཧཱུཾ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ་ཧ་ལ་ཧ་ལ་ཧ་ལ་ཧཱུཾ། ཞེས་བརྗོད་པས། འཇིག་རྟེན་དྲུག་གི་ཕྱོགས་བཅུ་མཐའ་ཡས་པ་ཁྱབ་པར་ཁྲོ་བོའི་དཀྱིལ་འཁོར་གྱི་ཚོགས་སྟོང་གསུམ་གྱི་འཇིག་རྟེན་ཙམ། ཕྱོགས་བཅུའི་རྡུལ་ཕྲ་མོ་སྙེད་འཐོན་པར་གྱུར་ནས། འཇིག་རྟེན་དྲུག་གི་ཕྱོགས་བཅུ་ཐམས་ཅད་གཡོས། རབ་ཏུ་གཡོས། ཀུན་ཏུ་གཡོས་སོ། །འུར་འུར། རབ་ཏུ་འུར་འུར། ཀུན་ཏུ་འུར་འུར་རོ། །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །ཤིག་ཤིག །རབ་ཏུ་ཤིག་ཤིག །ཀུན་ཏུ་ཤིག་ཤིག་གོ །གཏོར་གཏོར། རབ་ཏུ་གཏོར་གཏོར། ཀུན་ཏུ་གཏོར་གཏོར་རོ། །འཇིག་རྟེན་དྲུག་གི་ཕྱོགས་བཅུའི་སྟོང་ཁམས་ཐམས་ཅད་ན་གནས་པའི་དབང་ཆེ་བ་དང་། གཟི་བརྗིད་ཆེ་བ་དང་། མཐུ་ཆེ་བའི་དབང་ཕྱུག་ཆེན་པོ་ལ་སོགས་པ་ཐམས་ཅད་བརྒྱལ། རབ་ཏུ་བརྒྱལ། ཀུན་ཏུ་བརྒྱལ་བར་གྱུར་ཏོ། །དེ་ནས་བཅོམ་ལྡན་འདས་དགྱེས་པ་ཆེན་པོ་ཉིད། འཇིགས་བྱེད་ཆེན་པོ་ཤིན་ཏུ་རྔམ་པ་སྐྱི་བུང་ཞེས་བྱེད་པའི་འབར་བ་ཆེན་པོའི་ཁྲག་འཐུང་སྐུ་སྨུག་ནག་ཅིར་ཡང་འགྱུར་བ་དབུ་དང་ཕྱག་དང་ཞབས་སྟོང་ཁམས་ཀྱི་རྡུལ་སྙེད་མཚོན་ཆ་སྣ་ཚོགས་འཛིན་པ་དེ་དབུ་གསུམ་ཕྱག་དྲུག་ཞབས་བཞིར་གྱུར་ཏེ། དུར་ཁྲོད་ཆེན་པོར་དགྱེས་ནས་ཁྲག་གི་རྒྱ་མཚོའི་དཀྱིལ་ན། ཀེང་རུས་ཆེན་པོའི་རི་རབ་ཀྱི་སྟེང་འབར་བ་ཆེན་པོའི་ཀློང་གི་འཁོར་ལོའི་དཀྱིལ་ན་དབང་ཕྱུག་ཆེན་པོ་དང་། དུར་ཁྲོད་ཀྱི་བདག་པོ་དྲེགས་པ་ཆེན་པོ་ཁྱོ་ཤུག་གི་གདན་ལ་བརྐྱངས་བསྐུམས་སུ་བཞུགས་སོ། །ཁྲོ་བོའི་དཀྱིལ་འཁོར་གྱི་སྤྲིན་ཕུང་དེ་དག་ཀྱང་། ལ་ལ་ནི་དཔལ་ཁྲག་འཐུང་ཆེན་པོར་གྱུར་ཏེ་ཤར་ཕྱོགས་སུ་བཞུགས་སོ། །ལ་ལ་ནི་དཔལ་ཁྲག་འཐུང་ཆེན་པོ་རིན་པོ་ཆེར་གྱུར་ཏེ་ལྷོ་ཕྱོགས་སུ་བཞུགས་སོ། །ལ་ལ་ནི་དཔལ་ཁྲག་འཐུང་ཆེན་པོ་པདྨར་གྱུར་ཏེ་ནུབ་ཕྱོགས་སུ་བཞུགས་སོ། །ལ་ལ་ནི་དཔལ་ཁྲག་འཐུང་ཆེན་པོ་ཀུན་ཏུ་ལས་སུ་གྱུར་ཏེ་བྱང་ཕྱོགས་སུ་བཞུགས་སོ། །དེ་དག་ཀུན་ཀྱང་འཇིགས་བྱེད་ཆེན་པོའི་ཆ་ལུགས་དང་། རྔམ་པའི་ང་རོ་དང་། འབར་བའི་ཀློང་ན། དབུ་གསུམ་ཕྱག་དྲུག་ཞབས་བཞིས། དྲི་ཟ་དང་། གནོད་སྦྱིན་དང་། སྲིན་པོ་དང་། གཤིན་རྗེ་ལ་སོགས་པ་ཁྱོ་ཤུག་གིས་གདན་བྱས་པ་ལ་བརྐྱངས་བསྐུམས་སུ་བཞུགས་སོ། །བཙུན་མོ་ཁྲག་འཐུང་ཆེན་མོའི་ཚོགས་རྣམས་ཀྱང་སོ་སོའི་སྐུ་ལ་འཁྲིལ་བའི་ཚུལ་གྱིས་བཞུགས་སོ། །རིགས་རིགས་ལྔའི་ཞེས་པ་ནས་ངོ་མཚར་ཏེ་ཞེས་པའི་བར་འདི་རྒྱ་འགྲེལ་སྤར་ཁབ། རོང་ཟོམ། སྨན་ལུང་པ། གཡུང་སྟོན་པའི་འགྲེལ་པ་བཞིར་མི་གསལ་ཞིང་། རྒྱ་དཔེར་ཡང་མཐོང་བ་མ་བྱུང་མོད། སྒྲོལ་ཊཱིཀ་ཏུ་སྣང་བས་རྒྱ་དཔེ་མི་མཐུན་པ་གཅིག་གཉིས་ཤིག་བྱུང་ངམ་སྙམ། རྒྱ་དཔེ་གཅིག་ན། དེ་ནས་དབང་ཕྱུག་ཆེན་པོ་བརྩེ་བ་ཅན་དྲེགས་པ་ཆེན་པོ་ཞེས་བསྣོན་མ་ཡང་འདུག་གོ །ལྔའི་ཧེ་རུ་ཀ་གཅིག་ཏུ་བསྟིམས་ཏེ་བསྡུས་ནས། གཅིག་གིས་མང་པོ་འདུལ་བའི་ངོ་མཚར་ཏེ། དེ་ནས་དྲེགས་པ་ཆེན་པོ་ལ་སོགས་པ་གཏུམ་པའི་སེམས་ཀྱིས་གདུག་པའི་རྫུ་འཕྲུལ་ཆེན་པོ་སྣ་ཚོགས་བསྟན་ནས། མགྲིན་གཅིག་ཏུ་གདུག་པའི་ང་རོས། བརླང་པོའི་གཏུམ་ཚིག་ཏུ་སྨྲས་པ། ཐོང་ཐོང་སྙིང་རྗེའི་བདག་པོ་ཅི་དེ་ལྟར་བྱེད་དམ་ཞེས་འཛེར་ཞིང་། ཤིན་ཏུ་གདུག་པའི་སེམས་ཀྱིས་ཁྲོས་ནས་རྔམ་མོ། །དེ་ནས་བཅོམ་ལྡན་འདས་དགྱེས་པ་ཆེན་པོ་དབུ་དགུ་ཕྱག་བཅོ་བརྒྱད་ཞབས་བརྒྱད་དུ་གནས་ནས། རྔམ་པའི་སྐད་ཀྱིས་ཐུགས་རྗེས་འདུལ་བའི་ཐབས་ཀྱིས་ཤིན་ཏུ་ཁྲོས་ནས། ཧཱུཾ་ཧཱུཾ་ཧཱུཾ། ཧ་ཧ་ཧ། ཁཱ་ཧི་ཁཱ་ཧི་ཁཱ་ཧི། ཞེས་བརྗོད་ནས། དབང་ཕྱུག་ཆེན་པོ་ལ་སོགས་པ། གདུག་པ་ཆེན་པོའི་ཚོགས་དེ་དག་གི་སྙིང་དང་དབང་པོ་ཀུན་ཕྱུང་། ནང་ཁྲོལ་ཀུན་དྲངས། ཡན་ལག་ཀུན་བཅད་གཏུབས་ནས་ཤ་ཀུན་ཟོས། ཁྲག་ཀུན་འཐུངས། རུས་པ་ཀུན་འཆོས་སོ། །དེ་ནས་ཧཱུཾ་ཧཱུཾ་ཧཱུཾ་བྷྱོ་ཨེ་ཨ་ར་ལི་ཛཿཛཿ ཞེས་བརྗོད་པས། ཕྱོས་བཅུའི་འཇིག་རྟེན་གྱི་ཁམས་ནམ་མཁའ་དང་བཅས་པ་ཡུངས་འབྲུ་གཅིག་ཙམ་དུ་ཆུད་པར་བསྡུས་སོ། །དེ་ནས་འབྱུང་པོ་མ་ལུས་པའི་རྒྱལ་པོའི་ཡང་རྒྱལ་པོ་དྲེགས་པ་ཆེན་པོ་ལ་སོགས་པའི་ཆུང་མ་འབྱུང་པོ་ཐམས་ཅད་ཀྱི་རྗེ་མོའི་ཡང་རྗེ་མོ། སྲིན་མོ་ཆེན་མོ་མིའི་སྲིན་མོ་དང་། ཚངས་མ་དང་། འཁྲུག་མོ་དང་། དབང་མོ་དང་། འཇུག་སྲེད་མོ་དང་། གཞོན་ནུ་མོ་དང་། དམར་མོ་དང་། བདུད་རྩི་མོ་དང་། ཞི་བ་མོ་དང་། བེ་ཅོན་མོ་དང་། སྲིན་མོ་དང་། ཟ་བ་མོ་དང་། དགའ་བ་མོ་དང་། ར་རོ་ཁྲག་འཐུང་མྱོས་མ་དང་། གཅིག་པུར་སྤྱོད་མ་དང་། ཡིད་འཕྲོག་མ་དང་། གྲུབ་མོ་དང་། རླུང་མོ་དང་། གསོད་བྱེད་མོ་དང་། མེ་མོ་དང་། ཕག་མོ་དང་། རྒན་བྱེད་མོ་དང་། སྣ་ཆེན་མོ་དང་། ཆུ་ལྷ་མོ་དང་། ནག་མོ་ཆེན་མོ་དང་། ར་མགོ་དམར་སེར་ཆེན་མོ་དང་། བུམ་སྣ་སྔོ་ནག་ཆེན་མོ་དང་། གསུས་འཛིན་སེར་ནག་ཆེན་མོ་ལ་སོགས་པ། བྲན་དང་ཡང་བྲན་དང་། གཡོག་དང་ཡང་གཡོག་འཁོར་ཞིང་གི་རྡུལ་སྙེད་ཀྱང་བསྡུས་སོ། །དེ་ནས་བཅོམ་ལྡ་འདས་དགྱེས་པ་ཆེན་པོ་དཔལ་ཁྲག་འཐུང་ཆེན་པོས་འདུལ་བའི་ཐབས་ཀྱིས། ཡང་རིགས་ལྔའི་འཇིགས་བྱེད་ཆེན་པོར་སྣང་བར་བྱས་ནས། དེ་དག་ཀུན་ཀྱང་དགྱེས་པས་རོལ་པའི་དཀྱིལ་འཁོར་གྱི་སྤྲིན་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་སྐུ་དང་གསུང་དང་ཐུགས་རྡོ་རྗེ་ལས་འདི་ཕྱུང་ངོ་། །ༀ་ཨཱཿཧཱུཾ་བཛྲ་པྲ་བེ་ཤ་ཨ་ལ་ལ་ཧོཿཞེས་བརྗོད་པས། འབྱུང་མོའི་རྒྱལ་མོ་རྣམས་ཤིན་ཏུ་ཆགས་པའི་ཡིད་གཡོས་ནས། པདྨའི་དཀྱིལ་འཁོར་སྡུད་ཅིང་རྒྱས་པར་གྱུར་ནས། དཔེར་ན་ཁབ་ལེན་ལ་ལྕགས་འདུ་བའི་ཚུལ་དུ། བཅོམ་ལྡན་འདས་དགྱེས་པ་ཆེན་པོ་དཔལ་ཁྲག་འཐུང་ཆེན་པོ་རྡོ་རྗེའི་སྐུ་ལ། སྲིན་མོ་ཆེན་མོ་མིའི་སྲིན་མོ་དང་། དམར་མོ་དང་། དགའ་བ་མོ་དང་། གསོད་བྱེད་མོ་དང་། ནག་མོ་ཆེན་མོ་དང་། དམར་སེར་ཆེན་མོ་དང་། སྔོ་ནག་ཆེན་མོ་དང་། སེར་ནག་ཆེན་མོ་རྣམས་འཁྲིལ་ལོ། །བཅོམ་ལྡན་འདས་དཔལ་ཁྲག་འཐུང་ཆེན་པོ་དེ་བཞིན་གཤེགས་པའི་སྐུ་ལ། ཚངས་མ་དང་། འཁྲུག་མོ་དང་། དབང་མོ་དང་། འཇུག་སྲེད་མོ་དང་། གཞོན་ནུ་མོ་རྣམས་འཁྲིལ་ལོ། །བཅོམ་ལྡན་འདས་དཔལ་ཁྲག་འཐུང་ཆེན་པོ་རིན་པོ་ཆེའི་སྐུ་ལ། བདུད་རྩི་མོ་དང་། ཞི་བ་མོ་དང་། བེ་ཅོན་མོ་དང་། ཟ་བ་མོ་དང་། སྲིན་མོ་རྣམས་འཁྲིལ་ལོ། །བཅོམ་ལྡན་འདས་དཔལ་ཁྲག་འཐུང་ཆེན་པོ་པདྨའི་སྐུ་ལ། ཁྲག་གིས་མྱོས་མ་དང་། གཅིག་པུར་སྤྱོད་མ་དང་། ཡིད་འཕྲོག་མ་དང་། གྲུབ་མོ་དང་། རླུང་མོ་རྣམས་འཁྲིལ་ལོ། །བཅོམ་ལྡན་འདས་དཔལ་ཁྲག་འཐུང་ཆེན་པོ་ཀུན་ཏུ་ལས་ཀྱི་སྐུ་ལ། མེ་མོ་དང་། ཕག་མོ་དང་། རྒན་བྱེད་མོ་དང་། སྣ་ཆེན་མོ་དང་། ཆུ་ལྷ་མོ་རྣམས་འཁྲིལ་ལོ། །དེ་ནས་བཅོམ་ལྡན་འདས་དགྱེས་པ་ཆེན་པོའི་ཁྲོ་བོའི་དཀྱིལ་འཁོར་དེ་དག་གིས། ཧཱུཾ་ཞེས་བརྗོད་པས། པདྨའི་དཀྱིལ་འཁོར་གྱི་ཚོགས་བསྡུས་ནས་ཤིན་ཏུ་བཅུམ་པར་གྱུར་ཏོ། །དེ་ནས་དགྱེས་ཏེ་ཧ་ཞེས་བརྗོད་པས། བྱང་ཆུབ་སེམས་ཀྱི་སྤྲིན་ལས། དཀར་མོའི་ཚོགས་དང་། རྐུན་མོའི་ཚོགས་དང་། རྨོངས་མོའི་ཚོགས་དང་། ཐལ་བྱེད་མོའི་ཚོགས་དང་། སྦོས་མོའི་ཚོགས་དང་། གཏུམ་མོའི་ཚོགས་དང་། སྨེ་ཤ་ཅན་གྱི་ཚོགས་དང་། མ་ཚོགས་མའི་ཚོགས་རྣམས་རང་རང་གི་ལག་ཆ་དང་། ངོ་མཚར་དང་བཅས་ནས་འཐོན་ཏོ། །འཐོན་ནས་ཀྱང་འབར་བ་ཆེན་པོ་འཁོར་ལོའི་རྩིབས་མཆན་ཤར་ཕྱོགས་ནས་འཁོར་བར་འཇིགས་པའི་གཟུགས་རང་གི་ལག་ཆ་དང་བཅས་ནས་འཁོད་དོ། །དེ་ནས་ཤིན་ཏུ་དགྱེས་ནས་ཧེ་ཞེས་བརྗོད་པས། སེང་གདོང་ཆེན་མོའི་ཚོགས་དང་། སྟག་གདོང་ཆེན་མོའི་ཚོགས་དང་། ཝ་གདོང་ཆེན་མོའི་ཚོགས་དང་། ཁྱི་གདོང་ཆེན་མོའི་ཚོགས་དང་། བཞད་གདོང་ཆེན་མོའི་ཚོགས་དང་། ཀང་ཀའི་གདོང་ཆེན་མོའི་ཚོགས་དང་། ཁྭ་གདོང་ཆེན་མོའི་ཚོགས་དང་། འུག་པའི་གདོང་ཆེན་མོའི་ཚོགས་དང་བཅས་པ་རྣམས། རང་རང་གི་ལག་ཆ་དང་ངོ་མཚར་དང་བཅས་ནས་འཐོན་པར་གྱུར་ཏོ། །འཐོན་ནས་ཀྱང་འབར་བ་ཆེན་པོའི་འཁོར་ལོའི་ཕྱི་རོལ་ཤར་ཕྱོགས་ནས་འཁོར་བར་རྔམ་པའི་མདངས་ཀྱིས་འཁོད་དོ། །དེ་ནས་ཤིན་ཏུ་དགྱེས་པས་ཕྱོགས་བཅུའི་ཞིང་མ་ལུས་པར་ཁྱབ་ནས་ཕཊ་ཅེས་བརྗོད་པས། རྡོ་རྗེ་སྲིང་འགྲོ་མའི་ཚོགས་དང་། རྡོ་རྗེ་གདོང་མོའི་ཚོགས་དང་། རྡོ་རྗེ་འཇིག་རྟེན་མའི་ཚོགས་དང་། རྡོ་རྗེ་རོ་ལངས་མའི་ཚོགས་རྣམས་རང་རང་གི་ལག་ཆ་དང་། ངོ་མཚར་དུ་མ་བཅས་ནས་འཐོན་པར་གྱུར་ཏོ། །འཐོན་ནས་ཀྱང་འབར་བའི་དཀྱིལ་འཁོར་གྱི་སྒོར་ཤིན་ཏུ་རྔམ་པའི་གཟུགས་ཀྱིས་གནས་སོ། །དེ་ནས་དགྱེས་པ་ཆེན་པོའི་སྤྲིན་ལས་ཕྱོགས་བཅུ་ནས་ཕཊ་ཅེས་བསྒྲགས་པས། ཐམས་ཅད་ཁྲོས་ནས་མ་མོ་ཐམས་ཅད་ཀྱང་རང་རང་གི་གནས་ག་ལ་བ་དེར་ཡུད་ཙམ་གྱིས་ཕྱིན་པར་བཀྱེའོ། །དེ་ནས་བཅོམ་ལྡན་འདས་དགྱེས་པ་ཆེན་པོ་དཔལ་ཁྲག་འཐུང་ཆེན་པོ་དེ་དག་ཀུན་ཐུགས་རྗེ་ཆེན་པོ་བདུད་རྩི་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། སྐུ་དང་གསུང་དང་ཐུགས་རྡོ་རྗེ་ལས་འདི་དག་ཕྱུང་ངོ་། །ༀ་བཛྲ་མ་ཧཱ་ཨ་མྲྀ་ཏ་མ་ཧཱ་ཀྲོ་དྷ་ཨཾ་ཨཾ་ཨཾ་ཞེས་བརྗོད་པས། དབང་ཕྱུག་ཆེན་པོ་ལ་སོགས་པ་ཐམས་ཅད། བཅོམ་ལྡན་འདས་ཁྲོ་བོ་ཆེན་པོ་དེ་དག་གིས་བསྣམས་ནས་བཏོན་ཏེ། མི་གཙང་བའི་འདམ་གྱི་རྒྱ་མཚོར་ཆུད་པ་ལས་བསྣམས་ནས་ཨུ་ཙུཥྨ་ཀྲོ་དྷ་ཕྱུང་ནས་འདམ་ཀུན་འཐུངས་ཏེ་དྲན་པ་སླར་རྙེད་ནས། ཁྲོ་བོའི་དཀྱིལ་འཁོར་གྱི་ཚོགས་དེ་དག་ཐམས་ཅད་ཀྱང་དབུ་དགུ་བརྒྱ་ཕྱག་སྟོང་བརྒྱད་བརྒྱ། ཞབས་བརྒྱད་བརྒྱ། སྐུ་འབར་བ་ཆེན་པོའི་དཀྱིལ་འཁོར་ན་བཞུགས་པར་མཐོང་ངོ་། །དེའི་དུས་སུ་འཇིག་རྟེན་དྲུག་གི་ཕྱོགས་བཅུའི་སྲིད་པ་ཀུན་ཏུ་དྲེགས་པའི་དབང་ཕྱུག་ཐམས་ཅད་འདུལ་བའི་ཐབས་སྣ་ཚོགས་བསམ་གྱིས་མི་ཁྱབ་པར་སོ་སོར་སྣང་བས་དུས་གཅིག་ཏུ་བཏུལ་ལོ། །དེ་ནས་དེ་དག་ཤིན་ཏུ་འདར་ཞིང་བྲེད་པ་རབ་ཏུ་ཞུམ་པའི་ང་རོས། འབངས་སུ་མཆི། འབངས་སུ་མཆི། འབངས་སུ་ནན་ཏན་མ་བགྱིས་ན། །མགོ་དང་ལུས་ནི་བརྒྱར་འགས་ཤིང་། །སྙིང་ཡང་འགས་ཤིང་གཏུབ་གྱུར་ཅིག །རུལ་མྱགས་འཚིག་ནས་བརླག་པ་དང་། །དམྱལ་བར་ལྷུང་ནས་འབོད་པར་ཤོག །ཅེས་འབངས་སུ་མཆི་བར་མནའ་བོར་ནས། དཀྱིལ་འཁོར་གྱི་གདན་དུ་བཞག་གོ །ཐམས་ཅད་ཀྱིས་མགྲིན་གཅིག་ཏུ་ཡང་སྨྲས་པ། བདག་ཅག་རྣམས་ཀྱི་མཆིས་བྲང་དང་། །མ་དང་བུ་མོ་སྲིང་མོ་རྣམས། །དཀྱིལ་འཁོར་ཆེན་པོར་བཞེས་སུ་གསོལ། །དཔའ་བོ་ལྷ་རྗེས་བཞེས་སུ་གསོལ། །བདག་ཅག་སོ་སོ་འཁོར་བཅས་ཀྱི། །ཚོགས་ཀྱི་དཀྱིལ་འཁོར་ཆེན་པོ་འདིའི། །མིང་ཙམ་འཛིན་པར་བྱེད་པ་ཡང་། །གཙུག་གི་ནོར་བུ་འབར་བ་ལྟར། །གཡོ་སྒྱུ་མེད་ཅིང་གུས་ལྡན་པའི། །སེམས་ཀྱིས་བླངས་ནས་སྤྱི་བོ་ཡི། །གཙུག་ཏུ་བཞག་སྟེ་བཀུར་བར་བགྱི། །དེ་ཡི་དགོས་པ་ཅི་ཡང་རུང་། །མ་ལུས་རྫོགས་པར་བདག་ཅག་བསྒྲུབ། །གལ་ཏེ་དཔའ་བོའི་སྤྱན་སྔ་འདིར། །སྨྲས་པ་བཞིན་དུ་མ་བསྒྲུབས་ན། །བདག་ཅག་རྣམས་ཀྱི་མགོ་ལུས་སྙིང་། །བཀས་གཏུབས་དུམ་བུར་རུལ་བར་མཆིའོ། །ཞེས་སྨྲས་སོ། །དེ་ནས་དེ་དག་གི་ཆུང་མའི་ཚོགས་དང་། མ་དང་སྲིང་མོ་དང་། བུ་མོའི་ཚོགས་ཐམས་ཅད་དཀྱིལ་འཁོར་དུ་ཡུད་ཙམ་གྱིས་འོངས་ནས། ཐམས་ཅད་ཀྱིས་མགྲིན་གཅིག་ཏུ་སྨྲས་པ། བདག་ཅག་འཁོར་ཚོགས་ཐམས་ཅད་ཀུན། །དཔའ་བོ་ཆེན་པོའི་འབངས་སུ་མཆི། །དཔའ་བོ་ཆེན་པོས་བདག་ཅག་ལ། །ལས་ཀྱི་དངོས་གྲུབ་སྩལ་དུ་གསོལ། །ཞེས་སྨྲས་སོ། །དེ་ནས་བཅོམ་ལྡན་འདས་དགྱེས་པ་ཆེན་པོས་ལག་ཏུ་རྡོ་རྗེ་བྱིན་ནས་མིང་གི་དབང་བསྐུར་ཏེ་དཀྱིལ་འཁོར་གྱི་ཕྱི་རོལ་དུ་བཀོད་དོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཁྲོ་བོ་རང་བཞིན་གྱི་དཀྱིལ་འཁོར་གྱི་སྤྲིན་རྣམ་པར་སྤྲོས་པའི་ལེའུ་སྟེ་བཅོ་ལྔ་པའོ།། །། ལེའུ་བཅུ་དྲུག་པ།༈ དེ་ནས་བཅོམ་ལྡན་འདས་དགྱེས་པ་ཆེན་པོས་དཀྱིལ་འཁོར་གྱི་ཚོགས་ཆེན་པོ་འདི་དག་དམ་ཚིག་གིས་གྲུབ་པར་བྱ་བའི་ཕྱིར། དེ་བཞིན་གཤེགས་པ་ཁྲོ་བོ་ཁྲག་འཐུང་ཆེན་པོ་བཙུན་མོ་དང་བཅས་པའི་ཚོགས་དེ་དག་གི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་རྔམ་པ་ལས་གསུང་གི་དཀྱིལ་འཁོར་འདི་དག་ཕྱུང་ངོ་། །ༀ་སརྦ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ །མ་ཧཱ་ཙཎྜ་སརྦ་དུཥྚཱནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་བཛྲ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་རཏྣ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ༀ་པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ༀ་ཀརྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧུཾ་ཕཊ། ༀ་སརྦ་ཏ་ཐཱ་ག་ཏ་མ་ཧཱ་ཀྲོ་དྷེ་ཤྭ་རཱི་སརྦ་དུཥྚན་ཧཱུཾ་ཕཊ། ༀ་མ་ཧཱ་བཛྲ་དྷ་ར་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནཱི་ཧཱུཾ་ཕཊ། ༀ་མ་ཧཱ་སཱུརྱ་རཏྣ་མ་ཧཱ་ཀྲོ་དྷེ་ཤྭ་རཱི་བི་ད་མ་ཧཱུཾ་ཕཊ། ༀ་འདི་སཾ་སྐྲྀ་ཏ་དང་བསྟུན་ན་ཅུང་ཟད་ཐེ་ཚོམ་དུ་སྣང་ཡང་རྒྱུད་ལས་སཾ་སྐྲྀ་ཏ་ཁོ་ནའི་ངེས་པ་མེད་པས་རོང་ཟོམ་གྱི་གསུང་བཞིན་བཅོས་ནས་རྒོད་མར་བསྒྱུར་བའོ། །ཧྲཱི་ཤྲུཏྟ་ས་མནྟ་པདྨ་མ་ཧཱ་ཀྲོ་དྷེ་ཤྭ་རཱི་ཁཱ་ཧི་ཧཱུཾ་ཕཊ། ༀ་སརྦ་ཨ་མོ་གྷ་མ་ཧཱ་ཀྲོ་དྷེ་ཤྭ་རཱི་བི་ཤྭ་ཧཱུཾ་ཕཊ། ༀ་བཛྲ་ཀཽ་རཱི་ཧ། བཛྲ་ཙཽ་རཱི་ཧ། བཛྲ་པྲ་མོ་ཧེ་ཧ། བཛྲ་བེཏྟ་ལཱི་ཧ། ༼༡༽བཛྲ་ཙཎྜ་ལཱི་ཧ། ༼༤༽བཛྲ་༼༢༽པུཀྐ་སཱི་ཧ། བཛྲ་གྷསྨ་རཱི་ཧ། བཛྲ་སྨྲ་ཤ་ནཱི་ཧ། ༼༣༽བཛྲ་༼༥༽སིདྷ་མུ་ཁཱི་ཧེ། བཛྲ་བྱཱ་གྷྲྀ་མུ་ཁཱི་ཧེ། བཛྲ་སྲིངྒཱལ་མུ་ཁཱི་ཧེ། བཛྲ་ཤྭ་ན་མུ་ཁཱི་ཧེ། བཛྲ་གྲྀ་ཌྷ་མུ་ཁཱི་ཧེ། བཛྲ་ཀངྐ་མུ་ཁཱི་ཧེ། བཛྲ་ཀཱ་ཀ་མུ་ཁཱི་ཧེ། བཛྲ་ཨཱུ་ལུ་ཀ་མུ་ཁཱི་ཧེ། ༀ་བཛྲ་ཨཱརྱ་ཏེ་ཛ་ཏེ་ང་ཛཿༀ་བཛྲ་ཨ་མུ་ཁཱི་ཧཱུཾ། ༀ་བཛྲ་ལོ་ཀ་བཾ། ༀ་བཛྲ་བྷསྨི་པ་ལ་ཡ་བ་ཏུ་ཧོཿབྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོབྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ། ༀ་རུ་ལུ་རུ་ལུ་ཧཱུཾ། ཨེ་ཧྱེ་ཧི་ཨཱ་ན་ཡ། ཛཿཧཱུཾ་བཾ་ཧོཿརཾ། ༀ་བཛྲ་ཀྲོ་དྷ་ས་མ་ཡ་ཧཱུཾ། ༀ་ཁྲོ་ལ་ཁྲོས་པས་ཞི་མཛད་པ། །ཐུགས་རྗེ་ཁྲོ་དཔལ་རྔམ་པའི་ཚོགས། །འབར་བའི་བྱིན་རླབས་རྨད་པོ་ཆེ། །དེ་ཉིད་དུ་ནི་བདག་ལ་སྩོལ། །ༀ་བཛྲ་ཀྲོ་དྷ་ས་མ་ཡ་སྟྭཾ། ༀ་བཛྲ་ཀྲོ་དྷ་ས་མ་ཡ་ཕཊ། ༀ་བཛྲ་ཀྲོ་དྷ་ས་མ་ཡ་ཧོཿཨ་ལི་ཨུ་ལི་ཏཱ་ལི་ཏ་པཱ་ལི་དཾཥྚཱ་གོ་ནཱ་རཽ་དྲི། ཁཾ་རཾ་ཡོ་གི་ནཱི་ཁཱ་ཧི་ཧོཿགླུ་འདི་ཟུར་ཆག་གི་སྐད་ཡིན་པར་རོང་ཟོམ་ཆོས་བཟང་བཞེད་ཅེས་ལོ་ཆེན་བསོད་ནམས་རྒྱ་མཚོ་གསུང་། ཧཱུཾ་ཧ་ཧེ་ཕཊ། ཅེས་བརྗོད་པས། འཇིག་རྟེན་དྲུག་གི་ཕྱོགས་བཅུ་ཐམས་ཅད་ཚིག །རབ་ཏུ་ཚིག །ཀུན་ཏུ་ཚིག་གོ །འབར། རབ་ཏུ་འབར། ཀུན་ཏུ་འབར་རོ། །ཐམས་ཅད་དུ་འབར་བའི་དཀྱིལ་འཁོར་གྱི་ཚོགས་ཀྱིས་གང་། རབ་ཏུ་གང་། ཀུན་ཏུ་གང་བར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཁྲོ་བོའི་ཚོགས་ཆེན་པོའི་གསུང་གི་དཀྱིལ་འཁོར་སྤྲོས་པའི་ལེའུ་སྟེ་བཅུ་དྲུག་པའོ།། །། ལེའུ་བཅུ་བདུན་པ།༈ དེ་ནས་བཅོམ་ལྡན་འདས་དགྱེས་པ་ཆེན་པོས། དེ་དག་གི་དཀྱིལ་འཁོར་བསྟན་པའི་ཕྱིར་ཆེད་དུ་བརྗོད་པ་འདི་བརྗོད་དོ། །འབར་བའི་འཁོར་ལོ་རྩིབས་བཞི་པ། །གྲུ་ཆད་བཞིས་ནི་རྣམ་པར་བརྒྱན། །གྲུ་བཞི་སྒོ་ཁྱུད་བཞི་དང་ལྡན། །འབར་བའི་བར་ཁྱམས་གཉིས་ཀྱིས་མཛེས། །ཐོད་སྤྲུལ་སྣ་ཚོགས་ཉི་མས་བརྗིད། །འབར་བའི་འཕྲོ་བ་མང་པོ་འཁྲུག །ཁྱུ་མཆོག་མ་ཧེ་གཟིག་དང་སྟག །གཏུམ་པ་དོམ་གྱི་སྦར་བས་ནི། །དབང་ཕྱུག་ལྷ་ཆེན་ལ་སོགས་བཟུང་། །སྨུག་ནག་སྔོ་ནག་སེར་ནག་དང་། །དམར་ནག་ལྗང་ནག་འཇིགས་པའི་སྐུ། །དབུ་གསུམ་ཕྱག་དྲུག་ཞབས་བཞི་བགྲད། །ཀོ་རློན་གོས་ནི་སྣ་ཚོགས་གྱོན། །རྔམ་པའི་སྒྲ་ཆེན་འཇིགས་པར་སྒྲོགས། །སྦྲུལ་དང་ཐོད་ཕྲེང་ཉི་ཟླའི་ཆས། །སྟོང་གི་འཇིག་རྟེན་ཁོར་ཡུག་བཅས། །རྡོ་རྗེ་དུང་ཆེན་གང་བ་དང་། །རལ་གྲི་དགྲ་སྟྭ་གཤོལ་ལ་སོགས། །རང་གི་ལག་ཆ་སྣ་ཚོགས་ཏེ། །བཙུན་མོ་འཇིགས་པའི་ཚོགས་དང་འཁྲིལ། །གནས་དང་ཡུལ་གྱི་ཕྱག་རྒྱ་དང་། །སྒོ་བཞིའི་ཕྱག་རྒྱས་རབ་མཛེས་ཤིང་། །སླས་དང་བྱི་མོ་བྲན་མོའི་ཚོགས། །བཅུ་གཉིས་དང་ནི་བརྒྱད་ཀྱིས་མཛེས། །རང་གི་སྟན་དང་ལག་ཆ་དང་། །ཅི་བགྱི་ཞེས་ནི་ཆས་ཏེ་གནས། །ཞེས་བརྗོད་པས། འཇིག་རྟེན་དྲུག་གི་ཕྱོགས་བཅུ་ཐམས་ཅད་དུ་འབར་བའི་དཀྱིལ་འཁོར་ཀུན་ཏུ་གསལ་བར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཁྲོ་བོའི་དཀྱིལ་འཁོར་བསྟན་པའི་ལེའུ་སྟེ་བཅུ་བདུན་པའོ།། །། ལེའུ་བཅོ་བརྒྱད་པ།༈ དེ་ནས་བཅོམ་ལྡན་འདས་དགྱེས་པ་ཆེན་པོའི་མཉེས་པའི་མཆོད་པ་ཆེན་པོ་འདི་ཆེད་དུ་བརྗོད་དོ། །དེ་ལ་མཆོད་སྦྱིན་དམ་པ་ནི། །ཐོག་མར་བདག་ཉིད་རྟོགས་གོམས་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱའོ། །འཁྲིལ་བའི་མཆོད་ཆེན་མཉམ་སྦྱོར་བས། །བདག་ཉིད་མཉེས་པས་མཉེས་པར་བྱ། །མཉམ་པའི་གྲུབ་རྫས་ཆེན་པོ་དག །བདག་དང་མཉམ་པའི་ཚོགས་ལ་དབུལ། །བཟའ་དང་བཅའ་དང་བཏུང་དང་བགོ །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ནི་དཀྱིལ་འཁོར་ཐིམ། །ཕྱོགས་བཅུ་དུས་བཞིར་གཤེགས་པ་ཡི། །བདེ་གཤེགས་ཡོན་ཏན་རྨད་པོ་ཆེ། །གཞན་ནས་ཡོད་འོངས་མ་ཡིན་ཏེ། །ལྷ་སྲིན་ལ་སོགས་སྨོས་ཅི་དགོས། །རྣལ་འབྱོར་ལས་སུ་རུང་རྣམས་ཀྱིས། །ཕྱག་རྒྱ་ཆེན་པོ་རྫོགས་འགྱུར་ཞིང་། །གསལ་ལ་ཡིད་གཉིས་མེད་པས་ན། །དཀྱིལ་འཁོར་ཆེན་པོ་འབར་བར་འགྱུར། །ཞེས་བརྗོད་པས། མཉེས་པའི་མཆོད་པ་ཆེན་པོས་འཇིག་རྟེན་དྲུག་གི་ཕྱོགས་བཅུ་ཐམས་ཅད་ཁྱབ་པར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་མཆོད་སྦྱིན་དམ་པ་བསྟན་པའི་ལེའུ་སྟེ་བཅོ་བརྒྱད་པའོ།། །། ལེའུ་བཅུ་དགུ་པ།༈ དེ་ནས་བཅོམ་ལྡན་འདས་དགྱེས་པ་ཆེན་པོས་སྔགས་འཆང་རྣམས་དོན་ཡོད་པར་བྱ་བའི་ཕྱིར་དམ་ཚིག་ཆེན་པོ་འདི་ཆེད་དུ་བརྗོད་དོ། །བླ་མེད་ཐེག་པར་རབ་ངེས་ན། །ཉོན་མོངས་ལས་རྣམས་ཀུན་སྤྱོད་ཀྱང་། །བྱས་ལ་མི་སོགས་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །བླ་མེད་མཆོག་གི་དམ་ཚིག་ཏུ། །འདུལ་བའི་དབང་གིས་ཚུལ་ཁྲིམས་དང་། །ཇི་སྙེད་སྡོམ་པ་བསམ་ཡས་པ། །མ་ལུས་ཀུན་འདུས་རྣམ་པར་དག །ཡོད་མེད་དབུ་མའང་མི་དམིགས་ཤིང་། །སྒྱུ་མ་མིག་ཡོར་ལྟ་བུའི་ཚུལ། །སྲོག་མེད་སྲོག་ཀྱང་གཅད་དུ་མེད། །སྲོག་དང་སྐྱེས་བུ་ལོག་རྟོག་ཙམ། །བདེན་པ་གཉིས་ཀ་དབྱེར་མེད་པས། །འཕྲུལ་དགའི་ཚུལ་ཏེ་ཐ་དད་མིན། །གཞན་དང་མ་བྱིན་མེད་པའི་ཕྱིར། །བླངས་མེད་ཐམས་ཅད་ཉིད་ཀྱི་དབྱིངས། །ཆོས་རྣམས་སྒྱུ་མ་ལྟ་བུ་ལ། །མིང་དང་ཚིག་ཏུ་བཏགས་པ་རྫུན། །རྫུན་ཉིད་ལ་ནི་བརྫུན་སྤྱོད་པ། །རྫུན་ཞེས་བཏགས་ཙམ་ཡོད་མ་ཡིན། །མ་ཆགས་པ་ལ་ཆགས་པ་དང་། །ཆགས་པ་ཉིད་ན་ཆགས་པ་མེད། །དེ་ནི་ཚངས་མཆོག་རྒྱལ་པོ་སྟེ། །ཤིན་ཏུ་ཆགས་པ་ཆེན་པོ་ཡིན། །བླ་མེད་མི་སྤངས་བླ་མ་བཀུར། །སྔགས་དང་ཕྱག་རྒྱ་རྒྱུན་མི་གཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །བསྒྲུབ་དང་བསྲུང་བའི་དམ་ཚིག་མཆོག །གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ་། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་དོར་རོ། །ཡན་ལག་བཅུ་ཡི་དམ་ཚིག་སྟེ། །ཡེ་ནས་དག་མཉམ་རྟོགས་པས་སྤྱད། །བསྲུང་ཞིང་བསྒྲུབ་པའི་དམ་ཚིག་ལྔ། །རྩ་བ་ཡིན་ཏེ་རིགས་མེད་འགྱུར། །མི་སྤང་མི་དོར་ལྔ་གཉིས་ནི། །ཡན་ལག་དམ་ཚིག་འདའ་དཀའོ། །མཉམ་ལ་མཉམ་པར་སྦྱོར་བ་ཡི། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་འགྱུར་བས། །འདས་ན་སངས་རྒྱས་མ་ཡིན་ནོ། །རྩ་བ་ཉམས་པའི་འཆལ་བ་དག །གསོ་ལ་ཉེ་བར་མི་བརྩོན་དང་། །སྐད་ཅིག་ཡུད་ཙམ་སྨྲ་མ་བྱེད། །ཉམས་གྱུར་ཉེས་པ་བརྗོད་མི་ལང་། །རྩ་བའི་དམ་ཚིག་ཉམས་གྱུར་ན། །སྒྲུབ་པ་ཐམས་ཅད་ལོག་པར་འགྱུར། །ཡིད་དུ་མི་འོང་སྣ་ཚོགས་པའི། །འབྲས་བུ་མི་འདོད་བཞིན་དུ་འདུ། །ཡན་ལག་དམ་ཚིག་ཉམས་གྱུར་ན། །འབྲས་བུ་མེད་ཅིང་ངན་སོང་ལྟུང་། །དམ་ཚིག་རྣམས་ནི་རྡོ་རྗེ་ཆེ། །སངས་རྒྱས་ཀུན་གྱི་བདག་ཉིད་ཡིན། །རྩ་བའི་དམ་ཚིག་ལྔ་ལ་ནི། །གཅིག་ལའང་གཉིས་དང་བཅུ་ཕྲག་གསུམ། །ཡན་ལག་དམ་ཚིག་ལྔ་གཉིས་ལ། །གཅིག་ལའང་བཅུ་ཕྲག་གཉིས་སུ་དབྱེ། །དམ་ཚིག་འདི་ནི་རྨད་པོ་ཆེ། །འཇིག་རྟེན་དྲུག་གི་ཕྱོགས་བཅུ་ན། །སྲིད་གསུམ་འགྲོ་བ་ཇི་སྙེད་པ། །རྟོག་འདུལ་དམ་ཚིག་དེ་སྙེད་སྤྲོས། །གཞན་ཡང་རྒྱལ་མཆོག་ཀུན་བཟང་གི །ཐམས་ཅད་མ་ལུས་ཕྱག་རྒྱ་ཡིས། །སྒྲུབ་མེད་མཆོག་དམ་མ་ལུས་འགྲུབ། །དེ་ལ་སོགས་པ་མཐའ་ཡས་མཆོག །རྒྱལ་བའི་རིགས་མཆོག་འཛིན་པ་དེ། །འཇིག་རྟེན་གཙོ་དང་འཁོར་གྱིས་བཀུར། །དམ་པ་མཆོག་དང་དམ་པ་ཡིས། །སྲས་དང་སྤུན་དགོངས་བྱིན་གྱིས་རློབ། །བདེ་གཤེགས་ཉིད་ཀྱི་ཡུལ་ལ་ཞུགས། །འཇིགས་མེད་ཀུན་ཏུ་བཟང་པོར་སྦྱོར། །ཇི་བཞིན་ཉིད་དང་འདུལ་བའི་ཐབས། །ཇི་སྙེད་སྡོམ་པ་བསམ་ཡས་འདུས། །མ་ལུས་རྣམ་དག་ལྷུན་གྱིས་གྲུབ། །ཉམས་ན་བསྐངས་པས་རྫོགས་པ་དང་། །དེ་ལ་སོགས་པ་མཐའ་ཡས་མཆོག །ཅེས་བརྗོད་པས། དེ་བཞིན་གཤེགས་པ་ཉིད་དེ་བཞིན་གཤེགས་པ་ཉིད་ལ་འདུལ་བར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་དམ་ཚིག་གི་ལེའུ་སྟེ་བཅུ་དགུ་པའོ།། །། ལེའུ་ཉི་ཤུ་པ།༈ དེ་ནས་དེ་བཞིན་གཤེགས་པ་བཅོམ་ལྡན་འདས་དགྱེས་པ་ཆེན་པོ་ལྷུན་གྱིས་གྲུབ་པའི་དམ་ཚིག་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །ཨེ་ཡི་ཚོགས་ཀྱི་དཀྱིལ་འཁོར་མཆོག །འབར་བ་གཏུམ་ཆེན་རྔམ་པ་ལ། །ཁྲོས་པའི་ཡིད་ཀྱིས་མཆོད་སྦྱིན་བྱ། །སངས་རྒྱས་བསོད་ནམས་སྐུ་ཡང་འཇིག །བདུད་རྩི་ལྔའམ་ཟས་ལྔ་ལ། །མཚན་མ་མིང་དུ་བཅས་པར་བྱ། །བཀུག་ནས་རྡོ་རྗེ་ཕུར་བུས་གདབ། །རྡུལ་དུ་བྱས་ལ་ཚོགས་ལ་དབུལ། །ཨེ་ཡི་ཚོགས་ཀྱི་དཀྱིལ་འཁོར་མཆོག །ལུ་གུ་རྒྱུད་དུ་སྤྲེལ་བསྡམས་ནས། །བཅིངས་གྱུར་བསྐྱོད་ནས་ཕྱོགས་བཅུར་གཡོས། །མྱོས་ནས་གས་ཏེ་འཚིག་པར་འགྱུར། །བཾ་གྱི་ཚོགས་ཀྱི་དཀྱིལ་འཁོར་མཆོག །འབར་བ་གཟི་བརྗིད་ལྷུན་ཆེན་ལ། །ཆགས་པའི་ཡིད་ཀྱིས་མཆོད་སྦྱིན་བྱ། །རྡོ་རྗེ་གསུང་ཡང་དབང་དུ་འགྱུར། །བདུད་རྩི་ལྔའམ་ཟས་ལྔ་ལ། །མཚན་མ་མིང་དུ་བཅས་པར་བྱ། །རྡོ་རྗེ་ཆགས་པའི་ཕུར་པས་གདབ། །ཆགས་པའི་ཚོགས་ལ་ཐིམ་པར་དབུལ། །བཾ་གྱི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དུ་སྦྲེལ་བསྡམས་ནས། །འགུགས་འགྱུར་རྡོ་རྗེའང་ཕྱི་བཞིན་འབྲང་། །ཅི་འདོད་དེ་བཞིན་འོང་བར་འགྱུར། །མ་ཡི་ཚོགས་ཀྱི་དཀྱིལ་འཁོར་མཆོག །འབར་བ་འདུ་འཕྲོ་གཟི་ཆེན་ལ། །དགའ་བའི་ཡིད་ཀྱིས་མཆོད་སྦྱིན་བྱ། །ཡོན་ཏན་ནམ་མཁའི་མཐའ་དང་མཉམ། །བདུད་རྩི་ལྔའམ་ཟས་ལྔ་ལ། །ཡོན་ཏན་ཡིད་བཞིན་གཏེར་དུ་བརྟག །ང་རྒྱལ་དགའ་འཕྲོའི་ཕུར་པས་གདབ། །རྡོ་རྗེེ་གཟི་ཆེན་འཕེལ་བར་དབུལ། །མ་ཡི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དུ་སྦྲེལ་བསྡམས་བསྐྱོད། །གཟི་བརྗིད་འབར་བའི་འཕྲུལ་ཆེན་སྤྲོ། །ཡིད་བཞིན་ནམ་མཁའ་གང་བར་འགྱུར། །ཡ་ཡི་ཚོགས་ཀྱི་དཀྱིལ་འཁོར་མཆོག །གསལ་བའི་གཟི་བརྗིད་འཚེར་བ་ལ། །དང་བའི་ཡིད་ཀྱིས་མཆོད་སྦྱིན་བྱ། །གཏུམ་ཆེན་རྔམ་པའང་ལྷན་ནེར་འགྱུར། །བདུད་རྩི་ལྔའམ་ཟས་ལྔ་ལ། །གཏུམ་རྔམ་འཁྲུག་པའི་ངོ་བོར་བརྟག །ལྷན་ནེར་གསལ་བའི་ཕུར་བུས་གདབ། །འབར་བ་ལྷན་ནེའི་ཚོགས་ལ་དབུལ། །ཡ་ཡི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དུ་སྦྲེལ་བསྡམས་ནས། །འབར་བ་ལྷན་ནེའི་བྱིན་གྱིས་ཁྱབ། །ཐམས་ཅད་གཡོ་བ་མེད་པར་བྱེད། །སླས་དང་བྱི་མོ་བྲན་མོའི་ཚོགས། །ལྷག་མའི་མཆོད་སྦྱིན་འདོད་པ་སྦྱིན། །རང་གི་དམ་ཚིག་རབ་བསྒྲགས་ནས། །གང་འདོད་ལས་དེ་བྱེད་པར་བསྒོ། །སྔོན་ཚེ་དཔལ་ཆེན་ཧེ་རུ་ཀ །ཤིན་ཏུ་གདུག་ཅིང་གཏུམ་བག་ཅན། །ཐམས་ཅད་མ་ལུས་འདུལ་མཛད་པའི། །དབང་དང་བྱིན་རླབས་རྨད་པོ་ཆེ། །ལྷ་ཆེན་ལ་སོགས་དབང་དུ་བསྡུས། །འཁོར་རྣམས་དབང་ཕྱུག་སླས་སུ་བྱས། །སོ་སོའི་ལས་རྣམས་བསྐོས་པ་དེ། །ཇི་ལྟར་དམ་བཅས་ཁས་བླངས་པའི། །མ་ཐོགས་མྱུར་དུ་མངོན་པར་ཕྱུང་། །དམ་བཅས་བཞིན་དུ་མ་བྱས་ན། །ཇི་ལྟར་དམ་བཅས་མནའ་བོར་བའི། །སྡོམ་བཅས་དེ་ལས་འདའ་བར་འགྱུར། །དམ་ཚིག་དེ་ལས་འདས་གྱུར་ན། །མགོ་ལུས་སྙིང་ཡང་ཚལ་པ་བདུན། །ཡཀྵ་ཁྲོ་བོས་གཏུབས་པར་འགྱུར། །དེ་བས་རྣལ་འབྱོར་སྔགས་འཆང་གིས། །ཇི་ལྟར་བཅོལ་བ་བཞིན་དུ་བྱོས། །ལས་དེ་མངོན་དུ་མ་བྱས་ན། །རང་གིས་མནའ་བོར་ཁས་བླངས་པའི། །རུལ་མྱགས་འཚིག་ནས་དམྱལ་བར་འགྲོ། །རྣལ་འབྱོར་དམ་ལ་གནས་གྱུར་པའི། །ལས་རྣམས་ཡོངས་སུ་བྱ་བ་དང་། །འཁོར་རྣམས་བུ་གཅིག་བཞིན་དུ་སྐྱོང་། །ཕྲ་མེན་མ་ཡང་དངོས་གྲུབ་འཐོབ། །བཅོལ་བའི་ལས་རྣམས་མངོན་དུ་བྱོས། །ཞེས་བསྒོའོ། །ཁྲོ་བོ་སྒྲུབ་པའི་ལས་ཀྱི་གཙོ་བོ་ནི་འདི་ཡིན་ནོ། །ཁྲག་འཐུང་ཆེན་པོ་ལ་སོགས་པའི། །བྲོ་གར་གླུ་ཚིག་ཆེན་པོས་ནི། །ཐམས་ཅད་ཐམས་ཅད་ཅི་འདོད་པ། །ཐམས་ཅད་ཐམས་ཅད་བྱེད་པ་ཡིན། །མཛོད་ལྡན་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །འདུ་བར་འདོད་ན་འདུ་བར་བྱེད། །འཕེལ་བར་འདོད་ན་འཕེལ་བར་བྱེད། །སྦོས་མོ་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །ལྷན་ནེར་འདོད་ན་ལྷན་ནེར་བྱེད། །རྨུགས་པར་འདོད་ན་རྨུགས་པར་བྱེད། །སེང་གདོང་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །ཐམས་ཅད་ཀུན་ལ་ཟ་བར་བྱེད། །རྡུལ་ཆ་ཙམ་ཡང་མེད་པར་བྱེད། །བཞད་གདོང་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །ཐམས་ཅད་མ་ལུས་འབྱིན་པར་བྱེད། །ཀུན་ལ་རབ་ཏུ་ཉམས་པར་བྱེད། །སླས་དང་བྱི་མོ་བྲན་མོའི་ཚོགས། །བྲོ་གར་གླུ་ཚིག་ཆེན་མོས་ནི། །རྦད་ཅིང་གཏང་བར་བྱ་བ་སྟེ། །ཐམས་ཅད་ཐམས་ཅད་བྱེད་པ་ཡིན། །ལྗོན་པ་དང་ནི་ལྕུག་ཕྲན་ཚལ། །སྡོང་གཅིག་དང་ནི་མེས་རེག་དྲུང་། །དང་བས་དགའ་བས་ཆགས་པས་དང་། །ཁྲོས་པས་ཀཱ་ལི་རབ་ཏུ་བྱ། །ཞེས་བརྗོད་པས། དེ་བཞིན་གཤེགས་པ་ཉིད་ལ་དེ་བཞིན་གཤེགས་པ་ཉིད་སྦྱོང་བར་གྱུར་ཏོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ལྷུན་གྱིས་གྲུབ་པའི་ཕྲིན་ལས་བྱིན་གྱིས་རློབ་པ་ཞེས་བྱ་བའི་ལེའུ་སྟེ་ཉི་ཤུ་པའོ།། །། ལེའུ་ཉེར་གཅིག་པ།༈ དེ་ནས་བཅོམ་ལྡན་འདས་དགྱེས་པ་ཆེན་པོའི་ཚོགས་ཀྱི་དཀྱིལ་འཁོར་གྱིས་ཤིན་ཏུ་རྔམ་པའི་མདངས་ཀྱིས་གླུ་འདི་བླངས་སོ། །ཧཱུཾ་གཏུམ་ཆེན་དུས་མཐའི་མེ་ཆེན་འབར། །འོད་ཟེར་ཉི་མ་འབུམ་གྱི་གཟི། །ཁྲོ་གཉེར་གློག་སྟོང་འགྱུ་བ་བཞིན། །མཆེ་བ་ཟངས་ཡག་ཟ་བྱེད་ཆེ་ཧོཿཧཱུཾ་རྔམ་པའི་ང་རོ་འབྲུག་སྟོང་ལྡིར། །གཏུམ་ཆེན་རི་རབ་འབུམ་བསྙིལ་སྐད། །ཨ་ལ་ཧ་ལའི་གད་རྒྱངས་ཆེ། །སྤྱུགས་པའི་འཐོར་རླུང་གཡེང་བ་ཆེ་ཧོཿཧཱུཾ་ཁྲོ་བོ་ཤེས་རབ་འོད་པོ་ཆེ། །ཡེ་ཤེས་དཀྱིལ་འཁོར་ཀུན་ཏུ་གསལ། །འབར་བའི་ཡེ་ཤེས་ཀུན་ཏུ་འཇོམས། །སྣ་ཚོགས་ཡེ་ཤེས་ཐིག་ལེ་ཆེ་ཧོཿཧཱུཾ་ཁྲོ་བོའི་རྒྱལ་པོ་སྤྲིན་ཆེན་པོ། །འཕྲོས་པའི་དཀྱིལ་འཁོར་ཆར་ཆེན་འབེབས། །དཀྱིལ་འཁོར་ཡིད་བཞིན་འབྱུང་བའི་གཏེར། །སྣ་ཚོགས་ཁྲོས་པའི་ཐིག་ལེ་ཆེ་ཧོཿཧཱུཾ་བདུད་ཀུན་གྱི་ནི་བདག་ཆེན་པོ། །བདུད་ཀྱི་བདུད་དེ་བདུད་རྣམས་འཇོམས། །འཇིགས་པའི་ཚོགས་ཀྱང་འཇིགས་བྱེད་པ། །འཇིགས་བྱེད་ཆེན་པོ་ཐིག་ལེ་ཆེ་ཧོཿཧཱུཾ་རྡོ་རྗེ་བྲག་ཆེན་སྲ་བ་པོ། །རྡོ་རྗེ་ཆུ་བོ་སྡུད་ཆེན་པོ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་རླུང་སྟེ་འཐོར་རླུང་ཆེ་ཧོཿཞེས་ཆེད་དུ་གླུ་བླངས་སོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཁྲོ་བོ་ལ་བསྟོད་པའི་ལེའུ་སྟེ་ཉི་ཤུ་གཅིག་པའོ།། །། ལེའུ་ཉེར་གཉིས་པ།༈ དེ་ནས་བཅོམ་ལྡན་འདས་དགྱེས་པ་ཆེན་པོས་དེ་བཞིན་གཤེགས་པ་ཉིད་ལ་གསང་སྔགས་ཀྱི་རྒྱལ་པོ་བརྟན་པར་གཟུང་བ་འདི་ཆེད་དུ་བརྗོད་དོ། །ཀྱེ་ཀྱེ་ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །གཟུང་འཛིན་སྤྲོས་ལ་འཆེལ་བ་ཡིས། །རྣམ་རྟོག་ཞགས་པས་སོ་སོར་འཛིན། །ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཡེ་ཤེས་ངོ་མཚར་རབ་འབྱམས་ཀྱིས། །དོན་དུ་མི་འགྱུར་ཡོངས་མ་གསུངས། །དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བར་གང་བྱེད་པ། །དེ་ཉིད་ང་ཡིན་དབང་ཡང་རྫོགས། །དེ་བཞིན་གཤེགས་པ་ཐམས་ཅད་ལ། །གསང་བ་འདི་ལས་གཞན་མི་མངའ། །སྒྲོ་དང་སྐུར་པ་ཞི་བ་ཡི། །གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །དེ་ནི་ངེས་པར་ལུང་བསྟན་ཏེ། །སྲས་ནི་ཐུགས་ལས་སྐྱེས་པ་ཡིན། །ས་རབ་རིག་པ་འཛིན་ལ་གནས། །ཞེས་བརྗོད་པས། དེ་བཞིན་གཤེགས་པ་ཐམས་ཅད་དབྱེར་མེད་པར་དགྱེས་ནས་དུས་བཞི་མཉམ་པ་ཉིད་ཀྱི་དབྱིངས། སྐུ་གསུང་ཐུགས་ལྷུན་སྟུག་པོ་བཀོད་པའི་རྒྱན་ཉིད་དུ་བཞུགས་སོ། །འཕགས་པ་རྟོག་པའི་རྒྱལ་པོ་སྒྱུ་འཕྱུལ་དྲྭ་བ་ལེའུ་སྟོང་ཕྲག་བརྒྱ་པ་ལས་མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི་དེ་བཞིན་གཤེགས་པ་ཐམས་ཅད་ཀྱི་གསང་བ་གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཐམས་ཅད་མ་ལུས་པར་འཕྲོས་ཏེ་འཁོར་ལོ་བསྐོར་བ་དེ་དག་གི་འབྲས་བུའི་མཆོག །གཡུང་ཊཱིཀ་ན་རྫོགས་སོ་ཞེས་པ་རེ་ཞིག་རང་རྩོམ་ཟིན་པ་ལ་དགོངས་པ་འདྲའོ། །གསང་བའི་སྙིང་པོ་དེ་ཁོ་ན་ཉིད་ངེས་པ་ལས་མཉེས་པ་དང་ཡོངས་སུ་གཟུང་བའི་ལེའུ་སྟེ་ཉི་ཤུ་གཉིས་པའོ།། །། ༈ རྒྱ་གར་གྱི་མཁན་པོ་བི་མ་ལ་མི་ཏྲའི་ཞལ་སྔ་ནས་དང་། བོད་ཀྱི་ལོ་ཙཱ་བ་གཉགས་ཛྙཱ་ན་ཀུ་མཱ་ར་དང་། རྨ་ཨཱ་ཙཪྻ་རིན་ཆེན་མཆོག་གིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །སྤྱིར་རྩ་རྒྱུད་འདི་ལ་བོད་དུ་ལོ་པཎ་བསྡེབས་པའི་གཞི་འགྱུར་གསུམ་དང་། པཎྜི་ཏ་མེད་པའི་རྩལ་འགྱུར་གཉིས་ཏེ་འགྱུར་ལྔ་བྱུང་བར་གྲགས་པ་ལས། གཞི་འགྱུར་གསུམ་ནི། སློབ་དཔོན་སངས་རྒྱས་གསང་བ་དང་བཻ་རོ་ཙ་ནའི་སྔ་འགྱུར། སློབ་དཔོན་པདྨ་འབྱུང་གནས་དང་གཉགས་ཛྙཱ་ནའི་བར་འགྱུར། བི་མ་ལ་དང་རྨ་གཉགས་ཐུན་མོང་གི་ཕྱི་འགྱུར་དང་གསུམ་ལས། འདི་ནི་ཕྱི་མ་སྟེ་འཕྱོང་ཅན་ཡིན་ལ། སྔ་མ་གཉིས་ལ་འཕྱོང་མེད་པར་གྲགས་སོ། །རྩལ་འགྱུར་གཉིས་ནི། བསྟན་པ་ཕྱི་དར་གྱི་ཚེ་ཡོངས་རྫོགས་བསྟན་པའི་མངའ་བདག་ཐར་ལོ་ཉི་མ་རྒྱལ་མཚན་གྱི་འགྱུར་དང་། འགོས་ལོ་ཙཱ་བ་གཞོན་ནུ་དཔལ་གྱིས་འགྱུར་བཅོས་མཛད་པ་གཉིས་སུ་གྲགས་སོ། །སརྦ་དཱ་མདྒ་ལཾ།། །། གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཕྱི་མ།ལེའུ་ཉེར་གསུམ་པ།༄༅། །གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཕྱི་མ་བཞུགས། དེ་ནས་ཕྱོགས་བཅུའི་དུས་བཞིའི་བཅོམ་ལྡན་འདས་དེ་བཞིན་གཤེགས་པ་འཁོར་དང་བཅས་པ་མ་ལུས་པ་ཐམས་ཅད་ཀྱིས། བཅོམ་ལྡན་འདས་རབ་ཏུ་དགྱེས་པ་བདེ་བ་ཆེན་པོ་ཀུན་ཏུ་བཟང་པོ་ལ་གསོལ་བ་བཏབ་པ། གསང་བའི་སྙིང་པོ་ཞེས་གསུངས་གང་། །དེ་ཉིད་རྣམ་ངེས་ཇི་ལྟ་བུ། །འདི་ལ་རྗོད་བྱེད་གྱུར་པ་གང་། །འདི་ཡི་དགོས་པའང་ཅི་ཞིག་ཡིན། །འདི་བཤད་པ་རྣམས་ཇི་ལྟར་འབྲེལ། །རྗོད་པར་བྱེད་པ་གང་ལ་བརྗོད། །ཅི་ཡིས་རྒྱུད་ཅེས་བྱ་བར་བཤད། །འདི་དག་གི་ནི་བསྡུས་དོན་གང་། །ཞེས་ན་ཀུན་ཏུ་བཟང་པོའི་མཚན། །ཞི་བའི་དཀྱིལ་འཁོར་ཡང་ཅི་ལགས། །ཁྲོ་བོའི་དཀྱིལ་འཁོར་ཞེས་བྱ་གང་། །ཡི་གེའི་དཀྱིལ་འཁོར་གྱུར་པ་གང་། །དབང་བསྐུར་བ་ནི་དུ་ཞིག་གསུང་། །དབང་བསྐུར་བ་ཡི་དོན་ཡང་ཅི། །ཅི་ཕྱིར་ཏིང་ངེ་འཛིན་དུ་བརྗོད། །བླ་མ་སློབ་མ་ཇི་འདྲ་ལགས། །རེ་ཞིག་དེ་ཁོ་ན་ཉིད་ཅི། །ཅི་ལས་ཀུན་རྫོབ་ཏུ་ནི་བརྗོད། །དམ་ཚིག་སྡོམ་པ་དེ་ནི་ཅི། །ཅི་ཕྱིར་དེ་བཞིན་གཤེགས་པར་འགྱུར། །དེ་བཞིན་གཤེགས་པ་དུ་ཞིག་བཤད། །དེ་བཞིན་རིགས་ནི་རྣམ་པ་དུ། །མཆོད་པ་རྣམས་ཀྱང་ཅི་འདྲ་བཤད། །ཁྲུས་དང་སྦྱིན་སྲེག་ཇི་ལྟ་བུ། །དེ་བཞིན་ཉིད་དབྱིངས་ཀྱང་ཅི་འགྱུར། །སྐྱེ་བོ་ཇི་ལྟར་བཅིངས་པ་དང་། །ཇི་ལྟར་བུར་ན་གྲོལ་བར་བཤད། །ཅི་ཞིག་ལས་ནི་གྲོལ་བ་ལགས། །སུ་ཞིག་ཅི་ཡིས་འཁོར་བར་འགྱུར། །ཅི་ལས་དེ་རྣམས་འཁོར་བར་གནས། །ཕུང་པོ་སྐྱེ་མཆེད་ཁམས་རྣམས་དུ། །དེ་རྣམས་ཅི་ཡང་བདག་ཉིད་ཀྱི། །གང་ལ་བདུད་རྩི་ལྔ་རུ་བརྗོད། །སྒྲོན་མ་ལྔ་པོའང་གང་དང་གང་། །དེ་དག་ཀྱང་ནི་ཇི་ལྟར་བཟའ། །རྒྱུ་ཅི་ཞིག་གིས་གྲུབ་པ་ལགས། །སྣ་ཚོགས་ཚུལ་འབྱུང་དེ་ཅི་ལས། །གསང་སྔགས་ངེས་པར་ཅི་ལས་འགྱུར། །བསྐྱེད་པའི་རིམ་པ་ཅི་ཞིག་ཡིན། །རྫོགས་པའི་རིམ་པའང་གང་ཞིག་ལགས། །བསྙེན་པ་ལ་སོགས་བཞི་པོ་གང་། །སྐད་ཅིག་དང་ནི་དགའ་བ་རུ། །ཐིག་ལེ་ནཱ་དའང་གང་ཅི་ཞིག་ཅི། །རྡོ་རྗེ་པདྨ་ཅི་ལ་བརྗོད། །ཕྱག་རྒྱ་ཅི་ཞིག་རྣམ་པའང་དུ། །ཕྱི་ནི་ཅི་ཞིག་གནང་རེ་ཅེ། །གསང་དང་དེ་ཡི་བླ་མའང་ཅི། །ཆགས་བཅས་ཆགས་དང་བྲལ་རྣམས་ཀྱི། །ཕྱག་རྒྱའི་སྦྱོར་བ་ཇི་ལྟར་ལགས། །བྱང་ཆུབ་སེམས་ཀྱང་ཇི་ལྟར་སྙམ། །ཡང་ན་སྲོག་ཀྱང་ཇི་ལྟ་བུ། །སྦྱོར་བ་གང་གིས་གྱེན་དུ་འཕོ། །གང་གི་དུས་ནི་འཕོ་བ་ལགས། །དུས་སོ་ཞེས་ནི་གང་ལ་བརྗོད། །ཅི་ཡི་འཇིག་རྟེན་དངོས་གྲུབ་ནི། །ཕྲ་སོགས་རལ་གྲི་ལ་སོགས་ལགས། །ཇི་ལྟར་འཇིག་རྟེན་འདས་པར་འགྱུར། །བདེ་ཆེན་ཕྱག་རྒྱ་ཆེན་པོ་ཡང་། །ཅི་ཞིག་ལ་ནི་བརྗོད་པར་བྱ། །དོར་བྱ་ཅི་ཞིག་བླང་བྱ་གང་། །གནོད་སྦྱིན་ལ་སོགས་ཇི་ལྟར་འདུལ། །གང་གི་རོ་ལངས་སློང་བ་དང་། །སུ་ཞིག་གསད་པར་བྱ་བ་ཡིན། །ཤ་ལ་སོགས་པས་ཇི་ལྟར་བཟའ། །འཁོར་བཞི་པོ་རྣམས་གང་ཞིག་ལགས། །ཚོགས་ཀྱི་འཁོར་ལོ་ཅི་འདྲ་དང་། །རྣལ་འབྱོར་མ་རྣམས་ཅི་འདྲ་ཞིང་། །དེར་ནི་དཔའ་བོའང་ཅི་འདྲ་དང་། །དེ་རུ་བརྡའ་ཡང་གང་འདྲ་ཞིག །འདིར་ནི་རྣལ་འབྱོར་ཅི་འདྲར་འགྱུར། །དེ་བཞིན་སེམས་ཀྱི་རྒྱལ་ཅི་འདྲ། །གང་གིས་དམ་ཚིག་ཉམས་འགྱུར་ཞིང་། །སློང་བའི་དམ་ཚིག་ཇི་ལྟ་བུ། །ཇི་ལྟར་དེ་ལ་ནན་ཏན་དང་། །བཟླས་པའི་རྣམ་པའང་དུ་ཞིག་མཆིས། །བདུད་རྣམས་ཅི་ཞིག་གང་གིས་གཞོམ། །དགེ་བའང་ཅི་ཞིག་རྣམ་པ་དུ། །མི་དགེའི་ཅི་ཞིག་རྣམ་པ་དུ། །ས་དང་ཕ་རོལ་ཕྱིན་རྣམས་གང་། །ཅི་ལྟར་འདི་རྣམས་སངས་རྒྱས་ཆོས། །རྣམ་དག་རྣམ་པ་ཅི་འདྲ་ཞིག །དཀྱིལ་འཁོར་རྣམ་པ་དུ་རྒྱུ་གསུང་། །དེ་བཞིན་ལས་ནི་རབ་འབྱམས་ཅི། །དཀོན་མཆོག་གསུམ་ཞེས་བྱ་བ་གང་། །གང་གིས་ཇི་ལྟར་སྐྱོབ་པ་ལགས། །སྒྲུབ་པ་པོ་ནི་ཅི་འདྲ་ཞིག །འདིར་ནི་ཇི་ལྟར་གཏོར་མ་སྦྱིན། །ཕྱ་རྒྱ་དང་ནི་རྒྱན་ཡང་གང་། །གཡས་བརྐྱང་དེ་ལས་གཞན་པའང་ཅི། །ཅི་ཞིག་ཅི་ལྟར་བྱང་ཆུབ་ཕྱོགས། །རྒྱུ་ཅི་དག་གིས་དེ་རུ་འགྱུར། །སྐྱེ་གནས་ཅི་ཞིག་སྐྱེ་གནས་དུ། །ཕུན་སུམ་ཚོགས་པ་ལྔ་པོའང་ཅི། །ཕུང་རྣམས་ཟག་པར་བཅས་ཀྱང་རྩིས། །ཇི་ལྟར་ཡེ་ཤེས་ལྷ་རུ་འགྱུར། །གང་གི་ཅི་ཞིག་ཟག་པ་དང་། །གང་ཚེ་གང་རྣམ་ཟག་པ་ཟད། །ཅི་འདྲ་ཞིག་ལ་མ་རིག་བརྗོད། །དེ་བཞིན་རིག་པའང་ཅི་འདྲ་ལགས། །དུས་ཐུང་བ་ལ་ཇི་ལྟར་གྲོལ། །དུས་རིང་ལས་ཀྱང་ཇི་ལྟ་བུ། །བསོད་ནམས་སྡིག་པ་ཇི་ལྟར་འགྱུར། །སྐུ་ཡི་རྣམ་པའང་དུ་ཞིག་མཆིས། །བརྗོད་པ་ཅི་ཞིག་མཆོད་པའང་ཅི། །གཞན་ཡང་འདུག་སྟངས་དག་ཀྱང་གང་། །རབ་ཏུ་གནས་པ་ཅི་འདྲར་བརྗོད། །རང་གཞིན་ཡང་ན་གཞན་ཡང་རུང་། །འོང་བ་ཇི་ལྟ་བུ་ལ་བཤད། །འགྲོ་བར་གྱུར་པ་ཇི་ལྟ་བུ། །སྲོག་ཆགས་རྣམས་ཀྱི་རྣམ་རྟོག་ཅི། །རྨི་ལམ་ལ་སོགས་ཇི་ལྟར་མཐོང་། །སྙིང་རྗེ་དེ་ཡང་ཅི་འདྲ་ལགས། །གང་ལ་དགོངས་པའི་རྣམ་པ་དུ། །སངས་རྒྱས་བྱང་ཆུ་སེམས་དཔའ་རྣམས། །སྣ་ཚོགས་གང་ལས་རྣམ་པར་སྤྲོས། །དེ་ལྟར་བཤད་བྱ་མ་ལུས་རྣམས། །ཀུན་མཁྱེན་ཐུགས་རྗེའི་རང་བཞིན་ཅན། །གང་གི་ཐེ་ཚོམ་ཀུན་མེད་པ། །སྲིད་པ་གསུམ་ན་རྣམ་པར་རྒྱུ། །ཞེས་དཔལ་གསང་བའི་སྙིང་པོ་དེ་ཁོ་ན་ཉིད་རྣམ་པར་ངེས་པའི་རྒྱུད་ཆེན་པོ་ལས་དྲི་བ་བསྟན་པ་ཞེས་བྱ་བའི་ལེའུ་སྟེ་ཉི་ཤུ་རྩ་གསུམ་པའོ།། །། ལེའུ་ཉེར་བཞི་པ།དེ་ནས་བཅོམ་ལྡན་འདས་ཀུན་ཏུ་བཟང་པོས། དེ་བཞིན་བཤེགས་པ་རྣམས་ལ་བཀའ་སྩལ་པ། ལེགས་སོ་ལེགས་སོ་རྒྱལ་བ་ཀུན། །དེ་བཞིན་གཤེགས་རྣམས་ལེགས་སོ་ལེགས། །གང་ཤེས་ཤིན་ཏུ་མཆོག་གྱུར་བ། །རྣམ་པ་དེ་ལྟའི་ཞུ་བ་ཆེ། །གང་གིས་དགར་ཡང་འདིར་ལ་དྲིས། །འགའ་ཡང་རྣམ་པར་བཤད་པ་མིན། །རྒྱུད་རྣམ་ཀུན་ཏུ་ལེགས་འབྱུང་བ། །རྣལ་འབྱོར་སྤྱོད་ཡུལ་སྙིང་པོའི་དོན། །ཉན་ཐོས་རྣམས་ལ་མ་བཤད་ཅིང་། །རབ་ཏུ་མཆོག་གྱུར་དགེ་སློང་ལའང་། །གསང་ལས་ཤིན་ཏུ་གསང་བ་མཆོག །གནས་རྣམས་ཀུན་གྱི་ནང་ན་བཞུགས། །བླ་མ་རྣལ་འབྱོར་མའི་ཞལ་ནས། །སྙན་ནས་སྙན་དུ་ཡང་དག་བརྒྱུད། །རྩེ་གཅིག་གྱུར་པའི་ཡིད་ཀྱིས་ཀྱེ། །དེ་བཞིན་གཤེགས་རྣམས་མཉན་པར་གྱིས། །གསང་བ་ཆོས་འབྱུང་ལ་བཤད་དེ། །སྙིང་པོའང་དེ་ཡི་ཐབས་ཅན་ནོ། །གཉིས་པོ་ཕྱིན་ཅི་མ་ལོག་ཕྱིར། །དེ་ཉིད་དེ་འདིར་རྣམ་ངེས་ཏེ། །རྣམ་པ་ཀུན་ཏུ་དུས་ཀུན་ཏུ། །གང་གིས་བསྒྲུབས་ཤིང་བརྡར་བ་ཡིན། །སྟོང་ཉིད་སྙིང་རྗེ་སྦྱོར་བ་ནི། །བརྗོད་པར་བྱ་བར་འདིར་བཤད་དོ། །ཕྱག་རྒྱ་ཆེན་པོའི་དངོས་གྲུབ་ནི། །དགོས་པའི་གཙོ་བོའི་རང་བཞིན་ཕྱིར། །འཇིག་རྟེན་པ་ཡི་ལམ་གྱུར་པས། །སྣ་ཚོགས་རང་བཞིན་:ཐ་༼མཐའ་༽དག་གོ །ཐབས་དང་ཐབས་བྱུང་འབྲེལ་བ་སྟེ། །བླ་མ་སློབ་མ་དག་ཀྱང་ངོ་། །གང་གིས་བརྗོད་བྱ་འཆད་བྱེད་པ། །དེ་ནི་རྗོད་བྱེད་དུ་བཤད་དོ། །རྒྱུད་ནི་རྒྱུན་ཆགས་ལ་བཤད་དེ། །ཐབས་དང་རྒྱུ་ལས་འབྲས་བུའོ། །ཟབ་དང་རྒྱ་ཆེན་དབྱེ་བ་ཡིས། །འདིར་དེ་བསྡུས་དོན་གཉིས་སུ་འདོད། །ཕྱོགས་བཅུའི་འཇིག་རྟེན་ཐམས་ཅད་དུ། །མངོན་མཐོ་ངེས་ལེགས་རབ་སྟེར་བ། །ཀུན་ཏུ་བཟང་པོར་བརྗོད་པ་ཡིན། །རང་བཞིན་བདག་ཉིད་རྣམ་པ་ཀུན། །ཐམས་ཅད་ཞི་བར་བྱེད་ཉིད་ཕྱིར། །ཞི་བའི་དཀྱིལ་འཁོར་ཞེས་བརྗོད་དོ། །གདུལ་བར་དཀའ་བའི་ཉོན་མོངས་ལ། །ཐུགས་རྗེའི་དབང་གིས་ཁྲོ་བྱེད་ཕྱིར། །ཁྲོ་བོའི་དཀྱིལ་འཁོར་ཞེས་བརྗོད་དོ། །ངག་གི་སྤྲོས་པ་མ་ལུས་པ། །བརྗོད་པའི་རྟེན་གྱི་རང་བཞིན་ཕྱིར། །ཡི་གེའི་དཀྱིལ་འཁོར་དུ་བཤད་དོ། །སློབ་དཔོན་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །རྣམ་རྟོག་དྲི་མ་དག་བྱའི་ཕྱིར། །དབང་བསྐུར་རྣམ་པ་བཞི་ཡིན་ནོ། །གདོད་ནས་ཞི་བའི་རང་བཞིན་ཕྱིར། །ཆོས་ཀུན་སྐྱེ་བ་མེད་པ་སྟེ། །རྣམ་ཀུན་ཀུན་ལ་རྟག་པ་ནི། །བདེ་བ་ཆེན་པོ་མྱོང་པའང་དེ། །རང་གི་རྣམ་རྟོག་དབང་གིས་ན། །མ་རིག་སྣ་ཚོགས་ཚུལ་གྱིས་འཁྲུལ། །རང་གཞན་དོན་འབྲས་རབ་སྟེར་བ། །འདིར་ནི་ཏིང་འཛིན་དུ་བརྗོད་དེ། །ཡེ་ཤེས་ཚོགས་ཀྱི་རྒྱས་པའོ། །ཀུན་ཏུ་བཟང་པོ་བླ་མར་འདོད། །བསྟན་པ་འོས་པ་སློབ་མ་ཡིན། །གང་ཞིག་རྣམ་རྟོག་དམིགས་མེད་པས། །དངོས་གྲུབ་ཀུན་སྟེར་ཡང་དག་ལམ། །རྣམ་ཀུན་དེ་ཁོ་ན་ཉིད་བཤད། །རྣམ་པར་རྟོག་པའི་སྣང་བརྙན་ཡང་། །རྣམ་པ་ཀུན་ཏུ་ཀུན་རྫོབ་འདོད། །རྣམ་པ་ཀུན་ཏུ་ལུས་ཀྱང་བཏང་། །བྱ་བར་ངེས་པ་ཉིད་ཀྱིས་ན། །གང་ཞིག་ནན་ཏན་ལས་མི་འགོང་། །རྨི་ལམ་དུ་ཡང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད། །ལུས་ངག་ཡིད་ཀྱིས་བྱས་པའོ། །གང་ཕྱིར་དེ་བཞིན་ཉིད་དུ་གཤེགས། །དེ་བཞིན་གཤེགས་པ་མངོན་པར་བརྗོད། །དེ་དག་མདོར་བསྡུས་ལྔར་བཤད་དེ། །རྒྱས་པར་ན་ནི་གྲངས་མེད་དོ། །རིགས་ནི་རྣམ་པ་བརྒྱར་བརྗོད་དོ། །མདོར་བསྡུས་པས་ནི་རྣམ་པ་ལྔ། །སྐུ་གསུང་ཐུགས་ཀྱི་དབྱེ་བ་ཡིས། །ཕྱི་ནས་རྣམ་པ་གསུམ་དུ་འགྱུར། །ཕྱི་དང་ནང་དང་གསང་བ་དང་། །ཡིད་དེ་རྣམ་པ་བཞི་པོ་ནི། །མདོར་བསྡུས་ནས་ནི་མཆོད་པར་བཤད། །གང་དེ་རྣམ་པ་མང་པོར་འདོད། །ཕྱི་དང་ནང་གི་དབྱེ་བ་ཡིས། །ཁྲུས་དང་སྦྱིན་སྲེག་ཏུ་བརྗོད་དེ། །མར་དང་ཆུ་སོགས་ཡང་དག་པར། །སྦྱོར་ལས་བྱུང་བ་བདུད་རྩི་འོ། །རྣམ་འགྱུར་མེད་པའི་རྣལ་འབྱོར་གྱི། །དེ་བཞིན་ཉིད་ཅེས་མངོན་བརྗོད་དེ། །རང་བཞིན་འཛིན་ཕྱིར་དབྱིངས་ཡིན་ཏེ། །དེ་བཞིན་ཉིད་ནི་དབྱིངས་སུ་བཤད། །རང་གི་རྣམ་པར་རྟོག་པས་བཅིངས། །རང་ཉིད་ཡོངས་སུ་ཤེས་པས་གྲོལ། །སྤྲོས་པ་ཐམས་ཅད་ཉེར་ཞི་བ། །རང་བཞིན་གྱིས་ནི་གྲོལ་བར་བརྗོད། །འཆིང་བ་མེད་ཕྱིར་དེ་གྲོལ་ལོ། །ཉོན་མོངས་ལས་ཀྱིས་འཁོར་བ་སྟེ། །དེ་ཡང་འགྲོ་དྲུག་རང་བཞིན་ཡིན། །འགྲོ་བ་དེར་འགྲོ་དེ་རུ་གནས། །གཟུགས་དང་ཚོར་བ་འདུ་ཤེས་དང་། །འདུ་བྱེད་རྣམ་པར་ཤེས་པ་ཉིད། །ཕུང་པོ་ལྔ་ཞེས་རབ་ཏུ་བརྗོད། །ཡུལ་དང་དབང་པོའི་དབྱེ་བ་ཡིས། །སྐྱེ་མཆེད་དག་ཀྱང་བཅུ་གཉིས་ཏེ། །ཡུལ་དང་དབང་པོ་རྣམ་པར་ཤེས། །ཐམས་ཅད་གསུམ་དུ་དབྱེ་བ་ཡིས། །ཁམས་ནི་བཅོ་བརྒྱད་དག་ཏུ་བཤད། །རྣལ་འབྱོར་ཀུན་རྫོབ་བདེན་པ་ཡིས། །སངས་རྒྱས་ལྷ་མོ་དང་ནི་སྲས། །རྨི་ལམ་སྒྱུ་མ་ལ་སོགས་བཞིན། །དེ་ཉིད་དུ་ན་རང་བཞིན་མེད། །རྣམ་ཤེས་ལྔ་པོ་མི་དམིགས་པས། །བདུད་རྩི་ལྔ་ཞེས་བཤད་པ་སྟེ། །ཡེ་ཤེས་ལྔར་ནི་བརྗོད་པ་གང་། །སྒྲོན་མ་ལྔ་ཞེས་བརྗོད་བྱ་སྟེ། །བརྗོད་པའི་རྣམ་པ་དེ་ལྟ་བུས། །དེ་ཉིད་རིག་པས་གཉིས་པོ་བཟའ། །ལས་དང་ཉོན་མོངས་བྲལ་བྱའི་ཕྱིར། །སྔགས་དང་ཕྱག་རྒྱ་ཏིང་འཛིན་གྱིས། །དྲི་ཆེན་སོགས་ལྔ་བྱིན་རློབས་དང་། །བདུད་རྩི་ལྔ་པོ་དག་ཀྱང་སྟེ། །ཡང་ན་བ་ལང་ཤ་ལ་སོགས། །སྒྲོན་མ་ལྔར་བཤད་དག་ཀྱང་ངོ་། །ལྷ་ཡི་རྣམ་པར་སྦྱོར་བ་ཡིས། །སྦྱང་པ་ལ་སོགས་རིམ་པས་ཀྱང་། །དངོས་གྲུབ་ཕྱིར་བཟའ་རྣལ་འབྱོར་མའི། །དངོས་གྲུབ་འགྱུར་གྱི་གཞན་དུ་མིན། །དངོས་རྣམས་རང་རང་རྒྱུ་ཡིས་ནི། །བརྟེན་ནས་འབྱུང་བ་ཉིད་ཡིན་ཏེ། །མོས་པ་སྣ་ཚོགས་བཀྲི་བའི་ཕྱིར། །སྣ་ཚོགས་བསྟན་པར་མཛད་པ་ཡིན། །དབང་པོ་ཆེ་རྣོའི་ཐེག་པ་ནི། །བདེ་བའི་འབྲས་བུ་དོན་གཉེར་བ། །ཉོན་མོངས་ལྷག་པའི་ཕྱིར་གང་ཞིག །གསང་སྔགས་ལུགས་ནི་དབང་བསྒྱུར་ལ། །ཁྱབ་ཅིང་རང་བཞིན་མེད་པའི་ཕྱིར། །ལྷ་ཡི་རྣམ་པའི་རྣལ་འབྱོར་ལ། །ཟླ་བ་རྡོ་རྗེ་སོགས་རིམ་པས། །བསྐྱེད་པའི་རིམ་པ་བརྗོད་པའོ། །རང་བཞིན་གྲུབ་པ་རྫོགས་པ་ཡིས། །རིམ་པར་བཤད་པར་རྣལ་འབྱོར་རོ། །རྣལ་འབྱོར་རྣལ་འབྱོར་མར་འབྲེལ་བ། །བསྙེན་པ་ཞེས་བྱ་བསྟན་པ་ཡིན། །བོ་ལ་ཀ་ཀྐོ་ལ་སྦྱོར་བ། །ཉེ་བར་བསྙེན་པར་བརྗོད་པ་སྟེ། །རྩ་གཉིས་མངོན་པར་འབྲེལ་བ་སྟེ། །སྒྲུབ་པ་ཡིན་པར་བསྟན་པའོ། །ལྷན་ཅིག་སྐྱེས་གཉིས་འབྲེལ་བ་ནི། །སྒྲུབ་པ་ཆེན་པོར་བརྗོད་པ་འོ། །འཁྱུད་པ་ལ་སོགས་སྣ་ཚོགས་པས། །རྣམ་པ་སྣ་ཚོགས་སྐད་ཅིག་བརྗོད། །བདེ་བ་ཆེན་པོ་རྣམ་སྨིན་པས། །རྣམ་པར་སྨིན་པའི་སྐད་ཅིག་ཉིད། །རླུང་གི་དེ་ཉིད་རྟོགས་པ་ཡིས། །ཉིད་ལས་རྣམ་པར་ཉིད་པའོ། །རྣམ་པ་ཀུན་ཏུ་མི་འཛིན་པས། །མཚན་ཉིད་བྲལ་བའི་སྐད་ཅིག་ལ། །མགྲིན་སྙིང་ལྟེང་པར་གསང་བའི་མཐར། །བྱང་ཆུབ་སེམས་ནི་འགྲོ་དང་འོང་། །དཀར་དང་ནག་པའི་དབྱེ་བ་ཡིས། །ནང་དེར་བདེ་བ་ཆེན་པོ་འཆར། །ཕྱི་མ་ཕྱི་མའི་དབྱེ་བ་ཡིས། །དགའ་བ་ལ་སོགས་འདི་དག་འདོད། །དགའ་བ་དང་ནི་མཆོག་དགའ་དང་། །བྲལ་བ་ཡི་ནི་དགའ་བ་ཉིད། །བཞི་པ་ལྷན་ཅིག་སྐྱེས་དགའོ། །ཡུལ་དང་སྲོག་གི་རྣལ་འབྱོར་ལ། །ཡེ་ཤེས་མེ་སྐྱེས་ནཱ་ད་དང་། །ཐིག་ལེ་རྟོག་པ་ཡིད་ལས་འབྱུང་། །གཉིས་ཀ་འདུས་པའི་ཡེ་ཤེས་སོ། །རླུང་ལས་ཉེ་བར་རྙེད་མ་གང་། །རྡོ་རྗེའི་རྩ་ནི་མངོན་པར་བཅིངས། །དེ་ཉིད་རྩེ་མོར་ལྔ་བར་འདོད། །རྣམ་རྟོག་བཅོམ་པ་ལས་ཀྱང་ནི། །པདྨ་འདབ་མ་བརྒྱད་པ་སྟེ། །སྲུབ་པའི་མངོན་པར་སྦྱོར་བའོ། །ཕྱག་རྒྱའི་དགའ་བ་རབ་སྟེར་བ། །དེ་ཡང་རྣམ་པ་ལྔ་རུ་བཤད། །དམ་ཚིག་ལ་སོགས་དབྱེ་བས་སོ། །བསྐྱེད་པའི་རིམ་པའི་སྦྱོར་བ་ནི། །ཕྱིར་ནི་རྣམ་པར་བཤད་པར་མཛོད། །རྩ་ཡི་འཁོར་ལོ་ལ་སོགས་སྦྱོར། །ནང་གི་རྣམ་པར་བཤད་པར་འདོད། །གསང་བ་བྱང་ཆུབ་སེམས་སོགས་པས། །རྟོག་པ་བླ་མེད་ཡང་དག་རིག །དམ་ཚིག་ཡེ་ཤེས་ལས་སུ་གྲགས། །འདོད་པའི་རྣལ་འབྱོར་ཕྱག་རྒྱ་ལས། །འདོད་ཆགས་བྲལ་བ་ཆེན་པོར་གྲགས། །དེ་ལྟར་ཕྱག་རྒྱའི་རྗེས་མཐུན་པ། །ནུས་པའི་ཡིད་ནི་རྣམ་པར་རྒྱལ། །རྣལ་འབྱོར་མི་འཕམ་རླུང་ལས་འགྱུར། །དེ་ཡི་ཇི་ལྟར་འདོད་པ་གནས། །ལུས་རྐྱེན་དབུས་སུ་བསྡིགས་འཛུམ་བཅས། །བསྡིགས་འཛུམ་བྱང་ཆུབ་སེམས་སུ་འགྱུར། །འདིར་ནི་རིམས་པར་ཐེ་ཚོམ་མེད། །དེ་སྲོག་རྒྱལ་བའི་གོ་འཕང་འགྱུར། །དེ་གནོན་ས་ལ་དགའ་བ་མེད། །རླུང་ནི་བརྒྱ་ཕྲག་བཅུ་དྲུག་གིས། །དུས་མ་ཡིན་པར་འཆི་བར་བཤད། །རྩ་ཡི་དབུས་ཀྱི་ནང་དེ་རུ། །རབ་ཏུ་དབྱེ་བ་འཆི་བསླུར་འདོད། །འཇིག་རྟེན་འཇིག་རྟེན་འདས་དངོས་གྲུབ། །རྫོགས་པའི་རིམ་པའི་སྦྱོར་བ་ནི། །དེ་ཉིད་རྟོགས་བཟང་གང་རྣལ་འབྱོར། །ཕྱག་རྒྱ་ཆེན་པོ་བདེ་བ་ཆེ། །ཐམས་ཅད་ཉེར་ཐོབ་བླང་བར་བྱ། །བཀའ་བཞིན་དུ་ནི་དེ་ལྟར་བསྒོམ། །དབྱེ་བ་མེད་པར་འདིར་སྐྱོབ་པ། །གནོད་སྦྱིན་ལ་སོགས་གདུལ་བར་བྱ། །བཀའ་ཡི་ནང་དུ་ཁྲོ་བ་དང་། །གསང་སྔགས་འཕོ་བའི་སྦྱོར་བ་ཡིས། །རོ་ལངས་རབ་ཏུ་བསླང་བར་བྱ། །རྟོག་པ་ཐམས་ཅད་རྣམ་པར་སྤང་། །མཚམས་མེད་ལྔ་དང་ལྡན་པ་ནི། །བླ་མའི་སྒོ་བས་སེམས་པ་དང་། །ཆོ་ག་བཞིན་དུ་བསྒྲལ་བ་བྱ། །ལྷ་ཡི་སྦྱོར་བ་སྒྱུ་མ་ལྟར། །ཟས་སུ་ཤ་ལ་སོགས་པ་བཟའ། །རང་དང་གཞན་གྱི་འབྲས་ཐོབ་པར། །གཞོམ་ལ་སོགས་པ་རྗེས་མཐུན་པའོ། །འཁོར་ནི་བཞི་རུ་རབ་ཏུ་བརྗོད། །སྔགས་ཀྱི་ལུགས་དང་ངེས་ཚིག་དང་། །སོ་སོར་ཐར་ལ་སོགས་པ་དང་། །རྫོགས་པ་ལས་བྱུང་རྣལ་འབྱོར་དག །འདི་ཡི་བདག་དང་གཞན་གསལ་བ། །གཅིག་ཏུ་འདི་ལ་གཞོལ་བའོ། །ཕྱག་རྒྱའི་སྦྱོར་བ་ཐམས་ཅད་དུ། །འདོད་པ་ལྔ་པོ་ཉེར་ལོངས་སྤྱོད། །བཟའ་བ་ཉེ་བར་མི་དམིགས་པ། །ཚོགས་ཀྱི་འཁོར་ལོ་ཞེས་རབ་བཤད། །བརྡའ་ནི་ལགས་པ་ལ་སོགས་དབྱེ། །དཔའ་བོ་རྣལ་འབྱོར་བ་ཡི་བརྡའ། །སྟོང་དང་སྙིང་རྗེའི་བདག་ཉིད་ཅན། །འདི་སྦྱོར་རྣལ་འབྱོར་པས་ཤེས་བྱ། །རྟེན་དང་རྟེན་མེད་རྣལ་འབྱོར་གྱིས། །དམིགས་པའི་རིམ་པ་རྣམ་གཉིས་པས། །སེམས་ནི་ངེས་པར་རྒྱལ་བར་འགྱུར། །དམ་བཅའ་བ་ལས་ལོག་པ་ན། །དམ་ཚིག་ཉམས་པར་བརྗོད་པར་བྱ། །དོན་ཡོད་རྡོ་རྗེའི་རྣལ་འབྱོར་གྱིས། །དམ་ཚིག་བླང་བར་འདོད་པ་ཡིན། །དམ་བཅས་པ་ལས་མི་ལོག་པར། །རང་གི་ནན་ཏན་བྱ་བར་བཤད། །ངག་གི་བཟླས་པ་སོགས་དབྱེ་བས། །བཟླས་པ་རྣམ་པ་བཞིར་བཤད་དོ། །དགེ་བའི་ལས་ལ་གེགས་བྱེད་ཕྱིར། །གཤིན་རྗེ་ལ་སོགས་བདུད་འདོད་དེ། །དང་པོར་གཟུགས་མེད་སེམས་ལ་བརྗོད། །གཞོམ་པ་སྔགས་སོགས་སྦྱོར་བས་སོ། །རང་གཞན་དོན་དང་རྗེས་མཐུན་གང་། །རྣམ་པར་སྨིན་པས་དགེ་བར་འདོད། །མདོར་བསྡུས་དེར་ནི་རྣམ་གཉིས་གསུངས། །ཤེས་རབ་སྙིང་རྗེའི་དབྱེ་བས་སོ། །དེས་དབེན་པ་ནི་མི་དགེ་བ། །ས་དང་ཕ་རོལ་ཕྱིན་པ་ཡང་། །གསང་སྔགས་ངེས་པའི་རིམ་པ་ཡིས། །སྦྱིན་སོགས་དགའ་བ་སོགས་ལས་རྣམས། །སངས་རྒྱས་ཆོས་རྣམས་སྟོབས་སོགས་ཏེ། །རང་བཞིན་གྱིས་ནི་དག་པར་བརྗོད། །གང་གང་ངེས་པར་སྦྱོང་ཞིང་དག །སྐུ་གསུང་ཐུགས་ཀྱི་དབྱེ་བ་ལས། །དཀྱིལ་འཁོར་རྣམ་པ་གསུམ་འདོད་དེ། །ཡང་ན་བྷ་ག་སོགས་དབྱེ་དང་། །ལས་ཀྱི་ཕྱག་རྒྱ་སོགས་དབྱེ་བས། །གང་ཡང་རྣམ་པ་ལྔར་འདོད་དེ། །ཞི་བ་ལ་སོགས་རབ་དབྱེ་བས། །ལས་ནི་རྣམ་པ་བཞིར་བསྡུས་སོ། །སངས་རྒྱས་ཆོས་དང་དགེ་འདུན་རྣམས། །བསམ་པ་ཐམས་ཅད་རྫོགས་བྱེད་ཕྱིར། །གསུམ་པོ་དཀོན་མཆོག་ཅེས་བཤད་དོ། །དེ་ཡང་དམ་པའི་དོན་འདོད་དེ། །ལུས་སོགས་གཅིག་ཏུ་དེ་མཐར་ཐུག །མཐར་ཐུག་དོན་མིན་ཀུན་སྤངས་ཕྱིར། །འདོད་པའི་འབྲས་བུས་ཀུན་ཐོབ་པས། །དེ་དག་སྐྱབས་སུ་བརྗོད་པར་བྱ། །རང་གཞན་བདག་ཉིད་རྣམ་ཀུན་ཏུ། །མ་ལུས་མི་དགེའི་ཀུན་བྱེད་པ། །སྐྱེ་བོ་མ་ལུས་འདོད་ཅན་ནོ། །སྟོང་ཉིད་སྙིང་རྗེར་ལྡན་པ་དང་། །སྣ་ཚོགས་དོན་ཚུལ་ལ་མཁས་པ། །དབང་རྣམས་བསྐུར་ཞིང་རྗེས་སུ་གནང་། །དེ་ནི་སྒྲུབ་པ་པོ་ཞེས་བརྗོད། །ལྷ་ཡི་རྣམ་པའི་རྣལ་འབྱོར་གྱིས། །གླུ་དང་རོལ་མོའི་རྣམ་པ་དང་། །བཟའ་དང་སྟོན་མོ་བཏུང་སོགས་དང་། །ཕྱག་རྒྱ་ལ་འཁྱུད་སྦྱོར་བ་དང་། །སྔགས་ཀྱི་སྔགས་རིགས་བློ་ལྡན་པས། །མཉམ་པར་བཞག་པས་གཏོར་མ་སྦྱིན། །མཁའ་འགྲོ་མཁའ་འགྲོ་མའི་ཚོགས་ལས། །དུར་ཁྲོད་དུ་ནི་འབྲས་འཐོབ་ཕྱིར། །འཁོར་ལོ་སོགས་ཀྱིས་རབ་ཕྱེ་བའི། །ཕྱག་རྒྱས་བརྒྱན་པར་གསུངས་པ་ཡིན། །རྐང་པ་གཡས་པ་རབ་བརྐྱང་ལ། །གཡོན་པ་བསྐུམ་པའི་སྦྱོར་བ་ལས། །དེ་ནས་གཡས་བརྐྱང་དུ་ཤེས་བྱ། །བཟློག་པ་ལས་ནི་གཡོན་བརྐྱང་ངོ་། །ལུས་སོགས་དྲན་པ་ཉེར་བཞག་སོགས། །བྱང་ཆུབ་པ་ཡི་ཐབས་ཡིན་ཕྱིར། །བྱང་ཆུབ་ཕྱོགས་ཤེས་རབ་ཏུ་བརྗོད། །ཐེག་ཆེན་དོན་ནི་བསྡུས་པའི་ཕྱིར། །སྐྱེད་པར་བྱེད་པས་རྟེན་དུ་འགྱུར། །མངལ་སྐྱེས་ལ་སོགས་དབྱེ་བ་ཡིས། །དེ་ཡང་རྣམ་བཞིར་ཡང་དག་འདོད། །སྟོན་པ་པོ་སོགས་རབ་དབྱེ་བས། །ཕུན་སུམ་ཚོགས་པའང་ལྔར་བརྗོད་དོ། །དེ་དེའི་རྟོགས་པ་ལས་བཟློག་ཕྱིར། །མེ་ལོང་ལ་སོགས་ཡེ་ཤེས་ལྔ། །དག་པ་བར་ཆད་མེད་པའོ། །ཚུལ་ཁྲིམས་ལ་སོགས་ཕུང་པོ་ལ། །ཟག་མེད་རྣམ་ནི་གཞན་ཡིན་ནོ། །མ་རིག་བག་ཆགས་སོགས་དབང་གིས། །རྣམ་ཤེས་ཟག་པར་ཤེས་པར་བྱ། །ཐོག་མེད་དུས་ཀྱི་ཉོན་མོང་བདག །བརྟགས་ཕྱིར་འཁྲུལ་པ་ཙམ་ཡིན་ཏེ། །ཡང་དག་མ་ཡིན་དོན་སྒྲུབ་ཅིང་། །ཡང་དག་པ་ཡི་སྒྲིབ་པར་གནས། །མ་རིག་པར་ནི་བརྗོད་པ་སྟེ། །རིག་པ་བཤད་ལས་བཟློག་ཕྱིར་རོ། །རྣལ་འབྱོར་པ་རྣམས་དུས་ཐུང་ངུས། །གྲོལ་བར་རྩེ་གཅིག་སེམས་ཉིད་ཀྱིས། །དེ་ལས་བཟློག་པ་དང་འབྲེལ་ཕྱིར། །དུས་རིང་བ་ལས་དེ་འགྱུར་རོ། །བསོད་ནམས་གཞན་ལ་ཕན་པ་སྟེ། །དེ་ལས་བཟློག་པ་སྡིག་པའོ། །ཡེ་ཤེས་ལ་སོགས་རབ་དབྱེ་བས། །སྐུ་ནི་རྣམ་པ་ལྔར་བཤད་དེ། །ཤེས་ལྡན་སྐྱོན་མེད་ཡོན་ཏན་བཅས། །རྣམ་ཀུན་སྙིང་རྗེའི་བདག་ཉིད་བརྗོད། །མཆོད་པའང་གུས་པ་ལས་ཡིན་ཏེ། །རྩེ་གཅིག་སེམས་ཀྱི་འདུག་སྟངས་སོ། །ཡེ་ཤེས་སེམས་དཔའ་རྣམ་པར་གནས། །རབ་ཏུ་གནས་པ་ཞེས་བྱ་བ། །རང་གི་སེམས་དང་གཞན་གྱི་སེམས། །རྣལ་འབྱོར་ལྡན་པ་གང་རུང་གིས། །རྣམ་རྟོག་རླུང་གི་སྦྱོར་བ་ཡིས། །འགྲོ་བ་དང་ནི་འོང་བར་བརྗོད། །རྣམ་རྟོག་ཅེས་བྱ་འཁྲུལ་བ་སྟེ། །སེམས་ནི་འཁྲུལ་པར་ལྡན་པས་སོ། །སེམས་དང་འཁྲུལ་པའི་སྦྱོར་བ་ལས། །རྨི་ལམ་མཐོང་བ་བཞིན་དུ་བཤད། །སྡུག་བསྔལ་དག་དང་དེ་རྒྱུ་ལས། །སེམས་ཅན་ཐམས་ཅད་གྲོལ་འདོད་པ། །སྙིང་རྗེ་དེ་ནི་རྣམ་པ་གསུམ། །སེམས་ཅན་ཆོས་དང་དམིགས་མེད་དག །བསྡུ་ན་སངས་རྒྱས་དེ་སྲས་བརྗོད། །མོས་པ་སྤྱོད་པའི་ས་ནས་ནི། །ཇི་སྲིད་བཅུ་པའང་བྱང་ཆུབ་སེམས། །བཅུ་གཅིག་པ་ནི་སངས་རྒྱས་ཏེ། །དེ་ཉིད་རྟོགས་ཕྱིར་སངས་རྒྱས་སོ། །ཀུན་ནས་རབ་ཏུ་སྣང་བ་དང་། །རྟོགས་པའི་ཕྱིར་དང་སེམས་ཅན་དོན། །སྣ་ཚོགས་སྤྲོས་པར་བྱ་ཕྱིར་ཏེ། །འདི་ཡང་ཀུན་རྫོབ་དོན་དུ་བཤད། །དེ་ཉིད་དུ་ནི་སྤྲོས་མེད་དེ། །བླ་མའི་ཞལ་ནས་གནས་པ་ཡིན། །དབང་བསྐུར་བཞི་ཡི་དེ་ཉིད་དོན། །དེ་ཉིད་ཤིན་ཏུ་རྙེད་པར་དཀའ། །ཀུན་གྱི་སྲོག་དང་འདྲ་བར་ནི། །འབད་པ་ཡིས་ནི་བསྒྲུབ་བྱ་སྟེ། །དེ་ཚེ་རང་གཞན་རྗེས་འཛིན་པར། །ནུས་པ་ཕུན་སུམ་ཚོགས་ཀུན་ཐོབ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཅང་མི་གསུང་བར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་དགྱེས་པ་དང་། རབ་ཏུ་དགྱེས་པ་དང་། ཡིད་ཚིམ་པ་སྐྱེས་པར་གྱུར་ནས། འདི་སྐད་ཅེས་གསུངས་སོ། །ཀྱེ་མའོ་རྡོ་རྗེའི་ཚུལ་ཞི་བ། །ཀུན་ཏུ་བཟང་པོ་བླ་ན་མེད། །ཕུན་སུམ་ཚོགས་པ་ཀུན་སྟེར་བ། །རྟག་ཅིང་ཤིན་ཏུ་རྨད་བྱུང་བ། །གསང་བའི་སྙིང་པོ་རིན་པོ་ཆེ། །རྒྱུད་ཀུན་གྱིས་ནི་དོན་བསྡུས་པ། །ཐེ་ཚོམ་ཐམས་ཅད་གཅོད་པའོ། །གསང་བ་བས་ཀྱང་གསང་བའི་མཆོག །ཅེས་དེ་སྐད་ཅེས་གསུངས་ནས། ཐམས་ཅད་བདེ་བ་ཆེན་པོ་ལ་རྗེས་སུ་ཞུགས་པར་གྱུར་ཏོ། །དཔལ་གསང་བའི་སྙིང་པོ་དེ་ཁོ་ན་ཉིད་ངེས་པར་ལས། འཁོར་ཐམས་ཅད་ཀྱི་ཐེ་ཚོམ་ཐམས་ཅད་གཅོད་པ་བླ་ན་མེད་པ་རིན་པོ་ཆེ་སྦྱིན་པའི་ལེའུ་སྟེ་ཉི་ཤུ་བཞི་པའོ།། །།འཕགས་པ་སྒྱུ་འཕྲུལ་དྲྭ་བའི་རྒྱལ་པོ་སྟོང་ཕྲག་བརྒྱ་པ་ལས། རྒྱུད་ཐམས་ཅད་ཀྱི་ལུང་གི་མཚན་ཉིད་བསྡུས་པའི་དོན་དེ་བཞིན་གཤེགས་པ་ཐམས་ཅད་ཀྱི་གསང་བར་གྱུར་པ། དཔལ་གསང་བའི་སྙིང་པོ་དེ་ཁོ་ན་ཉིད་ངེས་པ་འཁོར་ལོས་བསྒྱུར་བ་མ་ལུས་པ་སྤྲོ་བའི་འཕྲིན་ལས་རྒྱས་པ་རྫོགས་སོ།། །། གསང་བའི་སྙིང་པོ་དེ་ཁོ་ན་ཉིད་རྣམ་པར་ངེས་པའི་རྒྱུད་ཕྱི་མའི་ལེའུ་ཉེར་གསུམ་པ་དང་། ཉེར་བཞི་པ་ལས། རྒྱ་དཔེ་ཇི་ལྟར་རྙེད་པ་ལ། ཐར་པ་ལོ་ཙཱ་བས་འགྱུར་མཛད། དུས་ཕྱིས་ཤོག་བྱང་གཅིག་མ་ཚང་བའི་རྒྱ་དཔེ་མཐོང་བས་མི་བཅོས་སུ་མི་རུང་བ་རྣམས་གཞོན་ནུ་དཔལ་གྱིས་ལྕགས་ཕོ་སྟག་གི་ལོ་ལ་དཔལ་ཚོང་འདུས་ཀྱི་ཕོ་བྲང་ཆེན་པོར་བཅོས་པའོ། །འདིའི་ཤོག་བྱང་གཅིག་མ་རྙེད་པ་ལ་ཐར་པ་ལོ་ཙཱ་བའི་འགྱུར་ཉིད་བྲིས་སོ། །ཞེས་འགོས་ལོའི་འགྱུར་ཉིད་གཞིར་བཞག་ལ་དྲི་བ་བརྒྱ་དང་གཉིས་པའི་ལན་མན་ཆད་དེར་མ་ཚང་བར་ཁ་ཆེའི་མཁས་པ་ཀུན་དགའ་དཔལ་གྱིས་བསྒྱུར་བ་ནས་བསབས་པའོ། །རྒྱལ་བ་ཀུན་གྱི་གས༵ང་བ༵འི་མཛོད། །སྒྱུ་༵འཕྲུལ༵་སྙིང༵་པོ༵་རྒྱུད༵་ཆེན་གྱི། །རྩ་བ་ལས་འཕྲོས་ཕྱི༵་མ༵འི་རྒྱུད༵། །དུ་མར་སྤར་བའི་དྲྭ་བ་འདི། །གནས་ལྔ་རིག་པའི་མཛོད་འཛིན་ཞིང་། །རྡོ་རྗེ་ཐེག་ལ་རབ་གུས་པ། །བརྟན་པའི་བློ་ལྡན་དེ་ཡིས་སྤེལ། །དགེ་བས་ཐུབ་བསྟན་འཕེལ་རྒྱས་ཤོག །ཅེས་པའང་སྐྱབས་མགོན་རྫོགས་ཆེན་རིན་པོ་ཆེའི་ཕྱག་མཛོད་རྡོ་རྗེ་རབ་བརྟན་ནས། སྒྱུ་འཕྲུལ་གྱི་རྒྱུད་ཕྱི་མ་འདི་ཉིད་གསར་དུ་བཞེངས་པའི་སྤར་བྱང་དུ། བཙུན་པ་གཞན་ཕན་པས་སྤེལ་བ་དགེ ། སརྦ་མངྒ་ལམ།། །། རྩ་རྒྱུད་སྙིང་པོའི་བཤད་པའི་འགོ་རྒྱན་གྱི་དཔེར་བརྗོད་ལས་དང་པོ་པ་ལ་ཕན་པ།༄༅། །རྩ་རྒྱུད་སྙིང་པོའི་བཤད་པའི་འགོ་རྒྱན་གྱི་དཔེར་བརྗོད་ལས་དང་པོ་པ་ལ་ཕན་པ་ཞེས་བྱ་བ་བཞུགས་སོ། ། བཅིང་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །བསྟན་ཕྱིར་སྤྲོ་བ་སྣ་ཚོགས་མཛད། །ཅེས་པའི་གཞུང་འདི་བཤད་གཞུང་དུ་གནང་བྱུང་བ་ཡིན་པས། གཞུང་འདི་ཉིད་བཤད་གཞུང་དུ་བགྱིས་ནས། སློབ་དཔོན་དཔའ་བོས། ཡ་རབས་རྣམས་དང་འཕྲད་ན་སྐྱེས་ཀྱི་མཆོག །ཚོགས་ཀྱི་ནང་ན་མཁས་པ་དགའ་བར་འགྱུར། །ཞེས་གསུངས་པ་ལྟར། འདིར་སྟོན་པ་ཐུབ་པའི་དབང་པོའི་རྒྱལ་ཚབ། བསྟན་པ་རིན་པོ་ཆེའི་ཆོས་ཀྱི་བདག་པོ། བསྟན་འཛིན་དགེ་འདུན་ཐམས་ཅད་ཀྱི་གཙུག་རྒྱན། རིག་པའི་གནས་ལྔ་སྨྲ་བ་ལ་གངས་རིའི་ཁྲོད་འདིར་འགྲན་ཟླ་ཐམས་ཅད་དང་བྲལ་བའི་རྗེ་བདག་ཉིད་ཆེན་པོའམ། མཁན་རིན་པོ་ཆེའི་ཞལ་སྔ་ནས་འདུས་པ་ཐམས་ཅད་ཀྱི་གདན་གྱི་གཙོ་བོར་བཞུགས་ཤིང་། གང་གི་སྙན་པའི་དྲི་བསུང་གྲགས་པའི་དྲི་བཞོན་གྱིས་བསྐུལ་བ་ལ་བརྟེན་ནས་ཆོས་ཀྱི་གྲྭ་ཡངས་པོ་འདིར་འདུས་པ། འཆད་པ་ལེགས་བཤད་ཉི་མའི་འོད་ཟེར་རྣམ་པར་འཕྲོ་བས་ཤེས་བྱའི་གནས་ཤིན་ཏུ་ཕྲ་མོ་རྣམས་ཀྱང་ལག་མཐིལ་གྱི་སྐྱུ་རུ་ར་ལྟར་གསལ་བར་སྟོན་ལ། རྩོད་པ་ལུང་རིགས་ཕ་ལམ་གྱི་རྡོ་རྗེ་རྩེ་བརྒྱ་པས་ལོག་རྟོག་ལྷ་མིན་གྱི་དཔུང་ཚོགས་ཕྱེ་མར་འཐག་ཅིང་། རྩོམ་པ་སྙན་ངག་ཨུཏྤ་ལའི་ཆུན་པོས་བློ་གྲོས་ཀྱི་མིག་ཅན་རྣམས་དགའ་བ་བསྐྱེད་པར་མཛད་པའི་སློབ་དཔོན་ནམ། ལས་ཆེན་པ་སོགས་ལུང་དང་རིགས་པའི་དབང་ཕྱུག་ཆེན་པོ་རྣམས་ཀྱིས་དབུ་མཛད། འཕགས་པའི་དགེ་འདུན་ཚུལ་ཁྲིམས་རྣམ་པར་དག་པའི་གེ་སར་ངུར་སྨྲིག་གི་འདབ་མས་མཛེས་ཤིང་། ཐེག་པ་ཆེན་པོའི་སྒོར་བླ་ན་མེད་པའི་བྱང་ཆུབ་ཏུ་ཐུགས་བསྐྱེད་པའི་བཤེས་གཉེན་དམ་པ་རྣམས་མདོའི་ཆ་འཛིན་དང་། དེ་རྣམས་ཀྱང་རྡོ་རྗེ་ཐེག་པའི་ཟབ་ལམ་ཉམས་སུ་བཞེས་པའི་ཆ་ནས་སྔགས་ཀྱི་ཆ་འཛིན་དུའང་བཞུགས་པའི་ཡུལ་དམ་པ་རྣམས་གདན་མངོན་པར་འཛོམ་པའི་མདུན་སར་རང་གི་བསོད་ནམས་སྤེལ་བའི་ཕྱིར་ལེགས་བཤད་ཀྱི་མཆོད་པ་ཅུང་ཟད་ཅིག་འབུལ་བར་བྱ་བ་སྐབས་སུ་བབས་ཤིང་། དེ་ལའང་སྤྱིར་རྙེད་དཀའ་བའི་དལ་འབྱོར་གྱི་མི་ལུས་རིན་པོ་ཆེའི་གྲུ་གཟིངས་རང་གིས་རྙེད་པའི་དུས་འདིར། དགེ་བའི་བཤེས་གཉེན་གྱི་དེད་དཔོན་ལ་བརྟེན་ནས། འཁོར་བའི་རྒྱ་མཚོ་ལས་བསྒྲལ་ཏེ་རྣམ་གྲོལ་ཡིད་བཞིན་གྱི་ནོར་བུ་ལེན་པ་ལ་འབད་པར་རིགས་ཞེས་སྐྱེས་བུ་དམ་པ་རྣམས་ཀྱི་གསུང་ལས་བྱུང་ཞིང་། དེ་ལྟ་བུའི་གསུང་དེ་ལ་བདག་ཅག་ཀྱང་ངེས་ཤེས་ཐོབ་སྟེ། ཐུབ་པའི་བསྟན་པ་ལ་རབ་དུ་བྱུང་ནས་ཐོས་བསམ་སྒོམ་གསུམ་ལ་བསླབ་འདོད་ཀྱི་འདུན་པའི་ཤུགས་ཅུང་ཟད་ཅིག་སྐྱེས་ཤིང་། དེ་ཡང་རྒྱུ་ཕ་རོལ་ཏུ་ཕྱིན་པའི་གཞུང་ལུགས་ཀྱི་རྫིང་བུར་ཞུགས་ཀྱང་སྐུ་གསུམ་གྱི་ནོར་བུ་ཐོབ་དཀའ་བར་མཐོང་ནས། གང་རྟོགས་པར་བྱ་བ་གཞི་རྒྱུད་ཀྱི་ཆུ་གཏེར་ཆེན་པོར། གང་གིས་རྟོགས་བྱེད་ཐབས་མཁས་ལམ་གྱི་རྒྱུད་ཀྱི་གྲུ་གཟིངས་ལེགས་པར་བསྐྱོད་དེ། འབྲས་རྒྱུད་སྐུ་ལྔ་ཡིད་བཞིན་གྱི་ནོར་བུ་ལེན་པའི་ཐབས་མཆོག །དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་རྩ་བའི་རྒྱུད་གསང་བའི་སྙིང་པོ་རྩ་འགྲེལ་ལ་ཐོས་པ་ཅུང་ཟད་བགྱིས་ཤིང་། དེ་ལ་ཡང་ཐོས་བྱུང་གི་ཤེས་རབ་རྣམ་པར་དག་པ་ཞིག་སྐྱེ་བ་ལ། བདག་རྐྱེན་སློབ་དཔོན་མཁས་པ། དམིགས་རྐྱེན་གཞུང་ལུགས་དག་པ། སྐྱེས་སྟོབས་ཤེས་རབ་ཆེ་བ། སྦྱོར་བྱུང་ནན་ཏན་ལ་བརྩོན་པ་ཞིག་དགོས་པར་གསུངས་ནའང་། བདག་དེ་ཀུན་གྱི་ནང་ནས། བཤེས་གཉེན་མཁས་པའི་ལམ་མཁན་གྱིས། གཞུང་ལུགས་བདེ་བའི་ལམ་ནས་ཁྲིད་པར་གྱུར་ཀྱང་། བདག་རང་སྐྱེས་སྟོབས་ཤེས་རབ་ཀྱི་མིག་གཏི་མུག་གི་ལིང་ཏོག་གིས་བསྒྲིབས་ཤིང་། སྦྱོར་བྱུང་ནན་ཏན་གྱི་ཡན་ལག་སྙོམས་ལས་དང་ལེ་ལོའི་ལྕགས་སྒྲོག་གིས་བཅིངས་པའི་སྟོབས་ཀྱིས། འཆད་བྱེད་ཚད་ལྡན་གྱི་སར་ཕྱིན་པར་མ་གྱུར་ནའང་། གསེར་གྱི་རི་ལ་གནས་པ་ཡི། །འདབ་ཆགས་རྣམས་ཀྱང་གསེར་དུ་སྣང་། །ཞེས་པ་ལྟར་དཔལ་གསང་བའི་བདག་པོ་དང་དབྱེར་མ་མཆིས་པའི་ཡོངས་འཛིན་དམ་པ་བཀའ་དྲིན་མཚུངས་པ་མེད་པ་གང་གི་ཞབས་བརྟེན་པདྨའི་ཕྲེང་བ་སྤྱི་བོའི་ལྡུམ་རར་རྟག་ཏུ་བཀོད་པའི་སྟོབས་ཀྱིས་གཞུང་ལུགས་ཀྱི་ཚིག་དོན་ཅི་རིགས་བློ་ཡུལ་དུ་ལོངས་པ་རྣམས་ལ་བརྟེན་ཏེ། མགོན་པོ་ཀླུ་སྒྲུབ་ཀྱིས། ཐུབ་པ་ཆེན་པོའི་བཀའ་ནི་སྙན་རྒུ་ཞིག །ཁྱོད་ཀྱི་ཐུགས་སུ་ལྟ་ཡང་ཆུད་མོད་ཀྱི། །རྡོ་ཐལ་ལས་བགྱིས་དགུང་ཟླའི་འོད་ཀྱིས་ཀྱང་། །ཆེས་དཀར་ཉིད་དུ་ཅི་སྟེ་མི་འགྱུར་ལགས། །ཞེས་གསུངས་པ་ལྟར་འདིར་བཤད་པའི་རྣམ་གྲངས་ཅུང་ཟད་ཅིག་འབུལ་བར་བྱེད་པ་ཡིན་ལ། དེ་ཉིད་འབུལ་བར་བྱེད་པ་ལའང་། གཞུང་ལུགས་འཆད་པ་ལ་མཁས་པ་རྣམས་ཀྱི་བཀའ་སྲོལ་ལས་ཇི་ལྟར་འབྱུང་བ་ལྟར། ཐོག་མར་འཕྲོས་ཚུལ་གྱི་དབང་དུ་བྱས་པ་དང་། བཤད་ཚུལ་གྱི་དབང་དུ་བྱས་པ་ཞེས་ས་བཅད་རྣམ་པ་གཉིས་ཡོད་པ་ལས། དང་པོ་འཕྲོས་ཚུལ་གྱི་དབང་དུ་བྱས་པ་ཞེས་བྱ་བ་དེ་འཆད་པར་བྱེད་པ་ནི། བཅིང་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །བསྟན་ཕྱིར་སྤྲོ་བ་སྣ་ཚོགས་མཛད། །ཅེས་པའི་གཞུང་འདི་ཉིད་གང་ལས་འཕྲོས་པ་ཡིན་ཞེ་ན། ཨེ་མའོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོ་སོར་འཛིན། །སུས་ཀྱང་མ་བཅིངས་བཅིངས་མེད་དེ། །བཅིང་བར་བྱ་བའང་ཡོད་མ་ཡིན། །རྣམ་རྟོག་བདག་ཏུ་འཛིན་པ་ཡིས། །ནན་གྱིས་མཁའ་ལ་མདུད་པ་འདོར། །ཞེས་པའི་གཞུང་འདི་ལས་འཕྲོས། འཕྲོས་པའི་རྒྱུ་མཚན། གཞུང་སྔ་མའི་སྐབས་སུ་སེམས་ཅན་ཐམས་ཅད་བདེ་བར་གཤེགས་པའི་སྙིང་པོ་ཅན་ཡིན་པ་ལས། དེ་ལྟར་མ་རྟོགས་པའི་དབང་གིས་བཅིངས་གྲོལ་ལྟར་སྣང་ཡང་། འཇམ་དཔལ་ཞལ་ལུང་ལས། འཁོར་བའི་ཆོས་རྣམས་ཐག་ཁྲ་ཡི། །སྦྲུལ་ལྟར་མེད་པ་ཉིད་དུ་འདོད། །ཅེས་པ་ལྟར་གཤིས་ལ་བཅིངས་གྲོལ་གཉིས་ཀ་མ་གྲུབ་པའི་ཚུལ་མཚོན་དཔེ་དང་བཅས་པའི་རྣམ་གཞག་དེ་ཉིད་བསྟན་ནས། གཤིས་ལ་བཅིངས་པ་མེད་ཕྱིར་རྣམ་པར་གྲོལ་བ་པོ་ཡང་མེད་པས་ན། རང་རིག་ཉིད་སྐུ་དང་ཡེ་ཤེས་སུ་ཡེ་ནས་ལྷུན་གྱིས་རྫོགས་པ་འཁོར་འདས་མཉམ་པ་ཉིད་དུ་གསལ་བའི་དོན་སངས་རྒྱས་ཀུན་གྱི་ཐུགས་སུ་ཆུད་པའི་ཆོས་དེ་ལྷན་ཅིག་པའི་འཁོར་ལ་དངོས་སུ་བསྟན་ནས། གོ་ཕྱེ་བའི་འཁོར་ལ་བརྒྱུད་ནས་སྟོན་པའི་ཕྱིར། སྤྲུལ་པ་སྤྲོ་བར་ཞལ་གྱིས་བཞེས་ཚུལ་གྱི་རྣམ་བཞག་དེ་སྟོན་པ་ལ། བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །བསྟན་ཕྱིར་སྤྲོ་བ་སྣ་ཚོགས་མཛད། །ཅེས་པའི་གཞུང་འདི་བྱུང་། ཨེ་མའོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོ་སོར་འཛིན། །སུས་ཀྱང་མ་བཅིངས་བཅིངས་མེད་དེ། །བཅིང་བར་བྱ་བའང་ཡོད་མ་ཡིན། །རྣམ་རྟོག་བདག་ཏུ་འཛིན་པ་ཡིས། །ནན་གྱིས་མཁའ་ལ་མདུད་པ་འདོར། །ཞེས་པའི་གཞུང་འདི་ཡང་གང་ལས་འཕྲོས་པ་ཡིན་ཞེ་ན། ཨེ་མའོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མིན་ལས་ཤིན་ཏུ་གསང་། །ཞེས་པའི་གཞུང་འདི་ལས་འཕྲོས། འཕྲོས་པའི་རྒྱུ་མཚན། གཞུང་སྔ་མའི་སྐབས་སུ་ལྷན་ཅིག་པའི་འཁོར་རྣམས་སྟོན་པའི་རྣམ་འགྱུར་ལས་གཞན་མ་ཡིན་པའི་ཕྱིར་རང་དོན་དུ་རྒྱུད་ཞུ་མི་དགོས་ཀྱང་། གཞན་དོན་དུ་གོ་ཕྱེ་བའི་འཁོར་རྣམས་ཀྱིས། ཆོས་ཐམས་ཅད་ཀྱི་རང་བཞིན་བདེན་པ་དབྱེར་མེད་སྤྱོད་ཡུལ་དང་བྲལ་བའི་དོན་དེ་གསང་བ་བཞིས་ཆོད་ནས་མ་རྟོགས་པ་རྣམས་ཀྱི་ཆེད་དུ་རྒྱུད་གསུང་བར་རིགས་ཞེས་ཞུས་ཚུལ་གྱི་རྣམ་བཞག་དེ་ཉིད་བསྟན་ནས། དེ་ལྟར་ཞུས་པས་སྟོན་པའི་ཐུགས་རྗེ་སྐྱེས་ཏེ། བཅིངས་གྲོལ་མེད་པའི་གཤིས་དེ་ཁོ་ན་ཉིད་ཀྱི་ཆོས་སྟོན་པར་དགྱེས་ནས་འཁོར་འདས་ཀྱི་ཆོས་ཐམས་ཅད་ཡེ་གདོད་མ་ནས་རང་བཞིན་གྱིས་རྣམ་པར་དག་པས་སངས་རྒྱས་པའི་ཕྱིར། གཤིས་ཀྱི་གནས་ལུགས་ལ་དབྱེར་མེད་ནའང་། མ་རྟོགས་པའི་དབང་གིས་འཁོར་བའི་ཆོས་མེད་སྣང་གློ་བུར་བའི་རྣམ་པར་འཁྲུལ་ཚུལ་གྱི་རྣམ་བཞག་དེ་སྟོན་པ་ལ། ཨེ་མའོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོ་སོར་འཛིན། །སུས་ཀྱང་མ་བཅིངས་བཅིངས་མེད་དེ། །བཅིང་བར་བྱ་བའང་ཡོད་མ་ཡིན། །རྣམ་རྟོག་བདག་ཏུ་འཛིན་པ་ཡིས། །ནན་གྱིས་མཁའ་ལ་མདུད་པ་འདོར། །ཞེས་པའི་གཞུང་འདི་བྱུང་། ཨེ་མའོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མིན་ལས་ཤིན་ཏུ་གསང་། །ཞེས་པའི་གཞུང་འདི་ཡང་གང་ལས་འཕྲོས་པ་ཡིན་ཞེ་ན། ཨེ་མའོ། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་ཡབ་ཀྱིས་གླེང་བསླང་བ་དང་། ཀྱེ་མ་ཧོ། ཕྱོགས་བཅུ་སྟོང་ཁམས་ཡེ་ནས་དབེན། །སྲིད་པ་གསུམ་ཉིད་དག་པའི་ཞིང་། །སྙིགས་མ་ལྔ་ཉིད་བདེ་ལྡན་གནས། །ཕུང་པོ་ལྔ་ཉིད་རྫོགས་སངས་རྒྱས། །ཐམས་ཅད་མཆོག་གི་སྙིང་པོ་ལས། །གཞན་དུ་རྒྱལ་བའི་ཆོས་མི་བཙལ། །ཉིད་ལས་གཞན་ཞེས་བྱ་བའི་ཆོས། །བཙལ་ཀྱང་རྒྱལ་བས་མི་བརྙེས་སོ། །ཞེས་ཡུམ་གྱིས་གླེང་བསླང་བ་དང་། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགག་པ་མེད་ལས་ཐམས་ཅད་འགག །འགག་པ་ཉིད་ན་འགག་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །ཅེས་སེམས་ལྔས་གླེང་བསླང་བ་སྟེ། ཐུན་མོང་མ་ཡིན་པའི་གླེང་བསླང་བ་སྟོན་པའི་གཞུང་ཆེན་གསུམ་པོ་དེ་ལས་འཕྲོས། འཕྲོས་པའི་རྒྱུ་མཚན། གཞུང་སྔ་མ་གསུམ་གྱི་སྐབས་སུ་རིམ་པ་ལྟར། ཡབ་ཀྱིས་ཐབས་ཀྱི་ཆ་བཟུང་ནས། འཁོར་འདས་ཀྱི་ཆོས་ཐམས་ཅད་དཀྱིལ་འཁོར་གཅིག་གི་རང་བཞིན་དུ་སངས་རྒྱས་པའི་དོན་གླེང་བར་མཛད་པས། འཁོར་རྣམས་ཀྱིས་ཕུང་ཁམས་སྐྱེ་མཆེད་ཀྱིས་བསྡུས་པའི་ཆོས་ཐམས་ཅད་རྒྱལ་བའི་དཀྱིལ་འཁོར་དུ་རྟོགས་ཏེ་ལྷག་པ་ཀུན་རྫོབ་ཀྱི་བདེན་པ་མཐོང་ཞིང་། ཡུམ་གྱིས་ཤེས་རབ་ཀྱི་ཆ་བཟུང་ནས་དབྱིངས་ཀྱི་དོན་གླེང་བར་མཛད་པས་འཁོར་རྣམས་ཀྱིས་ཐ་སྙད་བཞིས་བསྡུས་པའི་ཆོས་ཐམས་ཅད་ཡེ་ནས་ཆོས་ཀྱི་སྐུར་མངོན་པར་སངས་རྒྱས་པས་འབྲས་བུ་གཞན་ནས་བཙལ་དུ་མེད་པར་རྟོགས་ཏེ། ལྷག་པ་དོན་དམ་པའི་བདེན་པ་མཐོང་ལ། ཐུན་མོང་དུ་སེམས་ལྔའི་ལས་ཀྱིས་གླེང་བསླང་བས། དོན་དམ་པར་ཆོས་ཐམས་ཅད་སྐྱེ་འགག་གནས་དམིགས་འགྲོ་འོང་སོགས་སྤྲོས་པ་ཐམས་ཅད་ཀྱིས་མ་གོས་པ་ལས། ཀུན་རྫོབ་ཏུ་སྐྱེ་བ་ལ་སོགས་པ་ལྔར་འགག་མེད་དུ་སྣང་ཞིང་། སྐྱེས་པར་སྣང་ཙམ་ཉིད་ནས་སྐྱེ་བ་མེད་པ་ལ་སོགས་པ་དབྱེར་མེད་ཀྱི་དོན་གླེང་བར་མཛད་པས་འཁོར་རྣམས་ཀྱིས། ལྷག་པ་བདེན་པ་དབྱེར་མེད་སྤྱོད་ཡུལ་དང་བྲལ་བའི་དོན་རྟོགས་ཏེ། སྟོན་འཁོར་དགོངས་པ་ཁྱད་མེད་དུ་གྱུར་ཚུལ་གྱི་རྣམ་གཞག་དེ་ཉིད་བསྟན་ནས། གཞན་དོན་དུ་གོ་ཕྱེ་བའི་འཁོར་རྣམས་ཀྱིས་ལྷན་ཅིག་སྐྱེས་པའི་མ་རིག་པས་ལྷག་པ་དོན་དམ་གྱི་བདེན་པ་ཡེ་ནས་གསང་བའི་ཚུལ་དུ་མ་རྟོགས། ཀུན་བཏགས་ཀྱི་མ་རིག་པས་ལྷག་པ་ཀུན་རྫོབ་ཀྱི་བདེན་པ་རང་བཞིན་གསང་བའི་ཚུལ་དུ་མ་རྟོགས། སྣང་སྟོང་ཡ་བྲལ་དུ་བཟུང་བས་ལྷག་པ་བདེན་པ་དབྱེར་མེད་ངོ་བོ་ཉིད་ཀྱིས་གསང་བའི་ཚུལ་དུ་མ་རྟོགས། ཡུལ་དང་ཡུལ་ཅན་དུ་བཟུང་བས་སྤྱོད་ཡུལ་དང་བྲལ་བར་ཤིན་ཏུ་གསང་བའི་ཚུལ་དུ་མ་རྟོགས་པ་སྟེ། དེ་ལྟར་རང་གསང་ཐབས་ཀྱིས་ཆོད་པའི་གདུལ་བྱ་རྣམས་ལ་རྒྱུད་བསྟན་པའི་སྒོ་ནས་ཐུགས་རྗེས་བཟུང་བར་རིགས་སོ་ཞེས། ལྷན་ཅིག་པའི་འཁོར་རྣམས་ཀྱིས་སྟོན་པ་ལ་ཞུས་ཚུལ་གྱི་རྣམ་གཞག་དེ་སྟོན་པ་ལ། ཨེ་མའོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མིན་ལས་ཤིན་ཏུ་གསང་། །ཞེས་པའི་གཞུང་འདི་བྱུང་། གླེང་བསླང་བའི་གཞུང་ཚན་གསུམ་པོ་དེ་ཡང་གང་ལས་འཕྲོས་པ་ཡིན་ཞེ་ན། འདི་སྐད་བཤད་པའི་དུས་ན། ཞེས་པའི་གཞུང་འདི་ལས་འཕྲོས། འཕྲོས་པའི་རྒྱུ་མཚན་གཞུང་སྔ་མའི་སྐབས་སུ་སྡུད་པ་པོ་གསང་བདག་གིས་མ་འོངས་པའི་གདུལ་བྱ་རྣམས་ལ་ཡིད་ཆེས་ཀྱི་ངེས་པ་སྟེར་བའི་ཆེད་དུ། བསྟན་བཤད་བསྡུ་གསུམ་གྱི་སྒོ་ནས། རྒྱུད་འབྱུང་བའི་རྒྱུ་གླེང་གཞི་ཕུན་སུམ་ཚོགས་པ་ལྔ་ཇི་ལྟར་ཚོགས་ཚུལ་གྱི་རྣམ་གཞག་ཐོག་མར་བཀོད་པ་ལས། སྟོན་སྡུད་དགོངས་པ་ཐ་མི་དད་པ་དང་། དུས་རེས་འགའ་བ་མ་ཡིན་པ་སོགས་ཐུན་མོང་མ་ཡིན་པའི་ཕྱོགས་བཟུང་ནས། གླེང་གཞི་མདོར་བསྟན་གྱི་ཚུལ་དེ་ཉིད་བསྟན་ནས། རྒྱུད་འབྱུང་བའི་རྐྱེན་གླེང་བསླང་བ་ལ། ཐུན་མོང་མ་ཡིན་པ་དང་། ཐུན་མོང་བ་གཉིས་ལས། ཐུན་མོང་མ་ཡིན་པ་ལྷན་ཅིག་པའི་འཁོར་གྱི་ཆེད་དུ་སྟོན་པ་མདུན་བསུས་ཏེ་གླེང་བསླང་ཚུལ་གྱི་རྣམ་གཞག་དེ་སྟོན་པ་ལ། ཡབ་ཀྱིས་གླེང་བསླང་བ། ཨེ་མའོ་རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་དང་། ཡུམ་གྱིས་གླེང་བསླང་བ། ཀྱེ་མ་ཧོ། ཕྱོགས་བཅུ་སྟོང་ཁམས་ཡེ་ནས་དབེན། །སྲིད་པ་གསུམ་ཉིད་དག་པའི་ཞིང་། །སྙིགས་མ་ལྔ་ཉིད་བདེ་ལྡན་གནས། །ཕུང་པོ་ལྔ་ཉིད་རྫོགས་སངས་རྒྱས། །ཐམས་ཅད་མཆོག་གི་སྙིང་པོ་ལས། །གཞན་དུ་རྒྱལ་བས་ཆོས་མི་བཙལ། །ཉིད་ལས་གཞན་ཞེས་བྱ་བའི་ཆོས། །བཙལ་ཀྱང་རྒྱལ་བས་མི་བརྙེས་སོ། །ཞེས་དང་། ཐུན་མོང་དུ་གླེང་བསླང་བ། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགག་པ་མེད་ལས་ཐམས་ཅད་འགག །འགག་པ་ཉིད་ན་འགག་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །ཅེས་པའི་གཞུང་ཚན་གསུམ་པོ་འདི་བྱུང་། འདི་སྐད་བཤད་པའི་དུས་ན། ཞེས་པའི་གཞུང་འདི་ཡང་གང་ལས་འཕྲོས་པ་ཡིན་ཞེ་ན། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་པའི་གཞུང་འདི་ལས་འཕྲོས། འཕྲོས་པའི་རྒྱུ་མཚན། གཞུང་སྔ་མའི་སྐབས་སུ། གསང་བདག་ལག་ན་རྡོ་རྗེས་བཀའ་བསྡུ་བྱེད་པའི་ཚེ་ན། སྟོན་པ་ལ་དབང་མི་ཟ་བའི་ཕྱིར་ཕྱག་མཛད་ཚུལ་གྱི་རྣམ་བཞག་དེ་ཉིད་བསྟན་ནས། རྒྱུད་ཀྱི་གླེང་གཞི་ཕུན་སུམ་ཚོགས་པ་དེ་ལ། ཐུན་མོང་མ་ཡིན་པའི་ཕྱོགས་བཟུང་ནས་མདོར་བསྟན་པ། རྒྱུད་ཁྱད་པར་གྱི་གླེང་གཞི་ཚོགས་ཚུལ་གྱི་སྒོ་ནས་རྒྱས་པར་བཤད་པ། སྡུད་པ་པོ་གསང་བདག་ཉིད་རིགས་ལྔ་དབྱེར་མི་ཕྱེད་པ་རྒྱལ་བ་དྲུག་པ་ཉིད་དུ་ཁས་བླངས་ནས་གླེང་གཞིའི་དོན་བསྡུས་ཏེ་བསྟན་པ་དང་གསུམ་ལས། ཐུན་མོང་མ་ཡིན་པའི་ཕྱོགས་བཟུང་ནས་གླེང་གཞི་མདོར་བསྟན་གྱི་རྣམ་གཞག་དེ་སྟོན་པ་ལ། འདི་སྐད་བཤད་པའི་དུས་ན། ཞེས་པའི་གཞུང་འདི་བྱུང་། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་པའི་གཞུང་འདི་ཡང་གང་ལས་འཕྲོས་པ་ཡིན་ཞེ་ན། གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་པའི་གཞུང་འདི་ལས་འཕྲོས། འཕྲོས་པའི་རྒྱུ་མཚན། གཞུང་སྔ་མའི་སྐབས་སུ་ཁོག་གཞུང་ལས། རབ་ལ་མཚན་བསྟན་འབྲིང་ལ་དབྱེ། །ཐ་མ་འབྲུ་གཉེར་དགྲོལ་བའོ། །ཞེས་པས། རྒྱུད་འདིའི་ཆེད་དུ་བྱ་བའི་གདུལ་བྱ་ལ་དབང་པོ་རབ་འབྲིང་ཐ་གསུམ་ཡོད་པའི་ནང་ནས། མཚན་བསྟན་པ་ཙམ་གྱིས་རྒྱུད་དབུ་ཞབས་ཀྱི་དོན་ཁོང་དུ་ཆུད་པར་འགྱུར་བའི་དབང་པོ་ཡང་རབ་མཆོག་ཏུ་གྱུར་པ་རྣམས་ཀྱི་དོན་དུ་སྡུད་པ་པོ་གསང་བདག་གིས་བཀའ་བསྡུ་མཛད་པའི་ཐོག་མར་རྒྱུད་དོན་གྱི་ངོ་བོ་དང་མཐུན་པའི་མཚན་ཀླད་དུ་བཀོད་ཚུལ་གྱི་རྣམ་གཞག་དེ་ཉིད་བསྟན་ནས། རང་གི་སྟོན་པ་ལ་བསྟོད་ཕྱག་མཛད་ཚུལ་གྱི་རྣམ་གཞག་དེ་སྟོན་པ་ལ། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་པའི་གཞུང་འདི་བྱུང་། འོ་ན་འཕྲོས་ཚུལ་གྱི་དབང་དུ་བྱས་པ་དེ་ཙམ་ཞིག་ཞུས་ནས། རྩ་བའི་ས་བཅད་གཉིས་པ་བཤད་ཚུལ་གྱི་དབང་དུ་བྱས་པ་ཞེས་བྱ་བ་དེ་ཉིད་འཆད་པར་བྱེད་པ་ལ། བཤད་པའི་སྔོན་དུ་འགྲོ་བ་མཆོད་པར་བརྗོད་པ། དངོས་གཞི་བཤད་པ་རང་གི་ངོ་བོ། མཇུག་བསྔོ་བ་སྨོན་ལམ་བཀྲ་ཤིས་ཀྱི་མཐའ་བརྟེན་པ་དང་གསུམ་དུ་ཡོད་པ་ལས། དེའི་དང་པོ་བཤད་པའི་སྔོན་དུ་འགྲོ་བ་མཆོད་པར་བརྗོད་པ་ཞེས་བྱ་བ་དེ་ཉིད་འཆད་པར་བྱེད་པ་ནི། མདོ་ལས། རྣམ་དཀར་ལས་རྣམས་གང་བྱེད་པ། །དེ་ཡི་སྔོན་དུ་རྒྱལ་བ་མཆོད། །ཅེས་དང་། འཆད་པོས་ཐོག་མར་སྟོན་པ་ལ། །མཆོད་པར་བརྗོད་པ་འབྲས་མེད་མིན། །སྟོན་པ་དང་ནི་བསྟན་པ་ལ། །དད་འདུན་བསྐྱེད་པར་བྱ་ཕྱིར་ཡིན། །ཞེས་གསུངས་པ་ལྟར་གྱི་བཤད་པ་ལ་བར་ཆད་མི་འབྱུང་བ་དང་། བཤད་པ་མཐར་ཕྱིན་པར་བྱ་བའི་ཕྱིར་དུ། ཡུལ་ཁྱད་པར་ཅན་རྣམས་ལ་མཆོད་པར་བརྗོད་པས་ངག་གི་སྒོ་དབྱེ་བར་བྱ་དགོས་པ་ལས། དེའི་ཐོག་མ་ཁོ་ནར་དུས་གསུམ་སངས་རྒྱས་ཐམས་ཅད་ཀྱི་ངོ་བོ་བདག་ཅག་གི་རྩ་བའི་བླ་མ་ཐུགས་རྗེ་ཆེན་པོ་དང་ལྡན་པ་ལ་མཆོད་པར་བརྗོད་པ་ཅུང་ཟད་ཅིག་སྔོན་དུ་འགྲོ་དགོས་པ་ཡིན་ཏེ། རྒྱུ་མཚན་ཅིའི་ཕྱིར་ཞེ་ན། རང་ཉིད་བླ་ན་མེད་པའི་བྱང་ཆུབ་ཀྱི་གོ་འཕང་ཐོབ་པར་བྱེད་པ་ལ། རྨད་དུ་བྱུང་བ་གསང་སྔགས་རྡོ་རྗེ་ཐེག་པའི་མྱུར་ལམ་ཟབ་མོ་ལ་འཇུག་དགོས། དེ་ལ་འཇུག་པར་བྱེད་པའི་བདག་རྐྱེན་གྱི་གཙོ་བོ་བླ་མ་དམ་པ་ཁོ་ནར་ངེས་པའི་ཕྱིར་ཏེ། ཧེ་བཛྲ་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བསྟན་པ་དང་། །བདག་གི་བསོད་ནམས་ལས་ཤེས་བྱ། །ཞེས་དང་། རྫོགས་པ་ཆེན་པོའི་རྒྱུད་རྩལ་ཆེན་ལས། གསེར་ལ་ནག་མཚུར་གཏོང་འདྲའི་སློབ་དཔོན་རིན་ཆེན་དེ། །རིན་ཐང་དཔག་ཏུ་མེད་པའི་ཡོན་གྱིས་བསླུ་བར་བྱ། །ཞེས་དང་། རྣལ་འབྱོར་གྲུབ་པའི་ལུང་ལས་ཀྱང་། རྡོ་རྗེ་སློབ་དཔོན་བླ་མ་དེ། །ལམ་སྟོན་ས་མཁན་བཤེས་གཉེན་མགོན། །མུན་སེལ་སྒྲོན་མེ་རིན་པོ་ཆེ། །ཞེས་གསུངས་ཤིང་། གཞན་ཡང་ཤིན་ཏུ་རྒྱས་པ་སངས་རྒྱས་ཕལ་པོ་ཆེའི་མདོ་ལས། ཀྱེ་རྒྱལ་བའི་སྲས་དག །འདི་ལྟར་དགེ་བའི་བཤེས་གཉེན་ལས་བྱུང་བའི་ཡོན་ཏན་ནི་ཚད་མེད་དེ། ཐུགས་རྗེའི་གོ་སྐབས་ཡངས་པས་ནམ་མཁའ་ལྟ་བུའོ། །གཟུངས་དང་ཏིང་ངེ་འཛིན་གྱི་ཚོགས་མང་བས་གཟའ་སྐར་ལྟ་བུའོ། །སྙིང་རྗེ་དཔག་ཏུ་མེད་པས་གངས་ཆེན་མཚོ་ལྟ་བུའོ། །ཐུགས་རྗེ་ཚད་མེད་པས་ཆུ་ཀླུང་ལྟ་བུའོ། །རྣམ་པར་གཡེང་བས་མི་བསྒུལ་བས་གངས་ཀྱི་རི་བོ་ལྟ་བུའོ། །དེ་བཞིན་ཉིད་ལས་མི་གཡོ་བས་ལྷུན་པོ་ལྟ་བུའོ། །སྲིད་པ་ན་གནས་ཀྱང་ཉེས་པས་མི་གོས་པས་པདྨ་ཆེན་པོ་ལྟ་བུའོ། །བྱམས་པ་སྒྲིབ་པ་མེད་པར་སྙོམས་པས་ཕ་དང་མ་ལྟ་བུའོ། །ཡོན་ཏན་ཚད་མེད་པས་རིན་པོ་ཆེའི་འབྱུང་ཁུངས་ལྟ་བུའོ། །འཁོར་བ་ན་རྒྱུ་བ་ཐམས་ཅད་རྣམ་པར་སྒྲོལ་བས་དེ་བཞིན་གཤེགས་པ་ལྟ་བུ་སྟེ། དེ་ལྟར་ཡོན་ཏན་གྱི་ཚོགས་ཚད་མེད་དཔག་ཏུ་མེད་དོ། །ཞེས་དང་། འཕགས་པ་ལྗོན་ཤིང་ལས་ཀྱང་། ལེགས་པ་ཐམས་ཅད་སྟོན་པའི་ཕྱིར། །དགེ་བའི་བཤེས་གཉེན་ཕ་དང་འདྲ། །ཉེས་པ་ཐམས་ཅད་ལྡོག་པའི་ཕྱིར། །དགེ་བའི་བཤེས་གཉེན་མ་དང་འདྲ། །མ་རིག་མུན་པ་སེལ་བའི་ཕྱིར། །དགེ་བའི་བཤེས་གཉེན་སྒྲོན་མེ་འདྲ། །ཉོན་མོངས་འདམ་ནས་འདྲེན་པའི་ཕྱིར། །དགེ་བའི་བཤེས་གཉེན་གྱད་དང་འདྲ། །དེ་ཕྱིར་དགེ་བའི་བཤེས་གཉེན་བཙལ། །ཞེས་སོགས་རྒྱ་ཆེར་གསུངས་པ་ཡིན་པའི་ཕྱིར། གལ་ཏེ་ཁོ་ན་རེ། ཐོག་མར་རྩ་བའི་བླ་མ་ལ་མཆོད་པར་བརྗོད་པ་མི་འཐད་དེ། རྒྱུད་འབྱུང་བའི་རྒྱུའི་བདག་རྐྱེན་གྱི་གཙོ་བོ་ནི་སྟོན་པ་ཡང་དག་པར་རྫོགས་པའི་སངས་རྒྱས་རིགས་དྲུག་པ་ཀུན་ཏུ་བཟང་པོ་ཉིད་ཡིན་པ་གང་ཞིག །དེ་ནི་འགྲོ་བ་ཐམས་ཅད་ཀྱི་སྐྱབས་དང་། དཔུང་གཉེན་གྱི་མཆོག་ཡིན་པའི་ཕྱིར། ཡུལ་དེ་ཉིད་ལ་ཐོག་མ་ཁོ་ནར་མཆོད་བརྗོད་བྱ་བར་རིགས་སོ་ཞེ་ན། འདི་ལ་སྐྱོན་ཡོད་པ་མ་ཡིན་ཏེ། རྩ་བའི་བླ་མ་ལ་མཆོད་པར་བརྗོད་པས་ནི་བརྒྱུད་པའི་བླ་མ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་མཆོད་པར་བརྗོད་པར་འགྱུར་བའི་ཕྱིར་ཏེ། རྒྱུ་མཚན་ཅིའི་ཕྱིར་ཞེ་ན། བདེ་བར་གཤེགས་པའི་བཀའ་ལུང་ཚད་མ་རྣམས་ལས། གང་ཟག་གི་བློའི་ཁྱད་ཀྱིས་བླ་མ་དམ་པ་ནི་དཀོན་མཆོག་བཞི་པར་བལྟ་བའམ། ཡང་ན་སངས་རྒྱས་ཐམས་ཅད་དང་མཉམ་པར་བཀུར་བར་བྱའོ། །ཞེས་ཀྱང་འབྱུང་ལ། བློ་ཤིན་ཏུ་ཆེ་བས་ནི་སངས་རྒྱས་ཐམས་ཅད་ལས་ལྷག་པར་ཡང་བལྟ་བར་གསུངས་པའི་ཕྱིར་ཏེ། དེ་ཡང་། དང་པོའི་དབང་དུ་བྱས་ཏེ། སངས་རྒྱས་མཉམ་སྦྱོར་ལས། སངས་རྒྱས་ཆོས་དང་དགེ་འདུན་དང་། །བླ་མ་ཡང་ནི་བཞི་པ་ཡིན། །ཞེས་གསུངས། གཉིས་པའི་དབང་དུ་བྱས་ཏེ། རྡོ་རྗེ་མེ་ལོང་གི་རྒྱུད་ལས། རྡོ་རྗེ་སེམས་དཔའ་དཀྱིལ་འཁོར་གཙོ། །བླ་མ་སངས་རྒྱས་ཀུན་དང་མཉམ། །ཞེས་དང་། བླ་མ་ལྔ་བཅུ་པ་ལས། །བླ་མ་དང་ནི་རྡོ་རྗེ་འཛིན། །ཐ་དད་པར་ནི་མི་བལྟའོ། །ཞེས་གསུངས། གསུམ་པའི་དབང་དུ་བྱས་ཏེ། དགོངས་འདུས་ལས། བསྐལ་པ་སྟོང་གི་སངས་རྒྱས་བས། །བླ་མ་གཉན་པར་ཤེས་པར་བྱ། །ཅི་ཕྱིར་ཞེ་ན་བསྐལ་པ་ཡི། །སངས་རྒྱས་མ་ལུས་ཐམས་ཅད་ཀུན། །བླ་མ་དག་ལ་བརྟེན་ནས་བྱུང་། །བླ་མ་མེད་པའི་གོང་རོལ་ན། །སངས་རྒྱས་བྱ་བའི་མིང་ཡང་མེད། །ཅེས་དང་། ནམ་མཁའ་དྲི་མ་མེད་པའི་མདོ་ལས། ཀུན་དགའ་བོ། དེ་བཞིན་གཤེགས་པ་རྣམས་ནི་སེམས་ཅན་ཐམས་ཅད་ལ་སྣང་བའང་མ་ཡིན་གྱི། དགེ་བའི་བཤེས་གཉེན་ནི་ཡོངས་སུ་སྣང་བས་ཆོས་སྟོན་ཅིང་ཐར་པའི་ས་བོན་འདེབས་པའི་ཕྱིར་དེ་བཞིན་གཤེགས་པ་རྣམས་ལས་དགེ་བའི་བཤེས་གཉེན་ལྷག་པར་ཡང་ཟུངས་ཤིག །ཅེས་གསུངས་པའི་ཕྱིར་དང་། དེར་མ་ཟད། རྩ་བའི་བླ་མའི་ཕུང་ཁམས་སྐྱེ་མཆེད་ནི་གདན་གསུམ་ཚང་བའི་ལྷའི་དཀྱིལ་འཁོར་ཚད་མེད་པའི་རང་བཞིན་དུའང་གནས་པར་གསུངས་ཏེ། འདུས་པའི་རྒྱུད་ལས། རྡོ་རྗེ་སློབ་དཔོན་ལུས་འདི་ལ། །རྒྱལ་བའི་སྐུ་ནི་རིམ་བཞིན་གནས། །ཞེས་གསུངས་པའི་ཕྱིར་དང་། ཡང་བླ་མ་ལ་མ་བརྟེན་པར་སངས་རྒྱས་ཀྱི་ཕྲིན་ལས་གདུལ་བྱའི་རྒྱུད་ལ་འཇུག་མི་སྲིད་པས་ཀྱང་བླ་མ་ནི་ཡུལ་ཁྱད་པར་ཅན་དུ་ངེས་ཏེ། ཇི་སྐད་དུ། ཉི་མའི་འོད་ཟེར་རབ་ཚ་ཡང་། །མེ་ཤེལ་མེད་པར་མེ་མི་འབྱུང་། །དེ་བཞིན་སངས་རྒྱས་བྱིན་རླབས་ཀྱང་། །བླ་མ་མེད་པར་འབྱུང་མི་སྲིད། །ཅེས་གསུངས་ཤིང་། གཞན་ཡང་། གང་ཕྱིར་རྡོ་རྗེ་འཛིན་པ་ཡི། །དངོས་གྲུབ་སློབ་དཔོན་རྗེས་འབྲངས་གསུངས། །ཞེས་དང་། དཔལ་མགོན་འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱང་། རི་དབང་རྩེ་ནས་འགའ་ཞིག་ལྷུངས་གྱུར་ན། །ལྟུང་བར་མི་བྱ་སྙམ་ཡང་ལྟུང་བར་འགྱུར། །བླ་མའི་དྲིན་གྱིས་ཕན་པའི་ལུང་ཐོབ་ན། །གྲོལ་བར་མི་བྱ་སྙམ་ཡང་གྲོལ་བར་འགྱུར། །ཞེས་གསུངས་པའི་ཕྱིར་རོ། །དེས་ན་རྩ་བའི་བླ་མ་མཉེས་པར་བྱ་བའི་ཕན་ཡོན་ཡང་བསམ་གྱིས་མི་ཁྱབ་པ་སྟེ། ཡེ་ཤེས་དམ་པའི་རྒྱུད་ལས། བསྐལ་པའི་སངས་རྒྱས་མཆོད་པ་བས། །བླ་མའི་བ་སྤུ་ཉག་གཅིག་ལ། །འབྲུ་མར་ཐིག་པ་གཅིག་བྱུགས་ན། །བསོད་ནམས་ཕུང་པོ་ཁྱད་པར་འཕགས། །ཞེས་དང་། འཇམ་དཔལ་ཡེ་ཤེས་རྒྱན་གྱི་མདོ་ལས། རིགས་ཀྱི་བུའམ་རིགས་ཀྱི་བུ་མོ་དད་པ་མཆོག་དང་ལྡན་པ་གང་ལ་ལ་ཞིག་གིས། དགེ་བའི་བཤེས་གཉེན་ལ་བསྙེན་བཀུར་ན། བསྐལ་པ་གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་ཐམས་ཅད་ལ་མཆོད་པ་བྱས་པ་བས་བསོད་ནམས་ཀྱི་ཕུང་པོ་ཚད་མེད། དཔག་ཏུ་མེད། ཅེས་བྱ་བ་ལ་སོགས་པ་རྒྱ་ཆེར་གསུངས་པ་ཡིན་པའི་ཕྱིར། འོ་ན་རྩ་བའི་བླ་མ་ལ་ཐོག་མར་མཆོད་པར་བརྗོད་དགོས་ཚུལ་དེ་ལྟར་ཡིན་ན། ཚུལ་ཇི་ལྟ་བུའི་སྒོ་ནས་མཆོད་པར་བརྗོད་པར་བྱ་ཞེ་ན། དེ་ཡང་། ཚོགས་གཉིས་ཆུ་གཏེར་བསྲུབས་ལས་ལེགས་འཁྲུངས་པའི། །ཡེ་ཤེས་ཆེན་པོ་ཉི་མའི་ཟེར་ཕྲེང་གིས། །སྐྱེ་རྒུའི་ཕན་བདེའི་པདྨོ་རྒྱས་མཛད་པ། །གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་། །ཞེས་སྨོས་པ་ལྟར། སྔོན་སྐུ་ཚེ་དཔག་ཏུ་མེད་པའི་གོང་རོལ་ནས་མ་ཞུམས་པའི་སྙིང་སྟོབས་མཆོག་གི་ཕ་རོལ་ཏུ་སོན་པས་བསོད་ནམས་དང་ཡེ་ཤེས་ཀྱི་ཆུ་གཏེར་ཟབ་མོ་མངོན་པར་བསྲུབས་པའི་མཛད་པ་ཕུལ་དུ་བྱུང་བ་ཞིག །སྤྲོ་ཞིང་བརྟུལ་ཕོད་པ་དང་བརྩོན་པ་ཆེན་པོ་ལྷུར་བཞེས་པ་ལ་བརྟེན་ནས། སྤྱིར་ཆོས་ཀྱི་དབྱིངས་རྣམ་པར་དག་པའི་མཁའ་ལ་ཡེ་ཤེས་ཆེན་པོ་ཉིན་མོར་བྱེད་པའི་དཀྱིལ་འཁོར་རབ་ཏུ་རྒྱས་ཏེ། གཞན་ཕན་ཕྲིན་ལས་ཀྱི་ཟེར་ཕྲེང་ཕྱོགས་བཅུར་འཕྲོས་པས་སྐྱེ་རྒུ་མ་ལུས་པའི་ཕན་བདེའི་པད་ཚལ་རྒྱས་པར་མཛད་ཅིང་། ཁྱད་པར་སློབ་དཔོན་ཆེན་པོ་པདྨ་སཾ་བྷ་བས། ཟབ་གཏེར་གསང་བའི་རྒྱས་གདབ་པ་དམན་པའི་སྤྱོད་ཡུལ་དུ་མ་གྱུར་པའི་དམ་པ་ཆོས་ཀྱི་མངའ་ཐང་ཆེན་པོ་ལ་མངོན་པར་དབང་བསྒྱུར་བའི་རྒྱལ་ཐབས་ཀྱི་ཕྲིན་ལས་རྨད་དུ་བྱུང་བ་བདག་གིར་བཞེས་པས་ཆོས་ཀྱི་རྒྱལ་པོ་སྟེ། ལྷ་དང་བཅས་པའི་འཇིག་རྟེན་མ་ལུས་པས་ཞབས་བརྟེན་གྱི་པདྨོ་ལ་ཕྱག་བྱས་པ་ཁམས་གསུམ་གྱི་བླ་མ། དུས་གསུམ་གྱི་སངས་རྒྱས། སྲིད་པ་གསུམ་གྱི་འདྲེན་མཆོག །འགྲོ་བ་ལྷ་དང་མི་ཐམས་ཅད་ཀྱི་མགོན་སྐྱབས་དང་གཙུག་རྒྱན་དམ་པར་གྱུར་པ། དཔལ་རྡོ་རྗེ་འཆང་ཆེན་པོ་དང་དབྱེར་མ་མཆིས་པའི་རྗེ་བཙུན་དམ་པ་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ་འཇིགས་བྲལ་ཕྱོགས་ཐམས་ཅད་ལས་རྣམ་པར་རྒྱལ་བའི་སྡེ་ཞེས་སྙན་གྲགས་ཀྱི་བ་དན་དཀར་པོ་སྲིད་པའི་རྩེ་མོར་ཡོངས་སུ་བསྒྲེང་བ་གང་གི་ཞབས་ཀྱི་པདྨོ་དྲི་མ་མེད་པའི་ཕྲེང་བ་ལ། བླུན་པོ་བདག་ལུས་ངག་ཡིད་གསུམ་གུས་པ་ཆེན་པོས་འདུད་དོ། །བརྩེ་བ་ཆེན་པོས་རྗེས་སུ་བཟུང་ནས་ལེགས་བཤད་འཆད་པའི་རྣམ་དཔྱོད་བློ་གྲོས་ཀྱི་སྤོབས་པ་སྩལ་དུ་གསོལ། ཞེས་རང་གི་རྩ་བའི་བླ་མ་ལ་མཆོད་པར་བརྗོད་ཅིང་། འདོད་པའི་དོན་ལ་གསོལ་བ་གདབ་པའི་རིམ་པ་དེ་ཙམ་ཞིག་ཞུས་ནས། དེའི་འོག་ཏུ་གང་ལ་མཆོད་པར་བརྗོད་པར་བྱ་ཞེ་ན། བླ་མའི་རྗེས་སུ། ཡང་དག་པར་རྫོགས་པའི་སངས་རྒྱས་ཀྱི་མཆོག་རིགས་དྲུག་པ་ཀུན་ཏུ་བཟང་པོ་དང་། དཔལ་རྡོ་རྗེ་སེམས་དཔའ་ལ་མཆོད་བརྗོད་བྱ་བར་རིགས་ཏེ། དེ་དང་དེ་རྒྱུད་ཀྱི་སྟོན་པ་དང་འཆད་པའི་སྐྱེས་བུ་ཡིན་པའི་ཕྱིར་རོ། །དེ་ཡང་བཤད་རྒྱུད་ཐལ་བ་ལས། འཁོར་ལོའི་ལྟེ་བར་མི་འཇིགས་སྟེང་། །བདག་པོ་ཀུན་བཟང་འཁོར་རྣམས་ལ། །ཀུན་འབྱུང་སྒྱུ་འཕྲུལ་སྟོན་པའི་ཚེ། །མི་བསྐྱོད་རྒྱལ་པོ་མདུན་ན་གནས། །ཞེས་གསུངས་པ་ལྟར་གྱི། གནས་འོག་མིན་ཆོས་ཀྱི་དབྱིངས་ཀྱི་ཕོ་བྲང་དུ། རང་བཞིན་གཉིས་སུ་མེད་པའི་འཁོར་རྒྱལ་བ་རིགས་ལྔ། རིག་པ་ཁྱད་པར་ཅན་གྱི་འཁོར་སེམས་དཔའ་དང་འཇོམས་བྱེད། དད་པས་ཆོས་ཀྱི་གཏམ་ཉན་པའི་འཁོར་ལྷ་ཆེན་པོ་ལ་སོགས་པ་ཏིལ་གྱི་གོང་བུ་ཁ་ཕྱེ་བ་ལྟ་བུའི་འཁོར་གྱི་ཁྱམས་ཆེན་པོར་བརྗོད་མེད་རིག་པའི་གསུང་དབྱངས་ཀྱིས་བསྟན་པ་ཐམས་ཅད་ཀྱི་སྙིང་པོར་གྱུར་པ་གསང་བའི་ཏནྟྲ་སྟོན་པར་མཛད་པ་པོ། དེ་བཞིན་གཤེགས་པ་ཐམས་ཅད་ཀྱི་བདག་པོ། སངས་རྒྱས་ཐམས་ཅད་ཀྱི་ངོ་བོ། ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་སྟོན་པ་རིག་དྲུག་པ་ཀུན་ཏུ་བཟང་པོ་དང་། འཆད་པའི་སྐྱེས་བུ་བདེ་བར་གཤེགས་པ་ལྔའི་གཙོ་བོ་ཐུགས་རྡོ་རྗེའི་རིགས་དཔལ་རྡོ་རྗེ་སེམས་དཔའ་སྟེ། སྟོན་པ་གཉིས་ཀྱི་ཞབས་ཀྱི་པདྨོ་དྲི་མ་མེད་པའི་ཕྲེང་བ་ལ་བླུན་པོ་བདག་སྒོ་གསུམ་གུས་པས་འདུད་དོ། །བརྩེ་བ་ཆེན་པོས་རྗེས་སུ་བཟུང་ནས་ལེགས་བཤད་འཆད་པའི་རྣམ་དཔྱོད་བློ་གྲོས་ཀྱི་སྤོབས་པ་བདག་ལ་སྩལ་དུ་གསོལ། དེ་ལྟར་སྟོན་པ་གཉིས་ལ་མཆོད་བརྗོད་བྱས་པའི་འོག་ཏུ། སྡུད་པ་པོ་དང་བརྒྱུད་པའི་བླ་མ་རྣམས་ལ་མཆོད་བརྗོད་བྱ་བར་རིགས་ཏེ། ཅིའི་ཕྱིར་ཞེ་ན། རྒྱལ་བའི་གསུང་རབ་ཐམས་ཅད་གསལ་བར་མཛད་ཅིང་ཁྱད་པར་རྒྱུད་ཀྱི་རྒྱལ་པོ་ཆེན་པོ་འདི་སྐལ་ལྡན་གྱི་གདུལ་བྱ་ལ་རིམ་པར་མི་ནུབ་པར་སྟོན་པར་མཛད་པ་པོ་ཡིན་པ་གང་ཞིག །བདག་ཅག་རྣམས་ཀྱི་རྒྱུད་ལ་བྱིན་རླབས་ཀྱི་འཕོ་བ་རིམ་གྱིས་འབེབས་པར་མཛད་པ་པོ་ཡང་ཡིན་པའི་ཕྱིར་རོ། །དེ་ཡང་དང་པོ་སྡུད་པ་པོ་ལ་མཆོད་པར་བརྗོད་པའི་དབང་དུ་བྱས་ན། བཤད་རྒྱུད་རྒྱ་མཚོ་ལས། འཁོར་གྱི་ནང་ན་སྐལ་མཆོག་ལྡན། །འདུལ་བའི་དུས་བབ་གསང་བའི་བདག །ལག་ན་རྡོ་རྗེས་བསྡུ་བ་མཛད། །ཅེས་གསུངས་པ་ལྟར་གྱི་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་གསང་བའི་མཛོད་འཛིན་པའི་རྒྱལ་སྲས་སྟོན་པ་དང་དགོངས་པ་གཉིས་སུ་མེད་པའི་སྡུད་པ་པོ། མཐུ་སྟོབས་ཀྱི་དབང་ཕྱུག །གསང་བདག་ལག་ན་རྡོ་རྗེ་འཆང་ཆེན་པོའི་ཞབས་ཀྱི་པདྨོ་དྲི་མ་མེད་པའི་ཕྲེང་བ་ལ་བླུན་པོ་བདག་སྒོ་གསུམ་གུས་པས་འདུད་དོ། །བརྩེ་བ་ཆེན་པོས་རྗེས་སུ་བཟུང་ནས་ལེགས་བཤད་འཆད་པའི་རྣམ་དཔྱོད་བློ་གྲོས་ཀྱི་སྤོབས་པ་བདག་ལ་སྩལ་དུ་གསོལ། དེའི་རྗེས་སུ་བརྒྱུད་པའི་བླ་མ་རྣམས་ལ་མཆོད་པར་བརྗོད་ན། རྒྱུད་ལས། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བར་གང་བྱེད་པ། །དེ་ཉིད་ང་ཡིན་དབང་ཡང་རྫོགས། །ཞེས་ལུང་བསྟན་པས་བསྔགས་པར་མཛད་པ་ལྟར་གྱི། གསང་བདག་རྡོ་རྗེ་འཆང་ཆེན་པོས་དངོས་སུ་རྗེས་སུ་བཟུང་བ་ལི་ཙ་བི་དྲི་མ་མེད་པར་གྲགས་པ་ལ་སོགས་ཏེ་རིག་འཛིན་དྲ་མ་ལྔ། སྐལ་ལྡན་རྒྱལ་པོ་ཛཿལ་སོགས་པའི་རང་རང་གི་ཚོམ་བུ་དང་བཅས་པ་དཔལ་རྡོ་རྗེ་འཆང་ཆེན་པོའི་ས་ལ་མངོན་སུམ་དུ་གཤེགས་པ་ཚོམ་བུའི་རིག་འཛིན་གྱི་ཚོགས། འཇིགས་བྲལ་གྱི་སློབ་དཔོན་ཆེན་པོ་སངས་རྒྱས་གསང་བ་ལ་སོགས་ཏེ་འཕགས་ཡུལ་དུ་ཉི་ཟླ་ལྟར་ཡོངས་སུ་གྲགས་པའི་པཎ་གྲུབ་གསང་བའི་མཛོད་གསུམ་གྱི་བསྟན་པ་འཇིག་རྟེན་ན་གཅེས་པའི་བུ་གཅིག་པ་ལྟར་འཛིན་པར་མཛད་པ་པོ་རྣམས་དང་། བྱེ་བྲག་བོད་ཡུལ་མུན་པའི་གླིང་དུ་གསལ་བྱེད་བསྐྱེད་རྫོགས་རྣམ་པ་གསུམ་གྱི་བསྟན་པའི་སྒྲོན་མེ་སྦར་ཞིང་། དམ་ཆོས་ཤིང་རྟའི་ལམ་པོ་ཆེ་གཏོད་པར་མཛད་པ་པོ། ཨོ་རྒྱན་གྱི་སློབ་དཔོན་ཆེན་པོ་པདྨ་སཾ་བྷ་བ་དང་། པཎྜི་ཏ་ཆེན་པོ་བི་མ་ལ་མི་ཏྲ། སྐད་གཉིས་བརྡ་སྤྲོད་ཀྱི་ཡི་གེར་སྒྱུར་མཛད་ལོ་ཙཱ་བ་ཆེན་པོ་རྨ་རིན་ཆེན་མཆོག་དང་གཉགས་ལོ་ཆེན་པོ་ཡེ་ཤེས་གཞོན་ནུ་ནས། མཁས་པ་གཙུག་གྱེར་ཞང་གསུམ། གནུབས་ཆེན་སངས་རྒྱས་ཡེ་ཤེས་ཡབ་སྲས་རྣམས་དང་། ཁྱད་པར་རྒྱུད་ཀྱི་རྒྱལ་པོ་ཆེན་པོ་འདི་ཉིད་ཀྱི་བཀའ་སྡེ་ཟུར་ལ་བབས་ཏེ། བཤད་སྲོལ་གྱི་དབུ་བརྙེས་པར་མཛད་པ་པོ་ཟུར་པོ་ཆེ་ཤཱཀྱ་འབྱུང་གནས། སྲོལ་གཏོད་པར་མཛད་པ་པོ་ཟུར་ཆུང་པ་ཤེས་རབ་གྲགས། བོད་དང་བོད་ཆེན་པོ་དང་། རྒྱ་ཡུལ་ལ་སོགས་པ་སྟེ་ཕྱིའི་རྒྱ་མཚོ་ཆེན་པོ་ལ་ཐུག་གི་བར་དུ་དར་ཞིང་རྒྱས་པར་མཛད་པ་པོ་གསང་བདག་སྒྲོ་ཕུག་པ་ཆེན་པོ་ཤཱཀྱ་སེང་གེ་ནས། བདག་ཅག་གི་ཡོངས་སུ་འཛིན་པའི་བཤེས་གཉེན་ཆོས་ཀྱི་སྤྱན་མངའ་བ་གང་གི་བར་དུ་བརྒྱུད་པའི་མཁས་གྲུབ་ཀྱི་བླ་མ་གདུལ་བྱ་ཐར་འདོད་རྣམས་ཀྱི་སྐྱབས་མགོན་དང་དཔུང་གཉེན་དམ་པར་གྱུར་པ་རྣམས་ཀྱི་ཞབས་ཀྱི་པདྨོ་དྲི་མ་མེད་པའི་ཕྲེང་བ་ལ་སྒོ་གསུམ་གུས་པས་འདུད་དོ། །བརྩེ་བ་ཆེན་པོས་རྗེས་སུ་བཟུང་ནས་ལེགས་བཤད་འཆད་པའི་རྣམ་དཔྱོད་བློ་གྲོས་ཀྱི་སྤོབས་པ་བདག་ལ་སྩལ་དུ་གསོལ། དེའི་འོག་ཏུ་གང་ལ་མཆོད་པར་བརྗོད་པ་ཡིན་ཞེ་ན། དེང་ཆོས་གྲྭ་ཆེན་པོ་འདིར་གཤེགས་ཤིང་གདན་འཛོམ་པ་ཆེན་པོ་མཛད་དེ། ལེགས་བཤད་ཀྱི་མཆོད་ཡུལ་དམ་པར་གསེར་རིའི་ཕྲེང་བ་ལྟར་བཞུགས་པའི་མཁན་སློབ་དགེ་འདུན་དང་བཅས་པ་རྣམས་ལའང་གུས་པས་འདུད་དོ། །སོ་སོ་ནས་ཐུགས་བརྩེ་བས་དགོངས་ཏེ། ལེགས་བཤད་འཆད་པའི་རྣམ་དཔྱོད་བློ་གྲོས་ཀྱི་སྤོབས་པ་སྩོལ་བ་དང་། བདག་གིས་བཤད་ཅིང་འཆད་པར་འགྱུར་བའི་ཚིག་དོན་གྱི་ཆ་རྣམས་ལ་འགལ་བ་དང་། མ་འབྲེལ་བ་ལ་སོགས་ནོངས་པའི་ཆ་མཆིས་ནའང་བཟོད་བཞེས་བཀའ་དྲིན་སྐྱོང་བར་ཞུ་ཞེས། དེ་ལྟར་ཡུལ་ཁྱད་པར་ཅན་རྣམས་ལ་མཆོད་པར་བརྗོད་ཅིང་རང་གི་འདོད་པའི་དོན་ལ་གསོལ་བ་གདབ་པ་དེ་ཙམ་ཞིག་ཞུས་ནས། འདིར་ལས་སུ་བྱ་བ་ནི། རྩ་བའི་ས་བཅད་གཉིས་པ་དངོས་གཞི་བཤད་པར་རང་གི་ངོ་བོ་བཤད་པ་ཞེས་བྱ་བ་དེ་ཉིད་འཆད་པར་བྱེད་པ་ནི། ཆོས་ནི་ཤེས་བྱ་ལམ་དང་ནི། །མྱ་ངན་འདས་དང་ཡིད་ཀྱི་ཡུལ། །བསོད་ནམས་ཚེ་དང་གསུང་རབ་དང་། །འབྱུང་འགྱུར་ངེས་དང་ཆོས་ལུགས་ལའོ། །ཞེས་སློབ་དཔོན་ཆེན་པོ་དབྱིག་གཉེན་གྱིས་རྣམ་བཤད་རིག་པར་གསུངས་པ་ལྟར་གྱི། སྤྱིར་དྷརྨ་ཞེས་བྱའི་སྒྲ་ལས་དྲངས་ན། ཆོས་ཀྱི་སྒྲ་དོན་བཅུ་ལ་འཇུག་པར་བཞེད་ཅིང་། དེའི་ནང་ནས་ཀྱང་ཤེས་བྱའི་ཆོས་ནི། གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་དེ། དབྱེ་ན་སངས་རྒྱས་ཐམས་ཅད་ཀྱི་ཡེ་ཤེས་གཏན་ལ་དབབ་པའི་མདོ་ལས། ཆོས་རྣམས་མ་ལུས་ཐམས་ཅད་ཀུན། །རང་གི་མཚན་ཉིད་འཛིན་མོད་ཀྱང་། །རྣམ་པར་དཀར་བ་མ་ཡིན་ཕྱིར། །ངས་ནི་རྣམ་པར་དཀར་བ་བསྟན། །ཞེས་པས་རང་གི་མཚན་ཉིད་འཛིན་པའི་ཆོས་དང་། རྣམ་པར་དཀར་བའི་ཆོས་གཉིས་སུ་ངེས་ལ། དེའི་དང་པོ་མཚན་ཉིད་འཛིན་པའི་ཆོས་ནི། མེའི་མཚན་ཉིད་ཚ་ཞིང་དུ་མ་ཚོགས་པས་བསྲེག་པ་ལྟ་བུ། ཆོས་ཐམས་ཅད་ལ་རང་རང་གི་མཚན་གཞི་མཚོན་ནུས་པའི་མཚན་ཉིད་མི་འདྲ་བ་རེ་རེ་ཡོད་པ་ཡིན་ལ། རྣམ་པར་དཀར་བའི་ཆོས་ནི། རྒྱལ་ཚབ་བྱམས་པ་མགོན་པོས། རིག་པའི་གནས་ལྔ་དག་ལ་མཁས་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འགྱུར་ཏེ། །དེ་ལྟ་བས་ན་གཞན་དག་ཚར་གཅོད་རྗེས་འཛིན་དང་། །བདག་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱ། །ཞེས་རྒྱལ་སྲས་རྣམས་ཀྱིས་ཤེས་པར་བྱ་བའི་ཡུལ་རིག་པའི་གནས་རྣམ་པ་ལྔར་གསུངས་པའི་ནང་གི་རིག་གནས་ལྔ་པ་ནང་རིག་པ་སྟེ། དམ་པའི་ཆོས་དང་དོན་གཅིག་མིང་གི་རྣམ་གྲངས་སོ། །དེ་ལའང་དམ་པའི་ཆོས་མངོན་པ་མཛོད་ལས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །ཞེས་གང་གསུངས་པ་ལྟར་གྱི། ལུང་དང་རྟོགས་པའི་དམ་ཆོས་གཉིས་སུ་ངེས་པ་ལས། འདིར་བཤད་པར་བྱ་བའི་ཆོས་དེ་གང་ཞེ་ན། ལུང་གི་དམ་ཆོས་ཏེ། རྟོགས་པའི་ཆོས་དེ་ནི་རྣལ་འབྱོར་པ་རྣམས་ཀྱིས་སོ་སོ་རང་གིས་རིག་པར་བྱ་བའི་ཆོས་ཡིན་གྱི། ཐོས་བསམ་གྱིས་མངོན་དུ་བྱ་བའི་ཆོས་མ་ཡིན་པའི་ཕྱིར་དོན་འདི་ལ་དགོངས་ནས། རྒྱུད་འདིའི་ལེའུ་བཅུ་གསུམ་པར། ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཞེས་གསུངས་པ་ཡིན་པའི་ཕྱིར། ལུང་གི་དམ་ཆོས་ལའང་དབྱེ་ན། སློབ་དཔོན་ཆེན་པོ་པདྨ་སཾ་བྷ་བས་མཛད་པའི་བདེ་འདུས་ས་གཅོད་ཚོམས་ཀྱི་ཆིངས་ལས། ཐུབ་པ་ཆེན་པོའི་ཆོས་རྣམས་ཀུན། །བསྡུས་པས་བཀའ་དང་བསྟན་བཅོས་གཉིས། །ཞེས་པས་བཀའ་དང་བསྟན་བཅོས་གཉིས་སུ་གྲངས་ངེས་པ་ལས་འདིར་ལེགས་པར་གསུངས་པའི་བཀའ་ཉིད། དགོངས་འགྲེལ་མཁན་པོའི་བསྟན་བཅོས་ལ་བརྟེན་ནས་འཆད་པར་བྱེད་པ་སྐབས་སུ་བབ་པ་ཡིན་ཅིང་། ཇི་ལྟར་འཆད་པའི་ཚུལ་ལ་མི་མཐུན་པ་མང་དུ་སྣང་ཡང་། གསང་བདག་སྒྲོ་ཕུག་པ་ཆེན་པོའི་བཀའ་སྲོལ་ལ་ཚུལ་བཞི་དང་ལྡན་པའི་སྒོ་ནས་འཆད་དགོས་པར་བཞེད་དེ། དེ་ཡང་རྒྱུད་གཞུང་གཅིག་དབུ་ཞབས་སུ་དྲིལ་ནས་གང་ཟག་གཅིག་གིས་ཉམས་སུ་ལེན་པར་བྱེད་པ་ལ། གང་ལེན་ན་རྒྱུད་གཞུང་འདི་ཉིད། ཚུལ་ཇི་ལྟ་བུའི་སྒོ་ནས་ཉམས་སུ་ལེན་ཞེ་ན། བཞི་ལྡན་ཏེ། རྒྱུད་རྒྱུད་ཀྱིས། རྒྱུད་འགྲེལ་པས། རྒྱུད་སྒྲུབ་ཐབས་ཀྱིས། རྒྱུད་མན་ངག་གིས་བཤད་པའོ། །དེའི་དང་པོ་རྒྱུད་གང་རྒྱུད་གང་གིས་འཆད་པ་ཡིན་ཞེ་ན། གང་བཤད་བྱ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་རྩ་བའི་རྒྱུད། གང་གིས་འཆད་པ་རྡོ་རྗེ་མེ་ལོང་ལ་སོགས་པ་བཤད་རྒྱུད་སྡེ་བཞི། སྒྱུ་འཕྲུལ་བརྒྱད་ཅུ་པ་སོགས་མ་ཚང་ཁ་སྐོང་གི་རྒྱུད། ལེ་ལག་ལ་སོགས་པ་ཀལྤ་དུམ་བུའི་རྒྱུད། རྩ་རྒྱུད་ཀྱི་ཕྱི་མ་ལེའུ་ཉེར་གསུམ་པ་སོགས་ཕྱི་མའི་རྒྱུད། ཁྲོ་བོ་སྟོབས་པོ་ཆེའི་རྒྱུད་སོགས་དཀའ་བ་གཅོད་པའི་རྒྱུད་རྣམས་ཀྱིས་ཇི་ལྟར་རིགས་པར་འཆད། གཉིས་པ་འགྲེལ་པ་གང་གིས་འཆད་པ་ཡིན་ཞེ་ན། ཐོས་བསམ་གྱི་ཤེས་རབ་ལ་བརྟེན་ཏེ་རྒྱུད་དྲང་ཐད་དུ་གཏན་ལ་འབེབས་པར་བྱེད་པའི་མན་ངག་ཐུགས་ཐིག །ཁོག་གཞུང་གསལ་སྒྲོན་སོགས་སྤྱི་དོན་དང་། སྒེག་པ་རྡོ་རྗེའི་རིན་པོ་ཆེའི་སྤར་ཁབ། ཉིན་བྱེད་སེང་གེའི་རྒྱ་ཆེར་འགྲེལ། སངས་རྒྱས་གསང་བའི་རྣམ་དབྱེ་འགྲེལ་སོགས་ལས། རང་རང་གི་འདོད་གཞུང་སོ་སོས་འགྲེལ་པ་རེ་རེའམ། འགའ་ཞིག་དབང་བཙན་བྱས་ཏེ་འཆད། གསུམ་པ་སྒྲུབ་ཐབས་གང་གིས་འཆད་པ་ཡིན་ཞེ་ན། སྒོམ་པའི་ཤེས་རབ་ལ་གཙོ་བོར་བརྟེན་ནས་རྒྱུད་མངོན་རྟོགས་སུ་བསླབ་ཅིང་ཉམས་སུ་ལེན་པར་བྱེད་པའི་མན་ངག་གི་གཞུང་ཕྲ་མོ་རྣམས་ཀྱིས་རྒྱུད་དོན་གྱི་དམིགས་ཕྱེ་སྟེ་སྐབས་དང་སྦྱར་ནས་འཆད། བཞི་པ་བརྒྱུད་པའི་མན་ངག་གང་གིས་འཆད་པ་ཡིན་ཞེ་ན། བཤད་རྒྱུད་རྣམས་ལ་གཙོ་བོར་བརྟེན་ཅིང་། དགོངས་འགྲེལ་མན་ངག་རྣམས་ཀྱི་ལེགས་ཆ་བླངས་པ་ལ། ཟབ་ལམ་སྦས་བཤད་རྣམས་སྙན་བརྒྱུད་དང་ལྡན་པའི་བླ་མ་དམ་པའི་གསུང་བགྲོས་ཀྱིས་བརྒྱན་ཏེ་འཆད་ལ། དེ་ཡང་དཔལ་ཕྱོགས་ཐམས་ཅད་ལས་རྣམ་པར་རྒྱལ་བ་གཏེར་ཆེན་ཆོས་ཀྱི་རྒྱལ་པོའི་བཀའ་སྲོལ་ཇི་ལྟ་བར་སྟོན་པའི་རྣམ་བཤད་གསང་བདག་ཞལ་ལུང་གི་དགོངས་པ་ལྟར་གཏན་ལ་འབེབས་པར་བྱེད་པ་ལ་གསུམ་སྟེ། ཁུངས་ལ་ཡིད་ཆེས་བསྐྱེད་པའི་ཕྱིར་སྔོན་ཇི་ལྟར་བྱུང་བའི་ལོ་རྒྱུས་དང་། ཆོས་ལ་དོན་གཉེར་གྱི་གུས་པས་འཇུག་པའི་ཕྱིར་རྒྱུད་ཀྱི་ཆེ་བ་དང་། ཆེ་བ་དེ་ལྡན་གྱི་རྒྱུད་དོན་དངོས་བཤད་པའོ། །དང་པོ་ནི། ཁོ་ན་རེ། འོ་ན་རྒྱུད་ཟབ་མོ་འདི་ཇི་ལྟར་བྱུང་བ་ཡིན་ཞེ་ན། དེའི་ལན་འཆད་པར་བྱེད་པ་ལ་ས་བཅད་གཉིས་ཏེ། སྟོན་པས་ཇི་ལྟར་གསུང་ཚུལ་དང་། དེ་ལས་ཇི་ལྟར་བརྒྱུད་ཚུལ་ལོ། །དང་པོ་སྟོན་པས་ཇི་ལྟར་གསུང་ཚུལ་གྱི་རྣམ་གཞག་དེ་སྟོན་པར་བྱེད་པ་ལའང་ཉིན་བྱེད་སེང་གེའི་བཞེད་པ་དང་། སྒེག་རྡོར་གྱི་བཞེད་པ་གཉིས། དང་པོ་ནི། ཞེས་པ་ནས། གསང་སྔགས་ཀྱི་སྒྲ་ཡོངས་སུ་གྲགས་པར་འགྱུར་བ་ལ་དགོངས་པའི་ཕྱིར་སྐྱོན་མེད་དོ། །ཞེས་པའི་བར། གཉིས་པ་དེ་ལས་ཇི་ལྟར་བརྒྱུད་ཚུལ་གྱི་རྣམ་གཞག་དེ་སྟོན་པར་བྱེད་པ་ལ། བཤད་རྒྱུད་རྒྱ་མཚོ་ལས། རྒྱལ་བ་སེམས་དཔའ་རྣལ་འབྱོར་པ། །དགོངས་པ་རིག་པ་རྣ་བར་བརྒྱུད། །ཅེས་པའི་གཞུང་འདི་བྱུང་། དེའི་དོན་ལ་གསུམ་སྟེ། རྒྱལ་བ་དགོངས་བརྒྱུད། རིག་འཛིན་རིག་པའམ་བརྡ་བརྒྱུད། གང་ཟག་སྙན་བརྒྱུད་དོ། །དང་པོ་རྒྱལ་བ་དགོངས་པས་བརྒྱུད་པའི་ཚུལ་བཤད་དུ་ཡོད་དེ། རྒྱལ་བ་ཀུན་ཏུ་བཟང་པོས་སོགས། གཉིས་པ་རིག་འཛིན་རིག་པས་བརྒྱུད་པ་ལ། མི་མ་ཡིན་ལ་བརྒྱུད་པ་དང་། མི་དང་དེ་མ་ཡིན་པ་གཉིས་ཀ་ལ་བརྒྱུད་པ་གཉིས། དང་པོ་མི་མ་ཡིན་པ་ལས་བརྒྱུད་ཚུལ་བཤད་དུ་ཡོད་དེ། རྒྱལ་སྲས་སེམས་དཔའི་འཁོར་རྣམས་ཀྱི་ནང་ནས་ཞེས་པ་ནས། གནོད་སྦྱིན་ཀུན་ཏུ་བཟང་པོ་ལ་བཤད་དེ་རིམ་པར་བརྒྱུད་ཅིང་དར་བ་ཡིན་པའི་ཕྱིར། གཉིས་པ་མི་དང་མི་མ་ཡིན་གཉིས་ཀ་ལ་བརྒྱུད་ཚུལ་ཡོད་དེ། ཐུབ་པའི་དབང་པོ་མྱ་ངན་ལས་འདས་ནས་སོགས་ནས། དེར་རིགས་ཅན་ལྔ་ལ་བཤད་ཅིང་བརྒྱུད་པ་ཡིན་པའི་ཕྱིར། ཞེས་བསྒྱུར། གསུམ་པ་གང་ཟག་སྙན་བརྒྱུད་ལ། མི་ཡུལ་དུ་རྒྱུད་འདི་ཐོག་མར་བབས་ཚུལ་དང་། དེ་ལས་ཇི་ལྟར་བརྒྱུད་ཚུལ་གཉིས། དང་པོ་ལ། དུས་གང་གི་ཚེ། གནས་གང་དུ། གང་ཟག་གང་ལ། ཚུལ་ཇི་ལྟར་བབས་པ། དེ་ལ་རྩོད་པ་སྤང་བ་དང་ལྔ། དང་པོ་དུས་གང་གི་ཚེ་བབས་པའི་ཚུལ་བཤད་དུ་ཡོད་ས་བཅད་འོག་མ་རྣམས་ལའང་འགྲེ། མཆན། དེ་སོགས་ནས། ཧ་ཅང་ཐལ་བའི་ཕྱིར་བག་ཡོད་པར་མཛོད་ཅིག་གི་བར་རོ། །གཉིས་པ་དེ་ལས་ཇི་ལྟར་བརྒྱུད་ཚུལ་བཤད་དུ་ཡོད་དེ། རྒྱལ་པོ་རང་རང་གི་ཚོམ་བུ་དང་བཅས་ཏེ་རིག་པ་འཛིན་པའི་སར་གཤེགས་པ་ཡིན་པའི་ཕྱིར་ཞེས་བསྒྱུར། ཛཿས་ཏནྟྲ་སྡེ་བཅོ་བརྒྱད་པོ་ནས། ཉེ་བརྒྱུད་རྨད་དུ་བྱུང་བ་ཡིན་ནོ། །ཞེས་པའི་བར། གཉིས་པ་ཆོས་ལ་དོན་གཉེར་གྱི་གུས་པས་འཇུག་པའི་ཕྱིར་རྒྱུད་ཀྱི་ཆེ་བ་བཤད་པ་ནི། ཁོ་ན་རེ། འོ་ན་བརྒྱུད་པ་གསུམ་དང་ལྡན་པའི་ཆོས་འདི་ལ་ཆེ་བ་དུ་དང་ལྡན་པ་ཡིན་ཞེ་ན། དེའི་ལན་འཆད་པར་བྱེད་པ་ལ། ཁོག་གཞུང་གསལ་སྒྲོན་ལས། རང་བཞིན་གསང་བའི་སྙིང་པོ་འདི། །གཞན་ལས་འཕགས་པའི་ཆེ་བ་བརྒྱད། །ཅེས་པའི་གཞུང་འདི་བྱུང་། ཆེ་བ་བརྒྱད་པོ་དེ་གང་ཞེ་ན། རྒྱུད་ཐམས་ཅད་ཀྱི་རྒྱལ་པོ་ཡིན་པས་ངེས་པར་ཆེ་བ་གཟི་ལྡན་གསལ་བའི་ཉི་མ་ལྟ་བུ་ཇི་ལྟར་ཉི་མའི་སྣང་བ་ནི་སྣང་བ་ཐམས་ཅད་ཀྱི་རྒྱལ་པོ་ཡིན་པ་བཞིན་དུ་རྒྱུད་འདི་ཉིད་ཀྱང་རྒྱུད་ཐམས་ཅད་ཀྱི་རྒྱལ་པོ་ཡིན་ནོ། །ཞེས་སྟོན་པར་བྱེད་པ་ལ། རྒྱས་པ་ལས། གསང་བའི་སྙིང་པོ་ངེས་པ་ནི། །གསང་སྔགས་ཀུན་གྱི་རྒྱལ་པོ་ཡིན། །ཞེས་གསུངས་པའི་ཕྱིར། ཞེས་ཚིག་ཟུར་བསྒྱུར་ཚུལ་འགྲེ་ཤེས་པར་བྱའོ། །ཞེས་པ་ནས། འདི་ཡིས་ལྷུན་གྱིས་གྲུབ་པར་འགྱུར། །ཞེས་པའི་བར་རོ། ། གསུམ་པ་ཆེ་བ་དེ་ལྡན་གྱི་རྒྱུད་དོན་དངོས་བཤད་པ་ལ། རྒྱུད་ཀྱི་མཚན་བསྟན་པ་དང་། མཚན་དེ་ལྡན་གྱི་རྒྱུད་དོན་བཤད་པ་གཉིས་ཡོད་པ་ལས། དེའི་དང་པོ་རྒྱུད་ཀྱི་མཚན་བསྟན་པ་ཞེས་བྱ་བ་དེ་འཆད་པར་བྱེད་པ་ལ། བོད་སྐད་དུ། གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་པའི་གཞུང་འདི་བྱུང་། དེའི་དོན་འཆད་པ་ལ་ས་བཅད་བཞི་སྟེ། མཚན་ཀླད་དུ་སྨོས་པའི་དགོས་པ་དང་། མཚན་གྱི་བསྡུས་དོན་དང་། ཚིག་གི་དོན་དང་། བརྒལ་ལན་གྱི་དོན་བཤད་པའོ། །དེ་ལྟར་ཡང་རྣམ་བཤད་རིག་པ་ལས། མདོ་རྣམས་འཆད་འདོད་དེ་དག་ལ། །ངས་ནི་མན་ངག་སྦྱིན་པར་བྱ། །དགོས་པ་བསྡུས་པའི་དོན་བཅས་དང་། །ཚིག་དོན་བཅས་དང་བརྒལ་ལན་བཅས། །མཚམས་སྦྱར་བསྙད་དེ་བཤད་པར་བྱ། །ཞེས་གསུངས་པ་ཡིན་པའི་ཕྱིར། དེའི་དང་པོ་མཚན་ཀླད་དུ་སྨོས་པ་ལ་ཆོས་ཅན། དགོས་པ་ཡོད་དེ། བུམ་པ་ཞེས་པའི་མིང་ལས་ལྟོ་ལྡིར་ཞབས་ཞུམ་ཆུ་སྐྱོར་གྱི་དོན་བྱེད་ནུས་པའི་དངོས་པོ་གོ་བ་ལྟར། མཚན་མཐོང་བའམ་ཐོས་པ་ལ་བརྟེན་ནས། དབང་པོ་རབ་ཀྱིས་གཞུང་གི་དོན་གོ་བ་དང་། འབྲིང་གིས་དོན་གྱི་རྣམ་གྲངས་ཁོང་དུ་ཆུད་པ་དང་། ཐ་མས་ཀྱང་སྨན་གྱི་ཁ་བྱང་ལྟར་གླེགས་བམ་བཙལ་བདེ་བའི་ཆེད་ཡིན་པའི་ཕྱིར། གཉིས་པ་མཚན་གྱི་བསྡུས་དོན་ནི། གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་པའི་མཚན་འདི་ཆོས་ཅན། ཁྱོད་ཀྱིས་སྟོན་ཚུལ་ཡོད་དེ། གསང་བ་དང་། སྙིང་པོ་དང་། དེ་ཁོ་ན་ཉིད་དང་། ངེས་པ་བཞིས་རིམ་པ་བཞིན། རྒྱུད་ཀྱི་རང་བཞིན་དང་། ཆེ་བ་དང་། མཚན་ཉིད་དང་། ངེས་པའི་དོན་རྣམས་སྟོན་པ་ཡིན་པའི་ཕྱིར། དེ་ལྟར་ཡང་འགྲེལ་ཆུང་ལས། འདིས་ནི་རང་བཞིན་ཆེ་བ་དང་། །མཚན་ཉིད་དང་ནི་དོན་བསྟན་ཕྱིར། །སྒྱུ་འཕྲུལ་དྲྭ་བའི་རྒྱུད་ཆེན་ལས། །མདོར་བསྡུས་གཏན་ལ་ཕབ་པ་ཡིན། །རང་བཞིན་གསང་བ་ཞེས་བྱ་སྟེ། །ཆེ་བ་ཞེས་པ་སྙིང་པོའི་དོན། །དེ་ཁོ་ན་ཉིད་མཚན་ཉིད་དོ། །ངེས་པས་ངེས་དོན་མདོར་བསྟན་པ། །དེ་ལྟར་རྣམ་པ་བཞི་པོ་རུ། །མདོར་བསྡུས་སྤྱི་ཡི་དོན་དུ་བཤད། །ཅེས་གསུངས་པའི་ཕྱིར། ཡང་རྒྱུད་འདིའི་ཆེད་དུ་བྱ་བའི་གདུལ་བྱ་དབང་རྣོན་དེ་ཆོས་ཅན། ཁྱོད་ཀྱིས་མཚན་འདི་ལ་བརྟེན་ནས་གོ་ཚུལ་དང་རྟོགས་ཚུལ་ཡོད་དེ། གསང་བ་སོགས་མཚན་བཞིས་རིམ་པ་བཞིན་རྟོགས་དཀའ་བ་དང་། བཅུད་འདུས་པ་དང་། མཚན་ཉིད་གཞན་རྣམ་པར་བཅད་པ་དང་། དྲང་དོན་མ་ཡིན་ངེས་དོན་ཐེ་ཚོམ་དང་བྲལ་བར་གོ་བ་གང་ཞིག །སྟོན་ཚུལ་དང་རྗེས་སུ་མཐུན་པར་རྒྱུད་ཀྱི་རང་བཞིན་དང་ཆེ་བ་སོགས་ཀྱང་རྟོགས་པ་ཡིན་པའི་ཕྱིར། གསུམ་པ་ཚིག་གི་དོན་བཤད་པ་ལ། བླ་མ་བརྒྱུད་པའི་མན་ངག་ལས། ཕྱི་ལྟར་གྲོལ་ལམ་དང་སྦྱར་ཏེ་བཤད་པ། ནང་ལྟར་ཐབས་ལམ་སྟེང་སྒོ་དང་སྦྱར་ཏེ་བཤད་པ། གསང་བ་ལྟར་འོག་སྒོ་དང་སྦྱར་ཏེ་བཤད་པ་དངགསུམ་ལས། དེའི་དང་པོ་ཕྱི་ལྟར་གྲོལ་ལམ་དང་སྦྱར་ཏེ་བཤད་པ་ཞེས་བྱ་བ་དེ་འཆད་པར་བྱེད་པ་ལ། གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་པའི་གཞུང་འདི་བྱུང་། དེའི་དང་པོ་གསང་བ་ཞེས་པའི་མཚན་འདི་ཆོས་ཅན། ཁྱོད་ལ་དབྱེ་ན་གསུམ་དུ་ཡོད་དེ། རང་བཞིན་དང་། གབ་པ་དང་། སྦས་པའི་གསང་བ་གསུམ་དུ་ཡོད་པའི་ཕྱིར། དང་པོ་རང་བཞིན་གྱི་གསང་བ་ཆོས་ཅན། བཤད་དུ་ཡོད་དེ། སེམས་ཉིད་བདེན་པ་དབྱེར་མེད་ལྷག་པའི་ཆོས་སྐུར་ཡེ་ནས་རང་ཆས་སུ་གནས་ཀྱང་བློའི་སྤྱོད་ཡུལ་དང་བྲལ་བས་མ་རྟོགས་པ་ཡིན་པའི་ཕྱིར། དཔེར་ན་ནམ་མཁའ་ཉིད་མིག་གིས་མཐོང་བྱར་མ་གྱུར་པ་བཞིན་ནོ། །དེ་ཡང་འདི་ཉིད་ལས། ཨེ་མའོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མིན་ལས་ཤིན་ཏུ་གསང་། །ཞེས་པས་གསང་ཚུལ་བཞི་སྟེ། །ལྷན་སྐྱེས་ཀྱི་མ་རིག་པས་དོན་དམ་བདེན་པ་མ་རྟོགས་པ་ནི་ཡེ་ནས་གསང་བ། ཀུན་བཏགས་ཀྱི་མ་རིག་པས་ཀུན་རྫོབ་ཀྱི་བདེན་པ་མ་རྟོགས་པ་ནི་རང་བཞིན་གསང་བ། སྣང་སྟོང་སོ་སོར་བཟུང་བས་དབྱེར་མེད་མ་རྟོགས་པ་ནི་ངོ་བོ་ཉིད་ཀྱི་གསང་བ། ཡུལ་ཡུལ་ཅན་དུ་བཟུང་བས་སྤྱོད་ཡུལ་དང་བྲལ་བར་མ་རྟོགས་པ་ནི་ཤིན་ཏུ་གསང་བ་སྟེ། གསང་ཚུལ་བཞིས་ཆོད་པའི་ཚུལ་དུ་གསང་བ་ཡིན་པའི་ཕྱིར། གཉིས་པ་གབ་པའི་གསང་བ་ཆོས་ཅན། བཤད་དུ་ཡོད་དེ། གདུལ་བྱ་འཁྲུལ་བའི་བློ་ཅན་གྱིས་རྟོགས་དཀའ་བ་དང་། རས་ཆོད་ཅན་གྱིས་རྟོགས་སུ་མི་རུང་བས་གབ་པ་ཡིན་པའི་ཕྱིར། དཔེར་ན་མིག་སེར་ཅན་ལ་དུང་གི་ཁ་དོག་བཞིན་ནོ། །དེ་ཡང་རང་བཞིན་གྱི་རྒྱུད་དུ་གབ་པ་ནི། མཚོན་བྱའི་རྒྱུད་རང་ལ་རང་ཆས་སུ་གནས་ཀྱང་རྟོག་པས་བསྒྲིབས་པའི་ཕྱིར་གབ་སྟེ། དེ་གང་གིས་འབྱིན་ན། ལུང་ཚད་མའི་བདག་པོ་སངས་རྒྱས་ཀྱིས་སོ། །དཀྱུས་ཡི་གེ་ལ་གབ་པ་ནི། རས་ཆོད་ཅན་རྣམས་མགོ་རྨོངས་པར་བྱ་བའི་ཕྱིར། རྒྱུད་དཀྲུགས། ལུང་གཅུས། མན་ངག་གབ་པའི་ཚུལ་དུ་སྟེ། དེ་ནི་མན་ངག་ཚད་མའི་བདག་པོ་རྡོ་རྗེ་སློབ་དཔོན་གྱིས་འབྱིན་པར་མཛད་དེ། འདི་ཉིད་ལས། ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །ཞེས་གསུངས་པའི་ཕྱིར་རོ། །གསུམ་པ་སྦས་པའི་གསང་བ་ཆོས་ཅན། བཤད་དུ་ཡོད་དེ། རྒྱུད་ཟབ་མོ་འདི་སྔགས་ཀྱི་མན་ངག་མེད་པ་དང་། སྒྲ་ཇི་བཞིན་པར་སྤྱོད་པ་རྣམས་ལ་སྦས་པ་ཡིན་པའི་ཕྱིར་ཏེ་དེ་དག་གི་ཡུལ་མ་ཡིན་པའི་ཕྱིར། གཅན་གཟན་ཆེན་པོའི་སྒྱུ་རྩལ་སྤྲེའུས་མི་བཟོད་པའམ། སེང་ཞོ་སྣོད་ངན་དུ་བླུག་བྱ་མ་ཡིན་པ་བཞིན་ནོ། །གང་སྦ་ན། གསང་སྔགས་ཀྱི་མཛད་སྤྱོད་སྦྱོར་སྒྲོལ་ལ་སོགས་པ་ལྟ་སྤྱོད་འབྲེལ་བས་སྤྱད་པར་གསུངས་པ་དེ་དག་བརྡའི་ཚུལ་གྱིས་སྦས་ཏེ། གསལ་བཀྲ་ལས། གསང་སྔགས་སྐྱོན་ཡོད་མ་ཡིན་ཏེ། །སེམས་ཅན་དོན་ཕྱིར་རབ་ཏུ་གསང་། །གསང་ཐུབ་དངོས་གྲུབ་མི་ཡལ་བས། །གསང་ཕྱིར་བརྡ་དག་སྣ་ཚོགས་གསུངས། །ཞེས་གསུངས་པ་ཡིན་པའི་ཕྱིར། གཉིས་པ་སྙིང་པོ་ཞེས་པའི་མཚན་འདི་ཆོས་ཅན། ཁྱོད་ལའང་དབྱེ་ན་གསུམ་དུ་ཡོད་དེ། རྒྱུ་དང་། འབྲས་བུ་དང་། བཅུད་འདུས་པ་དོན་གྱི་སྙིང་པོ་དང་གསུམ་དུ་ཡོད་པའི་ཕྱིར། དང་པོ་རྒྱུའི་སྙིང་པོ་ཆོས་ཅན། བཤད་དུ་ཡོད་དེ། རྒྱུད་འདི་ཐེག་པ་ཐམས་ཅད་ཀྱི་འཕྲོ་གཞིའམ་འབྱུང་བའི་རྒྱུ་ལྟ་བུར་གྱུར་པས་ན་དེ་སྐད་དུ་བརྗོད་པ་ཡིན་པའི་ཕྱིར། དེ་ལྟར་ཡང་ལེའུ་གསུམ་པ་ལས། འདུལ་བ་མདོ་སྡེ་ཆོས་མངོན་དང་། །དམ་ཚིག་སྒྲུབ་དང་གྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །ཕྱོགས་བཅུ་རྣམས་སུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །ཞེས་གསུངས་པའི་ཕྱིར། གཉིས་པ་འབྲས་བུའི་སྙིང་པོ་ཆོས་ཅན། བཤད་དུ་ཡོད་དེ། ཐེག་པའི་སྒོ་གང་ནས་བསྒྲུབས་ཀྱང་མཐར་རང་བཞིན་གསང་བའི་སྙིང་པོ་འདིའི་དོན་མངོན་དུ་བྱེད་དགོས་པའི་ཕྱིར་ཏེ། འདི་ཉིད་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་དང་། ཐེག་པ་བཞི་ཡིས་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་གསུངས་པ་ལྟར་ཡིན་པའི་ཕྱིར། གསུམ་པ་བཅུད་འདུས་པ་དོན་གྱི་སྙིང་པོ་ཆོས་ཅན། བཤད་དུ་ཡོད་དེ། གཏན་ཚིགས་ཀྱི་སྒོ་གང་ནས་གཏན་ལ་ཕབ་ཀྱང་མཐར་ཐུག་སངས་རྒྱས་ཀྱི་དགོངས་པའི་དོན་རྟོག་ཚོགས་ཐམས་ཅད་སྐུ་དང་ཡེ་ཤེས་བཞི་བཅུ་རྩ་གཉིས་སུ་སངས་རྒྱས་པས་འཁོར་བ་རང་བཞིན་གྱིས་རྣམ་པར་དག་པ་ཡིན་པའི་ཕྱིར་ཏེ། རྒྱས་པ་ལས། དོན་བསྡུས་གསུང་རབ་བཞི་བཅུ་གཉིས། །དེ་བས་ལྷག་པའི་དོན་སྨྲ་བ། །དེ་ནི་རྣམ་དག་ལམ་མིན་ཏེ། །རང་བློས་བསམ་པའི་འཁྲུལ་པ་ཡིན། །ཞེས་གསུངས་པའི་ཕྱིར། གསུམ་པ་དེ་ཁོ་ན་ཉིད་ཅེས་པའི་མཚན་འདི་ཆོས་ཅན། ཁྱོད་ལའང་དབྱེ་ན་གསུམ་དུ་ཡོད་དེ། མ་བཅོས་པའི་དེ་ཁོ་ན་ཉིད་དང་། མ་ནོར་བའི་དེ་ཁོ་ན་ཉིད་དང་། གཞན་མ་ཡིན་པའི་དེ་ཁོ་ན་ཉིད་དང་གསུམ་དུ་ཡོད་པའི་ཕྱིར། དེའི་དང་པོ་མ་བཅོས་པའི་དེ་ཁོ་ན་ཉིད་ཆོས་ཅན། བཤད་དུ་ཡོད་དེ། རྟོག་ཚོགས་ཐམས་ཅད་རང་རིག་ལས་མི་གཞན་པས་སྣང་སྟོང་གཉིས་མེད་རང་བྱུང་གི་ཡེ་ཤེས་ལ་སྒོམ་བྱེད་ཀྱི་བློས་མ་བཅོས་པར་བཞག་པས་ན་དེ་སྐད་དུ་བརྗོད་པའི་ཕྱིར་ཏེ། རྒྱས་པ་ལས། མ་བཅོས་ལྷུན་མཉམ་ཇི་བཞིན་ངང་བཞག་དང་། ཞེས་གསུངས་པ་ཡིན་པའི་ཕྱིར། གཉིས་པ་མ་ནོར་བའི་དེ་ཁོ་ན་ཉིད་དེ་ཆོས་ཅན། བཤད་དུ་ཡོད་དེ། མ་བཅོས་པའི་དེ་ཁོ་ན་ཉིད་དེ་གོམས་པ་ལས་འབྲས་བུ་སྐུ་དང་ཡེ་ཤེས་ཀྱི་ཕྱག་རྒྱ་མང་པོར་སྣང་བ་ནི་མ་ནོར་བས་དེ་ལྟར་དུ་བརྗོད་པའི་ཕྱིར་ཏེ། རྒྱས་པ་ལས། རྒྱུ་འབྲས་ལྷུན་གྱིས་གྲུབ་པའི་ངང་དུ་གནས། །ཞེས་གསུངས་པའི་ཕྱིར། གསུམ་པ་གཞན་མ་ཡིན་པའི་དེ་ཁོ་ན་ཉིད་དེ་ཆོས་ཅན། བཤད་དུ་ཡོད་དེ། འབྲས་བུ་དེའང་སྒྲིབ་བྱེད་ཀྱི་ཞེན་པ་དག་པའི་ཚེ་རང་ལ་ཡོད་པའི་དོན་སྣང་བ་ལས་གཞན་ནས་བྱུང་བ་མ་ཡིན་པའི་ཕྱིར་ཏེ། འདི་ཉིད་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཞེས་དང་། རྒྱས་པ་ལས། ཇི་སྙེད་བརྒྱུད་པའི་ཁ་བརྒྱུད་ཀྱང་། །ཡང་དག་དོན་གྱི་སྙིང་པོ་ནི། །གཞན་ནས་བཙལ་ཀྱང་མི་རྙེད་དེ། །རང་རིག་སྒྲིབ་མེད་དག་པ་ཡིན། །ཞེས་གསུངས་པའི་ཕྱིར། བཞི་པ་ངེས་པའོ། །ཞེས་པའི་མཚན་འདི་ཆོས་ཅན། ཁྱོད་ལའང་དབྱེ་ན་གསུམ་དུ་ཡོད་དེ། གཞི་དང་ལམ་དང་འབྲས་བུར་ངེས་པ་ཡིན་པའི་ཕྱིར། དང་པོ་གཞིར་ངེས་པ་དེ་ཆོས་ཅན། བཤད་དུ་ཡོད་དེ། གཞིའི་རྒྱུད་རང་བཞིན་གསང་བའི་སྙིང་པོ་དེ་ཆོས་ཉིད་སྒྲོ་སྐུར་དང་བྲལ་བར་བདེན་པས་ན་དེ་ལྟར་དུ་བརྗོད་པའི་ཕྱིར་ཏེ། འདི་ཉིད་ལས། སྒྲོ་དང་སྐུར་པ་ཞི་བ་ཡི། །གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །ཞེས་གསུངས་པའི་ཕྱིར། གཉིས་པ་ལམ་དུ་ངེས་པ་དེ་ཆོས་ཅན། བཤད་དུ་ཡོད་དེ། ཐེག་པ་འདིའི་ལུགས་ཀྱིས་ཡེ་ནས་གནས་པའི་འབྲས་བུ་ཉིད་ཤེས་ཐོབ་ཀྱི་བྱེད་པས་ལམ་དུ་བྱེད་པར་ངེས་པའི་ཕྱིར་ཏེ། འདི་ནི་གསང་ཆེན་ངེས་པ་ཡིན། །འབྲས་བུ་ལམ་དུ་གྱུར་པ་ཡིན། །ཞེས་གསུངས་པའི་ཕྱིར། གསུམ་པ་འབྲས་བུར་ངེས་པ་དེ་ཆོས་ཅན། བཤད་དུ་ཡོད་དེ། རྒྱུད་འདི་རང་གི་ངོ་བོས་བརྗོད་བྱ་རྒྱལ་བའི་དགོངས་པ་ངེས་དོན་མངོན་དུ་ཕྱུང་ནས་སྟོན་པས་ན་དེ་ལྟར་དུ་བརྗོད་པའི་ཕྱིར་ཏེ། འདི་ཉིད་ལས། རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །ཅེས་གསུངས་པ་ཡིན་ནོ། །ཞེས་འཆད་པར་བྱེད་པ་ནི། གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་པའི་གཞུང་འདི་བྱུང་། འོ་ན་བཤད་ཐབས་གཉིས་པ་ནང་ལྟར་ཐབས་ལམ་སྟེང་སྒོ་དང་སྦྱར་ནས་བཤད་པ་དེ་ཇི་ལྟ་བུ་ཞེ་ན། དེ་ཉིད་འཆད་པར་བྱེད་པ་ལ་བཤད་མ་ཐག་པའི་གཞུང་འདི་བྱུང་། དེ་ལའང་སྙིང་གའི་འཁོར་ལོ་དང་སྦྱར་ཏེ་བཤད་པ། མཚན་བཞི་དང་འཁོར་ལོ་བཞི་སྦྱར་ཏེ་བཤད་པ་དང་ས་བཅད་གཉིས་ཡོད་པ་ལས། དེའི་དང་པོ་སྙིང་གའི་འཁོར་ལོ་དང་སྦྱར་ཏེ་བཤད་པ་ནི། མཚན་གྱི་དོན་བཞི་པོ་དེ་ཆོས་ཅན། སྙིང་གའི་འཁོར་ལོ་དང་སྦྱར་ནས་བཤད་དུ་ཡོད་དེ། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་ཀྱི་དབུས་ན་དྭངས་མ་ཆེན་པོ་ལྔ་དང་། དེའི་དཀྱིལ་ན་ཡེ་ཤེས་སྙིང་པོའི་ཐིག་ལེ་ཡེ་ནས་གནས་ཀྱང་རང་གསང་ཐབས་ཀྱིས་ཆོད་ནས་མ་མཐོང་བ་ནི་གསང་བ། ཐིག་ལེ་དེ་ཉིད་ལ་ཤེས་བྱ་དང་བསྒྲུབ་བྱའི་དོན་གྱི་བཅུད་འདུས་པས་ན་སྙིང་པོ་ཐབས་ཀྱི་མན་ངག་དང་ལྡན་པའི་སྒོ་ནས་ཉམས་སུ་བླངས་པས་རང་གི་སེམས་ཉིད་བདེ་ཆེན་ལྷན་ཅིག་སྐྱེས་པའི་ཡེ་ཤེས་སུ་རང་གསལ་བས་ན་དེ་ཁོ་ན་ཉིད། སྙིང་པོའི་ཐིག་ལེ་དེ་གཞི་ལམ་འབྲས་གསུམ་གྱི་དངོས་གཞི་ངེས་པས་ན་ངེས་པ་སྟེ་དེ་ལྟར་དུ་བརྗོད་པའི་ཕྱིར། གཉིས་པ་མཚན་བཞི་དང་འཁོར་ལོ་བཞི་སྦྱར་ཏེ་བཤད་པ་ནི། གསང་བ་ཞེས་པའི་མཚན་འདི་ཆོས་ཅན། ཁྱོད་ལྟེ་བའི་འཁོར་ལོ་རྩ་འདབ་དྲུག་ཅུ་རྩ་བཞིའི་དབུས་ན་དབྱིངས་ཕྱུག་ལྔའི་ཐིག་ལེ་ཡི་གེ་ཨའི་རྣམ་པར་གནས་པ་དང་སྦྱར་ནས་བཤད་དུ་ཡོད་དེ། དེ་ཉིད་ཡུམ་གྱི་མཁའ་གསང་གི་སྣ་རྩེའི་ཐིག་ལེ་དང་འབྲེལ་ཏེ་གནས་པའི་ཕྱིར། སྙིང་པོ་ཆོས་ཅན་ཁྱོད་སྙིང་གའི་འཁོར་ལོའི་དྭངས་མ་ལྔའི་དབུས་ན་ཡེ་ཤེས་སྙིང་པོའི་ཐིག་ལེ་བཞུགས་པ་དང་སྦྱར་ནས་བཤད་དུ་ཡོད་དེ། དེ་ཆོས་ཐམས་ཅད་ཀྱི་བཅུད་འདུས་པའི་སྙིང་པོ་ཡིན་པའི་ཕྱིར། དེ་ཁོ་ན་ཉིད་ཆོས་ཅན། ཁྱོད་མགྲིན་པའི་འཁོར་ལོ་རྩ་འདབ་བཅུ་དྲུག་གི་དབུས་ན་མཁའ་འགྲོ་མ་རྔམས་མའི་ཐིག་ལེ་ཨཾ་གྱི་དབྱིབས་སུ་གནས་པ་ལ་བཤད་དུ་ཡོད་དེ། ཐིག་ལེ་དེ་འོད་དུ་འབར་ཙམ་ནས་བདེ་བ་སྐྱེ་བས་དེ་ཁོ་ན་ཉིད་ལས་མི་གཡོ་བའི་ཕྱིར། ངེས་པ་ཆོས་ཅན། ཁྱོད་སྤྱི་བོའི་འཁོར་ལོ་རྩ་འདབ་སོ་གཉིས་ཀྱི་དབུས་ན་ཀུན་ཏུ་བཟང་པོའི་ཐིག་ལེ་ཧཾ་གྱི་རྣམ་པར་གནས་པ་ལ་བཤད་དུ་ཡོད་དེ། དེ་ལས་སྐྱེས་པའི་བདེ་ཆེན་མི་རྟོག་པའི་ཡེ་ཤེས་དེ་ནི་རྒྱལ་བ་ཀུན་གྱི་དགོངས་པའི་དངོས་གཞིར་ངེས་པའི་ཕྱིར། ཞེས་འཆད་པར་བྱེད་པ་ནི། གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་པའི་གཞུང་འདི་བྱུང་། འོ་ན་བཤད་ཐབས་གསུམ་པ་གསང་བ་ལྟར་ཐབས་ལམ་འོག་སྒོ་དང་སྦྱར་ནས་བཤད་པ་དེ་ཇི་ལྟ་བུ་ཞེ་ན། དེ་ཉིད་འཆད་པར་བྱེད་པ་ནི། གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་པའི་མཚན་འདི་ཆོས་ཅན། ཁྱོད་ཐབས་ལམ་འོག་སྒོ་བདེ་བ་ཆེན་པོའི་ལམ་དང་སྦྱར་ནས་བཤད་དུ་ཡོད་དེ། ལུས་ཅན་རྣམས་ཀྱི་རྩ་སྟོང་ཕྲག་བདུན་ཅུ་རྩ་གཉིས་ལ་སོགས་པའི་ནང་ན་ཐིག་ལེ་བདེ་བའི་ཡེ་ཤེས་ཀྱི་རོ་དང་བཅས་པ་རང་ཆས་སུ་ཡོད་ཀྱང་ངོ་མ་ཤེས་པས་ན་གསང་བ། ཐིག་ལེ་དེ་ལ་རྒྱུ་འབྲས་ཐམས་ཅད་ཀྱི་བཅུད་འདུས་པས་ན་སྙིང་པོ། བྱེད་པ་སྡོམ་པ་རླུང་དང་བཅས་པའི་ཐབས་ཀྱིས་ཉམས་སུ་བླངས་པས་བདེ་ཆེན་ལྷན་ཅིག་སྐྱེས་པའི་ཡེ་ཤེས་དངོས་སུ་རྒྱུད་ལ་སྐྱེས་པས་དེ་ཁོ་ན་ཉིད། ཐིག་ལེ་དེ་ཉིད་གཞི་ལམ་འབྲས་གསུམ་ཀའི་དངོས་གཞིར་ངེས་པས་ན་དེ་ལྟར་དུ་བརྗོད་པ་ཡིན་པའི་ཕྱིར་ཞེས་འཆད་པར་བྱེད་པ་ནི་བཤད་མ་ཐག་པའི་གཞུང་འདི་བྱུང་། བཞི་པ་བརྒལ་ལན་གྱི་དོན་བཤད་པ་ལ། མཚན་རྒྱུད་དོན་ཡིན་མིན་གྱི། མཚན་དུ་རྒྱུད་དོན་འདུས་མ་འདུས་ཀྱི། མན་ངག་ཁོ་ནའི་མཚན་ནས་སྨོས་པའི། རྒྱ་སྐད་མི་སྨོས་པར་བོད་སྐད་སྨོས་པའི་བརྒལ་ལན་ནོ། །དང་པོ་མཚན་རྒྱུད་དོན་ཡིན་མིན་གྱི་བརྒལ་ལན་བཤད་པ་ལའང་། བརྒལ་བ་དང་། ལན་གཉིས། དང་པོ་བརྒལ་བ་ནི། ཁོ་ན་རེ། མཚན་རྒྱུད་དོན་ཡིན་ནམ་མིན། ཡིན་ན་གླེང་གཞི་གླེང་བསླང་དགོས་མེད་དུ་ཐལ། དམ་བཅའ་དེ་འཐད་པ་གང་ཞིག །གླེང་གཞི་གླེང་བསླང་གི་གོང་དུ་རྒྱུད་དོན་བྱུང་བའི་ཕྱིར། མཚན་རྒྱུད་དོན་མིན་ན། རྒྱུད་འདིའི་ཆེད་དུ་བྱ་བའི་གདུལ་བྱ་དབང་པོ་ཡང་རབ་དེས་མཚན་མཐོང་བའམ་ཐོས་པས་རྒྱུད་དོན་མི་རྟོགས་པ་ཐལ། མཚན་རྒྱུད་དོན་མ་ཡིན་པའི་ཕྱིར། རྟགས་ཁས། ཁྱབ་པ་ཚད་མས་གྲུབ། འདོད་ན། ཁོག་གཞུང་གསལ་སྒྲོན་ལས། རབ་ལ་མཚན་བསྟན་འབྲིང་ལ་དབྱེ། ཐ་མར་འབྲུ་གཉེར་དགྲོལ་བའོ། །ཞེས་དང་། སྤར་ཁབ་ལས། རབ་ཀྱི་དོན་དུ་མཚན་བཤད་པ་ཡང་། ཞེས་གསུངས་པ་མི་འཐད་པར་འགྱུར་རོ། །ཟེར་ན། གཉིས་པ་དེའི་ལན་འཆད་པར་བྱེད་པ་ལ། ཉི་སྟོན་ཆོས་ཀྱི་སེང་གེའི་ཞལ་ནས། སྔོན་བྱུང་འོག་མིན་དུ་གླེང་གཞི་ཚོགས། གླེང་བསླངས་ནས་རྒྱུད་དོན་གསུངས་པས། གླེང་གཞི་གླེང་བསླང་མི་དགོས་པའི་སྐྱོན་མེད་ལ། མི་ཡུལ་དུ་གསང་བདག་གི་ཚིག་དང་ཡི་གེར་འགོད་པའི་ཚེ། བློ་རབ་འབྲིང་ཐ་གསུམ་ལ་དགོངས་ནས་མཚན་ཀླད་དུ་སྨོས་པས། མཚན་རྒྱུད་དོན་མིན་ཡང་། གླེང་གཞི་གླེང་བསླང་དགོས་མེད་དུ་མི་འགྱུར་གསུང་། དེ་ལ་རྗེ་འཁོན་སྟོན་ན་རེ། འོ་ན་སྟོན་པས་འོག་མིན་དུ་རྒྱུད་འདི་རྗོད་བྱེད་ཀྱི་ཚིག་ཏུ་མ་གསུངས་པར་ཐལ། དམ་བཅའ་དེ་འཐད་པའི་ཕྱིར། འདོད་ན། འདི་སྐད་བཤད་པའི་དུས་ན། ཞེས་གསུངས་པ་མི་འཐད་པར་ཐལ། འདོད་པའི་ཕྱིར། གསུངས་ནའང་། སྐྱོན་དེ་མི་འཇུག་སྟེ། དགོངས་པ་བརྡའི་བཤད་པ་ཉིད་གསང་བདག་གིས་ཚིག་ཏུ་སྡུད་པའི་ཚེ། རང་ཉིད་སྟོན་པ་དང་དགོངས་པ་མཉམ་པར་ཁས་བླངས་ནས། འདི་སྐད་བཤད་པའི་དུས་ན། ཞེས་བསྡུས་པར་བཞེད་པའི་ཕྱིར་ཏེ། འགྲེལ་པ་ཉི་སེང་མར། ད་ནི་སྡུད་པ་པོས་བཅོམ་ལྡན་འདས་ཀྱི་ལུང་དང་མཐུན་པ་ལྟར་ན་རྒྱུད་ཀྱི་གླེང་གཞི་མཛད་པ་བླ་མའི་མན་ངག་གིས་བཤད་པར་བྱ་སྟེ། འདི་སྐད་ཅེས་སོགས་གསུངས་པའི་ཕྱིར་རོ། །བརྒལ་ལན་གཉིས་པ་ལའང་། བརྒལ་བ་དང་ལན་གཉིས། དང་པོ་ནི། ཁོ་ན་རེ། མཚན་དུ་རྒྱུད་དོན་འདུས་སམ་མ་འདུས། འདུས་ན་མཚན་དང་རྒྱུད་དང་རྒྱུད་ཀྱི་དངོས་པོ་བཅུ་པོ་བྲང་སྤྲོད་ལ་སྦྱོར་རིགས་པར་ཐལ། མ་འདུས་ན། དབང་རབ་ཀྱིས་མཚན་ལ་བརྟེན་ནས་རྒྱུད་དོན་མི་རྟོགས་པར་ཐལ། ཟེར་ན། གཉིས་པ་དེའི་ལན་ནི། མཚན་དུ་རྒྱུད་དོན་མ་འདུས་པའི་སྐྱོན་མེད་དེ། རྒྱུད་ཀྱི་དངོས་པོ་བཅུ་དང་མཚན་དོན་སོ་སོར་སྦྱོར་དུ་མེད་ཀྱང་མཚན་དོན་གཞི་ལམ་འབྲས་གསུམ་དུ་གནས་པས། དེར་རྒྱུད་དོན་མཐའ་དག་འདུས་པའི་ཕྱིར། གཞན་ཡང་མཚན་མཐོང་བས་རྒྱུད་དབུ་ཞབས་ཀྱི་དོན་རྟོགས་པར་གསུངས་པ་དེ་སྔོན་བྱུང་འཁོར་གྱིས་རྟོགས་ཚུལ་ཡིན་ཏེ། དོན་མཐོང་བ་ལ་བརྟེན་ནས་མཚན་དུ་བཏགས་པའི་ཕྱིར་ཏེ། གསང་བདག་གིས་རང་གིས་རྒྱུད་དོན་ཐུགས་སུ་ཆུད་ནས་འཁོར་ལ་འཆད་པའི་ཚེ་གསང་བའི་སྙིང་པོ་ཞེས་དོན་མཐོང་བ་ལ་བརྟེན་ནས་མཚན་དུ་བཏགས་པའི་ཕྱིར། སྔོན་བྱུང་གི་ངོར་མཚན་ལ་ཚིག་དོན་མ་ལུས་པ་འདུས་པ་དང་། སྐད་ཅིག་ཙམ་ལ་རྟོགས་པའང་མི་འགལ་ཏེ། རྒྱ་མཚོ་ལས། སྒྲིབ་པ་མཐའ་སྤོང་གདུལ་བྱ་ལ། །སྐད་ཅིག་ཙམ་གྱིས་སྣང་བར་མཛད། །ཅེས་གསུངས་པ་ཡིན་པའི་ཕྱིར། རྗེས་འཇུག་ཏུ། མཚན་ལ་བརྟེན་ནས་དོན་གོ་བ་ནི། དེར་གཞི་ལམ་འབྲས་གསུམ་གྱི་བརྡ་ཕྲད་པ་ཙམ་དུ་གོ་བ་ཡིན་ཏེ། མིང་གིས་དོན་མཚོན་པར་ནུས་པ་ཙམ་གྱི་མིང་ཡིན་པའི་ཕྱིར། དཔེར་ན་བུམ་པ་ཞེས་བརྗོད་པས། ལྟོ་ལྡིར་ཞབས་ཞུམ་ཆུ་སྐྱོར་གྱི་དོན་བྱེད་ནུས་པའི་དངོས་པོ་ཙམ་གོ་ཡང་། གསེར་བུམ་སོགས་ཁྱད་ཆོས་རྣམས་གོ་བས་མ་ཁྱབ་པ་བཞིན་ནོ། །བརྒལ་ལན་གསུམ་པ་ལའང་། བརྒལ་བ་དང་། ལན་གཉིས། དང་པོ་ནི། ཁོ་ན་རེ། ཐུགས་ཐིག་ལས། དང་པོར་མཚོན་པ་མཚན་གསུམ་ལྡན། ཞེས་དང་། ཁོག་གཞུང་ལས། རབ་མཚན་ཐ་སྙད་གསུམ་དུ་གྲགས། ཞེས་པས་རྒྱུད་འདི་ལ་རྒྱུད་དང་འཆད་པའི་སྐྱེས་བུའི་མཚན་ཐུན་མོང་དུ་བསྟན་པ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ། ལུང་ངམ་ཆེ་བ་ལས་བཏགས་པ་ལུང་གི་སྤྱི། དོན་རང་གི་ངོ་བོ་ལས་བཏགས་པའམ་མན་ངག་གི་མཚན་གསང་བའི་སྙིང་པོ་ཞེས་གྲགས་པ་ལས། གླེགས་བམ་གྱི་ཀླད་དུ་རྒྱུད་དང་ལུང་གི་མཚན་ནས་མི་སྨོས་པར། མན་ངག་ཁོ་ནའི་མཚན་ནས་སྨོས་པ་ལ་རྒྱུ་མཚན་ཅི་ཡོད་ཅེ་ན། གཉིས་པ་དེའི་ལན་ནི། མ་ཧཱ་ཡོ་ག་ལའང་ནང་གསེས་ཀྱི་རྒྱུད་ལུང་མན་ངག་གསུམ་མམ་ཕ་མ་གཉིས་མེད་ཀྱི་རྒྱུད་གསུམ་དུ་ཕྱེ་བ་ལས། རྒྱུད་འདི་ནི་མ་ཧཱའི་ཨ་ཏི་ཐབས་ཤེས་གཉིས་མེད་དུ་སྟོན་པའི་རྒྱུད་ཡིན་པའི་ཕྱིར། མན་ངག་གི་མཚན་ནས་སྨོས་པ་ཡིན་ནོ། །བརྒལ་ལན་བཞི་པ་ལའང་། བརྒལ་བ་དང་། ལན་གཉིས། དང་པོ་ནི། ཁོ་ན་རེ། རྒྱུད་འདི་རྒྱ་གར་ནས་བསྒྱུར་བ་མ་ཡིན་ཏེ། ཀླད་དུ་རྒྱ་སྐད་མ་སྨོས་པའི་ཕྱིར་ཟེར། གཉིས་པ་དེའི་ལན་ལ། གཞན་ལན་བཀག་པ་དང་། རང་ལན་གདབ་པའོ། །དང་པོ་ནི། ཁ་ཅིག་ན་རེ། རྒྱ་སྐད་གཏན་མེད་ན་བོད་སྐད་དུ་བསྒྱུར་བ་མི་རིགས་པས། བོད་སྐད་དུ་ཞེས་པས་རྒྱ་སྐད་ཡོད་པར་ཤུགས་ཀྱིས་བརྡའ་མཇལ་བར་བྱའོ། །ཞེས་གསུངས་པ་ནི། མ་ཡིན་ཏེ། བོད་ཀྱི་སྐད་ལ་རྒྱ་ནག་ལ་སོགས་པའི་སྐད་ཀྱང་སྦྱར་དུ་རུང་བའི་ཕྱིར། རྒྱ་གར་མར་མི་འགྲུབ་ཅིང་། གྲོང་དུ་བརྩམས་པའི་བསྟན་བཅོས་རྣམས་ལའང་རྒྱ་སྐད་ཤུགས་ལ་སྦྱར་དུ་རུང་བའི་ཕྱིར་རྒྱ་གར་མར་ཐལ་བར་འགྱུར་རོ། །གཉིས་པ་རང་ལན་གང་གདབ་པ་ནི། འདིར་རྒྱ་སྐད་མེད་པས་བོད་མར་འགྱུར་བའི་ཁྱབ་པ་མེད་དེ། བོད་དུ་བརྩམས་པའི་བསྟན་བཅོས་དུ་མར་ཡང་རྒྱ་སྐད་ཀླད་དུ་བཀོད་པ་ཡོད་མོད། དེས་རྒྱ་གར་མར་མི་འགྱུར་བ་བཞིན་ནོ། །གཞན་ཡང་། ཀླད་དུ་རྒྱ་གར་གྱི་སྐད་གཅིག་པོ་མ་སྨོས་པས་བོད་མར་འགྱུར་རམ། སྐད་གཉིས་ཀ་མ་སྨོས་པས་བོད་མར་འགྱུར། དང་པོ་ལྟར་ན། རྒྱ་ནག་ནས་བསྒྱུར་བའི་ཆོས་རྣམས་ཆོས་ཅན། བོད་མར་ཐལ་ཏེ། ཀླད་དུ་རྒྱ་གར་གྱི་སྐད་མ་སྨོས་པའི་ཕྱིར། གཉིས་པ་ལྟར་ན། རྒྱ་གར་གྱི་དཔེ་རྣམས་ཆོས་ཅན། བོད་མར་ཐལ་ཏེ། ཀླད་དུ་སྐད་གཉིས་མ་སྨོས་པའི་ཕྱིར་རོ། །མདོར་ན། རྒྱུད་ཀྱི་རྒྱལ་པོ་ཆེན་པོ་འདི་ཆོས་ཅན། བོད་མར་འགྱུར་བའི་སྐྱོན་མེད་དེ། འདི་ཉིད་ཡོངས་སུ་གྲགས་པའི་རྒྱ་གར་གྱི་པཎ་ཆེན་རྣམས་ཀྱིས་མང་དུ་བཀྲལ་བ་གང་ཞིག །གསང་འདུས་ཀྱི་འགྲེལ་པ་བི་ཤྭ་མི་ཏྲས་མཛད་པར་ཡང་རྒྱུད་འདིའི་ལུང་མང་དུ་དྲངས་པའི་ཕྱིར་དང་། དུས་ཕྱིས་ཀྱང་རྒྱ་དཔེ་རྙེད་པ་ལས་ཐར་ལོ་ཉི་མ་རྒྱལ་མཚན་དང་། འགོས་ལོ་གཞོན་ནུ་དཔལ་བ་སོགས་ཐུབ་བསྟན་ཡོངས་སུ་རྫོགས་པའི་ལོ་ཙཱ་བ་ཆེན་པོ་དག་གིས་འགྱུར་མཛད་པའི་ཕྱིར་རོ། །དེས་མཚན་གྱི་དོན་བསྟན་པ་སོང་ནས། དེའི་རྗེས་སུ་གཉིས་པ་མཚན་དེ་ལྡན་གྱི་རྒྱུད་དོན་བཤད་པ་ལ། སྟོན་པ་ལ་དབང་མི་ཟ་བའི་ཕྱིར་ཀླད་དོན་ཕྱག་དང་། བཀའི་དོན་བདེ་བླག་ཏུ་རྟོགས་པར་བྱ་བའི་ཕྱིར་གཞུང་དོན་གཏན་ལ་དབབ་པ་གཉིས་ཡོད་པ་ལས། དེའི་དང་པོ་ཀླད་ཀྱི་དོན་ཕྱག་འཚལ་བ་ཞེས་བྱ་བ་དེ་འཆད་པར་བྱེད་པ་ལ། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་པའི་གཞུང་འདི་བྱུང་། འདི་འཆད་པ་ལ་གསུམ་སྟེ། ངག་དོན། ཚིག་དོན། རྩོད་པ་སྤོང་བའོ། །དང་པོ་ངག་དོན་ནི། བྱེད་པའི་མུ་བཞི་དང་སྦྱར་ན། ཕྱག་གང་གིས་བཙལ་ན་སྡུད་པ་པོ་གསང་བདག་གིས། གང་ལ་ན་རྒྱུད་ཀྱི་སྟོན་པ་བཅོམ་ལྡན་འདས་དཔལ་ཀུན་ཏུ་བཟང་པོ་ལའོ། །དུས་གང་གི་ཚེ་ན། སྡུད་པ་པོས་འོག་མིན་དུ་དང་པོར་ཤེས་རྒྱུད་ལ་བཏུས་ཏེ། དེ་ནས་མི་ཡུལ་དུ་ཚིག་ཏུ་བསྡུ་བའི་ཚེ་ནའོ། །ཚུལ་ཇི་ལྟར་བཙལ་ན། རབ་ལྟ་བ་མཇལ་བ། འབྲིང་སྒོམ་པ་གོམས་པ། ཐ་མ་མོས་གུས་ཀྱི་ཕྱག་གསུམ་ལས། འདི་ནི་སྡུད་པ་པོའི་ཕྱག་ཡིན་པའི་ཕྱིར་དང་པོའོ། །འོ་ན་གཉིས་པ་ཚིག་གི་དོན་དེ་ཇི་ལྟ་བུ་ཞེ་ན། དེའི་དོན་རྒྱས་པར་འཆད་པ་ལ། བི་མ་ལས་འགྲེལ་ཆུང་དུ། མཉམ་ཉིད་དབྱིངས་སུ་བདུད་བཞི་ངང་གིས་བཅོམ། །ཕྱག་རྒྱའི་རང་བཞིན་ཚོགས་གཉིས་རྫོགས་པར་ལྡན། །ཡོད་མེད་མཐའ་འདས་བདག་གཞན་ཡོངས་ཀྱི་དཔལ། །ཐམས་ཅད་རང་བཞིན་རྟོགས་དང་ཐུགས་རྗེ་བཟང་། །ཀུན་བཟང་ལྷ་ཡི་ལྷ་ཁྱོད་དབྱེར་མེད་ལ། །རྟོགས་དང་གུས་པས་རབ་ཏུ་ཕྱག་འཚལ་ལོ། །ཞེས་གསུངས་ཏེ། དེའི་དོན་སྟོན་པ་ཀུན་ཏུ་བཟང་པོ་ཆོས་ཅན། ཁྱོད་ཀྱི་མཚན་གྱི་ཚིག་ཟུར་ལ་བཅོམ་ཞེས་པ་ནི། ཆོས་ཉིད་མཉམ་པ་ཉིད་ཀྱི་དབྱིངས་སུ་བདུད་བཞི་ངང་གིས་དག་པས་ན་བདུད་བཞི་བཅོམ་པ་སྟེ། ཕྲིན་ལས་ཀྱི་མཚན་ཡིན་ཏེ། ཇི་ལྟར་ན་རྒྱུ་ཉོན་མོངས་པའི་མཚན་མ་རང་སར་གྲོལ་བས་འབྲས་བུ་ཉེར་ལེན་གྱི་ཕུང་པོ་མི་ལེན་ཞིང་། དེ་མ་བླངས་ན་སྐྱེ་ཤི་དང་ལྷའི་བུའི་བདུད་ཀྱི་བར་དུ་གཅོད་པས་མི་ཚུགས་པའི་ཕྱིར། དེ་ལྟར་ཡང་། རྒྱས་པ་ལས། ཉོན་མོངས་པ་ཉིད་རྣམ་པར་དག །ཕུང་པོ་ལྔ་ཉིད་མངོན་སངས་རྒྱས། །བདག་ཉིད་ལྷ་ཡི་དཀྱིལ་འཁོར་ཏེ། །སྐྱེ་ཤི་མེད་པའི་གཡུང་དྲུང་ནས། །ཞེས་གསུངས་པ་ཡིན་ནོ། །སྟོན་པ་ཆོས་ཅན། ཁྱོད་ལ་ལྡན་ཞེས་པ་ཡོན་ཏན་གྱི་མཚན་ཡིན་ཏེ། སྤྱིར་བྷ་ག་ཝན་གྱི་སྒྲ་ལས་བྷ་ག་ནི་བཅོམ་པ་ལ་འཇུག་པར་མ་ཟད། རྣམ་པ་གཅིག་ཏུ་སྐལ་བའམ་ལེགས་པ་རྣམ་པ་དྲུག་ལ་འཇུག་པར་ཡང་བཤད་པའི་ཕྱིར་ཏེ། སམྦྷུ་ཊི་ལས། དཔལ་དང་གྲགས་དང་ཡེ་ཤེས་དང་། །དབང་ཕྱུག་དང་ནི་གཟུགས་བཟང་དང་། །བརྩོན་འགྲུས་ཕུན་སུམ་ཚོགས་ལྡན་པ། །དྲུག་པོ་དེ་ལ་སྐལ་ཞེས་བྱ། །ཞེས་གསུངས་པའི་ཕྱིར་དང་། ཁྱད་པར་འདི་ནི། ཆོས་སྐུའི་ཕྱག་རྒྱ་ཡེ་ཤེས་ཀྱི་ཚོགས་དང་། གཟུགས་སྐུའི་ཕྱག་རྒྱ་བསོད་ནམས་ཀྱི་ཚོགས་རྫོགས་པས་སྐུ་ལྔ་ལ་སོགས་པའི་ཡོན་ཏན་རང་རིག་པའི་ཡེ་ཤེས་ལ་རང་བཞིན་གྱིས་ལྡན་པའི་དོན་ཏེ། རྡོ་རྗེ་ལས་རིམ་ལས། སྐུ་ལྔ་ལ་སོགས་ཡོན་ཏན་བརྗོད་ལས་འདས། །ཞེས་གསུངས་པའི་ཕྱིར། འོ་ན་འདས་ཞེས་པའི་དོན་དེ་གང་ཞེ་ན། དེ་ནི་བཀས་བཅད་ལས། འཇིག་རྟེན་པའི་བྷ་ག་བཱན་ལས་ཁྱད་པར་འདས་ཞེས་བླ་ཐབས་སུ་བསྣན་ཏེ། ཞེས་གསུངས་ཤིང་། བྷ་གའི་སྒྲ་སྲིད་པ་དང་འཇིགས་པར་འགྲོ་བ་ལ་འཇུག་སྟེ། དེ་ལས་འདས་པས་ན་བྷ་ག་བཱན་ནོ། །འདིར་ནི་འདས་ཞེས་པ་ཆོས་ཅན། མཚན་ཉིད་ཀྱི་མཚན་ཉིད་ཡིན་ཏེ། ཆོས་སྐུ་སྐྱེ་བ་མེད་པས་ཡོད་པའི་མཐའ་དང་། གཟུགས་སྐུ་འགག་པ་མེད་པས་མེད་པའི་མཐའ་སྟེ། སྤྲོས་པའི་མཚན་མ་ཀུན་ལས་འདས་པའི་ཕྱིར་ཏེ། དེ་ལྟར་ཡང་། ཕལ་པོ་ཆེ་ལས། སྤྲོས་པ་ཀུན་ལས་རབ་འདས་པའི། །བཅོམ་ལྡན་འདས་ནི་མཁའ་རབ་ཞི། །ཞེས་དང་། རྡོ་རྗེ་ལས་རིམ་ལས་ཀྱང་། རང་གི་ངོ་བོ་འདི་ཞེས་བསྟན་དུ་མེད། །ཅེས་གསུངས་པའི་ཕྱིར། ཡང་སྟོན་པ་ཆོས་ཅན། ཁྱོད་ལ་དཔལ་ཞེས་པ་ནི་ཆེ་བའི་མཚན་ཡིན་ཏེ། རང་བཞིན་ལྷུན་གྲུབ་ཀྱི་དཔལ་གཞི་ཆོས་དབྱིངས་ཤིན་ཏུ་དྲི་མེད་དེ་ཉིད་མངོན་དུ་གྱུར་པས་འབྲས་བུ་ཆོས་སྐུ་རྟོགས་པ་བདག་གི་དཔལ་དང་། གཟུགས་སྐུ་ཐུགས་རྗེ་གཞན་གྱི་དཔལ་མངའ་བ་ཡིན་པའི་ཕྱིར། དེ་ལྟར་ཡང་། རྡོ་རྗེ་ལས་རིམ་ལས། རང་བཞིན་མངོན་བྱས་མ་ལུས་རེ་བ་སྐོང་། ཞེས་གསུངས་པའི་ཕྱིར། འོ་ན་ཀུན་ཏུ་བཟང་པོ་ཞེས་པའི་དོན་དེ་ཇི་ལྟ་བུ་ཞེ་ན། སྟོན་པ་རིགས་དྲུག་པ་ཆོས་ཅན། ཁྱོད་ལ་ཀུན་ཏུ་བཟང་པོ་ཞེས་པ་ནི་རང་གི་ངོ་བོའི་མཚན་ཡིན་ཏེ། འཁོར་འདས་ཀྱི་ཆོས་ཐམས་ཅད་འཆིང་གྲོལ་མེད་པའི་རང་བཞིན་མངོན་དུ་རྟོགས་པས་སྤྱོད་ཡུལ་ཡོངས་སུ་དག་པའི་ཕྱིར་ཏེ། འདི་ཉིད་ལས། ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། ཞེས་གསུངས་པའི་ཕྱིར། སྤྱིར་གནས་ལུགས་ཡེ་སངས་རྒྱས་པ་ནི་རང་བཞིན་ཀུན་ཏུ་བཟང་པོ། དེ་ཉིད་རྟོགས་པའི་ཡོན་ཏན་མངོན་དུ་གྱུར་པ་ནི་རྟོགས་པ་ཀུན་ཏུ་བཟང་པོ། དེ་ལས་གཟུགས་ཀྱི་སྐུ་མངོན་དུ་སྣང་བ་ནི་ཐུགས་རྗེ་ཀུན་ཏུ་བཟང་པོ་སྟེ། འགྲོ་བ་ལ་ཕྱོགས་དུས་ཀུན་ཏུ་གནས་སྐབས་དང་མཐར་ཐུག་གི་ཕན་བདེ་སྟེར་བར་མཛད་པ་པོ་ཡིན་པའི་ཕྱིར་ཏེ། རྒྱུད་ཕྱི་མ་ལས། ཕྱོགས་བཅུའི་འཇིག་རྟེན་ཐམས་ཅད་དུ། །མངོན་མཐོ་ངེས་ལེགས་རབ་སྟེར་བ། །ཀུན་ཏུ་བཟང་པོར་བརྗོད་པ་ཡིན། །ཞེས་གསུངས་པའི་ཕྱིར། ལ་ཞེས་པ་ནི། ཕྱག་བྱ་བའི་ཡུལ་མཚོན་པར་བྱེད་པའི་རྣམ་དབྱེ་སྟེ། དེ་ལ་སྡུད་པ་པོ་གསང་བདག་གིས་རང་དང་སྟོན་པའི་ཐུགས་གཉིས་སུ་མེད་པར་རྟོགས་པའི་སྒོ་ནས་ཕྱག་བཙལ་བ་ཡིན་ནོ། །དེ་ལྟར་ཡང་འགྲེལ་པ་མངོན་རྟོགས་ལས། དེ་ཡང་ཐུན་མོང་པ་དག་ལུས་ངག་ཡིད་གསུམ་གྱིས་སོ་སོར་བལྟས་ནས་ཕྱག་འཚལ་བ་ནི་ཤིན་ཏུ་འགལ་ཏེ། ཚི་ཆད་པར་འགྱུར་རོ། །རྨད་དུ་བྱུང་བའི་ཐེག་པ་འདིར་ཀུན་ཏུ་བཟང་པོ་དང་རིག་པ་གཉིས་མེད་དུ་མཇལ་བ་ཕྱག་ཏུ་གསུངས་ཏེ། དེས་མར་གྱི་ནང་དུ་མར་བླུག་པ་བཞིན་ནོ། །ཞེས་དང་། རིམ་ལྔ་ལས་ཀྱང་། ཇི་ལྟར་ཆུ་ལ་ཆུ་བཞག་དང་། །ཇི་ལྟར་མར་ལ་མར་བཞག་བཞིན། །རང་གིས་རང་གི་ཡེ་ཤེས་གང་། །ལེགས་མཐོང་གང་ཡིན་འདིར་ཕྱག་འཚལ། །ཞེས་གསུངས་པའི་ཕྱིར། གསུམ་པ་རྩོད་པ་སྤང་བ་ལ། རྩོད་པ་འགོད་པ་དང་། དེ་སྤང་བའོ། །དང་པོ་ནི། ཁོ་ན་རེ། ཀླད་དུ་བཀོད་པའི་ཕྱག་འདི་ལོ་ཙཱ་བའི་འགྱུར་ཕྱག་ཡིན་གྱི། སྡུད་པ་པོའི་ཕྱག་མ་ཡིན་ཏེ། སྡུད་པ་པོའི་ཚིག་ནི། འདི་སྐད་བཤད་པའི་དུས་ན། ཞེས་པ་མན་ཆད་ཡིན་པའི་ཕྱིར་ཟེར་ན། གཉིས་པ་དེ་སྤང་བ་ནི། འོ་ན། སྡུད་པ་པོས་བཀའ་བསྡུ་བྱེད་པའི་ཐོག་མར་རང་གི་སྟོན་པ་ལ་བསྟོད་ཕྱག་བྱས་པ་དེ་མེད་པར་ཐལ། དམ་བཅའ་དེ་འཐད་པའི་ཕྱིར། འདོད་ན། དེ་ཡོད་པར་ཐལ། སོ་ཐར་གྱི་མདོའི་དཀའ་བསྡུ་བའི་ཚེ་སྟོན་པ་ལ་བསྟོད་ཕྱག་བྱས་ནས་བཀའ་བསྡུས་པའི་ཕྱིར་ཏེ། དེ་ལས། འགྲོ་བའི་གཙོ་ལ་སྤྱི་བོས་ཕྱག་བཙལ་ནས། །ཐམས་ཅད་མཁྱེན་པའི་བསླབ་གཞི་དཀོན་མཆོག་སྣོད། །འཕགས་པའི་ཚོགས་ཀྱི་དབུས་སུ་དབྱེ་བར་བྱ། །ཞེས་གསུངས་པའི་ཕྱིར་བྱས་པ་ལ། ཁོ་ན་རེ། འོ་ན་རྒྱུད་འདི་ལ་ལོ་ཙཱ་བའི་འགྱུར་ཕྱག་མེད་པར་ཐལ། ཀླད་དུ་བཀོད་པའི་ཕྱག་འདི་ནི་སྡུད་པ་པོའི་ཕྱག་ཡིན་ལ། དེ་ལས་གཞན་པའི་འགྱུར་ཕྱག་མེད་པའི་ཕྱིར་ཟེར་ན། དོགས་པ་དེའི་སྐྱོན་མེད་དེ། ལོ་ཙཱ་བས་རྒྱལ་པོའི་བཀས་བཅད་དང་བསྟུན་ནའང་སྟོན་པ་ཀུན་བཟང་ལ་ཕྱག་འཚལ་བར་རིགས། རང་གི་འདོད་པའི་ལྷ་ལ་འཚལ་ནའང་སྟོན་པ་ཀུན་བཟང་ལ་ཕྱག་འཚལ་བར་རིགས་པར་མཐོང་ནས་འགྱུར་ཕྱག་ཟུར་དུ་མ་བཀོད་པའི་ཕྱིར་ཏེ། དུས་འཁོར་གྱི་རྒྱུད་ཀྱི་ཀླད་དུའང་ཡི་གེ་པའི་ཕྱག་གིས་གོ་བཅད་དེ་འགྱུར་ཕྱག་མ་བཀོད་པ་བཞིན་ནོ། །འདིར་གཡུང་ཊིཀ་ཏུ། རྒྱུད་གཞུང་སྤྱིའི་ལུགས་ཀྱི་ཀླད་ཀྱི་བསྟོད་ཕྱག་ཡི་གེ་པའི་ཕྱག་ཏུ་བཞེད་པ་ནི་མ་ཡིན་ཏེ། ཕལ་ཆེ་བར་འགྱུར་ཕྱག་ཏུ་སྣང་བའི་ཕྱིར་དང་། འདིར་ནི་སྤར་ཁབ་ལས། སྡུད་པ་པོས་ཚིག་གཉེར་བ་དེའི་ཚེ་རང་གི་སྟོན་པ་ལ་མཆོད་པར་བརྗོད་པའོ། །ཞེས་སྡུད་པ་པོའི་ཕྱག་ཏུ་བཤད་པའི་ཕྱིར། ཞེས་འཆད་པར་བྱེད་པ་ནི། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་པའི་གཞུང་འདི་བྱུང་། དེས་སྟོན་པ་ལ་དབང་མི་ཟ་བའི་ཕྱིར་ཀླད་ཀྱི་དོན་ཕྱག་འཚལ་བ་སོང་ནས། གཉིས་པ་བཀའི་དོན་བདེ་བླག་ཏུ་རྟོགས་པར་བྱ་བའི་ཕྱིར་གཞུང་དོན་གཏན་ལ་དབབ་པ་ལ། འདི་ཉིད་ལས། རབ་འབྲིང་ཐ་མའི་བློ་ཅན་ལ། །མཐུན་པར་གསང་བསྒྲག་གཞན་དུ་མིན། །ཞེས་གསུངས་པ་ལྟར་གྱི། རྒྱུད་འདི་ཉིད་ཀྱི་ཆེད་དུ་བྱ་བའི་གདུལ་བྱ་དབང་པོ་རབ་འབྲིང་ཐ་གསུམ་ལ་ལྟོས་ནས་འཆད་ཚུལ་གསུམ་སྟེ། ཁོག་གཞུང་ལས། རབ་ལ་མཚན་བསྟན་འབྲིང་ལ་དབྱེ། །ཐ་མར་འབྲུ་གཉེར་དགྲོལ་བའོ། །ཞེས་གསུངས་པའི་ཕྱིར། དེ་ལས་འདིར་བར་མའི་དབང་དུ་བྱས་ན། གཞུང་ཚོགས་ལེའུ་ཉེར་གཉིས་ཀྱང་ཆོས་ལྔར་འདུ་སྟེ། འགྲེལ་པ་སྤར་ཁབ་ལས། སྤྲོས་པ་ལ་དགའ་བ་དབང་པོ་འབྲིང་གི་དོན་དུ་རྒྱུད་ཀྱི་དོན་རྣམ་པར་ཕྱེ་བས་ལྔ་སྟེ། ཞེས་གསུངས། དེའང་ལྔ་པོ་དེ་གང་ཡིན་ཞེ་ན། འགྲེལ་པ་མངོན་རྟོགས་ལས། རྒྱུད་གཞུང་གཞི་བསླང་ཡོངས་སུ་ཤེས། །དགོས་འབྲེལ་གཏད་དང་རྫོགས་པའོ། །ཞེས་གསུངས་པས། ལེའུ་དང་པོ་དང་། གསུམ་པའི་སྟོད་དང་། བཅོ་ལྔ་པ་རྣམས་ཀྱིས་རྒྱུད་འབྱུང་བའི་རྒྱུ་གླེང་གཞི་ཕུན་སུམ་ཚོགས་པ་དང་། ལེའུ་གཉིས་པས་རྐྱེན་གླེང་བསླང་བ་དང་། ལེའུ་གསུམ་པའི་སྨད་ནས་ཉེར་གཅིག་པ་ཡན་ཆད་ཀྱིས་འབྲས་བུ་ཡོངས་ཤེས་རྒྱུད་དོན་དང་། དེ་དག་ལ་ཁྱབ་བྱེད་དུ་རྒྱུད་ཀྱི་དགོས་འབྲེལ་དང་། ལེའུ་ཐ་མས་འཁོར་ལ་གདམས་ཤིང་བསྟན་པ་གཏད་པ་དང་ལྔ་ལས། དང་པོ། རྒྱུད་འབྱུང་བའི་གླེང་གཞི་ཕུན་སུམ་ཚོགས་པ་ཞེས་བྱ་བ་དེ་ཉིད་འཆད་པར་བྱེད་པ་ལའང་བཞི་སྟེ། གླེང་གཞི་བསྟན་པའི་དགོས་ཆེད། བསྟན་བྱ་གླེང་གཞིའི་ངོ་བོ། དེ་ལྟར་བསྟན་པའི་སྒྲ་དོན། ཇི་སྙེད་བསྟན་པའི་རྣམ་གྲངས་སོ། །དེའི་དང་པོ། གླེང་གཞི་བསྟན་པའི་དགོས་པ་ཆོས་ཅན། གཉིས་སུ་ངེས་ཏེ། གླེང་གཞི་ཚོགས་པས་རྒྱུད་དོན་འབྱུང་བའི་རྒྱུ་བྱེད་པའི་ཕྱིར་དང་། གླེང་གཞིའི་ལོ་རྒྱུས་ལ་བརྟེན་ནས་མ་འོངས་པའི་གདུལ་བྱ་རྣམས་ཡིད་ཆེས་ཤིང་རྒྱུད་ལ་འཇུག་པར་འགྱུར་བའི་ཆེད་ཡིན་པའི་ཕྱིར། གཉིས་པ་བསྟན་བྱ་གླེང་གཞིའི་ངོ་བོ་ཆོས་ཅན། ཁྱོད་ལ་ཕུན་སུམ་ཚོགས་པ་ལྔའམ་དྲུག་ལྡན་ཏེ། ཁོག་གཞུང་ལས། སྟོན་པ་གནས་དང་སྡུད་པ་འཁོར། །ཞེས་སོགས་དང་། དོན་བསྡུས་ལས། ངོ་བོ་ཚོགས་པ་དྲུག་ཉིད་དེ། །ཞེས་གསུངས་པ་ཡིན་པའི་ཕྱིར། གསུམ་པ་དེ་ལྟར་བསྟན་པའི་སྒྲ་དོན་ཆོས་ཅན། བཤད་དུ་ཡོད་དེ། གང་གླེང་ན་བསྟན་པ་སྟེ། དེའི་རྒྱུའམ་གཞི་ནི་ཕུན་སུམ་ཚོགས་པ་ལྔ་ཡིན་པའི་ཕྱིར་དང་། ཡང་ན་དཱ་ན་ཞེས་པའི་སྒྲ་ལས་དྲངས་ན། ངེས་པ་སྦྱིན་པ་ཞེས་བྱ་བ་ཡིན་ཏེ། བཀའ་མ་ཡིན་པར་རྟོག་པའི་ཐེ་ཚོམ་ཅན་གྱི་བློ་ལ་ཡིད་ཆེས་ཀྱི་ངེས་པ་སྦྱིན་བྱེད་ཡིན་པའི་ཕྱིར། བཞི་པ་ཇི་སྙེད་བསྟན་པའི་རྣམ་གྲངས་དེ་ཆོས་ཅན། ཁྱོད་ལ་གཉིས་སུ་ངེས་ཏེ། ཐུན་མོང་མ་ཡིན་པའི་གླེང་གཞི་དང་། ཐུན་མོང་གི་གླེང་གཞི་གཉིས་ཡོད་པའི་ཕྱིར། དེའི་དང་པོ་ཐུན་མོང་མ་ཡིན་པའི་གླེང་གཞི་དེ་འཆད་པར་བྱེད་པ་ལ། འདི་སྐད་བཤད་པའི་དུས་ན་ཞེས་པའི་གཞུང་འདི་བྱུང་། དེ་ཡང་། འདི་ཞེས་པ་ནི་ཨེའི་སྒྲ་ལས་གནས་ཕུན་སུམ་ཚོགས་པ་སྟེ། ཨེ་དཾ་ལ་བདུན་པ་གནས་གཞི་དོན་དུ་ཏྲ་སྦྱར་བའི་རྣམ་འགྱུར་ཡིན་པ་གང་ཞིག །ཡུམ་ལྔའི་མཁའ་དབྱིངས་མཚོན་པའི་ཕྱིར། སྐད་ཅེས་པ་ནི་ཝཾ་གྱི་སྒྲ་ལས་སྟོན་པ་ཕུན་སུམ་ཚོགས་པ་སྟེ། ཝ་ཙའི་དབྱིངས་དོན་ལས་སྐད་དང་ཝཾ་བཛྲ་ལས་རྡོ་རྗེ་ཀུན་ཏུ་བཟང་པོའི་རང་བཞིན་ཡིན་པའི་ཕྱིར། བཤད་ཅེས་པ་ནི་མའི་སྒྲ་ལས་འཁོར་ཕུན་སུམ་ཚོགས་པ་སྟེ། མ་ད་ན་སྡོམ་པ་དང་མ་ནུའི་སྒྲས་ཡིད་སོགས་རྣམ་ཤེས་ཏེ་འཁོར་དང་སྡུད་པ་པོར་འབྲེལ་བའི་ཕྱིར། པའི་ཞེས་པ་ནི་ཡའི་སྒྲ་ལས་བསྟན་པ་ཕུན་སུམ་ཚོགས་པ་སྟེ། ཡཱ་ནའི་སྒྲ་ཐེག་པ་ལ་འཇུག་ལ། དེ་ཉམས་སུ་བླངས་པས་དོན་དམ་འོད་གསལ་ལྷན་སྐྱེས་ཀྱི་ཡེ་ཤེས་ཟབ་མོའི་དོན་སྐྱེས་པ་ནི་བསྟན་པ་ཡིན་པའི་ཕྱིར། དུས་ན་ཞེས་པ་ནི། སླར་ཡང་ཡའི་སྒྲ་ལས་དུས་ཕུན་སུམ་ཚོགས་པ་སྟེ། ས་མ་ཡའི་སྒྲ་དུས་ལ་འཇུག་པའི་མིང་མཐའ་བསྡུས་པ་ཡིན་པའི་ཕྱིར། འདི་འཆད་པ་ལ། ཐུན་མོང་མ་ཡིན་པའི་སྒོ་ནས་གླེང་གཞིའི་དོན་བསྟན་པ་དང་། དེ་ལ་རྩོད་པ་སྤང་བའོ། །དང་པོ་ལའང་། ནང་ལྟར་ཐབས་ལམ་སྟེང་སྒོ་དང་སྦྱར་ཏེ་བཤད་པ་དང་། གསང་བ་ལྟར་ཐབས་ལམ་འོག་སྒོ་དང་སྦྱར་ཏེ་བཤད་པ་གཉིས་ལས། དང་པོ་ནང་ལྟར་ཐབས་ལམ་སྟེང་སྒོ་དང་སྦྱར་ཏེ་བཤད་པ་ཞེས་བྱ། དེ་ཉིད་འཆད་པར་བྱེད་པ་ལ། འདི་སྐད་བཤད་པའི་དུས་ན། ཞེས་པའི་གཞུང་འདི་བྱུང་། དེའི་དོན་ནི། འདི་ཞེས་པ་ཆོས་ཅན། ཁྱོད་ཀྱིས་གནས་ཕུན་སུམ་ཚོགས་པ་བསྟན་ཏེ། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་ལས། རྩ་བའི་འདབ་མ་བཞི་ཨེ་གྲུ་གསུམ་སོགས། ལས་བཞིའི་དབྱིབས་དང་ཁ་དོག་འོད་བཞིའི་རྣམ་པར་གནས་པ་ནི་ཡེ་ཤེས་སྙིང་པོའི་ཐིག་ལེ་བཞུགས་པའི་གནས་ཡིན་པའི་ཕྱིར་ཏེ། རྒྱ་མཚོ་ལས། དྷརྨ་ཙཀྲ་ཆོས་ཀྱི་གནས། །འོད་བཞི་ཨེ་སོགས་དབྱིབས་སུ་གནས། །ཞེས་གསུངས་པའི་ཕྱིར། སྐད་ཅེས་པ་ཆོས་ཅན། ཁྱོད་ཀྱིས་སྟོན་པ་ཕུན་སུམ་ཚོགས་པ་བསྟན་ཏེ། ཆོས་ཀྱི་འཁོར་ལོའི་དབུས་ན་སྲོག་མི་ཤིགས་པའི་ཐིག་ལེ་དྭངས་མ་ལྔ་འདུས་ཀྱི་ངོ་བོ་ཡི་གེ་ཝཾ་གྱི་དབྱིབས་ཅན་ནི། དཔེར་ན་མར་མེ་གསལ་བྱེད་གཞན་ལ་ལྟོས་མི་དགོས་པ་ལྟར། དེ་ཉིད་རང་ལ་བདེ་བ་གསལ་བར་སྟོན་པའི་བདག་ཉིད་ཡིན་པའི་ཕྱིར་ཏེ། རྒྱ་མཚོ་ལས། མི་ཤིགས་ཐིག་ལེ་ཝཾ་དབྱིབས་ཅན། །རང་ལ་བདེ་བ་གསལ་བྱེད་བདག །ཅེས་གསུངས་པའི་ཕྱིར། བཤད་ཅེས་པ་ཆོས་ཅན། ཁྱོད་ཀྱིས་འཁོར་ཕུན་སུམ་ཚོགས་པ་བསྟན་ཏེ། རྩ་བཞི་ལ་ཀུན་གཞི་དང་། ཡིད་དང་། ཉོན་ཡིད་དང་། སྒོ་ལྔའི་རྣམ་ཤེས་བཞི་གནས་ལ། དེ་དག་གིས་བརྗོད་བྲལ་རྣམ་པར་མི་རྟོག་པའི་ཡེ་ཤེས་གསལ་བར་ཉམས་སུ་མྱོང་བ་ནི་བཤད་པ་དང་འདྲ་བས་འཁོར་དང་། བྱེ་བྲག་ཚོགས་བདུན་ཀུན་གྱི་རྗེས་སུ་འཇུག་པའི་ཡིད་ཀྱི་རྣམ་ཤེས་ནི་སྡུད་པ་པོར་བཞེད་པའི་ཕྱིར་ཏེ། རྒྱ་མཚོ་ལས། མ་ནུ་རྣམ་ཤེས་ཡིད་སོགས་བཞི། །ཡེ་ཤེས་མྱོང་བས་སྡུད་པར་བཤད། །ཅེས་གསུངས་པའི་ཕྱིར། པའི་ཞེས་པ་ཆོས་ཅན། ཁྱོད་ཀྱིས་བསྟན་པ་ཕུན་སུམ་ཚོགས་པ་བསྟན་ཏེ། སྟེང་སྒོ་འཁོར་ལོ་བཞིའི་ཏིང་ངེ་འཛིན་གྱིས་ཉམས་སུ་བླངས་པས་བདེ་གསལ་མི་རྟོག་པའི་ཡེ་ཤེས་ཉམས་སུ་མྱོང་བ་ནི་བསྟན་པར་བཞེད་པའི་ཕྱིར་ཏེ། རྒྱ་མཚོ་ལས། ཡེ་ཤེས་ནམ་མཁའི་གཟུགས་སྐྱེས་པ། །པ་ར་མཱརྠ་དོན་ཟབ་མོ། །ཞེས་གསུངས་པའི་ཕྱིར། དུས་ན་ཞེས་པ་ཆོས་ཅན། ཁྱོད་ཀྱིས་དུས་ཕུན་སུམ་ཚོགས་པ་བསྟན་ཏེ། སྟེང་སྒོའི་བདེ་བ་སྐྱེས་པ་དེའི་ཚེ་དུས་སྔ་ཕྱིར་འཛིན་པའི་རྟོག་པ་དང་བྲལ་བ་ནི་བསམ་གྱིས་མི་ཁྱབ་པའི་དུས་ཡིན་པའི་ཕྱིར་ཏེ། རྒྱ་མཚོ་ལས། བདེ་བའི་དུས་ཉིད་སྔ་ཕྱི་བྲལ། །དུས་གསུམ་ཀུན་གྱི་ངོ་བོར་གནས། །ཞེས་གསུངས་པའི་ཕྱིར། ཞེས་འཆད་པར་བྱེད་པ་ནི་བཤད་མ་ཐག་པའི་གཞུང་འདི་བྱུང་། གཉིས་པ་གསང་བ་ལྟར་ཐབས་ལམ་འོག་སྒོ་དང་སྦྱར་ཏེ་བཤད་པ་ཞེས་བྱ་བ་དེ་ཉིད་འཆད་པར་བྱེད་པ་ལ། འདི་སྐད་བཤད་པའི་དུས་ན། ཞེས་པའི་གཞུང་འདི་བྱུང་། དེའི་དོན་ནི། འདི་ཞེས་པ་ཆོས་ཅན། ཁྱོད་ཀྱིས་གནས་ཕུན་སུམ་ཚོགས་པ་བསྟན་ཏེ། ཡུམ་གྱི་བྷ་ག་ཕྱི་ཁྱམས་ཨེ་གྲུ་གསུམ་ལ་སོགས་ཏེ་ལས་བཞིའི་དབྱིབས་སུ་གནས་པ་ནི་གསང་བའི་སྐུའི་བཞུགས་གནས་ཡིན་པའི་ཕྱིར། དེ་ལྟར་ཡང་ཐལ་རྒྱུད་ལས། འདི་ཞེས་ཉེ་བར་མཚོན་པ་ནི། ཨེ་སོགས་རྣམ་བཞིའི་དབྱིབས་སུ་གནས། །ཞེས་གསུངས་པའི་ཕྱིར་རོ། །སྐད་ཅེས་པ་ཆོས་ཅན། ཁྱོད་ཀྱིས་སྟོན་པ་ཕུན་སུམ་ཚོགས་པ་བསྟན་ཏེ། ཡབ་ཀྱི་རྡོ་རྗེའི་དབུར་ཐིག་ལེ་ཐབས་ཀྱིས་བཟུང་བའི་ཚེ་རྩ་ས་ཡ་ཕྲག་བཅུ་གསུམ་གྱི་བཅུད་འདུས་པའི་ཀུན་རྫོབ་ཡེ་ཤེས་ཀྱི་ཐིག་ལེ་ཝཾ་གྱི་དབྱིབས་ཅན་ནི་ཡབ་ཡུམ་གཉིས་ཀའི་རྒྱུད་ལ་བདེ་བ་གསལ་བར་སྟོན་པའི་བདག་ཉིད་དུ་བཞུགས་པའི་ཕྱིར་ཏེ། ཐལ་རྒྱུད་ལས། སྐད་ཅེས་གསལ་བྱེད་ལས་མིང་ཅན། །ཝཾ་ཡིག་ཐིག་ལེར་བཅས་སྟོན་པའོ། །ཞེས་གསུངས་པའི་ཕྱིར། བཤད་ཅེས་པ་ཆོས་ཅན། ཁྱོད་ཀྱིས་འཁོར་ཕུན་སུམ་ཚོགས་པ་བསྟན་ཏེ། བདེ་བ་སྡོམ་པར་བྱེད་པའི་ལས་ཀྱིས་ཡིད་ལ་སོགས་པ་གསང་བའི་རྣམ་ཤེས་ནི་བདེ་བའི་ཡེ་ཤེས་ཉམས་སུ་མྱོང་བས་འཁོར་དུ་བཤད་པའི་ཕྱིར་ཏེ། ཐལ་རྒྱུད་ལས། མ་ད་མ་ནུ་སྡོམ་བྱེད་ཡིད། །ལས་ཅན་རྣམ་ཤེས་དེ་དག་ལ། །གསལ་བར་གོ་བས་བཤད་པར་འདོད། །ཅེས་གསུངས་པའི་ཕྱིར། དེའི་ཚེ་བདེ་བ་སྡོམ་པར་བྱེད་པའི་ཡིད་ནི་ཉམས་སུ་མྱོང་བའི་ཆོས་རྣམས་བདེ་བར་བསྡུས་ནས་སྟོན་པས་སྡུད་པ་པོ་ཡང་ཡིན་ནོ། །པའི་ཞེས་པ་ཆོས་ཅན། ཁྱོད་ཀྱིས་བསྟན་པ་ཕུན་སུམ་ཚོགས་པ་བསྟན་ཏེ། མྱང་བྱ་སེམས་ལྔ་རྫོགས་པའི་དགའ་བ་བཅུ་དྲུག་གི་མཐའི་སྐད་ཅིག་མ་རང་བཞིན་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་བ་ནི་རང་བཞིན་གསང་བའི་སྙིང་པོའི་དོན་ཡོད་པའི་ཕྱིར་ཏེ། ཐལ་རྒྱུད་ལས། པ་སྒྲ་དོན་དམ་ངེས་པའི་རྒྱུད། །ཡཱ་ན་ཐེག་ཆེན་འདི་ཡིན་ནོ། །ཞེས་གསུངས་པའི་ཕྱིར། དུས་ན་ཞེས་པ་ཆོས་ཅན། ཁྱོད་ཀྱིས་དུས་ཕུན་སུམ་ཚོགས་པ་བསྟན་ཏེ། ལྷན་སྐྱེས་ཀྱི་ཡེ་ཤེས་ཉམས་སུ་མྱོང་བ་དེའི་ཚེ་སྔ་ཕྱིའི་འཛིན་རྟོག་དང་བྲལ་བ་ནི་བསམ་གྱིས་མི་ཁྱབ་པའི་དུས་ཞེས་མིང་དུ་བརྗོད་པ་ཡིན་པའི་ཕྱིར་ཏེ། ཐལ་རྒྱུད་ལས། དུས་ནི་བསམ་གྱིས་མི་ཁྱབ་དུས། །ནཱ་མ་དེ་མིང་ཞེས་བྱའོ། །ཞེས་གསུངས་པའི་ཕྱིར་ཞེས་འཆད་པར་བྱེད་པ་ནི་བཤད་མ་ཐག་པའི་གཞུང་དེ་བྱུང་། གཉིས་པ་དེ་ལ་རྩོད་པ་སྤང་བ་ལ་རྩོད་པ་འགོད་པ་དང་། དེའི་ལན་ནོ། །དང་པོ་ནི། ཁོ་ན་རེ། མདོ་རྒྱུད་གཞན་ཐམས་ཅད་དུ། འདི་སྐད་བདག་གིས་ཐོས་པ་དུས་གཅིག་ན། ཞེས་འབྱུང་བ་ལས། འདིར་དེ་ལྟར་མ་སྨོས་པའི་ཕྱིར། གླེང་གཞི་ལོག་པས་བཀའ་ཡང་དག་པ་མ་ཡིན་ནོ་ཟེར། གཉིས་པ་དེའི་ལན་ལ། གཞན་ལན་ལ་དཔྱད་པ་དང་། རང་ལན་གདབ་པ་གཉིས། དང་པོ་ནི། ལྷ་རྗེ་གླན་ཤཱཀ་བཟང་ན་རེ། བཤད་ཐོས་གཉིས་ཚིག་མི་མཐུན་ཀྱང་སྟོན་པས་འཁོར་ལ་བཤད་པ་དང་། འཁོར་གྱིས་སྟོན་པ་ལས་ཐོས་པ་དོན་མཐུན་གསུངས་ནའང་། ཐོས་པ་ལ་བཤད་པས་མ་ཁྱབ་པའི་ཕྱིར། ལེགས་པར་མི་སེམས་སོ། །ཡང་ལྷ་རྗེ་མདའ་ཏིག་ན་རེ། ཐོས་པ་ལ་མ་རྟོགས་ལོག་རྟོག་ཐེ་ཚོམ་གྱི་སྐྱོན་གསུམ་སྲིད་པ་ལས། འདིར་བཤད་ཅེས་པ་སྟོན་འཁོར་དགོངས་པ་གཉིས་སུ་མེད་པས་ཉིད་ལ་ཉིད་བཤད་པའི་ཕྱིར། སྔར་གྱི་སྐྱོན་གསུམ་རྣམ་པར་བཅད་པའོ་གསུང་ཡང་མི་འཐད་དེ། བཤད་ཙམ་ལ་སྐྱོན་གསུམ་དང་བྲལ་བས་མ་ཁྱབ་ཅིང་། དགོངས་པ་གཉིས་སུ་མེད་པ་ཉིད་ལ་ཉིད་ཐོས་པས་ཉིད་ལ་ཉིད་བཤད་པའི་ཕྱིར། ཡང་ཁྱེད་བླ་མ་དང་རྗེ་སྒྲོ་ཕུག་གི་བཞེད་ཀྱི། སྐུ་གཉིས་ཀྱིས་བསྟན་པའི་ཁྱད་པར་ཡིན་ཏེ། ལོངས་སྐུ་ཚིག་ཏུ་མི་གསུང་བས་རྣ་བས་ཐོས་སུ་མེད་པའི་ཕྱིར་བཤད་ཅེས་དང་། སྤྲུལ་སྐུ་ཚིག་ཏུ་གསུང་བའི་ཕྱིར་ཐོས་བྱ་བར་འོང་བ་ཡིན་གསུངས་ནའང་། ལོངས་སྐུས་གསུངས་པའི་རྒྱུད་དུ་བཤད་ཅེས་འོང་བས་ཁྱབ་ན། ལོངས་སྐུས་གསུངས་པའི་རྒྱུད་ཀུན་དུ། དེ་ལྟར་འབྱུང་རིགས་པ་ལས་མ་བྱུང་བའི་ཕྱིར་སྙམ་དུ་དོགས་སོ། །ཡང་རྗེ་དྲི་ངས་པ་ན་རེ། སྟོན་པའི་དགོངས་པ་བརྡའི་བཤད་པ་སྡུད་པ་པོས་མ་འཕྲི་མ་བསྣན་པར་བཤད་པར་བཞེད་པའང་སྔར་དང་ཞེ་འདོད་གཅིག་མོད། འོན་ཀྱང་འདི་ལ་འགལ་བ་མ་མཐོང་ངོ་། །འོ་ན་ཇི་ལྟར་ཡིན་ཞེ་ན། གཉིས་པ་རང་ལན་གདབ་པ་ནི། གསང་བདག་གིས་བསྡུ་བ་བྱེད་པ་ན་རང་ཉིད་སྟོན་པ་ཉིད་དུ་ཁས་བླངས་ཏེ། སྔར་ངས་འོག་མིན་དུ་བཤད་པ་ཉིད་ཡང་འདིར་བཤད་པར་བྱ་ཞེས་དང་། དུས་ན་ཞེས་པའང་། དུས་རེས་འགའ་བ་མ་ཡིན་ཏེ། རྟག་པ་རྒྱུན་གྱི་འཁོར་ལོར་གསུངས་པའི་དོན་གྱིས། རྒྱུད་གཞན་དང་ཐུན་མོང་མ་ཡིན་པའི་ཕྱོགས་བཟུང་ནས་བསྡུས་པར་མངོན་ཏེ། ཉི་འོད་སེང་གེའི་རྒྱ་ཆེར་འགྲེལ་ལས། བཤད་ཅེས་པས་ནི་འཁོར་དང་སྟོན་པ་གཉིས་སུ་མེད་པར་བསྟན་པ་ཡིན་ལ། ཞེས་སོགས་དང་། སྤར་ཁབ་ལས་ཀྱང་། ཐུན་མོང་མ་ཡིན་པའི་གླེང་གཞི་སྟེ། རྒྱུད་གཞན་ལས་ཁྱད་པར་དུ་གྱུར་པའི་ཕྱིར། བྱས་པ་ལ། ཁོ་ན་རེ། འོ་ན་བདེ་འདུས་ཀྱི་ཞི་བ་འདུས་པ་རྩ་བའི་རྒྱུད་ཀྱི་ཀླད་དུའང་འདི་སྐད་བཤད་པའི་དུས་ན། ཞེས་འབྱུང་རིགས་པར་ཐལ། རྒྱུད་དེར་སྟོན་འཁོར་རྒྱུད་གཅིག་ཏུ་གསུངས་པའི་ཕྱིར་ཏེ། ང་ནི་ཆེ་བའི་རྒྱལ་པོ་སྟེ༔འཆད་དང་ཉན་པའང་ང་ཉིད་ཡིན༔ཞེས་གསུངས་པའི་ཕྱིར་ཟེར་ན། སྐྱོན་མེད་དེ། སྟོན་འཁོར་ཁྱད་མེད་པར་མཚུངས་པ་བདེན་ཡང་། རྒྱུད་འདིར་ནི་ཁྱད་པར་མེད་པར་མཚོན་པའི་ངོས་ནས་སྨོས་ལ། བདེ་འདུས་སོགས་ཐུན་མོང་མ་ཡིན་པའི་རྒྱུད་གཞན་དག་ཏུ་ཁྱད་པར་ཡོད་པར་མཚོན་པའི་ངོས་ནས་སྨོས་པ་ཙམ་དུ་ཟད་དེ། གདུལ་བྱ་མོས་པ་ཐ་དད་ལ་གྲགས་པའི་ཕྱིར། ཁྱབ་པ་མེད་ལན་ཐེབས་པ་ཡིན་ནོ། །གཞན་ཡང་། འདི་སྐད་བདག་གིས་ཐོས་པའི་དུས་གཅིག་ན། ཞེས་མ་སྨོས་པས་བཀའ་ཡང་དག་པ་མ་ཡིན་པར་འགྱུར་ན། བདེ་མཆོག་རྩ་རྒྱུད་དང་། འཇམ་དཔལ་མཚན་བརྗོད་སོགས་ཀྱང་། དེར་ཐལ་དེ་ལྟར་མ་སྨོས་པའི་ཕྱིར་ཏེ། དེ་ནས་གསང་བ་བཤད་པར་བྱ། ཞེས་དང་། དེ་ནས་དཔལ་ལྡན་རྡོ་རྗེ་འཆང་། །ཞེས་གསུངས་པའི་ཕྱིར། དེས་ན་མངོན་རྟོགས་རྒྱན་གྱི་འགྲེལ་པ་ལས། འདི་ནི་རྣམ་པར་བཞག་པ་གཞན་ཁོ་ན་ཡིན་པས། ཐེག་པ་གཞན་གྱི་ལུགས་ལ་བརྟེན་ནས་ནམ་དུའང་སུན་འབྱིན་བརྗོད་པར་མི་བྱའོ། །ཞེས་གསུངས་པ་ལྟར་རོ། །ཞེས་འཆད་པར་བྱེད་པ་ནི། འདི་སྐད་བཤད་པའི་དུས་ན། ཞེས་པའི་གཞུང་འདི་བྱུང་། དེས་ཐུན་མོང་མ་ཡིན་པའི་གླེང་གཞིའི་དོན་བསྟན་པ་སོང་ནས། གཉིས་པ་ཐུན་མོང་གི་གླེང་གཞི་དེ་ཇི་ལྟ་བུ་ཞེ་ན། དེ་འཆད་པ་ལ་གཉིས་ཏེ། རྒྱུད་ཁྱད་པར་གྱི་གླེང་གཞི་དང་། བསྟན་པ་འབྱུང་བ་སྤྱིའི་གླེང་གཞིའོ། །དེའི་དང་པོ་རྒྱུད་ཁྱད་པར་གྱི་གླེང་གཞི་འཆད་པར་བྱེད་པ་ལ། རྒྱུད་ཕྱི་མ་ལས། སྟོན་པ་ལ་སོགས་རབ་དབྱེ་བས། །ཕུན་སུམ་ཚོགས་པ་ལྔར་བརྗོད་དོ། །ཞེས་གསུངས་པ་ལྟར་ཕུན་སུམ་ཚོགས་པ་ལྔའམ། ཡང་ན། ཁོག་གཞུང་ལས། སྟོན་གནས་འཁོར་དང་སྡུད་པ་དང་། །བསྟན་པ་དུས་ཀྱིས་ཤེས་པར་བྱ། །ཞེས་གསུངས་པས་ཕུན་སུམ་ཚོགས་པ་དྲུག་ལྡན་ཏེ། གང་ཞེ་ན། གང་གིས་གསུངས་པའི་སྟོན་པ་བཤད། གང་དུ་གསུངས་པའི་གནས་བཤད། གང་ལ་གསུངས་པའི་འཁོར་བཤད། གང་གསུངས་པའི་བསྟན་པ་བཤད། གང་གི་ཚེ་གསུངས་པའི་དུས་བཤད། གང་གིས་བསྡུས་པའི་སྡུད་པ་པོ་བཤད་པའོ། །དེའི་དང་པོ་གང་གིས་གསུངས་པའི་སྟོན་པ་བཤད་པ་ལའང་། སྟོན་པའི་བདག་ཉིད་དང་། འཆད་པའི་སྐྱེས་བུ་གཉིས་ལས། དང་པོ་སྟོན་པའི་བདག་ཉིད་ནི། བཅོམ་ལྡན་འདས་དྲུག་པ་སྤྱིའི་གཟུགས་ཅན་ཀུན་ཏུ་བཟང་པོ་སྟེ། ཁོག་གཞུང་ལས། སྟོན་པའི་རང་བཞིན་བརྒྱད་དང་ལྡན། །བདག་ཉིད་བྱེད་པ་ཀུན་ཏུ་བཟང་། །ཞེས་གསུངས་པའི་ཕྱིར། དེ་ལའང་དབྱེ་ན་གཉིས་ཏེ། སྟོན་པའི་རང་བཞིན་བཤད་པ་དང་། སྟོན་པའི་ངོ་བོ་བཤད་པའོ། །དང་པོ་སྟོན་པའི་རང་བཞིན་དེ་འཆད་པར་བྱེད་པ་ལ། དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས། ལོངས་སྤྱོད་ཆེན་པོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེའི་བདག་ཉིད་མ་ལུས་མི་ལུས་ལུས་པ་མེད་པ་ཐམས་ཅད་དང་སོ་སོ་མ་ཡིན་ཐ་མི་དད་དབྱེར་མེད་པའི་རང་བཞིན་ཏེ། ཞེས་པའི་གཞུང་འདི་བྱུང་། དེའི་དོན་དེ་ཇི་ལྟ་བུ་ཡིན་ཞེ་ན། སྟོན་པའི་རང་བཞིན་གྱི་གོ་དོན་དང་། དེ་གཏན་ལ་དབབ་པ་གཉིས་ལས། དང་པོ་གོ་དོན་ནི། སྟོན་པ་ཀུན་ཏུ་བཟང་པོ་ཆོས་ཅན། ཁྱོད་ཀྱི་རང་བཞིན་བཤད་དུ་ཡོད་དེ། ཉིད་ཀྱི་དགོངས་པ་རང་བྱུང་གི་ཡེ་ཤེས་དེ་ཉིད་ཆོས་ཅན། འཁོར་འདས་ཀྱིས་བསྡུས་པའི་ཆོས་ཐམས་ཅད་དང་ཆོས་ཉིད་ཐ་མི་དད་པར་གནས་པ་དེ་ཁྱོད་ཀྱི་རང་བཞིན་ཡིན་པའི་ཕྱིར། འོ་ན་སྟོན་པའི་རང་བཞིན་གཏན་ལ་དབབ་པ་དེ་ཇི་ལྟ་བུ་ཞེ་ན། སྤར་ཁབ་ལས། རྒྱལ་བ་དྲུག་པའི་ཡོན་ཏན་མཐའ་ཡས་པའང་མདོར་བདུན་དུ་འདུ་སྟེ། ཞེས་པས། སྟོན་པའི་རང་བཞིན་བདུན་དུ་བཤད་པ་དང་། ཁོག་གཞུང་ལས། སྟོན་པའི་རང་བཞིན་བརྒྱད་དང་ལྡན། །བདག་ཉིད་བྱེད་པ་ཀུན་ཏུ་བཟང་། །ཞེས་པས་ཡང་དག་པ་དང་། རྫོགས་པ་སོ་སོར་ཕྱེ་སྟེ་རང་བཞིན་བརྒྱད་དུ་བཤད་པ་དང་། བི་མ་ལས་འགྲེལ་ཆུང་དུ། བྱང་ཆུབ་མཆོག་གི་ངོ་བོ་དང་། །ཆོས་རྣམས་རོལ་པར་ལོངས་སྤྱོད་དང་། །ཕྱོགས་དུས་བདེ་གཤེགས་བདག་པོ་དང་། །ཆོས་སོ་ཅོག་དང་དབྱེར་མེད་པའོ། །ཞེས་སྟོན་པའི་རང་བཞིན་བཞིར་བཤད་ནའང་། འདིར་བླ་མ་བརྒྱུད་པའི་གདམས་ངག་ལྟར་མདོར་བསྡུ་ན་གཉིས་ཏེ། འདས་པའི་ཆོས་དང་དབྱེར་མི་ཕྱེད་པར་འཆད་པ་དང་། འཁོར་བའི་ཆོས་དང་དབྱེར་མི་ཕྱེད་པར་འཆད་པའོ། །དང་པོ་ལའང་། མཚན་གྱི་རྣམ་གྲངས་ལྔ་སོ་སོར་བསྟན་པ་དང་། སྤྱིར་བསྡུས་ཏེ་མི་ཕྱེད་པར་བསྟན་པའོ། །དང་པོ་མཚན་གྱི་རྣམ་གྲངས་ལྔར་སོ་སོར་བསྟན་པ་ཞེས་བྱ་བ་དེ་ཉིད་འཆད་པར་བྱེད་པ་ལ། དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ལོངས་སྤྱོད་ཆེན་པོ། ཞེས་པའི་གཞུང་འདི་བྱུང་། དེ་ལ་སྟོན་པའི་ཆེ་བའི་ཡོན་ཏན་གྱི་ལྡོག་ཆ་ནས་སྨོས་ན་མཚན་ལྔ་ལས། དེ་བཞིན་ཉིད་དུ་ནར་སོན་པའི་རང་བཞིན་ནི། དེ་བཞིན་གཤེགས་པ་ཞེས་པས་བསྟན་ཏེ། སྤྱིར་ཏ་ཐཱ་ག་ཏའི་སྒྲ་ལས། ཏ་ཐཱ་ནི་དེ་བཞིན། ག་ཏ་ནི་གཤེགས་པའམ། བྱོན་པའམ། མཁྱེན་པའམ། གསུང་བ་ལ་བྱ་སྟེ། སྔོན་གྱི་རྒྱལ་བ་རྣམས་ཇི་ལྟར་བྱང་ཆུབ་ཀྱི་སྤྱོད་པའི་སྒོ་ནས་གཤེགས་པ་དེ་ལྟར་ལམ་མཐུན་པས་གཤེགས་ཤིང་བྱོན་པ་དང་། དེ་བཞིན་ཉིད་ཇི་ལྟར་བར་མཁྱེན་ཅིང་གསུང་པ་དང་། འདོད་ཡོན་གྱི་སྣང་བ་ཇི་ལྟར་སྣང་བ་དེ་ཡི་ཐབས་ཀྱིས་སྤྱད་པས་གཤེགས་པ་དང་། སེམས་ཅན་རྣམས་སྐྱེ་བ་རྣམ་པ་བཞིའི་ཚུལ་གྱིས་སྐྱེ་བ་ལས་དེ་དག་གི་བསམ་པ་དང་མཐུན་པར་མངལ་ནས་སྐྱེ་བ་དེ་བཞིན་དུ་གཤེགས་པ་སོགས་བཤད་ཀྱང་། འདིར་ནི། སྟོན་པ་ཀུན་ཏུ་བཟང་པོ་ཆོས་ཅན། ཁྱོད་ལ་དེ་བཞིན་གཤེགས་པ་ཞེས་བརྗོད་པའི་རྒྱུ་མཚན་ཡོད་དེ། ཁྱོད་ཆོས་ཉིད་དེ་བཞིན་ཉིད་ཀྱི་དོན་སྒྲིབ་བྱེད་ཀྱི་ཞེན་པ་དང་བྲལ་བས་ནར་སོན་ཞིང་། དེའི་ངོ་བོ་མངོན་དུ་གྱུར་པས་ན་གཤེགས་པ་ཞེས་བརྗོད་པ་ཡིན་པའི་ཕྱིར་ཏེ། རྡོ་རྗེ་ལས། དེ་བཞིན་ཉིད་དུ་གཤེགས་པ་ཡང་། །སྣ་ཚོགས་ཞེན་ལས་གྲོལ་བར་བཤད། །ཅེས་དང་། རྒྱུད་ཕྱི་མ་ལས། གང་ཕྱིར་དེ་བཞིན་ཉིད་དུ་གཤེགས། །དེ་བཞིན་གཤེགས་པར་མངོན་པར་བརྗོད། །ཅེས་གསུངས་པའི་ཕྱིར། སྟོན་པ་ཆོས་ཅན། ཁྱོད་ལ་ཡང་དག་པར་རྫོགས་པ་ཟེར་བ་ནི་ཡོན་ཏན་མ་བཙལ་བར་ལྷུན་གྱིས་གྲུབ་པའི་རང་བཞིན་ཡིན་ཏེ། ཁྱོད་རང་བྱུང་གི་ཡེ་ཤེས་ལ་སྤང་བྱ་མ་གྲུབ་པས་མ་ནོར། མི་འགྱུར་མི་བསླུ་བས་ཡང་དག་པ་དང་། དེས་ན་ཐམས་ཅད་འབྲས་བུ་སྐུ་དང་ཡེ་ཤེས་སུ་རང་སྣང་བས་སྤང་ཐོབ་ལྷག་མ་མ་ལུས་པས་ན་དེ་ལྟར་བརྗོད་པའི་ཕྱིར། འདིས་ལྷུན་གྲུབ་རིག་འཛིན་ལས་ཁྱད་པར་དུ་བྱས་པ་ཡིན་ནོ། །སྟོན་པ་ཆོས་ཅན། ཁྱོད་ལ་སངས་རྒྱས་ཞེས་པ་ནི་སྒྲིབ་བྲལ་གྱི་ཡེ་ཤེས་མཐའ་དབུས་མེད་པར་བརྡལ་བའི་རང་བཞིན་ཡིན་ཏེ། སྤྱིར་བུདྡྷའི་སྒྲས། གཉིད་སད་པ་ལྟར་སངས་པ་དང་། པདྨ་ཁ་ཕྱེ་བ་ལྟར་རྒྱས་པའི་དོན་གཉིས་ཀ་ལ་འཇུག་པར། གཞུང་གཞན་ལས། མ་རིག་གཉིད་ལས་སངས་ཕྱིར་དང་། །ཤེས་བྱ་ལ་ཡང་བློ་རྒྱས་ཕྱིར། །ཞེས་གསུངས་པའི་ཕྱིར་དང་། འདིར་ནི་མི་མཐུན་པ་དང་གཉེན་པོ་དབྱེར་མེད་ཀྱང་། དོན་ཇི་བཞིན་པ་མངོན་དུ་བྱས་པའི་སྟོབས་ཀྱིས་སྤང་ཐོབ་མེད་པའི་ཡོན་ཏན་མཐར་ཐུག་པས་ན་དེ་ལྟར་བརྗོད་པའི་ཕྱིར་ཏེ། ལེ་ལག་ལས། མ་རིག་པ་ཉིད་ཡེ་ཤེས་གསལ། །ཉོན་མོངས་སྡུག་བསྔལ་བྱང་ཆུབ་མཆོག །ཅེས་གསུངས་པའི་ཕྱིར་རོ། །སྟོན་པ་ཆོས་ཅན། ཁྱོད་ལ་བཅོམ་ལྡན་འདས་ཞེས་བརྗོད་དེ། སྒྲིབ་པའི་ཆ་ཤས་ཕྲ་མོ་ཙམ་ཡང་མི་གནས་པས་བདུད་བཞི་བཅོམ་ཞིང་ཆེ་བའི་ཡོན་ཏན་གྱི་འབྲས་བུ་ལ་མངའ་མཛད་ཀྱང་། རང་གི་ངོ་བོ་བསྟན་དུ་མེད་པའི་རང་བཞིན་ཡིན་པས་ན་དེ་ལྟར་བརྗོད་པའི་ཕྱིར་ཏེ། རྡོ་རྗེ་ལས་རིམ་ལས། བདུད་བཞི་ལ་སོགས་རིག་པའི་གདེངས་ཀྱིས་བཅོམ། །སྐུ་ལྔ་ལ་སོགས་ཡོན་ཏན་བརྗོད་ལས་འདས། །རང་གི་ངོ་བོ་འདི་ཞེས་བསྟན་དུ་མེད། །ཅེས་གསུངས་པའི་ཕྱིར། སྟོན་པ་ཆོས་ཅན། ཁྱོད་ལ་ལོངས་སྤྱོད་ཆེན་པོ་ཞེས་བརྗོད་པ་ནི་མཉམ་པ་ཉིད་ཀྱི་དོན་མངོན་དུ་མཛད་ཀྱང་སྤྱོད་ཡུལ་དང་བྲལ་བའི་རང་བཞིན་ཡིན་ཏེ། ཁྱོད་འཁོར་འདས་ཀྱི་ཆོས་ཐམས་ཅད་ལ་སྤྱད་བྱ་སྤྱོད་བྱེད་དུ་འཛིན་པའི་ཞེན་པ་དང་བྲལ་བའི་སྒོ་ནས་ལོངས་སྤྱོད་པས་གཞན་ལས་ཆེས་མཆོག་ཏུ་གྱུར་པ་ཡིན་པའི་ཕྱིར་རོ། །དེ་ལྟར་ཡང་འཆི་མེད་མཛོད་ལས། ཆེན་པོ་མཆོག་དང་ཚད་མེད་དང་། །མཁས་མཚོན་སྤྲོ་བའི་ལས་འདི་ཉིད། །ཤིན་ཏུ་རྨད་བྱུང་བྱེད་པ་ནི། །ཆེན་པོ་ཞེས་ནི་བཤད་པ་ཡིན། །ཞེས་གསུངས་པའི་ཕྱིར་རོ། །ཞེས་འཆད་པར་བྱེད་པ་ནི། དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ལོངས་སྤྱོད་ཆེན་པོ། ཞེས་པའི་གཞུང་འདི་བྱུང་། ཁོ་ན་རེ། མཚན་གྱི་རྣམ་གྲངས་ལྔ་སོ་སོར་བསྟན་པ་དེ་ལྟར་ཡིན་ན་འོ་ན་གཉིས་པ་སྤྱིར་བསྡུས་ཏེ་མི་ཕྱེད་པར་བསྟན་པ་དེ་ཇི་ལྟ་བུ་ཞེ་ན། དེ་འཆད་པར་བྱེད་པ་ལ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེའི་བདག་ཉིད། ཅེས་པའི་གཞུང་འདི་བྱུང་། དེའི་དོན་ནི། སྟོན་པ་ཀུན་ཏུ་བཟང་པོ་ཆོས་ཅན། ཁྱོད་ལ་དེ་བཞིན་གཤེགས་པ་ཀུན་གྱི་བདག་ཉིད་གཅིག་དང་དུ་མ་ལས་གྲོལ་བའི་རང་བཞིན་གྱི་མཚན་སྐུ་གསུང་ཐུགས་རྡོ་རྗེའི་བདག་ཉིད་ཅེས་བརྗོད་པའི་རྒྱུ་མཚན་ཡོད་དེ། ཁྱོད་ཕྱོགས་དུས་བདེ་གཤེགས་ཐམས་ཅད་ཀྱི་རྟེན་བྱེད་པའི་ངོས་ནས་སྐུ་ལྔ། བརྡ་སྤྲོད་པའི་ངོས་ནས་གསུང་ལྔ། མི་གཡོ་བའི་ཐུགས་ལྔ། དགོས་འདོད་འབྱུང་བའི་ཡོན་ཏན་ལྔ། གཞན་དོན་མཛད་པའི་ངོས་ནས་ཕྲིན་ལས་ལྔ་སྟེ། འབྲས་ཆོས་ཉེར་ལྔ་པོ་དེ་དག་གཅིག་དང་དུ་མ་དང་བྲལ་ཞིང་། རང་བཞིན་དབྱེར་མི་ཕྱེད་པ། མཚན་ཉིད་སྐྱེ་འཇིག་དང་བྲལ་བ། ངོ་བོ་འདུས་མ་བྱས་པ་རྡོ་རྗེའི་བདག་ཉིད་དུ་གཅིག་པས་ན་དེ་ལྟར་བརྗོད་པའི་ཕྱིར་དང་། དེས་ན་ཀུན་ཏུ་བཟང་པོ་ཆོས་ཅན། ཁྱོད་ལ་སངས་རྒྱས་ཐམས་ཅད་ཀྱི་སྤྱི་གཟུགས་ཅན་ཞེས་བརྗོད་དེ། འབྲས་ཆོས་ཉེར་ལྔ་པོ་ཁྱོད་ཀྱི་དགོངས་པར་རང་བྱུང་གི་ཡེ་ཤེས་སུ་འདུས་ཤིང་རིགས་ལྔ་ཡང་དྲུག་པར་འདུས་པས་ན་དུ་མ་དང་བྲལ་བའི་ཕྱིར། ཡང་དེ་ཆོས་ཅན། ཁྱོད་ལ་རིགས་ཐམས་ཅད་ཀྱི་བདག་པོ་ཞེས་ཀྱང་བརྗོད་དེ། ཁྱོད་ཀྱི་ཡོན་ཏན་གྱི་ཁྱད་པར་ལས་འབྲས་ཆོས་ཉེར་ལྔ་དང་རིགས་ལྔར་མ་འགགས་པར་སྣང་བས་གཅིག་དང་བྲལ་བའི་ཕྱིར་རོ། །ཞེས་འཆད་པར་བྱེད་པ་ནི། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེའི་བདག་ཉིད། ཅེས་པའི་གཞུང་འདི་བྱུང་། དེས་སྟོན་པ་འདས་ཆོས་དང་དབྱེར་མེད་པའི་རང་བཞིན་བསྟན་པ་དེ་སོང་ནས། གཉིས་པ་སྟོན་པ་འཁོར་བའི་ཆོས་དང་དབྱེར་མི་ཕྱེད་པའི་རང་བཞིན་དེ་ཇི་ལྟ་བུ་ཡིན་ཞེ་ན། དེ་འཆད་པར་བྱེད་པ་ལ། མ་ལུས་མི་ལུས་ལུས་པ་མེད་པ་ཐམས་ཅད་དང་སོ་སོ་མ་ཡིན་ཐ་མི་དད་དབྱེར་མེད་པའི་རང་བཞིན་ཏེ། ཞེས་པའི་གཞུང་འདི་བྱུང་། དེའི་དོན་ནི། རྒྱལ་བ་དྲུག་པ་ཆོས་ཅན། ཁྱོད་ཁམས་གསུམ་དང་དུས་གསུམ་གྱིས་བསྡུས་པའི་འཁོར་བའི་ཆོས་ཐམས་ཅད་དང་སོ་སོ་མ་ཡིན་ཐ་མི་དད་དབྱེར་མེད་པའི་རང་བཞིན་ཅན་ཡིན་ཏེ། ཁྱོད་དང་དེ་ལྟ་བུའི་འཁོར་བའི་ཆོས་གཉིས་ཀའང་། ཀུན་རྫོབ་ཏུ་རིག་པ་སྒྱུ་མ་ལྟ་བུ་ཡིན་པས་སོ་སོ་མ་ཡིན། དོན་དམ་པར་སེམས་ཉིད་དུ་མ་སྐྱེས་པ་ཐ་མི་དད། བདེན་པ་གཉིས་ཀྱི་ཐ་སྙད་ལས་འདས་པས་ན་དབྱེར་མེད་པའི་རང་བཞིན་ཅན་ཡིན་པའི་ཕྱིར། གལ་ཏེ་ཁོ་ན་རེ། ཀུན་རྫོབ་ཏུ་སོ་སོ་དང་། དོན་དམ་པ་ཐ་དད་དོ་ཞེ་ན། མི་རིགས་ཏེ། ཀུན་རྫོབ་ཏུ་སོ་སོ་ཡིན་ན། རྒྱས་པ་ལས། སོ་སོའི་རང་བཞིན་ངེས་ཤེས་ན། །ཡང་དག་ལམ་གྱིས་བཅོས་སུ་མེད། །ཅེས་པས་གནོད་ཅིང་། དོན་དམ་པར་ཐ་དད་ནའང་། ཡེ་ནས་ངོ་བོ་ཡོད་ཡིན་ན། །ཉོན་མོངས་སྤང་ཞིང་བྱང་སྒྲུབ་མེད། །ཅེས་པས་གནོད་པའི་ཕྱིར། ཞེས་འཆད་པར་བྱེད་པ་ནི། མ་ལུས་མི་ལུས་ལུས་པ་མེད་པ་ཐམས་ཅད་དང་སོ་སོ་མ་ཡིན་ཐ་མི་དད་དབྱེར་མེད་པའི་རང་བཞིན་ཏེ་ཞེས་པའི་གཞུང་འདི་བྱུང་། འཕྲོས་དོན། འཆད་པའི་སྐྱེས་བུ་རིགས་ལྔ་ཆོས་ཅན། ཁྱོད་ལ་འོག་ཏུ་རང་བཞིན་གཉིས་སུ་མེད་པའི་འཁོར་ཞེས་བརྗོད་པ་ལ་རྒྱུ་མཚན་ཡོད་དེ། རང་བཞིན་བདུན་པོ་དེ་ཀུན་ཏུ་བཟང་པོའི་རང་བཞིན་ཡིན་པ་ལྟར་རིགས་ལྔའི་རང་བཞིན་ཡང་དེ་བདུན་དང་ལྡན་པའི་ཕྱིར། དེས་སྟོན་པའི་རང་བཞིན་བཤད་པ་དེ་སོང་ནས། གཉིས་པ་སྟོན་པའི་ངོ་བོ་བཤད་པ་ཞེས་བྱ་བ་དེ་ཉིད་རྒྱུད་འཁྲུགས་སྡེབས་ཀྱི་མན་ངག་གིས་གཞུང་འོག་ནས་བླངས་ཏེ་འཆད་པར་བྱེད་པ་ལ། སྐུ་མདུན་དང་རྒྱབ་མེད་པ། ཐམས་ཅད་དུ་ཞལ་ཐལ་ལེ་བར་གསལ་ཞིང་མཚན་དང་དཔེ་བྱད་དང་ལྡན་པ། བསམ་གྱིས་མི་ཁྱབ་པ་ཐམས་ཅད་དུ་སྐུ་གསུང་ཐུགས་སྣ་ཚོགས་པ་ཀུན་ཏུ་སྣང་བ། ཐབས་དང་ཤེས་རབ་ཀྱི་ཞབས་གཉིས་མཉམ་པའི་བརྟུལ་ཞུགས་ཀྱི་སྐྱིལ་མོ་ཀྲུང་དུ་བཞུགས་པ། ཡེ་ཤེས་དྲུག་གི་ཕྱག །ཡེ་ཤེས་རིན་པོ་ཆེའི་ཕྱག་རྒྱ་འབར་བ་ཅན་སྐུ་གསུང་ཐུགས་བསམ་གྱིས་མི་ཁྱབ་པའི་དབུ་གསུམ་དང་ལྡན་པ། ཞེས་པའི་གཞུང་འདི་བྱུང་། དེ་ཡང་ངོ་བོ་ལ་གོ་དོན་དང་། གཏན་ལ་དབབ་པ་གཉིས་ལས། དང་པོ་གོ་དོན་ནི། སྟོན་པ་ཆོས་ཅན། ཁྱོད་ཀྱི་ངོ་བོ་བཤད་དུ་ཡོད་དེ། སྔར་སྨོས་པའི་རང་བཞིན་དེ་ཉིད་གདུལ་བྱ་ལ་སྐུ་གསུང་ཐུགས་ཀྱི་མཚན་མ་སྣ་ཚོགས་པར་སྣང་བའི་རྣམ་འགྱུར་གྱི་ཆ་ལ་དེ་སྐད་དུ་བརྗོད་པའི་ཕྱིར། གཉིས་པ་གཏན་ལ་དབབ་པ་ནི། འདི་དག་སྟོན་པའི་ངོ་བོ་ཡང་ཡིན་ལ། འཆད་པའི་སྐྱེས་བུའི་མཚན་ཉིད་ཀྱང་ཡིན་པས་ཐུན་མོང་དུ་སྟོན་ཞེས་སྤར་ཁབ་མཁན་པོ་གསུངས་པ་ལྟར། འདིར་སྟོན་པའི་ངོ་བོ་དང་རིགས་ལྔའི་མཚན་ཉིད་དེ་ཇི་ལྟ་བུ་ཞེ་ན། དེའི་དོན་ཚོམས་བསྡུས་ནས་བཤད་ན་བཞི་སྟེ། སྐུ་གསུམ་གྱི་བདག་ཉིད་ཡིན་པའི་དོན་རྟགས་དང་། ཐབས་ཤེས་གཉིས་སུ་མེད་པའི་དོན་རྟགས་དང་། ཡེ་ཤེས་དྲུག་དང་ལྡན་པའི་དོན་རྟགས་དང་། རྣམ་ཐར་གསུམ་ཆུབ་པའི་དོན་རྟགས་བཤད་པའོ། །དང་པོ་ལའང་། ཆོས་སྐུའི། ལོངས་སྐུའི། སྤྲུལ་སྐུའི་བདག་ཉིད་ཡིན་པའི་དོན་རྟགས་གསུམ་ལས། དང་པོ་ཆོས་སྐུའི་བདག་ཉིད་ཡིན་པའི་དོན་རྟགས་འཆད་པར་བྱེད་པ་ལ། སྐུ་མདུན་དང་རྒྱབ་མེད་པ། ཐམས་ཅད་དུ་ཞལ་ཐལ་ལེ་བར་གསལ་ཞིང་། ཞེས་པའི་གཞུང་འདི་བྱུང་། དེའི་དོན་ནི་སྟོན་པ་དང་འཆད་པའི་སྐྱེས་བུ་རིགས་ལྔ་ཆོས་ཅན། ཁྱོད་ལ་མདུན་རྒྱབ་མེད་པར་ཞལ་ཐལ་ལེ་བར་གསལ་ཚུལ་བཤད་དུ་ཡོད་དེ། བདེ་གཤེགས་རང་སྣང་ལ་སྐུ་མདུན་དང་རྒྱབ་མ་གྲུབ་ཅིང་གདུལ་བྱའི་སྣང་བ་ལ་རིས་མེད་པར་ཐམས་ཅད་དུ་ཞལ་ཐལ་ལེ་བར་གསལ་བས་གཟུགས་སྐུའི་ཡོན་ཏན་མི་འགག་པའི་ཕྱིར་ཏེ། དེ་དང་དེ་ཡེ་ཤེས་ཀྱི་སྐུ་ཡིན་པའི་ཕྱིར། དེ་ལྟར་ཡང་སེང་གེ་རྩལ་རྫོགས་ལས། ཀུན་ཏུ་བཟང་པོའི་ཞལ་ནི་ཕྱོགས་བཅུར་གསལ། །ཀུན་གཟིགས་ཀུན་བཟང་སྐུ་ལ་མདུན་རྒྱབ་མེད། །ཕྱོགས་བཅུ་གང་བར་སྤྱན་གྱིས་རྣམ་པར་གཟིགས། །ཞེས་གསུངས་པའི་ཕྱིར། གཉིས་པ་ལོངས་སྐུའི་བདག་ཉིད་ཡིན་པའི་དོན་རྟགས་ནི། མཚན་དང་དཔེ་བྱད་དང་ལྡན་པ། ཞེས་པས་བསྟན་ཏེ། དེའང་ཐུན་མོང་དང་། ཁྱད་པར་གྱི་མཚན་དཔེ་གཉིས་ལས། དང་པོ་ཐུན་མོང་གི་མཚན་དཔེ་ནི། སྟོན་པ་དང་རིགས་ལྔ་ཆོས་ཅན། ཁྱོད་ལ་ཐུན་མོང་གི་མཚན་དང་དཔེ་བྱད་མངའ་བ་ཡིན་ཏེ། ཕྱག་ཞབས་ཀྱི་འཁོར་ལོ་སོགས་མཚན་སོ་གཉིས་དང་། སེན་མོ་ཟངས་ཀྱི་མདོག་ཅན་སོགས་དཔེ་བྱད་བརྒྱད་ཅུ་མངའ་བ་གང་ཞིག །མཚན་དཔེ་དེ་རྣམས་སྤྲུལ་སྐུ་ལའང་ཡོད་ཅིང་འཁོར་ལོས་སྒྱུར་བའི་རྒྱལ་པོ་སོགས་ལའང་ཕྱོགས་མཐུན་ཙམ་ཡོད་པར་བཤད་པས་ན་ཐུན་མོང་གི་མཚན་དཔེར་ངེས་པའི་ཕྱིར། འོ་ན་ཁྱད་པར་གྱི་མཚན་དཔེ་དེ་ཇི་ལྟ་བུ་ཡིན་ཞེ་ན། དེ་འཆད་པ་ལ་གསུམ་སྟེ། ཕྱིའི་མཚན་དཔེ་བཤད་པ། ནང་གི་བཤད་པ། གསང་བའི་བཤད་པའོ། །དང་པོ་ཕྱིའི་མཚན་དཔེ་ཆོས་ཅན། དེའང་བཤད་དུ་ཡོད་དེ། སྟོན་པའི་ཐུགས་མེ་ལོང་ལྟ་བུ་སོགས་ཡེ་ཤེས་བཞི་པོར་རེ་རེ་ལའང་བཞི་རེར་ཕྱེ་བའི་ཡེ་ཤེས་བཅུ་དྲུག་གི་རྩལ་སེམས་དཔའ་བཅུ་དྲུག་དང་། དེའི་ཡུལ་ཆོས་ཀྱི་དབྱིངས་བཅུ་དྲུག་ལས་སེམས་མ་བཅུ་དྲུག་སྟེ་མཚན་སོ་གཉིས་དང་། སེམས་དཔའ་བཅུ་དྲུག་པོར་ཡེ་ཤེས་ལྔའི་རྟགས་རིགས་ལྔས་དབུ་བརྒྱན་པའི་ལྷ་བརྒྱད་ཅུ་ནི། དཔེ་བྱད་བརྒྱད་ཅུར་འཆད་པའི་ཕྱིར་ཏེ། སྤྱི་མདོ་ལས། མཚན་གྱི་མེ་ཏོག་ལ་དཔེ་བྱད་ཀྱི་འབྲས་བུས་སྤྲས་པའི་ཕྱིར། སྲས་ཀྱི་ཚོགས་ཀྱིས་ཀུན་ནས་བརྒྱན་པའོ། །ཞེས་གསུངས་པའི་ཕྱིར་དང་། འདིར་ཡུམ་བཅུ་དྲུག་ལ་དབུ་རྒྱན་མ་བཤད་དེ། ཆོས་ཀྱི་དབྱིངས་མཚོན་པའི་ཕྱིར་རོ། །ཁོ་ན་རེ། དེ་དག་འཁོར་དུ་འདུག་པ་ལ་འདིར་རྒྱན་དུ་ཅིའི་ཕྱིར་འགྱུར་ཞེ་ན། དོགས་པ་དེའི་སྐྱོན་མེད་དེ། རྒྱན་གྱི་དོན་ནི་མཛེས་བྱེད་ཡིན་པ་གང་ཞིག །འཁོར་དང་འཁོར་གྱི་རྒྱན་ཕུན་སུམ་ཚོགས་པས་གཙོ་བོའི་རང་བཞིན་ཡང་བཀོད་པས་མཛེས་ཤིང་ཕུན་སུམ་ཚོགས་པར་འགྱུར་བའི་ཕྱིར། གཉིས་པ་ནང་གི་མཚན་དཔེ་དེ་ཅི་ལྟ་བུ་ཞེ་ན། དེ་ཆོས་ཅན། བཤད་དུ་ཡོད་དེ། སྤྱི་བོ་བདེ་ཆེན་འཁོར་ལོའི་རྩ་འདབ་སོ་གཉིས་ནི་མཚན་བཟང་པོ་སུམ་ཅུ་རྩ་གཉིས་དང་། ལྟེ་བའི་རྩ་འདབ་རེ་བཞི་ལས་སྟོང་པའི་རྩ་བཞི་ཕྲི་བའི་དྲུག་ཅུ། མགྲིན་པའི་བཅུ་དྲུག །སྙིང་གའི་རྩ་ཆེན་བཞི་སྟེ་བརྒྱད་ཅུ་ནི་དཔེ་བྱད་བཟང་པོ་བརྒྱད་ཅུར་གསུངས་པའི་ཕྱིར་ཏེ། ཐལ་རྒྱུད་ལས། སྒྲ་དབྱངས་གསུང་གི་གནས་བཞི་ཡི། །དབྱེ་བས་གསུམ་གསུམ་ངོས་གཉིས་དང་། །བཞི་བཅུ་གཉིས་སུ་གྱུར་པ་ཡིན། །ཞེས་གསུངས་པའི་ཕྱིར། གསུམ་པ་གསང་བའི་མཚན་དཔེ་བཤད་པ་ནི། དེ་ཆོས་ཅན། ཁྱོད་སྟོན་པ་ཡབ་ཡུམ་གཉིས་རོལ་པའི་དུས་ཀྱི་དགའ་བ་ལ་རྩི་བ་ཡིན་ཏེ། ཡབ་ཡུམ་གཉིས་ཀྱི་དགའ་བ་བཅུ་དྲུག་བཅུ་དྲུག་ནི་མཚན་སོ་གཉིས། ཡབ་ཀྱི་དགའ་བ་རེ་རེ་ལའང་ཡེ་ཤེས་ལྔ་ལྔའི་རོ་དང་ལྡན་པ་ནི་དཔེ་བྱད་བརྒྱད་ཅུར་གསུངས་པའི་ཕྱིར་ཏེ། རྒྱ་མཚོ་ལས། ཨཱ་ལི་ཀཱ་ལི་བདེ་བ་ཉིད། །ཕན་ཚུན་མ་འདྲེས་གཅིག་པར་ཤེས། །བཅུ་དྲུག་ངོས་གཉིས་མཚན་དང་ལྡན། །ཕྱོགས་གཅིག་ཡེ་ཤེས་ལྔ་ལྡན་པ། །བརྒྱད་ཅུའོ་བཟོད་སོགས་རྒྱུ་ལས་འཕགས། །ཞེས་གསུངས་པའི་ཕྱིར་བྱས་པ་ལ། ཁོ་ན་རེ། ནང་དང་གསང་བའི་མཚན་དཔེ་དེ་རྣམས་རྩ་ཁམས་ཀྱི་རང་བཞིན་དུ་འདུག་པ་ལ་རྒྱན་དུ་ཇི་ལྟར་འགྱུར་ཞེ་ན། དེ་རྣམས་རྒྱན་དུ་འགྱུར་ཚུལ་ཡོད་དེ། ལོངས་སྤྱོད་རྫོགས་པའི་སྐུ་ལ་རྩ་ཁམས་རྣམ་པར་དག་པ་བདེ་བ་ཆེན་པོའི་རང་བཞིན་དུ་རོ་མཉམ་པ་ནི་རྒྱན་གྱི་ནང་ནས་མཛེས་བྱེད་མཆོག་ཏུ་གྱུར་པ་ཡིན་པས་ན་དེ་ལྟར་བརྗོད་པའི་ཕྱིར། འོ་ན་ཕྱི་ནང་གསང་བའི་མཚན་དཔེ་དེ་རྣམས་ལ་ཁྱད་པར་ཞེས་བརྗོད་པའི་རྒྱུ་མཚན་གང་ཞེ་ན། དེའང་བཤད་དུ་ཡོད་དེ། མཚན་དཔེ་དེ་རྣམས་སྟོན་པ་དང་འཆད་པའི་སྐྱེས་བུ་ཁོ་ནའི་འཕགས་ཆོས་ཡིན་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། གསུམ་པ་སྤྲུལ་སྐུའི་བདག་ཉིད་ཡིན་པའི་དོན་རྟགས་ནི། བསམ་གྱིས་མི་ཁྱབ་པ་ཐམས་ཅད་དུ་སྐུ་གསུང་ཐུགས་སྣ་ཚོགས་པར་ཀུན་ཏུ་སྣང་བ། ཞེས་པས་བསྟན་ཏེ། དེའི་དོན་ནི། སྟོན་པ་དང་འཆད་པའི་སྐྱེས་བུ་ཆོས་ཅན། ཁྱོད་སྤྲུལ་པ་ཐམས་ཅད་ཀྱི་འབྱུང་གནས་ཡིན་ཏེ། ཁྱོད་ཀྱི་མཛད་པའི་སྣང་ཚུལ་ནི་རྣམ་པར་འཕྲུལ་པ་བསམ་གྱིས་མི་ཁྱབ་ཅིང་ཚད་མེད་པར་སྣང་བའི་ཕྱིར་རོ། །དེ་ལྟར་ཡང་སྡོང་པོ་བཀོད་པ་ལས། སྤུ་ཡི་རྩེ་མོ་གཅིག་ལ་ཡང་། །ཞིང་རྣམས་བྱེ་བ་བསམ་མི་ཁྱབ། །སྣ་ཚོགས་དབྱིབས་ཀྱང་ཐ་དད་དེ། །དེ་དག་འདྲེས་པར་གྱུར་པ་མེད། །ཅེས་དང་། གསང་བ་བསམ་གྱིས་མི་ཁྱབ་པའི་མདོ་ལས་ཀྱང་། ཞི་བའི་བློ་གྲོས། ནམ་མཁས་ཇི་ཙམ་ཁྱབ་པ་དེ་ཙམ་དུ་དེ་བཞིན་གཤེགས་པའི་སྐུས་ཁྱབ་བོ། །ཞེས་སོགས་རྒྱ་ཆེར་གསུངས་པ་ཡིན་པའི་ཕྱིར། གཉིས་པ་ཐབས་ཤེས་གཉིས་སུ་མེད་པའི་དོན་རྟགས་ནི། ཐབས་དང་ཤེས་རབ་ཀྱི་ཞབས་གཉིས་མཉམ་པའི་བརྟུལ་ཞུགས་སྐྱིལ་མོ་ཀྲུང་དུ་བཞུགས་པ། ཞེས་པས་བསྟན་ཏེ། དོན་ནི་ཐབས་ཤེས་གཉིས་སུ་མེད་པའི་དོན་རྟགས་ཆོས་ཅན། དེ་བཤད་དུ་ཡོད་དེ། ཐབས་སྙིང་རྗེ་ཆེན་པོ་དང་། ཤེས་རབ་སྟོང་པ་ཉིད་ཀྱི་ཡེ་ཤེས་ཀྱི་བརྡར་ཞབས་གཉིས་ཡབ་ཡུམ་གཉིས་ཀ་བཞེངས་པ་ལྟ་བུ་མ་ཡིན་པར་སྐྱིལ་ཀྲུང་དུ་མཚུངས་པར་བཞུགས་ནས་འཁྲིལ་བ་ཡིན་པའི་ཕྱིར་ཏེ། ཐར་ལོའི་འགྱུར་ལས། ཐབས་དང་ཤེས་རབ་ཀྱི་ཞབས་གཉིས་མཚུངས་པར་སྐྱིལ་ཀྲུང་དུ་བཅིངས་ནས་སྙོམས་པར་འཇུག་ཅིང་བཞུགས་པ། ཞེས་གསུངས་པའི་ཕྱིར། འཕྲོས་དོན་གཙོ་འཁོར་རྣམས་ཀྱི་སྐྱིལ་ཀྲུང་བཅིང་ཚུལ་ཆོས་ཅན། བཤད་དུ་ཡོད་དེ། རིགས་དྲུག་པ་རྡོ་རྗེའི་སྐྱིལ་ཀྲུང་དང་། ཡུམ་པདྨའི་སྐྱིལ་ཀྲུང་། འཆད་པའི་སྐྱེས་བུ་རིགས་ལྔ་ཡབ་རྣམས་མཉམ་པའམ་རྫོགས་པའི་སྐྱིལ་ཀྲུང་དང་། ཡུམ་རྣམས་བརྟུལ་ཞུགས་ཀྱི་སྐྱིལ་ཀྲུང་གིས་གཡོན་ཕྱོགས་ནས་འཁྱུད་པ་ཡིན་པའི་ཕྱིར། གསུམ་པ་ཡེ་ཤེས་དྲུག་དང་ལྡན་པའི་དོན་རྟགས་ནི། ཡེ་ཤེས་དྲུག་གི་ཕྱག་ཡེ་ཤེས་རིན་པོ་ཆེའི་ཕྱག་རྒྱ་འབར་བ་ཅན། ཞེས་པས་བསྟན་ཏེ། དེའི་དོན། ཡེ་ཤེས་དྲུག་དང་ལྡན་པའི་དོན་རྟགས་ཆོས་ཅན། དེ་བཤད་དུ་ཡོད་དེ། ཡེ་ཤེས་ལྔ་རང་བྱུང་གི་ཡེ་ཤེས་དང་དྲུག་ལྡན་པའི་རྟགས་སུ་ཕྱག་དྲུག་དང་། དེས་འགྲོ་དོན་མཛད་པའི་རྟགས་སུ་ཕྱག་མཚན་དྲུག་འཛིན་པ་ཡིན་པའི་ཕྱིར། འོ་ན་ཕྱག་མཚན་དྲུག་པོ་གང་ཞེ་ན། དེ་ཆོས་ཅན། བཤད་དུ་ཡོད་དེ། རིགས་ལྔ་ཡེ་ཤེས་ལྔའི་མཚན་མར་གྱུར་པའི་རྡོ་རྗེ་སོགས་ལྔ་དང་། ཆོས་ཀྱི་དབྱིངས་ཀྱི་ཕྱག་རྒྱ་དྲིལ་བུ་སྟེ་དྲུག་ལ་བཞག་པའི་ཕྱིར་ཏེ། སྒྱུ་འཕྲུལ་རོལ་པ་ཆེན་པོའི་རྒྱུད་ལས། ཡེ་ཤེས་དྲུག་གི་བདག་ཉིད་ཀྱི། །ཕྱག་རྒྱ་རིན་ཆེན་འབར་བའི་མཚན། །རྡོ་རྗེ་འཁོར་ལོ་རིན་པོ་ཆེ། །དྲིལ་བུ་པདྨ་རལ་གྲི་འབར། །ཞེས་གསུངས་པ་ཡིན་པའི་ཕྱིར། བཞི་པ་རྣམ་ཐར་གསུམ་ཆུབ་པའི་དོན་རྟགས་ནི། སྐུ་གསུང་ཐུགས་བསམ་གྱིས་མི་ཁྱབ་པའི་དབུ་གསུམ་དང་ལྡན་པ། ཞེས་པས་བསྟན་ཏེ། དེའི་དོན། སྟོན་པ་དང་འཆད་པའི་སྐྱེས་བུ་ཆོས་ཅན། ཁྱོད་ལ་རྣམ་ཐར་གསུམ་ཆུབ་པའི་དོན་རྟགས་བཤད་དུ་ཡོད་དེ། སྐུ་སྟོང་པ་ཉིད་དང་། གསུང་མཚན་མ་མེད་པ་དང་། ཐུགས་སྨོན་པ་མེད་པ་གསུམ་ནི་བློའི་སྤྱོད་ཡུལ་ལས་འདས་པ་བསམ་གྱིས་མི་ཁྱབ་ལ། དེ་གསུམ་གྱི་མཚན་མར་དབུ་དཀར་དམར་མཐིང་གསུམ་གྱི་ཁ་དོག་ཏུ་བསྟན་པའི་ཕྱིར། ཞེས་ཚོམས་བཞིར་བསྡུས་ནས་སྟོན་པའི་ངོ་བོ་རྣམས་དེ་འཆད་པར་བྱེད་པ་ནི། སྐུ་མདུན་དང་རྒྱབ་མེད་པ་ཐམས་ཅད་དུ་ཞལ་ཐལ་ལེ་བར་གསལ་ཞིང་མཚན་དང་དཔེ་བྱད་དང་ལྡན་པ། བསམ་གྱིས་མི་ཁྱབ་པ་ཐམས་ཅད་དུ་སྐུ་གསུང་ཐུགས་སྣ་ཚོགས་པར་ཀུན་ཏུ་སྣང་བ། ཐབས་དང་ཤེས་རབ་ཀྱི་ཞབས་གཉིས་མཉམ་པའི་བརྟུལ་ཞུགས་ཀྱི་སྐྱིལ་མོ་ཀྲུང་དུ་བཞུགས་པ། ཡེ་ཤེས་དྲུག་གི་ཕྱག་ཡེ་ཤེས་རིན་པོ་ཆེའི་ཕྱག་རྒྱ་འབར་བ་ཅན། སྐུ་གསུང་ཐུགས་བསམ་གྱིས་མི་ཁྱབ་པའི་དབུ་གསུམ་དང་ལྡན་པ། ཞེས་པའི་གཞུང་འདི་བྱུང་། དེ་དག་གིས་ནི་སྟོན་པ་ཕུན་སུམ་ཚོགས་པ་རྒྱས་པར་བསྟན་པ་ཡིན་ཏེ། ཐལ་རྒྱུད་ལས། འཁོར་ལོའི་ལྟེ་བར་མི་འཇིགས་སྟེང་། །བདག་པོ་ཀུན་བཟང་འཁོར་རྣམས་ལ། །ཀུན་འབྱུང་སྒྱུ་འཕྲུལ་སྟོན་པའི་ཚེ། །མི་བསྐྱོད་རྒྱལ་པོ་མདུན་ན་གནས། །ཞེས་པས་རྒྱུད་ཀྱི་སྟོན་པ་རིགས་དྲུག་པ་ཀུན་བཟང་དང་། འཆད་པའི་སྐྱེས་བུ་ནི། ཁོག་གཞུང་ལས། འཆད་པའི་སྐྱེས་བུ་རིགས་ལྔ་སྟེ། ཞེས་པས་སྤྱིར་རིགས་ལྔ་ཆར་ཡིན་ཡང་། ཁྱད་པར་ཐུགས་ཀྱི་སྒྱུ་འཕྲུལ་གྱི་སྐབས་འདིར་མི་བསྐྱོད་པ་མདུན་ན་བཞུགས་སོ། །ཁོ་ན་རེ། འོ་ན་གཉིས་པ་འཆད་པའི་སྐྱེས་བུ་དེ་ཇི་ལྟ་བུ་ཡིན་ཞེ་ན། རིགས་ལྔ་ཡབ་ཡུམ་སྟེ། ཁོག་གཞུང་ལས། མཚུངས་པ་བཞི་དང་ལྡན་པའི་ཕྱིར། །ལྔས་ཀྱང་བསྟན་པ་གསུང་མི་འགལ། །ཞེས་གསུངས་པའི་ཕྱིར། དེ་ལ་གཉིས་ཏེ། རིགས་ཀྱི་ཡབ་ལྔ་བཤད་པ་དང་། ཡུམ་ལྔ་བཤད་པའོ། །དེའི་དང་པོ་རིགས་ཀྱི་ཡབ་ལྔ་འཆད་པར་བྱེད་པ་ལ། བཅོམ་ལྡན་འདས་དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་དང་། དེ་བཞིན་གཤེགས་པ་གཟུགས་ཀྱི་རྒྱལ་པོ་དང་། དེ་བཞིན་གཤེགས་པ་ཚོར་བའི་རྒྱལ་པོ་དང་། དེ་བཞིན་གཤེགས་པ་འདུ་ཤེས་ཀྱི་རྒྱལ་པོ་དང་། དེ་བཞིན་གཤེགས་པ་འདུ་བྱེད་ཀྱི་རྒྱལ་པོ་དང་། ཞེས་པའི་གཞུང་འདི་བྱུང་། དེའི་དོན་ལ་གསུམ་སྟེ། རྟོག་པ་བཤད་པ། དེ་ལྷར་དག་ཚུལ་བཤད་པ། དེའི་རིགས་ཀྱི་དབྱེ་བ་བཤད་པའོ། །དང་པོ་ནི། རྒྱུད་ཕྱི་མ་ལས། གཟུགས་དང་ཚོར་བ་འདུ་ཤེས་དང་། །འདུ་བྱེད་རྣམ་པར་ཤེས་པ་ཉིད། །ཕུང་པོ་ལྔ་ཞེས་རབ་ཏུ་བརྗོད། །ཅེས་པའི་དོན་བཤད་ན། རྣམ་ཤེས་ཆོས་ཅན། ཁྱོད་ལ་དབྱེ་ན་ཡུལ་རྣམ་པར་རིག་པའི་མཚན་ཉིད་ཅན་གྱི་ཚོགས་བརྒྱད་ཡོད་དེ། ཀུན་གཞི། ཉོན་ཡིད། ཡིད། སྒོ་ལྔའི་རྣམ་ཤེས་རྣམས་སུ་ཡོད་པའི་ཕྱིར། གཟུགས་སུ་རུང་བའི་མཚན་ཉིད་ཅན་གྱི་གཟུགས་ཆོས་ཅན། ཁྱོད་ལ་དབྱེ་ན་བཅོ་ལྔ་ཡོད་དེ། རྒྱུའི་གཟུགས་འབྱུང་བ་བཞི་དང་། འབྲས་གཟུགས་ནི་མཛོད་ལས། གཟུགས་ནི་དབང་པོ་ལྔ་དང་དོན། །ལྔ་དང་རྣམ་རིག་བྱེད་མིན་ཉིད། །ཅེས་པ་ལྟར་བཅུ་གཅིག་རྣམས་སུ་ཡོད་པའི་ཕྱིར། ཉམས་སུ་མྱོང་བའི་མཚན་ཉིད་ཅན་གྱི་ཚོར་བ་ཆོས་ཅན། ཁྱོད་ལ་དབྱེ་ན་གསུམ་སྟེ། བདེ་སྡུག་བར་མ་གསུམ་དུ་ཡོད་པའི་ཕྱིར། ཡུལ་ལ་མཚན་མར་འཛིན་པའི་མཚན་ཉིད་ཅན་གྱི་འདུ་ཤེས་ཆོས་ཅན། ཁྱོད་ལ་དབྱེ་ན་གསུམ་སྟེ། རྒྱ་ཆེ་ཆུང་ཚད་མེད་གསུམ་དུ་ཡོད་པའི་ཕྱིར། མངོན་པར་འདུ་བྱེད་པའི་མཚན་ཉིད་ཅན་གྱི་སེམས་པ་ཆོས་ཅན། ཁྱོད་ལ་དབྱེ་ན་ལྔ་བཅུ་རྩ་གཅིག་སྟེ། ཀུན་འགྲོ་ལྔ། ཡུལ་ངེས་ལྔ། དགེ་བ་བཅུ་གཅིག །རྩ་ཉོན་དྲུག །ཉེ་ཉོན་ཉི་ཤུ། གཞན་འགྱུར་བཞི་རྣམས་སུ་ཡོད་པའི་ཕྱིར། དེ་ལྟར་སེམས་བྱུང་ལྔ་བཅུ་རྩ་གཅིག་ལས། ཚོར་བ་དང་འདུ་ཤེས་གཉིས་ཕྲི་བའི་ལྷག་མ་བཞི་བཅུ་རྩ་དགུ་ནི་འདུ་བྱེད་ཀྱི་ཕུང་པོའོ། །ཁོ་ན་རེ། ཀུན་འགྲོ་ལྔ་ལས་ཚོར་འདུ་གཉིས་ཕུང་པོར་ལོགས་སུ་འཇོག་པའི་རྒྱུ་མཚན་གང་ཞེ་ན། བཤད་དུ་ཡོད་དེ། མཛོད་ལས། རྩོད་པའི་རྩ་བར་གྱུར་པ་དང་། །འཁོར་བའི་རྒྱུ་ཕྱིར་རིམ་རྒྱུའི་ཕྱིར། །སེམས་བྱུང་རྣམས་ལས་ཚོར་བ་དང་། །འདུ་ཤེས་ལོགས་ཤིག་ཕུང་པོར་བཞག །ཅེས་གསུངས་པའི་ཕྱིར། དེ་ལྟར་བགྲངས་པས་ཕུང་པོ་ལྔ་ལ་ཡན་ལག་བརྒྱད་ཅུར་འགྱུར་ཏེ། སྤར་ཁབ་ལས། དེ་དག་རང་གི་ཡན་ལག་བརྒྱད་ཅུ་དང་བཅས་པ་ཉིད། རྫོགས་པའི་སངས་རྒྱས་ལྔ་རུ་གྲགས། ཞེས་གསུངས་པའི་ཕྱིར། ཁོ་ན་རེ། གཞུང་གཞན་རྣམས་སུ་ཕུང་པོའི་གོ་རིམ་དང་པོར་གཟུགས་ཕུང་སྨོས་ན། འདིར་རྣམ་པར་ཤེས་པ་དང་པོར་སྨོས་པ་གང་ཞེ་ན། བཤད་དུ་ཡོད་དེ། འདི་ལས་ཕྱི་རོལ་དུ་གྱུར་པའི་ཐུན་མོང་གི་ཐེག་པ་ལས་ཁྱད་པར་དུ་འཕགས་པར་སྟོན་པའི་ཕྱིར་ཏེ། ཉི་འོད་སེང་གེའི་འགྲེལ་པ་ལས། ཕྱི་རོལ་པ་དག་གཟུང་བའི་དོན་རགས་པ་དག་ལ་གཙོ་བོར་འདོད་པ་ཡིན་ལ། འདིར་ནི་འཛིན་པའི་གཞི་རྩ་བའི་རྣམ་པར་ཤེས་པ་གཙོ་བོར་འདོད་པ་ཡིན་པས། འགལ་བ་མ་ཡིན་པ་དང་། ཐེག་པ་ཆེན་པོ་སངས་རྒྱས་ཀྱི་བཀར་བཞེད་པ་ཡིན་ནོ། །ཞེས་གསུངས་པའི་ཕྱིར། གཉིས་པ་དེ་ལྷར་དག་ཚུལ་བཤད་པ་དེ་ཇི་ལྟ་བུ་ཡིན་ཞེ་ན། དེ་འཆད་པ་ལ། གཞན་ལུགས་དགག་པ་དང་། རང་ལུགས་བཞག་པ་གཉིས། དང་པོ་ནི། རྗེ་འཁོན་སྟོན་ན་རེ། འདིའི་སྐབས་ཀྱི་རྣམ་ཤེས་ནི་ཚོགས་བརྒྱད་མ་ཡིན་ཏེ་སྒོ་ལྔའི་རྣམ་ཤེས་སོ། །གལ་ཏེ་ཚོགས་བརྒྱད་དུ་འདོད་ན། མི་བསྐྱོད་པའི་རྒྱུད་ལ་ཀུན་གཞི་ཡོད་པའི་ཕྱིར། དགྲ་བཅོམ་པ་མ་ཡིན་པར་ཐལ་བ་དང་། ཉོན་ཡིད་ཡོད་པའི་ཕྱིར། སྒྲིབ་གཉིས་སྤངས་པའི་གང་ཟག་མ་ཡིན་པར་ཐལ་བའི་སྐྱོན་ཡོད་དོ། །གསུངས་ནའང་ཐུན་མོང་གི་གཞུང་དང་བསྟུན་པར་ཟད་ཀྱི། འདིར་ནི་ཤིན་ཏུ་མི་རིགས་ཏེ། དམྱལ་བའི་ཐུབ་པ་ཆོས་ཅན། ཁྱོད་ཀྱི་རྒྱུད་ལ་ཞེ་སྡང་མེད་པར་ཐལ། ཁྱོད་ཞེ་སྡང་ཟད་པར་སྤངས་པའི་གང་ཟག་ཡིན་པའི་ཕྱིར་ཏེ། ཁྱོད་སངས་རྒྱས་འཕགས་པ་ཡིན་པའི་ཕྱིར། ཞེས་རྟོག་པ་ཐམས་ཅད་ལ་མགོ་མཚུངས་པའི་ཕྱིར་མི་འཐད་དོ། །ལུང་དང་ཡང་འགལ་ཏེ། ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །ཞེས་དང་། རྒྱ་ཆེར་འགྲེལ་ལས། རྣམ་པར་ཤེས་པའི་རྒྱལ་པོ་ནི། དཔལ་རྡོ་རྗེ་སེམས་དཔའ་ཀུན་གཞི་རྣམ་པར་དག་པའོ། །དེ་ཡང་ཡོངས་སུ་མ་དག་པའི་དུས་ན་ནི། འཁོར་བའི་ཆོས་ཐམས་ཅད་ཀྱི་རྩ་བ་ཡིན་ལ། ཡོངས་སུ་དག་པའི་དུས་ན་ནི། མྱ་ངན་ལས་འདས་པའི་ཆོས་ཐམས་ཅད་ཀྱི་རྩ་བའོ། །ཞེས་གསུངས་པའི་ཕྱིར། དེ་བས་ན། ཐེག་པ་འདིའི་ལུགས་ཀྱི་ཀུན་གཞི་ཉིད་ཆོས་ཀྱི་དབྱིངས་ཀྱི་ཡེ་ཤེས་སུ་ཡེ་ནས་དག་པས་སྤང་གཉེན་དུ་མི་འདོད་དེ། འཆིང་གྲོལ་ལས་འདས་པའི་ཕྱིར་དང་། རང་གི་ཊཱི་ཀར་ཡང་། རྡོ་རྗེ་ཕུང་པོའི་ཡན་ལག་ནི། །ཞེས་པའི་ཡན་ལག་འདྲེན་པའི་ཚེ། བརྒྱད་ཅུར་བགྲངས་པ་དང་ནང་འགལ་ཏེ། ཀུན་གཞི་དང་ཉོན་ཡིད་འཕྲི་བས། རྟོག་པ་དོན་བརྒྱད་ལས་མ་བྱུང་བའི་ཕྱིར་རོ། །གཉིས་པ་རང་ལུགས་བཞག་པ་ནི། རྟོག་ཚོགས་ཕུང་པོ་ལྔའི་རང་བཞིན་ཡེ་ཇི་བཞིན་པའི་རིགས་ལྔ་ཡིན་པ་ལས། ཁྱད་པར་དུ་རྒྱུད་དག་པའི་སངས་རྒྱས་ལྔའི་འབྲས་བུ་མངོན་དུ་བྱས་ཏེ་མཐར་ཕྱིན་པར་གྱུར་པའམ། དེ་ལྟ་བུའི་རྟོག་པ་ལ་ཐུགས་རང་རིག་པའི་ཡེ་ཤེས་ཀྱིས་རང་དབང་བསྒྱུར་ཞིང་། ཟག་མེད་ཀྱི་ཆོས་ལ་མངའ་བརྙེས་པས་བདེ་བ་ཆེན་པོར་ལོངས་སྤྱོད་པས་ན་རྒྱལ་པོ་ཞེས་བྱའོ། །གལ་ཏེ་ཁོ་ན་རེ། གཞུང་འདིར་ལྷའི་མཚན་ནས་མི་སྨོས་པར་རྟོག་པའི་མཚན་ནས་སྨོས་པ་ལ་རྒྱུ་མཚན་ཅི་ཡོད་ཅེ་ན། ལན་ལ། བླ་མ་འགའ་ཞིག་འདིར་རྒྱལ་པོ་དང་། འོག་ཏུ་ཆེན་པོ་ཞེས་སོགས་གསུངས་པས། རྟོག་པའི་མཚན་ནས་སྨོས་པ་མ་གྲུབ་སྟེ། དཔེར་ན་མྱ་ངན་ལས་འདས་པ་ཞེས་པས་སངས་རྒྱས་ལ་མྱ་ངན་གྱི་མིང་གིས་བརྗོད་པ་མ་ཡིན་པ་བཞིན་ནོ་གསུངས། དོན་དུ་འདི་ཡིན་ཏེ། མ་དག་པ་འཁོར་བའི་གནས་སྐབས་སུའང་རྟོག་ཚོགས་རྣམས་རང་བཞིན་གྱིས་རྣམ་པར་དག་པས་སྐུ་དང་ཡེ་ཤེས་ཀྱི་དཀྱིལ་འཁོར་དུ་རྫོགས་པར་གསང་སྔགས་ཀྱི་རྒྱུད་རྣམས་སུ་གསུངས་པར་མ་ཟད། ངེས་དོན་གྱི་མདོ་སྡེ་ཟབ་མོ་རྣམས་ལས་ཀྱང་འབྱུང་སྟེ། འདི་ལྟར་སྡོང་པོ་བཀོད་པ་ལས། གཟུགས་དང་ཚོར་བ་འདུ་ཤེས་དང་། །རྣམ་པར་ཤེས་དང་སེམས་པ་ནི། །གྲངས་མེད་དེ་བཞིན་གཤེགས་པ་རྣམས། །དེ་དག་ཐུབ་པ་ཆེན་པོར་འགྱུར། །ཞེས་དང་། བྱམས་པ་སེང་གེ་སྒྲའི་མདོ་ལས་ཀྱང་། གལ་ཏེ་དེ་བཞིན་གཤེགས་པ་མཆོད་པར་འདོད་པ་དེས་བདག་ཉིད་མཆོད་པར་བྱའོ། །ཞེས་དང་། དྲི་མ་མེད་པར་བསྟན་པའི་མདོ་ལས། འཇིགས་ཚོགས་ལ་ལྟ་བ་ནི་དེ་བཞིན་གཤེགས་པའི་གདུང་ངོ་། །ཞེས་སོགས་རྒྱ་ཆེར་གསུངས་པའི་ཕྱིར། དེས་ན་འདིར་རྟོག་པའི་མཚན་ནས་སྨོས་པའི་དགོས་པ་ནི། སྤར་ཁབ་ལས། ཀུན་གཞི་ལ་སོགས་པའི་རྟོག་པ་ལྔ་སྨོས་པ་ནི། རང་བཞིན་དང་ཐུན་མོང་མ་ཡིན་པའི་ཕྱིར་སྨོས་པ་སྟེ། དེ་དག་ཀར་དག་པ་ཐུགས་སུ་ཆུད་པ་ལ་རྡོ་རྗེ་འཛིན་པ་ལ་སོགས་པར་རང་སྣང་བའི་ཕྱིར་རོ། །ཞེས་པས་རང་བཞིན་ཤེས་བྱའི་གཤིས་ལ། རྟོག་པ་དང་ལྷ་གཉིས་སྣང་ན་སྣང་མཉམ། སྟོང་ན་སྟོང་མཉམ། བཟང་ངན་མེད་པར་མཉམ་པའི་ཕྱིར་དང་། ཐུན་མིན་གྱི་ཐེག་པ་འདིར་ལམ་པས་ལྷ་རྟོག་དབྱེར་མེད་དུ་ངོས་ཟིན་པར་བྱ་བའི་ཕྱིར་དང་། འབྲས་བུ་མཐར་ཕྱིན་པའི་དུས་ན་རྟོག་པ་ཉིད་མ་སྤངས་མ་བསྒྱུར་བར་ལྷའི་དཀྱིལ་འཁོར་དུ་རང་སྣང་བའི་ཕྱིར་སྨོས་པའོ། །རྟོག་ཚོགས་ལྷར་སྣང་བའི་འཐད་པ་དེ་གང་ཡིན་ཞེ་ན། དེ་ལ་གཉིས་ཏེ། ཕྱི་རོལ་གྱི་དོན་ཡོད་པའི་དབང་དུ་བྱས་པ་དང་། ཤེས་བྱ་ནང་གི་དབང་དུ་བྱས་པའོ། །དང་པོ་ནི། རྟོག་པའི་རང་བཞིན་ཆོས་ཅན། ལྷར་སྣང་བ་ཡིན་ཏེ། ཡེ་ནས་ཡིན་པ་ཉིད་ལམ་རྐྱེན་དང་འཕྲད་ན་ལྷར་སྣང་རུང་མ་འགགས་པའི་ཕྱིར། དཔེར་ན་དངུལ་ཆུས་བསྡུས་པའི་གསེར་ཕྱེ་ཉིད་དངུལ་གྱི་གོང་བུ་ལྟ་བུར་སྣང་ཡང་མེའི་རྐྱེན་དང་འཕྲད་ན་གསེར་དུ་འགྱུར་ཞིང་། མ་འཕྲད་ན་མི་འགྱུར་བ་བཞིན་ནོ། །དེ་ལྟར་ཡང་། སྒྱུ་འཕྲུལ་རྟོག་པའི་དྲྭ་བ་རྣམ་པར་བསལ་བའི་རྒྱུད་ཕྱི་མའི་ཕྱི་མ་ལས། གསོལ་པ། བཅོམ་ལྡན་འདས་རྣལ་འབྱོར་པ་འདི་དག་རྒྱུ་ཅི་ལྟ་བུ་ཞིག་ལས་བསྒྲུབ་པར་བགྱི་བ་ལགས། བཀའ་སྩལ་པ། ཕུང་པོ་དང་། ཁམས་དང་། སྐྱེ་མཆེད་དང་། འབྱུང་བ་ལྔ་ལ་སོགས་པའོ། །གསོལ་པ། འོ་ན་རྒྱུ་ལས་ཀྱང་འབྲས་བུ་སྣང་བ་སྐྱེད་པར་འགྱུར་བ་ལགས། ཇི་སྐད་གསུང་། བཀའ་སྩལ་པ། རིགས་ཀྱི་བུ་དེ་བཞིན་ཏེ། རྒྱུ་ལས་འབྲས་བུའི་ཤེས་རབ་སྣང་ངོ་། །དེ་ཅིའི་ཕྱིར་ཞེ་ན། ཕུང་པོ་ལ་སོགས་པ་གང་དག་པ་སྒྱུ་མར་ཕྱག་རྒྱ་བཞི་བཅུར་སྣང་བ་དང་། དོན་དམ་པར་ན་དོན་དམ་རྩེ་གཅིག་པར་སྣང་བའི་ཕྱིར་ཏེ། ང་དེ་སྐད་ཅེས་སྨྲའོ། །གསོལ་པ། བཅོམ་ལྡན་འདས། བཅོམ་ལྡན་འདས་ཀྱིས་གསུངས་པ་ལྟར་ན། དེ་ཉིད་ནི་དེ་ཡིན་པའི་ཕྱིར། བསྒྲུབ་པར་བྱ་བ་དང་ཡང་འགལ་བའི་ཕྱིར་རོ། །བཀའ་སྩལ་པ། ཇི་སྙམ་དུ་སེམས། དཔེར་ན། རྐྱེན་གྱི་འབྲེལ་བ་དང་མ་འཕྲད་པའི་འབྲས་བུ་སྐྱེ་བའི་རྒྱུ་ཡོད་ཀྱང་། མངོན་དུ་འབྱིན་པའི་ནུས་པ་མེད་པ་བཞིན་དུ་བྱང་ཆུབ་ཀྱི་རྒྱུ་ཡོད་ཀྱང་། རྐྱེན་ཏིང་ངེ་འཛིན་དང་མ་འབྲེལ་བའི་ཕྱིར། འབྲས་བུ་འབྱིན་པའི་ནུས་པ་མེད་པས་ན། དེ་ལྟར་ཤེས་པར་བྱའོ། །ཞེས་གསུངས་པའི་ཕྱིར། གཉིས་པ་ཤེས་བྱ་ནང་གི་དབང་དུ་བྱས་པ་དེ་ཇི་ལྟ་བུ་ཞེ་ན། རྟོག་པའི་རང་བཞིན་ཆོས་ཅན། ལྷར་སྣང་བ་ཡིན་ཏེ། སྣང་བ་རིས་མ་ངེས་པའི་ཕྱིར། དཔེར་ན། ཆུའི་དངོས་པོ་གཅིག་ལ། མ་དག་པ་དང་། དག་པའི་ཞིང་གི་འགྲོ་བ་དང་། གྲུབ་པའི་གང་ཟག་རྣམས་ཀྱིས་མཐོང་ཚུལ་ཐ་དད་པ་བཞིན་ནོ། །དེ་ལྟར་ཡང་། དཔལ་ནམ་མཁའ་དང་མཉམ་པའི་རྒྱུད་ལས། འགྲོ་བ་འདི་ཀུན་སངས་རྒྱས་ལྔའི་བདག་ཉིད། །གར་མཁན་དང་ནི་རི་མོའི་གཟུགས་ལྟར་སྣང་། །ཞེས་གསུངས་པའི་ཕྱིར། གཞན་ཡང་། རྟོག་ཚོགས་ཆོས་ཅན། ལྷར་སྣང་བ་ཡིན་ཏེ། དེ་དང་དེ་ཆོས་མཐུན་པ་ཡིན་པའི་ཕྱིར། ཇི་ལྟར་ཞེ་ན། རྣམ་ཤེས་ཐུགས་ཀྱི་བདག་ཉིད་ཡིན་པ་དང་། གཟུགས་དང་སྐུ་མཐུན་པ་གཉིས་ནི། དངོས་སུ་མཐུན་པར་ཟད་ལ། ཚོར་བ་ནི་ཡུལ་ལ་ལོངས་སྤྱོད་དུ་ལྟ་བའི་གཞི་ཡིན་པའི་ཕྱིར་ཡོན་ཏན་དང་། འདུ་ཤེས་ནི་མཚན་མར་འཛིན་པའི་བདག་ཉིད་ཕྱི་ནང་གི་ཆོས་རྣམས་ཐ་སྙད་དུ་འདོགས་པའི་ལས་ཀྱིས་བརྡ་སྤྲོད་པའི་ཕྱིར་གསུང་དང་། འདུ་བྱེད་ནི། བྱ་བ་བྱེད་པས་ལས་ཀྱི་བདག་ཉིད་ཡིན་པའི་ཕྱིར། དེ་ལྟར་ཡང་རྒྱུད་གཞན་ལས། གཟུགས་ནི་རྣམ་པར་སྣང་མཛད་ཉིད། །ཚོར་བ་རིན་ཆེན་འབྱུང་ལྡན་ལ། །འདུ་ཤེས་སྣང་བ་མཐའ་ཡས་ཏེ། །འདུ་བྱེད་དོན་ཡོད་གྲུབ་པ་ཉིད། །རྣམ་པར་ཤེས་པ་མི་བསྐྱོད་པ། །ཞེས་གསུངས་པའི་ཕྱིར། །ཡང་ཁོ་ན་རེ། རྒྱུད་ཕྱི་མ་ལས། ཚུལ་ཁྲིམས་ལ་སོགས་ཕུང་པོ་ལྔ། །ཟག་མེད་རྣམས་ནི་གཞན་ཡིན་ནོ། །ཞེས་ཉེར་ལེན་གྱི་ཕུང་པོ་ལྔ་གནས་གྱུར་པའི་ཟག་མེད་ཀྱི་ཕུང་པོ་ལྔ་གསུངས་པ་དང་ཡང་ཆོས་མཐུན་བརྩིར་ཡོད་དམ་ཞེ་ན། ཡོད་དེ་རྣམ་ཤེས་གནས་གྱུར་རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་ནི་ཐུགས་ཀྱི་བདག་ཉིད་ཡིན་པ་དང་། དེ་བཞིན་དུ་གཟུགས་གནས་གྱུར་ཚུལ་ཁྲིམས་ཀྱི་ཕུང་པོ་ནི་དྲི་མ་མེད་པའི་སྐུ་དང་། ཚོར་བ་གནས་གྱུར་ཏིང་ངེ་འཛིན་ནི་ཡོན་ཏན་གྱི་གཞིར་གྱུར་པའི་ཕྱིར་ཡོན་ཏན་དང་། འདུ་ཤེས་གནས་གྱུར་ཤེས་རབ་ནི་ལུང་རྟོགས་ཀྱི་ཆོས་ཀྱི་གཞིར་གྱུར་པའི་ཕྱིར་གསུང་དང་། འདུ་བྱེད་གནས་གྱུར་རྣམ་པར་གྲོལ་བའི་ཕུང་པོ་ནི་མཛད་པ་ཡོངས་སུ་རྫོགས་པའི་བདག་ཉིད་དང་གཞིར་གྱུར་པའི་ཕྲིན་ལས་ཏེ། ལུང་ལས། གཟུགས་ཀྱི་ཕུང་པོ་གནས་གྱུར་ཚུལ་ཁྲིམས་སྐུ། །ཚོར་བ་གནས་གྱུར་ཏིང་འཛིན་འབུམ་ཕྲག་བརྙེས། །འདུ་ཤེས་གནས་གྱུར་ཤེས་རབ་ཕུང་པོ་སྟེ། །འདུ་བྱེད་གནས་གྱུར་རྣམ་པར་གྲོལ་བའོ། །སེམས་གྱུར་ཡེ་ཤེས་དེ་ནི་རྣམ་གྲོལ་མཐོང་། །ཞེས་གསུངས་པའི་ཕྱིར། ཡང་ཉོན་མོངས་པ་ལྔ་དང་ཕུང་པོ་ལྔ་ཆོས་ཅན། ཁྱོད་གཉིས་ཆོས་མཐུན་བརྩིས་ནས་རིགས་ལྔ་དང་སྦྱར་དུའང་ཡོད་དེ། གསང་བ་འདུས་པ་ལས། གཟུགས་ནི་གཏི་མུག་རྒྱུ་བསྟན་པ། །བླུན་པས་བཅིངས་པས་ངོ་བོའོ། །ཚོར་བ་འདོད་པས་མྱོས་བསྟན་པ། །ང་རྒྱལ་གྱི་ནི་ངོ་བོའོ། །འདུ་ཤེས་འདོད་ཆགས་བདག་ཉིད་ནི། །དངོས་པོ་ལ་ནི་ཆགས་པའི་མཚན། །འདུ་བྱེད་རྟག་ཏུ་ཕྲག་དོག་སྟེ། །རྩེ་གཅིག་བདག་ཉིད་གཏོད་པའོ། །རྣམ་ཤེས་ཞེ་སྡང་ཞེས་བསྟན་ཏེ། །རྒྱུ་དང་འབྲས་བུར་རབ་ཏུ་གྲགས། །ཞེས་གསུངས་པའི་ཕྱིར། གལ་ཏེ་ཁོ་ན་རེ། རྣམ་ཤེས་ལྷར་དག་པའི་ཚེ་མིག་གི་རྣམ་ཤེས་ཀྱང་མི་བསྐྱོད་པར་དག་གམ་མ་དག །གཉིས་པ་ལྟར་ན། སྤྱི་བྱེ་བྲག་བདག་མི་གཅིག་པར་འགྱུར་ཏེ། དག་མ་དག་འགལ་བའི་ཆོས་ཅན་ཡིན་པའི་ཕྱིར། དང་པོ་ལྟར་ན། མིག་གི་རྣམ་ཤེས་ས་སྙིང་དུ་དག་པར་གསུངས་པ་མི་འཐད་པར་ཐལ། དག་པ་གཞན་དུ་བརྗོད་དུ་མེད་པའི་ཕྱིར། འདོད་མི་ནུས་ཏེ། བྱང་ཆུབ་ཆེན་པོ་རྡོ་རྗེ་མཐོང་བ་དང་། ཞེས་སོགས་གསུངས་པས་གསལ་ལོ་ཞེ་ན། སྐྱོན་མེད་དེ། ལྟོས་ས་ཐ་དད་ལ་ལྟོས་ནས་རྣམ་ཤེས་ཀྱི་ཕུང་པོ་སྤྱི་བྱེ་བྲག་གཉིས་གཙོ་འཁོར་དུ་དག་པ་ཡིན་ཏེ། ཐ་མལ་གྱི་རྣམ་ཤེས་རིལ་པོ་གཅིག་ཏུ་ཞེན་པའི་གཉེན་པོར་བྱེ་བྲག་ས་སྙིང་སོགས་སུ་དག་ཚུལ་སྨོས་པ་གང་ཞིག །ལྷར་ཐ་དད་དུ་ཞེན་པའི་གཉེན་པོར་སྤྱིར་མི་བསྐྱོད་པར་དག་ཚུལ་སྨོས་པའི་ཕྱིར་ཏེ། འདི་ཉིད་ལས། ཐ་དད་མིན་ལས་ཐ་དད་པའི། །ནང་དང་ནང་གི་ཕྱི་རོལ་གྱི། །དཀྱིལ་འཁོར་བསམ་ཡས་ཡེ་ཤེས་རོལ། །འཇིགས་མེད་ཀུན་བཟང་ཕྱག་རྒྱའི་མཆོག །ཅེས་གསུངས་པའི་ཕྱིར། འོ་ན་རྟོག་པ་ལྷར་དག་ཚུལ་དེ་ལྟར་ཡིན་ན། གསུམ་པ་དེའི་རིགས་ཀྱི་དབྱེ་བ་དེ་ཇི་ལྟ་བུ་ཡིན་ཞེ་ན། དེ་འཆད་པ་ལ། གཞན་ལུགས་དགག་པ། རང་ལུགས་བཞག་པ། ཞར་བྱུངརིགས་ཀྱི་མཚན་མའི་སྐུ་མདོག་བསྟན་པའོ། །དང་པོ་ལ། འདོད་པ་བརྗོད་པ་དང་། དེ་དགག་པའོ། །དང་པོ་ནི། ཁོ་ན་རེ། རྣམ་པར་ཤེས་པའི་རྒྱལ་པོ་ཆོས་ཅན། ཁྱོད་ལྷའི་དུས་ན་མི་བསྐྱོད་པ་མ་ཡིན་ཏེ། རྣམ་ཤེས་དག་པ་ཐུགས་ཀྱི་རྣམ་སྣང་ཡིན་པའི་ཕྱིར། དེ་ཡིན་ཏེ། དབུས་སུ་རིགས་བདག་མཚོན་བྱེད་ཀྱི་གདན་འཁོར་ལོ་དང་སེང་གེ ། ཡུམ་དབྱིངས་ཕྱུག་མ། ཆོས་དབྱིངས་ཡེ་ཤེས་རྣམས་བྱུང་བའི་ཕྱིར་དང་། ཁྲོ་བོའི་སྐབས་སུ་ཡང་བུདྡྷ་ཧེ་རུ་ཀའི་སྐུ་མདོག་དང་སྔགས་ཐོག་མར་སྨོས་པའི་ཕྱིར་ཟེར། གཉིས་པ་དེ་དགག་པ་ནི། དེ་ལྟར་རིགས་པ་མ་ཡིན་ཏེ། ཐུན་མོང་མ་ཡིན་པའི་ལུང་རིགས་མན་ངག་གསུམ་དང་འགལ་བའི་ཕྱིར་ཏེ། དེ་ཡང་ལུང་དང་འགལ་ཏེ། སྒྱུ་འཕྲུལ་བླ་མ་ལས། གཟུགས་ལ་རྣམ་པར་སྣང་མཛད་དེ། ཞེས་དང་། རྣམ་ཤེས་རྡོ་རྗེ་སེམས་དཔའ་སྟེ། ཞེས་གསུངས་པའི་ཕྱིར། མན་ངག་དང་ཡང་འགལ་ཏེ། རྡོ་རྗེ་ལས་རིམ་ལས། རྣམ་ཤེས་ནམ་མཁའི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པ། །མི་བསྐྱོད་ཡབ་ཡུམ་རང་བཞིན་ལས། །ཞེས་དང་། ཉིན་བྱེད་སེང་གེས། ཀུན་གཞི་བྱང་ཆུབ་ཀྱི་སེམས་རྡོ་རྗེ་མི་བསྐྱོད་པ་ལ་ནི་རྣམ་པར་ཤེས་པའི་རྒྱལ་པོ་ཞེས་གནས་སྐབས་འདིར་བྱའོ། །ཞེས་གསུངས་པའི་ཕྱིར། རིགས་པ་ནི། རྣམ་པར་ཤེས་པའི་རྒྱལ་པོ་ཆོས་ཅན། རྣམ་སྣང་མ་ཡིན་ཏེ། ཁྱོད་མི་བསྐྱོད་པ་ཡིན་པའི་ཕྱིར། དེ་ཡིན་ཏེ། རྣམ་ཤེས་དག་པ་ཐུགས་ཡིན་ལ། དེ་རྡོ་རྗེའི་རིགས་མི་བསྐྱོད་པར་ངེས་པའི་ཕྱིར་ཏེ། གླང་པོ་ཆེ་རབ་འབོག་གི་རྒྱུད་ལས། དོན་དམ་པར་སེམས་ཅན་གྱི་རྣམ་པར་ཤེས་པ་གནས་སུ་དག་པ་དེ་བཞིན་གཤེགས་པའི་ཐུགས་ཀྱི་བདག་ཉིད། ཅེས་པ་ནས། བཅོམ་ལྡན་འདས་རྡོ་རྗེ་མི་བསྐྱོད་པ། ཞེས་གསུངས་པའི་ཕྱིར། ཡང་ཁོ་ན་རེ། དེ་ལྟར་རྣམ་ཤེས་དག་པ་མི་བསྐྱོད་པར་གྲུབ་མོད། འོན་ཀྱང་སྔར་གྱི་སྐྱོན་རྣམས་ཀྱིས་གནོད་པར་མི་འགྱུར་རམ་ཟེར་ན་མི་གནོད་དེ། ཅིའི་ཕྱིར་ཞེ་ན། གདན་གྱི་འཁོར་ལོ་ཆོས་ཅན། ཁྱོད་རིགས་བདག་མཚོན་བྱེད་ཀྱི་མཚན་མ་མ་ཡིན་ཏེ། རིགས་ལྔ་ཡེ་ཤེས་ལྔའི་ཕྱག་རྒྱ་ཡིན་པའི་ཕྱིར། དེ་ལྟར་ཡང་འགྲེལ་ཆུང་ལས། གཞི་ཡང་ཚད་མེད་འཁོར་ལོ་སྟེ། །ཡེ་ཤེས་ལྔ་ཡི་རང་བཞིན་ཡིན། །ཞེས་སོ། །སེང་ཁྲི་ཆོས་ཅན། དེ་མ་ཡིན་ཏེ། ཐུགས་གཙོ་བོར་སྟོན་པ་རྡོ་རྗེའི་རིགས་དང་སྦྱར་བ་ཙམ་དུ་ཟད་པའི་ཕྱིར། དཔེར་ན་ཡང་དག་གི་གཙོ་བོ་རྡོ་རྗེའི་རིགས་མི་བསྐྱོད་པའི་གདན་དུ་སེང་ཁྲི་བྱུང་བ་བཞིན་ཏེ། སློབ་དཔོན་པདྨས་མཛད་པའི་ལས་རིམ་ཤེལ་ཕྲེང་ལས། སེང་གེ་གླང་རྟ་རྨ་བྱ་ཁྱུང་། །ཉི་ཟླ་པདྨ་རིན་པོ་ཆེ། །གཙོ་དང་འཁོར་དུ་རིམ་པར་བསམ། །ཞེས་དང་། ནམ་མཁའ་དབྱིངས་ཕྱུག་མ་ཆོས་ཅན། ཁྱོད་རྣམ་སྣང་གི་ཡུལ་མ་ཡིན་ཏེ། འདིར་རྣམ་ཤེས་ཀྱི་ཡུལ་ནམ་མཁའི་ཁམས་དང་སྦྱར་ན་མི་བསྐྱོད་པའི་ཡུལ་དུ་ངེས་པའི་ཕྱིར་ཏེ། རྡོ་རྗེ་ལས་རིམ་ལས། རྣམ་ཤེས་ནམ་མཁའི་ངོ་བོ་ཉིད། །ཅེས་སོ། །ཆོས་དབྱིངས་ཡེ་ཤེས་ཆོས་ཅན། ཁྱོད་གཏི་མུག་དག་པ་སྐུའི་རིགས་དང་སྦྱོར་བ་མ་ཡིན་ཏེ། འདིར་ཞེ་སྡང་དག་པ་ཆོས་དབྱིངས་ཡེ་ཤེས་སུ་བཞེད་པའི་ལུགས་ཡིན་པའི་ཕྱིར་ཏེ། རྒྱ་ཆེན་འགྲེལ་ལས། ཞེ་སྡང་རྣམ་པར་དག་པའི་རང་བཞིན་རྣམ་པར་ཤེས་པའི་ཕུང་པོ་ཡོངས་སུ་དག་པ་ཐུགས་རྡོ་རྗེ་ཆོས་ཀྱི་དབྱིངས་ཀྱི་ཡེ་ཤེས་ཀྱི་བདག་ཉིད་མི་བསྐྱོད་པའི་དཀྱིལ་འཁོར་ཞེས་དང་། ཡེ་ཤེས་ཀྱི་ཐིག་ལེའི་རྒྱུད་ལས་ཀྱང་། གཏི་མུག་མེ་ལོང་ཡེ་ཤེས་བལྟ། །ང་རྒྱལ་མཉམ་པ་ཉིད་དུ་དྲན། །སོ་སོར་རྟོག་པ་འདོད་ཆགས་ཡིན། །བྱ་བ་གྲུབ་པ་ཕྲག་དོག་ཆེ། །ཞེ་སྡང་ཆོས་དབྱིངས་རྣམ་པར་དག །ཅེས་གསུངས་པའི་ཕྱིར། ཁྲོ་བོའི་སྐབས་སུ་ཡང་བུདྡྷ་ཧེ་རུ་ཀ་ཆོས་ཅན། ཁྱོད་གཙོ་བོར་མ་གྲུབ་སྟེ། པཎ་གྲུབ་ཀྱི་མན་ངག་རྣམས་སུ་རྒྱུད་འཁྲུགས་པ་བསྡེབས་ནས་གཙོ་བོ་བཛྲ་ཧེ་རུ་ཀར་བཞེད་པའི་ཕྱིར། དེ་ལྟར་ཡང་རྒྱ་ཆེར་འགྲེལ་ལས། ཞི་བའི་དུས་སུ་མི་བསྐྱོད་པ་དང་པོར་སྨོས་ཤིང་གཙོ་བོར་བྱས་ལ། ཁྲོ་བོའི་དུས་སུ་ནི་གཟུགས་ཀྱི་ཕུང་པོ་རྣམ་པར་དག་པ་བུདྡྷ་ཧེ་རུ་ཀ་དང་པོར་ཕྱུང་ཞིང་གཙོ་བོར་སྨོས་པ་ཅི་ཡི་ཕྱིར་ཞེ་ན། དེ་རྒྱུད་དཀྲུགས་པ་ཡིན་ཏེ། དབང་ཕྱུག་མ་གཙོ་བོ་ལ་འཁྲིལ་བའི་གནས་སྐབས་ན་དེ་ཉིད་མངོན་པར་འགྱུར་ཏེ། འདི་ནི་རྡོ་རྗེ་ཁྲག་འཐུང་ཉིད་ལ་ཅི་ནས་ཀྱང་དོན་གྱིས་ཤེས་པར་བྱའོ། །ཞེས་དང་། འདིར་ཡང་རྣམ་པར་ཤེས་པའི་རང་བཞིན་ཞེ་སྡང་རྣམ་པར་དག་པའི་ངོ་བོ་མི་བསྐྱོད་པ་རྡོ་རྗེ་ཁྲག་འཐུང་དུ་མངོན་པར་འདུ་མཛད་པ་དེ་ལ་ཤེས་པར་བྱའོ། །ཞེས་གསུངས་པའི་ཕྱིར། གཉིས་པ་རང་ལུགས་བཞག་པ་ནི། རྣམ་པར་ཤེས་པའི་རྒྱལ་པོ་ལ་སོགས་པ་དེ་བཞིན་གཤེགས་པ་རིགས་ལྔ་པོ་ཆོས་ཅན། དེ་རྣམས་ཀྱི་རིགས་དང་ཡེ་ཤེས་ཀྱི་དབྱེ་བ་བཤད་དུ་ཡོད་དེ། དཀྱིལ་འཁོར་གྱི་གཙོ་བོ་མི་བསྐྱོད་པ་ནི་ཐུགས་རྡོ་རྗེའི་རིགས་དང་ཆོས་ཀྱི་དབྱིངས་ཀྱི་ཡེ་ཤེས། རྣམ་སྣང་ནི་སྐུ་དེ་བཞིན་གཤེགས་པའི་རིགས་དང་མེ་ལོང་ལྟ་བུའི་ཡེ་ཤེས། རིན་འབྱུང་ནི་ཡོན་ཏན་རིན་པོ་ཆེའི་རིགས་དང་མཉམ་ཉིད་ཡེ་ཤེས། སྣང་མཐའ་ནི་གསུང་པདྨའི་རིགས་དང་སོར་རྟོག་ཡེ་ཤེས། དོན་གྲུབ་ནི་ཕྲིན་ལས་ཀྱི་རིགས་དང་བྱ་བ་གྲུབ་པའི་ཡེ་ཤེས་རྣམས་སུ་ངེས་པའི་ཕྱིར། དེ་ལྟར་ཡང་རྡོ་རྗེ་བཀོད་པ་ལས། སྐུ་ནི་མ་བཅོས་དེ་བཞིན་ཉིད། །ཐུགས་ནི་མི་འགྱུར་རྡོ་རྗེའི་རིགས། །ཡོན་ཏན་ཀུན་འབྱུང་རིན་ཆེན་རིགས། །གསུང་ནི་ཆགས་མེད་པདྨའི་རིགས། །དོན་གྲུབ་སྤྱོད་པ་ལས་ཀྱི་རིགས། །ཞེས་གསུངས་པའི་ཕྱིར་ཞེས་འཆད་པར་བྱེད་པ་ནི། བཅོམ་ལྡན་འདས་དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་དང་། དེ་བཞིན་གཤེགས་པ་གཟུགས་ཀྱི་རྒྱལ་པོ་དང་། དེ་བཞིན་གཤེགས་པ་ཚོར་བའི་རྒྱལ་པོ་དང་། དེ་བཞིན་གཤེགས་པ་འདུ་ཤེས་ཀྱི་རྒྱལ་པོ་དང་། དེ་བཞིན་གཤེགས་པ་འདུ་བྱེད་ཀྱི་རྒྱལ་པོ་དང་། ཞེས་པའི་གཞུང་འདི་བྱུང་། གསུམ་པ་རིགས་ཀྱི་མཚན་མར་གྱུར་པའི་སྐུ་མདོག་བསྟན་པ་དེ་ཇི་ལྟ་བུ་ཞེ་ན། དེ་འཆད་པར་བྱེད་པ་ལ། དེ་དག་ཀུན་ཀྱང་མཐིང་ག་དང་། དཀར་པོ་དང་། སེར་པོ་དང་། ལེ་བརྒན་དང་། ལྗང་གུའི་མདོག་ཏུ་འཚེར་བ་ཞེས་པའི་གཞུང་འདི་བྱུང་། རིགས་ལྔ་པོ་དེ་དག་ཀུན་གྱི་རིགས་ཀྱི་མཚན་མར་གྱུར་པའི་སྐུ་མདོག་ཆོས་ཅན། དེའང་བཤད་དུ་ཡོད་དེ། ཆོས་དབྱིངས་ཡེ་ཤེས་དང་རྡོ་རྗེའི་རིགས་མཐིང་ག །མེ་ལོང་ཡེ་ཤེས་དང་བདེ་གཤེགས་རིགས་དཀར་པོ། མཉམ་ཉིད་ཡེ་ཤེས་དང་རིན་ཆེན་རིགས་སེར་པོ། སོར་རྟོག་ཡེ་ཤེས་དང་པད་རིགས་དམར་པོ། བྱ་གྲུབ་ཡེ་ཤེས་དང་ལས་རིགས་ཀྱི་མཚན་མ་ལྗང་གུར་སྣང་བ་ཡིན་པའི་ཕྱིར། དེ་ཡིན་ཏེ། ཆོས་ཉིད་འགྱུར་བ་མེད་པའི་རྟགས་མཐིང་ནག །ཉེས་སྐྱོན་གྱིས་མ་གོས་པའི་རྟགས་དཀར་པོ། ཆེ་བའི་ཡོན་ཏན་རྒྱས་པའི་རྟགས་སེར་པོ། གདུལ་བྱ་ལ་ཆགས་པའི་རྟགས་དམར་པོ། ལས་སྣ་ཚོགས་ལྷུན་གྱིས་གྲུབ་པའི་རྟགས་སུ་ལྗང་གུ་སྣང་བའི་ཕྱིར་ཏེ། རྒྱས་པ་ལས། མ་མཐོང་རྨོངས་པ་ཐམས་ཅད་ལ། །ཡེ་ཤེས་མཚན་ཉིད་བསྟན་པའི་ཕྱིར། །དཀར་དང་དམར་དང་སེར་བ་དང་། །ལྗང་གུ་ལ་སོགས་ནག་པོར་བསྟན། །ཅེས་གསུངས་པའི་ཕྱིར། ཞེས་འཆད་པར་བྱེད་པ་ནི། དེ་དག་ཀུན་ཀྱང་མཐིང་ག་དང་། དཀར་པོ་དང་། སེར་པོ་དང་། ལེ་བརྒན་དང་། ལྗང་གུའི་མདོག་ཏུ་འཚེར་བ། ཞེས་པའི་གཞུང་འདི་བྱུང་། གཉིས་པ་རིགས་ཀྱི་ཡུམ་ལྔ་པོ་དེ་འཆད་པར་བྱེད་པ་ལ། བཙུན་མོ་དམ་པ་སྣང་བའི་དབྱིངས་དང་། སྲ་བའི་དབྱིངས་དང་། མཉེན་པའི་དབྱིངས་དང་། དྲོ་བའི་དབྱིངས་དང་། བསྐྱོད་པའི་དབྱིངས་ལ་སོགས་པ་བཙུན་མོའི་ཚོགས་དང་གཉིས་སུ་མེད་པ། ཞེས་པའི་གཞུང་འདི་བྱུང་། དེའི་དོན་བཤད་པ་ལ། ཡུམ་ལྔའི་སྤྱིའི་མཚན་བཤད་པ་དང་། བྱེ་བྲག་གི་མཚན་བཤད་པ་གཉིས་ལས། དེའི་དང་པོ་སྤྱིའི་མཚན་ནི། བཙུན་མོ་དམ་པ། ཞེས་པ་དང་། དབྱིངས་ཞེས་པས་བསྟན་ཏེ། རིགས་ཀྱི་ཡུམ་ལྔ་པོ་ཆོས་ཅན། ཁྱོད་ལ་བཙུན་མོ་ཞེས་བརྗོད་པའི་རྒྱུ་མཚན་ཡོད་དེ། སྐྱེད་པར་བྱེད་པའི་རྒྱུ་དང་། སྤྱད་པར་བྱ་བའི་ཡུལ་དུ་གྱུར་པས་དེ་ལྟར་བརྗོད་པའི་ཕྱིར་ཏེ། རྟོག་པའི་དུས་སུ་འབྱུང་ལྔས་ཕུང་པོ་ལྔ་བསྐྱེད་པ་གང་ཞིག །ལྷའི་སྐབས་སུ་རིགས་ཀྱི་ཡབ་ལྔས་སྤྱད་པར་བྱ་བའི་ཡུལ་ཡིན་པའི་ཕྱིར་དང་། ཡང་ན། ཡུམ་གྱི་ངོ་བོ་དབྱིངས་དང་། ཡབ་ཀྱི་ངོ་བོ་ཡེ་ཤེས་ཡིན་པས། དབྱིངས་ཀྱིས་ཡེ་ཤེས་བསྐྱེད་པ་དང་། དབྱིངས་ཡེ་ཤེས་ཀྱི་ཡུལ་དུ་གྱུར་པའི་ཕྱིར། ལྔ་པོ་དེ་ཆོས་ཅན། ཁྱོད་ལ་དམ་པ་ཞེས་བརྗོད་པའི་རྒྱུ་མཚན་ཡོད་དེ། རང་བཞིན་རྟོགས་པ་ལས་ཁྱད་པར་དུ་འཕགས་པ་ཡིན་པའི་ཕྱིར། དབྱིངས་ཞེས་བརྗོད་པའི་རྒྱུ་མཚན་ཡང་ཡོད་དེ། ཉི་འོད་སེང་གེས། དབྱིངས་ཀྱི་སྒྲ་ནི་མི་ཟད་པ་ལ་བྱའོ། །ཞེས་པས་སྲས་ཀྱི་འབྱུང་ཁུངས་དང་བདེ་བའི་ཡེ་ཤེས་བསྐྱེད་པའི་རྒྱུར་གྱུར་པའི་ཕྱིར་དང་། ཡུམ་རྣམས་དབྱིངས་ཀྱི་ཕྱག་རྒྱར་གྱུར་པས་ཀྱང་དེ་ལྟར་བརྗོད་པའི་ཕྱིར། གཉིས་པ་བྱེ་བྲག་གི་མཚན་ནི། ཡུམ་ནམ་མཁའ་དབྱིངས་ཕྱུག་མ་ཆོས་ཅན། ཁྱོད་ལ་སྣང་བ་ཞེས་བརྗོད་པ་ལ་རྒྱུ་མཚན་ཡོད་དེ། རྟོག་པའི་དུས་ན་ནམ་མཁས་གོ་མ་ཕྱེ་ན་དངོས་པོ་ཐམས་ཅད་སྣང་མི་ནུས་པས་ནམ་མཁའ་དང་། ལྷའི་དུས་ན་ཆོས་ཁམས་ནམ་མཁའ་རྣམ་ཤེས་ཀྱི་ཡུལ་ཡིན་པ་ལྟར་ཐུགས་རྡོ་རྗེ་མི་བསྐྱོད་པའི་ཡུམ་དུ་ངེས་པའི་ཕྱིར། སངས་རྒྱས་སྤྱན་མ་ཆོས་ཅན། ཁྱོད་ལ་སྲ་བ་ཞེས་བརྗོད་པ་ལ་རྒྱུ་མཚན་ཡོད་དེ། རྟོག་པའི་དུས་ན་སྲ་བརྟན་མཁྲང་བའི་མཚན་ཉིད་ཅན་གྱི་སའི་ཁམས་དང་། དེ་ལྷའི་དུས་ན་བརྟན་ཞིང་རྟེན་དུ་གྱུར་པས་སྐུའི་རིགས་ཀྱི་ཡུམ་དུ་ངེས་པའི་ཕྱིར། མཱ་མ་ཀཱི་ཆོས་ཅན། ཁྱོད་ལ་མཉེན་པ་ཞེས་བརྗོད་པ་ལ་རྒྱུ་མཚན་ཡོད་དེ། རྟོག་པའི་དུས་ན་གཤེར་སྡུད་བརླན་པའི་མཚན་ཉིད་ཅན་གྱི་ཆུའི་ཁམས་དང་། དེ་ལྷའི་དུས་ན་རྒྱུད་བརླན་ཅིང་ཡོན་ཏན་སྡུད་པ་རིན་ཆེན་རིགས་ཀྱི་ཡུམ་དུ་ངེས་པའི་ཕྱིར། གོས་དཀར་མོ་ཆོས་ཅན། ཁྱོད་ལ་དྲོ་བ་ཞེས་བརྗོད་པ་ལ་རྒྱུ་མཚན་ཡོད་དེ། རྟོག་པའི་དུས་ན་ཚ་ཞིང་སྲེག་པའི་མཚན་ཉིད་ཅན་གྱི་མེའི་ཁམས་དང་། དེ་ལྷའི་དུས་ན་མཚན་འཛིན་གྱི་སྤུ་རིས་གསལ་བ་དང་ཤེས་རབ་ཀྱི་མེས་དག་པར་བྱེད་པའི་བདག་ཉིད་པདྨའི་རིགས་ཀྱི་ཡུམ་དུ་ངེས་པའི་ཕྱིར། དམ་ཚིག་སྒྲོལ་མ་ཆོས་ཅན། ཁྱོད་ལ་བསྐྱོད་པ་ཞེས་བརྗོད་པ་ལ་རྒྱུ་མཚན་ཡོད་དེ། རྟོག་པའི་དུས་ན་ཡང་ཞིང་གཡོ་བའི་མཚན་ཉིད་ཅན་གྱི་རླུང་གི་ཁམས་དང་། དེ་ལྷའི་དུས་ན་རླུང་གིས་བསྐྱོད་འདེགས་ཀྱི་བྱ་བ་བྱེད་པ་ལྟར་ཐོགས་པ་མེད་པའི་ལས་ཅན་ལས་རིགས་ཀྱི་ཡུལ་དུ་ངེས་པའི་ཕྱིར། དེ་ལྟར་ཡང་འདི་ཉིད་ལས། ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །ཞེས་སོ། །དེ་ལྟར་དེ་བཞིན་གཤེགས་པ་རྣམས་དེ་ལྟ་བུའི་བཙུན་མོའི་ཚོགས་དང་ཐབས་ཤེས་གཉིས་སུ་མེད་པའི་ཚུལ་གྱིས་བདེ་བ་ཆེན་པོའི་རང་བཞིན་དུ་བཞུགས་སོ་ཞེས་འཆད་པར་བྱེད་པ་ནི། བཙུན་མོ་དམ་པ་སྣང་བའི་དབྱིངས་དང་། སྲ་བའི་དབྱིངས་དང་། མཉེན་པའི་དབྱིངས་དང་། དྲོ་བའི་དབྱིངས་དང་། བསྐྱོད་པའི་དབྱིངས་ལ་སོགས་པ་བཙུན་མོའི་ཚོགས་དང་གཉིས་སུ་མེད་པ། ཞེས་པའི་གཞུང་འདི་བྱུང་། གཉིས་པ་གང་དུ་གསུངས་པའི་གནས་ཕུན་སུམ་ཚོགས་པ་དེ་ཇི་ལྟ་བུ་ཡིན་ཞེ་ན། དེ་ལ་གཉིས་ཏེ། གནས་ཀྱི་ངོ་བོ་རྣམ་འགྱུར་དང་བཅས་པའི་དོན་བསྟན་པ་དང་། གདན་ཁྲིའི་དོན་བསྟན་པའོ། །དང་པོ་དེ་འཆད་པར་བྱེད་པ་ལ་འོག་མིན་གྱི་གནས་མཐའ་དང་དབུས་མེད་པ་ན། གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལ། ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་། རྒྱ་ཕྱོགས་བཅུར་ཡོངས་སུ་མ་ཆད་པ་ཡོན་ཏན་དཔག་ཏུ་མེད་པ་རྒྱས་པའི་ཕྱིར་གྲུ་བཞིར་གྱུར་པ། ལྷག་པའི་ཡེ་ཤེས་རིན་པོ་ཆེའི་གློ་འབུར་གྱིས་མཛེས་པ། རྩེ་མོ་ཕྱོགས་བཅུ་དུས་བཞིའི་སངས་རྒྱས་ཀྱི་དཀྱིལ་འཁོར་མ་ལུས་པ་ཐམས་ཅད་སོ་སོ་མ་ཡིན་ངོ་བོ་ཉིད་གཅིག་པའི་ཡེ་ཤེས་ཀུན་ཏུ་འཁྱིལ་བ། ཡེ་ཤེས་བསམ་གྱིས་མི་ཁྱབ་པ་ཡེ་ཤེས་རིན་པོ་ཆེའི་དབྱིབས་དང་ཁ་དོག་ལ་སོགས་པ་རྣམ་པ་ཐ་དད་པའི་བྱེ་བྲག་དང་ཁྱད་པར་དུ་གྱུར་པ་དཔགས་པ། ཚད་དཔག་ཏུ་མེད་པ། ཡེ་ཤེས་རིན་པོ་ཆེ་སྣ་ཚོགས་ཀྱི་ཕྲེང་བ་དང་། ཆུན་འཕྱང་དང་། ཤར་བུའི་རྒྱན་དང་། གཟུགས་སྣ་ཚོགས་དང་། སྒྲ་སྣ་ཚོགས་དང་། དྲི་སྣ་ཚོགས་དང་། རོ་སྣ་ཚོགས་དང་། རེག་བྱ་སྣ་ཚོགས་ཀྱིས་ཕྱོགས་བཅུར་འཁྲིགས་པར་རང་བྱུང་ལ། མི་སྒྲིབ་པར་གསལ་བའི་རྒྱན་བསམ་གྱིས་མི་ཁྱབ་པས་བཀླུབས་པ། རྣམ་པར་ཐར་པ་བཞིའི་སྒོ་ནས་འཇུག་པའི་སྒོ་ཁྱུད་ཅན། རྣམ་པར་ཐར་པ་བརྒྱད་ཀྱི་རྟ་བབས་དང་ལྡན་པ། ཕྱི་དང་ནང་མེད་པ་ཀུན་ཏུ་ཡང་ནང་དུ་གྱུར་པ་ན། ཞེས་པའི་གཞུང་འདི་བྱུང་། དེ་ལ་སྤྱིར་འོག་མིན་ལ་ཆོས་ཅན། དབྱེ་ན་ལྔར་ཡོད་དེ། དོན་གྱི་འོག་མིན། རིག་པའི་འོག་མིན། གསང་བའི་འོག་མིན། འཇིག་རྟེན་གནས་ཀྱི་འོག་མིན། དབང་ཕྱུག་ཆེན་པོའི་འོག་མིན་རྣམས་སུ་ཡོད་པའི་ཕྱིར། དང་པོ་དོན་གྱི་འོག་མིན་ཆོས་ཅན། དེ་ནི་ཆོས་ཀྱི་དབྱིངས་ལ་གྲགས་ཏེ། དེ་ཉིད་སངས་རྒྱས་ཐམས་ཅད་ཀྱི་རྟེན་ཡིན་པ་གང་ཞིག །རྣམ་རྟོག་དང་མཚན་མ་གང་གི་ཡང་འོག་ཏུ་མ་གྱུར་པའི་ཕྱིར། དེ་ལྟར་ཡང་རྒྱས་པ་ལས། གཟུང་འཛིན་བྲལ་བའི་ཡེ་ཤེས་ནི། །དེ་བཞིན་གཤེགས་པ་ཀུན་གྱི་གནས། །ཞེས་སོ། །གཉིས་པ་རིག་པའི་འོག་མིན་ཆོས་ཅན། ཁྱོད་བཤད་དུ་ཡོད་དེ། ཆོས་དབྱིངས་དེ་རྟོགས་པ་རང་རིག་པའི་ཡེ་ཤེས་ནི་གཉིས་འཛིན་གྱི་འོག་ཏུ་མ་གྱུར་པས་འོག་མིན་ཡིན་པ་གང་ཞིག །གཞན་དུ་ན་ལོངས་སྐུའི་ཞིང་དང་ཆ་མཐུན་པར་ལྷག་པ་ཏིང་ངེ་འཛིན་གྱི་བསྒོམ་པ་ལའང་དེ་ལྟར་དུ་གྲགས་པའི་ཕྱིར་ཏེ། རྒྱས་པ་ལས། རང་བཞིན་དཀྱིལ་འཁོར་ཇི་ལྟ་བར། །ཏིང་འཛིན་དཀྱིལ་འཁོར་བསྒོམ་པར་བྱ། །ཞེས་སོ། །གསུམ་པ་གསང་བའི་འོག་མིན་ཆོས་ཅན། ཁྱོད་ཡུམ་གྱི་མཁའ་ལ་གྲགས་ཏེ། སྟོན་པ་གསང་བའི་སྐུའི་བཞུགས་གནས་ཡིན་པ་གང་ཞིག །མཚན་མའི་རྟོག་པ་རང་རྒྱུད་པའི་འོག་ཏུ་མ་གྱུར་པའི་ཕྱིར། དེ་ལྟར་ཡང་རྒྱས་པ་ལས། ནུབ་ཕྱོགས་འོག་མིན་གནས་མཆོག་ཏུ། །མ་ཆགས་པདྨའི་གདན་གཏིང་ནས། །དུས་གསུམ་རྒྱལ་བ་བཞུགས་པའི་གནས། །ཞེས་དང་། རྒྱུད་གཞན་ལས་ཀྱང་། རྡོ་རྗེ་བཙུན་མོའི་བྷ་ག་ལ་བཞུགས་སོ། །ཞེས་གསུངས་སོ། །བཞི་པ་འཇིག་རྟེན་གནས་ཀྱི་འོག་མིན་ཆོས་ཅན། ཁྱོད་གཟུགས་ཁམས་གནས་རིས་བཅུ་བདུན་གྱི་ཡ་ཐ་གཙང་མ་རིས་ཀྱི་ལྷའི་གནས་དང་པོ་དེ་ཡིན་ཏེ། ཁྱོད་གཟུགས་ཅན་གྱི་གནས་གཞན་གྱི་འོག་ཏུ་མ་གྱུར་པའི་ཕྱིར། ལྔ་པ་དབང་ཕྱུག་ཆེན་པོའི་འོག་མིན་ཆོས་ཅན། དེ་བཤད་དུ་ཡོད་དེ། ཁྱོད་སྐབས་འདིར་བསྟན་གྱི་ལོངས་སྐུའི་བཞུགས་གནས་སུ་གྱུར་པའི་འོག་མིན་ཆེན་པོ་དེ་ལ་དེ་ལྟར་དུ་གྲགས་པའི་ཕྱིར་ཏེ། སྒྱུ་འཕྲུལ་རྡོ་རྗེ་ལས། གཙང་མའི་རིས་དག་རབ་སྤངས་པའི། །འོག་མིན་ཆེན་པོའི་གནས་མཆོག་ན། །རིགས་བདག་ཕྱག་རྒྱ་ལྷུན་གྲུབ་སྐུ། །གཅིག་དང་དུ་མ་རྣམ་སྤངས་པ། །སངས་རྒྱས་ཀུན་གྱི་སྤྱི་གཟུགས་ཏེ། །གདོད་ནས་ཐེག་ཆེན་མཛོད་ཉིད་ཕྱིར། །སྒྲིབ་པ་མཐའ་སྤངས་གདུལ་བྱ་ལ། །སྐད་ཅིག་གཅིག་གིས་སྣང་བར་མཛད། །ཅེས་གསུངས་པའི་ཕྱིར། དེའི་དོན་འཆད་པ་ལ། གནས་ཀྱི་ངོ་བོ། སྒྲ་དོན། གཏན་ལ་དབབ་པ་དང་གསུམ་ལས། དང་པོ་ངོ་བོ་ནི། དོན་དབྱིངས་དང་ཡེ་ཤེས་དབྱེར་མི་ཕྱེད་པའི་རྟགས་གཞལ་ཡས་ཁང་གི་དབྱིབས་དང་ཁ་དོག་ཏུ་རང་སྣང་བ་སྟེ། ཁོག་གཞུང་ལས། གནས་ཀྱི་རང་བཞིན་དེ་བཞིན་ཉིད། །ངོ་བོ་འོག་མིན་གཞལ་ཡས་ཁང་། །ཞེས་གསུངས་པའི་ཕྱིར། གཉིས་པ་སྒྲ་དོན། ཨ་ཀ་ནིཥྛ་ཞེས་པའི་སྒྲ་ལས་དྲངས་ན། འོག་མ་ཡིན་པ་སྟེ། དོན་གདུལ་བྱའི་བློ་ལས་འདས་ཤིང་། རྟགས་དེ་འཇིག་རྟེན་གནས་ཀྱི་འོག་མིན་ལས་ཉིས་འགྱུར་གྱི་སྤགས་པ་ཡིན་པའི་ཕྱིར། དེ་ལྟར་ཡང་རྒྱ་མཚོ་ལས། འཇིག་རྟེན་གནས་ཀྱི་འོག་མིན་ལས། །གཉིས་འགྱུར་ཤིན་ཏུ་སྤགས་པ་ན། །ཞེས་སོ། །གསུམ་པ་གཏན་ལ་དབབ་པ་ནི། ཁོ་ན་རེ། འོ་ན་གནས་དེའི་རང་བཞིན་ཇི་ལྟ་བུ་ཡིན་ཞེ་ན། འོག་མིན་གྱི་གནས་མཐའ་དང་དབུས་མེད་པ་ན། ཞེས་པས་བསྟན་ཏེ། ངག་དོན་དུ་བསྒྲིལ་ན། གནས་དེའི་རང་བཞིན་དེ་ཆོས་ཅན། མཐའ་དབུས་ལ་སོགས་པའི་སྤྲོས་པ་ཐམས་ཅད་ལས་འདས་པ་ཡིན་ཏེ། དེ་ནི་ཆོས་ཀྱི་དབྱིངས་ཡིན་པའི་ཕྱིར་ཏེ། འགྲེལ་ཆུང་ལས། མཐའ་དབུས་མེད་པ་ཆོས་ཀྱི་དབྱིངས། །དེ་ནི་གནས་ཀྱི་བླ་མར་འདོད། །ཅེས་གསུངས་པའི་ཕྱིར། དེ་ཉིད་ཀྱི་ངང་ལས་ཡོན་ཏན་གྱི་ཁྱད་པར་རང་སྣང་བས་ན། གནས་ཀྱི་ངོ་བོའི་ཆོས་རྣམས་དབྱེ་བར་བྱ་སྟེ། འགྲེལ་ཆུང་ལས། གཞལ་ཡས་གཞི་དང་རྒྱུ་དང་རྒྱ། །དབྱིབས་དང་གློ་འབུར་རྩེ་མོ་དང་། །རྒྱན་དང་སྒོ་ཁྱུད་རྟ་བབས་དང་། །མཚན་ཉིད། ཅེས་གསུངས་པའི་ཕྱིར། དེ་ལས་དང་པོ་གཞལ་ཡས་ཁང་གི་གཞི་ནི། གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལ། ཞེས་པས་བསྟན། དེའི་དོན་ནི། སྤྱིའི་འོག་གཞི་དེ་ཆོས་ཅན། ཡེ་ཤེས་ལྔ་མཚོན་པའི་རྟགས་རྒྱ་ཁྱོན་ཚད་མེད་པའི་འཁོར་ལོའི་རྣམ་པ་སྟེ། བཤད་རྒྱུད་རོལ་པ་ཆེན་པོ་ལས། འཁོར་ལོ་ཆེན་པོའི་ས་གཞི་ལ། །ཁང་པ་གྲུ་བཞི་རྣམ་པར་བརྗིད། །ཅེས་གསུངས་པའི་ཕྱིར། ནང་གི་འོག་གཞི་ནི། སྤགས་པ། ཞེས་པས་བསྟན་ཏེ། གཞལ་ཡས་ཁང་གི་སྒོ་དང་ཁྱམས་སོགས་ནས་ལྟེ་བའི་བར་གྱི་ནང་གི་འོག་གཞི་ཆོས་ཅན། དེ་རིམ་པ་ལྟར་རྡོ་རྗེ་འགྲེང་བུ་རེས་སྤགས་པ་ཡིན་ཏེ། ཐེག་པ་འོག་མ་ནས་འདིར་འཕར་བའི་དོན་ཡིན་པའི་ཕྱིར། གཉིས་པ་རྒྱུ་ནི། ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་ཞེས་གསུངས། དེའི་དོན་ནི། གཞལ་ཡས་ཁང་དེའི་རྒྱུ་ཆོས་ཅན། ཁྱོད་རིན་པོ་ཆེ་ལས་གྲུབ་པ་ཡིན་ཏེ། ཡེ་ཤེས་ཉིད་དབྱིབས་དང་ཁ་དོག་ཏུ་རང་སྣང་བས་རེ་བ་སྐོང་བའི་ཕྱིར། གསུམ་པ་རྒྱ་ནི། རྒྱ་ཕྱོགས་བཅུར་ཡོངས་སུ་མ་ཆད་པ། ཞེས་གསུངས། དོན་ནི། དེའི་རྒྱ་ཆོས་ཅན། ཁྱོད་ནི་ཕྱོགས་ཀུན་ཏུ་ཡོངས་སུ་མ་ཆད་པ་སྟེ། ཆོས་དབྱིངས་མཐའ་ཀླས་པར་ཁྱབ་པ་རང་སྣང་བའི་ཕྱིར། བཞི་པ་དབྱིབས་ནི། ཡོན་ཏན་དཔག་ཏུ་མེད་པ་རྒྱས་པའི་ཕྱིར་གྲུ་བཞིར་གྱུར་པ། ཞེས་གསུངས། དོན་ནི། དེའི་དབྱིབས་ཆོས་ཅན། གྲུ་བཞི་པ་ཡིན་ཏེ། དེ་བཞིན་གཤེགས་པའི་ཆེ་བ་ཡོན་ཏན་གྱིས་འདིར་ཁྱབ་པ་དང་། མཉམ་པ་དང་། རྒྱས་པ་ཡིན་པའི་ཕྱིར། དེ་ལྟར་ཡང་རྒྱ་ཆེར་འགྲེལ་ལས། མཉམ་པའི་ཕྱིར་དང་ཁྱབ་པའི་ཕྱིར། །རྒྱས་པའི་ཕྱིར་ནི་གྲུ་བཞིར་གྱུར། །ཅེས་སོ། །ལྔ་པ་གློ་འབུར་ནི། ལྷག་པའི་ཡེ་ཤེས་རིན་པོ་ཆེའི་གློ་འབུར་གྱིས་མཛེས་པ། ཞེས་གསུངས། དོན་ནི། གློ་འབུར་ཆོས་ཅན། ཁྱོད་གྲུ་ཆད་ལས་ཕྱིར་འཕྱང་བའི་དབྱིབས་མཁར་གྱི་འབུར་ཐབས་ལྟ་བུ་དང་། ཁ་དོག་རིགས་བཞིའི་མདོག་ཅན་གྱི་རིན་པོ་ཆེའི་གློ་འབུར་གྱིས་མཛེས་པ་ཡིན་ཏེ། ཡེ་ཤེས་རེ་རེའང་ལྷག་པའི་ཡེ་ཤེས་བཞི་བཞི་དང་ལྡན་པའི་ཕྱིར། དྲུག་པ་རྩེ་མོ་ནི། རྩེ་མོ་ཕྱོགས་བཅུ་དུས་བཞིའི་སངས་རྒྱས་ཀྱི་དཀྱིལ་འཁོར་མ་ལུས་པ་ཐམས་ཅད་སོ་སོ་མ་ཡིན་ངོ་བོ་ཉིད་གཅིག་པའི་ཡེ་ཤེས་ཀུན་ཏུ་འཁྱིལ་པ་ཞེས་དང་། ཚད་དཔག་ཏུ་མེད་པ་ཞེས་གསུངས། དོན་ནི། དེའི་རྩེ་མོའི་ཚད་དབྱིབས་ཆོས་ཅན། ཚད་དཔག་ཏུ་མེད་པ་དང་། དབྱིབས་བུམ་པ་ཟླུམ་པོའི་རྣམ་པར་འཁྱིལ་བ་ཡིན་ཏེ། རིམ་བཞིན་ཆོས་ཀྱི་དབྱིངས་ཀྱི་ཡེ་ཤེས་ལ་མཐར་ཐུག་པ་མེད་ཅིང་སྤྲོས་པ་དང་བྲལ་བ་ཡིན་པའི་ཕྱིར། བདུན་པ་རྒྱན་ནི། ཡེ་ཤེས་བསམ་གྱིས་མི་ཁྱབ་པའི་ཡེ་ཤེས་རིན་པོ་ཆེའི་དབྱིབས་དང་ཁ་དོག་ལ་སོགས་པ་རྣམ་པ་ཐ་དད་པའི་བྱེ་བྲག་དང་ཁྱད་པར་དུ་གྱུར་པ། ཞེས་དང་། ཡེ་ཤེས་རིན་པོ་ཆེ་སྣ་ཚོགས་ཀྱི་ཕྲེང་བ་དང་། ཆུན་འཕྱང་དང་། ཤར་བུའི་རྒྱན་དང་། གཟུགས་སྣ་ཚོགས་དང་། སྒྲ་སྣ་ཚོགས་དང་། དྲི་སྣ་ཚོགས་དང་། རོ་སྣ་ཚོགས་དང་། རེག་བྱ་སྣ་ཚོགས་ཀྱིས་ཕྱོགས་བཅུར་འཁྲིགས་པར་རང་བྱུང་ལ་མི་སྒྲིབ་པར་གསལ་བའི་རྒྱན་བསམ་གྱིས་མི་ཁྱབ་པས་བཀླུབས་པ། ཞེས་གསུངས། དེའི་དོན་ནི། སྤྱིར་རྒྱན་གྱི་རྣམ་གྲངས་ལ་བདུན་དུ་ངེས་པ་ལས། དེའི་དང་པོ་འོག་གཞིའི་རྒྱན་ཆོས་ཅན། ཁྱོད་བཤད་དུ་ཡོད་དེ། གཞལ་ཡས་ཁང་གི་ལྟེ་བར་ཡེ་ཤེས་ལྔ་མཚོན་པའི་འཁོར་ལོ་རྩིབས་བཞི་པའི་མཐའ་ཆོས་ཉིད་མཚོན་པའི་རྡོ་རྗེ་རྭ་བ་ཟླུམ་པོས་བསྐོར་བ་ལ་དེ་ལྟར་དུ་བརྗོད་པའི་ཕྱིར། གཉིས་པ་ལོགས་རྒྱན་ལ་གཉིས་ལས། རིན་པོ་ཆེའི་རྒྱན་ཆོས་ཅན། ཁྱོད་ཀྱི་ཁྱད་ཆོས་བཤད་དུ་ཡོད་དེ། གཉིས་སུ་མེད་པའི་ཡེ་ཤེས་ཀྱི་རྩལ་མ་འགགས་པར་རང་སྣང་བའི་རྟགས་སུ་པཉྩ་རེ་ཁཱའི་རྩིག་པའི་སྟེང་དུ་རིན་པོ་ཆེའི་ཕ་གུ་དང་། ཕྲེང་བ་དང་། ཆུན་འཕྱང་དང་། ཤར་བུ་དང་། མདའ་ཡབ་ལ་སོགས་པའི་རྒྱན་ཁྱད་པར་དུ་འཕགས་པ་དུ་མས་སྤྲས་པ་ཡིན་པའི་ཕྱིར། དེ་ལྟར་ཡང་འོད་རིམ་ལས། ཡེ་ཤེས་རྩིག་སྟེང་སེང་མགོས་གཏམས། །མི་འཇིགས་ཁ་ནས་མུ་ཏིག་ཧཱར། །ཕ་གུ་མཛེས་པའི་བད་དང་ལྡན། །དྲྭ་བ་དྲྭ་ཕྱེད་མགུལ་འཁོར་ལྡན། །ཞེས་སོ། །འདོད་ཡོན་གྱི་རྒྱན་ཆོས་ཅན། དེའང་བཤད་དུ་ཡོད་དེ། གཟུགས་རྡོ་རྗེ་མ་སོགས་འདོད་ཡོན་ལྔའི་ལྷ་མོས་ཕྱོགས་ཀུན་དུ་འཁྲིགས་པ་ཡིན་པའི་ཕྱིར་ཏེ། དོན་འདོད་པའི་ཡོན་ཏན་ལྔ་མ་སྤངས་རྣམ་དག་རྒྱན་དུ་རྫོགས་པའི་རྟགས་སུ་དེ་ལྟར་སྣང་བའི་ཕྱིར། དེའང་འོད་རིམ་ལས། གཟུགས་སོགས་ལྷ་མོས་འཁྲིགས་པ་སྟེ། །སྣ་ཚོགས་མཆོད་བྱེད་རོལ་མོ་ཡིས། །བར་སྣང་ཁམས་ཀུན་སྤྲིན་ཕུང་བཞིན། །ཞེས་སོ། །གསུམ་པ། སྟེང་རྒྱན་ཆོས་ཅན། ཁྱོད་བཤད་དུ་ཡོད་དེ། དབུས་བུམ་པ་ཟླུམ་པོའི་སྟེང་དུ་བྲེ་མཚོན་པའི་འཕྱུར་བུའི་རྩེར། པདྨ་ལ་གནས་པའི་འཁོར་ལོ་རིམ་པ་བཅུ་གསུམ་གྱི་སྟེང་ན་རཏྣའི་གདུགས་ཀྱིས་མཛེས་ཤིང་། རྡོ་རྗེ་རིན་པོ་ཆེའི་ཏོག་གིས་མཛེས་པར་སྤྲས་པའི་ཕྱིར་ཏེ། རྡོ་རྗེ་མེ་ལོང་ལས། ཆོས་ཀྱི་འཁོར་ལོ་བསྐོར་བྱས་ཤིང་། །ཉོན་མོངས་ཚད་པའི་གདུང་བ་སེལ། །ཐུགས་རྗེ་གདུགས་ཀྱི་འཁོར་ལོར་བརྟན། །མ་ལུས་གཅིག་ཏུ་འདུས་པ་ནི། །ཏོག་སྟོང་འོད་ཟེར་ལྡན་པ་སྟེ། །ཞེས་གསུངས་པའི་ཕྱིར་དང་། རྟ་བབས་ཀྱི་རྩེར་ཡང་གདུགས་ཀྱི་རྩ་བར་འཁོར་ལོ་རི་དྭགས་ཀྱིས་བསྐྱོད་པ་དང་། གཞན་ཡང་ཕྱོགས་ཀུན་ཏུ་རྔ་ཡབ་དང་བ་དན་ལ་སོགས་པས་མཛེས་པར་སྤྲས་པའི་ཕྱིར། བཞི་པ། སྒོ་དང་རྟ་བབས་ཀྱི་རྒྱན་ཆོས་ཅན། ཁྱོད་བཤད་དུ་ཡོད་དེ། སྒོ་བ་གླང་སེང་ལ་སོགས་པའི་རྒྱན་གྱི་བྱེ་བྲག་སྣ་ཚོགས་ཀྱིས་བརྒྱན་པ་ཡིན་པའི་ཕྱིར་ཏེ། རྔམ་གློག་ལས། གཞལ་ཡས་དེ་ཡི་སྒོ་བཞི་ན། །གླང་སེང་གཉིས་ཀྱིས་མཛེས་པར་བརྒྱན། །རྟ་བབས་རྣམས་ཀྱི་འཁོར་ལོ་ལ། །གསེར་གྱི་དྲིལ་བུ་འབར་བ་དག །དཀོན་མཆོག་གསུམ་གྱི་སྒྲ་ཡང་སྒྲོག །ཅེས་གསུངས་པའི་ཕྱིར། ལྔ་པ། ཕྱི་རོལ་གྱི་རྒྱན་ཆོས་ཅན། བཤད་དུ་ཡོད་དེ། སྒོའི་གཡས་གཡོན་གཉིས་ན་ཏཱ་ལའི་ལྗོན་པ་དང་། དཔག་བསམ་གྱི་ཤིང་དག་གསེར་གྱི་ཐིག་གུས་སྦྲེལ་བ་ལས་དྲིལ་བུའི་སྒྲ་སྒྲོག་པ་ལ་སོགས་པས་བརྒྱན་པ་ཡིན་པའི་ཕྱིར་ཏེ། འོད་རིམ་ལས། སྒོ་བཞི་གཡས་གཡོན་ལྗོན་ཤིང་དང་། །དཔག་བསམ་ཤིང་ཟུང་ཙོང་ཙོང་སྦྲེལ། །དྲིལ་བུ་གཡེར་ཁ་ཐེག་ཆེན་སྒྲོག །བཀྲ་ཤིས་བྱ་སྙན་སྒྲ་སྒྲོག་ལྡན། །ཡིད་བཞིན་རིན་ཆེན་བརྒྱད་བསྐོར་བ། །རིན་ཆེན་ཕུང་པོ་བཞི་གཉིས་ལྡན། །ཞེས་གསུངས་པའི་ཕྱིར། དྲུག་པ། ངོ་བོ་ཉིད་ཀྱི་རྒྱན་ཆོས་ཅན། ཁྱོད་བཤད་དུ་ཡོད་དེ། བདེན་བཞི་མཚོན་པའི་གྲུ་ཆད་དང་། བདེན་པ་དབྱེར་མེད་མཚོན་པའི་བར་ཁྱམས་ལ་སོགས་པས་མཛེས་པར་བརྒྱན་པའི་ཕྱིར། བདུན་པ། བདག་པོའི་རྒྱན་ཆོས་ཅན། དེ་ཡང་བཤད་དུ་ཡོད་དེ། སྤྲུལ་པའི་འཕྲོ་འདུ་བཞི་བཅུ་རྩ་གཉིས་ཀྱིས་གཞལ་ཡས་ཁང་མཛེས་པར་བརྒྱན་པའི་ཕྱིར་ཏེ། འདི་ཉིད་ལས། དཀྱིལ་འཁོར་བཞི་བཅུ་གཉིས་ཀྱིས་བརྒྱན། །ཞེས་གསུངས་པའི་ཕྱིར། བརྒྱད་པ་གཞལ་ཡས་ཁང་གི་སྒོའི་དོན་དེ་ཇི་ལྟ་བུ་ཞེ་ན། དེ་འཆད་པ་ལ། རྣམ་པར་ཐར་པ་བཞིའི་སྒོ་ནས་འཇུག་པའི་སྒོ་ཁྱུད་ཅན། ཞེས་གསུངས། དེའི་དོན་ནི། གཞལ་ཡས་ཁང་དེར་འཇུག་པའི་སྒོ་ཆོས་ཅན། ཁྱོད་ཀྱི་དོན་བཤད་དུ་ཡོད་དེ། རྣམ་ཐར་བཞིའི་ཏིང་ངེ་འཛིན་གྱི་སྒོ་ནས་བྱང་ཆུབ་ཆེན་པོར་ལྷུན་གྱིས་འཇུག་པའི་རྟགས་སུ་ཕྱོགས་ཀྱི་དབྱེ་བས་སྒོ་བཞི་དང་ལྡན་པ་ཡིན་པའི་ཕྱིར་ཏེ། ལེ་ལག་ལས། སྟོང་སྨོན་མཚོན་མེད་འོད་གསལ་འཇུག །དེ་ཕྱིར་ཡེ་ཤེས་སྒོ་བཞིར་ཤར། །ཞེས་གསུངས་པའི་ཕྱིར། དེའང་ཐང་སྒོ་ལྟ་བུ་མ་ཡིན་ཏེ། སྒོ་ཁྱུད་ཀྱི་ཟླས་དྲངས་པའི་འགྲམ་ལོགས་དང་། ཡ་ཕུབས་རྡོ་རྗེའི་དྲ་མིག་ཅན་ལ་སོགས་པས་བརྒྱན་པའི་ཕྱིར། དགུ་པ་རྟ་བབས་ནི། རྣམ་པར་ཐར་པ་བརྒྱད་ཀྱི་རྟ་བབས་དང་ལྡན་པ། ཞེས་གསུངས་པའི་དོན་ནི། རྟ་བབས་ཆོས་ཅན། ཁྱོད་ལ་དབྱེ་ན་རྒྱུའི་རྟ་བབས་བརྒྱད་དང་འབྲས་བུའི་རྟ་བབས་བརྒྱད་དེ་བཅུ་དྲུག་ཏུ་གྲངས་ངེས་པ་ཡིན་ཏེ། རྡོ་རྗེ་མེ་ལོང་ལས། ལམ་བརྒྱད་རིམ་པར་བགྲོད་པ་ཡིས། །འབྲས་བུའི་ཡོན་ཏན་ཀུན་རྫོགས་པས། །རྟ་བབས་རྒྱུ་འབྲས་བཅུ་དྲུག་བསྟན། །ཞེས་གསུངས་པའི་ཕྱིར། དེ་ལས་རྒྱུའི་རྟ་བབས་ཆོས་ཅན། ཁྱོད་བཤད་དུ་ཡོད་དེ། མཚོན་སྒོ་རྣམ་ཐར་བཞིའི་སྒོ་ནས་མཚོན་བྱ་མི་གནས་པའི་ཡེ་ཤེས་ལ་འཇུག་པ་དེ་ཡང་ཐུན་མོང་རྣམ་ཐར་གྱི་ཐེག་པ་བརྒྱད་ལ་སྦྱང་པས་རྟོགས་པའི་རྟགས་སུ་སྒོ་ཕུབས་ཀྱི་ཕྱི་ནང་གཉིས་སུ་ཐེམ་སྐས་བཞི་བཞི་སྟེ་བབས་ཞོན་གྱི་རྟ་བབས་བརྒྱད་དང་ལྡན་པ་ཡིན་པའི་ཕྱིར། དེ་ལྟར་ཡང་ལེ་ལག་ལས། དེར་འགྲོ་ལམ་སྟེགས་བརྒྱད་དང་ལྡན། །རྟ་བབས་བརྒྱད་དུ་འགྱུར་བ་ཡིན། །ཞེས་དང་། འགྲེལ་ཆུང་ལས། ཉན་ཐོས་རང་རྒྱལ་བྱང་ཆུབ་དང་། །བྱ་བ་རྒྱུད་དང་གཉིས་ཀ་རྒྱུད། །རྣལ་འབྱོར་བསྐྱེད་དང་རྫོགས་པ་ཡི། །རྣམ་ཐར་བརྒྱད་ཕྱིར་རྟ་བབས་བརྒྱད། །ཅེས་སོ། །འབྲས་བུའི་རྟ་བབས་ཆོས་ཅན། དེའང་བཤད་དུ་ཡོད་དེ། ཐེག་པ་བརྒྱད་ཀྱི་གྲུབ་མཐའི་ཡོན་ཏན་བརྒྱད་རྫོགས་པའི་རྟགས་སུ་སྒོ་ལོགས་ཀྱི་ཕྱི་ཟུར་བཞི་ནས་ཀ་བས་བཏེག་པའི་སྟེང་དུ་རྒྱན་གྱི་རྟ་བབས་བརྒྱད་དང་ལྡན་པ་ཡིན་པའི་ཕྱིར། དེ་ལྟར་ཡང་སྒྱུ་འཕྲུལ་བྱེ་བྲག་བསྟན་པ་ལས། དེ་ཡི་གྲུབ་པའི་མཐའ་རྫོགས་པའི། །ཡོན་ཏན་བརྒྱད་ཕྱིར་རྟ་རྐང་དང་། །ཆུ་སྐྱེས་སྒྲོམ་དང་ཟ་ར་ཚགས། །སྣ་འཕྱང་ཆུན་འཕྱང་ཤར་བུ་དང་། །ཁྱུང་མགོ་མཛེས་པས་རིམ་པར་འཁྲིགས། །ཞེས་སོ། །དེའང་རྒྱན་དང་ལྡན་པ་ཡིན་ཏེ། སྒོ་ཁང་དང་སྒོའི་བསིལ་ཁང་གི་མུན་པ་སེལ་བྱེད་གླང་རྒྱབ་ལ་སོགས་པའི་རྒྱན་དུ་མས་སྤྲས་པའི་ཕྱིར། བཅུ་པ་མཚན་ཉིད་ནི། ཕྱི་དང་ནང་མེད་པ་ཀུན་ཏུ་ཡང་ནང་དུ་གྱུར་པ་ན། ཞེས་གསུངས། དོན་ནི་གཞལ་ཡས་ཁང་དེའི་མཚན་ཉིད་ཆོས་ཅན། ཁྱོད་ཆོས་ཀྱི་དབྱིངས་རྡོ་རྗེ་ཀུན་ཏུ་བཟང་མོའི་བྷ་ག་ཉིད་དུ་འདུས་པས་ན་ཐ་སྙད་དུ་ནང་ཞེས་བརྗོད་པ་ཡིན་ཏེ། རང་བྱུང་ཡེ་ཤེས་ལ་ཕྱི་གཟུང་བའི་ཡུལ་དང་ནང་འཛིན་པའི་སེམས་གཉིས་སུ་མེད་པས་ཤེས་བྱའི་དཀྱིལ་འཁོར་ཀུན་ཀྱང་རང་བྱུང་ཡེ་ཤེས་སུ་གསལ་བ་ལས་གཞན་མ་དམིགས་པའི་ཕྱིར་ཏེ། འགྲེལ་ཆུང་ལས། གནས་མཆོག་མཚན་ཉིད་བརྗོད་པ་ནི། །གཞལ་ཡས་ཕྱི་ནང་ཆོས་དབྱིངས་ནང་། །བྷ་ག་ཉིད་དུ་བསྡུས་པས་ན། །ཀུན་ཏུ་ནང་ཞེས་བརྗོད་པ་ཡིན། །ཞེས་གསུངས་པའི་ཕྱིར། དེ་ལྟར་ན་ཆོས་ཀྱི་དབྱིངས་དེའི་ངང་ལས། ཡེ་ཤེས་ཀྱི་འཕྲུལ་པར་སྣང་བའི་གཞལ་ཡས་ཁང་རྒྱན་དང་བཅས་པ་ཐམས་ཅད་ཀྱང་། ཤེལ་གྱི་སྦུ་གུར་རིན་པོ་ཆེ་སྣ་ཚོགས་བཅུག་པ་ལྟར་མི་སྒྲིབ་པར་གསལ་བའི་རང་བཞིན་ཅན་ཡིན་ནོ། །ཞེས་འཆད་པར་བྱེད་པ་ནི། འོག་མིན་གྱི་གནས་མཐའ་དང་དབུས་མེད་པ་ན། སོགས་ནས། ཕྱི་དང་ནང་མེད་པ་ཀུན་ཏུའང་ནང་དུ་གྱུར་པ་ན། ཞེས་པའི་གཞུང་འདི་བྱུང་། འོ་ན་གཉིས་པ་གདན་ཁྲིའི་དོན་བསྟན་པ་དེ་ཇི་ལྟ་བུ་ཡིན་ཞེ་ན། དེ་འཆད་པར་བྱེད་པ་ལ། མི་འཇིགས་པ་སེང་གེའི་ཁྲི་དང་། སྟོབས་གླང་པོ་ཆེའི་ཁྲི་དང་། རྫུ་འཕྲུལ་རྟའི་ཁྲི་དང་། དབང་རྨ་བྱའི་ཁྲི་དང་། ཐོགས་པ་མེད་པ་ནམ་མཁའ་ལྡིང་གི་ཁྲི་དང་། རང་བཞིན་གྱིས་འོད་གསལ་བ་ཉི་ཟླའི་དཀྱིལ་འཁོར་དང་། གོས་པ་མེད་པ་པདྨ་རིན་པོ་ཆེའི་གདན་ལ། ཞེས་པའི་གཞུང་འདི་བྱུང་། དེའི་དོན་བཤད་ན་གསུམ་སྟེ། ཆོས་ཀྱི་འཁོར་ལོ་བསྐོར་བའི་གདན། སའི་ཁྱད་པར་བགྲོད་པའི་གདན། ཡོན་ཏན་གྱི་ཆེ་བས་ཉེས་ཚོགས་བཅོམ་པའི་གདན་རྣམས་སུ་ངེས་པའི་ཕྱིར། དེའི་དང་པོ་འོག་གཞི་ཆོས་ཀྱི་འཁོར་ལོ་བསྐོར་བའི་གདན་དེ་ཆོས་ཅན། སྔར་བསྟན་པའི་འོག་གཞིའི་རྒྱན་དེ་ཉིད་ཡིན་ཏེ། རིགས་ལྔ་ཡེ་ཤེས་ལྔའི་ཕྱག་རྒྱས་རྟོག་ཚོགས་གཅོད་པའི་ཆོས་ཀྱི་འཁོར་ལོ་རྒྱུན་མི་ཆད་པར་བསྐོར་བའི་རྟགས་སུ་རང་ཤར་བ་ཡིན་པའི་ཕྱིར། གཉིས་པ་སའི་ཁྱད་པར་བགྲོད་པའི་གདན་དེ་ཆོས་ཅན། བཤད་དུ་ཡོད་དེ། ཡོན་ཏན་གྱི་རྟགས་སུ་སེང་གེ་ལ་སོགས་པ་སེམས་ཅན་ལྔ་པོ་རེ་རེའང་བརྒྱད་བརྒྱད་ཀྱི་གདན་ཁྲི་དང་ལྡན་པའི་ཕྱིར་ཏེ། རང་བྱུང་གི་ཡེ་ཤེས་རྟོགས་པའི་རིག་པ་ལ་འབྲས་བུའི་ཆོས་མི་འཇིགས་པ་བཞི་སོགས་ལྷུན་གྱིས་གྲུབ་པས་ཡང་དག་པར་རྫོགས་པའི་སངས་རྒྱས་སུ་བསྟན་ཅིང་ངེས་པར་བྱས་པའི་རྟགས་སུ་དེ་ལྟར་སྣང་བ་ཡིན་པའི་ཕྱིར། དེ་ལྟར་ཡང་དབང་བསྐུར་རྒྱལ་པོའི་རྒྱུད་ལས། ཐུགས་ནི་མི་འཇིགས་བཞི་ཡིས་བདུད་བཞི་འཇོམས། །དེ་གྲུབ་རྟགས་སུ་སེང་གེའི་ཁྲི་ལ་བཞུགས། །སྐུ་ནི་སྟོབས་བཅུས་མི་དགེ་བཅུ་རྣམས་འདུལ། །དེ་གྲུབ་རྟགས་སུ་གླང་ཆེན་ཁྲི་ལ་བཞུགས། །ཡོན་ཏན་རྫུ་འཕྲུལ་རྐང་བཞིས་ཆགས་མེད་སྒྲོལ། །དེ་གྲུབ་རྟགས་སུ་རྟ་མཆོག་ཁྲི་ལ་བཞུགས། །གསུང་ནི་དབང་བཅུ་མཐར་ཕྱིན་རྒྱལ་པོའི་གསུང་། །དེ་གྲུབ་རྟགས་སུ་རྨ་བྱའི་ཁྲི་ལ་བཞུགས། །ལས་ནི་ཕྲིན་ལས་བཞི་ཡིས་ཐོགས་མེད་སྒྲོལ། །དེ་གྲུབ་རྟགས་སུ་ཤང་ཤང་ཁྲི་ལ་བཞུགས། །ཞེས་སོ། །གདན་དེ་རྣམས་ཆོས་ཅན། ཁྱོད་ལ་སའི་ཁྱད་པར་བགྲོད་པའི་གདན་ཞེས་བརྗོད་པ་ལ་རྒྱུ་མཚན་ཡོད་དེ། ཐེག་པ་བརྒྱད་ལ་བགྲོད་ནས་འབྲས་བུའི་ཡོན་ཏན་ཐུགས་སུ་ཆུད་པའི་རྟགས་སུ་སེང་གེ་ལ་སོགས་པ་རེ་རེ་ལའང་བརྒྱད་བརྒྱད་དུ་མཇུག་མ་ནང་དུ་བསྣོལ་ནས་རིན་པོ་ཆེའི་ཁྲི་རྐང་འདེགས་པ་ཡིན་པའི་ཕྱིར། གསུམ་པ་ཡོན་ཏན་གྱི་ཆེ་བས་ཉེས་ཚོགས་བཅོམ་པའི་གདན་དེ་ཆོས་ཅན། བཤད་དུ་ཡོད་དེ། རྒྱལ་བའི་ཐུགས་རང་བཞིན་གྱིས་འོད་གསལ་ཞིང་ཐབས་ཤེས་དབྱེར་མེད་པའི་རྟགས་སུ་ཉི་ཟླའི་གདན་དང་། པདྨ་ནི་འདམ་ལས་སྐྱེས་ཀྱང་ཉེས་སྐྱོན་གྱིས་མ་གོས་པ་ལྟར་མཐའི་སྐྱོན་གྱིས་གོས་པ་མེད་པའི་རྟགས་སུ་པདྨའི་གདན་དང་། རེ་བ་ཡིད་བཞིན་དུ་སྐོང་ཞིང་དཀོར་བདུན་ལྷུན་གྱིས་གྲུབ་པའི་རྟགས་སུ་རིན་པོ་ཆེའི་ཁྲི་རྐང་མཛོད་མིག་བདུན་ལྡན་རྣམས་སུ་ཤར་བ་ཡིན་པའི་ཕྱིར། ཁོ་ན་རེ། འོ་ན་གདན་དེ་རྣམས་ཀྱི་བརྩེགས་ལུགས་ཇི་ལྟ་བུ་ཞིག་ཡིན་ཞེ་ན། དེའང་བཤད་དུ་ཡོད་དེ། སྐྱེས་བུ་ལྔ་ལ་ལྔ་བརྩེགས་ཏེ། །སེམས་དཔའ་སེམས་མ་སུམ་བརྩེགས་དང་། །ཉི་རྐྱང་ཁྲོ་ལ་པད་རྐྱང་ཐུབ། །ཀུན་བཟང་ཡབ་ཡུམ་བཞི་བརྩེགས་སོ། །ཞེས་གསུངས་པའི་ཕྱིར། འོན་ཀྱང་དཀྱིལ་འཁོར་ལ་འགོད་པའི་ཚེ་དེ་ལྟར་ཡིན་གྱི། འདིར་ཆོས་འཆད་པའི་ཚེ་ན་ཀུན་བཟང་ལ་གདན་ལྔ་བརྩེགས་སུ་སྤྱན་འགྲེལ་ལས་གསུངས་སོ། །འོ་ན་གདན་བརྩེགས་ཀྱི་ཟླ་བ་སྟེང་དུ་འོང་བའི་རྒྱུ་མཚན་གང་ཞེ་ན། དེའང་བཤད་དུ་ཡོད་དེ། སྤྱན་འགྲེལ་ལས། གཙོ་བོ་ནི་ཤེས་རབ་ལ་སྤྱོད་པའི་ཕྱིར་དང་། ནང་གི་ཆུ་སྐྱེས་ཀྱི་ལྟེ་བའི་ཉི་མ་ལ་ཟླ་བ་བརྟེན་པའི་ཕྱིར་རི་བོང་ཅན་སྟེང་ན་གནས་སོ། །ཞེས་གསུངས་པའི་ཕྱིར། དེ་ནི་གསང་བ་ལྟར་ཐབས་ལམ་འོག་སྒོ་དང་སྦྱར་ནས་བཤད་པའོ། །གཞན་དུ་ཕྱི་གྲོལ་ལམ་ལྟར་བཤད་ནའང་ཟླ་བ་སྟེང་དུ་འོང་སྟེ། གཙོ་བོར་ཐབས་སྣང་བ་འགག་པ་མེད་པ་མཚོན་པའི་ཕྱིར་དང་། ནང་ཐབས་ལམ་སྟེང་སྒོ་ལྟར་བཤད་ན་ཟླ་བ་སྟེང་དུ་འོང་བ་ཡིན་ཏེ། ལྟེ་བའི་ཨ་ཐུང་གི་སྟེང་དུ་སྤྱི་བོའི་ཧཾ་ཡིག་གམ་སྙིང་གའི་སྲོག་མི་ཤིགས་པའི་ཐིག་ལེ་གནས་པ་ཡིན་པའི་ཕྱིར། ཞེས་འཆད་པར་བྱེད་པ་ནི། མི་འཇིགས་པ་སེང་གེའི་ཁྲི་དང་། སོགས་ནས། པདྨ་རིན་པོ་ཆེའི་གདན་ལ། ཞེས་པའི་གཞུང་འདི་བྱུང་། གསུམ་པ་གང་ལ་གསུངས་པའི་འཁོར་ཕུན་སུམ་ཚོགས་པ་དེ་འཆད་པ་ལ། འཁོར་གྱི་རྣམ་གྲངས་དངོས་བཤད་པ་དང་། ཞར་ལ་དེ་དག་གི་ཚད་བཤད་པའོ། །དང་པོ་ལ། ལྷན་ཅིག་པའི་འཁོར་བཤད་པ་དང་། གོ་ཕྱེ་བའི་འཁོར་བཤད་པ་གཉིས་ཏེ། ཁོག་གཞུང་ལས། ལྷན་ཅིག་འཁོར་དང་གོ་ཕྱེ་ལ། ཞེས་གསུངས་པའི་ཕྱིར། དེའི་དང་པོ་ལྷན་ཅིག་པའི་འཁོར་བཤད་པ་ལ། རང་བཞིན་གཉིས་སུ་མེད་པའི་འཁོར་བཤད་པ། རིག་པ་ཁྱད་པར་ཅན་གྱི་འཁོར་བཤད་པ། དད་པས་གཏམ་ཉན་པའི་འཁོར་བཤད་པའོ། །དང་པོ་རང་བཞིན་གཉིས་སུ་མེད་པའི་འཁོར་དེ་ཆོས་ཅན་བཤད་དུ་ཡོད་དེ། སྔར་སྨོས་པའི་འཆད་པའི་སྐྱེས་བུ་རིགས་ལྔ་ཡབ་ཡུམ་བཅུ་པོ་དེ་ཡིན་པའི་ཕྱིར་ཏེ། ཁོག་གཞུང་ལས། ཉིད་ལས་མི་གཞན་རིགས་ལྔ་དང་། ཞེས་གསུངས་པའི་ཕྱིར། གཉིས་པ་རིག་པ་ཁྱད་པར་ཅན་གྱི་འཁོར་བཤད་པ་ལ། གོ་དོན་དང་། དེ་གཏན་ལ་དབབ་པའོ། །དང་པོ་གོ་དོན་ནི། རྒྱལ་སྲས་སེམས་དཔའ་དང་འཇོམས་བྱེད་ཁྲོ་བོའི་འཁོར་རྣམས་ཆོས་ཅན། ཁྱོད་ལ་རིག་པ་ཁྱད་པར་ཅན་གྱི་འཁོར་ཞེས་བརྗོད་པའི་རྒྱུ་མཚན་ཡོད་དེ། སྟོན་པའི་ཐུགས་རང་རིག་པའི་ཡེ་ཤེས་ཀྱི་ཁྱད་པར་ལས་རང་སྣང་བ་ཡིན་པའི་ཕྱིར། དེ་ལྟར་ཡང་རྒྱ་མཚོ་ལས། དེ་བཞིན་ཐུགས་ཀྱི་ཁྱད་པར་ལས། རང་སྣང་རྒྱལ་བ་སེམས་སོགས་དང་། ཞེས་སོ། །གཉིས་པ་གཏན་ལ་དབབ་པ་ལ། རྒྱལ་སྲས་སེམས་དཔའི་འཁོར་བཤད་པ་དང་། འཇོམས་བྱེད་ཁྲོ་བོའི་འཁོར་བཤད་པའོ། །དང་པོ་རྒྱལ་སྲས་སེམས་དཔའི་འཁོར་འཆད་པར་བྱེད་པ་ལ། དེ་ནས་བྱང་ཆུབ་ཆེན་པོ་རྡོ་རྗེ་མཐོང་བ་དང་། བྱང་ཆུབ་ཆེན་པོ་རྡོ་རྗེ་ཐོས་པ་དང་། བྱང་ཆུབ་ཆེན་པོ་རྡོ་རྗེ་སྣོམ་པ་དང་། བྱང་ཆུབ་ཆེན་པོ་རྡོ་རྗེ་མྱོང་བ་དང་། བཙུན་མོ་མཐོང་བར་བྱ་བ་དང་། མཉན་པར་བྱ་བ་དང་། བསྣམ་པར་བྱ་བ་དང་། མྱོང་བར་བྱ་བའི་ཚོགས་དང་། བྱང་ཆུབ་ཆེན་པོ་རྡོ་རྗེ་མཐོང་བྱེད་དང་། བྱང་ཆུབ་ཆེན་པོ་རྡོ་རྗེ་ཐོས་བྱེད་དང་། བྱང་ཆུབ་ཆེན་པོ་རྡོ་རྗེ་སྣོམ་བྱེད་དང་། བྱང་ཆུབ་ཆེན་པོ་རྡོ་རྗེ་མྱོང་བྱེད་དང་། བཙུན་མོ་འདས་པ་དང་། ད་ལྟར་དང་། འབྱུང་བ་དང་། མ་བྱོན་པའི་ཚོགས་དང་། ཞེས་པའི་གཞུང་འདི་བྱུང་། དེའི་དོན་བཤད་ན། སྤྱིའི་མཚན་དང་། བྱེ་བྲག་གི་མཚན་གཉིས་ལས། དང་པོ་སྤྱིའི་མཚན་ནི། སེམས་དཔའ་ཡབ་རྣམས་ཀྱི་མཚན་ཆོས་ཅན། བྱང་ཆུབ་ཆེན་པོ་རྡོ་རྗེ་ཞེས་བརྗོད་པའི་རྒྱུ་མཚན་ཡོད་དེ། མིག་ཤེས་ལ་སོགས་པའི་རྟོག་ཚོགས་རྣམས་ཡེ་ནས་ཆོས་ཉིད་བྱང་ཆུབ་ཀྱི་སེམས་ཡིན་པ་ལས། ཡིན་པ་ལྟར་མངོན་དུ་གྱུར་པའི་འབྲས་བུ་ནི་བྱང་ཆུབ་ཆེན་པོ། དེ་ལྟར་རྒྱུ་འབྲས་ལྟར་སྣང་ཡང་དོན་དམ་པར་ལྷ་རྟོག་དབྱེར་མི་ཕྱེད་པས་ན་རྡོ་རྗེ་ཞེས་བརྗོད་པའི་ཕྱིར་ཏེ། འགྲེལ་ཆུང་ལས། འཁོར་གྱི་བཀོད་པ་ཇི་སྙེད་པ། །ཁམས་དང་སྐྱེ་མཆེད་ཡིན་པར་གྲགས། །རྣམ་ཤེས་ཡུལ་དང་དབང་པོ་དང་། །དུས་དང་ཕྱིན་ཅི་མ་ལོག་རྣམས། །བྱང་ཆུབ་ཆེན་པོའི་རང་བཞིན་དུ། །ལྷུན་གྱིས་གྲུབ་པའི་དཀྱིལ་འཁོར་ཡིན། །ཞེས་གསུངས་པའི་ཕྱིར། དེ་དག་གི་ཡུམ་སེམས་མ་རྣམས་ཀྱི་མཚན་ཆོས་ཅན། བཙུན་མོ་ཞེས་བརྗོད་པའི་རྒྱུ་མཚན་ཡོད་དེ། སྐབས་འདིར་ཡུལ་བཞིས་རྣམ་ཤེས་བཞི་དང་། དུས་བཞིས་གོ་ཕྱེ་ནས་དབང་པོ་བཞི་བསྐྱེད་པའི་ཆ་ནས་དེ་ལྟར་བརྗོད་པ་ཡིན་པའི་ཕྱིར། གཉིས་པ་བྱེ་བྲག་གི་མཚན་ནི། ནང་སེམས་བཞི་པོ་ཆོས་ཅན། དེ་རྣམས་ལ་མཐོང་བ་ལ་སོགས་པར་སྨོས་པ་ནི་རིམ་པ་ལྟར་མིག་རྣ་བ་སྣ་ལྕེའི་རྣམ་ཤེས་བཞི་ཡིན་པས་རྟོག་པའི་མཚན་ཡིན་ཏེ། མིག་དབང་ལ་བརྟེན་ནས་མིག་ཤེས་ཀྱིས་ཡུལ་གཟུགས་མཐོང་བ་ལ་སོགས་པ་ཡིན་པའི་ཕྱིར། མཐོང་བ་ལ་སོགས་པ་བཞི་པོ་ཆོས་ཅན། ཁྱོད་ལྷའི་དུས་ན་ཐུགས་ཀྱི་སེམས་དཔའ་བཞི་ཡིན་ཏེ། མཐོང་བ་ས་སྙིང་། ཐོས་པ་ཕྱག་རྡོར། སྣོམ་པ་ནམ་སྙིང་། མྱོང་བ་སྤྱན་རས་གཟིགས་དབང་ཕྱུག་རྣམས་སུ་ངེས་པའི་ཕྱིར། དེ་རྣམས་ལ་ཐུགས་ཀྱི་སེམས་དཔའ་ཞེས་བརྗོད་པ་ལ་རྒྱུ་མཚན་ཡོད་དེ། འདིའི་ལེའུ་བཞི་པར། ཀ་ནི་སྤྱན་གྱི་ཐུགས་ཀྱི་མཆོག །ཁ་ནི་སྙན་གྱི་ཐུགས་ཀྱི་མཆོག །ག་ནི་ཤངས་ཀྱི་ཐུགས་ཀྱི་མཆོག །གྷ་ནི་ལྗགས་ཀྱི་ཐུགས་ཀྱི་མཆོག །ཅེས་དང་། སྤར་ཁབ་ལས། རྣམ་ཤེས་བཞི་པོ་ནི་རིག་པ་ཁོ་ནའི་ཕྱིར་ཐུགས་ཏེ། ཞེས་གསུངས་པའི་ཕྱིར། ནང་སེམས་བཞི་པོའི་ཡུམ་ཆོས་ཅན། ཁྱོད་རྣམས་ལ་མཐོང་བར་བྱ་བ་ལ་སོགས་པར་སྨོས་པ་ནི་རིམ་པ་ལྟར་ཡུལ་གཟུགས་སྒྲ་དྲི་རོ་བཞི་ཡིན་པས་རྟོག་པའི་མཚན་ཏེ། མིག་ཤེས་ལ་སོགས་ཀྱི་མཐོང་བྱ་གཟུགས་ལ་སོགས་པའི་ཡུལ་ཡིན་པའི་ཕྱིར། དེ་དག་ཆོས་ཅན། ལྷའི་དུས་ན་སྐུའི་སེམས་མ་བཞིར་གྲགས་ཏེ། མཐོང་བར་བྱ་བ་ལཱ་སྱེ་མ། །མཉན་པར་བྱ་བ་གིརྟི་མ། །བསྣོམ་པར་བྱ་བ་མཱ་ལེ་མ། །མྱོང་བར་བྱ་བ་ནཱིརྟི་མ་རྣམས་སུ་ངེས་པའི་ཕྱིར། དེ་རྣམས་ལ་སྐུའི་སེམས་མ་ཞེས་བརྗོད་པ་ལ་རྒྱུ་མཚན་ཡོད་དེ། ཡུལ་བཞིས་རྣམ་པར་ཤེས་པའི་རྟེན་བྱེད་པའི་ཕྱིར། དེ་ལྟར་ཡང་འདི་ཉིད་ལས། ཙ་ནི་སྤྱན་གྱི་སྐུ་ཡི་མཆོག །ཚ་ནི་སྙན་གྱི་སྐུ་ཡི་མཆོག །ཛ་ནི་ཤངས་ཀྱི་སྐུ་ཡི་མཆོག །ཛྷ་ནི་ལྗགས་ཀྱི་སྐུ་ཡི་མཆོག །ཅེས་དང་། རྡོ་རྗེ་ལས། རྣམ་ཤེས་བཞི་ཡིས་དམིགས་པའི་ཡུལ། །མཐོང་བར་བྱ་བ་ལ་སོགས་པ། །དམིགས་པར་བྱ་ཕྱིར་སྐུ་ཡི་མཆོག །ཅེས་སོ། །གལ་ཏེ་ཁོ་ན་རེ། འདིར་རྟོག་པའི་གོ་རིམ་ལྟར་སྦྱར་ན་ཡུལ་ཡུལ་ཅན་མ་འཁྲུལ་ནའང་ལྷ་ཡབ་ཡུམ་སྦྱོར་བའི་ཚེ་རྣ་བའི་ཡུལ་རོ་དང་། ལྕེའི་ཡུལ་སྒྲར་བྱུང་བས་སྦྱོར་ཚུལ་ནོར་ཏེ། སྤྱན་རས་གཟིགས་ཀྱི་ཡུམ་གཱིརྟི་མ་དང་། ཕྱག་རྡོར་གྱི་ཡུམ་ནཱིརྟི་མར་བྱུང་བའི་ཕྱིར་ཟེར་ན། ཡུལ་ཡུལ་ཅན་གྱི་དབང་དུ་བྱས་ན་དེ་ལྟར་བདེན་མོད་ཀྱང་། འདིར་རིགས་ཀྱི་དབང་དུ་བྱས་པས་འགལ་བ་མེད་དེ། ཉི་འོད་སེང་གེའི་རྒྱ་ཆེར་འགྲེལ་ལས། རྒྱུད་འདིར་ནི་རིགས་ཁོ་ན་གཙོ་བོར་བྱས་ཏེ། མཉན་པར་བྱ་བ་སྒྲའི་ལྷ་མོ་རྣ་བའི་ཡུལ་ཡིན་ཡང་། རིགས་ཀྱི་དུས་སུ་གསུང་གི་རིགས་ཡིན་པས། འཇིག་རྟེན་དབང་ཕྱུག་གི་ཡུམ་དུ་ཤེས་པར་བྱའོ། །ཞེས་སོགས་གསུངས་པའི་ཕྱིར། ཕྱི་སེམས་བཞི་པོ་ཆོས་ཅན། དེ་དག་ལ་མཐོང་བྱེད་ལ་སོགས་པར་སྨོས་པ་ནི་རིམ་པ་ལྟར། མིག་རྣ་བ་སྣ་ལྕེའི་དབང་པོ་བཞི་ཡིན་པས་རྟོག་པའི་མཚན་ཏེ། རྣམ་ཤེས་བཞིས་ཡུལ་བཞི་མཐོང་བའི་བདག་རྐྱེན་དབང་པོ་བཞིས་བྱེད་པའི་ཕྱིར། དེ་དག་ཆོས་ཅན། ལྷའི་དུས་ན་གསུང་གི་སེམས་དཔའ་བཞིར་གྲགས་ཏེ། མཐོང་བྱེད་བྱམས་པ། ཐོས་བྱེད་སྒྲིབ་པ་རྣམ་སེལ། སྣོམ་བྱེད་ཀུན་ཏུ་བཟང་པོ། མྱོང་བྱེད་འཇམ་དཔལ་དབྱངས་རྣམས་སུ་ངེས་པའི་ཕྱིར། དེ་རྣམས་ལ་གསུང་གི་སེམས་དཔའ་ཞེས་བརྗོད་པ་ལ་རྒྱུ་མཚན་ཡོད་དེ། དབང་པོས་ཡུལ་དང་ཤེས་པ་གཉིས་ཕྱི་ནང་གི་བརྡ་སྦྱོར་བྱེད་པའི་ཕྱིར། དེ་ལྟར་ཡང་འདི་ཉིད་ལས། པ་ནི་སྤྱན་གྱི་གསུང་གི་མཆོག །ཕ་ནི་སྙན་གྱི་གསུང་གི་མཆོག །བ་ནི་ཤངས་ཀྱི་གསུང་གི་མཆོག །བྷ་ནི་ལྗགས་ཀྱི་གསུང་གི་མཆོག །ཅེས་སོ། །ཕྱི་སེམས་བཞིའི་ཡུལ་ཆོས་ཅན། དེ་དག་ལ་འདས་པ་ལ་སོགས་པར་སྨོས་པ་ནི་རྟོག་པའི་མཚན་ཏེ། དུས་བཞིས་གོ་ཕྱེ་ནས་དབང་པོ་བཞི་སྐྱེད་པར་བྱེད་པའི་ཕྱིར། དེ་དག་ཆོས་ཅན། ལྷའི་དུས་ན་དུས་བཞིའི་ལྷ་མོ་སྟེ། འདས་པའི་དུས་བདུག་པ་མ་དང་། ད་ལྟར་བ་མེ་ཏོག །འབྱུང་བ་སྟེ་མ་འོངས་པ་མར་མེ། མ་བྱོན་པ་སྟེ་འབྱུང་བར་མ་ངེས་པའི་དུས་དྲི་ཆབ་མ་རྣམས་སུ་ངེས་པའི་ཕྱིར། དེ་ལྟར་ཡང་འདི་ཉིད་ལས། ཡ་ནི་སྐྱེ་བ་རྣམ་པར་དག །ཝ་ནི་གནས་པ་དག་པ་ཡིན། །ར་ནི་འཇིག་པ་དག་པ་སྟེ། །ལ་ནི་སྟོང་པ་དག་པའོ། །ཞེས་སོ། །ཁོ་ན་རེ། འདིར་དུས་བཞིར་སྨོས་པས་དུས་ལོག་སྟེ། སྡེ་སྣོད་གཞན་དུ་དུས་གསུམ་ལས་མ་བཤད་པའི་ཕྱིར་ཟེར། དེ་ལྟར་ན། ཆོས་མངོན་པ་མཛོད་ལས། ཆགས་གནས་འཇིག་སྟོང་བཞི་དང་། རྫོགས་ལྡན་ལ་སོགས་པའི་དུས་བཞི་བཤད་པ་དང་། དཀོན་མཆོག་བརྩེགས་པར། དུས་གསུམ་དང་བསམ་གྱིས་མི་ཁྱབ་པའི་དུས་ཏེ་བཞིར་གསུངས་པ་སོགས་ཀྱང་དུས་ལོག་པར་ཐལ་ལོ། །འོ་ན་འདིར་དུས་བཞི་པོ་དེ་གང་ཞེ་ན། བཤད་དུ་ཡོད་དེ། རྒྱུ་འབྲས་གཉིས་ཀ་སྤྱད་ཟིན་པའི་དུས་ནི་འདས་པ། རྒྱུ་སྤྱད་ཅིང་འབྲས་བུ་མ་སྤྱད་པ་ནི་ད་ལྟར་བ། རྒྱུ་འབྲས་ཚོགས་ལ་མ་སྤྱད་པ་ནི་མ་འོངས་པ། རྒྱུ་འབྲས་ཡོད་ལ་མ་ཚོགས་པ་ནི་འདས་མ་འོངས་གང་དུ་ཡང་མ་ངེས་པའི་དུས་ཡིན་པའི་ཕྱིར་ཏེ། དཔེར་ན་དབྱར་གྱི་དུས་ལྟ་བུ་ཞིག་གཞིར་བཞག་ནས་བརྩི་ན། དཔྱིད་ནི་འདས་པ། དབྱར་ནི་ད་ལྟར་བ། སྟོན་ནི་མ་འོངས་པ། དགུན་ནི་མ་ངེས་པ་སྟེ། དབྱར་གྱི་དུས་འདི་ལས་སྔར་འདས་ཕྱིས་འབྱུང་གཉིས་ནི་འདས་མ་འོངས་པར་ངེས་ལ། དགུན་ནི་འདས་མ་འོངས་གང་རུང་གཅིག་ཏུ་ཁ་ཚོན་མ་ཆོད་པའི་ཕྱིར་ཏེ། དཔྱིད་ཀྱི་སྔ་ལོགས་ཀྱི་དགུན་ནི་འདས་པ་དང་། སྟོན་གྱི་ཕྱི་ལོགས་ཀྱི་དགུན་ནི་མ་འོངས་པ་ལྟར་སྣང་བའི་ཕྱིར། དེ་ལྟར་ཡང་རྔམ་གློག་ལས། རྒྱུ་འབྲས་ངེས་པ་མ་ཚོགས་པ། །འབྱུང་བར་མ་ངེས་དུས་ཞེས་གྲགས། །ཞེས་སོ། །དེའི་ཕྱིར་དུས་བཞིར་གྲངས་དང་གོ་རིམ་ངེས་པ་ཡིན་ནོ། །ཞེས་འཆད་པར་བྱེད་པ་ནི། བྱང་ཆུབ་ཆེན་པོ་རྡོ་རྗེ་མཐོང་བ་དང་། སོགས་ནས། མ་བྱོན་པའི་ཚོགས་དང་། ཞེས་པའི་གཞུང་འདི་བྱུང་། འོ་ན་གཉིས་པ་འཇོམས་བྱེད་ཁྲོ་བོའི་འཁོར་བཤད་པ་དེ་ཇི་ལྟ་བུ་ཡིན་ཞེ་ན། དེ་འཆད་པར་བྱེད་པ་ལ། འཇོམས་པ་ཆེན་པོ་རྡོ་རྗེ་རེག་པ་དང་། འཇོམས་པ་ཆེན་པོ་རྡོ་རྗེ་རེག་བྱེད་དང་། འཇོམས་པ་ཆེན་པོ་རྡོ་རྗེ་རེག་བྱ་དང་། འཇོམས་པ་ཆེན་པོ་རྡོ་རྗེ་རེག་ཤེས་དང་། བཙུན་མོ་རྟག་པར་མ་ཡིན་པ་དང་། ཆད་པར་མ་ཡིན་པ་དང་། བདག་ཏུ་མ་ཡིན་པ་དང་། མཚན་མར་མ་ཡིན་པ། ཞེས་པའི་གཞུང་འདི་བྱུང་། དེའི་དོན་བཤད་ན། སྤྱིའི་མཚན་དང་། བྱེ་བྲག་གི་མཚན་གཉིས་ལས། དང་པོ་སྤྱིའི་མཚན་ནི། འཇིགས་བྱེད་ཡབ་བཞི་པོ་ཆོས་ཅན། ཁྱོད་རྣམས་ལ་འཇོམས་པ་ཆེན་པོ་རྡོ་རྗེ་ཞེས་བརྗོད་པའི་རྒྱུ་མཚན་ཡོད་དེ། ཕྱི་ལུས་ཀྱི་ཆོས་བཞི་དང་སྦྱར་ན་རྟོག་པའི་རང་བཞིན་མངོན་དུ་གྱུར་པའི་ཁྲོ་བོ་བཞིའི་སྐུ་གསུང་ཐུགས་ཀྱི་མཛད་པས་བདུད་དང་ལོག་འདྲེན་རྣམས་འཇོམས་པ་དང་། ནང་གསང་བའི་ཁམས་བཞི་དང་སྦྱར་ན། འོག་སྒོ་གསང་བའི་ཁམས་སུ་འདུས་པའི་བདེ་བས་རྟོག་པ་དང་ལྷའམ་བདེ་བར་འཛིན་པའི་ཞེན་པ་གཉིས་ཀ་འཇོམས་པ་ལ་ཐོགས་པ་མེད་པས་ན་རྡོ་རྗེར་བརྗོད་པ་གང་ཞིག །དེས་འཇོམས་པའི་ཕྲིན་ལས་གཞན་ལས་ཁྱད་པར་དུ་གྱུར་པས་ན་ཆེན་པོ་ཞེས་བརྗོད་པའི་ཕྱིར། དེ་དག་གི་ཡུམ་བཞི་ཆོས་ཅན། དེ་རྣམས་ལ་བཙུན་མོ་ཞེས་བརྗོད་པའི་རྒྱུ་མཚན་ཡོད་དེ། དེ་ལྟ་བུའི་འཇོམས་བྱེད་ཀྱི་གཉེན་པོ་དེ་ཡང་རྟག་ཆད་བདག་མཚན་བཞི་མ་ཡིན་པའི་ཆོས་ཉིད་ཡུལ་གྱི་ངོ་བོ་དེས་བསྐྱེད་པ་ཡིན་པའི་ཕྱིར། དཔེར་ན་དཀར་པོ་འཇོམས་པ་དེ་དཀར་པོ་མ་ཡིན་པ་ཞིག་གིས་བསྐྱེད་པ་བཞིན་ནོ། །ཡང་ཕྱིན་ཅི་ལོག་གི་རྟོག་པ་བཞི་ལྟར་ན། དེས་ལུས་ཀྱི་རྟོག་པ་བཞི་དངོས་སུ་མི་བསྐྱེད་ཀྱང་བརྒྱུད་ནས་བསྐྱེད་པར་བཞེད་པའི་ཕྱིར། གཉིས་པ་བྱེ་བྲག་གི་མཚན་ནི། སྒོ་བ་ཡབ་བཞི་ཆོས་ཅན། དེ་དག་ལ་རེག་པ་ལ་སོགས་པར་སྨོས་པ་ནི་རྟོག་པའི་མཚན་ཏེ། ཕྱི་ལྟར་ལུས་ཀྱི་འདུས་ཏེ་རེག་པའི་ཚོར་བ་བསྐྱེད་པ་ལ། རེག་བྱེད་ལུས་དབང་། རེག་བྱ་ཡུལ། དེ་གཉིས་ཕྲད་པའི་རེག་ཤེས་སམ། ནང་ལྟར་ན། གསང་བའི་ཡུལ་དབང་རྣམ་ཤེས་གསུམ་འདུས་ཀྱི་རེག་པ་བསྐྱེད་པ་ལ། རེག་བྱེད་གསང་དབང་ཐབས་ཀྱི་རྡོ་རྗེ། རེག་བྱ་གསང་ཡུམ་ཤེས་རབ་ཀྱི་པདྨ། གསང་བའི་རེག་ཤེས་དགའ་བ་ཉམས་སུ་མྱོང་བ་རྣམས་སུ་ཡོད་པའི་ཕྱིར། དེ་དག་ཆོས་ཅན། ལྷའི་དུས་ན་མཐར་བྱེད་སྒོ་བ་བཞི་སྟེ། ཕྱི་ནང་གི་རྟོག་པ་གཉིས་ཀ་གོ་རིམ་བཞིན་དུ། ཁྲོ་བོ་བདུད་རྩི་འཁྱིལ་པ་དང་། རྟ་མགྲིན་དང་། སྟོབས་པོ་ཆེ་དང་། གཤིན་རྗེ་གཤེད་རྣམས་སུ་དག་པ་ཡིན་པའི་ཕྱིར། དེ་དག་གི་ཡུམ་བཞི་པོ་ཆོས་ཅན། དེ་རྣམས་ལ་རྟག་པར་མ་ཡིན་པ་ཞེས་སོགས་སྨོས་པ་ནི་རྟོག་པའི་མཚན་ཏེ། རྟག་པར་མ་ཡིན་པ་སྟེ་ཕུང་པོ་མི་རྟག་པར་འཛིན་པ་དང་། ཆད་པར་མ་ཡིན་པ་སྟེ་སྡུག་བསྔལ་གྱི་རང་བཞིན་དུ་འཛིན་པ་དང་། བདག་ཏུ་མ་ཡིན་པ་སྟེ་བདག་མེད་དུ་འཛིན་པ་དང་། མཚན་མར་མ་ཡིན་པ་སྟེ་སྟོང་པར་འཛིན་པ་རྣམས་སུ་ཡོད་པ་གང་ཞིག །དེ་དག་ལྷ་ཡི་དུས་ན། གོ་རིམ་ཇི་ལྟ་བ་བཞིན་དུ་ཁྲོ་མོ་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ་དང་བཞིར་ངེས་པའི་ཕྱིར། ཡང་རྟག་ཆད་བདག་མཚན་དུ་འཛིན་པའི་ཕྱིན་ཅི་ལོག་གི་རྟོག་པ་བཞི་ལྟར་ན། རྟག་པར་འཛིན་པ་ལ་སོགས་པའི་རྟོག་པ་བཞི་པོ་ཆོས་ཅན། ཁྱོད་རང་ག་མར་སྣང་བ་ལྟར་མ་ཡིན་ཏེ། དེ་དག་མ་སྤངས་པར་སྒོ་མ་བཞིའི་རང་བཞིན་དུ་དག་པའི་ཕྱིར། དེ་ལྟར་ཡང་ཐལ་རྒྱུད་ལས། རྟག་སོགས་མཚན་མ་ལས་བསྐྱེད་ཕྱིར། །བཙུན་མོ་ཞེས་སུ་བསྟན་པ་སྟེ། །ཞེས་དང་། གླང་པོ་ཆེ་རབ་འབོགས་ཀྱི་རྒྱུད་ལས་ཀྱང་། དོན་དམ་པར་སེམས་ཅན་གྱི་རྟག་པར་ལྟ་བ་གནས་སུ་དག་པ་བཛྲ་ཨངྐུ་ཤ་སྟེ། ཞེས་སོགས་གསུངས་པ་ཡིན་ནོ། །ཞེས་འཆད་པར་བྱེད་པ་ནི། འཇོམས་པ་ཆེན་པོ་རྡོ་རྗེ་རེག་པ་དང་། སོགས་ནས། མཚན་མར་མ་ཡིན་པ། ཞེས་པའི་གཞུང་འདི་བྱུང་། གསུམ་པ་དད་པས་གཏམ་ཉན་པའི་འཁོར་དེ་ཇི་ལྟ་བུ་ཞེ་ན། དེ་ཆོས་ཅན། བཤད་དུ་ཡོད་དེ། ཕྱིའི་ཁོར་ཡུག་ལ་བཞུགས་པའི་འཇིག་རྟེན་གྱི་ཆ་འཛིན་པའི་ལྷ་ཆེན་པོ་ལ་སོགས་པ་རྣམས་དེ་ཡིན་པའི་ཕྱིར་ཏེ། ཁོག་གཞུང་ལས། དད་པས་ཉན་པའི་ལྷ་ཆེན་རྣམས། ཞེས་དང་། ལེ་ལག་ལས། ཐམས་ཅད་ལ་ནི་དབང་བསྒྱུར་ཕྱིར། །འཇིག་རྟེན་ལྷ་ཆེན་རྣམས་ཀྱིས་བསྐོར། །ཞེས་པའི་སྤྱན་འགྲེལ་ལས། འཁོར་བའི་ཆོས་རྣམས་ཀྱང་བདག་ཉིད་དུ་རང་སྣང་བའི་ཕྱིར། ཕྱི་རོལ་དུ་མ་ཧཱ་དེ་ཝ་ལ་སོགས་པ་ལྷ་ཆེན་པོ་རྣམས་ཀྱིས་བསྐོར་བ་སྟེ། རང་རང་གི་མཆོད་ཡོན་དང་། རྒྱན་དང་ལྡན་པར་འཁོད་པའོ། །ཞེས་གསུངས་པའི་ཕྱིར། གཉིས་པ་གོ་ཕྱེ་བའི་འཁོར་ཆོས་ཅན། ཁྱོད་བཤད་དུ་ཡོད་དེ། ཐུན་མོང་འགྲོ་བ་འདུལ་བའི་འཁོར་སྤྲུལ་སྐུ་ཐུབ་པ་དྲུག་དང་། རྗེས་འཇུག་ཆོས་ཀྱི་མིག་དང་ལྡན་པའི་གང་ཟག་སྐལ་བ་དང་ལྡན་པ་རྣམས་ལ་དེ་ལྟར་དུ་བརྗོད་པའི་ཕྱིར་ཏེ། ཁོག་གཞུང་ལས། འགྲོ་བ་འདུལ་བར་སྤྲུལ་སོགས་པའོ། །ཞེས་དང་། འདི་ཉིད་ལས། སྲས་ནི་ཐུགས་ལས་སྐྱེས་པ་ཡིན། །ས་རབ་རིག་པ་འཛིན་ལ་གནས། །ཞེས་གསུངས་པའི་ཕྱིར། གཉིས་པ་འཁོར་གྱི་ཚད་བསྟན་པ་དེ་ཇི་ལྟ་བུ་ཡིན་ཞེ་ན། དེ་འཆད་པར་བྱེད་པ་ལ། ཆོས་ཀྱི་དབྱིངས་མཐའ་ཡས་པར་ཁྱབ་པ་ནི་འདི་ལྟ་སྟེ། དཔེར་ན་ཏིལ་གྱི་གོང་བུ་བཞིན་དུ་གང་ནས་ཁྱབ་པར་བཞུགས་སོ། །ཞེས་དང་། ལ་སོགས་པ། དེ་ལྟ་བུའི་ཚོགས་བརྗོད་ཀྱིས་མི་ལང་བ་དང་གཉིས་སུ་མེད་པར་བཞུགས་སོ། །ཞེས་པའི་གཞུང་འདི་བྱུང་། དེ་བཤད་ན་གཉིས་ཏེ། ཁྱབ་པའི་ཚད་དང་། མང་བའི་ཚད་གཉིས་ལས། དང་པོ། ཁྱབ་པའི་ཚད་དེ་ཆོས་ཅན། བཤད་དུ་ཡོད་དེ། ཀུན་ཏུ་ཁྱབ་ཅིང་མཐའ་ཀླས་པར་ཁྱབ་པའི་ཕྱིར་ཏེ། ཏིལ་གོང་དེ་ཏིལ་འབྲས་ཀྱིས་གང་ཞིང་ཁྱབ་པ་བཞིན་ནོ། །གཉིས་པ། མང་བའི་ཚད་དེ་ཆོས་ཅན། བཤད་དུ་ཡོད་དེ། སྔར་སྨོས་པ་དེ་ལྟ་བུའི་འཁོར་ཚོགས་ཀྱི་གྲངས་ཚད་འདི་ཙམ་ཞེས་བརྗོད་ཀྱིས་མི་ལང་བའི་ཕྱིར། འོ་ན་ཁྱབ་པ་དང་མང་བའི་བདག་ཉིད་ཅན་གྱི་འཁོར་དེ་དག་དང་གཉིས་སུ་མེད་པར་བཞུགས་ཚུལ་དེ་ཇི་ལྟ་བུ་ཞེ་ན། དེ་ཆོས་ཅན། རང་བཞིན་གཉིས་སུ་མེད་པར་བཞུགས་པ་ཡིན་ཏེ། དེ་བཞིན་གཤེགས་པ་དང་བྱང་ཆུབ་སེམས་དཔའ་མ་ལུས་པ་ཐམས་ཅད་དཔལ་ཀུན་ཏུ་བཟང་པོའི་རང་བཞིན་དུ་འདུས་པ་གང་ཞིག །འགྲོ་བའི་ཕུང་ཁམས་སྐྱེ་མཆེད་ཇི་སྙེད་པ་ཐམས་ཅད་ཀྱང་ལྷའི་རང་བཞིན་དུ་གནས་པ་ཡིན་པའི་ཕྱིར་ཏེ། འགྲེལ་ཆུང་ལས། སྲིད་གསུམ་འགྲོ་བ་ཐམས་ཅད་ཀྱི། །ཕུང་པོ་ཁམས་དང་སྐྱེ་མཆེད་དང་། །བརྗོད་མེད་བརྗོད་ཀྱིས་མི་ལང་བ། །དེ་སྙེད་འཁོར་ལོའི་དཀྱིལ་འཁོར་དུ། །མངོན་རྫོགས་རྒྱལ་པོར་དེ་ཉིད་ངེས། །གཉིས་མེད་ལྷུན་གྲུབ་དཀྱིལ་འཁོར་ན། །ཐམས་ཅད་བདག་ཉིད་རྟག་པར་བཞུགས། །ཞེས་གསུངས་པའི་ཕྱིར། ཞེས་འཆད་པར་བྱེད་པ་ནི། ཆོས་ཀྱི་དབྱིངས་མཐའ་ཡས་པར་ཁྱབ་པ་ནི་འདི་ལྟ་སྟེ། དཔེར་ན་ཏིལ་གྱི་གོང་བུ་བཞིན་དུ་གང་ནས་ཁྱབ་པར་བཞུགས་སོ། །ཞེས་དང་། ལ་སོགས་པ་དེ་ལྟ་བུའི་ཚོགས་བརྗོད་ཀྱིས་མི་ལང་བ་དང་གཉིས་སུ་མེད་པར་བཞུགས་སོ། །ཞེས་པའི་གཞུང་ཚན་གཉིས་པོ་འདི་བྱུང་། བཞི་པ་གང་གསུངས་པའི་བསྟན་པ་ཕུན་སུམ་ཚོགས་པ་དེ་ཇི་ལྟ་བུ་ཞེ་ན། དེ་འཆད་པར་བྱེད་པ་ལ། དེ་ནས་དེ་བཞིན་གཤེགས་པ་བཙུན་མོའི་ཚོགས་དང་གཉིས་སུ་མེད་པའི་གསང་བའི་དཀྱིལ་འཁོར་དེ་དག་ཉིད་ཀྱི་གསང་བ་འདི་ཉིད་སྐུ་དང་། གསུང་དང་། ཐུགས་དང་། ཡོན་ཏན་ཕྲིན་ལས་རྡོ་རྗེ་ལས་ཕྱུང་ངོ་། །ཨེ་ཨེ་མ་ཨེ་མའོ། །དེ་བཞིན་ཉིད་ཀྱི་དབྱིངས་ཉིད་དབང་སྒྱུར་ཡེ་ཤེས་དཀྱིལ་འཁོར་ཐུགས་རྗེའི་ངང་། །རང་སྣང་བ་ཉིད་ཏིང་འཛིན་གཟུགས་བརྙན་སྒྱུ་མ་རྣམ་དག་གསལ་བ་ནི། །སྐུ་གསུང་ཐུགས་དང་ཡོན་ཏན་ཕྲིན་ལས་སེལ་མེད་པ་ཡི་ཡོན་ཏན་ཡིད་བཞིན་རིན་པོ་ཆེ། །མི་ཟད་པར་ལྡན་རྒྱན་གྱི་འཁོར་ལོ་རྡོ་རྗེ་མཆོག་གི་གནས་ཉིད་དོ། །ཞེས་པའི་གཞུང་འདི་བྱུང་། ཚིག་དོན་དུ་བསྒྲིལ་ན། དེ་ནས་དེ་བཞིན་གཤེགས་པ་ཞེས་སོགས་གསུངས་པ་ལོ་རྒྱུས་སུ་བརྗོད་པའི་དོན་དེ་ཆོས་ཅན། བཤད་དུ་ཡོད་དེ། དེ་བཞིན་གཤེགས་པ་ཐམས་ཅད་འདུས་པའི་སྤྱི་གཟུགས་རིགས་ལྔ་དབྱེར་མི་ཕྱེད་པའི་སྟོན་པ་ཉིད་ཀྱི་ཐུགས་ལ་རྒྱུད་དོན་ཇི་ལྟར་ཤར་བའི་དོན་མངོན་དུ་སྣང་བས་ན་ཕྱུང་ངོ་ཞེས་ཐ་སྙད་དུ་བཏགས་པའི་ཕྱིར། ཨེ་ཨེ་མ་ཨེ་མའོ་ཞེས་སོགས་ཀྱི་དོན་དེ་ཆོས་ཅན། ཁྱོད་ཀྱིས་གང་གསུངས་པའི་བསྟན་པ་དངོས་དེ་ཉིད་བསྟན་པ་ཡིན་ཏེ། རྒྱུད་དབུ་ཞབས་ཀྱི་བརྗོད་བྱ་གཞི་ལམ་འབྲས་གསུམ་དུ་འདུ་བ་གང་ཞིག །གཞུང་འདིས་རྒྱུད་གསུམ་མདོར་བསྟན་པ་ཡིན་པའི་ཕྱིར། ཇི་ལྟར་ཞེ་ན། དེ་བཞིན་ཉིད་ཀྱི་དབྱིངས་ཉིད་ཞེས་པ་ཆོས་ཅན། ཁྱོད་ཀྱིས་གཞིའི་རྒྱུད་མདོར་བསྟན་པ་ཡིན་ཏེ། གནས་ལུགས་དེ་བཞིན་ཉིད་ཀྱི་དབྱིངས་དེ་ཉིད་འཁོར་འདས་ཀྱི་ཆོས་ཐམས་ཅད་ཀྱི་འབྱུང་གནས་སུ་གྱུར་པ་ཡིན་པའི་ཕྱིར། དབང་སྒྱུར་ཞེས་དང་། རང་སྣང་བ་ཉིད་ཏིང་འཛིན་གཟུགས་བརྙན་སྒྱུ་མ་རྣམ་དག་གསལ་བ་ནི། ཞེས་པ་ཆོས་ཅན། ཁྱོད་ཀྱིས་ལམ་གྱི་རྒྱུད་མདོར་བསྟན་པ་ཡིན་ཏེ། ལམ་ནི་ཤེས་འཇུག་གི་བྱེད་རྩོལ་དང་བཅས་པའི་གདུལ་བྱའི་སྣང་བ་གང་ཞིག །གཞི་འཆིང་གྲོལ་མེད་པའི་གནས་ལུགས་དེ་ཉིད་རྟོགས་པ་ལ་དབང་སྒྱུར་བའི་ལྟ་བ་དང་། སེམས་ཉིད་ལྷའི་དཀྱིལ་འཁོར་དུ་རང་གསལ་བར་སྒོམ་པའི་ཏིང་ངེ་འཛིན་གྱི་ཐབས་ཡན་ལག་དང་བཅས་པའི་དོན་འཕྲོ་གཞིའི་རྩ་བ་ཡིན་པའི་ཕྱིར། ཡེ་ཤེས་དཀྱིལ་འཁོར་ཐུགས་རྗེའི་ངང་། ཞེས་དང་། སྐུ་གསུང་ཐུགས་དང་ཡོན་ཏན་ཕྲིན་ལས་ཞེས་པ་མན་ཆད་ཆོས་ཅན། ཁྱོད་ཀྱིས་འབྲས་བུའི་རྒྱུད་མདོར་བསྟན་པ་ཡིན་ཏེ། ཆོས་ཉིད་མངོན་གྱུར་བསྐྱེད་དུ་བྱར་མེད་པ་ནི་འབྲས་བུ་བདེ་གཤེགས་ཀྱི་སྣང་བ་གང་ཞིག །དེ་ཤེས་འཇུག་གི་རྐྱེན་དེས་རྟོགས་བྱའི་ཡུལ་གྱི་གྲུབ་འབྲས་སུ་ངེས་པའི་ཕྱིར། དེས་ན་གཞུང་འདི་རྒྱུད་གསུམ་གྱི་མདོར་བསྟན་ནམ་རྩ་བ་ཡིན་པའི་ཕྱིར། རྒྱུད་དབུ་ཞབས་ཀྱི་བརྗོད་བྱ་དེ་དང་དེ་སྟོན་པ་ཐམས་ཅད་འདི་ལས་འཕྲོས་པར་ཤེས་པར་བྱའོ། །དེ་ལ་ཁོ་ན་རེ། བསྡུ་བའི་ཚིགས་སུ་བཅད་པ་འདི་ཆོས་ཅན། ཁྱོད་ཀྱིས་བསྟན་པ་རྒྱུད་དོན་མདོར་བསྟན་དུ་བཤད་པ་མི་རིགས་ཏེ། གལ་ཏེ་རིགས་ན་འོག་ཏུ་གླེང་བསླང་བ་ལ་དགོས་པ་མེད་པར་འགྱུར་བའི་ཕྱིར་ཟེར་ན་དོགས་པ་དེའི་སྐྱོན་མེད་དེ། སྟོན་པའི་ཐུགས་ལ་རྒྱུད་དོན་ཇི་ལྟར་ཤར་བའི་དོན་གསང་བདག་གིས་བསྡུ་བ་བྱེད་པའི་ཚེ། གདུལ་བྱ་དབང་རབ་ཀྱི་དོན་དུ་བསྟན་པ་རྒྱུད་དོན་མདོར་བསྟན་གྱི་ཚུལ་དུ་བསྡུས་པ་ཡིན་པའི་ཕྱིར་ཏེ། རྒྱ་མདུད་འགྲེལ་ལས། ད་ནི་ཆོས་ཕུན་སུམ་ཚོགས་པ་བསྟན་པར་བྱ་སྟེ་ཞེས་དང་། འགྲེལ་ཆུང་ལས། རྒྱུད་འདི་ཉིད་ཀྱི་མདོ་དོན་དུ། །དཀྱིལ་འཁོར་ཀུན་གྱི་གསང་བ་འདི། །སྐུ་གསུང་ཐུགས་ཡོན་ཕྲིན་ལས་ཐུགས། །རྡོ་རྗེ་ལས་ནི་ངེས་པར་ཕྱུང་། །ཞེས་གསུངས་པའི་ཕྱིར་དང་། འོག་ཏུ་གླེང་བསླང་བ་ལ་དགོས་པ་མེད་པར་ཡང་མི་འགྱུར་ཏེ། གདུལ་བྱ་དབང་འབྲིང་མན་ཆད་ལ་རྒྱུད་དོན་འོག་ཏུ་སྟོན་པས་ན་འདི་ཉིད་གླེང་གཞིའི་དོན་བསྡུས་སུ་བཞེད་པའི་ཕྱིར་ཏེ། སྤར་ཁབ་ལས། འདི་ནས་མར་ལ་གླེང་གཞི་བསྡུས་པ་སྟོན་ཏེ། ཞེས་གསུངས་པའི་ཕྱིར། ཞེས་འཆད་པར་བྱེད་པ་ནི། དེ་ནས་དེ་བཞིན་གཤེགས་པ་བཙུན་མོའི་ཚོགས་དང་། སོགས་ནས། རྡོ་རྗེ་མཆོག་གི་གནས་ཉིད་དོ། །ཞེས་པའི་གཞུང་འདི་བྱུང་། ལྔ་པ་གང་གི་ཚེ་གསུངས་པའི་དུས་ཕུན་སུམ་ཚོགས་པ་དེ་ཉིད་འཆད་པར་བྱེད་པ་ལ། སྔར་མདོར་བསྟན་དུ་བཤད་པའི་དུས་ན་ཞེས་པའི་གཞུང་འདི་བྱུང་། ཚིག་དོན་དུ་བསྒྲིལ་ན། དུས་ཕུན་སུམ་ཚོགས་པ་དེ་ཆོས་ཅན། ཁྱོད་ལ་དབྱེ་ན་གཉིས་སུ་ངེས་ཏེ། ངོ་བོའི་དུས་དང་། གདུལ་བྱ་ལ་སྣང་བའི་དུས་གཉིས་སུ་ཡོད་པའི་ཕྱིར་ཏེ། ཁོག་གཞུང་ལས། དུས་ཀྱི་ངོ་བོ་མཉམ་གནས་ཀྱང་། །སྐལ་པ་ཅན་ལ་དཀོན་པའི་དུས། །ཞེས་གསུངས་པའི་ཕྱིར། དང་པོ་ངོ་བོའི་དུས་དེ་ཆོས་ཅན། ཁྱོད་དུས་བཞི་མཉམ་པ་ཉིད་དུས་ཡིན་ཏེ། ཀུན་རྫོབ་བདེན་ངོར་དུས་སྔ་ཕྱི་ཐ་དད་པ་ལྟར་སྣང་ཡང་། དོན་དམ་བདེན་པའི་ཆ་ནས་དེར་མ་དམིགས་ལ། དབྱེར་མེད་ཀྱི་ངོས་ནས་དེ་ཉིད་དང་གཞན་དུ་བརྗོད་དུ་མེད་པས་ན་དེ་ལྟར་བརྗོད་པའི་ཕྱིར་ཏེ། རྒྱས་པ་ལས། འདས་དང་མ་འོངས་ཐམས་ཅད་ཀུན། །ཡེ་ཤེས་རྟོགས་པའི་ཁྱད་པར་ལས། །དུས་བཞི་སྔ་ཕྱི་མེད་པ་ཡི། །མཉམ་པ་ཉིད་དུ་ལྷན་ནེར་སྦྱོར། །ཞེས་དང་། འགྲེལ་ཆུང་ལས། དུས་བཞི་མཉམ་པ་ཆོས་ཀྱི་དབྱིངས་ཉིད་དུ། །སྟུག་པོ་བཀོད་པའི་རྒྱན་ལ་ཐིམ་པར་བཞུགས། །ཞེས་གསུངས་པའི་ཕྱིར། གཉིས་པ་གདུལ་བྱ་ལ་སྣང་བའི་དུས་དེ་ཆོས་ཅན། བཤད་དུ་ཡོད་དེ། རྒྱུད་ཀྱི་རྒྱུ་ཕུན་སུམ་ཚོགས་པ་ལྔ་ཚང་བས་གདུལ་བྱའི་ངོ་ལ་རྒྱུད་དོན་བྱུང་བའི་དུས་དེ་ཉིད་ལ་བརྗོད་པའི་ཕྱིར། ཞེས་འཆད་པར་བྱེད་པ་ནི། བཤད་པའི་དུས་ན། ཞེས་པའི་གཞུང་འདི་བྱུང་། དྲུག་པ་གང་གིས་བསྡུས་པའི་སྡུད་པ་པོ་དེ་ཉིད་འཆད་པར་བྱེད་པ་ལ། རྡོ་རྗེ་གསང་བའི་ཚིག་ཏུའོ། །ཞེས་པའི་གཞུང་འདི་བྱུང་། དེ་ཡང་སློབ་དཔོན་ཉིན་བྱེད་སེང་གེས། རྡོ་རྗེ་གསང་བ་ཞེས་པ་ནི། དབང་བསྐུར་བའི་མཚན་ཡིན་ཏེ། གསང་བའི་བདག་པོ་ཕྱག་ན་རྡོོ་རྗེ་ལ་གྲགས་པའོ། །ཞེས་གསུངས་པས་ཕྱོགས་བཅུ་དུས་བཞི་དེ་བཞིན་གཤེགས་པ་ཐམས་ཅད་ཀྱི་གསང་མཛོད་འཛིན་པ་པོ་རྒྱལ་སྲས་ལག་ན་རྡོ་རྗེ་ཆོས་ཅན། ཁྱོད་རྒྱུད་འདི་ཉིད་ཀྱི་སྡུད་པ་པོ་ཡིན་ཏེ། སྟོན་པས་དེ་ལྟར་ལུང་བསྟན་པའི་ཕྱིར་ཏེ། རྒྱ་མཚོ་ལས། འཁོར་གྱི་ནང་ནས་སྐལ་མཆོག་ལྡན། །འདུལ་བའི་དུས་བབས་གསང་བའི་བདག །ལག་ན་རྡོ་རྗེས་བསྡུ་བར་མཛད། །ཅེས་སོ། །དེ་ལྟར་རྒྱུད་འདིར་སྡུད་པ་པོ་སྨོས་པ་ལ་ཆོས་ཅན། དགོས་པ་ཡོད་དེ། སྡུད་པ་པོ་མེད་ན་སྟོན་པས་བསྟན་ཀྱང་གཏམ་ལྐུགས་པ་ལྟར་ཕྱིས་མི་འབྱུང་བའི་སྐྱོན་དང་། རྒྱུད་འདི་གནས་གང་དུ། སྟོན་པ་གང་གིས། འཁོར་གང་ལ་བསྟན་ཅིང་གཏད། དེ་ནས་སུ་ཞིག་གིས་སྤེལ་ཞེས་པའི་སྒྲོ་སྐུར་སྤང་བའི་ཆེད་ཡིན་པའི་ཕྱིར། ཞེས་འཆད་པར་བྱེད་པ་ནི། རྡོ་རྗེ་གསང་བའི་ཚིག་ཏུའོ། །ཞེས་པའི་གཞུང་འདི་བྱུང་། དེས་རྒྱུད་འབྱུང་བའི་རྒྱུ་གླེང་གཞི་བསྟན་པ་སོང་ནས། གཉིས་པ་རྐྱེན་གླེང་བསླང་བ་ལ། དགོས་ཆེད། ངོ་བོ། སྒྲ་དོན། རྣམ་གྲངས་དང་བཞི་ལས། དང་པོ་གླེང་བསླང་བའི་དགོས་པ་ཆོས་ཅན། བཤད་དུ་ཡོད་དེ། རྒྱུད་དོན་གདུལ་བྱའི་བློ་དང་འཚམས་པར་མྱུར་དུ་འབྱུང་བ་དེ་ཁྱོད་ཀྱི་དགོས་པ་ཡིན་པའི་ཕྱིར། དེ་ལྟར་ཡང་ཐུགས་ཐིག་ལས། བརྗོད་བྱ་རང་བཞིན་གསང་བའི་རྒྱུད། །དེ་ཇི་བཞིན་དུ་རྗོད་བྱེད་དག །སྟོན་པས་རྒྱུད་དོན་ལམ་དང་ཚིག །འབྲེལ་པ་རིམ་པ་འཆོལ་འཁྱུགས་པ། །གླེང་གཞི་རྗེས་སུ་ངེས་པར་འགྲོ། །ཞེས་སོ། ། གཉིས་པ་གླེང་བསླང་བའི་ངོ་བོ་ཆོས་ཅན། བཤད་དུ་ཡོད་དེ། སྟོན་འཁོར་གྱི་དྲི་ལན་གཅིག་གི་རྐྱེན་དུ་གཅིག་གྱུར་པས་བསྟན་པ་འབྱུང་མ་རག་པ་དེ་ཡིན་པའི་ཕྱིར། དེ་ལྟར་ཡང་ཐུགས་ཐིག་ལས། སྟོན་པས་གནང་དང་འཁོར་གྱིས་ཞུས། །སྐབས་ལ་གླེང་བསླང་སྟོན་དང་འཁོར། །གནང་འདྲིའི་རྐྱེན་དུ་གང་གྱུར་པ། །དེ་དེས་གསུང་ལ་མ་རེག་པ། །ཞེས་སོ། །གསུམ་པ་གླེང་བསླང་བའི་སྒྲ་དོན་དེ་ཆོས་ཅན། བཤད་དུ་ཡོད་དེ། གླེང་བར་བྱ་བ་བསྟན་པ་ཡིན་ལ། དེ་གླེང་བར་བསྐུལ་བ་ནི། བསྟན་པ་འབྱུང་བའི་རྐྱེན་དུ་གྱུར་པས་ན་བསླང་ཞེས་བརྗོད་པའི་ཕྱིར། བཞི་པ་གླེང་བསླང་གི་རྣམ་གྲངས་དེ་ཆོས་ཅན། ཁྱོད་ལ་དབྱེ་ན་གཉིས་སུ་ཡོད་དེ། ཐུན་མིན་ལྷན་ཅིག་པའི་འཁོར་གྱི་ཆེད་དུ་སྟོན་པས་མདུན་བསུས་ཏེ་གླེང་བསླང་བ་དང་། ཐུན་མོང་པ་གོ་ཕྱེ་བའི་འཁོར་གྱི་ཆེད་དུ་འཁོར་གྱིས་གུས་པས་དྲིས་ཏེ་གླེང་བསླང་བ་གཉིས་སུ་ཡོད་པའི་ཕྱིར། དེ་ལྟར་ཡང་ཐུགས་ཐིག་ལས། འཁོར་དང་གཞན་གྱི་དོན་ཕྱིར་དུ། །རྒྱུ་ཚོགས་ཐུགས་རྗེས་སྣང་བར་འགྱུར། །ཞེས་སོ། །དེ་དང་པོ་ཐུན་མིན་ལྷན་ཅིག་པའི་འཁོར་གྱི་ཆེད་དུ་སྟོན་པས་མདུན་བསུས་ཏེ་གླེང་བསླང་བའི་གོ་དོན་ནི། སྟོན་པ་ཡབ་ཡུམ་གྱིས་ལྷན་ཅིག་པའི་འཁོར་ལ་ཟབ་དབང་གསུམ་བསྐུར་བས་ཞེན་པ་དག་ནས་རང་བཞིན་གསང་བའི་སྙིང་པོའི་དོན་རྟོགས་པ་དེ་ཆོས་ཅན། ཁྱོད་ཐུན་མོང་མ་ཡིན་པའི་གླེང་བསླང་བ་ཡིན་ཏེ། དོན་དམ་ངེས་པའི་ཚིག་གིས་རང་བཞིན་གསང་བའི་སྙིང་པོའི་དོན་དངོས་སུ་སྟོན་པ་ཡིན་པའི་ཕྱིར། དེ་ལྟར་ཡང་ཁོག་གཞུང་ལས། ཐུན་མོང་མ་ཡིན་སྟོན་པ་ཉིད། །ཡབ་ཡུམ་ཆགས་བསྐུལ་རོལ་པ་དང་། །དགྱེས་བསྟར་འཁོར་ལ་དབང་བསྐུར་བས། །རྒྱུད་དོན་འབྱུང་ཕྱིར་བསླང་ཞེས་བྱ། །ཞེས་སོ། །དེ་གཏན་ལ་དབབ་པ་ལ་གཉིས་ཏེ། གསང་དབང་བསྐུར་བ་དང་། དབང་གཉིས་ཀྱི་ལས་ཐུན་མོང་དུ་བསྟན་པའོ། །དང་པོ་གསང་དབང་བསྐུར་བ་ལའང་ཡབ་ཀྱིས་ཐབས་ཀྱི་ཆ་བཟུང་ནས་སྐུ་དང་ཡེ་ཤེས་ཀྱི་དོན་གླེང་བ་དང་། ཡུམ་གྱིས་ཤེས་རབ་ཀྱི་ཆ་བཟུང་ནས་དབྱིངས་ཀྱི་དོན་གླེང་བ་གཉིས། དེའི་དང་པོ་ཡབ་ཀྱི་གླེང་བསླང་བ་དེ་ཉིད་འཆད་པར་བྱེད་པ་ལ། དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་ཡིད་ཀུན་ཏུ་བཟང་པོ། ཐམས་ཅད་མ་ལུས་པའི་རང་བཞིན་གྱི་ཚུལ་རྡོ་རྗེས། བཙུན་མོ་བྱ་བ་མོ་ཆོས་ཀུན་ཏུ་བཟང་མོ་ལ་འཇུག་པར་གྱུར་ཏོ། །ཞུགས་པས་ཕྱོགས་བཅུ་དུས་བཞིའི་དེ་བཞིན་གཤེགས་པ་མ་ལུས་པ་ཐམས་ཅད་གཅིག་གི་རང་བཞིན་དབྱེར་མེད་པས་དེ་བཞིན་གཤེགས་པ་ཉིད། དེ་བཞིན་གཤེགས་པ་ཉིད་ལ་ཆེད་དུ་བརྗོད་པ་འདི་བརྗོད་དོ། །ཨེ་མའོ་རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མཱ་མ་ཀཱི། མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཤིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་བརྗོད་པས་དེ་བཞིན་གཤེགས་པ་ཐམས་ཅད་མཉེས་པར་གྱུར་ཏོ། །ཞེས་པའི་གཞུང་འདི་བྱུང་། དེའི་དོན་ནི། རྒྱུད་ཀྱི་སྟོན་པ་རིགས་དྲུག་པ་ཡབ་ཡུམ་གཉིས་ཆོས་ཅན། ཁྱོད་ལ་བྱེད་པ་པོ་རྡོ་རྗེ་ཡིད་དང་། བྱ་བ་མོ་ཆོས་ཞེས་སྨོས་པ་ལ་རྒྱུ་མཚན་ཡོད་དེ། མ་རྟོགས་པའི་དུས་ན་ཡིད་ཀྱི་རྟོག་པ་ནི་འཁོར་བའི་བྱེད་པ་པོ་དང་། རྟོགས་པའི་དུས་ན་འདས་པའི་བྱེད་པ་པོ་རང་རིག་པའི་ཡེ་ཤེས་གཉིས་རང་བཞིན་དབྱེར་མི་ཕྱེད་པས་ན་རྡོ་རྗེ་ཡིད་ཀུན་ཏུ་བཟང་པོ་ཞེས་བརྗོད་པ་གང་ཞིག །བྱ་བ་མོ་ནི་དབང་པོ་ལྔའི་ཡུལ་དུ་མ་གྱུར་པའི་ཡུལ་འདུས་བྱས་དང་། འདུས་མ་བྱས་ཀྱི་ཆོས་ཀྱི་ཁམས་ཡིན་ལ། དེས་ཡིད་བསྐྱེད་པར་བྱེད་ཅིང་ཡིད་ཀྱི་ཡུལ་དུ་གྱུར་པས་ན་བཙུན་མོ་བྱ་བ་མོ་ཞེས་ཆོས་ཀུན་ཏུ་བཟང་མོ་ཞེས་བརྗོད་པའི་ཕྱིར། དེ་ལྟ་བུའི་སྟོན་པ་ཡབ་ཡུམ་གཉིས་སྙོམས་པར་ཞུགས་པ་ལ་ཆོས་ཅན། དགོས་པ་ཡོད་དེ། དེ་ལྟར་ཞུགས་པ་ལས་བྱུང་བའི་ཉི་ཟླ་བྱང་ཆུབ་སེམས་ཀྱིས་རྒྱུ་བྱས་ཤིང་། ཡབ་ཡུམ་གྱིས་ཉམས་སུ་བསྟར་བའི་དོན་ཆེད་དུ་བརྗོད་པས་རྐྱེན་བྱས་ཏེ། དེའི་འབྲས་བུ་རྟོགས་པ་བརྗོད་པས་ལྷན་ཅིག་པའི་འཁོར་རྣམས་ཀྱིས་བདེན་པ་མཐོང་བའི་ཕྱིར། ཨེ་མའོ་རྡོ་རྗེ་ཕུང་པོའི་ཡན་ལག་ནི། ཞེས་སོགས་ཀྱི་དོན་ཆོས་ཅན། བཤད་དུ་ཡོད་དེ། ཡབ་ཀྱིས་ཐབས་ཀྱི་ཆ་བཟུང་ནས་འཁོར་འདས་ཀྱི་ཆོས་ཐམས་ཅད་ཕྱག་རྒྱའི་དཀྱིལ་འཁོར་གཅིག་གི་རང་བཞིན་དུ་སངས་རྒྱས་པ་ལ་ངོ་མཚར་བའི་ཚུལ་གྱིས་དེ་ལྟར་གླེང་བར་མཛད་པས། འཁོར་རྣམས་ཀྱིས་ལྷག་པ་ཀུན་རྫོབ་ཀྱི་བདེན་པ་མཐོང་ནས་ཕུང་ཁམས་སྐྱེ་མཆེད་ཞིང་ལ་སོགས་པའི་ཆོས་ཐམས་ཅད་ལྷ་དང་ལྷ་མོའི་དཀྱིལ་འཁོར་དུ་རྟོགས་པས་སངས་རྒྱས་ཉིད་ལས་གཞན་པའི་ཆོས་རྡུལ་ཙམ་ཡང་མ་གྲུབ་པར་རྟོགས་པ་ཡིན་པའི་ཕྱིར། དེ་ལྟར་བརྗོད་པ་ལ་ཆོས་ཅན། དགོས་པ་ཡོད་དེ། དེ་བཞིན་གཤེགས་པ་ཐམས་ཅད་མཉེས་པར་གྱུར་པ་ཡིན་པའི་ཕྱིར། ཞེས་འཆད་པར་བྱེད་པ་ནི། དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་ཡིད་སོགས་ནས། མཉེས་པར་གྱུར་ཏོ། །ཞེས་པའི་གཞུང་འདི་བྱུང་། གཉིས་པ་ཡུམ་གྱིས་གླེང་བསླང་བ་དེ་ཉིད་འཆད་པར་བྱེད་པ་ལ། དེ་ནས་བཙུན་མོ་བྱ་བ་མོ་ཆོས་ཀུན་ཏུ་བཟང་མོ། བཅོམ་ལྡན་འདས་ཡིད་ཀུན་ཏུ་བཟང་པོ་དང་གཉིས་སུ་མེད་པར་གྱུར་ནས། ཆེད་དུ་བརྗོད་པ་འདི་བརྗོད་དོ། །ཀྱེ་མའོ། །ཕྱོགས་བཅུ་སྟོང་ཁམས་ཡེ་ནས་དབེན། །སྲིད་པ་གསུམ་ནི་དག་པའི་ཞིང་། །སྙིགས་མ་ལྔ་ཉིད་བདེ་ལྡན་གནས། །ཕུང་པོ་ལྔ་ཉིད་རྫོགས་སངས་རྒྱས། །ཐམས་ཅད་མཆོག་གི་སྙིང་པོ་བས། །གཞན་དུ་རྒྱལ་བའི་ཆོས་མི་བཙལ། །ཉིད་ལས་གཞན་ཞེས་བྱ་བའི་ཆོས། །བཙལ་ཀྱང་རྒྱལ་བས་མི་བརྙེས་སོ། །ཞེས་བརྗོད་པས་ཐམས་ཅད་ཡེ་ནས་སངས་རྒྱས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏོ། །ཞེས་པའི་གཞུང་འདི་བྱུང་། དེའི་དོན་ནི། རྒྱུ་སྔར་བཞིན་ལས། རྐྱེན་ཀྱེ་མའོ་ཕྱོགས་བཅུ་སྟོང་ཁམས་ཡེ་ནས་དབེན། །ཞེས་སོགས་ཀྱི་དོན་ཆོས་ཅན། བཤད་དུ་ཡོད་དེ། ཡུམ་གྱིས་ཤེས་རབ་ཀྱི་ཆ་བཟུང་ནས་རང་གི་ཉམས་སུ་བསྟར་བས་དབྱིངས་ཀྱི་དོན་ལ་ངོ་མཚར་བའི་ཚུལ་གྱིས་དེ་ལྟར་གླེང་བར་མཛད་པས། འཁོར་རྣམས་ཀྱིས་ལྷག་པ་དོན་དམ་པའི་བདེན་པ་མཐོང་ནས་ཕྱོགས་བཅུ་སྟོང་ཁམས་དང་། སྲིད་པ་གསུམ་དང་། སྙིགས་མ་ལྔ་དང་། ཕུང་པོ་ལྔ་སྟེ་ཐ་སྙད་བཞིས་བསྡུས་ཀྱི་ཆོས་ཐམས་ཅད་ཡེ་ནས་ཆོས་ཀྱི་སྐུར་མངོན་པར་སངས་རྒྱས་པས་འབྲས་བུ་གཞན་ནས་བཙལ་དུ་མེད་པར་རྟོགས་པ་ཡིན་པའི་ཕྱིར། དེ་ལྟར་བརྗོད་པ་ལ་ཆོས་ཅན། དགོས་པ་ཡོད་དེ། རྟོག་ཚོགས་ཐམས་ཅད་ཡེ་ནས་སངས་རྒྱས་པར་དེ་བཞིན་གཤེགས་པ་སྟོན་པ་ཉིད་ཀྱིས་མཁྱེན་པ་ཡིན་པའི་ཕྱིར་ཏེ། འཁོར་རྣམས་ཀྱིས་དབང་ཐོབ་པ་ལ་བརྟེན་ནས་དོན་དམ་པའི་བདེན་པ་རྟོག་མེད་ཀྱི་ཡེ་ཤེས་སྐྱེས་ཀྱང་སྟོན་པའི་དགོངས་པ་དབྱེར་མེད་ཀྱི་ཡེ་ཤེས་ཆེན་པོ་ད་དུང་ཉམས་སུ་མ་མྱོངས་པའི་ཕྱིར་ཞེས་འཆད་པར་བྱེད་པ་ནི། དེ་ནས་བཙུན་མོ་བྱ་བ་མོ་སོགས་ནས། དེ་བཞིན་གཤེགས་པ་ཉིད་ཀྱིས་མཁྱེན་ཏོ། །ཞེས་པའི་གཞུང་འདི་བྱུང་། དེ་ལྟར་བཤད་པའི་རྣམ་གྲངས་དེ་ཙམ་ཞིག་ཞུས་ནས། བཅིངས་མེད་རྣམ་པར་གྲོལ་མེད་པའི། །ཞེས་སོགས་ཀྱི་བཤད་གཞུང་འདི་ཉིད་སྦྱོར་བ་ངག་དོན་དུ་དྲིལ་ན་བཅིངས་གྲོལ་མེད་པའི་དོན་དེ་ཆོས་ཅན། བཤད་དུ་ཡོད་དེ། སེམས་ཅན་ཐམས་ཅད་མ་རྟོགས་པའི་དབང་གི་བཅིངས་གྲོལ་ལྟར་སྣང་ཡང་། སྣང་ཙམ་ཉིད་ནས་གཤིས་ལ་དེ་ལྟར་མ་གྲུབ་པས་འཁོར་འདས་མཉམ་པ་ཉིད་ལྷག་པའི་ཆོས་སྐུ་ཆེན་པོར་ཡེ་ནས་ལྷུན་རྫོགས་སུ་བཞུགས་པ་ཡིན་པའི་ཕྱིར་ཏེ། རྒྱུད་ཕྱི་མ་ལས། སྤྲོས་པ་ཐམས་ཅད་ཉེར་ཞི་བ། །རང་བཞིན་གྱིས་ནི་གྲོལ་བར་བརྗོད། །འཆིང་བ་མེད་ཕྱིར་དེ་གྲོལ་ལོ། །ཞེས་དང་། ཀུན་བྱེད་ལས། བཙལ་ནས་གྲུབ་པའི་འབྲས་བུ་བསྟན་པ་མིན། །མ་བཙལ་ཡེ་ནས་ལྷུན་གྱིས་གྲུབ་པ་ཡིན། །ཞེས་གསུངས་པའི་ཕྱིར། དེ་ལྟར་སངས་རྒྱས་ཀྱིས་ཐུགས་སུ་ཆུད་པ་ལྷུན་གྱིས་གྲུབ་པའི་ཆོས་དེ་ཆོས་ཅན། ཁྱོད་མཚོན་པར་བྱེད་པའི་རྒྱུད་འདི་དངོས་བརྒྱུད་ཀྱི་གདུལ་བྱ་ལ་ཇི་ལྟར་བསྟན་པའི་ཚུལ་ཡོད་དེ། དགྱེས་པའི་ཚུལ་དྲུག་གི་སྒོ་ནས་ལྷན་ཅིག་པའི་འཁོར་ལ་དངོས་སུ་བསྟན་པ་གང་ཞིག །གོ་ཕྱེ་བའི་འཁོར་གདུལ་བྱ་ཐུན་མོང་བ་རྣམས་ལམ་སྟེགས་ཀྱི་ཐེག་པ་ལ་བརྟེན་ནས་རིམ་གྱིས་ལམ་འདིར་དཀྲི་བའི་ཆེད་དུ་སྤྲུལ་པ་ཐུབ་པ་དྲུག་སྤྲོ་བ་སོགས་སྣ་ཚོགས་སུ་སྣང་ནས་བསམ་གྱིས་མི་ཁྱབ་པའི་མཛད་པ་འཁོར་བ་ཇི་སྲིད་ཀྱི་བར་དེ་སྲིད་དུ་རྒྱུན་མི་ཆད་པར་སྟོན་པ་ཡིན་པའི་ཕྱིར་ཞེས་འཆད་པར་བྱེད་པ་ནི། བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །བསྟན་ཕྱིར་སྤྲོ་བ་སྣ་ཚོགས་མཛད། །ཅེས་པའི་གཞུང་འདི་བྱུང་བ་ཡིན་ནོ། །དེས་དངོས་གཞི་བཤད་པ་རང་གི་ངོ་བོ་བཤད་པ་ཞེས་བྱ་བ་དེ་སོང་ནས། རྩ་བའི་ས་བཅད་གསུམ་པ་མཇུག་བསྔོ་བ་སྨོན་ལམ་བཀྲ་ཤིས་ཀྱིས་མཐའ་བརྟེན་པ་ཞེས་བྱ་བ་དེ་ཉིད་འཆད་པར་བྱེད་པ་ནི། སློབ་དཔོན་ཆེན་པོ་པདྨས་ངང་ཆུང་དཔལ་གྱི་རྒྱལ་མོ་ལ་གདམས་པ་ལས། གཞན་དོན་བསྔོ་བ་སྨོན་ལམ་རྒྱས་གདབ་བྱ། །རྗེས་ཀྱི་བྱ་བ་ཡིན་པས་མེད་ཐབས་མེད། །ཅེས་གསུངས་པས། རྗེས་ཀྱི་བྱ་བ་རྣམ་པར་དག་པ་ཡོངས་སུ་བསྔོ་བ་ཁྱད་པར་ཅན་གཟིངས་ཀྱི་ཁོང་གཟེར་བསྡམས་པ་ལྟ་བུས་ལམ་གྱི་དགེ་བ་རྣམས་ཆུད་མི་ཟ་བར་བྱེད་པ་སྟེ། མངོན་རྟོགས་རྒྱན་ལས། ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ནོ། །དེ་ནི་དམིགས་མེད་རྣམ་པ་ཅན། །ཕྱིན་ཅི་མ་ལོག་མཚན་ཉིད་དོ། །ཞེས་གསུངས་པའི་ཕྱིར། དེ་ལའང་། གང་བསྔོ་བར་བྱ་བའི་རྒྱུ། གང་དུ་བསྔོ་བའི་ཡུལ། ཇི་ལྟར་བསྔོ་བའི་ཆོ་ག་དང་གསུམ་དུ་ཡོད་པ་ལས། དེའི་དང་པོ་བསྔོ་རྒྱུ་ནི། དགེ་བའི་རྩ་བ་སྟེ། རྣམ་སྨིན་བདེ་བ་བསྐྱེད་པས་དགེ་བ། དེའི་རྒྱུ་བྱེད་པས་རྩ་བ་ཞེས་བརྗོད་པ་ཡིན་པའི་ཕྱིར་ཏེ། ལོ་ཐོག་གི་རྒྱུ་ས་བོན་འདེབས་པ་བཞིན་ནོ། །དེའང་རྒྱུད་འདི་ཉིད་ལས། གང་གིས་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱི། །ཕྱོགས་དུས་ཀུན་ནས་ཐམས་ཅད་དུ། །ཉེ་བའི་སྲས་སུ་དགོངས་པར་འགྱུར། །ཞེས་དང་། བཤད་རྒྱུད་རྒྱ་མཚོ་ལས། མོས་དང་མཐོང་དང་བྲི་བ་དང་། །བཀླགས་པ་ཙམ་གྱིས་འགྲུབ་འགྱུར་ན། །རྟོགས་དང་གོམས་པའི་སྦྱོར་བ་ཡིས། །འབྲས་བུ་ཐོབ་པ་སྨོས་ཅི་དགོས། །ཞེས་ཕན་ཡོན་བསམ་གྱིས་མི་ཁྱབ་པ་གསུངས་པ་ལ་ངེས་ཤེས་སྐྱེས་ཏེ། རྒྱུད་ཀྱི་རྒྱལ་པོ་འདི་ལ་དད་པས་ཐོས་བསམ་ཅུང་ཟད་ཙམ་ཞིག་བགྱིས་པ་དང་། དེ་ལྟར་འབད་པ་ལས་གཞུང་དོན་བློ་ཡུལ་དུ་ཅུང་ཟད་ལོངས་པ་རྣམས་མཆོད་རྫས་སུ་སྦྱར་ཏེ། ཡུལ་དམ་པ་རྣམས་ལ་ལེགས་བཤད་ཀྱི་མཆོད་པ་ཅུང་ཟད་ཙམ་ཕུལ་བའི་དགེ་བའི་རྩ་བ་འདིས་མཚོན་རྟེན་དུ་བྱས་ཏེ། དགེ་བ་དུས་ནམ་བྱས་ཀྱང་རུང་། གང་ཟག་སུས་བྱས་ཀྱང་རུང་། དངོས་པོ་ཇི་ལྟ་བུ་བྱས་ཀྱང་རུང་སྟེ། ཐམས་ཅད་གཅིག་ཏུ་བསྡུས་ཤིང་བསྡོམ་ནས་བདག་གིར་བསྔོར་རུང་བ་ཡིན་ཏེ། ཤིན་ཏུ་རྒྱས་པའི་སྡེ་སྣོད་ཕལ་པོ་ཆེ་ལས། འགྲོ་ཀུན་དགེ་བ་ཇི་སྙེད་ཡོད་པ་དང་། །བྱས་དང་བྱེད་འགྱུར་དེ་བཞིན་བྱེད་པ་དང་། །བཟང་པོ་ཇི་བཞིན་དེ་འདྲའི་ས་དག་ལ། །ཀུན་ནས་ཀུན་ཀྱང་བཟང་པོར་རེག་གྱུར་ཅིག །ཅེས་དང་། སྡུད་པ་ལས། གང་ཡང་སངས་རྒྱས་སྲས་རྣམས་དང་ནི་ཉན་ཐོས་དང་། །སློབ་དང་མི་སློབ་དགེ་བ་ཟག་བཅས་ཟག་མེད་པ། །བསྡུས་ནས། ཞེས་གསུངས་པའི་ཕྱིར། གཉིས་པ་གང་དུ་བསྔོ་བའི་ཡུལ་ནི། འཇིག་རྟེན་པའི་བདེ་འབྲས་སམ། ཕྱོགས་གཅིག་པའི་མྱང་འདས་མ་ཡིན་པར། མི་གནས་པའི་མྱང་འདས་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་ས་ཁོ་ནར་བསྔོ་བར་བྱ་སྟེ། རྒྱལ་བའི་ཡུམ་ལས། དགེ་བའི་རྩ་བ་ཐམས་ཅད་ཀྱང་རྣམ་པ་ཐམས་ཅད་མཁྱེན་པ་ཉིད་མ་གཏོགས་པར། ཉན་ཐོས་དང་། རང་སངས་རྒྱས་ཀྱི་སར་ཡོངས་སུ་བསྔོར་མི་གཞུག་གོ །ཞེས་དང་། ཡོངས་སུ་བསྔོ་བའི་མདོ་ལས། དགེ་བའི་རྩ་བ་འདི་དག་ཀྱང་། །སངས་རྒྱས་ཉིད་ཀྱིས་སར་བསྔོའོ། །ཞེས་གསུངས་པའི་ཕྱིར། གསུམ་པ་ཇི་ལྟར་བསྔོ་བའི་ཆོ་ག་ལ། ལྟ་བ་ཆོས་ཐམས་ཅད་བདག་མེད་པས་ཟིན་པ་དང་། ཐབས་བྱང་ཆུབ་ཀྱི་སེམས་ཀྱིས་འཕངས་པ་གཉིས་ལས། དེའི་དང་པོ་ལྟ་བ་བདག་མེད་པས་ཟིན་པ་ནི། དོན་དམ་པར་ཆོས་ཐམས་ཅད་རང་བཞིན་མེད་པ་ཡིན་པས་བསོད་ནམས་ཀྱང་མཚན་མར་དམིགས་སུ་མེད་ལ། ཐ་སྙད་ཀུན་རྫོབ་ཏུ། གང་གིས་བྱེད་པ་པོ་དང་། གང་ལ་བྱ་བའི་ཡུལ་དང་། ཇི་ལྟར་བྱས་པའི་དགེ་རྩ་རྣམས་ཐམས་ཅད་མདང་གི་རྨི་ལམ་ལྟར་སྣང་ལ་རང་བཞིན་མ་གྲུབ་པར་ཤེས་པའི་སྒོ་ནས་བསྔོ་སྟེ། མདོ་ལས། མེ་ལོང་དཀྱིལ་འཁོར་ཡོངས་དག་ལ། །ཇི་ལྟར་རང་བཞིན་མེད་པ་ཡི། །བཞིན་གྱི་དཀྱིལ་འཁོར་སྣང་བ་ལྟར། །ལྗོན་པས་ཆོས་རྣམས་ཤེས་པར་གྱིས། །ཞེས་དང་། ཡུམ་ལས། གལ་ཏེ་མཚན་མར་བྱེད་ན་བྱང་ཆུབ་བསྔོ་མ་ཡིན། །ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན། །ཞེས་གསུངས་པའི་ཕྱིར། གཉིས་པ་ཐབས་བྱང་ཆུབ་ཀྱི་སེམས་ཀྱིས་འཕངས་པ་ནི། དགེ་བའི་རྩ་བ་ཐམས་ཅད་མཁའ་ཁྱབ་ཀྱི་སེམས་ཅན་དང་ཐུན་མོང་དུ་བྱས་ནས་བསྔོ་བ་སྟེ། སྤྱོད་འཇུག་ལས། དངོས་སམ་ཡང་ན་བརྒྱུད་ཀྱང་རུང་། །སེམས་ཅན་དོན་ལས་གཞན་མི་བྱ། །སེམས་ཅན་ཁོ་ནའི་དོན་གྱི་ཕྱིར། །ཐམས་ཅད་བྱང་ཆུབ་ཕྱིར་བསྔོའོ། །ཞེས་གསུངས། དེའི་རྒྱུ་མཚན་ཡང་། བྱང་ཆུབ་ཀྱི་སེམས་ཀྱིས་མ་ཟིན་པའི་དགེ་བ་རྣམས་འབྲས་བུ་ལན་རེ་སྨིན་ནས་འཛད་ལ། གང་བྱང་ཆུབ་ཀྱི་སེམས་ཀྱིས་ཟིན་པའི་དགེ་བ་ནི་འབྲས་བུ་བྱུང་ནས་ཀྱང་མི་འཛད་པར་གོང་ནས་གོང་དུ་འཕེལ་བར་འགྱུར་ཏེ། སྤྱོད་འཇུག་ལས། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་བསྐྱེད་ནས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་ནས་མི་ཟད་འཕེལ་བར་བྱེད། །ཅེས་གསུངས་པའི་ཕྱིར། དེ་ལྟར་ཐབས་ཤེས་ཀྱིས་ཟིན་པའི་སྒོ་ནས་བསྔོ་བ་རང་གི་ངོ་བོ་ནི། དགེ་རྩ་བྱང་ཆུབ་ཏུ་འདུན་པས་བསྒྱུར་བའི་བློ་དང་། ཚིག་ཁྱད་པར་ཅན་གྱི་མཐུ་བསྡོམ་པ་སྟེ། འཇམ་དཔལ་ཞིང་གི་ཡོན་ཏན་བཀོད་པ་ལས། ཆོས་རྣམས་ཐམས་ཅད་རྐྱེན་ཡིན་ཏེ། །འདུན་པའི་རྩེ་ལ་རབ་ཏུ་གནས། །གང་གིས་སྨོན་ལམ་ཅི་བཏབ་པ། །དེ་ནི་དེ་བཞིན་ཉིད་དུ་འགྲུབ། །ཅེས་སོ། །བསྔོ་བ་དང་སྨོན་ལམ་གྱི་ཁྱད་པར་ནི། རྒྱུ་དགེ་རྩ་སྔོན་དུ་སོང་ནས་ཚིག་དང་སྨོན་པ་བསྡོམས་པ་ནི་བསྔོ་བ། རྒྱུ་དགེ་རྩ་སྔོན་དུ་མ་སོང་བར་སྨོན་པ་ཙམ་ནི་སྨོན་ལམ་སྟེ། དེའང་འདིར་རྫོགས་པའི་བྱང་ཆུབ་ཏུ་འདུན་ཞིང་བསྒྱུར་བའི་བསྔོ་སྨོན་མཚོན་བྱེད་ཙམ་ཞིག་བགྱིད་ན། འོ་སྐོལ་གྱི་སྟོན་པ་སྔོན་རྒྱལ་པོ་བྱམས་པའི་སྟོབས་སུ་གྱུར་པའི་ཚེ་གནོད་སྦྱིན་རྣམས་ལ་རང་གི་ཤ་ཁྲག་བྱིན་ནས་གསུངས་པ་ལྟར་བརྗོད་པར་བྱ་སྟེ། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ཏེ། །སྐྱེ་རྒ་ན་འཆིའི་རྦ་ཀློང་འཁྲུག་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །ཅེས་དང་། གཞན་ཡང་། དབང་གིས་སྨིན་ཅིང་དམ་ཚིག་སྡོམ་པར་ལྡན། །རིམ་གཉིས་ལམ་ལ་བསྙེན་སྒྲུབ་མཐར་ཕྱིན་ཏེ། །དཀའ་བ་མེད་པར་རིག་འཛིན་གོ་འཕང་བགྲོད། །དངོས་གྲུབ་རྣམ་གཉིས་བདེ་བླག་འགྲུབ་གྱུར་ཅིག །ཞི་ཁྲོ་སྤྲུལ་པའི་འཁོར་ལོས་ལུང་སྟོན་ཅིང་། །མཁའ་འགྲོ་རྣམས་ཀྱིས་བུ་བཞིན་སྐྱོང་བ་དང་། །ཆོས་སྐྱོང་སྲུང་མས་བར་ཆད་ཀུན་སེལ་ཞིང་། །ཡིད་ལ་སྨོན་པ་མཐའ་དག་འགྲུབ་གྱུར་ཅིག །རྒྱལ་བའི་བསྟན་པ་དར་ཞིང་རྒྱས་པ་དང་། །བསྟན་འཛིན་རྣམས་ཀྱི་བཞེད་པའི་དོན་ཀུན་འགྲུབ། །མ་ལུས་སྐྱེ་རྒུའི་འགལ་རྐྱེན་ཀུན་ཞི་ཞིང་། །ཕུན་ཚོགས་མཐའ་དག་ཡིད་བཞིན་འབྱོར་གྱུར་ཅིག །བདག་ཀྱང་རང་བཞིན་རྒྱུད་ཀྱི་ཕྱག་རྒྱ་ཡིས། །བཏབ་ལས་རྟོག་གེའི་གཡང་སར་མི་འཕྱན་པར། །ཐེག་མཆོག་མྱུར་བདེའི་ལམ་ལས་འབྲས་བུའི་རྒྱུད། །སྤང་ཐོབ་མེད་པར་མྱུར་དུ་རྟོགས་པར་ཤོག །ཅེས་བསྔོ་སྨོན་མདོར་བསྡུས་ཙམ་ཞིག་སོང་ནས་དེའི་འོག་ཏུ་བཀྲ་ཤིས་ནི། གང་ཕུན་སུམ་ཚོགས་པའི་དགེ་ཤིས་དང་ལྡན་པའི་འདོད་བྱ་ལ་སྨོན་པ་ཆེད་དུ་བརྗོད་པ་སྟེ། དེ་ཡང་། འདི་ལྟར་བདག་གིས་འབད་པ་ལས་བྱུང་བའི་དགེ་བ་མཆོག་ཏུ་གྱུར་པ་དེས། འགྲོ་བ་ཐམས་ཅད་ཀྱི་མགོན་སྐྱབས་ཐུབ་བསྟན་རིན་པོ་ཆེའི་དཔལ་དམ་པར་གྱུར་པ། གངས་ཅན་གྱི་ལྷ་གཅིག་ཕྱག་ན་པདྨོ་ངུར་སྨྲིག་གི་གར་གྱིས་རྣམ་པར་རོལ་པ་ཁམས་གསུམ་གྱི་བླ་མ་ཀུན་མཁྱེན་རྒྱལ་བའི་དབང་པོ་དང་། རྡོ་རྗེ་འཆང་ཆེན་པོ་དང་ཞལ་མི་གཉིས་པ་བཀའ་དྲིན་མཚུངས་མེད་གཏེར་ཆེན་ཆོས་ཀྱི་རྒྱལ་པོ་ཡབ་སྲས་ལ་སོགས་ཏེ་བླ་མ་དགེ་བའི་བཤེས་གཉེན་ཐམས་ཅད་ཞབས་པད་མི་ཤིགས་པ་རྡོ་རྗེའི་ངོ་བོར་བརྟན་ཅིང་། བསྟན་པ་རིན་པོ་ཆེ་མིག་གི་འབྲས་བུ་ལྟར་གཅེས་སྤྲས་ཀྱི་སྒོ་ནས་འཛིན་པར་མཛད་པའི་བསྟན་འཛིན་དགེ་འདུན་གྱི་ཚོགས་ཀྱིས་ནོར་འཛིན་གྱི་གཞི་ཐམས་ཅད་ཡོངས་སུ་ཁྱབ་ཅིང་། ཁྱད་པར་འདུས་པའི་སྡེ་འདིར་བཤད་སྒྲུབ་ཀྱི་བྱ་བས་དུས་འདའ་བའི་བསྟན་འཛིན་དབྱར་མཚོ་ལྟར་འཕེལ་ཞིང་རྒྱས་པ་དང་། ཀུན་བཟོད་མའི་གཞི་ལ་བསྟན་པ་སྟོབས་ཀྱིས་འཛིན་པའི་མི་རྗེ་ཆོས་ཀྱི་རྒྱལ་པོ་དཔལ་ཕྱོགས་ཐམས་ཅད་ལས་རྣམ་པར་རྒྱལ་བ་སངས་རྒྱས་རྒྱ་མཚོས་དབུ་མཛད་བསྟན་པ་བླ་ནས་བླར་མཆོད་ཅིང་བཀུར་བའི་སྦྱིན་པའི་བདག་པོ་རྣམས་ཀྱང་སྐུ་ཚེ་རིང་ཞིང་ཆབ་སྲིད་དཔལ་འབྱོར་མངའ་ཐང་ལ་སོགས་པ་ཡར་ངོའི་ཟླ་བ་ལྟར་འཕེལ་ཞིང་རྒྱས་པ་ལ་སོགས་པའི་མཐུ་ལ་བརྟེན་ཏེ། ཕན་བདེ་རབ་འབྱམས་མུ་མཐའ་མེད་པའི་འབྱུང་གནས་ཀུན་མཁྱེན་བུ་རམ་ཤིང་པའི་ལུང་རྟོགས་ཀྱི་བསྟན་པ་སྤྱི་དང་། བྱེ་བྲག་གསང་ཆེན་སྔ་འགྱུར་རྡོ་རྗེ་ཐེག་པའི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པས། མཐའ་ཡས་པའི་སེམས་ཅན་མ་ལུས་ཤིང་ལུས་པ་མེད་པ་ཐམས་ཅད་ཕྱོགས་དང་དུས་དང་གནས་སྐབས་ཐམས་ཅད་དུ་བཀྲ་ཤིས་ཀྱི་དགེ་མཚན་ཕུན་སུམ་ཚོགས་པའི་འོད་ཟེར་ཀུན་ནས་འཕྲོ་བས་བདེ་ལེགས་སུ་གྱུར་ཅིག །ཅེས་ཤིས་པར་བརྗོད་པ་མཚོན་བྱེད་ཙམ་ཞིག་བརྗོད་ན། བསྟན་པའི་དཔལ་གྱུར་བླ་མའི་ཞབས་པད་བརྟན། །བསྟན་འཛིན་སྐྱེས་བུས་ས་སྟེང་ཀུན་ལ་ཁྱབ། །བསྟན་པའི་སྦྱིན་བདག་མངའ་ཐང་འབྱོར་པ་རྒྱས། །བསྟན་པ་ཡུན་རིང་གནས་པའི་བཀྲ་ཤིས་ཤོག །མཁས་པའི་འདུན་སར་ལེགས་བཤད་སྐྱེས། །སྟེར་འདོད་དང་པོའི་ལས་ཅན་ཕྱིར། །སྙིང་པོའི་བཤད་པའི་མགོ་རྒྱན་གྱི། །དཔེར་བརྗོད་ཙམ་དུ་ཚུལ་འདི་ཡང་། །ཆོས་དཔལ་གྱིས་བྲིས་འདིས་མཚོན་ཏེ། །ཤེས་ལྡན་རྣམས་ཀྱིས་རྒྱས་པར་སྤེལ། །འདིར་འབད་དགེ་དེས་མྱུར་དུ་བདག །རྡོ་རྗེ་འཛིན་པ་ཉིད་གྱུར་ཅིག །ཅེས་ས་ག་ཉ་བའི་དུས་དགེ་བ་ལ་ཟིན་ཐུན་དུ་ཉིས་བྲིས་སོགས་སྤངས་ཏེ་ཤར་མར་སྤེལ་བ་ཤུ་བྷ་མསྟུ་སརྦ་ཛ་ག་ཏཱཾ། དགེའོ། །མངྒ་ལཾ།། །། དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་འགྲེལ་པ་གསང་བདག་དགོངས་རྒྱན།མགོ་སྨོས་པས་གོ་བའི་དབང་པོ་ཡང་རབ་རྣམས་ལ་མཚན་བཤད་པ།༄༅། །གུཧྱཔཏིསནདྷྱལཾཀཱརནཱམཤྲཱིགུཧྱགརྦྷཏཏྭབིནིཤྩཡཏནྟྲསྱབྲྀཏྟིབིཧརཏིསྨ། ། ༄༅། །དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་འགྲེལ་པ་གསང་བདག་དགོངས་རྒྱན་ཞེས་བྱ་བ་བཞུགས་སོ། ། དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་འགྲེལ་པ་གསང་བདག་དགོངས་རྒྱན་ཞེས་བྱ་བ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། ། གདོད་མའི་དབྱིངས་སུ་རང་རིག་ཡེ་ཤེས་ཉིད། །རྣམ་པར་གྲོལ་ལས་རྒྱལ་བའི་དཀྱིལ་འཁོར་ཀུན། །སྤྲོ་དང་བསྡུ་བའི་བྱེད་པོ་བཅོམ་ལྡན་འདས། །ཀུན་བཟང་ལྷ་ཡི་ལྷ་ལ་དང་པོར་འདུད། །མཐའ་ཡི་རྟོག་པས་མི་བསྐྱོད་རྡོ་རྗེའི་ཐུགས། །མཐའ་བྲལ་ཆོས་དབྱིངས་ངང་དུ་རྟོགས་གྱུར་པས། །མཐའ་དང་དབུས་མེད་རྒྱལ་བའི་དཀྱིལ་འཁོར་ཆེར། །མཐའ་ཡས་རྒྱུད་དོན་འཆད་པའི་སྐྱེས་བུ་རྒྱལ། །རབ་འབྱམས་བདེ་བར་གཤེགས་པ་མ་ལུས་པའི། །རྨད་བྱུང་ཐུགས་ཀྱི་གསང་བ་རྡོ་རྗེའི་མཛོད། །འཛིན་མཛད་རྒྱལ་སྲས་ཐུ་བོ་གང་ལགས་པ། །དེ་ལ་དངོས་པོ་ཀུན་གྱིས་ཕྱག་བགྱིའོ། །ཆོས་དབྱིངས་མཁའ་ལ་ཐབས་ཤེས་མཁའ་ལྡིང་གིས། །དྲངས་པའི་ལམ་རྒྱུད་ཤིང་རྟ་ལ་བསྐྱོན་ནས། །རྣམ་གྲོལ་གླིང་དུ་བདེ་བར་འཁྲིད་མཛད་པའི། །ལམ་མཁན་རིག་འཛིན་བླ་མའི་ཚོགས་ལ་འདུད། །ཁྱད་པར་གསང་བདག་དྲིན་ལས་གསང་ཆེན་གྱི། །བཀའ་བབས་དྲ་མ་ལྔ་དང་རྒྱལ་པོ་ཛཿ། །རྒྱུད་དོན་རྣམ་པར་འགྲེལ་ལ་ཟླ་བྲལ་བ། །སྒེག་རྡོར་སངས་རྒྱས་གསང་བ་རྣམ་གཉིས་མཆོད། །བསིལ་ལྡན་མཁའ་ལ་ཐུགས་རྗེའི་རྟ་བདུན་གྱིས། །གསང་ཆེན་ཉི་མ་འདྲེན་མཛད་པད་འབྱུང་དང་། །བི་མ་མི་ཏྲ་ལོ་ཆེན་རྨ་གཉགས་ཟུང་། །བཀའ་སྲོལ་གཅིག་འདུས་གནུབས་ཆེན་རྣམས་ལ་འདུད། །གངས་ཅན་རི་ཡི་སུལ་དུ་ཐེག་མཆོག་གི །འཇིགས་མེད་ཆོས་སྒྲས་ལྟ་ངན་རི་དྭགས་ཀུན། །སྐྲག་མཛད་ཕྱོགས་ལས་རྣམ་རྒྱལ་མིའི་སེང་གེ ། ཟུར་གྱི་རིགས་འཁྲུངས་མེས་དབོན་རྣམ་གསུམ་རྒྱལ། །གང་གི་བཀའ་སྲོལ་ཁོ་ནས་འཛིན་མའི་ཁྱོན། །ཁྱབ་མཛད་བཤེས་གཉེན་ཚོགས་དང་དེ་ལས་གཞན། །ལེགས་བཤད་གཏམ་གྱི་འབྱུང་གནས་རོང་ཟོམ་དང་། །དྲི་མེད་འོད་ཟེར་རྣམས་ལའང་གུས་ཕྱག་འཚལ། །གློ་བུར་ལས་སྐྱེས་མ་རིག་ཆུ་འཛིན་གྱིས། །མཐའ་བྲལ་ཆོས་དབྱིངས་ནམ་མཁའ་བསྒྲིབས་གྱུར་པ། །དེ་སེལ་མཛད་པོ་གཏེར་ཆེན་བླ་མ་ལས། །གཞན་དུ་མ་དམིགས་དད་བརྒྱའི་གཙུག་གིས་མཆོད། །གང་ཞིག་ཕུང་ཁམས་སྐྱེ་མཆེད་ལྟར་སྣང་འགྲོ་བའི་རྟོག་ཚོགས་ཇི་སྙེད་ཀུན། །ཡེ་ནས་རྣམ་གྲོལ་རང་བཞིན་རྣམ་དག་འཁོར་འདས་རོ་མཉམ་དཀྱིལ་འཁོར་ཆེར། །མཁའ་ལྟར་མི་ཕྱེད་ཐམས་ཅད་བདག་ཉིད་རྟག་བཞུགས་བདེ་བ་ཆེན་པོའི་སྐུ། །རང་བྱུང་ཡེ་ཤེས་དོན་དམ་སྙིང་པོ་བྱང་ཆུབ་སེམས་ལ་གུས་པས་འདུད། །གང་ཡང་དཔལ་ལྡན་སྙིང་པོའི་རྒྱུད་རྒྱལ་འདིར། །སྔོན་རབས་མཁས་པའི་རྣམ་བཤད་དཔག་མེད་ཅིང་། །བདག་ལྟས་དོན་གཞན་བརྗོད་པའང་ནུས་མིན་ཡང་། །དོན་ལ་མོས་པ་འགའ་ཡིས་བསྐུལ་བ་དང་། ཁྱད་པར་བདག་ཉིད་འདི་ན་ཚིག་གཅིག་ཙམ། །སྨྲ་བ་གང་དེའང་གསུང་རབ་འདི་ཡི་མཐུ། །དེ་ཕྱིར་རྒྱུད་དོན་ཇི་བཞིན་མཐོང་མིན་ཡང་། །གུས་པ་ཁོ་ནས་ཚུལ་འདི་བརྗོད་ལ་སྤྲོ། ། གང་གི་ཚེ་གདོད་མའི་དབྱིངས་སུ་རིག་པའི་ཡེ་ཤེས་རྣམ་པར་གྲོལ་བས་སྤངས་རྟོགས་མཐར་ཕྱིན་པའི་བྱང་ཆུབ་ཆེན་པོ་བརྙེས་ནས། གཙང་མའི་གནས་སྤངས་པའི་འོག་མིན་ཆེན་པོའི་གནས་སུ་རིགས་བདག་དྲུག་པའི་ཕྱག་རྒྱར་བསྟན་ཏེ། འཆད་པའི་སྐྱེས་བུ་དེ་བཞིན་གཤེགས་པ་ལྔ་ཡང་མངོན་པར་སྣང་བར་མཛད་ནས། རྡོ་རྗེ་གསང་བ་ལ་སོགས་པ་རིག་པ་ཁྱད་པར་ཅན་གྱི་འཁོར་རྣམས་ལ་རྒྱུད་ཀྱི་རྒྱལ་པོ་ཉིད་དགོངས་པ་བརྡའི་ཚིག་གིས་དུས་རྟག་པ་རྒྱུན་གྱི་འཁོར་ལོར་བགྲོ་བར་མཛད་པ་ལས་རྣམ་པར་གཡོ་བའི་རྩོལ་རྟོག་མི་མངའ་བཞིན་དུ་གདུལ་བྱ་གདུག་པ་ཅན་རྣམས་ཀྱི་ངོར་འཇིགས་བྱེད་ཆེན་པོ་དཔལ་ཧེ་རུ་ཀའི་རོལ་པ་ཚད་མེད་པ་དང་། ཐུན་མོང་གི་གདུལ་བྱ་རྣམས་ལ་འདུལ་བྱེད་ཀྱི་སྟོན་པ་ཐུབ་པ་ཆེན་པོ་བཅོམ་ལྡན་འདས་དྲུག་ཐུགས་རིག་པ་ཡེ་ཤེས་ཀྱི་བྱིན་རླབས་ལས་སྤྲོ་བ་སོགས་ཇི་ལྟར་འཚམས་པས་འདུལ་བའི་སྒྲོན་མ་རྣམ་པར་བཀོད་དེ་ཆོས་ཀྱི་འཁོར་ལོ་བསམ་གྱིས་མི་ཁྱབ་པ་བསྐོར་རོ། །དེ་དག་གི་དོན་དང་འབྲས་བུ་ཐམས་ཅད་གང་དུ་འདུ་བའི་སྣོད་དང་། གང་ལས་འཕྲོ་བའི་གཞི་ལྟ་བུ་ནི་དཔལ་གསང་བའི་སྙིང་པོ་ཡིན་ཏེ། ཇི་སྐད་དུ། འདུལ་བ་མདོ་སྡེ་ཆོས་མངོན་དང་། །དམ་ཚིག་སྒྲུབ་དང་གྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །ཕྱོགས་བཅུ་རྣམས་སུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །རང་བཞིན་གསང་བའི་སྙིང་པོ་འདི། །སྡེ་སྣོད་ཀུན་དང་རྒྱུད་ཀུན་གྱི། །འབྱུང་གནས་གཏན་ལ་ངེས་པར་འབེབས། །ཞེས་དང་། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་གསུངས་ཤིང་། བཤད་རྒྱུད་རྒྱས་པ་ལས་ཀྱང་། མཉམ་ཉིད་དོན་རྟོགས་རང་རིག་རྒྱལ་པོ་ནི། །རྒྱ་མཚོ་ཆེན་པོར་ཆུ་ཀླུང་ཀུན་འབབ་ལྟར། །བླ་མེད་དོན་རྟོགས་ཐབས་ཆེན་འདི་དག་ཏུ། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་གསུངས་པའི་ཕྱིར་རོ། །དེས་ན་འདིར་གང་བཤད་པར་བྱ་བའི་ཆོས་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་རྩ་བའི་རྒྱུད་དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་རྒྱལ་པོ་ཆེན་པོ་འདི་ཉིད་ཡིན་ལ། དེ་གང་གིས་འཆད་ན། བཤད་པའི་རྒྱུད་རྣམས་དང་། བླ་མ་དམ་པ་རྣམས་ཀྱིས་དོན་ལ་རྟོན་པའི་དགོངས་འགྲེལ་མཛད་པ་དེ་དག་ལ་བརྟེན་ནས་སོ། །ཇི་ལྟར་འཆད་པའི་ཚུལ་ལ། སློབ་དཔོན་ཆེན་པོ་བི་མ་ལས་ཁོག་གཞུང་གསལ་སྒྲོན་དུ། རབ་ལ་མཚན་བསྟན་འབྲིང་ལ་དབྱེ། །ཐ་མར་འབྲུ་གཉེར་དགྲོལ་བའོ། །ཞེས་པས་དོན་གསུམ་སྟེ། མགོ་སྨོས་པས་གོ་བའི་དབང་པོ་ཡང་རབ་རྣམས་ལ་མཚན་བཤད་པ་དང་། དབང་པོ་འབྲིང་པོ་རྣམས་ལ་སྤྱིའི་དོན་རྣམ་པར་དབྱེ་བས་བཤད་པ་དང་། དབང་པོ་ཐ་མ་རྣམས་ལ་འབྲུ་རེ་གཉེར་རེའི་སྒོ་ནས་སྤྲོས་ཏེ་བཤད་པའོ། །དང་པོ་ལའང་། ཁོག་གཞུང་ལས། རབ་མཚན་ཐ་སྙད་གསུམ་དུ་གྲགས། །སྒྱུ་འཕྲུལ་སྙིང་པོ་ལུང་གི་སྤྱི། །ལག་གི་རྩ་བཞིན་དབུ་ཞབས་རྟོགས། །སྐལ་བ་ཅན་གྱི་ཆེད་ཕྱིར་རོ། །ཞེས་མཚན་གྱི་རྣམ་གྲངས་གསུམ་དུ་བསྟན་པ་ལས། དང་པོ་རྒྱུད་དང་དཀྱིལ་འཁོར་གྱི་གཙོ་བོ་དང་འཆད་པའི་སྐྱེས་བུ་གསུམ་གྱི་མཚན་ཐུན་མོང་དུ་བསྟན་པ་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་སྟེ། བཤད་རྒྱུད་མེ་ལོང་ལས། ཆོས་རྣམས་མ་ལུས་གཉིས་མེད་པའི། །རང་རིག་བྱང་ཆུབ་སེམས་ཉིད་དོ། །ཐ་དད་མེད་པའི་རང་བཞིན་ཉིད། །རྡོ་རྗེ་ཞེས་ནི་བཤད་པ་ཡིན། ཞེས་པས་རྡོ་རྗེ་ནི་རང་བཞིན་དབྱེར་མི་ཕྱེད་པ་སྟེ་ཤེས་རབ་སྟོང་པ་ཉིད། སེམས་དཔའ་ནི་ས་ཏྭའི་སྒྲ་བརྟན་པ་དང་། བསྡུས་པ་དང་། རྟོགས་པ་གསུམ་ལ་སྐབས་འདིར་འཇུག་པས་ན། ཐབས་རང་རིག་པ་བྱང་ཆུབ་ཀྱི་སེམས་ཤེས་རབ་སྟོང་པ་ཉིད་དང་རོ་གཅིག་པའི་ཟུང་འཇུག་རང་བཞིན་གྱིས་རྣམ་པར་དག་པ་དེ་རྡོ་རྗེ་ལྟར་བརྟན་པས་སམ། དེ་ཉིད་ཀྱི་ཕྱག་རྒྱས་འཁོར་འདས་ཀྱི་ཆོས་ཐམས་ཅད་ལ་བཏབ་པས་མཉམ་པ་ཉིད་དུ་བསྡུས་པ་ནི་གཞི་འབྲས་གཉིས་སུ་མེད་པར་རྡོ་རྗེ་སེམས་དཔའ་དང་། གནས་ལུགས་ཀྱི་དོན་དེ་ཉིད་སྒྲིབ་གཉིས་ཟད་ཅིང་ཚོགས་གཉིས་རྫོགས་པའི་སྐྱེས་བུས་མངོན་དུ་རྟོགས་པ་ནི་འབྲས་བུའི་རྡོ་རྗེ་སེམས་དཔའ་སྟེ། གང་རྟོགས་པའི་ཡེ་ཤེས་དེ་ཡང་རྡོ་རྗེ་ལྟར་གཉིས་སུ་མེད་པར་གྱུར་པའི་ཕྱིར་རོ། །དེ་ཉིད་མཚན་མའི་ཕྱག་རྒྱར་སྣང་བར་དཀྱིལ་འཁོར་གྱི་གཙོ་བོ་དང་འཆད་པའི་སྐྱེས་བུ་རྡོ་རྗེ་མི་བསྐྱོད་པ་ལ་ཡང་རྡོ་རྗེ་སེམས་དཔའ་ཞེས་གྲགས་སོ། །སྒྱུ་འཕྲུལ་དྲྭ་བ་ནི། རྡོ་རྗེ་ལས། ཐབས་དང་ཤེས་རབ་འབྲེལ་བའི་དོན། །ཞེས་པས་འབྱུང་བ་ལྔ་སྒྱུ་མ་ལྟར་སྣང་བ་རིས་སུ་མ་ཆད་པའི་རྒྱུས་ཅིར་ཡང་འཕྲུལ་པ་ནི་ཕུང་པོ་ལྔ་སྟེ་རྒྱུ་འབྲས་འབྲེལ་བ་ཅན་གྱི་ཕྱིར་དྲྭ་བའོ། །རྒྱུ་མཚན་དེས་ཤེས་རབ་དབྱིངས་སྟོང་པ་ཉིད་དང་། ཐབས་རིག་པ་རང་བྱུང་གི་ཡེ་ཤེས་གཉིས་ཟུང་དུ་འབྲེལ་བ་ནི་ངེས་དོན་གྱི་སྒྱུ་འཕྲུལ་དྲྭ་བ་དང་། དེའི་རྟགས་ལྷ་ཡབ་ཡུམ་ཟུང་དུ་འབྲེལ་བ་ནི་དྲང་དོན་བརྡའི་སྒྱུ་འཕྲུལ་དྲྭ་བའོ། །ཡང་ན་སྒྱུ་མ་ནི་རྟོག་ཚོགས། འཕྲུལ་པ་ནི་ལྷ། དྲྭ་བ་ནི་རང་བཞིན་གཉིས་སུ་མེད་པར་འབྲེལ་བ་སྟེ། ལེ་ལག་ལས། ལྔ་ཕུང་སྒྱུ་མའི་ཡེ་ཤེས་ལ། །རང་རིག་ཐབས་ཀྱིས་རིགས་ལྔར་འཕྲུལ། ཞེས་དང་། བླ་མ་ལས། ཀུན་འབྱུང་དཀྱིལ་འཁོར་སྒྱུ་འཕྲུལ་ཆེ། །མང་ལ་འབྲེལ་བ་དྲྭ་བའི་དོན། །ཞེས་གསུངས། འདི་ཉིད་ཀྱི་ལེའུ་བཞི་པ་ལས་ནི་ཡབ་ལ་སྒྱུ་འཕྲུལ་དང་། ཡུམ་ལ་དྲྭ་བར་བཤད་ཅིང་། གཞི་དང་འབྲས་བུ་ལ་མཚན་ཇི་སྐད་དུ་ཐོབ་པའི་ངེས་པས་ཤེས་ཐོབ་ཀྱི་བྱ་བྱེད་དང་འབྲེལ་བ་ལམ་གྱི་རྒྱུད་དང་། དེ་མཚོན་བྱེད་ལམ་རྐྱེན་ཡི་གེའི་རྒྱུད་ལའང་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞེས་བྱའོ། ། གཉིས་པ་ཆེ་བ་ལས་མཚན་དུ་བཏགས་པ་ནི། ལུང་གི་སྤྱི་སྟེ། རྡོ་རྗེ་ལས། སོ་སོར་བསྟན་པ་རྒྱ་མཚོའི་རྒྱུད། །འདིར་སྟོན་འདིས་སྟོན་འདི་ཕྱིར་སྟོན། །དོན་ཀུན་འདི་ལ་ཡོངས་རྫོགས་པས། །ལུང་གི་སྤྱི་ཞེས་བཤད་པ་ཡིན། །ཞེས་དང་། འདི་ཉིད་ལས། མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི། ཞེས་སོ། ། གསུམ་པ་དོན་རང་གི་ངོ་བོ་ལས་བཏགས་པ་ནི། འགྲེལ་ཆུང་ལས། སྔོན་དུ་འགྲོ་བའི་བདག་ཉིད་པས། །མིང་ཉིད་ཐོག་མར་སྨོས་པ་གཅེས། །ཞེས་པ་ལྟར་གླེགས་བམ་གྱི་ཀླད་དུ་བཀོད་པའི་མཚན་ཏེ་འཆད་པར་འགྱུར་རོ། ། དབང་པོ་འབྲིང་པོ་རྣམས་ལ་སྤྱིའི་དོན་རྣམ་པར་དབྱེ་བས་བཤད་པ།གཉིས་པ་ལ་གཉིས་ཏེ། དོན་གྱི་རྣམ་གྲངས་རྣམ་པར་དབྱེ་བ་དང་། ཚིག་གི་རྣམ་གྲངས་རྣམ་པར་དབྱེ་བའོ། །དང་པོ་ལ་ལྔ་སྟེ། རྒྱུད་འབྱུང་བའི་རྒྱུ་གླེང་གཞི། རྐྱེན་གླེང་བསླང་བ། འབྲས་བུ་ཡོངས་སུ་ཤེས་པར་བྱ་བ་རྒྱུད་དོན། རྒྱུད་ཀྱི་དགོས་འབྲེལ། འཁོར་ལ་གདམས་ཤིང་བསྟན་པ་གཏད་པའོ། །དང་པོ་ནི། རྒྱུད་ཕྱི་མ་འགོས་འགྱུར་ལས། སྟོན་པ་ལས་སོགས་རབ་དབྱེ་བས། །ཕུན་སུམ་ཚོགས་པ་ལྔར་བརྗོད་དོ། །ཞེས་པས་གང་དུ་སྟོན་འཁོར་ཚོགས་པ་དེའི་ཚེ་རྒྱུད་དོན་འབྱུང་བར་ངེས་པའི་ཕྱིར་ཕུན་སུམ་ཚོགས་པ་ལྔ་ལྡན་ནི་གླེང་གཞིའོ། །ཅིའི་ཕྱིར་གླེང་གཞི་ཞེས་བྱ་ཞེ་ན། དཱ་ནའི་སྒྲ་ལས་བཀའ་ཡིན་མིན་དུ་རྟོག་པའི་ཐེ་ཚོམ་ཅན་དག་ལ་ཕུན་སུམ་ཚོགས་པ་ལྔའི་ལོ་རྒྱུས་བརྗོད་པས་ཡིད་ཆེས་ཀྱི་ངེས་པ་སྦྱིན་པར་བྱེད་པའི་ཕྱིར་དང་། གང་གླེང་བར་བྱ་བ་རྒྱུད་ཀྱི་དོན་འབྱུང་བའི་རྒྱུའམ་གཞིར་གྱུར་པའི་ཕྱིར་རོ། །དབྱེ་ན། ཐུན་མོང་མ་ཡིན་པ་དང་། ཐུན་མོང་གི་གླེང་གཞི་གཉིས་ལས། དང་པོ་ནི། ཐབས་ལམ་དང་སྦྱར་ཏེ་ནང་གསང་ལྟར་འཆད་པ་དག་ཡིན་ནོ། །གཉིས་པ་ནི། ལོངས་སྐུའི་གླེང་གཞིའམ། རྒྱུད་འབྱུང་བ་ཁྱད་པར་ཅན་གྱི་གླེང་གཞི་དང་། ཞར་བྱུང་གདུལ་བྱ་དགོས་ཆེད་དུ་བསྟན་པ་ཁྲོ་བོའི་གླེང་གཞི། སྤྲུལ་སྐུ་འགྲོ་བ་འདུལ་བའི་གླེང་གཞིའམ། བསྟན་པ་སྤྱིའི་གླེང་གཞིར་གྲགས་པ་རྣམས་སོ། ། གཉིས་པ་རྐྱེན་གླེང་བསླང་བ་ནི། ཐུགས་ཐིག་ལས། སྟོན་པས་གནང་དང་འཁོར་གྱིས་ཞུས། །སྐབས་ལས་གླེང་བསླང་སྟོན་དང་འཁོར། །གནང་འདྲིའི་རྐྱེན་དུ་གང་གྱུར་པ། །དེ་དེས་གསུང་ལ་མ་རག་པ། །ཞེས་པས་སྟོན་འཁོར་དྲི་ལན་གྱི་སྦྱོར་བས་རྒྱུད་དོན་གདུལ་བྱའི་བློ་དང་འཚམས་པར་འབྱུང་མ་རག་པའོ། །ཅིའི་ཕྱིར་གླེང་བསླང་ཞེས་བྱ་ཞེ་ན། གང་གླེང་བར་བྱ་བ་ནི་རྒྱུད་དོན་ཡིན་ལ། དེ་ཉིད་གླེང་བར་བསྐུལ་བ་ནི་བསླང་བ་སྟེ། བསྟན་པ་འབྱུང་བའི་རྐྱེན་བྱེད་པའི་ཕྱིར་རོ། །དབྱེ་ན། ཐུན་མོང་མ་ཡིན་པའི་དང་། ཐུན་མོང་གི་གླེང་བསླང་གཉིས་ལས། དང་པོ་ནི། སྟོན་པ་ཡབ་ཡུམ་གྱིས་ལྷན་ཅིག་པའི་འཁོར་ལ་ཟབ་དབང་བསྐུར་བའི་སྦྱོར་བས་མདུན་བསུས་ཏེ། ཐབས་ཤེས་གཉིས་མེད་ཀྱི་ཆ་བཟུང་ནས་གླེང་བསླང་བ་གསུམ་མོ། །གཉིས་པ་ནི། འཁོར་གྱིས་གཞན་དོན་དུ་རྒྱུད་བཤད་པར་ཞུས་པས་སྟོན་པའི་ཐུགས་རྗེ་སྐྱེས་ཏེ། དངོས་དང་བརྒྱུད་པའི་སྒོ་ནས་འཆད་པར་དགྱེས་པའོ། ། གསུམ་པ་འབྲས་བུ་ཡོངས་ཤེས་རྒྱུད་དོན་བཤད་པ་ལ་གཉིས་ཏེ། རྒྱུད་གསུམ་གྱི་རྣམ་གཞག་སྤྱིར་བཤད། ལམ་གྱི་ཆ་རྐྱེན་རྒྱུད་ཀྱི་དངོས་པོ་བྱེ་བྲག་ཏུ་བཤད་པའོ། །དང་པོ་ནི། རྒྱུད་ཕྱི་མ་ལས། རྒྱུད་ནི་རྒྱུན་ཆགས་ལ་བཤད་དེ། །ཐབས་དང་རྒྱུ་ལས་འབྲས་བུའོ། །ཞེས་པས་སྤྱིར་རྒྱུན་ཆགས་པའི་དོན་གྱིས་ན་རྒྱུད་ཅེས་བྱ་ལ། དབྱེ་ན། གང་རྟོགས་པར་བྱ་བ་གཞིའམ་རྒྱུའི་རྒྱུད་དང་། གང་གིས་རྟོགས་ཤིང་བགྲོད་པ་ཐབས་སམ་ལམ་གྱི་རྒྱུད་དང་། གང་དུ་མཐར་ཕྱིན་པ་འབྲས་བུའི་རྒྱུད་དོ། །དང་པོ་ནི། བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་དང་། རྒྱས་པ་ལས། ཐམས་ཅད་རང་རིག་བྱང་ཆུབ་སེམས། །དེ་ནི་ལུང་གི་ཚད་མར་བཤད། །ཅེས་པས་གཞི་འཆིང་གྲོལ་མེད་པའི་གནས་ལུགས་རང་རིག་པ་བྱང་ཆུབ་ཀྱི་སེམས་བདེན་པ་དབྱེར་མེད་སྤྱོད་ཡུལ་དང་བྲལ་བར་ཡེ་ནས་གནས་པ་གང་ཡིན་པ་སྟེ། ཁམས་བདེ་བར་གཤེགས་པའི་སྙིང་པོ་དང་། རང་བཞིན་གྱིས་གནས་པའི་རིགས་དང་། ཀུན་གཞིའི་ཡེ་ཤེས་དང་། དྲི་བཅས་དེ་བཞིན་ཉིད་ལ་སོགས་པའི་ཐ་སྙད་གང་ལ་འཇུག་པའི་གཞིའོ། །དེ་ཉིད་གཞི་ལམ་འབྲས་གསུམ་གྱི་ལྡོག་ཆ་གང་རུང་དང་མ་བསྟུན་པར་སྤྱིར་བཞག་པ་ན་རང་བཞིན་ནམ་གནས་ལུགས་དང་། གློ་བུར་གྱི་དྲི་མ་སྦྱོང་བ་དང་བསལ་སྟོབས་ཀྱིས་མངོན་དུ་གྱུར་པ་ལ་ལྟོས་ནས་ལམ་དང་འབྲས་བུར་བཞག་གོ །ཅིའི་ཕྱིར་གཞིའམ་རྒྱུའི་རྒྱུད་དུ་འགྱུར་ཞེ་ན། ཐབས་ཀྱི་རྐྱེན་གྱིས་ཟིན་པ་དང་མ་ཟིན་པ་ལས་འཁོར་བ་དང་མྱང་འདས་སུ་འགྲུབ་པར་བྱེད་པས་ན། འཁོར་འདས་གཉིས་ཀའི་འབྱུང་གཞིའམ་རྒྱུར་གྱུར་པའི་ཕྱིར་དང་། དེ་ཉིད་སེམས་ཅན་ནས་སངས་རྒྱས་ཀྱི་བར་དུ་རང་བཞིན་འགྱུར་བ་མེད་པར་རྒྱུན་ཆགས་སུ་འཇུག་པས་ན་རྒྱུད་དེ། རིམ་གསུམ་ལས། ཐ་སྙད་གཉིས་ཀྱི་ཆོས་རྣམས་ཀུན། །མ་ལུས་འབྱུང་ཕྱིར་གཞི་ཞེས་བྱ། །ཞེས་དང་། མགོན་པོ་བྱམས་པས། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་སོ། །དབྱེ་ན། སློབ་དཔོན་བི་མ་ལས། རིམ་པ་གསུམ་པར། དང་པོ་རྣམ་པ་གཉིས་ཡིན་ཏེ། །ངོ་བོའི་གཞི་དང་བཏགས་པའི་གཞི། །ཞེས་པས་སེམས་ཀྱི་ཆོས་ཉིད་རང་བཞིན་གྱིས་རྣམ་པར་དག་པ་བདེ་བར་གཤེགས་པའི་སྙིང་པོ་ནི་དྲི་མ་སྦྱོང་བའི་གཞི་ནོར་བུ་རིན་པོ་ཆེ་ལྟ་བུ་སྟེ་གནས་ལུགས་ངོ་བོ་ཉིད་ཀྱི་གཞི་དང་། ལོག་པའི་ཞེན་སྣང་ཡུལ་དང་བཅས་པ་ནི་སྦྱང་བྱའི་དྲི་མ་འདམ་རྫབ་ལྟ་བུ་སྟེ། མེད་སྣང་བློ་བུར་བ་ཡིན་པས་འཁྲུལ་པ་བཏགས་པའི་གཞི་ཞེས་གསུངས་སོ། །ཞེན་སྣང་ཉིད་འཁོར་བ་འགྲུབ་བྱེད་ཀྱི་རྒྱུ་དང་། རྣམ་ཤེས་ཀྱི་འཇུག་པ་མ་ཟད་བར་རྒྱུན་ཆགས་པ་ཙམ་ཡིན་ཡང་བཅོས་མ་གློ་བུར་གྱི་ཆོས་ཡིན་པས་འབྲས་བུའི་ཉེར་ལེན་དུ་གྱུར་པའི་རྒྱུ་རྒྱུད་མ་ཡིན་ཞིང་། རིགས་པས་དཔྱད་དོན་གྱི་སྟོང་ཉིད་མེད་དགག་ཀྱང་རྒྱུ་རྒྱུད་མཚན་ཉིད་པ་མ་ཡིན་ཏེ། ཉེར་ལེན་གྱི་རྒྱུ་དང་རྒྱུན་གྱི་དོན་གཉིས་ཀ་མི་གནས་པའི་ཕྱིར་རོ། ། གཉིས་པ་ནི། རྒྱུ་རྒྱུད་དེ་གློ་བུར་གྱི་དྲི་མ་དང་བྲལ་བར་བྱེད་པའི་ཐབས་ཤེས་འཇུག་གི་བྱེད་རྩོལ་དང་བཅས་པ་སྟེ། དེ་ཡང་ངོ་བོ་སྐྱེད་བྱེད་ཤེས་རབ་རྣམ་གསུམ་གྱིས་བསྐྱེད་བྱ་ཐུན་མོང་དང་མཆོག་གི་སེམས་ལྔ་སྐྱེས་སམ་སྐྱེ་བའོ། །དེ་ལྟར་ཡང་རིམ་གསུམ་ལས། ངོ་བོ་ཤེས་རབ་རྣམ་གསུམ་གྱིས། །སེམས་ལྔ་སྐྱེས་པར་བསྟན་པ་ཡིན། །ཞེས་སོ། །ཅིའི་ཕྱིར་ཐབས་སམ་ལམ་གྱི་རྒྱུད་དུ་འགྱུར་ཞེ་ན། ཐོབ་བྱ་འབྲས་རྒྱུད་ཉིད་མངོན་དུ་བྱེད་པའི་ལྷན་ཅིག་བྱེད་རྐྱེན་ཡིན་པས་ཐབས་དང་། གང་གིས་གང་དུ་བགྲོད་བྱའི་རྟེན་ཡིན་པས་ལམ་སྟེ། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་བྱུང་། །ཞེས་དང་། མདོའི་དོན་བསྡུས་ལས། བགྲོད་དང་དེ་ཆོས་ལྡན་པ་དང་། །ཞེས་སོ། །དེ་ལའང་ཉེ་རིང་གཉིས་ལས། རྣལ་འབྱོར་བླ་ན་མེད་པ་ཁྱད་པར་གྱི་ལམ་འདི་ནི་ཉེ་བའི་ལམ་མམ་ཐབས་རྒྱུད་ཡིན་ལ། དེ་ལས་གཞན་པ་ཐུན་མོང་གི་ལམ་ངེས་འབྱུང་གི་ཐེག་པ་བཞི་དང་། ཕྱི་རྒྱུད་སྡེ་གསུམ་གྱི་ལམ་རྣམས་ནི་སྐབས་འདིར་རིང་བའི་ལམ་ཞེས་བྱའོ། །དེ་ཡང་གཞི་འབྲས་གཉིས་དང་ཤེས་ཐོབ་ཀྱི་བྱ་བྱེད་འབྲེལ་བ་ཅན་དུ་གནས་པའི་ཕྱིར་ཐབས་བར་མ་ཆད་པར་རྒྱུན་ཆགས་སུ་འབྱུང་བས་ན་རྒྱུད་དོ། །ཁྱད་པར་གྱི་ལམ་ལ་དབྱེ་ན། ཐབས་ཀྱིས་ངེས་པའི་ལམ་དང་། ཤེས་རབ་རྣམ་པར་གྲོལ་བའི་ལམ་གཉིས་ཏེ། བཤད་རྒྱུད་རྒྱ་མཚོ་ལས། གྲོལ་ལམ་ཐབས་སུ་རྣམ་པར་བསྟན། ཞེས་སོ། །དེ་ལ་ཐབས་ལམ་ནི། ངོ་མཚར་ངན་འགྲོ་ཐར་པའི་ཐབས། །ཞེས་པས་གཙོ་བོར་ཐབས་ཀྱི་ཁྱད་པར་བརྟུལ་ཞུགས་ཀྱི་སྤྱོད་པ་རྨད་དུ་བྱུང་བའི་སྒོ་ནས་འབྲས་བུ་མྱུར་དུ་འགྲུབ་པར་བྱེད་པ་སྟེ། མཀྵི་ཀའི་སྦྱོར་བས་ལྕགས་ཁམས་ཡུད་ཙམ་གྱིས་གསེར་དུ་བསྒྱུར་བ་བཞིན་ནོ། །དབྱེ་ན། རིམ་གསུམ་ལས། གདམས་ངག་སྟེང་དང་འོག་གི་སྒོ། །ཞེས་པ་ལྟར་གཉིས་ལས། སྟེང་སྒོ་ནི། འཁོར་ལོ་དྲུག་ལ་བརྟེན་ནས་འབར་འཛག་གི་སྦྱོར་བས་འཁོར་ལོ་བཞིར་བདེ་བའི་ཡེ་ཤེས་བསྐྱེད་པ་ལ་བསླབ་པ་རིམ་གྱིས་པ་སྟེ། རྒྱ་མཚོ་ལས། འཁོར་ལོ་གསུམ་གཉིས་སྲོག་ཤིང་གསུམ། །མེ་རླུང་འགྲོ་བས་ནམ་མཁའི་བ། །བཞོ་བས་སྟེང་དུ་རྣམ་པར་གྲགས། །ཞེས་སོ། །འོག་སྒོ། མཁའ་གསང་གཉིས་ལ་བརྟེན་ནས་དབབ་བཟུང་ལྡོག་ཁྱབ་ཀྱི་སྦྱོར་བས་སྐད་ཅིག་ལ་བདེ་སྟོང་གཉིས་མེད་ཀྱི་ཡེ་ཤེས་བསྐྱེད་པ་ཐབས་ལམ་ཅིག་ཅར་བ་སྟེ། རྒྱས་པ་ལས། ཕུན་སུམ་ཚོགས་པ་ལྷུན་གྲུབ་རྣམས། །གསང་དབང་མཆོག་གིས་སྦྱིན་པར་བྱེད། །ཅེས་སོ། །གཉིས་པ་གྲོལ་ལམ་ནི། ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །ཅེས་པས་གཙོ་བོར་ཤེས་རབ་རྣམ་པ་གསུམ་གྱི་སྒོ་ནས་རང་རྒྱུད་ཀྱི་འཆིང་བ་ཆོས་ཉིད་དུ་གྲོལ་བར་བྱེད་པ་སྟེ། རིན་པོ་ཆེ་ཀཽ་ཏུ་བྷ་དང་ལྷན་ཅིག་བཞག་པའི་རྡོའི་ཁམས་རིམ་གྱིས་གསེར་དུ་འགྱུར་བ་བཞིན་ནོ། །དབྱེ་ན། ལམ་རིམ་ལས། རིང་པའམ་རིམ་དང་གཅིག་ཅར་བའོ། །ཞེས་པས་དབང་པོ་ཡང་རབ་ཁ་ཅིག་དབྱེར་མེད་ཆིག་ཆོད་དུ་རྟོགས་གོམས་མཐར་ཕྱིན་པར་བྱེད་པ་ཡོད་དེ་གཅིག་ཅར་བ་ཞེས་བྱ་ཞིང་། ཡང་རིམ་གྱིས་རྟོགས་གོམས་མཐར་ཕྱིན་པར་བྱེད་པ་ནི་རིམ་གྱིས་པ་སྟེ། དེ་ཅུང་ཟད་བཤད་ན། འདི་ཉིད་ལས། ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་པས་མཚན་ཉིད་གསུམ་སྟེ། རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་ངེ་འཛིན། ལམ་གྱུར་གྱི་འབྲས་བུ་རིག་འཛིན་བཞིའོ། །དང་པོ་ནི། ལམ་རིམ་ལས། གཞི་དང་གཏན་ཚིགས་གྲུབ་པའི་དོན། །ཞེས་པས་གཞལ་བྱ་ཞེན་སྣང་ཉིད་འཇལ་བྱེད་གཏན་ཚིགས་རྣམས་ཀྱིས་གཏན་ལ་ཕབ་པས་རྟོགས་བྱའི་ལྟ་བ་རང་བཞིན་རྒྱུ་རྒྱུད་གནས་ལུགས་ཀྱི་དོན་དེ་བཞིན་ཉིད་དེ་རང་རིག་མངོན་སུམ་གྱིས་ཡུལ་མེད་རང་གསལ་དུ་རྗེན་པར་རྟོགས་པ་ནི་གྲུབ་མཐའ་སྟེ། ལམ་རིམ་ལས། རྒྱ་མཚོ་དྭངས་པའི་གཟུགས་བརྙན་ལྟར། །སྒྲ་བརྟེན་ཡིད་ལ་བྱེད་མིན་པར། །རང་རིག་མངོན་སུམ་དམིགས་བྲལ་བ། །རང་གསལ་གསུམ་བྲལ་མི་བསྒུལ་བར། །ངེས་པར་གདེངས་སུ་གང་བྱས་པ། །ཐོས་བསམ་བརྟེན་པའི་ལྟ་མཐར་ཕྱིན། །ཞེས་གསུངས། གང་དག་སྔགས་ཀྱི་གྲུབ་མཐའ་ནི་ལྟ་བ་དབུ་མ་ལས་ཐབས་ཁྱད་པར་དུ་འཕགས་པས་ཕྱེ་བ་ཙམ་དུ་འདོད་པ་ནི། བདེན་པ་དབྱེར་མེད་སྣོད་བཅུད་དག་མཉམ་ཆེན་པོར་གཏན་ལ་འབེབས་པའི་སྔགས་ཀྱི་ཐུན་མོང་མ་ཡིན་པའི་ལྟ་བ་ལ་ཅེ་རེ་ལོང་དུ་སོང་བ་ཡིན་ནོ། །གལ་ཏེ་རིག་པ་འགྱུར་མེད་ལ་དེ་བཞིན་ཉིད་དུ་བྱས་པ་ནི་ངེས་དོན་གྱི་མདོ་སྡེ་ཟབ་མོ་རྣམས་ལས་ཀྱང་འབྱུང་བས་རྟོགས་བྱའི་ཡུལ་ལ་ཁྱད་པར་མེད་དམ་སྙམ་ན། བདེན་མོད་ཀྱི། དེ་ལྟ་ནའང་། དེ་བཞིན་ཉིད་དེ་བླ་ན་མེད་པའི་རྒྱུད་འདིར་རྒྱུ་རྒྱུད་དུ་འཇོག་པའི་ཚེ་ན་ལྷན་ཅིག་སྐྱེས་པ་མི་འགྱུར་བའི་བདེ་བ་ཆེན་པོའི་རང་བཞིན་དུ་བྱས་པ་ནི་སྔགས་ཀྱི་ཁྱད་ཆོས་སུ་བཞེད་པ་ཡིན་ཏེ། རྡོ་རྗེ་མེ་ལོང་ལས། ལུས་ཅན་སྙིང་ལ་གང་གནས་པ། །རང་བྱུང་ཟག་མེད་ཡེ་ཤེས་གཟུགས། །མི་ཤིགས་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ཁྱབ་པ། །མི་གནས་ཆོས་སྐུའི་རང་བཞིན་ཡིན། །ཞེས་དང་། དུས་འཁོར་ལས། དེས་ན་གཙོ་བོས་གང་ཞིག་འཕོ་མེད་ལྷན་སྐྱེས་ལུས་ཀྱི་བདེ་བ་སྔགས་ཀྱི་ཐེག་པར་བསྟན། །ཞེས་དང་། བརྟག་གཉིས་ལས། རྟག་ཏུ་རང་བཞིན་བདེ་བ་ཅན། །འཇིག་རྟེན་ཁམས་ནི་གང་དུ་ཡང་། །སངས་རྒྱས་གཞན་དུ་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་བསྟན་པ་མེད། །ཅེས་སོ། །གཞན་ཡང་གཉིས་སྣང་འཁོར་བའི་ཆོས་འདི་རྣམས་ཐག་ཁྲའི་སྦྲུལ་ལྟར་མེད་སྣང་གློ་བུར་བ་དང་། དེ་དག་གི་སྣང་གཞི་གནས་ལུགས་དེ་བཞིན་ཉིད་ཡིན་པའི་གནད་ཀྱིས། རྟོག་ཚོགས་སྐུ་དང་ཡེ་ཤེས་ཀྱི་དཀྱིལ་འཁོར་དུ་དག་པར་གསུངས་པ་ཡང་། ཕུང་སོགས་ཀྱི་སྣང་གཞི་དེ་བཞིན་ཉིད་ཀྱི་རྩལ་གཉུག་མའི་ཡེ་ཤེས་ཀྱི་རྩ་དང་རླུང་སེམས་ལ་སོགས་པ་གདོད་ནས་སྐུ་གསུམ་གྱི་ངོ་བོར་ལྷུན་གྱིས་གྲུབ་པ་དང་། ཡེ་ཇི་བཞིན་པའི་རིགས་ལྔ་སོགས་ལྷའི་བདག་ཉིད་དུ་བཞུགས་པ་གང་ཡིན་པ་སྟེ། སློབ་དཔོན་ཆེན་པོ་སངས་རྒྱས་གསང་བས་ལམ་རིམ་དུ། ཕུང་པོ་ཁམས་དང་སྐྱེ་མཆེད་རྣམས། །གཞི་རྫོགས་ཕྱག་རྒྱ་མ་འདྲེས་གསལ། །ཅིར་ཡང་འགྱུར་ཞིང་ཅིར་ཡང་འགྲུབ། །ཅེས་སོ། །གཉིས་པ་ལ། ཏིང་ངེ་འཛིན་ལ་བརྟན་པ་མ་ཐོབ་ཀྱང་། སྤྱིའི་རྣམ་པ་ཙམ་སྒོམ་པ་མོས་སྒོམ་དང་། ལམ་སོ་སོའི་ཏིང་ངེ་འཛིན་མཐར་ཕྱིན་པར་བསླབ་པ་ངེས་རྫོགས་གཉིས་སུ་འདུས་ཤིང་། དེ་ཡང་ངེས་རྫོགས་ནི། ལམ་རིམ་ལས། སྲིད་པ་རིམ་པར་སྨིན་ཚུལ་གྱིས། །འཇུག་པའི་ཡན་ལག་ལྔ་རུ་བཞག །གང་དག་དངོས་ཀུན་རང་རིག་ཕྱིར། །ཤི་བ་དོན་དམ་བདེན་པ་སྟེ། །སྐྱེ་བ་བར་མ་ཀུན་རྫོབ་ཡིན། །སྐྱེས་པའི་རིམ་གསུམ་གཉིས་མེད་དོན། །ཞེས་པས་སྐྱེ་འཆི་བར་དོ་གསུམ་ཕྲུགས་གཅིག་སྦྱོང་བའི་ལམ་རྫོགས་པར་སྟོན་པ་སྟེ། འཆི་བ་འོད་གསལ་དང་རྗེས་སུ་མཐུན་པའི་ལམ་སྟོང་པ་ཆེན་པོ། དེ་བཞིན་དུ་བར་དོ་དང་སྙིང་རྗེ་སྒྱུ་མ། སྐྱེས་པའི་རིམ་པ་གསུམ་པོ་དང་། ཕྱག་རྒྱ་གཅིག་པ། ཕྱག་རྒྱ་སྤྲོས་བཅས། ཚོམ་བུ་ཚོགས་སྒྲུབ་སྟེ་ཟག་པ་དང་བཅས་པའི་ལམ་གྱི་རྣལ་འབྱོར་ལྔ་ཡིན་ལ། དེ་ལས་ཀྱང་དང་པོ་བཞི་ནི་ཟག་ལྡོག་གཉིས་ཀ་ཡོད་པ་ཚོགས་ལམ་གྱི་རྣལ་འབྱོར་ཏེ། ལམ་རིམ་ལས། དེ་ཕྱིར་ལམ་བཞིར་ཟག་ལྡོག་ཡོད། །ཅེས་སོ། །ཚོགས་སྒྲུབ་ནི་སྦྱོར་ལམ་གྱི་རྣལ་འབྱོར་ཡིན་པས་ཟག་པ་ཡོད་ཀྱང་ལྡོག་པ་མེད་པའི་ལམ་སྟེ། སྤྱོད་པའི་དུས་གྲངས་ངེས་པས་ཟག་མེད་ལ་དངོས་སུ་སྦྱོར་བའི་བར་ཆད་མེད་ལམ་ཡིན་པའི་ཕྱིར་རོ། །གསུམ་པ་ལམ་གྱུར་གྱི་འབྲས་བུ་ནི། ཟག་ལྡོག་གཉིས་ཀ་མེད་པའི་ལམ་མཐོང་སྒོམ་མཐར་ལམ་གསུམ་གྱིས་བསྡུས་པ་རིག་འཛིན་བཞི་སྟེ། དེ་ཡང་མཐོང་ལམ་པ་ལ། ཆོས་ཉིད་ཀྱི་བདེན་པ་མཐོང་ཡང་བློའི་ནུས་སྟོབས་ཆེ་ཆུང་གིས་འབྱུང་བ་སྙིགས་མའི་ལུས་ཡེ་ཤེས་ཀྱི་མེས་སྦྱོང་བར་མ་ནུས་པ་རྣམ་སྨིན་རིག་འཛིན་དང་། སྦྱོང་བར་ནུས་པས་སྐྱེ་འཇིག་མེད་པ་དྭངས་མའི་ལུས་སུ་གྱུར་པ་ལམ་མཆོག་ཡོངས་སུ་རྫོགས་པའི་ཚེ་དབང་གཉིས་ཏེ། ལམ་ཆུང་ལས། ནུས་པ་ཐོབ་དང་མ་ཐོབ་པའི། །མཐོང་ལམ་གཉིས་སུ་འགྱུར་བ་ཡིན། །ཞེས་སོ། །སྒོམ་ལམ་པ་ནི། ཡེ་ཤེས་སྒྱུ་མའི་སྐུ་ཅན་ཕྱག་ཆེན་རིག་འཛིན་ཡིན་ལ། མཐར་ལམ་པ་ནི། སྐུ་ལྔ་ལྷུན་གྲུབ་རྡོ་རྗེ་འཆང་གི་ཆ་ལུགས་འཛིན་པ་ལྷུན་གྲུབ་རིག་འཛིན་ནོ། །དེ་དག་ཀྱང་རྣམ་སྨིན་རིག་འཛིན་དང་རྒྱུའི་ཐེག་པའི་མཐོང་ལམ་རབ་དགའ་ལ་གནས་པའི་སེམས་དཔའ་གཉིས་དགོངས་པ་མཉམ་ཞིང་། དེ་ལས་གཞན་པ་ཚེ་དབང་སོགས་གསུམ་ནི་རྒྱུའི་ཐེག་པ་ས་དང་པོ་དང་། བརྒྱད་པ་དང་། བཅུ་པ་ཙམ་དུ་སྐལ་བ་མཉམ་པར་འགྱུར་མོད་ཀྱི། འོན་ཀྱང་དགོངས་སྤྱོད་ཀྱིས་ཁྱད་པར་དུ་གྱུར་པ་ཡིན་ཏེ། རྒྱུའི་ཐེག་པའི་སྒོམ་ལམ་ས་བརྒྱད་པ་དང་ཚེ་དབང་། བཅུ་པ་དང་ཕྱག་ཆེན། མི་སློབ་པའི་ས་ཀུན་ཏུ་འོད་དང་ལྷུན་གྲུབ་རིག་འཛིན་རྣམས་མཉམ་པར་བཞེད་པའི་ཕྱིར། དེ་ལྟར་ཡང་ལམ་ཆུང་ལས། དེ་ཡང་དང་པོ་དང་པོ་དང་། །སྐལ་མཉམ་གཉིས་པའི་རིགས་མཆོག་དེ། །བརྒྱད་པའི་སེམས་དཔར་སྐལ་བ་མཉམ། །གསུམ་པ་བཅུ་དང་སྐལ་མཉམ་མོད། །དགོངས་སྤྱོད་རྒྱ་མཚོས་ཁྱད་པར་འཕགས། །ཞེས་དང་། བསམ་གཏན་མིག་སྒྲོན་གྱི་རང་འགྲེལ་ལས། ཀུན་ཏུ་འོད་བསྟི་གནས་ཀྱི་སའོ། །དེ་ནི་འདིར་ལྷུན་གྱིས་གྲུབ་པའི་རིག་འཛིན་དངོས་སོ། །ཞེས་གསུངས་སོ། །རྣམ་སྨིན་རིག་འཛིན་གྱི་དངོས་འབྲས་རྒྱ་ཆེན་དུ་ངེས་པའི་ཕྱིར། མཐོང་ལམ་གཉིས་པོ་ལམ་མཐར་ཆགས་ཀྱི་སྐབས་སུའང་རིམ་པར་བགྲོད་པ་མི་སྲིད་ཅིང་། རྣམ་སྨིན་ནས་ཐོད་བརྒལ་དུ་བགྲོད་པ་ཡང་མི་འབྱུང་ངོ་། །གཞན་དུ་ཅིག་ཅར་བའི་རིགས་མ་ཡིན་པའི་ལམ་པ་བློ་ཆེ་བ་འགའ་ཞིག་ཕྱག་རྒྱ་གཅིག་སྤྲོས་གཉིས་ནས་སྦྱོར་མཐོང་དང་། ཚེ་དབང་ནས་ལྷུན་གྲུབ་རིག་འཛིན། ཚེ་དབང་དང་རྒྱ་ཆེན་གཉིས་ནས་རྫོགས་པའི་སངས་རྒྱས་ཀྱི་སར་ལམ་གཞན་བར་ནས་བོར་ལ་ཐོད་བརྒལ་དུ་སྦྱོར་བ་སྲིད་པ་ཡིན་ཏེ། དེ་དག་ལ་ངང་གིས་བློ་ཆེ་བ་དང་། ཟུང་འཇུག་གི་ལམ་སྒོམ་པ་དང་། ལམ་གཞན་བར་ནས་བོར་དུ་ཡོད་པ་སྟེ་ཐོད་བརྒལ་འབྱུང་བའི་ཆོས་གསུམ་པོ་ཚང་བའི་ཕྱིར་རོ། །དེ་ལྟར་ན་ཚོགས་སྒྲུབ་ནས་ཀྱང་ཐོད་བརྒལ་འབྱུང་བ་སྲིད་དམ་སྙམ་ན། མ་ཡིན་ཏེ། ལམ་རིམ་ལས། ལམ་མཆོག་དབྱེ་ས་གཅིག་ཡིན་ནོ། །ཞེས་ཟག་མེད་ཀྱི་ལམ་གྱི་འདུ་ས་དང་དབྱེ་ས་མཐོང་ལམ་ཡིན་པར་གསུངས་པས་ལམ་གཞན་བར་ནས་བོར་དུ་མེད་པའི་ཕྱིར་རོ། ། གསུམ་པ་ནི། སྒྱུ་འཕྲུལ་བྱེ་བྲག་བསྟན་པ་ལས། གྲུབ་པའི་རྣལ་འབྱོར་རྣལ་འབྱོར་ཆེ། །ལྷུན་གྲུབ་ཇི་བཞིན་མངོན་བྱས་ལའང་། །བཏགས་པ་ཙམ་སྟེ་གཉིས་པ་མེད། །དེ་ཕྱིར་དེ་ལ་དེ་བརྗོད་དོ། །ཞེས་པས་སྦྱང་གཞི་རྒྱུ་རྒྱུད་ལ་བརྟེན་པའི་སྦྱང་བྱ་གློ་བུར་གྱི་དྲི་མ་རྣམས་སྦྱོང་བྱེད་ཀྱིས་ལེགས་པར་སྦྱངས་པས་གཞི་ཇི་ལྟ་བ་བཞིན་མངོན་དུ་གྱུར་པ་མཐར་ཐུག་པའོ། །ཅིའི་ཕྱིར་འབྲས་བུའི་རྒྱུད་དུ་འགྱུར་ཞེ་ན། ཁོག་གཞུང་ལས། གྲུབ་པ་མཐར་ཕྱིན་འབྲས་བུར་བརྗོད། །ཅེས་པས་བླ་ན་མེད་པ་མཆོག་གི་འབྲས་བུ་མཐར་ཐུག་པ་དོན་དུ་གཉེར་བ་རྣམས་བསམ་པ་ཡོངས་སུ་རྫོགས་པས་ན་འབྲས་བུ་དང་། ནམ་ཡང་རྒྱུན་མི་ཆད་པས་ན་རྒྱུད་དོ། །དབྱེ་ན། ཁོག་གཞུང་ལས། འབྲས་བུའི་ངོ་བོ་སྐུ་གསུང་ཐུགས། །ཡོན་ཏན་ཕྲིན་ལས་རྣམ་པ་ལྔ། །དེ་ཡང་སྐབས་ཀྱི་ལྔ་ལྔ་སྟེ། །ཞེས་པས་སྐུ་གསུང་ཐུགས་ཡོན་ཏན་ཕྲིན་ལས་ལྔ་རེ་རེ་ལའང་ལྔ་ལྔ་སྟེ་འབྲས་ཆོས་ཉི་ཤུ་རྩ་ལྔར་འགྱུར་ལ། དེ་ཡང་རྟེན་སྐུ་དང་། བརྟེན་པ་ཡེ་ཤེས་དང་། མཛད་པ་འཕྲིན་ལས་གསུམ་དུ་འདུ་བ་ཡིན་པས། དང་པོ་རྟེན་ནི། གསུམ་མམ་ལྔ་སྟེ། དབྱིངས་ཐོག་ཏུ་རིག་པའི་ཡེ་ཤེས་གྲོལ་བ་ཟུང་འཇུག་ཆོས་ཀྱི་སྐུ་དང་། དེ་ལས་མ་གཡོས་བཞིན་དུ་ས་བཅུའི་སེམས་དཔའ་ལ་མཚན་དཔེའི་རྣམ་པར་སྣང་བའི་གཟུགས་བརྙན་ལོངས་སྐུ་དང་། སོ་སྐྱེ་རྣམས་ལ་མོས་པ་དང་མཐུན་པར་སངས་རྒྱས་ཀྱི་གཟུགས་བརྙན་ཅི་རིགས་སུ་སྣང་བ་སྤྲུལ་པའི་སྐུ་སྟེ་སྐུ་གསུམ་མོ། །ཡང་ན་སྐུ་གསུམ་སྣང་ཆ་མ་འདྲེས་པའི་ཆ་ནས་མངོན་བྱང་དང་། དབྱེར་མི་ཕྱེད་པའི་ཆ་ནས་རྡོ་རྗེའི་སྐུ་སྟེ་གཉིས་པོ་བསྣན་པས་སྐུ་ལྔའོ། །གཉིས་པ་བརྟེན་པ་ཡེ་ཤེས་ནི། དེའི་ཚེ་ཚོགས་བརྒྱད་གནས་སུ་དག་པས་ཡེ་ཤེས་ལྔ་སྟེ། ཅིར་ཡང་མི་དམིགས་པ་ཆོས་དབྱིངས་ཡེ་ཤེས་དང་། གསལ་ལ་རྟོག་པ་མེད་པ་མེ་ལོང་ལྟ་བུའི་ཡེ་ཤེས་དང་། འཁོར་འདས་ཀྱི་མཐའ་ལས་མི་གནས་པ་མཉམ་ཉིད་ཡེ་ཤེས་དང་། ཆོས་ཅན་མ་ལུས་པ་མངོན་སུམ་དུ་གསལ་ལེར་གཟིགས་པ་སོར་རྟོག་ཡེ་ཤེས་དང་། འགྲོ་དོན་མཛད་པ་ལ་ཐོགས་པ་མེད་པའི་ཕྲིན་ལས་འཇུག་པ་བྱ་གྲུབ་ཡེ་ཤེས་སོ། །དེ་དག་ཀྱང་ཆོས་དབྱིངས་ཡེ་ཤེས་ཇི་ལྟ་བ་མཁྱེན་པའི་ཡེ་ཤེས་དང་། ཕྱི་མ་བཞི་པོ་ཇི་སྙེད་པ་མཁྱེན་པའི་ཡེ་ཤེས་སུ་འདུ་བས་ན་ཡེ་ཤེས་གཉིས་སོ། །གསུམ་པ་མཛད་པ་ཕྲིན་ལས་ནི། དེ་ལྟར་ན་སྒྲིབ་གཉིས་བག་ཆགས་དང་བཅས་པ་མཐའ་དག་སྤངས་ཤིང་། ཤེས་བྱ་ཐམས་ཅད་མངོན་སུམ་དུ་གཟིགས་པའི་སྤངས་རྟོགས་མཐར་ཕྱིན་པའི་མཐུ་ལས་གདུལ་བྱའི་སྐལ་བ་དང་འཚམས་པའི་ཕྲིན་ལས་དུས་ལས་ཡོལ་བ་མེད་པར་ལྷུན་གྱིས་གྲུབ་པ་ནམ་མཁའ་ཇི་སྲིད་བར་འབྱུང་བ་ཡིན་ནོ། ། གཉིས་པ་ལམ་གྱི་ཆ་རྐྱེན་རྒྱུད་ཀྱི་དངོས་པོ་བྱེ་བྲག་ཏུ་བཤད་པ་ནི། ལྟ་སྤྱོད་དཀྱིལ་འཁོར་དབང་དམ་ཚིག །མཆོད་སྔགས་ཏིང་འཛིན་ཕྲིན་སྒྲུབ་ཀྱིས། །གསང་སྔགས་རྒྱུད་ཀྱི་དབྱེ་བ་བྱ། །ཞེས་པ་ལྟར་བཅུ་སྟེ། དེ་ཁོ་ན་ཉིད་ལྟ་བ། ལ་དོར་བ་སྤྱོད་པ། བཀོད་པ་དཀྱིལ་འཁོར། རིམ་པ་བགྲོད་པ་དབང་། མི་འདའ་བ་དམ་ཚིག །རོལ་པ་ཕྲིན་ལས། དོན་དུ་གཉེར་བ་སྒྲུབ་པ། མི་གཡོ་བ་ཏིང་འཛིན། གནས་སུ་སྟོབ་པ་མཆོད་པ། འཆིང་ཟློས་སྔགས་དང་ཕྱག་རྒྱའོ། །དང་པོ་ལྟ་བ་ལ་གསུམ་སྟེ། ངོ་བོ་ནི། ལམ་རིམ་ལས། ཐབས་ཀྱི་ལྟ་སྤྱོད་ཆེན་པོ་ནི། །བླ་མེད་ཐེག་པ་ལས་འཕགས་པ། །དོན་དམ་དུ་ནི་དཀོར་བདུན་ལ། །ཀུན་རྫོབ་ཏུ་ནི་མཉམ་རྫོགས་སོ། །ཡང་དག་སྐྱེས་མཆོག་དམ་པ་ཡིས། །དོན་དམ་ཀུན་རྫོབ་དབྱེར་མེད་པར། །ཡང་དག་ཉིད་དུ་རབ་ཏུ་རྟོགས། །ཞེས་པས་མཐའ་གང་དུ་ཡང་མ་རེག་པའི་སེམས་ཉིད་ཡེ་ནས་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པ་ནི་ལྷག་པ་དོན་དམ་བདེན་པ་དང་། དེ་ཉིད་ཀྱི་རྩལ་སྣང་སྣོད་བཅུད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བས་འཁོར་འདས་མཉམ་པ་ཉིད་དུ་རྫོགས་པ་ནི་ལྷག་པ་ཀུན་རྫོབ་ཀྱི་བདེན་པ་སྟེ། དེ་གཉིས་ཀྱང་ཕྱོགས་སུ་ལྷུང་བ་མ་ཡིན་པར་ངོ་བོ་དབྱེར་མི་ཕྱེད་པར་མཉམ་པ་ཉིད་དུ་གནས་ཤིང་། དེར་འཛིན་གྱི་བསམ་བརྗོད་ལས་ཀྱང་ཡང་དག་པར་འདས་པས་ན་ཐ་སྙད་ཙམ་དུ་ལྷག་པ་བདེན་པ་དབྱེར་མེད་སྤྱོད་ཡུལ་དང་བྲལ་བ་ཞེས་བཏགས་ཏེ། དེ་ལས། རྒྱས་འགྲོས་མ་མཛད་མ་བཅོས་པར། །རང་བཞིན་ངང་གིས་དབྱེར་མེད་པའང་། །དེ་མིན་གཞན་པ་དགྲོལ་ཕྱིར་ལས། །ཐ་སྙད་གཉིས་པར་བསམ་བརྗོད་འདས། །ཞེས་གསུངས་ཤིང་། ལྷག་པ་ཞེས་པའི་སྒྲ་ཡང་དོན་དམ་བདེན་ངོར་མ་ཟད། ཀུན་རྫོབ་ཏུ་ཡང་ཆོས་ཐམས་ཅད་ལ་མི་གཉིས་པའི་བསམ་སྤྱོད་དང་ལྡན་པས་ན་རྒྱུའི་ཐེག་པ་ལས་འཕགས་པའི་ཕྱིར་དེ་སྐད་དུ་བརྗོད་པ་སྟེ། དེ་ལས། བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་ལ། །ཀུན་རྫོབ་ཏུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོར་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུའང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་སོ། །ངེས་ཚིག་ནི། དྲྀཥྚའི་སྒྲ་ལས་གནས་ལུགས་ཀྱི་དོན་ལ་དེ་དང་རྗེས་སུ་མཐུན་པའི་ཤེས་རབ་ཀྱིས་སྒྲོ་འདོགས་གཅོད་པས་ན་ལྟ་བའོ། །དབྱེ་ན། དབང་པོ་ཡང་རབ་ལ་གཏན་ཚིགས་ཀྱིས་རྟོགས་པར་བྱ་བ། དབང་པོ་འབྲིང་ལ་རང་བཞིན་དང་འབྲས་བུའི་རྟགས་ལ་བརྟེན་ནས་རྟོགས་པར་བྱ་བ། དབང་རྟུལ་ལ་བརྒྱུད་དེ་རྟོགས་པར་བྱ་བ་ཉེ་རིང་གཉིས་རྣམས་སོ། ། གཉིས་པ་སྤྱོད་པ་ལའང་གསུམ་སྟེ། ངོ་བོ་ནི། རིམ་གསུམ་ལས། ཏིང་འཛིན་ཁྱད་པར་འགྱུར་པའི་ཕྱིར། །རྗེས་མཐུན་སྤྱོད་པ་གཞུང་བཞིན་སྤྱད། །ཅེས་པས་ཐབས་ཤེས་ཁྱད་པར་ཅན་གྱིས་ཟིན་པའི་ལམ་པའི་སྒོ་གསུམ་གྱི་བྱ་བར་གྱུར་པ་གང་ཡིན་པའོ། །ངེས་ཚིག་ནི། ཙཪྻའི་སྒྲ་ལས་སྤྱད་བྱ་ལ་ཚུལ་བཞིན་དུ་སྤྱོད་པར་བྱེད་པའི་དོན་གྱིས་ན་སྤྱོད་པའོ། །དབྱེ་ན། སྤྱིར་ལུས་ངག་ཡིད་གསུམ་ཡོངས་སུ་དག་པར་བྱ་བ་ཡིན་ལ། བྱེ་བྲག་ཏུ། ཐབས་ལམ་བརྟུལ་ཞུགས་ཀྱི་སྤྱོད་པ་དང་། གྲོལ་ལམ་བག་ཡོད་ཀྱི་སྤྱོད་པ་གཉིས་སུ་བཤད་ཅིང་། ཕྱི་མ་ལའང་། དད་བརྩོན་གྱི་སྤྱོད་པ། ཤེས་རབ་དང་མཐུན་པ། ཐབས་དང་མཐུན་པ། ཕྱོགས་གཅིག་པ། སྤྲོས་པ་དང་བཅས་པ། ཚོགས་ཀྱི་སྤྱོད་པ། རྫུ་འཕྲུལ་གྱི་སྤྱོད་པ་སྟེ་རིམ་གྱིས་པའི་སྤྱོད་པ་བདུན་དང་། བླང་དོར་མེད་པ་རྨད་དུ་བྱུང་བ་ཅིག་ཅར་བའི་སྤྱོད་པ་དང་བརྒྱད་དོ། ། གསུམ་པ་དཀྱིལ་འཁོར་ལའང་གསུམ་སྟེ། ངོ་བོ་ནི། ཐུགས་ཐིག་ལས། གནས་སྐབས་བདུན་དུ་སྙིང་པོ་ལེན། །བཀོད་པ་གང་རྫོགས་དེ་ངོ་བོ། །ཞེས་པས་བཀོད་པ་ལྷའི་འཁོར་ལོར་རྫོགས་པར་སྣང་བའོ། །ངེས་ཚིག་ནི། མཎྜ་ལའི་སྒྲ་ལས། མཎྜ་ནི་སྙིང་པོའམ་བཅུད་དང་། ལ་ནི་འཛིན་པའམ་ལེན་པ་སྟེ། སྙིང་པོའི་ཡོན་ཏན་གྱི་གཞི་འཛིན་པས་ན་སྙིང་པོ་ལེན་པ་ཞེས་དང་། ཡང་སྒྲ་གཟུགས་པོ་ཟླུམ་པོའམ་བསྐོར་བའི་དོན་ལ་འཇུག་པས་ན་གང་གཙོ་བོ་ལ་འཁོར་གྱིས་བསྐོར་བའི་ཕྱིར་དཀྱིལ་འཁོར་རོ། །དབྱེ་ན། ཆོས་དོན་ལས་གསུམ་དང་། འགྲེལ་ཆུང་ལས་བཅུ་གཉིས་སུ་ཕྱེ་ཡང་། འདིར་རྒྱས་པ་ལས། འདིས་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་གསུམ། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། །ཅེས་བདུན་དུ་གསུངས་སོ། ། བཞི་པ་དབང་ལའང་གསུམ་སྟེ། ངོ་བོ་ནི། ཐུགས་ཐིག་ལས། རྒྱུ་གཉིས་རྐྱེན་བཞིས་ཡན་ལག་བསྙད། །དྲུག་ལ་གནས་པའི་ཐོབ་བྱ་དེ། །ངོ་བོ་ཉིད་ཅེས་རྣམ་པར་བཤད། །ཅེས་པས་རྒྱུ་གཉིས་དང་རྐྱེན་བཞི་ཚོགས་པ་ལ་བརྟེན་ནས་གོ་འཕང་གི་ཆོས་རྒྱུད་ལ་འཇོག་པའི་ལས་ཀྱིས་ཐར་པའི་མྱུ་གུ་མངོན་དུ་བསྐྱེད་པའམ་སྐྱེ་ངེས་ཀྱི་ནུས་རུང་དུ་སྨིན་པར་བྱེད་པའོ། །ངེས་ཚིག་ནི། ཨ་བྷི་ཥིཉྩའི་སྒྲ་ལས་མངོན་པར་གཏོར་བའམ་བླུགས་པ་སྟེ། སྒོ་གསུམ་གྱི་དྲི་མ་འཁྲུད་ཅིང་འབྲས་བུ་ཡེ་ཤེས་ཀྱི་ནུས་པ་ཁྱད་པར་ཅན་འཇོག་པས་ན་དབང་ངོ་། །དབྱེ་ན། རྒྱུད་ཕྱི་མ་ལས། སློབ་དཔོན་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །ཞེས་པས་བཞིར་གསུངས་ཤིང་། དེ་ལས་ཀྱང་བུམ་དབང་ལ་ཕན་ནུས་གཉིས་སུ་ཕྱེ་བས་ལྔར་འགྱུར་ཏེ། རྡོ་རྗེ་ལས། དང་པོ་ས་བོན་འཇོག་པ་སྟེ། །གཉིས་པ་ནུས་པ་བསྐྱེད་པ་ཡིན། །གསུམ་པ་ཉམས་མྱོང་བསྐྱེད་པའོ། །བཞི་པས་དེ་ཉིད་བརྟན་པར་བྱེད། །ལྔ་པས་བརྟན་པ་ཉམས་བླངས་པས། །མཆོག་གི་དངོས་གྲུབ་ཚེ་འདིས་འགྲུབ། །ཅེས་སོ། །དེ་ཡང་ཞི་བ་ལ་ཕན་དབང་བཅུ། ནུས་དབང་ལྔ། ཟབ་དབང་གསུམ་སྟེ་བཅོ་བརྒྱད། ཁྲོ་བོ་ལ། གདན་དང་ལྷ་དབང་ཕྱག་མཚན་དང་། །ཆས་བཅུ་སྒྲུབ་རྫས་བཅོ་ལྔ་སྟེ། །ཞེས་པ་ལྟར་ཕན་དབང་ལ་ཉེར་བརྒྱད་དུ་ཕྱེ་བས་སུམ་ཅུ་རྩ་དྲུག་གོ །ལྔ་པ་དམ་ཚིག་ལའང་གསུམ་སྟེ། ངོ་བོ་ནི། རྒྱུད་ཕྱི་མ་ལས། གང་ཞིག་ནན་ཏན་ལས་མི་འགོང་། །རྨི་ལམ་དུ་ཡང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད། །ཅེས་པས་བསྲུང་བྱའི་དོན་ཁྱད་པར་ཅན་ལས་མི་འདའ་བར་སྡོམ་པའི་སེམས་པ་ས་བོན་དང་བཅས་པའོ། །ངེས་ཚིག་ནི། ས་མ་ཡའི་སྒྲ་དངོས་སུ་ཡལ་གམ་བཅས་པའི་ཐ་ཚིག་ལ་འཇུག་པས་ཇི་ལྟར་བཅས་པ་ལས་འདའ་བར་བྱ་བ་མ་ཡིན་པའི་ཕྱིར་དམ་ཚིག་གོ །དབྱེ་ན། རྩ་བའི་དམ་ཚིག་ལྔ་དང་། ཡན་ལག་གི་དམ་ཚིག་ལྔ་ཚན་གཉིས་ཏེ་བཅོ་ལྔ། དེ་དག་ལས་ཀྱང་སྤྲོས་ན་སུམ་བརྒྱ་དྲུག་ཅུ་ལ་སོགས་པའོ། ། དྲུག་པ་ཕྲིན་ལས་ལའང་གསུམ་སྟེ། ངོ་བོ་ནི། ཐུགས་ཐིག་ལས། ཕྱི་རོལ་ཚད་མེད་ཉིད་ལས་བཞི། །ཞེས་པས་ཚད་མེད་པ་བཞིའི་རྒྱུ་ལས་བྱུང་བའི་བྱང་ཆུབ་ཀྱི་སེམས་དང་། ཤེས་རབ་ཆེན་པོས་ཟིན་པའི་སྒོ་ནས་གཙོ་བོར་གཞན་དོན་བསྒྲུབ་པ་ལ་དམིགས་པའི་ཐབས་མཁས་ཀྱི་མཛད་སྤྱོད་དོ། །ངེས་ཚིག་ནི། ཀརྨ་ཞེས་པའི་སྒྲ་ལས་སྒོ་གསུམ་གྱི་བྱ་བའི་མཚན་ཉིད་ཅན་ནི་ལས་ཏེ་བྱེད་པ་པོའི་འདོད་པའོ། །དབྱེ་ན། ཕྱི་མ་འགོས་འགྱུར་ལས། ཞི་བ་ལ་སོགས་རབ་དབྱེ་བས། །ལས་ནི་རྣམ་པ་བཞིར་བསྡུས་སོ། །ཞེས་པས་ཞི་བ་དང་། རྒྱས་པ་དང་། དབང་དང་། དྲག་པོ་སྟེ་ལས་བཞིའོ། །དེ་དག་ཀྱང་གང་གིས་བྱ་བའི་ཐབས་ཀྱི་རིམ་པ་ནི། མེ་དང་། རྫས་དང་། ལུ་གུ་རྒྱུད་དང་། མཆོད་རྟེན་དང་། ཕྱག་རྒྱའི་སྒོ་ནས་བྱ་བ་རྣམས་ཏེ། ཁོག་གཞུང་ལས། བདག་གཞན་དོན་གྲུབ་ཕྲིན་ལས་ནི། །མཆོད་རྟེན་ཕྱག་རྒྱའི་སྒོ་དང་ནི། །ཧོམ་བྲོ་གླུ་དང་རྫས་ཀྱིས་བྱ། །ཞེས་སོ། ། བདུན་པ་སྒྲུབ་པ་ལའང་གསུམ་སྟེ། ངོ་བོ་ནི། རྒྱུད་ཕྱི་མ་ཁ་ཆེ་འགྱུར་ལས། འཇིག་རྟེན་པ་ཡི་དངོས་གྲུབ་ནི། །བསྐྱེད་པའི་རིམ་པའི་སྦྱོར་བས་ཐོབ། །འཇིག་རྟེན་འདས་པའི་དངོས་གྲུབ་ནི། །རྫོགས་པའི་རིམ་པའི་སྦྱོར་བས་སོ། །ཞེས་པ་ལྟར་ཐབས་ཁྱད་པར་ཅན་གང་གིས་བསྒྲུབ་བྱ་མཆོག་དང་ཐུན་མོང་གི་དངོས་གྲུབ་རྣམ་པ་གཉིས་ལས་གང་འདོད་དོན་དུ་གཉེར་བ་ཞིག་གོ །ངེས་ཚིག་ནི། སིདྡྷིའི་སྒྲ་ལས་དངོས་གྲུབ་སྟེ་བསྒྲུབ་བྱ་དང་། སཱ་དྷ་ནའི་སྒྲ་ལས་ཀུན་ཏུ་ལེན་པ་སྟེ། འདོད་པའི་དོན་ལེན་ཅིང་ཐོབ་པར་བྱེད་པའམ་སྒྲུབ་པར་བྱེད་པས་ན་སྒྲུབ་པ་ཞེས་བྱའོ། །དབྱེ་ན། ཐུན་མོང་དང་། མཆོག་གི་སྒྲུབ་པའོ། །དང་པོ་ནི། ཁོག་གཞུང་ལས། རོ་ལངས་ཚེ་དང་པྲ་སྒྲུབ་དང་། །ལྷ་ཆེན་པོ་དང་རྒྱལ་པོ་བཞི། །གདུག་པ་ཀླུ་འདུལ་རྒྱལ་བློན་གྱི། །ཆུང་མ་དབང་དུ་བྱ་བ་གཉིས། །ཡུལ་ཁམས་ཅེ་སྤྱང་རྐང་མགྱོགས་བསྐྲད། །མི་སྣང་གཟུགས་སྒྲུབ་ལྷ་ཀླུ་མོ། །རྒྱལ་བློན་དམག་དཔོན་ཞང་བློན་སྒྲུབ། །ཚེ་འདིའི་ཆེད་ཕྱིར་འཇིག་རྟེན་པའོ། །ཞེས་སོ། །གཉིས་པ་ནི། དེ་ལས། ཡི་གེ་སྒྱུ་འཕྲུལ་ཚོགས་སྒྲུབ་དང་། །རྡོ་རྗེ་སེམས་དང་སྨན་སྒྲུབ་དང་། །རིགས་ལྔ་སྒྲུབ་དང་ཡུམ་ལྔ་སེམས། །བྱིན་དབབ་སྒྲུབ་པ་རྣམ་གཉིས་སོ། །ཞེས་སོ། །ཇི་ལྟར་སྒྲུབ་པའི་ཚུལ་ནི། བྱེ་བྲག་སོ་སོའི་སྒྲུབ་ཐབས་གུད་དུ་ཕྱུང་བ་རྣམས་དང་། གཙོ་བོར་སྟོན་པ་ནི་ཚོམ་བུ་ཚོགས་ཀྱི་སྒྲུབ་པ་སྟེ། གཞི་ཕུན་སུམ་ཚོགས་པ་ལྔ་ཚང་བའི་སྒོ་ནས་བསྙེན་སྒྲུབ་བཞིའི་ཐབས་ཀྱིས་སྒྲུབ་པའོ། ། བརྒྱད་པ་ཏིང་ངེ་འཛིན་ལའང་གསུམ་སྟེ། ངོ་བོ་ནི། ཧེ་རུ་ཀ་འདུས་པ་ལས། གང་དང་གང་དུ་གསལ་བའི་ཡིད། །མ་ཡེངས་པ་ཉིད་ཏིང་འཛིན་ཏེ། །ཞེས་པས་བསྒོམ་བྱའི་དོན་ཁྱད་པར་ཅན་ལས་མི་གཡོ་བར་གནས་པའི་སེམས་རྩེ་གཅིག་པའོ། །ངེས་ཚིག་ནི། ས་མ་དྷཱིའི་སྒྲ་ལས་མཉམ་པའི་བློ་སྟེ། སེམས་རྩེ་གཅིག་ཏུ་ཟིན་པའི་དོན་གྱིས་ན་ཏིང་ངེ་འཛིན་ནོ། །དབྱེ་ན། ཕྱི་མ་ཁ་ཆེ་འགྱུར་ལས། ལྷ་ཡི་རྣམ་པའི་སྦྱོར་བ་ཡི། །ཟླ་བ་རྡོ་རྗེ་ལ་སོགས་རིམ། །བསྐྱེད་པའི་རིམ་པ་ཞེས་སུ་བཤད། །རང་བཞིན་གྲུབ་པའི་རྣལ་འབྱོར་ནི། །རྫོགས་པའི་རིམ་པ་ཞེས་བྱར་བརྗོད། །ཅེས་པའི་བསྐྱེད་རིམ་དང་། རྫོགས་རིམ་གཉིས་ལས། དང་པོ་ལའང་། དེ་ལས། བསྐྱེད་རིམ་ལ་བརྟེན་སྐྱེ་གནས་ཏེ། །མངལ་སྐྱེས་ལ་སོགས་དབྱེ་བ་ཡིས། །དེ་ཡང་རྣམ་པ་བཞི་རུ་འདོད། །ཅེས་པས་སྐྱེ་གནས་བཞིའི་བག་ཆགས་སྦྱོང་བའམ་བསྟུན་ཏེ་སྒོམ་ཚུལ་བཞིའམ། ཡང་ན་ལམ་རིམ་ལྟར་སྲིད་པ་མངལ་སྐྱེས་རྫུས་སྐྱེས་གཉིས་དང་བསྟུན་ཏེ་རིམ་གྱིས་པ་དང་གཅིག་ཅར་པའོ། །རྫོགས་རིམ་ལ། ཐབས་ལམ་སྟེང་འོག་གི་སྒོ་ལ་བརྟེན་པ་དང་། གྲོལ་ལམ་ཟུང་འཇུག་གི་རྣལ་འབྱོར་རིམ་གཅིག་ཅར་གཉིས་ཀྱིས་བསྡུས་པ་རྣམ་པར་མི་རྟོག་པའི་ཏིང་ངེ་འཛིན་ནོ། ། དགུ་པ་མཆོད་པ་ལའང་གསུམ་སྟེ། ངོ་བོ་ནི། ཐུགས་ཐིག་ལས། བྱ་བྱེད་བྱ་བ་བྱེད་འདུས་པས། །དགྱེས་ཚིམ་གྱུར་པའི་དངོས་པོ་ཉིད། །ཅེས་པས་མཆོད་པའི་ཡུལ་དུ་གྱུར་པ་རྣམས་བཀུར་ཞིང་མཆོད་པའི་བསམ་པས་སྒོ་གསུམ་དང་། ཡོ་བྱད་སྟོབ་པའི་སྒོ་ནས་ཀྱང་མཉེས་པར་བྱེད་པའོ། །ངེས་ཚིག་ནི། པཱུ་ཛའི་སྒྲ་ལས་སྔོན་དུ་བསྐྱེད་པ་དང་། ཡང་དང་ཡང་དུ་དགྱེས་པ་བསྐྱེད་པ་དང་། བཀུར་བའི་དོན་གྱིས་གནས་སུ་སྟོབས་པའི་ཕྱིར་མཆོད་པའོ། །དབྱེ་ན། སྤྱིར་འཇིག་རྟེན་དང་། འཇིག་རྟེན་ལས་འདས་པའི་མཆོད་པ་དང་། བྱེ་བྲག་ཏུ། ཕྱི་ཉེར་སྤྱོད། ནང་དམ་རྫས་བདུད་རྩི། གསང་བ་སྦྱོར་སྒྲོལ་ཟབ་མོའམ། ཞི་ཁྲོའི་མཆོད་པ་བཅུ་བཞི་ལ་སོགས་པ་རྣམས་སོ། ། བཅུ་པ་སྔགས་དང་ཕྱག་རྒྱ་ལའང་གསུམ་སྟེ། ངོ་བོ་ནི། ཐུགས་ཐིག་ལས། ཡི་གེ་འདུས་པ་གྲུབ་པ་བཞི། །མཐུ་ཅན་རེད་པ་གང་ཡིན་པ། །བཞི་རྫོགས་ཉིད་ལས་མི་འདའ་བ། །གང་ལ་སྣང་བ་དེ་ངོ་བོ། །ཞེས་པས། ཐབས་ཤེས་ཀྱི་ཡི་གེ་འདུས་ཤིང་བྱིན་གྱིས་བརླབས་པས་ནུས་མཐུ་ཅན་དུ་གྱུར་པ་ནི་སྔགས་ཀྱི་ངོ་བོ་དང་། རིག་པ་ཕྱག་རྒྱ་བཞི་རྫོགས་ཀྱི་ལྷའི་སྐུར་གསལ་བ་ལས་མི་འདའ་བ་ནི་ཕྱག་རྒྱའི་ངོ་བོའོ། །ངེས་ཚིག་ནི། མནྟྲའི་སྒྲ་ལས་ཡིད་ཤེས་བདེ་མྱུར་དུ་སྐྱོབ་པས་ན་སྔགས་དང་། མུ་དྲའི་སྒྲ་ལས་འདེབས་ཤིང་མཚོན་པར་བྱེད་པའམ། རྒྱས་བཏབ་པ་ལས་འདའ་བར་དཀའ་བའི་ཕྱིར་མཚན་མའི་དོན་གྱིས་ན་ཕྱག་རྒྱའོ། །དབྱེ་ན། སྔགས་ལ་སྤྱིར་གསང་སྔགས། རིག་སྔགས། གཟུངས་སྔགས་གསུམ་དང་། བྱེ་བྲག་ཏུ་དེ་དག་གི་སྒོར་གྱུར་པའི་སྔགས་ལ། གསལ་བཀྲ་ལས། རྩ་བ་བསྐྱེད་དང་ལས་སྔགས་དང་། ཞེས་པས་རྒྱུ་མ་ནོར་བ་རྩ་བ། བསྐྱེད་པ་རྐྱེན། བཟླས་པ་ལས་ཀྱི་སྔགས་རྣམས་སོ། །ཕྱག་རྒྱ་ལའང་སྤྱིར་རྟོག་ཚོགས་ཡེ་ནས་ལྷའི་དཀྱིལ་འཁོར་དུ་གནས་པ་དང་། རྟོགས་པ་དང་། མངོན་དུ་བྱས་པའི་གནས་སྐབས་གསུམ་ལས། རང་བཞིན་དང་། ལྟ་བ་དང་། འབྲས་བུའི་ཕྱག་རྒྱ་གསུམ་དང་། བྱེ་བྲག་ཏུ་ལྷག་པ་ཏིང་ངེ་འཛིན་གྱི་དབང་དུ་བྱས་ན། གསལ་བཀྲ་ལས། དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་ཆེན་པོ་བཞི། །ཞེས་སོ། ། བཞི་པ་རྒྱུད་ཀྱི་དགོས་འབྲེལ་ནི། ཐུགས་ཐིག་ལས། བརྗོད་འབྲེལ་དགོས་པ་ཡང་དགོས་དང་། །རྒྱུ་རྐྱེན་ཡན་ལག་བཞི་རུ་འགྱུར། །ཞེས་པས་མཚོན་བྱ་རང་བཞིན་གྱི་རྒྱུད་ནི་བརྗོད་པར་བྱ་བའོ། །དེ་ཁོང་དུ་ཆུད་པར་བྱ་བའི་ཕྱིར་མཚོན་བྱེད་ཡི་གེའི་རྒྱུད་འདི་ནི་རྗོད་པར་བྱེད་པའོ། །རྗོད་བྱེད་ལ་བརྟེན་ནས་བརྗོད་བྱའི་དོན་ཤེས་པ་ནི་དགོས་པའོ། །དེ་ལྟར་ཤེས་པའི་དོན་ཉམས་སུ་བླངས་པས་ཐུན་མོང་གི་དངོས་གྲུབ་ཐོབ་པ་ནི་ཉིང་དགོས་ཕྲ་མོ་དང་། སློབ་པ་དང་མི་སློབ་པའི་ཟུང་འཇུག་ཕྱག་རྒྱ་ཆེན་པོ་མཆོག་གི་དངོས་གྲུབ་མངོན་དུ་གྱུར་པ་ནི་ཉིང་དགོས་མཆོག་གོ །དེ་ཡང་བརྗོད་བྱ་དང་རྗོད་བྱེད་གཉིས་ཤེས་བྱ་ཤེས་བྱེད་དང་། རྗོད་བྱེད་དང་དགོས་པ་གཉིས་ཐབས་ལས་ཐབས་བྱུང་དང་། དགོས་པ་དང་ཉིང་དགོས་གཉིས་དེ་ལས་དེ་བྱུང་དང་། ཉིང་དགོས་དང་བརྗོད་བྱ་གཉིས་ངོ་བོ་བདག་གཅིག་གིས་འབྲེལ་བ་ཡིན་ནོ། །ཅིའི་ཕྱིར་རྒྱུད་ཀྱི་དགོས་འབྲེལ་ཞེས་བྱ་ཞེ་ན། ཐོབ་བྱ་མཐར་ཐུག་གི་འབྲས་བུ་སྒྲུབ་པ་ལ་མེད་ན་མི་འབྱུང་གི་འབྲེལ་པ་གྲུབ་པའི་ཕྱིར་རོ། །དབྱེ་ན། གྲོལ་ལམ་དབང་བཙན་དུ་བྱས་པ་དང་། ཐབས་ལམ་དབང་བཙན་དུ་བྱས་པའི་དགོས་འབྲེལ་གཉིས་ཏེ། འདིར་ཕྱི་མ་བཏང་སྙོམས་སུ་བྱས་སོ། ། ལྔ་པ་གདམས་གཏད་ནི། བསྟན་པའི་སྙིང་པོ་དེ་ཡོངས་སུ་མི་ཉམས་ཤིང་བསྲུང་བའི་ཆེད་དུ་འཁོར་རྣམས་ལ་གདམས་ཤིང་གཏད་པའོ། །ཅིའི་ཕྱིར་གདམས་གཏད་ཅེས་བྱ་ཞེ་ན། རང་བཞིན་གྱི་རྒྱུད་ལས་མི་འགྱུར་བར་གདམས་པའང་ཡིན་ལ། ལམ་གྱི་རྒྱུད་དེ་མི་ནུབ་པར་ཟུངས་ཤིག་ཅེས་གཏད་པའང་ཡིན་པའི་ཕྱིར་རོ། །དབྱེ་ན་གཉིས་ལས། གདམས་པ་ནི། ཀྱེ་ཀྱེ། ཕྱོགས་བཅུ་དུས་བཞིའི་སོགས་ཚིགས་བཅད་གཉིས་ཀྱིས་རྒྱུད་དབུ་ཞབས་ཀྱི་དོན་ཐམས་ཅད་སྣང་བ་བཞིར་བསྡུས་ནས། འཁྲུལ་སྣང་དག་བྱ་དང་། གཞན་གསུམ་ཤེས་ཤིང་བགྲོད་པ་དང་ཐོབ་བྱར་བྱས་ཏེ། རང་བཞིན་གྱི་རྒྱུད་ལས་མི་འགྱུར་བར་གདམས་པའོ། །གཏད་པ་ནི། ཁོག་གཞུང་ལས། སྡུད་པ་པོ་དང་བུད་མེད་དང་། །རྣལ་འབྱོར་མིག་ལྡན་སོགས་ལའོ། །ཞེས་པས་ཡུལ་སྡུད་པ་པོ་དང་། མ་འོངས་པའི་གང་ཟག་ཆོས་མིག་ཅན་དང་། མ་མོ་དང་མཁའ་འགྲོ་རྣམས་ལ་གཉེར་གཏད་པའོ། ། གཉིས་པ་ཚིག་གི་རྣམ་གྲངས་རྣམ་པར་དབྱེ་བ་ནི། རྒྱུད་ཕྱི་མ་ལས། གང་གིས་བརྗོད་བྱ་འཆད་བྱེད་པ། །དེ་ནི་རྗོད་བྱེད་དུ་བཤད་དོ། །ཞེས་པས་བརྗོད་བྱ་འཆད་པར་བྱེད་པ་རྗོད་བྱེད་སྒྲའི་རྒྱུད་དམ། ཡི་གེའི་རྒྱུད་དུ་གྲགས་པ་གང་ཡིན་པའོ། །དེ་ཡང་ངོ་བོ་ཚོགས་པ་གསུམ་ལྡན་ཏེ། ཆོས་གང་ལ་སྒྲ་གང་ཞིག་དེ་ཉིད་ཡིན་པ་ལྟ་བུར་བཏགས་ནས་བརྗོད་པ་ནི་མིང་ཡིན་ལ། དེ་མང་པོ་འདུས་པ་ནི་མིང་གི་ཚོགས་སོ། །མིང་དེ་ཉིད་སྤྱིར་ཡན་དུ་མ་བཅུག་པར་རྣམ་དབྱེས་བྱེ་བྲག་སོ་སོར་ཕྱེ་ནས་ཆོས་དེ་དང་དེའི་དོན་གྱི་ཁྱད་པར་སྟོན་པ་ནི་ཚིག་ཡིན་ཅིང་། མིང་ཚིག་དེ་དག་གསལ་བར་བྱེད་པའི་འབྲུ་ལ་ནི་ཡི་གེ་ཞེས་བྱའོ། །དེ་ལྟར་ན། ཡི་གེ་འདུས་པ་ལས་མིང་། མིང་འདུས་པ་ལས་ཚིག །དེ་འདུས་པ་ལས་ཚིགས་སུ་བཅད་པ་དང་། ལྷུག་པ་དང་། ལེའུ་ལ་སོགས་པའི་རིམ་པས་གླེགས་བམ་གྱི་བར་དུ་རྒྱུན་ཆགས་པ་ལས་གཞུང་ཚོགས་ཡི་གེའི་རྒྱུད་དམ། བརྗོད་བྱ་དོན་གྱི་རྒྱུད་མཚོན་པར་ནུས་པའི་རྗོད་བྱེད་སྒྲའི་རྒྱུད་གྲུབ་པ་ཡིན་ཏེ། ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གི་རབ་མཚོན་ཏེ། །ཞེས་གསུངས་པའི་ཕྱིར་རོ། །དེ་ཡང་དཔྱད་ན། སྟོན་པའི་ཡེ་ཤེས་ཀྱི་རྣམ་པར་འཕྲུལ་པ་ལས་དངོས་ཀྱི་འཁོར་རྣམས་ཀྱི་ཡིད་ལ་རྒྱུད་དོན་རང་སྣང་བའམ། དེ་ཉིད་མ་འོངས་པའི་གདུལ་བྱ་རྣམས་ཀྱི་ཡིད་ལའང་སྒྲ་སྤྱིའི་རྣམ་པར་ཤར་བའི་མིང་ཚིག་ཡི་གེ་གསུམ་ཚོགས་པའི་རྒྱུད་གཞུང་སྟེ་སྒྲར་སྣང་བའི་རྒྱུད་དང་། དེ་དང་མཐུན་པའི་སྒྲ་བརྗོད་འདོད་ཀྱི་དབང་གིས་གནས་དང་བྱེད་པ་སོགས་འཕྲད་པ་ལས་ངག་ཏུ་བརྗོད་པ་ནི་སྒྲར་གྲགས་པའི་རྒྱུད་དང་། དེ་བརྗོད་པའི་རྟེན་ཕྱི་རོལ་དུ་ཡི་གེའི་གཟུགས་བརྙན་གླེགས་བམ་ལ་བཀོད་པ་ནི་བརྡར་གྱུར་པའི་རྒྱུད་གཞུང་སྟེ། རྗོད་བྱེད་ཀྱི་སྒོ་ནས་ཕྱེ་ན་དེ་ཙམ་མོ། །ཅིའི་ཕྱིར་སྒྲའི་རྒྱུད་ཅེས་བྱ་ཞེ་ན། བརྗོད་བྱའི་དོན་ཉིད་རྗོད་བྱེད་ཀྱི་སྒྲར་སྣང་ཞིང་སྒྲར་གྲགས་པའི་དོན་གྱིས་ན་སྒྲ་དང་། ཚིགས་སུ་བཅད་པ་སོགས་གཞུང་གི་ཚོགས་རྒྱུན་ཆགས་པས་སམ་གླེང་གཞི་ལ་སོགས་པ་ལྔ་རྒྱུ་རྐྱེན་འབྲས་བུའི་ཚུལ་དུ་འབྲེལ་བས་ན་རྒྱུད་དོ། །གཞན་དུ་ན་བརྗོད་བྱ་ལ་རྒྱུད་ཀྱི་མིང་ཐོབ་པས་དེ་རྗོད་བྱེད་ལའང་རྒྱུད་ཅེས་བཏགས་སོ། །དབྱེ་ན། རྩ་བའི་རྒྱུད་དང་། བཤད་པའི་རྒྱུད་གཉིས་སམ། རྩ་བའི་རྒྱུད་ཉིད་ལའང་ཚིག་གི་ཚོགས་པ་ལེའུ་ཉི་ཤུ་རྩ་གཉིས་སུ་བཅད་དེ་གནས་ལ། དེ་ཡང་ལེའུ་དང་པོ་དང་། གསུམ་པའི་སྟོད་དང་། བཅོ་ལྔ་པ་རྣམས་ཀྱིས་རྒྱུ་གླེང་གཞི་དང་། ལེའུ་གཉིས་པས་རྐྱེན་གླེང་བསླང་བ། ལེའུ་གསུམ་པའི་སྨད་ནས་ཉེར་གཅིག་པ་ཡན་ཆད་ཀྱིས། འབྲས་བུ་ཡོངས་ཤེས་རྒྱུད་དོན་དང་། དེ་དག་ལ་ཁྱབ་བྱེད་དུ་རྒྱུད་ཀྱི་དགོས་འབྲེལ་དང་། ལེའུ་ཐ་མས་གདམས་གཏད་རྣམས་སྟོན་ཅིང་། ཡོངས་སུ་ཤེས་པར་བྱ་བ་རྒྱུད་དོན་ལའང་། རྒྱུད་ཀྱི་དངོས་པོ་བཅུ་དང་། ཞི་ཁྲོ་སྤྱི་བྱེ་བྲག་གི་ཆོས་རྣམས་ལེའུ་གང་དང་གང་གིས་སྟོན་ཚུལ་སོགས་ཀྱང་སྤྲོ་ན་ཞིབ་ཏུ་བསྙད་པས་ཆོག་གོ ། དབང་པོ་ཐ་མ་རྣམས་ལ་འབྲུ་རེ་གཉེར་རེའི་སྒོ་ནས་སྤྲོས་ཏེ་བཤད་པ།གསུམ་པ་དབང་པོ་ཐ་མ་རྣམས་ལ་འབྲུ་རེ་གཉེར་རེའི་སྒོ་ནས་སྤྲོས་ཏེ་བཤད་པ་ལ། རྒྱུད་ཀྱི་མཚན་བསྟན་པ་དང་། མཚན་དེ་དང་ལྡན་པའི་རྒྱུད་དོན་དངོས་སོ། །དང་པོ་མཚན་བསྟན་པ་ནི། བོད་སྐད་དུ། གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་པ་སྟེ། འདི་ལ་གསུམ། ཀླད་དུ་སྨོས་པའི་དགོས་པ་དང་། མཚན་གྱི་དོན་བཤད་པ་དང་། རྩོད་པ་སྤོང་བའོ། །དང་པོ་ནི། བུམ་པ་ཞེས་མིང་ལས་བུམ་པའི་དངོས་པོ་གོ་བ་ལྟར། དབང་པོ་རབ་ཀྱིས་མཚན་ལ་བརྟེན་ནས་རྒྱུད་དོན་རྟོགས་པ་དང་། འབྲིང་གིས་དོན་གྱི་རྣམ་གྲངས་ཙམ་བརྡ་འཕྲོད་པ་དང་། ཐ་མས་ཀྱང་སྨན་སྣོད་ཀྱི་ཁ་བྱང་ལྟར་གླེགས་བམ་བཙལ་སླ་བའི་དགོས་པ་ཡོད་དོ། ། གཉིས་པ་ནི། བི་མ་ལས་འགྲེལ་ཆུང་དུ། རང་བཞིན་གསང་བ་ཞེས་བྱ་སྟེ། །ཆེ་བ་ཞེས་པ་སྙིང་པོའི་དོན། །དེ་ཁོ་ན་ཉིད་མཚན་ཉིད་དོ། །ངེས་པས་ངེས་དོན་མདོར་བསྟན་པ། །ཞེས་པས་མཚན་བཞིས་རྒྱུད་ཀྱི་རང་བཞིན་དང་། ཆེ་བ་དང་། མཚན་ཉིད་དང་། ངེས་པའི་དོན་རྣམས་བསྟན་ཏོ། །དེ་ལ་གསང་བའི་དོན་ནི། གནས་ལུགས་དེ་བཞིན་ཉིད་གདོད་མ་ནས་རང་བཞིན་གྱིས་རྣམ་པར་དག་པས་འཁོར་འདས་མཉམ་ཉིད་དུ་གནས་པ་ནི་རྒྱལ་བ་ཐམས་ཅད་ཀྱི་ཐུགས་ཀྱི་གསང་བ་བསམ་གྱིས་མི་ཁྱབ་པ་སྟེ། དེ་ཉིད་ཟབ་ཅིང་གཏིང་དཔག་དཀའ་བས་ཤིན་ཏུ་རྟོགས་དཀའ་བའི་ཕྱིར་གསང་བའོ། །ཇི་ལྟར་གསང་ཚུལ་ལ། སྒེག་པ་རྡོ་རྗེས་རང་བཞིན་སོགས་གསུམ་དང་། བི་མ་ལས་མི་བསྟན་པའི་གསང་བ་བསྣན་ཏེ་བཞིར་ཕྱེ་ནའང་། རང་བཞིན་གྱི་གསང་བ་ནི་གབ་པའི་ཁོངས་སུ་འདུ་ཞིང་། མི་བསྟན་པའི་གསང་བའང་སྦས་པའི་ནང་དུ་འདུ་བས་འདིར་རྟོགས་དཀའ་བ་དང་། རྟོགས་སུ་མི་རུང་བའི་ཁྱད་པར་གྱིས་གབ་སྦས་གཉིས་ཏེ། འདི་ཉིད་དུ། ཁོང་ནས་གབ་སྦས་དོན་འབྱིན་པ། །ཞེས་དང་། གབ་པའི་གསང་བ་མ་རྟོགས་པར། སྦས་པའི་གསང་བ་ལ་མངོན་པར་འཆེལ་ནས། ཞེས་གསུངས་པའི་ཕྱིར་རོ། །དེ་ཡང་གང་ལ་གབ་པའི་ཡུལ་ནི། གང་ཟག་འཁྲུལ་པའི་བློ་ཅན་རྣམས་ལའོ། །གབ་ཚུལ་ནི། མཚོན་བྱ་རང་བཞིན་གྱི་རྒྱུད་གནས་ལུགས་དེ་བཞིན་ཉིད་དེ་རང་ལ་རང་ཆས་སུ་གནས་ཀྱང་། དབུལ་པོའི་ཁྱིམ་ན་ཡོད་པའི་ས་འོག་གི་གཏེར་ལྟར་གློ་བུར་འཁྲུལ་རྟོག་གིས་བསྒྲིབས་ནས་མ་མཐོང་བ་ནི་གབ་པ་སྟེ། རྣམ་སྣང་མངོན་བྱང་ལས། བྱིས་པ་མི་ཤེས་པས་བསྒྲིབས་པས། །ཚུལ་འདི་ཤེས་པར་མ་གྱུར་རྣམས། །སངས་རྒྱས་གཞན་དུ་འཚོལ་བར་བྱེད། །འདི་ན་གནས་པ་ཡོངས་མ་མཐོང་། །ཞེས་སོ། །དེས་མཚོན་ཏེ། བླ་ན་མེད་པའི་དགོངས་སྤྱོད་ཟབ་མོ་རྣམས་རང་སྟོབས་ཀྱིས་སམ། གཞན་གྱིས་བསྟན་ཀྱང་མ་རྟོགས་པས་གབ་སྟེ། མིག་སེར་ཅན་ལ་དུང་གི་དཀར་སྣང་གབ་པ་བཞིན་ནོ། །སྦས་པའི་གསང་བ་ལའང་། གང་སྦ་ན། གསང་སྔགས་བླ་ན་མེད་པའི་ལྟ་བ་ཕུལ་དུ་བྱུང་བ་དང་། སྒོམ་སྤྱོད་རྨད་དུ་བྱུང་བ་རྣམས་སོ། །གང་ལ་སྦ་ན། ཐེག་པ་འོག་མ་པ་རྣམས་དང་། སོ་སོའི་སྐྱེ་བོ་ལོག་སྲེད་ཅན་སོགས་སྣོད་མ་སྨིན་པའི་གང་ཟག་རྣམས་ལ་སྟེ། དེ་དག་གི་སྤྱོད་ཡུལ་དུ་མི་རུང་བའི་ཕྱིར་རོ། །གལ་ཏེ་མ་སྦས་ན། འདི་ལ་བརྟེན་ནས་སྒྲོ་འདོགས་དང་སྐུར་པ་མི་བཟད་པས་དེ་དག་གནས་ངན་དུ་ལྟུང་ཞིང་། གསང་སྒོ་འཆོལ་བས་རང་ཉིད་ཀྱང་ཉམས་པར་འགྱུར་བའི་ཕྱིར་རོ། །ཇི་ལྟར་སྦ་ན། བརྡ་ལ་སོགས་པའི་ཚུལ་གྱིས་ཏེ། དམ་ཚིག་གསལ་བཀྲ་ལས། གསང་སྔགས་སྐྱོན་ཡོད་མ་ཡིན་ཏེ། །སེམས་ཅན་དོན་ཕྱིར་རབ་ཏུ་གསང་། །གསང་ཐུབ་དངོས་གྲུབ་མི་ཡལ་བ། །གསང་ཕྱིར་བརྡ་དག་སྣ་ཚོགས་གསུངས། །ཞེས་སོ། །གཉིས་པ་སྙིང་པོའི་དོན་ནི། སྙིང་པོའི་སྒྲ། སཱ་ར། ཧྲྀ་ད་ཡ། གཪྦྷ་གསུམ་ལས། སཱ་ར་ནི་གཅིག་ལས་དུ་མ་འཕྲོ་བའི་གཞི་ལྟ་བུ་ལ་འཇུག་པས། མཚོན་བྱ་རང་བཞིན་གྱི་རྒྱུད་རྟོགས་པ་དང་མ་རྟོགས་པ་ལས་འཁོར་འདས་ཀྱི་ཆོས་ཐམས་ཅད་འབྱུང་ཞིང་། དེ་གཏན་ལ་འབེབས་པའི་རྒྱུད་འདི་ཡང་བསྟན་པ་ཐམས་ཅད་ཀྱི་འཕྲོ་གཞིར་གྱུར་པས་སྙིང་པོ་སྟེ། ཕྱོགས་བཅུ་རྣམས་སུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །ཞེས་སོ། །ཧྲྀ་ད་ཡ་ནི་སྲོག་གམ་སྙིང་ལྟར་གཅེས་སྤྲས་སུ་བྱ་བའི་དོན་ལ་འཇུག་སྟེ། ཐེག་པའི་སྒོ་གང་ནས་ཞུགས་ཀྱང་མཐར་ཐུག་བགྲོད་པ་གཅིག་པའི་ལམ་འདི་ལས་མི་འདའ་བའི་ཕྱིར། ཐར་འདོད་ཀུན་གྱིས་བསྟེན་བྱར་གྱུར་པས་ན་སྙིང་པོ་སྟེ། བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་ཤིང་། །དཀྱིལ་འཁོར་མ་ལུས་བསྙེན་པ་ཡི། །འབྲས་བུ་གསང་ཆེན་འདི་ཡིན་ཏེ། །ཞེས་སོ། །གཪྦྷ་ནི་ཤུན་པའི་ནང་གི་སྙིང་པོ་ལྟ་བུ་ལ་འཇུག་སྟེ། རྟོག་ཚོགས་ཐམས་ཅད་ཡེ་ནས་ལྷའི་ངོ་བོར་དག་པས་འཁོར་འདས་མཉམ་པ་ཉིད་དུ་གཏན་ལ་ཕབ་པའི་དོན་འདི་ནི་ཆོས་ཐམས་ཅད་ཀྱི་རང་བཞིན་ཡིན་པས་དབུས་ན་གནས་པ་ལྟ་བུའམ། བཅུད་འདུས་པའི་དོན་གྱིས་ན་སྙིང་པོ་ཞེས་བྱའོ། །དེ་ཡང་རྒྱས་པ་ལས། བླ་མེད་དོན་རྟོགས་ཐབས་ཆེན་འདི་དག་ཏུ། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་དང་། རྡོ་རྗེ་ཕྲེང་བ་ལས། ཆོས་རྣམས་དབུས་ན་གནས་པའི་ཁམས། །ཁྱབ་ཅིང་སྤྱོད་ཡུལ་མ་ཡིན་ཏེ། ཞེས་སོ། །གསུམ་པ་དེ་ཁོ་ན་ཉིད་ཀྱི་དོན་ལ་གསུམ་སྟེ། སྣང་སྟོང་དབྱེར་མེད་རང་བྱུང་གི་ཡེ་ཤེས་ལ་སྒོམ་བྱེད་ཀྱི་བློས་མ་བཅོས་པར་འཇོག་པ་ནི་འབྲས་བུ་འབྱུང་བ་ལ་མི་བསླུ་བའི་ཕྱིར་རྒྱུའི་དེ་ཁོ་ན་ཉིད་དོ། །དེ་ཉིད་འབྲས་བུ་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་བྱུང་བ་ལ་ཕྱིན་ཅི་ལོག་གི་ཆོས་བསལ་དུ་མེད་པས་འབྲས་བུའི་དེ་ཁོ་ན་ཉིད་དོ། །རང་བཞིན་བདེན་པ་དབྱེར་མེད་ཀྱི་ཡེ་ཤེས་ལས་ཤེས་བྱ་དང་བསྒྲུབ་བྱའི་ཆོས་གཞན་ཞིག་གུད་ནས་མེད་དེ། དེ་ལ་རྒྱུ་འབྲས་ཀྱི་དབྱེ་བ་ཙམ་ཡང་མ་གྲུབ་པས་སྒྲོ་སྐུར་དང་བྲལ་བའི་ཕྱིར་རྒྱུ་འབྲས་རོ་གཅིག་པའི་དེ་ཁོ་ན་ཉིད་དོ། །དེ་དག་ཀྱང་རྡོ་རྗེ་ལས། རྒྱུ་འབྲས་གཉིས་སུ་མེད་པ་ལ། །དེ་ཉིད་ངོ་བོ་སྐབས་ཀྱིས་གསུམ། །ཞེས་སོ། །བཞི་པ་ངེས་པའི་དོན་ནི། སྐལ་དམན་གྱི་གདུལ་བྱ་རྣམས་ཆུད་མི་ཟ་བའི་ཐབས་དྲང་བའི་དོན་ཙམ་དུ་བསྟན་པ་ལྟ་བུ་མ་ཡིན་ཏེ། འདིར་སྐལ་ལྡན་དབང་རྣོན་རྣམས་ལ་རྒྱལ་བ་ཉིད་ཀྱིས་ཇི་ལྟར་ཐུགས་སུ་ཆུད་པའི་དོན་བསྟན་པས་ན་ངེས་པའོ། །དེ་སྐད་དུའང་། རྒྱལ་བའི་དཀྱིལ་འཁོར་མ་ལུས་པ། །འདི་ལས་གསང་བའི་ངེས་དོན་མེད། །ཅེས་སོ། །ཡང་ན། ཆོས་ཐམས་ཅད་ཀྱི་འབྱུང་གནས་སུ་གྱུར་པ་གཞིའི་རྒྱུད་ནི་རྟོགས་པར་དཀའ་བས་གསང་བའོ། །དེའི་ངང་ལ་བསལ་བཞག་མེད་པར་འཇོག་པའི་སྒོ་ནས་གང་ཤར་དག་སྣང་དུ་སྤྱོད་པའི་ཐབས་ཁྱད་པར་ཅན་ནི་ལམ་གྱི་རྒྱུད་དེ་བསྟན་པ་ཐམས་ཅད་ཀྱི་བཅུད་དུ་གྱུར་པས་ན་སྙིང་པོའོ། །གཞི་མི་འགྱུར་བ་དང་། ལམ་གྱིས་དེ་རྟོགས་པ་ལ་མི་བསླུ་བས་དོན་ལ་གཉིས་པོ་ཕྱིན་ཅི་མ་ལོག་པའི་ཕྱིར་དེ་ཁོ་ན་ཉིད་དོ། །དེ་འདིར་སྒྲོ་སྐུར་དང་བྲལ་བར་གཏན་ལ་ཕབ་པས་ན་རྣམ་པར་ངེས་པ་སྟེ། རྒྱུད་ཕྱི་མ་ལས། གསང་བ་ཆོས་འབྱུང་ལ་བཤད་དེ། །སྙིང་པོའང་དེ་ཡི་ཐབས་ཅན་ནོ། །གཉིས་པོ་ཕྱིན་ཅི་མ་ལོག་ཕྱིར། །དེ་ཉིད་དེ་འདིར་རྣམ་ངེས་སོ། །ཞེས་གསུངས་པ་ལྟར་རོ། །གཞན་ཡང་མཚན་ཐབས་ལམ་སྟེང་སྒོ་དང་སྦྱར་ཏེ་ནང་ལྟར་འཆད་པ་དང་། འོག་སྒོ་དང་སྦྱར་ཏེ་གསང་བ་ལྟར་འཆད་པའི་བཀའ་སྲོལ་ཡོད་ཀྱང་འདིར་མ་སྤྲོས་པས་སྤྲོ་ན་འཆད་པ་པོས་བསྙད་དོ། ། གསུམ་པ་རྩོད་པ་སྤང་བ་ནི། ཁ་ཅིག །ཁྱེད་ཀྱི་རྒྱུད་འདི་ལ་ཀླད་དུ་རྒྱ་སྐད་མ་སྨོས་པས་བོད་མར་འགྱུར་རོ་ཞེ་ན། དེར་མ་ངེས་ཏེ། བོད་དུ་བརྩམས་པའི་བསྟན་བཅོས་དུ་མར་ཡང་ཀླད་དུ་རྒྱ་སྐད་བཀོད་པ་ཡོད་དེ་དེས་རྒྱ་གར་མར་མི་འགྱུར་བ་བཞིན་ནོ། །འདི་ཡང་རྒྱ་གཞུང་སྤྱིའི་མཚན་ཀླད་དུ་ལོ་ཙཱ་བས་བཀོད་པ་ཤས་ཆེ་མོད་ཀྱང་། འདི་ནི་སྡུད་པ་པོས་བཀོད་པར་བཞེད་པའི་ཕྱིར། རྒྱ་དཔེའི་ཀླད་དུ། གུ་ཧྱ་གཪྦྷ་ཏ་ཏྭ་བི་ནིཤྩ་ཡ། ཞེས་འབྱུང་ཡང་ལོ་ཙཱ་བ་སྤྲོས་པ་ལ་མི་དགའ་བས་མཚན་བོད་སྐད་དུ་བསྒྱུར་ཏེ་བཀོད་པ་ལས་མིང་གཅིག་ལན་གཉིས་སུ་ཟློས་པ་ལ་དགོས་པ་ཆུང་བར་དགོངས་ནས་རྒྱ་སྐད་མ་སྨོས་པ་ཡིན་ནོ། ། གཉིས་པ་ལ་གསུམ་སྟེ། ཀླད་ཀྱི་དོན་སྟོན་པ་ལ་ཕྱག་བཙལ་བ། གཞུང་གི་དོན་རྒྱུད་དོན་དངོས་བཤད་པ། མཇུག་གི་དོན་རྒྱུད་རྫོགས་པའི་བྱ་བ་བསྟན་པའོ། །དང་པོ་ནི། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་པ་སྟེ། བདུད་བཞི་ལ་སོགས་པ་མི་མཐུན་པའི་ཕྱོགས་མ་ལུས་པ་བཅོམ་པ་ནི་སྤངས་པ་ཕུན་ཚོགས། ཆེ་བའི་ཡོན་ཏན་ཐམས་ཅད་རང་རིག་པའི་ཡེ་ཤེས་ལ་རང་བཞིན་གྱིས་ལྡན་པ་ནི་རྟོགས་པ་ཕུན་སུམ་ཚོགས་པའོ། །འདས་པའི་སྒྲ་ནི་རྒྱ་སྐད་ལ་མེད་དེ། བཀས་བཅད་ལས། འཇིག་རྟེན་པའི་བྷ་ག་ཝཱན་ལས་ཁྱད་པར་འདས་ཞེས་བླ་ཐབས་སུ་བསྣན་ཏེ། ཞེས་འབྱུང་བས་སོ་གསུང་ཡང་། བླ་ཐབས་སུ་སྣོན་པ་དེ་སྐད་དོད་དང་མ་འབྲེལ་བ་ཞིག་གློ་བུར་དུ་དབང་ཆེའི་རིག་པས་བསྣན་པ་ལྟ་བུ་མ་ཡིན་ཏེ། དཔེར་ན་བརྟག་གཉིས་ལས། སངས་རྒྱས་འདི་ལ་བྷ་ག་མངའ། །བཅོམ་ལྡན་འདས་ཞེས་བརྗོད་པར་བྱ། །བྷ་ག་རྣམ་པ་དྲུག་ཏུ་བརྗོད། །དབང་ཕྱུག་ལ་སོགས་ཡོན་ཏན་ཀུན། །ཡང་ན་ཉོན་མོངས་ལ་སོགས་བདུད། །འཇོམས་ཕྱིར་བཅོམ་ལྡན་འདས་ཞེས་བྱ། །ཞེས་བྷ་ག་ཝཱན་གྱི་སྒྲ་ལས། བྷ་ག་ནི་བཅོམ་པ་དང་། ལེགས་པ་རྣམ་པ་དྲུག་པོ་གཉིས་ཀ་ལ་འཇུག་པ་བཞིན་དུ། འདིར་ཡང་ཡི་གེ་བསྣན་པའི་སྒྲ་ལས། བྷ་ནི་ཨ་བྷ་ཝིཥྱནྟི་སྟེ་འབྱུང་བར་མི་འགྱུར་བ་དང་། ག་ནི་ག་ཏི་སྟེ་སོང་བ་ཞེས་པའི་དོན་ཡིན་པས། ཡང་དག་པའི་གནས་སུ་སོང་ཞིང་ལོག་པའི་གནས་སུ་མི་འགྱུར་བ་སྟེ། དོན་ལ་ཤེས་རབ་དང་སྙིང་རྗེ་ཆེན་པོས་འཁོར་འདས་གཉིས་ཀྱི་མཐའ་ལ་མི་གནས་པའི་ཕྱིར། འདས་ཞེས་འཇིག་རྟེན་པའི་བྷ་ག་ཝཱན་ལས་ཁྱད་འབྱེད་དུ་བྱས་པའོ། །དེ་ཡང་ཕལ་པོ་ཆེ་ལས། སྲིད་དང་ཞི་ལས་རྣམ་གྲོལ་ཞིང་། །ཡོན་ཏན་རྒྱ་མཚོ་གཉིས་སུ་མེད། །སྤྲོས་པ་ཀུན་ལས་རབ་འདས་པའི། །བཅོམ་ལྡན་འདས་ནི་མཁའ་རབ་ཞི། །ཞེས་སོ། །དཔལ་ནི་གཞི་ཆོས་དབྱིངས་ཤིན་ཏུ་དྲི་མེད་ལ་རང་བཞིན་ལྷུན་གྲུབ་ཀྱི་དཔལ་ཞེས་གྲགས་ཏེ། དེ་ཇི་ལྟ་བ་བཞིན་མངོན་དུ་གྱུར་པའི་འབྲས་བུ་ནི་ཆོས་སྐུ་རྟོགས་པ་བདག་གི་དཔལ་དང་། དེ་ཉིད་ཀྱི་ངང་ལས་གང་ལ་གང་འདུལ་གྱི་གཟུགས་སྐུ་ལྷུན་གྲུབ་ཏུ་འཆར་བ་ནི་ཐུགས་རྗེ་གཞན་གྱི་དཔལ་ལོ། །དེ་ཡང་ཆོས་ཀུན་གྱི་གནས་ལུགས་འཆིང་གྲོལ་མེད་པའི་རང་བཞིན་ཐུགས་སུ་ཆུད་པས་སྤྱོད་ཡུལ་ཡོངས་སུ་དག་པའི་ཕྱིར་ཀུན་ཏུ་བཟང་པོ་སྟེ། ཡེ་ཤེས་གསང་བ་ལས། རང་བཞིན་མི་གཡོ་ལྷུན་རྫོགས་ཤིང་། སྤྱོད་ཡུལ་ཀུན་ཏུ་བཟང་པོ་སྟེ། ཞེས་སོ། །དེ་ལ་ཕྱག་འཚལ་ལོ་ཞེས་གསང་བདག་གིས་ཡུལ་དང་འཚལ་མཁན་རོ་གཅིག་ཏུ་རྟོགས་པའི་སྒོ་ནས་ལྟ་བ་མཇལ་བའི་ཕྱག་མཛད་དོ། །ཁ་ཅིག་འགྱུར་ཕྱག་དང་། གཞན་དག་ཡི་གེ་པའི་ཕྱག་ཏུ་འདོད་པ་ནི་མ་ཡིན་ཏེ། སྤར་ཁབ་ལས། སྡུད་པ་པོས་ཚིག་གཉེར་བ་དེའི་ཚེ་རང་གི་སྟོན་པ་ལ་མཆོད་པར་བརྗོད་པའོ། །ཞེས་གསུངས་པའི་ཕྱིར། དེ་ལྟར་ན་ལོ་ཙཱ་བའི་འགྱུར་ཕྱག་ཆད་པར་འགྱུར་རོ་ཞེ་ན། སྐྱོན་མེད་དེ། དུས་འཁོར་བསྡུས་རྒྱུད་ཀྱི་ཀླད་དུའང་ཡི་གེ་པའི་ཕྱག་གིས་གོ་བཅད་ནས་འགྱུར་ཕྱག་ཟུར་དུ་མ་བཀོད་པ་ལྟར་འདིར་ཡང་དེ་བཞིན་ནོ། ། ལེའུ་དང་པོའི་འགྲེལ་པ།གཉིས་པ་རྒྱུད་དོན་དངོས་བཤད་པ། ལེའུ་ཉི་ཤུ་རྩ་གཉིས་སུ་གནས་པ་ལས། ལེའུ་དང་པོ་ལ་གཉིས་ཏེ། གཞུང་དང་། མཚན་ནོ། །དང་པོ་གཞུང་ལ་གསུམ་སྟེ། ཐུན་མོང་མ་ཡིན་པའི་སྒོ་ནས་གླེང་གཞི་མདོར་བསྟན། རྒྱུད་ཁྱད་པར་གྱི་གླེང་གཞིའི་སྒོ་ནས་དེ་རྒྱས་པར་བཤད། གླེང་གཞིའི་དོན་བསྡུ་བའོ། །དང་པོ་ནི། རྒྱུད་ཀྱི་ཐོག་མར་ཕུན་སུམ་ཚོགས་པ་ལྔའི་བདག་ཉིད། ཨེ་ཝཾ་མ་ཡ། ཞེས་པའི་ཡི་གེ་བཞི་སྨོས་པས་སྟོན་ཏེ། ཐུགས་ཐིག་ལས། ཡི་གེ་བཞི་ཡིས་ཤེས་པར་འགྱུར། །ཞེས་གསུངས་པའི་ཕྱིར། འདི་ལ་གསུམ་སྟེ། ཕྱི་གྲོལ་ལམ་ལྟར་རྒྱུད་ཁྱད་པར་གྱི་གླེང་གཞི་དང་སྦྱར་ཏེ་བཤད་པ། ནང་ཐབས་ལམ་སྟེང་སྒོ་དང་སྦྱར་ཏེ་བཤད་རྒྱུད་རྒྱ་མཚོས་བཤད་པ། གསང་བ་འོག་སྒོ་དང་སྦྱར་ཏེ་བཤད་རྒྱུད་ཐལ་བས་བཤད་པའོ། །དང་པོ་ནི། ཨེ་ཡིག་ཤེས་རབ་ཀྱི་བརྡའ་སྟེ། ཡུམ་ལྔའི་མཁའ་དབྱིངས་ཀྱི་རང་བཞིན་གནས་ཕུན་སུམ་ཚོགས་པ་འོག་མིན་ཆོས་ཀྱི་དབྱིངས་ཀྱི་ཕོ་བྲང་ངོ་། །ཝ་ཡིག་ཐབས་ཀྱི་བརྡའ་སྟེ་སྟོན་པ་ཕུན་སུམ་ཚོགས་པ་རིགས་དྲུག་པའོ། །ཝ་ཡིག་གི་ཐིག་ལེ་ནི་སྦྱོར་བའི་བརྡའ་སྟེ། ཐབས་ཤེས་ཟུང་དུ་འཇུག་པའི་དོན་གཞི་ལམ་འབྲས་གསུམ་དབྱེར་མི་ཕྱེད་པར་འབྲེལ་ཞིང་རྒྱུན་ཆགས་པའི་རྒྱུད་རང་བཞིན་གསང་བའི་སྙིང་པོ་ནི་སྟོན་པ་ཕུན་སུམ་ཚོགས་པའོ། །དེ་ལྟར་ཡང་དང་པོའི་སངས་རྒྱས་ལས། ཨེ་ཡི་དབུས་སུ་ཝཾ་ཡིག་ཉིད། །སངས་རྒྱས་ཀུན་གྱི་བདེ་བའི་གནས། །མཁའ་དབྱིངས་རྡོ་རྗེ་སེམས་དཔའ་འདི། །སྐུ་གསུང་ཐུགས་སུ་སྦྱོར་བ་ལས། །ཐིག་ལེ་ཟླ་བ་ཁུ་བ་སྐུ། །རྣམ་པར་བཅད་བྱ་རྡུལ་ཉི་གསུང་། །ཨ་ཡིག་མུན་ཅན་ཐུགས་རབ་བརྗོད། །མཁའ་ཁམས་ཨེ་ལ་རྣམ་པར་གནས། །ཞེས་དང་། བརྟག་གཉིས་ལས། ཨེ་ཡིག་ཆ་བྱད་བཟང་པོ་གང་། །དབུས་སུ་ཝཾ་གིས་རྣམ་པར་བརྒྱན། །བདེ་བ་ཐམས་ཅད་ཀྱི་ནི་གནས། །སངས་རྒྱས་རིན་ཆེན་ཟ་མ་ཏོག །ཅེས་དང་། ལྷའི་དབང་པོས་ཞུས་པའི་མདོ་ལས། ཆོས་ཀྱི་ཕུང་པོ་བརྒྱད་ཁྲི་དང་། །བཞི་སྟོང་གི་ནི་གྲངས་སྙེད་ཀྱི། །ཀུན་གྱི་གཞི་དང་ཕ་མ་ནི། །ཡི་གེ་གཉིས་སུ་རབ་ཏུ་བསྟན། །ཡི་གེ་ཨེ་ནི་མར་གྱུར་ལ། །ཝ་ནི་ཕ་ཞེས་བྱ་བར་གྲགས། །ཐིག་ལེ་དེར་ནི་སྦྱོར་བས་ཏེ། །སྦྱོར་ཏུ་ཤིན་ཏུ་རྨད་བྱུང་བའོ། །ཞེས་སོགས་གསུངས་ཤིང་། ཨེ་ཝཾ་ནི་དེ་བཞིན་གཤེགས་པ་ཐམས་ཅད་ཀྱི་ཐབས་ཤེས་སྟོན་པ་ཉིད་ཀྱི་བརྡར་གྱུར་པས་གསུང་རབ་ཀུན་གྱི་དང་པོར་འཇོག་དགོས་པར། དེ་ཉིད་ལས། ཨེ་ཝཾ་ཡིག་གཉིས་སྒྱུ་མ་ལ། །ཐམས་ཅད་མཁྱེན་པ་འདིར་བཞུགས་པས། །དམ་ཆོས་སྟོན་པའི་ཐོག་མར་ནི། །ཨེ་ཝཾ་དེ་ཕྱིར་རབ་ཏུ་བཤད། །ཅེས་སོ། །མ་ནི་མ་ན་ཤེས་པ་སྟེ། དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་ལ་སོགས་པའམ། ཡང་ན་སྤྱི་མདོར་མ་ནི་དྲན་པ་མཚོན་པའི་ཡི་གེར་བཤད་པས་སྨྲྀ་ཏ་སྟེ། དྲན་ཤེས་ཀྱི་ལས་ཀྱིས་རྒྱུད་དོན་མི་བརྗེད་པར་འཛིན་པས་འཁོར་ཕུན་སུམ་ཚོགས་པའོ། །ཡ་ནི་ཡ་དཱའི་སྒྲ་ལས་གང་ཚེ་ཞེས་པས་དུས་ཕུན་སུམ་ཚོགས་པ་སྟེ། རྒྱུད་འདི་བཤད་པ་གང་གི་ཚེ་ཞེས་དུས་སྟོན་པའི་ཚིག་ཕྲད་ཡིན་པའི་ཕྱིར་རོ། ། གཉིས་པ་ནི། ཇི་སྐད་དུ། དྷརྨ་ཙཀྲ་ཆོས་ཀྱི་གནས། །འོད་བཞི་ཨེ་སོགས་དབྱིབས་སུ་གནས། །མི་ཤིགས་ཐིག་ལེ་ཝཾ་དབྱིབས་ཅན། །རང་ལ་བདེ་བ་གསལ་བྱེད་དག །མ་ནུ་ཡིད་སོགས་རྣམ་ཤེས་བཞི། །ཡེ་ཤེས་མྱོང་བས་བསྡུས་པར་བཤད། །ཡེ་ཤེས་ནམ་མཁའི་གཟུགས་སྐྱེས་པ། །པ་ར་མཱརྠ་དོན་ཟབ་མོ། །བདེ་བའི་དུས་ཉིད་སྔ་ཕྱི་བྲལ། །དུས་གསུམ་ཀུན་གྱི་ངོ་བོར་གནས། །ཞེས་བཤད་རྒྱུད་རྒྱ་མཚོ་ལས་གསུངས་པ་ལྟར། ཨེས་མཚོན་པའི་གནས་ནི། དྷརྨ་ཙཀྲ་ཞེས་པས་སྙིང་ག་ཆོས་ཀྱི་འཁོར་ལོ་ན་རྩ་འདབ་བརྒྱད་ཡོད་པ་རྩ་བའི་འདབ་མ་བཞིར་འདུ་སྟེ། མདུན་ན་ཆོས་ཉིད་ཀྱི་རྩ་ལ་འོད་དཀར་པོ་ཟླུམ་པོ། གཡས་ཡེ་ཤེས་ཀྱི་རྩ་ལ་གྲུ་བཞི་སེར་པོ། གཡོན་ཡོན་ཏན་གྱི་རྩ་ལ་ཟླ་གམ་དམར་པོ། རྒྱབ་རང་རྒྱུད་ཀྱི་རྩ་ལ་གྲུ་གསུམ་དམར་ནག་རྣམས་ཏེ། ཨེ་སོགས་ལས་བཞིའི་དབྱིབས་མདོག་ཅན་ནི་དོན་དམ་འོད་གསལ་གྱི་བཞུགས་གནས་ཡིན་པའི་ཕྱིར་གནས་སོ། །ཝཾ་གིས་མཚོན་པའི་སྟོན་པ་ནི། དེ་ལྟ་བུའི་གནས་ལ་བརྟེན་པའི་དྭངས་མ་ལྔའི་དབུས་ན་བཞུགས་པ་སེམས་ཀྱི་དྭངས་མ་མི་ཤིགས་པའི་ཐིག་ལེ་ཝཾ་ཡིག་གི་རྣམ་པར་གནས་པ་སྟེ། དེ་ཉིད་མར་མེ་གསལ་བྱེད་གཞན་ལ་ལྟོས་མི་དགོས་པ་ལྟར་རང་གིས་རང་ལ་བདེ་བ་གསལ་བར་སྟོན་པས་ན་སྟོན་པའོ། །མས་མཚོན་པའི་འཁོར་ནི། མ་ནུའི་སྒྲ་ལས་དྲངས་ན། མ་ན་ཤེས་པ་ལའོ་ཞེས་པས་ཡིད་ལ་སོགས་པའི་རྣམ་ཤེས་ཚོགས་བརྒྱད་དེ། ཆོས་ཉིད་ཀྱི་རྩ་ལ་ཀུན་གཞི། ཡེ་ཤེས་ཀྱི་རྩ་ལ་ཡིད། ཡོན་ཏན་གྱི་རྩ་ལ་ཉོན་ཡིད། རང་རྒྱུད་ཀྱི་རྩ་ལ་སྒོ་ལྔའི་རྣམ་ཤེས་རྣམས་གནས་པས། དེ་དག་བརྗོད་བྲལ་རྣམ་པར་མི་རྟོག་པའི་ཡེ་ཤེས་ལྔར་གསལ་བར་ཉམས་སུ་མྱོང་བས་ན་འཁོར་རོ། །ཡ་ཡིག་གིས་མཚོན་པའི་བསྟན་པ་ནི། ཡཱ་ནའི་སྒྲ་ལས་བླ་ན་མེད་པའི་ཐེག་པ་སྟེ། དེའི་མན་ངག་སྟེང་སྒོ་འཇུ་འདུལ་གྱི་ཐབས་ཀྱིས་བདེ་གསལ་མི་རྟོག་པའི་ཡེ་ཤེས་ནམ་མཁའི་གཟུགས་ཅན་སྐྱེས་པ་ནི། པ་ར་མཱརྠའི་སྒྲ་ལས་དམ་པའི་དོན་ནམ། དོན་ཟབ་མོ་སྟེ་བསྟན་པའོ། །རྣམ་པ་གཅིག་ཏུ་ན་ཡ་ནི་ས་མ་ཡའི་མིང་མཐའ་བསྡུས་པའམ། ཡ་དཱའི་སྒྲ་ལས་དུས་ཀྱང་མཚོན་ཏེ། བདེ་བའི་ཡེ་ཤེས་སྐྱེས་པ་དེའི་ཚེ་སྔ་ཕྱིར་འཛིན་པའི་རྟོག་པ་དང་བྲལ་བས་དུས་གསུམ་མཉམ་པ་ཉིད་དེ་བསམ་གྱིས་མི་ཁྱབ་པའི་དུས་སོ། ། གསུམ་པ་ནི། ཇི་སྐད་དུ། འདི་ཞེས་ཉེ་བར་མཚོན་པ་ནི། །ཨེ་སོགས་རྣམ་བཞིའི་དབྱིབས་ཅན་གནས། །སྐད་ཅེས་གསལ་བྱེད་ལས་མིང་ཅན། །ཝཾ་དབྱིབས་ཐིག་ལེར་བཅས་སྟོན་པའོ། །མ་ད་མ་ནུ་སྡོམ་བྱེད་ཡིད། །ལུས་ཅན་རྣམ་ཤེས་དེ་དག་ལ། །གསལ་བར་གོ་བས་བཤད་པར་འདོད། །པ་སྒྲ་དོན་དམ་ངེས་པའི་རྒྱུད། །ཡཱ་ན་ཐེག་ཆེན་འདི་ཡིན་ནོ། །དུས་ནི་བསམ་གྱིས་མི་ཁྱབ་དུས། །ནཱ་མ་དེ་མིང་ཞེས་བྱའོ། །ཞེས་བཤད་རྒྱུད་ཐལ་བ་ལས་གསུངས་པ་ལྟར། འདི་ཞེས་པ་ཨེས་མཚོན་པའི་གནས་ཏེ། ཡུམ་གྱི་བྷ་ག་སྒོ་གྲུ་གསུམ། ཁྱམས་གྲུ་བཞི། སྐྱེ་གནས་ཟླ་གམ། དབྱིངས་ཕྱུག་གི་སྣ་རྩེ་ཟླུམ་པོ་སྟེ། ཨེ་སོགས་ལས་བཞིའི་དབྱིབས་ཅན་དེ་གསང་བའི་སྟོན་འཁོར་བཞུགས་པའི་གནས་སོ། །སྐད་ཅེས་པ་ཝཾ་ཡིག་གིས་མཚོན་པའི་སྟོན་པ་སྟེ། ཡབ་ཀྱི་རྡོ་རྗེ་ནོར་བུའི་དབུར་རྩ་ས་ཡ་ཕྲག་བཅུ་གསུམ་གྱི་བཅུད་འདུས་པའི་ཀུན་རྫོབ་ཡེ་ཤེས་ཀྱི་ཐིག་ལེ་ཝཾ་གི་དབྱིབས་ཅན་ནི་ཡབ་ཡུམ་གཉིས་ཀའི་རྒྱུད་ལ་བདེ་བ་གསལ་བར་སྟོན་པའི་བདག་ཉིད་ཡིན་པས་ན་སྟོན་པའོ། །བཤད་ཅེས་པ་མ་ཡིག་གིས་མཚོན་པའི་འཁོར་ཏེ། མ་ད་ན་སྡོམ་བྱེད། མ་ནུ་ན་ཡིད་དེ། བྱེད་པ་སྡོམ་པ་ཐབས་དང་བཅས་པའི་གསལ་བའི་རྣམ་ཤེས་ནི་ཡེ་ཤེས་ཉམས་སུ་མྱོང་བས་ན་འཁོར་རོ། །པའི་ཞེས་པ་ཡ་ཡིག་གིས་མཚོན་ནས། ཡཱ་ནའི་སྒྲ་ལས་ཐེག་པ་ཆེན་པོ་ཞེས་བསྙད་པའི་བསྟན་པ་འདིའོ། །དེ་གང་ཞེ་ན། པ་ར་མཱརྠ་ཞེས་པས་དོན་དམ་པ་སྟེ། ཉམས་སུ་མྱོང་བྱ་སེམས་ལྔ་རྫོགས་པའི་དགའ་བ་བཅུ་དྲུག་གི་ཐ་མ་རྣམ་ཐར་བཞི་ལྡན་གྱི་བདེ་བ་ཆེན་པོ་རང་བཞིན་ལྷན་ཅིག་སྐྱེས་པའི་ཡེ་ཤེས་སོ། །དུས་ན་ཞེས་པ་ཡ་ཡིག་གིས་མཚོན་པའི་དུས་ཏེ། དེ་ཉིད་ཉམས་སུ་མྱོང་བའི་ཚེ་དུས་འདི་ཞེས་མཚོན་དུ་མེད་པས་ན་བསམ་གྱིས་མི་ཁྱབ་པའི་དུས་སོ། །ནཱ་མ་ནི་ཞེས་བྱ་བ་ཞེས་པ་སྟེ། ཕུན་སུམ་ཚོགས་པ་ལྔ་ཀའི་མིང་དེ་དང་དེ་མཚོན་པའི་མཇུག་སྡུད་དོ། ། གཉིས་པ་རྒྱུད་ཁྱད་པར་གྱི་གླེང་གཞིའི་སྒོ་ནས་རྒྱས་པར་བཤད་པ་ལ་ལྔ་སྟེ། ཆོས་དང་། དུས་དང་། སྟོན་པ་དང་། གནས་དང་། འཁོར་ཕུན་སུམ་ཚོགས་པའོ། །དང་པོ་ནི། འདི་སྐད་བཤད་པ་ནི་གསང་བའི་སྙིང་པོ་སྟེ། དེ་ཡང་འདི་སྐད་ཅེས་པ་ནི་རྒྱུད་དོན་མ་ལུས་པ་མཚོན་པའི་ཚིག་ཕྲད་དོ། །འོ་ན་བདག་གིས་ཐོས་པ་མི་ཟེར་བར་བཤད་པ་ཟེར་བ་གང་ཞེ་ན། རྒྱུད་གཞན་རྣམས་སུ་བདག་གིས་ཐོས་ཞེས་སྨོས་པའི་དགོས་པ་ནི། སྡུད་པ་པོ་རང་ཉིད་སྟོན་པ་མ་ཡིན་པར་ཁས་བླངས་ནས་དེ་སྐད་དུ་བརྗོད་པ་དང་། བདག་ཉིད་ཀྱིས་སྟོན་པ་ལས་མངོན་སུམ་དུ་ཐོས་ཀྱི་གཞན་ལས་བརྒྱུད་དེ་ཐོས་པ་མ་ཡིན་པ་དང་། ཚིག་ཐོས་པ་ཙམ་དུ་ཟད་ཀྱི་དོན་རྟོགས་པ་ནི་མ་ཡིན་ནོ་ཞེས་མཚོན་པར་བྱེད་པ་ལས། འདིར་ནི་ཐུན་མོང་མ་ཡིན་པའི་ཕྱོགས་བཟུང་སྟེ། སྡུད་པ་པོ་རང་ཉིད་སྟོན་པ་དང་ཐ་མི་དད་པར་ཁས་བླངས་ནས་སྔར་ངས་འོག་མིན་དུ་བཤད་པ་ཉིད་ཡང་འདིར་བཤད་པར་བྱ་ཞེས་སྨོས་པའོ། །དོན་འདི་ཉིད་ཀྱིས་ན་བསྟན་པ་འདི་ཡང་རྒྱལ་བའི་དགོངས་པའི་ཞེ་ཕུགས་ངེས་དོན་མཐར་ཐུག་པ་ཉིད་བསྟན་པ་ཡིན་པར་མཚོན་ཅིང་། འཕགས་པ་ཕྱག་ན་རྡོ་རྗེ་རང་ཉིད་ཀྱང་ཐུན་མོང་གི་སྡུད་པ་པོ་གཞན་ལས་ཁྱད་པར་དུ་འཕགས་པའི་ཆེ་བ་བསྟན་པའོ། །དེ་སྐད་དུའང་ཉི་འོད་སེངྒེའི་རྒྱ་ཆེར་འགྲེལ་ལས། བཤད་ཅེས་པས་ནི་འཁོར་དང་སྟོན་པ་གཉིས་སུ་མེད་པར་བསྟན་པ་ཡིན་ལ། ཞེས་དང་། སྤར་ཁབ་ལས་ཀྱང་། ཐུན་མོང་མ་ཡིན་པའི་གླེང་གཞི་སྟེ། རྒྱུད་གཞན་ལས་ཁྱད་པར་དུ་གྱུར་པའི་ཕྱིར། ཞེས་སོ། །དེ་ཡང་སྡུད་པ་པོ་ཉིད་སྟོན་པ་དང་རྒྱུད་ཐ་མི་དད་པར། བདེ་འདུས་ཞི་བ་འདུས་པ་རྩ་བའི་རྒྱུད་ལས། ང་ནི་ཆེ་བའི་རྒྱལ་པོ་སྟེ། །འཆད་དང་ཉན་པའང་ང་ཉིད་ཡིན། །ཞེས་དང་། བརྟག་གཉིས་ལས། འཆད་པ་པོ་ང་ཆོས་ཀྱང་ང་། །རང་གི་ཚོགས་ལྡན་ཉན་པའང་ང་། །ཞེས་དང་། གསང་བ་གྲུབ་པ་ལས། རྒྱུད་འཆད་པ་དེ་ཐུགས་རྡོ་རྗེ། །འཆད་པ་པོ་དེ་སྡུད་པའང་དེ། །ཞེས་སོ། ། གཉིས་པ་དུས་ཕུན་སུམ་ཚོགས་པ་ནི། དུས་ན་ཞེས་པ་སྟེ། འདི་སྐད་བཤད་པའི་ཚེ་སྟོན་པ་འདི་ཉིད་གནས་འདིར་འཁོར་འདི་དག་དང་ལྷན་ཅིག་ཏུ་བཞུགས་ཞེས་འབྲེལ་སྦྱར་བ་ཡིན་ནོ། །འོ་ན་དུས་གཅིག་ན་མི་ཟེར་བ་གང་སྙམ་ན། འདིར་དུས་ན་ཞེས་པ་དུས་བཞི་མཉམ་པ་ཉིད་མཚོན་པ་སྟེ། སྟོན་པ་ལོངས་སྤྱོད་རྫོགས་པའི་སྐུ་ནི་རྟག་པ་རྒྱུན་གྱི་འཁོར་ལོར་ཆོས་སྟོན་པས་དུས་རེས་འགའ་བ་གཅིག་གི་ངེས་པ་ལས་འདས་པའི་ཕྱིར། དུས་ཐུན་མོང་མ་ཡིན་པའི་ཆེ་བ་སྨོས་པའོ། །དེ་ཡང་རྒྱ་མཚོ་ལས། དེ་ཚེ་དུས་ཉིད་མཐའ་བྲལ་ཕྱིར། །ངོ་བོ་དུས་བཞི་མཉམ་པ་ཉིད། །ཅེས་སོ། །གཞན་དུ་ཐུན་མོང་བ་ལྟར་ན། དུས་གཅིག་གི་ངེས་པ་བཟུང་བའི་དགོས་པ་ཡང་། དུས་གཅིག་གི་ཚེ་འདི་ཐོས་ཀྱི་གཞན་དུ་མ་ཐོས་ཞེས་བཀའི་དོན་རྙེད་དཀའ་བ་དང་། འདིར་འདི་ཐོས་ལ་གཞན་དུ་གཞན་དག་ཀྱང་ཐོས་ཞེས་སྡུད་པ་པོ་རང་ཉིད་ཐོས་པ་ཆེ་བ་དང་། དུས་ལན་གཅིག་གིས་ཁོང་དུ་ཆུད་པས་ཤེས་རབ་ཕུལ་དུ་བྱུང་བར་བསྟན་པ་ཡིན་ནོ། །འདིར་ཁ་ཅིག་ན་རེ། རྒྱུད་འདི་ཉིད་བཀའ་ཡང་དག་པ་མ་ཡིན་ཏེ། འདི་སྐད་བདག་གིས་ཐོས་པའི་དུས་གཅིག་ན། ཞེས་མ་སྨོས་པའི་གླེང་གཞི་ལོག་པའི་ཕྱིར་རོ་ཟེར་ན། དེ་ལྟར་ན། དུས་ཀྱི་འཁོར་ལོ་དང་། འཇམ་དཔལ་མཚན་བརྗོད་དང་། བདེ་མཆོག་རྩ་རྒྱུད་སོགས་རྒྱུད་རྣམ་དག་མང་པོ་ཞིག་ཀྱང་བཀའ་ཡང་དག་པ་མ་ཡིན་པར་འགྱུར་བས་རྣམ་པར་མ་བརྟགས་པའི་བླ་བརྡོལ་ལོ། །དེ་བས་ན་དེ་བཞིན་གཤེགས་པ་རྣམས་ནི་རྣམ་པར་འཕྲུལ་པ་སྒྱུ་མ་ལྟ་བུ་ལ་མངའ་བརྙེས་པའི་ཕྱིར། ཚུ་རོལ་མཐོང་བའི་བློས་ཕྱོགས་གཅིག་ཁོ་ནར་ངེས་བཟུང་བྱ་བའི་ཡུལ་མ་ཡིན་པས། ཐེག་པ་ཐུན་མོང་དང་ཐུན་མོང་མ་ཡིན་པའི་རྣམ་གཞག་ཐ་དད་པ་གཅིག་གིས་གཅིག་དགག་པར་མི་བྱ་སྟེ། མངོན་རྟོགས་རྒྱན་གྱི་འགྲེལ་པ་ལས། འདི་ནི་རྣམ་པར་བཞག་པ་གཞན་ཁོ་ན་ཡིན་པས། ཐེག་པ་གཞན་གྱི་ལུགས་ལ་བརྟེན་ནས་ནམ་དུའང་སུན་འབྱིན་བརྗོད་པར་མི་བྱའོ། །ཞེས་གསུངས་པ་ལྟར་རོ། ། གསུམ་པ་སྟོན་པ་ཕུན་སུམ་ཚོགས་པ་ལ་གཉིས་ཏེ། སྟོན་པའི་རང་བཞིན་དང་། ངོ་བོའོ། །དང་པོ་ནི། དེ་བཞིན་གཤེགས་པ་ནས། དབྱེར་མེད་པའི་རང་བཞིན་ཏེ། ཞེས་པའི་བར་གྱིས་བསྟན། དེ་ཡང་རྒྱུད་ཕྱི་མ་ལས། གང་ཕྱིར་དེ་བཞིན་ཉིད་དུ་གཤེགས། །དེ་བཞིན་གཤེགས་པར་མངོན་པར་བརྗོད། །ཅེས་པས་སྒྲིབ་བྱེད་ཀྱི་ཞེན་པ་གཟུང་འཛིན་གཉིས་དང་བྲལ་བ་མཐར་ཐུག་པས་གཞི་ཇི་ལྟ་བ་དེ་བཞིན་དུ་གཤེགས་པའོ། །དེ་ཉིད་ཀྱང་རང་བྱུང་གི་ཡེ་ཤེས་ལ་སྤང་བྱ་མ་གྲུབ་པས་ཡང་དག་པ་ཉིད་ཀྱི་ཕྱིར། འབྲས་བུ་མ་བཙལ་བར་སྐུ་དང་ཡེ་ཤེས་ཀྱི་དཀྱིལ་འཁོར་དུ་རྫོགས་པར་རང་སྣང་བའི་བདག་ཉིད་ནི་སངས་རྒྱས་ཏེ། བུདྡྷའི་སྒྲ་གཉིད་སད་པ་ལྟར་སངས་པ་དང་། པདྨ་ཁ་བྱེ་བར་ལྟར་རྒྱས་པའི་དོན་གཉིས་ཀ་ལ་འཇུག་པས། མ་རིག་པའི་གཉིད་སངས་ཤིང་ཤེས་བྱ་ལ་བློ་རྒྱས་པ་སྟེ། སྐྱབས་འགྲོ་བདུན་ཅུ་པ་ལས། མ་རིག་གཉིད་ལས་སངས་ཕྱིར་དང་། །ཤེས་བྱ་ལ་ཡང་བློ་རྒྱས་ཕྱིར། །ཞེས་སོ། །དེ་ནི་འདིར་དོན་ཇི་བཞིན་པ་མངོན་དུ་བྱས་པའི་སྟོབས་ཀྱིས་སྤངས་ཐོབ་མེད་པའི་ཡོན་ཏན་མཐར་ཐུག་པ་ལ་བཞག་སྟེ། ལེ་ལག་ལས། མ་རིག་པ་ཉིད་ཡེ་ཤེས་གསལ། །ཉོན་མོངས་སྡུག་བསྔལ་བྱང་ཆུབ་མཆོག །ཅེས་སོ། །དེ་ལྟ་བུའི་རང་བཞིན་ནི་བདུད་བཞི་སྒྲིབ་གཉིས་བག་ཆགས་དང་བཅས་པ་མ་ལུས་པ་བཅོམ་ཞིང་། སྐུ་ལྔ་ལ་སོགས་པ་ཆེ་བའི་ཡོན་ཏན་ཐམས་ཅད་ཀྱི་བདག་ཉིད་དུ་གནས་པས་ན་ལྡན་ལ། མཐའ་གཉིས་ལ་མི་གནས་པས་རང་གི་ངོ་བོ་འདི་ཞེས་བསྟན་དུ་མེད་པས་ན་འདས་པ་སྟེ། རྡོ་རྗེ་ལས་རིམ་ལས། བདུད་བཞི་ལ་སོགས་རིག་པའི་གདེངས་ཀྱིས་བཅོམ། །སྐུ་ལྔ་ལ་སོགས་ཡོན་ཏན་བརྗོད་ལས་འདས། །རང་གི་ངོ་བོ་འདི་ཞེས་བསྟན་དུ་མེད། །ཅེས་སོ། །བདུད་བཞི་བཅོམ་ལུགས་ནི། ཉོན་མོངས་པ་ལྔ་ཉིད་ཡེ་ཤེས་ལྔའི་ངོ་བོར་རྣམ་པར་དག་པས་ཉོན་མོངས་པའི་བདུད་བཅོམ་ལ། དེ་དག་པས་ཕུང་པོ་ལྔ་ཡང་རིགས་ལྔའི་ངོ་བོར་མངོན་དུ་འགྱུར་བར་གདོན་མི་ཟ་བས་ན་ཕུང་པོའི་བདུད་བཅོམ་མོ། །དེ་ལྟར་ལྷ་རྟོག་དབྱེར་མེད་དུ་རྟོགས་པ་ལ་འདོད་ལྷའི་བར་ཆད་ཀྱིས་མི་ཚུགས་ཤིང་། ཕུང་པོའི་བདུད་བཅོམ་པས་ཕུང་པོ་ཉིང་མཚམས་སྦྱོར་བ་མེད་ལ། དེ་མེད་པས་སེམས་ཉིད་སྐྱེ་འཆི་ལས་གྲོལ་བའི་ཕྱིར་ལྷའི་བུའི་བདུད་དང་འཆི་བདག་གི་བདུད་ཀྱང་བཅོམ་སྟེ། རྒྱས་པ་ལས། བདུད་བཞི་ཚར་གཅོད་ཅེས་བྱ་བའི་དམ་ཚིག་ནི། ཉོན་མོངས་པ་ཉིད་རྣམ་པར་དག །ཕུང་པོ་ལྔ་ཉིད་མངོན་སངས་རྒྱས། །བདག་ཉིད་ལྷ་ཡི་དཀྱིལ་འཁོར་ཏེ། །སྐྱེ་ཤི་མེད་པའི་གཡུང་དྲུང་གནས། །ཞེས་སོ། །སྒྲིབ་པ་གཉིས་ནི། རྒྱུད་བླ་མ་ལས། འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་བརྗོད། །སེར་སྣ་ལ་སོགས་རྣམ་རྟོག་གང་། །དེ་ནི་ཉོན་མོངས་སྒྲིབ་པར་བརྗོད། །ཅེས་པས་དུག་ལྔ་རང་མཚན་གྱི་རྟོག་པ་ནི་ཉོན་སྒྲིབ་ཡིན་ལ། ཤེས་སྒྲིབ་ནི། ཡེ་ཤེས་སྣང་བ་རྒྱན་གྱི་མདོར་དུས་གསུམ་ཡིད་བྱེད་ལ་བཤད་དེ། དོན་ལ་དག་བྱེད་གཉེན་པོ་ལ་ཞེན་པའི་རྟོག་པའོ། །བག་ཆགས་ནི་ཀུན་འབྱུང་ཕྲ་བའི་མཐར་ཐུག་འཕོ་བའི་བག་ཆགས་ཏེ་དཀར་དམར་རླུང་གསུམ་འགྲོགས་པས་ཤེས་པ་གཉིས་སྣང་འཁོར་བའི་ཆོས་སུ་ཤར་བ་ལ་བཞེད་པས། དེ་སྦྱོང་བྱེད་རྟེན་གྱི་བྱེད་བཅིངས་ལས་རྟེན་དང་བརྟེན་པའི་འབྲེལ་ཆད་ནས་དག་པར་གསུངས་པའི་ཕྱིར། འདི་ནི་ལམ་བདེན་མཐར་ཐུག་སྔགས་ཀྱི་ཐེག་པ་ཁོ་ནས་སྦྱོང་དགོས་པའི་སྒྲིབ་པ་ཤིན་ཏུ་ཕྲ་བའོ། །སྐུ་ལྔའི་ཡོན་ཏན་དང་ལྡན་པ་ནི་གཞན་ནས་སྐལ་བ་ཕུན་སུམ་ཚོགས་པ་དྲུག་བཤད་པ་དང་དགོངས་པ་མཐུན་ཏེ། སམྦུ་ཊི་ལས། དབང་ཕྱུག་དང་ནི་གཟུགས་བཟང་དང་། །དཔལ་དང་གྲགས་དང་ཡེ་ཤེས་དང་། །བརྩོན་འགྲུས་ཕུན་སུམ་ཚོགས་པ་སྟེ། །དྲུག་པོ་དེ་ལ་ལྡན་ཞེས་བརྗོད། །ཅེས་པས་དབང་ཕྱུག་ནི་བག་ཆགས་མ་ལུས་པ་བཅོམ་པའི་བདག་ཉིད་ཤིན་ཏུ་རྣམ་པར་དག་པ་ཆོས་ཀྱི་སྐུ་དང་ཆོས་དབྱིངས་ཡེ་ཤེས་ཡིན་ལ། དེ་བཞིན་དུ་གཟུགས་བཟང་བ་ནི་ཡོན་ཏན་ཐམས་ཅད་ཀྱི་འབྱུང་གནས་མངོན་བྱང་དང་མེ་ལོང་ལྟ་བུ། དཔལ་དང་གྲགས་པ་ནི་འགྲོ་ལ་ཡོན་ཏན་སྟེར་བ་ལས་མི་གཡོ་བ་ལོངས་སྐུ་དང་མཉམ་ཉིད། ཡེ་ཤེས་ནི་ཆོས་ཀུན་དབྱེར་མི་ཕྱེད་པར་དུས་གཅིག་ཏུ་མཁྱེན་པས་རྡོ་རྗེའི་སྐུ་དང་སོར་རྟོག །བརྩོན་འགྲུས་ནི་ཕྲིན་ལས་ཚད་མེད་པར་སྣང་བས་སྤྲུལ་པའི་སྐུ་དང་བྱ་བ་གྲུབ་པའི་ཡེ་ཤེས་སོ། །འཁོར་འདས་གཉིས་ཀྱི་ཆོས་ལ་རྫོགས་པར་ལོངས་སྤྱོད་ཀྱང་ཐམས་ཅད་ཡེ་ཤེས་ཀྱི་རོལ་པར་ལྷུན་གྱིས་གྲུབ་པས་བླང་དོར་གྱི་སྤྱོད་ཡུལ་ལས་འདས་པའི་ཕྱིར་གཞན་ལས་འཕགས་པས་ན་ཆེན་པོའོ། །དེ་ཡང་སྟེང་འོག་ཕྱོགས་མཚམས་བརྒྱད་དེ་ཕྱོགས་བཅུ་དང་། འདས་མ་འོངས་ད་ལྟ་འབྱུང་བར་མ་ངེས་པ་སྟེ་དུས་བཞིའི་དབྱིངས་ན་བཞུགས་ཤིང་འགྲོ་དོན་མཛད་པའི་དེ་བཞིན་གཤེགས་པ་ཐམས་ཅད་ཀྱི་ཆེ་བའི་ཡོན་ཏན་གྱི་རྟེན་བྱེད་པས་སྐུ་དང་། གདུལ་བྱའི་བསམ་པ་དང་མཐུན་པའི་ཆོས་བརྡ་སྤྲོད་པས་གསུང་དང་། ཤེས་བྱ་མ་ལུས་པ་མཁྱེན་ཅིང་སྒྲིབ་པ་གསུམ་ལས་རྣམ་པར་གྲོལ་བས་ཐུགས་དང་། དེ་དག་གི་ཟླས་དྲངས་ཏེ། དགོས་འདོད་མ་ལུས་པ་འབྱུང་བས་ཡོན་ཏན་དང་། གཞན་དོན་མཛད་པ་ལ་ནུས་མཐུ་ཐོགས་པ་མེད་པས་ཕྲིན་ལས་ཏེ། རེ་རེ་ཡང་ལྔ་ལྔར་ཕྱེ་བས་འབྲས་ཆོས་ཉི་ཤུ་རྩ་ལྔར་འགྱུར་ལ། དེ་དག་ཐམས་ཅད་ཀྱང་རང་བཞིན་དབྱེར་མི་ཕྱེད་པ། མཚན་ཉིད་སྐྱེ་འཇིག་དང་བྲལ་བ། ངོ་བོ་འདུས་མ་བྱས་པས་རྡོ་རྗེའི་བདག་ཉིད་དུ་རོ་གཅིག་པའི་ཕྱིར། རྒྱལ་བ་དྲུག་པ་ལ་རིགས་ཐམས་ཅད་ཀྱི་བདག་པོའམ། སངས་རྒྱས་ཐམས་ཅད་ཀྱི་སྤྱི་གཟུགས་ཅན་ཞེས་བྱའོ། །དེ་ལྟར་ན་སངས་རྒྱས་ཐམས་ཅད་ཀྱི་བདག་ཉིད་ཁོ་ནར་ངེས་པས་འཁོར་བའི་ཆོས་རྣམས་འདོར་རམ་ཞེ་ན་མ་ཡིན་ཏེ། འཁོར་འདས་ཀྱི་ཆོས་ཐམས་ཅད་དང་དབྱེར་མི་ཕྱེད་པའི་རང་བཞིན་དུ་བཞུགས་སོ་ཞེས་སྟོན་པ་ལ། སྔར་འདས་པའི་འཁོར་འདས་མ་ལུས་པ་དང་། ད་ལྟར་བའི་འཁོར་འདས་མི་ལུས། མ་འོངས་པའི་འཁོར་འདས་ལུས་པ་མེད་པ་ཐམས་ཅད་དང་རྒྱུད་ཀྱི་བདག་པོ་རིགས་དྲུག་པ་ཉིད་ཀུན་རྫོབ་ཏུ་རིག་པ་སྒྱུ་མའི་སྣང་བརྙན་ཡིན་པས་སོ་སོ་མ་ཡིན། དོན་དམ་པར་མ་སྐྱེས་པས་ཐ་མི་དད། བདེན་པ་གཉིས་ཀའི་ཐ་སྙད་ལས་ཀྱང་འདས་པས་དབྱེར་མེད་པའི་རང་བཞིན་ཏེ། དེ་དག་ཀྱང་། སྤར་ཁབ་ལས། རྒྱལ་བ་དྲུག་པའི་ཡོན་ཏན་མཐའ་ཡས་པ་ཡང་མདོར་བདུན་དུ་འདུ་སྟེ། ཞེས་པས་གཞུང་ཚན་བདུན་པོས་རིམ་བཞིན། དེ་བཞིན་ཉིད་དུ་ནར་སོན་པའི་དང་། ཡོན་ཏན་མ་བཙལ་བར་ལྷུན་གྱིས་གྲུབ་པའི་དང་། ཡེ་ཤེས་མཐའ་དབུས་དང་བྲལ་བའི་དང་། འབྲས་བུ་ལ་མངའ་མཛད་ཀྱང་ངོ་བོ་བསྟན་དུ་མེད་པའི་དང་། མཉམ་པ་ཉིད་མངོན་དུ་མཛད་ཀྱང་སྤྱོད་ཡུལ་དང་བྲལ་བའི་དང་། དེ་བཞིན་གཤེགས་པ་ཐམས་ཅད་ཀྱི་བདག་ཉིད་གཅིག་དང་དུ་མ་ལས་གྲོལ་བའི་དང་། གཉིས་སུ་མེད་པའི་བདག་ཉིད་ཆེན་པོར་དུས་གསུམ་འདུ་འབྲལ་མེད་པའི་རང་བཞིན་རྣམས་ཡིན་ལ། ཁོག་གཞུང་ལས། སྟོན་པའི་རང་བཞིན་བརྒྱད་དང་ལྡན། །ཞེས་པས་ཡང་དག་པའི་རང་བཞིན་དང་རྫོགས་པའི་རང་བཞིན་གཉིས་སོ་སོར་ཕྱེ་སྟེ་བརྒྱད་དང་། འགྲེལ་ཆུང་དུ་བཅོམ་ལྡན་འདས་ཞེས་པ་ཡན་ཆད་གཅིག་ཏུ་བསྡོམས་ནས་བཞིར་བཤད་དེ། ཇི་སྐད་དུ། བྱང་ཆུབ་མཆོག་གི་ངོ་བོ་དང་། །ཆོས་རྣམས་རོལ་པར་ལོངས་སྤྱོད་དང་། །ཕྱོགས་དུས་བདེ་གཤེགས་བདག་པོ་དང་། །ཆོས་སོ་ཅོག་དང་དབྱེར་མེད་པའོ། །ཞེས་གསུངས་སོ། ། གཉིས་པ་སྟོན་པའི་ངོ་བོ་ནི། སྐུ་མདུན་དང་རྒྱབ་མེད་པ་ནས། དབུ་གསུམ་དང་ལྡན་པ། ཞེས་པའི་བར་ཏེ། སྟོན་པ་ནི་ཡེ་ཤེས་ཀྱི་སྐུ་ཅན་ཡིན་པའི་ཕྱིར། དེའི་སྐུ་ལ་མདུན་དང་རྒྱབ་ཁོ་ནར་རིས་སུ་ཆད་པ་མེད་པས་ཕྱོགས་ཐམས་ཅད་དུ་སྒྲིབ་པ་མེད་པར་ཞལ་གྱི་དཀྱིལ་འཁོར་ཐལ་ལེ་བར་གསལ་བ་སྟེ་ཀུན་ཏུ་ཞལ་གྱི་རང་བཞིན་དུ་བཞུགས་ཤིང་། སྐྱེས་བུ་ཆེན་པོའི་མཚན་དང་དཔེ་བྱད་བཟང་པོ་གསལ་ཞིང་སོ་སོར་འབྱེད་པ་དང་ལྡན་པས་སྐུ་ལ་རྣམ་པར་སྤྲས་པའོ། །མཚན་དཔེ་ལ་གཉིས་ཏེ། ཐུན་མོང་དང་། ཐུན་མོང་མ་ཡིན་པའོ། །དང་པོ་ལ་གཉིས་ལས། མཚན་བཟང་པོ་སུམ་ཅུ་རྩ་གཉིས་ནི། མངོན་རྟོགས་རྒྱན་ལས། ཕྱག་ཞབས་འཁོར་ལོས་མཚན་དང་རུས་སྦལ་ཞབས། །ཕྱག་དང་ཞབས་སོར་དྲྭ་བས་འབྲེལ་བ་དང་། །ཕྱག་ནི་ཞབས་བཅས་འཇམ་ཞིང་གཞོན་ཤ་ཆགས། །འདི་ཡི་སྐུ་ནི་བདུན་དག་མཐོ་བ་དང་། །སོར་མོ་རིང་དང་རྟིང་ཡངས་སྐུ་ཆེ་དྲང་། །ཞབས་འབུར་མི་མངོན་སྤུ་ནི་གྱེན་དུ་ཕྱོགས། །བྱིན་པ་ཨེ་ནྱ་ཡའི་འདྲ་ཕྱག་རིང་མཛེས། །འདོམས་ཀྱི་ལྦ་བ་སྦུབས་སུ་ནུབ་པའི་མཆོག །པགས་པ་གསེར་མདོག་པགས་པ་སྲབ་པ་དང་། །སྤུ་ནི་རེ་རེ་ནས་ཀྱང་གཡས་ལེགས་འཁྲུངས། །ཞལ་མཛོད་སྤུས་བརྒྱན་རོ་སྟོད་སེངྒེ་འདྲ། །འདི་ཡི་དཔུང་པའི་མགོ་ཟླུམ་ཐལ་གོང་རྒྱས། །འདི་ལ་རོ་མི་ཞིམ་པ་རོ་མཆོག་སྣང་། །སྐུ་ནི་ནྱ་གྲོ་ཏ་ལྟར་ཆུ་ཞེང་གབ། །གཙུག་ཏོར་དབུར་ལྡན་ལྗགས་རིང་མཛེས་པ་དང་། །ཚངས་དབྱངས་འགྲམ་པ་སེང་གེ་འདྲ་དང་ཚེམས། །ཤིན་ཏུ་དཀར་དང་ཚད་མཉམ་ཐགས་བཟང་དང་། །གྲངས་ནི་བཞི་བཅུ་ཐམ་པ་ཚང་བ་དང་། །སྤྱན་ནི་མཐོན་མཐིང་སྤྱན་རྫི་བ་མཆོག་གི །འདྲ་བ་འདི་དག་སུམ་ཅུ་་རྩ་གཉིས་མཚན། །ཞེས་སོ། །དཔེ་བྱད་བཟང་པོ་བརྒྱད་ཅུ་ནི། དེ་ཉིད་ལས། ཐུབ་པའི་སེར་མོ་ཟངས་མདོག་དང་། །མདོག་སྣུམ་མཐོ་དང་སོར་མོ་རྣམས། །ཟླུམ་རྒྱས་བྱིན་གྱིས་ཕྲ་བ་དང་། །རྩ་མི་མངོན་དང་མདུད་པ་མེད། །ལོང་བུ་མི་མངོན་ཞབས་མཉམ་དང་། །སེང་གེ་གླང་ཆེན་བྱ་དང་ནི། །ཁྱུ་མཆོག་སྟབས་གཤེགས་གཡས་ཕྱོགས་དང་། །མཛེས་གཤེགས་དྲང་དང་འཁྲིལ་བག་ཆགས། །བྱི་དོར་བྱས་འདྲ་རིམ་པར་འཚམས། །གཙང་དང་འཇམ་དང་དག་པའི་སྐུ། །མཚན་ནི་ཡོངས་སུ་རྫོགས་པ་དང་། །སྐུ་ཡི་ཁོ་ལག་ཡངས་ཤིང་བཟང་། །གོམ་སྙོམ་པ་དང་སྤྱན་གཉིས་ནི། །དག་དང་གཞོན་ཤ་ཅན་ཉིད་དང་། །སྐུ་ཞུམ་མེད་དང་རྒྱས་པ་དང་། །ཤིན་ཏུ་གྲིམ་པའི་སྐུ་ཉིད་དང་། །ཡན་ལག་ཤིན་ཏུ་རྣམ་འབྱེས་དང་། །གཟིགས་པ་སྒྲིབ་མེད་དག་པ་དང་། །དཀུ་ཟླུམ་སྐབས་ཕྱིན་མ་རྙོངས་དང་། །ཕྱང་ངེ་བ་དང་ལྟེ་བ་ནི། །ཟབ་དང་གཡས་ཕྱོགས་འཁྱིལ་བ་དང་། །ཀུན་ནས་བལྟ་ན་སྡུག་པ་དང་། །ཀུན་སྤྱོད་གཙང་དང་སྐུ་ལ་ནི། །སྨེ་བ་གནག་བག་མེད་པ་དང་། །ཕྱག་ནི་ཤིང་བལ་ལྟར་འཇམ་དང་། །ཕྱག་རིས་མདངས་ཡོད་ཟབ་རིང་དང་། །ཞལ་ནི་ཧ་ཅང་མི་རིང་དང་། །མཆུ་ནི་བིམྦ་ལྟར་དམར་དང་། །ལྗགས་མཉེན་པ་དང་སྲབ་པ་དང་། །དམར་དང་འབྲུག་གི་སྒྲ་ཉིད་དང་། །གསུང་མཉེན་འཇམ་དང་མཆེ་བ་ཟླུམ། །རྣོ་དང་དཀར་དང་མཉམ་པ་དང་། །བྱིན་གྱིས་ཕྲ་དང་ཤངས་མཐོ་དང་། །མཆོག་ཏུ་དག་པ་དག་དང་ནི། །སྤྱན་ཡངས་པ་དང་རྫི་མ་སྟུག །པདྨའི་འདབ་མ་འདྲ་བ་དང་། །སྨིན་ཚུགས་རིང་དང་འཇམ་པ་དང་། །སྣུམ་དང་སྤུ་ནི་མཉམ་པ་དང་། །ཕྱག་རིང་རྒྱས་དང་སྙན་མཉམ་དང་། །ཉམས་པ་རྣམ་པར་སྤངས་པ་དང་། །དཔྲལ་བ་ལེགས་པར་འབྱེས་པ་དང་། །དབྱེས་ཆེ་བ་དང་དབུ་རྒྱས་དང་། །དབུ་སྐྲ་བུང་བ་ལྟར་གནག་དང་། །སྟུག་དང་འཇམ་དང་མ་འཛིངས་དང་། །མི་གཤོར་དྲི་ཞིམ་སྐྱེས་བུ་ཡི། །ཡིད་ནི་འཕྲོག་པར་བྱེད་པ་དང་། །དཔལ་གྱི་བེའུ་དང་བཀྲ་ཤིས་ནི། །གཡུང་དྲུང་འཁྱིལ་བས་བརྒྱན་པ་སྟེ། །སངས་རྒྱས་དཔེ་བྱད་བཟང་པོར་བཞེད། །ཅེས་སོ། །གཉིས་པ་ནི། མེ་ལོང་ལྟ་བུ་ལ་སོགས་པ་ཡེ་ཤེས་བཞི་རེ་རེའང་བཞི་བཞིར་ཕྱེ་བའི་ཡེ་ཤེས་བཅུ་དྲུག་གི་རྩལ་སེམས་དཔའ་བཅུ་དྲུག །དེའི་ཡུལ་ཆོས་དབྱིངས་བཅུ་དྲུག་གི་རྩལ་སེམས་མ་བཅུ་དྲུག་སྟེ་སུམ་ཅུ་རྩ་གཉིས་ནི་མཚན་བཟང་པོ་ཡིན་ལ། སེམས་དཔའ་བཅུ་དྲུག་ལ་ཡེ་ཤེས་ལྔའི་རྟགས་རིགས་ཀྱི་ལྷ་ལྔ་ལྔས་དབུ་བརྒྱན་པའི་ལྷ་བརྒྱད་ཅུ་ནི་དཔེ་བྱད་དེ། སྤྱི་མདོ་ལས། མཚན་གྱི་མེ་ཏོག་ལ་དཔེ་བྱད་ཀྱི་འབྲས་བུས་སྤྲས་པའི་ཕྱིར། སྲས་ཀྱི་ཚོགས་ཀྱིས་ཀུན་ནས་བརྒྱན་པའོ། །ཞེས་སོ། །འོ་ན་སེམས་མ་བཅུ་དྲུག་ལ་དབུ་རྒྱན་མེད་དམ་ཞེ་ན། མེད་དེ། ཆོས་ཀྱི་དབྱིངས་ཀྱི་ཕྱག་རྒྱར་གྱུར་པའི་ཕྱིར་རོ། །དེ་ཡང་ཕྱག་ཞབས་འཁོར་ལོས་མཚན་སོགས་ཐུན་མོང་དུ་གྲགས་པ་ལས་ཁྱད་པར་དུ་གྱུར་པ་ཡེ་ཤེས་ཆེན་པོའི་རྟགས་ཀྱི་མཚན་མར་སྣང་བས་ན་ཐུན་མོང་མ་ཡིན་པ་ཞེས་བྱ་ལ། དེ་དག་མཚན་དཔེར་འཇོག་པའི་རྒྱུ་མཚན་ཡང་། འཁོར་དང་འཁོར་གྱི་རྒྱན་ཕུན་སུམ་ཚོགས་པས་གཙོ་བོའི་རང་བཞིན་ཡང་བཀོད་པས་མཛེས་པར་བྱེད་པའི་ཕྱིར་ཏེ། སོར་གདུབ་དང་སོར་གདུབ་ཀྱི་ཕྲས་སྐྱེས་བུའི་ལག་པ་མཛེས་པར་བྱེད་པ་བཞིན་ནོ། །དེ་ལྟ་བུའི་སྐུ་ལས་མི་གཡོ་བཞིན་དུ་ཞིང་ཁམས་བསམ་གྱིས་མི་ཁྱབ་པ་ཐམས་ཅད་དུ་གང་ལ་གང་འདུལ་གྱི་སྐུའི་བཀོད་པ་དང་། སྒྲ་སྐད་མཐའ་ཡས་པས་ཐེག་པ་མ་ལུས་པ་སྟོན་པའི་གསུང་དང་། སྤངས་རྟོགས་ཀྱིས་བསྡུས་པའི་ཡོན་ཏན་ཐུགས་མཁྱེན་པའི་ཡེ་ཤེས་ཀྱིས་ཁྱབ་ཅིང་། གདུལ་བྱ་དག་མ་དག་གི་སྣང་བ་དང་མཐུན་པའི་རྣམ་པར་འཕྲུལ་པ་སྣ་ཚོགས་པར་ཀུན་ཏུ་སྣང་བས་འགྲོ་བའི་དོན་མཛད་དེ། དཀོན་བརྩེགས་ལས། ནམ་མཁས་ཇི་སྙེད་ཁྱབ་གྱུར་པ། །སྐུ་ཡིས་ཀྱང་ནི་དེ་སྙེད་ཁྱབ། །སྐུ་ཡིས་ཇི་སྙེད་ཁྱབ་གྱུར་པ། །འོད་ཀྱིས་ཀྱང་ནི་དེ་སྙེད་ཁྱབ། །འོད་ཀྱིས་ཇི་སྙེད་ཁྱབ་གྱུར་པ། །གསུང་གིས་ཀྱང་ནི་དེ་སྙེད་ཁྱབ། །གསུང་གིས་ཇི་སྙེད་ཁྱབ་གྱུར་པ། །ཐུགས་ཀྱིས་ཀྱང་ནི་དེ་སྙེད་ཁྱབ། །ཅེས་པ་ལྟར་རོ། །འདིས་སྤྲུལ་པ་ཐམས་ཅད་ཀྱི་འབྱུང་གནས་སུ་བསྟན་པས་ཐུབ་པ་དྲུག་ཀྱང་ཤུགས་ཀྱིས་བསྟན་པར་འགྱུར་ཞིང་། གོང་མ་རྣམས་གཞུང་ཚན་གསུམ་པོ་དེ་སྟོན་པ་སྐུ་གསུམ་གྱི་བདག་ཉིད་ཡིན་པར་སོ་སོར་སྦྱོར་བར་མཛད་པའང་མི་འགལ་ལོ། །འོ་ན་སྟོན་པའི་རྣམ་འགྱུར་ཇི་ལྟ་བུ་སྙམ་ན། ཐབས་སྙིང་རྗེ་ཆེན་པོ་དང་ཤེས་རབ་སྟོང་པ་ཉིད་ཀྱི་ཡེ་ཤེས་ཀྱིས་སྲིད་ཞིའི་མཐའ་ལ་མི་གནས་པའི་བརྡར་ཞབས་གཉིས་ཡབ་མཉམ་པའི་སྐྱིལ་ཀྲུང་དང་། ཡུམ་བརྟུལ་ཞུགས་ཀྱི་སྐྱིལ་མོ་ཀྲུང་དང་མཚུངས་པར་བཞུགས་ནས་སྙོམས་པར་འཇུག་པ་སྟེ། འདིར་ཡུམ་གྱི་བཞུགས་ཚུལ་བཤད་པས་ཀུན་ཏུ་བཟང་མོ་བསྟན་པ་ཡིན་ནོ། །ཡེ་ཤེས་ལྔ་རང་བྱུང་གི་ཡེ་ཤེས་དང་དྲུག་གི་དོན་མཚོན་བྱེད་ཕྱག་དྲུག་དང་། ཡེ་ཤེས་དེ་དག་གིས་གདུལ་བྱའི་རེ་བ་ཡིད་བཞིན་དུ་སྐོང་བའི་རྟགས་རིན་པོ་ཆེ་ལས་གྲུབ་པའི་རིགས་ལྔ་ཡེ་ཤེས་ལྔ་དང་ཆོས་དབྱིངས་ཀྱི་ཕྱག་རྒྱ་རྡོ་རྗེ་ལ་སོགས་པ་འོད་འབར་བ་ཅན་འཛིན་པ་སྟེ། སྒྱུ་འཕྲུལ་རོལ་པ་ཆེན་པོ་ལས། ཡེ་ཤེས་དྲུག་གི་བདག་ཉིད་ཀྱི། །ཕྱག་རྒྱ་རིན་ཆེན་འབར་བའི་མཚན། །རྡོ་རྗེ་འཁོར་ལོ་རིན་པོ་ཆེ། །དྲིལ་བུ་པདྨ་རལ་གྲི་འབར། །ཞེས་སོ། །སྐུ་སྟོང་པ་ཉིད་དང་། གསུང་མཚན་མ་མེད་པ་དང་། ཐུགས་སྨོན་པ་མེད་པ་གསུམ་ནི་བློའི་ཡུལ་ལས་འདས་པས་བསམ་གྱིས་མི་ཁྱབ་པ་ཡིན་ལ། དེའི་རྟགས་སུ་དབུ་གསུམ་དང་ལྡན་པ་སྟེ། གཡས་དཀར་གཡོན་དམར་དབུས་མཐིང་གར་སྣང་བའོ། ། བཞི་པ་གནས་ཕུན་སུམ་ཚོགས་པ་ལ་གཉིས་ཏེ། གནས་ཀྱི་རང་བཞིན་དང་། ངོ་བོའོ། །དང་པོ་ནི། འོག་མིན་ཞེས་སོགས་ཏེ། དེ་ལ་སྤྱིར་འོག་མིན་ནི་བླ་ན་གཞན་མེད་པའི་དོན་ཡིན་ལ། བྱེ་བྲག་ཏུ་དབྱེ་ན། ཆོས་དབྱིངས་དོན་གྱི་འོག་མིན་དང་། རིག་པའི་འོག་མིན་དང་། གསང་བའི་འོག་མིན་དང་། གཙང་རིས་ཀྱི་ལྷ་ལྔའི་ནང་ཚན་འཇིག་རྟེན་གནས་ཀྱི་འོག་མིན་རྣམས་ལས། འདིར་འོག་མིན་ཆེན་པོ་ཞེས་བྱ་བ་ལོངས་སྤྱོད་རྫོགས་པ་སྐུའི་སངས་རྒྱས་ཀྱི་བཞུགས་གནས་གཙང་མའི་གནས་ལས་སྤགས་པ་གང་ཡིན་པ་སྟེ། རྡོ་རྗེ་ལས། གཙང་མའི་རིས་དག་རྣམ་སྤངས་པའི། །འོག་མིན་ཆེན་པོའི་གནས་མཆོག་ན། །ཞེས་དང་། རྒྱ་མཚོ་ལས། འཇིག་རྟེན་གནས་ཀྱི་འོག་མིན་ལས། །ཉིས་འགྱུར་ཤིན་ཏུ་སྤགས་པ་ན། །ངོ་བོ་མཐའ་གསུམ་ལས་འདས་པ། །མ་སྤངས་རྒྱན་རྫོགས་གཞལ་ཡས་ཁང་། །ཞེས་སོ། །དེ་ཡང་རྒྱུའི་བྱང་སེམས་ཀྱིས་ས་དང་པོའི་བདེན་པ་མཐོང་བའི་གནས་གཙང་མའི་འོག་མིན་ལས། ངེས་དོན་དུ་འཚང་རྒྱ་བའི་ཞིང་ཁམས་འོག་མིན་ཆེན་པོ་ཉིས་འགྱུར་གྱིས་འཕགས་པར་གསུངས་པ་ནི། ཚོགས་ལམ་གྱི་སྣ་ཟིན་ནས་མཐོང་ལམ་ཐོབ་པ་ལ་ཡུན་ཇི་ཙམ་ཐོགས་པའི་ཉིས་འགྱུར་ས་དང་པོ་ནས་སངས་རྒྱས་ཀྱི་སའི་བར་དུ་དགོས་པ་ལ་དགོངས་པ་ཡིན་གྱི། གཙང་མའི་གནས་དེའི་ཡ་རོལ་ན་ཡོད་པའི་ངེས་པ་མེད་དེ། སངས་རྒྱས་ཀྱི་ཞིང་ནི་རང་གང་ན་བཞུགས་པའི་རང་སྣང་ཡིན་པས་མ་དག་པའི་ཞིང་སྤངས་པའི་ཕ་རོལ་ན་དག་པའི་ཞིང་གཞན་ཞིག་བློས་བཙལ་དུ་མེད་པའི་ཕྱིར་རོ། །དེ་ལྟར་ཡང་རྒྱས་པ་ལས། ཡང་དག་ཤེས་པའི་རང་རིག་བློ་མེད་ན། །བདེ་གཤེགས་ཞིང་ཡང་ངན་སོང་གནས་སུ་མཐོང་། །ཐེག་མཆོག་མཉམ་པའི་དོན་ཉིད་རྟོགས་པ་ན། །ངན་སོང་གནས་ཀྱང་འོག་མིན་དགའ་ལྡན་གནས། །ཞེས་དང་། རྡུལ་ཕྲ་རབ་གཅིག་གི་སྟེང་ནའང་སངས་རྒྱས་ཀྱི་ཞིང་ཚད་མེད་པ་མ་འགགས་པར་སྣང་བས་བསམ་གྱིས་མི་ཁྱབ་པའི་གནས་ཏེ། སྡོང་པོ་བཀོད་པ་ལས། སྤུ་ཡི་རྩེ་མོ་གཅིག་ལ་ཡང་། །ཞིང་རྣམས་བྱེ་བ་བསམ་མི་ཁྱབ། །སྣ་ཚོགས་དབྱིབས་ཀྱང་ཐ་དད་དེ། །དེ་དག་འདྲེས་པར་གྱུར་པ་མེད། །ཅེས་དང་། བཟང་སྤྱོད་ལས། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །ཞེས་སོ། །དོན་ལ་ནམ་མཁས་གར་ཁྱབ་ཏུ་སངས་རྒྱས་ཀྱི་སྐུ་དང་ཕྲིན་ལས་ཀྱིས་ཁྱབ་པས། སངས་རྒྱས་ཀྱི་ཞིང་ལ་ཕྱོགས་དང་རིས་སུ་ཆད་པ་མེད་དེ། ཤཱཀྱ་ཐུབ་པའི་ཞིང་འདི་ཉིད་ཀྱང་དག་དང་མ་དག་པའི་ཞིང་ཁམས་སོ་སོ་བར་མཐོང་ན། རང་གི་བློ་སྣང་ཙམ་ལས་དག་པ་དང་མ་དག་པའི་ཞིང་རང་མཚན་པ་ཞིག་ལོགས་ན་ཡོད་པ་མ་ཡིན་ནོ། །དེ་ཡང་འདི་ལྟར་དྲི་མ་མེད་པར་གྲགས་པའི་མདོ་ལས། བཙུན་པ་ཤཱ་རིའི་བུས་སྨྲས་པ། བདག་གིས་ས་ཆེན་པོ་འདི་མཐོ་དམན་དང་གཡང་ས་དང་ལྗན་ལྗིན་གྱིས་གང་བར་མཐོང་ངོ་ཞེས་ཟེར་རོ། །སངས་རྒྱས་མྱ་ངན་མེད་པའི་ཞིང་ནས་འོང་པའི་ཚངས་པ་རལ་པ་ཅན་གྱིས་སྨྲས་པ། བདག་གིས་ནི་བཅོམ་ལྡན་འདས་ཤཱཀྱ་ཐུབ་པའི་ཞིང་འདི་གཞན་འཕྲུལ་དབང་བྱེད་ཀྱི་ལྷའི་གནས་ཀྱི་བཀོད་པ་ཕུན་སུམ་ཚོགས་པ་བཞིན་དུ་ཡོངས་སུ་དག་པར་མཐོང་ངོ་ཞེས་ཟེར་རོ། །དེ་ནས་བཅོམ་ལྡན་འདས་ཀྱིས་འཁོར་གྱི་དཀྱིལ་འཁོར་རྣམས་ལ་སངས་རྒྱས་ཀྱི་ཞིང་འདིའི་རང་བཞིན་བསྟན་པར་མཛད་པས། ཐམས་ཅད་ཀྱིས་ཤར་ཕྱོགས་ཀྱི་སངས་རྒྱས་རིན་པོ་ཆེའི་རྒྱན་བཀོད་པའི་ཞིང་ཁམས་བཞིན་ཡོངས་སུ་དག་པར་མཐོང་བར་གྱུར་པ་དེའི་ཚེ། བཅོམ་ལྡན་འདས་ཀྱིས་བཀའ་སྩལ་པ། ངའི་སངས་རྒྱས་ཀྱི་ཞིང་འདི་ནི་རྟག་ཏུ་འདི་འདྲ་སྟེ། ཁྱེད་རྣམས་ཀྱིས་མི་མཐོང་ངོ་། །ཞེས་གསུངས་པ་ལྟར་རོ། །དེས་ན་ལོངས་སྐུའི་གནས་དེའི་རང་བཞིན་ནི། ཆོས་ཀྱི་དབྱིངས་ཤིན་ཏུ་རྣམ་པར་དག་པ་ཡིན་པས་མཐའ་དང་དབུས་ལ་སོགས་པ་གང་གི་ཡང་རིས་སུ་ཆད་པ་མེད་པས་ནམ་མཁའ་ལྟར་བསམ་གྱིས་མི་ཁྱབ་པ་སྟེ། འགྲེལ་ཆུང་ལས། མཐའ་དབུས་མེད་པ་ཆོས་ཀྱི་དབྱིངས། །དེ་ནི་གནས་ཀྱི་བླ་མར་འདོད། །ཅེས་སོ། ། གཉིས་པ་ངོ་བོ་ནི། དེ་ལྟ་བུའི་གནས་ན་ཡོན་ཏན་གྱི་ཁྱད་པར་རང་སྣང་བའི་ཕོ་བྲང་གི་བཀོད་པ་ཇི་ལྟ་བུ་སྙམ་ན། དེ་འཆད་པ་ལ། འགྲེལ་ཆུང་ལས། གཞལ་ཡས་གཞི་དང་རྒྱུ་དང་རྒྱ། །དབྱིབས་དང་གློ་འབུར་རྩེ་མོ་དང་། །རྒྱན་དང་སྒོ་ཁྱུད་རྟ་བབས་དང་། །མཚན་ཉིད་གདན་གྱི་རྣམ་པ་སྟེ། །ཞེས་དོན་བཅུ་གཅིག་ཏུ་གསུངས་པ་ལས། དང་པོ་འོག་གཞི་ནི། གཞི་ཚད་མེད་ཅེས་སོགས་ཏེ་འོག་གཞིའི་རྒྱ་ཁྱོན་བློས་ཚད་དམིགས་སུ་མེད་པར་བརྡལ་བའི་རང་བཞིན་ཡེ་ཤེས་ལྔ་མཚོན་བྱེད་ཀྱི་རྟགས་རྣམ་པ་འཁོར་ལོ་རྩིབས་བཞི་ལྟེ་བ་དང་བཅས་པ་མ་འདྲེས་པར་གསལ་བའི་སྟེང་ལ་སྟེ། རོལ་པ་ཆེན་པོ་ལས། འཁོར་ལོ་ཆེན་པོའི་ས་གཞི་ལ། །ཁང་པ་གྲུ་བཞི་རྣམ་པར་བརྗིད། །ཅེས་སོ། །གཉིས་པ་རྒྱུ་ནི། ཡེ་ཤེས་རིན་པོ་ཆེ་འབར་བའི་ཞེས་སོགས་ཏེ། ཡེ་ཤེས་ཉིད་དབྱིབས་དང་ཁ་དོག་ཏུ་རང་སྣང་བས་གདུལ་བྱའི་རེ་བ་སྐོང་བའི་རྟགས་སུ་རིན་པོ་ཆེ་འོད་འབར་བ་ལས་གྲུབ་པའི་གཞལ་ཡས་ཁང་ཆེན་པོའོ། །གསུམ་པ་རྒྱ་ཚད་ནི། རྒྱ་ཕྱོགས་བཅུར་ཞེས་སོགས་ཏེ་ཆོས་ཀྱི་དབྱིངས་ལ་རྒྱ་ཚད་མེད་པའི་རྟགས་སུ་གཞལ་ཡས་ཁང་དེའི་ཚད་ཕྱོགས་བཅུ་ཐམས་ཅད་དུ་རྒྱ་ཡོངས་སུ་མ་ཆད་པའོ། །བཞི་པ་དབྱིབས་ནི། ཡོན་ཏན་ཞེས་སོགས་ཏེ། དེ་ལྟར་རྒྱ་མ་ཆད་པས་ཕྱལ་བར་འགྱུར་རམ་སྙམ་ན། མ་ཡིན་ཏེ་རང་བྱུང་གི་ཡེ་ཤེས་ལ་འབྲས་བུ་ཆེ་བའི་ཡོན་ཏན་དཔག་ཏུ་མེད་པ་རྒྱས་པའི་ཕྱིར། དེའི་རྟགས་ཀྱི་ཕྱག་རྒྱ་དབྱིབས་གྲུ་བཞི་པར་གྱུར་པའོ། །ལྔ་པ་གློ་འབུར་ནི། ལྷག་པའི་ཞེས་སོགས་ཏེ། ཡེ་ཤེས་རེ་རེ་ཡང་ལྷག་པའི་ཡེ་ཤེས་བཞི་བཞི་དང་ལྡན་པའི་རེ་བ་སྐོང་བའི་རྟགས་སུ་གྲུ་ཆད་ལས་ཕྱིར་འཕྱར་བའི་རིན་པོ་ཆེའི་གློ་འབུར་རིགས་བཞིའི་ཁ་དོག་ཅན་གྱིས་མཛེས་པའོ། །དྲུག་པ་རྩེ་མོའི་དོན་ནི། རྩེ་མོ་ཞེས་སོགས་ཏེ། གཞལ་ཡས་ཁང་དེའི་རྩེ་མོ་བུམ་པ་ཟླུམ་པོའི་རྣམ་པར་འཁྱིལ་བ་ནི། ཐུགས་རང་རིག་པའི་ཡེ་ཤེས་ཉིད་ཕྱོགས་བཅུ་དུས་བཞིའི་སངས་རྒྱས་ཀུན་གྱི་དཀྱིལ་འཁོར་མ་ལུས་པ་ཐམས་ཅད་པར་རང་སྣང་བའི་ཕྱིར། རང་བཞིན་སོ་སོ་མ་ཡིན་ཞིང་། ངོ་བོ་ཉིད་གཅིག་པའི་ཡེ་ཤེས་སྤྲོས་པ་ཀུན་དང་བྲལ་བའི་ཀློང་དུ་འཁྱིལ་བ་མཚོན་པའི་རྟགས་སོ། །བདུན་པ་རྒྱན་ནི། ཡེ་ཤེས་བསམ་གྱིས་ནས། བཀླུབས་པ་ཞེས་པའི་བར་ཏེ། ཐུགས་རང་རིག་པའི་ཡེ་ཤེས་ཀྱི་རྩལ་མ་འགགས་པ་ལས་ཡེ་ཤེས་ལྔའམ་ཉི་ཤུ་རྩ་ལྔ་ལ་སོགས་པའི་བྱེ་བྲག་བསམ་གྱིས་མི་ཁྱབ་པ་མངའ་བའི་རྟགས་སུ་ཡེ་ཤེས་རང་སྣང་བའི་རྒྱན་རིན་པོ་ཆེ་ལས་གྲུབ་པའི་དབྱིབས་དང་ཁ་དོག་ལ་སོགས་པ་རྣམ་པ་ཐ་དད་པའི་བྱེ་བྲག་ཚད་མེད་པ་དང་ལྡན་པས་གཞལ་ཡས་ཁང་གཞན་ལས་ཁྱད་པར་དུ་གྱུར་པའི་བཀོད་པ་ཕུན་སུམ་ཚོགས་པས་བརྒྱན་པ། ཐེག་པ་དང་ས་ལམ་གཞན་ལས་འདི་ཉིད་འཕགས་པའི་རྟགས་སུ་སྒོ་དང་ཁྱམས་སོགས་ནས་ལྟེ་བའི་བར་རྡོ་རྗེ་འགྲེང་བུ་རེས་རིམ་པར་སྤགས་པ། ཆོས་ཀྱི་དབྱིངས་ལ་མཐའ་ཐུག་པ་མེད་པའི་རྟགས་སུ་ཕོ་བྲང་གི་རྩེ་མོ་དེ་བཞིན་གཤེགས་པའི་གཙུག་ཏོར་ལྟར་མཐོ་དམའི་ཚད་འདི་ཞེས་དཔག་ཏུ་མེད་པ། ཡེ་ཤེས་ཀྱི་རྩལ་སྣང་རིན་པོ་ཆེ་སྣ་ཚོགས་ལས་གྲུབ་པའི་རྒྱན་གྱི་ཁྱད་པར་ཡང་། ཐུགས་རྗེ་དང་སྤྲུལ་པའི་ཕྲིན་ལས་རྒྱུན་མི་ཆད་པའི་རྟགས་སུ་ཕྲེང་བ་དང་། བདེན་གཉིས་དབྱེར་མི་ཕྱེད་པའི་རྟགས་སུ་ཆུན་འཕྱང་དང་། ཐབས་སྣ་ཚོགས་པ་མ་འདྲེས་ཡོངས་སུ་རྫོགས་པའི་རྟགས་སུ་ཤར་བུའི་རྒྱན་དང་། གཞན་ཡང་འདོད་ཡོན་ཐམས་ཅད་མ་སྤངས་རྣམ་དག་རོལ་པའི་རྒྱན་དུ་ཤར་བའི་རྟགས་སུ་ཡིད་དུ་འོང་བའི་གཟུགས་སྣ་ཚོགས་དང་། སྒྲ་སྣ་ཚོགས་དང་། དྲི་སྣ་ཚོགས་དང་། རོ་སྣ་ཚོགས་དང་། རེག་བྱ་སྣ་ཚོགས་པ་དང་། དེ་དག་ཐོགས་པའི་རྡོ་རྗེའི་ལྷ་མོ་རྣམས་ཀྱིས་ཕྱོགས་བཅུར་སྤྲིན་ཕུང་ལྟར་འཁྲིགས་པ་ནི་འབད་རྩོལ་མེད་པར་རང་བྱུང་ལ། དེ་དག་ཐམས་ཅད་ཀྱང་ཕན་ཚུན་གཅིག་གིས་གཅིག་མི་བསྒྲིབ་པར་ཕྱི་ནང་ཟང་ཐལ་དུ་གསལ་བའི་རྒྱན་གྱི་བྱེ་བྲག་བསམ་གྱིས་མི་ཁྱབ་པའི་བཀོད་པས་མཛེས་པར་བརྒྱན་ཅིང་བཀླུབས་པའོ། །བརྒྱད་པ་སྒོ་ནི། རྣམ་པར་ཐར་པ་བཞིའི་ཞེས་སོགས་ཏེ། དངོས་པོ་དང་མཚན་འཛིན་གྱི་སྒྲིབ་པ་ལས་རྣམ་པར་ཐར་པའི་སྒོ་ཐུན་མོང་བ་གསུམ་དང་། ཐུན་མོང་མ་ཡིན་པ་རང་བཞིན་གྱིས་འོད་གསལ་བ་སྟེ་བཞིའི་སྒོ་ནས་བྱང་ཆུབ་ཆེན་པོར་ལྷུན་གྱིས་འཇུག་པའི་རྟགས་སུ་སྒོ་བཞི་སྒོ་ཁྱུད་ཀྱི་ཟླས་དྲངས་པའི་འགྲམ་ལོགས་དང་ཡ་ཕུབས་ཅན་གྱིས་ཕྱོགས་བཞིར་བརྒྱན་པ་སྟེ། ལེ་ལག་ལས། སྟོང་སྨོན་མཚན་མེད་འོད་གསལ་འཇུག །དེ་ཕྱིར་ཡེ་ཤེས་སྒོ་བཞིར་ཤར། །ཞེས་སོ། །དགུ་པ་རྟ་བབས་ནི། རྣམ་པར་ཐར་པ་བརྒྱད་ཀྱི་ཞེས་སོགས་ཏེ། རྡོ་རྗེ་མེ་ལོང་ལས། ལམ་བརྒྱད་རིམ་པར་བགྲོད་པ་ཡིས། །འབྲས་བུའི་ཡོན་ཏན་ཀུན་རྫོགས་པས། །རྟ་བབས་རྒྱུ་འབྲས་བཅུ་དྲུག་བསྟན། །ཅེས་པས་རྒྱུ་དང་འབྲས་བུའི་རྟ་བབས་བརྒྱད་བརྒྱད་དེ་བཅུ་དྲུག་ལས། རྒྱུའི་རྟ་བབས་ནི། མཚོན་སྒོ་རྣམ་ཐར་བཞིའི་སྒོ་ནས་མཚོན་བྱ་བྱང་ཆུབ་ཆེན་པོར་འཇུག་པ་དང་། འཁོར་བ་ལས་རྣམ་པར་ཐར་པ་ཐེག་པ་བརྒྱད་བགྲོད་ནས་འཇུག་པའི་རྟགས་སུ་སྒོ་ཕུགས་ཀྱི་ཕྱི་ནང་གཉིས་ན་ཐེམ་སྐས་བཞི་བཞི་སྟེ་བབས་ཞོན་གྱི་རྟ་བབས་བརྒྱད་དང་ལྡན་པའོ། །དེ་ཡང་ལེ་ལག་ལས། དེར་འགྲོ་ལམ་སྟེགས་བརྒྱད་དང་ལྡན། །རྟ་བབས་བརྒྱད་དུ་འགྱུར་བ་ཡིན། །ཞེས་དང་། སྡུད་པ་ལས། དེ་གང་ཞོན་ནས་སེམས་ཅན་ཐམས་ཅད་མྱ་ངན་ཟློ། །ཞེས་གསུངས་པ་ལྟར་རོ། །འབྲས་བུའི་རྟ་བབས་ནི། ཐེག་བརྒྱད་ཀྱི་གྲུབ་མཐའི་ཡོན་ཏན་བརྒྱད་རྫོགས་པའི་རྟགས་སུ་སྒོ་ཁང་གི་སྟེང་ན་རྒྱན་གྱི་རྟ་བབས་བརྒྱད་དང་ལྡན་པ་སྟེ། སྒྱུ་འཕྲུལ་བྱེ་བྲག་བསྟན་པ་ལས། དེ་ཡི་གྲུབ་པའི་མཐའ་རྫོགས་པའི། །ཡོན་ཏན་བརྒྱད་ཕྱིར་རྟ་རྐང་དང་། །ཆུ་སྐྱེས་སྒྲོམ་དང་ཟ་ར་ཚགས། །སྣ་འཕྱང་ཆུན་འཕྱང་ཤར་བུ་དང་། །ཁྱུང་མགོ་མཛེས་པས་རིམ་པར་འཁྲིགས། །ཞེས་སོ། །བཅུ་པ་གནས་ཀྱི་མཚན་ཉིད་ནི། ཕྱི་དང་ནང་མེད་པ་ཞེས་སོགས་ཏེ། གཞལ་ཡས་ཁང་དེའི་ཕྱི་དང་ནང་མེད་པ་ཐམས་ཅད་རང་རིག་པའི་ཡེ་ཤེས་ཀྱི་རྩལ་སྣང་འབའ་ཞིག་ཏུ་གྱུར་པའི་ཕྱིར་ཀུན་ཏུ་ཡང་ནང་དུ་གྱུར་པ་ན་ཞེས་བྱའོ། །བཅུ་གཅིག་པ་གདན་ཁྲི་ནི། མི་འཇིགས་པ་ནས། རིན་པོ་ཆེའི་གདན་ལ་ཞེས་པའི་བར་ཏེ། གསང་བའི་ཐེག་པ་འདི་ནི་ཐེག་པ་འོག་མ་རྣམས་ལ་ཉམ་མི་ང་བའི་ཕྱིར་རམ། རྒྱལ་བའི་ཐུགས་ལ་མི་འཇིགས་པ་བཞི་ལྷུན་གྱིས་གྲུབ་པ་མཚོན་བྱེད་དབུས་སུ་སེང་གེའི་ཁྲི་དང་། ཐེག་པ་འོག་མར་མི་ཆུད་པའི་དོན་འདིར་ཤོང་ཞིང་ཐེག་པས་སམ་སྐུ་སྟོབས་བཅུ་དང་ལྡན་པའི་རྟགས་སུ་ཤར་དུ་གླང་པོ་ཆེའི་ཁྲི་དང་། འདིས་གདུལ་བྱ་རྣམས་མྱུར་དུ་སྒྲོལ་ཞིང་ཡོན་ཏན་རྫུ་འཕྲུལ་གྱི་རྐང་པ་བཞི་དང་ལྡན་པའི་རྟགས་སུ་ལྷོར་རྟའི་ཁྲི་དང་། འདིས་ལས་ཉོན་མ་སྤངས་པར་དབང་དུ་བྱེད་ཅིང་གསུང་དབང་བཅུ་དང་ལྡན་པའི་རྟགས་སུ་ནུབ་ཏུ་རྨ་བྱའི་ཁྲི་དང་། ཕྲིན་ལས་འགྲོ་བ་སྒྲོལ་བ་ལ་ཆགས་པ་དང་ཐོགས་པ་མེད་པའི་རྟགས་སུ་བྱང་དུ་ནམ་མཁའ་ལྡིང་སྟེ་ཤང་ཤང་གི་ཁྲི་དང་། ཐེག་པ་བརྒྱད་བགྲོད་ནས་འབྲས་བུའི་ཡོན་ཏན་ཐུགས་སུ་ཆུད་པའི་རྟགས་སུ་སེང་གེ་ལ་སོགས་པ་དེ་དག་རེ་རེ་ཡང་བརྒྱད་བརྒྱད་དེ་མཇུག་མ་ནང་དུ་བསྣོལ་ནས་རིན་པོ་ཆེའི་ཁྲི་རྐང་འདེགས་པའོ། །དེ་ཡང་དབང་བསྐུར་རྒྱལ་པོའི་རྒྱུད་ལས། ཐུགས་ནི་མི་འཇིགས་བཞི་ཡིས་བདུད་བཞི་འཇོམས། །དེ་གྲུབ་རྟགས་སུ་སེང་གེའི་ཁྲི་ལ་བཞུགས། །སྐུ་ནི་སྟོབས་བཅུས་མི་དགེ་བཅུ་རྣམས་འདུལ། །དེ་གྲུབ་རྟགས་སུ་གླང་ཆེན་ཁྲི་ལ་བཞུགས། །ཡོན་ཏན་རྫུ་འཕྲུལ་རྐང་བཞིས་ཆགས་མེད་སྒྲོལ། །དེ་གྲུབ་རྟགས་སུ་རྟ་མཆོག་ཁྲི་ལ་བཞུགས། །གསུང་ནི་དབང་བཅུ་མཐར་ཕྱིན་རྒྱལ་པོའི་གསུང་། །དེ་གྲུབ་རྟགས་སུ་རྨ་བྱའི་ཁྲི་ལ་བཞུགས། །ལས་ནི་ཕྲིན་ལས་བཞི་ཡིས་འགྲོ་བ་སྒྲོལ། །དེ་གྲུབ་རྟགས་སུ་ཤང་ཤང་ཁྲི་ལ་བཞུགས། །ཞེས་སོ། །ཐུགས་རང་བཞིན་གྱིས་རྣམ་པར་དག་པས་འོད་གསལ་ཞིང་ཐབས་ཤེས་ཟུང་དུ་འཇུག་པའི་རྟགས་སུ་ཉི་ཟླའི་དཀྱིལ་འཁོར་དང་། ཉེས་པའི་སྐྱོན་གྱིས་གོས་པ་མེད་པའི་རྟགས་སུ་པདྨ་དང་། གདུལ་བྱའི་རེ་བ་ཡིད་བཞིན་དུ་སྐོང་བའི་རྟགས་སུ་རིན་པོ་ཆེའི་གདན་ཏེ། དེ་ཡང་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པའི་རྟགས་སུ་ཀ་བས་བཏེགས་པའི་ཁྲི་རྐང་མཛོད་མིག་བདུན་པའོ། །དེ་ལྟར་གདན་ལྔ་བརྩེགས་དེ་དག་གཙོ་བོ་དང་རིགས་ལྔའི་གདན་ཏེ། འཁོར་གཞན་རྣམས་ལ་ནི་སོ་སོའི་གནས་སུ་ཇི་ལྟར་འོས་པའི་གདན། སེམས་དཔའ་ལ་ནི་སུམ་བརྩེགས་སོ། །ཉི་རྐྱང་ཁྲོ་ལ་པད་རྐྱང་ཐུབ། །ཅེས་པ་ལྟར་ཡིན་ལ། ཀུན་བཟང་ཡབ་ཡུམ་ནི་དཀྱིལ་འཁོར་ལ་འགོད་པའི་ཚེ་བཞི་བརྩེགས་སུ་བཤད་ཀྱང་། གླེང་གཞིའི་སྐབས་འདིར་ཕོ་བྲང་གི་ལྟེ་བར་བཞུགས་ཤིང་། སྤྱན་འགྲེལ་ལས། གདན་ཡང་ལྔ་བརྩེགས་སུ་གསུངས་སོ། །འོ་ན་འདིར་མི་བསྐྱོད་པ་གང་དུ་བཞུགས་སྙམ་ན། འཆད་པའི་སྐྱེས་བུ་རིགས་ལྔ་ལས་ཐུགས་ཀྱི་སྒྱུ་འཕྲུལ་གྱི་སྐབས་འདིར་རྡོ་རྗེ་མི་བསྐྱོད་པ་ནི་སྟོན་པ་རིགས་དྲུག་པའི་མདུན་ན་བཞུགས་ཏེ། རྒྱ་མཚོ་ལས། འཁོར་ལོ་འབར་བའི་ལྟེ་བ་ལ། །བདག་པོ་ཀུན་བཟང་འཁོར་ལོ་བསྐོར། །བཀའ་སྡོད་སྐྱེས་བུ་མདུན་ན་གནས། །བརྗོད་པ་མེད་བཞིན་གོ་བར་མཛོད། །ཅེས་དང་། ཐལ་རྒྱུད་ལས། འཁོར་ལོའི་ལྟེ་བར་མི་འཇིགས་སྟེང་། །བདག་པོ་ཀུན་བཟང་འཁོར་རྣམས་ལ། །ཀུན་འབྱུང་སྒྱུ་འཕྲུལ་སྟོན་པའི་ཚེ། །མི་བསྐྱོད་རྒྱལ་པོ་མདུན་ན་གནས། །ཞེས་སོ། ། ལྔ་པ་འཁོར་ཕུན་སུམ་ཚོགས་པ་ལ་གཉིས་ཏེ། རང་བཞིན་གཉིས་སུ་མེད་པའི་འཁོར་དང་། རིག་པ་ཁྱད་པར་ཅན་གྱི་འཁོར་རོ། །དང་པོ་ལ་གཉིས་ཏེ། རིགས་ཀྱི་ཡབ་ལྔ་དང་། ཡུམ་ལྔའོ། །དང་པོ་ནི། བཅོམ་ལྡན་འདས་དེ་བཞིན་གཤེགས་པ་ནས། འཚེར་བ་ཞེས་པའི་བར་ཏེ། དེ་ཡང་སྤངས་རྟོགས་ཀྱི་ཡོན་ཏན་མཐར་ཕྱིན་ཅིང་མཐའ་གཉིས་ལ་མི་གནས་པས་བཅོམ་ལྡན་འདས་དང་། ཡེ་ཇི་བཞིན་པའི་དབྱིངས་སུ་གཤེགས་པས་དེ་བཞིན་གཤེགས་པའོ། །མཚན་གཉིས་པོ་དེ་སྟོན་པ་རིགས་དྲུག་པ་དང་ཐུན་མོང་བ་སྟེ། སྤར་ཁབ་ལས། མཚན་ཐུན་མོང་བ་གཉིས་ནི་སྔར་ཐལ་ཏེ། ཞེས་གསུངས་ཤིང་། དེས་མཚོན་ནས་སྟོན་པའི་རང་བཞིན་བདུན་པོ་རིགས་ལྔའི་རང་བཞིན་དུའང་འགྱུར་བས་རང་བཞིན་གཉིས་སུ་མེད་པའི་འཁོར་ཞེས་གྲགས་སོ། །རྣམ་པར་ཤེས་པ་ནི་ཡུལ་རྣམ་པར་རིག་པའི་མཚན་ཉིད་ཅན་གྱི་ཚོགས་བརྒྱད་དོ། །གཟུགས་ནི་གཟུགས་སུ་རུང་བའི་མཚན་ཉིད་ཅན་གྱི་རྒྱུའི་གཟུགས་བཞི། འབྲས་གཟུགས་བཅུ་གཅིག་སྟེ་བཅོ་ལྔའོ། །ཚོར་བ་ནི་ཉམས་སུ་མྱོང་བའི་མཚན་ཉིད་ཅན་གྱི་ཆོས་བདེ་བ། སྡུག་བསྔལ་བ། བཏང་སྙོམས་གསུམ་གྱིས་བསྡུས་པའོ། །འདུ་ཤེས་ནི་མཚན་མར་འཛིན་པའི་མཚན་ཉིད་ཅན་གྱི་ཆོས་མཚན་མ་མེད་པ། མཚན་མ་དང་བཅས་པ། རྒྱ་ཆེ་བ། ཆུང་བ། ཚད་མེད་པ་སྟེ་ལྔའོ། །འདུ་བྱེད་ནི་མངོན་པར་འདུ་བྱེད་པའི་མཚན་ཉིད་ཅན་གྱི་སེམས་པ་སྟེ། ཀུན་ཏུ་འགྲོ་བ་ལྔ། ཡུལ་སོ་སོར་ངེས་པ་ལྔ། དགེ་བ་བཅུ་གཅིག །རྩ་བའི་ཉོན་མོངས་པ་དྲུག །ཉེ་བའི་ཉོན་མོངས་པ་ཉི་ཤུ། གཞན་འགྱུར་བཞི་སྟེ་སེམས་བྱུང་ལྔ་བཅུ་རྩ་གཅིག་ལས་ཚོར་བ་དང་འདུ་ཤེས་གཉིས་ལོགས་སུ་བགྲངས་པའི་ལྷག་མ་བཞི་བཅུ་རྩ་དགུའོ། །གཞུང་ལུགས་ཕལ་མོ་ཆེར་ཕུང་པོ་ལྔའི་མགོ་གཟུགས་ཕུང་ནས་བརྩམས་ཏེ་སྟོན་ན། ཅིའི་ཕྱིར། འདིར་རྣམ་ཤེས་དང་པོར་སྨོས་ཞེ་ན། གཟུགས་ལ་སོགས་པའི་ཆོས་རྣམས་ཀྱང་སེམས་ཀྱི་རོལ་རྩལ་ཙམ་ལས་གཞན་མ་ཡིན་པས། སེམས་ཉིད་གཙོ་བོའི་དབང་དུ་མཛད་ནས་རྣམ་ཤེས་དང་པོར་སྨོས་ཤིང་། ལྷའི་དུས་ནའང་དཀྱིལ་འཁོར་གྱི་གཙོ་བོ་མི་བསྐྱོད་པ་དང་སྦྱར་རོ། །ལྷ་དང་རྟོག་པའི་ཆོས་མཐུན་བརྩི་བ་ནི། རྣམ་ཤེས་ཐུགས་ཀྱི་བདག་ཉིད་ཡིན་པས་ཐུགས་ཀྱི་རིགས་མི་བསྐྱོད་པ་དང་། གཟུགས་ནི་སྐུ་དང་དངོས་སུ་མཐུན་པས་ན་སྐུའི་རིགས་རྣམ་སྣང་དང་། ཚོར་བ་ནི་ཡུལ་ལ་ལོངས་སྤྱོད་དུ་ལྟ་བའི་གཞི་ཡིན་པས་ཡོན་ཏན་གྱི་རིགས་རིན་ཆེན་འབྱུང་གནས་དང་། འདུ་ཤེས་ནི་མཚན་མར་འཛིན་པའི་བདག་ཉིད་ཕྱི་ནང་གི་ཆོས་རྣམས་ལ་ཐ་སྙད་དུ་འདོགས་པའི་ལས་ཀྱིས་བརྡའ་སྤྲོད་པས་གསུང་གི་རིགས་སྣང་མཐའ་དང་། འདུ་བྱེད་ནི་བྱ་བ་བྱེད་པ་ལས་ཀྱི་བདག་ཉིད་ཡིན་པས་ཕྲིན་ལས་ཀྱི་རིགས་དོན་ཡོད་གྲུབ་པ་སྟེ། ཇི་སྐད་དུ། གཟུགས་ནི་རྣམ་པར་སྣང་མཛད་ཉིད། །ཚོར་བ་རིན་ཆེན་འབྱུང་ལྡན་ལ། །འདུ་ཤེས་སྣང་བ་མཐའ་ཡས་ཏེ། །འདུ་བྱེད་དོན་ཡོད་གྲུབ་པ་ཉིད། །རྣམ་པར་ཤེས་པ་མི་བསྐྱོད་པ། །ཞེས་ཡེ་ཤེས་གྲུབ་པའི་རྒྱུད་དུ་གསུངས་པ་ལྟར་རོ། །གང་དག་དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་རྣམ་སྣང་དུ་བཞེད་པ་ནི་མ་ཡིན་ཏེ། རྡོ་རྗེ་ལས་རིམ་ལས། རྣམ་ཤེས་ནམ་མཁའི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པ། །མི་བསྐྱོད་ཡབ་ཡུམ་རང་བཞིན་ལས། །ཞེས་པས་གནོད་པའི་ཕྱིར་རོ། །ཡན་ལག་བརྒྱད་ཅུ་དང་ལྡན་པའི་ཕུང་པོ་ལྔ་མ་དག་པ་འཁོར་བའི་ཆོས་ལྟར་སྣང་བ་འདི་ཁོ་ན་རིགས་ལྔའི་སངས་རྒྱས་ཡིན་ནམ་སྙམ་ན། མ་ཡིན་ཏེ། མ་དག་པའི་ཕུང་སོགས་རྟོག་ཚོགས་འདི་དག་སྦྱང་བྱའི་ཆོས་མེད་སྣང་གློ་བུར་བ་ཡིན་པས་རིགས་ལྔའི་སངས་རྒྱས་སུ་མི་རུང་སྟེ། དཔེར་ན་མིག་ནད་ཅན་གྱིས་དུང་སེར་པོར་མཐོང་བའི་ཚེ། སེར་པོ་དེ་དུང་གི་ཁ་དོག་གི་གནས་ལུགས་མ་ཡིན་པ་བཞིན་ནོ། །དེ་བས་ན་རྟོག་པ་དང་ལྷ་གཉིས་ཆོས་མཐུན་བརྩི་བའང་དངོས་པོ་ལ་མངོན་པར་ཞེན་པ་རྣམས་ལྷ་རྟོག་དབྱེར་མེད་ཀྱི་ཤེས་རབ་སྐྱེ་བ་ལ་ཁ་དྲང་བའི་ཐབས་ཙམ་དུ་གསུངས་པ་ཡིན་ནོ། །འོ་ན་ཕུང་སོགས་མ་དག་པའི་རྟོག་ཚོགས་ལས་རིགས་ལྔའི་སངས་རྒྱས་གཞན་དུ་གྲུབ་པ་ཞིག་གམ་སྙམ་ན། དེ་ཡང་མ་ཡིན་ཏེ། དེ་དག་གི་སྣང་གཞི་རང་བཞིན་ནམ་གཉུག་མའི་ཕུང་པོ་ལྔ་ཡེ་ནས་རིགས་ལྔའི་སངས་རྒྱས་སུ་རྣམ་པར་དག་པ་དེ་ཉིད་ལམ་རྐྱེན་གྱིས་མངོན་དུ་གྱུར་པ་ལ་འབྲས་བུར་རྣམ་པར་བཞག་པས་ན་རྟོག་ཚོགས་ལས་གཞན་དུའང་བརྗོད་དུ་མེད་པ་སྟེ། མིག་གི་ནད་སྨན་གྱིས་སྦྱངས་པས་དག་པའི་ཚེ་ན་སྔར་སེར་པོར་མཐོང་བའི་དུང་དེ་ཀ་དཀར་པོར་སྣང་བ་ལས། དཀར་པོའི་ཁ་དོག་གཞན་ཞིག་ལོགས་ནས་བཙལ་དུ་མེད་པ་བཞིན་ནོ། །རིགས་ལྔ་ཀའི་མཚན་ལ་རྒྱལ་པོ་ཞེས་སྨོས་པ་ནི། དཔེར་ན་རྒྱལ་པོ་རྣམས་རང་གི་རྒྱལ་སྲིད་ལ་དབང་སྒྱུར་ཞིང་ལོངས་སྤྱོད་པ་དང་། གཞན་གྱི་དཔུང་ཕམ་པ་དང་། རང་གི་དཔུང་རྒྱལ་བར་བྱེད་པ་བཞིན་དུ། ཐུགས་རང་རིག་པའི་ཡེ་ཤེས་ཀྱི་རྟོག་ཚོགས་ལ་དབང་སྒྱུར་བ་དང་། ཟག་པ་མེད་པའི་ཆོས་ལ་མངའ་བརྙེས་པས་བདེ་བ་ཆེན་པོའི་ལོངས་སྤྱོད་ལ་རོལ་པར་མཛད་ཅིང་། ཆོས་ཀྱི་རྒྱལ་སྲིད་བསྐྱངས་པས་གདུལ་བྱའི་རྒྱུད་ཀྱི་སྒྲིབ་གཉིས་བག་ཆགས་དང་བཅས་པའི་དཔུང་མ་ལུས་པ་ཕམ་པ་དང་། ཚོགས་གཉིས་ལ་སོགས་པའི་ཡོན་ཏན་གྱི་དཔུང་རྒྱལ་བར་མཛད་པའི་ཕྱིར་རོ། །མི་བསྐྱོད་པ་ལ་སོགས་པ་སོ་སོའི་མཚན་གྱི་རྒྱུ་མཚན་ཡང་། དེ་བཞིན་གཤེགས་པ་ཐམས་ཅད་ཀྱི་ཐུགས་ཡེ་ཤེས་ནི་ཕྱི་ནང་གི་རྐྱེན་གང་གིས་ཀྱང་བསྐྱོད་པར་མི་ནུས་པས་མི་འགྱུར་བ་རྡོ་རྗེའི་རིགས་མི་བསྐྱོད་པ་དང་། སྐུ་ནི་དེ་བཞིན་ཉིད་ལས་མ་གཡོས་བཞིན་དུ་རྣམ་པ་སྣ་ཚོགས་པར་སྣང་བས་དེ་བཞིན་གཤེགས་པའི་རིགས་རྣམ་སྣང་དང་། ཡོན་ཏན་ནི་དོན་གཉིས་འགྲུབ་པའི་གནས་སུ་གྱུར་པས་རིན་པོ་ཆེའི་རིགས་རིན་ཆེན་འབྱུང་གནས་དང་། གསུང་ནི་ཆགས་པ་མེད་པའི་སྒོ་ནས་འཇིག་རྟེན་དུ་ཆོས་ཀྱི་སྣང་བ་ཆེན་པོ་རྒྱས་པར་མཛད་པས་པདྨའི་རིགས་སྣང་བ་མཐའ་ཡས་དང་། ཕྲིན་ལས་ནི་འགྲོ་བའི་དོན་མཐར་ཕྱིན་པར་མཛད་པས་ལས་ཀྱི་རིགས་དོན་ཡོད་གྲུབ་པ་སྟེ། རྡོ་རྗེ་བཀོད་པ་ལས། སྐུ་ནི་མ་བཅོས་དེ་བཞིན་ཉིད། །ཐུགས་ནི་མི་འགྱུར་རྡོ་རྗེའི་རིགས། །ཡོན་ཏན་ཀུན་འབྱུང་རིན་ཆེན་རིགས། །གསུང་ནི་ཆགས་མེད་པདྨའི་རིགས། །དོན་གྲུབ་སྤྱོད་པ་ལས་ཀྱི་རིགས། །ཞེས་སོ། །དེ་ཡང་འབྲས་ཆོས་ལྔ་ལ་མཚན་ཇི་སྐད་དུ་ཐོབ་པའི་ངེས་པས། དེ་ཉིད་འགྲོ་བ་འདུལ་བའི་ཐབས་ཀྱི་ཕྱག་རྒྱར་འཕྲུལ་པ་:འཆང་བའི་༼འཆད་པའི་༽སྐྱེས་བུ་ལྔ་ལའང་དེ་ལྟར་དུ་གྲགས་སོ། །རིགས་ལྔ་པོ་དེ་དག་ཀུན་གྱི་རིགས་ཀྱི་མཚན་མར་གྱུར་པའི་ཁ་དོག་ཀྱང་། ཆོས་ཉིད་མི་འགྱུར་བའི་བརྡར་ཆོས་དབྱིངས་ཡེ་ཤེས་དང་རྡོ་རྗེའི་རིགས་མཐིང་ག་དང་། ཉེས་པའི་སྐྱོན་གྱིས་མ་གོས་པའི་བརྡར་མེ་ལོང་ལྟ་བུའི་ཡེ་ཤེས་དང་དེ་བཞིན་གཤེགས་པའི་རིགས་དཀར་པོ་དང་། ཆེ་བའི་ཡོན་ཏན་རྒྱས་པའི་བརྡར་མཉམ་ཉིད་ཡེ་ཤེས་དང་རིན་ཆེན་རིགས་སེར་པོ་དང་། གདུལ་བྱའི་དོན་ལ་རྗེས་སུ་ཆགས་པའི་བརྡར་སོར་རྟོག་ཡེ་ཤེས་དང་པདྨའི་རིགས་ལེ་བརྒན་ཏེ་དམར་པོ་དང་། སེམས་ཅན་གྱི་དོན་སྣ་ཚོགས་མཛད་པའི་ཕྲིན་ལས་ལྷུན་གྱིས་གྲུབ་པའི་བརྡར་བྱ་གྲུབ་ཡེ་ཤེས་དང་ལས་ཀྱི་རིགས་རྣམས་ལྗང་གུ་སྟེ། ཐམས་ཅད་ཀྱང་སོ་སོའི་མདོག་ཏུ་གསལ་ཞིང་བཀྲག་མདངས་འཚེར་བའོ། །གཉིས་པ་ཡུམ་ལྔ་ནི། བཙུན་མོ་དམ་པ་ནས། ཁྱབ་པར་བཞུགས་སོ། །ཞེས་པའི་བར་ཏེ། རྟོག་པའི་དུས་ན་འབྱུང་བ་ལྔས་ཕུང་པོ་ལྔ་བསྐྱེད་ཅིང་། ལྷའི་དུས་ན་རིགས་ཀྱི་ཡབ་ལྔས་ལོངས་སྤྱོད་པར་བྱ་བའི་ཡུལ་ལམ། སྲས་བསྐྱེད་པའི་ཡུམ་དུ་གྱུར་པས་ན་བཙུན་མོ། ཡོན་ཏན་གྱི་ཁྱད་པར་གཞན་ལས་འཕགས་པས་ན་དམ་པའོ། །གང་གིས་གོ་ཕྱེ་བས་དངོས་པོ་ཐམས་ཅད་སྣང་བར་བྱེད་པ་ནམ་མཁའ་ནི་ཆོས་ཀྱི་ཁམས་རྣམ་ཤེས་ཀྱི་ཡུལ་ཡིན་པས། དེ་གནས་སུ་དག་པའི་ཚེ། ཐུགས་རྡོ་རྗེའི་རིགས་ཀྱི་ཡུམ་རྡོ་རྗེ་དབྱིངས་ཕྱུག་མ་དང་། སྲ་བ་སའི་ཁམས་ནི་བརྟན་ཅིང་རྟེན་དུ་གྱུར་པས་ན་སྐུའི་རིགས་ཀྱི་ཡུམ་སངས་རྒྱས་སྤྱན་མ་དང་། མཉེན་པ་ཆུའི་ཁམས་ནི་རྒྱུད་བརླན་ཅིང་ཡོན་ཏན་སྡུད་པར་བྱེད་པ་རིན་ཆེན་རིགས་ཀྱི་ཡུམ་མཱ་མ་ཀཱི་དང་། དྲོ་བ་མེའི་ཁམས་ནི་མཚན་འཛིན་གྱི་སྤུ་རིས་གསལ་བར་བྱེད་ཅིང་ཤེས་རབ་ཀྱི་མེས་དག་པར་བྱེད་པའི་བདག་ཉིད་པདྨ་རིགས་ཀྱི་ཡུམ་གོས་དཀར་མོ་དང་། བསྐྱོད་པ་རླུང་གི་ཁམས་ནི་གདུལ་བྱ་སྒྲོལ་བ་ལ་ཐོགས་པ་མེད་པ་ལས་ཀྱི་རིགས་ཀྱི་ཡུམ་དམ་ཚིག་སྒྲོལ་མ་སྟེ། དེ་ཡང་འབྱུང་ལྔའི་ཁམས་ཡེ་ནས་ཡུམ་ལྔའི་དབྱིངས་སུ་དག་པས་སམ། སྲས་དང་བདེ་བའི་ཡེ་ཤེས་ཀྱི་འབྱུང་ཁུངས་སུ་གྱུར་པས་ན་ཐམས་ཅད་ལ་དབྱིངས་ཀྱི་སྒྲས་སྨོས་སོ། །དེ་དག་ལ་སོགས་པ་རིགས་ཀྱི་བཙུན་མོའི་ཚོགས་དང་། དོན་རང་བཞིན་གཉིས་སུ་མེད་ཅིང་། རྟགས་ཡབ་ཡུམ་འཁྲིལ་བས་མཉམ་པར་སྦྱོར་བའི་ཚུལ་གྱིས་བཞུགས་ཏེ། ཇི་ལྟར་ཞེ་ན། ཁྱབ་བྱེད་ཆོས་ཀྱི་དབྱིངས་ཀྱིས་ཁྱབ་བྱ་ཤེས་བྱའི་དཀྱིལ་འཁོར་ཐམས་ཅད་ལ་ཁྱབ་པས་ནམ་མཁའི་མཐའ་ཀླས་པ་ཀུན་ཏུ་སྟོན་པའི་མཛད་སྤྱོད་ཀྱི་རོལ་མོ་མཐའ་ཡས་པར་སྣང་བས་ཁྱབ་པ་ནི་འདི་ལྟ་སྟེ། དཔེར་ན་ཏིལ་གྱི་གང་བུ་ཁ་ཕྱེ་བ་བཞིན་དུ་གོ་མཚམས་མེད་པར་གང་ནས་ཀུན་ཏུ་ཁྱབ་པར་བཞུགས་སོ། ། གཉིས་པ་རིག་པ་ཁྱད་པར་ཅན་གྱི་འཁོར་ལ་གཉིས་ཏེ། རྒྱལ་སྲས་སེམས་དཔའི་འཁོར་དང་། འཇོམས་བྱེད་ཁྲོ་བོའི་འཁོར་རོ། །དང་པོ་ལ་གཉིས་ཏེ། ནང་སེམས་ཡབ་ཡུམ་དང་། ཕྱི་སེམས་ཡབ་ཡུམ་མོ། །དང་པོ་ནི། དེ་ནས་བྱང་ཆུབ་ཆེན་པོ་རྡོ་རྗེ་མཐོང་བ་ནས། མྱོང་བར་བྱ་བའི་ཚོགས་དང་། ཞེས་པའི་བར་ཏེ། དེ་བཞིན་གཤེགས་པ་ལྔ་བཤད་པའི་རྗེས་དེ་ནས་ཞེས་འབྲེལ་སྦྱར་ལ། མིག་ཤེས་ལ་སོགས་པའི་རྟོག་ཚོགས་རྣམས་ཡེ་ནས་ཆོས་ཉིད་བྱང་ཆུབ་ཀྱི་སེམས་ཏེ། དེ་ཉིད་མངོན་དུ་གྱུར་པའི་འབྲས་བུ་ནི་སྤངས་རྟོགས་མཐར་ཕྱིན་པས་བྱང་ཆུབ་ཀྱང་ཡིན་ལ། སར་གནས་ཀྱི་སེམས་དཔའ་ལས་འཕགས་པས་ཆེན་པོའང་ཡིན་ཏེ། འདིར་བསྟན་གྱི་འཁོར་ཐམས་ཅད་སྟོན་པའི་ཐུགས་རིག་པ་རང་སྣང་གི་སྤྲུལ་བ་པ་ཡིན་པའི་ཕྱིར། དེ་ཡང་རྒྱ་མཚོ་ལས། དེ་བཞིན་ཐུགས་ཀྱི་ཁྱད་པར་ལས། །རང་སྣང་རྒྱལ་བ་སེམས་སོགས་དང་། །ཞེས་གསུངས། རྡོ་རྗེ་ནི་རྟོག་ཚོགས་སུ་སྣང་ཡང་རང་བཞིན་ལྷའི་དཀྱིལ་འཁོར་དུ་ངེས་པས་དབྱེར་མི་ཕྱེད་པའི་དོན་ཏེ་སྤྱིའི་མཚན་ནོ། །བྱེ་བྲག་ཏུ་མིག་དབང་ལ་བརྟེན་ནས་མིག་ཤེས་ཀྱིས་ཡུལ་གཟུགས་མཐོང་བས་ན་མིག་གི་རྣམ་ཤེས་ལ་མཐོང་བ་ཞེས་བརྗོད་ལ། དེ་གནས་སུ་དག་པས་སའི་སྙིང་པོ་དང་། དེ་བཞིན་དུ་ཐོས་པ་རྣ་བའི་རྣམ་ཤེས་ཏེ་ཕྱག་ན་རྡོ་རྗེ་དང་། སྣོམ་པ་སྣའི་རྣམ་ཤེས་ཏེ་ནམ་མཁའི་སྙིང་པོ་དང་། མྱོང་བ་ལྕེའི་རྣམ་ཤེས་ཏེ་སྤྱན་རས་གཟིགས་དང་། དེ་དག་གི་ཡུམ་ཡང་། ཡུལ་བཞིས་རྣམ་ཤེས་བཞི་སྐྱེད་པར་བྱེད་ཅིང་རྣམ་ཤེས་ཀྱིས་སྤྱད་བྱར་གྱུར་པས་ན་བཙུན་མོ། མིག་ཤེས་ཀྱིས་མཐོང་བྱའི་ཡུལ་ཡིན་པས་མཐོང་བར་བྱ་བ་གཟུགས་ཏེ་རྡོ་རྗེ་སྒེག་མོ་དང་། དེ་བཞིན་དུ་མཉན་པར་བྱ་བ་སྒྲ་སྟེ་གླུ་དབྱངས་མ་དང་། བསྣམ་པར་བྱ་བ་དྲི་སྟེ་ཕྲེང་བ་མ་དང་། མྱོང་བར་བྱ་བ་རོ་སྟེ་གར་སྒྱུར་མའི་ཚོགས་སོ། །ཡབ་ཡུམ་འདི་རྣམས་འདིར་གོ་རིམ་བཞིན་ཡུལ་ཤེས་སྦྱོར་བ་དང་མན་ངག་ལས་སྤྱན་རས་གཟིགས་ཀྱི་ཡུམ་གླུ་མ་དང་། ཕྱག་རྡོར་གྱི་ཡུམ་གར་མར་མཛད་པ་གཉིས་མི་འགལ་ལམ་སྙམ་ན། འདིར་ནི་རྟོག་པའི་ཡུལ་ཡུལ་ཅན་གཙོ་བོར་བྱས་ལ། མན་ངག་ལས་ནི་རིགས་གཙོ་བོའི་དབང་དུ་བྱས་ཏེ། གླུ་མ་གསུང་གི་རིགས་དང་། གར་མ་ལས་རིགས་སུ་བསྡུས་པ་ཡིན་པས་འགལ་བ་མེད་དོ། །གཉིས་པ་ནི། བྱང་ཆུབ་ཆེན་པོ་རྡོ་རྗེ་མཐོང་བྱེད་ནས། མ་བྱོན་པའི་ཚོགས་དང་ཞེས་པའི་བར་ཏེ། འདིར་ཡང་བྱང་ཆུབ་ཆེན་པོ་རྡོ་རྗེ་ནི་སྤྱིའི་མཚན་ཡིན་ལ། བྱེ་བྲག་ཏུ་མིག་ཤེས་ཀྱིས་གཟུགས་མཐོང་བར་བྱེད་པའི་བདག་རྐྱེན་མིག་གི་དབང་པོས་བྱེད་པ། མཐོང་བྱེད་ནི་མིག་དབང་སྟེ་བྱམས་པ་དང་། དེ་བཞིན་དུ་ཐོས་བྱེད་རྣ་བའི་དབང་པོ་སྟེ་སྒྲིབ་སེལ་དང་། སྣོམ་བྱེད་སྣའི་དབང་པོ་སྟེ་ཀུན་ཏུ་བཟང་པོ་དང་། མྱོང་བྱེད་ལྕེའི་དབང་པོ་སྟེ་འཇམ་དཔལ་དབྱངས་དང་། དེ་དག་གི་ཡུམ་ཡང་། དུས་བཞིས་གོ་ཕྱེ་ནས་དབང་པོ་བཞི་བསྐྱེད་པས་ན་བཙུན་མོ། རྒྱུ་འབྲས་གཉིས་ཀ་སྤྱད་ཟིན་པ་འདས་པའི་དུས་ཏེ་བདུག་སྤོས་མ་དང་། རྒྱུ་སྤྱད་ཅིང་འབྲས་བུ་མ་སྤྱད་པ་ད་ལྟར་བ་སྟེ་མེ་ཏོག་མ་དང་། རྒྱུ་འབྲས་ཚོགས་ལ་མ་སྤྱད་པ་འབྱུང་བ་ནི་མ་འོངས་པ་སྟེ་མར་མེ་མ་དང་། རྒྱུ་འབྲས་ཡོད་ལ་མ་ཚོགས་པས་འདས་མ་འོང་གང་དུའང་མ་ངེས་པ་ནི་མ་བྱོན་པའི་དུས་ཏེ་དྲི་ཆབ་མའི་ཚོགས་སོ། །དེ་ཡང་དུས་བཞིས་བསྡུས་པའི་ཆོས་ཐམས་ཅད་རྒྱལ་བ་རྣམས་ཀྱི་དག་པའི་དབང་པོ་མེ་ལོང་ལྟ་བུའི་ནང་དུ་ཆགས་ཐོགས་མེད་པར་སལ་ལེར་གསལ་བས་ཀྱང་ཡབ་ཡུམ་དུ་འབྲེལ་ཏེ། ཕལ་པོ་ཆེ་ལས། འདས་དང་མ་འོངས་ད་ལྟར་བྱུང་། །ཇི་སྙེད་ཇི་བཞིན་མངོན་དུ་གྱུར། །ཞེས་སོ། །གཉིས་པ་འཇོམས་བྱེད་ཁྲོ་བོའི་འཁོར་ནི། འཇོམས་པ་ཆེན་པོ་ནས། གཉིས་སུ་མེད་པར་བཞུགས་སོ། །ཞེས་པའི་བར་ཏེ། གདུག་པ་ཅན་འཇོམས་པའི་བརྟུལ་ཞུགས་ཆེན་པོས་ཐམས་ཅད་འཇོམས་ཤིང་། ཕས་ཀྱི་རྒོལ་བས་ཚུར་མི་ཚུགས་པས་ན་རྡོ་རྗེ་སྟེ། རྒྱས་པ་ལས། རྡོ་རྗེའི་རང་བཞིན་སྒྲིབ་པ་ཀུན། །འཇོམས་ཤིང་ཅིས་ཀྱང་མི་ཚུགས་ལ། །རང་བྱུང་ཡེ་ཤེས་ལྷ་ཡི་ལྷ། །ཐམས་ཅད་ཀུན་ལ་འབིག་པར་བྱེད། །ཅེས་སོ། །བྱེ་བྲག་ཏུ་ལུས་ཀྱི་ཡུལ་དབང་རྣམ་ཤེས་གསུམ་འདུས་པའི་རེག་པ་སྟེ་བདུད་རྩི་འཁྱིལ་བ་དང་། རེག་བྱེད་ལུས་ཀྱི་དབང་པོ་སྟེ་རྟ་མགྲིན་དང་། རེག་བྱ་ཡུལ་ཏེ་སྟོབས་པོ་ཆེ་དང་། རེག་ཤེས་ལུས་ཀྱི་རྣམ་པར་ཤེས་པ་སྟེ་གཤིན་རྗེ་གཤེད་དང་། གདུག་པ་ཅན་འཇོམས་བྱེད་ཀྱི་གཉེན་པོ་ཡང་རྟག་ཆད་བདག་མཚན་བཞི་མ་ཡིན་པའི་ཆོས་ཉིད་ཡུམ་གྱི་ངོ་བོ་དེས་བསྐྱེད་པའི་ཕྱིར་རམ། ཆོས་ཉིད་དེ་ཡང་ཡེ་ཤེས་ཀྱི་དམིགས་ཤིང་སྤྱད་བྱར་གྱུར་པ་དང་། ཚད་མེད་པ་བཞི་ཡང་སྤྱད་བྱའི་ཡུལ་ཡིན་པས་ན་བཙུན་མོ། ཆོས་ཐམས་ཅད་རྟག་པར་འཛིན་པའི་རྟོག་པ་ཉིད་རང་ག་མར་སྣང་བ་ལྟར་མ་ཡིན་ཏེ། དེ་གནས་སུ་དག་པའི་ལྷ་བྱམས་པས་སྡུད་ཅིང་འདྲེན་པར་བྱེད་པའི་བདག་ཉིད་ལྕགས་ཀྱུ་མ་དང་། དེ་བཞིན་དུ་ཆད་པར་འཛིན་པ་མ་ཡིན་པ་སྟེ་སྙིང་རྗེས་གཞན་སྡུད་ཅིང་འཆིང་བར་བྱེད་པའི་ལས་ཅན་ཞགས་པ་མ་དང་། བདག་ཏུ་འཛིན་པ་མ་ཡིན་པ་སྟེ་དགའ་བས་སྡུད་ཅིང་སྡོམ་པའི་ལས་ཅན་ལྕགས་སྒྲོག་མ་དང་། མཚན་མར་འཛིན་པ་མ་ཡིན་པ་སྟེ་བཏང་སྙོམས་ཀྱིས་སྡུད་ཅིང་མཉེས་པར་བྱེད་པའི་ལས་ཅན་དྲིལ་བུ་མ་ལ་སོགས་པ་དེ་ལྟ་བུ་ཐུགས་ཡེ་ཤེས་རང་སྣང་གི་འཁོར་དང་། གཞན་ཡང་རྒྱུད་མས་སྦྱངས་ཀྱི་ཚོགས་དང་བཅས་པ་བརྗོད་ཀྱིས་མི་ལང་བ་རྣམས་དང་རང་བཞིན་གཉིས་སུ་མེད་པར་བཞུགས་ཏེ། ཇི་སྐད་སྨོས་པའི་སྟོན་འཁོར་གྱི་རྣམ་པར་སྣང་བ་དེ་ཐམས་ཅད་སྟོན་པ་རིགས་དྲུག་པ་ཉིད་ཀྱི་ཡེ་ཤེས་ཀྱི་རོལ་པ་གཅིག་གི་ངང་དུ་འདུ་ཞིང་། འགྲོ་བའི་ཕུང་ཁམས་སྐྱེ་མཆེད་ཇི་སྙེད་པ་ཐམས་ཅད་ཀྱང་ལྷུན་གྱིས་གྲུབ་པའི་དཀྱིལ་འཁོར་དུ་ཡེ་ནས་སངས་རྒྱས་པའི་ཕྱིར་ཏེ། འགྲེལ་ཆུང་ལས། སྲིད་གསུམ་འགྲོ་བ་ཐམས་ཅད་ཀྱི། །ཕུང་པོ་ཁམས་དང་སྐྱེ་མཆེད་དང་། །བརྗོད་མེད་བརྗོད་ཀྱིས་མི་ལང་བ། །དེ་སྙེད་འཁོར་ལོའི་དཀྱིལ་འཁོར་དུ། །མངོན་རྫོགས་རྒྱལ་པོར་དེ་ཉིད་ངེས། །གཉིས་མེད་ལྷུན་གྲུབ་དཀྱིལ་འཁོར་ན། །ཐམས་ཅད་བདག་ཉིད་རྟག་པར་བཞུགས། །ཞེས་དང་། བརྟག་གཉིས་ལས། ང་ཡིས་འདི་ཀུན་ཁྱབ་པ་སྟེ། །འགྲོ་བའི་རང་བཞིན་གཞན་མ་མཐོང་། །ཞེས་སོ། ། གསུམ་པ་བསྡུ་བ་ལ་གསུམ་སྟེ། གསུངས་པ་ལོ་རྒྱུས་སུ་བརྗོད་པ་དང་། བསྡུ་བ་དངོས། བཀའ་གསང་སྔགས་མཚོན་བྱེད་ཀྱི་ཚིག་གོ །དང་པོ་ནི། དེ་ནས་དེ་བཞིན་གཤེགས་པ་ཞེས་སོགས་ཏེ། གླེང་གཞི་རྒྱས་པར་བསྟན་པ་དེ་ནས་དེ་བཞིན་གཤེགས་པ་ཡབ་རྣམས་ཡུམ་བཙུན་མོའི་ཚོགས་དང་དགོངས་པ་གཉིས་སུ་མེད་པའི་ངོ་བོ་རྟོགས་དཀའ་བ་གསང་བ་ཡེ་ཤེས་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དེ་དག་ཉིད་ཀྱི་དོན་གཞན་གྱི་སྤྱོད་ཡུལ་ལས་འདས་པའི་གསང་བ་ཆེན་པོ་འདི་ཉིད་སྟོན་པ་རིགས་དྲུག་པའི་སྐུ་དང་གསུང་དང་ཐུགས་དང་ཡོན་ཏན་དང་ཕྲིན་ལས་ལྔའི་ངོ་བོ་འཆད་པའི་སྐྱེས་བུ་རིགས་ལྔ་དབྱེར་མི་ཕྱེད་པའི་རྡོ་རྗེའི་ངང་དེ་ལས་མངོན་པར་སྣང་བས་ན་ཕྱུང་ངོ་ཞེས་བསྙད་དོ། ། གཉིས་པ་ནི། ཨེ་ཨེ་མ་ཨེ་མའོ། །དེ་བཞིན་ཉིད་ཅེས་སོགས་ཚིགས་བཅད་གཅིག་སྟེ། ཨེ་ཨེ་མ་ཨེ་མའོ་ཞེས་ཟློས་ཏེ་བརྗོད་པ་ནི། འགྲེལ་ཆུང་ལས། ཨེ་ཞེས་བྱ་བ་ངམ་པའི་ཚིག །ཨེ་མ་ཞེས་པ་རབ་ཏུ་ངམ། །ཨེ་མའོ་ཞེས་པ་ཤིན་ཏུ་ངམ། །ཞེས་པས་ཤིན་ཏུ་ངོ་མཚར་བར་སྟོན་པའི་ཚིག་སྟེ། ངན་སོང་སྦྱོང་བ་ལས། ཀྱེ་མ་སངས་རྒྱས་ཀྱེ་སངས་རྒྱས། །ཀྱེ་མ་སངས་རྒྱས་མཛད་པ་ལེགས། །ཞེས་པ་ལྟ་བུའོ། །དེ་བཞིན་ཉིད་ཀྱི་དབྱིངས་ཉིད་ཅེས་པར་གནས་ཀྱི་རང་བཞིན་དང་མཚན་ཉིད་བསྡུ་སྟེ། དེ་ཡང་སེམས་ཉིད་རང་བྱུང་གི་ཡེ་ཤེས་དེ་བཞིན་ཉིད་ཀྱི་དབྱིངས་ལས་མ་གཡོས་པའོ། །རང་སྣང་བ་ཉིད་ཅེས་པར། གཞལ་ཡས་གཞི་དང་རྒྱུ་དང་རྒྱ། །དབྱིབས་དང་གློ་འབུར་རྩེ་མོ་དང་། །རྒྱན་དང་ཞེས་པ་ཡན་ཆད་བསྡུ་སྟེ། རྟོགས་པའི་རིག་པ་ཉིད་ལ་འབྲས་བུའི་ཡོན་ཏན་ཐམས་ཅད་རྫོགས་པའི་རྩལ་ཕོ་བྲང་གི་གཞི་ལ་སོགས་པ་རྣམ་འཕྲུལ་སྣ་ཚོགས་པར་རང་སྣང་བ་ཉིད་དོ། །ཏིང་འཛིན་ཞེས་པར་སྒོའི་དོན་བསྡུ་སྟེ། རྣམ་ཐར་བཞིའི་ཏིང་ངེ་འཛིན་གྱི་སྒོ་ནས་འཇུག་པའི་བརྡར་སྒོ་བཞིར་སྣང་བའོ། །གཟུགས་བརྙན་ཞེས་པར་རྟ་བབས་ཀྱི་དོན་བསྡུ་སྟེ། ཐེག་པ་བརྒྱད་ནས་བགྲོད་པའི་རྒྱུ་འབྲས་མཚོན་བྱེད་རྟ་བབས་ཀྱི་གཟུགས་བརྙན་དུ་རང་སྣང་བའོ། །སྒྱུ་མ་རྣམ་དག་གསལ་བ་ཞེས་དང་། ཡིད་བཞིན་རིན་པོ་ཞེས་པར་གདན་གྱི་དོན་བསྡུ་སྟེ། མི་འཇིགས་པ་བཞི་སོགས་མཚོན་བྱེད་རྟོགས་པའི་རིག་པ་ཉིད་སྒྱུ་མ་ལྟར་སེམས་ཅན་ལྔའི་གདན་དང་། ཉེས་སྐྱོན་གྱིས་མ་གོས་པས་རྣམ་པར་དག་པ་པདྨ་དང་། འོད་གསལ་བ་ཉི་ཟླ་དང་། རེ་བ་ཡིད་བཞིན་དུ་སྐོང་བ་རིན་པོ་ཆེའི་གདན་རྣམས་སུ་སྣང་བ་ཡིན་ནོ། །དབང་སྒྱུར་ཡེ་ཤེས་དཀྱིལ་འཁོར་ཐུགས་རྗེའི་ངང་ཞེས་པར་སྟོན་པའི་དོན་བསྡུ་སྟེ། དེ་བཞིན་ཉིད་ཀྱི་དབྱིངས་ལ་མངའ་མཛད་ཅིང་དབང་སྒྱུར་བའི་ཡེ་ཤེས་ཉིད་སྟོན་པའི་ངོ་བོར་སྣང་ལ། རྟོགས་པའི་རིག་པ་ཉིད་ཡེ་ཤེས་ལྔའི་དཀྱིལ་འཁོར་དུ་གསལ་ཞིང་དེ་ཉིད་ཆོས་ཅན་འཁོར་འདས་ཀྱི་ཆོས་ཐམས་ཅད་དང་ཆོས་ཉིད་ཐ་མི་དད་པར་གནས་པ་ཐུགས་རྗེའི་ངང་སྟེ་སྟོན་པའི་རང་བཞིན་ནོ། །སྐུ་གསུང་ཐུགས་དང་ཡོན་ཏན་ཕྲིན་ལས་ཞེས་པར་རང་བཞིན་གཉིས་སུ་མེད་པའི་འཁོར་རིགས་ལྔ་ཡབ་ཡུམ་བསྡུ་སྟེ། སྟོན་པའི་སྐུ་དང་གསུང་དང་ཐུགས་དང་ཡོན་ཏན་ཕྲིན་ལས་ལྔ་ལས་ཕུང་ཁམས་རྣམ་པར་དག་པ་འཆད་པའི་སྐྱེས་བུ་རིགས་ལྔ་ཡབ་ཡུམ་དུ་སྣང་བའོ། །སེལ་མེད་ཅེས་པར་ཁྱབ་པའི་ཚད་ཆོས་ཀྱི་དབྱིངས་ཀུན་ཏུ་ཞེས་དང་། མང་བའི་ཚད་དེ་ལྟ་བུའི་ཚོགས་ཞེས་སོགས་བསྡུ་སྟེ། ཆོས་ཐམས་ཅད་ལ་སྐུ་དང་ཡེ་ཤེས་ཀྱིས་ཁྱབ་པས་ཉེས་སྐྱོན་ཅུང་ཟད་ཙམ་གྱི་ཡང་སེལ་མེད་པའོ། །ཡོན་ཏན་ཞེས་པར་སྐུ་མདོག་གི་དོན་བསྡུ་སྟེ་རིགས་ཀྱི་སྐུ་མདོག་དང་འོད་ཟེར་ལ་སོགས་པར་སྣང་བས་འགྲོ་བ་འདུལ་བའི་ཐབས་མ་འདྲེས་པར་གསལ་བའི་ཡོན་ཏན་མཚོན་པའོ། །མི་ཟད་པར་ལྡན་རྒྱན་གྱི་འཁོར་ལོ་ཞེས་པར་རིག་པ་ཁྱད་པར་ཅན་གྱི་འཁོར་བསྡུ་སྟེ། སྟོན་པ་ཉིད་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཁྱད་པར་ལས་རང་སྣང་བའོ། །རྡོ་རྗེ་མཆོག་གི་གནས་ཉིད་དོ་ཞེས་པར་དུས་དང་ཆོས་ཕུན་སུམ་ཚོགས་པ་བསྡུ་སྟེ། རྡོ་རྗེ་ཐེག་པའི་རྒྱུད་མཆོག་ཏུ་གྱུར་པ་ནི་བསྟན་པ་ཡིན་ལ། དེ་འབྱུང་བའི་གནས་ནི་སྟོན་འཁོར་གནས་གསུམ་ཚོགས་པའི་དུས་ཉིད་དོ་ཞེས་པའི་ཐ་ཚིག་གོ །གསུམ་པ་ནི། ཞེས་རྡོ་རྗེ་གསང་བའི་ཚིག་ཏུའོ། །ཞེས་པ་སྟེ། རྡོ་རྗེ་གསང་བ་ནི་རྡོ་རྗེའི་ཐེག་པ་ཡིན་ལ། དེ་མཚོན་པར་བྱེད་པའི་ཚིག་ཏུ་བསྡུས་པའོ་ཞེས་སམ། ཡང་ན་རྡོ་རྗེ་འཛིན་པ་གསང་བའི་བདག་པོས་ཚིག་ཏུ་བསྡུས་པའོ། །དེ་ལྟར་ན་རིགས་ལྔ་དབྱེར་མི་ཕྱེད་པ་དྲུག་པ་ཉིད་ཀྱི་ཐུགས་ལས་ཕྱུང་བར་བཤད་པ་དང་འགལ་ལོ་ཞེ་ན། འདིར་སྡུད་པ་པོ་ཉིད་སྟོན་པ་དང་དགོངས་པ་ཐ་མི་དད་པར་སྔར་བཤད་པ་བཞིན་ཡིན་པས་སྐྱོན་མེད་དོ། ། གཉིས་པ་ལེའུའི་མཚན་ནི། གསང་བའི་ཞེས་སོགས་ཏེ། དེ་ལྟར་བཤད་པ་དེ་དག་གིས་གསང་བའི་སྙིང་པོ་དེ་ཁོ་ན་ཉིད་ངེས་པ་རྩ་བའི་རྒྱུད་འདི་ལ་ཉི་ཤུ་རྩ་གཉིས་སུ་ཡོད་པ་ལས། འདིས་རྒྱུད་འབྱུང་བའི་རྒྱུ་ཕུན་སུམ་ཚོགས་པ་ལྔ་བསྟན་པས་ན་གླེང་གཞི་ཞེས་བྱ་ལ། ལེའུ་ནི་པ་ཊ་ལའི་སྒྲ་ལས་རིས་སུ་བཅད་པའམ། ཡང་ན་པ་ཊ་ནི་གོས་ཀྱི་དོན་ཏེ་སྐྱོབ་པའི་མཚན་ཉིད་ཅན། ལ་ནི་འཛིན་པའི་དོན་ལ་འཇུག་པས་མཚན་གྱིས་གཞུང་ཁེབས་ཤིང་གཞུང་དུམ་བུར་བཅད་པས་དོན་ཚན་འདྲེས་པ་ལས་ཉེ་བར་སྐྱོབ་པའི་ཕྱིར་ལེའུ་ཞེས་བྱ་སྟེ། ཡས་ནས་བགྲངས་པའི་ཐོག་མར་ཡིན་པས་ན་དང་པོའོ།། །། ལེའུ་གཉིས་པའི་འགྲེལ་པ།ལེའུ་གཉིས་པ་ལ་གཉིས་ཏེ། གཞུང་དང་། མཚན་ནོ། །དང་པོ་གཞུང་ལ་གཉིས་ཏེ། ཐུན་མོང་མ་ཡིན་པར་གླེང་བསླང་བ་དང་། ཐུན་མོང་དུ་གླེང་བསླང་བའོ། །དང་པོ་ལ་གཉིས་ཏེ། ཡབ་ཡུམ་གཉིས་ཀྱིས་གླེང་བསླང་བའི་སྒོ་ནས་གསང་དབང་བསྐུར་བ་དང་། དབང་གཉིས་ཀྱི་ལས་ཐུན་མོང་དུ་བསྟན་པའོ། །དང་པོ་ལ་གསུམ་སྟེ། གསང་དབང་བསྐུར་བའི་ཆེད་དུ་ཡབ་ཡུམ་སྙོམས་པར་ཞུགས་ཚུལ། ཉམས་སུ་བསྟར་བའི་དོན་ལས་རྫས་ཀྱི་དབང་བསྐུར་ཞིང་རྟོགས་པ་བརྗོད་པ། དབང་ཐོབ་པའི་ཡོན་ཏན་ངེས་ཚིག་དང་བཅས་པའོ། །དང་པོ་ནི། དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་ཡིད་ཅེས་སོགས་དང་། དེ་ནས་བཙུན་མོ་བྱ་བ་མོ་ཆོས་སྐུ་ཀུན་ཏུ་བཟང་མོས་ཞེས་སོགས་འོག་ནས་བླངས་ཏེ་གཞུང་ཚན་གཉིས་པོ་དེས་བསྟན། དེ་ཡང་གླེང་གཞི་ཚོགས་པ་དེ་ནས་ཞེས་འབྲེལ་སྦྱར་ཏེ། སྤྱིར་ཡིད་ནི་རྟོགས་པའི་དུས་ན་རང་རིག་པ་རང་བྱུང་གི་ཡེ་ཤེས་ཞེས་གྲགས་པ་གཉུག་མའི་ཡིད་དེ་འདས་པའི་བྱེད་པ་པོ་ཡིན་མོད་ཀྱང་། དེ་ཉིད་མ་རྟོགས་པའི་དུས་ན་རྟོག་བཅས་འཁྲུལ་པའི་ཡིད་ཅེས་གློ་བུར་བ་མེད་སྣང་འཁོར་བའི་བྱེད་པ་པོར་འགྱུར་བའི་ཕྱིར། འཁོར་འདས་གཉིས་ཀའི་བྱེད་པ་པོའོ། །ཆོས་བྱ་བ་ཞེས་པ་ནི་དབང་པོ་གཟུགས་ཅན་ལྔས་སྤྱད་བྱར་མ་གྱུར་པའི་ཡུལ་འདུས་བྱས་དང་འདུས་མ་བྱས་ཀྱི་ཆོས་ཀྱི་ཁམས་ཏེ། ཡིད་ཀྱིས་གཏན་ལ་དབབ་པར་བྱ་བའི་ཡུལ་ཡང་ཡིན་ལ། དེས་ཡིད་སྐྱེད་པར་བྱེད་པས་ན་སྐྱེད་བྱེད་དུའང་འགྱུར་རོ། །དེ་བས་ན་འདིར་ནི་བཅོམ་ལྡན་འདས་རྒྱུད་དང་དཀྱིལ་འཁོར་ཐམས་ཅད་ཀྱི་བྱེད་པ་པོ་འཁོར་འདས་རྡོ་རྗེ་ལྟར་དབྱེར་མི་ཕྱེད་པར་ཐུགས་སུ་ཆུད་པའི་ཡིད་རང་རིག་པ་རང་བྱུང་གི་ཡེ་ཤེས་ཏེ། སྤྱོད་ཡུལ་ཡོངས་སུ་དག་པས་ཀུན་ཏུ་བཟང་པོ་འཁོར་འདས་ཀྱི་ཆོས་ཐམས་ཅད་མ་ལུས་པའི་རང་བཞིན་བདག་ཉིད་ཀྱི་ཚུལ་དུ་རོ་གཅིག་ཅིང་དབྱེར་མི་ཕྱེད་པའི་རྡོ་རྗེས། བཙུན་མོ་སྟེ་ཡུལ་གཏན་ལ་དབབ་པར་བྱ་བ་མོ་འཁོར་འདས་ཀྱི་ཆོས་ཐམས་ཅད་རང་བཞིན་གྱིས་རྣམ་པར་དག་པའི་དབྱིངས་ཀྱི་ཕྱག་རྒྱ་ཡུམ་ཀུན་ཏུ་བཟང་མོ་ལ་སྙོམས་པར་འཇུག་པར་གྱུར་ཅིང་། དེའི་ཚེ་བཙུན་མོ་བྱ་བ་མོ་ཆོས་ཀྱི་དབྱིངས་ཀུན་ཏུ་བཟང་མོ་ཡང་བཅོམ་ལྡན་འདས་ཡིད་ཀུན་ཏུ་བཟང་པོ་དང་ཐབས་ཤེས་གཉིས་སུ་མེད་པར་སྙོམས་པར་འཇུག་པར་གྱུར་ཏོ། །དེ་ལྟར་ཐབས་ཤེས་གཉིས་ཕན་ཚུན་སྙོམས་པར་ཞུགས་པས་ཕྱོགས་བཅུ་དུས་བཞིའི་དེ་བཞིན་གཤེགས་པ་མ་ལུས་པ་ཐམས་ཅད་ཀྱི་དགོངས་པ་དབྱིངས་དང་ཡེ་ཤེས་ཟུང་འཇུག་གཅིག་གི་རང་བཞིན་དུ་དབྱེར་མེད་པར་མཁྱེན་པས་ཉིད་ལས་གཞན་པའི་གདུལ་བྱ་མ་གཟིགས་ནས་སྟོན་པ་དེ་བཞིན་གཤེགས་པ་ཡབ་ཡུམ་ཉིད་ལྷན་ཅིག་པའི་འཁོར་རང་བཞིན་གྱི་དེ་བཞིན་གཤེགས་པ་ཉིད་ལ་ཐབས་དང་ཤེས་རབ་ཀྱི་གསང་དབང་བསྐུར་བའི་ཕྱིར་རང་གིས་ཉམས་སུ་བསྟར་བའི་དགོངས་པ་འོག་ནས་འབྱུང་བ་ཉིད་བསྟན་པར་བཞེད་ནས་ཆེད་དུ་བརྗོད་པའི་ཚུལ་ཐབས་ཤེས་ཀྱི་གླེང་བསླང་གཉིས་པོ་འདི་བརྗོད་པར་མཛད་དོ། ། གཉིས་པ་ལ་གཉིས་ལས། དང་པོ་ཡབ་ཀྱིས་ཉམས་སུ་བསྟར་བའི་དོན་ཐབས་ཀྱི་ཆ་བཟུང་ནས་བརྗོད་པ་ནི། ཨེ་མའོ་རྡོ་རྗེ་ཕུང་པོ་ནས། མཉེས་པར་གྱུར་ཏོ་ཞེས་པའི་བར་ཏེ། རྟོག་ཚོགས་ཐམས་ཅད་ཕྱག་རྒྱའི་དཀྱིལ་འཁོར་དུ་རྟོགས་པ་ལ་ཨེ་མའོ་ཞེས་ངོ་མཚར་བའོ། །ཇི་ལྟར་ན། སྲིད་དང་རྣམ་པར་གྲོལ་བའི་ཆོས་ཐམས་ཅད་རང་རིག་པའི་ཡེ་ཤེས་ཀྱི་རང་བཞིན་དུ་དབྱེར་མི་ཕྱེད་པས་རྡོ་རྗེ་སྟེ། ཕུང་པོ་ནི་དུ་མ་སྤུངས་པའི་དོན་ཡིན་ལ། དེའི་ཡན་ལག་གི་དབྱེ་བ་ནི་རྣམ་ཤེས་སོགས་ལྔའི་བྱེ་བྲག་རྟོག་པ་བརྒྱད་ཅུའོ། །དེ་དག་རྣམ་ཤེས་ཀྱི་ཕུང་པོ་མི་བསྐྱོད་པར་གྲུབ་པ་སོགས་ཕུང་པོ་ལྔ་རྫོགས་པའི་སངས་རྒྱས་ལྔ་རུ་གྲགས་ཤིང་། དེ་བཞིན་དུ་དབང་ཡུལ་ལས་རྣམ་ཤེས་དྲུག་སྐྱེ་ཞིང་སྐད་ཅིག་ཕྱི་མར་རྒྱུན་མཆེད་པར་བྱེད་པས་དང་། རྣམ་ཤེས་ཡུལ་དབང་གི་ཁམས་དྲུག་དྲུག་སྟེ་བཅོ་བརྒྱད་པོ་རྣམས་ཀྱི་རྟོག་པའི་བྱེ་བྲག་མང་པོ་ཀུན་ཀྱང་བྱང་ཆུབ་སེམས་དཔའ་ཡབ་ཡུམ་སོགས་འཁོར་གྱི་དཀྱིལ་འཁོར་ཉིད་དུ་གནས་ཏེ། ཤེས་ཡུལ་དབང་གསུམ་རེ་རེ་ཡང་དྲུག་དྲུག་གི་སྔ་མ་བཞི་བཞི་དང་། དབང་པོའི་གོ་འབྱེད་དུས་རྣམས་ནི་རིམ་པ་ཇི་ལྟ་བར་ནང་སེམས་ཡབ་ཡུམ་དང་ཕྱི་སེམས་ཡབ་ཡུམ། དེ་གསུམ་གྱི་ལྔ་པ་ལུས་ཀྱི་དབང་ཤེས་རེག་བྱ་གསུམ་དང་། གསུམ་འདུས་ཀྱི་རེག་པ་རྣམས་ནི་འཇོམས་པ་བཞི། ཡིད་ཀྱི་དབང་ཤེས་ཀུན་ཏུ་བཟང་པོ་དང་། ཡུལ་ཆོས་ནི་བཟང་མོ་ཡིན་ལ། སྒོ་མ་བཞིའི་རྟོག་པའང་དེའི་བྱེ་བྲག་སྟེ། རྟག་ཆད་བདག་མཚན་བཞི་མ་ཡིན་པའི་ཆོས་ཉིད་ཀྱང་དེར་འདུ་བའི་ཕྱིར་རོ། །འབྱུང་བ་ལྔ་ནི་རིགས་ཀྱི་ཡུམ་ལྔ་སྟེ། ས་དང་ཆུ་ནི་སངས་རྒྱས་སྤྱན་མ་དང་མཱ་མ་ཀཱིའོ། །མེ་དང་རླུང་ནི་གོས་དཀར་མོ་དང་དམ་ཚིག་སྒྲོལ་མ་སྟེ། ནམ་མཁའ་ནི་ཡུམ་དབྱིངས་ཀྱི་དབང་ཕྱུག་མའོ། །དེ་ལྟར་ན་སྲིད་གསུམ་ཡེ་ནས་སངས་རྒྱས་ཀྱི་སྐུ་དང་ཞིང་ཁམས་སུ་རྣམ་པར་དག་པས་འཁོར་བའི་ཆོས་ཐམས་ཅད་དང་། འདས་པའི་ཆོས་མ་ལུས་པ་སྟེ། སྣང་ཞིང་སྲིད་པའི་ཆོས་སོ་ཅོག་ཐམས་ཅད་རང་བཞིན་གྱིས་རྣམ་པར་དག་ཅིང་འོད་གསལ་བས་སྐུ་དང་ཡེ་ཤེས་སུ་སངས་རྒྱས་པ་ཉིད་ལས་གཞན་མ་ཡིན་ཏེ། སངས་རྒྱས་ཉིད་ལས་གཞན་དུ་གྱུར་པའི་ཆོས་འདི་ཞེས་རང་མཚན་དུ་གྲུབ་པ་ཞིག་སངས་རྒྱས་ཉིད་ཀྱིས་བཙལ་ཀྱང་དོན་ལ་མེད་པས་མི་བརྙེས་སོ་སྟེ་རྙེད་པ་མ་ཡིན་ནོ། །དེ་ལྟར་ཡང་ཕྱིར་མི་ལྡོག་པ་འཁོར་ལོའི་མདོ་ལས། ཆོས་ཀུན་ཡེ་ནས་སངས་རྒྱས་པས། །བྱང་ཆུབ་ནམ་མཁའི་མཚན་ཉིད་དོ། །ཞེས་སོ། །དེ་ལྟར་རྟོག་ཚོགས་ཐམས་ཅད་ཡེ་ནས་སངས་རྒྱས་པའོ་ཞེས་སྟོན་པ་ཡབ་ཀྱིས་བརྗོད་པས་ཡུམ་དང་འཁོར་གྱི་དེ་བཞིན་གཤེགས་པ་ཐམས་ཅད་མཉེས་པར་གྱུར་ཏོ། ། གཉིས་པ་ཡུམ་གྱིས་ཉམས་སུ་བསྟར་བའི་དོན་ཤེས་རབ་ཀྱི་ཆ་བཟུང་ནས་དབྱིངས་ཀྱི་དོན་གླེང་བ་ནི། ཀྱེ་མའོ་ཕྱོགས་བཅུ་སོགས་ཚིགས་བཅད་གཉིས་ཏེ། རང་གིས་རྟོགས་པའི་དོན་གཞན་ལ་སྟོན་པར་བཞེད་ནས་ཀྱེ་མའོ་ཞེས་བོད་ཅིང་། འདི་འདྲའི་ངོ་མཚར་བ་བསྟན་དུ་ཡོད་ཅེས་ངམ་པའོ། །དེ་ཇི་ལྟ་བུ་ཞེ་ན། ཞིང་འདིས་མཚོན་ཏེ་ཕྱོགས་བཅུའི་སྟོང་ཁམས་ཀྱི་འཇིག་རྟེན་དུ་སྣང་བ་ཐམས་ཅད་ལོག་རྟོག་གིས་བརྟགས་པ་ལས་ཡེ་ནས་རང་བཞིན་གྱིས་དབེན་ལ། དེའི་རྒྱུ་མཚན་གྱིས་སྲིད་པ་གསུམ་ཉིད་རྣམ་པར་དག་པས་སངས་རྒྱས་སྐུ་གསུམ་གྱི་ཞིང་ཁམས་དང་། འགྲེལ་ཆུང་དུ། ཉོན་མོངས་དུས་ཚེ་ལྟ་བ་སེམས་ཅན་ཉིད། །ཅེས་གསུངས་པའི་སྙིགས་མ་ལྔ་ཉིད་མ་སྤངས་པར་བདེ་ལྡན་གྱི་གནས་སུ་རྟོགས་ཏེ། ཉོན་མོངས་པ་ལ་སོགས་པའི་སྙིགས་མ་ལྔ་པོ་རིམ་བཞིན་དྭངས་མ་ཡེ་ཤེས་ལྔ་དང་། དུས་བཞི་མཉམ་ཉིད་དང་། སྐྱེ་འཆི་མེད་པ་རྡོ་རྗེའི་ཚེ་དང་། ཡེ་ནས་སངས་རྒྱས་པ་དང་། སྲིད་ཞི་མཉམ་ཉིད་དུ་སྟེ། སྤར་ཁབ་ཏུ། ལྟ་བའི་སྙིགས་མའི་དོད་དུ་ལས་ཀྱི་སྙིགས་མ་བཤད་པ་ལྟར་ན། ཅི་བྱེད་ཡང་དག་པའི་མཛད་སྤྱོད་དུ་རྟོགས་ཤིང་། འགྲོ་བའི་ཕུང་པོ་ལྔ་ཉིད་རང་བཞིན་གྱིས་མངོན་པར་རྫོགས་པར་སངས་རྒྱས་པས་ན། ཆོས་ཐམས་ཅད་གནས་ལུགས་ལ་མཆོག་གི་འབྲས་བུ་བསྒྲུབ་བྱའི་གཞི་བདེ་བར་གཤེགས་པའི་སྙིང་པོ་སྟེ། གཉུག་མ་རང་བཞིན་རྣམ་དག་གི་སངས་རྒྱས་ཡིན་པས། དེ་ལས་གཞན་དུ་རྒྱལ་བའི་ཆོས་ཤིག་ཡོད་དམ་སྙམ་ནས་བཙལ་བར་མི་བྱ་སྟེ། སངས་རྒྱས་ཉིད་ལས་གཞན་དུ་གྱུར་པ་མ་དག་པ་འདི་ཞེས་བྱ་བའི་ཆོས་ཤིག་གུད་ནས་བཙལ་ཀྱང་། གཟིགས་པ་རྣམ་པར་དག་པ་རྒྱལ་བ་ཉིད་ཀྱིས་ཀྱང་མི་རྙེད་དོ་སྟེ། དོན་ལ་མེད་ངེས་ཡིན་པའི་ཕྱིར་མི་རྙེད་དོ། །དེ་ཡང་རྣམ་ངེས་ལས། ཐམས་ཅད་མཁྱེན་པས་གཟིགས་པ་ལོག་པ་ནི་ཐམས་ཅད་དུ་མེད་པར་གོ་བར་བྱེད་པ་ཁོ་ན་ཡིན་ནོ། །ཞེས་སོ། ། གསུམ་པ་ནི། ཞེས་བརྗོད་པས་ཐམས་ཅད་ཅེས་སོགས་ཏེ། དེ་ཡང་སྟོན་པའི་ཐུགས་རང་རིག་པ་ཉིད་གདུལ་བྱའི་ངོ་ལ་ཡེ་ཤེས་སྒྱུ་མའི་རང་བཞིན་རྩ་རླུང་ཐིག་ལེའི་རྣམ་པར་སྣང་བས་ཡབ་ཡུམ་སྙོམས་པར་ཞུགས་ཏེ། དེ་ལས་བྱུང་བའི་ཉི་ཟླས་རྒྱུ་དང་། ཉམས་སུ་བསྟར་བའི་དོན་རྟོག་ཚོགས་ཐམས་ཅད་ཡེ་ནས་ལྷའི་ཕྱག་རྒྱ་དང་། ཆོས་ཉིད་སྐྱེ་བ་མེད་པའི་ངོ་བོར་སངས་རྒྱས་པའོ་ཞེས་རྟོགས་པ་བརྗོད་པས་རྐྱེན་བྱས་ཏེ། ལྷག་པ་ཀུན་རྫོབ་དང་དོན་དམ་པའི་བདེན་པ་མཐོང་སྟེ་རྟོག་ཚོགས་ཐམས་ཅད་ཡེ་གདོད་མ་ནས་སངས་རྒྱས་པར་དེ་བཞིན་གཤེགས་པ་སྟོན་པ་ཡབ་ཡུམ་ཉིད་དང་དགོངས་པ་ཐ་མི་དད་པའི་འཁོར་རྣམས་ཀྱིས་མཁྱེན་ཏོ་ཞེས་འདིར་གཞན་རྣམ་པར་བཅད་པའི་ཚིག་གིས་གསང་དབང་གི་ངེས་ཚིག་ཀྱང་གྲུབ་སྟེ། འཁོར་ཐུན་མོང་བ་རྣམས་ཀྱིས་དབང་ཐོབ་པས་དོན་དམ་རྟོག་མེད་ཀྱི་ཡེ་ཤེས་རྒྱུད་ལ་སྐྱེས་ཀྱང་སྟོན་པའི་དགོངས་པ་དབྱེར་མེད་ཀྱི་ཡེ་ཤེས་ཆེན་པོ་ད་དུང་མ་མྱོང་བའི་ཕྱིར་སྤྱོད་ཡུལ་མ་ཡིན་པས་ན་གསང་བའི་དབང་ཞེས་བྱའོ། ། གཉིས་པ་དབང་གཉིས་ཀྱི་ལས་ལ་གསུམ་སྟེ། གསུངས་པའི་ལོ་རྒྱུས་དང་། སེམས་བསྐྱེད་ཅིང་ཇི་ལྟར་བསྐུར་བའི་རིམ་པ་དངོས་དང་། དེའི་ཡོན་ཏན་ནོ། །དང་པོ་ནི། དེ་ནས་གཉིས་སུ་མེད་པའི་ཞེས་སོགས་ཏེ། གསང་དབང་བསྐུར་བ་དེ་ནས་དོན་དགོངས་པ་དང་རྟགས་ཡབ་ཡུམ་གྱི་ཉི་ཟླ་བྱང་ཆུབ་ཀྱི་སེམས་གཉིས་སུ་མེད་པའི་བདག་ཉིད་བདེ་བ་ཆེན་པོའི་རང་བཞིན་གྱིས་འཁོར་རྣམས་ལ་ཆོས་ཐམས་ཅད་ཡེ་ནས་སངས་རྒྱས་པའི་དོན་སེམས་ཉིད་ཡེ་ཤེས་ལྔར་དངོས་སུ་བསྐྱེད་པ་འདི་གསུངས་སོ། ། གཉིས་པ་ནི། ཨེ་མའོ་ངོ་མཚར་སོགས་ཚིགས་བཅད་ལྔ་སྟེ། འདི་ལ་གསུམ། གཞི་རང་བཞིན་གྱི། བགྲོད་པ་ལམ་གྱི། མཐར་ཕྱིན་འབྲས་བུའི་སེམས་བསྐྱེད་དོ། །དང་པོ་ནི། ཨེ་མའོ་ཞེས་པ་ངོ་མཚར་བའི་ཚིག་སྟེ། གང་ལ་ན། རྣམ་ཤེས་ཚོགས་བརྒྱད་ཀྱི་རང་བཞིན་ཡེ་ཤེས་ལྔར་དག་པའི་གནས་ལུགས་ངོ་མཚར་ཞིང་གཞན་ལས་རྨད་དུ་བྱུང་བའི་ཆོས་ཉིད་འདི་ནི་རྫོགས་པའི་སངས་རྒྱས་ཀུན་གྱི་ཐུགས་ཀྱི་གསང་བ་ཟབ་མོ་སྟེ། ཕལ་གྱི་སྤྱོད་ཡུལ་མ་ཡིན་པའོ། །གང་ཞེ་ན། སེམས་ཉིད་གདོད་ནས་སྐྱེ་བ་མེད་པ་ལས་འཁྲུལ་ངོར་རྟོག་བཅས་ཀྱི་སེམས་ཐམས་ཅད་རྒྱུ་རྐྱེན་ལས་སྐྱེས་པ་ལྟར་སྣང་ལ། དེ་ལྟར་སྐྱེས་པར་སྣང་ཙམ་ཉིད་ན་དོན་ལ་དེ་ལྟ་བུར་སྐྱེ་བ་གྲུབ་པ་མེད་པ་འདི་ནི་ཀུན་གཞི་ཉིད་ཆོས་དབྱིངས་ཡེ་ཤེས་སུ་བསྐྱེད་པའོ། །དེ་བཞིན་དུ་སྣང་བ་ཐམས་ཅད་འགག་པ་ཉིད་ན་དོན་ལ་འགག་པ་མེད་པའི་ཟུང་འཇུག་རྟོག་མེད་རང་གསལ་བ་འདི་ནི་ཀུན་གཞིའི་རྣམ་ཤེས་མེ་ལོང་ལྟ་བུའི་ཡེ་ཤེས་སུའོ། །རྟེན་གང་ལ་གནས་པ་ལྟར་སྣང་ཙམ་ཉིད་ན་དོན་ལ་གནས་པ་མེད་པའི་ཟུང་འཇུག་དངོས་པོའི་གཤིས་ཐ་དད་དང་ཕྱོགས་རིས་བྲལ་བ་འདི་ནི་ཉོན་མོངས་པ་ཅན་གྱི་ཡིད་མཉམ་པ་ཉིད་ཀྱི་ཡེ་ཤེས་སུའོ། །ཡུལ་ཐ་དད་དུ་དམིགས་པ་ཉིད་ན་དོན་ལ་དམིགས་པ་མེད་པའི་ཟུང་འཇུག་ཡུལ་ཡུལ་ཅན་གཉིས་མེད་གསལ་ལ་མ་འདྲེས་པ་ནི་ཡིད་སོ་སོར་རྟོག་པའི་ཡེ་ཤེས་སུའོ། །གང་དུ་འགྲོ་བ་དང་འོང་བ་ལྟར་སྣང་ཙམ་ཉིད་ན་དོན་ལ་འགྲོ་འོང་མེད་པའི་ཟུང་འཇུག་སེམས་ཉིད་མ་བཙལ་ལྷུན་གྱིས་གྲུབ་པ་ནི་སྒོ་ལྔ་བྱ་བ་གྲུབ་པའི་ཡེ་ཤེས་སུ་བསྐྱེད་པའོ། ། གཉིས་པ་ལ། གྲོལ་ལམ་དང་། ཐབས་ལམ་གཉིས་ལས། དང་པོ་ནི། ཨེ་མའོ་ངོ་མཚར་རྨད་དུ་བྱུང་བ་ཟུང་འཇུག་སྤྲོས་པ་ཐམས་ཅད་དང་བྲལ་བའི་ཆོས་ཉིད་རྫོགས་པའི་སངས་རྒྱས་ཀུན་གྱི་ཐུགས་ཀྱི་གསང་བ་ནི་འདི་ལྟ་སྟེ། དོན་དམ་པར་སྐྱེ་འགག་གནས་དམིགས་འགྲོ་འོང་མེད་པའི་ངང་ལས། ཀུན་རྫོབ་ཏུ་ཆོས་ཐམས་ཅད་སྐྱེ་འགག་ལ་སོགས་པར་སྣང་ལ། དེ་ལྟར་སྐྱེས་པ་ལ་སོགས་པར་སྣང་དུས་ཉིད་ན་དོན་དམ་པར་སྐྱེ་བ་ལ་སོགས་པ་མེད་པའི་ངོ་བོ་ལྷག་པ་བདེན་པ་དབྱེར་མེད་དུ་ལ་བཟླ་བ་ལྔ་པོ་འདི་ནི་ཡེ་ཤེས་ལྔ་དང་སྦྱར་ན་སྟོང་པ་ཉིད་ལ་སོགས་པ་སྟེ། དེ་ལྟར་རྟོགས་པའི་བློ་ནི་ཡེ་ཤེས་སོ། །དེ་དག་སེམས་ལྔ་དང་སྦྱར་ཏེ་བཤད་ན། ཆོས་ཐམས་ཅད་ཐོག་མར་སྐྱེ་བ་མེད་ན་མཐར་འགག་པ་དང་བར་དུ་གནས་པ་མེད་ལ། དེ་མེད་པས་རང་སྤྱིའི་མཚན་ཉིད་དུ་དམིགས་པ་མེད་ཅིང་། གནས་དམིགས་མེད་པས་འགྲོ་འོང་ཡང་མེད་མོད་ཀྱི་དེ་ལྟ་ནའང་། དེའི་ངང་ལས་རིག་པ་སྒྱུ་མ་ཙམ་དུ་ཐམས་ཅད་སྐྱེ་འགག་ལ་སོགས་པ་ལྟར་སྣང་བས་བདེན་གཉིས་མཚོན་ཚུལ་གྱི་ལྡོག་ཆ་ནས་ཐ་དད་ཀྱང་ངོ་བོ་དབྱེར་མེད་པ་སྟེ། སྐྱེས་པ་ཉིད་ན་སྐྱེ་བ་མེད་པ་ནི་བདེན་པ་དབྱེར་མེད་ཀྱི་དོན་ལ་སེམས་དང་པོར་མགོ་ལྡང་བ་གཡོ་ལྡང་བྱང་ཆུབ་ཀྱི་སེམས་སོ། །དེ་བཞིན་དུ་འཁྲུགས་སྡེབས་ཀྱི་རིམ་པས་དམིགས་པ་སོགས་དོན་དེ་ཁོང་དུ་ཆུད་པར་སྨོན་པ་བྱང་ཆུབ་ཀྱི་སེམས་དང་། འགག་པ་སོགས་དབྱེར་མེད་ཀྱི་དོན་ལ་འཇུག་པ་བྱང་ཆུབ་ཀྱི་སེམས་དང་། གནས་པ་སོགས་དབྱེར་མེད་ཀྱི་དོན་ལ་གནས་པ་བྱང་ཆུབ་ཀྱི་སེམས་དང་། འགྲོ་འོང་སོགས་དབྱེར་མེད་ཀྱི་དོན་མཐར་ཕྱིན་པ་བྱང་ཆུབ་ཀྱི་སེམས་སོ། །དེ་ཡང་ལམ་པའི་བློ་ཁྱད་ཀྱིས་དབྱེར་མེད་ཀྱི་བདེན་པ་ལ་སེམས་ལྔ་དུས་གཅིག་ལ་རྫོགས་པ་གཅིག་ཅར་བ་དང་། རིམ་པར་བསྐྱེད་པ་རིམ་གྱིས་པའོ། ། གཉིས་པ་ནི། ཨེ་མའོ་ཞེས་པ་ངམ་པ་སྟེ། གང་ལ་ན། འདོད་ཆགས་ཆེན་པོའི་སྤྱོད་པ་འདི་ནི་སྤྱད་ཀྱང་མི་འཆིང་བས་ངོ་མཚར་ཞིང་། དེས་བླ་ན་མེད་པའི་འབྲས་བུ་མངོན་དུ་བྱེད་པའི་མྱུར་ལམ་གཞན་ལས་ཆེས་རྨད་དུ་བྱུང་བའི་ཆོས་རྫོགས་པའི་སངས་རྒྱས་ཀུན་གྱི་ཐུགས་ཀྱི་བརྣག་བྱ་ཡིན་པར་མ་ཟད། ཁེ་ཉེན་དང་བཅས་པའི་ཐབས་ཀྱི་ལམ་ཡིན་པའི་ཕྱིར་གསང་བའོ། །གང་ཞེ་ན། རང་བཞིན་ལྷན་ཅིག་སྐྱེས་པ་རྟེན་མེད་ཀྱི་ཡེ་ཤེས་ལ་སྐྱེ་འགག་གནས་དམིགས་འགྲོ་འོང་མེད་པ་ལས་ཡབ་ཡུམ་གཉིས་སུ་མེད་པར་རོལ་པའི་སྦྱོར་བས་དངོས་པོ་ལྷན་ཅིག་སྐྱེས་པའི་ཡེ་ཤེས་ཀྱི་ལམ་ཉམས་སུ་བླངས་པའི་ཚེ་རྩ་གནས་ཐམས་ཅད་ནས་ཐིག་ལེ་གཡོས་པས་བདེ་བ་མགོ་ལྡང་བའི་ཚུལ་དུ་སྐྱེས་པ་ནི་གཡོ་ལྡང་བྱང་ཆུབ་ཀྱི་སེམས་སོ། །བདེ་བ་ཕྱི་མ་འཇུག་པའི་ཚེ་སྔ་མ་འཇིག་ཅིང་མཐར་ཐམས་ཅད་འགག་པ་ནི་འཇིག་འཇུག་བྱང་ཆུབ་ཀྱི་སེམས་སོ། །རྟེན་ཅན་གྱི་བདེ་བ་རང་ས་ན་གནས་པ་མེད་པའི་ཚུལ་གྱིས་ཐམས་ཅད་གནས་པ་ནི་གནས་པ་བྱང་ཆུབ་ཀྱི་སེམས་སོ། །སྔ་མའི་བདེ་བས་མཚོན་ནས་ཕྱི་མའི་བདེ་བ་ཐམས་ཅད་ལ་དམིགས་ཤིང་འདུན་པ་ནི་སྨོན་པ་བྱང་ཆུབ་ཀྱི་སེམས་ཏེ། དེ་དག་ནི་དབང་གཉིས་ཀྱི་སྔོན་འགྲོ་ཐུན་མོང་བའོ། །དངོས་གཞི་ནི། ཉི་ཟླ་བྱང་ཆུབ་ཀྱི་སེམས་རྡོ་རྗེ་དང་པདྨའི་རྩེར་དགའ་བ་བཅུ་དྲུག་ལུགས་འབྱུང་དུ་འགྲོ་བས་ཕྲད་ཙམ་ན་ཐབས་ཀྱིས་འཛག་པ་བཀག་སྟེ་བཟུང་བས་ཤེས་རབ་ཡེ་ཤེས་ཀྱི་དབང་ཐོབ་ཅིང་། ཐུན་མོང་གི་ས་བཅུ་དང་ལམ་ལྔ་རྫོགས་ནས་དོན་དམ་འོད་གསལ་གྱི་ཡེ་ཤེས་རྒྱུད་ལ་སྐྱེས་པའོ། །དེ་ཉིད་སླར་ལྡོག་པའི་ཐབས་ཀྱིས་རང་གནས་སུ་འོང་བ་མས་བརྟན་གྱི་དགའ་བ་བཅུ་དྲུག་གི་མཐར་དཀར་དམར་གྱི་ཆ་སྟེང་འོག་ཏུ་ཐིམ་པའི་སྐད་ཅིག་གཉིས་པར་རླུང་ཡང་འགག་པས་དེ་གསུམ་གྱི་འགྱུར་བ་མྱོང་བའི་ཤེས་རིག་ཀྱང་རྒྱུན་ཆད་དེ་བདེ་བ་ཆེན་པོའི་དབང་ཐོབ་ཅིང་། ཁྱད་པར་གྱི་ས་ལམ་རྫོགས་ནས་ལྷག་པ་བདེན་པ་དབྱེར་མེད་སྤྱོད་ཡུལ་དང་བྲལ་བའི་ཡེ་ཤེས་མི་འགྱུར་བའི་བདེ་བ་ཆེན་པོ་མངོན་དུ་བྱས་པ་ནི་མཐར་ཕྱིན་པ་བྱང་ཆུབ་ཀྱི་སེམས་ཏེ། དེ་དག་ཀྱང་སྐྱེ་འགག་གནས་དམིགས་འགྲོ་འོང་ལྟར་སྣང་དུས་ཉིད་ན་དོན་ལ་སྐྱེ་བ་ལ་སོགས་པ་མེད་པས་རང་བཞིན་ལྷན་ཅིག་སྐྱེས་པའི་ཡེ་ཤེས་ལ་བདེན་པ་དབྱེར་མེད་དུ་ལ་བཟླ་བའོ། །དེ་ལྟར་དབང་རྫོགས་པས་ལྷན་ཅིག་པའི་འཁོར་རྣམས་ཀྱིས་རང་བཞིན་གསང་བའི་སྙིང་པོའི་དོན་ཁོང་དུ་ཆུད་དེ་སྟོན་འཁོར་དགོངས་པ་དབྱེར་མེད་དུ་གྱུར་ནས་གཞན་དོན་དུ་རྒྱུད་ཞུ་བའི་སྤོབས་པ་སྐྱེས་པའི་ཕྱིར། སྔོན་བྱུང་གི་ཟབ་དབང་གསུམ་པོ་འདི་གོ་ཕྱེ་བའི་འཁོར་ལ་ལྟོས་ཏེ་རྒྱུད་འབྱུང་བའི་རྐྱེན་གླེང་བསླང་དུ་འགྱུར་ནའང་། ལྷན་ཅིག་པའི་འཁོར་ལ་ལྟོས་ན་རྒྱུད་ཚར་གཅིག་དུས་དེར་རྫོགས་པ་ཡིན་ཏེ། སྔོན་བྱུང་དུ་གླེང་བསླང་བ། དབང་ཐོབ་པ། རྒྱུད་དོན་རྟོགས་པ་གསུམ་ངོ་བོ་གཅིག་ལ་ལྡོག་པ་སོ་སོར་སྣང་བ་ཙམ་ཡིན་པའི་ཕྱིར་རོ། ། གསུམ་པ་ནི། ཨེ་མའོ་ངོ་མཚར་རྨད་དུ་བྱུང་བའི་ཆོས་ཟབ་དབང་གསུམ་ཐོབ་པས་ལྷན་ཅིག་པ་རྣམས་རང་དོན་དུ་རྫོགས་པའི་སངས་རྒྱས་སྐུ་ལྔ་པོ་ཀུན་གྱི་བདག་ཉིད་དུ་སངས་རྒྱས་ཏེ། སྟོན་འཁོར་དགོངས་པ་དབྱེར་མེད་དུ་གྱུར་པ་འདི་ནི་འཁོར་ཐུན་མོང་བའི་སྤྱོད་ཡུལ་མ་ཡིན་པས་གསང་བ་སྟེ། སྐྱེ་བ་མེད་ལས་ཞེས་སོགས་ཀྱི་དབྱིངས་ཡེ་ཟུང་འཇུག་ཆོས་ཀྱི་སྐུ་དང་། འགག་པ་སོགས་ཀྱིས་སྐུ་གསུམ་དབྱེར་མེད་གསལ་སྟོང་ཟུང་འཇུག་མངོན་བྱང་གི་སྐུ་དང་། གནས་པ་སོགས་ཀྱིས་དག་པའི་གདུལ་བྱ་ལ་གཟུགས་སྐུའི་རྣམ་པར་སྣང་ཡང་མཐའ་ལ་མི་གནས་པའི་ཟུང་འཇུག་ལོངས་སྤྱོད་རྫོགས་པའི་སྐུ་དང་། དམིགས་པ་སོགས་ཀྱིས་སྐུ་གསུམ་སོ་སོར་སྣང་ཡང་མི་དམིགས་པའི་དབྱིངས་སུ་དབྱེར་མི་ཕྱེད་པ་རྡོ་རྗེའི་སྐུ་དང་། འགྲོ་འོང་སོགས་ཀྱིས་སྐལ་བ་དང་འཚམས་པར་འཆར་ནུབ་ཏུ་སྟོན་ཀྱང་དོན་ལ་འགྲོ་འོང་མེད་པ་སྤྲུལ་པའི་སྐུའོ། ། གསུམ་པ་ཡོན་ཏན་ནི། ཞེས་བརྗོད་པས་སོགས་ཏེ། སེམས་བསྐྱེད་ཅིང་དབང་བསྐུར་བའི་རིམ་པ་དེ་སྐད་ཅེས་བརྗོད་པས་ལྷན་ཅིག་པའི་འཁོར་གྱི་དེ་བཞིན་གཤེགས་པ་ཡབ་ཐམས་ཅད་དང་ཡུམ་བཙུན་མོའི་ཚོགས་ཐམས་ཅད་ཀྱང་དོན་དམ་འོད་གསལ་དང་དབྱེར་མེད་ཀྱི་དགོངས་པ་ཉམས་སུ་མྱོང་སྟེ་སྟོན་འཁོར་དགོངས་པ་ཁྱད་མེད་དུ་གྱུར་པ་ལ་མཉེས་པས་ཁྱབ་པར་གྱུར་ཏོ། ། གཉིས་པ་ཐུན་མོང་གི་གླེང་བསླང་བ་ལ་གཉིས་ཏེ། འཁོར་གྱིས་ཞུས་པ་དང་། སྟོན་པས་ལན་སྩལ་པའོ། །དང་པོ་ནི། དེ་ནས་དེ་བཞིན་གཤེགས་པ་ནས། ཤིན་ཏུ་གསང་ཞེས་པའི་བར་ཏེ། ཐུན་མོང་མ་ཡིན་པའི་གླེང་བསླང་བ་དེ་ནས་འཁོར་གྱིས་དེ་བཞིན་གཤེགས་པ་ཐམས་ཅད་རང་རང་གི་བཙུན་མོའི་ཚོགས་དང་བཅས་པས་གོ་ཕྱེ་བའི་འཁོར་གྱི་ཆེད་དུ་སྟོན་པའི་ཐུགས་རྗེ་བསྐུལ་བའི་བརྗོད་པ་འདི་བརྗོད་དོ། །ཇི་ལྟར་ཞུས་ན། མ་རྟོགས་པའི་འགྲོ་བ་ལ་སྐྱོ་བའི་ཚུལ་གྱིས་ཨེ་མའོ་ཞེས་ངམ་སྟེ། གཉིས་སུ་མེད་པའི་ཆོས་ཉིད་ལ་འབྲས་བུ་ཆེ་བའི་ཡོན་ཏན་ཐམས་ཅད་ལྷུན་གྱིས་གྲུབ་ཀྱང་། དེའི་དོན་ཐོག་མ་ཉིད་ནས་མ་རྟོགས་པས་ཡེ་ནས་གསང་བའི་ཆོས་སོ། །དེ་ཉིད་སྣ་ཚོགས་སུ་སྣང་བའི་ཆོས་ཐམས་ཅད་ཀྱང་འབྲས་བུ་མི་ཟད་པ་རྒྱན་གྱི་འཁོར་ལོར་གནས་པ་ལ་ཕྱིན་ཅི་ལོག་གི་ཤེས་པས་བསླད་ནས་རང་གི་རང་བཞིན་མ་རྟོགས་པ་ནི་རང་བཞིན་གྱིས་གསང་བའོ། །གནས་ལུགས་དེ་ཡང་ཡུལ་སེམས་དང་རྒྱུ་འབྲས་ལ་སོགས་པ་གཉིས་ཆོས་ཐམས་ཅད་ལས་ངོ་བོ་ཉིད་ཀྱིས་གྲོལ་ཏེ་ཡུལ་དུ་བྱར་མེད་ཀྱང་མ་རྟོགས་པས་དེ་ལྟར་ལྟ་བ་ནི་རབ་ཏུ་གསང་བའོ། །དེ་ཡང་སེམས་ཉིད་ལས་གཞན་ཞིག་གུད་དུ་ཡོད་པ་མིན་ཡང་སྒྲིབ་གཉིས་བག་ཆགས་དང་བཅས་པས་བསྒྲིབས་ཏེ་རང་ལ་གནས་པ་གཞན་ལས་འཚོལ་བ་ནི་ཤིན་ཏུ་གསང་བ་སྟེ། དེ་ལྟར་གསང་བ་བཞིས་ཆོད་ནས་མ་རྟོགས་པའི་གདུལ་བྱ་རྣམས་ཐུགས་རྗེས་བཟུང་བར་རིགས་ཞེས་ཞུས་པའོ། ། གཉིས་པ་ལན་སྩལ་བ་ནི། ཞེས་བརྗོད་པས་དེ་བཞིན་གཤེགས་པ་ཐམས་ཅད་དང་ནས། ཆེད་དུ་གླེང་ངོ་ཞེས་པའི་བར་ཏེ། འཁོར་གྱིས་གསང་བ་བཞིའི་དོན་དེ་སྐད་ཅེས་བརྗོད་དེ་ཞུས་པས་སྟོན་པའི་ཐུགས་རྗེ་སྐྱེས་ཏེ། ཇི་ལྟར་ན། དག་པ་དེ་བཞིན་གཤེགས་པའི་སྐུ་དང་ཡེ་ཤེས་ཀྱི་སྣང་བ་ཐམས་ཅད་དང་། མ་དག་པ་འཁོར་བའི་ཆོས་ཕྱི་ནང་སྣོད་བཅུད་དུ་སྣང་བ་ཐམས་ཅད་རྟོགས་རུང་མ་རྟོགས་རུང་གཉིས་སུ་མེད་དེ། བྱེད་པ་པོ་མེད་པར་ཡེ་ནས་རང་བཞིན་ལྷུན་གྲུབ་ཀྱི་སངས་རྒྱས་བདེན་པ་དབྱེར་མེད་པའི་ངོ་བོ་ཉིད་དུ་གཅིག་པའི་མཚན་ཉིད་ཡིན་པས་དབྱེར་མི་ཕྱེད་པའི་ཕྱིར་ཐུགས་རྗེ་སྐྱེས་ནས་དོན་བྱར་མེད་ནའང་། འགྲོ་བ་རང་རང་གི་རྣམ་པར་རྟོག་པ་བསྐྱེད་པའི་རྩ་བ་མ་རིག་པ་གཉིས་ལས། འབྲས་བུ་ལྷ་མ་ཡིན་སྟོད་རིས་ལྷ་དང་སྨད་རིས་དུད་འགྲོར་བསྡུས་པས་འགྲོ་བ་རྒྱུད་ལྔའི་སྡུག་བསྔལ་ནང་རིགས་མི་མཐུན་པ་བསམ་གྱིས་མི་ཁྱབ་པར་སྨིན་པ་ལ། ཐབས་དམིགས་པ་མེད་པའི་ཐུགས་རྗེ་ཆེན་པོ་དང་། ཤེས་རབ་སངས་རྒྱས་ཀྱི་ཐུགས་ཇི་ལྟ་བ་མཁྱེན་པའི་ཡེ་ཤེས་ཆེན་པོ་སྟེ། དེ་ཉིད་ཀྱི་ངང་ནས་ཇི་སྙེད་མཁྱེན་པའི་ཡེ་ཤེས་མི་འགགས་པས་གདུལ་བྱའི་ངོ་ལ་ཐུགས་རྗེ་སྐྱེས་ནས་དོན་མཛད་པར་དགོངས་ཏེ་ཆེད་དུ་བརྗོད་པ་འདི་བརྗོད་དོ་ཞེས་སྤྲུལ་པ་སྤྲོ་བར་ཞལ་གྱིས་བཞེས་པའོ། །གང་གི་ཕྱིར་སྤྲོ་ན། མ་རྟོགས་པ་ལ་བརྩེ་བའི་རང་བཞིན་གྱིས་ཨེ་མའོ་ཞེས་ངམ་སྟེ། སེམས་ཉིད་ཡེ་ནས་རང་བཞིན་གྱིས་རྣམ་པར་དག་པ་ནི་བདེ་གཤེགས་སྙིང་པོའོ། །དེ་ལྟར་ཡིན་པ་ལས་རྒྱུ་ལྷན་ཅིག་སྐྱེས་པའི་མ་རིག་པས་རང་ངོ་མ་ཤེས་ཤིང་། རྐྱེན་སེམས་ཅན་རང་རང་གི་ཕྱིན་ཅི་ལོག་གི་རྣམ་པར་རྟོག་པ་ཀུན་བརྟགས་ཀྱིས་ཉོན་མོངས་པ་སྐྱེས་ནས་ལས་སྣ་ཚོགས་ལ་སྤྱད་པའི་དབང་གིས་འཁོར་བའི་ཆོས་འདི་རྣམས་ཐག་ཁྲ་ལ་སྦྲུལ་མཐོང་ལྟར་མེད་སྣང་གློ་བུར་དུ་སྤྲུལ་ཏེ། དེ་ལས་བདེ་འགྲོ་དང་ངན་འགྲོ་སོགས་སྣ་ཚོགས་པའི་ལུས་དང་། རང་རང་གི་འདོད་པའི་ཡུལ་གཟུགས་སྒྲ་དྲི་རོ་སོགས་ལོངས་སྤྱོད་དང་། མཐོ་དམན་སྣ་ཚོགས་པའི་གནས་དང་། ཚ་གྲང་གི་སྡུག་བསྔལ་ལ་སོགས་པ་སྣ་ཚོགས་པར་སྣང་བ་ལ། ལུས་ཅན་རྣམས་ཀྱིས་ངའོ་ཞེས་བདག་དང་། ངའི་འདི་དང་འདི་ཞེས་བདག་གིར་བྱེད་པས་སོ་སོར་བཟུང་བ་དང་འཛིན་པས་བཅིངས་ཏེ་ཉམ་ཐག་གོ །དེ་ཡང་འཁྲུལ་ངོར་སྣང་བ་ཙམ་དུ་ཟད་ཀྱི། དོན་དམ་པར་འགྲོ་བ་འདི་ཀུན་འཆིང་བྱེད་ཀྱི་མཁན་པོ་སུས་ཀྱང་མ་བཅིངས་ཤིང་། དངོས་པོ་གང་གིས་ཀྱང་བཅིངས་པ་མེད་དེ། གང་བཅིངས་པར་བྱ་བ་རང་ཡང་ཡོད་པ་མ་ཡིན་ཡང་། ཀུན་རྫོབ་ཏུ་བཅིངས་པ་ལྟར་སྣང་བ་ནི། རང་གི་རྣམ་རྟོག་བདག་ཏུ་འཛིན་པ་ཡིས་བཅིངས་པ་ལས། འཆིང་བྱེད་གཞན་མེད་ཀྱང་བློ་འཁྲུལ་ངོར་སྣང་བ་ཙམ་དུ་ཟད་དེ། དཔེར་ན་རབ་རིབ་ཅན་གྱིས་ནན་གྱིས་བརྟགས་ཀྱང་མཁའ་ལས་སྐྲ་ཤད་འཛག་པ་མེད་བཞིན་དུ་འཛག་པར་མཐོང་ནས། དེ་ལ་མདུད་པ་འདོར་བའི་འཁྲུལ་སྣང་བྱུང་བ་ལྟར། ཆོས་ཉིད་རིས་མེད་ལ་དགག་སྒྲུབ་གཟུང་འཛིན་གྱི་ཕྱོགས་རིས་སུ་བཅད་པས་འཁྲུལ་པ་ལས་དོན་ལ་འཁོར་བ་ཚད་མས་གྲུབ་པ་མ་ཡིན་ནོ། །དེ་ཡང་བཅིངས་པ་ཡོད་ན་དེ་ལྟོས་ཀྱི་གྲོལ་བའང་སྲིད་པ་ལས། ལྟོས་གཞི་བཅིངས་པ་མེད་པས་དེ་ལ་ལྟོས་པའི་ཆོས་རྣམ་པར་གྲོལ་བའང་མེད་པའི་ཕྱིར། འགྲོ་བ་མཐའ་དག་ཡེ་ནས་བཅིངས་གྲོལ་མེད་པའི་གནས་ལུགས་སྐུ་དང་ཡེ་ཤེས་ཀྱི་དཀྱིལ་འཁོར་དུ་ལྷུན་གྱིས་གྲུབ་ཅིང་ཡོངས་སུ་རྫོགས་པའི་རང་བཞིན་དུ་སངས་རྒྱས་པས་འཁོར་འདས་མཉམ་པ་ཉིད་དུ་ལ་བཟླ་བའི་ཆོས་ཏེ། དེ་ཉིད་མཚོན་པར་བྱེད་པའི་རྒྱུད་འདི་གདུལ་བྱ་ཁྱད་པར་ཅན་གྱི་ཆེད་དུ་དངོས་སུ་བསྟན་ཅིང་། གདུལ་བྱ་ཐུན་མོང་བ་རྣམས་ལ་བརྒྱུད་ནས་བསྟན་པར་བྱ་བའི་ཕྱིར་བསམ་གྱིས་མི་ཁྱབ་པའི་སྤྲུལ་པ་ཐུབ་པ་དྲུག་སྤྲོ་བ་སོགས་འགག་མེད་ཐུགས་རྗེ་ཆེན་པོའི་རོལ་པ་རྣམ་པ་སྣ་ཚོགས་པ་སྟོན་པར་མཛད་དོ། །ཞེས་སྟོན་པ་དེ་བཞིན་གཤེགས་པ་ཉིད་ལྷན་ཅིག་པའི་འཁོར་དབང་རྫོགས་པས་དེ་བཞིན་གཤེགས་པ་ཉིད་དུ་གྱུར་པ་ལ་གོ་ཕྱེ་བའི་འཁོར་གྱི་ཆེད་དུ་གླེང་ངོ་། ། གཉིས་པ་ལེའུའི་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉི་ཤུ་རྩ་གཉིས་སུ་ཡོད་པ་ལས། འདིས་དོན་དམ་པར་སྤྲོས་པ་ཉེ་བར་ཞི་བ་དང་། ཀུན་རྫོབ་ཏུ་དེ་ཉིད་མ་རྟོགས་པའི་དབང་གིས་འཁོར་བ་ལ་དོན་མཛད་ཚུལ་གཉིས་སོ་སོར་བསྟན་ཀྱང་། དོན་ལ་གཉིས་ཀ་བྱང་ཆུབ་ཀྱི་སེམས་འཆིང་གྲོལ་མེད་པའི་ངོ་བོར་དབྱེར་མི་ཕྱེད་པས་ན་འཁོར་འདས་ཡེ་ནས་དབྱེར་མེད་དུ་གནས་པ་ལ་གནས་པར་ཤེས་པའི་བདག་ཉིད་དུ་སེམས་བསྐྱེད་པར་བསྟན་པའི་ལེའུ་སྟེ་གཉིས་པའོ།། །། ལེའུ་གསུམ་པའི་འགྲེལ་པ།ལེའུ་གསུམ་པ་ལ་གཉིས་ཏེ། གཞུང་དང་། མཚན་ནོ། །གཞུང་ལ་གཉིས་ཏེ། རྒྱས་པར་བཤད་པ་དང་། དོན་བསྡུ་བའོ། །དང་པོ་ལ་གཉིས་ཏེ། བསྟན་པ་འབྱུང་བ་སྤྱིའི་གླེང་གཞི་དང་། ཡོངས་སུ་ཤེས་པར་བྱ་བ་ལྟ་བའོ། །དང་པོ་ལའང་། རྒྱུ་དང་། ངོ་བོ་གཉིས་ལས། དང་པོ་ནི། དེ་ནས་དེ་བཞིན་གཤེགས་པ་ནས། འཐོན་ཏོ་ཞེས་པའི་བར་ཏེ། གང་གི་ཆེད་དུ་སྤྲོ་བར་ཞལ་གྱིས་བཞེས་པ་དེ་ནས། ཇི་ལྟར་སྤྲོ་ན། འཐོན་ཏོ་ཞེས་སྦྲེལ་ཏེ། གང་ན། དེ་བཞིན་གཤེགས་པ་ཐམས་ཅད་ལས་དམིགས་མེད་ཀུན་ཁྱབ་རང་བྱུང་གི་ཐུགས་རྗེ་ཆེན་པོར་རང་ཤར་བའི་བྱིན་གྱིས་བརླབས་པ་དུས་སུ་འབྱུང་བ་ཞེས་བྱ་བ་ཐུགས་རིག་པའི་ཡེ་ཤེས་ལས་རྣམ་པར་འཕྲུལ་པས་ན་རིག་པའི་སྐྱེས་བུ་དང་། ལས་ཉོན་གྱི་དཔུང་བཅོམ་པས་ན་ཐུབ་པ་སྟེ། གདུལ་བྱའི་དབང་གིས་རྣམ་པ་དྲུག་གོ །གང་ལས་ན་སྟོན་པ་དེ་བཞིན་གཤེགས་པ་རིགས་དྲུག་པའི་སྐུ་དང་གསུང་དང་ཐུགས་དབྱེར་མི་ཕྱེད་པའི་རྡོ་རྗེ་ལས་སོ། །ཇི་ལྟར་ན། ཚངས་པ་རང་གི་གནས་ལས་མ་གཡོས་བཞིན་དུ་ལྷ་གནས་གཞན་ཐམས་ཅད་དུ་རང་གཟུགས་ཀྱི་སྣང་བ་སྟོན་པ་ལྟར་གདུལ་བྱའི་ངོ་ལ་རང་སྣང་བའི་ཚུལ་གྱིས་ཏེ། རྒྱུད་བླ་མ་ལས། ཇི་ལྟར་ཚངས་པ་ཚངས་པ་ཡིི། །གནས་ནས་འཕོ་བ་མེད་བཞིན་དུ། །ལྷ་ཡི་གནས་ནི་ཐམས་ཅད་དུ། །སྣང་བ་འབད་མེད་སྟོན་པ་ལྟར། །དེ་བཞིན་ཐུབ་པ་ཆོས་སྐུ་ལས། །བསྐྱོད་པ་མེད་པར་ཁམས་ཀུན་ཏུ། །སྐལ་ལྡན་རྣམས་ལ་འབད་མེད་པར། །སྤྲུལ་པ་དག་ནི་སྟོན་པར་མཛད། །ཅེས་སོ། ། གཉིས་པ་ངོ་བོ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། འཐོན་ནས་ཀྱང་ནས། དོན་མཛད་དེ་ཞེས་པའི་བར་ཏེ། དེ་ལྟར་ཐུབ་པ་དྲུག་འཐོན་ནས་ཀྱང་དོན་མཛད་པའི་ཡུལ་ངན་སོང་གསུམ་དང་ལྷ་མི་སྟེ་འགྲོ་བ་རྒྱུད་ལྔའམ། ཐེག་པ་ལྔའི་རིགས་ཅན་གྱི་འགྲོ་བ་ལྔའི་དོན་མཛད་དེ། གང་དུ་ན། དོན་བྱ་བའི་ཞིང་གདུལ་བྱའི་ལས་ཀྱི་བྱེ་བྲག་ཐ་དད་པའི་དབང་གིས་མགོ་འཕྲེད་ལ་བསྟན་ནས་འགྲོ་བ་སྣྲེལ་ཞི་དང་། གྱེན་ཐུར་དུ་བསྟན་ནས་འགྲོ་བ་ཡན་མན་གྱི་འཇིག་རྟེན་སྣོད་ཀྱི་བྱེ་བྲག་ཟླུམ་པོ་སོགས་བཞི་དང་གཞི་ཕྱལ་བ་དང་སྟེང་གཡོགས་མེད་པ་སྟེ་རྣམ་པ་མི་འདྲ་བ་དྲུག་གི་རང་བཞིན་གྱིས་ཕྱོགས་བཅུར་ཁྱབ་ཅིང་ཚད་བཟུང་དུ་མེད་པས་མཐའ་ཡས་མུ་མེད་པའི་ཞིང་ཁམས་ནམ་མཁའི་དབྱིངས་ལྟར་སྣང་བ་ལས། དེའི་ཁོངས་སུ་ཚུད་པ་དུམ་བུའི་འཇིག་རྟེན་ཆུ་དཀྱིལ་ནས་བསམ་གཏན་དང་པོ་མན་ཆད་ཀྱིས་བསྡུས་པ་གླིང་བཞི་པ་སྟེ། དེ་སྟོང་ལ་སྟོང་སྤྱི་ཕུད། དེ་སྟོང་ལ་སྟོང་གཉིས་པ་བར་མ། དེ་སྟོང་ལ་སྟོང་གསུམ་གྱི་སྟོང་ཆེན་པོ་སྟེ། དེ་རེ་རེར་གང་གིས་དོན་མཛད་པ་པོ་ཐུབ་པ་ཆེན་པོ་བཅོམ་ལྡན་འདས་རེ་རེར་སྣང་ནས་ཇི་ལྟར་དོན་མཛད་པའི་ཚུལ་འོག་ནས་འབྱུང་བའི་སྐུ་བསོད་ནམས་ཆེན་པོས་འདུལ་བ་སོགས་འདུལ་བ་རྣམ་པ་བཞིའི་སྒོ་ནས་སོ། ། གཉིས་པ་ལ་བཞི་སྟེ། སྐུ་བསོད་ནམས་ཆེན་པོས། ཐུགས་མངོན་སུམ་པས། རྫུ་འཕྲུལ་བསམ་གྱིས་མི་ཁྱབ་པས། གསུང་རིག་པས་འདུལ་བའོ། །དང་པོ་ནི། བལྟམས་པ་དང་ནས། སྟོན་པའི་ཐུབ་པས། ཞེས་པའི་བར་ཏེ། འཛམ་གླིང་བྱེ་བ་ཕྲག་བརྒྱ་རེ་རེར་འདུལ་བྱེད་མཆོག་གི་སྤྲུལ་སྐུ་ཡང་དེ་སྙེད་འབྱུང་བ་ཐམས་ཅད་མཛད་པའི་ཚུལ་མཐུན་པར་སྟོན་པས་ན་གཅིག་གི་མཛད་ཚུལ་སྨོས་པས་ཐམས་ཅད་ཀྱི་མཛད་པ་རྟོགས་པར་འགྱུར་བའི་ཕྱིར། འོ་སྐོལ་གྱི་སྟོན་པ་འདི་ཉིད་ཀྱི་སྒོ་ནས་བརྗོད་དེ། དགའ་ལྡན་གྱི་གནས་སུ་དམ་པ་ཏོག་དཀར་པོར་སྐྱེ་བ་བཞེས་ཏེ། གཟིགས་པ་ལྔས་གཟིགས་ནས། ས་མོ་ལུག་གི་ལོ་ཆུ་སྟོད་ཟླ་བའི་ཉ་ལ་གླང་པོ་ཆེའི་རྣམ་པས་ཡུམ་སྒྱུ་འཕྲུལ་མ་གསོ་སྦྱོང་ལ་གནས་པའི་ལྷུམས་སུ་ཞུགས་ཏེ། ཟླ་བ་བཅུ་ཕལ་ཆེར་རྫོགས་པ་ལྕགས་སྤྲེལ་ས་གའི་ཚེས་བདུན་རྒྱུ་སྐར་རྒྱལ་ལ་བབས་པའི་ཚེ་ལུམྦི་ནིའི་ཚལ་དུ་ཡུམ་གྱི་རྩིབ་ལོགས་གཡས་པ་ནས་མངལ་གྱི་དྲི་མ་མེད་པར་སྐུ་བལྟམས་ཏེ། ཡི་གེ་སོགས་སློབ་པ་ལྟར་མཛད་ནས་བཟོའི་གནས་ལ་བྱང་བར་གྱུར་ཅིང་། ཤཱཀྱ་རྣམས་སྒྱུ་རྩལ་གྱིས་ཕམ་པར་མཛད་དེ། ས་འཚོ་མ་བཙུན་མོའི་འཁོར་བརྒྱད་ཁྲི་བཞི་སྟོང་དང་བཅས་པ་བདག་གིར་བཞེས་ནས་ལོ་ཉི་ཤུ་རྩ་དགུའི་བར་ཁབ་ཏུ་བཞུགས་པ་དང་། དེ་ནས་ཁྱིམ་སྤངས་ཏེ་མཆོད་རྟེན་རྣམ་དག་གི་དྲུང་དུ་རབ་ཏུ་བྱུང་བ་དང་། དེ་ནས་ཆུ་བོ་ནཻ་རཉྫ་ནའི་འགྲམ་དུ་ལོ་དྲུག་གི་བར་དཀའ་ཐུབ་མཛད་པས་སྐུ་ཤིན་ཏུ་རིད་པ་ལ་གྲོང་པའི་བུ་མོ་ལེགས་སྐྱེས་མས་བ་སྟོང་གི་འོ་མ་ཉིང་ཁུར་བྱས་པ་སྦྲང་རྩི་དང་སྦྱར་བ་དྲངས་པ་གསོལ་བའི་མོད་ལ་སྐུ་གསེར་གྱི་གཏན་པ་ཕྱིས་པ་ལྟར་གྱུར་པ་དང་། དེ་ནས་རྡོ་རྗེ་གདན་དུ་སྐྱེས་བུ་ཆེན་པོའི་སྟབས་ཀྱིས་གཤེགས་ཤིང་རྩྭ་འཚོང་བཀྲ་ཤིས་ལས་རྩྭ་བསླངས་པ་ལ་སྟན་མཛད་ནས། བྱང་ཆུབ་ཀྱི་ཤིང་དྲུང་དུ་སྐྱིལ་མོ་ཀྲུང་གིས་བཞུགས་ཏེ། དགུང་ལོ་སོ་ལྔ་པ་ཤིང་རྟ་ས་གའི་ཉའི་ཐོ་རེངས་བསམ་གཏན་བཞི་པ་ལ་བརྟེན་ནས་སྒྲིབ་གཉིས་བག་ཆགས་དང་བཅས་པ་མ་ལུས་པ་སྤངས་ཤིང་། ཤེས་བྱ་ཐམས་ཅད་ཐུགས་སུ་ཆུད་དེ་མངོན་པར་རྫོགས་པ་སངས་རྒྱས་པ་དང་། དེའི་སྔ་ལོགས་ཉ་དེའི་སྲོད་ཀྱི་དུས་སུ་སྨིན་མཚམས་ནས་འོད་ཟེར་བཀྱེ་བ་ལ་སོགས་པའི་སྒོ་ནས་བདུད་བཏུལ་བ་དང་། སངས་རྒྱས་ནས་ཞག་བདུན་ཕྲག་བདུན་གྱི་བར་དུ་ཆོས་མ་གསུངས་པ་ལ། ཚངས་པ་དང་བརྒྱ་བྱིན་གྱིས་བསྐུལ་ཏེ་ཝཱ་ར་ཎཱ་སཱིར་ལྔ་སྡེ་ལས་བརྩམས་ནས་བཀའ་དང་པོ་བདེན་པ་བཞི་དང་། བྱ་རྒོད་ཕུང་པོའི་རི་བོ་ལ་སོགས་པར་བཀའ་བར་པ་མཚན་ཉིད་མེད་པ་དང་། ཡངས་པ་ཅན་ལ་སོགས་པར་བཀའ་ཐ་མ་དོན་དམ་རྣམ་པར་ངེས་པ་སྟེ་ཆོས་ཀྱི་འཁོར་ལོ་རྣམ་པ་གསུམ་བསྐོར་བ་དང་། མཉན་ཡོད་དུ་མུ་སྟེགས་རྣམས་འདུལ་བ་དང་སངས་རྒྱས་མ་ཐག་ཤིང་ཏཱ་ལ་བདུན་སྲིད་དུ་འཕགས་པ་སོགས་ཆོ་འཕྲུལ་ཆེན་པོ་བསྟན་པ་དང་། མཐར་དགུང་ལོ་བརྒྱད་ཅུ་རྩ་གཅིག་པ་ལྕགས་འབྲུག་ས་གའི་ཉ་ལ་གྱད་ཡུལ་རྩྭ་ཅན་གྱི་གནས་ཤིང་སཱ་ལ་ཟུང་གི་རྩ་བར་རྡོ་རྗེ་ལྟ་བུའི་སྐུ་བཤིག་ནས་མྱ་ངན་འདའ་བའི་ཚུལ་དང་སྐུ་གདུང་རིང་བསྲེལ་ལ་སོགས་པ་རྣམ་འཕྲུལ་མཐའ་ཡས་པར་སྟོན་པའི་ཐུབ་པ་གང་གི་སྐུའི་མཛད་པ་དེ་དག་ནི་བསོད་ནམས་ཐུན་མོང་མ་ཡིན་པ་གཞན་ལས་འཕགས་པར་བསྟན་པས་ན་སྐུ་བསོད་ནམས་ཆེན་པོས་འདུལ་བའོ། ། གཉིས་པ་ནི། དུས་བཞི་ནས། དྲུག་དང་ཞེས་པའི་བར་ཏེ། སྔོན་གནས་དྲན་པ་དང་ཕྱི་མའི་གནས་མཁྱེན་པའི་མངོན་ཤེས་ཀྱིས་འདས་པ་ལ་སོགས་པའི་དུས་བཞི་ཀུན་ཏུ་སྒྲིབ་པ་མེད་པར་སལ་ལེར་མཁྱེན་པ་དང་། ཕ་རོལ་གྱི་སེམས་མཁྱེན་པའི་མངོན་ཤེས་ཀྱིས་གཞན་ཐམས་ཅད་ཀྱི་སེམས་ཀྱི་རྒྱུད་ཀྱི་འགྱུ་བ་སྣ་ཚོགས་པ་ཀུན་ཏུ་མ་བསྒྲིབས་པར་མཁྱེན་པ་དང་། སྒྲིབ་པ་མེད་པ་རྫུ་འཕྲུལ་གྱི་ལྷའི་སྤྱན་གྱིས་ཉེ་རིང་མེད་པའི་གཟུགས་དང་འཆི་འཕོ་སྐྱེ་བ་སོགས་ཐམས་ཅད་ཀུན་ཏུ་གཟིགས་པ་དང་། ལྷའི་སྙན་གྱིས་སྒྲ་ཆེ་ཆུང་ཐམས་ཅད་ཉེ་རིང་མེད་པར་ཀུན་ཏུ་གསན་པ་དང་། ཆོ་ག་སྟེ་བྱ་བ་གྲུབ་པའི་མངོན་ཤེས་ཀྱིས་གང་འདུལ་གྱི་མོས་པ་དང་མཐུན་པར་སྤྲུལ་སྒྱུར་སོགས་སྣ་ཚོགས་སྟོན་པས་ཀུན་ཏུ་སེམས་ཅན་གྱི་དོན་སྤྱོད་པ་དང་། སྒྲིབ་པ་དག་པའི་ཡེ་ཤེས་ཟག་པ་མེད་པའི་མངོན་ཤེས་ཀྱིས་ཇི་ལྟར་སྤྱད་ཀྱང་མི་གོས་པ་རྣམ་པ་ཀུན་ཏུ་བཟང་པོའི་སྤྱོད་པ་ཡོངས་སུ་རྫོགས་པར་བྱེད་པ་སྟེ། དེ་ལྟ་བུའི་མངོན་པར་ཤེས་པ་ཆེན་པོ་དྲུག་ཀ་ཐུགས་ཀྱི་རྗེས་སུ་འགྲོ་ཞིང་མཁྱེན་ནས་ཤེས་བྱ་ཐམས་ཅད་ལ་མངོན་སུམ་དུ་དབང་སྒྱུར་བ་དང་ལྡན་པས་དོན་མཛད་པའི་ཕྱིར་ཐུགས་མངོན་སུམ་པས་འདུལ་བའོ། ། གསུམ་པ་ནི། ཀུན་ཏུ་སྐུ་ནས་སྣང་བར་གྱུར་ཏོ་ཞེས་པའི་བར་ཏེ། གདུལ་བྱའི་ཞིང་ཀུན་ཏུ་རང་རང་གི་སྣང་བ་དང་མཐུན་པར་ལྷ་མིའི་རྒྱལ་པོ་ལ་སོགས་པའི་སྐུ་དང་། རྒྱུད་ཀུན་ཏུ་མོས་པ་དང་མཐུན་པར་འཇུག་པའི་ཐུགས་མཁྱེན་པའི་ཡེ་ཤེས་དང་། སྐུ་རེ་རེ་ལའང་འགྲོ་བའི་མོས་པ་ཐ་དད་པའི་སྤྱོད་ཡུལ་ཀུན་ཏུ་དེ་དང་མཐུན་པའི་ཞལ་གྱི་དཀྱིལ་འཁོར་ཞི་ཁྲོ་དང་ཕྲ་མེན་ལ་སོགས་པ་དང་། གདུལ་བྱའི་སྐལ་བ་ཇི་ལྟར་ཡོད་པ་ཀུན་ཏུ་སོ་སོའི་སྐད་དང་མཐུན་པར་ཆོས་སྟོན་པའི་གསུང་བསམ་གྱིས་མི་ཁྱབ་པ་དང་ལྡན་པ་སྟེ། དེ་ལྟར་རྣམ་འཕྲུལ་བསམ་གྱིས་མི་ཁྱབ་ཅིང་མཐའ་ཡས་པར་འཕྲོ་བས་གྲངས་མེད་པ་དག་ཕྱོགས་བཅུའི་ཞིང་ཀུན་ཏུ་སྣང་ནས་འདུལ་བར་གྱུར་ཏོ། ། བཞི་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། ཐམས་ཅད་ཀྱང་ནས། ཐེག་པས་ཞེས་པའི་བར་ཏེ། དེ་ལ་སྤྱིར་ཐེག་པའི་སྒྲ་དོན་དང་། དབྱེ་བ་དང་། ཕྱེ་བ་སོ་སོའི་དོན་བཤད་པ་དང་གསུམ་ལས། སྒྲ་དོན་ནི། ཡཱ་ནའི་སྒྲ་ལས་འདེགས་པའི་དོན་གྱིས་ན་ཐེག་པ་ཞེས་བྱའོ། །དེའང་འདིས་འདེགས་པས་ན་ཐེག་པ་སྟེ་བཞོན་པ་བཟང་པོ་ལྟ་བུའོ། །འདི་འདེགས་པས་ན་ཐེག་པ་སྟེ་དེ་ལ་བརྟེན་ནས་འགྲོ་བའི་གང་ཟག་གོ །འདིར་འདེགས་པས་ན་ཐེག་པ་སྟེ་རང་རང་གི་འདོད་བྱའི་འབྲས་བུའོ། །དེ་ཡང་སྡུད་པ་ལས། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། །དགའ་སྐྱིད་བདེ་བ་མངོན་པར་ཐོབ་བྱེད་ཐེག་པའི་མཆོག །དེ་གང་ཞོན་ནས་སེམས་ཅན་ཐམས་ཅད་མྱ་ངན་འདའ། །ཞེས་སོ། །དབྱེ་བ་ལ། བཀའ་སྤྱི་གཞུང་དུ་གྲགས་པ་ལྟར་ན། ཐེག་པའི་གྲངས་འདི་ཁོ་ན་ཞེས་ཕྱོགས་གཅིག་ཏུ་བཟུང་དུ་མེད་དེ། གདུལ་བྱའི་བློ་དང་འཚམས་པར་སངས་རྒྱས་ཀྱི་ཐུགས་རྗེས་ཆོས་གང་ལ་གང་འདུལ་དུ་བསྟན་པའི་ཕྱིར་ཏེ། རྒྱས་པ་ལས། བླ་མེད་ཐེག་པ་བསམ་ཡས་གསུངས་པ་ཡང་། །སོ་སོ་རང་གི་བློ་ལ་སྣང་བར་ཟད། །ཅེས་དང་། ལང་ཀར་གཤེགས་པ་ལས། སེམས་ཅན་རྣམས་ནི་ཡོངས་དྲང་ཕྱིར། །ཐེག་པ་མཐའ་དག་ངས་བཤད་དེ། །འདི་ཞེས་དམིགས་སུ་ཡོད་མ་ཡིན། །ཞེས་སོ། །དེ་ཡང་རེ་ཞིག་བསྡུ་ན། དམ་ཆོས་པད་དཀར་ལས། ཐེག་པ་གཅིག་སྟེ་ཐེག་པ་གསུམ་དུ་མེད། །ཅེས་པ་ལྟ་བུ་འབྲས་བུ་ལ་དགོངས་ཏེ་མཐར་ཐུག་ཐེག་པ་གཅིག་ཏུ་བསྒྲུབ་པ་དང་། ཡང་ཐེག་པ་ཆུང་ངུ་དང་ཆེན་པོའམ། རྒྱུ་འབྲས་ཀྱི་དབྱེ་བས་གཉིས་དང་། ཉན་རང་བྱང་སེམས་གསུམ་མམ། ཀུན་འབྱུང་འདྲེན་པ། དཀའ་ཐུབ་རིག་བྱེད། དབང་སྒྱུར་ཐབས་ཀྱི་ཐེག་པ་སྟེ་གསུམ་དང་། རྒྱུའི་ཐེག་པ་གསུམ་འབྲས་ཐེག་དང་བཅས་པས་བཞི་དང་། མཚན་ཉིད་སྡེ་གསུམ། ཕྱི་རྒྱུད་སྡེ་གསུམ། ནང་རྒྱུད་སྡེ་གསུམ་སྟེ་ཐེག་པ་དགུ་དང་། ལང་གཤེགས་ལས། ཇི་སྲིད་སེམས་ནི་འཇུག་པའི་བར། །ཐེག་པའི་མཐའ་ལ་ཐུག་པ་མེད། །སེམས་ནི་ནམ་ཞིག་གྱུར་པ་ན། །ཐེག་པ་མེད་ཅིང་འགྲོ་བའང་མེད། །ཅེས་པས་ཇི་སྲིད་བློའི་རིམ་པ་མ་ཟད་ཀྱི་བར་དུ་ཐེག་པའི་མཐའ་ལ་ཐུག་པ་མེད་པས་བསམ་གྱིས་མི་ཁྱབ་པ་དང་། གང་ལ་བརྟེན་ནས་འགྲོ་བའི་ལམ་དང་གང་གིས་འགྲོ་བ་ལ་སོགས་པ་བློ་ངོ་བོ་ཉིད་ཀྱིས་དག་པའི་དོན་ཐེག་པ་ཞེས་པའང་དམིགས་སུ་མེད་པའི་བར་དུ་བཤད་དོ། །བྱེ་བྲག་རྒྱུད་གཞུང་འདི་ཉིད་དུ་གྲགས་པ་ལྟར་ན། སྤྲུལ་སྐུའི་གསུང་བསམ་གྱིས་མི་ཁྱབ་པ་དེ་དག་ཐམས་ཅད་ཀྱང་བསྡུ་ན་འདི་ལྟ་སྟེ། རིགས་ཅན་ལྔའི་གདུལ་བྱ་འདུལ་བའི་དབང་གིས་ཐེག་པའི་བྱེ་བྲག་ལྔར་ཕྱེ་ནས་བསྟན་ཏོ། །ཕྱེ་བ་སོ་སོའི་དོན་ནི། དེ་ཝའི་སྒྲ་ལས་བདེ་བ་ལ་རོལ་པའི་དོན་གྱིས་ལྷ་དང་། མ་ནུ་ཥྱའི་སྒྲ་ལས་ཡིད་ཤས་ཆེ་བས་ན་མི་སྟེ་བསོད་ནམས་ཀྱི་བྱེ་བྲག་ལས་རྟེན་བཟང་པོར་གྱུར་པའོ། །དེའི་ཐེག་པ་ནི། འཇིག་རྟེན་ཕ་རོལ་དང་ལས་འབྲས་ལ་ཡིད་ཆེས་ཀྱི་ལྟ་བས་ཟིན་པའི་སྒོ་ནས་དགེ་བཅུའི་ལས་ལམ་ལ་སྤྱད་པས་ངན་སོང་ལས་ཐར་ཏེ། དགེ་བའི་ལས་སྟོབས་ཆེ་ཆུང་གིས་མི་དང་འདོད་ལྷའི་བདེ་བ་མཐར་ཐུག་གི་བར་བགྲོད་པ་དང་། དགེ་བཅུ་སྤྱོད་པ་གཞིར་བཞག་གི་སྟེང་དུ་ཚད་མེད་པ་བཞི་དང་མི་གཡོ་བའི་ཏིང་ངེ་འཛིན་བསམ་གཟུགས་ཀྱི་སྙོམས་འཇུག་བརྒྱད་བསྒོམས་པས་ཁམས་གོང་མ་གཉིས་ཀྱི་ལྷའི་གོ་འཕང་བགྲོད་པར་བྱེད་དེ་ལང་གཤེགས་སུ་སྔ་མ་ལ་གཙོ་བོའི་སྒྲས་བསྟན་ནས་ལྷའི་ཐེག་པ་དང་། ཕྱི་མ་ལ་འདོད་ཉོན་གྱིས་གཙང་ཞིང་དག་པས་ཚངས་པའི་ཐེག་པ་ཞེས་བཤད་དོ། །དེའང་རྒྱས་པ་ལས། དགེ་བཅུ་སྤྱོད་ཅིང་མི་དགེ་སྤོང་བྱེད་པ། །འདོད་ཁམས་ལྷ་དང་མི་རུ་སྐྱེ་བའི་རྒྱུ། །ཚད་མེད་བཞི་སྤྱོད་མི་གཡོ་སྒོམ་བྱེད་པ། །ཚངས་གནས་ལ་སོགས་སྐྱེ་བའི་རྒྱུ་ཡིན་ནོ། །ཞེས་སོ། །ཤྲ་བ་ཀའི་སྒྲ་ཉན་པ་དང་ཐོས་སྒྲོག་ལ་འཇུག་པས་སྟོན་པ་ལས་ཆོས་ཉན་ཅིང་། རང་གིས་ཐོས་པའི་འབྲས་བུ་གཞན་ལ་སྒྲོག་ཅིང་ཐོས་པས་ན་ཉན་ཐོས་ཏེ། དེ་ཉིད་ཀྱི་ཐེག་པ་ནི། དངོས་པོ་གཟུང་ཡུལ་རགས་པ་དང་འཛིན་པ་སོགས་ཀྱི་རྒྱུན་འདི་ཀུན་རྫོབ་ཏུ་སྣང་བ་ཙམ་ལས་རང་བཞིན་མེད་པས་གང་ཟག་གི་བདག་མེད་རྟོགས་ཀྱང་། ཆོས་ཀྱི་བདག་གཟུང་བ་རྡུལ་ཕྲན་བྱེ་མདོ་གཉིས་ཀྱིས་བསྐོར་བ་བར་བཅས་བར་མེད་དང་། གཉིས་ཀས་འཛིན་སེམས་སྐད་ཅིག་མ་དོན་དམ་བདེན་པར་གཏན་ལ་ཕབ་ནས། ལས་འབྲས་ལ་བླང་དོར་མ་ནོར་བར་སྤྱོད་ཅིང་། སེམས་ལས་སུ་རུང་བའི་ཞི་གནས་དང་། བདེན་བཞིའི་རྣམ་པ་བཅུ་དྲུག་བསྒོམ་པའི་ལྷག་མཐོང་གིས་མཐོང་བས་སྤངས་བ་སོགས་ཡེ་ཤེས་བཅུ་དྲུག་གིས་རིམ་པར་སྦྱངས་ཏེ། མཐོང་ལམ་ཐོབ་པའི་རྗེས་སྒོམ་ལམ་གྱིས་འདོད་ཉོན་དགུའི་བཞི་མན་ཆད་ཙམ་དང་། དྲུག་ནས་བརྒྱད་ཀྱི་བར་དང་། དགུ་པ་སྤངས་པའི་རིམ་པས་གནས་སྐབས་ཀྱི་འབྲས་བུ་རྒྱུན་ཞུགས་ལན་ཅིག་ཕྱིར་འོང་། ཕྱིར་མི་འོང་བ་གསུམ་བགྲོད་ནས་མཐར་ཐུག་ཁམས་གསུམ་གྱི་ཉོན་མོངས་པ་ཐམས་ཅད་སྤངས་པ་དགྲ་བཅོམ་པ་ཉིད་ཀྱི་འབྲས་བུ་མངོན་དུ་བྱེད་པ་སྟེ། རྒྱས་པ་ལས། བདེན་བཞིའི་དོན་རྟོགས་རབ་ཏུ་སྤོང་བ་ཡི། །ཡེ་ཤེས་བཅུ་དྲུག་ཆ་སྦྱངས་རབ་ཞི་བ། །རྒྱུན་ཞུགས་ལ་སོགས་རིམ་པས་སྦྱངས་ནས་ནི། །ཉོན་མོངས་དགྲ་རྣམས་ཞི་བའི་ས་རུ་འགྲོ། །ཞེས་སོ། །པྲ་ཏྱེ་ཀ་བུདྡྷའི་སྒྲ་ལས་སློབ་དཔོན་ལ་མ་བརྟེན་པར་རང་གི་བྱང་ཆུབ་རང་གིས་རྟོགས་པས་ན་རང་རྒྱལ་ཏེ། དེ་ཉིད་ཀྱི་ཐེག་པ་ནི། གང་ཟག་གི་བདག་དང་། གཟུང་བ་རང་བཞིན་མེད་པར་རྟོགས་ཀྱང་། ཤེས་པ་སྐད་ཅིག་མ་དོན་དམ་དུ་བལྟ་ཞིང་འཁོར་འདས་རྟེན་འབྲེལ་རྒྱུ་འབྲས་སུ་ཤེས་ནས་ལུགས་ལྡོག་སྟོང་པ་བཅུ་གཉིས་ཁྲིགས་ཆགས་སུ་བསྒོམས་པས་འབྲས་བུ་བསྒྲུབས་སྟེ། སྒྲ་མེད་ལུས་ཀྱི་རྫུ་འཕྲུལ་གྱིས་ཆོས་སྟོན་ཅིང་། ཡིད་བཞིན་བདེ་བ་མཆོག་གི་སར་མྱ་ངན་ལས་འདའ་བར་བྱེད་པ་སྟེ། རྒྱས་པ་ལས། ཕྱི་ནང་རྟེན་འབྲེལ་སྒྱུ་མ་མིག་ཡོར་ཚུལ་ཤེས་ཤིང་། །དངོས་པོའི་གཟུགས་ལ་ཐོགས་མེད་རབ་ཏུ་འཇུག །དགེ་བཤེས་མི་སློབ་རང་གི་རིག་པས་རྟོགས། །བྱང་ཆུབ་སར་བགྲོད་ཡིད་བཞིན་བདེ་བ་མཆོག །ཅེས་སོ། །བོ་དྷི་སཏྭའི་སྒྲ་ལས་བླ་ན་མེད་པའི་བྱང་ཆུབ་བསྒྲུབ་པ་ལ་སེམས་སྟོབས་ཆེ་བས་ན་བྱང་ཆུབ་སེམས་དཔའ་སྟེ། དེའི་ཐེག་པ་ནི། སེམས་ཙམ་པས་དོན་དམ་པར་གཟུང་འཛིན་གཉིས་མེད་ཀྱི་ཤེས་པ་རང་རིག་རང་གསལ་དང་། དབུ་མ་པས་དོན་དམ་པར་ཆོས་ཐམས་ཅད་སྤྲོས་པ་དང་བྲལ་བར་གཏན་ལ་ཕབ་སྟེ། ཀུན་རྫོབ་སྒྱུ་མ་ཙམ་དུ་སྨོན་པ་དང་འཇུག་པའི་སེམས་ཀྱིས་ཟིན་པའི་སྒོ་ནས་ཕ་རོལ་ཏུ་ཕྱིན་པ་བཅུས་དོན་གཉིས་རྒྱ་ཆེན་པོ་སྤྱོད་ཅིང་། སློབ་པའི་ལམ་བཞིར་བྱང་ཆུབ་ཀྱི་ཆོས་སུམ་ཅུ་རྩ་བདུན་བསྒོམས་པས་བསྐལ་པ་གྲངས་མེད་གསུམ་ན་མི་སློབ་པའི་ལམ་ཀུན་ཏུ་འོད་ཀྱི་ས་བརྙེས་པར་བྱེད་པ་སྟེ། རྒྱས་པ་ལས། བདག་མེད་གཉིས་རྟོགས་ཕ་རོལ་ཕྱིན་རྫོགས་པའི། །ས་བཅུ་རིམ་གྱིས་བགྲོད་པའི་རྣལ་འབྱོར་པས། །སངས་རྒྱས་ས་བགྲོད་གོ་འཕང་ཐོབ་པའི་ལམ། །བདེན་པ་གཉིས་ཀྱིས་རབ་ཏུ་ཐོབ་པར་འགྱུར། །ཞེས་སོ། །གསང་བ་སྔགས་ཀྱི་ཐེག་པ་ནི། རྒྱས་པ་ལས། མཉམ་ཉིད་དོན་རྟོགས་རང་རིག་རྒྱལ་པོ་ནི། །རྒྱ་མཚོ་ཆེན་པོར་ཆུ་ཀླུང་ཀུན་འབབ་ལྟར། །བླ་མེད་དོན་རྟོགས་ཐབས་ཆེན་འདི་དག་ཏུ། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་པས་ཀུན་རྫོབ་ཏུ་ཡང་ཆོས་ཐམས་ཅད་ལ་མི་གཉིས་པའི་བསམ་སྤྱོད་དང་ལྡན་པས་བདེན་གཉིས་ལ་བཟང་ངན་བླང་དོར་དུ་བལྟ་བ་རྒྱུའི་ཐེག་པ་ལས་འཕགས་ཤིང་། དེ་དག་ཐམས་ཅད་འདིར་རྫོགས་པས་ན་བླ་ན་མེད་པ་སྟེ། དེའི་ཐེག་པ་ལ། ཕྱི་ཐུབ་པ་རྒྱུད་དང་། ནང་པ་ཐབས་རྒྱུད་གཉིས་ལས། ཕྱི་ནི་ཀྲྀ་ཡོག་སྡེ་གསུམ་སྟེ། དེ་ཡང་དོན་དམ་པར་མཐའ་བཞི་དང་བྲལ་བའི་དག་པར་རྟོགས་པས་ཀུན་རྫོབ་ཏུ་ལྷ་དང་བདག་རྗེ་ཁོལ་གྱི་ཚུལ་དུ་བལྟས་ནས་དངོས་གྲུབ་ཞུ་ཞིང་། གཙང་སྦྲ་དང་དཀའ་སྤྱད་སོགས་ཕྱིའི་བྱ་བ་ལ་གཙོ་བོར་བརྟེན་ཏེ་བསྒྲུབས་པས་མི་ཚེ་བདུན་ན་རིགས་གསུམ་རྡོ་རྗེ་འཛིན་པའི་ས་ཐོབ་པར་འདོད་པ་ཀྲྀ་ཡ་སྟེ་བྱ་བ་དང་། ལྟ་སྒོམ་རྣལ་འབྱོར་རྒྱུད་དང་སྤྱོད་པ་བྱ་བ་ལྟར་སྤྱད་པས་མི་ཚེ་ལྔ་ན་རིགས་བཞི་རྡོ་རྗེ་འཆང་གི་ས་ཐོབ་པར་འདོད་པའི་ཕྱིར་ཨུ་པ་ཡ་སྟེ་གཉིས་ཀའི་སྤྱོད་པ་ཞེས་བྱ་བ་དང་། དོན་དམ་པར་མཚན་མ་མེད་པའི་ཆོས་ཉིད་ཀྱི་བྱིན་རླབས་ཀུན་རྫོབ་རྡོ་རྗེ་དབྱིངས་ཀྱི་དཀྱིལ་འཁོར་དུ་གཏན་ལ་ཕབ་སྟེ། བདག་དམ་ཚིག་པ་དང་ལྷ་ཡེ་ཤེས་པ་གཉིས་བཟང་ངན་མེད་པར་བལྟས་ནས་རྣལ་འབྱོར་ལ་གཙོ་བོར་བརྟེན་ཅིང་བསྒྲུབས་པས་མི་ཚེ་གསུམ་ན་རིགས་ལྔ་སྟུག་པོ་བཀོད་པའི་ས་ཐོབ་པར་འདོད་པ་ཡོ་ག་སྟེ་རྣལ་འབྱོར་གྱི་ཐེག་པའོ། །ནང་པ་ཐབས་ཀྱི་རྒྱུད་དུ་ཆོས་ཐམས་ཅད་སེམས་ཉིད་སྣང་སྟོང་དབྱེར་མེད་ལྷག་པའི་ཆོས་སྐུ་ཆེན་པོར་གཏན་ལ་ཕབ་པའི་དོན་ཡུལ་མེད་རང་གསལ་དུ་སྒོམ་ཞིང་། དེའི་ངང་ལ་བླང་དོར་མེད་པར་སྤྱད་པས་ཚེ་འདི་ཉིད་ལ་གྲོལ་བར་འགྱུར་རོ། ། གཉིས་པ་ལ་གཉིས་ཏེ། གཉེན་པོ་ལ་དགོངས་ཏེ་དབྱེ་བ་དང་། དེའང་དབང་པོའི་བྱེ་བྲག་གིས་བསྡུ་བའོ། །དང་པོ་ནི། མ་རིག་པ་ནས་གསུང་བར་འགྱུར་རོ་ཞེས་པའི་བར་ཏེ། འགྲོ་བ་རྣམས་ལྷན་ཅིག་སྐྱེས་པའི་མ་རིག་པའི་དབང་གིས་ཕྱིན་ཅི་ལོག་གི་རྣམ་པར་རྟོག་པས་བསྐྱེད་པའི་ཉོན་མོངས་པ་དུག་གསུམ་དང་ཆ་མཉམ་པ་ཉི་ཁྲི་ཆིག་སྟོང་རེ་སྟེ་བསྡོམས་པས་སྟོང་ཕྲག་བརྒྱད་ཅུ་རྩ་བཞིར་སྤྱོད་པའི་གཉེན་པོར་ཆོས་ཀྱི་སྒོ་ཡང་སྡེ་སྣོད་གསུམ་དང་། ཆ་མཉམ་རིག་པ་འཛིན་པའི་སྡེ་སྣོད་དེ་བཞིས་བསྡུས་པ་སྟོང་ཕྲག་བརྒྱད་ཅུ་རྩ་བཞི་སྔར་གསུངས་སོ། །ད་ལྟར་གསུང་ངོ་། །མ་འོངས་པ་ནའང་གསུང་བར་འགྱུར་རོ། །དེ་སྐད་དུའང་ཀུན་བྱེད་ལས། འདོད་ཆགས་འདུལ་བའི་གཉེན་པོར་གསུངས་པ་ནི། །འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས། །ཞེ་སྡང་འདུལ་བའི་གཉེན་པོར་གསུངས་པ་ནི། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས། །གཏི་མུག་འདུལ་བའི་གཉེན་པོར་གསུངས་པ་ནི། །མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས། །ཐམས་ཅད་འདུལ་བའི་གཉེན་པོར་གསུངས་པ་ནི། །སྡེ་སྣོད་བཞི་པ་ཉི་ཁྲི་ཆིག་སྟོང་གསུངས། །ཞེས་དང་། མཛོད་ལས། སྤྱོད་པ་རྣམས་ཀྱི་གཉེན་པོར་ནི། །ཆོས་ཀྱི་ཕུང་པོ་མཐུན་པར་གསུངས། །ཞེས་སོ། ། གཉིས་པ་ནི། དེ་དག་ནས་མཐར་ཐུག་གོ་ཞེས་པའི་བར་ཏེ། ཆོས་ཀྱི་སྒོ་དེ་དག་ཐམས་ཅད་ཀྱང་དབང་པོའི་བྱེ་བྲག་གིས་ལྔར་འདུ་སྟེ། དེ་ཡང་ལས་དགེ་སྡིག་དང་མི་གཡོ་བའི་ལས་ཀྱི་འབྲས་བུ་ཐམས་ཅད་ཆུད་མི་ཟ་བར་སོ་སོར་སྨིན་པར་ཡིད་ཆེས་པས་བླང་དོར་མ་ནོར་བར་སྤྱོད་ཀྱང་འཁོར་བ་ལས་ངེས་པར་འབྱུང་མ་ནུས་པ་ལྷ་མིའི་ཐེག་པ་དང་། གང་ཟག་གི་བདག་མེད་རྟོགས་པས་འཁོར་བ་ལས་ངེས་པར་བྱུང་ཡང་ཆོས་ཀྱི་བདག་གཟུང་བ་རྡུལ་ཕྲན་དང་འཛིན་པ་སྐད་ཅིག་མ་དོན་དུ་འདོད་པ་ཉན་ཐོས་ཀྱི་ཐེག་པ་ལ་ཉོན་མོངས་པ་སྤོང་བའི་ཐབས་དང་། ཤེས་པ་སྐད་ཅིག་མ་དོན་དམ་དུ་འདོད་པས་ཕྱིའི་རྟེན་འབྲེལ་ས་བོན་ནས་འབྲས་བུའི་བར་དང་། ནང་གི་རྟེན་ཅིང་འབྲེལ་བར་འབྱུང་བ་མ་རིག་པ་ནས་རྒ་ཤིའི་བར་དུ་འཁོར་བར་འདོད་པས་རང་རྒྱལ་གྱི་ཐེག་པ་ལ་ཉོན་མོངས་པ་འགེགས་པའི་ཐབས་ཏེ། དེ་གསུམ་ནི་བདེན་པ་གཉིས་ཀ་རྫས་ཡོད་དུ་བལྟས་ནས་བླང་དོར་བྱེད་པས་སྤོང་བའི་ལམ་དུ་གཅིག་གོ །ཆོས་ཐམས་ཅད་བདག་གཉིས་ཀྱིས་སྟོང་པར་རྟོགས་པས་གཟུང་བའི་ཡུལ་ཡང་འཛིན་པའི་ཤེས་པ་རྐྱེན་གྱིས་འཁྲུལ་པའི་ལས་ཀྱིས་ཡུལ་དུ་སྒྲོ་འདོགས་པར་ཟད་ཀྱི། དོན་ལ་དོན་མེད་སྒྱུ་མ་ལྟ་བུར་ཤེས་ཀྱང་། ཐབས་ཀྱིས་ཟིན་པ་དང་མ་ཟིན་པ་ལས་ཕན་གནོད་ཀྱི་བྱ་བ་ཡང་བྱེད་པར་ཤེས་ནས་ཀུན་རྫོབ་རྫས་ཡོད་དུ་བལྟས་ཏེ་བླང་དོར་བྱེད་པས་བྱང་ཆུབ་སེམས་དཔའི་ཐེག་པ་ལ་ཉོན་མོངས་པ་ཆོས་ཉིད་དུ་སྦྱོང་བའི་ཐབས་དང་། ཡང་ཀུན་རྫོབ་རྫས་ཡོད་དུ་མི་འདོད་ཀྱང་བཏགས་པའི་ཡོད་པ་མི་འགོག་པས་འདི་ལྟར་ལས་དང་ལས་ཀྱི་འབྲས་བུ་རྣམས་མེད་ཅེས་སྐུར་པ་གདབ་ཏུ་མི་རུང་ལ། འོན་ཀྱང་ཉོན་མོངས་པ་ལྷ་དང་ཡེ་ཤེས་སུ་སྒྱུར་བའི་ཐབས་ལ་བརྟེན་ན་དེ་དག་གིས་མི་གོས་སོ་ཞེས་སྟོན་པ་ཀྲྀ་ཡོག་སྡེ་གསུམ་གྱི་ཐེག་པ་དང་། ཀུན་རྫོབ་ཏུ་བཏགས་པའི་ཡོད་པར་འཛིན་པའང་ཆེར་ཟད་དེ་ལས་དང་ལས་ཀྱི་འབྲས་བུ་བདག་ཉིད་ཆེན་པོའི་རོལ་པར་རྟོགས་པས་ཉོན་མོངས་པ་ལྔ་ཉིད་ཡེ་ཤེས་ལྔའི་རང་གདངས་སུ་ཤེས་ཏེ་སྤང་གཉེན་གཉིས་མེད་པས་ན་གོས་པར་མི་འགྱུར་ཏེ། ཇི་ལྟར་སྤྱད་ཀྱང་ཡོན་ཏན་དུ་འཆར་བ་སྔགས་ནང་པ་གཉིས་ལ་ཉོན་མོངས་པ་དབང་དུ་བྱེད་པའི་ཐབས་དང་། ཆོས་དབྱིངས་རང་བཞིན་གྱིས་རྣམ་པར་དག་པ་རང་བྱུང་གི་ཡེ་ཤེས་རང་ཤར་བས་སྤོང་སྦྱོང་བསྒྱུར་བ་དབང་དུ་བྱེད་པ་ཐམས་ཅད་དངོས་ཞེན་གྱི་ལྟ་བ་ལས་བྱུང་བར་རྟོགས་ནས། གང་ཡང་མི་འགོག་ཅིང་གང་དུའང་མི་རྩོལ་བས་སྤང་གཉེན་གྱི་ཐ་སྙད་ཐམས་ཅད་ལས་གྲོལ་ནས་ལས་དང་ལས་ཀྱི་འབྲས་བུས་གོས་སུ་མེད་པར་སྟོན་པ་སྟེ། ཐེག་པ་ཐམས་ཅད་ཀྱི་གྲུབ་མཐའི་མཐའ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་གཞུང་འདིར་ཐུག་པ་ཡིན་ནོ། ། གཉིས་པ་ཡོངས་སུ་ཤེས་པར་བྱ་བ་ལྟ་བ་ལ་གཉིས་ཏེ། གསུངས་པ་ལོ་རྒྱུས་སུ་བརྗོད་པ་དང་། གཏན་ལ་དབབ་པ་དངོས་སོ། །དང་པོ་ནི། དེ་ནས་དེ་བཞིན་སོགས་ཏེ། བསྟན་པ་སྤྱིའི་གླེང་གཞི་བཤད་པ་དེ་ནས་སྟོན་པ་དེ་བཞིན་གཤེགས་པ་ཐམས་ཅད་ཀྱི་བདག་པོ་ཉིད་ཀྱིས་གོ་ཕྱེ་བའི་འཁོར་གྱི་ཆེད་དུ་དགོངས་པ་བརྡའི་གསུང་གིས་བརྗོད་པ་དང་འདྲ་བར་བརྡ་སྤྲོད་པ་འདི་བརྗོད་པས་གོ་བར་མཛད་དོ་ཞེས་སྡུད་པ་པོས་ལོ་རྒྱུས་བརྗོད་དེ་འབྲེལ་སྦྱར་བའོ། ། གཉིས་པ་ལ་གཉིས་ཏེ། བརྟག་གཞི་འཁོར་བའི་ཆོས་རང་བཞིན་མེད་པར་དང་། འདས་པའི་ཆོས་བརྗོད་མེད་དུ་གཏན་ལ་དབབ་པའོ། །དང་པོ་ལ། གཞལ་བྱ། གཏན་ཚིགས། གྲུབ་མཐའ་རྡོ་རྗེ་ཐེག་པར་བསྟན་པའོ། །དང་པོ་ནི། ཇི་སྙེད་སོགས་རྐང་པ་ལྔ་སྟེ། ཕྱི་ནང་སྣོད་བཅུད་ཀྱི་དངོས་པོ་ཇི་སྙེད་པས་བསྡུས་པའི་འཇིག་རྟེན་འདི་དག་དེ་མ་ཡིན་པ་ལ་དེར་འཛིན་གྱིས་སྒྲོ་བཏགས་པས་རྨི་ལམ་ལྟར་འཁྲུལ་པའི་ཆོས་ཏེ། རྩ་བ་ལྷན་ཅིག་སྐྱེས་པའི་མ་རིག་པ་དང་། བདག་གཉིས་སུ་རྟོག་པའི་ཀུན་བརྟགས་གཟུང་འཛིན་གཉིས་སྣང་གི་ཤེས་པས་ཕྱིའི་རྟེན་འབྲེལ་ས་བོན་གྱི་རྒྱུ་དང་འབྲེལ་བ་མྱུ་གུ་ནས་འབྲས་བུའི་བར་གྱིས་བསྡུས་པ། རྐྱེན་དང་འབྲེལ་བའི་ཆོས་འབྱུང་ལྔ་དུས་ཀྱི་འགྱུར་བ་དང་བཅས་པས་བསྐྱེད་པ་ལྟ་བུ་དང་། ནང་གི་རྟེན་འབྲེལ་མ་རིག་པ་ནས་རྒ་ཤིའི་བར་གྱིས་བསྡུས་པ་ལྟ་བུར་ཕྱི་ནང་གཉིས་སུ་བར་མེད་པ་ཤིང་རྟའི་འཁོར་ལོ་ལྟར་འཁོར་ཏེ་ལས་མི་མཐུན་པའི་དབང་གིས་བདེ་སྡུག་སྣ་ཚོགས་མྱོང་བས་ཉམ་ཐག་པར་འགྱུར་ཞིང་། དེ་ལྟར་སྣང་དུས་ཉིད་ན་དེའི་རང་བཞིན་ཆོས་ཉིད་ལས་ཉམས་པ་མེད་པས་འཁོར་འདས་གཉིས་དེ་ཉིད་དང་གཞན་དུ་བརྗོད་དུ་མེད་མོད་ཀྱང་། སོ་སོར་ཞེན་པ་སྒྲོ་བཏགས་ཀྱི་བློ་དེ་ཉིད་སྐབས་འདིར་བརྟག་གཞིའམ་གཞལ་བྱའོ། །དེའང་རྣམ་བཀོད་ལས། བཏགས་པའི་སྤྱོད་ཡུལ་གཉིས་ལ་གཞལ། །ཞེས་དང་། ལམ་རིམ་ལས། འཁོར་དང་འདས་དངོས་ཞེན་སྣང་བརྟག །ཅེས་སོ། ། གཉིས་པ་ལ། ཐུན་མོང་དང་། ཐུན་མོང་མ་ཡིན་པ་གཉིས་ལས། དང་པོ། ཐུན་མོང་བ་བདེན་པའི་གཏན་ཚིགས་ནི། ཡང་དག་སྒྱུ་མའི་སོགས་རྐང་པ་གསུམ་སྟེ། འཁོར་བར་སྣང་ཙམ་ཉིད་ནས་ཡང་དག་པར་མ་གྲུབ་པ་དོན་དམ་བདེན་པ་དང་། སྒྱུ་མ་ལྟ་བུར་མ་འགགས་པར་སྣང་བ་ཀུན་རྫོབ་སྟེ། དེ་ལྟར་མཚན་ཉིད་ཐེག་པ་བས་ཆོས་ཐམས་ཅད་བདེན་པ་གཉིས་སུ་འབྱེད་པའི་འདོད་པ་དང་ཚུལ་མཐུན་པར་འདིར་ཡང་གཉིས་སུ་སྨྲ་སྟེ། འདི་ལྟར་བདག་ཏུ་འཛིན་པའི་ཤེས་པ་དང་། བདག་གི་བར་རྟོག་པ་ཕུང་པོ་ལྔ་དང་། འབྱུང་བ་ལྔ་ལ་གཞན་དུ་སྒྲོ་བཏགས་ཏེ་ཡུལ་དུ་འཛིན་པ་འདི་དག་སྣང་ཙམ་ཉིད་ནས་དེ་ལྟར་གྲུབ་པ་མེད་དེ། རྣམ་པར་དག་པའི་དབྱིངས་དེ་བཞིན་ཉིད་ཀྱི་ངང་དུ་ཚུལ་གཅིག་པར་མཉམ་པའི་ཕྱིར་རོ། །དེ་ཡང་བདག་གསུམ་པོ་དེ་དོན་དམ་བདེན་ངོར་གྲུབ་པ་མེད་པས་སྐྱེ་མེད་དུ་མཉམ་ལ། ཀུན་རྫོབ་བདེན་ངོར་མི་བསླུ་བས་སྒྱུ་མ་ཙམ་དུ་མཉམ་པ་ནི་ཐུན་མོང་བ་དང་། ལྷག་པ་བདེན་པ་གཉིས་ཀྱིས་གཏན་ལ་ཕབ་ན། བདག་གསུམ་པོ་དེ་རིམ་པ་ཇི་ལྟ་བར་ཡེ་ཤེས་ལྔ་དང་། རིགས་ལྔ་དང་། ཡུམ་ལྔར་དག་པས་དོན་དམ་བདེན་པའི་དབང་དུ་ཡེ་ཤེས། འབྲས་བུ། རང་བཞིན་དོན་དམ་གསུམ་སྟེ་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པར་མཉམ་ལ། ཀུན་རྫོབ་བདེན་པའི་དབང་དུ་ཡེ་ཤེས། ཕྱག་རྒྱ། དངོས་པོ་སྒྱུ་མ་གསུམ་སྟེ། སྐུ་དང་ཡེ་ཤེས་ཀྱི་དཀྱིལ་འཁོར་དུ་ཡེ་ནས་རྫོགས་པར་མཉམ་པ་ནི་ཐུན་མོང་མ་ཡིན་པའི་མཉམ་པའོ། ། གཉིས་པ་ལ། རྟོགས་པ་བཞི་དང་། དག་པ་གསུམ་གྱི་གཏན་ཚིགས་སོ། །དང་པོ་ནི། བདག་དང་བདག་གི་གཞན་རྣམས་ནི་སོགས་རྐང་པ་གཅིག་དང་བཅས་པའི་ཚིགས་བཅད་གཉིས་ཏེ། བདག་དང་བདག་གི་གཞན་ཞེས་ཐ་དད་དུ་སྣང་བ་འདི་རྣམས་ནི་མ་རིག་པའི་དབང་གིས་ལོག་པར་རྟོག་པའི་འཁྲུལ་སྣང་ཙམ་ཉིད་ལས་གཞན་དུ་མ་མཐོང་བས་ཕྲ་ཞིང་ཕྲ་བ་སྟེ་རྡུལ་ཕྲན་དང་། མ་རྟོགས་པས་ཟབ་པ་སྟེ་ཤེས་པ་སྐད་ཅིག་མ་ཡང་ལོགས་ན་ཡོད་པ་མ་ཡིན་ཡང་། འདི་ལྟར་སྣང་བ་ནི་ལོག་རྟོག་གི་རྒྱུན་སྔ་མ་ཉིད་ལ་ཕྱི་མ་ཉིད་སྤྱོད་པ་རྨི་ལམ་གྱི་སྣང་བ་ལྟར་འཁྲུལ་པར་ཟད་པས་ན་འབྱུང་བཞིའི་འཕོ་འགྱུར་ནམ་མཁའི་ངང་ལས་མ་གཡོས་པ་བཞིན་དུ་དོན་ལ་ཆོས་ཉིད་ལས་གཞན་དུ་གཡོ་བ་ཅི་ཡང་མེད་པ་ནི་རྒྱུ་གཅིག་པའི་རྟགས་ཀྱི་བསྒྲུབ་བྱ་སྟེ། སྒྲུབ་ཚུལ་ནི་ཐ་སྙད་པའི་ཤེས་ངོར་སྣང་ཡང་རྣམ་པར་དཔྱད་ན་ལོག་རྟོག་ཙམ་ཡང་ཡོད་པ་མ་ཡིན་ཏེ། དེའི་རྒྱུ་མ་རིག་པའི་བདག་དང་། འབྲས་བུ་ཕུང་པོ་ལྔ་དང་། ཞེན་པའི་རྒྱུན་རྣམ་ཤེས་སུ་སྣང་བ་ཉིད་ཀྱང་བརྟེན་པའི་གཞི་དང་བསྐྱེད་པའི་རྩ་བ་ཡེ་ནས་གྲུབ་པ་མེད་པས་ཏེ། འཁོར་འདས་མཉམ་པ་ཉིད་ཀྱི་དབྱིངས་སུ་ལོག་རྟོག་སྐད་ཅིག་མའི་རྒྱུད་ཙམ་ཡང་མ་གྲུབ་པས་ཆོས་ཐམས་ཅད་སེམས་ཀྱི་ཆོས་ཉིད་དུ་རྒྱུ་གཅིག་པར་རྟོགས་པའི་ཕྱིར་རོ། །དེ་ལྟར་ལོག་རྟོག་གི་རྒྱུན་རྣམ་པར་དག་པས་ཆོས་ཐམས་ཅད་མཉམ་པའི་དབྱིངས་སུ་རྒྱུ་གཅིག་པ་ཉིད་རྟགས་ཡིག་འབྲུའི་ཚུལ་གྱིས་མ་འགགས་པར་རྟོགས་ཏེ། དེ་ཡང་སྐྱེ་མེད་མཚོན་པ་ཨའི་ཚུལ་ཏེ་གསུང་གི་རང་བཞིན་དང་། དེ་ཉིད་ལ་ཅིར་ཡང་མི་འགགས་པས་དབང་སྒྱུར་བ་མཚོན་པ་ཨུའི་ཚུལ་ཏེ་སྐུའི་རང་བཞིན་དང་། ཡི་གེ་གཉིས་མཚམས་སྦྱར་ལ་ཐིག་ལེས་བརྒྱན་པས་གཉིས་མེད་དུ་རྟོགས་པའི་རིག་པ་ཉིད་ཡེ་ཤེས་ལྔར་གསལ་བ་མཚོན་བྱེད་ༀ་གྱི་ཚུལ་དུ་རྟོགས་པ་ཐུགས་ཀྱི་རང་བཞིན་ཏེ་ཡིག་འབྲུའི་ཚུལ་ལོ། །དེ་ལྟར་རྒྱུ་གཅིག་པ་དང་ཡིག་འབྲུའི་ཚུལ་དུ་རྟོགས་པའི་མཐུས་བདེན་པ་དབྱེར་མེད་དུ་ཡེ་ནས་སངས་རྒྱས་པར་རྟོགས་པའི་བྱིན་རླབས་ཤུགས་ལ་འབྱུང་ཞིང་། རང་རིག་མངོན་སུམ་གྱིས་ཉིད་ལ་ཉིད་སྤྱོད་པ་ལྟར་ཡུལ་མེད་རང་གསལ་དུ་རྟོགས་པའི་ཕྱིར་རྟོགས་པ་བཞིའི་གཏན་ཚིགས་སོ། ། གཉིས་པ་ནི། བདག་དང་གཞན་དང་སོགས་རྐང་པ་གཉིས་ཏེ། བདག་ཕུང་པོ་ལྔ་དང་། གཞན་འབྱུང་བ་ལྔ་དང་། རྟོག་པའི་རྒྱུན་རྣམ་ཤེས་ཏེ་ཕྱི་ནང་གི་ཆོས་འདི་དག་རང་བཞིན་གྱིས་རྣམ་པར་དག་པ་ཡིན་ཏེ། བདག་གསུམ་པོ་དེ་རིམ་པ་ཇི་ལྟ་བར་རིགས་ཀྱི་ཡབ་ལྔ་དང་། ཡུམ་ལྔ་དང་། ཡེ་ཤེས་ལྔར་དག་པའི་ཕྱིར་རོ། ། གསུམ་པ་གྲུབ་མཐའ་ནི། གཏན་ཚིགས་དེ་དག་གིས་གཞལ་བའི་འབྲས་བུ་སྔར། རང་བཞིན་ཉིད་ལས་ཉམས་པ་མེད། །ཅེས་པས་ཆོས་ཐམས་ཅད་རང་བཞིན་བདེན་པ་དབྱེར་མེད་སྤྱོད་ཡུལ་དང་བྲལ་བའི་ཆོས་ཉིད་དུ་གཏན་ལ་ཕེབས་པ་ནི། བླ་ན་མེད་པ་རྡོ་རྗེའི་ཐེག་པ་འདིའི་གྲུབ་མཐའ་སྟེ། མཚན་ཉིད་དང་ཕྱི་རྒྱུད་ཀྱི་ཐེག་པ་ལས་ཁྱད་པར་དུ་གྱུར་པའི་ཕྱིར་མཆོག་གོ །གཉིས་པ་འདས་པའི་ཆོས་བརྗོད་མེད་དུ་གཏན་ལ་དབབ་པ་ལ་ལྔ་སྟེ། ཐེག་པ་བཞིས་ངེས་པར་འབྱུང་ལ་དེ་ལྟར་ངེས་པར་བྱུང་བའི་འབྲས་བུ་བླ་ན་མེད་པའི་ཐེག་པར་བསྟན་པ། ཆོས་ཐམས་ཅད་རང་བཞིན་མེད་པའི་ཆོ་འཕྲུལ་དུ་བསྟན་པ། སངས་རྒྱས་དང་ཆོས་ལ་འཕོ་འགྱུར་མེད་ཀྱང་གདུལ་བྱའི་དོན་དུ་དེ་ལྟར་བསྟན་པ། རྒྱུད་ཀྱི་ཆེ་བ་བསྟན་པ། དེ་ཐམས་ཅད་བཏགས་པ་ཙམ་སྟེ་རང་བཞིན་བརྗོད་མེད་དུ་བསྟན་པའོ། །དང་པོ་ནི། ཐེག་པ་བཞི་སོགས་རྐང་པ་གཉིས་ཏེ། ལྷ་མི་ཉན་རང་། བྱང་སེམས་ཀྱི་ཐེག་པ་བཞི་ཡིས་རང་རང་གི་མི་མཐུན་ཕྱོགས་ངན་འགྲོ་དང་། འཁོར་བ་དང་། མཐའ་གཉིས་ལས་ངེས་པར་འབྱུང་ལ། དེ་ལྟར་ངེས་པར་འབྱུང་བའི་མཐར་བླ་ན་མེད་པའི་ཐེག་པ་གཅིག་པུ་འདི་ཁོ་ན་ནི། དེ་དག་གི་བསྒྲུབ་བྱ་དང་འདི་ལས་བགྲོད་ཅིང་སྦྱང་དུ་མེད་པས་འབྲས་བུར་ངེས་ཤིང་གནས་པའི་ས་ཡང་ཡིན་ནོ། ། གཉིས་པ་ནི། ཡང་དག་རྟོགས་པས་སོགས་རྐང་པ་གཉིས་ཏེ། ཡང་དག་པའི་གནས་ལུགས་རྟོགས་པའི་ཤེས་རབ་ཀྱིས་རབ་ཏུ་བརྟགས་ཤིང་དཔྱད་ན་ཆོས་ཐམས་ཅད་རང་བཞིན་ཅིར་ཡང་གྲུབ་པ་མེད་པའི་ངང་ལས་རྟེན་འབྲེལ་ཙམ་དུ་རོལ་པ་ཅིར་ཡང་མ་འགགས་པར་འཆར་བས་ཐབས་རྣམས་ཀྱང་གདུལ་བྱའི་བློ་དང་མཐུན་པར་ཆུད་མི་ཟ་བར་འགྲུབ་བོ། ། གསུམ་པ་ནི། སངས་རྒྱས་སོགས་ཚིགས་བཅད་གཅིག་སྟེ། ཡང་དག་པར་ན་སྐུ་གསུམ་དབྱེར་མེད་པས་སངས་རྒྱས་སྤྲུལ་པའི་སྐུའང་མྱ་ངན་ལས་ཡོངས་སུ་མི་འདའ་ཞིང་། དེས་གསུངས་པའི་ཆོས་ཀྱང་འཁོར་བ་མ་སྟོངས་བར་ནུབ་པར་མི་འགྱུར་ཏེ། སེམས་ཅན་ཐམས་ཅད་སྒྲོལ་བར་བཞེད་པའི་སྙིང་རྗེ་ཆེན་པོ་མཐར་ཕྱིན་པའི་ཕྱིར་རོ། །འོན་ཀྱང་འཕོ་འགྱུར་ཡོད་པ་ལྟར་སྣང་བ་ནི། གནས་ལུགས་མ་རིག་པའི་སེམས་ཅན་རྣམས་སྨིན་པར་མཛད་པ་དང་འདུལ་བར་མཛད་པའི་ཕྱིར། སངས་རྒྱས་འཇིག་རྟེན་དུ་དང་པོ་བྱུང་བ་ནས་མཐའ་མྱ་ངན་ལས་འདའ་བའི་བར་གྱི་མཛད་པ་དང་། བསྟན་པ་དར་ནུབ་ཀྱི་ཚུལ་སྟོན་པ་ཐམས་ཅད་སྤྲུལ་པ་ཙམ་ལས་རང་རྒྱུད་པ་མ་ཡིན་ཏེ། སྤྱི་མདོ་ལས། ཁྱོད་ནི་ནམ་མཁའི་རང་བཞིན་ཏེ། །འདའ་དང་མི་འདའ་ཡོངས་མི་མངའ། །འཇིག་རྟེན་པ་དང་མཐུན་འཇུག་ཏུ། །འདའ་བས་འདུལ་བར་ཡོངས་སུ་དགོངས། །ཞེས་དང་། གསེར་འོད་དམ་པ་ལས། སངས་རྒྱས་བཅོམ་ལྡན་བསམ་མི་ཁྱབ། །དེ་བཞིན་གཤེགས་པ་རྟག་པའི་སྐུ། །སེམས་ཅན་རྣམས་ལ་ཕན་པའི་ཕྱིར། །བཀོད་པ་རྣམ་པ་སྣ་ཚོགས་སྟོན། །ཞེས་སོ། ། བཞི་པ་ནི། འདུལ་བ་སོགས་ཚིགས་བཅད་གཉིས་ཏེ། གང་དུ་ལྷག་པ་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ཀྱི་བསླབ་པ་གསུམ་གཙོ་བོར་སྟོན་པས་བཞག་པ་འདུལ་བ། མདོ་སྡེ། ཆོས་མངོན་པ་སྟེ་སྡེ་སྣོད་གསུམ་དང་། ཁྲུས་དང་གཙང་སྦྲ་སོགས་འདའ་བར་དཀའ་བའི་དམ་ཚིག་གིས་བཅིངས་པ་བྱ་རྒྱུད་དང་། ཀྲྀ་ཡོག་གཉིས་ཀ་ལ་བརྟེན་ནས་སྒྲུབ་པ་སྤྱོད་རྒྱུད་དང་། ལུས་ངག་གི་སྤྱོད་པ་གྲོགས་ཙམ་ལས་གཙོ་བོར་རྣལ་འབྱོར་ལ་བརྟེན་པས་དོན་གྲུབ་པར་བྱེད་པ་ཡོ་ག་དང་། ཆོ་ག་གསུམ་བསྐྱེད་སོགས་བསྐྱེད་རིམ་དང་། རྫོགས་རིམ་གསལ་སྟོང་གཙོ་བོར་སྟོན་པ་སྐུའི་རྒྱུད་ཕ་བླ་མེད་དང་། བསྐྱེད་རིམ་རྫོགས་ཚུལ་དང་རྫོགས་རིམ་བདེ་སྟོང་གཙོ་བོར་སྟོན་པ་གསུང་གི་རྒྱུད་མ་བླ་མེད་དང་། བསྐྱེད་རྫོགས་ཟུང་དུ་འཇུག་ཅིང་འོད་གསལ་ཡེ་ཤེས་ཆེན་པོའི་རྫོགས་རིམ་གཙོ་བོར་སྟོན་པ་ཐུགས་ཀྱི་རྒྱུད་གཉིས་སུ་མེད་པ་སྟེ། ཕྱོགས་བཅུའི་ཞིང་ཁམས་རྣམས་སུ་སྣོད་ལྡན་ལ་རབ་ཏུ་གྲགས་པའི་མདོ་རྒྱུད་ཐམས་ཅད་གསང་བའི་སྙིང་པོ་འདི་ལས་འཕྲོས་ཏེ། དེ་བས་ན་མ་མོ་དང་མཁའ་འགྲོ་ཐམས་ཅད་ཀྱིས་རྒྱས་འདེབས་པའི་རང་བཞིན་གྱིས་གསང་བའི་སྙིང་པོ་འདི་ནི་འཁོར་བ་ཇི་སྲིད་པ་དེ་སྲིད་དུ་སྡེ་སྣོད་ཀུན་དང་རྒྱུད་ཀུན་གྱི་འབྱུང་གནས་ཏེ་ཕྱི་མོ་ལྟ་བུར་འགྱུར་ཞིང་། དེ་ཐམས་ཅད་གཏན་ལའང་འདིས་ངེས་པར་འབེབས་པས་ན་མདོ་རྒྱུད་ཀུན་གྱི་སྤྱི་འགྲེལ་ལྟ་བུའང་ཡིན་ནོ། ། ལྔ་པ་ནི། ཆོས་རྣམས་ནས་བརྗོད་དོ་ཞེས་པའི་བར་ཏེ། དེ་ལྟར་བསྟན་པའི་ཆོས་རྣམས་ཐམས་ཅད་མིང་ཐ་དད་དུ་བཏགས་པ་ཙམ་ལས་དོན་ལ་གྲུབ་པ་མེད་ཀྱང་། སྟོན་པས་ཐ་སྙད་ལ་བརྟེན་ནས་ཡང་དག་པའི་དོན་ལ་རིམ་གྱིས་དཀྲི་བའི་ཆེད་དུ་རེ་ཞིག་གདུལ་བྱའི་བློ་དང་མཐུན་ཕྱོགས་སུ་མིང་དང་ཚིག་ཏུ་སྒྲོ་བཏགས་ནས་ཆོས་བསྟན་པ་ཙམ་ལས། དེ་ལྟར་སྟོན་པའི་དུས་ཉིད་ནས་མིང་ཚིག་ལ་དོན་གྱི་དངོས་པོ་ཅུང་ཟད་ཀྱང་གྲུབ་པ་མེད་དེ། ཏིང་འཛིན་རྒྱལ་པོ་ལས། ཇི་ལྟར་ལ་ལ་ཞིག་ལ་བུ་བཙས་ནས། །དེ་ཡི་མིང་ནི་ཐ་དད་དེར་བཏགས་ཀྱང་། །ནང་དང་ཕྱི་རོལ་ཀུན་ཏུ་བཙལ་ན་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་སོ། །དེ་ལྟར་ཆོས་ཐམས་ཅད་བརྗོད་དུ་མེད་པའོ་ཞེས་བརྗོད་པར་མཛད་དོ། ། གཉིས་པ་བསྡུ་བ་ལ་བཞི་སྟེ། གསུངས་པ་ལོ་རྒྱུས་སུ་བརྗོད་པ། བསྡུ་བ་དངོས། བཀའ་གསང་སྔགས་མཚོན་པའི་ཚིག །བསྡུས་པའི་ཡོན་ཏན་ནོ། །དང་པོ་ནི། དེ་ནས་སོགས་ཏེ། རྒྱས་པར་བསྟན་པ་དེ་ནས་དེ་བཞིན་གཤེགས་པ་ཡབ་ཡུམ་དགོངས་པ་གཉིས་སུ་མེད་པའི་རང་བཞིན་གྱི་དཀྱིལ་འཁོར་དེ་དག་ཉིད་ཀྱི་དོན་སྤྱོད་ཡུལ་ལས་འདས་པའི་གསང་བ་འདི་ཉིད་སྟོན་པའི་སྐུ་ལ་སོགས་པ་ལྔའི་ངོ་བོ་རིགས་ལྔ་དབྱེར་མི་ཕྱེད་པའི་རྡོ་རྗེ་ལས་ཕྱུང་ངོ་། །གཉིས་པ་ནི། ཨ་ཧོཿསྲིད་རྩའི་སོགས་ཚིགས་བཅད་གཉིས་ཏེ། ཨ་ཧོཿཞེས་པ་ནི་འཁོར་འདས་གཉིས་མེད་དུ་གཏན་ལ་ཕེབས་པ་ལ་ངོ་མཚར་བའོ། །དེ་ཡང་ཚིགས་སུ་བཅད་པ་དང་པོའི་ནང་དུ་ཇི་སྙེད་འཇིག་རྟེན་ཞེས་སོགས་གཞལ་བྱ་སྟོན་པ་རྐང་པ་ལྔ་བསྡུ་སྟེ། འདི་ལྟར་སྲིད་པ་འཁོར་བའི་ཉེས་དམིགས་ཐམས་ཅད་བསྐྱེད་པའི་རྩ་བ་ནི་ང་དང་བདག་ཏུ་རྟོག་པའི་མ་རིག་པ་སྟེ། དེ་ལས་འཕྲོས་པ་ལས་དང་ཉོན་མོངས་པའི་འདུ་བྱེད་ཀྱི་བག་ཆགས་སྨིན་པའི་དབང་གིས་མངོན་པར་གྲུབ་པ་རྒྱུད་དྲུག་གི་སེམས་ཅན་སོ་སོའི་སྣང་བ་ལ་སྐྱེ་བ་དང་། སྲོག་འགག་པས་འཆི་བ་དང་། ལུས་བཟང་ངན་དང་། ལོངས་སྤྱོད་ཆེ་ཆུང་དང་། གནས་མཐོ་དམའ་དང་། འཆི་འཕོ་ལྟུང་བ་ལ་སོགས་པའི་སྡུག་བསྔལ་གྱི་འཕྲུལ་འཁོར་བར་མེད་དུ་འཁོར་བ་ལ་སོགས་པ་སྟེ། དེ་དག་ཀྱང་ལོག་རྟོག་ཉིད་དེ་ལྟར་སྣང་བ་ཙམ་ལས་དོན་གཞན་དུ་གྲུབ་པ་ཅི་ཡང་མེད་དེ། དྲན་པ་ཉེར་བཞག་ལས། སྣ་ཚོགས་ལུས་དང་ལོངས་སྤྱོད་དང་། །བདེ་སྡུག་ཉིད་དུ་སྣང་བ་ནི། །སེམས་ཀྱིས་སྤྲུལ་ཞིང་སེམས་ཀྱིས་བྱས། །སེམས་ལས་གཞན་དུ་ཅུང་ཟད་མེད། །དཔེར་ན་རྨི་ལམ་ཇི་བཞིན་ནོ། །ཞེས་སོ། །རྐང་པ་ལྔ་པའི་ཕྱེད་སྔ་མར་གཏན་ཚིགས་གསུམ་གྲུབ་མཐའ་དང་བཅས་པ་བསྡུ་སྟེ། བདེན་རྟོག་དག་པའི་གཏན་ཚིགས་གསུམ་གྱི་སྒོ་ནས་གཞལ་བྱའི་ཆོས་ཐམས་ཅད་རང་བཞིན་གྱིས་རྣམ་པར་དག་པའི་སྟོང་ཉིད་བདག་མེད་པའི་དོན་གཏན་ལ་ཕེབས་པའོ། །ཕྱེད་ཕྱི་མར་ཡང་དག་རྟོགས་པས་སོགས་རྐང་པ་དྲུག་བསྡུ་སྟེ། སྟོང་ཉིད་བདག་མེད་པའི་དོན་ཡེ་ནས་མཁྱེན་པ་སོ་སོ་རང་གིས་རིག་པའི་ཡེ་ཤེས་ཐུགས་སུ་ཆུད་པ་ན་ཆོས་ཐམས་ཅད་རང་བཞིན་མེད་པའི་ཆོ་འཕྲུལ་དུ་གཟིགས་ཤིང་སྟོན་པ་དང་བསྟན་པའི་འཕོ་འགྱུར་ཡང་འགྲོ་བ་འདུལ་བའི་ཐབས་ཙམ་དུ་སྟོན་པར་སྣང་བའོ། །རྐང་པ་དྲུག་པར་ཐེག་པའི་ཁྱད་པར་དང་། རྒྱུད་ཀྱི་ཆེ་བ། རང་བཞིན་བརྗོད་མེད་དུ་བསྟན་པའི་དོན་གསུམ་བསྡུ་སྟེ། དམིགས་བྱ་གཟུང་བའི་ཡུལ་དང་དམིགས་བྱེད་འཛིན་སེམས་ཀྱི་རྟོག་པ་གཉིས་ངང་གིས་མེད་པར་དྲན་སྣང་ཡེ་ཤེས་སུ་དབང་བསྒྱུར་བ་སྟེ། ཡེ་ཤེས་ཉིད་ལ་ཉིད་འདོད་དགུར་སྤྱོད་པས་བཞིས་ངེས་པར་བྱུང་བའི་འབྲས་བུ་ཐེག་པ་འདིར་བསྟན་པ་དང་། འདི་ལས་བསྟན་པ་ཐམས་ཅད་འཕྲོས་ཤིང་ཐམས་ཅད་འདིས་འགྲེལ་པ་དང་། དབབ་བྱའི་ཡུལ་དང་འབེབས་བྱེད་ཀྱི་ཐེག་པ་ཐམས་ཅད་བརྗོད་མེད་དུ་བསྟན་པའོ། །དེ་རྣམས་ནི་བསྡུ་བའི་སྟོད་དུ་ལེའུའི་སྨད་བསྡུ་བ་ཞེས་བྱའོ། །དེ་ནས་རྐང་པ་བདུན་པ་དང་བརྒྱད་པ་སྟེ་བསྡུ་བའི་སྨད་དུ་ལེའུའི་སྟོད་བསྟན་པ་འབྱུང་བ་སྤྱིའི་གླེང་གཞི་བསྡུ་སྟེ། གནས་ལུགས་རྟོགས་པས་ཆོས་ཐམས་ཅད་ལ་དབང་བསྒྱུར་བའི་འབྲས་བུ་མངོན་དུ་བྱས་པས་ཡོན་ཏན་ལྷུན་གྱིས་གྲུབ་པ་ལ་ངོ་མཚར་བའི་མཛད་པ་གླེང་གཞི་སྤྲོ་བའི་རྒྱུ་དང་། སྐུ་བསོད་ནམས་ཆེན་པོ་དང་། གསུང་རིག་པ་དང་། ཡོན་ཏན་ཉིད་མངོན་ཤེས་དང་རྫུ་འཕྲུལ་དུ་ཤར་ནས་དོན་མཛད་པ་ཐུགས་མངོན་སུམ་པ་དང་། རྫུ་འཕྲུལ་བསམ་གྱིས་མི་ཁྱབ་པས་འདུལ་བ་སྟེ། ཇི་ལྟར་སྤྲོ་བའི་མཛད་པ་འདུལ་བ་བཞིས་གང་དུ་འདུལ་བའི་ཞིང་ཁམས་མཐའ་ཡས་པར་སྣང་བ་དེ་ཐམས་ཅད་ཀྱང་སངས་རྒྱས་ཉིད་ཀྱི་ཡེ་ཤེས་རང་སྣང་བ་ལས་གཞན་ལོགས་ན་རང་མཚན་དུ་གྲུབ་པ་མེད་དེ། ཡེ་ཤེས་དེ་ཉིད་གདུལ་བྱའི་སྣང་བ་ལ་དེ་ལྟར་སྣང་བ་ཡིན་ཏེ། རྨད་བྱུང་རྒྱལ་པོ་ལས། སངས་རྒྱས་སྐུ་དང་ཡེ་ཤེས་ཞིང་ཁམས་དང་། །ཡེ་ཤེས་ཡོན་ཏན་ཕྲིན་ལས་ཇི་སྙེད་པ། །ཡེ་ཤེས་དེ་ཉིད་དེ་ལྟར་སྣང་བ་ཡིན། །གཞན་ནས་མ་ཡིན་དེ་ལྟར་ལྷུན་གྱིས་གྲུབ། །ཅེས་སོ། །གསུམ་པ་ནི། ཞེས་རྡོ་རྗེ་སོགས་ཏེ། དེ་ལྟར་ཆོས་ཐམས་ཅད་སྣང་བ་གཉིས་ལས་མ་འདས་སོ་ཞེས་རྡོ་རྗེ་འཛིན་པ་གསང་བའི་བདག་པོས་ཚིག་ཏུ་བསྡུས་པའོ། །བཞི་པ་ནི། ཞེས་བརྗོད་པས་ཐུབ་པ་སོགས་ཏེ། དེ་སྐད་ཅེས་བརྗོད་པས་སྟོན་པའི་ཐུགས་རྗེ་ལས་ཐུབ་པ་དྲུག་གི་སྤྲུལ་པ་གྲངས་མེད་པ་སྤྲོས་ནས་འདུལ་བའི་དབང་གིས་ཆོས་ཀྱི་སྒོ་དུ་མ་བསྟན་པ་དང་། གདོད་ནས་གྲུབ་པའི་དེ་བཞིན་གཤེགས་པ་ཐམས་ཅད་ཀྱིས་དགོངས་པ་དང་བརྡ་ལ་སོགས་པའི་སྒོ་ནས་གསུངས་པ་ཡང་ཆོས་ཐམས་ཅད་སེམས་དང་ཡེ་ཤེས་རང་སྣང་བར་བསྟན་པ་དེ་དག་ཙམ་དུ་འདུས་པར་སྟོན་པ་དེ་བཞིན་གཤེགས་པ་རིགས་དྲུག་པ་ཉིད་ཀྱིས་མཁྱེན་ཏོ། ། གཉིས་པ་ལེའུའི་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉི་ཤུ་རྩ་གཉིས་སུ་ཡོད་པ་ལས་འདིས་འཁོར་འདས་ཀྱི་ཆོས་ཐམས་ཅད་སེམས་དང་ཡེ་ཤེས་ཉིད་དེ་ལྟར་སྣང་བ་ཙམ་དང་། དེ་ཐམས་ཅད་ཀྱང་མཐར་རང་བཞིན་གྱིས་རྣམ་པར་དག་པའི་ཆོས་ཉིད་དུ་གཏན་ལ་ཕབ་ནས་བསྟན་པའི་ལེའུ་སྟེ་གསུམ་པའོ།། །། ལེའུ་བཞི་པའི་འགྲེལ་པ།ལེའུ་བཞི་པ་ལ་གསུམ་སྟེ། གསུངས་པ་ལོ་རྒྱུས་བརྗོད་པ་དང་། གཞུང་དང་། མཚན་ནོ། །དང་པོ་ནི། དེ་ནས་དེ་བཞིན་གཤེགས་པ་ཐམས་ཅད་ནས་རྡོ་རྗེ་ལས་ཕྱུང་ངོ་ཞེས་པའི་བར་ཏེ། ཆོས་ཐམས་ཅད་གཏན་ལ་ཕབ་པ་དེའང་མཚོན་བྱེད་ཡི་གེ་ལ་བརྟེན་ནས་འབེབས་དགོས་པའི་ཕྱིར། དེ་ནས་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་དགོངས་པ་ཐ་དད་མེད་དེ་གཅིག་ཏུ་གྱུར་ནས་སྲིད་ཞི་མཉམ་པ་ཆེན་པོའི་ཚུལ་དུ་དབྱེར་མི་ཕྱེད་པ་རྡོ་རྗེའི་དབྱིངས་སུ་འཁོར་འདས་ཀྱིས་བསྡུས་པའི་ཆོས་ཐམས་ཅད་ཡེ་ནས་རྣམ་པར་དག་པས་སངས་རྒྱས་པར་གྱུར་པའི་ཏིང་ངེ་འཛིན་ལས་དགོངས་པ་གཞན་དུ་མི་གཡོ་བར་བཞུགས་པས་ཆོས་ཐམས་ཅད་ངོ་བོ་མེད་པ་མིང་ཙམ་དུ་གནས་པའི་དོན་མཚོན་པར་བྱེད་པ་ཡི་གེ་ཕྲེང་བའི་འཁོར་ལོ་ཞེས་བྱ་བ་འདི་སྟོན་པ་ཉིད་ཀྱི་སྐུ་དང་གསུང་དང་ཐུགས་དབྱེར་མི་ཕྱེད་པའི་རྡོ་རྗེ་ལས་ཕྱུང་ངོ་། ། ལེའུའི་གཞུང་ལ་གཉིས་ཏེ། རྒྱས་པར་བཤད་པ་དང་། བསྡུས་ཏེ་བསྟན་པའོ། །དང་པོ་ལ་བཞི་སྟེ། ཡི་གེ་ཇི་ལྟར་བྱུང་བའི་ཚུལ། དེ་ལྟར་བྱུང་བའི་མཐུ། ལམ་པའི་དབང་དུ་སེམས་སྦྱང་བ། ཡི་གེའི་དོན་བཤད་པའོ། །དང་པོ་ནི། ཨ། ཀ་ཁ་ནས་ཨོ་ཨཽ་ཞེས་པའི་བར་ཏེ། ཀུན་འདུས་ལས། དབྱིངས་ལས་ཨ་བྱུང་ཨ་ལས་ནི། །ཡི་གེའི་ཚོགས་རྣམས་མ་ལུས་འཕྲོ། །ཞེས་པས་ཡི་གེ་འཁོར་ལོའི་འཕྲོ་གཞིའམ་རྩ་བ་ཨ་ཡིག་ནི་ཁོང་ནས་རང་བྱུང་བ་སྟེ། འགྲེལ་ཆུང་ལས། སྐུ་གསུང་ཐུགས་ཀྱི་ཀློང་ནས་ཨ་བྱུང་སྟེ། །ཨ་ནི་ཁོང་ནས་འབྱུང་བ་སྐྱེ་བ་མེད། །ཅེས་སོ། །ཡི་གེ་གཞན་རྣམས་སྔོན་བྱུང་སྟོན་པའི་ཐུགས་རྗེ་རང་སྣང་བའི་ཚེ་འཕྲོ་བའི་གནས་ནི་ཨའི་འོད་ཟེར་སྐུའི་གནས་སོ་སོར་འཁྱིལ་བ་དེ་དང་དེ་ལས་བྱུང་བ་སྟེ། དེའང་འགྲེལ་ཆུང་ལས། ཨ་ལས་འོད་ཟེར་མགུལ་གྱི་བུམ་པར་འཁྱིལ། །འོད་འཕྲོས་ཀ་ལ་སོགས་པ་འབྲུ་ལྔ་ཤར། །ཞེས་སོགས་གསུངས་པ་ལྟར། མགུལ་གྱི་གནས་ལས་ཀ་ཁ་ག་གྷ་ང་། དེ་བཞིན་དུ་ལྗགས་ལས་ཙ་སྡེ། ལྗགས་ཀྱི་རྩེ་མོ་ལས་ཊ་སྡེ་དང་ཏ་སྡེ་གཉིས། མཆུ་ལས་པ་སྡེ། སྐུའི་ཆ་ཉི་ཤུ་ལས་ཡ་སོགས་བཅུ་བདུན་དང་ཁྱབ་བྱེད་ཀྱི་ཡི་གེ་གསུམ་རྣམས་འཐོན་ཏོ། །དེ་ལ་སྐུའི་ཆ་ཉི་ཤུ་ནི་འགྲེལ་ཆུང་གི་བཞེད་པ་ལྟར་བསྡོམས་སུ་བྱས་ན། བྱིན་པ་སྟ་ཟུར་དཀུ་སྐབས་དང་། །དཔུང་ལས་ཡ་ར་ཝ་ལ་བྱུང་། །ཕྱག་མཐིལ་ཐུགས་ཀ་མཛོད་སྤུ་དང་། །ཞབས་མཐིལ་གསང་གནས་ལས་རིམ་བཞིན། །ཤ་ཥ་ས་ཧ་ཀྵ་རྣམས་འཕྲོས། །སྤྱན་སྙན་ཚེམས་ཤངས་རྣམ་བཞི་ལས། །གཉིས་གཉིས་འཕྲོས་པས་ཨི་ཨཱི་དང་། །ཨུ་ཨཱུ་ཨེ་ཨཻ་ཨོ་ཨཽ་འཕྲོས། །སྤྱི་གཙུག་ལྟེ་བ་མཚོག་མ་ཡི། །གནས་ལས་མགོ་ཤད་ཏིག་གསུམ་འཐོན། །ཞེས་བྱའོ། །རྗེས་འཇུག་ལམ་པའི་སེམས་ཉིད་རང་སྣང་བའི་ཡི་གེ་འབྱུང་བའི་གནས་ནི། སྨྲ་སྒོ་ལས། ཁོག་པ་མགྲིན་པ་རྐན་དང་ལྕེ། །སྣ་དང་སྤྱི་བོ་སོ་དང་མཆུ། །ཞེས་པས་ཨ་ཀུ་ཧ་རྣམས་མགྲིན་པ། ཨི་ཙུ་ཡ་ཤ་ཡེ་རྣམས་རྐན། རྀ་ཊུ་ར་ཥ་སྤྱི་བོ། ཨུ་པུ་ཝ་ཨོ་མཆུ། ལྀ་ཏུ་ལ་ས་སོ། རྗེས་སུ་ང་རོ་སྣ་སྟེ། མགྲིན་པ་རྐན་སྤྱི་བོ་སོ་བཞིའི་བྱེད་པ་ནི་རིམ་བཞིན་ལྕེའི་རྩ་བ་དང་། དབུས་དང་། རྩེ་མོར་ཉེ་བ་དང་། རྩེ་མོ་རྣམས་རྐན་དང་འཕྲད་པ་ལས་སོ། །འདིར་དབྱངས་ཨཱ་རིང་དང་། རྀ་ལྀ་བཞི་དང་། ཨཾ་ཨཿརྣམས་མ་བྱུང་བ་ནི་ལྷ་དང་སྦྱོར་བའི་དབང་གིས་བསྡུས་པ་སྟེ། ཨཱ་རིང་པོ་ཤད། ཨཿརྣམ་བཅད་ཅན་ཏིག །རྀ་ལྀ་བཞི་ར་དང་ལ། ཨཾ་ནི་ཨོ་ཡིག་ལ་སྦྱར་ནས། ༀ་ཞེས་བསྡུས་པར་རྗེ་རོང་ཟོམ་བཞེད། ཐར་ལོའི་ཕྱི་འགྱུར་ལས་ནི་ཡི་གེ་ལྔ་བཅུ་ཚང་བར་བྱུང་ཞིང་འོག་ཏུ་སོ་སོའི་དོན་འཆད་པའི་དུས་སུའང་། ཨཱ་ནི་ཐོག་མཐའ་སྟོང་པ་ཉིད། །ཨཾ་ནི་ཉེར་སྐྱེས་དག་པ་ཉིད། །ཨཿནི་ཟས་སོགས་དག་པ་ཉིད། །རྀ་ནི་དངོས་དང་དངོས་མེད་སྟོང་། །རཱྀ་ནི་སྲིད་དང་སྲིད་མེད་སྟོང་། །ལྀ་ནི་ཤེས་དང་ཤེས་བྱ་སྟོང་། །ལཱྀ་ནི་སྟོང་དང་སྙིང་རྗེའི་བདག །ཅེས་འབྱུང་ཞིང་། སྔར་གྱི་དཔེ་ཕལ་ཆེ་བར། ༀ་ནི་ཐམས་ཅད་ཞིག་པ་ཡིན། །ཞེས་རོང་ཊཱིཀ་གི་བསྡུས་བཤད་ལྟར་ཨཽ་ལ་ༀ་དུ་འདོན་ནའང་རྒྱ་དཔེར། ཨཽ་སརྦ་བཱི་ནཱ་ཤི་ཏཱ། ཞེས་སྣང་བས་ཨཽ་ཉིད་དུ་བཏོན་པ་ལེགས་སོ། ། གཉིས་པ་ནི། འདི་དག་ཕྱུང་བས་ཞེས་སོགས་ཏེ། ཡི་གེ་འདི་དག་ཕྱུང་བ་ཙམ་གྱི་མཐུས་འཇིག་རྟེན་དྲུག་གི་ཕྱོགས་བཅུ་མཐའ་ཡས་པ་ཐམས་ཅད་ཤར་ནུབ་དང་མཐའ་དབུས་སོགས་ཕན་ཚུན་མཐོ་དམའི་རྣམ་པ་དྲུག་ཏུ་གཡོས། ཆེར་རབ་ཏུ་གཡོས། ཆེས་ཆེར་ཀུན་ཏུ་གཡོས་པས་དངོས་པོའི་འཁྲུལ་པ་ཞིག་ནས་འཁོར་འདས་ཀྱི་ཆོས་ཐམས་ཅད་མིང་དུ་བཏགས་པ་ལས་དོན་གྱི་ངོ་བོ་མ་གྲུབ་པའི་མཚན་ཉིད་ཙམ་དུ་གྱུར་པ་ལ་མཉེས་པས་ཧོཿཞེས་བྱའོ། །དེ་ལྟར་ཡང་སྤྱི་མདོ་ལས། གང་སྐྱེ་བ་མེད་པ་མཚོན་པར་བྱེད་པའི་ཡི་གེ་ལ་ནི་ཨ་ཞེས་བླ་དྭགས་སུ་བཏགས་སོ། །བྱ་བ་མཚོན་པར་བྱེད་པའི་ཡི་གེ་ལ་ནི་ཀ་ཞེས་བླ་དྭགས་སུ་བཏགས་སོ། །ཞེས་སོགས་གསུངས་པ་བཞིན་ནོ། ། གསུམ་པ་ལམ་པའི་དབང་དུ་སེམས་སྦྱང་བ་ལ་གསུམ་སྟེ། ཨ་ཡིག་ལ་སྦྱང་བ། ཡི་གེ་གཞན་ལ་སྦྱང་བ། དེ་ཡེ་ཤེས་ཀྱི་རྒྱུར་བསྟན་པའོ། །དང་པོ་ནི། ཨ། རབ་ཏུ་བརྟན་གྱུར་སོགས་ཚིགས་བཅད་གཅིག་སྟེ། རང་རིག་སྣང་སྟོང་གཉིས་སུ་མེད་པའི་རང་བཞིན་ཨ་ཡིག་དཀར་པོ་གསལ་བརྟན་གྱི་ཚད་བརྒྱད་དང་ལྡན་པ་བསྒོམ་པར་བྱའོ། །ཇི་ལྟར་ན། མི་གཡོ། མི་འགྱུར། མངོན་པར་མི་འགྱུར། ཅིར་ཡང་བསྒྱུར་དུ་རུང་བ་སྟེ་རབ་ཏུ་བརྟན་པར་གྱུར་པའི་ཚད་བཞི་དང་ལྡན་པའི་ཨ་དཀར་པོ། སལ་ལེ། སང་ངེ་། ལྷག་གེ ། ལྷང་ངེ་བ་སྟེ་གསལ་བའི་ཚད་བཞི་དང་ལྡན་པ་ལ་རྩེ་གཅིག་ཏུ་བློ་གནས་པ་དང་། སྤྱོད་ཡུལ་གྱི་སྣང་ཞེན་སྦྱོང་ཕྱིར་དེ་ལས་ཤིན་ཏུ་ཕྲ་བའི་ཨ་གྲངས་མེད་པ་རྣམས་སྤྲོ་བར་བྱའོ། །དེ་ལྟར་སྤྲོས་པས་ཕྱོགས་བཅུ་ཐམས་ཅད་ཨས་གང་བར་སྣང་བ་ཏིང་ངེ་འཛིན་གྱི་ཡུལ་དུ་གསལ་བར་གྱུར་པ་དང་། དེ་ནས་འཕྲོ་གཞིའི་ཨ་དེ་ལ་བསྡུས་ཀྱང་གཞི་དང་མཁའ་ཁྱབ་ཀྱི་ཨའི་རང་བཞིན་ལ་འཕེལ་བའམ་འགྲིབ་པ་མེད་དེ། མ་འདྲེས་ཡོངས་སུ་རྫོགས་པར་གསལ་ཞིང་བརྟན་པའི་ཕྱིར་རོ། །གཉིས་པ་ནི། དེ་ལས་སོགས་རྐང་པ་གཉིས་ཏེ། ཨ་ཡིག་དེ་ལས་མིང་གི་གཞི་དང་ང་རོ་རྣམས་གསལ་བར་བྱེད་པའི་ཡི་གེ་བཞི་བཅུ་རྩ་གཉིས་ཀྱི་ཚོགས་ཁ་དོག་གསལ་ཞིང་འོད་འབར་བ་ཕྱོགས་ཀུན་ཁྱབ་པར་སྤྲོ་ཞིང་བསྡུ་བའི་ཚུལ་གྱིས་སྦྱོང་བའང་སྔར་ཨ་ལ་ཇི་ལྟར་སྦྱངས་པ་དེ་བཞིན་ནོ། །གསུམ་པ་ནི། འདི་ནི་སོགས་རྐང་པ་གཉིས་ཏེ། དེ་ལྟར་ཡི་གེ་ལ་སེམས་སྦྱོང་བའི་ཐབས་འདི་ལ་འབད་པས་ནི་རྡོ་རྗེ་གསུམ་གྱི་དངོས་གྲུབ་ཐམས་ཅད་ཀྱི་རྒྱུ་ཏིང་ངེ་འཛིན་བརྟན་པ་ཉིད་འབྱུང་སྟེ། དེས་འབྲས་བུ་ཡེ་ཤེས་བསྐྱེད་པའི་རྒྱུ་བྱེད་པ་ཡིན་ནོ། ། བཞི་པ་ཡི་གེའི་དོན་བཤད་པ་ལ་གསུམ་སྟེ། གསུངས་པ་ལོ་རྒྱུས། དོན་བཤད་དངོས། མཇུག་བསྡུ་བའོ། །དང་པོ་ནི། དེ་ནས་སོགས་ཏེ། ཡི་གེ་ལ་སེམས་སྦྱང་བ་བསྟན་པའི་རྗེས་དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་ཉིད་སྟོན་པས་ཡི་གེའི་དོན་བཤད་ཀྱི་ཆེད་དུ་བརྗོད་པ་འདི་དག་བརྗོད་དོ། ། གཉིས་པ་ལ་གཉིས་ཏེ། ཡི་གེ་སྤྱིའི་དོན་བཤད་དང་། བྱེ་བྲག་བཞི་བཅུ་རྩ་ལྔའི་དོན་བཤད་པའོ། །དང་པོ་ལ་བཞི་སྟེ། ཡི་གེའི་ཆེ་བ། རང་བཞིན། བྱེད་ལས། ངེས་ཚིག་གོ །དང་པོ་ལ་གཉིས་ཏེ། ཡི་གེ་སྐུ་གསུམ་གྱི་བདག་ཉིད་དུ་བསྟན་པ་དང་། དེ་དག་གི་རྡོ་རྗེ་གསུམ་མཚོན་བྱེད་དུ་བསྟན་པའོ། །དང་པོ་ལ་གསུམ་ལས། དམིགས་མེད་ཆོས་སྐུར་བསྟན་པ་ནི། ཨ་ནི་སྟོང་དང་སོགས་ཚིགས་བཅད་གཅིག་སྟེ། ཡི་གེ་ཨ་ནི་སྟོང་པ་དང་མི་སྟོང་པ་གཉིས་ཀྱི་མཐའ་དང་བྲལ་བར་མ་ཟད། ཟུང་འཇུག་དབུ་མ་ཙམ་དུའང་དམིགས་སུ་ཡོད་པ་མ་ཡིན་པས་སྤྲོས་པ་ཐམས་ཅད་དང་བྲལ་བ་སྟེ། སྤྱི་མདོ་ལས། སྣང་དང་མི་སྣང་ལ་སོགས་པ། །གཉིས་སུ་རྟོག་པ་ཐམས་ཅད་མཐའ། །ཀུན་མཁྱེན་རྣམས་ནི་དབུས་ལའང་མིན། །ཞེས་སོ། །དེ་ལྟར་གཏན་ལ་ཕེབས་པས་ཆོས་ཐམས་ཅད་མིང་དུ་བཏགས་པ་ཙམ་ལས་དོན་བསམ་བརྗོད་ཀྱི་ཡུལ་ལས་འདས་པ་ནི་སངས་རྒྱས་ཀུན་གྱི་རང་བཞིན་ཆོས་སྐུར་ངེས་པའི་ཕྱིར། དེའི་རང་གདངས་ཡི་གེ་ཕྲེང་བའི་འཁོར་ལོ་ཉིད་ཀྱང་ཆོས་སྐུའི་ངང་ལ་གནས་པ་ལས་གཞན་དུ་མ་གཡོས་སོ། །གཉིས་པ་དབང་སྒྱུར་ལོངས་སྐུར་བསྟན་པ་ནི། ཨ་ཉིད་སྣ་ཚོགས་སོགས་ཚིགས་བཅད་གཅིག་སྟེ། ཡི་གེ་ཐམས་ཅད་ཀྱི་འབྱུང་ཁུངས་ཨ་ཉིད་ཀྱིས་གོ་ཕྱེ་བས་སྣ་ཚོགས་པར་སྣང་བའི་ཚུལ་ནི་ངག་གི་འདུ་བྱེད་ཀྱི་དབང་ལས་ཀ་ལ་སོགས་པ་བཞི་བཅུ་གཉིས་སུ་སྣང་བའང་སྒྲའི་ང་རོ་དབྱངས་དང་མིང་གཞི་གསལ་བྱེད་ཀྱི་ཡི་གེ་ཇི་སྙེད་པ་ཐམས་ཅད་འདིར་དེ་སྙེད་དུ་བསྡུས་པ་སྟེ། དེའང་སངས་རྒྱས་བཞི་བཅུ་རྩ་གཉིས་སུ་མངོན་པར་རྫོགས་པར་མངའ་མཛད་པའི་རྒྱལ་པོ་དེ་ཁོ་ན་ཉིད་ལོངས་སྐུའི་ངོ་བོར་ངེས་པའོ། །གསུམ་པ་རོལ་པ་སྣ་ཚོགས་པར་སྣང་བ་སྤྲུལ་སྐུར་བསྟན་པ་ལ་གསུམ་ལས། དང་པོ་སྤྲུལ་སྐུའི་གསུང་དུ་བསྟན་པ་ནི། ཨེ་མ་ཧོ་ངོ་མཚར་སོགས་ཚིགས་བཅད་གཅིག་སྟེ། ཨེ་མ་ཧོ་ཞེས་ཡི་གེ་ཕྲེང་བའི་འཁོར་ལོ་ནི་ཤིན་ཏུ་ངོ་མཚར་ཞིང་ཆེས་ཡ་མཚན་གྱི་གནས་ཏེ། ཅིའི་ཕྱིར་ན། ཆོ་འཕྲུལ་ཆེན་པོ་བསམ་གྱིས་མི་ཁྱབ་པ་མངའ་བའི་ཡི་གེ་ཞེ་གཉིས་ཀྱི་སྟེང་དུ་ཁྱབ་བྱེད་ཀྱི་ཡི་གེ་གསུམ་བསྣན་པས་བཞི་བཅུ་རྩ་ལྔའི་ཚོགས་འདི་དག་འདུས་པ་ལས། དོན་གྱི་ངོ་བོ་ཙམ་སྟོན་པ་མིང་དང་། དོན་གྱི་ཁྱད་པར་སྟོན་པའི་ཚིག་རྣམས་བྱུང་ཞིང་། དེ་འདུས་པ་ལས་ངག་གི་རྣམ་པ་མ་ལུས་པ་འཛིན་པའི་གནས་སུ་གྱུར་ཏེ། གང་འདུལ་སྤྲུལ་སྐུའི་གསུང་རྒྱ་ཆེ་བ་ཐེག་པ་སྣ་ཚོགས་པ་དང་། ཟབ་པ་བརྗོད་བྱའི་དོན་ཆེན་པོ་གདུལ་བྱའི་སྣང་ངོར་སྨྲ་ཞིང་གཞན་ལ་སྟོན་པ་ཡིན་ནོ། ། གཉིས་པ་སྤྲུལ་སྐུའི་ཐུགས་སུ་བསྟན་པ་ནི། དངོས་མེད་སོགས་རྐང་པ་གཉིས་ཏེ། ཡི་གེ་སྣང་དུས་ཉིད་ནས་བདེན་པའི་དངོས་པོ་མེད་དེ། ཅིའི་ཕྱིར་ན་ཡི་གེའི་རང་བཞིན་སེམས་ཉིད་ཡིན་པས། སེམས་ཀྱི་རང་བཞིན་ཇི་ལྟ་བ་བཞིན་དུ་ཡི་གེའི་རང་བཞིན་ཡང་བདག་གཉིས་མེད་ཅིང་སྤྲོས་པའི་མཐའ་ཐམས་ཅད་དང་བྲལ་བས་བློའི་ཡུལ་དུ་ཅིར་ཡང་མི་དམིགས་པ་ནི་ཐུགས་ཀྱི་གསང་བའོ། །གསུམ་པ་སྤྲུལ་སྐུའི་སྐུར་བསྟན་པ་ནི། དབྱིབས་དང་སོགས་རྐང་པ་གཉིས་ཏེ། ཡི་གེའི་རང་བཞིན་དམིགས་པ་མེད་ཀྱང་རོལ་པ་མ་འགགས་པ་ཙམ་དུ། སྤྱི་མདོ་ལས། ཨ་སེང་གེ་གླལ་བ་ལྟ་བུ་ཞེས་སོགས་གསུངས་པ་ལྟར་བརྡར་བཏགས་པ་ཡི་གེའི་གཟུགས་དབྱིབས་དང་། དེ་དག་གི་ཁ་དོག་ཀྱང་ཐ་དད་པ་ལ་བརྟེན་ནས་ངོ་བོ་མིང་ཚིག་སྣ་ཚོགས་ཀྱི་རྣམ་པར་འཕྲུལ་པའི་སྤྲིན་ལས་ལྷ་བསྐྱེད་པའི་ས་བོན་དང་། གླེགས་བམ་གྱི་སྣང་བརྙན་སོགས་ཐུགས་རྗེའི་རོལ་པ་ཅིར་ཡང་སྣང་བས་སྤྲུལ་སྐུའི་མཛད་པ་སྒྲུབ་ཅིང་སྟོན་པའི་ཕྲིན་ལས་ཅན་ནོ། །གཉིས་པ་དེ་དག་གི་རྡོ་རྗེ་གསུམ་མཚོན་བྱེད་དུ་བསྟན་པ་ནི། ཕྱོགས་བཅུ་དུས་བཞིར་སོགས་ཚིགས་བཅད་གཅིག་སྟེ། ཕྱོགས་བཅུ་དུས་བཞིར་འགྲོ་དོན་ལ་གཤེགས་ཤིང་བཞུགས་པའི་སངས་རྒྱས་ཐམས་ཅད་ཀྱང་ཡེ་ཤེས་སེམས་དཔའ་རང་བཞིན་གྱི་དཀྱིལ་འཁོར་ཞེ་གཉིས་སུ་འདུས་པ་ཁྱབ་བྱར་བྱས་པའི་དེ་རེ་རེ་ལ་ཁྱབ་བྱེད་སྐུ་གསུང་ཐུགས་གསུམ་གསུམ་དང་ལྡན་པས་དཀྱིལ་འཁོར་ཞེ་གཉིས་ཁྱབ་བྱེད་གསུམ་དང་བཅས་ཏེ་བཞི་བཅུ་རྩ་ལྔའི་བདག་ཉིད་དུ་འདུས་ཤིང་དེ་དག་ཀྱང་ཡི་གེ་མགོ་ཤད་ཏིག་སྟེ་ཁྱབ་བྱེད་གསུམ་དང་། ཀ་ནས་ཀྵའི་བར་གསལ་བྱེད་སོ་བཞི། ཨི་དང་ཨཽའི་བར་དབྱངས་བརྒྱད་དྲིལ་བས་ཁྱབ་བྱའི་ཡི་གེ་ཞེ་གཉིས་ཏེ། མདོར་ན་ཨའི་ཆོ་འཕྲུལ་ཡི་གེ་བཞི་བཅུ་རྩ་ལྔ་ལ་འདུས་ཤིང་རྫོགས་པས་ཆོས་སྐུའི་རོལ་པ་གཟུགས་སྐུའི་དཀྱིལ་འཁོར་ཇི་སྙེད་པ་ཐམས་ཅད་ཀྱི་རྩ་བ་མཚོན་པར་བྱེད་པ་ནི་ཡི་གེའོ། །གཉིས་པ་ཡི་གེའི་རང་བཞིན་ནི། སེམས་ཀྱི་སོགས་རྐང་པ་གཉིས་ཏེ། སེམས་ཀྱི་རང་བཞིན་འོད་གསལ་བ་ཉིད་ཡི་གེར་རང་སྣང་བ་སྟེ། དེ་ལས་གཞན་དུ་ཡི་གེ་ཞེས་དངོས་པོར་གྲུབ་པ་ཅུང་ཟད་ཀྱང་ཡོད་པ་མ་ཡིན་ནོ། །དེ་ལྟར་ཡང་མདོ་ལས། རབ་འབྱོར་ཡི་གེ་ནི་དོན་དམ་པར་མ་སྐྱེས་པ་སྟེ། ཨའི་ངོ་བོ་ཉིད་དོ། །ཨའི་ངོ་བོ་ཉིད་གང་ཡིན་པ་དེ་ནི་སེམས་ཀྱི་རང་བཞིན་ཏེ། དངོས་པོ་དང་དངོས་པོ་མེད་པ་ཐམས་ཅད་ལས་ཡང་དག་པར་འདུས་པའོ། །ཞེས་སོ། །གསུམ་པ་བྱེད་ལས་ནི། དམིགས་མེད་དེ་ཉིད་སོགས་ཚིགས་བཅད་གཅིག་སྟེ། ཅིར་ཡང་དམིགས་མེད་ཀྱི་ཡི་གེ་དེ་ཉིད་ཀྱང་རོལ་པ་སྣ་ཚོགས་པར་རང་སྣང་བའི་ཡི་གེ་སྐུ་གསུང་ཐུགས་དཀྱིལ་འཁོར་གྱི་འཁོར་ལོ་ཆེན་པོར་མ་འགགས་པ་སྟེ། དེས་ཡེ་ནས་སྐུ་གསུང་ཐུགས་སུ་ལྷུན་གྱིས་གྲུབ་པ་ནི་ངོ་མཚར་གྱི་གནས་ཡ་མཚན་ཞིང་ཆོ་འཕྲུལ་ཆེན་པོར་སྣང་བའི་དངོས་གྲུབ་ཉིད་རང་རིག་པའི་མངོན་སུམ་དུ་རབ་ཏུ་འགུགས་ཤིང་འདྲེས་པར་བྱེད་པ་ཡིན་ནོ། །བཞི་པ་ངེས་ཚིག་ནི། དབྱིངས་ལ་སོགས་རྐང་པ་གཉིས་ཏེ། ཡུལ་ཆོས་ཀྱི་དབྱིངས་ལ་ཡུལ་ཅན་མཚན་མེད་ཤེས་རབ་ཀྱི་དབྱིངས་ཀྱིས་བྱ་རྩོལ་མེད་པར་བྲིས་པ་སྟེ། དེའི་ཕྱིར་ཡེ་ནས་ལྷུན་གྱིས་གྲུབ་པའི་ཡི་གེའི་སྤྲིན་འགྱུར་བ་མེད་ཅིང་རྣམ་པ་བརྗོད་བྱ་ཐམས་ཅད་གསལ་བའི་ནུས་པ་དང་ལྡན་པས་ཡི་གེ་ཞེས་པའི་མིང་ནི་ཐ་སྙད་ཙམ་དུ་བརྗོད་པ་སྟེ། ཡི་གེའི་སྐད་དོད་ཨཀྵ་རའི་སྒྲ་ལས་དྲངས་ན་མི་འགྱུར་བ་དང་། བྱཉྫ་ན་གསལ་བྱེད། ཝརྞ་ནུས་པ་དང་ལྡན་པར་འཇུག་པའི་ཕྱིར་རོ། ། གཉིས་པ་བྱེ་བྲག་གི་དོན་བཤད་པ་ལ་གཉིས་ཏེ། ཁྱབ་བྱེད་གསུམ་དང་། ཁྱབ་བྱ་ཞེ་གཉིས་ཀྱི་དོན་བཤད་པའོ། །དང་པོ་ནི། མགོ་ནི་སོགས་རྐང་པ་གསུམ་སྟེ། མཚོན་བྱེད་ཡི་གེ་མགོ་ནི་བེར་ཀ་རིས་ཏེ། མཚོན་བྱའི་དོན་ཟུང་འཇུག་མ་ནོར་བ་གཉིས་མེད་ཡེ་ཤེས་ཀྱི་རང་བཞིན་ཐུགས་རྡོ་རྗེ་མཚོན། བྱེད་ལས་ནི་ཡི་གེ་ཐམས་ཅད་ཀྱི་མགོ་འདྲེན་ཅིང་འཇུག་པའི་སྒོར་གྱུར་པས་ལམ་དང་འདྲ་བ་ཡིན་ཏེ། དཔལ་བྱིན་གྱིས་ཞུས་པའི་མདོ་ལས། མགོ་ནི་ཐོག་མར་མཚོན་པ་སྟེ། །དང་ལ་གཟུགས་སུ་གང་གསལ་བ། །དེ་ནི་ཡི་གེའི་མགོ་ཡིན་ཏེ། །བེར་ཀ་རིས་ལ་མགོ་ཞེས་བྱ། །ཞེས་སོ། །ཡི་གེ་ཏིག་ནི་ཚེག་སྟེ། དོན་ཤེས་རབ་བརྗོད་མེད་ཀྱི་རང་བཞིན་གསུང་རྡོ་རྗེ། བྱེད་ལས་ཡི་གེ་རྣམས་འདུས་པ་དབྱངས་ཀྱིས་བཅིངས་པས་དངོས་པོ་སོ་སོའི་མིང་དུ་གྲུབ་པ་མ་འདྲེས་པར་སྨྲ་བ་སྟེ། ཡོ་ག་རྒྱན་དམ་པ་ལས། སྡུད་པའི་ཕྱིར་ན་ཚེག་ནི་ཏིག །འཐོར་བ་བསྡུས་ནས་མིང་དུ་སྨྲ། །ཞེས་སོ། །འདིར་ཁ་ཅིག་རྒྱ་གར་གྱི་དཔེ་ལ་ཚེག་མེད་པས་བོད་མའོ་ཟེར་བ་ནི། དཔུང་བཟང་ལས། གུག་བཀྱེད་ཀླད་ཀོར་ཚེག་རྣམས་མ་ཉམས་པར། །ཞེས་པ་མ་མཐོང་བར་ཟད་དོ། །ཡི་གེ་ཤད་ནི་དོན་ཐབས་སྙིང་རྗེ་ཆེན་པོས་འདུལ་བའི་རང་བཞིན་སྐུ་རྡོ་རྗེ། བྱེད་ལས་རྐང་པ་བསྡེབས་ནས་ཚིགས་སུ་གཅོད་པར་བྱེད་པ་སྟེ། སྤྱི་མདོར། གཅོད་པ་མཚོན་པར་བྱེད་པའི་ཡི་གེ་ལ་ནི་མིང་དབྱུག་པ་ཞེས་བླ་དྭགས་སུ་བཏགས་སོ། །ཞེས་སོ། །གཉིས་པ་ལ་བདུན་ལས། དང་པོ་བཟང་མོ་དང་རིགས་ལྔ་ཡབ་ཡུམ་གྱི་ཡི་གེ་ནི། ཨ་ནི་སྐྱེ་མེད་སོགས་རྐང་པས་དམན་པའི་ཚིགས་བཅད་གསུམ་སྟེ། ཡི་གེ་ཨ་ནི་ཆོས་ཐམས་ཅད་སྐྱེ་མེད་དེ་བཞིན་ཉིད་ཀྱི་དབྱིངས་བྱ་བ་མོ་ཀུན་ཏུ་བཟང་མོ་སྟེ། ཡུམ་བར་མ་ལས། ཨ་ཞེས་བྱ་བ་ནི་གདོད་མ་ནས་མ་སྐྱེས་པའི་ཕྱིར་ཆོས་ཐམས་ཅད་ཀྱི་སྒོའོ། །ཞེས་དང་། སྒྱུ་འཕྲུལ་ཕྱི་མ་ལས། ཨ་ནི་སྟོང་པ་ཡེ་ནས་སྟོང་། །སྟོང་པ་ཉིད་ན་སྟོང་པ་མེད། །ཡི་གེ་ཀུན་གྱི་གཞིའམ་རྒྱུ། །ཡིན་པའི་ཕྱིར་ན་མགོ་བོར་བཞག །ཅེས་ཡི་གེ་ཀུན་གྱི་འབྱུང་ཁུངས་ཡིན་པས་ཐོག་མར་སྨོས་སོ། །ཋ་ཡིག་ནི་སྒྱུ་མ་ལྟ་བུའི་རྣམ་ཤེས་ཆོས་དབྱིངས་ཡེ་ཤེས་སུ་དག་པའི་ཕྱག་རྒྱར་འཕྲུལ་པ་རྡོ་རྗེ་མི་བསྐྱོད་པ་ཉིད་དེ། འདིར་ཡབ་ལྔ་ལ་སྒྱུ་འཕྲུལ་གྱི་སྒྲས་སྟོན་པའང་། ཕུང་པོ་ལྔ་སྒྱུ་མའི་སྣང་བ་ལྟར་མེད་པ་གསལ་སྣང་ཙམ་དུ་འཆར་བ་མ་འགགས་ཀྱང་། འཆར་གཞི་གཉུག་མ་རང་རིག་པའི་ཡེ་ཤེས་སུ་རྣམ་པར་དག་པ་ནི་ཡེ་ཤེས་ལྔ་ཡིན་ལ། དེ་ཉིད་ཐབས་ཀྱི་ཕྱག་རྒྱར་འཕྲུལ་པ་ནི་དེ་བཞིན་གཤེགས་པ་ཡབ་ལྔ་སྟེ། ལེ་ལག་ལས། ལྔ་ཕུང་སྒྱུ་མའི་ཡེ་ཤེས་ལ། །རང་རིག་ཐབས་ཀྱིས་རིགས་ལྔར་འཕྲུལ། །ཞེས་སོ། །དེ་ལྟར་སྤྱིའི་མཚན་སྒྱུ་འཕྲུལ་འགྲེལ་བ་ལས་སོ་སོའི་ཁྱད་ཆོས་ལ། ཊ་ནི་མེ་ལོང་ཡེ་ཤེས་ཀྱི་ཕྱག་རྒྱར་སྣང་བའི་ལྷ་རྣམ་སྣང་། ཌ་ནི་མཉམ་ཉིད་ཡེ་ཤེས་ཀྱིས་རེ་བ་ཡིད་བཞིན་དུ་སྐོང་བའི་ཕྱག་རྒྱ་རིན་འབྱུང་། ཌྷ་ནི་ཆོས་ཀུན་སོ་སོར་མ་འདྲེས་པའི་གཟིགས་པ་རྣམ་པར་དག་པའི་ཡེ་ཤེས་ཀྱི་ཕྱག་རྒྱ་སྣང་མཐའ། ཎ་ནི་གདུལ་བྱའི་དོན་ཀུན་ཏུ་མཐར་ཕྱིན་པར་མཛད་པའི་ཡེ་ཤེས་ཀྱི་ཕྱག་རྒྱ་དོན་གྲུབ་ཉིད་དོ། །ཐ་ནི་དྲྭ་བས་ཏེ་ཡུམ་རྣམས་དབྱིངས་ཀྱི་ཕྱག་རྒྱ་ཡིན་པས་ཆོས་ཅན་ཐམས་ཅད་དང་འབྲེལ་ཞིང་། རྣམ་པའང་ཡབ་དང་ཕན་ཚུན་ཐབས་ཤེས་ཟུང་འབྲེལ་དུ་བཞུགས་པས་སམ་ཡུམ་གྱི་མཁའ་དྲྭ་བ་དང་ཆོས་མཐུན་པས་ཀྱང་དྲྭ་བ་ཞེས་པའི་སྒྲས་བསྟན་ནོ། །སོ་སོའི་ཁྱད་པར་ནི། ཐ་ནི་ཆོས་ཉིད་ཀྱི་མཁའ་ལ་ཆོས་ཅན་ཐམས་ཅད་མངོན་པར་རྫོགས་པའི་ཕྱག་རྒྱ་དབྱིངས་ཕྱུག་མ་ཉིད་དོ། །ཏ་ནི་སྲ་བརྟན་སའི་ཁམས་ཡོན་ཏན་གྱི་རྟེན་དུ་གྱུར་པ་སྤྱན་མ། ད་ནི་ལྷག་མཐོང་གི་མེ་ལྷམ་མེར་གསལ་བ་གོས་དཀར། དྷ་ནི་མཉེན་ཅིང་འཁྲིལ་བ་ཆུས་ཡོན་ཏན་སྡུད་པ་མཱ་མ་ཀཱི། ན་ནི་ཀུན་ཏུ་གཡོ་ཞིང་འགྱུར་བས་གདུལ་བྱ་སྒྲོལ་བ་དམ་ཚིག་སྒྲོལ་མའོ། །གཉིས་པ་ནང་སེམས་བཞི་ཤར་སྒོའི་ཁྲོ་བོ་དང་བཅས་པའི་ཡི་གེ་ནི། ཀ་ནི་སྤྱན་གྱི་སོགས་རྐང་པ་ལྔ་སྟེ། ཡུལ་སོ་སོར་རིག་པ་སྒོ་ལྔའི་རྣམ་ཤེས་ལ་འདིར་ཐུགས་ཀྱི་སྒྲས་བསྟན་ཏེ། ཀ་ནི་སྤྱན་གྱི་རྣམ་ཤེས་དག་པས་ཐུགས་ཀྱི་མཆོག་ས་སྙིང་། ཁ་ནི་སྙན་གྱི་རྣམ་ཤེས་དག་པ་ཕྱག་རྡོར། ག་ནི་ཤངས་ཀྱི་རྣམ་ཤེས་དག་པ་ནམ་སྙིང་། གྷ་ནི་ལྗགས་ཀྱི་རྣམ་ཤེས་དག་པ་སྤྱན་རས་གཟིགས། ང་ནི་ལུས་ཤེས་ཀྱི་མཐར་ཐུག་གསང་བའི་རྣམ་ཤེས་ཀྱིས་བདེ་བ་མྱོང་དུས་མིག་ཤེས་ལ་སོགས་པའི་རྟོག་པ་འགག་པས་ཐུགས་ཀྱང་འཇིག་པར་བྱེད་པ་གཤིན་རྗེ་གཤེད་དོ། །གསུམ་པ་ནང་གི་སེམས་མ་བཞི་ལྷོ་སྒོའི་ཁྲོ་བོ་དང་བཅས་པའི་ཡི་གེ་ནི། ཙ་ནི་སྤྱན་གྱི་སོགས་རྐང་པ་ལྔ་སྟེ། སྒོ་ལྔའི་རྣམ་ཤེས་སྐྱེ་བའི་རྟེན་བྱེད་པས་ན་ཡུལ་ལྔ་ལ་སྐུའི་སྒྲས་བསྟན་ཏེ། ཙ་ནི་སྤྱན་གྱི་ཡུལ་གཟུགས་རྣམ་པར་དག་པས་སྐུའི་མཆོག་སྒེག་མོ། ཚ་ནི་སྙན་གྱི་ཡུལ་སྒྲ་དག་པ་གླུ་མ། ཛ་ནི་ཤངས་ཀྱི་ཡུལ་དྲི་དག་པ་ཕྲེང་མ། ཛྷ་ནི་ལྗགས་ཀྱི་ཡུལ་རོ་དག་པ་གར་མ། ཉ་ནི་ཡུལ་རེག་བྱའི་མཐར་ཐུག་གསང་བའི་པདྨ་དང་འཕྲད་པའི་དུས་ཡུལ་གཞན་གྱི་རྟོག་པ་འགག་པས་སྐུ་ཡང་འཇིག་པར་བྱེད་པ་སྟོབས་ཆེན་ནོ། །བཞི་པ་ཕྱི་སེམས་བཞི་ནུབ་སྒོའི་ཁྲོ་བོ་དང་བཅས་པའི་ཡི་གེ་ནི། པ་ནི་སྤྱན་གྱི་སོགས་རྐང་པ་ལྔ་སྟེ། ཡུལ་དང་ཤེས་པ་གཉིས་ཕྱི་ནང་དུ་བརྡ་སྦྱོར་བྱེད་པས་ན་དབང་པོ་ལྔ་ལ་གསུང་གི་སྒྲས་བསྟན་ཏེ། པ་ནི་སྤྱན་གྱི་དབང་པོ་དག་པས་གསུང་གི་མཆོག་བྱམས་པ། ཕ་ནི་སྙན་གྱི་དབང་པོ་དག་པ་སྒྲིབ་སེལ། བ་ནི་ཤངས་ཀྱི་དབང་པོ་དག་པ་ཀུན་བཟང་། བྷ་ནི་ལྗགས་ཀྱི་དབང་པོ་དག་པ་འཇམ་དཔལ། མ་ནི་རིག་བྱེད་ལུས་དབང་གི་མཐར་ཐུག་གསང་བའི་དབང་པོས་ཡུལ་བཞིར་འཛིན་པའང་མི་གནས་པས་གསུང་ཡང་འཇིག་པར་བྱེད་པ་རྟ་མགྲིན་ནོ། །ལྔ་པ་ཕྱིའི་སེམས་མ་བཞི་སྒོ་མ་བཞི་དང་བཅས་པའི་ཡི་གེ་ནི། ཡ་ནི་སྐྱེ་བ་སོགས་ཚིགས་བཅད་གཉིས་ཏེ། ཡ་ནི་ད་ལྟར་བ་སྐྱེ་བའི་གོ་འབྱེད་བྱེད་འདས་པའི་དུས་རྣམ་པར་དག་པ་སྤོས་མ། ཝ་ནི་གནས་བཞིན་པ་ད་ལྟར་བའི་དུས་དག་པ་མེ་ཏོག་མ་ཡིན་ནོ། །ར་ནི་ད་ལྟར་བ་འདི་འཇིག་པ་མ་འོངས་པའི་དུས་དག་པ་སྟེ་མར་མེ་མ། ལ་ནི་དུས་གསུམ་གང་དུའང་ཐ་སྙད་གདགས་རུང་གིས་སྟོང་པ་མ་ངེས་པའི་དུས་དག་པ་དྲི་ཆབ་མའོ། །ཤ་ནི་ཆོས་ལ་རྟག་པ་མེད་པར་འཛིན་པ་དག་པ་སྟེ་ལྕགས་ཀྱུ་མ། ཥ་ནི་ཆད་པར་འཛིན་པའང་ཡོད་པ་མ་ཡིན་པ་སྟེ་ཞགས་པ་མ། ས་ནི་བདག་གཉིས་སུ་འཛིན་པའི་མཐའ་དང་བྲལ་བས་བདག་མེད་པ་སྟེ་ལྕགས་སྒྲོག་མ། ཧ་ནི་མཚན་མ་མེད་པའི་ཆོས་ཉིད་དུ་འཛིན་པའང་དག་པ་དྲིལ་བུ་མའོ། །དྲུག་པ་ཀུན་བཟང་ཐུབ་དྲུག་དང་བཅས་པའི་ཡི་གེ་ནི། ཀྵ་ནི་ཡེ་ཤེས་སོགས་རྐང་པ་བདུན་ཏེ། ཀྵ་ནི་རྣམ་ཤེས་ཡེ་ཤེས་སུ་དག་པ་ཐུགས་ཀྱི་བདག་ཉིད་རང་བྱུང་ཡེ་ཤེས་ཀྱི་ཐུགས་རིགས་དྲུག་པ་ཀུན་ཏུ་བཟང་པོ་སྟེ། འདིར་ཐུགས་ཀྱི་སྒྲ་ཟློས་ཏེ་བསྟན་པ་ནི། ཡིད་ཀྱི་རྣམ་ཤེས་ཀྱིས་རང་ཡུལ་ཆོས་དང་སྒོ་ལྔའི་ཡུལ་གཉིས་ཀ་གཅོད་པར་བྱེད་པའི་ཕྱིར་རོ། །ཨི་ནི་རྒྱ་མཚོ་ཆེན་པོའི་རྡུལ་ཕྲ་རབ་ཇི་སྙེད་པ་དེ་སྙེད་ཀྱི་ལྷ་རྣམས་ཀྱི་གནས་སུ་འདུལ་བྱེད་རིགས་མཐུན་གྱི་གཟུགས་སུ་སྣང་བ་ལྷའི་ཐུབ་པ་བརྒྱ་བྱིན་དང་། ཨཱི་ནི་རྡུལ་སྙེད་ལྷ་མིན་གྱི་ཐུབ་པ་ཐག་བཟང་རིས། ཨུ་ནི་རྡུལ་སྙེད་མི་རྣམས་ཀྱི་གནས་སུ་ཤཱཀ་ཐུབ། ཨཱུ་ནི་རྡུལ་སྙེད་བྱོལ་སོང་རྣམས་ཀྱི་ཐུབ་པ་སེང་གེ་རབ་བརྟན། ཨེ་ནི་རྡུལ་སྙེད་ཡི་དྭགས་རྣམས་ཀྱི་གནས་སུ་ཁ་འབར་དེ་བ། ཨཻ་ནི་རྡུལ་སྙེད་དམྱལ་བའི་ཐུབ་པ་ཆོས་ཀྱི་རྒྱལ་པོ་རྣམས་སུ་བསྟན་ནས་འདུལ་བ་སྟེ། ཡི་གེ་དྲུག་པོ་ཀྵ་ཡིག་གི་རྗེས་སུ་འབྱུང་བའང་བྱེད་པ་པོ་ཀུན་བཟང་གི་ཐུགས་རིག་པ་ཡེ་ཤེས་ཀྱི་བྱིན་རླབས་ལས་འགྲོ་འདུལ་གྱི་སྤྲུལ་སྐུར་བསྟན་པ་མཚོན་ནོ། །བདུན་པ་བྱང་སྒོའི་ཁྲོ་བོའི་ཡི་གེ་ནི། ཨོ་ནི་སོགས་རྐང་པ་གཉིས་ཏེ། ཨོ་ནི་ཡུལ་དབང་ཤེས་གསུམ་འདུས་པ་རེག་པའི་མཐར་ཐུག་གསང་བའི་ཁམས་གསུམ་གྱི་རྟོག་པ་ཐམས་ཅད་བདེ་བའི་ངང་དུ་འཇིག་པར་བྱེད་ཅིང་། ཨཽ་ནི་བདེ་བའང་སྟོང་པར་གྲོལ་བས་རྟོག་པ་ཐམས་ཅད་མི་གནས་པར་ཞིག་པ་ཡིན་ཏེ་རྒྱུ་འབྲས་རོ་གཅིག་པས་ཡི་གེ་གཉིས་པོ་དེ་བདུད་རྩི་འཁྱིལ་བར་བསྡུས་སོ། ། གསུམ་པ་མཇུག་བསྡུ་བ་ནི། ཡི་གེ་ནས་ཨ་ཧོཿའི་བར་ཏེ། དེ་ལྟར་ན་གསུང་ཡི་གེ་འཁོར་ལོའི་ཚོགས་ཆེན་འདི་རྣམས་ཀྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཕྲེང་བ་རྣམས་མ་ལུས་པར་བསྡུས་པའོ་ཞེས་ཆེད་དུ་བརྗོད་དོ། །དེ་ལྟར་ན་གསུང་ཡི་གེའི་འཁོར་ལོ་གཏན་ལ་ཕབ་པ་ལ་དགྱེས་པས་ཨ་ཧོཿཞེས་ངོ་མཚར་བར་བསྟན་པའོ། ། གཉིས་པ་བསྡུས་ཏེ་བསྟན་པ་ལ་བཞི་སྟེ། གསུངས་པ་ལོ་རྒྱུས་སུ་བརྗོད་པ། བསྡུ་བ་དངོས། བཀའ་གསང་སྔགས་མཚོན་པ། ཡོན་ཏན་ནོ། །དང་པོ་ནི། དེ་ནས་སོགས་ཏེ། རྒྱས་པར་བསྟན་པ་དེ་ནས་དེ་བཞིན་གཤེགས་པ་ཡབ་རྣམས་ཡུམ་བཙུན་མོའི་ཚོགས་དང་གཉིས་སུ་མེད་པའི་རང་བཞིན་གྱི་དཀྱིལ་འཁོར་དེ་དག་ཉིད་ཀྱི་དོན་རྟོགས་དཀའ་བའི་གསང་བ་འདི་ཉིད་སྟོན་པའི་སྐུ་སོགས་རིགས་ལྔ་དབྱེར་མི་ཕྱེད་པའི་རྡོ་རྗེ་ལས་ཕྱུང་ངོ་། །གཉིས་པ་ནི། ཨ་ཧོཿཐབས་དང་ནས་ཨ་ཧོཿའི་བར་ཏེ། ཨ་སྐྱེ་བ་མེད་པ་ཤེས་རབ་དང་། ཧོཿདགྱེས་པ་ཐབས་ཏེ་ཟུང་འཇུག་ཡི་གེའི་འཁོར་ལོ་ལ་ངོ་མཚར་བའོ། །དེ་ཡང་ཐབས་སྣང་བ་དང་ཤེས་རབ་སྟོང་པ་ཉིད་དབྱེར་མེད་སྤྲོས་བྲལ་གྱི་ཡེ་ཤེས་ཏེ། དེར་ཡི་གེ་དམིགས་མེད་ཆོས་སྐུར་བསྟན་པའི་ཚིགས་བཅད་གཅིག་བསྡུའོ། །སེམས་ཉིད་སྣང་སྟོང་གཉིས་མེད་དུ་སྦྱོར་བའི་དགྱེས་རོལ་ལས་སྤྱོད་ཡུལ་ཐམས་ཅད་ཨའི་སྤྲིན་ཆེན་པོར་སྤྲོ་ཞིང་བསྡུ་བ་སྟེ། ཨ་ཡིག་ལ་སེམས་སྦྱང་བ་བསྡུའོ། །བྱང་ཆུབ་སེམས་ཀྱི་རང་བཞིན་ཨ་ལས་ཡི་གེ་ཞེ་གཉིས་ཀྱི་ཚོགས་ཀྱང་སྤྲོ་ཞིང་བསྡུ་བ་སྟེ། ཡི་གེ་གཞན་ལ་སེམས་སྦྱང་བ་བསྡུའོ། །སྟོན་པའི་ཐུགས་རྗེ་དང་ལམ་པས་ཡི་གེ་ལ་སེམས་སྦྱོང་བའི་ཐབས་ནི་ཡི་གེ་འཁོར་ལོ་དང་འབྲས་བུ་ཡེ་ཤེས་ཀྱི་རྒྱུར་ངེས་པ་སྟེ། ལེའུ་སྤྱི་དང་། ཡི་གེའི་དོན་བཤད་གཉིས་ཀྱི་གསུངས་པ་ལོ་རྒྱུས་དང་། འདི་ནི་སོགས་ཡེ་ཤེས་ཀྱི་རྒྱུར་བསྟན་པ་རྣམས་བསྡུའོ། །གསུང་མི་ཟད་པ་རྒྱན་གྱི་འཁོར་ལོ་ཡི་གེའི་སྤྲིན་ནི་སྟོན་པའི་ཐུགས་རྗེ་ལས་རང་སྣང་བ་སྟེ། ཨ་ཀ་ཁ་སོགས་ཡི་གེ་ཇི་ལྟར་བྱུང་བའི་ཚུལ་བསྡུའོ། །སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་ཕྱག་རྒྱ་རྨད་དུ་བྱུང་བའི་འབྲས་བུ་རྒྱལ་བ་བཞི་བཅུ་རྩ་གཉིས་སུ་སྨིན་པས་དོན་གཉིས་གྲུབ་པ་སྟེ། དེ་དག་གི་རྡོ་རྗེ་གསུམ་མཚོན་བྱེད་དུ་བསྟན་པ་དང་། འགོ་ནི་མ་ནོར་སོགས་བྱེ་བྲག་ཡི་གེ་བཞི་བཅུ་རྩ་ལྔའི་དོན་བཤད་པ་བསྡུའོ། །ཡི་གེའི་སྒོ་ནས་ཟབ་པ་དང་རྒྱ་ཆེ་བའི་དོན་སྟོན་པ་ལ་ངོ་མཚར་བ་སྟེ། ཡི་གེ་སྤྲུལ་སྐུའི་གསུང་དུ་བསྟན་པ་བསྡུའོ། །ཆོས་ཐམས་ཅད་མིང་གི་ཚོགས་པ་ཙམ་ལ་ངོ་བོ་གང་དུའང་མ་གྲུབ་པ་སྟེ། ཡི་གེ་འབྱུང་བའི་མཐུ་བཤད་པ་བསྡུའོ། །ཡི་གེ་བཞི་བཅུ་རྩ་གཉིས་ནི་རྒྱལ་བ་ཞེ་གཉིས་ཀྱི་རང་བཞིན་དུ་མངོན་པར་གྲུབ་པ་སྟེ། ཡི་གེ་དབང་སྒྱུར་ལོངས་སྐུར་བསྟན་པ་བསྡུའོ། །ཡི་གེ་དེ་དག་ཀྱང་རྒྱུ་རྐྱེན་གྱིས་གསར་དུ་འདུ་མ་བྱས་པ་སེམས་ཀྱི་ཆོས་ཉིད་དམིགས་པ་དང་བྲལ་བ་སྟེ། ཡི་གེ་སྤྲུལ་སྐུའི་ཐུགས་སུ་བསྟན་པ། ཡི་གེའི་རང་བཞིན། ཡི་གེའི་ངེས་ཚིག་རྣམས་བསྡུའོ། །དེ་ལྟ་ནའང་ལམ་པའི་ངོར་ཡི་གེ་དེ་དག་འདུས་བྱས་པ་ལྟར་དབྱིབས་ཁ་དོག་སོགས་ཀྱི་རོལ་པ་མ་འགགས་པར་སྣང་བ་སྟེ། ཡི་གེ་སྤྲུལ་སྐུའི་སྐུར་བསྟན་པ་བསྡུའོ། །སངས་རྒྱས་ཐམས་ཅད་ཀྱི་རྡོ་རྗེ་གསུམ་དབྱེར་མི་ཕྱེད་པའི་དཀྱིལ་འཁོར་མ་ལུས་པ་གསུང་ཡི་གེའི་འཁོར་ལོས་མངོན་དུ་འབྱིན་པ་ལས་མི་འདའ་བའི་དམ་ཚིག་སྟེ། ཡི་གེ་འཁོར་ལོ་སོགས་མཇུག་བསྡུའི་རྐང་པ་གཉིས་བསྡུའོ། །དེ་ལྟར་རྡོ་རྗེ་གསུམ་གྱི་དཀྱིལ་འཁོར་སྣང་བར་མཛད་པའི་དམ་ཚིག་ལས་འདའ་བར་མི་མཛད་པས་འབྲས་བུ་སྐུ་དང་ཡེ་ཤེས་ཀྱིས་བསྡུས་པའི་དངོས་གྲུབ་མི་འགྲུབ་པའི་དབང་མེད་དེ། འགྲུབ་བྱེད་ཀྱི་རྒྱུ་ལྟ་བ་དང་རྐྱེན་བསྒོམ་པའི་ཏིང་ངེ་འཛིན་ཚོགས་པའི་མཐུ་ཆེན་པོ་ལས་འབྲས་བུ་མངོན་དུ་ཐོབ་པ་ཆོས་ཉིད་ཡིན་པའི་ཕྱིར་ཏེ། དམིགས་མེད་དེ་ཉིད་སོགས་ཡི་གེའི་བྱེད་ལས་བསྡུའོ། །དེ་ལྟར་བསྡུས་པ་ལ་ཨ་ཧོཿཞེས་ངོ་མཚར་བས་མཉེས་པའོ། །གཞན་ཡང་ཐབས་ལམ་སྟེང་འོག་གི་སྒོ་གཉིས་དང་སྦྱར་ནས་འཆད་པའི་བཀའ་སྲོལ་ཡང་ཡོད་དེ། སྤྲོ་ཞིང་ནུས་ན་འཆད་པ་པོས་བསྙད་པར་བྱའོ། །གསུམ་པ་ནི། རྡོ་རྗེ་སོགས་ཏེ། ཡི་གེ་འཁོར་ལོ་བཀོད་པའི་དོན་རྣམས་རྡོ་རྗེ་འཛིན་པ་གསང་བའི་བདག་པོས་ཚིག་ཏུ་བསྡུས་པའོ། །བཞི་པ་ནི། ཞེས་བརྗོད་པས་སོགས་ཏེ། ཆོས་ཐམས་ཅད་མིང་ཙམ་དུ་གནས་པའི་ཡི་གེ་ཕྲེང་བའི་འཁོར་ལོའི་དོན་ཐམས་ཅད་དེ་ཙམ་དུ་འདུས་སོ་ཞེས་ཆེད་དུ་བརྗོད་པས་གཞི་འབྲས་ཀྱི་དེ་བཞིན་གཤེགས་པའི་དཀྱིལ་འཁོར་ཐམས་ཅད་ཡི་གེ་ཕྲེང་བའི་འཁོར་ལོ་དང་རང་བཞིན་གཉིས་སུ་མེད་པར་གྱུར་ཏོ། ། གསུམ་པ་ལེའུའི་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉི་ཤུ་རྩ་གཉིས་སུ་ཡོད་པ་ལས་འདིས་ཆོས་ཐམས་ཅད་མིང་ཙམ་ལས་དོན་ལ་མ་གྲུབ་པ་མཚོན་བྱེད་ཡི་གེ་ཕྲེང་བའི་འཁོར་ལོ་སྟོན་པའི་ཐུགས་རྗེ་དང་གདུལ་བྱའི་སེམས་ཉིད་ལས་རང་སྣང་བར་བཀོད་ཅིང་བསྟན་པའི་ལེའུ་སྟེ་བཞི་པའོ།། །། ལེའུ་ལྔ་པའི་འགྲེལ་པ།ལེའུ་ལྔ་པ་ལ་གསུམ་སྟེ། གསུང་པ་ལོ་རྒྱུས་སུ་བརྗོད་པ་དང་། གཞུང་དངོས། མཚན་ནོ། །དང་པོ་ནི། དེ་ནས་ཡི་གེ་སོགས་ཏེ། གསུང་ཡི་གེའི་དཀྱིལ་འཁོར་བསྟན་པ་དེ་ནས་བཤད་མ་ཐག་གི་ཡི་གེ་འཁོར་ལོའི་སྤྲིན་བཀོད་པའི་མཐུ་ལས་ཐབས་ཤེས་ཟུང་འཇུག་སྒྱུ་འཕྲུལ་ལྷའི་དཀྱིལ་འཁོར་དང་། ལས་དང་དངོས་གྲུབ་སྒྲུབ་པའི་རིམ་པ་རྣམ་པར་འཕྲོ་བ་འདི་ཆེད་དུ་བརྗོད་དོ། ། གཉིས་པ་གཞུང་དངོས་ལ་གསུམ་སྟེ། གང་གིས་སྒྲུབ་པ་རྟེན་གྱི་གང་ཟག །རྟོགས་གོམས་ཀྱི་ཐབས་ཀྱིས་ཇི་ལྟར་འགྲུབ་ཚུལ། གཞུང་གསུངས་པའི་ཡོན་ཏན་ནོ། །དང་པོ་ནི། སྟོན་པ་མཆོད་བརྩོན་སོགས་ཚིགས་བཅད་གཅིག་སྟེ། ཐར་ལམ་སྟོན་པ་པོ་བླ་མ་རྡོ་རྗེ་སློབ་དཔོན་མཆོད་པ་ལ་བརྩོན་ཞིང་ཕན་ནུས་ཟབ་མོའི་དབང་གསུམ་ཐོབ་པས་རྒྱུད་སྨིན་པ། ལྟ་བ་ལྷག་པ་བདེན་པ་དབྱེར་མེད་ཀྱི་གནས་ལུགས་རྟོགས་པ་དང་། རྟོགས་དོན་སྒོམ་པའི་ཏིང་ངེ་འཛིན་གསལ་བ། རྩ་བ་དང་ཡན་ལག་གི་དམ་ཚིག་རྣམས་མ་ཉམས་པས་རྣམ་པར་དག་པ། རྒྱུ་རྐྱེན་ལས་ཀྱི་སྔགས་གསུམ་དང་། དམ་ཚིག་ལས་ཆོས་རྒྱ་ཆེན་བཞིའི་ཕྱག་རྒྱ་རྣམས་ལེགས་པར་ཤེས་ཤིང་། ལམ་རིམ་ལས། དམ་ཚིག་ལྟ་བ་ཏིང་འཛིན་དང་། །བྱང་ཆུབ་སེམས་དང་སྙིང་རྗེ་སྟེ། །ལྷག་པའི་ཡོ་བྱད་ལྔ་རྫོགས་བྱ། །ཞེས་པ་ལྟར་ལམ་དུས་ཀྱི་ཡོ་བྱད་ལྔའམ། ཡང་ན་བཟའ་དང་བཏུང་བ། རྒྱན་དང་བགོ་བ། གླུ་ཚིག་སྒྲ། བྲོ་གར་འདུ་འཕྲོ། ཨཱ་ལི་ཀཱ་ལི་སྟེ་སྒྲུབ་པ་རྫས་ཀྱི་ཡོ་བྱད་ལྔ་དང་ལྡན་པས་བསྒྲུབས་ན་འགྲུབ་པར་འགྱུར་ལ། ཆོས་དེ་དག་དང་མི་ལྡན་པས་ནི་བསྒྲུབས་ཀྱང་དོན་མེད་པར་མ་ཟད། སྒྲུབ་པ་པོ་རང་ཉིད་བརླག་པར་འགྱུར་རོ་ཞེས། ཁེ་ཉེན་དང་བཅས་ཏེ་བསྟན་ཏོ། ། གཉིས་པ་ལ་གསུམ་སྟེ། རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་འཛིན། མངོན་དུ་གྱུར་པ་འབྲས་བུའི་མཚན་ཉིད་དོ། །དང་པོ་ལ་གཉིས་ཏེ། རྟོགས་པའི་ཐབས་ལ་གདམས་པ་དང་། རྟོགས་བྱ་ལྟ་བའི་ངོ་བོ་བཤད་པའོ། །དང་པོ་ནི། གང་གིས་དམིགས་མེད་སོགས་ཚིགས་བཅད་གཅིག་སྟེ། གང་ཟག་གང་གིས་སེམས་ཉིད་གང་དུའང་དམིགས་སུ་མེད་པའི་དོན་མི་ཤེས་པ་དེ་ཡིས་ཆོས་ཀྱི་དབྱིངས་རྣམ་པར་དག་པ་མཐའ་བྲལ་གྱི་གནས་ལུགས་ཟབ་མོ་མི་ཤེས་ལ། རྒྱུ་མཚན་དེའི་ཕྱིར་ཕྱི་ནང་གི་གྲུབ་མཐའ་དངོས་པོར་ལྟ་བ་རྣམས་དང་། དངོས་པོ་མེད་པར་འཛིན་པ་དེ་ཐམས་ཅད་ཅིར་ཡང་མ་གྲུབ་ཅིང་གང་དུའང་མ་འགགས་པའི་སེམས་ཉིད་མཐའ་བྲལ་གྱི་ངང་དེར་འཇིག་པའི་ཚུལ་རྟོགས་པས་ཆོས་ཐམས་ཅད་ཀྱི་རང་བཞིན་དམིགས་མེད་བསམ་བརྗོད་དང་བྲལ་བའི་དོན་དེ་ཉིད་ཤེས་པར་གྱིས་ཤིག་ཅེས་གདམས་སོ། ། གཉིས་པ་ནི། གཞི་རྩ་མེད་པའི་སོགས་རྐང་པ་བདུན་ཏེ། རྟེན་པའི་གཞི་དང་བསྐྱེད་པའི་རྩ་བ་མེད་པའི་སེམས་ཉིད་གཉུག་མའི་རང་བཞིན་ནི། འདི་ཞེས་ཅིར་ཡང་གདགས་སུ་མེད་དེ། ཕོ་དང་མོ་དང་མ་ནིང་གསུམ་ཡང་མིན་ལ། དེ་ལས་གཞན་དུ་མཚན་མེད་དང་། འགྲོ་བ་རིགས་དྲུག །རྒྱལ་རིགས་སོགས་རིགས་བཞི། རིགས་སོ་སོའི་རྒྱུད་སོགས་གང་ཡང་མ་ཡིན་ཞིང་། དཀར་དམར་སོགས་ཁ་དོག་དང་། གྲུ་བཞི་ཟླུམ་པོ་སོགས་དབྱིབས་སུ་གྲུབ་པ་དང་། བརྟེན་བྱའི་གནས་དང་རྟེན་བྱེད་ཀྱི་རྫས་སོགས་དངོས་པོ་དང་དངོས་མེད་ཀྱི་ཆོས་སུ་གྲུབ་པ་མ་ཡིན་ཏེ། མདོར་ན་གང་ཡང་ཡིན་པར་མི་འགྱུར་བས་མཐའ་ཅིར་ཡང་གྲུབ་པ་མིན་པ་ནི་ཆོས་ཉིད་དེ་བཞིན་ཉིད་ཀྱི་དབྱིངས་རྣམ་པར་དག་པ་རང་བྱུང་གི་ཡེ་ཤེས་ཏེ། དེ་ཉིད་གཞི་མངོན་དུ་བྱེད་པ་ལས་མི་འདའ་བ་ཐབས་ཀྱི་ཕྱག་རྒྱ་ལམ་དང་། རྟོགས་མ་རྟོགས་ཀྱི་བྱེད་པས་འཁོར་འདས་སུ་སྣང་བ་ཀུན་གྱི་གཞིའམ་རྒྱུ་སྟེ། ཅིའི་ཕྱིར་ན། སེམས་ཀྱི་ཆོས་ཉིད་ལས་གཞན་དུ་གྱུར་པའི་ཆོས་འགའ་ཡང་མེད་པའི་ཕྱིར་རོ། །དེ་ཡང་ལེའུ་ལྔ་པ་འདི་ཉིད་བརྒྱུད་པའི་བཀའ་སྲོལ་ལ་མཚན་ཉིད་གསུམ་དུ་དྲིལ་ནས་འཆད་པས་ན། རྟོགས་པའི་ཐབས་དང་རྟོགས་བྱའི་ངོ་བོ་བཤད་པའི་གཞུང་ཚན་གཉིས་པོ་འདི་རྒྱུ་ཤེས་པའི་མཚན་ཉིད་ཡིན་མོད། དེ་ཡང་མན་ངག་ལམ་རིམ་དང་སྦྱར་ན། དེ་ཉིད་ལས། རང་བཞིན་ཡེ་ཤེས་རང་གནས་དང་། །དེ་མཐོང་དེར་འཇུག་རྣལ་འབྱོར་བཞི། །བར་ཆད་མེད་སྒྲུབ་རྣམ་པར་སྨིན། །དབང་སྒྱུར་ཕྱག་རྒྱ་ལྷུན་གྲུབ་ལམ། །མངོན་བྱས་རིམ་པ་བརྗོད་པར་བྱ། །ཞེས་པ་ལྟར་མཚན་ཉིད་གསུམ་ཡང་ལེའུ་དགུར་ཕྱེ་སྟེ། དང་པོར་རྟོགས་བྱ་ཡེ་ཤེས་རང་གནས་གཞིའི་ལེའུ། གཉིས་པར་རང་གནས་མཐོང་བ་ལྟ་བའི་ལེའུ། གསུམ་པ་ནས་དྲུག་པའི་བར་ལེའུ་བཞིས། སྟོང་ཆེན། སྙིང་རྗེ་སྒྱུ་མ། ཕྱག་རྒྱ་གཅིག་སྤྲོས་ཏེ་ཚོགས་ལམ་གྱི་རྣལ་འབྱོར་བཞི། བདུན་པ་སྦྱོར་ལམ་ཚོགས་སྒྲུབ། བརྒྱད་པས་ལམ་གྱུར་གྱི་འབྲས་བུ་རིག་འཛིན་བཞི། དགུ་པས་གཞི་ཇི་ལྟ་བ་མངོན་བྱས་མཐར་ཐུག་གི་འབྲས་བུ་རྣམས་བསྟན་པ་ལས། རྟོགས་བྱ་ལྟ་བའི་ངོ་བོ་འདི་ལམ་རིམ་གྱི་གཞི་ཡེ་ཤེས་རང་གནས་ཀྱི་ལེའུ་དང་སྦྱར་ནས། རྟོགས་པའི་ཐབས་ལ་གདམས་པ་རང་གནས་མཐོང་བ་དང་སྦྱར་དུ་རུང་བར་རྒྱལ་བ་གཡུང་བཞེད་ཅིང་། སྔར་རྟེན་གྱི་གང་ཟག་བཤད་པའི་གཞུང་དེ་ལེའུ་བདུན་པ་བར་ཆད་མེད་པའི་ལམ་ཚོགས་སྒྲུབ་དང་སྦྱོར་བ་ཡིན་ནོ། ། གཉིས་པ་རྐྱེན་འཇུག་པའི་མཚན་ཉིད་ཏིང་ངེ་འཛིན་ལ་དྲུག་སྟེ། ཅིའི་ཕྱིར་བསྒོམ་པའི་དགོས་ཆེད། ཇི་ལྟར་བསྒོམ་པའི་ཐབས། དེ་ཉིད་ཐམས་ཅད་དུ་རང་སྣང་བ། དེ་ལས་དཀྱིལ་འཁོར་གྱི་འཁོར་ལོ་བསྒོམ་པ། དེ་ཉིད་ཀར་དག་པས་བླང་དོར་དང་བྲལ་བར་དཔེས་བསྟན་པ། དེ་ལ་འདྲིས་པར་བསླབས་པས་འབྲས་བུ་ལ་མཚམས་སྦྱོར་བའོ། །དང་པོ་ནི། དངོས་རྣམས་སོགས་རྐང་པ་གཉིས་ཏེ། འདི་ལྟར་དངོས་པོ་སྣ་ཚོགས་སུ་སྣང་བའི་ཆོས་རྣམས་སྣང་དུས་ཉིད་ན་དངོས་པོར་གྲུབ་པ་རྡུལ་ཙམ་ཡང་མེད་པར་རྟོགས་པའི་དོན་ལ་རང་དབང་སྒྱུར་བའི་ཐབས་ནི་ཏིང་ངེ་འཛིན་ཡིན་ནོ། །གཉིས་པ་ནི། གང་གིས་གླང་ཆེན་སོགས་རྐང་པ་གཉིས་ཏེ། སྒོམ་པ་པོ་གང་གིས་མ་དུལ་བའི་གླང་ཆེན་ཆང་གིས་མྱོས་པ་དང་འདྲ་བའི་སེམས་འཁྲུལ་རྟོག་སྣ་ཚོགས་ཀྱིས་མྱོས་པས་ལས་སུ་མི་རུང་བ་འདི་ཉིད། ཇི་ལྟར་གླང་རྫི་མཁས་པས་ལྕགས་ཀྱུ་ལ་སོགས་པའི་ཐབས་ཀྱིས་གླང་པོ་བཏུལ་ན་ཐུལ་བ་ལྟར། གདམས་ངག་གམ་ཤེས་རབ་ཀྱི་སྟོབས་ཀྱིས་མཉམ་པར་འཇོག་ཐབས་གཉིས་པོ་གང་རུང་ལ་བརྟེན་ནས་རྟོགས་དོན་གནས་ལུགས་ཀྱི་ངང་ལ་ཡུལ་མེད་རང་གསལ་དུ་བཞག་པས་བཏུལ་བ་ན་དངོས་པོ་དང་མཚན་མར་འཛིན་པའི་འཁྲུལ་རྟོག་ཐམས་ཅད་ཞི་ནས་གཞི་ཇི་ལྟ་བ་བཞིན་ཀླུངས་སུ་ཕེབས་པ་ནི་ཐུལ་བའོ། །དེ་ལྟར་དགོས་ཆེད་དང་སྒོམ་ཐབས་གཉིས་པོ་འདི་ཉིད་དེ་བཞིན་ཉིད་ཀྱི་ཏིང་ངེ་འཛིན་སྟོང་པ་ཆེན་པོའི་རྣལ་འབྱོར་ཏེ། ལམ་རིམ་ལེའུ་གསུམ་པ་དང་སྦྱར་རོ། །གསུམ་པ་ནི། རྩ་བ་མེད་པའི་སོགས་ཚིགས་བཅད་གཅིག་སྟེ། གཞི་དང་རྩ་བ་གང་དུའང་གྲུབ་པ་མེད་པའི་སེམས་ཀྱི་ཆོས་ཉིད་ནི་ཅིར་ཡང་མ་འགགས་པས་འཁོར་འདས་ཀྱི་ཆོས་རྣམས་ཀུན་གྱི་རྩ་བ་ཡིན་པར་ངེས་པ་རྙེད་ནས། རང་གནས་ཀྱི་ཡེ་ཤེས་མ་རྟོགས་པས་སྒྱུ་མ་ལྟ་བུའི་འཁོར་བར་འཁྱམས་པའི་སེམས་ཅན་ལ་དམིགས་མེད་ཀྱི་སྙིང་རྗེ་ཆེན་པོ་བསྒོམ་པ་ནི་ཀུན་སྣང་གི་ཏིང་ངེ་འཛིན་སྙིང་རྗེ་སྒྱུ་མའི་རྣལ་འབྱོར་ཏེ། ལམ་རིམ་ལེའུ་བཞི་པ་དང་སྦྱར་རོ། །དེ་ལྟར་སྐྱེ་འགག་གཉིས་སུ་མེད་པའི་སེམས་ཉིད་ཐམས་ཅད་དུ་རང་སྣང་བ་ལས་འདིར་ཡི་གེ་ཨའི་རང་བཞིན་དུ་བསྒོམས་ཏེ། ཡི་གེ་དེ་ལས་ཨ་ཕྲ་མོ་དང་ཀ་ལ་སོགས་པའི་འཕྲོ་འདུ་ལ་སེམས་སྦྱོང་བ་ནི་ཇི་ལྟར་ཡིད་བཞིན་གྱི་ནོར་བུས་ཆར་འདོད་རྒུར་འབེབས་པ་ལ་རིན་ཆེན་གྱི་ཁམས་ལས་གྲུབ་པའི་སྤྲིན་དགོས་པ་བཞིན་དུ་དཀྱིལ་འཁོར་གྱི་འཁོར་ལོ་ཐམས་ཅད་སྤྲོ་བའི་རྒྱུར་ཡི་གེ་ལ་སེམས་སྦྱོང་དགོས་ཏེ། རྒྱུའི་ཏིང་ངེ་འཛིན་ནམ་ཕྲ་བ་ཡིག་འབྲུ་ལ་བསླབ་པ་ཞེས་བྱའོ། །བཞི་པ་ནི། ཐབས་ལས་སོགས་རྐང་པ་ལྔ་སྟེ། རྩ་བའི་ཐབས་རང་རིག་ཡི་གེར་སྣང་བ་ལས། རྟེན་གྱི་དཀྱིལ་འཁོར་དུ་སྣང་བ་གཞིའི་ཐབས་བྱུང་ཞིང་། དེར་བརྟེན་པ་ལྷའི་དཀྱིལ་འཁོར་བཀོད་དེ་སྒོམ་པ་ནི་ཐབས་བསམ་ཡས་པ་ཞེས་བྱའོ། །དེ་དག་ནི་རགས་པ་ལྷ་སྐུ་ལ་བསླབ་པ་སྟེ། འདི་དང་། སྔར་གྱི་ཕྲ་བ་ཡིག་འབྲུ་ལ་བསླབ་པ། འཆད་འགྱུར་གྱི་དེ་ལ་འདྲིས་པར་བསླབ་པ་གསུམ་ནི་ཕྱག་རྒྱ་གཅིག་པའི་རྣལ་འབྱོར་ཡིན་པས་ལམ་རིམ་ལེའུ་ལྔ་པ་དང་སྦྱར་རོ། །དེ་ལྟར་ཐབས་གསུམ་དང་ལྡན་པའི་དཀྱིལ་འཁོར་གྱི་འཁོར་ལོ་ཐམས་ཅད་རང་རིག་པའི་ཡེ་ཤེས་ཀྱི་ཆོ་འཕྲུལ་དུ་སྣང་བས་བཟང་ངན་ཐ་དད་པར་གྲུབ་པ་མིན་ཡང་། རྣམ་པ་གཙོ་བོ་ལས་ཐ་དད་པའི་འཁོར་སོགས་ནང་བརྟེན་པ་ལྷའི་དཀྱིལ་འཁོར་དང་ནང་གི་ཕྱི་རོལ་རྟེན་གྱི་དཀྱིལ་འཁོར་ཏེ། སྣང་བ་རྣམ་པར་འབྱེད་པའི་ཏིང་ངེ་འཛིན་གྱི་དཀྱིལ་འཁོར་ཞི་བ་ལ་ཚོམ་བུ་སྟོང་དང་། ཉི་ཁྲི་བཞི་སྟོང་དང་། ཁྲོ་བོ་ལ་སྟོང་བཞི་བརྒྱ་ལྔ་བཅུ་དང་། བདུན་ཁྲི་དྲུག་སྟོང་བརྒྱད་བརྒྱ་ལྔ་བཅུ། གཉིས་ཀ་ལ་བསམ་ཡས་ལྷུན་གྲུབ་ཀྱི་དཀྱིལ་འཁོར་སོགས་ཕྱག་རྒྱ་སྤྲོས་པ་མཁའ་ཁྱབ་བསམ་ཡས་ཀྱི་དཀྱིལ་འཁོར་དུ་བསྒོམ་པ་དེ་ཐམས་ཅད་ཀྱང་རང་རིག་ཡེ་ཤེས་ཀྱི་རོལ་པར་ཤར་བས་འཁོར་བ་དང་ཚོགས་ལམ་གྱི་གཡང་སར་འཇིགས་པ་མེད་དེ། སྤྱོད་ཡུལ་ཡོངས་དག་ཀུན་བཟང་ཕྱག་རྒྱའི་མཆོག་དེས་མ་བཏབ་པ་ཅི་ཡང་མེད་པའི་ཕྱིར་རོ། །ལྔ་པ་ནི། དེ་ཉིད་ཡེ་ཤེས་སོགས་ཚིགས་བཅད་གཅིག་སྟེ། བཤད་མ་ཐག་གི་ཐབས་གསུམ་པོ་དེ་ཉིད་རང་རིག་པའི་ཡེ་ཤེས་ལས་རང་སྣང་བའི་ཕྱིར་ན་ཡི་གེ་དང་མིང་ཚིག་གིས་བསྡུས་པའི་ལྷའི་ས་བོན་དང་སྐྱེད་སྔགས་ལས་གཟུགས་ཀྱི་ཆ་ཤས་ཡོངས་སུ་རྫོགས་པའི་སྐུར་བསྒོམ་པ་སོགས་ཡིད་ལ་ཇི་ལྟར་འདོད་པ་བཞིན་ཏིང་ངེ་འཛིན་ལ་འདོད་རྒུར་བྱར་ཡོད་པའི་ཡོན་ཏན་གྱི་དཔེ་ནི། མུན་ནག་ལ་སྒྲོན་མེ་བཏེག་པས་སྣང་བ་བྱུང་བ་ཇི་ལྟ་བ་དེ་བཞིན་དུ་རྟོག་ཚོགས་གར་ཡང་མ་སྤངས་པར་བརྟེན་པ་ལྷའི་སྣང་བར་གྲོལ་ཞིང་། ལྕགས་ཡུད་ཙམ་གྱིས་གསེར་དུ་འགྱུར་བ་གསེར་འགྱུར་གྱི་རྩིས་ཐེབས་པ་ལྟར་འབྱུང་ལྔ་མ་སྤངས་པར་ཡུམ་ལྔའི་རང་བཞིན་རྟེན་གཞལ་ཡས་ཁང་གི་སྣང་བར་གྲོལ་བ་དང་། བཅུད་ལེན་གྱི་རྩིས་དུག་སྨན་གྱི་རང་བཞིན་དུ་འགྱུར་བའི་ཚུལ་དང་འདྲ་བར་རྣམ་ཤེས་ཚོགས་བརྒྱད་དམ་དུག་ལྔ་ཡེ་ཤེས་ལྔར་གྲོལ་བ་སྟེ། དེའང་རྣམ་པར་གྲོལ་བ་ཙམ་ལས་མ་དག་པའི་ཆོས་རྣམས་མེད་སྣང་ཡིན་པས་དག་པའི་ངོ་བོར་གསར་དུ་བསྒྱུར་དགོས་པར་ནི་མི་བསམ་མོ། །དྲུག་པ་ནི། སྔགས་དང་སོགས་རྐང་པ་གཉིས་ཏེ། ཕྱག་རྒྱ་གཅིག་སྤྲོས་ཀྱི་སྐབས་སུ་སྔགས་ཀྱི་ཡན་ལག་ལྔ་དང་ལྡན་པའི་ལྷ་སྐུ་ཕྱག་རྒྱ་ཆེན་པོའི་ཏིང་ངེ་འཛིན་ལ་འདྲིས་པར་བསླབས་པའི་རྐྱེན་གྱིས་མི་འཕྲོག་པའི་གསལ་སྣང་ལ་རབ་ཏུ་བརྟན་ཅིང་གོམས་པ་ན་འོག་ནས་འབྱུང་བའི་དངོས་གྲུབ་ཡ་མཚན་ཆེན་པོ་རྣམས་ཐོབ་པར་འགྱུར་བ་ཡིན་ནོ། ། གསུམ་པ་མངོན་འགྱུར་འབྲས་བུའི་མཚན་ཉིད་ལ་གཉིས་ཏེ། ཐུན་མོང་དང་། མཆོག་གི་དངོས་གྲུབ་བོ། །དང་པོ་ཐུན་མོང་ནི། ལམ་ཐབས་གྲོལ་གཉིས་ཀྱི་དབང་དུ་ཕྱི་ནང་གི་བཤད་ཚུལ་གཉིས་མཛད་པའི་བཀའ་སྲོལ་སྣང་ནའང་། འདིར་རེ་ཞིག་ཕྱི་བཤད་གྲོལ་ལམ་ལྟར་འཆད་དོ། །དེ་ལ་གསུམ་སྟེ། ཡོན་ཏན་འབྱུང་བའི་དངོས་གྲུབ་དྲུག །འབྱུང་ལྔའི་དངོས་གྲུབ་ལྔ། ལས་ཕྲན་ཚེགས་བརྒྱད་དོ། །དང་པོ་ནི། བདུད་རྩིར་སོགས་ཚིགས་བཅད་གཅིག་སྟེ། རྒྱུད་འགྲེལ་པ་དང་སྒྲུབ་ཐབས་ཀྱིས་འཆད་པའི་དབང་དུ་བྱས་ན། ཡི་གེའི་འཕྲོ་འདུ་ལ་བརྟེན་ནས་བསྒྲུབ་སྟེ། བསྒྱུར་གཞི་ཟས་དུག་ཅན་ལ་ཡི་གེ་ཨ་བཀོད་དེ་འཇུ་འདུལ་གྱི་ལས་ཀྱིས་སྨན་མཆོག་བདུད་རྩིར་འགྱུར་བ་ཟོས་པ་ཙམ་གྱིས་འདོད་བྱ་འགྲུབ་པ་དང་། ནད་ཞི་བ་སོགས་ཡོན་ཏན་ལྷག་མ་ལྔ་པོ་ཐམས་ཅད་འགྲུབ་ཅིང་། དེ་ལྔ་སོ་སོར་བསྒྲུབ་ན། ཡི་གེའི་འཕྲོ་འདུས་འདོད་བྱ་གཞན་དམིགས་པ་ལྟར་འབྱུང་བ་དང་། ནད་པའི་ལུས་ལ་ཡི་གེ་བཀོད་པའི་འཕྲོ་འདུས་རླུང་མཁྲིས་བད་ཀན་འདུས་པའི་ནད་བཞིའམ། ཡང་ན་ཀུན་བརྟགས་གདོན་གྱི། འཕྲལ་བྱུང་རྐྱེན་གྱི། འབྱུང་འདུས་གཞིའི། རང་བཞིན་སྔོན་ལས་ཀྱི་ནད་བཞི་པོ་རེ་རེ་ལའང་བརྒྱ་རྩ་གཅིག་པ་རེ་སྦྱར་བ་བཞི་བརྒྱ་རྩ་བཞིའི་ནད་ཐམས་ཅད་སེལ་ཞིང་བདེ་བར་འགྱུར་རོ། །ཏྲཾ་ལས་རིན་པོ་ཆེའི་གཏེར་དུ་བསམ་པའམ། ཡི་གེའི་འཕྲོ་འདུས་མཆོད་པས་ལོངས་སྤྱོད་ཅི་འདོད་འབྱུང་ཞིང་། འབྱུང་བའི་ཡི་གེ་གསུམ་གྱི་འཕྲོ་འདུས་ངན་སོང་དུ་སྐྱེ་བའི་སྒྲིབ་པ་སྦྱོང་བ་དང་། གང་དང་ཅིར་སྣང་བའི་ཆོས་ཀྱི་རྣམ་པ་ཡང་དེ་དང་མི་མཐུན་པའི་སྣང་བ་གཞན་སྐམ་ས་ལས་ཆུ་དང་། སོལ་བ་ལས་ལྗོན་ཤིང་། བྱེ་མ་ལས་གསེར་དུ་འགྱུར་བ་སོགས་འགྲུབ་པ་ཡིན་ནོ། །དེ་དག་བཤད་རྒྱུད་རྒྱས་པ་དང་སྦྱར་ཏེ་བཤད་ན། རྐང་པ་དང་པོ་གཉིས་ནི་ལེའུ་བཞི་བཅུ་པ་མཆོག་གི་བདུད་རྩི་སྒྲུབ་པ་དང་། བདུན་ཅུ་པ་ཐུན་མོང་གི་བདུད་རྩི་རོ་ལངས་སྒྲུབ་པས་བསྟན། ལོངས་སྤྱོད་འབྱུང་བ་ནི་ཞེ་གཅིག་པའི་བློན་པོ་ནོར་མང་སྒྲུབ་པ་སོགས་ཀྱིས་བསྟན། ངན་སོང་སྦྱོང་བ་ནི་ཞེ་གཅིག་པའི་རྡོ་རྗེ་རིགས་ཀྱི་སྒྲུབ་པ་ལས་ཨ་ལ་སེམས་སྦྱངས་ནས་ཧཱུཾ་དུ་བསྒོམས་ཏེ་བདག་ལུས་སྦྱོང་བ་སོགས་ཀྱིས་བསྟན། ཅི་ཡང་གཞན་དུ་འགྱུར་བ་ནི། སོ་བརྒྱད་པ་ནས་རྐང་མགྱོགས་དང་མི་སྣང་བ། རེ་བཞི་པ་ནས་ཚེ། རེ་ལྔ་པ་ནས་པྲ་སྒྲུབ་སོགས་ཀྱིས་བསྟན། གཉིས་པ་ནི། ནམ་མཁའ་སོགས་རྐང་པ་ལྔ་སྟེ། འདི་ཡང་འགྲེལ་སྒྲུབ་ལྟར་ན། ནམ་མཁའ་ལ་ཧཱུཾ་ཞེས་རྡོ་རྗེའི་སྐས་བསམས་ན་སྲ་བའི་སྐས་འབྱུང་ཞིང་། ལག་མཐིལ་དུ་རཾ་བཀོད་པས་འབར་བའི་ཡེ་ཤེས་ཀྱི་མེར་གྱུར་ནས་ཐ་མལ་གྱི་མེ་ཡང་ཚིག་པར་འགྱུར་བ་དང་། དེ་བཞིན་དུ་ཁཾ་བཀོད་པ་ཡེ་ཤེས་ཀྱི་ཆུར་འགྱུར་བས་ཐ་མལ་གྱི་ཆུར་འབབ་པའང་དག་པར་བྱེད་པ་དང་། ཡཾ་བཀོད་པ་རླུང་དུ་གྱུར་ནས་འཇིག་རྟེན་གྱི་ཁམས་ནི་གཞན་དུ་འདེགས་ཤིང་འཐོར་བར་བྱེད་པ་དང་། ཡི་གེ་ཨི་བཀོད་དེ་འཕྲོ་འདུས་འཇིག་རྟེན་གྱི་ཁམས་ཐམས་ཅད་སྟོངས་པར་བྱེད་ཅིང་སྟེང་འོག་ཏུ་འཕེན་པ་དང་ལྟུང་བར་འགྱུར་བ་སོགས་འགྲུབ་བོ། །བཤད་རྒྱུད་དང་སྦྱར་ན་འབྱུང་བ་ལ་ཐོགས་པ་མེད་པའི་རྫུ་འཕྲུལ་སྟོན་པར་ནུས་པ་སྟེ། རྒྱས་པའི་སོ་བརྒྱད་པ་ལས། མི་གནས་ནམ་མཁའི་མཐའ་ཀླས་པར། །གོམས་པར་འདོད་པས་འགྲོ་བ་དང་། །ཆུ་ལ་ས་བཞིན་འགྲོ་བ་དང་། །བསྲེག་བྱ་འབར་བའི་དབུས་གནས་དང་། །ཚངས་པའི་རླུང་གིས་བཏེགས་ནས་ཀྱང་། །ཕྱོགས་བཅུ་ཀུན་ཏུ་ཕྱིན་པར་འགྱུར། །ཞེས་སོ། །གསུམ་པ་ནི། དགུག་དང་སོགས་རྐང་པ་གསུམ་སྟེ། འགྲེལ་སྒྲུབ་ལྟར་ན་ཏིང་ངེ་འཛིན་གྱིས་གཟུངས་མ་དང་དགྲ་བགེགས་སོགས་བསྒྲུབ་བྱ་གང་ཡིན་དགུག་པ་དང་། ཡུལ་གཞན་དུ་བཏང་བ་སྟེ་བསྐྲད་པ་དང་། དགྲ་རྐུན་སོགས་གཡོ་མེད་དུ་བཅིང་བ་དང་། བྱད་གདོན་གྱིས་བཅིངས་པ་སོགས་དགྲོལ་བ་དང་། ནད་པ་དང་སྲིའུ་ལ་སོགས་པ་གསོ་བ་དང་། དགྲ་བགེགས་གསད་པ་དང་། གཞན་སྡེ་ཕམ་པར་བྱ་བ་དང་། རང་སྡེ་རྒྱལ་བར་བྱ་བའི་ལས་རྣམས་ཇི་ལྟར་དམིགས་པ་བཞིན་དུ་འགྲུབ་བོ། །དེ་དག་བཤད་རྒྱུད་དང་སྦྱར་ན། དགུག་པ་དང་བཅིང་བ་ནི། རྒྱས་པའི་སོ་བརྒྱད་པར་ཡུལ་ཁམས་དབང་དུ་བྱ་བ། ཞེ་གཉིས་དང་ཞེ་གསུམ་གཉིས་ནས་འདས་པའི་གཟུངས་མ་རིགས་ལྔའི་ཡུམ་དང་སེམས་མ། ཞེ་ལྔ་པར་འཇིག་རྟེན་པའི་གཟུངས་མ་རྒྱལ་པོ་དང་ལྷ་ཆེན་གཞན་གྱི་ཆུང་མ་དགུག་པ། ང་དྲུག་པ་ནས་དགྲ་བགེགས་དགུག་པ། རེ་ལྔ་པར་པྲ་སེ་ན། རེ་དྲུག་པར་ལྷ་ཆེན་དང་རྒྱལ་པོ་དགུག་ཅིང་བཅིང་བ་སོགས་ཀྱིས་བསྟན་ཏོ། །བཏང་བ་ནི་སོ་བརྒྱད་པར་དགྲ་བགེགས་གླིང་ཁམས་གཞན་དུ་བསྐྲད་པ་དང་། ཞེ་དྲུག་པར་རང་གནས་ཀྱི་ཀླུ་བསྐྲད་པ་སོགས་ཀྱིས་བསྟན། དགྲོལ་བ་དང་གསོ་བ་ནི་ལེའུ་དེ་ལས་གཟུངས་མ་ཀླུའི་བྱད་དུ་བཅུག་པ་དགྲོལ་ཐབས་དང་འཁོར་ཀླུ་ནད་ཀྱིས་ཟིན་པ་གསོ་བ། ཞེ་བདུན་པར་མཐར་བྱེད་བཞིའི་སྒོ་ནས་རོ་ལངས་དང་། བདུན་ཅུ་པར་ཞིང་ཆེན་སྒྲུབ་པ། རེ་བཞི་པར་ཚེ་གསོ་བ་སོགས་ཀྱིས་གསོ་བ་བསྟན། བསད་པ་ནི་ང་དྲུག་པར་དགྲ་བགེགས་བསད་པ་སོགས་ཀྱིས་བསྟན། ཕམ་རྒྱལ་གྱི་ལས་གཉིས་ནི། ཞེ་གཅིག་པར་དམག་མང་མཐུ་ཆེན་དང་། རེ་དྲུག་པར་ལྷ་ཆེན་དང་རྒྱལ་པོ་སྡེ་བཞི་སྒྲུབ་པ་སོགས་དང་སྦྱར་བར་བྱ་སྟེ། ལས་དང་ཐུན་མོང་གི་དངོས་གྲུབ་དེ་རྣམས་ཐམས་ཅད་ཕྱག་རྒྱ་གཅིག་སྤྲོས་ཀྱི་ཏིང་ངེ་འཛིན་འདི་ལ་བརྟན་པ་ཐོབ་པ་ཡིས་བྱེད་ནུས་པར་འགྱུར་ཞིང་། དེ་ལྟར་ཐུན་མོང་གི་དངོས་གྲུབ་བསྟན་པ་འདི་དང་། སྔར་བཤད་དཀྱིལ་འཁོར་གྱི་འཁོར་ལོ་བསྒོམ་པ། དེ་ཉིད་ཀར་དག་པས་བླང་དོར་དང་བྲལ་བར་དཔེས་བསྟན་པ་གསུམ་གྱིས་ཕྱག་རྒྱ་སྤྲོས་བཅས་ཀྱི་རྣལ་འབྱོར་བསྟན་ཏེ། ལམ་རིམ་ལེའུ་དྲུག་པ་དང་སྦྱར་རོ། ། གཉིས་པ་མཆོག་གི་དངོས་གྲུབ་ལ་བསྟན་བཤད་གཉིས་ལས། དང་པོ་མདོར་བསྟན་ནི། སྒྱུ་འཕྲུལ་དཀྱིལ་འཁོར་སོགས་ཏེ། རྟོག་ཚོགས་སྒྱུ་འཕྲུལ་ལྷའི་དཀྱིལ་འཁོར་རྒྱལ་བ་བཞི་བཅུ་རྩ་གཉིས་སུ་སྣང་བ་རྣམས་ཐབས་ཤེས་ཟུང་འབྲེལ་དྲྭ་བའི་དཀྱིལ་འཁོར་རང་རིག་མངོན་སུམ་གྱི་ཡུལ་དུ་རྫོགས་པར་གསལ་བ་ལ། བསྒྲུབ་བྱ་ཕྱོགས་བཅུ་དུས་བཞིའི་རྒྱལ་བ་མ་ལུས་པའི་ཡོན་ཏན་རྫོགས་པས་གཅིག་དང་དུ་མའི་མཐའ་ལས་གྲོལ་བའི་ཕྱིར་རང་བཞིན་འབྲས་བུ་མཐར་ཕྱིན་གྱི་དཀྱིལ་འཁོར་ཐམས་ཅད་ཡོངས་སུ་འགྲུབ་པར་འགྱུར་རོ། །འདི་ནི་མཐར་ཐུག་གི་འབྲས་བུ་སྟེ། ལམ་རིམ་ལེའུ་དགུ་པ་དང་སྦྱར་རོ། །གཉིས་པ་རྒྱས་བཤད་ནི། དུས་གསུམ་སོགས་རྐང་པ་དྲུག་སྟེ། སྣང་སྤྱོད་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་གསལ་བ་ནི། དུས་གསུམ་གྱི་རྒྱལ་བ་རྣམས་ཀྱི་དགོངས་པའི་ངོ་བོ་དང་། དེ་དག་གིས་ཐུགས་སུ་ཆུད་པའི་དོན་ཡང་ཡིན་ལ། རྣལ་འབྱོར་པའི་ལྟ་བའང་ཡིན་པའི་ཕྱིར། ཐུན་མོང་གི་གྲུབ་པ་ལས་ཁྱད་པར་དུ་གྱུར་པ་དངོས་གྲུབ་མཆོག་ཅེས་བརྗོད་པ་གང་གི་བསྒྲུབ་བྱའི་སྙིང་པོ་འདི་མངོན་དུ་གྱུར་པའི་ཡོན་ཏན་ནི་ངོ་བོ་ཉིད་ཀྱིས་རྟག་པའི་ཕྱིར། ཐོབ་ནས་ཟད་པའི་དུས་མེད་པས་ཡིད་བཞིན་གྱི་ནོར་བུའི་མཛོད་ལྟར་འཕེལ་འགྲིབ་ཀྱི་འགྱུར་བ་མེད་པར་འབྱུང་བ་ཡིན་ཏེ། དོན་དམ་པར་དངོས་པོའམ་མཚན་མར་གྲུབ་པ་མེད་པའི་ངང་ལས་གདུལ་བྱའི་ངོར་དངོས་པོ་ལྟར་སྣང་བའི་སྤྲིན་གྱི་རོལ་པ་ལྷ་དང་དཀྱིལ་འཁོར་ལ་སོགས་པ་དངོས་གྲུབ་སྣ་ཚོགས་པའི་རྣམ་པར་འབྱུང་ཞིང་། དོན་མཛད་པའི་ཕྲིན་ལས་ཅིར་ཡང་འགྱུར་བའོ། །འདི་ནི་གནས་སྐབས་ལམ་གྱུར་གྱི་འབྲས་བུ་སྟེ། ལམ་རིམ་ལེའུ་བརྒྱད་པ་དང་སྦྱོར་ཞིང་། དེའང་གཞུང་ཚན་གཉིས་པོ་འདི་མདོ་རྒྱས་སུ་འཇོག་པའི་འཐད་པ་ནི། མཆོག་དངོས་སྤྱི་ལ་སྦྱོར་བའི་ཚེ་གཞུང་སྔ་མར་རང་དོན་ཕུན་ཚོགས་དང་། ཕྱི་མར་དོན་གཉིས་ཕུན་ཚོགས་གཙོ་བོར་བསྟན་པས་ཕྱི་མ་བརྗོད་བྱ་རྒྱས་པར་བཞེད་ལ། ཡང་གནས་སྐབས་དང་མཐར་ཐུག་གི་མཆོག་དངོས་སོ་སོར་སྦྱོར་བ་ན་གཞུང་ཚིག་མང་ཉུང་གིས་མདོ་རྒྱས་སུ་སོང་བ་ཡིན་གསུངས་སོ། ། གསུམ་པ་གཞུང་གསུངས་པའི་ཡོན་ཏན་ནི། ཞེས་བརྗོད་པས་སོགས་ཏེ། དེ་ལྟར་སྒྱུ་འཕྲུལ་དྲྭ་བ་སྒྲུབ་པའི་རིམ་པའང་ཤེས་འཇུག་མཐར་ཕྱིན་པའི་མཚན་ཉིད་གསུམ་པོ་དེར་འདུས་སོ་ཞེས་ཆེད་དུ་བརྗོད་པས་འཁོར་གྱི་དེ་བཞིན་གཤེགས་པ་ཉིད་ཏིང་ངེ་འཛིན་ལས་དངོས་གྲུབ་སྣ་ཚོགས་ཡུལ་མེད་རང་གསལ་དུ་ཤར་བའི་གཟིགས་མོས་མཉེས་པར་གྱུར་ཏོ། ། གསུམ་པ་ལེའུའི་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉི་ཤུ་རྩ་གཉིས་སུ་ཡོད་པ་ལས། འདིས་ཟུང་འཇུག་སྒྱུ་འཕྲུལ་དྲྭ་བའི་དངོས་གྲུབ་ཐམས་ཅད་སྒྲུབ་པའི་ཐབས་ཏིང་ངེ་འཛིན་བསྟན་པའི་ལེའུ་སྟེ་ལྔ་པའོ།། །། ལེའུ་དྲུག་པའི་འགྲེལ་པ།ལེའུ་དྲུག་པ་ལ་གསུམ་སྟེ། ལོ་རྒྱུས་དང་། གཞུང་དང་། མཚན་ནོ། །དང་པོ་ནི། དེ་ནས་དེ་བཞིན་སོགས་ཏེ། སྔ་མར་ཐབས་གསུམ་མདོར་བསྟན་པ་དེ་ནས་གཞི་དང་བསམ་མི་ཁྱབ་ཀྱི་ཐབས་གཉིས་ལས། ཞི་བ་ལྷག་ཏིང་དང་འབྲས་བུ་རང་བཞིན་སྐུའི་དཀྱིལ་འཁོར་གཉིས་རྒྱས་པར་སྟོན་པའི་ཕྱིར་དེ་བཞིན་གཤེགས་པ་ཐམས་ཅད་ཀྱི་རང་བཞིན་གཅིག་དང་དུ་མ་མེད་པས་མ་འདྲེས་ཡོངས་སུ་རྫོགས་པའི་བདག་ཉིད་ཆེན་པོ་སངས་རྒྱས་ཐམས་ཅད་ཀྱི་སྤྱི་གཟུགས་སྟོན་པས་གདུལ་བར་བྱ་བའི་ཡུལ་འཇིག་རྟེན་དྲུག་གི་ཕྱོགས་བཅུ་ཐམས་ཅད་ལ་རྣམ་པར་གཟིགས་ཏེ། འདུལ་བྱེད་སྟོན་པ་ཉིད་ཀྱི་ཆེ་བའི་ཡོན་ཏན་ཡེ་ཤེས་ལྔའི་དཀྱིལ་འཁོར་གྱི་རྣམ་པར་དབྱུང་བར་བཞེད་ནས་འཁོར་གྱི་ཆེད་དུ་བརྗོད་པ་འདི་བརྗོད་དོ། ། གཉིས་པ་གཞུང་ལ་གཉིས་ཏེ། རྒྱས་པར་བཤད་པ་དང་། བསྡུས་ཏེ་བསྟན་པའོ། །དང་པོ་ལ་གསུམ་སྟེ། ཏིང་ངེ་འཛིན་གྱི་དཀྱིལ་འཁོར་དང་། ལྷག་པ་ཏིང་ངེ་འཛིན་སྐུའི་དཀྱིལ་འཁོར་དང་། རང་བཞིན་འབྲས་བུ་མཐར་ཕྱིན་སྐུའི་དཀྱིལ་འཁོར་རོ། །དང་པོ་ནི། ཡེ་ཤེས་ཕྱོགས་སོགས་ཚིགས་བཅད་གཅིག་སྟེ། རང་རིག་པའི་ཡེ་ཤེས་ཀྱི་རང་བཞིན་ལ་ཕྱོགས་རིས་མ་གྲུབ་ཀྱང་། ཡོན་ཏན་གྱི་ལྡོག་ཆ་ནས་མཚོན་བྱ་ཡེ་ཤེས་ལྔར་སྣང་བ་ལ། མཚོན་བྱེད་ཕྱོགས་བཞི་དང་དབུས་ལྔའི་ཐ་སྙད་བཏགས་ཏེ། དེ་ལྟར་ཡེ་ཤེས་ལྔའི་དཀྱིལ་འཁོར་དེ་ཉིད་དམིགས་མེད་བསམ་བརྗོད་ཀྱི་ཡུལ་ལས་འདས་ཤིང་། མཐའ་ཡས་པའི་ཆོས་ཐམས་ཅད་ཀྱི་ཁྱབ་བྱེད་དུ་བཙལ་བར་ལྷུན་གྱིས་གྲུབ་པ་ནི་རང་བཞིན་གསང་བའི་སྙིང་པོར་ཡེ་ནས་རྫོགས་པའི་གནས་ལུགས་ཆོས་ཉིད་རང་བཞིན་གྱི་དཀྱིལ་འཁོར་ཆེན་པོ་སྟེ། དེ་རྟོགས་པའི་རྣལ་འབྱོར་པས་ཆོས་ཀུན་འབྱུང་བའི་གཞི་རང་བཞིན་གྱི་དཀྱིལ་འཁོར་ཆེན་པོ་དེ་ཉིད་ཏིང་ངེ་འཛིན་གྱི་ཡུལ་དུ་བྱས་ཏེ་གོམས་ཤིང་འདྲིས་པར་བསླབ་པའི་ཕྱིར་བསྒོམ་པའི་བྱ་བས་སྤྱོད་ཅིག་པའོ། ། གཉིས་པ་ལ་གསུམ་སྟེ། རྟེན་གཞལ་ཡས་ཁང་། བརྟེན་པ་ལྷ། དཀྱིལ་འཁོར་གྱི་ཆེ་བ་བཤད་པའོ། །དང་པོ་ནི། འཁོར་ལོ་སོགས་ཚིགས་བཅད་གཅིག་སྟེ། འོག་གཞི་ཚད་མེད་པའི་ཡེ་ཤེས་ཀྱི་འཁོར་ལོའི་ལྟེ་བ་ལ་རྫོགས་པའི་ཡེ་ཤེས་རིན་པོ་ཆེའི་གཞལ་ཡས་ཁང་བསྒོམ་པ་སྟེ། དེའང་ཡེ་ཤེས་ལྔས་མ་རིག་པ་གཅོད་པའི་རྟགས་སུ་ནང་གི་གཞི་འཁོར་ལོ་རྩིབས་བཞི་དབུས་ཀྱི་ལྟེ་བ་དང་ལྔ། དེ་ཉིད་ཀྱང་སྤྲོས་པ་དང་བྲལ་བའི་ཆོས་ཉིད་དུ་ཟླུམ་པས་རྡོ་རྗེ་རྭ་བའི་མུ་ཁྱུད་དང་བཅས་པ། དེའི་ཕྱིར་བདེན་པ་བཞི་མཚོན་པའི་གྲུ་ཆད་བཞིས་བརྒྱན་པ། བདེན་གཉིས་དབྱེར་མེད་མཚོན་པའི་བར་ཁྱམས་འཁོར་ཡུག་ཏུ་འཁོར་བ་དང་། ཆེ་བའི་ཡོན་ཏན་ཀུན་ཏུ་རྒྱས་པའི་རྟགས་སུ་དབྱིབས་གྲུ་བཞི་པ། རྣམ་ཐར་བཞི་མཚོན་པའི་སྒོ་བཞི་སྒོ་ཁྱུད་ཅན་རྒྱུ་འབྲས་ཀྱི་རྟ་བབས་ལ་སོགས་པའི་རྒྱན་དང་ལྡན་པ་གཉིས་སུ་མེད་པའི་ཡེ་ཤེས་ཀྱི་རྩལ་སྣང་མ་འགགས་པའི་རོལ་མོ་རྩིག་པ་ལྔ་སྦྲག་གི་སྟེང་ན་མུ་ཏིག་གི་དྲྭ་བ་དཔྱངས་པའི་སེང་མགོས་བཏེགས་པའི་རིན་པོ་ཆེའི་ཕ་གུ་དང་། བྲེ་ཕུལ་གྱི་སྣམ་བུར་རིན་པོ་ཆེའི་དྲྭ་བ་དང་དྲྭ་ཕྱེད། བྱ་འདབ་ལས་དཔྱངས་པའི་ཤར་བུ། སྟེང་ངོས་སུ་པུ་ཤུས་མཛེས་པ། གདུགས་འཕན་རྒྱལ་མཚན་སོགས་རྒྱན་སྣ་ཚོགས་པས་ཀུན་ཏུ་འཁྲིགས་ཤིང་། འདོད་ཡོན་མ་སྤངས་རྒྱན་དུ་ཤར་བས་གཟུགས་རྡོ་རྗེ་མ་སོགས་མཆོད་རྫས་ཐོགས་པའི་ལྷ་མོ་སྤྲིན་ཕུང་བཞིན་དུ་གཏིབས་པ། ཆོས་དབྱིངས་ཡེ་ཤེས་མཐའ་ཐུག་པ་མེད་པའི་བརྡར་དབུས་ཕྱུར་བུར་བུམ་པ་ཟླུམ་པོའི་རྣམ་པར་འཁྱིལ་བའི་རྩེར་རྡོ་རྗེ་རིན་པོ་ཆེའི་ཏོག་གིས་མཛེས་པ། ཡེ་ཤེས་ལྷག་མ་བཞི་མཚོན་པའི་གློ་འབུར་བཞི་གྲུ་ཆད་ལས་ཕྱིར་འཕྱར་བ་སོགས་ལེའུ་དང་པོར་བཤད་པ་ལྟར་ཤེས་པར་བྱའོ། ། གཉིས་པ་ལ་བསྟན་བཤད་གཉིས་ལས། མདོར་བསྟན་ནི། དཀྱིལ་འཁོར་སོགས་ཏེ། གཞལ་ཡས་ཁང་དེ་ཉིད་མཛེས་བྱེད་བདག་པོའི་རྒྱན་ལྷའི་དཀྱིལ་འཁོར་རྒྱལ་བ་བཞི་བཅུ་རྩ་གཉིས་ཀྱིས་མཛེས་པར་བརྒྱན་པ་སྟེ། ཁང་པ་མཛེས་བྱེད་ཁྱིམ་བདག་བཞིན་ནོ། ། རྒྱས་བཤད་ལ་བཞི་སྟེ། གདན་གང་ལ་ཇི་ལྟར་བཞུགས་ཚུལ། བཞུགས་གནས་ཀྱི་ཁྱད་པར། འཛིན་པ་ཕྱག་མཚན། སྐུ་མདོག་ཞི་ཚུལ་འོད་དང་བཅས་པའོ། །དང་པོ་ནི། སེང་གེ་སོགས་ཚིགས་བཅད་གཅིག་སྟེ། གདན་གྱི་ཁྱད་པར་མི་འཇིགས་པ་བཞི་སོགས་མཚོན་བྱེད་དབུས་ཀྱི་འཁོར་ལོའི་ལྟེ་བ་དང་རྩིབས་བཞིར་སེང་གེ་དང་། གླང་ཆེན་དང་། རྟ་དང་། ཁྱུང་དང་། ནམ་མཁའ་ལྡིང་སྟེ་ཤང་ཤང་རྣམས་རེ་རེ་ཡང་བརྒྱད་བརྒྱད་ཀྱིས་བཏེགས་པའི་ཁྲི་ཆེན་པོ་ལ། ཐབས་ཤེས་རྣམ་དག་ཉི་ཟླ་པདྨའི་གདན་རྣམས་ཏེ། དེ་དག་ཀྱང་འདོད་རྒུ་འབྱུང་བ་རིན་པོ་ཆེའི་ཁྲི་རྐང་མཛོད་མིག་བདུན་པས་བཏེགས་པའོ། །སྣང་མཐའ་ལ་འདིར་ཁྱུང་དང་གླེང་གཞིར་རྨ་བྱ་འབྱུང་བ་ནི་དབང་གི་ཁྲིར་དོན་རྟགས་མཚུངས་པས་འདམ་ཁ་སྟེ། རྨ་བྱས་དུག་དབང་དུ་བྱེད་པ་ལྟར་ཁྱུང་གིས་ཀྱང་ཀླུའི་དུག་དབང་དུ་བྱེད་པའི་ཕྱིར་རོ། །དེ་ལྟར་རིགས་ལྔ་ལ་སྲོག་ཆགས་དང་རིན་པོ་ཆེའི་ཁྲི་ཉི་ཟླ་པདྨ་སྟེ་ལྔ་བརྩེགས་བཤད་ཅིང་། དེས་གཞན་རྣམས་ཀྱང་མཚོན་དགོས་ཏེ། འདི་ལྟར་འོད་རིམ་ལས། ཉི་ཟླ་ཆུ་སྐྱེས་སུམ་བརྩེགས་སེམས། །ཉི་རྐྱང་ཁྲོ་ལ་པད་རྐྱང་ཐུབ། །བྱ་བྱེད་ཀུན་བཟང་ཡབ་ཡུམ་ལ། །ཉི་ཟླ་པདྨ་རིན་ཆེན་རྒྱས། །ཞེས་སོ། །སོ་སོའི་གདན་དེ་དག་ལ་བཞུགས་ཚུལ་ཇི་ལྟར་ཞེ་ན། རིགས་ལྔ་ཡབ་ལྔ་ནི་དོན་གཉིས་ཀྱི་མཛད་པ་ཡོངས་སུ་རྫོགས་པ་དང་། ཡུམ་ལྔ་ནི་རང་དོན་བརྟུལ་ནས་གཞན་དོན་ལ་ཞུགས་པའི་ཕྱིར་ཡབ་ཡུམ་བཅུ་པོ་རྒྱལ་པོའི་ཚུལ་ལྟར་དེ་དང་དེའི་སྐྱིལ་ཀྲུང་དུ་བཞུགས་ཤིང་། སེམས་དཔའ་རྣམས་ནི་གཞན་དོན་གྱི་མཛད་པ་མ་རྫོགས་པས་ཡབ་རྣམས་གཡས་དང་ཡུམ་རྣམས་གཡོན་ཅུང་ཟད་བརྐྱངས་པའི་ཕྱེད་སྐྱིལ་ཏེ་བློན་པོའི་ཚུལ་དང་། ཀུན་བཟང་ཡབ་ཡུམ་ནི་མཛད་པ་རྫོགས་ཤིང་དཀྱིལ་འཁོར་ཐམས་ཅད་ཀྱི་བྱ་བྱེད་ཐབས་ཤེས་མཚོན་པས་རྡོ་རྗེ་དང་པདྨའི་སྐྱིལ་ཀྲུང་། མཐར་བྱེད་ཡབ་ཡུམ་ནི་དམག་དཔོན་གྱི་ཚུལ་ལྟར་གདུག་པ་ཅན་ཚར་གཅོད་པས་ཞལ་ཕྱིར་གཟིགས་ནས་གྱད་ཀྱི་དོར་སྟབས། ཐུབ་དྲུག་ནི་སྐད་ཅིག་ཀྱང་མི་གནས་པར་འགྲོ་དོན་ལ་གཤེགས་པས་བཞེངས་སྟབས་ཀྱིས་བཞུགས་པའོ། ། གཉིས་པ་ནི། འཁོར་ལོ་རྒྱལ་པོ་སོགས་རྐང་པས་དམན་པའི་ཚིགས་བཅད་གསུམ་སྟེ། དབུས་ཀྱི་འཁོར་ལོའི་ལྟེ་བ་དང་རྩིབས་བཞི་ལ་རྒྱལ་པོ་རིགས་ལྔ་པོ་རྒྱལ་མོ་ཡུམ་ལྔ་དང་བཅས་པའོ། །གཙོ་བོ་ཞལ་ཤར་གཟིགས་ཀྱི་གཡས་ནས་བརྩམས་ཏེ་མདུན་རྒྱབ་ཀྱི་གཡས་གཡོན་དུ་རིམ་པར་འགོད་པའི་ངེས་པས། ཤར་ལྷོ་དང་། བྱང་ཤར་དང་། ལྷོ་ནུབ་དང་། ནུབ་བྱང་བཞིའི་རྩིབས་མཆན་ལ་རིམ་པ་ཇི་ལྟ་བར། མཐོང་བ་ས་སྙིང་དང་། ཐོས་པ་ཕྱག་རྡོར་དང་། སྣོམ་པ་ནམ་སྙིང་དང་། མྱོང་བ་སྤྱན་རས་གཟིགས་དང་བཞི། བཙུན་མོའང་རིམ་པར་སྒེག་མོ། གར་མ། ཕྲེང་མ། གླུ་མའི་ཚོགས་སུ་བཅས་པའོ། །དེ་བཞིན་དུ་གྲུ་ཆད་བཞི་ལ་ནི་ཤར་ལྷོ་ནས་གཡས་བསྐོར་གྱིས་རིམ་པར། མཐོང་བྱེད་བྱམས་པ་དང་། ཐོས་བྱེད་སྒྲིབ་སེལ་དང་། སྣོམ་བྱེད་ཀུན་བཟང་དང་། མྱོང་བྱེད་འཇམ་དཔལ་རྣམས། བཙུན་མོ་སྤོས་མ། མེ་ཏོག་མ། མར་མེ་མ། དྲི་ཆབ་མའི་ཚོགས་དང་ལྡན་པར་གནས་སོ། །བར་ཁྱམས་ལ་ནི། འོད་རིམ་ལས། ཤར་ལྷོ་ལྷ་ལ་ལྷོ་ཕྱོགས་མི། །ལྷོ་ནུབ་ནུབ་བྱང་ཡི་དྭགས་བྱོལ། །བྱང་དང་བྱང་ཤར་ལྷ་མིན་དམྱལ། །ཞེས་པའི་རིམ་པ་ལྟར་ཐུབ་པ་དྲུག་དང་། གཞན་ཡང་བར་ཁྱམས་དེའི་ཤར་དང་ནུབ་སྟེ་གཙོ་བོ་ཞལ་ཤར་གཟིགས་ཀྱི་མདུན་དང་རྒྱབ་ཀྱི་ཕྱོགས་དག་ཏུ་བྱེད་པ་ཀུན་ཏུ་བཟང་པོ་དང་། བྱ་བ་བཟང་མོ་དག་ནི་གནས་པར་བསྟན་ཏེ། དེ་གཉིས་དཀྱིལ་འཁོར་ཐམས་ཅད་ཀྱི་བྱ་བྱེད་དུ་མཚོན་པའོ། །ཡོངས་གྲགས་ཁམས་ལུགས་པ་རྣམས་དཀྱིལ་འཁོར་གྱི་དབུས་སུ་བཞུགས་པར་བཞེད་པ་ནི་མི་རིགས་ཏེ། བཤད་རྒྱུད་མེ་ལོང་ལས། ཁྱམས་ཀྱི་མདུན་དང་རྒྱབ་ཏུ་ནི། །ཀུན་བཟང་ཡབ་ཡུམ་ནམ་མཁའི་མདོག །ཅེས་གསུངས་པ་དང་འགལ་བའི་ཕྱིར་རོ། །སྒོ་ཁྱུད་བཞི་ལ་གདུག་པ་ཅན་འཇོམས་པར་བྱེད་པའི་ཁྲོ་བོ་ཤར་སྒོར་གཤིན་རྗེ་གཤེད། ལྷོར་སྟོབས་ཆེན། ནུབ་ཏུ་རྟ་མགྲིན། བྱང་དུ་བདུད་རྩི་འཁྱིལ་བ་རྣམས་ནི་རང་རང་གི་བཙུན་མོ་ལྕགས་ཀྱུ། ཞགས་པ། ལྕགས་སྒྲོག །དྲིལ་བུ་མ་བཞིའི་ཚོགས་དང་ལྡན་པར་གནས་སོ། །འདིར་ཁ་ཅིག །སྟོན་པ་ཀུན་བཟང་ཁྱམས་ལ་བཀོད་པས་གཙོ་འཁོར་ལོག་པའི་སྐྱོན་ཡོད་ཅེས་སྨྲ་བ་ནི། རང་གི་རང་བཞིན་གསལ་བར་སྟོན་པའི་སྨྲེ་སྔགས་ཤོར་བ་སྟེ། རྒྱུད་འཆད་པ་པོ་ཁོ་ནས་དཀྱིལ་འཁོར་གྱི་གཙོ་བོར་བྱེད་པར་མ་ངེས་པའི་ཕྱིར། དཔེར་ན་འཇམ་དཔལ་སྒྱུ་དྲྭའི་དཀྱིལ་འཁོར་གྱི་གཙོ་བོར་སྟོན་པ་ཤཱཀ་ཐུབ་མི་འབྱུང་བ་བཞིན་ནོ། །གསུམ་པ་ནི། རྡོ་རྗེ་སོགས་ཚིགས་བཅད་གཅིག་སྟེ། ཡེ་ཤེས་ལྔ་མཚོན་པ་རིགས་ལྔའི་རང་རྟགས་ཀྱི་ཕྱག་མཚན་ནི། མཐའི་རྟོག་པས་མི་ཕྱེད་པའི་བརྡའ་མི་བསྐྱོད་པའི་རྡོ་རྗེ། ཀུན་ལ་དབང་སྒྱུར་བས་རྣམ་སྣང་གི་འཁོར་ལོ། ཆེ་བའི་ཡོན་ཏན་ལྷུན་གྱིས་གྲུབ་པས་རིན་འབྱུང་གི་རིན་པོ་ཆེ། གསལ་ལ་མ་ཆགས་པར་གཟིགས་པས་སྣང་མཐའི་པདྨ། ཕྲིན་ལས་བཞིས་འགྲོ་བའི་ཉོན་མོངས་པ་གཅོད་པས་དོན་གྲུབ་ཀྱི་རལ་གྲི། ཡེ་ཤེས་ཀྱི་ཡུལ་དབྱིངས་ཀྱི་ཕྱག་རྒྱ་དྲིལ་བུ་སྟེ་ཐམས་ཅད་ཀྱང་འོད་འབར་བ་ཅན་ནོ། །དེ་ཡང་ཡབ་ལྔ་གཡས་རང་རྟགས་ཐུགས་ཀ་དང་། གཡོན་དྲིལ་བུ་དཀུར་བརྟེན་པས་ཡུམ་ལ་འཁྱུད་ཅིང་། ཡུམ་ལྔ་པོ་དེ་ལས་ལྡོག་སྟེ་གཡས་དྲིལ་བུས་ཡབ་ཀྱི་དཀུ་གཡས་ནས་འཁྱུད་ཅིང་གཡོན་རང་རྟགས་ཐུགས་ཀར་འཛིན་པའོ། །སེམས་དཔའ་རྣམས་ཀྱི་ཕྱག་མཚན་ནི། འཇམ་དཔལ་ནི་ཉོན་མོངས་དག་པས་བློ་རྒྱས་པའི་ཕྱིར་ཨུཏྤལ། བྱམས་པ་ནི་གདུང་བ་སྐྱོབ་པས་ཀླུ་ཤིང་འཛིན་པ་ལ་སོགས་པས་མཚོན་ནས་གཞན་རྣམས་ཀྱང་རང་རྟགས་ཀྱིས་མཚན་པ་སྟེ། ཇི་ལྟར་ན། ས་སྙིང་ནི་ཡེ་ཤེས་སྐྱེད་པའི་རིན་ཆེན་མྱུ་གུ། ནམ་སྙིང་ནི་ཉོན་མོངས་པ་གཅོད་པའི་རལ་གྲི། སྤྱན་རས་གཟིགས་ནི་སྐྱོན་གྱིས་མ་གོས་པས་པད་དཀར། ཕྱག་རྡོར་ནི་ཉོན་མོངས་པ་འཇོམས་པས་རྡོ་རྗེ། སྒྲིབ་སེལ་ནི་ཉོན་མོངས་པ་ཆོས་ཉིད་དུ་མཁྱེན་པས་འཁོར་ལོ། ཀུན་བཟང་ནི་རེ་བ་སྐོང་བས་རིན་ཆེན་སྙེ་མའོ། །འདིར་ཕྱི་སེམས་ཀྱི་མཐའ་ཐོག་ནས་བརྩམས་ཏེ་ཕྱག་མཚན་སོགས་ཁོངས་སྨོས་པ་གང་ཞེ་ན། གཞན་དྲུག་པོའི་ཕྱག་མཚན་རིགས་ལྔའི་ཕྱག་མཚན་དུ་འདུས་པའི་དབང་དུ་མཛད་པ་སྟེ། གཡོན་པའི་དྲིལ་བུ་བཞིན་ནོ། །སེམས་མ་བརྒྱད་ནི་མཛེས་པའི་མཆོར་སྒེག་གི་ཚུལ་དང་བཅས་ཏེ་མཉེས་པར་བྱེད་པའི་མཆོད་རྫས་གཟུགས་གསལ་བའི་མེ་ལོང་དང་། དྲི་རྒྱུན་མི་ཆད་པའི་ཕྲེང་བ་སོགས་རང་རང་གི་མིང་དང་མཐུན་པའི་ཡོ་བྱད་འཛིན་པ་སྟེ། སེམས་དཔའ་བརྒྱད་པོ་གཡོན་དྲིལ་བུ་དཀུར་བརྟེན་ཅིང་ཡབ་ཡུམ་ཕན་ཚུན་འཁྱུད་ཚུལ་ཡང་སྔར་རིགས་ལྔར་བཤད་པ་བཞིན་ནོ། །སྒོ་བ་བཞི་ནི། བྱམས་པས་ཞེ་སྡང་ཚར་གཅོད་པ་དང་། སྙིང་རྗེས་སྡུག་བསྔལ་འཇོམས་པ་དང་། དགའ་བས་འགྲོ་བའི་དོན་མི་གཏོང་བ་དང་། བཏང་སྙོམས་ཀྱིས་འགྲོ་དོན་མཐར་ཕྱིན་པར་མཛད་པས་ཕྱག་མཚན་ནྲྀ་མགོ་གདེངས་པ་ལ་སོགས་པ་དང་། ཡུམ་རྣམས་ཚད་མེད་པ་བཞིས་འགྲོ་བ་རྣམས་ཐུགས་རྗེས་འཛིན་པ་དང་། འཆིང་བ་དང་། མི་འཆོར་བར་སྡོམ་པ་དང་། ཉོན་མོངས་པ་ཐལ་བར་རློག་པས་དགའ་བར་མཛད་པའི་ཕྱིར་ལྕགས་ཀྱུ་ལ་སོགས་པའོ། །ཀུན་བཟང་ཡབ་ཡུམ་ནི་བྱེད་པས་འཁོར་འདས་མཉམ་ཉིད་དུ་མཁྱེན་ཅིང་བྱ་བ་མོས་ཀུན་ལ་ཁྱབ་པར་གནས་པས་ཕྱག་མཉམ་བཞག་གོ །ཐུབ་དྲུག་ནི། སྡོམ་བཞིའི་ཆོས་སྒྲས་ང་རྒྱལ་འཇོམས་པར་མཛད་པས་ལྷའི་ཐུབ་པ་པི་ཝཾ། བཟོད་པས་ཕྲག་དོག་སྦྱོང་མཛད་ལྷ་མིན་གྱི་ཐུབ་པ་གོ་ཆ། ཆགས་བྲལ་གྱི་ལམ་གྱིས་འདོད་ཆགས་དག་པར་མཛད་པས་མིའི་ཐུབ་པ་གསེག་པར། གཏི་མུག་སེལ་ཕྱིར་ཆོས་སྟོན་པས་བྱོལ་སོང་གི་ཐུབ་པ་པུསྟི། བཀྲེས་སྐོམ་སེལ་བས་སེར་སྣ་དག་བྱེད་ཡི་དྭགས་ཀྱི་ཐུབ་པ་རིན་ཆེན་སྒྲོམ་བུ། ཚ་གྲང་གི་ཉེས་དམིགས་བསྟན་ནས་ཞེ་སྡང་དག་པར་མཛད་པ་དམྱལ་བའི་ཐུབ་པ་མེ་ཆུ་བསྣམས་པའོ། །ཞལ་ཕྱག་སྤྲོས་པའི་སྐབས་འདིར་རྒྱས་འབྲིང་བསྡུས་གསུམ་ལས། རྒྱས་པ་ནི་ཡུམ་རྣམས་དང་ཐུབ་དྲུག་མ་གཏོགས་ཐམས་ཅད་ཞལ་གསུམ་ཕྱག་དྲུག་པར་བཤད་རྒྱུད་རྡོ་རྗེར་བཤད་ཅིང་། དེ་ལས་གཞན་དུ་རིགས་ལྔའམ་གཙོ་བོ་ཙམ་ཞལ་གསུམ་ཕྱག་དྲུག་པར་མཛད་པ་འབྲིང་པོ། ཐམས་ཅད་ཞལ་གཅིག་ཕྱག་གཉིས་པར་མཛད་པ་བསྡུས་པ་སྟེ། འདིར་བླ་མ་རྣམས་འབྲིང་པོ་རིགས་ལྔ་ཞལ་གསུམ་ཕྱག་དྲུག་པ་ལ་ཕྱག་ལེན་མཛད་པས། དེའི་དབང་དུ་རྡོ་རྗེ་ལས། རྡོ་རྗེ་འཁོར་ལོ་རལ་གྲི་འབར། །དྲིལ་བུ་པདྨ་རིན་པོ་ཆེ། །རྡོ་རྗེ་འཛིན་པའི་རིམ་པའོ། །གཞན་གང་གནས་སུ་རྡོ་རྗེ་ཤེས། །དང་པོ་ཐུགས་དང་གཡོན་འཁྱུད་པའོ། །ཞེས་པས་མི་བསྐྱོད་པའི་ཕྱག་མཚན་རྫོགས་པར་བསྟན་ནས་རིགས་གཞན་བཞི་ལ་གཡས་དང་པོར་རང་རྟགས་ཀྱི་ཕྱག་མཚན་སོང་བའི་ཤུལ་དུ་རྡོ་རྗེ་སྤོ་བ་ཁྱད་པར་རོ། ། བཞི་པ་ནི། མཐིང་ག་སོགས་རྐང་པ་དྲུག་སྟེ། དེ་ཡང་སྐུ་མདོག་ལ་རིགས་དང་རིགས་འདྲེས་པའི་ཁ་དོག་གཉིས་ལས། དང་པོ་རིགས་ཀྱི་སྐུ་མདོག་ནི་ཉེར་གསུམ་སྟེ། ལེའུ་དང་པོར་བཤད་པ་ལྟར་རིགས་ལྔ་ཡེ་ཤེས་ལྔའི་མཚོན་ཚུལ་ངེས་པར་བྱས་ཏེ། མི་བསྐྱོད། བྱེད་པོ། ཕྱག་རྡོར་རྣམས་སོ་སོའི་ཡུམ་བཅས། ལྷ་མིན་གྱི་ཐུབ་པ་དང་བདུན་ནི་མཐིང་ག །རྣམ་སྣང་དང་། ས་སྙིང་ཡུམ་བཅས། ལྷའི་ཐུབ་པ་དང་ལྔ་ནི་དཀར་པོ། རིན་འབྱུང་དང་ནམ་སྙིང་ཡུམ་བཅས། མིའི་ཐུབ་པ་དང་ལྔ་ནི་སེར་པོ། སྣང་མཐའ་དང་སྤྱན་རས་གཟིགས་ཡུམ་བཅས་བཞི་ནི་ལེ་བརྒན་ཏེ་དམར་པོ། དོན་གྲུབ་ཡབ་ཡུམ་གཉིས་ནི་ལྗང་ཁུའོ། །གཉིས་པ་དེ་ལ་སོགས་པའི་ཁོངས་ནས་རིགས་གཉིས་འདྲེས་སྣ་ཚོགས་པའི་སྐུ་མདོག་ནི་བཅུ་དགུ་སྟེ། བྱམས་པ་དཀར་སེར་ཡིན་པ་སོགས་གྲུ་ཆད་ཀྱི་ཕྱི་སེམས་བཞི་ཡབ་ཡུམ་ཕྱེ་བས་བརྒྱད་ནི་ཕྱོགས་གཉིས་འདྲེས་ཀྱི་ཁ་དོག་དང་། ཤར་སྒོ་ལ་སོགས་པའི་འཇོམས་པ་ཡབ་ཡུམ་བརྒྱད་ནི་སྨུག་སེར་དམར་ལྗང་བཞིའི་ཁ་དོག་ནག་པོ་དང་འདྲེས་པ་དང་། ཐུབ་པ་དྲུག་ལས་བྱོལ་སོང་དམར་ནག །ཡི་དྭགས་སེར་ནག །དམྱལ་བ་དུད་ཁའོ། །ཞི་བའི་ཚུལ་དགུ་ནི། ལྷ་དེ་དག་ཀྱང་ང་རྒྱལ་གནས་སུ་དག་པས་སྐུ་ཤ་མཉེན་པ། ཞེ་སྡང་དག་པས་ཡན་ལག་ལྕུག་པའམ། དཀུ་སྐབས་ཕྱེད་ཅིང་འཚམས་པ། འདོད་ཆགས་དག་པས་ཐབས་ཤེས་ཕན་ཚུན་འཁྲིལ་བའམ་འཁྲིལ་བག་ཆགས་པས་སྐུ་ལྷོད་པོར་མ་གྱུར་པ། ཕྲག་དོག་དག་པས་སྐུ་དྲང་ཞིང་ལྡེམ་པ། གཏི་མུག་དག་པས་སྐུ་གཞོན་ཤ་ཆགས་པའི་ངང་ཚུལ་ཅན། མ་རིག་པ་སྤངས་པས་སྐུ་གཙང་ཞིང་གསལ་བ། ཡེ་ཤེས་རྒྱས་པས་བཀྲག་ཅིང་འཚེར་བ། མཚན་དཔེ་རྫོགས་པས་བརྗིད་ཅིང་ཡིད་དུ་འོང་བས་ལྷུན་སྡུག་པ། ཆེ་བའི་ཡོན་ཏན་གྱིས་ཐམས་ཅད་ཟིལ་གྱིས་གནོན་པས་གཟི་བྱིན་ཆེན་པོ་དང་ལྡན་པ་སྟེ། སྔ་མ་ལྔ་ངོ་བོའི་ཡོན་ཏན་དང་། ཕྱི་མ་བཞི་རྣམ་པའི་ཡོན་ཏན་ནོ། །སྐུ་དེ་དག་ལས་འོད་ཇི་ལྟར་འཕྲོ་བ་ནི། ཞི་བ་རྣམས་ཀྱི་བ་སྤུའི་བུ་ག་རེ་རེ་ནས་ཀྱང་གསལ་ཞིང་དག་པའི་འོད་ཟེར་དཀར་སེར་དམར་སྔོ་བཙོད་ཁ་དངུལ་མདོག་དང་དྲུག་པོ་རེ་རེ་ལས་ཀྱང་བྱེ་བ་ཕྲག་དྲུག་དྲུག་ཕྱོགས་བཅུར་འཕྲོ་བའི་ཚོགས་ཆེན་པོའི་སྣང་བས་ཁྱབ་པར་བྱེད་ཅིང་། ཁྲོ་བོ་རྣམས་ལ་མེ་ལྟར་འབར་ཞིང་རྣོ་བའི་འོད་ཟེར་གྱི་ཕྲེང་བས་ཀུན་ཏུ་འཁྲིགས་པའི་ཀློང་ན་བཞུགས་པ་སྟེ། གར་དགུའི་ཉམས་ཀྱིས་སྒེག་པའོ། །འཕྲོས་དོན་རྒྱན་གྱི་ཁྱད་པར་ལ། རིགས་ལྔ་དང་། སེམས་དཔའ་ཡབ་ཡུམ། བྱ་བྱེད་རྣམས་ནི། གདུལ་བྱའི་ཉོན་མོངས་པའི་གདུང་བ་སེལ་བའི་བརྡར་ལྷ་རྫས་ལས་གྲུབ་པའི་དར་གྱི་ཆས་གོས་ལྔ་དང་། འདོད་ཡོན་མ་སྤངས་རྒྱན་དུ་རྫོགས་པས་འགྲོ་བའི་རེ་བ་སྐོང་བའི་བརྡར་རིན་པོ་ཆེའི་རྒྱན་བརྒྱད་དེ། རྒྱན་ཆས་བཅུ་གསུམ་མོ། །ཐུབ་དྲུག་ནི་གང་འདུལ་གྱི་གཟུགས་སུ་རྣམ་པར་སྟོན་ཀྱང་འཁོར་བའི་ཆགས་པས་མ་གོས་པའི་བརྡར་ཚངས་པར་སྤྱོད་པའི་ཆ་ལུགས་ཅན་དང་། ཁྲོ་བོ་ཡབ་ཡུམ་ནི་དཔའ་རྟགས་ཀྱི་རྒྱན་དུར་ཁྲོད་ཀྱི་ཆས་བརྒྱད་དོ། ། གསུམ་པ་དཀྱིལ་འཁོར་གྱི་ཆེ་བ་ནི། མཐའ་དབུས་སོགས་རྐང་པ་གཉིས་ཏེ། མཐའ་དང་དབུས་འདི་ཞེས་དམིགས་སུ་མེད་པར་ཆོས་ཐམས་ཅད་ལ་ཁྱབ་པའི་ཆོས་ཉིད་གཞི་རང་བཞིན་གྱི་དཀྱིལ་འཁོར་བསམ་བརྗོད་ལས་འདས་པའི་མཐའ་ཡས་པའི་གནས་ལུགས་དེ་ཉིད་རྟོགས་དོན་སྒོམ་པའི་ཐབས་ལྷག་པ་ཏིང་ངེ་འཛིན་གྱི་དཀྱིལ་འཁོར་ལ་གོམས་པར་བསླབས་པའི་མཐུས་འབྲས་བུ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་འགྲུབ་པར་འགྱུར་རོ། ། གསུམ་པ་རང་བཞིན་འབྲས་བུ་མཐར་ཕྱིན་སྐུའི་དཀྱིལ་འཁོར་ལ་བཞི་སྟེ། སྐུའི་མཚན་ཉིད། སྐུའི་ཕྲིན་ལས། འབྲས་བུ་ཐོབ་ཚུལ། དེ་གསུངས་པའི་ཡོན་ཏན་ནོ། །དང་པོ་ནི། སྐུའི་ཕྱག་རྒྱ་སོགས་ཚིགས་བཅད་གཉིས་ཏེ། འབྲས་བུ་ཆེ་བའི་ཡོན་ཏན་གྱི་རྟེན་བྱེད་པས་ན་སྐུ་སྟེ། དེ་ཡང་མཐར་ཐུག་གི་འབྲས་བུ་སྐུ་ལྔ་ལྷུན་གྱིས་གྲུབ་པ་ལས་མི་འདའ་ཞིང་གཞན་ལས་ཁྱད་པར་དུ་གྱུར་པའི་ཕྱག་རྒྱ་ཆེས་ཆེ་བའི་མཆོག་ནི་རིགས་དྲུག་པ་རྒྱལ་བ་སྤྱིའི་གཟུགས་ཅན་ཉིད་ཡིན་ལ། སྐུ་གཅིག་པོ་དེ་ལས་སྐུ་ལྔར་སྣང་བ་ནི། གཞི་ཆོས་དབྱིངས་དེ་བཞིན་ཉིད་ཟུང་འཇུག་སྤྲོས་བྲལ་གྱི་ཡེ་ཤེས་ལས་མ་གཡོས་པའི་ལྡོག་པ་ནི་ཆོས་ཀྱི་སྐུའོ། །དེ་ལྟར་མ་གཡོས་ཀྱང་སྒྲིབ་གཉིས་བག་ཆགས་དང་བཅས་པ་ལས་ཡང་དག་པར་ཐར་པའི་གཟུགས་སྐུ་དག་པའི་གདུལ་བྱ་ལ་ཐུན་མོང་དང་ཐུན་མོང་མ་ཡིན་པའི་མཚན་དཔེས་བརྒྱན་པར་སྣང་ཞིང་དངོས་པོ་གཉིས་ལ་རྫོགས་པར་ལོངས་སྤྱོད་པའི་ལྡོག་པ་ནི་ལོངས་སྐུ་དང་། གདུལ་བྱའི་འགྲོ་བ་མ་ལུས་པ་དངོས་བརྒྱུད་ཅི་རིག་པར་འདུལ་བའི་ཕྱིར། དེ་དག་གི་བསམ་པ་དང་མཐུན་པར་བྱས་པའི་སྐུའི་བཀོད་པ་ནི་གཅིག་ཏུ་མ་ངེས་པར་སྣ་ཚོགས་སུ་སྟོན་པའི་ལྡོག་པ་ནི་སྤྲུལ་པའི་སྐུའོ། །དེ་ལྟར་སྟོན་པ་ཉིད་ཀྱང་དཔེ་སྒྱུ་མའམ་མིག་ཡོར་གྱི་ཚུལ་དང་འདྲ་བར་གཟུགས་སྐུ་གཉིས་སུ་སྣང་བའི་ཚུལ་དེ་ཉིད་ཀྱང་དབྱིངས་ཆོས་ཀྱི་སྐུ་ལས་གཡོས་པ་མེད་པས་སྐུ་གསུམ་དབྱེར་མི་ཕྱེད་པའི་ལྡོག་པ་ནི་རྡོ་རྗེའི་སྐུའོ། །དེ་ལྟར་ཆོས་སྐུ་ལས་མ་གཡོས་བཞིན་དུ་གདུལ་བྱའི་ལས་དང་མཐུན་པར་སྐུ་སྣ་ཚོགས་སུ་སྣང་བས་སྐུ་གསུམ་སྣང་ཆ་མ་འདྲེས་པར་གོ་འབྱེད་པའི་ལྡོག་པ་ནི་མངོན་བྱང་གི་སྐུའོ། ། གཉིས་པ་སྐུའི་ཕྲིན་ལས་ལ་གཉིས་ཏེ། སྐུ་ཇི་ལྟར་སྣང་བའི་ཚུལ་དང་། སྐུའི་མཛད་པའོ། །དང་པོ་ནི། དེ་ཚེ་མི་མཐུན་སོགས་རྐང་པ་ལྔ་སྟེ། སྐུ་ལྔ་ལྷུན་གྱིས་གྲུབ་པ་དེའི་ཚེ་གདུལ་བྱའི་སྐལ་བ་མི་མཐུན་པ་སྣ་ཚོགས་ལ་འདུལ་བྱེད་ཀྱི་སྐུ་སོ་སོའི་རིགས་དང་འདྲ་བར་སྣང་བ་ནི་དེ་བཞིན་ཉིད་ཀྱི་ངང་ལས་རྩོལ་བས་མ་བཅོས་ཀྱང་གདུལ་བྱ་རང་རང་གི་སྐལ་བ་དང་སྔོན་གྱི་ལས་འཕྲོའི་དབང་གིས་སྐུ་སོ་སོར་སྣང་བ་སྟེ། དཔེར་ན་གཟུགས་གཅིག་ཉིད་མེ་ལོང་དུ་མའི་ནང་དུ་སོ་སོར་འཆར་བའམ། ཆུ་སྣོད་དུ་མར་ཟླ་གཟུགས་གཅིག་ཉིད་སོ་སོར་འཆར་བ་བཞིན་ནོ། །དེ་ལྟར་ཡང་ཕལ་པོ་ཆེ་ལས། ཟླ་བ་དབྱིངས་ལས་མ་འཕོས་ཀྱང་། །ཆུ་ཡི་སྣོད་དུ་སྣང་བ་ལྟར། །དེ་བཞིན་ཉིད་ལས་མ་གཡོས་པར། །སྤྲུལ་པ་བྱེ་བ་བསམ་མི་ཁྱབ། །ཅེས་སོ། །གཉིས་པ་སྐུའི་མཛད་པ་ནི། དེ་ཚེ་འགྲོ་དྲུག་སོགས་རྐང་པ་བཅུ་སྟེ། སྐུ་དེ་ལྟར་སྣང་ནས་དོན་མཛད་པ་དེའི་ཚེ་ལྷ་དང་མི་སོགས་འགྲོ་དྲུག་གི་སེམས་ཅན་ཐ་མལ་པ་ཐམས་ཅད་ལ་འདུལ་བྱེད་སྡིག་སྤོང་གི་གཟུགས་བརྒྱ་བྱིན་དང་འཁོར་ལོས་སྒྱུར་རྒྱལ་སོགས་སུ་རྣམ་པར་བསྟན་ནས་དོན་མཛད་ཅིང་། དེ་བཞིན་དུ་དགེ་ཚུལ་གྱིས་མཚོན་པའི་ཉན་ཐོས་ཀྱི་རིགས་ཅན་རྣམས་ལ་ཉན་ཐོས་དགྲ་བཅོམ་པའི་གཟུགས་དང་། རང་རྒྱལ་གྱི་རིགས་ཅན་རྣམས་ལ་བསེ་རུ་ལྟ་བུ་རིགས་མཐུན་པའི་ཚུལ་དུ་བསྟན་ནས་དོན་མཛད་དོ། །དེ་ལས་གཞན་ཡང་རྒྱུ་དང་འབྲས་བུའི་ཐེག་པ་མཆོག་གི་རིགས་ཅན་རྣམས་ལ་ཤཱཀྱ་ཐུབ་པ་སོགས་འདུལ་བྱེད་ཀྱི་སྟོན་པའང་གདུལ་བྱའི་དབང་པོའི་རིམ་པ་བཞིན་དུ་བསྟན་ནས་འདུལ་བ་ནི་སྤྲུལ་སྐུའི་མཛད་པའོ། །ལོངས་སྐུའི་མཛད་པ་ནི། གནས་ངེས་པ་འོག་མིན་བླ་ན་མེད་པའི་གནས་གཟུགས་ཁམས་ལས་འཕགས་པའི་མཆོག་ཏུ། སྟོན་པ་ངེས་པ་ལོངས་སྐུ་རྣམ་པར་སྣང་མཛད་ཆེན་པོའི་ཚུལ་གྱིས། འཁོར་ངེས་པ་ས་བཅུའི་བྱང་ཆུབ་སེམས་དཔའ་སྟེ་འཕགས་པའི་འཁོར་རྣམས་ལ། དུས་ངེས་པ་རྟག་པ་རྒྱུན་གྱི་འཁོར་ལོར་ཆོས་སྟོན་ཏེ། དེའི་ཚུལ་ནི་སྤྲུལ་སྐུ་བཞིན་དུ་ཆོས་རྣམས་གསུང་མཆོག་ཚིག་ཏུ་མི་སྨྲ་སྟེ། འོ་ན་ཇི་ལྟར་སྟོན་ན་སྐུའི་བརྡ་ཡིས་ཆོས་ངེས་པ་ཐེག་པ་ཆེན་པོ་ཉིད་འཁོར་རྣམས་ཀྱི་བློ་ལ་འཇལ་བར་སྟོན་ཏོ། ། གསུམ་པ་འབྲས་བུ་ཐོབ་ཚུལ་ལ་གཉིས་ཏེ། བྱང་ཆུབ་སེམས་དཔའི་དང་། གསང་སྔགས་ཀྱི་ཐོབ་ཚུལ་ལོ། །དང་པོ་ལ་གཉིས་ལས། སྒྲིབ་པ་སྦྱངས་པས་གྲོལ་ཚུལ་ནི། མེ་ལོང་བསྟན་པའི་སོགས་རྐང་པ་བདུན་ཏེ། ཇི་ལྟར་མེ་ལོང་བསྟན་པའི་ནང་དུ་བྱད་ཀྱི་དྲི་མ་སྣང་བའི་ཚུལ་གྱིས་བྱད་དངོས་ཀྱི་མདོག་བཟང་པོ་ངན་པར་བསྒྱུར་བའི་དྲི་མ་ཐམས་ཅད་ངོས་ཟིན་ནས། གདོད་སེལ་བར་བྱེད་པ་དེ་བཞིན་དུ་འཁོར་ས་བཅུའི་བྱང་སེམས་རྣམས་ཀྱིས་སྟོན་པ་དེ་བཞིན་གཤེགས་པའི་ཡེ་ཤེས་ཀྱི་སྐུར་བལྟས་པ་ན། བླ་ན་མེད་པའི་བྱང་ཆུབ་ལ་སྒྲིབ་པར་བྱེད་པའི་དྲི་མ་གཏིང་དཔག་མེད་པ་རྣམས་མེ་ལོང་ལ་སྣང་བ་བཞིན་དུ་སྟོན་པའི་སྐུ་ལ་སྣང་བས་རང་རྒྱུད་ཀྱི་སྦྱང་བྱའི་དྲི་མ་ངོས་ཟིན་པའོ། །དེ་ཡང་ཐོག་མར་ཚོགས་ལམ་གསུམ་དུ་ཚོགས་བསགས་པས་གཙོ་བོར་ཐོས་བསམ་ལ་བརྟེན་པའི་ཤེས་རབ་ཀྱིས་བདག་མེད་གཉིས་དོན་སྤྱིའི་ཚུལ་དུ་རྟོགས་ཤིང་། ཚོགས་ལམ་ཆེན་པོ་ཐོབ་ནས་སངས་རྒྱས་སྤྲུལ་པའི་སྐུ་ལས་གདམས་ངག་ཉན། སྦྱོར་ལམ་བཞིར་འཇིག་རྟེན་པའི་སྒོམ་བྱུང་གི་ཡེ་ཤེས་ལ་དངོས་སུ་ཞུགས་པས་གཟུང་འཛིན་གྱི་རྣམ་རྟོག་རགས་པ་རྣམས་རིམ་པར་བཅོམ་ནས། འཇིག་རྟེན་ལས་འདས་པའི་ཡེ་ཤེས་སྔར་མ་མཐོང་བ་གསར་དུ་མཐོང་བས་སྒྲོ་བཏགས་ཀྱི་སྒྲིབ་པ་མ་ལུས་པ་སངས་པ་ན། སྤྱི་མདོ་ལས། བྱུང་བའི་མུན་པ་སངས་ནས་རྫོགས་ལོངས་སྤྱོད་པ་མངོན་དུ་སྣང་ངོ་། །ཞེས་པས་ལོངས་སྐུའི་ཞལ་མཐོང་སྟེ་སྒྲིབ་པ་ངོས་ཟིན་པ་དེ་ནས་བརྩམས་ཏེ། མཐོང་ཟིན་གོམས་པར་བྱེད་པ་སྒོམ་ལམ་ས་དགུར་ལྷན་སྐྱེས་ཀྱི་སྒྲིབ་པ་ཇེ་སྲབ་ཏུ་གྱུར་པས་ས་བཅུའི་མི་མཐུན་ཕྱོགས་རྣམས་ཕར་ཕྱིན་བཅུ་དང་སའི་ཡོངས་སུ་སྤྱོད་པས་རིམ་གྱིས་འབྱང་བ་སྟེ་དག་པས། ས་དང་པོར་ཡོན་ཏན་བརྒྱ་ཕྲག་བཅུ་གཉིས་དང་། དེ་ཉིད་ས་གཉིས་པར་སྟོང་འགྱུར། གསུམ་པར་བརྒྱ་སྟོང་། བཞི་པར་ཁྲག་ཁྲིག །ལྔ་པར་ཁྲག་ཁྲིག་ཕྲག་སྟོང་། དྲུག་པར་ཁྲག་ཁྲིག་ཕྲག་བརྒྱ་སྟོང་། བདུན་པར་བྱེ་བ་ཁྲག་ཁྲིག་བརྒྱ་སྟོང་། བརྒྱད་པར་སྟོང་གསུམ་བརྒྱ་སྟོང་ཕྲག་བཅུའི་རྡུལ་སྙེད། དགུ་པར་སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུའི་རྡུལ་སྙེད། བཅུ་པར་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་སྙེད་ཀྱི་གྲངས་དང་མཉམ་པའི་སངས་རྒྱས་ཀྱི་ཞལ་བལྟ་བ་དང་། ཆོས་ཉན་པ་སོགས་སྐད་ཅིག་རེ་རེ་ལ་སྟོན་པར་ནུས་པ་ཡིན་ནོ། །དེ་ལྟར་ས་བཅུ་རྒྱུན་གྱི་ཐ་མར་མདོ་སྡེ་རྒྱན་ལས། སྒོམ་པ་ཐ་མ་ཐོབ་ནས་ནི། །འོད་ཟེར་ཆེན་པོའི་དབང་བསྐུར་རོ། །ཞེས་པ་ལྟར་འོད་ཟེར་ཆེན་པོའི་དབང་བསྐུར་བས་རྡོ་རྗེ་ལྟ་བུའི་ཏིང་ངེ་འཛིན་ཐོབ་སྟེ་ཤེས་སྒྲིབ་ཕྲ་བ་བག་ལ་ཉལ་གྱི་དྲི་མ་བཅོམ་ནས་བླ་ན་མེད་པའི་བྱང་ཆུབ་ཀུན་ཏུ་འོད་ཀྱི་ས་ཡང་དག་པར་ཐོབ་བོ། །གཉིས་པ་དེ་ལྟར་ཐོབ་པའི་འབྲས་བུའི་ངོ་བོ་སྐུ་གསུམ་ནི། ཆོས་སྐུ་སོགས་རྐང་པ་གསུམ་སྟེ། དག་པ་གཉིས་ལྡན་ཆོས་ཀྱི་སྐུ་ནི་བློས་དཔག་ཏུ་མེད་ཅིང་ངག་གིས་བརྗོད་དུ་མེད་དེ་ནམ་མཁའ་ལྟ་བུའོ། །དེའི་ངང་ལས་ལོངས་སྤྱོད་རྫོགས་པའི་སྐུ་ནི་རྟག་ཏུ་ཟད་པ་མེད་པ་ནོར་བུ་རིན་ཆེན་གྱི་གཏེར་དང་འདྲ་བར་བཞུགས་པ་དང་། སྤྲུལ་པའི་སྐུ་ནི་གང་ལ་གང་འདུལ་གྱི་སྐུའི་བཀོད་པ་བྱེ་བ་ཕྲག་བརྒྱ་སོགས་བསམ་གྱིས་མི་ཁྱབ་པ་སྣ་ཚོགས་པར་བསྟན་ནས་དོན་མཛད་དོ། །གཉིས་པ་སྔགས་ཀྱི་ཐོབ་ཚུལ་ལའང་གཉིས་ལས། མཐར་ཐུག་གི་སའི་ཁྱད་པར་ནི། མཚན་དང་དཔེ་བྱད་སོགས་རྐང་པ་ལྔ་སྟེ། སྔགས་ཀྱི་ཐབས་ཁྱད་པར་ཅན་ལ་བརྟེན་ནས་འགྱུར་བ་དེའི་བག་ཆགས་ཆེས་ཕྲ་བའང་རྣམ་པར་དག་པས་མཆོག་ཏུ་མི་འགྱུར་བའི་བདེ་བ་ཆེན་པོ་སྐུ་ལྔ་ལྷུན་གྱིས་གྲུབ་པའི་བདག་ཉིད་དུ་འཚང་རྒྱ་བའི་སངས་རྒྱས་ཀྱི་ས་གཅིག་གི་ངོ་བོ་ལ། སྐུ་གསུམ་གྱི་ལྡོག་པས་ཕྱེ་ན། སྒྲིབ་བྲལ་གྱི་དགོངས་པ་ཤེས་རབ་སྤྲོས་བྲལ་གྱི་ཡེ་ཤེས་ནི་ཐུན་མོང་མ་ཡིན་པའི་ཀུན་ཏུ་འོད་དེ་ཆོས་སྐུའི་སའོ། །དེའི་ངང་ལས་ཐབས་འགག་པ་མེད་པ་ཆོས་སྐུ་དང་ངོ་བོ་གཅིག་པའི་དཀྱིལ་འཁོར་གྱི་འཁོར་ལོ་རབ་འབྱམས་སུ་འཆར་ཡང་དམིགས་པ་དང་བྲལ་བས་གོས་པ་མེད་པའི་ཡེ་ཤེས་ནི་པདྨ་ཅན་ལོངས་སྐུའི་ས་དང་། ཐུན་མོང་མ་ཡིན་པའི་མཚན་དང་དཔེ་བྱད་ཐམས་ཅད་རྫོགས་ཤིང་། སྤྱོད་ཡུལ་ཀུན་ཏུ་ཡེ་ཤེས་རང་སྣང་བདེ་བ་ཆེན་པོའི་མཎྜལ་ཞེས་དཀྱིལ་འཁོར་ཏེ། སྐུ་དང་ཡེ་ཤེས་ཀྱི་དཀྱིལ་འཁོར་དུ་སྣང་ལ་མ་ཞེན་པར་ཤར་བའི་ཕྱིར་ཚོགས་ཆེན་གཉིས་ཀྱང་མ་བཙལ་ལྷུན་གྱིས་རྫོགས་པས་གདུལ་བྱ་གཞན་སྣང་དུ་རྣམ་པར་རོལ་པའི་སྤྲུལ་པ་སྟོན་པར་ནུས་པའི་ཡེ་ཤེས་ནི་འཁོར་ལོ་ཚོགས་ཆེན་སྤྲུལ་སྐུའི་སའོ། །དེ་ལ་སོགས་ཏེ་སའི་གྲངས་དང་ཡོན་ཏན་བསམ་ཡས་པའི་མཆོག་རྫོགས་པ་མཐར་ཐུག་གི་ས་གསུམ་པོ་དེ་རྒྱུའི་ཐེག་པའི་ཀུན་ཏུ་འོད་ལས་ཁྱད་པར་དུ་གྱུར་པས་ན་སའི་མཆོག་ཅེས་བྱའོ། །གང་དག་ཀུན་ཏུ་འོད་སྤྲུལ་སྐུ་དང་། ཡི་གེ་འཁོར་ལོ་ཆོས་སྐུའི་སར་བསྡུས་པ་ནི་མཁས་པའི་གསུང་ཡིན་ཡང་འཐད་པར་མི་སེམས་ཏེ། ཧེ་རུ་ཀ་གལྤོ་ལས། དབྱིངས་ལ་ཡེ་ཤེས་ཤར་བ་ཀུན་ཏུ་འོད། །པདྨའི་སྤྱན་འདྲ་མི་འགག་ལོངས་སྤྱོད་རྫོགས། །ཡི་གེ་འཁོར་ལོར་གདུལ་བྱར་སྤྲུལ་པ་འགྱེད། །དེ་བཞིན་གཤེགས་པའི་ས་ཞེས་བྱ་བའོ། །ཞེས་གསུངས་པ་དང་འགལ་བའི་ཕྱིར་རོ། །གཉིས་པ་འབྲས་བུ་སྐུ་ལྔར་བསྟན་པ་ནི། སྐྱེ་ཤི་སོགས་རྐང་པ་བདུན་ཏེ། སྐྱེ་ཤི་སོགས་སྤྲོས་པའི་མཐའ་ཐམས་ཅད་དང་བྲལ་བའི་ཡེ་ཤེས་འགྱུར་བ་མེད་པའི་ཡོངས་གྲུབ་རྟག་བརྟན་གཡུང་དྲུང་གི་སྐུ་ནི་ཆོས་ཀྱི་སྐུའོ། །འགྲོ་བ་ཉོན་མོངས་པ་ཅན་ཀུན་གྱི་བསོད་ནམས་ཀྱི་ཞིང་དུ་གནས་པ་སྤྲུལ་པའི་སྐུའི་སྣང་བརྙན་གདུལ་བྱའི་བློ་དང་མཐུན་པར་ཟད་མི་ཤེས་པར་འབྱུང་བའི་གཏེར་དུ་གྱུར་པ་ནི་ལོངས་སྤྱོད་རྫོགས་པའི་སྐུའོ། །སྐུ་གསུམ་དབྱེར་མི་ཕྱེད་པའི་རྡོ་རྗེ་རང་རིག་པའི་ངང་དུ་འདུ་འབྲལ་མེད་པར་འཛིན་པའི་སྐུ་ནི་རྡོ་རྗེའི་སྐུའོ། །ཆོས་ཐམས་ཅད་རིག་པའི་ཡེ་ཤེས་སུ་དབྱེར་མེད་པས་མཉམ་པ་ཉིད་དུ་གནས་པའི་ཕྱིར་སྐུ་གསུམ་སྣང་ཆ་མ་འདྲེས་པར་སྣང་བའི་སྐུ་ནི་མངོན་བྱང་ངོ་། །ཆོས་ཅན་ཇི་སྙེད་པ་ཐམས་ཅད་མ་འདྲེས་པར་མཁྱེན་པའི་ཡེ་ཤེས་ཀྱིས་གདུལ་བྱའི་མོས་ངོར་བརྟན་གཡོ་སྣ་ཚོགས་པའི་རྣམ་པར་སྟོན་པའི་སྐུ་ནི་སྤྲུལ་པའི་སྐུ་སྟེ། མཐར་ཐུག་ཐུན་མོང་མ་ཡིན་པའི་ས་ཐོབ་པ་དེའི་ཚེ་སྐུ་ལྔ་པོ་དེ་དག་ཀུན་ཀྱང་རྫོགས་པར་ཐོབ་པས་སྔ་ཕྱི་མེད་དེ། སྒྲིབ་བྲལ་མི་འགྱུར་བའི་ཡེ་ཤེས་ཉིད་ཡོན་ཏན་གྱི་རྟེན་བྱེད་པའི་ལྡོག་པ་ནས་སྐུ་དང་། སངས་རྒྱས་ཀྱི་ས་དང་། མི་སློབ་པའི་ལམ་ཞེས་སམ། རང་བྱུང་གི་རིག་པར་གནས་པའི་ཆ་ནས་ཡེ་ཤེས་དང་། དེས་དོན་མཛད་པའི་ཆ་ནས་ཕྲིན་ལས་ཞེས་སོ་སོར་བཏགས་ནའང་ངོ་བོ་ཐ་མི་དད་པར་གཅིག་པའི་ཕྱིར་རོ། ། བཞི་པ་གསུངས་པའི་ཡོན་ཏན་ནི། ཞེས་བརྗོད་པས་སོགས་ཏེ་རང་བཞིན་སྐུའི་དཀྱིལ་འཁོར་གྱི་དོན་དེ་སྐད་ཅེས་བརྗོད་པས་གདུལ་བྱའི་ཡུལ་འཇིག་རྟེན་དྲུག་གི་ཕྱོགས་བཅུའི་ཞིང་མཐའ་ཡས་མུ་མེད་པ་ཐམས་ཅད་དུ་འདུལ་བྱེད་སྐུའི་དཀྱིལ་འཁོར་གྱི་རྣམ་པར་རོལ་པ་བརྗོད་ཀྱིས་མི་ལང་བ་ཕྱོགས་བཅུའི་སངས་རྒྱས་ཀྱི་ཞིང་གི་རྡུལ་སྙེད་རང་རིག་པའི་ཡུལ་དུ་གསལ་ཞིང་སྣང་བར་གྱུར་ཏོ། ། གཉིས་པ་བསྡུས་ཏེ་བསྟན་པ་ལ་གསུམ་སྟེ། ལོ་རྒྱུས་བརྗོད་པ། བསྡུ་བ་དངོས། གསང་སྔགས་མཚོན་པའི་ཚིག་གོ །དང་པོ་ནི། དེ་ནས་སོགས་ཏེ། རྒྱས་པར་བསྟན་པ་དེ་ནས་དེ་བཞིན་གཤེགས་པ་ཡབ་རྣམས་ཡུམ་བཙུན་མོའི་ཚོགས་དང་གཉིས་སུ་མེད་པའི་དཀྱིལ་འཁོར་དེ་དག་ཉིད་ཀྱི་རང་བཞིན་རྟོགས་དཀའ་བའི་གསང་བ་འདི་ཉིད་སྟོན་པའི་སྐུ་སོགས་རིགས་ལྔ་དབྱེར་མི་ཕྱེད་པའི་རྡོ་རྗེ་ལས་ཕྱུང་ངོ་། །གཉིས་པ་ནི། ཨ་ཧོཿདམིགས་བྱ་སོགས་ཏེ། རང་བཞིན་མ་སྐྱེས་པ་ལས་རོལ་པ་འགག་མེད་ལམ་དང་འབྲས་བུ་སྐུའི་དཀྱིལ་འཁོར་དུ་གསལ་བ་ལ་ཨ་ཧོཿཞེས་ངོ་མཚར་བའོ། །དེའང་དམིགས་བྱ་དབྱིངས་དང་དམིགས་བྱེད་རང་རིག་གཉིས་དབྱེར་མེད་ཀྱི་ཡེ་ཤེས་ཙམ་དུའང་མི་དམིགས་པས་བློས་དཔག་མེད་བསམ་གྱིས་མི་ཁྱབ་པར་རྟོགས་ནས་བསྒོམ་པ་སྟེ། དེར་ཏིང་ངེ་འཛིན་གྱི་དཀྱིལ་འཁོར་བསྟན་པའི་ཚིགས་བཅད་གཅིག་བསྡུའོ། །གཞི་རང་བྱུང་གི་ཡེ་ཤེས་ལ་རང་རིག་པས་དབང་སྒྱུར་བའི་རྩལ་སྣང་ལྷག་པ་ཏིང་ངེ་འཛིན་གྱི་དཀྱིལ་འཁོར་རྟེན་དང་བརྟེན་པར་བཅས་པ་རྣམ་པ་སྣ་ཚོགས་བརྗོད་ཀྱིས་མི་ལང་བར་སྣང་བ་སྟེ། གསུངས་པའི་ལོ་རྒྱུས་དང་། ལྷག་པ་ཏིང་ངེ་འཛིན་གྱི་དཀྱིལ་འཁོར་སྟོན་པའི་ཚིགས་བཅད་བརྒྱད་བསྡུའོ། །གདུལ་བྱ་དག་པ་ཆོས་མཉམ་ཉིད་དུ་རྟོགས་པ་དང་། མི་མཉམ་པར་ཐ་དད་དུ་འཛིན་པ་མ་དག་པའི་གདུལ་བྱ་སྟེ། དེ་དག་ཀུན་ལ་རྒྱལ་བ་དྲུག་པའི་ཕྲིན་ལས་ཀྱིས་ཁྱབ་པར་དོན་མཛད་པའི་དུས་ན། གདུལ་བྱའི་ཡུལ་དེ་དག་ཆོས་ཉིད་ལས་གཞན་དུ་མ་གྱུར་པའི་ཕྱིར་ཁྱབ་བྱ་ཁྱབ་བྱེད་མེད་པས་གཉིས་མེད་དུ་ཁྱབ། སྣང་སྟོང་ཐ་མི་དད་པའི་དབྱིངས་རྣམ་པར་དག་པ་སྟེ། སྐུའི་མཚན་ཉིད་དང་ཕྲིན་ལས། རྒྱུའི་འབྲས་བུ་ཐོབ་ཚུལ། སྔགས་ཀྱི་མཐར་ཐུག་སའི་ཁྱད་པར་བསྟན་པ་རྣམས་བསྡུའོ། །ཡེ་ནས་སྐུ་ལྔ་པོ་ཀུན་ཀྱང་བདེ་བ་ཆེན་པོའི་སྐུ་ལས་མ་འགགས་པར་རང་གསལ་བའི་དཀྱིལ་འཁོར་རྣམ་པར་སྤྲོས་པ་ཙམ་ཉིད་ནས་སྤྲོས་པའི་མཚན་མ་མེད་པ་སྟེ། སྔགས་ཀྱི་འབྲས་བུ་སྐུ་ལྔ་བསྟན་པ་དང་། དེ་གསུངས་པའི་ཡོན་ཏན་གཉིས་བསྡུའོ། །དེ་ལྟར་བསྡུས་པའི་དོན་ལ་ཧོཿཞེས་མཉེས་པའོ། །གསུམ་པ་ནི། ཞེས་རྡོ་རྗེ་སོགས་ཏེ། དཀྱིལ་འཁོར་གསུམ་གྱི་དོན་དེ་སྐད་ཅེས་རྡོ་རྗེ་འཛིན་པ་གསང་བའི་བདག་པོས་ཚིག་ཏུ་བསྡུས་པའོ། ། གསུམ་པ་ལེའུའི་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉི་ཤུ་རྩ་གཉིས་སུ་ཡོད་པ་ལས། འདིས་ཏིང་འཛིན་ལྷག་པའི་ཏིང་འཛིན་གཉིས་དང་། འབྲས་བུ་རང་བཞིན་སྐུའི་དཀྱིལ་འཁོར་སྤྲོས་ནས་བསྟན་པའི་ལེའུ་སྟེ་དྲུག་པའོ།། །། ལེའུ་བདུན་པའི་འགྲེལ་པ།ལེའུ་བདུན་པ་ལ་གསུམ་སྟེ། ལོ་རྒྱུས་དང་། གཞུང་དང་། མཚན་ནོ། །དང་པོ་ནི། དེ་ནས་དེ་བཞིན་སོགས་ཏེ། སྐུའི་དཀྱིལ་འཁོར་བསྟན་པ་དེ་ནས་ལྷག་ཏིང་དང་འབྲས་བུ་རང་བཞིན་གསུང་གི་དཀྱིལ་འཁོར་གཉིས་སྟོན་པའི་ཕྱིར་དེ་བཞིན་གཤེགས་པ་ཡབ་རྣམས་ཡུམ་བཙུན་མོའི་ཚོགས་དང་བཅས་པ་ཐམས་ཅད་ཀྱི་སྐུ་དང་གསུང་དང་ཐུགས་དབྱེར་མི་ཕྱེད་པའི་རྡོ་རྗེ་ལས་གསུང་གསང་སྔགས་ཀྱི་གསང་བ་འདི་དག་ཕྱུང་ངོ་། ། གཉིས་པ་གཞུང་ལ་གཉིས་ཏེ། ལྷག་པ་ཏིང་ངེ་འཛིན་གསུང་གི་དཀྱིལ་འཁོར་དང་། རང་བཞིན་གསུང་གི་དཀྱིལ་འཁོར་རོ། །དང་པོ་ལྷག་པ་ཏིང་ངེ་འཛིན་གསུང་གི་དཀྱིལ་འཁོར་འཆད་པའི་སྐབས་འདིར་ཞི་བའི་ཕྲིན་ལས་སྒོམ་རིམ་གྱི་སྡེབས་ཅུང་ཟད་བརྗོད་པར་བྱ་སྟེ། དེ་ལ་སྔོན་འགྲོ། དངོས་གཞི། རྗེས་ཀྱི་རིམ་པ་དང་གསུམ་ལས། སྔོན་འགྲོ་ལའང་བདུན་ཏེ། དང་པོ་གྲལ་ཕྱག་དང་ཚུལ་ཕྱག་བྱ་བ། གཉིས་པ་ཡན་ལག་བརྒྱད་པས་རྒྱུད་སྦྱང་བ། གསུམ་པ་མཚོན་ཆ་དམ་ཚིག་ལས་རྒྱལ་པོ་ལྔའི་ཕྱག་རྒྱས་མཚམས་བཅད་པ། བཞི་པ་བརྗོད་མེད་ཀྱི་བཤགས་པ་བྱ་བ། ལྔ་པ་པུཎྜ་རི་ཀའི་རྒྱུད་ལས་གསུངས་པ་ལྟར་དམ་བཅའ་ཉི་ཤུ་པ་བྱ་བ། དྲུག་པ་བབ་དྲུག་འདས་བཞིའི་དགོངས་པས་བདག་གནས་ཡོ་བྱད་རྣམས་ལ་བྱིན་དབབ་པ། བདུན་པ་ཕྱི་ནང་གི་མཆོད་པ་རྣམས་བྱིན་གྱིས་རློབ་པ་སྟེ། སྒྲུབ་ཐབས་ཀྱི་ལས་བྱང་ལྟར་བྱའོ། ། གཉིས་པ་དངོས་གཞི་ལ་གཉིས་ལས། དང་པོ་ཁྱད་པར་གྱི་སྦྱོར་བ་སེམས་བསྐྱེད་པ་ནི། བདག་དང་མཐའ་ཡས་སོགས་ཀྱིས་ཀུན་རྫོབ་དང་། ལེའུ་གཉིས་པའི་ཨེ་མ་མཚར་ལྔས་དོན་དམ་པའི་སེམས་བསྐྱེད་པའོ། ། གཉིས་པ་ཏིང་ངེ་འཛིན་གྱི་རིམ་པ་དངོས་ལ་གསུམ་སྟེ། ཏིང་ངེ་འཛིན་གསུམ་གྱིས་ཁོག་དབུབ་པ། རྟེན་དང་བརྟེན་པའི་དཀྱིལ་འཁོར་བསྐྱེད་པ། ལས་ཀྱི་རིམ་པ་ཏིང་ངེ་འཛིན་ནོ། །དང་པོ་སྣང་སྟོང་སོ་སོ་ཐ་དད་ཀྱི་ཞེན་རྟོག་སྦྱོང་བྱེད་ལེའུ་ལྔ་པར་གསུངས་པའི་ཏིང་ངེ་འཛིན་གསུམ་ཚིག་རིན་ཆེན་དྲྭ་བ་ལྟར་དང་། བརྟན་པའི་ཡན་ལག་ཏུ་རྒྱུའི་ཨ་ལས་ཡི་གེ་ཕྲ་མོའི་སྤྲོ་བསྡུ་ལ་སེམས་སྦྱང་བ་ལེའུ་བཞི་པ་ལྟར་རོ། །གཉིས་པ་ལ། འབྱུང་ལྔའི་ཞེན་རྟོག་སྦྱང་ཕྱིར་སྒྲུབ་ཐབས་ལྟར་ཡུམ་ལྔའི་མཁའ་ཀློང་རྣམ་པར་དག་པའི་རང་བཞིན་གཞི་དབང་ཆེན་གྱི་དཀྱིལ་འཁོར་བསྐྱེད་པ། མ་དག་པའི་སྣོད་བཅུད་ཀྱི་སྣང་ཞེན་སྦྱོང་ཕྱིར་ས་བོན་བྷྲུཾ་ལས་རྟེན་གཞལ་ཡས་ཁང་དང་། ལེའུ་བཞི་པ་ལྟར་ཡི་གེ་ཞེ་གཉིས་སྤྲོས་པ་ལས་ཆོ་ག་གསུམ་གྱིས་བརྟེན་པ་ལྷའི་དཀྱིལ་འཁོར་ཏེ། འདིར་བཤད་པའི་སྐྱེད་སྔགས་ཀྱིས་བསྐྱེད་ཅིང་། ལེའུ་དྲུག་པ་ལྟར་ཚིག་གིས་གསལ་གདབ། རིགས་མཐུན་གྱི་ལས་ལ་དབང་བསྒྱུར་བ་དང་སྒོ་གསུམ་གྱི་སྟོབས་འཕེལ་བའི་ཞེན་རྟོག་སྦྱང་ཕྱིར་དབང་བསྐུར་བྱིན་རླབས་འདི་ནས་བཤད་པ་ལྟར་བྱ་བ་རྣམས་སོ། །གསུམ་པ་ལས་ཀྱི་རིམ་པའི་ཏིང་ངེ་འཛིན་ལ་དྲུག་ལས། དང་པོ་འཁོར་འདས་ཐ་དད་ཀྱི་ཞེན་པ་སྦྱང་ཕྱིར་ཡེ་ཤེས་ཀྱི་དཀྱིལ་འཁོར་ལ་སྙན་གསན་དབབ་ཅིང་། སྤྱན་དྲངས་པ་ལ་རིག་པའི་མེ་ཏོག་དོར་ནས་དབྱེར་མེད་དུ་བསྟིམ་པ་རྣམས་འདི་ནས་བཤད་པ་ལྟར་རོ། །གཉིས་པ་ཕྱག་དང་མཆོད་པ་བཅུ་གསུམ་འབུལ་བ། གསུམ་པ་བཤགས་པ་བྱ་བ། བཞི་པ་དངོས་གྲུབ་གསོལ་བ། ལྔ་པ་དམ་བཅའ་བ། དྲུག་པ་འཛབ་ཁང་ཕྱེ་ནས་དམ་ཡེ་འཕྲོ་འདུ་གསུམ་གསལ་བས་ངག་གི་ཞེན་པ་སྦྱོང་བ་དང་ལྷའི་ཐུགས་དམ་བསྐུལ་བའི་ཕྱིར་འཛབ་བཟླ་ཞིང་སྐབས་ཀྱི་མཇུག་བསྡུ་བ་རྣམས་སྒྲུབ་ཐབས་ལྟར་རོ། ། གསུམ་པ་རྗེས་ཀྱི་རིམ་པ་ལ་ལྔ་སྟེ། དང་པོ་བསོད་ནམས་སྤེལ་ཕྱིར་ཚོགས་ཀྱི་མཆོད་སྦྱིན། གཉིས་པ་ལས་འཆོལ་ཕྱིར་བརྟན་མ་སྐྱོང་བ། གསུམ་པ་རྟག་ཆད་ཀྱི་མཐའ་བསལ་ཕྱིར་དཀྱིལ་འཁོར་བསྡུ་ཞིང་ཐུན་མཚམས་ཀྱི་ལྷར་ལྡང་བ། བཞི་པ་བར་ཆད་ཀྱི་རྒྱུན་གཅོད་ཕྱིར་གོ་བགོ་ལུས་བསྲུང་། ལྔ་པ་སྤྱོད་པ་རྣམ་པར་དག་པའི་ཕྱིར་སྤྱོད་ལམ་རྒྱུན་གྱི་རྣལ་འབྱོར་བསྐྱང་བ་རྣམས་ཀྱང་སྒྲུབ་ཐབས་ལྟར་རོ། ། ད་ནི་དཀྱུས་ཉིད་ལ་འཇུག་སྟེ། ལྷག་པ་ཏིང་ངེ་འཛིན་གསུང་གི་དཀྱིལ་འཁོར་ལ་གསུམ། དམ་ཚིག་གི་དཀྱིལ་འཁོར་སྐྱེད་པའི་སྔགས། ཡེ་ཤེས་ཀྱི་དཀྱིལ་འཁོར་དགུག་བསྟིམ་གྱི་སྔགས། དེའི་ཡོན་ཏན་ནོ། །དང་པོ་ལ་གསུམ་སྟེ། རྟེན་གཞལ་ཡས་ཁང་སྐྱེད་པའི། བརྟེན་པ་ལྷ་སྐྱེད་པའི། དབང་བསྐུར་བྱིན་གྱིས་རློབ་པའི་སྔགས་སོ། །དང་པོ་ནི། བྷྲཱུཾ་བི་ཤྭ་བི་ཤུདྡྷེ། ཞེས་པའི་བྷྲཱུཾ་ནི་རིགས་ལྔ་འདུས་པའི་གཞལ་ཡས་ཁང་གི་ས་བོན། བི་ཤྭ་སྣ་ཚོགས། བི་ཤུདྡྷེ་རྣམ་པར་དག་པ་ན་ཞེས་པ་སྟེ། འབྱུང་ལྔའི་རྟོག་པ་སྣ་ཚོགས་ཡུམ་ལྔའི་མཁའ་དབྱིངས་སུ་རྣམ་པར་དག་པ་གཞལ་ཡས་ཁང་སྐྱེད་པའི་སྔགས་ཏེ། ཐལ་རྒྱུད་ལས། བྷྲཱུཾ་དབྱིངས་བྷ་གར་སྣ་ཚོགས་འདུས། །ལས་དང་ངོ་བོ་དག་པ་ཉིད། །སངས་རྒྱས་རིན་ཆེན་ཟ་མ་ཏོག །བྱིན་རླབས་སྐྱོབ་ཕྱིར་སྔགས་སུ་བརྗོད། །ཅེས་སོ། ། གཉིས་པ་ལ་ལྔ་སྟེ། རིགས་ལྔ་ཡབ་ཡུམ། སེམས་དཔའ་ཡབ་ཡུམ། སྒོ་སྐྱོང་ཡབ་ཡུམ། བྱེད་པོ་ཡབ་ཡུམ། ཐུབ་དྲུག་གི་སྔགས་སོ། །དང་པོ་ནི། ཧཱུཾ་བཛྲ་དྷྲིཀ྄་སོགས་ཏེ། རིགས་ཀྱི་ཡབ་ལྔའི་སྔགས་ཀྱི་འགོ་འདྲེན་ཧཱུཾ་ༀ་སྭཱ་ཨཱཾ་ཧཱཾ་རྣམས་ནི་ཐུགས་རྡོ་རྗེ་མི་བསྐྱོད་པ་སོགས་ཀྱི་རིགས་ཀྱི་ས་བོན་ཏེ། རྒྱུ་མ་ནོར་བ་རྩ་བའི་སྔགས་སོ། །བཛྲ་རྡོ་རྗེ། དྷྲིཀ྄་འཛིན་པ་སྟེ། རྣམ་ཤེས་དག་པ་བྱང་ཆུབ་ཀྱི་སེམས་ཟུང་འཇུག་དབྱེར་མི་ཕྱེད་པའི་རྡོ་རྗེ་འཛིན་པ་མི་བསྐྱོད་པ་སྟེ། དེའི་སྐྱེད་པ་རྐྱེན་གྱི་སྔགས་སོ། །ས་བོན་དང་སྐྱེད་སྔགས་སྦྲེལ་བ་ནི་བཟླས་པ་ལས་ཀྱི་སྔགས་ཏེ་ཐམས་ཅད་ལ་འགྲེ་ཤེས་པར་བྱའོ། །ཛི་ན་ཛིཀ྄་རྒྱལ་བ་རྒྱལ་ཏེ། དབྱིངས་སྤྲོས་བྲལ་ནི་མི་དགེ་བའི་ཆོས་ལས་རྒྱལ་ཞིང་། དེ་ལས་ཤར་བའི་འབྱུང་དང་འབྱུང་འགྱུར་གྱི་གཟུགས་ཀྱང་རྒྱལ་བའི་སྐུར་དག་པ་སྟེ་རྣམ་སྣང་། རཏྣ་དྷྲིཀ྄་རིན་ཆེན་འཛིན་པ་སྟེ། བསམ་པ་ཐམས་ཅད་རྫོགས་པར་བྱེད་པས་སེམས་ཡོན་ཏན་རིན་པོ་ཆེའི་འབྱུང་གནས་དེ་ཉིད་ཉམས་སུ་མྱོང་བས་འཛིན་པར་བྱེད་པ་ཚོར་ཕུང་དག་པ་རིན་འབྱུང་། ཨཱ་རོ་ལིཀ྄་ཆགས་ཆེན་མཚོན་ཏེ། སེམས་འདོད་ཅིང་རྩེན་པའི་མཚན་ཉིད་མཚོན་བྱེད་མཚན་མར་འཛིན་པ་འདུ་ཤེས་དག་པ་སྣང་མཐའ། པྲ་ཛྙཱ་དྷྲིཀ྄་ཤེས་རབ་འཛིན་པ་སྟེ། རྣམ་ཤེས་དོན་ལ་ཕྱིན་ཅི་མ་ལོག་པར་འཇུག་པའི་བློ་ནི་ཤེས་རབ། དེ་འཛིན་པར་བྱེད་པ་འདུ་བྱེད་དག་པ་དོན་གྲུབ་ཀྱི་སྐྱེད་སྔགས་སོ། །དེ་ལྟར་ཡང་གསང་འདུས་ལས། རྡོ་རྗེ་འཛིན་དང་རྒྱལ་བའི་རྒྱལ། །རིན་ཆེན་འཛིན་དང་ཆགས་ཆེན་མཚོན། །ཤེས་རབ་འཛིན་པ་ཞེས་བྱ་སྟེ། །ཞེས་དང་། ནང་ལྟར་ན་སྙིང་ག་ཆོས་ཀྱི་འཁོར་ལོའི་རྩ་ལྔས་རིགས་ལྔའི་ཐིག་ལེའི་བཅུད་འཛིན་པ་སྟེ། ཐལ་རྒྱུད་ལས། ཙིཏྟ་ཁམས་ལྔའི་ཤི་ར་ལ། །རྡོ་རྗེ་རྒྱལ་བ་རིན་ཆེན་ཆོས། །ཤེས་རབ་རིགས་ལྡན་བཅུད་ཀྱི་གཟུགས། །ངེས་པར་འཛིན་པ་གསང་བའི་སྔགས། །ཞེས་སོ། །རིགས་ལྔའི་ཡུམ་གྱི་སྔགས་ཀྱི་འགོ་འདྲེན། མཱུཾ་ལཱཾ་མཱཾ་པཱཾ་ཏཱཾ་སྟེ་ས་བོན་རྣམས་ནི། མོཀྵ་ཐར་པ་སྟེ་རང་བཞིན་གྱི་རྣམ་པར་དག་པའི་དབྱིངས་མཚོན་པར་བྱེད་པ་དང་། ལོ་ཙ་ན་སྤྱན་མ། མཱ་མ་ཀཱི་བདག་མོ། པཎྜ་ར་དཀར་མོ། ཏཱ་ར་སྒྲོལ་མ་ལྔའི་མིང་ཡིག་དང་པོ་ཐིག་ལེས་བརྒྱན་པ་སྟེ་བྱང་ཆུབ་ཀྱི་སེམས་དཀར་ཆ་ཐབས་དང་མ་བྲལ་བ་མཚོན་པའོ། །དྷཱ་ཏྭཱི་ཤྭ་རཱི་ནི་དབྱིངས་ཀྱི་དབང་ཕྱུག་མ་སྟེ་གཙོ་ཡུམ། དྭེ་ཥ་ཞེ་སྡང་། མོ་ཧ་གཏི་མུག །རཱ་ག་འདོད་ཆགས། བཛྲ་རྡོ་རྗེ་སྟེ་ཕྲག་དོག །དེ་བཞིན་རྣམ་པར་དག་པ་རིགས་ཀྱི་ཡབ་རྣམས་མཉེས་པར་བྱེད་པས་ན་ར་ཏི་ཞེས་དགའ་མ་སྟེ། གསང་འདུས་ལས། གཏི་མུག་ཞེ་སྡང་འདོད་ཆགས་དང་། །རྡོ་རྗེ་རྟག་ཏུ་དགའ་མར་སྦྱར། །ཞེས་དང་། ནང་ལྟར་སྙིང་གའི་ཐིག་ལེའི་ཡུལ་ཆ་ཕྲ་བའི་དྭངས་མ་ལྔས་དུག་ལྔ་དབྱིངས་སུ་སྐྱོབ་པར་བྱེད་པ་སྟེ། ཐལ་རྒྱུད་ལས། དེ་ཉིད་དྭངས་མའི་ཡེ་ཤེས་ལྔ། །མ་རིག་གཉིས་སོགས་བཞི་པོ་དང་། །མི་ཕྱེད་ཕྲག་དོག་རྡོ་རྗེའི་སྔགས། །དབྱིངས་སུ་སྐྱོབ་པ་དགའ་མར་བརྗོད། །ཅེས་སོ། །གཉིས་པ་ལ་གཉིས་ལས། དང་པོ་ནང་སེམས་ཡབ་ཡུམ་གྱི་སྔགས་ནི། ཀྵིཾ་ཧི་རཱ་ཛ་སོགས་ཏེ། ཀྵིཾ་ཏི་ཞེས་སའི་མིང་གི་དང་པོ་སྟེ་ས་བོན། ཧི་རཱ་ཛ་ཡ་ངོ་མཚར་རྒྱལ་པོ་སྟེ་ས་སྙིང་། ཏྲཾ་རིན་ཆེན་རིགས་ཀྱི་ས་བོན། ཨཱ་ནི་ཨཱ་ཀ་ཤ་ནམ་མཁའ། གཪྦྷ་ཡ་སྙིང་པོ་སྟེ་ནམ་སྙིང་། ཧྲཱི་ཧ་ཧཱུཾ་པདྨ་རིགས་ཀྱི་ས་བོན། པདྨ་པ་ད་མ་པདྨའི་ཕྱག་སྟེ་སྤྱན་རས་གཟིགས། ཛིཾ་རྒྱལ་བའི་ས་བོན། ཀུ་རུ་པཱ་ཎ་དང་སྦྲེལ་བས་རྒྱལ་མཛད་ཕྱག་སྟེ་ཕྱག་རྡོར། ཡུམ་བཞིའི་ཧཱུཾ་ཏྲཱཾ་ཧྲཱི་ཨཱཾ་བཞི་ནི་རིགས་ཀྱི་ས་བོན། ལཱ་སྱེ་སྒེག་མོ། མཱ་ལེ་ཕྲེང་མ། གཱི་ཏི་གླུ་མ། ནཱིརྟི་གར་མ་སྟེ། འདོད་ཆགས་ཀྱི་ཡུལ་དང་། འཁྱུད་པ་དང་། དགའ་བ་དང་། བསྐྱོད་པར་གྱུར་པའི་མིང་ངོ་། །སོ་སོའི་མཐར་སྙོམས་འཇུག་གི་བརྡ་བཞི་སྦྱོར་ཏེ། ས་མ་ཡ་སྟྭཾ་དུས་ལ་བབ་ཅེས་ཡུམ་གྱིས་བསྐུལ་བ། ས་མ་ཡ་ཧོཿདུས་ཡིན་ནོ་ཞེས་ལན་བྱིན་པ། རཱ་གོ྅ཧཾ་བདག་ཆགས་སོ་ཞེས་བསྐུལ་བ། རཱ་ག་ཡ་མི་ཆགས་པར་བགྱིའོ་ཞེས་ལན་བྱིན་པའོ། །དེ་ཡང་ཐལ་རྒྱུད་ལས། ལས་ཀྱི་བདེ་བས་སྒེག་པ་ནི། །ཆགས་པའི་དམ་ཚིག་དུས་ཡིན་ནོ། །སླར་ཡང་ལན་གྱིས་འབྲེལ་བ་ནི། །གཉིས་ཀ་དགྱེས་པའི་མཆོག་ཏུ་བཤད། །ཧ་དང་ས་ཡི་བདེ་སྒྲ་དག །བདག་གི་ཆགས་པ་ཐོབ་པའོ། །ཤིན་ཏུ་བསྐྱོད་པའི་བདེ་བ་ཉིད། །ཀུན་ནས་བསྐྱོད་པས་རླུང་ཞེས་བྱ། །ཞེས་སོ། །གཉིས་པ་ཕྱི་སེམས་ཡབ་ཡུམ་གྱི་སྔགས་ནི། མཻ་དྷཱ་ར་ཎེ་སོགས་ཏེ། མཻ་ནི་མཻ་ཏྲི་བྱམས་པའི་མིང་གི་དང་པོ་ས་བོན། དྷཱ་ར་ཎི་གཟུངས་ལ་ཞེས་པ་སྟེ་བྱམས་པས་རྗེས་སུ་འཛིན་པ། ཐླྷིཾ་སྒྲིབ་སེལ་གྱི་བསྡུས་པའི་ས་བོན། ནིསྶ་རཾ་བྷ་ཡ་དང་སྦྲེལ་བས་སྒྲིབ་པ་བསལ་བའི་ཆེད་དུ། ཧཱུཾ་བྱང་ཆུབ་སེམས་ཀྱི་ས་བོན། སྭ་རཱ་ཛ་ཡའི་ས་ནི་ས་མནྟ་སྟེ་ཀུན་ནས་རྒྱལ་པོའི་ཆེད་དུ་ཞེས་ཀུན་བཟང་། མུཾ་ནི་མུཀྟ་སྟེ་རྣམ་པར་གྲོལ་བ་མཚོན་པའི་ས་བོན། ཤྲཱི་དཔལ། ཨཱཾ་གསུང་གི །རཱ་ག་ཡ་ཆགས་པའི་ཆེད་དུ་སྟེ་འཇམ་དཔལ། བཞི་ཀའི་མཐར་སྭཱ་ཧཱ་ནི་ཡོན་ཏན་ཁྱད་པར་ཅན་ལས་དང་སྦྱར་བའི་མིང་སོ་སོ་དེ་དང་དེའི་ཆེད་དུ་གཞི་འཛུགས་པའི་ལེགས་པར་བྱིན་ཞེས་པའོ། །ཡུམ་བཞིའི་ས་བོན་ཛཿཧཱུཾ་བཾ་ཧོཿབཞི་ནི་བཟུང་འཁྱུད་སྡོམ་མཉེས་ཏེ་ཕྱག་རྒྱ་བཞིའི་ས་བོན། དྷཱུ་པེ་བདུག་སྤོས་མ། པུཥྤེ་མེ་ཏོག་མ། དཱི་པ་སྒྲོན་མེ། གནྡྷེ་དྲི་ཆབ་མ་ཞེས་སོ་སོའི་མིང་དང་། མཐར་སྙོམས་འཇུག་གི་སྦྱོར་ཚད་བཞི་རིམ་པར་སྦྱོར་ཏེ། པྲ་བེ་ཤ་རབ་ཏུ་ཞུགས་པ། ཨ་བེ་ཤ་བབས་པ། སུ་གི་རཱི་བདེ་བ་མ། ཙིཏྟ་ཐུགས་ཏེ་སེམས་ཚིམ་པའོ། །དེའང་ཐལ་རྒྱུད་ལས། གཉིས་འདྲེས་འཛིན་པ་ཞེས་བྱ་སྟེ། །དེ་ཉིད་ཕྱེ་བ་ལས་བྱུང་བའོ། །མེ་ཏོག་བསྡུས་པའི་ངོ་བོ་ཉིད། །བདག་པོའི་ཞལ་དུ་ཐིམ་པར་བཤད། །ཤིན་ཏུ་བསྡམ་པའི་རིམ་ལས་བྱུང་། །གསལ་བའི་ཡེ་ཤེས་བདེ་བ་ཆེ། །ཀུན་གསལ་བརྗོད་དང་འདྲ་བའི་སྒྲ། །གཉིས་མེད་ཐུགས་སུ་ཤེས་པར་བྱ། །ཞེས་སོ། །གསུམ་པ་ནི། ཧཱུཾ་ཡ་མཱནྟ་ཀྲྀཏ་སོགས་ཏེ། ཁྲོ་བོ་བཞིའི་འགོ་འདྲེན་ཧཱུཾ་བཞི་ནི་སྤྱིའི་རིགས་ཀྱིས་ཁྱབ་བྱའི་རིགས་བཞི་ལ་ཞུགས་པའི་ས་བོན། ཡ་མ་གཤིན་རྗེ་དང་། པྲ་ཛྙཱ་ཤེས་རབ་དང་། པདྨ་སྐད་སོར་བཞག་དང་། བིགྷྣཾ་བགེགས་ཏེ། སོ་སོའི་མཐར་ཨནྟ་ཀྲྀཏ་ཏེ་མཐར་བྱེད་ཅེས་སྦྱར་བ་མིང་དང་། ཕཊ་བཀས་པའི་དོན་ཏེ་བཀས་པར་གྱིས་ཞེས་ལས་ལ་སྦྱར་བའི་སྐུལ་ཚིག་གོ །ཡུམ་བཞིའི་འགོ་འདྲེན་ༀ་བཞི་ནི་རབ་བསྔགས་ཏེ་སྤྱིའི་ས་བོན། མ་ཧཱ་ཆེན་པོ། བཛྲ་རཏྣ་པདྨ་ཀརྨ་བཞི་ནི་རྡོ་རྗེ་རིན་ཆེན་པདྨ་ལས། དྷ་ར་འཆང་བ། མ་ཧཱ་ཆེན་པོ། ཀྲོ་དྷཱི་ཤྭ་རཱི་ཁྲོ་མོའི་དབང་ཕྱུག་མ། ཛྭ་ལཱི་ནི་འབར་བ་མ་སྟེ། རྡོ་རྗེ་རིན་ཆེན་སོགས་འཆང་ཆེན་པོའི་ཞེས་པ་ཐབས་དང་། ཁྲོ་མོ་ཆེན་མོ་འབར་བའི་དབང་ཕྱུག་མ་ཞེས་པ་ཤེས་རབ་ཀྱི་མིང་སོ་སོའི་མཐར། ཧཱུཾ་བཞི་ཁྱབ་བྱེད་ཞུགས་པའི་རིགས་ཀྱི་སྙིང་པོ་དང་། ཕཊ་སྐུལ་ཚིག་སྦྱར་བའོ། །བཞི་པ་ནི། ཧཱུཾ་ཧཱུཾ་ཧཱུཾ་སོགས་ཏེ། ཧཱུཾ་གསུམ་ནི་ཀུན་བཞི་སྒོ་ལྔ་ཡིད་ཀྱི་རྣམ་ཤེས་གསུམ་འདས་པ་ཡེ་ཤེས་ཀྱི་ས་བོན། བཛྲ་ཙིཏྟ་རྡོ་རྗེ་ཐུགས། ༀ་ཐབས་ཀྱི་སྙིང་པོ་སྟེ་བྱེད་པ་པོ་ཀུན་བཟང་། ཨ་གསུམ་ནི་ཤེས་པ་གསུམ་གྱི་ཡུལ་ཆོས་ཀྱི་དབྱིངས་ཀྱི་ས་བོན། བཛྲཱི་བྷ་དྲ་ས་མནྟ་རྡོ་རྗེ་ཀུན་ཏུ་བཟང་མོ། ཨ་ནི་ཤེས་རབ་ཀྱི་སྙིང་པོ་སྟེ་བྱ་བ་མོའི་སྔགས་སོ། །དེའང་ཐལ་རྒྱུད་ལས། རྣམ་ཤེས་གསུམ་འདས་རྡོ་རྗེ་ནི། །ཡེ་ཤེས་ལྔ་རྫོགས་ཐུགས་ཉིད་དོ། །དབྱིངས་གསུམ་རྣམ་དག་འདུས་མ་བྱས། །ཀུན་ཏུ་དེ་བཞིན་གནས་བྱེད་པའོ། །ཞེས་སོ། །ལྔ་པ་ནི། ༀ་མུ་ནེ་ཀྲཱེཾ་སོགས་ཏེ། ༀ་རྣམས་ནི་རབ་བསྔགས་ཏེ་ཕྱག་འཚལ་བའི་ས་བོན། མུ་ནེ་རྣམས་ནི་ཐུབ་པ། ཀྲཱེཾ་ནི་བྱེད་པ་སྟེ་འདོད་ཡོན་གྱི་བྱེད་པས་ལྷག་པ་ལྷའི་ས་བོན། ཧཱུཾ་ཏྲུཾ་ནི་གོ་ཆ་བཀོད་པ་སྟེ་ལྷ་མིན་གྱི་ས་བོན། སྲུཾ་ནི་ས་ར་འཁྱིལ་བ་སྟེ་བློ་དཀྱེལ་ཆེ་བ་མིའི་ས་བོན། པྲཾ་ནི་པྲ་ཧོ་སྟེ་འདུད་པའི་དོན་གྱིས་དུད་འགྲོའི་ས་བོན། ཀྵཾ་ནི་ཀྵ་ར་སྟེ་དངོས་སྣང་འགྱུར་བས་གདུང་བ་ཡི་དྭགས་ཀྱི་ས་བོན། ཡེ་ནི་གང་ཡང་རུང་བར་ཁྲིད་པས་དམད་པའི་གནས་སུ་གྱུར་པ་སྟེ་དམྱལ་བའི་ས་བོན། སྭཱ་ཧཱ་ནི་འགྲོ་བའི་རིགས་དེ་དང་དེའི་བག་ཆགས་ཞི་བའི་ཆེད་དུ་གཞི་འཛུགས་པའི་དོན་ནོ། །ནང་ལྟར་ན་སྙིང་གར་རིགས་དྲུག་གི་ས་བོན་ཟུང་གསུམ་གནས་པ་བདེ་བ་ཆེན་པོས་རང་རིག་པའི་ཡེ་ཤེས་སུ་གསལ་བ་ན་མ་རིག་པ་གཉིས་ལས་བྱུང་བའི་འཁོར་བའི་བག་ཆགས་ཐུལ་བ་སྟེ། ཐལ་རྒྱུད་ལས། ས་བོན་ཟུང་གསུམ་དེ་བདེ་བ། །ངེས་སྐྱེས་རང་རིག་གྱུར་པ་ཡིས། །གཉིས་བྱུང་འདུལ་བས་ཐུབ་པར་གསུངས། །ཞེས་སོ། ། གསུམ་པ་དབང་བསྐུར་བྱིན་གྱིས་རློབ་པའི་སྔགས་ལ་གསུམ་སྟེ། ལོ་རྒྱུས། སྔགས་དངོས། དེའི་ཡོན་ཏན་ནོ། །དང་པོ་ནི། དེ་ནས་བཅོམ་ལྡན་འདས་ནས་ཕྱུང་ངོ་ཞེས་པའི་བར་ཏེ། དཀྱིལ་འཁོར་བསྐྱེད་པ་དེ་ནས་བཅོམ་ལྡན་འདས་དབང་བསྐུར་བའི་བྱེད་པ་པོ་ཕྱོགས་དུས་བདེ་གཤེགས་ཐམས་ཅད་དང་མི་ཕྱེད་པའི་རྡོ་རྗེ་རིགས་ཀྱི་ཡབ་ལྔ་དང་། སྤྱད་བྱའི་ཡུལ་བྱ་བ་མོ་རྡོ་རྗེ་ཡུམ་ལྔའི་རྣམ་པར་རང་གི་ཐུགས་ཀའི་དྭངས་མའི་སྲོག་ཧཱུཾ་ཡིག་གི་འོད་ཀྱིས་སྤྱན་དྲངས་པ་རྣམས་གཉིས་སུ་མེད་པར་སྦྱོར་བའི་རྗེས་ཆགས་ཀྱི་མེས་ཞུ་བ་ཡེ་ཤེས་ལྔའི་ཆུ་རྒྱུན་དཀྱིལ་འཁོར་གྱི་ལྷ་ཐམས་ཅད་ཀྱི་དབུའི་གནས་ལྔ་ལ་ཐིམ་པར་མཛད་དོ། །དེ་ལྟར་དབང་བསྐུར་བས་ཉོན་མོངས་པ་ལྔ་སྦྱངས་ནས་ཆུ་ལུད་པ་དབང་གནས་སུ་འཁྱིལ་བ་ལས་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་འདུས་པའི་བདག་ཉིད་ཆེན་པོ་རང་རིགས་བདག་པོར་གྱུར་པའི་རིགས་ལྔ་སྤྲུལ་སྐུའི་ཆ་བྱད་ཅན་གྱིས་དབུ་བརྒྱན་ཅིང་། ཕུང་ལྔ་བདག་ཉིད་ཆེན་པོའི་རང་བཞིན་དུ་དག་པའི་ཡེ་ཤེས་ཀྱི་ངོ་བོ་རིགས་ལྔའི་སངས་རྒྱས་སུ་ང་རྒྱལ་འཛིན་པ་སྟེ། འདིར་རིགས་ཀྱི་དབྱེ་བ་ནི། ཐལ་བ་ལས། མི་བསྐྱོད་བྱེད་པོ་ཡུམ་དང་བཅས། །རྡོ་རྗེ་འཛིན་པའི་ཕྱག་རྒྱར་བསྟན། །བྱམས་པ་ས་སྙིང་དེ་བཞིན་ཉིད། །གཞན་དག་རང་གི་ཕྱག་རྒྱས་ཏེ། །གཤིན་རྗེ་གཤེད་ལ་རྟག་པར་བཤད། །ཐུབ་ཆེན་རྡོ་རྗེ་འཛིན་འཆང་བ། །ཞེས་པས་མི་བསྐྱོད་པ་ཡབ་ཡུམ་རྡོ་རྗེའི་རིགས་ཡིན་པའི་ཤུགས་ཀྱིས། སྣང་མཛད་དེ་བཞིན་རིགས། རིན་འབྱུང་རིན་ཆེན། མཐའ་ཡས་པདྨ། དོན་གྲུབ་ལས་རིགས་ཡིན་པར་མཚོན་ཞིང་། དེ་བཞིན་དུ་བྱ་བྱེད་དང་ཐུབ་དྲུག་ཀྱང་རྡོ་རྗེའི་རིགས་ཏེ། རྐང་པ་དང་པོ་གཉིས་དང་དྲུག་པའི་དོན་ནོ། །ས་སྙིང་དང་བྱམས་པ་དེ་བཞིན་གཤེགས་པའི་རིགས་ཡིན་པའི་ཤུགས་ཀྱིས། ནམ་སྙིང་དང་སྒྲིབ་སེལ་རིན་ཆེན། སྤྱན་རས་གཟིགས་དང་ཀུན་བཟང་པདྨ། ཕྱག་རྡོར་དང་འཇམ་དཔལ་ལས་རིགས་ཡིན་པར་མཚོན་ཏེ། རྐང་པ་གསུམ་པའི་དོན་ནོ། །གཤིན་རྗེ་གཤེད་རྟག་པ་རྣམ་སྣང་གི་རིགས་ཡིན་པའི་ཤུགས་ཀྱིས། སྟོབས་ཆེན་རིན་ཆེན། རྟ་མགྲིན་པདྨ། འཁྱིལ་བ་ལས་རིགས་ཏེ། རྐང་པ་ལྔ་པའི་དོན་དང་། རྐང་པ་བཞི་པས་ནི་མཚོན་བྱེད་དངོས་སུ་སྨོས་པའི་ཤུགས་ལས་མཚོན་བྱ་གཞན་རྣམས་མཚོན་པའི་ཚིག་གོ །མདོར་ན་རིགས་གང་ཡིན་གྱི་ལྷ་ལ་རང་རིགས་ཀྱི་བདག་པོ་དབུས་སུ་སོང་བའི་ཤུལ་དུ་རྡོ་རྗེའི་རིགས་འགྲོ་བའང་ཤེས་པར་བྱ་སྟེ། དེ་དག་ནི་དབང་བསྐུར་བའི་དགོངས་པ་དང་། ཡང་སངས་རྒྱས་ཐམས་ཅད་ཀྱི་འབྲས་ཆོས་ལྔའི་བྱིན་བསྡུ་བའི་དགོངས་པ་ནི། སྤྱི་བོ་དུང་ཁང་དུ་ཟླ་བ་ལ་ༀ་དཀར་པོ། མགྲིན་པར་པདྨ་ལ་ཨཱཿདམར་པོ། ཐུགས་ཀར་ཙིཏྟའི་མདུན་དུ་ཉི་མ་ལ་ཧཱུཾ་སྔོན་པོ། ལྟེ་བའི་གཡས་གཡོན་དུ་ཟླ་བ་ལ་སྭཱ་སྔོན་པོ་དང་ཧཱ་ལྗང་ཁུ་རྣམས་ལས་འཕྲོས་པའི་འོད་ཀྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། རྡོ་རྗེ་ལྔའི་ལྷའི་རྣམ་པར་སྤྱན་དྲངས་པ་ཡི་གེ་སོ་སོ་ལ་ཐིམ་པས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་གཉིས་སུ་མེད་པར་བྱིན་གྱིས་བརླབས་པའི་རྟགས་ཡི་གེ་ལྔ་ཡོངས་སུ་གྱུར་པ་ལས་རྣམ་སྣང་དཀར་པོ་འཁོར་ལོ་འཛིན་པ་སོགས་དེ་བཞིན་གཤེགས་པ་ལྔས་རྒྱས་བཏབ་པར་བསམ་པ་སྟེ། ཐལ་བ་ལས། གནས་གསུམ་ཁྱབ་འཇུག་ཡི་གེ་ལས། །འོད་ཟེར་འཕྲོ་བའི་ཚོགས་ཆེན་པོས། །ཁམས་གསུམ་བྱིན་རླབས་གཟི་བྱིན་བསྡུ། །རང་བཞིན་རྡོ་རྗེ་གསུམ་གནས་པ། །རྒྱུ་གཉིས་ཚུལ་གྱིས་རང་སྣང་བའོ། །ལྟེ་བ་རྣམ་གཉིས་ཟླ་བ་ལ། །སྔོ་ལྗང་ཡི་གེ་སྭཱ་ཧཱ་གཉིས། །རྗེས་མཐུན་འོད་ཀྱིས་ཡོན་ཏན་ལས། །ཡན་ལག་རྫོགས་པའི་གཟི་བྱིན་ལྡན། །ཞེས་སོ། །དེ་ལྟར་དབང་དང་བྱིན་བསྡུ་བ་ཞེས་བྱ་བའི་གསང་སྔགས་འདི་དག་སྟོན་པའི་སྐུ་དང་གསུང་དང་ཐུགས་མི་ཕྱེད་པའི་རྡོ་རྗེ་ཐབས་ཤེས་ཟུང་འབྲེལ་སྒྱུ་འཕྲུལ་དྲྭ་བ་ལས་ཕྱུང་ངོ་། ། གཉིས་པ་ལ་གཉིས་ཏེ། དབང་བསྐུར་བ་དང་། བྱིན་གྱིས་རློབ་པའི་སྔགས་སོ། །དང་པོ་ནི། ༀ་མ་ཧཱ་ཤཱུ་ནྱ་ཏཱ་སོགས་ཏེ། ༀ་རབ་བསྔགས། མ་ཧཱ་ཆེན་པོ། ཤཱུ་ནྱ་ཏཱ་སྟོང་པ་ཉིད། ཨཱ་དཪྴ་མེ་ལོང་ལྟ་བུ། ས་མ་ཏཱ་མཉམ་པ་ཉིད། པྲ་ཏྱ་བེཀྵ་ཎ་སོ་སོར་རྟོག་པ། ཀྲྀཏྱཱ་ནུཥྛ་ན་བྱ་བ་གྲུབ་པ། ཛྙཱ་ན་བཛྲ་ཡེ་ཤེས་རྡོ་རྗེ། སྭ་བྷཱ་ཝ་རང་བཞིན་ནམ་ངོ་བོ་ཉིད། ཨཱཏྨ་ཀཿབདག་ཉིད། ཨ་ཧཾ་ང་སྟེ། མཚམས་སྦྱར་བས་ཨཱཏྨ་ཀོ྅ཧཾ་ཞེས་འབྱུང་བས། རབ་བསྔགས་སྟོང་པ་ཉིད་སོགས་ཀྱི་ཡེ་ཤེས་ཆེན་པོ་རྡོ་རྗེའི་ངོ་བོ་ཉིད་ཀྱི་བདག་ཉིད་ངའོ་ཞེས་སོ། །འདིར་དབང་རྒྱ་ནི། ལེའུ་བརྒྱད་པར་གསུངས་པ་ལྟར་གུང་མོ་རྡོ་རྗེའི་རིགས་ཡིན་པ་སོགས་ངེས་པར་བྱས་ཏེ། རྡོ་རྗེ་བསྡམས་པ་ལས་རང་རིགས་ཀྱི་སོར་མོ་གཉིས་སྦྱར་ནས་བརྐྱང་བ་སྤྱི་བོ་སོགས་མགོ་བོའི་གནས་ལྔར་འཇོག་ཅིང་། དེའང་རང་རིགས་ཀྱི་ཕྱག་རྒྱ་དབུས་སུ་གང་སོང་གི་ཤུལ་དུ་རྡོ་རྗེའི་རིགས་ཀྱི་དབང་རྒྱ་འགྲོ་བའང་ཤེས་པར་བྱའོ། །གཉིས་པ་ནི། ༀ་སརྦ་ཏ་ཐཱ་ག་ཏ་སོགས་ཏེ། ༀ་རབ་བསྔགས། སརྦ་ཐམས་ཅད། ཏ་ཐཱ་ག་ཏ་དེ་བཞིན་གཤེགས་པ། མ་ཧཱ་ཆེན་པོ། ཀཱ་ཡ་སྐུ། ཝཱ་ཀ་གསུང་། ཙིཏྟ་ཐུགས། ཨ་ནུ་རཱ་ག་ཎ་རྗེས་སུ་ཆགས་པ། པཱུ་ཛ་མཆོད་པ། བཛྲ་རྡོ་རྗེ། སྭ་བྷཱ་ཝ་ཨཱཏྨ་ཀོ྅ཧཾ་སྔར་བཞིན་ཏེ། རབ་བསྔགས་དེ་བཞིན་གཤེགས་པ་ཐམས་ཅད་ཀྱི་སྐུ་སོགས་རྡོ་རྗེ་ཆེན་པོའི་ངོ་བོ་ཉིད་ཀྱི་བདག་ཉིད་ངའོ་ཞེས་སོ། །འདིར་བྱིན་གྱིས་རློབ་པའི་རྒྱ་ནི། རྡོ་རྗེའི་ཕྱག་རྒྱ་གནས་དེ་དང་དེར་གཏུག་པའོ། །དེ་ལྟར་དབང་དང་བྱིན་རླབས་ཀྱི་ལྷ་ལྔ་ལྔ་སྟེ་བཅུའི་སྟེང་དུ་སྙིང་དབུས་སྲོག་གི་གོར་རང་འདྲའི་ཡེ་ཤེས་སེམས་དཔའ་རྒྱན་དང་ཕྱག་མཚན་སྤངས་པ་རེ་རེ་བསྒོམ་པ་བརྩིས་པས་ཡན་ལག་གི་ལྷ་བཅུ་གཅིག་ཏུ་འགྱུར་ནའང་དོན་ལ་བྱིན་རླབས་ཀྱི་ཡོན་ཏན་དང་ཕྲིན་ལས་གཉིས་རྡོ་རྗེ་གསུམ་གྱི་ཞར་བྱུང་ཙམ་ཡིན་པས་ལམ་བསྒོམས་པའི་དབང་དུ། ས་ཆུ་གཉིས་དང་མེ་རླུང་གཉིས་ཀྱི་དྭངས་མ་རོ་གཅིག་ཏུ་འཇུག་པས་རིན་འབྱུང་རྣམ་སྣང་ལ་བསྡུས་པ་སྐུ་རྡོ་རྗེ། དོན་གྲུབ་མཐའ་ཡས་ལ་བསྡུས་པ་གསུང་རྡོ་རྗེ། དེའི་རིག་པས་སེམས་ཀྱི་དྭངས་མ་དོན་དམ་པའི་ནམ་མཁའ་དང་རོ་གཅིག་པ་ཉིད་ཀྱིས་ཁྱབ་བྱེད་དྲུག་པ་དང་ཁྱབ་བྱ་མི་བསྐྱོད་པ་གཉིས་འདྲེས་ཐུགས་རྡོ་རྗེར་བྱས་པས་བྱིན་རླབས་ཀྱི་ལྷ་གསུམ་སྟེ། ཡན་ལག་གི་ལྷ་དགུར་གསུངས་པའི་གནད་ཀྱང་ཤེས་པར་བྱའོ། ། གསུམ་པ་ཡོན་ཏན་ནི། ཞེས་བརྗོད་པས་སོགས་ཏེ། དབང་དང་བྱིན་བསྡུ་བའི་སྔགས་དེ་སྐད་ཅེས་བརྗོད་པས་ཡེ་ཤེས་ལྔའི་ཆུ་རྒྱུན་སྤྱི་བོ་ནས་ཐིམ་པར་གྱུར་པས་དབུའི་གནས་ལྔར་དབང་ལྷ་རིགས་ལྔ་གསལ་བར་གྱུར། གནས་གསུམ་དུ་རྡོ་རྗེ་གསུམ་གྱི་ལྷ་རྣམས་འབར་བར་གྱུར་ཏོ། ། གཉིས་པ་ཡེ་ཤེས་ཀྱི་དཀྱིལ་འཁོར་དགུག་བསྟིམ་གྱི་སྔགས་ལ་བཞི་ལས། དང་པོ་སྙན་གསན་དབབ་པའི་སྔགས་ནི། ༀ་ཨེ་ཧྱེ་ཧི་སོགས་ཏེ། ༀ་ཡེ་ཤེས་ཀྱི་སྙིང་པོ་སྟེ་འགོ་འདྲེན། ཨེ་ཧྱེ་ཧི་ཚུར་སྤྱོན་ཚུར་སྤྱོན། བྷ་ག་ཝཱན་བཅོམ་ལྡན་འདས། མ་ཧཱ་ཀཱ་རུ་ཎི་ཀ་ཐུགས་རྗེ་ཆེན་པོ་དང་ལྡན་པ། དྲྀ་ཤྱ་ཧོཿགཟིགས་ཤིག །ས་མ་ཡ་སྟྭཾ་དུས་ལ་བབ་བོ་ཞེས་པ་སྟེ། དམ་ཚིག་པའི་ཐུགས་སྲོག་ཧཱུཾ་གི་འོད་ཀྱིས་བསྐུལ་བས་དེ་བཞིན་གཤེགས་པ་ཐམས་ཅད་ཆོས་ཀྱི་སྐུ་ལས་གཟུགས་ཀྱི་སྐུ་ཡེ་ཤེས་ཀྱི་འཁོར་ལོའི་རྣམ་པ་ཅན་དུ་སད་པར་བསམ་པའོ། །གཉིས་པ་སྤྱན་དྲངས་པའི་སྔགས་ནི། ཛཿཧཱུཾ་བཾ་ཧོཿཞེས་ཏེ། ཐུགས་ཀ་ནས་སྤྲོས་པའི་ཕྱག་རྒྱའི་ལྷ་མོ་བཞིས་དགུག་བཅིངས་བསྡམས་ལ་དགྱེས་པ་བསྐྱེད་པས་ཡེ་ཤེས་ཀྱི་འཁོར་ལོ་རྟེན་དང་བརྟེན་པར་བཅས་པ་སྤྱན་དྲངས་ཏེ། དམ་ཚིག་གི་འཁོར་ལོ་དང་མེ་རི་འདབ་འབྱོར་དུ་བཞུགས་པའོ། །གསུམ་པ་རིག་པའི་མེ་ཏོག་དོར་བའི་སྔགས་ནི། ༀ་ཨཱཾ་སོགས་ཏེ། ༀ་ཨཱཾ་ཧཱུཾ་སྭཱ་ཧཱ་ཞེས་པའི་ཡི་གེ་རེ་རེ་ཐོག་མཐར་སྦྱར་བའི་བར་དུ། བཛྲ་ས་མ་ཡ་ཞེས་ཡི་གེ་རེ་རེ་བཏུས་ཏེ་སྡེབས་པའི་སྔགས་ཚན་ལྔས། བདག་དམ་ཚིག་པའི་སྐུ་གསུང་ཐུགས་ཡོན་ཏན་ཕྲིན་ལས་རྣམས་རྡོ་རྗེ་ལྟར་དབྱེར་མི་ཕྱེད་པའི་དམ་ཚིག་གིས་དེ་བཞིན་གཤེགས་པ་ཐམས་ཅད་ཀྱི་འབྲས་ཆོས་ལྔ་དང་གཉིས་མེད་དུ་རྟོགས་པར་བྱེད་པ་སྟེ། རིག་པའི་མེ་ཏོག་དོར་བ་ཞེས་ཀྱང་བྱ། སོ་སོ་མ་ཡིན་པར་རིག་པ་འདུན་པའི་ཕྱག་གམ་རང་སྣང་གི་དཀྱིལ་འཁོར་དུ་འཇུག་པའི་ཚུལ་ཞེས་ཀྱང་གྲགས་སོ། །བཞི་པ་དངོས་གྲུབ་བསྐུལ་ཏེ་བསྟིམ་པའི་སྔགས་ནི། ༀ། ཡེ་ཤེས་རྒྱལ་སོགས་ཏེ། ༀ་ནི་དངོས་གྲུབ་གསོལ་བའི་གླུའི་འགོ་འདྲེན་ནོ། །རང་རིག་པའི་ཡེ་ཤེས་ལ་མངའ་མཛད་པའི་རྒྱལ་པོ་ཞེས་བོས་ཏེ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་གཞན་ལས་ཆེས་རྨད་པོ་ཆེ་དེ་ཉིད་དུས་ཕྱིར་མ་ལུས་པར་ད་ལྟ་ཉིད་དུ་འདིར་ནི་དབྱེར་མེད་མཉམ་པར་སྦྱོར་བས་ཡེ་ཤེས་ལྷའི་རྡོ་རྗེ་གསུམ་གྱི་ཕྱག་རྒྱ་ཆེན་པོར་བདག་གི་སྒོ་གསུམ་སྦྱོར་བར་མཛོད་ཅིག་ཅེས་བསྐུལ་བས་ལྷ་རྣམས་དངོས་གྲུབ་སྩོལ་བ་ལ་ཕྱོགས་པར་གྱུར་པ་དང་། ༀ་བཛྲ་ས་མ་ཡ་ཧཱུཾ་ཞེས་པའི་ཧཱུཾ་ཐུགས་བསྐུལ་བའི་ས་བོན་དུ་བྱས་ཏེ། རབ་བསྔགས་རྡོ་རྗེ་མཉམ་པར་མཛོད། ཅེས་པས་ཡེ་ཤེས་པ་དམ་ཚིག་པ་ལ་བསྟིམ་སྟེ་གཉིས་མེད་དུ་གྱུར། ༀ་བཛྲ་ས་མ་ཡ་སྟྭཾ་ཞེས་པས་ནམ་མཁའི་ལྷའི་འཁོར་ལོར་གྲུབ་པར་མ་གྱུར་གྱི་བར་དུ་བརྟན་པར་བཞུགས་པའི་རྡོ་རྗེའི་དམ་ཚིག་ཁྱོད་ཅེས་སོ། །ༀ་བཛྲ་ས་མ་ཡ་ཧོཿམཆོག་སྟེར་རྡོ་རྗེའི་དམ་ཚིག་གིས་མཉེས་པར་མཛོད་ཅེས་བསྐུལ་བས་ཤིན་ཏུ་དབང་དུ་གྱུར་ཏེ་དགྱེས་པ་ཆེན་པོས་རྗེས་སུ་ཆགས་པར་བྱའོ། །ཛཿཧཱུཾ་བཾ་ཧོཿཞེས་ཕྱག་རྒྱ་བཞིས་ཤིན་ཏུ་བརྟན་ཅིང་གསལ་བར་བྱས་པའོ། ། གསུམ་པ་ཡོན་ཏན་ནི། ཞེས་བརྗོད་པས་སོགས་ཏེ། དེ་སྐད་ཅེས་བརྗོད་པས་ལྷག་ཏིང་གསུང་གསང་སྔགས་ཀྱི་དཀྱིལ་འཁོར་འདི་དག་གིས་ཡུལ་འཇིག་རྟེན་དྲུག་གི་ཕྱོགས་བཅུ་ཐམས་ཅད་ཀྱི་གདུལ་བྱའི་ངག་ལ་ཡེ་ནས་ཁྱབ་པར། དེ་ལམ་རྐྱེན་གྱིས་སྔགས་སྒྲར་རབ་ཏུ། དེས་འགག་མེད་གསུང་རྡོ་རྗེར་གྲོལ་བས་ཀུན་ཏུ་གྲགས་སོ། ། གཉིས་པ་རང་བཞིན་གསུང་གི་དཀྱིལ་འཁོར་ལ་གསུམ་སྟེ། གསུང་ལྔའི་མཚན་ཉིད། བྱེད་ལས། རྣམ་གྲངས་སོ། །མཚན་ཉིད་ལ་ལྔ་ལས། དང་པོ་སྐྱེ་མེད་དོན་གྱི་གསུང་ནི། ཨེ་མ་ཧོཿངོ་མཚར་སོགས་ཚིགས་བཅད་གཅིག་སྟེ། ཨེ་མ་ཧོཿཞེས་བརྗོད་མེད་ལས་དོན་གོ་བས་ངོ་མཚར་ཞིང་ཆེས་རྨད་ཀྱི་ཆོས་ཏེ། ཇི་ལྟར་ན་རྫོགས་པའི་སངས་རྒྱས་ཀུན་གྱི་ཁྱབ་བྱེད་ཆོས་ཀྱི་སྐུའི་གསུང་ནི་གྲགས་པའི་སྒྲ་དང་བཏགས་པའི་མིང་དང་། བརྗོད་པའི་ཚིག་སོགས་ཀུན་ལས་འདས་པའི་བརྗོད་མེད་ཀྱི་གསུང་དེས་གོ་ཕྱེ་བས་སྣ་ཚོགས་པའི་སྒྲ་རྣམས་གསལ་བར་འབྱུང་བའི་གཞིར་གྱུར་པའོ། །གཉིས་པ་བརྗོད་པ་ཚིག་གི་གསུང་ནི། གསུང་གཅིག་སོགས་ཚིགས་བཅད་གཅིག་སྟེ། དེ་བཞིན་གཤེགས་པའི་གསུང་གི་གསང་བ་གཅིག་ལ་ཡང་གསུང་གི་དཀྱིལ་འཁོར་ཡན་ལག་དྲུག་ཅུ་ལ་སོགས་པར་སྣང་བ་ནི། མདོ་ཆེན་པོར་གསུངས་པའི་དོན་སྡོམ་དུ་བྱས་ན། ཚངས་དབྱངས་སིལ་སྙན་གླུ་གར་དང་། །ཀ་ལ་པིངྐ་འབྲུག་གི་སྒྲ། །སྒྲ་བརྙན་ལྟ་བུའི་རྣམ་གྲངས་དྲུག །རེ་རེ་ལ་ཡང་ཡན་ལག་ནི། །བཅུ་བཅུ་འཇུག་སྟེ་འདུ་ཤེས་བསྐྱེད། །རྣམ་རིག་མཉན་འོས་མི་མཐུན་མེད། །ཤིན་ཏུ་ཟབ་དང་རྗེས་སུ་འབྱུང་། །མི་ཚུགས་རྣར་སྙན་མ་འཁྲུགས་དང་། །ཤིན་ཏུ་གསང་སྟེ་དྲུག་ཅུའོ། །དེ་དག་ཀྱང་གདུལ་བྱ་རིགས་དྲུག་གི་གནས་ཀྱིས་ཕྱེ་བས་སུམ་བརྒྱ་དྲུག་ཅུ་སོགས་བསམ་གྱིས་མི་ཁྱབ་པས་ཞིང་ཁམས་ཀུན་ཏུ་ཁྱབ་ཅིང་རང་རང་གི་སྐད་དུ་བརྡ་སྤྲོད་པའི་སྒྲ་དང་མིང་ཚིག་སོ་སོར་གྲག་ཅིང་། གྲགས་པ་དེ་ཐམས་ཅད་ཀྱང་ཟབ་པ་དང་རྒྱ་ཆེ་བའི་གསུང་གི་ཕྱག་རྒྱ་ལས་མི་འདའ་བའི་ཕྱིར་མཆོག་ཏུ་གྱུར་པའོ། །གསུམ་པ་རིག་པ་བྱིན་རླབས་ཀྱི་གསུང་ནི། རྒྱུད་མཆོག་སོགས་རྐང་པ་ལྔ་སྟེ། རྒྱུད་ཐམས་ཅད་ཀྱི་མཆོག་ཐབས་ཤེས་ཟུང་འབྲེལ་སྒྱུ་འཕྲུལ་དྲྭ་བའི་རྒྱུད་ལས་འབྲས་བུ་བདེ་བ་ཆེན་པོ་དང་ལྡན་པ་རང་རིག་པ་ཡེ་ཤེས་ཀྱི་གསུང་གི་དོན་འབྱུང་བའང་ཇི་ལྟར་ཞེ་ན། འཁོར་འདས་ཀྱི་སྒྲ་ཐམས་ཅད་གཟུང་འཛིན་གྱིས་གོས་པ་མེད་པ་པདྨ་ལྟ་བུའི་ངང་དུ་གྱུར་པའི་ཕྱིར་ན། རྣམ་པར་གྲོལ་བ་འདས་པ་དང་། ཐར་པར་བགྲོད་བྱེད་ལམ་དང་། བཅིངས་པ་འཁོར་བའི་སྒྲ་སྐད་ཀྱི་རྣམ་པ་ཇི་སྐད་བརྗོད་པ་ཐམས་ཅད་ཀྱང་མཚན་མས་མ་གོས་པས་གསུང་གི་མཆོག་སྟེ། ཅིར་ཡང་མི་འགག་པར་རང་རིག་ལ་སྣང་བའི་ཕྱིར་རིག་པའི་གསུང་ངམ་བདེ་བ་ཆེན་པོའི་གསུང་ཞེས་ཀྱང་བྱའོ། །བཞི་པ་དབྱེར་མེད་རྡོ་རྗེའི་གསུང་ནི། ཐེག་པ་མཐོ་དམན་སོགས་རྐང་པ་དྲུག་སྟེ། རྣམ་པར་གྲོལ་བའི་ཐེག་པ་མཐོ་དམན་ཐམས་ཅད་དང་། ཕྱིན་ཅི་ལོག་མུ་སྟེགས་པ་དང་། འགྲོ་བ་རིགས་དྲུག་གིས་བསྡུས་པའི་སེམས་ཅན་མ་ལུས་ཐམས་ཅད་ཀྱི་སྒྲ་སྐད་ཀུན་ཀྱང་དོན་ལ་གྲག་སྟོང་གཉིས་སུ་མེད་པའི་ངོ་བོར་ཡེ་ནས་བྱང་ཆུབ་པ་རྡོ་རྗེའི་གསུང་དུ་བསྡུས་ཤིང་། བསྡུས་ཙམ་ཉིད་ནའང་དེ་ལས་མ་གཡོས་བཞིན་དུ་ཕྱོགས་བཅུར་རྣམ་པར་གྲགས་ཤིང་གོ་བར་མཛད་པའི་སྒྲ་ཉིད་ཇི་ལྟར་པདྨ་ལ་ཆུས་མི་གོས་པ་ལྟར་མ་ཆགས་འཛིན་མེད་ཀྱི་ངང་དུ་གསུངས་པས་མཐའ་གཉིས་ལས་གྲོལ་བའི་ཕྱིར། མ་འགགས་པར་གསུངས་པའི་དུས་ཉིད་ན་མ་དམིགས་པས་བརྗོད་དུ་མེད་པའོ། །ལྔ་པ་ཚངས་པ་དབྱངས་ཀྱི་གསུང་ནི། བརྗོད་མེད་དེ་ཉིད་སོགས་རྐང་པ་ལྔ་སྟེ། བརྗོད་མེད་དོན་གྱི་གསུང་དེ་ཉིད་བརྗོད་པ་སྣ་ཚོགས་པའི་སྒྲའི་འབྱུང་གནས་སུ་སྣང་བས་གདུལ་བྱ་ཀུན་ལ་ཚིག་གཅིག་མཐུན་པར་གྲགས་ཤིང་། དེ་ལས་དོན་སོ་སོར་འཇལ་ཞིང་གོ་བར་བྱེད་དེ། དཔེར་ན་ཚུལ་དེ་བཞིན་དུ་ཐུབ་པའི་དབང་པོས་སྦྲིད་པ་སངས་པ་ལ་ནད་པ་སྨན་པ་ཁྱིམ་བདག་མོ་གསུམ་གྱིས་དོན་སོ་སོར་གོ་བ་བཞིན་དེ་བཞིན་གཤེགས་པའི་གསུང་གཅིག་གི་སྒྲ་ཡིས་སོ་སོའི་བསམ་པ་དང་མཐུན་པའི་ཆོས་ཐམས་ཅད་གོ་བ་དེ་ནི་གསུང་གཅིག་གིས་ཀུན་ལ་ཁྱབ་པས་གསུང་མཆོག་རྒྱལ་པོ་སྟེ་ཚངས་པ་དབྱངས་ཀྱི་གསུང་ཡིན་ནོ། །དེ་ལྟར་ཡང་དཀོན་བརྩེགས་ལས། རྒྱལ་བའི་གསུང་དབྱངས་གཅིག་སྣང་བ། །མོས་པའི་དབང་གིས་སོ་སོར་ཐོས། །ཞེས་གསུངས་པ་ལྟར་རོ། །འདིར་ལོངས་སྐུ་བརྡའི་གསུང་མ་བྱུང་བས་ཆད་ལ། སྤྲུལ་སྐུའི་གསུང་གཉིས་བྱུང་བས་ལྷག་གོ་ཞེ་ན། ལོངས་སྐུའི་གསུང་ནི་སྔར་ལེའུ་དྲུག་པར། དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་འཇལ་བར་སྟོན། །ཅེས་བསྟན་ཟིན་པས་འདིར་མ་སྨོས་ལ། སྤྲུལ་སྐུའི་གསུང་གཉིས་ལས། ཚིག་གི་གསུང་ནི་ཚིག་རེས་དོན་རེ་མཚོན་པ་ཡིན་ལ། ཚངས་པ་དབྱངས་ཀྱི་གསུང་ནི་ཚིག་རེས་དོན་དུ་མ་མཚོན་པ་ཡིན་པས་ལྷག་པའི་སྐྱོན་མེད་ཅེས་གསུངས་སོ། ། གཉིས་པ་གསུང་གི་བྱེད་ལས་ནི། ཐེག་པ་མཐོ་དམན་སོགས་རྐང་པ་གསུམ་སྟེ། གདུལ་བྱའི་སྣང་བར་ཐེག་པ་མཐོ་དམན་བསམ་ཡས་གསུངས་པ་ལྟར་སྣང་ཡང་བཅོམ་ལྡན་འདས་ཀྱིས་དེ་བཞིན་ཉིད་ལ་འབབ་པ་ཁོ་ན་ལས་གཞན་མ་གསུངས་ཏེ། གདུལ་བྱ་འདུལ་བའི་ཐབས་སུ་ཆོས་ཀྱི་རྣམ་གྲངས་སོ་སོར་ཐོས་པ་ཙམ་དུ་ཟད་དོ། །དེ་ལྟར་ཡང་ཏིང་ངེ་འཛིན་རྒྱལ་པོ་ལས། ཀཽ་དཱི་ནྱ། ངས་ནི་གཟུགས་ཀྱི་དེ་བཞིན་ཉིད་འབའ་ཞིག་གསུངས་ན། ལ་ལས་ནི་གཟུགས་སྟོང་ཞེས་བྱ་བར་ཐོས། ལ་ལས་ནི་གཟུགས་མི་སྟོང་ཞེས་བྱ་བར་ཐོས། ལ་ལས་ནི་གཟུགས་བདེ་ཞེས་བྱ་བར་ཐོས། ལ་ལས་ནི་གཟུགས་སྡུག་བསྔལ་ཞེས་བྱ་བར་ཐོས། ཞེས་སོ། ། གསུམ་པ་གསུང་གི་རྣམ་གྲངས་ནི། ཇི་ལྟར་གསུང་རབ་སོགས་ཚིགས་བཅད་ཕྱེད་དང་གསུམ་སྟེ། ཇི་ལྟར་གསུང་རབ་ཀྱི་དོན་ཀུན་ཚིག་ཏུ་བརྗོད་ཀྱང་དོན་ཆོས་ཉིད་དེ་བཞིན་ཉིད་ཀྱིས་གཞལ་ན་བརྗོད་དུ་མེད་པའི་ཕྱིར་ཅུང་ཟད་ཀྱང་གསུངས་པ་མེད་དེ། ཆོས་སྐུ་སྐྱེ་མེད་དོན་གྱི་གསུང་ངོ་། །དོན་གྱི་གསུང་དེ་ཉིད་མཚོན་བྱེད་ཀྱི་ཡི་གེར་གྲུབ་པ་མེད་པ་དང་སྒྲར་བརྗོད་དུ་མེད་པས་ལྗགས་ཀྱི་རྩེ་མོར་སྒྲ་ཚིག་ཏུ་མ་བྱུང་ཡང་སྐུའི་བརྡས་འཁོར་གྱི་བློ་ལ་དོན་འཇལ་བར་སྟོན་པས་ན་ལོངས་སྐུ་དགོངས་པ་བརྡའི་གསུང་ངོ་། །རིག་པ་ཡེ་ཤེས་ཀྱི་གསུང་དེ་ཉིད་ཀུན་ཁྱབ་ཀྱི་ཐུགས་རྗེ་དང་སྒྲ་ཐམས་ཅད་ཆོས་ཉིད་ཀྱི་ངང་དུ་ལྷུན་གྱིས་གྲུབ་པའི་གསུང་གི་བྱིན་རླབས་ཅིར་ཡང་མི་འགགས་པའི་སྟོབས་ཀྱིས་དོན་མཛད་པ་ནི་མངོན་བྱང་རིག་པ་བྱིན་རླབས་ཀྱི་གསུང་ངོ་། །འགྲོ་བ་གང་ལ་གང་འདུལ་གྱི་མོས་པ་དང་མཐུན་པའི་སྒྲ་དོན་སྣ་ཚོགས་ཚིག་གཅིག་གིས་སོ་སོར་གསལ་ཞིང་ཐོས་པས་བརྡ་སྤྲོད་པ་ནི་སྤྲུལ་སྐུ་བརྗོད་པ་ཚིག་གི་གསུང་ངོ་། །དེ་ལྟར་གསལ་བ་ཉིད་ནའང་མི་དམིགས་པས་གསུང་གི་རང་བཞིན་དབྱེར་མི་ཕྱེད་པས་རྡོ་རྗེའི་མཆོག་སྟེ་དབྱེར་མེད་རྡོ་རྗེའི་གསུང་ངོ་། །ཚུལ་དེ་བཞིན་དུ་སངས་རྒྱས་ཀྱི་གསུང་གི་སྒོ་ནས་འགྲོ་བའི་དོན་མཛད་པ་རྣམས་ནི་བརྗོད་མེད་དེ་བཞིན་ཉིད་ཀྱི་ངང་ལས་གཞན་དུ་མ་གཡོས་ཀྱང་རྒྱལ་བའི་ཐུགས་རྗེ་དང་། གདུལ་བྱའི་མོས་པ་ལས་རང་སྣང་བ་སྟེ། དཔེར་ན་བྲག་ཅའི་སྒྲ་ཉིད་ཀྱང་བརྗོད་འདོད་དང་། རྟོག་པ་དང་། རྩོལ་བ་གང་ཡང་མེད་བཞིན་དུ་རྐྱེན་གྱིས་སྒྲའི་རྣམ་པ་འབྱུང་བ་བཞིན་ནོ། །དེ་སྐད་དུའང་རྒྱུད་བླར། ཇི་ལྟར་སྒྲ་བརྙན་གྱི་ནི་སྒྲ། །གཞན་གྱི་རྣམ་རིག་ལས་བྱུང་བ། །དེ་ལྟར་དེ་བཞིན་གཤེགས་པའི་གསུང་། །ཕྱི་དང་ནང་ནའང་གནས་མ་ཡིན། །ཞེས་པ་ལྟར་རོ། ། གསུམ་པ་ལེའུའི་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉི་ཤུ་རྩ་གཉིས་སུ་ཡོད་པ་ལས། འདིས་རང་བཞིན་གསུང་གི་དཀྱིལ་འཁོར་ཇི་སྙེད་པ་གསུང་ལྔར་བསྡུས་པ་དང་། ལྷག་པ་ཏིང་ངེ་འཛིན་གསུང་གི་དཀྱིལ་འཁོར་གསང་སྔགས་ཀྱི་དོན་བསྟན་པའི་ལེའུ་སྟེ་བདུན་པའོ།། །། ལེའུ་བརྒྱད་པའི་འགྲེལ་པ།ལེའུ་བརྒྱད་པ་ལ་གསུམ་སྟེ། ལོ་རྒྱུས་དང་། གཞུང་དང་། མཚན་ནོ། །དང་པོ་ནི། དེ་ནས་དེ་བཞིན་སོགས་ཏེ། གསུང་གི་དཀྱིལ་འཁོར་བསྟན་པ་དེ་ནས་རང་བཞིན་དང་ལྟ་བ་དང་ལྷག་ཏིང་སྟེ་ཐུགས་ཕྱག་རྒྱའི་དཀྱིལ་འཁོར་གསུམ་སྟོན་པའི་ཕྱིར་དེ་བཞིན་གཤེགས་པ་ཐམས་ཅད་འདུས་པའི་བདག་ཉིད་ཀྱིས་ལུས་དང་རྟོག་པའི་ཡན་ལག་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་ཡེ་ནས་ལྷུན་གྱིས་གྲུབ་པ་ཉིད་རྟོགས་གོམས་ཀྱི་སྦྱོར་བས་མཐར་ཕྱིན་པར་བྱིན་གྱིས་རློབ་པ་ཞེས་བྱ་བའི་ཕྱག་རྒྱའི་རིམ་པ་འདི་ཆེད་དུ་བརྗོད་དོ། ། གཉིས་པ་གཞུང་ལ་ལྔ་སྟེ། རང་བཞིན་གྱི་ཕྱག་རྒྱ་དང་། ལྷག་པ་ཏིང་ངེ་འཛིན་གྱི་ཕྱག་རྒྱ་དང་། ལྟ་བའི་ཕྱག་རྒྱ་དང་། ཕྱག་རྒྱ་སྤྲོས་བཅས་ཀྱི་ཏིང་ངེ་འཛིན་བསྟན་པ་དང་། ཕྱག་རྒྱའི་རྣམ་གྲངས་ཀྱི་སྒོ་ནས་མཇུག་བསྡུ་བའོ། །དང་པོ་ནི། སྒྱུ་འཕྲུལ་དྲྭ་བས་སོགས་ཚིགས་བཅད་གཅིག་སྟེ། ཆོས་ཐམས་ཅད་ཟུང་འཇུག་སྒྱུ་འཕྲུལ་དྲྭ་བའི་དཀྱིལ་འཁོར་དུ་ཡེ་ནས་རང་བཞིན་གྱིས་མངོན་པར་རྫོགས་པར་སངས་རྒྱས་པའི་ཕྱིར་རྟོག་ཚོགས་ཐམས་ཅད་ལ་ཆོས་ཉིད་བྱང་ཆུབ་ཀྱི་སེམས་ཀུན་ཏུ་བཟང་པོ་མཆོག་གི་ཕྱག་རྒྱས་བཏབ་པ་སྟེ། དེ་ཉིད་གནས་རྟོགས་མངོན་དུ་བྱས་པའི་གནས་སྐབས་གསུམ་ལ། རང་བཞིན་དང་། ལྟ་བ་དང་། འབྲས་བུའི་ཕྱག་རྒྱ་ཞེས་བྱའོ། །དེ་ལྟར་རྟོགས་དཀའ་བའི་གསང་བ་དེ་ཁོ་ན་ཉིད་དུ་ངེས་པའི་དོན་ཆོས་ཉིད་སྙིང་པོའི་ཕྱག་རྒྱས་བཏབ་པ་ནི་རྒྱལ་པོའི་བཀའ་རྟགས་ལྟར་འདའ་བར་དཀའ་བ་སྟེ། ནམ་ཡང་དེ་ལས་མི་འདའོ། ། གཉིས་པ་ལ་གསུམ་སྟེ། ཕྱག་རྒྱའི་རྒྱུ་དང་། དེ་ལས་བྱུང་བ་རིགས་ལྔ་སྤྱིའི་དམ་རྒྱ། དེ་ལས་འཕྲོས་པ་ལྷ་སོ་སོའི་ཕྱག་རྒྱའོ། །དང་པོ་ནི། མི་བསྐྱོད་སོགས་ཚིགས་བཅད་གཅིག་སྟེ། འགྲེལ་ཆུང་ལས། དབུ་ནི་བདེ་གཤེགས་རིགས་ཉིད་དེ། །ལག་གཡས་རྡོ་རྗེ་མི་བསྐྱོད་པ། །ལག་གཡོན་རིན་ཆེན་སེམས་དཔའི་རིགས། །རྐང་གཡོན་ཆོས་ཀྱི་སེམས་དཔའ་སྟེ། །རྐང་གཡས་ལས་ཀྱི་སེམས་དཔའོ། །ཞེས་ལུས་ཀྱི་ཡན་ལག་ལྔ་དང་། ཉིང་ལག་གི་གུང་མོ་རྡོ་རྗེ། མཛུབ་མོ་བདེ་གཤེགས། སྲིན་ལག་རིན་ཆེན། མཐེ་བོང་པདྨ། མཐེའུ་ཆུང་ལས་རིགས་ཏེ། ཡན་ལག་དང་ཉིང་ལག་ཐམས་ཅད་རིགས་ལྔའི་དཀྱིལ་འཁོར་དུ་ལྷུན་གྱིས་གྲུབ་པའི་ཕྱིར། མི་བསྐྱོད་པའི་རིགས་ལག་པ་གཡས་ཀྱི་སོར་མོའི་བྲེ་ཁ་ལྔ་ལ་ཉི་མའི་དཀྱིལ་འཁོར་ལྔའི་སྟེང་དུ་ཐབས་རིགས་ལྔའི་ཡི་གེ་ཧཱུཾ་ༀ་སྭཱ་ཨཱཾ་ཧཱ་དང་། རིན་ཆེན་རིགས་ལག་པ་གཡོན་གྱི་སོར་མོ་ལྔ་ལ་ཟླ་བའི་དཀྱིལ་འཁོར་ལྔའི་སྟེང་དུ་ཤེས་རབ་ཡུམ་ལྔའི་ཡི་གེ་མཱུཾ་ལཱཾ་མཱཾ་པཱཾ་ཏཱཾ་རྣམས་སོར་མོའི་རིགས་གང་ཡིན་ལྟར་མ་འཁྲུལ་བར་བཀོད་རྗེས། སོར་མོ་ལྔ་ཕྲག་གཉིས་པོ་ཟུང་དུ་སྤྲད་པའི་ལས་ཀྱིས་ཐལ་མོ་མཉམ་པར་སྦྱར་བས་ལྷ་སོ་སོའི་ཕྱག་རྒྱ་འབྱུང་བའི་རྒྱུར་འགྱུར་རོ། ། གཉིས་པ་ནི། ༀ་དང་མཱུཾ་གཉིས་སོགས་ཚིགས་བཅད་གཅིག་སྟེ། གཡས་ཀྱི་མཛུབ་མོའི་ༀ་དང་གཡོན་གྱི་གུང་མོའི་མཱུཾ་གཉིས་རྩེ་སྦྱར་ཏེ་ལྷག་མ་རིགས་བཞིའི་ཡི་གེ་འབྲུ་བརྒྱད་ཀྱང་། གཡས་ཀྱི་གུང་མོའི་ཧཱུཾ་དང་གཡོན་གྱི་མཛུབ་མོའི་ལཱཾ། དེ་བཞིན་དུ་མཐེ་བོང་དང་མཐེའུ་ཆུང་གཡས་གཡོན་གྱི་ཧཱ་དང་པཱཾ། ཨཱཾ་དང་ཏཱཾ་རྣམས་ཕན་ཚུན་སོ་སོར་བསྣོལ་ནས་རྩེ་སྤྲད་པ་ལས་སྲིན་ལག་གི་སྭཱ་མཱཾ་གཉིས་མཐེའུ་ཆུང་ནང་དུ་བཀུག་པའི་རྒྱབ་ཏུ་སྦྱར་ནས་སྦྲེང་བ་ནི་རྒྱལ་བ་ཀུན་དང་དབྱེར་མེད་མཉམ་པར་སྦྱོར་བའི་དངོས་གྲུབ་བདེ་བ་ཆེན་པོའི་ཡེ་ཤེས་སྦྱིན་པར་བྱེད་པའི་ཕྱིར་ཕྱག་རྒྱའོ། །དེ་ལྟར་ཡང་ཐབས་ཞགས་ལས། སོར་མོ་ནང་དུ་བསྣོལ་ནས་བཀན། །གུང་མཛུབ་མཐེ་བོང་མཐེའུ་ཆུང་རྣམས། །སོ་སོར་རྩེ་སྤྲད་ཕྱིར་བཀྱེད་དེ། །སྲིན་ལག་གཤིབས་བསྒྲེང་དམ་ཚིག་རྒྱ། །ཞེས་དང་། རྔམ་གློག་ལས་ཀྱང་། ༀ་དང་མཱུཾ་གཉིས་རྩེ་སྤྲད་ལ། །དེ་བཞིན་ཧཱུཾ་དང་ལཱཾ་དུ་སྦྱར། །ཧཱ་དང་པཱཾ་ཡང་དེ་བཞིན་ཏེ། །ཨཱཾ་དང་ཏཱཾ་དུ་སྦྱར་བ་ལས། །རྒྱབ་སྦྱར་སྭཱ་དང་མཱཾ་བསྒྲེང་བ། །འདི་ནི་ཡབ་ཀྱི་སྤྱི་རྒྱ་ཡིན། །ལག་པ་ཐལ་མོ་སྦྱར་བ་ལས། །ༀ་དང་མཱུཾ་སྦྱར་ཧཱུཾ་དང་ནི། །ལཱཾ་སྦྱར་སྭཱ་དང་པཱཾ་དུ་སྦྱར། །ཨཱཾ་དང་མཱཾ་སྦྱར་ཧཱ་ཏཱཾ་བསྒྲེང་། །ཡུམ་གྱི་སྤྱི་རྒྱ་ཡིན་པར་བཤད། །ཅེས་སོ། ། གསུམ་པ་སོ་སོའི་ཕྱག་རྒྱ་ལ་ལྔ་ལས། དང་པོ་རིགས་ལྔའི་ཕྱག་རྒྱ་ལས་གཙོ་བོ་ཡབ་ཡུམ་ནི། འབྲུ་བཞི་སྦས་ནས་སོགས་ཚིགས་བཅད་གཉིས་ཏེ། བདག་ཉིད་གཙོ་བོ་མི་བསྐྱོད་པའི་སྐུར་བསྒོམ་པ་ཕྱག་རྒྱ་ཆེན་པོ། དེའི་ངང་ལས་ལག་གཡས་པའི་ཧཱུཾ་མ་གཏོགས་པའི་ཡིག་འབྲུ་གཞན་བཞི་པོ་ཁུ་ཚུར་གྱི་རྣམ་པར་སྦས་ནས་གུང་མོ་གྱེན་དུ་བསྒྲེང་བའི་རྒྱབ་ཐུགས་ཀར་གཏད་དེ་བཀན་པ་ནི་བཅའ་བ་དམ་རྒྱ། ཧཱུཾ་ཡིག་མཐིང་ག་གུང་མོ་བསྒྲེང་བ་དེའི་རྩེ་མོར་བསྒོམ་པ་ནི་བསམ་པ་ཆོས་རྒྱ། ཧཱུཾ་ཞུ་བ་ལས་རྡོ་རྗེ་རྩེ་ལྔ་པ་འོད་འབར་བར་གྱུར་པ་ནི་བསམ་པ་དམ་རྒྱ། ལག་གཡོན་པའི་ཟླ་བ་ལྔ་ནང་དུ་བརྟུལ་བས་ཡུམ་གྱི་ཡིག་འབྲུ་ལྔ་སྦས་པའི་ཁུ་ཚུར་གྱིས་དྲིལ་བུ་བཟུང་བ་གསིལ་ཞིང་ཡུམ་ལ་འཁྲིལ་བའི་ཚུལ་གྱིས་བརླ་གཡོན་པ་ཆོས་ཀྱི་སེམས་དཔའམ་པདྨའི་རིགས་ཀྱི་སྟེང་དུ་བཞག་པས་དཀུ་ལ་བརྟེན་ཐབས་སུ་བཅའ་བ་ནི་བཅའ་བ་ལས་རྒྱ་དང་། དེ་ལྟར་བསྒོམ་པ་ནི་བསམ་པ་ལས་རྒྱ། དེ་ནས་ཕྱག་རྒྱ་གཡས་སུ་བཅས་པ་མདུན་དུ་བསྒྱུར་ནས་གཡོན་དུ་ཡུམ་གྱི་ཐུགས་ཀར་སེ་གོལ་གྱི་སྒྲ་དང་བཅས་ཏེ། ངག་ཏུ་ཧཱུཾ་བཛྲ་དྷྲིཀ྄་ཅེས་བརྗོད་ཅིང་དགྲོལ་བ་ནི་བརྗོད་པ་ཆོས་ཀྱི་ཕྱག་རྒྱ་སྟེ། ཤེས་རབ་ལ་ཐབས་ཀྱིས་རྒྱས་འདེབས་པའོ། །ཡུམ་གྱི་ཕྱག་རྒྱ་ནི་མི་བསྐྱོད་པའི་གཡོན་ཕྱོགས་ཀྱི་འཕང་དུ་ཡུམ་དབྱིངས་ཕྱུག་མ་བསྒོམ་པ་ནི་ཕྱག་ཆེན། ལག་གཡོན་གྱི་འབྲུ་བཞི་ནང་དུ་སྦས་ནས་གུང་མོ་ཐུགས་ཀར་བཀན་ཐབས་སུ་བསྒྲེང་བ་ནི་བཅའ་བ་དམ་རྒྱ། མཱུཾ་མཐིང་ག་གུང་མོ་བསྒྲེང་བའི་རྩེ་མོར་བསྒོམ་པ་ནི་བསམ་པ་ཆོས་རྒྱ། མཱུཾ་ཞུ་བ་ལས་དྲིལ་བུ་གསིལ་བའི་སྒྲ་ཅན་འོད་འབར་བར་གྱུར་པ་ནི་བསམ་པ་དམ་རྒྱ། ལག་གཡས་ཉི་མ་ལ་གནས་པའི་འབྲུ་ལྔ་མ་བཅིངས་པས་ཡབ་ཀྱི་བརླ་གཡས་པ་ལས་ཀྱི་སེམས་དཔའི་སྟེང་དུ་བཞག་པའི་ཚུལ་གྱིས་འཁྲིལ་ཞིང་དབུ་ཡབ་ལ་ཅུང་ཟད་བཏུད་དེ་ཞལ་འཛུམ་པའི་མདངས་ཀྱིས་ཡབ་ཀྱི་ཞལ་ལ་བལྟ་བའི་ཚུལ་དུ་བཅའ་བ་ནི་བཅའ་བ་ལས་རྒྱ། དེ་ལྟར་བསྒོམ་པ་ནི་བསམ་པ་ལས་རྒྱ། དེ་ནས་ཕྱག་རྒྱ་གཡོན་དུ་བཅས་པ་མདུན་དུ་བསྒྱུར་ནས་གཡས་སུ་ཡབ་ཀྱི་ཐུགས་ཀར་སེ་གོལ་གྱི་སྒྲ་དང་བཅས་ཏེ་མཱུཾ་དྷཱ་ཏྭཱི་ཤྭ་རཱི་ཞེས་བརྗོད་ཅིང་དགྲོལ་བ་ནི་བརྗོད་པ་ཆོས་རྒྱ་སྟེ་ཐབས་ལ་ཤེས་རབ་ཀྱིས་རྒྱས་འདེབས་པའོ། །མདོར་ན་ཕྱག་རྒྱ་བདུན་པོ་དེའང་བཞིར་འདུ་སྟེ། དམ་རྒྱ་དང་ལས་རྒྱ་གཉིས་ལ་བཅའ་བ་དང་བསམ་པ། ཆོས་རྒྱ་ལ་བསམ་པ་དང་བརྗོད་པ་གཉིས་གཉིས་སུ་ཕྱེ་བ་ཙམ་དུ་ཟད་པས་དྲུག་པོ་དབྱེ་གཞི་གསུམ་དུ་བསྡུས་པའི་སྟེང་ཕྱག་རྒྱ་ཆེན་པོ་བསྣན་པས་བཞིའམ། ཡང་ན་ལྷ་སྐུ་སྒྱུ་མ་ལྟ་བུར་གསལ་བ་ཕྱག་ཆེན། ས་བོན་ཆོས་རྒྱ། བཅའ་བ་དམ་རྒྱ། དགྲོལ་བ་ལས་རྒྱ་སྟེ་བཞིའོ། །དེ་ལྟར་ཡང་གསལ་བཀྲ་ལས། དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་ཆེན་པོ་བཞི། །ཞེས་སོ། །དེ་བཞིན་དུ་རྣམ་སྣང་ཡབ་ཡུམ་སོགས་རིགས་གཞན་བཞི་པོའི་ཕྱག་རྒྱ་ཡང་། འབྲུ་བཞི་སྦས་ནས་སོགས་ཚིགས་བཅད་བརྒྱད་དེ། བདག་ཉིད་རྣམ་སྣང་སོགས་རིགས་གང་ཡིན་དེར་གསལ་བ་ལས། ལག་གཡས་པའི་འབྲུ་བཞི་སྦས་ནས་རང་རིགས་ཀྱི་སོར་མོ་བསྒྲེང་བ་ཐུགས་ཀར་བཀན་ཐབས་སུ་བཅས་ཤིང་། ༀ་སྭཱ་ཨཱཾ་ཧཱཾ་བཞི་རིགས་མཐུན་གྱི་ཁ་དོག་ཅན་སོར་མོ་བསྒྲེང་བ་དེའི་རྩེ་མོར་བསམ་པ་ལས་རང་རང་གི་ཐུགས་ཕྱག་མཚན་འཁོར་ལོ་དང་རིན་ཆེན་དང་པདྨ་དང་རལ་གྲི་རྣམས་འོད་འབར་བར་གྱུར་པར་བསམ་ཞིང་། གཡོན་ཟླ་བརྟུལ་གྱིས་ཡུམ་གྱི་འབྲུ་ལྔ་སྦས་པའི་ཁུ་ཚུར་གྱིས་དྲིལ་བུ་གསིལ་ཞིང་ཡུམ་ལ་འཁྲིལ་བའི་ཚུལ་གྱིས་བརླ་གཡོན་པ་ཆོས་ལ་བརྟེན་པའོ། །ཡང་གཡོན་དུ་རིགས་ཀྱི་ཡུམ་གང་ཡིན་གསལ་བ་ལས། གཡོན་པའི་འབྲུ་བཞི་སྦས་ནས་རང་རིགས་ཀྱི་སོར་མོ་བསྒྲེང་བ་ཐུགས་ཀར་བཀན་ཐབས་སུ་བཅའ་ཞིང་། ལཱཾ་མཱཾ་པཱཾ་ཏཱཾ་བཞི་རིགས་ཀྱི་ཁ་དོག་ཅན་སོར་མོ་བསྒྲེང་བ་དེའི་རྩེ་མོར་བསམ་པ་ལས་དྲིལ་བུ་གསིལ་བའི་སྒྲ་ཅན་འོད་འབར་བར་གྱུར་ཅིང་། གཡས་ཉི་མ་འབྲུ་ལྔ་དང་བཅས་པ་མ་བཅིངས་པས་ལས་ཏེ་ཡབ་ཀྱི་བརླ་གཡས་པའི་སྟེང་དུ་བཞག་པས་འཁྲིལ་ཞིང་ཡབ་ལ་དབུ་བཏུད་དེ་འཛུམ་པའི་མདངས་ཀྱིས་ཞལ་ལ་བལྟ་བ་སྟེ། ཡབ་ཡུམ་སོ་སོའི་མཐར་སྔགས་བརྗོད་ཅིང་ཐབས་ཤེས་ཕན་ཚུན་རྒྱས་འདེབས་ཀྱིས་དགྲོལ་བར་བྱའོ། ། གཉིས་པ་སེམས་དཔའ་ཡབ་ཡུམ་གྱི་ཕྱག་རྒྱ་ནི། ཨུཏྤལ་ཀླུ་ཤིང་སོགས་ཚིགས་བཅད་གསུམ་སྟེ། ལག་གཡས་པའི་མཐེ་བོང་མ་གཏོགས་པའི་སོར་མོ་གཞན་བཞི་ལ་ཉི་དཀྱིལ་རེ་རེའི་སྟེང་དུ་མཛུབ་མོ་ནས་བརྩམས་ཏེ་ཐུགས་ཀྱི་སེམས་དཔའ་བཞིའི་ས་བོན། ཀྵཱིཾ་ཏྲཱཾ་ཧྲཱིཾ་ཛྲིཾ་དང་། གསུང་གི་སེམས་དཔའི་ཚེ་མཻ་ཐླྷིཾ་ཧཱུཾ་མཱུཾ་བཞི་དགོད། གཡོན་གྱི་སོར་རྩེ་བཞི་ལ་ཟླ་དཀྱིལ་རེ་རེར་ནང་སེམས་ཀྱི་ཡུམ་བཞིའི་ས་བོན་ཧཱུཾ་ཏྲཱཾ་ཧྲཱི་ཨཱ་དང་། ཕྱིའི་སེམས་མ་ཛཿཧཱུཾ་བཾ་ཧོཿབཞི་བཀོད་ནས། སེམས་དཔའ་སེམས་མ་གང་ཡིན་གྱི་སྐུར་གསལ་བ་ལས་འབྲུ་གསུམ་སྦས་ནས་རང་རིགས་ཀྱི་སོར་མོ་སྦྲེང་བའི་རྩེར་ས་བོན་སོ་སོ་ཡོངས་སུ་གྱུར་པ་ལས་འཇམ་དཔལ་གྱི་ཨུཏྤལ། བྱམས་པའི་ཀླུ་ཤིང་ལ་སོགས་པ་ཐུགས་ཕྱག་མཚན་འོད་འབར་བ་བསམ་པ་སྟེ། དེ་བཞིན་དུ་ས་སྙིང་གི་རིན་ཆེན་མྱུ་གུ། ནམ་སྙིང་གི་རལ་གྲི་འོད་འབར་བ། སྤྱན་རས་གཟིགས་ཀྱི་པདྨ་དཀར་པོ། ཕྱག་རྡོར་གྱི་རྡོ་རྗེ་འོད་འབར་བ། སྒྲིབ་སེལ་གྱི་ཆོས་ཀྱི་འཁོར་ལོ། ཀུན་བཟང་གི་རིན་ཆེན་སྙེ་མ་སྟེ་ཡབ་བརྒྱད་དང་། དེ་དག་གི་ཡུམ་སྒེག་མོས་གཟུགས་མཛེས་གསལ་བའི་མེ་ལོང་། མཱ་ལེས་རིན་ཆེན་ཕྲེང་བ་དང་། གཱིརྟིས་པི་ཝཾ། ནཱིརྟིས་གར་མཁན་མཆོག་གི་མཚན་མ་རྔ་ཡབ་ཉིད་དང་། དེ་བཞིན་དུ་པུཥྤེས་མེ་ཏོག་གི་ཕྲེང་བ་དང་། བདུག་སྤོས་ཀྱི་མཆོད་སྣོད་འཆང་བའི་དྷཱུ་པེ་མ། ཨཱ་ལོ་ཀེའི་མར་མེ། གནྡྷེ་མའི་དྲིའི་བྱུག་པ་རྣམས་འོད་འབར་བར་བསམ་པའོ། །ལ་སོགས་ཞེས་པའི་ཁོངས་ནས་སེམས་དཔའ་བརྒྱད་ཀྱི་གཡོན་ཟླ་བརྟུལ་འབྲུ་སྦས་ཀྱིས་ཕྱག་མཚན་དྲིལ་བུ་བཟུང་བ་གསིལ་ཞིང་བརླ་གཡོན་པ་ཆོས་ལ་བརྟེན་ཐབས་སུ་བཅས་ལ་ཚུལ་དེ་དང་ཡབ་ཀྱི་དབུ་རྣམས་ཀྱང་ཡུམ་ལ་ཅུང་ཟད་འབྱོར་བར་བསྒོམ་ཞིང་། སེམས་མ་བརྒྱད་ཀྱི་ལག་གཡས་ཉི་མ་འབྲུ་ལྔ་མ་བཅིངས་པས་ཡབ་ཀྱི་བརླ་གཡས་ལས་ལ་བརྟེན་པས་འཁྲིལ་ཞིང་དབུ་རྣམས་ཡབ་ལ་ཅུང་ཟད་འདུད་པའི་ཚུལ་དུ་བཅའ་བ་དང་བསམ་པའི་མཐར་སོ་སོའི་སྔགས་དང་བཅས་ཐབས་ཤེས་ཕན་ཚུན་རྒྱས་འདེབས་ཀྱིས་དགྲོལ་བའོ། །མདོར་ན་གོང་གི་ཕྱག་རྒྱ་ཆེན་པོ་སོགས་ཕྱག་རྒྱ་བདུན་ལྡན་རིགས་ལྔའི་སྐབས་བཞིན་དུ་ཐབས་ཤེས་གཉིས་མེད་ཆོས་ཉིད་དབྱིངས་ཀྱི་ངང་དུ་འཁྲིལ་བའོ། ། གསུམ་པ་སྒོ་བ་ཡབ་ཡུམ་གྱི་ཕྱག་རྒྱ་ནི། སྒོ་བཞི་སོགས་རྐང་པ་བདུན་ཏེ། སྒོ་བཞིར་གནས་པའི་ཁྲོ་བོ་ཡབ་ཡུམ་གྱི་ཕྱག་རྒྱ་ནི་སྔར་བཞིན་གཡས་ཀྱི་སོར་མོ་བཞི་ལ་ཧཱུཾ་རེ་དང་གཡོན་གྱི་སོར་མོར་ཛཿཧཱུཾ་བཾ་ཧོཿབཀོད་ནས་ལྷ་སོ་སོའི་སྐུར་གསལ་བས་ཁུ་ཚུར་ལས་རང་རིགས་ཀྱི་སོར་མོ་བསྒྲེང་བའི་རྩེར་ས་བོན་སོ་སོ་ལས། གཤིན་རྗེ་གཤེད་ཀྱི་ནྲྀ་མགོ་གདེངས་པ་དང་། སྟོབས་ཆེན་གྱི་རྡོ་རྗེ་རྩེ་ལྔ་གནོན་ཐབས་དང་། རྟ་མགྲིན་ཐོད་དབྱུག་སྦྲུལ་ཆེན་པོས་དཀྲིས་པ་གནོན་ཐབས་སུ་འཛིན་པ་དང་། བདུད་རྩི་འཁྱིལ་བ་རྡོ་རྗེ་རྒྱ་གྲམ་ལས་ཀྱི་མཚན་མ་གནོན་ཐབས་དང་། ཡུམ་བཞིར་ཐོད་ཁྲག་ཏུ་གྱུར་པར་བསམ་ཞིང་། དེ་ལྟར་སྒོ་བཞིར་གནས་པ་དེ་དག་ཀྱང་ཡབ་ཀྱི་གཡོན་རྣམས་སྡིག་མཛུབ་དང་། ཡུམ་གྱི་གཡས་རྣམས་རིམ་པར་ལྕགས་ཀྱུ་དང་ཞགས་པ་དང་སྥོ་ཊ་སྟེ་ལྕགས་སྒྲོག་དང་ཧོཿཞེས་དགྱེས་པ་སྐྱེད་བྱེད་དྲིལ་བུ་འཛིན་པས་ཕན་ཚུན་དབུ་འདུད་པ་དང་འབྱོ་བའི་ཚུལ་གྱིས་ཡབ་ཡུམ་འཁྲིལ་བའང་གོང་དུ་བཤད་མ་ཐག་པ་བཞིན་ནོ། ། བཞི་པ་ཐུབ་དྲུག་གི་ཕྱག་རྒྱ་ནི། ཐུབ་དྲུག་སོགས་རྐང་པ་གསུམ་སྟེ། ཐུབ་པ་དྲུག་གི་ཕྱག་རྒྱ་ནི་གདུལ་བྱ་མ་ངེས་པ་འདུལ་བའི་ཕྱིར་སྣ་ཚོགས་ཏེ། འོན་ཀྱང་རིགས་མདོར་བསྡུས་ན་ཕྱག་རྒྱ་དྲུག་ཏུ་འདུ་སྟེ། རྡོ་རྗེ་ལས། པི་ཝཾ་གོ་ཆ་གསེག་པར་སྒྲོམ། །པུསྟི་མེ་ཆུར་ཤེས་པར་བྱ། །ཞེས་པས་ཀྲཱིཾ་ཏྲུཾ་སོགས་ཀྱི་ས་བོན་ལས་ཕྱག་མཚན་དེ་དག་ཐུགས་ཀར་འཛིན་པར་བསམ་པ་ཡིན་ནོ། །འདིར་ཐུབ་དྲུག་ལ་ཐབས་ཤེས་ཟུང་འབྲེལ་གྱིས་མཉེས་པར་བྱེད་པའི་ཕྱག་རྒྱ་མེད་དམ་སྙམ་ན། དམིགས་བཅས་རྟགས་ཀྱི་ཡུམ་མེད་ཀྱང་འདིར་ནི་དམིགས་མེད་ཆོས་ཀྱི་དབྱིངས་ཀྱི་ཡུམ་དང་འདུ་འབྲལ་མེད་པས་མཉེས་པར་བྱེད་དོ། ། ལྔ་པ་ཀུན་བཟང་ཡབ་ཡུམ་གྱི་ཕྱག་རྒྱ་ནི། ཀུན་བཟང་སོགས་རྐང་པ་ལྔ་སྟེ། བྱེད་པ་པོ་ཀུན་བཟང་ཕྱག་གཡས་པ་སྟེང་དུ་བཀོད་པའི་མཉམ་བཞག་ལས་ཡེ་ཤེས་ལྔའི་འོད་ཟེར་འཕྲོ་བ། ཡུམ་བྱ་བ་མོ་དེ་ལས་འགྱུར་ཏེ་ཕྱག་གཡོན་སྟེང་དུ་བཀོད་པའི་མཉམ་བཞག་མཛད་ཅིང་། བཞུགས་ཐབས་ཡབ་རྫོགས་པ་རྡོར་སྐྱིལ་དང་། ཡུམ་པདྨོའི་སྐྱིལ་ཀྲུང་དུ་བཞུགས་པའོ། །དེ་ལས་གཞན་ཡང་ཡུམ་གྱི་ཕྱག་རྒྱའི་བྱེ་བྲག་ནི་ཆོས་ཉིད་ཅིར་ཡང་མི་འགག་པས་གཅིག་ཏུ་མ་ངེས་པར་སྣ་ཚོགས་སུ་སྣང་སྟེ། དེ་ཡང་ཇི་ལྟར་ན་དེ་བཞིན་གཤེགས་པ་ཡབ་ཀུན་བཟང་ལྟར་ལས་མ་འགྱུར་བའི་མཉམ་བཞག་ཉིད་དམ། ཡང་ན་རྡོ་རྗེ་ཐལ་མོ་ཐུགས་ཀར་སྦྱར་བ་ཉིད་དོ། །ཡང་བཀའ་སྲོལ་ལ་ལར། རྐང་པ་ཕྱི་མ་གསུམ་པོ་ཕྱག་རྒྱ་སྤྱིའི་རྣམ་གྲངས་བསྡུ་བའི་དོན་དུ་མཛད་དོ། །གདུལ་བྱའི་དབང་གིས་རིགས་སོ་སོར་བསྒྲུབ་པ་ན་དེ་དག་གི་ཕྱག་རྒྱ་རིགས་དེ་དང་དེའི་ཕྱག་མཚན་གྱི་རྣམ་པར་བསྟན་པ་སོགས་མ་ངེས་པ་དང་། ཡང་ན་ལྷ་སོ་སོའི་ཕྱག་རྒྱ་མི་ནུས་པས་བསྡུས་པ་ལ་དགའ་ན་དེ་བཞིན་གཤེགས་པ་རིགས་ལྔ་སོ་སོའི་ཕྱག་རྒྱའམ་སྤྱིའི་དམ་རྒྱ་སྔར་བཤད་པ་ཙམ་དང་། དེའང་མི་ནུས་ན་རྡོ་རྗེ་ཐལ་མོ་འབའ་ཞིག་བཅས་པས་ཀྱང་རུང་ཞེས་བཞེད་དོ། ། གསུམ་པ་ལྟ་བའི་ཕྱག་རྒྱ་ནི། ཕྱག་རྒྱ་ཆེན་པོའི་སོགས་ཚིགས་བཅད་གཅིག་སྟེ། རྟོག་ཚོགས་ཐམས་ཅད་ཕྱག་རྒྱ་ཆེན་པོ་སྣང་སྟོང་དབྱེར་མེད་ལྷ་སྐུ་སྒྱུ་མ་ལྟ་བུའི་རྡོ་རྗེ་གསུམ་གྱི་རོལ་པར་སྣང་བའི་ཚོགས་མཆོག་ནི་སྲིད་ཞིའི་མཐའ་འགོག་བྱེད་ཐབས་དང་ཤེས་རབ་དབྱེར་མི་ཕྱེད་པ་སྟེ། ཡུལ་མེད་རང་གསལ་ཟུང་འཇུག་གི་དོན་ཟབ་མོ་དེ་རྟོགས་པའི་བློ་དང་ལྡན་ཅིང་རྒྱུད་ལ་འབྱོར་ན། ལུས་མ་བསྐྱོད་ཅིང་ཡན་ལག་མ་བསྒུལ་ཡང་ཅི་བྱས་ཅིར་སྣང་ཐམས་ཅད་ཀུན་ལྷ་སྐུ་ཕྱག་རྒྱ་ཆེན་པོའི་ངང་དུ་གནས་པ་ལས་མི་འདའ་བས་ལག་པ་བསྒྱུར་བ་སོགས་བཅོས་མའི་ཕྱག་རྒྱ་ངེས་པར་འཆིང་དགོས་པ་མ་ཡིན་ནོ། ། བཞི་པ་ཕྱག་རྒྱ་སྤྲོས་བཅས་ལ་གཉིས་ཏེ། སྣང་བ་རྣམ་འབྱེད་ལ་ཇི་ལྟར་བསླབ་པ་དང་། དེས་དོན་བྱེད་ཚུལ་ལོ། །དང་པོ་ལའང་གསུམ་སྟེ། སངས་རྒྱས་སྟོང་དང་། ཉི་ཁྲི་བཞི་སྟོང་། བསམ་ཡས་ལྷུན་གྲུབ་ཀྱི་དཀྱིལ་འཁོར་ལ་བསླབ་པའོ། །དང་པོ་ནི། ཡན་ལག་སོགས་རྐང་པ་གསུམ་སྟེ། ཡན་ལག་གི་ལྷ་བཞི་བཅུ་ཐམ་པ་རྩ་ལྷ་ཡབ་ཡུམ་གཉིས་ལ་ལྡན་པར་བསྒོམ་པ་སྟེ། དེ་ཡང་ཡབ་ཀྱི་རྟོག་པའི་གནས་སུ་ཡབ་བཅུ་བདུན་ཐུབ་དྲུག་དང་བཅས་པས་ཉེར་གསུམ། ཡུམ་གྱི་རྟོག་པའི་གནས་སུ་ཡུམ་བཅུ་བདུན་འགོད་དོ། །ཇི་ལྟར་ན། བདག་ཉིད་མི་བསྐྱོད་པར་གསལ་བའི་དབུ་ལ་རྣམ་སྣང་། ལག་གཡས་སུ་ཀུན་བཟང་། གཡོན་ལ་རིན་འབྱུང་། རྐང་པ་གཡོན་ལ་མཐའ་ཡས། གཡས་ལ་དོན་གྲུབ། མིག་རྣ་བ་སྣ་ལྕེ་བཞིའི་གཡས་ཀྱི་ཆའི་རྩ་ལ་རིམ་པར་ས་སྙིང་། ཕྱག་རྡོར། ནམ་སྙིང་། སྤྱན་རས། གཡོན་གྱི་ཆའི་རྩ་ལ། བྱམས་པ། སྒྲིབ་སེལ། ཀུན་བཟང་། འཇམ་དཔལ། ལག་མཐིལ་གཡས་སུ་གཤིན་རྗེ་གཤེད། གཡོན་པར་སྟོབས་ཆེན། རྐང་མཐིལ་གཡོན་པར་རྟ་མགྲིན། གཡས་པར་འཁྱིལ་བ། མཚོག་མར་ལྷ། དཔུང་པའི་སྟ་ཟུར་ལ་ལྷ་མིན། སྙིང་གར་མི། ལྟེ་བར་བྱོལ་སོང་། མགྲིན་པར་ཡི་དྭགས། གསང་གནས་སུ་དམྱལ་བའི་ཐུབ་པ་རྣམས་དགོད་དོ། །དེ་བཞིན་དུ་ཡུམ་རྡོ་རྗེ་དབྱིངས་ཕྱུག་མའི་ཡན་ལག་ལྔ་ལ་སྤྱན་མ་དང་བཟང་མོ་སོགས་ཡུམ་ལྔ། མིག་སོགས་བཞིའི་གཡས་པར་སྒེག་སོགས་ཡུལ་གྱི་ལྷ་མོ་བཞི་དང་། གཡོན་པར་དྷཱུ་པེ་མ་སོགས་དུས་ཀྱི་ལྷ་མོ་བཞི། རྐང་ལག་གི་མཐིལ་རྣམས་སུ་སྒོ་མ་བཞི་རྣམས་གོ་རིམ་ཡབ་ལྟར་དགོད་དེ། ཡབ་ཡུམ་བསྡོམས་པས་ཡན་ལག་གི་ལྷ་བཞི་བཅུ་ནི་རགས་པ་དང་ཕྱིར་གནས་པའི་ཆ་ནས་ཐབས་ཀྱི་ལྷ་ཞེས་བྱའོ། །དེ་ལྟར་ཐབས་ལྷ་བཞི་བཅུ་པོ་དེ་རྣམས་སོ་སོའི་སྲོག་གི་གོར་རང་ཉིད་འདྲ་བའི་ཡན་ལག་གི་ལྷ་ཡེ་ཤེས་སེམས་དཔའ་རྒྱན་དང་ཕྱག་མཚན་སྤངས་པ་ཚོན་གང་བ་རེ་རེ་སྤྲོས་ཏེ་བསྒོམ་པ་ནི། ཕྲ་བ་དང་། ནང་ན་གནས་པའི་ཆ་ནས་ཤེས་རབ་ཀྱི་ལྷ་བཞི་བཅུ་ཞེས་བྱའོ། །ཡན་ལག་གི་ལྷ་བཞི་བཅུ་ཐམ་པ་རྩ་ལྷ་གཉིས་ལ་བཀོད་པའི་ཐབས་ལྷ་བཞི་བཅུ་པོ་རེ་རེ་ལའང་སྐུ་གསུང་ཐུགས་བྱིན་རླབས་ཀྱི་ལྷ་གསུམ་གསུམ་འཕྲོ་བས་བརྒྱ་ཉི་ཤུར་འགྱུར་རོ། །ཐབས་ཀྱི་ལྷ་དང་བྱིན་རླབས་ཀྱི་ལྷ་བསྡོམས་པ་བརྒྱ་དྲུག་ཅུ་པོ་རེ་རེ་ལའང་རང་རང་གི་རིགས་ཀྱི་བདག་པོས་གཙོ་བྱས་པའི་དབུ་རྒྱན་གྱི་ལྷ་ལྔ་ལྔ་སྟེ་བརྒྱད་བརྒྱའོ། །མདོར་ན་ཐབས་ཀྱི་ལྷ་བཞི་བཅུ། ཤེས་རབ་ཀྱི་ལྷ་བཞི་བཅུ། སྐུ་གསུང་ཐུགས་ཀྱི་ལྷ་བརྒྱ་ཉི་ཤུ། དབུ་རྒྱན་གྱི་ལྷ་བརྒྱད་བརྒྱ་སྟེ། ཀུན་དྲིལ་བས་རྩ་ལྷ་ཡབ་ཡུམ་གཉིས་ལ་ཡན་ལག་དང་ལྷག་པའི་ལྷ་སྟོང་བསྒོམ་པ་ནི་སངས་རྒྱས་སྟོང་གི་དཀྱིལ་འཁོར་ལ་བསླབ་པའོ། ། གཉིས་པ་ནི། དེ་ལྟར་ལྡན་པའི་སོགས་རྐང་པ་གསུམ་སྟེ། སངས་རྒྱས་སྟོང་གི་དཀྱིལ་འཁོར་དེ་དག་གང་ལ་ཇི་ལྟར་ལྡན་པའི་ལྷ་གཙོ་མཆོག་མི་བསྐྱོད་པ་ཡབ་ཡུམ་གྱིས་མཚོན་ཏེ། ལྷ་གཞན་རྣམས་ལའང་རིགས་འགྲེ་ཤེས་པར་བྱ་ཞིང་། ཁྱད་པར་གང་རྩ་ལྷར་སོང་བའི་ཡབ་ཡུམ་གྱི་རྟོག་པའི་གནས་སུ་ཀུན་བཟང་ཡབ་ཡུམ་འགོད་པ་ནི་ཐམས་ཅད་ལ་འདྲའོ། །དེ་ལྟར་ངེས་པར་བྱས་ཏེ། རྒྱལ་བ་རིགས་བཞི་དང་། རྒྱལ་མཆོག་ཀུན་ཏུ་བཟང་པོ་ཡབ་ཡུམ་སྟེ་ཟུང་ལྔ་ལའང་སྔར་བཀོད་པ་དེ་བཞིན་དུ་བརྩིས་པས་སྟོང་ཚོ་ལྔ། སེམས་དཔའ་བརྒྱད་དང་སྒོ་སྐྱོང་བཞི་སྟེ་ཡབ་ཡུམ་ཟུང་བཅུ་གཉིས་ལ་སྟོང་ཚོ་བཅུ་གཉིས། ཐུབ་དྲུག་ལ་ཡུམ་མེད་པས་གཡས་ཀྱི་ཆ་ལ་ཡབ་ཉི་ཤུ་རྩ་གསུམ་དང་། གཡོན་གྱི་ཆ་ལ་ཡུམ་བཅུ་བདུན་པོ་རྣམས་རྐང་ལག་གི་ལྷ་གནས་དེ་དང་དེའི་རྩའི་མདུན་རྒྱབ་དང་། ཕྱི་ནང་གི་སེམས་དཔའ་ཡབ་ཡུམ་རྣམས་དབང་རྩའི་ཕྱི་དང་ནང་དུ་འགོད་པའི་ངེས་པས་ཐུབ་པ་དྲུག་རེ་རེ་ལའང་སྟོང་ཚང་བས་སྟོང་ཚོ་དྲུག །དེ་དག་གི་སྟེང་དུ་གཙོ་བོ་མི་བསྐྱོད་པའི་སྟོང་ཚོ་གཅིག་སྟེ། མདོར་ན་སྟོང་ཚོ་ཉི་ཤུ་རྩ་བཞི་པོ་ཐམས་ཅད་ཀྱང་འོད་ཟེར་འཕྲོ་ཞིང་གཟི་བརྗིད་འབར་བར་བསྒོམ་པ་ནི་ཉི་ཁྲི་བཞི་སྟོང་གི་དཀྱིལ་འཁོར་ལ་བསླབ་པའོ། ། གསུམ་པ་ནི། དེ་ལ་སོགས་ཏེ་བསམ་མི་ཁྱབ་ཅེས་ཏེ། སྟོང་དང་ཉི་ཁྲི་བཞི་སྟོང་པོ་དེ་ལ་སོགས་ཏེ་སྣང་འབྱེད་ཀྱི་ཏིང་ངེ་འཛིན་ལས་སུ་རུང་བས་སྣང་བ་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་རབ་འབྱམས་བསམ་གྱིས་མི་ཁྱབ་པར་གསལ་བ་ནི་བསམ་ཡས་ལྷུན་གྲུབ་ཀྱི་དཀྱིལ་འཁོར་ལ་བསླབ་པའོ། ། གཉིས་པ་དེས་དོན་བྱེད་ཚུལ་ནི། ཕྱོགས་བཅུ་སོགས་ཚིགས་བཅད་གཉིས་ཏེ། དོན་བྱ་བའི་ཡུལ་ཕྱོགས་བཅུ་དང་དུས་བཞིས་བསྡུས་པའི་ཞིང་ཁམས་བསམ་ཡས་པ་རྣམས་སུ་འདུལ་བྱེད་དཀྱིལ་འཁོར་གྱི་འཁོར་ལོ་དེ་ལྟར་སྤྲོས་པས་གདུལ་བྱ་འགྲོ་བའི་དོན་རྣམས་མོས་པ་བཞིན་དུ་འདུལ་ཐབས་སོ་སོར་སྟོན་ཅིང་། དེར་མ་ཟད་ཐེག་པ་མཐོ་བ་གསང་སྔགས་དང་བྱང་སེམས། དམན་པ་ཉན་རང་སྟེ་ཡང་དག་པའི་གྲུབ་མཐའ་ལ་ཞུགས་པ་ཐམས་ཅད་དང་། ཕྱིན་ཅི་ལོག་གི་གྲུབ་མཐའ་ལ་ཞུགས་པ་མུ་སྟེགས་བྱེད་རྣམས་དང་། གང་ལའང་མ་ཞུགས་པའི་སྐྱེ་བོ་བསམ་ཡས་དང་། དེ་དག་ཀྱང་ལྷ་སོགས་ཞི་བའི་རིགས་དང་། བདུད་སྲིན་སོགས་ཁྲོ་བོའི་རིགས་ཀྱི་གདུལ་བྱའི་ཚོགས་ཆེན་པོ་ཐམས་ཅད་ལ་སོ་སོར་མོས་པ་དང་མཐུན་པར་བྱས་པའི་འདུལ་བྱེད་ཀྱི་སྐུའི་བཀོད་པ་ཀུན་ཏུ་སྣང་བར་མཛད་ནའང་། ཕྱག་རྒྱའི་དཀྱིལ་འཁོར་ལས་གཡོས་པ་མི་མངའ་ཞིང་རྩོལ་རྟོག་དང་བྲལ་བས་དོན་མཛད་པ་ནི་དཔེར་ན་ཟློས་གར་མཁན་ཉིད་དང་འདྲ་བ་སྟེ། གར་མཁན་དེ་ཡང་ལུས་གཅིག་པོ་དེ་ལས་མ་གཡོས་བཞིན་དུ་རྣམ་འགྱུར་གྱི་བཀོད་པ་སྣ་ཚོགས་སྟོན་པའི་ཕྱིར་རོ། ། ལྔ་པ་ཕྱག་རྒྱའི་རྣམ་གྲངས་བསྡུ་བ་ནི། མདོར་ན་ཕྱག་རྒྱ་སོགས་ཚིགས་བཅད་གཉིས་ཏེ། མདོར་ན་ལུས་དང་རྟོག་པའི་ཡན་ལག་གི་ཕྱག་རྒྱ་ཐམས་ཅད་ནི། རྣམ་པ་འདི་ཁོ་ནའོ་ཞེས་སམ། གྲངས་གཅིག་ཏུ་ངེས་ཞེས་བརྗོད་དུ་མེད་དེ། ཇི་ལྟར་ན། ལུས་ཀྱི་ཡན་ལག་གི་དབང་དུ་གཉིས་དང་གསུམ་གཅིག་ཏུ་བསྡོམས་ཏེ་ཡན་ལག་ལྔ་པོ་རེ་རེའང་རིགས་ལྔ་ཡབ་ཡུམ་བཅུ་བཅུར་རྣམ་པར་འཕྲོ་བས་ཕྱག་རྒྱ་ལྔ་བཅུའམ། རྟོག་པའི་ཡན་ལག་གི་དབང་དུ་ཐབས་ཤེས་གཉིས་བསྡོམས་པའི་ལྷ་བརྒྱད་ཅུ་དང་། རྡོ་རྗེ་གསུམ་དུ་བྱིན་གྱིས་རློབ་པའི་ལྷ་བརྒྱ་ཉི་ཤུ། དེ་དག་ལས་ཀྱང་རྣམ་པར་འཕྲོ་བ་དབུ་རྒྱན་གྱི་ལྷ་བརྒྱད་བརྒྱ་སྟེ་སངས་རྒྱས་སྟོང་གི་དཀྱིལ་འཁོར་ལ་སོགས་པའོ། །དེ་བས་ན་ལུས་ཀྱི་ཡན་ལག་བསྐྱོད་པ་དང་། རྟོག་པའི་ཡན་ལག་སྤྲོ་བའང་ལྷའི་སྐུ་གསུང་ཐུགས་ཀྱི་ཕྱག་རྒྱའི་དེ་བཞིན་ཉིད་ལས་མི་འདའ་བར་བསླབ་པར་བྱ་བ་སྟེ། དེ་དག་ཀྱང་མདོར་བསྡུ་ན་ཡན་ལག་བསྒུལ་ཞིང་ལུས་བསྐྱོད་པ་ཅི་སྣང་ཅི་བྱས་ཐམས་ཅད་ཀུན་རང་བཞིན་ཇི་ལྟ་བར་རྟོགས་གོམས་ཀྱིས་ལྷ་སྐུ་ཕྱག་རྒྱ་ཆེན་པོའི་ངང་དུ་གནས་པ་ལས་མི་གཡོ་ཞིང་། དེ་ལྟར་གནས་པའི་དུས་ཉིད་ནའང་དེར་འཛིན་མེད་པའི་ཕྱིར། མི་གནས་པའང་མ་ཡིན་ལ། གནས་པའང་མིན་ཏེ་མཐའ་དང་བྲལ་བའི་ཆོས་ཉིད་དོ་ཞེས་དེ་སྐད་དུ་སྤྱོད་ཡུལ་ཡོངས་སུ་དག་པའི་རྒྱལ་མཆོག་སྟོན་པ་ཉིད་ཀྱིས་བཤད་ཅེས་སྡུད་པ་པོའི་ཚིག་གོ །གསུམ་པ་ལེའུའི་མཚན་ནི། གསང་བའི་སོགས་ནི། རྒྱུད་འདི་ལ་ལེའུ་ཉི་ཤུ་རྩ་གཉིས་སུ་ཡོད་པ་ལས། འདིས་ལུས་དང་རྟོག་པའི་ཡན་ལག་ཐམས་ཅད་ཕྱག་རྒྱའི་དཀྱིལ་འཁོར་དུ་བྱིན་གྱིས་བརླབས་ནས་རང་བཞིན་ལྟ་བ་ཏིང་ངེ་འཛིན་གསུམ་གྱི་ཕྱག་རྒྱ་སྤྲོས་ནས་བསྟན་པའི་ལེའུ་སྟེ་བརྒྱད་པའོ།། །། ལེའུ་དགུ་པའི་འགྲེལ་པ།ལེའུ་དགུ་པ་ལ་གསུམ་སྟེ། ལོ་རྒྱུས་དང་། གཞུང་དང་། མཚན་ནོ། །དང་པོ་ནི། དེ་ནས་སོགས་ཏེ། ལྷག་པ་ཏིང་ངེ་འཛིན་གྱི་དཀྱིལ་འཁོར་བསྟན་པ་དེ་ནས་ལྷག་པ་གཟུགས་བརྙན་གྱི་དཀྱིལ་འཁོར་སྟོན་པའི་ཕྱིར་དེ་བཞིན་གཤེགས་པ་ཆོས་ཐམས་ཅད་དབྱེར་མེད་བླང་དོར་དང་བྲལ་བ་ཟག་མེད་བདེ་བའི་ཡེ་ཤེས་ལ་དགྱེས་པ་ཆེན་པོར་ལོངས་སྤྱོད་པའི་བདག་ཉིད་ཀུན་ཏུ་བཟང་པོས་སྐུ་གསུང་ཐུགས་ཡེ་ཤེས་རྡོ་རྗེའི་གསང་བ་གསུམ་ཐོབ་པར་བྱེད་པའི་ཐབས་ལས་མི་འདའ་བའི་དམ་ཚིག་དཀྱིལ་འཁོར་དབང་སྒྲུབ་སྟེ་ལས་ཀྱི་རིམ་པ་གསུམ་དུ་བཀོད་ཅིང་། དེ་ཉིད་སྟོན་པའི་དགོངས་པ་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། ། གཉིས་པ་གཞུང་ལ་གསུམ་སྟེ། དཀྱིལ་འཁོར་དང་། དབང་དང་། སྒྲུབ་པའོ། །དང་པོ་ལ་གཉིས་ཏེ། སྔོན་དུ་སློབ་དཔོན་གྱིས་བསྙེན་པ་བྱ་བ་དང་། དཀྱིལ་འཁོར་གྱི་ལས་རིམ་དངོས་སོ། །དང་པོ་ནི། ཤིན་ཏུ་ཕྲ་བའི་དམ་ཚིག་མཆོག །ཅེས་ཏེ། ཡིད་དང་མཐུན་པའི་གནས་སུ་ཏིང་ངེ་འཛིན་གསུམ་གྱིས་ཁོག་ཕུབ་ནས་ཡི་གེ་དང་ཕྱག་མཚན་དང་ལྷ་སྐུ་སྟེ་རྡོ་རྗེ་གསུམ་གྱི་ཕྱག་རྒྱ་ཤིན་ཏུ་ཕྲ་བའི་ཏིང་ངེ་འཛིན་བསྒོམ་པའི་སྒོ་ནས་མཚན་དུས་གྲངས་གསུམ་གང་རུང་གི་བསྙེན་པ་རྫོགས་པར་བྱ་བ་སྟེ། འདི་ནི་གཞན་དོན་གཉེར་བའི་སློབ་དཔོན་གྱིས་ངེས་པར་འདའ་མི་རུང་བའི་དམ་ཚིག་གི་མཆོག་སྟེ་གཙོ་བོ་ཡིན་པས་འབད་པར་བྱའོ། ། གཉིས་པ་ལ་གཉིས་ཏེ། ཞི་བའི་དཀྱིལ་འཁོར་བསྟན་པ་དང་། དེས་ཁྲོ་བོ་དང་མཆོག་གི་དཀྱིལ་འཁོར་མཚོན་པར་བསྟན་པའོ། །དང་པོ་ལའང་། རྡོ་རྗེ་ལས་རིམ་ལས། ས་གཞི་མཉམ་དང་ཚད་ཐིག་དང་། །ཚོན་དང་བྲི་བ་རྣམ་པ་དང་། །རབ་གནས་སྦྱིན་སྲེག་དཀྱིལ་འཁོར་དུ། །འཇུག་དང་ཞུགས་པའི་ཡོན་ཏན་ནོ། །ཞེས་དོན་བཅུ་ལས། དང་པོ་ལའང་། ས་གཞི་མཉམ་པ་སྤྱིར་བཤད་པ་དང་། གོ་མ་ཡེ་བཏང་བ་བྱེ་བྲག་ཏུ་བཤད་པའོ། །དང་པོ་ནི། ཡང་ན་ས་གཞི་རབ་མཉམ་ལ། །ཞེས་ཏེ། སྐལ་ལྡན་གཞུག་བྱའི་དཀྱིལ་འཁོར་རྒྱུད་ཚོད་དང་སྦྱར་བ་བཞི་ལས། རང་བཞིན་ཡེ་ཤེས་དང་། ལྷག་པ་ཏིང་ངེ་འཛིན་དང་། རིག་པ་ཉམས་ཀྱི་དཀྱིལ་འཁོར་གསུམ་དུ་འཇུག་མི་ནུས་པའི་གང་ཟག་རྣམས། དེ་ལས་གཞན་ཡང་ལྷག་པ་གཟུགས་བརྙན་གྱི་དཀྱིལ་འཁོར་བཞེངས་ཏེ། དེར་འཇུག་པའི་དབང་དུ་བྱས་ན། ཐོག་མར་ས་དང་སར་འཛིན་གྱི་རྟོག་པ་རིག་པའི་དབྱིངས་སུ་མཉམ་པར་བྱ་བའི་ཕྱིར་ས་གཞི་སའི་ཆོ་གས་རབ་ཏུ་མཉམ་པར་བྱ་སྟེ། དེ་ལའང་སྔ་མ་ལས། གཞི་དང་རང་མཚན་བསླང་དབང་དང་། །སྦྱང་བྱིན་བསྲུང་དང་བཟུང་བ་ནི། །དང་པོ་ཉིད་ལ་ཉིད་དུ་བཤད། །ཅེས་པས། ས་དེར་དཀྱིལ་འཁོར་རུང་མི་རུང་བརྟག་པའི་ཕྱིར་སྤྱིར་གནམ་ས་བར་གསུམ་གྱི་དཔྱད་དེ་སའི་གཞི་ལ་བརྟག་པ། བྱེ་བྲག་ཏུ་ས་རང་གི་མཚན་ཉིད་ལ་བརྟག་ཅིང་། བརྟགས་པས་རུང་བར་མཐོང་ན་སྣང་བ་སའི་བདག་པོ་ལ་རིན་འཇལ་བ་དང་། མི་སྣང་བ་དཀྱིལ་འཁོར་གྱི་ལྷ་ལ་འདོད་དོན་གསོལ་ཞིང་ས་བདག་འཁོར་དང་བཅས་པར་བདེན་པ་བརྗོད་དེ་བསླངས་ལ། གཞི་དེར་དབང་མཆོག་གི་ཕུར་བུ་གདབ་པས་དབང་དུ་བྱ་བ་དང་། ལྟོ་འཕྱེ་སྟོན་གསུམ་མགོ་ཤར་དུ་བལྟ་བ་སོགས་གཡས་བསྐོར་གྱི་གནས་ལུགས་ཤེས་པས་ལྟོ་བའི་ཐད་ནས་བརྐོས་ལ། ཆུ་སའི་སྒོ་ནས་པྲ་བརྟག་ཅིང་གཏེར་བཅུག་སྟེ། སྟེགས་བུ་དབུས་བགས་ཀྱིས་མཐོ་ཞིང་ཤར་དང་བྱང་ཡིད་ཙམ་གཞོལ་བ་བརྩིགས་པ་ལ་བ་བྱུང་དང་རྫས་སུམ་ཅུས་སྐྱང་ནུལ་བྱ་བ་རྣམས་ནི་ལས་དང་བྱ་བས་སྦྱང་བའོ། །གཞན་ཡང་ཞི་བའི་མེ་དང་། སྔགས་རྒྱ་དང་། མཚན་མེད་སྟོང་ཉིད་ཀྱི་ངང་ལས་མཚན་བཅས་གཞི་དེར་གཞལ་ཡས་ཁང་བསྒོམ་པའི་ཏིང་ངེ་འཛིན་རྣམས་ཀྱིས་སའི་ཉེས་སྐྱོན་སྦྱང་བ་དང་། དེ་ནས་སློབ་དཔོན་རྡོ་རྗེའི་འགྲོས་ཀྱིས་ཤར་སྒོ་ནས་ཞུགས་ཏེ་དབུས་སུ་གནས་པས་བདག་ཉིད་གཙོ་བོ་ཡབ་ཡུམ་དུ་བསྐྱེད་པའི་སེམས་སྤྲིན་ལས་འཁོར་རྣམས་སྤྲོ་ཞིང་། མཁའ་ཁྱབ་ཀྱི་རྒྱལ་བ་རྣམས་མཆོད་ནས། ཡུམ་བཞིའི་ང་རྒྱལ་འཛིན་པའི་ཕྱོགས་ཀྱི་སློབ་མ་བཞིས་སློབ་དཔོན་ལ་མཆོད་ཅིང་གསོལ་བ་བཏབ་རྗེས། སློབ་དཔོན་གྱིས་རྒྱལ་བ་རྣམས་བསྐུལ་ཞིང་བྱིན་བསྡུས་ནས། རང་ཉིད་ཞེ་སྡང་རྡོ་རྗེ་སྙེམས་པས་འབར་བའི་སྤྱན་དང་རྡོ་རྗེའི་འགྲོས་ཀྱིས་ས་གཞི་རྡོ་རྗེའི་རང་བཞིན་དུ་བྱིན་གྱིས་རློབ་ཅིང་། ཁྲོ་བཅུའི་ཕུར་བུ་གདབ་པ་དང་མཚོན་ཆ་ལྔའི་ར་བས་ས་བསྲུང་བར་བྱ་བ་རྣམས་ཏེ། བཟུང་བ་ནི་འོག་ཏུ་མཛད་དོ། །དེ་དག་ནི་ནུབ་དང་པོའི་བྱ་བའོ། །གཉིས་པ་ནི། འབྲུ་ལྔ་སོགས་རྐང་པ་གསུམ་སྟེ། ཕུང་པོ་ལྔ་སྐུ་ལྔར་དག་བྱེད་འབྲུ་ལྔ། དབང་པོ་ལྔ་ཕྲིན་ལས་ལྔར་དག་བྱེད་སྤོས་ལྔ། ཡུལ་ལྔ་ཡོན་ཏན་ལྔར་དག་བྱེད་རིན་ཆེན་ལྔ། རྣམ་ཤེས་ལྔ་ཡེ་ཤེས་ལྔར་དག་བྱེད་སྙིང་པོ་ལྔ་དང་། འདོད་ཡོན་ལྔ་གསུང་ལྔར་དག་བྱེད་སྨན་ལྔ་དང་། ཁམས་ལྔ་རིགས་ལྔར་དག་བྱེད་བདུད་རྩི་ལྔ་སྟེ། རྫས་སུམ་ཅུ་པོ་ཉིད་རབ་ཏུ་མཉམ་པར་སྦྱར་བའི་ལྡེ་གུས་དཀྱིལ་འཁོར་གྱི་གཞི་ལ་གོ་མ་ཡེ་བཏང་བར་བྱའོ། །འདི་ཉིད་ཊཱི་ཀ་རྣམས་སུ་གཞུང་གི་འགྲོས་ལྟར་ཐིག་གི་ཁོངས་སུ་བསྡུས་ནའང་། རྡོ་རྗེ་ལས་རིམ་ལྟར་འདིར་ལས་དང་བྱ་བས་སྦྱང་བའི་ཁོངས་སུ་སྡེབས་ཤིང་། དཀྱིལ་འཁོར་ཁང་པ་རྙིང་པ་ལྟ་བུར་ནི་ཐིག་དང་སྦྲེལ་ཡང་ལེགས་པར་འགྱུར་རོ། ། གཉིས་པ་ཚད་ལ་གཉིས་ལས། ལྷག་པ་གཟུགས་བརྙན་གྱི་དཀྱིལ་འཁོར་གྱི་ཚད་ནི། དཀྱིལ་འཁོར་ཁྲུ་གང་སོགས་རྐང་པ་གསུམ་དང་། ཡང་ན་ཁྲུ་ནི་སོགས་རྐང་པ་གཉིས་ཏེ། གནས་ཁང་དང་འབྱོར་པའི་ཁྱད་པར་ལས་ཆུང་འབྲིང་ཆེ་གསུམ་དུ་འགྱུར་བས་དཀྱིལ་འཁོར་ལོགས་རེར་ཁྲུ་གང་གི་ཚད་དུ་བྱ་བའམ། ཡང་ན་དེ་བཞི་འགྱུར་ལུས་གང་གི་ཚད་དུ་བྱ་སྟེ་ཆུང་ཚད་གཉིས་སོ། །ཡང་ན་ལུས་ནི་གསུམ་གྱི་ཚད་དེ་ཁྲུ་བཅུ་གཉིས་པའམ། ཡང་ན་ཁྲུ་ནི་བཅུ་དྲུག་གི་ཚད་གཉིས་ནི་འབྲིང་ཚད་དང་། ཁྲུ་ཉི་ཤུའམ་ཡང་ན་ཉི་ཤུ་རྩ་ལྔར་བྱ་བ་གཉིས་ནི་ཆེ་ཚད་དོ། །དེ་ནས་མཆོག་གི་དཀྱིལ་འཁོར་ལྷག་པ་ཏིང་ངེ་འཛིན་གྱི་ཚད་ནི། ཡང་ན་རྒྱང་གྲགས་སོགས་རྐང་པ་གསུམ་སྟེ། རྣལ་འབྱོར་པ་ཏིང་ངེ་འཛིན་གྱི་རྩལ་ཞན་པ་དང་། འབྲིང་དང་། རབ་གསུམ་གྱི་དགོངས་པའི་ཁྱད་པར་ལས་ཆུང་འབྲིང་ཆེ་གསུམ་སྟེ། བྲིས་དཀྱིལ་ལས་གཞན་ཡང་ན་རྒྱང་གྲགས་གཅིག་གི་ཚད་དུ་བསྒོམ་པ་ཆུང་ཚད་དེ། དེའི་དོན་ནི་མཛོད་ལས། སོར་མོ་ཉི་ཤུ་བཞི་ལ་ཁྲུ། །ཁྲུ་བཞི་ལ་ནི་གཞུ་གང་ངོ་། །དེ་དག་ལྔ་བརྒྱ་དག་ལ་ནི། །རྒྱང་གྲགས་དེ་ལ་དགོན་པར་འདོད། །དེ་བརྒྱད་དཔག་ཚད་ཅེས་བྱའོ། །ཞེས་སོ། །འབྲིང་དཔག་ཚད་གཅིག་གི་ཚད་དམ། །ཡང་ན་རབ་ཀྱི་ཚད་ནམ་མཁའི་དབྱིངས་ནི་བསམ་ཡས་པར་ཁྱབ་པའི་སངས་རྒྱས་སྟོང་དང་ཉི་ཁྲི་བཞི་སྟོང་དང་བསམ་ཡས་ལྷུན་གྲུབ་ཀྱི་དཀྱིལ་འཁོར་སོགས་སྣ་ཚོགས་བརྗོད་ཀྱིས་མི་ལང་བ་བསྒོམ་པའམ། ལྷག་པ་ཏིང་ངེ་འཛིན་གྱི་གཟུགས་བརྙན་ཞེས་གྲགས་པ་དཀྱིལ་འཁོར་དངོས་སུ་སྤྲུལ་ནས་སྟོན་པ་སྟེ། ལམ་རིམ་ལས། སངས་རྒྱས་སྟོང་གི་དཀྱིལ་འཁོར་སོགས། །རྡོ་རྗེའི་ཐིག་ཚད་དོར་ཙམ་གྱིས། །རྒྱང་གྲགས་ལ་སོགས་མཚན་མ་ཡི། །དཀྱིལ་འཁོར་ཕྱག་རྒྱ་གསལ་ལྡན་པ། །ཏིང་འཛིན་ལྷག་པའི་གཟུགས་བརྙན་ཡིན། །ཞེས་གསུངས་ཏེ། སྔོན་སངས་རྒྱས་གསང་བས་མཚོ་མ་ཕམ་ལ་ཐིག་བཏབ་ནས་མཉྫུ་ཤྲཱི་སོགས་ལ་རྡོ་རྗེའི་དབྱིངས་ཀྱི་དཀྱིལ་འཁོར་དངོས་སུ་བསྟན་པ་དང་། སློབ་དཔོན་པདྨས་སྟག་ཚང་དུ་མཁར་ཆེན་བཟའ་ལ་རྡོ་རྗེ་གཞོན་ནུའི་དཀྱིལ་འཁོར་ནམ་མཁའ་དང་མཉམ་པར་བསྟན་ནས་དབང་བསྐུར་བ་ལྟ་བུ་སྟེ། གཞན་དུ་སྤྲུལ་པའི་དཀྱིལ་འཁོར་ཞེས་གྲགས་པ་དེའོ། །གང་དག་ལྷག་ཏིང་གི་ཚད་འདིར་སྨོས་པ་ནི་སྐབས་འཆོལ་ལོ་སྙམ་ན། སྐྱོན་མེད་དེ། ལྷག་པ་གཟུགས་བརྙན་གྱིས་མཚོན་ནས་ལྷག་པ་ཏིང་ངེ་འཛིན་གྱི་དཀྱིལ་འཁོར་བསྒོམ་པའི་ཕྱིར་འབྲེལ་བས་འཕྲོས་དོན་དུ་སྨོས་པའོ། ། གསུམ་པ་ཐིག་ནི། རིག་པས་ཐིག་ནི་གདབ་པར་བྱ། །ཞེས་དང་། ཕུར་བུ་སོགས་ཚིགས་བཅད་གཅིག་སྟེ། དེ་ལའང་དོན་བདུན་ལས། དང་པོ་རྒྱུ་ནི། སྤྱིར་མི་འགྱུར་བའི་དོན་གྱིས་ཐིག་སྟེ། དེའི་རྒྱུར་འགྱིང་བསྐོར་གྱི་ཕུར་བུ་གཉིས་འདུ་བྱ་ཞིང་། སྲད་བུ་ལ་གཉིས་ལས། ཡེ་ཐིག་གི་རྒྱུ་པདྨའི་རྒྱུས་པ་དང་། དམ་ཐིག་གི་རྒྱུ་རས་བལ་འཇམ་པོའོ། །གྲོགས་ནི། གོས་རྒྱན་བཟང་པོས་མཛེས་པར་བརྒྱན་པའི་མཚན་ལྡན་ཡིད་དུ་འོང་བའི་གྲོགས་ཕྱག་རྒྱ་ལོ་བཅུ་དྲུག་ལོན་པས་འཁེལ་ལོ། །ཚད་ནི། རིང་ཐུང་དཀྱིལ་འཁོར་ཉིས་འགྱུར་ལ། །སྦོམ་ཕྲ་སྒོ་ཡི་ཉི་ཤུ་ཆའོ། །གྲངས་ནི། ཚོན་གྱིས་ཁ་དོག་སོ་སོར་ཕྱེ་བ་སྟེ། ཡེ་ཤེས་ཀྱི་ཐིག་སྐུད་ཁ་དོག་ཉི་ཤུ་རྩ་ལྔའམ་ལྔ་སྒྲིལ་དང་། དམ་ཚིག་གི་ཐིག་སྐུད་ཁ་དོག་དགུའམ་སུམ་སྒྲིལ་ལོ། །རབ་གནས་ནི། ཡེ་ཐིག་གདབ་པའི་སྲད་བུ་ཡེ་ཤེས་ལྔ་དང་། དམ་ཚིག་གི་ཐིག་སྐུད་སྐུ་གསུང་ཐུགས་ཀྱི་ངོ་བོར་བྱིན་གྱིས་རློབ་པའི་ཆོ་ག་རིགས་མཐུན་གྱི་ཡིག་འབྲུར་བསྐྱེད་པ་ལ་མཁའ་ཁྱབ་ཀྱི་རྒྱལ་བ་རྣམས་སྦྱོར་བའི་བྱིན་བསྡུ་ཞིང་བསྟིམ་པ་ལ་སོགས་ཕུན་སུམ་ཚོགས་པར་བྱའོ། །གདབ་པའི་ཐབས་ནི། ཐིག་གཡོག་རིག་མ་དངོས་སམ་དེར་མོས་པ་ལ་ཐིག་སྣ་གཏད་དེ་ཡབ་ཡུམ་ལྷར་གསལ་བར་བྱས་པས་དམ་ཚིག་གི་ཐིག་སྐུ་གསུང་ཐུགས་ཀྱི་རང་བཞིན་ཅན་དུ་བཏབ་པའི་སྟེང་དུ་ཡེ་ཤེས་ཀྱི་ཐིག་ནི་མཁའ་ལ་བཏབ་པས་སྐུ་གསུང་ཐུགས་རེ་རེའང་ཡེ་ཤེས་ལྔ་ལྔའི་རང་བཞིན་དུ་རྒྱས་གདབ་པར་བྱ་བའོ། །ཉེས་པ་སྤངས་པ་ནི། དཀྱིལ་འཁོར་གྱི་ལས་ལ་མཁས་པས་ལག་ལེན་དང་ལྡན་པའི་རྡོ་རྗེ་སློ་དཔོན་ཆེན་པོས་རིག་པ་མ་ཡེངས་པར་བསྒྲིམས་ཏེ། ཐིག་སྐུད་མ་ཆད་ཅིང་ཐིག་སྣ་མ་ཤོར་བ་དང་། བསྐོར་འདུག་གི་ཕྱོགས་མ་འཁྲུལ་བ། ཐིག་རྒྱུན་མ་ཆད་པ། ཐིག་ལ་མི་འགོམ་པའི་སྒོ་ནས་གདབ་ཅིང་། གལ་ཏེ་འགོམ་དགོས་ན་ཧྲཱིཿའི་སྒྲ་དང་འདེགས་པའི་རྒྱས་ཐིག་མཁའ་ལ་བཏེག་པའི་འོག་ཏུ་འཛུལ་ནས་ལས་བྱའོ། ། བཞི་པ་ཚོན་ནི། རིགས་ཀྱི་དཀྱིལ་འཁོར་ལྔ་རྣམས་བསྒོམ། །ཞེས་དང་། མ་མཐོང་སོགས་ཚིགས་བཅད་གཅིག་སྟེ། དེ་ལའང་དོན་དྲུག་ལས། དགོས་ཆེད་ནི། ཡེ་ཤེས་ལྔས་འགྲོ་བ་ཀུན་ལ་ཁྱབ་ཀྱང་དེའི་དོན་མ་མཐོང་བའི་རྨོངས་པ་རྣམས་ལ་རང་གནས་ཀྱི་དོན་བསྟན་པར་བྱ་བའི་ཕྱིར་ཚོན་ཁ་དོག་སོ་སོར་ཕྱེ་བའོ། །རྒྱུ་ནི། འབྱོར་པ་རབ་ཀྱིས་རིན་ཆེན་སྣ་ལྔ་དང་། འབྲིང་གིས་འབྲུའམ་སྨན་ཁ་དོག་བསྒྱུར་བ་དང་། ཐ་མས་ས་ཚོན་ཁ་དོག་ལྔ་ལ་བྱའོ། །གྲངས་ནི། ཁ་དོག་རྒྱས་པར་ན་རིགས་རེ་རེའང་ལྔ་ལྔར་ཕྱེ་བས་ཉི་ཤུ་རྩ་ལྔའམ། ཡང་ན་ཁ་དོག་ལྔ་ཡི་གྲངས་སུ་བསྡུས་ཀྱང་རུང་ངོ་། །རབ་གནས་ནི། ས་བོན་ཕྱག་མཚན་ལས་རིགས་ཀྱི་དཀྱིལ་འཁོར་ཐབས་ཤེས་ཟུང་འབྲེལ་ལྔའམ། རྒྱས་པར་ན་སོ་སོའི་རིགས་ཆུང་དང་བཅས་པས་ལྷ་ལྔ་བཅུ་རྣམས་བསྒོམས་པ་ཞུ་བ་ལས་རིན་པོ་ཆེའི་རྡུལ་ཕྲ་རབ་ཏུ་གྱུར་པར་བསམ་པའོ། །ཚོན་བཀྱེ་ལུགས་ནི། ལག་སོར་ལ་དཔའ་བོ་འབྲུ་ལྔ་བཀོད་ནས་དང་པོར་སློབ་དཔོན་གྱིས་འགྱིང་ཕུར་བཏབ་པའི་ཤུལ་དུ་ཚོན་སྣ་ལྔས་བཀང་རྗེས་ཤར་དུ་བལྟ་བས་གཡོན་པའི་ཁུ་ཚུར་གྱིས་དབང་ལྡན་ནས་བརྩམས་ཏེ་པཉྩ་རེ་ཁཱ་སྒོ་ཚད་གཅིག་གི་ཚད་དུ་བྲི་བར་བྱ་ཞིང་། པྲ་བརྟག་པའི་དོན་དུ་དེ་ལ་ཀ་པཱ་ལ་བཀབ་སྟེ་བཞག་ནས། སློབ་བུ་རྣམས་དཀྱིལ་འཁོར་རྒྱས་འབྲིང་བསྡུས་གསུམ་གང་གིས་འདུལ་བའི་ཆོ་ག་སྟེ་དེའི་ལུགས་བཞིན་དུ་བག་དང་ལྡན་པས་དགྱེ་བར་བྱའོ། །དེ་ལྟར་ཡང་རྣམ་སྣང་སྒྱུ་དྲྭ་ལས། ཚོན་ནི་ནང་ནས་བཀྱེ་བར་བྱ། །ཕྱི་རོལ་ནས་ནི་ཚོན་མི་དགྱེ། །དང་པོ་བྱང་ཤར་ནས་བརྩམས་ཏེ། །ཐོག་མར་སློབ་དཔོན་ཉིད་ཀྱིས་བཀྱེ། །དེ་ནས་སློབ་མས་བྱ་བར་བཤད། །ཅེས་སོ། །ཉེས་པ་སྤང་བ་ནི། ཚོན་ཧ་ཅང་འཐུག་པའམ་སྲབ་པ། ཚོན་ཐལ་ཤོར་བ་སོགས་སྤྱི་དང་། ཁྱད་པར་ཚོན་པྲ་ལ། རེ་ཁཱ་དམས་པ། ཡོ་བ། ཆད་ལྷག །ཉམས་པ། མི་གསལ་བ་སོགས་འདུག་ན་ངན་པས་བསལ་བའི་ཆོ་ག་བྱའོ། ། ལྔ་པ་བྲི་བ་ནི། ལྟེ་བ་རྩིབས་དང་སོགས་ཚིགས་བཅད་གཅིག་སྟེ། དབུས་ཀྱི་ལྟེ་བ་ཟླུམ་པོའི་མཐར་འཁོར་ལོ་རྩིབས་བཞི་རྩིབས་རྟེན་མུ་ཁྱུད་དང་ལྡན་པའི་ཕྱི་རོལ་དུ་གྲུ་ཆད་བཞི་དང་། དབྱིབས་གྲུ་བཞིའི་རྣམ་པ་སྒོ་བཞི་སྒོ་ཁྱུད་ཅན་རྟ་བབས་སྣམ་བུ་བརྒྱད་པ་ཕྱི་རོལ་དུ་པད་རྡོར་མེའི་ཁོར་ཡུག་དང་ལྡན་པར་བྱ་བ་ནི་དཀྱིལ་འཁོར་རྒྱས་འབྲིང་བསྡུས་གསུམ་ཀའི་ཐུན་མོང་བ་སྟེ། ཁྱད་པར་རྒྱས་པ་ལྟར་ན་དབུས་ཀྱི་འཁོར་ལོ་རྩིབས་བཞི་ལྟེ་བ་དང་བཅས་པའི་གནས་ལྔར་རྩིབས་བཞི་པའི་འཁོར་ལོ་ཆུང་བ་མུ་ཁྱུད་དང་བཅས་པ་རེ་རེས་མཚན་པ་དང་། རྒྱས་འབྲིང་གཉིས་ལ་གྲུ་ཆད་ཀྱི་ཕྱིར་བར་ཁྱམས་དང་ལྡན་པ་བྲི་ཞིང་། བསྡུས་པ་ལ་ནི་ཁྱམས་མེད་པའི་ཕྱིར་གྲུ་ཆད་ལ་སྒོ་དོད་པའི་རྣམ་པ་ཅན་ནོ། ། དྲུག་པ་རྣམ་པ་དགོད་པ་ནི། སྐུ་གསུང་ཐུགས་སོགས་ཏེ། དཀྱིལ་འཁོར་གྱི་ལྷ་གནས་སོ་སོར་རྟེན་ཙཀ་ལི་ལྟ་བུ་བྲིས་འབུར་རམ། མེད་ན་ཚོན་གྱིས་བྲི་བའི་རྗེས་འབྲེལ་དུ་སྐུ་ཕྱག་རྒྱའི་གཟུགས་བརྙན་དང་། གསུང་ཋ་ཊའམ་ཧཱུཾ་མཱུཾ་སོགས་ས་བོན་དང་། ཐུགས་ཕྱག་མཚན་ནམ་རང་མདོག་མཚུངས་པའི་ཐིག་ལེ་འབྲི་བ་སོགས་མཚན་མ་གསུམ་གང་རུང་དང་ལྡན་པའི་གཟུགས་ཀྱི་རྣམ་པའང་ཅི་ནུས་དགོད་པར་བྱའོ། ། བདུན་པ་རབ་གནས་ལ་གཉིས་ཏེ། ནུབ་གཉིས་པའི་ལས་རིམ་གཞུང་བཤད་ཀྱི་དབང་དུ་འབྲེལ་བསྡེབས་ནས་འདིར་བཤད་པ་དང་། སྐབས་ཐོབ་ཀྱི་ལས་རིམ་དཀྱིལ་འཁོར་རབ་གནས་སོ། །དང་པོ་ལའང་གཉིས་ཏེ། ཡན་ལག་དང་། ཡན་ལག་ཅན་གྱི་ལྷག་གནས་སོ། །དང་པོ་ནི། ཁྲོ་བོ་མི་འཆི་ཐབ་སྦྱོར་བསྐྱེད་བཟླས་ཞུ་བའི་སྒོ་ནས་ཐོག་མར་ལས་བུམ་སྒྲུབ་སྟེ། གནས་བྱ་ཐམས་ཅད་ལ་བསངས་གཏོར་བྱ་བའི་ཆེད་དུའོ། །དེ་དང་རྗེས་འབྲེལ་དུ་རྡོར་དྲིལ། ཐོད་ཆུ་སྔར་བཤད་པའི་ཐིག་ཚོན་རབ་གནས་རྣམས་སོ། །གཉིས་པ་ལ། བུམ་པ། སློབ་མ། ལྷ་སྟ་གོན་ནོ། །དང་པོ་ནི། རྣམ་རྒྱལ་བུམ་པར་དཀྱིལ་འཁོར་གྱི་འཁོར་ལོ་ཡོངས་རྫོགས་བསྐྱེད་བཟླས་འོད་ཞུས་བུམ་ཆུ་ནུས་ལྡན་དུ་སྒྲུབ་པའོ། །གཉིས་པ་ནི། ཁྲུས་དང་སེམས་བསྐྱེད་ནས་གནང་བ་བྱིན་ཅིང་སྤྲོ་བ་བསྐྱེད། བགེགས་དང་སྒྲིབ་པ་ཕྲལ་བ་སྔོན་དུ་འགྲོ་བས་སློབ་མ་ལྷར་བསྐྱེད་ཅིང་བསྐུར་རློབ་གོ་བགོ་ལུས་བསྲུང་རྣམས་བྱས་ལ་སོ་ཤིང་དོར། དེ་ནས་ཁྱོར་ཆུ། བསྲུང་སྐུད། སྐུ་ཤ་གསུམ་བྱིན་ཞིང་གེགས་བརྒྱད་བཤད་དེ། རྨི་ལམ་བརྟག་ཏུ་གཞུག །གལ་ཏེ་ངན་ན་སྔགས་རྒྱ་དང་མེས་སྦྱང་བ་རྣམས་སོ། །གསུམ་པ་ནི། རྡོ་རྗེ་ལས་རིམ་དུ། ས་བཟུང་བ་ཞེས་གསུངས་པ་དེ་ཡིན་ཏེ། ལས་ཐིག་རྫོགས་པའམ་སྐྱ་ཐིག་ཙམ་གདབ་པ་གང་རུང་གི་ལྷ་གནས་ངེས་པར་བྱས་ནས་གཞལ་ཡས་ཁང་བསྒོམས་རྗེས། ལྷ་གནས་རྣམས་སུ་བྱང་སེམས་ཀྱི་ཐིག་ལེ་ཚོམ་བུ་དང་བཅས་པ་སོ་སོའི་སྔགས་ཀྱིས་བཀོད་དེ། རང་གཙོ་བོ་ཡབ་ཡུམ་གྱི་སྦྱོར་མཚམས་ནས་དཀྱིལ་འཁོར་གྱི་ལྷ་ཐམས་ཅད་སྤྲོས་ལ་དབང་ནས་བསྟོད་པའི་བར་བྱས་རྗེས་སྙན་གསན་ཕབ་སྟེ་རོལ་པའི་གཟི་བྱིན་གྱིས་དེ་ཉིད་དུ་ཐིམ་པར་མོས་པའོ། ། གཉིས་པ་དཀྱིལ་འཁོར་རབ་གནས་ལ་གཉིས་ཏེ། ལས་ཁྲིགས་ཀྱི་སྡེབས་བཤད་པ་དང་། གཞུང་དོན་བཤད་པའོ། །དང་པོ་ལ་དོན་དགུ་ལས། དང་པོ་སྔོན་དུ་བྱ་བའི་རིམ་པ་ནི། སློབ་དཔོན་གྱིས་བུམ་བསྙེན་བྱ་ཞིང་བུམ་ཆུ་བསྡུ་བ། རྒྱས་པའི་སྦྱིན་སྲེག །གནས་བྱའི་གཟུགས་བརྙན་ལ་བ་བྱུང་བཀུ་ཞིང་ཤིང་ཤུན་གྱིས་འཕྱི་བ་སོགས་བྱས་ཏེ། ཞི་བའི་ལས་གཞུང་བསྲང་བ་རྣམས་སོ། །གཉིས་པ་ཏིང་ངེ་འཛིན་གཉིས་ཀྱིས་སྦྱང་ཞིང་བསྐྱེད་པ་དང་། གསུམ་པ་སྤྱན་དྲང་ཞིང་བསྟིམ་པ་གཉིས་ལེའུ་འདི་ནས་བཤད་པ་ལྟར་རོ། །བཞི་པ་ཐུར་མས་སྤྱན་དབྱེ་བ་སོགས་དབང་པོའི་སྐྱོན་བསལ་བའི་ཆོས་བདུན་དབུལ་ལོ། །ལྔ་པ་ཐུན་མོང་དུ་ཡེ་ཤེས་ལྔའི་རང་བཞིན་གྱི་བུམ་ཆུས་དབང་བསྐུར་ཞིང་སྐུ་གསུང་ཐུགས་བྱིན་གྱིས་བརླབས་ནས། ཁྱད་པར་དབུ་རྒྱན་སོགས་རྒྱན་ཆས་ཉི་ཤུ་རྩ་ལྔས་མངའ་གསོལ་བའོ། །དྲུག་པ་ཆུ་བདུན་གྱིས་ཁྲུས་གསོལ་ཞིང་རས་ཀྱིས་འཕྱི་བའོ། །བདུན་པ་མཆོད་པ་ཕྱི་ནང་ལྷག་ཏིང་གསང་མཆོད་རྣམས་འདི་ནས་བཤད་པ་ལྟར་དབུལ་ལོ། །བརྒྱད་པ་འདོད་དོན་མ་རྫོགས་ཀྱི་བར་བརྟན་བཞུགས་གསོལ་བའོ། །དགུ་པ་བསྐོར་བ་དང་སྨོན་ལམ་གདབ་པ་རྣམས་ཏེ་རབ་གནས་ཀྱི་ཆོ་ག་ལས་ཤེས་པར་བྱའོ། ། གཉིས་པ་གཞུང་དོན་བཤད་པ་ལ་དྲུག་སྟེ། ཡོ་བྱད་དགྲམ་པ། སྟོང་པ་ཉིད་ཀྱི་ཏིང་ངེ་འཛིན་གྱིས་སྦྱང་བ། རོལ་མོ་ལྟ་བུའི་ཏིང་ངེ་འཛིན་གྱིས་བསྐྱེད་པ། དེ་ལྟར་སྦྱངས་ཤིང་བསྐྱེད་པའི་ཡོན་ཏན། ཡེ་ཤེས་པ་དྲང་ཞིང་གཞུག་པ། མཆོད་པ་འབུལ་བའོ། །དང་པོ་ནི། བཅོས་བུའི་སོགས་རྐང་པ་གཉིས་ཏེ། བཅོས་བུ་སྟེ་ཁ་དོག་བསྒྱུར་བའི་རས་ལ་དབྱིབས་ནི་བླ་རེ་འཕན་གདུགས་ལྡ་ལྡི་སོགས་སྣ་ཚོགས་པ་དང་། རིན་པོ་ཆེའི་རྒྱན་ཕྲེང་དང་། བཏུང་བ་དང་བཟའ་བ་བྲོ་མཆོག་ལྡན་པས་ཀྱང་ཡོངས་སུ་བསྐོར་ཞིང་། གཞན་ཡང་ཐུན་མོང་མ་ཡིན་པའི་དཀྱིལ་འཁོར་གྱི་རྒྱན་བཀོད་དང་། ཁྲུས་ཆས་སོགས་རབ་གནས་ཀྱི་ཡོ་བྱད། ཐུན་མོང་དུ་ཕྱི་ནང་གི་མཆོད་གཏོར་སོགས་བཀོད་ལེགས་པར་བཤམས་པའོ། །གཉིས་པ་ནི། ལུས་ངག་སོགས་ཚིགས་བཅད་གཅིག་སྟེ། རང་གི་ལུས་ངག་སེམས་གསུམ་དང་གནས་བྱའི་རྟེན་གྱིས་མཚོན་པའི་ཕྱི་ནང་གི་ཆོས་ཐམས་ཅད་སེམས་ཀྱི་སྣང་བ་ལས་གཞན་གང་ནའང་མི་གནས་ཤིང་ཅིར་ཡང་མི་དམིགས་པའི་ངང་ལས་མེད་བཞིན་དུ་རང་སྣང་བ་མིག་ཡོར་ལྟ་བུའི་ཚུལ་དུ་མཉམ་པར་སྦྱོར་བས་ཡུལ་ཆོས་ཉིད་ནམ་མཁའ་ལྟ་བུ་ལ་ཡུལ་ཅན་རིག་པ་ནི་རོ་གཅིག་ཏུ་འདྲེས་པས་ཡུལ་མེད་རང་གསལ་ནམ་མཁའ་ལྟར་མཐའ་བྲལ་དུ་བསྒོམ་ཞིང་ཤཱུ་ནྱ་ཏཱའི་སྔགས་ཀྱིས་ང་རྒྱལ་བྱའོ། །གསུམ་པ་ནི། ཏིང་འཛིན་རོལ་མོ་སོགས་རྐང་པ་ལྔ་སྟེ། སྟོང་ཉིད་ཀྱི་ངང་ལས་ཏིང་འཛིན་གྱི་རྩལ་ཅིར་ཡང་མ་འགགས་པའི་རོལ་མོ་མཐའ་ཡས་མཆོག་དང་ལྡན་པས་རང་གི་ཐུགས་ཀ་ནས་སྤྲོས་པའི་ས་བོན་ལས་འབྱུང་ལྔ་རིམ་བརྩེགས་གཞལ་ཡས་ཁང་གདན་དང་བཅས་པ་བསྐྱེད། དེར་གཟུགས་སྐུ་རྣམས་སྟོང་ཉིད་ཡེ་ཤེས་སུ་གསལ་བ་ལ་བདག་ཉིད་ལྷ་ཡབ་ཡུམ་སྦྱོར་བའི་བྱང་སེམས་ཋ་ཊ་སོགས་གསུང་ཡི་གེའི་འཁོར་ལོའམ། ཧཱུཾ་མཱུཾ་སོགས་སྙིང་པོའི་རྣམ་པར་བཏོན་པ་ལས་སྐད་ཅིག་གིས་བསྐྱེད་པའམ། ཡང་ན་ཡིག་འབྲུ་རྣམས་སོ་སོའི་གདན་ལ་བཀོད་དེ་འོད་ཟེར་སྤྲོ་བསྡུ་བྱ་བའམ་མ་བྱས་ཀྱང་རུང་སྟེ་ཕྱག་རྒྱ་ཕྲ་བ་ཕྱག་མཚན་ལས་རགས་པ་སྐུ་ཡོངས་སུ་རྫོགས་པའི་ལྷ་གནས་གསུམ་དུ་སྐུ་གསུང་ཐུགས་རྡོ་རྗེའི་ལྷ་དང་ལྡན་པར་བསྐྱེད་ཅིང་བྱིན་གྱིས་བརླབས་ན་དངོས་གྲུབ་ཡ་མཚན་ཐུན་མོང་དང་རྨད་པོ་ཆེ་མཆོག་འགྲུབ་པར་འགྱུར་བ་ནི་སངས་རྒྱས་ཀུན་གྱི་དམ་ཚིག་སྟེ། ནམ་དུའང་དེ་ལས་མི་འདའ་བར་སྟོན་པའི་ཕྱིར་རོ། །བཞི་པ་ནི། ས་ལ་སོགས་ལ་སོགས་ཚིགས་བཅད་གཅིག་སྟེ། འདི་ལྟར་ས་དང་ཤིང་ལ་སོགས་པ་རྒྱུ་དམན་པ་ལ་སྐུ་གསུང་ཐུགས་ཀྱི་ཕྱག་རྒྱའི་རྣམ་པར་བྱས་པས་ཀྱང་རྣམ་གྲོལ་འབྲས་བུའི་རིམ་པ་གདུལ་བྱ་རང་རང་གི་སྐལ་བ་དང་མཐུན་པ་ཐོབ་པར་འགྱུར་ན་གཟུང་འཛིན་དག་པ་སྟོང་པ་ཉིད་དང་རོལ་མོ་ལྟ་བུའི་ཡེ་ཤེས་ཀྱིས་སྦྱངས་ཤིང་ལྷར་བསྐྱེད་པས་འདོད་པའི་འབྲས་བུ་ཐོབ་པ་སྨོས་ཅི་དགོས་ཏེ། སེམས་ཀྱི་དེ་ཁོ་ན་ཉིད་ཡེ་ནས་ལྷ་ཡིན་པ་ལས་གཞན་པའི་ལྷ་སྐུ་བཙལ་དུ་མེད་པའི་ཕྱིར་རོ། །ལྔ་པ་ནི། ཕྱོགས་དུས་སོགས་ཚིགས་བཅད་གཉིས་ཏེ། ཕྱོགས་བཅུ་དུས་བཞིའི་རྒྱལ་བའི་དཀྱིལ་འཁོར་མ་ལུས་པའི་བདག་ཉིད་ཆེན་པོ་ཆོས་ཀྱི་སྐུ་ཅིར་ཡང་མི་དམིགས་པ་ཐུགས་ཀྱི་དཀྱིལ་འཁོར་སྤྲོས་བྲལ་གྱི་ངང་ལ་བཞུགས་པ་ལས་གཟུགས་སྐུ་ཡེ་ཤེས་ཀྱི་དཀྱིལ་འཁོར་ཇི་ལྟར་འདུལ་བའི་མོས་པ་ལྟར་བཞེངས་པ་ཐམས་ཅད་སྤྱན་དྲང་ངོ་། །གང་དུ་ན་རིག་པ་རང་སྣང་དབྱེར་མེད་དམ་ཚིག་གི་དཀྱིལ་འཁོར་ལ་སྤྱན་དྲངས་པ་དེ་ཉིད་འཇུག་ཅིང་བསྟིམ་པའི་མཚན་ཉིད་ཀྱིས་དམ་ཡེ་མཉམ་པར་སྦྱོར་བས་ཕྱོགས་བཅུ་དུས་བཞི་ཀུན་ནས་དོན་གཉིས་མཐར་ཕྱིན་པར་གཤེགས་པའི་རྒྱལ་བ་ཐམས་ཅད་སྔོན་བསྙེན་པའི་སྨོན་ལམ་གྱི་དབང་གིས་འགྲོ་དོན་མཛད་པའི་ཕྲིན་ལས་ཡེ་ཤེས་ཀྱི་དཀྱིལ་འཁོར་དུ་ཐུགས་རྗེས་བཞེངས་ནས་བྱོན་པ་དམ་ཚིག་གི་དཀྱིལ་འཁོར་ལ་རབ་ཏུ་རྫོགས་པར་འཇུག་པ་ནི་སངས་རྒྱས་ཐམས་ཅད་འདི་ལས་འདའ་བར་མི་མཛད་པས་ཉེ་བར་འབྲེལ་བར་གྱུར་པའི་ཕྱིར་དམ་ཚིག་གི་མཆོག་ཅེས་བྱའོ། །དྲུག་པ་ལ་གསུམ་ལས། དང་པོ་ཕྱི་ནང་གི་མཆོད་པ་ནི། གླུ་ཚིག་སོགས་ཚིགས་བཅད་གཅིག་སྟེ་ཕྱིའི་མཆོད་པ་རྣམ་པ་ལྔ་དང་ན་བཟའ་ལྷབ་ལྷུབ། ནང་སྨན་གཏོར་ཚོགས་ཀྱི་ཡོ་བྱད་དང་། ངག་གི་གླུ་ཚིག །ལུས་ཀྱི་བྲོ་གར། རོལ་མོ་ཡེ་ཤེས་སོགས་མཆོད་པའི་སྤྲིན་ཕུང་མཐའ་ཡས་པའི་ཚོགས་ཀྱིས་རབ་ཏུ་མཆོད་ཅིང་། རྒྱས་འདེབས་མ་སོགས་གསང་ཡུམ་བཞི་དང་། ཡིད་འཇོ་བའི་ཚུལ་ཅན་སྒོ་མ་བཞི་དང་། ཕྱི་ནང་གི་སེམས་མ་བརྒྱད་དེ་ལྷ་མོ་བཅུ་དྲུག་གིས་ཇི་ལྟར་འདོད་པའི་སྐབས་ཀྱི་ལས་གང་བྱེད་པ་དེ་བཞིན་དུ་མཆོད་དོ། །གཉིས་པ་ལྷག་པ་ཏིང་ངེ་འཛིན་གྱི་མཆོད་པ་ནི། མཆོད་པའི་ཕྱག་རྒྱ་སོགས་རྐང་པས་དམན་པའི་ཚིགས་བཅད་དྲུག་སྟེ། ཡིད་སྤྲུལ་གྱིས་ཇི་ལྟར་མཆོད་པ་ལས་མི་འདའ་བའི་ཕྱག་རྒྱ་ཆེན་པོ་ནི་རང་སེམས་ཀྱི་བཀོད་པ་ཡིད་བཞིན་གྱི་ཆར་འབེབས་པའི་རིན་པོ་ཆེའི་སྤྲིན་ཚོགས་ལྟར་བསམ་མི་ཁྱབ་ཀྱིས་མཆོད་དེ། ཇི་ལྟར་ན་རང་གི་ཐུགས་ཀ་ནས་ས་བོན་སོ་སོ་སྤྲོས་པས་སྣང་གྲགས་ཐམས་ཅད་མཆོད་རྫས་སུ་གྱུར་ནས་མཆོད་པའོ། །དེ་ཡང་བྷྲུཾ་ལས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་ཞིང་རྣམ་པར་དག་པར་རློབ་སྟེ། དེའི་ཡོན་ཏན་ཡང་མཉེན་འཇམ་རེག་ན་བདེ་བ་དང་ལྡན་པའི་རང་བཞིན་རྒྱུ་སྣ་ཚོགས་རིན་པོ་ཆེའི་ས་གཞི་ཁོད་སྙོམས་པ་ལ་མིག་མང་རིས་སུ་མཛེས་པར་བྲིས་ཤིང་རིན་པོ་ཆེའི་ཕྲ་ཚོམ་གྱིས་སྤྲས་པ་དང་། ཏྲཱཾ་ལས་རི་དང་རི་བྲན་ཐམས་ཅད་འདོད་རྒུ་ཀུན་འབྱུང་བའི་རིན་ཆེན་གྱི་ཕུང་པོ་འོད་འབར་བར་གྱུར་པ་དང་། ཨ་ལས་རྒྱ་མཚོ་དང་ལྟེང་ཀ་སོགས་ཁ་དོག་དང་དབྱིབས་ལེགས་པའི་རྫིང་བུ་རོ་བྲོ་བའི་མཆོག་བསིལ་ཞིང་དྭངས་པ་སོགས་ཡན་ལག་བརྒྱད་ལྡན་གྱི་ཆུས་གང་བ་དང་། བྷྲུཾ་ལས་གནས་ཁང་ཐམས་ཅད་རྒྱུ་རིན་ཆེན་ལས་གྲུབ་པའི་ཁང་པ་རྒྱན་དང་བཀོད་པ་སྣ་ཚོགས་ཀྱིས་མཛེས་པ་དང་། ཏྲཱཾ་ལས་རྩི་ཤིང་ནགས་ཚལ་ཐམས་ཅད་རིན་པོ་ཆེའི་རྒྱན་དང་དར་གྱི་ལྡ་ལྡིས་སྦྲེལ་བའི་ལྷའི་དཔག་བསམ་གྱི་ལྗོན་ཤིང་རྒྱས་པའི་ཚལ་དང་། ཧྲཱིཿལས་སྒྲ་ཐམས་ཅད་སྙན་པའི་གླུ་དབྱངས་དང་འཕགས་པ་མཆོད་ཅིང་སེམས་ཅན་ལ་ཆོས་སྟོན་པའི་ཚིགས་སུ་བཅད་པའི་སྒྲར་རང་བྱུང་བ་དང་། མཱཾ་ལས་གོས་ཐམས་ཅད་བླ་རེ་རྒྱལ་མཚན་ན་བཟའ་གདུགས་ལ་སོགས་པ་སྣ་ཚོགས་དང་། ཏྲཱཾ་ལས་རྒྱན་ཐམས་ཅད་དོ་ཤལ་དཔུང་རྒྱན་སེ་མོ་དོ་སོགས་རིན་པོ་ཆེའི་རྒྱན་གྱི་ཁྱད་པར་དང་། ཨ་ལས་ལོངས་སྤྱོད་ཐམས་ཅད་རོ་བརྒྱ་ལྡན་པའི་བཟའ་བ་དང་བདུད་རྩིའི་བཏུང་བ་རོ་བྲོ་བའི་མཆོག་རྣམས་དང་། ཧཱུཾ་ལས་འགྲོ་བ་ཀུན་ཀྱང་རང་ལུས་ལ་ཇི་ལྟར་མཛེས་པའི་རྒྱན་གྱི་ཁྱད་པར་གྱིས་བརྒྱན་ཅིང་འདོད་ཡོན་སྣ་ཚོགས་ཐོགས་པའི་ལྷ་དང་ལྷ་མོ་ཞིང་གི་རྡུལ་སྙེད་ཀྱི་གྲངས་དང་མཉམ་པས་ལུས་ཀྱི་བྲོ་གར་དང་ངག་གི་གླུ་དབྱངས་ལ་སོགས་པས་བསམ་ཡས་ཀྱིས་ཕྱོགས་བཅུའི་ནམ་མཁའི་མཐའ་ཀླས་ཀྱི་ཁམས་ཐམས་ཅད་ཡོངས་སུ་བཀང་ནས་རྒྱལ་བའི་དཀྱིལ་འཁོར་ཀུན་ལ་རེ་རེ་ཞིང་ནས་རྒྱས་པར་དབུལ་ཏེ། ཇི་ལྟར་ན་སྐལ་ལྡན་རྣལ་འབྱོར་པའི་ཏིང་ངེ་འཛིན་མི་གསལ་བའམ་གསལ་བའི་ཁྱད་པར་གྱིས་དུས་རིམ་གྱིས་སམ་ཡང་ན་ཅིག་ཅར་དུ་སྤྲོས་ཏེ་འཁོར་གསུམ་མི་དམིགས་ཆོས་ཀྱི་དབྱིངས་དང་མཉམ་པ་ཉིད་དུ་སྦྱོར་ཞིང་སྣང་སྲིད་ཐམས་ཅད་གཉིས་མེད་ཀྱི་ངོ་བོར་གནས་སུ་སྟོབ་པ་ལས་མི་འདའ་བ་མཆོད་པའི་ཕྱག་རྒྱ་ཆེན་པོར་བསྒོམ་པར་བྱ་བའོ། །གསུམ་པ་གསང་མཆོད་ནི། གསལ་ལྡན་མའམ་སོགས་ཚིགས་བཅད་གསུམ་སྟེ། ལས་རྒྱ་ཤེས་རབ་དང་ཏིང་ངེ་འཛིན་གསལ་ལྡན་མ་ཡིན་ན་རང་ཉིད་ཀྱིས་སམ། མི་ལྡན་ན་ཡབ་ཀྱིས་ལྷར་བསྐྱེད་ཅིང་མཁའ་གསང་བྱིན་གྱིས་བརླབས་ལ། དཔེར་ན་འཕགས་པའི་རྫུ་འཕྲུལ་གྱིས་སྟོང་གསུམ་འཇིག་རྟེན་གྱི་ཁམས་ཐམས་ཅད་ཡུངས་འབྲུར་གཞུག་ཅིང་ཆུད་པའི་ཚུལ་བཞིན་དུ་ཡུམ་གྱི་པདྨའི་སྣ་རྩེ་ཡུངས་འབྲུ་ཙམ་ལ་རྟེན་དང་བརྟེན་པའི་དཀྱིལ་འཁོར་ཐམས་ཅད་ཚང་ཞིང་མ་འདྲེས་པར་བཀོད་པ་ཆོས་ཀྱི་དབྱིངས་ན་རང་བཞིན་གྱི་དཀྱིལ་འཁོར་སྤྱན་དྲངས་ཤིང་བསྟིམ་པ་ཐབས་ཤེས་རོལ་པའི་བདེ་བས་མཆོད་དོ། །དེས་དཀྱིལ་འཁོར་གྱི་ལྷ་རྣམས་མཉེས་ནས་དངོས་གྲུབ་སྟེར་བར་འགྱུར་བ་ལས་མི་འདའ་བའི་དམ་ཚིག་མཆོག་གི་བདུད་རྩི་སྟེ། དེ་ལྟར་བདེ་བའི་བདག་ཉིད་ཆེན་པོ་ཡུམ་གྱི་མཁའ་དཀྱིལ་མཆོད་པས་ཕྱོགས་བཅུ་དུས་བཞིའི་སངས་རྒྱས་ཀྱི་དཀྱིལ་འཁོར་མ་ལུས་པ་མཉེས་ཤིང་། དེའི་བྱིན་རླབས་ཀྱིས་སྲིད་གསུམ་གྱི་འགྲོ་བ་ཐམས་ཅད་ལ་དགའ་བ་ཆེན་པོའི་ཏིང་ངེ་འཛིན་གྱི་རོས་ཁྱབ་པར་འགྱུར་ཞིང་། དེར་མ་ཟད་རྣལ་འབྱོར་པ་རང་ཉིད་སྒྱུ་འཕྲུལ་དྲྭ་བ་སྟེ་ཐབས་ཤེས་ཟུང་དུ་འབྲེལ་བའི་ཏིང་ངེ་འཛིན་ལ་བརྟན་པ་ཐོབ་པ་ཡིས་འབྲས་བུ་ཕྱོགས་བཅུ་དུས་བཞིར་དོན་གཉིས་མཐར་ཕྱིན་པར་གཤེགས་པའི་སངས་རྒྱས་དཀྱིལ་འཁོར་མ་ལུས་པའི་རང་བཞིན་དང་ཁམས་གསུམ་གྱི་འགྲོ་བ་སེམས་ཅན་རྣམས་ལ་ཐུགས་རྗེས་གཟིགས་པའི་ཡེ་ཤེས་མངོན་སུམ་དུ་གསལ་བར་འགྱུར་བ་ཡིན་ནོ། ། བརྒྱད་པ་སྦྱིན་སྲེག་ནི། དབྱིབས་དང་ཁ་དོག་སོགས་ཚིགས་བཅད་གཅིག་སྟེ། རྡོ་རྗེ་ལས་རིམ་ལས། ས་དང་རབ་གནས་རྣམ་གཉིས་དང་། །བདེ་བ་སྦྱིན་པའི་དུས་ཉིད་དོ། །ཞེས་པས་ས་ཆོག་གི་ཚེ་མཚན་མ་ངན་ན་ཞི་བ། རབ་གནས་ཀྱི་ཚེ་རྒྱས་པ། དབང་བསྐུར་བའི་གོང་དུ་དབང་། སློབ་མ་སྟ་གོན་གྱི་ཚེ་ཀུན་རྨི་ལྟས་ངན་ན་དྲག་པོ་བྱ་སྟེ། དེ་ཡང་སྦྱིན་སྲེག་རྩ་བར། གནས་རྫས་ཐབ་ཀྱི་རྣམ་པ་དང་། །གཟུངས་དང་གཙོ་སེམས་བསྒྲུབ་བྱ་དང་། །ཕུར་བུ་ལྷ་དུས་ལས་རིམ་དང་། །ལྷག་མ་བཅུ་གཅིག་ཤེས་པར་བྱ། །ཞེས་དོན་བཅུ་གཅིག་ལས། དང་པོ་གནས་ནི། སྤྱིར་ཞི་རྒྱས་གཉིས་བཀྲ་ཤིས་པའི་གནས་དང་། དབང་དྲག་གཉིས་གཉན་པའི་གནས་སུ་བྱ་བའམ། བྱེ་བྲག་ཞི་བ་རི་བོ་འདུས་པའི་རྩེ། རྒྱས་པ་ནགས་ཚལ། དབང་ཆུ་བོ་འདུས་པའི་སུམ་མདོ། དྲག་པོ་དུར་ཁྲོད་དོ། །གཉིས་པ་རྫས་ནི། ལས་བཞི་གང་བྱེད་ཀྱི་སྲེག་ཤིང་། ཡམ་ཤིང་། ལིངྒའི་རྒྱུ། གཏོར་མ། སྲེག་རྫས་རྣམས་བསྲེག་གོ །གསུམ་པ་ཐབ་ཀྱི་རྣམ་པ་ནི། འཁོར་ལོ་རིན་ཆེན་པདྨ་རྒྱ་གྲམ་བཞིའི་ལྟེ་བ་ལ་གནས་པའི་ཐབ་ཁུང་དབྱིབས་ནི་ཞི་བར་ཟླུམ་པོ་སོགས་སྤྱི་དང་འདྲ་ཞིང་། བཞི་ཀའང་རྒྱར་ཁྲུ་གང་དཔངས་སུ་ཁྲུ་ཕྱེད་པ་བང་རིམ་གསུམ་པའོ། །ཁ་དོག་ནི་དཀར་སེར་དམར་མཐིང་ངོ་། །ཐབ་སོ་སོའི་དབུས་སུ་མཚན་མ་ནི་ཞི་བར་འཁོར་ལོ་ༀ། རྒྱས་པར་རིན་ཆེན་ཏྲཾ། དབང་ལ་པདྨ་ཧྲཱིཿདྲག་པོར་རྡོ་རྗེ་ཧཱུཾ་ཡིག་དང་ལྡན་པར་བྱ་བའོ། །བཞི་པ་གཟུངས་མ་ནི། དུང་ཅན་མ། བ་གླང་མ། པདྨ་ཅན། རི་མོ་ཅན་བཞིའོ། །ལྔ་པ་གཙོ་སེམས་ནི། དོན་གྱི་སེམས་སྤྱིར་བདེན་པ་དབྱེར་མེད་ཀྱི་ལྟ་བ་རྟོགས་ཤིང་བྱང་ཆུབ་ཀྱི་སེམས་དང་ལྡན་པ། བྱེ་བྲག་ལས་སོ་སོའི་ཀུན་སློང་སྟོངས་ཀྱི་སེམས་ནི། ཞི་ཞིང་དྭངས་པ། དགའ་ཞིང་སྤྲོ་བ། ཆགས་ཤིང་ཞེན་པ། ཞེ་སྡང་ཁྲོས་པའི་སེམས་སོ། །དྲུག་པ་བསྒྲུབ་བྱ་ནི། གནོད་སྡིག་ཅན་དང་། དབུལ་ཕོངས་ཅན་དང་། ལོག་ལྟ་ཅན་དང་། གདུག་པ་ཅན་རྣམས་ཏེ། ཡུལ་དེ་དག་གི་ལིངྒ་གནས་ཡིག་དང་བཅས་པ་བྲིས་ཏེ་ལས་དང་མཐུན་པའི་བྲུབ་ཁུང་དུ་གཞུག་གོ །བདུན་པ་ཕུར་བུ་ནི། རྒྱུ་དབྱིབས་ལས་དང་མཐུན་པའི་ཕུར་བུ་བཞི་སོགས་ལ་རིམ་པར་གྲངས་དྲུག་དང་། བཞི་དང་། ལྔ་དང་། གསུམ་རྣམས་ཏེ། རང་རང་གི་བྲུབ་ཁུང་གི་ཁ་ཁྱེར་ལ་བསྐོར་རོ། །བརྒྱད་པ་ལྷ་ནི། ལས་སྦྱོར་གྱི་ལྷ་ཞི་ཁྲོ་གང་ལ་བརྟེན་པ་དེའི་གཞུང་ཡིན་ལ། སྦྱིན་སྲེག་གི་ལྷ་ལ་གཉིས་ལས། སྦྱིན་ལྷ་ནི་དྲང་སྲོང་གི་ཆས་ཅན་ར་སྐྱེས་ལ་གནས་པ་ལས་བཞི་གང་ཡིན་གྱི་སྐུ་མདོག་ཕྱག་མཚན་ཅན་ནོ། །སྲེག་ལྷ་ནི། ཞི་བ་ལ་རྣམ་སྣང་དང་བུདྡྷ་ཧེ་རུ་ཀ །རྒྱས་པ་ལ་རིན་འབྱུང་དང་རཏྣ། དབང་ལ་མཐའ་ཡས་དང་པདྨ། དྲག་པོ་ལ་མི་བསྐྱོད་པ་དང་བཛྲ་ཧེ་རུ་ཀ་རྣམས་ཀྱིས་གཙོ་བྱས་པའི་ཞི་ཁྲོའི་ལྷ་ཀུན་ལས་གང་ཡིན་གྱི་ཁ་དོག་ཅན་དུ་བསྐྱེད་དོ། །དགུ་པ་དུས་ནི། ཞི་སོགས་རིམ་བཞིན་ལོ་དང་ཞག་གི་དབང་དུ་བྱས་པ་གཉིས་རེ་སྟེ། དབྱར་རམ་སྔ་དྲོ། སྟོན་ནམ་ཉི་ཕྱེད། དགུན་ནམ་དགོང་ཀ །དཔྱིད་དམ་ནམ་གུང་ངོ་། །བཅུ་པ་ལས་རིམ་ནི། ཕྱི་རོལ་དུ་ཆ་གསུམ་བཏང་། ནང་དུ་ལས་བཞིའི་འདུག་སྟངས་ཀྱིས་ཤིས་པའི་ཕྱོགས་ལ་ཁ་བལྟས་ཏེ། ཞི་ཁྲོ་གང་བྱེད་ཀྱི་གཞུང་བསྲང་། ལས་བཞི་སོ་སོའི་འཛབ་ཀྱི་འཕྲོ་འདུས་ཐུགས་དམ་བསྐུལ། དེ་ནས་ཚོགས་ཐ་མ་དང་སྦྲེལ་ཏེ་ལིངྒ་ལ་དགུག་བསྟིམ་དང་། སོ་སོའི་བསྐུལ་སྔོན་འགྲོས་གཏོར་ཐུན་དབབ་ཅིང་ཕུར་བུ་གདབ། མཚོན་ཆར་དབབ་གྲིས་གཏུབས་ནས་སྲེག་རྫས་དང་བསྲེས་ལ་བཞག་གོ །སྦྱིན་སྲེག་གི་ལས་རིམ་དངོས་ནི། དཔེར་ན་ཁ་ཟས་ཀྱིས་ལུས་ཀྱི་འབྱུང་བ་རྒྱས་པས་དེ་ལ་དེར་བརྟེན་གྱི་དབང་པོ་དང་རྣམ་ཤེས་རྒྱས་པར་འགྱུར་བ་ལྟར་མེའི་སྒོ་ནས་མེ་ལྷ་ཚིམ་པས། དེའི་སྒོ་ནས་དཀྱིལ་འཁོར་གྱི་ལྷ་ཚིམ་པར་འགྱུར་བའི་ཕྱིར། མེ་ལྷའི་རང་བཞིན་ནི་མཆོད་སྦྱིན་གསོལ་བའི་ཞལ་དུ་གྱུར་པ་ཞེས་གྲགས་པས་ན་ཐོག་མར་འཇིག་རྟེན་པའི་མེ་ལྷ་མཆོད་པར་བྱ་སྟེ། མེ་སྦར་ལ་ཐབ་ནང་དུ་ༀ་ཏྲཱཾ་ཧྲཱིཿཧཱུཾ་བཞི་ལས། ལས་གང་བྱེད་ཀྱི་མེ་ལྷ་བསྐྱེད་ཅིང་བསྐུར་རློབ་དབབ། དད་པ་དང་ནི་སོགས་ཀྱིས་བོས་ལ་བསྟིམ། མཆོད་སྲེག་གི་རྫས་དང་དགང་བླུགས་ཕུལ་ལ་སྨོན་ལམ་གདབ། དེ་ནས་མེ་ལྷའི་ལྟོ་བར་ལས་བཞི་གང་བྱེད་ཀྱི་སྲེག་ལྷ་བསྐྱེད་ཅིང་། བསྐུར་རློབ་དབབ་དྲངས་བསྟིམ་པ་ལ་མཆོད་ནས། བཟའ་བཏུང་རོ་བྲོ་བའི་ཚོགས་ཀྱི་སྲེག་རྫས་དང་དགང་བླུགས་རྣམས་ལས་གང་བྱེད་ཀྱི་ཆོ་གས་ལས་བཞི་སོ་སོའི་སྐབས་དང་སྦྱར་བའི་མཆོད་པ་རབ་ཏུ་སྦྱིན་ནས་བདེན་པ་དང་སྨོན་ལམ་བརྗོད་ཅིང་བསྟོད་པར་བྱའོ། །ཚུལ་དེས་ཐོག་མར་ཞི་བའི་དཀྱིལ་འཁོར་མཆོད་ནས་སླར་ཁྲོ་དཀྱིལ་དུ་བསྒྱུར་ཏེ་སྲེག་བླུགས་སྔར་ལྟར་ཕུལ་རྗེས་ལས་གང་ཡིན་གྱི་བྲོ་བྱའོ། །བཅུ་གཅིག་པ་ལྷག་མའི་ལས་ནི། ཚོགས་ལྷག་དང་སྲེག་རྫས་ལྷག་རྣམས་བསྡུས་ཏེ་ལྷག་ཆོག་བྱ་ཞིང་བརྟན་མ་བསྐྱང་། ལྷག་ཆད་བསྐང་ལ་སྲེག་ལྷ་དང་མེ་ལྷ་ཡེ་ཤེས་པ་གཤེགས། དམ་ཚིག་པ་བསྡུ་བ་སོགས་ལས་ཀྱི་རྗེས་རྣམས་མཐའ་རྒྱས་སུ་བྱའོ། ། དགུ་པ་དཀྱིལ་འཁོར་དུ་འཇུག་པ་ནི། རྡོ་རྗེ་ལས་རིམ་ལས། དབང་ཕྱུག་འཇུག་དང་བཟོད་གསོལ་དང་། །ཁྲུས་དགབ་དྲི་དང་ལུས་དབུལ་དང་། །བགེགས་བསྐྲད་ལྷར་རློབ་དམ་ཚིག་སྦྱིན། །དེ་ཉིད་དབབ་དང་ཆུ་ནན་དང་། །བསྒྲག་དང་རིན་ཆེན་དོར་བ་དང་། །ལྷ་དབབ་པ་དང་ནན་ཏན་དང་། །མིག་དབྱེ་དཀྱིལ་འཁོར་ལེགས་བསྟན་དང་། །ཚོགས་མཆོག་ཡོན་དང་རྣམ་བཅོ་བརྒྱད། །འདི་ཡི་ཡན་ལག་རྫོགས་པར་འགྱུར། །ཞེས་ཆོས་བཅོ་བརྒྱད་པོ་རིགས་བསྡུས་ན་གཉིས་ཏེ། སློབ་དཔོན་འཇུག་པའི་ཆོས་གཉིས་དང་། སློབ་མ་འཇུག་པའི་ཆོས་བཅུ་དྲུག་གོ །དང་པོ་ནི། ཀུན་བྱས་སོགས་ཏེ། དེ་ལྟར་དཀྱིལ་འཁོར་བཞེངས་སྒྲུབ་ཀྱི་ལས་རིམ་ཀུན་བྱས་ནས་དབང་གིས་ཕྱུག་ཅིང་དབང་དོན་ཤེས་པའི་རྡོ་རྗེ་སློབ་དཔོན་རང་ཉིད་སློབ་མ་འཇུག་པ་ལྟར་དཀྱིལ་འཁོར་དུ་ཞུགས་ཏེ། སློབ་མ་ལ་དབང་ཇི་ཙམ་བསྐུར་བ་དེ་ཆོ་ག་རྒྱས་བསྡུས་ཅི་རིགས་པས་བླངས་བའམ། ཡང་ན་རིག་པའི་མེ་ཏོག་དོར་བ་ཙམ་གྱིས་ཀྱང་དཀྱིལ་འཁོར་དུ་འཇུག་པའི་གོ་ཆོད་ཅིང་། གང་ལྟར་ཡང་སློབ་མ་འཇུག་པར་གསོལ་བ་གདབ་པ་དང་བཟོད་གསོལ་གནང་བ་ནོད་པ་རྣམས་ཏེ། སློབ་དཔོན་འཇུག་པའི་ཆོས་གཉིས་སོ། །གཉིས་པ་ནི། དེ་ནས་སློབ་མ་སོགས་ཏེ། སློབ་དཔོན་ཞུགས་པ་དེ་ནས་ཆོས་བཅུ་དྲུག་གིས་སློབ་མ་དཀྱིལ་འཁོར་དུ་གཞུག་པར་བྱ་སྟེ། ཐོག་མར་སློབ་མས་ཁྲུས་བྱ། གཉིས་པ་གདོང་བཅིངས་ཏེ་སྙིམ་པ་མེ་ཏོག་གིས་བཀང་ལ་གསོལ་བ་གདབ། གསུམ་པ་འདོད་དོན་དྲི་ལན་བྱས་ནས་སློབ་དཔོན་གྱི་དྲུང་དུ་དྲང་། བཞི་པ་དུས་གསུམ་གྱི་རྒྱལ་བ་ལ་ལུས་དབུལ། ལྔ་པ་སློབ་བུའི་ཚེ་བསྲུངས་ལ་བགེགས་བསྐྲད། དྲུག་པ་སྒྲིབ་པ་ཕྲལ་ནས་ལྷར་བསྐྱེད་དེ་གོ་བགོ་ལུས་བསྲུང་བྱ། བདུན་པ་རྡོ་རྗེ་གསུམ་གྱི་དམ་ཚིག་བྱིན། བརྒྱད་པ་དམ་ཚིག་དེ་ཉིད་ཚིག་གིས་དབབ། དགུ་པ་ཁེ་ཉེན་གྱི་སྒོ་ནས་ཆུ་ནན་བྱ། བཅུ་པ་སྐྲག་པ་དང་དོགས་པ་མེད་པའི་བརྟུལ་ཞུགས་ཀྱི་རྨད་དུ་བྱུང་བའི་དམ་ཚིག་གཞུང་བཞིན་སྤྱོད་ཅིག་པར་བསྒྲག །བཅུ་གཅིག་པ་ལྷ་དང་ལས་འབྲེལ་བརྟག་ཕྱིར་མེ་ཏོག་དོར། བཅུ་གཉིས་པ་མེ་ཏོག་དེ་སྤྱི་བོར་བཅིངས་ལ་འོག་མིན་ནས་ཡི་དམ་གྱི་ལྷ་བཀུག་པ་སྔར་ཆུ་ནན་གྱི་ལྷ་དང་གཉིས་མེད་དུ་བསྟིམ་པ་ནི་ཕྱིའི་ལྷ་དབབ་པ་སྟེ། ཕེབས་རྟགས་བྱུང་བ་དང་བརྟན་པར་བྱ། ནང་གི་ལྷ་དབབ་པ་ནི་གསང་མཚན་འདོགས་ཤིང་ལྷའི་སྒོམ་ཐབས་སྟོན་པའོ། །བཅུ་གསུམ་པ་ལྷ་བསྒོམ་པ་ལ་ནན་ཏན་བྱེད་པར་གདམས་པ་ནི། སྐལ་བ་མཉམ་པའི་སོགས་ཚིགས་བཅད་གཅིག་སྟེ། དེ་ལྟར་དཀྱིལ་འཁོར་དུ་ཞུགས་ཕྱིན་ཆད་སྒོ་གསུམ་རྡོ་རྗེ་གསུམ་དུ་བྱིན་གྱིས་བརླབས་པས་ཡི་དམ་གྱི་ལྷ་དང་སྐལ་བ་མཉམ་པར་གྱུར་པའི་ཕྱིར། ཡེ་ཤེས་དེ་ཉིད་དོན་དུ་གཉེར་ནས་བསྒྲུབས་ན་དུས་ཉེ་བ་ཚེ་འདིར་མངོན་དུ་འབྱུང་བའི་མཆོག་ཐུན་གྱི་དངོས་གྲུབ་ཡ་མཚན་ཆེན་པོ་འབྱུང་ཞིང་ཐོབ་པར་ངེས་པས་ལྷ་བསྒོམ་པ་ལ་ནན་ཏན་དུ་བྱ་སྟེ། གཞན་དུ་ལྷའི་སྒོམ་བཟླས་ལ་དད་པ་མེད་ན་རྡོ་རྗེ་གསུང་གི་དམ་ཚིག་ཉམས་པར་གྱུར་པས་ན་འདི་ཕྱིར་མི་འདོད་པའི་གནས་སུ་ལྟུང་བའི་ཕྱིར་འཕུང་བར་འགྱུར་རོ། །བཅུ་བཞི་པ་མིག་དབྱེ། བཅོ་ལྔ་པ་དཀྱིལ་འཁོར་གྱི་དོན་རྟགས་བཤད་ཅིང་ལྷ་ངོ་བསྟན། དེའང་བརྒྱུད་པའི་ཕྱག་བཞེས་སུ་སྔར་སོང་བའི་ནང་གི་ལྷ་དབབ་པ་དང་ནན་ཏན་བྱེད་པར་གདམས་པ་གཉིས་སྐབས་འདིར་བླངས་ནས་མཛད་དོ། །བཅུ་དྲུག་པ་སློབ་མས་ཡོན་དབུལ་ཏེ། དེ་དག་ནི་སློབ་བུ་འཇུག་པའི་ཆོས་སོ། ། བཅུ་པ་དཀྱིལ་འཁོར་དུ་ཞུགས་པའི་ཡོན་ཏན་ནི། བདེ་བ་ཆེན་པོའི་སོགས་ཚིགས་བཅད་གཅིག་སྟེ། ཐབས་ཤེས་ཟུང་འབྲེལ་བདེ་བ་ཆེན་པོའི་དཀྱིལ་འཁོར་རྒྱས་པ་འབྲི་བའམ་མི་ནུས་པས་ནི་གཙོ་བོ་སྟངས་དཔྱལ་ཏེ་ཡབ་ཡུམ་གཉིས་སམ། ཡང་ན་རིགས་ལྔ་ཡབ་ཡུམ་ཙམ་གྱིས་ཏེ་དད་ལྡན་གྱི་སློབ་མ་དེར་རབ་ཏུ་ཞུགས་ན་དཀྱིལ་འཁོར་རྒྱས་པར་ཞུགས་པ་དང་འདྲ་བར་འདོད་པའི་དོན་དབང་དང་དངོས་གྲུབ་ཡིད་འོང་ཐོབ་པས་ན་སྔར་འོག་མིན་དུ་མཐར་ལམ་པ་ཞུགས་པ་དང་སྐལ་བ་མཉམ་པར་འགྱུར་ཏེ། མཉམ་སྦྱོར་ལས། རྡོ་རྗེ་སེམས་དཔའ་ལ་སོགས་པའི། །འཁོར་ལོ་སྔོན་དུ་མཐོང་བ་ཡིས། །བསོད་ནམས་རྟག་པ་གང་ཡིན་པ། །ཕྱིས་བྱས་པ་ཡང་དེ་བཞིན་ནོ། །ཞེས་སོ། ། གཉིས་པ་དེས་ཁྲོ་བོ་དང་མཆོག་གི་དཀྱིལ་འཁོར་མཚོན་པར་བསྟན་པ་ལའང་གཉིས་ལས། དང་པོ་ཁྲོ་དཀྱིལ་ནི། ཁྲོ་བོའི་དཀྱིལ་འཁོར་སོགས་ཏེ། སྒྱུ་འཕྲུལ་ཁྲོ་བོའི་ལྷག་པ་གཟུགས་བརྙན་གྱི་དཀྱིལ་འཁོར་ལས་རིམ་ཡང་ཁོག་ཞི་བའི་སྐབས་སུ་བཤད་པ་དེ་བཞིན་དུ་དོན་བཅུས་སྟོན་ནའང་། མི་འདྲ་བའི་ཁྱད་པར་འགའ་ཞིག་ཡོད་དེ། འདིར་ཡི་གེས་འཇིགས་པས་ཁྲོ་བོའི་དཀྱིལ་ཆོག་ལྟར་ཤེས་པར་བྱའོ། ། གཉིས་པ་མཆོག་གི་དཀྱིལ་འཁོར་ནི། ཤིན་ཏུ་ཕྲ་ལ་སོགས་རྐང་པ་གསུམ་སྟེ། ཏིང་ངེ་འཛིན་གྱི་གནད་ཤིན་ཏུ་ཕྲ་ཞིང་ཟབ་པ་ལ་བློ་སྦྱངས་པའི་རྣལ་འབྱོར་པས་བསམ་ཡས་ལྷུན་གྲུབ་སོགས་ལྷག་ཏིང་གི་དཀྱིལ་འཁོར་དག་ལའང་བཤད་མ་ཐག་པ་དེ་བཞིན་དུ་རྣམ་གྲངས་བཅུར་ཤེས་པར་བྱ་སྟེ། དེ་ལ་ས་གཞི་མཉམ་པ་ནི། ཆོས་ཐམས་ཅད་མཉམ་ཉིད་དུ་རྟོགས་པའམ་ཇི་བཞིན་པའི་དོན་ལ་མཉམ་པར་འཇོག་པའོ། །ཚད་ནི། རྒྱང་གྲགས་སམ་དཔག་ཚད་ནས་ཇི་སྲིད་མཁའ་ཁྱབ་ཀྱི་བར་རང་གི་རིག་པས་ཇི་ཙམ་དཔག་ནུས་པ་དེ་ཙམ་དུ་བསྒོམ་པའོ། །ཐིག་ནི། རང་རིག་དཀྱིལ་འཁོར་དུ་གསལ་བ་ལས་མི་འགྱུར་བའོ། །ཚོན་ནི་རྣམ་ཤེས་ཚོགས་བརྒྱད་ཡེ་ཤེས་ལྔར་མཚོན་པའི་རང་གདངས་མ་འདྲེས་པའོ། །བྲི་བ་ནི། སེམས་ཀྱི་ཆོས་ཉིད་ལ་སྐུ་དང་ཡེ་ཤེས་ཀྱི་དཀྱིལ་འཁོར་མ་འདྲེས་ཡོངས་རྫོགས་སུ་གསལ་བ་སྟེ། རྟེན་གཞལ་ཡས་ཁང་སྒོམ་པ་ལའང་སྦྱར་རོ། །རྣམ་པ་ནི། སྣང་གྲགས་རིག་གསུམ་རྡོ་རྗེ་གསུམ་གྱི་དཀྱིལ་འཁོར་དུ་མ་འགགས་པར་དགོད་པ་སྟེ། བརྟེན་པ་ལྷ་བསྐྱེད་པའང་ངོ་། །རབ་གནས་ནི་ཡེ་ཤེས་ཀྱི་འཁོར་ལོ་སྤྱན་དྲངས་ཏེ་བསྟིམ་ནས་མཆོད་པས་འཁོར་འདས་དབྱེར་མེད་ཀྱི་དབྱིངས་སུ་སེམས་རབ་ཏུ་ཞུགས་པའོ། །སྦྱིན་སྲེག་ནི། ཏིང་ངེ་འཛིན་གྱི་ཕྱག་རྒྱར་འབར་བའམ། འོད་གསལ་ལམ་གཏུམ་མོའི་མེས་མཚན་རྟོག་སྲེག་ཅིང་བདེ་ཆེན་ཡེ་ཤེས་རྒྱུད་ལ་སྦྱིན་པའོ། །འཇུག་པ་ནི། རང་སྣང་གི་དཀྱིལ་འཁོར་དུ་ཏིང་ངེ་འཛིན་གྱིས་ཞུགས་ནས་རྒྱུན་ཆད་མེད་པར་ཉམས་སུ་ལེན་པའོ། །ཞུགས་པའི་ཡོན་ཏན་ནི། སྔོན་འོག་མིན་དུ་མཐར་ལམ་པ་ཞུགས་པ་དང་སྐལ་བ་མཉམ་མོ། ། གཉིས་པ་དབང་ལ་གསུམ་སྟེ། རྒྱུ་ཡོན་འབུལ་བ། སྣོད་དང་འཚམས་པར་བསྐུར་ཚུལ། གསང་དབང་གི་དཀྱིལ་འཁོར་བཤད་པའོ། །དང་པོ་ནི། དེ་ནས་རིགས་ཀྱི་སོགས་ཚིགས་བཅད་གཉིས་ཏེ། དཀྱིལ་འཁོར་དུ་ཞུགས་པ་དེ་ནས་རིགས་ཀྱི་བུར་བྱས་པ་དཀྱིལ་འཁོར་མཐོང་བས་སྐལ་བ་མཆོག་ཏུ་གྱུར་པ་དེས་མེ་ཏོག་ཕོག་པའི་ལྷ་དང་སྦྱར་ནས་ཡོན་དབུལ་ཏེ། དེ་བཞིན་གཤེགས་པའི་རིགས་ལ་རྒྱལ་སྲིད་དེ་རང་གི་འབྱོར་པ་ཐམས་ཅད་དང་། རྡོ་རྗེའི་རིགས་ལ་ནི་རང་གི་ལུས་དང་། པདྨའི་རིགས་ལ་བུ་དང་ཆུང་མ། རིན་ཆེན་རིགས་ལ་གསེར་དངུལ་སོགས་ནོར་གྱི་དབྱིག །ལས་རིགས་ལ་རང་ལ་གང་ཡོད་ཀྱི་དངོས་པོའི་ནང་ནས་རབ་ཏུ་གཅེས་ཤོས་དེ་དང་། རིགས་དྲུག་པ་ལ་རང་གི་ཡིད་དུ་འོང་ཞིང་བླ་མའི་ཐུགས་ལ་གང་འཐད་ཀྱི་དངོས་པོ་སྟེ་རིགས་སོ་སོར་དབྱེའམ། ཡང་ན་མ་ཕྱེ་བར་རྒྱལ་སྲིད་སོགས་རང་གང་ལ་གཅེས་ཤིང་ཡིད་དུ་འོང་བ་དེ་ཉིད་དབུལ་ལོ། །དེ་ལྟར་དབང་ཕྱུག་ལ་འདོད་པའི་ལོངས་སྤྱོད་ལྔས་མཆོད་ན་རྒྱལ་བའི་དཀྱིལ་འཁོར་ཐམས་ཅད་ཀྱང་མཆོད་པར་འགྱུར་བ་ཡིན་པས་ཉེ་བ་ད་ལྟ་ཞུགས་པའི་དཀྱིལ་འཁོར་དེ་ཉིད་མཆོད་པ་ལྟ་སྨོས་ཀྱང་ཅི་དགོས་ཏེ། སངས་རྒྱས་ཐམས་ཅད་རྡོ་རྗེ་སློབ་དཔོན་གྱི་སྐུ་ལ་ཞུགས་ནས་གདུལ་བྱའི་མཆོད་པ་ལེན་པར་མཛད་པའི་ཕྱིར་དང་། དེས་ཉམས་ཆག་སོགས་ཉེས་པ་ཐམས་ཅད་བྱང་ཞིང་དག་པར་འགྱུར་བའི་ཕྱིར་ཏེ། འཇམ་དཔལ་ཞལ་ལུང་ལས། འདི་ཡིས་དོན་ལྡན་འགའ་ཞིག་ལ། །ང་ནི་འདི་ཡི་ལུས་གནས་ཏེ། །སྒྲུབ་པོ་གཞན་ལ་མཆོད་པ་ལེན། །དེ་མཉེས་དེ་ཡི་རང་གི་རྒྱུད། །ལས་ཀྱི་སྒྲིབ་པ་དག་བྱེད་དོ། །ཞེས་སོ། ། གཉིས་པ་ནི། དད་བརྩོན་སོགས་ཚིགས་བཅད་གཅིག་སྟེ། ཐོག་མར་སློབ་དཔོན་གྱིས་སློབ་མའི་རྒྱུད་བརྟགས་པའི་ཕྱི་ནང་གསང་བའི་དབང་གསུམ་བསྐུར་རུང་གི་སྣོད་ལྡན་དུ་རབ་ཏུ་རྟོགས་ན་བློའི་ཐེག་ཚད་དང་སྦྱར་ནས་དབང་བསྐུར་ཏེ། དེའང་སློབ་བུ་དད་པ་ཅན་ལ་ཕྱི་ཕན་པའི་དབང་བཅུ་སྦྱིན་ཞིང་། རང་གཞན་གྱི་དོན་ནུས་པའི་བརྩོན་འགྲུས་ཅན་ལ་ནང་ནུས་པའི་དབང་ལྔ་དང་། སྤྱོད་རིག་མཉམ་པའི་བརྟུལ་ཞུགས་ཅན་ལ་གསང་བ་ཟབ་མོའི་དབང་གསུམ་སྣོད་ཀྱི་རིམ་པ་བཞིན་དུ་འཚམས་པར་སྦྱིན་པར་བྱ་ཞིང་། གལ་ཏེ་མི་ཐེག་པ་ལ་སྦྱིན་ན་བུའི་རྒྱུད་ཆུད་ཟོས་པར་འགྱུར་བས་སློབ་དཔོན་གྱིས་ལྷག་པའི་སྙིང་རྗེས་སློབ་བུའི་རྒྱུད་ཆུད་མ་ཟོས་པར་རྗེས་སུ་བཟུང་བར་བྱ་སྟེ། ཐལ་རྒྱུད་ལས། གང་དུ་དད་དང་བརྩོན་འགྲུས་དང་། །བརྟུལ་ཞུགས་གསུམ་དང་ལྡན་པ་ལ། །ས་བོན་འཇུག་དང་ནུས་སྐྱེད་ནས། །བདེ་བའི་དབང་ནི་རིམ་བཞིན་སྦྱིན། །ཞེས་སོ། ། གསུམ་པ་ལ་གཉིས་ཏེ། ཚད་དང་། དེ་ལ་མཚན་མ་དགོད་པའོ། །དང་པོ་ཚད་ནི། སྤྱིར་གསང་བ་སྒྱུ་འཕྲུལ་པའི་ལུགས་ལ་དཀྱིལ་འཁོར་རྣམ་པ་བཞིར་དབང་ལྔ་བསྐུར་བར་གསུང་སྟེ། དེ་ཡང་ཕྱི་ལྷག་པ་གཟུགས་བརྙན་དུ་ཕན་དབང་། ནང་ལུས་དཀྱིལ་དུ་ནུས་དབང་། གསང་བ་བྷ་གར་གསང་དབང་དང་ཤེར་དབང་། དེ་ཁོ་ན་ཉིད་སེམས་ཀྱི་དཀྱིལ་འཁོར་དུ་བདེ་བ་ཆེན་པོའི་དབང་བསྐུར་བ་ལས། འདིར་ནི་གསང་དབང་གི་དཀྱིལ་འཁོར་ཡབ་ཡུམ་གྱི་མཁའ་གསང་མཚོན་བྱེད་འབུར་དུ་དོད་པའམ་བྲིས་པས་ཀྱང་རུང་སྟེ། སོར་བཞི་པའི་པདྨ་དང་། མཛུབ་གང་བའི་རྡོ་རྗེའོ། །དེ་ལ་པདྨའི་ཚད་ནི། ཤིན་ཏུ་ཕྲ་བའི་སོགས་ཚིགས་བཅད་གཅིག་སྟེ། དཀྱིལ་འཁོར་ཁྲུ་གང་བ་སོགས་ལ་ལྟོས་ན་ཤིན་ཏུ་ཕྲ་ཞིང་མཚོན་བྱེད་རྟགས་ཀྱིས་མཚོན་བྱ་མཁའ་དབྱིངས་བདེ་བའི་ཡེ་ཤེས་ཀྱི་རྒྱུར་མཚོན་པའི་དམ་ཚིག་མཆོག་གི་དཀྱིལ་འཁོར་ཏེ། སློབ་དཔོན་ལྷ་སྐུ་ཕྱག་རྒྱ་ཆེན་པོར་གསལ་བའི་ཕྱག་མཉམ་བཞག་གི་མཐིལ་དུ་ཐུགས་བདེ་བའི་ཡེ་ཤེས་སྐྱེད་བྱེད་ཀྱི་དཀྱིལ་འཁོར་དམ་པ་ཡུམ་གྱི་མཁའ་དེ་ཉིད་མཚོན་བྱེད་པདྨ་དམར་པོ་འདབ་མ་བཞི་པ་ཚད་དགའ་བཞི་མཚོན་པའི་སོར་ནི་བཞི་ཡི་ཚད་དུ་བྱ་བ་ཡིན་ནོ། །དེ་ནས་རྡོ་རྗེའི་ཚད་ནི། ཡང་ན་ཐལ་མོ་སོགས་ཚིགས་བཅད་གཅིག་སྟེ། དེ་ལས་གཞན་ཡང་རྡོ་རྗེའི་ཚད་ཇི་ལྟར་ན། ཐལ་མོ་ནི་བརྡ་སྟེ་སློབ་དཔོན་ཡབ་ཡུམ་གཉིས་ཀྱི་དབང་པོ་རབ་ཏུ་བསྣོལ་ནས་ཡབ་ལྷ་སྐུ་ཕྱག་རྒྱ་ཆེན་པོར་གསལ་བའི་པང་དུ་ཡུམ་བླངས་ནས་ནི་བདེ་བའི་ཡེ་ཤེས་བསྐྱེད་པའི་རྟེན་གྱི་དཀྱིལ་འཁོར་གསང་བའི་རྡོ་རྗེ་མཚོན་བྱེད་རྡོ་རྗེ་སྔོན་པོ་རྩེ་ལྔ་པ་མཛུབ་གང་བའི་ཚད་དུའང་མཁས་པས་ཆོ་ག་བཞིན་དུ་བཟོ་བར་བྱའོ། ། གཉིས་པ་མཚན་མ་དགོད་པ་ནི། སེན་ཟླུམ་སོགས་ཚིགས་བཅད་གཅིག་སྟེ། གསང་དཀྱིལ་གཉིས་ཀྱི་པདྨའི་ལྟེ་བ་དང་འདབ་བཞིར་སེན་ཟླུམ་ཙམ་གྱི་ཉི་དཀྱིལ་དང་། རྡོ་རྗེའི་རྭ་ལྔ་ལ་དེ་ཙམ་གྱི་ཟླ་བ་ལ་སྲན་མ་ཙ་ན་ཀའི་འབྲུ་ཙམ་གྱི་པདྨའི་གདན་རེ་རེའི་སྟེང་དུ་ཡུངས་འབྲུ་ཙམ་གྱི་ཡི་གེ་རྡོ་རྗེ་ལ་ཡབ་ཀྱི་འབྲུ་ལྔ་དང་པདྨར་ཡུམ་གྱི་འབྲུ་ལྔ་བཀོད་པ་ལས་ལྷའི་ཕྱག་རྒྱ་ཏིལ་འབྲུ་ཙམ་དུ་བྲི་བ་སྟེ་གསལ་གདབ་བོ། །ཇི་ལྟར་ན་མཚོན་བྱེད་རྟགས་ལ་བཀོད་པ་ལྟར་མཚོན་བྱ་ཡབ་ཡུམ་མཉམ་པར་སྦྱོར་བའི་མཁའ་གསང་གཉིས་ལ་ཐབས་ཤེས་བསྣོལ་བའི་སྒོ་ནས་དགོད་པར་བྱའོ། ། གསུམ་པ་སྒྲུབ་པ་ལ་གསུམ་སྟེ། སྒྲུབ་པ་པོ་དང་། འགྲུབ་པའི་དུས་དང་། བསྒྲུབས་པའི་འབྲས་བུའོ། །དང་པོ་ནི། ཆོ་ག་ལྔ་ནི་སོགས་ཚིགས་བཅད་གཅིག་སྟེ། སྟོང་ཆེན། སྙིང་རྗེ་སྒྱུ་མ། ཕྱག་རྒྱ་གཅིག་པ་ཕྲ་རགས་གཉིས། ཕྱག་རྒྱ་སྤྲོས་བཅས་ཀྱི་ཆོ་ག་ལྔ་ནི་སྔོན་དུ་རྫོགས་པ་སྟེ་བརྟན་པ་ཐོབ་པར་བྱས་ཤིང་། ལམ་རིམ་ལས། དམ་ཚིག་ལྟ་བ་ཏིང་འཛིན་དང་། །བྱང་ཆུབ་སེམས་དང་སྙིང་རྗེ་སྟེ། །ལྷག་པའི་ཡོ་བྱད་ལྔ་རྫོགས་བྱ། །ཞེས་པ་ལྟར་ལམ་གྱི་ཡོ་བྱད་ལྔའམ། བྲོ་གར། གླུ་ཚིག །བཟའ་བཏུང་། གོས་རྒྱན། སྦྱོར་སྒྲོལ་ཏེ་སྒྲུབ་པ་རྫས་ཀྱི་ཡོ་བྱད་ལྔ་ནི་རྫོགས་པར་ལྡན་པ་དང་། ཡིད་སྐྱོབ་པ་དང་བྱིན་གྱིས་རློབ་པའི་ཕྱིར་སྔགས་ཏེ་ཡན་ལག་གི་ལྷ་དགུའི་དབུ་རྒྱན་རིགས་བདག་གཅིག་གིས་བསྡུས་པའི་གནད་ཀྱིས་གཅིག་ཏུ་བརྩིས་པས་ཡན་ལག་གི་ལྷ་ལྔའམ། ཡང་ན་འགྲེལ་ཆུང་ལས། སྙིང་གར་ཡེ་ཤེས་སེམས་བསྒོམ་སྙིང་གར་ཉི་ཟླའི་དཀྱིལ། །དམ་ཚིག་ཕྱག་རྒྱ་བཞག་སྟེ་དེ་སྟེང་ཡིག་འབྲུ་བཞག །ཟློས་ཚེ་སྤྲོ་བསྡུས་བཟླས་པ་སྔགས་ཀྱི་ཡན་ལག་ཡིན། །ཞེས་གསུངས་ཏེ། དེ་དག་རྫོགས་པར་གསལ་བའི་རྣལ་འབྱོར་པས་རྩ་བ་དང་ཡན་ལག་གི་དམ་ཚིག་མ་ཉམས་པར་སྒྲུབ་པ་ལ་འཇུག་ཅིང་། ཞུགས་ནས་ཉམས་ལེན་ལ་རབ་ཏུ་བརྩོན་པར་བྱས་ན་འགྲུབ་པར་འགྱུར་རོ། ། གཉིས་པ་ལ་གཉིས་ཏེ། མཐོང་ལམ་འགྲུབ་པའི་དུས་དང་། མཐར་ཐུག་སྐུ་ལྔ་འགྲུབ་པའི་དུས་སོ། །དང་པོ་ནི། ཞག་ནི་སོགས་རྐང་པ་གསུམ་སྟེ། དབང་པོ་དང་བརྩོན་པ་ཡང་རབ་ཀྱིས་ཞག་ནི་སུམ་ཅུ་ཕྲག་དྲུག་སྟེ་ཟླ་བ་དྲུག་གམ། རབ་ཀྱིས་ཟླ་བ་བཅུ་གཉིས་ཏེ་ལོ་གཅིག །འབྲིང་གིས་ཟླ་བ་བཅུ་བཞི་སྟེ་ལོ་གཅིག་དང་ཟླ་བ་གཉིས། ཐ་མས་ཀྱང་ཟླ་བ་བཅུ་དྲུག་སྟེ་ལོ་གཅིག་དང་ཟླ་བ་བཞི་རྣམས་ཀྱིས་དབང་པོ་རྟུལ་ན་རྣམ་སྨིན་ནམ། རྣོ་ན་ཚེ་ལ་དབང་སྒྱུར་བའི་རིགས་ཀྱི་དམ་པ་སྟེ་ལམ་མཆོག་ཡོངས་སུ་རྫོགས་པའི་ཚེ་དབང་རིག་འཛིན་འགྲུབ་པར་འགྱུར་རོ། ། གཉིས་པ་ནི། དེ་ཚེ་སོགས་རྐང་པ་གཉིས་ཏེ། མཐོང་ལམ་ལ་གཉིས་ལས་ནུས་ཐོབ་ཚེ་དབང་རིག་འཛིན་ཐོབ་པ་དེའི་ཚེ་ལོ་བརྒྱ་བརྒྱ་ན་ཕྱིར་བསྣུར་བ་ལན་བཅུ་དྲུག་སྟེ་སྟོང་དྲུག་བརྒྱ་ཚུན་ཆད་ཀྱིས་རིམ་གྱིས་པ་ཕྱག་ཆེན་དང་ལྷུན་གྲུབ་རིག་འཛིན་བརྒྱུད་ནས་མཐར་ཐུག་གི་འབྲས་བུ་ལ་སྦྱོར་ཞིང་ཐོད་རྒལ་བ་ཚེ་དབང་ནས་ལྷུན་གྲུབ་རིག་འཛིན་ནམ། ཤིན་ཏུ་བློ་ཆེ་ན་ལམ་གཞན་མ་བརྒྱུད་པར་མཐར་ཐུག་གི་འབྲས་བུ་སྐུ་ལྔ་ལྷུན་གྱིས་གྲུབ་པ་རྫོགས་པའི་སངས་རྒྱས་ཐོབ་པར་བྱེད་དེ། རྒྱས་པ་ལས། ཚེ་ནི་བཅུ་དང་དྲུག་པ་ཡིས། །བརྒྱ་བརྒྱ་དག་ཏུ་བསྣུར་ཞིང་གནས། །ལུས་མ་བོར་བར་སངས་རྒྱས་ས། །ཞེས་གསུངས་ཤིང་། ཇི་ལྟར་འགྲུབ་པའི་ཚུལ་ནི་འཆད་པར་འགྱུར་རོ། ། གསུམ་པ་བསྒྲུབས་པའི་འབྲས་བུ་ལ་གཉིས་ཏེ། འགྲུབ་ཚུལ་དང་། འབྲས་བུ་རང་གི་ངོ་བོའོ། །དང་པོ་ལ་གཉིས་ཏེ། འགྲུབ་ཚུལ་རང་སྣང་དུ་བསྟན་པ་དང་། དེ་དཔེའི་སྒོ་ནས་བསྟན་པའོ། །དང་པོ་ནི། ཡེ་ཤེས་ཐིག་ལེ་སོགས་རྐང་པས་དམན་པའི་ཚིགས་བཅད་གསུམ་སྟེ། ལམ་མཐར་ཆགས་ཀྱི་དབང་དུ་ལྷུན་གྲུབ་རིག་འཛིན་དང་། ཐོད་རྒལ་གྱི་དབང་དུ་ཚེ་དབང་གི་དགོངས་པ་རང་རིག་པའི་ཡེ་ཤེས་སྤྲོས་བྲལ་ཐིག་ལེ་དེ་ཉིད་ཀྱི་ངང་ལ་མཉམ་པར་བཞག་པའི་དུས་སུ་སངས་རྒྱས་ཀྱི་ཡེ་ཤེས་སྤྲོས་པ་དང་བྲལ་བའི་ཐིག་ལེ་དེ་ཉིད་རང་སྣང་བའི་ཕྱིར། དགོངས་པའི་ངོ་བོ་ནི་བློའི་ཡུལ་ལས་འདས་པས་བསམ་གྱིས་མི་ཁྱབ་ཅིང་མཐའ་ཡས་པའི་ཡོན་ཏན་མ་བཙལ་ལྷུན་གྱིས་གྲུབ་པའི་ཕྱིར་མཆོག་སྟེ། དེ་ཚེ་ཕྱོགས་བཅུ་དང་དུས་བཞིར་མངོན་པར་རྫོགས་པ་བྱང་ཆུབ་པའི་དེ་བཞིན་གཤེགས་པ་ཐམས་ཅད་ཀྱི་ཞིང་ཁམས་རྣམ་པར་དག་པ་ཡོན་ཏན་བསམ་གྱིས་མི་ཁྱབ་ཅིང་མཐའ་ཡས་པ་དང་། ཞིང་དེར་རྒྱ་གང་དུའང་མ་ཆད་པས་འདི་ཙམ་ཞེས་བསམ་པའི་ཡུལ་དང་བྲལ་བའི་གཞལ་ཡས་ཁང་གཞི་ཚད་མེད་ཀྱི་ཡེ་ཤེས་ཀྱི་འཁོར་ལོ་ལ་བརྟེན་པའི་བཀོད་པ་མཛེས་པའི་རྒྱན་དང་། འདོད་ཡོན་གྱི་རོལ་མོའི་སྤྲིན་ཚོགས་རྣམ་པར་འཁྲིགས་ཤིང་། དེ་ལྟར་རྒྱལ་བའི་དཀྱིལ་འཁོར་ཆེ་བའི་ཡོན་ཏན་མ་ལུས་ཟད་པ་མེད་པའི་རྒྱན་གྱི་འཁོར་ལོ་བསམ་ཡས་པར་སྣང་བ་ཀུན་ཀྱང་། སྐད་ཅིག་དང་པོ་མཉམ་བཞག་གི་གཟིགས་ངོར་རང་རིག་མངོན་སུམ་གྱིས་མཐོང་ནས་སྐད་ཅིག་གཉིས་པ་རྗེས་ཐོབ་ལ་ཉེ་བར་བརྙེས་པ་སྟེ། དེ་ཐོབ་པ་དང་གསུང་ལྔ་ཡང་ལྷུན་གྱིས་གྲུབ་པས་རིས་སུ་མ་ཆད་པ་རྒྱ་ཆེན་པོའི་གསུང་གི་སྣང་བ་ལས་གདུལ་བྱའི་དོན་ལྷུན་གྲུབ་ཏུ་འབྱུང་བའང་གཞི་ལམ་འབྲས་བུའི་ཡེ་ཤེས་གསུམ་ཚུལ་གཅིག་ཏུ་གྱུར་པས་མཐུན་པའི་ཡེ་ཤེས་ཞེས་བྱའོ། །དེའི་ཕྱིར་གཞན་དུ་གྲུབ་པ་མེད་དེ། རིག་པའི་ཡེ་ཤེས་ལ་རང་སྣང་བའོ། །གཉིས་པ་ནི། དཔག་བསམ་སོགས་ཚིགས་བཅད་གཉིས་ཏེ། དཔེར་ན་ལྷའི་གནས་སོགས་སུ་དཔག་བསམ་ཤིང་གིས་གྲིབ་མར་གནས་པ་རྣམས་ཀྱི་རེ་བ་སྐོང་ནུས་པ་དང་། ཡིད་བཞིན་གྱི་ནོར་བུ་རིན་པོ་ཆེས་མཆོད་པ་བྱེད་པ་རྣམས་ཀྱི་རེ་བ་སྐོང་ནུས་པ་དང་། དེར་མ་ཟད་གཞན་ཡང་འདོད་པ་འབྱུང་བའི་གནས་སུ་གྱུར་པ་ཀུན་སྣང་ཡང་། དོན་དེ་དག་རྫས་གྲུབ་ཏུ་ཡོད་ནས་དེ་ལ་སྤྱོད་པ་མ་ཡིན་ཏེ། གཞོན་ནུ་མེ་སྐྱེས་ཀྱི་རིན་པོ་ཆེའི་ཁང་བཟང་མ་སྐྱེས་དགྲའི་ཁང་པ་དང་བརྗེས་ཀྱང་ཁོ་རང་གི་ཕྱི་བཞིན་འབྲང་བ་ལྟར་རང་རང་གི་སེམས་ཀྱི་སྣང་བ་བསོད་ནམས་ཀྱི་མཐུ་བརྟས་ཤིང་བརྟན་པར་གྱུར་པ་ཉིད་དེ་ལྟ་བུར་སྣང་བ་ཡིན་ནོ། །དེ་བཞིན་དུ་འབྲས་བུ་འགྲུབ་ཚུལ་ཡང་དེ་དང་འདྲ་སྟེ། གཞི་ཇི་ལྟ་བ་མངོན་དུ་གྱུར་པས་སྤངས་ཐོབ་མེད་པར་སྐུ་དང་ཡེ་ཤེས་ཀྱི་དཀྱིལ་འཁོར་ངོ་མཚར་བའི་ཆོ་འཕྲུལ་ཆེན་པོ་ཡ་མཚན་རྨད་དུ་བྱུང་བ་བརྙེས་པའི་ཡོན་ཏན་གྱི་ཆོས་དེ་ཡང་། ལམ་པ་ཉིད་ཀྱིས་ཕར་བགྲོད་ནས་དེར་སླེབས་པའམ། གཞན་ཞིག་ན་ཡོད་པ་ཚུར་བཀུག་ནས་འོངས་པ་མ་ཡིན་ཏེ། ཐབས་རང་གསལ་འགགས་མེད་བདེ་བ་ཆེན་པོ་ལ་གོམས་པ་རབ་ཏུ་བརྟན་པར་གྱུར་པའི་རང་རིག་པའི་ཡེ་ཤེས་ཉིད་ཤེས་རབ་སྟོང་པ་ཉིད་ཀྱི་དབྱིངས་སུ་གྲོལ་བའི་ཟུང་འཇུག་དེ་ལྟ་བུའི་ངང་དུ་མ་བཙལ་བར་རང་བྱུང་དུ་སྣང་བའོ། ། གཉིས་པ་འབྲས་བུ་རང་གི་ངོ་བོ་ལ་གསུམ་སྟེ། རྒྱུ་རྐྱེན་ལས་མ་སྐྱེས་ཤིང་དོན་བྱེད་ནུས་པར་བསྟན་པ། གཅིག་དུ་བྲལ་གྱི་དོན་རང་བྱུང་གི་ཡེ་ཤེས་སུ་བསྟན་པ། ཐམས་ཅད་མཁྱེན་པའི་ཡེ་ཤེས་ཀྱིས་གདུལ་བྱ་ལ་གཟིགས་ཚུལ་ལོ། །དང་པོ་ནི། ཤེས་རབ་དབྱིངས་སོགས་ཚིགས་བཅད་གཉིས་ཏེ། ཤེས་རབ་ཆོས་ཀྱི་དབྱིངས་རང་བཞིན་གྱིས་རྣམ་པར་དག་པ་དེ་བཞིན་གཤེགས་པའི་སྙིང་པོ་ཉིད་ཐབས་ལམ་གྱི་ཕྱག་རྒྱ་ཆེན་པོ་གོམས་པར་གྱུར་པས་སྣང་ཞེན་གྱི་འཁྲུལ་པ་སངས་པའི་དོན་འབྲས་བུའི་ཡོན་ཏན་རྣམས་རང་གསལ་བའི་ཕྱིར། བྲལ་འབྲས་ཙམ་ལས་ལམ་གྱིས་གསར་དུ་བསྒྲུབས་པ་མ་ཡིན་ཏེ། གཞིའི་ཡེ་ཤེས་དེ་ཉིད་ལ་ནི་འབྲས་བུ་རང་སྣང་བའི་ཡེ་ཤེས་རོལ་པ་ཙམ་དུ་ཟད་པའི་ཕྱིར་རོ། །དེ་ལྟར་ན་འབྲས་བུའི་སྣང་བ་དེ་དག་ཡོད་པའི་མཚན་མར་མི་འགྱུར་རམ་ཞེ་ན། ཡེ་ཤེས་ལ་ཡེ་ཤེས་རོལ་པ་ཉིད་ཀྱང་དངོས་པོར་མ་གྲུབ་སྟེ། སྒྱུ་མ་ལྟར་གསོག་གསོབ་ཡ་མ་བརླའོ། །ཡེ་ཤེས་ཅི་འདྲ་བར་སྐུ་ཡང་དེ་འདྲ་སྟེ། རྒྱལ་བ་སྤྲུལ་པའི་སྐུ་འཇིག་རྟེན་དུ་མངོན་སུམ་དུ་འབྱུང་ཞིང་འགྲོ་བ་སྡུག་བསྔལ་ལས་སྐྱོབ་པ་དང་། ཆོས་སྐུའི་ངང་ལས་ལོངས་སྐུ་རང་སྣང་བའི་བྱིན་རླབས་ཀྱིས་བརྡའི་ཆོས་སྟོན་པའང་ཡེ་ཤེས་ལ་བརྗོད་པ་དེ་བཞིན་ཏེ། རང་རིག་སྐུའི་དཀྱིལ་འཁོར་དུ་ཡེ་ནས་བཞུགས་པ་ལ་འབྲས་བུའི་སྐུ་རོལ་ཞིང་དེ་ཉིད་ཀྱང་རང་བཞིན་མེད་པ་སྒྱུ་མ་ལྟ་བུའོ། །འོ་ན་སྐུ་དང་ཡེ་ཤེས་དེས་དོན་བྱེད་མི་ནུས་པ་ཞིག་གམ་སྙམ་ན། མ་ཡིན་ཏེ། དོན་བྱ་བའི་ཡུལ་ལ་དོན་བྱེད་ནུས་པའི་ཐུགས་རྗེའི་གཟི་བྱིན་མངའ་བའི་ཕྲིན་ལས་ཀྱིས་སྐུ་དང་ཡེ་ཤེས་ཀྱི་རོལ་པ་གང་ལ་གང་འཚམས་སུ་བསྟན་ནས་སྒྱུ་མ་ལྟ་བུའི་ཕྲིན་ལས་ཀྱིས་དོན་མཛད་ཅིང་། དེ་ལྟ་ནའང་ངོ་བོ་གཞན་དུ་འགྱུར་བ་མ་ཡིན་ཏེ། སྐུ་ལྔ་དབྱེར་མི་ཕྱེད་པ་རྡོ་རྗེའི་རང་བཞིན་ཅན་གང་གིས་ཀྱང་མི་ཤིགས་པའི་ནུས་མཐུ་མངའ་བས་བཙན་པོ་སྟེ་ཆེ་བའི་མཆོག་དམ་པའོ། །དེ་ཡང་རྡོ་རྗེ་ལས། ཡེ་ཤེས་སྒྱུ་མ་རང་སྣང་བ། །རྡོ་རྗེ་བཙན་པོ་དམ་ཚིག་མཆོག །སྐུ་གསུང་ཐུགས་ཀྱི་དངོས་གྲུབ་ཆེ། །འགྲོ་བ་ཀུན་ལ་རབ་སྣང་བའོ། །ཞེས་སོ། །གཉིས་པ་ནི། གཅིག་དང་དུ་མ་སོགས་ཚིགས་བཅད་གཅིག་སྟེ། སངས་རྒྱས་རྣམས་ནི་གཞན་སྣང་གཟུགས་སྐུའི་རོལ་པ་ཐ་དད་དུ་སྟོན་པས་གཅིག་གི་མཐའ་དང་། ཇི་ལྟར་བསྟན་ཀྱང་རང་བཞིན་ཆོས་ཉིད་ཀྱི་སྐུ་ལས་མ་གཡོས་པས་དུ་མའི་མཐའ་དང་བྲལ་ཞིང་། དེ་ལྟོས་ཀྱི་གཉིས་ཀ་དང་གཉིས་ཀ་མ་ཡིན་པའི་མུ་ཡང་མེད་དེ། གཅིག་དང་དུ་མ་མ་གྲུབ་པས་དེའི་མཐའ་ཁེགས་པའི་ཕྱིར་དང་། ཡོད་མེད་རྟག་ཆད་ལ་སོགས་པའི་མཐའ་དང་དེ་ལྟོས་ཀྱི་དབུས་ཀྱང་གྲུབ་པ་མེད་དེ། བརྗོད་མེད་དེ་བཞིན་ཉིད་ཀྱི་དབྱིངས་སུ་གཤེགས་པས་མཚན་ཉིད་མེད་པའི་ཕྱིར། སངས་རྒྱས་ཀྱིས་ཀྱང་གཟིགས་བྱ་གཟིགས་བྱེད་ལས་འདས་པས་མི་གཟིགས་ཏེ། སྡོང་པོ་བཀོད་པ་ལས། ཇི་ལྟར་མཚན་ཉིད་སྣ་ཚོགས་པ། །དེ་དག་བྱིས་པའི་སྤྱོད་ཚུལ་ཏེ། །གང་ཞིག་མཚན་ཉིད་ཀུན་མེད་པའི། །སངས་རྒྱས་རྣམས་ནི་མི་མཐོང་ངོ་། །ཞེས་སོ། །དེ་ལྟར་ནའང་རང་བྱུང་ཡེ་ཤེས་ཀྱི་དགོངས་པ་ནི་གནས་བྱའི་ཡུལ་དང་གནས་བྱེད་ཀྱི་ཡུལ་ཅན་གཉིས་མེད་པར་རང་གསལ་མ་འགགས་པར་ཐམས་ཅད་དུ་སྣང་བའོ། །གསུམ་པ་ནི། ལོག་པར་སོགས་ཚིགས་བཅད་གཅིག་དང་། ཞེས་ཆེད་སོགས་ཏེ། འགྲོ་བའི་ལོག་པར་རྟོག་པ་གཟུང་འཛིན་གྱིས་རྣམ་པར་བཏགས་པའི་སྒྲིབ་པ་དེ་དག་ཡེ་ནས་རྣམ་པར་དག་པས་ཆོས་དང་ཆོས་ཉིད་རང་བཞིན་གྱིས་འབྲེལ་ཞིང་། སངས་རྒྱས་རྣམས་ཀྱི་ཡེ་ཤེས་ཀྱང་ཆོས་ཐམས་ཅད་ཀྱི་ཆོས་དབྱིངས་ལས་མི་གཞན་པའི་ཕྱིར་ཡུལ་དང་ཡུལ་ཅན་རང་བཞིན་ཐ་མི་དད་པར་འབྲེལ་བ་དང་། སངས་རྒྱས་རྣམས་སྔོན་བྱང་ཆུབ་ཀྱི་སྤྱད་པ་སྤྱོད་པའི་ཚེ་ཐུགས་རྗེ་ཆེན་པོས་སེམས་ཅན་ཡོངས་སུ་སྒྲོལ་བར་དམ་བཅས་པས་ལས་དང་ཐུགས་རྗེར་འབྲེལ་བའོ། །དེ་ལྟར་འབྲེལ་པ་གསུམ་གྱིས་འབྲེལ་བས་ན་ཐུགས་རྗེས་གཟིགས་པའི་ཐ་སྙད་གདགས་སུ་རུང་སྟེ། གདུལ་བྱ་འགྲོ་བའི་སྣང་བ་དངོས་པོར་མ་གྲུབ་པས་ཅིར་ཡང་མི་དམིགས་པར་གཟིགས་པ་ཇི་ལྟ་བ་མཁྱེན་པའི་ཡེ་ཤེས་དང་། རིགས་དྲུག་གི་འཇིག་རྟེན་དུས་སྔ་ཕྱི་དང་གནས་མཐོ་དམན་སོགས་སྣང་བ་ཐམས་ཅད་མ་ལུས་པ་ས་ལེར་གཟིགས་པ་ནི་ཇི་སྙེད་མཁྱེན་པའི་ཡེ་ཤེས་སོ། །འཁོར་འདས་ཀྱི་ཆོས་ཐམས་ཅད་སྣང་ལ་རང་བཞིན་མེད་པར་གཟིགས་པ་ནི་དབྱེར་མེད་མཁྱེན་པའི་ཡེ་ཤེས་ཞེས་བྱའོ། །དེ་སྐད་ཅེས་སྟོན་པས་ཆེད་དུ་བརྗོད་པར་མཛད་དོ། ། གསུམ་པ་ལེའུའི་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉེར་གཉིས་ཡོད་པ་ལས། འདིས་རྡོ་རྗེ་གསུམ་ཐོབ་བྱེད་ལས་ཀྱི་རིམ་པ་གསུམ་དུ་བཀོད་པའི་དོན་མཆོག་ཏུ་གསང་བ་འདའ་དཀའི་དམ་ཚིག་གི་ལེའུ་སྟེ་དགུ་པའོ།། །། ལེའུ་བཅུ་པའི་འགྲེལ་པ།ལེའུ་བཅུ་པ་ལ་གསུམ་སྟེ། ལོ་རྒྱུས་དང་། གཞུང་། མཚན་ནོ། །དང་པོ་ནི། དེ་ནས་སོགས་ཏེ། དཀྱིལ་འཁོར་དུ་འཇུག་ཅིང་སྣོད་དང་འཚམས་པར་དབང་བསྐུར་ཚུལ་མདོར་བསྟན་པ་དེ་ནས་ཇི་ལྟར་བསྐུར་བའི་རིམ་པ་སྟོན་པའི་ཕྱིར་བཅོམ་ལྡན་འདས་དགྱེས་པ་ཆེན་པོ་ཆོས་ཀྱི་རྒྱལ་པོའི་གོ་འཕང་སྐལ་བ་དང་འཚམས་པར་སྦྱིན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དབང་བསྐུར་བའི་ཆེད་དུ་བརྗོད་པ་འདི་བརྗོད་དོ། ། གཉིས་པ་གཞུང་ལ་གསུམ་སྟེ། དབང་བསྐུར་བའི་རིམ་པ། མ་བསྐུར་བའི་སྐྱོན། བསྐུར་བའི་ཡོན་ཏན་ནོ། །དང་པོ་དབང་བསྐུར་བའི་རིམ་པ་འཆད་པའི་སྐབས་འདིར། སྤྱིར་གསང་བདག་སྒྲོ་ཕུག་པ་ཆེན་པོའི་གསུང་རྒྱུན་སྔ་ཕྱི་གཉིས་ལས། སྔ་མའི་བཀའ་སྲོལ་འཛིན་པ་རྣམས་དབང་ཐམས་ཅད་ལ། མཚུངས་ལྡན་དང་། དབང་རྫས་དང་། བསྐུར་ཐབས་གསུམ་དུ་བསྡུས་ནས་གསུང་ནའང་། ཕྱིས་དོན་བརྒྱད་བརྒྱད་དུ་བསྡུས་ནས་གསུངས་པའི་ལུགས་དབང་བཙན་དུ་བྱས་ན། རྡོ་རྗེ་ལས་རིམ་ལས། རྒྱུ་རྐྱེན་ངོ་བོ་འབྲས་བུ་དང་། །རིམ་ལས་སྐྱོན་ཡོན་བརྒྱད་ཅེས་བྱ། །ཞེས་པ་ལྟར་དོན་བརྒྱད་ཀྱི། དང་པོ་རྒྱུ་ལ་གཉིས་ལས། མཚུངས་ལྡན་ནི། རླུང་སེམས་རྩ་དང་ཐིག་ལེར་དབང་བཅོ་བརྒྱད་རང་ཆས་སུ་ལྡན་པ་སྟེ། ལམ་རིམ་ལས། གནས་བརྟེན་རྩ་དང་ཐིག་ལེ་ལ། །བཅུ་དབང་ལྔ་གསུམ་དབང་རྣམས་ལྡན། །ཞེས་པས། ཕན་ནུས་གཉིས་ལ་རང་རང་གི་བསྟིམ་གནས་དང་། ཟབ་དབང་གསུམ་གྱི་ལྷག་པའི་བདེན་པ་གསུམ་མོ། །ལྷན་ཅིག་བྱེད་རྒྱུ་ནི། ཕན་ནུས་གཉིས་ལ་དབང་རྫས་རབ་གནས་ཅན་དང་། ཟབ་དབང་ལ་བྱིན་གྱིས་བརླབས་པའི་ཕྱག་རྒྱ་མའོ། །གཉིས་པ་རྐྱེན་ལ་བཞི་ལས། དད་བརྩོན་བརྟུལ་ཞུགས་གསུམ་ལྡན་པའི་རིམ་པས་ཕན་ནུས་ཟབ་མོའི་དབང་གསུམ་བསྐུར་རུང་བའི་སློབ་བུ་རྒྱུའི་རྐྱེན། དབང་གསུམ་བསྐུར་ནུས་པའི་མཚན་ལྡན་གྱི་སློབ་དཔོན་བདག་པོའི་རྐྱེན། རྫས་སྔགས་ཏིང་འཛིན་སོགས་འཛོམ་པའི་ནུས་པ་ཁྱད་པར་ཅན་དམིགས་པའི་རྐྱེན། དབང་སྔ་མ་སྔ་མས་གོ་ཕྱེ་ནས་ཕྱི་མ་ཕྱི་མ་འབྱུང་བ་དེ་མ་ཐག་རྐྱེན་ནོ། །གསུམ་པ་ངོ་བོ་ནི། རྡོ་རྗེ་ལས་རིམ་ལས། ངོ་བོ་སྣོད་ཀྱི་མཚན་ཉིད་ཀྱིས། །དབྱེ་བ་རྣམ་པ་ལྔ་རུ་འགྱུར། །ཞེས་པས་ཕྱི་ཕན་དབང་། ནང་ནུས་དབང་། གསང་བ་ཟབ་མོའི་དབང་གསུམ་མོ། །བཞི་པ་འབྲས་བུ་ནི། དཔེར་ན་མཚོན་ལ་ངར་བཏགས་པ་ལྟར་དབང་བསྐུར་བས་ཐོབ་བྱ་རང་གནས་ཀྱི་དོན་མངོན་དུ་གྱུར་པའི་ནུས་པ་དངོས་སུ་སྐྱེས་པའམ་ས་བོན་ཙམ་ཐེབས་པ་སྟེ། ཁོག་གཞུང་ལས། རྣོ་ལ་ངར་བཏགས་ནུས་པ་བཞིན། །ནུས་པ་སྐྱེས་པ་ཐོབ་པའི་ཚད། །ཅེས་སོ། །ལྔ་པ་རིམ་པ་ནི། ཐོག་མར་ཕན་དབང་། དེ་རྗེས་ནུས་དབང་དང་ཟབ་མོའི་དབང་གསུམ་སྣོད་དང་སྦྱར་ཏེ་རིམ་པར་བསྐུར་ཞིང་། ཁྱད་པར་ཕན་དབང་གི་འཁྲུགས་སྡེབས་ནི། སྙིང་པོ་ལྔ་དང་དབུ་རྒྱན་དང་། །བུམ་པ་ཅོད་པན་ཕྲེང་བ་སྟེ། །གོ་ཆ་རྒྱལ་མཚན་གདུགས་ཕྱག་རྒྱ། །བཟའ་བཏུང་དབང་རྣམས་རིམ་བཞིན་བསྐུར། །དྲུག་པ་དབང་བསྐུར་བའི་ལས་རིམ་ནི། བསམ་རྒྱུད། བསྒྲག་ཚིག །བསྐུར་གནས། བསྟིམ་གནས། རང་སྐལ་གྱི་སྒྲིབ་པ་གང་དག་ནས་ནུས་པ་གང་སྐྱེ་བའི་ཚུལ་རྗེས་མཐུན་སྨོན་ལམ་དང་བཅས་པ་སྟེ། དབང་རེ་རེ་ལའང་ལྔ་ལྔའོ། །བདུན་པ་མ་ཐོབ་པའི་སྐྱོན་དང་། བརྒྱད་པ་ཐོབ་པའི་ཡོན་ཏན་གཉིས་ནི་འོག་ཏུ་སྟོན་ནོ། ། ད་ནི་གཞུང་གི་དཀྱུས་ཉིད་ལ་འཇུག་སྟེ། དེ་ཡང་དབང་བསྐུར་བའི་རིམ་པ་ལ། ཕྱི་ཕན་པའི་དབང་བཅུ། ནང་ནུས་པའི་དབང་ལྔ། གསང་བ་ཟབ་མོའི་དབང་གསུམ་བསྐུར་བའི་རིམ་པ་དང་གསུམ། དང་པོ་ནི། དབུ་རྒྱན་སོགས་ཚིགས་བཅད་གཅིག་སྟེ། སློབ་བུ་ལྷར་གསལ་བ་ལ། རིན་འབྱུང་གི་རབ་གནས་ཅན་གྱི་དབུ་རྒྱན་བསྐོན་ལ་སྤྱི་བོར་རིགས་ལྔའི་དབང་རྒྱ་འཆིང་ཞིང་དབང་རྫས་ཚོགས་བརྒྱད་ཀྱི་ཤེས་པ་ལ་བསྟིམས་པས་དོན་ཡེ་ཤེས་ལྔའི་ངོ་བོར་དག་པའི་རྟགས་རིགས་ལྔས་དབུ་བརྒྱན་པར་བསམ་པའོ། །དེ་བཞིན་དུ་མཐའ་ཡས་དང་རྡོར་སེམས་ཀྱིས་བརླབས་པའི་དར་དམར་མཐིང་གི་ཅོད་པན་མགོ་བོའི་གཡས་གཡོན་དུ་འཕུར་ཞིང་དཔྱངས་པ་རྩ་རོ་རྐྱང་གཉིས་ལ་བསྟིམས་པས་ཡོན་ཏན་ཐམས་ཅད་རྫོགས་ཤིང་གདུག་པ་ཅན་འདུལ་བ་དང་། རིན་འབྱུང་གིས་བརླབས་པའི་ཕྲེང་བ་མགོར་བཅིངས་ཤིང་ཐིག་ལེ་སོ་གཉིས་ལ་བསྟིམས་པས་གཟུངས་དང་ཏིང་འཛིན་སོགས་འབྲས་བུའི་ཆོས་ཐམས་ཅད་རྫོགས་པར་དང་། དོན་གྲུབ་ཀྱིས་བརླབས་པའི་གོ་ཆ་ལུས་ལ་བསྐོན་ཞིང་ལུས་རྩའི་དྲྭ་བས་ཁེབས་པ་ལ་བསྟིམས་པས་རྒོལ་བས་མི་ཚུགས་པར་དང་། རྡོར་སེམས་ཀྱིས་བརླབས་པའི་རྒྱལ་མཚན་ལག་ཏུ་གཏད་ཅིང་གསང་བའི་དབང་པོ་ལ་བསྟིམས་པས་ལོག་ལྟ་ཅན་ཟིལ་གྱིས་གནོན་པར་དང་། ལྷ་རང་རང་གིས་བརླབས་པའི་ཕྱག་རྒྱ་སྤྱི་བོའམ་སྙིང་གར་བཞག་ཅིང་སོ་སོའི་རྟོག་ཚོགས་ལ་བསྟིམས་པས་རྟོག་པ་ལྷའི་ངོ་བོར་དག་པར་དང་། མི་བསྐྱོད་པས་བརླབས་པའི་གདུགས་སྤྱི་བོར་བཞག་ཅིང་ཀླད་པ་བདེ་ཆེན་གྱི་འཁོར་ལོ་ལ་བསྟིམས་པས་ཉོན་མོངས་པའི་གདུང་བ་ལས་སྐྱོབ་པར་དང་། རིགས་ལྔ་འདུས་ཀྱིས་བརླབས་པའི་བུམ་པའི་ཆུས་སྤྱི་བོར་བསྐུར་ཞིང་། རྩ་གནས་ཐིག་ལེས་གང་བ་ལ་བསྟིམས་པས་ཉོན་མོངས་པའི་དྲི་མ་དག་ནས་ཡེ་ཤེས་ལྔའི་དབང་ཐོབ་པར་དང་། རྣམ་སྣང་གིས་བརླབས་པའི་བཟའ་བཏུང་ཁར་བྱིན་ཞིང་ལྕེ་ལ་གནས་པའི་རོ་འབབ་མ་ལ་བསྟིམས་པས་ཡེ་ཤེས་ཀྱི་སྣང་བ་འདོད་ཡོན་གྱི་རོལ་མོར་མ་འགགས་པར་སྤྱོད་པའི་དང་། འབྲས་བུ་ལྔས་བརླབས་པའི་སྙིང་པོ་ལྔ་སྤྱི་མགྲིན་སྙིང་དང་ལྟེ་བའི་གཡས་གཡོན་ལྔའམ་མགོར་བཞག་ཅིང་ཁམས་ལྔའི་བཅུད་དམ་རྫས་ལྔ་ལ་བསྟིམས་པས་ཁམས་ལྔ་རིགས་ལྔའི་ངོ་བོར་དག་པར་བསམ་ཞིང་། དེ་ལྟར་ཕྱི་དབང་བཅུ་བསྐུར་བས་ནི་འདི་ཕྱིར་ཕན་པའི་ས་བོན་ཙམ་འཇོག་པ་ལས་ད་ལྟ་ནས་དོན་གཉིས་སྒྲུབ་པའི་ནུས་པ་སོ་སོར་བཞག་པ་མེད་པའི་ཕྱིར་ན་ཕན་དབང་ཞེས་བྱ་སྟེ། ཕྱི་དཀྱིལ་འཁོར་དྲང་དོན་གྱི་བསྐྱེད་རིམ་རྣམས་མཉན་དུ་རུང་བའི་སྐལ་བ་ཅན་དུ་བྱས་སོ། ། གཉིས་པ་ནུས་དབང་ལྔ་པོ་རིགས་བསྡུས་ན་གསུམ་སྟེ། བདག་དོན་ནུས་པའི་བརྩོན་འགྲུས་ཅན་ལ་ཉན་སྒོམ། གཞན་དོན་ནུས་པའི་བརྩོན་འགྲུས་ཅན་ལ་ཕྲིན་ལས་དང་འཆད་དབང་། གཉིས་ཀའི་དོན་ནུས་པའི་བརྩོན་འགྲུས་ཅན་ལ་རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་བསྐུར་བའོ། །དང་པོ་ལ་གཉིས་ཀྱི། ཉན་དབང་གི་བསམ་རྒྱུད་ནི། ཉན་བྱེད་སོགས་ཏེ། སློབ་དཔོན་རིགས་དྲུག་པ་ཡབ་ཡུམ་དུ་གསལ་བའི་སྦྱོར་མཚམས་ནས་སློབ་བུའི་མཚུངས་ལྡན་གྱི་གནས་སོ་སོར་བྷྲུཾ་ཡིག་དམར་སེར་སྤྲོས་པ་ལས་གཞལ་ཡས་ཁང་སྒོམ་པ་དབང་ལྔ་ཀ་ལ་སྦྱར་ཏེ། སློབ་བུའི་ཉན་བྱེད་རྣ་བ་གཉིས་ཀྱི་འདོམ་རྩར་བྷྲུཾ་ལས་འཁོར་ལོ་རྩིབས་བཞི་པ་སྒོ་དང་བཅས་པའི་གཞལ་ཡས་སུ་སྒྲ་གསལ་བའི་ཐིག་ལེ་ཤིན་ཏུ་དྭངས་པའི་ངོ་བོ་ཉིད་དུ་གནས་པ་དེ་ཏྲཱཾ་ཡིག་ཟུང་ལྔ་གསུང་ཆོས་ཀྱི་ཕྱག་རྒྱའི་ཚོགས་མཆོག་ལས་རིན་ཆེན་འབྱུང་གནས་རིགས་ཆུང་གི་སེམས་དཔའ་སྒོ་སྐྱོང་དང་བཅས་པའི་ལྷ་ཡབ་ཡུམ་བཅོ་བརྒྱད་ཀྱི་དཀྱིལ་འཁོར་གསལ་བར་བསྐྱེད་ཅིང་། བསྐུར་རློབ་དབབ་དྲང་བསྟིམ་བརྟན་མཆོད་ནས། སློབ་དཔོན་གྱི་སྦྱོར་མཚམས་ནས་སྤྲོས་པའི་འོད་ཀྱིས་བསྐུལ་བས་ལྷ་ཐམས་ཅད་རྗེས་ཆགས་ཀྱིས་ཞུ་བ་སློབ་བུར་ཐིམ་པའི་རྐྱེན་གྱིས་སློབ་བུའང་འོད་དུ་ཞུ་བ་ལས་རིན་ཆེན་འབྱུང་གནས་ཀྱི་སྐུར་བསྐྱེད་པ་ལ། གླེགས་བམ་རིན་འབྱུང་གི་རབ་གནས་ཅན་ལག་ཏུ་གཏད་དེ། བསྒྲག་ཚིག་ནི། ཏྲཱཾ། གསང་བ་སོགས་ཏེ། ཏྲཱཾ་ཡིག་འགོ་འདྲེན། གསང་བ་མ་ཧཱ། གསང་ཆེན་ཨ་ནུ། གསང་མཆོག་ཨ་ཏི་ཡོ་གའི་རྒྱུད་གང་ཡིན་པ་དང་། དེར་མ་ཟད་གསང་བ་སྔགས་ཀྱི་རྒྱུད་སྡེ་གཞན་ཀྲྀ་ཡོག་སོགས་ཀུན་ལའང་ཉན་པར་དབང་བས་མཉན་པར་བྱ་ཞེས་གནང་བ་སྦྱིན་ཞིང་། ཉན་ནས་གསང་བའི་དོན་ཉིད་བསམ་པས་བརྟག་ཅིང་དཔྱོད་པ་ལས་གཞན་འཆད་དབང་མ་ཐོབ་ཀྱི་བར་དེ་སྲིད་དུ་སུ་ལའང་སྨྲ་བར་བྱ་བ་མིན་པས་མ་སྟོན་ཅིག་ཅེས་དམ་ཚིག་བསྒྲགས་ནས། དབང་རྫས་རྣ་བའི་ཐིག་ལེར་བསྟིམས་པས་བཀའ་ཕྱི་ནང་ཐམས་ཅད་ཉན་པ་ལ་དབང་ཐོབ་པར་གྱུར་པའོ། །དེ་ནས་སྒོམ་དབང་གི་བསམ་རྒྱུད་ནི། གསལ་བའི་སོགས་ཏེ། དྲན་པ་གསལ་བར་བྱེད་བའི་རྟེན་སྙིང་རྩའི་འཁོར་ལོའི་གཞལ་ཡས་སུ་དྲན་པ་གསལ་བའི་ཐིག་ལེ་དྭངས་པའི་ངོ་བོ་ཉིད་མེ་ཏོག་འཕོག་པའི་ལྷ་གང་ཡིན་གྱི་ཡི་གེ་ཟུང་ལྔའི་ཕྲེང་བ་ཚོགས་མཆོག་ལས་རིགས་གང་ཡིན་གྱི་དཀྱིལ་འཁོར་གསལ་སྤྲོ་ཐིམ་པ་སོགས་སྔར་ལྟར་ལས་སློབ་བུ་ཡི་དམ་གང་ཡིན་དུ་བསྐྱེད་པ་ལ། རང་རིགས་ཀྱིས་བརླབས་པའི་ཕྲེང་བ་ལག་ཏུ་གཏད་དེ། བསྒྲག་ཚིག་ནི། ༀ། དུས་གསུམ་སོགས་ཏེ། བུ་ཁྱོད་དུས་གསུམ་རྒྱལ་བའི་སྲས་ཆེན་པོ་ཡིན་པས་སྒོ་གསུམ་སྐུ་གསུང་ཐུགས་ཀྱི་རྡོ་རྗེ་ལྷ་སྔགས་འོད་གསལ་གྱི་དོན་སྒོམ་པ་ལས་མི་འདའ་བར་བཟུང་སྟེ། རྒྱལ་བ་ཐམས་ཅད་ནི་སྒྲུབ་པས་མཉེས་པར་འགྱུར་བས་ན་དེས་མཆོད་ལ་འབྲས་བུ་རྒྱལ་བ་ཀུན་དང་མཉམ་པར་སྦྱོར་བའི་གོ་འཕང་སྒྲུབས་ཤིག་ཅེས་བསྒྲགས་ནས། རྫས་སྙིང་གི་ཐིག་ལེར་བསྟིམས་པས་རྣམ་པར་གྲོལ་བའི་ལམ་མཐའ་དག་སྒོམ་པ་ལ་དབང་ཐོབ་པར་གྱུར་པའོ། ། གཉིས་པ་ལ་གཉིས་ཀྱི། ཕྲིན་ལས་དབང་གི་བསམ་རྒྱུད་ནི། ལག་པའི་སོགས་ཏེ། ལག་པ་གཉིས་ཀྱི་འདོམ་རྩའི་འཁོར་ལོའི་གཞལ་ཡས་སུ་བྱ་བྱེད་གསལ་བའི་རྟེན་གྱི་ཐིག་ལེ་དྭངས་པའི་ངོ་བོ་ཉིད་ཧཱཾ་ཟུང་ལྔའི་ཕྱག་རྒྱའི་ཚོགས་མཆོག་ལས་ཕྲིན་ལས་ཀྱི་དཀྱིལ་འཁོར་གསལ་སྤྲོ་ཐིམ་པ་སོགས་ལས་སློབ་བུ་དོན་གྲུབ་ཏུ་བསྐྱེད་པ་ལ། ལས་རིགས་ཀྱིས་བརླབས་པའི་རྒྱ་གྲམ་ལག་ཏུ་གཏད་དེ། བསྒྲག་ཚིག་ནི། ༀ། ཁྱོད་ནི་སོགས་ཏེ། བུ་ཁྱོད་ནི་ད་ཕྱིན་ཆད་རྡོ་རྗེ་ལས་མཁན་ཡིན་གྱིས་ཞི་རྒྱས་སོགས་ལས་རྣམས་མ་ལུས་ཀུན་ཁྱོད་ཀྱིས་གྱིས་ཤིག་དང་། དེའི་གྲོགས་ཕོ་ཉ་མང་པོའི་རོལ་པ་ནང་དུ་འདུ་ཞིང་ཕྱིར་འཕྲོ་བ་ཀུན་གྱིས་ཁྱོད་ཀྱི་གནས་སྐབས་དང་མཐར་ཐུག་གི་དགོས་པའི་དོན་ཐམས་ཅད་སྒྲུབ་པར་བྱེད་པ་ཡིན་ཞེས་བསྒྲགས་ནས། རྫས་ལག་པའི་ཐིག་ལེར་བསྟིམས་པས་གཞན་དོན་ཕྲིན་ལས་ཀུན་ལ་དབང་ཐོབ་པར་གྱུར་པའོ། །དེ་ནས་འཆད་དབང་གི་བསམ་རྒྱུད་ནི། སྨྲ་བྱེད་སོགས་ཏེ། སྨྲ་བྱེད་ལྕེའི་འདོམ་རྩའི་འཁོར་ལོའི་གཞལ་ཡས་སུ་སྒྲ་གསལ་བའི་ཐིག་ལེ་དྭངས་བའི་ངོ་བོ་ཉིད་ཧྲཱིཿཟུང་ལྔའི་ཕྱག་རྒྱའི་ཚོགས་མཆོག་ལས་གསུང་ཆོས་ཀྱི་རིགས་སྣང་མཐའི་དཀྱིལ་འཁོར་གྱི་འཁོར་ལོ་གསལ་སྤྲོ་ཐིམ་པ་སོགས་ལས་སློབ་བུ་འོད་དཔག་མེད་དུ་བསྐྱེད་པ་ལ། སྣང་མཐས་བརླབས་པའི་དུང་དང་འཁོར་ལོ་ཕྱག་ཤིང་རྣམས་ལག་ཏུ་གཏད་དེ། བསྒྲག་ཚིག་ནི། ༀ། ཆོས་ཀྱི་སོགས་ཏེ། ཕྱི་ནང་གསང་བའི་ཆོས་ཀྱི་བདུད་རྩི་བླ་མེད་ཀྱིས་གདུལ་བྱ་དད་ལྡན་གྱི་སྐྱེས་བུ་ངོམས་པར་བྱོས་ཤིག །ཇི་ལྟར་ན་དབང་པོ་རབ་འབྲིང་ཐ་མའི་བློ་ཅན་ལ་སོ་སོའི་བློའི་རིམ་པ་དང་མཐུན་པར་ཆོས་ཀྱི་གསང་བ་བསྒྲག་པར་བྱ་བ་ལས་གཞན་དུ་མིན་ཏེ། དོན་དུ་མི་འགྱུར་བའི་ཕྱིར་རོ་ཞེས་བསྒྲགས་ནས་རྫས་ལྕེའི་ཐིག་ལེར་བསྟིམས་པས་བསྟན་པ་མཐའ་དག་འཆད་པ་ལ་དབང་ཐོབ་པར་གྱུར་པའོ། ། གསུམ་པ་རྡོ་རྗེ་རྒྱལ་པོའི་དབང་གི་བསམ་རྒྱུད་ནི། བསྐྱོད་ཆེན་སོགས་ཏེ། བསྐྱོད་ཆེན་ཡན་ལག་ལྔར་འཁོར་ལོའི་གཞལ་ཡས་ཁང་ཆ་ལྔའི་གནས་སུ་སྐྱོད་བྱེད་གསལ་བའི་རིག་ཤེས་ཀྱི་ཐིག་ལེའི་ངོ་བོ་ཉིད་ལག་གཡས་པར་ཧཱུཾ། མགོ་བོར་ༀ། ལག་གཡོན་པར་སྭཱ། རྐང་པ་གཡོན་པར་ཨཱཾ། གཡས་པར་ཧཱ་རྣམས་ཟུང་ལྔ་ལྔ་ལས་རིགས་ལྔ་སོ་སོ་རིགས་ཆུང་དང་བཅས་པའི་དཀྱིལ་འཁོར་ལྔ་དང་། ལུས་ཀྱི་སྟེང་འོག་ཕྱོགས་མཚམས་བཅུར་ཁྲོ་བཅུ་ཡབ་ཡུམ་གྱི་ཕྲེང་བ་སྒོམ་པ་སོགས་སྔར་ལྟར་ལས་སློབ་བུ་ཀུན་ཏུ་བཟང་པོར་བསྐྱེད་པ་ལ། རིགས་དྲུག་པས་བརླབས་པའི་རྡོར་དྲིལ་ལག་ཏུ་གཏད་དེ། བསྒྲག་ཚིག་ནི། ༀ། ཕྱོགས་བཅུ་སོགས་ཏེ། ཕྱོགས་བཅུ་དུས་བཞིའི་རྒྱལ་བ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེའི་བདག་ཉིད་ཆེ་བའི་མཆོག་སྟེ། རྒྱུད་དང་དཀྱིལ་འཁོར་ཀུན་གྱི་བྱེད་པ་པོ་ཁྱོད་ཡིན་པས་དཀྱིལ་འཁོར་ཀུན་གྱི་བདག་པོ་གྱིས་ལ་སྐལ་བ་དང་འཚམས་པར་སྦྱིན་པའི་བྱ་བ་ལ་སྤྱོད་ཅིག་ཅེས་གནང་བ་སྦྱིན་ནས། དབང་རྫས་ཡན་ལག་ལྔའི་ཐིག་ལེ་ལ་བསྟིམས་པས་རང་གཞན་གྱི་དོན་ཕུན་སུམ་ཚོགས་པ་ལ་དབང་ཐོབ་པར་གྱུར་པའོ། །དེ་ལྟར་ནང་དབང་ལྔ་བསྐུར་བས་རང་གཞན་གྱི་དོན་ད་ལྟ་ཉིད་ནས་དངོས་སུ་བྱེད་པའི་ནུས་པ་སོ་སོར་བཞག་པའི་ཕྱིར་ནུས་དབང་ཞེས་བྱ་སྟེ། དང་པོ་གཉིས་ཀྱིས་སྣང་བྱེད་ཀྱི་མན་ངག་སོགས་ནང་དཀྱིལ་ངེས་དོན་གྱི་བསྐྱེད་རིམ་དང་ཐུན་མོང་བའི་རྫོགས་རིམ་རྗེས་མཐུན་པ་རྣམས་ཉན་བསྒོམ་ནུས་པའི་སྐལ་བ་ཅན་དུ་བྱས་ཤིང་། ལྔ་པས་ནི་རྡོ་རྗེ་སློབ་དཔོན་དུ་མངའ་གསོལ་བ་དང་། འཆད་ཕྲིན་གཉིས་དེའི་བྱེད་ལས་སུ་འགྱུར་རོ། ། གསུམ་པ་ཟབ་དབང་བསྐུར་བའི་རིམ་པ་ནི། ཤེས་རབ་སོགས་ཚིགས་བཅད་གཅིག་གི་སྟེང་དུ་ཟབ་དབང་གསུམ་སྦྲགས་ནས་སྟོན་ཏེ། ཡུམ་ཤེས་རབ་མ་མཚན་དང་ལྡན་པ་ལོ་ཉི་ཤུ་མ། བཅུ་དྲུག་མ། བཅུ་གཉིས་མ་གསུམ་རིམ་པར་དབང་གསུམ་གྱི་རྟེན་དུ་གྱུར་པ་དང་། ཐབས་ཡབ་ནི་གསང་དབང་ལ་རྡོ་རྗེ་སློབ་དཔོན་དང་། གོང་མ་གཉིས་ལ་སློབ་མ་སྟེ། ཡབ་ཡུམ་ལྷར་གསལ་བས་ཐབས་ཤེས་གཉིས་ཀྱི་མཁའ་གསང་བྱིན་གྱིས་རློབ་ཅིང་། སྦྱོར་བའི་བརྡས་བསྐུལ་ནས་ཕྱག་རྒྱ་བཞིས་སྙོམས་པར་ཞུགས་པ་ལས་ཡབ་ཀྱི་བྱང་ཆུབ་ཀྱི་སེམས་བདེ་བའི་རང་བཞིན་ཧཱུྃ་ཡིག་གི་འབྲུ་ཚོགས་སུ་གསལ་བའི་ཆུ་རྒྱུན་ཡབ་ཀྱི་རྡོ་རྗེའི་ལམ་ནས་ཡུམ་གྱི་པདྨོར་འཁྱིལ་བའོ། །དེ་ནས་བཤད་པའི་ཟུར་གསུམ་ལས། དང་པོ་གསང་དབང་གི་དུས་སུ་པདྨོར་བསྐྱིལ་བའི་བྱང་སེམས་དེ་ཉིད་ཐབས་ཤེས་གང་ཡང་རུང་བའི་མཁའ་གསང་གི་རྩེ་ནས་དངོས་སུ་ལེན་ཅིང་། མི་ནུས་ན་ཡབ་ཀྱི་ལྕེས་བླངས་པ་ལས་སམ། མེ་ལོང་གིས་བླངས་ཏེ་བདུད་རྩི་དང་སྦྱར་བ་སློབ་བུའི་ལྕེ་ཐོག་ཏུ་བཞག་པས་བྱང་སེམས་དེ་ཉིད་ཡུངས་འབྲུ་ཙམ་གྱི་རྡོ་རྗེ་སེམས་དཔའ་ཤ་སྟག་ཏུ་གསལ་བ་སྙིང་གར་བབས་ཏེ་བསྟིམ་ཞིང་། དེས་ཆོས་ཀྱི་འཁོར་ལོའི་རྩ་ཆེན་བཞི་ལ་གནས་པའི་རིགས་དྲུག་གི་ས་བོན་གཉིད་དང་བཅས་པ་སྦྱངས་པས་སེམས་ཉིད་རྣམ་པར་མི་རྟོག་པའི་རང་བཞིན་དོན་དམ་སྤྲོས་མེད་ཀྱི་དཀྱིལ་འཁོར་དུ་དབང་སྒྱུར་བའོ། །ཡང་ཟུར་གཉིས་པ་ཤེར་དབང་གི་དུས་སུ་ཡས་བབས་དགའ་བཞིའི་འགྲོས་ཀྱིས་ཕྱིན་པའི་ཐིག་ལེ་པདྨོར་རེག་པའི་གནས་སུ་བསྐྱིལ་བ་གསང་རྩེའི་སྣ་རྩེ་གཉིས་ནས་ཉི་ཟླ་ཕན་ཚུན་དུ་བསྟིམ་ཞིང་རོ་གཅིག་ཏུ་འདྲེས་པས་སེམས་ཉིད་དོན་དམ་འོད་གསལ་དུ་དྭངས་པའི་རྟགས་སྣང་ལྷག་པ་ཀུན་རྫོབ་ཀྱི་ཡེ་ཤེས་སུ་ཤར་བ་ན་དེའི་ལྷན་ཅིག་སྐྱེས་པའི་བདེ་ཆེན་གྱི་དཀྱིལ་འཁོར་དུ་དབང་སྒྱུར་བའོ། །ཡང་ཟུར་གསུམ་པ་དབྱེར་མེད་བདེ་ཆེན་གྱི་དབང་གི་དུས་སུ་བྱང་སེམས་ཡུམ་གྱི་པདྨོར་བསྐྱིལ་བས་ཡས་བབས་ཀྱི་དགའ་བཞིའི་འགྲོས་རེ་རེ་ལའང་དགའ་བ་བཞི་བཞི་སྟེ་བཅུ་དྲུག །དེ་ལ་ཉི་ཟླ་སོ་སོར་བརྩིས་པས་མཚན་སོ་གཉིས་དང་། ཟླ་བའི་དགའ་བ་བཅུ་དྲུག་པོ་ལའང་ཡེ་ཤེས་ལྔ་ལྔའི་རོ་དང་ལྡན་པས་དཔེ་བྱད་བརྒྱད་ཅུ་རྫོགས་ཤིང་། མངོན་པར་ཤེས་པ་དྲུག་ཀྱང་འཆར་རོ། །སླར་ཡང་ཡུམ་གྱི་རྩ་ཁ་ག་མུ་ཁའི་རྩེ་ནས་ཉི་ཟླ་གཉིས་འདྲེས་དེའི་ལྡོག་པའི་ཐབས་ཀྱིས་རྡོ་རྗེར་བསྟིམ་ཞིང་། མས་བརྟན་གྱི་དགའ་བ་བཅུ་དྲུག་གི་དང་པོ་བཞིས་ཚོགས་ལམ། དེ་ནས་རེ་རེས་སྦྱོར་མཐོང་། དེ་ནས་དགུས་སྒོམ་ལམ་ས་དགུ་རྫོགས་ཏེ། དགའ་བ་བཅུ་དྲུག་གི་མཐའི་རང་བཞིན་ལྷན་ཅིག་སྐྱེས་དགའི་ལྷན་སྐྱེས་མི་འགྱུར་བའི་བདེ་བ་ཆེན་པོ་ནི་སྣང་སྟོང་གི་མཐས་མ་བསྒྲིབས་པར་གསལ་བས་ཀུན་ཏུ་འོད་དང་། མི་ཤིགས་པའི་དྭངས་མས་ལུས་ཐམས་ཅད་ལ་ཁྱབ་ཅིང་བརྟན་པས་འཁོར་བའི་སྐྱོན་གྱིས་མ་གོས་པས་པདྨ་ཅན་དང་། རྟོག་ཚོགས་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་རབ་འབྱམས་སུ་རང་སྣང་བས་ཡི་གེ་འཁོར་ལོའི་ས་རྫོགས་ཏེ། འཁོར་འདས་མཉམ་ཉིད་བདེ་བ་ཆེན་པོའི་དཀྱིལ་འཁོར་དུ་དབང་སྒྱུར་བའོ། །དེ་ལྟར་གསང་བ་ཟབ་མོའི་དབང་གསུམ་བསྐུར་བས་ཐུན་མོང་མ་ཡིན་པའི་རྫོགས་རིམ་ལ་སྤྱོད་པའི་སྐལ་བ་ཅན་དུ་བྱས་པའོ། ། གཉིས་པ་དབང་མ་བསྐུར་བའི་སྐྱོན་ནི། སློབ་དཔོན་སོགས་ཚིགས་བཅད་གཅིག་སྟེ། དབང་སྐུར་བ་པོའི་སློབ་དཔོན་སྒོ་གསུམ་གྱིས་མཉེས་པར་མ་བྱས་ཤིང་། ཕན་ནུས་ཟབ་མོའི་དབང་རྣམས་རྒྱུད་ལ་ཐོབ་པར་མ་བྱས་པར་གསང་སྔགས་ཀྱི་རྒྱུད་དང་མན་ངག་ཉན་འཆད་སྒྲུབ་པ་ལ་སོགས་པའི་བྱ་བ་རྩོམ་པ་རྣམས་ཚེ་འདིར་བསྒྲུབས་པའི་འབྲས་བུ་དངོས་གྲུབ་མེད་ཅིང་། ཕྱི་མ་ངན་འགྲོར་ལྟུང་བས་བརླག་པར་འགྱུར་རོ། ། གསུམ་པ་དབང་བསྐུར་བའི་ཡོན་ཏན་ནི། དུས་འདི་སོགས་ཚིགས་བཅད་གཅིག་སྟེ། དབང་ཐོབ་པའི་དུས་འདི་ཕྱིན་ཆད་བུ་ཁྱོད་དུས་གསུམ་གྱི་རྒྱལ་བའི་སྲས་སུ་གྱུར་པ་ཡིན་ཞིང་། ཕྱི་མར་ངན་སོང་དུ་ལྟུང་བའི་ལས་བསྲབས་ཤིང་ཟད་པར་བྱས་པས་ངན་འགྲོའི་སྡུག་བསྔལ་ཐམས་ཅད་མེད་པ་དང་། འདིར་ཡང་ཚེ་རིང་ཞིང་བདེ་བ་ཕུན་སུམ་ཚོགས་པ་དང་ལྡན་ལ། སྐྱེ་བ་ཕྱི་མར་ཕན་དབང་གིས་མཐོ་རིས་ལྷ་མིའི་རྒྱལ་པོ་དང་། ནུས་དབང་གིས་ཐར་པའི་ལམ་སྟོན་པའི་བཤེས་གཉེན་དང་། ཟབ་དབང་གིས་རྒྱལ་བ་ཀུན་གྱི་རིགས་ཀྱི་བདག་པོ་ཆེན་པོར་འགྱུར་རོ་ཞེས་བརྗོད་པར་མཛད་དོ། ། གསུམ་པ་ལེའུ་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉེར་གཉིས་ཡོད་པ་ལས། འདིས་སྣོད་དང་འཚམས་པར་དབང་གསུམ་སྦྱིན་པའི་ལེའུ་སྟེ་བཅུ་པའོ།། །། ལེའུ་བཅུ་གཅིག་དང་བཅུ་གཉིས་པ་བསྡེབས་ནས་བསྟན་པ།ལེའུ་བཅུ་གཅིག་པ་དང་བཅུ་གཉིས་པ་བསྡེབས་ནས་ཚོགས་སྒྲུབ་བསྟན་པ་ལ་གསུམ་སྟེ། ལོ་རྒྱུས་གཉིས་དང་། གཞུང་གཉིས་དང་། མཚན་གཉིས་བསྡེབས་པའོ། །དང་པོ་ནི། ལེའུ་བཅུ་གཅིག་པའི་དེ་ནས་སོགས་དང་། བཅུ་གཉིས་པའི་དེ་ནས་སོགས་ཏེ། སྔར་ལེའུ་དགུ་པར་ཚོགས་སྒྲུབ་མདོར་བསྟན་པ་དེ་ནས་ལེའུ་གཉིས་བསྡེབས་ནས་ཚོགས་སྒྲུབ་རྒྱས་པར་སྟོན་པའི་ཕྱིར་དེ་བཞིན་གཤེགས་པ་དགྱེས་པ་ཆེན་པོས་བསྒྲུབ་བྱ་ཟུང་འཇུག་སྒྱུ་འཕྲུལ་དྲྭ་བའི་རྒྱལ་པོའི་གོ་འཕང་མཆོག་གི་དངོས་གྲུབ་ལ་དབང་སྒྱུར་བ་ཞེས་བྱ་བའི་ཏིང་ངེ་འཛིན་དང་། སྣང་སྤྱོད་ཀྱི་ཡུལ་ཐམས་ཅད་ཡེ་ཤེས་ཀྱི་རོལ་མོའི་སྤྲིན་རྣམ་པར་སྤྲོས་ཏེ་ལོངས་སྤྱོད་མི་ཟད་པ་རྒྱན་གྱི་འཁོར་ལོ་བཀོད་པ་ཞེས་བྱ་བའི་ཏིང་ངེ་འཛིན་གཉིས་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། ། གཉིས་པ་གཞུང་གཉིས་སྡེབ་པ་ལ་གཉིས་ཏེ། དངོས་དང་། དེ་གསུངས་པའི་ཚུལ་ལོ། །དང་པོ་ལ་གཉིས་ཏེ། མཚན་ཉིད་གསུམ་མདོ་དང་། རྒྱས་པར་བཤད་པའོ། །དང་པོ་ནི། ཤེས་འཇུག་སོགས་ཚིགས་བཅད་གཅིག་སྟེ། རྒྱུ་ཤེས་པའི་མཚན་ཉིད་ལྟ་བ་རྟོགས་ཤིང་། རྐྱེན་འཇུག་པའི་མཚན་ཉིད་ཏིང་ངེ་འཛིན་གོམས་པས་ལྟ་སྤྱོད་ཟུང་འབྲེལ་དུ་འབྱོར་པ་ནི། སྒྲུབ་བྱེད་ཐབས་ཀྱི་ངེས་པ་མི་གཏོང་བའི་གཟུངས་ཀྱང་ཡིན་ལ། ས་བོན་དང་ཆུ་ལུད་ལྟར་འབྲས་བུར་སྨིན་བྱེད་ཀྱི་རྒྱུ་དང་རྐྱེན་ཡང་ཡིན་ནོ། །དེ་ལྟར་རྟོགས་གོམས་གཉིས་འབྲས་བུ་འབྱིན་ནུས་ཀྱི་མཐུ་ཅན་དུ་གང་གི་ཚེ་གྱུར་པ་ན་ཟག་མེད་སློབ་པའི་ལམ་རིག་འཛིན་བཞི་དང་། མི་སློབ་པའི་ལམ་རྒྱལ་བ་སྐུ་ལྔའི་གོ་འཕང་ཐོབ་ནས་སངས་རྒྱས་ཀྱི་ཞིང་ཀུན་ཏུ་གྲགས་པར་འགྱུར་རོ། །ཡང་ཅིག་ཅར་བ་ལྟར་ན་ཤེས་འཇུག་གཉིས་དབྱེར་མེད་ཆིག་ཆོད་དུ་རྟོགས་གོམས་ཟུང་དུ་འབྱོར་པས་ཟག་མེད་ལམ་གྱི་ཡེ་ཤེས་གཅིག་ཆོད་དུ་མངོན་དུ་འགྱུར་བའོ། །དེ་ལྟར་རིམ་ཅིག་ཅར་གཉིས་ཀའི་ལམ་མཚན་ཉིད་གསུམ་གྱིས་འཆིང་སྟེ། ལྟ་ཕྲེང་ལས། ལམ་གཉིས་ཀ་ཡང་མཚན་ཉིད་གསུམ་གྱིས་དོན་མཐར་ཕྱིན་པར་འགྱུར་ཏེ། ཞེས་སོ། ། གཉིས་པ་ལ་གསུམ་སྟེ། རྒྱུ་ཤེས་པའི་དང་། རྐྱེན་འཇུག་པའི་དང་། འབྲས་བུ་མཐར་ཕྱིན་པའི་མཚན་ཉིད་དོ། །དང་པོ་ལ་གཉིས་ཏེ། གཏན་ཚིགས་དང་། གྲུབ་འབྲས་གཞན་འཚོལ་གྱི་ཞེན་པ་དགག་པའོ། །དང་པོ་ལ་གསུམ་སྟེ། རྟོགས་པ་བཞིའི་དང་། དག་པ་གསུམ་གྱི་དང་། མཉམ་པ་བཞིའི་གཏན་ཚིགས་སོ། །དང་པོ་ནི། རྒྱུ་གཅིག་སོགས་ཚིགས་བཅད་གཅིག་སྟེ། མ་རིག་ལོག་རྟོག་གི་སེམས་ལས་འཁོར་བ་དང་། སྐུ་དང་ཡེ་ཤེས་ཀྱི་དཀྱིལ་འཁོར་ལས་མྱང་འདས་སུ་སྣང་བ་སྟེ། དེ་ལྟར་འཁོར་འདས་གཉིས་སུ་སྣང་ཞིང་ཞེན་པའི་ཆོས་ནི་རྒྱུ་གཅིག་པའི་རྟགས་ཀྱི་གཞལ་བྱ་ཡིན་ལ། འཇལ་ཚུལ་སྔ་མ་སྔ་མས་གཏན་ལ་ཕབ་པའི་གྲུབ་མཐའ་ཞེན་ཆ་གཏན་ཚིགས་ཕྱི་མ་ཕྱི་མའི་གཞལ་བྱར་བྱས་ཏེ། འཇལ་བྱེད་རྒྱུ་གཅིག་པའི་དང་། ཡིག་འབྲུའི་ཚུལ་གྱིས་དང་། བྱིན་གྱིས་བརླབས་པའི་དང་། མངོན་སུམ་པའི་གཏན་ཚིགས་བཞིས་བཅལ་བས། རིམ་པ་ཇི་ལྟ་བར་རང་བཞིན་སྐྱེ་མེད། རོལ་པ་འགག་མེད། ངོ་བོ་དབྱེར་མེད། དེའང་ཡུལ་ཡུལ་ཅན་མེད་པར་མངོན་སུམ་དུ་རྟོགས་པ་ནི་མཚན་ཉིད་བློ་བྲལ་ཏེ་གྲུབ་མཐའོ། །ཇི་ལྟར་ཞེ་ན། འཁོར་འདས་ཀྱིས་བསྡུས་པའི་ཆོས་ཐམས་ཅད་སེམས་ཉིད་རང་བྱུང་གི་ཡེ་ཤེས་སྐྱེ་བ་མེད་པའི་དབྱིངས་སུ་རྒྱུ་གཅིག་པ་ཡིན་ཏེ། དེ་ལྟར་རྟོགས་པ་དང་མ་རྟོགས་པ་ལས་འཁོར་འདས་གཉིས་སུ་སྣང་བའི་ཕྱིར། དཔེར་ན་རྒྱལ་བུ་དྭའུ་དམངས་སུ་འཛིན་པའི་སྒྲོ་འདོགས་དང་རྒྱལ་བུར་ངེས་པའི་ཚད་མ་གཉིས་ངོ་བོ་རྒྱལ་བུར་གཅིག་པ་བཞིན་ནོ། །དེའང་རྒྱ་མཚོ་ལས། ཆོས་ཉིད་དབྱིངས་སུ་ཚུལ་གཅིག་པས། །མ་ལུས་རང་སྣང་ཆོས་ཐམས་ཅད། །མ་ལུས་བྱང་ཆུབ་སེམས་སུ་རྟོགས། །ཞེས་སོ། །སེམས་ཉིད་སྐྱེ་མེད་ཀྱི་གདངས་རོལ་པ་འགགས་མེད་ལྷའི་སྐུ་གསུང་ཐུགས་སུ་རང་སྣང་བ་ཡིན་ཏེ། མཚོན་དུ་མེད་པའི་ཡི་གེ་ཨ་ཉིད་མཚོན་བྱེད་ཡི་གེ་དུ་མར་མ་འགགས་པར་སྣང་བས་མཚོན་ནས་རྟོགས་པའི་ཕྱིར། དཔེར་ན་མཛུབ་མོས་རི་བོང་ཅན་བཞིན་ནོ། །དེའང་རྒྱ་མཚོ་ལས། སྐུ་གསུང་ཐུགས་སུ་སྣང་བ་ཡིས། །མ་ལུས་གསུང་གི་རྒྱན་དུ་རྟོགས། །ཐམས་ཅད་གསུང་གི་ཡི་གེ་སྟེ། །ཐབས་དང་ལྡན་པས་རྒྱས་གདབ་བོ། །ཞེས་སོ། །རང་བཞིན་སྐྱེ་མེད་དང་རོལ་པ་འགག་མེད་གཉིས་དངོས་སུ་རྟོགས་པའི་མཐུས་དེ་གཉིས་ངོ་བོ་དབྱེར་མེད་དུ་རྟོགས་པའི་བྱིན་རླབས་ཤུགས་ལ་འབྱུང་བ་ཡིན་ཏེ། ལྷག་པ་དོན་དམ་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པས་དེའི་སྣང་ལྡོག་སྣོད་བཅུད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བའི་ཕྱིར། དཔེར་ན་གསེར་དང་གསེར་གྱི་སེར་པོ་བཞིན་ནོ། །དེའང་རྒྱ་མཚོ་ལས། དེ་ཉིད་དབྱེར་མེད་བྱིན་རླབས་ལས། །དེ་ཉིད་དེ་ཡི་བྱིན་རླབས་ཏེ། །གཉིས་མེད་ཚུལ་གྱིས་རང་སྣང་བ། །བྱིན་རླབས་ངོ་མཚར་བསམ་མི་ཁྱབ། །ཅེས་སོ། །བདེན་པ་དབྱེར་མེད་དེའང་བློའི་སྤྱོད་ཡུལ་ལས་འདས་པ་ཡིན་ཏེ། བལྟ་བྱའི་ཡུལ་དང་ལྟ་བྱེད་ཀྱི་ཤེས་པ་གཉིས་སུ་མེད་པ་རང་རིག་མངོན་སུམ་གྱིས་ཡུལ་མེད་རང་གསལ་དུ་རྟོགས་པའི་ཕྱིར། དེ་ཉིད་ཆོས་ཐམས་ཅད་ཀྱི་གནས་ལུགས་ཡིན་ནོ། །རྒྱུད་དག་པ་རྣམས་ཀྱིས་ཡེ་ཤེས་ཀྱི་གཟིགས་ངོར་དེ་ལྟར་གཟིགས་པའི་ཕྱིར། དཔེར་ན་མིག་སྐྱོན་མེད་པས་དུང་དཀར་པོར་མཐོང་བ་ཉིད་དུང་གི་ཁ་དོག་གི་གནས་ལུགས་ཡིན་པ་བཞིན་ནོ། །དེའང་རྒྱ་མཚོ་ལས། རང་བྱུང་རང་ཤར་སེམས་འདི་དག །གཉིས་མེད་རང་རིག་མ་སྐྱེས་པར། །གསལ་བར་མངོན་སུམ་ཐེ་ཚོམ་མེད། །རྟོགས་པ་ཀུན་གྱི་མཆོག་ཏུ་བཤད། །ཅེས་དང་། ལྟ་ཕྲེང་ལས། ཆོས་ཐམས་ཅད་ཡེ་ནས་སངས་རྒྱས་པར་གནས་པ་དེའང་ལུང་དང་མན་ངག་དང་འགལ་བའང་མ་ཡིན་ལ། ལུང་དང་མན་ངག་གི་ཚིག་ཙམ་ལ་བརྟེན་པའང་མ་ཡིན་པར་རང་གི་རིག་པས་བློའི་གཏིང་དུ་ཡིད་ཆེས་པས་མངོན་སུམ་དུ་རྟོགས་པའོ། །ཞེས་སོ། །དེ་ལྟར་རབ་ཏུ་རྟོགས་པ་རྣམ་པ་བཞིའི་གཏན་ཚིགས་ཀྱིས་ཆོས་ཐམས་ཅད་གཏན་ལ་ཕེབས་ཏེ་གནས་ལུགས་ཇི་ལྟ་བ་བཞིན་རང་རིག་པའི་མངོན་སུམ་དུ་གསལ་བར་རྫོགས་པས་སྤོང་ལེན་མེད་པར་ཕྱམ་གཅིག་སྐུ་དང་ཡེ་ཤེས་ཀྱི་རོལ་པར་དབང་སྒྱུར་བའི་ཕྱིར་རྒྱལ་པོ་སྟེ། འདི་ལས་ཆེ་བའི་གྲུབ་མཐའ་གཞན་མེད་པའོ། །འདི་དག་སྔ་མའི་གྲུབ་མཐའ་ཕྱི་མའི་གཞལ་བྱར་བྱས་པ་ནི་རིམ་གྱིས་པའི་རྟོགས་ཚུལ་ཏེ། ཅིག་ཅར་བའི་དབང་དུ་བྱས་ན། དངོས་པོ་གཉིས་ཀྱིས་བསྡུས་པའི་ཆོས་ཐམས་ཅད་བདེན་པ་དབྱེར་མེད་དུ་རྒྱུ་གཅིག་པ་དང་། དེ་མཚོན་བྱེད་ཡིག་འབྲུ་ཨ་ཨུ་མ་གསུམ་འདུས་པའི་ཚུལ་གྱིས་མཚོན་ནས། གཉིས་སུ་མེད་པའི་དབྱངས་དེའི་བྱིན་གྱིས་བརླབས་ཀྱི་མཐུས་རྡོ་རྗེ་གསུམ་དུ་ཡེ་ནས་སངས་རྒྱས་པར་རང་རིག་མངོན་སུམ་གྱིས་ཐག་ཆོད་ཅིང་བློའི་སྤྱོད་ཡུལ་ལས་རྣམ་པར་གྲོལ་བ་ནི་གྲུབ་མཐའ་སྟེ། རྔམ་གློག་ལས། རྒྱུ་ནི་བདེན་གཉིས་ཅིག་ཅར་དུ། །གཅིག་པས་གཅིག་པའི་མཚན་ཉིད་དང་། །སྐུ་གསུང་ཐུགས་ཀྱི་དཀྱིལ་འཁོར་དུ། །ཆོས་ཀུན་རང་བཞིན་རྟོགས་པ་དང་། །སྐྱེ་མེད་དབྱིངས་ཀྱི་བྱིན་རླབས་ལས། །ཆོས་ཀུན་སྣང་བར་ཤེས་པ་དང་། །དེ་ལྟ་བུ་ཡི་རང་བཞིན་ཏེ། །གཞན་ལ་མ་བརྟེན་མི་འགལ་བར། །མངོན་སུམ་རིག་པས་ཐག་ཆོད་ན། །རྣལ་འབྱོར་ས་ལ་སླེབས་པ་ཡིན། །ཞེས་སོ། ། གཉིས་པ་ནི། སྣོད་བཅུད་རྒྱུད་རྣམས་དག་རྟོགས་ཤིང་། །ཞེས་ཏེ། ཕྱི་སྣོད་ཀྱི་འཇིག་རྟེན་འབྱུང་བ་ལྔ་དང་། ནང་བཅུད་ཀྱི་སེམས་ཅན་ཕུང་པོ་ལྔ་དང་དེ་དག་རང་རང་གི་རྒྱུད་རྣམ་ཤེས་ཚོགས་བརྒྱད་ཀྱིས་བསྡུས་པ་རྣམས་ཡེ་ནས་སྐུ་དང་ཡེ་ཤེས་ཀྱི་དཀྱིལ་འཁོར་དུ་སངས་རྒྱས་པ་ཡིན་ཏེ། སྣོད་བཅུད་རྒྱུད་གསུམ་པོ་དེ་རིམ་པ་ཇི་ལྟ་བར་དེ་བཞིན་གཤེགས་པ་ཡུམ་ལྔ་དང་། ཡབ་ལྔ་དང་། ཡེ་ཤེས་ལྔར་དག་པའི་ཕྱིར། གང་ཡེ་ནས་དག་པའི་རང་བཞིན་ལ་སྒྲིབ་པ་མཐའ་དག་གིས་གོས་མ་མྱོང་བས་ཁྱབ་ཅིང་དེ་ཉིད་སྐུ་དང་ཡེ་ཤེས་ཀྱི་ངོ་བོར་སངས་རྒྱས་པས་ཁྱབ་སྟེ། ཆོས་ཀྱི་སྐུ་བཞིན་ནོ། །དེ་སྐད་དུའང་། ཐམས་ཅད་མཆོག་གི་སྙིང་པོ་བས། །གཞན་དུ་རྒྱལ་བས་ཆོས་མི་བཙལ། །ཞེས་སོ། །གལ་ཏེ་དེ་ཉིད་རྟོགས་ཤིང་གོམས་ན་སངས་རྒྱས་ཡིན་མོད། གནས་པ་ཙམ་གྱིས་སངས་རྒྱས་སུ་ཇི་ལྟར་འགྱུར་སྙམ་ན། རྟོགས་རུང་མ་རྟོགས་རུང་རང་བཞིན་རྣམ་དག་ནི་སངས་རྒྱས་ཡིན་ཏེ། འདུས་བྱས་རྣམས་རྟོགས་རུང་མ་རྟོགས་རུང་མི་རྟག་པ་ཡིན་པ་བཞིན་ནོ། ། གསུམ་པ་ནི། མཉམ་གཉིས་སོགས་རྐང་པ་གསུམ་སྟེ། ཆོས་ཐམས་ཅད་ཡེ་ནས་སངས་རྒྱས་པ་ཡིན་ཏེ། མཉམ་པ་བཞིས་འཁོར་འདས་གཉིས་མེད་དུ་རྟོགས་པའི་ཕྱིར། དེ་ལ་མཉམ་པ་བཞི་ནི། སྤྲོས་པ་ཕྱོགས་རེ་ཙམ་དང་མཐའ་དག་ཆོད་པའི་དབྱེ་བས་རྣམ་གྲངས་དང་རྣམ་གྲངས་མ་ཡིན་པའི་དོན་དམ་ཞེས་ཕྱེ་བ་གཉིས་ཀའང་སྤྲོས་པ་བཀག་པའི་སྟོང་ཉིད་ཙམ་དུ་མཉམ་ཞིང་། སྣང་དུ་འདྲའང་དོན་བྱེད་ནུས་མི་ནུས་ཀྱིས་ཡང་དག་དང་ལོག་པའི་ཀུན་རྫོབ་ཅེས་བཏགས་པ་གཉིས་ཀའང་བདེན་པས་སྟོང་པ་ཙམ་དུ་མཉམ་པ་གཉིས་ནི་ཐེག་ཆེན་ཐུན་མོང་བའི་ཚུལ་ཡིན་ལ། ཁྱད་པར་སྔགས་བླ་ན་མེད་པའི་ཚུལ་ལས་ནི་ལྷག་པའི་མཉམ་པ་གཉིས་གསུངས་ཏེ། མེད་དགག་དང་མ་ཡིན་དགག་གི་དབྱེ་བས་རྣམ་གྲངས་མ་ཡིན་པའི་སྟོང་ཉིད་གཉིས་ཀའང་ལྷག་པའི་དོན་དམ་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པར་མཉམ་ཞིང་། མ་དག་པ་ལས་སྣང་ལོག་པའི་དང་དག་པ་ལྷར་སྣང་ཡང་དག་པའི་ཀུན་རྫོབ་གཉིས་ཀའང་ལྷག་པ་ཀུན་རྫོབ་སྐུ་དང་ཡེ་ཤེས་ཀྱི་དཀྱིལ་འཁོར་དུ་མཉམ་པའོ། །དེ་ལྟར་འཇལ་བྱེད་གཏན་ཚིགས་རྣམས་ཀྱིས་བཅལ་བས་གཞལ་བྱ་འཁོར་འདས་ཀྱི་ཆོས་ཐམས་ཅད་རོ་མཉམ་པར་རང་བཞིན་གྱི་དཀྱིལ་འཁོར་དུ་རྟོགས་པ་ནི་གྲུབ་མཐའ་སྟེ། དེའི་ཚེ་དག་མ་དག་གིས་ཕྱེ་བའི་ཞིང་ཐམས་ཅད་ཀྱང་ཀུན་ཏུ་བཟང་པོའི་ཞིང་ཁམས་ཀྱི་རང་བཞིན་དུ་དབྱེར་མི་ཕྱེད་ཅིང་། སྒོ་གསུམ་གྱི་བྱེད་སྤྱོད་ཅི་དང་ཅི་བྱས་ཀྱང་བསོད་ནམས་དང་ཡེ་ཤེས་ཀྱི་ཚོགས་ཆེན་པོ་གཉིས་ལྷུན་ཚོགས་སུ་གྱུར་ནས་ཅིར་སྣང་ཡེ་ཤེས་སུ་འཆར་རོ། །གང་དག་རྟོགས་པ་བཞི་དང་དག་མཉམ་གྱི་གཏན་ཚིགས་འདི་རྣམས་སྔར་ལེའུ་གསུམ་པར་ཡང་བྱུང་བས་ཟློས་སོ་སྙམ་ན། གནས་ཚུལ་དང་རྟོགས་ཚུལ་གྱི་ལྡོག་པས་ཟློས་སྐྱོན་མེད་དེ། སྔ་མ་ནི་བརྟགས་གཞི་འཁོར་བའི་ཆོས་གཏན་ལ་འབེབས་པའི་ཆེད་དུ་སྨོས་ལ། འདིར་ནི་ལྟ་སྤྱོད་སྦྲེལ་བའི་ཕྱིར་ཚོགས་སྒྲུབ་ཀྱི་སྔོན་འགྲོར་སྨོས་པའོ། ། གཉིས་པ་ནི། དུས་བཞི་སོགས་ཚིགས་བཅད་གཅིག་སྟེ། དེ་ལྟར་གཏན་ལ་ཕེབས་པའི་གྲུབ་མཐའི་འབྲས་བུ་དེ་དག་དུས་བཞི་དང་ཕྱོགས་བཅུ་སྟེ་ཡུལ་དུས་གནས་སྐབས་གང་ནས་བཙལ་ཀྱང་རང་གི་སེམས་ཉིད་ལས་ལོགས་སུ་གྱུར་པའི་རྫོགས་པའི་སངས་རྒྱས་རང་མཚན་པ་ཞིག་རྙེད་པར་མི་འགྱུར་རོ། །ཅིའི་ཕྱིར་ཞེ་ན། སེམས་ཉིད་རང་བཞིན་གྱིས་རྣམ་པར་དག་པ་དེ་ཀ་རྟོགས་ན་རྫོགས་པའི་སངས་རྒྱས་ཏེ། འདི་ལྟར་ནང་དུ་སངས་རྒྱས་མ་རྟོགས་ན་གཞན་ཕྱི་རོལ་དུ་བཙལ་ཀྱང་མི་རྙེད་པས་མ་འཚོལ་ཞིག་ཅེས་གདམས་སོ། ། གཉིས་པ་རྐྱེན་འཇུག་པའི་མཚན་ཉིད་ལ། རིམ་གྱིས་པ་དང་། ཅིག་ཅར་བ་གཉིས་ལས། དང་པོ་ལའང་གཉིས་ཏེ། གང་བསྒྲུབ་པའི་གཞི་དང་། ཇི་ལྟར་བསྒྲུབ་པའི་ཐབས་ཕུན་སུམ་ཚོགས་པའོ། །དང་པོ་ལ་གསུམ་སྟེ། སྒྲུབ་པ་པོ་དང་། གནས་ཡོ་ཐུན་མོང་དུ་བསྟན་པ་དང་། དུས་སོ། །དང་པོ་ནི། ཡན་ལག་སོགས་ཚིགས་བཅད་གཅིག་སྟེ། སྔགས་ཀྱི་ཡན་ལག་ལྔ་ཚང་ཞིང་དམ་ཚིག་མ་ཉམས་པས་རྒྱུད་དག་པ། སྒྲུབ་པ་རྫས་ཀྱི་ཡོ་བྱད་ལྔ་དང་ལྡན་ཞིང་། དེ་ཏིང་སོགས་ཆོ་ག་ལྔ་པོ་རྫོགས་པར་ཤེས་པའི་རྣལ་འབྱོར་པ་ཚོམ་བུ་གཅིག་གསུམ་ལྔ་པ་གང་ཡིན་གྱི་ལྷ་གྲངས་དང་མཐུན་པ་ཚོགས་པའི་དཀྱིལ་འཁོར་གྱིས་ཚོགས་བསྒྲུབས་ན་ངེས་པར་ལེགས་པའི་དགོས་པ་རིག་འཛིན་བཞི་དང་། མཐར་ཐུག་གི་འབྲས་བུ་རྫོགས་པའི་བྱང་ཆུབ་འགྲུབ་པར་འགྱུར་རོ། ། གཉིས་པ་ནི། གནས་དང་སོགས་རྐང་པ་བདུན་ཏེ། རང་དབང་ཞིང་བར་ཆད་མི་འབྱུང་བའི་གནས་འཁོར་ཁང་རིམ་པ་གསུམ་ལྡན་དང་། འཚོ་བ་ཟས་ཀྱི། རྐྱེན་བཟློག་སྨན་གྱི། སྒྲུབ་པ་རྫས་ཀྱི། མཆོད་པ་རྫས་ཀྱི་ཡོ་བྱད་དེ་ཉེར་མཁོའི་ལོངས་སྤྱོད་ཐམས་ཅད་བསགས་པས་ཅི་བདེ་བར་སྤྱད་དུ་ཡོད་པ་དང་། དེས་མཚོན་ཏེ་མཐུན་རྐྱེན་རྣམས་མ་ཉམས་པར་ཚང་ཞིང་འགལ་རྐྱེན་མེད་ལ། སྒྲུབ་པའི་བློ་ནི་གཞན་རྐྱེན་གྱིས་མི་འཕྲོག་པས་མཐར་སྐྱེལ་བའི་ཞེ་བཅད་དང་། ལྟ་སྒོམ་སྤྱོད་གསུམ་འབྲེལ་བའི་བློ་རབ་དང་ལྡན་པས། དང་པོར་སྒྲུབ་པ་ལ་འཇུག་དུས་འདོད་པའི་དོན་མ་གྲུབ་ཀྱི་བར་དུ་བསྒྲུབ་བོ་སྙམ་པའི་དམ་ནོས་པ་བཞིན་དུ་མཐར་སྐྱེལ་བར་བྱ་ཞིང་། དེའི་ཚེ་བརྩོན་པ་འདོར་བའི་ལེ་ལོ་དང་སྒྱིད་ལུག་གི་སྙོམ་ལས་སུ་ལུས་པ་རྣམས་མེད་པའི་སྒོ་ནས་བློ་ལ་ཐེ་ཚོམ་མེད་པར་བསྒྲུབས་བྱས་ན་ཚོམ་བུའི་དཀྱིལ་འཁོར་གང་བསྒྲུབས་ཀྱང་ཐུན་མཆོག་གི་དངོས་གྲུབ་ཐམས་ཅད་འགྲུབ་པར་འགྱུར་ཏེ། གང་ཞེ་ན། འབྲས་ཆོས་ལྔ་དབྱེར་མི་ཕྱེད་པའི་རྡོ་རྗེ་གསང་མཆོག་རྒྱལ་བའི་དགོངས་པ་དམ་པ་ཐོབ་པར་འགྱུར་རོ། ། གསུམ་པ་ནི། སྒྲུབ་པའི་སོགས་རྐང་པ་གཉིས་ཏེ། ཇི་ཙམ་སྒྲུབ་པའི་ཞག་གྲངས་ནི་སུམ་ཅུ་ཕྲག་དྲུག་སོགས་ལེའུ་དགུ་པར་བཤད་པ་བཞིན་དང་། སྒྲུབ་པ་ལ་འཇུག་པའི་ཚེས་གྲངས་སོགས་ནི་བཤད་རྒྱུད་རྒྱས་པ་སོགས་རྒྱུད་གཞན་ལས་སྨོས་པ་བཞིན་དུ་བཤད་པར་བྱ་ཞེས་ཁ་འཕངས་ཏེ། རྒྱས་པ་ལས། ཚེས་གྲངས་ཡར་གྱི་བརྒྱད་ལ་བྱ། །ཤིན་ཏུ་སྐར་མ་རྒྱལ་རྣམས་ལ། །ཞེས་སོ། །འདིར་ཁ་ཅིག །སྙིང་པོའི་རྒྱུད་འདི་རྒྱུད་མ་ཡིན་པར་འགྱུར་ཏེ། རྒྱུད་ལ་ཁ་འཕངས་པའི་ཕྱིར་ཟེར། དེ་ལྟར་ན་འཇམ་དཔལ་སྒྱུ་དྲྭ་དང་མཁའ་འགྲོ་མ་ཀུན་སྤྱོད་ཀྱི་རྒྱུད་སོགས་ཀྱང་རྒྱུད་མ་ཡིན་པར་འགྱུར་ཏེ། རྒྱུད་ཆེན་སྒྱུ་འཕྲུལ་དྲྭ་བ་ལས། ཞེས་དང་། རྒྱུད་དུ་སྦས་པ་འདིར་བཤད་བྱ། ཞེས་རྒྱུད་གཞན་ལ་ཁ་འཕངས་པའི་ཕྱིར་རོ། ། གཉིས་པ་སྒྲུབ་པའི་ཐབས་ལ་གཉིས་ཏེ། ཞི་བའི་དང་། ཁྲོ་བོའ་ིསྒོ་ནས་བསྒྲུབ་པའོ། །དང་པོ་ལ་གཉིས་ཏེ། བསྙེན་སྒྲུབ་བཞི་མདོར་བསྟན་པ་དང་། དེ་རྒྱས་པར་བཤད་པའོ། །དང་པོ་ནི། བསྙེན་པ་དང་ནི་སོགས་རྐང་པ་གཉིས་ཏེ། འདིའི་སྐབས་སུ་སྤྱིར་ལམ་རིམ་ལས། འདི་ཡང་ལམ་སྒྲུབ་སྦྱོར་བ་ཡི། །ཞེས་པས་ལམ་དུས་ཀྱི། སྒྲུབ་པའི་དུས་ཀྱི། སྦྱོར་བའི་དུས་ཀྱི་བསྙེན་སྒྲུབ་ཡན་ལག་བཞི་ལས། དང་པོ་ནི། ལམ་བགྲོད་ཚུལ་རིམ་གྱིས་པའི་དབང་དུ་བྱས་ཏེ། ལྟ་བ་རྟོགས་ནས་སྟོང་ཆེན་དང་ཀུན་ཏིང་ལ་གནས་པ་བསྙེན་པ་དང་། ཕྱག་རྒྱ་གཅིག་སྤྲོས་ནི་ཉེ་བསྙེན་དང་། ཚོགས་སྒྲུབ་ནི་སྒྲུབ་པ་དང་། དེ་འབྲས་མཐོང་ལམ་ཐོབ་མ་རག་པ་ནི་སྒྲུབ་པ་ཆེན་པོ་སྟེ། ལམ་རིམ་ལས། བྱང་ཆུབ་སེམས་རྟོགས་འགྲུས་པ་ནི། །བསྙེན་པའི་དམ་པ་ཡིན་པའི་ཕྱིར། །སེམས་ཆས་སྙིང་རྗེ་མན་ཆད་དོ། །ཕྱག་རྒྱ་གསལ་བ་ཉེ་བསྙེན་པ། །དེ་ཕྱིར་གཅིག་དང་སྤྲོས་པའོ། །སྒྲུབ་པ་ཉིད་ནི་བར་ཆད་མེད། །དུས་ཀྱི་ཚོགས་མཐས་སྒྲུབ་ཆེན་ལེན། །ཞེས་སོ། །གཉིས་པ་ནི། བར་ཆད་མེད་པའི་ལམ་པ་ཚོགས་སྒྲུབ་པའི་དབང་དུ་བྱས་ཏེ། སྔོན་འགྲོ་ཤོམས་བྱེད་ཅིང་ནུབ་དང་པོ་འགོ་འཛིན་གྱི་བསྙེན་པ་ལ་འཇུག་པ་དང་བཅས་པ་ནི་བསྙེན་པ་དང་། ཇི་ཙམ་བསྒྲུབ་པའི་ཞག་གྲངས་ཕྱེད་ཚུན་ཆད་ནི་ཉེ་བསྙེན་ཏེ། དེ་གཉིས་ལ་འོད་ཟེར་དཀར་པོ་སྤྲོས་པས་སྣོད་རུང་དུ་བྱེད་པ་དང་། ནུབ་ཐ་མ་མ་གཏོགས་པའི་ཕྱེད་ཕན་ཆད་འོད་ཟེར་དམར་པོའི་འཕྲོ་འདུ་བསྣོལ་མས་དངོས་གྲུབ་བསྐུལ་ཞིང་བསྡུ་བས་བཅུད་དག་པར་བྱེད་པ་ནི་སྒྲུབ་པ་དང་། རྟགས་མཐོང་ནས་ནུབ་ཐ་མར་འོད་ཟེར་མཐིང་ག་ཚུར་བསྡུ་བས་རྒྱུད་དག་པར་བྱེད་པ་ནི་སྒྲུབ་པ་ཆེན་པོ་སྟེ། ཟླ་གཅིག་ལ་དཔེར་བྱས་ན་ལམ་རིམ་ལས། ཟླ་ཕྱེད་ཕྱེད་ཞལ་ཉེ་བསྙེན་པ། །ལྷ་གསལ་འཕྲོ་འདུས་སྣོད་དུ་རུང་། །བཅོ་ལྔ་མར་ཕྱེད་སྒྲུབ་པ་སྟེ། །འཕྲོ་དུ་བསྣོལ་མས་བསྒྲུབ་པར་བྱ། །ཞག་གྲངས་ཚང་ནས་རྟགས་བྱུང་ན། །དངོས་གྲུབ་བཟླས་བླང་སྒྲུབ་ཆེན་པོ། །ཞེས་སོ། །གསུམ་པ་ནི། སྒྲུབ་པ་ཆེན་པོའི་དུས་དེར་དངོས་གྲུབ་ཡུམ་གྱི་མཁའ་ལས་བླང་བའི་དབང་དུ་བྱས་ཏེ། ཕྱག་རྒྱ་བཙལ་ནས་ཆས་སུ་འཇུག་པ་ནི་བསྙེན་པ་དང་། ཡུམ་རློབ་ཅིང་སྦྱོར་བའི་བརྡས་བསྐུལ་བ་སོགས་ནི་ཉེ་བསྙེན་དང་། རོལ་ནས་དབབ་བཟུང་གི་དགོངས་པ་ནི་སྒྲུབ་པ་དང་། ཉི་ཟླ་རྡོ་རྗེའི་ལྕེས་བླངས་ཏེ་ལྡོག་དགྲམ་གྱི་དགོངས་པ་ནི་སྒྲུབ་པ་ཆེན་པོའོ། ། གཉིས་པ་རྒྱས་བཤད་ལ་གསུམ་སྟེ། བསྙེན་པ་དང་། ཉེ་སྒྲུབ་ཐུན་མོང་དུ་བསྟན་པ་དང་། སྒྲུབ་པ་ཆེན་པོའོ། །དང་པོ་ལ་གཉིས་ཏེ། སྔོན་དུ་བྱ་བའི་དང་། ནུབ་དང་པོ་བྱ་བ་ལས་ཀྱི་བསྙེན་པའོ། །དང་པོ་ནི། མཁའ་དཀྱིལ་སོགས་ཚིགས་བཅད་གཅིག་སྟེ། བསྐྱེད་རིམ་ལྟར་ན་ཏིང་འཛིན་གསུམ་སྔོན་དུ་འགྲོ་བས་མཁའ་དཀྱིལ་ལྟར་དྭངས་པའི་དབྱིངས་ཀྱི་སྣང་བརྙན་གཞལ་ཡས་ཁང་དུ་པད་ཉི་ཟླ་བའི་གདན་ལ། རང་བྱུང་ཡེ་ཤེས་ཀྱིས་ཀུན་ལ་དབང་སྒྱུར་བའི་རྒྱལ་པོ་རྡོ་རྗེ་སེམས་དཔའ་སྟངས་དཔྱལ་ཏེ་ཡབ་ཡུམ་དང་། རྫོགས་རིམ་ལྟར་ན་དབྱིངས་དང་ཡེ་ཤེས་ཏེ། དེ་ལྟར་ཟུང་འབྲེལ་དུ་བསྒོམ་པར་བྱས་པས་རྒྱལ་བའི་དཀྱིལ་འཁོར་ཐམས་ཅད་ཀུན་ཀྱང་ལྷག་མ་མ་ལུས་པར་ནི་བསྒོམ་པར་འགྱུར་ཏེ། རྒྱལ་བ་ཐམས་ཅད་གཅིག་དང་དུ་མའི་མཐའ་ལས་གྲོལ་ཞིང་། སངས་རྒྱས་ཐམས་ཅད་ཀྱི་དགོངས་པའང་དབྱིངས་ཡེ་ཟུང་འཇུག་ཏུ་འདུ་བའི་ཕྱིར་རོ། །དེ་ལ་སྤྱིར་ཚོགས་སྒྲུབ་ཀྱི་སྔོན་དུ་ཞི་ཁྲོ་གང་བྱེད་ཀྱི་བསྙེན་པ་བྱེད་པ་ནི། མོས་བསྒོམ་ཙམ་མ་ཡིན། ངེས་རྫོགས་སུ་བསླབ་པའི་ལུགས་ཡིན་པས། དང་པོར་ལྟ་བ་གཏན་ལ་ཕེབས་པར་བྱས་ནས་ཚོགས་ལམ་གྱི་རྣལ་འབྱོར་བཞི་ལ་བརྟན་པ་ཐོབ་པར་བྱ་དགོས་མོད། འདིར་དོན་རྟོགས་ཀྱི་རྒྱ་གཅིག་ཙམ་སྨོས་པ་ནི། བསྐྱེད་རྫོགས་གཉིས་ཀའི་བསྡུས་དོན་ལྟ་བུ་ལས་སྔོན་དུ་བྱ་བའི་བསྙེན་པ་ཁོ་ན་འཆད་བྱེད་དུ་མ་ངེས་ཀྱང་། སྙིང་རྗེ་སྒྱུ་མ་ནས་ཐོད་བརྒལ་དུ་བགྲོད་པ་འབྱུང་མི་སྲིད་པས་ཚོགས་སྒྲུབ་ཀྱི་སྔོན་དུ་རྒྱ་གཅིག་འགྲོ་བས་ཁྱབ་པའི་ཕྱིར་ས་ཁོངས་འཛིན་བྱེད་ཙམ་དུ་སྨོས་པའོ། ། གཉིས་པ་ལ་གསུམ་སྟེ། ཚོམ་བུ་ལྔ་པ་དང་། གསུམ་པ་དང་། གཅིག་པའོ། །དང་པོ་ནི། ལྔ་དང་སོགས་ཚིགས་བཅད་གཅིག་སྟེ། རྣལ་འབྱོར་པ་ཕོ་མོ་དང་། ལྷ་ཡབ་ཡུམ་བྲང་སྤྲད་དེ་སོ་སོར་བསྒོམ་པའམ། རྣལ་འབྱོར་པ་སྤྱིས་ཚོམ་བུ་སྤྱིར་བསྒོམ་པ་གང་མོས་ཀྱིས་གཙོ་བོ་རིགས་ཀྱི་ཡབ་ལྔ་དང་ཡུམ་ལྔའི་ལྷ་ཞལ་སྦྱོར་དུ་བཞུགས་པ་ལ་སོ་སོའི་རིགས་ཆུང་གི་སེམས་དཔའ་ཡབ་ཡུམ་ཟུང་བཞིས་བསྐོར་བས་ཚོམ་བུ་ལྔའི་ལྷ་ལྔ་བཅུ་བཀོད་པ་ལ་ཁྲོ་བོ་བཅུ་དང་ཁྲོ་མོ་བཅུས་བསྐོར་བས་ལྷ་བདུན་ཅུའི་དཀྱིལ་འཁོར་གྱི་འཁོར་ལོའི་ཚུལ་དུ་ཤོམས་ཀྱི་ཚེ་བྲི་ཞིང་བསྙེན་པའི་དུས་སུ་རྣམ་པར་བསྒོམ་པར་བྱའོ། །གཉིས་པ་ནི། དེ་བཞིན་སོགས་ཚིགས་བཅད་གཅིག་སྟེ། ཤར་ཕྱོགས་སུ་དེ་བཞིན་གཤེགས་པའི་རིགས་དང་། དབུས་སུ་རྡོ་རྗེའི་རིགས་དང་། ནུབ་ཏུ་པདྨའི་རིགས་རྣམས་ལ་སོ་སོའི་རིགས་ཆུང་གི་སེམས་དཔའ་ཟུང་བཞིས་བསྐོར་བ་སྟེ། དེ་ལྟར་སྐུ་གསུང་ཐུགས་ཀྱི་དཀྱིལ་འཁོར་ཆ་གསུམ་གྱི་མཐར་ཁྲོ་བོ་ཡབ་ཡུམ་བརྒྱད་ཀྱིས་བསྐོར་བས་ལྷ་ཞེ་དྲུག་གི་ཚོགས་དང་ལྡན་པའི་ཚོམ་བུ་གསུམ་གྱི་ལྷ་རྣམས་བྲི་ཞིང་བསྒོམ་མོ། །གསུམ་པ་ནི། རིགས་ཀྱི་སོགས་ཚིགས་བཅད་གཅིག་སྟེ། རིགས་ཐམས་ཅད་ཀྱི་རིགས་ཀྱི་བདག་པོ་སྟེ་རིགས་ཀྱི་གཙོ་བོ་ནི་ཐུགས་རྡོ་རྗེར་འདུ་ཞིང་། དེའི་རྒྱུ་མཚན་རྒྱལ་བ་ཐམས་ཅད་ཀྱི་ཐུགས་ཡེ་ཤེས་ལྔ་གཅིག་ཏུ་འདུས་པ་ནི་རང་བྱུང་གི་ཡེ་ཤེས་ཏེ། དེ་ཉིད་མཚོན་བྱེད་ཐུགས་ཀྱི་མཆོག་རྡོ་རྗེ་མི་བསྐྱོད་པ་ཡབ་ཡུམ་ལ་རང་གི་རིགས་ཆུང་གི་སེམས་དཔའ་ཟུང་བཞི་དང་། ཁྲོ་བོ་ཡབ་ཡུམ་བཞིས་བསྐོར་བས་ལྷ་བཅོ་བརྒྱད་ཀྱི་ཚོགས་དང་ལྡན་པའི་ཚོམ་བུ་གཅིག་པའི་ལྷ་རྣམས་བྲི་ཞིང་བསྒོམ་མོ། ། གཉིས་པ་ལ་གཉིས་ཏེ། རྣལ་འབྱོར་པ་ཕོ་མོས་ལྷ་སོ་སོར་བསྒོམ་པ་དང་། ཚོམ་བུའི་ལྷ་སྒྲུབ་པའི་ཐབས་སོ། །དང་པོ་ནི། རྣལ་འབྱོར་ཐབས་དང་སོགས་རྐང་པ་ལྔ་སྟེ། རྣལ་འབྱོར་པ་ཐབས་ཡབ་དང་ཤེས་རབ་ཡུམ་རྣམས་ཀྱིས་རིམ་པ་ལྟར་དེ་བཞིན་གཤེགས་པ་རིགས་ཀྱི་ཡབ་ལྔ་དང་རིགས་ཀྱི་ཡུམ་ལྔ་རུ་སོ་སོར་བསྒོམ་ཞིང་། དེ་བཞིན་དུ་འཁོར་གྱི་རྣལ་འབྱོར་པ་ཕོ་རྣམས་ཀྱིས་སེམས་དཔའ་དང་། མོ་རྣམས་ཀྱིས་སེམས་མ་ཉིད་དུ་བསྒོམས་ནས་ལྷ་སོ་སོའི་སྔགས་དང་རང་རང་གི་ཕྱག་རྒྱ་དང་ཏིང་ངེ་འཛིན་དེ་དང་དེ་ཡང་དག་པར་སོ་སོ་མ་འདྲེས་པར་གསལ་བ་ལ་བསླབ་པའོ། ། གཉིས་པ་ལ་གསུམ་སྟེ། ཚོམ་བུ་གཅིག་པ་དང་། གསུམ་པ་དང་། ལྔ་པ་སྒྲུབ་པའི་ཐབས་སོ། །དང་པོ་ནི། རྡོ་རྗེའི་རིགས་སོགས་ཚིགས་བཅད་གཅིག་སྟེ། རྡོ་རྗེའི་རིགས་སུ་རིགས་གཞན་ཐམས་ཅད་འདུ་བས་ཚོམ་བུ་གཅིག་པའི་དཀྱིལ་འཁོར་འོད་འཕྲོ་གཟི་བྱིན་འབར་བར་རབ་ཏུ་བསྒོམ་ཞིང་། ཡོ་བྱད་ལ་ཆགས་མེད་ཚུལ་གྱིས་སྤྱོད་པས་འཁོར་གསུམ་མི་དམིགས་པའི་དབྱིངས་སུ་བསྟིམ་པར་བྱ་བ་སྟེ། དེའི་འབྲས་བུ་ནི་ལྟ་སྤྱོད་གཉིས་མེད་དུ་འབྱོར་བར་གྱུར་ནས་ཐོབ་པའི་མཐོང་ལམ་དེ་ལམ་གོང་མ་ཕྱག་རྒྱ་ཆེན་པོའི་རིག་འཛིན་ལ་སྦྱོར་བར་བྱེད་དོ། །གཉིས་པ་ནི། ཡང་ན་སོགས་ཚིགས་བཅད་གཉིས་ཏེ། ཚོམ་བུ་གཅིག་པ་ལས་གཞན་ཡང་ན་སྐུ་གསུང་ཐུགས་ཀྱི་ཚོམ་བུ་གསུམ་དུ་བསྒྲུབ་པར་བྱ་བ་ཉིད་དེ། སངས་རྒྱས་ཐམས་ཅད་མ་ལུས་པ་སྐུ་གསུང་ཐུགས་རྡོ་རྗེ་གསུམ་དུ་འདུས་པའི་ཕྱིར། ཚོམ་བུ་གསུམ་གྱི་ལྷའི་ཏིང་འཛིན་གསལ་ཞིང་གཟི་བྱིན་འབར་བའི་འོད་ཟེར་འཕྲོ་བར་བསྒོམས་ནས། ཡོ་བྱད་རྣམས་གཉིས་མེད་ཀྱི་བློས་མཉམ་པའི་དབྱིངས་ཀྱི་ངང་དུ་ཐིམ་པར་སྤྱད་པས་བརྙེས་པའི་འབྲས་བུ་མཐོང་ལམ་གཉིས་ལས། ཚེ་དབང་དེ་རིག་འཛིན་བཞིའི་ནང་ནས་དངོས་གྲུབ་མཆོག་བརྙེས་པ་ལྷུན་གྲུབ་རིག་འཛིན་ཐོབ་པ་ལ་སྦྱོར་བར་འགྱུར་བས་ཡོན་ཏན་བདག་དོན་དུ་རྒྱལ་བའི་དཀྱིལ་འཁོར་མ་ལུས་འབར་བ་སྟེ་གསལ་བར་མངོན་དུ་འགྲུབ་ཅིང་། གཞན་དོན་དུ་འགྲོ་བའི་ཉོན་མོངས་སྡུག་བསྔལ་སེལ་བར་བྱེད་པའི་ཕྲིན་ལས་ཀྱིས་ཐམས་ཅད་ཀྱང་རྡོ་རྗེ་གསུམ་མི་ཕྱེད་པའི་རིགས་སུ་སྐྱེ་བའི་གནས་ལ་འགོད་པར་མཛད་དོ། །གསུམ་པ་ནི། སྔགས་འཆང་སོགས་རྐང་པ་བདུན་ཏེ། སྔགས་འཆང་གང་ཞིག་དངོས་གྲུབ་ཡང་དག་ཐོབ་པར་འདོད་པས་ནི་རྣལ་འབྱོར་པ་ཐབས་དང་ཤེས་རབ་གྲངས་ཚང་བ་ཚོགས་པ་ཐམས་ཅད་ཀྱིས་ཚོམ་བུའི་དཀྱིལ་འཁོར་ཆ་ལྔ་དང་ཁྲོ་ཕྲེང་རྣམས་ཏེ་ལྷ་བདུན་ཅུ་སོ་སོར་བསྒོམས་ནས། ཡོ་བྱད་ལ་ཆགས་པ་མེད་པའི་ཚུལ་གྱིས་འདོད་ཡོན་མ་འགགས་པའི་འོད་ཟེར་རྣམ་པ་མང་པོ་འཕྲོ་ཞིང་གཉིས་སུ་མེད་པའི་དབྱིངས་སུ་སྟིམ་པར་བྱེད་པའི་བྱ་བས་བརྙེས་པའི་འབྲས་བུ་མཐོང་ལམ་གཉིས་ལས་ཚེ་དབང་དེས་དངོས་གྲུབ་མཆོག་གི་སྙིང་པོ་སྐུ་ལྔར་སྦྱོར་བ་འགྲུབ་བོ། །འོ་ན་ཚོམ་བུ་དང་དཀྱིལ་འཁོར་གྱི་ཁྱད་པར་གང་སྙམ་ན། རྣམ་སྣང་སོགས་རིགས་བཞིའི་གཙོ་བོ་རྡོ་རྗེའི་རིགས་གཅིག་གིས་བསྡུས་པས་རིགས་ཐ་དད་ཀྱི་གཙོ་བོ་གཅིག་ཏུ་གྱུར་པ་ནི་དཀྱིལ་འཁོར་དང་། རང་གི་རིགས་ཆུང་གིས་བྱེ་བྲག་ཏུ་བསྐོར་བར་རིགས་ཐ་མི་དད་ཀྱི་གཙོ་བོ་རིགས་སོ་སོས་བྱེད་པ་ནི་ཚོམ་བུའོ། ། གསུམ་པ་སྒྲུབ་པ་ཆེན་པོ་ལ་གཉིས་ཏེ། སྒྲུབ་བྱེད་ཡོ་བྱད་ལྔ་ལ་སྤྱད་པའི་ཐབས་དང་། དེའི་བསྒྲུབ་བྱ་དངོས་གྲུབ་བོ། །དང་པོ་ལ་གཉིས་ཏེ། ཡོ་བྱད་བཞི་ལ་སྤྱད་པའི་ཐབས་དང་། ཨཱ་ལི་ཀཱ་ལི་ལ་སྤྱད་པའི་ཐབས་སོ། །དང་པོ་ནི། གོས་རྒྱན་སོགས་ཚིགས་བཅད་གཅིག་སྟེ། དར་དང་ཞིང་ལྤགས་སོགས་ལུས་ལ་བགོ་བའི་གོས་དང་། རིན་ཆེན་དང་ཐོད་ཕྲེང་སོགས་འདོགས་པའི་རྒྱན་གྱི་ཡོ་བྱད་དང་། དྲི་རོ་ཞིམ་པའི་བཟའ་བཏུང་གི་དང་། སྙན་པའི་གླུ་དང་སྦྱར་བའི་སྒྲ་ཚིག་གི་དང་། རིགས་སོ་སོའི་རྐང་བྲོ་དང་ལག་གར་གྱི་འདུ་འཕྲོ་སྟེ། ཡོ་བྱད་བཞིའི་ཚོགས་གང་དང་གང་སྤྱོད་པ་ཐམས་ཅད་ཀྱི་སྤྲིན་ཕུང་ལ་རང་རིག་པའི་ཡེ་ཤེས་ཀྱི་རང་བཞིན་ཧཱུཾ་གིས་མཚོན་ནས་རང་སྣང་གི་ལོངས་སྤྱོད་དུ་ཤེས་པས་ཆགས་ཞེན་མེད་པར་རབ་སྤྱད་ན་འབྲས་བུ་ངོ་མཚར་འབྱུང་བའི་དཀྱིལ་འཁོར་ཐམས་ཅད་མཉེས་པས་ཕན་ཡོན་རླབས་པོ་ཆེ་ཐོབ་བོ། ། གཉིས་པ་ལ་གསུམ་སྟེ། ཨཱ་ལི་སྦྱོར་བ། ཀཱ་ལི་སྒྲོལ་བ། དེ་གཉིས་སྤྱད་ཀྱང་ཉེས་པས་མི་གོས་པར་བསྟན་པའོ། །དང་པོ་ལ་གསུམ་སྟེ། གང་ལ་སྤྱད་བྱའི་ཡུལ། ཇི་ལྟར་སྤྱད་པའི་ཐབས། ཡུམ་གྱི་མཁའ་ལས་དངོས་གྲུབ་ཆེན་པོ་བླང་བའོ། །དང་པོ་ནི། ལྷ་མོ་སོགས་རྐང་པ་གཉིས་ཏེ། ལོ་གྲངས་རྒན་གཞོན་དང་། རྩ་བཟང་ངན་དང་། ཉི་ཟླ་འཛག་མི་འཛག་དང་། སྦྱོར་ཐབས་ཀྱི་སྒྱུ་རྩལ་ཤེས་མི་ཤེས་སོགས་ཀྱི་སྒོ་ནས་ཕྱེ་བའི་མི་མོ་སྟེ། རབ་ལྷ་མོ། འབྲིང་ཀླུ་མོ། ཐ་མ་རིགས་ངན་མོ་དང་། ཡང་ན་རྣལ་འབྱོར་པ་ནུས་པ་ཐོབ་པས་དང་པོ་གཉིས་དངོས་སུ་དགུག་པའམ། དེ་ལྟར་མི་ནུས་པས་ཕྱི་མ་སྟེ་མིའི་བུ་མོའོ། །གང་ལྟར་ཡང་རྣལ་འབྱོར་པའི་བློ་ཁྱད་ཀྱིས་བཟང་ངན་སོ་སོར་དབྱེ་སྟེ་བཟང་པོ་བསྟེན་པའམ། ཡང་ན་མི་དབྱེ་བར་གང་རུང་བསྟེན་པའོ། །གཉིས་པ་ནི། ཡུམ་གྱི་སོགས་ཚིགས་བཅད་གཅིག་སྟེ། འདོད་པའི་བསྟན་བཅོས་ཀྱིས་བདེ་བ་རྒྱས་པར་བྱས་ཏེ། ཡབ་ཡུམ་ལྷར་བསྐྱེད་ཅིང་མཁའ་གསང་རྡོ་རྗེ་དང་པདྨར་རློབ་པའི་ཡུམ་གྱི་པདྨར་ཚོམ་བུའི་དཀྱིལ་འཁོར་བསྐྱེད་ནས། དེ་ཉིད་དུ་བདེ་བ་ཆེན་པོའི་རང་བཞིན་ཐུགས་ཀྱི་དཀྱིལ་འཁོར་བྱང་ཆུབ་ཀྱི་སེམས་སྤྲོ་ཞིང་། བདེ་བའི་སྒྲ་དང་འོད་ཟེར་གྱིས་སངས་རྒྱས་ཀྱི་སྤྲིན་འཁྲིགས་པའི་ཚོགས་མ་ལུས་ལ་མཆོད་ཅིང་སྤྱན་དྲངས། དེ་རྣམས་དགྱེས་པར་རོལ་པས་འདོད་ཆགས་ཆེན་པོའི་མེས་བྱང་སེམས་དཀར་དམར་ཤིན་ཏུ་དྭངས་པའི་ངོ་བོར་ཞུ་བ་བདག་གི་སྤྱི་བོ་ནས་ཞུགས་པདྨའི་དཀྱིལ་འཁོར་གྱི་ལྷ་རྣམས་མཆོད་པས་ཐམས་ཅད་རང་རིག་གི་ངོ་བོར་དགྱེས་མཉམ་མཆོག་གི་སྦྱིན་པས་བདག་དང་འཁོར་འདས་དབྱེར་མེད་བདེ་བ་ཆེན་པོའི་ངང་དུ་བསྟིམ་པའོ། །གསུམ་པ་ནི། སྒྲུབ་པ་སོགས་ཚིགས་བཅད་གཅིག་སྟེ། དེ་ལྟར་སྒྲུབ་པར་བྱས་པའི་མཁའ་གསང་གི་ཉི་ཟླ་གཉིས་འདྲེས་ཡེ་ཤེས་ལྔར་རང་གསལ་བར་བྱེད་པའི་སྙིང་པོ་དེ་པདྨའི་དཀྱིལ་འཁོར་ནས་ཚོགས་སྒྲུབ་ཀྱི་ནུབ་ཐ་མའི་ཐོ་རེངས་ཀྱི་དུས་སུ་ཡབ་ཀྱི་གསང་བ་རྡོ་རྗེའི་ལྕེ་ཡིས་བླངས་ཏེ་ལྡོག་དགྲམ་གྱི་སྦྱོར་བས་རང་བཞིན་ལྷན་ཅིག་སྐྱེས་པའི་ཡེ་ཤེས་སུ་ལ་བཟླའོ། །དེ་ལྟར་བསྒྲུབས་པའི་ཡོན་ཏན་ནི། རྫུ་འཕྲུལ་གྱིས་མཁའ་ལ་བྱ་ལྟར་འགྲོ་བ་དང་། ལུས་ཀྱི་ཁ་དོག་གསལ་ཞིང་གཟི་བྱིན་འབར་བའམ་སེམས་ཀྱི་མངོན་ཤེས་གསལ་ཞིང་ཏིང་འཛིན་དང་ཡེ་ཤེས་ཀྱི་འོད་འབར་བས་ལམ་གོང་མར་བགྲོད་པ་དང་། ཚེ་ཉི་ཟླ་དང་མཉམ་པ་ལ་སོགས་པ་ཐུན་མོང་གི་དངོས་གྲུབ་རྣམས་དང་། ཡིད་བཞིན་རིན་པོ་ཆེའི་སྤྲིན་ལྟར་འདོད་པའི་ཆར་འབེབས་པ་ཟག་མེད་སློབ་པའི་ལམ་རིག་འཛིན་གྱི་ས་དང་མཐར་ཐུག་གི་འབྲས་བུ་རིགས་བདག་ཀུན་ཏུ་བཟང་པོའི་ས་མཆོག་ཐོབ་པར་འགྱུར་ཏེ་མཆོག་གི་དངོས་གྲུབ་བོ། ། གཉིས་པ་ཀཱ་ལི་སྒྲོལ་བའི་ཐབས་ནི། ཞིང་གྱུར་སོགས་ཚིགས་བཅད་གཉིས་ཏེ། བསྒྲལ་བའི་ཞིང་དུ་གྱུར་པ་ནི་མཆོག་བཀྲ་ཤིས་དག་པའི་ཞིང་དང་། མཆོག་ཕྲན་ཐུགས་རྗེས་བཟུང་བྱའི་ཞིང་གཉིས་ལས། སྔ་མ་ནི་དངོས་གྲུབ་ཀྱི་རྫས་ཁྱད་པར་ཅན་གྱི་རྒྱུ་སྐྱེ་བ་བདུན་པའི་མི་ཡིན་ལ། ཕྱི་མ་ནི་ཞིང་བཅུ་སྟེ། གསལ་བཀྲ་ལས། དཀོན་མཆོག་སློབ་དཔོན་སྐུ་དགྲ་གཉིས། །དམ་ཉམས་ལོག་དང་འཁུས་པ་དང་། །འདུ་བར་འོངས་དང་ཡོངས་ལ་གནོད། །དམ་དགྲ་ངན་པའི་ངང་ཚུལ་ཅན། །ངན་སོང་གསུམ་དང་བཅུ་པོ་ནི། །རྣལ་འབྱོར་ཀུན་གྱིས་དང་དུ་བླང་། །ཞེས་སོ། །ཡང་ན་མཆོག་ཞིང་བཅུ་ལས་སྐུ་དགྲ་གཉིས་གཅིག་ཏུ་བརྩིས་པའི་ལྷ་མི་བདུན་དང་། མཆོག་ཕྲན་ནི་ངན་སོང་གསུམ་རྣམས་སོ། །ཇི་ལྟར་སྒྲོལ་བའི་ཐབས་ནི། ཨེ་གྲུ་གསུམ་འབར་བའི་ནང་ཉི་ཟླའི་སྟེང་དུ་སྒྲོལ་བའི་ལས་ལ་མཁས་པའི་རྣལ་འབྱོར་པས་བསྒྲལ་བྱ་བཀུག་པ་བཞག །དེ་ནས་བསྒྲལ་བྱ་རཱུ་ཏྲ་སྟེ་བདག་འཛིན་གསུམ་སྒྲོལ་བའི་ཕྱིར། སྒྲོལ་བྱེད་སློབ་དཔོན་དཔལ་ཆེན་པོ་དང་། སྒྲོལ་གིང་ཊཀྐི་རཱ་ཛའི་ང་རྒྱལ་ལ་གནས་པས་གྲི་འཇམ་དཔལ་རྣོན་པོར་བསྐྱེད་དེ་ལག་གི་འདུ་བྱེད་ཀྱི་ཁོག་པ་ཕྱེ་བས་མ་རིག་པའི་རྒྱ་དྲལ་བར་བསྒོམ། དེ་ནས་ལག་སོར་ལ་དཔའ་བོ་འབྲུ་ལྔ་བཀོད་པ་དེས་སྙིང་བཟུང་བས་ཡིག་འབྲུའི་འོད་ཀྱིས་རིགས་དྲུག་གི་ས་བོན་གཉིད་དང་བཅས་པ་སྦྱང་པའི་དྭངས་མ་ཧཱུཾ་ཡིག་དྲུག་དང་། དེའང་གཅིག་ཏུ་གྱུར་པ་སློབ་དཔོན་གྱི་ཤངས་བུག་གཡོན་ནས་སྐུ་ལ་བཅུག་པས་སྒྲིབ་པ་རྣམ་པར་དག་པ་དེ་ཉིད་རྡོ་རྗེའི་ལམ་ནས་ཡུམ་གྱི་མཁའ་དབྱིངས་སུ་ཐིམ་ནས་གནས་པའི་ཧཱུཾ་ཡིག་དེ་ཐུགས་ཀྱི་ཕྱག་རྒྱ་རྡོ་རྗེ་འོད་འབར་བར་གྱུར་པ་ལས་རྡོ་རྗེ་སེམས་དཔའི་སྐུར་གྱུར་ཅིང་། ཡེ་ཤེས་ལྔའི་འོད་ཟེར་འཕྲོ་བས་བརྗིད་པའི་གཙུག་ཏུ་འཁོར་བ་ལས་རྣམ་པར་རྒྱལ་བའི་རྟགས་རིགས་བདག་བསྒོམ་ཞིང་། དེ་ཉིད་རླུང་དཀྱིལ་ལ་གནས་པའི་ཟླ་བའི་དཀྱིལ་འཁོར་གྱི་སྟེང་དུ་བཞག་ནས་ཕཊ་ཀྱིས་འོག་མིན་དུ་འཕང་བའི་ལས་ཀྱིས་སྒྲོལ་བའི་ཐབས་འདི་ནི་ངོ་མཚར་ཆེ་སྟེ། བསྒྲལ་བྱ་སྡིག་ཅན་ངན་འགྲོ་ལས་ཐར་ནས་རྣམ་པར་གྲོལ་བ་ཐོབ་པའི་ཐབས་ཁྱད་པར་ཅན་ཡིན་པའི་ཕྱིར་རོ། ། གསུམ་པ་ཉེས་པས་མི་གོས་པར་བསྟན་པ་ནི། ཡེ་ནས་སོགས་ཚིགས་བཅད་གཅིག་སྟེ། ཆོས་ཐམས་ཅད་ཡེ་ནས་སྐྱེ་མེད་དེ་བཞིན་ཉིད་ཀྱི་གནས་ལུགས་རྟོགས་པས་ཇི་ལྟར་སྒྱུ་མར་སྣང་བའི་སྐྱེས་བུས་མིག་ཡོར་དུ་སྣང་བའི་གང་ཟག་ལ་སྦྱོར་སྒྲོལ་བྱས་པའི་ཚུལ་ཞིན་དུ་སྦྱོར་བ་དང་སྒྲོལ་བའི་བྱ་བ་ཀུན་བྱས་ཀྱང་འཛིན་ཞེན་མེད་པས་རྡུལ་ཕྲ་རབ་ཀྱི་ཆ་ཙམ་ཡང་བྱས་པ་མེད་དེ། ཡེ་ཤེས་རྒྱས་པ་ལས། ཇི་ལྟར་སྒྱུ་མའི་མཁན་པོ་དག །རང་གིས་སྤྲུལ་པའི་སྒྱུ་མ་ལ། །དགེ་དང་མི་དགེ་འདུ་བྱེད་པ། །ཉེས་པ་གང་གིས་མི་གོས་ལྟར། །ཐབས་ལ་མཁས་པས་རྣམ་པར་སྤྱོད། །ཅེས་དང་། སྡུད་པ་ལས། སྐྱེ་བོ་ཕལ་ཆེར་མགོ་མང་བྱེ་བ་གཅོད་བྱེད་ཀྱང་། །འགྲོ་ཀུན་སྤྲུལ་འདྲར་རབ་ཤེས་དེ་ལ་འཇིགས་པ་མེད། །ཅེས་སོ། ། གཉིས་པ་བསྒྲུབ་བྱ་དངོས་གྲུབ་ལ་གཉིས་ཏེ། དེ་འབྱུང་བའི་རྒྱུ་དང་། བླང་བའི་ཐབས་སོ། །དང་པོ་ནི། རྣལ་འབྱོར་སྔགས་འཆང་སོགས་ཚིགས་བཅད་གཅིག་སྟེ། ལམ་བསྐྱེད་རྫོགས་ཀྱི་རྣལ་འབྱོར་ཡིད་སྐྱོབ་སྔགས་ཀྱི་རང་བཞིན་རང་རིག་ལ་འཆང་བས་བསྒྲུབ་བྱའི་དངོས་གྲུབ་ནི། ལྟ་བ་ཆོས་ཐམས་ཅད་སྐུ་དང་ཡེ་ཤེས་སུ་མཉམ་རྫོགས་ལྷུན་གྱིས་གྲུབ་པར་རྟོགས་པ་དེའི་ངང་ལ་བསྒོམ་པ་ཏིང་ངེ་འཛིན་གནས་ཤིང་། སྤྱོད་པ་ཅི་ལའང་ཆགས་ཐོགས་དང་ཞེན་པ་མེད་པར་སྤྱོད་པའི་ཐབས་དེས་ཆོས་ཐམས་ཅད་ཡེ་ནས་དབྱེར་མེད་དུ་རྟོགས་པ་ནི་དངོས་གྲུབ་འབྱུང་བའི་གཞིའམ་རྒྱུའོ། །གཉིས་པ་ནི། ཡན་ལག་སོགས་ཚིགས་བཅད་གཉིས་ཏེ། རང་སྣང་གི་ཡན་ལག་དང་། དབང་པོ་ལྔ་དང་། དེ་དག་གི་རྣམ་ཤེས་དང་བཅས་པ་ཀུན་གྱི་རྣམ་པ་ཡེ་ཤེས་ལྔའི་ངོ་བོར་སྨིན་པ་མཚོན་བྱེད་ཡི་གེ་ༀ་དུ་ཤེས་པར་བྱ་ཞིང་། དེས་མཚོན་བྱ་རྫོགས་པའི་སངས་རྒྱས་རིགས་ལྔ་ཡབ་ཀྱི་དཀྱིལ་འཁོར་ཉིད་དུ་བསྒོམ་པའམ། ཡང་ན་གདུལ་བྱའི་དབང་གིས་ཁྲོ་བོ་རིགས་ལྔའི་དཀྱིལ་འཁོར་དུ་བསྒོམ་པར་བྱའོ། །དེ་བཞིན་དུ་གཟུགས་སྒྲ་དྲི་རོ་རེག་བྱ་ལ་སོགས་པ་ཡུལ་གྱི་རྣམ་པ་ཀུན་དབྱིངས་ལྔའི་ངོ་བོར་སྨིན་པ་མཚོན་བྱེད་ཡི་གེ་མཱུཾ་དུ་ཤེས་པར་བྱ་ཞིང་། དེས་མཚོན་བྱ་རིགས་ལྔ་ཡུམ་གྱི་དཀྱིལ་འཁོར་ཉིད་དུ་བསྒོམ་པའམ། ཡང་ན་ཁྲོ་མོ་ལྔའི་དཀྱིལ་འཁོར་དུ་བསྒོམ་པར་བྱའོ། ། གཉིས་པ་ཁྲོ་བོའི་སྒོ་ནས་སྒྲུབ་པ་ནི། ཁྲོ་བོ་ཁྲོ་མོའི་སོགས་ཚིགས་བཅད་གཅིག་སྟེ། ཁྲོ་བོ་ཡབ་ལྔ་དང་ཁྲོ་མོ་ཡུམ་ལྔའི་ཚོགས་ཆེན་པོ་ལ་འཁོར་ཕོ་ཉ་གནས་མ་བརྒྱད་དང་། ཕྱག་བརྙན་ཡུལ་མ་བརྒྱད། བཀའ་ཉན་སྒོ་མ་བཞིའི་ཚོགས་དང་། ཅི་བགྱིའི་མངགས་གཞུག་དབང་མོ་ཉེར་བརྒྱད་ལ་སོགས་པའི་ཁོངས་ནས་ཁྲོ་བཅུ་ཡབ་ཡུམ་སྟེ་བདུན་ཅུ་དོན་བརྒྱད་ཀྱི་ཚོགས་རྣམས་ཀྱི་རྣལ་འབྱོར་དང་ལྡན་པས་བསྒྲུབས་ན་མཆོག་ཐུན་གྱི་དངོས་གྲུབ་དང་ལས་བཞི་སོགས་འདོད་པའི་འབྲས་བུ་རྣམས་རྫོགས་པར་བྱེད་དོ། །འདིར་ལམ་རིམ་ལས། དེ་ནས་འཁོར་ལོ་གཅིག་པའམ། །གསུམ་དང་ལྔ་རུ་བསྒོམ་པར་བྱ། །ཞེས་པས་སྔར་གྱི་རིགས་བཞི་ཧེ་རུ་ཀ་རྡོ་རྗེའི་རིགས་ཆུང་གི་ཁྲོ་བོ་ཡབ་ཡུམ་བཞིས་བརྗེས་པའི་ལྷ་དོན་བརྒྱད་ནི་ཚོམ་བུ་གཅིག་པ། ཡང་རྡོ་རྗེ་ཧེ་རུ་ཀ་རིགས་ཆུང་དང་བཅས་པ་ལྟེ་བར་བཀོད་ནས་ཤར་ནུབ་ཀྱི་རྩིབས་ལ་བུདྡྷ་དང་པདྨ་ཧེ་རུ་ཀ་སོ་སོའི་རིགས་ཆུང་དང་བཅས་པ་བསྣན་པའི་གོ་བརྒྱད་ནི་ཚོམ་བུ་གསུམ་པ། དེའི་སྟེང་དུ་ལྷོ་བྱང་གི་རྩིབས་ལ་རཏྣ་དང་ཀརྨ་ཧེ་རུ་ཀ་རིགས་ཆུང་དང་བཅས་བསྣན་པའི་བརྒྱ་བཅོ་བརྒྱད་ནི་ཚོམ་བུ་ལྔ་པའོ། ། གཉིས་པ་རྐྱེན་འཇུག་པའི་མཚན་ཉིད་ཅིག་ཅར་བ་ནི། ཆོ་ག་ལྷག་གམ་སོགས་རྐང་པ་གཉིས་ཏེ། ཆོ་ག་སྟེ་ལམ་གྱི་རིམ་པ་རྣམས་ཅིག་ཅར་བའི་གང་ཟག་གིས་རིམ་གྱིས་པ་ལྟར་བསྒོམས་པས་ལྷག་གམ་མ་བསྒོམས་པས་མ་ཚང་ནའང་ཆད་ལྷག་གི་སྐྱོན་ཉིད་དག་སྟེ། དེའི་ཉེས་པ་མེད་པས་དངོས་གྲུབ་ཐོབ་པ་ལ་མི་སྒྲིབ་སྟེ། ནམ་མཁའ་ལ་རྡུལ་གྱིས་མི་གོས་པ་བཞིན་ནོ། ། གསུམ་པ་འབྲས་བུ་མཐར་ཕྱིན་པའི་མཚན་ཉིད་ལའང་རིམ་ཅིག་ཅར་གཉིས་ལས། དང་པོ་རིམ་གྱིས་པ་ལ་གསུམ་སྟེ། ཡོ་བྱད་ལྔ་ལ་སྤྱད་པའི་འབྲས་བུ། ཚེ་དབང་རིག་འཛིན་གྱི་ཆ་ལུགས། མཐར་ཐུག་གི་འབྲས་བུ་བསྟན་པའོ། །དང་པོ་ལའང་ལྔ་སྟེ། བྲོ་གར་འདུ་འཕྲོའི། གླུ་ཚིག་སྒྲའི། རྒྱན་དང་བགོ་བའི། བཟའ་དང་བཏུང་བའི། ཨཱ་ལི་ཀཱ་ལིའི་ཡོ་བྱད་ལ་སྤྱད་པའི་འབྲས་བུའོ། །དང་པོ་ནི། སྒྱུ་འཕྲུལ་དྲྭ་བས་སོགས་ཚིགས་བཅད་གཅིག་སྟེ། ཚོམ་བུའི་ལྷ་ཟུང་འཇུག་སྒྱུ་འཕྲུལ་དྲྭ་བའི་ཕྱག་རྒྱ་རང་རིག་ལ་ཐེབས་པས་ཐམས་ཅད་མངོན་རྫོགས་ལྷ་དང་ལྷ་མིའི་དཀྱིལ་འཁོར་དུ་གསལ་ཞིང་བརྟན་པའི་ཏིང་ངེ་འཛིན་ཐོབ་པས་ཆགས་ཞེན་མེད་པར་སྤྱོད་ཅེས་འོག་མ་རྣམས་ལའང་སྦྱར་རོ། །དེའི་ངང་ལས་ཡན་ལག་ལྔ་ལ་ལྷ་བཀོད་དེ་རྐང་ལག་གི་བསྒུལ་བསྐྱོད་བྲོ་གར་ལས་མི་འདའ་བའི་ཕྱག་རྒྱ་འོད་ཟེར་སྤྲུལ་པའི་འདུ་འཕྲོ་སྣ་ཚོགས་དང་བཅས་ཏེ་སྤྱད་པ་ཡིས་ས་འོག་དང་རི་བྲག་ལ་འཛུལ་ལམ། སྟེང་གི་ནམ་མཁར་ཐོགས་མེད་དུ་འགྲོ་བས་ཀླུ་དང་ལྷའི་བུ་མོ་རྣམས་དབང་དུ་བྱེད་པར་འགྱུར་རོ། །གཉིས་པ་ནི། ཀླུ་ཚིགས་སོགས་ཏེ། སྙན་པའི་གླུ་དང་བརྗོད་པའི་ཚིག་ཐམས་ཅད་རང་རིག་ཡེ་ཤེས་ཀྱི་སྒྲ་ལས་མི་འདའ་བའི་ཕྱག་རྒྱར་སྤྱད་པ་ཡིས་གསུང་གཅིག་གིས་མཐའ་ཡས་པའི་གདུལ་བྱར་ཆོས་ཀྱི་འཁོར་ལོ་བསྐོར་བའི་དངོས་གྲུབ་ཐོབ་པར་འགྱུར་རོ། །གསུམ་པ་ནི། རྒྱན་དང་སོགས་ཏེ། རིན་ཆེན་རུས་པ་སོགས་ཀྱི་རྒྱན་དང་དར་དང་ཀོ་རློན་སོགས་བགོ་བའི་ཆས་གོས་རྣམས་ཡེ་ཤེས་ལས་མི་འདའ་བའི་ཕྱག་རྒྱར་སྤྱད་པ་ཡིས་གཟི་བྱིན་འབར་བའི་རྒྱན་རྒོལ་བ་གང་གིས་ཀྱང་ཐུབ་པ་མེད་པའི་སྟོབས་དང་ལྡན་པ་འགྲུབ་པར་འགྱུར་རོ། །བཞི་པ་ནི། བཟའ་དང་སོགས་ཏེ། ཤ་ཆང་སོགས་བཟའ་དང་བཏུང་བ་རྣམས་ཡེ་ཤེས་ལས་མི་འདའ་བའི་ཕྱག་རྒྱར་སྤྱད་པ་ཡིས་འདོད་རྒུར་བསྒྱུར་བའི་ཡིད་བཞིན་གྱི་སྐུ་བཟང་པོ་དང་རོ་བརྒྱ་ལྡན་པའི་བདུད་རྩི་ཟད་པ་མེད་པས་འགྲོ་བ་ཚིམ་པར་བྱེད་པ་འགྲུབ་བོ། །ལྔ་པ་ནི། ཨཱ་ལི་སོགས་ཏེ། ཨཱ་ལི་སྦྱོར་བ་དང་ཀཱ་ལི་སྒྲོལ་བའི་བརྡ་ཚིག་སྟེ། རང་རིག་པའི་ཡེ་ཤེས་ལས་མི་འདའ་བའི་ཕྱག་རྒྱར་སྤྱད་པ་ཡིས་ལས་ཐམས་ཅད་དང་མཆོག་ཐུན་གྱི་དངོས་གྲུབ་ཐམས་ཅད་འགྲུབ་པར་འགྱུར་རོ། ། གཉིས་པ་ཚེ་དབང་གི་ཆ་ལུགས་ནི། མི་དང་སོགས་རྐང་པ་གསུམ་སྟེ། མིའི་དབང་པོ་དང་། འདོད་པའི་ལྷ་དང་། གཟུགས་ཀྱི་ལྷ་ཚངས་པ་ལ་སོགས་པའི་སྐྱེ་བ་རྣམ་དག་འཛིན་མོད་ཀྱང་གཞན་ལས་ཁྱད་པར་དུ་གྱུར་པ་སྟེ། སྐྱེ་བ་ལ་རང་དབང་འབྱོར་བས་གང་ལ་གང་འདུལ་དུ་སྐྱེ་བར་སྣང་བའི་ཕྱིར་རོ། །དེས་ན་ནུས་ཐོབ་མཐོང་ལམ་གྱི་ས་ལ་གནས་པས་རྒྱུའི་ཐེག་པའི་རབ་དགའ་དང་མཐོང་ལམ་ཙམ་དུ་སྐལ་བ་མཉམ་ཡང་དགོངས་པ་རྒྱུའི་མི་གཡོ་བའི་ས་ལ་བཞུགས་པའི་བྱང་སེམས་དང་མཉམ་པར་འགྱུར་བ་ཡིན་ནོ། ། གསུམ་པ་ནི། ཕ་རོལ་སོགས་རྐང་པ་ལྔ་སྟེ། ཤེས་འཇུག་འབྲེལ་བས་ཚོགས་གཉིས་རྫོགས་པའི་འབྲས་བུ་ནི་རྒྱུ་འབྲས་ཀྱི་ས་ལམ་ཐམས་ཅད་ཡོངས་སུ་རྫོགས་པ་སྟེ། དེ་ཡང་སློབ་ལམ་ས་བཅུའི་ངོ་བོ་ཕ་རོལ་ཏུ་ཕྱིན་པ་བཅུ་པོ་གཉིས་སུ་མེད་པའི་དོན་མཐར་ཕྱིན་པ་ལ་རྫོགས་པ་ནི། གང་ལ་ཡང་ཡོངས་སུ་མི་འཛིན་པས་སྦྱིན་པ། ཅིའང་མ་ཆགས་པས་ཚུལ་ཁྲིམས། གཉིས་མེད་ཀྱི་དོན་ལ་མི་སྐྲག་པའི་བཟོད་པ། དེའི་ངང་ལས་མི་གཡོ་བའི་བསམ་གཏན། དེ་ལས་དུས་ཐམས་ཅད་དུ་མི་གཡེལ་བའི་བརྩོན་འགྲུས། དོན་ཕྱིན་ཅི་མ་ལོག་པར་རང་རིག་ལ་གསལ་བའི་ཤེས་རབ། དེ་མངོན་དུ་གྱུར་པས་སྨོན་ལམ། འབྲས་བུ་གཞན་ནས་མི་འཚོལ་བས་ཐབས། མི་མཐུན་ཕྱོགས་ཀྱིས་མི་བརྫི་བས་སྟོབས། ཡེ་ཇི་བཞིན་པའི་དོན་མངོན་དུ་རྟོགས་པས་ཡེ་ཤེས་ཏེ། དེ་ལྟར་ཕར་ཕྱིན་བཅུ་པོ་ཀུན་ཏུ་རྫོགས་པ་ན་སའི་ཁྱད་པར་བཅུའི་བགྲོད་པའང་རྫོགས་པར་འགྱུར་ཏེ། འདི་ལྟར་མཉམ་པ་ཉིད་ཀྱི་དབྱིངས་རང་མཚན་མཐོང་བས་ས་དང་པོ་རབ་ཏུ་དགའ་བ། མཐར་ལྟའི་དྲི་མ་དག་པས་གཉིས་པ་དྲི་མ་མེད་པ། སེམས་ཉིད་རང་གསལ་བས་འགྲོ་བའི་དོན་མི་འགོག་པར་བྱེད་པས་གསུམ་པ་འོད་བྱེད་པ། རང་རིག་ཉིད་ཐམས་ཅད་དུ་འོད་གསལ་བས་བཞི་པ་འོད་འཕྲོ་བ། དོན་གཉིས་དུས་གཅིག་ཏུ་བྱེད་པས་ལྔ་པ་སྦྱང་དཀའ་བ། སེམས་ཉིད་ཡུལ་མེད་དུ་རང་གསལ་བས་དྲུག་པ་མངོན་དུ་གྱུར་པ། མཐའི་ལྟ་བ་ལས་རིང་དུ་སོང་བས་བདུན་པ་རིང་དུ་སོང་བ། གཡེང་བའི་ཡུལ་མེད་པས་བརྒྱད་པ་མི་གཡོ་བ། ཡོན་ཏན་ལྷུན་གྱིས་གྲུབ་པའི་ཡེ་ཤེས་མངའ་བས་དགུ་པ་ལེགས་པའི་བློ་གྲོས། ཡོན་ཏན་དེ་དག་ཀུན་གྱི་འབྱུང་གནས་སུ་གྱུར་པས་བཅུ་པ་ཆོས་ཀྱི་སྤྲིན་རྣམས་དང་། མཐར་ཐུག་སངས་རྒྱས་ཀྱི་ས་གསུམ་ཡང་གྲུབ་སྟེ། རང་རིག་ཅིར་ཡང་མི་དམིགས་པའི་ཡེ་ཤེས་ཉིད་ཀུན་ཏུ་ཁྱབ་ཅིང་སྣང་བས་ཐབས་མ་འགགས་པ་སྟེ་ཀུན་ཏུ་འོད་ཀྱི་ས་དང་། དེ་ལས་མ་གཡོས་བཞིན་དུ་མ་ཆགས་མི་དམིགས་པའི་ཤེས་རབ་ཀྱིས་གོས་པ་མེད་པའི་ཡེ་ཤེས་ནི་ཐབས་ལ་མཁས་པ་ཉིད་ཀྱི་ཕྱིར་མཆོག་སྟེ་པདྨ་ཅན་གྱི་སའོ། །ཤེས་རབ་སྤྲོས་བྲལ་གྱི་ཡེ་ཤེས་མཆོག་གི་བྱིན་རླབས་སྐུ་དང་ཡེ་ཤེས་ཀྱི་དཀྱིལ་འཁོར་དུ་རྩོལ་བ་མེད་པར་ལྷུན་གྱིས་གྲུབ་པར་སྟོན་ནུས་པ་མཆོག་ཏུ་གྱུར་པའི་ཡེ་ཤེས་ནི་འཁོར་ལོ་ཚོགས་ཆེན་གྱི་ས་སྟེ། འགྲེལ་ཆུང་ལས། ཐབས་ནི་ཀུན་ཏུ་འོད་ཡིན་ཤེས་རབ་པདྨ་ཅན། །ཐབས་དང་ཤེས་རབ་མཆོག་ཉིད་འཁོར་ལོ་ཚོགས་ཆེན་ཏེ། །ཞེས་སོ། །དེ་ལྟར་མཐོང་སྒོམ་མཐར་གསུམ་གྱིས་བསྡུས་པ་ས་བཅུ་ནི་རྒྱུའི་ས་སྟེ། སྤང་བྱ་སྤོང་བ་དང་གཉེན་པོ་སྐྱེ་བའི་ས་ཡིན་པའི་ཕྱིར་ས་མཚན་ཉིད་པ་ཡིན་ལ། ཀུན་ཏུ་འོད་སོགས་གསུམ་ནི་མཐར་ཐུག་འབྲས་བུ་སངས་རྒྱས་ཀྱི་ས་གཅིག་གི་ངོ་བོ་ལ་སྐུ་གསུམ་གྱི་ཆས་ཕྱེ་ནས་བཏགས་པ་སྟེ། ས་ལམ་གྱི་ཁྱད་པར་དེ་ཐམས་ཅད་དུས་ཡུན་རིང་པོར་སྦྱང་མི་དགོས་པར་མྱུར་དུ་ལྷུན་གྱིས་རྫོགས་པར་འགྱུར་རོ། །འོ་ན་རྒྱུའི་ཐེག་པའི་ཀུན་ཏུ་འོད་དང་མཐར་ཐུག་ས་གསུམ་གྱི་ནང་ཚན་ཀུན་ཏུ་འོད་གཉིས་གཅིག་གམ་སྙམ་ན། མི་གཅིག་སྟེ། ལམ་རིམ་ལས། ལམ་གྱི་རྩོལ་བས་ངལ་བ་རྣམས། །བྲོད་པ་བསྐྱེད་ཕྱིར་ཀུན་ཏུ་འོད། །རྡོ་རྗེ་འཛིན་སྟུག་བཀོད་པར་བསྟན། །མཐར་ཐུག་ས་གསུམ་ཆ་ལས་བརྗོད། །ཅེས་སོགས་ཀྱི་འཕྲོས་ལས། རང་ས་ཐོབ་ལས་ངོ་བོ་ཉིད། །གཅིག་པར་སྨྲ་བ་མུན་སྤྲུལ་ལོ། །ཞེས་དང་། དབྱིག་གི་སྒྲོན་མ་ལས་ཀྱང་། ཁྱོད་ཀྱིས་མཐར་ཕྱིན་ཀུན་ཏུ་འོད། །ཐབས་ཆེན་ཐེག་པའི་བསྟི་གནས་སོ། །ཞེས་དང་། ཨཱརྱ་དེ་བའི་གསུང་མིག་སྒྲོན་རང་འགྲེལ་དུ་དྲངས་པར་ཡང་། རྒྱུ་ཡིས་བགྲོད་པའི་ཀུན་ཏུ་འོད། །ཐབས་ཆེན་ལམ་གྱི་ཆོས་སྐུ་སྟེ། །ཞེས་སོ། །དེ་ལྟར་ན་འདི་ཉིད་ལས། ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་པ་དང་འགལ་ལོ་ཞེ་ན། རང་རང་གི་གནས་སྐབས་ཀྱི་དམིགས་ཡུལ་ལ་ལྟོས་ནས་ཐ་དད་པའི་འབྲས་བུ་རེ་ཐོབ་ནའང་མཐར་ཐུག་ཡང་དག་པའི་འབྲས་བུ་ལ་ལྟོས་ནས་གཅིག་ཏུ་གྱུར་པས་སྐྱོན་མེད་དེ། འདི་ཉིད་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཡེ་ཤེས་ངོ་མཚར་རབ་འབྱམས་ཀྱིས། །དོན་དུ་མི་འགྱུར་ཡོངས་མ་གསུངས། །ཞེས་སོ། ། གཉིས་པ་ཅིག་ཅར་བའི་འབྲས་བུ་ནི། དཀྱིལ་འཁོར་ཀུན་ཏུ་སོགས་རྐང་པ་གཉིས་ཏེ། བསྒྲུབ་བྱའི་དཀྱིལ་འཁོར་ཀུན་དང་། ལམ་དུ་གྱུར་པའི་འབྲས་བུ་རིག་འཛིན་བཞིའི་ཆར་གཏོགས་པའི་ཡེ་ཤེས་ཆིག་ཆོད་དུ་རང་རིག་ལ་གསལ་བའི་བློས་རབ་ཏུ་སྦྱོར་བས་ན་མཐར་ཐུག་གི་འབྲས་བུའི་དཀྱིལ་འཁོར་གྱི་ཆེ་བའི་ཡོན་ཏན་ཐམས་ཅད་ཀྱང་རྩོལ་མེད་དུ་འགྲུབ་པར་འགྱུར་ཏེ། འདི་ཉིད་ལས། མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་པར་འགྱུར། །ཞེས་སོ། ། གཉིས་པ་གསུང་ཚུལ་ལ་གཉིས་ཏེ། བཀའ་གསང་སྔགས་མཚོན་པ་དང་། གཞུང་གསུང་པའི་ཡོན་ཏན་ནོ། །དང་པོ་ནི། རྡོ་རྗེ་སོགས་ཏེ་ཚོགས་སྒྲུབ་ཀྱི་དོན་འདི་རྣམས་རྡོ་རྗེ་འཛིན་པ་གསང་བའི་བདག་པོས་ཚིག་ཏུ་བརྗོད་པའོ། །གཉིས་པ་ནི། ཞེས་དེ་བཞིན་སོགས་དང་། ཅེས་ཆེད་དུ་སོགས་ཏེ། དེ་སྐད་ཅེས་སྟོན་པ་དེ་བཞིན་གཤེགས་པ་ཉིད་ཀྱིས་འཁོར་གྱི་དེ་བཞིན་གཤེགས་པ་ཉིད་ལ་ཆེད་དུ་གླེང་ཞིང་ཆེད་དུ་བརྗོད་པས་སྣང་སྤྱོད་ཐམས་ཅད་ཡེ་ཤེས་ཀྱི་རོལ་མོར་འཆར་བའི་སྤྲིན་གྱིས་མཉེས་པར་གྱུར་ཏོ། ། གསུམ་པ་མཚན་གཉིས་བསྡེབས་པ་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉེར་གཉིས་ཡོད་པ་ལས། འདིས་སྐལ་ལྡན་མིའི། འབྱོར་ལྡན་ཡོ་བྱད་ཀྱི། དགྱེས་ལྡན་ལྷའི་ཚོགས་དང་། དེ་དག་སྣང་ལ་མི་དམིགས་པར་སྤྱད་པས་ཚོགས་ཆེན་པོ་སྟེ། དེ་ལྟ་བུའི་ཚོགས་ཀྱི་དཀྱིལ་འཁོར་ཚོམ་བུ་གཅིག་གསུམ་ལྔ་པའི་སྒོ་ནས་ཚོགས་སྒྲུབ་པའི་ལེའུ་སྟེ་བཅུ་གཅིག་པ་དང་བཅུ་གཉིས་པའོ།། །། ལེའུ་བཅུ་གསུམ་པའི་འགྲེལ་པ།ལེའུ་བཅུ་གསུམ་པ་ལ་གསུམ་སྟེ། ལོ་རྒྱུས་དང་། གཞུང་དང་། མཚན་ནོ། །དང་པོ་ནི། དེ་ནས་སོགས་ཏེ། ཚོགས་སྒྲུབ་བསྟན་པ་དེ་ནས་ཐབས་གྲོལ་གྱི་མན་ངག་སྙིང་པོ་སྟོན་པའི་ཕྱིར་དེ་བཞིན་གཤེགས་པ་ཕྱོགས་བཅུ་དུས་བཞིས་བསྡུས་པ་ཐམས་ཅད་ཀྱི་སྐུ་གསུང་ཐུགས་མི་ཕྱེད་པའི་རྡོ་རྗེའི་དཀྱིལ་འཁོར་ཐམས་ཅད་རིག་པའི་ཡེ་ཤེས་རང་སྣང་བ་ལས་ཐ་མི་དད་པས་གཅིག་ཏུ་འདུས་ནས་གནས་པའི་སྟོན་པ་བཅོམ་ལྡན་འདས་དགྱེས་པ་ཆེན་པོས་འཁོར་འདས་ཀྱི་ཆོས་ཐམས་ཅད་ཡེ་ནས་རྫོགས་པ་ཆེན་པོ་རང་བྱུང་གི་ཡེ་ཤེས་སུ་མ་བཙལ་བར་ལྷུན་གྱིས་གྲུབ་པ་ལས་མི་འདའ་བའི་དམ་ཚིག་སྣོད་མ་ཡིན་པ་ལ་ཤིན་ཏུ་གསང་བ་རང་བཞིན་གསང་བའི་སྙིང་པོ་དེ་ཁོ་ན་ཉིད་མཚོན་བྱེད་ཐབས་ཀྱི་སྤྲིན་རྣམ་པར་བཀོད་པའི་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། ། གཉིས་པ་གཞུང་ལ་གཉིས་ཏེ། དངོས་དང་། གསུང་ཚུལ་ལོ། །དང་པོ་ལ་གསུམ་སྟེ། མན་ངག་གི་ངོ་བོ་བཤད་པ། དེ་གཞན་ལས་འཕགས་པའི་ཆེ་བ་བཤད་པ། ཡུལ་གང་ལ་གདམས་པའི་སྣོད་བཤད་པའོ། །དང་པོ་ལ་གཉིས་ཏེ། རྒྱས་པར་བཤད་པ་དང་། དོན་བསྡུ་བའོ། །དང་པོ་ལ་གསུམ་སྟེ། མཚོན་པར་བྱེད་པའི་སྒོ། མྱོང་བར་བྱེད་པའི་ཐབས། མངོན་དུ་གྱུར་པ་འབྲས་བུའོ། །དང་པོ་ལའང་གསུམ་སྟེ། འཇིག་རྟེན་དང་འཇིག་རྟེན་ལས་འདས་པའི་ལྟ་བ་མཚོན་པའི་སྒོ། དེ་གཉིས་ཀའི་ཐ་སྙད་མཚོན་བྱེད་ཀྱི་སྒོ། མཚོན་བྱ་དོན་གྱི་ཁྱད་པར་འབྱིན་ཚུལ་ལོ། །དང་པོ་ནི། མ་རྟོགས་པ་དང་སོགས་ཚིགས་བཅད་གཅིག་སྟེ། འདི་ལ་གཉིས་ལས། དང་པོ་འཇིག་རྟེན་པའི་ལྟ་བ་ལ། མ་རྟོགས་པ་དང་། ལོག་པར་རྟོག་པ་གཉིས་ཀྱི། མ་རྟོགས་པ་ནི། འཁོར་བ་ལས་སྒྲོལ་བའི་ཐབས་ལ་རྨོངས་པ་སོར་བཞག་ལྷ་དང་མིའི་ཐེག་པ་གཉིས་སོ་ཞེས་བཞེད་པའང་ཡོད་མོད་ཀྱི། དེ་ལྟ་ནའང་མན་ངག་ལྟ་ཕྲེང་དང་བི་མ་ལའི་འགྲེལ་ཆུང་ལས། ཕྱལ་རྒྱང་གཉིས་ལ་བཞེད་པ་ལྟར་འཆད་དེ། རྟེན་འབྱུང་རྒྱུ་འབྲས་ཀྱི་ཆོས་ཡོད་མེད་གང་དུའང་མ་རྟོགས་པས་སྤོང་ལེན་མི་བྱེད་པའི་ཀུན་ཏུ་རྨོངས་པ་ནི་ཕྱལ་པ་ཞེས་བྱ་ཞིང་། ཚེ་སྔ་ཕྱི་དང་ལས་འབྲས་ཡོད་པ་ཙམ་རྟོགས་ཀྱང་ཕྱི་མ་རྒྱང་དུ་བོར་ཏེ་ཚེ་འདིའི་བཙན་ཕྱུག་མཐུ་སྟོབས་སོགས་འཇིག་རྟེན་པའི་རིག་པ་བཟོ་དང་མོ་རྩིས་སོགས་ལ་བརྟེན་ནས་བསྒྲུབ་པས་ན་རྒྱང་འཕེན་པ་ཞེས་བྱའོ། །དེ་ལ་ཕྱལ་བ་ནི་མ་རྟོགས་པ་དངོས་དང་། རྒྱང་འཕེན་པ་ནི་ཞར་ལས་བྱུང་བའི་མ་རྟོགས་པ་སྟེ། དེ་གཉིས་ཀ་གྲུབ་མཐས་བློ་བསྒྱུར་བའི་ལྟ་བ་མ་ཡིན་ཡང་སེམས་ཀྱི་གནས་ཚུལ་བསྡུ་བའི་ཕྱིར་དེའི་ཟླ་ལ་བཤད་པ་ཡིན་ནོ། །ལོག་པར་རྟོག་པ་ནི། ཆད་ལྟ་མུར་སྟུག་པ་དང་། རྟག་ལྟ་མུ་སྟེགས་པའོ། །དང་པོ་ནི། ཆོས་ཉིད་ཅིའི་ངོ་བོར་ཡང་མ་གྲུབ་པས་འཁྲུལ་གཞི་བྱས་ནས་ཚེ་སྔ་ཕྱི་དང་ལས་རྒྱུ་འབྲས་མེད་པར་ལྟ་བ་སྟེ། ཚེ་གཅིག་གི་ཆོས་ཐམས་ཅད་རྒྱུ་མེད་གློ་བུར་དུ་སྐྱེ་ཞིང་མཐའ་ཆད་པར་སྨྲ་བས་སྔ་ཕྱིའི་མུར་ཐུག་པའོ། །གཉིས་པ་ནི། ཆོས་ཉིད་འགྱུར་བ་མེད་པས་འཁྲུལ་གཞི་བྱས་ནས་བདག་དང་གཙོ་བོའམ་དབང་ཕྱུག་སོགས་རྟག་པ་གཅིག་པུ་རང་དབང་ཅན་དུ་འདོད་པ་སྟེ། དབྱེ་ན། གྲངས་ཅན་པ། བྱེ་བྲག་པ། སྤྱོད་པ་པ། གཅེར་བུ་པ་དང་བཞིའི་སྟེང་དུ་ཆད་ལྟ་མུར་སྟུག་པ་བསྣན་པས་ཏརྐ་སྡེ་ལྔ་ཞེས་གྲགས་ཞིང་། དེ་ཐམས་ཅད་བདག་ཏུ་ལྟ་བར་མཐུན་ཏེ། མུ་སྟེགས་པ་ནི་བདག་རྟག་པར་འདོད་ལ། མུར་སྟུག་པ་ནི་བདག་ཡོད་པ་ཆད་པར་འདོད་པའོ། །རྒྱུ་མཚན་དེས་ཐམས་ཅད་འཁོར་བ་ལས་སྒྲོལ་བའི་ཐབས་མ་ཡིན་ཏེ། འཁོར་བའི་རྩ་བ་བདག་འཛིན་གྱིས་བཅིངས་པའི་ཕྱིར། དེ་ལྟར་ཡང་རྣམ་འགྲེལ་ལས། ཇི་སྲིད་བདག་ལ་མངོན་ཆགས་པ། །དེ་སྲིད་དེ་ནི་འཁོར་བར་འགྱུར། །ཞེས་སོ། ། གཉིས་པ་འཇིག་རྟེན་ལས་འདས་པའི་ལྟ་བ་ལ། རྒྱུ་འབྲས་ཀྱི་ཐེག་པ་གཉིས་ལས། དང་པོ་རྒྱུའི་ཐེག་པ་ལའང་རྣམ་པར་ཐར་པའི་སྒོ་ཕྱོགས་རེ་ཙམ་རྟོགས་པ་ནི་ཉན་ཐོས་དང་རང་སངས་རྒྱས་གཉིས་ཏེ། སྔ་མས་གང་ཟག་གི་བདག་མེད་དང་། ཕྱི་མས་དེའི་སྟེང་དུ་ཆོས་བདག་གཟུང་བ་རང་བཞིན་མེད་པར་རྟོགས་པས་ཕྱེད་དང་གཉིས་རྟོགས་ཀྱང་འཛིན་པ་རང་བཞིན་མེད་པར་མ་རྟོགས་པའི་ཕྱིར་རོ། །བསམ་གྱིས་མི་ཁྱབ་པའི་རྣམ་ཐར་གྱི་སྒོ་ལ་སྤྱོད་ཀྱང་རྡོ་རྗེའི་ཐེག་པའི་དོན་མ་རྟོགས་པས། ཡང་དག་ཉིད་མ་རྟོགས་པ་ནི་དབུ་སེམས་གཉིས་ཏེ། སེམས་ཙམ་པས་དོན་དམ་པར་གཟུང་འཛིན་གཉིས་མེད་དང་། དབུ་མ་པས་དོན་དམ་པར་སྤྲོས་པ་དང་བྲལ་བར་འདོད་པས་བདག་མེད་གཉིས་རྟོགས་ཀྱང་། ཆོས་ཐམས་ཅད་ཡེ་ནས་དག་མཉམ་ཆེན་པོར་གནས་པའི་དོན་མ་མཐོང་བའི་ཕྱིར། གཉིས་པ་འབྲས་བུའི་ཐེག་པ་ལ་ཕྱི་ནང་གཉིས་ལས། དང་པོ་ཕྱི་ཐུབ་པ་རྒྱུད་ཀྱི་ཐེག་པ་ལ། སྒོ་གསུམ་གྱི་བྱ་བས་རྒྱུད་འདུལ་བ་གཙོ་བོར་བྱེད་པ་ཀྲྀ་ཡ་དང་ཨུ་པ་ཡ། སེམས་ཀྱི་དགོངས་པ་ཏིང་ངེ་འཛིན་གཙོ་བོར་བྱེད་པས་འབྲས་བུ་སྒྲུབ་པ་ནི་ཡོ་གའོ། །གཉིས་པ་ནང་པ་ཐབས་ཀྱི་རྒྱུད་ལ། ཕྱི་རྒྱུད་མན་ཆད་ཐུན་མོང་གི་ཡུལ་དུ་མ་གྱུར་པས་གསང་བ་ནི་ཕ་རྒྱུད་བསྐྱེད་པ་མ་ཧཱ་ཡོ་ག་དང་། མ་རྒྱུད་རྫོགས་པ་ཨ་ནུ་ཡོ་གའོ། །ཆོས་ཐམས་ཅད་ཡེ་ནས་རང་བཞིན་གྱིས་རྣམ་པར་དག་པ་རང་བྱུང་གི་ཡེ་ཤེས་སུ་གནས་པའི་དོན་ཨ་ནུ་མན་ཆད་ཀྱི་ཡུལ་དུ་མ་གྱུར་པས་གསང་བ་ནི་གཉིས་མེད་ཀྱི་རྒྱུད་ཨ་ཏི་ཡོ་ག་སྟེ། མ་ཧཱ་ཡོ་ག་ལ་གསུམ་དུ་ཕྱེ་བའི་བསྐྱེད་རྫོགས་གསུམ་མོ། །དེ་ལྟར་ཨ་ཏི་མན་ཆད་ཀྱི་དོན་དེ་རྣམས་ནི་མཚོན་བྱ་སྒོའི་ཁྱད་པར་བསྟན་པའོ། །གཉིས་པ་ནི། ཡི་གེ་སྒྲ་བཏགས་སོགས་རྐང་པ་གཉིས་ཏེ། མཚོན་བྱ་དེ་རྣམས་ཐ་སྙད་གང་གིས་མཚོན་ཞེ་ན། ཡི་གེ་ཨ་ལས་སྒྲའི་ང་རོ་དང་མིང་གཞི་གསལ་བར་བྱེད་པའི་ཐ་སྙད་ཀྱིས་བཏགས་པ་དབྱངས་གསལ་གྱི་ཡི་གེ་སིལ་བུ་འདུས་པ་ལས་དོན་གྱི་ངོ་བོ་ཙམ་སྟོན་པ་མིང་འབྱུང་ཞིང་། དེ་དུ་མ་ཚོགས་པ་ལ་བརྟེན་ནས་དོན་གྱི་ཁྱད་པར་གསལ་བར་སྟོན་པའི་ཚིག་དང་། ཚིག་གི་ཚོགས་འདུས་པ་ལས་གཞུང་སོ་སོའི་ལུས་གྲུབ་ཅིང་། དེས་རང་རང་གི་བརྗོད་བྱའི་དོན་རབ་ཏུ་མཚོན་ཏེ་གནས་སོ། ། གསུམ་པ་ནི། ཁོང་ནས་སོགས་རྐང་པ་གཉིས་ཏེ། སྤྱིར་གཞུང་ཚིག་སོ་སོའི་ཁོང་ནས་རང་རང་གི་བརྗོད་བྱའི་དོན་གནས་ཤིང་། ཁྱད་པར་མཚོན་བྱ་རང་བཞིན་གྱི་རྒྱུད་སེམས་ཅན་ཀུན་གྱི་ཁོང་ན་གནས་ཀྱང་རྟོགས་དཀའ་བས་གབ་ཅིང་། མཚོན་བྱེད་ལམ་རྐྱེན་ཡི་གེའི་རྒྱུད་དུ་གསང་བ་ཟབ་མོ་རྣམས་སྐལ་མེད་ཀྱིིས་མི་གོ་བའི་ཕྱིར་སྦས་པ་སྟེ། དེ་ལྟར་གབ་སྦས་ཀྱི་དོན་གཉིས་པོ་དེ་འབྱིན་པར་བྱེད་པ་པོ་ནི་རྒྱུད་དོན་ཕྱིན་ཅི་མ་ལོག་པར་སྟོན་པ་རྡོ་རྗེ་སློབ་དཔོན་གྱི་ཐུགས་ལ་གནས་པའི་ཕྱིར་དེ་འབྱིན་ཅིང་། ཇི་ལྟར་འབྱིན་ན། རང་གནས་རང་བཞིན་གྱི་རྒྱུད་ངོ་སྤྲོད་པ་དང་། ཡི་གེའི་རྒྱུད་འཆད་པའི་མན་ངག་གིས་འཁྲུགས་པ་སྡེབ་ཅིང་གབ་པ་མངོན་དུ་ཕྱུང་བའི་ཚུལ་གྱིས་སོ། ། གཉིས་པ་མྱོང་བར་བྱེད་པའི་ཐབས་ལ། གཞུང་གཅིག་གི་སྟེང་དུ་བཤད་ཚུལ་གཉིས་ཏེ། ཤེས་རབ་གྲོལ་ལམ་གྱི་དབང་དུ་བཤད་པ་དང་། ཐབས་ལམ་གདམས་ངག་གི་དབང་དུ་བཤད་པའོ། །དང་པོ་ལའང་གཉིས་ཏེ། གྲོལ་ལམ་རིམ་གྱིས་པ་ལྟར་དུ་བཤད་པ་དང་། གྲོལ་ལམ་ཅིག་ཅར་བ་ལྟར་དུ་བཤད་པའོ། །དང་པོ་ལའང་མཚན་ཉིད་གསུམ་ལས། རྒྱུ་ཤེས་པའི་མཚན་ཉིད་ལྟ་བ་ནི། དཀྱིལ་འཁོར་ལྡན་པའི་དཀྱིལ་འཁོར་གྱིས། །ཞེས་ཏེ། རང་རིག་པ་ཡེ་ནས་རང་བཞིན་གྱིས་རྣམ་པར་དག་པ་རང་བཞིན་ཉིད་ཀྱི་དཀྱིལ་འཁོར་ལྷག་པ་བདེན་པ་དབྱེར་མེད་སྤྱོད་ཡུལ་དང་བྲལ་བ་དེ་འཁོར་འདས་ཀྱི་ཆོས་ཐམས་ཅད་ལ་རིས་མེད་དུ་ལྡན་པར་ཁྱབ་པ་ནི་ལྟ་བའི་ངོ་བོ་སྟེ། གནས་ལུགས་ཀྱི་དཀྱིལ་འཁོར་དེ་ཉིད་གཏན་ཚིགས་རྣམས་ཀྱིས་གཏན་ལ་ཕབ་པས་ཡུལ་མེད་རང་གསལ་དུ་རྟོགས་པ་ནི་གྲུབ་མཐའོ། །དེ་ནས་རྐྱེན་འཇུག་པའི་མཚན་ཉིད་ཏིང་ངེ་འཛིན་ནི། དཀྱིལ་འཁོར་ལ་ནི་སོགས་ཚིགས་བཅད་ཕྱེད་དང་བཞི་སྟེ། ཡེ་ནས་རྣམ་པར་དག་པ་ཆོས་ཉིད་དོན་གྱི་དཀྱིལ་འཁོར་དེ་ལ་ནི་རྣམ་པར་མི་རྟོག་པའི་ཏིང་ངེ་འཛིན་གྱི་དཀྱིལ་འཁོར་སྟོང་པ་ཆེན་པོའི་རྣལ་འབྱོར་བསྒོམ་ཞིང་། དོན་དམ་ཆོས་ཉིད་ཀྱི་དཀྱིལ་འཁོར་དེའི་རང་གདངས་མ་འགགས་པ་ཡེ་ཤེས་སྒྱུ་མའི་དཀྱིལ་འཁོར་སྙིང་རྗེ་ཆེན་པོ་མཁའ་ཁྱབ་ཏུ་བསྒོམ་པ་ནི་སྙིང་རྗེ་སྒྱུ་མའི་རྣལ་འབྱོར་རོ། །དེ་གཉིས་ཟུང་དུ་འཇུག་པ་མི་འགྱུར་བའི་བདེ་བ་ཆེན་པོ་ཅིར་ཡང་མ་འགགས་པ་ལས་རང་བྱུང་བའི་ཡི་གེ་ཨར་སྣང་སྟེ། དེ་ལས་ཨ་ཕྲ་མོ་དང་ཀ་སོགས་ཀྱི་འཕྲོ་འདུ་ལ་སེམས་སྦྱང་ཞིང་། དེ་ཐམས་ཅད་ཀྱང་ཐུགས་རང་རིག་པའི་ཡེ་ཤེས་ཀྱི་ངོ་བོ་ཡི་གེ་ཧཱུཾ་གི་དཀྱིལ་འཁོར་དུ་བསྡུས་པ་བསྒོམ་པ་ནི་ཕྲ་བ་ཡིག་འབྲུ་ལ་བསླབ་པའོ། །དེ་ཉིད་རྡོ་རྗེ་རྩེ་ལྔ་པར་གསལ་བ་ཡོངས་སུ་གྱུར་པ་ལས་སྣང་སྟོང་དབྱེར་མེད་ཀྱི་ལྷ་སྐུའི་དཀྱིལ་འཁོར་ཡན་ལག་ལྷག་པའི་ལྷ་དང་བཅས་པ་བསྒོམ་པ་ནི་ཕྱག་རྒྱ་གཅིག་པའི་ཏིང་ངེ་འཛིན་ཡིན་ལ། །དེས་དཀྱིལ་འཁོར་ཐམས་ཅད་བསྒོམ་པར་འགྱུར་བས་ན་མཆོག་སྟེ། རྒྱལ་བའི་དཀྱིལ་འཁོར་ཐམས་ཅད་ཀུན། །མ་ལུས་པར་ནི་བསྒོམ་པར་འགྱུར། །ཞེས་གསུངས་ཤིང་། ཟུང་འཇུག་གི་ལྷ་སྐུ་དེ་ཐ་དད་དུ་ཞེན་པའི་བློས་རྟོགས་དཀའ་བས་གསང་བའི་དོན་དང་མཐའི་སྤྲོས་པ་དང་བྲལ་བས་ཐིག་ལེ་སྟེ། དེ་ལྟར་སྤྲོས་བཅས་ཀྱི་དཀྱིལ་འཁོར་འཆར་གཞིར་གྱུར་པས་ན་དབྱིངས་སོ། །དེའང་འབྱུང་བ་ལྔ་ནི་ཤེས་རབ་ཀྱི་རང་བཞིན་རིགས་ཀྱི་ཡུམ་ལྔ་དང་། ཆེན་པོའི་སྒྲས་བརྗོད་པ་ཕུང་པོ་ལྔ་ནི་རིགས་ཀྱི་དེ་བཞིན་གཤེགས་པ་ལྔ་སྟེ། དེ་ལྟར་རྟོག་ཚོགས་ཐམས་ཅད་བྱང་ཆུབ་ཀྱི་སེམས་སུ་རང་བཞིན་གྱིས་རྣམ་པར་དག་པས་ལྷ་རྟོག་དབྱེར་མི་ཕྱེད་པ་ནི་རྡོ་རྗེའི་ཚོགས་ཏེ། འདི་ལྟར་མིག་སོགས་དབང་པོ་དང་། གཟུགས་སོགས་ཡུལ་དང་། འདས་པ་སོགས་དུས་དང་། མིག་གི་རྣམ་ཤེས་སོགས་རིག་པ་སྟེ། དེ་ལྟར་རྟོག་ཚོགས་ཀྱིས་བསྡུས་པའི་སྤྱོད་ཡུལ་རྣམས་སེམས་དཔའ་སེམས་མ་དང་། ཁྲོ་བོ་ཁྲོ་མོ་སོགས་ལྷར་ཡོངས་སུ་དག་པས་ན་ཀུན་ཏུ་བཟང་པོའི་དཀྱིལ་འཁོར་ཏེ། རྒྱལ་བ་བཞི་བཅུ་རྩ་གཉིས་ལ་ཡན་ལག་གི་ལྷ་བཞི་བཅུ་པ་རེ་བསྒོམ་པ་ནི་ཐབས་ཀྱི་ལྷ་བཞི་བཅུའོ། །དེ་རྣམས་ཀྱང་རང་གི་སེམས་ཉིད་རྣམ་པར་འཕྲུལ་པའི་བདག་ཉིད་ཆེན་པོ་ཡན་ལག་ལྷག་པའི་ལྷ་ཐུགས་ཡེ་ཤེས་སེམས་དཔའ་རེ་རེ་བསྒོམས་པས་ཤེས་རབ་ཀྱི་ལྷ་བཞི་བཅུ་དང་། ཐབས་ལྷ་བཞི་བཅུ་པོ་ལ་སྐུ་གསུང་ཐུགས་ཀྱི་ལྷ་རེ་རེ་སྟེ། བཞི་བཅུ་པ་ཚན་པ་བཞི་ལ་ཡེ་ཤེས་ལྔའི་ཕྱག་རྒྱ་དབུ་རྒྱན་གྱི་ལྷ་ལྔ་ལྔ་རེས་བརྒྱན་པར་བལྟ་ཞིང་བསྒོམ་མོ། །དེ་ལྟར་ཉི་ཁྲི་བཞི་སྟོང་པོ་ཐམས་ཅད་གསལ་ཞིང་བརྟན་པ་ནི་སྣང་བ་རྣམ་པར་འབྱེད་པའི་ཏིང་ངེ་འཛིན་ཏེ་སྤྲོས་བཅས་སོ། །དྭངས་མ་དཀར་དམར་གྱི་སྙིང་པོའི་ཐིག་ལེ་དབབ་ལྡོག་གི་སྦྱོར་བས་ལྷན་སྐྱེས་ཀྱི་ཡེ་ཤེས་ལ་སྦྱོར་བ་ནི་ཨཱ་ལི་སྟེ། དེས་མཚོན་ནས་ཡོ་བྱད་ལྔ་ཡུལ་དང་ཡུལ་ཅན་གཉིས་སུ་མེད་པར་མཉམ་པར་སྦྱོར་བས་སྤྱོད་བཞིན་མ་ཆགས་པ་བདེ་བའི་ཡེ་ཤེས་ཀྱི་རོལ་མོ་ཡིས་རྟོག་ཚོགས་ཡེ་ཤེས་ཀྱི་དཀྱིལ་འཁོར་དུ་རང་གསལ་བས་དགྱེས་པ་དང་ལྡན་པའི་ལྷ་ཉིད་རོལ་པའི་ཚུལ་དུ་མཆོད་པ་མཉམ་རྫོགས་ཆེན་པོར་དབུལ་བ་ནི་ཚོམ་བུ་ཚོགས་སྒྲུབ་བོ། །དེ་ནས་འབྲས་བུའི་མཚན་ཉིད་ནི། ཟག་པ་སོགས་རྐང་པ་དགུ་སྟེ། དེ་ལྟར་ཟག་པ་མེད་པའི་ཡེ་ཤེས་དང་བསོད་ནམས་ཁྱད་པར་ཅན་གྱི་མཐུས་གནས་སྐབས་ཀྱི་འབྲས་བུ་འོད་གསལ་གྱི་ལྷ་སྐུར་མངོན་དུ་གྱུར་པ་མཐོང་ལམ་གཉིས་གང་རུང་ཐོབ་པ་ལས། ཟུང་འཇུག་ཡེ་ཤེས་སྒྱུ་མའི་སྐུར་རང་སྣང་བ་རྒྱ་ཆེན་དང་མཐར་ལམ་གྱི་ས་བརྙེས་པ་ལ་སྦྱོར་བར་འགྱུར་ཏེ། དེའི་དགོངས་པ་ནི་སྤྱོད་ཡུལ་ཐམས་ཅད་རང་བྱུང་གི་ཡེ་ཤེས་རང་སྣང་བའི་རོལ་མོ་དག་པ་རབ་འབྱམས་ལྷའི་དཀྱིལ་འཁོར་མཐའ་ཡས་པར་འཆར་ཞིང་། སྣང་སྟོང་མི་ཕྱེད་པའི་ཡེ་ཤེས་མཆོག་ཐུགས་སུ་ཆུད་ལ། དེ་ཉིད་རྟོགས་དཀའ་ཞིང་སྤྲོས་པའི་ཡུལ་ལས་འདས་པས་གསང་བའི་ཐིག་ལེ་སྟེ་མཉམ་པ་ཉིད་ཀྱི་དབྱིངས་སོ། །ཟུང་འཇུག་དེ་ནི་སངས་རྒྱས་ཀུན་གྱི་ངོ་བོའམ་དངོས་གཞི་སྟེ། དེའི་ཚེ་ན་ཕྱོགས་བཅུ་དུས་བཞིའི་དབྱིངས་སུ་མངོན་པར་རྫོགས་པ་སངས་རྒྱས་པའི་རྒྱལ་བ་ཐམས་ཅད་ཀྱི་སྐུ་གསུང་ཡོན་ཏན་ཕྲིན་ལས་ཐུགས་ཏེ་འབྲས་བུའི་ཆོས་རྣམས་མ་ལུས་པ་རང་གི་རིག་པ་ལས་ཐ་དད་མེད་པར་རྟོགས་པ་ནི། བདག་ཉིད་ལ་ཡོད་པ་དེའི་ཞལ་བདག་གིས་མཐོང་བས་འཁོར་འདས་ཀྱི་ཆོས་ཐམས་ཅད་གཉིས་སུ་མེད་པའི་བདག་ཉིད་དུ་དབང་སྒྱུར་བའི་མཆོག་ཉིད་དེ། སློབ་ལམ་གྱི་རྩེ་མོར་ཕྱིན་པས་ལམ་གྱི་ནང་ནས་དམ་པ་ཡིན་ནོ། །དེ་ལྟར་མན་ངག་ལམ་རིམ་གྱིས་རྒྱབ་བྱས་ནས་གྲོལ་ལམ་རིམ་གྱིས་པ་ལྟར་དུ་བཤད་པ་སྟེ། འདི་ལ་སྔ་རབས་པ་རྣམས་ཀྱིས་བསྐྱེད་རིམ་ཞེས་བཤད་ནའང་། གྲོལ་ལམ་ཅིག་ཅར་བ་ལ་ལྟོས་ནས་དེ་ལྟར་གསུངས་པ་ལས། རིམ་པ་གཉིས་ཀྱི་ཟླས་ཕྱེ་བའི་བསྐྱེད་རིམ་ནི་མ་ཡིན་ཏེ། གལ་ཏེ་ཡིན་ན། དེ་ཁོ་ན་ལ་བསླབ་པས་སྤྱོད་པའི་ཉེ་རྒྱུ་ཚོགས་སྒྲུབ་ཀྱིས་ཟག་མེད་མཐོང་ལམ་ལ་སྦྱོར་བ་མི་སྲིད་པའི་ཕྱིར་རོ། །དེས་ན་ལམ་རིམ་དུ། ཕྱག་རྒྱ་གཅིག་པའི་སྐབས་སུ་ཆོ་ག་གསུམ་བསྐྱེད་དང་བཟླས་པ་བྱ་ཚུལ་སོགས་འབྱུང་ཡང་། དེ་ཙམ་གྱིས་བསྐྱེད་རིམ་ཁོ་ནར་མི་འགྱུར་ཏེ། རྫོགས་རིམ་གྱིས་དྲངས་པའི་ལྷའི་གསལ་སྣང་ལ་བསླབ་ཚུལ་དང་། ཐུན་མཚམས་ཀྱི་བྱ་བ་བཟླས་པ་སོགས་སྦྱར་ཏེ་བསྐྱེད་རྫོགས་ཟུང་འཇུག་ཏུ་བསླབ་པའི་ཆེད་ཡིན་པའི་ཕྱིར་རོ། །འོན་ཀྱང་བསྐྱེད་རིམ་ལྟར་བསླབ་པའང་མཐའ་གཅིག་ཏུ་ནི་མི་འགོག་སྟེ། གང་ཟག་འགའ་ཞིག་བསྐྱེད་པའི་རིམ་པས་སྤྲོས་བཅས་ཀྱི་ལྷའི་གསལ་སྣང་ཅི་རིགས་ཐོབ་ནས། ཚོགས་ཀྱི་སྤྱོད་པས་ཐུན་མོང་གི་དངོས་གྲུབ་མཁའ་སྤྱོད་བསྒྲུབས་ཏེ་དངོས་དང་སྤྲུལ་པའི་སྒོ་ནས་ཕན་འདོགས་པ་དང་ཚར་གཅོད་པ་སོགས་ཀྱིས་སེམས་ཅན་གྱི་དོན་བྱེད་ཅིང་། རྟེན་དེས་སངས་རྒྱས་བྱང་སེམས་རྣམས་མཉེས་པར་བྱས་པའི་མཐུས་རྫོགས་རིམ་ལ་ཞུགས་ཏེ་ཟུང་འཇུག་གི་སྐུ་སྒྲུབ་པ་ནི་ཡོད་པར་འདོད་དགོས་སོ། །དེས་ན་ལམ་གྱི་གནད་ནི་འདི་ཡིན་ཏེ། ལམ་རིམ་ལས། ཡན་ལག་དབང་པོ་ཐམས་ཅད་ཀུན། །རང་བཞིན་ཡོངས་ཀྱིས་དག་པ་དང་། །ཏིང་འཛིན་དེ་བཞིན་གཤེགས་པ་ལྔར། །ཡེ་ནས་མ་བཅོས་ཡོངས་ཀྱིས་གནས། །ཞེས་དང་། རང་ལུས་གདོད་ནས་ཕྱག་རྒྱ་ཆེ། །བསྒོམས་པས་མངོན་དུ་གྱུར་པའི་ལྷ། །ཞེས་སོགས་གསུངས་པ་ལྟར་མན་ངག་གི་གནད་གཟིགས་པའི་དམ་པ་གོང་མ་རྣམས་བསྐྱེད་རིམ་ཞེས་གསུང་ཡང་། དེའི་དོན་འཆད་པའི་ཚེ་ལྷག་པ་ཀུན་རྫོབ་འདི་ལྟར་སྣང་བ་ཀུན་རང་བཞིན་གྱིས་ལྷའི་དཀྱིལ་འཁོར་དུ་ཡོངས་སུ་གྲུབ་པས། དེ་ལྟར་གསལ་བཏབ་ཅིང་གོམས་པ་ན་ཟུང་འཇུག་གི་ལྷ་སྐུ་རང་ཤར་དུ་འབྱུང་བར་བཞེད་པའི་ཕྱིར་རྫོགས་རིམ་གྱི་ལྷ་སྐུ་ལས་འོས་མེད་དོ། །ཇི་ལྟར་བསྒོམ་པའི་གནད་ཀྱང་། ལྟ་བ་གཏན་ལ་ཕེབས་པའི་གང་ཟག་གིས་སྒོ་གསུམ་གྱི་བྱ་བ་བཏང་ནས། སྟོང་པ་ཆེན་པོའི་རྣལ་འབྱོར་གྱིས་ཉིན་མཚན་སྦྲེལ་ཏེ་དོན་དམ་འོད་གསལ་རྣམ་པར་མི་རྟོག་པའི་ཏིང་ངེ་འཛིན་ལ་མཉམ་པར་བཞག་པས། ཞི་ལྷག་ཟུང་དུ་འཇུག་པའི་འོད་གསལ་གྱི་ངང་དུ་སེམས་ཐིམ་སྟེ་འགགས་པ་ན་ཕྱི་ནང་གསང་བའི་དྲོད་དང་ཟད་པར་གྱི་སྣང་བ་སོགས་སྟོང་གཟུགས་ཀྱི་སྣང་བ་མཐའ་ཡས་པ་འཆར་ལ། དེའི་ངང་ལས་ཉིན་སྣང་དང་མཚན་མོ་རྨི་ལམ་གྱི་སྣང་བ་ཐམས་ཅད་སྒྱུ་མ་ལྟ་བུར་ཤར་ནས་འགྲོ་བ་རྣམས་ལ་དམིགས་མེད་ཀྱི་སྙིང་རྗེ་རང་གསལ་མ་འགགས་པའི་ངང་དུ་མཉམ་པར་འཇོག་པ་སྙིང་རྗེ་སྒྱུ་མའི་རྣལ་འབྱོར་ལ་བསླབ་པས། སྣང་བ་རིས་མེད་ལས་སྙིང་རྗེ་ཆེན་པོའི་འཕེན་པ་དང་ཏིང་ངེ་འཛིན་གྱི་རྐྱེན་གྱི་ཟུང་འཇུག་གི་ལྷ་སྐུ་ཕྱག་རྒྱ་གཅིག་པ་དང་། དེ་ལས་ཆེས་ཆེར་འཕེལ་ཏེ་སྣང་བ་ཐམས་ཅད་ཟུང་འཇུག་གི་ལྷར་མངོན་སུམ་དུ་སྤྲོ་བར་ནུས་པ་ནི་ཕྱག་རྒྱ་སྤྲོས་བཅས་སོ། །དེ་ལས་ཉེ་རྒྱུའི་སྤྱོད་པ་སྤྲོས་བཅས་ཚོགས་སྒྲུབ་བམ། སྤྲོས་མེད་རྣལ་འབྱོར་ཕོ་མོ་གཙོ་བོ་ཡབ་ཡུམ་ཙམ་ཚོགས་པ་ལ་བརྟེན་པའམ་ཤིན་ཏུ་སྤྲོས་མེད་ནི་ཡབ་མི་འགྱུར་བའི་བདེ་ཆེན་ཉིད་ཡུམ་རྣམ་ཀུན་མཆོག་ལྡན་གྱི་སྟོང་པ་ཉིད་དང་ཁ་སྦྱོར་གྱི་སྤྱོད་པས་ཟག་མེད་ཀྱི་ལམ་ལ་སྦྱོར་བར་བྱེད་དོ། །དེས་ན་ཐོག་མར་སྟོང་ཆེན་འོད་གསལ་རྣམ་པར་མི་རྟོག་པའི་ལམ་ལས་བརྩམས་པས་ལྷ་སྐུའི་སྣང་བ་རྣམས་ཀྱང་ཟུང་འཇུག་གི་ལྷ་སྐུ་ཕྱག་རྒྱ་ཆེན་པོར་འཆར་བའི་ཕྱིར། མངོན་སུམ་པའི་ལམ་རྫོགས་པའི་རིམ་པ་སྟེ། རྡོ་རྗེ་སྙིང་འགྲེལ་ལས། ཀོ་ཊ་པ་ཡི་ས་བོན་ལས། །སཱ་ལུའི་འབྲུ་ནི་འབྱུང་བ་མེད། །རྣམ་རྟོག་ས་བོན་ལས་བྱུང་བའི། །འབྲས་བུ་རྣམ་པར་རྟོག་པར་འགྱུར། །རྣམ་པར་མི་རྟོག་ལས་སྐྱེས་པའི། །འབྲས་བུ་རྣམ་པར་མི་རྟོག་འགྱུར། །ཞེས་སོ། ། གཉིས་པ་ཅིག་ཅར་བ་ལྟར་བཤད་པ་ལ། བསྟན་བཤད་གཉིས་ལས། དང་པོ་ནི། དཀྱིལ་འཁོར་ལྡན་པའི་སོགས་རྐང་པ་ལྔ་སྟེ། འཁོར་འདས་ཀྱི་ཆོས་ཐམས་ཅད་ཡེ་ནས་སྐུ་གསུང་ཐུགས་ཀྱི་དཀྱིལ་འཁོར་དུ་སངས་རྒྱས་ཏེ་རང་བཞིན་གྱིས་རྣམ་པར་དག་པ་ཡིན་གྱི། ཕྱིས་ལམ་གྱིས་འབྲས་བུ་གསར་དུ་བསྒྲུབས་པ་ནི་མ་ཡིན་ནོ། །ཆོས་རྣམས་ཀྱི་རང་བཞིན་དེ་ལྟར་ཡིན་ཡང་། ཡིན་པ་ཙམ་གྱིས་ཕན་མི་ཐོགས་པས། གཞི་དེ་ལྟར་ཡིན་པ་ལམ་གྱིས་མངོན་དུ་རྟོགས་པར་བྱ་དགོས་ཏེ། དེ་ཡང་ཡེ་ནས་རང་བཞིན་གྱི་དཀྱིལ་འཁོར་སེམས་ཅན་ཐམས་ཅད་ལ་རང་ཆས་སུ་ལྡན་པའི་དོན་རྟོགས་ནས། ཏིང་ངེ་འཛིན་གྱི་དཀྱིལ་འཁོར་གྱིས་ཡེ་ནས་ཡིན་པའི་དཀྱིལ་འཁོར་དེ་ལ་ནི། དེ་ལྟར་ཡིན་པར་ཤེས་པའི་ཚུལ་གྱིས་དཀྱིལ་འཁོར་དུ་གསལ་འདེབས་ཤིང་བསྒོམ་པར་བྱས་ནས་རང་བཞིན་གྱི་དཀྱིལ་འཁོར་དང་མཉམ་པར་སྦྱོར་བའི་ཏིང་ངེ་འཛིན་གྱི་དཀྱིལ་འཁོར་ལས་བྱུང་བ་ནི་ཐུགས་རང་རིག་པ་ཡེ་ཤེས་ཀྱི་དཀྱིལ་འཁོར་ཞེས་བྱ་སྟེ། དཀྱིལ་འཁོར་ཐམས་ཅད་ཀྱི་མཆོག་འབྲས་བུའི་དཀྱིལ་འཁོར་རོ། །དེ་ལྟར་གཞི་ལམ་འབྲས་གསུམ་དུ་སྣང་ཡང་དོན་ལ་གསང་བ་བྱང་ཆུབ་སེམས་ཀྱི་རང་བཞིན་ཐིག་ལེ་ཆེན་པོའི་དཀྱིལ་འཁོར་སྤྲོས་བྲལ་གྱི་དབྱིངས་ལས་གཞན་དུ་མ་གཡོས་པས་དེ་ཙམ་དུ་ཟད་དོ། ། གཉིས་པ་ལ་གསུམ་ལས། དང་པོ་དཀྱིལ་འཁོར་ཇི་ལྟར་ལྡན་པར་བསྟན་པ་ནི། འབྱུང་བ་སོགས་ཚིགས་བཅད་གཅིག་སྟེ། སྔར་ལྟར་འབྱུང་བ་ལྔ་ཡུམ་ལྔ་ཡིན་པ་སོགས་རྟོག་ཚོགས་ཐམས་ཅད་རང་བཞིན་གྱིས་ལྷར་རྣམ་པར་དག་པས་འགྲོ་བ་ཀུན་ལ་དེ་ལྟར་ཡེ་ནས་རང་ཆས་སུ་ལྡན་པ་ཡིན་ནོ། །གཉིས་པ་རང་བཞིན་གྱི་དཀྱིལ་འཁོར་ལ་ཏིང་ངེ་འཛིན་གྱི་དཀྱིལ་འཁོར་ཇི་ལྟར་བསྒོམ་ཚུལ་ནི། ཀུན་ཏུ་བཟང་པོའི་སོགས་རྐང་པ་གསུམ་སྟེ། དེ་ལྟར་ཆོས་ཐམས་ཅད་ཀུན་ཏུ་བཟང་པོའི་དཀྱིལ་འཁོར་དུ་ཡེ་ནས་སངས་རྒྱས་པ་དེ་ལ། དེའི་དོན་ལེགས་པར་རྟོགས་པའི་རྣལ་འབྱོར་པ་བདག་ཉིད་ཆེན་པོས་ཡེ་ནས་གྲུབ་པའི་དོན་དེ་དང་གཉིས་སུ་མེད་པར་རིག་པས་ལྷག་པའི་དགོངས་པ་ཟབ་མོ་སྟེ། ཐུགས་རང་བྱུང་གི་ཡེ་ཤེས་གཅིག་དང་དུ་མའི་མཐའ་དང་བྲལ་བ་ལས་རོལ་པ་མ་འགགས་པ་ཡེ་ཤེས་ལྔར་འཆར་བའི་ཚུལ་གྱིས་ལྟ་ཞིང་བསྒོམ་པར་བྱའོ། །གསུམ་པ་དེ་ལྟར་བསྒོམ་པ་ལས་ཅིར་འགྱུར་བ་ནི། སྙིང་པོའི་སོགས་ཚིགས་བཅད་གསུམ་སྟེ། ཆོས་ཐམས་ཅད་ཀྱི་སྙིང་པོར་གྱུར་པའི་ཆོས་ཀྱི་དབྱིངས་ཐིག་ལེ་ཉག་གཅིག་དང་གཉིས་སུ་མེད་པར་མཉམ་པར་སྦྱོར་བ་ལས། དོན་ཕྱིན་ཅི་མ་ལོག་པར་རྟོགས་པའི་རིག་པ་རང་བྱུང་བ་ནི་བྱང་ཆུབ་ཀྱི་སེམས་བདེ་བ་ཆེན་པོའི་ཡེ་ཤེས་ཏེ། དེ་ཉིད་ཀྱི་རོལ་མོ་སྣ་ཚོགས་པར་འཆར་བའི་སྤྲིན་གྱིས་ཡེ་ཤེས་ལ་ཡེ་ཤེས་དགྱེས་པར་རོལ་པའི་ཚུལ་དུ་མཆོད་པར་དབུལ་ཞེས་བྱའོ། །དེ་ལྟར་གཞི་ལམ་འབྲས་གསུམ་དུ་བསྟན་ཀྱང་རྩ་བ་བྱང་ཆུབ་ཀྱི་སེམས་ལས་མ་གཡོས་ཏེ། ཟག་པ་མེད་པའི་བསོད་ནམས་ཀྱི་སྟོབས་ཀྱིས་བསྒྲུབས་པའི་ཡེ་ཤེས་སྒྱུ་མ་ལྟ་བུར་མ་འགགས་པར་རང་སྣང་བའི་རོལ་མོའི་དཀྱིལ་འཁོར་རྣམ་འགྱུར་མཐའ་ཡས་པར་འཕྲུལ་ཡང་མཆོག་གསང་བའི་ཐིག་ལེ་བྱང་ཆུབ་ཀྱི་སེམས་དེ་བཞིན་ཉིད་ཀྱི་དབྱིངས་ལས་གཞན་དུ་གཡོས་པ་མེད་དོ། །དེ་ལྟ་བུའི་མན་ངག་དང་མན་ངག་ཅན་གྱི་ཡོན་ཏན་གང་ཞེ་ན། དབྱིངས་དེ་ཉིད་ནི་སངས་རྒྱས་ཀུན་གྱི་དངོས་གཞི་སྟེ་མན་ངག་གི་དོན་ཡིན་ལ། མན་ངག་དེ་དང་ལྡན་པ་ནི། ཕྱོགས་བཅུ་དུས་བཞིར་ཚོགས་གཉིས་རྫོགས་པའི་སངས་རྒྱས་མ་ལུས་པ་བདག་ཉིད་ལས་མི་གཞན་པའི་ཚུལ་དུ་སྐུའི་ཞལ་མཐོང་བ་དང་། གསུང་ཆོས་ལ་དབང་སྒྱུར་བ་དང་། ཡོན་ཏན་ཕྲིན་ལས་མཐར་ཕྱིན་པའི་མཆོག་ཉིད་དུ་དང་། ཐུགས་དབྱེར་མི་ཕྱེད་པའི་བསླུ་མེད་སྐྱབས་ཀྱི་དམ་པར་གྱུར་པ་ཡིན་ནོ། །གཞན་ཡང་དཀྱིལ་འཁོར་ལ་གནས་སོགས་རྐང་པ་གསུམ་གྱིས་དེ་ཐོབ་ཚུལ་དང་། རྫོགས་པའི་དཀྱིལ་འཁོར་མཉམ་སྦྱོར་བས་སོགས་རྐང་པ་ལྔས་ཐུགས་རྗེ་ཆེན་པོའི་མཛད་པ་ཇི་ལྟར་འབྱུང་ཚུལ་བསྟན་པའི་ཡོན་ཏན་རྣམས་ཀྱང་འདིར་སྦྲེལ་བའི་བཀའ་སྲོལ་ཡོད་ཀྱང་ཡི་གེས་འཇིགས་སོ། །དེ་ལྟར་མན་ངག་དེ་ལ་སློབ་དཔོན་ཆེན་པོ་པདྨས་ལྟ་བའི་ཕྲེང་བར། རྟོགས་པ་བཞིའི་ལམ་གྱིས་ཡིད་ཆེས་པར་བྱ་བ་དང་། མཚན་ཉིད་གསུམ་གྱིས་དོན་མཐར་དབྱུང་བ་དང་། བསྙེན་སྒྲུབ་ཡན་ལག་བཞིས་དོན་ལྷུན་གྱིས་གྲུབ་པར་བྱ་བ་དང་། ལྷུན་གྱིས་གྲུབ་པའི་དཀྱིལ་འཁོར་དུ་འཇུག་པའི་ཐབས་བསྟན་པ་སྟེ། དོན་རྣམ་པ་བཞིར་ཕྱེ་ནས་གསུངས་པ་ལས། ཕྱི་མ་ནི་འོག་ཏུ་འཆད་པར་འགྱུར་ཞིང་། དང་པོ་གསུམ་ནི་སྔར་བཤད་པ་ལ་འདུས་པས་འདིར་རྒྱས་པར་མ་སྤྲོས་སོ། ། གཉིས་པ་ཐབས་ལམ་གདམས་ངག་གི་དབང་དུ་བཤད་པ་ལ་གཉིས་ཏེ། སྟེང་སྒོ་འཇུ་འདུལ་གྱི་མན་ངག་ལྟར་བཤད་པ་དང་། འོག་སྒོ་ཁམས་གསུམ་རོལ་པའི་མན་ངག་ལྟར་བཤད་པའོ། །དང་པོ་ལའང་བཞི་སྟེ། ཀུན་ཏུ་བཟང་པོའི་དང་། ཀུན་ཏུ་བཟང་མོའི་དང་། སྦྱོར་བ་དག་པའི་དང་། ཁྱབ་བརྡལ་ཆེན་པོའི་མན་ངག་གོ །དང་པོ་ནི། དཀྱིལ་འཁོར་ལྡན་པའི་སོགས་ཚིགས་བཅད་གཅིག་སྟེ། སྙིང་ཁོང་སྟོང་གི་དབུས་ན་རྩའི་དྭངས་མ་རྩ་འདབ་བརྒྱུས་པ་ལྡང་བ་འདྲ་བ་བརྒྱད་ཡོད་པ་རྩ་བཞིར་འདུ་སྟེ། མདུན་གྱི་གསུམ་ཆོས་ཉིད་ཀྱི་རྩ་སྟེ་སྐྱེ་བ་མེད་པའི་རང་སྣང་བའི་ལས་བྱེད་པ། གཡས་ཀྱི་གཅིག་ཡེ་ཤེས་ཀྱི་རྩ་སྟེ་ཡེ་ཤེས་འཆར་བའི་ལས་བྱེད་པ། གཡོན་གྱི་གཅིག་ཡོན་ཏན་གྱི་རྩ་སྟེ་མངོན་ཤེས་དང་འབྲས་བུའི་ཆོས་རྣམས་སྣང་བའི་ལས་བྱེད་པ། རྒྱབ་ཀྱི་གསུམ་རང་རྒྱུད་ཀྱི་རྩ་སྟེ་ཤེས་པ་རྣམས་རྨོངས་ཤིང་འཇོམས་པའི་ལས་བྱེད་དོ། །རྩ་དེ་དག་གི་སྦུབས་ན་འོད་བཞི་དང་། དེའི་ཁྲོད་ན་སྦྱང་བྱ་དང་སྦྱོང་བྱེད་ཀྱི་ས་བོན་རྣམ་ཤེས་དང་བཅས་པ་རྣམས་གནས་ཏེ། ཆོས་ཉིད་ཀྱི་རྩ་ལ་འོད་ཟླུམ་པོ་དཀར་པོ། །སྦྱང་བྱ་སུ་དང་ཏྲི། སྦྱོང་བྱེད་ༀ། ཀུན་གཞིའི་རྣམ་ཤེས། ཡེ་ཤེས་ཀྱི་རྩ་ལ་འོད་གྲུ་བཞི་སེར་པོ། སྦྱང་བྱ་ཨ་དང་ནྲྀ། སྦྱོང་བྱེད་ཧཱུཾ། ཡིད་ཀྱི་རྣམ་ཤེས། ཡོན་ཏན་གྱི་རྩ་ལ་འོད་ཟླ་གམ་དམར་པོ། སྦྱང་བྱ་པྲེ་དང་དུ། སྦྱོང་བྱེད་ཨཱཿཉོན་མོངས་ཅན་གྱི་ཡིད། རང་རྒྱུད་ཀྱི་རྩ་ལ་འོད་གྲུ་གསུམ་དམར་ནག་ལ། སྒོ་ལྔའི་ཤེས་པ་གཉིད་དང་བཅས་པ་གནས་སོ། །འདིར་ཆོས་ཉིད་དང་ཡེ་ཤེས་ཀྱི་རྩའི་འོད་དཀར་པོ་དང་སེར་པོར་བྱས་པ་ནི་དཔེ་ཆུང་རང་གནས་ཀྱི་ལུགས་ཏེ། གསང་ཐིག་ལས་ནི་ཆོས་ཉིད་སེར་པོ་དང་། ཡེ་ཤེས་མཐིང་གར་བཤད་དོ། །དེ་ལྟར་སྙིང་གི་དཀྱིལ་འཁོར་རྩ་ཆེན་བཞི་དང་ལྡན་པ་དེའི་ནང་ན། དྭངས་མ་ལྔའི་དཀྱིལ་འཁོར་རང་བཞིན་གྱིས་གནས་པའི་དབུས་སུ་ཡེ་ཤེས་སྙིང་པོའི་ཐིག་ལེ་སྟོང་གསལ་འགག་མེད་བདེ་བ་ཆེན་པོའི་ངོ་བོར་བཞུགས་ཏེ། ཉི་ཟླ་ཁ་སྦྱོར་གྱི་རྒྱུད་ལས། ཙིཏྟ་རིན་ཆེན་གཞལ་ཡས་ན། །ཞི་བའི་དཀྱིལ་འཁོར་བཞི་བཅུ་གཉིས། །སྐུ་ནི་སྣང་ལ་རང་བཞིན་མེད། །ཆ་ཕྲ་འོད་གསལ་སྙིང་པོར་བཞུགས། །ཞེས་དང་། བརྟག་གཉིས་ལས། ལུས་ལ་ཡེ་ཤེས་ཆེན་པོར་གནས། །རྟོག་པ་ཐམས་ཅད་ཡང་དག་སྤངས། །དངོས་པོ་ཀུན་ལ་ཁྱབ་པ་པོ། །ལུས་གནས་ལུས་ལས་མ་སྐྱེས་པའོ། །ཞེས་དང་། རིམ་ལྔ་ལས། རྟག་ཏུ་སྙིང་ལ་གནས་པ་ཡི། །ཐིག་ལེ་གཅིག་ལ་འགྱུར་བ་མེད། །དེ་སྒོམ་བྱེད་པའི་སྐྱེ་བོ་ལ། །ངེས་པར་ཡེ་ཤེས་སྐྱེ་བར་འགྱུར། །ཞེས་སོ། །དེ་ལ་དྭངས་མ་ལྔ་ནི། རྩའི་དྭངས་མ་དར་དཀར་གྱི་སྐུད་པ་འདྲ་བ་སྦོམ་ཕྲ་རྟ་རྔ་བཅུ་གཤགས་ཙམ་གྱི་ནང་ན། ཁྲག་གི་དྭངས་མ་མཚལ་ཁུ་ལྟ་བུ་དང་། མེའི་དྭངས་མ་མེ་ལོང་ཉི་མ་ལ་བཞག་པའི་ངད་ཙམ་དང་། རླུང་གི་དྭངས་མ་གསེར་ས་འོག་ན་ཡོད་པའི་རླངས་ཙམ་དང་། ནམ་མཁའི་དྭངས་མ་བར་སྣང་སང་སེང་གོ་འབྱེད་པའི་ཚུལ་དུ་ཡོད་དེ། ལྔ་པོའང་ཡེ་ནས་ཡུམ་ལྔ། ཡེ་ཤེས་ལྔ། སྐུ་ལྔར་གནས་ཏེ། རྩའི་དྭངས་མ་ནི་འབྱུང་བ་ས་སྟེ། ཡུམ་སྤྱན་མ། མེ་ལོང་ལྟ་བུའི་ཡེ་ཤེས། མངོན་བྱང་གི་སྐུའོ། ཁྲག་གི་དྭངས་མ་ནི་ཆུ་སྟེ། མཱ་མ་ཀཱི། མཉམ་ཉིད། ལོངས་སྐུའོ། །མེའི་དྭངས་མ་ནི། གོས་དཀར། སོར་རྟོག །རྡོ་རྗེའི་སྐུའོ། །རླུང་གི་དྭངས་མ་ནི། སྒྲོལ་མ། བྱ་གྲུབ། སྤྲུལ་སྐུའོ། །ནམ་མཁའི་དྭངས་མ་ནི། དབྱིངས་ཕྱུག་མ། སྟོང་པ་ཉིད། ཆོས་ཀྱི་སྐུའོ། ཡེ་ཤེས་སྙིང་པོའི་ཐིག་ལེ་ནི། རིག་པའི་དྭངས་མ་སེམས་ཉིད་འོད་གསལ་བ་སྟེ། ཡུམ་ལྔ་འདུས་པ་བྱ་བ་མོ་དང་། ཡེ་ཤེས་ལྔ་འདུས་རང་བྱུང་གི་ཡེ་ཤེས་དང་། སྐུ་ལྔ་འདུས་པ་བདེ་ཆེན་གྱི་སྐུར་དོན་གྱིས་འགྱུར་ཞིང་། དེར་མ་ཟད་དྭངས་མ་དྲུག་པོའང་གཉིས་གཉིས་རོ་གཅིག་ཏུ་འཇུག་པས་ཤིན་ཏུ་ཕྲ་བའི་སྒོ་གསུམ་མམ། རྡོ་རྗེ་མི་ཤིགས་པ་གསུམ་དུའང་འགྱུར་ཏེ། ས་ཆུ་གཉིས་སྐུ་རྡོ་རྗེ། མེ་རླུང་གཉིས་གསུང་རྡོ་རྗེ། མཁའ་སེམས་གཉིས་ཐུགས་རྡོ་རྗེ་སྟེ། དཔེ་ཆུང་ལས། མི་ཤིགས་ཡེ་ཤེས་ཐིག་ལེ་ནི། །སྐུ་གསུང་ཐུགས་ཀྱི་རྡོ་རྗེའི་བདག །གཅིག་དང་དུ་མ་རྣམ་སྤངས་པ། །སྣ་ཚོགས་སྣང་ལ་མཚོན་དུ་མེད། །ཅེས་སོ། །དེ་ལྟར་དྭངས་མ་ལྔ་འདུས་ཀྱི་དབུས་ན་ཡེ་ཤེས་སྙིང་པོའི་དཀྱིལ་འཁོར་དྭངས་ཤིང་འོད་འབར་བར་བཞུགས་ལ། དེ་ཉིད་ནི་ཡེ་ནས་བཞུགས་པ་ལྟར་ལམ་པས་ཐིག་ལེའི་དཀྱིལ་འཁོར་ཡུངས་འབྲུ་ཙམ་འོད་ལྔའི་གོང་བུ་ཅན་གསལ་བ་ཡུལ་གྱིས་མི་འཕྲོག་པར་བསྒོམ་པར་བྱས་པས། དྭངས་མ་ལྔ་ཡེ་ཤེས་སྙིང་པོ་དང་དྲུག་ཡེ་ཤེས་དྲུག་གི་དཀྱིལ་འཁོར་དུ་རང་སྣང་བ་ནི་ཕྱིན་ཅི་མ་ལོག་པའི་ཡོངས་གྲུབ་བོ། །དེ་ལ་སྤྱི་བོ་ཚངས་པའི་བུ་ག་ནས་མར་སེམས་གཏད་དེ་བསྒོམས་པས་ཡེ་ཤེས་སྙིང་པོའི་དཀྱིལ་འཁོར་ཏེ་ཐིག་ལེ་འོད་འབར་བ་ལས་བྱུང་བའི་འོད་ཀྱིས་སྐུ་གསུང་ཐུགས་ཀྱི་ཡི་གེ་བསྐུལ་བ་འོད་དུ་འབར་བས་སྦྱང་བྱའི་ཡི་གེ་དྲུག་གཉིད་དང་བཅས་པ་སྦྱངས་ཏེ། ལས་དང་བག་ཆགས་ཐམས་ཅད་མི་དམིགས་པས་འཁོར་བ་ཆོས་ཉིད་དུ་གྲོལ་ཞིང་། དྭངས་མ་ལྔའང་ཡེ་ཤེས་སྙིང་པོ་ལ་བསྡུས་པས་བདེ་བའི་ཡེ་ཤེས་འབྱུང་སྟེ། དེའང་རྩས་བདེ་བའི་རྟེན་བྱེད། ཆུས་བདེ་བ་སྡུད་ཅིང་རྒྱུད་རླན་པར་བྱེད། དྲོད་ཀྱིས་བདེ་བ་སྨིན་པར་བྱེད། དབུགས་ཀྱིས་གཡོ་བར་བྱེད། ནམ་མཁས་ཁམས་གསུམ་བདེ་བ་ཆེན་པོར་ཡོངས་སུ་གྲོལ་བར་བྱེད་པས་བདེ་བའི་ཡེ་ཤེས་ཀྱི་ངོ་བོ་ནི་དམིགས་མེད་མཐའ་བྲལ་ཐུགས་ཀྱི་དཀྱིལ་འཁོར་ཏེ། གསང་ཐིག་འགྲེལ་པ་ལས། དེ་ལྟར་ནམ་མཁའི་གཟུགས་སུ་སྐྱེས་པ་དེ་ཉིད་ཐིག་ལེ་བྱང་ཆུབ་ཀྱི་སེམས་ཡིན་ཏེ་ཆོས་ཀྱི་སྐུའོ། །ཞེས་པས་རླུང་སེམས་ཀྱི་དྭངས་མ་ཐམས་ཅད་ཐུགས་ཀྱི་དཀྱིལ་འཁོར་དེར་རྫོགས་པའི་ཚེ་སྣང་ཆ་འོད་ལྔ་དང་སྟོང་ཆ་ཆོས་ཀྱི་སྐུར་རོ་གཅིག་ཏུ་འདྲེས་པས་ཚོགས་གཉིས་རྫོགས་ཏེ། སྐུ་གཉིས་མངོན་དུ་གྱུར་ནས་འཚང་རྒྱ་བའི་ཕྱིར། འདི་ནི་དཀྱིལ་འཁོར་ཐམས་ཅད་ཀྱི་ནང་ནས་མཆོག་ཏུ་གྱུར་པའོ། །རྣལ་འབྱོར་པ་འཆི་བའི་དུས་སུའང་དྭངས་མ་དང་རླུང་ཐམས་ཅད་དབུ་མར་འདུ། དབུ་མའི་རླུང་དང་དྭངས་མའི་ཤིན་ཏུ་དྭངས་མ་རིམ་བཞིན་འདུས་པ་ལས་འཆི་སྲིད་སྟོང་པའི་འོད་གསལ་སྣང་བ་བཞི་དང་། དེ་ནུབ་ནས་སྣང་བའི་འོད་གསལ་རིགས་ལྔ་ཚོམ་བུའི་སྣང་བ་ནམ་མཁའ་ཁྱབ་པར་འཆར་བའང་འདིའི་གནད་ཀྱིས་བྱུང་བར་བཞེད་དོ། ། གཉིས་པ་ནི། གསང་བའི་ཐིག་ལེ་སོགས་ཚིགས་བཅད་གཉིས་ཏེ། ལྟེ་བའི་རྩ་འདབ་དྲུག་ཅུ་རྩ་བཞིའི་དབུས་ན་དབྱིངས་ཕྱུག་ལྔའི་ཐིག་ལེ་ཞེས་བྱ་བ་ཨ་ཐུང་གི་རྣམ་པར་གནས་པ་ནི་ཆོས་ཀྱི་དབྱིངས་ཟབ་མོ་གསང་བ་ཤེས་རབ་ཀུན་ཏུ་བཟང་མོའི་རང་བཞིན་ཉི་མའི་ཐིག་ལེ་སྟེ། དཀྱིལ་འཁོར་ཐམས་ཅད་ཀྱི་འབྱུང་གནས་སུ་གྱུར་པས་དབྱིངས་སོ། །དེའི་རང་བཞིན་ནི་ཤེས་རབ་དང་ཐབས་ཏེ། གང་ཞེ་ན། ཐིག་ལེ་དེ་ལས་བྱུང་བ་འབྱུང་བ་ལྔའི་དྭངས་མ་ཆ་ཕྲ་བ་རང་བཞིན་མེད་པའི་དབྱིངས་ནི་ཤེས་རབ་སྟེ་རིགས་ཀྱི་ཡུམ་ལྔ་དང་། ཆེན་པོ་རགས་པ་མཚན་ཉིད་འཛིན་པ་ནི་ཐབས་རིགས་ཀྱི་དེ་བཞིན་གཤེགས་པ་སྟེ་ཡབ་ལྔའོ། །དེ་ལྟར་ཐིག་ལེ་བྱང་ཆུབ་ཀྱི་སེམས་ཐབས་ཤེས་དབྱེར་མི་ཕྱེད་པ་ནི་རྡོ་རྗེ་སྟེ། དེ་ལས་བྱུང་བའི་རྟོག་ཚོགས་དབང་པོ་དང་ཡུལ་དང་དུས་དང་། ཡུལ་སོ་སོ་རིག་པར་བྱེད་པའི་རྣམ་ཤེས་རྣམས་སེམས་དཔའ་དང་འཇོམས་བྱེད་ཡབ་ཡུམ་སོགས་ཐམས་ཅད་བདེ་བ་ཆེན་པོའི་ཡེ་ཤེས་ཀྱི་སྤྱོད་ཡུལ་དུ་རྣམ་པར་དག་པས་ཀུན་ཏུ་བཟང་པོའི་དཀྱིལ་འཁོར་ཡིན་ལ། དེ་དག་ཐམས་ཅད་ཀྱང་དབྱིངས་རང་བྱུང་གི་ཡེ་ཤེས་སུ་རྫོགས་པས་བདག་ཉིད་ཆེན་པོ་སྟེ། དེ་དང་ཁ་སྦྱོར་སྙིང་གའི་འཁོར་ལོ་ལ་རྒྱལ་བ་ཀུན་གྱི་ལྷག་པའི་དགོངས་པ་ཟབ་མོ་ཐུགས་སྟོང་པ་ཉིད་ཀྱི་ཡེ་ཤེས་ཀྱི་སྣང་ཆ་མེ་ལོང་ལྟ་བུ་ལ་སོགས་པ་ལྔ་ཡེ་ནས་ལྷུན་གྲུབ་ཏུ་གནས་པ་སྟེ། དེས་བལྟ་བ་ནི་སྙིང་ག་ནས་མར་ལྟེ་བའི་ཐིག་ལེ་ལ་སེམས་གཏད་དེ་བསྒོམས་པས་སྙིང་གའི་ཐིག་ལེའི་འོད་དང་དྭངས་མའི་དྲོད་མར་སོང་བ་དབྱིངས་ཕྱུག་ལྔའི་ཐིག་ལེ་ལ་ཕོག་སྟེ་འོད་དུ་འབར་བས་རྟོག་ཚོགས་སྐུ་དང་ཡེ་ཤེས་སུ་གསལ་བར་གྱུར། དེའི་དྲོད་སླར་ཡང་ཡར་སོང་སྟེ་སྙིང་གའི་དྭངས་མ་ལ་ཐིམ་པས་དྭངས་མའི་བདེ་དྲོད་ཆེས་ཆེར་འབར་བ་ན་རགས་པའི་རླུང་གི་རྒྱུ་བ་འགགས་པས་ཐིག་ལེ་འགྲོ་འོང་མེད་པར་སྙིང་གའི་གནས་ལས་མི་གཡོ་བར་གནས་པས་བདེ་བ་ཆེན་པོ་རང་རིག་པའི་ཡེ་ཤེས་རང་ཤར་བ་ལ་བལྟ་བྱ་ལྟ་བྱེད་མེད་པའི་ཚུལ་གྱིས་བལྟ་ཞིང་ཉམས་སུ་ལེན་པ་ནི་ལྟེ་བའི་འཁོར་ལོ་སྒོམ་པའི་མན་ངག་གོ །གསུམ་པ་ནི། སྙིང་པོའི་ཐིག་ལེ་སོགས་རྐང་པ་གསུམ་སྟེ། མགྲིན་པའི་རྩ་འདབ་བཅུ་དྲུག་གི་དབུས་ན་མཁའ་འགྲོ་མ་རྔམས་མ་ཞེས་བྱ་བ་ཡི་གེ་ཨཾ་གི་རྣམ་པར་གནས་པ་ལ་བཟའ་བཏུང་གི་བཅུད་འདུས་པས་ན་སྙིང་པོའི་ཐིག་ལེ་སྟེ། དེ་སྙིང་གའི་དྭངས་མ་ཆེན་པོའི་འོད་དང་དྲོད་ཡར་སོང་སྟེ་ཞུ་བའི་དྭངས་མ་སྙིང་གར་མཆེད། དབུགས་ཐིག་ལེར་ཐིམ་པར་རླུང་དང་རྟོག་པ་འགགས་ཏེ་འཁོར་ལོ་གཉིས་བདེ་བ་དུས་གཅིག་ཏུ་མཉམ་པར་སྦྱོར་ཞིང་། དེ་ལྟར་སྦྱར་བས་བདེ་བ་ཆེན་པོ་ལ་གནས་པའི་རང་གདངས་ཡེ་ཤེས་ལྔར་མ་འགགས་པའི་རོལ་མོ་ཡིས་དྲོད་རླུང་རྩ་གསུམ་གཅིག་ཏུ་འདྲེས་ཏེ་བདེ་གསལ་རྣམ་པར་མི་རྟོག་པའི་ཡེ་ཤེས་མི་གཡོ་བར་རང་གསལ་བའི་དགྱེས་པ་ཆེན་པོ་ལ་ཡུལ་ཡུལ་ཅན་གཉིས་མེད་ཀྱི་ངང་དུ་མཆོད་པར་འབུལ་ཞེས་བྱ་སྟེ། མགྲིན་པའི་འཁོར་ལོ་སྒོམ་པའི་མན་ངག་གོ །བཞི་པ་ནི། ཟག་པ་སོགས་རྐང་པ་དགུ་སྟེ། སྤྱི་བོ་བདེ་ཆེན་གྱི་འཁོར་ལོ་རྩ་འདབ་སུམ་ཅུ་རྩ་གཉིས་ཀྱི་དབུས་ན་ཀུན་ཏུ་བཟང་པོ་ཟླ་བའི་ཐིག་ལེ་ཧཾ་གི་རྣམ་པར་གནས་ཏེ། དེའང་སྔར་མགྲིན་པའི་ཐིག་ལེའི་བདེ་བ་ནི་ཡུལ་ཡུལ་ཅན་གྱི་རྟོག་པ་ཟད་པས་ཟག་པ་མེད་པའི་བདེ་བ་ཡིན་ལ། དེ་ཉིད་མ་འགགས་པའི་བསོད་ནམས་ཀྱི་མཐུས་ཐིག་ལེ་ཉིད་རང་བཞིན་མེད་དེ། བདེ་བ་ཆེན་པོའི་ཡེ་ཤེས་སྒྱུ་མ་ལྟ་བུར་རང་སྣང་བ། དེ་ལས་བདེ་བའི་རོལ་མོ་འོད་ཀྱི་དཀྱིལ་འཁོར་མཐའ་ཡས་པར་སྤྲོ་བའི་མཆོག་ཅེས་བྱ་སྟེ། མགྲིན་པའི་ཐིག་ལེའི་འོད་ཀྱིས་ཤིན་ཏུ་རྟོགས་དཀའ་བས་གསང་བ་སྟེ་བདེ་ཆེན་འཁོར་ལོའི་ཐིག་ལེ་ལ་འཕོག་པས་འོད་དུ་ཞུ་ནས་སྤྱི་བླུགས་སུ་གྱུར་པས་བདེ་བ་ཆེན་པོའི་རང་བཞིན་དུ་གྱུར་ཏེ། དེ་ཉིད་ཆོས་ཀྱི་དབྱིངས་དང་རོ་གཅིག་པས་ཁམས་གསུམ་ཐམས་ཅད་སོ་སོ་མ་ཡིན་པ་བདེ་གསལ་རྣམ་པར་མི་རྟོག་པའི་ཡེ་ཤེས་ནམ་མཁའི་གཟུགས་སུ་སྐྱེས་ནས་ཀུན་གྱི་དངོས་པོར་བདག་གྱུར་པ་ཞེས་བྱ་བ་ཆོས་ཀྱི་སྐུར་གྱུར་པ་དེ་ནི་དུས་གསུམ་སངས་རྒྱས་ཀུན་གྱི་དགོངས་པའི་དངོས་ཏེ། དེ་ལྟར་རྣལ་འབྱོར་པ་བདེ་བ་ཆེན་པོ་ཆོས་ཀྱི་སྐུར་གྱུར་པ་ན་ཕྱོགས་བཅུ་དུས་བཞིར་གཤེགས་ཤིང་བཞུགས་པའི་རྫོགས་པའི་སངས་རྒྱས་མ་ལུས་པ་ཐམས་ཅད་བདག་ཉིད་ལས་གཞན་དུ་མ་གྱུར་པས་སྐུའི་ཞལ་དུས་གཅིག་ལ་མཐོང་བ་སྟེ། དེ་གསུང་ལ་དབང་སྒྱུར་བ་དང་། ཡོན་ཏན་ཕྲིན་ལས་མཆོག་ཉིད་མཐར་ཕྱིན་ཞིང་། ཐུགས་དོན་དམ་པའི་ཡེ་ཤེས་སུ་རོ་གཅིག་ཏུ་གྱུར་པ་ཡིན་ཏེ་སྤྱི་བོའི་འཁོར་ལོ་སྒོམ་པའི་མན་ངག་གོ །དེ་ལྟར་འཁོར་ལོ་བཞིའི་རིམ་པ་མདོར་བསྡུ་ན། སྙིང་གའི་འཁོར་ལོ་སྒོམ་པ་ལས་བྱུང་བའི་ཡེ་ཤེས་སྤྲོས་པ་ཐམས་ཅད་དང་བྲལ་བ་ནི་ཆོས་ཀྱི་སྐུ་དང་། ལྟེ་བའི་འཁོར་ལོ་སྒོམ་པའི་ཡེ་ཤེས་རྟོག་ཚོགས་ཞེ་གཉིས་ལྷར་དག་པ་ནི་སྤྲུལ་པའི་སྐུ་དང་། མགྲིན་པའི་བདེ་གསལ་མི་རྟོག་པའི་ཡེ་ཤེས་ནི་ལོངས་སྐུ་དང་། སྤྱི་བོའི་བདེ་གསལ་མི་རྟོག་པའི་ཡེ་ཤེས་ནི་བདེ་བ་ཆེན་པོའི་སྐུ་སྟེ། དེའང་དྭངས་མའི་དྭངས་མ་རྣམས་འཁོར་ལོ་བཞིའི་ལྟེ་བའི་དྭངས་མ་གཡོ་བྱེད་དང་བྲལ་བའི་འོད་གསལ་ལ་ཚུར་ཐིམ་པས་བདེ་གསལ་རྣམ་པར་མི་རྟོག་པའི་ཡེ་ཤེས་ཆེན་པོ་གཅིག་དང་དུ་མ་མེད་པའི་ཆོས་ཉིད་མཆོག་ཏུ་མི་འགྱུར་བའི་འོད་གསལ་འཆར་བ་ཡིན་ནོ། ། གཉིས་པ་འོག་སྒོ་ཁམས་གསུམ་རོལ་པའི་མན་ངག་ལྟར་བཤད་པ་ལ་གསུམ་སྟེ། ཐབས་ཉིད་ཤེས་རབ་ཏུ་དང་། ཤེས་རབ་ཉིད་ཐབས་སུ་དང་། ཐབས་ཤེས་དབྱེར་མེད་དུ་སྦྱོར་བའོ། །དང་པོ་ནི། དཀྱིལ་འཁོར་ལྡན་པའི་སོགས་ཚིགས་བཅད་གཅིག་སྟེ། གསང་བ་བྱང་ཆུབ་ཀྱི་སེམས་དཀྱིལ་འཁོར་བདེ་བའི་ཡེ་ཤེས་ཀྱི་རོ་དང་བཅས་པ་ཡབ་ཡུམ་གཉིས་ལ་རང་ཆས་སུ་ལྡན་པ་དེ་ཉིད་རྟོགས་པར་བྱེད་པའི་དཀྱིལ་འཁོར་གསང་བའི་ལུང་རིགས་མན་ངག་གསུམ་གྱིས་གཏན་ལ་ཕབ་ནས། ཡབ་ཡུམ་ལྷའི་དཀྱིལ་འཁོར་དུ་བསྐྱེད་པ་ལ་སྐྱེ་མཆེད་རློབ་པ་ནི་ཡན་ལག་གི་ལྷ་ཡབ་ལ་ཡབ་དང་ཡུམ་ལ་ཡུམ་གྱི་དཀྱིལ་འཁོར་བསྒོམ་ཞིང་། མཁའ་གསང་རྡོ་རྗེ་དང་པདྨར་བརླབས་ཏེ་སྙོམས་འཇུག་གི་བརྡ་བཞིས་བསྐུལ་ནས་ཡབ་ཐབས་ཀྱི་དཀྱིལ་འཁོར་དང་ཡུམ་ཤེས་རབ་ཀྱི་དཀྱིལ་འཁོར་གཉིས་ཕྱག་རྒྱ་བཞིས་གཉིས་མེད་དུ་རོལ་པའི་རྗེས་ཆགས་ཀྱི་རྐྱེན་གྱིས་རླུང་བསྐྱོད་པས་དམར་ཆ་འབར་བ་དེས་དཀར་ཆ་ཞུ་བ་ཡས་འབབ་ཀྱི་དགའ་བཞིའི་འགྲོས་ཀྱིས་ཕྱིན་པའི་རིམ་གྱི་ཟླ་བ་རྡོ་རྗེའི་བུམ་པར་འཛག་མེད་དུ་བཟུང་སྟེ་གང་བ་ལས་བདེ་བའི་ཡེ་ཤེས་བྱུང་བའོ། །དེ་ཉིད་གཉིས་མེད་ཀྱི་ཡེ་ཤེས་སུ་གསལ་ལ་མི་རྟོག་པས་ཐུགས་ཀྱི་དཀྱིལ་འཁོར་ཏེ། དེ་ལྟར་མྱོང་བའི་ཚེ་ཁམས་ལྔའི་བཅུད་ཀུན་རྫོབ་ཡེ་ཤེས་ཀྱི་དཀྱིལ་འཁོར་དུ་རང་སྣང་བས་ན་མཆོག་གོ །གཉིས་པ་ནི། གསང་བའི་ཐིག་ལེ་སོགས་ཚིགས་བཅད་གཉིས་ཏེ། དེའི་ཚེ་ཡུམ་གྱི་གསང་བ་པདྨའི་ཟེའུ་འབྲུར་ཐིག་ལེ་ཉི་མ་བྱང་ཆུབ་སེམས་ཀྱི་དཀྱིལ་འཁོར་སྣང་བ་སྟེ་གནས་པའི་ཚེ། དེ་ཉིད་ཐབས་ཀྱིས་ཟིན་ན་རྟོག་ཚོགས་སྐུ་དང་ཡེ་ཤེས་སུ་འབྱུང་བའི་རྒྱུ་ཡིན་པའི་ཕྱིར་དབྱིངས་སོ། །ཇི་ལྟར་ན། ཡུམ་གྱི་འབྱུང་བའི་དྭངས་མ་ཆ་ཕྲ་བ་ནི་ཤེས་རབ་རིགས་ཀྱི་ཡུམ་ལྔ་དང་། ཆེན་པོ་སྟེ་རགས་པ་རིགས་ཀྱི་ཡབ་དེ་བཞིན་གཤེགས་པ་ལྔར་གསལ་བ་སྟེ་ལྷུན་གྱིས་གྲུབ་ཅིང་། བྱང་ཆུབ་སེམས་ཀྱི་བདེ་བས་རྟོག་ཚོགས་ཐམས་ཅད་ནི་སྐུ་དང་ཡེ་ཤེས་ཀྱི་རྡོ་རྗེ་དབྱེར་མི་ཕྱེད་པའི་ཚོགས་སོ། །དེའང་དབང་པོ་ཡུལ་དུས་རིག་པ་རྣམས་ལྷར་ཡོངས་སུ་དག་པས་སྤྱོད་ཡུལ་ཀུན་ཏུ་བཟང་པོའི་དཀྱིལ་འཁོར་ལ་སེམས་ལྔ་མཐར་ཕྱིན་པའི་ལྷན་སྐྱེས་བདེ་བའི་ཡེ་ཤེས་ཟག་པ་མེད་པའི་བདག་ཉིད་ཆེན་པོ་སྐྱེས་པ་དེ་ཉམས་སུ་མྱོང་བས་ལྷག་པའི་ཐུགས་ཀྱི་དགོངས་པའི་ངོ་བོ་བདེ་བ་ཆེན་པོའི་རོ་ཡེ་ཤེས་ལྔར་འཆར་བ་ལས་བལྟ་བྱ་ལྟ་བྱེད་མེད་པའི་ཚུལ་གྱིས་བལྟ་ཞིང་རང་གསལ་བའོ། ། གསུམ་པ་ནི། སྙིང་པོའི་ཐིག་ལེ་སོགས་ཚིགས་བཅད་གསུམ་སྟེ། ཡབ་ཡུམ་གྱི་རྩ་ཐམས་ཅད་ཀྱི་བཅུད་འདུས་པའི་སྙིང་པོ་ཉི་ཟླའི་དྭངས་མ་ཐིག་ལེ་དུས་གཅིག་ཏུ་མཉམ་པར་སྦྱོར་བས་དངོས་པོ་ལྷན་ཅིག་སྐྱེས་པ་བདེ་བའི་ཡེ་ཤེས་ཉམས་སུ་མྱོང་ནས། སླར་ཡང་དགའ་བཞི་ལུགས་ལྡོག་གི་འགྲོས་ཀྱིས་མྱོང་བའི་བདེ་བ་མཆོག་ཏུ་གསང་བའི་རོལ་མོ་ཡིས་རྟོག་ཚོགས་རང་བཞིན་ལྷན་ཅིག་སྐྱེས་པའི་ཡེ་ཤེས་སུ་རྣམ་པར་གྲོལ་བས་རབ་ཏུ་དགྱེས་པར་གྱུར་པའི་དཀྱིལ་འཁོར་ལ་བདེ་སྟོང་གཉིས་སུ་མེད་པའི་མཆོད་པར་དབུལ་ཞེས་བྱའོ། །དེ་ལྟར་ཚོགས་དྲུག་གི་རྟེན་གྱི་དྭངས་མ་ཐམས་ཅད་དབབ་བཟུང་ལྡོག་པའི་ཐབས་ཀྱིས་ཚོགས་བརྒྱད་རྟོག་པའི་དངོས་པོ་ཐམས་ཅད་ལྷན་སྐྱེས་ཀྱི་ཡེ་ཤེས་སུ་རང་གསལ་བས་ཟག་པ་མེད་པའི་ཡེ་ཤེས་ཀྱི་རོ་མ་འགགས་པར་མྱོང་བ་བསོད་ནམས་ཀྱི་ཚོགས་ཀྱི་བདེ་བའི་ཡེ་ཤེས་སྒྱུ་མ་ལྟ་བུར་སྣང་ལ་འཛིན་མེད་དུ་སྤྱོད་པས་ཚོགས་གཉིས་རྫོགས་པ་དང་། འདོད་ཆགས་བདེ་སྟོང་གི་ཡེ་ཤེས་སུ་རང་སྣང་བའི་རོལ་མོས་རྟོག་ཚོགས་སྐུ་དང་ཡེ་ཤེས་ཀྱི་དཀྱིལ་འཁོར་བསམ་མི་ཁྱབ་པས་མཐའ་ཡས་པའི་མཆོག་ཏུ་རང་གསལ་ཞིང་། ཉི་ཟླ་གཉིས་མེད་ཀྱི་ཡེ་ཤེས་ཉམས་སུ་མྱོང་དཀའ་བས་གསང་བའི་ཐིག་ལེ་སྟེ། དེ་ཉིད་འབྲས་ཆོས་ཐམས་ཅད་ཀྱི་འབྱུང་གནས་སུ་གྱུར་པས་དབྱིངས་སོ། །དེ་ལྟར་བསྒོམས་པའི་ཡོན་ཏན་ཡང་། བདེ་བ་ཆེན་པོའི་ཡེ་ཤེས་དེ་ནི་སངས་རྒྱས་ཀུན་གྱི་དགོངས་པའི་དངོས་གཞི་སྟེ། དེ་ཐོབ་པའི་ཚེ་ཕྱོགས་བཅུ་དུས་བཞི་རྫོགས་པའི་སངས་རྒྱས་ཐམས་ཅད་ཀྱི་སྐུ་གསུང་ཡོན་ཏན་ཕྲིན་ལས་ཐུགས་ཏེ་འབྲས་ཆོས་ཉི་ཤུ་རྩ་ལྔ་མ་ལུས་པ་མངོན་དུ་བྱས་ཤིང་བདག་ཉིད་ཀྱི་ཞལ་མཐོང་བ་མེད་པའི་ཚུལ་གྱིས་མཐོང་བ་དང་། འཛག་མེད་ཀྱི་བདེ་བས་དབང་པོའི་སྡུག་བསྔལ་བཅོམ་སྟེ་འདོད་ཆགས་བདེ་ཆེན་ལྷན་ཅིག་སྐྱེས་པའི་ཡེ་ཤེས་སུ་དབང་བསྒྱུར་བས་ན་ལམ་གྱི་ནང་ནས་མཆོག་ཉིད་དང་། ཐབས་ཀྱི་ནང་ནས་དམ་པ་སྟེ། བདེ་མྱུར་གྱི་ལམ་རྨད་དུ་བྱུང་བ་ཡིན་པའི་ཕྱིར་རོ། །དེ་ལྟར་འོག་སྒོ་ཐིག་ལེའི་རྣལ་འབྱོར་ཉམས་སུ་བླངས་པའི་ཚེ་གནས་སྐབས་ལ་ལྟོས་པའི་དགའ་བ་བཞི་ནི། སྙོམས་པར་ཞུགས་པས་དང་པོར་ཐིག་ལེ་གནས་ནས་གཡོས་པ་ནི་དགའ་བ། བདེ་བ་ཉམས་སུ་མྱོང་བ་ནི་མཆོག་དགའ། བདེ་བའི་ངོ་བོར་སེམས་འགགས་པས་སྟོང་པར་གྲོལ་བ་ནི་དགའ་བྲལ། རང་བཞིན་གསང་བའི་སྙིང་པོ་བདེ་སྟོང་དབྱེར་མེད་ཉམས་སུ་མྱོང་བ་ནི་ལྷན་སྐྱེས་ཀྱི་དགའ་བ་སྟེ། ལུགས་འབྱུང་ལུགས་ལྡོག་གི་འགྲོས་ཀྱིས་དགའ་བ་བཞི་བཞི་ལུས་ཀྱི་གནས་བཞི་དང་ཡང་སྦྱར་ལ་བཤད་དོ། །དེ་རེ་རེ་ལའང་དགའ་བའི་དགའ་བ་སོགས་བཅུ་དྲུག་སྟེ། རྡོ་རྗེ་ལས་རིམ་ལས། གནས་ནི་ཡེ་ཤེས་བཅུ་དྲུག་པོ། །ཚོགས་སྦྱོར་ལ་སོགས་དང་པོ་ནས། །མཐར་ཕྱིན་སངས་རྒྱས་ས་ཉིད་དེ། །གནས་བཞི་དེ་བཞིན་དབྱེ་བ་ལས། །གཉིས་པའི་གཉིས་པ་རབ་དགའ་སོགས། །ཕ་རོལ་ཕྱིན་དང་ས་མཚན་ཉིད། །མཚུངས་ཕྱིར་རྫོགས་པར་བཤད་པ་ཡིན། །ཞེས་པས་དགའ་བའི་དགའ་བ་བཞི་ཚོགས་ལམ་སོགས་སྔར་དབང་གི་དུས་སྦྱར་བ་ལྟར་ལས་ཡས་འབབ་རྒྱུའི་ས་ལམ་དང་། མས་བརྟན་ལ་འབྲས་བུའི་ས་ལམ་ཁྱད་པར་གྱི་ས་གསུམ་དང་བཅས་པ་རྫོགས་ཚུལ་སྦྱར་ཞིང་། དེའི་ཚེ་ཕ་རོལ་ཏུ་ཕྱིན་པ་བཅུ་ཡང་རྫོགས་ཏེ། བྱང་སེམས་རྩ་གནས་ཐམས་ཅད་དུ་ཁྱབ་པར་གཏོང་བ་སྦྱིན་པ། འཛག་མེད་དུ་སྡོམ་པ་ཚུལ་ཁྲིམས། ཐབས་ལ་མི་སྐྲག་པ་བཟོད་པ། དེ་ལ་འབད་པ་བརྩོན་འགྲུས། དེའི་ངང་ལས་མི་གཡོ་བ་བསམ་གཏན། རྟོག་ཚོགས་བདེ་ཆེན་དུ་ཤར་བ་ཤེས་རབ། སྤྱད་ཀྱང་ཉོན་མོངས་པས་མི་གོས་པ་ཐབས། རྣམ་རྟོག་དུས་གཅིག་ལ་འཇོམས་པས་སྟོབས། འབྲས་བུ་ལ་སྨོན་པས་སྨོན་ལམ། རང་བཞིན་ལྷན་ཅིག་སྐྱེས་པའི་ཡེ་ཤེས་མྱོང་བ་ཡེ་ཤེས་ཀྱི་ཕ་རོལ་ཏུ་ཕྱིན་པའོ། ། གསུམ་པ་མངོན་དུ་གྱུར་པའི་འབྲས་བུ་ནི། དཀྱིལ་འཁོར་ལ་གནས་སོགས་ཚིགས་བཅད་གཉིས་ཏེ། ཐབས་གྲོལ་ལམ་གྱི་དཀྱིལ་འཁོར་ལ་གོམས་པ་མཐར་ཕྱིན་པའི་མཐུས་གཞི་གནས་ལུགས་ཀྱི་དཀྱིལ་འཁོར་དེ་ཉིད་མངོན་དུ་རྟོགས་པས་ཚོགས་གཉིས་རྫོགས་པ་རང་བཞིན་འབྲས་བུ་མཐར་ཕྱིན་གྱི་དཀྱིལ་འཁོར་རང་རིག་ལ་ལྷུན་གྱིས་གྲུབ་པར་སྣང་བའི་ཚེ་ཡེ་ཤེས་ཀྱི་རང་བཞིན་རིག་པའི་རྒྱན་དུ་ཕྱོགས་བཅུ་དུས་བཞིའི་སངས་རྒྱས་ཀྱི་དཀྱིལ་འཁོར་མ་ལུས་པ་ཐམས་ཅད་མ་འདྲེས་ཡོངས་རྫོགས་སུ་ཐོགས་ཏེ། འབྲས་བུའི་ཡོན་ཏན་ཐམས་ཅད་ཀྱིས་མཛེས་པའོ། །དེ་ལྟར་སྤངས་རྟོགས་རྫོགས་པ་འབྲས་བུའི་དཀྱིལ་འཁོར་རང་སྣང་གི་སྐུ་གསུམ་དབྱེར་མི་ཕྱེད་པར་མཉམ་པར་སྦྱོར་བ་ལས་གདུལ་བྱ་འདུལ་བྱེད་ཐུགས་རྗེའི་དཀྱིལ་འཁོར་བཙལ་བ་མེད་པར་ཡོངས་ཏེ་སྭ་ཡཾ་བྷུའི་སྒྲ་ལས་རང་བྱུང་གིས་འབྱུང་སྟེ། ཕྱོགས་བཅུ་དུས་བཞིས་བསྡུས་པའི་གདུལ་བྱའི་ཞིང་ཁམས་ཀུན་ཏུ་གཞན་སྣང་གཟུགས་སྐུའི་དཀྱིལ་འཁོར་གང་ལ་གང་གིས་འདུལ་ཞིང་སྐྱོབ་པའི་མགོན་པོ་སྒྱུ་མ་ལྟ་བུའི་དཀྱིལ་འཁོར་དུ་སྣང་བས་མེད་སྣང་སྒྱུ་མ་ལྟ་བུའི་འཁོར་བ་ལས་སྒྱུ་མ་ལྟ་བུའི་སེམས་ཅན་རྣམས་རང་གནས་སུ་སྒྲོལ་བའི་ཕྲིན་ལས་ཀྱིས་དོན་མཛད་པ་ལྟར་སྣང་ཡང་། སྣང་དུས་ཉིད་ནས་བསྒྲལ་བྱ་སེམས་ཅན་དང་སྒྲོལ་བྱེད་སྤྲུལ་པ་གཉིས་ཀ་རང་མཚན་པ་མེད་པར་སྒྱུ་མའི་སྐྱེས་བུས་སྒྱུ་མའི་སྐྱེ་བོ་མང་པོ་སྒྱུ་མའི་སྡུག་བསྔལ་ལས་བཏོན་ནས་སྒྱུ་མའི་བདེ་བ་ལ་འགོད་པའི་ཚུལ་གྱིས་འདུལ་བྱེད་སྤྲུལ་པའི་དཀྱིལ་འཁོར་གྱིས་འདུལ་བའི་སྤྱོད་པ་སྟོན་པར་མཛད་དོ། ། གཉིས་པ་དོན་བསྡུ་བ་ནི། ཡེ་ཤེས་རྫོགས་པའི་སོགས་རྐང་པ་ལྔ་སྟེ། ཆོས་ཐམས་ཅད་ཡེ་ནས་རྣམ་པར་དག་པ་རང་བྱུང་གི་ཡེ་ཤེས་ཆེན་པོར་ལྷུན་གྱིས་རྫོགས་པ་རང་བཞིན་གཞིའི་དཀྱིལ་འཁོར་དུ་གནས་པ་ལ་ཇི་ལྟར་འཇུག་ཅེ་ན། དེ་ལྟར་གནས་པའི་དོན་དགེ་བའི་བཤེས་གཉེན་ལས་ཐོས་ཤིང་བསམ་པའི་ཤེས་རབ་ཀྱིས་རྟོགས་པར་བྱས་ནས་སྒོམ་པའི་ཤེས་རབ་ཀྱིས་རྟོགས་དོན་གོམས་པར་བྱས་ཏེ། གནས་ལུགས་ཀྱི་དོན་ལ་བློ་མཉམ་པར་སྦྱོར་བའི་ཐབས་ཀྱིས་ཡིན་ལུགས་ཇི་ལྟ་བ་ལྟར་མངོན་དུ་གྱུར་པ་ནི་འབྲས་བུ་རང་བྱུང་བ་སྐུ་དང་ཡེ་ཤེས་ཀྱི་དཀྱིལ་འཁོར་རང་སྣང་བས་གདུལ་བྱའི་དོན་ལ་ཐུགས་རྗེ་ཆེན་པོ་ཀུན་ནས་ངམ་པའི་ཕྲིན་ལས་ལྷུན་གྱིས་གྲུབ་པར་སྣང་ངོ་། །ཚུལ་འདི་ནི་དུས་གསུམ་གྱི་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་ཡིན་པས་བླ་ན་མེད་པའི་བྱང་ཆུབ་དོན་དུ་གཉེར་བ་རྣམས་ཀྱིས་འདའ་བར་མི་མཛད་པའི་དམ་ཚིག་མཆོག་ཏུ་བསྟན་ཏོ། ། གཉིས་པ་དེ་གཞན་ལས་འཕགས་པའི་ཆེ་བ་བཤད་པ་ལ་གཉིས་ཏེ། སྒྲུབ་པ་པོ་གང་ཟག་གི་ཆེ་བ་དང་། སྒྲུབ་ཐབས་ལམ་གྱི་ཆེ་བའོ། །དང་པོ་ནི། གང་ཞིག་སོགས་རྐང་པ་ལྔ་སྟེ། སྒྲུབ་པ་པོ་གང་ཞིག་རྒྱུད་འདི་ལ་མོས་པར་གྱུར་པ་ཙམ་ཡང་སངས་རྒྱས་ཀྱི་དཀྱིལ་འཁོར་ཕྱོགས་བཅུར་བཞུགས་པ་ཐམས་ཅད་ཀྱིས་ཕྱོགས་དང་དུས་ཀུན་ནས་གཟིགས་ཏེ། རྣམ་པ་ཐམས་ཅད་དུ་གསང་བའི་དཀྱིལ་འཁོར་མ་ལུས་རྒྱུད་ལ་བསྙེན་ཏེ་ཐོབ་པར་བྱེད་པའི་ཉེ་བའི་སྲས་སུ་དགོངས་པར་འགྱུར་ཏེ། དཔེར་ན་སངས་རྒྱས་ཀྱི་ཉེ་བའི་སྲས་ཉན་རང་སོགས་མ་ཡིན་པར་དགོངས་པ་མཐུན་པར་སྐྱེས་པ་ཐབས་ལ་མཁས་པའི་བྱང་ཆུབ་སེམས་དཔའ་རྣམས་ཡིན་པ་བཞིན་ནོ། ། གཉིས་པ་ལ་བཞི་སྟེ། ལམ་ཀུན་གྱི་འབྲས་བུ་ཡིན་པའི་དང་། རྒྱལ་བའི་གཤེགས་ཤུལ་ཡིན་པའི་དང་། རྣལ་འབྱོར་པ་རྣམས་ཀྱི་ལམ་ཡིན་པའི་དང་། རྒྱལ་བའི་དགོངས་པའི་ཞེ་ཕུགས་ཡིན་པའི་ཆེ་བའོ། །དང་པོ་ནི། བསྐལ་པ་སོགས་ཚིགས་བཅད་གཅིག་སྟེ། དུས་བསྐལ་པ་སངས་རྒྱས་ཀྱི་ཞིང་གི་རྡུལ་ཕྲན་གྱི་གྲངས་དང་མཉམ་པ་དེ་སྙེད་དུ་རྒྱུའི་ཐེག་པར་ཤིན་ཏུ་བློ་སྦྱངས་པ་ལ་རབ་ཏུ་གནས་ཤིང་བརྩོན་པ་དང་། གསང་སྔགས་ཕྱི་ནང་གི་དཀྱིལ་འཁོར་མ་ལུས་པ་བསྙེན་ཅིང་སྒྲུབ་པ་དེ་ཐམས་ཅད་ཀྱི་དོན་དུ་གཉེར་བྱའི་འབྲས་བུ་འཚང་རྒྱ་བ་ལ་ལམ་གསང་ཆེན་བླ་ན་མེད་པའི་ཐེག་པ་འདི་ཁོ་ན་ལ་རག་ལས་པ་ཡིན་ཏེ་གཞན་མེད་དོ། །གཉིས་པ་ནི། འཇིག་རྟེན་སོགས་ཚིགས་བཅད་གཅིག་སྟེ། འཇིག་རྟེན་དྲུག་གི་ཕྱོགས་བཅུའི་ཞིང་ན་སྔར་འདས་པ་དང་། ད་ལྟར་བྱུང་ནས་དོན་མཛད་པའི་རྒྱལ་བའི་དཀྱིལ་འཁོར་མ་ལུས་པ་ཐམས་ཅད་ཀྱང་ལམ་འདི་ལ་བསྙེན་པ་སྟེ་བརྟེན་ནས་འབྲས་བུ་སྐུ་ལྔ་ལྷུན་གྱིས་རྫོགས་ཏེ། རྒྱལ་བ་ཀུན་གྱི་བགྲོད་པ་གཅིག་པའི་ལམ་ཡིན་པའི་ཕྱིར་རོ། །གསུམ་པ་ནི། འབྱུང་དང་སོགས་རྐང་པ་གཉིས་ཏེ། དེ་ལྟར་འབྱུང་བཞིན་པ་དང་མ་འོངས་འབྱུང་འགྱུར་གྱི་རྣལ་འབྱོར་པ་ཐམས་ཅད་ཀུན་ཀྱང་ལམ་འདི་ཡིས་འབྲས་བུ་ལྷུན་གྱིས་གྲུབ་པར་འགྱུར་རོ། །བཞི་པ་ནི། འདི་ནི་སོགས་རྐང་པ་ལྔ་སྟེ། རྒྱུད་འདི་ནི་གསང་ཆེན་ངེས་པའི་དོན་རྨད་དུ་བྱུང་བ་སྟེ་འབྲས་བུའི་ངོ་བོ་ཡེ་ནས་སངས་རྒྱས་པའི་དོན་ལམ་དུ་བྱས་པས་བསྒྲུབ་བྱ་གཞན་ནས་སྒྲུབ་མི་དགོས་པར་འགྲུབ་པའི་ཉེ་ལམ་དུ་གྱུར་པ་ཡིན་པའི་ཕྱིར་དང་། དུས་གསུམ་གྱི་རྒྱལ་བའི་དཀྱིལ་འཁོར་མ་ལུས་པ་ཐམས་ཅད་ལ་དགོངས་པའི་ཞེ་ཕུགས་འདི་ལས་བཟང་བའི་ལམ་གསང་བའི་ངེས་དོན་གཞན་ཞིག་མེད་ངེས་ཡིན་པས་བཙལ་ཀྱང་གཞན་གྱིས་རྙེད་པ་ལྟ་ཞོག་རྒྱལ་བས་ཀྱང་མི་བརྙེས་སོ་སྟེ་མི་རྙེད་དོ། ། གསུམ་པ་ཡུལ་གང་ལ་གདམས་པའི་སྣོད་བཤད་པ་ལ་གཉིས་ཏེ། སྣོད་དང་ལྡན་ལ་སྦྱིན་པ་དང་། སྣོད་མིན་ལ་མི་སྦྱིན་པར་བསྟན་པའོ། །དང་པོ་ནི། ཀུན་གྱི་སོགས་རྐང་པ་ལྔ་སྟེ། སངས་རྒྱས་ཀུན་གྱི་བཀའ་རྟགས་ཀྱི་ཕྱག་རྒྱ་ཆེན་པོ་མཆོག་ཏུ་གྱུར་པའི་མན་ངག་འདི་ནི་ཐོས་བསམ་སྒོམ་གསུམ་ལ་བློ་རབ་ཏུ་སྦྱངས་པའི་ཤེས་རབ་རྣམ་པ་གསུམ་གྱི་མིག་དང་ལྡན་པ་རྣམས་ཀྱིས་མ་ནུབ་པར་བཟུང་ལ། སྐལ་ལྡན་གྱི་སློབ་མ་ཟབ་དོན་ལ་མི་སྐྲག་པས་སྣོད་དང་ལྡན་ཞིང་། ངང་ཚུལ་དགེ་ཞིང་བཟང་ལ་དད་པ་བརྟན་པས་ཆོས་ཕྱིར་ལུས་དང་ལོངས་སྤྱོད་ཐམས་ཅད་གཏོང་ནུས་པ་རྟག་ཏུ་ངུ་ལྟ་བུ་དེ་ལ་ཡོངས་སུ་རྫོགས་པར་སྦྱིན་ཅིག་པའོ། །གཉིས་པ་ནི། གཞན་དུ་སོགས་ཚིགས་བཅད་གཅིག་སྟེ། དེ་ལས་གཞན་དུ་སྣོད་མིན་ལ་ནམ་ཡང་སྦྱིན་པར་མི་བྱ་སྟེ། ཉེས་པ་ཆེན་པོ་བསྐྱེད་པའི་ཕྱིར་རོ། །ཇི་ལྟར་ཞེ་ན། རྨོངས་པ་ལ་འཕྱར་བས་གསང་མ་ཐུབ་པར་གལ་ཏེ་སྦྱིན་ན་བཀའི་ཆད་པས་འཆི་བའི་དུས་མིན་པར་གློ་བུར་དུ་ནི་སྲོག་ཟད་ནས་ཚེའི་དུས་བྱེད་ཅིང་། ཤི་མ་ཐག་ཚ་དམྱལ་གྱི་མེས་བསྲེག་པ་དང་། གྲང་དམྱལ་གྱི་ཆུས་སྦྲེབས་པར་བྱེད་པའི་སྡུག་བསྔལ་ལ་ཡུན་རིང་གནས་ཏེ་ཉམ་ཐག་པར་འགྱུར་རོ། ། གཉིས་པ་གསུང་ཚུལ་ནི། ཞེས་དེ་བཞིན་སོགས་ཏེ། དེ་སྐད་ཅེས་སྟོན་པ་དེ་བཞིན་གཤེགས་པ་ཉིད་ཀྱིས་འཁོར་གྱི་དེ་བཞིན་གཤེགས་པ་ཉིད་ལ་ཆེད་དུ་བརྗོད་པར་མཛད་དོ། ། གསུམ་པ་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉེར་གཉིས་ཡོད་པ་ལས། འདིས་ཐེག་པ་འོག་མ་རྣམས་ལ་ཤིན་ཏུ་གསང་བའི་དོན་ཚེ་འདི་ཉིད་ལ་གྲོལ་བའི་ཐབས་ཉེ་བར་བསྟན་པའི་མན་ངག་ཟབ་ཅིང་སྙིང་པོར་དྲིལ་བའི་ལེའུ་སྟེ་བཅུ་གསུམ་པའོ།། །། ལེའུ་བཅུ་བཞི་པའི་འགྲེལ་པ།ལེའུ་བཅུ་བཞི་པ་ལ་གསུམ་སྟེ། ལོ་རྒྱུས་དང་། གཞུང་དང་། མཚན་ནོ། །དང་པོ་ནི། དེ་ནས་སོགས་ཏེ། ལམ་ཐབས་གྲོལ་གྱི་མན་ངག་སྙིང་པོ་བསྟན་པ་དེ་ནས་རང་སྣང་གི་དཀྱིལ་འཁོར་ལ་བསྟོད་པའི་ཕྱིར་དེ་བཞིན་གཤེགས་པ་ཐམས་ཅད་ཀྱི་བདག་པོ་རིགས་དྲུག་པས་ཉིད་ཀྱི་ཆེ་བའི་ཡོན་ཏན་བཞི་བཅུ་རྩ་གཉིས་ཀྱི་དཀྱིལ་འཁོར་དུ་རང་སྣང་བ་ལ་དགྱེས་པ་ཆེན་པོའི་གླུ་དྲུག་པོ་འདི་བླངས་སོ། ། གཉིས་པ་གཞུང་ལ་གཉིས་ཏེ། འབྲས་ཆོས་ཉེར་ལྔ་སོ་སོར་བསྟོད་པ་དང་། སྤྱིར་བསྟོད་པའོ། །དང་པོ་ལ་ལྔ་ལས། དང་པོ་སྐུ་ལྔ་ལ་བསྟོད་པ་ནི། ༀ། ཕྱོགས་བཅུ་སོགས་ཏེ། ༀ་ནི་ཡེ་ཤེས་ལྔའི་ཡི་གེ་གླུའི་འགོ་འདྲེན་པར་བྱེད་པ་སྟེ། འདིར་སྐུ་ལྔ་མཚོན་པའོ། །ཕྱོགས་བཅུ་དུས་བཞིའི་རྒྱལ་བ་ཐམས་ཅད་རང་རིག་པའི་ཡེ་ཤེས་གཅིག་ལ་ལྷུན་གྱིས་རྫོགས་པས་སྐུ་གསུམ་སྣང་བའི་གོ་འབྱེད་པ་ནི། མངོན་པར་བྱང་ཆུབ་པའི་སྐུའོ། །རིག་པ་ཡེ་ཤེས་ཀྱི་དཀྱིལ་འཁོར་དབྱིངས་ཐིག་ལེ་ཆེན་པོའི་ཀློང་དུ་གྲོལ་བ་ནི་ཆོས་ཀྱི་སྐུའོ། །བསོད་ནམས་ཀྱི་ཚོགས་ལས་གྲུབ་པའི་སྐུ་མཚན་དཔེའི་དཀྱིལ་འཁོར་དག་པའི་གདུལ་བྱ་ལ་སྣང་བ་ནི་ལོངས་སྐུའོ། །གང་ལ་གང་འདུལ་གྱི་སྐུ་ཡི་བཀོད་པ་སྣ་ཚོགས་པར་སྟོན་པ་ནི་སྤྲུལ་པའི་སྐུའོ། །སྣང་སྟོང་དབྱེར་མི་ཕྱེད་པའི་ཐིག་ལེར་སྐུ་གསུམ་པོ་ཀུན་རོ་གཅིག་ཏུ་རྫོགས་པ་ནི་རྡོ་རྗེའི་སྐུའོ། །ཧོཿཞེས་པ་དེ་ལ་མཉེས་པའི་དོན་ནོ། ། གཉིས་པ་གསུང་ལྔ་ལ་བསྟོད་པ་ནི། ༀ། རྡོ་རྗེ་བསོད་ནམས་སོགས་ཏེ། ༀ་ནི་གསུང་ལྔ་མཚོན་པའོ། །འགྲོ་བ་སྒྲོལ་བ་ལ་ཐོགས་པ་མེད་པ་རྡོ་རྗེའི་ཚིག་གིས་གདུལ་བྱའི་བསོད་ནམས་དང་མཐུན་པར་སྟོན་པ་བརྗོད་པ་ཚིག་གི་གསུང་ངོ་། །བརྗོད་མེད་ཐིག་ལེ་ཆེན་པོའི་རང་བཞིན་བརྗོད་པ་ཐམས་ཅད་ཀྱི་གཞིར་གྱུར་པ་ནི་སྐྱེ་མེད་དོན་གྱི་གསུང་ངོ་། །སྒྲ་ཐམས་ཅད་རང་རིག་པའི་རྡོ་རྗེར་ལྷུན་གྱིས་གྲུབ་པས་རིག་པ་ཡེ་ཤེས་གསུང་གི་དཀྱིལ་འཁོར་ཅིར་ཡང་མ་འགགས་པར་ལྡན་པས་བརྡ་སྤྲོད་པ་ནི་རིག་པ་བྱིན་རླབས་ཀྱི་གསུང་ངོ་། །དོན་ཐ་དད་པ་ཚིག་གཅིག་ཏུ་མི་ཕྱེད་པར་འབབ་པས་རྡོ་རྗེའི་སྒྲ་ཆེན་པོ་སྟེ་རྗོད་བྱེད་ཀྱི་ཚིག་གཅིག་གིས་བརྗོད་བྱའི་དོན་མཐའ་ཡས་པ་གོ་བར་བྱེད་པ་ནི་ཚངས་པ་དབྱངས་ཀྱི་གསུང་ངོ་། །སྐུའི་བརྡའ་ཐོགས་པ་མེད་པར་གདུལ་བྱའི་བློ་ལ་དོན་འཇལ་བས་དབང་བསྒྱུར་བ་ནི་རྡོ་རྗེ་རྒྱལ་པོ་སྟེ་དགོངས་པ་བརྡའི་གསུང་ངོ་། །སྒྲ་ཐམས་ཅད་གྲགས་སྟོང་དབྱེར་མི་ཕྱེད་པ་ཐིག་ལེ་ཆེན་པོར་གྲོལ་བ་ནི་རྡོ་རྗེའི་གསུང་ངོ་། །ཧོཿཞེས་མཉེས་པའོ། ། གསུམ་པ་ཐུགས་ལྔ་ལ་བསྟོད་པ་ནི། ༀ། སྐུ་གསུང་སོགས་ཏེ། ༀ་ནི་ཐུགས་ལྔ་མཚོན་པའོ། །མེ་ལོང་ཡེ་ཤེས་ནི་ཡེ་ཤེས་གཞན་གསུམ་པོ་འཆར་གཞིའི་རྟེན་བྱེད་པས་སྐུ་དང་། སོར་རྟོག་ཡེ་ཤེས་ནི་ཤེས་བྱ་ཐམས་ཅད་མ་འདྲེས་པར་གཟིགས་ནས་ཆོས་སྟོན་པས་གསུང་དང་། ཆོས་དབྱིངས་ཡེ་ཤེས་ནི་སྙིང་པོར་གྱུར་པས་ཐུགས་ཀྱི་ཐུགས་ཏེ། དེ་གསུམ་རྫོགས་པའི་བདག་ཉིད་ཆེན་པོ་དེ་ལ་ཡོན་ཏན་མ་ལུས་པའི་འབྱུང་གནས་མཉམ་ཉིད་དང་། གདུལ་བྱ་འདུལ་བའི་ཕྲིན་ལས་བྱ་གྲུབ་ཡེ་ཤེས་ཀྱང་ཀུན་ཏུ་རྫོགས་པའོ། །དེ་ལྟར་ཡེ་ནས་ཡེ་ཤེས་ལྔར་ལྷུན་རྫོགས་ཀུན་ཏུ་བཟང་པོའི་རང་བཞིན་ཏེ། ཡེ་ཤེས་རེ་རེ་ལའང་ལྔ་ལྔ་འདུས་པའི་ཚོགས་རང་བྱུང་གི་ཡེ་ཤེས་ཆེན་པོ་གཅིག་གི་ངོ་བོར་འདུས་པའི་ཐིག་ལེ་ཆེ་ཧོཿཞེས་མཉེས་པའོ། ། བཞི་པ་ཡོན་ཏན་ལྔ་ལ་བསྟོད་པ་ནི། ༀ། མི་དམིགས་སོགས་ཏེ། ༀ་ནི་ཡོན་ཏན་ལྔ་མཚོན་པའོ། །མཐའ་དབུས་གང་དུའང་མི་དམིགས་ཤིང་ཅིར་ཡང་མ་འགགས་པའི་སྒྱུ་འཕྲུལ་རིས་མེད་ཀུན་ཁྱབ་མཉམ་པ་ཆེན་པོ་ཆོས་ཀྱི་དབྱིངས་རྣམ་པར་དག་པ་ནི་ཞིང་ཁམས་ཀྱི་ཡོན་ཏན་ནོ། །རྒྱ་ཚད་ཀྱིས་གཞལ་བའི་ཡུལ་རང་སྣང་གི་བཀོད་པ་དང་བཅས་པ་མཐའ་ཡས་པར་ཀུན་ནས་སྣང་བ་ནི་གཞལ་ཡས་ཁང་གི་ཡོན་ཏན་ནོ། །བ་སྤུའི་བུ་ག་རེ་རེ་ནས་ཀྱང་གསལ་ཞིང་དག་པའི་འོད་ཟེར་སྣ་ཚོགས་པ་སྤྲོ་བ་ནི་འོད་ཟེར་གྱི་ཡོན་ཏན་ནོ། །འདོད་ཡོན་གྱི་ལྷ་མོ་རེ་རེ་ཡང་མཐའ་ཡས་པ་ཕྱོགས་བཅུ་ཀུན་ནས་མ་བཙལ་བར་ལྷུན་གྱིས་གྲུབ་ཅིང་། དབང་པོ་སོ་སོ་ལ་ཐིམ་པས་དགྱེས་དགུར་སྤྱོད་པ་ནི་ལོངས་སྤྱོད་ཀྱི་ཡོན་ཏན་ནོ། །མི་འཇིགས་པ་བཞི་སོགས་ཡོན་ཏན་སྣ་ཚོགས་པ་ཐུགས་ལ་མངའ་བས་སེང་གེ་ལ་སོགས་པ་ལྔས་བཏེགས་པའི་ཁྲིའི་སྟེང་དུ། ཁུ་བ་དག་པ་སྐུ་ཟླ་བ། རྡུལ་དག་པ་གསུང་ཉི་མ། རླུང་དག་པས་སྐྱོན་གྱིས་གོས་པ་མེད་པ་ཐུགས་པདྨའི་གདན་དང་། རེ་བ་སྐོང་བས་རིན་ཆེན་སྣ་ཚོགས་པའི་ཁྲི་རྐང་སྟེ་ཁྱད་པར་དུ་འཕགས་པ་གདན་ཁྲིའི་ཡོན་ཏན་ནོ། །ཧོཿཞེས་མཉེས་པའོ། ། ལྔ་པ་ཕྲིན་ལས་ལྔ་བསྟོད་པ་ནི། ༀ། ཕྱོགས་བཅུའི་སོགས་ཏེ། ༀ་ནི་ཕྲིན་ལས་ལྔ་མཚོན་པའོ། །དོན་བྱ་བའི་ཡུལ་ཕྱོགས་བཅུའི་འཇིག་རྟེན་རྡུལ་ཕྲ་མོ་སྙེད་ཀྱི་ཞིང་ཁམས་དག་པ་དང་མ་དག་པ་ཀུན་ཏུ། བྱེད་པའི་ཐབས་རྒྱལ་བ་རྣམས་ཀྱིས་གདུལ་བྱའི་དོན་རྣམས་ཐོགས་པ་མེད་པར་མཛད་པའི་ཕྲིན་ལས་རྡུལ་ཕྲན་གྱི་གྲངས་དེ་སྙེད་དུ་སྟོན་པ་ཀུན་ཀྱང་། ཞི་བ་དང་། རྒྱས་པ་དང་། དབང་དང་། དྲག་པོ་བཞིར་འདུ་ལ། དོན་དེ་དག་བྱེད་པའི་མཁན་པོ་ནི་ཞི་བ་དང་ཁྲོ་བོ་སོགས་གང་ལ་གང་འདུལ་གྱི་སྤྲུལ་པ་ཡང་རྡུལ་ཕྲན་གྱི་གྲངས་དང་མཉམ་པ་བསམ་ཡས་ཀྱིས་དོན་མཛད་དོ། །ཇི་ལྟར་མཛད་ན། སྤྲུལ་པ་དེ་དག་གིས་ཞིང་དེ་དག་ཏུ་སྐད་ཅིག་ཡུད་ཙམ་ལ་འབད་རྩོལ་མེད་པར་ཕྲིན་ལས་བཞིས་དོན་མཛད་པ་ནི་ལྷུན་གྱིས་གྲུབ་པའི་ཕྲིན་ལས་སོ། །ཧོཿཞེས་མཉེས་པའོ། ། གཉིས་པ་སྤྱིར་བསྟོད་པ་ནི། ༀ། ཐམས་ཅད་སོགས་ཏེ། ༀ་ནི་འབྲས་ཆོས་ལྔ་མཚོན་པའོ། །ཕྱོགས་བཅུ་དུས་བཞི་དང་རང་སྣང་རྒྱལ་བའི་དཀྱིལ་འཁོར་ཐམས་ཅད་མ་ལུས་པའི་རང་བཞིན་ནི་སྐུ་གསུང་ཐུགས་ཡོན་ཏན་ཕྲིན་ལས་ལྔ་སྟེ། དེ་དག་གི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་སངས་རྒྱས་ཀུན་གྱི་སྤྱི་གཟུགས་རྒྱལ་བ་དྲུག་པའི་བདག་ཉིད་ཆེན་པོར་འདུ་ཞིང་། ཁྱབ་བྱེད་རིགས་དྲུག་པའི་སྐུ་གསུང་ཐུགས་ཡོན་ཏན་ཕྲིན་ལས་ལྔ་ཆར་གྱིས་ཀྱང་ཁྱབ་བྱ་རྒྱལ་བ་ཐམས་ཅད་ལ་ཀུན་ཏུ་ཁྱབ་བོ། །དེའི་ཕྱིར་མཚོ་གཅིག་ཏུ་གངས་ལྔའི་གཟུགས་བརྙན་འཆར་བ་དང་། གངས་གཅིག་མཚོ་ལྔར་འཆར་བའི་དཔེས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྣང་ཚུལ་ཀུན་གཅིག་གི་བདག་ཉིད་དུ་འདུས་པ་དང་། གཅིག་ཀུན་ཏུ་འཆར་བས་ན་གཅིག་དང་དུ་མའི་མཐའ་ལས་གྲོལ་བ་ཐིག་ལེ་ཆེན་པོའི་རང་བཞིན་ནོ། །ཧོཿཞེས་མཉེས་པ་སྟེ། དེ་སྐད་ཅེས་རང་སྣང་གི་དཀྱིལ་འཁོར་ལ་དགྱེས་པ་ཆེན་པོས་ཆེད་དུ་བསྒྲགས་སོ། ། གསུམ་པ་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉེར་གཉིས་ཡོད་པ་ལས། འདིས་མཉེས་པ་ཆེན་པོའི་གླུས་ཉིད་ཀྱི་དཀྱིལ་འཁོར་ལ་བསྟོད་པའི་ལེའུ་སྟེ་བཅུ་བཞི་པའོ།། །། ལེའུ་བཅོ་ལྔ་པའི་འགྲེལ་པ།ལེའུ་བཅོ་ལྔ་པ་ལ་གཉིས་ཏེ། གཞུང་དང་། མཚན་ནོ། །དང་པོ་ལ་གཉིས་ཏེ། ཁྲོ་བོའི་དཀྱིལ་འཁོར་མངོན་པར་འདུ་མཛད་ཚུལ་མདོར་བསྟན། དེའི་རང་བཞིན་རྒྱས་པར་བཤད་པའོ། །དང་པོ་ནི། དེ་ནས་དེ་བཞིན་གཤེགས་པ་སོགས་ཏེ། ཞི་བའི་དཀྱིལ་འཁོར་བསྟན་པ་དེ་ནས་ཁྲོ་བོའི་དཀྱིལ་འཁོར་སྟོན་པའི་ཕྱིར་དེ་བཞིན་གཤེགས་པ་རིགས་ཐམས་ཅད་ཀྱི་བདག་པོ་དྲུག་པ་ཀུན་ཏུ་བཟང་པོ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་ངོ་བོར་ལྷུན་གྱིས་གྲུབ་པ་ཉིད་ཀྱིས་རང་སྣང་ལོངས་སྤྱོད་རྫོགས་པའི་དཀྱིལ་འཁོར་ལས་མ་གཡོས་པར་འདུལ་བྱེད་སྤྲུལ་པ་སྐུའི་ཁྲོ་བོའི་དཀྱིལ་འཁོར་ཇི་ལྟར་འཚམས་པ་མངོན་པར་འདུ་མཛད་དེ། ཐབས་ཞགས་ལས། མཉམ་ཉིད་ངང་གིས་ཁྲོ་ལ་ཕྱག་འཚལ་ལོ། །ཁྲོ་བས་ལོངས་སྤྱོད་རྫོགས་ལ་ཕྱག་འཚལ་ལོ། །རྡོ་རྗེ་འདུ་འཕྲོ་མཛད་ལ་ཕྱག་འཚལ་ལོ། །ཞེས་སོ། །སྤྱིར་ཁྲོ་བོ་ལ་བཞི་སྟེ། བདག་མེད་རྟོགས་པའི་ཤེས་རབ་ནི་ངང་གིས་ཁྲོ་བ་སྟེ། དེས་རྣམ་རྟོག་གི་མཚན་མ་འཇོམས་པའི་ཕྱིར་རོ། །རང་རིག་པའི་ཡེ་ཤེས་ནི་རྟོགས་པ་ངང་གིས་ཁྲོ་བ་སྟེ། དེས་འཁོར་བའི་ས་བོན་དྲུང་ནས་འཇོམས་པའི་ཕྱིར་རོ། །ཐུགས་རྗེ་ནི་ཤུགས་ཀྱིས་ཁྲོ་བ་སྟེ། དེས་འགྲོ་བ་སྐྱོབ་པ་ན་འབད་རྩོལ་མེད་པར་མི་མཐུན་ཕྱོགས་འཇོམས་པའི་ཕྱིར་རོ། །ཕྲིན་ལས་ཕྱག་རྒྱའི་ཁྲོ་བོ་ནི་གདུལ་བྱའི་དབང་གིས་ཁྲོ་བོར་སྟོན་པ་སྟེ། ཇི་ལྟར་འཚམས་པར་འབྱུང་བས་གདུལ་བྱ་ནམ་ཡང་མི་འདོར་བའི་ཕྱིར་རོ། །དེ་ལྟར་བཞི་ལས་འདིར་ནི་ཕྱི་མ་ཕྱག་རྒྱ་ཆེན་པོའི་ཁྲོ་བོ་སྟེ། དགོངས་འདུས་ལས། ཤིན་ཏུ་གདུག་ཅིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་ཕྱག་རྒྱ་ལ། །ཁྲོ་བོར་དེ་བཞིན་གཤེགས་ཀུན་མཛད། །ཅེས་སོ། ། གཉིས་པ་ལ་གསུམ་སྟེ། གང་གདུལ་བྱའི་ཡུལ། གང་གིས་ཇི་ལྟར་འདུལ་བའི་ཐབས། དེ་ལྟར་བཏུལ་བའི་འབྲས་བུའོ། །དང་པོ་ལ་གཉིས་ཏེ། རྒྱུ་གང་གིས་གོལ་བ་དང་། གོལ་བའི་འབྲས་བུ་ཇི་ལྟར་སྨིན་པའོ། །དང་པོ་ནི། དེ་ཅིའི་ཕྱིར་ནས་རྨོངས་པས་ཞེས་པའི་བར་ཏེ། དེ་ལྟར་འདུལ་བྱེད་ཁྲོ་བོའི་དཀྱིལ་འཁོར་མངོན་པར་འདུ་མཛད་པ་དེ་དགོས་ཆེད་ཅིའི་ཕྱིར་ཞེ་ན། ཞེས་དྲིས་པའི་ལན་ནི། གདུལ་བྱ་གདུག་པ་ཅན་འདུལ་བའི་ཆེད་དུའོ། །དེ་སུ་ཞིག་སྙམ་པ་ལ། སྤྱིར་སྲིད་པའི་རྩ་བ་བདག་ཏུ་རྨོངས་པ་མ་རིག་པའི་རྣམ་པར་རྟོག་པས་ང་དང་བདག་ཏུ་ཞེན་པ་དང་། ཆོས་ཐམས་ཅད་བློས་སྒྲོ་བཏགས་ཙམ་བདེན་པར་གྲུབ་པ་མ་ཡིན་ཡང་། ཕྱིན་ཅི་ལོག་གིས་གཟུང་ཡུལ་ལ་བདག་གིར་མངོན་པར་ཞེན་པས་འཁོར་བར་འཁྱམས་ཤིང་གདུང་ལ། དེ་ལས་ངེས་པར་འབྱིན་བྱེད་ཡང་དག་པའི་ལམ་དང་བྲལ་བ་དག་ནི་སྲིད་པར་འདུ་བྱེད་པ་ཡིན་ལ། དེའི་སྟེང་དུ་ཁྱད་པར་རཱུ་ཏྲ་ནི་གབ་པའི་གསང་བ་གནས་ལུགས་དེ་བཞིན་ཉིད་མ་རྟོགས་པར་སྦས་པའི་གསང་བ་སྦྱོར་སྒྲོལ་སོགས་སྤྱོད་པ་བརླང་པོ་ལ་མངོན་པར་འཆེལ་ནས་བྱོལ་ཉོག་ཏུ་སྤྱོད་ཅིང་། དེ་ཡང་རྒྱུ་ལས་དགེ་སྡིག་དང་། འབྲས་བུ་བདེ་སྡུག་གི་འབྲེལ་བ་ལ་རྨོངས་པའི་དབང་གིས། དེ་ལྟར་སྤྱོད་པ་རྣམས་རཱུ་ཏྲར་གོལ་བའི་རྒྱུ་སྟེ། དཔེར་ན་སྔོན་བསྐལ་པ་ཀུན་བཀོད་ཀྱི་དུས་སུ་བྱུང་བའི་དགེ་སློང་ཐར་པ་ནག་པོ་དེ། གོལ་གཞི་ཐུབ་དཀའ་གཞོན་ནུས། ཇི་བཞིན་ཉིད་དེ་མ་བཅོས་ན། །དངོས་པོ་བཞི་ལ་གནས་སྤྱད་ཀྱང་། །ནམ་མཁའ་ལ་ནི་སྤྲིན་བཞིན་ཏེ། །འདི་ནི་རྣལ་འབྱོར་དམ་པའི་ལམ། །ཞེས་གསུངས་པ་ལ་སྒྲ་ཇི་བཞིན་པར་སྤྱད་པས་གོལ་བ་བཞིན་ནོ། ། གཉིས་པ་གོལ་བའི་འབྲས་བུ་ཇི་ལྟར་སྨིན་པ་ལ་གཉིས་ཏེ། རྣམ་སྨིན་གྱི་འབྲས་བུ་སྡུག་བསྔལ་མྱོང་བ་དང་། རྒྱུ་མཐུན་གྱི་འབྲས་བུ་གཞན་ལ་འཚེ་བའོ། །དང་པོ་ལའང་གཉིས་ཏེ། དམྱལ་བར་དང་། ཡི་དྭགས་སུ་སྐྱེས་ཚུལ་ལོ། །དང་པོ་ནི། སྲིད་པའི་སོགས་ཏེ། སྲིད་པར་སྐྱེ་བའི་ས་བོན་མི་དགེ་བའི་ལས་རྩུབ་མོས་འཕངས་ནས་བར་དོ་མེད་པར་མཚམས་མེད་པའི་རབ་ཏུ་ཚ་བའི་དམྱལ་བ་མནར་མེད་པར་སྐད་ཅིག་གིས་སྐྱེས་སོ། །དེ་ཉིད་དུ་རབ་ཏུ་ཚ་བས་བསྲེགས་པའི་སྡུག་བསྔལ་དྲག་པོས་ཡུན་རིང་གདུངས་པ་དང་། འདི་བས་ཤིན་ཏུ་གྲང་ཡང་ཅི་མ་རུང་སྙམ་པའི་མོད་ལ་ཁ་བ་དང་བུ་ཡུག་སོགས་ཀྱིས་རབ་ཏུ་སྦྲེབས་པས་གྲང་བ་དང་ལུས་པདྨ་ལྟར་ཆེར་གས་པའི་སྡུག་བསྔལ་དྲག་པོ་དག་གིས་རབ་ཏུ་གདུངས་པར་བྱས་སོ། །དེ་ལྟ་བུའི་སྡུག་བསྔལ་རབ་ཏུ་ཚ་བ་ལ་སོགས་པ་སྟེ། ཚ་བ་ནས་ཡང་སོས་ཀྱི་བར་བརྒྱད་དང་། ཤིན་ཏུ་གྲང་བ་པདྨ་ལྟར་ཆེར་གས་པ་ལ་སོགས་པ་སྟེ་ཆུ་བུར་ཅན་གྱི་བར་བརྒྱད་པོ་དག་ཏུ་ཚ་གྲང་གི་དམྱལ་བ་ཕན་ཚུན་ཟུང་རེ་རེ་ཞིང་སྐྱེ་རེས་ཀྱིས་འཇིག་རྟེན་གྱི་ཁམས་དེ་འཇིག་པའི་དུས་སུ་འཇིག་རྟེན་གྱི་ཁམས་གཞན་དང་གཞན་དུ་བརྒྱུད་ནས་འཕོ་ཞིང་། ཚེ་ཚད་ནི། འཇིག་རྟེན་གྱི་ཁམས་གཅིག་ཆགས་གནས་འཇིག་སྟོངས་བཞི་པོ་རེ་རེ་ལ་བར་བསྐལ་ཉི་ཤུ་ཉི་ཤུ་སྟེ་བསྡོམས་པས་བར་བསྐལ་བརྒྱད་ཅུ་ལ་བསྐལ་ཆེན་དུ་བྱས་པའི་བསྐལ་པ་ཆེན་པོ་སྟོང་ཕྲག་བཅུ་གཉིས་སུ་ཚ་གྲང་གི་སྡུག་བསྔལ་མྱོང་ངོ་། །གཉིས་པ་ནི། དེ་ནས་རྣམ་པར་སོགས་ཏེ། དེ་ནས་དམྱལ་བར་སྐྱེ་བའི་ལས་ཀྱི་རྣམ་པར་སྨིན་པ་དེ་མྱོང་སྟོབས་ཀྱིས་ཟད་པ་དང་ཡི་དྭགས་སུ་སྐྱེས་ཏེ། ལྟོགས་པ་དང་སྐོམ་པའི་སྡུག་བསྔལ་གྱིས་རབ་ཏུ་ཉེན་པ་སྤྱི་མཐུན་གྱི་སྒྲིབ་པ་ཅན་དང་། ཕྱི་རོལ་གྱི་འདོད་པའི་དངོས་པོ་རྣམས་ཀྱང་ཡིད་དུ་མི་འོང་བ་ཆུ་རྣག་ཏུ་མཐོང་བ་ལྟ་བུ་ཕྱིའི་སྒྲིབ་པ་ཅན་དང་། བཟའ་བཏུང་ཅུང་ཟད་རྙེད་པ་ཟོས་པ་ན་གདུག་ཅིང་རྩུབ་པའི་དངོས་པོ་མེ་སོགས་སྣ་ཚོགས་སུ་འགྱུར་བས་ནང་ཁྲོལ་སྲེག་པ་སོགས་མེ་ལྕེའི་འཁོར་ལོ་ཅན་དང་། ཟས་སྐོམ་སོགས་མཐོང་བ་སྤྱོད་འདོད་པས་དྲུང་དུ་བསྙེགས་པའི་ཚེ་ཡོད་པ་རྗེས་ཙམ་ཡང་མེད་པར་འགྱུར་ཞིང་། ལུས་ཤིན་ཏུ་རིད་ཅིང་སྐམ་པ་དང་། ལྟོ་བ་རི་བོ་ཙམ་ལ་རྐང་ལག་འཇག་མ་དང་ཁ་ཁབ་མིག་ལྟ་བུ་སོགས་ལུས་དང་ཡན་ལག་དང་དབང་པོ་རྣམས་མི་འཚམས་པར་ཉམ་ཐག་པར་གྱུར་པ་དེ་ལྟ་བུར་བསྐལ་པ་ཆེན་པོ་དྲུག་ཏུ་འཇིག་རྟེན་གྱི་ཁམས་བརྒྱུད་ཅིང་སྐྱེས་སོ། ། གཉིས་པ་རྒྱུ་མཐུན་གྱི་འབྲས་བུ་ནི། དེ་ནས་ལས་ཀྱི་སོགས་ཏེ། དེ་ནས་ཡི་དྭགས་སུ་སྐྱེ་བའི་ལས་ཀྱི་སྒྲིབ་པ་རྩུབ་མོའི་རྣམ་པར་སྨིན་པ་དེ་ཡང་ཁད་ཀྱིས་བསྲབས་པ་དང་། སྔོན་གྱི་དུས་སུ་སྔགས་ལམ་ལས་གོལ་ཏེ་ཁྲོ་བོ་དང་ཕྲ་མེན་གྱི་ལྷ་རང་རྒྱུད་དུ་བསྒོམས་ནས་དྲག་སྔགས་བཟླས་ཤིང་ལས་བརླང་པོར་སྤྱད་པའི་སྲིད་པས་རཱུ་ཏྲའི་རྒྱུད་དུ་མཚམས་སྦྱར་ནས། ཡི་དྭགས་ཀྱི་འགྲོ་བས་བསྡུས་པའི་སྲིན་པོ་ཆེན་པོ་བྱའི་གཤོག་པ་ཅན་ལུས་རབ་ཏུ་འཇིགས་ཤིང་། སེམས་གདུག་པ་ཁྲོ་ཞིང་གཏུམ་པོ་སྟེ། ལས་ཀྱི་རྫུ་འཕྲུལ་ལུས་གཅིག་ལ་མགོ་བོ་བརྒྱ་ཡོད་པ་དང་། དེ་ཡང་མགོ་བརྙན་མི་འདྲ་བ་སྣ་ཚོགས་པ་དང་། ལུས་མི་གཅིག་པ་བརྒྱ་ལ་མགོ་བོ་གཅིག་ལས་མེད་པ་དང་། སྟག་སེང་སོགས་ཀྱི་ལུས་སྣ་ཚོགས་པ་དང་། ལུས་གཅིག་ལ་ཡན་ལག་མང་པོ་དང་། ཡན་ལག་རིགས་མི་འདྲ་བ་སྣ་ཚོགས་པ་དང་། དེ་དག་གི་མདའ་དང་མདུང་ཐུང་སོགས་གདུག་པའི་ལག་ཆ་སྣ་ཚོགས་པ་ཐོགས་པ། གསོད་བྱེད་ཀྱི་འཁོར་དྲེད་མོ་འཕར་བ་བྱ་གཅན་སོགས་རབ་ཏུ་མང་པོ་དང་། འཇིགས་པའི་སྦྲུལ་གཟུགས་སྡོམ་སྡིག་སོགས་སྣ་ཚོགས་པ་དང་། འཇིགས་པའི་སྒྲ་ར་ལ་ར་ལ་སོགས་སྣ་ཚོགས་སྒྲོག་པ། འཇིགས་པའི་གཟུགས་དང་། མི་སྙན་པའི་ང་རོ་དང་། མི་ཞིམ་པའི་དྲི་དང་ཁ་རླངས་ཀྱིས་ནད་གཏོང་ཞིང་། ལུས་ཅན་ཐམས་ཅད་སྐྱི་བུང་ཞེས་དངངས་བར་བྱེད་པ། རབ་ཏུ་འཇིགས་པའི་རླུང་ནག་གིས་ཕྱོགས་ཀུན་ཁེབས་པ་དང་། གྲང་བ་དང་ཚ་བའི་དབུགས་ཀྱིས་ཕྱོགས་བཅུ་ཀུན་ཏུ་སྟོང་ཁམས་ཐམས་ཅད་འཁྲུག་པར་བྱེད་པ། རླུང་མཁྲིས་བད་ཀན་འདུས་པ་ལས་གྱུར་པའི་ནད་བཞི་བརྒྱ་རྩ་བཞིས་འདེབས་པར་བྱེད་པ། སེམས་མྱོས་ཤིང་དྲན་པ་ཉམས་པར་བྱེད་པའི་བྱེད་ལས་ཀྱི་མཐུས་ཀླུའི་རིས་དང་། ལྷ་མ་ཡིན་གྱི་རིས་དང་། འདོད་པའི་ལྷའི་རིས་དང་། གཟུགས་ཁམས་ལས་ཚངས་པའི་རིས་སོགས་བསམ་གཏན་དང་པོའི་གནས་གསུམ་དང་། འོད་གསལ་གྱི་བར་གཉིས་པའི་གསུམ་དང་། དགེ་རྒྱས་ཀྱི་བར་གསུམ་པའི་གསུམ་དང་། འབྲས་བུ་ཆེ་བའི་བར་བཞི་པའི་གསུམ་སྟེ། གནས་རིས་བཅུ་གཉིས་པ་མན་ཆད་དབང་དུ་བསྡུས་སོ། ། གཉིས་པ་གང་གིས་ཇི་ལྟར་འདུལ་བའི་ཐབས་ལ་གཉིས་ཏེ། གདུལ་བྱར་གཟིགས་ནས་འདུལ་བ་མདོར་བསྟན་པ་དང་། དེ་རྒྱས་པར་བཤད་པའོ། །དང་པོ་ནི། དེ་སྔོན་སོགས་ཏེ། རཱུ་ཏྲ་དེས་སྔོན་དགེ་བའི་བཤེས་གཉེན་བསྟེན་ཅིང་སྔགས་ཀྱི་ཐེག་པར་ཞུགས་པའི་སྟོབས་ཀྱིས་འབྲེལ་བས་ཐམས་ཅད་མཁྱེན་པས་འདུལ་བའི་དུས་ལ་བབ་པར་གཟིགས་ནས་ཐུགས་རྗེ་དང་ཕྲིན་ལས་ཀྱིས་འདུལ་བར་གྱུར་ཏོ། ། གཉིས་པ་ལ་བཅུ་གཉིས་ཏེ། ཏིང་ངེ་འཛིན་གྱི་ཆོ་འཕྲུལ་དང་། ཆེ་མཆོག་ལོངས་སྤྱོད་རྫོགས་པའི་དཀྱིལ་འཁོར་དང་། ཀུན་བརྗོད་པའི་ཆོ་འཕྲུལ་དང་། སྤྲུལ་པ་རྫུ་འཕྲུལ་གྱི་ཆོ་འཕྲུལ་དང་། བྱིན་གྱིས་རློབ་ཀྱི་ཆོ་འཕྲུལ་དང་། ཆོས་སྣང་བའི་ཆོ་འཕྲུལ་དང་། སྤྲུལ་པ་ཆེན་པོའི་དཀྱིལ་འཁོར་དང་། ཕྲིན་ལས་རྨད་དུ་བྱུང་བའི་ངོ་བོ་དང་། འཁོར་སྡུད་པའི་ཆོ་འཕྲུལ་དང་། ཡོངས་སུ་རྫོགས་པའི་དཀྱིལ་འཁོར་དང་། འཁོར་འདུས་པའི་ཆོ་འཕྲུལ་དང་། ངོ་མཚར་ཚོགས་ཀྱི་དཀྱིལ་འཁོར་རོ། །དང་པོ་ནི། དེ་ནས་དེ་བཞིན་གཤེགས་པ་སོགས་ཏེ། གདུལ་བྱ་བསྟན་པ་དེ་ནས་འདུལ་བྱེད་སྟོན་པའི་ཕྱིར་དེ་བཞིན་གཤེགས་པ་ཆེ་བའི་རྡོ་རྗེ་གསུམ་གྱི་དཀྱིལ་འཁོར་བཀོད་པའི་ཟུང་འཇུག་སྒྱུ་འཕྲུལ་དྲྭ་བ་ལས། དོན་བྱ་བའི་ཡུལ་འཇིག་རྟེན་དྲུག་གི་ཕྱོགས་བཅུའི་སྲིད་པ་གསུམ་གྱི་བདག་པོ་དྲེགས་པ་ཅན་རཱུ་ཏྲ་འདུལ་བའི་ང་རྒྱལ་ཆེན་པོས་ཟིལ་གྱིས་གནོན་པའི་གཟི་བརྗིད་སྟོན་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་དབྱེར་མི་ཕྱེད་པ་རྡོ་རྗེའི་བདག་པོ་རིགས་དྲུག་པ་བཅོམ་ལྡན་འདས་དྲེགས་པ་འདུལ་བའི་ཐབས་ལ་དགྱེས་པ་ཆེན་པོ་ཁྲོ་བོའི་རྒྱལ་པོ་ཆེ་མཆོག་ཧེ་རུ་ཀའི་དཀྱིལ་འཁོར་གྱི་སྤྲིན་ཆེན་པོ་རྣམ་པར་འཕྲོ་བའི་སྒྱུ་འཕྲུལ་དྲྭ་བའི་རྒྱལ་པོའི་ཏིང་ངེ་འཛིན་ལ་དགོངས་པ་སྙོམས་པར་ཞུགས་པ་སྟེ། དམ་པ་རྒྱན་ལས། འཛིན་པའི་དབང་གིས་སྡུག་བསྔལ་ཞིང་། །གདུག་པ་སྲིད་གསུམ་འདུལ་བ་ཡི། །ང་རྒྱལ་ཆེན་པོ་བསྟན་པའི་ཕྱིར། །སྒྱུ་འཕྲུལ་དྲྭ་བའི་ཏིང་འཛིན་བསྒོམ། །ཞེས་གསུངས་པ་ལྟར་རོ། །གཉིས་པ་ནི། དེ་བཞིན་ཉིད་ཀྱི་སོགས་ཏེ། ཆོས་ཉིད་དེ་བཞིན་ཉིད་སྐྱེ་མེད་ཀྱི་དབྱིངས་ནས་ཡུམ་ཁྲོ་མོ་དབང་ཕྱུག་ཆེན་མོ་མངོན་དུ་ཕྱུངས་ཏེ། ཧི་ཧི་ཞེས་ཡབ་ལ་དགྱེས་པའི་གཟི་མདངས་ཀྱིས་བསྐུལ་བས། ཐབས་ཤེས་ཀྱི་མཁའ་གསང་རིན་ཆེན་དང་པདྨ་བདེ་བས་རྒྱས་པར་མཛད་ནས་ཡབ་ཡུམ་གཉིས་སུ་མེད་པར་འཁྲིལ་བའི་དགྱེས་པས་པདྨར་ནོར་བུ་ཐིམ་ནས་རོལ་བར་མཛད་དོ། །གསུམ་པ་ནི། བྱང་ཆུབ་སོགས་ཏེ། རྒྱུ་གཉིས་སུ་མེད་པའི་བྱང་ཆུབ་སེམས་ཀྱི་སྤྲིན་སྤྲོས་པ་ལས། རྐྱེན་དེའི་ཚེ་ཧཱུཾ་ཧཱུཾ་ཧཱུཾ་རྡོ་རྗེ་གསུམ་གྱི་བདག་ཉིད། བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ནི་རྡོ་རྗེ་ཁྲོ་བོ་སྣ་ཚོགས་འབར་བའི་དཀྱིལ་འཁོར། ཕཊ་ཕཊ་ཕཊ། ཧ་ལ་ཧ་ལ་ཧ་ལ་ཧཱུཾ། སྒོ་གསུམ་བཀས་ཤིང་གཏོར་ཅིག་ཅེས་ཐུགས་བསྐུལ་བའི་ཚིག་སྦྱར་བའོ། །དེ་སྐད་ཅེས་བརྗོད་པས་ཡབ་ཡུམ་གྱི་སྦྱོར་མཚམས་ནས་ཁྲོ་བོ་འཆོལ་བའི་སྤྲིན་སྤྲོ་བའི་རྐྱེན་བྱེད་པའོ། །བཞི་པ་ནི། འཇིག་རྟེན་སོགས་ཏེ། གང་དུ་སྤྲོ་ན་འཇིག་རྟེན་དྲུག་གི་ཕྱོགས་བཅུ་མཐའ་ཡས་པ་གོ་མཚམས་མེད་པར་ཁྱབ་པར། གང་སྤྲོ་ན་ཁྲོ་བོ་འཆོལ་བའི་དཀྱིལ་འཁོར་གྱི་ཚོགས། ཆེ་ཆུང་སྟོང་གསུམ་གྱི་འཇིག་རྟེན་ཙམ་ལ་གྲངས་ཕྱོགས་བཅུའི་འཇིག་རྟེན་གྱི་རྡུལ་ཕྲ་མོ་སྙེད་ཙམ་འཐོན་པས་སྟོང་ཁམས་གང་བར་གྱུར་ནས་གདུག་པ་ཅན་རྣམས་བག་འཁུམས་པར་བྱེད་པའོ། །ལྔ་པ་ནི། འཇིག་རྟེན་སོགས་ཏེ། དེ་ལྟར་ཁྲོ་བོའི་སྤྲིན་སྤྲོས་པ་དེས་འཇིག་རྟེན་དྲུག་གི་ཕྱོགས་བཅུ་ཐམས་ཅད་ཀྱི་ས་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་གཡོས་སོ། །ཟིན་པའི་སྒྲ་ཐམས་ཅད་དྲག་པོར་འུར་འུར། རབ་ཏུ་འུར་འུར། ཀུན་ཏུ་འུར་འུར་རོ། །མ་ཟིན་པའི་སྒྲ་རྣམས་ཀྱང་རང་འཁྲོལ་དུ་ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །རི་གླིང་སོགས་དུམ་བུར་ཤིག་ཤིགརབ་ཏུ་ཤིག་ཤིག །ཀུན་ཏུ་ཤིག་ཤིག་གོ །དེ་དག་ཀྱང་གཏོར་གཏོར། རབ་ཏུ་གཏོར་གཏོར། ཀུན་ཏུ་གཏོར་གཏོར་རོ། །དེ་ལྟར་ཕྱི་རོལ་དུ་ལྟས་གཡོས་པ་དང་འུར་བ་སོགས་སྡེ་ཚན་ལྔ་པོ་རེ་རེ་ལའང་ཆུང་འབྲིང་ཆེ་གསུམ་སྟེ་བཅོ་ལྔ་དང་། ནང་དུ་ལམ་པའི་སེམས་ལ་ཚོགས་སྦྱོར་གྱི་རྣལ་འབྱོར་ལྔར་གཡོ་ཐོབ་གོམས་པའི་ཉམས་གསུམ་བོགས་འཐོན་པའོ། །དྲུག་པ་ནི། འཇིག་རྟེན་སོགས་ཏེ། དེ་ལྟར་ལྟས་ཆེན་པོ་བཅོ་ལྔ་དང་ཁྲོ་བོའི་སྤྲིན་ཚོགས་མི་བཟད་པའི་ཆོས་ཀུན་ཏུ་སྣང་བ་དེའི་ཚེ་འཇིག་རྟེན་དྲུག་གི་ཕྱོགས་བཅུའི་སྟོང་གསུམ་གྱི་ཁམས་ཐམས་ཅད་གནས་པའི་གཙོ་བོ། སོ་སོའི་གནས་སུ་དབང་ཆེ་བ་དང་། འཕྲུལ་དང་གཟི་བརྗིད་ཆེ་བ་དང་། ནུས་མཐུ་ཆེ་བའི་རིས་དབང་ཕྱུག་ཆེན་པོ་དང་། ཚངས་པ་དང་། ཁྱབ་འཇུག་དང་། བརྒྱ་བྱིན་ལ་སོགས་ཏེ། དྲེགས་པ་ཅན་ཐམས་ཅད་འཇིགས་ཤིང་སྐྲག་ནས་ལུས་སར་འགྱེལ་ཞིང་། ངག་འཐམ། སེམས་མྱོས་ནས་དྲན་པ་ཉམས་ཏེ་བརྒྱལ། རབ་ཏུ་བརྒྱལ། ཀུན་ཏུ་བརྒྱལ་བར་གྱུར་ཏོ། །བདུན་པ་ནི། དེ་ནས་སོགས་ཏེ། ཆོས་སྣང་བའི་ཆོ་འཕྲུལ་བསྟན་པ་དེ་ནས་བཅོམ་ལྡན་འདས་དགྱེས་པ་ཆེན་པོ་ཆེ་མཆོག་ཉིད། འཇིགས་བྱེད་ཆེན་པོ་ཤིན་ཏུ་རྔམ་པའི་སྐུ་གདུག་པ་ཅན་རྣམས་སྐྱི་བུང་ཞེས་བྱེད་པའི་གཟི་བྱིན་འབར་བ་ཆེན་པོའི་མེ་འོད་འཕྲོ་བ་ཁྲག་འཐུང་སྨུག་ནག་ཅིར་ཡང་འགྱུར་བའི་རྣམ་པ་ཅན། དབུ་དང་ཕྱག་ཞབས་སྟོང་ཁམས་ཀྱི་རྡུལ་སྙེད་ལྟར་མཐའ་ཡས་པས་མཚོན་ཆ་སྣ་ཚོགས་འཛིན་པ་དེ་ཉིད་ལ་གོང་དུ་སྤྲོས་པའི་ཁྲོ་བོའི་སྤྲིན་ལས་རྡོ་རྗེའི་རིགས་ཀྱི་ཁྲོ་ཚོགས་ཐམས་ཅད་འདུས་ཏེ་སྟོང་པ་ཉིད་ཀྱི་ཡེ་ཤེས་ཀྱི་བདག་ཉིད་བཛྲ་ཧེ་རུ་ཀ །རྣམ་ཐར་གྱི་དབུ་གསུམ། ཡེ་ཤེས་ཀྱི་ཕྱག་དྲུག །རྫུ་འཕྲུལ་རྐང་བཞིའི་རྟགས་ཞབས་བཞི་པར་གྱུར་ཏེ། དུར་ཁྲོད་འབར་བའི་གཞལ་ཡས་ཁང་ཆེན་པོར་བཞུགས་པར་དགྱེས་ནས། མཁའ་རླུང་གི་དཀྱིལ་འཁོར་ལ་བརྟེན་པའི་ཁྲག་གི་རྒྱ་མཚོར་ཆགས་པ་ཞིང་ཆེན་གྱི་ས་བཞིའི་དཀྱིལ་ན་ཀེང་རུས་ཆེན་པོའི་རི་རབ་ཀྱི་སྟེང་། ཡེ་ཤེས་ཀྱི་མེ་དཔུང་འབར་བ་ཆེན་པོའི་ཀློང་། གཞལ་ཡས་ཁང་གི་དབུས་འཁོར་ལོ་རྩིབས་བཞི་པའི་དཀྱིལ་ན་དབང་ཕྱུག་ལྷ་ཆེན་པོ་དང་། དུར་ཁྲོད་ཀྱི་བདག་པོ་དྲེགས་པ་ཆེན་པོ་རཱུ་ཏྲ་ཕོ་མོ་སྟེ་ཁྱོ་ཤུག་བྱི་ཆིངས་སུ་བསྣོལ་བའི་གདན་ལ་ཞབས་གཡས་བརྐྱང་གཡོན་བསྐུམ་དུ་བཞུགས་སོ། །འདིར་ཞབས་གཡོན་བརྐྱང་དུ་བཞེད་པའང་སྣང་མོད། དེ་ལྟ་ནའང་རྒྱ་དཔེར། ཨཱ་ལཱི་ཌྷ་པཱ་ད་ཞེས་གཡས་བརྐྱང་གི་སྐད་དོད་ཡོད་དོ། །དེ་བཞིན་དུ་བདེ་གཤེགས་རིགས་དང་། རིན་ཆེན་རིགས་དང་། པདྨའི་རིགས་དང་། ལས་ཀྱི་རིགས་ཀྱི་ཁྲོ་མོའི་དཀྱིལ་འཁོར་གྱི་སྤྲིན་ཕུང་དེ་དག་སོ་སོར་འདུས་པ་ལས་མེ་ལོང་ལྟ་བུ་ལ་སོགས་པ་ཡེ་ཤེས་བཞིའི་བདག་ཉིད་རིགས་བཞིའི་ཧེ་རུ་ཀར་གྱུར་པའང་། ལ་ལ་ནི་དཔལ་ཁྲག་འཐུང་ཆེན་པོ་ཞེས་སྦྱར་ཏེ། བུདྡྷ་ཧེ་རུ་ཀར་གྱུར་ཏེ་འཁོར་ལོའི་རྩིབས་བཞིའི་ཤར་ཕྱོགས་སུ་དང་། རིན་པོ་ཆེར་གྱུར་ཏེ་ལྷོ་ཕྱོགས་སུ་དང་། པདྨར་གྱུར་ཏེ་ནུབ་ཕྱོགས་སུ་དང་། ཀུན་ཏུ་ལས་སུ་གྱུར་ཏེ་བྱང་ཕྱོགས་སུ་བཞུགས་སོ། །ཁྲག་འཐུང་དེ་དག་ཀུན་ཀྱང་འཇིགས་བྱེད་ཆེན་པོའི་ཆ་ལུགས་དུར་ཁྲོད་ཀྱི་ཆས་དང་། ཧཱུཾ་ཕཊ་སོགས་རྔམ་པའི་ང་རོ་དང་། མེ་དཔུང་འབར་བའི་ཀློང་ན་དབུ་གསུམ་ཕྱག་དྲུག་ཞབས་བཞིས། ཤར་དུ་དྲི་ཟ་དང་། བྱང་དུ་གནོད་སྦྱིན་དང་། ནུབ་ཏུ་སྲིན་པོ་དང་། ལྷོར་གཤིན་རྗེ་ལ་སོགས་ཏེ་གདུག་པ་ཅན་ཐམས་ཅད་བསྡུས་པ་ཁྱོ་ཤུག་གི་གདན་ལ་གཡས་བརྐྱང་གིས་བཞུགས་སོ། །བཙུན་མོ་ཁྲག་འཐུང་ཆེན་མོ་རིགས་ལྔའི་ཚོགས་རྣམས་ཀྱང་རིགས་སོ་སོའི་ཧེ་རུ་ཀའི་སྐུ་ལ་འཁྲིལ་བའི་ཚུལ་གྱིས་བཞུགས་སོ། །བརྒྱད་པ་ནི། དེ་ནས་དྲེགས་པ་སོགས་ཏེ། རིགས་ལྔའི་ཧེ་རུ་ཀར་སྣང་བས་དྲེགས་པ་ཅན་གདན་དུ་བྱས་པ་དེ་ནས་དྲེགས་པ་ཆེན་པོ་རཱུ་ཏྲ་ལ་སོགས་པ་ཕོ་རྒྱུད་རྣམས་ཀྱིས། ཁྲོ་ཞིང་གཏུམ་པའི་སེམས་ཀྱིས་དགྲ་ཟླར་མཐོང་སྟེ། ལུས་གདན་དུ་གནས་ཀྱང་གདུག་པའི་རྫུ་འཕྲུལ་ཆེན་པོ་སྣ་ཚོགས་བསྟན་ནས། འཁོར་བཅས་མགྲིན་གཅིག་ཏུ་གདུག་པའི་ང་རོས་མི་སྙན་བརླང་པོའི་གཏུམ་ཚིག་གིས་འདི་སྐད་དུ་སྨྲས་པ། ངེད་རྣམས་གདན་དུ་བཅིངས་པ་ལས་ཐོང་ཐོང་། ཁྱེད་ཅག་སྙིང་རྗེའི་བདག་པོ་མ་ཡིན་ནམ། ཅི་བདག་ཅག་ལ་དེ་ལྟར་ཐོ་འཚམས་པར་བྱེད་དམ། ཞེས་ཟེར་ཞིང་། ཤིན་ཏུ་གདུག་པའི་སེམས་ཀྱིས་ཁྲོས་ནས་ད་དུང་རྔམ་མོ། །དེ་ནས་གདུག་པ་ཅན་དེ་དག་གི་གཉེན་པོར་བཅོམ་ལྡན་འདས་དགྱེས་པ་ཆེན་པོ་རིགས་ལྔའི་ཧེ་རུ་ཀ་ཉིད་སྒྲོལ་བྱེད་རྡོ་རྗེ་སྲིན་པོ་དབུ་དགུ་ཕྱག་བཅོ་བརྒྱད་ཞབས་བརྒྱད་དུ་གནས་པར་སྤྲུལ་ནས། ཐུགས་རྗེས་འདུལ་བའི་ཐབས་ལ་མཁས་པ་ཉིད་ཀྱིས་རཱུ་ཏྲའི་ངོར་ཤིན་ཏུ་ཁྲོས་པ་ལྟར་སྣང་ནས་རྔམ་པའི་སྐད་ཀྱིས། ཧཱུཾ་ཧཱུཾ་ཧཱུཾ་ཞེས་དེ་དག་གི་སྒོ་གསུམ་བསྡུས་ཤིག་པའོ། །ཧ་ཧ་ཧ་ཞེས་དུག་གསུམ་ཞལ་དུ་གསོལ་བར་དགྱེས་པའི་བཞད་སྒྲའོ། །ཁཱ་ཧི་ཁཱ་ཧི་ཁཱ་ཧི་ཞེས་ཤ་ཁྲག་རུས་གསུམ་ཟོ་ཞིག་པའོ། །སྔགས་དེ་སྐད་ཅེས་བརྗོད་པས་དབང་ཕྱུག་ཆེན་པོ་ལ་སོགས་པ་གདུག་པ་ཆེན་པོའི་ཚོགས་དེ་དག་གི་བདག་འཛིན་གཅོད་ཕྱིར་དོན་སྙིང་དང་། ཡུལ་འཛིན་གྱི་སྒོ་དགག་ཕྱིར་དབང་པོ་ཀུན་ཕྱུང་། མངོན་ཞེན་དགག་ཕྱིར་ནང་ཁྲོལ་ཀུན་དྲངས། ལས་ངན་གྱི་བག་ཆགས་གཅོད་ཕྱིར་ཡན་ལག་ཀུན་དུམ་བུར་བཅད་ཅིང་བཏུབས་ནས། དུག་གསུམ་དག་པར་མཛད་པའི་ཕྱིར་དུ་གཏི་མུག་ཤ་ཀུན་ཟོས། འདོད་ཆགས་ཁྲག་ཀུན་འཐུངས། ཞེ་སྡང་རུས་པ་ཀུན་འཆོས་སོ། །དགུ་པ་ནི། དེ་ནས་སོགས་ཏེ། ཕོ་རྒྱུད་བསྒྲལ་ཏེ་བཏུལ་བ་དེ་ནས་མོ་རྒྱུད་སྦྱོར་བས་འདུལ་བའི་ཕྱིར། ཧཱུཾ་ཧཱུཾ་ཧཱུཾ་ནི་ལུས་ངག་ཡིད་གསུམ་བསྡུས་ཤིག་པའི་བསྐུལ་ཚིག །བྷྱོ་ནི་མ་མོ་རྣམས་ཀྱི་སྙིང་པོ་དང་བོད་པ། ཨེ་འདིར། ཨཱ་ར་ལི་རོལ་པ། ཛཿཛ་དགུག་པའི་ས་བོན་ནོ། །དེ་སྐད་ཅེས་བརྗོད་པས་ཕྱོགས་བཅུའི་སྣོད་ཀྱི་འཇིག་རྟེན་གྱི་ཁམས་ནམ་མཁའི་མཐས་གཏུགས་པ་དང་བཅས་པ་ཀུན་མ་ལུས་པར་ཡུངས་འབྲུ་གཅིག་ཙམ་དུ་ཆུད་པར་དབང་འབྱོར་བའི་རྫུ་འཕྲུལ་ཆེན་པོས་བསྡུས་སོ། །དེ་ནས་བཅུད་ཀྱི་སེམས་ཅན་འབྱུང་པོ་ཕལ་པའི་རིགས་མ་ལུས་པའི་རྒྱལ་པོ་ནི་ལྷ་དང་ལྷ་མིན་གྱི་བློན་པོ་ཆེན་པོ་རྣམས་ཡིན་ལ། དེའི་ཡང་རྒྱལ་པོ་ནི་དྲེགས་པ་ཆེན་པོ་སྲིན་པོ་ལ་སོགས་པ་དབང་ཕྱུག་ཆེན་པོ་ཕོ་རྒྱུད་ཉི་ཤུ་རྩ་བརྒྱད་པོ་ཡིན་པས། དེ་རྣམས་སོ་སོའི་ཆུང་མ་ནི་འབྱུང་པོ་མོ་རྒྱུད་ཕལ་པའི་རིགས་ཐམས་ཅད་ཀྱི་རྗེ་མོ་སྟེ་བློན་པོ་ཆེན་པོའི་ཆུང་མ། དེ་ཚོའི་ཡང་རྗེ་མོར་གྱུར་པ་དབང་ཕྱུག་མ་ཉི་ཤུ་རྩ་བརྒྱད་དེ། ཁྱོའི་མིང་ཆུང་མར་གྲགས་པས། སྲིན་པོ་ད་ཤ་གྲཱི་བའི་ཆུང་མ་སྲིན་མོ་ཆེན་མོ་མིའི་སྲིན་མོ་དང་། ཚངས་པའི་ཚངས་མ་དང་། ལྷ་ཆེན་དྲག་པོའི་འཁྲུག་མོ་དང་། བརྒྱ་བྱིན་གྱི་དབང་མོ་དང་། ཁྱབ་འཇུག་གི་འཇུག་སྲེད་མོ་དང་། གདོང་དྲུག་གི་གཞོན་ནུ་མོ་དང་དྲུག་ནི་ཤར་གྱི་མ་མོའོ། །འཇུག་སྲེད་ཀྱི་དམར་མོ་དང་། ཉི་མའི་བདུད་རྩི་མོ་དང་། ཟླ་བའི་ཞི་བ་མོ་དང་། བེ་ཅོན་གྱི་བེ་ཅོན་མོ་དང་། སྲིན་པོ་ཁྲག་མིག་གི་སྲིན་མོ་དང་། ལྷ་ཟ་བྱེད་ཀྱི་ཟ་བ་མོ་དང་དྲུག་ནི་ལྷོའི་མ་མོའོ། །དགའ་བྱེད་དབང་ཕྱུག་གི་དགའ་བ་མོ་དང་། སྟོབས་བཟང་གི་ར་རོ་ཁྲག་འཐུང་མྱོས་མ་དང་། བྷྲྀཾ་གི་རི་ཏིའི་གཅིག་པུར་སྤྱོད་མ་དང་། འདོད་ལྷའི་ཡིད་འཕྲོག་མ་དང་། ནོར་སྲུང་གི་གྲུབ་མོ་དང་། རླུང་ལྷའི་རླུང་མོ་དང་དྲུག་ནི་ནུབ་ཀྱི་མ་མོའོ། །ལྷ་གསོད་བྱེད་ཀྱི་གསོད་བྱེད་མོ་དང་། མེ་ལྷའི་མེ་མོ་དང་། ས་བདག་ཕག་ཆེན་གྱི་ཕག་མོ་དང་། གཤིན་རྗེའི་རྒན་བྱེད་མོ་དང་། ཚོགས་བདག་གི་སྣང་ཆེན་མོ་དང་། ཀླུའི་ཆུ་ལྷ་མོ་དང་དྲུག་ནི་བྱང་གི་མ་མོའོ། །ལྷ་ནག་པོ་ཆེན་པོའི་ནག་མོ་ཆེན་མོ་དང་། ར་གདོང་ཆེན་པོའི་ར་མགོ་དམར་སེར་ཆེན་མོ་དང་། སྲིན་པོ་བུམ་སྣའི་བུམ་སྣ་སྔོ་ནག་ཆེན་མོ་དང་། གསུས་པོ་ཆེའི་གསུས་འཛིན་སེར་ནག་ཆེན་མོ་དང་བཞི་ནི་སྒོ་མའོ། །དེ་ལ་སོགས་པ་མ་མོའི་ཚོགས་ཏེ། ཕྱིའི་ལས་བྱེད་བྲན་དང་། དེའི་ཡང་བྲན་དང་། ནང་གི་ལས་བྱེད་གཡོག་དང་། དེའི་ཡང་གཡོག་དང་བཅས་པ་འཁོར་ཞིང་གི་རྡུལ་སྙེད་ལྟར་མཐའ་ཡས་པ་ཐམས་ཅད་ཀྱང་བསྡུས་སོ། །བཅུ་པ་ནི། དེ་ནས་བཅོམ་ལྡན་འདས་སོགས་ཏེ། མོ་རྒྱུད་རྣམས་བསྡུས་པ་དེ་ནས་བཅོམ་ལྡན་འདས་དགྱེས་པ་ཆེན་པོ་དཔལ་ཁྲག་འཐུང་ཆེན་པོ་རྡོ་རྗེ་སྲིན་པོར་སྣང་བ་དེས་མ་མོ་རྣམས་འདུལ་བའི་ཐབས་ཀྱིས། སླར་ཡང་རིགས་ལྔའི་འཇིགས་བྱེད་ཆེན་པོ་ལྔ་ཀ་ཡོངས་སུ་རྫོགས་པར་མ་མོ་རྣམས་ལ་སྣང་བར་བྱས་ནས། དེ་དག་ཀུན་ཀྱང་དགྱེས་པ་ཆེན་པོས་རོལ་པ་ལས་ཁྲོ་བོའི་དཀྱིལ་འཁོར་གྱི་སྤྲིན་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྐུ་དང་གསུང་དང་ཐུགས་དབྱེར་མི་ཕྱེད་པ་རྡོ་རྗེ་ལས་སྔགས་འདི་ཕྱུང་ངོ་། །ༀ་ཨཱཿཧཱུཾ་ནི་རྡོ་རྗེ་གསུམ། བཛྲ་ནི་རྡོ་རྗེ་སྟེ་ཡབ་ཀྱི་གསང་བའི་རྡོ་རྗེ། པྲ་བེ་ཤ་རབ་ཏུ་ཞུགས་པ་སྟེ་གསང་བའི་པདྨར་རོ། །ཨ་ལ་ལ་ཧོཿདགྱེས་པས་ངོ་མཚར་བའོ། །བཅུ་གཅིག་པ་ནི། ཞེས་བརྗོད་པས་སོགས་ཏེ། དེ་སྐད་ཅེས་བརྗོད་པས་འབྱུང་མོའི་རྒྱལ་མོ་རྣམས་རིགས་ལྔའི་ཧེ་རུ་ཀར་སྣང་བ་ལ་ཤིན་ཏུ་ཆགས་པའི་ཡིད་གཡོས་ནས། རང་རང་གི་པདྨའི་དཀྱིལ་འཁོར་སྡུད་པ་སྟེ་འཛུམ་ཞིང་རྒྱས་པར་གྱུར་ནས། དཔེར་ན་རྡོ་ཁབ་ལེན་ལ་ལྕགས་འདུ་བའི་ཚུལ་དུ་དབང་མོ་རྣམས་བཅོམ་ལྡན་འདས་དགྱེས་པ་ཆེན་པོ་ཧེ་རུ་ཀ་རིགས་ལྔའི་སྐུ་ལ་འཁྲིལ་ཏེ། འདི་ལྟར་དཔལ་ཁྲག་འཐུང་ཆེན་པོ་རྡོ་རྗེ་ཧེ་རུ་ཀའི་སྐུ་བརྒྱད་དུ་སྣང་བ་ལ། ཕྱོགས་ཀྱི་གཙོ་མོ་སྲིན་མོ་ཆེན་མོ་མིའི་སྲིན་མོ་སོགས་བཞི་དང་། སྒོ་སྐྱོང་ནག་མོ་ཆེན་མོ་སོགས་བཞི་སྟེ་བརྒྱད་པོ་རྣམས་སོ་སོར་འཁྲིལ་ཏོ། །བཅོམ་ལྡན་འདས་དཔལ་ཁྲག་འཐུང་ཆེན་པོ་རིགས་བཞི་པོ་ལྔ་ལྔར་སྣང་སྟེ། དེ་བཞིན་གཤེགས་པའི་སྐུ་ལ་ཚངས་མ་སོགས་ཤར་ཕྱོགས་ཀྱི་མ་མོ་ལྔ་རྣམས་འཁྲིལ་ཏོ། །རིན་པོ་ཆེའི་སྐུ་ལ་བདུད་རྩི་མོ་སོགས་ལྷོའི་མ་མོ་ལྔ་རྣམས་འཁྲིལ་ཏོ། །པདྨའི་སྐུ་ལ་ཁྲག་གི་མྱོས་མ་སོགས་ནུབ་ཀྱི་མ་མོ་ལྔ་རྣམས་འཁྲིལ་ཏོ། །ཀུན་ཏུ་ལས་ཀྱི་སྐུ་ལ་མི་མོ་སོགས་བྱང་གི་མ་མོ་ལྔ་རྣམས་འཁྲིལ་ཏོ། །དེ་ནས་བཅོམ་ལྡན་འདས་དགྱེས་པ་ཆེན་པོ་རིགས་ལྔའི་ཁྲོ་བོའི་དཀྱིལ་འཁོར་དེ་དག་གིས་ཧཱུཾ་ཞེས་བརྗོད་པས་དབང་མོ་རྣམས་ཀྱི་པདྨའི་དཀྱིལ་འཁོར་གྱི་ཚོགས་རིགས་ལྔའི་རྡོ་རྗེ་ལ་བསྡུས་ནས་སྐུའི་སྟོད་སྨད་ཤིན་ཏུ་བཅུམ་པས་རོལ་པར་གྱུར་ཏོ། །བཅུ་གཉིས་པ་ལ་བཞི་སྟེ། གནས་མ་དང་། ཡུལ་མ་དང་། སྒོ་མ་རྣམས་སྤྲོ་བ་དང་། ཁྲོས་པར་བསྐུལ་བའོ། །དང་པོ་ནི། དེ་ནས་སོགས་ཏེ། གཉིས་མེད་དུ་རོལ་པ་དེ་ནས་དགྱེས་ཏེ་ཧ་ཞེས་བརྗོད་པའི་བཞད་སྒྲས་སྦྱོར་མཚམས་ནས་ཡབ་ཡུམ་གྱི་བྱང་ཆུབ་སེམས་ཀྱི་སྤྲིན་ལས། ཞི་བའི་ལས་ཀྱིས་དག་པར་བྱེད་པ་དཀར་མོའི་ཚོགས་དང་། དབང་གིས་སྡུད་པ་རྐུན་མོའི་ཚོགས་དང་། ཞི་བས་སྤང་བླང་འབྱེད་པ་མེད་པའི་དབྱིངས་སུ་སྦྱར་བ་རྨོངས་མོའི་ཚོགས་དང་། དྲག་པོས་མི་མཐུན་པ་འཇོམས་པ་ཐལ་བྱེད་མའི་ཚོགས་དང་། རྒྱས་པས་ཡོན་ཏན་གྱི་གང་བ་སྦོས་མོའི་ཚོགས་དང་། དྲག་པོས་ཞེ་གཅོད་པ་གཏུམ་མོའི་ཚོགས་དང་། ལས་ཐམས་ཅད་པས་གང་ཡང་འགྲུབ་པ་སྨེ་ཤ་ཅན་གྱི་ཚོགས་དང་། རྒྱས་པས་འཕེལ་བའི་ལས་སྒྲུབ་པ་མ་ཚོགས་མའི་ཚོགས་རྣམས་ཞིང་དབྱུག་དང་ཐོད་ཁྲག་སོགས་རང་རང་གི་ལག་ཆ་དང་། ངོ་མཚར་བའི་གཟུགས་རྒྱན་དང་བཅས་པས་དབང་མོའི་མཁའ་ནས་ཕྱིར་འཐོན་ཏོ། །གནས་མ་བརྒྱད་པོ་རེ་རེ་ཡང་ཉི་ཤུ་རྩ་བརྒྱད་དུ་འཐོན་ནས་ཀྱང་རིགས་བསྡུས་ཏེ་འབར་བ་ཆེན་པོའི་འཁོར་ལོའི་རྩིབས་མཆན་དང་གྲུ་ཆད་བཞིར་ཤར་ལྷོའི་ཕྱོགས་ནས་གཡས་བསྐོར་གྱིས་འཁོར་བར་འཇིགས་པའི་གཟུགས་རང་རང་གི་ལག་ཆ་དང་བཅས་པས་འཁོད་དོ། །གཉིས་པ་ནི། དེ་ནས་སོགས་ཏེ། གནས་མ་འཐོན་པ་དེ་ནས་ཤིན་ཏུ་དགྱེས་ནས་ཧེ་ཞེས་བརྗོད་པའི་བཞད་སྒྲ་དང་སེམས་སྤྲིན་ལས། རྟོག་པ་ཟིལ་གྱིས་གནོན་པ་སེང་གདོང་ཆེན་མོའི་ཚོགས་དང་། དེ་བཞིན་དུ་དཔའ་ཞིང་བརྟུལ་ཕོད་པ་སྟག་གདོང་། ཐབས་ལ་མཁས་པས་ཕུང་པོའི་བདུད་འཇོམ་པ་ཝ་གདོང་། མེལ་ཚེ་མཁས་ཤིང་ལྷའི་བུའི་བདུད་འཇོམས་པ་ཁྱི་གདོང་། མིག་རྣོ་ཞིང་ཤེས་བྱ་ལ་ཐོགས་པ་མེད་པ་བཞད་གདོང་། དབུགས་བྲལ་ལ་སྤྱོད་ཅིང་འཆི་བདག་གི་བདུད་འཇོམས་པ་ཀངྐའི་གདོང་། ཉོན་མོངས་པ་ཟད་པར་བྱེད་པ་ཁྭ་གདོང་། གདུལ་བྱ་ཕྲ་བའང་མི་འདོར་བ་འུག་གདོང་སྟེ། དེ་ལྟར་ཕྲ་མེན་ཆེན་མོ་རེ་རེའང་ཉེར་བརྒྱད་ཀྱི་ཚོགས་དང་བཅས་པ་རྣམས། ལག་གཉིས་གྱེན་དུ་བསྣོལ་བས་རོ་བཟུང་བ་སོགས་རང་རང་གི་ལག་ཆ་དང་ངོ་མཚར་དུ་བཅས་ནས་འཐོན་པར་གྱུར་ཏོ། །འཐོན་ནས་ཀྱང་རིགས་བསྡུས་ཏེ་འབར་བ་ཆེན་པོའི་འཁོར་ལོའི་ཕྱི་རོལ་གསེར་ཁྱམས་ལ་ཤར་ཕྱོགས་ནས་འཁོར་བར་ཕྱོགས་བཞིར་མཆེ་བ་ཅན་དང་མཚམས་བཞིར་གཤོག་པ་ཅན་བཞི་རྔམ་པའི་མདངས་ཀྱིས་འཁོད་དོ། །གསུམ་པ་ནི། དེ་ནས་སོགས་ཏེ། ཡུལ་མ་འཐོན་པ་དེ་ནས་ཤིན་ཏུ་དགྱེས་པས་ཕྲིན་ལས་བཞིའི་སྣང་བས་ཕྱོགས་བཅུའི་ཞིང་ཁམས་མ་ལུས་པར་ཁྱབ་ནས་ཕཊ་ཅེས་བརྗོད་པའི་བཞད་སྒྲ་དང་སེམས་སྤྲིན་ལས། བྱམས་པས་མི་གཏོང་བར་འཛིན་པ་རྡོ་རྗེ་སྲིང་འགྲོ་རྟ་གདོང་མ། སྙིང་རྗེས་འཆིང་བ་རྡོ་རྗེ་གདོང་མོ་ཕག་གདོང་མ། དགའ་བས་སྡོམ་པ་རྡོ་རྗེ་འཇིག་རྟེན་སེང་གདོང་མ། བཏང་སྙོམས་ཀྱིས་མྱོས་པར་བྱེད་པ་རྡོ་རྗེ་རོ་ལངས་སྤྱང་གདོང་མའི་ཚོགས་རྣམས་ལྕགས་ཀྱུ་སོགས་རང་རང་གི་ལག་ཆ་དང་ངོ་མཚར་དུ་བཅས་ནས་འཐོན་པར་གྱུར་ཏོ། །འཐོན་ནས་ཀྱང་ཉེར་བརྒྱད་པོ་རིགས་བསྡུས་ཏེ་འབར་བ་ཆེན་པོའི་དཀྱིལ་འཁོར་གྱི་སྒོ་བཞིར་ཤིན་ཏུ་རྔམ་པའི་གཟུགས་ཀྱིས་གནས་སོ། །གང་དག་སྲས་མོ་ཉི་ཤུ་པོ་སྤྲོ་བའི་ཡུམ་འདིར་དབང་མོ་དང་སྒྲུབ་ཐབས་སུ་རིགས་ཀྱི་ཡུམ་ལྔས་བྱས་པ་གཉིས་འགལ་ལོ་ཞེ་ན། འདིར་སྔོན་བྱུང་དྲེགས་པ་འདུལ་བའི་དགོས་ཆེད་དང་། སྒྲུབ་ཐབས་ཀྱི་དུས་རྗེས་འཇུག་ཉམས་ལེན་གྱི་དབང་དུ་ཡིན་པས་འགལ་བ་མེད་དོ། །བཞི་པ་ནི། དེ་ནས་སོགས་ཏེ། དཀྱིལ་འཁོར་འགོད་པའི་མཛད་པ་རྫོགས་པ་དེ་ནས་ཡབ་ཡུམ་དགྱེས་པར་རོལ་པའི་སྤྲིན་ལས་ཕྱོགས་བཅུ་ནས་ཕཊ་ཅེས་བསྒྲགས་པས་ཐམས་ཅད་རྔམས་ཤིང་ཁྲོས་ནས་མ་མོ་ཐམས་ཅད་ཀྱང་སྔོན་གང་ནས་འོངས་པའི་རང་རང་གི་གནས་ག་ལ་བ་དེར་ཡུད་ཙམ་ལ་རྫུ་འཕྲུལ་གྱིས་ཕྱིན་པར་བཀྱེའོ། ། གསུམ་པ་དེ་ལྟར་བཏུལ་བའི་འབྲས་བུ་ལ་བཞི་སྟེ། དབང་བསྐུར་ཏེ་གནས་སྤར་ནས་སྣང་འབྱེད་ཀྱི་ཏིང་འཛིན་ཐོབ་པ། འབངས་སུ་དམ་བཅས་ནས་ལུས་གདན་དུ་ཕུལ་བ། འཁོར་ཕུལ་ཏེ་གུས་པས་མཆོད་པར་དམ་བཅས་པ། དབང་མོ་རྣམས་ལས་ནོད་པ་ལ་དབང་བསྐུར་ནས་མུ་རན་ལ་བཀོད་ཚུལ་ལོ། །དང་པོ་ནི། དེ་ནས་བཅོམ་ལྡན་འདས་སོགས་ཏེ། སྦྱོར་སྒྲོལ་གྱི་ཕྲིན་ལས་རྨད་དུ་བྱུང་བ་བསྟན་པ་དེ་ནས་བཅོམ་ལྡན་འདས་དགྱེས་པ་ཆེན་པོ་དཔལ་ཁྲག་འཐུང་ཆེན་པོ་རིགས་ལྔ་པོ་དེ་དག་ཀུན་བཛྲ་ཧེ་རུ་ཀར་བསྡུས་པ་ཉིད་རང་བྱུང་གི་ཐུགས་རྗེ་ཆེན་པོ་གསོ་བར་བྱེད་པས་བདུད་རྩི་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྐུ་དང་གསུང་དང་ཐུགས་དབྱེར་མི་ཕྱེད་པའི་རྡོ་རྗེ་ལས་དབང་བསྐུར་བའི་དམ་རྫས་སྔགས་དང་བཅས་པ་འདི་དག་ཕྱུང་ངོ་། །སྔར་ཞལ་དུ་བསྟབས་པའི་དབང་ཕྱུག་ཆེན་པོ་ལ་སོགས་པ་དེ་རྣམས་ཐམས་ཅད་བཅོམ་ལྡན་འདས་ཁྲོ་བོ་ཆེན་པོ་དེ་དག་གི་ལྟོ་བ་ན་གནས་པ་དཔའ་ཆེན་པོས་བསྣམས་ཏེ་བཤང་ལམ་ནས་བཏོན་ཏེ་མི་གཙང་བའི་འདམ་གྱི་རྒྱ་མཚོར་ཆུད་པ་ལས། སླར་ཡང་བསྣམས་ནས་ཨུ་ཙུཥྨ་ཀྲོ་དྷ་ཞེས་པ་ཁྲོ་བོ་སྨེེ་བ་བརྩེགས་པ་དང་དམ་རྫས་བདུད་རྩི་ཕྱུང་ནས་ༀ་བཛྲ་མ་ཧཱ་ཨ་མྲྀ་ཏ་མཆོག་སྟེར་རྡོ་རྗེ་བདུད་རྩི་ཆེན་པོ། མ་ཧཱ་ཀྲོ་དྷ་ཁྲོ་བོ་ཆེན་པོ། ཨཾ་ཨཾ་ཨཾ་ཞེས་བརྗོད་པས་ལན་གསུམ་དམ་རྫས་བདུད་རྩི་ལྕེར་བཞག་ཅིང་དབང་བསྐུར། སྨེེ་བ་བརྩེགས་པས་འདམ་ཀུན་འཐུངས་ཏེ་གསོས་པས་དྲེགས་པ་ཅན་དེ་དག་དྲན་པ་སླར་རྙེད་ནས་སྣང་བ་རྣམ་པར་འབྱེད་པའི་ཏིང་ངེ་འཛིན་ཐོབ་པས་འབར་བ་ཁྲོ་བོའི་དཀྱིལ་འཁོར་གྱི་ཚོགས་བསམ་ཡས་ལྷུན་གྲུབ་ཀྱི་ཞལ་མངོན་སུམ་དུ་མཐོང་སྟེ། ཁྲོ་བོ་དེ་དག་ཐམས་ཅད་ཀྱང་དབུ་དགུ་བརྒྱ་པ། ཕྱག་སྟོང་བརྒྱད་བརྒྱ་པ། ཞབས་བརྒྱད་བརྒྱ་པ། སྐུ་གཟི་བྱིན་མཐའ་ཡས་པ་འབར་བ་ཆེན་པོའི་དཀྱིལ་འཁོར་ན་བཞུགས་པར་མཐོང་ངོ་། །ཡེ་ཤེས་ཀྱི་ཆོ་འཕྲུལ་གྱིས་སྤྲུལ་པའི་རཱུ་ཏྲ་བཏུལ་བ་དེའི་དུས་སུ། གདུལ་བར་བྱ་བའི་ཡུལ་འཇིག་རྟེན་དྲུག་གི་ཕྱོགས་བཅུའི་སྲིད་པ་གསུམ་པོ་ཀུན་ཏུ་གནས་ཤིང་དབང་སྒྱུར་བའི་དྲེགས་པའི་དབང་ཕྱུག་ཆེན་པོ་ཐམས་ཅད་གང་ལ་གང་གིས་ཇི་ལྟར་འདུལ་བའི་ཐབས་ཀྱི་སྒོ་སྣ་ཚོགས་སུ་སྣང་བའི་རོལ་པ་བསམ་གྱིས་མི་ཁྱབ་པར་རང་རང་གི་ཞིང་སོ་སོར་སྣང་བའི་སྔ་ཕྱི་མེད་པར་དུས་གཅིག་ཏུ་བཏུལ་ལོ། །འོ་ན་སྐབས་འདིར་བསྟན་གྱི་གདུལ་བྱ་སྤྲུལ་པ་ཡིན་པར་གང་གིས་ཤེས་སྙམ་ན། འགྲེལ་བ་ལུང་བསྟན་ལས། དེ་བཞིན་གཤེགས་པ་ཉིད་ཀྱིས་ཚུལ་དུ་བསྟན་པར་རིག་པར་བྱ་སྟེ། དེ་ལ་དགོས་པ་དང་དགོངས་པ་ཅི་ཡོད་ཅེ་ན། རང་རྒྱུད་པའི་གོལ་ས་དགག་པ་དང་། ཆེ་བའི་མཐུའི་ཚད་བསྟན་པའི་དགོས་པ་དང་། ནང་དུ་བདུད་བཞི་བཏུལ་བའི་རྟགས་ཕྱི་རོལ་ཏུ་བསྟན་པར་འབྲེལ་ཏོ། །ཞེས་དང་། ཇི་སྐད་བཤད་པའི་མཐུ་འདི་དག་རང་རྒྱུད་པ་ལ་ཡོད་པ་མ་ཡིན་ཏེ། སྤྲུལ་པ་བ་ཡིན་པར་སོམ་ཉི་མི་བྱའོ། །ཞེས་སོ། །དེ་ལྟར་ན་གོང་དུ་བདག་ཏུ་རྨོངས་པའི་ཞེས་སོགས་ཀྱིས་གནོད་དོ་ཞེ་ན། མི་གནོད་དེ། ཕྱིས་འཇིག་རྟེན་དུ་ཆ་ལུགས་དང་མཐུ་ཆ་འདྲ་བའི་རཱུ་ཏྲ་རང་མཚན་པ་འབྱུང་བ་རྣམས་རྒྱུ་དེ་ལྟ་བུས་བསྐྱེད་པར་སྟོན་པའི་ཕྱིར་དང་། དེར་མ་ཟད། གཉེན་པོ་མཆོག་རྣམས་ཉེས་པས་མི་གོས་པར་བསྟན་པའི་ཕྱིར། རྒྱལ་བས་སོར་མོའི་ཕྲེང་བ་ཅན་སྤྲུལ་ནས་བཏུལ་བ་བཞིན་ཐབས་ཀྱི་ཆེ་བ་དབྱུང་བ་དང་། སྔགས་ལམ་པའི་གོལ་ས་དགག་པའི་ཆེད་དུ་ཐབས་ལ་མཁས་པའི་ཆོ་འཕྲུལ་རྨད་དུ་བྱུང་བའོ། ། གཉིས་པ་ནི། དེ་ནས་དེ་དག་སོགས་ཏེ། གནས་སྤར་བ་དེ་ནས་དྲེགས་པ་ཅན་དེ་དག་སྐྲག་པས་ལུས་ཤིན་ཏུ་འདར་ཞིང་། སེམས་བྲེད་པས་རབ་ཏུ་དཔའ་ཞུམ་པའི་ང་རོས། བདག་ཅག་ཁྱེད་ཀྱི་འབངས་སུ་མཆི། ངེས་པར་འབངས་སུ་མཆི། གལ་ཏེ་འབངས་སུ་ནན་ཏན་མ་བགྱིས་ན། བདག་ཅག་རྣམས་ཀྱི་མགོ་དང་ལུས་ནི་དུམ་བུ་བརྒྱར་འགས་ཤིང་། སྙིང་ཡང་ཚལ་པར་འགས་ཤིང་དུམ་བུར་གཏུབ་པར་གྱུར་ཅིག །ལུས་ཀྱང་རུལ་ཞིང་མྱགས་ལ་དམོད་ཚིག་གི་མེས་འཚིག་ནས་ཐལ་བར་བརླག་པ་དང་། ཚེ་ཕྱི་མར་ཡང་རྡོ་རྗེའི་དམྱལ་བར་ལྷུངས་ནས་འོ་དོད་འབོད་པར་ཤོག །དེ་སྐད་ཅེས་འབངས་སུ་མཆི་བར་མནའ་བོར་ནས་རང་རང་གི་ལུས་ཁྲག་འཐུང་རིགས་ལྔའི་དཀྱིལ་འཁོར་གྱི་གདན་དུ་ཕུལ་ནས་བཞག་གོ །གསུམ་པ་ནི། ཐམས་ཅད་ཀྱིས་སོགས་ཏེ། དྲེགས་པ་ཅན་ཐམས་ཅད་ཀྱིས་མགྲིན་གཅིག་ཏུ་ཡང་སྨྲས་པ། བདག་ཅག་རྣམས་ཀྱི་མཆིས་བྲང་ཆུང་མ་དང་། མ་དང་བུ་མོ་དང་། སྲིང་མོ་རྣམས་ཀྱང་ཁྲོ་བོའི་དཀྱིལ་འཁོར་ཆེན་པོར་འབུལ་བས་བཞེས་སུ་གསོལ། གང་གིས་ན་དྲེགས་པ་ཅན་འཇོམས་པའི་དཔའ་བོ་ལྷ་ཆེན་པོ་རྣམས་ཀྱི་ཡང་རྗེ་བོར་གྱུར་པ་དཔལ་ཧེ་རུ་ཀས་བཞེས་སུ་གསོལ། ཞེས་འཁོར་ཕུལ་ནས། མཆོད་པར་དམ་བཅའ་བ་ནི། བདག་ཅག་སོ་སོ་འཁོར་དང་བཅས་པ་རྣམས་ཀྱིས། འདི་ལྟར་ཞལ་མཐོང་བའི་ཁྲོ་བོའི་ཚོགས་ཀྱི་དཀྱིལ་འཁོར་ཆེན་པོ་འདིའི་མིང་ཙམ་འཛིན་པར་བྱེད་པའི་རྣལ་འབྱོར་པ་ཡང་རང་གི་གཙུག་གི་ནོར་བུ་འོད་འབར་བ་བཀུར་བ་ལྟར་སེམས་ལ་གཡོ་སྒྱུ་མེད་ཅིང་མཆོག་ཏུ་གུས་པ་དང་ལྡན་པའི་སེམས་ཀྱི་བློས་བླངས་ནས་རྣམ་པ་ཐམས་ཅད་དུ་སྤྱི་བོའི་གཙུག་ཏུ་བཞག་སྟེ་བཀུར་བསྟི་དང་རིམ་གྲོ་ཕུན་སུམ་ཚོགས་པར་བགྱི་བས། དཀྱིལ་འཁོར་གྱི་མཚན་འཆང་བ་དེའི་དགོངས་པའི་ལས་ཅི་ཡིན་ཡང་རུང་སྟེ། འདོད་པའི་རེ་བ་མ་ལུས་པ་རྫོགས་པར་བདག་ཅག་རྣམས་ཀྱིས་སྒྲུབ་བོ། །གལ་ཏེ་དཔའ་བོ་ཧེ་རུ་ཀའི་སྤྱན་སྔ་འདིར་བདག་ཅག་རྣམས་ཀྱིས་ཡལ་གམ་བཅས་པའི་ཐ་ཚིག་སྨྲས་པ་འདི་བཞིན་དུ་མ་བསྒྲུབས་ན། བདག་ཅག་རྣམས་ཀྱི་མགོ་ཚལ་པར་བཀས་ཤིང་། ལུས་དམོད་པའི་མཚོན་གྱིས་བཏུབས་ཏེ་སྙིང་ཡང་དུམ་བུར་འཐོར་ནས་རུལ་བར་མཆིའོ་ཞེས་སྨྲས་སོ། ། བཞི་པ་ནི། དེ་ནས་སོགས་ཏེ། བྲོ་བོར་བ་དེ་ནས་དྲེགས་པ་ཅན་དེ་དག་གི་ཆུང་མའི་ཚོགས་དང་། སྲིང་མོ་དང་། མ་དང་། བུ་མོའི་ཚོགས་ཐམས་ཅད་སྔར་བཀྱེ་བ་ལས་སླར་ཡང་དཀྱིལ་འཁོར་གྱི་དྲུང་དུ་ཡུད་ཙམ་གྱིས་འོངས་ནས། དེ་དག་ཐམས་ཅད་ཀྱིས་མགྲིན་གཅིག་ཏུ་སྨྲས་པ། བདག་ཅག་དབང་མོ་འཁོར་གྱི་ཚོགས་དང་བཅས་པ་ཐམས་ཅད་ཀུན་གཡུལ་ལས་རྣམ་པར་རྒྱལ་བའི་དཔའ་བོ་ཆེན་པོའི་འབངས་སུ་མཆི་བར་བགྱི་ན་དཔའ་བོ་ཆེན་པོས་བདག་ཅག་རྣམས་ལ། ཕྲིན་ལས་རྣམ་པ་བཞི་ལས་འདི་དང་འདི་གྱིས་ཤིག་ཅེས་ལས་གང་བྱེད་ཀྱི་བཀའི་བསྒོ་བ་སྐལ་བ་དང་མཐུན་པའི་དངོས་གྲུབ་སྩལ་དུ་གསོལ་ཞེས་སྨྲས་སོ། །ཅི་བགྱི་ཞུས་པ་དེ་ནས་བཅོམ་ལྡན་དགྱེས་པ་ཆེན་པོས་དེ་རྣམས་ཀྱི་ལག་ཏུ་རྡོ་རྗེ་བྱིན་ནས། རྡོ་རྗེ་མིའི་སྲིན་མོ་སོགས་རང་རང་དང་མཐུན་པའི་མིང་གི་དབང་བསྐུར་ཏེ། དཀྱིལ་འཁོར་ཆེན་པོའི་གསེར་ཁྱམས་ཀྱི་ཕྱི་རོལ་དུ་ཁྲག་ཁྱམས་ལ་སོ་སོའི་ལས་བསྐོས་པའི་ཕྱོགས་ཀྱི་རིམ་པ་ཇི་ལྟ་བར་བཀོད་དོ། ། གཉིས་པ་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉེར་གཉིས་ཡོད་པ་ལས། འདིས་ཁྲོ་བོ་རང་བཞིན་འབྲས་བུ་མཐར་ཕྱིན་གྱི་དཀྱིལ་འཁོར་གྱི་སྤྲིན་རྣམ་པར་སྤྲོས་པའི་ལེའུ་སྟེ་བཅོ་ལྔ་པའོ།། །། ལེའུ་བཅུ་དྲུག་པའི་འགྲེལ་པ།ལེའུ་བཅུ་དྲུག་པ་ལ་གསུམ་སྟེ། ལོ་རྒྱུས་དང་། གཞུང་དང་། མཚན་ནོ། །དང་པོ་ནི། དེ་ནས་སོགས་ཏེ། རང་བཞིན་གྱི་དཀྱིལ་འཁོར་བསྟན་པ་དེ་ནས་གསུང་སྔགས་ཀྱི་དཀྱིལ་འཁོར་སྟོན་པའི་ཕྱིར་བཅོམ་ལྡན་འདས་དགྱེས་པ་ཆེན་པོས་ཁྲོ་བོའི་དཀྱིལ་འཁོར་གྱི་ཚོགས་ཆེན་པོ་སྔར་བསྟན་པ་འདི་དག་གསུང་སྔགས་ཀྱི་དམ་ཚིག་གིས་འགྲུབ་པར་བྱ་བའི་ཕྱིར། དེ་བཞིན་གཤེགས་པ་ཁྲོ་བོ་ཁྲག་འཐུང་ཆེན་པོ་རིགས་ལྔ་རང་རང་གི་བཙུན་མོ་དང་བཅས་པའི་ཚོགས་དེ་དག་གི་སྐུ་དང་གསུང་དང་ཐུགས་དབྱེར་མི་ཕྱེད་པའི་རྡོ་རྗེའི་བདག་ཉིད་རང་བྱུང་གི་ཡེ་ཤེས་རང་ཤར་བའི་སྔགས་ཀྱི་ང་རོ་རྔམ་པ་ལས་ལྷག་ཏིང་གསུང་གི་དཀྱིལ་འཁོར་གསང་སྔགས་འདི་དག་ཕྱུང་ངོ་། ། གཉིས་པ་གཞུང་ལ་གཉིས་ཏེ། གསུང་གི་དཀྱིལ་འཁོར་དང་། དེའི་ཡོན་ཏན་ནོ། །དང་པོ་གསུང་གི་དཀྱིལ་འཁོར་གྱི་སྐབས་འདིར་ཁྲོ་བོའི་ཕྲིན་ལས་སྒོམ་རིམ་གྱི་སྡེབས་ཅུང་ཟད་བརྗོད་པར་བྱ་སྟེ། དེ་ལ་སྔོན་འགྲོ། དངོས་གཞི། རྗེས་ཀྱི་རིམ་པ་དང་གསུམ་གྱི། སྔོན་འགྲོ་ལ་ཆོས་བདུན་ཞི་བ་དང་འདྲ་བ་ལས་ཁྱད་པར་ཁྲོ་བོའི་མཚམས་གཅོད་ལ་ཁྲོ་བཅུ་རོལ་པ་མཛད་དོ། ། གཉིས་པ་དངོས་གཞི་ལ་གཉིས་ལས། དང་པོ་ཁྱད་པར་གྱི་སྦྱོར་བ་སེམས་བསྐྱེད་པ་ནི། འཛིན་པའི་དབང་གིས་སྡུག་བསྔལ་ཞིང་། །ཞེས་སོགས། ཏིང་ངེ་འཛིན་གྱི་དགོས་ཆེད་བསྟན་པའི་སྒོ་ནས་སོ། །གཉིས་པ་ཏིང་ངེ་འཛིན་གྱི་རིམ་པ་དངོས་ལ་གསུམ་སྟེ། ཏིང་ངེ་འཛིན་གསུམ་གྱིས་ཁོག་དབུབ་པ། རྟེན་དང་བརྟེན་པའི་དཀྱིལ་འཁོར་བསྐྱེད་པ། ལས་ཀྱི་རིམ་པའི་ཏིང་ངེ་འཛིན་ནོ། །དང་པོ་ནི། སྒྲུབ་ཐབས་ལྟར་དེ་ཏིང་དང་ཀུན་སྣང་སྔོན་དུ་འགྲོ་བས། རྒྱུ་ཏིང་ནི། རང་རིག་ཧཱུཾ་ལས་ཆོ་ག་གསུམ་གྱིས་རྒྱུའི་ཧེ་རུ་ཀ་སྨུག་ནག་ཅིར་ཡང་འགྱུར་བར་བསྐྱེད། གཉིས་པ་ལ། རྒྱུའི་ཧེ་རུ་ཀའི་ཐུགས་ཀ་ནས་ས་བོན་སྤྲོས་ཏེ་གཞི་དབང་ཆེན་གྱི་དཀྱིལ་འཁོར་གཞལ་ཡས་ཁང་གདན་དང་བཅས་པར་བསྒོམས་ལ། ལེའུ་བཅུ་བདུན་པ་ལྟར་ཚིག་གིས་གསལ་གདབ། དེ་ནས་བདག་ཉིད་ཡེ་ནས་སངས་རྒྱས་ཡིན་པའི་ཕྱིར་བདག་གི་སྲས་སུ་དེ་བཞིན་གཤེགས་པ་བྱ་བ་བདག་སྲས་ཀྱི་ཆོ་ག་ནི། ལེའུ་བཅོ་ལྔ་པ་ལྟར་ངོ་མཚར་ཚོགས་ཀྱི་ལྷ་སུམ་ཅུ་བསྐྱེད། རིགས་མི་ནུབ་ཅིང་ལྷུན་གྱིས་གྲུབ་པར་བྱ་བའི་ཕྱིར་དེ་བཞིན་གཤེགས་པའི་སྲས་སུ་བདག་བྱ་བ་གཞན་སྲས་ཀྱི་ཆོ་ག་ནི། བདག་གཙོ་བོའི་ཐུགས་ཀ་ནས་འཐོན་ཏེ་བསྐུལ་བས། ལྷ་ཚོགས་རྣམས་ལ་ཐབས་ཤེས་གཉིས་སུ་མེད་པའི་འོད་ཟེར་སྤྲོས་པས་བདག་གི་ལུས་རྟོག་སྦྱངས་ཏེ་འོད་ཀྱི་གོང་བུར་གྱུར་པ་ལ། སླར་ཡང་རྡོ་རྗེ་གསུམ་གྱི་འོད་ཟེར་བསྟིམ་པས་ཡི་གེ་འབྲུ་གསུམ་དུ་གྱུར་པ་རིམ་བཞིན་ཧཱུཾ་ལ་བསྡུས་པ་དེ་ཉིད་ཟླ་བ་ལ་གནས་པ་རླུང་དཀྱིལ་གྱིས་བཏེགས་ཏེ། དཀྱིལ་འཁོར་གྱི་ལྷ་ཚོགས་རྣམས་ལ་གཡས་སུ་བསྐོར་ནས་གཙོ་བོའི་ཐུགས་ཀར་ཐིམ། བྱང་ཆུབ་ཀྱི་སེམས་སུ་ཞུ་བ་སྐུའི་དབྱིབས་བརྒྱུད་ཡུམ་གྱི་མཁར་སོན་པའི་རྐྱེན་གྱིས་གཙོ་བོ་ཡབ་ཡུམ་ཡང་བདེ་བ་ཆེན་པོའི་ངོ་བོར་ཞུ་ཞིང་། ཧཱུཾ་ཧ་ཧེ་ཕཊ་ཅེས་པས་འཁོར་རྣམས་ཀྱང་དབུས་ཀྱི་ཐིག་ལེར་བསྡུས་ནས་འོད་ཀྱི་གོང་བུར་བསམ་པ་ནི་བདག་དོན་ཆོས་སྐུའི་ཏིང་ངེ་འཛིན་གྱིས་སྣང་བའི་ཞེན་པ་སྦྱོང་བའོ། །དེ་ནས་ཧཱུཾ་ཧཱུཾ་ཞེས་པའི་སྒྲ་གདངས་ཡིད་ལ་དྲན་པ་ཙམ་གྱིས་འོད་ཕུང་དེ་ཧཱུཾ་ཡིག་ཟུང་དུ་གྱུར་པ་ལས་ཆོ་ག་གསུམ་གྱིས་གཙོ་བོ་བཛྲ་ཧེ་རུ་ཀ་ཡབ་ཡུམ་བསྐྱེད་ནས་དབང་བསྐུར་ཞིང་བྱིན་གྱིས་བརླབ། དེ་ནས་མཁའ་གསང་བརླབ་པ་སོགས་བྱས་ཏེ་ཡུམ་གྱི་མཁར་བྱང་ཆུབ་ཀྱི་སེམས་ལྷའི་ས་བོན་ཡིག་འབྲུའི་དཀྱིལ་འཁོར་དུ་བཞུགས་པ། ལེའུ་འདིར་བཤད་པའི་སྔགས་ཀྱིས་བསྐྱེད་ནས་ངོ་མཚར་ཚོགས་ཀྱི་ལྷ་སུམ་ཅུ་ཡུམ་གྱི་མཁའ་ལས་ཕཊ་ཛཿཞེས་པས་ཕྱིར་བཏོན་ལ། སྤྲོ་བསྡུས་སངས་རྒྱས་ཀྱི་མཛད་པ་བསྒྲུབས་ཏེ་གཙོ་བོ་རང་ལ་བསྟིམ་ཞིང་འཁོར་རྣམས་སོ་སོའི་གནས་སུ་བཀོད། དབང་མོ་ཉེར་བརྒྱད་པོ་གཙོ་བོའི་ཐུགས་ཀ་ནས་བྷྱོ་ཉེར་བརྒྱད་སོ་སོའི་གནས་སུ་སྤྲོས་པ་ལས། མ་ནུ་རཀྵ་སཱི་བྷྱོ་སོགས་སྐྱེད་སྔགས་ཀྱིས་ཁྲག་ཁྱམས་སུ་བསྐྱེད་ཅིང་། ལེའུ་བཅུ་བདུན་པ་བཞིན་དུ་ཚིག་གིས་གསལ་གདབ་པ་རྣམས་ནི་གཞན་དོན་གཟུགས་སྐུའི་ཏིང་ངེ་འཛིན་གྱིས་སྟོང་པའི་འཛིན་པ་སྦྱོང་བའོ། །གསུམ་པ་ལས་ཀྱི་རིམ་པའི་ཏིང་ངེ་འཛིན་ནི། སྤྱན་དྲང་བ་ནས་བརྩམས་ཏེ་ཛཔ྄་བཟླ་བའི་བར་ས་བཅད་དྲུག་དང་། གསུམ་པ་རྗེས་ཀྱི་རིམ་པ་ལའང་ཚོགས་མཆོད་སོགས་ས་བཅད་ལྔ་སྟེ་སྒྲུབ་ཐབས་ལྟར་ཤེས་པར་བྱའོ། ། ད་ནི་དཀྱུས་ལ་འཇུག་སྟེ། གསུང་གི་དཀྱིལ་འཁོར་ལ་གཉིས་ཏེ། དམ་ཚིག་གི་དཀྱིལ་འཁོར་སྐྱེད་པའི་སྔགས་དང་། ཡེ་ཤེས་ཀྱི་དཀྱིལ་འཁོར་སྤྱན་དྲང་བ་སོགས་ལས་ཀྱི་རིམ་པའི་སྔགས་སོ། །དང་པོ་ལ་གསུམ་སྟེ་རིགས་ལྔ་ཡབ་ཡུམ་བཅུའི་དང་། ཁྲོ་མོ་ཉི་ཤུའི་རྩ་བསྐྱེད་ལས་སྔགས་དང་བཅས་པ། དབང་མོ་རྣམས་ཀྱི་རྩ་བའི་སྔགས་སོ། །དང་པོ་ནི། ༀ་བཛྲ་མ་ཧཱ་སོགས་ཏེ། སྔར་གྱི་དཔེ་རྒྱུན་རྣམས་སུ་བུདྡྷ་ཧེ་རུ་ཀའི་སྔགས་ཐོག་མར་འབྱུང་ཡང་། རྒྱ་དཔེར་བཛྲ་ཧེ་རུ་ཀ་ཉིད་དང་པོར་ཡོད་ཅེས་གསུང་ཞིང་ཐར་ལོ་འགྱུར་དུའང་དེ་ལྟར་འབྱུང་ངོ་། །དེ་ལ་སྔགས་ཀྱི་འགོ་འདྲེན་ༀ་རྣམས་ནི་ཡེ་ཤེས་ལྔའམ་རྡོ་རྗེ་གསུམ་གྱི་བདག་ཉིད་རབ་བསྔགས་ཀྱི་ས་བོན་ནོ། །བཛྲ་རྡོ་རྗེ། སརྦ་ཏ་ཐཱ་ག་ཏ་དེ་བཞིན་གཤེགས་པ་ཐམས་ཅད། རཏྣ་རིན་པོ་ཆེ། པདྨ་སྐད་སོར་བཞག །ཀརྨ་ལས་ཏེ་ཡབ་ལྔའི་རིགས་སོ་སོའི་མཚན། མ་ཧཱ་ཤྲཱི་ཧེ་རུ་ཀ་ཞེས་པ་ནི་སྤྱིའི་མཚན་སྔགས་བོད་པ་སྟེ། མ་ཧཱ་ཆེན་པོ། ཤྲཱི་དཔལ། ཧེ་ནི་ཧེ་ལ་སྟེ་སྤྱོད་ཅིང་རྩེན་པ། རུ་ནི་རུ་དྷི་ར་ཏེ་ཁྲག །ཀ་ནི་བདག་པོའི་སྒྲ་སྟེ་ཁྲག་ལ་རོལ་བའི་དོན་གྱིས་ཁྲག་འཐུང་ངོ་། །དེ་དག་ནི་སྙིང་པོ་སྐྱེད་པའི་སྔགས་སོ། །མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ་ཅེས་པ་ནི་ལས་ལ་བསྐུལ་བའི་སྔགས་ཏེ། མ་ཧཱ་ཙཎྜ་ནི་གཏུམ་པོ་ཆེན་པོ། སརྦ་དུཥྚ་ནི་གདུག་པ་ཅན་ཐམས་ཅད། ཨནྟ་ཀ་ནི་མཐར་བྱེད་པ། ཧ་ན་བསྣུན་པ། ད་ཧ་སྲེག་པ། པ་ཙ་འཚེད་པ། ཧཱུཾ་གསུམ་གྱི་དང་པོ་རྩ་བའི་ས་བོན། གཉིས་པ་ཐུགས་བསྐུལ་བའི་ས་བོན། གསུམ་པ་ནི་བསྡིགས་པར་མཛོད། ཕཊ་ནི་བཀས་པར་གྱིས་ཞེས་ལས་ལ་བསྐུལ་བའི་སྔགས་ཏེ། རབ་བསྔགས་རྡོ་རྗེ་སོགས་རིགས་གང་ཡིན་གྱི་དཔལ་ཁྲག་འཐུང་ཆེན་པོ་ཞེས་བོས་ནས། གཏུམ་པོ་ཆེན་པོ་གདུག་པ་ཅན་ཐམས་ཅད་མཐར་བྱེད་པས་བསྣུན་ཅིག །སྲེགས་ཤིག །ཚོས་ཤིག །སྡིགས་ཤིག །བཀས་པར་མཛོད་ཅིག་པའོ། །ཡུམ་ལྔའི་སྔགས་ནི། བཛྲ་སརྦ་ཏ་ཐཱ་ག་ཏ་རཏྣ་པདྨ་རྣམས་སྔར་ལྟར་དང་། སརྦ་ཨ་མོ་གྷ་ཐམས་ཅད་དོན་ཡོད་པ་སྟེ་རིགས་ཀྱི་མཚན་ནོ། །མ་ཧཱ་ཀྲོ་དྷི་ཤྭ་རཱི་རྣམས་ནི་ཁྲོ་མོ་དབང་ཕྱུག་མ་ཆེན་མོ། ཐོག་མཐའི་ༀ་དང་ཕཊ་སྔར་བཞིན། ཧཱུཾ་རྩ་བའི་ས་བོན། ཁྱད་པར་དུ་དྷཱ་ར་འཆང་བ། ཛྭ་ལི་ནཱི་འབར་བ་མ། སརྦ་དུཥྚན་གདུག་པ་ཅན་ཐམས་ཅད་ལ། མ་ཧཱ་སཱུརྱ་ཉི་མ་ཆེན་མོ། བི་ད་མ་རིག་མ། ཧྲཱི་ཤྲུ་ཏ་ས་མ་ཏ་ཀུན་ཏུ་རྒོད་པ། ཁཱ་ཧི་ཟོ་ཞིག །བི་ཤྭ་སྣ་ཚོགས་སོ། ། གཉིས་པ་ལ་གསུམ་སྟེ། གནས་མ་བརྒྱད་ཀྱི། ཡུལ་མ་བརྒྱད་ཀྱི། སྒོ་སྐྱོང་བཞིའི་སྔགས་སོ། །དང་པོ་ནི། ༀ་བཛྲ་གཽ་རཱི་སོགས་ཏེ། ༀ་རབ་སྔགས། བཛྲ་རྣམས་ནི་རྡོ་རྗེ་སྟེ་དབང་རྟགས་མཚོན་པའོ། །མཇུག་གི་ཧ་བརྒྱད་ནི། རྩ་བའི་ས་བོན། བྱེ་བྲག་གཽ་རཱི་དཀར་མོའམ་མཛོད་ལྡན་མ། ཙཽ་རཱི་ཆོམ་རྐུན་མའམ་རྐུན་མོ། པྲ་མོ་ཧེ་རབ་རྨོངས་མའམ་རྨོངས་མོ། བེ་ཏ་ལཱི་རོ་ལངས་མའམ་ཐལ་བྱེད་མ། ཙཎྜ་ལཱི་གཏུམ་མོ། པུཀྐ་སཱི་སྦོས་མོ། གྷསྨ་རཱི་སྨེ་ཤ་ཅན་ནམ་དྲོད་མོ། སྨ་ཤ་ནཱི་དུར་ཁྲོད་མའམ་མ་ཚོགས་མའོ། །གཉིས་པ་ནི། ༀ་བཛྲ་སིཾ་ཧ་སོགས་ཏེ། ༀ་དང་བཛྲ་འདྲ། མཇུག་གི་ཧེ་བརྒྱད་རྩ་བའི་ས་བོན། སིངྷ་མུ་ཁཱི་སེང་གདོང་མ། བྱཱ་གྷྲྀ་མུ་ཁཱི་སྟག་གདོང་མ། ཤྲཱི་གཱ་ལ་མུ་ཁཱི་ཝ་གདོང་མ། ཤྭ་ན་མུ་ཁཱི་ཁྱི་གདོང་མའམ་སྤྱང་གདོང་མ། གྲྀདྡྷ་མུ་ཁཱི་བྱ་རྒོད་གདོང་མའམ་བཞད་གདོང་མ། ཀངྐ་མུ་ཁཱི་ཀངྐའི་གདོང་མའམ་དུར་བྱའི་གདོང་མ། ཀཱ་ཀ་མུ་ཁཱི་ཁྭ་གདོང་མའམ་བྱ་རོག་གདོང་མ། ཨུ་ལཱུ་ཀ་མུ་ཁཱི་འུག་གདོང་མའོ། །གསུམ་པ་ནི། ༀ་བཛྲ་ཨཱཪྻ་སོགས་ཏེ། ༀ་དང་བཛྲ་འདྲ། ཨཱཪྻ་ཏེ་ཛ་ཏེ་ང་འཕགས་མ་སྲིང་འགྲོ་མའམ་རིང་འགྲོ་མ། ཨ་མུ་ཁེ་གདོང་མོའམ་དོན་ཡོད་མ། ལོ་ཀ་འཇིག་རྟེན་མ། བྷསྨི་པ་ལ་ཡ་བ་ཏུ་ཐལ་བར་བྱེད་མ། མཇུག་གི་ཛཿཧཱུཾ་བཾ་ཧོཿབཞི་ནི་ས་བོན་ནོ། ། གསུམ་པ་དབང་མོའི་རྩ་སྔགས་ནི། བྷྱོ་དྲུག་ཚན་བཞི། བཞི་ཚན་གཅིག་སྟེ་ཉེར་བརྒྱད་ནི། མ་མོའི་ཚོགས་ཀྱི་དོན་དང་། སྙིང་པོའང་ཡིན་ལ། འབོད་པ་དང་བསྐུལ་བའང་ཡིན་ནོ། །རྣམ་པ་གཅིག་ཏུ་ན། བྷ་གི་ནཱི་སྲིང་མོ་དང་། བྷཪྻཱ་ཆུང་མ་ལ་འཇུག་པའི་སྒྲ་བསྡུས་པའམ། མན་ངག་སྙེ་མར། འཇིགས་པར་བྱེད་པའི་དོན་ལ་བཤད་པ་ལྟར་ན་འཇིགས་བྱེད་མ་ཞེས་བོད་པའོ། །སྐྱེད་སྔགས་ནི་མ་ནུ་རཀྵ་སཱི་བྷྱོ་སོགས་བཤད་རྒྱུད་མེ་ལོང་ལས་གསུངས་པ་ལྟར་རོ། ། གཉིས་པ་ལས་ཀྱི་རིམ་པའི་སྔགས་ལ་གསུམ་སྟེ། དབབ་ཅིང་དྲང་བའི་སྔགས། མེ་ཏོག་དོར་ཞིང་དངོས་གྲུབ་སྐུལ་བའི་ཚིག་སྔགས། དྲིན་ལན་དུ་མཆོད་ཅིང་བརྟན་པའི་སྔགས་སོ། །དང་པོ་ནི། ༀ་རུ་ལུ་རུ་ལུ་ཧཱུཾ་ཞེས་པ་སྙན་གསན་དབབ་པའི་སྔགས་ཏེ། སྤྱིར་རུ་ནི་རུ་ཛའི་སྒྲ་ལས་འཇིག་པར་གྱིས། ལུ་ནི་ལུ་ཉའི་སྒྲས་གཅོད་པ། ཧཱུཾ་ནི་བསྡིགས་པ་སྟེ། སྔགས་ཀྱི་ལྷ་བཅོམ་ལྡན་འདས་ཀྱིས་འཇིག་ཅིང་ཆོད་ལ་བསྡིགས་པར་མཛོད་ཅེས་པས་གདུལ་བྱ་གདུག་པ་ཅན་གྱི་ངོར་ཆོས་ཀྱི་སྐུ་ལས་འཇིགས་བྱེད་ཆེན་པོར་བཞེངས་པར་མཛོད་ཅེས་བསྐུལ་བའོ། །ཁྱད་པར་བ་ནི་རུ་ལུའི་བྱེ་བྲག་བཅུ་ལས་སྤྱན་དྲང་བར་ཤེས་པའི་སྐབས་ཏེ། སྔོན་ལས་ཀྱི་སྲིན་པོའི་དམ་ཚིག་གི་གདུག་པའི་གླུ་དཔལ་ཆེན་པོས་བྱིན་གྱིས་བརླབས་པའོ། །ཨེ་ཧྱེ་ཧི་ཨཱ་ན་ཡ་ཛཿཧཱུཾ་བཾ་ཧོཿཞེས་པ་ནི་སྤྱན་དྲང་བའི་སྔགས་ཏེ། ཨེ་ཧྱེ་ཧི་ཚུར་སྤྱོན་ཚུར་སྤྱོན། ཨཱ་ན་ཡ་དགུག་པའོ། །ཛ་ཧཱུཾ་བཾ་ཧོཿཚད་མེད་བཞིས་འགྲོ་དོན་ལ་བསྐུལ་བའོ། །རཾ་ནི་དམ་ཡེ་གཉིས་མེ་རི་འདབ་འབྱོར་ཙམ་དུ་བཞུགས་པའོ། ། གཉིས་པ་ནི། ༀ་བཛྲ་ཀྲོ་དྷ་ས་མ་ཡ་ཧཱུཾ་ནི་མེ་ཏོག་དོར་བ་སྟེ། ༀ་རབ་བསྔགས། བཛྲ་ཀྲོ་དྷ་རྡོ་རྗེ་ཁྲོ་བོ། ས་མ་ཡ་དམ་ཚིག །ཧཱུཾ་བསྡུས་ཤིག་པའོ། །ༀ། ཁྲོ་ལ་སོགས་ནི་དངོས་གྲུབ་བསྐུལ་བ་སྟེ། ༀ་ནི་གླུའི་འགོ་འདྲེན། གདུལ་བྱ་ཁྲོ་ལ་འདུལ་བྱེད་ཁྲོས་པར་སྣང་བའི་རྒྱུད་ཞི་བར་མཛད་པ་ཐུགས་རྗེ་ངང་གིས་ཁྲོ་བར་བསྟན་པས་འགྲོ་བའི་དཔལ་མགོན་འཇིགས་བྱེད་ཆེན་པོ་རྔམས་པའི་ཚོགས་ཁྲག་འཐུང་འབར་བའི་དཀྱིལ་འཁོར་སྐུ་གསུང་ཐུགས་ཡོན་ཏན་ཕྲིན་ལས་ལྔའི་བྱིན་རླབས་གཞན་ལས་ཆེས་ཆེ་བའི་རྨད་པོ་ཆེ་སྟེ། དེ་ཉིད་དུས་ད་ལྟ་ཉིད་དུ་འདིར་ནི་བདག་ལ་སྩོལ་བར་མཛོད་ཅིག་པའོ། །ༀ་བཛྲ་ཀྲོ་དྷ་གསུམ་ནི་སྔར་ལྟར་དང་། ས་མ་ཡ་དམ་ཚིག་གམ་དུས་ལ། སྟྭཾ་ཁྱོད་ཅེས་བོད་པའམ་བབ་བོ། །ཕཊ་སྤྲོས་ཤིགག །ཧོཿམཉེས་པར་མཛོད་ཅེས་པ་སྟེ། མཆོག་སྟེར་རྡོ་རྗེ་ཁྲོ་བོའི་དམ་ཚིག་ཁྱོད། དམ་ཚིག་སྤྲོས་ཤིག །དམ་ཚིག་གིས་དགྱེས་པར་མཛོད་ཅེས་སོ། ། གསུམ་པ་ནི། ཨ་ལི་སོགས་ཏེ་ཨ་བ་བྷྲཾ་ཤའི་སྐད་ཡིན་ཞེས་གསུང་། དེ་ལ་ཨ་ལི་ནི་ཆང་སྟེ་བཏུང་བ། ཨུ་ལི་ནི་ཤ་སྟེ་བཟའ་བ། ཏཱ་ལི་ཏ་པ་ལི་འབྲུ་འབྲས་སོགས་དམ་ཚིག་གི་རྫས་སྣ་ཚོགས། དཾཥྚཱ་ཞལ་མཆེ་བ་བགྲད་པ། གོ་ནཱ་རྡོ་རྗེ། རཽ་དྲི་ཁྲོ་བའམ་དྲག་པོ། ཁ་རཾ་སྟོབ་པ་སྟེ། རྡོ་རྗེ་ཁྲོ་བོ་མཆེ་བ་བགྲད་པའི་ཞལ་དུ་སྟོབ་བོ་ཞེས་པའོ། །ཡོ་གི་ནི་རྣལ་འབྱོར་མ། ཁཱ་ཧི་གསོལ་ཅིག །ཧོཿམཆོད་པ་སྟོབ་པ་སྟེ། འཁོར་གྱི་རྣལ་འབྱོར་མ་རྣམས་ལ་སྟོབ་པའོ། །ཧཱུཾ་ཧ་ཧེ་ཕཊ་ནི་དམ་ཡེ་གཉིས་མེད་དུ་གྱུར་ནས་གསལ་ཞིང་བརྟན་པར་བྱས་པའོ། ། གཉིས་པ་ཡོན་ཏན་ནི། ཅེས་བརྗོད་པས་སོགས་ཏེ། དེ་སྐད་ཅེས་གསུང་གསང་སྔགས་བརྗོད་པའི་མཐུ་བྱིན་གྱིས་འཇིག་རྟེན་དྲུག་གི་ཕྱོགས་བཅུའི་འགྲོ་བ་ཐམས་ཅད་ཀྱི་ལུས་སྣང་བའི་རྟོག་ཚོགས་ཐམས་ཅད་ཚིག །ངག་གྲགས་པའི་རྟོག་ཚོགས་རབ་ཏུ་ཚིག །སེམས་སྒྲིབ་པའི་རྟོག་ཚོགས་ཀུན་ཏུ་ཚིག་གོ །དེ་ལྟར་ཚིག་པས་སྣང་བ་ལྷའི་དཀྱིལ་འཁོར་དུ་འབར། གྲགས་པ་སྔགས་ཀྱི་དཀྱིལ་འཁོར་དུ་རབ་ཏུ་འབར། དྲན་རིག་ཐུགས་ཡེ་ཤེས་ཀྱི་དཀྱིལ་འཁོར་དུ་ཀུན་ཏུ་འབར་རོ། །དེའི་ཚེ་ནམ་མཁས་གར་ཁྱབ་ཐམས་ཅད་དུ་འབར་བའི་དཀྱིལ་འཁོར་གྱི་ཚོགས་ཀྱི་སྐུས་གང་། གསུང་གིས་ཁྱབ་པར་རབ་ཏུ་གང་། ཐུགས་གཉིས་སུ་མེད་པའི་ཡེ་ཤེས་ཀྱིས་ཀུན་ཏུ་ཁྱབ་ཅིང་གང་བར་གྱུར་ཏོ། ། གསུམ་པ་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉེར་གཉིས་ཡོད་པ་ལས། འདིས་ཁྲོ་བོའི་ཚོགས་ཆེན་པོའི་ལྷག་ཏིང་གསུང་གི་དཀྱིལ་འཁོར་སྤྲོས་པའི་ལེའུ་སྟེ་བཅུ་དྲུག་པའོ།། །། ལེའུ་བཅུ་བདུན་པའི་འགྲེལ་པ།ལེའུ་བཅུ་བདུན་པ་ལ་གསུམ་སྟེ། ལོ་རྒྱུས་དང་། གཞུང་དང་། མཚན་ནོ། །དང་པོ་ནི། དེ་ནས་སོགས་ཏེ། གསུང་གི་དཀྱིལ་འཁོར་བསྟན་པ་དེ་ནས་ལྷག་པ་སྐུ་དང་ཐུགས་ཀྱི་དཀྱིལ་འཁོར་སྟོན་པའི་ཕྱིར་བཅོམ་ལྡན་འདས་དགྱེས་པ་ཆེན་པོས་ཁྲོ་བོའི་སྤྲིན་གསང་སྔགས་དང་བཅས་པ་དེ་དག་གིས་བསྐྱེད་པའི་དཀྱིལ་འཁོར་གྱི་རྣམ་པ་གསལ་བར་བསྟན་པའི་ཕྱིར་ཆེད་དུ་བརྗོད་པ་འདི་བརྗོད་དོ། ། གཉིས་པ་གཞུང་ལ་གཉིས་ཏེ། སྐུའི་དཀྱིལ་འཁོར་དང་། དེའི་ཡོན་ཏན་ནོ། །དང་པོ་ལ་གཉིས་ཏེ། རྟེན་གཞལ་ཡས་ཁང་དང་། བརྟེན་པ་ལྷའོ། །དང་པོ་ལའང་གཉིས་ཏེ། ངོ་བོ་རྒྱན་དང་བཅས་པ་དང་། གདན་བསྟན་པའོ། །དང་པོ་ནི། འབར་བའི་འཁོར་ལོ་སོགས་རྐང་པ་དྲུག་སྟེ། འོག་གཞི་ཚད་མེད་པའི་འཁོར་ལོའི་ལྟེ་བ་ལ་རྫོགས་པའི་ཡེ་ཤེས་རིན་པོ་ཆེའི་རང་བཞིན་བྷཉྫ་འབར་བའི་གཞལ་ཡས་ཁང་གི་དབུས་སུ་ཡེ་ཤེས་ལྔའི་འཁོར་ལོ་རྩིབས་བཞི་ལྟེ་བ་དང་བཅས་པ། དེའི་ཕྱིར་བདེན་བཞི་མཚོན་པའི་གྲུ་ཆད་བཞི་ནི་རྣམ་པར་བརྒྱན་ཅིང་། ཆེ་བའི་ཡོན་ཏན་རྒྱས་པས་དབྱིབས་གྲུ་བཞི་པ། རྣམ་ཐར་བཞིའི་སྒོ་བཞི་སྒོ་ཁྱུད་ཅན་བཞི་དང་ལྡན་པ། བདེན་གཉིས་མཚོན་པའི་འབར་བའི་བར་ཁྱམས་ནང་མ་གསེར་ཁྱམས་དང་། ཕྱི་མ་ཁྲག་ཁྱམས་གཉིས་ཀྱིས་མཛེས་ཤིང་། ཐོད་པ་སྐམ་རློན་རྙིང་གསུམ་གྱི་རྩིག་པ་ཕྱི་མ་རིམ་པ་ལྔ་དང་། ནང་མ་གསུམ་པ། ཐམས་ཅད་ཀྱང་རཀྟས་སྤྱིན་ཐབས་སུ་སྦྱར་ཞིང་གནམ་ལྕགས་ཀྱི་གཟེར་བུས་བཏབ་པ། རྩིག་སྟེང་ཐོད་པ་སྣ་ཚོགས་ཀྱི་ཕ་གུ་འཕྱར་བ་ལས་རྒྱུ་མ་དང་སྙིང་གི་མགུལ་འཁོར་དང་། བྲེ་ཕུལ་གྱི་སྣམ་བུར་སྦྲུལ་སྦྲམ་དང་ཐོད་ཕྲེང་གི་དྲྭ་བ་དང་དྲྭ་བ་ཕྱེད་པ། རྐང་ལག་གི་ཤར་བུ། སྒལ་རྩིབ་ཀྱི་མདའ་ཡབ། རིམ་པ་གཉིས་ཀའི་རྩིག་པའི་འགྲམ་དུ་འདོད་པའི་སྣམ་བུ་དང་། སྒོ་ཕྱི་མ་ལ་རྒྱུ་འབྲས་ཀྱི་རྟ་བབས་སོགས་འཇིགས་པའི་རྒྱན་སྣ་ཚོགས་ཀྱིས་བཀྲ་བ། སྟེང་ཞིང་ལྤགས་ཀྱི་ཐོག་ཕུབས་ཉི་མ་དང་ཟླ་བའི་མཐོངས་དཀར་དང་བཅས་པའི་དབུས་ཕྱུར་བུ་ལྷ་ཆེན་གྱི་ཐོད་པས་ཕུབ་པའི་རྩེ་མོར་ཙིཏྟའི་ཏོག་གིས་བརྗིད་པ། ཕྱི་རོལ་དུ་རཱུ་ཏྲ་ལོངས་སྤྱོད་དང་བཅས་པ་དབྱིངས་སུ་བསྒྲལ་བའི་དུར་ཁྲོད་བརྒྱད་ཀྱིས་ཡོངས་སུ་བསྐོར་ཞིང་། འབར་བའི་མེ་དཔུང་མེའི་ཚྭ་ཚྭ་འཕྲོ་བའི་ཀློང་ནས་ཁྲོ་ཆུང་མང་པོ་འཕྲོ་ཞིང་འཁྲུག་པས་མཛེས་པའོ། ། གཉིས་པ་ནི། ཁྱུ་མཆོག་སོགས་རྐང་པ་གསུམ་སྟེ། དབུས་ཀྱི་ལྟེ་བ་དང་རྩིབས་བཞིར་པདྨ་དང་ཉི་ཟླ་བརྩེགས་པའི་སྟེང་དུ། གཏི་མུག་གནས་སུ་དག་པའི་རྟགས་སུ་ཤར་རྩིབས་ལ་ཁྱུ་མཆོག་དང་། ང་རྒྱལ་དག་པ་ལྷོར་མ་ཧེ་དང་། འདོད་ཆགས་དག་པ་ནུབ་ཏུ་གཟིག་དང་། ཕྲག་དོག་དག་པ་བྱང་དུ་སྟག་དང་། ཞེ་སྡང་དག་པ་དབུས་སུ་གཏུམ་པོ་དོམ་རྣམས་ཟུང་གི་སྤར་བས་ནི་དྲེགས་པ་ཟིལ་གནོན་གྱི་གདན་དབུས་སུ་དབང་ཕྱུག་དང་ལྷ་ཆེན་པོ་དྲག་པོ་ལ་སོགས་པས་ཤར་དུ་དྲི་ཟ། ལྷོར་གཤིན་རྗེ། ནུབ་ཏུ་སྲིན་པོ། བྱང་དུ་གནོད་སྦྱིན་རྣམས་ཕོ་མོ་ཁ་བུབ་གན་རྒྱལ་དུ་བསྣོལ་བའི་སོག་སྦྲག་དང་ནུ་སྦྲག་ནས་ལས་ལ་ནན་ཏུར་དུ་བཏན་པའི་ཕྱིར་བཟུང་བའོ། །འཁོར་གྱི་གནས་ཡུལ་སྒོ་སྐྱོང་རྣམས་ལ་ཉི་མ་དང་ཞིང་གི་གདན། དབང་མོ་རྣམས་ལ་ཞིང་སྐམ་པོའི་གདན་རེ་རེའོ། ། གཉིས་པ་བརྟེན་པ་ལྷ་ལ་གཉིས་ཏེ། གཙོ་བོ་རིགས་ལྔའི་བཞུགས་ཚུལ་དང་། འཁོར་གྱི་བཀོད་པའོ། །དང་པོ་ལ་ལྔ་སྟེ། སྐུ་མདོག །ཞལ་ཕྱག །རྒྱན་དང་ང་རོ། ཕྱག་མཚན། འཁྲིལ་ཚུལ་ལོ། །དང་པོ་ནི། སྨུག་ནག་སོགས་རྐང་པ་གཉིས་ཏེ། དུག་ལྔ་གནས་སུ་དག་ཅིང་ཕྲིན་ལས་ལྔའི་མཛད་པ་མཚོན་པའི་བརྡར་རིགས་སོ་སོའི་ཁ་དོག་ལ། དེ་དག་ཀྱང་རིགས་མི་འགྱུར་ཞིང་ལས་བཞིའི་ཕྲིན་ལས་ཀྱི་གཞི་དང་མཐར་ཕྱིན་པར་དྲག་པོས་མཛད་པའི་ཕྱིར་ཐམས་ཅད་ལ་ནག་པོའི་སྒྲས་སྨོས་ཏེ། བུདྷ་ཧེ་རུ་ཀའི་སྐུ་མདོག་སྨུག་ནག །བཛྲ་ཧེ་རུ་ཀའི་སྔོ་ནག །རཏྣ་ཧེ་རུ་ཀའི་སེར་ནག་དང་། པདྨ་ཧེ་རུ་ཀའི་དམར་ནག །ཀརྨ་ཧེ་རུ་ཀའི་ལྗང་ནག་སྟེ་སྐུ་མདོག་རྩ་ཞལ་དང་བཅས་པའོ། །གཡས་ཞལ་ནི་རཏྣ་ཧེ་རུ་ཀའི་སྔོན་པོ་དང་། གཞན་ཐམས་ཅད་དཀར་པོ། གཡོན་ཞལ་ནི་བུདྡྷ་དང་པདྨ་གཉིས་སེར་པོ་དང་། གཞན་གསུམ་དམར་པོ་སྟེ། གདུག་པ་ཅན་གྱི་ངོར་ཤིན་ཏུ་འཇིགས་པའི་སྐུ་ཆེ་ཞིང་ཡན་ལག་རགས་པའོ། །གཉིས་པ་ནི། དབུ་གསུམ་སོགས་ཏེ། ཐམས་ཅད་ཀྱང་རྣམ་ཐར་གསུམ་མཚོན་པའི་དབུ་གསུམ། ཡེ་ཤེས་དྲུག་གིས་འགྲོ་དོན་མཛད་པའི་ཕྱིར་ཕྱག་དྲུག །རྫུ་འཕྲུལ་གྱི་རྐང་པ་བཞི་དང་ལྡན་པའི་ཕྱིར་ཞབས་བཞི་གཡས་བརྐྱང་བའི་དོར་སྟབས་སུ་བགྲད་པའོ། །གསུམ་པ་ནི། ཀོ་རློན་སོགས་རྐང་པ་གསུམ་སྟེ། བགོ་བ་ཀོ་རློན་གྱི་གོས་ནི་སྣ་ཚོགས་པ་གྱོན་པ་སྟེ། སྟོབས་བཅུས་གཏི་མུག་བཅོམ་པའི་བརྡར་གླང་ཆེན་གྱི་ཀོ་རློན་དང་། བྱང་ཆུབ་སེམས་ཀྱིས་འདོད་ཆགས་བཅོམ་པའི་བརྡར་ཞིང་ལྤགས་ཀྱིས་སྟོད་གཡོགས་ཤིང་། དཔའ་བརྟུལ་དྲག་པོའི་ལས་ཀྱིས་ཞེ་སྡང་བཅོམ་པའི་བརྡར་སྟག་ལྤགས་ཀྱི་ཤམ་ཐབས་གྲོལ་བ་སྟེ་བགོ་བའི་གོས་གསུམ་མོ། །ཀླུ་རྒྱལ་རིགས་དཀར་པོས་སྐྲ་ཆིངས། རྗེ་རིགས་སེར་པོས་སྙན་ཆ། བྲམ་ཟེའི་རིགས་དམར་པོས་སེ་མོ་དོ་དང་མགུར་ཆུ། དམངས་རིགས་ལྗང་ཁུས་སྐ་རགས་དང་དོ་ཤལ། གདོལ་པ་ནག་པོས་གདུ་བུ་སྟེ་ཐམས་ཅད་ཀྱང་གདུག་པ་སྦྲུལ་གྱི་རྣམ་པ་ཅན་དང་། ཐོད་ཕྲེང་ནི་སྐམ་པོ་ལྔའི་དབུ་རྒྱན། འཛག་པའི་མགོ་རློན་ལྔ་བཅུའི་དོ་ཤལ། ཚལ་བུས་དཔུང་རྒྱན་ཏེ་གདགས་པའི་རྒྱན་གཉིས་སོ། །དཔྲལ་བར་ཐལ་ཆེན་གྱི་ཚོམ་བུ། སྨིན་མཚམས་སུ་རཀྟའི་ཐིག་ལེ། མགྲིན་པར་ཞག་གི་ཟོ་རིས་རྣམས་ནི་བྱུག་པའི་རྩི་གསུམ་སྟེ། དེ་དག་ནི་དུར་ཁྲོད་ཀྱི་ཆས་བརྒྱད་དོ། །སྙན་གོང་གཡས་གཡོན་ནས་ཉི་ཟླའི་འོད་ཟེར་སྤྲོ་བ་ནི་གསལ་བའི་ཆས་གཉིས་སོ། །གསུང་ནི་འབྲུག་ལྟར་ཆེམས་པའི་རྔམས་པའི་སྒྲ་ཆེན་དྲག་པོ་ཤིན་ཏུ་འཇིགས་པར་སྒྲོག་པའོ། །བཞི་པ་ནི། སྟོང་གི་སོགས་ཏེ། སྟོང་གསུམ་གྱི་འཇིག་རྟེན་ཁོར་ཡུག་དང་བཅས་པ་ནི་བཛྲ་ཧེ་རུ་ཀའི་ཕྱག་གཡོན་གྱི་ཐ་མས་བསྣམས་པ་ཡིན་ལ། རྡོ་རྗེ་རྩེ་དགུ་པ་ནི་བཛྲ་ཧེ་རུ་ཀའི་གཡས་དང་པོའི་ཕྱག་མཚན་དང་། རྩེ་ལྔ་པ་དང་དུང་ཆེན་གང་བ་ནི་ཐམས་ཅད་ཀྱི་ཕྱག་བར་པ་གཉིས་དང་། རལ་གྲི་ནི་ཀརྨ་ཧེ་རུ་ཀའི་གཡས་དང་པོ་སྟེ། སྒྲུབ་ཐབས་སུ་བཤད་རྒྱུད་བརྒྱད་པ་ལྟར་རྒྱ་གྲམ་བཤད་དོ། །དགྲ་སྟྭ་ནི་རཏྣའི་གཡོན་ཐ་མ། ཐོང་གཤོལ་ནི་ཀརྨའི་གཡོན་ཐ་མའོ། །དེ་ལ་སོགས་པ་རང་རང་གི་ལག་ཆ་སྣ་ཚོགས་པ་འཛིན་པ་སྟེ། ཕྱག་གཡས་ཀྱི་དང་པོ་བུདྡྷའི་འཁོར་ལོ། རཏྣའི་རིན་ཆེན། པདྨའི་པད་སྡོང་། ཐམས་ཅད་ཀྱི་གཡོན་དང་པོ་དྲིལ་བུ་དང་། གཡས་ཐ་མ་ཞིང་དབྱུག །བུདྡྷའི་གཡོན་ཐ་མ་ཏྲི་ཤཱུ་ལ་དང་པདྨའི་རྔེའུ་ཆུང་རྣམས་ཏེ། འདི་དག་ནི་བཤད་རྒྱུད་བརྒྱད་པ་ལྟར་སྒྲུབ་ཐབས་ཀྱི་ཕྱག་རྒྱ་གར་མཆོད་དང་མཐུན་པར་བྱས་པའོ། །ལྔ་པ་ནི། བཙུན་མོ་སོགས་ཏེ། རང་རང་གི་རིགས་ཀྱི་བཙུན་མོ་འཇིགས་པའི་ཚོགས་ལྔ་ག་སྐུ་མདོག་ཡབ་དང་མཐུན་པ་གཟིག་ཤམ་ཅན། ཞལ་གཅིག་ཕྱག་གཉིས་ཀྱི་གཡས་དྲིལ་བུས་ཡབ་ལ་འཁྱུད་ཅིང་གཡོན་དུང་དམར་ཞལ་དུ་སྟོབ་པ། སྟོང་པ་ཉིད་དང་སྙིང་རྗེ་ཟུང་དུ་འཇུག་པའི་བརྡར་ཡབ་དང་གཉིས་སུ་མེད་པར་འཁྲིལ་བའོ། ། གཉིས་པ་འཁོར་གྱི་བཀོད་པ་ནི། གནས་དང་སོགས་རྐང་པ་དྲུག་སྟེ། རྣམ་ཤེས་ཚོགས་བརྒྱད་ནི་འཁོར་བ་བསྐྱེད་པའི་གནས་དང་། དེའི་ཡུལ་བརྒྱད་གནས་སུ་དག་པས་ན་གཽ་རཱི་མ་སོགས་ལ་གནས་མ་དང་། སིངྷ་མ་སོགས་ལ་ཡུལ་མ་བརྒྱད་ཅེས་བཏགས་ལ། དེ་དག་གི་ཕྱག་རྒྱ་ནི། གཽ་རཱི་བྷན་དམར་ཞིང་དབྱུག་སྔོ། །ཞེས་སོགས་དང་། སིངྷ་ཁ་རོ་བསྣོལ་སེང་སེར། །ཞེས་སོགས་དང་། སྒོ་མ་བཞིའི་ཕྱག་རྒྱ་ནི། རྟ་གདོང་སྔོན་མོ་ལྕགས་ཀྱུ་འཛིན། །ཞེས་སོགས་ཏེ། སོ་སོའི་སྐུ་མདོག་ཕྱག་མཚན་དང་མགོ་བརྙན་རྣམས་ཀྱང་གར་མཆོད་ཀྱིས་གསལ་བར་བསྟན་ཏོ། །དེ་ལྟར་ཁྲོ་མོ་ཉི་ཤུའི་འཁོར་གྱི་བཀོད་པས་རབ་ཏུ་མཛེས་ཤིང་། གཞན་ཡང་སླས་ཏེ་ཆུང་མ་དང་། བྱི་མོ་སྟེ་མཛའ་མོ་དང་། བྲན་མོ་སྟེ་ལས་བྱེད་པོའི་ཆ་ནས་བཏགས་པ་དབང་ཕྱུག་མའི་ཚོགས་གྲངས་བཅུ་ཚན་གཉིས་དང་ཡ་བརྒྱད་དེ་ཉི་ཤུ་རྩ་བརྒྱད་ཀྱིས་མཛེས་པར་བསྐོར་བ། དེ་དག་ཀྱང་རང་རང་གི་སྟན་ཞིང་སྐམ་པོ་རེ་དང་། སྐུ་མདོག་དང་ལག་ཆ་ནི། སྲིན་མོ་སྨུག་ནག་ཐོད་རློན་འཆང་། །ཞེས་སོགས་དང་། བདག་གི་ལས་སྐལ་ཅི་བགྱིས་ཞེས་ཞུ་ཞིང་། རྫུ་འཕྲུལ་ནི་ཐོགས་པ་མེད་པར་ཡུད་ཙམ་གྱིས་ཆས་ཏེ་སོ་སོའི་ལས་དང་མཐུན་པའི་ཕྱོགས་སུ་གནས་སོ། །དེ་ལྟར་ཁྲག་འཐུང་ང་བརྒྱད་ནི་དཀྱིལ་འཁོར་སྤྲོས་པ་ལས་བསྡུས་པའི་དཀྱིལ་འཁོར་ཏེ། འབྲིང་པོ་ལ་དེའི་སྟེང་དུ་ཁྲོ་བཅུ་ཡབ་ཡུམ་བསྣན་པས་དོན་བརྒྱད། རྒྱས་པ་ལ་དེའི་ཡང་སྟེང་དུ་ཁྲག་འཐུང་རིགས་ལྔ་ལ་རིགས་ཆུང་གི་ཁྲོ་བོ་ཡབ་ཡུམ་ཟུང་བཞིས་བསྐོར་བའི་བཞི་བཅུ་བསྣན་པས་བརྒྱ་བཅོ་བརྒྱད་དོ། །ཡང་འཕྲོས་དོན་རྣམ་གྲངས་སྤྲོས་པ་ནི། ལམ་རིམ་ལས། ཡན་ལག་བཀོད་པ་ལྔ་བཅུ་བརྒྱད། །ཆ་ལྔའི་གྲངས་ནི་ཉིས་བརྒྱ་དང་། །དགུ་བཅུའི་ལྷ་རྣམས་ཡན་ལག་ལྡན། །ཞེས་པས་བཛྲ་ཧེ་རུ་ཀའི་ཡན་ལག་ལྔ་ལ་ཁྲག་འཐུང་ཡབ་ལ་ཡབ་ལྔ་དང་ཡུམ་ལ་ཡུམ་ལྔ། ཡབ་ཀྱི་དབང་རྟེན་གྱི་ནང་རྩར་གཽ་རཱི་མ་བརྒྱད། ཕྱི་རྩར་སེང་ཧ་མ་བརྒྱད། མཐིལ་བཞི་ལ་སྒོ་མ། སྒལ་ཚིགས་ལ་དབང་མོ་ཉེར་བརྒྱད་དེ་ཐབས་ལྷ་ང་བརྒྱད། དེ་རྣམས་ལ་ཡེ་ཤེས་སེམས་དཔའ་དང་། སྐུ་གསུང་ཐུགས་ཀྱི་ལྷ་རྣམས་རེ་རེ་བསྒོམས་པས་ང་བརྒྱད་པ་ཆ་ལྔ་ལ་ཉིས་བརྒྱ་དང་དགུ་བཅུ། དེ་ལས་ཤེས་རབ་ཀྱི་ལྷ་ང་བརྒྱད་ཕྲི་བའི་ལྷག་ཉིས་བརྒྱ་སོ་གཉིས་པོ་རེ་རེ་ལ་དབུ་རྒྱན་གྱི་ལྷ་ལྔ་ལྔ་སྟེ་སྟོང་ཆིག་བརྒྱ་དྲུག་ཅུ་འབྱུང་བ་ཉིས་བརྒྱ་དགུ་བཅུ་ལ་བསྣན་པས་སྟོང་བཞི་བརྒྱ་ལྔ་བཅུ་སྟེ་གཙོ་བོ་ཡབ་ཡུམ་ལ་ཚང་བར་བསྒོམ་མོ། དེས་མཚོན་ནས་ཁྲག་འཐུང་རིགས་བཞིའི་ཟུང་རེ་རེ་དང་། གནས་ཡུལ་སྒོ་དབང་གི་ལྷ་ཞེ་བརྒྱད་ལ་ཡུམ་མེད་པས། མགོའི་གཡས་དང་། རྐང་ལག་གཡས་ཀྱི་མདུན་རྒྱབ་ལ་ཡབ་ལྔ་དང་། མགོའི་གཡོན་དང་། རྐང་ལག་གཡོན་གྱི་མདུན་རྒྱབ་ལ་ཡུམ་ལྔ་བཀོད་དེ། མདོར་ན་སྟོང་བཞི་བརྒྱ་ལྔ་བཅུ་ཆ་ང་གསུམ་ལ་བདུན་ཁྲི་དྲུག་སྟོང་བརྒྱད་བརྒྱ་ལྔ་བཅུའི་དཀྱིལ་འཁོར་འབྱུང་ཞིང་། བསམ་ཡས་ལྷུན་གྲུབ་ཀྱི་དཀྱིལ་འཁོར་ནི་ཞི་བ་ལྟར་རོ། ། གཉིས་པ་ཡོན་ཏན་ནི། ཞེས་བརྗོད་པས་སོགས་ཏེ། དེ་སྐད་ཅེས་བརྗོད་པའི་མཐུས་འཇིག་རྟེན་དྲུག་གི་ཕྱོགས་བཅུ་ཐམས་ཅད་དུ་འབར་བ་ཆེན་པོ་ཁྲོ་བོའི་དཀྱིལ་འཁོར་གྱིས་ཀུན་ཏུ་ཁྱབ་ཅིང་གསལ་བར་གྱུར་ཏོ། ། གསུམ་པ་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉེར་གཉིས་ཡོད་པ་ལས། འདིས་ཁྲོ་བོའི་ལྷག་ཏིང་སྐུ་དང་ཐུགས་ཀྱི་དཀྱིལ་འཁོར་བསྟན་པའི་ལེའུ་སྟེ་བཅུ་བདུན་པའོ།། །། ལེའུ་བཅོ་བརྒྱད་པའི་འགྲེལ་པ།ལེའུ་བཅོ་བརྒྱད་པ་ལ་གསུམ་སྟེ། ལོ་རྒྱུས་དང་། གཞུང་དང་། མཚན་ནོ། །དང་པོ་ནི། དེ་ནས་སོགས་ཏེ། ཁྲོ་བོའི་དཀྱིལ་འཁོར་བསྟན་པ་དེ་ནས་ཁྱད་པར་གྱི་མཆོད་པ་སྟོན་པའི་ཕྱིར་བཅོམ་ལྡན་འདས་དགྱེས་པ་ཆེན་པོས་དཀྱིལ་འཁོར་གྱི་ལྷ་ཚོགས་རྣམས་མཉེས་པར་བྱེད་པ་རྨད་དུ་བྱུང་བའི་མཆོད་པ་ཆེན་པོ་འདི་ཆེད་དུ་བརྗོད་དོ། ། གཉིས་པ་གཞུང་ལ་གསུམ་སྟེ། མཆོད་པ་དངོས་དང་། མཆོད་པའི་འབྲས་བུ་དང་། དེ་གསུང་པའི་ཡོན་ཏན་ནོ། །དང་པོ་ལ་བཞི་སྟེ། ཞེ་སྡང་སྒྲོལ་བའི། འདོད་ཆགས་སྦྱོར་བའི། གཏི་མུག་དམ་རྫས་ཀྱི། འདོད་ཡོན་རྒྱན་གྱི་མཆོད་པའོ། །དང་པོ་ནི། དེ་ལ་སོགས་རྐང་པ་ལྔ་སྟེ། ལྷག་པ་ཏིང་ངེ་འཛིན་གྱི་དཀྱིལ་འཁོར་ལ་བརྟེན་ནས་བསོད་ནམས་ཀྱི་ཚོགས་བསགས་པ་དེ་ལ་བདེ་གཤེགས་རྣམས་མཆོད་པ་དང་། མཁའ་འགྲོ་རྣམས་ལ་སྦྱིན་པ་གཉིས་ལས། དེ་དག་གི་ནང་ནས་ཀྱང་ཁྱད་པར་དུ་གྱུར་པའི་མཆོག་དམ་པ་ནི་འདི་ཡིན་ཏེ། ཐོག་མར་རྣལ་འབྱོར་པ་བདག་ཉིད་རྒྱུ་ཤེས་པའི་མཚན་ཉིད་ལྟ་བ་རྟོགས་ཤིང་། རྐྱེན་འཇུག་པའི་མཚན་ཉིད་ཏིང་ངེ་འཛིན་གོམས་པའི་ཐབས་ཀྱིས་གཟུང་འཛིན་གྱི་ཞེན་རྟོག་ཆོས་ཉིད་སྐྱེ་མེད་ཀྱི་དབྱིངས་སུ་བསྒྲལ་ཏེ་རྟོགས་པས་བདག་བསྒྲལ་བའོ། །དེ་ནས་ཐུགས་རྗེས་གཞན་སྒྲོལ་བ་ནི། བསྒྲལ་བྱ་སྒྲོལ་བྱེད་གཉིས་མེད་དུ་རྟོགས་པའི་བློ་ཡི་གདེངས་ཀྱིས་ཟིན་པ་ནི་ཤེས་རབ་སྟེ། དེའི་ངང་ལས་རྒྱུ་འབྲས་ཀྱི་དོན་ལ་རྨོངས་པའི་བློ་ངན་ཞིང་བཅུར་གྱུར་པའི་སེམས་ཅན་སྲིད་པའི་འཇིག་རྟེན་འོག་མར་བརྒྱུད་པ་འདི་དག་སྙིང་རེ་རྗེ་ཞེས་ཐབས་སྙིང་རྗེ་ཆེན་པོའི་སྒོ་ནས་བསྒྲལ་བྱའི་རྣམ་ཤེས་གཉིས་སུ་མེད་པའི་བྱང་ཆུབ་ཀྱི་སེམས་ཆོས་ཀྱི་དབྱིངས་དེར་བསྒྲལ་བར་བྱའོ། །གཉིས་པ་ནི། འཁྲིལ་བའི་སོགས་རྐང་པ་གཉིས་ཏེ། ཡབ་ཡུམ་གཉིས་སུ་མེད་པར་འཁྲིལ་བས་བདེ་བའི་མཆོད་རྫས་ཆེན་པོ་ཉི་ཟླ་བྱང་ཆུབ་ཀྱི་སེམས་མཉམ་པར་སྦྱོར་བས་རྣལ་འབྱོར་པ་བདག་ཉིད་བདེ་བའི་རོལ་མོས་མཉེས་ཤིང་ཚིམ་པར་བྱས་ནས། བྱང་ཆུབ་སེམས་ཀྱི་རྡུལ་རབ་མཁའ་ཁྱབ་ཏུ་སྤྲོས་པས་དེ་བཞིན་གཤེགས་པ་ཐམས་ཅད་མཉེས་པ་དང་། སེམས་ཅན་ཐམས་ཅད་ཀྱང་ཚིམ་སྟེ་བདེ་ཆེན་ལྷན་ཅིག་སྐྱེས་པའི་ཡེ་ཤེས་སུ་རོ་མཉམ་པར་བྱས་པའོ། །གསུམ་པ་ནི། མཉམ་པའི་སོགས་རྐང་པ་གཉིས་ཏེ། འཁོར་འདས་ཀྱི་ཆོས་ཐམས་ཅད་མཉམ་པ་ཉིད་དུ་རྟོགས་པའི་དངོས་གྲུབ་སྒྲུབ་པའི་རྫས་ཆེན་པོ་བདུད་རྩི་ལྔ་པོ་འདི་དག་བདག་དམ་ཚིག་གི་འཁོར་ལོ་དང་ཡེ་ཤེས་ལྷའི་དཀྱིལ་འཁོར་གཉིས་མེད་དུ་མཉམ་པའི་ཚོགས་ལ་འཁོར་གསུམ་ཡོངས་དག་གི་མཆོད་པར་འབུལ་ལོ། །བཞི་པ་ནི། བཟའ་དང་སོགས་རྐང་པ་གསུམ་སྟེ། ཤ་ཟན་སོགས་བཟའ་བ་དང་། ཤིང་ཏོག་སོགས་བཅའ་བ་དང་། ཇ་ཆང་སོགས་བཏུང་བ་དང་། སྲབ་འཇམ་ཡངས་པའི་བགོ་བ་དང་། གཞན་ཡང་ལྷ་དང་མིའི་ལོངས་སྤྱོད་འདོད་པའི་ཡོན་ཏན་དང་ལྡན་པའི་སྣང་བ་ཐམས་ཅད་ལྷ་དང་ལྷ་མོར་རྣམ་པར་དག་པས་འབུལ་ཚུལ་ནི། མཆོད་ཡུལ་ཡེ་ཤེས་ཀྱི་དཀྱིལ་འཁོར་ལྷ་ཚོགས་ལ་ནི་མཆོད་རྫས་འདོད་ཡོན་ལྷ་མོའི་དཀྱིལ་འཁོར་གཉིས་མེད་བདེ་བ་ཆེན་པོར་རོ་གཅིག་ཏུ་ཐིམ་པའི་ཚུལ་གྱིས་འབུལ་ལོ། ། གཉིས་པ་མཆོད་པའི་འབྲས་བུ་ལ་གཉིས་ཏེ། ཐུན་མོང་དང་། མཆོག་གིའོ། །དང་པོ་ནི། ཕྱོགས་བཅུ་སོགས་ཚིགས་བཅད་གཅིག་སྟེ། ཕྱོགས་བཅུ་དང་དུས་བཞིར་འགྲོ་བའི་དོན་ལ་གཤེགས་པ་ཡི་བདེ་བར་གཤེགས་པ་རྣམས་ཀྱི་ཆེ་བའི་ཡོན་ཏན་རྨད་པོ་ཆེ་རྣམས་ཀྱང་། རང་རིག་རྟོགས་པ་ལས་གཞན་ཞིག་ལོགས་ནས་བཙལ་དུ་ཡོད་པའམ་ཚུར་འོངས་པ་མ་ཡིན་ན་གཞན་འཇིག་རྟེན་པའི་དངོས་གྲུབ་ལྷ་སྲིན་ལ་སོགས་པའི་མཐུ་ལས་བྱུང་བའི་ཡོན་ཏན་འགྲུབ་པ་ནི་ལྟ་སྨོས་ཀྱང་ཅི་དགོས་སོ། །གཉིས་པ་ནི། རྣལ་འབྱོར་སོགས་ཚིགས་བཅད་གཅིག་སྟེ། རྣལ་འབྱོར་པ་གང་ཞིག་ལྟ་བ་རྟོགས་ཤིང་ཏིང་ངེ་འཛིན་ལས་སུ་རུང་བ་རྣམས་ཀྱིས་ལྷ་སྐུ་ཕྱག་རྒྱ་ཆེན་པོ་རང་རིག་ལ་མངོན་དུ་རྫོགས་པར་འགྱུར་ཞིང་། དེ་ཉིད་ཡུལ་གྱིས་མི་འཕྲོག་པར་གསལ་བ་ལ་བརྟན་པ་ཐོབ་ནས་འབྲས་བུ་འགྲུབ་བམ་མི་འགྲུབ་སྙམ་པའི་ཡིད་གཉིས་དང་ཐེ་ཚོམ་མེད་པར་གྱུར་པ་ན་རང་བཞིན་འབྲས་བུའི་དཀྱིལ་འཁོར་གྱི་དངོས་གྲུབ་ཆེན་པོ་འབྱུང་བར་འགྱུར་རོ། ། གསུམ་པ་དེ་གསུངས་པའི་ཡོན་ཏན་ནི། ཞེས་བརྗོད་པས་སོགས་ཏེ། དེ་སྐད་ཅེས་བརྗོད་པའི་མཐུས་མཉེས་པ་ཆེན་པོས་འཇིག་རྟེན་དྲུག་གི་ཕྱོགས་བཅུ་ཐམས་ཅད་དུ་མཆོད་པའི་སྤྲིན་གྱི་རོལ་མོས་ཁྱབ་པར་གྱུར་ཏོ། ། གསུམ་པ་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉེར་གཉིས་ཡོད་པ་ལས། འདིས་རྒྱལ་བ་རྣམས་མཆོད་ཅིང་མ་མོ་དང་མཁའ་འགྲོར་སྦྱིན་པའི་ཐབས་ཐུན་མོང་དུ་མ་གྲགས་པས་མཆོག་དམ་པ་བསྟན་པའི་ལེའུ་སྟེ་བཅོ་བརྒྱད་པའོ།། །། ལེའུ་བཅུ་དགུ་པའི་འགྲེལ་པ།ལེའུ་བཅུ་དགུ་པ་ལ་གསུམ་སྟེ། ལོ་རྒྱུས་དང་། གཞུང་དང་། མཚན་ནོ། །དང་པོ་ནི། དེ་ནས་སོགས་ཏེ། ཁྱད་པར་གྱི་མཆོད་སྦྱིན་བསྟན་པ་དེ་ནས་དམ་ཚིག་གི་རིམ་པ་སྟོན་པའི་ཕྱིར་བཅོམ་ལྡན་འདས་དགྱེས་པ་ཆེན་པོས་སྔགས་འཆང་རྣལ་འབྱོར་པ་རྣམས་ལོག་པར་མི་ལྟུང་ཞིང་འབྲས་བུ་མྱུར་དུ་འགྲུབ་པས་ལམ་ལ་འབད་པ་དོན་ཡོད་པར་བྱ་བའི་ཕྱིར། བླ་ན་མེད་པའི་དམ་ཚིག་ཆེན་པོ་འདི་དག་ཆེད་དུ་བརྗོད་དོ། ། གཉིས་པ་གཞུང་ལ་གཉིས་ཏེ། དམ་ཚིག་དངོས་དང་། དེའི་ཡོན་ཏན་ནོ། །དང་པོ་ལ་བདུན་ཏེ། དམ་ཚིག་གི་ཆེ་བ་དང་། རྣམ་གྲངས་མདོར་བསྟན་པ་དང་། མཉམ་པའི་དམ་ཚིག་སྐྱོན་ཡོན་དང་བཅས་པ་དང་། དམ་ཚིག་ཉམས་པའི་སྐྱོན་དང་། དམ་ཚིག་གི་རང་བཞིན་དང་། དམ་ཚིག་གི་རྣམ་གྲངས་རྒྱས་པར་བཤད་པ་དང་། དེ་མ་ཉམས་པའི་ཡོན་ཏན་ནོ། །དང་པོ་ལ་གཉིས་ཏེ། སྤྱོད་སྒོ་ཡངས་པའི་དང་། འདུལ་སྡོམ་ཐམས་ཅད་འདུས་པའི་ཆེ་བའོ། །དང་པོ་ནི། བླ་མེད་ཐེག་པར་སོགས་ཚིགས་བཅད་གཅིག་སྟེ། གང་ཟག་གང་ཞིག་རྟོགས་གོམས་ཀྱི་གདེངས་དང་ལྡན་པས་མཉམ་པ་ཆེན་པོའི་དམ་ཚིག་ལ་གནས་པ་ནི་བླ་ན་མེད་པའི་ཐེག་པར་རབ་ཏུ་ངེས་པ་སྟེ། ཉམས་སུ་ལོན་ན་ཉོན་མོངས་པ་དུག་ལྔ་དང་། དེས་བསྐྱེད་པའི་ལས་རྣམས་ཀུན་ལ་སྤྱད་ཀྱང་སྒྱུ་མ་མཁན་གྱིས་སྒྱུ་མའི་ལོངས་སྤྱོད་ལ་སྤྱོད་པ་ལྟར་བྱས་པར་སྣང་ཡང་དེ་ལ་འཛིན་ཞེན་མེད་པས། དེའི་སྒྲིབ་པ་དང་བག་ཆགས་མི་གསོག་པའི་སྟེང་དུ་ཚོགས་གཉིས་རྫོགས་པར་འགྱུར་ཏེ། སྤྱོད་པ་དེའི་ངོ་བོ་ལ་སོ་བྱང་ཕྱི་རྒྱུད་རྣམས་ཀྱི་ཚུལ་ཁྲིམས་དང་སྡོམ་པ་ཐམས་ཅད་ཀྱང་ཕུན་སུམ་ཚོགས་པར་འགྱུར་བ་ཡིན་ནོ། ། གཉིས་པ་ལ། སྤྱིར་བཤད་པ་དང་། ཇི་ལྟར་འདུས་ཤིང་དག་ཚུལ་རྒྱས་པར་བཤད་པའོ། །དང་པོ་ནི། བླ་མེད་མཆོག་གི་སོགས་ཚིགས་བཅད་གཅིག་སྟེ། གསང་སྔགས་བླ་ན་མེད་པ་རྡོ་རྗེའི་ཐེག་པ་མཆོག་གི་དམ་ཚིག་འདིའི་ནང་དུ་འགྲོ་བ་འདུལ་བའི་དབང་གིས་རྣམ་པར་བཞག་པའི་ཉན་ཐོས་ཀྱི་ཚུལ་ཁྲིམས་ཇི་སྙེད་པ་དང་། བྱང་སེམས་དང་གསང་སྔགས་ཕྱི་ནང་གི་བསྲུང་བྱ་ཇི་སྙེད་པའི་སྡོམ་པ་བསམ་ཡས་ཡོད་པ་མ་ལུས་པའི་ཡོན་ཏན་ཀུན་ཡར་ལྡན་གྱི་ཚུལ་དུ་འདིར་འདུས་ཤིང་། ཉེས་པ་ཕྲ་མོས་ཀྱང་གོས་པ་མེད་པས་རྣམ་པར་དག་པའི་ཕྱིར་རོ། །དེ་ལ་ཇི་སྙེད་པའི་སྡོམ་པ་ཀུན་རིགས་བསྡུས་ན། སོ་ཐར། བྱང་སེམས། རིག་པ་འཛིན་པའི་སྡོམ་པ་གསུམ་དུ་འདུ་ལ། དེ་གསུམ་ཡང་རྣམ་པ་འགལ་བ་ལྟར་སྣང་ཡང་། ངོ་བོ་ཚང་བ་དང་གནས་འགྱུར་བའི་སྒོ་ནས་སོ་བྱང་གཉིས་སྔགས་སྡོམ་དུ་འདུས་ཤིང་རྣམ་པར་དག་པ་སྟེ། ཇི་ལྟར་ན། སོ་བྱང་གཉིས་ལ་མཉམ་པ་ཆེན་པོའི་ཐབས་ཀྱིས་མ་ཟིན་པའི་ཐ་མལ་སྣང་ཞེན་གྱི་ལྡོག་ཆ་རེ་ཡོད་པ་རྩ་གཏོང་གིས་སོ་ཐར་གྱི་གཞན་གནོད་གཞི་བཅས་ལས་ལྡོག་པ་དང་། བྱང་སྡོམ་གྱི་གཞན་ཕན་ལ་ཞུགས་པའི་ལྡོག་ཆ་གཉིས་པོ་དེ་སྔགས་སྡོམ་གྱི་མཉམ་པ་ཆེན་པོའི་ངང་ནས་གཞན་དོན་རྩོལ་མེད་དུ་མཛད་པའི་ཐབས་མཁས་ཀྱི་ནང་དུ་ཚང་ཞིང་། རྫས་གོང་འཕེལ་གྱི་ཚུལ་གྱིས་སྔགས་ཀྱི་སྡོམ་རྫས་སུ་གནས་འགྱུར་བ་ཡིན་ནོ། །དེ་ལྟར་ཡང་། ཐེག་ཆེན་དམ་ཚིག་ལ་གནས་ན། །འོག་མའི་འདུལ་སྡོམ་དམ་ཚིག་ཀུན། །བསྲུང་བ་མེད་པར་ཐུབ་པས་ན། །དགེ་སློང་བྱང་ཆུབ་སེམས་དཔའ་དང་། །རྣལ་འབྱོར་རྣལ་འབྱོར་ཆེན་པོ་ཡིན། །ཞེས་སོ། ། གཉིས་པ་ལ་བཞི་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། རྫུན་དུ་སྨྲ་བ་དང་། མི་ཚངས་པར་སྤྱོད་པ་སྤོང་བ་ཇི་ལྟར་འདུས་ཤིང་དག་པའོ། །དང་པོ་ནི། ཡོད་མེད་སོགས་ཚིགས་བཅད་གཅིག་སྟེ། དོན་དམ་པར་ཆོས་ཐམས་ཅད་ཡོད་པ་རྟག་པ་དང་། མེད་པ་ཆད་པའི་མཐའ་དང་། དེ་གཉིས་ཀ་དང་བྲལ་བའི་དབུ་མ་ཙམ་དུའང་མི་དམིགས་ཤིང་། ཀུན་རྫོབ་ཏུ་སྒྱུ་མའི་སྐྱེས་བུས་མིག་ཡོར་གྱི་སེམས་ཅན་བསད་པ་ལྟ་བུའི་ཚུལ་དུ་སྣང་ཡང་། སྣང་དུས་ཉིད་ནས་གཅད་བྱའི་སྲོག་བདེན་པར་གྲུབ་པ་མེད་པས་སྲོག་གཅོད་མཁན་དང་བཅད་དོ་བའི་འདུ་ཤེས་ཀྱང་མ་གྲུབ་པས་དོན་ལ་བཅད་དུ་མེད་དེ། སྲོག་དང་དེ་ལྡན་གྱི་སྐྱེས་བུར་འཛིན་པ་ནི་ལོག་རྟོག་འཁྲུལ་ངོ་ཙམ་ཡིན་པའི་ཕྱིར། དེ་ལྟར་རྟོགས་ནས་ཞིང་བཅུའི་སྲོག་བཅད་ཀྱང་ཉེས་པས་མི་གོས་ཤིང་། ཚོགས་རྫོགས་པས་ན་སྲོག་གཅོད་སྤོང་བའི་སྡོམ་པའི་ངོ་བོ་དང་ཡོན་ཏན་ཡར་ལྡན་དུ་འདུས་སོ། །གཉིས་པ་ནི། བདེན་པ་སོགས་ཚིགས་བཅད་གཅིག་སྟེ། ཆོས་ཐམས་ཅད་དོན་དམ་པ་དང་ཀུན་རྫོབ་ཀྱི་བདེན་པ་གཉིས་ཀའི་ཚུལ་ལ་བདག་དང་གཞན་ཞེས་དབྱེར་མེད་པས་དོན་དམ་པར་མ་དམིགས་ཤིང་། ཐ་སྙད་ཀུན་རྫོབ་ཏུའང་འཕྲུལ་དགའི་ལྷ་རྣམས་རང་གི་སྤྲུལ་པའི་ལོངས་སྤྱོད་ལེན་པ་ལྟར། མ་བྱིན་པར་ལེན་དུས་ཉིད་ནས་རང་སྣང་གི་རྫས་ལ་རང་སྣང་གིས་ལེན་པའི་ཚུལ་གྱིས་བླངས་ཏེ་སྤྱད་ཀྱང་དོན་ལ་ཐ་དད་མིན་པས། བླང་བྱའི་ཡུལ་གཞན་དང་། དེས་བདག་གིར་བཟུང་བའི་རྫས་མ་བྱིན་པར་ལེན་རྒྱུ་ཞིག་གུད་ན་མེད་པའི་ཕྱིར། བླངས་པའང་མེད་དེ། ཅི་བླངས་ཀྱང་ཐམས་ཅད་བདག་ཉིད་ལས་མི་འདའ་བར་གཉིས་མེད་ཀྱི་དབྱིངས་སུ་རོ་གཅིག་ཏུ་རྟོགས་པའི་ཕྱིར། དེ་ལྟར་བདག་གཞན་གྱི་རྒྱུད་དབྱེར་མེད་དུ་ཤེས་པས་འཇུངས་པ་ལས་བླངས་ནས་བཀྲེན་པ་ལ་སྟེར་བ་སོགས་བྱས་ན་ཉེས་པས་མི་གོས་ཤིང་ཚོགས་རྫོགས་པས་མ་བྱིན་ལེན་སྤོང་བའི་སྡོམ་པའི་ངོ་བོ་དང་ཡོན་ཏན་ཡར་ལྡན་དུ་འདུས་སོ། །གསུམ་པ་ནི། ཆོས་རྣམས་སོགས་ཚིགས་བཅད་གཅིག་སྟེ། ཆོས་རྣམས་ཐམས་ཅད་ཇི་ལྟར་སྣང་བ་དེ་བཞིན་དུ་ཡོད་པ་མ་ཡིན་པས་སྒྱུ་མ་ལྟ་བུ་སྟེ་རྫུན་ཙམ་དུ་ཟད་ལ། དེ་ལྟར་བརྗོད་བྱའི་དོན་མ་གྲུབ་བཞིན་དུ་རྗོད་བྱེད་ཀྱི་མིང་དང་ཚིག་ཏུ་སྒྲོ་བཏགས་ནས་དེ་ལ་དེར་འཛིན་པའང་རྫུན་ནོ། །དེའི་ཕྱིར་ཡུལ་ཤེས་བྱ་དང་བརྗོད་བྱ་ཐམས་ཅད་བདེན་པར་མ་གྲུབ་པས་རྫུན་པ་ཉིད་ལ་ནི། ཤེས་བྱེད་དང་རྗོད་བྱེད་རྫུན་པ་ཉིད་སྤྱོད་པ་སྟེ། ཆོས་གང་ལའང་བདེན་པ་གཉིས་མ་གྲུབ་ན། དེ་ལ་ལྟོས་པའི་རྫུན་པའང་མ་གྲུབ་པས་རྫུན་ཞེས་བྱ་བའི་ཆོས་ནི་མིང་ཙམ་བཏགས་པ་ཙམ་དུའང་ཡོད་པ་མ་ཡིན་ནོ། །དེ་ལྟར་ཤེས་པས་རྫུན་སྨྲས་ཀྱང་ཉེས་པས་མི་གོས་ཤིང་། ཇི་ལྟར་ཕན་པ་དེ་ལྟར་སྨྲས་པས་ཚོགས་རྫོགས་པའི་ཕྱིར་ན་རྫུན་སྨྲ་བ་སྤོང་བའི་སྡོམ་པའི་ངོ་བོ་དང་ཡོན་ཏན་ཡར་ལྡན་དུ་འདུས་སོ། །བཞི་པ་ནི། མ་ཆགས་སོགས་ཚིགས་བཅད་གཅིག་སྟེ། ཆོས་ཐམས་ཅད་ལ་ཡུལ་སེམས་གཉིས་མེད་དུ་གསལ་བ་ནི་མ་ཆགས་པའི་ཡེ་ཤེས་ཏེ། དེ་ལ་གཉིས་སུ་ཞེན་ཅིང་ཆགས་པའི་དུས་ན། གཉིས་མེད་དུ་ཤེས་པའི་ལྟ་བ་དང་། འདུ་ཤེས་གསུམ་ལྡན་གྱི་སྒོམ་པ་དང་། ཐབས་ཀྱིས་ཟིན་པའི་སྤྱོད་པ་དང་ལྡན་པས་འཁྲིག་པའི་འདོད་ཆགས་ལ་སྤྱོད་པ་ལྟར་སྣང་བའི་དུས་ཉིད་ན་ཡང་ཐ་མལ་གྱི་ཆགས་པའི་དྲི་མ་རྡུལ་ཙམ་ཡང་མེད་པ་ནི་འཛག་མེད་ཀྱི་ཚུལ་ཁྲིམས་ཚངས་པར་སྤྱོད་པ་ཐམས་ཅད་ཀྱི་མཆོག་གམ་རྒྱལ་པོ་སྟེ། ཆོས་ཐམས་ཅད་ཤིན་ཏུ་རྣམ་པར་དག་པར་བདེ་སྟོང་ཟུང་འཇུག་རང་རིག་གི་ངོ་བོར་གྲོལ་བ་ནི་ཆགས་པ་ཆེན་པོ་བདེ་ཆེན་གྱི་ཡེ་ཤེས་ཡིན་ནོ། །དེ་ལྟར་ཤེས་ནས་སྤྱད་ན་ཉེས་པས་མི་གོས་ཤིང་། འཛག་མེད་ཀྱི་ཡེ་ཤེས་གྲུབ་པ་སོགས་ཚོགས་རྫོགས་པའི་ཕྱིར་མི་ཚངས་སྤྱོད་སྤོང་བའི་སྡོམ་པའི་ངོ་བོ་དང་ཡོན་ཏན་ཡར་ལྡན་དུ་འདུས་སོ། ། གཉིས་པ་དམ་ཚིག་གི་རྣམ་གྲངས་མདོར་བསྟན་པ་ལ་གསུམ་སྟེ། རྩ་བའི་དམ་ཚིག །ཡན་ལག་གི་དམ་ཚིག །དེ་གཉིས་ཀྱི་ངེས་ཚིག་བཤད་པའོ། །དང་པོ་ནི། བླ་མེད་སོགས་རྐང་པ་དྲུག་སྟེ། འདི་ལ་དམ་ཚིག་གསལ་བཀྲ་ལས། བྱང་སེམས་རྣམ་གཉིས་སློབ་དཔོན་དྲུག །མཆེད་བཞི་སྔགས་གསུམ་ཕྱག་རྒྱ་བཞི། །གསང་བཅུ་རྩ་བར་ཤེས་པར་བྱ། །ཞེས་པ་ལྟར་རྩ་བའི་དམ་ཚིག་ལ་ལྔ་ལས། བླ་མེད་མི་སྤོང་བ་ནི། ཡུལ་བླ་ན་མེད་པའི་བྱང་ཆུབ་ཀྱི་སེམས་ལྷག་པ་དོན་དམ་དང་། ལྷག་པ་ཀུན་རྫོབ་ཀྱི་བདེན་པ་གཉིས་སོ། །དེ་མི་སྤང་བའི་ཚུལ་ནི་ལྷག་པ་བདེན་གཉིས་དབྱེར་མེད་དུ་རྟོགས་ནས། སྒོ་གསུམ་ལྷའི་སྐུ་གསུང་ཐུགས་ཀྱི་ཕྱག་རྒྱ་ལས་མི་འདའ་བར་བྱེད་པའོ། །བླ་མ་བཀུར་བ་ནི། ཡུལ་ཀུན་གྱིས་དམ་པར་བཀུར་ཞིང་བཀའ་དྲིན་ཅུང་ཟད་ཐོབ་པ་སྤྱིའི་དང་། རབ་བྱུང་གི་མཁན་པོ་ལྟ་བུ་འདྲེན་པའི་དང་། དམ་ཚིག་འབོགས་ཤིང་དབང་སྐུར་བ་པོ་དམ་ཚིག་དབང་གི་དང་། བཤགས་ཡུལ་དུ་གྱུར་པ་ཉམས་ཆག་སྐོང་བའི་དང་། ཆོས་འཆད་པའི་སློབ་དཔོན་ལྟ་བུ་ཤེས་རྒྱུད་འགྲོལ་བའི་དང་། མན་ངག་སྟོན་ཅིང་ལུང་འབོགས་པ་པོ་མན་ངག་ལུང་གི་སློབ་དཔོན་ཏེ། གསལ་བཀྲ་ལས། སྤྱི་དང་འདྲེན་དང་དམ་ཚིག་དབང་། །ཉམས་ཆག་སྐོང་དང་ཤེས་རྒྱུད་གྲོལ། །མན་ངག་ལུང་གི་སློབ་དཔོན་དྲུག །ཅེས་སོ། །ཁྱད་པར་དུའང་དབང་བསྐུར། རྒྱུད་བཤད། མན་ངག་ནོད་པ་གསུམ་ནི་ལྷག་པར་ཡང་བཀུར་བའི་ཡུལ་གྱི་བླ་མའོ། །བཀུར་ལུགས་ནི་སྒོ་གསུམ་གཡོ་ཟོལ་མེད་པས་ཅི་མཉེས་སྒྲུབ་པའོ། །སྔགས་རྒྱ་རྒྱུན་མི་བཅད་པ་ནི། ཡུལ་སྔགས་གསུམ་དང་ཕྱག་རྒྱ་བཞི་སྟེ། གསལ་བཀྲ་ལས། རྩ་བ་བསྐྱེད་དང་ལས་སྔགས་དང་། །དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་ཆེན་པོ་བཞི། །ཞེས་སོ། །དེ་དག་བརྩོན་པ་རབ་ཀྱིས་ཆུ་བོའི་རྒྱུན་བཞིན་ནམ། ཉིན་ཞག་གཅིག་གི་ནང་དུ་ཐུན་དྲུག་གམ་བཞིའི་རྣལ་འབྱོར་དུ་བྱ་བ། འབྲིང་གིས་ཟླ་བ་རེ་ལ་དུས་ཚིགས་དྲུག་གམ། དུས་བཟང་པོ་བཞིའམ། ཉ་སྟོང་གཉིས་ཙམ་དང་། ཐ་མས་ཀྱང་ཟླ་དུས་དང་ལོ་དུས་ཀྱི་མཆོད་པ་རྒྱུན་མི་བཅད་པར་འབད་པར་བྱའོ། །མཆེད་ལ་བྱམས་པ་ནི། ཡུལ་སྤྱིའི་མཆེད་སེམས་ཅན་ཐམས་ཅད། རིང་བའི་མཆེད་བསྟན་ལ་ཞུགས་སོ་ཅོག །ཉེ་བའི་མཆེད་སྔགས་ཀྱི་ཐེག་པར་ཞུགས་པ། འདྲེས་པའི་མཆེད་བླ་མ་གཅིག་གིས་བསྡུས་པ་ཕ་གཅིག་པའི་སྤུན་དང་། དེའི་ཤུགས་ཀྱི་དཀྱིལ་འཁོར་གཅིག་གིས་བསྡུས་པ་མ་གཅིག་གི་སྤུན་རྣམས་སོ། །དེ་རྣམས་ལས་ཁྱད་པར་ཕྱི་མ་གསུམ་ནི་ཡང་དག་པའི་ལམ་དུ་ཞུགས་པའི་མཆེད་དང་། དེའི་ནང་ནས་ཀྱང་འདྲེས་པའི་མཆེད་ནི་ལྷག་པར་ཡང་བྱམས་པར་བྱ་བའི་ཡུལ་ལོ། །དེ་དག་ལ་བྱམས་ལུགས་ནི་རྟག་ཏུ་མི་འབྲལ་ཞིང་ཕན་འདོགས་པའི་ལྷག་བསམ་གྱིས་བརྩེ་གདུང་རྒྱུན་མི་ཆད་པར་བྱ་བའོ། །གསང་སྒྲོག་གི་ཡུལ་ནི། ཕྲ་རྒྱས་ལས། དམ་ཉམས་དམ་ལས་ལོག་པ་དང་། །དམ་མེད་དཀྱིལ་འཁོར་མ་མཐོང་དང་། །འདྲེས་དང་མ་འདྲེས་ཐམས་ཅད་ལ། །ཞེས་སོ། །ཇི་ལྟར་གསང་བའི་ཚུལ་ནི། སྤྱིར་གསང་སྔགས་ཀྱི་ཚིག་དོན་རྣམས་ཕྱིར་གྱུར་པ་སྟེ། སྣོད་མ་ཡིན་པ་ལ་གསང་བར་བྱ་བ་ཡིན་མོད། ཁྱད་པར་དུ་ནི། ཕྲ་རྒྱས་ལས། སྤྱི་དང་བར་གསང་བཞི་བཞི་དང་། །འོས་དང་གཉེར་གཏད་རྣམ་པ་བཅུ། །ཞེས་གསུངས་པ་རྣམས་ནི་ཤིན་ཏུ་གསང་བར་བྱ་བའོ། །དེ་ལ་སྤྱིར་གསང་བཞི་ནི། གསལ་བཀྲ་ལས། ལྟ་ཟབ་སྤྱོད་པ་རླང་པོ་དང་། །ལྷའི་མིང་གཟུངས་དང་གྲུབ་རྟགས་གསང་། །ཞེས་པའི་ལྟ་ཟབ་ནི་ཐེག་དམན་སོགས་བློ་འཕང་དམའ་བ་རྣམས་དང་། སྤྱོད་པ་ནི་མ་འདྲེས་པ་ཐམས་ཅད་ལ་གསང་ངོ་། །ཡི་དམ་གྱི་ལྷ་སྔགས་དང་གྲུབ་རྟགས་ནི་མ་འདྲེས་པ་ལ་བསྟན་ན་དམ་ཚིག་ཉམས་ཤིང་། འདྲེས་པར་བསྟན་ནའང་དངོས་གྲུབ་ཉམས་པར་གསུངས་པས་ཐམས་ཅད་དུ་གསང་བར་བྱའོ། །བར་གསང་བཞི་ནི། སྒྲུབ་པའི་གནས་དུས་གྲོགས་དང་རྫས། །བར་དུ་གསང་ལ་བསྒྲུབ་པར་བྱ། །ཞེས་པས་སྒྲུབ་པའི་བར་དེ་སྲིད་དུ་གསང་ངོ་། །གསང་བར་འོས་པ་ནི་རྫས་དང་སྤྱོད་པ་མཐོང་ཐོས་སུ་མི་རུང་བ་རྣམས་སོ། །གཉེར་གཏད་པ་ནི། སློབ་དཔོན་དང་མཆེད་ཀྱིས་གསང་བར་གདམས་པ་རྣམས་གཞན་དུ་སྨྲ་བར་མི་བྱའོ། །དེ་ལྟར་ལྔ་པོ་འདི་ལ་ནི། ལྗོན་ཤིང་གི་རྩ་བ་ལྟར་ཡོན་ཏན་གྱི་རྟེན་གཞི་ཡིན་པས་རྩ་བ་ལྔ་ཞེས་གསུང་པ་རྣམས་ཏེ། དེའང་བྱང་སེམས་དང་སྔགས་རྒྱ་གཉིས་སྒྲུབ་པའི་དམ་ཚིག་དང་། གཞན་གསུམ་བསྲུང་བའི་དམ་ཚིག་གི་མཆོག་སྟེ་རྩ་བའོ། །ཡང་རྩ་བ་གསུམ་དུ་བསྡུ་ན། བླ་མ་དང་མཆེད་ལ་བསྲུང་བ་སྐུའི་དམ་ཚིག །སྔགས་རྒྱ་གསུང་གི །གསང་བཅུ་ཐུགས་ཏེ། བྱང་སེམས་ཀྱང་ཐུགས་ཀྱི་དམ་ཚིག་ཏུ་བསྡུས་ན་བདེའོ། །དེ་ལྟར་ཡང་བདེ་འདུས་ཞི་རྒྱུད་ལས། བྱང་ཆུབ་སེམས་གསུམ་བསྒོམ་པ་ནི། །རྡོ་རྗེ་ཐུགས་ཀྱི་དམ་ཚིག་གོ །ཞེས་སོ། ། གཉིས་པ་ཡན་ལག་གི་དམ་ཚིག་ལ་གསུམ་སྟེ། མི་སྤང་བ་ལྔ་དང་། མི་དོར་བ་ལྔ་བསྟན་པ་དང་། གཉིས་ཀའི་མཇུག་བསྡུ་བའོ། །དང་པོ་ནི། གཏི་མུག་སོགས་རྐང་པ་གཉིས་ཏེ། འདི་ལ་གསལ་བཀྲ་ལས། ཡང་དག་དུག་ལྔ་ལོག་དུག་ལྔ། །ཞེས་པས་སྤྱིར་ཡང་ལོག་གཉིས་ལས། ཡང་དག་པའི་དུག་ལྔ་ནི། ཆོས་ཐམས་མཉམ་ཉིད་དུ་རྟོགས་པའི་ཚེ། ལྟ་བ་ལ་ཕྱོགས་རིས་དང་སྤྱོད་པ་ལ་བླང་དོར་གྱིས་འབྱེད་པ་མེད་པ་ནི་གཏི་མུག་དང་། དེ་མ་རྟོགས་པ་ལ་དམིགས་མེད་ཀྱི་སྙིང་རྗེ་ཆེན་པོའི་འདོད་ཆགས་དང་། རང་རིག་པའི་ཡེ་ཤེས་ཀྱིས་ལོག་རྟོག་འཇོམས་པའི་ཞེ་སྡང་དང་། མཉམ་ཉིད་རྟོགས་པའི་ལྟ་བ་ཤོངས་སུ་མི་འབེབས་པའི་ང་རྒྱལ་དང་། གཉིས་འཛིན་གྱི་ཞེན་རྟོག་མཉམ་ཉིད་ཀྱི་ཀློང་དུ་མི་ཤོང་བའི་ཕྲག་དོག་སྟེ། རྟོགས་གོམས་ཀྱིས་སྦྱོར་བས་མི་སྤང་ངོ། །ལོག་པའི་དུག་ལྔ་ནི། དུག་ལྔ་རང་མཚན་པ་རྣམས་ཏེ། དེ་དག་ཅིའི་ཕྱིར་མི་སྤང་ཞེ་ན། ལོག་པའི་དུག་ལྔ་ཆོས་ཅན། སྤང་བྱ་མ་ཡིན་ཏེ། ཆོས་ཐམས་ཅད་རང་རང་གི་ངོ་བོས་སྟོང་པས་སྤང་བྱའི་རྫས་མ་གྲུབ་པའི་ཕྱིར་དང་། ཐབས་ཀྱིས་ཟིན་ན་སྤྱད་ཀྱང་མི་འཆིང་བར་རྣམ་པར་གྲོལ་བའི་ལམ་ཡིན་པའི་ཕྱིར་དང་། ཡེ་ནས་རིགས་ལྔའི་རང་བཞིན་ཡིན་པའི་ཕྱིར་རོ། །དེ་བས་ན་མི་སྤང་བ་ལ་དགོས་པ་ཡོད་དེ། དངོས་པོའི་ཞེན་པ་ལྡོག་པ་དང་། འཆིང་བྱེད་ཀྱི་ལས་ལ་སྤྱད་པས་གྲོལ་བ་འདི་འདྲ་ངོ་མཚར་ཆེ་སྙམ་དུ་ཐབས་ཀྱི་ལམ་ཟབ་མོ་ལ་ངེས་ཤེས་སྐྱེ་བ་དང་། ཆོས་ཉིད་ཟབ་མོ་རྟོགས་པ་ལ་བློ་མྱུར་བའི་དགོས་པ་རྣམས་ཡོད་པའི་ཕྱིར་རོ། །གཉིས་པ་མི་དོར་བ་ལྔ་བ་ནི། དཀར་རྩི་སོགས་རྐང་པ་གཉིས་ཏེ། དཀར་རྩི་བྱང་སེམས་དཀར་པོ་དང་། དམར་རྩི་བྱང་སེམས་དམར་པོ་དང་། དྲི་ཆེན་དང་ཤ་ཆེན་དག་པའི་སྣོད་དེ་དྭངས་མ་དང་། དྲི་ཆུ་རྣམས་ནི་གཙང་རྨེའི་རྟོག་པ་སྦྱོང་བ་དང་། ནད་ལྔ་སེལ་ཞིང་ཐུན་མོང་གི་ཡོན་ཏན་ལྔ་འབྱུང་བ་དང་། རིགས་ལྔ་ཡེ་ཤེས་ལྔ་སྒྲུབ་པའི་དམ་རྫས་ཁྱད་པར་ཅན་ཡིན་པའི་ཕྱིར། མི་དོར་དང་དུ་བླང་བར་བྱའོ། །འདིར་དཔེ་ཕལ་ཆེ་བར། དག་པའི་སྣོད་བཅུད་ཅེས་འབྱུང་བ་ནི་མ་དག་པ་སྟེ། རྒྱ་དཔེར་ཆུའི་སྐད་དོད་ཛ་ལམ་ཞེས་ཡོད་ཅེས། ཐར་ལོའི་འགྱུར་ལས་ཀྱང་། དཀར་དང་དམར་དང་དྲི་དང་ནི། །ཤ་ཆེན་དག་པ་ཡི་ནི་སྣོད། །ཆུ་ཉིད་ཀྱང་ནི་དོར་མི་བྱ། །ཞེས་སོ། །གསུམ་པ་མཇུག་བསྡུ་བ་ནི། ཡན་ལག་སོགས་རྐང་པ་གཉིས་ཏེ། དེ་ལྟར་མི་སྤང་མི་དོར་བ་ནི་རྩ་བའི་གྲོགས་སམ་ཐབས་སུ་གྱུར་པས་ན་ཡན་ལག་བཅུ་ཡི་དམ་ཚིག་ཅེས་བྱ་སྟེ། ཡེ་ནས་དག་པ་གསུམ་དང་མཉམ་པ་བཞིར་གནས་པའི་དོན་རྟོགས་པས་སྤྱད་པར་བྱའོ། ། གསུམ་པ་ངེས་ཚིག་ནི། བསྲུང་ཞིང་སོགས་ཚིགས་བཅད་གཅིག་སྟེ། སྔར་བཤད་བསྲུང་ཞིང་སྒྲུབ་པའི་དམ་ཚིག་རྣམ་པ་ལྔ་ནི་རྩ་བའི་དམ་ཚིག་ཡིན་ཏེ། ལྗོན་ཤིང་གི་རྩ་བ་ལྟར་བསྲུང་ན་དངོས་གྲུབ་འབྱུང་ཞིང་ཉམས་ན་རེ་ཞིག་བྱང་ཆུབ་ཀྱི་རིགས་ཀྱང་མེད་པར་འགྱུར་བའི་ཕྱིར་རོ། །མི་སྤོང་མི་དོར་བའི་དམ་ཚིག་ལྔ་ཚན་གཉིས་ནི་རྩ་བའི་དམ་ཚིག་གི་གྲོགས་སུ་དགོས་པས་ཡན་ལག་གི་དམ་ཚིག་ཅེས་བྱ་སྟེ། དེ་དག་ཀྱང་ཉམས་ན་འབྲས་བུ་མྱུར་དུ་འབྱུང་བ་ལ་གེགས་བྱེད་པས་ར་བ་མཚམས་ཀྱི་འོབས་ལྟར་འདའ་བར་དཀའ་བའོ། ། གསུམ་པ་མཉམ་པའི་དམ་ཚིག་སྐྱོན་ཡོན་དང་བཅས་པ་ནི། མཉམ་ལ་སོགས་ཚིགས་བཅད་གཅིག་སྟེ། ཆོས་ཐམས་ཅད་བདེན་གསུམ་རིས་མེད་དུ་མཉམ་པ་ལ་ཤེས་འཇུག་གི་ལམ་ཟབ་མོས་མཉམ་པར་སྦྱོར་བ་ཡི་དོན་དེ་ལས་མི་འདའ་བས་མཉམ་པའི་དམ་ཚིག་སྟེ། དེའི་ངང་ལ་གནས་ན་འབྲས་བུ་མཉམ་རྫོགས་ཆེན་པོ་ཀུན་ཏུ་བཟང་པོ་དབྱེ་བ་མེད་པའི་ས་ཐོབ་པར་འགྱུར་བས་བསྲུང་བར་བྱ་ཞིང་། གལ་ཏེ་དེའི་འགལ་ཟླ་མཉམ་པ་ལས་འདས་ཏེ་ཐ་དད་དུ་རྟོག་ན་འབྲས་བུ་སངས་རྒྱས་ཐོབ་པ་མ་ཡིན་ནོ། ། བཞི་པ་དམ་ཚིག་ཉམས་པའི་སྐྱོན་ལ་གསུམ་སྟེ། ཉམས་པ་དང་འགྲོགས་པའི་དང་། རྩ་བ་ཉམས་པའི་དང་། ཡན་ལག་ཉམས་པའི་སྐྱོན་ནོ། །དང་པོ་ནི། རྩ་བ་ཉམས་པའི་སོགས་ཚིགས་བཅད་དེ། རྩ་བའི་དམ་ཚིག་ཉམས་པའི་བསླབ་སྡོམ་འཆལ་བ་དག་དམ་ཚིག་གསོ་བའི་ཐབས་ལ་དུས་ཉེ་བར་མི་བརྩོན་པ་རྣམས་དང་སྐད་ཅིག་ཙམ་ཡང་མི་འགྲོགས་ཤིང་ཡུད་ཙམ་དུའང་གཏམ་སྨྲ་བར་མ་བྱེད་ཅིག །ཅིའི་ཕྱིར་ཞེ་ན། ཉམས་པ་དང་འགྲོགས་པར་གྱུར་པའི་ཉེས་པ་བརྗོད་ཀྱིས་མི་ལང་སྟེ་ཟླས་ཉམས་ཞེས་བྱའོ། །དེ་ལྟར་ཡང་ཀུན་འདུས་ལས། ཇི་ལྟར་འོ་མ་རུལ་བ་དག །རུལ་བས་འོ་མ་ཀུན་རུལ་ལྟར། །རྣལ་འབྱོར་ཉམས་གྱུར་གཅིག་གིས་ནི། །རྣལ་འབྱོར་ཅན་ཀུན་མ་རུང་བྱེད། །ཅེས་སོ། །གཉིས་པ་ནི། རྩ་བའི་དམ་ཚིག་སོགས་ཚིགས་བཅད་གཅིག་སྟེ། རྩ་བའི་དམ་ཚིག་ཉམས་པར་གྱུར་ན་ཆར་ཕབ་པས་ཐན་པ་འབྱུང་བ་ལྟ་བུ་ཚེ་འདིར་ཡང་ལས་གང་སྒྲུབ་པ་ཐམས་ཅད་ཀྱང་འབྲས་བུ་ཕྱིན་ཅི་ལོག་པར་འགྱུར་བ་སོགས་མི་འདོད་པ་སྣ་ཚོགས་འབྱུང་ཞིང་། ཕྱི་མར་ཡང་ཡིད་དུ་མི་འོང་བ་སྣ་ཚོགས་པའི་འབྲས་བུ་རྡོ་རྗེའི་དམྱལ་བ་སོགས་ངན་སོང་གསུམ་གྱི་སྡུག་བསྔལ་མི་འདོད་བཞིན་དུ་ཁབ་ལེན་གྱིས་ལྕགས་ལྟར་རང་དབང་མེད་པར་འདུ་བར་འགྱུར་རོ། །གསུམ་པ་ནི། ཡན་ལག་སོགས་རྐང་པ་གཉིས་ཏེ། ཡན་ལག་གི་དམ་ཚིག་ཉམས་པར་གྱུར་ན་བསྒྲུབས་པའི་འབྲས་བུ་དངོས་གྲུབ་མེད་ཅིང་ཕྱི་མར་ངན་སོང་གསུམ་གྱི་གནས་སུ་ལྟུང་བར་འགྱུར་རོ། ། ལྔ་པ་དམ་ཚིག་གི་རང་བཞིན་ནི། དམ་ཚིག་རྣམས་ནི་སོགས་ཏེ། རྩ་བ་དང་ཡན་ལག་གི་དམ་ཚིག་རྣམས་ཀྱི་རང་བཞིན་ནི་སྐུ་གསུང་ཐུགས་དབྱེར་མི་ཕྱེད་པ་རྡོ་རྗེ་ཆེན་པོའི་རང་བཞིན་ཏེ། འདི་ནི་དུས་གསུམ་གྱི་སངས་རྒྱས་ཀུན་གྱི་བདག་ཉིད་ཆོས་ཀུན་གྱི་སྲོག་དང་བསླབ་པ་ཐམས་ཅད་ཀྱི་དམ་པ་ཡིན་ནོ། ། དྲུག་པ་དམ་ཚིག་གི་རྣམ་གྲངས་རྒྱས་པར་བཤད་པ་ལ་གཉིས་ཏེ། སུམ་བརྒྱ་དྲུག་ཅུར་དང་། མཐའ་ཡས་པར་སྤྲོས་པའོ། དང་པོ་ནི། རྩ་བའི་དམ་ཚིག་སོགས་ཚིགས་བཅད་གཅིག་སྟེ། འདི་ལ་ཕྲ་རྒྱས་ལས། ཕྱི་མ་རྩ་བ་ཡན་ལག་ལས། །ལྔ་བཅུའི་བརྒྱ་དང་དྲུག་ཅུ་དང་། །ཉིས་བརྒྱའི་བསྲུང་བྱ་མ་ལུས་པ། །བཀའ་ལུང་གཉིས་ཀྱི་རྗེས་སུ་བསྙེག །ཅེས་པས་རྩ་བའི་དམ་ཚིག་ལ་བརྒྱ་དྲུག་ཅུ་དང་། ཡན་ལག་གི་དམ་ཚིག་ལ་ཉིས་བརྒྱར་ཕྱེ་བས་སུམ་བརྒྱ་དྲུག་ཅུ་སྟེ། དེ་ཡང་རྩ་བའི་དམ་ཚིག་ལྔ་པོ་ལ་ནི། གཅིག་སྟེ་རེ་རེ་ལའང་ཐབས་ཤེས་གཉིས་གཉིས་སུ་ཕྱེ་བས་བཅུ་དང་། ཡང་རྩ་བ་ལྔ་པོ་རེ་རེ་ལའང་བཅུ་ཕྲག་གསུམ་སྟེ་སུམ་ཅུ་རེར་ཕྱེ་བས་ཆིག་བརྒྱ་ལྔ་བཅུ་སྟེ། དེ་སྔར་གྱི་བཅུ་དང་སྡོམ་པས་བརྒྱ་དྲུག་ཅུའོ། །དེ་ཡང་ཕྲ་རྒྱས་ལས། པཉྩའི་ཉིང་ལག་ཅེས་པའང་། །དང་པོ་ཉིད་ནས་ཐབས་སྤྱོད་དང་། །ཤེས་རབ་ཉིད་ཀྱིས་ཉིས་འགྱུར་ཡིན། །རེ་རེའང་བསྲུང་བྱ་སུམ་ཅུ་སྟེ། །ཞེས་སོ། །ཡན་ལག་གི་དམ་ཚིག་ལྔ་ཚན་གཉིས་ཏེ་བཅུ་པོ་རེ་རེ་ལ་དབྱེ་ཚུལ་གཏི་མུག་ལྟ་བུ་གཅིག་ལའང་ནང་ཚན་བཅུ་ཕྲག་གཉིས་སུ་སྟེ་ཉི་ཤུ་ཉི་ཤུར་དབྱེ་བས་ཉིས་བརྒྱའོ། །དེ་ལྟར་རྩ་བ་དང་ཡན་ལག་གི་དམ་ཚིག་སུམ་བརྒྱ་དྲུག་ཅུ་པོ་སོ་སོའི་དོན་ཤེས་པར་འདོད་ན་ཕྲ་རྒྱས་སུ་བལྟ་བར་བྱའོ། ། གཉིས་པ་ནི་དམ་ཚིག་འདི་ནི་སོགས་ཚིགས་བཅད་གཅིག་སྟེ། རྩ་བ་དང་ཡན་ལག་གི་དམ་ཚིག་འདི་དག་ནི་གཞན་ལས་ཁྱད་པར་དུ་གྱུར་པས་རྨད་པོ་ཆེ་ཡིན་ཏེ། དེས་དོན་བྱ་བའི་ཡུལ་འཇིག་རྟེན་དྲུག་གི་ཕྱོགས་བཅུ་ན་སྲིད་པ་གསུམ་གྱིས་བསྡུས་པའི་འགྲོ་བ་ཇི་སྙེད་ཅིག་ཡོད་པ་དེ་རྣམས་སོ་སོའི་རྣམ་པར་རྟོག་པ་འདུལ་བའི་གཉེན་པོར་དམ་ཚིག་གི་རྣམ་གྲངས་ཀྱང་བསམ་གྱིས་མི་ཁྱབ་པ་དེ་སྙེད་ཅིག་སྤྲོས་ནས་དོན་མཛད་དོ། ། བདུན་པ་མ་ཉམས་པའི་ཡོན་ཏན་བསྟན་པ་ལ་དྲུག་ལས། དང་པོ་འབྲས་བུ་ཐོབ་ཅིང་ཚད་མེད་པའི་ཡོན་ཏན་ནི། གཞན་ཡང་སོགས་ཚིགས་བཅད་གཅིག་སྟེ། མཉམ་པའི་དམ་ཚིག་ལས་གཞན་ཡང་རྩ་བ་དང་ཡན་ལག་གི་དམ་ཚིག་རྣམས་བསྲུངས་པའི་འབྲས་བུ་རྒྱལ་མཆོག་རིགས་ཀྱི་བདག་པོ་ཀུན་ཏུ་བཟང་པོ་ཉིད་ཀྱི་གོ་འཕང་ཐོབ་པར་འགྱུར་ཏེ། དེའི་ངོ་བོ་ཇི་ལྟར་ཞེ་ན། འཁོར་འདས་ཀྱི་ཆོས་ཐམས་ཅད་ལྷག་མ་མ་ལུས་པ་རྒྱལ་བའི་སྐུ་གསུང་ཐུགས་ཀྱི་ཕྱག་རྒྱའི་ངོ་བོར་ལྷུན་གྱིས་གྲུབ་པས་ཆེད་དུ་སྒྲུབ་པ་མེད་པར་འབྲས་བུའི་མཆོག་དམ་པ་ཀུན་བཟང་གི་ཡོན་ཏན་མ་ལུས་པ་འགྲུབ་ཅིང་། དེ་ལ་སོགས་པའི་ཡོན་ཏན་བསམ་བརྗོད་ལས་འདས་པས་ན་མཐའ་ཡས་པའི་མཆོག་གོ །གཉིས་པ་འཇིག་རྟེན་གྱི་གཙོ་བོས་བསྟོད་ཅིང་བཀུར་བ་ནི། རྒྱལ་བའི་སོགས་རྐང་པ་གཉིས་ཏེ། རྒྱལ་བའི་རིགས་མཆོག་གསང་སྔགས་འཛིན་ཅིང་དམ་ཚིག་ལ་གནས་པ་དེ་ལྷ་ཆེན་པོ་ལ་སོགས་པ་འཇིག་རྟེན་གྱི་གཙོ་བོ་རྣམས་དང་། དེའི་འཁོར་མ་མོ་དང་མཁའ་འགྲོ་ཐམས་ཅད་ཀྱིས་རྫོགས་པའི་སངས་རྒྱས་ལྟར་བཀུར་ནས་དམ་པར་མཐོང་བར་འགྱུར་རོ། །གསུམ་པ་འཕགས་པས་བྱིན་གྱིས་རློབ་པ་ནི། དམ་པ་སོགས་རྐང་པ་གཉིས་ཏེ། དམ་པ་མཆོག་རྫོགས་པའི་སངས་རྒྱས་དང་། དམ་པར་སར་གནས་ཀྱི་བྱང་ཆུབ་སེམས་དཔའ་ཡིས་རིམ་པ་ཇི་ལྟར་བར་རང་གི་སྲས་ཀྱི་ཐུ་བོ་དང་། སྤུན་དུ་དགོངས་པས་ཐུགས་རྗེའི་བྱིན་གྱིས་རློབ་པ་མྱུར་བ་ཉིད་དུ་འཇུག་པར་འགྱུར་རོ། །བཞི་པ་རྒྱལ་བའི་སྤྱོད་ཡུལ་ཐོབ་པ་ནི། བདེ་གཤེགས་སོགས་རྐང་པ་གཉིས་ཏེ། དམ་ཚིག་དང་ལྡན་པ་དེ་ནི་བདེ་བར་གཤེགས་པ་ཉིད་ཀྱི་སྤྱོད་ཡུལ་རིག་པ་འཛིན་པའི་ས་ལ་རིམ་པར་ཞུགས་ནས། ལྟུང་གནས་ཀྱི་འཇིགས་པ་དང་བག་ཚ་བ་ཐམས་ཅད་མེད་པ་སྤྱོད་ཡུལ་ཡོངས་དག་ཀུན་ཏུ་བཟང་པོའི་ཞིང་ཁམས་ཆེན་པོར་སྦྱོར་བར་འགྱུར་རོ། །ལྔ་པ་འོག་མའི་འདུལ་སྡོམ་རྫོགས་པའི་ཡོན་ཏན་ནི། ཇི་བཞིན་སོགས་རྐང་པ་གསུམ་སྟེ། གནས་ལུགས་ཇི་བཞིན་པའི་ཆོས་ཉིད་མངོན་དུ་བྱེད་པ་བླ་མེད་ཀྱི་དམ་ཚིག་དང་། དེའི་ནང་དུ་གདུལ་བྱ་རྣམས་བློ་དང་འཚམས་པར་འདུལ་བའི་ཐབས་ཉན་རང་བྱང་སེམས་ཀྲི་ཡོག་སོགས་ཐེག་པ་ཇི་སྙེད་པ་དེ་དག་གི་སྡོམ་པ་བསམ་ཡས་པ་ཐམས་ཅད་ཀྱང་འདིར་ཡར་ལྡན་གྱི་ཚུལ་དུ་འདུས་ཤིང་། དགག་བྱ་མ་ལུས་པ་རྣམ་པར་དག་པ་དང་། ཡོན་ཏན་ཐམས་ཅད་མ་བཙལ་བར་རང་བཞིན་ལྷུན་གྱིས་གྲུབ་པ་ཡིན་ནོ། །དྲུག་པ་ཉམས་ཀྱང་བསྐང་བའི་ཐབས་ཡོད་པའི་ཡོན་ཏན་ནི། ཉམས་ན་སོགས་རྐང་པ་གཉིས་ཏེ། གལ་ཏེ་གསང་སྔགས་ཀྱི་དམ་ཚིག་ཉམས་པར་གྱུར་པར་ཉན་ཐོས་ཀྱི་ཕམ་པ་འཆབ་བཅས་བྱུང་བ་ལྟར་གསོར་མི་རུང་བ་མ་ཡིན་ཏེ། སྐོང་བའི་ཐབས་ཁྱད་པར་ཅན་གྱི་ཆོ་གས་བསྐང་བས་སྔར་བཞིན་སོར་ཆུད་ཅིང་། དམ་ཚིག་གི་ཡོན་ཏན་ཐམས་ཅད་ཡོངས་སུ་རྫོགས་པར་འགྱུར་བ་དང་། དེ་ལ་སོགས་པའི་ཡོན་ཏན་མཐའ་ཡས་པའི་མཆོག་རྡོ་རྗེའི་ཐེག་པ་འདི་ལ་མངའ་བ་ཡིན་ནོ། ། གཉིས་པ་ཡོན་ཏན་ནི། ཅེས་བརྗོད་པས་སོགས་ཏེ། དེ་སྐད་ཅེས་བརྗོད་པས་དམ་ཚིག་གི་རང་བཞིན་ནི་དེ་བཞིན་གཤེགས་པ་ཉིད་ཡིན་པས་ན། དེའི་རང་བཞིན་ལས་རྒྱལ་བ་དེ་བཞིན་གཤེགས་པ་ཉིད་ཀྱང་འདའ་བར་མི་མཛད་ན་གཞན་ལྟ་ཅི་སྨོས་ཏེ། དེའི་ཕྱིར་གདུལ་བྱ་རྣམས་ལ་བླ་ན་མེད་པའི་དམ་ཚིག་བསྟན་ནས་འདུལ་བར་གྱུར་ཏོ། ། གསུམ་པ་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉེར་གཉིས་ཡོད་པ་ལས། འདིས་རྩ་བ་དང་ཡན་ལག་གི་དམ་ཚིག་གི་རྣམ་བཞག་བསྟན་པའི་ལེའུ་སྟེ་བཅུ་དགུ་པའོ།། །། ལེའུ་ཉི་ཤུ་པའི་འགྲེལ་པ།ལེའུ་ཉི་ཤུ་པ་ལ་གསུམ་སྟེ། ལོ་རྒྱུས་དང་། གཞུང་དང་། མཚན་ནོ། དང་པོ་ནི། དེ་ནས་སོགས་ཏེ། དམ་ཚིག་བསྟན་པ་དེ་ནས་དམ་ཚིག་ཅན་གྱིས་ཕྲིན་ལས་བྱ་བ་སྟོན་པའི་ཕྱིར་དེ་བཞིན་གཤེགས་པ་བཅོམ་ལྡན་དགྱེས་པ་ཆེན་པོས་ཡེ་ནས་སེམས་ཉིད་ཕྲིན་ལས་བཞིའི་རང་བཞིན་དུ་ལྷུན་གྱིས་གྲུབ་པ་ལས་མི་འདའ་བའི་དམ་ཚིག་དེ་ཉིད་ཆོ་ག་བཞིས་བསྐུལ་བས་མངོན་དུ་སྣང་བར་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཕྲིན་ལས་ཀྱི་དོན་ཆེད་དུ་བརྗོད་པ་འདི་བརྗོད་དོ། ། གཉིས་པ་གཞུང་ལ་གཉིས་ཏེ། ཕྲིན་ལས་དངོས་དང་། དེའི་ཡོན་ཏན་ནོ། །དང་པོ་ལ་ལྔ་སྟེ། རྫས་ཧོམ་ལུག་རྒྱུད་ཀྱི་སྒོ་ནས་ལས་བྱ་བ་དང་། ལྷག་མའི་ལས་དང་། བྲོ་གར་གླུ་ཚིག་གི་ཡོན་ཏན་དང་། ལས་བཞིའི་གནས་གཟུངས་ཐུན་མོང་དུ་བསྟན་པ་དང་། དོན་སྟོངས་ཀྱི་སེམས་བསྟན་པའོ། །དང་པོ་ལའང་ལས་རྣམ་པ་བཞི་ལས། ཐོག་མར་དྲག་པོའི་ཕྲིན་ལས་ལ་ལྔ་སྟེ། ལིངྒ་བཅའ་བ། དཀྱིལ་འཁོར་བསྐྱེད་པ། བསྒྲུབ་བྱའི་ལས། མཆོད་སྦྱིན་བྱ་བ་ཡོན་ཏན་དང་བཅས་པ། ལུ་གུ་རྒྱུད་ཀྱི་བྲོའི་ལས་ཡོན་ཏན་དང་བཅས་པའོ། །དང་པོ་ནི། བདུད་རྩི་ལྔ་སོགས་རྐང་པ་གཉིས་ཏེ། བསྒྲུབ་བྱའི་བདུད་རྩི་ལྔ་སྟེ་ཟག་རྫས་སམ། ཟས་ཤ །ཉ་ཤ །བུ་རམ། སྦྲང་རྩི། ཏིལ་ལྔ་དང་། གཞན་ཡང་མི་ལ་རྐང་རྗེས་ཀྱི་ས་དང་། མི་མ་ཡིན་པ་ལ་གནས་རྟེན་གྱི་ས་སོགས་ལ་རྒྱུ་བྱས་པའི་ལིངྒ་ཕོ་མོ་གང་ཡིན་གྱི་མཚན་མ་ཅན་དཔྲལ་བར་རུས། སྙིང་གར་སྲོག་གང་ཡིན་མིང་དུ་བཅས་པ་རྣམས་གྲོ་ཤོག་ལ་བྲིས་ཏེ་གནས་སོ་སོར་གླན་པའི། ཡང་ན་གྲོ་ཤོག་རང་ལ་ལིངྒ་བྲིས་པའི་ལྟེ་བར་བླ་དྭགས། འདོམས་སུ་ཆེ་གེ་མོ་མཱ་ར་ཡ་ཕཊ་ཀྱི་སྤུ་གྲི་བྲི། མཐའ་རྫས་བསྐོར་ཞིང་། སྔར་གྱི་རྫས་རྣམས་བྱུགས་ཏེ། ཐོད་པ་མཚན་ངན་གྱི་ནང་དུ་མགོ་ལྷོ་ནུབ་ཏུ་བསྟན་ནས་བཅུག་པ་དཀྱིལ་འཁོར་གྱི་བྱང་ཕྱོགས་སུ་བྲུབ་ཁུང་གྲུ་གསུམ་དུ་གཞུག་པར་བྱའོ། །གཉིས་པ་ནི། ཨེ་ཡི་ཚོགས་ཀྱི་དཀྱིལ་འཁོར་མཆོག །ཅེས་ཏེ། སྔགས་འཆང་རྣམས་དྲག་པོའི་ལས་དང་མཐུན་པའི་ཆ་བྱད་དང་འདུག་སྟངས་ཀྱིས། ཨེ་རཾ་སོགས་བརྗོད་པས་ཕྱི་སྣོད་ཀྱི་འཇིག་རྟེན་གྲུ་གསུམ་ཨེ་ཡིག་གི་རྣམ་པ་ཅན་མཐིང་ནག་མེ་འབར་བའི་དབུས་སུ་སྔགས་ཀྱི་རྐྱེན་གྱིས་ནང་བཅུད་ཀྱི་སེམས་ཅན་ཐམས་ཅད་ཁྲག་འཐུང་འབར་བའི་ལྷ་ཚོགས་ལྔ་བཅུ་རྩ་བརྒྱད་ཀྱི་དཀྱིལ་འཁོར་དྲག་པོའི་ལས་ལ་མཆོག་ཏུ་ཤིས་པ་བཛྲ་ཧེ་རུ་ཀས་གཙོ་བྱས་ཤིང་། ཐམས་ཅད་ཀྱང་སྐུ་མདོག་མཐིང་ནག་འཇིགས་པའི་གཟུགས་ཅན་དུ་བཞེངས་པར་བསམ་པའོ། །གསུམ་པ་ནི། བཀུག་ནས་སོགས་རྐང་པ་གཉིས་ཏེ། བ་ཧུའི་སྔགས་ཀྱིས་ལས་ལ་གཟུད། བི་ཤྭས་སྤྲུལ་པ་སྤྲོ། བསྒྲུབ་བྱ་བཀུར་ནས་གཉིས་མེད་དུ་བསྟིམ་ལ། ལྕགས་སམ་ཤིང་ནག་པོ་ལས་བྱས་པའི་རྡོ་རྗེ་ཕུར་བུ་རྒྱ་མདུད་དབལ་ཟུར་གསུམ་པ་གསུམ་སྲས་མཆོག་བཛྲ་ཀཱི་ལ་ཡར་བསྐྱེད་ནས་བྱིན་གྱིས་བརླབས་ཏེ། ཕུར་བསྐུལ་དང་སྡེར་མོའི་སྔགས་ལས་ཀྱི་སྤུ་གྲི་བཏགས་པས་དཔྲལ་བ་སོགས་གནས་གསུམ་དུ་གདབ་ཅིང་གྲིས་གཏུབ། མཚོན་ཆའི་ཆར་དབབ་པས་ལུས་ངག་རྡུལ་ཕྲན་བཞིན་དུ་བྱས་པར་བསམ་ནས་ལིང་རོ་ཆ་གསུམ་དུ་བཅད་ལ། ཆ་གཅིག་བཛྲ་ཧེ་རུ་ཀས་གཙོ་བྱས་པའི་ཁྲག་འཐུང་གི་ཚོགས་ལ་འབུལ་ཏེ་སྟོབ་པ་བྱ། ཆ་གཅིག་སྦྱིན་སྲེག་གི་སྲེག་རྫས་དང་བསྲེ། ཆ་གཅིག་བྲོ་གདན་ལ་བྲོ་རའི་དབུས་སུ་སྤུངས་ནས་བྲོ་བརྡུངས་རྗེས་མི་མ་ཡིན་གདུག་པ་ཅན་གནས་པའི་སར་དོང་གྲུ་གསུམ་པར་བཅུག་སྟེ། དུར་གཡམ་ལ་རོ་སོལ་གྱིས་རྡོ་རྗེ་རྒྱ་གྲམ་བྲིས་པས་བཀབ་ལ་མནན་པར་བྱའོ། །བཞི་པ་ནི། འབར་བ་སོགས་རྐང་པ་གསུམ་སྟེ། དྲག་པོའི་མེ་ལྷའི་ལྟོ་བར་བཛྲ་ཧེ་རུ་ཀ་གཙོ་བྱས་པའི་ཁྲག་འཐུང་འབར་བའི་དཀྱིལ་འཁོར་བསྐྱེད་པའི་ལྷ་ཚོགས་གཏུམ་ཆེན་རྔམས་པའི་ཆ་བྱད་ཅན་ལ། སྟོངས་ཀྱི་སེམས་རབ་ཏུ་ཁྲོས་པའི་ཡིད་ཀྱིས་སྲེག་བླུགས་ཀྱི་མཆོད་སྦྱིན་བྱས་ན་ཚོགས་གཉིས་ལས་གྲུབ་པས་སངས་རྒྱས་བསོད་ནམས་བརྒྱའི་མཚན་གྱིས་བརྒྱན་པའི་སྐུ་ཡང་འཇིག་ན་བསྒྲལ་བྱའི་སེམས་ཅན་རྣམས་ལྟ་ཅི་སྨོས་པའོ། །ལྔ་པ་ནི། ཨེ་ཡི་སོགས་ཚིགས་བཅད་གཅིག་སྟེ། ཨེ་བྷྲུཾ་ཞེས་བརྗོད་པས་ཕྱི་སྣོད་དྲག་པོའི་དཀྱིལ་འཁོར་ཨེ་དབྱིབས་གྲུ་གསུམ་པའི་རྣམ་པ་ཅན་མཐིང་ནག་འབར་བའི་དབུས་སུ་སྔགས་ཀྱི་རྐྱེན་གྱིས་བཅུད་ཐམས་ཅད་ཁྲག་འཐུང་འབར་བའི་ལྷ་ཚོགས་ལྔ་བཅུ་རྩ་བརྒྱད་ཀྱི་དཀྱིལ་འཁོར་གཙོ་མཆོག་བཛྲ་ཧེ་རུ་ཀས་བྱས་པར་བསམ་ལ། ལིང་རོ་དབུས་སུ་སྤུངས་པའི་མཐར་སྒྲུབ་པ་པོ་མཆེད་ལྕམ་ཀུན་བྲོ་ར་གྲུ་གསུམ་དུ་བཅས་ལ། ལག་གཡས་སྟེང་དུ་བྱས་ཏེ་བསྣོལ་བའི་མཐེའུ་ཆུང་རྣམས་ལུ་གུ་རྒྱུད་དུ་སྦྲེལ་ཞིང་བསྡམས་ནས། ཧཱུཾ་ཧཱུཾ་ཧཱུཾ། ཞེ་སྡང་རྡོ་རྗེ་སོགས་ཀྱི་ཚིག་དང་སུམྦྷའི་སྔགས་ཀྱིས་བསྐུལ་ཞིང་། ཕྱག་རྒྱ་དེ་ལྟར་བཅིངས་པར་གྱུར་པ་ལས་མིག་དང་ལུས་བསྐྱོད་ནས་བྲོ་བརྡུངས་པས་རྡོ་རྗེའི་རིགས་ཀྱི་ཁྲོ་ཚོགས་དཔག་མེད་ཕྱོགས་བཅུར་གཡོས་པས་བསྒྲུབ་བྱ་རྡུལ་དུ་བརླག་པར་བསམས་ལ། ཆེ་གེ་མོ་མཱ་ར་ཡ་ཧཱུཾ་ཕཊ། ཅེས་བརྗོད་ཅིང་། ཕྱག་རྒྱ་སྤྲུགས་ཏེ་བཤིགས་པས་གཟས་པོ་དེ་ཉིད་དྲན་པ་མྱོས་ནས་སྙིང་གས་ཏེ་ལུས་ཀྱང་ཐུལ་གྱིས་འཚིག་ནས་མིང་གི་ཐ་མར་བྱེད་པར་འགྱུར་རོ། །དེ་བཞིན་དུ་དབང་སོགས་ལས་ལྷག་མ་གཞན་གསུམ་སྤྱིར་དེས་ཁོག་ཕུབ་པ་ལས། ཁྱད་པར་གྱི་སྒོས་ཆོས་རྣམས་བཤད་པར་བྱ་སྟེ། དེ་ལ་ལིངྒ་བཅའ་བ་ནི། རྒྱུ་བདུད་རྩི་ལྔའམ་ཟས་ལྔ་ལ། བསྒྲུབ་བྱ་གང་ཡིན་གྱི་ལིངྒ་མཚན་མ་མིང་དུ་བཅས་པ་བྱ་སྟེ། དེའང་དབང་ལ་གང་དབང་དུ་བྱ་བར་འདོད་པ་དང་། རྒྱས་པ་ལ་འཇིག་རྟེན་ན་ཚེ་དང་བསོད་ནམས་རྒྱས་པ་སོགས་འདོད་པའི་ཡོན་ཏན་འབྱུང་བའི་ཡིད་བཞིན་གྱི་གཏེར་དུ་བརྟག་པ་དང་། ཞི་བ་ལ་མ་རུངས་པ་གཏུམ་རྔམ་འཁྲུག་པའི་ངོ་བོར་བརྟག་སྟེ། དེ་རྣམས་ལས་གང་ཡིན་གྱི་བྲུབ་ཁུང་དུ་བཅུག་ནས། དབང་ལ་དཀྱིལ་འཁོར་གྱི་ནུབ། རྒྱས་པ་ལ་ལྷོ། ཞི་བར་ཤར་དུ་བཞག་གོ །དེ་ནས་དཀྱིལ་འཁོར་བསྐྱེད་པ་ནི། དབང་ལ་ཝཾ་གི་རྣམ་པའི་དཀྱིལ་འཁོར་དམར་པོ་ཟླ་གམ། རྒྱས་པ་ལ་མ་ཡི་རྣམ་པའི་གྲུ་བཞི་སེར་པོ། ཞི་བ་ལ་ཡ་ཡི་རྣམ་པའི་ཟླུམ་པོ་དཀར་པོ་སྟེ། ཐམས་ཅད་ཀྱང་ཡངས་ཤིང་མེ་འོད་འཕྲོ་བ་ཅན་གྱི་ནང་དུ་ཁྲག་འཐུང་འབར་བའི་ལྷ་ཚོགས་ལྔ་བཅུ་རྩ་བརྒྱད་ཀྱི་དཀྱིལ་འཁོར་ལས་གང་ལ་ཤིས་པའི་མཆོག་དབང་ལ་པདྨ་ཧེ་རུ་ཀ །རྒྱས་པར་རཏྣ་ཧེ་རུ་ཀ །ཞི་བར་བུདྡྷ་ཧེ་རུ་ཀས་གཙོ་བྱས་པ། གཙོ་འཁོར་ཐམས་ཅད་ཀྱང་ལས་དང་མཐུན་པའི་ཁ་དོག་ཅན་དུ་བསྐྱེད་དོ། །དེ་ནས་བསྒྲུབ་བྱའི་ལས་ནི། སྔར་བཞིན་བསྒྲུབ་བྱ་དགུག་བསྟིམ་གྱི་བར་དུ་བྱས་ཏེ། དབང་ལ་ཟངས་སམ་ཤིང་དམར་པོ་ལས་དབལ་ཟླ་གམ་ཅན་རྡོ་རྗེ་ཆགས་པ་སྟེ་པདྨ་ཀཱི་ལ་ཡར་བསྐྱེད་པའི་ཕུར་བུ་ལྔ་དབང་པོ་ལྔ་དང་། རྒྱས་པར་གསེར་རམ་ཤིང་སེར་པོ་ལས་དབལ་གྲུ་བཞི་པར་བྱས་པ་ང་རྒྱལ་དགའ་འཕྲོ་སྟེ་རཏྣ་ཧེ་རུ་ཀར་བསྐྱེད་པའི་ཕུར་བུ་བཞི་ཡན་ལག་བཞི་དང་། ཞི་བར་དངུལ་ལམ་ཤིང་དཀར་པོ་ལས་དབལ་ཟླུམ་པོར་བྱས་པ་ལྷན་ནེར་གསལ་བ་སྟེ་བུདྡྷ་ཀཱི་ལ་ཡར་བསྐྱེད་པའི་ཕུར་བུ་དྲུག་གིས་ཡན་ལག་ལྔ་དང་སྙིང་ལ་གདབ་པར་བྱ་སྟེ། ཕུར་བུ་ཐམས་ཅད་ཀྱང་མགོ་བོ་རྒྱ་མདུད་ཅན་བྱིན་གྱིས་བརླབས་ཏེ། ཕུར་བསྐུལ་དང་། སྡེར་མོའི་སྔགས་ལས་སོ་སོའི་སྤུ་གྲིའི་ཤམ་བུ་ཅན་གྱིས་གདབ་ཅིང་། གྲི་མཚོན་གྱིས་གཏུབས་ཏེ། ལིང་རོ་ཆ་གཅིག་ཆགས་པའི་ཚོགས་དང་འབར་བ་ལྷན་ནེ་སོགས་ལས་དང་མཐུན་པའི་ལྷ་ལ་སྟོབ་པ་བྱ། ཆ་གཅིག་ལས་གང་ཡིན་གྱི་བསྲེག་རྫས་ལ་བསྲེ། ཆ་གཅིག་ལ་བྲོ་གདན་བྱའོ། །དེ་ནས་མཆོད་སྦྱིན་བྱ་བ་ཡོན་ཏན་དང་བཅས་པ་ནི། ལས་སོ་སོའི་མེ་ལྷའི་ལྟོ་བར་འདས་པའི་ལྷའི་དཀྱིལ་འཁོར་བསྐྱེད་དེ། དེའང་དབང་ལ་ལྷ་ཚོགས་འོད་འབར་བ་གཟི་བརྗིད་ཆེ་ཞིང་སྐུ་ལྷུན་པོ་ཆེན་པོ་ལྟ་བུ་པད་རིགས་གཙོ་བོར་བྱས་པ་ལ་སྟོངས་ཀྱི་སེམས་ཆགས་པའི་ཡིད་ཀྱིས་མཆོད་སྦྱིན་བྱས་པའི་གསུང་རྡོ་རྗེ་པདྨ་གར་དབང་ཡང་དབང་དུ་འགྱུར་ན་གཞན་ལྟ་ཅི་སྨོས་པ་དང་། རྒྱས་པར་རིན་ཆེན་རིགས་གཙོ་བོར་བྱས་པའི་ལྷ་ཚོགས་འོད་འབར་བ་སྤྲུལ་པའི་འདུ་འཕྲོ་ཅན་གཟི་བརྗིད་ཆེན་པོ་ལ་སྟོངས་ཀྱི་སེམས་དགའ་ཞིང་སྤྲོ་བའི་ཡིད་ཀྱིས་མཆོད་སྦྱིན་བྱས་པས་ཚེ་དང་བསོད་ནམས་འཕེལ་བ་སོགས་ཡོན་ཏན་ཚད་མེད་ནམ་མཁའི་མཐའ་དང་མཉམ་པ་ཐོབ་པ་དང་། ཞི་བར་བུདྡྷས་གཙོ་བྱས་པའི་ལྷ་ཚོགས་དྭངས་ཤིང་གསལ་བའི་གཟི་བརྗིད་མཆོག་ཏུ་འབར་ཞིང་འོད་ཟེར་འཚེར་བ་ལ་སྟོངས་ཀྱི་སེམས་ཞི་ཞིང་དང་བའི་ཡིད་ཀྱིས་མཆོད་སྦྱིན་བྱས་ན་མ་རུངས་པ་གཏུམ་ཆེན་རྔམ་པའང་ཞི་བའི་སེམས་སུ་ལྷན་ནེར་འགྱུར་བའོ། །དེ་ནས་ལུག་རྒྱུད་ཡོན་ཏན་དང་བཅས་པ་ནི། སྔར་བཞིན་ཝཾ་བྷྲུཾ་སོགས་ཀྱིས་ཡི་གེ་གསུམ་གྱི་རྣམ་པའི་དཀྱིལ་འཁོར་མེ་འབར་བའི་ནང་དུ་ལས་དང་མཐུན་པའི་ཁྲག་འཐུང་འབར་བ་ཚོགས་ཀྱི་དཀྱིལ་འཁོར་བསྐྱེད་ལ། ལིང་རོ་སྤུངས་པའི་མཐར་མཆེད་རྣམས་ལག་གཡས་སྟེང་དུ་བྱས་ནས་བསྣོལ་བའི་དབང་ལ་སྲིན་ལག །རྒྱས་པར་གུང་མོ། ཞི་བར་མཛུབ་མོ་ལུ་གུ་རྒྱུད་དུ་སྦྲེལ་ཞིང་བསྡམས་ནས་བྲོ་ར་ལས་དབྱིབས་དང་མཐུན་པ་བཅས་ལ། ཧཱུཾ་ཧཱུཾ་ཧཱུཾ། འདོད་ཆགས་རྡོ་རྗེ་སོགས་ལས་སོ་སོའི་ཚིག་དང་སུམྦྷའི་སྔགས་ཀྱིས་བསྐུལ་ལ་བྲོ་བརྡུངས། དེའི་ཚེ་རིགས་སོ་སོའི་ཁྲོ་ཚོགས་དཔག་མེད་སྤྲོས་པས་ལས་གང་ཡིན་འགྲུབ་པར་བསམས་ནས། ལས་སོ་སོའི་སྤུ་གྲིའི་སྔགས་བརྗོད་ཅིང་ཕྱག་རྒྱ་སྤྲུགས་ཏེ་བཤིག་ལ། ལིང་རོ་དེ་དབང་ལ་རང་གི་མལ་འོག །རྒྱས་པར་མཛོད་དུ། ཞི་བར་ལམ་གྱི་དཀྱིལ་རྣམས་སུ་ལས་མཐུན་གྱི་བྲུབ་ཁུང་བྲུས་པར་མནན་ནོ། །དེ་དག་གི་ཡོན་ཏན་ཡང་། དབང་གིས་འགྲོ་བ་ཐམས་ཅད་འགུགས་པར་འགྱུར་བ་ལྟ་ཅི་སྨོས་ཏེ། ཕྱག་ན་རྡོ་རྗེའང་རང་གི་ཕྱི་བཞིན་དུ་འབྲང་བ་སོགས་ཡིད་ལ་ཅི་འདོད་པ་དེ་བཞིན་དུ་འོང་བར་འགྱུར་བ་དང་། རྒྱས་པར་གཟི་བརྗིད་འབར་བའི་རྣམ་འཕྲུལ་ཆེན་པོ་རིགས་ཀྱི་ཁྲོ་བོ་སྤྲོ་བའི་ཏིང་ངེ་འཛིན་གྱི་ཡོན་ཏན་ཚེ་དང་བསོད་ནམས་སོགས་འདོད་དགུ་འབྱུང་བའི་ཡིད་བཞིན་གྱི་ནོར་བུས་ནམ་མཁའི་ཁམས་ཐམས་ཅད་གང་བར་འགྱུར་བ་དང་། ཞི་བས་ཕ་རོལ་མ་རུངས་པའི་སེམས་མེ་ལྟར་འབར་བའང་ལྷན་ནེར་ཞི་བའི་བྱིན་རླབས་ཀྱིས་ཁྱབ་པས་སྡིག་པ་དང་གདུག་སེམས་ཐམས་ཅད་ཅུང་ཟད་ཀྱང་ཡིད་ལ་མི་འགྱུ་བས་གཡོ་བ་མེད་པར་བྱེད་པའོ། ། གཉིས་པ་ལྷག་མའི་ལས་ལ་གཉིས་ཏེ། མདོ་དང་། རྒྱས་པའོ། །དང་པོ་ནི། སླས་དང་སོགས་ཚིགས་བཅད་གཅིག་སྟེ། དེ་ལྟར་ལས་བཞི་གང་ཡང་རུང་བ་བྱས་པའི་རྗེས་ལ། རྩ་བའི་དཀྱིལ་འཁོར་གསལ་གདབ། ལྷག་མའི་དཀྱིལ་འཁོར་བསྐྱེད། མགྲོན་བཀུག་ལ། ལྷག་གཏོར་རྣམས་ཁ་ཕྲུས་བྲན་ནས་གཏོར་མར་བསྲེ་ཞིང་སོ་སོར་མཆོད་དེ། དཔལ་ཆེན་པོའི་དཀྱིལ་འཁོར་གྱི་མུ་རན་དུ་གནས་པ་སླས་ཏེ་ལྷ་ཆེན་པོའི་ཆུང་མ་དང་། བྱི་མོ་སྟེ་མཛའ་མོ་དང་། གཡོག་བྱེད་པས་བྲན་མོའི་ཚོགས་ཏེ་དབང་ཕྱུག་མ་ཉི་ཤུ་རྩ་བརྒྱད་པོ་ལྷག་མའི་མཆོད་སྦྱིན་འདོད་པའི་མགྲོན་ཡིན་པས། ཆོ་ག་བཞིན་དུ་སྦྱིན་ཏེ་ཟ་ལམ་བདུན་ཅུའི་སར་བསྐྱལ་ཞིང་། སྔོན་དཔལ་ཆེན་པོའི་སྤྱན་སྔར་རང་རང་གིས་ཁས་བླངས་པའི་དམ་ཚིག་རྣམས་རབ་ཏུ་བསྒྲགས་ནས་ཕྲིན་ལས་བཞི་གང་དང་གང་འདོད་པའི་ལས་དེ་དང་དེ་བྱེད་པར་བཀའ་བསྒོ་བར་བྱའོ། ། གཉིས་པ་ལ་གསུམ་སྟེ། དམ་བསྒྲག་ཅིང་ལས་ལ་བསྐུལ་བ། ལས་དེ་མ་བསྒྲུབས་པའི་སྐྱོན། ལས་བསྒྲུབས་པའི་ཡོན་ཏན་ནོ། །དང་པོ་ནི། སྔོན་ཚེ་སོགས་རྐང་པ་དགུ་སྟེ། སྔོན་རཱུ་ཏྲ་འདུལ་བའི་ཚེ་དཔལ་ཆེན་པོ་ཧེ་རུ་ཀ་གདུལ་བྱ་དང་མཐུན་པར་ཤིན་ཏུ་གདུག་ཅིང་གཏུམ་བག་ཅན་དུ་བཞེངས་ཏེ། འཇིག་རྟེན་གྱི་ཁམས་ཐམས་ཅད་ཀྱི་དྲེགས་པ་ཅན་མ་ལུས་པ་རྣམས་འདུལ་བར་མཛད་པའི་དབང་ཕྱུག་དང་བྱིན་རླབས་ཁྱད་པར་དུ་གྱུར་པའི་ཕྱིར་རྨད་པོ་ཆེ་མངའ་བས་ལྷ་ཆེན་པོ་ལ་སོགས་པ་ཐམས་ཅད་དབང་དུ་བསྡུས་ནས། དེ་དག་གི་འཁོར་ན་གནས་པའི་མ་མོ་རྣམས་ལོངས་སྤྱོད་པའི་ཕྱིར་དབང་ཕྱུག་དང་སླས་སུ་དབང་བསྐུར་བ་བྱས་ཏེ། ཞི་རྒྱས་དབང་དྲག་སོ་སོའི་ལས་རྣམས་སྐལ་བ་བཞིན་བསྐོས་པ་དེ་ཉིད་སྔོན་ཇི་ལྟར་དམ་བཅས་ཤིང་ཁས་བླངས་པ་རྣམས་སྐད་ཅིག་ཀྱང་མ་ཐོགས་པར་མྱུར་བ་ཉིད་དུ་ལས་ཀྱི་འབྲས་བུ་མངོན་པར་ཕྱུང་བར་མཛོད་ཅིག་པའོ། །གཉིས་པ་ནི། དམ་བཅས་སོགས་རྐང་པ་བཅུ་གཅིག་སྟེ། རང་གིས་དམ་བཅས་པ་བཞིན་དུ་ལས་མ་བྱས་ན་སྔོན་ཇི་ལྟར་རང་གིས་དམ་བཅས་ཤིང་མནའ་བོར་བའི་སྡོམ་བཅས་ཀྱི་མཚམས་དེ་ལས་འདའ་བར་འགྱུར་ལ། གལ་ཏེ་དམ་ཚིག་དེ་ལས་འདའ་བར་གྱུར་ན་ནི་ཁྱེད་ཅག་རྣམས་ཀྱི་མགོ་ལུས་དང་སྙིང་ཡང་ཚལ་པ་བདུན་དུ་ཡཀྵ་ཁྲོ་བོས་དུམ་བུར་གཏུབ་པར་འགྱུར་རོ། །དེ་བས་ན་དེ་འདྲའི་ཉེན་ལ་མ་བདོ་བར་རྣལ་འབྱོར་སྔགས་འཆང་བདག་གིས་ལས་ཇི་ལྟར་བཅོལ་བ་བཞིན་དུ་སྒྲུབ་པར་བྱོས་ཤིག །གལ་ཏེ་ལས་དེ་མངོན་དུ་མ་བྱས་ན་རང་རང་གིས་མནའ་བོར་ཞིང་ཁས་བླངས་པའི་དམོད་པ་བཞིན་རུལ་མྱགས་འཚིག་ནས་ཐུར་དུ་བལྟས་ཏེ་རྡོ་རྗེའི་དམྱལ་བར་འགྲོ་བར་འགྱུར་རོ། །གསུམ་པ་ནི། རྣལ་འབྱོར་སོགས་རྐང་པ་ལྔ་སྟེ། དེ་བས་ན་རྣལ་འབྱོར་པ་དམ་ལ་གནས་པར་གྱུར་པའི་ལས་གང་དང་གང་འདོད་པ་རྣམས་ཡོངས་སུ་རྫོགས་པར་བྱ་བ་དང་། རྣལ་འབྱོར་པ་དེའི་འཁོར་རྣམས་ཀྱང་རང་གི་བུ་གཅིག་པུ་ལ་མས་གདུངས་པ་བཞིན་དུ་སྐྱོངས་ཤིག་དང་། དེའི་མཐུས་ཁྱེད་ཅག་ཕྲ་མེན་མ་རྣམས་ཀྱང་དངོས་གྲུབ་རྣམ་པ་གཉིས་ཐོབ་པར་འགྱུར་བ་དེའི་ཕྱིར། རྣལ་འབྱོར་པས་ཇི་ལྟར་བཅོལ་བའི་ལས་རྣམས་མངོན་སུམ་དུ་གྲུབ་པར་བྱོས་ཤིག་ཅེས་བཀའ་བསྒོའོ། ། གསུམ་པ་བྲོ་གར་གླུ་ཚིག་གི་ཡོན་ཏན་ལ་གཉིས་ཏེ། སྤྱིར་བསྟན་པ་དང་། སོ་སོར་བཤད་པའོ། །དང་པོ་ནི། ཁྲོ་བོ་ཞེས་སོགས་ཏེ། ཁྲོ་བོའི་དཀྱིལ་འཁོར་དང་ཚོགས་ཀྱི་སྒྲུབ་པའི་དུས་སུ་ཕྲིན་ལས་བཞིའི་བྱ་ཐབས་ཀྱི་གཙོ་བོ་ནི་བྲོ་གར་གླུ་ཚིག་འདི་ཡིན་ཏེ། ཧོམ་དང་རྫས་སོགས་ཀྱི་སྒོ་ནས་ལས་བཞིའི་ཕྲིན་ལས་གང་དང་གང་བགྱིས་ཀྱང་རུང་སྟེ། ལས་ཟིན་རྗེས་འདིས་མཐའ་བསྡུས་ན་ལས་བྱས་པ་གསོར་མི་རུང་བར་འགྱུར་བ་ཡིན་ནོ། །འདིར་འགོས་འགྱུར་དུ། ཞེས་པ་ཁྲོ་བོའི་སྒྲུབ་ཐབས་ཀྱི། །ལས་རྣམས་ཀུན་ལ་བརྗོད་པར་བྱ། །ངེས་པར་གཙོ་བོ་འདི་ཡིན་ཏེ། །རྣམ་པ་གཞན་དུ་གདུལ་དཀར་འགྱུར། །ཞེས་འབྱུང་ངོ་། ། གཉིས་པ་ལ་དྲུག་སྟེ། ཁྲག་འཐུང་ཡབ་ཡུམ་གྱིས་ལས་བཞི་ཀ་འགྲུབ་པ། ཕྱོགས་ཀྱི་ཁྲོ་མོས་དབང་རྒྱས། མཚམས་ཀྱི་ཁྲོ་མོས་ཞི་དྲག །ཕྱོགས་ཀྱི་ཕྲ་མེན་མས་དྲག་པོ། མཚམས་ཀྱི་ཕྲ་མེན་མས་ཀྱང་དྲག་པོ། དབང་ཕྱུག་མས་ཕོ་ཉ་དང་མངགས་གཞུག་གི་ལས་ཐམས་ཅད་འགྲུབ་པའོ། །དང་པོ་ནི། ཁྲག་འཐུང་སོགས་ཚིགས་བཅད་གཅིག་སྟེ། ཁྲག་འཐུང་ཆེན་པོ་བཛྲ་ཧེ་རུ་ཀ་ལ་སོགས་པ་རིགས་ལྔའི་ཧེ་རུ་ཀ་ཡབ་ཡུམ་གྱི་རྐང་པའི་བྲོ། ལག་པའི་གར། ཞལ་གྱི་གླུ་ཚིག་གི་ང་རོ་ཆེན་པོས་ནི། ཞི་རྒྱས་སོགས་ལས་ཐམས་ཅད་དང་མཆོག་ཐུན་གྱི་དངོས་གྲུབ་ཐམས་ཅད་ཅི་དང་ཅི་ཐོབ་པར་འདོད་པ་ལྟར་ལས་ཐམས་ཅད་དང་དངོས་གྲུབ་ཐམས་ཅད་འགྲུབ་པར་བྱེད་པ་ཡིན་ནོ། །གཉིས་པ་ནི། མཛོད་ལྡན་སོགས་ཚིགས་བཅད་གཅིག་སྟེ། གཽ་རཱིའི་སྒྲ་ལས་མཛོད་ལྡན་ཆེན་མོ་ལ་སོགས་པའི་ཁོངས་ནས། ཙཽ་རཱི་མ། པྲ་མོ་ཧེ། བེ་ཏཱ་ལི་རྣམས་ཀྱི་བྲོ་གར་གླུ་ཚིག་ཆེན་མོས་ནི་འགྲོ་བ་དབང་འདུ་བར་འདོད་ན་དབང་དུ་འདུ་བར་བྱེད་ཅིང་། ཚེ་དང་བསོད་ནམས་སོགས་འཕེལ་ཞིང་རྒྱས་པར་འདོད་ན་འཕེལ་ཞིང་རྒྱས་པར་བྱེད་དོ། །གསུམ་པ་ནི། སྦོས་མོ་སོགས་ཚིགས་བཅད་གཅིག་སྟེ། པུཀྐ་སཱིའི་སྒྲ་ལས་སྦོས་མོ་ཆེན་མོ་ལ་སོགས་པའི་ཁོངས་ནས། གྷསྨ་རཱི། སྨེ་ཤ་ནཱི། ཙཎྜ་ལཱི་རྣམས་ཀྱི་བྲོ་གར་གླུ་ཚིག་ཆེན་མོས་ནི་མི་མཐུན་པའི་ཕྱོགས་རྣམས་ལྷན་ནེར་ཞི་བར་འདོད་ན་ཞི་ཞིང་ལྷན་ནེར་བྱེད་ལ། དྲག་པོས་དྲན་པ་ཉམས་ཏེ་སེམས་རྨུགས་ཤིང་མི་གསལ་བར་འདོད་ན་རྨུགས་པར་བྱེད་དོ། །བཞི་པ་ནི། སེང་གདོང་སོགས་ཚིགས་བཅད་གཅིག་སྟེ། སེང་གདོང་ཆེན་མོ་ལ་སོགས་པ་མཆེ་བ་ཅན་བཞིའི་བྲོ་གར་གླུ་ཚིག་ཆེན་མོས་ནི་གདུག་པ་ཅན་ཐམས་ཅད་ཀུན་གྱི་སྲོག་ལུས་ལ་ཟ་བར་བྱེད་ཅིང་། རྡུལ་ཕྲན་གྱི་ཆ་ཙམ་ཡང་མེད་པར་བརླག་པར་བྱེད་དོ། །ལྔ་པ་ནི། བཞད་གདོང་སོགས་ཚིགས་བཅད་གཅིག་སྟེ། གྲྀདྡྷའི་སྒྲ་ལས་བཞད་གདོང་ཆེན་མོ་ལ་སོགས་པ་གཤོག་པ་ཅན་བཞིའི་བྲོ་གར་གླུ་ཚིག་ཆེན་མོས་ནི་གདུག་པ་ཅན་ཐམས་ཅད་ཀྱི་མཐུ་རྩལ་མ་ལུས་པའམ་རང་གནས་ལས་འབྱིན་པ་སྟེ་བསྐྲད་པར་བྱེད་ཅིང་། དེ་དག་ཀུན་ལ་ཡོད་པའི་ཕུན་སུམ་ཚོགས་པ་རྣམས་རབ་ཏུ་ཉམས་པར་བྱེད་དོ། །འདིའི་འབྱིན་པ་ཞེས་པའི་རྒྱ་དཔེར། ཨཱ་ཀཪྵ་ཞེས་ཡོད་པས་འགུགས་པའི་དོན་དེ་དབང་གི་ལས་སུ་འགྱུར་རམ་སྙམ་མོ། །དྲུག་པ་ནི། སླས་དང་སོགས་ཚིགས་བཅད་གཅིག་སྟེ། སླས་དང་བྱི་མོ་བྲན་མོ་སྟེ་དབང་ཕྱུག་མའི་ཚོགས་ཀྱི་བྲོ་གར་གླུ་ཚིག་ཆེན་མོས་ནི་དགྲ་ལ་རྦད་ཅིང་མངགས་གཞུག་གི་ལས་ལ་གཏང་བར་བྱ་བ་སྟེ། འགལ་བྱེད་ཐམས་ཅད་བརླག་པར་བྱེད་པ་དང་། མཐུན་པའི་ཕྱོགས་རྣམས་སྒྲུབ་པ་ཕོ་ཉའི་ལས་ཐམས་ཅད་བྱེད་པ་ཡིན་ནོ། ། བཞི་པ་ལས་བཞིའི་གནས་གཟུངས་ཐུན་མོང་དུ་བསྟན་པ་ནི། ལྗོན་པ་སོགས་རྐང་པ་གཉིས་ཏེ། ཤིང་ལྗོན་པ་ཅན་ནི་ཞི་བའི་གནས་དང་། ལྕུག་ཕྲན་གྱི་ཚལ་ནི་རྒྱས་པའི་དང་། སྡོང་གཅིག་ནི་དབང་གི་དང་། མེས་རེག་སྟེ་ནགས་ཚལ་འཚིག་པའི་གནས་སུ་དྲག་པོའི་ལས་ཤིས་པའོ། །ལས་སོ་སོའི་གཟུངས་མ་ཡང་། ཞི་བའི་གཟུངས་མ་ཤིང་ལྗོན་པ་དང་ཆོས་མཚུངས་པ་ནི་དུང་ཅན་མའི་རིགས་དཀར་མོ་བཞིན་ལུས་མཛེས་པ་ལ་སོགས་པའོ། །རྒྱས་པའི་གཟུངས་མ་ནི་ལྕུག་ཕྲན་གྱི་ཚལ་ལྟ་བུ་སྟེ་བ་གླང་ཅན་གྱི་རིགས་ཤ་རྒྱས་ཤིང་སྤུན་ཟླ་མང་བའོ། །དབང་གི་གཟུངས་མ་ཤིང་སྡོང་པོ་གཅིག་པ་དང་ཆོས་མཐུན་པ་ནི་པདྨ་ཅན་གྱི་རིགས་བཞིན་ལུས་མཛེས་ཤིང་སྤུན་ཟླ་དང་བུ་ཚ་མེད་པའོ། །དྲག་པོའི་གཟུངས་མ་ལྗོན་ཤིང་མེས་རེག་པ་ལྟ་བུ་ནི་རི་མོ་ཅན་གྱི་རིགས་མདོག་ནག་ཅིང་ངག་གཏུམ་པ་ལ་སོགས་པའོ། ། ལྔ་པ་དོན་སྟོངས་ཀྱི་སེམས་བསྟན་པ་ནི། དང་བས་སོགས་རྐང་པ་གཉིས་ཏེ། དེ་ལ་དོན་གྱི་སེམས་ནི། ལྷག་པ་བདེན་པ་དབྱེར་མེད་ཀྱི་གནས་ལུགས་རྟོགས་ཤིང་། ཚད་མེད་པ་བཞིའི་རྒྱུ་ལས་བྱུང་བའི་བྱང་ཆུབ་ཀྱི་སེམས་དང་ལྡན་པ་ནི་ལས་བཞི་ཀ་ལས་ཁྱབ་བྱེད་དུ་དགོས་པ་རྒྱུའི་སེམས་ཞེས་བྱ་སྟེ། སྦྱིན་སྲེག་རྩ་བ་ལས། རང་རིག་སངས་རྒྱས་ཀུན་གྱི་དངོས། །ཐམས་ཅད་རང་དབང་བསྒྱུར་བདག་ཕྱིར། །སྒྲུབ་པའི་གཙོ་བོར་འདི་གསུངས་སོ། །ཞེས་སོ། །སྟོངས་ཀྱི་སེམས་ནི། མཐུན་པའི་གྲོགས་བྱེད་པས་རྐྱེན་གྱི་སེམས་ཞེས་བྱ་སྟེ། ལས་སོ་སོ་ཀུན་ནས་སློང་བའི་བསམ་པའོ། །དེའང་ཞི་བ་ལ་ཞི་ཞིང་དང་བས། རྒྱས་པ་ལ་དགའ་ཞིང་སྤྲོ་བས། དབང་ལ་ཆགས་ཤིང་ཞེན་པས་དང་། དྲག་པོ་ལ་ཞེ་སྡང་ཁྲོས་པའི་སེམས་དང་ལྡན་པས་ཀཱ་ལི་ཐབས་ཏེ། ཕྲིན་ལས་རྣམ་པ་བཞིའི་ཐབས་མཁས་ཀྱི་མཛད་པ་རབ་ཏུ་བསྒྲུབ་པར་བྱའོ། ། གཉིས་པ་ཡོན་ཏན་ནི། ཞེས་བརྗོད་པས་སོགས་ཏེ། དེ་སྐད་ཅེས་བརྗོད་པས་གདུལ་བྱ་རང་བཞིན་གྱི་དེ་བཞིན་གཤེགས་པ་ཉིད་དེ་སེམས་ཅན་རྣམས་ལ། འདུལ་བྱེད་རྟོགས་པ་མངོན་དུ་གྱུར་པའི་དེ་བཞིན་གཤེགས་པ་ཉིད་ཀྱི་ཕྲིན་ལས་རྣམ་བཞིས་རྒྱུད་དག་པར་སྤྱོད་པས་འདུལ་བར་གྱུར་ཏོ། ། གསུམ་པ་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉེར་གཉིས་ཡོད་པ་ལས། འདིས་ཡེ་ནས་ལྷུན་གྱིས་གྲུབ་པའི་ཕྲིན་ལས་བཞི་མངོན་དུ་སྣང་བར་བྱེད་པས་བྱིན་གྱིས་བརླབ་པ་ཞེས་བྱ་བའི་ལེའུ་སྟེ་ཉི་ཤུ་པའོ།། །། ལེའུ་ཉེར་གཅིག་པའི་འགྲེལ་པ།ལེའུ་ཉེར་གཅིག་པ་ལ་གསུམ་སྟེ། ལོ་རྒྱུས་དང་། གཞུང་དང་། མཚན་ནོ། །དང་པོ་ནི། དེ་ནས་སོགས་ཏེ། ཁྲོ་བོའི་དཀྱིལ་འཁོར་རྫོགས་པར་བསྟན་པ་དེ་ནས་རང་སྣང་གི་དཀྱིལ་འཁོར་ལ་བསྟོད་པའི་ཕྱིར་བཅོམ་ལྡན་འདས་དགྱེས་པ་ཆེན་པོ་ཁྲག་འཐུང་ང་བརྒྱད་འདུས་པའི་ཚོགས་ཀྱི་དཀྱིལ་འཁོར་གྱིས་ཞལ་ཤིན་ཏུ་རྔམ་པའི་མདངས་ཀྱིས་རང་སྣང་གི་འཁོར་ལོར་དགྱེས་པའི་གླུ་དྲུག་པོ་འདི་བླངས་སོ། ། གཉིས་པ་གཞུང་ལ་གཉིས་ཏེ། འབྲས་ཆོས་ལྔ་སོ་སོར་བསྟོད་པ་དང་། རྟེན་བརྟེན་པ་སྤྱིར་བསྟོད་པའོ། །དང་པོ་ལ་ལྔ་ལས། དང་པོ་སྐུ་ལ་བསྟོད་པ་ནི། ཧཱུཾ། གཏུམ་ཆེན་སོགས་ཏེ། འགོ་འདྲེན་གྱི་ཧཱུཾ་རྣམས་ནི་ཁྲོ་བོའི་སྣང་གླུ་སྟེ། གླུ་རྣམས་རེ་རེའང་སྐུ་ལྔ་ཡེ་ཤེས་ལྔར་མཚོན་པའོ། །དེ་ལ་དཔལ་ཆེན་པོའི་སྐུ་ནི། དྲེགས་པ་ཅན་རྣམས་འདུལ་བས་གཏུམ་པོ་ཆེན་པོ་སྟེ། དུས་ཀྱི་མཐའི་བསྐལ་པ་འཇིག་པའི་མེ་ཆེན་ལྟར་འབར་བའི་སྐུ་ལས་ཡེ་ཤེས་ཀྱི་འོད་ཟེར་ཉི་མ་འབུམ་དུས་གཅིག་ལ་ཤར་བ་ལྟར་གྱི་གཟི་བརྗིད་ཆེན་པོས་ཐམས་ཅད་ཟིལ་གྱིས་གནོན་པ། མི་སྡུག་པའི་ཁྲོ་གཉེར་རྣམ་པར་འགྱུར་པ་ནི་གློག་སྟོང་དུས་གཅིག་ལ་འགྱུ་བ་བཞིན་འཁྱུག་པས་བསྡིགས་པར་མཛད་པ་གདུག་པ་ཅན་ཚར་གཅོད་པའི་མཆེ་བ་ནི་ཏཱིཀྵའི་སྒྲ་ལས་ཟངས་ཡག་སྟེ་རྣོན་པོ་གཙིགས་པས་མ་རུངས་པ་ཐམས་ཅད་ཆོམ་ཆོམ་དུ་ཟ་བར་བྱེད་པའི་འཇིགས་བྱེད་ཆེན་པོའོ། །མཇུག་གི་ཧོཿརྣམས་ནི་དགྱེས་པའི་གད་རྒྱང་ངོ་། །གཉིས་པ་གསུང་ལ་བསྟོད་པ་ནི། རྔམ་པའི་སོགས་ཏེ། འཇིགས་རུང་ཁྲོས་ཤིང་རྔམ་པའི་གསུང་གི་ང་རོ་ནི་འབྲུག་སྟོང་དུས་གཅིག་ལ་ལྡིར་བ་ལྟར་སྒྲའི་གཏུམ་ཆེན་གྱི་དྲག་ཤུལ་རི་རབ་འབུམ་དུས་གཅིག་ལ་བསྙིལ་བའི་སྐད་དང་མཉམ་པ། ཨ་ལ་དང་། ཧ་ཧ་དང་། ཨ་ལ་ལ་ཞེས་རྡོ་རྗེའི་གད་རྒྱངས་ཆེན་པོ་རྒོད་པས་ས་གསུམ་གཡོ་བ་དབུགས་ཀྱི་ཤུགས་ལས་སྤྱུགས་པའི་འཐོར་བྱེད་ཀྱི་རླུང་ཆེན་པོས་གདུག་པ་ཅན་རྣམས་གཡེང་བ་སྟེ། དུས་མཐའི་རླུང་ཆེན་པོས་གཏོར་བ་ལྟར་བྱེད་པའོ། །གསུམ་པ་ཐུགས་ལ་བསྟོད་པ་ནི། ཁྲོ་བོ་ཤེས་རབ་སོགས་ཏེ། ཡེ་ཤེས་ཆེན་པོས་མ་རིག་པའི་ཚོགས་ལ་ངམ་ངམ་ཤུགས་ཀྱིས་ཁྲོས་པའི་ཁྲོ་བོ་ཡང་དག་པའི་ཤེས་རབ་ཀྱི་གདུལ་བྱའི་མུན་པ་སེལ་བར་མཛད་པས་འོད་པོ་ཆེ་སྟེ། ཐུགས་ཡེ་ཤེས་ལྔའི་དཀྱིལ་འཁོར་གྱིས་ཤེས་བྱའི་ཡུལ་ཀུན་དུས་གཅིག་ཏུ་རང་གསལ་མ་འགགས་པར་མཁྱེན་ཅིང་། འབར་བའི་ཡེ་ཤེས་དེས་གདུལ་བྱའི་ལོག་རྟོག་ཀུན་ཏུ་འཇོམས་པར་མཛད་པ། དེ་ཡང་ཡེ་ཤེས་ལྔ་དང་ཇི་ལྟ་ཇི་སྙེད་མཁྱེན་པའི་ཡེ་ཤེས་སོགས་སྣ་ཚོགས་པའི་ཡེ་ཤེས་རྣམ་པ་ཐ་དད་དུ་གསལ་བ་ཀུན་ཀྱང་རང་བྱུང་གི་ཡེ་ཤེས་ཐིག་ལེ་ཆེན་པོ་གཅིག་གི་ངོ་བོར་དབྱེར་མེད་པའོ། །བཞི་པ་ཡོན་ཏན་ལ་བསྟོད་པ་ནི། ཁྲོ་བོའི་རྒྱལ་པོ་སོགས་ཏེ། གདུག་པ་ཅན་འདུལ་བ་ཁྲོ་བོའི་མཛད་པས་གདུལ་བྱ་ལ་དབང་སྒྱུར་བའི་རྒྱལ་པོ་སྟེ། ཡོན་ཏན་འབྱུང་བའི་སྤྲིན་ཆེན་པོ་ལས་འཕྲོས་པའི་འདུལ་བྱེད་ཁྲོ་བོའི་དཀྱིལ་འཁོར་གྱི་ཐུགས་རྗེའི་ཆར་ཆེན་པོ་འབེབས་པས་གང་ལ་གང་འདུལ་གྱི་སྤྲུལ་པའི་དཀྱིལ་འཁོར་ཟད་པ་མེད་པ་དགོས་འདོད་ཡིད་བཞིན་དུ་འབྱུང་བ་རིན་པོ་ཆེའི་གཏེར་དང་འདྲ་བས་དོན་མཛད་པ་སྣ་ཚོགས་སུ་སྣང་བའི་ཕྱག་རྒྱ་ཆེན་པོའི་སྐུར་ཁྲོས་པ་ཐམས་ཅད་ཀྱང་ཡེ་ཤེས་ཆེན་པོའི་ཁྲོ་བོར་རོ་གཅིག་པའི་ཐིག་ལེ་ཆེན་པོར་གནས་པའོ། །ལྔ་པ་ཕྲིན་ལས་ལ་བསྟོད་པ་ནི། བདུད་ཀུན་སོགས་ཏེ། བདུད་བཞི་པོ་ཀུན་གྱི་རང་བཞིན་མ་སྤངས་པར་དབང་དུ་བྱེད་པ་ནི་བདག་ཉིད་ཆེན་པོ་དཔལ་ཧེ་རུ་ཀའོ། །དེའང་བདུད་བཞིའི་དཔུང་མཐར་བྱེད་ཀྱི་བདུད་དེ་སྒྲིབ་གཉིས་བག་ཆགས་དང་བཅས་པའི་བདུད་རྣམས་འཇོམས་པར་མཛད་ཅིང་། བདུད་དང་གཤིན་རྗེ་སོགས་འཇིགས་པའི་ཚོགས་རྣམས་ཀྱང་བསྡིགས་ཤིང་འཇིགས་པར་བྱེད་པས་འཇིགས་བྱེད་ཆེན་པོ་ཆེ་བཙན་འགྲན་ཟླ་དང་བྲལ་བའི་ཁྲག་འཐུང་གི་ཚོགས་ཐམས་ཅད་ཀྱང་ངོ་བོ་ཆོས་སྐུ་སྤྲོས་བྲལ་ཐིག་ལེ་ཆེན་པོར་རོ་གཅིག་པའོ། ། གཉིས་པ་རྟེན་བརྟེན་པ་སྤྱིར་བསྟོད་པ་ནི། རྡོ་རྗེ་བྲག་ཆེན་སོགས་ཏེ། ཁྲག་འཐུང་གི་དཀྱིལ་འཁོར་ལྷ་ཚོགས་ཐམས་ཅད་ཀྱི་སྐུ་ནི་རྡོ་རྗེའི་བྲག་ཆེན་པོ་ལྟར་སྐྱེ་ཤི་དང་འཕོ་འགྱུར་མེད་པས་སྲ་བ་པོ་སྟེ་ཆེ་བའི་ཡོན་ཏན་ཀུན་གྱི་རྟེན་དུ་གྱུར་པའོ། །གསུང་དང་ཡོན་ཏན་ནི་རྡོ་རྗེའི་ཆུ་བོ་ལྟ་བུ་སྟེ་གདུལ་བྱའི་ཚོགས་མ་ལུས་པ་སྡུད་པ་དང་བདེ་བ་ཆེན་པོས་རྒྱུད་བརླན་ཅིང་ཚིམ་པར་མཛད་པའོ། །ཐུགས་ནི་རྡོ་རྗེ་མེ་སྟེ་ཐུགས་རྗེའི་ཡེ་ཤེས་ཀུན་ཏུ་འབར་བ་ཆེན་པོས་མཚན་མའི་རྟོག་པ་ཐམས་ཅད་བསྲེག་ཅིང་ཤེས་བྱའི་ཡུལ་ཐམས་ཅད་མངོན་སུམ་དུ་མཁྱེན་པའོ། །ཕྲིན་ལས་ནི་རྡོ་རྗེ་རླུང་སྟེ་གདུལ་བྱ་ལ་ཁྱབ་ཅིང་གཡོ་བས་འདུལ་བར་མཛད་ཅིང་ཁྱད་པར་གདུག་པ་ཅན་རྣམས་ཆོས་དབྱིངས་སུ་འཐོར་བར་བྱེད་པའི་རླུང་ཆེན་པོ་སྟེ་བརྟེན་པ་ལ་བསྟོད་པའོ། །རྟེན་གཞལ་ཡས་ཁང་ལ་བསྟོད་པ་ནི། རྡོ་རྗེ་བྲག་ཆེན་ནི་ཀེང་རུས་ཀྱི་རི་རབ་ཞིང་ཆེན་གྱི་ས་གཞི་སྲ་བ་དང་བཅས་པ། རྡོ་རྗེ་ཆུ་ནི་རཀྟའི་རྒྱ་མཚོ། རྡོ་རྗེ་མེ་ནི་ཡེ་ཤེས་ཀྱི་མེ། རྡོ་རྗེ་རླུང་ནི་འོག་གཞི་རླུང་གི་དཀྱིལ་འཁོར་དང་། ནམ་མཁའ་ནི་ཀུན་གྱི་གོ་འབྱེད་པ་སྟེ། འབྱུང་ལྔ་དག་པ་ཡུམ་ལྔའི་མཁའ་ཀློང་ནི་གཞལ་ཡས་ཁང་གི་རང་བཞིན་ནོ། །དེ་སྐད་ཅེས་རང་སྣང་གི་དཀྱིལ་འཁོར་ལ་དགྱེས་པ་ཆེན་པོས་ཆེད་དུ་གླུ་བླངས་སོ། ། གསུམ་པ་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉེར་གཉིས་ཡོད་པ་ལས། འདིས་རང་སྣང་ཁྲོ་བོའི་དཀྱིལ་འཁོར་ལ་བསྟོད་པའི་ལེའུ་སྟེ་ཉི་ཤུ་གཅིག་པའོ།། །། ལེའུ་ཉེར་གཉིས་པའི་འགྲེལ་པ།ལེའུ་ཉེར་གཉིས་པ་ལ་གསུམ་སྟེ། ལོ་རྒྱུས་དང་། གཞུང་། མཚན་ནོ། །དང་པོ་ནི། དེ་ནས་བཅོམ་ལྡན་འདས་སོགས་ཏེ། རྒྱུད་དོན་རྫོགས་པར་བསྟན་པ་དེ་ནས་རྒྱུད་གདམས་ཤིང་གཏད་པ་སྟོན་ཏེ། གང་གིས་ན། སྟོན་པ་བཅོམ་ལྡན་འདས་དགྱེས་པ་ཆེན་པོ་དཔལ་ཀུན་ཏུ་བཟང་པོས་སོ། །གང་ལ་ན། ལྷན་ཅིག་པའི་འཁོར་རྒྱུད་ཡོངས་སུ་དག་པའི་དེ་བཞིན་གཤེགས་པ་ཉིད་དང་། གོ་ཕྱེ་བའི་འཁོར་ཡེ་ཇི་བཞིན་པའི་དེ་བཞིན་གཤེགས་པ་ཉིད་དེ་ཕྱི་རབས་ཀྱི་གང་ཟག་ཆོས་ཀྱི་མིག་ཅན་རྣམས་ལ་གཏད། གང་གཏད་ན། བསྟན་པ་གསང་སྔགས་རྨད་དུ་བྱུང་བའི་རྒྱུད་ཀྱི་རྒྱལ་པོ་ཆེན་པོ་འདིའོ། །ཇི་ལྟར་ན། རྒྱུད་འདི་ཉིད་འགྲོ་བའི་ཕན་བདེའི་གཞིར་མི་ནུབ་པར་བརྟན་པར་ཟུང་ཞིག་ཅེས་པ་འདི་ཆེད་དུ་བརྗོད་དོ། ། གཉིས་པ་གཞུང་ལ་གསུམ་སྟེ། གདམས་པ་དང་། གཏད་པ་དང་། རྒྱུད་རྫོགས་ནས་མཛད་པ་ཆོས་ཉིད་དུ་བཞུགས་ཚུལ་ལོ། །དང་པོ་ལ་བཞི་སྟེ། གཞི་རང་བཞིན་གྱི་སྣང་བ་རྟོགས་བྱར་གདམས་པ། ལོག་རྟོག་འཁྲུལ་པའི་སྣང་བ་དག་བྱར་གདམས་པ། གདུལ་བྱ་ལམ་གྱི་སྣང་བ་བགྲོད་བྱར་གདམས་པ། འབྲས་བུ་བདེ་གཤེགས་ཀྱི་སྣང་བ་ཐོབ་བྱར་གདམས་པའོ། །དང་པོ་ནི། ཀྱེ་ཀྱེ། ཕྱོགས་བཅུ་སོགས་རྐང་པ་གཉིས་ཏེ། ཀྱེ་ཀྱེ་ཞེས་འཁོར་གཉིས་ལ་བོས་ནས། ཕྱོགས་བཅུ་དང་དུས་བཞིས་བསྡུས་པའི་འཁོར་འདས་ཀྱི་ཆོས་ཐམས་ཅད་རང་བཞིན་གྱིས་རྣམ་པར་དག་པ་འདི་ནི་དེ་བཞིན་གཤེགས་པའི་སྙིང་པོ་སྟེ། ཡེ་ནས་སངས་རྒྱས་པའི་ངོ་བོ་ཉིད་དུ་གནས་པ་གཞི་རང་བཞིན་གྱི་རྒྱུད་ཡིན་པས་དེའི་དོན་རྟོགས་པར་བྱའོ་ཞེས་གདམས་པའོ། །གཉིས་པ་ནི། གཟུང་འཛིན་སོགས་རྐང་པ་གཉིས་ཏེ། ཕྱི་གཟུང་བའི་ཡུལ་དང་ནང་འཛིན་པའི་སེམས་ཀྱི་སྤྲོས་པ་ལ་ཞེན་པས་བློ་མངོན་པར་འཆེལ་ཞིང་གོམས་པ་ཡི་མཐུས་རང་གི་རྣམ་རྟོག་ཞགས་པ་དང་འདྲ་བས་ཁམས་གསུམ་རིགས་དྲུག་གི་གནས་སོ་སོར་འཛིན་ཅིང་སྡུག་བསྔལ་གྱིས་ཉམ་ཐག་པར་གྱུར་པས་ན། དེ་ལས་གྲོལ་བར་གདམས་པའོ། །གསུམ་པ་ནི། ས་རྣམས་སོགས་རྐང་པ་གཉིས་ཏེ། དེ་ལས་གྲོལ་བྱེད་དབང་པོའི་རིམ་པས་ཐེག་པ་སོ་སོའི་ས་རྣམས་དང་ལམ་གྱི་ཁྱད་པར་མ་འདྲེས་པར་བཀོད་པ་ཉན་རང་བྱང་སེམས་དང་ཕྱི་རྒྱུད་གསུམ་གྱི་ཐེག་པ་ཡང་རང་བཞིན་གསང་བའི་སྙིང་པོ་འདིར་འགྲོ་བའི་ལམ་སྟེགས་ཡིན་པས་ན་འགྲོད་པ་གཅིག་པའི་ལམ་འདི་ཉིད་ཉམས་སུ་བླང་བར་གདམས་པའོ། །བཞི་པ་ནི། ཡེ་ཤེས་སོགས་རྐང་པ་གཉིས་ཏེ། དེ་ལྟར་ལམ་མཐར་ཕྱིན་པས་སྤངས་པ་དང་རྟོགས་པའི་ཡེ་ཤེས་ངོ་མཚར་བ་བརྙེས་ནས་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཡོན་ཏན་རབ་འབྱམས་མངའ་བ་ཉིད་ཀྱིས་ཕྲིན་ལས་གསུང་ཆོས་ཀྱི་རྣམ་གྲངས་བསམ་གྱིས་མི་ཁྱབ་པར་སྣང་བའང་གདུལ་བྱའི་དོན་དུ་མི་འགྱུར་བ་ནི་གང་ཅུང་ཟད་ཅིག་ཀྱང་རྣམ་པ་ཐམས་ཅད་དུ་ཡོངས་སུ་མ་གསུངས་ཏེ་གསུང་བར་མི་མཛད་པས་ན། དེ་ཉིད་ཐོབ་བྱར་གདམས་པའོ། །མདོར་ན་གཞི་ལམ་འབྲས་གསུམ་ཡང་རང་བཞིན་གྱི་རྒྱུད་དུ་འདུས་པས་ན་ཡེ་ནས་སངས་རྒྱས་པའི་དོན་དེ་ལས་ནམ་ཡང་མི་འགྱུར་བར་གདམས་པའོ། ། གཉིས་པ་གཏད་པ་ལ་གསུམ་སྟེ། ལྷན་ཅིག་པའི་འཁོར་སྡུད་པ་པོ་དང་། གོ་ཕྱེ་བའི་འཁོར་ཕྱི་རབས་ཀྱི་གང་ཟག་དང་། མ་མོ་དང་མཁའ་འགྲོ་རྣམས་ལ་གཏད་པའོ། །དང་པོ་ནི། དེ་བཞིན་གཤེགས་པ་ཐམས་ཅད་ལ་ཞེས་སོགས་རྐང་པ་ལྔ་སྟེ། ཕྱོགས་དུས་ཀྱི་དེ་བཞིན་གཤེགས་པ་ཐམས་ཅད་ལ་དགོངས་པ་གསང་བའི་སྙིང་པོ་འདི་ལས་ལྷག་པའི་དོན་གཞན་ཅུང་ཟད་ཀྱང་མི་མངའ་བས་འདིའི་བརྗོད་བྱ་ནི་ཟབ་པའི་ཕྱིར་ཡོད་པ་སྒྲོ་འདོགས་དང་མེད་པ་སྐུར་བ་འདེབས་པ་སོགས་མཐའི་སྤྲོས་པ་ཐམས་ཅད་ཉེ་བར་ཞི་བའི་རང་བཞིན་ཏེ། མངོན་རྟོགས་རྒྱན་ལས། ཟབ་པ་ཉིད་དེ་སྒྲོ་འདོགས་དང་། །སྐུར་པའི་མཐའ་ལས་གྲོལ་བ་ཉིད། །ཅེས་སོ། །དེ་རྗོད་བྱེད་ལམ་རྐྱེན་ཡི་གེའི་རྒྱུད་གསང་བའི་སྙིང་པོ་དེ་ཁོ་ན་ཉིད་ངེས་པ་ཞེས་བྱ་བ་འདི་ཉིད་ཀྱང་སྒྲོ་སྐུར་ཐམས་ཅད་དང་བྲལ་བའོ། །དེ་ལྟར་སྟོན་པའི་བདག་ཉིད་ཀྱིས་རང་བཞིན་ཆོས་ཉིད་དེ་བཞིན་ཉིད་ངེས་པའི་དབྱིངས་རུམ་ནས་ཕྱུང་བའི་རྒྱུད་འདི་ཟུང་ཞིག་ཅེས་སྡུད་པ་པོ་ལ་གཏད་པའོ། །གཉིས་པ་ལ་གཉིས་ཏེ། གང་ཟག་ཆོས་མིག་ཅན་ལ་གཏད་པ་དང་། ངེས་པར་ལུང་བསྟན་པའི་སྒོ་ནས་གཏད་པའི་འཐད་པ་དང་བཅས་པའོ། །དང་པོ་ནི། དེ་བཞིན་གཤེགས་པ་ཐམས་ཅད་ཀྱི་སོགས་ཚིགས་བཅད་གཅིག་སྟེ། ཕྱོགས་དུས་ཀྱི་དེ་བཞིན་གཤེགས་པ་ཐམས་ཅད་ཀྱི་གསུང་གི་ཕྱག་རྒྱ་གསང་ཆེན་སྙིང་པོ་ཡི་གེའི་རྒྱུད་འདི་མ་འོངས་པའི་རྣལ་འབྱོར་པ་གང་ཞིག་རང་གིས་ཚུལ་བཞིན་དུ་རྟོགས་ནས་གཞན་ལ་མ་ནོར་བར་སྨྲ་བར་བྱེད་པ་དེ་ཉིད་ནི་ཀུན་ཏུ་བཟང་པོ་ང་དང་ཐ་མི་དད་པ་ཡིན་ཞིང་། ཕན་ནུས་ཟབ་མོའི་དབང་ཡང་རང་བཞིན་གྱིས་རྫོགས་པའི་ཕྱིར་རྒྱུད་འདི་བཟུང་ལ་མི་ནུབ་པར་གྱིས་ཤིག་ཅེས་པའོ། །གཉིས་པ་ནི། དེ་ནི་སོགས་རྐང་པ་གསུམ་སྟེ། རྒྱུད་འདི་འཛིན་ཅིང་སྟོན་པའི་གང་ཟག་དེ་ནི་ངེས་པ་ཁོ་ནར་གཞན་ལ་སྟོན་པ་རིག་པའི་སྐྱེས་བུ་དང་། དེ་ཉིད་ང་ཡིན་དབང་ཡང་རྫོགས། །ཞེས་སངས་རྒྱས་སུ་ལུང་བསྟན་ཏེ། རྡོ་རྗེ་ལས། རང་རིག་ཡེ་ཤེས་རྒྱུད་དོན་ཕྱིར། །རང་སྣང་རིག་པ་མངོན་བྱས་པས། །རིག་འཛིན་མཆོག་དེ་ལྷུན་གྲུབ་པའོ། །ཏིང་འཛིན་ནུས་པའི་མཐུ་མེད་ཀྱང་། །ས་སྦྱོང་སེམས་དཔའ་བསྐྱེད་དུ་མེད། །བདེ་གཤེགས་ཉིད་དང་སྤྱོད་ཡུལ་གཅིག །རིག་པའི་སྐྱེས་བུར་ལུང་ཐོབ་པའོ། །ཞེས་སོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་སྲས་ཀྱི་དྭངས་མ་ཡིན་ཏེ། དེ་ནི་ཀུན་ཏུ་བཟང་པོའི་ཐུགས་ཀྱི་གསང་བ་ཟབ་མོ་འདི་ལས་སྐྱེས་པ་ཡིན་པའི་ཕྱིར། ས་རབ་སྟེ་ས་ཐམས་ཅད་ཀྱི་མཆོག་རིག་པ་འཛིན་པའམ་རྡོ་རྗེ་འཛིན་པའི་ས་ལ་གནས་པ་ཡིན་ཏེ། དེ་ཉིད་ང་ཡིན་དབང་ཡང་རྫོགས། །ཞེས་གསུངས་པའི་ཕྱིར་རོ། །དེ་བས་ན་རང་གིས་དོན་ཕྱིན་ཅི་མ་ལོག་པར་རྟོགས་པར་བྱས་ནས་སྣོད་ལྡན་རྣམས་ལ་སྟོན་ཅིག་ཅེས་གཏད་པའོ། །གསུམ་པ་ནི། རྒྱས་པ་ལས། ང་ཡི་ཐུགས་ཀྱི་སྙིང་པོ་འདི། །ཕྱོགས་བཅུ་ཀུན་ཏུ་སྤེལ་བ་དང་། །དེ་ཡི་གཟུངས་ལ་གཏད་པ་ནི། །ཡིད་བཞིན་མཛོད་འབྱོར་བཀའ་ཡི་གནས། །བསྟན་པ་འཛིན་པར་ནུས་པ་ལ། །གསང་བའི་སྙིང་པོ་མཆོག་ཏུ་གཏད། །ཅེས་མ་མོ་དང་མཁའ་འགྲོ་རྣམས་ལ་བསྟན་པ་སྐྱོང་ཞིང་ཕྱོགས་བཅུར་སྤེལ་བར་གཉེར་གཏད་པའོ། ། གསུམ་པ་མཛད་པ་ཆོས་ཉིད་དུ་བཞུགས་ཚུལ་ནི། ཞེས་བརྗོད་པས་སོགས་ཏེ། རྒྱུད་དོན་དེ་སྐད་ཅེས་བརྗོད་པས་སྟོན་འཁོར་གྱི་དེ་བཞིན་གཤེགས་པ་ཐམས་ཅད་དགོངས་པ་དབྱེར་མེད་པར་གྱུར་ཅིང་། རྒྱུད་ཀྱི་མཛད་པ་རྫོགས་པས་དགྱེས་ནས་དུས་བཞི་ཐ་དད་དུ་མི་དམིགས་པ་ཆོས་ཉིད་མཉམ་པ་ཉིད་ཀྱི་དབྱིངས་སུ་རྣམ་པར་དག་པའི་ཞིང་ཁམས་སྣང་ཞིང་བཀོད་པ་ཐམས་ཅད་སྟོན་པ་ཉིད་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོར་ལྷུན་གྱིས་གྲུབ་པ་སྟུག་པོ་བཀོད་པའི་རྒྱན་ཉིད་དུ་འཕོ་འགྱུར་མེད་པར་བཞུགས་སོ། ། གསུམ་པ་མཚན་ནི། གསང་བའི་སོགས་ཏེ། རྒྱུད་འདི་ལ་ལེའུ་ཉེར་གཉིས་ཡོད་པ་ལས། འདིས་ཐ་མ་རྒྱུད་རྫོགས་ཤིང་སྟོན་འཁོར་དགོངས་པ་དབྱེར་མེད་དུ་གྱུར་པ་ལ་མཉེས་པ་དང་། གདམས་ཤིང་གཏད་པའི་སྒོ་ནས་རྒྱུད་ཡོངས་སུ་བཟུང་བའི་ལེའུ་སྟེ་ཉི་ཤུ་གཉིས་པའོ།། །། མཇུག་གི་དོན་རྒྱུད་རྫོགས་པའི་བྱ་བ་བསྟན་པ།གསུམ་པ་མཇུག་གི་དོན་རྒྱུད་རྫོགས་པའི་བྱ་བ་བསྟན་པ་ནི། འཕགས་པ་ཞེས་སོགས་ཏེ། བརྗོད་བྱ་གཞི་ལམ་འབྲས་གསུམ་དབྱེར་མེད་པའི་རང་བཞིན་ལྷག་པ་བདེན་པ་དབྱེར་མེད་ཀྱི་དོན་ཡེ་ནས་སྐུ་དང་ཡེ་ཤེས་ཀྱི་དཀྱིལ་འཁོར་དུ་སངས་རྒྱས་པར་སྟོན་པས་ན་གཞན་ལས་ཁྱད་པར་དུ་འཕགས་པའི་ཕྱིར། དེ་རྗོད་བྱེད་ཡི་གེའི་རྒྱུད་འདི་ལའང་འཕགས་པ་ཞེས་བཏགས་སོ། །རྟོག་པ་ནི་དངོས་གྲུབ་རྣམ་པ་གཉིས་སྒྲུབ་པའི་ཐབས་ཀྱི་རྒྱུད་ཐམས་ཅད་ལ་གྲགས་ཤིང་། དེ་དག་ཐམས་ཅད་ལས་རྒྱུད་འདི་མཆོག་ཏུ་གྱུར་པས་ན་རྒྱལ་པོའོ། །དེ་ལྟ་བུའི་རྒྱུད་ཀྱི་རྒྱལ་པོ་རྡོ་རྗེ་སེམས་དཔའ་སྒྲུ་འཕྲུལ་དྲྭ་བ་ཞེས་བྱ་བ། དེའི་ལེའུའི་གྲངས་ནི་སྟོང་ཕྲག་བརྒྱ་པ་སྟེ་འབུམ་ཕྲག་གཅིག་བཞུགས་པ་ལས་ཕྱུང་པ་རྩ་བའི་རྒྱུད་ལེའུ་ཉི་ཤུ་རྩ་གཉིས་ཀྱི་བདག་ཉིད་དུ་བསྟན་པ་འདི་ནི་རྒྱུ་མཚན་ཉིད་ཀྱི་ཐེག་པ་དང་འབྲས་བུ་གསང་སྔགས་ཀྱི་རྒྱུད་ཐམས་ཅད་ཀྱི་འབྱུང་ཁུངས་སམ་འཕྲོ་གཞིར་གྱུར་པས་ལུང་གི་སྤྱི་འགྲེལ། ཕྱོགས་བཅུ་དང་དུས་བཞིས་བསྡུས་པའི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་གསང་བ་ལས་ཀྱང་ཆེས་གསང་བ། དཔལ་གསང་བ་སྙིང་པོ་དེ་ཁོ་ན་ཉིད་ངེས་པ་ཞེས་བྱ་བའི་རྒྱུད་འདི་ལས་བསྟན་པ་དང་ཐེག་པ་ཐམས་ཅད་མ་ལུས་པར་འཕྲོས་ཏེ་ཆོས་ཀྱི་འཁོར་ལོ་བསམ་གྱིས་མི་ཁྱབ་བསྐོར་བ་དེ་དག་གང་ནས་ཞུགས་ཀྱང་མཐར་ཐུག་བགྲོད་པ་གཅིག་པས་ཀུན་གྱི་འབྲས་བུ་བླ་ན་མེད་པའི་མཆོག་རྩ་བའི་རྒྱུད་ཆེན་པོ་རྫོགས་སོ་ཞེས་པ་ནི་གཏན་ལ་ཕབ་ཟིན་པའི་དོན་དང་། ཨི་ཏི་ཞེས་པ་ནི་ཤིན་ཏུ་ཟབ་པའི་དོན་ནོ། །གླེགས་བམ་གྱི་མཐར་རྒྱ་གར་གྱི་མཁན་པོ་བི་མ་ལ་མི་ཏྲའི་ཞལ་སྔ་ནས་དང་། བོད་ཀྱི་ལོ་ཙ་བ་གཉགས་ཛྙཱ་ན་ཀུ་མཱ་ར་དང་། རྨ་ཨཱ་ཙརྱ་རིན་ཆེན་མཆོག་གིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །ཞེས་འབྱུང་བ་ནི་འགྱུར་བྱང་སྟེ། རྒྱུད་འདི་ལ་ལོ་པཎ་བསྡེབས་པའི་གཞི་འགྱུར་གསུམ་ཡོད་པར་གྲགས་ཤིང་། དེའང་སངས་རྒྱས་གསང་བ་དང་བཻ་རོ་ཙ་ནའི་སྔ་འགྱུར། སློབ་དཔོན་ཆེན་པོ་པདྨ་དང་གཉགས་ཀྱི་བར་འགྱུར། བི་མ་ལ་དང་རྨ་གཉགས་ཐུན་མོང་གི་ཕྱི་འགྱུར་རྣམས་ལས་འདིར་ཕྱི་མ་སྟེ། ལོ་པཎ་དེ་རྣམས་ཀྱིས་ལེགས་པར་བསྒྱུར་ཞིང་འཆད་ཉན་གྱིས་གཏན་ལ་ཕབ་ནས་དར་རྒྱས་སུ་མཛད་དོ། ། ཟབ་རྒྱས་བདེ་གཤེགས་གསུང་རབ་མ་ལུས་པའི། །ཕུལ་གྱུར་དཔལ་ལྡན་གསང་བ་སྙིང་པོ་ལྟའི། །ཐར་འདོད་རྣམས་ཀྱི་འཇུག་ངོགས་གཞན་མེད་པས། །འཇིག་རྟེན་འདི་ན་མཚུངས་མེད་ཡིད་བཞིན་ནོར། །༡དེ་དོན་ཇི་བཞིན་འཆད་ལ་ཟླ་བྲལ་བ། །དཔལ་ལྡན་ཟུར་པའི་བཀའ་སྲོལ་བདུད་རྩིའི་རྒྱུན། །གཏེར་ཆེན་བླ་མའི་ཐུགས་མཚོར་འཁྱིལ་བ་ལས། །དད་བརྩོན་རྔ་ཡབ་རྩེ་མོས་བཅུད་དུ་བླངས། །༢ཤིན་ཏུ་རྙེད་དཀའ་གསང་ཆེན་རྡོ་རྗེའི་ཚིག །དབྱེ་བར་དཀའ་མོད་རང་དང་རྗེས་མཐུན་པར། །རྣམ་པར་ཕྱེ་འདི་དཔལ་ལྡན་གསང་བའི་བདག །དགོངས་པ་མཛེས་བྱེད་ལེགས་བཤད་རྒྱན་དུ་རློམ། །༣སྦྲང་བུའི་བགྲོད་པས་ནམ་མཁའི་མཐའ་འཚོལ་ལྟར། །གསང་ཆེན་ཟབ་མོ་བྱིས་བློའི་སྤྱོད་ཡུལ་མིན། །དེ་ཕྱིར་བླུན་བློས་འདིར་ནོངས་འགྱུར་པའི་ཚོགས། །འཕགས་དང་དམ་པ་རྣམས་ཀྱིས་བཟོད་པར་མཛོད། །༤སྐྱེ་བོ་ཕལ་ཆེར་གྲགས་པའི་རྗེས་འགྲོ་བས། །འཕགས་དང་མཁས་གཞུང་རྣམས་ཀྱང་ཕྱོགས་གཅིག་ཏུ། །ལེན་པ་མིན་ན་བདག་གཞུང་ལྟ་ཅི་སྨོས། །དེ་ཕྱིར་གཞན་དོན་འགྱུར་སྙམ་སྤྲོ་བ་མེད། །༥འོན་ཀྱང་དམ་པའི་གསུང་གིས་བསྐུལ་བ་དང་། །རང་གི་བློ་ལའང་གོམས་པ་སྐྱེ་བའི་སླད། །བློ་རྨོངས་གྱུར་ཀྱང་བླ་མའི་མན་ངག་ལ། །བརྟེན་ནས་རྣམ་པར་བཤད་ལ་སྐྱོན་ཡོད་མིན། །༦འདི་ལས་རྣམ་དཀར་དགེ་བ་གང་ཐོབ་པ། །དེ་ཡིས་མཁའ་མཉམ་ལུས་ཅན་ཐམས་ཅད་ཀུན། །རྨད་བྱུང་ལམ་གྱིས་དྲི་མ་ཡོངས་སྦྱངས་ཏེ། །རང་བྱུང་ཡེ་ཤེས་མངོན་དུ་རྟོགས་པར་ཤོག །༧ཕྱོགས་ལྷུང་སྒྲོ་སྐུར་བྲལ་བའི་བློ་གྲོས་མཁར། །རྣམ་པར་སོང་བའི་ལེགས་བཤད་འོད་བརྒྱ་པ། །ཤར་བ་ཡིས་ནི་མི་ཤེས་རྨོངས་པའི་མུན། །མཐར་བྱེད་བཀྲ་ཤིས་སྣང་བ་འབར་གྱུར་ཅིག །༨དཔལ་གསང་བའི་སྙིང་པོའི་རྒྱུད་ཀྱི་འགྲེལ་པ་གྲོལ་ལམ་གཙོ་བོར་སྟོན་པ་གསང་བདག་དགོངས་རྒྱན་ཞེས་བྱ་བ་འདི་ནི་དཔལ་གདོང་ཆུ་བྱའི་ལོར་ལེའུ་གསུམ་པ་ཡན་ཆད་ཙམ་གྲུབ་པ་ལས། དེ་མན་ཆད་ལེ་ལོའི་དབང་གིས་ལུས་པ་ཕྱིས་རྗེ་བླ་མ་དམ་པའི་སྲས་ཀྱི་ཐུ་བོ་ཐུགས་རྗེ་དང་མཁྱེན་རབ་རྨད་དུ་བྱུང་བ་ཞབས་དྲུང་རིན་པོ་ཆེ་སྐུ་མཆེད་གཟིགས་པའི་སླད་དང་། བློ་གསར་དོན་ཉེར་ཅན་མང་པོས་ཀྱང་བསྐུལ་ཞིང་། ཁྱད་པར་སྔོན་གོམས་ཀྱི་ཡོན་ཏན་ཕུལ་དུ་བྱུང་བས་སྤྲས་པ་དཔལ་རི་སྤྲུལ་པའི་སྐུ་ངག་དབང་ཀུན་བཟང་པདྨ་དང་། མང་ཐོས་སྤོང་བ་ལ་གཞོལ་བ་མེ་རག་ཆོས་རྗེ་པདྨ་ཕྲིན་ལས་དབང་ཕྱུག་གཉིས་ཀྱིས་ནན་ཏན་ཆེན་པོའི་གསུང་གིས་ཉེ་བར་བསྐུལ་བ་ལ་བརྟེན་ནས། དུས་གསུམ་སངས་རྒྱས་ཐམས་ཅད་ཀྱི་ངོ་བོ་ཚད་མེད་པའི་ཐུགས་རྗེ་དང་དྲི་མ་མེད་པའི་ཡེ་ཤེས་ལ་མངའ་འབྱོར་བ་མཚན་བརྗོད་པར་དཀའ་བ་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པའི་བཀའ་དྲིན་གྱིས་འཚོ་བ་སྨྱོས་ཀྱི་དགེ་སློང་རྨོངས་པ་དྷརྨ་ཤྲཱིས་རྣམ་གནོན་ལྕགས་འབྲུག་གི་ལོ། སྟོན་ར་ཁྲུམས་ཟླ་བའི་མར་ངོའི་ཚེས་བཅུ། རྒྱལ་ཕུར་འཛོམས་པའི་འགྲུབ་སྦྱོར་བཟང་པོ་ལ། ཡོན་ཏན་རིན་པོ་ཆེའི་འབྱུང་གནས་གངས་རིའི་ཁྲོད་ཀྱི་པདྨ་འོད་འོག་མིན་ཨོ་རྒྱན་སྨིན་གྲོལ་གླིང་གི་ཆོས་གྲྭར་སུག་བྲིས་སུ་སྦྱར་བའོ། །འདིས་ཀྱང་བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བའི་གཞིར་གྱུར་ཅིག །ༀ་སྭ་སྟི། གཞི་རྒྱུད་བདེ་གཤེགས་སྙིང་པོའི་ཁམས། །ཐབས་རྒྱུད་ལམ་གྱིས་ཡོངས་སྦྱངས་ནས། །འབྲས་རྒྱུད་སྐུ་བཞིར་མཚམས་སྦྱོར་བའི། །བླ་མ་དེ་ལ་གུས་ཕྱག་འཚལ། །༡འོག་མིན་ཞིང་ཁམས་ཉམས་དགའ་བར། །ཁྱབ་བདག་སྟོན་པ་ཀུན་བཟང་གིས། །གང་གསུངས་རྡོ་རྗེ་ཐེག་པ་ནི། །གསང་འཛིན་རྣམས་ཀྱིས་བསྡུ་བ་མཛད། །༢མཁའ་སྤྱོད་གྲུབ་པའི་ཞིང་རྣམས་སུ། །འཕེལ་འགྲིབ་མེད་པར་བཞུགས་པ་ཉིད། །རིགས་ཅན་དྲ་མ་ལྔ་སོགས་ཀྱིས། །ཞིང་འདིར་མངོན་དུ་མཛད་པ་གང་། །༣འཕགས་ཡུལ་པཎ་གྲུབ་དགོངས་པའི་མཚོར། །ཡོངས་འཁྱིལ་པད་འབྱུང་བི་མ་དང་། །རྨ་གཉགས་བཻ་རོ་ལ་སོགས་ཀྱིས། །བསྒྱུར་བཤད་གངས་ཅན་གདུང་སེལ་མཛད། །༤དེ་ནས་གནུབས་ཉང་ཟུར་ལ་སོགས། །སྐྱེས་མཆོག་རིམ་པར་བྱོན་རྣམས་ཀྱིས། །བཤད་སྒྲུབ་ཕྲིན་ལས་ཉི་མ་ཡིས། །གསང་ཆེན་རིང་ལུགས་ཀུན་གསལ་མཛད། །༥ཕྱིས་དུས་རིག་འཛིན་འགའ་ཞིག་ལ། །ཐུན་མོང་མིན་ལས་གཞན་དག་ཏུ། །ཆོས་དཀོན་གྱུར་ཚེ་བླ་མའི་དྲིན། །གཞན་དུ་མེད་ལས་རྙེད་འདི་མཚར། །༦དེ་ཕྱིར་སྡེ་སྣོད་རྒྱུད་ཀུན་མཆོག །མཆོག་གསང་གསང་བ་སྙིང་པོའི་རྒྱུད། །རྒྱུད་དོན་ཇི་བཞིན་འགྲེལ་བྱེད་གཞུང་། །གཞུང་ལུགས་ཀུན་གྱི་སྙིང་པོ་གང་། །༧ངག་གི་དབང་ཕྱུག་གྲུབ་པའི་ལྷ། །ཆོས་དཔལ་རྒྱ་མཚོའི་རྣམ་དཔྱོད་ལས། །འཁྲུངས་པའི་ཡིད་བཞིན་ནོར་བུ་ནི། །གསང་བདག་དགོངས་པའི་རྒྱན་དུ་ཤར། །༨གང་དེ་ཨོ༵་རྒྱ༵ན་མཁན་པོ་ཡི། །རིང་ལུགས་སྨི༵ན་གྲོ༵ལ་འདུས་པའི་གླི༵ང་། །བཤད་སྒྲུབ་ཆོས་ཀྱི་རྒྱལ་མཚན་གྱི། །རྩེ་མོར་མཆོད་པ་ཉིད་དུ་བྱས། །༩དེ་ལས་ཇི་སྙེད་ཆོས་ཀྱི་ཆར། །འབེབས་ཕྱིར་ཨོ་རྒྱན་དཔལ་འབྱོར་གྱིས། །བྲིས་ཤིང་དག་བྱེད་འབུམ་རམས་པ། །ཨོ་རྒྱན་སྐལ་བཟང་ཞེས་བྱའོ། །༡༠བརྐོས་མཁན་ཨོ་རྒྱན་རྡོ་རྗེ་དང་། །རྡོ་རྗེ་ཚེ་བརྟན་དགེ་གཉེན་གྱིས། །ལེགས་བརྐོས་སྨིན་གྲོལ་གླིང་ཞེས་པའི། །ཆོས་གྲྭར་སྣ་ཚོགས་ལོ་ལ་བསྒྲུབས། །༡༡འདི་ལས་བྱུང་བའི་བསོད་ནམས་ཀྱིས། །ཆོས་དང་སྲིད་ཀྱི་ཕུན་ཚོགས་དཔལ། །རབ་འཕེལ་འགྲོ་ཀུན་ལམ་འདི་ལས། །ཀུན་བཟང་གོ་འཕང་ཐོབ་ཕྱིར་བསྔོ། །༡༢ལེགས་བྱས་ཆུ་ཡི་གཏེར་ཆེན་ལས། །འཁྲུངས་པའི་བསོད་ནམས་ཉི་མ་ནི། །ཕན་བདེའི་སྣང་བ་མཐའ་ཡས་པའི། །བཀྲ་ཤིས་ཀུན་ཏུ་གསལ་གྱུར་ཅིག །༡༣ཅེས་གསང་ཆེན་རྡོ་རྗེ་ཐེག་པའི་རྒྱུད་སྡེ་ཀུན་གྱི་རྩེ་མོ་དཔལ་གསང་བའི་སྙིང་པོའི་འགྲེལ་པ་གསང་བདག་དགོངས་པའི་རྒྱན་ཞེས་བྱ་བ་གནས་ལྔ་རིག་པའི་བཤེས་གཉེན་མཁན་ཆེན་ལོ་ཙཱ་བ་ཆོས་དཔལ་རྒྱ་མཚོའི་རྣམ་དཔྱོད་ལས་བྱུང་བ་འདི་ཉིད་ཨོ་རྒྱན་སྨིན་གྲོལ་གླིང་གི་རིག་འཛིན་འདུས་པའི་སྡེ་རྗེས་འབྲང་དང་བཅས་པ་རྣམས་ཐོས་བསམ་ལྷུར་བྱེད་པའི་མིག་རྐྱེན་དུ་ཆུ་ཕོ་རྟའི་ལོ་ལ་པར་དུ་བརྐོས་པའི་ཚེ་འགྱུར་མེད་རྡོ་རྗེས་སྨྲས་པའོ།། ། |