 སྔ་འགྱུར་སྨིན་གླིང་དཔེ་ཚོགས།པོད་བཅོ་བརྒྱད་པ།རྩོམ་མཁན། རྒྱལ་སྲས་པདྨ་འགྱུར་མེད་རྒྱ་མཚོ།འོག་མིན་ཨོ་རྒྱན་སྨིན་གྲོལ་གླིང་།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། གསང་བ་སྙིང་པོའི་སྤྱི་དོན་མཐོང་བས་དོན་རྟོགས། རྒྱལ་སྲས་པདྨ་འགྱུར་མེད་རྒྱ་མཚོ།― MLP018_Page_0001 ―
[མ་དཔེ་གཟིགས་ན་འདིར་གནོན།]
དྲྀ ཥྚེ ཎཱ རྠ བུ དྡྷ ན མོ གུ ཧྱ ག རྦྷ སྱ ས མཱ ནྱཱ རྠ བི ཧ ར ཏི སྨ། ། ― MLP018_Page_0002 ―
[མ་དཔེ་གཟིགས་ན་འདིར་གནོན།]
དྲྀ ཥྚེ ཎཱ རྠ བུ དྡྷ ན མོ གུ ཧྱ ག རྦྷ སྱ ས མཱ ནྱཱ རྠ བི ཧ ར ཏི སྨ། ། ― MLP018_Page_0003 ―
[མ་དཔེ་གཟིགས་ན་འདིར་གནོན།]
མགོན། །འབྲས་རྒྱུད་དེ་བཞིན་གཤེགས་ལ་གུས་ཕྱག་འཚལ། །ཤིན་ཏུ་རྟོགས་དཀའ་ཟབ་གསང་སྙིང་པོའི་དོན། །ངག་ཚིག་བརྗོད་པས་འདོམས་ལ་དབང་འབྱོར་བས། །ཆོས་ཀུན་ཟབ་གནད་སྟོན་པའི་བྱེད་པ་པོ། །དཔལ་ལྡན་རྡོ་རྗེ་འཛིན་མཆོག་རྒྱལ་གྱུར་ཅིག །མཆོག་ཏུ་གསང་བ་བརྟན་གཡོའ་དངོས་ཀུན་གཤིས། །དུས་གསུམ་རྒྱལ་བའི་དགོངས་བཅུད་སྙིང་པོའི་དོན། །འཁྲུལ་མེད་དེ་བཞིན་ཉིད་དུ་སྟོན་བྱེད་རྒྱུད། །ངེས་པའི་ཟབ་གནད་དོན་ཀུན་འདིར་གསལ་བྱ། །དེ་ལ་འདིར་གང་བཤད་བྱའི་ཆོས་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་རྩ་བའི་རྒྱུད། དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་རྒྱལ་པོ་ཆེན་པོ་འདི་ཉིད་ཡིན་ལ། དེ་གང་གིས་འཆད་ན། ལུང་རིགས་མན་ངག་གསུམ་གྱིས་འཆད་དེ། དེ་ལ་ལུང་གིས་ཇི་ལྟར་འཆད་ཅེ་ན། གྲོལ་ལམ་རིམ་ཅིག་ཅར་དུ་སྟོན་པ་རྡོ་རྗེ་མེ་ལོང་དང་། ཡེ་ཤེས་སྙིང་པོ། ཐབས་ལམ་རིམ་ཅིག་ཅར་དུ་སྟོན་པ་རྒྱ་མཚོ་དང་ཐལ་བ་སྟེ། དེ་ལྟར་བཤད་རྒྱུད་སྡེ་བཞི་སོགས་རྒྱུད་རྣམ་པར་དག་པ་རྣམས་ཀྱིས་སོ། །མན་ངག་གིས་ཇི་ལྟར་འཆད་ན། འཕགས་ཡུལ་གྱི་པཎ་གྲུབ་ཆེན་པོ་པདྨ་འབྱུང་གནས་དང་། བི་མ་ལ་མི་ཏྲ་སོགས་སྤྱི་དང་། ཁྱད་པར་སྒེག་རྡོར་གྱི་རྒྱས་འགྲེལ་སྤར་ཁབ་དང་། སངས་རྒྱས་གསང་བའི་སྒྱུ་འཕྲུལ་ལམ་རིམ་སོགས་ལ་བརྟེན་ནས་འཆད། བོད་ཀྱི་མཁས་པ་ཆེན་པོ་སོ་ཟུར་གནུབས་གསུམ། ཁྱད་པར་ཟུར་མེས་དབོན་རྣམ་གསུམ་སོགས་ཀྱི་བསྟན་བཅོས་རྣམ་དག་ལ་བརྟེན་ནས་སོ། །རིགས་པས་ཇི་ལྟར་འཆད་ཅེ་ན། ལུང་མན་ངག་དང་མི་འགལ་བའི་རིགས་པ་རྣམ་པར་དག་པས་སོ། །ཇི་ལྟར་འཆད་པའི་ཚུལ་ལ། སྒེག་རྡོར་གྱིས་རྒྱུད་གསུམ་སྣང་བ་བཞིར་བསྡུས་ནས་གསུངས། ཟུར་ཆུང་ཤེས་རབ་གྲགས་ཀྱིས་ཆོས་ལྔར་བསྡུ་བ་སོགས་འཆད་ཚུལ་གྱི་བཀའ་སྲོལ་དུ་མ་ཡོད་ཀྱང་། འདིར་བི་མ་ལའི་རྗེས་སུ་འབྲངས་ཏེ་འཆད་ན། ཁོག་གཞུང་གསལ་སྒྲོན་དུ། རབ་ལ་མཚན་བསྟན་འབྲིང་ལ་དབྱེ། །ཐ་མར་འབྲུ་གཉེར་དགྲོལ་བའོ། །ཞེས་པས་དོན་གསུམ་སྟེ། འགོ་སྨོས་པས་གོ་བའི་དབང་པོ་ཡང་རབ་རྣམས་ལ་མཚན་བཤད་པ་དང་། དབང་པོ་འབྲིང་པོ་རྣམས་ལ་སྤྱིའི་དོན་རྣམ་པར་དབྱེ་བས་བཤད་པ་དང་། དབང་པོ་ ― MLP018_Page_0004 ―
[མ་དཔེ་གཟིགས་ན་འདིར་གནོན།]
ཐ་མ་རྣམས་ལ་འབྲུ་རེ་གཉེར་རེའི་སྒོ་ནས་སྤྲོས་ཏེ་བཤད་པ་དང་གསུམ་ལས། སྐབས་འདིར་ས་བཅད་དང་པོ་གཉིས་སྟོན་ཏེ། དེ་ལ་དང་པོ་མགོ་སྨོས་པས་གོ་བའི་དབང་པོ་ཡང་རབ་རྣམས་ལ་མཚན་བཤད་པ་ལའང་། ཁོག་གཞུང་ལས། རབ་མཚན་ཐ་སྙད་གསུམ་དུ་གྲགས། །སྒྱུ་འཕྲུལ་སྙིང་པོ་ལུང་གི་སྤྱི། །ལག་གི་རྩ་བཞིན་དབུ་ཞབས་རྟོགས། །སྐལ་བ་ཅན་གྱི་ཆེད་ཕྱིར་རོ། །ཞེས་པས་བསྟན། རབ་ལ་མཚན་བསྟན་པ་དེ་ལའང་ཐ་སྙད་གསུམ་སྟེ། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞེས་པ་རྒྱུད་དང་མཐུན་པའི་མཚན། གསང་བའི་སྙིང་པོ་དེ་ཁོ་ན་ཉིད་ངེས་པ་ཞེས་པ་མན་ངག་དང་མཐུན་པའི་མཚན། མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི་ཞེས་པ་ལུང་དང་མཐུན་པའི་མཚན་ཏེ། གཙོ་ཆེ་བའི་དབང་དུ་མཚན་ཐ་སྙད་གསུམ་དུ་གྲགས་ཤིང་། དེས་རྟོགས་ཚུལ་ནི། སྨན་པས་ལག་གི་རྩ་བལྟས་པས་ལུས་མགོ་མཇུག་གི་ནད་ཤེས་པ་བཞིན་ནོ། །དེ་ལ་མཚན་གྱི་རྣམ་གྲངས་གསུམ་ལས། དང་པོ་རྒྱུད་དང་དཀྱིལ་འཁོར་གྱི་གཙོ་བོ་དང་འཆད་པའི་སྐྱེས་བུ་གསུམ་གྱི་མཚན་ཐུན་མོང་དུ་བསྟན་པ་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་སྟེ། དེ་ལ་མཚན་གྱི་ཟུར་གཉིས་ལས། དང་པོ་རྡོ་རྗེ་སེམས་དཔའ་ནི། བཤད་རྒྱུད་མེ་ལོང་ལས། ཆོས་རྣམས་མ་ལུས་གཉིས་མེད་པའི། །རང་རིག་བྱང་ཆུབ་སེམས་ཉིད་དོ། །ཐ་དད་མེད་པའི་རང་བཞིན་ཉིད། །རྡོ་རྗེ་ཞེས་ནི་བཤད་པ་ཡིན། །ཞེས་དང་། མཉམ་སྦྱོར་ལས། རྡོ་རྗེ་སྟོང་པ་ཉིད་དུ་བརྗོད། །སེམས་དཔའ་ཡེ་ཤེས་ཙམ་ཉིད་དེ། །དེ་དག་བདག་ཉིད་གྲུབ་པ་ནི། །རྡོ་རྗེ་སེམས་དཔའ་ཞེས་བརྗོད་དོ། །ཞེས་པས་རྡོ་རྗེ་ནི་ཤེས་རབ་སྟོང་པ་ཉིད་དོ། །སྟོང་པ་ཉིད་དེ་ལ་ཚུར་མཚན་མའི་ཆོས་གང་གིས་ཀྱང་མི་ཕྱེད་ཅིང་ཕར་མཚན་ཆོས་ཐམས་ཅད་འཇོམས་ནུས་པས་རྡོ་རྗེ་དང་ཆོས་མཚུངས་པའི་ཕྱིར་དེ་ལྟར་བཏགས། སེམས་དཔའ་ནི། ས་ཏྭའི་སྒྲ་ལས་དྲངས་ན། སྤྱིར་ས་ཏྭ་དོན་དྲུག་ལ་འཇུག་སྟེ། སྙིང་སྟོབས་ཏེ་ཞེ་སྡང་དང་། དཔའ་ཞིང་བརྟན་པ་དང་། འདུན་པ་དང་། ཤེས་རིག་དང་། སྲོག་ཆགས་དང་། ― MLP018_Page_0005 ―
[མ་དཔེ་གཟིགས་ན་འདིར་གནོན།]
བསྡུས་པ་རྣམས་ལ་འཇུག་པ་ལས། སྐབས་འདིར་བརྟན་བསྡུས་རྟོགས་གསུམ་སྟེ། དེ་ལ་བརྟན་པ་ནི། སེམས་ཅན་ཀུན་གྱི་སེམས་གང་ནི། །རྡོ་རྗེ་ཞེས་སུ་བཤད་པ་ཡིན། །བརྟན་པའི་ཕྱིར་ན་སེམས་དཔར་བརྗོད། །ཅེས་དང་། བསྡུས་པ་ནི། རྡོ་རྗེ་སེམས་དཔའ་བསྡུས་པས་ན། །ཞེས་སམ། མི་ཕྱེད་རྡོ་རྗེ་ཞེས་བརྗོད་དོ། །སེམས་དཔའ་སྲིད་གསུམ་གཅིག་པའོ། །འདི་ན་ཤེས་རབ་ལྡན་པ་ཡིས། །རྡོ་རྗེ་སེམས་དཔའ་ཞེས་སུ་བཤད། །ཅེས་དང་། རྟོགས་པ་ནི། སྐྱེ་མེད་ཡེ་ཤེས་རང་གི་དབྱིངས། །མི་འགྱུར་མི་ཤིགས་རྡོ་རྗེའི་དོན། །སེམས་དཔའ་ཡེ་ཤེས་རྡོ་རྗེ་སྟེ། །ཞེས་པས་ཡུལ་ཅན་ཐབས་རང་རིག་པ་བྱང་ཆུབ་ཀྱི་སེམས་ཡུལ་ཤེས་རབ་དབྱིངས་སྟོང་པ་ཉིད་དང་རོ་གཅིག་པའི་ཟུང་འཇུག་རང་བཞིན་གྱིས་རྣམ་པར་དག་པ་དེ་ནི་རྡོ་རྗེ་ལྟར་བརྟན་པའི་ཕྱིར་བརྟན་པའི་རྡོ་རྗེ་སེམས་དཔའ་ཞེས་བྱ་སྟེ་མཆོག་ཏུ་མི་འགྱུར་བའི་ཆ་ནས་བཞག ཟུང་འཇུག་དེའི་ཕྱག་རྒྱས་འཁོར་འདས་ཀྱི་ཆོས་ཐམས་ཅད་ལ་བཏབ་པས་འཁོར་འདས་བཟང་ངན་མེད་པར་མཉམ་པ་ཉིད་དུ་བསྡུས་པ་ནི་བསྡུས་པའི་རྡོ་རྗེ་སེམས་དཔའ་སྟེ་རྣམ་ཀུན་མཆོག་ལྡན་གྱི་ཆ་ནས་བཞག་ཅིང་། དེ་ལྟར་བརྟན་བསྡུས་གཉིས་པོ་དེ་གནས་ལུགས་ཀྱི་ངོས་ནས་བཞག་སྟེ། དེའི་ཕྱིར་གཉིས་པོ་དེ་ལ་གཞི་འབྲས་གཉིས་སུ་མེད་པའི་རྡོ་རྗེ་སེམས་དཔའ་ཞེས་བྱའོ། །དེ་ལྟ་བུའི་གནས་ལུགས་ཀྱི་དོན་གདོད་མ་ནས་རང་ཆས་སུ་བཞུགས་པ་དེ་ཉིད་སྒྲིབ་གཉིས་ཟད་ཅིང་ཚོགས་གཉིས་རྫོགས་པའི་སྐྱེས་བུས་རང་གི་རང་བཞིན་ཇི་ལྟ་བ་བཞིན་མངོན་དུ་རྟོགས་པ་ནི་འབྲས་བུའི་རྡོ་རྗེ་སེམས་དཔའ་སྟེ། སྣང་ལུགས་ཀྱི་ངོས་ནས་བཞག་ལ། གང་རྟོགས་པའི་ཡེ་ཤེས་དེ་ཡང་རྡོ་རྗེ་ལྟར་གཉིས་སུ་མེད་པར་གྱུར་པའི་ཕྱིར་དེ་སྐད་ཅེས་བྱའོ། །དེ་ཉིད་མཚོན་བྱེད་མཚན་མའི་ཕྱག་རྒྱར་སྣང་བ་དཀྱིལ་འཁོར་གྱི་གཙོ་བོ་དང་། སྐབས་འདིར་ཐུགས་ཀྱི་སྒྱུ་འཕྲུལ་གྱི་དབང་དུ་བྱས་ཏེ་འཆད་པའི་སྐྱེས་བུ་རྡོ་རྗེ་མི་བསྐྱོད་པ་ལའང་རྡོ་རྗེ་སེམས་དཔའ་ཞེས་བྱའོ། །དེ་ལ་དཀྱིལ་འཁོར་གྱི་གཙོ་བོ་ནི། ལས་དང་པོ་པས་དོན་སྤྱིའི་ཚུལ་དུ་བསྒོམས་པ་བརྟགས་པའི་ལྷ་སྐུ། འབྲས་བུའི་རྫོགས་རིམ་གྲུབ་པའི་ས་མཚམས་སྦྱོར་ལམ་གྱི་དུས་སུ་རླུང་སེམས་ཀྱི་ལྷ་སྐུ་རང་ཤར། མཐོང་ལམ་འོད་ ― MLP018_Page_0006 ―
[མ་དཔེ་གཟིགས་ན་འདིར་གནོན།]
གསལ་གྱི་ལྷ་སྐུ། སློབ་པའི་ཟུང་འཇུག་གི་ལྷ་སྐུ་སྟེ་ལམ་གྱིས་བསྡུས་པའི་དཀྱིལ་འཁོར་གྱི་གཙོ་བོ་དང་། མི་སློབ་པའི་ཟུང་འཇུག་འོག་མིན་དུ་བཞུགས་པའི་དག་པ་གཉིས་ལྡན་གྱི་དཀྱིལ་འཁོར་གྱི་གཙོ་བོ་རྣམས་སོ། །མཚན་གྱི་ཟུར་གཉིས་པ་སྒྱུ་འཕྲུལ་དྲྭ་བ་ནི། རྡོ་རྗེ་ལས། ཐབས་དང་ཤེས་རབ་འབྲེལ་བའི་དོན། ཞེས་པས་སྒྱུ་འཕྲུལ་དྲྭ་བའང་ཐབས་ཤེས་ཟུང་འཇུག་གི་དོན་ཏེ། དེ་ལ་དང་པོ་རྟོག་ཚོགས་སྒྱུ་དྲྭ་ནི། འབྱུང་བ་ལྔ་ཆོས་ཅན། སྒྱུ་མ་ཞེས་བྱ་སྟེ། སྣང་བ་རིས་སུ་མ་ཆད་པའི་ཕྱིར། ཕུང་པོ་ལྔ་ཆོས་ཅན། འཕྲུལ་པ་ཞེས་བྱ་སྟེ། རྒྱུ་འབྱུང་བ་རིས་སུ་མ་ཆད་པའི་རྒྱུས་འབྲས་བུ་ཕུང་པོ་ལྔར་འཕྲུལ་པའི་ཕྱིར། རྒྱུ་འབྲས་གཉིས་པོ་དེ་ཆོས་ཅན། དྲྭ་བ་ཞེས་བྱ་སྟེ། དེ་གཉིས་རྒྱུ་འབྲས་འབྲེལ་པ་ཅན་གྱི་སྒོ་ནས་ཟུང་དུ་འཇུག་པའི་ཕྱིར། གཉིས་པ་ངེས་དོན་སྒྱུ་དྲྭ་ནི། ཤེས་རབ་དབྱིངས་སྟོང་པ་ཉིད་ཆོས་ཅན། སྒྱུ་མ་ཞེས་བྱ་སྟེ། རིས་མེད་ཀུན་ཁྱབ་ཀྱི་ཆོས་ཉིད་ཡིན་པའི་ཕྱིར། ཐབས་རིག་པ་རང་བྱུང་གི་ཡེ་ཤེས་ཆོས་ཅན། འཕྲུལ་པ་ཞེས་བྱ་སྟེ། སྟོང་ཉིད་ཀྱི་རྩལ་སྣང་རིག་པ་རང་བྱུང་གི་ཡེ་ཤེས་སུ་མ་འགགས་པར་འཕྲུལ་པའི་ཕྱིར། དེ་གཉིས་ཟུང་འཇུག་ཆེན་པོ་ཆོས་ཅན། དྲྭ་བ་ཞེས་བྱ་སྟེ། སྟོང་ཉིད་ཀྱི་རྩལ་སྣང་ཡེ་ཤེས་སུ་འཆར་ལ་ཡེ་ཤེས་ཀྱི་རང་བཞིན་སྟོང་པར་གྲོལ་བའི་ཕྱིར། གསུམ་པ་དྲང་དོན་བརྡའི་སྒྱུ་དྲྭ་ནི། གང་དུ་དྲང་ན་ངེས་དོན་གྱི་སྒྱུ་འཕྲུལ་དྲྭ་བ་ལ། གང་དྲང་ན་མཚན་མའི་བློ་ཅན་རྣམས། ཇི་ལྟར་དྲང་ན་སྒྱུ་མ་མཚོན་པ་ལྷ་ཡུམ། འཕྲུལ་པ་མཚོན་པ་ལྷ་ཡབ། དྲྭ་བ་མཚོན་པ་ཡབ་ཡུམ་ཞལ་སྦྱོར་གྱི་བརྡས་སོ། །བཞི་པ་ལྷ་རྟོག་དབྱེར་མེད་ཀྱི་སྒྱུ་དྲྭ་ནི། རྟོག་ཚོགས་ནི་སྒྱུ་མ་སྟེ། སྣང་ལ་རང་བཞིན་མ་གྲུབ་པའི་ཕྱིར། ལྷ་ནི་འཕྲུལ་པ་སྟེ། རྟོག་ཚོགས་ཀྱི་རང་བཞིན་ཆོས་ཉིད་བྱང་ཆུབ་སེམས་ཀྱི་རྩལ་སྣང་ལྷར་སྣང་བའི་ཕྱིར། དྲྭ་བ་ནི་རང་བཞིན་གཉིས་སུ་མེད་པར་འབྲེལ་པ་སྟེ། རྟོག་ཚོགས་ཀྱི་རང་བཞིན་ལྷ་ཡིན་པའི་ཕྱིར། དེ་ལྟར་ཡང་། ལེ་ལག་ལས། ལྔ་ཕུང་སྒྱུ་མའི་ཡེ་ཤེས་ལ། །རང་རིག་ཐབས་ཀྱིས་རིགས་ལྔར་འཕྲུལ། །ཞེས་དང་། བླ་མ་ལས། ཀུན་འབྱུང་དཀྱིལ་འཁོར་སྒྱུ་འཕྲུལ་ཆེ། །མང་ལ་འབྲེལ་བ་དྲྭ་བའི་དོན། །ཞེས་གསུངས། འདི་ཉིད་ཀྱི་ལེའུ་བཞི་པ་ལས་ནི་ཡབ་ལ་ ― MLP018_Page_0007 ―
[མ་དཔེ་གཟིགས་ན་འདིར་གནོན།]
སྒྱུ་འཕྲུལ་དང་། ཡུམ་ལ་དྲྭ་བར་བཤད་དེ། ཋ་ནི་སྒྱུ་འཕྲུལ་རྡོ་རྗེ་ཉིད། སོགས་དང་། ཐ་ནི་དྲྭ་བ་བརྟན་པ་ཉིད། །སོགས་སོ། །དེ་ལྟར་གཞི་དང་འབྲས་བུའི་ཟུང་འཇུག་ལ་མཚན་ཇི་སྐད་དུ་ཐོབ་པའི་ངེས་པས་ལས་ཀྱི་རྒྱུད་དེ་ལའང་དེ་སྐད་ཅེས་བྱ་སྟེ། གཞི་འབྲས་གཉིས་དང་ཤེས་ཐོབ་ཀྱི་བྱ་བྱེད་འབྲེལ་པ་ཅན་དུ་གནས་པའི་ཕྱིར། རྒྱུ་མཚན་དེའི་ཕྱིར་མཚོན་བྱེད་ལམ་རྐྱེན་ཡི་གེའི་རྒྱུད་སྒྲར་སྣང་ཞིང་སྒྲར་གྲགས་པའི་རྒྱུད་དང་། བརྡར་བཏགས་གླེགས་བམ་གྱི་རྣམ་པར་བཀོད་པ་འདི་ལའང་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞེས་བྱའོ། །གཉིས་པ་ཆེ་བ་ལས་མཚན་དུ་བཏགས་པ་ནི། ལུང་གི་སྤྱི་སྟེ། རྡོ་རྗེ་ལས། སོ་སོ་བསྟན་པ་རྒྱ་མཚོའ་རྒྱུད། །འདིར་སྟོན་འདིས་སྟོན་འདི་ཕྱིར་སྟོན། །དོན་ཀུན་འདི་ལ་ཡོངས་རྫོགས་པས། །ལུང་གི་སྤྱི་ཞེས་བཤད་པ་ཡིན། །ཞེས་པས་བསྟན་ཏེ། སྟོན་པ་ཡང་དག་པར་རྫོགས་པའི་སངས་རྒྱས་ཀྱིས་གདུལ་བྱ་སོ་སོའ་བློ་དང་འཚམས་པར་བསྟན་པའི་ཐེག་པའི་རྣམ་གྲངས་ནི་ཟབ་ཅིང་རྒྱ་ཆེ་བས་རྒྱ་མཚོའ་རྒྱུད་ཅེས་བྱ་སྟེ། དེ་ལྟ་བུའི་བསྟན་པ་དང་ཐེག་པ་ཐམས་ཅད་ཀྱི་དོན་འདིའི་ནང་དུ་སྟོན་པས་འདིར་སྟོན་ཞེས་བྱ་སྟེ། བཤད་རྒྱུད་རྒྱས་པ་ལས། མཉམ་ཉིད་དོན་རྟོགས་རང་རིག་རྒྱལ་པོ་ནི། །རྒྱ་མཚོ་ཆེན་པོར་ཆུ་ཀླུང་ཀུན་འབབ་ལྟར། །བླ་མེད་དོན་རྟོགས་ཐབས་ཆེན་འདི་དག་ཏུ། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་སོ། །བསྟན་པ་དང་ཐེག་པ་ཐམས་ཅད་རྒྱུད་འདིས་རྫོགས་པར་སྟོན་པས་འདིས་སྟོན་ཞེས་བྱ་སྟེ། ཇི་སྐད་དུ། འདུལ་བ་མདོ་སྡེ་ཆོས་མངོན་དང་། །ཞེས་པ་ནས། འབྱུང་གནས་གཏན་ལ་ངེས་པར་འབེབས། །ཞེས་སོ། །བསྟན་པ་དང་ཐེག་པ་ཐམས་ཅད་ཀྱང་འདི་ཉིད་རྟོགས་པའི་ཐབས་སུ་སྟོན་པས་འདི་ཕྱིར་སྟོན་ཞེས་བྱ་སྟེ། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་སོ། །རྒྱུ་མཚན་དེའི་ཕྱིར་ཐེག་པ་ཐམས་ཅད་ཀྱི་དོན་རྒྱུད་འདི་ལ་ཡོངས་སུ་རྫོགས་པས་ལུང་གི་སྤྱི་ཞེས་བཤད་ལ། དེ་ཡང་གསང་བ་སྤྱི་རྒྱུད་ལྟ་བུ་མིན་པར་བསྟན་པ་དང་ཐེག་པ་ཐམས་ཅད་ཀྱི་ལུང་གི་སྤྱི་ཡིན་ནོ་ཞེས་འཆད་པར་བྱེད་པ་ལ། མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི་ཞེས་པའི་གཞུང་འདི་བྱུང་བ་ཡིན་ ― MLP018_Page_0008 ―
[མ་དཔེ་གཟིགས་ན་འདིར་གནོན།]
ནོ། །གསུམ་པ་དོན་རང་གི་ངོ་བོ་ལས་བཏགས་པའི་མཚན་གླེགས་བམ་གྱི་ཀླད་དུ་བཀོད་དགོས་ཚུལ་ནི། འགྲེལ་ཆུང་ལས། སྔོན་དུ་འགྲོ་བའི་བདག་ཉིད་པས། །མིང་ཉིད་ཐོག་མར་སྨོས་པ་གཅེས། །ཞེས་པས་གླེགས་བམ་གྱི་ཀླད་དུ་བཀོད་པའི་མཚན་ཏེ། གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་པ་སྟེ། གསང་བ་ནི་གཞི་རྒྱུད་རྟོགས་དཀའ་བ། སྙིང་པོ་ནི་ལམ་གྱི་རྒྱུད་དེ་བསྟན་པ་ཐམས་ཅད་ཀྱི་བཅུད་འདུས་པ། དེ་ཁོ་ན་ཉིད་ནི་གཞི་མི་འགྱུར་བ་དང་ལམ་གྱིས་དེ་རྟོགས་པ་ལ་མི་བསླུ་བ། ངེས་པ་ནི་སྒྲོ་སྐུར་དང་བྲལ་བར་གཏན་ལ་ཕབ་པའི་དོན་ཏེ། རྒྱུད་ཕྱི་མ་ལས། གསང་བ་ཆོས་འབྱུང་ལ་བཤད་དེ། །སྙིང་པོའང་དེ་ཡི་ཐབས་ཅན་ནོ། །གཉིས་པོ་ཕྱིན་ཅི་མ་ལོག་ཕྱིར། །དེ་ཉིད་དོ་འདིར་རྣམ་ངེས་སོ། །ཞེས་སོ། །ཡང་ན། གཞི་རྒྱུད་དེ་བཞིན་ཉིད་དེ་རྟོགས་དཀའ་ཞིང་ཀུན་གྱི་སྙིང་པོར་བཞུགས་པས་གསང་བའི་སྙིང་པོ། ལམ་རྒྱུད་ནི་གཞི་རྟོགས་པ་དང་འབྲས་བུ་ཐོབ་པ་ལ་མི་བསླུ་བས་དེ་ཁོ་ན་ཉིད། འབྲས་བུའི་རྒྱུད་ནི་སྐུ་དང་ཡེ་ཤེས་ཀྱི་དཀྱིལ་འཁོར་དུ་ངེས་པའོ་ཞེས་བཤད་ཀྱང་རུང་སྟེ་རྡོ་རྗེའི་ཚིག་ཡིན་པའི་ཕྱིར། གཉིས་པ་དབང་པོ་འབྲིང་པོ་རྣམས་ལ་སྤྱིའི་དོན་རྣམ་པར་དབྱེ་བས་འཆད་པ་ལ་གཉིས་ཏེ། དོན་གྱི་རྣམ་གྲངས་རྣམ་པར་དབྱེ་བ་དང་། ཚིག་གི་རྣམ་གྲངས་རྣམ་པར་དབྱེ་བའོ། །དང་པོ་ལ་ལྔ་སྟེ། རྒྱུད་འབྱུང་བའི་རྒྱུ་གླེང་གཞི། རྐྱེན་གླེང་བསླང་བ། འབྲས་བུ་ཡོངས་སུ་ཤེས་པར་བྱ་བ་རྒྱུད་དོན། རྒྱུད་ཀྱི་དགོས་འབྲེལ། འཁོར་ལ་གདམས་ཤིང་བསྟན་པ་གཏད་པའོ། །དང་པོ་ལ་ངོ་བོ་ནི། རྒྱུད་ཕྱི་མ་འགོས་འགྱུར་ལས། སྟོན་པ་ལ་སོགས་རབ་དབྱེ་བས། །ཕུན་སུམ་ཚོགས་པ་ལྔར་བརྗོད་དོ། །ཞེས་པས་བསྟན། གླེང་གཞི་ཕུན་སུམ་ཚོགས་པ་དེ་ལ། སྟོན་པ་དང་ལ་སོགས་པས། འཁོར་དང་། གནས། ཆོས། དུས་ཕུན་སུམ་ཚོགས་པ་སྟེ་ལྔར་བརྗོད་ལ། དེ་ཡང་། གནས་གང་དུ། སྟོན་པ་གང་། འཁོར་གང་དང་ལྷན་ཅིག་ཚོགས་པ་དེའི་ཚེ་རྒྱུད་དོན་འབྱུང་བར་ངེས་པའི་ཕྱིར་ཕུན་སུམ་ཚོགས་པ་ལྔ་ལྡན་ནི་གླེང་གཞིའོ། ། ― MLP018_Page_0009 ―
[མ་དཔེ་གཟིགས་ན་འདིར་གནོན།]
ངེས་ཚིག་ནི། ཅིའི་ཕྱིར་གླེང་གཞི་ཞེས་བྱ་ཞེ་ན། ལེགས་སྦྱར་གྱི་སྐད་དུ། དཱ་ནའི་སྒྲ་ལས་དྲངས་ན་སྦྱིན་པ་ཞེས་པ་ལ་འཇུག་སྟེ། གང་ལ་ན་བཀའ་ཡིན་མིན་དུ་རྟོག་པའི་ཐེ་ཚོམ་ཅན་དག་ལ་སྦྱིན། ཇི་ལྟར་ན། ཕུན་སུམ་ཚོགས་པ་ལྔའི་ལོ་རྒྱུས་བརྗོད་པས་སོ། །གང་སྦྱིན་ན། ཡིད་ཆེས་ཀྱི་ངེས་པ་སྦྱིན་ནོ། །འོན་ཀྱང་བོད་སྐད་དུ་སྦྱིན་པ་ཞེས་བསྒྱུར་ན་དངོས་པོ་སྦྱིན་པ་ལྟ་བུ་ཕྱོགས་གཅིག་ཏུ་ཆད་འགྲོ་བས་བོད་ཀྱི་བརྡ་དང་སྦྱར་ཏེ་ལོ་ཙཱ་བ་རྣམས་ཀྱིས་གླེང་གཞི་ཞེས་བསྒྱུར་བའི་དབང་དུ་ན། གང་གླེང་བར་བྱ་བ་རྒྱུད་ཀྱི་དོན་འབྱུང་བའི་རྒྱུའམ་གཞིར་གྱུར་པའི་ཕྱིར་རོ། །དབྱེ་ན་ཐུན་མོང་མིན་པའི་གླེང་གཞི་དང་། ཐུན་མོང་གི་གླེང་གཞི་གཉིས། དང་པོ་ལ། ནང་ལྟར་ཐབས་ལམ་སྟེང་སྒོ་དང་སྦྱར་ཏེ་བཤད་རྒྱུད་རྒྱ་མཚོས་བཤད་པ་དང་། གསང་བ་ལྟར་འོག་སྒོ་དང་སྦྱར་ཏེ་བཤད་རྒྱུད་ཐལ་བས་བཤད་པའོ། །དང་པོ་ནི། ཇི་སྐད་དུ། དྷརྨ་ཙཀྲ་ཆོས་ཀྱི་གནས། །འོད་བཞི་ཨེ་སོགས་དབྱིབས་སུ་གནས། །མི་ཤིགས་ཐིག་ལེ་ཝཾ་དབྱིབས་ཅན། །རང་ལ་བདེ་བ་གསལ་བྱེད་དག །མ་ནུ་ཡིད་སོགས་རྣམ་ཤེས་བཞི། །ཡེ་ཤེས་མྱོང་བས་བསྡུས་པར་བཤད། །ཡེ་ཤེས་ནམ་མཁའི་གཟུགས་སྐྱེས་པ། །པ་ར་མཱརྠ་དོན་ཟབ་མོ། །བདེ་བའི་དུས་ཉིད་སྔ་ཕྱི་བྲལ། །དུས་གསུམ་ཀུན་གྱི་ངོ་བོར་གནས། །ཞེས་པས། གནས་ཕུན་སུམ་ཚོགས་པ་སྙིང་ག་ཆོས་ཀྱི་འཁོར་ལོ། སྟོན་པ་ཕུན་སུམ་ཚོགས་པ་སྲོག་མི་ཤིགས་པའི་ཐིག་ལེ། འཁོར་ཕུན་སུམ་ཚོགས་པ་རྣམ་ཤེས་ཚོགས་བརྒྱད། ཆོས་ཕུན་སུམ་ཚོགས་པ་དོན་དམ་འོད་གསལ་ནམ་མཁའི་གཟུགས་ཅན། དུས་ཕུན་སུམ་ཚོགས་པ་དུས་གསུམ་མཉམ་ཉིད་དོ། །གཉིས་པ་ནི། ཇི་སྐད་དུ། འདི་ཞེས་ཉེ་བར་མཚོན་པ་ནི། །ཨེ་སོགས་རྣམ་བཞིའི་དབྱིབས་ཅན་གནས། །སྐད་ཅེས་གསལ་བྱེད་ལས་མིང་ཅན། །ཝཾ་དབྱིབས་ཐིག་ལེར་བཅས་སྟོན་པའོ། །མ་དཱ་མ་ནུ་སྡོམ་བྱེད་ཡིད། །ལུས་ཅན་རྣམ་ཤེས་དེ་དག་ལ། །གསལ་བར་གོ་བས་བཤད་པར་འདོད། །པ་སྒྲ་དོན་དམ་ངེས་པའི་རྒྱུད། །ཡ་ན་ཐེག་ཆེན་འདི་ཡིན་ནོ། །དུས་ནི་བསམ་གྱིས་མི་ཁྱབ་དུས། །ནཱ་མ་དེ་མིང་ཞེས་བྱའོ། །ཞེས་པས། གནས་ཕུན་སུམ་ཚོགས་པ་ཡུམ་གྱི་མཁའ་གསང་། སྟོན་པ་ཕུན་སུམ་ཚོགས་པ་ཡབ་ ― MLP018_Page_0010 ―
[མ་དཔེ་གཟིགས་ན་འདིར་གནོན།]
ཀྱི་རྡོ་རྗེ་ཀུན་རྫོབ་བྱང་ཆུབ་ཀྱི་སེམས་དང་བཅས་པ། འཁོར་ཕུན་སུམ་ཚོགས་པ་བྱེད་པ་སྡོམ་པའི་ཐབས་དང་བཅས་པའི་གསང་བའི་རྣམ་ཤེས། ཆོས་ཕུན་སུམ་ཚོགས་པ་རང་བཞིན་ལྷན་ཅིག་སྐྱེས་པའི་ཡེ་ཤེས། དུས་ཕུན་སུམ་ཚོགས་པ་བསམ་གྱིས་མི་ཁྱབ་པའི་དུས་སོ། །འདི་དག་གླེང་གཞིར་འགྱུར་བའི་འཐད་པ་ནི། རྒྱུན་མཐའི་ས་ལ་བཞུགས་པའི་ལྷན་ཅིག་པའི་འཁོར་རྣམས་ལ་སྟོན་པས་འབྲས་དུས་ཀྱི་དབང་བསྐུར་བས་ནང་གི་མངོན་བྱང་ལྔ་ལ་བརྟེན་ནས་ཡང་དག་པའི་མཐའ་མངོན་དུ་མཛད་དེ་སྟོན་འཁོར་དགོངས་པ་དབྱེར་མེད་དུ་གྱུར་པའི་དུས་དེར་སྙིང་ག་དང་གསང་བའི་འོག་མིན་དུ་མངོན་པར་རྫོགས་པར་འཚང་རྒྱ་བའི་རྒྱུ་མཚན་གྱིས་ནང་གསང་གཉིས་གླེང་གཞི་དང་འབྲེལ་བ་ཡིན་ལ། དེའི་ཕྱིར་ཐུན་མོང་མིན་པའི་གླེང་གཞི་ཞེས་ཀྱང་བྱའོ། །གཉིས་པ་ཐུན་མོང་གི་གླེང་གཞི་ལ་གསུམ་ལས། དང་པོ་ལོངས་སྐུའི་གླེང་གཞིའམ་རྒྱུད་འབྱུང་བ་ཁྱད་པར་ཅན་གྱི་གླེང་གཞི་ལ། ཆོས་ཕུན་སུམ་ཚོགས་པ་ནི། འདི་སྐད་བཤད་པ་ཞེས་པས་བསྟན་ཏེ། འདི་སྐད་ཅེས་པ་ཚིག་འཕྲད་དེ་རྒྱུད་དོན་རྫོགས་པར་འཆར་པའི་དོན་ནོ། །དུས་ཕུན་སུམ་ཚོགས་པ་ནི། དུས་ན་ཞེས་པ་རྟག་པ་རྒྱུན་གྱི་འཁོར་ལོའོ། །སྟོན་པ་ཕུན་སུམ་ཚོགས་པ་ལ། སྟོན་པའི་རང་བཞིན་དང་། ངོ་བོ་གཉིས། དང་པོ་ནི། དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ལོངས་སྤྱོད་ཆེན་པོ་ཞེས་སོགས་ཀྱིས་བསྟན་ཏེ། སྤྱིར་སྟོན་པའི་རང་བཞིན་བདུན་དུ་འདུ་ཞིང་། དེ་ཡང་རིགས་བསྡུ་ན་བཞིར་འདུ་སྟེ། འགྲེལ་ཆུང་ལས། བྱང་ཆུབ་མཆོག་གི་ངོ་བོ་དང་། །ཆོས་རྣམས་རོལ་པར་ལོངས་སྤྱོད་དང་། །ཕྱོགས་དུས་བདེ་གཤེགས་བདག་པོ་དང་། །ཆོས་སོ་ཅོག་དང་དབྱེར་མེད་པའོ། །ཞེས་སོ། །གཉིས་པ་ནི། སྐུ་མདུན་དང་རྒྱབ་མེད་པ་ཐམས་ཅད་དུ་ཞེས་སོགས་ཀྱིས་བསྟན་ཏོ། །གནས་ཕུན་སུམ་ཚོགས་པ་ལ། གནས་ཀྱི་རང་བཞིན་དང་། ངོ་བོ་གཉིས། དང་པོ་ནི། འོག་མིན་གྱི་གནས་མཐའ་དང་དབུས་མེད་པ་ན། ཞེས་པས་བསྟན། དེ་ལ་སྤྱིར་འོག་མིན་ལ། ཆོས་དབྱིངས་དོན་གྱི་འོག་མིན་དང་། རིག་པའི་འོག་མིན་དང་། གསང་བའི་འོག་མིན་དང་། གཙང་རིས་ཀྱི་ལྷ་ལྔའི་ནང་ཚན་འཇིག་ ― MLP018_Page_0011 ―
[མ་དཔེ་གཟིགས་ན་འདིར་གནོན།]
རྟེན་གནས་ཀྱི་འོག་མིན་རྣམས་ལས། འདིར་ནི་འོག་མིན་ཆེན་པོ་བྱ་བ་ལོངས་སྤྱོད་རྫོགས་སྐུའི་ཞིང་ཁམས་ཏེ། རྡོ་རྗེ་ལས། གཙང་མའི་རིས་དག་རྣམ་སྤངས་པའི། །འོག་མིན་ཆེན་པོའི་གནས་མཆོག་ན། །ཞེས་དང་། རྒྱ་མཚོ་ལས། འཇིག་རྟེན་གནས་ཀྱི་འོག་མིན་ལས། །ཉིས་འགྱུར་ཤིན་ཏུ་སྤགས་པ་ན། །ངོ་བོ་མཐའ་གསུམ་ལས་འདས་པ། །མ་སྤངས་རྒྱན་རྫོགས་གཞལ་ཡས་ཁང་། །ཞེས་སོ། །གཉིས་པ་ནི། གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལ་ཞེས་པས་བསྟན་ཏེ། དེ་དག་གི་དོན་བསྡུ་ན། འགྲེལ་ཆུང་ལས། གཞལ་ཡས་གཞི་དང་རྒྱུ་དང་རྒྱ། །དབྱིབས་དང་གློ་འབུར་རྩེ་མོ་དང་། །རྒྱན་དང་སྒོ་ཁྱུད་རྟ་བབས་དང་། །མཚན་ཉིད་གདན་གྱི་རྣམ་པ་སྟེ། །ཞེས་པ་ལྟར་རོ། །འཁོར་ཕུན་སུམ་ཚོགས་པ་ལ། རང་བཞིན་གཉིས་སུ་མེད་པའི་འཁོར་དང་། རིག་པ་ཁྱད་པར་ཅན་གྱི་འཁོར་གཉིས། དང་པོ་ནི། རིགས་ལྔ་ཡབ་ཡུམ་སྟེ། བཅོམ་ལྡན་འདས་དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་དང་། ཞེས་སོགས་ཀྱིས་བསྟན། གཉིས་པ་ལ། རྒྱལ་སྲས་སེམས་དཔའི་འཁོར་དང་། འཇོམས་བྱེད་ཁྲོ་བོའ་འཁོར་གཉིས། དང་པོ་ནི། དེ་ནས་བྱང་ཆུབ་ཆེན་པོ་རྡོ་རྗེ་མཐོང་བ་དང་། སོགས་ཀྱིས་ནང་སེམས་ཡབ་ཡུམ་དང་། བྱང་ཆུབ་ཆེན་པོ་རྡོ་རྗེ་མཐོང་བྱེད་དང་། སོགས་ཀྱིས་ཕྱི་སེམས་ཡབ་ཡུམ་བསྟན། གཉིས་པ་ནི། འཇོམས་པ་ཆེན་པོ་རྡོ་རྗེ་རེག་པ་དང་སོགས་ཀྱིས་བསྟན། གཞན་ཡང་རྒྱུད་མས་སྦྱངས་ཀྱི་ཚོགས་དཔག་ཏུ་མེད་པ་དང་ལྷན་ཅིག་བཞུགས་སོ་ཞེས་སྟོན་པ་ལ། དེ་ལྟ་བུའི་ཚོགས་བརྗོད་ཀྱིས་མི་ལང་བ་དང་གཉིས་སུ་མེད་པར་བཞུགས་སོ། །ཞེས་པས་བསྟན་ཏོ། །ཞར་བྱུང་དོགས་པ་བསལ་བ་ནི། ལེའུ་དང་པོ་ནས་བཤད་པའི་ལོངས་སྐུའི་གླེང་གཞི་འདི་ཉིད་སངས་རྒྱས་རང་སྣང་དང་གདུལ་བྱ་གཞན་སྣང་གང་ཡིན་ཞེ་ན། འོག་མིན་གྱི་གནས་མཐའ་དང་དབུས་མེད་པ་ན་ཞེས་སོགས་གཞུང་དངོས་བསྟན་ལྟར་ཡིན་ལུགས་ནས་རང་སྣང་གི་གླེང་གཞི་ཡིན་མོད། འོན་ཀྱང་གདུལ་བྱ་ལ་ལྟོས་ནས་གཞན་སྣང་གི་གླེང་གཞི་ཡིན་པའང་མི་འགལ་ཏེ། གླེང་བསླང་གི་དུས་སུ་རྒྱུན་མཐའི་བྱང་སེམས་ལ་འབྲས་དབང་བསྐུར་ནས་གནས་དེར་འཚང་རྒྱ་བར་བསྟན་པས་རྒྱུན་ ― MLP018_Page_0012 ―
[མ་དཔེ་གཟིགས་ན་འདིར་གནོན།]
མཐའི་སེམས་དཔའ་དེ་དག་སྟོན་འཁོར་དགོངས་པ་དབྱེར་མེད་དུ་མ་གྱུར་གོང་དུ་གདུལ་བྱ་དེའི་བློ་ངོར་གཞན་སྣང་གི་གླེང་གཞིར་སྣང་བ་ཡང་ཡོད་པའི་ཕྱིར་ཏེ། རྒྱ་མཚོ་ལས། དང་པོ་སངས་རྒྱས་ས་རྒྱལ་བ། །སེམས་དཔའ་ཆེ་དང་འཇོམས་པ་ཆེ། །བརྗོད་ཀྱིས་མི་ལང་ཚད་མེད་དང་། །རྣམ་གཉིས་ཚུལ་དུ་བཞུགས་པའོ། །ཞེས་གསུངས་པས་སོ། །གཉིས་པ་ཞར་བྱུང་གདུལ་བྱ་དགོས་ཆེད་དུ་བསྟན་པ་ཁྲོ་བོའ་གླེང་གཞི་ལ། གནས་ཕུན་སུམ་ཚོགས་པ་ནི། བཟོད་པར་དཀའ་བའི་དུར་ཁྲོད་ཆེན་པོ་སྟེ། དུར་ཁྲོད་ཆེན་པོར་དགྱེས་ནས་སོགས་ཀྱིས་བསྟན། སྟོན་པ་ཕུན་སུམ་ཚོགས་པ་ནི། བཅོམ་ལྡན་འདས་དགྱེས་པ་ཆེན་པོ་དཔལ་ཧེ་རུ་ཀ་སྟེ། དེ་ནས་དེ་བཞིན་གཤེགས་པ་ཐམས་ཅད་ཀྱི་སོགས་ཀྱིས་བསྟན། འཁོར་ཕུན་སུམ་ཚོགས་པ་ལ། གདུལ་བྱ་གདུག་པ་ཅན་གྱི་འཁོར་དང་། འདུལ་བྱེད་གཉེན་པོའི་འཁོར་གཉིས། དང་པོ་ནི། རུ་ཏྲ་འཁོར་དང་བཅས་པ་སྟེ། དེ་ལ་རུ་ཏྲར་གོལ་ཚུལ་དང་། གོལ་བའི་འབྲས་བུ་སྨིན་ཚུལ་ལོ། །དང་པོ་ནི། དེ་ཅིའི་ཕྱིར་ཞེ་ན། བདག་ཏུ་རྨོངས་པའི་རྟོག་པ་དང་སོགས་ཀྱིས་མ་རིག་པའི་རྒྱུས་སེམས་ཅན་ཐམས་ཅད་སྤྱིར་འཁྲུལ་ཚུལ་བསྟན་ནས། བྱེ་བྲག་ཏུ་རུ་ཏྲ་རང་གི་གོལ་ཚུལ་ནི། གབ་པའི་གསང་བ་མ་རྟོགས་པར་སྦས་པའི་གསང་བ་ལ་མངོན་པར་འཆེལ་ནས། ཞེས་པས་བསྟན་ཏེ། སྔོན་བསྐལ་པ་ཀུན་བཀོད་ཀྱི་དུས་སུ་བྱུང་བའི་དགེ་སློང་ཐར་པ་ནག་པོ་ལྟ་བུ་སྟེ། གོལ་གཞི་ཐུབ་དཀའ་གཞོན་ནུས། ཇི་བཞིན་ཉིད་དེ་མ་བཅོས་ན། །དངོས་པོ་བཞི་ལ་གནས་སྤྱད་ཀྱང་། །ནམ་མཁའ་ལ་ནི་སྤྲིན་བཞིན་ཏེ། །འདི་ནི་རྣལ་འབྱོར་དམ་པའི་ལམ། །ཞེས་གསུངས་པ་ལ་སྒྲ་ཇི་བཞིན་པར་སྤྱད་པས་གོལ་བ་བཞིན་ནོ། །གཉིས་པ་ནི། སྲིད་པའི་ས་བོན་རྩུབ་མོས་འཕངས་ནས་སོགས་ཀྱིས་རྣམ་སྨིན་གྱི་འབྲས་བུ་དམྱལ་བ་དང་ཡི་དྭགས་སུ་སྐྱེས་ཚུལ་དང་། དེ་ནས་ལས་ཀྱི་སྒྲིབ་པ་རྩུབ་མོའི་རྣམ་པར་སྨིན་པ་དེ་སོགས་ཀྱིས་རྒྱུ་མཐུན་གྱི་འབྲས་བུ་རུ་ཏྲར་སྐྱེས་ཚུལ་དངོས་བསྟན་ནོ། །གཉིས་པ་འདུལ་བྱེད་གཉེན་པོའི་འཁོར་ནི། ལ་ལ་ནི་དཔལ་ཁྲག་འཐུང་ཆེན་པོར་གྱུར་ཏེ་སོགས་ཀྱིས་རིགས་བཞི་ཡབ་ཡུམ། དཀར་མོའ་ཚོགས་དང་སོགས་ཀྱིས་གནས་ ― MLP018_Page_0013 ―
[མ་དཔེ་གཟིགས་ན་འདིར་གནོན།]
མ་བརྒྱད། སེང་གདོང་ཆེན་མོའ་ཚོགས་དང་སོགས་ཀྱིས་ཡུལ་མ་བརྒྱད། རྡོ་རྗེ་སྲིང་འགྲོ་མའི་ཚོགས་དང་སོགས་ཀྱིས་གདོང་མོ་བཞི། སྲིན་མོ་ཆེན་མོ་མིའི་སྲིན་མོ་དང་སོགས་ཀྱིས་དབང་མོ་ཉེར་བརྒྱད་རྣམས་བསྟན་ཏོ། །སྐབས་འདིར་སྤྱིར་དབང་མོ་རྣམས་གདུལ་བྱའི་འཁོར་ཡིན་ཡང་ངོ་མཚར་ཚོགས་ཀྱི་སྲས་མོ་རྣམས་སྐྱེད་པའི་ཡུམ་ཡིན་པས་འདུལ་བྱེད་དུ་བསྡུས་སོ། །ཆོས་ཕུན་སུམ་ཚོགས་པ་ནི། ཐབས་ལམ་སྦྱོར་སྒྲོལ་གྱི་ཐབས་རྨད་དུ་བྱུང་བ་སྟེ། དེ་ལ་དབྱེ་ན། ཕོ་རྒྱུད་སྒྲོལ་བས་འདུལ་བ། མོ་རྒྱུད་སྦྱོར་བས་འདུལ་བ། དེ་ལྟར་བཏུལ་བའི་འབྲས་བུ་དང་གསུམ་གྱིས་བསྟན་ཏེ། དེ་ནས་དེ་བཞིན་གཤེགས་པ་ཆེ་བའི་རྡོ་རྗེ་བཀོད་པའི་སྒྱུ་འཕྲུལ་དྲྭ་བ་ལས། ཞེས་པ་ནས། མིང་གི་དབང་བསྐུར་ཏེ་དཀྱིལ་འཁོར་གྱི་ཕྱི་རོལ་དུ་བཀོད་དོ། །ཞེས་པའི་བར་གྱིས་བསྟན་ཏོ། །དུས་ཕུན་སུམ་ཚོགས་པ་ནི། དེའི་དུས་སུ་འཇིག་རྟེན་དྲུག་གི་ཕྱོགས་བཅུའི་སྲིད་པ་ཀུན་ཏུ་སོགས་ཀྱིས་བསྟན་ཏོ། །དོགས་སེལ་ནི། ཁྲོ་བོའ་གླེང་གཞི་འདི་ལ་ཞར་བྱུང་ཞེས་བརྗོད་པའི་རྒྱུ་མཚན། རྒྱུན་མཐའི་སེམས་དཔའ་རྣམས་ལ་སྟོན་པས་འབྲས་དབང་བསྐུར་བའི་དུས་དེར་ནང་དུ་སྣང་གསུམ་གྱི་སྒྲིབ་པ་བཅོམ་པའི་བརྡར་ཕྱི་རོལ་དུ་རུ་ཏྲ་འཁོར་དང་བཅས་པའི་སྣང་ངོར་ཁྲོ་བོའ་གླེང་གཞིར་སྣང་བའི་ཕྱིར་དེ་སྐད་ཅེས་སྨོས་ལ། གདུལ་བྱ་དགོས་ཆེད་དུ་བསྟན་པའི་དོན། སྔོན་བྱུང་དུ་གདུལ་བྱ་གདུག་པ་ཅན་འདུལ་བ་དང་། མ་འོངས་པའི་གདུལ་བྱ་དབང་རྣོན་བརྟུལ་ཞུགས་ཅན་རྣམས་གསང་སྔགས་ཀྱི་ཉེ་ལམ་སྦྱོར་སྒྲོལ་གྱི་ཐབས་ཁྱད་པར་ཅན་ལ་བཀྲི་བའི་ཆེད་ཡིན་ཞིང་། ཁྱད་པར་རྫོགས་རིམ་གྱི་དུས་སུ་སྐྱོན་ཅན་གྱི་རྩ་དང་ལས་ཀྱི་རླུང་ཐིག་གི་རྒྱུ་བ་བཅོམ་ནས་ཡེ་ཤེས་ཀྱི་རྩ་རླུང་ཐིག་ལེར་སྦྱོར་བའི་གནད་ཁྱད་པར་ཅན་སྟོན་པའི་ཕྱིར་རོ། །གསུམ་པ་སྤྲུལ་སྐུ་འགྲོ་བ་འདུལ་བའི་གླེང་གཞིའམ། བསྟན་པ་སྤྱིའི་གླེང་གཞིར་གྲགས་པ་ལ། གནས་ཕུན་སུམ་ཚོགས་པ་ནི། སྤྱིར་གཙོ་ཆེ་བའི་དབང་དུ་བྱས་ནས། ཕྱོགས་བཞི་སྟེང་འོག་དང་བཅས་པའི་འཇིག་རྟེན་དྲུག་གམ། ཡང་ན་ཡས་ཀྱི་འཇིག་རྟེན་ལྷ་མི། འཕྲེད་བསྟན་གྱི་འགྲོ་བ་དུད་འགྲོ་སྟེ་སྣྲེལ་ཞི། མས་ཀྱི་འཇིག་རྟེན་ཡི་དྭགས་དང་དམྱལ་བའོ། ། ― MLP018_Page_0014 ―
[མ་དཔེ་གཟིགས་ན་འདིར་གནོན།]
མདོར་ན་དེ་དག་གིས་བསྡུས་པའི་སྟོང་གསུམ་གྱི་སྟོང་ཆེན་པོ་གཅིག་སྟེ། སྣྲེལ་ཞི་དང་ཡས་མན་གྱི་འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པའི་སྟོ ང་གསུམ་གྱི་སྟོང་ཆེན་པོ་རེར། ཞེས་པས་བསྟན་ཏོ། །སྟོན་པ་ཕུན་སུམ་ཚོགས་པ་ནི། འཇིག་རྟེན་གྱི་ཁམས་སྟོང་གསུམ་གྱི་སྟོང་ཆེན་པོ་རེ་རེར་མཆོག་གི་སྤྲུལ་སྐུ་རེ་རེས་དོན་མཛད་ཅིང་། དེ་ཡང་འཇིག་རྟེན་དྲུག་གམ། གདུལ་བྱ་རིགས་དྲུག་ལ་ལྟོས་ནས་ཐུབ་པ་དྲུག་སྟེ། རིག་པའི་སྐྱེས་བུ་ཐུབ་པ་དྲུག ཅེས་དང་། ཐུབ་པ་ཆེན་པོ་བཅོམ་ལྡན་འདས་རེ་རེས་ཞེས་པས་བསྟན། འཁོར་ཕུན་སུམ་ཚོགས་པ་ནི། འགྲོ་བ་ལྔའི་དོན་མཛད་དེ། ཞེས་པས། ལྷ་མི་སོགས་ཐེག་པ་ལྔའི་རིས་ཅན་གྱི་གདུལ་བྱ་ལྔའམ། འགྲོ་འདུལ་ཐུབ་པ་དྲུག་ལ་ལྟོས་ནས་ལྷ་མིན་སྟོད་རིས་ལྷ་དང་སྨད་རིས་དུད་འགྲོར་བསྡུས་པའི་རྒྱུད་ལྔའོ། །ཆོས་ཕུན་སུམ་ཚོགས་པ་ནི། འདུལ་བ་རྣམ་པ་བཞིས། ཞེས་པས། སྐུ་བསོད་ནམས་ཆེན་པོས་འདུལ་བ། ཐུགས་མངོན་སུམ་པས། རྫུ་འཕྲུལ་བསམ་གྱིས་མི་ཁྱབ་པས། གསུང་རིག་པས་འདུལ་བ་དང་བཞི། གསུང་རིག་པས་འདུལ་བ་དེ་ལ། ཐེག་པ་ལྔར་ཕྱེ་བས་མདོར་བསྟན། ཆོས་ཕུང་བརྒྱད་ཁྲི་བཞི་སྟོང་དུ་དབྱེ་བས་རྒྱས་པར་བཤད། དེ་ཡང་དབང་པོའི་བྱེ་བྲག་གིས་ལྔར་བསྡུ་བ་དང་གསུམ་གྱིས་བསྟན་ཏེ། བལྟམས་པ་དང་། ཞེས་པ་ནས། གོས་སུ་མེད་པར་སྟོན་པའི་ཐར་ཐུག་གོ །ཞེས་པའི་བར་གྱིས་བསྟན་ཏོ། །དུས་ཕུན་སུམ་ཚོགས་པ་ནི། སྒྲོན་མ་བཀོད་པའི་དུས་ཞེས་བྱ་བ་སངས་རྒྱས་མཆོག་གི་སྤྲུལ་སྐུ་འཇིག་རྟེན་དུ་བྱོན་པའི་དུས་ཏེ། ཤིན་ཏུ་དཀོན་པའི་དུས་ནའོ། །ཞེས་གསུངས་པའི་ཕྱིར་རོ། །དོགས་སྤོང་ནི། སྔར་བཤད་ལེའུ་བཅོ་ལྔ་པ་ཁྲོ་བོའ་གླེང་གཞིར་མ་ཟད། ལེའུ་གསུམ་པའི་གླེང་གཞི་འདི་ཡང་ལེའུ་དང་པོའི་གླེང་གཞིའི་ཞར་བྱུང་དུ་འགྲོ་སྟེ། ལོངས་སྐུ་དངོས་ཀྱི་གདུལ་ཞིང་དུ་མ་གྱུར་པའི་གོ་ཕྱེ་བའི་འཁོར་རྣམས་ལ་འདིའི་ལམ་སྟེགས་ཀྱི་ཐེག་པ་སྤྱི་དང་ཁྱད་པར་རྒྱུད་འདི་སོགས་རང་རང་གི་དབང་པོ་དང་འཚམས་པར་ཆོས་སྟོན་པའི་ཕྱིར། སྟོན་པ་ལོངས་སྐུ་ལས་མ་གཡོས་བཞིན་དུ་གང་འདུལ་གྱི་སྤྲུལ་སྐུར་སྣང་ནས་དོན་མཛད་དེ། ལེའུ་དང་པོར། བསམ་གྱིས་མི་ཁྱབ་པ་ཐམས་ཅད་དུ་སྐུ་གསུང་ཐུགས་སྣ་ཚོགས་པ་ཀུན་ཏུ་སྣང་ ― MLP018_Page_0015 ―
[མ་དཔེ་གཟིགས་ན་འདིར་གནོན།]
བ། ཞེས་དང་། ལེའུ་གཉིས་པར། བསྟན་ཕྱིར་སྤྲོ་བ་སྣ་ཚོགས་མཛད། །ཅེས་པ་ལས་འཕྲོས་པས་སོ། །གཉིས་པ་རྐྱེན་གླེང་བསླང་བ་ལ། ངོ་བོ། ངེས་ཚིག དབྱེ་བ་དང་གསུམ་གྱི། ངོ་བོ་ནི། ཐུགས་ཐིག་ལས། སྟོན་པས་གནང་དང་འཁོར་གྱིས་ཞུས། །སྐབས་ལས་གླེང་བསླང་སྟོན་དང་འཁོར། །གནང་འདྲིའི་རྐྱེན་དུ་གང་གྱུར་པ། །དེ་དེས་གསུང་ལ་མ་རེག་པ། །ཞེས་པས་སྟོན་འཁོར་དྲི་ལན་གྱི་སྦྱོར་བས་རྒྱུད་དོན་གདུལ་བྱའི་བློ་དང་འཚམས་པར་འབྱུང་མ་རག་པ་སྟེ། དེ་ཡང་འཇམ་དཔལ་མཚན་བརྗོད་ལྟ་བུ་འཁོར་གྱིས་ཞུས་པ་དང་། མདོ་སྡུད་པ་ལྟ་བུ་སྟོན་པས་མདུན་བསུས་པ་སྟེ། གླེང་བསླང་ཚུལ་གཉིས་སོ། །ངེས་ཚིག་ནི་ཅིའི་ཕྱིར་གླེང་བསླང་ཞེས་བྱ་ཞེ་ན། གང་གླེང་བར་བྱ་བ་ནི་རྒྱུད་དོན་ཡིན་ལ། དེ་ཉིད་གླེང་བར་བསྐུལ་བ་ནི་བསླང་བ་སྟེ། བསྟན་པ་འབྱུང་བའི་རྐྱེན་བྱེད་པའི་ཕྱིར་རོ། །དབྱེ་ན་ཐུན་མོང་མིན་པའི་དང་། ཐུན་མོང་གི་གླེང་བསླང་གཉིས་ལས། དང་པོ་ལ། ལྷན་ཅིག་པའི་འཁོར་ལ་གསང་དབང་བསྐུར་བ་དང་། དབང་གོང་མ་གཉིས་ལྷན་ཅིག་ཏུ་བསྐུར་བའོ། །དང་པོ་ནི། དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་ཡིད་ཀུན་ཏུ་བཟང་པོ། ཞེས་སོགས་ཀྱིས་ཐབས་ཤེས་ལ་སྦྱོར་ཚུལ་དང་། དེ་ནས་བཙུན་མོ་བྱ་བ་མོ་ཆོས་ཀུན་ཏུ་བཟང་མོས། ཞེས་སོགས་ཀྱི་ཤེས་རབ་ཐབས་སུ་རོལ་ཚུལ་བསྟན། དེ་ལྟར་སྟོན་པ་ཡབ་ཡུམ་གཉིས་སུ་མེད་པར་མཉམ་པར་སྦྱར་བ་ལས། རྒྱུ་ཡབ་ཡུམ་གྱི་བྱང་ཆུབ་ཀྱི་སེམས་དང་རྐྱེན་དེའི་ཚེ། ཨེ་མའོ། །རྡོ་རྗེ་ཕུང་པོ་ཡན་ལག་ནི། ཞེས་སོགས་ཡབ་ཀྱིས་ཐབས་ཀྱི་ཆ་བཟུང་ནས་རྟོག་ཚོགས་ཐམས་ཅད་ཕྱག་རྒྱའི་དཀྱིལ་འཁོར་དུ་དག་ཚུལ་གྱིས་གླེང་བསླང་བས་འཁོར་རྣམས་ཀྱི་རྒྱུད་ལ་ལྷག་པ་ཀུན་རྫོབ་ཀྱི་བདེན་པ་རྟོགས་པར་བྱས། ཀྱེ་མའོ། །ཕྱོགས་བཅུ་སྟོང་ཁམས་ཡེ་ནས་དབེན། །ཞེས་སོགས་ཡུམ་གྱིས་ཤེས་རབ་ཀྱི་ཆ་བཟུང་ནས་དངོས་པོ་བཞིས་བསྡུས་པའི་ཆོས་ཐམས་ཅད་ཆོས་ཉིད་སྐྱེ་བ་མེད་པའི་ངོ་བོར་སངས་རྒྱས་པའོ་ཞེས་གླེང་བསླང་བས་འཁོར་རྣམས་ཀྱི་རྒྱུད་ལ་དོན་དམ་རྟོག་མེད་ཀྱི་ཡེ་ཤེས་མངོན་དུ་བྱས་མོད། འོན་ཀྱང་སྟོན་འཁོར་དགོངས་ ― MLP018_Page_0016 ―
[མ་དཔེ་གཟིགས་ན་འདིར་གནོན།]
པ་དབྱེར་མེད་ཀྱི་ཡེ་ཤེས་ཆེན་པོ་ད་དུང་མ་མྱོང་བའི་ཕྱིར་སྤྱོད་ཡུལ་མིན་པས་གསང་བའི་དབང་ཞེས་བྱའོ། །གཉིས་པ་ལ་དབང་གཉིས་ཀྱི་སྔོན་འགྲོ་ཐུན་མོང་བ་ནི། ཨེ་མའོ་ངོ་མཚར་རྨད་ཀྱི་ཆོས། །ཞེས་སོགས་མཚར་དང་པོ་བཞིས་བསྟན་ཏེ། དེ་ལ་འཁོར་གྱི་རྒྱུན་མཐའི་སེམས་དཔའ་རྣམས་རང་སྣང་ཡེ་ཤེས་ཀྱི་ཕྱག་རྒྱ་དང་སྙོམས་པར་ཞུགས་པའི་ཐབས་ཀྱིས་རྩ་གནས་ནས་ཐིག་ལེ་གཡོས་ཏེ་བདེ་བ་མགོ་ལྡང་བའི་ཚུལ་དུ་སྐྱེས་པ་གཡོ་ལྡང་བྱང་ཆུབ་ཀྱི་སེམས། བདེ་བ་ཕྱི་མ་འཇུག་པའི་ཚེ་སྔ་མ་འཇིག་ཅིང་མཐར་ཐམས་ཅད་འགག་པ་འབྱིན་འཇིགའཇུག་བྱང་ཆུབ་ཀྱི་སེམས། རྟེན་ཅན་གྱི་བདེ་བ་རང་ས་ན་གནས་པའི་ཚུལ་གྱིས་ཐམས་ཅད་གནས་པ་གནས་པ་བྱང་ཆུབ་ཀྱི་སེམས། སྔ་མའི་བདེ་བས་མཚོན་ནས་ཕྱི་མའི་བདེ་བ་ལ་དམིགས་ཤིང་འདུན་པ་སྨོན་པ་བྱང་ཆུབ་ཀྱི་སེམས་ཏེ། དེ་དག་ནི་དབང་གཉིས་ཀྱི་སྔོན་འགྲོའོ། །དངོས་གཞི་ནི། ཨེ་མའོ་སོགས་མཚར་ལྔའི་ཐ་མས་བསྟན་ཏེ། ཉི་ཟླ་བྱང་ཆུབ་ཀྱི་སེམས་ཡས་བབས་འགྲོ་བའི་སྦྱོར་བས་རྡོ་རྗེ་དང་པདྨའི་སྣ་རྩེར་ཞལ་མཇལ་བ་ལས་ཐབས་ཤེས་རབ་ཏུ་སྦྱོར་བ། ཤེས་རབ་ཐབས་སུ་སྦྱོར་བ། ཐབས་ཤེས་གཉིས་མེད་དུ་སྦྱོར་བ་གསུམ་གྱི་སྒོ་ནས་དངོས་པོ་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་སྟེ་ཤེས་རབ་ཡེ་ཤེས་ཀྱི་དབང་ཐོབ་ནས་དོན་དམ་འོད་གསལ་གྱི་ཡེ་ཤེས་རྒྱུད་ལ་སྐྱེས་པའོ། །དེ་ཉིད་སླར་ལྡོག་པའི་ཐབས་ཀྱིས་རང་གནས་སུ་འོང་བས་མས་བརྟན་གྱི་དགའ་བ་བཅུ་དྲུག་གི་མཐར་དཀར་དམར་གྱི་ཆ་སྟེང་འོག་ཏུ་ཐིམ་པའི་སྐད་ཅིག་གཉིས་པར་རླུང་ཡང་འགགས་པས་དེ་གསུམ་གྱི་འགྱུར་བ་མྱོང་བའི་ཤེས་རིག་ཀྱང་རྒྱུན་ཆད་དེ་བདེ་བ་ཆེན་པོའི་དབང་ཐོབ་ནས་ལྷག་པ་བདེན་པ་དབྱེར་མེད་ཀྱི་དོན་ཇི་ལྟ་བ་བཞིན་མངོན་དུ་གྱུར་ཏེ་སྟོན་འཁོར་དགོངས་པ་དབྱེར་མེད་དུ་གྱུར་པའོ། །སྔོན་བྱུང་གི་དབང་གསུམ་པོ་འདི་མ་འོངས་གོ་ཕྱེ་བའི་འཁོར་ལ་ལྟོས་ན་རྒྱུད་འབྱུང་བའི་གླེང་བསླང་དུ་འགྱུར་མོད། འོན་ཀྱང་ལྷན་ཅིག་པའི་འཁོར་རྣམས་ཁོ་ན་ལ་ལྟོས་ནས་གླེང་བསླང་བ། དབང་ཐོབ་པ། རྒྱུད་དོན་རྟོགས་པ་གསུམ་ངོ་བོ་གཅིག་ལ་ལྡོག་པ་སོ་སོར་སྣང་བ་ཙམ་ཡིན་ནོ། །གཉིས་པ་ཐུན་མོང་གི་གླེང་བསླང་ནི། འཁོར་ ― MLP018_Page_0017 ―
[མ་དཔེ་གཟིགས་ན་འདིར་གནོན།]
རྣམས་ཀྱི་གཞན་དོན་དུ་གསང་བ་བཞིས་ཆོད་པ་རྣམས་ལ་ཐུགས་རྗེས་བཟུང་བར་རིགས་ཞེས་གསོལ་བ་བཏབ་པ་ལས་སྟོན་པའི་ཐུགས་རྗེ་སྐྱེས་ཏེ་རྒྱུད་འདིས་དངོས་སུ་འདུལ་བའི་ཡུལ་དུ་གྱུར་པ་རྣམས་ལ་རྒྱུད་གསུངས་ཤིང་། གདུལ་བྱ་ཐུན་མོང་བ་རྣམས་ལ་བརྒྱུད་ནས་བསྟན་པར་བྱ་བའི་ཕྱིར་བསམ་གྱིས་མི་ཁྱབ་པའི་སྤྲུལ་སྐུ་ཐུབ་པ་དྲུག་སྤྲོ་བ་སོགས་ཐུགས་རྗེ་ཆེན་པོ་རོལ་པ་རྣམ་པ་སྣ་ཚོགས་སྟོན་པར་མཛད་དེ། དེ་ནས་དེ་བཞིན་གཤེགས་པ་ཐམས་ཅད་བཙུན་མོའ་ཚོགས་དང་བཅས་པས་ཆེད་དུ་བརྗོད་པ་འདི་བརྗོད་དོ། །ཞེས་པ་ནས། བསྟན་ཕྱིར་སྤྲོ་བ་སྣ་ཚོགས་མཛད། །ཅེས་པའི་བར་གྱིས་བསྟན་ཏོ། །གསུམ་པ་འབྲས་བུ་ཡོངས་ཤེས་རྒྱུད་དོན་བཤད་པ་ལ་གཉིས་ཏེ། བརྗོད་བྱ་གཙོ་ཆེ་བའི་དབང་དུ་རྒྱུད་གསུམ་གྱི་རྣམ་བཞག་སྤྱིར་བཤད། རྗོད་བྱེད་གཙོ་ཆེ་བའི་དབང་དུ་ལམ་གྱི་ཆ་རྐྱེན་རྒྱུད་ཀྱི་དངོས་པོ་བྱེ་བྲག་ཏུ་བཤད་པའོ། །དང་པོ་ནི། རྒྱུད་ཕྱི་མ་ལས། རྒྱུད་ནི་རྒྱུན་ཆགས་ལ་བཤད་དེ། །ཐབས་དང་རྒྱུ་ལས་འབྲས་བུའོ། །ཞེས་པས་སྤྱིར་རྒྱུན་ཆགས་པའི་དོན་གྱིས་ན་རྒྱུད་ཅེས་བྱ་ལ། དབྱེ་ན། གང་རྟོགས་པར་བྱ་བ་གཞིའམ་རྒྱུའི་རྒྱུད་དང་། གང་གིས་རྟོགས་ཤིང་བགྲོད་པ་ཐབས་སམ་ལམ་གྱི་རྒྱུད་དང་། གང་དུ་མཐར་ཕྱིན་པ་འབྲས་བུའི་རྒྱུད་དོ། །དང་པོ་ནི། བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་དང་། རྒྱས་པ་ལས། ཐམས་ཅད་རང་རིག་བྱང་ཆུབ་སེམས། །དེ་ནི་ལུང་གི་ཚད་མར་བཤད། །ཅེས་པས། གཞི་འཆིང་གྲོལ་མེད་པའི་གནས་ལུགས་རང་རིག་པ་བྱང་ཆུབ་ཀྱི་སེམས་བདེན་པ་དབྱེར་མེད་སྤྱོད་ཡུལ་དང་བྲལ་བར་ཡེ་ནས་གནས་པ་གང་ཡིན་པ་སྟེ། དེ་ལ་རྒྱུ་རྒྱུད་ཅེས་བྱ་ལ། དེའི་དོན་བཤད་པ་ནི། རྒྱུ་རྒྱུད་དེ་རྟོགས་མ་རྟོགས་ཀྱི་བྱེད་པས་འཁོར་འདས་ཀྱི་ཆོས་ཐམས་ཅད་ཀྱི་འཆར་གཞིར་གྱུར་པས་ན་གཞི་ཞེས་བྱ་ལ། དེ་ཉིད་གནས་ལུགས་ལ་འཆིང་གྲོལ་ཐམས་ཅད་དང་བྲལ་བ་སྟེ། རྒྱུ་མཚན་འཆིང་བྱེད་འཁྲུལ་པའི་ཆོས་མེད་སྣང་གློ་བུར་བ་ཡིན་པས་བཅིངས་པ་མེད་ལ། བཅིངས་པ་མེད་ན་གྲོལ་བ་མི་འབྱུང་བ་ཆོས་ཉིད་ཡིན་པའི་ཕྱིར་འཆིང་གྲོལ་མེད་པ་ཞེས་བྱ་ཞིང་། སེམས་ཉིད་བདེ་བར་ ― MLP018_Page_0018 ―
[མ་དཔེ་གཟིགས་ན་འདིར་གནོན།]
གཤེགས་པའི་སྙིང་པོ་དེ་གསར་བྱུང་མིན་པར་གདོད་མ་ནས་ཡོངས་གྲུབ་རྟག་པ་འདུས་མ་བྱས་ཀྱི་རང་བཞིན་དུ་བཞུགས་པས་གནས་ལུགས་ཞེས་བྱའོ། །རང་རིག་པ་བྱང་ཆུབ་ཀྱི་སེམས་ཞེས་བྱ་བ་ནི། འཁོར་འདས་ཀྱི་ཆོས་ཐམས་ཅད་སེམས་སུ་འདུ་ལ། དེ་ཡང་རང་རིག་བྱང་ཆུབ་སེམས་ཀྱི་ངོ་བོར་འདུས་པའི་རྒྱུ་མཚན་གྱིས་དེ་ལྟར་དུ་བཏགས། བདེན་པ་དབྱེར་མེད་ཅེས་པའི་དོན། དབྱིངས་སྤྲོས་པ་ཐམས་ཅད་དང་བྲལ་བའི་ཆ་ནས་རང་བཞིན། རང་གསལ་སྒྲིབ་གཡོགས་དང་བྲལ་བའི་ཆ་ནས་ཡེ་ཤེས། དེ་ལས་སྐུ་གསུང་ཐུགས་ཡོན་ཏན་ཕྲིན་ལས་ཏེ་འབྲས་ཆོས་ལྔ་འཆར་རུང་ངོ་བོ་ཉིད་རྒྱུར་ལྷུན་གྱིས་གྲུབ་པའི་ཆ་ནས་འབྲས་བུ་དོན་དམ་སྟེ་དེ་ལྟར་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པ་ལྷག་པ་དོན་དམ་བདེན་པ་དང་། དེའི་རྩལ་སྣང་སྣོད་བཅུད་སྐུ་དང་ཡེ་ཤེས་ཀྱི་དཀྱིལ་འཁོར་རབ་འབྱམས་སུ་འཆར་བ་ལྷག་པ་ཀུན་རྫོབ་བདེན་པ་སྟེ། དེ་གཉིས་ངོ་བོ་དབྱེར་མེད་ཟུང་འཇུག་ཡིན་པས་ན་བདེན་པ་དབྱེར་མེད་ཅེས་བྱའོ། །དེ་ལ་བདེན་པ་གཉིས་ཟུང་དུ་འཇུག་ཚུལ་ནི། གཅིག་གིས་གཅིག་མི་གཏོང་བའི་ཟུང་འཇུག་སྟེ། གསེར་དང་གསེར་གྱི་སེར་པོའམ། མར་མེ་དང་མར་མེའི་འོད་བཞིན་དུ་དོན་དམ་གྱི་སྣང་ལྡོག་ཀུན་རྫོབ་ཏུ་རང་ཤར་བའི་ཕྱིར། དེ་ནི་བསམ་བརྗོད་ཀྱི་ཡུལ་ཐམས་ཅད་ལས་འདས་པས་སྤྱོད་ཡུལ་དང་བྲལ་བ་ཞེས་བཏགས་ཤིང་། དེ་ཉིད་བརྟན་གཡོ་འཁོར་འདས་ཀྱིས་བསྡུས་པའི་ཆོས་ཐམས་ཅད་ལ་ཁྱབ་ཆས་སུ་ཡེ་གདོད་མ་ནས་གནས་པ་གང་ཡིན་པ་སྟེ། ཁམས་བདེ་བར་གཤེགས་པའི་སྙིང་པོ་དང་། རང་བཞིན་གྱིས་གནས་པའི་རིགས་དང་། ཀུན་གཞིའི་ཡེ་ཤེས་དང་། དྲི་བཅས་དེ་བཞིན་ཉིད་ལ་སོགས་པའི་ཐ་སྙད་གང་ལ་འཇུག་པའི་གཞིའོ། །དེ་དག་གི་དོན་བཤད་པ་ནི། ཆོས་ཀུན་གྱི་འབྱུང་གནས་སུ་གྱུར་པས་དབྱིངས་སམ་ཁམས། དྲི་མ་དང་འབྲེལ་ཡང་རང་གི་ངོ་བོ་སངས་རྒྱས་ཡིན་པས་བདེ་གཤེགས་སྙིང་པོའོ། །སེམས་ཉིད་སྟོང་ཆ་ནས་ཆོས་སྐུ་དང་སྣང་ཆ་ནས་གཟུགས་སྐུའི་ཡོན་ཏན་རྫོགས་པར་ལྡན་ཡང་དྲི་མ་མ་དག་པར་རང་གི་བྱ་བ་བྱེད་མི་ནུས་པས་རང་བཞིན་གྱིས་གནས་པའི་རིགས་སོ། །རང་གི་ངོ་བོ་རང་བྱུང་གི་ཡེ་ཤེས་ཡིན་ལ་རྟོགས་མ་རྟོགས་ཀྱི་ ― MLP018_Page_0019 ―
[མ་དཔེ་གཟིགས་ན་འདིར་གནོན།]
བྱེད་པས་འཁོར་འདས་ཀུན་གྱི་འཆར་གཞིར་གྱུར་པས་ཀུན་གཞིའི་ཡེ་ཤེས་སོ། །ཆོས་ཉིད་དེ་བཞིན་ཉིད་དེ་སྣང་ལུགས་ལ་དྲི་མའི་སྦུབས་ཀྱིས་བཅིངས་པར་སྣང་བས་དྲི་བཅས་དེ་བཞིན་ཉིད་ཅེས་བྱའོ། །སོགས་ཁོང་ནས་ཀྲི་ཡས་བདག་གི་དེ་ཁོ་ན་ཉིད་དང་། ཨུ་པ་ཡས་བྱང་ཆུབ་ཀྱི་སེམས། ཡོ་གས་ཐོག་མཐའ་མེད་པའི་བྱང་ཆུབ་ཀྱི་སེམས་སམ་བྱང་ཆུབ་ཀྱི་སེམས་ཀུན་ཏུ་བཟང་པོ་དང་། མ་ཧཱ་ཡོ་གས་བྱང་ཆུབ་ཀྱི་སེམས་དབྱེར་མེད་སྤྱོད་ཡུལ་དང་བྲལ་བའམ་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོ། ཨ་ནུས་དབྱིངས་དང་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར། ཨ་ཏིས་འོད་གསལ་བྱང་ཆུབ་ཀྱི་སེམས་སྟོང་གསལ་འགག་པ་མེད་པའི་གནས་ལུགས་ཡེ་ཤེས་གསུམ་ལྡན་ལ་སོགས་པ་མིང་དུ་མར་གྲགས་སོ། །རྒྱུ་རྒྱུད་དེ་ཉིད་གཞི་ལམ་འབྲས་གསུམ་གྱི་ལྡོག་ཆ་གང་རུང་དང་མ་བསྟུན་པར་སྤྱིར་བཞག་པ་ན་རང་བཞིན་ནམ་གནས་ལུགས་ཞེས་བྱ་སྟེ། གཞི་ལམ་འབྲས་གསུམ་དབྱེར་མི་ཕྱེད་པའི་ཟུང་འཇུག་རང་བཞིན་གསང་བའི་སྙིང་པོའོ། །ལྡོག་ཆ་སོ་སོར་ཕྱེ་སྟེ་གློ་བུར་གྱི་དྲི་མ་སྦྱོང་བ་དང་། དྲི་མ་དེ་ཉིད་ལམ་རྒྱུད་ཀྱིས་བསལ་ཞིང་སྦྱངས་པའི་སྟོབས་ཀྱིས་འབྲས་བུ་ཇི་ལྟ་བ་བཞིན་མངོན་དུ་གྱུར་པ་ལ་ལྟོས་ནས་ལམ་དང་འབྲས་བུར་བཞག་གོ །ཅིའི་ཕྱིར་གཞིའམ་རྒྱུའི་རྒྱུད་དུ་འགྱུར་ཞེ་ན། ཐབས་ལམ་གྱི་རྐྱེན་གྱིས་ཟིན་པ་ལས་མྱང་འདས་དང་མ་ཟིན་པ་ལས་འཁོར་བར་འགྲུབ་པར་བྱེད་པས་ན། འཁོར་འདས་གཉིས་ཀའི་འབྱུང་གཞིའམ་རྒྱུར་གྱུར་པའི་ཕྱིར་དང་། དེ་ཉིད་སེམས་ཅན་ནས་སངས་རྒྱས་ཀྱི་བར་དུ་རང་བཞིན་འགྱུར་བ་མེད་པར་རྒྱུན་ཆགས་སུ་འཇུག་པས་ན་རྒྱུད་དེ། རིམ་གསུམ་ལས། ཐ་སྙད་གཉིས་ཀྱི་ཆོས་རྣམས་ཀུན། །མ་ལུས་འབྱུང་ཕྱིར་གཞི་ཞེས་བྱ། །ཞེས་དང་། མགོན་པོ་བྱམས་པས། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་སོ། །དབྱེ་ན། སློབ་དཔོན་བི་མ་ལས། རིམ་པ་གསུམ་པར། དང་པོ་རྣམ་པ་གཉིས་ཡིན་ཏེ། །ངོ་བོའ་གཞི་དང་བཏགས་པའི་གཞི། །ཞེས་པས། སེམས་ཆོས་ཉིད་གདོད་མ་ནས་རང་བཞིན་གྱིས་རྣམ་པར་དག་པ་རྒྱུ་རྒྱུད་བདེ་བར་གཤེགས་པའི་སྙིང་པོ་ནི་སྐབས་ ― MLP018_Page_0020 ―
[མ་དཔེ་གཟིགས་ན་འདིར་གནོན།]
འདིར་སྦྱང་གཞི་སྟེ་དྲི་མ་སྦྱོང་བའི་གཞི་ཡིན་པའི་ཕྱིར། དཔེར་ན། འདམ་རྫབ་ཀྱི་དབུས་ཀྱི་ཡིད་བཞིན་གྱི་ནོར་བུ་རིན་པོ་ཆེ་ལྟ་བུའོ། །དེ་ལ་ནི་གནས་ལུགས་ངོ་བོ་ཉིད་ཀྱི་གཞི་ཞེས་བྱ་སྟེ། གཞི་མཚན་ཉིད་པ་ཡིན་ནོ། །ལོག་པའི་ཞེན་སྣང་ཡུལ་དང་བཅས་པ་ནི་སྦྱང་བྱའི་དྲི་མ་འདམ་རྫབ་ལྟ་བུ་སྟེ། མེད་སྣང་གློ་བུར་བ་ཡིན་པས་འཁྲུལ་པ་བཏགས་པའི་གཞི་ཞེས་གསུངས་སོ། །སྐབས་འདིའི་ལོག་ཞེན་ནི། གཉིས་མེད་ལ་གཉིས་སུ་འཛིན་པའི་ལོག་པའི་ཞེན་སྣང་སྟེ། དེ་ལས་ལས་དང་ལོག་རྟོག་གི་བློར་སྣང་བའི་འཁྲུལ་པའི་ཡུལ་དང་བཅས་པའི་རིགས་གནས་སོ། །ཞེན་སྣང་ཉིད་འཁོར་བ་འགྲུབ་བྱེད་ཀྱི་རྒྱུ་དང་། རྣམ་ཤེས་ཀྱི་འཇུག་པ་མ་ཟད་བར་རྒྱུན་ཆགས་པ་ཙམ་ཡིན་པས་རྒྱུ་རྒྱུད་ཀྱི་མིང་ཙམ་ཐོགས་ཀྱང་། སྐབས་འདིའི་རྒྱུ་རྒྱུད་མིན་ཏེ། བཅོས་མ་གློ་བུར་གྱི་ཆོས་ཡིན་པས་འབྲས་བུའི་ཉེར་ལེན་དུ་གྱུར་པའི་རྒྱུ་རྒྱུད་མིན་པའི་ཕྱིར། རིགས་པས་དཔྱད་དོན་གྱི་སྟོང་ཉིད་ཅེས་བྱ་བ་ཀ་བ་ཀ་བའི་ཆོས་ཉིད་དང་། བུམ་པ་བུམ་པའི་ཆོས་ཉིད་ཀྱིས་སྟོངས་པ་ལྟ་བུ་མེད་དགག་གི་སྟོང་ཉིད་ཀྱང་སྐབས་འདིར་རྒྱུ་རྒྱུད་མཚན་ཉིད་པ་མིན་ཏེ། ཉེར་ལེན་གྱི་རྒྱུ་དང་རྒྱུན་གྱི་དོན་གཉིས་ཀ་མི་གནས་པའི་ཕྱིར་ཏེ། མེད་དགག་དེ་ཉིད་སྤྲོས་བྲལ་ཙམ་ཡིན་ཡང་འཁོར་འདས་གཉིས་ཀའི་རྒྱུ་མིན་ལ། འདུས་མ་བྱས་པ་ཙམ་ལས་རྒྱུན་གྱི་དོན་ཡང་མ་ཚང་བའི་ཕྱིར། འོན་ཀྱང་རྒྱུ་རྒྱུད་བཏགས་པ་བར་བཞག་པ་ལ་འགལ་བ་མེད་དེ། དེ་ལ་དམིགས་ན་སྐྱོན་ཡོན་སྐྱེ་བ་དང་གནས་སྐབས་རིག་ངོར་རྒྱུན་ཆགས་པ་ཙམ་ཡིན་པའི་ཕྱིར། གཉིས་པ་གང་གིས་རྟོགས་ཤིང་བགྲོད་པ་ཐབས་སམ་ལམ་གྱི་རྒྱུད་ནི། རྒྱུ་རྒྱུད་བདེ་བར་གཤེགས་པའི་སྙིང་པོ་དེ་གློ་བུར་གྱི་དྲི་མ་དང་བྲལ་བར་བྱེད་པའི་ཐབས་ཏེ། དེ་ཡང་དང་པོར་ཐོས་བསམ་གྱིས་ལྟ་བའི་གནས་ལུགས་དོན་སྤྱིའི་ཚུལ་དུ་ཤེས་པར་བྱས་ནས། དེ་ལྟར་ཤེས་པའི་དོན་ལ་ཉམས་སུ་ལེན་པའི་སྒོ་ནས་འཇུག་པའི་བྱེད་རྩོལ་དང་བཅས་པ་སྟེ། དེ་ཡང་ངོ་བོ་སྐྱེད་བྱེད་ཐོས་བསམ་སྒོམ་པའི་ཤེས་རབ་རྣམ་པ་གསུམ་གྱིས་བསྐྱེད་བྱ་ཐུན་མོང་དང་། མཆོག་གི་སེམས་ལྔ་སྐྱེས་སམ་སྐྱེ་བའོ། །དེ་ལྟར་ཡང་རིམ་གསུམ་ལས། ངོ་བོ་ ― MLP018_Page_0021 ―
[མ་དཔེ་གཟིགས་ན་འདིར་གནོན།]
ཤེས་རབ་རྣམ་གསུམ་གྱིས། །སེམས་ལྔ་སྐྱེས་པར་བསྟན་པ་ཡིན། །ཞེས་སོ། །སྐབས་འདིའི་ཐུན་མོང་གི་སེམས་ལྔ་ནི། ལྷ་མི་གཉིས། ཉན་ཐོས། རང་རྒྱལ། བྱང་སེམས། ཕྱི་རྒྱུད་སྡེ་གསུམ་སྟེ་ཐུན་མོང་གི་ལམ་ལྔ་དང་མཐུན་པའི་སེམས་ལྔ་ཡིན་ལ། མཆོག་གི་སེམས་ལྔ་ནི། མ་ཧཱ་ཡོ་ག་བ་རང་ལུགས་ཀྱི་སེམས་ལྔ་སྟེ། སེམས་ལྔ་པོ་གང་ཞེ་ན། ལམ་ལ་འཇུག་འདོད་ཀྱི་སེམས་དང་པོར་འགོ་ལྡང་བ་གཡོ་ལྡང་བྱང་ཆུབ་ཀྱི་སེམས། དེ་ཐོབ་ན་ཅི་མ་རུང་སྙམ་པ་སྨོན་པ་བྱང་ཆུབ་ཀྱི་སེམས། དེ་ལ་འཇུག་པ་འཇུག་པ་བྱང་ཆུབ་ཀྱི་སེམས། ཞུགས་ནས་གནས་པ་གནས་པ་བྱང་ཆུབ་ཀྱི་སེམས། དེ་དོན་མཐར་ཕྱིན་པ་མཐར་ཕྱིན་བྱང་ཆུབ་ཀྱི་སེམས་སོ། །སེམས་ལྔ་པོ་དེ་དག་གི་སྐྱེ་ཚུལ་ནི། རྒྱ་མཚོ་ལས། གཞི་དང་སྐབས་ནས་སྐྱེ་འགྱུར་པ། །གྲོལ་ཐར་ལམ་དུ་རྣམ་པར་བཤད། །ཅེས་པས་གཞི་ནས་སེམས་བསྐྱེད་པ། ལམ་ནས་སེམས་བསྐྱེད་པ། འབྲས་བུ་ནས་སེམས་བསྐྱེད་པའོ། །དང་པོ་ནི། མུན་པའི་ས་ནས་སེམས་བསྐྱེད་པ་ཞེས་བྱ་སྟེ། ལམ་མ་ཞུགས་ཀྱི་གང་ཟག་ཅིག་ཐོག་མ་ནས་ལམ་འདི་ལ་ཞུགས་ཏེ། རང་འབྲས་མཐར་ཕྱིན་པར་བྱེད་པའོ། །གཉིས་པ་ནི། ལམ་སྟེགས་ཀྱི་ཐེག་པ་གང་རུང་ཞིག་ལ་ཞུགས་ནས་སློབ་བཞིན་པ་ལས་ཁྱད་པར་གྱི་ལམ་འདི་ལ་འཇུག་པ་ལྟ་བུའོ། །གསུམ་པ་ནི། ལམ་སྟེགས་ཀྱི་ཐེག་པ་གང་ཡིན་ཡང་རུང་། རང་ལམ་གྱི་མཐར་ཐུག་གི་འབྲས་བུ་མངོན་དུ་བྱས་ནས་སླར་ཉེ་ལམ་རྨད་དུ་བྱུང་བའི་ལམ་མཆོག་འདི་ལ་འཇུག་པའོ། །ཞར་བྱུང་དེ་དག་གི་དོགས་སེལ་ནི། ལམ་དང་འབྲས་བུའི་ས་ནས་སེམས་བསྐྱེད་པ་གང་ཡིན་ཡང་རུང་། ཉན་རང་མན་ཆད་རང་ལམ་གྱི་མི་སློབ་ལམ་མཐར་ཕྱིན་པར་བསྒྲུབས་ཀྱང་ཐེག་ཆེན་གྱི་ཚོགས་ལམ་རང་ནས་འཇུག་དགོས་ཤིང་། བྱང་སེམས་ཡན་ཆད་ལམ་དང་འབྲས་བུ་གང་ནས་ཞུགས་ཀྱང་ལོ་ཚོད་མཐུན་པའི་ས་ནས་ཞུགས་པས་ཆོག་གོ ། ངེས་ཚིག་ནི། ཅིའི་ཕྱིར་ཐབས་སམ་ལམ་གྱི་རྒྱུད་དུ་འགྱུར་ཞེ་ན། ཐོབ་བྱ་འབྲས་རྒྱུད་ཉིད་མངོན་དུ་བྱེད་པའི་ལྷན་ཅིག་བྱེད་རྐྱེན་ཡིན་པས་ཐབས་དང་། གང་གིས་གང་དུ་བགྲོད་བྱའི་རྟེན་ཡིན་པས་ལམ་སྟེ། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ ― MLP018_Page_0022 ―
[མ་དཔེ་གཟིགས་ན་འདིར་གནོན།]
ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་བྱུང་། །ཞེས་དང་། མདོའ་དོན་བསྡུས་ལས། བགྲོད་དང་དེ་ཆོས་ལྡན་པ་དང་། །ཞེས་སོ། །ལམ་དེ་ལའང་ཉེ་རིང་གཉིས་ལས། རྣལ་འབྱོར་བླ་ན་མེད་པ་ཁྱད་པར་གྱི་ལམ་འདི་ནི་ཉེ་བའི་ལམ་མམ། ཐབས་ཀྱི་རྒྱུད་ཡིན་ཏེ། ལམ་འདི་མཐར་ཕྱིན་པར་བསྒྲུབས་ནས་ལམ་གཞན་གྱི་བསྣོན་མ་མི་དགོས་པའི་ཕྱིར། དེ་ལས་གཞན་པ་ཐུན་མོང་གི་ལམ་ནི། ངན་སོང་ལས་ངེས་པས་འབྱུང་བ་ལྷ་མི། འཁོར་བ་ལས་ངེས་པར་འབྱུང་བ་ཉན་རང་། མཐའ་གཉིས་ལས་ངེས་པར་འབྱུང་བ་བྱང་སེམས་ཏེ་ངེས་འབྱུང་གི་ཐེག་པ་བཞི་དང་། ཕྱི་རྒྱུད་སྡེ་གསུམ་གྱི་ལམ་རྣམས་ནི་སྐབས་འདིར་རིང་བའི་ལམ་ཞེས་བྱ་སྟེ། རང་ལམ་གྱི་འབྲས་བུ་མཐར་ཕྱིན་ནས་ཀྱང་འདི་ལ་འཇུག་དགོས་པའི་ཕྱིར། ལམ་དེ་ནི་གཞི་ཤེས་པར་བྱེད་པ་ལ་མར་འབྲེལ། འབྲས་བུ་ཐོབ་པར་བྱེད་པ་ལ་ཡར་འབྲེལ་བས་ཤེས་ཐོབ་ཀྱི་བྱ་བྱེད་དང་འབྲེལ་བའི་ཐབས་བར་མ་ཆད་པས་རྒྱུད་དུ་བཞག་གོ ། ཁྱད་པར་གྱི་ལམ་ལ་དབྱེ་ན། ཐབས་ཀྱིས་ངེས་པའི་ལམ་དང་། ཤེས་རབ་རྣམ་པར་གྲོལ་བའི་ལམ་གཉིས་ཏེ། བཤད་རྒྱུད་རྒྱ་མཚོ་ལས། གྲོལ་ལམ་ཐབས་སུ་རྣམ་པར་བསྟན། །ཅེས་སོ། །དེ་ལ་ཐབས་ལམ་ནི། ངོ་མཚར་ངན་འགྲོ་ཐར་པའི་ཐབས། །ཞེས་པས་གཙོ་བོར་ཐབས་ཀྱི་ཁྱད་པར་བརྟུལ་ཞུགས་ཀྱི་སྤྱོད་པ་རྨད་དུ་བྱུང་བའི་སྒོ་ནས་འབྲས་བུ་མྱུར་དུ་འགྲུབ་པར་བྱེད་པ་སྟེ། ལམ་ཐབས་གྲོལ་གཉིས་ཕན་ཚུན་ལྟོས་པ་ཅན་ཡིན་པས་གཙོ་ཆེ་བའི་དབང་དུ་བྱས་ཏེ་གཙོ་བོར་ཞེས་སྨོས་ལ། སྤྱིར་ཐབས་ཞེས་བྱ་བ་ལམ་ཐམས་ཅད་ལ་འཇུག་ཀྱང་འདིར་ཐབས་མཁས་ཀྱིས་ཟིན་མ་ཟིན་གྱི་ཁེ་ཉེན་ཆེ་བས་སྤྱི་མིང་བྱེ་བྲག་ལ་སྦྱར་ཏེ་ཐབས་ཀྱི་ཁྱད་པར་ཞེས་བྱ་ཞིང་། འདི་ལྟ་བུའི་སྤྱོད་ཚུལ་ཁྱད་པར་ཅན་དེ་ནི་གང་ཟག་བརྟུལ་ཞུགས་དང་ལྡན་པ་ཁོ་ནའི་སྤྱོད་ཡུལ་ཡིན་པས་དེ་ལྟར་གྲགས་ལ། རྨད་དུ་བྱུང་བ་ཞེས་པ་ཡ་ཤ་བའི་དོན་ཏེ། འཆིང་བྱེད་ཀྱི་ལས་ལ་སྤྱོད་པ་ལྟར་གནང་བས་གྲོལ་བ་འདི་འདྲ་ངོ་མཚར་ཞིང་ངམ་པའོ། །དེས་ནི་འབྲས་བུ་ཕྱི་དུས་སུ་མི་ལུས་པར་མྱུར་དུ་འགྲུབ་པར་བྱེད་པ་སྟེ། དཔེ་མཀྵི་ཀ་བྱ་བ་དངུལ་ཆུ་ལས་བསྒྲུབས་པའི་གསེར་འགྱུར་གྱི་རྩི་སྟེ། དེས་ལྕགས་གསེར་དུ་བསྒྱུར་ ― MLP018_Page_0023 ―
[མ་དཔེ་གཟིགས་ན་འདིར་གནོན།]
བའི་ཚེ་རྩི་དེ་ཉིད་ཀྱིས་ལྕགས་ལ་བཏབ་སྟེ་ཐབས་དང་ལྡན་པས་བསྲེགས་པ་ན་གནས་སྐབས་ལྔས་གསེར་དུ་བསྒྱུར་བ་བཞིན་ཏེ། དེ་ལ་གནས་སྐབས་ལྔ་ནི། དུ་བ་དང་ནི་རྩེག་རྩེག་དང་། །སྦལ་པ་འཆོང་བ་ཉིད་དང་ནི། །འདར་བ་དང་ནི་མི་འདར་བའི། །དངུལ་ཆུ་ཡི་ནི་གནས་སྐབས་ལྔ། །ཞེས་སོ། །མྱུར་བར་མ་ཟད་ཁེ་ཉེན་ཆེ་བའི་དཔེར་ཡང་འགྱུར་ཏེ། བསྲེག་པའི་ཐབས་ལ་མཁས་ན་ལྕགས་གསེར་དུ་འགྱུར་བ་ལ་དཀའ་ཚེགས་མེད་ཅིང་། ཐབས་དང་མི་ལྡན་ན་མེ་ཉིད་དངུལ་ཆུའི་དགྲ་ཡིན་པས་ལྕགས་གསེར་དུ་མི་འགྱུར་བར་མ་ཟད་རྩི་དེ་ཡང་འཐོར་ཏེ་ཆུད་ཟོས་སུ་འགྲོ་བ་བཞིན་ནོ། །དབྱེ་ན། རིམ་གསུམ་ལས། གདམས་ངག་སྟེང་དང་འོག་གི་སྒོ། །ཞེས་པ་ལྟར་གཉིས་ལས་དང་པོ་སྟེང་སྒོ་ནི། འཁོར་ལོ་དྲུག་ལ་བརྟེན་ནས་འབར་འཛག་གི་སྦྱོར་བས་འཁོར་ལོ་བཞིར་བདེ་བའི་ཡེ་ཤེས་བསྐྱེད་པ་ལ་བསླབ་པ་རིམ་གྱིས་པ་སྟེ། ཞེས་པས། ལུས་ཀྱི་ལྟེ་བར་རྩ་གསུམ་འཁོར་ལོ་དྲུག་དང་བཅས་པ་གསལ་བཏབ། དེ་ལ་རྩ་གསུམ་ནི་ལུས་ཀྱི་དབུས་སུ་རྩ་དབུ་མ། གཡས་སུ་རོ་མ། གཡོན་དུ་རྐྱང་མ་གསུམ་གྱི་དབུ་མ་ཚངས་བུག་ནས་གསང་གནས་ཀྱི་བར་དྲང་ཐལ་ལེ་བ། རོ་རྐྱང་གཉིས་རྩེ་མོ་གུག་སྟེ་ཡར་སྣ་སྣ་བུག་གཉིས་སུ་ཟུག་པ། མར་སྣ་གསང་གནས་དང་བཤང་སྒོར་ཟུག་པ་སྟེ། དབུ་མའི་མར་སྣ་ལྟེ་འོག་སོར་བཞི་མན་ཆད་དབུ་མ་དང་རྩ་རྒྱུད་གཅིག་ཀྱང་ལས་ཐ་དད་པའི་ཕྱིར་དུང་ཅན་མ་ཞེས་བྱ་ལ། འཁོར་ལོ་དྲུག་ནི། སྤྱི་བོ་བདེ་ཆེན་གྱི་འཁོར་ལོ་རྩ་འདབ་སུམ་ཅུ་སོ་གཉིས། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད། ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི་སྟེ་རྩ་བའི་འཁོར་ལོ་བཞི། དེ་འོག་སོར་བཞི་གཞལ་བ་ན་མེའི་དཀྱིལ་འཁོར་གྲུ་གསུམ་ཐིག་ལེ་རཾ་གྱིས་མཚན་པ་དང་། དེ་འོག་སོར་བཞི་གཞལ་བ་རྒྱུ་ཞབས་ཀྱི་ཐད་དུ་རླུང་གི་དཀྱིལ་འཁོར་གཞུའི་དབྱིབས་ཅན་ཡཾ་གྱིས་མཚན་པ་སྟེ་རྐྱེན་གྱི་འཁོར་ལོ་གཉིས་རྣམས་གསལ་བཏབ་ནས། རླུང་བུམ་པ་ཅན་སྦྱོར་བ་བཞི་ལྡན་ལ་སོགས་པའི་ཐབས་དང་ལྡན་པས་ཉམས་སུ་བླངས་པ་ལས། བཤང་ཁའི་རླུང་གཡོས། དེས་སྟེང་འོག་གི་མེ་སྦར། འཁོར་ལོ་བཞིའི་ ― MLP018_Page_0024 ―
[མ་དཔེ་གཟིགས་ན་འདིར་གནོན།]
གནས་བརྒྱུད་དེ་དབུ་མའི་ཡར་རྩེར་ཧཾ་ཡིག་བདེ་བ་ཆེན་པོའི་རང་བཞིན་མགོ་བོ་ཐུར་བསྟན་གྱི་ཚུལ་དུ་གནས་པ་ལ་རེག་པས་བདུད་རྩི་བྱང་ཆུབ་ཀྱི་སེམས་བབས་པ་སྤྱི་བོ་ནས་མགྲིན་པར་སླེབས་པས་དགའ་བ། མགྲིན་པ་ནས་སྙིང་གར་སླེབས་པས་མཆོག་དགའ། སྙིང་ག་ནས་ལྟེ་བར་སླེབས་པས་ཁྱད་དགའ། ལྟེ་བ་ནས་གསང་བར་སླེབས་པས་ལྷན་སྐྱེས་ཀྱི་དགའ་བ་ཉམས་སུ་མྱོང་སྟེ་སླར་ཡང་མས་བརྟན་གྱིས་བསྡུས་པའི་དགའ་བཞིའི་ཡེ་ཤེས་ཉམས་སུ་མྱོང་བ་ལས་མཐར་བདེ་གསལ་རྣམ་པར་མི་རྟོག་པའི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པའོ། །དེ་སྐད་དུ་ཡང་རྒྱ་མཚོ་ལས། འཁོར་ལོ་གསུམ་གཉིས་སྲོག་ཤིང་གསུམ། །མེ་རླུང་འགྲོ་བས་ནམ་མཁའི་བ། །བཞོ་བས་སྟེང་དུ་རྣམ་པར་གྲགས། །ཞེས་སོ། །དེ་དག་ནི་སྟེང་སྒོ་ཐུན་མོང་བ་ཡིན་ལ། ཁྱད་པར་བ་ནི་འདི་ཉིད་ཀྱི་ལེའུ་བཅུ་གསུམ་པར་བཤད་པ་ལྟར་ཏེ། དེ་ལ། ཀུན་ཏུ་བཟང་པོའི་དང་། ཀུན་ཏུ་བཟང་མོའ་དང་། སྦྱོར་བ་དག་པའི་དང་། ཁྱབ་བརྡལ་ཆེན་པོའི་མན་ངག་གོ །དང་པོ་ནི། དཀྱིལ་འཁོར་ལྡན་པའི་སོགས་ཚིགས་བཅད་གཅིག་སྟེ། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་ཡོད་པ་བཞིར་བསྡུ་སྟེ། མདུན་ཆོས་ཉིད་ཀྱི་རྩ་གསུམ། གཡས་ཡེ་ཤེས་ཀྱི་རྩ་གཅིག གཡོན་ཡོན་ཏན་གྱི་རྩ་གཅིག རྒྱབ་རང་རྒྱུད་ཀྱི་རྩ་གསུམ་མོ། །རྩ་དེ་དག་གི་སྦུབས་ན་འོད་བཞི་དང་། དེའི་ཁྲོད་ན་སྦྱང་བྱ་སྦྱོང་བྱེད་ཀྱི་ས་བོན་རྣམ་ཤེས་དང་བཅས་པའོ། །དེ་དག་གི་དབུས་ན་དྭངས་མ་ལྔ་ལ་བརྟེན་པའི་ཡེ་ཤེས་སྙིང་པོའི་ཐིག་ལེ་སྟོང་གསལ་འགག་མེད་བདེ་བ་ཆེན་པོའི་ངོ་བོར་བཞུགས་པ་ལ། སྤྱི་བོ་ནས་མར་སེམས་གཏད་དེ་བསྒོམས་པས་དེ་ཉིད་འོད་དུ་འབར་བས་སྦྱོང་བྱེད་ཀྱི་ས་བོན་རྣམས་ཀྱང་མེར་སྦར། དེས་རིགས་དྲུག་གི་ས་བོན་གཉིད་དང་བཅས་པ་སྦྱངས། རགས་རླུང་ཐམས་ཅད་དྭངས་མ་ལ་ཐིམ་པས་རྣམ་རྟོག་ཐམས་ཅད་མི་རྟོག་པའི་ཀློང་དུ་ཐིམ་ཞིང་དམིགས་མེད་མཐའ་བྲལ་བདེ་བ་ཆེན་པོར་བྱང་ཆུབ་པའོ། །གཉིས་པ་ནི། གསང་བའི་ཐིག་ལེ་སོགས་ཚིགས་བཅད་གཉིས་ཏེ། ལྟེ་བའི་རྩ་འདབ་ཀྱི་དབུས་ན་དབྱིངས་ཕྱུག་ལྔའི་ཐིག་ལེ་ཨ་ཐུང་གི་རྣམ་པར་གནས་པ་ལ། སྙིང་ག་ནས་མར་སེམས་གཏད་པས་སྙིང་གའི་ཐིག་ལེའི་བདེ་ ― MLP018_Page_0025 ―
[མ་དཔེ་གཟིགས་ན་འདིར་གནོན།]
དྲོད་མར་སོང་བ་ལྟེ་བའི་ཐིག་ལེ་ལ་ཕོག དེ་ཉིད་འོད་དུ་འབར་ཞིང་རྟོག་ཚོགས་སྐུ་དང་ཡེ་ཤེས་སུ་གསལ། དེའི་དྲོད་སླར་ཡང་ཡར་སོང་སྟེ་སྙིང་གའི་དྭངས་མ་ལ་ཐིམ་པས་དྭངས་མའི་བདེ་དྲོད་ཆེར་འབར་བས་རགས་རླུང་གི་རྒྱུ་བ་བཅོམ། ཐིག་ལེ་འགྲོ་འོང་མེད་པར་སྙིང་གའི་གནས་ལས་མི་གཡོ་བར་གནས་པས་མཚན་འཛིན་ཐམས་ཅད་མི་རྟོག་པའི་ཀློང་དུ་ཐིམ་པའོ། །གསུམ་པ་ནི། སྙིང་པོའི་ཐིག་ལེ་སོགས་རྐང་པ་གསུམ་སྟེ། མགྲིན་པའི་རྩ་འདབ་ཀྱི་དབུས་ན་མཁའ་འགྲོ་མ་རྔམ་མ་ཞེས་བྱ་བ་ཡི་གེ་ཨཾ་གི་རྣམ་པར་གནས་པ་ལས། སྙིང་གའི་འོད་ཀྱིས་མགྲིན་པའི་ཐིག་ལེ་ཞུ་བའི་དྭངས་མ་སྙིང་གར་མཆེད། དབུགས་ཐིག་ལེར་ཐིམ་པས་རླུང་དང་རྟོག་པ་འགགས། འཁོར་ལོ་གཉིས་ཞལ་སྦྱོར་བ་ལས་དྲོད་རླུང་རྩ་གསུམ་གཅིག་ཏུ་འདྲེས་པའི་བདེ་གསལ་རྣམ་པར་མི་རྟོག་པའི་ཡེ་ཤེས་སྐྱེས་པའོ། །བཞི་པ་ནི། ཟག་པ་མེད་པའི་སོགས་རྐང་པ་དགུ་སྟེ། སྤྱི་བོ་བདེ་ཆེན་གྱི་འཁོར་ལོའི་དབུས་སུ་ཀུན་ཏུ་བཟང་པོ་ཟླ་བའི་ཐིག་ལེ་ཧཾ་གི་རྣམ་པར་གནས་ཏེ། སྒོམ་ཚུལ་མགྲིན་པའི་ཐིག་ལེའི་དྲོད་ཡར་སོང་། སྤྱི་བོའ་ཐིག་ལེ་ལ་ཕོག་པས་འོད་དུ་ཞུ་ནས་སྤྱི་བླུགས་སུ་གྱུར་པས་བདེ་བ་ཆེན་པོའི་རང་བཞིན་དུ་གྱུར་ཏེ་བདེ་གསལ་རྣམ་པར་མི་རྟོག་པའི་ཡེ་ཤེས་ནམ་མཁའི་གཟུགས་སུ་སྐྱེས་ནས་ཀུན་གྱི་དངོས་པོར་བདག་གྱུར་པ་ཞེས་བྱ་བ་ཆོས་ཀྱི་སྐུར་གྱུར་པའོ། །གཉིས་པ་འོག་སྒོ་ནི། འོག་སྒོ་མཁའ་གསང་གཉིས་ལ་བརྟེན་ནས་དབབ་བཟུང་ལྡོག་ཁྱབ་ཀྱི་སྦྱོར་བས་སྐད་ཅིག་ལ་བདེ་སྟོང་གཉིས་མེད་ཀྱི་ཡེ་ཤེས་བསྐྱེད་པ་ཐབས་ལམ་ཅིག་ཅར་བ་སྟེ། ཞེས་པས་ཕྱག་རྒྱ་མཚན་ཉིད་དང་ལྡན་པ་བརྟག་པ། བཙལ་བ། འགུགས་པ། འདོད་པའི་བསྟན་བཅོས་ཀྱིས་བདེ་བ་རྒྱས་པར་བྱེད་པ་རྣམས་ནི་བསྙེན་པའི་ཡན་ལག ཡབ་ཡུམ་ལྷར་བསྐྱེད་པ་ལྷའི་འདུ་ཤེས། མཁའ་གསང་རྡོ་རྗེ་དང་པདྨར་བྱིན་གྱིས་བརླབ་པ་སྔགས་ཀྱི་འདུ་ཤེས། ཐབས་འདི་ལ་བརྟེན་ནས་ལྷན་སྐྱེས་ཀྱི་ཡེ་ཤེས་མངོན་དུ་བྱའོ་སྙམ་པ་ཆོས་ཀྱི་འདུ་ཤེས་ཏེ་འདུ་ཤེས་གསུམ་ལྡན་དང་། བརྡའ་བཞིས་བསྣོལ་མར་བསྐུལ་བ་སོགས་ནི་ཉེ་བསྙེན། ཕྱག་རྒྱ་བཞིས་གཉིས་མེད་དུ་རོལ་པ་ན། རྗེས་ཆགས་ཀྱི་རླུང་བསྐྱོད་པས་དམར་ ― MLP018_Page_0026 ―
[མ་དཔེ་གཟིགས་ན་འདིར་གནོན།]
ཆ་འབར་བ་དེས་དཀར་ཆ་ཞུ་བ་ཡས་བབས་ཀྱི་འགྲོས་ཀྱིས་ཕྱིན་པ་ལས་འཁོར་ལོ་བཞིར་དགའ་བཞིའི་རིམ་པས་རྡོ་རྗེ་ནོར་བུའི་རྩེར་འཛག་མེད་དུ་བཟུང་བས་དངོས་པོ་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་བར་འགྱུར་ཏེ། དེ་ལྟར་དབབ་བཟུང་གི་དགོངས་པ་ནི་སྒྲུབ་པ། ཉི་ཟླ་རྡོ་རྗེའི་ལྕེས་བླངས་ཏེ་བཟློག་པའི་སྦྱོར་བས་གྱེན་དུ་དྲངས་ཏེ་འཁོར་ལོའ་གནས་སོ་སོར་མས་བརྟན་གྱི་དགའ་བ་ཉམས་སུ་མྱོང་མཐར་བྱང་སེམས་རྩ་གནས་ཐམས་ཅད་དུ་ཁྱབ་པར་དགྲམ་པའི་སྦྱོར་བས་རང་བཞིན་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་བ་ནི་སྒྲུབ་པ་ཆེན་པོའོ། །དེ་ལྟར་ཡང་རྩ་རྒྱུད་དུ། བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་པོ། །ཞེས་དང་། རྒྱས་པ་ལས། ཕུན་སུམ་ཚོགས་པ་ལྷུན་གྲུབ་རྣམས། །གསང་དབང་མཆོག་གིས་སྦྱིན་པར་བྱེད། །ཅེས་སོ། །གཉིས་པ་གྲོལ་ལམ་ནི། ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །ཅེས་པས་གཙོ་བོར་ཐོས་བསམ་སྒོམ་པས་བསྡུས་པའི་ཤེས་རབ་རྣམ་པ་གསུམ་གྱིས་རང་རྒྱུད་ལ་སྒྲིབ་པར་བྱེད་པའི་འཆིང་བ་ཆོས་ཉིད་དུ་གྲོལ་བར་བྱེད་པ་སྟེ། དཔེ་གང་གིས་མཚོན་ན། རིན་པོ་ཆེ་ཀཽསྟུ་བྷ་དང་ལྷན་ཅིག་བཞག་པའི་རྡོའི་ཁམས་རིམ་གྱིས་གསེར་དུ་འགྱུར་བ་བཞིན་ནོ། །དབྱེ་ན། ལམ་རིམ་ལས། རིང་བའམ་རིམ་དང་ཅིག་ཅར་བའོ། །ཞེས་པས་ཐབས་ལམ་ལ་ལྟོས་ན་གྲོལ་ལམ་རིང་ལམ་དུ་འགྱུར་བས་རིང་བ་ཞེས་སྨོས་ལ། དེ་ལ་རིམ་ཅིག་ཅར་གཉིས་ལས། ཐོག་མར་འཆད་བདེ་བའི་ཕྱིར་ཅིག་ཅར་བ་བཤད་ན། སྐལ་ལྡན་དབང་པོ་ཡང་རབ་ཁ་ཅིག་ལྟ་བ་གཏན་ལ་འབེབས་པའི་སྐབས་སུ་དབྱེར་མེད་ཆིག་ཆོད་དུ་རྟོགས། བར་དུ་བསྒོམ་པ་གོམས་པའི་དུས་སུ་དབྱེར་མེད་ཆིག་ཆོད་དུ་གོམས། མཐར་འབྲས་བུའི་དུས་སུའང་དབྱེར་མེད་ཆིག་ཆོད་དུ་མཐར་ཕྱིན་པར་བྱེད་པ་སྟེ། རྔམ་གློག་ལས། རྒྱུ་ནི་བདེན་གཉིས་ཅིག་ཅར་དུ། །གཅིག་པས་གཅིག་པའི་མཚན་ཉིད་དང་། །སྐུ་གསུང་ཐུགས་ཀྱི་དཀྱིལ་འཁོར་དུ། །ཆོས་ཀུན་རང་བཞིན་རྟོགས་པ་དང་། །སྐྱེ་མེད་དབྱིངས་ཀྱི་བྱིན་རླབས་ལས། ། ― MLP018_Page_0027 ―
[མ་དཔེ་གཟིགས་ན་འདིར་གནོན།]
ཆོས་ཀུན་སྣང་བར་ཤེས་པ་དང་། །དེ་ལྟ་བུ་ཡི་རང་བཞིན་དུ། །གཞན་ལ་མ་བརྟེན་མི་འགལ་བར། །མངོན་སུམ་རིག་པས་ཐག་ཆོད་ན། །རྣལ་འབྱོར་ས་ལ་སླེབས་པ་ཡིན། །ཞེས་དང་། བླ་མ་ལས། ཐིག་ལེ་ཆེན་པོའི་རང་བཞིན་ལ། །བསྒོམ་པ་རྣམ་གསུམ་དུས་གཅིག་རྫོགས། །ཞེས་སོ། །གཉིས་པ་རིམ་གྱིས་པ་ནི། ཡང་རིམ་གྱིས་རྟོགས་གོམས་མཐར་ཕྱིན་པར་བྱེད་པ་ནི་རིམ་གྱིས་པ་སྟེ། ཞེས་པས་བསྟན་ཏེ། དེ་ཅུང་ཟད་བཤད་ན། འདི་ཉིད་ལས། ཤེས་འཇུག་མཚན་ཉིད་འབྱོར་བའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་པས་མཚན་ཉིད་གསུམ་སྟེ། རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་ངེ་འཛིན། ལམ་འགྱུར་གྱི་འབྲས་བུ་རིག་འཛིན་བཞིའོ། །དང་པོ་ནི། ལམ་རིམ་ལས། གཞི་དང་གཏན་ཚིགས་གྲུབ་པའི་དོན། །ཞེས་པས། གཞལ་བྱ་ཞེན་སྣང་ཉིད་འཇལ་བྱེད་གཏན་ཚིག་རྣམས་ཀྱིས་གཏན་ལ་འབེབས་པ་སྟེ། ཇི་ལྟར་འབེབས་ན། ལམ་རིམ་ལས། དེ་ཉིད་དངོས་ལྔ་ཚུལ་དང་ཚིག །ཅེས་པས། སྔོན་འབྱུང་དངོས་ལྔའི་གཏན་ཚིགས། རྗེས་འཇུག་ཚུལ་ལྔའི་གཏན་ཚིགས། ཚིག་ལྔའི་གཏན་ཚིགས་དང་གསུམ་མོ། །དང་པོ་ནི། སྔོན་བྱུང་དུ་སྟོན་པ་སྐུ་ལྔས་སྟོན་པ་ཆོས་སྐུས་འཁོར་ཡེ་ཤེས་རྒྱ་མཚོ་ལ་སྐྱེ་མེད་དོན་གྱི་གསུང་གིས། ལོངས་སྐུས་སྨིན་པ་རྒྱ་མཚོར་དགོངས་པ་བརྡས། སྤྲུལ་སྐུས་མོས་པ་རྒྱ་མཚོར་བརྗོད་ཚིག་གིས། རྡོ་རྗེའི་སྐུས་དབྱེར་མེད་རྡོ་རྗེའི་འཁོར་ལ་རྡོ་རྗེའི་གསུང་གིས། མངོན་བྱང་གིས་རྒྱལ་བ་རྒྱ་མཚོ་ལ་རིག་པ་བྱིན་རླབས་ཀྱིས་བརྡའ་སྤྲོད་པའོ། །རང་རང་གི་འཁོར་ལྔ་ལ་གསུང་ལྔའི་སྒོ་ནས་ཆོས་ཉིད་ཀྱི་དོན་དངོས་སུ་གཏན་ལ་འབེབས་པར་བྱེད་པ་སྟེ། དེ་ཉིད་ལས། ཡང་དག་རྫོགས་སངས་རྒྱས་སྟོན་པ། །སྐུ་ལྔས་འདུལ་བའི་འཁོར་རྣམས་ལ། །གསུང་ལྔ་བསྟན་པ་དེ་ཁོ་ན། །གཏན་ལ་འབེབས་ཤིང་འཇལ་བྱེད་པའོ། །ཞེས་སོ། །གཉིས་པ་ནི། དབང་རྣོན་མཆོག་རྣམས་ལ་སྣང་གྲགས་ཀྱི་ཆོས་འདི་དག་གིས་མཚོན་ནས། དངོས་ལྔས་གཏན་ལ་ཕབ་པའི་སྐུ་ལྔའི་གསུང་གི་ཚུལ་དུ་རྟོགས་པར་བྱེད་པ་སྟེ། དེ་ཉིད་ལས། རྟོགས་དང་ལྡན་པའི་བློ་རྣམས་ལ། །དངོས་པོ་སྣ་ཚོགས་ ― MLP018_Page_0028 ―
[མ་དཔེ་གཟིགས་ན་འདིར་གནོན།]
སེམས་གསང་སྔགས། །དེས་ལུང་ཡིན་ཕྱིར་ཆོས་ཚུལ་སྟོན། །བརྗོད་དང་འདྲ་བར་བརྡ་སྤྲོད་པས། །ངོ་བོ་ཉིད་ཀྱིས་བཤད་པའི་ཕྱིར། །མ་འོངས་དོན་དུ་གཏན་ཚིགས་ངེས། །ཞེས་སོ། །གསུམ་པ་ནི། སྔར་གྱི་ཚུལ་ལྔ་ཉིད་ཚིག་ཏུ་དངོས་སུ་བརྗོད་པ་སྟེ། དེ་ཉིད་ལས། ངོ་བོ་སྣང་ཚིག་རང་སྣང་ཚིག །ལྡེམ་དགོངས་ཚིག་དང་བཀྲི་དྲང་ཚིག །འདོད་རྐྱེན་ཚིག་དང་རྡོ་རྗེའི་ཚིག །རང་རིག་མངོན་གསལ་ཚིག་གིས་མཚོན། །ཞེས་སོ། །དེ་དག་ཀྱང་བསྡུ་ན། དཔྱད་དུ་མེད་པས་གོ་བ་སྐུ་བཞིའི་གཏན་ཚིགས་དང་། དཔྱད་དུ་ཡོད་པས་གོ་བ་སྤྲུལ་སྐུའི་གཏན་ཚིགས་གཉིས་ལས། ཕྱི་མ་ལ། ཚིག་དོན་མཐུན་པའི་གཏན་ཚིགས་དང་། མི་མཐུན་པའི་གཏན་ཚིགས་སོ། །དང་པོ་ལ། ཚད་མ་བཀའ་གཞུང་དང་། སྒྲ་མཐུན་དོན་སྤགས་གཉིས། དང་པོ་ལ། རྟོགས་པ་བཞི། དག་པ་གསུམ། མཉམ་པ་བཞི། བདག་ཉིད་ཆེན་པོའི་གཏན་ཚིགས་དང་བཞི། དང་པོ་ནི། རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པ། །ཞེས་པས། རྒྱུ་གཅིག་པའི་གཏན་ཚིགས་ནི། འཁོར་འདས་གཉིས་ཆོས་ཅན། རང་བྱུང་གི་ཡེ་ཤེས་སུ་རྒྱུ་གཅིག་པ་ཡིན་ཏེ། རྟོགས་མ་རྟོགས་ཀྱི་བྱེད་པས་འཁོར་འདས་གཉིས་སུ་སྣང་བའི་ཕྱིར། ཡིག་འབྲུའི་ཚུལ་ནི། སེམས་ཉིད་སྐྱེ་མེད་ཀྱི་གདངས་ཆོས་ཅན། རོལ་པ་འགག་མེད་ལྷའི་སྐུ་གསུང་ཐུགས་སུ་རང་སྣང་བ་ཡིན་ཏེ། མཚོན་དུ་མེད་པའི་ཡི་གེ་ཨ་ཉིད་མཚོན་བྱེད་ཡི་གེ་དུ་མར་མ་འགག་པར་མཚོན་ནས་རྟོགས་པའི་ཕྱིར། བྱིན་གྱིས་བརླབས་ནི། རང་བཞིན་སྐྱེ་མེད་དང་རོལ་པ་འགག་མེད་གཉིས་ཆོས་ཅན། ལྡོག་པ་སོ་སོར་སྣང་ཡང་ངོ་བོ་དབྱེར་མེད་ཀྱི་བྱིན་རླབས་ཤུགས་ལ་འབྱུང་བ་ཡིན་ཏེ། ལྷག་པ་དོན་དམ་གྱི་སྣང་ལྡོག་ཀུན་རྫོབ་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བའི་ཕྱིར། མངོན་སུམ་པ་ནི། བདེན་པ་དབྱེར་མེད་ཆོས་ཅན། བློའི་སྤྱོད་ཡུལ་ལས་འདས་པ་ཡིན་ཏེ། རང་རིག་མངོན་སུམ་གྱིས་ཡུལ་མེད་རང་གསལ་དུ་རྟོགས་པའི་ཕྱིར། གཉིས་པ་ནི། སྣོད་བཅུད་རྒྱུད་རྣམས་དག་རྟོགས་ཤིང་། ཞེས་པས། སྣོད་བཅུད་རྒྱུད་གསུམ་གྱིས་བསྡུས་པའི་ཆོས་ཐམས་ཅད་ཆོས་ཅན། ཡེ་ནས་སྐུ་དང་ཡེ་ཤེས་ཀྱི་དཀྱིལ་འཁོར་དུ་སངས་རྒྱས་པ་ཡིན་ཏེ། ― MLP018_Page_0029 ―
[མ་དཔེ་གཟིགས་ན་འདིར་གནོན།]
དག་པ་གསུམ་དང་ལྡན་པའི་ཕྱིར། གསུམ་པ་ནི། མཉམ་གཉིས་ལྷག་པའི་མཉམ་གཉིས་ཀྱིས། །ཞེས་པས། ཤེས་བྱ་ཆོས་ཅན། ཡེ་ནས་སངས་རྒྱས་པ་ཡིན་ཏེ། མཉམ་པ་བཞིས་འཁོར་འདས་གཉིས་མེད་དུ་རྟོགས་པའི་ཕྱིར། དེ་ལ་གཉིས་ལས། ཐེག་ཆེན་ཐུན་མོང་བའི་མཉམ་པ་གཉིས་ནི། མྱུ་གུ་བདག་ལས་སྐྱེ་བ་མེད་པ་ལྟ་བུ་རྣམ་གྲངས་པའི་དོན་དམ་དང་། མཐའ་བཞིའི་སྤྲོས་པ་དང་བྲལ་བ་རྣམ་གྲངས་མིན་པའི་དོན་དམ་གཉིས་ཆོས་ཅན། མཉམ་པ་ཡིན་ཏེ། སྤྲོས་པ་བཀག་པའི་སྟོང་ཉིད་ཙམ་དུ་མཉམ་པའི་ཕྱིར། ཆུ་ཟླ་ལྟ་བུ་ལོག་པའི་ཀུན་རྫོབ་དང་། མཁའ་ཟླ་ལྟ་བུ་ཡང་དག་པའི་ཀུན་རྫོབ་གཉིས་ཆོས་ཅན། མཉམ་པ་ཡིན་ཏེ། བདེན་པས་སྟོང་པ་ཙམ་དུ་མཉམ་པའི་ཕྱིར། ཐུན་མོང་མིན་པ་ལྷག་པའི་མཉམ་པ་གཉིས་ནི། རྣམ་གྲངས་པ་མེད་དགག་དང་། རྣམ་:པ་གྲངསམིན་པ་མིན་དགག་གི་སྟོང་ཉིད་གཉིས་ཆོས་ཅན། མཉམ་པ་ཡིན་ཏེ། ལྷག་པ་དོན་དམ་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པའི་ཕྱིར། མ་དག་པ་ལས་སྣང་ལོག་པའི་དང་། དག་པ་ལྷར་སྣང་ཡང་དག་པའི་ཀུན་རྫོབ་གཉིས་ཆོས་ཅན། མཉམ་པ་ཡིན་ཏེ། ལྷག་པ་ཀུན་རྫོབ་སྐུ་དང་ཡེ་ཤེས་ཀྱི་དཀྱིལ་འཁོར་དུ་མཉམ་པའི་ཕྱིར། བཞི་པ་ནི། འཁོར་འདས་ཀྱི་ཆོས་རྣམས་ཆོས་ཅན། སྣང་ལུགས་དུ་མར་སྣང་ཡང་ཡིན་ལུགས་ནས་གཞལ་ན་དེ་ལྟར་མིན་ཏེ། སེམས་ཉིད་སྐྱེ་མེད་རང་བྱུང་གི་ཡེ་ཤེས་ཆེན་པོ་གཅིག་གི་བདག་ཉིད་དུ་ཡེ་ནས་གནས་པའི་ཕྱིར། གཉིས་པ་སྒྲ་མཐུན་དོན་སྤགས་ནི། ཚིག་མདོ་སྔགས་ཐུན་མོང་དུ་གྲགས་ཤིང་དོན་སྔགས་རང་གཞུང་དུ་གཏན་ལ་འབེབས་པས་ཁྱད་པར་དུ་སྤགས་པ་སྟེ། དབྱེ་ན། རང་སྤྱི། མཐའ་བྲལ། རྣམ་པར་དབྱེ་བ། མཚོན་པའི་གཏན་ཚིགས་དང་བཞིའོ། །གཉིས་པ་ཚིག་དོན་མི་མཐུན་པའི་གཏན་ཚིགས་ནི་བསྒྲུབ་བྱ་སྒྲུབ་༈ ༡ དུག་ལྔ་ཆོས་ཅན། ཡང་དག་པར་མ་གྲུབ་སྟེ། རང་རང་གི་ངོ་བོ་སྟོང་པའི་ཕྱིར། དཔེར་ན་ཐག་ཁྲ་སྦྲུལ་དུ་སྣང་ཡང་གཤིས་ལ་སྦྲུལ་མ་གྲུབ་པ་བཞིན་ནོ། ༢ །སྣང་བ་ཕྱི་ནང་གི་ཆོས་ཐམས་ཅད་ཆོས་ཅན། སྤྲོས་པའི་མཐའ་དང་དེ་ལ་ལྟོས་པའི་དབུས་སོགས་ཅིར་ཡང་མ་དམིགས་པ་སྟེ། ཡང་དག་པར་གཅིག་དང་དུ་མ་དང་བྲལ་བའི་ཕྱིར། ༣ བུམ་པ་ཆོས་ཅན། རང་བཞིན་དུ་ངེས་པ་མིན་ཏེ། དབྱིབས་དང་ཁ་དོག་ཆོས་དུ་མ་དང་ལྡན་པས་ཕྱི་ཡུལ་གྱི་རྣམ་པ་ ― MLP018_Page_0030 ―
[མ་དཔེ་གཟིགས་ན་འདིར་གནོན།]
གཅིག་ཏུ་མ་གྲུབ་པའི་ཕྱིར། གཞུའི་རྒྱུ་ཚོགས་བཞིན་ནོ། ༤ །སེམས་ཉིད་ཆོས་ཅན། ཅིར་ཡང་མ་གྲུབ་སྟེ། གཟུང་དུ་མེད་པའི་ཕྱིར། ནམ་མཁའ་བཞིན་ནོ། ༥ །སེམས་ཉིད་ཆོས་ཅན། ཡང་དག་པར་ཅིར་ཡང་མ་གྲུབ་པས་ཅི་ཡང་མིན་ཏེ། སྣང་ཚོད་དུ་མ་འགགས་པར་རང་སྣང་བས་ཅི་ཡང་ཡིན་པའི་ཕྱིར། བྱེད་གཉིས་ཐ་སྙད་པའི་ངོར་གོ་བཟློག་པའི་ཚུལ་གྱིས་སྟོན་པ་སྟེ། ལམ་རིམ་ལས། དེས་མཚོན་ཅི་ཡང་ཡིན་པའི་ཕྱིར། །སེམས་ཆོས་ཅི་ཡང་མ་ཡིན་ནོ། །དེ་ཕྱིར་མ་ཡིན་ཀུན་ཡིན་པས། །ཅི་ཡང་ཡིན་ནོ་ལྷུན་གྱིས་གྲུབ། །ཅེས་སོ། །དེ་ལྟར་གཏན་ལ་ཕབ་པས་རྟོགས་བྱའི་ལྟ་བ་རང་བཞིན་རྒྱུ་རྒྱུད་གནས་ལུགས་ཀྱི་དོན་དེ་བཞིན་ཉིད་དེ་རང་རིག་མངོན་སུམ་གྱིས་ཡུལ་མེད་རང་གསལ་དུ་རྗེན་པར་རྟོགས་པ་ནི་གྲུབ་མཐའ་སྟེ། ལམ་རིམ་ལས། རྒྱ་མཚོ་དྭངས་པའི་གཟུགས་བརྙན་ལྟར། །སྒྲ་བརྟེན་ཡིད་ལ་བྱེད་མིན་པར། །རང་རིག་མངོན་སུམ་དམིགས་བྲལ་བ། །རང་གསལ་གསུམ་བྲལ་མི་འགུལ་བར། །ངེས་པར་གདེངས་སུ་གང་བྱས་པ། །ཐོས་བསམ་བརྟེན་པའི་ལྟ་མཐར་ཕྱིན། །ཞེས་གསུངས། རྩོད་སྤོང་ནི། ཁ་ཅིག ལྟ་བ་ཁྱད་པར་འཕགས་པའི་ཕྱིར། རྫོགས་པ་ཆེན་པོ་མཆོག་གོ་ལོ། །སྔགས་ཀྱི་ཁྱད་ཆོས་ལྟ་བ་མིན། །དབུ་མ་ལས་ལྷག་ག་ལ་ཡོད། །ཅེས་ཟེར་བ་ལྟར། གང་དག་སྔགས་ཀྱི་གྲུབ་མཐའ་ནི་ལྟ་བ་དབུ་མ་ལ་ཐབས་ཁྱད་པར་དུ་འཕགས་པས་ཕྱེ་བ་ཙམ་དུ་བཞེད་པ་ནི་མི་རིགས་ཏེ། དབུ་མ་དང་སྔགས་གཉིས་དོན་དམ་སྤྲོས་བྲལ་དང་ཀུན་རྫོབ་སྒྱུ་མ་ཙམ་དུ་མཉམ་པར་ལྟ་བར་མཐུན་ན་ཡང་དེ་ཙམ་གྱིས་སྔགས་ཀྱི་ལྟ་བ་གཏན་ལ་མི་ཕེབས་པའི་ཕྱིར། ཇི་ལྟར་ཞེ་ན། སྔགས་ཀྱི་ཐུན་མོང་མིན་པའི་ལྟ་བ་ནི་བདེན་པ་དབྱེར་མེད་སྣོད་བཅུད་དག་མཉམ་ཆེན་པོར་གཏན་ལ་འབེབས་དགོས་པའི་རྒྱུ་མཚན་གྱིས་སོ། །གལ་ཏེ་ཁོ་ན་རེ། ཁྱེད་ཅག་གིས་རྒྱུ་རྒྱུད་དེ་རིག་པ་འགྱུར་མེད་ལ་དེ་བཞིན་ཉིད་དུ་བྱེད་པར་འདུག་པས། དེ་འདྲ་དེ་འཁོར་ལོ་ཐ་མའི་ངེས་དོན་གྱི་མདོ་སྡེ་ཟབ་མོ་རྣམས་དང་། དེའི་དགོངས་འགྲེལ་རྒྱུད་བླ་མ་སོགས་ལས་ཀྱང་འབྱུང་བས་རྟོགས་བྱའི་ཡུལ་ལ་ཁྱད་པར་མེད་དོ་ཞེ་ན། རིག་པ་འགྱུར་མེད་ལ་རྒྱུ་རྒྱུད་དུ་བྱེད་པ་འཁོར་ལོ་ཐ་མ་ལས་གསུངས་པ་དང་འདྲ་བ་བདེན་མོད་ཀྱང་། ད་དུང་དེས་སྔགས་ཀྱི་ཐུན་མོང་མིན་པའི་ལྟ་བ་གཏན་ལ་འབེབས་ ― MLP018_Page_0031 ―
[མ་དཔེ་གཟིགས་ན་འདིར་གནོན།]
པར་མི་འགྱུར་ཏེ། དེ་བཞིན་ཉིད་དེ་བླ་ན་མེད་པའི་རྒྱུད་འདིར་རྒྱུ་རྒྱུད་དུ་འཇོག་པའི་ཚེ་ན་ལྷན་ཅིག་སྐྱེས་པ་མི་འགྱུར་བའི་བདེ་བ་ཆེན་པོའི་རང་བཞིན་དུ་བྱས་པ་ནི་སྔགས་ཀྱི་ཁྱད་ཆོས་སུ་དེ་བཞིན་གཤེགས་པ་སྲས་བཅས་བཞེད་པའི་ཕྱིར་ཏེ། རྡོ་རྗེ་མེ་ལོང་ལས། ལུས་ཅན་སྙིང་ལ་གང་གནས་པ། །རང་བྱུང་ཟག་མེད་ཡེ་ཤེས་གཟུགས། །མི་ཤིགས་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ཁྱབ་པ། །མི་གནས་ཆོས་སྐུར་རང་བཞིན་ཡིན། །ཞེས་དང་། དུས་འཁོར་ལས། སྲིད་གསུམ་ཕྲ་རགས་གཟུགས་མིན་འདིར་ནི་རྣམ་པར་ཤེས་པའོ་དེ་བཞིན་གཤེགས་པ་ཉིད་མེད་དེ། །སངས་རྒྱས་ཤེས་རབ་གང་དུའང་གནས་མིན་ཞེས་པའི་ཚིག་ནི་སངས་རྒྱས་པ་རྣམས་སྟོན་པར་འགྱུར། །གང་གིས་འགྱུར་མེད་དང་བྲལ་མི་རྣམས་ཀྱིས་ནི་སྟོང་པ་ཉིད་དོ་བཟུང་ནས་སྟོང་པར་ལྟ་བྱེད་པ། །དེས་ན་གཙོ་བོས་གང་ཞིག་འཕོ་མེད་ལྷན་སྐྱེས་ལུས་ཀྱི་བདེ་བ་དག་ནི་སྔགས་ཀྱི་ཐེག་པར་བསྟན། །ཅེས་དང་། བརྟག་གཉིས་ལས། དམྱལ་བ་ཡི་དྭགས་དུད་འགྲོ་ལས། །ལྷ་དང་ལྷ་མིན་མི་རྣམས་དང་། །བཤང་བའི་སྲིན་བུ་སོགས་ཀྱིས་ཀྱང་། །བདེ་བ་གང་ཕྱིར་མི་ཤེས་པ། །རྟག་ཏུ་རང་བཞིན་བདེ་བ་ཅན། །འཇིག་རྟེན་ཁམས་ནི་གང་དུ་ཡང་། །སངས་རྒྱས་གཞན་དུ་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་བསྟན་པ་མེད། །ཅེས་སོ། །གཞན་ཡང་འཕྲོས་དོན་གཉིས་སྣང་འཁོར་བའི་ཆོས་འདི་རྣམས་ཐག་ཁྲའི་སྦྲུལ་ལྟར་མེད་སྣང་གློ་བུར་བ་དང་། དེ་དག་གི་སྣང་གཞི་གནས་ལུགས་དེ་བཞིན་ཉིད་ཡིན་པའི་གནད་ཀྱིས། རྟོག་ཚོགས་སྐུ་དང་ཡེ་ཤེས་ཀྱི་དཀྱིལ་འཁོར་དུ་དག་པར་གསུངས་པ་ཡང་། ཕུང་སོགས་ཀྱི་སྣང་གཞི་དེ་བཞིན་ཉིད་ཀྱི་རྩལ་གཉུག་མ་སྟེ། ཤིན་ཏུ་ཕྲ་བའི་ཡེ་ཤེས་ཀྱི་རྩ་དང་། ཡེ་ཤེས་ཀྱི་རླུང་དང་། ཡེ་ཤེས་ཀྱི་ཁམས་ཞེས་སམ། ཡང་ན། ས་ཆུ་གཉིས། མེ་རླུང་གཉིས། མཁའ་སེམས་གཉིས་གཉིས་ཟུང་དུ་འཇུག་པ་རྣམས་རིམ་པར་ཡེ་ནས་སྐུ་གསུམ་རྡོ་རྗེ་གསུམ་གྱི་ངོ་བོར་གཞན་གྱིས་མ་བཙལ་བར་ལྷུན་གྱིས་གྲུབ་པ་དང་། ཁམས་ལྔའི་དྭངས་མ་ཡེ་ཇི་བཞིན་པའི་རིགས་ལྔ་དང་། སོགས་ཁོང་ནས་ཡེ་ཤེས་ཀྱི་ཁམས་རིགས་དྲུག་པའི་བདག་ཉིད་དུ་དག་པས་ ― MLP018_Page_0032 ―
[མ་དཔེ་གཟིགས་ན་འདིར་གནོན།]
ལྷའི་བདག་ཉིད་དུ་བཞུགས་པ་གང་ཡིན་པ་སྟེ། སློབ་དཔོན་ཆེན་པོ་སངས་རྒྱས་གསང་བས་ལམ་རིམ་དུ། ཕུང་པོ་ཁམས་དང་སྐྱེ་མཆེད་རྣམས། །གཞི་རྫོགས་ཕྱག་རྒྱ་མ་འདྲེས་གསལ། །ཅིར་ཡང་འགྱུར་ཞིང་ཅིར་ཡང་འགྲུབ། །ཅེས་སོ། །གཉིས་པ་རྐྱེན་འཇུག་པའི་མཚན་ཉིད་ཏིང་ངེ་འཛིན་ལ། མོས་སྒོམ་དང་། ངེས་རྫོགས་གཉིས། དང་པོ་ནི། ཏིང་ངེ་འཛིན་ལ་བརྟན་པ་མ་ཐོབ་ཀྱང་། སྤྱིའི་རྣམ་པ་ཙམ་སྒོམ་པ་མོས་སྒོམ་དང་། ཞེས་དང་། ལམ་སོ་སོ་ནས་གཡོ་ཐོབ་གོམས་བརྟན་གྱི་ཉམས་མཐར་ཕྱིན་པར་བསླབ་མ་ནུས་ན་ཡང་། དོན་སྤྱིའི་ཚུལ་ཙམ་དུ་བསྒོམ་པ་ནི་མོས་སྒོམ་སྟེ། དཔེར་ན། ཐུན་གཅིག་ལ་སྲུང་འཁོར་ནས་བཟུང་ཆོ་གའི་བྱ་བ་ཚར་གཅིག་རྫོགས་པར་བསྒྲུབ་པ་ལྟ་བུའོ། །དེ་ལྟར་ཡང་ལམ་རིམ་ལས། ལམ་ཀུན་སྐད་ཅིག་ཆས་བསྒོམ་ན། །སྤྲོས་པའི་འཁོར་ལོ་མོས་སྒོམ་ཞིང་། །ཞེས་སོ། །གཉིས་པ་ནི། ལམ་སོ་སོའ་ཏིང་ངེ་འཛིན་མཐར་ཕྱིན་པར་བསླབ་པ་ནི་ངེས་རྫོགས་ཏེ། ལམ་རིམ་ལས། སྲིད་པ་རིམ་པར་སྨིན་ཚུལ་གྱིས། །འཇུག་པའི་ཡན་ལག་ལྔ་རུ་བཞག །གང་དག་དངོས་ཀུན་རང་རིག་ཕྱིར། །ཤི་བ་དོན་དམ་བདེན་པ་སྟེ། །སྐྱེ་བ་བར་མ་ཀུན་རྫོབ་ཡིན། །སྐྱེས་པའི་རིམ་གསུམ་གཉིས་མེད་དོན། །ཞེས་པས། གཙོ་བོར་རྫོགས་རིམ་གྱི་སྦྱང་བྱ་བསྟན་ཀྱང་། འཆི་བར་སྐྱེ་གསུམ་གྱི་བག་ཆགས་ལ་ཕྲ་རགས་གཉིས་ལས། རགས་པ་སྦྱོང་བྱེད་བསྐྱེད་རིམ་གྱི་དབང་དུ་བྱས་ན། མར་འཆི་བར་སྐྱེ་གསུམ་དང་སྐྱེ་བ་ལའང་དྲི་ཟའི་སེམས་མངལ་དུ་ཞུགས་ནས་ལུས་རིམ་གྱིས་གྲུབ་སྟེ་སྐྱེས་པའི་བར་དང་། སྐྱེས་ནས་བུ་ཚ་འཁོར་འདབ་རྒྱས་པའི་བར་དང་། བློ་གྲོས་ནར་སོན་ནས་བཅད་རིས་དང་ཁེ་གྲགས་སྒྲུབ་པ་སྟེ། སྐྱེས་པའི་རིམ་པ་གསུམ་གྱི་བག་ཆགས་སྦྱོང་། ཡར་སངས་རྒྱས་ཆོས་ལོངས་སྤྲུལ་གསུམ་ཕྲིན་ལས་དང་བཅས་པའི་རྣམ་པ་ལམ་བྱེད་ཀྱིས་རིགས་ཀྱི་ནུས་པ་གསོས་བཏབ་ནས་འབྲས་བུར་རྫོགས་པར་བྱེད། ལམ་གོང་མ་འོད་གསལ་ལས་སྙིང་རྗེ་ཆེན་པོའི་འཕེན་པས་ཟུང་འཇུག་གི་ལྷར་ལྡང་བའི་སྨིན་བྱེད་དུ་འགྲོ་ཞིང་། ཇི་ལྟར་སྒོམ་པའི་ཚུལ་ནི། འདི་ལྟར་སྣང་བའི་ཆོས་ཐམས་ཅད་མི་དམིགས་པར་བསྒོམ་པ་དེ་ཏིང་སྟོང་པ་ཆེན་ ― MLP018_Page_0033 ―
[མ་དཔེ་གཟིགས་ན་འདིར་གནོན།]
པོའི་རྣལ་འབྱོར། དེ་ལྟར་མ་རྟོགས་པའི་སྒྱུ་མ་ལྟ་བུའི་སེམས་ཅན་ལ་དམིགས་པ་མེད་པའི་སྙིང་རྗེ་བསྒོམ་པ་ཀུན་ཏིང་སྙིང་རྗེ་སྒྱུ་མའི་རྣལ་འབྱོར། དེ་ལས་རྒྱུ་ཏིང་རང་རིག་ཨ་དཀར་པོར་བསྒོམས་ནས་ཡི་གེའི་འཕྲོ་འདུ་ལ་སེམས་སྦྱང་བ་ཕྲ་བ་ཡིག་འབྲུ་དང་། དེ་ལས་ཆོ་ག་གསུམ་ལྟ་བུས་ལྷ་ཡབ་ཡུམ་ཡན་ལག་གི་ལྷ་དགུ་དང་བཅས་བསྒོམ་པ་རགས་པ་ལྷ་སྐུལ་བསླབ་པ་སྟེ་ཕྱག་རྒྱ་གཅིག་པའི་རྣལ་འབྱོར་ཡིན་ལ། འོ་ན། རྩ་ལྷ་གཉིས་ལ་ཡན་ལག་གི་ལྷ་དགུ་དང་བཅས་བསྒོམས་པས་ལྷ་ཉི་ཤུར་འགྱུར་བའི་ཕྱིར་ཕྱག་རྒྱ་གཅིག་པར་ཅིའི་ཕྱིར་འགྱུར་སྙམ་ན། མི་འགལ་ཏེ། རྩ་བའི་ལྷ་ཟུང་འཇུག་གི་ལྷ་སྐུ་གཅིག་ལས་མི་འདའ་བའི་ཕྱིར། དཔེར་ན་ཤིང་གི་སྡོང་པོ་བཞིན་ནོ། །ཕྱག་རྒྱ་སྤྲོས་བཅས་ཀྱི་རྣལ་འབྱོར་ལ་བཞི། དཀྱིལ་འཁོར་སྤྲོས་པ། ཚོམ་བུ། གྲངས། ཞལ་ཕྱག་སྤྲོས་པའོ། །དང་པོ་ནི། ཞི་བ་ལ་དཀྱིལ་འཁོར་རྒྱས་པ་རིགས་ལྔ་རིགས་ཆུང་དང་བཅས་པ་ཡབ་ཡུམ་སྟེ་ལྔ་བཅུའི་སྟེང་དུ། སེམས་དཔའ་སེམས་མ་བཅུ་དྲུག སྒོ་བ་ཡབ་ཡུམ། བྱ་བྱེད། ཐུབ་དྲུག་སྟེ་བརྒྱད་ཅུ་རྩ་གཉིས། འབྲིང་པོ་རིགས་ལྔ་ཡབ་ཡུམ། སེམས་དཔའ་སེམས་མ། སྒོ་སྐྱོང་། བྱ་བྱེད། ཐུབ་དྲུག་བཅས་ཞེ་གཉིས། བསྡུས་པ་རིགས་ལྔ་ཡབ་ཡུམ་བཅུ་དང་། སྒོ་བ་ཡབ་ཡུམ་བརྒྱད་དེ་བཅོ་བརྒྱད་དོ། །ཁྲོ་བོ་ལ་དཀྱིལ་འཁོར་རྒྱས་པ་ཁྲག་འཐུང་རིགས་ལྔ་ཡབ་ཡུམ་རིགས་ཆུང་བཅས་ལྔ་བཅུའི་སྟེང་། གནས་ཡུལ་སྒོ་མ་དབང་ཕྱུག་ཉེར་བརྒྱད་ཁྲོ་བཅུ་ཡབ་ཡུམ་ཉི་ཤུ་བསྣན་པས་བརྒྱ་དང་བཅོ་བརྒྱད། འབྲིང་པོ་ཁྲག་འཐུང་རིགས་ལྔ་ཡབ་ཡུམ་སྟེང་གནས་ཡུལ་སོགས་སྔར་ལྟར་བགྲངས་པས་དོན་བརྒྱད་བསྡུས་པ་དེ་དག་ལས་ཁྲོ་བཅུ་ཡབ་ཡུམ་ཉི་ཤུ་ཕྲི་བས་ལྔ་བཅུ་རྩ་བརྒྱད་དོ། །གཉིས་པ་ནི། ཞི་བ་ལ་ཚོམ་བུ་གཅིག་གསུམ་ལྔ་པ་གསུམ་སྟེ། མི་བསྐྱོད་པ་ཡབ་ཡུམ་ལ་རྡོ་རྗེ་རིགས་ཀྱི་རིགས་ཆུང་ཟུང་བཞི་དང་། སྒོ་བ་ཡབ་ཡུམ་བརྒྱད་དེ་བཅོ་བརྒྱད་ཀྱི་བདག་ཉིད་ཅན་ནི་ཚོམ་བུ་གཅིག་པ་དང་། སྐུ་གསུང་ཐུགས་ཀྱི་ལྷ་གསུམ་ཡུམ་དང་བཅས་པ་རང་རང་གི་རིགས་ཆུང་གིས་བསྐོར་བ་ལ། ཁྲོ་བོ་བཅུ་ལས་སྟེང་འོག་གི་ཁྲོ་བོ་སྤངས་པའི་ཡབ་ཡུམ་ཟུང་བརྒྱད་བསྣན་པའི་ཞེ་དྲུག་ནི་ཚོམ་བུ་གསུམ་པ། རིགས་ལྔ་ཡབ་ཡུམ་རིགས་ཆུང་ ― MLP018_Page_0034 ―
[མ་དཔེ་གཟིགས་ན་འདིར་གནོན།]
དང་བཅས་པ་ལ་ཁྲོ་བོ་ཡབ་ཡུམ་ཉི་ཤུ་སྟེ་བདུན་ཅུ་ནི་ཚོམ་བུ་ལྔ་པའོ། །ཁྲོ་བོ་ལ་རྩ་རྒྱུད་དུ་ཚོགས་སྒྲུབ་ཙམ་ལས་གསལ་བར་མ་གསུངས་ནའང་། ལམ་རིམ་ལས། དེ་ནས་འཁོར་ལོ་གཅིག་པའམ། གསུམ་དང་ལྔ་རུ་བསྒོམ་པར་བྱ། ཞེས་པས་ཞི་བ་དང་མཚུངས་པར་ཚོམ་བུ་གཅིག་གསུམ་ལྔ་པ་གསུམ་སྟེ། གསུམ་ཀ་ལ་མཚུངས་པར་གནས་ཡུལ་སྒོ་སྐྱོང་དབང་མོ་དང་བཅས་ཡོད་པ་གཞིར་བཞག་ནས། ཚོམ་བུ་གཅིག་པའི་སྐབས་དབུས་སུ་རྡོ་རྗེ་ཁྲག་འཐུང་ཡབ་ཡུམ་ལ་རྡོ་རྗེ་རིགས་ཀྱི་རིགས་ཆུང་གི་ཁྲོ་བོ་ཡབ་ཡུམ་བཞིས་བསྐོར་བ་དང་། མཐའ་བསྐོར་དུ་ཁྲོ་བཅུ་ཡབ་ཡུམ་ཉི་ཤུ་སྟེ་དོན་བརྒྱད། ཚོམ་བུ་གསུམ་པའི་སྐབས་སུ་དེ་རྣམས་ཀྱི་སྟེང་དུ་ཤར་ནུབ་ཏུ་བུདྡྷ་དང་པདྨ་ཁྲག་འཐུང་ཡབ་ཡུམ་རིགས་ཆུང་བཅས་བསྣན་པའི་གོ་བརྒྱད། ཚོམ་བུ་ལྔ་པའི་སྐབས་སུ་དེའི་སྟེང་དུ་རཏྣ་དང་ཀརྨ་ཁྲག་འཐུང་རིགས་ཆུང་བཅས་བསྣན་པའི་བརྒྱ་བཅོ་བརྒྱད་དོ། །གསུམ་པ་ནི། སྣང་བ་རྣམ་འབྱེད་ལ་བསླབ་པ་སྟེ། དེ་ལའང་ཞི་ཁྲོ་གཉིས་ལས། ཞི་བ་ལ། ཚོམ་བུ་སྟོང་དང་། ཉི་ཁྲི་བཞི་སྟོང་དང་། བསམ་ཡས་ལྷུན་གྲུབ་ལ་བསླབ་པའོ། །དང་པོ་ནི། ཡན་ལག་གི་ལྷ་བཞི་བཅུ་ཐམ་པ་རྩ་ལྷ་ཡབ་ཡུམ་གཉིས་ལ་ལྡན་པར་བསྒོམ་པ་སྟེ། དེ་ཡང་མི་བསྐྱོད་པ་ལ་མཚོན་ན། བདག་ཉིད་མི་བསྐྱོད་པ་ཡབ་ཡུམ་དུ་གསལ་བའི་ཡབ་ཀྱི་ཡན་ལག་ལྔ་ལ་བྱེད་པོ་དང་རྒྱལ་བ་རིགས་བཞི། མིག་རྣ་བ་སྣ་ལྕེ་བཞིའི་གཡས་ཀྱི་ཆ་ལ་ནང་སེམས་དང་། གཡོན་གྱི་ཆ་ལ་ཕྱི་སེམས་བཞི། རྐང་ལག་གི་མཐིལ་བཞིར་སྒོ་བ་བཞི་རྣམས་དང་། ཡུམ་གྱི་གནས་དེ་རྣམས་སུ་སྔར་གྱི་ཡུམ་རྣམས་བསྒོམ། ཡབ་ལ་ལྷག་པོར། མཚོག་མ་ལ་སོགས་པའི་གནས་དྲུག་ཏུ་ཐུབ་པ་དྲུག་སྟེ། དེ་ལྟར་ཡབ་ཡུམ་བསྡོམས་པས་ཡན་ལག་གི་ལྷ་བཞི་བཅུ་ནི་རགས་པ་དང་ཕྱིར་གནས་པའི་ཆ་ནས་ཐབས་ལྷ་ཞེས་བྱའོ། །དེ་རྣམས་ལ་ཤེས་རབ་ཀྱི་ལྷ་ཡེ་ཤེས་སེམས་དཔའ་བཞི་བཅུ། དེ་དག་ལས་ཐབས་ལྷ་བཞི་བཅུ་པོ་རེ་རེ་ལ་སྐུ་གསུང་ཐུགས་ཀྱི་ལྷ་གསུམ་གསུམ་སྟེ་བརྒྱ་ཉི་ཤུ། ཐབས་ལྷ་དང་བྱིན་རླབས་ཀྱི་ལྷ་བསྡོམས་པ་བརྒྱ་དྲུག་ཅུ་པོ་རེ་རེ་ལ་དབང་ལྷ་ལྔ་ལྔ་སྟེ་བརྒྱད་བརྒྱ། ཀུན་དྲིལ་བས་ཆིག་སྟོང་ངོ་། །གཉིས་པ་ནི་མི་བསྐྱོད་པ་ལ་ཇི་ལྟར་ ― MLP018_Page_0035 ―
[མ་དཔེ་གཟིགས་ན་འདིར་གནོན།]
སྒོམ་པ་བཞིན་དུ། རྒྱལ་བ་རིགས་བཞི། རྒྱལ་མཆོག་ཀུན་བཟང་། སེམས་དཔའ་བརྒྱད་དང་། སྒོ་བ་བཞི་སྟེ་ཡབ་ཡུམ་ཟུང་བཅུ་བདུན་དང་། ཐུབ་པ་དྲུག་རེ་རེ་ལ་ཡང་བསྒོམས་པས་ཉི་ཁྲི་བཞི་སྟོང་སྟེ། རྩ་ལྷ་གང་ཡིན་གྱི་རྟོག་པའི་གནས་སུ་བྱེད་པོ་སྤོ་བ་ཁྱད་པར་རོ། །གསུམ་པ་ནི། མི་བསྐྱོད་པས་གཙོ་བོ་བྱས་པའི་དཀྱིལ་འཁོར་ལ་ཡན་ལག་གི་ལྷ་ཇི་ལྟར་སྒོམ་པ་བཞིན་དུ་ཤར་གྱི་གློ་འབུར་ལ་རྣམ་སྣང་གིས་གཙོ་བྱས་པའི་དཀྱིལ་འཁོར་གྱི་འཁོར་ལོ་སྒོམ་པ་སོགས་རིགས་འགྲེ་བས་བསམ་གྱིས་མི་ཁྱབ་པར་སྤྲོ་བའོ། །ཁྲོ་བོ་ལ། སྟོང་བཞི་བརྒྱ་ལྔ་བཅུ། བདུན་ཁྲི་དྲུག་སྟོང་བརྒྱད་བརྒྱ་ལྔ་བཅུ། བསམ་ཡས་ལྷུན་གྲུབ་ལ་བསླབ་པ་དང་གསུམ་མོ། །དང་པོ་ནི། ལམ་རིམ་ལས། ཡན་ལག་བཀོད་པ་ལྔ་བཅུ་བརྒྱད། །ཆ་ལྔའི་གྲངས་ནི་ཉིས་བརྒྱ་དང་། །དགུ་བཅུའི་ལྷ་རྣམས་ཡན་ལག་ལྡན། །ཞེས་པས་གཙོ་བོ་བཛྲ་ཧེ་རུ་ཀའི་ཡན་ལག་ལྔ་ལ་ཁྲག་འཐུང་ཡབ་ལྔ་དང་། ཡུམ་ལ་ཡུམ་ལྔ། ཡབ་ཀྱི་དབང་རྟེན་གྱི་ནང་རྩར་གཽ་རཱི་མ་བརྒྱད། ཕྱི་རྩར་སིངྷ་མ་བརྒྱད། མཐིལ་བཞི་ལ་སྒོ་མ། མཇིང་མཇུག་གི་ཚིགས་བསྣན་པའི་རྒལ་ཚིགས་ཉེར་བརྒྱད་ལ་དབང་མོ་ཉེར་བརྒྱད་དེ་ཐབས་ལྷ་ང་བརྒྱད། དེ་རྣམས་ལ་ཡེ་ཤེས་སེམས་དཔའ་དང་སྐུ་གསུང་ཐུགས་ཀྱི་ལྷ་རྣམས་རེ་རེ་བསྒོམས་པས་ང་བརྒྱད་པ་ཆ་ལྔ་ལ་ཉིས་བརྒྱ་དང་དགུ་བཅུ། དེ་ལས་ཤེས་རབ་ཀྱི་ལྷ་ང་བརྒྱད་ཕྲི་བའི་ལྷག་ཉིས་བརྒྱ་སོ་གཉིས་པོ་རེ་རེ་ལ་དབུ་རྒྱན་གྱི་ལྷ་ལྔ་ལྔ་སྟེ་ཆིག་སྟོང་ཆིག་བརྒྱ་དྲུག་ཅུ་བྱུང་བ་ཉིས་བརྒྱ་དགུ་བཅུ་ལ་བསྣན་པས་སྟོང་བཞི་བརྒྱ་ལྔ་བཅུའོ། །གཉིས་པ་ནི། ཁྲག་འཐུང་རིགས་ལྔ་ཡབ་ཡུམ་ཟུང་ལྔ་ལ་སྔར་ལྟར་དང་། གནས་ཡུལ་སྒོ་སྐྱོང་དབང་མོ་རྣམས་ལ་མགོའ་གཡས་དང་། རྐང་ལག་གཡས་ཀྱི་མདུན་རྒྱབ་ལ་ཡབ་ལྔ་དང་། མགོའ་གཡོན་དང་། རྐང་ལག་གཡོན་གྱི་མདུན་རྒྱབ་ལ་ཡུམ་ལྔ་བཀོད་དེ་ལྷ་རེ་རེ་ལ་སྟོང་བཞི་བརྒྱ་ལྔ་བཅུ་བསྒོམ་པའི་ངེས་པས་བདུན་ཁྲི་དྲུག་སྟོང་བརྒྱད་བརྒྱ་ལྔ་བཅུའོ། །གསུམ་པ་ནི། སྔར་ཞི་བའི་སྐབས་སུ་བཤད་པས་མཚོན་ནོ། །བཞི་པ་ནི། ཞི་ཁྲོ་གཉིས་ཀ་ལ་རྒྱས་འབྲིང་བསྡུས་གསུམ་སྟེ། ཞི་བ་ལ་རྒྱས་པ་བཤད་རྒྱུད་རྡོ་རྗེ་ནས་ཐུབ་དྲུག་དང་ཡུམ་རྣམས་མ་གཏོགས་ཐམས་ཅད་ ― MLP018_Page_0036 ―
[མ་དཔེ་གཟིགས་ན་འདིར་གནོན།]
ཞལ་གསུམ་ཕྱག་དྲུག་པར་བཤད། འབྲིང་པོ་རིགས་ལྔའམ་གཙོ་བོ་ཙམ་ཞལ་གསུམ་ཕྱག་དྲུག་པ། བསྡུས་པ་ཐམས་ཅད་ཞལ་གཅིག་ཕྱག་གཉིས་པའོ། །ཁྲོ་བོ་ལ་གཙོ་བོ་དབུ་ཕྱག་གྲངས་མེད་པ་དང་། དབུ་དགུ་ཕྱག་བཅོ་བརྒྱད་པ། ཆ་མཐུན་གྱི་རྒྱུད་ལྷ་མོ་སྒྱུ་དྲྭ་ནས་གནས་ཡུལ་གྱི་མ་མོ་སོགས་ཀྱང་ཞལ་གསུམ་ཕྱག་དྲུག་པ་འབའ་ཞིག་བཤད་ཀྱང་། ད་ལྟ་ཕྱག་བཞེས་སུ་རྒྱས་པ་ལ་རིགས་ལྔ་ཞལ་གསུམ་ཕྱག་དྲུག འབྲིང་པོ་གཙོ་བོ་ཙམ་དང་། བསྡུས་པ་ཐམས་ཅད་ཞལ་གཅིག་ཕྱག་གཉིས་པའོ། །ཚོམ་བུ་ཚོགས་སྒྲུབ་ཀྱི་རྣལ་འབྱོར་ལ། ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་བ། བསྙེན་སྒྲུབ་ཡན་ལག་བཞིས་གཞུང་བསྲང་བ། འབྲས་བུ་རིག་འཛིན་འགྲུབ་པའི་དུས་བསྟན་པ་དང་གསུམ། དང་པོ་ལ་ལྔ་ལས། དང་པོ་གང་དུ་སྒྲུབ་པའི་གནས་ནི། བདག་དབང་བར་ཆད་མེད་པའི་གནས་སུ་ཚོགས་ཀྱི་ཁང་པ་སྟེང་འོག་དང་འཁོར་ཁང་རིམ་པ་སུམ་ལྡན་རྩིག་པ་ལ་ཆུ་ཚོན་གྱིས་ཚོམ་བུ་གང་སྒོམ་གྱི་དཀྱིལ་འཁོར་བྲིས་པའོ། །གཉིས་པ་གང་གི་ཚེ་སྒྲུབ་པའི་དུས་ནི། ཡར་གྱི་ཚེས་བརྒྱད་རྒྱུ་སྐར་རྒྱལ་དང་ལྡན་པ་ལ་སོགས་པ་གཟའ་སྐར་ཤིས་པའི་དུས་ནས་སྒྲུབ་པ་ལ་འཇུག་ཅིང་། འབྲས་བུ་འགྲུབ་པའི་དུས་ནི་འོག་ཏུ་འཆད་དོ། །གསུམ་པ་གང་ལ་བརྟེན་ནས་སྒྲུབ་པའི་ཡོ་བྱད་ནི། འཚོ་བ་ཟས་ཀྱི། རྐྱེན་བཟློག་སྨན་གྱི། སྒྲུབ་པ་རྫས་ཀྱི། མཆོད་པ་རྫས་ཀྱི་ཡོ་བྱད་རྣམས་སྤོགས་ཆོག་ལྡང་ཚོད་དུ་བསག་པའོ། །བཞི་པ་སྒྲུབ་པ་པོ་ལ་གང་གིས་སྒྲུབ་པའི་སྟོན་པ་དང་། གང་དང་ལྷན་ཅིག་སྒྲུབ་པའི་འཁོར་གཉིས། དང་པོ་ནི། ཚོགས་ཀྱི་རྡོ་རྗེ་སློབ་དཔོན་ཡོན་ཏན་བརྒྱད་དང་ལྡན་པ་སྟེ། ལམ་རིམ་ལས། སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་འཆང་བརྒྱད་འཆང་བ། །རྣལ་འབྱོར་མཐར་ལྡན་ཤིན་ཏུ་བསྟེན། །ཞེས་སོ། །གཉིས་པ་ནི། སློབ་དཔོན་དང་དགོངས་པ་མཉམ་པའི་རྡོ་རྗེ་རྒྱལ་ཚབ། སྐད་གདངས་ཆེ་ཞིང་ལས་ཁྲིགས་མཁས་པའི་རྡོ་རྗེ་ལས་མཁན། སྦྱོར་བའི་སྒྱུ་རྩལ་ཤེས་པའི་ལས་བཞིའི་གཟུངས་མ། མི་མ་ཡིན་མཐོང་བའི་མིག་རྣོན་གྱིས་ཉུལ་ལེ་ཤེས་ཤིང་ཏིང་འཛིན་ལས་རུང་གིས་བཟློག་ནུས་པའི་རྡོ་རྗེ་སྤྱན་པ། དྲོད་འཛིན་པའི་རྡོ་རྗེ་ ― MLP018_Page_0037 ―
[མ་དཔེ་གཟིགས་ན་འདིར་གནོན།]
བྱ་རོག སྒྲོལ་བའི་ལས་ལ་མཁས་པའི་རྡོ་རྗེ་གིང་། ཁ་བསྐ་ཞིང་གཡོས་ལ་མཁས་པའི་རྡོ་རྗེ་བྱན་པོ། ཕྱི་ནང་གི་བརྡའ་སྦྱོར་མཁས་པའི་རྡོ་རྗེ་རྡུལ་ཕྱགས་སྐྱེས་བུ་སོགས་ཚོམ་བུར་འབྲེལ་བའི་འཁོར་ལོ། །ལྔ་པ་སྒྲུབ་ཆོས་ཕུན་སུམ་ཚོགས་པ་ནི། སྤྲོས་བཅས་མན་ཆད་ལ་བརྟན་པ་ཐོབ་པ་ཞིག་གིས་འོག་ནས་འབྱུང་བའི་བསྙེན་སྒྲུབ་ཀྱི་སྒོ་ནས་སྒྲུབ་པའི་ཐབས་ཕུན་སུམ་ཚོགས་པའོ། །གཉིས་པ་ནི། སྔར་བཤད་པའི་གནས་སུ་དཀྱིལ་འཁོར་གྱི་ལྷ་གནས་སོ་སོར་རྣལ་འབྱོར་པ་ཕོ་མོ་དང་ལྷ་ཡབ་ཡུམ་བྲང་སྤྲད་དེ་སོ་སོར་འདུག་ནས་རིམ་པ་གཤོམ་དང་འབྲེལ་བར་ནུབ་དང་པོ་མགོ་འཛིན་གྱི་བསྙེན་པ་ནས་བཟུང་བསྙེན་སྒྲུབ་ཡན་ལག་བཞིའི་རིམ་པས་སྒྲུབ་པ་སྟེ། དེ་ཡང་། བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་པོ། །ཞེས་པས། སྐབས་འདིར་བསྐྱེད་རིམ་གྱི་དབང་དུ་བྱས་ཏེ། གཙོ་འཁོར་གང་ཡིན་དེའི་ལྷ་སོ་སོའ་ང་རྒྱལ་བརྟན་པོ་ལ་སེམས་རྩེ་གཅིག་ཏུ་གནས་པ་སོར་བཞག་ནས། ནུབ་དང་པོ་མགོ་འཛིན་གྱི་བསྙེན་པ་དང་། ཇི་ཙམ་སྒྲུབ་པའི་ཞག་གྲངས་ཕྱེད་ཚུན་ཆད་ཉེ་བསྙེན་ཏེ་དེ་གཉིས་ལ་འོད་ཟེར་དཀར་པོའི་འཕྲོ་འདུ་བསྣོལ་མས་རྒྱུད་དག་པར་བྱེད་པ་ཉེ་བསྙེན་དང་། ནུབ་ཐ་མ་མ་གཏོགས་པའི་ཕྱེད་ཕན་ཆད་འོད་ཟེར་དམར་པོའི་འཕྲོ་འདུས་དངོས་གྲུབ་བསྐུལ་ཞིང་བསྡུ་བས་བཅུད་དག་པར་བྱེད་པ་སྒྲུབ་པ་དང་། ནུབ་ཐ་མར་འོད་ཟེར་མཐིང་ག་ཚུར་བསྡུ་བས་རྒྱུད་དག་པར་བྱེད་པའི་སྒོ་ནས་སྲོད་ཀྱི་ཆ་ལས་ལྷ་ལ་དངོས་གྲུབ་བླང་། ནམ་གུང་གི་ཚེ་ཏ་ན་སྒྲོལ་བའི་མཛད་སྤྱོད་ཀྱིས་དགྲ་ལས་དངོས་གྲུབ་བླང་། ཐོ་རེངས་ཡུམ་དང་གཉིས་སུ་མེད་པར་སྦྱོར་བའི་སྒོ་ནས་ཨ་ལིའི་མཛད་སྤྱོད་ཀྱིས་ཡུམ་གྱི་མཁའ་ལས་དངོས་གྲུབ་ལེན་པ་སྒྲུབ་པ་ཆེན་པོ་སྟེ། ཟླ་གཅིག་ལ་དཔེར་མཚོན་ན། ལམ་རིམ་ལས། ཟླ་ཕྱེད་ཕྱེད་ཞལ་ཉེ་བསྙེན་པ། །ལྷ་གསལ་འཕྲོ་འདུས་སྣོད་དུ་རུང་། །བཅོ་ལྔ་མར་ཕྱེད་སྒྲུབ་པ་སྟེ། །འཕྲོ་འདུ་བསྣོལ་མས་སྒྲུབ་པར་བྱ། །ཞག་གྲངས་ཚང་ནས་རྟགས་བྱུང་ན། །དངོས་གྲུབ་བཟླས་བླང་སྒྲུབ་ཆེན་པོ། །ཞེས་སོ། །གསུམ་པ་ནི། དེ་ལྟར་ཟླ་བ་དྲུག་སྤོགས་ཆོག་དང་བཅས་པས་རིག་འཛིན་གྱི་འབྲས་བུ་འགྲུབ་པ་སྟེ། འདི་བསྐྱེད་རིམ་ཡིན་པས་རིག་འཛིན་ཡང་ཐུན་མོང་གི་ ― MLP018_Page_0038 ―
[མ་དཔེ་གཟིགས་ན་འདིར་གནོན།]
དངོས་གྲུབ་ལས་རྒྱ་དང་ཡེ་རྒྱའི་ཁྱད་པར་གྱིས་འདོད་པ་དང་གཟུགས་ཀྱི་ལྷ་དང་སྐལ་བ་མཉམ་པའི་རིག་འཛིན་ལ་སྦྱོར་བའོ། །ད་ནི་ལམ་གྱི་གཞུང་ཤིང་རྫོགས་རིམ་ལྟར་བཤད་ན། འཆི་བ་འོད་གསལ་དང་རྗེས་མཐུན་སྟོང་པ་ཆེན་པོ། བར་དོ་དང་སྙིང་རྗེ་སྒྱུ་མ། སྐྱེས་པའི་རིམ་པ་དང་པོ་དང་ཕྱག་རྒྱ་གཅིག་པ། གཉིས་པ་དང་སྤྲོས་བཅས། གསུམ་པ་དང་ཚོགས་སྒྲུབ་སྟེ་ལྔའོ། །དང་པོ་སྟོང་ཆེན་ནི། ལུས་ཅན་རྣམས་འཆི་བའི་ཚེ་འབྱུང་བ་ལྔ་དང་དཀར་དམར་ནག་པོའི་ལམ་གསུམ་རིམ་པར་ཐིམ་པས་རྣམ་པར་མི་རྟོག་པའི་འོད་གསལ་འཆར་ཏེ། ཐལ་རྒྱུད་ལས། འགྲོ་བ་མ་ལུས་ཐམས་ཅད་དག །གནས་པའི་སྟོབས་ནི་ཟད་པ་ན། །འདུས་པ་ལྔ་ཡི་རིམ་པ་ཡིས། །བག་ཆགས་སྙིགས་མ་རང་ཟད་ནས། །འོད་གསལ་སྟོང་པར་སྣང་བ་ན། །རེ་དོགས་མེད་པ་ནམ་མཁའ་བཞིན། །ཞེས་སོ། །དེའི་བག་ཆགས་སྦྱོང་བའི་ཕྱིར་དེ་དང་རྣམ་པ་མཐུན་པའི་ལམ་སྒོམ་ཚུལ་ཡང་། ལྟ་བ་གཏན་ལ་འབེབས་པ་གཞིར་བཞག་སྟེ། བསམ་གཏན་ལ་ཚེར་མ་མི་འབྱུང་བའི་གནས་སུ་ལུས་གནད་རྣམ་པར་སྣང་མཛད་ཀྱི་ཆོས་བདུན་དང་ལྡན་པས། རིག་པ་མ་བཅོས་པའི་ངང་དུ་སོ་མར་འཇོག་པ་རིག་པ་སྤྱི་བླུགས་དང་། སྔར་ཐོས་བསམ་གྱི་ལྟ་བ་དྲན་པར་བྱས་ནས་དེའི་ངང་དུ་འཇོག་པ་མཐོང་བའི་རྗེས་ལ་འཇོག་པ་སྟེ། འཇོག་ཐབས་གཉིས་གང་རུང་གིས་དོན་དམ་རྣམ་པར་མི་རྟོག་པའི་ཏིང་འཛིན་ལ་མཉམ་པར་འཇོག་པ་ཉིན་མོའ་རྣལ་འབྱོར་དང་། མཚན་མོ་གཉིད་འཐུག་གི་འོད་གསལ་འཛིན་པའི་མན་ངག་ཉིས་སྦྲེལ་ཏེ་ཉིན་མཚན་ཁ་སྦྱོར་དུ་ཉམས་སུ་ལེན་པའི་སྒོ་ནས་ཉམས་ལྔ་མཐར་ཕྱིན་པར་བསླབ་པའོ། །གཉིས་པ་སྙིང་རྗེ་སྒྱུ་མ་ནི། སྔར་གྱི་འཆི་ཁའི་འོད་གསལ་ངོས་མ་ཟིན་པ་ལས་སྣང་གསུམ་དང་འབྱུང་ལྔའི་བགྲོད་པ་གོ་བཟློག་གི་ཚུལ་དུ་ལངས་ཏེ་བར་དོའ་ཡིད་ལུས་སྒྱུ་མ་ལྟ་བུར་གྲུབ་སྟེ། སྔ་མ་ལས། བར་མ་སྒྱུ་མའི་ལུས་ཐོབ་པས། །མ་སྤངས་ལོངས་སྤྱོད་རྫོགས་པར་བཤད། །ཅེས་སོ། །དེའི་བག་ཆགས་སྦྱོང་བའི་ཕྱིར་རྗེས་མཐུན་གྱི་ལམ་སྒོམ་ཚུལ་ཡང་། སྔར་གྱི་སྟོང་ཆེན་འོད་གསལ་གྱི་ངང་དུ་སེམས་འགགས་པས། དུ་བ་དང་། སྨིག་རྒྱུ་དང་། མེ་ཁྱེར་ལྟ་བུ་དང་། མར་མེ་ལྟ་བུ་དང་། དཀར་ ― MLP018_Page_0039 ―
[མ་དཔེ་གཟིགས་ན་འདིར་གནོན།]
དམར་ནག་པོའི་ལམ་གསུམ་ལ་སོགས་པའི་སྟོང་གཟུགས་ཀྱི་སྣང་བ་ཤར་བ་ན་ཉིན་གྱི་རྣལ་འབྱོར་སད་པའི་སྣང་བ་དེ་དག་དང་། མཚན་མོ་རྨི་ལམ་གྱི་སྣང་བ་ཐམས་ཅད་སྒྱུ་མ་ཆུ་ཟླ་ལྟར་མཐོང་བ་ལས་དམིགས་མེད་བདེ་ཆེན་གྱི་སྙིང་རྗེ་མ་འགགས་པར་ཤར་བ་ལ་གོམས་པར་བྱེད་པའོ། །གསུམ་པ་ཕྱག་རྒྱ་གཅིག་པ་ནི། སྐྱེས་པའི་རིམ་པ་དང་པོའི་བག་ཆགས་སྦྱོང་བའི་ཕྱིར་དེ་དང་རྗེས་སུ་མཐུན་པའི་ལམ་སྟེ། སྣང་བ་རིས་མེད་ལས་སྙིང་རྗེ་ཆེན་པོའི་འཕེན་པ་དང་། ཏིང་ངེ་འཛིན་གྱི་རྐྱེན་གྱི་ཆུ་དྭངས་པ་ལ་གཟུགས་བརྙན་ཤར་བ་ལྟར་ཞུ་བདེ་དང་མཚུངས་ལྡན་དུ་བྱུང་བའི་ལྷ་སྐུ་ཕྱག་རྒྱ་གཅིག་པ་རང་ཤར་གྱིས་སྣང་བ་ཐམས་ཅད་ལ་རྒྱས་ཐེབས་པའོ། །བཞི་པ་ཕྱག་རྒྱ་སྤྲོས་བཅས་ནི། སྐྱེས་པའི་རིམ་པ་བར་མའི་བག་ཆགས་སྦྱོང་བའི་ཕྱིར། དེ་དང་རྗེས་མཐུན་གྱི་ལམ་སྟེ། སྔར་གྱི་ལྷ་སྣང་དེ་ལས་ཆེས་ཆེར་འཕེལ་བས་སྣང་བ་ཐམས་ཅད་ཟུང་འཇུག་གི་ལྷ་གཙོ་འཁོར་དང་ཚོམ་བུའི་རྣམ་པར་མངོན་སུམ་དུ་སྤྲོས་ཏེ་མ་འདྲེས་ཡོངས་སུ་འཆར་བ་ལ་གོམས་པར་བྱེད་པའོ། །ལྔ་པ་ཚོམ་བུ་ཚོགས་སྒྲུབ་ནི། སྐྱེས་པའི་རིམ་པ་གསུམ་པའི་བག་ཆགས་སྦྱོང་བའི་ཕྱིར། དེ་དང་རྗེས་མཐུན་གྱི་ལམ་སྟེ། ཚོམ་བུ་གཅིག་གསུམ་ལྔ་པ་གང་རུང་གི་སྒོ་ནས་སྤྲོས་བཅས་བསྐྱེད་རིམ་དང་ཕྱོགས་མཐུན་དུ་སྒྲུབ་པའམ། སྤྲོས་མེད་རྣལ་འབྱོར་ཕོ་མོ་གཙོ་བོ་ཡབ་ཡུམ་ཙམ་ཚོགས་པ་ལ་བརྟེན་པའམ། ཤིན་ཏུ་སྤྲོས་མེད་ནི་ཡབ་མི་འགྱུར་བའི་བདེ་ཆེན་ཉིད་ཡུམ་རྣམ་ཀུན་མཆོག་ལྡན་གྱི་སྟོང་པ་ཉིད་ཁ་སྦྱོར་གྱིས་སྒྲུབ་པ་སྟེ། གང་ལྟར་ཡང་། དབང་པོ་རབ་འབྲིང་ཐ་གསུམ་གྱི་དབྱེ་བས་ཟླ་བ་དྲུག་གམ་ལོ་གཅིག ལོ་གཅིག་དང་ཟླ་བ་གཉིས། ལོ་གཅིག་ཟླ་བ་བཞི་རྣམས་ཀྱིས་ནང་གི་མངོན་བྱང་ལྔ་ལ་བརྟེན་ནས་ཟག་མེད་མཐོང་ལམ་རྣམ་གཉིས་གང་རུང་ལ་སྦྱོར་བར་བྱེད་དེ། ལམ་རིམ་ལས། ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །ཅེས་སོ། །ད་ནི་ཟག་ལྡོག་ཡོད་མེད་ཀྱི་མུ་བཞི་བརྩི་བར་བྱ་སྟེ། དེ་ལ་ཟག་ལྡོག་གཉིས་ཀ་ཡོད་པའི་མུ། ཟག་པ་ཡོད་ལ་ལྡོག་པ་མེད་པའི་མུ། ཟག་པ་མེད་ལ་ལྡོག་པ་ཡོད་པའི་མུ། ཟག་ལྡོག་གཉིས་ཀ་མེད་ ― MLP018_Page_0040 ―
[མ་དཔེ་གཟིགས་ན་འདིར་གནོན།]
པའི་མུའོ། །དང་པོ་ནི། སྟོང་ཆེན། སྙིང་རྗེ་སྒྱུ་མ། ཕྱག་རྒྱ་གཅིག་སྤྲོས་ཏེ་ཚོགས་ལམ་གྱི་རྣལ་འབྱོར་བཞི་སྟེ། ལམ་རིམ་ལས། དེ་ཕྱིར་ལམ་བཞིར་ཟག་ལྡོག་ཡོད། །ཅེས་སོ། །གཉིས་པ་ནི། སྦྱོར་ལམ་ཚོམ་བུ་ཚོགས་སྒྲུབ་སྟེ། སྤྱོད་པའི་དུས་གྲངས་ངེས་པས་ཟག་མེད་ལ་དངོས་སུ་སྦྱོར་བའི་བར་ཆད་མེད་པ་མ་ཡིན་པའི་ཕྱིར། གསུམ་པ་ནི། དམན་ལམ་སྔོན་དུ་སོང་བའི་འཕགས་པ་དགྲ་བཅོམ་པ་སྔགས་ཀྱི་ཚོགས་ལམ་ལ་གནས་པ་ལྟ་བུ་སྟེ། དེ་ནི་རང་དོན་ཡིད་བྱེད་ཀྱི་བསམ་པས་ལྡོག་པ་སྲིད་པའི་ཕྱིར། ལུང་ལས། ཇི་སྲིད་ས་བརྒྱད་མ་ཐོབ་བར། །དེ་སྲིད་ཐེག་པ་དམན་པས་འཇིག །ཅེས་སོ། །བཞི་པ་ནི། སློབ་པའི་ཟུང་འཇུག་རིག་འཛིན་བཞི་སྟེ། ལམ་རིམ་ལས། ཟག་ཀུན་ཟད་པའི་རིགས་ཆེན་འདི། །ཇི་ལྟར་སྤྱད་ཀྱང་ལྡོག་པ་མེད། །ཅེས་སོ། །འོ་ན་ཟག་པ་ཞེས་བྱ་བ་གང་ལ་ཟེར་ན། སྤྱིར་མངོན་པ་སོགས་ལས་ཟག་པའི་སྒོ་དྲུག་བཤད་ཀྱང་། སྐབས་འདིར་ཟག་པའི་གཙོ་བོ་དང་། ཡན་ལག་གཉིས། དང་པོ་ནི། ཀུན་ནས་ཉོན་མོངས་པ་དང་བཅས་པའི་ལས་ཀྱིས་ཁམས་གསུམ་དུ་ཟག་ཅིང་འཕོ་བ་སྟེ། སྤར་ཁབ་ལས། དེ་དག་འཇིག་རྟེན་པ་ལ་ཡོད་པ་ནི་འཛིན་པའི་ཕྱིར་ཟག་པར་འགྱུར་ལ། ཞེས་སོ། །གཉིས་པ་ནི། ལུས་རང་དབང་མེད་པར་འདོར་བ་ལུས་ཀྱི་དང་། བདེ་མི་བདེ་རང་དབང་མེད་པར་མྱོང་བ་ཁམས་ཀྱི་དང་། རང་དབང་མེད་པར་ལུས་ལེན་པ་སྐྱེ་གནས་ཀྱི་ཟག་པ་དང་གསུམ་མོ། །གསུམ་པ་ལམ་འགྱུར་གྱི་འབྲས་བུ་རིག་འཛིན་བཞི་ནི། ཟག་ལྡོག་གཉིས་ཀ་མེད་པའི་ལམ་མཐོང་སྒོམ་མཐར་ལམ་གསུམ་གྱིས་བསྡུས་པ་རིག་འཛིན་བཞི་སྟེ། དེ་ཡང་མཐོང་ལམ་པ་ལ། ཆོས་ཉིད་ཀྱི་བདེན་པ་མཐོང་ཡང་བློའི་ནུས་སྟོབས་ཆེ་ཆུང་གིས་འབྱུང་བ་སྙིགས་མའི་ལུས་ཡེ་ཤེས་ཀྱི་མེས་སྦྱོང་བར་མ་ནུས་པ་རྣམ་སྨིན་རིག་འཛིན་དང་། སྦྱོང་བར་ནུས་པས་སྐྱེ་འཇིག་མེད་པ་དྭངས་མའི་ལུས་སུ་གྱུར་པ་ལམ་མཆོག་ཡོངས་སུ་གྱུར་པའི་ཚེ་དབང་གཉིས་ཏེ། ལམ་ཆུང་ལས། ནུས་པ་ཐོབ་དང་མ་ཐོབ་པའི། །མཐོང་ལམ་གཉིས་སུ་འགྱུར་བ་ཡིན། །ཞེས་སོ། །དེ་ལ་རྣམ་སྨིན་རིག་འཛིན་ནི། ལུས་རྣམ་སྨིན་ཤ་ཁྲག་གི་ཕུང་པོ་དང་མ་བྲལ་བ། ― MLP018_Page_0041 ―
[མ་དཔེ་གཟིགས་ན་འདིར་གནོན།]
ཡིད་འོད་གསལ་གྱི་ལྷ་སྐུར་སྨིན་པ། ཇི་ལྟར་འདོད་པ་བཞིན་ལུས་རྒྱ་དང་བྲལ་མ་ཐག་ཕྱག་རྒྱ་ཆེན་པོའི་རིག་འཛིན་ལ་སྦྱོར་ངེས་པ་སྟེ། ཆོས་གསུམ་དང་ལྡན་པ་ཡིན་ནོ། །དེ་ལྟར་ཡང་ལམ་རིམ་ལས། ཡིད་ཀྱིས་ལྷ་ཡི་གཟུགས་བཟུང་ཞིང་། །ལུས་ཀྱི་རྒྱ་མདུད་གྲོལ་གྱུར་ན། །ཕྱག་རྒྱའི་སྐུ་ཉིད་གསལ་གྱུར་པས། །རྣམ་པར་སྨིན་ཞེས་དེ་ལ་བརྗོད། །ཅེས་སོ། །སྤྱོད་པ་ནི། བདག་དོན་དུ་བཀོད་པ་དཀྱིལ་འཁོར་གྱི་བྱ་བས་ཚོགས་གཉིས་རྫོགས་པར་བྱེད་ཅིང་། ཕྲིན་ལས་བཞིའི་སྒོ་ནས་གཞན་དོན་རྫོགས་པར་བྱེད། ཟག་མེད་ལྷའི་སྤྱན་རྣམ་པར་དག་པ་ལ་སོགས་པའི་ཡོན་ཏན་དང་ལྡན་ལ། གླིང་བཞི་པའི་འཇིག་རྟེན་ཙམ་དུ་སྐུས་དོན་མཛད་ཅིང་། སྤྲུལ་གཟུགས་སྟོན་ཚུལ་ཚེ་དབང་དང་ཆ་འདྲ་བས་དོན་མཛད་དོ། །ཞར་བྱུང་དོགས་སེལ་ནི། རྣམ་སྨིན་གྱི་ལུས་དྭངས་མའི་སྐུར་བསྒྱུར་མ་ནུས་པས་མཐོང་ལམ་དུ་ཅིའི་ཕྱིར་འགྱུར་ཞེ་ན། སྐྱོན་མེད་དེ། བྱང་ཆུབ་སེམས་དཔའ་དབང་རྟུལ་གྱི་ཟག་བཅས་ཀྱི་ལུས་ས་བདུན་པའི་བར་འགྲོ་བར་མདོ་ལས་བཤད་པ་བཞིན་ནོ། །ཚེ་དབང་རིག་འཛིན་ནི། སེམས་འོད་གསལ་གྱི་ལྷ་སྐུར་སྨིན་ཅིང་ཕྲ་ཡང་ལ་སོགས་པའི་འཇའ་ལུས་ཀྱི་ཡོན་ཏན་ཁྱད་པར་ཅན་དང་ལྡན་པའི་རྡོ་རྗེའི་ལུས་ཅན་ཏེ། ལམ་རིམ་ལས། དོན་མཐོང་འཇུག་པ་མཐར་ཕྱིན་པའི། །ཚོགས་སྤྱོད་སྒྲུབ་པའི་དངོས་གྲུབ་ཀྱིས། །ལུས་ཁམས་སྐྱེ་གནས་ཟག་པ་ཟད། །རྡོ་རྗེའི་ལུས་འགྱུར་ཚེ་ཡི་རིག །ཅེས་སོ། །སྤྱིར་ཚེ་དབང་ལ། སྨན་གྱི་བཅུད་ལེན་ལ་བརྟེན་པའི་དང་། ཐིག་ལེ་དབབ་བཟུང་སོགས་ལ་བརྟེན་པའི་དང་། སྒྲོལ་མ་རླུང་ལ་བརྟེན་པའི་དང་། ལམ་མཆོག་ཡོངས་སུ་རྫོགས་པའི་ཚེ་དབང་དང་བཞི་ལས། འདི་ནི་ཕྱི་མ་སྟེ། ཟག་མེད་མཐོང་ལམ་གྱི་ཡེ་ཤེས་ཇི་ལྟ་བ་བཞིན་མངོན་སུམ་དུ་མཐོང་བའི་ཕྱིར། སྤྱོད་པ་ནི། བདག་དོན་དུ་ཀུན་འགྲོའི་དྲི་མ་སྦྱོང་ཞིང་། གཞན་དོན་དུ་ཆོ་འཕྲུལ་བཞི་དང་ཕྲིན་ལས་བཞི་སོགས་ཀྱི་དོན་མཛད། ཆ་ལུགས་ནི། མི་དང་འདོད་གཟུགས་ཀྱི་ལྷའི་གཙོ་བོའི་ཆ་བྱད་དུ་སྟོན་པ་སྟེ། སྔ་མ་ལས། ལྷ་མིའི་རྒྱལ་པོའི་སྐྱེ་བ་འཛིན། །ཞེས་སོ། །དེ་ཡང་ལྷ་མི་གཞན་དང་ཁྱད་པར་ཆེ་སྟེ། སྔ་མའི་འཕྲོས་ལས། མི་དང་ལྷ་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ ― MLP018_Page_0042 ―
[མ་དཔེ་གཟིགས་ན་འདིར་གནོན།]
ཀྱང་། །ཁྱད་པར་ས་ལ་གནས་འགྱུར་ཡིན། །ཆ་བྱད་དེ་ཉིད་ཀྱིས་ཆོས་སྟོན། །ཞེས་སོ། །མངོན་ཤེས་ཀྱི་ཡུལ་དོན་ཡང་། དབང་ཤེས་ཉི་ཤུ་རྩ་ལྔས་གླིང་བཞི་བྱེ་བ་ཕྲག་བརྒྱར་དུས་གཅིག་ཏུ་དོན་མཛད་དོ། །སྒོམ་ལམ་པ་ནི། ཡེ་ཤེས་སྒྱུ་མའི་སྐུ་ཅན་ཕྱག་ཆེན་རིག་འཛིན་ཏེ། ལམ་རིམ་ལས། རང་སེམས་ཕྱག་རྒྱ་ཆེན་པོ་སྟེ། །སྒོམ་པ་གང་ཡིན་མངོན་འགྱུར་སྐུ། །ཐུན་མོང་མཆོག་གི་མཚན་དཔེར་ལྡན། །ལོངས་སྤྱོད་གཉིས་པ་ཕྱག་རྒྱའི་རིག །ཅེས་དང་། ཡེ་ཤེས་སྐུ་ཡི་ཆ་ལུགས་ཅན། །འབྱུང་བ་རྡོ་རྗེའི་ལུས་ལས་གྲོལ། །ཞེས་སོ། །དེ་ལ་ཡང་སྔ་མ་ལས། རྡོ་རྗེ་འཁོར་ལོ་རིན་ཆེན་དང་། །པདྨ་རལ་གྲིའི་རིག་འཛིན་འགྱུར། །ཞེས་པས། འདི་ལ་བཤད་ཚུལ་གཉིས་ཏེ། སྔར་རང་ཉིད་ཀྱིས་གང་བསྒོམས་ཀྱི་ལྷག་པའི་ལྷ་རིགས་ལྔ་གང་ཡིན་གྱི་ཆ་ལུགས་འཛིན་པར་འཆད་པའམ། ཡང་ན་བསྒོམ་ལམ་ས་གཉིས་པ་ནས་བཅུ་པ་ཙམ་གྱི་བར་ས་དགུ་ལ་རིམ་པར་སྦྱར་ཏེ། ས་གཉིས་པ་ནས་ལྔ་པའི་བར་བཞི་ལ་རྡོ་རྗེའི་རིག་འཛིན་ཞེས་བྱ་སྟེ། རྟོགས་པའི་ཡེ་ཤེས་རྡོ་རྗེ་ལྟ་བུས་རང་སའི་སྒྲིབ་པ་འཇོམས་པའི་ཕྱིར། ས་དྲུག་པར་ཤེར་ཕྱིན་གཙོ་བོར་སྤྱོད་ཅིང་ཆོས་འཁོར་བསྐོར་བའི་ཕྱིར་དང་། ས་བདུན་པའང་ཐབས་མཁས་པ་འཁོར་ལོ་ལྟར་གྱུར་པས་ས་དེ་གཉིས་སུ་འཁོར་ལོའ་རིག་འཛིན་ཞེས་བྱའོ། །བརྒྱད་པར་མི་རྟོག་པའི་ཡེ་ཤེས་ལ་དབང་ཐོབ་པས་རིན་པོ་ཆེའི་རིག་འཛིན་དང་། དགུ་པར་ཆགས་པ་མེད་པས་ཞིང་སྦྱོང་ཞིང་དོན་མཛད་པས་པདྨའི་རིག་འཛིན་དང་། བཅུ་པར་ཕྲིན་ལས་ཕུན་སུམ་ཚོགས་པས་སེམས་ཅན་གྱི་དོན་བྱེད་པའི་ཕྱིར་རལ་གྲིའི་རིག་འཛིན་ནོ། །ཆ་བྱད་ཟུང་འཇུག་ལྷའི་སྐུ་མཚན་དཔེ་རྫོགས་པའི་བདག་ཉིད་ཅན་བདག་དོན་དུ་ལྷན་ཅིག་གནས་པའི་དྲི་མ་སྦྱོང་ཞིང་། གཞན་དོན་དུ་རྔོན་པ་དང་སྨད་འཚོང་མ་ལ་སོགས་པ་གང་འདུལ་གྱི་སྤྲུལ་གཟུགས་སུ་སྟོན་པར་བྱེད་དེ། སྔ་མ་ལས། མཉམ་བཞག་ངང་ལས་མ་གཡོས་བཞིན། །ཞེས་དང་། རྔོན་དང་སྨད་འཚོང་ལ་སོགས་པ། །སྤྲུལ་པའི་ལུས་ཀྱིས་འདུལ་བར་བྱེད། །ཅེས་སོ། །མངོན་ཤེས་ཀྱི་ཡུལ་དོན་ཡང་། དབང་ཤེས་ཉེར་ལྔའི་ཡོན་ཏན་དང་ལྡན་པ་ཚེ་དབང་དང་འདྲ་ནའང་། འདིར་གསལ་བརྟན་གྱི་ཁྱད་པར་དུ་བྱས་ཤིང་། ― MLP018_Page_0043 ―
[མ་དཔེ་གཟིགས་ན་འདིར་གནོན།]
ལོངས་སྐུའི་ཞིང་དང་མཉམ་པར་དོན་བྱེད་དེ། སྔ་མ་ལས། དྲུག་དང་ལྔ་ཡི་ཡན་ལག་བཅས། །ཤེས་པའང་འདྲ་མོད་བཞི་སོགས་ཀུན། །དེ་སྙེད་ཡུལ་གྱི་ཁྱད་པར་དང་། །དོན་རྫོགས་མཐུ་དང་གདུལ་བྱས་སྤགས། །ཞེས་སོ། །དེ་ལྟར་ས་བཅུ་ཙམ་སྒོམ་ལམ་དུ་བསྡུས་ནས་རྒྱུན་མཐའི་ཡེ་ཤེས་དག་ལས་རྣམ་གྲོལ་ལམ་དང་། ཁྱད་པར་ལམ་ནི་མཐར་ལམ་ལྷུན་གྲུབ་རིག་འཛིན་ཏེ། ཡན་ལག་བདུན་དང་ལྡན་པའི་ཡེ་ཤེས་གོང་མའི་གཞིར་གྱུར་པའོ། །ཆ་ལུགས་ནི། སྐུ་ལྔ་ལྷུན་གྲུབ་རྡོ་རྗེ་འཆང་གི་ཆ་ལུགས་འཛིན་པ་སྟེ། དྲུག་པའི་རྒྱལ་ཚབ་མཛད་པ་པོ་གསང་བའི་བདག་པོ་བཞིན་ནོ། །སྤྱོད་ཚུལ་ནི་བདག་དོན་དུ་རྡོ་རྗེ་ལྟ་བུའི་ཏིང་ངེ་འཛིན་བྱ་བ་ནང་གི་མངོན་བྱང་གིས་ཤེས་སྒྲིབ་ཕྲ་བ་སྣང་གསུམ་གྱི་དྲི་མ་སྦྱོང་ཞིང་། གཞན་དོན་རྗེས་ཐོབ་ལ་སངས་རྒྱས་དང་ཆ་འདྲ་བར་འགྲོ་བའི་དོན་མཛད། སྤྲུལ་གཟུགས་ཀྱང་མཛད་པ་བཅུ་གཉིས་སོགས་མཆོག་གི་སྤྲུལ་སྐུ་དང་ཕྱོགས་མཐུན་དུ་སྟོན། མངོན་ཤེས་ཀྱི་ཡུལ་དོན་ཇི་སྙེད་མཁྱེན་པའི་ཡུལ་རྒྱལ་བ་ཉིད་དང་ཤས་ཆེར་འདྲ་བའི་ཕྱིར་ནམ་མཁས་ཁྱབ་ཚད་ཀྱི་དོན་ཡང་ཅི་རིགས་པར་མཛད་དེ། ལམ་རིམ་ལས། དེ་ལྟར་དག་པའི་ཤེས་པ་ཉིད། །སྐུ་ལྔ་ལྷུན་གྲུབ་རྡོ་རྗེ་འཛིན། །ལྷུན་མཉམ་ངང་ལས་མི་གཡོ་ཞིང་། །མི་རྟོག་ཉིད་དུ་བཞུགས་པའང་། །བག་ལ་ཉལ་བ་འཇོམས་བྱེད་ཅིང་། །སྐད་ཅིག་ཉིད་ལས་རིག་འཛིན་མཐའོ། །ཞེས་དང་། ཉིད་ཕྱིར་རྡོ་རྗེ་འཛིན་རྫོགས་ལ། །སྐད་ཅིག་དུས་ཀྱིས་བསླབ་རྫོགས་ནས། །ཐ་མའི་བག་ལ་ཉལ་བ་དང་། །བཅོམ་ལྡན་འདས་པར་གྱུར་པ་ཡིན། །དེ་ཚེ་དེ་སྒྲིབ་ཆ་ཡོད་ཀྱང་། །ལྷུན་གྲུབ་རིག་འཛིན་སར་བཞུགས་ནས། །ཞིང་ཁམས་ཐུག་པ་མེད་པ་དག །འདུལ་ཕྱིར་སྤྲུལ་སྐུའི་མཛད་པ་སྟོན། །ཞེས་སོ། །ཞར་བྱུང་རྒྱུའི་ཐེག་པའི་འཕགས་པ་རྣམས་དང་དགོངས་པ་མཉམ་ཚུལ་དང་སའི་:མོ་ལོཚོད་མཐུན་ཚུལ་བཤད་དེ། རྣམ་སྨིན་རིག་འཛིན་དང་། རྒྱུའི་ཐེག་པའི་མཐོང་ལམ་རབ་དགའ་ལ་གནས་པའི་སེམས་དཔའ་གཉིས་དགོངས་པ་མཉམ་ཞིང་། དེ་ལས་གཞན་པ་ཚེ་དབང་སོགས་གསུམ་ནི་རྒྱུའི་ཐེག་པའི་ས་དང་པོ་དང་། བརྒྱད་པ་དང་། བཅུ་པ་ཙམ་དུ་སྐལ་བ་མཉམ་པ་སྟེ་ལམ་གྱི་ལ་ོཚོད་མཚུངས་མོད། འོན་ཀྱང་ ― MLP018_Page_0044 ―
[མ་དཔེ་གཟིགས་ན་འདིར་གནོན།]
དགོངས་སྤྱོད་ཀྱིས་རྒྱུའི་ཐེག་པའི་ས་དེ་དག་གི་བྱང་སེམས་ལས་ཁྱད་པར་དུ་གྱུར་པ་ཡིན་ཏེ། རྒྱུའི་ཐེག་པའི་སྒོམ་ལམ་ས་བརྒྱད་པ་དང་ཚེ་དབང་། བཅུ་པ་དང་ཕྱག་ཆེན། མི་སློབ་པའི་ས་ཀུན་ཏུ་འོད་དང་ལྷུན་གྲུབ་རིག་འཛིན་རྣམས་མཉམ་པར་བཞེད་པའི་ཕྱིར། དེ་ལྟར་ཡང་ལམ་ཆུང་ལས། དེ་ཡང་དང་པོ་དང་པོ་དང་། །སྐལ་མཉམ་གཉིས་པའི་རིགས་མཆོག་དེ། །བརྒྱད་པའི་སེམས་དཔར་སྐལ་བ་མཉམ། །གསུམ་པ་བཅུ་དང་སྐལ་མཉམ་མོད། །དགོངས་སྤྱོད་རྒྱ་མཚོས་ཁྱད་པར་འཕགས། །ཞེས་དང་། བསམ་གཏན་མིག་སྒྲོན་གྱི་རང་འགྲེལ་ལས། ཀུན་ཏུ་འོད་བསྟི་གནས་ཀྱི་སའོ། །དེ་ནི་འདིར་ལྷུན་གྱིས་གྲུབ་པའི་རིག་འཛིན་དངོས་སོ། །ཞེས་གསུངས་སོ། །ད་ནི་ཐོད་རྒལ་འབྱུང་མི་འབྱུང་གི་ས་མཚམས་འཆད་དེ། རྣམ་སྨིན་རིག་འཛིན་གྱི་དངོས་འབྲས་རྒྱ་ཆེན་དུ་ངེས་པའི་ཕྱིར། མཐོང་ལམ་གཉིས་པོ་ལམ་མཐར་ཆགས་ཀྱི་སྐབས་སུའང་རིམ་པར་བགྲོད་པ་མི་སྲིད་ཅིང་། རྣམ་སྨིན་ནས་ཐོད་རྒལ་དུ་བགྲོད་པ་ཡང་མི་འབྱུང་སྟེ། ཐོད་རྒལ་འབྱུང་བའི་ཆོས་གསུམ་མ་ཚང་བའི་ཕྱིར། གང་མ་ཚང་ན། མཁས་པ་དག་ཀྱང་། ངང་གིས་བློ་ཆུང་བས་ཐོད་རྒལ་མི་འབྱུང་ངོ་ཞེས་བཞེད་པ་ཡོད་མོད། དེ་ནི་སྐབས་འདིར་དགོངས་པ་མཉམ་པར་མ་བཞག་པར་མངོན་ཏེ། དེ་ལྟ་ན་ཕྱག་རྒྱ་གཅིག་སྤྲོས་གཉིས་ནས་ཐོད་རྒལ་འབྱུང་ངམ་མི་འབྱུང་། འབྱུང་ན། རིག་འཛིན་གྱི་ས་ལ་བཞུགས་པའི་བྱང་སེམས་འཕགས་པ་ལས་བློ་ཆེ་བའི་སོ་སྐྱེ་ཡོད་པར་ཐལ། ཕྱག་རྒྱ་གཅིག་སྤྲོས་དང་རྣམ་སྨིན་གཉིས་ཟུང་འཇུག་གི་ལམ་སྒོམ་པ་དང་། ལམ་གཞན་བར་ནས་བོར་དུ་ཡོད་པར་ཕྱོགས་མཚུངས་པ་གང་ཞིག གཅིག་སྤྲོས་ལ་ཐོད་རྒལ་འབྱུང་ཞིང་རྣམ་སྨིན་ལ་མི་འབྱུང་བའི་ཕྱིར། མི་འབྱུང་ན། ཟག་བཅས་ཀྱི་ལམ་པ་ཐོད་རྒལ་དུ་བགྲོད་པ་མི་སྲིད་པར་ཐལ། ཁས་བླངས་དེའི་ཕྱིར། རྒྱུ་མཚན་དེས་ན། འཕགས་པ་ཇི་ལྟར་དབང་པོ་རྟུལ་ཡང་སོ་སྐྱེས་འགྲན་པར་ནུས་པ་མིན་ཏེ། དེའི་ཕྱིར་རྣམ་སྨིན་ནི། རང་གི་དངོས་འབྲས་ཕྱག་ཆེན་ཉིད་དུ་ངེས་པའི་ཕྱིར་ལམ་གཞན་བར་ནས་བོར་དུ་མེད་པས་ཐོད་རྒལ་མི་འབྱུང་བ་ཡིན་ནོ། །ཞེས་བཤད་ན་ལེགས་སོ། །གཞན་དུ་ན་ཅིག་ཅར་རིགས་མིན་པའི་ལམ་པ་བློ་ཆེ་བ་ ― MLP018_Page_0045 ―
[མ་དཔེ་གཟིགས་ན་འདིར་གནོན།]
འགའ་ཞིག་ཕྱག་རྒྱ་གཅིག་སྤྲོས་གཉིས་ནས་སྦྱོར་མཐོང་དང་། ཚེ་དབང་ནས་ལྷུན་གྲུབ་རིག་འཛིན་ཚེ་དབང་དང་རྒྱ་ཆེན་གཉིས་ནས་རྫོགས་པའི་སངས་རྒྱས་ཀྱི་སར་ལམ་གཞན་བར་ནས་བོར་ལ་ཐོད་རྒལ་དུ་སྦྱོར་བ་སྲིད་པ་ཡིན་ཏེ། དེ་དག་ལ་ངང་གིས་བློ་ཆེ་བ་དང་། ཟུང་འཇུག་གི་ལམ་སྒོམ་པ་དང་། ལམ་གཞན་བར་ནས་བོར་དུ་ཡོད་པ་སྟེ་ཐོད་རྒལ་འབྱུང་བའི་ཆོས་གསུམ་པོ་ཚང་བའི་ཕྱིར་རོ། །དེ་ལྟར་ན་ཚོགས་སྒྲུབ་ནས་ཀྱང་ཐོད་རྒལ་འབྱུང་བ་སྲིད་དམ་སྙམ་ན་མིན་ཏེ། ལམ་རིམ་ལས། ལམ་མཆོག་དབྱེ་ས་གཅིག་ཡིན་ནོ། །ཞེས་ཟག་མེད་ཀྱི་ལམ་གྱི་འདུས་དང་དབྱེ་ས་མཐོང་ལམ་ཡིན་པར་གསུངས་པས་ལམ་གཞན་བར་ནས་བོར་དུ་མེད་པའི་ཕྱིར་རོ། །གསུམ་པ་གང་དུ་མཐར་ཕྱིན་འབྲས་བུའི་རྒྱུད་ནི། སྒྱུ་འཕྲུལ་བྱེ་བྲག་བསྟན་པ་ལས། གྲུབ་པའི་རྣལ་འབྱོར་རྣལ་འབྱོར་ཆེ། །ལྷུན་གྲུབ་ཇི་བཞིན་མངོན་བྱས་པའང་། །བཏགས་པ་ཙམ་སྟེ་གཉིས་པ་མེད། །དེ་ཕྱིར་དེ་ལ་དེ་བརྗོད་དོ། །ཞེས་པས་དེ་ལ་སྦྱང་གཞི་ནི། རྒྱུ་རྒྱུད་བདེ་བར་གཤེགས་པའི་སྙིང་པོ་གདོད་མ་ནས་རང་ཆས་སུ་བཞུགས་པ་སྟེ། འདམ་གྱི་དབུས་ན་བཞུགས་པའི་ནོར་བུ་རིན་པོ་ཆེ་བཞིན་ནོ། །སྦྱང་བྱ་ནི། མེད་སྣང་གློ་བུར་གྱི་དྲི་མ་ཕྲ་ཞིང་ཕྲ་བ་དང་བཅས་པ་སྟེ། ནོར་བུ་ལ་སྒྲིབ་པར་བྱེད་པའི་འདམ་རྫབ་བཞིན་ནོ། །སྦྱོང་བྱེད་ནི། རིམ་པ་གཉིས་ཀྱིས་བསྡུས་པའི་ལམ་རྣམས་ཏེ། བཀྲུ་བྱེད་ཀྱི་ཆུ་དང་འདག་རྫས་བཞིན་ནོ། །སྦྱངས་འབྲས་ནི། དེ་ལྟར་ལམ་གྱི་དྲི་མ་སྦྱངས་པ་ལས་གཞི་ལ་ཇི་ལྟར་ཡོད་པའི་ཡོན་ཏན་མངོན་དུ་གྱུར་པ་མཐར་ཐུག་པ་སྟེ། འདམ་རྫབ་ལས་གྲོལ་བའི་ཡིད་བཞིན་གྱི་ནོར་བུ་རིན་པོ་ཆེ་ལས་འདོད་རྒུའི་ཆར་འབེབས་པ་བཞིན་ནོ། །ངེས་ཚིག་ནི་ཅིའི་ཕྱིར་འབྲས་བུའི་རྒྱུད་དུ་འགྱུར་ཞེ་ན། ཁོག་གཞུང་ལས། གྲུབ་པ་མཐར་ཕྱིན་འབྲས་བུར་བརྗོད། ཅེས་པས་བླ་ན་མེད་པ་མཆོག་གི་འབྲས་བུ་མཐར་ཐུག་པ་དོན་དུ་གཉེར་བ་རྣམས་བསམ་པ་ཡོངས་སུ་རྫོགས་པས་ན་འབྲས་བུ་དང་། ནམ་ཡང་རྒྱུན་མི་ཆད་པས་ན་རྒྱུད་དོ། །དབྱེ་ན། ཁོག་གཞུང་ལས། འབྲས་བུའི་ངོ་བོ་སྐུ་གསུང་ཐུགས། །ཡོན་ཏན་ཕྲིན་ལས་རྣམ་པ་ལྔ། ། ― MLP018_Page_0046 ―
[མ་དཔེ་གཟིགས་ན་འདིར་གནོན།]
དེ་ཡང་སྐབས་ཀྱིས་ལྔ་ལྔ་སྟེ། །ཞེས་པས་སྐུ་གསུང་ཐུགས་ཡོན་ཏན་ཕྲིན་ལས་ལྔ་རེ་རེ་ལའང་ལྔ་ལྔར་ཕྱེ་བས་འབྲས་ཆོས་ཉི་ཤུ་རྩ་ལྔར་འགྱུར་ཏེ། དེ་ལ་སྐུ་ལྔ་ནི་ཆོས་སྐུ། ལོངས་སྐུ། སྤྲུལ་སྐུ། མངོན་བྱང་གི་སྐུ། རྡོ་རྗེའི་སྐུ་དང་ལྔའོ། །གསུང་ལྔ་ནི། ཆོས་སྐུ་བརྗོད་མེད་དོན་གྱི་གསུང་། ལོངས་སྐུ་དགོངས་པ་བརྡའི་གསུང་། སྤྲུལ་སྐུ་བརྗོད་པ་ཚིག་གི་གསུང་། མངོན་བྱང་རིག་པ་བྱིན་རླབས་ཀྱི་གསུང་། དབྱེར་མེད་རྡོ་རྗེའི་གསུང་དང་ལྔའོ། །ཐུགས་ལྔ་ནི། ཆོས་ཀྱི་སྐུའི་ཐུགས་ཆོས་དབྱིངས་ཡེ་ཤེས། ལོངས་སྐུའི་ཐུགས་མཉམ་ཉིད་ཡེ་ཤེས། སྤྲུལ་སྐུའི་ཐུགས་བྱ་གྲུབ་ཡེ་ཤེས། མངོན་བྱང་གི་ཐུགས་མེ་ལོང་ལྟ་བུའི་ཡེ་ཤེས། རྡོ་རྗེའི་ཐུགས་སོ་སོར་རྟོག་པའ་ིཡེ་ཤེས་དང་ལྔའོ། །ཡོན་ཏན་ལྔ་ནི། རྣམ་པར་དག་པའི་ཞིང་ཁམས། རྒྱ་ཚད་དང་བྲལ་བའི་གཞལ་ཡས་ཁང་། གསལ་ཞིང་དག་པའི་འོད་ཟེར། ཁྱད་པར་དུ་འཕགས་པའི་གདན་ཁྲི། དགྱེས་རྒུར་སྤྱོད་པའི་ལོངས་སྤྱོད་དང་ལྔའོ། །ཕྲིན་ལས་ལྔ་ནི། ཞི་བ། རྒྱས་པ། དབང་། དྲག་པོ། ལྷུན་གྱིས་གྲུབ་པ་སྟེ་ལྔའོ། །དེ་དག་ཀྱང་། རྟེན་སྐུ་དང་། བརྟེན་པ་ཡེ་ཤེས་དང་། མཛད་པ་ཕྲིན་ལས་གསུམ་དུ་འདུ་བ་ཡིན་པས། དང་པོ་རྟེན་སྐུ་ནི། གསུམ་མམ་ལྔ་སྟེ། དབྱིངས་རྣམ་དག་གི་ཐོག་ཏུ་རིག་པའི་ཡེ་ཤེས་སྒྲིབ་པ་ལས་གྲོལ་བས་ཟུང་འཇུག་སྐུ་གསུང་ཡེ་རྫོགས་མཚན་འཛིན་གྱི་སྤྲོས་པ་ཐམས་ཅད་དང་བྲལ་བའི་བདག་ཉིད་དུ་བཞུགས་པ་ཆོས་ཀྱི་སྐུ་དང་། དེ་ལས་མ་གཡོས་བཞིན་དུ་ས་བཅུ་རྒྱུན་མཐའ་ལ་བཞུགས་པའི་བྱང་སེམས་རྣམས་ལ་མཚན་དཔེའི་རྣམ་པར་སྣང་བའི་གཟུགས་བརྙན་ལོངས་སྐུ་དང་། སོ་སྐྱེ་རྣམས་ལ་སོ་སོའ་མོས་པ་དང་མཐུན་པར་མཆོག་གི་སྤྲུལ་སྐུ་དང་། བཟོ་དང་སྐྱེ་བ་སོགས་གང་ལ་གང་འཚམས་པར་སངས་རྒྱས་ཀྱི་གཟུགས་བརྙན་ཅི་རིགས་སུ་སྣང་བ་སྤྲུལ་པའི་སྐུ་སྟེ་སྐུ་གསུམ་མོ། །ཡང་ན། སྐུ་གསུམ་སྣང་ཆ་མ་འདྲེས་པར་སྣང་བའི་ལྡོག་ཆ་ནས་མངོན་བྱང་དང་། སྐུ་གསུམ་པོ་ངོ་བོ་དབྱེར་མི་ཕྱེད་པའི་ཆ་ནས་རྡོ་རྗེའི་སྐུ་སྟེ་གཉིས་པོ་བསྣན་པས་སྐུ་ལྔའོ། །སྐབས་འདིར་ཟུར་པ་རྣམས་ཆོས་ལོངས་སྤྲུལ་གསུམ་སྐུ་མཚན་ཉིད་པ་དང་། མངོན་བྱང་དང་རྡོ་རྗེའི་སྐུ་གཉིས་ཏེ་གསུམ་གྱི་རྣམ་པའི་ལྡོག་ཆ་དང་། ངོ་བོ་དབྱེར་མི་ཕྱེད་པའི་ ― MLP018_Page_0047 ―
[མ་དཔེ་གཟིགས་ན་འདིར་གནོན།]
ཆ་ནས་བཞག་པས་སྐུ་བཏགས་པ་བ་ཡིན་གསུང་། ཀུན་མཁྱེན་ཆེན་པོ་ནི། ཆོས་སྐུ་དང་། མངོན་བྱང་། རྡོ་རྗེའི་སྐུ་གསུམ་པོ་སངས་རྒྱས་རང་སྣང་གི་སྐུ་ཡིན་པས་མཚན་ཉིད་པ་ཡིན་ལ། སྐབས་འདིའི་ལོངས་སྐུ་དང་སྤྲུལ་སྐུ་གཉིས་གདུལ་བྱ་གཞན་སྣང་ཡིན་པས་སྐུ་བཏགས་པ་བའོ་ཞེས་གསུངས་ཏེ་ལེགས་སོ། །གཉིས་པ་བརྟེན་པ་ཡེ་ཤེས་ནི། དེ་ལྟར་སྐུ་ལྔ་མངོན་དུ་བྱས་པ་དེའི་ཚེ་རྣམ་པར་ཤེས་པའི་ཚོགས་བརྒྱད་གནས་སུ་དག་པ་ཡེ་ཤེས་ལྔ་སྟེ། ཀུན་གཞི་འབྱེད་པ་མེད་པའི་ཆ་ནས་དེ་ཉིད་གནས་སུ་དག་པ་ཅིར་ཡང་མི་དམིགས་པས་སྤྲོས་པའི་མཐའ་ཐམས་ཅད་ལས་འདས་པ་ཆོས་དབྱིངས་ཡེ་ཤེས་དང་། ཀུན་གཞིའི་རྣམ་ཤེས་གསལ་ལ་རྣམ་པར་མི་རྟོག་པའི་ཆ་ནས་དེ་ཉིད་གནས་སུ་དག་པ་མེ་ལོང་ངོས་གཉིས་པ་ལྟར་རང་བཞིན་གྱིས་ཆོས་རྣམས་གསལ་ལ་སྤུ་རིས་འབྱེད་པར་མི་མཛད་པ་མེ་ལོང་ལྟ་བུའི་ཡེ་ཤེས་དང་། ཉོན་ཡིད་ཀྱི་ཕྱི་ནང་གི་ཆོས་རྣམས་ལ་བླང་དོར་བྱེད་པའི་ཆ་ནས་དེ་ཉིད་གནས་སུ་དག་པ་འཁོར་འདས་བཟང་ངན་མེད་པར་མཉམ་ཉིད་དུ་གཟིགས་པས་སྲིད་ཞིའི་མཐའ་གཉིས་ལ་མི་གནས་པ་མཉམ་ཉིད་ཡེ་ཤེས་དང་། རྣམ་ཤེས་དྲུག་འགགས་མ་ཐག་པའི་ཡིད་ཀྱིས་དཔྱོད་པ་མེད་པར་རྟོག་པའི་ཆ་ནས་དེ་ཉིད་གནས་སུ་དག་པ་ཆོས་ཅན་མ་ལུས་པ་མངོན་སུམ་དུ་མ་འདྲེས་ཡོངས་རྫོགས་སུ་ས་ལེར་གཟིགས་པ་སོ་སོར་རྟོག་པའི་ཡེ་ཤེས་དང་། སྒོ་ལྔའི་རྣམ་ཤེས་ཀྱིས་བྱ་བ་ཐམས་ཅད་སྒྲུབ་པའི་ཆ་ནས་དེ་ཉིད་གནས་སུ་དག་པ་འགྲོ་བའི་དོན་མཛད་པ་ལ་ཐོགས་པ་མེད་པའི་ཕྲིན་ལས་འཇུག་པ་བྱ་གྲུབ་ཡེ་ཤེས་ཏེ་ལྔའོ། །དེ་དག་ཡེ་ཤེས་གཉིས་སུ་བསྡུ་ཚུལ་ནི། ཟུར་པ་རྣམས་ཆོས་དབྱིངས་ཡེ་ཤེས་ཇི་ལྟ་བ་མཁྱེན་པའི་ཡེ་ཤེས་དང་། ཕྱི་མ་བཞི་པོ་རྟེན་བརྟེན་པའི་ཆ་ནས་ཇི་སྙེད་པ་མཁྱེན་པའི་ཡེ་ཤེས་སུ་འདུའོ། །ཞེས་གསུངས། ཀུན་མཁྱེན་ཆེན་པོ་ནི། ཆོས་དབྱིངས་དང་། མཉམ་ཉིད་གཉིས་གནས་ལུགས་གཟིགས་པའི་ཆ་ནས་ཇི་ལྟ་བ་དང་། གཞན་གསུམ་འཆར་གཞི་དང་ཡུལ་གཟིགས་པ་དང་དེའི་དོན་མཛད་པའི་ཆ་ནས་ཇི་སྙེད་པའི་ཡེ་ཤེས་སོ། །ཞེས་གསུངས་ཏེ་ཇི་ལྟར་བཤད་ཀྱང་ཁྱད་པར་མེད་དོ། །གསུམ་པ་མཛད་པ་ཕྲིན་ལས་ནི། དེ་ལྟར་ན་ཉོན་སྒྲིབ་དང་ཤེས་སྒྲིབ་ ― MLP018_Page_0048 ―
[མ་དཔེ་གཟིགས་ན་འདིར་གནོན།]
ཀྱིས་བསྡུས་པའི་མེད་སྣང་གློ་བུར་གྱི་སྒྲིབ་གཉིས་བག་ཆགས་སྣང་གསུམ་གྱི་དྲི་མ་དང་བཅས་པ་མཐའ་དག་སྤངས་ཤིང་། ཇི་ལྟ་བ་དང་ཇི་སྙེད་པ་མཁྱེན་པའི་ཡེ་ཤེས་ཀྱིས་ཤེས་བྱའི་ཆོས་ཐམས་ཅད་མངོན་སུམ་དུ་གཟིགས་པའི་སྒོ་ནས་སྤངས་རྟོགས་ཀྱི་ཡོན་ཏན་ཐམས་ཅད་མཐར་ཕྱིན་ཅིང་། དེའི་མཐུ་ལས་གདུལ་བྱ་སོ་སོའ་སྐལ་བ་དང་འཚམས་པར་ཞི་བ་དང་། རྒྱས་པ་དང་། དབང་དང་། དྲག་པོ་ལ་སོགས་ཏེ་གང་ལ་གང་གིས་ཇི་ལྟར་འདུལ་བའི་ཕྲིན་ལས་ཀྱི་སྒོ་མཐའ་ཡས་དུས་ལས་ཡོལ་བ་མེད་ལ། འབད་རྩོལ་མེད་པར་ལྷུན་གྱིས་གྲུབ་པ་ནི། ནམ་མཁའ་ཇི་སྲིད་པ་དེ་སྲིད་དུ་རྒྱ་ཆེན་རྒྱུན་མི་ཆད་པར་འབྱུང་བ་སྟེ། མངོན་རྟོགས་རྒྱན་ལས། དེ་བཞིན་འཁོར་བ་ཇི་སྲིད་འདིའི། །ལས་ནི་རྒྱུན་མི་ཆད་པར་འདོད། །ཅེས་སོ། །གཉིས་པ་ལམ་གྱི་ཆ་རྐྱེན་རྒྱུད་ཀྱི་དངོས་པོ་བྱེ་བྲག་ཏུ་བཤད་པ་ནི། ལྟ་སྤྱོད་དཀྱིལ་འཁོར་དབང་དམ་ཚིག །མཆོད་སྔགས་ཏིང་འཛིན་ཕྲིན་སྒྲུབ་ཀྱི། །གསང་སྔགས་རྒྱུད་ཀྱི་དབྱེ་བ་བྱ། །ཞེས་པ་ལྟར་བཅུ་སྟེ། དེ་ཁོ་ན་ཉིད་ལྟ་བ། ལ་དོར་བ་སྤྱོད་པ། བཀོད་པ་དཀྱིལ་འཁོར། རིམ་པ་བགྲོད་པ་དབང་། མི་འདའ་བ་དམ་ཚིག རོལ་པ་ཕྲིན་ལས། དོན་དུ་གཉེར་བ་སྒྲུབ་པ། མི་གཡོ་བ་ཏིང་འཛིན། གནས་སུ་སྟོབ་པ་མཆོད་པ། འཆིང་ཟློས་སྔགས་དང་ཕྱག་རྒྱའོ། །དང་པོ་ལྟ་བ་ལ་གསུམ་སྟེ། ངོ་བོ་ནི། ལམ་རིམ་ལས། ཐབས་ཀྱི་ལྟ་སྤྱོད་ཆེན་པོ་ནི། །བླ་མེད་ཐེག་པ་ལས་འཕགས་པ། །དོན་དམ་དུ་ནི་དཀོར་བདུན་ལ། །ཀུན་རྫོབ་ཏུ་ནི་མཉམ་རྫོགས་སོ། །ཡང་དག་སྐྱེས་མཆོག་དམ་པ་ཡིས། །དོན་དམ་ཀུན་རྫོབ་དབྱེར་མེད་པར། །ཡང་དག་ཉིད་དུ་རབ་ཏུ་རྟོགས། །ཞེས་པས་སྤྲོས་པའི་མཐའ་གང་དུ་ཡང་མ་རེག་པའི་ཆ་ནས་དབུ་མ་པ་དང་། ཆོས་ཐམས་ཅད་སེམས་ཀྱི་རང་རྩལ་ཙམ་དུ་འདུ་བའི་ཆ་ནས་སེམས་ཙམ་པ་དང་ཕྱོགས་མཚུངས་ཀྱང་། སྔགས་ཀྱི་ལྟ་བ་ནི། དེ་དག་ལས་ཁྱད་པར་དུ་གྱུར་པ་སྟེ། དེ་ཡང་ཡེ་གདོད་མ་ནས་དབྱིངས། ཡེ་ཤེས། སྐུ་གསུང་ཐུགས་ཡོན་ཏན་ཕྲིན་ལས་ཏེ་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པ་ལྷག་པ་དོན་དམ་བདེན་པ་དང་། དེ་ཉིད་ཀྱི་རྩལ་སྣང་སྣོད་བཅུད་སྐུ་དང་ཡེ་ཤེས་རྒྱལ་བའི་དཀྱིལ་འཁོར་དུ་རང་སྣང་བས་འཁོར་ ― MLP018_Page_0049 ―
[མ་དཔེ་གཟིགས་ན་འདིར་གནོན།]
འདས་བཟང་ངན་མེད་པར་མཉམ་པ་ཉིད་དུ་རྫོགས་པ་ནི་ལྷག་པ་ཀུན་རྫོབ་ཀྱི་བདེན་པ་སྟེ། དེ་གཉིས་ཀྱང་ཕྱོགས་སུ་ལྷུང་བ་མིན་པར་ལྷག་པ་བདེན་གཉིས་ཟུང་འཇུག་ངོ་བོ་དབྱེར་མི་ཕྱེད་པར་མཉམ་ཉིད་དུ་གནས་ཤིང་། དེར་འཛིན་གྱི་བསམ་བརྗོད་ལས་ཀྱང་ཡང་དག་པར་འདས་པ་ན་ཐ་སྙད་ཙམ་དུ་ལྷག་པ་བདེན་པ་དབྱེར་མེད་སྤྱོད་ཡུལ་དང་བྲལ་བ་ཞེས་མིང་ཙམ་དུ་བཏགས་ཏེ། དེ་ལས། རྒྱལ་འགྲོས་མ་མཛད་མ་བཅོས་པར། །རང་བཞིན་ངང་གིས་དབྱེར་མེད་པའང་། །དེ་མིན་ཞེན་པ་དགྲོལ་ཕྱིར་ལས། །ཐ་སྙད་གཉིས་པར་བསམ་བརྗོད་འདས། །ཞེས་གསུངས་ཤིང་། ལྷག་པ་ཞེས་པའི་སྒྲ་ཡང་། ཁྱད་པར་དུ་འཕགས་པའི་དོན་ཏེ། ཕར་ཕྱིན་ཐེག་པ་ནས་དོན་དམ་བདེན་ངོར་འཁོར་འདས་མཉམ་ཉིད་དུ་བཞེད་པ་ཙམ་ཕྱོགས་མཐུན་ཡང་། སྔགས་ལུགས་འདིར་ནི་ཀུན་རྫོབ་ཏུ་ཡང་ཆོས་ཐམས་ཅད་ལ་མི་གཉིས་པའི་བསམ་བརྗོད་དང་ལྡན་པས་ན་རྒྱུའི་ཐེག་པ་ལས་ཁྱད་པར་དུ་འཕགས་པའི་ཕྱིར་དེ་སྐད་དུ་བརྗོད་པ་སྟེ། དེ་ལས། བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་ལ། །ཀུན་རྫོབ་ཏུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོར་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུ་ཡང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་སོ། །ངེས་ཚིག་ནི། དྲྀཥྚའི་སྒྲ་ལས་དྲངས་ན། དྲྀ་ཤིར་ལྟ་བ་ལའོ་ཞེས་པའི་བྱིངས་དོན་གྱིས་བསྒྲུབས་པས་ལྟ་བ་ཞེས་བྱ་བ་ལ་འཇུག་སྟེ། གནས་ལུགས་ཀྱི་དོན་ལ་དེ་དང་རྗེས་སུ་མཐུན་པའི་ཤེས་རབ་ཀྱིས་གཏན་ཚིགས་ལ་སོགས་པའི་སྒོ་ནས་སྒྲོ་འདོགས་གཅོད་པའི་དོན་གྱིས་ན་ལྟ་བ་ཞེས་བྱའོ། །དབྱེ་ན་དབང་པོ་ཡང་རབ་ལ་གཏན་ཚིགས་ཀྱིས་རྟོགས་པར་བྱ་བ་སྟེ། རྒྱལ་པོ་ཛཿའི་ལམ་རྣམ་བཀོད་དུ། དེ་ལྟར་ཚུལ་གསུམ་བརྗོད་པ་ཡིས། །མཐོང་བ་གང་ཡིན་ཤེས་རབ་སྤྱན། །དེ་ཡང་མངོན་སུམ་གཞན་སྤངས་ཏེ། །སྒྲ་ཚིག་རྟེན་འབྲེལ་ཞེན་ཙམ་མིན། །ཡུལ་མིན་རང་རིག་བདེན་དབྱེར་མེད། །བློའི་གཏིང་གོ་བ་མངོན་སུམ་ཡུལ། །ཞེས་སོ། །དབང་འབྲིང་ལ་རང་བཞིན་དང་འབྲས་བུའི་རྟགས་ལ་བརྟེན་ནས་རྟོགས་པར་བྱ་བ་སྟེ། ཤེས་རབ་སྤྱན་འབྱེད་ལས། དང་པོ་རང་གི་རིག་པ་ཡི། ། ― MLP018_Page_0050 ―
[མ་དཔེ་གཟིགས་ན་འདིར་གནོན།]
ཆོ་འཕྲུལ་སྣང་བའི་འབྱུང་བ་དང་། །ཕྱོགས་དང་ཁ་དོག་ལ་སོགས་ཀྱིས། །མཚོན་ནས་ཇི་བཞིན་ཉིད་རྟོགས་བྱེད། །ཅེས་རང་བཞིན་དང་། འབྲས་བུ་ནི། དེ་ལས། ཅིག་ཤོས་མཐར་ཕྱིན་ཡེ་ཤེས་ཀྱི། །དཀྱིལ་འཁོར་རྟེན་དང་བརྟེན་ཅན་ལྟར། །ཞེས་སོ། །དབང་རྟུལ་ལ་བརྒྱུད་དེ་རྟོགས་པར་བྱ་བ་ཉེ་རིང་གཉིས་ལས། ཉེ་བ་ནི། སྔ་མ་ལས། དམན་ལ་རྒྱ་གསུམ་གོམས་པ་ཡི། །བརྟན་ནས་བརྟག་དཔྱད་ཀླུང་ཞུགས་མཐོང་། །བསྒོམ་པའི་ལམ་དུ་བསྟན་པར་བྱ། །རིམ་པར་སྐྱེ་ལ་ཐེ་ཚོམ་མེད། །ཅེས་སོ། །རིང་བ་ནི། རྣམ་བཀོད་ལས། དེ་མིན་རྒྱུ་ཙམ་གསོག་བྱེད་པ། །རྒྱུད་ལས་འདི་སྐད་གསུངས་པ་སྟེ། །ཆོས་ཉིད་རྟེན་ཅིང་འབྲེལ་བྲིས་ན། །ཆོས་ཉིད་དོན་རྣམས་རྟོགས་འགྱུར་ཏེ། །ཞེས་སོ། །གཉིས་པ་སྤྱོད་པ་ལའང་གསུམ་སྟེ། ངོ་བོ་ནི། རིམ་གསུམ་ལས། ཏིང་འཛིན་ཁྱད་པར་འབྱུང་བའི་ཕྱིར། །རྗེས་མཐུན་སྤྱོད་པ་གཞུང་བཞིན་སྤྱད། །ཅེས་པས། གསང་སྔགས་དང་རྗེས་མཐུན་གྱི་ཐབས་ཤེས་ཁྱད་པར་ཅན་གྱིས་ཟིན་པའི་ལམ་པའི་སྒོ་གསུམ་གྱི་བྱ་བར་གྱུར་པ་གང་ཡིན་པ་སྟེ། སྤྱིར་ལམ་གྱི་ཉམས་ལེན་ཐམས་ཅད་ལྟ་སྤྱོད་གཉིས་སུ་འདུ་ནའང་། གཙོ་ཆེ་བའི་དབང་དུ་སྤྱི་མིང་བྱེ་བྲག་ལ་བཏགས་ནས་མཉམ་བཞག་དང་རྗེས་མཐུན་ཐུན་མཚམས་ཀྱི་བྱ་བ་ལ་སོགས་པའོ། །ངེས་ཚིག་ནི། ཙའི་སྒྲ་ལས་དྲངས་ན་ཙ་ར་སྤྱོད་པའི་བྱིངས་དོན་གྱིས་བསྒྲུབས་པས་སྤྱོད་པ་ཞེས་བྱ་བ་ལ་འཇུག་སྟེ། གང་སྤྱད་བྱའི་ཡུལ་ལ་དུས་ཚོད་དང་འབྲེལ་བས་ཚུལ་བཞིན་དུ་སྤྱོད་པར་བྱེད་པའི་དོན་གྱིས་ན་སྤྱོད་པའོ། །དབྱེ་ན། སྤྱིར་ལུས་ངག་ཡིད་གསུམ་ཡོངས་སུ་དག་པར་བྱ་བ་ཡིན་ལ། དེ་ཡང་། སྤྱོད་པ་དུས་ཚོད་དང་འབྲེལ་བར་བསླབ་སྟེ། ལས་དང་པོ་པའི་དུས་སུ་གཟབས་ཤིང་བག་ཡོད་པ་དགེ་སྦྱོང་གཞོན་ནུའི་སྤྱོད་པ་ལྟ་བུ། དེ་ལས་ཅུང་ཟད་གོམས་ཏེ་མཉམ་རྗེས་བསྲེ་བར་ནུས་པ་ན་རྟོགས་པ་རྐྱེན་ཐུབ་ཏུ་བྱེད་པ་སྨྱོན་པ་བརྟུལ་ཞུགས་ཀྱི་སྤྱོད་པ་དང་། བརྟན་པ་ཆེར་ཐོབ་ནས་རྟོགས་པ་བྲི་གང་མེད་པར་གྱུར་པ་ན་གཞན་ཕན་ཁོ་ན་ལ་བསླབ་པ་རྒྱལ་པོ་ས་འཛིན་གྱི་སྤྱོད་པ་ལྟ་བུ་སྟེ་སྤྱོད་ཚུལ་གསུམ་མོ། །བྱེ་བྲག་ཏུ་ཐབས་ལམ་བརྟུལ་ཞུགས་ཀྱི་སྤྱོད་པ་དང་། གྲོལ་ལམ་ ― MLP018_Page_0051 ―
[མ་དཔེ་གཟིགས་ན་འདིར་གནོན།]
བག་ཡོད་ཀྱི་སྤྱོད་པ་གཉིས་སུ་བཤད་ཅིང་། ཕྱི་མ་ལའང་། དང་པོར་ལྟ་བ་གཏན་ལ་འབེབས་པའི་དུས་སུ་དད་བརྩོན་གྱི་སྤྱོད་པ་སྤྱད་དེ། སྤྱིར་དད་པ་ལ། དང་བའི་དད་པ། འདུན་པའི་དད་པ། ཡིད་ཆེས་ཀྱི་དད་པ་དང་གསུམ་མོ། །དེ་ལྟ་བུའི་དད་པས་ཀུན་ནས་བསླངས་ཏེ་ཐོས་བསམ་ལ་ཞུགས་ནས་བརྩོན་འགྲུས་ཐང་ལྷོད་མེད་པས་དེ་དོན་མཐར་ཕྱིན་པར་སྤྱོད་པའོ། །གཉིས་པ་སྟོང་ཆེན་གྱི་དུས་སུ་ཤེས་རབ་དང་མཐུན་པ་སྟེ། མཉམ་བཞག་ཏུ་སྟོང་ཆེན་རྣམ་པར་མི་རྟོག་པའི་འོད་གསལ་བསྒོམ་ཞིང་། རྗེས་ཐོབ་རྗེས་ཤེས་ཀྱི་གནས་སྐབས་སུ་ཡང་དེའི་ངང་ལས་མི་གཡོ་བར་སྤྱོད་པའོ། །དེ་ལྟར་ཡང་། ལམ་རིམ་ལས། སྤྱོད་དགུ་དོར་བའི་ཅིག་ཅར་སྤང་། །མི་དམིགས་མཐུན་པར་སྤྱོད་ཅེས་བྱ། །ཞེས་སོ། །གསུམ་པ་སྙིང་རྗེ་སྒྱུ་མའི་སྐབས་སུ་ཐབས་དང་མཐུན་པ་སྟེ། མཉམ་བཞག་ཏུ་དམིགས་པ་མེད་པའི་སྙིང་རྗེ་རྩོལ་མེད་ཤུགས་འབྱུང་དུ་འཆར་བ་ལ་བསླབ་ཅིང་རྗེས་ཐོབ་རྗེས་ཤེས་ལའང་དེའི་ངང་བསྐྱང་བའོ། །དེ་ཡང་། ལམ་རིམ་ལས། སྙིང་རྗེ་ཆེན་པོའི་རྣལ་འབྱོར་པས། །སྲིད་གསུམ་སྒྱུ་མ་འདྲ་བར་ནི། །ཞེས་སོ། །བཞི་པ་ཕྱག་རྒྱ་གཅིག་པའི་སྐབས་སུ་ཕྱོགས་གཅིག་པ་སྟེ་མཉམ་རྗེས་གཉིས་ཀར་ཟུང་འཇུག་ཕྱག་རྒྱ་གཅིག་པའི་རྣལ་འབྱོར་ཁོ་ན་ལ་སྤྱོད་པའོ། །དེ་ཡང་སྔ་མ་ལས། རྒྱུ་འབྲས་མཚམས་སྦྱོར་བར་སྐབས་སུ། །ཆོས་སྤྱོད་དགུ་ཡི་སྤྲོས་པ་དོར། །རྒྱུད་ལ་ལྡན་ཡང་བླང་བྱ་མིན། །མཚན་མའི་གཡེང་བ་ཡིན་ཕྱིར་རོ། །ཞེས་སོ། །ལྔ་པ་ཕྱག་རྒྱ་སྤྲོས་བཅས་ཀྱི་སྐབས་སུ་སྤྲོས་པ་དང་བཅས་པ་སྟེ། མཉམ་རྗེས་གཉིས་ཀར་སྤྱོད་ཡུལ་ཐམས་ཅད་ལྷའི་རོལ་མོར་འཆར་བ་ལ་བསླབ་པའོ། །དེ་ཡང་། སྔ་མ་ལས། སྤྱོད་ཡུལ་མཐོང་ཐོས་ཐམས་ཅད་ཀུན། །འགྲོ་དང་འདུག་དང་ཉལ་བ་ན། །དཀྱིལ་འཁོར་གཉིས་ཀྱི་རྣལ་འབྱོར་པ། །མ་ཉམས་དེ་ཡི་དབྱིངས་ན་གནས། །ཤེས་རབ་མཆོག་གིས་རྟག་ཏུ་སྤྱད། །ཅེས་སོ། །དྲུག་པ་ཚོགས་སྒྲུབ་ཀྱི་སྐབས་སུ་ཚོགས་ཀྱི་སྤྱོད་པ་སྟེ། མཉམ་རྗེས་གཉིས་ཀར་ཡོ་བྱད་ལྔ་ལ་ཆགས་མེད་དུ་སྤྱོད་པའོ། །དེ་ཡང་། སྔ་མ་ལས། སྤྱོད་ལམ་ཡོ་བྱད་ལྔ་སྤྱོད་ཅིང་། །དངོས་སུ་མཆོད་པ་རྣམ་གཉིས་སོ། །ཞེས་སོ། །བདུན་པ་ཟག་མེད་སློབ་པའི་ལམ་རིག་འཛིན་བཞིའི་ ― MLP018_Page_0052 ―
[མ་དཔེ་གཟིགས་ན་འདིར་གནོན།]
སྐབས་སུ་རྫུ་འཕྲུལ་གྱི་སྤྱོད་པ་སྟེ། བདག་དོན་དུ་རང་སའི་དྲི་མ་ཕྲ་བ་རྣམས་སྦྱོང་ཞིང་གཞན་དོན་རྫུ་འཕྲུལ་གྱི་བཀོད་པས་སྤྲུལ་པ་མ་འགགས་པར་སྟོན་ཅིང་གདུལ་བྱའི་དོན་མཛད་པའོ། །དེ་ཡང་སྔ་མ་ལས། དཀྱིལ་འཁོར་རོལ་པའི་ཚུལ་སྤྱོད་པས། །ཚོགས་གཉིས་རྫོགས་པ་བདག་གི་དོན། །སྨིན་པས་ཕྲིན་ལས་རྫོགས་བྱེད་པ། །མི་འདོར་འགོད་པ་གཞན་གྱིའོ། །ཞེས་རྣམ་སྨིན་དང་། དཀྱུས་སར་ཕྱིན་པའི་ཅང་ཤེས་བཞིན། །ཀུན་ཏུ་འགྲོ་བ་བདག་པོའི་དོན། །རྫུ་འཕྲུལ་ཆོས་སྣང་རྗེས་སྟོན་བརྗོད། །ཅེས་ཚེ་དབང་དང་། མཉམ་བཞག་ངང་ལས་མ་གཡོས་བཞིན། །སྟོང་གི་འཇིག་རྟེན་བརྒྱ་སྟོང་ཕྲག །བཅུ་ཡི་རྡུལ་སྙེད་འཇིག་རྟེན་དང་། །ཞིང་གྲངས་མེད་པ་བརྒྱ་སྟོང་ཕྲག །བཅུ་ཡི་རྡུལ་སྙེད་ཞིང་ཁམས་སུ། །རྔོན་དང་སྨད་འཚོང་ལ་སོགས་པ། །སྤྲུལ་པའི་ལུས་ཀྱིས་འདུལ་བར་བྱེད། །ཅེས་ཕྱག་ཆེན་དང་། ཉིད་ཕྱིར་རྡོ་རྗེ་འཛིན་རྫོགས་ལ། །ཞེས་སོགས་དང་། གསང་བའི་ཏནྟྲ་སྟོན་པ་དང་། །དེ་བཞིན་བསྡུ་བ་མཛད་པ་དང་། །ཞེས་པས་ལྷུན་གྲུབ་རིག་འཛིན་ཏེ་དེ་ལྟར་རིག་འཛིན་གྱི་སྤྱོད་པ་རྣམས་གསུངས་སོ། །དེ་ལྟར་རིམ་གྱིས་པའི་སྤྱོད་པ་བདུན་བཤད་ནས། ཅིག་ཅར་བའི་སྤྱོད་པ་ནི། ཆོས་ཐམས་ཅད་ལ་བླང་དོར་མེད་པར་སྤྱོད་པ་སྟེ། ཀུན་འདུས་ལས། མི་དམིགས་པ་ལས་རྣམ་པར་སྤྱོད། །དེ་ལྟར་སྤྱོད་པ་ཀུན་སྤྱོད་ཀྱང་། །དམ་པའི་དོན་དེ་སྤྱོད་མཆོག་ཉིད། །ཅེས་སོ། །གསུམ་པ་དཀྱིལ་འཁོར་ལའང་གསུམ་སྟེ། ངོ་བོ་ནི། ཐུགས་ཐིག་ལས། གནས་སྐབས་བདུན་དུ་སྙིང་པོ་ལེན། །བཀོད་པ་གང་རྫོགས་དེ་ངོ་བོ། །ཞེས་པས་བཀོད་པ་ལྷའི་འཁོར་ལོ་རྫོགས་པར་སྣང་བའོ། །ཇི་ལྟར་ན། ཕྱི་ལྟར། ནང་ལྟར། གསང་བ་ལྟར། ཡང་གསང་ལྟར་འགོད་པ་དང་བཞིའོ། །ངེས་ཚིག་ནི། མཎྜ་ལའི་སྒྲ་ལས་དྲངས་ན། མཎྜ་ནི་སྙིང་པོའམ་བཅུད་དང་། ལ་ནི་འཛིན་པའམ་ལེན་པ་སྟེ། སྙིང་པོའི་ཡོན་ཏན་གྱི་གཞི་འཛིན་པས་ན་སྙིང་པོ་ལེན་པ་ཞེས་དང་། ཡང་མཎྜལ་ཞེས་པའི་མཎྜ་དང་ལ་སོ་སོར་མ་ཕྱེ་བར་སྒྲ་གཟུགས་ཟླུམ་པོའམ་བསྐོར་བའི་དོན་ལ་འཇུག་པས་ན་གང་གཙོ་བོ་ལ་འཁོར་གྱིས་བསྐོར་བའི་ཕྱིར་དཀྱིལ་འཁོར་རོ། །དབྱེ་ན། སངས་རྒྱས་གསང་བས་ཆོས་དོན་དུ། དབྱེ་བ་རང་བཞིན་ཏིང་འཛིན་ ― MLP018_Page_0053 ―
[མ་དཔེ་གཟིགས་ན་འདིར་གནོན།]
དང་། །གཟུགས་བརྙན་དཀྱིལ་འཁོར་རྣམ་པ་གསུམ། །ཞེས་པ་ལྟར་རམ། ཡང་ན། རྒྱུད་ཕྱི་མ་ལས། སྐུ་གསུང་ཐུགས་ཀྱི་དབྱེ་བ་ལས། །དཀྱིལ་འཁོར་རྣམ་པ་གསུམ་འདོད་དེ། །ཞེས་གསུམ་དུ་དབྱེ་བ་དང་། འགྲེལ་ཆུང་ལས། དཀྱིལ་འཁོར་རྣམ་པ་བཅུ་གཉིས་ཏེ། །དེ་བཞིན་ཉིད་དང་རང་བཞིན་དང་། །ཐུགས་རྗེ་འདུལ་བའི་དཀྱིལ་འཁོར་དང་། །ཏིང་ངེ་འཛིན་དང་གཟུགས་བརྙན་དང་། །ལྷག་པའི་ཏིང་འཛིན་གཟུགས་བརྙན་དང་། །བྱང་ཆུབ་སེམས་དང་ལྷག་བྱང་སེམས། །ཚོགས་དང་ལྷུན་གྲུབ་དཀྱིལ་འཁོར་རོ། །ཞེས་བཅུ་གཉིས་སུ་དབྱེ་བ་སོགས་ཡོད་པ་ལས། སྐབས་འདིར་རྒྱས་པ་ལས། འདིས་ནི་རང་བཞིན་དཀྱིལ་འཁོར་དང་། གཟུགས་བརྙན་ལྷག་པའི་གཟུགས་བརྙན་གསུམ། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། །ཅེས་གསུངས་པ་ལྟར་བདུན་དུ་ཕྱེ་ནས་བཤད་དེ། དང་པོ་རང་བཞིན་དཀྱིལ་འཁོར་ལ། རང་བཞིན་ཉིད་ཀྱི་དཀྱིལ་འཁོར་དང་། རང་བཞིན་འབྲས་བུ་མཐར་ཕྱིན་གྱི་དཀྱིལ་འཁོར་གཉིས། དང་པོ་ནི། ཆོས་ཐམས་ཅད་ཡེ་ནས་རང་བཞིན་གྱིས་རྣམ་པར་དག་པ་གནས་ལུགས་ཀྱི་དཀྱིལ་འཁོར་ཏེ། ཁོག་གཞུང་ལས། ཆོས་ཉིད་རང་བཞིན་སྤྲོས་བྲལ་ཏེ། །དངོས་པོ་ཀུན་ཀྱང་དེ་བཞིན་པས། །རང་བཞིན་ཉིད་ཀྱི་དཀྱིལ་འཁོར་རོ། །ཞེས་སོ། །གཉིས་པ་ནི། རང་གི་ཡེ་ཤེས་མངོན་སུམ་དུ་གྱུར་པས་འོག་མིན་ཆོས་ཀྱི་དབྱིངས་སུ་སྐུ་དང་ཡེ་ཤེས་འདུ་འབྲལ་མེད་པའི་དཀྱིལ་འཁོར་དུ་བཞུགས་པ་སྟེ། དེ་ལས། འབྲས་བུ་མཐར་ཕྱིན་འོག་མིན་ན། །བཞུགས་པ་དཀྱིལ་དང་འཁོར་གྱི་ཚུལ། །ཞེས་སོ། །གཉིས་པ་གཟུགས་བརྙན་གྱི་དཀྱིལ་འཁོར་ནི། དོན་དམ་པའི་གཟུགས་བརྙན་ཀུན་རྫོབ་ལྷའི་དཀྱིལ་འཁོར་དུ་རང་ཤར་བ་སྟེ། རྒྱས་པ་ལས། གཟུགས་བརྙན་དཀྱིལ་འཁོར་ཡང་དག་ནི། །ཆེན་པོ་རགས་པ་ཐབས་སུ་རྟོགས། །སོ་སོའི་མཚན་ཉིད་ཤེས་རབ་རྟོགས། །གཉིས་མེད་འབྲེལ་བ་ཐབས་ཆེན་ཡིན། །ཞེས་སོ། །གསུམ་པ་ལྷག་པ་གཟུགས་བརྙན་གྱི་དཀྱིལ་འཁོར་ནི། རྡོ་རྗེ་ལས་རིམ་ལས། ས་གཞི་མཉམ་དང་ཚད་ཐིག་དང་། །ཚོན་དང་བྲི་དང་རྣམ་པ་དང་། །རབ་གནས་སྦྱིན་སྲེག་དཀྱིལ་འཁོར་དུ། །འཇུག་དང་ཞུགས་པའི་ཡོན་ ― MLP018_Page_0054 ―
[མ་དཔེ་གཟིགས་ན་འདིར་གནོན།]
ཏན་ནོ། །ཞེས་དོན་བཅུ་ལས། དང་པོ་ས་གཞི་མཉམ་པ་ནི། དེ་ཉིད་ལས། གཞི་དང་རང་མཚན་བླང་དབང་དང་། །སྦྱང་བྱིན་བསྲུང་དང་བཟུང་བ་ནི། །དང་པོའི་ཉིང་ལག་ཉིད་དུ་བཤད། །ཅེས་སོ། །གཉིས་པ་ཚད་ནི། རྩ་རྒྱུད་དུ། དཀྱིལ་འཁོར་ཁྲུ་གང་ཚད་དུ་བྱ། །ཡང་ན་ལུས་གང་ཚད་དུ་སྟེ། །ཡང་ན་ལུས་ནི་གསུམ་གྱི་ཚད། །ཅེས་དང་། ཡང་ན་ཁྲུ་ནི་བཅུ་དྲུག་གམ། །ཉི་ཤུའམ་ཉི་ཤུ་རྩ་ལྔར་བྱ། །ཞེས་ལྷག་པ་གཟུགས་བརྙན་གྱི་དཀྱིལ་འཁོར་གྱི་ཚད་དངོས་བཤད་ནས། ཞར་བྱུང་ལྷག་ཏིང་གི་ཚད་ནི། ཡང་ན་རྒྱང་གྲགས་དཔག་ཚད་དམ། །ནམ་མཁའི་དབྱིངས་ནི་བསམ་ཡས་པར། །སངས་རྒྱས་དཀྱིལ་འཁོར་སྣ་ཚོགས་བསྒོམ། །ཞེས་སོ། །གསུམ་པ་ཐིག་ནི། འདི་ཉིད་ལས། རིག་པས་ཐིག་ནི་གདབ་པར་བྱ། །ཞེས་དང་། ཕུར་བུ་སྲད་བུ་ཚོན་ཕྱེ་དང་། །གོས་རྒྱན་མཛེས་པའི་ཡིད་འོང་གྲོགས། །ཐིག་གདབ་ཆོ་ག་ཕུན་སུམ་ཚོགས། །མཁས་ལྡན་ཆེན་པོས་བསྒྲིམས་ཏེ་བྱ། །ཞེས་སོ། །བཞི་པ་ཚོན་ནི། འདི་ཉིད་ལས། རིགས་ཀྱི་དཀྱིལ་འཁོར་ལྔ་རྣམས་བསྒོམ། །ཞེས་དང་། མ་མཐོང་རྨོངས་ལ་བསྟན་ཕྱིར་དང་། །ཁ་དོག་ཉི་ཤུ་རྩ་ལྔའམ། །ལྔ་ཡི་ཚོན་གྱིས་བྲི་བར་བྱ། །འདུལ་བའི་ཆོ་ག་བཞིན་དུ་དགྱེ། །ཞེས་སོ། །ལྔ་པ་བྲི་བ་ནི། ལྟེ་བ་རྩིབས་དང་ལྡན་པ་ཡི། །རྩིབས་བཞི་འཁོར་ལོ་མུ་ཁྱུད་བཅས། །གྲུ་ཆད་བཞི་དང་གྲུ་བཞི་པའི། །བར་ཁྱམས་སྒོ་ཁྱུད་ལྡན་པར་བྱ། །ཞེས་པ་ལྟར་དཀྱིལ་འཁོར་རྒྱས་འབྲིང་བསྡུས་གསུམ་གང་གིས་འདུལ་བའི་ཆོ་ག་བཞིན་དུ་བྲིའོ། །དྲུག་པ་རྣམ་པ་དགོད་པ་ནི། སྐུ་གསུང་ཐུགས་ལྡན་གཟུགས་ཀྱང་དགོད། །ཅེས་པའམ། ཡང་ན་གཙོ་འཁོར་གྱི་འགྲོས་སྦྱར་ཏེ། རྔམ་གློག་ལས། གཙོ་བོ་གཟུགས་སུ་རྫོགས་པར་བྲི། །འཁོར་རྣམས་ཕྱག་རྒྱ་དག་ཏུ་བྱ། །ཕལ་པ་དག་ལ་ཡིག་འབྲུས་སོ། །ཞེས་སོ། །བདུན་པ་རབ་གནས་ལ། ནུབ་གཉིས་པའི་ལས་རིམ་སྤྱིར་བཤད་པ་དང་། སྐབས་ཐོབ་ཀྱི་ལས་རིམ་དཀྱིལ་འཁོར་རབ་གནས་སོ། །དང་པོ་ནི། ཡན་ལག་གི་རབ་གནས། ལས་བུམ། རྡོར་དྲིལ། ཐོད་ཆུ། ཐིག་ཚོན་རབ་གནས་རྣམས་དང་། ཡན་ལག་ཅན་ལ། བུམ་པ། སློབ་མ། ལྷ་སྟ་གོན་གསུམ་གྱིས་བསྟན་ཏོ། །གཉིས་པ་ནི། ལས་ཁྲིགས་རྣམ་པ་དགུ་ལ་སོགས་པའི་སྒོ་ནས་ ― MLP018_Page_0055 ―
[མ་དཔེ་གཟིགས་ན་འདིར་གནོན།]
བྱ་བ་སྟེ། འདི་ཉིད་ལས། བཅོས་བུའི་རས་ནི་སྣ་ཚོགས་དང་། ཞེས་སོགས་དང་། ལུས་ངག་སེམས་དང་ཆོས་ཐམས་ཅད། །ཅེས་སོགས་འཁྲུགས་སྡེབས་ཀྱི་སྒོ་ནས་བསྟན་ཏོ། །བརྒྱད་པ་སྦྱིན་སྲེག་ནི། སྐབས་ཐོབ་ཀྱི་དབང་གིས་ལས་བཞི་སྟེ། འདི་ཉིད་ལས། དབྱིབས་དང་ཁ་དོག་མཚན་ལྡན་པར། །ཞལ་དུ་གྱུར་པའི་མེ་བུས་ལ། །བཟའ་བཏུང་བྲོ་བའི་ཚོགས་རྣམས་ཀྱིས། །ལས་བཞིའི་མཆོད་པ་རབ་ཏུ་སྦྱིན། །ཞེས་སོ། །དགུ་པ་དཀྱིལ་འཁོར་དུ་འཇུག་པ་ནི། སྒྲུབ་མཆོད་ལ་སོགས་པ་སྔོན་དུ་འགྲོ་བའི་སྒོ་ནས་དང་པོར་སློབ་དཔོན་རང་ཉིད་ཞུགས་རྗེས་སློབ་མ་དཀྱིལ་འཁོར་དུ་འཇུག་པར་བྱ་བ་སྟེ། འདི་ཉིད་ལས། ཀུན་བྱས་དབང་ཕྱུག་རིག་པས་འཇུག །དེ་ནས་སློབ་མ་གཞུག་པར་བྱ། །ཞེས་དང་། རྡོ་རྗེ་ལས་རིམ་ལས། དབང་ཕྱུག་འཇུག་དང་བཟོད་གསོལ་དང་། །ཁྲུས་དགབ་དྲི་དང་ལུས་དབུལ་དང་། །བགེགས་བསྐྲད་ལྷར་རློབ་དམ་ཚིག་སྦྱིན། །དེ་ཉིད་དབབ་དང་ཆུ་ནན་དང་། །སྒྲག་དང་རིན་ཆེན་དོར་བ་དང་། །ལྷ་དབབ་པ་དང་ནན་ཏན་དང་། །མིག་དབྱེ་དཀྱིལ་འཁོར་ལེགས་བསྟན་དང་། །ཚོགས་མཆོག་ཡོན་དང་རྣམ་བཅོ་བརྒྱད། །འདི་ཡི་ཡན་ལག་རྫོགས་པར་འགྱུར། །ཞེས་སོ། །བཅུ་པ་ཞུགས་པའི་ཡོན་ཏན་ནི། བདེ་བ་ཆེན་པོའི་དཀྱིལ་འཁོར་ནི། །སྟངས་དཔྱལ་གཉིས་སམ་ཡང་ན་ལྔ། །བྱས་ཏེ་དད་ལྡན་རབ་ཞུགས་ན། །འདོད་པ་ཡིད་འོང་མཉམ་པར་འགྱུར། །ཞེས་དང་། མཉམ་སྦྱོར་ལས། རྡོ་རྗེ་སེམས་དཔའ་ལ་སོགས་པའི། །འཁོར་ལོ་སྔོན་དུ་མཐོང་བ་ཡིས། །བསོད་ནམས་བརྟག་པ་གང་ཡིན་པ། །ཕྱིས་བྱས་པ་ཡང་དེ་བཞིན་ནོ། །ཞེས་སོ། །བཞི་པ་ཏིང་ངེ་འཛིན་གྱི་དཀྱིལ་འཁོར་ནི། རང་བཞིན་གྱི་དཀྱིལ་འཁོར་ཉིད་ཏིང་ངེ་འཛིན་གྱི་ཡུལ་དུ་བྱས་ནས་རང་རིག་མ་བཅོས་པའི་དོན་ལ་མཉམ་པར་བཞག་པས་རྣམ་པར་མི་རྟོག་པའི་རང་རྩལ་ཡེ་ཤེས་ལྔར་འགག་པ་མེད་པར་འཆར་བ་སྟེ། འདི་ཉིད་ལས། ཡེ་ཤེས་ཕྱོགས་བཞི་དབུས་བརྟགས་ཏེ། །ཞེས་སོགས་ཤོ་ལོ་ཀ་གཅིག་དང་། རྒྱས་པ་ལས། དེ་བཞིན་ཏིང་འཛིན་དཀྱིལ་འཁོར་གྱི། །ཐམས་ཅད་དབྱིངས་སུ་བསྡུས་ནས་ནི། །ཉིད་ཀྱི་ཐུགས་ལ་ཐིམ་བྱས་ཏེ། །ཐམས་ཅད་ཆོས་སྐུའི་ཕྱག་རྒྱ་ཆེ། །ཞེས་སོ། །ལྔ་པ་ལྷག་པ་ཏིང་ངེ་འཛིན་གྱི་ ― MLP018_Page_0056 ―
[མ་དཔེ་གཟིགས་ན་འདིར་གནོན།]
དཀྱིལ་འཁོར་ནི། ཁོག་གཞུང་ལས། ལྷག་པ་ཏིང་འཛིན་རྣམ་པ་གཉིས། །གདུལ་བའི་དོན་ཕྱིར་ཞི་ཁྲོ་སྟེ། །ཞེས་གསུངས་པ་ལྟར། ཐུགས་རྗེ་ཞི་བའི་དཀྱིལ་འཁོར་དང་། བདུད་འདུལ་ཁྲོ་བོའ་དཀྱིལ་འཁོར་གཉིས་ལས། ཞི་ཁྲོ་གཉིས་ཀ་ལ་མཚུངས་པར། སྔོན་འགྲོ་ལས་བདུན་སྔོན་དུ་འགྲོ་བས། དངོས་གཞི་ལ། ཞི་བ་དང་། ཁྲོ་བོ་གཉིས། དང་པོ་ནི། བདག་དང་མཐའ་ཡས་སོགས་ཀྱིས་ཁྱད་པར་གྱི་སྦྱོར་བ་སེམས་བསྐྱེད། ཆོས་ཐམས་ཅད་སྟོང་ཉིད་དེ་བཞིན་ཉིད་དུ་བསྒོམ་པ་དེ་ཏིང་། དེ་མ་རྟོགས་པ་རྣམས་ལ་དམིགས་མེད་ཀྱི་སྙིང་རྗེ་བསྒོམ་པ་ཀུན་ཏིང་། སྟོང་ཉིད་སྙིང་རྗེ་ཟུང་དུ་འཇུག་པའི་རང་རྩལ་རྒྱུའི་ཡི་གེ་ཨ་དཀར་པོར་བསྒོམ་པ་རྒྱུ་ཏིང་དང་། དེ་ལས་ཡི་གེ་ཕྲ་མོའ་འཕྲོ་འདུ་ལ་སེམས་སྦྱངས་ནས། འབྱུང་ལྔའི་ཞེན་རྟོག་སྦྱང་ཕྱིར་དབང་ཆེན་གྱི་དཀྱིལ་འཁོར་བསྐྱེད་པ་དང་། མ་དག་པ་སྣོད་ཀྱི་ཞེན་པ་སྦྱོང་ཕྱིར་ས་བོན་བྷྲཱུྃ་ལས་གཞལ་ཡས་ཁང་དང་། དེའི་ནང་དུ་བཅུད་ཀྱི་ཞེན་རྟོག་སྦྱང་ཕྱིར་བདག་སྲས་གཞན་སྲས་སམ། ཆོ་ག་གསུམ་བསྐྱེད་ལྟ་བུས་རྒྱལ་བའི་དཀྱིལ་འཁོར་གསལ་བཏབ་པ་ལ་རང་རིགས་ཀྱིས་དབང་བསྐུར་ཞིང་། སྐུ་གསུང་ཐུགས་རྡོ་རྗེར་བྱིན་གྱིས་བརླབ་པ་རྣམས་བྱ་སྟེ། དེའི་མཐར་སྙན་གསན་དབབ་ཅིང་སྤྱན་དྲང་བ། མེ་ཏོག་དོར་ཞིང་དབྱེར་མེད་དུ་བསྟིམ་པ། ཕྱག་མཆོད་བཤགས་པ་བྱ་བ། དངོས་གྲུབ་གསོལ་ཞིང་དམ་བཅའ་བ། འཛབ་ཁང་ཕྱེ་ནས་འཕྲོ་འདུ་གསུམ་གསལ་བས་འཛབ་བཟླས་སྐབས་ཀྱི་མཇུག་བསྡུ་དང་བཅས་བྱའོ། །གཉིས་པ་ནི། འཛིན་པའི་དབང་གིས་ཞེས་སོགས་ཀྱིས་ཁྱད་པར་གྱི་སྦྱོར་བ་ཏིང་ངེ་འཛིན་གྱི་དགོས་ཆེད་བསྟན་པ་སྔོན་དུ་འགྲོ་བས་དེ་ཏིང་དང་། ཀུན་ཏིང་གཉིས་ཀྱི་མཐར་རང་རིག་ཧཱུྃ་ལས་ཆོ་ག་གསུམ་གྱིས་རྒྱུའི་ཧེ་རུ་ཀར་བསྐྱེད་པ་རྒྱུ་ཏིང་སྟེ་ཏིང་འཛིན་རྣམ་གསུམ་དང་། དེའི་ཐུགས་ཀ་ནས་ས་བོན་སྤྲོས་ཏེ་འབྱུང་བ་རིམ་བརྩེགས་གཞལ་ཡས་ཁང་། བརྟེན་པ་ལྷའི་དཀྱིལ་འཁོར་དང་བཅས་བསྐྱེད་ཚུལ་ཆོ་ག་གཉིས་ལྟ་བུས་ཞི་བ་དང་འདྲ་བར་བསྒོམ་ཞིང་། དབང་བསྐུར། བྱིན་བརླབ། སྙན་གསན་དབབ་པ་སོགས་ལས་ཀྱི་རིམ་པའི་ཏིང་ངེ་འཛིན་རྣམས་ཞི་བ་དང་ཕྱོགས་མཚུངས་པར་བྱ་བའོ། །མཇུག་གི་ཆོ་ག་ནི། གོ་བགོ་ལུས་བསྲུང་གི་བར་ ― MLP018_Page_0057 ―
[མ་དཔེ་གཟིགས་ན་འདིར་གནོན།]
དོན་ལྔས་བསྟན་པ་བཞིན་ནོ། །དྲུག་པ་བྱང་ཆུབ་སེམས་ཀྱི་དཀྱིལ་འཁོར་ནི། སྤྱན་འགྲེལ་ལས། བྱང་སེམས་ཕྱི་ནང་གསང་བ་ཡང་། །གནས་བཞི་ཁམས་གསུམ་ཡེ་ཤེས་ཆེ། །ཞེས་པས། ཕྱི་བྱང་ཆུབ་ཀྱི་སེམས་རྩ་དང་རླུང་། ནང་བྱང་ཆུབ་ཀྱི་སེམས་ཐིག་ལེ། གསང་བ་བྱང་ཆུབ་ཀྱི་སེམས་བདེ་བའི་ཡེ་ཤེས་དང་གསུམ་མོ། །དང་པོ་ནི། སྒྱུ་འཕྲུལ་སྙིང་པོ་བཀོད་པའི་རྒྱུད་ལས། སྲིད་གསུམ་སེམས་ཅན་ཐམས་ཅད་ལ། །སྲོག་ཤིང་གསུམ་དང་འཁོར་ལོ་བཞི། །ཞེས་རྩ་དང་། རླུང་ལ། སྦྱང་གཞི་ཡེ་ཤེས་ཀྱི་རླུང་དང་། སྦྱང་བྱ་ལས་ཀྱི་རླུང་གཉིས། ཕྱི་མ་ལ་རྩ་བ་དང་ཡན་ལག་གིས་བསྡུས་པའི་རླུང་བཅུ། སྣར་རྒྱུ་བའི་རླུང་དང་བཅས་པའོ། །གཉིས་པ་ནི། སྙིང་ག་ན་སྲོག་མི་ཤིགས་པའི་ཐིག་ལེ་སོགས་ཡེ་ཤེས་ཀྱི་ཐིག་ལེ་དང་། རྣམ་ཤེས་ཀྱི་ཐིག་ལེ་དྭངས་སྙིགས་ལ་སོགས་པའོ། །གསུམ་པ་ནི། སྟེང་འོག་གི་སྒོ་ལ་བརྟེན་ནས་བདེ་ཆེན་གྱི་ཡེ་ཤེས་བསྐྱེད་པ་སྟེ། དགྱེས་རྡོར་ལས། དཀྱིལ་ནི་སྙིང་པོ་ཞེས་བརྗོད་དེ། །བྱང་ཆུབ་སེམས་ནི་བདེ་ཆེན་པོ། །ལེན་པར་བྱེད་པས་དཀྱིལ་འཁོར་ཉིད། །འདུས་པ་དཀྱིལ་འཁོར་ཉིད་དུ་བརྗོད། །ཅེས་སོ། །བདུན་པ་ཚོམ་བུ་ཚོགས་ཀྱི་དཀྱིལ་འཁོར་ནི། ཞི་ཁྲོ་གཉིས་ཀ་ལ་ཚོམ་བུ་གཅིག་གསུམ་ལྔ་པ་གསུམ་སྟེ། ཁོག་གཞུང་ལས། ཚོགས་ནི་འབྱོར་པ་རྣམ་པ་གསུམ། །ཚོམ་བུ་གཅིག་གསུམ་ལྔ་པའོ། །ཞེས་སོ། །བཞི་པ་དབང་ལའང་གསུམ་སྟེ་ངོ་བོ་ནི། ཐུགས་ཐིག་ལས། རྒྱུ་གཉིས་རྐྱེན་བཞིས་ཡན་ལག་བསྙད། །དྲུག་ལ་གནས་པའི་འཐོབ་བྱ་དེ། །ངོ་བོ་ཉིད་ཅེས་རྣམ་པ་བཤད། །ཅེས་པས་སྤྱིར་དབང་ལ་རྒྱུ་གཉིས་དང་རྐྱེན་བཞིའོ། །དང་པོ་ལ། མཚུངས་ལྡན་གྱི་རྒྱུ་ནི། དབང་གི་རྒྱུ་གདོད་མ་ནས་རང་ལ་རང་ཆས་སུ་བཞུགས་སོ། །ལྷན་ཅིག་བྱེད་རྒྱུ་ནི། དབང་རྫས་རབ་གནས་ཀྱི་བྱིན་གྱིས་རློབ་པ་ཅན་ནོ། །གཉིས་པ་ལ་རྒྱུའི་རྐྱེན་ནི། ཕན་ནུས་ཟབ་མོའ་དབང་གསུམ་བསྐུར་དུ་རུང་བའི་སྣོད་ལྡན་གྱི་སློབ་མའོ། །བདག་པོའི་རྐྱེན་ནི། དབང་གསུམ་བསྐུར་ནུས་པའི་རྡོ་རྗེ་སློབ་དཔོན་ཚད་ལྡན་ནོ། །དམིགས་པའི་རྐྱེན་ནི། རྫས་སྔགས་ཏིང་འཛིན་གསུམ་འཛོམ་པའི་ནུས་པ་ཁྱད་པར་ཅན་ནོ། །དེ་མ་ཐག་རྐྱེན་ནི། དབང་སྔ་མས་གོ་ཕྱེ་ནས་ ― MLP018_Page_0058 ―
[མ་དཔེ་གཟིགས་ན་འདིར་གནོན།]
ཕྱི་མ་འབྱུང་བའོ། །དེ་ལྟར་རྒྱུ་གཉིས་རྐྱེན་བཞི་སྟེ། དྲུག་པོ་ཚོགས་པ་ལ་བརྟེན་ནས་གོ་འཕང་གི་ཆོས་དབང་གི་ཡེ་ཤེས་རྒྱུད་ལ་འཇོག་པའི་ལས་ཀྱིས་ཐར་པའི་མྱུ་གུ་མངོན་དུ་བསྐྱེད་པའམ་སྐྱེ་ངེས་ཀྱི་ནུས་རུང་དུ་སྨིན་པར་བྱེད་པ་ནི་དབང་གི་ངོ་བོའོ། །ངེས་ཚིག་ནི། ཨ་བྷི་ཥིཉྩའི་སྒྲ་ལས་དྲངས་ན། ཨ་བྷི་ནི་མངོན་པ། ཥིཉྩ་ནི་གཏོར་བའམ་བླུགས་པ་སྟེ། དབང་གིས་སྒོ་གསུམ་གྱི་དྲི་མ་འཁྲུད་པའི་ཆ་ནས་མངོན་པར་གཏོར་བ་དང་། འབྲས་བུ་ཡེ་ཤེས་ཀྱི་ནུས་པ་ཁྱད་པར་ཅན་རྒྱུད་ལ་འཇོག་པའི་ཆ་ནས་མངོན་པར་བླུགས་པ འི་དོན་གྱིས་ན་དབང་ངོ་། །དབྱེ་ན། སྤྱིར་གཞི་དང་། ལམ་དང་། འབྲས་བུའི་དབང་གསུམ་དུ་འགྱུར་བ་ལས། དང་པོ་ནི། རྩ་རྒྱུད་དུ། དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །སྙིང་རྗེས་ཆུད་མ་ཟོས་པར་བཟུང་། །ཞེས་དང་། ཁོག་གཞུང་ལས། དད་དང་བརྩོན་འགྲུས་གསུམ་ལྡན་དང་། །བརྟུལ་ཞུགས་གསུམ་ལྡན་སློབ་མ་ལ། །ཞེས་པས་གང་ཟག་རིམ་གཉིས་ཀྱི་ལམ་ཉམས་སུ་ལེན་པར་མི་ནུས་ན་ཡང་དད་པ་ཅན་ལ་ཕན་དབང་ཙམ་བསྐུར་བ་དང་། དེའི་སྟེང་དུ་ནུས་དབང་ལྔ་ལས། རྒྱུད་ལ་ཐོས་བསམ་བྱེད་ནུས་ཀྱི་གང་ཟག་ལ་ཉན་དབང་། བསྐྱེད་རིམ་གྱི་ལམ་རྣམས་དང་རྫོགས་རིམ་རྗེས་མཐུན་ཙམ་ཉམས་སུ་ལེན་ནུས་ལ་སྒོམ་དབང་སྟེ་བདག་དོན་ནུས་པའི་བརྩོན་འགྲུས་ཅན་དང་། དེའི་སྟེང་དུ་ཞི་རྒྱས་སོགས་ཕྲིན་ལས་ཀྱི་སྦྱོར་བས་གཞན་དོན་བྱེད་ནུས་ལ་ཕྲིན་ལས་ཀྱི་དབང་དང་། རྒྱུད་འཆད་ནུས་ལ་འཆད་དབང་སྟེ་གཞན་དོན་ནུས་པའི་བརྩོན་འགྲུས་ཅན་དང་། དེའི་སྟེང་དུ་རབ་གནས་དང་སློབ་མ་ལ་དབང་བསྐུར་བ་སོགས་རྡོ་རྗེ་སློབ་དཔོན་མཆོག་ཏུ་འོས་པ་རང་གཞན་གཉིས་ཀའི་དོན་ནུས་པ་རྣམས་ལ་བདག་པོའི་དབང་སྟེ་ནུས་དབང་ལྔ། སྤྱོད་རིགས་མཉམ་པའི་བརྟུལ་ཞུགས་ཅན་ལ་གསང་བ་ཟབ་མོའ་དབང་གསུམ་བསྐུར་བ་ལྟ་བུ་སྟེ་སྤྱིར་བཞག་པ་ཡིན་ལ། དོན་དུ་ན། ཁྱད་པར་ཅན་གྱི་ལམ་འདི་སོགས་ལ་སྔོན་དུ་མ་ཞུགས་པ་གཅིག་དང་པོར་དཀྱིལ་འཁོར་དུ་བཅུག་ནས་དབང་གིས་སྨིན་པར་བྱེད་པའོ། །གཉིས་པ་ནི། སྔོན་དུ་དབང་ཐོབ་བསྐྱེད་རྫོགས་གང་རུང་གི་ལམ་ཉམས་སུ་ལེན་ ― MLP018_Page_0059 ―
[མ་དཔེ་གཟིགས་ན་འདིར་གནོན།]
བཞིན་པའི་གང་ཟག་ལྟ་བུ་ལམ་ཞུགས་གཅིག་ལ། དེའི་རྒྱུད་ཀྱི་སྔགས་སྡོམ་ཇེ་དག་ཇེ་བཟང་དུ་འགྱུར་བ་ལ་སོགས་པའི་ཆེད་དུ་བླ་མ་རྡོ་རྗེ་སློབ་དཔོན་གྱིས་དཀྱིལ་འཁོར་དུ་བཅུག་སྟེ་དབང་བསྐུར་བའམ། རང་ཉིད་ཀྱིས་བདག་འཇུག་བྱེད་པ་ལྟ་བུ་ནི་ལམ་དབང་སྟེ། དོན་དུ་ན་ཐེག་པ་མཆོག་གི་ལམ་ལ་བགྲོད་བཞིན་པའི་གང་ཟག་གིས་བླ་མའི་བདག་འཇུག་གང་རུང་ལས་དབང་ལེན་པའོ། །གསུམ་པ་ནི། ཕ་རོལ་ཏུ་ཕྱིན་པའི་ལམ་གྱིས་བསྒྲུབ་པའི་མི་སློབ་ལམ་དང་། སྔགས་རང་ལུགས་ཀྱི་མཐར་ལམ་ལྷུན་གྲུབ་རིག་འཛིན་གྱི་ས་ལ་བཞུགས་པའི་གང་ཟག་རྣམས་ལ། འོག་མིན་ཆོས་ཀྱི་དབྱིངས་ཀྱི་ཕོ་བྲང་ཆེན་པོར། སྟོན་པ་ལོངས་སྤྱོད་རྫོགས་པ་རིགས་དྲུག་པ་དཔལ་ཀུན་ཏུ་བཟང་པོས་ནང་གི་མངོན་བྱང་ལ་བརྟེན་ནས་གསང་བ་ཟབ་མོའ་དབང་གསུམ་བསྐུར་བས་ཤེས་སྒྲིབ་ཕྲ་བ་སྣང་གསུམ་གྱི་དྲི་མ་སྦྱངས་ནས་རང་གི་ཡེ་ཤེས་ཇི་ལྟ་བ་མངོན་དུ་བྱེད་པའི་སྒོ་ནས་སྟོན་འཁོར་དགོངས་པར་དབྱེར་མེད་དུ་སྒྲུབ་པ་ནི་འབྲས་དབང་སྟེ། དོན་དུ་ན། སྟོན་པ་རྫོགས་པའི་སངས་རྒྱས་ཀྱིས་རྒྱུན་མཐའི་བྱང་སེམས་ལ་འོག་མིན་དུ་དབང་བསྐུར་བའོ། །བྱེ་བྲག་ཏུ་དབྱེ་ན། རྒྱུད་ཕྱི་མ་ལས། སློབ་དཔོན་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །ཞེས་པས་བཞིར་གསུངས་ཤིང་། དེ་ལས་ཀྱང་བུམ་དབང་ལ་ཕན་ནུས་གཉིས་སུ་ཕྱེ་བས་ལྔར་འགྱུར་ཏེ། རྡོ་རྗེ་ལས། དང་པོ་ས་བོན་འཇོག་པ་སྟེ། གཉིས་པ་ནུས་པ་བསྐྱེད་པ་ཡིན། །གསུམ་པ་ཉམས་མྱོང་བསྐྱེད་པའོ། །བཞི་པས་དེ་ཉིད་བརྟན་པར་བྱེད། །ལྔ་པས་བརྟན་པ་ཉམས་ལོན་པས། །མཆོག་གི་དངོས་གྲུབ་ཚེ་འདིས་འགྲུབ། །ཅེས་པས། དང་པོ་ཕན་དབང་གི་སྣོད་རུང་དུ་སྨིན་པར་བྱེད་པའི་སྒོ་ནས་འདི་ཕྱི་གང་རུང་དུ་བསྐྱེད་རྫོགས་ཀྱི་ལམ་ལ་འཇུག་པའི་སྐལ་ལྡན་དུ་བྱེད་པའི་ས་བོན་གསོས་འདེབས་པ་དང་། གཉིས་པ་ནུས་དབང་གིས་ད་ལྟ་ནས་རང་གཞན་གྱི་དོན་བྱེད་པའི་ནུས་པ་བསྐྱེད་པ་དང་། གསུམ་པ་གསང་དབང་གིས་བདེ་ཆེན་གྱི་ཁྱད་པར་དུ་བྱས་པའི་ཉམས་མྱོང་བསྐྱེད་པ་དང་། བཞི་པ་ཡེ་ཤེས་རང་གནས་ཀྱིས་ཁམས་འཛིན་འགྲེམ་ལ་སོགས་པའི་སྒོ་ནས་དེ་ཉིད་བརྟན་པར་བྱེད་པ་དང་། ལྔ་པ་བདེ་བ་ཆེན་པོས་བརྟན་པ་དེའི་དོན་ཉམས་ ― MLP018_Page_0060 ―
[མ་དཔེ་གཟིགས་ན་འདིར་གནོན།]
སུ་ལེན་ཏེ་རང་བཞིན་ལྷན་ཅིག་སྐྱེས་པའི་ཡེ་ཤེས་སུ་ལ་བཟླ་བར་བྱེད་པའོ། །དེ་ཡང་ཞི་བ་ལ་ཕན་དབང་བཅུ། ནུས་དབང་ལྔ། ཟབ་དབང་གསུམ་སྟེ་བཅོ་བརྒྱད། དེ་ལ་ཕན་དབང་བཅུ་ནི། སྡོམ་ཚིག་ཏུ་བྱེད་ན། སྙིང་པོ་ལྔ་དང་དབུ་རྒྱན་དང་། །བུམ་པ་ཅོད་པན་ཕྲེང་བ་སྟེ། །གོ་ཆ་རྒྱལ་མཚན་གདུགས་ཕྱག་རྒྱ། །བཟའ་བཏུང་དབང་རྣམས་རིམ་བཞིན་བསྐུར། །ཞེས་སོ། །ནུས་དབང་ལྔ་ནི། ཉན་དབང་། བསྒོམ་དབང་། ཕྲིན་ལས་ཀྱི་དབང་། འཆད་དབང་། རྡོ་རྗེ་རྒྱལ་པོ་བཀའ་རབ་འབྱམས་ཏེ་ལྔའོ། །ཟབ་དབང་གསུམ་ནི། གསང་དབང་། ཡེ་ཤེས་རང་གནས། བདེ་བ་ཆེན་པོའི་དབང་དང་གསུམ་མོ། །ཁྲོ་བོ་ལ། གདན་དང་ལྷ་དབང་ཕྱག་མཚན་དང་། ཆས་བཅུ་སྒྲུབ་རྫས་བཅོ་ལྔ་སྟེ། ཞེས་པ་ལྟར་ཕན་དབང་ལ་ཉེར་བརྒྱད་དུ་ཕྱེ་བས་སུམ་ཅུ་རྩ་དྲུག་སྟེ། ཐུགས་ཐིག་ལས། བསྒྱུར་བ་ལྔ་ལ་སུམ་ཅུ་དྲུག །ཅེས་སོ། །ལྔ་པ་དམ་ཚིག་ལའང་གསུམ་སྟེ། ངོ་བོ་ནི། རྒྱུད་ཕྱི་མ་ལས། གང་ཞིག་ནན་ཏན་ལས་མི་འགོང་། །རྨི་ལམ་དུའང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད། །ཅེས་པས་གང་བསྲུང་བྱའི་དོན་ཁྱད་པར་ཅན་ནི་འོག་ཏུ་འབྱུང་བའི་རྩ་བ་དང་ཡན་ལག་གི་དམ་ཚིག་རྣམས་ཡིན་ལ། དེ་དག་ལས་ནམ་ཡང་མི་འདའ་བར་སྡོམ་པར་བྱེད་པའི་སེམས་དཔའ་རྒྱུན་ཆགས་དང་། གཉིད་དང་སེམས་ཡེངས་པ་ལ་སོགས་པའི་གནས་སྐབས་སུ་ཡང་ཚིག་སྡོམ་པའི་ས་བོན་དང་བཅས་པའོ། །ངེས་ཚིག་ནི། ས་མ་ཡའི་སྒྲ་ལས་དྲངས་ན། ས་མ་ཡ་ནི་དངོས་སུ་ཡལ་གམ་བཅས་པའི་ཐ་ཚིག་ལ་འཇུག་སྟེ། སྔོན་རང་གིས་ཇི་ལྟར་དམ་བཅས་པ་ལས་འདའ་བར་བྱ་བ་མིན་པའི་ཕྱིར་དམ་ཚིག་གོ །དེ་ལྟར་ཡང་། ཇི་སྐད་དུ། དམ་པ་སྐུ་གསུང་ཐུགས་ཡིན་ཏེ། །དེ་ལས་འདས་ན་ཚིག་པར་འགྱུར། །ཞེས་སོ། །དབྱེ་ན། རྩ་བའི་དམ་ཚིག་ལྔ། ཡན་ལག་གི་དམ་ཚིག་ལྔ་ཚན་གཉིས། སྤྲོ་ན་སུམ་བརྒྱ་དྲུག་ཅུར་དབྱེ་བ་དང་གསུམ་མོ། །དང་པོ་ནི། འདི་ཉིད་ལས། བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །སྒྲུབ་དང་བསྲུང་བའི་དམ་ཚིག་མཆོག །ཅེས་པ་ལྟར་ལྔ་ལས། དང་པོ་ ― MLP018_Page_0061 ―
[མ་དཔེ་གཟིགས་ན་འདིར་གནོན།]
བླ་མེད་མི་སྤང་བ་ནི། ཡུལ་བླ་ན་མེད་པའི་བྱང་ཆུབ་ཀྱི་སེམས་ལྷག་པ་བདེན་གཉིས་མི་སྤང་བ་སྟེ། ཇི་ལྟར་མི་སྤང་ན། ལྷག་པའི་བདེན་གཉིས་དབྱེར་མེད་དུ་རྟོགས་ནས་སྒོ་གསུམ་ལྷའི་སྐུ་གསུང་ཐུགས་ཀྱི་ཕྱག་རྒྱ་ལས་མི་འདའ་བར་བྱེད་པ་སྟེ། གསལ་བཀྲ་ལས། རང་ལུས་རྒྱལ་བའི་ཕྱག་རྒྱ་ཆེ། །སེམས་ཅན་ཁམས་ཀྱང་དེར་ཤེས་ཤིང་། །སྣང་སྟོང་གཉིས་མེད་རྡོ་རྗེའི་སྐུ། །བྱས་མཐོང་ཟོས་པ་ཐམས་ཅད་ཀྱང་། །སེམས་ཕྱིར་གང་ཡང་བྱས་སྣང་མེད། །དྲན་དང་ཤེས་བཞིན་སྔོན་བཏང་ལ། །དུས་གསུམ་རྒྱུན་དུ་མ་དྲན་ན། །ཐེག་ཆེན་སྔགས་པར་ཅི་ཡིས་ཆུད། །ཅེས་སོ། །གཉིས་པ་བླ་མ་བཀུར་བ་ནི། སྔ་མ་ལས། སྤྱི་དང་འདྲེན་དང་དམ་ཚིག་དབང་། །ཉམས་ཆག་སྐོང་དང་ཤེས་རྒྱུད་འགྲོལ། །མན་ངག་ལུང་གི་སློབ་དཔོན་དྲུག ། ཅེས་པ་ལྟར་སློབ་དཔོན་དྲུག་པོ་བཀུར་ཐབས་དྲུག་གི་སྒོ་ནས་བཀུར་ཏེ། སྔ་མ་ལས། ཡུལ་ལ་དབང་བའི་རྒྱལ་པོ་དང་། །ཁུ་བོ་ཕ་དང་མ་དང་མིག །སྙིང་བས་ལྷག་པའི་ཚུལ་བསྟན་ཏེ། །ཞེས་སོ། ཁྱད་པར་དུ་ཡང་། དབང་བསྐུར། རྒྱུད་བཤད། མན་ངག་ནོད་པ་གསུམ་ནི་ལྷག་པར་ཡང་བཀུར་བའི་ཡུལ་ཏེ། བདེ་འདུས་ཞི་རྒྱུད་ལས། རྒྱུད་འགྲོལ་དབང་བསྐུར་དེ་ཉིད་བསྟན། །ཞེས་སོ། །གསུམ་པ་སྔགས་རྒྱ་རྒྱུན་མི་བཅད་པ་ནི། ཡུལ་སྔགས་གསུམ་དང་ཕྱག་རྒྱ་བཞི་སྟེ། དེ་དག་ཉམས་སུ་ལེན་ཚུལ་ནི། གསལ་བཀྲ་ལས། རབ་ཀྱི་ཆུ་བོའ་རྒྱུན་བཞིན་ནམ། །ཉིན་གསུམ་མཚན་གསུམ་གཉིས་གཅིག་ཏུ། །མ་ཡེངས་ཙམ་དུ་ངང་གིས་བཟླ། །འབྲིང་གིས་ཟླ་གཅིག་དུས་དྲུག་དང་། །དུས་བཞིའི་བར་དུ་མི་བཅད་ཅིང་། །ཐ་མ་བྱ་བའི་རྣལ་འབྱོར་པས། །ཟླ་རེའམ་ར་བའི་དུས་དག་ཏུ། །བཙོན་པས་འབད་དེ་མི་བྱེད་པ། །བྱང་ཆུབ་ས་བོན་བརླག་པ་ཡིན། །ཚོགས་དང་གཏོར་མའང་དེ་བཞིན་དུ། །ཐ་ན་ལོ་ཟླར་མི་འདའ་འོ། །ཞེས་སོ། །བཞི་པ་མཆེད་ལ་བྱམས་པ་ནི། སྔ་མ་ལས། མཐའ་ཡས་སེམས་ཅན་རང་རིག་ཕྱིར། །གང་ཡང་བདག་ལས་གཞན་མེད་དང་། །བདེ་གཤེགས་སྙིང་པོའི་སྤུན་ཡིན་ཕྱིར། །མ་འོངས་སངས་རྒྱས་རང་བཞིན་ནི། །སྤྱི་ཡི་མཆེད་དེ་ཕ་ཚན་བཞིན། །སངས་རྒྱས་ཆོས་ཞུགས་རིང་བ་དང་། །ལྟ་སྤྱོད་མཐུན་པ་ཉེ་བར་བཤད། །ཕ་གཅིག་དམ་ཚིག་ནང་འདྲེས་ ― MLP018_Page_0062 ―
[མ་དཔེ་གཟིགས་ན་འདིར་གནོན།]
པ། །ཞེས་སོ། །དེས་མཚོན་པའི་རྡོ་རྗེའི་མཆེད་རྣམས་དང་བྱང་ཆུབ་བར་དུ་མི་འབྲལ་བའི་ལྷག་བསམ་རྒྱུན་མི་ཆད་པར་བྱེད་པའོ། །ལྔ་པ་གསང་བ་མི་སྨྲ་བ་ནི། ཕྲ་རྒྱས་ལས། དམ་ཉམས་དམ་ལས་ལོག་པ་དང་། །དམ་མེད་དཀྱིལ་འཁོར་མ་མཐོང་དང་། །འདྲེས་དང་མ་འདྲེས་ཐམས་ཅད་ལ། །ཞེས་གང་ལ་གསང་བྱའི་ཡུལ་བསྟན་ནས། གང་གསང་ན། དེ་ལས། སྤྱི་དང་བར་གསང་བཞི་བཞི་དང་། །འོས་དང་གཉེར་གཏད་རྣམ་པ་བཅུ། །ཞེས་པས། སྤྱིར་གསང་བཞི། བར་གསང་བཞི། གསང་བར་འོས་པ། གསང་བ་གཉེར་གཏད་པ་རྣམས་སོ། །ཇི་ལྟར་གསང་ན། སྤྱིར་གསང་བཞི་ལས་ལྟ་ཟབ་ནི་ཐེག་དམན་སོགས་བློ་འཕང་དམའ་བ་རྣམས་དང་། སྤྱོད་པ་ནི་མ་འདྲེས་པ་ཐམས་ཅད་ལ་གསང་། ཡི་དམ་གྱི་ལྷ་སྔགས་དང་གྲུབ་རྟགས་ནི་མ་འདྲེས་པ་ལ་བསྟན་ན་དམ་ཚིག་ཉམས་ཤིང་། འདྲེས་པ་ལ་བསྟན་ན་ཡང་དངོས་གྲུབ་ཉམས་པར་འགྱུར་བས་གསང་བར་བྱའོ། །བར་གསང་བཞི་ནི། སྒྲུབ་པ་ཇི་ཙམ་བྱེད་པའི་བར་དེ་ཉིད་དུ་གསང་ངོ་། །གསང་བར་འོས་པ་ནི། གང་མཐོང་བ་ལས་མ་དད་པར་འགྱུར་བ་ལ་སོགས་པའི་ཆ་ཐམས་ཅད་དོ། །གསང་བ་གཉེར་གཏད་པ་ནི། སློབ་དཔོན་དང་མཆེད་ཀྱིས་གསང་བར་གདམས་པ་རྣམས་སོ། །གཉིས་པ་ལ་མི་སྤང་བ་ལྔ་དང་། མི་འདོར་བ་ལྔའོ། །དང་པོ་ནི། འདི་ཉིད་ལས། གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ་། །ཞེས་པ་ལྟར་ལྔ་ཡིན་ལ། དེ་ལ་དབྱེ་ན་བསལ་བཀྲ་ལས། མི་སྤང་དམ་ཚིག་བཤད་བྱ་བ། །ཡང་དག་དུག་ལྔ་ལོག་དུག་ལྔ། །ཞེས་ཡང་ལོག་གཉིས་གཉིས་སོ། །གཉིས་པ་ནི། དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་འདོར་རོ། །ཞེས་སོ། །གསུམ་པ་ནི། འདི་ཉིད་ལས། རྩ་བའི་དམ་ཚིག་ལྔ་ལ་ནི། །གཅིག་ལའང་གཉིས་དང་བཅུ་ཕྲག་གསུམ། །ཡན་ལག་དམ་ཚིག་ལྔ་གཉིས་ལ། །གཅིག་ལའང་བཅུ་ཕྲག་གཉིས་སུ་དབྱེ། །ཞེས་པས་རྩ་བའི་དམ་ཚིག་ལྔ་པོ་རེ་རེ་ལ་ཐབས་ཤེས་གཉིས་གཉིས་སུ་ཕྱེ་བས་བཅུ་དང་། ཡང་རྩ་བ་ལྔ་པོ་རེ་རེ་ལ་སུམ་ཅུ་རེར་ཕྱེ་བས་ཆིག་བརྒྱ་ལྔ་བཅུ་སྟེ། སྔར་གྱི་བཅུ་དང་བསྡོམས་པས་བརྒྱ་དྲུག་ཅུའོ། །ཡན་ལག་གི་དམ་ཚིག་བཅུ་པོ་རེ་རེ་ལ་ཉི་ཤུ་ཉི་ཤུར་ཕྱེ་བས་ཉིས་བརྒྱ་ ― MLP018_Page_0063 ―
[མ་དཔེ་གཟིགས་ན་འདིར་གནོན།]
སྟེ། སྔར་གྱི་བརྒྱ་དྲུག་ཅུ་དང་བསྡོམས་པས་སུམ་བརྒྱ་དྲུག་ཅུའོ། །དེ་དག་གི་རྣམ་བཞག་རྒྱས་པར་ཕྲ་རྒྱས་ལས་ཤེས་པར་བྱའོ། །དྲུག་པ་ཕྲིན་ལས་ལའང་གསུམ་སྟེ། ངོ་བོ་ནི། ཐུགས་ཐིག་ལས། ཕྱི་རོལ་ཚད་མེད་ཉིད་ལས་བཞི། །ཞེས་པས། སེམས་ཅན་ཐམས་ཅད་རང་གི་ཕ་མར་ཤེས་པའི་བྱམས་པ། དེ་དག་རིགས་དྲུག་གི་གནས་ན་སྡུག་བསྔལ་གྱི་ཡོ་ལང་ལ་སྤྱོད་པ་སྙིང་རྗེ། སེམས་ཅན་འགའ་ཞིག་ལྷ་མིའི་འདོད་ཡོན་གྱིས་འབྱོར་པ་སོགས་བདེ་བར་གནས་པ་ལ་དགའ་བ། ཉེ་རིང་ཆགས་སྡང་དང་བྲལ་བའི་བཏང་སྙོམས་ཏེ། དེ་ལྟ་བུའི་ཚད་མེད་པ་བཞིའི་རྒྱུ་ལས་བྱུང་བའི་བྱང་ཆུབ་ཀྱི་སེམས་དང་། འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པའི་སྒོ་ནས་གཙོ་བོར་གཞན་དོན་སྒྲུབ་པ་ལ་དམིགས་པའི་ཐབས་མཁས་ཀྱི་མཛད་སྤྱོད་དོ། །ངེས་ཚིག་ནི། ཀརྨ་ཞེས་པའི་སྒྲ་ལས་ལུས་ངག་ཡིད་གསུམ་སྟེ་སྒོ་གསུམ་གྱིས་བསྡུས་པའི་བྱ་བའི་མཚན་ཉིད་ཅན་ནི་ལས་དེ་བྱེད་པ་པོར་འདོད་པའོ། །དབྱེ་ན། ཕྱི་མ་འགོས་འགྱུར་ལས། ཞི་བ་ལ་སོགས་རབ་དབྱེ་བས། །ལས་ནི་རྣམ་པ་བཞིར་བསྡུས་སོ། །ཞེས་པས་ནད་གདོན་སོགས་མི་མཐུན་ཕྱོགས་ཞི་བ་དང་། ཚེ་དཔལ་སོགས་མཐུན་ཕྱོགས་རྒྱས་པ་དང་། ལོག་ལྟ་ཅན་དབང་དུ་བསྡུ་བ་དང་། གདུག་པ་ཅན་ཚར་གཅོད་པ་དྲག་པོའི་ཕྲིན་ལས་ཏེ་བཞིའོ། །དེ་དག་ཀྱང་གང་གིས་བྱ་བའི་ཐབས་ཀྱི་རིམ་པ་ནི། མེ་དང་། རྫས་དང་། ལུ་གུ་རྒྱུད་དང་། མཆོད་རྟེན་དང་། ཕྱག་རྒྱའི་སྒོ་ནས་བྱ་བ་རྣམས་ཏེ། ཁོག་གཞུང་ལས། བདག་གཞན་དོན་སྒྲུབ་ཕྲིན་ལས་ནི། །མཆོད་རྟེན་ཕྱག་རྒྱའི་སྒོ་དང་ནི། །ཧོམ་བྲོ་གླུ་དང་རྫས་ཀྱིས་བྱ། །ཞེས་སོ། །དེ་ལ་མེའི་སྒོ་ནས་ལས་བྱ་བ་ནི། སྦྱིན་སྲེག་རྩ་བ་ལས། གནས་རྫས་ཐབ་ཀྱི་རྣམ་པ་དང་། །གཟུངས་དང་གཙོ་སེམས་བསྒྲུབ་བྱ་དང་། །ཕུར་བུ་ལྷ་དུས་ལས་རིམ་དང་། །ལྷག་མ་བཅུ་གཅིག་ཤེས་པར་བྱ། །ཞེས་པ་ལྟར་ལས་བཞི་ཀ་ལ་དོན་ཚན་བཅུ་གཅིག་གི་སྒོ་ནས་སྟོན་ཅིང་། འདི་ཉིད་ལས། འབར་བ་གཏུམ་ཆེན་རྔམས་པ་ལ། །ཁྲོས་པའི་ཡིད་ཀྱིས་མཆོད་སྦྱིན་བྱ། །སངས་རྒྱས་བསོད་ནམས་སྐུ་ཡང་འཇིག །ཅེས་སོགས་ཕྲིན་ལས་བཞི་སོ་སོ་ལ་མེའི་སྒོ་ནས་ལས་བྱ་ཚུལ་ཕན་ཡོན་དང་ ― MLP018_Page_0064 ―
[མ་དཔེ་གཟིགས་ན་འདིར་གནོན།]
བཅས་བསྟན་ཏོ། །གཉིས་པ་རྫས་ཀྱི་སྒོ་ནས་ལས་བྱ་བ་ནི། ལིངྒ་བཅའ་བ། དཀྱིལ་འཁོར་བསྐྱེད་པ། བསྒྲུབ་བྱའི་ལས། མཆོད་སྦྱིན་བྱ་བ་ཡོན་ཏན་དང་བཅས་པ་སྟེ། བདུད་རྩི་ལྔའམ་ཟས་ལྔ་ལ། །མཚན་མ་མིང་དུ་བཅས་པར་བྱ། །བཀུག་ནས་རྡོ་རྗེ་ཕུར་བུས་གདབ། །རྡུལ་དུ་བྱས་ནས་ཚོགས་ལ་དབུལ། །ཞེས་སོ། །གསུམ་པ་ལུ་གུ་རྒྱུད་ཀྱི་སྒོ་ནས་ལས་བྱ་བ་ནི། བྲོའི་སྒོ་ནས་ཕྲིན་ལས་བཞི་སྒྲུབ་པ་སྟེ། ཨེ་ཡི་ཚོགས་ཀྱི་དཀྱིལ་འཁོར་མཆོག །ལུ་གུ་རྒྱུད་དུ་སྦྲེལ་བསྡམས་ནས། །བཅིངས་གྱུར་སྤྱོད་ནས་ཕྱོགས་བཅུར་གཡོ། །མྱོས་ནས་གས་ཏེ་འཚིག་པར་འགྱུར། །ཞེས་པ་ལ་སོགས་པས་ཕྲིན་ལས་བཞི་སོ་སོའ་བྲོ་ཕན་ཡོན་དང་བཅས་པ་དང་། ཁྲོ་བོ་སྒྲུབ་པའི་ལས་ཀྱི་གཙོ་བོ་ནི་འདི་ཡིན་ནོ། །ཞེས་སོགས་ཀྱིས་སྤྱིར་བསྟན་ཏོ། །བཞི་པ་མཆོད་རྟེན་གྱི་སྒོ་ནས་ལས་བྱ་བ་ནི། བདག་ཉིད་ཞི་བའི་ལས་ལ་རྣམ་སྣང་། རྒྱས་པར་རིན་འབྱུང་། དབང་ལ་རྟ་མགྲིན། དྲག་པོ་ལ་བཛྲ་ཧེ་རུ་ཀར་བསྐྱེད་ནས་རིགས་སོ་སོའ་སྔགས་ཀྱིས་མཆོད་རྟེན་དཀར་པོ་ཟླུམ་པོ་སོགས་ལས་མཐུན་དུ་བཏབ་པའི་བུམ་ནང་དུ། རིགས་མཐུན་གྱི་ལྷ་བསྐྱེད། དེའི་འོད་ཀྱིས་བསྒྲུབ་བྱ་གང་ཡིན་བཀུག་ནས་མཆོད་རྟེན་གྱི་འོག་ཏུ་གནས་པ་ལ། འོད་དེས་རེག་པས་ཞི་རྒྱས་དབང་དྲག་གི་ལས་གང་ཡིན་འགྲུབ་པར་བསམ་པ་སྟེ། རྒྱས་པ་ལས། དྲག་པོ་གཏུམ་པོ་འདུལ་བའི་ཕྱིར། །བདག་ཉིད་དྲག་པོར་བསྒོམས་ནས་ནི། །ཆོས་སྐུ་ནག་པོ་འོད་འབར་གྱིས། །བགེགས་ཀྱི་ལིངྒ་མནན་པར་བྱ། །ཞེས་སོགས་སོ། །དེ་ལྟར་ས་ལ་དངོས་སུ་འདེབས་པའམ། ཏིང་ངེ་འཛིན་གྱིས་འབྱུང་བ་གཞན་ལ་འདེབས་པའང་རུང་སྟེ། སྤྱན་འགྲེལ་ལས། མཆོད་རྟེན་འབྱུང་བ་གང་ལ་འདེབས་ཀྱང་། ཞེས་དང་། འཇིམ་པ་ལ་དངོས་སུ་མི་འདོད་པའང་མིན་ཏེ། ཞེས་སོ། །ཡང་ན་རྒྱུད་ཕྱི་མ་ལས་གསུངས་པ་བཞིན་དངོས་སུ་བཞེངས་ནས་ཐབ་ཁུང་དུ་བྱས་ཏེ་ལས་བཞིའི་སྦྱིན་སྲེག་བྱ་བར་ཡང་བཤད་དོ། །ལྔ་པ་ཕྱག་རྒྱའི་སྒོ་ནས་ལས་བྱ་བ་ལ། ཕྱག་རྒྱ་བཅའ་བའི་སྒོ་ནས་དང་། བསྒྱུར་བའི་སྒོ་ནས་ལས་བྱ་བའོ། །དང་པོ་ནི་དཔལ་ཧེ་རུ་ཀའི་ལས་བཞིའི་ཕྱག་རྒྱ་བཅའ་བ་སྟེ། རྒྱས་པ་ལས། ཡན་ལག་སྙིང་པོ་རྩེ་གཅིག་དང་། །རྩེ་ལྔ་རྩེ་དགུ་བཅུ་གཅིག་ཏུ། ། ― MLP018_Page_0065 ―
[མ་དཔེ་གཟིགས་ན་འདིར་གནོན།]
ལས་རྣམས་སོ་སོར་རབ་ཏུ་སྒོམ། །ཞེས་སོ། །གཉིས་པ་ནི། རྒྱས་པ་ལས། རྡོ་རྗེ་ལན་གསུམ་གསོར་བ་ཡིས། །ལྷ་མོ་ཀླུ་མོ་རིགས་ངན་མོ། །དམ་ཅན་རྣལ་འབྱོར་དབང་དུ་འགྱུར། །ཞེས་ཀུན་བཟང་ཡབ་ཡུམ་ཁྲོས་པའི་སྐུར་བསྐྱེད་ལ། གཟུངས་མ་དམ་ཅན་དབང་དུ་བྱ་བ་དང་། དེ་བཞིན་དུ་རིགས་ཀྱི་ཧེ་རུ་ཀ་བཞིར་བསྐྱེད་ནས་སོ་སོའ་ཕྱག་རྒྱ་བསྒྱུར་བས་ལས་བཞི་སྒྲུབ་པའོ། །བདུན་པ་སྒྲུབ་པ་ལའང་གསུམ་སྟེ། ངོ་བོ་ནི། རྒྱུད་ཕྱི་མ་ཁ་ཆེའི་འགྱུར་ལས། འཇིག་རྟེན་པ་ཡི་དངོས་གྲུབ་ནི། །བསྐྱེད་པའི་རིམ་པའི་སྦྱོར་བས་ཐོབ། །འཇིག་རྟེན་འདས་པའི་དངོས་གྲུབ་ནི། །རྫོགས་པའི་རིམ་པའི་སྦྱོར་བས་སོ། །ཞེས་པ་ལྟར་ཐབས་ཁྱད་པར་ཅན་བསྐྱེད་རིམ་གྱིས་བསྒྲུབ་བྱ་ཐུན་མོང་དང་། ཐབས་ཁྱད་པར་ཅན་རྫོགས་རིམ་གྱིས་བསྒྲུབ་བྱ་མཆོག་གི་དངོས་གྲུབ་སྟེ། དེ་ལྟར་མཆོག་དང་ཐུན་མོང་གི་དངོས་གྲུབ་རྣམ་པ་གཉིས་ལས་གང་འདོད་དོན་དུ་གཉེར་བ་ཞིག་གོ །ངེས་ཚིག་ནི། སིདྡྷིའི་སྒྲ་ལས་དྲངས་ན་དངོས་གྲུབ་སྟེ་བསྒྲུབ་བྱ་དང་། སཱ་དྷ་ནའི་སྒྲ་ལས། ཀུན་ཏུ་ལེན་པ་སྟེ། འདོད་པའི་དོན་ལེན་ཅིང་ཐོབ་པར་བྱེད་པའམ་སྒྲུབ་པར་བྱེད་པས་ན་སྒྲུབ་པ་ཞེས་བྱའོ། །དབྱེ་ན། ཐུན་མོང་དང་། མཆོག་གི་སྒྲུབ་པའོ། །དང་པོ་ལ། བཤད་རྒྱུད་རྒྱས་པའི་ལེའུ་སོ་སོས་བསྟན་ཚུལ་གྱིས་སྤྱིར་བསྟན་པ་དང་། དེ་དག་རྩ་གཞུང་གི་བཤད་ཚུལ་དང་སྦྱར་ཏེ་བྱེ་བྲག་ཏུ་བཤད་པ་གཉིས། དང་པོ་ནི། ཁོག་གཞུང་ལས། རོ་ལངས་ཚེ་དང་པྲ་སྒྲུབ་དང་། །ལྷ་ཆེན་པོ་དང་རྒྱལ་པོ་བཞི། །གདུག་པ་ཀླུ་འདུལ་རྒྱལ་བློན་གྱི། །ཆུང་མ་དབང་དུ་བྱ་བ་གཉིས། །ཡུལ་ཁམས་ཅེ་སྤྱང་རྐང་མགྱོགས་བསྐྲད། །མི་སྣང་གཟུགས་སྒྲུབ་ལྷ་ཀླུ་མོ། །རྒྱལ་བློན་དམག་དཔོན་ཞང་བློན་སྒྲུབ། །ཚེ་འདིའི་ཆེད་ཕྱིར་འཇིག་རྟེན་པའོ། །ཞེས་པས། རོ་ལངས་ཏེ་རྡོ་རྗེ་ཞིང་ཆེན་སྒྲུབ་པ་ལེའུ་བདུན་ཅུ་པ། ཚེ་སྒྲུབ་པ་ཞི་ཁྲོ་གཉིས་སོགས་ཆོ་ག་དང་བཅས་པའི་སྒོ་ནས་སྒྲུབ་ཚུལ་དྲུག་ཅུ་རེ་བཞི་པ། པྲ་སེ་ན་དབབ་པ་ལེའུ་དྲུག་ཅུ་རེ་ལྔ་པ། ལྷ་ཆེན་པོ་མ་ཧཱ་དེ་ཝ་སྒྲུབ་པ་དང་རྒྱལ་པོ་ཆེན་པོ་སྡེ་བཞི་སྒྲུབ་པ་དྲུག་ཅུ་རེ་དྲུག་པ། གནོད་བྱེད་གདུག་པའི་ཀླུ་གདོན་འདུལ་བ་བཞི་བཅུ་ ― MLP018_Page_0066 ―
[མ་དཔེ་གཟིགས་ན་འདིར་གནོན།]
ཞེ་དྲུག་པ། རྒྱལ་པོ་དང་བློན་པོའི་ཆུང་མ་དབང་དུ་བྱ་བ་གཉིས་བཞི་བཅུ་ཞེ་ལྔ་པ། ཡུལ་ཁམས་དབང་དུ་བྱ་བ་སུམ་ཅུ་སོ་བརྒྱད་པ། ལྕེ་སྤྱང་ཞེས་བྱ་བ་རྡོ་རྗེ་རིགས་ཀྱི་རྐང་མགྱོགས་བྱེ་བྲག་ཏུ་སྟོན་པ་བཞི་བཅུ་ཞེ་གཅིག་པ། རྐང་མགྱོགས་ཀྱི་དངོས་གྲུབ་སྤྱིར་སྒྲུབ་པ་དང་། དགྲ་བགེགས་སོགས་ཡུལ་གཞན་དུ་བསྐྲད་པ་དང་། མི་སྣང་བའི་གཟུགས་སྒྲུབ་པ་དང་། ལྷ་མོ་དང་ཀླུ་མོ་ཕྱག་རྒྱར་འགུག་ཅིང་དབང་དུ་བྱ་བ་རྣམས་སུམ་ཅུ་སོ་བརྒྱད་པ། རྒྱལ་པོ་དང་བློན་པོ་སྒྲུབ་པ། དམག་དཔོན་མཐུ་ཆེན་དང་ཞང་བློན་སྒྲུབ་པ་རྣམས་བཞི་བཅུ་ཞེ་གཅིག་པ་རྣམས་ཀྱིས་བསྟན་ཏེ། ལས་དེ་རྣམས་ཀྱིས་རང་འབྲས་མཆོག་གི་འབྲས་བུ་མངོན་དུ་བྱེད་མི་ནུས་པའི་རྒྱུ་མཚན་གྱིས་ཚེ་འདིའི་ཆེད་ཕྱིར་འཇིག་རྟེན་པ་ཞེས་ཐུན་མོང་གི་སྒྲུབ་པར་བསྟན་ཏོ། །གཉིས་པ་ལ། ཡོན་ཏན་འབྱུང་བའི་དངོས་གྲུབ་དྲུག འབྱུང་ལྔའི་དངོས་གྲུབ་ལྔ། ལས་ཕྲན་ཚེགས་བརྒྱད་དོ། །དང་པོ་ནི། བདུད་རྩིར་འགྱུར་ཞིང་འབྱུང་བ་དང་། །བཞི་བརྒྱ་རྩ་བཞིའི་ནད་སེལ་ཞིང་། །ལོངས་སྤྱོད་འབྱུང་ཞིང་ངན་སོང་སྦྱོང་། །ཅི་ཡང་གཞན་དུ་འགྱུར་བ་འགྲུབ། །ཅེས་པས། ཟས་དུག་ཅན་ལ་ཡི་གེ་བཀོད་དེ་འཇུ་འདུལ་གྱི་ལས་ཀྱིས་སྨན་མཆོག་བདུད་རྩིར་འགྱུར་བ་ལ་སོགས་པ་ཡི་གེའི་འཕྲོ་འདུས་ནད་ཞི་བ་སོགས་དེ་ཐམས་ཅད་འགྲུབ་པའོ། །གཉིས་པ་ནི། ནམ་མཁའ་རྡོ་རྗེ་སྲ་འབྱུང་ཞིང་། །འབར་ནས་མེ་ཡང་འཚིག་པ་དང་། །ཆུར་འགྱུར་འབབ་པའང་དེ་བཞིན་ཏེ། །འཇིག་རྟེན་ཁམས་ནི་འཐོར་བ་དང་། །ཐམས་ཅད་སྟོངས་ཤིང་ལྟུང་བར་འགྱུར། །ཞེས་པས་ནམ་མཁའ་ལ་ཧཱུྃ་ཞེས་རྡོ་རྗེའི་སྐས་བསམ་ན་མངོན་སུམ་དུ་འབྱུང་བ་ལ་སོགས་པ་དང་། གཞན་ཡང་འབྱུང་བ་ལ་ཐོགས་པ་མེད་པའི་རྫུ་འཕྲུལ་སྟོན་པར་ནུས་པ་སྟེ། རྒྱས་པའི་སོ་བརྒྱད་པ་ལས། མི་གནས་ནམ་མཁའི་མཐའ་ཀླས་པར། །གོམས་པར་འདོད་པས་འགྲོ་བ་དང་། །ཆུ་ལ་ས་བཞིན་འགྲོ་བ་དང་། །བསྲེག་བྱ་འབར་བའི་དབུས་གནས་དང་། །ཚངས་པའི་རླུང་གིས་བཏེག་ནས་ཀྱང་། །ཕྱོགས་བཅུ་ཀུན་ཏུ་ཕྱིན་པར་འགྱུར། །ཞེས་སོ། །གསུམ་པ་ནི། དགུག་དང་བཏང་དང་བཅིང་དང་དགྲོལ། །གསོ་དང་བསད་དང་ཕམ་དང་རྒྱལ། །ཏིང་འཛིན་འདི་ཡིས་བྱེད་པར་འགྱུར། ། ― MLP018_Page_0067 ―
[མ་དཔེ་གཟིགས་ན་འདིར་གནོན།]
ཞེས་སོ། །གཉིས་པ་མཆོག་གི་སྒྲུབ་པ་ལ། བཤད་རྒྱུད་ལས་བསྟན་ཚུལ་དང་། མཆོག་གི་དངོས་གྲུབ་སྤྱིར་བཤད་པ་གཉིས། དང་པོ་ནི། ཁོག་གཞུང་ལས། ཡི་གེ་སྒྱུ་འཕྲུལ་ཚོགས་སྒྲུབ་དང་། །རྡོ་རྗེ་སེམས་དང་སྨན་སྒྲུབ་དང་། །རིགས་ལྔ་སྒྲུབ་དང་ཡུམ་ལྔ་སེམས། །བྱིན་དབབ་སྒྲུབ་པ་རྣམ་གཉིས་སོ། །ཞེས་པས། ཡི་གེ་སྒྱུ་འཕྲུལ་ནི་རྩ་བའི་རྒྱུད་ཀྱི་ལེའུ་བཞི་པ་ལ་སོགས་པས་བསྟན། ཚོམ་བུ་ཚོགས་ཀྱི་སྒྲུབ་པ་དེའི་ལེའུ་བཅུ་གཅིག་པ་དང་བཅུ་གཉིས་པ་ལ་སོགས་པས་བསྟན། རྒྱས་པའི་ལེའུ་ཉེར་གཉིས་པར་རྡོར་སེམས་ཕྱག་རྒྱ་གཅིག་པའི་སྒྲུབ་པ་དང་། དོན་བཞི་པས་རྡོ་རྗེ་སེམས་དཔའ་ཞལ་མཐོང་གི་ལེའུ་བསྟན། ལེའུ་བཞི་བཅུ་པར་བདུད་རྩི་སྨན་གྱི་སྒྲུབ་པ་དང་། ལེའུ་སོ་དགུ་པར་དེ་བཞིན་གཤེགས་པ་རིགས་ལྔ། ཞེ་གཉིས་པར་ཡུམ་ལྔ། ཞེ་བཞི་པར་སེམས་དཔའ་སྒྲུབ་ཅིང་བྱིན་དབབ་པ་རྣམས་བསྟན་ཏེ། རང་གི་འདོད་འབྲས་མཐར་ཐུག་གི་དོན་གཙོ་ཆེ་བའི་དབང་དུ་བྱས་ནས་མཆོག་གི་དངོས་གྲུབ་ཅེས་བྱའོ། །གཉིས་པ་ལ། བསྟན་བཤད་གཉིས་ལས། དང་པོ་ནི། སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པ། །ཕྱོགས་བཅུ་དུས་བཞི་རྫོགས་པ་ཡི། །དཀྱིལ་འཁོར་ཐམས་ཅད་འགྲུབ་པར་འགྱུར། །ཞེས་སོ། །གཉིས་པ་ནི། དུས་གསུམ་རྒྱལ་བས་ཐུགས་ཆུད་པའི། །དངོས་གྲུབ་མཆོག་གི་སྙིང་པོ་ནི། །ཟད་པའི་དུས་མེད་ཡིད་བཞིན་མཛོད། །འཕེལ་འགྲིབ་མེད་པར་འབྱུང་བ་སྟེ། །དངོས་པོ་མེད་ལས་དངོས་པོའི་སྤྲིན། །སྣ་ཚོགས་རྣམ་པར་འབྱུང་ཞིང་འགྱུར། །ཞེས་སོ། །ཇི་ལྟར་སྒྲུབ་པའི་ཚུལ་ནི། ཞི་ཁྲོའི་ཆོ ག་གཞུང་ལ་སོགས་པས་མཚོན་བྱེ་བྲག་སོ་སོའ་སྒྲུབ་ཐབས་གུད་དུ་ཕྱུང་བ་རྣམས་དང་། གཙོ་བོར་སྟོན་པ་ནི་ཚོམ་བུ་ཚོགས་ཀྱི་སྒྲུབ་པ་སྟེ། ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་བ། བསྙེན་སྒྲུབ་ཡན་ལག་བཞིས་གཞུང་བསྲང་བ། འབྲས་བུ་རིག་འཛིན་སྒྲུབ་པའི་དུས་བཤད་པ་དང་གསུམ་གྱིས་བསྟན་ཏོ། །བརྒྱད་པ་ཏིང་ངེ་འཛིན་ལའང་གསུམ་སྟེ། ངོ་བོ་ནི། ཧེ་རུ་ཀ་འདུས་པ་ལས། གང་དང་གང་དུ་གསལ་བའི་ཡིད། །མ་ཡེངས་པ་ཉིད་ཏིང་འཛིན་ཏེ། །ཞེས་པས། བསྒོམ་བྱའི་དོན་ ― MLP018_Page_0068 ―
[མ་དཔེ་གཟིགས་ན་འདིར་གནོན།]
ཁྱད་པར་ཅན་བསྐྱེད་རྫོགས་ཀྱི་ཏིང་ངེ་འཛིན་ལས་མི་གཡོ་བར་གནས་པའི་སེམས་རྩེ་གཅིག་པའོ། །ངེས་ཚིག་ནི། ས་མ་དྷཱིའི་སྒྲ་ལས་དྲངས་ན་མཉམ་པའི་བློ་སྟེ། ས་མ་ནི་མཉམ་པ། དྷཱི་ནི་བློ་ལ་འཇུག་པས། གང་བསྒོམ་བྱའི་དོན་ལ་སེམས་རྩེ་གཅིག་ཏུ་ཟིན་པའི་དོན་གྱིས་ན་ཏིང་ངེ་འཛིན་ནོ། །དབྱེ་ན། ཕྱི་མ་ཁ་ཆེ་འགྱུར་ལས། ལྷ་ཡི་རྣམ་པའི་སྦྱོར་བ་ཡི། །ཟླ་བ་རྡོ་རྗེ་ལ་སོགས་རིམ། །བསྐྱེད་པའི་རིམ་པ་ཞེས་སུ་བཤད། །རང་བཞིན་གྲུབ་པའི་རྣལ་འབྱོར་ནི། །རྫོགས་པའི་རིམ་པ་ཞེས་བྱར་བརྗོད། །ཅེས་པས་ཀུན་བཏགས་བསྐྱེད་རིམ་གྱི་རྣལ་འབྱོར་དང་། ཡོངས་གྲུབ་རྫོགས་རིམ་གྱི་རྣལ་འབྱོར་གཉིས་ལས། དང་པོ་ལའང་། དེ་ལས། བསྐྱེད་རིམ་ལ་བརྟེན་སྐྱེ་གནས་ཏེ། །མངལ་སྐྱེས་ལ་སོགས་དབྱེ་བ་ཡིས། །དེ་ཡང་རྣམ་པ་བཞི་རུ་འདོད། །ཅེས་པས་སྐྱེ་གནས་བཞིའི་བག་ཆགས་སྦྱོང་བ་དང་བསྟུན་ཏེ་སྒོམ་ཚུལ་བཞི་སྟེ། ཇི་སྐད་དུ། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། །སྤྲོས་བཅས་སྤྲོས་དང་སྤྲོས་མེད་པ། །ཤིན་ཏུ་སྤྲོས་པ་མེད་བཞིའོ། །ཞེས་པས་རྒྱས་པ་སྒོང་སྐྱེས། འབྲིང་པོ་མངལ་སྐྱེས། བསྡུས་པ་དྲོད་གཤེར་སྐྱེས། ཤིན་ཏུ་བསྡུས་པ་བརྫུས་སྐྱེས་ཏེ། དེ་ལྟར་སྐྱེ་གནས་བཞིའི་བག་ཆགས་སྦྱོང་ཕྱིར། སྤྲོས་པ་རྒྱས་པ་དཀྱིལ་འཁོར་གྱི་འཁོར་ལོ་བདག་སྲས་གཞན་སྲས་གཉིས་ཀྱི་སྒོ་ནས་སྒོམ་པ་དང་། གཞན་ཡང་མངོན་བྱང་ལྔ་བསྐྱེད་དང་། རྡོ་རྗེའི་ཆོ་ག་བཞི་བསྐྱེད་ལ་སོགས་པ་དང་། འབྲིང་པོ་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་ཏེ་ཆོ་ག་གསུམ་གྱི་སྒོ་ནས་བསྐྱེད་པ་དང་། བསྡུས་པ་ཨ་ནུ་ཡོ་ག་བའི་སྒོམ་ཚུལ་ལྟར་ས་བོན་ཙམ་ལས་བསྐྱེད་པའམ། བསྐྱེད་སྔགས་བརྗོད་པའི་རྐྱེན་ཙམ་གྱིས་བསྐྱེད་པ་དང་། ཤིན་ཏུ་བསྡུས་པ་ཨ་ཏི་ཡོ་ག་བའི་སྒོམ་ཚུལ་ལྟར་ཆུ་ལས་ཉ་ལྡང་གི་ཚུལ་དུ་སྐད་ཅིག་དྲན་རྫོགས་ཀྱིས་ལྷའི་སྐུར་བསྐྱེད་པ་སྟེ་སྒོམ་ཚུལ་བཞིའམ། ཡང་ན་ལམ་རིམ་ལྟར་སྲིད་པ་མངལ་སྐྱེས་རྫུས་སྐྱེས་གཉིས་དང་བསྟུན་ཏེ་སྒོམ་ཚུལ་གཉིས་སུ་བསྡུས་ནས་གསུངས་ཏེ། ཅིའི་ཕྱིར་ན། གསང་སྔགས་རྡོ་རྗེ་ཐེག་པའི་ལམ་འདིའི་ཆེད་དུ་བྱ་བའི་གདུལ་བྱའི་གཙོ་བོ་ནི་ཁམས་དྲུག་ལྡན་གྱི་མི་ལུས་ཡིན་ཏེ། སྔོན་སྦྱངས་པ་ཅན་མིན་པའི་གང་ཟག་ཅིག་ལམ་ ― MLP018_Page_0069 ―
[མ་དཔེ་གཟིགས་ན་འདིར་གནོན།]
འདིར་དང་པོར་ཞུགས་ནས་ཚེ་གཅིག་ལུས་གཅིག་གིས་ཟུང་འཇུག་སྒྲུབ་པའི་རྟེན་གྱི་མཆོག་ཏུ་ངེས་པའི་ཕྱིར། དེ་ལྟ་བས་ན་མིའི་རྟེན་ཅན་ཕལ་ཆེར་མངལ་སྐྱེས་རྫུས་སྐྱེས་གཉིས་སུ་འགྱུར་བས་སམ། ཡང་ན་ཆེད་དུ་བྱ་བའི་གདུལ་བྱ་དེ་ལ་རིམ་གྱིས་པ་དང་ཅིག་ཅར་བ་གཉིས་ཡོད་པས་དེ་ལྟར་བསྡུས་སོ། །རྫོགས་རིམ་ལ། སྟེང་སྒོ་འཇུ་འདུལ་དང་། འོག་སྒོ་ཁམས་གསུམ་རོལ་པ་སྟེ་ཐབས་ལམ་སྟེང་འོག་གི་སྒོ་ལ་བརྟེན་པ་དང་། གྲོལ་ལམ་ཟུང་འཇུག་གི་རྣལ་འབྱོར་རིམ་ཅིག་ཅར་གཉིས་ཀྱིས་བསྡུས་པ་རྣམ་པར་མི་རྟོག་པའི་ཏིང་ངེ་འཛིན་ནོ། །འོ་ན་ཐབས་ལམ་སྟེང་སྒོ་ལ། རྩ་འཁོར་གསལ་འདེབས་པ་སོགས་དང་། དེས་མཚོན་འོག་སྒོ་ལ། ཡབ་ཡུམ་ལྷར་བསྐྱེད་པ་ལ་སོགས་པ་ཀུན་བརྟགས་ཀྱི་ཆ་འདྲེས་པས་རྫོགས་རིམ་དུ་ཅིའི་ཕྱིར་འགྱུར་སྙམ་ན། བསྐྱེད་རྫོགས་གཉིས་ལམ་ཕན་ཚུན་ལྟོས་པ་ཅན་ཡིན་པའི་ཕྱིར་ཐོག་མར་ཀུན་བརྟགས་བསྐྱེད་རིམ་གྱིས་རང་ལམ་གྱི་ཉམས་མྱོང་གཏན་ལ་འབེབས་པ་ལ་བཀྲི་བ་ཙམ་ལས་རང་གི་ངོ་བོ་རང་བཞིན་ལྷན་སྐྱེས་ཀྱི་ཡེ་ཤེས་ངོ་སྤྲོད་པར་བྱེད་པའི་ཐབས་རྣམ་པར་མི་རྟོག་པས་བསྡུས་པ་ཡོངས་གྲུབ་རྫོགས་རིམ་དུ་འགྱུར་བ་ཡིན་པས་སྐྱོན་མེད་དོ། །དགུ་པ་མཆོད་པ་ལའང་གསུམ་སྟེ། ངོ་བོ་ནི། ཐུགས་ཐིག་ལས། བྱ་བྱེད་བྱ་བ་བྱེད་འདུས་པས། །དགྱེས་ཚིམ་གྱུར་པའི་དངོས་པོ་ཉིད། །ཅེས་པས་མཆོད་པའི་ཡུལ་དུ་གྱུར་པ་རྣམས་བཀུར་ཞིང་མཆོད་པའི་བསམ་པས་སྒོ་གསུམ་གྱིས་མཉེས་པ་སྒྲུབ་པ་དང་། ད་ལྟ་ཡོངས་གྲགས་ལྟར་སྤྱི་མིང་བྱེ་བྲག་ལ་བཏགས་ཏེ་ཡོ་བྱད་སྟོབ་པའི་སྒོ་ནས་ཀྱང་མཉེས་པར་བྱེད་པའོ། །ངེས་ཚིག་ནི། པཱུ་ཛའི་སྒྲ་ལས་དྲངས་ན། པཱུརྦ་ནི་སྔོན་དང་། ཛ་ཏ་བསྐྱེད་པ་ལ་འཇུག་པས་དེའི་སྒྲ་བསྡུས་ཏེ་བྱ་བ་གང་སྒྲུབ་པ་རྣམས་ཀྱི་སྔོན་དུ་འགྲོ་བའི་རྒྱུ་མཚན་གྱིས་སྔོན་དུ་བསྐྱེད་པ་དང་། ཡང་། པུ་ན་ནར་ནི་ཡང་དང་ཡང་། ཛ་ཏ་བསྐྱེད་པ་སྟེ་དེའི་སྒྲ་བསྡུས་པས་པཱུ་ཛ་ཞེས་ཡང་དང་ཡང་དུ་དགྱེས་པ་བསྐྱེད་པ་དང་། པཱུ་ཛའི་སྒྲ་གཟུགས་པོའི་དབང་དུ་བྱས་ནས་བཀུར་བའི་དོན་གྱི་གནས་སུ་སྟོབ་པའི་ཕྱིར་མཆོད་པའོ། །དབྱེ་ན། སྤྱིར་འཇིག་རྟེན་དང་། འཇིག་རྟེན་ལས་འདས་པའི་མཆོད་པ་གཉིས། དེ་གཉིས་ཀ་ལ་མཚུངས་ ― MLP018_Page_0070 ―
[མ་དཔེ་གཟིགས་ན་འདིར་གནོན།]
པར། དམིགས་ཡུལ་ཞིང་གི་ཁྱད་པར། འབྲས་བུ་ལ་དམིགས་པའི་ཁྱད་པར། ཡོངས་སུ་བསྔོ་བའི་ཁྱད་པར། མཆོད་རྫས་དངོས་པོའི་ཁྱད་པར་དང་བཞི། དང་པོ་ནི། བླ་མ་དང་དཀོན་མཆོག་གསུམ་ལ་སོགས་པ་འཇིག་རྟེན་ལས་འདས་པ། ཚངས་པ་དང་བརྒྱ་བྱིན་ལ་སོགས་པ་འཇིག་རྟེན་པའི་མཆོད་ཡུལ་ལོ། །གཉིས་པ་ནི། གང་བསྒྲུབས་པའི་མཆོད་པ་དེ་ཉིད་མཐར་ཐུག་མྱང་འདས་ཀྱི་རྒྱུར་འགྱུར་བ་ཐར་པ་ཆ་མཐུན་གྱི་ཆ་ཐམས་ཅད་འཇིག་རྟེན་ལས་འདས་པ་དང་། ཚེ་འདི་དང་ཕྱི་མར་ལྷ་མིའི་བདེ་འབྲས་ཐོབ་པའི་རྒྱུར་འགྱུར་བ་བསོད་ནམས་ཆ་མཐུན་གྱི་ཆ་ཐམས་ཅད་འཇིག་རྟེན་པའོ། །གསུམ་པ་ནི། མཆོད་པ་དེ་ཉིད་མྱང་འདས་ཐོབ་པའི་ཆེད་དུ་བསྔོ་བ་འཇིག་རྟེན་ལས་འདས་པ་དང་། ཚེ་འདི་དང་ཕྱི་མའི་བདེ་འབྲས་ཙམ་གྱི་ཆེད་དུ་བསྔོ་བ་ལྟ་བུ་འཇིག་རྟེན་པའོ། །བཞི་པ་ནི། ཐོས་བསམ་སྒོམ་གསུམ་ལ་སོགས་པ་འཇིག་རྟེན་ལས་འདས་པ་དང་། ཟས་ནོར་སྟེར་བ་ལ་སོགས་པ་འཇིག་རྟེན་པའོ། །ད་ནི་དེ་དག་ལ་དཔྱད་དེ། དེ་ཡང་སྤྱི་ཙམ་དུ། ཡུལ། དམིགས་པ། བསྔོ་བ། རྫས་ཏེ་བཞི་ཀ་ལ་འཇིག་རྟེན་དང་། འཇིག་རྟེན་ལས་འདས་པ་གཉིས་གཉིས་སུ་འགྱུར་ཚུལ་སྔར་བཤད་པ་ལྟར་ཡིན་མོད། འོན་ཀྱང་མཐའ་གཅིག་ཏུ་མ་ངེས་ཏེ། དཔེར་ན། ཡུལ་བླ་མ་དང་སངས་རྒྱས་ལྟ་བུ་ཞིག་ལ་དངོས་པོ་ཁྱད་པར་ཅན་ཐོས་བསམ་སྒོམ་གསུམ་གྱིས་མཉེས་པ་སྒྲུབ་པ་ལྟ་བུ་ཞིག་ཡིན་ཡང་། འདི་ཉིད་ཚེ་འདིའི་བདེ་འབྱོར་སྙན་གྲགས་དང་། ཕྱི་མར་ལྷ་མིའི་གོ་འཕང་ངམ། ངན་སོང་གི་སྡུག་བསྔལ་ལས་ཐར་པའི་ཆེད་དུ་བསྔོས་ཤིང་། དེ་ལ་བརྟེན་ནས་བསོད་ནམས་ཆ་མཐུན་གྱི་དགེ་བར་འགྱུར་ཏེ། དེ་ལྟ་བུ་ནི་འཇིག་རྟེན་པའི་མཆོད་པའོ། །ཡང་། ཡུལ་དམན་པ་སྲང་མདོར་རྒྱུ་བའི་ཁྱི་ལྟ་བུ་ཞིག་ལ་དངོས་པོ་དམན་པ་ཟན་ཁམ་གཅིག་ཙམ་བྱིན་ནས། སྦྱིན་པ་དེ་ཉིད་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པའི་སྒོ་ནས་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་ཆེད་དུ་བསྔོས་ཤིང་དེ་ལ་བརྟེན་ནས་ཐར་པ་ཆ་མཐུན་གྱི་དགེ་བར་འགྱུར་ཏེ། དེ་ལྟ་བུ་ནི་འཇིག་རྟེན་ལས་འདས་པའི་མཆོད་པའོ། །དོན་དུ་ན་ཞིང་དང་དངོས་པོ་བཟང་ངན་གཙོ་མི་ཆེ་ཞིང་དམིགས་ཡུལ་དང་བསྔོ་བའི་ཁྱད་པར་ ― MLP018_Page_0071 ―
[མ་དཔེ་གཟིགས་ན་འདིར་གནོན།]
གཙོ་ཆེ་བ་ཡིན་ནོ། །བྱེ་བྲག་ཏུ་ཕྱི་ཉེར་སྤྱོད། ནང་དམ་རྫས་བདུད་རྩི། གསང་བ་སྦྱོར་སྒྲོལ་ཟབ་མོ་སྟེ། དེ་ལ་ཉེར་སྤྱོད་ནི། མེ་ཏོག་དང་བདུག་སྤོས་ལ་སོགས་པ་སྟེ། དེ་དག་ལ་ཕྱི་ཞེས་ཟེར་བ་ནི་མདོ་སྔགས་གཉིས་ཀར་ཡོངས་སུ་གྲགས་པར་མ་ཟད། འཇིག་རྟེན་དུ་ཡང་ཡོ་བྱད་ཀྱི་ཁྱད་པར་བཟང་ངན་མ་གཏོགས་རྒྱལ་པོ་ནས་སྤྲང་པོའི་བར་ཐམས་ཅད་ཀྱི་ལོངས་སྤྱོད་དུ་དགོས་པས་དེ་ལྟར་སྨོས་ལ། དམ་རྫས་བདུད་རྩིའི་མཆོད་པ་ནི། སྤྱི་མིང་གཙོ་ཆེ་བའི་ངོས་ནས་བཞག་པ་སྟེ། བདུད་རྩི། རཀྟའི་མཆོད་པ་ལ་སོགས་པའོ། །ནང་ཞེས་བྱ་བའི་རྒྱུ་མཚན། མདོར་མ་གྲགས་པར་མ་ཟད། ཀྲི་ཡོག་སོགས་ཀྱི་ཕྱི་རྒྱུད་དུ་ཡང་མ་གྲགས་པས་ནང་པ་ཁོ་ནའི་ཁྱད་ཆོས་ཡིན་པའི་ཕྱིར་དང་། གསང་བ་སྦྱོར་སྒྲོལ་ཟབ་མོ་ནི། ཏ་ན་དང་ག་ཎའི་སྤྱོད་པ་རྨད་དུ་བྱུང་བ་སྟེ། འདི་དག་ལ་གསང་བ་ཞེས་ཐ་སྙད་འདོགས་པ་ནི་ཀྲི་ཡོག་སོགས་སུ་མ་གྲགས་པར་མ་ཟད་དེ་དག་ལ་ཤིན་ཏུ་གསང་བའི་སྒོ་ནས་སྤྱོད་དགོས་པས་སོ། །སྐབས་དོན་ཉེ་བར་འབྲེལ་བ་ཞི་ཁྲོའི་ཆོག་གཞུང་གི་དབང་དུ་བྱས་ན། ཞི་བ་ལ་ལྷག་ཏིང་དང་། ཁྲོ་བོ་ལ་དེ་ཚབ་རཀྟ་ཚར་གསུམ་གྱིས་བྱས་པའི་མཉེས་པ་ཕྱག་གི་མཆོད་པ་ལ་སོགས་པ་བཅུ་བཞི་སྟེ། གུས་པ་ཕྱག་དང་ཕྱག་རྒྱ་གར། །ཀུན་བཟང་ཞབས་བསིལ་བཞི་བསྣོལ་ཏེ། །བདུད་རྩི་གཏོར་མ་གསང་བསྣན་དང་། །ལྷག་པ་ཏིང་འཛིན་སྒྲོལ་དང་སྦྱོར། །འདོད་ཡོན་རོལ་མོ་གླུ་ཡེ་ཤེས། །ཞེས་སོ། །དེ་ལ་སོགས་པ་མཆོད་པའི་རྣམ་གྲངས་ཇི་སྙེད་པ་རྣམས་སོ། །བཅུ་པ་སྔགས་དང་ཕྱག་རྒྱ་ལའང་གསུམ་སྟེ། ངོ་བོ་ནི། ཐུགས་ཐིག་ལས། ཡི་གེ་འདུས་པ་གྲུབ་པ་བཞི། །མཐུ་ཅན་རེད་པ་གང་ཡིན་པ། །བཞི་རྫོགས་ཉིད་ལས་མི་འདའ་བ། །གང་ལ་སྣང་བ་དེ་ངོ་བོ། །ཞེས་པས། ཐབས་ཤེས་ཀྱི་ཡི་གེ་ཨ་ལི་ཀ་ལིར་འདུས་ཤིང་གྲུབ་པ་བཞིས་བྱིན་གྱིས་བརླབས་པས་ནུས་པ་མཐུ་ཅན་དུ་གྱུར་པ་ནི་སྔགས་ཀྱི་ངོ་བོ་དང་། རིག་པ་ཕྱག་རྒྱ་བཞི་རྫོགས་ཀྱི་ལྷའི་སྐུར་གསལ་བ་ལས་མི་འདའ་བ་ནི་ཕྱག་རྒྱའི་ངོ་བོའོ། །ངེས་ཚིག་ནི། མནྟྲའི་སྒྲ་ལས་དྲངས་ན་ཡིད་ཤེས་བདེ་མྱུར་དུ་སྐྱོབ་པའི་དོན་གྱིས་སྔགས་ཏེ། དེ་ ― MLP018_Page_0072 ―
[མ་དཔེ་གཟིགས་ན་འདིར་གནོན།]
ལ་བདེ་བའི་སྒོ་ནས་སྐྱོབ་པ་ནི། འདོད་ཡོན་ལམ་བྱེད་ཀྱིས་འབྲས་བུ་མངོན་དུ་བྱེད་པའི་རྒྱུ་མཚན་གྱིས་དེ་ལྟར་བཞག་ལ། མྱུར་བ་ནི། གྲངས་མེད་གསུམ་ལ་སོགས་པར་ཚོགས་བསག་མི་དགོས་པར་ཚེ་གཅིག་སོགས་ཀྱིས་འབྲས་བུ་འགྲུབ་ནུས་པས་སོ། །མུ་དྲའི་སྒྲ་ལས་དྲངས་ན་འདེབས་ཤིང་མཚོན་པར་བྱེད་པའམ། ཕྱག་རྒྱ་བཞིས་རྒྱས་བཏབ་པ་ལས་འདའ་བར་དཀའ་བའི་ཕྱིར་མཚན་མའི་དོན་གྱིས་ན་ཕྱག་རྒྱའོ། །དབྱེ་ན། སྔགས་ལ་སྤྱིར། གསང་སྔགས། རིག་སྔགས། གཟུངས་སྔགས་གསུམ་ལས། དང་པོ་ནི། ཐབས་དང་ཤེས་རབ་ཀྱི་བདག་ཉིད། དེའི་སྒོ་ཡིག་འབྲུར་སྣང་བས་གསང་སྟེ་ངག་ཏུ་བརྗོད་པར་བྱེད་པ་དང་བཅས་ཤིང་ཤེས་སྐྱོབ་ཀྱི་ལས་ཀྱིས་ལོག་རྟོག་གི་གཉེན་པོར་གྱུར་པའོ། །གཉིས་པ་ནི། ཤེས་རབ་དང་ཡེ་ཤེས་ཀྱི་བདག་ཉིད་དངོས་པོའི་དོན་རིག་པར་བྱེད་པའི་ལས་ཀྱིས་མ་རྟོགས་པའི་གཉེན་པོར་གྱུར་པའོ། །གསུམ་པ་ནི། དྲན་པ་དང་ཤེས་རབ་ཀྱི་བདག་ཉིད་ཆོས་ཀྱི་ཚིག་དོན་མི་བརྗེད་པར་འཛིན་པའི་ལས་ཀྱིས་དྲན་ཉམས་ཀྱི་གཉེན་པོར་གྱུར་པའོ། །དེ་གསུམ་མཚོན་པའི་རྟགས་ལྷར་སྣང་ཚུལ་ཡང་། གསང་སྔགས་རྣམས་ལྷ་ཕོའ་དབྱིབས་དང་། ཕྱི་མ་གཉིས་ལྷ་མོའ་གཟུགས་སུ་བཞུགས་ཞེས་འབྱུང་ངོ་། །བྱེ་བྲག་ཏུ། གསལ་བཀྲ་ལས། རྩ་བ་བསྐྱེད་དང་ལས་སྔགས་དང་། ཞེས་པས་རྒྱུ་མ་ནོར་བ་རྩ་བའི་སྔགས། སྐྱེད་པ་རྐྱེན་གྱི་སྔགས། བཟླས་པ་ལས་ཀྱི་སྔགས་དང་གསུམ། དང་པོ་ནི། གཞལ་ཡས་ཁང་སྐྱེད་པའི་ས་བོན་བྷྲཱུཾ་ཡིག་དང་། ལྷ་བསྐྱེད་པ་ལ། ཞི་བར། ཨ། ཀ་ཁ་ག་གྷ་ང་ལ་སོགས་པ་ཡི་གེ་འཁོར་ལོའ་ས་བོན་དང་། ཧཱུཾ་མཱུཾ་ལ་སོགས་པ་རིགས་ཀྱི་ས་བོན་གཉིས། ཁྲོ་བོ་ལ། ཧཱུཾ་ཧ་ཧེ་ཕཊ་བྷྱོ། ཞེས་པའོ། །གཉིས་པ་ནི། ས་བོན་བོར་བའི་སྐྱེད་སྔགས་རྐྱང་པ་སྟེ། བཛྲ་དྷྲིཀ་སོགས་དང་། བཛྲ་ཤྲཱི་ཧེ་རུ་ཀ་ཧཱུཾ་ཞེས་སོགས་ལྟ་བུའོ། །གསུམ་པ་ནི། རྩ་སྔགས་སྐྱེད་སྔགས་བསྒྲིལ་ནས་ཛཔ་ཏུ་བཟླ་བའོ། །དེ་དག་རྫོགས་རིམ་དང་སྦྱར་ཏེ་བཤད་ན། ཐིག་ལེ་ཆེན་པོ་བདེ་ཆེན་གྱི་རང་བཞིན་གདོད་མ་ནས་རང་ཆས་སུ་བཞུགས་པ་ནི་རྒྱུ་མ་ནོར་བ་རྩ་བའི་སྔགས། དེ་ལྟར་བཞུགས་པ་ལ་གནད་དུ་བསྣུན་པའི་ཐབས་ཀྱི་བྱེད་རྩོལ་གྱི་གནད་ཁྱད་པར་ཅན་ནི་སྐྱེད་པ་རྐྱེན་གྱི་སྔགས། དེ་ལ་ ― MLP018_Page_0073 ―
[མ་དཔེ་གཟིགས་ན་འདིར་གནོན།]
བཟླ་ཞིང་སྒོམ་པ་བཟླས་པ་ལས་ཀྱི་སྔགས་སོ། །ཕྱག་རྒྱ་ལའང་སྤྱིར་རྟོག་ཚོགས་ཐམས་ཅད་ཡེ་གདོད་མ་ནས་ལྷའི་དཀྱིལ་འཁོར་དུ་གནས་པ་རང་བཞིན་གྱི་ཕྱག་རྒྱ་དང་། དེ་ལ་ངེས་ཤེས་ཁྱད་པར་ཅན་སྐྱེས་པའི་སྒོ་ནས་དེ་མངོན་དུ་རྟོགས་པ་ལྟ་བའི་ཕྱག་རྒྱ་དང་། རང་འབྲས་ཇི་བཞིན་མངོན་དུ་གྱུར་པས་འོག་མིན་ན་རྒྱལ་བ་ཞི་ཁྲོའི་དཀྱིལ་འཁོར་ཆེན་པོར་བཞུགས་པ་འབྲས་བུའི་ཕྱག་རྒྱ་སྟེ་གསུམ་མོ། །བྱེ་བྲག་ཏུ་ལྷག་པ་ཏིང་ངེ་འཛིན་གྱི་དབང་དུ་བྱས་ན། གསལ་བཀྲ་ལས། དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་ཆེན་པོ་བཞི། །ཞེས་པས་ཕྱག་རྒྱ་བཞི་ལྡན་ནམ། ནང་གསེས་སུ་དབྱེ་ན་ཕྱག་རྒྱ་བདུན་ལྡན་དུ་འགྱུར་བ་ཡིན་ནོ། །དེ་ལ་ཞི་ཁྲོ་གཉིས། དང་པོ་ལ་ཕྱག་རྒྱའི་རྒྱུ་དང་། དེ་ལས་བྱུང་བ་རིགས་ལྔ་སྤྱིའི་དམ་རྒྱ། དེ་ལས་འཕྲོས་པ་ལྷ་སོ་སོའ་ཕྱག་རྒྱའོ། །དང་པོ་ནི། འགྲེལ་ཆུང་ལས། དབུ་ནི་བདེ་གཤེགས་རིགས་ཉིད་དེ། །ལག་གཡས་རྡོ་རྗེ་མི་བསྐྱོད་པ། །ལག་གཡོན་རིན་ཆེན་སེམས་དཔའི་རིགས། །རྐང་གཡོན་ཆོས་ཀྱི་སེམས་དཔའ་སྟེ། །རྐང་གཡས་ལས་ཀྱི་སེམས་དཔའ་འོ། །ཞེས་ལུས་ཀྱི་ཡན་ལག་ལྔ་དང་། ཉིང་ལག་གི་གུང་མོ་རྡོ་རྗེའི་རིགས་ཡིན་པ་སོགས་ངེས་པར་བྱས་ཏེ། མི་བསྐྱོད་པའི་རིགས་ལག་གཡས་ཀྱི་སོར་མོར་ཉི་དཀྱིལ་ལ་ཧཱུཾ་ཨཱོཾ་སྭཱ་ཨཱཾ་ཧཱ་རྣམས་དང་། རིན་ཆེན་རིགས་གཡོན་གྱི་སོར་མོར་ཟླ་དཀྱིལ་ལ་མཱུཾ་ལཱཾ་མཱཾ་པཱཾ་ཏཱཾ་རྣམས་བཀོད་དེ་ཐལ་མོ་སྦྱར་བའོ། །འདི་ལ་ཕྱག་རྒྱའི་རྒྱུ་རྡོ་རྗེ་ཐལ་མོ་ཞེས་བྱའོ། །གཉིས་པ་ནི། ༀ་དང་མཱུཾ་གཉིས་རྩེ་སྦྱར་ཏེ། །ཞེས་སོགས་ཀྱིས་བསྟན་ཏེ། དེ་ཡང་ཐབས་ཞགས་ལས། སོར་མོ་ནང་དུ་བསྣོལ་ནས་བཀན། གུང་མཛུབ་མཐེ་བོང་མཐེའུ་ཆུང་རྣམས། །སོ་སོར་རྩེ་སྤྲད་ཕྱིར་བསྐྱེད་དེ། །སྲིན་ལག་གཤིབས་སྦྲེང་དམ་ཚིག་རྒྱ། །ཞེས་དང་། རྔམ་གློག་ལས་ཀྱང་། ཨཱོཾ་དང་མཱུཾ་གཉིས་རྩེ་སྤྲད་ལ། །དེ་བཞིན་ཧཱུཾ་དང་ལཱཾ་དུ་སྦྱར། །ཧཱ་དང་པཱཾ་ཡང་དེ་བཞིན་ཏེ། །ཨཱཾ་དང་ཏཱཾ་དུ་སྦྱར་བ་ལས། །རྒྱབ་སྦྱར་སྭཱ་དང་མཱཾ་སྦྲེང་བ། །འདི་ནི་ཡབ་ཀྱི་སྤྱི་རྒྱ་ཡིན། །ལག་པ་ཐལ་མོ་སྦྱར་བ་ལས། །ཨཱོཾ་དང་མཱུཾ་སྦྱར་ཧཱུཾ་དང་ནི། །ལཱཾ་སྦྱར་སྭཱ་དང་པཱཾ་དུ་སྦྱར། །ཨཱཾ་དང་མཾ་སྦྱར་ཧཱ་ཏཱཾ་སྒྲེང་། །ཡུམ་གྱི་སྤྱི་རྒྱ་ཡིན་པར་བཤད། །ཅེས་སོ། །གསུམ་པ་ལ་ལྔ་ལས། དང་ ― MLP018_Page_0074 ―
[མ་དཔེ་གཟིགས་ན་འདིར་གནོན།]
པོ་རིགས་ལྔའི་ཕྱག་རྒྱ་ནི། གཙོ་བོ་མི་བསྐྱོད་པ་ལ་སྦྱར་ན། བདག་ཉིད་མི་བསྐྱོད་པར་སྒོམ་པ་ཕྱག་ཆེན། དེའི་ངང་ལས་ལག་གཡས་ཀྱི་ཡིག་འབྲུ་གཞན་བཞི་སྦས་ནས་གུང་མོ་ཐུགས་ཀར་བཀན་ཐབས་སུ་སྒྲེང་བ་བཅའ་བ་དམ་རྒྱ། དེའི་རྩེ་མོར་ཧཱུཾ་སྒོམ་པ་བསམ་པ་ཆོས་རྒྱ། དེ་ཞུ་བ་ལས་རྡོ་རྗེར་གྱུར་པ་བསམ་པ་དམ་རྒྱ། ལག་གཡོན་པའི་ཟླ་བ་ལྔ་ནང་དུ་བརྟུལ་བའི་ཁུ་ཚུར་གྱིས་དྲིལ་བུ་གསིལ་ཞིང་ཡུམ་ལ་འཁྲིལ་བའི་ཚུལ་གྱིས་བརླ་གཡོན་ལ་བརྟེན་པ་བཅའ་བ་ལས་རྒྱ། དེ་ལྟར་བསྒོམ་པ་བསམ་པ་ལས་རྒྱ། དེ་ནས་ཕྱག་རྒྱ་གཡས་སུ་བཅས་པ་མདུན་དུ་བསྒྱུར་ནས་གཡོན་དུ་ཡུམ་གྱི་ཐུགས་ཀར་སེ་གོལ་དང་བཅས་ཧཱུཾ་བཛྲ་དྷྲིཀ་ཅེས་བརྗོད་ཅིང་དགྲོལ་བ་བརྗོད་པ་ཆོས་རྒྱ་སྟེ་ཤེས་རབ་ལ་ཐབས་ཀྱིས་རྒྱས་འདེབས་པའོ། །དེས་མཚོན་ཡུམ་གྱི་ཕྱག་རྒྱ་དང་། རིགས་གཞན་རྣམས་ལ་དེ་དག་གིས་རིགས་འགྲེའོ། །གཉིས་པ་སེམས་དཔའ་ཡབ་ཡུམ་གྱི་ཕྱག་རྒྱ་ནི། མཐེ་བོང་སྤངས་པའི་སོར་མོ་རྣམས་ལ་རང་རང་གི་ས་བོན་སྔར་ལྟར་སྒོམ་པའི་ངེས་པས་ཕྱག་རྒྱ་བདུན་ལྡན་རིགས་ལྔའི་སྐབས་བཞིན་ནོ། །གསུམ་པ་སྒོ་བ་ཡབ་ཡུམ་གྱི་ཕྱག་རྒྱ་ནི། སྔ་མས་མཚོན་ནོ། །བཞི་པ་ཐུབ་དྲུག་གི་ཕྱག་རྒྱ་ནི། གདུལ་བྱ་མ་ངེས་པ་འདུལ་བའི་ཕྱིར་སྣ་ཚོགས་ཏེ། དེ་ཡང་བསྡུ་ན་དྲུག་ཏུ་འདུའོ། །ལྔ་པ་ཀུན་བཟང་ཡབ་ཡུམ་གྱི་ཕྱག་རྒྱ་ནི། ཡབ་ཀུན་བཟང་ཕྱག་གཡས་སྟེང་དུ་བྱས་པའི་མཉམ་བཞག་ལས་ཡེ་ཤེས་ལྔའི་འོད་ཟེར་འཕྲོ་བ་དང་། ཡུམ་ཀུན་ཏུ་བཟང་མོ་ཕྱག་གཡོན་སྟེང་དུ་བྱས་པའི་མཉམ་བཞག་གམ། ཡང་ན་ཡབ་ཀུན་བཟང་བཞིན་ནམ་རྡོ་རྗེ་ཐལ་མོ་ཐུགས་ཀར་སྦྱར་བའོ། །གཉིས་པ་ཁྲོ་བོའ་ཕྱག་རྒྱ་ནི། རྣམ་པར་གྲོལ་བ་མཚོན་པའི་ཕྱིར། དབུས་ཀྱི་ཁྲོ་བོའ་ཕྱག་རྒྱ་ནིི། ཞེས་སོགས་རྒྱུད་གཞན་ལས་ཇི་སྐད་གསུངས་པ་ལྟར་རིགས་ལྔ། གནས་ཡུལ། སྒོ་སྐྱོང་། དབང་ཕྱུག་མ་དང་བཅས་པའི་ཕྱག་རྒྱ་བྱ་བ་སྟེ། རྒྱས་པ་ལས། དབུས་ཀྱི་ཧེ་རུ་ཀའི་ཕྱག་རྒྱ་ནི། ཞེས་སོགས་དང་། གནས་དང་ཡུལ་གྱི་ཕྱག་རྒྱ་ནི། །རྒྱུད་གཞན་དག་དང་མཐུན་པར་བཤད། །མ་མོ་རྣམས་ཀྱི་ཕྱག་རྒྱ་ནི། །འཇིག་རྟེན་འདས་མདོ་ཆེ་ལས་བཤད། །ཅེས་སོ། །དེ་དག་ཀྱང་ཕྱག་རྒྱ་བཞི་ལྡན་ཏེ། ལྷ་སྐུར་གསལ་ ― MLP018_Page_0075 ―
[མ་དཔེ་གཟིགས་ན་འདིར་གནོན།]
བ་ཕྱག་ཆེན། ཐུགས་ཀར་རང་རང་གི་ས་བོན་གསལ་ཞིང་ངག་ནས་ཚིག་བརྗོད་པ་ཆོས་རྒྱ། ཕྱག་མཚན་འཛིན་པའི་ཕྱག་རྒྱ་བཅའ་ཞིང་བསམ་པ་དམ་རྒྱ། ཕྱག་རྒྱ་བཅའ་ནས་མདུན་དུ་བསྒྱུར་ཏེ་འགྲོལ་བ་ལས་རྒྱའོ། །དེ་ལྟར་ཡང་ཧེ་རུ་ཀ་གལ་པོ་ལས། སྐུ་ནི་ཕྱག་རྒྱ་ཆེན་པོ་དང་། །གསུང་ནི་ཆོས་ཀྱི་ཕྱག་རྒྱ་དང་། །ཕྲིན་ལས་ལས་ཀྱི་ཕྱག་རྒྱ་དང་། །ཐུགས་ནི་དམ་ཚིག་ཕྱག་རྒྱའོ། །ཞེས་སོ། །ཕྱག་རྒྱ་བཞི་རྫོགས་རིམ་དང་སྦྱར་ཏེ་བཤད་ན། སྟེང་སྒོ་གཏུམ་མོ་ཙཎྜ་ལཱི་ནི་དམ་ཚིག་གི་ཕྱག་རྒྱ། འོག་སྒོ་ཕྱག་རྒྱ་གསུམ་ནི་ལས་ཀྱི་ཕྱག་རྒྱ། སྒྱུ་ལུས་སྙིང་རྗེ་ཆེན་པོ་ནི་ཆོས་ཀྱི་ཕྱག་རྒྱ། རྣམ་པར་མི་རྟོག་པ་རང་བཞིན་འོད་གསལ་གྱི་ཡེ་ཤེས་ནི་ཕྱག་རྒྱ་ཆེན་པོའོ། །བཞི་པ་རྒྱུད་ཀྱི་དགོས་འབྲེལ་ལའང་གསུམ་སྟེ། ངོ་བོ་ནི། ཐུགས་ཐིག་ལས། བརྗོད་འབྲེལ་དགོས་པ་ཡང་དགོས་དང་། །རྒྱུ་རྐྱེན་ཡན་ལག་བཞི་རུ་འགྱུར། །ཞེས་པས། བརྗོད་བྱ། རྗོད་བྱེད། དགོས་པ། ཉིང་དགོས་དང་བཞི། དང་པོ་ནི། མཚོན་བྱ་རང་བཞིན་གཞིའི་རྒྱུད་སེམས་ཅན་ཐམས་ཅད་ཀྱི་རྒྱུད་ལ་གདོད་མ་ནས་རང་ཆས་སུ་བཞུགས་པ་ནི་བརྗོད་པར་བྱ་བ་སྟེ། ཁོག་གཞུང་ལས། མཚོན་བྱ་རང་བཞིན་གཞི་ཡི་རྒྱུད། །ཅེས་སོ། །གཉིས་པ་ནི། རང་བཞིན་རྒྱུད་དེ་ཁོང་དུ་ཆུད་པར་བྱ་བའི་ཕྱིར་མཚོན་བྱེད་ལམ་རྐྱེན་ཡི་གེའི་རྒྱུད་སྒྱུ་འཕྲུལ་དྲྭ་བ་སྒྲར་སྣང་ཞིང་སྒྲར་གྲགས་པའི་བདག་ཉིད་ཅན་བརྡར་བཏགས་ཀྱི་རྟེན་གླེགས་བམ་དང་བཅས་པ་ནི་རྗོད་པར་བྱེད་པ་སྟེ། དེ་ཉིད་ལས། སྒྲོ་སྐུར་མེད་པར་བསྟན་པ་ནི། །མཚོན་བྱེད་སྒྱུ་འཕྲུལ་དྲྭ་བ་སྟེ། །ཞེས་སོ། །གསུམ་པ་ནི། རྗོད་བྱེད་ལ་ཐོས་བསམ་བྱས་པ་ལ་བརྟེན་ནས་བརྗོད་བྱའི་དོན་དམིགས་ཡུལ་དོན་སྤྱིའི་ཚུལ་དུ་ཤེས་པ་ནི་དགོས་པ་སྟེ། དེ་ཉིད་ལས། མཛུབ་མོས་རི་བོང་ཅན་བཞིན་ནོ། །ཞེས་སོ། །བཞི་པ་ནི། དེ་ལྟར་ཤེས་པའི་དོན་སྒོམ་པ་བསྐྱེད་རྫོགས་གཉིས་གང་རུང་གིས་ཉམས་སུ་བླངས་པས། རོ་ལངས་ཚེ་ལ་སོགས་ཏེ་ཐུན་མོང་གི་དངོས་གྲུབ་ཐོབ་པ་ཉིང་དགོས་ཕྲ་མོ་དང་། སློབ་པའི་ཟུང་འཇུག་རིག་འཛིན་བཞི་དང་། མི་སློབ་པའི་ཟུང་འཇུག་རྫོགས་པའི་སངས་རྒྱས་ཏེ་དེ་ལྟར་མཆོག་གི་དངོས་གྲུབ་མངོན་ ― MLP018_Page_0076 ―
[མ་དཔེ་གཟིགས་ན་འདིར་གནོན།]
དུ་གྱུར་པ་ནི་ཉིང་དགོས་མཆོག་སྟེ། དེ་ཉིད་ལས། དགོས་པའི་དགོས་པ་འབྲས་བུ་ཉིད། །ཅེས་སོ། །དེ་དག་གི་འབྲེལ་བཤད་ནི། དེ་ཡང་བརྗོད་བྱ་དང་རྗོད་བྱེད་གཉིས་ཤེས་བྱ་ཤེས་བྱེད་དང་། རྗོད་བྱེད་དང་དགོས་པ་གཉིས་ཐབས་ལས་ཐབས་བྱུང་དང་། དགོས་པ་དང་ཉིང་དགོས་གཉིས་དེ་ལས་དེ་བྱུང་དང་། ཉིང་དགོས་དང་བརྗོད་བྱ་གཉིས་ངོ་བོ་བདག་གཅིག་གི་འབྲེལ་བ་ཡིན་ནོ། །ངེས་ཚིག་ནི། ཅིའི་ཕྱིར་རྒྱུད་ཀྱི་དགོས་འབྲེལ་ཞེས་བྱ་ཞེ་ན། དགོས་སོགས་ཆོས་བཞི་པོ་དེ་དག་སྔར་བཤད་པ་ལྟར་ཕན་ཚུན་འབྲེལ་བ་ཅན་དུ་གྲུབ་པའི་ཕྱིར་ཏེ། ཐོབ་བྱ་མཐར་ཐུག་གི་འབྲས་བུ་སྒྲུབ་པ་ལ་མེད་ན་མི་འབྱུང་གི་འབྲེལ་བ་གྲུབ་པའི་ཕྱིར་རོ། །དབྱེ་ན། གྲོལ་ལམ་དབང་བཙན་དུ་བྱས་པ་དང་། ཐབས་ལམ་དབང་བཙན་དུ་བྱས་པ་གཉིས། དང་པོ་ནི། སྔར་ངོ་བོའ་སྐབས་སུ་བཤད་པ་ལྟར་ཡིན་ལ། གཉིས་པ་ནི། ལྷན་ཅིག་སྐྱེས་པའི་ཡེ་ཤེས་གདོད་མ་ནས་རང་ལ་བཞུགས་པ་ནི་མཚོན་བྱ་རང་བཞིན་གཞིའི་རྒྱུད་དོ། །དེ་ཉིད་རྟོགས་བྱེད་ཀྱི་མན་ངག་ཐིག་ལེ་ཆེན་པོ་ཐབས་དང་བཅས་པ་ནི་མཚོན་བྱེད་ལམ་རྐྱེན་ཡི་གེའི་རྒྱུད་དོ། །དེའི་དོན་ཉམས་སུ་བླངས་པས་བདེ་ཆེན་གྱི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པ་ནི་དགོས་པའོ། །དེ་ལ་གོམས་པར་བྱས་པས་མཆོག་ཏུ་མི་འགྱུར་བའི་ཡེ་ཤེས་ཆེན་པོ་མངོན་དུ་བྱས་པ་ནི་ཉིང་དགོས་སོ། །ལྔ་པ་འཁོར་ལ་གདམས་ཤིང་བསྟན་པ་གཏད་པ་ལའང་གསུམ་སྟེ། ངོ་བོ་ནི། བསྟན་པའི་སྙིང་པོ་རང་བཞིན་གསང་བའི་སྙིང་པོ་མཚོན་བྱེད་ལམ་རྐྱེན་གྱི་རྒྱུད་དང་བཅས་པ་འདི་ཉིད་མི་ཉམས་ཤིང་བསྲུང་བའི་ཆེད་དུ་འཁོར་རྣམས་ལ་གདམས་ཤིང་གཏད་པའོ། །ངེས་ཚིག་ནི། ཅིའི་ཕྱིར་གདམས་གཏད་ཅེས་བྱ་ཞེ་ན། རང་བཞིན་གཞིའི་རྒྱུད་ཀྱི་དོན་ལས་མི་འགྱུར་བར་གདམས་པའང་ཡིན་ལ། ལམ་གྱི་རྒྱུད་དེ་གཞི་རྟོགས་བྱེད་ཀྱི་ཐབས་སུ་མི་ནུབ་པར་ཟུངས་ཤིག་ཅེས་གཏད་པའང་ཡིན་པའི་ཕྱིར་གདམས་གཏད་ཅེས་བྱའོ། །དབྱེ་ན་གཉིས་ལས། དང་པོ་གདམས་པ་ལ་བཞི་སྟེ། གཞི་རང་བཞིན་གྱི་སྣང་བ་རྟོགས་བྱར་གདམས་པ། ལོག་རྟོག་འཁྲུལ་པའི་སྣང་བ་དག་བྱར་གདམས་པ། གདུལ་བྱ་ལམ་གྱི་སྣང་བ་བགྲོད་བྱར་ ― MLP018_Page_0077 ―
[མ་དཔེ་གཟིགས་ན་འདིར་གནོན།]
གདམས་པ། འབྲས་བུ་བདེ་གཤེགས་ཀྱི་སྣང་བ་ཐོབ་བྱར་གདམས་པའོ། །དང་པོ་ནི། ཀྱཻ། ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །ཅེས་སོ། །གཉིས་པ་ནི། གཟུང་འཛིན་སྤྲོས་ལ་འཆེལ་བ་ཡིས། །རྣམ་རྟོག་ཞགས་པས་སོ་སོར་འཛིན། །ཞེས་སོ། །གསུམ་པ་ནི། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོའི་འགྲོ་བའི་ལམ། །ཞེས་སོ། །བཞི་པ་ནི། ཡེ་ཤེས་ངོ་མཚར་རབ་འབྱམས་ཀྱིས། །དོན་དུ་མི་འགྱུར་ཡོངས་མ་གསུངས། །ཞེས་སོ། །མདོར་ན། སྦྱང་གཞི་གཞི་རྒྱུད་རྟོགས་བྱ། སྦྱང་བྱ་གློ་བུར་གྱི་དྲི་མ་དག་བྱ། སྦྱོང་བྱེད་ཐུན་མོང་དང་ཁྱད་པར་གྱིས་བསྡུས་པའི་ལམ་བགྲོད་བྱ། སྦྱང་འབྲས་སྐུ་གསུམ་གྱི་འབྲས་བུ་ཐོབ་བྱར་གདམས་པ་སྟེ། རྒྱུ་མཚན་དེས་ན་རྒྱུད་ཀྱི་དོན་ཐམས་ཅད་སྣང་བ་བཞིར་བསྡུས་ནས་གསུངས་པའི་ཕྱིར། རལ་གྲི་ལྟར་ཡུ་བ་ནས་བཟུང་སྟེ་བཤད་པ་ཞེས་བྱའོ། །གཉིས་པ་གཏད་པ་ལ། ཁོག་གཞུང་ལས། སྡུད་པ་པོ་དང་བུད་མེད་དང་། །རྣལ་འབྱོར་མིག་ལྡན་སོགས་ལའོ། །ཞེས་གསུངས་པ་ལྟར་གསུམ་ལས། དང་པོ་སྡུད་པ་པོ་ལ་གཏད་པ་ནི། དེ་བཞིན་གཤེགས་པ་ཐམས་ཅད་ཀྱི་བཀའི་བསྡུ་བ་པོ་གསང་བའི་བདག་པོ་ལག་ན་རྡོ་རྗེ་ལ་གཏད་པ་སྟེ། དེ་བཞིན་གཤེགས་པ་ཐམས་ཅད་ལ། །གསང་བ་འདི་ལས་གཞན་མི་མངའ། །སྒྲོ་དང་སྐུར་པ་ཞི་བ་ཡི། །གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །ཞེས་སོ། །གཉིས་པ་ཕྱི་རབས་ཀྱི་གང་ཟག་ལ་གཏད་པ་ལ་གཉིས་ཏེ། གང་ཟག་ཆོས་མིག་ཅན་ལ་གཏད་པ་དང་། ངེས་པར་ལུང་བསྟན་པའི་སྒོ་ནས་གཏད་པའི་འཐད་པ་དང་བཅས་པའོ། །དང་པོ་ནི། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བར་གང་བྱེད་པ། །དེ་ཉིད་ང་ཡིན་དབང་ཡང་རྫོགས། །ཞེས་སོ། །གཉིས་པ་ནི། དེ་ནི་ངེས་པར་ལུང་བསྟན་ཏེ། །སྲས་ནི་ཐུགས་ལས་སྐྱེས་པ་ཡི། །ས་རབ་རིག་པ་འཛིན་ལ་གནས། །ཞེས་དང་། སྒྱུ་འཕྲུལ་རྡོ་རྗེ་ལས། རང་རིག་ཡེ་ཤེས་རྒྱུད་དོན་ཕྱིར། །རང་སྣང་རིག་པ་མངོན་བྱས་པས། །རིག་འཛིན་མཆོག་དེ་ལྷུན་གྲུབ་པའོ། །ཏིང་འཛིན་ནུས་པའི་མཐུ་མེད་ཀྱང་། །ས་སྦྱོང་སེམས་དཔའ་བསྐྱེད་དུ་མེད། །བདེ་ ― MLP018_Page_0078 ―
[མ་དཔེ་གཟིགས་ན་འདིར་གནོན།]
གཤེགས་ཉིད་དང་སྤྱོད་ཡུལ་གཅིག །རིག་པའི་སྐྱེས་བུར་ལུང་ཐོབ་པའོ། །ཞེས་སོ། །གསུམ་པ་མ་མོ་དང་མཁའ་འགྲོ་རྣམས་ལ་གཏད་པ་ནི། རྒྱས་པ་ལས། ང་ཡི་ཐུགས་ཀྱི་སྙིང་པོ་འདི། །ཕྱོགས་བཅུ་ཀུན་ཏུ་སྤེལ་བ་དང་། །དེ་ཡི་གཟུངས་ལ་གཏད་པ་ནི། །ཡིད་བཞིན་མཛོད་འབྱོར་བཀའ་ཡི་གནས། །བསྟན་པ་འཛིན་པར་ནུས་པ་ལ། །གསང་བའི་སྙིང་པོ་མཆོག་ཏུ་གཏད། །ཅེས་མ་མོ་དང་མཁའ་འགྲོ་རྣམས་ལ་བསྟན་པ་སྐྱོང་ཞིང་ཕྱོགས་བཅུར་སྤེལ་བར་གཉེར་གཏད་པའོ། །གཉིས་པ་ཚིག་གི་རྣམ་གྲངས་རྣམ་པར་དབྱེ་བ་ལའང་གསུམ་སྟེ། ངོ་བོ་ནི། རྒྱུད་ཕྱི་མ་ལས། གང་གིས་བརྗོད་བྱ་འཆད་བྱེད་པ། །དེ་ནི་རྗོད་བྱེད་དུ་བཤད་དོ། །ཞེས་པས་བརྗོད་བྱ་འཆད་པར་བྱེད་པ་ནི་རྗོད་བྱེད་དེ། སྒྲར་སྣང་ཞིང་སྒྲར་གྲགས་པའི་བདག་ཉིད་ཅན་སྒྲའི་རྒྱུད་དམ་གླེགས་བམ་དུ་སྣང་བ་ཡི་གེའི་རྒྱུད་དུ་གྲགས་པ་གང་ཡིན་པའོ། །དེ་ཡང་ངོ་བོ་ཚོགས་པ་གསུམ་ལྡན་ཏེ། གདུང་འདེགས་ཀྱི་ཤིང་ལ་ཀ་བ་ཞེས་འདོགས་པ་ལྟ་བུ་ཆོས་གང་ལ་སྒྲ་གང་ཞིག་དེ་ཉིད་ཡིན་པ་ལྟ་བུར་བཏགས་ནས་བརྗོད་པ་ནི་མིང་ཡིན་ལ། མིང་དེ་མང་པོ་འདུས་པ་ནི་མིང་གི་ཚོགས་ཏེ། མངོན་བརྗོད་ཀྱི་བསྟན་བཅོས་ལྟ་བུའོ། །མིང་དེ་ཉིད་སྤྱིར་ཡན་དུ་མ་བཅུག་པར་དང་པོ་ངོ་བོ་ཙམ་སྟོན་པ། གཉིས་པ་ལས་སུ་བྱ་བ་ལ་སོགས་པ་རྣམ་དབྱེ་རྣམས་ཀྱི་བྱེ་བྲག་སོ་སོར་ཕྱེ་ནས་ཆོས་དེ་དང་དེའི་དོན་གྱི་ཁྱད་པར་སྟོན་པ་ནི་ཚིག་ཡིན་ཏེ། རྟ་བབས་ཀྱི་སྟེང་ན་ཆོས་འཁོར་གདུགས་དང་བཅས་པའི་གཡས་གཡོན་དུ་རི་དྭགས་ཕོ་མོས་བརྟེན་པ་ཞེས་པ་ལྟ་བུའོ། །མིང་ཚིག་དེ་དག་གསལ་བར་བྱེད་པའི་འབྲུ་ལ་ནི་ཡི་གེ་ཞེས་བྱ་སྟེ། ཨ་དང་ཀ་ལ་སོགས་པ་དབྱངས་གསལ་གྱི་ཡི་གེ་རྣམས་སོ། །དེ་ལྟར་ན། ཡི་གེ་འདུས་པ་ལས་མིང་འབྱུང་སྟེ། ཀ་འ་བ་འ་ཞེས་གསལ་བྱེད་བཞི། དབྱངས་ཨ་གཉིས་རྣམས་འདུས་པས་ཀ་བ་ཞེས་གྲུབ་པ་ལྟ་བུའོ། །མིང་འདུས་པ་ལས་ཚིག་འབྱུང་སྟེ། ཀ་བ་དང་། གདུང་མ། རིན་པོ་ཆེ། ཕྲ་ཚོམས་ཞེས་སོགས་མིང་དུ་མ་འདུས་པ་རྣམ་དབྱེས་མཚམས་སྦྱར་བས། ཀ་བས་བཏེགས་པའི་གདུང་མ་རིན་པོ་ཆེའི་ཕྲ་ཚོམས་ཀྱིས་མཛེས་པ། ཞེས་གྲུབ་ ― MLP018_Page_0079 ―
[མ་དཔེ་གཟིགས་ན་འདིར་གནོན།]
པ་ལྟ་བུའོ། །དེ་འདུས་པ་ལས་ཚིགས་སུ་བཅད་པ་དང་། ལྷུག་པ་དང་། ལེའུ་ལ་སོགས་པའི་རིམ་པས་གླེགས་བམ་གྱི་བར་དུ་རྒྱུན་ཆགས་པ་ལས་གཞུང་ཚོགས་ཡི་གེའི་རྒྱུད་དམ། བརྗོད་བྱ་དོན་གྱི་རྒྱུད་མཚོན་པར་ནུས་པའི་རྗོད་བྱེད་སྒྲའི་རྒྱུད་གྲུབ་པ་ཡིན་ཏེ། ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཞེས་གསུངས་པའི་ཕྱིར་རོ། །དེ་ལ་བཅད་ལྷུག་སྤེལ་མ་གསུམ་གྱི་མཚན་ཉིད་ནི། སྤྱིར་མདོ་ལས། བྲམ་ཟེ་ཆུ་ལ་ཇི་ཙམ་ཞིག །ཅེས་དྲིས་པའི་ལན་དུ། མི་ཡི་བདག་པོ་པུས་ནུབ་ཙམ། ཞེས་ཚིགས་སུ་བཅད་པ་ལྟ་བུ་རྐང་པ་གཅིག་ལ་ཚིགས་བཅད་དུ་བཞག་པས་མཚོན་མངོན་པ་ཀུན་ལས་བཏུས་སུ་གསུངས་པ་ལྟར། རྐང་པ་གཅིག་པ་ནས་བདུན་པའི་བར་དང་། ཁྱད་པར། སྙན་ངག་མེ་ལོང་དང་། སྡེབ་སྦྱོར་རིན་འབྱུང་དུ། ཚིགས་བཅད་རྐང་བཞི་དེ་ཡང་ནི། །ཞེས་རྐང་པ་བཞིར་བཅད་ཅིང་རྐང་པ་བཞི་ཚོགས་པའི་བདག་ཉིད་ཅན་ཚིགས་བཅད། ཚིག་ལྷུག་པ་རྒྱུན་ཆགས་སུ་སྤེལ་བའི་ཚིག་ལྷུག བཅད་ལྷུག་སྤེལ་བ་སྤེལ་མའི་མཚན་ཉིད་དོ། །དེ་དག་ཀྱང་དཔྱད་ན། སྟོན་པའི་ཡེ་ཤེས་ཀྱི་རྣམ་པར་འཕྲུལ་པ་ལས་ལོངས་སྐུ་དགོངས་པ་བརྡའི་ཚིག་མི་གསུང་བ་གསུང་བ་ཆེན་པོའི་སྒོ་ནས་དངོས་ཀྱི་འཁོར་འབྲས་དབང་ཐོབ་པས་སྟོན་འཁོར་དགོངས་པ་དབྱེར་མེད་དུ་གྱུར་པ་རྣམས་ཀྱི་ཡིད་ལ་རྒྱུད་དོན་རང་སྣང་བའམ། དེ་ཉིད་མ་འོངས་པའི་གདུལ་བྱ་གོ་ཕྱེ་བའི་འཁོར་རྣམས་ཀྱི་ཡིད་ལའང་རྒྱུད་དོན་སྒྲ་སྤྱིའི་རྣམ་པར་ཤར་བའི་མིང་ཚིག་ཡི་གེ་གསུམ་ཚོགས་པའི་རྒྱུད་གཞུང་སྟེ་སྒྲར་སྣང་བའི་རྒྱུད་དང་། དེ་དང་མཐུན་པའི་སྒྲ་བརྗོད་འདོད་ཀྱི་དབང་གིས་སྤྱི་བོ་ལ་སོགས་པའི་གནས་དང་། ལྕེ་མཆུའི་སྦྱོར་བ་ལ་སོགས་པའི་བྱེད་པ་སོགས་འཕྲད་པ་ལས་ངག་ཏུ་བརྗོད་པ་ནི་སྒྲར་གྲགས་པའི་རྒྱུད་དང་དེ་བརྗོད་པའི་རྟེན་ཕྱི་རོལ་དུ་ཡི་གེའི་གཟུགས་བརྙན་གླེགས་བམ་ལ་བཀོད་པ་ནི་བརྡར་གྱུར་པའི་རྒྱུད་གཞུང་སྟེ། རྗོད་བྱེད་ཀྱི་སྒོ་ནས་ཕྱེ་ན་དེ་ཙམ་མོ། །ངེས་ཚིག་ནི། ཅིའི་ཕྱིར་སྒྲའི་རྒྱུད་ཅེས་བྱ་ཞེ་ན། བརྗོད་བྱའི་དོན་ཉིད་རྟོགས་བྱེད་ཀྱི་ཐབས་རྗོད་བྱེད་ཀྱི་སྒྲར་སྣང་ཞིང་སྒྲར་གྲགས་པའི་དོན་གྱིས་ན་སྒྲ་དང་། ཚིགས་སུ་བཅད་པ་སོགས་གཞུང་གི་ཚོགས་རྒྱུན་ཆགས་པའམ། གླེང་གཞི་ལ་ ― MLP018_Page_0080 ―
[མ་དཔེ་གཟིགས་ན་འདིར་གནོན།]
སོགས་པ་ལྔ་རྒྱུ་རྐྱེན་འབྲས་བུའི་ཚུལ་དུ་འབྲེལ་བས་ན་རྒྱུད་དོ། །གཞན་དུ་ན་བརྗོད་བྱ་ལ་རྒྱུད་ཀྱི་མིང་ཐོབ་པས་དེ་རྗོད་བྱེད་ལའང་རྒྱུད་ཅེས་བཏགས་སོ། །དབྱེ་ན། འཆད་གཞིར་གྱུར་པ་རྩ་བའི་རྒྱུད་དང་འཆད་བྱེད་དུ་གྱུར་པ་བཤད་པའི་རྒྱུད་གཉིས་སམ། རྩ་བའི་རྒྱུད་ཉིད་ལའང་ཚིག་གི་ཚོགས་པ་ལེའུ་ཉི་ཤུ་རྩ་གཉིས་སུ་བཅད་དེ་གནས་ལ། དེ་ཡང་ལེའུ་དང་པོས་ལོངས་སྐུའི་གླེང་གཞི། གསུམ་པའི་སྟོད་ཀྱིས་སྤྲུལ་སྐུ་འགྲོ་བ་འདུལ་བའི་གླེང་གཞི། བཅོ་ལྔ་པས་ཁྲོ་བོའ་གླེང་གཞི་སྟེ་དེ་རྣམས་ཀྱིས་རྒྱུ་གླེང་གཞིའི་རྣམ་བཞག་བསྟན། ལེའུ་གཉིས་པས་རྐྱེན་གླེང་བསླང་བ། ལེའུ་གསུམ་པའི་སྨད་ནས་ཉེར་གཅིག་པ་ཡན་ཆད་ཀྱིས་འབྲས་བུ་ཡོངས་ཤེས་རྒྱུད་དོན་དང་། དེ་དག་ལ་ཁྱབ་བྱེད་དུ་རྒྱུད་ཀྱི་དགོས་འབྲེལ་དང་། ལེའུ་ཐ་མས་གདམས་གཏད་རྣམས་སྟོན་ཅིང་། ཡོངས་སུ་ཤེས་པར་བྱ་བ་རྒྱུད་དོན་ལའང་རྒྱུད་ཀྱི་དངོས་པོ་བཅུའི་སྟོན་ཚུལ་ནི། ལེའུ་གསུམ་པའི་སྨད་དང་བཅུ་གཅིག་པའི་དབུར་ལྟ་བ་གཏན་ལ་འབེབས་ཚུལ་བསྟན་པ་སོགས་ལེའུ་དུ་མ་ནས་དུམ་ཆ་དུམ་ཆས་དང་པོ་ལྟ་བའི་རྣམ་གཞག་སྟོན་པ་ལ་སོགས་ཏེ། ལེའུ་གང་དང་གང་གིས་རྒྱུད་ཀྱི་དངོས་པོ་བཅུ་ཇི་ལྟར་བསྟན་ཚུལ་གཙོ་ཆེ་ཆུང་གི་སྒོ་ནས་གཞུང་ཉིད་ལ་ཞིབ་མོར་དཔྱད་པས་ཤེས་པར་འགྱུར་ཞིང་། ཞི་ཁྲོ་སྤྱི་བྱེ་བྲག་གི་ཆོས་རྣམས་ལེའུ་གང་དང་གང་གིས་སྟོན་ཚུལ་ཡང་ཞི་བ་སྟོན་པའི་ལེའུ་དགུ། ཁྲོ་བོ་སྟོན་པའི་ལེའུ་ལྔ། ཞི་ཁྲོ་ཐུན་མོང་དུ་སྟོན་པའི་ལེའུ་བརྒྱད་དེ། དེ་དག་གི་ཚུལ་བློ་གྲོས་དང་ལྡན་པ་རྣམས་ཀྱིས་སྤྲོ་ན་ཞིབ་ཏུ་བསྙད་པས་ཆོག་གོ །དེ་དག་གིས་སྤྱི་དོན་གྱི་རྣམ་པར་དབྱེ་བ་བཤད་ཟིན་ཏོ། །སྨྲས་པ། བསིལ་ལྡན་ཆུ་ལས་ལེགས་འཐོན་པདྨ་ལྟར། །དྲི་མས་བཅིངས་ཀྱང་ཉེས་པས་གོས་མིན་པའི། །རང་སེམས་འགྱུར་མེད་འདུས་མ་བྱས་པའི་ཁམས། །དཀྱིལ་འཁོར་རྒྱ་མཚོའ་སྙིང་པོ་ཉིད་དུ་གྲུབ། །དེ་ཕྱིར་པད་འབྱུང་བི་མ་རྨ་གཉགས་སོགས། །གྲུབ་བརྙེས་ཐུགས་བཅུད་སྙིང་པོ་གསང་བའི་རྒྱུད། །རང་སེམས་འགྱུར་མེད་རྟོགས་པའི་ཐབས་ཚུལ་དུ། །གསལ་ཕྱིར་ལེགས་བཤད་རྒྱ་མཚོའ་དགའ་སྟོན་སྤྲོས། །པད་རྩ་ལྟར་དཀར་རྣམ་ཀུན་ ― MLP018_Page_0081 ―
[མ་དཔེ་གཟིགས་ན་འདིར་གནོན།]
དགེ་བ་གང་། །མ་གྱུར་འགྲོ་ཀུན་མཐར་ཐུག་སྙིང་པོའི་དཔྱིད། །མི་འགྱུར་ཟག་མེད་དག་པ་གཉིས་ལྡན་དངོས། །རྒྱལ་བ་རྒྱ་མཚོའ་གོ་འཕང་ཐོབ་ཕྱིར་བསྔོ། །ཤེས་རབ་གསུམ་གྱི་ཉམས་སྟོབས་མི་ལྡན་ཞིང་། །བརྩོན་འགྲུས་འགྲོས་ཀྱི་ཟློས་གར་བྱང་མིན་པས། །མཐོང་བས་དོན་ཀུན་རྟོགས་པར་འབོད་པའི་རྟ། །ཉེས་བཤད་འཕྲང་ལས་བརྒལ་བར་མ་ནུས་དོགས། །དེ་ཕྱིར་འཕགས་མཆོག་ཐུགས་རྗེའི་སྲབ་སྐྱོགས་ཀྱིས། །གཅུན་ལས་བཟོད་པའི་ལྕག་གིས་ལེགས་བསྐུལ་ནས། །དད་བརྩོན་གོས་རྒྱན་འཆང་བའི་ཤེས་ལྡན་ཀུན། །མཁས་པའི་མདུན་སར་བཀྲི་བའི་བཀའ་དྲིན་སྩོལ། །དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་སྤྱི་དོན་གྱི་རིམ་པ་རྣམ་པར་ཕྱེ་བ་མཐོང་བས་དོན་རྟོགས་ཞེས་བྱ་བ་འདི་ནི་མཁན་ཆེན་ལོ་ཙཱ་བས་མཛད་པའི་སྙིང་འགྲེལ་གསང་བདག་དགོངས་རྒྱན་གྱི་དབུའི་སྤྱི་དོན་ཉིད་རྩ་བའི་བཤད་གཞིར་བཟུང་། དེ་ལས་འཕྲོས་པའི་བཤད་ཚོམས་ཟིན་བྲིས་སུ་བསྡུས་ཏེ་ཁྱབ་བདག་བླ་མ་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ་དང་། མཁན་ཆེན་ལོ་ཙཱ་བ་ཆེན་པོ་དྷརྨ་ཤྲཱིའི་བཀའ་དྲིན་ལ་བརྟེན་ནས་བློ་གྲོས་ཀྱི་པདྨོ་ཅུང་ཟད་བཞད་པ་སྨྱོས་བན་པདྨ་འགྱུར་མེད་རྒྱ་མཚོ་མི་ཕམ་རྣམ་རྒྱལ་རྡོ་རྗེ་དཔལ་བཟང་པོས་རང་ལོ་བཅུ་གཉིས་པའི་ཐོག་ས་བོན་ཟིན་བྲིས་ཙམ་དུ་བཀོད་པ་བློ་གྲོས་ཀྱི་ནུས་པ་ཆུང་བས་དགོས་དོན་ཆེ་བ་མ་བྱུང་བར་བརྟེན། སླར་རང་ལོ་ཉི་ཤུ་རྩ་གསུམ་པ་ཀུན་འཛིན་གྱི་ལོར་ཅུང་ཟད་རྒྱས་པར་ཕྱེ་སྟེ་དག་པར་བཀོད་པའི་དགེ་བ་འདིས་ཀྱང་འགྲོ་ཀུན་བདེ་གཤེགས་སྙིང་པོའི་རང་ཞལ་མཇལ་བའི་རྒྱུར་གྱུར་ཅིག། །། དཔལ་གསང་བདག་དགོངས་རྒྱན་གྱི་སྤྱི་དོན་ཡན་གྱི་བཤད་པའི་ཟིན་བྲིས་བླ་མའི་མན་ངག་རིན་ཆེན་ཕྲེང་བ། རབ་འབྱམས་ཨོ་རྒྱན་ཆོས་གྲགས།― MLP018_Page_0083 ―
[མ་དཔེ་གཟིགས་ན་འདིར་གནོན།]
དཔལ་གསང་བདག་དགོངས་རྒྱན་གྱི་སྤྱི་དོན་ཡན་གྱི་བཤད་པའི་ཟིན་བྲིས་བླ་མའི་མན་ངག་རིན་ཆེན་ཕྲེང་བ་ཞེས་བྱ་བ་བཞུགས་སོ། །རབ་འབྱམས་ཨོ་རྒྱན་ཆོས་གྲགས། ― MLP018_Page_0084 ―
[མ་དཔེ་གཟིགས་ན་འདིར་གནོན།]
དཔལ་གསང་བདག་དགོངས་རྒྱན་གྱི་སྤྱི་དོན་ཡན་གྱི་བཤད་པའི་ཟིན་བྲིས་བླ་མའི་མན་ངག་རིན་ཆེན་ཕྲེང་བ་ཞེས་བྱ་བ་བཞུགས་སོ། །ༀ་སྭ་སྟི། དཔལ་གསང་བདག་དགོངས་རྒྱན་གྱི་སྤྱི་དོན་ཡན་གྱི་བཤད་པའི་ཟིན་བྲིས་བླ་མའི་མན་ངག་རིན་ཆེན་ཕྲེང་བ་ཞེས་བྱ་བ། བླ་མ་དང་དཔལ་ཀུན་ཏུ་བཟང་པོ་དབྱེར་མ་མཆིས་པའི་ཞབས་ལ་གུས་པས་ཕྱག་འཚལ་ལོ། །སེམས་ཀྱི་ཆོས་ཉིད་ཡེ་ནས་རང་བཞིན་རྣམ་དག་གདོད་མའི་མགོན་པོ་གཞི་ཡི་རྒྱུད། །རྟོགས་གོམས་བྱེད་རྩོལ་དང་བཅས་རྨད་བྱུང་ཐབས་དང་གྲོལ་བ་ཤེས་ཐོབ་ལམ་གྱི་རྒྱུད། །གློ་བུར་དྲི་མ་ལས་གྲོལ་བྲལ་ཐོབ་ཡོན་ཏན་བླ་ན་མེད་གང་འབྲས་བུའི་རྒྱུད། །རྒྱུད་གསུམ་ངོ་བོ་སྲིད་ཞི་ཀུན་ཁྱབ་རང་བྱུང་ཡེ་ཤེས་ཀུན་ཏུ་བཟང་པོར་འདུད། །དགོངས་པ་བརྡ་དང་སྙན་དུ་བརྒྱུད་པ་ཡི། །བཤེས་གཉེན་རིམ་པར་བྱོན་པའི་ཚོགས་ཀུན་ལ། །མོས་དང་ལྷག་བསམ་རྣམ་པར་དག་པ་ཡི། །དད་པའི་དབྱངས་ཀྱིས་གུས་པས་འདིར་བསྟོད་དོ། །ཁྱད་པར་རྒྱལ་ཀུན་ཐུགས་རྗེའི་མཚོ་ལས་ངོ་མཚར་རྒྱལ་བའི་ཉི་མ་ནི། །ཕན་བདེའི་པདྨོ་ཀུན་དགའ་རྒྱས་བྱེད་ཕྲིན་ལས་འོད་སྟོང་འབྱུང་བའི་གནས། །སྲིད་ཞིའི་མུན་སེལ་གཏེར་ཆེན་བླ་མ་འགྱུར་མེད་རྡོ་རྗེ་ཉིན་མོར་བྱེད། །གདུལ་བྱའི་མཁའ་ལ་འཆར་ནུབ་བྲལ་ཁྱོད་མི་འབྲལ་སྤྱི་བོའི་གཙུག་ཏུ་མཆོད། །གང་གི་ཡེ་ཤེས་སྒྱུ་མའི་རྣམ་རོལ་ངག་ཚིག་ཀུན་ལ་དབང་འབྱོར་བ། །ཇི་ལྟ་ཇི་སྙེད་ཤེས་བྱའི་ཆོས་རྣམས་ཡོངས་གཟིགས་ལེགས་བཤད་སྨྲ་བའི་དཔལ། །དམ་པ་རྣམ་གཉིས་མཐོང་ཐོས་དྲན་རེག་འགྲོ་བའི་འདྲེན་པ་བླ་ན་མེད། །སྤྱི་གཙུག་འཁོར་ལོའ་རྒྱན་དུ་མི་འབྲལ་བརྩེ་བས་འགྲོ་ཀུན་བུ་བཞིན་སྐྱོངས། །ཚུལ་བཞིན་བསྙེན་ལས་དམ་ཆོས་གངྒཱའི་རྒྱུན། །བླ་མའི་ཞལ་གྱི་འབབ་སྟེགས་ལས་འོངས་པ། །རྣ་བའི་བུམ་པར་ཐིགས་པ་ཙམ་འཁྱིལ་ ― MLP018_Page_0085 ―
[མ་དཔེ་གཟིགས་ན་འདིར་གནོན།]
བ། །མྱོང་བ་འདིས་ནི་སྐལ་བ་བཟང་པོར་བྱས། །དེ་ཕྱིར་རྒྱུད་དོན་ཇི་བཞིན་རྟོགས་མིན་ཡང་། །འདི་དོན་འཆད་དང་རྩོད་དང་རྩོམ་སོགས་ལ། །དགྱེས་པའི་འཛུམ་མདངས་ལེགས་སྐྱེས་དབུགས་དབྱུང་སོགས། །བཀའ་དྲིན་དྲན་པས་མཆོད་པའི་རྫས་སུ་སྤྲོ། །འོན་ཀྱང་བླ་མའི་གསུང་བཤད་གང་། །ཇི་བཞིན་ཟིན་ཐོར་འགོད་པ་ལས། །བླུན་པོས་དོན་གཞན་ཇི་ལྟར་སྤོབས། །དེས་ན་གུས་པས་བརྗོད་པར་བྱ། །དེ་ཡང་འདི་ལྟར་གསུངས་ཏེ། ཐོག་མར་སློབ་བུའི་རྒྱུད་ཀྱི་སྡིག་སྒྲིབ་སྦྱོང་བའི་ཕྱིར་དུ། སོ་སོ་རང་རང་གི་དབུ་གཙུག་ཏུ་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ངོ་བོ་དྲིན་ཅན་རྩ་བའི་བླ་མ་ལ་རྣམ་པ་དཔལ་རྡོ་རྗེ་སེམས་དཔའི་རྣམ་པར་གསལ་བའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་བརྒྱ་པའི་སྔགས་ཕྲེང་གསལ་བཏབ་སྟེ། ཡིག་བརྒྱ་གསོལ་འདེབས་ཀྱི་ཚུལ་དུ་བཟླས་པས་ཐུགས་ཀའི་སྔགས་ཕྲེང་དང་སྐུའི་ཆ་ཐམས་ཅད་ལས་བདུད་རྩི་དཀར་པོའི་རྒྱུན་སྐྱ་ཆིལ་ཆིལ་བབས་པས་ནད་གདོན་སྡིག་སྒྲིབ་ཐམས་ཅད་སངས་ཀྱིས་དག སྐུ་གསུང་ཐུགས་ཡེ་ཤེས་རྡོ་རྗེའི་དབང་བཞི་རྫོགས་སུ་ཐོབ་པའི་ཐུགས་མོས་གནང་བར་ཞུ་གསུངས་ཏེ། ལྷན་ཅིག་ཏུ་ཡིག་བརྒྱ་ཚར་བདུན་རེ་སོང་བ་དང་། སྤྱི་བོའ་བླ་མ་རྡོ་རྗེ་སེམས་དཔའ་འོད་དུ་ཞུ་སྟེ་སོ་སོ་རང་རང་ལ་ཐིམ་པར་གྱུར་གསུངས། དེ་ནས་སློབ་མ་རིན་འབྱུང་ཡབ་ཡུམ་གྱི་ངོ་བོར་བསྐྱེད་བསྟིམ་འོད་ཞུས་ཉན་དབང་དང་། སློབ་དཔོན་རང་ཉིད་སྣང་བ་མཐའ་ཡས་ཀྱི་ངོ་བོ་བསྐྱེད་བསྟིམ་འོད་ཞུས་འཆད་པའི་དབང་བཞེས་ཏེ་སངས་རྒྱས་ཐམས་ཅད་ཀྱི་གསུང་རྡོ་རྗེའི་ངོ་བོར་བཞེངས་ནས། གང་དག་རབ་འབྱམས་ཕྱོགས་བཅུའི་འཇིག་རྟེན་ན། །བདེར་གཤེགས་སློབ་མར་གྱུར་པ་གང་སུ་དག །དེང་འདིར་སྟོན་པས་ཆོས་ཀྱི་ཆར་འབེབས་ཀྱི། །མཉན་པར་འདོད་པ་ཐམས་ཅད་འདིར་གཤེགས་ཤིག །ཅེས་གསུངས། དེ་ནས་ལས་ཀྱི་སློབ་དཔོན་གྱིས་མཎྜལ་ཕུལ་ནས། དེ་ཡང་རྣ་རྒྱུད་ལུང་གི་ཕྲེང་བ་ལས། རྒྱལ་བ་རྣམས་ནི་འཇིག་རྟེན་འབྱོན་པའི་ཚེ། །དེ་ཡིས་གསུངས་པའི་ལུང་ཆེན་རྣམས་ལ་ནི། ། ― MLP018_Page_0086 ―
[མ་དཔེ་གཟིགས་ན་འདིར་གནོན།]
ཕྱི་རོལ་རྒོལ་བ་ངན་པ་བྱུང་སྲིད་ཀྱི། །དང་པོར་སྲིད་པ་ཆོས་ཀྱི་ལོ་རྒྱུས་སྨྲོས། །ཞེས་གསུངས་པ་ལྟར། རྒྱུད་ཀྱི་རྒྱལ་པོ་ཆེན་པོ་འདི་ཉིད་ཀྱི་ལོ་རྒྱུས་ཅུང་ཟད་བརྗོད་པའི་དབང་དུ་བྱས་ན། དང་པོ་སྟོན་པས་གསུངས་ཚུལ་དང་། དེ་ལས་ཇི་ལྟར་བརྒྱུད་ཚུལ་གཉིས་ལས། དང་པོ་ནི། འདི་ལ་བཞེད་ཚུལ་མི་འདྲ་བ་འགའ་ཞིག་སྣང་སྟེ། སློབ་དཔོན་ཉི་འོད་སེང་གེས་ནི། འོག་མིན་དུ་ལོངས་སྤྱོད་རྫོགས་པའི་སྐུས་གསང་སྔགས་ཀྱི་ཆོས་གསུངས་པའི་ཚེ། དེ་དང་དུས་མཚུངས་པར་མི་ཡུལ་དུ་མཆོག་གི་སྤྲུལ་སྐུས་རྡོ་རྗེ་གདན་དུ་འཚང་རྒྱ་ཚུལ་མ་བསྟན་པའི་གོང་དུ་གསུངས་པ་ཡིན་ནོ། །ཞེས་གསུངས་ཏེ་ཉི་འོད་སེང་གེའི་རྒྱ་ཆེར་འགྲེལ་དུ་དེ་ལྟར་བཤད། ཡང་སློབ་དཔོན་སྒེག་པ་རྡོ་རྗེས་ནི། མཆོག་གི་སྤྲུལ་སྐུས་མི་ཡུལ་དུ་ཐུན་མོང་གི་ཐེག་པ་བཤད་པ་དང་དུས་མཚུངས་པར་སྟོན་པས་འོག་མིན་དུ་གསུངས་པར་བཞེད་དེ། དེས་མཛད་པའི་འགྲེལ་པ་སྤར་ཁབ་ཏུ་དེ་ལྟར་བཤད་པའིཕྱིར། དོན་ལ་དེ་གཉིས་ཀྱང་དགོངས་པའི་གནད་གཅིག་པས་འགལ་བ་མེད་ཀྱང་། སྔོན་གྱི་ཟུར་པ་རྣམས་ཀྱིས་སྤར་ཁབ་ཀྱི་ལུགས་ལྟར་མཛད་པས་འདིར་ཡང་དེ་ལྟར་བཞེད་པ་ཡིན། དོན་ལ་དེ་གཉིས་འགལ་མེད་དུ་འཆད་ཐུབ་སྟེ། གདུལ་བྱའི་མཐོང་སྣང་གི་དབང་གིས་རྒྱུད་གཞུང་གཅིག་ལ་གླེང་གཞི་བཤད་ཚུལ་ཐ་དད་པ་གཞན་ལས་ཀྱང་འབྱུང་སྟེ། འཇམ་དཔལ་སྒྱུ་དྲྭའི་བཤད་རྒྱུད་ལས། གླེང་གཞི་རྣམ་པ་གསུམ་ཡིན་ཏེ། །འོག་མིན་གནས་དང་རི་རབ་རྩེ། །འཛམ་བུའི་གླིང་འདིར་གྲགས་པ་ཡིན། །བྱང་ཆུབ་སེམས་དང་ལྷ་རྣམས་དང་། །མི་རྣམས་ཀྱི་ནི་དོན་དུ་གསུངས། །སྟོན་པ་ཡང་ནི་རྣམ་གསུམ་སྟེ། །སངས་རྒྱས་རྡོ་རྗེ་འཆང་ཆེན་དང་། །སྤྲུལ་སྐུ་འཁོར་ལོས་སྒྱུར་བ་དང་། །ཤཱཀྱ་ཐུབ་པ་ཉིད་ཀྱིས་གསུངས། །དུས་ནི་གདུལ་བྱ་འདུལ་བའི་དུས། །འཁོར་རྣམས་འདུས་པའི་དུས་དེར་གསུངས། །ཞེས་གསུངས་པའི་ཕྱིར་རོ། །གཉིས་པ་དེ་ལས་ཇི་ལྟར་བརྒྱུད་ཚུལ་ནི། བཤད་རྒྱུད་རྒྱ་མཚོ་ལས། རྒྱལ་བ་སེམས་དཔའ་རྣལ་འབྱོར་པ། །དགོངས་པ་རིག་པ་རྣ་བར་བརྒྱུད། །ཅེས་གསུངས་པས། རྒྱལ་བ་དགོངས་བརྒྱུད། རིག་འཛིན་བརྡ་བརྒྱུད། གང་ཟག་སྙན་བརྒྱུད་དང་གསུམ་ལས། དང་པོ་ ― MLP018_Page_0087 ―
[མ་དཔེ་གཟིགས་ན་འདིར་གནོན།]
ནི། རྒྱལ་བ་ཀུན་ཏུ་བཟང་པོས་འོག་མིན་བདེ་བ་ཆེན་པོའི་གནས་སུ་ཉིད་ལས་མི་གཞན་པའི་འཁོར་རྒྱལ་བ་རིགས་ལྔ་ལ་ཆོས་འོད་གསལ་གྱི་དགོངས་པ་ཟང་ཐལ་དུ་གསུངས་པ་ནི་རྒྱལ་བ་དགོངས་པས་བརྒྱུད་པ། རིག་འཛིན་བརྡས་བརྒྱུད་པ་ནི། རྒྱལ་བ་རིགས་ལྔས་རྒྱལ་སྲས་སེམས་དཔའ་སོགས་ལ་བརྗོད་མེད་རིག་པའི་གསུང་དབྱངས་ཀྱི་བརྡས་གོ་བར་མཛད་པ་ནི་རིག་འཛིན་བརྡ་བརྒྱུད། གང་ཟག་སྙན་ཁུང་དུ་བརྒྱུད་པ་ནི། རྒྱལ་སྲས་སེམས་དཔའི་འཁོར་རྣམས་ཀྱི་ནང་ནས་རིགས་གསུམ་གྱིས་གདུལ་བྱ་རང་རང་གི་སྐལ་བ་དང་མཐུན་པར་བསྟན་པ་ནི། འཇམ་དཔལ་གྱིས་ལྷའི་གནས་སུ་ལྷ་གྲགས་ལྡན་མཆོག་སྐྱོང་ལ་བཤད་དེ་ལྷའི་རིག་འཛིན་རྣམས་ལ་དར་བར་མཛད། སྤྱན་རས་གཟིགས་ཀྱིས་ཀླུའི་གནས་སུ་ཀླུ་རྒྱལ་མགྲིན་པ་ནག་པོ་ལ་བཤད་དེ་དར། ཕྱག་ན་རྡོ་རྗེས་གནོད་སྦྱིན་གྱི་གནས་སུ་གནོད་སྦྱིན་ཀུན་ཏུ་བཟང་པོ་ལ་བཤད་དེ་དར་བར་བྱས་པ་ནི་གང་ཟག་སྙན་ཁུང་དུ་བརྒྱུད་པའོ། །དེའི་དུས་སུ་སྟོན་པས་ལས་ཅན་གྱི་གདུལ་བྱ་དག་པ་ལ་གསང་སྔགས་ཀྱི་ཐེག་པ་གསུངས་ནས། ལྷ་ཀླུ་མིའི་འཇིག་རྟེན་དུ་གསང་ཐབས་ཀྱིས་སྤྱོད་པ་ལས། གསང་སྔགས་ཀྱི་སྒྲ་ཡོངས་སུ་མ་གྲགས་ཏེ་འདི་ལ་དགོངས་ནས། དགོངས་འདུས་སུ། ངེས་པའི་ཐེག་པ་ཡོངས་མ་གསུངས། ཞེས་གསུངས། དེས་ན་རེ་ཞིག་རྡོ་རྗེའི་ཐེག་པས་འདུལ་བའི་དུས་ལ་མ་བབས་པའི་ཕྱིར། རིགས་ཅན་ལྔ་དང་རྒྱལ་པོ་ཟླ་བཟང་སོགས་ལ་གསུངས་ནས། འཇིག་རྟེན་དུ་གསང་སྔགས་ཀྱི་སྒྲ་ཡོངས་སུ་མ་གྲགས་པ་ཕྱིས་འབྱུང་བར་ལུང་བསྟན་ཏེ། སྡོམ་འབྱུང་གི་རྒྱུད་ཕྱི་མ་ལས། ང་ནི་འདི་ནས་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །རྒྱལ་པོ་ཛཿཞེས་བྱ་བ་ལ། །བསོད་ནམས་ཆེན་པོའི་མཐུས་སྣང་བའི། །གསང་བའི་བདག་པོས་གནང་བར་འགྱུར། །ཞེས་གསུངས་པ་དང་མཐུན་པར་སྟོན་པ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་འདས་པ་ན། དམ་པའི་རིགས་ཅན་དྲ་མ་ལྔ་ནང་དུ་ཡང་དག་འཇོག་ལ་གནས་པ་རང་རང་གི་མངོན་པར་ཤེས་པས་མཁྱེན་ནས། རི་མ་ལ་ཡ་གནམ་ལྕགས་ཡོད་ ― MLP018_Page_0088 ―
[མ་དཔེ་གཟིགས་ན་འདིར་གནོན།]
པའི་རྩེར་རྫུ་འཕྲུལ་གྱི་བྱ་བས་འདུས་ནས་ཕྱོགས་བཅུའི་སངས་རྒྱས་ཐམས་ཅད་ཡིད་ལ་བྱས་ཏེ། ཀྱེ་མ་ཀྱེ་ཧུད་ཀྱེ་མ་ཀློང་། །སྟོན་པ་སྒྲོན་མེའི་འོད་ནུབ་ན། །འཇིག་རྟེན་མུན་པ་གང་གིས་སེལ། །ཞེས་སོགས་གདུང་ཚིག་ཉི་ཤུ་རྩ་གསུམ་བཏོན་པས། སྟོན་པ་རིགས་དྲུག་པ་ཀུན་ཏུ་བཟང་པོ་ཉིད་གསང་བའི་བདག་པོ་ཕྱག་ན་རྡོ་རྗེའི་རྣམ་པར་བསྟན་ནས། སྔར་འོག་མིན་དུ་གསུངས་པ་ཉིད་སླར་ཡང་བཟླས་ཏེ་གསུང་བར་དགོངས་ཏེ། ཇི་སྐད་དུ། སེམས་ཀྱི་དཀྱིལ་འཁོར་མེ་ལོང་བཞིན། །བསྟན་པ་དེ་ལྟར་བདག་གིས་ཀྱང་། །ཐོག་མ་ཐ་མ་མེད་པ་རུ། །བདག་གི་དམ་བཅའ་མི་འདོར་བས། །བསྐུལ་བའི་དུས་ནི་གང་བྱུང་བ། །བདག་ཀྱང་དེ་བཞིན་ཆོ་འཕྲུལ་སྣང་། །ཞེས་རྨད་དུ་བྱུང་བའི་ཆོ་འཕྲུལ་གྱིས་རི་མ་ལ་ཡའི་རྩེར་གཤེགས་ཏེ། རིགས་ཅན་དྲ་མ་ལྔ་དང་རིག་འཛིན་ཕལ་པོ་ཆེའི་འཁོར་གྱི་དབུས་སུ་གསང་བདག་ལག་ན་རྡོ་རྗེའི་སྐུའི་རྣམ་པར་བསྟན་ནས། སྔོན་འོག་མིན་དང་། དགའ་ལྡན་དང་། སུམ་ཅུ་རྩ་གསུམ་གྱི་ལྷ་གནས་རྣམས་སུ་གྲགས་པའི་གསང་བའི་ཐེག་པ་ཉིད་སྟོན་པར་མཛད་ཅིང་། དེ་རྣམས་སྲིན་པོ་བློ་གྲོས་ཐབས་ལྡན་གྱིས་གསེར་གྱི་གླེགས་བམ་ལ་བཻ་ཌཱུའི་ཞུན་མས་བྲིས་ནས་དགོངས་པའི་རྩལ་བདུན་གྱིས་ནམ་མཁའ་ལ་སྦས་སོ། །དེའི་ཚེ་དེའི་བྱིན་རླབས་ཀྱིས་ས་ཧོ་རའི་རྒྱལ་པོ་ཛཿལ་རྨི་ལྟས་ངོ་མཚར་བ་བདུན་རྨིས་ཏེ། ཇི་སྐད་དུ། སྐུ་གསུང་ཐུགས་རྟགས་ཐིམ་པ་དང་། །རིན་ཆེན་གླེགས་བམ་བབས་པ་དང་། །ཆོས་ཀྱི་བགྲོ་བ་བྱས་པ་དང་། །ཀུན་གྱིས་དམ་པར་བསྒྲགས་པ་དང་། །མཆོད་པ་ཆེན་པོ་བྱས་པ་དང་། །རིན་ཆེན་ཆར་པ་བབས་པ་དང་། །སངས་རྒྱས་ས་ལ་ལུང་བསྟན་པའོ། །ཞེས་པའི་རྨི་ལྟས་དང་མཐུན་པར་རྒྱུད་སྡེའི་གླེགས་བམ་རྣམས་མི་ཡུལ་དུ་དངོས་སུ་བབས་ཏེ། ཀྲི་ཡའི་རྒྱུད་རྣམས་ཝཱ་ར་ཎཱ་སཱི་དང་། ཨུ་པ་ཡའི་རྒྱུད་རྣམས་རི་བོ་བྱ་རྐང་ཅན་དང་བསིལ་བའི་ཚལ་དུ་བབས། ཡོ་གའི་རྒྱུད་རྣམས་དུར་ཁྲོད་མེ་རི་འབར་བའི་རྩེ་མོར་བབས། མ་ཧཱ་ཡོ་གའི་རྒྱུད་རྣམས་ཟ་ཧོར་གྱི་ཡུལ་རྒྱལ་པོ་ཛཿའི་ཁང་སྟེང་དུ་ཏནྡྲ་ཆེན་པོ་སྡེ་བཅོ་བརྒྱད་ཀྱི་ཆར་བབས། ཨ་ནུ་ཡོ་གའི་རྒྱུད་རྣམས་སིངྒ་ལའི་གླིང་དུ་གླེགས་བམ་དང་བཅས་ཏེ་བབས། ཨ་ཏི་ཡོ་ག་རྣམས་ནི་ནུབ་ཕྱོགས་ཨོ་ཌཱི་ཡ་ ― MLP018_Page_0089 ―
[མ་དཔེ་གཟིགས་ན་འདིར་གནོན།]
ནའི་ཡུལ་དུ་སློབ་དཔོན་ཆེན་པོ་དགའ་རབ་རྡོ་རྗེས་དཔལ་རྡོ་རྗེ་སེམས་དཔའ་ལས་དངོས་སུ་གསན་ནས་གླེགས་བམ་ལ་བཀོད་པར་མཛད་དོ། །དེ་ལྟར་ཏནྡྲ་ཆེན་པོ་སྡེ་བཅོ་བརྒྱད་པོ་རྒྱལ་པོ་ཛཿས་སློབ་དཔོན་ཀུ་ཀུ་རཱ་ཛ་ལ། དེས་སེང་ཧ་རཱ་ཛ་ལ། དེས་ཨུ་པ་རཱ་ཛ་ལ། དེས་སྲས་མོ་གོ་མ་དེ་ཝི་ལ། དེས་སྒེག་པ་རྡོ་རྗེ་དང་སངས་རྒྱས་གསང་བ་གཉིས་ལ། དེ་གཉིས་ཀྱིས་པཎ་ཆེན་བི་མ་ལ་མི་ཏྲ་ལ། དེས་བོད་དུ་ལོ་ཙཱ་བ་རྨ་རིན་ཆེན་མཆོག་དང་། གཉགས་ཛྙཱ་ན་ཀུ་མཱ་ར་གཉིས་ལ། རྨ་རིན་ཆེན་མཆོག་གིས་གཙུག་རུ་རིན་ཆེན་གཞོན་ནུ་དང་། གྱེ་རེ་ཕྱོགས་སྐྱོང་གཉིས་ལ། དེ་གཉིས་ཀས་དར་རྗེ་དཔལ་གྱི་གྲགས་པ་དང་ཞང་རྒྱལ་བའི་ཡོན་ཏན་གཉིས་ལ་བཤད། ཞང་གིས་གནུབས་སངས་རྒྱས་ཡེ་ཤེས་ལ་བཤད་པ་སྟེ་བཀའ་སྲོལ་གཅིག་གོ །ཡང་སློབ་དཔོན་པདྨ་དང་བི་མ་ལ་གཉིས་ཀས་གཉགས་ཛྙཱ་ན་ཀུ་མཱ་ར་ལ། དེས་སོག་པོ་དཔལ་གྱི་ཡེ་ཤེས་ལ། དེས་གནུབས་ཆེན་ལ་བཤད་པ་སྟེ་བཀའ་སྲོལ་གཅིག་གོ ། ཡང་རྨ་གཉགས་ཐུན་མོང་གི་སློབ་མ་ཁུ་བྱང་ཆུབ་འོད་ནས། མཁས་པ་གཙུག་གྱེར་རྣམ་གཉིས་ལ་བརྒྱུད་དེ་གནུབས་ལ་བཤད་པས་བཀའ་སྲོལ་གཅིག་གོ །དེ་ལྟར་ན་གནུབས་ལ་བརྒྱུད་པའི་བཀའ་སྲོལ་གྱི་ཆུ་བོ་ཐམས་ཅད་འདུས་ཤིང་། དེ་ལ་ཐུགས་ཟིན་གྱི་སྲས་བཞི། སྲས་ཀྱི་དམ་པ་གཅིག་དང་ལྔ་བྱུང་བར་གྲགས། སྲས་ཀྱི་དམ་པ་གནུབས་ཡོན་ཏན་རྒྱ་མཚོས་སྲས་ཡེ་ཤེས་རྒྱ་མཚོ་ལ། དེས་སོ་ཡེ་ཤེས་དབང་ཕྱུག་ལ། དེས་ཉང་ཤེས་རབ་མཆོག་ལ། དེས་ཉང་ཡེ་ཤེས་འབྱུང་གནས་ལ། དེས་ལྷ་རྗེ་ཟུར་པོ་ཆེ་ཤཱཀྱ་འབྱུང་གནས་ལ། དེ་ལ་སློབ་མ་རྩེ་མོ་བཞི་དང་། རྩེ་ལྐོག་ལྔ། སྒོམ་ཆེན་བརྒྱ་རྩ་བརྒྱད་ལ་སོགས་པ་བྱུང་། ཟུར་ཤཱཀྱ་འབྱུང་གནས་ཀྱིས་ཟུར་ཆུང་ཤེས་རབ་གྲགས་པ་ལ། དེ་ལ་སློབ་མ་ཀ་བ་བཞི། གདུང་མ་བརྒྱད། ཕྱམ་བཅུ་དྲུག དྲལ་མ་སུམ་ཅུ་སོ་གཉིས། ཡུས་པོ་ཆེ་མི་གཉིས་ལ་སོགས་པ་མང་དུ་བྱུང་། ལྷ་རྗེ་ཟུར་ཆུང་གིས་རང་གི་སྲས་གསང་བདག་སྒྲོ་ཕུག་པ་ཆེན་པོ་ཤཱཀྱ་སེང་གེ་ལ། དེ་ལ་གདུགས་ཐོགས་ཀྱི་སློབ་མ་གྲྭ་ས་འཛིན་པ་སྟོང་དང་། དེའི་ནང་ནས་ཀྱང་ཐུགས་ཟིན་གྱི་སློབ་མ་བཞི་གསུམ་བཅུ་གཉིས་ལ་སོགས་པ་བྱུང་བར་གྲགས། དེ་ནས་ཟུར་གྱི་རིགས་ལས་རིམ་ ― MLP018_Page_0090 ―
[མ་དཔེ་གཟིགས་ན་འདིར་གནོན།]
པར་བརྒྱུད་པའི་མཐར། ཟུར་ཆེན་བཀྲ་ཤིས་ཀུན་དགས་གཉོས་སྟོན་གསང་བདག་ཕྲིན་ལས་ལྷུན་གྲུབ་ལ་བསྩལ། དེས་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ་ལ། དེས་མཁན་ཆེན་དྷརྨཱ་ཤྲཱི་ལ་བརྒྱུད་པ་སྟེ། དེ་ལྟར་གོང་འོག་གི་བབས་སོ་དེ་དག་གི་ནང་ནས་མ་ཧཱ་ཡོ་གའི་ཐེག་པ་ལ་ཏནྟྲ་ཆེན་པོ་སྡེ་བཅོ་བརྒྱད་དུ་ཡོད་པ་ལས། དེའི་གྲངས་ལ་བཞེད་པ་མི་མཐུན་པ་མང་ཡང་། གཏེར་ཆེན་བླ་མའི་དགོངས་པ་ལ་སྐུ་གསུང་ཐུགས་ཡོན་ཏན་ཕྲིན་ལས་ལྔའི་གཞི་དང་རྩ་བར་གྱུར་པའི་རྒྱུད་སྡེ་ཆེན་པོ་ལྔ། སྒྲུབ་པ་ལག་ལེན་དུ་སྟོན་པ་རོལ་པའི་རྒྱུད་སྡེ་ལྔ། སྤྱོད་པའི་ཡན་ལག་ཏུ་འགྲོ་བའི་རྒྱུད་སྡེ་ལྔ། མ་ཚང་བ་ཁ་སྐོང་བར་བྱེད་པའི་རྒྱུད་ཕྱི་མ་ལྟ་བུ་གཉིས། དེ་ཐམས་ཅད་ཀྱི་བསྡུས་དོན་ལྟ་བུའི་རྒྱུད་སྡེ་ཆེན་པོ་གཅིག་དང་བཅོ་བརྒྱད་དོ། །ཐམས་ཅད་ཀྱི་བསྡུས་དོན་ལྟ་བུའི་རྒྱུད་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་རྒྱལ་པོ་ཆེན་པོ་འདི་ཉིད་ཡིན་ལ། དེ་ནི་བཤད་བྱའི་ཆོས་ངོས་བཟུང་བ་དེ་ཡིན། དེ་གང་གིས་འཆད་ན་ཞེས་པ་ནི་འཆད་བྱེད་ཀྱི་ཆོས་ཏེ། དེ་ནི་བཤད་པའི་རྒྱུད་རྣམས་དང་། བླ་མ་དམ་པ་རྣམས་ཀྱིས་དོན་ལ་རྟོན་པའི་དགོངས་འགྲེལ་མཛད་པ་དེ་དག་ལ་བརྟེན་ནས་སོ། །ཞེས་པའི་བཤད་རྒྱུ ད་རྣམས་དང་ཞེས་པ་ནི། འདི་དག་ལ་སྔ་རབས་པ་དག་གི་དགོངས་པ་མི་མཐུན་པ་མང་ཡང་། ཟུར་ལུགས་ལ་སྒྱུ་འཕྲུལ་སྡེ་བརྒྱད། བཤད་རྒྱུད་སྡེ་བཞི་ཞེས་བཤད་པས་སྡེ་བརྒྱད་ནི། འཁོར་འདས་ཀྱི་ཆོས་ཐམས་ཅད་རང་སྣང་དབྱེར་མེད་དུ་སྟོན་པ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ། ལས་ཚོགས་རྒྱས་པར་སྟོན་པ་རྣམ་པར་སྣང་མཛད་སྒྱུ་འཕྲུལ་དྲྭ་བ། སྡེ་སྣོད་ཡོངས་ལ་ཁྱབ་པར་སྟོན་པ་འཇམ་དཔལ་སྒྱུ་འཕྲུལ་དྲྭ་བ། དཀྱིལ་འཁོར་རྒྱས་པར་སྟོན་པ་སྒྱུ་འཕྲུལ་བརྒྱད་པ། ཕྲིན་ལས་རྫོགས་པར་སྟོན་པ་བཞི་བཅུ་པ། དབང་གཙོ་བོར་སྟོན་པ་བླ་མ། ཡོན་ཏན་མཐར་ཕྱིན་པར་སྟོན་པ་བརྒྱད་ཅུ་པ། དམ་ཚིག་མཆོག་ཏུ་སྟོན་པ་ལེ་ལག་དང་བརྒྱད་དོ། །སྐབས་དོན་འཆད་བྱེད་ཀྱི་ཆོས་ནི་བཤད་རྒྱུད་སྡེ་བཞི་སྟེ། རྒྱུད་འདིའི་བཤད་བྱའི་གཙོ་ ― MLP018_Page_0091 ―
[མ་དཔེ་གཟིགས་ན་འདིར་གནོན།]
བོ་ལ། ལམ་ཐབས་གྲོལ་གཉིས་ལས། གྲོལ་ལམ་རིམ་ཅིག་ཅར་དུ་སྟོན་པ་སྒྱུ་འཕྲུལ་ཡེ་ཤེས་སྙིང་པོ་དང་། སྒྱུ་འཕྲུལ་རྡོ་རྗེ་མེ་ལོང་། ཐབས་ལམ་རིམ་ཅིག་ཅར་དུ་སྟོན་པ་སྒྱུ་འཕྲུལ་རྒྱ་མཚོ་དང་། སྒྱུ་འཕྲུལ་ཐལ་རྒྱུད་དེ། བཤད་རྒྱུད་སྡེ་བཞིའི་ལུང་ཚད་མ་དང་། བླ་མ་དམ་པ་རྣམས་ཀྱིས་དོན་ལ་རྟོན་པའི་དགོངས་འགྲེལ་ཞེས་པས་རྒྱུད་སྡེ་དེ་དག་གི་དགོངས་འགྲེལ་གྱི་མན་ངག་སྟེ་རྒྱ་བོད་ཀྱི་མཁས་གྲུབ་རྣམས་ཀྱིས་མཛད་པའི་མན་ངག་ཚད་མ་དང་། དེ་གཉིས་དང་རྗེས་སུ་མཐུན་པའི་རིགས་པ་ཚད་མ་གསུམ་གྱིས་གཏན་ལ་ཕབ་པས་རྒྱུད་དོན་ཕྱིན་ཅི་མ་ལོག་པར་རྟོགས་པར་འགྱུར་ཏེ། རྡོ་རྗེ་མེ་ལོང་ལས། ལུང་དང་རིགས་པ་མན་ངག་གི །ཚད་མ་དག་གིས་གང་གཞལ་བས། །ཤེས་བྱ་ཁོང་དུ་ཆུད་པར་འགྱུར། །ཞེས་དང་། བི་མ་ལའི་འགྲེལ་ཆུང་ལས་ཀྱང་། ཐུགས་ཀྱི་སྒྲོན་མ་གསང་བའི་འགྲེལ་པ་འདི། །ལུང་དང་མན་ངག་རིགས་པས་གཏན་ལ་དབབ། །ཅེས་སོ། །རྒྱུད་ལུང་མན་ངག་གི་མཚན་ཉིད་དེ་ཡང་གང་ཞེ་ན། རྒྱུད་ཀྱི་མཚན་ཉིད་ནི། འབྲེལ་ཞིང་རྒྱུན་ཆགས་ལ་དངོས་གྲུབ་སྒྲུབ་པའི་ཡན་ལག་མ་ཚང་བ་མེད་ཅིང་ཕུན་སུམ་ཚོགས་པ་ལྔ་དང་ལྡན་པ་སྟེ། རྡོ་རྗེ་རྩེ་མོ་ལས། འབྲེལ་དང་མ་ཚང་མེད་ཕྱིར་དང་། ཕུན་སུམ་ཚོགས་པས་རྒྱུད་ཅེས་བྱ། །ཞེས་སོ། །ལུང་གི་མཚན་ཉིད་ནི། མདོ་རྒྱུད་ནས་ཚིག་དུམ་བུར་ཕྱུང་ཞིང་ཡིད་ཆེས་སུ་བྱེད་པ་སྟེ། མདོ་ལས། ལུང་ནི་ཡིད་ཆེས་ཚིག་ཡིན་ཏེ། །ཉེས་པ་ཟད་པ་རྫུན་གྱི་ངག །སྨྲ་བར་མི་འགྱུར་རྒྱུ་མེད་ཕྱིར། །ཉེས་ཟད་ལུང་དུ་ཤེས་པར་བྱ། །ཞེས་སོ། །མན་ངག་གི་མཚན་ཉིད་ནི། ཚེགས་ཆུང་ངུས་དཔག་པར་དཀའ་བའི་དོན་དཔག་ཏུ་མེད་པ་རྟོགས་སླ་བའི་ཐབས་སུ་གྱུར་པ་སྟེ། རྒྱུད་ལས། ཐབས་ཆེ་ཚེགས་ཆུང་དོན་དཔག་མེད། །བྱ་སླ་དཔག་དཀའ་མན་ངག་གོ །ཞེས་སོ། །ཇི་ལྟར་འཆད་པའི་ཚུལ་ནི། ཞེས་པ་ལ་འཆད་ཚུལ་མང་དུ་ཡོད་དེ། མ་ཧཱ་ཡོ་ག་སྤྱིའི་འཆད་ཚུལ། བོད་སྔ་རབས་པའི་འཆད་ཚུལ། ཟུར་ལུགས་ཀྱི་འཆད་ཚུལ་སོགས་ཡོད་པ་ལས། དང་པོ་ནི་ཧེ་རུ་ཀ་གལྤོའི་རྒྱུད་ལས། མ་ཧཱ་ཡོ་གའི་རྒྱན་བདུན་ཡང་། །གླེང་བསླང་བ་དང་སངས་རྒྱས་ཚུལ། །རྒྱས་བཤད་མཐའ་དང་བཤད་པའི་ཚུལ། །དབྱེ་བའི་རྣམ་པ་གང་ཟག་ ― MLP018_Page_0092 ―
[མ་དཔེ་གཟིགས་ན་འདིར་གནོན།]
སྣོད། །བདེན་པའི་དགོངས་པ་ཤེས་པར་བྱ། །ཞེས་གསུངས་པ་ལྟར་རྒྱན་བདུན་གྱི་སྒོ་ནས་འཆད་དེ། རྒྱན་དང་པོ་ནི། དྲི་བ་དྲིས་ལན་གྱི་སྒོ་ནས་འཆད་པ་སྟེ། གལྤོ་ལས། རྒྱུད་འདིའི་མིང་ནི་ཅི་ཞིག་ཡིན། །རྒྱུད་འདི་སུ་ཡི་དོན་དུ་མཛད། །ཅེས་སོགས་གསུངས་པ་ལྟར་ཡིན། རྒྱན་གཉིས་པ་ནི། གལྤོ་ལས། སངས་རྒྱས་པ་ཡི་ཚུལ་བཞི་སྟེ། །རྒྱུད་དང་གླེང་གཞི་ངེས་ཚིག་རྒྱུ། །ཞེས་གསུངས་པ་ལྟར་ཚུལ་བཞིའི་སྒོ་ནས་འཆད་དེ། བཅོམ་ལྡན་འདས་ཐུབ་པའི་དབང་པོས་ནི་ཚུལ་བཞིའི་སྒོ་ནས་སངས་རྒྱས་པར་འཇིག་རྟེན་དུ་གྲགས་ཏེ། མིའི་རིགས་རྒྱུད་དུ་འཁྲུངས་པས་རྒྱུད་ཀྱི་ཚུལ་དང་། དེ་ལས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་གླེང་གཞིའི་ཚུལ་དང་། རབ་ཏུ་བྱུང་ནས་ཀྱང་འདུལ་སྡོམ་བསྲུང་བར་ངེས་པས་ངེས་ཚིག་གི་ཚུལ་དང་། དེ་ལྟར་བསྲུང་ནས་ལམ་ལ་བསླབ་པས་རྣམ་གྲོལ་ཐོབ་པའི་རྒྱུ་ཡིན་པའི་ཕྱིར་རྒྱུ་ཡི་ཚུལ་ཏེ། ཚུལ་བཞིའི་སྒོ་ནས་འཆད་པར་བཞེད་པའོ། །རྒྱན་གསུམ་པ་ནི། གལྤོ་ལས། རྒྱས་བཤད་མཐའ་ནི་རྣམ་པ་དྲུག །དྲང་དོན་ངེས་དོན་དགོངས་པས་བཤད། །དགོངས་མིན་སྒྲ་ནི་ཇི་བཞིན་པ། །ཇི་བཞིན་མ་ཡིན་ཉིད་དུ་བཤད། །ཅེས་གསུངས་པ་ལྟར་དྲང་ངེས་གཉིས། དགོངས་དགོངས་མིན་གཉིས། སྒྲ་ཇི་བཞིན་པ་དང་ཇི་བཞིན་མ་ཡིན་པ་གཉིས་ཏེ་ཚིག་དོན་འདི་དྲུག་ལས་མི་འདའ་བས་ན་མཐའ་དྲུག་ཅེས་བཤད་པའི་ཕྱིར་གསུངས། རྒྱན་བཞི་པ་ནི། གལྤོ་ལས། ཚིག་སྤྱི་སྦས་དང་མཐར་ཐུག་ཡིན། ཞེས་གསུངས་པ་ལྟར་བཞི་ལས། ཚིག་གི་དོན་ནི། ཡི་གེའི་འབྲུ་བསྣོལ་མཚམས་ལ་གཞོལ་བའི་བཤད་པ་སྒྲ་ཚད་ཀྱི་གཞུང་དང་མཐུན་པར་འཆད་པའོ། །སྤྱིའི་དོན་ནི། སྔགས་ལམ་བདེ་ཞིང་མྱུར་བ་ལ་མི་ཞུགས་པར། མདོ་ལམ་བུལ་ཞིང་དཀའ་ཐུབ་ཀྱི་ལམ་ལ་ཞུགས་པར་འགྱོད་ན། དེ་དག་ཀྱང་འདིའི་ལམ་སྟེགས་ཡིན་ཚུལ་དུ་འཆད་པའོ། །ཡང་སྔགས་ལམ་གཙང་དམེ་མེད་པ་ཁྱི་ཕག་ལྟ་བུ་དང་སྦྱོར་སྒྲོལ་སོགས་འཚེ་བ་ཆོས་སུ་སྨྲ་བས་མུ་སྟེགས་ཀྱི་ཆོས་སོ་སྙམ་དུ་འགྱོད་ན། མདོ་ལམ་དུའང་གཙང་དམེར་ཞེན་འཛིན་མ་སྤངས་ན་མཉམ་ཉིད་ཀྱི་དོན་མི་མཐོང་བ་དང་། དགེ་སེམས་ཀྱི་སྤྱོད་པར་འཛིན་པ་མ་ཞུགས་ན་གང་ཡང་བསོད་ནམས་ཀྱི་ཚོགས་སུ་གསུངས་ཏེ། མི་ནག་མདུང་ཐུང་ཅན་ ― MLP018_Page_0093 ―
[མ་དཔེ་གཟིགས་ན་འདིར་གནོན།]
བསད་པ་དང་། དེད་དཔོན་གྱི་བུ་མོར་བསྒྲོད་པ་སོགས་བསོད་ནམས་འཕེལ་བའི་རྒྱུར་སོང་ཚུལ་དུ་འཆད་པའོ། །སྦས་དོན་ནི། བསྐྱེད་རིམ་ལས་རྒྱ་སོགས་དང་། རྫོགས་རིམ་རྩ་རླུང་ཐིག་ལེའི་བྱེད་བཅིངས་སོགས་སྦས་དོན་དུ་འཆད་པའོ། །མཐར་ཐུག་གི་དོན་ནི། དོན་དམ་འོད་གསལ་གྱི་དགོངས་པ་དང་། བདེན་གཉིས་ཟུང་འཇུག་གི་གནས་ལུགས་མཐར་ཐུག་ཡིན་ཚུལ་དུ་འཆད་པའོ། །རྒྱན་ལྔ་པ་ནི། གལྤོ་ལས། ཉན་བཤད་དབྱེ་བ་རྣམ་པ་གཉིས། །ཚོགས་དང་སློབ་མ་དག་ཏུ་འདོད། །ཅེས་གསུངས་པ་ལྟར། ཚོགས་བཤད་ནི། སྒྲ་ཇི་བཞིན་པ་དང་། ཐེག་པ་ཐུན་མོང་གི་དོན་འཆད་པའོ། །སློབ་བཤད་ནི། སྒྲ་ཇི་བཞིན་མ་ཡིན་པ་དང་། ངེས་དོན་མཐར་ཐུག་གི་དོན་འཆད་པར་བྱེད་པའོ། །རྒྱན་དྲུག་པ་ནི། གལྤོ་ལས། སྣོད་ཀྱི་གང་ཟག་རྣམ་པ་ལྔ། །ཨུཏྤལ་པདྨ་དཀར་དམར་དང་། །ཙནྡན་རིན་པོ་ཆེ་ཡི་དཔེ། །ཞེས་གསུངས་པ་ལྟར། ཨུཏྤལ་ལྟ་བུའི་གང་ཟག་དང་། པདྨ་དཀར་དམར་ལྟ་བུ་དང་། ཙནྡན་ལྟ་བུ་དང་། རིན་པོ་ཆེ་ལྟ་བུའི་གང་ཟག་ལྔའི་སྣོད་ལ་བརྟགས་ནས་འཆད་པར་བྱེད་པའོ། །རྒྱན་བདུན་པ་ནི། གལྤོ་ལས། བདེན་པའི་དགོངས་པ་རྣམ་པ་གཉིས། །ཀུན་རྫོབ་དོན་དམ་བཤད་པར་གྱིས། །ཞེས་གསུངས་པ་ལྟར་སྔ་མ་དྲུག་ལ་བརྟེན་ནས་རྒྱུད་དོན་བདེན་པ་གཉིས་སུ་བསྡུས་ཏེ་འཆད་པར་བྱེད་པའོ། །དེ་ལྟར་རྒྱན་བདུན་གྱི་འཆད་ཚུལ་འདི་ནི་རྒྱུད་འདིའི་འཆད་ཐབས་ཀྱི་བཀའ་སྲོལ་མ་ཡིན་ཡང་མ་ཧཱ་ཡོ་ག་སྤྱིའི་འཆད་ཐབས་ཡིན་གསུངས། གཉིས་པ་སྔ་རབས་པ་རྣམས་ཀྱིས་འཆད་ཚུལ་ནི། མདའ་ལྟར་རྩེ་མོ་ནས་བཟུང་སྟེ་འཆད་པ་ཞེས་བྱ་བ། མཚན་གྱི་ནང་དུ་ཆོས་ཐམས་ཅད་གཞི་ལམ་འབྲས་གསུམ་དུ་བསྡུས་ནས་འཆད་པ་དང་། མདུང་ལྟར་སྐེད་པ་ནས་བཟུང་སྟེ་འཆད་པ་ཞེས་བྱ་བ། ལེའུ་ལྔ་པའི་ནང་དུ་ཆོས་ཐམས་ཅད་མཚན་ཉིད་གསུམ་དུ་དྲིལ་ནས་འཆད་པ་དང་། རལ་གྲི་ལྟར་ཡུབ་ནས་བཟུང་སྟེ་འཆད་པ་ཞེས་བྱ་བ། ལེའུ་ཐ་མར་ཆོས་ཐམས་ཅད་སྣང་བ་བཞིར་བསྡུས་ནས་འཆད་པ་ཡིན་གསུངས། གསུམ་པ་བཀའ་སྡེ་ཟུར་པའི་བཤད་སྲོལ་ནི། ཆོས་ལྔའི་སྒོ་ནས་འཆད་དེ། རང་བཞིན་དངོས་པོའི་གནས་ཚུལ། མ་རྟོགས་འཁྲུལ་པའི་སྣང་ཚུལ། ཐམས་ཅད་མཁྱེན་པས་གཟིགས་ཚུལ། ― MLP018_Page_0094 ―
[མ་དཔེ་གཟིགས་ན་འདིར་གནོན།]
བརྩེ་བའི་ཐུགས་རྗེ་སྐྱེ་ཚུལ། འགྲོ་དོན་ཇི་ལྟར་མཛད་ཚུལ་དང་ལྔའི་སྒོ་ནས་འཆད་གསུངས། འདིར་ནི་སློབ་དཔོན་བི་མ་ལའི་རྗེས་སུ་འབྲངས་ནས་འཆད་དེ། བི་མའི་ཁོག་གཞུང་གསལ་སྒྲོན་དུ། རབ་ལ་མཚན་བསྟན་འབྲིང་ལ་དབྱེ། །ཐ་མར་འབྲུ་གཉེར་དགྲོལ་བའོ། །ཞེས་གསུངས་པ་ལྟར། རབ་ལ་མཚན་བསྟན་ཞེས་པ་དབང་པོ་ཡང་རབ་ལ་རྒྱུད་ཀྱི་མཚན་བསྟན་ཏེ་བཤད་པའི་དོན་ཡིན། འབྲིང་ལ་དབྱེ་ཞེས་པ་དབང་པོ་འབྲིང་ལ་རྒྱུད་ཀྱི་སྤྱི་དོན་རྣམ་པར་དབྱེ་ནས་བཤད་པའི་དོན་ཡིན། ཐ་མར་འབྲུ་གཉེར་དགྲོལ་བའོ། །ཞེས་པ་དབང་པོ་ཐ་མ་ལ་ཚིག་འབྲུ་རེ་རེའི་སྒོ་ནས་དགྲོལ་ཏེ་བཤད་པའི་དོན་ཡིན་གསུངས། དང་པོ་དབང་པོ་ཡང་རབ་རྣམས་ལ་རྒྱུད་ཀྱི་མཚན་བསྟན་པ་ནི། ཁོག་གཞུང་ལས། རབ་མཚན་ཐ་སྙད་གསུམ་དུ་གྲགས། །སྒྱུ་འཕྲུལ་སྙིང་པོ་ལུང་གི་སྤྱི། །ལག་གི་རྩ་བཞིན་དབུ་ཞབས་རྟོགས། །སྐལ་བ་ཅན་གྱི་ཆེད་ཕྱིར་རོ། །ཞེས་པས་བསྟན། དེ་ལ་རབ་མཚན་ཐ་སྙད་གསུམ་དུ་གྲགས། ཞེས་པ་ནི་དབང་པོ་ཡང་རབ་ལ་བསྟན་པའི་མཚན་དེ་ལ་རྣམ་པ་གསུམ་དུ་ཡོད་ཅེས་པའི་དོན་ཡིན། གསུམ་པོ་གང་ཞེ་ན། སྒྱུ་འཕྲུལ་སྙིང་པོ་ལུང་གི་སྤྱི། ཞེས་པས་བསྟན། སྒྱུ་འཕྲུལ་ཞེས་པས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞེས་པ་རྒྱུད་དང་མཐུན་པའི་མཚན། སྙིང་པོ་ཞེས་པས་གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་པ་མན་ངག་དང་མཐུན་པའི་མཚན། ལུང་གི་སྤྱི་ཞེས་པས་མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི་ཞེས་པ་ལུང་དང་མཐུན་པའི་མཚན་ནོ། །ལག་གི་རྩ་བཞིན་དབུ་ཞབས་རྟོགས། །ཞེས་པས་དབང་རབ་ཀྱིས་མཚན་ཐ་སྙད་གསུམ་པོ་དེ་ལ་བརྟེན་ནས་རྒྱུད་དོན་རྟོགས་ཚུལ་བསྟན་ཏེ། ལག་གི་རྩ་བཞིན་ཞེས་པས་དཔེ་བསྟན། དབུ་ཞབས་རྟོགས་ཞེས་པས་དཔེ་ཅན་བསྟན་ཏེ། དཔེར་ན་སྨན་པ་མཁས་པས་ནད་པའི་ལག་གི་རྩ་ལ་བརྟེན་ནས་ལུས་མགོ་མཇུག་གི་ནད་ཐམས་ཅད་ངོས་ཟིན་པ་བཞིན་དུ། དབང་རབ་དེས་ཀྱང་རྒྱུད་ལུང་མན་ངག་གི་མཚན་གསུམ་ལ་བརྟེན་ནས། རྒྱུད་དབུ་ཞབས་ཀྱི་དོན་ཐམས་ཅད་བདེ་བླག་ཏུ་རྟོགས་པར་འགྱུར་བས་དབུ་ཞབས་རྟོགས་ཞེས་བཤད་པ་ཡིན་གསུངས། སྐལ་བ་ཅན་གྱི་ཆེད་ཕྱིར་རོ། །ཞེས་པ་ནི། དེ་ནི་སྐལ་ ― MLP018_Page_0095 ―
[མ་དཔེ་གཟིགས་ན་འདིར་གནོན།]
ལྡན་དབང་རབ་ཀྱི་སྤྱོད་ཡུལ་ཡིན་ལ་སྐལ་མེད་རྣམས་ཀྱི་སྤྱོད་ཡུལ་མ་ཡིན་ཞེས་པའི་དོན་ཡིན། དེ་ལྟར་རྒྱུད་དང་དཀྱིལ་འཁོར་གྱི་གཙོ་བོ་དང་འཆད་པའི་སྐྱེས་བུ་གསུམ་གྱི་མཚན་ཐུན་མོང་དུ་བསྟན་པ་ལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་སྟེ། ཞེས་པ་ལ་མཚན་གྱི་ཟུར་གཉིས་ཏེ། རྡོ་རྗེ་སེམས་དཔའ་བཤད་པ་དང་། སྒྱུ་འཕྲུལ་དྲྭ་བ་བཤད་པའོ། །དང་པོ་རྡོ་རྗེ་སེམས་དཔའ་ལའང་ཟུར་གཉིས་ཏེ། རྡོ་རྗེ་བཤད་པ་དང་། སེམས་དཔའ་བཤད་པ་གཉིས། དང་པོ་རྡོ་རྗེ་ཞེས་པའི་དོན་ནི། བཤད་རྒྱུད་མེ་ལོང་ལས། ཐ་དད་མེད་པའི་རང་བཞིན་ཉིད། །རྡོ་རྗེ་ཞེས་ནི་བཤད་པ་ཡིན། །ཞེས་པས་བསྟན། དེའི་དོན་ནི། རྡོ་རྗེ་ནི་རང་བཞིན་དབྱེར་མི་ཕྱེད་པས་ཤེས་རབ་སྟོང་པ་ཉིད་དང་ཞེས་པས། རྡོ་རྗེ་དེ་རང་བཞིན་གང་དང་དབྱེར་མི་ཕྱེད་ཅེ་ན། ཆོས་ཐམས་ཅད་ཀྱི་རང་བཞིན་སྟོང་པ་ཉིད་དང་དབྱེར་མི་ཕྱེད་པ་ཡིན་ལ་སྟོང་པ་ཉིད་ལ་རྡོ་རྗེ་ཞེས་བྱ་སྟེ། མཉམ་སྦྱོར་ལས། རྡོ་རྗེ་སྟོང་པ་ཉིད་དུ་བཤད། །སེམས་དཔའ་ཡེ་ཤེས་ཆེན་པོ་སྟེ། །ཞེས་གསུངས། དེ་ལ་ཐ་དད་མེད་པའི་རང་བཞིན་ཞེས་བྱ་སྟེ། སྟོང་ཉིད་དེ་གང་དང་ཐ་དད་མེད་ཅེ་ན། འཁོར་འདས་གཉིས་སྣང་ཚུལ་ལ་ཐ་དད་ཀྱང་རང་བཞིན་ནམ་གནས་ལུགས་ལ་སྟོང་ཉིད་ལས་ནམ་ཡང་གཡོས་པ་མེད་པས་ན། ཐ་དད་མེད་པའི་རང་བཞིན་ཉིད། །རྡོ་རྗེ་ཞེས་ནི་བཤད་པ་ཡིན། ཞེས་བཤད་པ་ཡིན། རང་བཞིན་གྱི་དོན་ཡང་གཞན་གྱིས་མ་བཅོས་པའི་དོན་ཏེ། རྩ་ཤེས་ལས། རང་བཞིན་དག་ནི་བཅོས་མིན་དང་། །གཞན་ལ་ལྟོས་པ་མེད་པའོ། །ཞེས་གསུངས། མདོར་ཧྲིལ་གྱིས་དྲིལ་ན། ཆོས་ཐམས་ཅད་སེམས་སུ་འདུལ། སེམས་ཉིད་སྟོང་པ་ཉིད་དུ་གནས་པ་དེ་ལ་རྡོ་རྗེ་ཞེས་བཤད་དེ། མཉམ་སྦྱོར་ལས། སེམས་ཅན་ཀུན་གྱི་སེམས་གང་ཞིག །རྡོ་རྗེ་ཞེས་ནི་བཤད་པ་ཡིན། །ཞེས་དང་། སེམས་ལས་མ་གཏོགས་ཆོས་མེད་དེ། །སྒྱུ་མ་རྡོ་རྗེ་བཙན་པོ་མཆོག །ཅེས་དང་། སྒྱུ་འཕྲུལ་རྒྱས་པ་ལས། ཐམས་ཅད་རང་རིག་བྱང་ཆུབ་སེམས། །དེ་ནི་ལུང་གི་ཚད་མར་བཤད། །ཅེས་དང་། བརྟག་གཉིས་ལས་ཀྱང་། རིན་ཆེན་སེམས་ལས་ཕྱིར་གྱུར་པའི། ། ― MLP018_Page_0096 ―
[མ་དཔེ་གཟིགས་ན་འདིར་གནོན།]
སངས་རྒྱས་མེད་ཅིང་སེམས་ཅན་མེད། །ཅེས་དང་། ས་ར་ཧས་ཀྱང་། སེམས་ཉིད་གཅིག་པོ་ཀུན་གྱི་ས་བོན་ཏེ། །གང་ལ་སྲིད་དང་མྱ་ངན་འདས་འཕྲོ་བ། །ཞེས་སོགས་རྒྱ་ཆེར་གསུངས་སོ། །དེས་ན་སེམས་ཉིད་སྟོང་པ་ཉིད་ལ་རྡོ་རྗེ་ཞེས་བརྗོད་པ་ནི། འཇིག་རྟེན་ན་རྫས་རྡོ་རྗེ་ཕ་ལམ་ཞེས་པའི་དངོས་པོ་ཞིག་ཡོད་པ་དེས་ཕར་མཚན་མའི་ཆོས་ཐམས་ཅད་འཇོམས་ལ། ཚུར་དེའི་ངོ་བོ་ལ་གང་གིས་ཀྱང་མི་ཚུགས་པ་བཞིན་ཏེ། རྡོ་རྗེའི་ཡོན་ཏན་འཆད་པའི་ཚེ། རྡོ་རྗེ་ནི་མི་ཆོད་པ། མི་ཤིགས་པ། བདེན་པ། སྲ་བ། བརྟན་པ། ཐམས་ཅད་དུ་ཐོགས་པ་མེད་པ། ཐམས་ཅད་དུ་མ་ཕམ་པ་ཞེས་ཆོས་བདུན་ལྡན་དུ་གསུངས་སོ། །མཚན་གྱི་ཟུར་གཉིས་པ་སེམས་དཔའ་ཞེས་པ་ནི། ཆོས་རྣམས་མ་ལུས་གཉིས་མེད་པའི། །རང་རིག་བྱང་ཆུབ་སེམས་ཉིད་དོ། །ཞེས་པས་བསྟན། དེ་ཡང་སེམས་དཔའ་ཞེས་པས་ས་ཏྭའི་སྒྲ་ལས་དོན་དྲུག་ཙམ་ལ་འཇུག་སྟེ། སེམས་ཅན་དང་། དཔའ་བ་དང་། སྙིང་སྟོབས་ཆེ་བ་དང་། བརྟན་པ་དང་། བསྡུས་པ་དང་། རྟོགས་པ་རྣམས་ལ་འཇུག་པ་ལས། འདིར་བརྟན་བསྡུས་རྟོགས་གསུམ་ལ་འཇུག་པའི་སྐབས་ཡིན་པས། གོང་དུ་བཤད་པའི་ཤེས་རབ་སྟོང་པ་ཉིད་དེའི་སྣང་བ་ཐབས་རིག་པ་རང་བྱུང་གི་ཡེ་ཤེས་ཡིན་ལ། ཐབས་རིག་པ་རང་བྱུང་གི་ཡེ་ཤེས་དེ་ཤེས་རབ་སྟོང་པ་ཉིད་དང་རོ་གཅིག་པའི་ཟུང་འཇུག་རང་བཞིན་གྱིས་རྣམ་པར་དག་པ་དེ་རྡོ་རྗེ་ལྟར་བརྟན་པས་སོ་ཞེས་བཤད། དེས་ན་སེམས་ཉིད་སྣང་སྟོང་གཉིས་སུ་མེད་པའི་རང་བྱུང་གི་ཡེ་ཤེས་དེ་སེམས་ཅན་ནས་སངས་རྒྱས་ཀྱི་བར་དུ་རང་བཞིན་བཟང་ངན་མེད་པ་མི་འགྱུར་བར་གནས་པ་སྟེ། སེམས་ཉིད་མི་འགྱུར་བའི་ངོས་ནས་བརྟན་པའི་རྡོ་རྗེ་སེམས་དཔའ་ཞེས་བཤད་དེ། མགོན་པོ་བྱམས་པས། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་གསུངས། དེ་ཉིད་ཀྱི་ཕྱག་རྒྱས་འཁོར་འདས་ཀྱི་ཆོས་ཐམས་ཅད་ལ་བཏབ་པས་མཉམ་པ་ཉིད་དུ་བསྡུས་པ་ཞེས་པ་ནི། སེམས་ཉིད་སྣང་སྟོང་གཉིས་སུ་མེད་པའི་ཆོས་དེས་འཁོར་འདས་ཀྱི་ཆོས་ཐམས་ཅད་ལ་ཏིལ་ལ་མར་བཞིན་དུ་ཁྱབ་ནས་གནས་པ་སྟེ། མདོ་ལས། བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ། །ཅེས་དང་། དགྱེས་རྡོར་ལས། ― MLP018_Page_0097 ―
[མ་དཔེ་གཟིགས་ན་འདིར་གནོན།]
འདི་ཉིད་ཡེ་ཤེས་ཆེན་པོ་སྟེ། །བརྟན་དང་གཡོ་བར་ཁྱབ་ནས་གནས། །ཞེས་གསུངས། དེ་ལྟར་ན་སེམས་ཉིད་དེ་ཉིད་ཀྱི་ཕྱག་རྒྱས་འཁོར་འདས་ཀྱི་ཆོས་ཐམས་ཅད་ལ་བཏབ་པ་ཞེས་བྱ་སྟེ། དཔེར་ན་རྒྱལ་པོའི་བཀའ་རྟགས་ཀྱི་ཕྱག་རྒྱས་བཏབ་ན་འབངས་རྣམས་ཀྱིས་དེ་ལས་ནམ་ཡང་འདའ་མི་ནུས་པ་བཞིན་དུ་ཆོས་ཐམས་ཅད་ཀྱི་གནས་ལུགས་སྟོང་པ་ཉིད་ཡིན་ལ། དེ་ཉིད་ཆོས་ཐམས་ཅད་ཀྱི་སྲོག་ཏུ་སོང་བས་དབུས་ན་གནས་པའམ་ཀུན་ལ་ཁྱབ་བཅས་སུ་གནས་པ་སྟེ། རྡོ་རྗེ་ཕྲེང་བ་ལས། ཆོས་རྣམས་དབུས་ན་གནས་པའི་ཁམས། །ཁྱབ་ཅིང་སྤྱོད་ཡུལ་མ་ཡིན་ཏེ། །ཞེས་གསུངས་སོ། །མཉམ་པ་ཉིད་དུ་བསྡུས་པ་ཞེས་པ། སེམས་ཉིད་རང་བྱུང་གི་ཡེ་ཤེས་དེའི་ངོས་ནས་གཞལ་ན། འཁོར་བ་ཞེས་པའི་ངན་པ་དང་། མྱང་འདས་ཞེས་པའི་བཟང་པོ་གཉིས་ཀ་ཐ་དད་དུ་མ་གྲུབ་པར་འཁོར་འདས་བཟང་ངན་མེད་པར་སེམས་ཉིད་དེའི་ཀློང་དུ་མཉམ་པ་ཉིད་དུ་བསྡུས་པ་སྟེ། དགྱེས་རྡོར་ལས། འདི་ཉིད་འཁོར་བ་ཞེས་བྱ་ལ། །འདི་ཉིད་མྱ་ངན་འདས་པ་ཞེས། །འཁོར་བ་སྤངས་ནས་གཞན་དུ་ནི། །མྱ་ངན་འདས་པ་ཡོད་མ་ཡིན། །ཞེས་དང་། མདོ་ལས། འདི་ལྟར་སྣང་བའི་ཆོས་ཐམས་ཅད། །གདོས་པ་ཅན་གྱི་ཆོས་མིན་ཏེ། །རྟོག་མེད་རང་རིག་འོད་གསལ་བའི། །ཤེས་པ་འབའ་ཞིག་ཁོ་ནའོ། །ཞེས་གསུངས། སྒྲིབ་གཉིས་ཟད་ཅིང་ཚོགས་གཉིས་རྫོགས་པའི་སྐྱེས་བུས་མངོན་དུ་བྱས་པ་ནི་འབྲས་བུའི་རྡོ་རྗེ་སེམས་དཔའ་སྟེ། ཞེས་པ་ནི། དེ་ལྟར་བརྟན་བསྡུས་གཉིས་པོ་དེ་སེམས་ཉིད་གནས་ལུགས་ཀྱི་ངོས་ནས་བཞག་པ་ཡིན་ལ། རྟོགས་པའི་རྡོ་རྗེ་སེམས་དཔ འ་འམ་འབྲས་བུའི་རྡོ་རྗེ་སེམས་དཔའ་ནི། སྣང་ལུགས་ཀྱི་ངོས་ནས་འབྱུང་བ་སྟེ། གནས་ལུགས་ལ་དེ་ལྟར་ཡིན་ཡང་སྣང་ལུགས་ལ་འཁོར་འདས་གཉིས་བཟང་ངན་ལྟར་དུ་སྣང་བས་ན་རྣམ་གྲོལ་དོན་གཉེར་གྱི་གང་ཟག་གིས་སེམས་ཉིད་རྣལ་མའི་དོན་རྟོགས་པའི་ཐབས་སུ་ལམ་ཐབས་གྲོལ་གཉིས་ལ་འབད་པས་ཇི་ཞིག་ན་སེམས་ཉིད་སངས་རྒྱས་སུ་རྟོགས་པ་དེ་ལ་རྟོགས་པའི་རྡོ་རྗེ་སེམས་དཔའ་ཞེས་བྱ་སྟེ། འདའ་ཀ་ཡེ་ཤེས་ལས། སེམས་རྟོགས་ན་སངས་རྒྱས་ཡིན་པས་སངས་རྒྱས་གཞན་ནས་མི་བཙལ་བའི་འདུ་ཤེས་རབ་ཏུ་བསྒོམ་པར་བྱའོ། །ཞེས་ ― MLP018_Page_0098 ―
[མ་དཔེ་གཟིགས་ན་འདིར་གནོན།]
གསུངས། གང་རྟོགས་པའི་ཡེ་ཤེས་དེ་ཡང་རྡོ་རྗེ་ལྟར་གཉིས་སུ་མེད་པར་གྱུར་པའི་ཕྱིར་རོ། །ཞེས་པ་ནི། དེ་ལྟར་རྟོགས་པའི་སྐྱེས་བུ་དེ་ལ་རྡོ་རྗེ་སེམས་དཔའ་ཞེས་བཏགས་པས་དེའི་ཐུགས་རྒྱུད་ན་ཡོད་པའི་ཡེ་ཤེས་དེ་ཡང་རྡོ་རྗེ་ལྟར་གཉིས་སུ་མེད་པར་རྟོགས་པར་གྱུར་པའི་ཕྱིར་དེ་ལྟར་དུ་བརྗོད་དོ། །དེས་རྒྱུད་ལ་རྡོ་རྗེ་སེམས་དཔའ་ཞེས་པའི་མཚན་བཏགས་པ་སོང་ནས། དཀྱིལ་འཁོར་གྱི་གཙོ་བོ་ལ་རྡོ་རྗེ་སེམས་དཔའ་ཞེས་པའི་དོན་ནི། དེ་ཉིད་མཚན་མའི་ཕྱག་རྒྱར་སྣང་བ་དཀྱིལ་འཁོར་གྱི་གཙོ་བོ་དང་ཞེས་བཤད་པ་དེ་ཡིན་ཏེ། དེའི་དོན་ནི་སེམས་ཉིད་རང་བྱུང་གི་ཡེ་ཤེས་དེ་ཉིད་ཀྱི་ངོ་བོ་མཚན་མེད་སྟོང་པ་ཉིད་ཡིན་ཡང་། སེམས་ཅན་གྱི་བློ་ལ་ལྟོས་ནས་རིག་པ་ཉིད་ཡེ་ཤེས་ཀྱི་འཁོར་ལོའ་ཚུལ་དུ་མཚན་མའི་ཕྱག་རྒྱར་རང་སྣང་བ་ཡིན་ཏེ། འདི་ཉིད་ལས། རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའ་ཚུལ། །ཞེས་གསུངས་པ་ལྟར། ལམ་པས་ཉམས་སུ་བླངས་པའི་ཚེ་ཚོགས་ལམ་དུ་མོས་སྤྱོད་ཀྱི་ལྷ་སྐུ་དང་། སྦྱོར་ལམ་དུ་རླུང་སེམས་ཀྱི་ལྷ་སྐུ། མཐོང་ལམ་དུ་འོད་གསལ་གྱི་ལྷ་སྐུ། ས་གཉིས་པ་ནས་བཅུ་པའི་བར་སློབ་པའི་ཟུང་འཇུག་གི་ལྷ་སྐུ། སངས་རྒྱས་ཀྱི་སར་མི་སློབ་པའི་ཟུང་འཇུག་གི་ལྷ་སྐུའི་གཙོ་འཁོར་གྱི་རྣམ་པར་སྣང་བ་རྣམས་ལའང་རྡོ་རྗེ་སེམས་དཔའ་ཞེས་པའི་མཚན་དུ་བཏགས་པ་ཡིན། སྤྱིར་འཆད་པའི་སྐྱེས་བུ་རིགས་ལྔ་སྟེ། ཞེས་འབྱུང་ཡང་སྐབས་འདིར་འཆད་པའི་སྐྱེས་བུ་མི་བསྐྱོད་པ་ལའང་རྡོ་རྗེ་སེམས་དཔའ་ཞེས་གྲགས་སོ། །ཞེས་པ་ནི། ཀུན་འབྱུང་སྒྱུ་འཕྲུལ་སྟོན་པའི་ཚེ། །མི་བསྐྱོད་སྐྱེས་བུ་མདུན་ན་གནས། །ཞེས་པས་ཐུགས་ཀྱི་སྒྱུ་འཕྲུལ་འཆད་པའི་སྐབས་འདིར་སྟོན་པ་ཀུན་ཏུ་བཟང་པོའི་མདུན་ན་བཞུགས་པའི་རྡོ་རྗེ་མི་བསྐྱོད་པ་དེ་ལའང་དེ་ལྟར་བརྗོད་དོ་ཞེས་པའི་དོན་ཡིན། གཞན་དུ་སྐུ་དང་གསུང་དང་ཡོན་ཏན་དང་ཕྲིན་ལས་ཀྱི་སྒྱུ་འཕྲུལ་གང་སྟོན་པའི་ཚེ་དེ་དང་དེའི་འཆད་པའི་སྐྱེས་བུ་དེ་རིགས་སོ་སོའ་དཀྱིལ་འཁོར་མདུན་དུ་འབྱུང་བས་སོ། །དེས་མཚན་གྱི་ཟུར་དང་པོ་རྡོ་རྗེ་སེམས་དཔའ་བཤད་པ་དེ་སོང་ནས། ཟུར་གཉིས་པ་སྒྱུ་འཕྲུལ་དྲྭ་བ་ཞེས་པའི་མཚན་ནི། སྒྱུ་འཕྲུལ་རྡོ་རྗེ་ལས། ཐབས་དང་ཤེས་རབ་འབྲེལ་ ― MLP018_Page_0099 ―
[མ་དཔེ་གཟིགས་ན་འདིར་གནོན།]
བའི་དོན། །སྒྱུ་འཕྲུལ་ཞེས་ནི་བཞིར་བཤད་དོ། །ཞེས་པས་དེ་ལ་བཞི་ལས། དང་པོ་རྟོག་ཚོགས་སྒྱུ་འཕྲུལ་དྲྭ་བ་ནི། འབྱུང་བ་ལྔ་སྒྱུ་མ་ལྟར་སྣང་བ་རིས་སུ་མ་ཆད་པའི་རྒྱུས་ཅིར་ཡང་འཕྲུལ་པ་ནི་ཕུང་པོ་ལྔ་སྟེ། ཞེས་པས་འབྱུང་བ་ལྔ་སྒྱུ་མ་ལྟར་སྣང་བ་རིས་སུ་མ་ཆད་དེ། ཅིའི་ཕྱིར་རིས་སུ་མ་ཆད་ཅེ་ན། དཔེར་ན་ཆུ་ལྟ་བུ་གཅིག་ལའང་མཐོང་སྣང་མི་འདྲ་བ་དུ་མ་འབྱུང་སྟེ། སྐ་བ་དཔལ་བརྩེགས་ཀྱི་ལྟ་རིམ་ལས། དམྱལ་བས་རང་སེམས་མེ་སོགས་སྣང་། །ཡི་དྭགས་སྡིག་སེམས་མི་གཙང་ཡུལ། །བྱོལ་སོང་གྱེན་ཐུར་ངམ་གྲོག་སྟེ། །མི་ལ་མཐོང་ཡུལ་འདི་ལྟར་སྣང་། །དེ་བཞིན་ལྷ་མིན་གོ་མཚོན་སོགས། །ལྷ་ལ་དགེ་སེམས་རིན་ཆེན་སྣང་། །ཞེས་གསུངས་པ་ལྟར་དམྱལ་བ་པ་རྣམས་ཀྱིས་ཟངས་ཞུན་དང་ཁྲོ་ཆུ་ཁོལ་མར་མཐོང་། ཡི་དྭགས་རྣམས་ཀྱིས་རྣག་ཁྲག་དང་ལྗན་ལྗིན་དུ་མཐོང་། དུད་འགྲོས་གྱེན་ཐུར་དང་ངམ་གྲོག་དང་། མིས་ཆུ་གཙང་མར་མཐོང་། ལྷ་མ་ཡིན་གྱིས་གོ་མཚོན་དུ་མཐོང་། ལྷས་བདུད་རྩིར་མཐོང་། གྲུབ་པའི་ས་ལ་བཞུགས་པའི་འཕགས་པ་རྣམས་ཀྱིས་ཡུམ་མཱ་མ་ཀཱིར་མཐོང་སྟེ། དབུ་མ་བདེན་གཉིས་ལས། དངོས་གཅིག་ཡིད་ནི་ཐ་དད་ཕྱིར། །དོན་མ་གྲུབ་པ་སོ་སོར་མཐོང་། །ཞེས་གསུངས། དེས་མཚོན་ཏེ་འབྱུང་བ་ལྔ་ཡིན་ལུགས་ནས་ཡེ་ནས་ཡུམ་ལྔའི་རང་བཞིན་དུ་ཡིན་ཡང་། སྣང་ལུགས་ནས་སོ་སོར་སྣང་བས་འབྱུང་བ་ལྔ་སྒྱུ་མ་ལྟར་ཞེས་བཤད། སྒྱུ་མ་དེ་ཡང་སྒྱུ་མ་མཁན་གྱིས་ཤིང་བུ་རྡེའུ་སོགས་ལ་སྔགས་བཏབ་སྟེ། དེ་ཉིད་རྟ་ལྟར་སྟོན་པ་དང་། གླང་པོ་ལྟར་སྟོན་པ་སོགས་དུ་མར་སྣང་བ་བཞིན། ད་རེས་འདིར་ཡང་རྒྱུ་འབྱུང་བ་ལྔ་ལས་འབྲས་བུ་འབྱུང་འགྱུར་ཕུང་པོ་ལྔར་རྣམ་པར་འཕྲུལ་པ་སྟེ། ལེ་ལག་ལས། ལྔ་ཕུང་སྒྱུ་མའི་ཡེ་ཤེས་ལས། །རང་རིག་ཐབས་ཀྱི་རིགས་ལྔར་འཕྲུལ། །ཞེས་སོ། །རྒྱུ་འབྲས་འབྲེལ་བ་ཅན་གྱི་ཕྱིར་དྲྭ་བའོ། །ཞེས་པས་འབྱུང་བ་ལྔ་དང་ཕུང་པོ་ལྔ་ངོ་བོ་བདག་གཅིག་གིས་འབྲེལ་བ་སྟེ། དཔེར་ན། འཇིག་རྟེན་ན་ཐིག་གུ་ཕན་ཚུན་སྦྲེལ་བའི་ཕད་བུ་ལ་དྲྭ་ཕད་ཅེས་འདོགས་པ་བཞིན་འདིར་ཡང་དེ་གཉིས་ཟུང་འཇུག་ཏུ་གནས་པ་ལ་དྲྭ་བ་ཞེས་པའི་ཐ་སྙད་དུ་བཞག་གོ ། ― MLP018_Page_0100 ―
[མ་དཔེ་གཟིགས་ན་འདིར་གནོན།]
གཉིས་པ་ངེས་དོན་སྒྱུ་འཕྲུལ་དྲྭ་བ་ནི། རྒྱུ་མཚན་དེས་ཞེས་པས། རྟོག་ཚོགས་སྒྱུ་དྲྭའི་སྐབས་སུ་འབྱུང་བ་ལྔ་ལ་སྒྱུ་མ། ཕུང་པོ་ལྔ་ལ་འཕྲུལ་པ། དེ་གཉིས་འབྲེལ་བ་ལ་དྲྭ་བར་བཤད་པ་བཞིན་དུ། སྟོང་པ་ཉིད་ལ་སྒྱུ་མ། རིག་པའི་ཡེ་ཤེས་ལ་འཕྲུལ་པ། དེ་གཉིས་འབྲེལ་བ་ལ་དྲྭ་བ་ཞེས་འཇོག་པས། ཤེས་རབ་དབྱིངས་སྟོང་པ་ཉིད་དང་ཐབས་རིག་པ་རང་བྱུང་གི་ཡེ་ཤེས་གཉིས་ཟུང་དུ་འཇུག་པ་ནི་ངེས་དོན་སྒྱུ་དྲྭ་སྟེ། དེའི་དོན་ནི་སྟོང་པ་ཉིད་ལ་སྒྱུ་མ་ཞེས་བྱ་སྟེ། སྟོང་པ་ཉིད་ནི་གང་དུའང་མ་གྲུབ་ལ་ཅིར་ཡང་འཆར་དུ་རུང་བ་ཞིག་སྟེ། རྩ་ཤེས་ལས། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བ་ཡིན། །ཞེས་དང་། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས། སྟོང་ཉིད་དེ་ནི་ཅིར་ཡང་སྣང་ལ་གང་གི་ངོ་བོར་ཡང་མ་གྲུབ་ཅིང་རྣམ་པ་མཐའ་ཡས་པར་འཆར་བ་སྟེ། སྒྱུ་འཕྲུལ་བླ་མ་ལས། ཅིར་ཡང་མེད་ལས་ཅིར་ཡང་སྣང་། །མ་སྐྱེས་སྒྱུ་འཕྲུལ་སྣ་ཚོགས་འབྱུང་། །རྒྱལ་བའི་དཀྱིལ་འཁོར་སྣ་ཚོགས་ཀྱང་། །སེམས་ཀྱི་སྒྱུ་འཕྲུལ་ཆེན་པོ་ཡིན། །ཞེས་དང་། ཀུན་འབྱུང་དཀྱིལ་འཁོར་སྒྱུ་འཕྲུལ་ཆེ། །ཞེས་སོ། །དེས་ན་ཆོས་ཐམས་ཅད་ཀྱི་སྣང་གཞིའམ་གནས་ལུགས་སྨྲ་བསམ་བརྗོད་མེད་དེའི་ངོ་བོ་དམིགས་སུ་མེད་ཀྱང་། སྒྱུ་འཕྲུལ་རྒྱས་པ་ལས། མེད་པ་ཉིད་ན་སྣ་ཚོགས་སྣང་། །ཐམས་ཅད་ཤེས་རབ་དབྱིངས་ལས་བྱུང་། །ཞེས་གསུངས་པ་ལྟར་ཤེས་རབ་དབྱིངས་སྟོང་པ་ཉིད་སྒྱུ་མ་ལྟ་བུ་དེ་ཐབས་རང་རིག་པའི་ཡེ་ཤེས་སུ་རྣམ་པར་འཕྲུལ་པས་སྒྱུ་འཕྲུལ་དང་། རིག་པའི་ཡེ་ཤེས་ཉིད་ཤེས་རབ་སྟོང་པ་ཉིད་དུ་གྲོལ་བས་ན་དྲྭ་བ་ཞེས་བྱ་སྟེ། དེས་ན་ངེས་དོན་གྱི་སྒྱུ་འཕྲུལ་དྲྭ་བ་སྟེ། ཆོས་ཐམས་ཅད་ཀྱི་གནས་ལུགས་སམ་རྒྱལ་བའི་དགོངས་པའི་ཞེ་ཕུགས་ངེས་དོན་མཐར་ཐུག་པ་སྟེ། འདི་ལས་གསང་བའི་ངེས་དོན་མེད། །ཅེས་གསུངས་སོ། །གསུམ་པ་དྲང་དོན་བརྡའི་སྒྱུ་འཕྲུལ་དྲྭ་བ་ནི། ངེས་དོན་གྱི་སྒྱུ་འཕྲུལ་དྲྭ་བ་དེ་ཉིད་རྟོགས་པའི་ཐབས་སུ་གྱུར་པ་སྟེ། དེའི་རྟགས་ལྷ་ཡབ་ཡུམ་ཟུང་དུ་འབྲེལ་བ་ནི་དྲང་དོན་བརྡའི་སྒྱུ་ ― MLP018_Page_0101 ―
[མ་དཔེ་གཟིགས་ན་འདིར་གནོན།]
འཕྲུལ་དྲྭ་བའོ། །ཞེས་པའི་དོན། ངེས་དོན་གྱི་སྒྱུ་འཕྲུལ་དྲྭ་བ་དངོས་སུ་མི་རྟོགས་པའི་གང་ཟག་དེ་ལ་རེ་ཞིག་བརྡ་དང་རྟགས་ཀྱི་སྒོ་ནས་ཐབས་སྟོན་པ་སྟེ། སྟོང་པ་ཉིད་མཚོན་པའི་ལྷ་ཡུམ། རིག་པའི་ཡེ་ཤེས་མཚོན་པའི་ལྷ་ཡབ། ཟུང་འཇུག་མཚོན་པའི་ལྷ་ཡབ་ཡུམ་ཕན་ཚུན་འཁྲིལ་སྦྱོར་གྱི་ཕྱག་རྒྱའི་བརྡ་དང་རྟགས་བསྟན་པ། ལྷ་ཡུམ་གྱི་ཕྱག་རྒྱ་ནི་སྟོང་པ་ཉིད་དོ། །ལྷ་ཡབ་ཀྱི་ཕྱག་རྒྱ་ནི་རིག་པའི་ཡེ་ཤེས་ཡིན་ནོ། །ཡབ་ཡུམ་འཁྲིལ་སྦྱོར་གྱི་ཚུལ་དུ་བཞུགས་པ་སྟོང་པ་ཉིད་དང་རིག་པའི་ཡེ་ཤེས་ཟུང་དུ་འཇུག་པ་ཡིན་ནོ། །ཞེས་པ་ལ་སོགས་པ་མཚན་མ་བསྒོམ་པའི་དོན་བསྟན་ནས་དེ་ལྟར་བསྒོམ་དུ་བཅུག་པས། ཇི་ཞིག་ན་སེམས་ཉིད་རང་བྱུང་གི་ཡེ་ཤེས་དེའི་དོན་རྟོགས་པར་འགྱུར་བ་སྟེ། དེ་ཡང་གང་དྲངས་ན་གང་ཟག་མཚན་མའི་བློ་ཅན་དེ་དྲངས། གང་དུ་དྲངས་ན་ངེས་དོན་གྱི་སྒྱུ་དྲྭ་དེ་ལ་དྲངས། ཚུལ་ཇི་ལྟ་བུས་དྲངས་ན་ལྷ་ཡབ་ཡུམ་ཐབས་ཤེས་ཕན་ཚུན་འཁྲིལ་སྦྱོར་གྱི་ཕྱག་རྒྱའི་བརྡ་དང་རྟགས་ལ་བརྟེན་ནས་དྲངས་ཏེ། ཀླུ་སྒྲུབ་ཀྱིས། ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་གདང་བུ་ལྟ་བུར་བསྟན། །ཅེས་སོ། །བཞི་པ་ལྷ་རྟོག་དབྱེར་མེད་ཀྱི་སྒྱུ་འཕྲུལ་དྲྭ་བ་ནི། ལྷ་དང་རྟོག་པ་དབྱེར་མེད་སྒྱུ་མ་བྱུང་ཡང་། རྟོག་ཚོགས་ཀྱི་རང་བཞིན་ལྷར་དག་པ་དང་། ལྷའི་ངོ་བོ་རྟོག་ཚོགས་ཀྱི་རང་བཞིན་དུ་རྣམ་པར་འཕྲུལ་པའི་ཕྱིར་ན་ལྷ་རྟོག་དབྱེར་མེད་ཅེས་བཤད། ཡང་འདི་ཉིད་ཀྱི་ལེའུ་བཞི་པ་ལས་ནི། ཡབ་ལ་སྒྱུ་འཕྲུལ་དང་། ཡུམ་ལ་དྲྭ་བར་བཤད་ཅིང་ཞེས་པ་ནི། ལེའུ་བཞི་པར། ཋ་ནི་སྒྱུ་འཕྲུལ་རྡོ་རྗེ་ཉིད། །ཅེས་སོགས་གསུངས་ཤིང་། རྡོ་རྗེ་གཡུང་དྲུང་འཁྱིལ་བའི་མདོ་ལས་ཀྱང་། དྲྭ་བ་ཅིར་ཡང་འགྱུར་བ་སྟེ། །མདོ་མདུད་འབྲེལ་ཞིང་ཟང་ཐལ་བ། །ཐམས་ཅད་སྡུད་ཅིང་ཤོང་བའི་ཕྱིར། །ཡུམ་ལ་དྲྭ་བ་ཞེས་བཤད་དོ། །ཞེས་གསུངས་པ་ལྟར་རྡོ་རྗེའི་ཚིག་ཡིན་པས་གང་ལྟར་བཤད་ཀྱང་མི་འགལ་ལོ་གསུངས། དེས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞེས་པ་རྒྱུད་དང་མཐུན་པའི་མཚན་བཤད་པ་དེ་སོང་ནས། །གཉིས་པ་ཆེ་བ་ལས་མཚན་དུ་བཏགས་པ་ལུང་གི་མཚན་ནི། རྡོ་རྗེ་ལས། སོ་སོར་བསྟན་ ― MLP018_Page_0102 ―
[མ་དཔེ་གཟིགས་ན་འདིར་གནོན།]
པ་རྒྱ་མཚོའ་རྒྱུད། །འདིར་སྟོན་འདིས་སྟོན་འདི་ཕྱིར་སྟོན། །དོན་ཀུན་འདི་ལ་ཡོངས་རྫོགས་པས། །ལུང་གི་སྤྱི་ཞེས་བཤད་པ་ཡིན། །ཞེས་པས། སྟོན་པས་གདུལ་བྱ་སོ་སོའ་བློ་དང་འཚམས་པར་བསྟན་པའི་ཆོས་ནི་རྒྱ་མཚོའ་རྒྱུད་དེ། རྒྱ་མཚོ་ནི་ཟབ་ཅིང་གཏིང་དཔག་དཀའ་བས་འདི་ཙམ་ཞེས་དཔག་པར་མི་ནུས་པའི་ཕྱིར། སྟོན་པས་གསུངས་པའི་ཆོས་རྣམས་ཀྱང་དོན་ཟབ་ཅིང་གཏིང་དཔག་དཀའ་བ་དང་། ཚིག་རྒྱ་ཆེ་ཞིང་མཐའ་ཡས་པ་སྟེ། དེ་ཐམས་ཅད་ཀྱང་རྒྱུད་ཀྱི་རྒྱལ་པོ་ཆེན་པོ་འདིའི་ནང་དུ་རྫོགས་པར་སྟོན་པས་ན་འདིར་སྟོན་ཞེས་བཤད་དེ། རྒྱས་པ་ལས། མཉམ་ཉིད་དོན་རྟོགས་རང་རིག་རྒྱལ་པོ་ནི། །རྒྱ་མཚོ་ཆེན་པོར་ཆུ་ཀླུང་ཀུན་འབབས་ལྟར། །བླ་མེད་དོན་རྟོགས་ཐབས་ཆེན་འདི་དག་ཏུ། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་གསུངས། འདིས་སྟོན་ཞེས་པ་ནི། བསྟན་པ་དང་ཐེག་པ་ཐམས་ཅད་ཀྱི་དོན་མ་ལུས་པ་རྒྱུད་ཀྱི་རྒྱལ་པོ་ཆེན་པོ་འདི་ཉིད་ལས་འཕྲོས་ཏེ་སྟོན་པས་ན་འདིས་སྟོན་ཞེས་བཤད་དེ། འདི་ཉིད་ལས། ཕྱོགས་བཅུ་རྣམས་སུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །རང་བཞིན་གསང་བའི་སྙིང་པོ་ནི། །སྡེ་སྣོད་ཀུན་དང་རྒྱུད་ཀུན་གྱི། །འབྱུང་གནས་གཏན་ལ་ངེས་པར་འབེབས། །ཞེས་གསུངས། འདི་ཕྱིར་སྟོན་ཞེས་པ་ནི། ཐེག་པའི་སྒོ་གང་ནས་ཞུགས་ཀྱང་མཐར་ཐུག་ཐེག་པ་འདི་ལས་མི་འདའ་བས་ན་ཐེག་པ་གཞན་ཐམས་ཅད་འདི་ཉིད་ཀྱི་ལམ་སྟེགས་ཀྱི་ཚུལ་དུ་གསུངས་པ་ཡིན་ཏེ། འདི་ཉིད་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་གསུངས། དོན་དེ་ཉིད་ཀྱི་ཕྱིར་ན་རྒྱུད་འདི་ལ་ལུང་གི་སྤྱི་ཞེས་བཤད་དེ། དེ་ཡང་གསང་སྔགས་སྤྱིའི་རྒྱུད་ལྟ་བུ་ཡིན་ནམ་ཞེ་ན་མ་ཡིན་ཏེ། འདི་ཉིད་ལས། མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི། ཞེས་གསུངས། དེ་ཡང་སྤྱིར་ལུང་ལ། གཏན་ལ་འབེབས་པའི་ལུང་དང་། མངོན་དུ་ཕྱུང་པའི་ལུང་ཞེས་བཤད་པ་དང་། ཡང་དྲང་བ་མཚན་ཉིད་ཀྱི་ལུང་དང་། ངེས་པ་སྔགས་ཀྱི་ལུང་ཞེས་པའི་ཕྱི་མ་ལའང་གཞི་གནས་སྦྱོར་བའི་ལུང་། མཐུན་འཇུག་སྤྱོད་པའི་ལུང་། བྱ་བྲལ་རྫོགས་པའི་ལུང་། རྣམ་གྲོལ་རིག་པའི་ལུང་ཞེས་ཀྱང་བཤད་དོ། །འདིར་ནི་སྒྱུ་འཕྲུལ་ ― MLP018_Page_0103 ―
[མ་དཔེ་གཟིགས་ན་འདིར་གནོན།]
རྡོ་རྗེ་ལས། དྲི་མ་མེད་པའི་ལུང་ཉིད་དེ། །ལས་དང་ཡེ་ཤེས་སྤྱི་ཉིད་ཀྱི། །རྫོགས་པས་རྫོགས་ཕྱིར་ལུང་ཉིད་དོ། །ཞེས་གསུངས་པ་ལྟར། རྒྱ་མ་ལས་ཀྱི་ལུང་མཚན་ཉིད་སྡེ་གསུམ། ཡེ་ཤེས་ལྷའི་ལུང་ཕྱི་རྒྱུད་སྡེ་གསུམ། བྱ་བྲལ་རྫོགས་པའི་ལུང་ནང་རྒྱུད་སྡེ་གསུམ་སྟེ། དེ་དག་གི་ལུང་གི་སྤྱིར་གྱུར་པས་ལུང་གི་སྤྱི་ཞེས་བཤད་པ་ཡིན། ཞེས་གསུངས་སོ། །གསུམ་པ་དོན་རང་གི་ངོ་བོ་ལ་བཏགས་པ་མན་ངག་གི་མཚན་ནི། འགྲེལ་ཆུང་ལས། སྔོན་དུ་འགྲོ་བའི་བདག་ཉིད་པས། །མིང་ཉིད་ཐོག་མར་སྨོས་པ་གཅེས། །ཞེས་གསུངས་པ་ལྟར་གླེགས་བམ་གྱི་ཀླད་དུ་མཚན་མ་བཀོད་ན་གང་ཡིན་མི་ཤེས་པས་རྨོངས་པ་སེལ་བའི་ཕྱིར་བཀོད་པ་སྟེ། ལང་ཀར་གཤེགས་པ་ལས། མིང་དུ་གདགས་པར་མ་མཛད་ན། །འཇིག་རྟེན་ཐམས་ཅད་རྨོངས་པར་འགྱུར། །དེ་བས་རྨོངས་པ་སེལ་བའི་ཕྱིར། །མགོན་པོས་མིང་དུ་གདགས་པར་མཛད། །ཅེས་གསུངས་སོ། །དེ་ལ་ཀླད་དུ་བཀོད་པའི་མཚན་ནི། གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་པ་སྟེ། དེའི་དོན་བཤད་པ་ནི། བི་མ་ལའི་འགྲེལ་ཆུང་དུ། རང་བཞིན་གསང་བ་ཞེས་བྱ་སྟེ། །ཆེ་བ་ཞེས་བྱ་སྙིང་པོའི་དོན། །དེ་ཁོ་ན་ཉིད་མཚན་ཉིད་དོ། །ངེས་པས་ངེས་དོན་མདོར་བསྟན་པ། །ཞེས་གསུངས་པ་ལྟར། གསང་བ། སྙིང་པོ། དེ་ཁོ་ན་ཉིད། ངེས་པའི་དོན་བཤད་པ་དང་བཞི་ལས། དང་པོ་གསང་བའི་དོན་བཤད་པ་ནི། རང་བཞིན་གྱིས་གསང་བ། གབ་པའི་གསང་བ། སྦས་པའི་གསང་བ་སྟེ་གསུམ་ལས། རང་བཞིན་གྱིས་གསང་བ་ནི། མཚོན་བྱ་རང་བཞིན་གྱི་རྒྱུད་གནས་ལུགས་དེ་བཞིན་ཉིད་དེ་རང་ལ་རང་ཆས་སུ་གནས་ཀྱང་དབུལ་པོའི་ཁྱིམ་གྱི་ས་འོག་གི་ནོར་བུ་ལྟར་མ་མཐོང་བ་རང་ལ་ཡོད་ཀྱང་རང་གི་མིག་རང་གིས་མི་མཐོང་བ་ལྟར་རང་བཞིན་མ་རྟོགས་པས་གསང་བ་སྟེ། རྒྱུད་བླ་མ་ལས། ཇི་ལྟར་མི་དབུལ་ཁྱིམ་ནང་ས་འོག་ན། །མི་ཟད་པ་ཡི་གཏེར་ནི་ཡོད་གྱུར་ཀྱང་། །མི་དེས་དེ་མ་ཤེས་ཤིང་གཏེར་དེས་ཀྱང་། །དེ་ལ་ང་འདིར་ཡོད་ཅེས་མི་སྨྲ་ལྟར། །དེ་བཞིན་སེམས་ཀྱི་ནང་ཆུད་རིན་ཆེན་གཏེར། །དྲི་མེད་བཞག་དང་བསལ་མེད་ཡེ་ཤེས་ཏེ། །མ་རྟོགས་པས་ན་དབུལ་བའི་སྡུག་བསྔལ་ནི། །རྣམ་མང་རྒྱུན་དུ་སྐྱེ་རྒུ་འདིས་མྱོང་ངོ་། །ཞེས་ ― MLP018_Page_0104 ―
[མ་དཔེ་གཟིགས་ན་འདིར་གནོན།]
སོ། །གབ་པའི་གསང་བ་ནི། །སེམས་ཉིད་སངས་རྒྱས་ཀྱི་རང་བཞིན་ཡིན་ཚུལ་མདོ་རྒྱུད་དུ་མ་ནས་གསུངས་ཀྱང་རང་སེམས་སངས་རྒྱས་ཡིན་པ་བོར་ནས་སངས་རྒྱས་གཞན་ལས་འཚོལ་བ་རང་གིས་རང་ལ་གབ་སྟེ་གནས་པས་གསང་བ་སྟེ། རྣམ་སྣང་མངོན་བྱང་ལས། བྱིས་པ་མི་ཤེས་པས་བསྒྲིབས་པའི། །ཚུལ་འདི་ཤེས་པར་མ་གྱུར་རྣམས། །སངས་རྒྱས་གཞན་དུ་འཚོལ་བར་བྱེད། །འདི་ན་གནས་པ་ཡོངས་མ་མཐོང་། །ཞེས་སོ། །སྦས་པའི་གསང་བ་ནི། གསང་སྔགས་ཀྱི་ལྟ་སྤྱོད་ཟབ་མོ་བློར་མི་ཤོང་བའི་སྣོད་མིན་གྱི་གང་ཟག་རྣམས་ཀྱིས་མི་རྟོགས་པར་བྱ་བའི་ཕྱིར་སྦས་པས་གསང་བ་སྟེ། དམ་ཚིག་གསལ་བཀྲ་ལས། གསང་སྔགས་སྐྱོན་ཡོད་མ་ཡིན་ཏེ། །བློ་ཆུང་ཐེག་པ་དམན་ལ་གསང་། །ཞེས་སོ། །ཡང་བི་མ་ལས། དེའི་སྟེང་དུ་མི་བསྟན་པའི་གསང་བ་བསྣན་ཏེ་བཞིར་བཤད་ཀྱང་། མདོར་ཧྲིལ་གྱིས་དྲིལ་ན། རང་བཞིན་གྱིས་གསང་བ་ནི་གབ་པའི་ཁོངས་སུ་གཏོགས་ཤིང་། མི་བསྟན་པའི་གསང་བའང་སྦས་པའི་ནང་དུ་འདུ་བས་ན་གབ་སྦས་གཉིས་སུ་འདུ་སྟེ། འདི་ཉིད་ལས། གབ་པའི་གསང་བ་མ་རྟོགས་པར་སྦས་པའི་གསང་བ་ལ་མངོན་པར་འཆེལ་ནས། ཞེས་གསུངས་སོ། །གཉིས་པ་སྙིང་པོའི་དོན་ནི། དོན་ཚན་གསུམ་ལ་འཇུག་སྟེ། པཱ་ར་ཞེས་པ་གཅིག་ལས་དུ་མ་འཕྲོ་བའི་གཞི་ལྟ་བུ་ལ་འཇུག་སྟེ། སེམས་ཉིད་གནས་ལུགས་དེ་བཞིན་ཉིད་དེ་འཁོར་འདས་ཀྱི་ཆོས་ཐམས་ཅད་ཀྱི་འཕྲོ་གཞི་ཡིན་ཞིང་། དེ་གཏན་ལ་འབེབ་པའི་རྒྱུད་ཀྱི་རྒྱལ་པོ་འདི་ཉིད་ཀྱང་བསྟན་པ་དང་ཐེག་པ་ཐམས་ཅད་ཀྱི་འབྱུང་ཁུངས་སམ་འཕྲོ་བའི་གཞི་མ་ལྟ་བུ་སྟེ། འདི་ཉིད་ལས། ཕྱོགས་བཅུ་རྣམས་སུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །ཞེས་གསུངས་སོ། །ཧྲི་དཱ་ཡ་ཞེས་པ་ཁམས་ཆེ་བའམ་སྲོག་གམ་སྙིང་ལྟར་གཅེས་སྤྲས་སུ་བྱ་བའི་དོན་ལ་འཇུག་སྟེ། སངས་རྒྱས་མི་བསྒྲུབ་ན་ཕར་ཞོག བསྒྲུབ་ཕྱིན་ཐེག་པའི་སྒོ་གང་ནས་ཞུགས་ཀྱང་མཐར་ཐུག་བགྲོད་པ་གཅིག་པའི་ཐེག་པ་འདི་ལ་འཇུག་དགོས་ཏེ། པཎ་ཆེན་པདྨ་དབང་རྒྱལ་གྱིས། བགྲོད་གཅིག་ལམ་ལ་མ་བརྟེན་འབྲས་ཐོབ་ཅི། །ཞེས་དང་། འདི་ཉིད་ལས། བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་ཤིང་། །དཀྱིལ་ ― MLP018_Page_0105 ―
[མ་དཔེ་གཟིགས་ན་འདིར་གནོན།]
འཁོར་མ་ལུས་བསྙེན་པ་ཡི། །འབྲས་བུ་གསང་ཆེན་འདི་ཡིན་ཏེ། །ཞེས་སོ། །གརྦྷ་ཡ་ཞེས་པ་ཤུན་པའི་ནང་གི་སྙིང་པོ་ལྟ་བུ་ལ་འཇུག་སྟེ། འཁོར་འདས་ཀྱི་ཆོས་ཐམས་ཅད་ཀྱི་བཅུད་འདུས་པའམ། དེ་ཐམས་ཅད་ཀྱི་སྲོག་ཏུ་སོང་བའི་གནས་ལུགས་ཀྱི་སྙིང་པོ་ཡིན་ལུགས་སྤྲོས་བྲལ་བསམ་བརྗོད་ལས་འདས་པ་སྟེ། རྡོ་རྗེ་ཕྲེང་བ་ལས། ཆོས་རྣམས་དབུས་ན་གནས་པའི་ཁམས། །ཁྱབ་ཅིང་སྤྱོད་ཡུལ་མ་ཡིན་ཏེ། །ཞེས་སོ། །གསུམ་པ་དེ་ཁོ་ན་ཉིད་ཀྱི་དོན་ནི། གཞི་མི་འགྱུར་བ་དང་ལམ་གྱི་གཞིའི་དོན་ཉམས་སུ་བླངས་པས་འབྲས་བུ་འབྱུང་བ་ལ་མི་བསླུ་བ་སྟེ། དོན་ལ་དེ་གཉིས་ཕྱིན་ཅི་མ་ལོག་པས་གཞི་འབྲས་ལྟོ་སྦྱར་ཏེ་མ་ནོར་བས་དེ་ཁོ་ན་ཉིད་ཅེས་བྱ་སྟེ། རྒྱུད་ཕྱི་མ་ལས། གཉིས་པོ་ཕྱིན་ཅི་མ་ལོག་ཕྱིར། །དེ་ཉིད་དོ་འདིར་རྣམ་ངེས་སོ། །ཞེས་སོགས་གསུངས་པའི་ཕྱིར་རོ། །བཞི་པ་ངེས་པའི་དོན་ནི། སྐལ་དམན་གྱི་གདུལ་བྱ་དྲང་བའི་ཐབས་ཙམ་དུ་བསྟན་པ་མ་ཡིན་པར། འདིར་སྐལ་ལྡན་དབང་རྣོན་རྣམས་ལ་རྒྱལ་བའི་དགོངས་པའི་ཞེ་ཕུགས་ཐུན་མོང་མ་ཡིན་པ་ཉིད་བསྟན་པས་ན་ངེས་པ་སྟེ། འདི་ཉིད་ལས། རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །ཅེས་སོ། །གཞན་ཡང་མཚན་ནང་ལྟར་ཐབས་ལམ་སྟེང་སྒོ་དང་སྦྱར་ཏེ་བཤད་པ་དང་། གསང་བ་ལྟར་འོག་སྒོ་དང་སྦྱར་ཏེ་བཤད་པ་གཉིས་ཡོད་པ་ལས། དང་པོ་ལའང་། སྙིང་གའི་འཁོར་ལོ་དང་སྦྱར་ཏེ་བཤད་པ་དང་། མཚན་བཞི་དང་འཁོར་ལོ་བཞི་སྦྱར་ཏེ་བཤད་པ་གཉིས་ལས། དང་པོ་ནི། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་ཀྱི་དབུས་ན་དྭངས་མ་ཆེན་པོ་ལྔ་དང་དེའི་དཀྱིལ་ན་ཡེ་ཤེས་སྙིང་པོའི་ཐིག་ལེ་ཡེ་ནས་གནས་ཀྱང་རང་གསང་ཐབས་ཀྱིས་ཆོད་ནས་མ་མཐོང་བ་ནི་གསང་བ། ཐིག་ལེ་དེ་ཉིད་ལ་ཤེས་བྱ་དང་བསྒྲུབ་བྱའི་དོན་གྱི་བཅུད་འདུས་པས་ན་སྙིང་པོ། ཐབས་ཀྱི་མན་ངག་དང་ལྡན་པའི་སྒོ་ནས་ཉམས་སུ་བླངས་པས་རང་གི་སེམས་ཉིད་བདེ་ཆེན་ལྷན་ཅིག་སྐྱེས་པའི་ཡེ་ཤེས་སུ་རང་གསལ་བས་ན་དེ་ཁོ་ན་ཉིད། སྙིང་པོའི་ཐིག་ལེ་དེ་གཞི་ལམ་འབྲས་གསུམ་གྱི་དངོས་གཞིར་ངེས་པས་ན་ངེས་པ་ཞེས་བཤད་ ― MLP018_Page_0106 ―
[མ་དཔེ་གཟིགས་ན་འདིར་གནོན།]
པའི་ཕྱིར་རོ། །གཉིས་པ་མཚན་བཞི་དང་འཁོར་ལོ་བཞི་སྦྱར་ཏེ་བཤད་པ་ནི། ལྟེ་བའི་འཁོར་ལོ་རྩ་འདབ་དྲུག་ཅུ་རྩ་བཞིའི་དབུས་ན་དབྱིངས་ཕྱུག་ལྔའི་ཐིག་ལེ་ཡི་གེ་ཨའི་རྣམ་པར་གནས་པ་དེ་ཉིད་ཡུམ་གྱི་མཁའ་གསང་གི་སྣ་རྩེའི་ཐིག་ལེ་དང་འབྲེལ་ཏེ་གནས་པ་ནི་གསང་བ། སྙིང་གའི་འཁོར་ལོ་རྩ་འདབ་བརྒྱད་ཀྱི་དྭངས་མ་ལྔའི་དབུས་ན་ཡེ་ཤེས་སྙིང་པོའི་ཐིག་ལེ་བཞུགས་པ་དེ་ཆོས་ཐམས་ཅད་ཀྱི་བཅུད་འདུས་པའི་སྙིང་པོ་ཡིན་པས་ན་སྙིང་པོ། མགྲིན་པའི་འཁོར་ལོ་རྩ་འདབ་བཅུ་དྲུག་གི་དབུས་ན་མཁའ་འགྲོ་མ་རྔམ་མའི་ཐིག་ལེ་ཨཾ་ཡིག་གི་དབྱིབས་སུ་གནས་པ་དེ་འོད་དུ་འབར་ཙ་ན་བདེ་བ་སྐྱེས་པས་དེ་ཁོ་ན་ཉིད་ལས་མི་གཡོ་བའི་ཕྱིར་དེ་ཁོ་ན་ཉིད། སྤྱི་བོའ་འཁོར་ལོའ་རྩ་འདབ་སོ་གཉིས་ཀྱི་དབུས་ན་ཀུན་ཏུ་བཟང་པོའི་ཐིག་ལེ་ཧཾ་ཡིག་གི་རྣམ་པར་གནས་པ་དེ་ལས་སྐྱེས་པའི་བདེ་ཆེན་གྱི་ཡེ་ཤེས་དེ་ནི་རྒྱལ་བ་ཀུན་གྱི་དགོངས་པའ་དངོས་གཞིར་ངེས་པའི་ཕྱིར་ན་ངེས་པ་ཞེས་བཤད་པའི་ཕྱིར་རོ། །གཉིས་པ་གསང་བ་ལྟར་འོག་སྒོ་དང་སྦྱར་ཏེ་བཤད་པ་ནི། ལུས་ཅན་རྣམས་ཀྱི་རྩ་སྟོང་ཕྲག་བདུན་ཅུ་རྩ་གཉིས་ལ་སོགས་པའི་ནང་ན་ཐིག་ལེ་བདེ་བའི་ཡེ་ཤེས་ཀྱི་རོ་དང་བཅས་པ་རང་ཆས་སུ་ཡོད་ཀྱང་ངོ་མ་ཤེས་པས་ན་གསང་བ། ཐིག་ལེ་དེ་ལ་རྒྱུ་འབྲས་ཀྱི་བཅུད་འདུས་པས་ན་སྙིང་པོ། བྱེད་པ་སྡོམ་པ་རླུང་དང་བཅས་པའི་ཐབས་ཀྱིས་ཉམས་སུ་བླངས་པས་བདེ་ཆེན་ལྷན་ཅིག་སྐྱེས་པའི་ཡེ་ཤེས་དངོས་སུ་རྒྱུད་ལ་སྐྱེས་པས་ན་དེ་ཁོ་ན་ཉིད། ཐིག་ལེ་དེ་ཉིད་གཞི་ལམ་འབྲས་གསུམ་གྱི་དངོས་གཞིར་ངེས་པས་ན་དེ་ལྟར་ངེས་པ་ཞེས་བརྗོད་པའི་ཕྱིར་རོ། །དེ་རྣམས་ཀྱིས་དབང་པོ་རབ་ལ་མཚན་བསྟན་པ་སོང་ནས། གཉིས་པ་དབང་པོ་འབྲིང་པོ་རྣམས་ལ་སྤྱིའི་དོན་རྣམ་པར་དབྱེ་བས་བཤད་པ་ལ་གཉིས་ལས། དང་པོ་དོན་གྱི་རྣམ་གྲངས་རྣམ་པར་དབྱེ་བ་ནི། དེ་ལ་དོན་གྱི་རྣམ་གྲངས་ཞེས་པ། ཚིག་ལ་མི་རྟོན་དོན་ལ་རྟོན། དོན་ལའང་དྲང་དོན་ལ་མི་རྟོན་ངེས་དོན་ལ། དེ་ཡང་གང་ཟག་ལ་མི་རྟོན་ཆོས་ལ། ཆོས་ལའང་རྣམ་ཤེས་ལ་མི་རྟོན་ཡེ་ཤེས་ལ་རྟོན་པས་སོ། །དེ་ལ་དབྱེ་ན། རྒྱུད་འབྱུང་བའི་རྒྱུ་གླེང་གཞི། རྐྱེན་གླེང་བསླང་བ། འབྲས་བུ་ཡོངས་ཤེས་རྒྱུད་དོན། ― MLP018_Page_0107 ―
[མ་དཔེ་གཟིགས་ན་འདིར་གནོན།]
རྒྱུད་ཀྱི་དགོས་འབྲེལ། འཁོར་ལ་གདམས་ཤིང་བསྟན་པ་གཏད་པ་དང་ལྔ་ལས། དང་པོ་ནི། རྒྱུད་ཕྱི་མ་འགོས་འགྱུར་ལས། སྟོན་པ་ལ་སོགས་རབ་དབྱེ་བས། །ཕུན་སུམ་ཚོགས་པ་ལྔར་བརྗོད་དོ། །ཞེས་གསུངས་པ་ལྟར། གནས་གང་དུ་སྟོན་པ་གང་ཞིག་འཁོར་གང་དང་ལྷན་ཅིག་ཚོགས་པ་དེའི་ཚེ་རྒྱུད་དོན་འབྱུང་ངེས་པ་ཅན་ཡིན་པས་ན། ལྔ་པོ་དེ་ལ་གླེང་གཞི་ཞེས་བྱ་ལ། གླེང་གཞིའི་ངེས་ཚིག་ནི། ཅིའི་ཕྱིར་གླེང་གཞི་ཞེས་བྱ་ཞེ་ན། ཞེས་པའི་དྲི་བ་བཀོད་ནས། དེའི་ལན་ནི། དཱ་ནའི་སྒྲ་ལས་བཀའ་ཡིན་མིན་དུ་རྟོག་པའི་ཐེ་ཚོམ་ཅན་དག་ལ་ཕུན་སུམ་ཚོགས་པ་ལྔའི་ལོ་རྒྱུས་བརྗོད་པས་ཡིད་ཆེས་ཀྱི་ངེས་པ་སྦྱིན་པར་བྱ་བའི་ཕྱིར་དང་། ཞེས་བཤད། གླེང་གཞིའི་སྐད་དོད་ལེགས་སྦྱར་གྱི་སྒྲ་དཱ་ན་ཞེས་འབྱུང་ལ། དེ་བོད་སྐད་དུ་བསྒྱུར་ན་སྦྱིན་པ་ཞེས་འབྱུང་ལ། དེ་ལྟར་དུ་བསྒྱུར་ན་ཟང་ཟིང་གི་སྦྱིན་པ་དང་ནོར་གྱིས་དོགས་ནས། གཞི་མཐུན་པའི་བསྡུ་བ་བྱས་ཏེ་ཕུན་སུམ་ཚོགས་པ་ལྔ་པོ་དེ་རྒྱུད་འབྱུང་བའི་རྒྱུ་ཡང་ཡིན། རྒྱུད་གླེང་བའི་གཞི་ཡང་ཡིན་པས་ན་གླེང་གཞི་ཞེས་བཤད་པ་ཡིན་གསུངས། དེ་ཡང་གང་སྦྱིན་ན་ཡིད་ཆེས་ཀྱི་ངེས་པ་སྦྱིན། གང་ལ་སྦྱིན་ན་བཀའ་ཡིན་མིན་དུ་རྟོག་པའི་ཐེ་ཚོམ་ཅན་དེ་ལ་སྦྱིན། ཚུལ་ཇི་ལྟ་བུས་སྦྱིན་ན་ཕུན་སུམ་ཚོགས་པ་ལྔའི་ལོ་རྒྱུས་བརྗོད་པའི་སྒོ་ནས་སྦྱིན་པས་སོ། །དེ་ལ་དབྱེ་ན་ཐུན་མོང་མ་ཡིན་པའི་གླེང་གཞི་དང་། ཐུན་མོང་གི་གླེང་གཞི་གཉིས་ལས། དང་པོ་ནི། ཐབས་ལམ་དང་སྦྱར་ཏེ་ནང་གསང་ལྟར་འཆད་པ་དག་ཡིན་ནོ། །ཞེས་གསུངས་པས། ནང་ཐབས་ལམ་སྟེང་སྒོ་དང་སྦྱར་ཏེ་བཤད་རྒྱུད་རྒྱ་མཚོས་བཤད་པ་དང་། གསང་བ་འོག་སྒོ་དང་སྦྱར་ཏེ་བཤད་རྒྱུད་ཐལ་བས་བཤད་པ་གཉིས་ལས། དང་པོ་ནི། དྷརྨ་ཙཀྲ་ཆོས་ཀྱི་གནས། །འོད་བཞི་ཨེ་སོགས་དབྱིབས་སུ་གནས། །མི་ཤིགས་ཐིག་ལེ་ཝཾ་དབྱིབས་ཅན། །རང་ལ་བདེ་བ་གསལ་བྱེད་དག །མ་ནུ་ཡིད་སོགས་རྣམ་ཤེས་བཞི། །ཡེ་ཤེས་མྱོང་བས་བསྡུས་པར་བཤད། །ཡེ་ཤེས་ནམ་མཁའི་གཟུགས་སྐྱེས་པ། །པ་ར་མཱརྠ་དོན་ཟབ་མོ། །བདེ་བའི་ ― MLP018_Page_0108 ―
[མ་དཔེ་གཟིགས་ན་འདིར་གནོན།]
དུས་ཉིད་སྔ་ཕྱིར་བྲལ། །དུས་གསུམ་ཀུན་གྱི་ངོ་བོར་གནས། །ཞེས་པས་བསྟན། དེ་ཡང་ཕུན་སུམ་ཚོགས་པ་ལྔའི་སྒོ་ནས་འཆད་དེ། རྐང་པ་དང་པོ་གཉིས་ཀྱིས་གནས་ཕུན་སུམ་ཚོགས་པ་སྟོན་པས། དེ་ཡང་སྙིང་ག་ཆོས་ཀྱི་འཁོར་ལོར་རྩ་འདབ་བརྒྱད་ཡོད་པ་རིགས་བསྡུ་ན་བཞིར་བསྡུ་སྟེ། མདུན་གྱི་རྩ་གསུམ་པོ་དེ་ཆོས་ཉིད་སྐྱེ་བ་མེད་པ་འཆར་བའི་ལས་བྱེད་པས་ཆོས་ཉིད་ཀྱི་རྩ་ཞེས་བྱ་ལ་དབྱིབས་མདོག་ཀྱང་དཀར་པོ་ཟླུམ་པོའི་རྣམ་པར་གནས། གཡས་ན་གཅིག་སྟེ་ཡེ་ཤེས་འཆར་པའི་ལས་བྱེད་པས་ཡེ་ཤེས་ཀྱི་རྩ་ཞེས་བྱ་ལ་དབྱིབས་མདོག་ཀྱང་གྲུ་བཞི་སེར་པོའི་རྣམ་པར་གནས། གཡོན་ན་གཅིག་སྟེ་ཡོན་ཏན་དང་མངོན་ཤེས་འཆར་བའི་ལས་བྱེད་པས་ཡོན་ཏན་གྱི་རྩ་ཞེས་བྱ་བ་དབྱིབས་མདོག་ཀྱང་ཟླ་གམ་དམར་པོའི་རྣམ་པར་གནས། རྒྱབ་ན་གསུམ་ཡོད་པ་གཉིད་རྨུག་དང་བཅས་པའི་ལས་བྱེད་པས་རང་རྒྱུད་ཀྱི་རྩ་ཞེས་བྱ་ལ་དབྱིབས་མདོག་ཀྱང་གྲུ་གསུམ་དམར་ནག་གི་རྣམ་པར་གནས། དེ་ཡང་ཕུན་སུམ་ཚོགས་པ་ལྔའི་སྐད་དོད་དུ་ཨེ་ཝཾ་མ་ཡ་ཞེས་འབྱུང་ལ། དེ་བོད་སྐད་དུ་བསྒྱུར་ན། འདི་སྐད་བཤད་པ་ཞེས་འབྱུང་ལ། ཨེས་མཚོན་པའི་གནས་དང་། ཝཾ་གྱིས་མཚོན་པའི་སྟོན་པ་དང་། མས་མཚོན་པའི་འཁོར་དང་། ཡ་ནི་ཆོས་དང་དུས་གཉིས་ཀ་ལ་འཇུག་སྟེ། ཡཱ་ནའི་སྒྲ་ལས་ཐེག་པ་ཆེན་པོ་ཞེས་བསྙད་པས་ཆོས་ཕུན་སུམ་ཚོགས་པ་དང་། ཡ་ཡིག་གིས་མཚོན་པའི་དུས་ཏེ་བསམ་གྱིས་མི་ཁྱབ་པའི་དུས་རྣམས་ཏེ། ཨེ་སོགས་ལས་བཞིའི་དབྱིབས་མདོག་ཅན་ནི་དོན་དམ་འོད་གསལ་གྱི་བཞུགས་གནས་ཡིན་པས་ན་གནས་ཕུན་སུམ་ཚོགས་པ་ཞེས་བྱའོ། །སྟོན་པ་ཕུན་སུམ་ཚོགས་པ་ནི། མི་ཤིགས་ཐིག་ལེ་ཝཾ་དབྱིབས་ཅན། །རང་ལ་བདེ་བ་གསལ་བྱེད་དག །ཅེས་པས་བསྟན་ཏེ། སྙིང་ག་ཆོས་ཀྱི་འཁོར་ལོའ་དབུས་ན་དྭངས་མ་ཆེན་པོ་ལྔ་བཞུགས་ཏེ། སའི་དྭངས་མ་རྩ་དར་དཀར་གྱི་སྐུད་པ་ལྟ་བུ་སྦོམ་ཕྲ་རྟ་རྔ་བཅུ་གཤགས་ཙམ་པ། དེའི་དབུས་ན་ཆུའི་དྭངས་མ་རྒྱ་མཚལ་ལྕོག་ལའི་ཁུ་བ་ལྟ་བུ། དེའི་དབུས་ན་མེའི་དྭངས་མ་མེ་ལོང་ཉི་མ་ལ་བཞག་པའི་ངད་ཙམ་པ། དེའི་དབུས་ན་རླུང་གི་དྭངས་མ་གསེར་ས་འོག་ན་ཡོད་པའི་རླངས་པ་ནམ་མཁའ་ལ་རྒྱུ་བ་ཙམ་པ། དེའི་དབུས་ན་ནམ་མཁའི་དྭངས་ ― MLP018_Page_0109 ―
[མ་དཔེ་གཟིགས་ན་འདིར་གནོན།]
མ་བར་སྣང་སེང་སེང་གོ་འབྱེད་པའི་རྣམ་པ་ཅན་དུ་གནས་པ་སྟེ། དེ་ལྟར་དྭངས་མ་ལྔ་འདུས་ཀྱི་དབུས་ན་ཡེ་ཤེས་སྙིང་པོའི་ཐིག་ལེ་སྟོང་གསལ་འགགས་མེད་ཡི་གེ་ཝཾ་དབྱིབས་ཀྱི་རྣམ་པར་གནས་པ་སྟེ། རྡོ་རྗེ་མེ་ལོང་གི་རྒྱུད་ལས། ལུས་ཅན་སྙིང་ལ་གང་གནས་པ། །རང་བྱུང་ཟག་མེད་ཡེ་ཤེས་གཟུགས། །མི་ཤིགས་ཐིག་ལེ་བདེ་ཆེན་པོར། །ནམ་མཁའ་ལྟ་བུར་ཀུན་ཁྱབ་པ། །མི་གནས་ཆོས་སྐུའི་རང་བཞིན་ཡིན། །ཞེས་གསུངས་པ་ལྟར། དེ་ཉིད་མར་མེ་གསལ་བྱེད་གཞན་ལ་ལྟོས་མི་དགོས་པ་ལྟར། རང་གིས་རང་ལ་བདེ་བ་གསལ་བར་སྟོན་པའི་ཕྱིར་སྟོན་པ་ཕུན་སུམ་ཚོགས་པ་ཞེས་བཤད། འཁོར་ཕུན་སུམ་ཚོགས་པ་ནི། མ་ནུ་ཡིད་སོགས་རྣམ་ཤེས་བཞི། །ཡེ་ཤེས་མྱོང་བས་སྡུད་པར་བཤད། །ཅེས་པས། མ་ན་ཤེས་པ་ལའོ་ཞེས་ཡིད་ལ་སོགས་པའི་རྣམ་ཤེས་ཚོགས་བརྒྱད་དེ། མདུན་ཆོས་ཉིད་ཀྱི་རྩ་ལ་ཀུན་གཞི། གཡས་ཡེ་ཤེས་ཀྱི་རྩ་ལ་ཡིད། གཡོན་ཡོན་ཏན་གྱི་རྩ་ལ་ཉོན་ཡིད། རྒྱབ་རང་རྒྱུད་ཀྱི་རྩ་ལ་སྒོ་ལྔའི་རྣམ་ཤེས་མིག་རྣ་བ་སྣ་ལྕེ་ལུས་ཀྱི་རྣམ་ཤེས་རྣམས་ཏེ་ཚོགས་བརྒྱད་པོ་དེས་ཡེ་ཤེས་ལྔ་ཉམས་སུ་མྱོང་བར་བྱེད་པའི་ཆ་ནས་འཁོར་ཕུན་སུམ་ཚོགས་པའོ། །ཆོས་ཕུན་སུམ་ཚོགས་པ་ནི། ཡེ་ཤེས་ནམ་མཁའི་གཟུགས་སྐྱེས་པ། །པ་ར་མཱརྠ་དོན་ཟབ་མོ། །ཞེས་པས་བསྟན། དེའི་མན་ངག་སྟེང་སྒོའི་ལམ་ཉམས་སུ་བླངས་པ་ལས་བདེ་གསལ་རྣམ་པར་མི་རྟོག་པའི་ཡེ་ཤེས་ནམ་མཁའི་གཟུགས་ཅན་རྒྱུད་ལ་སྐྱེས་པ་ནི། པ་ར་མཱརྠ་ཞེས་པའི་སྒྲ་ལས། དོན་དམ་པའམ་དོན་ཟབ་མོ་ཞེས་གནས་ལུགས་ཀྱི་ཆོས་ཉིད་ཟབ་མོ་ཡིན་པས་ཆོས་ཕུན་སུམ་ཚོགས་པའོ། །དུས་ཕུན་སུམ་ཚོགས་པ་ནི། བདེ་བའི་དུས་ཉིད་སྔ་ཕྱི་བྲལ། །དུས་གསུམ་ཀུན་གྱི་ངོ་བོར་གནས། །ཞེས་པས་བསྟན་ཏེ། ཡེ་ཤེས་ནམ་མཁའི་གཟུགས་ཅན་རྒྱུད་ལ་སྐྱེས་པ་དེའི་ཚེ་སྔ་ཕྱིར་འཛིན་པའི་རྟོག་པ་ཐམས་ཅད་དང་བྲལ་བས་བསམ་གྱིས་མི་ཁྱབ་པའི་དུས་ཏེ་དུས་ཕུན་སུམ་ཚོགས་པའོ། །གཉིས་པ་གསང་བ་འོག་སྒོ་དང་སྦྱར་ཏེ་བཤད་རྒྱུད་ཐལ་བས་བཤད་པ་ནི། འདི་ཞེས་ཉེ་བར་མཚོན་པ་ནི། །ཨེ་སོགས་རྣམ་བཞིའི་དབྱིབས་ཅན་གནས། །སྐད་ཅེས་གསལ་བྱེད་ལས་མིང་ཅན། །ཝཾ་དབྱིབས་ཐིག་ལེར་བཅས་སྟོན་པའོ། །མ་དཱ་མ་ ― MLP018_Page_0110 ―
[མ་དཔེ་གཟིགས་ན་འདིར་གནོན།]
ནུ་སྡོམ་བྱེད་ཡིད། །ལས་ཅན་རྣམ་ཤེས་དེ་དག་ལ། །གསལ་བར་གོ་བས་བཤད་པར་འདོད། །པ་སྒྲ་དོན་དམ་ངེས་པའི་རྒྱུད། །ཡཱ་ན་ཐེག་ཆེན་འདི་ཡིན་ནོ། །དུས་ནི་བསམ་གྱིས་མི་ཁྱབ་དུས། །ནཱ་མ་དེ་མིང་ཞེས་བྱའོ། །ཞེས་པས་བསྟན། དེ་ལ་གནས་ཕུན་སུམ་ཚོགས་པ་ནི། འདི་ཞེས་ཨེས་མཚོན་པའི་ཆོས་འབྱུང་གི་རྣམ་པར་གནས་པ་ཡུམ་གྱི་བྷ་ག་སྒོ་གྲུ་གསུམ། ཁྱམས་གྲུ་བཞི། སྐྱེ་གནས་ཟླ་གམ། དབྱིངས་ཕྱུག་གི་སྣ་རྩེར་ཟླུམ་པོར་གནས་པ་སྟེ། ཨེ་སོགས་ལས་བཞིའི་དབྱིབས་ཅན་ནི་གསང་བའི་སྟོན་འཁོར་བཞུགས་པའི་གནས་ཡིན་པས་ན་གནས་སོ། །སྟོན་པ་ཕུན་སུམ་ཚོགས་པ་ནི། སྐད་ཅེས་གསལ་བྱེད་ལས་མིང་ཅན། །ཝཾ་དབྱིབས་ཐིག་ལེར་བཅས་སྟོན་པའོ། །ཞེས་པས་བསྟན་ཏེ། ཡབ་ཀྱི་རྡོ་རྗེ་ནོར་བུའི་དབུར་རྩ་ས་ཡ་ཕྲག་བཅུ་གསུམ་གྱི་བཅུད་འདུས་པའི་ཀུན་རྫོབ་ཡེ་ཤེས་ཀྱི་ཐིག་ལེ་ཝཾ་དབྱིབས་ཀྱི་རྣམ་པ་ཅན་དུ་གནས་པ་ནི་ཡབ་ཡུམ་གཉིས་ཀའི་རྒྱུད་ལ་བདེ་བ་གསལ་བར་སྟོན་པའི་བདག་ཉིད་ཅན་ཡིན་པས་ན་སྟོན་པའོ། །འཁོར་ཕུན་སུམ་ཚོགས་པ་ནི། མ་དཱ་མ་ནུ་སྡོམ་བྱེད་ཡིད། །ལས་ཅན་རྣམ་ཤེས་དེ་དག་ལ། །གསལ་བར་གོ་བས་བཤད་པར་འདོད། །ཅེས་པས་བསྟན་ཏེ། མ་དཱ་ན་སྡོམ་བྱེད་དང་། མ་ནུ་ཡིད་དེ་བྱེད་པ་སྡོམ་པའི་ཐབས། དེ་ནི་འདུ་ཤེས་གསུམ་ལྡན་གྱི་མཚན་རྟོག་སྡོམ་པར་བྱེད་པའི་གསང་བའི་རྣམ་ཤེས་ཀྱིས་རེག་བདེ་ཉམས་སུ་མྱོང་བར་བྱེད་པས་ན་འཁོར་རོ། །ཆོས་ཕུན་སུམ་ཚོགས་པ་ནི། པ་སྒྲ་དོན་དམ་ངེས་པའི་རྒྱུད། །ཡཱ་ན་ཐེག་ཆེན་འདི་ཡིན་ནོ། །ཞེས་པས་བསྟན་ཏེ། ཐབས་ལམ་བདེ་བ་ཆེན་པོའི་ཡེ་ཤེས་ཉམས་སུ་མྱོང་བྱ་སེམས་ལྔ་རྫོགས་པའི་དགའ་བ་བཅུ་དྲུག་གི་ཡེ་ཤེས་ནི་རྣམ་ཐར་བཞི་ལྡན་ཏེ། ངོ་བོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། འོད་གསལ་བའི་རྣམ་པར་ཐར་པ་བཞི་དང་ལྡན་པ་རང་བཞིན་ལྷན་ཅིག་སྐྱེས་པའི་ཡེ་ཤེས་ནི་ཆོས་སོ། །དུས་ཕུན་སུམ་ཚོགས་པ་ནི། དུས་ནི་བསམ་གྱིས་མི་ཁྱབ་དུས། །ཞེས་པས་བསྟན་ཏེ། ཡེ་ཤེས་དེ་ཉམས་སུ་མྱོང་བའི་ཚེ་དུས་འདི་ཞེས་མཚོན་དུ་མེད་པས་ན་བསམ་གྱིས་མི་ཁྱབ་པའི་དུས་སོ། །ནཱ་མ་དེ་མིང་ཞེས་བྱའོ། །ཞེས་པ། ཕུན་སུམ་ཚོགས་པ་ལྔ་ཀའི་མཇུག་སྡུད་དེ་སྟོན་པ་ ― MLP018_Page_0111 ―
[མ་དཔེ་གཟིགས་ན་འདིར་གནོན།]
ཕུན་སུམ་ཚོགས་པ་ཞེས་བྱའོ། །འཁོར་ཕུན་སུམ་ཚོགས་པ་ཞེས་བྱའོ། །ཞེས་པ་ལ་སོགས་པའི་དོན་ནོ། །གཉིས་པ་ཐུན་མོང་གི་གླེང་གཞི་ནི། ལོངས་སྐུའི་གླེང་གཞིའམ་རྒྱུད་འབྱུང་བ་ཁྱད་པར་ཅན་གྱི་གླེང་གཞི་དང་། ཞར་བྱུང་གདུལ་བྱ་དགོས་ཆེད་དུ་བསྟན་པ་ཁྲོ་བོའ་གླེང་གཞི་དང་། སྤྲུལ་སྐུ་འགྲོ་བ་འདུལ་བའི་གླེང་གཞིའམ་བསྟན་པ་སྤྱིའི་གླེང་གཞིར་གྲགས་པ་དང་གསུམ་ལས། དང་པོ་ནི། འདི་ཉིད་ཀྱི་ལེའུ་དང་པོས་སྟོན་ཏེ། དེ་ལའང་ཕུན་སུམ་ཚོགས་པ་ལྔ་ཡོད་པ་ལས། དང་པོ་ཆོས་ཕུན་སུམ་ཚོགས་པ་ནི། འདི་སྐད་བཤད་པ་ཞེས་པས་བསྟན། དེ་ལ་འདི་སྐད་བཤད་རྒྱུ་ནི་རྒྱུད་དོན་མ་ལུས་པ་མཚོན་པའི་ཚིག་ཕྲད་དེ། རྒྱུད་དབུ་ཞབས་ཀྱི་དོན་ཐམས་ཅད་མཚོན་པའོ། །དེ་ལ་བཤད་ཅེས་པ་ནི། ངས་སྔར་འོག་མིན་དུ་བཤད་པ་ཉིད་ཡང་འདིར་བཤད་པར་བྱའོ། །ཞེས་སྟོན་འཁོར་དགོངས་པ་ཐ་མི་དད་པས་བཤད་པ་སྟེ། བདེ་འདུས་རྩ་རྒྱུད་ལས། ང་ནི་ཆེ་བའི་རྒྱལ་པོ་སྟེ། །འཆད་དང་ཉན་པའང་ང་ཉིད་ཡིན། །ཞེས་དང་། བརྟག་གཉིས་ལས། འཆད་པ་པོ་ང་ཆོས་ཀྱང་ང་། །རང་གི་ཚོགས་ལྡན་ཉན་པའང་ང་། །ཞེས་གསུངས་ཤིང་། ཉི་འོད་སེང་གེའི་རྒྱ་ཆེར་འགྲེལ་ལས་ཀྱང་། བཤད་ཅེས་པས་ནི་འཁོར་དང་སྟོན་པ་གཉིས་སུ་མེད་པར་བསྟན་པ་ཡིན་ལ། ཞེས་གསུངས་པའི་ཕྱིར་རོ། །གཉིས་པ་དུས་ཕུན་སུམ་ཚོགས་པ་ནི། དུས་ན་ཞེས་པས་བསྟན། དེའི་དོན་ནི་ལོངས་སྐུའི་གླེང་གཞི་ཡིན་པས་དུས་རེ་འགའ་བ་ཞིག་གི་ངེས་པ་ལས་འདས་པའི་ཕྱིར་དུས་རྟག་པ་རྒྱུན་གྱི་འཁོར་ལོར་ཆོས་གསུངས་པའི་དུས་ཡིན་པའི་ཕྱིར་རོ། །འདི་ལ་ཁ་ཅིག་ན་རེ། མདོ་རྒྱུད་གཞན་རྣམས་སུ་འདི་སྐད་བདག་གིས་ཐོས་པའི་དུས་གཅིག་ན། ཞེས་འབྱུང་བ་ལས། འདིར་དེ་ལྟར་མ་སྨོས་པའི་ཕྱིར་གླེང་གཞི་ལོག་པས་བཀའ་ཡང་དག་པ་མ་ཡིན་ནོ་ཟེར། དེའི་ལན་ལ་གཞན་ལན་ལ་དཔྱད་པ་དང་། རང་ལན་གདབ་པ་གཉིས་ལས། དང་པོ་ནི། ལྷ་རྗེ་གླན་ཤཱཀ་བཟང་ན་རེ། བཤད་ཐོས་གཉིས་ཚིག་མི་མཐུན་ཡང་སྟོན་པས་འཁོར་ལ་བཤད་པ་དང་། འཁོར་གྱིས་སྟོན་པ་ལས་ཐོས་པ་དོན་མཐུན་གསུངས་ནའང་། ཐོས་པ་ལ་བཤད་ ― MLP018_Page_0112 ―
[མ་དཔེ་གཟིགས་ན་འདིར་གནོན།]
པས་མ་ཁྱབ་པའི་ཕྱིར་ལེགས་པར་མི་སེམས་གསུངས། ཡང་ལྷ་རྗེ་མདའ་ཏིག་ན་རེ། ཐོས་པ་ལ་མ་རྟོགས་ལོག་རྟོག་ཐེ་ཚོམ་གྱི་སྐྱོན་གསུམ་སྲིད་པ་ལས། འདིར་བཤད་ཅེས་པ་སྟོན་འཁོར་དགོངས་པ་གཉིས་སུ་མེད་པས་ཉིད་ལ་ཉིད་ཀྱིས་བཤད་པའི་ཕྱིར་སྔར་གྱི་སྐྱོན་གསུམ་རྣམ་པར་བཅད་པའོ་གསུངས་ཀྱང་མི་འཐད་དེ། བཤད་ཙམ་ལ་སྐྱོན་གསུམ་དང་བྲལ་བས་མ་ཁྱབ་ཅིང་། དགོངས་པ་གཉིས་སུ་མེད་པ་ལ་ཉིད་ལས་ཉིད་ཐོས་པའང་འགལ་བའི་ཕྱིར་རོ་གསུངས། ཡང་ཁྱེད་བླ་མ་དང་རྗེ་སྒྲོ་ཕུག་གི་བཞེད་པ་ནི། སྐུ་གཉིས་ཀྱིས་བསྟན་པའི་ཁྱད་པར་ཡིན་ཏེ། ལོངས་སྐུས་ཚིག་ཏུ་མི་གསུངས་པས་རྣ་བས་ཐོས་སུ་མེད་པའི་ཕྱིར་བཤད་ཅེས་དང་། སྤྲུལ་སྐུས་ཚིག་ཏུ་གསུངས་པའི་ཕྱིར་ཐོས་བྱ་བར་འོང་བ་ཡིན་གསུངས་ནའང་། ལོངས་སྐུས་གསུངས་པའི་རྒྱུད་ཐམས་ཅད་ལ་བཤད་ཅེས་འོང་བས་ཁྱབ་ན། ལོངས་སྐུས་གསུངས་པའི་རྒྱུད་ཐམས་ཅད་དུ་དེ་ལྟར་འབྱུང་རིགས་པ་ལས་མ་བྱུང་བའི་ཕྱིར་འཐད་པར་མ་གོ་གསུངས། ཡང་ལྷ་རྗེ་དྲི་ངས་པ་ན་རེ། སྟོན་པས་དགོངས་པ་བརྡའི་བཤད་པ་བསྡུ་བ་པོས་མ་ཕྲི་མ་བསྣན་པར་བཤད་པ་བཞེད་པ་འདི་ལ་འགལ་བ་རང་མ་མཐོང་ངོ་གསུངས། གཉིས་པ་རང་ལན་གདབ་པ་ནི། བཤད་ཅེས་པ་གོང་དུ་སྨོས་པ་ལྟར་སྟོན་འཁོར་དགོངས་པ་དབྱེར་མེད་ཀྱི་ཕྱོགས་བཟུང་ནས་བཤད་པ་ཡིན་ལ། དུས་ན་ཞེས་པའང་ལོངས་སྐུ་ངེས་པ་ལྔ་ལྡན་གྱི་དུས་ཡིན་པས་སྐྱོན་མེད་དོ་གསུངས། གཞན་དུ་ཐུན་མོང་བའི་ཐེག་པར་གླེང་གཞིའི་སྐབས་སུ་བདག་གིས་ཐོས་པ་ཞེས་འབྱུང་བ་ནི། བདག་ཉིད་ཀྱིས་སྟོན་པ་ལས་མངོན་སུམ་དུ་ཐོས་ཀྱི་གཞན་ལས་བརྒྱུད་དེ་ཐོས་པ་ནི་མ་ཡིན་ནོ། །ཞེས་ཆོས་ཁུངས་བཙུན་པར་འཇོག་པ་དང་། ཡང་ཚིག་ཐོས་པ་ཙམ་དུ་ཟད་ཀྱིས་དོན་རྟོགས་པ་ནི་མ་ཡིན་ནོ་ཞེས་བཀའི་དོན་རྟོགས་དཀའ་བ་ལ་འཇོག་པ་དང་། དུས་གཅིག་ན་ཞེས་འབྱུང་བ་ཡང་། འདི་ནི་སྟོན་པས་དུས་ལན་གཅིག་རང་གསུངས་ཀྱི་གཞན་དུ་མ་གསུངས་ཞེས་བཀའི་དོན་རྙེད་དཀའ་བ་ལ་འཇོག་པ་དང་། ཡང་དུས་གཅིག་གི་ཚེ་འདི་ཐོས་ཀྱི་གཞན་དུ་གཞན་དག་ཀྱང་ཐོས་སོ་ཞེས་སྡུད་པ་པོ་རང་ཉིད་ཐོས་པ་ཆེ་བ་དང་། ཡང་དུས་ལན་གཅིག་གིས་ཁོང་དུ་ཆུད་པར་ཤེས་རབ་ ― MLP018_Page_0113 ―
[མ་དཔེ་གཟིགས་ན་འདིར་གནོན།]
ཕུལ་དུ་བྱུང་བར་བསྟན་པ་ཡང་ཡིན་ནོ་གསུངས། གཞན་ཡང་འདི་སྐད་བདག་གིས་ཐོས་པ་མ་སྨོས་པས་བཀའ་ཡང་དག་པ་མ་ཡིན་པར་འགྱུར་ན། བདེ་མཆོག་རྩ་རྒྱུད་དང་། འཇམ་དཔལ་མཚན་བརྗོད་སོགས་ཀྱང་དེར་ཐལ་ཏེ། དེ་ལྟར་མ་སྨོས་པའི་ཕྱིར་ཏེ། དེ་ནས་གསང་བ་བཤད་པར་བྱ། །ཞེས་དང་། དེ་ནས་དཔལ་ལྡན་རྡོ་རྗེ་འཆང་། །ཞེས་གསུངས་པའི་ཕྱིར་རོ། །དེས་ན་མངོན་རྟོགས་རྒྱན་གྱི་འགྲེལ་པ་ལས། འདི་ནི་རྣམ་པར་བཞག་པ་གཞན་ཁོ་ན་ཡིན་པས། ཐེག་པ་གཞན་གྱི་ལུགས་ལ་བརྟེན་ནས་ནམ་དུའང་སུན་འབྱིན་བརྗོད་པར་མི་བྱའོ། །ཞེས་གསུངས་པ་ལྟར་ཡིན་གསུངས། གསུམ་པ་སྟོན་པ་ཕུན་སུམ་ཚོགས་པ་ལའང་། སྟོན་པའི་རང་བཞིན་དང་། སྟོན་པའི་ངོ་བོ་བཤད་པ་གཉིས་ལས། དང་པོ་ནི། དེ་བཞིན་གཤེགས་པ་ཡང་དག་པ་སོགས་ནས། དབྱེར་མེད་པའི་རང་བཞིན་ཏེ། ཞེས་པའི་བར་གྱིས་བསྟན། དེའི་དོན་ནི་དེ་བཞིན་ཉིད་དུ་ནར་སོན་པའི་རང་བཞིན། ཡོན་ཏན་མ་བཙལ་བར་ལྷུན་གྱིས་གྲུབ་པའི་རང་བཞིན། ཡེ་ཤེས་མཐའ་དབུས་དང་བྲལ་བའི་རང་བཞིན། འབྲས་བུ་ལ་མངའ་མཛད་ཀྱང་ངོ་བོ་བསྟན་དུ་མེད་པའི་རང་བཞིན། མཉམ་པ་ཉིད་མངོན་དུ་མཛད་ཀྱང་སྤྱོད་ཡུལ་དང་བྲལ་བའི་རང་བཞིན། གཅིག་དང་དུ་མ་ལས་གྲོལ་བའི་རང་བཞིན། དུས་གསུམ་འདུ་འབྲལ་མེད་པའི་རང་བཞིན་དང་བདུན་ལས། དང་པོ་ནི། དེ་བཞིན་གཤེགས་པ་ཞེས་པས་བསྟན་ཏེ། དེ་ཡང་སྤྱིར་ཏ་ཐཱ་ག་ཏའི་སྒྲ་ལས། ཏ་ཐཱ་ནི་དེ་བཞིན། ག་ཏ་ནི་གཤེགས་པའམ། བྱོན་པའམ། མཁྱེན་པའམ། གསུངས་པ་ལ་བྱ་སྟེ། སྔོན་གྱི་རྒྱལ་བ་རྣམས་ཀྱིས་ཇི་ལྟར་བྱང་ཆུབ་ཀྱི་སྤྱོད་པའི་སྒོ་ནས་གཤེགས་པ་དེ་ལྟར་ལམ་མཐུན་པས་གཤེགས་ཤིང་བྱོན་པ་དང་། དེ་བཞིན་ཉིད་ཇི་ལྟ་བ་བཞིན་མཁྱེན་ཅིང་གསུངས་པ་དང་། འདོད་ཡོན་གྱི་སྣང་བ་ཇི་ལྟར་སྣང་བ་དེ་བཞིན་ཐབས་ཀྱི་སྤྱོད་པས་གཤེགས་པ་དང་། སེམས་ཅན་སྐྱེ་བ་རྣམ་པ་བཞིའི་ཚུལ་གྱིས་སྐྱེ་བ་ལས། དེ་དག་གི་བསམ་པ་དང་མཐུན་པར་མངལ་ནས་སྐྱེ་བ་དེ་བཞིན་དུ་གཤེགས་པ་སོགས་ལ་བཤད་ཀྱང་། འདིར་ཆོས་ཉིད་དེ་བཞིན་ཉིད་ཀྱི་དོན་སྒྲིབ་བྱེད་ཀྱི་ཞེན་པ་དང་བྲལ་བས་ནར་ ― MLP018_Page_0114 ―
[མ་དཔེ་གཟིགས་ན་འདིར་གནོན།]
སོན་ཞིང་། དེའི་ངོ་བོ་མངོན་དུ་གྱུར་པས་ན་གཤེགས་པ་ཞེས་བརྗོད་པ་ཡིན་ཏེ། རྡོ་རྗེ་ལས། དེ་བཞིན་ཉིད་དུ་གཤེགས་པ་ཡང་། །སྣ་ཚོགས་ཞེན་ལས་གྲོལ་བར་བཤད། །ཅེས་དང་། རྒྱུད་ཕྱི་མ་ལས། གང་ཕྱིར་དེ་བཞིན་ཉིད་དུ་གཤེགས། །དེ་བཞིན་གཤེགས་པ་མངོན་པར་བརྗོད། །ཅེས་གསུངས་སོ། །གཉིས་པ་ཡོན་ཏན་མ་བཙལ་བར་ལྷུན་གྱིས་གྲུབ་པའི་རང་བཞིན་ནི། ཡང་དག་པར་རྫོགས་པ་ཞེས་པ་འདིས་བསྟན། རང་བྱུང་གི་ཡེ་ཤེས་ལ་སྤང་བྱ་མ་གྲུབ་པས་མ་ནོར། མི་འགྱུར་མི་བསླུ་བས་ཡང་དག་པ་དང་། ཆོས་ཉིད་དེའི་ཀློང་ན་འབྲས་བུ་སྐུ་དང་ཡེ་ཤེས་ཀྱི་ཡོན་ཏན་རྫོགས་པར་རང་སྣང་བའི་ཕྱིར་སྤང་ཐོབ་མེད་པའི་དོན་ཡིན་པའི་ཕྱིར་གསུངས། གསུམ་པ་ཡེ་ཤེས་མཐའ་དབུས་དང་བྲལ་བའི་རང་བཞིན་ནི། སངས་རྒྱས་ཞེས་པ་འདིས་བསྟན། དེའི་དོན་ནི། སྒྲིབ་བྲལ་གྱི་ཡེ་ཤེས་མཐའ་དབུས་མེད་པར་བརྡལ་བའི་རང་བཞིན་ཡིན་པའི་ཕྱིར། བུདྡྷའི་སྒྲ་ལས། གཉིད་སད་པ་ལྟར་སངས་པ་དང་། པདྨ་ཁ་བྱེ་བ་ལྟར་རྒྱས་པའི་དོན་གཉིས་ཀ་ལ་འཇུག་པས། སྐྱབས་འགྲོ་བདུན་ཅུ་པ་ལས། མ་རིག་གཉིད་ལས་སངས་ཕྱིར་དང་། །ཤེས་བྱ་ལ་ཡང་བློ་རྒྱས་ཕྱིར། །ཞེས་གསུངས་པའི་ཕྱིར་རོ། །འདིར་མི་མཐུན་པ་དང་སྙིང་པོ་དབྱེར་མེད་ཀྱང་དོན་ཇི་བཞིན་པ་མངོན་དུ་བྱས་པའི་སྟོབས་ཀྱིས་སྤང་ཐོབ་མེད་པའི་ཡོན་ཏན་མཐར་ཐུག་པ་སྟེ། ལེ་ལག་ལས། མ་རིག་པ་ཉིད་ཡེ་ཤེས་གསལ། །ཉོན་མོངས་སྡུག་བསྔལ་བྱང་ཆུབ་མཆོག །ཅེས་གསུངས་པའི་ཕྱིར་རོ། །བཞི་པ་འབྲས་བུ་ལ་མངའ་མཛད་ཀྱང་ངོ་བོ་བསྟན་དུ་མེད་པའི་རང་བཞིན་ནི། བཅོམ་ལྡན་འདས་ཞེས་པས་བསྟན། སྒྲིབ་པའི་ཆ་ཤས་ཕྲ་མོ་ཙམ་ཡང་མི་གནས་པས་བདུད་བཞི་བཅོམ་ཞིང་། ཆེ་བའི་ཡོན་ཏན་གྱི་འབྲས་བུ་ལ་མངའ་མཛད་ཀྱང་རང་གི་ངོ་བོ་འདི་ཞེས་བསྟན་དུ་མེད་པའི་རང་བཞིན་ཡིན་པས་ན་དེ་ལྟར་དུ་བརྗོད་པའི་ཕྱིར་ཏེ། རྡོ་རྗེ་ལས་རིམ་ལས། བདུད་བཞི་ལ་སོགས་རིག་པའི་གདེངས་ཀྱིས་བཅོམ། །སྐུ་ལྔ་ལ་སོགས་ཡོན་ཏན་བརྗོད་ལས་འདས།། རང་གི་ངོ་བོ་འདི་ཞེས་བསྟན་དུ་མེད། །ཅེས་སོ། །བདུད་བཞི་བཅོམ་ལུགས་ནི། ཉོན་མོངས་པ་ལྔ་ཉིད་མ་སྤངས་པར་ཡེ་ཤེས་ལྔའི་ངོ་བོར་རྣམ་པར་དག་པས་ན་ཉོན་མོངས་པའི་བདུད་ ― MLP018_Page_0115 ―
[མ་དཔེ་གཟིགས་ན་འདིར་གནོན།]
བཅོམ་ལ། དེ་དག་པས་ཕུང་པོ་ལྔ་ཡང་རིགས་ལྔའི་ངོ་བོར་སངས་རྒྱས་པས་ན་ཕུང་པོའི་བདུད་བཅོམ། དེའི་ཚེ་དག་པ་ལྷ་དང་མ་དག་པ་རྣམ་རྟོག་གི་འཆིང་བ་ལས་གྲོལ་བས་འདོད་ལྷའི་བར་ཆད་ཀྱིས་མི་ཚུགས་ཏེ་ལྷའི་བུའི་བདུད་བཅོམ་ཞིང་། སེམས་ཉིད་སྐྱེ་འཆི་ལས་གྲོལ་བས་འཆི་བདག་གི་བདུད་ཀྱང་བཅོམ་སྟེ། རྒྱས་པ་ལས། ཉོན་མོངས་པ་ཉིད་རྣམ་པར་དག ། ཕུང་པོ་ལྔ་ཉིད་མངོན་སངས་རྒྱས། །བདག་ཉིད་ལྷ་ཡི་དཀྱིལ་འཁོར་ཏེ། །སྐྱེ་ཤི་མེད་པའི་གཡུང་དྲུང་གནས། །ཞེས་གསུངས་སོ། །ལྔ་པ་མཉམ་པ་ཉིད་མངོན་དུ་མཛད་ཀྱང་སྤྱོད་ཡུལ་དང་བྲལ་བའི་རང་བཞིན་ནི། ལོངས་སྤྱོད་ཆེན་པོ་ཞེས་པས་བསྟན། འཁོར་འདས་མཉམ་པ་ཉིད་ཀྱི་དོན་མངོན་དུ་མཛད་ཀྱང་འཁོར་འདས་ཀྱི་ཆོས་ཐམས་ཅད་ལ་སྤྱད་བྱ་སྤྱོད་བྱེད་དུ་འཛིན་པའི་ཞེན་པ་དང་བྲལ་བའི་སྒོ་ནས་ལོངས་སྤྱད་པས་སྤྱོད་ཡུལ་དང་བྲལ་བའི་རང་བཞིན་ཞེས་བྱ་བ་ཡིན། དྲུག་པ་གཅིག་དང་དུ་མ་ལས་གྲོལ་བའི་རང་བཞིན་ནི། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་ཉིད། ཅེས་པས་བསྟན། ཕྱོགས་བཅུ་དང་དུས་བཞིས་བསྡུས་པའི་དེ་བཞིན་གཤེགས་པ་ཐམས་ཅད་ཀྱི་ཆེ་བའི་ཡོན་ཏན་གྱི་རྟེན་བྱེད་པའི་ཆ་ནས་སྐུ་ལྔ་དང་། ཆོས་བརྡ་སྤྲོད་པའི་ཆ་ནས་གསུང་ལྔ། མི་གཡོ་བའི་ངོས་ནས་ཐུགས་ལྔ། དགོས་འདོད་འབྱུང་བའི་ངོས་ནས་ཡོན་ཏན་ལྔ། གཞན་དོན་མཛད་པའི་ངོས་ནས་ཕྲིན་ལས་ལྔ་སྟེ། འབྲས་ཆོས་ཉེར་ལྔ་སྣང་བས་གཅིག་གི་རང་བཞིན་དང་བྲལ་ཞིང་། འབྲས་ཆོས་ཉེར་ལྔ་པོ་དེ་རང་བྱུང་གི་ཡེ་ཤེས་སུ་འདུ་ཞིང་། རིགས་ལྔ་ཡང་དྲུག་པར་འདུས་པས་ན་དུ་མ་དང་བྲལ་བའི་ཕྱིར་བསམ་གྱིས་མི་ཁྱབ་པའི་གནས་ཡིན་པས་སོ་གསུངས། བདུན་པ་དུས་གསུམ་འདུ་བྲལ་མེད་པའི་རང་བཞིན་ནི། མ་ལུས་མི་ལུས་ལུས་པ་མེད་པ་ཐམས་ཅད་དང་སོ་སོ་མ་ཡིན་ཐ་མི་དད་དབྱེར་མེད་པའི་རང་བཞིན་ཏེ། ཞེས་པས་བསྟན། རྒྱལ་བ་རིགས་དྲུག་པ་ཀུན་ཏུ་བཟང་པོ་དེ་ཁམས་གསུམ་དང་དུས་གསུམ་གྱིས་བསྡུས་པའི་འཁོར་བའི་ཆོས་ཐམས་ཅད་དང་སོ་སོ་མ་ཡིན་ཐ་མི་དད་པར་གནས་པ་སྟེ། ཀུན་རྫོབ་ཏུ་རིག་པ་སྒྱུ་མའི་སྣང་བརྙན་ཡིན་པས་སོ་སོ་མ་ཡིན། དོན་དམ་ ― MLP018_Page_0116 ―
[མ་དཔེ་གཟིགས་ན་འདིར་གནོན།]
པར་སེམས་ཉིད་དུ་མ་སྐྱེས་པས་ཐ་མི་དད། བདེན་པ་གཉིས་ཀྱི་ཐ་སྙད་ལས་ཀྱང་འདས་པས་ན་དབྱེར་མེད་པའི་རང་བཞིན་ཅན་ཡིན་ཏེ། རྒྱས་པ་ལས། སོ་སོ་རང་བཞིན་ངེས་རྙེད་ན། །ཡང་དག་ལམ་གྱིས་བཅོས་སུ་མེད། །ཡེ་ནས་ངོ་བོ་ཡོད་མིན་ན། །ཉོན་མོངས་སྤངས་ཤིང་བྱང་སྒྲུབ་མེད། །ཅེས་པ་ལ་སོགས་པ་རྣམས་ཀྱིས་གནོད་པའི་ཕྱིར་རོ་གསུངས། དེ་ལྟར་བདུན་དུ་བཤད་པ་དེ་ནི་སྤར་ཁབ་ཀྱི་ལུགས་ལྟར་འཐད་ཕྱོགས་སུ་བཀོད་པ་ཡིན་ལ། སློབ་དཔོན་བི་མ་ལས་ཡང་དག་པ་དང་རྫོགས་པ་གཉིས་སོ་སོར་ཕྱེ་ནས་བརྒྱད་དུ་བཤད་དེ། ཁོག་གཞུང་ལས། སྟོན་པའི་རང་བཞིན་བརྒྱད་དང་ལྡན། །བདག་ཉིད་བྱེད་པོ་ཀུན་ཏུ་བཟང་། །ཞེས་སོ། །ཡང་འགྲེལ་ཆུང་དུ། བྱང་ཆུབ་མཆོག་གི་ངོ་བོ་དང་། །ཆོས་རྣམས་རོལ་པར་ལོངས་སྤྱོད་དང་། །ཕྱོགས་དུས་བདེ་གཤེགས་བདག་པོ་དང་། །ཆོས་སོ་ཅོག་དང་དབྱེར་མེད་པའོ། །ཞེས་སྟོན་པའི་རང་བཞིན་བཞིར་བཤད་ཀྱང་འདིར་གོང་དུ་སྨོས་པ་ལྟར་བཟུང་ངོ་གསུངས། གཉིས་པ་སྟོན་པའི་ངོ་བོ་བཤད་པ་ནི། སྐུ་མདུན་དང་རྒྱབ་མེད་པ་ཐམས་ཅད་དུ་སོགས་ནས། སྐུ་གསུང་ཐུགས་བསམ་གྱིས་མི་ཁྱབ་པའི་དབུ་གསུམ་དང་ལྡན་པ། ཞེས་པའི་བར་གྱིས་བསྟན། སྔར་སྨོས་པའི་རང་བཞིན་དེ་ཉིད་གདུལ་བྱ་ལ་སྐུ་གསུང་ཐུགས་ཀྱི་མཚན་མ་སྣ་ཚོགས་པར་སྣང་བའི་རྣམ་འགྱུར་གྱི་ཆ་ལ་ངོ་བོ་ཞེས་བཤད་དེ། དེ་ལ་སྟོན་པ་སྐུ་གསུམ་གྱི་བདག་ཉིད་ཡིན་པའི་དོན་རྟགས། ཐབས་ཤེས་གཉིས་སུ་མེད་པའི་དོན་རྟགས། ཡེ་ཤེས་དྲུག་དང་ལྡན་པའི་དོན་རྟགས། རྣམ་ཐར་གསུམ་དང་ལྡན་པའི་དོན་རྟགས་དང་བཞི་ལས། དང་པོ་ལའང་། ཆོས་སྐུའི་བདག་ཉིད་ཡིན་པའི་དོན་རྟགས་ནི། སྐུ་མདུན་དང་རྒྱབ་མེད་པའི་ཐམས་ཅད་དུ་ཞལ་ཐལ་ལེ་བར་གསལ་ཞིང་ཞེས་པས་བསྟན། བདེ་གཤེགས་རང་སྣང་ལ་སྐུ་མདུན་དང་རྒྱབ་མ་གྲུབ་ཅིང་གདུལ་བྱའི་སྣང་བ་ལ་རིས་མེད་པས་ཐམས་ཅད་དུ་ཞལ་ཐལ་ལེ་བར་གསལ་ཞིང་གཟུགས་སྐུའི་ཡོན་ཏན་མི་འགགས་པས་དེ་དང་དེ་ཡེ་ཤེས་ཀྱི་སྐུ་ཡིན་པའི་ཕྱིར་ཏེ། དེ་ལྟར་ཡང་སེང་གེ་རྩལ་རྫོགས་ལས། ཀུན་ཏུ་བཟང་པོའི་ཞལ་ནི་ཕྱོགས་བཅུར་གསལ། །ཀུན་གཟིགས་ཀུན་བཟང་སྐུ་ལ་མདུན་རྒྱབ་མེད། །ཕྱོགས་བཅུ་གང་བར་ ― MLP018_Page_0117 ―
[མ་དཔེ་གཟིགས་ན་འདིར་གནོན།]
སྤྱན་གྱིས་རྣམ་པར་གཟིགས། །ཞེས་གསུངས་པའི་ཕྱིར་རོ། །གཉིས་པ་ལོངས་སྐུའི་བདག་ཉིད་ཡིན་པའི་དོན་རྟགས་ནི། མཚན་དང་དཔེ་བྱད་དང་ལྡན་པ་ཞེས་པས་བསྟན། དེ་ལའང་ཐུན་མོང་དང་ཁྱད་པར་གྱི་མཚན་དཔེ་གཉིས་ལས། དང་པོ་ནི། ཕྱག་ཞབས་འཁོར་ལོས་མཚན་དང་རུས་སྦལ་ཞབས། །སོགས་མཚན་སོ་གཉིས་དང་། ཐུབ་པའི་སེན་མོ་ཟངས་མདོག་དང་། །སོགས་དཔེ་བྱད་བརྒྱད་ཅུ་མངའ་བས་སོ། །དེ་ནི་འཁོར་ལོས་སྒྱུར་བའི་རྒྱལ་པོ་ལའང་ཕྱོགས་མཐུན་ཙམ་ཡོད་པས་ཐུན་མོང་གི་མཚན་ད པེ་ཞེས་བཤད། གཉིས་པ་ཁྱད་པར་གྱི་མཚན་ད པེ་ལའང་ཕྱི་ནང་གསང་གསུམ་ལས། དང་པོ་ཕྱིའི་མཚན་དཔེ་ནི། སྟོན་པའི་ཐུགས་མེ་ལོང་ལྟ་བུ་ལ་སོགས་པ་ཡེ་ཤེས་བཞི་པོ་རེ་རེའང་བཞི་བཞིར་ཕྱེ་བའི་ཡེ་ཤེས་བཅུ་དྲུ ག་གི་རྩལ་སེམས་དཔའ་བཅུ་དྲུག དེའི་ཡུལ་ཆོས་ཉིད་བཅུ་དྲུག་གི་རྩལ་སེམས་མ་བཅུ་དྲུག་སྟེ་མཚན་སོ་གཉིས་དང་། སེམས་དཔའ་བཅུ་དྲུག་པོར་ཡེ་ཤེས་ལྔའི་རྟགས་རིགས་ལྔས་དབུ་བརྒྱན་པའི་ལྷ་བརྒྱད་ཅུ་ནི་དཔེ་བྱད་བརྒྱད་ཅུ་སྟེ། སྤྱི་མདོ་ལས། མཚན་གྱི་མེ་ཏོག་ལ་དཔེ་བྱད་ཀྱི་འབྲས་བུས་སྤྲས་པའི་ཕྱིར་སྲས་ཀྱི་ཚོགས་ཀྱིས་ཀུན་ནས་བརྒྱན་པའོ། །ཞེས་སོ། །གཉིས་པ་ནང་གི་མཚན་དཔེ་ནི། སྤྱི་བོ་བདེ་ཆེན་གྱི་འཁོར་ལོ་རྩ་འདབ་སོ་གཉིས་ནི་མཚན་སོ་གཉིས་དང་། ལྟེ་བའི་རེ་བཞི་ལས་སྟོང་པའི་རྩ་བཞི་ཕྲི་བས་དྲུག་ཅུ། མགྲིན་པའི་བཅུ་དྲུག སྙིང་གའི་རྩ་ཆེན་བཞི་སྟེ་བརྒྱད་ཅུ་ནི་དཔེ་བྱད་བརྒྱད་ཅུར་བཤད་དེ། ཐལ་རྒྱུད་ལས། སྒྲ་དབྱངས་གསུང་གི་གནས་བཞི་ཡིས། །དབྱེ་བས་གསུམ་གསུམ་ངོས་གཉིས་དང་། །བཞི་བཅུ་གཉིས་སུ་གྱུར་པ་ཡིན། །ཞེས་སོ། །གསུམ་པ་གསང་བའི་མཚན་དཔེ་ནི། སྟོན་པ་ཡབ་ཡུམ་གཉིས་རོལ་པའི་དུས་ཀྱི་དགའ་བ་ལ་བརྩི་བ་ཡིན་ཏེ། ཡབ་ཡུམ་གཉིས་ཀྱི་དགའ་བ་བཅུ་དྲུག་བཅུ་དྲུག་ནི་མཚན་སོ་གཉིས་དང་། ཡབ་ཀྱི་དགའ་བ་རེ་རེ་ལའང་ཡེ་ཤེས་ལྔ་ལྔའི་རོ་དང་ལྡན་པ་ནི་དཔེ་བྱད་བརྒྱད་ཅུར་བཤད་པ་ཡིན་ཏེ། རྒྱ་མཚོ་ལས། ཨཱ་ལི་ཀཱ་ལི་བདེ་བ་ཉིད། །ཕན་ཚུན་མ་འདྲེས་གཅིག་ཏུ་གནས། །བཅུ་དྲུག་ངོས་གཉིས་མཚན་དང་ལྡན། །ཕྱོགས་གཅིག་ཡེ་ཤེས་ལྔ་ལྡན་པ། །བརྒྱད་ཅུའོ་བཟོད་སོགས་རྒྱུ་ལས་འཕགས། །ཞེས་སོ། ། ― MLP018_Page_0118 ―
[མ་དཔེ་གཟིགས་ན་འདིར་གནོན།]
དེ་ལ་ཁོ་ན་རེ། ནང་དང་གསང་བའི་མཚན་དཔེ་དེ་རྣམས་རྩ་ཁམས་ཀྱི་རང་བཞིན་དུ་འདུག་པ་ལ་རྒྱན་དུ་ཇི་ལྟར་འགྱུར་ཞེ་ན། ལོངས་སྤྱོད་རྫོགས་པའི་སྐུ་ལ་རྩ་ཁམས་རྣམ་པར་དག་པ་བདེ་བ་ཆེན་པོའི་རང་བཞིན་དུ་རོ་མཉམ་པ་ནི་རྒྱན་གྱི་ནང་ནས་མཛེས་བྱེད་མཆོག་ཏུ་གྱུར་པ་ཡིན་པས་དེ་ལྟར་དུ་བཤད་པ་ཡིན་གསུངས། གསུམ་པ་སྤྲུལ་སྐུའི་བདག་ཉིད་ཡིན་པའི་དོན་རྟགས་ནི། བསམ་གྱིས་མི་ཁྱབ་པ་ཐམས་ཅད་དུ་སྐུ་གསུང་ཐུགས་སྣ་ཚོགས་པར་ཀུན་ཏུ་སྣང་བ། ཞེས་པས་བསྟན། འདི་ནི་སྤྲུལ་པ་ཐམས་ཅད་ཀྱི་འབྱུང་གནས་ཡིན་པས་མཛད་པའི་སྣང་ཚུལ་རྣམ་པར་འཕྲུལ་པ་བསམ་གྱིས་མི་ཁྱབ་ཅིང་ཚད་མེད་པར་རང་སྣང་བ་སྟེ། སྡོང་པོ་བཀོད་པ་ལས། སྤུ་ཡི་རྩེ་མོ་གཅིག་ལ་ཡང་། །ཞིང་རྣམས་བྱེ་བ་བསམ་མི་ཁྱབ། །སྣ་ཚོགས་དབྱིབས་ཀྱང་ཐ་དད་དེ། །དེ་དག་འདྲེས་པར་གྱུར་པ་མེད། །ཅེས་དང་། གསང་བ་བསམ་གྱིས་མི་ཁྱབ་པའི་མདོ་ལས་ཀྱང་། ཞི་བའི་བློ་གྲོས། ནམ་མཁའ་ཇི་ཙམ་ཁྱབ་པ་དེ་སྲིད་དུ་དེ་བཞིན་གཤེགས་པའི་སྐུས་ཁྱབ་བོ། །ཞེས་སོགས་རྒྱ་ཆེར་གསུངས་སོ། །གཉིས་པ་ཐབས་ཤེས་གཉིས་སུ་མེད་པའི་དོན་རྟགས་ནི། ཐབས་དང་ཤེས་རབ་ཀྱི་ཞབས་གཉིས་མཉམ་པའི་བརྟུལ་ཞུགས་ཀྱིས་སྐྱིལ་མོ་ཀྲུང་དུ་བཞུགས་པ། ཞེས་པས་བསྟན། ཐབས་སྙིང་རྗེ་ཆེན་པོ་དང་ཤེས་རབ་སྟོང་པ་ཉིད་ཀྱི་ཡེ་ཤེས་ཀྱི་བརྡར་ཞབས་གཉིས་ཡབ་ཡུམ་གཉིས་ཀ་བཞེངས་པ་ལྟ་བུ་མ་ཡིན་པར་ཡབ་རྡོ་རྗེའི་སྐྱིལ་ཀྲུང་དང་ཡུམ་བརྟུལ་ཞུགས་ཀྱི་སྐྱིལ་ཀྲུང་དུ་མཚུངས་པར་བཞུགས་པ་སྟེ། ཐར་ལོའ་འགྱུར་ལས་ཀྱང་། ཐབས་དང་ཤེས་རབ་ཀྱི་ཞབས་གཉིས་མཚུངས་པར་སྐྱིལ་ཀྲུང་དུ་བཅིངས་ནས་སྙོམས་པར་འཇུག་ཅིང་བཞུགས་པ་ཞེས་གསུངས་པའི་ཕྱིར་གསུངས། གསུམ་པ་ཡེ་ཤེས་དྲུག་དང་ལྡན་པའི་དོན་རྟགས་ནི། ཡེ་ཤེས་དྲུག་གི་ཕྱག་ཡེ་ཤེས་རིན་པོ་ཆེའི་ཕྱག་རྒྱ་འབར་བ་ཅན། ཞེས་པས་བསྟན། ཡེ་ཤེས་ལྔ་རང་བྱུང་གི་ཡེ་ཤེས་དང་དྲུག་ལྡན་པའི་རྟགས་སུ་ཕྱག་དྲུག་དང་། དེས་འགྲོ་དོན་མཛད་པའི་རྟགས་སུ་ཕྱག་མཚན་དྲུག་འཛིན་པ་སྟེ། རིགས་ལྔ་ཡེ་ཤེས་ལྔའི་མཚན་མར་གྱུར་པའི་རྡོ་རྗེ་སོགས་ལྔ་དང་། ཆོས་ཀྱི་དབྱིངས་ཀྱི་ཕྱག་རྒྱར་དྲིལ་བུ་སྟེ་དྲུག་འཛིན་པ་སྟེ། སྒྱུ་འཕྲུལ་རོལ་པ་ཆེན་པོ་ ― MLP018_Page_0119 ―
[མ་དཔེ་གཟིགས་ན་འདིར་གནོན།]
ལས། ཡེ་ཤེས་དྲུག་གི་བདག་ཉིད་ཀྱི། །ཕྱག་རྒྱ་རིན་ཆེན་འབར་བས་མཚན། །རྡོ་རྗེ་འཁོར་ལོ་རིན་པོ་ཆེ། །དྲིལ་བུ་པདྨ་རལ་གྲི་འབར། །ཞེས་སོ། །བཞི་པ་རྣམ་ཐར་གསུམ་ཆུབ་པའི་དོན་རྟགས་ནི། སྐུ་གསུང་ཐུགས་བསམ་གྱིས་མི་ཁྱབ་པའི་དབུ་གསུམ་དང་ལྡན་པ་ཞེས་པས་བསྟན། སྐུ་སྟོང་པ་ཉིད་དང་། གསུང་མཚན་མ་མེད་པ་དང་། ཐུགས་སྨོན་པ་མེད་པ་གསུམ་ནི་བློའི་ཡུལ་ལས་འདས་པས་བསམ་གྱིས་མི་ཁྱབ་ལ། དེ་གསུམ་གྱི་མཚན་མར་དབུ་གཡས་དཀར་གཡོན་དམར་དབུས་མཐིང་གར་སྣང་བའོ། །ཞེས་གསུངས། བཞི་པ་གནས་ཕུན་སུམ་ཚོགས་པ་ལ་གཉིས་ལས། དང་པོ་གནས་ཀྱི་རང་བཞིན་ནི། འོག་མིན་གྱི་གནས་མཐའ་དང་དབུས་མེད་པ་ན། ཞེས་པས་བསྟན། དེའི་དོན་ནི། འགྲེལ་ཆུང་ལས། མཐའ་དབུས་མེད་པ་ཆོས་ཀྱི་དབྱིངས། །དེ་ནི་གནས་ཀྱི་བླ་མར་འདོད། །ཅེས་པ་ལྟར་ཡིན་ལ། དེ་ལ་དབྱེ་ན། ཆོས་དབྱིངས་དོན་གྱི་འོག་མིན། རིག་པའི་འོག་མིན། གསང་བའི་འོག་མིན། འཇིག་རྟེན་གནས་ཀྱི་འོག་མིན། དབང་ཕྱུག་ཆེན་པོའི་འོག་མིན་དང་ལྔ་ལས། དང་པོ་ནི་ཆོས་ཀྱི་དབྱིངས་ལ་གྲགས་ཏེ་དེ་ནི་སངས་རྒྱས་ཐམས་ཅད་ཀྱི་རྟེན་གནས་སམ། རྣམ་རྟོག་དང་མཚན་མ་གང་གི་ཡང་འོག་ཏུ་མ་གྱུར་པ་སྟེ། རྒྱས་པ་ལས། གཟུང་འཛིན་བྲལ་བའི་འོག་མིན་ནི། །དེ་བཞིན་གཤེགས་པ་ཀུན་གྱི་གནས། །ཞེས་སོ། །གཉིས་པ་རིག་པའི་འོག་མིན་ནི། དེ་ནི་ཆོས་ཀྱི་དབྱིངས་དེ་རྟོགས་པའི་རང་རིག་པའི་ཡེ་ཤེས་ལ་བྱ་སྟེ། གཉིས་འཛིན་གྱི་འོག་ཏུ་མ་གྱུར་པས་སོ། །གཞན་དུ་ན་ལོངས་སྐུའི་ཞིང་དང་ཆ་མཐུན་པར་ལྷག་པ་ཏིང་ངེ་འཛིན་གྱི་དཀྱིལ་འཁོར་བསྒོམ་པ་ལའང་དེ་ལྟར་དུ་གྲགས་པའི་ཕྱིར་ཏེ། རྒྱས་པ་ལས། རང་བཞིན་དཀྱིལ་འཁོར་ཇི་ལྟ་བར། །ཏིང་འཛིན་དཀྱིལ་འཁོར་བསྒོམ་པར་བྱ། །ཞེས་སོ། །གསུམ་པ་གསང་བའི་འོག་མིན་ནི། ཡུམ་གྱི་མཁའ་ལ་གྲགས་ཏེ་སྟོན་པའི་གསང་བའི་སྐུའི་བཞུགས་གནས་ཡིན་ཞིང་མཚན་མའི་རྟོག་པ་རང་རྒྱུད་པའི་འོག་ཏུ་མ་གྱུར་པ་སྟེ། རྒྱས་པ་ལས། ནུབ་ཕྱོགས་འོག་མིན་གནས་མཆོག་ཏུ། །མ་ཆགས་པདྨའི་གདན་སྟེང་ན། །དུས་གསུམ་སངས་རྒྱས་བཞུགས་པའི་གནས། །ཞེས་དང་། རྒྱུད་གཞན་ལས་ཀྱང་། རྡོ་རྗེ་ ― MLP018_Page_0120 ―
[མ་དཔེ་གཟིགས་ན་འདིར་གནོན།]
བཙུན་མོའ་བྷ་ག་ལ་བཞུགས་སོ། །ཞེས་གསུངས་པ་དེ་ཡིན་གསུངས། བཞི་པ་འཇིག་རྟེན་གནས་ཀྱི་འོག་མིན་ནི། དེ་ནི་གཟུགས་ཁམས་གནས་རིགས་བཅུ་བདུན་གྱི་ཡ་མཐའ་གཙང་མའི་རིགས་ཀྱི་ལྷ་ལྔའི་དང་པོ་སྟེ། གཟུགས་ཅན་གྱི་གནས་གཞན་གྱི་འོག་ཏུ་མ་གྱུར་པས་སོ་གསུངས། ལྔ་པ་དབང་ཕྱུག་ཆེན་པོའི་འོག་མིན་ནི། སྐབས་འདིར་བསྟན་གྱི་ལོངས་སྐུའི་བཞུགས་གནས་སུ་གྱུར་པའི་འོག་མིན་ཆེན་པོ་སྟེ། སྒྱུ་འཕྲུལ་རྡོ་རྗེ་ལས། གཙང་མའི་རིགས་དག་རྣམ་སྤངས་པའི། །འོག་མིན་ཆེན་པོའི་གནས་མཆོག་ན། །རིགས་བདག་ཕྱག་རྒྱ་ལྷུན་གྲུབ་སྐུ། །གཅིག་དང་དུ་མ་རྣམ་སྤངས་པ། །སངས་རྒྱས་ཀུན་གྱི་གཟུགས་སྤྱི་སྟེ། །གདོད་ནས་ཐེག་ཆེན་མཛོད་ཡིན་ཕྱིར། །སྒྲིབ་པ་མཐའ་སྤངས་གདུལ་བྱ་ལ། །སྐད་ཅིག་གཅིག་གིས་སྣང་བར་མཛད། །ཅེས་གསུངས་པའི་ཕྱིར་རོ་གསུངས། དེ་ཡང་སངས་རྒྱས་ཀྱི་ཞིང་ནི་རང་ཉིད་གང་ན་གནས་པའི་རང་སྣང་ཡིན་པས་མ་དག་པའི་ཞིང་སྤངས་པའི་ཕ་རོ ལ་ན་དག་པའི་ཞིང་གཞན་ཞིག་བློས་བཙལ་དུ་མེད་པའི་ཕྱིར་ཏེ། རྒྱས་པ་ལས། ཡང་དག་ཤེས་པའི་རང་རིག་བློ་མེད་ན། །བདེ་གཤེགས་ཞིང་ཡང་ངན་སོང་གནས་སུ་མཐོང་། །ཐེག་མཆོག་མཉམ་པའི་དོན་ཉིད་རྟོགས་པ་ན། །ངན་སོང་གནས་ཀྱང་འོག་མིན་དགའ་ལྡན་གནས། །ཞེས་དང་། སྡོང་པོ་བཀོད་པ་ལས། སྤུ་ཡི་རྩེ་མོ་གཅིག་ལ་ཡང་། །ཞིང་རྣམས་བྱེ་བ་བསམ་མི་ཁྱབ། །སྣ་ཚོགས་དབྱིབས་ཀྱང་ཐ་དད་དེ། །དེ་དག་འདྲེས་པར་གྱུར་པ་མེད། །ཅེས་དང་། ཕལ་པོ་ཆེའི་མདོ་ལས་ཀྱང་། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །ཞེས་གསུངས་པ་ལྟར་དོན་ལ་ནམ་མཁས་གར་ཁྱབ་ཏུ་སངས་རྒྱས་ཀྱི་སྐུ་དང་ཕྲིན་ལས་ཀྱིས་ཁྱབ་ལ། ཤཱཀྱ་ཐུབ་པའི་ཞིང་འདི་ཉིད་ཀྱང་རང་མཚན་པར་མ་གྲུབ་སྟེ། འདི་ལྟར་དྲི་མ་མེད་པར་གྲགས་པའི་མདོ་ལས། བཙུན་པ་ཤཱ་རིའི་བུས་སྨྲས་པ། བདག་གིས་ནི་ས་ཆེན་པོ་འདི་མཐོ་དམན་དང་། གཡང་ས་དང་། ལྗན་ལྗིན་གྱིས་གང་བར་མཐོང་ངོ་། །ཞེས་ཟེར་ཞིང་། སངས་རྒྱས་མྱ་ངན་མེད་པའི་ཞིང་ནས་འོངས་པའི་ཚངས་པ་རལ་པ་ཅན་གྱིས་སྨྲས་པ། བདག་གིས་ནི་བཅོམ་ལྡན་འདས་ཤཱཀྱ་ཐུབ་པའི་ཞིང་འདི་ཉིད་གཞན་འཕྲུལ་དབང་བྱེད་ཀྱི་ལྷའི་གནས་ཀྱི་ ― MLP018_Page_0121 ―
[མ་དཔེ་གཟིགས་ན་འདིར་གནོན།]
བཀོད་པ་ཕུན་སུམ་ཚོགས་པ་བཞིན་དུ་ཡོངས་སུ་དག་པར་མཐོང་ངོ་ཞེས་ཟེར། དེ་ནས་བཅོམ་ལྡན་འདས་ཀྱིས་འཁོར་གྱི་དཀྱིལ་འཁོར་རྣམས་ལ་སངས་རྒྱས་ཀྱི་ཞིང་འདིའི་རང་བཞིན་བསྟན་པར་མཛད་པས། ཐམས་ཅད་ཀྱིས་ཤར་ཕྱོགས་ཀྱི་སངས་རྒྱས་རིན་པོ་ཆེའི་རྒྱན་བཀོད་པའི་ཞིང་ཁམས་བཞིན་ཡོངས་སུ་དག་པར་མཐོང་བར་གྱུར་པ་དེའི་ཚེ་བཅོམ་ལྡན་འདས་ཀྱིས་བཀའ་སྩལ་པ། ངའི་སངས་རྒྱས་ཀྱི་ཞིང་ནི་རྟག་ཏུ་འདི་འདྲ་སྟེ་ཁྱེད་རྣམས་ཀྱིས་མ་མཐོང་ངོ་། །ཞེས་གསུངས་པ་ལྟར་རོ། །གཉིས་པ་གནས་ཀྱི་ངོ་བོ་ནི། གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལ་ཞེས་པ་ནས་གོས་པ་མེད་པ་པདྨ་རིན་པོ་ཆེའི་གདན་ལ། ཞེས་པའི་བར་གྱིས་བསྟན། དེའི་དོན་ནི་དབྱིངས་དང་ཡེ་ཤེས་དབྱེར་མི་ཕྱེད་པའི་རྟགས་གཞལ་ཡས་ཁང་གི་དབྱིབས་དང་ཁ་དོག་ཏུ་རང་སྣང་བ་སྟེ། ཁོག་གཞུང་ལས། གནས་ཀྱི་རང་བཞིན་དེ་བཞིན་ཉིད། །ངོ་བོ་འོག་མིན་གཞལ་ཡས་ཁང་། །ཞེས་གསུངས་པ་ལྟར་དེ་བཞིན་ཉིད་ཀྱི་ངང་ལས་ཡོན་ཏན་གྱི་ཁྱད་པར་རང་སྣང་བ་སྟེ། དེ་ཡང་གནས་ཀྱི་ངོ་བོའ་ཆོས་རྣམས་དབྱེ་བར་བྱ་སྟེ། འགྲེལ་ཆུང་ལས། གཞལ་ཡས་གཞི་དང་རྒྱུ་དང་རྒྱ། །དབྱིབས་དང་གློ་འབུར་རྩེ་མོ་དང་། །རྒྱན་དང་སྒོ་ཁྱུད་རྟ་བབ་དང་། །མཚན་ཉིད་གདན་གྱི་རྣམ་པ་སྟེ། །ཞེས་དོན་བཅུ་གཅིག་ལས། དང་པོ་གཞལ་ཡས་ཁང་གི་སྤྱིའི་འོག་གཞི་ནི། གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལ། ཞེས་པས་བསྟན། དེའི་དོན་ནི། སྤྱིའི་འོག་གཞི་ཡེ་ཤེས་ལྔ་མཚོན་པའི་རྟགས་རྒྱ་ཁྱོན་ཚད་མེད་པའི་འཁོར་ལོའ་རྣམ་པ་ཅན་ཏེ། བཤད་རྒྱུད་རོལ་པ་ཆེན་པོ་ལས། འཁོར་ལོ་ཆེན་པོའི་ས་གཞི་ལ། །ཁང་པ་གྲུ་བཞི་རྣམ་པར་བརྗིད། །ཅེས་སོ། །ནང་གི་འོག་གཞི་ནི། སྤགས་པ་ཞེས་པས་བསྟན་ཏེ། གཞལ་ཡས་ཁང་གི་སྒོ་དང་ཁྱམས་སོགས་ནས་ལྟེ་བའི་བར་གྱི་ནང་གི་འོག་གཞི་དེ་རིམ་པ་ལྟར་རྡོ་རྗེ་འགྲེང་བུ་རེས་སྤགས་པ་ཡིན་ཏེ་ཐེག་པ་འོག་མ་ནས་འདིར་འཕར་བའི་རྟགས་ཡིན་པའི་ཕྱིར་གསུངས། གཉིས་པ་རྒྱུ་ནི། ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་། ཞེས་པས་བསྟན། གདུལ་བྱའི་རེ་བ་སྐོང་བའི་རྟགས་སུ་རྒྱུ་རིན་པོ་ཆེ་ལས་གྲུབ་པའི་ཡེ་ཤེས་ཉིད་དབྱིབས་དང་ཁ་དོག་ཏུ་རང་ ― MLP018_Page_0122 ―
[མ་དཔེ་གཟིགས་ན་འདིར་གནོན།]
སྣང་བས་སོ་གསུངས། གསུམ་པ་རྒྱ་ཚད་ནི། རྒྱ་ཕྱོགས་བཅུར་ཡོངས་སུ་མ་ཆད་པ། ཞེས་པས་བསྟན། ཕྱོགས་ཀུན་ཏུ་ཡོངས་སུ་མ་ཆད་པ་ཆོས་དབྱིངས་མཐའ་ཀླས་པར་ཁྱབ་པར་རང་སྣང་བའི་ཕྱིར་གསུངས། བཞི་པ་དབྱིབས་ནི། ཡོན་ཏན་དཔག་ཏུ་མེད་པ་རྒྱས་པའི་ཕྱིར་གྲུ་བཞིར་གྱུར་པ། ཞེས་པས་བསྟན། དོན་ནི་གྲུ་བཞི་པ་ཡིན་ཏེ། དེ་བཞིན་གཤེགས་པའི་ཡོན་ཏན་གྱིས་འདིར་ཁྱབ་པ་དང་མཉམ་པ་དང་རྒྱས་པའི་དོན་ཏེ། དེ་ལྟར་ཡང་རྒྱ་ཆེར་འགྲེལ་ལས། མཉམ་པའི་ཕྱིར་དང་ཁྱབ་པའི་ཕྱིར། །རྒྱས་པའི་ཕྱིར་ནི་གྲུ་བཞིར་འགྱུར། །ཞེས་སོ། །ལྔ་པ་གློ་འབུར་ནི། ལྷག་པའི་ཡེ་ཤེས་རིན་པོ་ཆེའི་གློ་འབུར་གྱིས་མཛེས་པ། ཞེས་པས་བསྟན། དོན་ནི། གྲུ་ཆད་ལས་ཕྱིར་འཕྱར་བའི་ཕྱིར་དབྱིབས་མཁར་ཐབས་ཀྱི་འབུར་ཐབས་ལྟ་བུ་དང་། ཁ་དོག་རིགས་བཞིའི་མདོག་ཅན་གྱི་རིན་པོ་ཆེའི་གློ་འབུར་གྱིས་མཛེས་པ་ཡིན་ཏེ། ཡེ་ཤེས་རེ་རེ་ཡང་ལྷག་པའི་ཡེ་ཤེས་བཞི་བཞི་དང་ལྡན་པའི་རྟགས་སོ་གསུངས། དྲུག་པ་རྩེ་མོའ་དོན་ནི། རྩེ་མོ་ཕྱོགས་བཅུ་དུས་བཞིའི་སངས་རྒྱས་ཀྱི་དཀྱིལ་འཁོར་མ་ལུས་པ་ཐམས་ཅད་སོ་སོ་མ་ཡིན་ངོ་བོ་ཉིད་གཅིག་པའི་ཡེ་ཤེས་ཀུན་ཏུ་འཁྱིལ་བ། ཞེས་དང་། ཚད་དཔག་ཏུ་མེད་པ། ཞེས་པས་བསྟན། དོན་ནི། ཚད་དཔག་ཏུ་མེད་པ་དང་དབྱིབས་བུམ་པ་ཟླུམ་པོའི་རྣམ་པར་འཁྱིལ་བ་སྟེ། ཆོས་ཀྱི་དབྱིངས་ཀྱི་ཡེ་ཤེས་ལ་མཐར་ཐུག་པ་མེད་ཅིང་སྤྲོས་པ་དང་བྲལ་བས་སོ་གསུངས། བདུན་པ་རྒྱན་ནི། ཡེ་ཤེས་བསམ་གྱིས་མི་ཁྱབ་པའི་ཡེ་ཤེས་རིན་པོ་ཆེའི་དབྱིབས་དང་ཁ་དོག་ལ་སོགས་པ་རྣམ་པ་ཐ་དད་པའི་བྱེ་བྲག་དང་ཁྱད་པར་དུ་གྱུར་པ། ཞེས་དང་། ཡེ་ཤེས་རིན་པོ་ཆེའི་ཕྲེང་བ་དང་སོགས་ནས། མི་སྒྲིབ་པར་གསལ་བའི་རྒྱན་བསམ་གྱིས་མི་ཁྱབ་པས་བ ཀླུབས་པ། ཞེས་པས་བསྟན། དེའི་དོན་ནི། སྤྱིར་རྒྱན་གྱི་རྣམ་གྲངས་ལ་བདུན་དུ་ངེས་པ་ལས། དང་པོ་འོག་གཞིའི་རྒྱན་ནི། གཞལ་ཡས་ཁང་གི་ལྟེ་བར་ཡེ་ཤེས་ལྔ་མཚོན་པའི་འཁོར་ལོ་རྩིབས་བཞི་པའི་མཐར་ཆོས་ཉིད་མཚོན་པའི་རྡོ་རྗེའི་ར་བ་ཟླུམ་པོས་བསྐོར་བ་དང་། གཉིས་པ་ལོགས་རྒྱན་ལ་གཉིས་ལས། རིན་པོ་ཆེའི་རྒྱན་ནི། གཉིས་སུ་མེད་པའི་ཡེ་ཤེས་ཀྱི་རྩལ་སྣང་མ་འགགས་པར་རང་སྣང་བའི་རྟགས་སུ་པཉྩ་ ― MLP018_Page_0123 ―
[མ་དཔེ་གཟིགས་ན་འདིར་གནོན།]
རེ་ཁཱའི་རྩིག་པ་ལྔའི་སྟེང་ན་རིན་པོ་ཆེའི་ཕ་གུ་དང་། ཕྲེང་བ་དང་། ཆུན་འཕྱང་དང་། ཤར་བུ་དང་། མདའ་ཡབ་ལ་སོགས་པའི་རྒྱན་ཁྱད་པར་དུ་འཕགས་པ་དུ་མས་སྤྲས་པ་སྟེ། འོད་རིམ་ལས། ཡེ་ཤེས་རྩིག་སྟེང་སེང་མགོས་གཏམས། །མི་འཇིགས་ཁ་ནས་མུ་ཏིག་ཧར། །ཕ་གུ་མཛེས་པའི་བད་དང་ལྡན། །དྲྭ་བ་དྲྭ་ཕྱེད་མགུལ་འཁོར་ལྡན། །ཞེས་སོ། །འདོད་ཡོན་གྱི་རྒྱན་ནི། གཟུགས་རྡོ་རྗེ་མ་སོགས་འདོད་ཡོན་ལྔའི་ལྷ་མོས་ཕྱོགས་ཀུན་ཏུ་འཁྲིགས་པ་སྟེ། དོན་འདོད་པའི་ཡོན་ཏན་ལྔ་མ་སྤངས་རྣམ་དག་རོལ་པའི་རྒྱན་དུ་ཤར་བའི་རྟགས་སུ་དེ་ལྟར་སྣང་བ་ཡིན་ཏེ། འོད་རིམ་ལས། གཟུགས་སོགས་ལྷ་མོས་འཁྲིགས་པ་སྟེ། །སྣ་ཚོགས་མཆོད་བྱེད་རོལ་མོ་ཡིས། །བར་སྣང་ཁམས་ཀུན་སྤྲིན་ཕུང་བཞིན། །ཞེས་སོ། །གསུམ་པ་སྟེང་རྒྱན་ནི། དབུས་བུམ་པ་ཟླུམ་པོའི་སྟེང་དུ་བྲེ་མཚོན་པའི་འཕྱུར་བུའི་རྩེར། པདྨ་ལ་གནས་པའི་ཆོས་ཀྱི་འཁོར་ལོ་རིམ་པ་བཅུ་གསུམ་གྱི་སྟེང་ན་རཏྣའི་གདུགས་ཀྱིས་མཛེས་ཤིང་རྡོ་རྗེ་རིན་པོ་ཆེའི་ཏོག་གིས་མཛེས་པར་སྤྲས་པ་སྟེ། རྡོ་རྗེ་མེ་ལོང་ལས། ཆོས་ཀྱི་འཁོར་ལོས་བསྐོར་བྱས་ཤིང་། །ཉོན་མོང་ཚད་པའི་གདུང་བ་སེལ། །ཐུགས་རྗེའི་གདུགས་ཀྱི་རྩ་བ་བརྟན། །མ་ལུས་གཅིག་ཏུ་འདུས་པ་ནི། །ཏོག་སྟོང་འོད་ཟེར་ལྡན་པའོ། །ཞེས་གསུངས་པའི་ཕྱིར་དང་། རྟ་བབས་ཀྱི་རྩེར་གདུགས་ཀྱི་རྩ་བར་འཁོར་ལོ་རི་དྭགས་ཀྱིས་བསྐྱོད་པ་དང་། གཞན་ཡང་ཕྱོགས་ཀུན་ཏུ་རྔ་ཡབ་དང་བ་དན་ལ་སོགས་པས་མཛེས་པར་སྤྲས་པའི་ཕྱིར་རོ་གསུངས། བཞི་པ་སྒོ་དང་རྟ་བབས་ཀྱི་རྒྱན་ནི། སྒོ་གླང་སེང་ལ་སོགས་པའི་རྒྱན་གྱི་བྱེ་བྲག་སྣ་ཚོགས་ཀྱིས་བརྒྱན་པ་སྟེ། རྔམ་གློག་ལས། གཞལ་ཡས་དེ་ཡི་སྒོ་བཞི་ན། །གླང་སེང་གཉིས་ཀྱིས་མཛེས་པར་བརྒྱན། །རྟ་བབས་རྣམས་ཀྱི་འཁོར་ལོ་ལ། །གསེར་གྱི་དྲིལ་བུ་འབར་བ་དག ། དཀོན་མཆོག་གསུམ་གྱི་སྒྲ་དབྱངས་སྒྲོག །ཅེས་གསུངས་པའི་ཕྱིར་གསུངས། ལྔ་པ་ཕྱི་རོལ་གྱི་རྒྱན་ནི། སྒོའི་གཡས་གཡོན་གཉིས་ན་ཏཱ་ལའི་ལྗོན་པ་དང་། དཔག་བསམ་གྱི་ཤིང་དག་གསེར་གྱི་ཐི་གུས་སྦྲེལ་བ་ལས་དྲིལ་བུའི་སྒྲ་སྒྲོག་པ་ལ་སོགས་པས་བརྒྱན་པ་སྟེ། འོད་རིམ་ལས། སྒོ་བཞིའི་གཡས་གཡོན་ལྗོན་ཤིང་དང་། །དཔག་བསམ་ཤིང་ཟུང་ཅོང་ཅོང་སྦྲེལ། ། ― MLP018_Page_0124 ―
[མ་དཔེ་གཟིགས་ན་འདིར་གནོན།]
དྲིལ་བུ་གཡེར་ཁ་ཐེག་ཆེན་སྒྲོག ། བཀྲ་ཤིས་བྱ་སྙན་སྒྲ་སྒྲོག་ལྡན། །ཡིད་བཞིན་རིན་ཆེན་བརྒྱད་བསྐོར་བ། །རིན་ཆེན་ཕུང་པོ་བཞི་གཉིས་ལྡན། །ཞེས་གསུངས་པའི་ཕྱིར་རོ་གསུངས། དྲུག་པ་ངོ་བོ་ཉིད་ཀྱི་རྒྱན་ནི། བདེན་བཞི་མཚོན་པའི་གྲུ་ཆད་དང་། བདེན་པ་གཉིས་མེད་མཚོན་པའི་བར་ཁྱམས་ལ་སོགས་པས་མཛེས་པར་བརྒྱན་པའོ་གསུངས། བདུན་པ་བདག་པོའི་རྒྱན་ནི། དཀྱིལ་འཁོར་སྤྲུལ་པའི་འཕྲོ་འདུ་རྒྱལ་བ་བཞི་བཅུ་རྩ་གཉིས་ཀྱིས་གཞལ་ཡས་ཁང་མཛེས་པར་བརྒྱན་པ་སྟེ། འདི་ཉིད་ལས། དཀྱིལ་འཁོར་བཞི་བཅུ་གཉིས་ཀྱིས་བརྒྱན། །ཞེས་སོ། །བརྒྱད་པ་གཞལ་ཡས་ཁང་གི་སྒོའི་དོན་ནི། རྣམ་པར་ཐར་པ་བཞིའི་སྒོ་ནས་འཇུག་པའི་སྒོ་འཁྱུད་ཅན། ཞེས་པས་བསྟན། དོན་ནི། གཞལ་ཡས་ཁང་དེར་འཇུག་པའི་སྒོ་ནི། རྣམ་ཐར་བཞིའི་ཏིང་འཛིན་གྱི་སྒོ་ནས་བྱང་ཆུབ་ཆེན་པོར་ལྷུན་གྱིས་འཇུག་པའི་རྟགས་སུ་ཕྱོགས་ཀྱི་དབྱེ་བའི་སྒོ་བཞི་དང་ལྡན་པ་སྟེ། ལེ་ལག་ལས། སྟོང་སྨོན་མཚན་མེད་འོད་གསལ་འཇུག །དེ་ཕྱིར་ཡེ་ཤེས་སྒོ་བཞིར་ཤར། ཞེས་གསུངས། དེའང་ཐང་སྒོ་ལྟ་བུ་མ་ཡིན་ཏེ། སྒོ་ཁྱུད་ཀྱི་ཟླས་དྲངས་པའི་འགྲམ་ལོགས་དང་ཡ་ཕུབས་རྡོ་རྗེའི་དྲྭ་མིག་ཅན་ལ་སོགས་པས་བརྒྱན་པའོ་གསུངས། དགུ་པ་རྟ་བབས་ནི། རྣམ་པར་ཐར་པ་བརྒྱད་ཀྱི་རྟ་བབས་དང་ལྡན་པ། ཞེས་པས་བསྟན། དེ་ལ་རྒྱུའི་རྟ་བབས་བརྒྱད་དང་འབྲས་བུའི་རྟ་བབས་བརྒྱད་དེ་བཅུ་དྲུག་ཏུ་བསྟན་པ་ཡིན་ཏེ། རྡོ་རྗེ་མེ་ལོང་ལས། ལམ་བརྒྱད་རིམ་པར་བགྲོད་པ་ཡིས། །འབྲས་བུའི་ཡོན་ཏན་ཀུན་རྫོགས་པས། །རྟ་བབས་རྒྱུ་འབྲས་བཅུ་དྲུག་བསྟན། །ཞེས་སོ། །དེ་ལ་རྒྱུའི་རྟ་བབས་ནི། མཚོན་སྒོ་རྣམ་ཐར་བཞིའི་སྒོ་ནས་མཚོན་བྱ་བྱང་ཆུབ་ཆེན་པོར་འཇུག་པ་སྟེ། དེ་ཡང་ཐུན་མོང་རྣམ་ཐར་གྱི་ཐེག་པ་བརྒྱད་ལ་སྦྱངས་པས་རྟོགས་པའི་རྟགས་སུ་སྒོ་ཕུགས་ཀྱི་ཕྱི་ནང་གཉིས་སུ་ཐེམ་སྐས་བཞི་བཞི་སྟེ་བབས་ཞོན་གྱི་རྟ་བབས་བརྒྱད་དང་ལྡན་པ་སྟེ། ལེ་ལག་ལས། དེར་འགྲོ་ལམ་སྟེགས་བརྒྱད་དང་ལྡན། །རྟ་བབས་བརྒྱད་དུ་འགྱུར་བ་ཡིན། །ཞེས་དང་། འགྲེལ་ཆུང་ལས། ཉན་ཐོས་རང་རྒྱལ་བྱང་ཆུབ་དང་། །བྱ་བ་རྒྱུད་དང་གཉིས་ཀ་རྒྱུད། །རྣལ་འབྱོར་བསྐྱེད་དང་རྫོགས་པ་ཡི། །རྣམ་པར་བརྒྱད་ཕྱིར་རྟ་བབས་ ― MLP018_Page_0125 ―
[མ་དཔེ་གཟིགས་ན་འདིར་གནོན།]
བརྒྱད། །ཅེས་སོ། །འབྲས་བུའི་རྟ་བབས་ནི། ཐེག་པ་བརྒྱད་ཀྱི་གྲུབ་མཐའི་ཡོན་ཏན་བརྒྱད་རྫོགས་པའི་རྟགས་སུ་སྒོ་ལོགས་ཀྱི་ཟུར་བཞི་ནས་ཀ་བས་བཏེགས་པའི་སྟེང་དུ་རྒྱན་གྱི་རྟ་བབས་བརྒྱད་དང་ལྡན་པ་སྟེ། སྒྱུ་འཕྲུལ་བྱེ་བྲག་བསྟན་པ་ལས། དེ་ཡི་གྲུབ་པའི་མཐའ་རྫོགས་པའི། །ཡོན་ཏན་བརྒྱད་ཕྱིར་རྟ་རྐང་དང་། །ཆུ་སྐྱེས་སྒྲོམ་དང་ཟ་ར་ཚགས། །སྣ་འཕྱོ ང་ཆུན་འཕྱང་ཤར་བུ་དང་། །ཁྱུང་མགོ་མཛེས་པས་རིམ་པར་འཁྲིགས། །ཞེས་སོ། །དེའང་རྒྱན་དང་ལྡན་པ་ཡིན་ཏེ། སྒོ་ཁང་དང་སྒོའི་བསིལ་ཁང་གི་མུན་པ་སེལ་བྱེད་གླང་རྒྱབ་མིག་གསུམ་ལ་སོགས་པའི་རྒྱན་དུ་མས་སྤྲས་པའོ་གསུངས། བཅུ་པ་གནས་ཀྱི་མཚན་ཉིད་ནི། ཕྱི་དང་ནང་མེད་པ་ཀུན་ཏུའང་ནང་དུ་གྱུར་པ་ན། ཞེས་པས་བསྟན། དེའི་དོན་ནི། གཞལ་ཡས་ཁང་དེའི་མཚན་ཉིད་ནི་ཆོས་ཀྱི་དབྱིངས་རྡོ་རྗེ་ཀུན་ཏུ་བཟང་མོའ་བྷ་ག་ཉིད་དུ་འདུས་པས་ན་ཐ་སྙད་དུའང་ཀུན་ཏུ་ནང་ཞེས་བརྗོད་པ་ཡིན་ཏེ། རང་བྱུང་ཡེ་ཤེས་ལ་ཕྱི་གཟུང་བའི་ཡུལ་དང་ནང་འཛིན་པའི་སེམས་གཉིས་སུ་མེད་པའི་ཤེས་བྱའི་དཀྱིལ་འཁོར་ཀུན་ཀྱང་རང་བྱུང་གི་ཡེ་ཤེས་སུ་གསལ་བ་ལས་གཞན་མ་དམིགས་པའི་ཕྱིར་ཏེ། འགྲེལ་ཆུང་ལས། གནས་མཆོག་མཚན་ཉིད་བརྗོད་པ་ནི། །གཞལ་ཡས་ཕྱི་ནང་ཆོས་དབྱིངས་ནང་། །བྷ་ག་ཉིད་དུ་བསྡུས་པས་ན། །ཀུན་ཏུ་ནང་ཞེས་བརྗོད་པ་ཡིན། །ཞེས་སོ། །དེ་ལྟར་ན་ཆོས་ཀྱི་དབྱིངས་དེའི་ངང་ལས་ཡེ་ཤེས་ཀྱི་འཕྲུལ་བར་སྣང་བའི་གཞལ་ཡས་ཁང་རྒྱན་དང་བཅས་པ་ཐམས་ཅད་ཀྱང་། ཤེལ་གྱི་སྦུ་གུར་རིན་པོ་ཆེ་སྣ་ཚོགས་བཅུག་པ་ལྟར་མི་བསྒྲིབ་པར་གསལ་བའི་རང་བཞིན་ཅན་ཏེ། འདི་ཉིད་ལས། ཕྱི་དང་ནང་མེད་པ་ཀུན་ཏུ་ཡང་ནང་དུ་གྱུར་པ་ན། ཞེས་བཤད་པ་ཡིན་གསུངས། བཅུ་གཅིག་པ་གདན་ཁྲིའི་དོན་ནི། མི་འཇིགས་པ་སེང་གེའི་ཁྲི་དང་སོགས་ནས། གོས་པ་མེད་པ་པདྨ་རིན་པོ་ཆེའི་གདན་ལ། ཞེས་པའི་བར་གྱིས་བསྟན། དེའི་དོན་བཤད་ན་གསུམ་སྟེ། ཆོས་ཀྱི་འཁོར་ལོ་བསྐོར་བའི་གདན། སའི་ཁྱད་པར་བགྲོད་པའི་གདན། ཡོན་ཏན་གྱི་ཆེ་བས་ཉེས་ཚོགས་བཅོམ་པའི་གདན་དང་གསུམ་ལས། དང་པོ་ནི། སྔར་བཤད་པའི་འོག་གཞིའི་གདན་ཏེ་རིགས་ལྔ་ཡེ་ཤེས་ལྔའི་ཕྱག་རྒྱས་རྟོག་ཚོགས་གཅོད་པའི་ཆོས་ཀྱི་ ― MLP018_Page_0126 ―
[མ་དཔེ་གཟིགས་ན་འདིར་གནོན།]
འཁོར་ལོ་རྒྱུན་མི་ཆད་པར་བསྐོར་བའི་རྟགས་སུ་རང་སྣང་བ་དེ་ཡིན་གསུངས། གཉིས་པ་སའི་ཁྱད་པར་བགྲོད་པའི་གདན་ནི། ཡོན་ཏན་གྱི་རྟགས་སུ་སེང་གེ་ལ་སོགས་པའི་སེམས་ཅན་ལྔ་པོ་རེ་རེའང་བརྒྱད་བརྒྱད་ཀྱི་གདན་ཁྲི་དང་ལྡན་པའི་ཕྱིར་ཏེ། རང་བྱུང་གི་ཡེ་ཤེས་རྟོགས་པའི་རིག་པ་ལ་འབྲས་བུའི་ཆོས་མི་འཇིགས་པ་བཞི་སོགས་ལྷུན་གྱིས་གྲུབ་པས་ཡང་དག་པར་རྫོགས་པའི་སངས་རྒྱས་སུ་བསྟན་ཅིང་ངེས་པར་བྱས་པའི་རྟགས་སུ་དེ་ལྟར་སྣང་བ་ཡིན་ཏེ། དབང་བསྐུར་རྒྱལ་པོའི་རྒྱུད་ལས། ཐུགས་ནི་མི་འཇིགས་བཞི་ཡིས་བདུད་བཞི་བཅོམ། །དེ་གྲུབ་རྟགས་སུ་སེང་གེའི་ཁྲི་ལ་བཞུགས། །སྐུ་ནི་སྟོབས་བཅུས་མི་དགེ་བཅུ་རྣམས་འདུལ། །དེ་གྲུབ་རྟགས་སུ་གླང་ཆེན་ཁྲི་ལ་བཞུགས། །ཡོན་ཏན་རྫུ་འཕྲུལ་རྐང་བཞིས་ཆགས་མེད་སྒྲོལ། །དེ་གྲུབ་རྟགས་སུ་རྟ་མཆོག་ཁྲི་ལ་བཞུགས། །གསུང་ནི་དབང་བཅུ་མཐར་ཕྱིན་རྒྱལ་པོའི་གསུང་། །དེ་གྲུབ་རྟགས་སུ་རྨ་བྱའི་ཁྲི་ལ་བཞུགས། །ལས་ནི་ཕྲིན་ལས་བཞི་ཡིས་ཐོགས་མེད་སྒྲོལ། །དེ་གྲུབ་རྟགས་སུ་ཤང་ཤང་ཁྲི་ལ་བཞུགས། །ཞེས་སོ། །དེ་ལ་མི་འཇིགས་པ་བཞི་ནི། ཇི་ལྟ་ཇི་སྙེད་པའི་ཆོས་མ་ལུས་པ་མངོན་སུམ་དུ་རྟོགས་པའི་ཚུལ་གྱིས་བདག་ཉིད་མངོན་པར་རྫོགས་པར་སངས་རྒྱས་སོ་ཞེས་ཞལ་གྱིས་བཞེས་པ་ལ་མི་འཇིགས་པ་དང་། ཐར་པ་ཐོབ་པ་ལ་སྒྲིབ་པ་འགོག་དགོས་སོ་ཞེས་བར་དུ་གཅོད་པའི་ཆོས་སྟོན་པ་ལ་མི་འཇིགས་པ་དང་། ངེས་འབྱུང་གི་ཐེག་པ་གསུམ་གྱི་ལམ་སྟོན་པ་ལ་མི་འཇིགས་པ་དང་། སྤང་བྱ་སྤངས་པའི་འགོག་པ་ཐོབ་པ་ལ་མི་འཇིགས་པ་སྟེ། རྒྱུད་བླ་མ་ལས། ཆོས་ཀུན་རྫོགས་པར་བྱང་ཆུབ་དང་། །གེགས་ནི་འགོག་པར་བྱེད་པ་དང་། །ལམ་སྟོན་པ་དང་འགོག་སྟོན་ལ། །མི་འཇིགས་པ་ནི་རྣམ་པ་བཞི། །ཞེས་སོ། །སྟོབས་བཅུ་ནི། གནས་དང་གནས་མ་ཡིན་པ་མཁྱེན་པའི་སྟོབས། ལས་ཀྱི་རྣམ་པར་སྨིན་པ་མཁྱེན་པའི་སྟོབས། དབང་པོ་མཆོག་དང་མཆོག་མ་ཡིན་པ་མཁྱེན་པའི་སྟོབས། འཇིག་རྟེན་གྱི་ཁམས་དུ་མ་མཁྱེན་པའི་སྟོབས། མོས་པ་སྣ་ཚོགས་པ་མཁྱེན་པའི་སྟོབས། ཐམས་ཅད་དུ་འགྲོ་བའི་ལམ་མཁྱེན་པའི་སྟོབས། ཉོན་མོངས་པ་དང་རྣམ་པར་བྱང་བ་མཁྱེན་པའི་སྟོབས། སྔོན་གྱི་གནས་མཁྱེན་པའི་སྟོབས། འཆི་འཕོ་ ― MLP018_Page_0127 ―
[མ་དཔེ་གཟིགས་ན་འདིར་གནོན།]
དང་སྐྱེ་བ་མཁྱེན་པའི་སྟོབས། ཟག་པ་ཟད་པ་མཁྱེན་པའི་སྟོབས་རྣམས་ཏེ། རྒྱུད་བླ་མ་ལས། གནས་དང་གནས་མིན་ལས་རྣམས་ཀྱི། །རྣམ་པར་སྨིན་དང་དབང་པོ་དང་། །ཁམས་རྣམས་དང་ནི་མོས་པ་དང་། །ཀུན་འགྲོའི་ལམ་དང་བསམ་གཏན་སོགས། །ཉོན་མོངས་དྲི་མ་མེད་པ་དང་། །གནས་ནི་རྗེས་སུ་དྲན་པ་དང་། །ལྷ་མི་མིག་དང་ཞི་བ་དག །མཁྱེན་པའི་སྟོབས་ནི་རྣམ་པ་བཅུ། །ཞེས་སོ། །རྫུ་འཕྲུལ་གྱི་རྐང་པ་བཞི་ནི། འདུན་དང་བརྩོན་འགྲུས་སེམས་དང་ནི། །དཔྱོད་པའི་ཏིང་འཛིན་སྤོང་བ་ཡིས། །འདུ་བྱེད་རྣམས་ནི་རྐང་པ་བཞི། །ཞེས་སོ། །དབང་བཅུ་ནི། ཡོ་བྱད་སྐྱེ་བ་ཚེ་ལ་དབང་། །ཡེ་ཤེས་ཆོས་དང་སེམས་དང་ལས། །རྫུ་འཕྲུལ་སྨོན་ལམ་མོས་རྣམས་ཀྱིས། །ཁམས་གསུམ་ཀུན་གྱི་དབང་ཕྱུག་རྒྱལ། །ཞེས་སོ། །ཕྲིན་ལས་བཞི་ནི། ཞི་རྒྱས་དབང་དྲག་ལས་རྣམས་ཀྱིས། །ཐོགས་མེད་ལས་རྣམས་ལྷུན་གྱིས་གྲུབ། །ཅེས་སོ། །འོ་ན་སེམས་ཅན་གྱི་གདན་དེ་དག་ཐུགས་རིག་པ་རང་སྣང་བར་འདོད་པ་ཅི་ཡིན་ཞེ་ན། དཔེར་ན་རྟ་བཟང་པོ་གཅིག་རང་གི་བསོད་ནམས་ཀྱིས་གྲུབ་པ་དང་གཞན་གྱི་དད་པས་ཕུལ་བ་གཉིས་རྟ་གཅིག་གི་སྟེང་དུ་མཚུངས་པ་ལྟར། སངས་རྒྱས་ལ་མི་འཇིགས་པ་བཞི་སོགས་ལྷུན་གྱིས་གྲུབ་པའི་རྟགས་སུ་སྣང་བ་དང་། བྱང་སེམས་སྨོན་ལམ་གྱི་རང་དབང་ཅན་རྣམས་ཀྱིས་སེདྒེ་ལ་སོགས་པར་སྤྲུལ་ཏེ་གུས་པས་ལུས་གདན་དུ་ཕུལ་ཏེ་རྣ་བས་ཆོས་ཉན་པའི་ཕྱིར་མི་འགལ་ལོ་གསུངས་ཏེ། རྒྱ་མཚོ་ལས། བྱང་ཆུབ་སེམས་དཔའ་སྨོན་ལམ་དབང་། །ཐོས་པ་རྒྱ་མཚོ་བསགས་པའི་ཕྱིར། །ལུས་ནི་སེང་གེའི་གདན་དུ་ཕུལ། །ཞེས་སོ། །གདན་དེ་རྣམས་ལ་སའི་ཁྱད་པར་བགྲོད་པའི་གདན་ཞེས་བརྗོད་པ་ནི། ཐེག་པ་བརྒྱད་ལ་བགྲོད་ནས་འབྲས་བུའི་ཡོན་ཏན་ཐུགས་སུ་ཆུད་པའི་རྟགས་སུ་སེང་གེ་ལ་སོགས་པ་རེ་རེ་འང་བརྒྱད་བརྒྱད་མཇུག་མ་ནང་དུ་བསྣོལ་ནས་རིན་པོ་ཆེའི་ཁྲི་རྐང་འདེགས་པས་སོ་གསུངས། གསུམ་པ་ཡོན་ཏན་གྱི་ཆེ་བས་ཉེས་ཚོགས་བཅོམ་པའི་གདན་ནི། རྒྱལ་བའི་ཐུགས་རང་བཞིན་གྱིས་འོད་གསལ་ཞིང་ཐབས་ཤེས་དབྱེར་མེད་པའི་རྟགས་སུ་ཉི་ཟླའི་གདན་དང་། པདྨ་འདམ་ལས་སྐྱེས་ཀྱང་ཉེས་སྐྱོན་གྱིས་མ་གོས་པ་ལྟར་མཐའི་སྐྱོན་གྱིས་གོས་པ་མེད་པའི་རྟགས་སུ་ ― MLP018_Page_0128 ―
[མ་དཔེ་གཟིགས་ན་འདིར་གནོན།]
པདྨའི་གདན་དང་། རེ་བ་ཡིད་བཞིན་དུ་སྐོང་ཞིང་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པའི་རྟགས་སུ་རིན་པོ་ཆེ་ཁྲི་རྐང་མཛོད་མིག་བདུན་ལྡན་རྣམས་སུ་ཤར་བ་ཡིན་ནོ་གསུངས། གདན་དེ་རྣམས་ཀྱི་བརྩེགས་ལུགས་ཀྱང་། སྐྱེས་བུ་ལྔ་ལ་ལྔ་བརྩེགས་དང་། །སེམས་དཔའ་ལ་ནི་སུམ་བརྩེགས་སོ། །ཉི་རྐྱང་ཁྲོ་ལ་པད་རྐྱང་ཐུབ། །ཀུན་བཟང་ཡབ་ཡུམ་བཞི་བརྩེགས་སོ། །ཞེས་གསུངས། འོན་ཀྱང་དཀྱིལ་འཁོར་ལ་འགོད་པའི་ཚེ་དེ་ལྟར་ཡིན་གྱི། འདིར་ཆོས་འཆད་པའི་ཚེ་ན་ཀུན་བཟང་ལ་གདན་ལྔ་བརྩེགས་སྤྱན་འགྲེལ་ལས་གསུངས་སོ། །ཡང་ཟླ་བ་སྟེང་དུ་འོང་བའི་རྒྱུ་མཚན་ཡང་། སྤྱན་འགྲེལ་ལས། གཙོ་བོ་ནི་ཤེས་རབ་ལ་སྤྱོད་པའི་ཕྱིར། ནང་གི་ཆུ་སྐྱེས་ཀྱི་ལྟེ་བའི་ཉི་མ་ཟླ་བ་ལ་བརྟེན་པའི་ཕྱིར་རི་བོང་ཅན་སྟེང་ན་གནས་སོ་ཞེས་གསུངས་སོ། །ཟླ་བ་སྟེང་དུ་འོང་བ་གཙོ་འཁོར་ཐབས་སྣང་བ་འགགས་པ་མེད་པ་མཚོན་པའི་བརྡ་དང་། ལྟེ་བའི་ཨ་ཐུང་གི་སྟེང་དུ་སྤྱི་བོའ་ཧཾ་ཡིག་གམ་སྙིང་གའི་སྲོག་མི་ཤིགས་པའི་ཐིག་ལེ་གནས་པའི་ཕྱིར་ཡང་དེ་ལྟར་དུ་བཤད་པ་ཡིན་གསུངས་སོ། །ལྔ་པ་འཁོར་ཕུན་སུམ་ཚོགས་པ་ལ། རང་བཞིན་གཉིས་སུ་མེད་པའི་འཁོར་དང་། རིག་པ་ཁྱད་པར་ཅན་གྱི་འཁོར་གཉིས་ལས། དང་པོ་ལའང་རིགས་ཀྱི་ཡབ་ལྔ་དང་། ཡུམ་ལྔ་ལས། དང་པོ་རིགས་ཀྱི་ཡབ་ལྔ་ནི། བཅོམ་ལྡན་འདས་དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་དང་སོགས་ནས། འདུ་བྱེད་ཀྱི་རྒྱལ་པོ་དང་། ཞེས་པའི་བར་གྱིས་བསྟན། དེའི་དོན་ལ་གསུམ་སྟེ། རྟོག་པ་བཤད་པ། དེ་ལྷར་དག་ཚུལ་བཤད་པ། དེའི་རིགས་ཀྱི་དབྱེ་བ་བཤད་པ་དང་གསུམ་ལས། དང་པོ་ནི། རྒྱུད་ཕྱི་མ་ལས། གཟུགས་དང་ཚོར་བ་འདུ་ཤེས་དང་། །འདུ་བྱེད་རྣམ་པར་ཤེས་པ་ཉིད། །ཕུང་པོ་ལྔ་ཞེས་རབ་ཏུ་བརྗོད། །ཅེས་གསུངས་པ་ལྟར་ཕུང་པོ་ལྔ་ལས། དང་པོ་རྣམ་པར་ཤེས་པའི་ཕུང་པོ་ནི། སྤྱིར་ཕུང་པོ་ཞེས་པ་མངོན་པ་ལས། དུ་མ་སྤུངས་པ་ཕུང་པོའི་མཚན་ཉིད། ཅེས་གསུངས་པ་ལྟར་དཔེར་ན་ནས་འབྲུ་མང་པོ་སྤུངས་པ་ལ་ནས་ཕུང་ཞེས་བརྗོད་པ་དང་གནད་གཅིག་གསུངས། དེ་ལ་རྣམ་པར་ཤེས་པ་ནི་ཡུལ་རྣམ་པར་རིག་པའི་མཚན་ཉིད་ཅན་གྱི་ཚོགས་བརྒྱད་དེ། ཀུན་གཞི། ཉོན་ཡིད། ཡིད། སྒོ་ ― MLP018_Page_0129 ―
[མ་དཔེ་གཟིགས་ན་འདིར་གནོན།]
ལྔའི་རྣམ་པར་ཤེས་པ་རྣམས་ཏེ་རྣམ་ཤེས་ཀྱི་ཕུང་པོར་བཞག གཟུགས་ཀྱི་ཕུང་པོ་ནི་གཟུགས་སུ་རུང་བའི་མཚན་ཉིད་ཅན་གྱི་ཟུགས་བཅོ་ལྔ་ཡོད་དེ། རྒྱུའི་གཟུགས་འབྱུང་བ་བཞི་དང་། འབྲས་བུའི་གཟུགས་ནི་མཛོད་ལས། གཟུགས་ནི་དབང་པོ་ལྔ་དང་དོན། །ལྔ་དང་རྣམ་རིག་བྱེད་མིན་ཉིད། །ཅེས་པ་ལྟར་བཅུ་གཅིག་སྟེ་བཅོ་ལྔ་ནི་གཟུགས་ཀྱི་ཕུང་པོའོ། །ཚོར་བའི་ཕུང་པོ་ནི། ཉམས་སུ་མྱོང་བའི་མཚན་ཉིད་ཅན་གྱི་ཚོར་བ་བདེ་སྡུག་བར་མ་གསུམ་རྣམས་སོ། །འདུ་ཤེས་ཀྱི་ཕུང་པོ་ནི། ཡུལ་ལ་མཚན་མར་འཛིན་པའི་མཚན་ཉིད་ཅན་གྱི་འདུ་ཤེས་རྒྱ་ཆེ་ཆུང་ཚད་མེད་པ་མཚན་མ་དང་བཅས་པ་མཚན་མ་མེད་པ་དང་ལྔའོ། །འདུ་བྱེད་ཀྱི་ཕུང་པོ་ནི། མངོན་པར་འདུ་བྱེད་པའི་མཚན་ཉིད་ཅན་གྱི་སེམས་པ་སྟེ་སེམས་བྱུང་ལྔ་བཅུ་རྩ་གཅིག་ཡོད་དེ། སྡོམས་སུ་སྟོན་ན། ཚོར་འདུ་སེམས་པ་རེག་ཡིད་བྱེད། །འདི་དག་ཀུན་འགྲོ་ལྔ་ཡིན་ནོ། །འདུན་མོས་དྲན་ཏིང་ཤེས་རབ་སྟེ། །འདི་དག་ཡུལ་ངེས་ལྔ་ཡིན་ནོ། །དད་དང་བག་ཡོད་ཤིན་ཏུ་སྦྱངས། །འདོད་ཆགས་ཞེ་སྡང་གཏི་མུག་མེད། །བཏང་སྙོམས་ངོ་ཚ་ཤེས་ཁྲེལ་ཡོད། །རྣམ་པར་མི་འཚེ་བརྩོན་འགྲུས་ཏེ། །འདི་དག་དགེ་བ་བཅུ་གཅིག་གོ །འདོད་ཆགས་ཁོང་ཁྲོ་ང་རྒྱལ་དང་། །མ་རིག་ཐེ་ཚོམ་ལྟ་བ་སྟེ། །དྲུག་པོ་རྩ་བའི་ཉོན་མོངས་ཡིན། །ཁྲོ་དང་འཁོན་འཛིན་འཆབ་དང་འཚིག །ཕྲག་དོག་སེར་སྣ་སྒྱུ་དང་གཡོ། །རྒྱགས་དང་རྣམ་འཚེ་ངོ་ཚ་མེད། །ཁྲེལ་མེད་རྨུགས་རྒོད་མ་དད་དང་། །ལེ་ལོ་བག་མེད་བརྗེད་ངས་དང་། །ཤེས་བཞིན་མ་ཡིན་རྣམ་གཡེང་སྟེ། །འདི་དག་ཉེ་ཉོན་ཉི་ཤུའོ། །གཉིད་འགྱོད་རྟོག་དཔྱོད་གཞན་འགྱུར་བཞི། །ཞེས་པ་སྟེ་ལྔ་བཅུ་རྩ་གཅིག་ལས། ཚོར་བ་དང་འདུ་ཤེས་གཉིས་ཕྲི་བའི་ལྷག་མ་བཞི་བཅུ་རྩ་དགུ་ནི་འདུ་བྱེད་ཀྱི་ཕུང་པོར་འཇོག་པའོ་གསུངས། གཞུང་གཞན་རྣམས་སུ་ཕུང་པོའི་གོ་རིམ་དང་པོར་གཟུགས་ཕུང་སྨོས་ལ། འདིར་རྣམ་ཤེས་དང་པོར་སྨོས་པ་ཅི་ཡིན་ཞེ་ན། གཟུགས་ལ་སོགས་པའི་ཆོས་རྣམས་ཀྱང་སེམས་ཀྱི་རོལ་རྩལ་ཙམ་ལས་གཞན་མ་ཡིན་པས་སོ་གསུངས། གཉིས་པ་དེ་དག་ལྷར་དག་ཚུལ་བཤད་པ་ལ། གཞན་ལུགས་དགག་པ་དང་། རང་ ― MLP018_Page_0130 ―
[མ་དཔེ་གཟིགས་ན་འདིར་གནོན།]
ལུགས་བཞག་པ་གཉིས་ལས། དང་པོ་ནི་རྗེ་འཁོན་སྟོན་ན་རེ། འདིའི་སྐབས་ཀྱི་རྣམ་ཤེས་ནི་ཚོགས་བརྒྱད་མ་ཡིན་ཏེ། སྒོ་ལྔའི་རྣམ་ཤེས་སོ། །གལ་ཏེ་ཚོགས་བརྒྱད་དུ་འདོད་ན། མི་བསྐྱོད་པའི་རྒྱུད་ལ་ཀུན་གཞི་ཡོད་པས་དགྲ་བཅོམ་པ་མ་ཡིན་པར་ཐལ་བ་དང་། ཉོན་ཡིད་ཡོད་པས་སྒྲིབ་གཉིས་སྤངས་པའི་གང་ཟག་མ་ཡིན་པར་ཐལ་བའི་སྐྱོན་ཡོད་དོ་གསུངས་ནའང་། ཐུན་མོང་གི་གཞུང་དང་བསྟུན་པར་ཟད་ཀྱི། འདིར་ནི་ཤིན་ཏུ་མི་རིགས་ཏེ། ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །ཞེས་དང་། རྒྱ་ཆེར་འགྲེལ་ལས། རྣམ་པར་ཤེས་པའི་རྒྱལ་པོ་ནི། དཔལ་རྡོ་རྗེ་སེམས་དཔའ་ཀུན་གཞི་རྣམ་པར་དག་པའོ། །དེ་ཡང་ཡོངས་སུ་མ་དག་པའི་དུས་ན་ནི་འཁོར་བའི་ཆོས་ཐམས་ཅད་ཀྱི་རྩ་བ་ཡིན་ལ། ཡོངས་སུ་དག་པའི་དུས་ན་ནི་མྱ་ངན་ལས་འདས་པའི་ཆོས་ཐམས་ཅད་ཀྱི་རྩ་བའོ། །ཞེས་གསུངས་པའི་ཕྱིར་རོ། །དེ་བས་ན་ཐེག་པ་འདིའི་ལུགས་ཀྱི་ཀུན་གཞི་ཉིད་ཆོས་དབྱིངས་ཡེ་ཤེས་སུ་ཡེ་ནས་དག་པས་སྤང་གཉེན་དུ་མི་འདོད་དེ། འཆིང་གྲོལ་ལས་འདས་པའི་ཕྱིར་རོ་གསུངས། གཉིས་པ་རང་ལུགས་བཞག་པ་ནི། རྟོག་ཚོགས་ཕུང་པོ་ལྔ་ཡི་རང་བཞིན་ཡེ་ཇི་བཞིན་པའི་རིགས་ལྔ་ཡིན་པ་ལས་ཁྱད་པར་དུ་རྒྱུད་དག་པའི་སངས་རྒྱས་ལྔའི་འབྲས་བུ་མངོན་དུ་བྱས་ཏེ་མཐར་ཕྱིན་པར་གྱུར་པའི་ཕྱིར་རོ། །དེ་ལྟ་བུའི་རྟོག་པ་ལ་ཐུགས་རང་རིག་པའི་ཡེ་ཤེས་ཀྱིས་རང་དབང་བསྒྱུར་ཞིང་། ཟག་མེད་ཀྱི་ཆོས་ལ་མངའ་བརྙེས་པས་བདེ་བ་ཆེན་པོར་ལོངས་སྤྱོད་པས་ན་རྒྱལ་པོ་ཞེས་བྱའོ། །གཞུང་འདིར་ལྷའི་མཚན་ནས་མི་སྨོས་པར་རྟོག་པའི་མཚན་ནས་སྨོས་པ་ཅི་ཡིན་ཞེ་ན། མ་དག་པ་འཁོར་བའི་གནས་སྐབས་སུའང་རྟོག་ཚོགས་རྣམས་རང་བཞིན་གྱིས་རྣམ་པར་དག་པ་སྐུ་དང་ཡེ་ཤེས་ཀྱི་དཀྱིལ་འཁོར་དུ་རྫོགས་པར་གསང་སྔགས་ཀྱི་རྒྱུད་རྣམས་སུ་གསུངས་པ་མ་ཟད། ངེས་དོན་གྱི་མདོ་སྡེ་ཟབ་མོ་རྣམས་ལས་ཀྱང་འབྱུང་སྟེ། འདི་ལྟར་སྡོང་པོ་བཀོད་པ་ལས། གཟུགས་དང་ཚོར་དང་འདུ་ཤེས་དང་། །རྣམ་པར་ཤེས་དང་འདུ་བྱེད་ནི། །གྲངས་མེད་དེ་བཞིན་གཤེགས་པ་རྣམས། །དེ་དག་ཐུབ་པ་ཆེན་པོར་འགྱུར། །ཞེས་གསུངས་སོ། །དེས་ན་རང་བཞིན་ཤེས་བྱའི་གཤིས་ལ་རྟོག་པ་དང་ལྷ་གཉིས་ ― MLP018_Page_0131 ―
[མ་དཔེ་གཟིགས་ན་འདིར་གནོན།]
སྣང་ན་སྣང་མཉམ། སྟོང་ན་སྟོང་མཉམ། བཟང་ངན་མེད་པར་མཉམ་པའི་ཕྱིར་དང་། ཐུན་མིན་གྱི་ཐེག་པ་འདིར་ལམ་པས་ལྷ་རྟོག་དབྱེར་མེད་དུ་ངོས་ཟིན་པར་བྱ་བའི་ཕྱིར་དང་། འབྲས་བུ་མཐར་ཕྱིན་པའི་དུས་ན་རྟོག་པ་ཉིད་མ་སྤངས་མ་བསྒྱུར་བར་ལྷའི་དཀྱིལ་འཁོར་དུ་རང་སྣང་བའི་ཕྱིར་སྨོས་པའོ། །རྟོག་ཚོགས་ལྷར་སྣང་བའི་འཐད་པ་དེ་གང་ཡིན་ཞེ་ན། དེ་ལ་གཉིས་ཏེ། ཕྱི་རོལ་གྱི་དོན་ཡོད་པའི་དབང་དུ་བྱས་པ་དང་། ཤེས་བྱ་ནང་གི་དབང་དུ་བྱས་པ་གཉིས་ལས། དང་པོ་ནི། རྟོག་པའི་རང་བཞིན་ལྷར་སྣང་བ་དེ་ཡེ་ནས་ཡིན་པ་ཉིད་ལམ་རྐྱེན་དང་འཕྲད་པས་ལྷར་སྣང་རུང་མ་འགག་པའི་ཕྱིར་ཏེ། དཔེར་ན་དངུལ་ཆུས་བསྡུས་པའི་གསེར་ཕྱེ་ཉིད་དངུལ་གྱི་གོང་བུ་ལྟར་སྣང་ཡང་མེའི་རྐྱེན་དང་འཕྲད་ན་གསེར་དུ་འགྱུར་ཞིང་། མ་འཕྲད་ན་མི་འགྱུར་བ་བཞིན་ནོ། །དེ་ལྟར་ཡང་སྒྱུ་འཕྲུལ་རྟོག་པའི་དྲྭ་བ་རྣམ་པར་གསལ་བའི་རྒྱུད་ཕྱི་མ་ལས། གསོལ་པ། བཅོམ་ལྡན་འདས་རྣལ་འབྱོར་པ་འདི་དག་རྒྱུ་ཅི་ལྟ་བུ་ཞིག་ལས་བསྒྲུབ་པར་བགྱི་བ་ལགས། བཀའ་སྩལ་པ། ཕུང་པོ་དང་། ཁམས་དང་། སྐྱེ་མཆེད་དང་། འབྱུང་བ་ལ་སོགས་པའོ། །གསོལ་པ། འོ་ན་རྒྱུ་ལས་ཀྱང་འབྲས་བུའི་སྣང་བ་བསྐྱེད་པར་འགྱུར་བ་ལགས། ཇི་སྐད་གསུངས། བཀའ་སྩལ་པ། རིགས་ཀྱི་བུ་དེ་དེ་བཞིན་ཏེ། རྒྱུ་ལས་འབྲས་བུའི་ཤེས་རབ་སྣང་ངོ་། །དེ་ཅིའི་ཕྱིར་ཞེ་ན། ཕུང་པོ་ལ་སོགས་པ་གང་དག་སྒྱུ་མའི་ཕྱག་རྒྱ་བཞི་བཅུར་སྣང་བ་དང་། དོན་དམ་པར་ནི་དོན་དམ་རྩེ་གཅིག་པར་སྣང་བའི་ཕྱིར་རོ། །དེ་སྐད་ཅེས་སྨྲའོ། །གསོལ་པ་བཅོམ་ལྡན་འདས། བཅོམ་ལྡན་འདས་ཀྱིས་གསུངས་པ་ལྟར་ན་དེ་ཉིད་ནི་དེ་མ་ཡིན་པའི་ཕྱིར། བསྒྲུབ་པར་བྱ་བ་དང་ཡང་འགལ་བའི་ཕྱིར་རོ། །བཀའ་སྩལ་པ། ཇི་སྙམ་དུ་སེམས། དཔེར་ན་རྐྱེན་གྱི་འབྲེལ་བ་དང་མ་འཕྲད་པའི་འབྲས་བུ་སྐྱེ་བའི་རྒྱུ་ཡོད་ཀྱང་མངོན་དུ་འབྱིན་པའི་ནུས་པ་མེད་པ་བཞིན་དུ། བྱང་ཆུབ་ཀྱི་རྒྱུ་ཡོད་ཀྱང་རྐྱེན་ཏིང་ངེ་འཛིན་དང་མ་འཕྲད་པའི་ཕྱིར་འབྲས་བུ་འབྱིན་པའི་ནུས་པ་མེད་པས་ན་དེ་ལྟར་ཤེས་པར་བྱའོ། །ཞེས་གསུངས་པའི་ཕྱིར་རོ། །གཉིས་པ་ཤེས་བྱ་ནང་གི་དབང་དུ་བྱས་པ་ནི། རྟོག་པའི་རང་བཞིན་ལྷར་སྣང་བ་ཡིན་ཏེ། དེ་དང་དེ་ཆོས་མཐུན་པས་རྣམ་ ― MLP018_Page_0132 ―
[མ་དཔེ་གཟིགས་ན་འདིར་གནོན།]
ཤེས་ནི་ཐུགས་ཀྱི་བདག་ཉིད། གཟུགས་ནི་སྐུའི་བདག་ཉིད། ཚོར་བ་ནི་ཡུལ་ལ་ལོངས་སྤྱོད་དུ་བལྟ་བའི་གཞི་ཡིན་པའི་ཕྱིར་ཡོན་ཏན་གྱི་བདག་ཉིད། འདུ་ཤེས་ནི་མཚན་མར་འཛིན་པའི་བདག་ཉིད་ཕྱི་ནང་གི་ཆོས་རྣམས་ཐ་སྙད་དུ་འདོགས་པའི་ལས་ཀྱི་བརྡ་སྤྲོད་པའི་ཕྱིར་དང་། འདུ་བྱེད་ནི་བྱ་བ་བྱེད་པ་ལས་ཀྱི་བདག་ཉིད་ཡིན་པའི་ཕྱིར་ཏེ། དེ་ལྟར་ཡང་རྒྱུད་གཞན་ལས། གཟུགས་ནི་རྣམ་པར་སྣང་མཛད་ཉིད། །ཚོར་བ་རིན་ཆེན་འབྱུང་གནས་ལ། །འདུ་ཤེས་སྣང་བ་མཐའ་ཡས་ཏེ། །འདུ་བྱེད་དོན་ཡོད་གྲུབ་པ་ཉིད། །རྣམ་པར་ཤེས་པ་མི་བསྐྱོད་པ། །ཞེས་སོ། །ཡང་ཁོ་ན་རེ། རྒྱུད་ཕྱི་མ་ལས། ཚུལ་ཁྲིམས་ལ་སོགས་ཕུང་པོ་ལྔ། །ཟག་མེད་རྣམས་ནི་གཞན་ཡིན་ནོ། །ཞེས་ཉེར་ལེན་གྱི་ཕུང་པོ་ལྔ་གནས་གྱུར་པའི་ཟག་མེད་ཀྱི་ཕུང་པོ་ལྔ་གསུངས་པ་དང་ཡང་ཆོས་མཐུན་བརྩིར་ཡོད་དམ་ཞེ་ན། ཡོད་དེ་རྣམ་ཤེས་གནས་གྱུར་རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་ནི་ཐུགས་ཀྱི་བདག་ཉིད་ཡིན་པ་དང་། དེ་བཞིན་དུ་གཟུགས་གནས་གྱུར་ཚུལ་ཁྲིམས་ཀྱི་ཕུང་པོ་ནི་དྲི་མ་མེད་པའི་སྐུ་དང་། ཚོར་བ་གནས་གྱུར་ཏིང་ངེ་འཛིན་ནི་ཡོན་ཏན་གྱི་གཞིར་གྱུར་པའི་ཡོན་ཏན་དང་། འདུ་ཤེས་གནས་གྱུར་ཤེས་རབ་ནི་ལུང་རྟོགས་ཀྱི་ཆོས་ཀྱི་གཞིར་གྱུར་པའི་ཕྱིར་གསུངས། འདུ་བྱེད་གནས་གྱུར་རྣམ་པར་གྲོལ་བའི་ཕུང་པོ་ནི་མཛད་པ་ཡོངས་སུ་རྫོགས་པའི་བདག་ཉིད་དང་གཞིར་གྱུར་པའི་ཕྱིར་ཕྲིན་ལས་ཏེ། ལུང་ལས། གཟུགས་ཀྱི་ཕུང་པོ་གནས་གྱུར་ཚུལ་ཁྲིམས་སྐུ། །ཚོར་བ་གནས་གྱུར་ཏིང་འཛིན་འབུམ་ཕྲག་བརྙེས། །འདུ་ཤེས་གནས་གྱུར་ཤེས་རབ་ཕུང་པོ་སྟེ། །འདུ་བྱེད་གནས་གྱུར་རྣམ་པར་གྲོལ་བའོ། །སེམས་གྱུར་ཡེ་ཤེས་དེ་ནི་རྣམ་གྲོལ་མཐོང་། །ཞེས་གསུངས་པའི་ཕྱིར་རོ། །གལ་ཏེ་ཁོ་ན་རེ། རྣམ་ཤེས་ལྷར་དག་པའི་ཚེ་མིག་གི་རྣམ་ཤེས་ཀྱང་མི་བསྐྱོད་པར་དག་གམ་མ་དག གཉིས་པ་ལྟར་ན་སྤྱི་བྱེ་བྲག་དག་མི་གཅིག་པར་འགྱུར་ཏེ། དག་མ་དག་འགལ་བའི་ཆོས་ཅན་ཡིན་པའི་ཕྱིར། དང་པོ་ལྟར་ན། མིག་གི་རྣམ་ཤེས་ས་སྙིང་དུ་དག་པར་གསུངས་པ་མི་འཐད་པར་ཐལ། དེ་ལས་དག་པ་གཞན་དུ་བརྗོད་དུ་མེད་པའི་ཕྱིར། འདོད་མི་ནུས་ཏེ། བྱང་ཆུབ་ཆེན་པོ་རྡོ་རྗེ་མཐོང་བ་དང་། ཞེས་སོགས་གསུངས་ ― MLP018_Page_0133 ―
[མ་དཔེ་གཟིགས་ན་འདིར་གནོན།]
པ་དང་འགལ་ལོ་ཞེ་ན། སྐྱོན་མེད་དེ། ལྟོས་ས་ཐ་དད་ལ་ལྟོས་ནས་རྣམ་ཤེས་ཀྱི་ཕུང་པོ་སྤྱི་བྱེ་བྲག་གཉིས་གཙོ་འཁོར་དུ་དག་པ་ཡིན་ཏེ། ཐ་མལ་གྱི་རྣམ་རྟོག་རིལ་པོར་གཅིག་ཏུ་ཞེན་པའི་གཉེན་པོར་བྱེ་བྲག་ས་སྙིང་སོགས་སུ་དག་ཚུལ་སྨོས་ནས། ལྷར་ཐ་དད་དུ་ཞེན་པའི་གཉེན་པོར་སྤྱིར་མི་བསྐྱོད་པར་དག་ཚུལ་སྨོས་པའི་ཕྱིར་ཏེ། འདི་ཉིད་ལས། ཐ་དད་མིག་ལས་ཐ་དད་པའི། །ནང་དང་ནང་གི་ཕྱི་རོལ་གྱི། །དཀྱིལ་འཁོར་བསམ་ཡས་ཡེ་ཤེས་རོལ། །འཇིགས་མེད་ཀུན་བཟང་ཕྱག་རྒྱའི་མཆོག །ཅེས་གསུངས་པའི་ཕྱིར་རོ། །གསུམ་པ་དེའི་རིགས་ཀྱི་དབྱེ་བ་བཤད་པ་ལ། གཞན་ལུགས་དགག་པ། རང་ལུགས་བཞག་པ། ཞར་བྱུང་རིགས་ཀྱི་མཚན་མའི་སྐུ་མདོག་བསྟན་པ་དང་གསུམ་ལས། དང་པོ་ལ། འདོད་པ་བརྗོད་པ་དང་། དེ་དགག་པ་གཉིས་ལས། དང་པོ་ནི། ཁོ་ན་རེ། རྣམ་པར་ཤེས་པའི་རྒྱལ་པོ་ཆོས་ཅན། ཁྱོད་ལྷའི་དུས་ན་མི་བསྐྱོད་པ་མ་ཡིན་ཏེ། རྣམ་ཤེས་ཐུགས་ཀྱི་བདག་ཉིད་རྣམ་སྣང་ཡིན་པའི་ཕྱིར། དབུས་སུ་རིགས་བདག་མཚོན་བྱེད་ཀྱི་གདན་འཁོར་ལོ་དང་སེང་གེ ཡུམ་དབྱིངས་ཕྱུག་མ། ཆོས་དབྱིངས་ཡེ་ཤེས་རྣམས་བྱུང་བའི་ཕྱིར་དང་། ཁྲོ་བོའ་སྐབས་སུའང་བུདྡྷ་ཧེ་རུ་ཀའི་སྐུ་མདོག་དང་སྔགས་ཐོག་མར་སྨོས་པའི་ཕྱིར་ཟེར། གཉིས་པ་དེ་དགག་པ་ནི། དེ་ལྟར་རིགས་པ་མ་ཡིན་ཏེ་ཐུན་མོང་མ་ཡིན་པའི་ལུང་རིགས་མན་ངག་གསུམ་དང་འགལ་བའི་ཕྱིར། ལུང་དང་འགལ་ཏེ་སྒྱུ་འཕྲུལ་བླ་མ་ལས། གཟུགས་ལ་རྣམ་པར་སྣང་མཛད་དེ། །ཞེས་དང་། རྣམ་ཤེས་རྡོ་རྗེ་སེམས་དཔའ་སྟེ། །ཞེས་གསུངས་པའི་ཕྱིར། མན་ངག་དང་འགལ་ཏེ། རྡོ་རྗེ་ལས་རིམ་ལས། རྣམ་ཤེས་ནམ་མཁའི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པ། །མི་བསྐྱོད་ཡབ་ཡུམ་རང་བཞིན་ལས། །ཞེས་དང་། ཉི་འོད་སེང་གེས། ཀུན་གཞི་བྱང་ཆུབ་ཀྱི་སེམས་རྡོ་རྗེ་མི་བསྐྱོད་པ་ལ་རྣམ་པར་ཤེས་པའི་རྒྱལ་པོ་ཞེས་གནས་སྐབས་འདིར་བྱའོ་ཞེས་གསུངས་པའི་ཕྱིར། རིགས་པས་གནོད་དེ། རྣམ་པར་ཤེས་པའི་རྒྱལ་པོ་ཆོས་ཅན། ཁྱོད་རྣམ་སྣང་མ་ཡིན་པར་ཐལ། ཁྱོད་མི་བསྐྱོད་པ་ཡིན་པའི་ཕྱིར་ཏེ། རྣམ་ཤེས་དག་པ་ཐུགས་ཀྱི་བདག་ཉིད་ཡིན་པ་གང་ཞིག དེ་རྡོ་རྗེའི་རིགས་མི་བསྐྱོད་ ― MLP018_Page_0134 ―
[མ་དཔེ་གཟིགས་ན་འདིར་གནོན།]
པར་ངེས་པའི་ཕྱིར། དེ་ལྟར་ཡང་གླང་པོ་ཆེ་རབ་འབོགས་ཀྱི་རྒྱུད་ལས། དོན་དམ་པར་སེམས་ཅན་གྱི་རྣམ་པར་ཤེས་པ་གནས་སུ་དག་པ་དེ་བཞིན་གཤེགས་པའི་ཐུགས་ཀྱི་བདག་ཉིད་ཅེས་པ་ནས། བཅོམ་ལྡན་འདས་རྡོ་རྗེ་མི་བསྐྱོད་པ། ཞེས་གསུངས་པའི་ཕྱིར། ཡུམ་ནམ་མཁའི་དབྱིངས་ཕྱུག་མ་ཆོས་ཅན། ཁྱོད་རྣམ་སྣང་གི་ཡུམ་མ་ཡིན་པར་ཐལ། ཁྱེད་རྣམ་ཤེས་ཀྱི་ཡུལ་ནམ་མཁའི་ཁམས་དང་སྦྱར་བའི་མི་བསྐྱོད་པའི་ཡུམ་དུ་ངེས་པའི་ཕྱིར་ཏེ། རྣམ་ཤེས་ནམ་མཁའི་ངོ་བོ་ཉིད། །ཅེས་སོ། །ཆོས་དབྱིངས་ཡེ་ཤེས་ཆོས་ཅན། ཁྱོད་གཏི་མུག་དག་པ་སྐུའི་རིགས་དང་སྦྱོར་བ་མ་ཡིན་ཏེ། ཁྱོད་ཞེ་སྡང་དག་པ་ཐུགས་ཀྱི་རིགས་སུ་བཞེད་པའི་ཕྱིར་ཏེ། རྒྱ་ཆེར་འགྲེལ་ལས། ཞེ་སྡང་རྣམ་པར་དག་པའི་རང་བཞིན་རྣམ་པར་ཤེས་པའི་ཕུང་པོ་ཡོངས་སུ་དག་པ་ཐུགས་རྡོ་རྗེ་ཆོས་དབྱིངས་ཡེ་ཤེས་ཀྱི་བདག་ཉིད་མི་བསྐྱོད་པའི་དཀྱིལ་འཁོར། ཞེས་དང་། ཡེ་ཤེས་ཐིག་ལེའི་རྒྱུད་ལས་ཀྱང་། གཏི་མུག་མེ་ལོང་ཡེ་ཤེས་ཏེ། །ང་རྒྱལ་མཉམ་པ་ཉིད་དུ་དག །སོ་སོར་རྟོག་པ་འདོད་ཆགས་ཡིན། །བྱ་བ་གྲུབ་པ་ཕྲག་དོག་ཆེ། །ཞེ་སྡང་ཆོས་དབྱིངས་རྣམ་པར་དག །ཅེས་གསུངས་པའི་ཕྱིར་རོ། །ཁྲོ་བོའ་སྐབས་སུ་བུདྡྷ་ཧེ་རུ་ཀ་གཙོ་བོར་མ་གྲུབ་སྟེ། པཎ་གྲུབ་ཀྱི་མན་ངག་རྣམས་སུ་རྒྱུད་དཀྲུག་པ་བསྡེབས་ནས་གཙོ་བོར་བཛྲ་ཧེ་རུ་ཀ་ལ་བཞེད་པའི་ཕྱིར་རོ། །དེ་ཡང་རྒྱ་ཆེར་འགྲེལ་ལས། ཞི་བའི་དུས་སུ་མི་བསྐྱོད་པ་དང་པོར་སྨོས་ཤིང་གཙོ་བོར་བྱས་ལ། ཁྲོ་བོའ་སྐབས་སུ་ནི་གཟུགས་ཀྱི་ཕུང་པོ་རྣམ་པར་དག་པ་བུདྡྷ་ཧེ་རུ་ཀ་དང་པོར་ཕྱུང་ཞིང་གཙོ་བོ་སྨོས་པ་ཅིའི་ཕྱིར་ཞེ་ན། དེ་ནི་རྒྱུད་དཀྲུག་པ་ཡིན་ཏེ། དབང་ཕྱུག་མ་གཙོ་བོ་ལ་འཁྲིལ་བའི་གནས་སྐབས་ན་དེ་ཉིད་མངོན་པར་འགྱུར་ཏེ། འདི་ནི་རྡོ་རྗེ་ཁྲག་འཐུང་ཉིད་ལ་ཅི་ནས་ཀྱང་དོན་གྱིས་ཤེས་པར་བྱའོ། །ཞེས་དང་། འདིར་ཡང་རྣམ་པར་ཤེས་པའི་རང་བཞིན་ཞེ་སྡང་རྣམ་པར་དག་པའི་ངོ་བོ་མི་བསྐྱོད་པ་རྡོ་རྗེ་ཁྲག་འཐུང་དུ་མངོན་པར་འདུ་མཛད་པ་དེ་ལ་ཤེས་པར་བྱའོ། །ཞེས་གསུངས་པའི་ཕྱིར་རོ། །གཉིས་པ་རང་ལུགས་བཞག་པ་ནི། རྣམ་པར་ཤེས་པའི་རྒྱལ་པོ་ལ་སོགས་པ་དེ་བཞིན་གཤེགས་པ་རིགས་ལྔ་པོ་དེ་དག་གི་རིགས་དང་ཡེ་ཤེས་ཀྱི་དབྱེ་བ་ནི། དཀྱིལ་འཁོར་གྱི་གཙོ་བོ་མི་བསྐྱོད་ ― MLP018_Page_0135 ―
[མ་དཔེ་གཟིགས་ན་འདིར་གནོན།]
པ་ནི་ཐུགས་རྡོ་རྗེའི་རིགས་དང་ཆོས་ཀྱི་དབྱིངས་ཀྱི་ཡེ་ཤེས། རྣམ་སྣང་སྐུ་དེ་བཞིན་གཤེགས་པའི་རིགས་དང་མེ་ལོང་ལྟ་བུའི་ཡེ་ཤེས། རིན་འབྱུང་ནི་ཡོན་ཏན་རིན་པོ་ཆེའི་རིགས་དང་མཉམ་ཉིད་ཡེ་ཤེས། སྣང་མཐའ་ནི་པདྨའི་རིགས་དང་སོར་རྟོག་ཡེ་ཤེས། དོན་གྲུབ་ནི་ཕྲིན་ལས་ཀྱི་རིགས་དང་བྱ་བ་གྲུབ་པའི་ཡེ་ཤེས་སུ་ངེས་པའི་ཕྱིར་ཏེ། དེ་ལྟར་ཡང་རྡོ་རྗེ་བཀོད་པ་ལས། སྐུ་ནི་མ་བཅོས་དེ་བཞིན་ཉིད། །ཐུགས་ནི་མི་འགྱུར་རྡོ་རྗེའི་རིགས། །ཡོན་ཏན་ཀུན་འབྱུང་རིན་ཆེན་རིགས། །གསུང་ནི་ཆགས་མེད་པདྨའི་རིགས། །དོན་གྲུབ་སྤྱོད་པ་ལས་ཀྱི་རིགས། །ཞེས་སོ། །གསུམ་པ་རིགས་ཀྱི་མཚན་མར་གྱུར་པའི་སྐུ་མདོག་བསྟན་པ་ནི། དེ་དག་ཀུན་ཀྱང་མཐིང་ག་དང་སོགས་ནས། ལྗང་གུའི་མདོག་ཏུ་འཚེར་བ། ཞེས་པའི་བར་གྱིས་བསྟན། རིགས་ལྔ་པོ་དེ་དག་ཀུན་གྱི་མཚན་མར་གྱུར་པའི་སྐུ་མདོག་ནི། ཆོས་དབྱིངས་ཡེ་ཤེས་དང་རྡོ་རྗེའི་རིགས་མཐིང་ག མེ་ལོང་ཡེ་ཤེས་དང་བདེ་གཤེགས་རིགས་དཀར་པོ། མཉམ་ཉིད་ཡེ་ཤེས་དང་རིན་ཆེན་རིགས་སེར་པོ། སོར་རྟོག་ཡེ་ཤེས་དང་པདྨའི་རིགས་དམར་པོ། བྱ་གྲུབ་ཡེ་ཤེས་དང་ལས་ཀྱི་རིགས་ཀྱི་མཚན་མ་ལྗང་གུར་སྣང་བ་ཡིན་ཏེ། ཆོས་ཉིད་འགྱུར་བ་མེད་པའི་རྟགས་མཐིང་ག ཉེས་སྐྱོན་གྱིས་མ་གོས་པའི་རྟགས་དཀར་པོ། ཆེ་བའི་ཡོན་ཏན་རྒྱས་པའི་རྟགས་སེར་པོ། གདུལ་བྱ་ལ་ཆགས་པའི་རྟགས་དམར་པོ། ལས་སྣ་ཚོགས་ལྷུན་གྱིས་གྲུབ་པའི་རྟགས་སུ་ལྗང་གུར་སྣང་བའི་ཕྱིར་ཏེ། རྒྱས་པ་ལས། མ་མཐོང་རྨོངས་པ་ཐམས་ཅད་ལ། །ཡེ་ཤེས་མཚན་ཉིད་བསྟན་པའི་ཕྱིར། །དཀར་དང་དམར་དང་སེར་བ་དང་། །ལྗང་གུ་ལ་སོགས་ནག་པོར་བསྟན། །ཅེས་སོ། །གཉིས་པ་རིགས་ཀྱི་ཡུམ་ལྔ་ནི། བཙུན་མོ་དམ་པ་སྣང་བའི་དབྱིངས་དང་སོགས་ནས། བསྐྱོད་པའི་དབྱིངས་ལ་སོགས་པ་བཙུན་མོའ་ཚོགས་དང་གཉིས་སུ་མེད་པ། ཞེས་པའི་བར་གྱིས་བསྟན། དེའི་དོན་ལ་ཡུམ་ལྔ་སྤྱིའི་མཚན་བཤད་པ་དང་། བྱེ་བྲག་གི་མཚན་བཤད་པ་གཉིས་ལས། དང་པོ་སྤྱིའི་མཚན་ནི། བཙུན་མོ་དམ་པ་ཞེས་པ་དང་། དབྱིངས་ཞེས་པས་བསྟན། ཡུམ་ལྔ་ལ་བཙུན་མོ་ཞེས་བརྗོད་པ་ནི། སྐྱེད་པར་བྱེད་པའི་རྒྱུ་དང་། སྤྱད་པར་བྱ་བའི་ཡུལ་དུ་གྱུར་པས་དེ་ལྟར་དུ་ ― MLP018_Page_0136 ―
[མ་དཔེ་གཟིགས་ན་འདིར་གནོན།]
བརྗོད་དེ། རྟོག་པའི་དུས་སུ་འབྱུང་བ་ལྔས་ཕུང་པོ་ལྔ་བསྐྱེད་པ་དང་། ལྷའི་དུས་ན་རིགས་ཀྱི་ཡབ་ལྔས་ལོངས་སྤྱད་པར་བྱ་བའི་ཡུལ་ཡིན་པའི་ཕྱིར་དང་། ཡང་ན་ཡུམ་གྱི་ངོ་བོ་དབྱིངས་དང་། ཡབ་ཀྱི་ངོ་བོ་ཡེ་ཤེས་ཡིན་པས། དབྱིངས་ཀྱི་ཡེ་ཤེས་བསྐྱེད་པ་དང་། དབྱིངས་ཡེ་ཤེས་ཀྱི་ཡུལ་དུ་གྱུར་བས་སོ་གསུངས། ལྔ་པོ་དེ་ལ་དམ་པ་ཞེས་བརྗོད་པ་ནི། ཡོན་ཏན་གྱི་ཁྱད་པར་གཞན་ལས་འཕགས་པས་ན་དམ་པ་ཞེས་བཤད། དབྱིངས་ཞེས་པ་ལ་ཉི་འོད་སེང་གེས། །དབྱིངས་ཀྱི་སྒྲ་ནི་མི་ཟད་པ་ལ་བྱའོ། །ཞེས་པས། སྲས་ཀྱི་འབྱུང་ཁུངས་དང་བདེ་བའི་ཡེ་ཤེས་བསྐྱེད་པའི་རྒྱུར་གྱུར་པའི་ཕྱིར་དང་། ཡུམ་རྣམས་དབྱིངས་ཀྱི་ཕྱག་རྒྱར་གྱུར་པས་ཀྱང་དེ་ལྟར་དུ་བརྗོད་དོ་གསུངས། གཉིས་པ་བྱེ་བྲག་གི་མཚན་ནི། ཡུམ་ནམ་མཁའི་དབྱིངས་ཕྱུག་མ་ལ་སྣང་བ་ཞེས་བརྗོད་པ་ནི། རྟོག་པའི་དུས་ན་ནམ་མཁས་གོ་མ་ཕྱེ་ན་དངོས་པོ་ཐམས་ཅད་སྣང་མི་ནུས་པས་གོ་འབྱེད་པ་ནམ་མཁའ་དང་། ལྷའི་དུས་ན་ཆོས་ཁམས་ནམ་མཁའ་རྣམ་ཤེས་ཀྱི་ཡུལ་ཡིན་པ་ལྟར་ཐུགས་རྡོ་རྗེ་མི་བསྐྱོད་པའི་ཡུམ་དང་། ཡུམ་སྤྱན་མ་ལ་སྲ་བ་ཞེས་བརྗོད་པ་ནི། རྟོག་པའི་དུས་ན་སྲ་བརྟན་མཁྲང་པའི་མཚན་ཉིད་ཅན་གྱི་སའི་ཁམས་དང་། དེ་ལྷའི་དུས་ན་བརྟན་ཅིང་རྟེན་དུ་གྱུར་པས་སྐུའི་རིགས་ཀྱི་ཡུམ་དང་། ཡུམ་མཱ་མ་ཀཱི་ལ་མཉེས་པ་ཞེས་བརྗོད་པ་ནི། རྟོག་པའི་དུས་ན་གཤེར་སྡུད་བརླན་པའི་མཚན་ཉིད་ཅན་གྱི་ཆུའི་ཁམས་དང་། དེ་ལྷའི་དུས་ན་རྒྱུད་བརླན་ཅིང་ཡོན་ཏན་སྡུད་པ་རིན་ཆེན་རིགས་ཀྱི་ཡུམ་དང་། ཡུམ་གོས་དཀར་མོ་ལ་དྲོ་བ་ཞེས་བརྗོད་པ་ནི། རྟོག་པའི་དུས་ན་ཚ་ཞིང་བསྲེག་པའི་མཚན་ཉིད་ཅན་གྱི་མེའི་ཁམས་དང་། དེ་ལྷའི་དུས་ན་མཚན་འཛིན་གྱི་སྤུ་རིས་གསལ་བར་ཤེས་རབ་ཀྱི་མེས་དག་པར་བྱེད་པའི་བདག་ཉིད་པདྨའི་རིགས་ཀྱི་ཡུམ་དང་། ཡུམ་དམ་ཚིག་སྒྲོལ་མ་ལ་བསྐྱོད་པ་ཞེས་བརྗོད་པ་ནི། རྟོག་པའི་དུས་ན་ཡང་ཞིང་གཡོ་བའི་མཚན་ཉིད་ཅན་གྱི་རླུང་གི་ཁམས་དང་། དེ་ལྷའི་དུས་ན་རླུང་གིས་བསྐྱོད་འདོད་ཀྱི་བྱ་བ་བྱེད་པ་ལྟར་ཐོགས་པ་མེད་པའི་ལས་ཅན་ལས་ཀྱི་རིགས་ཀྱི་ཡུམ་སྟེ། འདི་ཉིད་ལས། ས་ཆུ་སྤྱན་དང་མཱ་མ་ཀཱི །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །ཞེས་སོ། ། ― MLP018_Page_0137 ―
[མ་དཔེ་གཟིགས་ན་འདིར་གནོན།]
གཉིས་པ་རིག་པ་ཁྱད་པར་ཅན་གྱི་འཁོར་ལ་གཉིས་ལས། དང་པོ་རྒྱལ་སྲས་སེམས་དཔའི་འཁོར་ནི། དེ་ནས་བྱང་ཆུབ་ཆེན་པོ་རྡོ་རྗེ་མཐོང་བ་དང་། སོགས་ནས། མ་བྱོན་པའི་ཚོགས་དང་། ཞེས་པའི་བར་གྱིས་བསྟན། དེའི་དོན་བཤད་ན་སྤྱི་དང་བྱེ་བྲག་གཉིས་ལས། དང་པོ་སྤྱིའི་མཚན་ནི། སེམས་དཔའ་ཡབ་རྣམས་ཀྱི་མཚན་ལ་བྱང་ཆུབ་ཆེན་པོ་རྡོ་རྗེ་ཞེས་བརྗོད་པ་ནི། མིག་ཤེས་ལ་སོགས་པའི་རྟོག་ཚོགས་རྣམས་ཡེ་ནས་ཆོས་ཉིད་བྱང་ཆུབ་ཀྱི་སེམས་ཡིན་པ་ལས། ཡིན་པ་ལྟར་མངོན་དུ་གྱུར་པའི་འབྲས་བུ་ནི་བྱང་ཆུབ་ཆེན་པོ། དེ་ལྟར་རྒྱུ་འབྲས་ལྟར་སྣང་ཡང་དོན་དམ་པར་ལྷ་རྟོག་དབྱེར་མི་ཕྱེད་པས་ན་རྡོ་རྗེ་ཞེས་བརྗོད་པའི་ཕྱིར་ཏེ། འགྲེལ་ཆུང་ལས། འཁོར་གྱི་བཀོད་པ་ཇི་སྙེད་པ། །ཁམས་དང་སྐྱེ་མཆེད་ཡིན་པར་གྲགས། །རྣམ་ཤེས་ཡུལ་དང་དབང་པོ་དང་། །དུས་དང་ཕྱིན་ཅི་མ་ལོག་རྣམས། །བྱང་ཆུབ་ཆེན་པོའི་རང་བཞིན་དུ། །ལྷུན་གྱིས་གྲུབ་པའི་དཀྱིལ་འཁོར་ཡིན། །ཞེས་གསུངས་སོ། །དེ་དག་གི་ཡུམ་སེམས་མ་རྣམས་ཀྱི་མཚན་ལ་བཙུན་མོ་ཞེས་བརྗོད་པ་ནི། སྐབས་འདིར་ཡུལ་བཞིས་རྣམ་ཤེས་བཞི་བསྐྱེད་པ་དང་། དུས་བཞིས་གོ་ཕྱེ་ནས་དབང་པོ་བཞི་བསྐྱེད་པའི་ཆ་ནས་དེ་ལྟར་དུ་བརྗོད་པའི་ཕྱིར་རོ། །གཉིས་པ་བྱེ་བྲག་གི་མཚན་ནི། ནང་སེམས་ཡབ་བཞི་པོ་ལ་མཐོང་བ་ལ་སོགས་པར་སྨོས་པ་ནི་རིམ་པ་ལྟར། མིག་རྣ་བ་སྣ་ལྕེའི་རྣམ་ཤེས་བཞི་ཡིན་པས་རྟོག་པའི་མཚན་ཏེ། མིག་དབང་ལ་བརྟེན་ནས་མིག་ཤེས་ཀྱིས་ཡུལ་གཟུགས་མཐོང་བ་ལ་སོགས་པ་ཡིན་པའི་ཕྱིར། མཐོང་བ་ལ་སོགས་པ་བཞི་པོ་ལྷའི་དུས་ན་ཐུགས་ཀྱི་སེམས་དཔའ་བཞི་ཡིན་ཏེ། མཐོང་བ་ས་སྙིང་། སྣོམ་པ་ནམ་སྙིང་། ཐོས་པ་ཕྱག་རྡོར། མྱོང་བ་སྤྱན་རས་གཟིགས་དབང་ཕྱུག་རྣམས་སུ་ངེས་པའི་ཕྱིར། དེ་རྣམས་ལ་ཐུགས་ཀྱི་སེམས་དཔའ་ཞེས་བརྗོད་པ་ནི། འདི་ཉིད་ཀྱི་ལེའུ་བཞི་པར། ཀ་ནི་སྤྱན་གྱི་ཐུགས་ཀྱི་མཆོག །ཁ་ནི་སྙན་གྱི་ཐུགས་ཀྱི་མཆོག །ག་ནི་ཤངས་ཀྱི་ཐུགས་ཀྱི་མཆོག །གྷ་ནི་ལྗགས་ཀྱི་ཐུགས་ཀྱི་མཆོག །ཅེས་སོ། །ནང་སེམས་བཞི་པོའི་ཡུམ་ཡང་། མཐོང་བར་བྱ་བ་ལ་སོགས་པ་ནི། རིམ་པ་ལྟར་ཡུལ་གཟུགས་སྒྲ་དྲི་རོ་བཞི་ཡིན་པས་རྟོག་པའི་མཚན་ཏེ། མིག་ཤེས་ལ་སོགས་པའི་ ― MLP018_Page_0138 ―
[མ་དཔེ་གཟིགས་ན་འདིར་གནོན།]
མཐོང་བྱ་གཟུགས་ལ་སོགས་པའི་རྟེན་བྱེད་པའི་ཕྱིར་དང་། དེ་དག་ལྷའི་དུས་ན་མཐོང་བར་བྱ་བ་ལཱ་སྱེ་མ། ཉན་པར་བྱ་བ་གཱིརྟི་མ། སྣོམ་པར་བྱ་བ་མཱ་ལེ་མ། མྱོང་བར་བྱ་བ་ནཱིརྟི་མ་རྣམས་སུ་ངེས་པའི་ཕྱིར། དེ་རྣམས་ལ་སྐུ་ཡི་སེམས་མ་ཞེས་བརྗོད་པ་ནི། ཡུལ་བཞིས་རྣམ་པར་ཤེས་པའི་རྟེན་བྱེད་པའི་ཕྱིར་ཏེ། འདི་ཉིད་ལས། ཙ་ནི་སྤྱན་གྱི་སྐུ་ཡི་མཆོག །ཚ་ནི་སྙན་གྱི་སྐུ་ཡི་མཆོག །ཛ་ནི་ཤངས་ཀྱི་སྐུ་ཡི་མཆོག །ཛྷ་ནི་ལྗགས་ཀྱི་སྐུ་ཡི་མཆོག །ཅེས་དང་། རྡོ་རྗེ་ལས། རྣམ་ཤེས་བཞི་ཡི་དམིགས་པའི་ཡུལ། །མཐོང་བར་བྱ་བ་ལ་སོགས་པ། །དམིགས་པར་བྱ་ཕྱིར་སྐུ་ཡི་མཆོག །ཅེས་སོ། །གལ་ཏེ་ཁོ་ན་རེ། འདིར་རྟོག་པའི་གོ་རིམ་ལྟར་སྦྱར་ན་ཡུལ་ཡུལ་ཅན་མ་འཁྲུལ་ནའང་། ལྷ་ཡབ་ཡུམ་སྦྱོར་བའི་ཚེ་རྣ་བའི་ཡུལ་རོ་དང་། ལྕེའི་ཡུལ་སྒྲར་བྱུང་བས་སྦྱོར་ཚུལ་ནོར་ཏེ། སྤྱན་རས་གཟིགས་ཀྱི་ཡུམ་གཱིརྟི་མ་དང་། ཕྱག་རྡོར་གྱི་ཡུམ་ནཱིརྟི་མར་བྱུང་བའི་ཕྱིར་ཟེར་ན། ཡུལ་ཡུལ་ཅན་གྱི་དབང་དུ་བྱས་ན་དེ་ལྟར་ཡིན་མོད་ཀྱང་། འདིར་རིགས་ཀྱི་དབང་དུ་བྱས་པས་འགལ་བ་མེད་དེ། ཉི་འོད་སེང་གེའི་རྒྱ་ཆེར་འགྲེལ་ལས། རྒྱུད་འདིར་ནི་རིགས་ཁོ་ན་གཙོ་བོར་བྱས་ཏེ། མཉན་པར་བྱ་བ་སྒྲའི་ལྷ་མོ་རྣ་བའི་ཡུལ་ཡིན་ཡང་། རིགས་ཀྱི་དུས་སུ་གསུང་གི་རིགས་ཡིན་པས་འཇིག་རྟེན་དབང་ཕྱུག་གི་ཡུམ་དུ་ཤེས་པར་བྱའོ། །ཞེས་སོགས་གསུངས་པའི་ཕྱིར་རོ། །ཕྱི་སེམས་བཞི་པོ་དེ་དག་ལ་མཐོང་བྱེད་ལ་སོགས་པ་སྨོས་པ་ནི། རིམ་པ་ལྟར་མིག་རྣ་བ་སྣ་ལྕེའི་དབང་པོ་བཞི་ཡིན་པས་རྟོག་པའི་མཚན་ཏེ། རྣམ་ཤེས་བཞིས་ཡུལ་བཞི་མཐོང་བའི་བདག་རྐྱེན་དབང་པོ་བཞིས་བྱེད་པའི་ཕྱིར་དང་། དེ་དག་ལྷའི་དུས་ན་གསུང་གི་སེམས་དཔའ་བཞིར་གྲགས་ཏེ། མཐོང་བྱེད་བྱམས་པ། ཐོས་བྱེད་སྒྲིབ་སེལ། སྣོམ་བྱེད་ཀུན་བཟང་། མྱོང་བྱེད་འཇམ་དཔལ་རྣམས་སུ་ངེས་པའི་ཕྱིར། དེ་རྣམས་ལ་གསུང་གི་སེམས་དཔའ་ཞེས་བརྗོད་པའི་རྒྱུ་མཚན་ཡང་ཡོད་དེ། དབང་པོས་ཡུལ་དང་ཤེས་པ་གཉིས་ཕྱི་ནང་གི་བརྡ་སྦྱོར་བྱེད་པའི་ཕྱིར་ཏེ། འདི་ཉིད་ལས། པ་ནི་སྤྱན་གྱི་གསུང་གི་མཆོག །ཕ་ནི་སྙན་གྱི་གསུང་གི་མཆོག །བ་ནི་ཤངས་ཀྱི་གསུང་གི་མཆོག །བྷ་ནི་ལྗགས་ཀྱི་གསུང་གི་མཆོག །ཅེས་སོ། །ཕྱི་སེམས་བཞིའི་ཡུམ་དེ་དག་ལ་ ― MLP018_Page_0139 ―
[མ་དཔེ་གཟིགས་ན་འདིར་གནོན།]
འདས་པ་ལ་སོགས་པ་སྨོས་པ་ནི་རྟོག་པའི་མཚན་ཏེ། དུས་བཞིས་གོ་ཕྱེ་ནས་དབང་པོ་བཞི་སྐྱེད་པར་བྱེད་པའི་ཕྱིར་དང་། དེ་དག་ལྷའི་དུས་ན་དུས་བཞིའི་ལྷ་མོ་སྟེ། འདས་པའི་དུས་བདུག་པ་མ་དང་། ད་ལྟར་བ་མེ་ཏོག་མ། འབྱུང་བ་སྟེ་མ་འོངས་པ་མར་མེ་མ། མ་བྱོན་པར་འབྱུང་བར་མ་ངེས་པའི་དུས་ཏེ་དྲི་ཆབ་མ་རྣམས་སུ་ངེས་པའི་ཕྱིར་ཏེ། འདི་ཉིད་ལས། ཡ་ནི་སྐྱེ་བ་རྣམ་པར་དག །ཝ་ནི་གནས་པ་དག་པ་ཡིན། །ར་ནི་འཇིག་པ་དག་པ་སྟེ། །ལ་ནི་སྟོང་པ་དག་པའོ། །ཞེས་སོ། །ཁོ་ན་རེ། འདིར་དུས་བཞི་སྨོས་པས་དུས་ལོག་སྟེ། སྡེ་སྣོད་གཞན་རྣམས་སུ་དུས་གསུམ་ལས་མ་བཤད་པའི་ཕྱིར་ཟེར། དེ་ལྟར་ན་མངོན་པ་མཛོད་ནས་ཆགས་གནས་འཇིག་སྟོངས་བཞི་དང་། རྫོགས་ལྡན་ལ་སོགས་པའི་དུས་བཞི་བཤད་པ་དང་། དཀོན་མཆོག་བརྩེགས་པར། དུས་གསུམ་དང་བསམ་གྱིས་མི་ཁྱབ་པའི་དུས་ཏེ་བཞིར་གསུངས་པ་སོགས་ཀྱང་དུས་ལོག་པར་ཐལ་ལོ། །འོ་ན་འདིར་དུས་བཞི་པོ་གང་ཞེ་ན། རྒྱུ་འབྲས་གཉིས་ཀ་སྤྱད་ཟིན་པའི་དུས་ནི་འདས་པ། རྒྱུ་སྤྱད་ཅིང་འབྲས་བུ་མ་སྤྱད་པ་ནི་ད་ལྟ་བ། རྒྱུ་འབྲས་ཚོགས་ལ་མ་སྤྱད་པ་ནི་མ་འོངས་པ། རྒྱུ་འབྲས་ཡོད་ལ་མ་ཚོགས་པ་ནི་འདས་མ་འོངས་གང་དུའང་མ་ངེས་པའི་དུས་ཏེ། དཔེར་ན་དབྱར་གྱི་དུས་ལྟ་བུ་ཞིག་ལ་བཞིར་བཞག་ནས་བརྩི་ན། དཔྱིད་ནི་འདས་པ། དབྱར་ནི་ད་ལྟ་བ། སྟོན་ནི་མ་འོངས་པ། དགུན་ནི་མ་ངེས་པ་སྟེ། དབྱར་གྱི་དུས་འདི་ལས་སྔར་འདས་ཕྱིས་འབྱུང་གཉིས་ནི་འདས་མ་འོངས་པར་ངེས་ལ། དགུན་ནི་འདས་མ་འོངས་གང་རུང་གཅིག་ཏུ་ཁ་ཚོན་མ་ཆོད་པའི་ཕྱིར་ཏེ། དཔྱིད་ཀྱི་སྔ་ལོགས་ཀྱི་དགུན་ནི་འདས་པ་དང་། སྟོན་གྱི་ཕྱི་ལོགས་ཀྱི་དགུན་ནི་མ་འོངས་པ་ལྟར་སྣང་བའི་ཕྱིར་ཏེ། དེ་ལྟར་ཡང་རྔམ་གློག་ལས། རྒྱུ་འབྲས་ངེས་པ་མ་ཚོགས་པ། །འབྱུང་བར་མ་ངེས་དུས་ཞེས་གྲགས། །ཞེས་སོ། །དེའི་ཕྱིར་དུས་བཞིར་གྲངས་ཀྱང་གོ་རིམ་ངེས་པ་ཡིན་ནོ། །གཉིས་པ་འཇོམས་བྱེད་ཁྲོ་བོའ་འཁོར་ནི། འཇོམས་པ་ཆེན་པོ་རྡོ་རྗེ་རེག་པ་དང་ནས། མཚན་མར་འཛིན་པ་མ་ཡིན་པ་དང་། ཞེས་པའི་བར་གྱིས་བསྟན། དེ་ལའང་སྤྱི་བྱེ་བྲག་གཉིས་ལས། དང་པོ་སྤྱིའི་མཚན་ནི། འཇོམས་བྱེད་ཡབ་བཞི་པོ་ལ་འཇོམས་པ་ཆེན་པོ་རྡོ་རྗེ་ཞེས་ ― MLP018_Page_0140 ―
[མ་དཔེ་གཟིགས་ན་འདིར་གནོན།]
བརྗོད་པ་ནི། ཕྱི་ལུས་ཀྱི་ཆོས་བཞི་དང་སྦྱར་ན་རྟོག་པའི་རང་བཞིན་མངོན་དུ་གྱུར་པའི་ཁྲོ་བོ་བཞིའི་སྐུ་གསུང་ཐུགས་ཀྱི་མཛད་པས་བདུད་དང་ལོག་འདྲེན་རྣམས་འཇོམས་པ་དང་། ནང་གསང་བའི་ཁམས་བཞི་དང་སྦྱར་ན། འོག་སྒོ་གསང་བའི་ཁམས་གསུམ་འདུས་པའི་བདེ་བའི་རྟོག་པ་ལྷའམ་བདེ་བར་འཛིན་པའི་ཞེན་པ་གཉིས་ཀ་འཇོམས་པ་ལ་ཐོགས་པ་མེད་པས་ན་རྡོ་རྗེ་ཞེས་བརྗོད་པ་ཡིན་ཅིང་། དེས་འཇོམས་པའི་ཕྲིན་ལས་གཞན་ལས་ཁྱད་པར་དུ་གྱུར་པས་ན་ཆེན་པོ་ཞེས་བརྗོད་པ་ཡིན་གསུངས། དེ་དག་གི་ཡུམ་བཞི་པོ་ལ་བཙུན་མོ་ཞེས་བརྗོད་པ་ནི། དེ་ལྟ་བུའི་འཇོམས་བྱེད་ཀྱི་སྙིང་པོ་དེ་ཡང་རྟག་ཆད་བདག་མཚན་བཞི་མ་ཡིན་པའི་ཆོས་ཉིད་ཡུམ་གྱི་ངོ་བོ་དེས་བསྐྱེད་པའི་ཕྱིར་ཏེ། དཔེར་ན་དཀར་པོ་འཇོམས་པ་དེ་དཀར་པོ་མ་ཡིན་པ་ཞིག་གིས་བསྐྱེད་པ་བཞིན་ནོ། །ཡང་ཕྱིན་ཅི་ལོག་གི་རྟོག་པ་བཞི་ལྟར་ན། དེས་ལུས་ཀྱི་རྟོག་པ་བཞི་པོ་དངོས་སུ་མི་བསྐྱེད་ཀྱང་བརྒྱུད་ནས་བསྐྱེད་པར་བཞེད་པའི་ཕྱིར་རོ། །གཉིས་པ་བྱེ་བྲག་གི་མཚན་ནི། སྒོ་བ་ཡབ་བཞི་པོ་དེ་ལ་རེག་པ་ལ་སོགས་པར་སྨོས་པ་ནི་རྟོག་པའི་མཚན་ཏེ། ཕྱི་ལྟར་ལུས་ཀྱི་འདུས་ཏེ་རེག་པའི་རྐྱེན་གྱིས་ཚོར་བ་བསྐྱེད་པ་ལ། རེག་བྱེད་ཡུལ་དབང་རེག་བྱ་ཡུལ། དེ་གཉིས་འཕྲད་པའི་རེག་ཤེས་སོ། །ནང་ལྟར་ན་གསང་བའི་ཡུལ་དབང་རྣམ་ཤེས་གསུམ་འདུས་ཀྱི་རེག་པ་བསྐྱེད་པ་ལ། རེག་བྱེད་གསང་དབང་ཐབས་ཀྱི་རྡོ་རྗེ། རེག་བྱ་གསང་ཡུལ་ཤེས་རབ་ཀྱི་པདྨ། གསང་བའི་རེག་ཤེས་དགའ་བ་ཉམས་སུ་མྱོང་བ་རྣམས་སོ། །དེ་དག་ལྷའི་དུས་ན་མཐར་བྱེད་སྒོ་བ་བཞི་སྟེ། ཕྱི་ནང་གི་རྟོག་པ་གཉིས་ཀ་གོ་རིམ་བཞིན་དུ་ཁྲོ་བོ་བདུད་རྩི་འཁྱིལ་བ་དང་། རྟ་མགྲིན་དང་། སྟོབས་པོ་ཆེ་དང་། གཤིན་རྗེའི་གཤེད་རྣམས་སུ་ངེས་པའི་ཕྱིར། དེ་དག་གི་ཡུམ་བཞི་པོ་དེ་དག་ལ་རྟག་པ་མ་ཡིན་པ་ཞེས་སོགས་སྨོས་པ་ནི་རྟོག་པའི་མཚན་ཏེ། རྟག་པར་མ་ཡིན་པ་སྟེ་ཕུང་པོ་མི་རྟག་པར་འཛིན་པ་དང་། ཆད་པར་མ་ཡིན་པ་སྟེ་སྡུག་བསྔལ་གྱི་རང་བཞིན་ང་རུ་འཛིན་པ་དང་། བདག་ཏུ་མ་ཡིན་པ་སྟེ་བདག་མེད་དུ་འཛིན་པ་དང་། མཚན་མར་མ་ཡིན་པ་སྟེ་སྟོང་པར་འཛིན་པ་རྣམས། ལྷའི་དུས་ན་གོ་རིམ་བཞིན་དུ་ཁྲོ་མོ་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ་དང་ ― MLP018_Page_0141 ―
[མ་དཔེ་གཟིགས་ན་འདིར་གནོན།]
བཞིར་ངེས་པའི་ཕྱིར། ཡང་རྟག་ཆད་བདག་མཚན་དུ་འཛིན་པ་ཕྱིན་ཅི་ལོག་གི་ཤེས་པ་བཞི་ལྟར་ན། རྟག་པར་འཛིན་པ་སོགས་རྟོག་པ་བཞི་པོ་དེ་རང་ག་མར་སྣང་བ་ལྟར་མ་ཡིན་ཏེ། དེ་དག་མ་སྤངས་པར་སྒོ་མ་བཞིའི་རང་བཞིན་དུ་དག་པའི་ཕྱིར་ཏེ། དེ་ལྟར་ཡང་ཐལ་རྒྱུད་ལས། རྟག་སོགས་མཚན་མ་ལས་སྐྱེས་ཕྱིར། །བཙུན་མོ་ཞེས་སུ་བསྟན་པ་སྟེ། །ཞེས་དང་། གླང་པོ་ཆེ་རབ་འབོག་གི་རྒྱུད་ལས་ཀྱང་། དོན་དམ་པར་སེམས་ཅན་གྱི་རྟག་པར་ལྟ་བ་གནས་སུ་དག་པ་བཛྲ་ཨངྐུ་ཤ་སྟེ། ཞེས་སོ། །དེ་ལྟར་རྒྱལ་སྲས་སེམས་པའི་འཁོར་དང་འཇོམས་བྱེད་ཁྲོ་བོའ་འཁོར་རྣམས་ལ་རིག་པ་ཁྱད་པར་ཅན་གྱི་འཁོར་ཞེས་བཤད་པ་ནི། སྟོན་པའི་ཐུགས་རིག་པའི་ཡེ་ཤེས་ཀྱི་ཁྱད་པར་ལས་རང་སྣང་བའི་ཕྱིར་ཏེ། རྒྱ་མཚོ་ལས། དེ་བཞིན་ཐུགས་ཀྱི་ཁྱད་པར་ལས། །རང་སྣང་རྒྱལ་བ་སེམས་སོགས་དང་། །ཞེས་སོ། །དེར་མ་ཟད་དད་པས་གཏམ་ཉན་པའི་འཁོར་ཕྱིའི་ཁོར་ཡུག་ལ་བཞུགས་པའི་འཇིག་རྟེན་གྱི་ཆ་འཛིན་པ་ལྷ་ཆེན་པོ་རྣམས་ཀྱང་ཡོད་དེ། ཁོག་གཞུང་ལས། དད་པས་ཉན་པའི་ལྷ་ཆེན་རྣམས། །ཞེས་དང་། ལེ་ལག་ལས། ཐམས་ཅད་ལ་ནི་དབང་བསྒྱུར་ཕྱིར། །འཇིག་རྟེན་ལྷ་ཆེན་རྣམས་ཀྱིས་བསྐོར། །ཞེས་དང་། སྤྱན་འགྲེལ་ལས་ཀྱང་། འཁོར་བའི་ཆོས་རྣམས་ཀྱང་བདག་ཉིད་དུ་རང་སྣང་བའི་ཕྱིར་ཕྱི་རོལ་དུ་མ་ཧཱ་དེ་ཝ་ལ་སོགས་པའི་ལྷ་ཆེན་པོ་རྣམས་ཀྱིས་བསྐོར་བ་སྟེ། རང་རང་གི་མཆོད་ཡོན་དང་རྒྱན་དང་ལྡན་པར་འཁོད་པའོ། །ཞེས་གསུངས་པའི་ཕྱིར་རོ། །དེ་ལྟར་བསྟན་པའི་འཁོར་གྱི་ཚད་ནི། ཆོས་ཀྱི་དབྱིངས་ཀུན་ཏུ་མཐའ་ཀླས་པར་ཁྱབ་པ་ནི་འདི་ལྟ་སྟེ། དཔེར་ན་ཏིལ་གྱི་གོང་བུ་བཞིན་དུ་གང་ནས་ཁྱབ་པར་བཞུགས་སོ། །ཞེས་དང་། ལ་སོགས་པ་དེ་ལྟ་བུའི་ཚོགས་བརྗོད་ཀྱིས་མི་ལང་བ་དང་གཉིས་སུ་མེད་པར་བཞུགས་སོ། །ཞེས་པས་བསྟན། དེའི་དོན་ནི་གཉིས་ལས། ཁྱབ་པའི་ཚད་ནི། ཀུན་ཏུ་ཁྱབ་ཅིང་མཐའ་ཡས་པར་ཁྱབ་པའི་ཕྱིར་ཏེ། ཏིལ་གོང་དེར་ཏིལ་འབྲས་ཀྱིས་གང་བ་བཞིན་ཁྱབ་པ་ཡིན་ནོ། །གཉིས་པ་མང་བའི་ཚད་ནི། སྔར་སྨོས་པ་དེ་ལྟ་བུའི་འཁོར་ཚོགས་ཀྱི་གྲངས་ཚད་འདི་ཙམ་ཞེས་བརྗོད་ཀྱིས་མི་ལང་བའི་ཕྱིར་རོ། །འོ་ན་ཁྱབ་པ་དང་མང་བའི་བདག་ཉིད་ཅན་གྱི་འཁོར་ ― MLP018_Page_0142 ―
[མ་དཔེ་གཟིགས་ན་འདིར་གནོན།]
དེ་དག་དང་གཉིས་སུ་མེད་པར་བཞུགས་ཚུལ་དེ་ཇི་ལྟ་བུ་ཞེ་ན། རང་བཞིན་གཉིས་སུ་མེད་པར་བཞུགས་པ་ཡིན་ཏེ། དེ་བཞིན་གཤེགས་པ་དང་བྱང་ཆུབ་སེམས་དཔའ་མ་ལུས་པ་ཐམས་ཅད་དཔལ་ཀུན་ཏུ་བཟང་པོའི་རང་བཞིན་དུ་འདུས་ཤིང་། འགྲོ་བའི་ཕུང་ཁམས་སྐྱེ་མཆེད་ཇི་སྙེད་པ་ཐམས་ཅད་ཀྱང་ལྷའི་རང་བཞིན་དུ་གནས་པའི་ཕྱིར་ཏེ། འགྲེལ་ཆུང་ལས། སྲིད་གསུམ་འགྲོ་བ་ཐམས་ཅད་ཀྱི། །ཕུང་པོ་ཁམས་དང་སྐྱེ་མཆེད་དང་། །བརྗོད་མེད་བརྗོད་ཀྱིས་མི་ལང་བ། །དེ་སྙེད་འཁོར་ལོའ་དཀྱིལ་འཁོར་དུ། །མངོན་རྫོགས་རྒྱལ་པོ་དེ་ཉིད་ངེས། །གཉིས་མེད་ལྷུན་གྲུབ་དཀྱིལ་འཁོར་ན། །ཐམས་ཅད་བདག་ཉིད་རྟག་པར་བཞུགས། །ཞེས་གསུངས་པའི་ཕྱིར་རོ། །གཉིས་པ་ཞར་བྱུང་གདུལ་བྱ་དགོས་ཆེད་དུ་བསྟན་པ་ཁྲོ་བོའ་གླེང་གཞི་ལའང་ཕུན་སུམ་ཚོགས་པ་ལྔ་ཡོད་པས། དང་པོ་སྟོན་པ་ཕུན་སུམ་ཚོགས་པ་ནི། དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་སངས་རྒྱས་ཐམས་ཅད་ཀྱི་ངོ་བོ་ཉིད་ཀྱི་ཁྲོ་བོའ་དཀྱིལ་འཁོར་མངོན་པར་འདུ་མཛད་དེ། ཞེས་པས་བསྟན། དོན་ནི། སྟོན་པ་དེ་བཞིན་གཤེགས་པ་རིགས་ཐམས་ཅད་ཀྱི་བདག་པོ་དྲུག་པ་ཀུན་ཏུ་བཟང་པོ་ཉིད་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་ངོ་བོ་ལོངས་སྤྱོད་རྫོགས་པའི་དཀྱིལ་འཁོར་ལས་མ་གཡོས་པར། གདུལ་བྱ་རུ་ཏྲའི་ངོར་འདུལ་བྱེད་ཁྲོ་བོའ་དཀྱིལ་འཁོར་གྱི་ཚོགས་མངོན་པར་འདུ་མཛད་དེ་ཕྲིན་ལས་ཕྱག་རྒྱའི་སྐུར་བཞེངས་པ་སྟེ། དགོངས་འདུས་ལས། ཤིན་ཏུ་གདུག་ཅིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་ཕྱག་རྒྱ་ཡིས། །ཁྲོ་བོར་དེ་བཞིན་གཤེགས་ཀུན་མཛད། །ཅེས་གསུངས་པའི་ཕྱིར་རོ། །གཉིས་པ་གནས་ཕུན་སུམ་ཚོགས་པ་ནི། དུར་ཁྲོད་ཆེན་པོར་དགྱེས་ནས་ཁྲག་གི་རྒྱ་མཚོའ་དཀྱིལ་ན་ཀེང་རུས་ཆེན་པོའི་རི་རབ་ཀྱི་སྟེང་འབར་བ་ཆེན་པོའི་ཀློང་གི་འཁོར་ལོའ་དཀྱིལ་ན། ཞེས་པས་བསྟན། དོན་ནི། དུར་ཁྲོད་འབར་བའི་གཞལ་ཡས་ཁང་ཆེན་པོར་བཞུགས་པར་དགྱེས་ནས། མཁའ་རླུང་གི་དཀྱིལ་འཁོར་ལ་བརྟེན་པའི་ཁྲག་ཞག་གི་རྒྱ་མཚོར་ ― MLP018_Page_0143 ―
[མ་དཔེ་གཟིགས་ན་འདིར་གནོན།]
ཆགས་པ། ཞིང་ཆེན་གྱི་ས་གཞིའི་དབུས་ཀེང་རུས་བརྩེགས་པའི་རི་རབ་ཀྱི་སྟེང་ཡེ་ཤེས་ཀྱི་མེ་དཔུང་འབར་བ་ཆེན་པོའི་ཀློང་ན་བཞུགས་པ་སྟེ། ཧེ་རུ་ཀ་གལྤོའི་རྒྱུད་ལས། ཆགས་པ་རཀྟའི་རྒྱ་མཚོ་རྦ་ཀློང་འཁྱིལ། །ཞིང་ཆེན་གཏམས་པའི་ས་གཞི་མཐའ་དབུས་བརྡལ། །ཀེང་རུས་ཆེན་པོ་བརྩེགས་པའི་རི་རབ་འབར། །ཡེ་ཤེས་འབར་བའི་མེ་འོད་ཀུན་ཏུ་འཕྲོ། །ཞེས་སོ། །གསུམ་པ་འཁོར་ཕུན་སུམ་ཚོགས་པ་ལ། གདུལ་བྱ་གདུག་པ་ཅན་གྱི་འཁོར་དང་། འདུལ་བྱེད་གཉེན་པོའི་འཁོར་གཉིས་ལས། དང་པོ་ནི། བདག་ཏུ་རྨོངས་པའི་རྟོག་པ་དང་བཏགས་པ་ལ་མངོན་པར་ཞེན་ནས། ཞེས་པ་ལ་སོགས་པ་རྣམས་ཀྱིས་བསྟན། དེ་ཡང་རྒྱུ་དེས་སྤྱིར་སེམས་ཅན་ཐམས་ཅད་འཁོར་བ་རུ་གོལ་ཞིང་། བྱེ་བྲག་ཏུ་རུ་ཏྲ་ཉིད་གབ་པའི་གསང་བ་ལྟ་བ་གནས་ལུགས་དེ་བཞིན་ཉིད་མ་རྟོགས་པར། སྦས་པའི་གསང་བ་སྤྱོད་པ་སྦྱོར་སྒྲོལ་གཉིས་བརླང་པོར་སྤྱད་པས། རྣམ་སྨིན་གྱི་འབྲས་བུ་དམྱལ་བ་ཚ་གྲང་གི་སྡུག་བསྔལ་མི་ཟད་པ་མྱོང་ཞིང་། རྒྱུ་མཐུན་གྱི་འབྲས་བུ་ལྷ་རང་རྒྱུད་པར་སྒོམ་ནས་ར་ལ་ར་ལ་ལ་སོགས་པའི་དྲག་སྔགས་རང་གར་བཟླས་ཤིང་ལས་བརླང་པོར་སྤྱད་པས་ཡི་དྭགས་ཀྱི་འགྲོ་བས་བསྡུས་པའི་སྲིན་པོ་བྱ་ཡི་གཤོག་པ་ཅན་ཞིག་ཏུ་སྐྱེས་ནས་གཟུགས་ཁམས་གནས་རིས་བཅུ་གཉིས་མན་ཆད་དབང་དུ་བྱས་པ་ན་ཐུགས་རྗེས་འདུལ་བར་གྱུར་ཏོ། །ཞེས་པས། ཐུབ་དཀའ་རྡོ་རྗེ་སྙིང་པོ་དང་སྔོན་དཔོན་སློབ་ཏུ་འབྲེལ་བའི་སྟོབས་ཀྱིས་ཐུགས་རྗེས་འདུལ་བར་གདུལ་བྱར་གཟིགས་པའོ་གསུངས། གཉིས་པ་འདུལ་བྱེད་གཉེན་པོའི་འཁོར་ནི། ལ་ལ་ནི་དཔལ་ཁྲག་འཐུང་ཆེན་པོར་གྱུར་ཏེ་ཤར་ཕྱོགས་སུ་བཞུགས་སོ། །ཞེས་སོགས་ཀྱིས་དེ་བཞིན་གཤེགས་པ་རིགས་ལྔའི་འཁོར་དང་། དཀར་མོའ་ཚོགས་དང་ཞེས་སོགས་ཀྱིས་གནས་མ་བརྒྱད། སེང་གདོང་ཆེན་མོའ་ཚོགས་དང་ཞེས་སོགས་ཀྱིས་ཡུལ་མ་བརྒྱད། རྡོ་རྗེ་སྲིང་འགྲོ་མའི་ཚོགས་དང་ཞེས་སོགས་ཀྱིས་སྒོ་མ་བཞི། སྲིན་མོ་ཆེན་མོ་མིའི་སྲིན་མོ་དང་ཞེས་སོགས་ཀྱིས་དབང་ཕྱུག་མ་ཉི་ཤུ་རྩ་བརྒྱད་རྣམས་སོ། ། ― MLP018_Page_0144 ―
[མ་དཔེ་གཟིགས་ན་འདིར་གནོན།]
བཞི་པ་ཆོས་ཕུན་སུམ་ཚོགས་པ་ནི། དེ་ནས་དེ་བཞིན་གཤེགས་པ་ཆེ་བའི་རྡོ་རྗེ་བཀོད་པ་ལས་ཞེས་སོགས་ཀྱིས་བསྟན། དེའི་དོན་ནི། སྦྱོར་སྒྲོལ་གྱི་ཕྲིན་ལས་རྨད་དུ་བྱུང་བ་སྟེ། དེ་ལ་ཕོ་རྣམས་སྒྲོལ་བས་འདུལ་བ་ནི། དེ་བཞིན་ཉིད་ཀྱི་དབྱིངས་ནས་གསང་བའི་ཡུམ་སྤྲུལ་ཏེ་སྙོམས་པར་ཞུགས་པའི་བྱང་ཆུབ་ཀྱི་སེམས་སྤྲིན་ལས། ཁྲོ་བོ་འཆོལ་བའི་ཚོགས་མཐའ་ཡས་པར་སྤྲོས་ཏེ། ལྟས་ཆེན་པོ་བཅོ་ལྔ་བསྟན་པས་གདུག་པ་ཅན་ཐམས་ཅད་རབ་ཏུ་བརྒྱལ་ཀུན་ཏུ་བརྒྱལ་བར་གྱུར་པ་ན། ཁྲོ་ཚོགས་རྣམས་བསྡུས་ཏེ་སླར་ཡང་རིགས་ལྔའི་ཧེ་རུ་ཀར་སྣང་བར་བྱས་ནས་དེ་དག་ཞབས་འོག་ཏུ་མནན་པ་ན་ད་དུང་དགྲ་ཟླར་མཐོང་སྟེ་མི་སྙན་པའི་བརླང་པོའི་གཏུམ་ཚིག་སྨྲ་བ་ན། དཔལ་ཆེན་པོ་ཉིད་ཀྱིས་དྲེགས་པ་རཱུ་ཏྲའི་ངོར་སྒྲོལ་བྱེད་རྡོ་རྗེ་སྲིན་པོ་དབུ་དགུ་ཕྱག་བཅོ་བརྒྱད་པའི་རྣམ་པར་བསྟན་ནས། གདུག་པ་ཅན་དེ་རྣམས་ཀྱི་དུག་གསུམ་དག་པར་བྱ་བའི་ཕྱིར། འདོད་ཆགས་ཁྲག ཞེ་སྡང་རུས། གཏི་མུག་ཤ་ཡི་རྣམ་པར་ཕུང་པོ་ལྷག་མ་མ་ལུས་པར་ཞལ་དུ་བསྟབ་པ་དང་བཅས་པ་ནི་ཕོ་རྣམས་སྒྲོལ་བས་འདུལ་བའོ། །མོ་རྣམས་སྦྱོར་བས་འདུལ་བ་ནི། གདུག་པ་ཅན་དེ་རྣམས་ཀྱི་ཆུང་མ་དབང་མོ་ཉེར་བརྒྱད་པོ་དབང་དུ་བསྡུས་ནས་རོལ་པར་མཛད་པ་སྟེ། དེ་ཡང་གཙོ་བོ་ལ་ཕྱོགས་ཀྱི་གཙོ་མོ་བཞི་དང་སྒོ་མ་བཞི་སྟེ་བརྒྱད་འཁྲིལ། རིགས་བཞི་ལ་ཕྱོགས་ཀྱི་ལྷག་མ་ལྔ་ལྔ་འཁྲིལ་ཏེ་མཉམ་པར་སྦྱོར་བའི་སེམས་སྤྲིན་ལས། གནས་མ་བརྒྱད། ཡུལ་མ་བརྒྱད། སྒོ་མ་བཞི་རྣམས་རེ་རེ་ལ་ཡང་ཉེར་བརྒྱད་རེ་འཐོན་ཅིང་། སོ་སོ་ཡང་རིགས་བསྡུས་ཏེ་དཀྱིལ་འཁོར་གྱི་གནས་སོ་སོར་བཀོད་ནས་ཕཊ་ཅེས་བསྒྲགས་ཏེ་དབང་མོ་རྣམས་རང་རང་གི་གནས་ག་ལ་བ་དེར་ཡུད་ཙམ་གྱིས་ཕྱིན་པར་བཀྱེའོ། །དེ་ནས་སྔར་ཞལ་དུ་བསྟབ་པའི་རཱུ་ཏྲ་ཕོ་རྣམས་ལྟོ་བ་ན་གནས་པ་དེ་འོག་སྒོ་ནས་བཏོན་ཏེ་མི་གཙང་བའི་འདམ་གྱི་རྒྱ་མཚོར་ཆུད་པ་ལས། སླར་ཡང་བསྣམས་ནས་ཁྲོ་བོ་སྨེ་བ་བརྩེགས་པ་ཕྱུང་ནས་འདམ་ཀུན་འཐུངས་པས་དྲེགས་པ་ཅན་དེ་དག་དྲན་པ་སླར་རྙེད་ནས་སྣང་བ་རྣམ་འབྱེད་ཀྱི་ཏིང་ངེ་འཛིན་ཐོབ་སྟེ། བསམ་ཡས་ལྷུན་གྲུབ་ཁྲོ་བོའ་དཀྱིལ་འཁོར་གྱི་ཞལ་མངོན་སུམ་དུ་མཐོང་ངོ་། །དེ་ནས་ཤིན་ཏུ་འདར་ ― MLP018_Page_0145 ―
[མ་དཔེ་གཟིགས་ན་འདིར་གནོན།]
ཞིང་བྲེད་པས་རབ་ཏུ་ཞུམ་པའི་ང་རོས། འབངས་སུ་མཆི་འབངས་སུ་མཆི། འབངས་སུ་ནན་ཏན་མ་མཆིས་ན། ཞེས་པ་ལ་སོགས་པས་འབངས་སུ་མཆི་བར་དམ་བཅས་པ་དེ་ནས་ཡང་སྨྲས་པ། བདག་ཅག་རྣམས་ཀྱི་མཆིས་བྲང་དང་། ཞེས་སོགས་ཀྱིས་བྲོ་བོར་ནས་རང་རང་གི་ལུས་ཁྲག་འཐུང་རིགས་ལྔའི་དཀྱིལ་འཁོར་གྱི་གདན་དུ་ཕུལ་བས། དེ་ནས་དཔལ་ཆེན་པོས་མ་མོ་རྣམས་ཀྱི་ལག་ཏུ་རྡོ་རྗེ་རེ་བྱིན་ནས་རྡོ་རྗེ་མིའི་སྲིན་མོ་ཞེས་པ་ལ་སོགས་པའི་མིང་གི་དབང་བསྐུར་ནས་དཀྱིལ་འཁོར་གྱི་ཁྲག་ཁྱམས་ལ་འགོད་པར་མཛད་དོ། །ལྔ་པ་དུས་ཕུན་སུམ་ཚོགས་པ་ནི། ཐམས་ཅད་འདུལ་བའི་ཐབས་སྣ་ཚོགས་བསམ་གྱིས་མི་ཁྱབ་པ་སོ་སོར་སྣང་བས་དུས་གཅིག་ཏུ་བཏུལ་ལོ། །ཞེས་པས་བསྟན། དོན་ནི། དེའི་དུས་སུ་འཇིག་རྟེན་དྲུག་གི་ཕྱོགས་བཅུའི་གདུག་པ་ཅན་ཐམས་ཅད་སྔ་ཕྱི་མེད་པར་དུས་གཅིག་ཏུ་བཏུལ་བའོ་གསུངས། གླེང་གཞི་འདི་ལ་ཞར་བྱུང་གདུལ་བྱ་དགོས་ཆེད་དུ་བསྟན་པ་ཞེས་པ་ནི། གསང་བའི་འོག་མིན་དུ་སྟོན་འཁོར་ཚོགས་ནས་སྙིང་གའི་འོག་མིན་དུ་སངས་རྒྱས་པའི་ཚེ། ནང་གི་རྩ་མདུད་གྲོལ་བས་ནང་གི་བདུད་བཞི་བཅོམ་པའི་རྟགས་སྣང་ཕྱི་རོལ་དུ་དེ་ལྟར་བྱུང་བའོ་གསུངས། གསུམ་པ་སྤྲུལ་སྐུ་འགྲོ་བ་འདུལ་བའི་གླེང་གཞི་ལའང་ལྔ་ལས། དང་པོ་སྟོན་པ་ཕུན་སུམ་ཚོགས་པ་ནི། ཐུབ་པ་ཆེན་པོ་བཅོམ་ལྡན་རེ་རེས། ཞེས་པས་བསྟན། དེའི་དོན་ནི། སྟོང་གསུམ་གྱི་སྟོང་ཆེན་པོ་རེ་རེར་ཐུབ་པ་ཆེན་པོར་རེ་རེས་དོན་མཛད་པ་སྟེ། ཤེར་ཕྱིན་གྱི་ལྗགས་ཀྱི་དབང་པོ་བཀྲམ་པའི་ལེའུ་ལས། བཅོམ་ལྡན་འདས་ཀྱིས་སྟོང་གསུམ་གྱི་སྟོང་ཆེན་པོ་ལྗགས་ཀྱི་དབང་པོས་ཁེབས་པར་མཛད་པས། དེ་ན་གནས་པའི་སེམས་ཅན་འདུལ་བའི་སྣོད་དུ་གྱུར་པ་རྣམས་ནི་བླ་ན་མེད་པའི་བྱང་ཆུབ་ཏུ་ལུང་བསྟན་པར་གྱུར་བས། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ནི་འོད་ཀྱིས་ཁྱབ་པར་མཛད་དོ། །ཞེས་སོ། །དེའང་གདུལ་བྱ་རིགས་དྲུག་སོ་སོའི་ལས་སྣང་དང་མཐུན་པར་སྣང་སྟེ། སྒྱུ་འཕྲུལ་བླ་མ་ལས། ལྷ་ཡི་གནས་ན་བརྒྱ་བྱིན་མགོན། །ལྷ་མ་ཡིན་ལ་ཐག་བཟང་རིས། །མི་ལ་བདུད་འདུལ་ཤཱཀྱ་མགོན། ། ― MLP018_Page_0146 ―
[མ་དཔེ་གཟིགས་ན་འདིར་གནོན།]
ཡི་དྭགས་གནས་ན་ཁ་འབར་དེ། །བྱོལ་སོང་སེང་གེ་ཉིད་དུ་སྨྲ། །དམྱལ་བ་ལ་ནི་གཤིན་རྗེའི་མགོན། །ཞེས་སོ། །གཉིས་པ་འཁོར་ཕུན་སུམ་ཚོགས་པ་ནི། འགྲོ་བ་ལྔ་ཡི་དོན་མཛད་དེ། ཞེས་པས་བསྟན། དོན་ནི། ལྷ་མིན་སྟོད་རིས་ལྷ་དང་། སྨད་རིས་དུད་འགྲོར་བསྡུས་ཏེ། དྲན་པ་ཉེར་བཞག་ལས། ལྷ་མིན་དུད་འགྲོ་ཀླུ་དུད་འགྲོ། །ཞེས་སོ། །བྱེ་བྲག་འཁོར་རྣམ་པ་བཞི་ལ་སོགས་པའོ་གསུངས། གསུམ་པ་གནས་ཕུན་སུམ་ཚོགས་པ་ནི། སྣྲེལ་ཞི་དང་ཡས་མན་གྱི་འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་ཅེས་དང་། སྟོང་གསུམ་གྱི་སྟོང་ཆེན་པོ་རེ་རེས། ཞེས་པ་རྣམས་ཀྱིས་བསྟན། དེ་ལ་བླ་མ་གོང་མ་རྣམས་མཐའ་ཡས་མུ་མེད་ཅེས་ཆོས་སྐུའི་ཞིང་དང་། སྣྲེལ་ཞི་དང་ཡས་མན་གྱི་འཇིག་རྟེན་དྲུག་གི་ཕྱོགས་བཅུ་ཞེས་པས་སྟོང་གསུམ་གྱི་འཇིག་རྟེན་སྟོང་ལ་སྟོང་རྒྱུ་བཀོད་དང་པོ་དང་། དེ་སྟོང་ལ་སྟོང་རྒྱུ་བཀོད་གཉིས་པ་དང་། དེ་སྟོང་ལ་སྟོང་མཚམས་སྦྱོར་ཡོངས་སུ་དག་པ་ཞེས་བྱ་བ་ལོངས་སྐུའི་ཞིང་གི་ཚད་དུ་འདོད་ཅིང་། དེའང་འགལ་བར་མ་མཐོང་ཞིང་། ཁོ་བོ་ནི་ཕལ་ཆེན་ལས། ལས་ཀྱི་བྱེ་བྲག་བསམ་མི་ཁྱབ། །དམྱལ་བའི་འཇིག་རྟེན་ཐུར་འཕྱང་ཞིང་། །གཤིན་རྗེའི་འཇིག་རྟེན་སྣྲེལ་ཞི་སྟེ། །བྱོལ་སོང་ལྷ་མིན་གྱེན་ཐུར་འགྲོ། །ཞེས་པ་ལྟར་རམ། ཡང་ན་མགོ་གྱེན་དུ་བསྟན་ནས་འགྲོ་བ་མཐོ་རིས། སྣྲེལ་ཞི་སྟེ་ཕྲེད་བསྟན་གྱིས་འགྲོ་བ་དུད་འགྲོ། ཐུར་བསྟན་གྱིས་འགྲོ་བ་དམྱལ་བ་དང་ཡི་དྭགས་ཏེ། དེ་དྲུག་པོ་སྟོང་གསུམ་གྱི་འཇིག་རྟེན་གཅིག་གི་ནང་དུ་ཚང་བ་སྟེ། འགྲེལ་ཆུང་ལས། སྟོང་གསུམ་གཅིག་ལ་ཆགས་ཚུལ་དྲུག །སྤྲུལ་སྐུ་གཅིག་གི་ཞིང་དུ་གྲགས། །ཞེས་སོ། །འགྲོ་བའི་ལས་སྣང་གི་ཞིང་ཁམས་ཀྱི་བཀོད་པ་མཐའ་ཡས་ཀྱང་འདིར་མཛོད་ལས། གླིང་བཞི་པ་དང་ཉི་ཟླ་དང་། །རི་རབ་དང་ནི་འདོད་ལྷར་བཅས། །ཚངས་པའི་འཇིག་རྟེན་སྟོང་ལ་ནི། །སྟོང་ནི་སྤྱི་ཕུད་ཡིན་པར་འདོད། །དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཡིན་ནོ། །དེ་སྟོང་ལ་ནི་སྟོང་གསུམ་མོ། །ཞེས་གསུངས་པས་སོ་གསུངས། ― MLP018_Page_0147 ―
[མ་དཔེ་གཟིགས་ན་འདིར་གནོན།]
བཞི་པ་ཆོས་ཕུན་སུམ་ཚོགས་པ་ནི། འདུལ་བ་རྣམ་པ་བཞིས། ཞེས་པས་བསྟན་ཏེ། དེ་ལ་དང་པོ་སྐུ་བསོད་ནམས་ཆེན་པོས་འདུལ་བ་ནི། བལྟམས་པ་དང་། རབ་ཏུ་བྱུང་བ་དང་སོགས་ནས། ཐུབ་པས་ཞེས་པའི་བར་གྱིས་བསྟན། གཉིས་པ་ཐུགས་མངོན་སུམ་པས་འདུལ་བ་ནི། དུས་བཞི་ཀུན་ཏུ་མཁྱེན་པ་དང་སོགས་ནས། མངོན་པར་ཤེས་པ་ཆེན་པོ་དྲུག་དང་ཞེས་པའི་བར་གྱིས་བསྟན། གསུམ་པ་རྫུ་འཕྲུལ་བསམ་གྱིས་མི་ཁྱབ་པས་འདུལ་བ་ནི། ཀུན་ཏུ་སྐུ་བསམ་གྱིས་མི་ཁྱབ་པ་དང་སོགས་ནས། བསམ་གྱིས་མི་ཁྱབ་པ་ཐམས་ཅད་དུ་གྲངས་མེད་པ་ཕྱོགས་བཅུར་སྣང་བར་གྱུར་ཏོ། །ཞེས་པའི་བར་གྱིས་བསྟན། བཞི་པ་གསུང་རིག་པས་འདུལ་བ་ལ་བསྟན་བཤད་བསྡུ་གསུམ་ལས། ཐམས་ཅད་ཀྱང་འདི་ལྟ་སྟེ། ལྷ་དང་མིའི་ཐེག་པ་དང་སོགས་ཀྱིས་རིགས་ཅན་ལྔའི་གདུལ་བྱ་ལ་ལྟོས་ནས་ཐེག་པ་ལྔའི་སྒོ་ནས་མདོར་བསྟན། མ་རིག་པའི་རྣམ་པར་རྟོག་པ་ཞེས་སོགས་ཀྱིས། ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོར་ཆོས་ཕུང་བརྒྱད་ཁྲི་བཞི་སྟོང་གསུངས་ཏེ་རྒྱས་པར་བཤད། དེ་དག་ཐམས་ཅད་ཀྱང་གཟུང་བ་དང་འཛིན་པའི་རྣམ་པར་རྟོག་པ་ཞེས་སོགས་ཀྱིས་དབང་པོའི་རིམ་པས་མཇུག་བསྡུ་བ་དང་བཅས་པ་རྣམས་སོ་གསུངས། ལྔ་པ་དུས་ཕུན་སུམ་ཚོགས་པ་ནི། འགྲེལ་ཆུང་ལས། དུས་ཀྱི་ངོ་བོ་མཉམ་གནས་ཀྱང་། །སྐལ་བ་ཅན་ལ་དཀོན་པའི་དུས། །ཞེས་སོ། །དེ་རྣམས་ཀྱིས་རྒྱུད་འབྱུང་བའི་རྒྱུ་གླེང་གཞི་བཤད་པ་སོང་ནས། གཉིས་པ་རྐྱེན་གླེང་བསླང་བ་ནི། ཐུགས་ཐིག་ལས། སྟོན་པས་གནང་དང་འཁོར་གྱིས་ཞུས། །སྐབས་ལས་གླེང་བསླང་སྟོན་དང་འཁོར། །གནང་འདྲིའི་རྐྱེན་དུ་གང་གྱུར་པ། །དེ་དེས་གསུང་ལ་མ་རག་པ། །ཞེས་གསུངས་པས་སྟོན་འཁོར་དྲི་ལན་གྱི་སྦྱོར་བས་རྒྱུད་དོན་གདུལ་བྱའི་བློ་དང་འཚམས་པར་འབྱུང་མ་རག་པ་སྟེ། དེ་ལྟར་གླེང་གཞི་ཚོགས་ནས་རྐྱེན་གླེང་མ་བསླང་ན་རྒྱུད་དོན་མི་འབྱུང་སྟེ། སྟོན་པས་གནང་དང་ཞེས་པས་སྟོན་པས་མདུན་བསུས་ཏེ་གནང་བ་མདོ་སྡུད་པ་ལྟ་བུ་སྟེ། ངས་སྔར་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ ― MLP018_Page_0148 ―
[མ་དཔེ་གཟིགས་ན་འདིར་གནོན།]
རྒྱས་པར་བཤད་ཀྱི། ད་དེ་རྣམས་ཀྱི་དོན་མདོར་བསྡུས་ཏེ་སྟོན་པར་བྱེད་པས་ལེགས་པར་ཉོན་ལ་ཡིད་ལ་ཟུངས་ཤིག ཅེས་པ་ལྟ་བུ་དང་། འཁོར་གྱིས་ཞུས་ཞེས་པས་འཇམ་དཔལ་མཚན་བརྗོད་ལྟ་བུ་སྟེ། གསང་བའི་བདག་པོ་ཕྱག་ན་རྡོ་རྗེས། རབ་གསུང་གང་ལགས་བཤད་དུ་གསོལ། །ཞེས་ཞུས་པས། ཉིད་ཀྱི་ཞལ་ནས་ལྗགས་བཟང་བ། །རིང་ཞིང་ཡངས་པ་བརྐྱང་མཛད་དེ། །ཞེས་འཁོར་གྱིས་ཞུས་པ་ལྟར་སྟོན་འཁོར་དྲི་ལན་གྱི་སྦྱོར་བ་དེ་ལྟ་བུའི་རྐྱེན་གྱིས་རྒྱུད་དོན་འབྱུང་མ་རག་པ་ནི་རྐྱེན་གླེང་བསླང་བ་སྟེ། དེ་ལ་དབྱེ་ན། ཐུན་མོང་མ་ཡིན་པ་དང་། ཐུན་མོང་གི་གླེང་བསླང་གཉིས་ལས། དང་པོ་ནི། སྟོན་པ་ཡབ་ཡུམ་གྱིས་ལྷན་ཅིག་པའི་འཁོར་ལ་ཟབ་དབང་བསྐུར་བའི་སྦྱོར་བས་མདུན་བསུས་ཏེ་ཐབས་ཤེས་གཉིས་མེད་ཀྱི་ཆ་བཟུང་ནས་གླེང་བསླང་བ་གསུམ་མོ། །ཞེས་པས། ཡབ་ཀྱིས་ཐབས་ཀྱི་ཆ་བཟུང་ནས་གླེང་བསླང་བ་ནི། ཨེ་མ་ཧོ། རྡོ་རྗེ་ཕུང་པོའི་ཡན་ལག་ནི། །ཞེས་སོགས་ཐབས་ཀྱི་ཆ་བཟུང་ནས་གླེང་བསླང་བས་འཁོར་འདས་ཀྱི་ཆོས་ཐམས་ཅད་ཕྱག་རྒྱའི་དཀྱིལ་འཁོར་གཅིག་གི་རང་བཞིན་དུ་སངས་རྒྱས་པ་ལ་ངོ་མཚར་བའི་ཚུལ་གྱིས་དེ་ལྟར་གླེང་བར་མཛད་པས། འཁོར་རྣམས་ཀྱིས་ལྷག་པ་ཀུན་རྫོབ་ཀྱི་བདེན་པ་མཐོང་། ཕུང་ཁམས་སྐྱེ་མཆེད་ལ་སོགས་པའི་ཆོས་ཐམས་ཅད་ལྷ་དང་ལྷ་མོའ་རང་བཞིན་དུ་རྟོགས་པས་སངས་རྒྱས་པ་ཉིད་ལས་གཞན་པའི་ཆོས་རྡུལ་ཙམ་ཡང་མ་དམིགས་པའི་ཕྱིར་རོ། །དེ་ནས་ཡུམ་གྱིས། ཀྱེ་མ་ཧོ། ཕྱོགས་བཅུ་སྟོང་ཁམས་ཡེ་ནས་དབེན། །ཞེས་སོགས་ཤེས་རབ་ཀྱི་ཆ་བཟུང་ནས་གླེང་བསླང་བས་ཀུན་རྫོབ་ཀྱི་སྣང་བ་ཐམས་ཅད་དོན་དམ་སྟོང་ཉིད་ཀྱི་ཀློང་དུ་ཐིམ་པ་ལ་ངོ་འཚར་བའི་ཚུལ་གྱིས་དེ་ལྟར་གླེང་བར་མཛད་པས། འཁོར་རྣམས་ཀྱིས་ལྷག་པ་དོན་དམ་པའི་བདེན་པ་མཐོང་ནས། ཕྱོགས་བཅུ་སྟོང་ཁམས་དང་། སྲིད་པ་གསུམ་དང་། སྙིགས་མ་ལྔ་དང་། ཕུང་པོ་ལྔ་སྟེ། ཐ་སྙད་བཞིས་བསྡུས་པའི་ཆོས་ཐམས་ཅད་ཡེ་ནས་ཆོས་ཀྱི་སྐུར་མངོན་པར་རྫོགས་པར་སངས་རྒྱས་པ་ལས་འབྲས་བུ་གཞན་ནས་བཙལ་དུ་མེད་པར་རྟོགས་པའི་ཕྱིར་རོ། །དེ་ནས་ཐབས་ཤེས་གཉིས་མེད་ཀྱི་ཆ་བཟུང་ནས་དབང་ཕྱི་མ་གཉིས་བསྐུར་བ་ནི། མདོ་སྡེ་རྒྱན་ལས། དགོངས་ ― MLP018_Page_0149 ―
[མ་དཔེ་གཟིགས་ན་འདིར་གནོན།]
པ་ཐ་མ་ཐོབ་ནས་ནི། །འོད་ཟེར་ཆེན་པོས་དབང་བསྐུར་རོ། །ཞེས་པས་ཡབ་ཡུམ་སྙོམས་པར་ཞུགས་པའི་ཉི་ཟླ་བྱང་ཆུབ་ཀྱི་སེམས་ཀྱིས་རྒྱུ་བྱས། ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །ཞེས་སོགས་ཀྱིས་རྐྱེན་གླེང་བསླང་བས། རྩ་གནས་ཐམས་ཅད་ནས་བདེ་བ་འགོ་ལྡང་བའི་ཚུལ་གྱིས་སྐྱེས་པ་གཡོ་ལྡང་བྱང་ཆུབ་ཀྱི་སེམས། བདེ་བ་སྔ་མ་འཇིག་ཅིང་ཕྱི་མའི་བདེ་བ་ལ་འཇུག་པ་འཇིག་འཇུག་བྱང་ཆུབ་ཀྱི་སེམས། སྔ་མའི་བདེ་བས་མཚོན་ནས་ཕྱི་མའི་བདེ་བ་ལ་སྨོན་པ་སྨོན་པ་བྱང་ཆུབ་ཀྱི་སེམས། རྟེན་ཅན་གྱི་བདེ་བ་རང་ས་ན་གནས་པ་མེད་པའི་ཚུལ་གྱིས་གནས་པ་གནས་པ་བྱང་ཆུབ་ཀྱི་སེམས། འགྲོ་འོང་ཐམས་ཅད་དང་བྲལ་བ་མཐར་ཕྱིན་པ་བྱང་ཆུབ་ཀྱི་སེམས་དང་ལྔ་ལས། དེ་ལྟར་ཡས་འབབ་དགའ་བཞིའི་བགྲོད་ཀྱི་མཐར་བྱང་སེམས་ཡུམ་གྱི་པདྨའི་ཟེའུ་འབྲུར་ཞལ་མཇལ་བའི་མཐར་དངོས་པོ་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་བ་སྟེ། ཤེས་རབ་ཡེ་ཤེས་ཀྱི་དབང་ཐོབ་པ་ནི་འགྲོ་དང་ཞེས་པའི་དོན་ཡིན། འོང་ཞེས་པ་སླར་ཡང་མས་བརྟན་གྱི་དགའ་བཞིའི་སྐབས་སུ་བྱང་ཆུབ་ཀྱི་སེམས་དཀར་དམར་གཉིས་གཅིག་ཏུ་གྱུར་པ་གྱེན་དུ་ལྡོག་སྟེ་སྤྱི་བོར་སོན་པས་རང་བཞིན་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་སྟེ། དབང་བཞི་པ་བདེ་བ་ཆེན་པོའི་དབང་ཐོབ་པ་སྟེ། དེའི་ཚེ་འཇིག་རྟེན་ན་ཆུ་ཐུར་དུ་འགྲོ་བ་གྱེན་དུ་སོང་སྟེ་དཀར་ཆ་ཆུའི་རང་བཞིན་སྤྱི་བོར་དག་པས་སྐུ་རྡོ་རྗེ་ཐོབ། དམར་ཆ་མེའི་རང་བཞིན་གྱེན་དུ་འགྲོ་བ་སྟེ་ཐུར་དུ་སོང་ནས་རྡོ་རྗེ་ནོར་བུའི་རྩེར་འགག་པས་དམར་ཆ་དག་པ་གསུང་རྡོ་རྗེ་ཐོབ། དཀར་དམར་བར་གྱི་འབྲེལ་བྱེད་པའི་རླུང་དག་པས་ཐུགས་རྡོ་རྗེ་ཐོབ། དེ་གསུམ་འགྱུར་བ་མྱོང་བའི་ཤེས་རིག་དག་པས་ཡེ་ཤེས་རྡོ་རྗེ་ཐོབ་སྟེ་སྐུ་བཞི་ཡེ་ཤེས་ལྔའི་ངོ་བོ་སངས་རྒྱས་པས་ན། སྟོན་འཁོར་དགོངས་པ་དབྱེར་མེད་དུ་གྱུར་པ་ནི་ཐུན་མོང་མ་ཡིན་པའི་གླེང་བསླང་ངོ་གསུངས། གཉིས་པ་ཐུན་མོང་གི་གླེང་བསླང་བ་ནི། དེ་ལྟར་སྟོན་འཁོར་དགོངས་པ་དབྱེར་མེད་དུ་གྱུར་ནས་རང་དོན་དུ་རྒྱུད་ཞུ་མ་དགོས་ཀྱང་། ཨེ་མ་ཧོ་ཡེ་ནས་གསང་བའི་ཆོས། །སྣ་ཚོགས་ ― MLP018_Page_0150 ―
[མ་དཔེ་གཟིགས་ན་འདིར་གནོན།]
སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མིན་ལས་ཤིན་ཏུ་གསང་། །ཞེས་གསང་བ་བཞིས་ཆོད་པའི་ཐུན་མོང་གི་གདུལ་བྱ་རྣམས་ཐུགས་རྗེས་བཟུང་བར་རིགས་སོ་ཞེས་ཞུས་པས། སངས་རྒྱས་ཀྱི་ཡེ་ཤེས་ཆེན་པོ་སྐྱེས་ནས་ཞེས་པས། བསྟན་ཕྱིར་སྤྲོ་བ་སྣ་ཚོགས་མཛད། །ཅེས་སྟོན་པའི་ཐུགས་རྗེ་སྐྱེས་ནས་དངོས་དང་བརྒྱུད་པའི་སྒོ་ནས་འཆད་པར་དགྱེས་པའོ་ཞེས་ཞལ་གྱིས་བཞེས་པ་དང་བཅས་པ་ནི་ཐུན་མོང་གི་གླེང་བསླང་ངོ་གསུངས། དེ་རྣམས་ཀྱིས་གླེང་བསླང་བ་སོང་ནས། གསུམ་པ་འབྲས་བུ་ཡོངས་ཤེས་རྒྱུད་དོན་བཤད་པ་ལ། རྒྱུད་གསུམ་གྱི་རྣམ་བཞག་སྤྱིར་བཤད་པ་དང་། ལམ་གྱི་ཆ་རྐྱེན་རྒྱུད་ཀྱི་དངོས་པོ་བཅུ་བྱེ་བྲག་ཏུ་བཤད་པ་གཉིས་ལས། དང་པོ་ནི། རྒྱུད་ཕྱི་མ་ལས། རྒྱུད་ནི་རྒྱུན་ཆགས་ལ་བཤད་དེ། །ཐབས་དང་རྒྱུ་ལས་འབྲས་བུའོ། །ཞེས་པས། སྤྱིར་རྒྱུན་ཆགས་པའི་དོན་གྱིས་ན་རྒྱུད་ཅེས་བྱ་སྟེ། སེམས་ཅན་ནས་སངས་རྒྱས་ཀྱི་བར་དུ་སེམས་ཀྱི་ཆོས་ཉིད་རང་བཞིན་རྣམ་དག་དེ་པི་ཝང་གི་རྒྱུད་ལྟར་བྲེང་ཆགས་སུ་གནས་པས་རྒྱུན་ཆགས་པ་ཞེས་བཤད། དེ་ཉིད་ཐབས་ཀྱི་རྐྱེན་གྱིས་ཟིན་པ་ལ་ལྟོས་ནས་གཞི་ལམ་འབྲས་གསུམ་དུ་སྣང་སྟེ། ཐབས་དང་རྒྱུ་ལས་འབྲས་བུའོ། །ཞེས་གསུངས་པ་ལྟར། གང་རྟོགས་པར་བྱ་བ་གཞིའམ་རྒྱུའི་རྒྱུད། གང་གིས་རྟོགས་ཤིང་བགྲོད་པ་ཐབས་སམ་ལམ་གྱི་རྒྱུད། གང་དུ་མཐར་ཕྱིན་པ་འབྲས་བུའི་རྒྱུད་དང་གསུམ་ལས། དང་པོ་ནི། བཅིང་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་གསུངས་པ་ལྟར་གཞི་འཆིང་གྲོལ་མེད་པའི་གནས་ལུགས་རང་རིག་པ་བྱང་ཆུབ་ཀྱི་སེམས་བདེན་པ་དབྱེར་མེད་སྤྱོད་ཡུལ་དང་བྲལ་བ་ཡེ་ནས་གནས་པ་གང་ཡིན་པ་སྟེ། ཞེས་པས། སེམས་ཀྱི་ཆོས་ཉིད་འདི་འཁོར་བའི་གནས་སྐབས་སུ་བཅིངས་པ་དང་མྱ་ངན་ལས་འདས་པའི་གནས་སྐབས་སུ་གྲོལ་བ་ལྟར་སྣང་ཡང་། དོན་ལ་ལྟོས་གཞི་བཅིངས་པ་མེད་པས། དེ་ལྟོས་ཀྱིས་གྲོལ་བའང་མི་སྲིད་པས་འཆིང་གྲོལ་མེད་པ་ཞེས་བྱ། འཆིང་གྲོལ་མེད་པའི་གནས་ལུགས་རང་རིག་པ་བྱང་ཆུབ་ཀྱི་སེམས་ཞེས་པ་ནི། འཁོར་འདས་ཀྱི་ཆོས་ཐམས་ཅད་སེམས་སུ་འདུས་ཤིང་སེམས་ ― MLP018_Page_0151 ―
[མ་དཔེ་གཟིགས་ན་འདིར་གནོན།]
ཀྱི་ངོ་བོ་ལ་སྒྲིབ་པས་གོས་མ་མྱོང་བས་བྱང་ཆུབ་ཀྱི་སེམས་ཞེས་བྱ་སྟེ། སྒྱུ་འཕྲུལ་རྒྱས་པ་ལས། ཐམས་ཅད་རང་རིག་བྱང་ཆུབ་སེམས། །དེ་ནི་ལུང་གི་ཚད་མར་བཤད། །ཅེས་གསུངས། བྱང་ཆུབ་ཀྱི་དོན་ནི་སྤང་ཐོབ་མེད་པའི་དོན་ཡིན་ཏེ། སྤང་བྱ་སྒྲིབ་གཉིས་སྤང་རྒྱུ་དང་ཐོབ་བྱའི་ཡོན་ཏན་གསར་དུ་ཐོབ་རྒྱུ་མེད་པར་ཡེ་ནས་ལྷུན་གྲུབ་ཏུ་ཡོད་པས་བྱང་ཆུབ་ཀྱི་སེམས་ཞེས་བྱ། དེ་ལ་བདེན་པ་དབྱེར་མེད་སྤྱོད་ཡུལ་དང་བྲལ་བར་ཡེ་ནས་གནས་པ་གང་ཡིན་པ་སྟེ། ཞེས་པ་ནི་སེམས་དེའི་ངོ་བོ་དོན་དམ་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པ་ནི་ལྷག་པ་དོན་དམ་བདེན་པ་སྟེ། ལམ་རིམ་ལས། དེ་ཡང་རྣམ་གསུམ་གནས་ཚུལ་བཞག ། ཅེས་པས། དབྱིངས་དོན་དམ། ཡེ་ཤེས་དོན་དམ། འབྲས་བུ་དོན་དམ་གསུམ་གྱི་རང་བཞིན་དུ་གནས་པ་སྟེ། དེའི་དཔེ་ནི་སེམས་ཉིད་ནམ་མཁའ་ལྟ་བུའམ་མེ་ལོང་ནག་ལིང་ངེ་བ་ལྟ་བུ་ནི་དབྱིངས་དོན་དམ། དེ་ལ་གསལ་དྭངས་སྒྲིབ་གཡོགས་མེད་པའི་ཆ་ནི་ཡེ་ཤེས་དོན་དམ། མེ་ལོང་ལ་གཟུགས་བརྙན་འཆར་རུང་གི་ནུས་པ་ཡོད་པ་ལྟར། སེམས་ཉིད་དྭངས་གསལ་སྒྲིབ་གཡོག་མེད་པའི་ཀློང་ན་སྐུ་དང་ཡེ་ཤེས་ཀྱི་ཡོན་ཏན་འཆར་རུང་མ་འགགས་པར་གནས་པ་ནི་འབྲས་བུ་དོན་དམ་སྟེ། ལམ་རིམ་ལས། བདུན་དང་གསུམ་ཕྱིར་དོན་དམ་པ། །ཞེས་གསུངས་པས། འབྲས་བུ་དོན་དམ་ལ་སྐུ་གསུང་ཐུགས་ཡོན་ཏན་ཕྲིན་ལས་ལྔར་ཕྱེ་བས་སེམས་ཉིད་དོན་དམ་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པ་ལྷག་པ་དོན་དམ་བདེན་པ་དང་། སེམས་ཉིད་དོན་དམ་བདེན་པའི་རྩལ་སྣང་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་ཤར་བ་ནི་ལྷག་པ་ཀུན་རྫོབ་ཀྱི་བདེན་པ་སྟེ། དེ་གཉིས་ཀྱང་ངོ་བོ་དབྱེར་མི་ཕྱེད་པར། གསེར་དང་གསེར་གྱི་སེར་པོ་དང་། གཡུ་དང་གཡུ་ཡི་སྔོན་པོ་དང་། མར་མེ་དང་མར་མེའི་འོད་ལྟ་བུར་ཟུང་འཇུག་ངོ་བོ་གཅིག་པའི་བདག་ཉིད་དུ་གནས་པ་ནི་ལྷག་པ་བདེན་པ་དབྱེར་མེད་པ་སྟེ། དེ་ཡང་སྤྱོད་ཡུལ་དང་བྲལ་བར་ཡེ་ནས་གནས་པ་ཞེས་པས་བདེན་པ་དབྱེར་མེད་དེ་ནི་བློས་བསམ་པའི་ཡུལ་ལས་འདས། ངག་གིས་བརྗོད་པའི་ཡུལ་ལས་འདས་པས་སྨྲ་བསམ་བརྗོད་མེད་ཀྱི་དོན་ཏེ། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །ཞེས་དང་། སྡུད་པ་ ― MLP018_Page_0152 ―
[མ་དཔེ་གཟིགས་ན་འདིར་གནོན།]
ལས། དོན་དེ་གང་ཡིན་ནམ་མཁའ་དག་ལ་བརྟག་པར་གྱིས། །ཞེས་སོགས་གསུངས། དེ་ལ་ཡེ་ནས་གནས་པ་ཞེས་པ་ནི། དེ་ནི་བཅོས་མ་གློ་བུར་གྱི་ཆོས་མ་ཡིན་པར་གདོད་མ་ཁུངས་ཐུབ་ཀྱི་ཆོས་སེམས་ཉིད་དེ་གའི་གནས་ལུགས་སམ་ཡིན་ལུགས་སམ་གཤིས་ལུགས་སུ་གདོད་མ་ནས་དེ་ལྟར་ཡོད་པས་ཡེ་ནས་གནས་པ་ཞེས་བཤད་པ་ཡིན་གསུངས། དེ་ལ་མདོ་རྒྱུད་རྣམས་སུ་མིང་གི་རྣམ་གྲངས་དུ་མ་ཞིག་བཤད་པ་ཡོད་དེ། ཁམས་བདེ་བར་གཤེགས་པའི་སྙིང་པོ་དང་། རང་བཞིན་དུ་གནས་པའི་རིགས་དང་། ཀུན་གཞིའི་ཡེ་ཤེས་དང་། དྲི་བཅས་དེ་བཞིན་ཉིད་ལ་སོགས་པ་ཐ་སྙད་གང་ལའང་འཇུག་པའི་གཞིའོ། །ཞེས་པ་ནི། དེ་ལ་བདེ་གཤེགས་སྙིང་པོ་ལ། སྤྱིར་མདོ་རྒྱུད་བསྟན་བཅོས་རྣམས་སུ་རིགས་ཞེས་གྲགས་པ་ལ་གྲུབ་མཐའི་དབང་གིས་འདོད་ཚུལ་མི་འདྲ་བ་དུ་མ་སྣང་སྟེ། བྱེ་བྲག་ཏུ་སྨྲ་བས་ནི། སྲིད་པ་དང་སྲིད་པའི་ཡོ་བྱད་ལ་མ་ཆགས་པའི་སེམས་བྱུང་ཆོག་ཤེས་པ་ལ་འཕགས་པའི་རིགས་སུ་འདོད། མདོ་སྡེ་པས་ནི། སེམས་ཀྱི་ས་བོན་ཟག་མེད་ཀྱི་ཡེ་ཤེས་འབྱུང་རུང་གི་ནུས་པ་ལ་འདོད། སེམས་ཙམ་པས་ནི། ཐོག་མ་མེད་པ་ནས་སེམས་རྒྱུད་ལ་གནས་པའི་ཟག་མེད་ཀྱི་ཆོས་སྐྱེད་པར་བྱེད་པའི་ནུས་པ་ཆོས་ཉིད་ཀྱིས་ཐོབ་པ་ལ་འདོད། དེ་རྣམས་ནི་བདེ་གཤེགས་སྙིང་པོ་འདུས་བྱས་སུ་འདོད་པའི་ལུགས་ཏེ་དངོས་པོར་སྨྲ་བའི་ལུགས་སོ། །དབུ་མ་པས་ནི། དྲི་བཅས་དེ་བཞིན་ཉིད་ལ་རིགས་སུ་ཕལ་ཆེར་འདོད་པ་མཐུན་ཡང་། ངོས་འཛིན་ལུགས་མི་འདྲ་བ་མང་དུ་སྣང་མོད། འདིར་ཐེག་ཆེན་ཐུན་མོང་མ་ཡིན་པའི་ལུགས་ལྟར་ན། སེམས་ཉིད་ཡེ་ནས་རང་བཞིན་གྱིས་རྣམ་པར་དག་པ་སྟོང་གསལ་འགགས་མེད་ཀུན་ཁྱབ་ཀྱི་ངོ་བོར་འཕོ་འགྱུར་མེད་པར་གནས་པ་ནི་ཁམས་བདེ་བར་གཤེགས་པའི་སྙིང་པོ་ཞེས་ངེས་དོན་གྱི་མདོ་སྡེ་ཟབ་མོ་རྣམས་ལས་འབྱུང་སྟེ། ཏིང་འཛིན་རྒྱལ་པོ་ལས། དག་པ་དྭངས་པ་འོད་གསལ་བ། །མི་འཁྲུགས་འདུས་མ་བྱས་པ་ཉིད། །བདེ་བར་གཤེགས་པའི་སྙིང་པོ་སྟེ། །ཡེ་ནས་གནས་པའི་ཆོས་ཉིད་དོ། །ཞེས་དང་། སངས་རྒྱས་ཕལ་པོ་ཆེ་ལས། སྟོང་གསུམ་དར་ཡུག་གི་དཔེ་བཀོད་ནས། ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་ཡེ་ཤེས་དང་ ― MLP018_Page_0153 ―
[མ་དཔེ་གཟིགས་ན་འདིར་གནོན།]
ཚད་མེད་པའི་ཡེ་ཤེས། སེམས་ཅན་ཐམས་ཅད་ལ་ཉེ་བར་འཚོ་བའི་ཡེ་ཤེས་ཀྱང་སེམས་ཅན་ཐམས་ཅད་ཀྱི་སེམས་ཀྱི་རྒྱུད་ལ་མ་ཚང་བ་མེད་པར་བཞུགས་ཏེ། སེམས་ཅན་གྱི་སེམས་ཀྱི་རྒྱུད་དེ་དག་ཀྱང་དེ་བཞིན་གཤེགས་པའི་ཡེ་ཤེས་དང་འདྲ་བར་ཚད་མེད་དོ། །དེ་ལྟ་མོད་ཀྱི་འདུ་ཤེས་ཀྱི་འཛིན་པས་བཅིངས་པའི་བྱིས་པ་རྣམས་ཀྱིས་དེ་བཞིན་གཤེགས་པའི་ཡེ་ཤེས་མི་ཤེས་རབ་ཏུ་མི་ཤེས་ཤིང་ཉམས་སུ་མི་མྱོང་མངོན་སུམ་དུ་མི་བྱེད་དོ། །དེས་ན་དེ་བཞིན་གཤེགས་པ་ཆགས་པ་མེད་པའི་དེ་བཞིན་གཤེགས་པའི་ཡེ་ཤེས་ཀྱིས་ཆོས་ཀྱི་དབྱིངས་སེམས་ཅན་གྱི་གནས་ཐམས་ཅད་རྣམ་པར་གཟིགས་ནས་འདུ་ཤེས་སུ་འགྱུར་ཏེ། ཀྱེ་མ་མ་ལ་སེམས་ཅན་འདི་དག་ནི་དེ་བཞིན་གཤེགས་པའི་ཡེ་ཤེས་ཡང་དག་པ་ཇི་ལྟ་བ་བཞིན་མི་ཤེས་པ་དང་། དེ་བཞིན་གཤེགས་པའི་ཡེ་ཤེས་རྗེས་སུ་ཞུགས་པ་དག་སྟེ། གང་ཡང་ངས་སེམས་ཅན་འདི་དག་ལ་འཕགས་པའི་ལམ་ཉེ་བར་བསྟན་པས་འདུ་ཤེས་ཀྱིས་བྱས་པའི་འཆིང་བ་མཐའ་དག་བསལ་བར་བྱ་སྟེ། ཇི་ལྟར་རང་ཉིད་ཀྱིས་འཕགས་པའི་ཡེ་ཤེས་ཀྱི་སྟོབས་བསྐྱེད་པས་འདུ་ཤེས་ཀྱི་མདུད་པ་ཆེན་པོ་བསལ་ནས་དེ་བཞིན་གཤེགས་པའི་ཡེ་ཤེས་སོ་སོར་མངོན་པར་ཤེས་ཤིང་། དེ་བཞིན་གཤེགས་པ་དང་མཉམ་པ་ཉིད་རྗེས་སུ་ཐོབ་པ་བཞིན་དུ་དེ་བཞིན་གཤེགས་པའི་ལམ་བསྟན་པས་འདུ་ཤེས་ཀྱིས་བྱས་པའི་འཆིང་བ་མཐའ་དག་ལས་ལྡོག་པར་བྱེད་དོ། །འདུ་ཤེས་ཀྱིས་བྱས་པའི་འཆིང་བ་ཐམས་ཅད་ལས་ལོག་པ་དག་ལ་ནི་དེ་བཞིན་གཤེགས་པའི་ཡེ་ཤེས་ཚད་མེད་པ་དེས་འགྲོ་བ་ཐམས་ཅད་ཀྱི་ཉེ་བར་འཚོ་བར་འགྱུར་རོ། །ཞེས་དང་། འགྲིབ་པ་དང་འཕེལ་བ་མེད་པའི་མདོ་ལས་ཀྱང་། ཤཱ་རིའི་བུ་དོན་དམ་པ་ཞེས་བྱ་བ་འདི་ནི་སེམས་ཅན་གྱི་ཁམས་ཀྱི་ཚིག་བླ་དྭགས་སོ། །ཤཱ་རིའི་བུ་སེམས་ཅན་གྱི་ཁམས་ཞེས་བྱ་བ་འདི་ནི་དེ་བཞིན་གཤེགས་པའི་སྙིང་པོའི་ཚིག་བླ་དྭགས་སོ། །ཞེས་དང་། དེ་བཞིན་གཤེགས་པའི་སྙིང་པོའི་མདོ་ལས་ཀྱང་། རིགས་ཀྱི་བུ་དག་འདི་ནི་ཆོས་རྣམས་ཀྱི་ཆོས་ཉིད་དེ་བཞིན་ཉིད་དེ། དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་སེམས་ཅན་འདི་དག་ནི་རྟག་ཏུ་དེ་བཞིན་གཤེགས་པའི་སྙིང་པོ་ཅན་ཡིན་ནོ། །ཞེས་གསུངས་པའི་ཕྱིར་ ― MLP018_Page_0154 ―
[མ་དཔེ་གཟིགས་ན་འདིར་གནོན།]
དང་། དེ་དག་གི་དགོངས་འགྲེལ་གྱི་བསྟན་བཅོས་རྒྱུད་བླ་མ་ལས། རྫོགས་སངས་རྒྱས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་བདེ་གཤེགས་སྙིང་པོ་ཅན། །ཞེས་རྒྱུ་མཚན་གསུམ་གྱིས་སེམས་ཅན་ཐམས་ཅད་བདེ་བར་གཤེགས་པའི་སྙིང་པོ་ཅན་དུ་བསྟན་ཅིང་། ཉོན་མོངས་སྦུབས་ནང་གནས་པ་དེ། །དཔེ་དག་གིས་ནི་ཤེས་པར་བྱ། །ཞེས་གསུངས་པས་དཔེ་དགུ་ནི། དེ་ཉིད་ལས། སངས་རྒྱས་པད་ངན་སྦྲང་མ་སྦྲང་རྩི་དང་། །སྦུན་ལ་སྙིང་པོ་མི་གཙང་ནང་ན་གསེར། །ས་ལ་གཏེར་དང་མྱུག་སོགས་འབྲས་ཆུང་དང་། །གོས་ཧྲུལ་ནང་ན་རྒྱལ་བའི་སྐུ་དང་ནི། །བུད་མེད་ངན་པའི་ལྟོ་ན་མི་བདག་དང་། །ས་ནང་རིན་ཆེན་གཟུགས་ཡོད་ཇི་ལྟ་བར། །གློ་བུར་ཉོན་མོངས་དྲི་མས་བསྒྲིབས་པ་ཡི། །སེམས་ཅན་རྣམས་ལ་དེ་བཞིན་ཁམས་འདི་གནས། །ཞེས་དཔེ་དགུའི་སྒོ་ནས་མདོར་བསྟན་དུ་བཤད་ཅིང་། རྒྱས་བཤད་ཀྱི་སྐབས་སུ་རྣམ་བཞག་རྣམ་པ་བཅུའི་སྒོ་ནས་གཏན་ལ་ཕབ་པ་སྟེ། དེ་ཉིད་ལས། ངོ་བོ་རྒྱུ་འབྲས་ལས་ལྡན་འཇུག་པ་དང་། །གནས་སྐབས་དེ་བཞིན་ཀུན་ཏུ་འགྲོ་བའི་དོན། །རྟག་ཏུ་མི་འགྱུར་ཡོན་ཏན་དབྱེར་མེད་པ། །དོན་དམ་དབྱིངས་ཀྱི་དགོངས་དོན་ཡིན་ཞེས་བྱ། །ཞེས་སོགས་རྒྱས་པར་གསུངས་སོ། །དེ་ཡང་མདོར་ཧྲིལ་གྱིས་དྲིལ་ན། དེ་ལ་བདེ་གཤེགས་སྙིང་པོ་ཞེས་བརྗོད་པ་ནི། སེམས་ཉིད་བདེན་པ་དབྱེར་མེད་དུ་གནས་པ་དེ་ཉིད་སངས་རྒྱས་ཀྱི་ངོ་བོ་ཡིན་པའི་ཆ་ནས་བདེ་གཤེགས་སྙིང་པོ་དང་། སེམས་ཉིད་དེ་ལ་སྟོང་ཆ་ནས་ཆོས་སྐུའི་ཡོན་ཏན་དང་། སྣང་ཆ་ནས་གཟུགས་སྐུའི་ཡོན་ཏན་འཆར་རུང་མ་འགགས་པར་གནས་པས་རང་བཞིན་གནས་རིགས་དང་། འཁོར་འདས་གཉིས་ཀའི་འབྱུང་གཞི་ཡིན་པས་ཀུན་གཞིའི་ཡེ་ཤེས་དང་། དེ་ཉིད་སེམས་ཅན་གྱི་དུས་སུ་དྲི་མ་དང་འབྲེལ་བས་དྲི་བཅས་དེ་བཞིན་ཉིད་དང་། སོགས་ཁོངས་ནས་ཀྲི་ཡ་པ་རྣམས་ཀྱིས་བདག་གི་དེ་ཁོ་ན་ཉིད་དང་། ཨུ་པ་ཡ་དང་ཡོ་ག་བ་གཉིས་ཀྱིས་དོན་དམ་པར་མཚན་མ་མེད་པའི་བྱིན་རླབས་ཀུན་རྫོབ་རྡོ་རྗེ་དབྱིངས་ཀྱི་ལྷར་བལྟ་བ་དང་། མ་ཧཱ་ཡོ་ག་བ་རྣམས་ཀྱིས་སེམས་ཉིད་ཡེ་ནས་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོ་ཞེས་དང་། ― MLP018_Page_0155 ―
[མ་དཔེ་གཟིགས་ན་འདིར་གནོན།]
ཨ་ནུ་ཡོ་ག་བ་རྣམས་ཀྱིས་གཉིས་སུ་མེད་པའི་སྲས་རྩ་བ་བྱང་ཆུབ་སེམས་ཀྱི་དཀྱིལ་འཁོར་ཞེས་དང་། ཨ་ཏི་ཡོ་ག་བ་རྣམས་ཀྱིས་ངོ་བོ་རང་བཞིན་ཐུགས་རྗེ་གསུམ་ཞེས་པ་ལ་སོགས་པ་མིང་གི་ཐ་སྙད་དུ་མ་ལ་འཇུག་པའི་གཞི་ཡིན་པས་སོ་གསུངས། དེ་ཉིད་གཞི་ལམ་འབྲས་གསུམ་གྱི་ལྡོག་ཆ་གང་རུང་དང་མ་བསྟུན་པར་སྤྱིར་བཞག་པ་ན། ཞེས་པས། དེ་ལ་རང་བཞིན་ནམ་གནས་ལུགས་ཞེས་པ་ལས་མིང་གི་ཐ་སྙད་གང་ཡང་མི་འཇུག་པའོ། །དེ་གསུམ་གང་རུང་དང་བསྟུན་ན། དེ་ཉིད་དྲི་མ་ཅུང་ཟད་ཀྱང་མ་སྤངས་པའི་གནས་སྐབས་ལ་གཞི། དྲི་མ་སྦྱོང་བཞིན་པའི་གནས་སྐབས་ལ་ལྟོས་ནས་ལམ། དྲི་མ་མཐའ་དག་དང་བྲལ་བའི་གནས་སྐབས་ལ་འབྲས་བུར་འཇོག་གོ །ངེས་ཚིག་ནི། རིམ་གསུམ་ལས། ཐ་སྙད་གཉིས་ཀྱི་ཆོས་རྣམས་ཀུན། །མ་ལུས་འབྱུང་ཕྱིར་གཞི་ཞེས་བྱ། །ཞེས་པས་གནས་ལུགས་ལ་ལྟོས་ནས་འཁོར་འདས་གཉིས་ཀྱི་ཐ་སྙད་ལས་འདས་ཀྱང་། སྣང་ལུགས་ལ་དེ་གཉིས་ཀྱི་ཐ་སྙད་འབྱུང་བས་སོ་གསུངས། གཞི་དེ་ལ་དབྱེ་ན་རིམ་གསུམ་ལས། ངོ་བོའ་གཞི་དང་བཏགས་པའི་གཞི། །ཞེས་པས་གནས་ལུགས་ངོ་བོ་ཉིད་ཀྱི་གཞི་ནི་དྲི་མ་སྦྱོང་བའི་གཞི་ནོར་བུ་རིན་པོ་ཆེ་ལྟ་བུའོ་ཞེས་པས་ངོ་བོའ་གཞི་སྟེ། དཔེར་ན་འདམ་རྫབ་ཀྱི་དབུས་ཀྱི་ནོར་བུ་ལྟར་རོ། །དེ་ལྟར་ཡང་ཀླུ་སྒྲུབ་ཀྱིས། ས་ཡི་ནང་ན་གནས་པའི་ཆུ། །དྲི་མ་མེད་པར་ཡང་དག་གནས། །ཉོན་མོངས་ནང་ན་ཡེ་ཤེས་ཀྱང་། །དེ་བཞིན་དྲི་མ་མེད་པར་གནས། །ཞེས་སོ། །ནོར་བུའི་འདམ་རྫབ་ལྟ་བུ་ནི་བཏགས་པའི་གཞི་སྟེ། མེད་སྣང་འཁོར་བའི་ཆོས་ཐམས་ཅད་སྦྱང་བྱའི་དྲི་མ་འདམ་རྫབ་ལྟ་བུ་སྟེ། དེ་ནི་གཉིས་མེད་ལ་གཉིས་སུ་བཟུང་ནས་ལོག་ཤེས་འཁྲུལ་རྟོག་སྟེ། མདོ་ལས། གང་ཞིག་ལོག་པར་རྟོག་པས་མེད་མཐོང་བ། །བྱིས་པ་འདི་དག་མེད་པའི་ཆོས་ལ་སྤྱོད། །ཅེས་དང་། འཇམ་དཔལ་ཞལ་ལུང་ལས། འཁོར་བའི་ཆོས་རྣམས་ཐག་ཁྲ་ཡི། །སྦྲུལ་ལྟར་མེད་པ་ཉིད་དུ་འདོད། །ཅེས་སོ། །དེ་ཉིད་ལ་བཏགས་གཞི་ཞེས་པ་ནི། ཞེན་སྣང་ཉིད་འཁོར་བ་འགྲུབ་བྱེད་ཀྱི་རྒྱུ་དང་། འཁོར་བ་པའི་རྣམ་ཤེས་ཀྱི་འཇུག་པ་མ་ཟད་ཀྱི་བར་དུ་རྒྱུན་ཆགས་པ་ཙམ་ཡིན་པས་དེ་ལྟར་དུ་བཤད་པ་ཡིན་གསུངས། འབྲས་བུའི་ཉེར་ ― MLP018_Page_0156 ―
[མ་དཔེ་གཟིགས་ན་འདིར་གནོན།]
ལེན་དུ་གྱུར་པའི་རྒྱུ་རྒྱུད་མ་ཡིན་ཞེས་པ་ནི། འབྲས་བུའི་ཉེར་ལེན་དུ་མི་འགྲོ་སྟེ། འབྲས་བུ་ཐོབ་པའི་དུས་ཟད་ནས་རང་སངས་ལ་འགྲོ་བའི་ཕྱིར་དང་། བཅོས་མ་གློ་བུར་གྱི་ཆོས་ཡིན་པས་སོ་གསུངས། རིགས་པས་དཔྱད་དོན་གྱི་སྟོང་ཉིད་མེད་དགག་ཀྱང་རྒྱུ་རྒྱུད་མཚན་ཉིད་པ་མ་ཡིན་ནོ། །ཞེས་པ་མཚན་ཉིད་པ་མ་ཡིན་ཡང་བཏགས་པ་ཙམ་དུ་ཁས་ལེན་ཏེ། དེ་ལ་དམིགས་ནས་སྐྱོན་ཡོན་སྐྱེ་བ་ཙམ་ཡིན་གསུངས། སྟོང་ཉིད་མེད་དགག་དེ་གང་ཡིན་ཞེ་ན། ཀ་བ་ཀ་བའི་ངོ་བོས་སྟོང་། བུམ་པ་བུམ་པའི་ངོ་བོས་སྟོང་པ་སྟེ་ཆོས་ཐམས་ཅད་རང་རང་གི་ངོ་བོས་སྟོང་པས་དགག་གཞི་ཆོས་ཅན་སྟོང་པས་སྐྱེ་མེད་ཙམ་དུ་ཟད་པའི་ཕྱིར་རོ་གསུངས། དེ་རྣམས་ཀྱིས་གཞིའི་དོན་བཤད་པ་སོང་ནས། གཉིས་པ་ལམ་གྱི་རྒྱུད་ནི། རྒྱུའི་རྒྱུད་དེ་གློ་བུར་གྱི་དྲི་མ་དང་བྲལ་བར་བྱེད་པའི་ཞེས་སོགས་ཀྱིས་བསྟན། དེའི་དོན་ནི། རིམ་གསུམ་ལས། ངོ་བོ་ཤེས་རབ་རྣམ་གསུམ་གྱིས། །སེམས་ལྔ་སྐྱེ་བར་བསྟན་པ་ཡིན། །ཞེས་གསུངས་པ་ལྟར། སེམས་ལྔའི་སྒོ་ནས་ལམ་གྱི་ངོ་བོ་སྐྱེ་བའོ། །དེ་ཡང་སེམས་སྐྱེ་ཚུལ་ནི། གཞིའི་ས་ནས་སེམས་སྐྱེ་བ་ཞེས་པ་ཐེག་པ་གང་དུ་ཡང་མ་ཞུགས་པའི་གནས་སྐབས་ནས་སྐྱེ་བ་དང་། ལམ་གྱི་ས་ནས་སེམས་སྐྱེ་བ་ཞེས་པ་ཉན་རང་སོགས་ཀྱི་ཐེག་པར་ཞུགས་ནས་སྐེད་འཇུས་བྱས་ཏེ་ལམ་དེ་བོར་ནས་ཐེག་པ་འདིར་འཇུག་པ་དང་། འབྲས་བུའི་ས་ནས་སེམས་སྐྱེ་བ་ཞེས་པ་ཐེག་པ་འོག་མའི་འབྲས་བུའི་བར་དུ་བསླབས་ནས། དེ་ནས་སྔགས་ལམ་འདིར་འཇུག་པ་རྣམས་སོ་གསུངས། སེམས་ཇི་ལྟར་སྐྱེ་ཚུལ་ནི། ཐེག་པ་འོག་མའི་སྐྱོན་མཐོང་ཞིང་གོང་མའི་ཡོན་ཏན་མཐོང་སྟེ་འཇུག་འདོད་ཀྱི་སེམས་དང་པོ་འགོ་ལྡང་བའི་ཚུལ་གྱིས་སྐྱེས་པ་གཡོ་ལྡང་བྱང་ཆུབ་ཀྱི་སེམས། ཐེག་པ་དེའི་ཡོན་ཏན་ཐོབ་ན་སྙམ་པ་སྨོན་པ་བྱང་ཆུབ་ཀྱི་སེམས། དེ་སྨོན་པ་ཙམ་དུ་མ་བཞག་པར་དེ་ལ་འཇུག་པ་འཇུག་པ་བྱང་ཆུབ་ཀྱི་སེམས། དེ་ལ་གནས་པ་གནས་པ་བྱང་ཆུབ་ཀྱི་སེམས། དེའི་འབྲས་བུ་ཐོབ་པ་མཐར་ཕྱིན་བྱང་ཆུབ་ཀྱི་སེམས་ཏེ། དེ་ཡང་ངོ་བོ་ཤེས་རབ་རྣམ་པ་གསུམ་གྱི་ཐུན་མོང་གི་སེམས་ལྔ་ཐེག་པ་འོག་མ་པ་རྣམས་དང་། མཆོག་གི་སེམས་ལྔ་བླ་ན་མེད་པའི་ཐེག་ ― MLP018_Page_0157 ―
[མ་དཔེ་གཟིགས་ན་འདིར་གནོན།]
པ་འདིར་འཇུག་པའི་སེམས་ཏེ། དེ་ཡང་སྐྱེས་སམ་སྐྱེས་སོ་ཞེས་པས། ཅིག་ཅར་དུ་སྐྱེ་བ་ཞིག་ཡོད་དེ། སྐྱེས་སམ་སྐྱེས་སོ་ཞེས་པ་སྟེ། དེ་གང་ཞེ་ན། སྡོམ་གསུམ་རྣམ་ངེས་ལས། རྟོགས་གྲོལ་དུས་མཉམ་ཨིནྡྲ་བྷུ་ཏི་བཞིན། །ཞེས་པ་ལྟར་རོ། །སྐྱེ་བ་ནི་རིམ་གྱིས་སྐྱེ་བས་སོ་གསུངས། ངེས་ཚིག་ནི་གོ་སླ་ཞིང་། དབྱེ་བ་ལ་གཉིས་ལས། རྣལ་འབྱོར་བླ་ན་མེད་པ་ཁྱད་པར་གྱི་ལམ་འདི་ནི་ཉེ་བའི་ལམ་མམ་ཐབས་རྒྱུད་ཡིན་ལ། ཞེས་པ་ནི། ཁྱད་པར་ཅན་གྱི་ལམ་ཞེས་པ་ཐེག་ཆེན་དབུ་མ་སོགས་སུ་བདེན་གཉིས་ཟུང་འཇུག་ཟེར་ཡང་ཟུང་འཇུག་རྣལ་མའི་དོན་མ་མྱོང་སྟེ། ཐབས་བདེ་བ་ཆེན་པོའི་ཁྱད་པར་མེད་པའི་ཕྱིར་རོ། །ཉེ་ལམ་ཞེས་པའང་ལམ་འདིར་ཞུགས་ན་ཐེག་པ་གཞན་བསྟན་མི་དགོས་པར་འདི་ཁོ་ནས་འབྲས་བུ་ལ་སྦྱོར་བས་སོ། །ཐབས་ཀྱི་རྒྱུད་ཅེས་པའང་། ཐེག་པ་གཞན་རྣམས་སུ་ནི་དུག་གསུམ་ལ་སྤང་བྱར་བྱེད་ལ། འདིར་ནི་དམིགས་མེད་ལྟ་བས་གཟེར་བཏབ་ནས། འདོད་ཆགས་བདེ་སྟོང་། ཞེ་སྡང་གསལ་སྟོང་། གཏི་མུག་རིག་སྟོང་གི་ངོ་བོར་བལྟས་ཏེ་དུག་གསུམ་ལམ་ཁྱེར་གྱི་ཐབས་ལ་བརྟེན་ནས་ཚེ་གཅིག་གིས་སངས་རྒྱས་ཀྱི་གོ་འཕང་ཐོབ་པར་བྱེད་པའི་ཐབས་རྨད་དུ་བྱུང་བ་སྟེ། ས་པཎ་གྱི་སྡོམ་གསུམ་རབ་དབྱེར། སྔགས་ཀྱིས་བཏབ་པའི་ས་བོན་ནི། །ཉི་མ་གཅིག་ལ་ལོ་ཐོག་སྨིན། །རྡོ་རྗེ་ཐེག་པའི་ཐབས་ཤེས་ན། །ཚེ་འདི་ཉིད་ལ་སངས་རྒྱས་འགྲུབ། །ཅེས་གསུངས། དེ་ལས་གཞན་པ་ངེས་འབྱུང་གི་ཐེག་པ་བཞི་ཞེས་པ་ནི། ལྷ་མིའི་ཐེག་པས་ངན་སོང་ལས་ངེས་པར་འབྱུང་། ཉན་རང་གི་ཐེག་པས་འཁོར་བ་ལས་ངེས་པར་འབྱུང་། བྱང་ཆུབ་སེམས་དཔའི་ཐེག་པས་མཐའ་གཉིས་ལས་ངེས་པར་འབྱུང་བས་སོ་གསུངས། ཕྱི་རྒྱུད་སྡེ་གསུམ་གྱི་ལམ་སྐབས་འདིར་རིང་ལམ་ཡིན་ཞེས་པ། སྤྱིར་སྔགས་ལམ་ཡིན་པས་ཉེ་ལམ་ཡིན་མོད་ཀྱང་། དེ་དག་བླ་མེད་ཀྱི་ལམ་འདི་ལ་འཇུག་དགོས་པས། ཐེག་པ་འདི་ལ་ལྟོས་ནས་རིང་བའི་ལམ་ཞེས་བཤད་པའོ། །དེ་ཡང་གཞི་འབྲས་གཉིས་དང་ཤེས་ཐོབ་ཀྱི་བྱ་བྱེད་འབྲེལ་བ་ཅན་དུ་གནས་པའི་ཕྱིར་ཞེས་སོགས་ཀྱི་དོན་ལམ་རྒྱུད་དེ་གཞི་ཤེས་པར་བྱ་བ་དང་མར་འབྲེལ། འབྲས་བུ་ཐོབ་པར་བྱེད་པ་དང་ཡར་འབྲེལ་ཏེ་དེ་གཉིས་ཀྱི་བར་གྱི་བྱ་བྱེད་འབྲེལ་བ་ཅན་དུ་ ― MLP018_Page_0158 ―
[མ་དཔེ་གཟིགས་ན་འདིར་གནོན།]
གནས་པའི་ཕྱིར་རོ། །ཁྱད་པར་གྱི་ལམ་ལ་དབྱེ་ན་ཐབས་གྲོལ་གཉིས་ཏེ། གྲོལ་ལམ་ཐབས་སུ་རྣམ་པར་བསྟན། །ཞེས་པས་ཐབས་ལམ་ནི། ངོ་མཚར་ངན་འགྲོ་ཐར་པའི་ཐབས། །ཞེས་པ་འཆིང་བྱེད་ཀྱི་ལས་ལ་སྤྱད་ཀྱང་གྲོལ་བའི་འབྲས་བུ་ཐོབ་པ་ལ་ངོ་མཚར་བའི་དོན་ནོ། །དེ་ནི་གཙོ་བོར་ཐབས་ཀྱི་ཁྱད་པར་བརྟུལ་ཞུགས་ཀྱི་སྤྱོད་པ་རྨད་དུ་བྱུང་བའི་སྒོ་ནས་འབྲས་བུ་མྱུར་དུ་འགྲུབ་པར་བྱེད་པ་སྟེ། ཞེས་པས་གཙོ་བོར་ཐབས་ཀྱི་ཁྱད་པར་ཞེས་པ། གྲོལ་ལམ་ཡང་ཐབས་ཤེས་གཉིས་ལྡན་ཡིན་ཡང་། འདིར་ཐབས་གཙོ་བོར་སྟོན་པའི་ཕྱིར་གཙོ་བོ་ཐབས་ཀྱི་ཁྱད་པར་ཞེས་སྨོས། དེ་ལ་བརྟུལ་ཞུགས་ཀྱི་སྤྱོད་པ་ཞེས་བཤད་པས། དུག་གསུམ་མི་སྤངས་པར་ཐོག་བརྫིས་ཀྱི་སྤྱོད་པའི་བརྟུལ་ཞུགས་ཏེ། དཔེར་ན་རྒྱུད་ལས། རྣ་བར་ཆུ་ནི་ཞུགས་གྱུར་ན། །ཆུ་ཉིད་ཀྱིས་ནི་གདོན་པར་བྱ། །ཞེས་གསུངས་པ་ལྟར། སླར་ཡང་ཆུ་སྣོན་མ་བླུགས་ནས་བཏོན་པས་ཐོན་འགྲོ་བ་བཞིན་དུ། དུག་གསུམ་ལ་ལྟ་བའི་བརྟུལ་ཞུགས་ཀྱི་གདེངས་དང་ལྡན་པས་སྤྱད་ན་མི་འཆིང་བར་མ་ཟད་གྲོལ་བའི་འབྲས་བུ་མྱུར་དུ་སྟོན་པ་སྟེ། དཔེར་ན་མཀྵི་ཀའི་སྦྱོར་བས་ལྕགས་ཁམས་ཡུད་ཙམ་གྱིས་གསེར་དུ་བསྒྱུར་བ་བཞིན་ནོ། །ཞེས་པ་སྟེ། མཀྵི་ཀ་ནི་དངུལ་ཆུའི་སྦྱོར་བ་སྟེ། ཁེ་ཉེན་གཉིས་ཀའི་དཔེར་མཚོན་པས། དངུལ་ཆུའི་སྦྱོར་བ་ལེགས་པར་ཤེས་པ་ཞིག་གིས་གནས་སྐབས་ལྔའི་སྒོ་ནས་ལྕགས་ཁམས་གསེར་དུ་འགྱུར་ཏེ། ཇི་སྐད་དུ། དུ་བ་དང་ནི་ཙག་ཙག་དང་། །སྦལ་པ་འཕྱོང་བ་ཉིད་དང་ནི། །འདར་བ་དང་ནི་མི་འདར་བའི། །དངུལ་ཆུ་ཡི་ནི་གནས་སྐབས་ལྔ། །ཞེས་གསུངས་པ་ལྟར་རོ། །དེའི་སྦྱོར་བ་མི་ཤེས་པ་ཞིག་གིས་བྱས་ན་དངུལ་ཆུའི་དགྲ་མེ་ཡིན་པས་ལྕགས་གསེར་དུ་མི་འགྱུར་བ་མ་ཟད་དངུལ་ཆུའི་རྒྱུ་ཁམས་ཆེན་པོ་དེ་ཡང་ཆུད་ཟོས་སུ་འགྲོ་བ་བཞིན་དུ། ཐབས་དང་མི་ལྡན་པ་ཞིག་གིས་སྦྱོར་སྒྲོལ་གྱི་ལས་ལ་སྤྱད་ན་གྲོལ་བའི་འབྲས་བུ་མི་ཐོབ་པར་མ་ཟད། ངན་སོང་དུ་ལྟུང་བའི་ཉེན་ཆེན་པོ་ཡོད་དེ། ཞེ་སྡང་གིས་ནི་དམྱལ་བར་སྐྱེ། །ཆགས་པས་ཡི་དྭགས་འགྲོ་བར་འགྱུར། །རྨོངས་པ་ཕལ་ཆེར་དུད་འགྲོར་འགྲོ། །ཞེས་གསུངས། ― MLP018_Page_0159 ―
[མ་དཔེ་གཟིགས་ན་འདིར་གནོན།]
ཐབས་ལམ་དེ་ལ་དབྱེ་ན་གཉིས་ཏེ། གདམས་ངག་སྟེང་དང་འོག་གི་སྒོ། །ཞེས་པས་སྟེང་སྒོ་ནི། འཁོར་ལོ་དྲུག་ལ་བརྟེན་ནས་འབར་འཛག་གི་སྦྱོར་བས་སོགས་ཏེ། རྒྱ་མཚོ་ལས། འཁོར་ལོ་སུམ་གཉིས་སྲོག་ཤིང་གསུམ། །མེ་རླུང་འགྲོ་བས་ནམ་མཁའི་བ། །བཞོ་བས་སྟེང་དུ་རྣམ་པར་གྲགས། །ཞེས་པས་བསྟན་ཏེ། འཁོར་ལོ་གསུམ་གཉིས་ཞེས་པས་གསུམ་ཚན་གཉིས་ཏེ་དྲུག་ཡིན་ཞིང་། སྲོག་ཤིང་གསུམ་ནི་རྩ་རོ་རྐྱང་དབུ་གསུམ་སྟེ་ལུས་ཀྱི་དབུས་སུ་སྲོག་ཤིང་བསླང་བ་ལྟར་ཡོད་པ་དེ་ལ་བརྟེན་པའི་རྩ་འཁོར་ནི། སྤྱི་བོའ་བདེ་ཆེན་གྱི་འཁོར་ལོ་རྩ་འདབ་སོ་གཉིས། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད། ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རེ་བཞི། དེའི་འོག་ཏུ་སྦར་བྱ་མེའི་འཁོར་ལོ་གྲུ་གསུམ་རཾ་གྱིས་མཚན་པ་དང་། དེའི་འོག་ཏུ་སྦར་བྱེད་རླུང་གི་འཁོར་ལོ་གཞུའི་དབྱིབས་ཅན་ཡཾ་ཡིག་གིས་མཚན་པ་དྲུག་གནས་ཤིང་། མེ་རླུང་འགྲོ་བས་ནམ་མཁའི་བ། །ཞེས་པས་དེ་ལྟར་སྟེང་སྒོའི་ལམ་ཉམས་སུ་བླངས་པས་སྟེང་རླུང་མནན་པ་རོ་རྐྱང་གཉིས་ཀྱི་ལམ་བརྒྱུད་དེ་ལྟེ་འོག་ཏུ་སླེབས་པ་དང་འོག་རླུང་བསྐུམ་པའི་རྐྱེན་གྱིས་སུམ་མདོའ་རླུང་དང་བཅས་པས་རླུང་གི་དཀྱིལ་འཁོར་གཡོས་པས་མེའི་དཀྱིལ་འཁོར་འབར་ཏེ་མེ་རླུང་གཉིས་པོ་དབུ་མའི་ལམ་བརྒྱུད་སྤྱི་བོའ་ཧཾ་ཡིག་ལ་ནམ་མཁའི་བ་ཞེས་པའི་ཐ་སྙད་བཏགས་པས། བ་ལས་འོ་མ་བཞོ་བ་མཚོན་བྱེད་དུ་བྱས་པ་ཧཾ་ཡིག་ལས་བྱང་སེམས་དངུལ་ཆུའི་རྡོག་པོ་ལྟར་འཛག་པས་སྤྱི་བོའ་རྩ་འཁོར་གང་བས་དགའ་བའི་ཡེ་ཤེས་སྐྱེས། དེ་བཞིན་དུ་མགྲིན་པ་དང་། སྙིང་ག་དང་། ལྟེ་བ་སྟེ་འཁོར་ལོ་བཞིར་བདེ་བའི་ཡེ་ཤེས་བསྐྱེད་པ་ལ་བསླབ་པ་ཐབས་ལམ་སྟེང་སྒོའི་ལམ་མོ། །དེ་ལ་སྤྱི་དང་ཁྱད་པར་གཉིས་ལས། ཁྱད་པར་བ་ནི་ལེའུ་བཅུ་གསུམ་པའི་དངོས་བསྟན་སྒྲ་ཇི་བཞིན་པའོ། །གཉིས་པ་ཐབས་ལམ་འོག་སྒོ་ནི། འོག་སྒོ་མཁའ་གསང་གཉིས་ལ་བརྟེན་ནས་སོགས་ཏེ། དེ་ཡང་། བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་པོ། །ཞེས་པས། བསྙེན་སྒྲུབ་ཡན་ལག་བཞིའི་སྒོ་ནས་སྟོན་པ་སྟེ། མཚན་ཉིད་དང་ལྡན་པའི་ཡུམ་བཙལ་བ། བརྟག་པ་སོགས་བསྙེན་ ― MLP018_Page_0160 ―
[མ་དཔེ་གཟིགས་ན་འདིར་གནོན།]
པའི་ཡན་ལག བརྡ་བཞིས་བསྐུལ་ཏེ་ཕྱག་རྒྱ་བཞིས་འདུ་ཤེས་གསུམ་ལྡན་གྱི་སྒོ་ནས་སྙོམས་པར་འཇུག་པ་ཉེ་བསྙེན། དེ་ལྟར་བྱང་སེམས་སྤྱི་བོ་མགྲིན་པ་སྙིང་ག་ལྟེ་བ་རྣམས་སུ་རིམ་གྱིས་བབས་པས་དགའ་བཞིའི་རིམ་པས་དངོས་པོ་ལྷན་ཅིག་སྐྱེས་པའི་ཡེ་ཤེས་དབབ་བཟུང་གི་སྦྱོར་བས་ཉམས་སུ་མྱོང་བ་ནི་སྒྲུབ་པའི་ཡན་ལག དེ་ནས་བྱང་སེམས་ལྡོག་ཁྱབ་ཀྱི་སྦྱོར་བས་དཀར་དམར་འདྲེས་པ་ཡུམ་གྱི་རྩ་ཁ་ཁ་མུ་ཁའི་རྩེ་ནས་སླར་ཡང་གྱེན་དུ་ལྡོག་སྟེ། ལྟེ་བ་ནས་སྤྱི་བོའ་རྩ་འཁོར་གྱི་བར་དུ་ཁྱབ་པས་ལུས་ཐམས་ཅད་ལ་རྩས་ཁྱབ། རྩ་ཐམས་ཅད་ལ་བྱང་ཆུབ་སེམས་ཀྱིས་ཁྱབ། དེ་ཐམས་ཅད་ལ་བདེ་བའི་ཡེ་ཤེས་ཀྱིས་ཁྱབ་པས་རང་བཞིན་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་བ་ནི་སྒྲུབ་པ་ཆེན་པོའི་ཡན་ལག་སྟེ། སྐད་ཅིག་ལ་བདེ་སྟོང་གི་ཡེ་ཤེས་བཙན་ཐབས་སུ་སྐྱེ་བ་ལས་ལམ་ཆིག་ཆོད་དུ་རྫོགས་པའི་ཐབས་ལམ་ཅིག་ཅར་བ་སྟེ། རྒྱས་པ་ལས། ཕུན་སུམ་ཚོགས་པའི་ལྷུན་གྲུབ་རྣམས། །གསང་དབང་མཆོག་གིས་སྦྱིན་པར་བྱེད། །ཅེས་གསུངས་སོ། །གཉིས་པ་གྲོལ་ལམ་ནི། ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །ཅེས་པས་གཙོ་བོར་ཤེས་རབ་རྣམ་པ་གསུམ་གྱི་སྒོ་ནས་སོགས་ཏེ། ལམ་འདི་ལ་ཐབས་ཀྱི་ཁྱད་པར་ཡོད་མོད་ཀྱང་ཤེས་རབ་གཙོ་བོར་གཏན་ལ་འབེབས་པ་སྟེ། དང་པོ་ཐོས་པའི་ཤེས་རབ་ཀྱིས་གསུང་རབ་ཀྱི་མཐའ་རྒྱ་བཅད་དེ་ཐོས་པ་རྒྱ་མཚོ་བསགས་ནས། བསམ་པའི་ཤེས་རབ་ཀྱིས་ཐོས་དོན་བསམ་པས་བརྟགས་ཏེ། བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་གསུངས་པ་བཞིན་དུ་གཏན་ལ་ཕབ་ནས། སྒོམ་པའི་ཤེས་རབ་ཀྱིས་སེམས་ཉིད་རྣལ་མའི་དོན་ལ་མ་བཅོས་པར་བཞག་པས་རང་རྒྱུད་ཀྱི་འཆིང་བ་རང་སངས་སུ་སོང་ནས་ཆོས་ཉིད་ཀྱི་ཀློང་དུ་གྲོལ་བ་ཞེས་བྱ་གསུངས། དཔེ་རིན་པོ་ཆེ་ཀོ་ཏུ་བྷ་ཞེས་བྱ་བའི་རིན་པོ་ཆེའི་རིགས་ཤིག་ཡོད་པ་དེ་ཁེ་ཉེན་ཆུང་བའི་གྲོལ་ལམ་གྱི་དཔེར་མཚུངས་ཏེ། རིན་པོ་ཆེ་དེ་རྡོ་ཕལ་པ་དང་ལྷན་ཅིག་ཏུ་བཞག་པ་ན། དེ་མ་ཐག་ཏུ་རིན་པོ་ཆེའི་རིགས་སུ་མི་འགྱུར་ལ། ཇི་ཞིག་ན་ ― MLP018_Page_0161 ―
[མ་དཔེ་གཟིགས་ན་འདིར་གནོན།]
དེ་དང་འདྲ་བར་འགྱུར་བས་ན། གྲོལ་ལམ་དེ་ཡང་ཐབས་ལམ་ལྟ་བུའི་མྱུར་ཁྱད་མེད་ཀྱང་། ཇི་ཞིག་ན་འབྲས་བུ་ལ་སྦྱོར་བ་ལ་ཁྱད་པར་མེད་པས་སོ་གསུངས། དབྱེ་ན། ལམ་རིམ་ལས། རིང་བའང་རིམ་དང་ཅིག་ཅར་བའོ། །ཞེས་པས་རིང་བས་ཞེས་པ། གྲོལ་ལམ་འདི་རིང་བའི་ལམ་ཡིན་ཞིང་། དེ་ལའང་རིམ་གྱིས་པ་དང་ཅིག་ཅར་བ་གཉིས་ཡོད་པའི་དོན་ཡིན་གསུངས། དབང་པོ་ཡང་རབ་རྟོགས་གོམས་ཐམས་ཅད་དབྱེར་མེད་ཆིག་ཆོད་དུ་བྱེད་པ་ཞིག་ཡོད་དེ་ཅིག་ཅར་བ་ཞེས་བྱ་སྟེ། དབང་དུས་སུ་གྲོལ་བའི་རྒྱལ་པོ་ཨིནྡྲ་བྷུ་ཏི་ལྟ་བུའོ་གསུངས། རིམ་གྱིས་རྟོགས་གོམས་མཐར་ཕྱིན་པར་བྱེད་པ་ནི་རིམ་གྱིས་པ་སྟེ། དེ་ཅུང་ཟད་བཤད་ན། འདི་ཉིད་ལས། ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་པས་མཚན་ཉིད་གསུམ་སྟེ། དང་པོ་རྒྱུ་ཤེས་པའི་མཚན་ཉིད་ལྟ་བ་ནི། ལམ་རིམ་ལས། གཞི་དང་གཏན་ཚིགས་གྲུབ་པའི་དོན། །ཞེས་པས། གཞལ་བྱ་ཞེན་སྣང་ཉིད་སོགས་ཏེ། དེ་ལ་གཞལ་བྱ་ནི། ལམ་རིམ་ལས། འཁོར་དང་འདས་དངོས་ཞེན་སྣང་བརྟག །ཅེས་དང་། རྣམ་བཀོད་ལས་ཀྱང་། བཏགས་པའི་སྤྱོད་ཡུལ་གཉིས་ལ་གཞལ། །ཞེས་པས་འཁོར་འདས་གཉིས་སུ་ཞེན་པའི་ཞེན་པ་སྒྲོ་བཏགས་དང་བཅས་པ་ནི་གཞལ་བྱ་སྟེ། འོ་ན་འཁོར་འདས་གཉིས་མི་གཞལ་ལམ་ཞེ་ན། མི་གཞལ་ཏེ། འཁོར་བ་ནི་མེད་སྣང་གློ་བུར་བ་ཡིན་པས་གཞལ་རྒྱུ་མ་བྱུང་། མྱ་ངན་ལས་འདས་པ་ནི་བློའི་སྤྱོད་ཡུལ་ལས་འདས་པས་གཞལ་བྱར་མ་གྲུབ་པ་སྟེ། རྣམ་བཀོད་ལས། འདས་པ་སྤྱོད་ཡུལ་མ་ཡིན་ཕྱིར། །གཞལ་བྱའི་ཡུལ་དུ་ཇི་ལྟར་རིགས། །ཞེས་སོ། །གཉིས་པ་འཇལ་བྱེད་ཀྱི་གཏན་ཚིགས་ནི། ལམ་རིམ་ལས། དེ་ཉིད་དངོས་ལྔ་ཚུལ་དང་ཚིག །ཅེས་པས་གསུམ་སྟེ། སྔོན་བྱུང་དངོས་ལྔའི། རྗེས་འཇུག་ཚུལ་ལྔའི། ཚིག་ལྔའི་གཏན་ཚིགས་དང་གསུམ་ལས། དང་པོ་ནི། སྟོན་པ་ཆོས་ཀྱི་སྐུས་འཁོར་ཡེ་ཤེས་རྒྱ་མཚོ་ལ་སྐྱེ་མེད་དོན་གྱི་གསུང་གིས་བརྡ་སྤྲོད་པ་དང་། ལོངས་སྐུས་འཁོར་སྨིན་པ་རྒྱ་མཚོ་ལ་དགོངས་པ་བརྡ་ཡི་གསུང་གིས་བརྡ་སྤྲོད་པ་དང་། སྤྲུལ་སྐུས་འཁོར་མོས་པ་རྒྱ་མཚོ་ལ་བརྗོད་པ་ཚིག་ ― MLP018_Page_0162 ―
[མ་དཔེ་གཟིགས་ན་འདིར་གནོན།]
གི་གསུང་གིས་བརྡ་སྤྲོད་པ་དང་། རྡོ་རྗེའི་སྐུས་དབྱེར་མེད་རྡོ་རྗེའི་འཁོར་ལ་རྡོ་རྗེའི་གསུང་གིས་བརྡ་སྤྲོད་པ་དང་། མངོན་བྱང་གི་སྐུས་འཁོར་རྒྱལ་བ་རྒྱ་མཚོ་ལ་རིག་པ་བྱིན་རླབས་ཀྱི་གསུང་གིས་བརྡ་སྤྲོད་པ་སྟེ། སྔོན་བྱུང་དུ། སྟོན་པ་སྐུ་ལྔས་རང་རང་གི་འཁོར་ལ་གསུང་ལྔའི་སྒོ་ནས་ཆོས་ཉིད་ཀྱི་དོན་དངོས་སུ་གཏན་ལ་ཕབ་པ་ནི་དངོས་ལྔའི་གཏན་ཚིགས་ཏེ། ལམ་རིམ་ལས། ཡང་དག་རྫོགས་སངས་རྒྱས་སྟོན་པ། །སྐུ་ལྔས་འདུས་པའི་འཁོར་རྣམས་ལ། །གསུང་ལྔ་བསྟན་པ་དེ་ཁོ་ན། །གཏན་ལ་འབེབས་ཤིང་འཇལ་བྱེད་པའོ། །ཞེས་གསུངས་སོ། །གཉིས་པ་རྗེས་འཇུག་ཚུལ་ལྔའི་གཏན་ཚིག་ནི། སྐུ་ལྔ་དེ་དག་གི་གསུང་ལྔ་དང་ཚུལ་མཐུན་པའི་བརྡ་དོན་ཏེ། སྐྱེ་མེད་མཚོན་པ་ནམ་མཁའ་ལྟ་བུ་དང་། སྒྲིབ་པ་ངོས་འཛིན་པ་མེ་ལོང་ནང་གི་གཟུགས་བརྙན་ལྟ་བུ་དང་། རང་རིག་མངོན་གསལ་རང་གསལ་ཉི་མའི་འོད་ལྟ་བུ་དང་། དབྱེར་མེད་རྡོ་རྗེའི་གསུང་མཚོན་པ་གྲགས་སྟོང་དབྱེར་མེད་བྲག་ཆ་ལྟ་བུ་དང་། བརྗོད་པ་ཚིག་གི་གསུང་མཚོན་པ་ཀུན་ཡིད་འཇུག་པ་ཚངས་པ་དབྱངས་ཀྱི་སྒྲ་ལྟ་བུ་སྟེ། ལམ་རིམ་ལས། བརྗོད་དང་འདྲ་བར་བརྡ་སྤྲོད་པ། །ངོ་བོ་ཉིད་ཀྱིས་བཤད་པའི་ཕྱིར། །མ་འོངས་དོན་དུ་གཏན་ཚིགས་ངེས། །ཞེས་སོ། །གསུམ་པ་ཚིག་ལྔའི་གཏན་ཚིགས་ནི་སྔར་གྱི་ཚུལ་ལྔ་པོ་དེ་ཚིག་ཏུ་དངོས་སུ་བརྗོད་པ་ནི་ཚིག་ལྔའི་གཏན་ཚིགས་ཏེ། ཚིག་ལྔ་ནི། ཆོས་སྐུའི་ཚིག་ནི་སྐྱེ་མེད་རང་གསལ་དུ་སྟོན་པའི་ཚིག་དང་ཡི་གེ་རྣམས་སོ། །ལོངས་སྐུའི་ལྡེམ་དགོངས་བརྡ་སྟོན་པའི་ཚིག་དང་། སྤྲུལ་སྐུའི་དཀྲི་དྲང་རྒྱུད་པའི་ཚིག་དང་། རྡོ་རྗེའི་སྐུའི་དབྱེར་མེད་རྡོ་རྗེའི་ཚིག་དང་། མངོན་བྱང་གི་དབྱེར་མེད་རང་སྣང་དུ་སྟོན་པའི་ཚིག་དང་ཡི་གེ་རྣམས་སོ། །ཞེས་ཞལ་ལུང་ལས་གསུངས་སོ། །མཆན། ལམ་རིམ་ལས། ངོ་བོ་སྣང་ཚིག་རང་སྣང་ཚིག །ལྡེམ་དགོངས་ཚིག་དང་དཀྲི་དྲང་ཚིག །འདོད་རྐྱེན་ཚིག་དང་རྡོ་རྗེའི་ཚིག །རང་རིག་མངོན་གསལ་ཚིག་གིས་མཚོན། །ཞེས་སོ། །དེ་རྣམས་བསྡུ་ན་དཔྱད་དུ་མེད་པས་གོ་བ་སྐུ་བཞིའི་གཏན་ཚིགས་ཏེ། དབང་རྣོན་རྣམས་བརྟག་དཔྱད་ལ་མ་ལྟོས་པར་དོན་གོ་བའི་ཕྱིར་དང་། དཔྱད་དུ་ཡོད་པས་གོ་བ་ནི་སྤྲུལ་སྐུའི་གཏན་ཚིགས་ཏེ། དབང་རྟུལ་རྣམས་བརྟག་དཔྱད་ལ་བརྟེན་ནས་དོན་གོ་དགོས་པའི་ཕྱིར་ཏེ། ལམ་རིམ་ལས། དེ་ལྟ་མོད་ཀྱང་བསྡུ་ན་གཉིས། །བཞི་ ― MLP018_Page_0163 ―
[མ་དཔེ་གཟིགས་ན་འདིར་གནོན།]
རྗེས་མི་སྤྱོད་གཅིག་རྗེས་སྤྱོད། །ཅེས་སོ། །དེ་ལྟར་དཔྱད་དུ་ཡོད་པ་སྤྲུལ་སྐུའི་གཏན་ཚིགས་ལ་ཚད་མ་བཀའ་གཞུང་གི་གཏན་ཚིགས་དང་། སྒྲ་མཐུན་དོན་སྤགས་ཀྱི་གཏན་ཚིགས་གཉིས་ལས། དང་པོ་ལའང་། རྟོགས་པ་བཞིའི། དག་པ་གསུམ་གྱི། མཉམ་པ་བཞིའི། བདག་ཉིད་ཆེན་པོའི་གཏན་ཚིགས་དང་བཞི་ལས། དང་པོ་ནི། འདི་ཉིད་ལས། རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །ཞེས་པས། རྟོགས་པ་བཞིའི་གཏན་ཚིགས་ཀྱིས་ཆོས་ཐམས་ཅད་བདེན་པ་དབྱེར་མེད་དུ་གཏན་ལ་འབེབས་པར་བྱེད་པ་སྟེ། དེ་ལ་འཁོར་འདས་གཉིས་སུ་སྣང་ཞིང་ཞེན་པའི་གཉིས་འཛིན་གྱི་བློ་དེ་གཉིས་མེད་ཀྱི་ཡེ་ཤེས་སུ་གཏན་ལ་འབེབས་པའི་ཆེད་དུ་གཉིས་འཛིན་གྱི་ཞེན་པ་དེ་གཞལ་བྱར་བྱས་ནས། འཇལ་བྱེད་རྒྱུ་གཅིག་པའི་གཏན་ཚིགས་ཀྱིས་རང་བཞིན་སྐྱེ་མེད་དུ་གཏན་ལ་འབེབས་པའོ། །དེ་བཞིན་དུ། སྔ་མ་སྔ་མས་གཏན་ལ་ཕབ་པའི་གྲུབ་མཐའི་ཞེན་ཆ་དེ་དང་དེ་གཏན་ཚིགས་ཕྱི་མ་ཕྱི་མ་རྣམས་ཀྱི་གཞལ་བྱར་བྱས་ནས། ཡིག་འབྲུའི་ཚུལ་དང་། བྱིན་གྱིས་བརླབས་དང་། མངོན་སུམ་པའི་གཏན་ཚིགས་རྣམས་ཀྱིས་བཅལ་བས་རིམ་པ་ཇི་ལྟ་བར་རང་བཞིན་སྐྱེ་མེད། རོལ་པ་འགག་མེད། ངོ་བོ་དབྱེར་མེད། མཚན་ཉིད་བློ་བྲལ་དུ་གཏན་ལ་ཕེབས་པ་ནི་གྲུབ་མཐའོ། །ཇི་ལྟར་གཞལ་ན། འཁོར་འདས་གཉིས་ཀྱིས་བསྡུས་པའི་ཆོས་སོ་ཅོག་ཆོས་ཅན། སེམས་ཉིད་རང་བྱུང་གི་ཡེ་ཤེས་སྐྱེ་བ་མེད་པའི་དབྱིངས་སུ་རྒྱུ་གཅིག་པ་ཡིན་ཏེ། དེ་ལྟར་རྟོགས་པ་དང་མ་རྟོགས་པ་ལས་འཁོར་འདས་སོ་སོར་སྣང་བ་ཙམ་ལས་གཉིས་སུ་མ་གྲུབ་པའི་ཕྱིར། ཞེས་པས་རྒྱུ་གཅིག་པའི་གཏན་ཚིགས་སོ། །སེམས་ཉིད་སྐྱེ་མེད་ཀྱི་གདངས་ཆོས་ཅན། རོལ་པ་འགག་མེད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བ་ཡིན་ཏེ། མཚོན་དུ་མེད་པའི་ཡི་གེ་ཨ་ཉིད་མཚོན་བྱེད་ཡི་གེ་དུ་མར་སྣང་བས་མཚོན་ནས་རྟོགས་པའི་ཕྱིར་ཞེས་པ་ཡིག་འབྲུའི་ཚུལ་གྱི་གཏན་ཚིགས་སོ། །རང་བཞིན་སྐྱེ་མེད་དང་རོལ་པ་འགགས་མེད་གཉིས་ཆོས་ཅན། ཚིག་ལ་སྔ་ཕྱི་བྱུང་ཡང་དེ་དང་དེ་དབྱེར་མེད་དུ་རྟོགས་པའི་མཐུས། དེ་ཉིད་ངོ་བོ་དབྱེར་མེད་ ― MLP018_Page_0164 ―
[མ་དཔེ་གཟིགས་ན་འདིར་གནོན།]
དུ་རྟོགས་པའི་བྱིན་རླབས་ཤུགས་ལས་འབྱུང་བ་ཡིན་ཏེ། ལྷག་པ་དོན་དམ་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པས། དེའི་སྣང་ལྡོག་སྣོད་བཅུད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བའི་ཕྱིར་ཞེས་པ་བྱིན་གྱིས་བརླབས་པའི་གཏན་ཚིགས་སོ། །བདེན་པ་དབྱེར་མེད་ཆོས་ཅན། བློའི་སྤྱོད་ཡུལ་ལས་འདས་པ་ཡིན་ཏེ། རང་རིག་མངོན་སུམ་གྱི་ཡུལ་མེད་རང་གསལ་དུ་བསམ་བརྗོད་དང་བྲལ་བར་རྟོགས་པའི་ཕྱིར་ཞེས་པ་ལྟ་བུ་མངོན་སུམ་པའི་གཏན་ཚིགས་སོ། །རབ་ཏུ་རྟོགས་པ་རྣམ་བཞི་ཡིས། །ཞེས་པའི་གཏན་ཚིགས་བཞི་པོ་དེས་བཅལ་བས། ཐམས་ཅད་མངོན་རྫོགས་རྒྱལ་པོ་ཆེ། ཞེས་པས་ཆོས་ཐམས་ཅད་རང་རིག་མངོན་སུམ་གྱི་རྫོགས་པར་གཏན་ལ་ཕེབས་པས་དག་པ་རབ་འབྱམས་ཀྱི་སྣང་བ་ལ་དབང་བསྒྱུར་བས་ན་རྒྱལ་པོ་ཆེ་ཞེས་བྱའོ་གསུངས། གཉིས་པ་དག་པ་གསུམ་གྱི་གཏན་ཚིགས་ནི། སྣོད་བཅུད་རྒྱུད་རྣམས་དག་རྟོགས་ཤིང་། །ཞེས་པས་བསྟན། དེ་ཡང་འདི་ལྟར་སྣང་བ་ཕྱི་ནང་གི་ཆོས་རྣམས་ཆོས་ཅན། ཡེ་ནས་སྐུ་དང་ཡེ་ཤེས་ཀྱི་དཀྱིལ་འཁོར་དུ་སངས་རྒྱས་པ་ཡིན་ཏེ། དག་པ་གསུམ་དང་ལྡན་པའི་ཕྱིར་ཏེ། སྣོད་འབྱུང་བ་ལྔ་ཡུམ་ལྔར་རྣམ་པར་དག བཅུད་ཕུང་པོ་ལྔ་ཡབ་ལྔར་རྣམ་པར་དག རྒྱུད་རྣམ་པར་ཤེས་པའི་ཚོགས་བརྒྱད་ཡེ་ཤེས་ལྔར་རྣམ་པར་དག་པའི་ཕྱིར། དེ་ལྟར་ཡང་འདི་ཉིད་ལས། བདག་དང་གཞན་དང་རྟོག་པའི་རྒྱུན། །རྣམ་དག་བླ་མེད་ཐེག་པའི་མཆོག །ཅེས་སོ། །གསུམ་པ་མཉམ་པ་བཞིའི་གཏན་ཚིག་ནི། མཉམ་གཉིས་ལྷག་པའི་མཉམ་གཉིས་ཀྱི། །དཀྱིལ་འཁོར་ཀུན་ཏུ་བཟང་པོའི་ཞིང་། །ཞེས་པས་བསྟན། འདི་ལྟར་སྣང་བའི་ཆོས་རྣམས་ཆོས་ཅན། ཡེ་ནས་ཆོས་ཀྱི་སྐུར་སངས་རྒྱས་པ་ཡིན་ཏེ། མཉམ་པ་བཞི་དང་ལྡན་པའི་ཕྱིར། མཉམ་པ་བཞི་ནི། མི་ལ་མིར་སྣང་བ་ཡང་དག་ཀུན་རྫོབ་དང་། ཐོ་ཡོར་ལ་མིར་སྣང་བ་ལོག་པའི་ཀུན་རྫོབ་གཉིས་ཀ་སྣང་བ་སྒྱུ་མར་མཉམ་པ་དང་། སྤྲོས་པ་ཕྱོགས་རེ་ཙམ་ཆོད་པ་མྱུ་གུ་བདག་ལས་སྐྱེ་བ་མེད་པར་རྟོགས་པ་ལྟ་བུ་རྣམ་གྲངས་པའི་དོན་དམ་བདེན་པ་དང་། སྤྲོས་པ་མཐའ་དག་ཆོད་པ་མྱུ་གུ་བདག་ལས་ཀྱང་མི་སྐྱེ། གཞན་ལས་ཀྱང་མི་སྐྱེ་བར་མཐའ་བཞིའི་སྤྲོས་པ་ཆོད་པ་ལྟ་བུ་རྣམ་གྲངས་མ་ ― MLP018_Page_0165 ―
[མ་དཔེ་གཟིགས་ན་འདིར་གནོན།]
ཡིན་པའི་དོན་དམ་གཉིས་ཀ་སྐྱེ་མེད་དུ་མཉམ་པ་གཉིས་ནི། ཐུན་མོང་གི་མཉམ་པ་གཉིས་སོ། །ལྷག་པའི་མཉམ་པ་གཉིས་ནི། དབུ་མ་བདེན་གཉིས་ལས། སྣང་དུ་འདྲ་ཡང་དོན་བྱེད་དག །ནུས་པའི་ཕྱིར་དང་མི་ནུས་པའི། །ཡང་དག་ཡང་དག་མ་ཡིན་པའི། །ཀུན་རྫོབ་ཀྱི་ནི་དབྱེ་བ་བྱས། །ཞེས་པས། སྣང་ལ་དོན་བྱེད་ནུས་པ་ཡང་དག་ཀུན་རྫོབ་དང་། སྣང་ལ་དོན་བྱེད་མི་ནུས་པ་ལོག་པའི་ཀུན་རྫོབ་གཉིས་ཀ་མ་དག་པ་ལས་སྣང་ལོག་པའི་ཀུན་རྫོབ་ཡིན་པས་གཉིས་ཀ་སྐུ་དང་ཡེ་ཤེས་ཀྱི་དཀྱིལ་འཁོར་དུ་མཉམ་པ་དང་། ཆོས་ཐམས་ཅད་རང་རང་གི་ངོ་བོས་སྟོང་པའི་མེད་དགག་གི་སྟོང་ཉིད་དེ་རྣམ་གྲངས་པའི་དོན་དམ་པ་དང་། སེམས་ཉིད་ཅི་ཡང་མ་ཡིན་པའི་དབྱིངས་ཡེ་ཟུང་དུ་འཇུག་པ་མ་ཡིན་དགག་གི་སྟོང་ཉིད་དེ་རྣམ་གྲངས་མ་ཡིན་པའི་དོན་དམ་བདེན་པ་གཉིས་ཀ་དོན་དམ་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པ་མཉམ་པ་ལྷག་པའི་མཉམ་པ་གཉིས་ཏེ། མཉམ་པ་བཞིའི་གཏན་ཚིགས་སོ། །བཞི་པ་བདག་ཉིད་ཆེན་པོའི་གཏན་ཚིགས་ནི། རང་བྱུང་ཡེ་ཤེས་གནས་མེད་སྣང་། །ཞེས་པས་བསྟན་ཏེ། དེ་ཡང་འཁོར་འདས་གཉིས་ཀྱི་ཆོས་ཐམས་ཅད་ཆོས་ཅན། སྣང་ལུགས་ནས་དུ་མར་སྣང་ཡང་ཡིན་ལུགས་ནས་གཞལ་ན་དེ་ལྟར་མ་ཡིན་ཏེ། སེམས་ཉིད་སྐྱེ་མེད་རང་བྱུང་གི་ཡེ་ཤེས་ཆེན་པོ་གཅིག་གི་བདག་ཉིད་དུ་ཡེ་ནས་གནས་པའི་ཕྱིར་ཏེ། རྣམ་བཀོད་ལས། སྣང་བ་འདི་ཀུན་རང་རང་གི །རང་བཞིན་མེད་པའི་རྣམ་ཤེས་ཉིད། །རང་བྱུང་ཡེ་ཤེས་གནས་མེད་སྣང་། །ཞེས་སོ། །གཉིས་པ་སྒྲ་མཐུན་དོན་སྤགས་ཀྱི་གཏན་ཚིགས་ནི། ཐུན་མོང་གི་ཐེག་པར་དུག་ལྔ་སྤོང་སྦྱོང་བྱེད་པ་དེ་ཐེག་པ་འདིར་རང་བཞིན་མ་གྲུབ་པར་ལྟ་བས་དོན་སྤགས་པ་སྟེ། དེ་གཏན་ཚིགས་ཀྱིས་བསྒྲུབ་ན། དུག་ལྔ་ཆོས་ཅན། ཡང་དག་པར་མ་གྲུབ་སྟེ། རང་རང་གི་ངོ་བོས་སྟོང་པའི་ཕྱིར། ཞེས་པ་ལྟ་བུའོ་གསུངས། དེ་ལྟར་འཇལ་བྱེད་གཏན་ཚིག་རྣམས་ཀྱིས་གཏན་ལ་ཕབ་པས་རང་བཞིན་རྒྱུ་རྒྱུད་གནས་ལུགས་ཀྱི་དོན་མངོན་སུམ་སྐྱེ་བ་ནི་གྲུབ་མཐའ་སྟེ། ལམ་རིམ་ལས། རྒྱ་མཚོ་དྭངས་པའི་གཟུགས་བརྙན་ལྟར། །སྒྲ་བརྟེན་ཡིད་ལ་བྱེད་མིན་པར། །རང་རིག་མངོན་སུམ་དམིགས་བྲལ་བ། །རང་གསལ་གསུམ་བྲལ་ ― MLP018_Page_0166 ―
[མ་དཔེ་གཟིགས་ན་འདིར་གནོན།]
མི་བསྒུལ་བར། །ངེས་པར་གདེངས་སུ་གང་བྱས་པ། །ཐོས་བསམ་བརྟེན་པའི་ལྟ་མཐར་ཕྱིན། །ཞེས་དང་། རྔམ་གློག་ལས། མངོན་སུམ་རིགས་པས་ཐག་ཆོད་ན། །རྣལ་འབྱོར་ས་ལ་སླེབས་པ་ཡིན། །ཞེས་གསུངས་སོ། །གང་དག་སྔགས་ཀྱི་གྲུབ་མཐའི་ནི་སོགས་གོ་སླའོ། །གཉིས་པ་རྐྱེན་འཇུག་པའི་མཚན་ཉིད་ཏིང་ངེ་འཛིན། དེ་ལ་མོས་སྒོམ་དང་ངེས་རྫོགས་གཉིས་ལས། མོས་སྒོམ་ནི། དོན་སྤྱིའི་རྣམ་པ་མོས་པ་ལམ་དུ་བྱེད་པ་ཡིན་ཅིང་། ངེས་རྫོགས་ནི། ལམ་སོ་སོའ་ཏིང་ངེ་འཛིན་ཉམས་ལྔ་མཐར་ཕྱིན་པར་བསླབ་པ་སྟེ། དེ་ལ་ཉམས་ལྔ་ནི། བི་མ་ལ་ཡི་ཕྱག་རྒྱ་བསམ་གཏན་གྱི་འགྲེལ་པར། གཡོ་ཐོབ་གོམས་བརྟན་མཐར་ཕྱིན་ལྔ། །བསམ་གཏན་ཉམས་ཀྱི་སྐྱེ་ཚུལ་ཡིན། །ཞེས་པས། དེ་ལ་དང་པོ་གཡོ་བའི་ཉམས་ནི། གནས་པ་དང་པོ་རི་གཟར་གྱི་འབབ་ཆུ་ལྟར་སེམས་སྐད་ཅིག་ཀྱང་མི་གནས་པར་རྣམ་རྟོག་སྔར་བས་མང་དུ་སོང་བ་ལྟ་བུ་སྟེ། དེ་ཡང་མང་དུ་སོང་བ་མ་ཡིན་ཏེ། སྔར་རྣམ་རྟོག་ལ་རྩིས་གདབ་མ་བྱས་པས་མ་ཚོར་བ་ཡིན། ད་དེ་ངོས་ཟིན་པས་ཅུང་ཟད་སེམས་ཟིན་པའི་འབྲས་བུའོ་གསུངས། གཉིས་པ་ཐོབ་པའི་ཉམས་ནི། དེ་ལ་སྐྱོན་ཡོན་དུ་མ་བལྟས་པར་རྒྱུན་མཐུད་དེ་བསྒོམས་པས། དཔེ་རོང་ཁུང་དོག་པོའི་འབབ་ཆུ་ལྟ་བུ་སྟེ། རྣམ་རྟོག་འཕྲོ་མུ་ནས་ཡུད་ཙམ་རེ་རྟོག་མེད་དུ་ཞི་མེ་རེ་གནས་པ་ཞིག་འབྱུང་སྟེ། ཐོབ་པའི་ཉམས་སམ་རྣམ་རྟོག་ངལ་གསོས་པའི་ཉམས་ཞེས་བྱའོ། །གསུམ་པ་གོམས་པའི་ཉམས་ནི། དེའི་རྒྱུན་མཐུད་དེ་བསྒོམས་པས། དཔེ་གཡོ་འགུལ་མང་པོ་བྱེད་མི་ནུས་པ་རྒན་པོའི་སྤྱོད་པ་ལྟ་བུའམ། འདབ་ཆགས་རྙིས་བཟུང་བ་ལྟར་ཕལ་ཆེར་རྟོག་མེད་དུ་གནས་པ་ལས་རེས་འགའ་རྟོག་པ་བན་བུན་ཙམ་རེ་འབྱུང་སྟེ། གོམས་པའི་ཉམས་སམ་རྣམ་རྟོག་ཐང་ཆད་པའི་ཉམས་ཞེས་བྱ་གསུངས། བཞི་པ་བརྟན་པའི་ཉམས་ནི། དེ་ནས་ཀྱང་ཡུན་བསྲིངས་ཏེ་བསྒོམས་པས། དཔེ་མཚོ་ཆུང་སེར་བུས་བསྐྱོད་པ་ལྟར། ཕལ་ཆེར་རྟོག་མེད་རྒྱ་འ བྱམས་སུ་ཉལ་ལེ་གསལ་སིང་ངེར་གནས་པ་ལས་རྐྱེན་དྲག་པོས་ཅུང་ཟད་གཡོ་བ་སྟེ། བརྟན་པའི་ཉམས་སམ་རྣམ་རྟོག་གི་ཅུང་ཟད་བསྐྱོད་དུ་ཡོད་པའི་ཉམས་ཞེས་བྱའོ་གསུངས། ལྔ་པ་མཐར་ཕྱིན་པའི་ཉམས་ནི། ད་དུང་འབད་དེ་བསྒོམས་པས། དཔེ་ ― MLP018_Page_0167 ―
[མ་དཔེ་གཟིགས་ན་འདིར་གནོན།]
རྒྱ་མཚོ་རླབས་དང་བྲལ་བའམ་རི་བོ་ཆེན་པོ་ལྟར་གནས་པ་ལ་རྐྱེན་གང་གིས་ཀྱང་གནོད་མི་ནུས་པ་མ་ཟད་སླར་ལ་བོགས་འབྱིན་ཞིང་། བཏང་འགྲོ་བཞག་སྡོད་རང་དབང་དུ་འབྱོར་བས་མཐར་ཕྱིན་པའི་ཉམས་སམ་རང་དབང་འབྱོར་པའི་ཉམས་ཞེས་བྱའོ་གསུངས། ངེས་རྫོགས་ཀྱི་ལམ་འདི་ཅུང་ཟད་བཤད་ན། ལམ་རིམ་ལས། སྲིད་པ་རིམ་པར་སྨིན་ཚུལ་གྱི། །འཇུག་པའི་ཡན་ལག་ལྔ་རུ་བཞག །གང་དག་དངོས་ཀུན་རང་རིག་ཕྱིར། །ཤི་བ་དོན་དམ་བདེན་པ་སྟེ། །སྐྱེ་བ་བར་མ་ཀུན་རྫོབ་ཡིན། །སྐྱེས་པའི་རིམ་གསུམ་གཉིས་མེད་དོན། །ཞེས་པས་སྐྱེ་འཆི་བར་དོ་གསུམ་ཕྲུགས་གཅིག་སྦྱོང་བའི་ལམ་རྫོགས་པར་སྟོན་པ་སྟེ། འཆི་བ་འོད་གསལ་དང་རྗེས་སུ་མཐུན་པའི་ལམ་སྟོང་པ་ཆེན་པོ། དེ་བཞིན་དུ་བར་དོ་དང་སྙིང་རྗེ་སྒྱུ་མ། སྐྱེས་པའི་རིམ་པ་གསུམ་པོ་དང་ཕྱག་རྒྱ་གཅིག་པ། ཕྱག་རྒྱ་སྤྲོས་བཅས། ཚོམ་བུ་ཚོགས་སྒྲུབ་སྟེ་ལྔ་ལས། དེ་ཉིད་རགས་པ་བསྐྱེད་རིམ་གྱིས་སྦྱོང་བ་དང་། ཕྲ་བ་རྫོགས་རིམ་གྱིས་སྦྱོང་ཚུལ་གཉིས་ལས། དང་པོ་བསྐྱེད་རིམ་གྱིས་སྦྱོང་ཚུལ་ནི། འཆི་བའི་འོད་གསལ་དང་རྗེས་སུ་མཐུན་པའི་ལམ་སྟོང་པ་ཆེན་པོ་སྟེ། དེ་ཡང་ལུས་ཅན་རྣམས་འཆི་བའི་ཚེ། ཕྱི་ནང་གི་ཐིམ་རིམ་རྣམས་རྫོགས་པའི་མཐར་འཆི་སྲིད་ཆོས་སྐུའི་འོད་གསལ་འཆར་ཏེ། ཇི་སྐད་དུ། སྣང་བ་ཐིམ་དང་རྟོག་པ་ཐིམ། །ཕྲ་བ་ཐིམ་དང་རགས་པ་ཐིམ། །ཐིམ་པའི་རྗེས་ལ་གོམས་པ་ཡིས། །རང་བཞིན་གྱི་ནི་འོད་གསལ་འཆར། །ཞེས་གསུངས་པ་ལྟར། འདི་ལྟར་ཕྲ་རགས་ཀྱི་ཐིམ་ལུགས་རྒྱས་པའི་ཕྱོགས་ནས་འཆད་པའི་དབང་དུ་བྱས་ན། ཐོག་མར་རགས་པའི་རིམ་པ་རང་བཞིན་ཉིད་དུ་ཐིམ་པར་འགྱུར་ཏེ། རྣམ་སྣང་གི་རིགས་གཟུགས་ཀྱི་ཕུང་པོ་འོད་གསལ་དུ་འཇུག་པའི་རྟགས་སུ། ཡན་ལག་ཐམས་ཅད་ཕྲ་བ་དང་། ལུས་ཀྱི་ཉམས་ཞན་ཅིང་ནུས་པ་མེད་པར་འགྱུར། མེ་ལོང་ལྟ་བུའི་ཡེ་ཤེས་ཐིམ་པས་སེམས་མི་གསལ་ཞིང་རབ་རིབ་ཏུ་འགྱུར། སའི་ཁམས་ཐིམ་པས་ལུས་ཐམས་ཅད་སྐམ་པར་འགྱུར། མིག་གི་དབང་པོ་ཐིམ་པས་མིག་མི་འགྱུར་ཞིང་ཟླུམ་པར་འགྱུར། ཡུལ་གྱི་གཟུགས་ཐིམ་པས་ལུས་ཀྱི་མདངས་མེད་ཅིང་ཉམས་པར་འགྱུར་ཏེ། དེ་ལྟར་རྣམ་སྣང་གི་རིགས་རྣམས་དོན་དམ་པར་འཇུག་པའོ། ། ― MLP018_Page_0168 ―
[མ་དཔེ་གཟིགས་ན་འདིར་གནོན།]
དེ་ནས་རིན་འབྱུང་གི་རིགས་ཚོར་བའི་ཕུང་པོ་ཐིམ་པས་ཚོར་བ་ཉམས་སུ་མི་མྱོང་། མཉམ་ཉིད་ཡེ་ཤེས་ཐིམ་པས་ཚོར་བ་གསུམ་དྲན་པར་མི་འགྱུར། ཆུའི་ཁམས་ཐིམ་པས་རང་ལུས་ཀྱི་ཁ་ཆུ་དག་རྡུལ་གཅིན་དང་ཁུ་ཁྲག་སོགས་སྐམ་པར་འགྱུར། རྣ་བའི་དབང་པོ་ཐིམ་པར་ཕྱི་ནང་གི་སྒྲ་མི་ཐོས། ཡུལ་གྱི་སྒྲ་ཐིམ་པས་རང་ལུས་ཀྱི་སྒྲ་མི་ཐོས་སོ། །དེ་ནས་པདྨའི་རིགས་འདུ་ཤེས་ཀྱིས་ཕུང་པོ་ཐིམ་པས་རྐང་གཉིས་ལ་སོགས་པའི་སེམས་ཅན་རྣམས་མི་དྲན། སོ་སོར་རྟོག་པའི་ཡེ་ཤེས་ཐིམ་པས་ཕ་མ་བུ་སྲིང་ལ་སོགས་པའི་མིང་མི་དྲན། མེའི་ཁམས་ཐིམ་པས་ཟས་མི་འཇུ། སྣའི་དབང་པོ་ཐིམ་པས་སྟེང་རླུང་དལ་གྱིས་འགྲོ། ཡུལ་གྱི་དྲི་ཐིམ་པས་རང་གི་ལུས་ལ་དྲི་མི་བྲོ་བའོ། །དེ་ནས་ལས་ཀྱི་རིགས་འདུ་བྱེད་ཀྱི་ཕུང་པོ་ཐིམ་པས་ལུས་ཀྱི་བྱ་བ་ཐམས་ཅད་ལ་འཇུག་པར་མི་འགྱུར། བྱ་བ་གྲུབ་པའི་ཡེ་ཤེས་ཐིམ་པས་འཇིག་རྟེན་གྱི་བྱ་བ་དང་དགོས་པ་མི་དྲན། རླུང་གི་ཁམས་ཐིམ་པས་རླུང་བཅུ་རང་གི་གནས་ནས་འཕོ། ལྕེའི་དབང་པོ་ཐིམ་པས་ལྕེ་སྦོམ་ཞིང་ཐུང་ལ་རྩ་བ་སྔོན་པོར་འགྲོ། ཡུལ་གྱི་རོ་ཐིམ་པས་རོ་དྲུག་ཉམས་སུ་མི་མྱོང་སྟེ་དེ་ལྟར་རགས་པའི་རང་བཞིན་ཉི་ཤུ་ཐིམ་ནས། ཕྲ་བ་ནང་གི་འབྱུང་བཞིའི་ཐིམ་ལུགས་ནི། ཡེ་ཤེས་རོལ་པ་ཆེན་པོ་ལས། དང་པོ་ས་ནི་ཆུ་ལ་ཐིམ། །ཆུ་ཡང་མེ་ལ་ཐིམ་གྱུར་ནས། །མེ་ནི་རླུང་ལ་ཐིམ་པར་འགྱུར། །རླུང་ནི་རྣམ་པར་ཤེས་ལ་ཐིམ། །རྣམ་ཤེས་འབྱུང་བ་འདི་ཉིད་ནི། །འོད་གསལ་རབ་ཡང་འཇིག་པར་འགྱུར། །ཞེས་གསུངས་པ་ལྟར། ས་ཆུ་ལ་ཐིམ་པ་ཞེས་བྱ་བ་ནི། ལུས་ཀྱི་སའི་གནས་སུ་ས་མེད་པར་གྱུར་པའམ། གནས་འཕོས་ནས་ཆུའི་ནང་དུ་ས་འཇུག་པའི་དོན་ཡང་མ་ཡིན་གྱི། དབུ་མའི་ཡེ་ཤེས་ཀྱི་རླུང་སྟོབས་སུ་གྱུར་པས་སའི་ལས་རླུང་བཅོམ་སྟེ། རྟེན་ཐིམ་པ་ན་བརྟེན་པ་ངེས་པར་ཐིམ་པས་སྲ་བར་སྣང་བའི་རྣམ་ཤེས་ཀྱང་རང་གི་བག་ཆགས་དབུ་མ་ལ་བཞག་ནས་འགགས་ཏེ། རུས་པ་ལ་སོགས་པ་སྲ་བ་ཤས་ཆེ་བའི་ཁམས་རྟེན་རླུང་དང་རྣམ་ཤེས་བྲལ་བར་བྱས་ཏེ་སའི་དྭངས་མ་དེ་ཉིད་ཆུའི་དྭངས་མ་ལ་ཐིམ་པར་གྱུར་པས་ལུས་སྒུལ་སྐྱོད་མི་ནུས་ཤིང་ཟུངས་མི་ཐུབ། ལུས་ས་ལ་བྱིང་སྙམ་བྱེད། ནང་རྟགས་སུ་མིག་སྒྱུ་ལྟ་བུ་སྔོ་མེར་མེར་བ་དང་སྔོ་ཧྲིབ་ཧྲིབ་པ་དང་། ― MLP018_Page_0169 ―
[མ་དཔེ་གཟིགས་ན་འདིར་གནོན།]
ཆར་ཟིམ་དང་ཆུ་གཡོ་བའི་རྣམ་པ་ལྟ་བུ་འབྱུང་། དེ་བཞིན་དུ་དབུ་མའི་ཡེ་ཤེས་ཀྱི་རླུང་སྟོབས་སུ་གྱུར་པས་ཆུའི་ལས་རླུང་བཅོམ་སྟེ། གཤེར་བ་སྣང་བའི་རྣམ་ཤེས་ཀྱང་རང་གི་བག་ཆགས་དབུ་མ་ལ་བཞག་ནས་འགགས་ཏེ། ཁྲག་དང་ཆུ་སེར་སོགས་གཤེར་བ་ཤས་ཆེ་བའི་ཁམས་རྣམས་རྟེན་རླུང་དང་རྣམ་ཤེས་བྲལ་བས་ཆུའི་དྭངས་མ་དེ་ཉིད་མེའི་དྭངས་མ་ལ་ཐིམ་པས་ཁ་སྣ་བསྐམས་ཤིང་ལྕེ་རྐན་ཕུགས་སུ་འགྲོ། ནང་རྟགས་སུ་དུ་བ་འཕྱུར་བ་དང་དུ་ཐང་ཆགས་པ་ལྟ་བུ་འབྱུང་། དབུ་མའི་ཡེ་ཤེས་ཀྱི་རླུང་གིས་མེའི་ལས་རླུང་བཅོམ་སྟེ། ཚ་བར་སྣང་བའི་རྣམ་ཤེས་ཀྱང་རང་གི་བག་ཆགས་དབུ་མ་ལ་བཞག་ནས་འགགས་ཏེ། དྲོད་སོགས་ཚ་བ་ཤས་ཆེ་བའི་ཁམས་རྣམས་རྟེན་རླུང་དང་རྣམ་ཤེས་བྲལ་བས། མེའི་དྭངས་མ་དེ་ཉིད་རླུང་གི་དྭངས་མ་ལ་ཐིམ་པས་ལུས་ཀྱི་དྲོད་མཐའ་ནས་སྡུད་ཅིང་ཕོ་བའི་མེ་དྲོད་ཉམས། ནང་རྟགས་སུ་སྲིན་བུ་མེ་ཁྱེར་ལྟ་བུར་དམར་ཙིག་ཙིག་དང་དམར་ཕྲོམ་ཕྲོམ་འབྱུང་། རླུང་རྣམ་ཤེས་ལ་ཐིམ་པའི་དོན་ཡང་ལུས་ཀྱི་རླུང་གི་གནས་སུ་རླུང་མེད་པར་གྱུར་པའམ། སྡོད་ས་འཕོས་ནས་རླུང་ཉིད་རྣམ་ཤེས་ཀྱི་ནང་དུ་འཇུག་པའི་དོན་ཡང་མ་ཡིན། རྣམ་ཤེས་ལ་རླུང་དྭངས་མའི་བག་ཆགས་བཞག་སྟེ་རླུང་འགགས་པའི་དོན་ཡང་མ་ཡིན་གྱི། རླུང་གི་དྭངས་མས་སྲོག་རྩ་ར གས་པའི་བར་གྱི་ལུས་ཐམས་ཅད་དོར་ནས་སྲོག་རྩའི་ནང་གི་འོད་ལྔའི་སྦུ་གུ་ཅན་གྱི་རྩ་ལྔ་ལ་ཞུགས་ནས་ཡིད་ཀྱི་སྣང་བ་དང་རོ་གཅིག་ཏུ་གྱུར་པས། དབུགས་ཕྱིར་རིང་དུ་རྒྱུ་ཞིང་ནང་དུ་སྡུད་མི་ཤེས་པས་རགས་པའི་རྒྱུ་བ་ཆད། ནང་རྟགས་སུ་དབུ་མར་མེ་འབར་བའི་རྣམ་པ་དང་། སྒྲོན་མེའི་ཕྲེང་བ་སྒྲིག་པ་ལྟ་བུ་འབྱུང་། རྣམ་ཤེས་ནམ་མཁའ་ལ་ཐིམ་པ་ནི། རྣམ་ཤེས་དངོས་མེད་དུ་གྱུར་པ་མ་ཡིན་གྱི། ནམ་མཁའ་ལྟར་དྭངས་ཤིང་ཐོགས་པ་མེད་པ་ལ་མཚོན་པར་དཀའ་བའི་དབུ་མ་ལ་ཐིམ་པ་སྟེ། དེ་ཡང་གསང་འདུས་འཕགས་སྐོར་གྱི་གཞུང་རྣམས་སུ། ནམ་མཁའི་ཁམས་ཐིམ་ཚུལ་གྱི་ཐ་སྙད་གསལ་བར་མ་གསུངས་པ་ནི། ཁམས་ཕྲ་བ་དེ་རླུང་གི་ནང་དུ་སྦས་ནས་བཤད་པ་ཡིན་པས་ན་ནམ་མཁའི་ཁམས་ཐིམ་པ་ལོགས་སུ་མི་བྱེད་པར་རྣམ་ཤེས་ཐིམ་རིམ་གྱི་སྐབས་སུ་ནམ་མཁའ་སྤྲིན་མེད་ཀྱི་རྟགས་སྣང་འཆར་གཞིར་བཞག་ ― MLP018_Page_0170 ―
[མ་དཔེ་གཟིགས་ན་འདིར་གནོན།]
པ་ལ་དཀར་དམར་ནག་གསུམ་སྣང་བ་འཆར་བར་བཞེད་དོ། །རྟོག་པ་ཐིམ་པ་ནི་རླུང་ནམ་མཁའ་ལ་ཐིམ་པ་ཡན་ཆད་དུ། རང་བཞིན་བརྒྱད་ཅུའི་སྣང་བ་འདུ་བྱེད་ཀྱི་བྱ་བ་བྱེད་ནུས་པ་རྣམ་ཤེས་རླུང་དང་བཅས་པ་ཐིམ་པ་ཡིན་ལ། ལས་མི་བྱེད་པའི་རྟོག་པ་ཕྲ་མོ་རྣམས་ནི་སྣང་གསུམ་ཉིད་ལ་འདྲེས་ཏེ་གནས་པས། སྐབས་དེ་དང་དེར་ཐིམ་པར་འགྱུར་བ་ཡིན་ནོ། །དེས་ན་སྣང་བ་ཐིམ་པ་ཞེས་པ་ནམ་མཁའ་འོད་གསལ་ལ་ཐིམ་པའི་སྐབས་འདིར། སེམས་ཉིད་སྟོང་པའི་ཆ་ལས་ཆོས་སྐུའི་འོད་གསལ་རྣམ་པ་བཞི་འཆར་ཏེ། སྤྱིར་སྣང་བ་གསུམ་ལ། དོན་དམ་དེ་ཁོ་ན་ཉིད་ཀྱི་སྣང་བ་དང་། ཀུན་རྫོབ་རྟེན་འབྲེལ་གྱི་སྣང་བ་གཉིས་ལས། དོན་དམ་དེ་ཁོ་ན་ཉིད་ཀྱི་སྣང་བ་ནི། རྩ་བ་ཆོས་ཀྱི་དབྱིངས་རང་སེམས་བདེ་ཆེན་རྟག་པ་འགྱུར་མེད་དོན་དམ་རང་རིག་ཆེན་པོ་དེ་ཡིན་ལ། ངོ་བོ་བདེ་ཆེན་དེ་ཉིད་རང་གི་སྣང་ཆའམ་རང་གཟུགས་འཆར་ཚུལ་རྡོ་རྗེ་གསུམ་གྱི་གསང་བ་བསམ་གྱིས་མི་ཁྱབ་པ་སྟེ། སྐུའི་གསང་བ་སྣང་བ། གསུང་གི་གསང་བ་མཆེད་པ། ཐུགས་ཀྱི་གསང་བ་ཐོབ་པ། སྔར་བཤད་ཀྱི་ཀུན་ཁྱབ་བདེ་བ་ཆེན་པོ་དེ་ཉིད་ནི་ཐམས་ཅད་སྟོང་པ་འོད་གསལ་བ་ཡིན་ནོ། །ཀུན་རྫོབ་རྟེན་འབྲེལ་གྱི་སྣང་བ་ལ། རང་བཞིན་དང་བཅས་པ་དང་། རང་བཞིན་དང་བྲལ་བའི་སྣང་བ་གཉིས་ཀྱི། འདིར་རང་བཞིན་དང་བཅས་པ་ལའང་། གཞི་དུས་དང་ལམ་དུས་གཉིས་ལས། འདིར་གཞི་དུས་ཏེ། དེ་ལའང་རྒྱུན་ཆགས་པ་དང་། ཁྱད་པར་གྱི་དུས་སུ་འབྱུང་བ་གཉིས་ལས། ཕྱི་མ་ལའང་ཆེས་རགས་ཤིང་གསལ་བར་འབྱུང་བ་འཆི་བའི་དུས་དང་། འབྲིང་དུ་འབྱུང་བ་གཉིད་དང་འཁྲིག་པའི་དུས་དང་། ཕྲ་ཞིང་མི་གསལ་བར་འབྱུང་བ་ཚོར་དྲུག་གི་སྣང་བ་རགས་པ་ཤར་བའི་དུས་ཏེ། དེ་ལས་འདིར་འཆི་བའི་དུས་ཀྱི་སྔ་རོལ་དུ་ཕྲ་རགས་ཉེར་ལྔ་ཡོངས་སུ་རྫོགས་པར་ཐིམ་རྗེས། དང་པོའི་སངས་རྒྱས་ལས། ལུས་ཅན་རྣམས་ནི་འཆི་བ་ན། །ཟླ་བ་བདུད་རྩི་ཐུར་དུ་འགྲོ། །སྟེང་དུ་ཉི་རྡུལ་སྒྲ་གཅན་དེ། །རྣམ་ཤེས་སྲིད་པའི་མཚན་ཉིད་སྦྱོར། །ཞེས་གསུངས་པ་ལྟར། ནམ་མཁའ་འོད་གསལ་ལ་འཇུག་དུས་རོ་རྐྱང་གི་དྭངས་མ་ཐམས་ཅད་དབུ་མའི་ཡས་མར་གྱི་ཨ་ཧྃ་ལ་འདུས། དེ་ཉིད་སྙིང་གའི་ཡེ་ཤེས་ ― MLP018_Page_0171 ―
[མ་དཔེ་གཟིགས་ན་འདིར་གནོན།]
འོད་གསལ་གྱི་དྭངས་མ་ཆེན་པོའི་ནང་དུ་ཐིམ་པས་ཕྲ་རགས་ཀྱི་རྟོག་པ་ཐམས་ཅད་འགགས་ནས་འོད་གསལ་རྣམ་པ་བཞིའི་ཡེ་ཤེས་འཆར་ཏེ། དེ་ཡང་དབུ་མའི་ཡས་སྣའི་ཁམས་དཀར་ཆའི་དྭངས་མ་ཐུར་དུ་བབས་ནས་སྙིང་གར་སོན་པ་ན། སེམས་སྣང་དང་པོའི་དུས་སུ་ཤེས་རབ་ཀྱི་རང་བཞིན་སུམ་ཅུ་རྩ་གསུམ་འགགས་ཏེ། འཕགས་པ་ལྷས་མཛད་པའི་སྤྱོད་བསྡུས་ལས། འདོད་ཆགས་དང་བྲལ་བ་དང་། འདོད་ཆགས་དང་བྲལ་བ་བར་མ་དང་། ཤིན་ཏུ་འདོད་ཆགས་དང་བྲལ་བ་དང་། གང་ཡིད་ཀྱི་འགྲོ་བ་དང་འོང་བ་དང་། མྱ་ངན་དང་། མྱ་ངན་བར་མ་དང་། ཤིན་ཏུ་མྱ་ངན་དུ་གྱུར་པ་དང་། ཞི་བ་དང་རྣམ་པར་རྟོག་པ་དང་། འཇིགས་པ་དང་། འཇིགས་པ་བར་མ་དང་། ཤིན་ཏུ་འཇིགས་པ་དང་། སྲེད་པ་དང་། སྲེད་པ་བར་མ་དང་། ཤིན་ཏུ་སྲེད་པ་དང་། ཉེ་བར་ལེན་པ་དང་། མི་དགེ་བ་དང་། བཀྲེས་པ་དང་། སྐོམ་པ་དང་། ཚོར་བ་དང་། ཚོར་བ་བར་མ་དང་། ཤིན་ཏུ་ཚོར་བ་དང་། རིག་པ་པོ་དང་། རིག་པ་དང་། འཛིན་པའི་གཞི་དང་། སོ་སོར་རྟོག་པ་དང་། ངོ་ཚ་ཤེས་པ་དང་། སྙིང་རྗེ་དང་། བརྩེ་བ་དང་། བརྩེ་བ་བར་མ་དང་། ཤིན་ཏུ་བརྩེ་བ་དང་། དོགས་པ་དང་བཅས་པ་དང་། སྡུད་པ་དང་། ཕྲག་དོག་སྟེ་མཚན་ཉིད་སུམ་ཅུ་རྩ་གསུམ་མོ། །ཞེས་གསུངས། དེའི་ཚེ་ན་ནང་གི་ཁམས་དཀར་པོ་དང་འབྲེལ་བའི་དབང་གིས། ཕྱི་རྟགས་སུ་སྣང་བ་ཐམས་ཅད་སྤྲིན་བྲལ་གྱི་ནམ་མཁའ་གཡའ་དག་པ་ལ་ཟླ་འོད་ཀྱིས་ཁྱབ་པ་ལྟར་དཀར་ལམ་པ་འབྱུང་། གཟུང་བའི་རྣམ་པར་རྟོག་པ་རགས་པ་སྟོང་པས་སྟོང་པའི་འོད་གསལ་དང་། ཤེས་པའི་རང་གདངས་གསལ་བར་སྣང་བས་སྣང་བའི་འོད་གསལ་ཞེས་བྱ་བ་སྐད་ཅིག་མ་དང་པོ་སྟེ། གཉིས་མེད་རྣམ་རྒྱལ་ལས། སྣང་བ་ཞེས་བྱ་རྣམ་པར་མི་རྟོག་ལ། །གསལ་བའི་ཆ་དེ་གཟུང་རྟོག་སྤངས་པ་ལས། །འབྱུང་བ་མི་མངོན་རླུང་དང་བཅས་པ་གང་། །ལྷང་ངེར་གནས་པ་སྐད་ཅིག་དང་པོ་ཡིན། །ཞེས་གསུངས་སོ། །དབུ་མའི་མས་སྣའི་ཁམས་དམར་ཆའི་དྭངས་མ་གྱེན་དུ་སོང་བའི་ཚེ། སྣང་བའི་ཡེ་ཤེས་མཆེད་པ་ལ་ཐིམ་པས་ཐབས་ཀྱི་ཡེ་ཤེས་ཀྱི་རང་བཞིན་བཞི་བཅུ་འགགས་ཏེ། སྤྱོད་བསྡུས་ལས། ཆགས་པ་དང་ཀུན་ཏུ་ཆགས་པ་དང་། དགའ་བ་དང་། དགའ་ ― MLP018_Page_0172 ―
[མ་དཔེ་གཟིགས་ན་འདིར་གནོན།]
བ་བར་མ་དང་། ཤིན་ཏུ་དགའ་བ་དང་། རངས་པ་དང་། རབ་ཏུ་མགུ་བ་དང་། ངོ་མཚར་བ་དང་། རྒོད་པ་དང་། ཚིམ་པ་དང་། འཁྱུད་པ་དང་། འོ་བྱེད་པ་དང་། འཇིབ་པ་དང་། བརྟན་པ་དང་། བརྩོན་པ་དང་། ཁེངས་པ་དང་། བྱ་བ་དང་། དབྲོག་པ་དང་། སྟོབས་དང་། སྤྲོ་བ་དང་། དགའ་བ་ལ་སྦྱོར་བ་དང་། དགའ་བ་ལ་སྦྱོར་བ་བར་མ་དང་། ཤིན་ཏུ་དགའ་བ་ལ་སྦྱོར་བ་དང་། སྒེག་པ་དང་། རྣམ་པར་སྒེག་པ་དང་། འགྲས་པ་དང་། དགེ་བ་དང་། ཚིག་གསལ་བ་དང་། བདེན་པ་དང་། མི་བདེན་པ་དང་། ངེས་པ་དང་། ཉེ་བར་མི་ལེན་པ་དང་། སྦྱིན་པ་པོ་དང་། བསྐུལ་བ་དང་། དཔའ་བ་དང་། ངོ་ཚ་མེད་པ་དང་། སྒྲིན་པ་དང་། གདུག་པ་དང་། མི་བསྲུན་པ་དང་། གྱ་གྱུ་ཆེ་བ་སྟེ་མཚན་ཉིད་བཞི་བཅུ་ཐམ་པའོ། །ཞེས་གསུངས་སོ། །དེའི་ཚེ་ནང་གི་ཁམས་དམར་པོ་དང་འབྲེལ་བའི་དབང་གིས་ཕྱི་རྟགས་སུ་སྤྲིན་མེད་ཀྱི་ནམ་མཁའ་གཡའ་དག་པ་ལ་ཉི་འོད་ཀྱིས་ཁྱབ་པ་ལྟར་དམར་ཐིང་ངེ་བའམ་དམར་ལམ་པ་འབྱུང་། འཛིན་པའི་རྣམ་པར་རྟོག་པ་རགས་པ་ཆེས་སྟོངས་པས་ན་ཤིན་ཏུ་སྟོང་པའི་འོད་གསལ་དང་། སེམས་ཤིན་ཏུ་གསལ་བར་སྣང་བས་མཆེད་པའི་ཡེ་ཤེས་ཞེས་བྱ་བ་སྐད་ཅིག་མ་གཉིས་པ་སྟེ། གཉིས་མེད་རྣམ་རྒྱལ་ལས། མཆེད་པ་སྣང་བ་རབ་ཏུ་མི་རྟོག་སྟེ། །ཆེས་གསལ་བ་ལ་འཛིན་རྟོག་མ་ཞུགས་ཏེ། །ཡེ་ཤེས་ཕྲ་བ་རྡུལ་བྲལ་མི་རྟོག་པ། །ལྷན་ནེར་གནས་པ་སྐད་ཅིག་གཉིས་པ་ཡིན། །ཞེས་གསུངས་སོ། །དྭངས་མ་དཀར་དམར་སྙིང་གར་འཕྲད་པའི་དུས་སུ་མཆེད་པའི་ཡེ་ཤེས་ཐོབ་པ་ལ་ཐིམ་པས་སྣང་བ་ཐོབ་པའི་ཡེ་ཤེས་ཀྱི་རང་བཞིན་བདུན་འགགས་ཏེ། སྤྱོད་བསྡུས་ལས། ཆགས་པ་བར་མ་དང་། བརྗེད་ངེས་པ་དང་། འཁྲུལ་པ་དང་། མི་སྨྲ་བ་དང་། སྐྱོ་བ་དང་། ལེ་ལོ་དང་། ཐེ་ཚོམ་དང་བཅས་པ་སྟེ། འདི འི་རང་བཞིན་གྱི་མཚན་ཉིད་ནི་བདུན་པོ་དག་གོ །ཞེས་གསུངས་སོ། །སེམས་ཉིད་ངལ་གསོའ་འགྲེལ་བ་ཤིར་རྟ་ཆེན་མོ ར་དྲངས་པའི་སྤྱོད་བསྡུས་ཀྱི་ལུང་ཚིག་དང་འདི་མི་འདྲ་བར་སྣང་། མཆན་དེའི་ཚེ་དཀར་དམར་གྱི་ནུས་པའང་དབྱིངས་སུ་ཡལ་ཏེ་སྲོག་རླུང་གི་ཆ་ཤས་འགའ་ཞིག་ལུས་པ་དེས་དབང་བྱས་ནས་ཕྱི་རྟགས་སུ་ནམ་མཁའ་ལ་མུན་ནག་གིས་ཁྱབ་པ་ལྟར་ནག་ཐིབས་ཀྱིས་འགྲོ་བའི་ནག་ལམ་ ― MLP018_Page_0173 ―
[མ་དཔེ་གཟིགས་ན་འདིར་གནོན།]
པ་འབྱུང་། ཤིན་ཏུ་ཕྲ་བའི་གཟུང་འཛིན་གྱི་རྟོག་པ་ཆེས་ཆེར་སྟོང་པས་ན་སྟོང་པ་ཆེན་པོའི་འོད་གསལ་དང་། སྣང་ཆའི་སྟེང་དུ་ཐ་དད་པའི་མཚན་མ་ཐམས་ཅད་ནུབ་པའི་སེམས་འགགས་པ་ལ་ཕྱོགས་པས་སྣང་བ་ཐོབ་པའི་ཡེ་ཤེས་ཞེས་བྱ་བ་སྐད་ཅིག་གསུམ་པ་སྟེ། གཉིས་མེད་རྣམ་རྒྱལ་ལས། ཐོབ་པའི་ཡེ་ཤེས་ཤིན་ཏུ་མི་རྟོག་པ། །གསལ་བ་ཙམ་དུའང་མི་གནས་ཤིན་ཏུ་ཕྲ། །རླུང་སེམས་མི་ཕྱེད་གསལ་བར་འཆར་བ་སྟེ། །ལྷམ་མེར་གནས་པ་སྐད་ཅིག་གསུམ་པ་ཡིན། །ཞེས་གསུངས་སོ། །དེ་ནས་སྙིང་གའི་རྩ་དར་དཀར་གྱི་སྐུད་པ་འདྲ་བའི་ནང་གི་ཁྲག་དབུགས་ཀྱི་དྭངས་མ་ཐིག་ལེ་ཨ་ཧྃ་རྫོགས་པར་ཐིམ་པ་ན་ཐོབ་པའི་ཡེ་ཤེས་ཀྱང་འཆི་བ་འོད་གསལ་ལ་ཐིམ་པས་སྲིད་པའི་ཆོས་ཐམས་ཅད་བག་ཆགས་ཀྱི་ཚུལ་དུ་ཡོད་པའི་རྒྱུན་དེ་དག་ལ་གནས་པ་ཡིན་ཡང་། བག་ཆགས་དེ་རྣམས་ནི་འདིར་མི་མངོན་ལ། ཚེ་འདིས་བསྡུས་པའི་རྣམ་རྟོག་དང་ཀུན་རྫོབ་ཀྱི་སྣང་བ་ཐམས་ཅད་འོད་གསལ་དུ་ཐིམ། ཚེ་རབས་གཞན་གྱིས་བསྡུས་པ་རྣམས་མ་ཤར་བས། རེ་ཞིག་གཟུང་འཛིན་གྱི་སྣང་བ་ཐམས་ཅད་དང་སྣང་བ་གསུམ་ཡང་འགགས་པས། ཕྱི་རྟགས་སུ་སྤྲིན་དང་བྲལ་བའི་ནམ་མཁའ་གཡའ་དག་པ་ལྟ་བུ་དྭངས་གསལ་མཐའ་དབུས་མེད་པའི་སྣང་བ་དང་། ནང་རྟགས་སུ་རྣམ་པར་མི་རྟོག་པ་ལྷན་ཅིག་སྐྱེས་པ་ཤིན་ཏུ་སྤྲོས་པ་དང་བྲལ་བའི་ཡེ་ཤེས་ཁོ་ན་ལ་ཡུད་ཅིག་གནས་པ་ཐམས་ཅད་སྟོང་པ་འོད་གསལ་གྱི་ཉམས་འཆར་བས་སེམས་དྲི་མ་དང་བྲལ་བ་ཉེ་བར་ཐོབ་པའི་ཡེ་ཤེས་ཞེས་བྱ་བ་སྐད་ཅིག་མ་བཞི་པ་སྟེ། གཉིས་མེད་རྣམ་རྒྱལ་ལས། ཉེ་བར་ཐོབ་པ་དྲི་མ་མེད་པ་སྟེ། །རང་བྱུང་རང་གསལ་བདེ་བ་དམིགས་སུ་མེད། །ཕྲ་རགས་རབ་ཞི་ཏིང་འཛིན་མཆོག་ཏུ་འགྱུར། །སྐད་ཅིག་བཞི་པར་མི་འགྱུར་ཁྱབ་བྱེད་ཡིན། །ཞེས་གསུངས་སོ། །དེ་རྣམས་ངོས་ཟིན་པ་ལ། སྣང་བ་ནི་གོམས་པའི་འོད་གསལ། མཆེད་པ་ནི་བསམ་གཏན་གྱི་འོད་གསལ། ཐོབ་པ་ནི་རྡུལ་བྲལ་ཟག་པ་མེད་པའི་འོད་གསལ། ཉེ་བར་ཐོབ་པ་ནི་ལྷན་ཅིག་སྐྱེས་པ་ཆོས་སྐུ་རང་བཞིན་གྱི་འོད་གསལ་ཏེ། གཉིས་མེད་རྣམ་རྒྱལ་ལས། འོད་གསལ་བ་ནི་བསམ་གཏན་ཟག་པ་མེད། །རྡུལ་བྲལ་ས་བོན་མེད་པ་མི་གཡོ་བ། །ལྷན་ཅིག་སྐྱེས་པ་ ― MLP018_Page_0174 ―
[མ་དཔེ་གཟིགས་ན་འདིར་གནོན།]
ཆོས་སྐུའི་སྙིང་པོ་ནི། །ལྷུ ན་གྲུབ་བྱང་ཆུབ་སེམས་ཀྱི་ངོ་བོ་ཉིད། །ཅེས་གསུངས་སོ། །དེ་ཡང་འོད་གསལ་བཞི་རིམ་གྱིས་ཤར་བས་སྣང་མཆེད་ཐོབ་པའི་སྣང་བ་གསུམ་གྱི་སྐབས་སུ་སྒྲིབ་པ་དང་བྲལ་བའི་ཡེ་ཤེས་ཀ་དག་ཡེ་ཐོག་ཏུ་གྲོལ་བའི་འཐད་པ་ནི། སངས་རྒྱས་མངོན་དུ་བྱེད་དུས་བཞིན་ནོ། །འོན་ཀྱང་སངས་རྒྱས་ཀྱི་སྤངས་པ་ནི་མི་ལྡོག་ལ། འདི་ངོ་མ་ཤེས་ན་ལྡོག་པ་ནི། སངས་རྒྱས་ཀྱིས་ས་ལམ་དུ་སྤངས་པ་ཡིན་ལ། འདིར་སྤངས་པ་མེད་པས་ལྡོག་པར་འགྱུར་ཞིང་། ངོ་ཤེས་ན་མི་ལྡོག་པ་ནི། ངོ་ཤེས་པའི་སྐད་ཅིག་ལ་གྲོལ་ནས་མངོན་པར་ཤེས་པ་ལ་སོགས་པ་ཟག་མེད་ཀྱི་ཡོན་ཏན་བརྙེས་པའི་ཕྱིར་ལྡོག་པའི་གནས་མེད་པ་ཡིན་ནོ། །དེ་ལྟར་འཆི་སྲིད་ཆོས་སྐུའི་འོད་གསལ་དེ་ཉིད་ལམ་དུ་ཁྱེར་ནས་འཆི་སྲིད་དག་པ་ཆོས་སྐུའོ་སྙམ་པའི་གཞི་འབྲས་སྦྲེལ་བའི་ང་རྒྱལ་དང་ལྡན་པས་སྣང་གྲགས་འཁོར་འདས་ཀྱིས་བསྡུས་པའི་ཆོས་ཐམས་ཅད་ཆོས་སྐུ་སྤྲོས་བྲལ་དེ་བཞིན་ཉིད་ཀྱི་ཏིང་ངེ་འཛིན་གྱི་ངང་དུ་བལྟས་ཏེ་བསྒོམ་པ་ནི་ལམ་སྟོང་པ་ཆེན་པོའི་རྣལ་འབྱོར་ཏེ། འདི་ལ་དག་རྫོགས་སྨིན་གསུམ་ཚང་དགོས་པས། སྟོང་པ་ཆེན་པོའི་ལམ་དེ་བསྒོམས་པས་མར་འཆི་བའི་བག་ཆགས་དེ་དག་པར་བྱེད། ཡར་ཆོས་སྐུ་སྤྲོས་བྲལ་གྱི་རིགས་ཀྱི་ནུས་པ་གསོས་འདེབས་པས་འབྲས་བུ་རྫོགས་པར་བྱེད། བར་དུ་ལམ་དེ་བསྒོམས་པས་དོན་གྱི་འོད་གསལ་རྒྱུད་ལ་སྐྱེ་བའི་གཞི་འདིང་བས་ལམ་གོང་མའི་སྨིན་བྱེད་དུ་འགྲོ་བ་ཡིན་གསུངས། གཉིས་པ་བར་དོ་དང་རྗེས་སུ་མཐུན་པའི་ལམ་སྙིང་རྗེ་སྒྱུ་མའི་རྣལ་འབྱོར་ནི། ཆོས་ཉིད་འོད་གསལ་གྱི་སྣང་ཆ་དེ་ཉིད་ངོས་མ་ཟིན་པར་ནུབ་པའི་སྐད་ཅིག་ལ། ཕྱི་མའི་བག་ཆགས་སད་བྱེད་ཀྱི་རྐྱེན་ཅི་རིགས་པ་དག་གིས་བསྐུལ་ནས་རླུང་སེམས་ཕྲ་བའི་འབྱུང་བཞི་དང་བཅས་པ་དེ་རྣམས་ཀྱི་རྒྱུ་རྐྱེན་བྱས་པ་ལས་བར་དོའ་གཟུགས་དྭངས་ཤིང་ཐོགས་པ་མེད་པ་དེ་ཉིད་འགྲུབ་པར་བྱེད་ལ། དེ་སྦྱོང་བར་བྱེད་པ་ནི། རྔམ་གློག་ལས། གཉིས་པ་ཀུན་སྣང་ནམ་མཁའི་ངང་། །སྙིང་རྗེ་གསུམ་གྱིས་ཁྱབ་པའི་ཕྱིར། །ཁྱབ་བརྡལ་ཆེན་པོའི་ཏིང་འཛིན་བསྒོམ། །ཞེས་གསུངས་པ་ལྟར། དེ་བཞིན་ཉིད་མ་རྟོགས་པའི་འགྲོ་བ་ལ་འཛིན་མེད་སྒྱུ་མ་ལྟ་བུའི་སྙིང་རྗེ་མཁའ་ཁྱབ་ཏུ་བསྒོམ་པ་སྟེ། དེ་ཡང་ནམ་མཁའི་ ― MLP018_Page_0175 ―
[མ་དཔེ་གཟིགས་ན་འདིར་གནོན།]
དབྱིངས་དག་པ་ལས་གློ་བུར་དུ་འཇའ་ཚོན་གྱི་རྣམ་པར་ཤར་བ་ཡང་ནམ་མཁའི་ཆོ་འཕྲུལ་ཙམ་ལས་བདེན་པར་མ་གྲུབ་པ་བཞིན་དུ་སྟོང་ཉིད་དེ་བཞིན་ཉིད་ཀྱི་གནས་ལུགས་དེའི་ངོ་ན་འཁོར་འདས་གཉིས་སུ་མེད་པ་དེའི་ངང་ལས་མ་གཡོས་བཞིན་དུ་སྒྱུ་མའི་མཚང་མ་ཤེས་པ་ལྟར། རྩལ་སྣང་ལ་བདེན་པར་བཟུང་བས་འཁྲུལ་ཏེ་འཁོར་བའི་གནས་སུ་རང་དབང་མེད་པར་འཁྱམས་པའི་འགྲོ་བ་འདི་དག་སྡུག་བསྔལ་ལས་བསྒྲལ་བར་བྱའོ་སྙམ་དུ་རིགས་དྲུག་གིས་བསྡུས་པའི་སེམས་ཅན་གྱི་ཁམས་ཐམས་ཅད་ལ་ཀུན་ཏུ་ཁྱབ་པའི་སྙིང་རྗེ་འཛིན་མེད་སྒྱུ་མ་ལྟ་བུར་བལྟས་ཏེ་བསྒོམས་པ་ནི་སྙིང་རྗེ་སྒྱུ་མའི་རྣལ་འབྱོར་ཏེ། ལམ་དེ་བསྒོམས་པས། མར་བར་དོའ་ཡིད་ལུས་སྒྱུ་མ་ལྟ་བུའི་བག་ཆགས་དག་པར་བྱེད། ཡར་ཆོས་སྐུ་སྤྲོས་བྲལ་ལས་ལོངས་སྐུ་མཚན་དཔེས་བརྒྱན་པའི་རིགས་ཀྱི་ནུས་པ་གསོས་འདེབས་པས་འབྲས་བུ་རྫོགས་པར་བྱེད། བར་དུ་སྙིང་རྗེ་སྒྱུ་མའི་ལམ་དེ་བསྒོམས་པས། དོན་གྱི་འོད་གསལ་ལས་ཟུང་འཇུག་གི་ལྷ་སྐུར་ལྡང་བའི་མཚམས་སྦྱོར་སྙིང་རྗེ་ཆེན་པོ་རྒྱུད་ལ་སྐྱེ་བའི་གཞི་འདིང་བས་ལམ་གོང་མའི་སྨིན་བྱེད་དུ་འགྲོ་གསུངས། གསུམ་པ་སྐྱེས་པའི་རིམ་པ་གསུམ་པོ་སྦྱོང་བར་བྱེད་པའི་ལམ་དེ་ལ། ཕྱག་རྒྱ་གཅིག་པ། ཕྱག་རྒྱ་སྤྲོས་བཅས། ཚོམ་བུ་ཚོགས་སྒྲུབ་དང་གསུམ་ལས། དང་པོ་མའི་མངལ་དུ་སྐྱེ་བའི་རིམ་པ་དང་པོ་སྦྱོང་བའི་ལམ་ཕྱག་རྒྱ་གཅིག་པ་ནི། དེ་ལ་ཕྲ་རགས་གཉིས་ལས། དང་པོ་ཕྲ་བ་ཡིག་འབྲུ་ལ་བསླབ་པ་ནི། སྦྱང་བྱ་བར་དོའ་སེམས་ཅན་དེ་ཕྱི་མའི་སྐྱེ་བ་ལེན་པ་ལ་ཕྱོགས་པ་ན་སྐྱེ་གནས་ལ་སྲེད་པ་སྐྱེ་སྟེ། བརྫུས་ཏེ་སྐྱེ་ན་གནས་ལ། དྲོད་གཤེར་ལས་སྐྱེ་ན་དྲོ་གྲང་ལ། སྒོ་ང་ལས་སྐྱེ་ན་རོ་ལ། མངལ་ལས་སྐྱེ་ན་ཕ་མའི་འདུ་འཕྲོད་ལ་སྲེད་པ་སྐྱེ་སྟེ། གང་དུ་སྐྱེ་འགྱུར་གྱི་གནས་ལ་སྲེད་པ་སྐྱེས་པའི་རྐྱེན་གྱིས་དེར་འཇུག་མ་རག་པ་སྐད་ཅིག་མའི་བར་དོའ་རླུང་སེམས་དེ་ཡིན་ལ། སྦྱོང་བྱེད་ནི་འདི་ཉིད་ལས། ཨཿརབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཕྱོགས་བཅུར་གང་བར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བརྟན། །ཅེས་གསུངས་པ་ལྟར། སྟོང་ཉིད་སྙིང་རྗེ་ཟུང་དུ་འཇུག་པའི་རང་རིག་ཨ་དཀར་པོ་གསལ་བརྟན་གྱི་ཚད་ ― MLP018_Page_0176 ―
[མ་དཔེ་གཟིགས་ན་འདིར་གནོན།]
བརྒྱད་དང་ལྡན་པའི་སྒོ་ནས་བསླབ་པའོ། །གཉིས་པ་རགས་པ་ལྷ་སྐུ་ལ་བསླབ་པ་ནི། ཐོག་མར་སྦྱང་བྱ་ནི། དུས་འཁོར་རྩ་རྒྱུད་ལས། ཐིག་ལེ་ཟླ་བ་ཁུ་བ་སྐུ། །རྣམ་པར་བཅད་བྱ་རྡུལ་ཉི་གསུང་། །ཨ་ཡིག་མུན་ཅན་ཐུགས་རབ་བརྗོད། །ཅེས་གསུངས་པ་ལྟར། དེ་ལྟར་བར་དོའ་རྣམ་ཤེས་དེ་ཕ་མའི་ཁུ་ཁྲག་གི་དབུས་སུ་ཞུགས་པ་ལ་ལུས་ངག་ཡིད་གསུམ་གྱི་རྟེན་ཁུ་རྡུལ་རླུང་གསུམ་བསྐྱེད་དེ། དེ་ལ་ཕ་མ་གཉིས་ཀྱི་རེག་པ་སྲ་བ་དེ་ཉམས་སུ་མྱོང་བས་སའི་ཁམས་གྲུབ། དེ་བཞིན་དུ་བྱང་སེམས་ཁུ་བ་གཤེར་བའི་རང་བཞིན་ལས་ཆུ། བསྐྱོད་པ་ལས་དྲོད་སྐྱེས་པ་མེ། རྩ་གནས་ཐམས་ཅད་ནས་བྱང་སེམས་གཡོ་བ་རླུང་། བདེ་བ་ནམ་མཁའི་ཁམས་ཏེ་རྣམ་པར་ཤེས་པ་འབྱུང་ལྔ་ཡེ་ཤེས་ཀྱི་ཁམས་དང་དྲུག་འདུས་པ་ལས་ལུས་གྲུབ་སྟེ། དགྱེས་རྡོར་ལས། སེམས་ནི་ཆེན་པོ་གཅིག་ཉིད་ལ། །ལྔ་ཡི་གཟུགས་ཀྱིས་རྣམ་པར་བསྐོར། །ཞེས་སོ། །དེ་ཡང་ཞག་བདུན་ཚན་རེ་རེ་ལ་ཆགས་པ་དང་བཤིགས་པ་སོགས་འབྱུང་ལྔས་བྱ་བ་བྱེད་པས། ཞག་བདུན་ཕྲག་བཞི་ལ་རིམ་པར་མེར་ནུར་ལྟར་གོར་གྱི་གནས་སྐབས་བཞིས་ཞག་ཉེར་བརྒྱད། དེ་ནས་བདུན་ཕྲག་ལྔ་པ་མཁྲང་འགྱུར་གྱི་ཞག་དང་པོ་ལ་མ་དང་འབྲེལ་བའི་ལྟེ་བ་ནས་རང་སོར་ཕྱེད་དང་བཅུ་ག སུམ་གྱི་ཚད་དང་ལྡན་པའི་དབུ་མ་ཆགས་ཏེ། ནང་དུ་སྲོག་རླུང་དང་སྟེང་འོག་གི་སྣ་གཉིས་སུ་དཀར་དམར་གྱི་ཐིག་ལེ་དང་བཅས་པ་གྲུབ། ཞག་གཉིས་པ་ལ་རླུང་བཅུའི་རྟེན་སྙིང་གའི་རྩ་འཁོར་ཆགས་ཤིང་། དེ་ནས་ཞག་རེ་ལ་རྩ་ཉིས་བརྒྱ་རེ་ཆགས་པས་མངལ་གྱི་ཟླ་བ་བརྒྱད་དང་། ཕྱི་རོལ་གྱི་ཟླ་བཞི་སྟེ་ཟླ་བ་བཅུ་གཉིས་ཀྱི་བར་དུ་རྩ་འཕེལ་བས་རོ་རྐྱང་དབུ་གསུམ་གྱི་རིགས་འཛིན་པའི་རྩ་སྟོང་ཕྲག་ཉི་ཤུ་རྩ་བཞི་རེ་བསྡོམས་པས་སྟོང་ཕྲག་བདུན་ཅུ་རྩ་གཉིས་སུ་འགྱུར་ཏེ། སྡོམ་འབྱུང་ལས། ལུས་ཀྱི་རྗེས་སུ་འགྲོ་བའི་རྩ། །སྟོང་ཕྲག་བདུན་ཅུ་རྩ་གཉིས་བརྗོད། །ཅེས་སོ། །དེ་ཡང་ལྟེ་འཁོར་ཆགས་ནས་ཉའི་རྣམ་པར་འགྱུར་ལ། དེ་ནས་རིམ་པར་ཡན་ལག་དོད་པ་དང་། རྐང་ལག་རྫོགས་པའི་གནས་སྐབས་སུ་གཅིག་པོར་རུས་སྦལ་ལྟ་བུ་ཞེས་གཉིས་སུ་ཕྱེ་ལ། དེ་ནས་བརྩམས་ཏེ་ཇི་སྲིད་བཙའ་བའི་ཉིན་ཞག་ལ་ཐུག་གི་བར་དུ་ཕག་པའི་གནས་སྐབས་ཞེས་བྱ་ ― MLP018_Page_0177 ―
[མ་དཔེ་གཟིགས་ན་འདིར་གནོན།]
ཞིང་། དེ་ཡང་རིམ་པར་ཚིགས་རྣམས་ཀྱི་བར་རྩའི་འཁོར་ལོ་དང་ཤ་ཁྲག་རུས་ཚིགས་དང་བཅས་པ་རྣམས་ཆགས་ཏེ། དེ་ཡན་ཆད་བརྒྱལ་བ་ལྟར་སྣང་མེད་དུ་གནས་ལ། ཟླ་བ་དྲུག་པ་ནས་ཡིད་ཀྱི་རྣམ་ཤེས་སྐྱེ་ཞིང་སྔོན་གྱི་སྐྱེ་བ་དྲན་པ་སོགས་ཚོར་བ་མྱོང་། བདུན་པ་ནས་སྐྲ་དང་བ་སྤུ་སོགས་སྐྱེས་ཤིང་དབང་རྟེན་རྣམས་ཀྱང་འགྲུབ། བརྒྱད་པ་ལ་དབང་པོ་རྫོགས་པས་བཀྲེས་སྐོམ་དང་གཤང་གཅི་འབྱུང་། དགུ་པའི་མཐར་སྡུག་བསྔལ་ཞིང་སྐྱོ་བ་སྐྱེ་སྟེ། དེ་ལྟར་ཟླ་དགུ་ཞག་བཅུ་ནས་བཙའ་བ་སྟེ། དེ་ལྟར་ཡང་ཉི་ཟླ་ཁ་སྦྱོར་གྱི་རྒྱུད་ལས། དེ་ནས་མངལ་གྱི་སྒོར་ཚུད་ནས། །ཕ་དང་མ་ཡི་རྒྱུ་རྐྱེན་ལས། །མེར་མེར་པོ་དང་ནུར་ནུར་པོ། །ཏར་ཏར་པོ་དང་གོར་གོར་པོ། །མཁྲང་འགྱུར་ཉ་ཡི་རྣམ་པ་དང་། །རུས་སྦལ་བཞིན་དང་ཕག་པ་བཞིན། །དེ་ལྟར་ཞག་ནི་བདུན་ཕྲག་བརྒྱད། །ལྟེ་བ་ལས་ནི་ལུས་རྣམས་བསྐྱེད། །ཟླ་དགུ་དེ་བཞིན་ངོ་བཅུ་ནས། །ལུས་རྫོགས་མ་ཡི་མངལ་ནས་འཐོན། །ཞེས་གསུངས་སོ། །ཞར་ལ་སེམས་ཅན་རྣམས་གང་དུ་སྐྱེ་བའི་སྣོད་ཀྱི་འཇིག་རྟེན་ཆགས་པའི་གཞི་ནམ་མཁའི་ཁམས་དང་། ཆགས་པར་འགྱུར་བའི་རྒྱུའི་གཙོ་བོར་དབུ་མ་འཇུག་པར། སེམས་ཉིད་ཀྱིས་ནི་སེམས་ཅན་འཇིག་རྟེན་དང་། །སྣོད་ཀྱི་འཇིག་རྟེན་སྣ་ཚོགས་ཤིན་ཏུ་འགོད། །འགྲོ་བ་མ་ལུས་ལས་ལས་སྐྱེ་བར་གསུངས། །ཞེས་པས་སྤྱིར་སེམས་ཅན་དང་། བྱེ་བྲག་ཏུ་ལས་མཐུན་པར་བསགས་པའི་སེམས་ཅན་སྤྱི་མཐུན་གྱི་ལས་ཀྱི་བག་ཆགས་སེམས་ལ་འགོས་པ་ཡུལ་སྣང་འཛིན་གྱུར་ཐུན་མོང་དུ་སྨིན་པས་འབྱུང་བཞིའི་དཀྱིལ་འཁོར་རི་རབ་དང་བཅས་པ་གྲུབ་པ། སེམས་ཅན་རྣམས་གང་དུ་རྒྱུ་ཞིང་ལོངས་སྤྱོད་པའི་གནས་སུ་གྱུར་པ་ཡུལ་དང་ཁང་ཁྱིམ་ལ་སོགས་པའི་ཞེན་རྟོག་སྦྱོང་བའང་རྟེན་གཞལ་ཡས་ཁང་སྔར་ལོངས་སྐུའི་གླེང་གཞིར་བཤད་པ་བཞིན་གོམས་པས་སྦྱོང་བར་བྱེད་དོ། །དེའི་དག་རྫོགས་སྨིན་གསུམ་ཡང་། མར་གོང་དུ་བཤད་མ་ཐག་པ་དེ་རྣམས་ཀྱི་བག་ཆགས་དག་པར་བྱེད། ཡར་སངས་རྒྱས་ཀྱི་ཞིང་ཁམས་རྣམ་པར་དག་པ་དེའི་རིགས་ཀྱི་ནུས་པ་གསོས་འདེབས་པས་འབྲས་བུར་རྫོགས་པར་བྱེད། བར་དུ་ནི་འབྱུང་བ་རིམ་བརྩེགས་གཞལ་ཡས་ཁང་དང་བཅས་པའི་ཏིང་འཛིན་གྱི་ལམ་དེ་བསྒོམ་ ― MLP018_Page_0178 ―
[མ་དཔེ་གཟིགས་ན་འདིར་གནོན།]
པས། འབྱུང་བ་རིམ་བརྩེགས་རི་རབ་དང་བཅས་པ་ནི་རྩ་འཁོར་ལྔ་དང་དབུ་མ། དཀྱིལ་འཁོར་གྱི་གཞི་པད་ཉི་རྒྱ་གྲམ་ནི་རྩ་འཁོར་གྱི་ལྟེ་བའི་རླུང་ཐིག དེ་རྣམས་དང་རོ་གཅིག་ཏུ་འདྲེས་པའི་སེམས་གསལ་སྟོང་བདེ་བའི་ཆ་ནི་གཞལ་ཡས་ཁང་སྟེ། དེ་ཉིད་ལེགས་པར་སྒོམ་པས་རྩ་རླུང་ཐིག་ལེ་རྣམས་མཉེན་ཅིང་དུལ་ནས་རྫོགས་རིམ་གྱི་ཡེ་ཤེས་རྒྱུད་ལ་སྐྱེ་བའི་གཞི་འདིང་བས་དེའི་སྨིན་བྱེད་དུ་འགྲོ་བ་ཡིན་གསུངས། གོང་དུ་བཤད་པའི་སྦྱང་བྱའི་ཆོས་དེ་རྣམས་ཀྱིས་སྦྱོང་བྱེད་ཀྱི་ལམ་དང་པོ་ཕྱག་རྒྱ་གཅིག་པའི་ལམ་རགས་པ་ལྷ་སྐུ་ལ་བསླབ་པའི་རྣལ་འབྱོར་ནི། དེ་ཡང་གཞལ་ཡས་ཁང་གི་དབུས་སུ་གདན་ཉི་མའི་རྡུལ། ཟླ་བའི་ཁུ་བ། ས་བོན་ཨ་ཡིག་གདན་སྟེང་དུ་བབས་པ་ནི་བར་དོའ་རྣམ་ཤེས་ཏེ། མངལ་དུ་ཁུ་རྡུལ་སེམས་གསུམ་འདྲེས་པས། ཕ་མའི་འདུ་འཕྲོད་ཀྱི་འགྱུར་བས་ཁམས་ལྔ་ཉམས་སུ་མྱོང་བ་ནི་རིགས་སོ་སོའ་ས་བོན་ཕྱག་མཚན་དུ་གྱུར་པ་མཚོན་པའོ། །འོད་ཟེར་སྤྲོ་བསྡུ་ནི། མངལ་དུ་ལུས་ཆགས་པའི་ཚེ་ལུས་དེ་ཉིད་རླུང་གིས་འཕེལ་བར་བྱེད། མེས་སྨིན། ཆུས་སྡུད། བསྡུས་པ་དེ་ཡང་སས་སྲ་བར་བྱེད། ནམ་མཁས་དེ་ཐམས་ཅད་ཀྱི་གོ་ཕྱེ་བས་ཕུང་ཁམས་སྐྱེ་མཆེད་གྲུབ་པ་དེ་སྦྱོང་བའོ། །ཁུ་རྡུལ་སེམས་གསུམ་འདྲེས་པའི་དཀར་དམར་འོད་ཀྱི་གོང་བུ་དེ་འོད་ཟེར་སྤྲོ་བསྡུའི་ལྷ་སོ་སོའ་རིགས་ཀྱི་ཕྱག་མཚན་སོ་སོར་ས་བོན་གྱིས་མཚན་པ་ལས་སྐུ་ཡོངས་སུ་རྫོགས་པར་བསྐྱེད་པ་སྟེ། དེ་ཡང་འདིར་མངལ་སྐྱེས་གཙོ་ཆེ་བ་ཙམ་དུ་བྱས་ནས་བཤད་ཀྱི། གཞན་དུ་སྒོང་སྐྱེས་ལ་སོགས་པའི་བག་ཆགས་ཀྱང་སྦྱོང་བར་ནུས་ཏེ། སྒོང་སྐྱེས་ལ་ས་བོན་ནི་དྲི་ཟའི་སེམས། ཕྱག་མཚན་ནི་མངལ་དུ་ཁུ་ཁྲག་གིས་དབུས་སུ་ཞུགས་པ། སྤྲོ་བསྡུས་ཡོངས་སུ་གྱུར་པའི་གོང་བུ་ནི་སྒོ་ངར་གྱུར་པ། དེ་བཞིན་དུ་དྲོད་གཤེར་ལ་གདན་གྱི་ཉི་མ་དྲོད། ཟླ་བ་ནི་གཤེར། ས་བོན་ཕྱག་མཚན་ནི་བར་དོའ་རླུང་སེམས། སྤྲོ་བསྡུ་དང་སྐུ་ཡོངས་སུ་རྫོགས་པ་ནི་དེ་གསུམ་འདུས་པ་ལས་དྲོད་གཤེར་གྱི་དབུས་ནས་ལུས་གྲུབ་པ་དེ་སྦྱོང་། རྫུས་སྐྱེས་ལ་གདན་ནི་སྐྱེ་གནས། ས་བོན་ཕྱག་མཚན་ནི་བར་དོའི་རླུང་སེམས། སྤྲོ་བསྡུ་ནི་གནས་ལུས་ལ་སྲེད་པ་དང་ལེན་པའི་མཐུ་གསོས་བཏབ་པ། སྐུ་ཡོངས་སུ་རྫོགས་པ་ནི་ལུས་ ― MLP018_Page_0179 ―
[མ་དཔེ་གཟིགས་ན་འདིར་གནོན།]
སྐད་ཅིག་གིས་གྲུབ་པ་མཚོན་ཞིང་སྦྱོང་བར་བྱེད་དོ། །མངོན་བྱང་ལྔའི་སྒོ་ནས་བསྐྱེད་ཚུལ་ནི། ཁུ་བ་མཚོན་བྱེད་ཟླ་གཟུགས་ནི་མེ་ལོང་ཡེ་ཤེས། རྡུལ་མཚོན་བྱེད་ཉི་མ་ནི་མཉམ་ཉིད་ཡེ་ཤེས། བར་སྲིད་དཀར་དམར་གྱི་དབུས་སུ་ཞུགས་པ་མཚོན་བྱེད་ས་བོན་ཕྱག་མཚན་ནི་སོར་རྟོག་ཡེ་ཤེས། ཁུ་རྡུལ་སེམས་གསུམ་འདྲེས་པ་མཚོན་བྱེད་འོད་ཟེར་སྤྲོ་བསྡུ་ཡོངས་སུ་གྱུར་པ་ནི་བྱ་གྲུབ་ཡེ་ཤེས། མངལ་དུ་ལུས་གྲུབ་པ་མཚོན་བྱེད་སྐུ་ཡོངས་སུ་རྫོགས་པ་ནི་ཆོས་དབྱིངས་ཡེ་ཤེས་ཡིན་ཏེ། དེ་ལྟར་སངས་རྒྱས་ཀྱི་ཉེ་རྒྱུའི་ལམ་ཏིང་ངེ་འཛིན་མངོན་པར་བྱང་ཆུབ་པ་ལྔ་ཐུགས་སུ་ཆུད་པ་ལས་ཡེ་ཤེས་ལྔ་ཡི་རང་བཞིན་འབྲས་བུའི་ངོ་བོར་སངས་རྒྱས་པ་སྟེ། དགྱེས་རྡོར་ལས། ཟླ་བ་མེ་ལོང་ཡེ་ཤེས་ཏེ། །བདུན་གྱི་བདུན་པ་མཉམ་པ་ཉིད། །རང་ལྷའི་ས་བོན་ཕྱག་མཚན་ནི། །སོ་སོར་རྟོག་པ་བརྗོད་པར་བྱ། །ཐམས་ཅད་གཅིག་གྱུར་ནན་ཏན་ཉིད། །རྫོགས་པར་ཆོས་དབྱིངས་དག་པ་སྟེ། །རྣམ་པ་ལྔ་པོ་བསྒོམ་བྱ་ཞིང་། །མཁས་པས་ཆོ་གར་ཤེས་པར་བྱ། །ཞེས་སོ། །དེ་ལ་ཁ་ཅིག་ན་རེ། དེ་ནི་ལྷ་སྐུ་ཕྱག་རྒྱ་གཅིག་པ་མ་ཡིན་ཏེ། གནས་གསུམ་དུ་སྐུ་གསུང་ཐུགས་ཀྱི་ལྷ་གསུམ་དང་། དབུ་རྒྱན་གྱི་ལྷ་ལྔ། ཡེ་ཤེས་སེམས་དཔའ་དང་དགུ་བྱུང་བས་སོ་ཟེར་ན། དེ་ནི་སྐྱོན་མེད་དེ། ཤིང་གི་རྩ་བ་གཅིག་ལ་ཡལ་ག་མང་དུ་ཡོད་ཀྱང་ཤིང་སྡོང་གཅིག་ཟེར་བ་དང་གནད་གཅིག་པ་ཡིན་གསུངས། དེ་ཡང་དག་རྫོགས་སྨིན་གསུམ་དང་སྦྱར་ན། དེ་ལྟར་ཕྱག་རྒྱ་གཅིག་པའི་ལམ་དེ་བསྒོམས་པས། མར་མའི་མངལ་དུ་སྐྱེས་ནས་བཙའ་བའི་བར་གྱི་བག་ཆགས་དེ་དག་པར་བྱེད། ཡར་ལོངས་སྤྱོད་རྫོགས་པའི་སྐུ་དེས་གང་འདུལ་གྱི་སྤྲུལ་སྐུར་སྣང་ནས་ལྷུམས་སུ་ཞུགས་ནས་བལྟམས་པའི་བར་གྱི་རིགས་ཀྱི་ནུས་པ་གསོས་འདེབས་པས་འབྲས་བུ་རྫོགས་པར་བྱེད། བར་དུ་ལམ་དེ་བསྒོམས་པས་སྙིང་རྗེ་ཆེན་པོའི་འཕེན་པས་ཟུང་འཇུག་གི་ལྷ་སྐུར་ལྡང་བའི་གཞི་འདིང་བས་ལམ་གོང་མའི་སྨིན་བྱེད་དུ་འགྲོ་གསུངས། སྐྱེས་པའི་རིམ་པ་བར་པ་སྦྱོང་བའི་ལམ་ཕྱག་རྒྱ་སྤྲོས་བཅས་ཀྱི་རྣལ་འབྱོར་ནི། ལམ་རིམ་ལས། འཁོར་ལོ་ཚོམ་བུ་གྲངས་ཞལ་ཕྱག །ཅེས་པས། དཀྱིལ་འཁོར་སྤྲོ་བ། ཚོམ་བུ་སྤྲོ་བ། གྲངས་སྤྲོ་བ། ཞལ་ཕྱག་སྤྲོ་བ་དང་ ― MLP018_Page_0180 ―
[མ་དཔེ་གཟིགས་ན་འདིར་གནོན།]
བཞི་ལས། དང་པོ་ནི། ཞི་བ་ལ་དཀྱིལ་འཁོར་རྒྱས་པ་རིགས་ལྔ་རིགས་ཆུང་གི་སེམས་དཔའ་དང་བཅས་པ་ཡབ་ཡུམ་ལྔ་བཅུའི་སྟེང་དུ་སེམས་དཔའ་སེམས་མ་བཅུ་དྲུག སྒོ་བ་ཡབ་ཡུམ་བརྒྱད། བྱ་བྱེད་ཡབ་ཡུམ་གཉིས། ཐུབ་དྲུག་དང་བཅས་བརྒྱད་ཅུ་རྩ་གཉིས། འབྲིང་པོ་རིགས་ལྔ་ཡབ་ཡུམ། སེམས་དཔའ། སེམས་མ། སྒོ་སྐྱོང་ཡབ་ཡུམ། བྱ་བྱེད། ཐུབ་དྲུག་དང་བཅས་ཞེ་གཉིས། བསྡུས་པ་རིགས་ལྔ་ཡབ་ཡུམ་བཅུ་དང་། སྒོ་བ་ཡབ་ཡུམ་བརྒྱད་དེ་བཅོ་བརྒྱད་དོ། །ཁྲོ་བོ་ལ་དཀྱིལ་འཁོར་རྒྱས་པ་ཁྲག་འཐུང་རིགས་ལྔ་ཡབ་ཡུམ་རིགས་ཆུང་དང་བཅས་པ་ལྔ་བཅུའི་སྟེང་། གནས་ཡུལ་སྒོ་མ་དབང་ཕྱུག་མ་ཉེར་བརྒྱད་ཁྲོ་བཅུ་ཡབ་ཡུམ་ཡ་ཉི་ཤུ་བཅས་བསྣན་པས་བརྒྱ་དང་བཅོ་བརྒྱད་དོ། །འབྲིང་པོ་ཁྲག་འཐུང་རིགས་ལྔ་ཡབ་ཡུམ་དེ་སྟེང་གནས་ཡུལ་སོགས་སྔར་ལྟར་བགྲངས་པས་དོན་བརྒྱད། བསྡུས་པ་དེ་དག་ལས་ཁྲོ་བཅུ་ཡབ་ཡུམ་ཡ་ཉི་ཤུ་ཕྲི་བས་ལྔ་བཅུ་རྩ་བརྒྱད་དོ། །གཉིས་པ་ཚོམ་བུ་སྤྲོ་བ་ནི། ཞི་བ་ལ་ཚོམ་བུ་གཅིག་གསུམ་ལྔ་པ་དང་གསུམ་ལས། དང་པོ་ནི། མི་བསྐྱོད་པ་ཡབ་ཡུམ་རྡོ་རྗེ་རིགས་ཀྱི་རིགས་ཆུང་ཟུང་བཞི་དང་། སྒོ་བ་ཡབ་ཡུམ་བརྒྱད་དེ་བཅོ་བརྒྱད་ཀྱི་བདག་ཉིད་ཅན་ནི་ཚོམ་བུ་གཅིག་པ་དང་། དབུས་སུ་མི་བསྐྱོད་པ་དང་ཤར་ནུབ་ཏུ་རྣམ་སྣང་དང་མཐའ་ཡས་ཏེ་རང་རང་གི་རིགས་ཆུང་གིས་བསྐོར་བ། ཁྲོ་བཅུ་ལས་སྟེང་འོག་གི་ཁྲོ་བོ་སྤངས་པའི་ཡབ་ཡུམ་ཟུང་བརྒྱད་བསྣན་པའི་ཞེ་དྲུག་ནི་ཚོམ་བུ་གསུམ་པ་དང་། རིགས་ལྔ་ཡབ་ཡུམ་རིགས་ཆུང་དང་བཅས་པ་ལ་ཁྲོ་བཅུ་ཡབ་ཡུམ་ཡ་ཉི་ཤུ་བསྣན་པའི་བདུན་ཅུ་ནི་ཚོམ་བུ་ལྔ་པའོ། །ཁྲོ་བོ་ལ་རྩ་རྒྱུད་དུ་ཚོགས་སྒྲུབ་ཙམ་ལས་མ་གསུངས་ནའང་། ལམ་རིམ་ལས། དེ་ནས་འཁོར་ལོ་གཅིག་པ་དང་། །གསུམ་དང་ལྔ་རུ་བསྒོམ་པར་བྱ། །ཞེས་པས། ཞི་བ་དང་མཚུངས་པར་ཚོམ་བུ་གཅིག་གསུམ་ལྔ་པ་གསུམ་སྟེ། གསུམ་ཀ་མཚུངས་པར་གནས་ཡུལ་སྒོ་སྐྱོང་དབང་མོ་དང་བཅས་པ་བཞིར་བཞག་ནས། ཚོམ་བུ་གཅིག་པའི་སྐབས་སུ་དབུས་སུ་རྡོ་རྗེ་ཁྲག་འཐུང་ཡབ་ཡུམ་ལ་རྡོ་རྗེ་རིགས་ཀྱི་རིགས་ཆུང་གི་ཁྲོ་བོ་ཡབ་ཡུམ་བཞིས་བསྐོར་བ་དང་། མཐའ་སྐོར་དུ་ཁྲོ་བཅུ་ཡབ་ཡུམ་ཡ་ཉི་ཤུ་སྟེ་དོན་བརྒྱད་ནི་ཚོམ་བུ་གཅིག་པ། ཚོམ་ ― MLP018_Page_0181 ―
[མ་དཔེ་གཟིགས་ན་འདིར་གནོན།]
བུ་གསུམ་པའི་སྐབས་སུ་དེ་རྣམས་ཀྱི་སྟེང་དུ ། ཤར་ནུབ་ཏུ་བུདྡྷ་དང་པདྨ་ཁྲག་འཐུང་ཡབ་ཡུམ་རིགས་ཆུང་དང་བཅས་བསྣན་པའི་ལྷ་གོ་བརྒྱད་ནི་ཚོམ་བུ་གསུམ་པ། ཚོམ་བུ་ལྔ་པའི་སྐབས་སུ་དེའི་སྟེང་དུ་ལྷོ་བྱང་གཉིས་སུ་རཏྣ་དང་ཀརྨ་ཁྲག་འཐུང་རིགས་ཆུང་དང་བཅས་བསྣན་པའི་བརྒྱ་དང་བཅོ་བརྒྱད་དོ། །གསུམ་པ་གྲངས་སྤྲོ་བ་ནི། སྣང་བ་རྣམ་འབྱེད་ལ་བསླབ་པ་སྟེ། དེ་ལ་ཞི་ཁྲོ་གཉིས་ལས། ཞི་བ་ལའང་ཚོམ་བུ་སྟོང་དང་། ཉི་ཁྲི་བཞི་སྟོང་དང་། བསམ་ཡས་ལྷུན་གྲུབ་ལ་བསླབ་པའོ། །དང་པོ་ནི། འདི་ཉིད་ལས། ཡན་ལག་བཞི་བཅུ་རྩ་གཉིས་ལྡན། །དེ་ཉིད་ཡན་ལག་སྤྲོས་དག་སྟེ། །བཞི་བཅུ་རྩ་གཉིས་གསུམ་འཕྲོར་འགྱུར། །ཞེས་པས་ཡན་ལག་གི་ལྷ་བཞི་བཅུ་ཐམ་པ་རྩ་ལྷ་ཡབ་ཡུམ་གཉིས་ལ་ལྡན་པར་བསྒོམས་པ་སྟེ། དེ་ཡང་མི་བསྐྱོད་པ་ལ་མཚོན་ན་བདག་ཉིད་མི་བསྐྱོད་པ་ཡབ་ཡུམ་དུ་གསལ་བའི་ཡབ་ཀྱི་ཡན་ལག་ལྔ་ལ་བྱེད་པ་པོ་དང་རྒྱལ་བ་རིགས་བཞི། མིག་རྣ་བ་སྣ་ལྕེ་བཞིའི་གཡས་ཀྱི་ཆ་ལ་ནང་སེམས་དང་། གཡོན་གྱི་ཆ་ལ་ཕྱི་སེམས་བཞི། རྐང་ལག་གི་མཐིལ་བཞིར་སྒོ་བ་བཞི་རྣམས་དང་། ཡུམ་གྱི་གནས་དེ་རྣམས་སུ་སྔར་གྱི་ཡུམ་རྣམས་བསྒོམ། ཡབ་ལ་ལྷག་པོར་མཚོག་མ་ལ་སོགས་པའི་གནས་དྲུག་ཏུ་ཐུབ་པ་དྲུག་སྟེ། དེ་ལྟར་སྡོམ་པའི་ཡན་ལག་གི་ལྷ་བཞི་བཅུ་ནི་རགས་པ་དང་ཕྱིར་གནས་པའི་ཆ་ནས་ཐབས་ལྷ་ཞེས་བྱ། དེ་རྣམས་ལ་ཤེས་རབ་ཀྱི་ལྷ་ཡེ་ཤེས་སེམས་དཔའ་བཞི་བཅུ་ཐབས་ལྷ་བཞི་བཅུ་པོ་རེ་རེ་ལ་སྐུ་གསུང་ཐུགས་ཀྱི་ལྷ་གསུམ་གསུམ་སྟེ་བརྒྱ་ཉི་ཤུ། ཐབས་ལྷ་དང་བྱིན་རླབས་ཀྱི་ལྷ་བསྡོམས་པས་བརྒྱ་དྲུག་ཅུ་པོ་རེ་རེ་ལ་ཡང་དབང་ལྷ་ལྔ་ལྔ་སྟེ་བརྒྱད་བརྒྱ། ཀུན་དྲིལ་བས་ཆིག་སྟོང་བསྒོམ་པས་ནི་ཚོམ་བུ་སྟོང་ལ་བསླབ་པ་ཞེས་བྱའོ། །གཉིས་པ་ཉི་ཁྲི་ཆིག་སྟོང་ལ་བསླབ་པ་ནི། འདི་ཉིད་ལས། དེ་ལྟར་ལྡན་པའི་གཙོ་མཆོག་གིས། །རྒྱལ་བ་རྒྱལ་མཆོག་དེ་བཞིན་ཉིད། །བཅུ་གཉིས་དྲུག་གི་འོད་འཕྲོ་འབར། །ཞེས་གསུངས་པས། མི་བསྐྱོད་པ་ལ་ཇི་ལྟར་བསྒོམ་པ་བཞིན་དུ་རྒྱལ་བ་རིགས་བཞི། རྒྱལ་མཆོག་ཀུན་ཏུ་བཟང་པོ་དང་། སེམས་དཔའ་བརྒྱད། སྒོ་བ་བཞི་སྟེ་ཡབ་ཡུམ་ཟུང་བཅུ་བདུན། ཐུབ་དྲུག་སྟེ་རེ་རེ་ལའང་དེ་ལྟར་བསྒོམ་པ་ནི་ཉི་ ― MLP018_Page_0182 ―
[མ་དཔེ་གཟིགས་ན་འདིར་གནོན།]
ཁྲི་བཞི་སྟོང་ལ་བསླབ་པ་ཞེས་བྱའོ། །གསུམ་པ་བསམ་ཡས་ལྷུན་གྲུབ་ལ་བསླབ་པ་ནི། འདི་ཉིད་ལས། དེ་ལ་སོགས་ཏེ་བསམ་མི་ཁྱབ། །ཅེས་གསུངས་པས། དེ་ལྟར་མི་བསྐྱོད་པས་གཙོ་བྱས་པའི་དབུས་ཀྱི་དཀྱིལ་འཁོར་ལ་ཡན་ལག་གི་ལྷ་ཇི་ལྟར་བསྒོམ་པ་དེ་བཞིན་དུ། ཤར་གྱི་གློ་འབུར་ལ་རྣམ་སྣང་གིས་གཙོ་བྱས་པའི་དཀྱིལ་འཁོར་གྱི་འཁོར་ལོ་བསྒོམས་པ་སོགས་རིགས་འགྲེས་པས་བསམ་གྱིས་མི་ཁྱབ་པར་སྤྲོ་བའོ། །ཁྲོ་བོ་ལ་ཡང་། སྟོང་བཞི་བརྒྱ་ལྔ་བཅུ་ལ་བསླབ་པ། བདུན་ཁྲི་དྲུག་སྟོང་བརྒྱད་བརྒྱ་ལྔ་བཅུ་ལ་བསླབ་པ། བསམ་ཡས་ལྷུན་གྲུབ་ལ་བསླབ་པ་དང་གསུམ་ལས། དང་པོ་ནི། ལམ་རིམ་ལས། ཡན་ལག་བཀོད་པ་ལྔ་བཅུ་བརྒྱད། །ཆ་ལྔའི་གྲངས་ནི་ཉིས་བརྒྱ་དང་། །དགུ་བཅུའི་ལྷ་རྣམས་ཡན་ལག་ལྡན། །ཞེས་པས་གཙོ་བོ་བཛྲ་ཧེ་རུ་ཀའི་ཡན་ལག་ལྔ་ལ་ཁྲག་འཐུང་ཡབ་ལྔ་དང་། ཡུམ་ལ་ཡུམ་ལྔ། ཡབ་ཀྱི་དབང་རྟེན་གྱི་ནང་རྩར་གཽ་རཱི་མ་བརྒྱད་དང་། ཕྱི་རྩར་སེང་ཧ་མ་བརྒྱད། མཐིལ་བཞི་ལ་སྒོ་མ་བཞི། མཇིང་མཇུག་གི་ཚིགས་བསྣན་པའི་སྒལ་ཚིགས་ཉེར་བརྒྱད་ལ་དབང་མོ་ཉེར་བརྒྱད་དེ་ཐབས་ལྷ་ང་བརྒྱད། དེ་རྣམས་ལ་ཡེ་ཤེས་སེམས་དཔའ་དང་སྐུ་གསུང་ཐུགས་ཀྱི་ལྷ་རྣམས་རེ་རེ་བསྒོམས་པས་ང་བརྒྱད་པ་ཆ་ལྔ་ལ་ཉིས་བརྒྱ་དགུ་བཅུ། དེ་ལས་ཤེས་རབ་ཀྱི་ལྷ་ང་བརྒྱད་ཕྲི་བའི་བྱིན་རླབས་དང་། ཐབས་ལྷ་གཉིས་པོ་རེ་རེ་ལ་དབུ་རྒྱན་གྱི་ལྷ་ལྔ་ལྔ་སྟེ་སྟོང་གཅིག་བརྒྱ་དྲུག་ཅུ་འབྱུང་བ་ཉིས་བརྒྱ་དགུ་བཅུ་ལ་བསྣན་པས། སྟོང་བཞི་བརྒྱ་ལྔ་བཅུ་སྒོམ་པ་ནི་དེའི་དཀྱིལ་འཁོར་ལ་བསླབ་པ་ཞེས་བྱའོ། །གཉིས་པ་བདུན་ཁྲི་དྲུག་སྟོང་བརྒྱད་བརྒྱ་ལྔ་བཅུ་ལ་བསླབ་པ་ནི། ཁྲག་འཐུང་རིགས་ལྔ་ཡབ་ཡུམ་ཟུང་ལྔ་སྔར་ལྟར་དང་། གནས་ཡུལ་སྒོ་སྐྱོང་དབང་མོ་རྣམས་ལ། མགོ་ཡི་གཡས་དང་རྐང་ལག་གི་གཡས་ཀྱི་མདུན་རྒྱབ་ལ་ཡབ་ལྔ། མགོ་ཡི་གཡོན་དང་རྐང་ལག་གི་གཡོན་གྱི་མདུན་རྒྱབ་ལ་ཡུམ་ལྔ་བཀོད་དེ། ལྷ་རེ་རེ་ལ་སྟོང་བཞི་བརྒྱ་ལྔ་བཅུ་བསྒོམ་པའི་ངེས་པས་བདུན་ཁྲི་དྲུག་སྟོང་བརྒྱད་བརྒྱ་ལྔ་བཅུ་ལ་བསླབ་པ་ཞེས་བྱའོ། །གསུམ་པ་བསམ་ཡས་ལྷུན་གྲུབ་ལ་བསླབ་པ་ནི། སྔར་ཞི་བའི་སྐབས་སུ་བཤད་པས་མཚོན་ནོ། །བཞི་པ་ཞལ་ཕྱག་སྤྲོ་བ་ནི། ཞི་ཁྲོ་གཉིས་ཀ་ལ་རྒྱས་ ― MLP018_Page_0183 ―
[མ་དཔེ་གཟིགས་ན་འདིར་གནོན།]
འབྲིང་བསྡུས་གསུམ་སྟེ། ཞི་བ་ལ་རྒྱས་པར་བཤད་རྒྱུད་རྡོ་རྗེ་ནས་ཐུབ་དྲུག་དང་ཡུམ་རྣམས་མ་གཏོགས་ཐམས་ཅད་ཞལ་གསུམ་ཕྱག་དྲུག་པར་བཤད། འབྲིང་པོ་རིགས་ལྔ་ཙམ་མམ་གཙོ་བོ་ཞལ་གསུམ་ཕྱག་དྲུག་པ། བསྡུས་པ་ཐམས་ཅད་ཞལ་གཅིག་ཕྱག་གཉིས་པའོ། །ཁྲོ་བོ་ལ་གཙོ་བོ་དབུ་ཕྱག་གྲངས་མེད་པ་དང་། དབུ་དགུ་ཕྱག་བཅོ་བརྒྱད་པ། ཆ་མཐུན་གྱི་རྒྱུད་ལྷ་མོ་སྒྱུ་དྲྭ་ནས་གནས་ཡུལ་གྱི་མ་མོ་སོགས་ཀྱང་ཞལ་གསུམ་ཕྱག་དྲུག་པ་ཞིག་བཤད་ཀྱང་། ད་ལྟ་ཕྱག་བཞེས་སུ་རྒྱས་པ་ལ་རིགས་ལྔ་ཞལ་གསུམ་ཕྱག་དྲུག་པ། འབྲིང་པོ་གཙོ་བོ་ཙམ་ཞལ་གསུམ་ཕྱག་དྲུག་པ། བསྡུས་པ་ཐམས་ཅད་ཞལ་གཅིག་ཕྱག་གཉིས་པའོ། །དེ་ལྟར་ཕྱག་རྒྱ་སྤྲོས་བཅས་ཀྱི་ལམ་དེ་བསྒོམ་པས། མར་འཁོར་བའི་བག་ཆགས་གང་དག་ན། བྱིས་པ་བཙས་པ་དེ་ནར་སོན་ནས་འདོད་པའི་ཚོར་བས་གདུང་སྟེ། དོན་དུ་གཉེར་བ་ཆུང་མ་ལེན་པ། སྒོ་གསུམ་གྱི་ནུས་པ་རིམ་གྱིས་འཕེལ་བ་རང་རིགས་ཀྱི་བྱ་བ་ལ་དབང་བསྒྱུར་བ་རྣམས་ཀྱི་བག་ཆགས་དག་པར་བྱེད། ཡར་སངས་རྒྱས་སྤྲུལ་པའི་སྐུ་དེས་གདུལ་བྱ་རྣམས་བྱང་ཆུབ་ལ་འགོད་པའི་རིགས་ཀྱི་ནུས་པ་གསོས་འདེབས་པས་འབྲས་བུ་རྫོགས་པར་བྱེད། བར་ཕྱག་རྒྱ་སྤྲོས་བཅས་ཀྱི་ལམ་དེ་བསྒོམ་པས། ཟུང་འཇུག་གི་ལྷ་སྐུའི་རྩལ་སྣང་གོང་ནས་གོང་དུ་འཕེལ་བའི་གཞི་འདིང་བས་ལམ་གོང་མའི་སྨིན་བྱེད་དུ་འགྲོ་བ་ཡིན་ནོ་གསུངས། ལྔ་པ་ཚོམ་བུ་ཚོགས་སྒྲུབ་ཀྱི་ལམ་གྱི་རྣལ་འབྱོར་ལ། ཕུན་སུམ་ཚོགས་པ་ལྔས་བསྒྲུབ་པའི་གཞི་བཟུང་བ། བསྙེན་སྒྲུབ་ཡན་ལག་བཞིས་གཞུང་བསྲང་བ། འབྲས་བུ་རིག་འཛིན་ཐོབ་པའི་དུས་བསྟན་པ་དང་གསུམ། དང་པོ་ལའང་ལྔ་ལས། གང་དུ་བསྒྲུབ་པའི་གནས་ཕུན་སུམ་ཚོགས་པ་ནི། ལམ་རིམ་ལས། བསྐོར་ཁང་ཕྱི་ནང་བར་ལྡན་པ། །ཞེས་པས་བདག་དབང་བར་ཆད་མེད་པའི་གནས་སུ་ཚོགས་ཀྱི་ཁང་པ་སྟེང་འོག་དང་འཁོར་ཁང་གཉིས་ཀ་རིམ་པ་གསུམ་ལྡན་བརྩིག བར་ཁང་དུ་ཆུ་ཚོན་སོགས་ཀྱིས་ཚོམ་བུ་གང་བསྒོམ་གྱི་དཀྱིལ་འཁོར་བྲིས་པ་རྒྱན་དང་ལྡན་པའོ། །གཉིས་པ་གང་གི་ཚེ་སྒྲུབ་པའི་དུས་ཕུན་སུམ་ཚོགས་པ་ནི། དེ་ཡང་སྒྲུབ་པ་ལ་འཇུག་པའི་དུས་ནི། རྒྱས་པ་ལས། ཚེས་གྲངས་ཡར་གྱི་བརྒྱད་ནས་བརྩམ། ། ― MLP018_Page_0184 ―
[མ་དཔེ་གཟིགས་ན་འདིར་གནོན།]
ཤིན་ཏུ་སྐར་མ་རྒྱལ་རྣམས་ལ། །བྱང་ཆུབ་སྤྱོད་པ་ཆེར་སྤྱོད་པ། །གསང་མཆོག་དངོས་གྲུབ་མྱུར་བའི་ཕྱིར། །གཟའ་སྐར་ཤིས་པར་བླང་བར་བྱ། །ཞེས་དང་། རྔམ་གློག་ལས་ཀྱང་། རིག་བྱེད་དག་གི་ཡན་ལག་ལས། །དུས་རྣམས་ཤེས་པར་བྱ་བ་ནི། །བཀྲ་ཤིས་ལྷ་ཡི་ཉི་མ་དང་། །འབྱོར་དང་དུས་ཚོད་བཟང་བ་ནི། །མཚན་མའི་རྟོག་པ་ཡིན་མོད་ཀྱང་། བརྟགས་ན་དངོས་གྲུབ་མཚན་མ་འབྱུང་། །ཞེས་སོ། །གསུམ་པ་གང་ལ་བརྟེན་ནས་བསྒྲུབ་པའི་ཡོ་བྱད་ཕུན་སུམ་ཚོགས་པ་ནི། འཚོ་བ་ཟས་ཀྱི། རྐྱེན་བཟློག་སྨན་གྱི། སྒྲུབ་པ་རྫས་ཀྱི། མཆོད་པ་རྫས་ཀྱི་ཡོ་བྱད་རྣམས་ཚང་བར་གསོག་པ་སྟེ། ལམ་རིམ་ལས། གོས་རྒྱན་བཟའ་བཏུང་གསང་བ་དང་། །སྒྲུབ་པའི་ཡོ་བྱད་ལྔ་རྣམས་དང་། །དཀྱིལ་འཁོར་ཡོ་བྱད་མཆོད་པའི་རྫས། །དངོས་གྲུབ་རྟེན་དང་བར་ཆད་བཟློག །ཡོ་བྱད་དག་པ་བསྡུ་བྱ་སྟེ། །ཞེས་གསུངས་སོ། །དེ་ཡང་དང་པོ་ཚོ་གསུམ་དུ་བཅད་དེ། ཆ་གཅིག་གི་སྔོན་དུ་མཆོད་སྦྱིན་བྱ་བ། ཆ་གཅིག་མཇུག་ཏུ་དགའ་སྟོན་གྱི་ཕྱིར་བཞག ཆ་གཅིག་རཾ་ཡཾ་ཁཾ་གིས་སྦྱངས་ལ་ཏྲྃ་ལས་འདོད་ཡོན་དུ་བྱིན་གྱིས་བརླབས་ནས་སྒྲུབ་པའི་ཆ་རྐྱེན་དུ་འཇོག་སྟེ། ལམ་རིམ་ལས། ཚོ་གསུམ་བཅད་ལ་བྱིན་གྱིས་བརླབ། །ཅེས་སོ། །བཞི་པ་གང་གིས་སྒྲུབ་པའི་སྒྲུབ་པ་པོ་ཕུན་སུམ་ཚོགས་པ་ལ་གཉིས་ཏེ། གང་གིས་སྒྲུབ་པའི་སྟོན་པ་ཕུན་སུམ་ཚོགས་པ་ནི། ལམ་རིམ་ལས། སྟོན་པ་མཛོད་ལྡན་ཆུ་བོ་རྫོགས། གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་འཆང་བརྒྱད་འཆང་བ། །རྣལ་འབྱོར་མཐའ་ལྡན་ཤིན་ཏུ་བསྟེན། །ཞེས་སོ། །གཉིས་པ་གང་དང་ལྷན་ཅིག་ཚོགས་པའི་འཁོར་ཕུན་སུམ་ཚོགས་པ་ནི། སྤྱིར་ཡོན་ཏན་དྲུག་ལྡན་གྱི་འཁོར་ཏེ། འདི་ཉིད་ལས། སྟོན་པ་མཆོད་བརྩོན་རྟོགས་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །ཞེས་སོ། །ཁྱད་པར་སློབ་དཔོན་དང་དགོངས་པ་མཉམ་པའི་རྡོ་རྗེ་རྒྱལ་ཚབ། སྐད་གདངས་ཆེ་ཞིང་ལས་ཁྲིགས་ལ་མཁས་པའི་ཀརྨ་གདངས་ཅན། སྦྱོར་བའི་སྒྱུ་རྩལ་ཤེས་པའི་ལས་བཞིའི་གཟུངས་མ། མིག་རྣོན་གྱི་མི་མ་ཡིན་མཐོང་ལྡོག་ནུས་པའི་རྡོ་རྗེ་སྤྱན་པ། དྲོད་འཛིན་པའི་རྡོ་རྗེ་བྱ་རོག སྒྲོལ་བའི་ལས་ལ་མཁས་པའི་ཀིང་ཀ་ར། གཡོས་ལ་མཁས་ ― MLP018_Page_0185 ―
[མ་དཔེ་གཟིགས་ན་འདིར་གནོན།]
པའི་རྡོ་རྗེ་བྱན་པོ། ཕྱི་ནང་གི་བརྡ་སྦྱོར་མཁས་པའི་རྡུལ་ཕྱགས་སྐྱེས་བུ་སོགས་ཚོམ་བུར་འབྲེལ་བའི་འཁོར་ཕུན་སུམ་ཚོགས་པ་སྟེ། ལམ་རིམ་ལས། རྒྱལ་ཚབ་རྒྱལ་པོར་མཚུངས་པ་དང་། །ཀརྨ་གདངས་ཅན་ཕྲིན་ལས་ལྡན། །ལྗོན་ལྕུག་སྡོང་རེག་མཚན་རྫོགས་དང་། །རྣལ་འབྱོར་མིང་སྲིང་བརྩེ་གདུང་ལྡན། །ཚོམ་བུ་ལྔའམ་ཟུང་གིས་སྒྲུབ། །ཅེས་སོ། །ལྔ་པ་སྒྲུབ་པའི་ཐབས་ཕུན་སུམ་ཚོགས་པ་ནི། འདི་ཉིད་ལས། གནས་དང་ལོངས་སྤྱོད་ཅི་བདེ་དང་། །མ་ཉམས་བློ་ནི་རབ་ལྡན་པས། །དང་པོར་དམ་མནོས་བཞིན་དུ་བྱ། །ལེ་ལོ་སྒྱིད་སྙོམས་མེད་པ་ཡིས། །ཐེ་ཚོམ་མེད་པར་བསྒྲུབ་བྱས་ན། །དཀྱིལ་འཁོར་ཐམས་ཅད་འགྲུབ་པར་འགྱུར། །ཞེས་སོ། །གཉིས་པ་བསྙེན་སྒྲུབ་ཡན་ལག་བཞིས་གཞུང་བསྲང་བ་ནི། བསྙེན་པ་དང་ནི་ཉེ་བསྙེན་དང་། །བསྒྲུབ་པ་དང་ནི་སྒྲུབ་ཆེན་པོ། །ཞེས་པས་འདིར་བསྐྱེད་རིམ་གྱི་སྐབས་ཡིན་པས། སྔར་བཤད་པའི་གནས་སུ་དཀྱིལ་འཁོར་གྱི་ལྷ་གནས་སོ་སོར་རྣལ་འབྱོར་པ་ཕོ་མོ་དང་ལྷ་ཡབ་ཡུམ་བྲང་སྤྲད་དེ་འདུག་ནས་སོ་སོའ་ང་རྒྱལ་བརྟན་པོ་ལ་སེམས་རྩེ་གཅིག་ཏུ་གནས་ནས་རིམ་པར་གཤོམ་དང་འབྲེལ་བར། ནུབ་དང་པོ་འགོ་འཛིན་གྱི་ཚུལ་དུ་བྱ་བ་བསྙེན་པ། ཇི་ཙམ་སྒྲུབ་པའི་ཞག་གྲངས་ཕྱེད་ཚུན་ཆད་ཉེ་བསྙེན་ཏེ། དེ་གཉིས་ལས་འོད་ཟེར་དཀར་པོའི་འཕྲོ་འདུ་བསྣོལ་མས་སྣོད་དག་པར་བྱེད་པ་བསྙེན་པ་དང་། ཉེ་བསྙེན། ནུབ་ཐ་མ་མ་གཏོགས་པའི་ཕྱེད་ཕན་ཆད་འོད་ཟེར་དམར་པོའི་འཕྲོ་འདུས་དངོས་གྲུབ་བསྐུལ་ཞིང་བསྡུ་བས་བཅུད་དག་པར་བྱེད་པ་སྒྲུབ་པ་དང་། ནུབ་ཐ་མར་འོད་ཟེར་མཐིང་ག་ཚུར་བསྡུས་ཏེ་རྒྱུད་དག་པར་བྱེད་པའི་སྒོ་ནས། སྲོད་ཀྱི་ཆ་ལ་ལྷ་ལས་དངོས་གྲུབ་བླངས། ནམ་གུང་གི་ཚེ་ཏ་ན་སྒྲོལ་བའི་མཛད་སྤྱོད་ཀྱིས་དགྲ་ལས་དངོས་གྲུབ་བླངས། ཐོ་རེངས་ཡུམ་དང་གཉིས་མེད་དུ་སྦྱོར་བའི་སྒོ་ནས་ཨ་ལིའི་མཛད་སྤྱོད་ཀྱིས་ཡུམ་གྱི་མཁའ་ལས་དངོས་གྲུབ་ལེན་པ་སྒྲུབ་པ་ཆེན་པོ་སྟེ། ཟླ་བ་གཅིག་ལ་དཔེར་མཚོན་ན། ལམ་རིམ་ལས། ཟླ་ཕྱེད་ཕྱེད་ཞལ་ཉེ་བསྙེན་པ། །ལྷ་གསལ་འཕྲོ་འདུས་སྣོད་དུ་རུང་། །བཅོ་ལྔ་མར་ཕྱེད་སྒྲུབ་པ་སྟེ། །འཕྲོ་ ― MLP018_Page_0186 ―
[མ་དཔེ་གཟིགས་ན་འདིར་གནོན།]
འདུ་བསྣོལ་མས་བསྒྲུབ་པ་བྱ། །ཞག་གྲངས་ཚང་ནས་རྟགས་བྱུང་ན། །དངོས་གྲུབ་བཟླས་བླང་སྒྲུབ་ཆེན་པོ། །ཞེས་སོ། །གསུམ་པ་འབྲས་བུ་རིག་འཛིན་འགྲུབ་པའི་དུས་བསྟན་པ་ནི། དེ་ལྟར་ཟླ་བ་དྲུག་སྤོག་ཆོག་དང་བཅས་པས་རིག་འཛིན་གྱི་འབྲས་བུ་གྲུབ་སྟེ། འདི་བསྐྱེད་རིམ་ཡིན་པས་ཐུན་མོང་གི་དངོས་གྲུབ་ལས་རྒྱ་དང་ཡེ་རྒྱའི་ཁྱད་པར་གྱིས་འདོད་པའི་རིག་པ་འཛིན་པ་དང་། གཟུགས་ཀྱི་རིག་འཛིན་གང་རིགས་ལ་སྦྱོར་བའོ། །ལམ་འདིས་འཁོར་བའི་བག་ཆགས་གང་དག་ན། སྐྱེས་པའི་རིམ་པ་གསུམ་པ་སྟེ། དེ་ནས་བྱིས་པ་དེ་རྒན་པོ་རྣམས་དང་བློ་གྲོས་མཉམ་པས་སྤྱད་རིས་དང་ཁེ་གྲགས་ལ་སོགས་པའི་བག་ཆགས་དག་པར་བྱེད། ཡར་སངས་རྒྱས་རྣམས་མཆོད་སྤྲིན་མཐའ་ཡས་པའི་རོལ་མོ་ལ་དགྱེས་དགུར་སྤྱོད་པའི་རིགས་ཀྱི་ནུས་པ་གསོས་འདེབས་པའི་འབྲས་བུ་རྫོགས་པར་བྱེད། བར་དུ་ཚོགས་སྒྲུབ་ཀྱི་ལམ་དེ་བསྒོམ་པས། བདེ་སྟོང་གི་ལྷ་སྐུར་འགྲུབ་པར་བྱེད་པའི་ཕྱིར་མཆོག་གི་དངོས་གྲུབ་ལ་མྱུར་དུ་སྦྱོར་བའི་གཞི་འདིང་བས་ལམ་གོང་མའི་སྨིན་བྱེད་དུ་འགྲོ་གསུངས། གཉིས་པ་ལམ་གྱི་གཞུང་ཤིང་རྫོགས་རིམ་ལྟར་བཤད་ན། སྟོང་པ་ཆེན་པོ་ལ་སོགས་པའི་ལམ་གྱི་རྣལ་འབྱོར་ལྔ་ལས། དང་པོ་སྟོང་པ་ཆེན་པོའི་རྣལ་འབྱོར་ནི། དེ་ཡང་ལུས་ཅན་རྣམས་འཆི་བའི་ཚེ། འབྱུང་བ་ལྔ་དང་དཀར་དམར་ནག་གསུམ་རིམ་པར་ཐིམ་ནས་རྣམ་པར་མི་རྟོག་པའི་འོད་གསལ་འཆར་ཏེ། ཐལ་འགྱུར་ལས། འགྲོ་བ་མ་ལུས་ཐམས་ཅད་དག །གནས་པའི་སྟོབས་ནི་ཟད་པ་ན། །འདུས་པ་ལྔ་ཡི་རིམ་པ་ཡིས། །བག་ཆགས་སྙིགས་མ་རང་ཟད་ནས། །འོད་གསལ་སྟོང་པར་སྣང་བས་ན། །རེ་དོགས་མེད་པ་ནམ་མཁའ་བཞིན། །ཞེས་གསུངས་པ་ལྟར། དེ་ལམ་དུ་ཁྱེར་ཏེ་དེ་དང་རྗེས་སུ་མཐུན་པའི་ལམ་བསྒོམ་ཚུལ་ཡང་། ལྟ་བ་གཏན་ལ་འབེབས་པ་གཞིར་བཞག་སྟེ། བསམ་གཏན་ལ་ཚེར་མ་མི་འབྱུང་བའི་གནས་སུ་ལུས་གནད་རྣམ་པར་སྣང་མཛད་ཀྱི་ཆོས་བདུན་དང་ལྡན་པས། རིག་པ་མ་བཅོས་པའི་ངང་དུ་སོ་མར་འཇོག་པ་རིག་པ་སྤྱི་བླུགས་དང་། སྔར་གྱི་ཐོས་བསམ་གྱི་ལྟ་བ་དྲན་པར་བྱས་ནས་ ― MLP018_Page_0187 ―
[མ་དཔེ་གཟིགས་ན་འདིར་གནོན།]
དེའི་ངང་དུ་འཇོག་པ་མཐོང་བའི་རྗེས་ལ་འཇོག་པ་སྟེ། འཇོག་ཐབས་གཉིས་པོ་གང་རུང་གི་རྣམ་པར་མི་རྟོག་པའི་ཏིང་ངེ་འཛིན་ལ་མཉམ་པར་འཇོག་པ་ཉིན་མོའ་རྣལ་འབྱོར་དང་། མཚན་མོ་གཉིད་འཐུག་གི་འོད་གསལ་འཛིན་པའི་མན་ངག་གཉིས་སྦྲེལ་ཏེ་ཉིན་མཚན་ཁ་སྦྱོར་དུ་ཉམས་སུ་ལེན་པའི་སྒོ་ནས་ཉམས་ལྔ་མཐར་ཕྱིན་པར་བསླབ་པའོ། །གཉིས་པ་སྙིང་རྗེ་སྒྱུ་མའི་རྣལ་འབྱོར་ནི། སྔར་གྱི་འཆི་ཁའི་འོད་གསལ་ངོས་མ་ཟིན་པ་ལས་སྣང་གསུམ་འབྱུང་ལྔའི་བགྲོད་པ་གོ་བཟློག་གི་ཚུལ་དུ་ལངས་ཏེ་བར་དོའ་ཡིད་ལུས་སྒྱུ་མ་ལྟ་བུར་གྲུབ་སྟེ། སྔ་མ་ལས། བར་མ་སྒྱུ་མའི་ལུས་ཐོབ་པས། །མ་སྤངས་ལོངས་སྤྱོད་རྫོགས་པར་བཤད། །ཅེས་གསུངས་པ་ལྟར། དེ་ལམ་དུ་ཁྱེར་ནས་དེ་དང་རྗེས་སུ་མཐུན་པའི་ལམ་སྒོམ་ཚུལ་ཡང་། སྔར་གྱི་སྟོང་ཆེན་འོད་གསལ་གྱི་ངང་དུ་སེམས་འགགས་པས། དུ་བ་དང་། སྨིག་རྒྱུ་དང་། མེ་ཁྱེར་ལྟ་བུ་དང་། མར་མེ་ལྟ་བུ་དང་། དཀར་དམར་ནག་གསུམ་ལ་སོགས་པའི་སྟོང་གཟུགས་ཀྱི་སྣང་བ་ཤར་བ་ན་ཉིན་གྱི་རྣལ་འབྱོར་སད་པའི་སྣང་བ་དེ་དང་། མཚན་མོ་རྨི་ལམ་གྱི་སྣང་བ་ཐམས་ཅད་སྒྱུ་མ་ཆུ་ཟླ་ལྟ་བུར་མཐོང་བ་ལ་དམིགས་མེད་ཀྱི་སྙིང་རྗེ་མ་འགགས་པར་རང་ཤར་བ་ལ་གོམས་ཤིང་བསླབ་པར་བྱེད་པའོ། །གསུམ་པ་ཕྱག་རྒྱ་གཅིག་པའི་རྣལ་འབྱོར་ནི། བསྐྱེད་པའི་རིམ་པ་དང་པོའི་བག་ཆགས་སྦྱོང་བའི་ཕྱིར། དེ་དང་རྗེས་སུ་མཐུན་པའི་ལམ་སྟེ། སྣང་བ་རིས་མེད་ལ་སྙིང་རྗེ་ཆེན་པོའི་འཕེན་པ་དང་། ཏིང་ངེ་འཛིན་གྱིས་ཆུ་དྭངས་པ་ལ་གཟུགས་བརྙན་ཤར་བ་ལྟར་ཞུ་བདེ་དང་མཚུངས་ལྡན་དུ་གྱུར་པའི་ལྷ་སྐུ་ཕྱག་རྒྱ་གཅིག་པ་རང་ཤར་གྱིས་སྣང་བ་ཐམས་ཅད་ལ་རྒྱས་ཐེབས་པའོ། །བཞི་པ་ཕྱག་རྒྱ་སྤྲོས་བཅས་ཀྱི་རྣལ་འབྱོར་ནི། སྐྱེ་བའི་རིམ་པ་བར་མའི་བག་ཆགས་སྦྱོང་བའི་ཕྱིར། དེ་དང་མཐུན་པའི་ལམ་སྟེ་སྔར་གྱི་ལྷ་སྣང་དེ་ལས་ཆེས་ཆེར་འཕེལ་བའི་སྣང་བ་ཐམས་ཅད་ཟུང་འཇུག་གི་ལྷ་གཙོ་འཁོར་དང་ཚོམ་བུའི་རྣམ་པར་མངོན་སུམ་དུ་སྤྲོས་ཏེ་མ་འདྲེས་ཡོངས་རྫོགས་སུ་འཆར་བ་ལ་གོམས་པར་བྱེད་པའོ། །ལྔ་པ་ཚོམ་བུ་ཚོགས་སྒྲུབ་ནི། སྐྱེ་བའི་རིམ་པ་གསུམ་པའི་བག་ཆགས་སྦྱོང་བའི་ཕྱིར། དེ་དང་རྗེས་སུ་མཐུན་པའི་ལམ་སྟེ། ཚོམ་བུ་གཅིག་གསུམ་ལྔ་ ― MLP018_Page_0188 ―
[མ་དཔེ་གཟིགས་ན་འདིར་གནོན།]
པ་གང་རུང་གི་སྒོ་ནས་སྤྲོས་བཅས་བསྐྱེད་རིམ་དང་ཕྱོགས་མཐུན་དུ་སྒྲུབ་པའམ། སྤྲོས་མེད་རྣལ་འབྱོར་ཕོ་མོ་གཙོ་བོ་ཡབ་ཡུམ་ཚོགས་པ་ལ་བརྟེན་པའམ་ཤིན་ཏུ་སྤྲོས་མེད་ཡབ་མི་འགྱུར་བའི་བདེ་བ་ཆེན་པོ་དང་། ཡུམ་རྣམ་ཀུན་མཆོག་ལྡན་གྱི་སྟོང་པ་ཉིད་ཁ་སྦྱོར་དུ་སྒྲུབ་པ་སྟེ། གང་ལྟར་ཡང་དབང་པོ་རབ་འབྲིང་ཐ་གསུམ་གྱི་དབྱེ་བས་ཟླ་བ་དྲུག་གམ། ལོ་གཅིག་དང་ཟླ་བ་གཉིས། ལོ་གཅིག་དང་ཟླ་བ་བཞི་རྣམས་ཀྱིས་ནང་གི་མངོན་བྱང་ལྔ་ལ་བརྟེན་ནས་ཟག་མེད་མཐོང་ལམ་རྣམ་གཉིས་གང་རུང་ལ་སྦྱོར་བ་བྱེད་པ་སྟེ། ལམ་རིམ་ལས། ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །ཅེས་སོ། །ཞར་ལ་ཟག་ལྡོག་ཡོད་མེད་ཀྱི་མུ་བཞི་བརྗོད་པར་བྱ་སྟེ། དེ་ལ་ཟག་ལྡོག་གཉིས་ཀ་ཡོད་པའི་མུ་ནི། སྟོང་ཆེན་སྙིང་རྗེ་སྒྱུ་མ་ཕྱག་རྒྱ་གཅིག་སྤྲོས་ཏེ་ཚོགས་ལམ་གྱི་རྣལ་འབྱོར་བཞི་སྟེ། ལམ་རིམ་ལས། དེ་ཕྱིར་ལམ་བཞིར་ཟག་ལྡོག་ཡོད། །ཅེས་སོ། །ཟག་པ་ཡོད་ལ་ལྡོག་པ་མེད་པའི་མུ་ནི། སྦྱོར་ལམ་ཚོམ་བུ་ཚོགས་སྒྲུབ་སྟེ། སྤྱོད་པའི་དུས་གྲངས་ངེས་པ་ཟག་མེད་ལ་དངོས་སུ་སྦྱོར་བའི་བར་ཆད་མེད་ལམ་ཡིན་པའི་ཕྱིར་རོ། །ཟག་པ་མེད་ལ་ལྡོག་པ་ཡོད་པའི་མུ་ནི། དམན་ལམ་སྔོན་དུ་སོང་བའི་འཕགས་པ་དགྲ་བཅོམ་པ་སྔགས་ཀྱི་ཚོགས་ལམ་ལ་གནས་པ་ལྟ་བུ་སྟེ། དེ་ནི་རང་དོན་ཡིད་བྱེད་ཀྱི་བསམ་པས་ལྡོག་པར་སྲིད་པའི་ཕྱིར་ཏེ། རྡོ་རྗེ་རྩེ་མོ་ལས། ཇི་སྲིད་ས་བརྒྱད་མ་ཐོབ་བར། །དེ་སྲིད་ཐེག་པ་དམན་པས་འཇིག །ཅེས་སོ། །འོ་ན་ཟག་པ་ཞེས་པ་དེ་གང་ཞེ་ན། སྤྱིར་མངོན་པ་སོགས་ནས་ཟག་པའི་སྒོ་དྲུག་སོགས་བཤད་ཀྱང་། འདིར་ཟག་པའི་གཙོ་བོ་དང་། ཡན་ལག་གཉིས་ལས། གཙོ་བོ་ནི་ཀུན་ནས་ཉོན་མོངས་པ་དང་བཅས་པའི་ལས་ཀྱིས་ཁམས་གསུམ་དུ་ཟག་ཅིང་འཕོ་བ་སྟེ། སྤར་ཁབ་ལས། དེ་དག་འཇིག་རྟེན་པ་ལ་ཡོད་པ་ནི་འཛིན་པའི་ཕྱིར་ཟག་པར་འགྱུར་ལ། ཞེས་སོ། །ཡན་ལག་ནི། ལུས་རང་དབང་མེད་པར་ལེན་པ་སྐྱེ་གནས་ཀྱི་ཟག་པ། ཁམས་བདེ་མི་བདེ་རང་དབང་མེད་པར་མྱོང་བ་ཁམས་ཀྱི་ཟག་པ། རང་དབང་མེད་པར་ལུས་འདོར་བ་ལུས་ཀྱི་ཟག་པ་དང་གསུམ་མོ། ། ― MLP018_Page_0189 ―
[མ་དཔེ་གཟིགས་ན་འདིར་གནོན།]
གསུམ་པ་ལམ་གྱུར་གྱི་འབྲས་བུ་རིག་འཛིན་བཞི་ནི། ཟག་ལྡོག་གཉིས་ཀ་མེད་པའི་ལམ་མཐོང་སྒོམ་མཐར་ལམ་གསུམ་གྱིས་བསྡུས་པ་རིག་འཛིན་བཞི་སྟེ། དེ་ཡང་མཐོང་ལམ་པ་ལ་བློའི་ནུས་སྟོབས་ཆེ་ཆུང་གིས་འབྱུང་བ་སྙིགས་མའི་ལུས་ཡེ་ཤེས་ཀྱི་མེས་སྦྱོང་བར་མ་ནུས་པ་རྣམ་སྨིན་རིག་འཛིན་དང་། སྦྱོང་བར་ནུས་པས་སྐྱེ་འཇིག་མེད་པ་དྭངས་མའི་ལུས་སུ་གྱུར་པ་ལམ་མཆོག་ཡོངས་སུ་རྫོགས་པའི་ཚེ་དབང་གཉིས་ཏེ། ལམ་ཆུང་ལས། ནུས་པ་ཐོབ་དང་མ་ཐོབ་པའི། །མཐོང་ལམ་གཉིས་སུ་གྱུར་པ་ཡིན། །ཞེས་སོ། །དེ་ལ་རྣམ་སྨིན་རིག་འཛིན་ནི། ལུས་རྣམ་སྨིན་ཤ་ཁྲག་གི་ཕུང་པོ་དང་མ་བྲལ་བ། ཡིད་འོད་གསལ་གྱི་ལྷ་སྐུ་སྨིན་པ། ཇི་ལྟར་འདོད་པ་བཞིན་དུ་ལུས་རྒྱ་དང་བྲལ་མ་ཐག་ཕྱག་རྒྱ་ཆེན་པོའི་རིག་འཛིན་ལ་སྦྱོར་ངེས་པ་སྟེ། ཆོས་གསུམ་དང་ལྡན་པ་ཡིན་ཏེ། ལམ་རིམ་ལས། ཡིད་ཀྱིས་ལྷ་ཡི་གཟུགས་བཟུང་བཞིན། །ལུས་ཀྱི་རྒྱ་མདུད་གྲོལ་གྱུར་ན། །ཕྱག་རྒྱའི་སྐུ་ཉིད་གསལ་གྱུར་པས། །རྣམ་པར་སྨིན་ཞེས་དེ་ལ་བརྗོད། །ཅེས་སོ། །མཛད་སྤྱོད་ནི། བདག་དོན་དུ་བཀོད་པ་དཀྱིལ་འཁོར་གྱི་བྱ་བ་ལ་སོགས་པས་ཚོགས་གཉིས་རྫོགས་པར་བྱེད་ཅིང་། ཕྲིན་ལས་བཞིའི་སྒོ་ནས་གཞན་དོན་རྫོགས་པར་བྱེད། ཟག་མེད་ལྷའི་སྤྱན་རྣམ་པར་དག་པ་ལ་སོགས་པའི་ཡོན་ཏན་དང་ལྡན་ལ། གླིང་བཞི་པའི་འཇིག་རྟེན་ཙམ་དུ་སྐུ་དངོས་ཀྱིས་འགྲོ་དོན་མཛད་ཅིང་། སྤྲུལ་གཟུགས་སྟོན་ཚུལ་ཚེ་དབང་དང་ཆ་འདྲ་བ་ཙམ་མོ། །ཞར་བྱུང་དོགས་སེལ་ནི། རྣམ་སྨིན་གྱི་ལུས་དྭངས་མའི་ལུས་སུ་བསྒྱུར་མ་ནུས་པས་མཐོང་ལམ་དུ་ཅིའི་ཕྱིར་འགྱུར་ཞེ་ན། སྐྱོན་མེད་དེ་བྱང་ཆུབ་སེམས་དཔའ་དབང་རྟུལ་གྱི་ཟག་བཅས་ཀྱི་ལུས་ས་བདུན་པའི་བར་དུ་འགྲོ་བ་མདོ་ལས་བཤད་པ་དང་གནད་གཅིག་གོ་གསུངས། མཐོང་ལམ་ཚེ་དབང་རིག་འཛིན་ནི་ལུས་སེམས་གཉིས་ཀ་འོད་གསལ་གྱི་ལྷ་སྐུར་སྨིན་ཞིང་ཕྲ་ཡང་ལ་སོགས་པའི་འཇའ་ལུས་ཀྱི་ཡོན་ཏན་ཁྱད་པར་ཅན་དང་ལྡན་པའི་རྡོ་རྗེའི་ལུས་ཏེ། ལམ་རིམ་ལས། དོན་མཐོང་འཇུག་པ་མཐར་ཕྱིན་པའི། །ཚོགས་སྤྱོད་སྒྲུབ་པའི་དངོས་གྲུབ་ཀྱིས། །ལུས་ཁམས་སྐྱེ་གནས་ཟག་པ་ཟད། །རྡོ་རྗེའི་ལུས་འགྱུར་ཚེ་ཡི་རིག །ཅེས་སོ། །དེ་ཡང་སྤྱིར་ཚེ་དབང་ལ། སྨན་གྱི་བཅུད་ ― MLP018_Page_0190 ―
[མ་དཔེ་གཟིགས་ན་འདིར་གནོན།]
ལེན་ལ་བརྟེན་པའི། ཐིག་ལེ་དབབ་བཟུང་ལ་བརྟེན་པའི། སྒྲོལ་མ་རླུང་གི་འཁོར་ལོ་ལ་བརྟེན་པའི། ལམ་མཆོག་ཡོངས་སུ་རྫོགས་པའི་ཚེ་དབང་དང་བཞི་ལས། འདི་ནི་ཕྱི་མ་སྟེ། ས་དང་པོའི་རྟོགས་པ་ཁྱད་པར་ཅན་མཐར་ཕྱིན་པའོ། །མཛད་སྤྱོད་ནི། བདག་དོན་དུ་ཀུན་འགྲོའི་དྲི་མ་སྦྱོང་ཞིང་། གཞན་དོན་དུ་ཆོ་འཕྲུལ་བཞི་དང་ཕྲིན་ལས་བཞི་སོགས་ཀྱིས་འགྲོ་དོན་མཛད་ཅིང་ཆ་ལུགས་ཀྱང་། མི་དང་ལྷ་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ཀྱང་། །ཁྱད་པར་ས་ལ་གནས་གྱུར་ཡིན། །ཞེས་སོ། །མངོན་ཤེས་ཀྱི་ཡུལ་དོན་ཡང་། དབང་ཤེས་ཉི་ཤུ་རྩ་ལྔས་གླིང་བཞི་བྱེ་བ་ཕྲག་བརྒྱར་དུས་གཅིག་ཏུ་འགྲོ་དོན་མཛད་པའོ། །སྒོམ་ལམ་ཕྱག་ཆེན་རིག་འཛིན་ནི། ཡེ་ཤེས་སྒྱུ་མའི་སྐུ་ཅན་སྟེ། ལམ་རིམ་ལས། རང་སེམས་ཕྱག་རྒྱ་ཆེན་པོ་སྟེ། བསྒོམ་པས་མངོན་དུ་གྱུར་པའི་ལྷ། །ཐུན་མོང་མཆོག་གི་མཚན་དཔེར་ལྡན། །ལོངས་སྤྱོད་གཉིས་པ་ཕྱག་རྒྱའི་རིག །ཅེས་དང་། ཡེ་ཤེས་སྐུ་ཡི་ཆ་ལུགས་ཅན། །འབྱུང་བ་རྡོ་རྗེ་ལུས་ལས་གྲོལ། །ཞེས་སོ། །དེ་ལ་ཡང་སྔ་མ་ལས། རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲིའི་རིག་པ་འཛིན། །ཞེས་པས། འདི་ལ་བཤད་ཚུལ་གཉིས་ཏེ། ས་གཉིས་པ་ནས་ལྔ་པའི་བར་བཞི་ལ་རྡོ་རྗེའི་རིག་པ་འཛིན་པ་ཞེས་བྱ་སྟེ། རྟོགས་པ་ཡེ་ཤེས་རྡོ་རྗེས་རང་སའི་སྒྲིབ་པ་འཇོམས་པའི་ཕྱིར། ས་དྲུག་པར་ཤེར་ཕྱིན་ལ་གཙོ་བོར་སྤྱོད་ཅིང་ཆོས་འཁོར་བསྐོར་བའི་ཕྱིར་དང་། ས་བདུན་པའང་ཐབས་ལ་མཁས་པས་འཁོར་ལོ་ལྟར་གྱུར་པས། དེ་གཉིས་ལ་འཁོར་ལོའ་རིག་འཛིན་ཞེས་བྱའོ། །ས་བརྒྱད་པར་མི་རྟོག་པའི་ཡེ་ཤེས་ལ་དབང་བསྒྱུར་བས་རིན་པོ་ཆེའི་རིག་འཛིན་དང་། དགུ་པར་ཆགས་པ་མེད་པས་ཞིང་སྦྱོང་ཞིང་འགྲོ་དོན་མཛད་པས་པདྨའི་རིག་འཛིན་དང་། བཅུ་པར་ཕྲིན་ལས་ཕུན་སུམ་ཚོགས་པས་སེམས་ཅན་གྱི་དོན་དཔག་མེད་མཛད་པའི་ཕྱིར་རལ་གྲིའི་རིག་འཛིན་ཞེས་བྱའོ། །ཆ་བྱད་ཀྱང་ཟུང་འཇུག་གི་ལྷའི་སྐུ་མཚན་དཔེ་རྫོགས་པའི་བདག་ཉིད་ཅན་བདག་དོན་དུ་ལྷན་ཅིག་གནས་པའི་དྲི་མ་སྦྱོང་ཞིང་། གཞན་དོན་དུ་རྔོན་པ་དང་སྨད་འཚོང་མ་ལ་སོགས་པ་གང་འདུལ་གྱི་སྤྲུལ་གཟུགས་སུ་སྟོན་པར་བྱེད་པ་སྟེ། ལམ་རིམ་ལས། མཉམ་བཞག་ངང་ལས་མ་གཡོས་ ― MLP018_Page_0191 ―
[མ་དཔེ་གཟིགས་ན་འདིར་གནོན།]
བཞིན། །ཞེས་དང་། རྔོན་དང་སྨད་འཚོང་ལ་སོགས་པ། །སྤྲུལ་པའི་ལུས་ཀྱིས་འདུལ་བར་བྱེད། །ཅེས་སོ། །མངོན་ཤེས་ཀྱི་ཡུལ་དོན་ཡང་། དབང་ཤེས་ཉི་ཤུ་རྩ་ལྔའི་ཡོན་ཏན་དང་ལྡན་པ་ཚེ་དབང་དང་འདྲ་ནའང་། འདིར་གསལ་བརྟན་གྱི་ཁྱད་པར་དུ་བྱས་ཤིང་། ལོངས་སྐུའི་ཞིང་དང་མཉམ་པའི་འགྲོ་དོན་མཛད་དོ། །དེ་ལྟར་ས་བཅུ་པའི་རྣམ་གྲོལ་ལམ་ཚུན་ཆད་སྒོམ་ལམ་ཕྱག་ཆེན་དུ་བསྡུས་ནས་ས་བཅུ་པའི་ཁྱད་པར་གྱི་ལམ་མཐར་ལམ་ལྷུན་གྲུབ་རིག་འཛིན་ནི། སྐུ་ལྔ་ལྷུན་གྲུབ་རྡོ་རྗེ་འཆང་གི་ཆ་ལུགས་འཛིན་པ་དྲུག་པའི་རྒྱལ་ཚབ་མཛད་པ་པོ་གསང་བའི་བདག་པོ་བཞིན་ནོ། །སྤྱོད་ཚུལ་ནི། བདག་དོན་དུ་རྡོ་རྗེ་ལྟ་བུའི་ཏིང་ངེ་འཛིན་ཏེ་ནང་གི་མངོན་བྱང་གིས་ཤེས་སྒྲིབ་ཕྲ་བ་སྣང་གསུམ་གྱི་དྲི་མ་སྦྱོང་ཞིང་། གཞན་དོན་རྗེས་ཐོབ་ལ་སངས་རྒྱས་དང་ཆ་འདྲ་བའི་འགྲོ་དོན་མཛད། སྤྲུལ་གཟུགས་ཀྱང་མཛད་པ་བཅུ་གཉིས་སོགས་མཆོག་གི་སྤྲུལ་སྐུ་དང་ཕྱོགས་མཐུན་དུ་སྟོན། མངོན་ཤེས་ཀྱང་ཡུལ་དོན་ལ་ཇི་སྙེད་མཁྱེན་པའི་ཡུལ་རྒྱལ་བ་ཉིད་དང་ཆ་འདྲ་སྟེ་ནམ་མཁས་ཁྱབ་ཚད་ཀྱི་དོན་ཡང་ཅི་རིགས་པ་མཛད་པ་སྟེ། ལམ་རིམ་ལས། དེ་ལྟར་དག་པའི་ཡེ་ཤེས་ཉིད། །སྐུ་ལྔ་ལྷུན་གྲུབ་རྡོ་རྗེ་འཛིན། །ལྷུན་མཉམ་ངང་ལས་མི་གཡོ་ཞིང་། །མི་རྟོག་ཉིད་དུ་བཞུགས་པ་དང་། །བག་ལ་ཉལ་བ་འཇོམས་བྱེད་ཅིང་། །སྐད་ཅིག་ཉིད་ལས་རིག་འཛིན་ཐོབ། །ཅེས་སོ། །ཞར་བྱུང་རྒྱུའི་ཐེག་པའི་འཕགས་པ་རྣམས་དང་དགོངས་པ་མཉམ་ཚུལ་དང་སའི་:མུ་ལོ་ཚོད་མཐུན་ཚུལ་བཤད་དེ། རྣམ་སྨིན་རིག་འཛིན་དང་རྒྱུའི་ཐེག་པའི་མཐོང་ལམ་རབ་དགའ་ལ་གནས་པའི་སེམས་དཔའ་གཉིས་དགོངས་པ་མཉམ་ཞིང་། དེ་ལས་གཞན་པ་ཚེ་དབང་སོགས་ནི་རྒྱུའི་ཐེག་པའི་ས་དང་པོ་དང་། བརྒྱད་པ་དང་། བཅུ་པ་ཙམ་དུ་སྐལ་པ་མཉམ་པ་སྟེ་ལམ་གྱི་:མུ་ལོ་ཚོད་མཚུངས་མོད། འོན་ཀྱང་དགོངས་པ་ནི་རྒྱུའི་ཐེག་པའི་སྒོམ་ལམ་ས་བརྒྱད་པ་དང་ཚེ་དབང་། བཅུ་པ་དང་ཕྱག་ཆེན། མི་སློབ་པ་ཀུན་ཏུ་འོད་དང་ལྷུན་གྲུབ་རིག་འཛིན་རྣམས་མཉམ་པར་བཞེད་པའི་ཕྱིར་ཏེ། དེ་ལྟར་ཡང་ལམ་ཆུང་ལས། དེ་ཡང་དང་པོ་དང་པོ་དང་། །སྐལ་མཉམ་གཉིས་པའི་རིགས་མཆོག་སྟེ། །བརྒྱད་པའི་སེམས་དཔར་སྐལ་བ་མཉམ། ། ― MLP018_Page_0192 ―
[མ་དཔེ་གཟིགས་ན་འདིར་གནོན།]
གསུམ་པ་བཅུ་དང་སྐལ་མཉམ་མོད། །དགོངས་སྤྱོད་རྒྱ་མཚོས་ཁྱད་པར་འཕགས། །ཞེས་དང་། བསམ་གཏན་མིག་སྒྲོན་གྱི་རང་འགྲེལ་ལས། ཀུན་ཏུ་འོད་བསྟི་གནས་ཀྱི་སའོ། །དེ་ནི་འདིར་ལྷུན་གྲུབ་རིག་འཛིན་དངོས་སོ། །ཞེས་གསུངས་སོ། །ད་ནི་ཐོད་རྒལ་འབྱུང་མི་འབྱུང་གི་ས་མཚམས་འཆད་དེ། རྣམ་སྨིན་ནས་ཐོད་རྒལ་དུ་བགྲོད་པ་མི་སྲིད་དེ། ཐོད་རྒལ་འབྱུང་བའི་ཆོས་གསུམ་མ་ཚང་བའི་ཕྱིར། གང་མ་ཚང་ན་ལམ་གཞན་བར་ནས་བོར་དུ་མེད་པའི་ཕྱིར་ཏེ། རང་གི་དངོས་འབྲས་རྒྱ་ཆེན་དུ་ངེས་པའི་ཕྱིར། ལམ་རིམ་ལས། རྒྱ་མིག་རྒྱ་ས་ཇི་བཞིན་དུ། །ཕྱག་རྒྱ་ཐོབ་ལ་མ་རེག་པ། །གཟུགས་རྫོགས་སྟོབས་ཆེན་དེ་ཁོ་ན། །ཞེས་གསུངས་སོ། །གཞན་དུ་ཅིག་ཅར་བའི་རིགས་མ་ཡིན་པའི་ལམ་པ་བློ་ཆེ་བ་འགའ་ཞིག་ཕྱག་རྒྱ་གཅིག་སྤྲོས་གཉིས་ནས་སྦྱོར་མཐོང་དང་། ཚེ་དབང་ནི་ལྷུན་གྲུབ་རིག་འཛིན། ཚེ་དབང་དང་རྒྱ་ཆེན་གཉིས་ནས་རྫོགས་པའི་སངས་རྒྱས་ཀྱི་སར་ལམ་གཞན་བར་ནས་བོར་ལ་ཐོད་རྒལ་དུ་སྦྱོར་བ་སྲིད་པ་ཡིན་ཏེ། དེ་དག་ལ་ངང་གིས་བློ་ཆེ་བ་དང་། ཟུང་འཇུག་གི་ལམ་བསྒོམ་པ་དང་། ལམ་གཞན་བར་ནས་བོར་དུ་ཡོད་པ་སྟེ། ཐོད་རྒལ་འབྱུང་བའི་ཆོས་གསུམ་ཚང་བའི་ཕྱིར་རོ། །དེ་ལྟར་ན་ཚོགས་སྒྲུབ་ནས་ཐོད་རྒལ་འབྱུང་ངམ་སྙམ་ན་མི་འབྱུང་སྟེ། ལམ་རིམ་ལས། ལམ་མཆོག་དབྱེ་ས་གཅིག་ཡིན་ནོ། །ཞེས་པ་ཟག་མེད་ཀྱི་ལམ་གྱི་དབྱེ་ས་དང་འདུ་ས་མཐོང་ལམ་ཡིན་པར་གསུངས་པས་ལམ་གཞན་བར་ནས་བོར་དུ་མེད་པའི་ཕྱིར་རོ། །ཞེས་གསུངས་སོ། །གསུམ་པ་གང་དུ་མཐར་ཕྱིན་པ་འབྲས་བུའི་རྒྱུད་ནི། སྒྱུ་འཕྲུལ་བྱེ་བྲག་བསྟན་པ་ལས། གྲུབ་པའི་རྣལ་འབྱོར་རྣལ་འབྱོར་ཆེ། །ལྷུན་གྲུབ་ཇི་བཞིན་མངོན་བྱས་པའང་། །བཏགས་པ་ཙམ་སྟེ་གཉིས་པ་མེད། །དེ་ཕྱིར་དེ་ལ་དེ་བརྗོད་དོ། །ཞེས་པས། དེ་ལ་སྦྱང་གཞི་རྒྱུ་རྒྱུད་བདེ་བར་གཤེགས་པའི་སྙིང་པོ་གདོད་མ་ནས་རང་ལ་རང་ཆས་སུ་བཞུགས་པ་སྟེ། འདམ་གྱི་དབུས་ན་བཞུགས་པའི་ནོར་བུ་རིན་པོ་ཆེ་བཞིན་ནོ། །སྦྱང་བྱ་ནི། མེད་སྣང་གློ་བུར་གྱི་དྲི་མ་ཕྲ་ཞིང་ཕྲ་བ་དང་བཅས་པ་སྟེ། ནོར་བུ་དེ་སྒྲིབ་པར་བྱེད་པའི་འདམ་རྫབ་བཞིན་ནོ། ། ― MLP018_Page_0193 ―
[མ་དཔེ་གཟིགས་ན་འདིར་གནོན།]
སྦྱོང་བྱེད་ནི། རིམ་པ་གཉིས་ཀྱིས་བསྡུས་པའི་ལམ་སྟེ། འཁྲུད་བྱེད་ཀྱི་ཆུ་དང་འདག་རྫས་བཞིན་ནོ། །སྦྱང་འབྲས་ནི། དེ་ལྟར་ལམ་གྱིས་དྲི་མ་སྦྱངས་པ་ལས་གཞི་ལ་ཇི་ལྟར་ཡོད་པའི་ཡོན་ཏན་མངོན་དུ་གྱུར་པ་མཐར་ཐུག་པ་སྟེ། འདམ་རྫབ་ལས་གྲོལ་བའི་ཡིད་བཞིན་གྱི་ནོར་བུ་རིན་པོ་ཆེ་ལས་འདོད་རྒུའི་ཆར་འབེབས་པ་བཞིན་ནོ། །ངེས་ཚིག་ནི། ཅིའི་ཕྱིར་འབྲས་བུའི་རྒྱུད་དུ་འགྱུར་ཞེ་ན། ཁོག་གཞུང་ལས། གྲུབ་པ་མཐར་ཕྱིན་འབྲས་བུར་བརྗོད། །ཅེས་པས་བླ་ན་མེད་པ་མཆོག་གི་འབྲས་བུ་མཐར་ཐུག་པ་དོན་དུ་གཉེར་བ་རྣམས་བསམ་པ་ཡོངས་སུ་རྫོགས་པས་ན་འབྲས་བུ་དང་། ནམ་ཡང་རྒྱུན་མི་ཆད་པས་ན་རྒྱུད་དོ། །དབྱེ་ན་ཁོག་གཞུང་ལས། འབྲས་བུའི་ངོ་བོ་སྐུ་གསུང་ཐུགས། །ཡོན་ཏན་ཕྲིན་ལས་རྣམ་པ་ལྔ། །དེ་ཡང་སྐབས་ཀྱི་ལྔ་ལྔ་སྟེ། །ཞེས་པས་སྐུ་གསུང་ཐུགས་ཡོན་ཏན་ཕྲིན་ལས་རེ་རེ་ལའང་ལྔ་ལྔར་དབྱེ་བས་འབྲས་ཆོས་ཉི་ཤུ་རྩ་ལྔར་འགྱུར་ལ། དེ་ལ་སྐུ་ལྔ་ནི། ཆོས་སྐུ། ལོངས་སྐུ། སྤྲུལ་སྐུ། མངོན་བྱང་གི་སྐུ། རྡོ་རྗེའི་སྐུ་དང་ལྔའོ། །གསུང་ལྔ་ནི། ཆོས་སྐུ་སྐྱེ་མེད་དོན་གྱི་གསུང་། ལོངས་སྐུ་དགོངས་པ་བརྡ་ཡི་གསུང་། སྤྲུལ་སྐུ་ཚངས་པ་དབྱངས་ཀྱི་གསུང་། མངོན་བྱང་རིག་པ་བྱིན་རླབས་ཀྱི་གསུང་། དབྱེར་མེད་རྡོ་རྗེའི་གསུང་དང་ལྔའོ། །ཐུགས་ལྔ་ནི། ཆོས་སྐུའི་ཐུགས་ཆོས་དབྱིངས་ཡེ་ཤེས། ལོངས་སྐུའི་ཐུགས་མཉམ་ཉིད་ཡེ་ཤེས། སྤྲུལ་སྐུའི་ཐུགས་བྱ་གྲུབ་ཡེ་ཤེས། མངོན་བྱང་གི་ཐུགས་མེ་ལོང་ཡེ་ཤེས། རྡོ་རྗེ་སྐུའི་ཐུགས་སོར་རྟོག་ཡེ་ཤེས་སོ། །ཡོན་ཏན་ལྔ་ནི། རྣམ་པར་དག་པའི་ཞིང་ཁམས། རྒྱ་ཚད་དང་བྲལ་བའི་གཞལ་ཡས་ཁང་། གསལ་ཞིང་དག་པའི་འོད་ཟེར། ཁྱད་པར་འཕགས་པའི་གདན་ཁྲི། དགྱེས་རྒུར་སྤྱོད་པའི་ལོངས་སྤྱོད་དང་ལྔའོ། །ཕྲིན་ལས་ལྔ་ནི། ཞི་བ། རྒྱས་པ། དབང་། དྲག་པོ། ལྷུན་གྱིས་གྲུབ་པའི་ཕྲིན་ལས་དང་ལྔའོ། །དེ་དག་ཀྱང་རྟེན་སྐུ། བརྟེན་པ་ཡེ་ཤེས། མཛད་པ་ཕྲིན་ལས་གསུམ་དུ་འདུབ་ཡིན་པས་སྐུ་ནི་གསུམ་མམ་ལྔ་སྟེ། ཆོས་སྐུ་ནི། དབྱིངས་སྤྲོས་བྲལ་ནམ་མཁའ་ལྟ་བུའི་ཀློང་ན། ཐུགས་རྗེ་དང་ཡེ་ཤེས་རང་བཞིན་ལྷུན་གྱིས་གྲུབ་པའི་བདག་ཉིད་ཅན་ནོ། །ལོངས་སྐུ་ནི། དེ་ལས་ཤར་བའི་ཐུགས་རྗེ་ཡེ་ཤེས་ཀྱི་སྐུའོ། །སྤྲུལ་སྐུ་ནི། སོ་སོའ་ ― MLP018_Page_0194 ―
[མ་དཔེ་གཟིགས་ན་འདིར་གནོན།]
མོས་པ་དང་འཚམས་པར་གོང་གི་སྐུ་དེ་གཉིས་ཀྱི་གཟུགས་བརྙན་འགྲོ་བའི་སེམས་གཙང་མའི་མེ་ལོང་ལ་ཤར་བ་སྟེ། རྒྱུད་བླ་མ་ལས། ཇི་ལྟར་བཻཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །ཞེས་སོགས་སྐུ་གསུམ་སྣང་ཆ་མ་འདྲེས་པའི་ཆ་ནས་མངོན་བྱང་དང་། ངོ་བོ་དབྱེར་མི་ཕྱེད་པའི་ཆ་ནས་རྡོ་རྗེའི་སྐུ་སྟེ་གཉིས་པོ་བསྣན་པས་སྐུ་ལྔའོ། །སྐབས་འདིར་ཟུར་པ་རྣམས་ཆོས་ལོངས་སྤྲུལ་གསུམ་སྐུ་མཚན་ཉིད་པ་དང་། གཞན་གཉིས་རྣམ་པའི་ལྡོག་ཆ་དང་ངོ་བོ་དབྱེར་མི་ཕྱེད་པའི་ཆ་ནས་བཞག་པའི་སྐུ་བཏགས་པ་བ་ཡིན་གསུངས། ཀུན་མཁྱེན་ཀློང་ཆེན་པས་ནི། ཆོས་སྐུ་མངོན་བྱང་རྡོ་རྗེའི་སྐུ་གསུམ་པོ་སངས་རྒྱས་རང་སྣང་གི་སྐུ་ཡིན་པས་མཚན་ཉིད་པ་ཡིན་ལ། ལོངས་སྤྲུལ་གཉིས་གདུལ་བྱའི་སྣང་བས་བསྡུས་པའི་སྐུ་བཏགས་པ་བའོ་གསུངས་པ་འཐད་པར་མངོན་གསུངས། གཉིས་པ་ཡེ་ཤེས་ནི། དེ་ལྟར་སྐུ་ལྔ་མངོན་དུ་བྱས་པའི་ཚེ། ཚོགས་བརྒྱད་གནས་སུ་དག་པའི་ཡེ་ཤེས་ལྔ་སྟེ། ཀུན་གཞི་འབྱེད་པ་མེད་པའི་ཆ་ནས་དེ་ཉིད་གནས་སུ་དག་པ་ཅིར་ཡང་མི་དམིགས་པ་སྤྲོས་པའི་མཐའ་ཐམས་ཅད་དང་བྲལ་བ་ཆོས་དབྱིངས་ཡེ་ཤེས་དང་། ཀུན་གཞིའི་རྣམ་ཤེས་གསལ་ལ་མི་རྟོག་པའི་ཆ་ནས་དེ་ཉིད་གནས་སུ་དག་པ་མེ་ལོང་ངོས་གཉིས་པ་ལྟར་རང་བཞིན་གྱི་ཆོས་ཐམས་ཅད་གསལ་ལ་སྤུ་རིས་མི་འབྱེད་པ་མེ་ལོང་ལྟ་བུའི་ཡེ་ཤེས་དང་། ཉོན་ཡིད་ཀྱིས་ཕྱི་ནང་གི་ཆོས་རྣམས་ལ་བླང་དོར་འབྱེད་པའི་ཆ་ནས་དེ་ཉིད་གནས་སུ་དག་པ་འཁོར་འདས་བཟང་ངན་མེད་པ་མཉམ་པ་ཉིད་དུ་གཟིགས་པས་སྲིད་ཞིའི་མཐའ་ལ་མི་གནས་པས་མཉམ་ཉིད་ཡེ་ཤེས་དང་། རྣམ་ཤེས་ཚོགས་དྲུག་འགགས་མ་ཐག་པར་ཡིད་ཀྱི་དཔྱོད་པ་མེད་པར་རྟོག་པའི་ཆ་ནས་དེ་ཉིད་གནས་སུ་དག་པ་ཆོས་ཅན་མ་ལུས་མངོན་སུམ་དུ་མ་འདྲེས་ཡོངས་རྫོགས་སུ་ས་ལེར་གཟིགས་པ་སོ་སོར་རྟོག་པའི་ཡེ་ཤེས་དང་། སྒོ་ལྔའི་རྣམ་ཤེས་ཀྱི་བྱ་བ་ཐམས་ཅད་སྒྲུབ་པའི་ཆ་ནས་དེ་ཉིད་གནས་སུ་དག་པ་འགྲོ་དོན་མཛད་པ་ལ་ཐོགས་པ་མེད་པའི་ཕྲིན་ལས་འཇུག་པ་བྱ་གྲུབ་ཡེ་ཤེས་ཏེ་ལྔའོ། །དེ་དག་གཉིས་སུ་བསྡུ་ ― MLP018_Page_0195 ―
[མ་དཔེ་གཟིགས་ན་འདིར་གནོན།]
ཚུལ་ནི། ཟུར་པ་རྣམས་ཆོས་དབྱིངས་ཡེ་ཤེས་ཇི་ལྟ་བ་མཁྱེན་པའི་ཡེ་ཤེས་དང་། ཕྱི་མ་བཞི་པོ་རྟེན་བརྟེན་པའི་ཆ་ནས་ཇི་སྙེད་པ་མཁྱེན་པའི་ཡེ་ཤེས་སུ་བཞེད། ཀུན་མཁྱེན་པས་ནི། ཆོས་དབྱིངས་ཡེ་ཤེས་དང་མཉམ་ཉིད་ཡེ་ཤེས་གཉིས་གནས་ལུགས་གཟིགས་པའི་ཆ་ནས་ཇི་ལྟ་བ་དང་། གཞན་གསུམ་འཆར་གཞི་དང་། ཡུལ་གཟིགས་པ་དང་། དེས་འགྲོ་དོན་མཛད་པའི་ཆ་ནས་ཇི་སྙེད་པའི་ཡེ་ཤེས་སོ། །ཞེས་གསུངས་ཏེ་ཇི་སྐད་བཤད་ཀྱང་ཁྱད་པར་མ་མཆིས་འདྲ་གསུངས། གསུམ་པ་མཛད་པ་ཕྲིན་ལས་ནི། དེ་ལྟར་ན་ཉོན་སྒྲིབ་དང་ཤེས་སྒྲིབ་གཉིས་ཀྱིས་བསྡུས་པའི་མེད་སྣང་གློ་བུར་གྱི་སྒྲིབ་གཉིས་བག་ཆགས་སྣང་གསུམ་གྱི་དྲི་མ་དང་བཅས་པ་མཐའ་དག་སྤངས་ཤིང་། ཇི་ལྟ་བ་དང་ཇི་སྙེད་མཁྱེན་པའི་ཡེ་ཤེས་ཀྱིས་ཤེས་བྱ་ཐམས་ཅད་མངོན་སུམ་དུ་གཟིགས་པའི་སྒོ་ནས་སྤངས་རྟོགས་ཀྱི་ཡོན་ཏན་མཐར་ཕྱིན་ཅིང་། དེའི་མཐུ་ལས་གདུལ་བྱ་སོ་སོའ་སྐལ་བ་དང་འཚམས་པར་ཞི་བ་དང་། རྒྱས་པ་དང་། དབང་དང་། དྲག་པོ་ལ་སོགས་ཏེ་གང་ལ་གང་གིས་ཇི་ལྟར་འདུལ་བའི་ཕྲིན་ལས་ཀྱི་སྒོ་མཐའ་ཡས་པ་དུས་ལས་ཡོལ་བ་མེད་ཅིང་འབད་རྩོལ་མེད་པར་ལྷུན་གྱིས་གྲུབ་པ་ནི། ནམ་མཁའ་ཇི་སྲིད་པ་དེ་སྲིད་དུ་རྒྱ་ཆེ་རྒྱུན་མི་ཆད་པར་འབྱུང་བ་སྟེ། མངོན་རྟོགས་རྒྱན་ལས། དེ་བཞིན་འཁོར་བ་ཇི་སྲིད་དུ། །ལས་ནི་རྒྱུན་མི་ཆད་པར་འདོད། །ཅེས་སོ། །གཉིས་པ་ལམ་གྱི་ཆ་རྐྱེན་རྒྱུད་ཀྱི་དངོས་པོ་བཅུ་བྱེ་བྲག་ཏུ་བཤད་པ་ནི། ལྟ་སྤྱོད་དཀྱིལ་འཁོར་དབང་དམ་ཚིག །མཆོད་སྔགས་ཏིང་འཛིན་ཕྲིན་སྒྲུབ་ཀྱི། །གསང་སྔགས་རྒྱུད་ཀྱི་དབྱེ་བ་བྱ། །ཞེས་པ་ལྟར་བཅུ་སྟེ། དེ་ཁོ་ན་ཉིད་ལྟ་བ། ལ་དོར་བ་སྤྱོད་པ། བཀོད་པ་དཀྱིལ་འཁོར། རིམ་པ་བགྲོད་པ་དབང་། མི་འདའ་བ་དམ་ཚིག རོལ་པ་ཕྲིན་ལས། དོན་དུ་གཉེར་བ་སྒྲུབ་པ། མི་གཡོ་བ་ཏིང་ངེ་འཛིན། གནས་སུ་སྟོབ་པ་མཆོད་པ། འཆིང་ཟློས་སྔགས་དང་ཕྱག་རྒྱའོ། །དང་པོ་ལྟ་བ་ལའང་གསུམ་སྟེ། ངོ་བོ་ནི། ལམ་རིམ་ལས། ཐབས་ཀྱི་ལྟ་སྤྱོད་ཆེན་པོར་ནི། །བླ་མེད་ཐེག་པ་ལས་འཕགས་པ། །དོན་དམ་དུ་ནི་དཀོར་བདུན་ལ། །ཀུན་རྫོབ་ཏུ་ནི་མཉམ་རྫོགས་སོ། །ཡང་དག་སྐྱེས་མཆོག་དམ་པ་ཡིས། །དོན་དམ་ཀུན་རྫོབ་དབྱེར་ ― MLP018_Page_0196 ―
[མ་དཔེ་གཟིགས་ན་འདིར་གནོན།]
མེད་པར། །ཡང་དག་ཉིད་དུ་རབ་ཏུ་རྟོགས། །ཞེས་པས་སྤྲོས་པའི་མཐའ་ཐམས་ཅད་དང་བྲལ་བ་གང་དུ་ཡང་མ་རེག་པའི་ཆ་ནས་དབུ་མ་པ་དང་། ཆོས་ཐམས་ཅད་སེམས་ཀྱི་རོལ་རྩལ་ཙམ་དུ་འདུ་བའི་ཆ་ནས་སེམས་ཙམ་པ་དང་ཕྱོགས་མཚུངས་ཀྱང་། སྔགས་ཀྱི་ལྟ་བ་ནི། དེ་དག་ལས་ཀྱང་ཁྱད་པར་དུ་འཕགས་པ་སྟེ། གདོད་མ་ནས་དབྱིངས་ཡེ་ཤེས་སྐུ་གསུང་ཐུགས་ཡོན་ཏན་ཕྲིན་ལས་ཏེ་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པ་ལྷག་པ་དོན་དམ་བདེན་པ་དང་། དེ་ཉིད་ཀྱི་རྩལ་སྣང་སྣོད་བཅུད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བས། འཁོར་འདས་བཟང་ངན་མེད་པར་མཉམ་པ་ཉིད་དུ་རྫོགས་པ་ནི་ལྷག་པ་ཀུན་རྫོབ་ཀྱི་བདེན་པ་སྟེ། དེ་གཉིས་ཀྱང་ཕྱོགས་སུ་ལྷུང་བ་མ་ཡིན་པར་ལྷག་པ་བདེན་གཉིས་ཟུང་འཇུག་ངོ་བོ་དབྱེར་མི་ཕྱེད་པར་མཉམ་པ་ཉིད་དུ་གནས་ཤིང་། དེར་འཛིན་གྱི་བསམ་བརྗོད་ལས་ཀྱང་ཡང་དག་པར་འདས་པས་ན་ཐ་སྙད་ཙམ་དུ་ལྷག་པ་བདེན་པ་དབྱེར་མེད་སྤྱོད་ཡུལ་དང་བྲལ་བ་ཞེས་མིང་དུ་གཏགས་ཏེ། དེ་ལས། རྒྱལ་འགྲོས་མ་མཛད་མ་བཅོས་པར། །རང་བཞིན་ངང་གིས་དབྱེར་མེད་པར། །དེ་མིང་ཞེན་པ་དགྲོལ་ཕྱིར་ལས། །ཐ་སྙད་གཉིས་པ་བསམ་བརྗོད་འདས། །ཞེས་གསུངས་ཤིང་། ལྷག་པ་ཞེས་པའི་སྒྲ་ཡང་། ཁྱད་པར་དུ་འཕགས་པའི་དོན་ལྷག་པར་སྟོན་པ་སྟེ། ཕར་ཕྱིན་ཐེག་པ་ནས་དོན་དམ་བདེན་ངོར་འཁོར་འདས་མཉམ་པ་ཉིད་དུ་བཞེད་པ་ཙམ་ཕྱོགས་མཐུན་ཡང་། སྔགས་ལུགས་འདིར་ནི། ཀུན་རྫོབ་ཏུའང་ཆོས་ཐམས་ཅད་ལ་མི་གཉིས་པའི་བསམ་བརྗོད་དང་བྲལ་བས་ན་རྒྱུའི་ཐེག་པ་ལས་ཁྱད་པར་འཕགས་པའི་ཕྱིར་དེ་སྐད་དུ་བརྗོད་པ་སྟེ། དེ་ལས། བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་ལ། །ཀུན་རྫོབ་ཏུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོར་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུའང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་སོ། །ངེས་ཚིག་ནི། དྲྀཥྚའི་སྒྲ་ལས་དྲི་ཥི་ལྟ་བའོ། །ཞེས་པས་བྱིངས་དོན་གྱིས་བསྒྲུབས་པས་ལྟ་བ་ཞེས་བྱ་བ་ལ་འཇུག་སྟེ་གནས་ལུགས་ཀྱི་དོན་ལ་དེ་དང་རྗེས་སུ་མཐུན་པའི་ཤེས་རབ་ཀྱི་མིག་གིས་ལྟ་བ་སྟེ། དབྱེ་ ― MLP018_Page_0197 ―
[མ་དཔེ་གཟིགས་ན་འདིར་གནོན།]
ན་གསུམ་སྟེ། དབང་པོ་ཡང་རབ་ལ་གཏན་ཚིགས་ཀྱིས་རྟོགས་པར་བྱ་བ་ནི། རྒྱལ་པོ་ཛཿས་ལམ་རྣམ་བཀོད་དུ། དེ་ལྟར་ཚུལ་གསུམ་བརྗོད་པ་ཡིས། །མཐོང་བ་གང་ཡིན་ཤེས་རབ་སྤྱན། །དེ་ཡང་མངོན་སུམ་གཞན་སྤངས་ཏེ། །སྒྲ་ཚིག་རྟེན་འབྲེལ་ཞེན་ཙམ་མིན། །ཡུལ་མིན་རང་རིག་བདེན་དབྱེར་མེད། །བློའི་གཏིང་གོ་བ་མངོན་སུམ་ཡུལ། །ཞེས་སོ། །དབང་པོ་འབྲིང་ལ་རང་བཞིན་དང་འབྲས་བུའི་རྟགས་ལ་བརྟེན་ནས་རྟོགས་པར་བྱ་བ་ནི། ཤེས་རབ་སྤྱན་འབྱེད་ལས། དང་པོ་རང་གི་རིག་པ་ཡིས། །ཆོ་འཕྲུལ་སྣང་བའི་འབྱུང་བ་དང་། །ཕྱོགས་དང་ཁ་དོག་ལ་སོགས་ཀྱིས། །མཚོན་ནས་ཇི་བཞིན་ཉིད་རྟོགས་བྱེད། །ཅེས་གསུངས་པ་ལྟར། འདི་ལྟར་མ་དག་པའི་འཇིག་རྟེན་འདི་ཡང་རང་གི་རིག་པ་ཡེ་ཤེས་ལྔའི་ཆོ་འཕྲུལ་ཡིན་ཏེ། དེའི་རྟགས་སུ་སུས་ཀྱང་མ་བྱས་པར་ཡུལ་ལྔ་དང་། འབྱུང་བ་ལྔ་དང་། ཁ་དོག་ལྔ་ལ་སོགས་པ་རང་བཞིན་གྱིས་ཡོད་པ་སྟེ། བཤགས་རྒྱུད་ཀྱི་རིགས་ལྔའི་དམ་ཚིག་གི་ལེའུ་ལས། ཁ་དོག་ལྔ་དང་ཡུལ་ལྔ་ལ་སོགས་པ། །ཡེ་ནས་རིགས་ལྔའི་རང་བཞིན་ཡིན་པ་ལ། །ཞེས་གསུངས་སོ། །འབྲས་བུའི་རྟགས་ནི། སེམས་ཉིད་ལ་འབྲས་བུ་སྐུ་དང་ཡེ་ཤེས་རང་ཆས་སུ་བཞུགས་པའི་མཚོན་དོན་ཆུ་ཚོན་སོགས་ཀྱིས་དཔེའི་དཀྱིལ་འཁོར་འགོད་པ་སྟེ། ཅིག་ཤོས་མཐར་ཕྱིན་ཡེ་ཤེས་ཀྱི། །དཀྱིལ་འཁོར་རྟེན་དང་བརྟེན་ཅན་ལྟར། །ཞེས་སོ། །དབང་རྟུལ་ལ་བརྒྱུད་དེ་རྟོགས་པ་ཉེ་རིང་གཉིས་ལས་ཉེ་བ་ནི། སྔ་མ་ལས། བསྒོམས་པའི་ལམ་དུ་བསྟན་པར་བྱ། །རིམ་པར་སྐྱེ་བ་ཐེ་ཚོམ་མེད། །ཅེས་གསུངས་པ་ལྟར། དེ་ལྟར་ཐོས་པའི་ཤེས་རབ་ཀྱིས་མི་གོ་བའི་རིགས་ལ་རྩ་མདུད་གྲོལ་བའི་དམིགས་པ་ཕྲ་མོ་ཞིག་བསྟན་པས། ནང་གི་རྩ་མདུད་གྲོལ་ནས་གནས་ལུགས་རྟོགས་པ་ཞིག་ཡོད་དེ་དཔེར་ན་སྔོན་ཀླུ་སྒྲུབ་ཀྱི་སློབ་མ་གྲུབ་ཐོབ་ཤྲྀ་གཱི་པ་ལྟ་བུ་སྟེ། ཀླུ་སྒྲུབ་ཀྱིས་སློབ་མ་རྣམས་ལ་ཆོས་བཤད་པའི་དུས། ཤྲྀ་གཱི་པ་ཞེས་པ་དེས་ཚིག་གཅིག་ཀྱང་ཉིན་མང་པོའི་བར་མི་ཟིན་ཅིང་དོན་མ་གོ་བས། ཀླུ་སྒྲུབ་ཀྱིས་མགོ་ལ་རྭ་སྐྱེས་པ་ཞིག་སྒོམས་ཞེས་གསུངས་པས། སློབ་དཔོན་གྱིས་དུད་འགྲོ་ཡིན་འདུག་གསུངས་པ་ཡིན་ཡང་ཁོ་རང་གི་སེམས་ལ་དེ་སྒོམ་སླ་བར་གོ་སྟེ་སྒོམ་པས་ཇི་ཞིག་ན་རྭ་སྐྱེས་པའི་སྣང་ ― MLP018_Page_0198 ―
[མ་དཔེ་གཟིགས་ན་འདིར་གནོན།]
བས་བྲག་ཕུག་ཏུ་རྭ་ཐོགས་ཏེ་ལང་མ་ཤེས་པ་སློབ་དཔོན་གྱིས་མཁྱེན་ཏེ་དམིགས་པ་ཟབ་པ་ཞིག་གོ་དགོངས་ཏེ་རྩ་མདུད་དགྲོལ་བའི་དམིགས་པ་ཞིག་བསྟན་པས་གྲོལ་བ་ཐོབ་པ་སོགས་ནི་ཉེ་བའི་དབང་རྟུལ་ལོ། །རིང་བ་ནི་རྣམ་བཀོད་ལས། དེ་མིན་རྒྱུ་ཙམ་གསོག་བྱེད་པ། །རྒྱུད་ལས་འདི་སྐད་གསུངས་པ་སྟེ། །ཆོས་ཉིད་རྟེན་ཅིང་འབྲེལ་བྲིས་ན། །ཆོས་ཉིད་དོན་དམ་རྟོགས་འགྱུར་ཏེ། །ཞེས་གསུངས་པ་ལྟར། རེ་ཞིག་རྟོགས་པའི་སྐལ་བ་མེད་པ་དག་ལ་སྒྲིབ་སྦྱོང་གི་ཕྱིར་བདེ་བར་གཤེགས་པའི་མཆོད་རྟེན་ལ་བསྐོར་བ་བྱེད་པ་དང་མཉམ་དུ་རྟེན་འབྲེལ་སྙིང་པོ་བཟླས་ཤིང་བསགས་སྦྱངས་ལ་འབད་པས་རྟོགས་པར་འགྱུར་བ་སྟེ། དཔེར་ན་རྒྱལ་བ་ཙོང་ཁ་པའི་བླ་མ་དོན་གྲུབ་རིན་ཆེན་ལྟ་བུ་སྟེ། དེ་ནི་ཐུགས་རབ་ཤིན་ཏུ་བུལ་བས་ཉིན་མཚན་ངལ་མེད་ཀྱིས་རིང་བསྲེལ་ཅན་གྱི་མཆོད་རྟེན་ལ་རྟེན་འབྲེལ་སྙིང་པོ་བཟླས་ཤིང་བསྐོར་བ་མཛད་པས་ཇི་ཞིག་ན་ཞབས་ཐམས་ཅད་རྨར་སོང་། ད་དུང་འབད་པས་ཞབས་ཀྱི་རྨ་ཡང་རང་ཤུགས་ཀྱིས་དྭངས་ཤིང་ཤེས་རབ་དང་གོ་དོན་ལ་ཐོགས་པ་མེད་པར་བྱུང་བར་གྲགས་པ་ལྟ་བུའོ་གསུངས། གཉིས་པ་སྤྱོད་པ་ལའང་གསུམ་ལས། ངོ་བོ་ནི། རིམ་གསུམ་ལས། ཏིང་འཛིན་ཁྱད་པར་འགྱུར་བའི་ཕྱིར། །རྗེས་མཐུན་སྤྱོད་པ་གཞུང་བཞིན་སྤྱོད། །ཅེས་ཐབས་ཤེས་ཁྱད་པར་ཅན་གྱིས་ཟིན་པའི་སྒོ་ནས་སོགས་ཏེ། དེ་ལ་སྤྱིར་སྤྱོད་པ་ལ་མཉམ་བཞག་དང་རྗེས་ཐོབ་ཀྱི་སྤྱོད་པ་གཉིས་ལས། མཉམ་བཞག་གི་སྤྱོད་པ་ནི། སྔར་བཤད་པའི་ལམ་ལྔ་དང་རིག་འཛིན་བཞིའི་གནས་སྐབས་ཀྱི་སོ་སོའ་ཏིང་ངེ་འཛིན་ལ་རྩེ་གཅིག་ཏུ་སྤྱོད་པར་བྱེད་པ་དེ་ཡིན་ཞིང་། འདིར་རྗེས་ཐོབ་གཙོ་ཆེ་བའི་དབང་དུ་བྱས་པ་སྟེ། རྗེས་མཐུན་སྤྱོད་པ་གཞུང་བཞིན་སྤྱད། །ཅེས་འབྱུང་བས་སོ། །ཇི་ལྟར་སྤྱོད་ཚུལ་ནི། ལྟ་བ་བདག་མེད་པས་ཟིན་པའི་ཤེས་རབ་དང་ཐབས་སྙིང་རྗེ་ཆེན་པོ་ཟུང་དུ་འཇུག་པའི་སྒོ་ནས་སྤྱོད་པས་ལུས་ངག་ཡིད་གསུམ་ཡོངས་སུ་དག་པར་འགྱུར་བའོ། །ངེས་ཚིག་ནི། ཙའི་སྒྲ་ལས། སྤྱད་བྱ་ལ། ཞེས་པས། ཏ་ན་དང་ག་ན་ལ་སོགས་ཏེ། དེ་ཡང་དུས་ཚོད་དང་འབྲེལ་བར་ཚུལ་བཞིན་སྤྱོད་པའོ། །དབྱེ་ན། ལས་ ― MLP018_Page_0199 ―
[མ་དཔེ་གཟིགས་ན་འདིར་གནོན།]
དང་པོ་པའི་དུས་སུ་བག་དང་ལྡན་པ་གཟབ་པ་ལྷུར་ལེན་པ་དགེ་སྦྱོང་གཞོན་ནུའི་སྤྱོད་པ་ལྟ་བུ་སྟེ། རྡོ་རྗེ་རྩེ་མོ་ལས། བརྟན་པ་མ་ཐོབ་བར་དུ་ནི། །ཁ་ན་མ་ཐོ་རྡུལ་མེད་ཅིང་། །སྡོམ་པ་གསུམ་ལ་གནས་པར་བྱ། །ཞེས་སོ། །དེ་ནས་ཅུང་ཟད་གོམས་ཏེ་མཉམ་རྗེས་བསྲེ་བར་ནུས་པ་ན། རྟོགས་པ་རྐྱེན་ཐུབ་ཏུ་བྱེད་པ་སྨྱོན་པ་བརྟུལ་ཞུགས་ཀྱི་སྤྱོད་པ་དང་། བརྟན་པ་ཆེར་ཐོབ་ནས་རྟོགས་པ་ལ་བྲི་གང་མེད་པས་ན་གཞན་ཕན་ཁོ་ན་ལ་བསླབ་པ་རྒྱལ་པོ་ས་འཛིན་གྱི་སྤྱོད་པ་ལྟ་བུ་སྟེ་སྤྱོད་ཚུལ་གསུམ་མོ། །བྱེ་བྲག་ཏུ་ཐབས་ལམ་བརྟུལ་ཞུགས་ཀྱི་སྤྱོད་པ་དང་། གྲོལ་ལམ་བག་ཡོད་ཀྱི་སྤྱོད་པ་གཉིས་སུ་བཤད་ཅིང་། ཕྱི་མ་ལའང་། དང་པོ་ལྟ་བ་གཏན་ལ་འབེབས་པའི་དུས་སུ་དད་བརྩོན་གྱི་སྤྱོད་པ་སྟེ། སྤྱིར་དད་པ་ལ་དང་བའི་དད་པ། འདོད་པའི་དད་པ། ཡིད་ཆེས་ཀྱི་དད་པ་དང་གསུམ་མོ། །དེ་ལྟ་བུའི་དད་པས་ཐོས་བསམ་ལ་ཞུགས་ནས་ཐང་ལྷོད་མེད་པའི་བརྩོན་འགྲུས་ཀྱིས་མཐར་ཕྱིན་པར་སྤྱོད་པའོ། །ཤེས་རབ་དང་མཐུན་པའི་སྤྱོད་པ་སྟོང་པ་ཆེན་པོ་སྟེ་མཉམ་བཞག་ཏུ་སྟོང་པ་ཆེན་པོ་བསྒོམ་ཞིང་རྗེས་ཐོབ་ཏུའང་དེའི་ངང་བསྐྱངས་ཏེ་སྤྱོད་པའོ། །ཐབས་དང་མཐུན་པ་སྙིང་རྗེ་སྒྱུ་མ་སྟེ་མཉམ་བཞག་ཏུ་སྙིང་རྗེ་སྒྱུ་མ་སྒོམ་ཞིང་རྗེས་ཐོབ་ཏུའང་སྤྱོད་ཡུལ་ཐམས་ཅད་སྒྱུ་མར་བལྟ་བའོ། །ཕྱོགས་གཅིག་པ་ནི་ཕྱག་རྒྱ་གཅིག་པ་སྟེ་མཉམ་བཞག་ཏུ་ཟུང་འཇུག་ཕྱག་རྒྱ་གཅིག་པ་བསྒོམ་ཞིང་རྗེས་ཐོབ་ཏུའང་དེའི་རྒྱུན་བསྲིང་བའོ། །སྤྲོས་པ་དང་བཅས་པ་ནི་ཕྱག་རྒྱ་སྤྲོས་བཅས་ཀྱི་སྤྱོད་པ་སྟེ། མཉམ་རྗེས་གཉིས་ཀར་སྤྱོད་ཡུལ་ཐམས་ཅད་ལྷའི་རོལ་མོར་འཆར་བ་ལ་བསླབ་པའོ། །ཚོགས་ཀྱི་སྤྱོད་པ་ནི། ཚོགས་སྒྲུབ་ཀྱི་སྐབས་ཏེ། མཉམ་རྗེས་གཉིས་ཀ་ཡོ་བྱད་ལྔ་ལ་མ་ཆགས་པར་སྤྱོད་པའོ། །རྫུ་འཕྲུལ་གྱི་སྤྱོད་པ་ནི། རིག་འཛིན་བཞིའི་གནས་སྐབས་ཀྱི་སྤྱོད་པ་སྟེ། རྫུ་འཕྲུལ་གྱི་བཀོད་པས་སྤྲུལ་པ་མ་འགགས་པར་སྟོན་ཅིང་དོན་མཛད་པའོ། །དེ་ལྟར་གྲོལ་ལམ་རིམ་གྱིས་པའི་སྤྱོད་པ་བདུན་བཤད་ནས་ཅིག་ཅར་བའི་སྤྱོད་པ་ནི་ཆོས་ཐམས་ཅད་ལ་བླང་དོར་མེད་པ་སྤྱོད་པ་སྟེ། ཀུན་འདུས་ལས། མི་དམིགས་པ་ལས་རྣམ་པར་སྤྱོད། །དེ་ལྟར་སྤྱོད་པ་ཀུན་སྤྱོད་ཀྱང་། །དམ་པའི་དོན་ཏེ་སྤྱོད་མཆོག་ཉིད། །ཅེས་སོ། ། ― MLP018_Page_0200 ―
[མ་དཔེ་གཟིགས་ན་འདིར་གནོན།]
གསུམ་པ་བཀོད་པ་དཀྱིལ་འཁོར་ནི། ཇི་སྐད་དུ། དཀྱིལ་འཁོར་དབང་དང་དམ་ཚིག་གསུམ། །གསང་སྔགས་ཀུན་གྱི་གཞུང་ཤིང་ཡིན། །ཞེས་གཙོ་བོར་སྟོན་ཏེ་བཤད་དགོས་པས། དེ་ལ་ངོ་བོ་ནི། བཀོད་པ་ལྷའི་འཁོར་ལོ་རྫོགས་པར་སྣང་བ་ལ་འཇོག་ཅིང་། ངེས་ཚིག་ནི། མཎྜ་ལ་ཞེས་པའི་སྒྲ་ལས་ལེན་པའམ་འཛིན་པ་སྟེ་ཡོན་ཏན་གྱི་གཞི་འཛིན་པའམ། དེ་ལེན་ཅིང་ཐོབ་པར་བྱེད་པའི་ཕྱིར་རོ། །དབྱེ་ན་སངས་རྒྱས་གསང་བས་ཆོས་དོན་དུ། དབྱེ་བ་རང་བཞིན་ཏིང་འཛིན་དང་། །གཟུགས་བརྙན་དཀྱིལ་འཁོར་རྣམ་པ་གསུམ། །ཞེས་པ་ལྟར་རམ། ཡང་རྒྱུད་ཕྱི་མ་ལས། སྐུ་གསུང་ཐུགས་ཀྱི་དབྱེ་བ་ལས། །དཀྱིལ་འཁོར་རྣམ་པ་གསུམ་འདོད་དེ། །ཞེས་གསུམ་དུ་དབྱེ་བ་དང་། འགྲེལ་ཆུང་ལས། དཀྱིལ་འཁོར་རྣམ་པ་བཅུ་གཉིས་ཏེ། །དེ་བཞིན་ཉིད་དང་རང་བཞིན་དང་། །ཐུགས་རྗེ་འདུལ་བའི་དཀྱིལ་འཁོར་དང་། །ཏིང་ངེ་འཛིན་དང་གཟུགས་བརྙན་དང་། །ལྷག་པ་ཏིང་འཛིན་གཟུགས་བརྙན་དང་། །བྱང་ཆུབ་སེམས་དང་ལྷག་བྱང་སེམས། །ཚོགས་དང་ལྷུན་གྲུབ་དཀྱིལ་འཁོར་རོ། །ཞེས་བཅུ་གཉིས་སུ་དབྱེ་བ་སོགས་ཡོད་པ་ལས། སྐབས་འདིར་རྒྱས་པ་ལས། འདིར་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་དང་། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། །ཞེས་གསུངས་པ་ལྟར་བདུན་དུ་ཕྱེ་ནས་འཆད་དེ། དང་པོ་རང་བཞིན་དཀྱིལ་འཁོར་ལ། རང་བཞིན་ཉིད་ཀྱི་དཀྱིལ་འཁོར་དང་། རང་བཞིན་འབྲས་བུ་མཐར་ཕྱིན་གྱི་དཀྱིལ་འཁོར་གཉིས་ལས། དང་པོ་ནི་ཆོས་ཐམས་ཅད་ཡེ་ནས་རང་བཞིན་གྱིས་རྣམ་པར་དག་པ་གནས་ལུགས་ཀྱི་དཀྱིལ་འཁོར་ཏེ། ཁོག་གཞུང་ལས། ཆོས་ཉིད་རང་བཞིན་སྤྲོས་བྲལ་ཏེ། །དངོས་པོ་ཀུན་ཀྱང་དེ་བཞིན་པས། །རང་བཞིན་ཉིད་ཀྱི་དཀྱིལ་འཁོར་རོ། །ཞེས་སོ། །འབྲས་བུ་མཐར་ཕྱིན་གྱི་དཀྱིལ་འཁོར་ནི། རང་རིག་ཡེ་ཤེས་མངོན་དུ་གྱུར་པས་འོག་མིན་གྱི་གནས་སུ་སྐུ་དང་ཡེ་ཤེས་འདུ་འབྲལ་མེད་པའི་དཀྱིལ་འཁོར་དུ་བཞུགས་པ་ནི། དེ་ལས། འབྲས་བུ་མཐར་ཕྱིན་འོག་མིན་ན། །བཞུགས་པ་དཀྱིལ་དང་འཁོར་གྱི་ཚུལ། །ཞེས་སོ། །གཉིས་པ་གཟུགས་བརྙན་གྱི་དཀྱིལ་འཁོར་ནི། དོན་དམ་ ― MLP018_Page_0201 ―
[མ་དཔེ་གཟིགས་ན་འདིར་གནོན།]
པའི་གཟུགས་བརྙན་ཀུན་རྫོབ་ལྷའི་དཀྱིལ་འཁོར་དུ་རང་ཤར་བ་སྟེ། རྒྱས་པ་ལས། གཟུགས་བརྙན་དཀྱིལ་འཁོར་ཡང་དག་ནི། །ཆེན་པོ་རགས་པ་ཐབས་སུ་རྟོགས། །སོ་སོའ་མཚན་ཉིད་ཤེས་རབ་རྟོགས། །གཉིས་མེད་འབྲེལ་བ་ཐབས་ཆེན་ཡིན། །ཞེས་སོ། །གསུམ་པ་ལྷག་པ་གཟུགས་བརྙན་གྱི་དཀྱིལ་འཁོར་ནི། རྡོ་རྗེ་ལས་རིམ་ལས། ས་གཞི་མཉམ་དང་ཚད་ཐིག་དང་། །ཚོན་དང་བྲི་དང་རྣམ་པ་དང་། །རབ་གནས་སྦྱིན་སྲེག་དཀྱིལ་འཁོར་དུ། །འཇུག་དང་ཞུགས་པའི་ཡོན་ཏན་ནོ། །ཞེས་དོན་བཅུ་ལས། དང་པོ་ས་གཞི་མཉམ་པ་ནི། དེ་ཉིད་ལས། གཞི་དང་རང་མཚན་བསླང་དབང་དང་། །སྦྱང་བྱིན་བསྲུང་དང་བཟུང་བ་ནི། །དང་པོའི་ཉིང་ལག་ཉིད་དུ་བཤད། །ཅེས་དོན་བརྒྱད་ལས། དང་པོ་ས་གཞི་ལ་བརྟག་པ་ནི། རྔམ་གློག་ལས། གནམ་དང་ས་དང་བར་སྣང་རྣམས། །ལེགས་པར་བརྟགས་ཏེ་ལས་རྣམས་བྱ། །ཞེས་གསུངས་པ་ལྟར་གནམ་ས་བར་གསུམ་གྱི་དཔྱད་ལ་བརྟག་པ་སྟེ། དང་པོ་ནམ་མཁའ་ལ་བརྟག་པ་ནི། ལམ་རིམ་ལས། ཟུར་བརྒྱད་ལ་སོགས་རྩེ་མང་དང་། །ཆུ་བོ་བཞིན་དུ་མ་བོ་ཞིང་། །མཉམ་ཞིང་འོ་ཁ་ཆུ་ལྟར་དྭངས། །ཉི་མ་ཤིན་ཏུ་གནས་པ་ནི། །ནམ་མཁའི་མཚན་ཉིད་ཤེས་པར་བྱ། །ཞེས་སོ། །བར་གྱི་སྒྲོས་ལ་བརྟག་པ་ནི། ཕྱོགས་ཀྱི་རི་ལ་བརྟག་པ་དང་། མཚམས་ཀྱི་དགྲ་ལ་བརྟག་པའོ། །དང་པོ་ནི། ལམ་རིམ་ལས། ཤར་ལྷོ་གཞོལ་ཞིང་འཇམ་པ་ལ། །མཐོ་དང་འདུད་པ་ནུབ་བྱང་ཡིན། །ཞེས་སོ། །གཉིས་པ་མཚམས་ཀྱི་དགྲ་ལ་བརྟག་པ་ནི། དེ་ཡི་ཚུལ་ཡང་། རྔམ་གློག་ལས། གཤིན་རྗེ་གདུག་པའི་མདུང་རྩེ་དང་། །སྲིན་མོ་ངུས་པའི་མཆི་རྗེས་དང་། །གནོད་སྦྱིན་ཁྲོས་པའི་སྦར་རྗེས་དང་། །འབྱུང་པོ་རྐུན་མོའ་འཇོལ་ས་དང་། །ཞེས་པ་ལྟ་བུ་ཤར་ལྷོ་ནས་རིམ་པ་བཞིན་གཡས་བསྐོར་གྱིས་མཚམས་བཞིར་མེད་པའོ། །གསུམ་པ་འོག་གི་ས་གཞི་ལ་བརྟག་པ་ནི། ལམ་རིམ་ལས། ལྷུན་སྡུག་རི་བོ་ནགས་ཚལ་ལྡན། །རབ་ཏུ་མཉམ་ཞིང་སྣུམ་བག་ཅན། །ཆུ་བོ་དབང་གི་ཕྱོགས་ཡིན་ཏེ། །ཅུང་ཟད་ཀྱིས་ནི་རླུང་ཉུང་ཞིང་། །མེ་ཏོག་ཤིང་ཚལ་བྱ་སྐད་བརྟག །ལོ་རྒྱུས་ཤིས་པ་མཆོག་ཏུ་གསུངས། །ཞེས་སོ། །ཆུ་བོ་དབང་གི་ཕྱོགས་ལ་འདོད་ཚུལ་གཉིས་ཏེ། རྒྱལ་བློན་སྔ་དར་གྱི་དུས་སུ་ནི། ― MLP018_Page_0202 ―
[མ་དཔེ་གཟིགས་ན་འདིར་གནོན།]
ཤར་ཕྱོགས་དབང་པོའི་ཕྱོགས་ནས་འབབས་པ་དེ་ཡིན་གསུངས་ཏེ་ལྷ་ས་ལྟ་བུ་དང་། ཁྲི་སྲོང་གི་དུས་སུ་ནི། ནུབ་ཕྱོགས་ཀླུ་དབང་གི་ཕྱོགས་ཡིན་གསུངས་ཏེ་བསམ་ཡས་བཞིན་ནོ། །དེ་གཉིས་ཀའང་འགལ་སྐྱོན་མེད་འདྲ་གསུངས། གཉིས་པ་ས་རང་གི་མཚན་ཉིད་ལ་བརྟག་པ་ལ་བཟང་ངན་གཉིས་ལས། བཟང་བ་ནི། ལམ་རིམ་ལས། བཀྲ་ཤིས་རྩྭ་དང་མེ་ཏོག་ཤིང་། །གནག་དང་ཁ་དོག་ལྡན་པའོ། །ཞེས་གསུངས་སོ། །ངན་པ་ནི། ཕྱི་དབྱིབས་ངན་པ། ཐང་ཀ་སོག་ལེ་ལྟ་བུ་དང་། །དམའ་དང་བོ་བའི་མཚན་ཉིད་དང་། །ཞེས་སོགས་སོ། །ནང་ངན་པ་ནི། གྲམ་པ་ཐལ་བ་ཤིང་སོལ་དང་། །གྱོ་མོ་རུས་པ་གསེག་མ་སོགས། །ཞེས་པ་རྣམས་སོ། །དེ་ལྟར་ངན་པའི་སྐྱོན་མེད་པ་རུང་བའི་མཚན་ཉིད་དང་ལྡན་ན། བསླང་དགོས་པ་ནི། རྔམ་གློག་ལས། རྩོད་པ་ཉེ་བར་ཞི་བའི་ཕྱིར། །མངོན་དང་མི་མངོན་བདག་པོ་ལ། །སེར་སྣ་སྤངས་པའི་ཡིད་ཀྱིས་ནི། །རིན་བཅལ་བདེན་པས་བསྒོས་ལ་བསླང་། །ཞེས་པས། སྣང་བ་མི་ལས་བསླང་བ་དང་། མི་སྣང་བ་ལྷ་ལས་བསླང་བའོ། །དང་པོ་ནི། ས་དེའི་བདག་པོར་གྱུར་པའི་རྒྱལ་པོ་སོགས་ལ་རིན་གཞལ་ཏེ་བསླང་བའོ། །གཉིས་པ་ནི། བདེ་བར་གཤེགས་པ་དང་། སའི་ལྷ་མོ་འཁོར་བཅས་ལ་བསླང་བའོ། །བཞི་པ་དབང་དུ་བྱ་བ་ནི། ལམ་རིམ་ལས། དངོས་གྲུབ་དབང་དུ་བྱ་བའི་ཕྱིར། །ཟངས་སོགས་ཕུར་བུ་ཟླ་གམ་ལ། །ཧཱུྃ་ལས་བྱུང་བའི་དབང་མཆོག་ཁྲོ། །ཞེས་གསུངས་པ་ལྟར། པདྨ་ཀཱི་ལ་ཡར་བསྐྱེད་པའི་དབང་མཆོག་གི་ཕུར་བུ་གདབ་པའོ། །ལྔ་པ་སྦྱང་བ་ནི། ལམ་རིམ་ལས། སྦྱང་བ་ལས་མེ་སྔགས་ཕྱག་རྒྱ། །ཏིང་ངེ་འཛིན་གྱིས་དག་པར་བྱ། །ཞེས་པ་ལྟར་བཞི་ལས། དང་པོ་ལས་དང་བྱ་བས་སྦྱོང་བ་ནི། ལྟོ་འཕྱེ་བརྟགས་ཏེ། ལྟོ་བ་ནས་ས་བརྐོས་ལ། དོང་ཚད་སྐེད་པའམ་པུས་ནུབ་ཀྱི་ཚད་གང་རིགས་བརྐོས་ལ་སའི་རོ་རྣམས་བསལ་ཏེ། ལམ་རིམ་ལས། ཆུས་བཀང་གོམ་པ་བརྒྱར་བལྟ་བྱ། །ཞེས་པ་ལྟར། གོམ་པ་ལྔ་བཅུར་ཕྱིན་ནས་ཚུར་འོངས་ཏེ་བལྟས་པས། ཆུ་མ་བྲི་ན་ལེགས་པའི་རྟགས་ཏེ་དེ་ཉིད་དུ་གཏེར་གཞུག་ཅིང་སྟེགས་བུ་བརྩིགས་ལ། ནས་འབྲས་གྲོ་སྲན་ཏིལ་དཀར་འབྲུ། །ཞེས་པས། ཕུང་ལྔ་སྐུ་ལྔར་དག་བྱེད་དང་། །གུར་གུམ་གླ་རྩི་ཛ་ཏི་དང་། །ཙན་ ― MLP018_Page_0203 ―
[མ་དཔེ་གཟིགས་ན་འདིར་གནོན།]
དན་དཀར་དམར་སྤོས་ལྔ་སྟེ། །ཞེས་པས། དབང་པོ་ལྔ་ཕྲིན་ལས་ལྔར་དག་བྱེད་དང་། བྱུ་རུ་མུ་ཏིག་མུ་མེན་དང་། །གསེར་དངུལ་རྣམས་ནི་རིན་པོ་ཆེ། །ཞེས་པས། ཡུལ་ལྔ་ཡོན་ཏན་ལྔར་དག་བྱེད་དང་། །ལན་ཚྭ་སྦྲང་རྩི་བུ་རམ་དང་། །ཨ་འབྲས་མར་ཏེ་སྙིང་པོ་ལྔ། །ཞེས་པས་རྣམ་ཤེས་ལྔ་ཡེ་ཤེས་ལྔར་དག་བྱེད་དང་། ཧ་ས་དེ་བ་བྲྀ་ཧ་ཏི། །སྭ་ར་ཀཎྜ་ཀ་རི་དང་། །ཨ་པརྩི་ཏ་སྨན་ལྔའོ། །ཞེས་པས། འདོད་ཡོན་ལྔ་གསུང་ལྔར་དག་བྱེད་དང་། བྱང་སེམས་དཀར་དམར་དྲི་ཆེ་ཆུང་། །ཤ་ཆེན་བདུད་རྩི་རྣམ་ལྔ་སྟེ། །ཞེས་པས་ཁམས་ལྔ་རིགས་ལྔར་དག་བྱེད་དེ་ལྔ་ཚན་དྲུག་གི་ལྡེ་གུའི་རྫས་སུམ་ཅུས་སྐྱང་ནུལ་བྱའོ། །གཉིས་པ་མེས་སྦྱང་བ་ནི་སྦྱིན་སྲེག་སྟེ་འོག་ཏུ་འཆད་དོ། །གསུམ་པ་སྔགས་དང་ཕྱག་རྒྱས་སྦྱང་བ་ནི། ལག་གཡས་པ་ཉི་དཀྱིལ་ལ་འབྲུ་ལྔ་བཀོད་དེ། ༀ་བཛྲ་ཧ་ན་ཧ་ན་ཀྲོ་དྷ་ཧཱུྃ་ཕཊ། ཅེས་པའི་སྔགས་བརྗོད་པ་དང་བསྟུན་ནས་ས་ལ་ལན་གསུམ་བརྡབས་པའི་འོད་ཀྱིས་སྦྱང་བའོ། །བཞི་པ་ཏིང་ངེ་འཛིན་གྱིས་སྦྱང་བ་ལ་གཉིས་ལས། མཚན་མེད་སྟོང་པ་ཉིད་ཀྱི་སྦྱང་བ་ནི། ཤུ་ནྱ་ཏའི་སྔགས་ཀྱིས་སོ། །མཚན་བཅས་ཀྱིས་སྦྱང་བ་ནི། ཞི་ཁྲོ་གང་བྱེད་ཀྱི་དཀྱིལ་འཁོར་འབྱུང་བ་རིམ་བརྩེགས་ནས་བཟུང་སྟེ་གསལ་གདབ་པའོ། །དྲུག་པ་བྱིན་གྱིས་བརླབ་པ་ནི། སློབ་དཔོན་རྒྱས་པའི་ཆས་སུ་ཞུགས་ནས་རྡོ་རྗེའི་འགྲོས་ཀྱིས་དཀྱིལ་འཁོར་ལ་བསྐོར་ཞིང་ཤར་སྒོ་ནས་ཞུགས་ཏེ་དབུས་སུ་འདུག་པ་ལ། ཡུམ་བཞིའི་ང་རྒྱལ་འཛིན་པའི་ཕྱོགས་ཀྱི་སློབ་མ་བཞིས་ཕྱོགས་སོ་སོ་ནས། ཞི་བའི་ཡེ་ཤེས་རང་སྣང་བའི། ཞེས་སོགས་ཀྱིས་གསོལ་བ་བཏབ་པས། སློབ་དཔོན་གྱིས་ནམ་མཁར་བཞུགས་པའི་དེ་བཞིན་གཤེགས་པ་རྣམས་ཀྱི་བྱིན་རླབས་བསྐུལ་ཞིང་བསྡུས་ནས་ཞེ་སྡང་རྡོ་རྗེའི་ང་རྒྱལ་གྱིས་འབར་བའི་སྡང་མིག་དང་བཅས་ཏེ། རྡོ་རྗེ་འཛིན་པ་ཉི་མ་དང་། །ཆོས་དང་རྟ་མཆོག་སྣང་མཛད་ཀྱང་། །བདག་ཉིད་ཆེན་པོ་ང་ཉིད་ཡིན། །ཐམས་ཅད་བཀའ་ལས་དེང་མ་འདའ། །ཞེས་དང་། སུམྦྷའི་སྔགས་བརྗོད་ཅིང་རྡོ་རྗེའི་འགྲོས་ཀྱིས་བསྐོར་བས་ས་གཞི་རྡོ་རྗེའི་རང་བཞིན་དུ་བྱིན་གྱིས་བརླབས་པའོ། །བདུན་པ་བསྲུང་བ་ནི། མཚོན་ཆ་ལྔས་མཚམས་བཅད་པ་སྟེ། འདི་ཉིད་ལས། མཚོན་ཆ་ལྔ་ཡི་རིམ་པ་སྟེ། ། ― MLP018_Page_0204 ―
[མ་དཔེ་གཟིགས་ན་འདིར་གནོན།]
བསྲུང་བའི་མཆོག་ཏུ་དེ་གསུངས་སོ། །ཞེས་སོ། །བརྒྱད་པ་བཟུང་བ་ནི། དེ་ལྟར་ལྷ་ཚོགས་ཡབ་ཡུམ་རོལ་པའི་འོད་ས་གཞི་ལ་ཐིམ་པས་དཀྱིལ་འཁོར་གྱི་རང་བཞིན་དུ་གསལ་བར་བསམ་པ་ནི་ས་བཟུང་བ་སྟེ། ལམ་རིམ་ལས། ངེས་བརྗོད་རོལ་པའི་གཟི་བྱིན་གྱིས། །ཐམས་ཅད་དཀྱིལ་འཁོར་རང་བཞིན་དུ། །གསལ་བྱས་ཡོངས་སུ་བཟུང་བའོ། །ཞེས་སོ། །གཉིས་པ་དཀྱིལ་འཁོར་གྱི་ཚད་ནི། འདི་ཉིད་ལས། དཀྱིལ་འཁོར་ཁྲུ་གང་ཚད་དུ་བྱ། །ཞེས་སོགས་ཀྱིས་བསྟན་པའོ། །གསུམ་པ་ཐིག་ནི། འདི་ཉིད་ལས། ཕུར་བུ་སྲད་བུ་ཚོན་ཕྱེ་དང་། །ཞེས་སོགས་ཏེ། དེ་ཡང་སྤྱིར་ཐིག་ཅེས་པ་མི་འགྱུར་བའི་དོན་ཏེ། དེའི་རྒྱུ་འགྱིང་ཕུར་དང་བསྐོར་ཕུར་ཏེ་ཕུར་བུ་གཉིས་དང་། སྲད་བུའང་གཉིས་ལས། ཡེ་ཐིག་གི་རྒྱུ། ཞི་བ་ལ་པདྨའི་རྒྱུས་པ་དང་། ཁྲོ་བོ་ལ་རྒྱུས་ཆེན་ཏེ། གཉིས་ཀའི་དམ་ཐིག་གི་རྒྱུ་རས་བལ་གཙང་མ་དཔའ་བོའི་རིན་གྱིས་ཉོས་པའོ། །དེ་ཡང་ཡེ་ཤེས་ཀྱི་སྐུད་པ་ཉི་ཤུ་རྩ་ལྔའམ་ལྔ་བསྒྲིལ་དང་། དམ་ཚིག་གི་སྐུད་པ་དགུ་བསྒྲིལ་ལམ་གསུམ་བསྒྲིལ་དུ་བྱའོ། །གདབ་ཚུལ་ཡང་། དམ་ཐིག་སྐུ་གསུང་ཐུགས་ཀྱི་རང་བཞིན་དུ་ས་ལ་བཏབ་ནས། སྐུ་གསུང་ཐུགས་རེ་རེའང་ཡེ་ཤེས་ལྔ་དང་ལྡན་པར་བྱ་བའི་ཕྱིར། ཡེ་ཐིག་དཀྱིལ་འཁོར་གྱི་གཞིའི་སྟེང་གི་ནམ་མཁའ་ལ་གདབ་བོ། །འདེབས་ཚུལ་ཡང་། འདི་ཉིད་ལས། མཁས་ལྡན་ཆེན་པོས་བསྒྲིམས་ཏེ་བྱ། །ཞེས་པས་སྐོར་ཕྱོགས་མ་འཁྲུལ་བར་གདབ་སྟེ། གལ་ཏེ་མ་བསྒྲིམས་པའི་ཉེས་པ་ནི། ལམ་རིམ་ལས། སྐུད་པ་ཆད་ན་སློབ་དཔོན་འཆི། །ཐིག་སྣ་ཤོར་ན་སློབ་མ་འཆི། །ཕྱོགས་འཁྲུལ་བས་ནི་གཉིས་ཀ་ཉམས། །རྒྱུན་ཆད་ལམ་ལ་གནོད་པར་འགྱུར། །དེ་ཕྱིར་མཁས་པས་བསྒྲིམས་ཏེ་བྱ། །ཞེས་སོ། །བཞི་པ་ཚོན་ནི། འདི་ཉིད་ལས། མ་མཐོང་རྨོངས་ལ་བསྟན་ཕྱིར་ཚོན། །ཁ་དོག་ཉི་ཤུ་རྩ་ལྔའམ། །ལྔ་ཡི་ཚོན་གྱིས་བྲི་བར་བྱ། །འདུལ་བའི་ཆོ་ག་བཞིན་དུ་དགྱེ། །ཞེས་སོ། །ལྔ་པ་བྲི་བ་ནི། འདི་ཉིད་ལས། ལྟེ་བ་རྩིབས་དང་ལྡན་པ་ཡི། །རྩིབས་བཞིར་འཁོར་ལོ་མུ་ཁྱུད་བཅས། །གྲུ་ཆད་བཞི་དང་གྲུ་བཞི་པའི། །བར་ཁྱམས་སྒོ་ཁྱུད་ལྡན་པར་བྱ། །ཞེས་གསུངས་པ་ལྟར། དཀྱིལ་འཁོར་རྒྱས་འབྲིང་བསྡུས་གསུམ་གང་གིས་འདུལ་བའི་ཆོ་ག་བཞིན་དུ་བྲི་ ― MLP018_Page_0205 ―
[མ་དཔེ་གཟིགས་ན་འདིར་གནོན།]
བའོ། །དྲུག་པ་རྣམ་པ་འགོད་པ་ནི། སྐུ་གསུང་ཐུགས་ལྡན་གཟུགས་ཀྱང་འགོད། །ཅེས་པའམ། ཡང་ན་གཙོ་འཁོར་གྱི་འགྲོས་སྦྱར་ཏེ། རྔམ་གློག་ལས། གཙོ་བོ་གཟུགས་སུ་རྫོགས་པར་བྲི། །འཁོར་རྣམས་ཕྱག་རྒྱ་དག་ཏུ་བྱ། །ཕལ་པ་ལ་ནི་ཡིག་འབྲུས་སོ། །ཞེས་སོ། །བདུན་པ་རབ་གནས་ལ། ནུབ་གཉིས་པའི་ལས་རིམ་སྤྱིར་བཤད་པ་དང་། སྐབས་ཐོབ་ཀྱི་ལས་རིམ་དཀྱིལ་འཁོར་རབ་གནས་གཉིས་ལས། དང་པོ་ཡན་ལག་གི་རབ་གནས་ནི། ལས་བུམ། རྡོར་དྲིལ། ཐོད་ཆུ། ཐིག་ཚོན་རབ་གནས་རྣམས་དང་། ཡན་ལག་ཅན་གྱི་རབ་གནས་ནི། བུམ་པ། སློབ་མ། ལྷ་སྟ་གོན་གྱིས་བསྟན་ཏོ། །གཉིས་པ་ནི། ལས་ཁྲིགས་རྣམ་པ་དགུ་ལ་སོགས་པའི་སྒོ་ནས་སོ། །བརྒྱད་པ་སྦྱིན་སྲེག་ནི། སྐབས་ཐོབ་ཀྱི་ལས་བཞི་སྟེ། འདི་ཉིད་ལས། དབྱིབས་དང་ཁ་དོག་མཚན་ལྡན་པར། །ཞལ་དུ་གྱུར་པའི་མེ་བུས་ལ། །བཟའ་བཏུང་བྲོ་བའི་ཚོགས་རྣམས་ཀྱིས། །ལས་བཞིའི་མཆོད་པ་རབ་ཏུ་སྦྱིན། །ཞེས་སོ། །དགུ་པ་དཀྱིལ་འཁོར་དུ་འཇུག་པ་ནི། སྒྲུབ་མཆོད་ལ་སོགས་པ་སྔོན་དུ་འགྲོ་བའི་སྒོ་ནས་དང་པོར་སློབ་དཔོན་རང་ཉིད་ཞུགས་རྗེས་སློབ་མ་དཀྱིལ་འཁོར་དུ་འཇུག་པར་བྱ་བ་སྟེ། འདི་ཉིད་ལས། ཀུན་བྱས་དབང་ཕྱུག་རིག་པས་འཇུག །དེ་ནས་སློབ་མ་གཞུག་པར་བྱ། །ཞེས་དང་། རྡོ་རྗེ་ལས་རིམ་ལས། དབང་ཕྱུག་འཇུག་དང་བཟོད་གསོལ་དང་། །ཁྲུས་དགབ་དྲི་དང་ལུས་དབུལ་དང་། །བགེགས་བསྐྲད་ལྷར་རློབ་དམ་ཚིག་སྦྱིན། །དེ་ཉིད་དབབ་དང་ཆུ་ནན་དང་། །བསྒྲགས་དང་རིན་ཆེན་དོར་བ་དང་། །ལྷ་དབབ་པ་དང་ནན་ཏན་དང་། །མིག་དབྱེ་དཀྱིལ་འཁོར་ལེགས་བསྟན་དང་། །ཚོགས་མཆོག་ཡོན་དང་རྣམ་བཅོ་བརྒྱད། །འདི་ཡིས་ཡན་ལག་རྫོགས་པར་འགྱུར། །ཞེས་སོ། །བཅུ་པ་ཞུགས་པའི་ཡོན་ཏན་ནི། འདི་ཉིད་ལས། བྱས་ཏེ་དད་ལྡན་རབ་ཞུགས་ནས། །འདོད་པ་ཡིད་འོང་མཉམ་པར་འགྱུར། །ཞེས་དང་། མཉམ་སྦྱོར་ལས། །རྡོ་རྗེ་སེམས་དཔའ་ལ་སོགས་པའི། །འཁོར་ལོ་མངོན་དུ་མཐོང་བ་ཡི། །བསོད་ནམས་བརྟགས་པ་གང་ཡིན་པ། །ཕྱིས་བྱས་པ་ཡང་དེ་བཞིན་ནོ། །ཞེས་གསུངས་སོ། །བཞི་པ་ཏིང་ངེ་འཛིན་གྱི་དཀྱིལ་འཁོར་ནི། རང་བཞིན་གྱི་དཀྱིལ་འཁོར་ཉིད་ཏིང་ངེ་འཛིན་གྱིས་ཡུལ་དུ་བྱས་ཏེ་ ― MLP018_Page_0206 ―
[མ་དཔེ་གཟིགས་ན་འདིར་གནོན།]
རང་རིག་མ་བཅོས་པའི་དོན་ལ་མཉམ་པར་བཞག་པས་རྣམ་པར་མི་རྟོག་པའི་རང་རྩལ་ཡེ་ཤེས་འགགས་མེད་དུ་འཆར་བ་སྟེ། འདི་ཉིད་ལས། ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །ཅེས་སོ། །ལྔ་པ་ལྷག་པ་ཏིང་ངེ་འཛིན་གྱི་དཀྱིལ་འཁོར་ནི། ཁོག་གཞུང་ལས། ལྷག་པ་ཏིང་འཛིན་རྣམ་པ་གཉིས། །འདུལ་བའི་དོན་ཕྱིར་ཞི་ཁྲོ་གཉིས། །ཞེས་གསུངས་པ་ལྟར། ཐུགས་རྗེ་ཞི་བའི་དཀྱིལ་འཁོར་དང་། བདུད་འདུལ་ཁྲོ་བོའ་དཀྱིལ་འཁོར་གཉིས་ལས། ཞི་ཁྲོ་གཉིས་ཀ་ལ་མཚུངས་པར། སྔོན་འགྲོ་ལས་བདུན་ནས་གོ་བགོ་ལུས་བསྲུང་གི་བར་ཏིང་ངེ་འཛིན་གྱི་དམིགས་པའི་འཕྲོ་འདུ་མང་པོས་ལྷག་པོར་སྒྲུབ་དགོས་པས་ན་ལྷག་པ་ཏིང་ངེ་འཛིན་གྱི་དཀྱིལ་འཁོར་ཞེས་བྱའོ། །དྲུག་པ་བྱང་ཆུབ་སེམས་ཀྱི་དཀྱིལ་འཁོར་ནི། སྤྱན་འགྲེལ་ལས། བྱང་སེམས་ཕྱི་ནང་གསང་བ་དང་། །གནས་གཞི་ཁམས་གསུམ་ཡེ་ཤེས་ཆེ། །ཞེས་པས། ཕྱི་བྱང་ཆུབ་ཀྱི་སེམས་རྩ་དང་རླུང་། ནང་བྱང་ཆུབ་ཀྱི་སེམས་ཐིག་ལེ། གསང་བ་བྱང་ཆུབ་ཀྱི་སེམས་བདེ་བའི་ཡེ་ཤེས་དང་གསུམ་མོ། །དང་པོ་ནི། སྒྱུ་འཕྲུལ་སྙིང་པོ་བཀོད་པའི་རྒྱུད་ལས། སྲིད་གསུམ་སེམས་ཅན་ཐམས་ཅད་ལ། །སྲོག་ཤིང་གསུམ་དང་འཁོར་ལོ་བཞི། །ཞེས་རྩ་དང་རླུང་ལ་སྦྱང་གཞི་ཡེ་ཤེས་ཀྱི་རླུང་དང་། སྦྱང་བྱ་ལས་ཀྱི་རླུང་གཉིས། ལས་རླུང་ལ་རྩ་བ་དང་ཡན་ལག་གིས་བསྡུས་པའི་རླུང་བཅུ། སྣར་རྒྱུ་བའི་རླུང་དང་བཅས་པའོ། །གཉིས་པ་ནི། སྙིང་ག་ན་སྲོག་མི་ཤིགས་པའི་ཐིག་ལེ་སོགས་ཡེ་ཤེས་ཀྱི་ཐིག་ལེ་དང་། རྣམ་ཤེས་ཀྱི་ཐིག་ལེ་སྙིགས་མ་དང་བཅས་པའོ། །གསུམ་པ་ནི། སྟེང་འོག་གི་སྒོ་ལ་བརྟེན་ནས་བདེ་ཆེན་གྱི་ཡེ་ཤེས་བསྐྱེད་པ་སྟེ། དགྱེས་རྡོར་ལས། དཀྱིལ་ནི་སྙིང་པོ་ཞེས་བརྗོད་དེ། །བྱང་ཆུབ་སེམས་ནི་བདེ་ཆེན་པོ། །ལེན་པར་བྱེད་པ་དཀྱིལ་འཁོར་ཉིད། །ཅེས་སོ། །བདུན་པ་ཚོམ་བུ་ཚོགས་ཀྱི་དཀྱིལ་འཁོར་ནི། ཞི་ཁྲོ་གཉིས་ཀ་ལ་ཚོམ་བུ་གཅིག་གསུམ་ལྔ་པ་གསུམ་སྟེ། ཁོག་གཞུང་ལས། ཚོགས་ནི་འབྱོར་པ་རྣམ་པ་གསུམ། །ཚོམ་བུ་གཅིག་གསུམ་ལྔ་པའོ། །ཞེས་གསུངས་སོ། ། ― MLP018_Page_0207 ―
[མ་དཔེ་གཟིགས་ན་འདིར་གནོན།]
བཞི་པ་དབང་ལའང་གསུམ་སྟེ། ངོ་བོ་ནི། ཐུགས་ཐིག་ལས། རྒྱུ་གཉིས་རྐྱེན་བཞིས་ཡན་ལག་བསྙད། །དྲུག་ལ་གནས་པའི་ཐོབ་བྱ་ནི། །ངོ་བོ་ཉིད་བཅས་རྣམ་པར་བཤད། །ཅེས་སྤྱིར་དབང་ལ་རྒྱུ་གཉིས་དང་རྐྱེན་བཞིའོ། །དང་པོ་རྒྱུ་གཉིས་ནི། མཚུངས་ལྡན་གྱི་རྒྱུ་གདོད་མ་ནས་རང་ལ་རང་ཆས་སུ་བཞུགས་པའི་ཆོས་ཉིད་དོ། །ལྷན་ཅིག་བྱེད་རྒྱུ་ནི། དབང་རྫས་རབ་གནས་ཀྱི་བྱིན་གྱིས་བརླབས་པ་ཅན་ནོ། །གཉིས་པ་ལ་རྐྱེན་ནི། ཕན་ནུས་ཟབ་མོའ་དབང་གསུམ་བསྐུར་དུ་རུང་བའི་སྣོད་ལྡན་གྱི་སློབ་མ་རྒྱུའི་རྐྱེན། དབང་གསུམ་བསྐུར་ནུས་པའི་སློབ་དཔོན་ཚད་ལྡན་བདག་པོའི་རྐྱེན། རྫས་སྔགས་ཏིང་ངེ་འཛིན་གསུམ་འཛོམ་པའི་ནུས་པ་ཁྱད་པར་ཅན་དམིགས་པའི་རྐྱེན། དབང་སྔ་མ་སྔ་མས་གོ་ཕྱེ་ནས་ཕྱི་མ་ཕྱི་མ་འབྱུང་བ་དེ་མ་ཐག་པའི་རྐྱེན་ནོ། །དེ་ལྟར་རྒྱུ་གཉིས་དང་རྐྱེན་བཞི་སྟེ་དྲུག་པོ་ཚོགས་པ་ལ་བརྟེན་ནས་གོ་འཕང་གི་ཆོས་དབང་གི་ཡེ་ཤེས་རྒྱུད་ལ་འཇོག་པའི་ལས་ཀྱིས་ཐར་པའི་མྱུ་གུ་མངོན་དུ་བསྐྱེད་པའམ་སྐྱེ་ངེས་ཀྱི་ནུས་རུང་དུ་སྨིན་པར་བྱེད་པ་ནི་དབང་གི་ངོ་བོའོ། །ངེས་ཚིག་ནི། ཨ་བྷི་ཥིཉྩའི་སྒྲ་ལས། ཨ་བྷི་ནི་མངོན་པ། ཥིཉྩ་ནི་གཏོར་བའམ་བླུགས་པ་སྟེ། དབང་གིས་སྒོ་གསུམ་གྱི་དྲི་མ་འཁྲུད་པའི་ཆ་ནས་མངོན་པར་གཏོར་བ་དང་། འབྲས་བུ་ཡེ་ཤེས་ཀྱི་ནུས་པ་ཁྱད་པར་ཅན་རྒྱུད་ལ་འཇོག་པའི་ཆ་ནས་མངོན་པར་བླུགས་པའི་དོན་གྱིས་ན་དབང་སྟེ། བརྟག་གཉིས་ལས། གཏོར་དང་བླུགས་པ་ཞེས་བྱ་བ། །དེས་ན་དབང་ཞེས་བརྗོད་པར་བྱ། །ཞེས་སོ། །དབྱེ་ན། སློབ་དཔོན་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །ཞེས་པས་བཞི་དང་། ཡང་སྣོད་ཀྱི་དབང་དུ་བྱས་ཏེ་དབྱེ་ན་ཕན་ནུས་ཟབ་མོའ་དབང་གསུམ་སྟེ། འདི་ཉིད་ལས། དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །ཞེས་གསུངས་པ་ལྟར། གང་ཟག་དད་པ་ཅན་ལ་ཕྱི་ཕན་པའི་དབང་བཅུ་སྟེ། དེ་ཡང་སྡོམས་སུ་བྱས་ནས། སྙིང་པོ་ལྔ་དང་དབུ་རྒྱན་དང་། །བུམ་པ་ཅོད་པན་ཕྲེང་བ་སྟེ། །གོ་ཆ་རྒྱལ་མཚན་གདུགས་ཕྱག་རྒྱ། །བཟའ་བཏུང་དབང་རྣམས་རིམ་བཞིན་བསྐུར། །ཞེས་སོ། །གཉིས་པ་ནང་ནུས་པའི་དབང་ལ་ལྔ་ཡོད་དེ། བདག་དོན་ ― MLP018_Page_0208 ―
[མ་དཔེ་གཟིགས་ན་འདིར་གནོན།]
ནུས་པ་ལ་ཉན་དབང་དང་ལྷ་བསྒོམ་པའི་དབང་། གཞན་དོན་ནུས་པ་ལ་འཆད་ཕྲིན་གྱི་དབང་། གཉིས་ཀའི་དོན་ནུས་པ་ལ་རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་བསྐུར་བའོ། །ཟབ་དབང་གསུམ་ནི། སྤྱོད་རིག་མཉམ་པའི་བརྟུལ་ཞུགས་ཅན་ལ་བསྐུར་བས་རིམ་གྱིས་ཕྱག་རྒྱ་ཆེན་པོའི་དངོས་གྲུབ་ལ་སྦྱོར་བ་སྟེ། རྡོ་རྗེ་ལས་རིམ་ལས། དང་པོས་ས་བོན་འཇོག་པ་དང་། །གཉིས་པས་ནུས་པ་བསྐྱེད་པ་ཡིན། །གསུམ་པས་ཉམས་མྱོང་བསྐྱེད་པའོ། །བཞི་པས་དེ་ཉིད་བརྟན་པར་བྱ། །ལྔ་པས་བརྟན་པ་ཉམས་ལེན་པས། །མཆོག་གི་དངོས་གྲུབ་ཚེ་འདིས་འགྲུབ། །ཅེས་གསུངས་པ་ལྟར། ཕན་དབང་གིས་ས་བོན་འཇོག །ནུས་དབང་གིས་ས་བོན་ནུས་ལྡན་དུ་སྨིན། གསང་དབང་གིས་དབང་དོན་གྱི་ཡེ་ཤེས་རྒྱུད་ལ་མྱོང་། ཤེར་དབང་གིས་དེ་ཁོ་ན་ཉིད་རྒྱུད་ལ་བརྟན་པར་བྱེད། བདེ་བ་ཆེན་པོའི་དབང་གིས་མཆོག་གི་དངོས་གྲུབ་ཐོབ་པར་བྱེད་པའོ། །ཁྲོ་བོ་ལ། གདན་དང་ལྷ་དབང་ཕྱག་མཚན་དང་། །ཆས་བཅུ་སྒྲུབ་རྫས་བཅོ་ལྔའོ། །ཞེས་པས། ཕན་དབང་ལ་ཉེར་བརྒྱད་དུ་ཕྱེ་བས་ནང་གསེས་ཀྱིས་དབྱེ་ན་གྲངས་སོ་དྲུག་སྟེ། དེ་འདྲེན་ཚུལ་ནི། ཕྱག་རྒྱ་ལྷའི་དབང་། བསྣམས་པ་ཕྱག་མཚན་གྱི་དབང་། དྲེགས་པ་གདན་གྱི་དབང་གསུམ་ནི་རེ་རེ་དང་། དེ་ལས་གཞན་རྣམས་ཀྱི་བྱེ་བྲག་བགྲང་བའི་སྡོམ་ཚིག་ནི། རྒྱན་ཆས་རྟགས་ལ་བཅུ་ཡིན་ཏེ། །དབུ་རྒྱན་བུམ་པ་སྙིང་པོ་ལྔ། །ཅོད་པན་གོ་ཆ་ཕྲེང་བ་རྒྱན། །ཐོད་ཕྲེང་རྟགས་གསུམ་མེ་དཔུང་ངོ་། །ནུས་པའི་དབང་ནི་ལྔར་ངེས་ཏེ། །ཉན་སྒོམ་འཆད་ལས་རབ་འབྱམས་དབང་། །སྒྲུབ་པའི་དབང་ལ་བཅོ་ལྔ་སྟེ། །བདུད་རྩི་ལྔ་དང་ཤ་ལྔ་དང་། །རཀྟ་ཁ་ཾ་གདུགས་རྒྱལ་མཚན། །ཕུར་པ་རྡོར་དྲིལ་རྔེའུ་ཆུང་དང་། །ཡུངས་ཀར་གཟུངས་མ་ཕྲེང་བ་དང་། །ཚེ་དང་བཟའ་བཏུང་མིང་དབང་ངོ་། །ཟབ་དབང་གསུམ་སྟེ་གསང་བ་དང་། །ཤེས་རབ་ཡེ་ཤེས་བདེ་ཆེན་ནོ། །ཞེས་གསུངས་པ་ལྟར་རོ། །དེ་ལྟར་དབང་བསྐུར་ཚུལ་ནི། ངེས་འབྱེད་ལས། བཞག་པའི་གནས་དང་བསྟིམ་པའི་གནས། །དེ་བཞིན་ཁོང་དུ་ཆུད་པ་གཅེས། །ཞེས་གསུངས་པ་ལྟར། དང་པོ་བཞག་གནས་ནི། དེ་ལས། ཕྱི་དབང་ལུས་ལ་བསྐུར་བ་སྟེ། ཁྱད་པར་སྙིང་པོ་དབུ་རྒྱན་བུམ། །གདུགས་དང་ཅོད་པན་ཕྲེང་བ་མགོ ། ― MLP018_Page_0209 ―
[མ་དཔེ་གཟིགས་ན་འདིར་གནོན།]
གོ་ཆ་ལུས་ཏེ་རྒྱལ་མཚན་ལག །བཟའ་བཏུང་ངག་གི་ལམ་དུའོ། །ཕྱག་རྒྱ་སྤྱི་བོའམ་སྙིང་ག་སྟེ། །ཞེས་སོ། །དབང་རྫས་ནི། ངེས་འབྱེད་ལས། རྫས་ནི་གླེགས་བམ་རྒྱ་གྲམ་དང་། །འཁོར་ལོ་ཕྲེང་བ་རྡོ་རྗེ་དྲིལ། །འབྱུང་ལྡན་དོན་ཡོད་སྣང་མཐའ་ཡས། །ཡི་དམ་རིགས་ལྔའི་རབ་གནས་ལྡན། །ཞེས་དང་། ཟབ་དབང་ལ། དེ་ལས། རྫས་ནི་སྐབས་ཀྱི་ཕྱག་རྒྱ་མོ། །ཟླ་བ་འཛག་པ་གཏད་པའོ། །ཞེས་སོ། །བསྟིམ་གནས་ནི། དབང་གི་གལ་པོ་ལས། སེམས་ཀྱི་དཀྱིལ་ནས་དྲངས་པའི་ཆུ། །ཁྱོད་ཀྱི་ལྕེ་ལ་བཞག་པ་ནི། །སྙིང་གི་དཀྱིལ་དུ་བཟུང་བར་བྱོས། །ཞེས་སོ། །དེ་ལྟར་དབང་ཐོབ་པའི་ཚད་ནི། ཁོག་གཞུང་ལས། རྣོ་ལ་ངར་བཏགས་ནུས་པ་བཞིན། །ནུས་པ་སྐྱེས་པ་ཐོབ་པའི་ཚད། །ཅེས་སོ། །དབང་མ་ཐོབ་པའི་སྐྱོན་ནི། འདི་ཉིད་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་བརྩོན་པ་ནི། །འབྲས་བུ་མེད་ཅིང་བརླག་པར་འགྱུར། །ཞེས་སོ། །དེ་ལྟར་དབང་ཐོབ་པའི་ཡོན་ཏན་ནི། དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་དང་། ཧེ་རུ་ཀ་མངོན་བྱུང་ལས། དཀྱིལ་འཁོར་བདག་པོ་མཐོང་ནས་ནི། །ཅུང་ཟད་དེ་ནི་མི་འགྲུབ་མེད། །སྡིག་པ་ཀུན་ལས་རྣམ་པར་གྲོལ། །དངོས་གྲུབ་མྱུར་དུ་ཐོབ་པར་འགྱུར། །ཞེས་གསུངས་སོ། །ལྔ་པ་དམ་ཚིག་ལའང་གསུམ་སྟེ། ངོ་བོ་ནི། རྒྱུད་ཕྱི་མ་ལས། གང་ཞིག་ནན་ཏན་ལས་མི་འགོང་། །རྨི་ལམ་དུའང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད། །ཅེས་པས་གང་བསྲུང་བྱའི་དོན་ཁྱད་པར་ཅན་ནི་འོག་ནས་འབྱུང་བའི་རྩ་བ་དང་ཡན་ལག་གི་དམ་ཚིག་རྣམས་ཡིན་ལ། དེ་དག་ལས་ནམ་ཡང་མི་འདའ་བར་སྡོམ་བྱེད་ཀྱི་སེམས་པ་རྒྱུན་ཆགས་དང་། གཉིད་དང་སེམས་ཡེངས་པ་ལ་སོགས་པའི་གནས་སྐབས་སུ་ཡང་སྡོམ་པའི་ས་བོན་དང་བཅས་པའོ། །ངེས་ཚིག་ནི། ས་མ་ཡའི་སྒྲ་ལས་ས་མ་ཡ་ནི་རྣམ་པ་གཅིག་ཏུ་ན་དངོས་སུ་ཡལ་གམ་བཅས་པའི་ཐ་ཚིག་ལ་འཇུག་སྟེ། སྔོན་རང་གི་ཇི་ལྟར་དམ་བཅས་པ་ལས་འདའ་བར་བྱ་བ་ ― MLP018_Page_0210 ―
[མ་དཔེ་གཟིགས་ན་འདིར་གནོན།]
མ་ཡིན་པའི་ཕྱིར་དམ་ཚིག་སྟེ། ཇི་སྐད་དུ། རྡོ་རྗེ་འདའ་དཀའ་དམ་ཚིག་གཏན་གྱི་གཉེར། །སྤྱི་དང་ཁྱད་པར་ལྷག་པའི་དམ་ཚིག་རྣམས། །སྔ་ཕྱི་མནོས་ཤིང་གཉེར་དུ་སྨྲས་སོ་འཚལ། །ཡུན་དུ་མི་གཏོང་འདའ་བར་མི་བགྱིད་དོ། །ཞེས་གསུངས། རྣམ་པ་གཅིག་ཏུ་ན། ངན་སོང་གི་གནས་སུ་རྒྱུད་ཚིག་པར་འགྱུར་བའི་ཉེས་དམིགས་ཀྱིས་དམ་ཚིག་ཏུ་བཞག་སྟེ། ཇི་སྐད་དུ། དམ་པ་སྐུ་གསུང་ཐུགས་ཡིན་ཏེ། །དེ་ལས་འདས་ན་ཚིག་པར་འགྱུར། །ཞེས་དང་། རྡོ་རྗེ་ལས། དམ་པ་འདི་ལས་གང་འདའ་བ། །རྡོ་རྗེ་ཅན་ཡང་ཚིག་པར་འགྱུར། །ཞེས་དང་། ཧེ་རུ་ཀ་འདུས་པ་ལས། མི་འདའ་དམ་པ་མཆོག་གྱུར་པ། །འདས་པར་གྱུར་ན་ཚིག་པར་བཤད། །ཅེས་སོ། །དབྱེ་ན་རྩ་བའི་དམ་ཚིག་ལྔ་དང་། ཡན་ལག་གི་དམ་ཚིག་ལྔ་ཚན་གཉིས། དེ་ལས་ཀྱང་སྤྲོ་ན་སུམ་བརྒྱ་དྲུག་ཅུར་དབྱེ་བ་དང་གསུམ་མོ། །དང་པོ་ནི། འདི་ཉིད་ལས། བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །བསྒྲུབ་དང་བསྲུང་བའི་དམ་ཚིག་མཆོག །ཅེས་པ་ལྟར་ལྔ་ལས། དང་པོ་བླ་མེད་མི་སྤང་བའི་དམ་ཚིག་ནི། ཡུལ་བླ་ན་མེད་པའི་བྱང་ཆུབ་ཀྱི་སེམས་ལྷག་པ་བདེན་པ་དབྱེར་མེད་རྟོགས་གོམས་ཀྱིས་སྒོ་གསུམ་ལྷའི་སྐུ་གསུང་ཐུགས་ཀྱི་ཕྱག་རྒྱ་ལས་མི་འདའ་བར་བྱེད་པ་སྟེ། གསལ་བཀྲ་ལས། རང་ལུས་རྒྱལ་བའི་ཕྱག་རྒྱ་ཆེ། །སེམས་ཅན་ཁམས་ཀྱང་དེར་ཤེས་ཤིང་། །སྣང་སྟོང་དབྱེར་མེད་རྡོ་རྗེའི་སྐུ། །དུས་གསུམ་རྒྱུན་དུ་མ་དྲན་ན། །ཐེག་ཆེན་སྔགས་པར་ཅི་ཡིས་ཚུད། །ཅེས་སོ། །གཉིས་པ་བླ་མ་བཀུར་བའི་དམ་ཚིག་ནི། སྔ་མ་ལས། སྤྱི་དང་འདྲེན་དང་དམ་ཚིག་དབང་། །ཉམས་ཆག་སྐོང་དང་ཤེས་རྒྱུད་དགྲོལ། །མན་ངག་ལུང་གི་སློབ་དཔོན་དྲུག །ཅེས་པ་ལྟར་དྲུག་པོ་བཀུར་ཐབས་དྲུག་གི་སྒོ་ནས་བཀུར་ཏེ། སྔ་མ་ལས། ཡུལ་ལ་དབང་བའི་རྒྱལ་པོ་དང་། །ཁུ་བོ་ཕ་དང་མ་དང་མིག །སྙིང་བས་ལྷག་པའི་ཚུལ་གྱིས་ཏེ། །ཞེས་སོ། །ཁྱད་པར་དུའང་དབང་བསྐུར། རྒྱུད་བཤད། མན་ངག་ནོད་པ་གསུམ་བཀའ་དྲིན་སུམ་ལྡན་གྱི་བླ་མ་ཡིན་པས་ལྷག་པར་ཡང་བཀུར་དགོས་ཏེ། བདེ་འདུས་ཞི་རྒྱུད་ལས། རྒྱུད་གྲོལ་དབང་བསྐུར་དེ་ ― MLP018_Page_0211 ―
[མ་དཔེ་གཟིགས་ན་འདིར་གནོན།]
ཉིད་བསྟན། །ཞེས་སོ། །གསུམ་པ་སྔགས་གསུམ་དང་ཕྱག་རྒྱ་བཞི་རྒྱུན་མི་བཅད་པའི་དམ་ཚིག་ནི། གསལ་བཀྲ་ལས། རབ་ཀྱིས་ཆུ་བོའི་གཞུང་བཞིན་ནམ། །ཉིན་གསུམ་མཚན་གསུམ་གཉིས་གཅིག་ཏུ། །མ་ཡེངས་ཙམ་དུ་ངང་གིས་བཟླ། །འབྲིང་གིས་ཟླ་གཅིག་དུས་དྲུག་གམ། །དུས་བཞིའི་བར་དུ་མི་བཅད་ཅིང་། །ཐ་མ་བྱ་བའི་རྣལ་འབྱོར་པས། །ཟླ་རེའམ་ར་བའི་དུས་དག་ཏུ། །བརྩོན་པས་འབད་དེ་མི་བྱེད་ན། །བྱང་ཆུབ་ས་བོན་བརླག་པ་ཡིན། །ཚོགས་དང་གཏོར་མའང་དེ་བཞིན་དུ། །ཐ་ན་ལོ་ཟླར་མི་འདའོ། །ཞེས་སོ། །བཞི་པ་མཆེད་ལ་བྱམས་པའི་དམ་ཚིག་ནི། སྔ་མ་ལས། མཐའ་ཡས་སེམས་ཅན་རང་རིག་ཕྱིར། །གང་ཡང་བདག་ལས་གཞན་མིན་དང་། །བདེ་གཤེགས་སྙིང་པོའི་སྤུན་ཡིན་ཕྱིར། །མ་འོངས་སངས་རྒྱས་རང་བཞིན་ནི། །སྤྱི་ཡི་མཆེད་དེ་ཕ་ཚན་བཞིན། །སངས་རྒྱས་ཆོས་ཞུགས་རིང་བ་དང་། །ལྟ་སྤྱོད་མཐུན་པ་ཉེ་བར་བཤད། །ཕ་གཅིག་དམ་ཚིག་ནང་འདྲེན་པ། །ཞེས་སོ། །དེས་མཚོན་པའི་རྡོ་རྗེའི་མཆེད་ལྕམ་དང་། བྱང་ཆུབ་བར་དུ་མི་འབྲལ་བའི་བརྩེ་གདུང་རྒྱུན་མི་ཆད་པར་བྱེད་པའོ། །ལྔ་པ་གསང་བ་མི་སྨྲ་བ་ནི། ཕྲ་རྒྱས་ལས། དམ་ཉམས་དམ་ལས་ལོག་པ་དང་། །དམ་མེད་དཀྱིལ་འཁོར་མ་མཐོང་དང་། །འདྲེས་དང་མ་འདྲེས་ཐམས་ཅད་ལ། །ཞེས་གང་ལ་གསང་བྱའི་ཡུལ་བསྟན་ནས། གང་གསང་ན། དེ་ལས། སྤྱི་དང་བར་གསང་བཞི་བཞི་དང་། །འོས་དང་གཉེར་གཏད་རྣམ་པ་བཅུ། །ཞེས་པས། སྤྱིར་གསང་བཞི། བར་གསང་བཞི། གསང་བར་འོས་པ། གསང་བ་གཉེར་གཏད་པ་རྣམས་སོ། །སྤྱིར་གསང་བཞི་ནི། དེ་ལས། ལྟ་ཟབ་སྤྱོད་པ་བརླང་པོ་དང་། །ལྷ་མིང་གཟུངས་དང་གྲུབ་རྟགས་རྣམས། །ཞེས་པས། དེ་ནི་གནས་སྐབས་ཐམས་ཅད་དུའང་གསང་དགོས་པའོ། །བར་གསང་བཞི་ནི། དེ་ལས། སྒྲུབ་པའི་གནས་དུས་གྲོགས་དང་རྫས། །བར་དུ་གསང་ལ་བསྒྲུབ་པར་བྱ། །ཞེས་པས་དེ་ནི་སྒྲུབ་པ་ཇི་ཙམ་བྱ་བའི་བར་དུ་གསང་དགོས་པའོ། །གསང་བར་འོས་པ་ནི་གཞན་མ་དད་པ་སྐྱེ་བའི་རྫས་དང་ཡོ་བྱད་སོགས་སོ། །གསང་བ་གཉེར་གཏད་པ་ནི། སློབ་དཔོན་དང་། མཆེད་ཀྱིས་གདམས་པ་རྣམས་སོ། །གཉིས་པ་ཡན་ལག་གི་དམ་ཚིག་ལ། མི་སྤང་བ་ལྔ་དང་ ― MLP018_Page_0212 ―
[མ་དཔེ་གཟིགས་ན་འདིར་གནོན།]
མི་དོར་བ་ལྔ་ལས། དང་པོ་ནི། འདི་ཉིད་ལས། གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ་། །ཞེས་པ་ལྟར་ལྔ་ཡིན། དེ་ལ་གསལ་བཀྲ་ལས། ཡང་དག་དུག་ལྔ་ལོག་དུག་ལྔ། །ཞེས་པས་གཉིས་ཏེ། ཡང་དག་པའི་དུག་ལྔ་ནི། ཆོས་ཐམས་ཅད་ལ་བླང་དོར་གྱིས་འབྱེད་པ་མེད་པའི་གཏི་མུག སེམས་ཅན་ལ་སྙིང་རྗེས་ཆགས་པའི་འདོད་ཆགས། རང་རིག་པའི་ཡེ་ཤེས་ཀྱིས་ལོག་རྟོག་འཇོམས་པའི་ཞེ་སྡང་། མཉམ་ཉིད་ལྟ་བའི་རྒྱལ་པོ་གཤོངས་སུ་མི་འབེབས་པའི་ང་རྒྱལ། མཉམ་ཉིད་ཀྱི་ཀློང་དུ་གཉིས་འཛིན་མི་ཤོང་བའི་ཕྲག་དོག་གོ །ལོག་པའི་དུག་ལྔ་ཡང་མི་སྤོང་སྟེ། སྤང་བྱའི་རྫས་མ་གྲུབ་པས་སྨིག་སྒྱུ་ལ་ཆུ་རགས་མི་དགོས་པ་བཞིན་ནོ། །གཉིས་པ་མི་དོར་བ་ལྔ་ནི། འདི་ཉིད་ལས། དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་འདོར་རོ། །ཞེས་སོ། །གསུམ་པ་སུམ་བརྒྱ་དྲུག་ཅུར་དབྱེ་བ་ནི། འདི་ཉིད་ལས། རྩ་བའི་དམ་ཚིག་ལྔ་ལ་ནི། །གཅིག་ལའང་གཉིས་དང་བཅུ་ཕྲག་གསུམ། །ཡན་ལག་དམ་ཚིག་ལྔ་ཉིད་ལ། །གཅིག་ལའང་བཅུ་ཕྲག་གཉིས་སུ་དབྱེ། །ཞེས་པས་རྩ་བའི་དམ་ཚིག་ལྔ་པོ་རེ་རེར་ཐབས་ཤེས་གཉིས་གཉིས་སུ་ཕྱེ་བས་བཅུ་དང་། ཡང་རྩ་བ་ལྔ་པོ་རེ་རེ་ལ་སུམ་ཅུར་ཕྱེ་བས་ཆིག་བརྒྱ་ལྔ་བཅུ་སྟེ། སྔར་གྱི་བཅུ་དང་བསྡོམས་པས་བརྒྱ་དྲུག་ཅུའོ། །སུམ་ཅུར་དབྱེ་ཚུལ། དཔེར་ན་བླ་མེད་མི་སྤང་བ་ལ་སུམ་ཅུར་དབྱེ་བ་ནི། ཕྲ་རྒྱས་ལས། བྱང་ཆུབ་སེམས་ནི་བླ་མེད་ལྷ། །ཞི་ཁྲོའི་དགུ་གཉིས་དང་ནི་བཅུ། །བཅུ་གཉིས་བསམ་ཡས་མི་འདའ་ཞིང་། །ཐུན་མོང་མཆོག་གི་ཚད་མེད་བརྒྱད། །བདེན་གཉིས་བྱང་ཆུབ་རྣམ་པ་བཅུ། །བླ་མེད་གསལ་བས་ཉམས་མི་བྱ། །ཞེས་སོ། །དེས་མཚོན་ནས་ལྷག་མ་བཞི་ལའང་རྒྱས་པར་བཤད་དོ། །ཡན་ལག་གི་དམ་ཚིག་བཅུ་པོ་རེ་རེར་ཉི་ཤུར་དབྱེ་བའང་། ཞེ་སྡང་ལ་ཐབས་ཤེས་ཀྱིས་མི་སྤང་བའི་བཅུ་བཅུ་སྟེ་ཉི་ཤུ། དེས་མཚོན་པའོ། །དེ་ལྟར་ཡན་ལག་གི་དམ་ཚིག་བཅུ་པོ་རེ་རེར་ཉི་ཤུར་ཕྱེ་བས་ཉིས་བརྒྱ་སྟེ། སྔར་གྱི་བརྒྱ་དྲུག་ཅུ་དང་བསྡོམས་པས་སུམ་བརྒྱ་དྲུག་ཅུའོ། །དེ་དག་གི་རྣམ་གཞག་རྒྱས་པར་ཕྲ་རྒྱས་ལས་བཤད་པས་དེར་བལྟ་བར་བྱའོ། ། ― MLP018_Page_0213 ―
[མ་དཔེ་གཟིགས་ན་འདིར་གནོན།]
དྲུག་པ་རོལ་པ་ཕྲིན་ལས་ལའང་གསུམ་ལས། ངོ་བོ་ནི། ཐུགས་ཐིག་ལས། ཕྱི་རོལ་ཚད་མེད་ཉིད་ལས་བཞི། །ཞེས་པས་སེམས་ཅན་ཐམས་ཅད་རང་གི་ཕ་མར་ཤེས་པའི་བྱམས་པ། དེ་དག་རིགས་དྲུག་གི་གནས་ན་སྡུག་བསྔལ་གྱི་ཡོ་ལངས་ལ་སྤྱོད་པ་རྣམས་ལ་སྙིང་རྗེ། སེམས་ཅན་འགའ་ཞིག་ལྷ་མིའི་དཔལ་འབྱོར་གྱི་བདེ་བ་ལ་དགའ་བ། ཉེ་རིང་ཆགས་སྡང་དང་བྲལ་བའི་བཏང་སྙོམས་ཏེ། དེ་ལྟ་བུའི་ཚད་མེད་བཞིའི་རྒྱུ་ལས་བྱུང་བའི་བྱང་ཆུབ་ཀྱི་སེམས་དང་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པའི་སྒོ་ནས་གཞན་དོན་སྒྲུབ་པ་ལ་དམིགས་པའི་ཐབས་མཁས་ཀྱི་མཛད་སྤྱོད་དོ། །ངེས་ཚིག་ནི། ཀརྨ་ཞེས་པའི་སྒྲ་ལས། སྒོ་གསུམ་གྱིས་བསྡུས་པའི་བྱ་བའི་མཚན་ཉིད་ཅན་གྱི་ལས་ཏེ། བྱེད་པ་པོའི་འདོད་པའོ། །དེ་ལ་དབྱེ་ན་ཕྱི་མ་འགོས་འགྱུར་ལས། ཞི་བ་ལ་སོགས་རབ་དབྱེ་བས། །ལས་ནི་རྣམ་པ་བཞིར་བསྡུས་སོ། །ཞེས་པས་ལས་བཞིའོ། །དེ་དག་ཀྱང་གང་གིས་བྱ་བའི་ཐབས་ཀྱི་རིམ་པ་ནི། མེ་དང་། རྫས་དང་། ལུ་གུ་རྒྱུད་དང་། མཆོད་རྟེན་དང་། ཕྱག་རྒྱའི་སྒོ་ནས་བྱ་བ་རྣམས་ཏེ། ཁོག་གཞུང་ལས། བདག་གཞན་དོན་འགྲུབ་ཕྲིན་ལས་ནི། །མཆོད་རྟེན་ཕྱག་རྒྱའི་སྒོ་དང་ནི། །ཧོམ་བྲོ་གླུ་དང་རྫས་ཀྱིས་བྱ། །ཞེས་སོ། །དེ་ལ་མེའི་སྒོ་ནས་བྱ་བ་སྦྱིན་སྲེག་ཡིན་ཏེ། སྦྱིན་སྲེག་རྩ་བ་ལས། གནས་རྫས་ཐབ་ཀྱི་རྣམ་པ་དང་། །གཟུངས་དང་གཙོ་སེམས་བསྒྲུབ་བྱ་དང་། །ཕུར་བུ་ལྷ་དུས་ལས་རིམ་བཞིན། །ལྷག་མ་བཅུ་གཅིག་ཤེས་པར་བྱ། །ཞེས་བཤད་པ་ལྟར་ཤེས་པར་བྱ་བ་ཡིན་ནོ། །གཉིས་པ་རྫས་ཀྱི་སྒོ་ནས་བྱ་བ་ནི། ལིང་ག་བཅའ་བ། དཀྱིལ་འཁོར་བསྐྱེད་པ། བསྒྲུབ་བྱའི་ལས། མཆོད་སྦྱིན་བྱ་བ་ཡོན་ཏན་དང་བཅས་པ་རྣམས་ཏེ། འདི་ཉིད་ལས། བདུད་རྩི་ལྔའམ་ཟས་ལྔ་ལ། །མཚན་མ་མིང་དུ་བཅས་པ་བྱ། །བཀུག་སྟེ་རྡོ་རྗེ་ཕུར་བུས་གདབ། །རྡུལ་དུ་བྱས་ནས་ཚོགས་ལ་དབུལ། །ཞེས་སོ། །གསུམ་པ་ལུ་གུ་རྒྱུད་ཀྱི་སྒོ་ནས་བྱ་བ་ནི། བྲོའི་སྒོ་ནས་ཕྲིན་ལས་བཞི་སྒྲུབ་པ་སྟེ། འདི་ཉིད་ལས། ཨེ་ཡི་ཚོགས་ཀྱི་དཀྱིལ་འཁོར་མཆོག །ལུ་གུ་རྒྱུད་དུ་སྦྲེལ་བསྡམས་ནས། །བཅིང་བསྒྱུར་བསྐྱོད་ནས་ཕྱོགས་བཅུར་གཡོ། །མྱོས་ནས་གས་ཏེ་འཚིག་པར་འགྱུར། །ཞེས་པ་ལ་སོགས་པ་རྣམས་ ― MLP018_Page_0214 ―
[མ་དཔེ་གཟིགས་ན་འདིར་གནོན།]
སོ། །བཞི་པ་མཆོད་རྟེན་གྱི་སྒོ་ནས་བྱ་བ་ནི། ཞི་བར་རྣམ་སྣང་། རྒྱས་པར་རིན་འབྱུང་། དབང་ལ་རྟ་མགྲིན། དྲག་པོར་བཛྲ་ཧེ་རུ་ཀར་བསྐྱེད་ནས་རིགས་སོ་སོའ་སྔགས་ཀྱིས་མཆོད་རྟེན་དབྱིབས་མདོག་སོགས་ལས་མཐུན་དུ་བཏབ་པའི་བུམ་ནང་དུ་རིགས་མཐུན་གྱི་ལྷ་བསྐྱེད། དེ་ཡི་འོད་ཀྱིས་བསྒྲུབ་བྱ་གང་ཡིན་བཀུག་ནས་མཆོད་རྟེན་གྱི་འོག་ཏུ་མནན་པ་ལ། འོད་དེས་རེག་པས་ཞི་རྒྱས་དབང་དྲག་གི་ལས་གང་ཡིན་འགྲུབ་པར་བསམ་པ་སྟེ། རྒྱས་པ་ལས། དྲག་པོ་གཏུམ་པོ་འདུལ་བའི་ཕྱིར། །བདག་ཉིད་དྲག་པོར་བསྒོམས་ནས་ནི། །མཆོད་སྐུ་ནག་པོ་འོད་འབར་གྱིས། །བགེགས་ཀྱི་ལིང་ག་མནན་པར་བྱ། །ཞེས་སོ། །དེ་ལྟར་ས་ལ་དངོས་སུ་འདེབས་པའམ། ཡང་ན་ཏིང་ངེ་འཛིན་གྱི་འབྱུང་བ་གཞན་ལ་འདེབས་པའང་བཤད་དེ། སྤྱན་འགྲེལ་ལས། མཆོད་རྟེན་འབྱུང་བ་གང་ལ་འདེབས་ཀྱང་ཞེས་སོགས་སོ། །ལྔ་པ་ཕྱག་རྒྱའི་སྒོ་ནས་བྱ་བ་ནི། ཕྱག་རྒྱ་བཅའ་བའི་སྒོ་ནས་དང་། དེ་བསྒྱུར་བའི་སྒོ་ནས་བྱ་བའོ། །དང་པོ་ནི། དཔལ་ཧེ་རུ་ཀའི་ལས་བཞིའི་ཕྱག་རྒྱ་བཅའ་བ་སྟེ། རྒྱས་པ་ལས། ཡན་ལག་སྙིང་པོ་རྩེ་གཅིག་དང་། །རྩེ་ལྔ་རྩེ་དགུ་བཅུ་གཅིག་ཏུ། །ལས་རྣམས་སོ་སོར་རབ་ཏུ་བསྒོམ། །ཞེས་སོ། །གཉིས་པ་ནི། རྒྱས་པ་ལས། རྡོ་རྗེ་ལན་གསུམ་གསོར་ནས་ནི། །ལྷ་མོ་ཀླུ་མོ་རིགས་ངན་མོ། །དམ་ཅན་རྣལ་འབྱོར་དབང་དུ་འགྱུར། །ཞེས་རང་ཀུན་བཟང་ཡབ་ཡུམ་ཁྲོས་པར་བསྐྱེད་ལ། གཟུངས་མ་དམ་ཅན་དབང་དུ་བྱ་བ་དང་། དེ་བཞིན་དུ་རིགས་ཀྱི་ཧེ་རུ་ཀ་བཞིར་བསྐྱེད་ནས་སོ་སོའ་ཕྱག་རྒྱ་བསྒྱུར་བས་ལས་བཞི་འགྲུབ་པའོ། །བདུན་པ་སྒྲུབ་པ་ལའང་གསུམ་ལས། ངོ་བོ་ནི། རྒྱུད་ཕྱི་མ་ཁ་ཆེའི་འགྱུར་ལས། འཇིག་རྟེན་པ་ཡི་དངོས་གྲུབ་ནི། །བསྐྱེད་པའི་རིམ་པས་སྦྱོར་བས་འཐོབ། །འཇིག་རྟེན་འདས་པའི་དངོས་གྲུབ་ནི། །རྫོགས་པའི་རིམ་པས་སྦྱོར་བས་སོ། །ཞེས་པས་མཆོག་ཐུན་མོང་གི་དངོས་གྲུབ་རྣམ་པ་གཉིས་གང་འདོད་དོན་དུ་གཉེར་བ་ཞིག་གོ །ངེས་ཚིག་ནི། སིདྡྷིའི་སྒྲ་ལས་དངོས་གྲུབ་སྟེ་བསྒྲུབ་བྱ་དང་། སཱ་དྷ་ནའི་སྒྲ་ལས་ཀུན་ཏུ་ལེན་པ་སྟེ། འདོད་པའི་དོན་ལེན་ཅིང་ཐོབ་པར་བྱས་པས་ན་སྒྲུབ་པ་ཞེས་བྱའོ། །དབྱེ་ན་ཐུན་མཆོག་གཉིས་ལས། དང་པོ་ཐུན་མོང་གི་ ― MLP018_Page_0215 ―
[མ་དཔེ་གཟིགས་ན་འདིར་གནོན།]
སྒྲུབ་པ་ནི། ཁོག་གཞུང་ལས། རོ་ལང་ཚེ་དང་པྲ་སྒྲུབ་དང་། །ལྷ་ཆེན་པོ་དང་རྒྱལ་པོ་བཞི། །གདུག་པ་ཀླུ་འདུལ་རྒྱལ་བློན་གྱི། །ཆུང་མ་དབང་དུ་བྱ་བ་གཉིས། །ཡུལ་ཁམས་ལྕེ་སྤྱང་རྐང་མགྱོགས་བསྐྲད། །མི་སྣང་གཟུགས་སྒྲུབ་ལྷ་ཀླུ་མོ། །རྒྱལ་བློན་དམག་དཔོན་ཞང་བློན་སྒྲུབ། །ཚེ་འདིའི་ཆེད་ཕྱིར་འཇིག་རྟེན་པའོ། །ཞེས་པས། འདི་དག་སྒྱུ་འཕྲུལ་རྒྱས་པའི་ལེའུ་རེ་རེས་སྟོན་ཏེ། རོ་ལངས་རྡོ་རྗེ་ཞིང་ཆེན་སྒྲུབ་པ་ལེའུ་བཅུ་བདུན་པ་ནས། ཚེ་སྒྲུབ་པ་དྲུག་ཅུ་རེ་བཞི་པ་ནས། པྲ་སེ་ན་དབབ་པ་དྲུག་ཅུ་རེ་ལྔ་པ་ནས། ལྷ་ཆེན་པོ་མ་ཧཱ་དེ་ཝ་སྒྲུབ་པ་དང་། རྒྱལ་པོ་ཆེན་པོ་སྡེ་བཞི་སྒྲུབ་པ་རེ་དྲུག་པ་ནས། གདུག་པའི་ཀླུ་གདོན་འདུལ་བ་ཞེ་དྲུག་པ་ནས། རྒྱལ་བློན་གྱི་ཆུང་མ་དབང་དུ་བྱ་བ་གཉིས་ཞེ་ལྔ་པ་ནས། ཡུལ་ཁམས་དབང་དུ་བྱ་བ་སོ་བརྒྱད་པ་ནས། ཅེ་སྤྱང་ཞེས་པ་རྡོ་རྗེ་རིགས་ཀྱི་རྐང་མགྱོགས་བྱེ་བྲག་པ་སྟེ་ཞེ་གཅིག་པ་ནས། རྐང་མགྱོགས་སྤྱིར་སྒྲུབ་པ། དགྲ་བགེགས་གཞན་དུ་བསྐྲད་པ། མི་སྣང་བའི་གཟུགས་སྒྲུབ་པ། ལྷ་མོ་དང་ཀླུ་མོ་ཕྱག་རྒྱར་འགུགས་པ་རྣམས་སོ་བརྒྱད་པ་ནས། རྒྱལ་བློན་སྒྲུབ་པ། དམག་མང་མཐུ་ཆེན་སྒྲུབ་པ་དང་། ཞང་བློན་སྒྲུབ་པ་རྣམས་ཞེ་གཅིག་པ་ནས་བསྟན་ཏོ། །དེར་མ་ཟད་ཐུན་མོང་གི་དངོས་གྲུབ་འདི་ཉིད་རང་ནས་ཀྱང་བསྟན་ཏེ། ཡོན་ཏན་འབྱུང་བའི་དངོས་གྲུབ་དྲུག འབྱུང་ལྔའི་དངོས་གྲུབ་ལྔ། ལས་ཕྲན་ཚེགས་བརྒྱད་དང་བཅས་པའོ། །དང་པོ་ནི། བདུད་རྩིར་འགྱུར་ཞིང་འབྱུང་བ་དང་། །བཞི་བརྒྱ་རྩ་བཞིའི་ནད་སེལ་ཞིང་། །ལོངས་སྤྱོད་འབྱུང་ཞིང་ངན་སོང་སྦྱོང་། །ཅིར་ཡང་གཞན་དུ་འགྱུར་བ་འགྲུབ། །ཅེས་སོ། །གཉིས་པ་ནི། ནམ་མཁའ་རྡོ་རྗེ་སྲ་འབྱུང་ཞིང་། །འབར་ནས་མེ་ཡང་འཚིག་པ་དང་། །ཆུར་འགྱུར་འབབ་པའང་དེ་བཞིན་ཏེ། །འཇིག་རྟེན་ཁམས་ནི་འཐོར་བ་དང་། །ཐམས་ཅད་སྟོང་ཞིང་ལྟུང་བར་འགྱུར། །ཞེས་སོ། །གསུམ་པ་ནི། དགུག་དང་བཏང་དང་བཅིང་དང་གྲོལ། །གསོ་དང་བསད་དང་ཕམ་དང་རྒྱལ། །ཏིང་འཛིན་འདི་ཡིས་བྱེད་པར་འགྱུར། །ཞེས་སོ། །གཉིས་པ་མཆོག་གི་དངོས་གྲུབ་ནི། ཁོག་གཞུང་ལས། ཡི་གེ་སྒྱུ་འཕྲུལ་ཚོགས་སྒྲུབ་དང་། །རྡོ་རྗེ་སེམས་དང་སྨན་སྒྲུབ་དང་། །རིགས་ལྔ་སྒྲུབ་དང་ཡུམ་ལྔ་སེམས། །བྱིན་དབབ་སྒྲུབ་པ་རྣམ་གཉིས་སོ། ། ― MLP018_Page_0216 ―
[མ་དཔེ་གཟིགས་ན་འདིར་གནོན།]
ཞེས་སོ། །ཇི་ལྟར་སྒྲུབ་པའི་ཚུལ་ནི། ཞི་ཁྲོ་སོ་སོའ་ཆོག་གཞུང་རྣམས་དང་། བྱེ་བྲག་སོ་སོའ་སྒྲུབ་ཐབས་གུད་དུ་ཕྱུང་པ་རྣམས་སོ། །གཙོ་བོར་སྒྲུབ་པ་ནི་ཚོམ་བུ་ཚོགས་ཀྱི་སྒྲུབ་པའོ། །བརྒྱད་པ་མི་གཡོ་བ་ཏིང་ངེ་འཛིན་ལའང་གསུམ་སྟེ། ངོ་བོ་ནི། ཧེ་རུ་ཀ་འདུས་པ་ལས། གང་དང་གང་དུ་གསལ་བའི་ཡིད། །མ་ཡེངས་པ་ནི་ཏིང་འཛིན་ཏེ། །ཞེས་པས། བསྒོམ་བྱའི་དོན་ཁྱད་པར་ཅན་བསྐྱེད་རྫོགས་ཀྱི་ཏིང་ངེ་འཛིན་ལས་མི་གཡོ་བར་གནས་པའི་སེམས་རྩེ་གཅིག་པའོ། །ངེས་ཚིག་ནི། ས་མ་དྷིའི་སྒྲ་ལས་མཉམ་པའི་བློ་སྟེ། ས་མ་ནི་མཉམ་པ། དྷི་ནི་བློ་ལ་འཇུག་པ་ལས་གང་བསྒོམ་བྱའི་དོན་ལ་སེམས་རྩེ་གཅིག་ཏུ་ཟིན་པའི་དོན་གྱིས་ན་ཏིང་ངེ་འཛིན་ནོ། །དབྱེ་ན། ཕྱི་མ་ཁ་ཆེའི་འགྱུར་ལས། ལྷ་ཡི་རྣམ་པས་སྦྱོར་བ་ཡིས། །ཟླ་བ་རྡོ་རྗེ་ལ་སོགས་རིམ། །བསྐྱེད་པའི་རིམ་པ་ཞེས་སུ་གྲགས། །རང་བཞིན་གྲུབ་པའི་རྣལ་འབྱོར་ཆེ། །རྫོགས་པའི་རིམ་པ་ཞེས་བྱར་བརྗོད། །ཅེས་པས། ཀུན་བཏགས་བསྐྱེད་རིམ་གྱི་རྣལ་འབྱོར་དང་། །ཡོངས་གྲུབ་རྫོགས་རིམ་གྱི་རྣལ་འབྱོར་གཉིས་ལས། དང་པོ་ལའང་། དེ་ལས། བསྐྱེད་རིམ་ལ་བརྟེན་སྐྱེ་གནས་ཏེ། །མངལ་སྐྱེས་ལ་སོགས་དབྱེ་བ་ཡིས། །དེ་ཡང་རྣམ་པ་བཞི་རུ་འདོད། །ཅེས་པས་སྐྱེ་གནས་བཞིའི་བག་ཆགས་སྦྱོང་བ་དང་བསྟུན་ཏེ་སྒོམ་ཚུལ་བཞི་སྟེ། ཇི་སྐད་དུ། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། །སྤྲོས་བཅས་སྤྲོས་དང་སྤྲོས་པ་མེད། །ཤིན་ཏུ་སྤྲོས་པ་མེད་བཞིའོ། །ཞེས་པས། རྒྱས་པ་སྒོང་སྐྱེས། འབྲིང་མངལ་སྐྱེས། བསྡུས་པ་དྲོད་གཤེར་སྐྱེས། ཤིན་ཏུ་བསྡུས་པ་རྫུས་སྐྱེས་ཏེ། དེ་ལྟར་སྐྱེ་གནས་བཞིའི་བག་ཆགས་སྦྱོང་བའི་ཕྱིར། སྤྲོས་པ་རྒྱས་པ་དཀྱིལ་འཁོར་གྱི་འཁོར་ལོ་བདག་སྲས་དང་གཞན་སྲས་གཉིས་ཀྱི་སྒོ་ནས་བསྒོམ་པ་དང་། གཞན་ཡང་མངོན་བྱང་ལྔ་བསྐྱེད་དང་། རྡོ་རྗེའི་ཆོ་ག་བཞི་བསྐྱེད་ལ་སོགས་པ་དང་། འབྲིང་པོ་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་ཏེ་ཆོ་ག་གསུམ་བསྐྱེད་ཀྱི་སྒོ་ནས་བསྐྱེད་པ་དང་། བསྡུས་པ་ཨ་ནུ་ཡོ་གའི་སྒོམ་ཚུལ་ལྟར་ས་བོན་ཙམ་ལས་བསྐྱེད་པ་དང་། སྐྱེད་སྔགས་བརྗོད་པའི་རྐྱེན་གྱིས་བསྐྱེད་པའོ། །ཤིན་ཏུ་བསྡུས་པ་ཨ་ཏི་ཡོ་གའི་སྒོམ་ཚུལ་ལྟར་ཆུ་ལས་ཉ་ལྡང་བའི་ཚུལ་ ― MLP018_Page_0217 ―
[མ་དཔེ་གཟིགས་ན་འདིར་གནོན།]
དུ་སྐད་ཅིག་དྲན་རྫོགས་ཀྱི་ལྷའི་སྐུར་བསྐྱེད་པ་སྟེ་སྒོམ་ཚུལ་བཞིའོ། །རྫོགས་རིམ་ལ་སྟེང་སྒོ་འཇུ་འདུལ་དང་། འོག་སྒོ་ཁམས་གསུམ་རོལ་པའི་མན་ངག་ལ་བརྟེན་པ་དང་། གྲོལ་ལམ་ཟུང་འཇུག་གི་རྣལ་འབྱོར་རིམ་ཅིག་ཅར་གཉིས་ཀྱིས་བསྡུས་པ་རྣམ་པར་མི་རྟོག་པའི་ཏིང་ངེ་འཛིན་ནོ། །འོ་ན་ཐབས་ལམ་སྟེང་འོག་ལ། རྩ་འཁོར་གསལ་འདེབས་དང་། ཡབ་ཡུམ་ལྷར་བསྐྱེད་པ་སོགས་ཀུན་བཏགས་བསྐྱེད་རིམ་གྱི་ཆ་འདྲེས་པས་རྫོགས་རིམ་དུ་ཅིའི་ཕྱིར་འགྱུར་ཞེ་ན། བསྐྱེད་རྫོགས་གཉིས་ལམ་ཕན་ཚུན་གཅིག་ལ་གཅིག་ལྟོས་པ་ཅན་ཡིན་པའི་ཕྱིར། ཐོག་མར་ཀུན་བཏགས་བསྐྱེད་རིམ་གྱི་ཉམས་མྱོང་གཏན་ལ་འབེབས་པ་ལ་བཀྲི་བ་ཙམ་ལས། རང་གི་ངོ་བོ་རང་བཞིན་ལྷན་སྐྱེས་ཀྱི་ཡེ་ཤེས་ངོ་སྤྲོད་པར་བྱེད་པའི་ཐབས་རྣམ་པར་མི་རྟོག་པས་བསྡུས་པ་ཡོངས་གྲུབ་རྫོགས་རིམ་དུ་འགྱུར་བ་ཡིན་པས་སྐྱོན་མེད་དོ་གསུངས་སོ། །དགུ་པ་མཆོད་པ་ལའང་གསུམ་སྟེ། ངོ་བོ་ནི། ཐུགས་ཐིག་ལས། བྱ་བྱེད་བྱ་བ་བྱེད་འདུས་པས། །དགྱེས་ཚིམ་གྱུར་པའི་དངོས་པོ་ཉིད། །ཅེས་པས། མཆོད་པའི་ཡུལ་དུ་གྱུར་པ་རྣམས་བཀུར་ཞིང་མཆོད་པའི་བསམ་པས་སྒོ་གསུམ་གྱི་མཉེས་པ་སྒྲུབ་པ་དང་། ད་ལྟ་ཡོངས་གྲགས་ལྟར་སྤྱི་མིང་བྱེ་བྲག་ལ་བཏགས་པ་ཡོ་བྱད་སྟོབ་པའི་སྒོ་ནས་ཀྱང་མཉེས་པར་བྱེད་པའོ། །ངེས་ཚིག་ནི། པཱུ་ཛའི་སྒྲ་ལས། པཱུརྦ་ནི་སྔོན་དང་ཛ་ཏ་བསྐྱེད་པ་ལ་འཇུག་པས། བྱ་བ་གང་བསྒྲུབ་པ་རྣམས་ཀྱི་སྔོན་དུ་འགྲོ་བའི་རྒྱུ་མཚན་གྱིས་སྔོན་དུ་དགྱེས་པ་བསྐྱེད་པ་དང་། པཱུརྞ་པཱུརྞ་ནི་ཡང་དང་ཡང་། ཛ་ཏ་བསྐྱེད་པ་སྟེ། དེའི་སྒྲ་བསྡུས་པས་པཱུ་ཛ་ཞེས་པ་ཡང་དང་ཡང་དུ་དགྱེས་པ་བསྐྱེད་པ་དང་། པཱུ་ཛའི་སྒྲ་གཟུགས་སོ་སོའ་དབང་དུ་བྱས་ན་བཀུར་བའི་དོན་གྱིས་གནས་སུ་སྟོབ་པའི་ཕྱིར་མཆོད་པའོ། །དབྱེ་ན་སྤྱིར་འཇིག་རྟེན་དང་འཇིག་རྟེན་ལས་འདས་པའི་མཆོད་པ་གཉིས། དེ་གཉིས་ཀ་ལ་མཚུངས་པར་དམིགས་ཡུལ་ཞིང་གི་ཁྱད་པར། འབྲས་བུ་ལ་དམིགས་པའི་ཁྱད་པར། ཡོངས་སུ་བསྔོ་བའི་ཁྱད་པར། མཆོད་རྫས་དངོས་པོའི་ཁྱད་པར་དང་བཞི་ལས། དང་པོ་ནི། བླ་མ་དང་དཀོན་མཆོག་སོགས་འཇིག་ ― MLP018_Page_0218 ―
[མ་དཔེ་གཟིགས་ན་འདིར་གནོན།]
རྟེན་ལས་འདས་པའི་མཆོད་ཡུལ། ཚངས་པ་དང་བརྒྱ་བྱིན་སོགས་འཇིག་རྟེན་པའི་མཆོད་ཡུལ་ལོ། །གཉིས་པ་ནི། མྱང་འདས་ཀྱི་རྒྱུར་འགྱུར་བ་ཐར་པ་ཆ་མཐུན་ཏེ་འདས་པ་དང་། འདི་ཕྱིའི་བདེ་འབྲས་ཀྱི་རྒྱུར་འགྱུར་བ་བསོད་ནམས་ཆ་མཐུན་ཏེ་འཇིག་རྟེན་པའི་མཆོད་པའོ། །གསུམ་པ་ནི། མཆོད་པ་དེ་ཉིད་མྱང་འདས་ཐོབ་ཕྱིར་བསྔོ་བ་འདས་པ་དང་། འདི་ཕྱིའི་བདེ་འབྲས་ཀྱི་ཕྱིར་བསྔོ་བ་འཇིག་རྟེན་པའོ། །བཞི་པ་ནི། ཐོས་བསམ་སྒོམ་གསུམ་ལ་སོགས་པ་འདས་པ། ཟང་ཟིང་གི་དངོས་པོ་ལ་སོགས་པ་འཇིག་རྟེན་པའི་འོ། །འོན་ཀྱང་སྤྱི་ཙམ་དུ་འདས་མ་འདས་ཀྱི་ཁྱད་པར་དེ་ལྟར་དབྱེ་བ་ཡིན་མོད་ཀྱང་། ཞིབ་ཏུ་ཕྱེ་ན་དེར་མ་ངེས་ཏེ། དཔེར་ན་ཡུལ་བླ་མ་དང་སངས་རྒྱས་ལྟ་བུ་ཞིག་ལ། དངོས་པོ་ཁྱད་པར་ཅན་ཐོས་བསམ་སྒོམ་གསུམ་གྱིས་མཉེས་པ་སྒྲུབ་པ་ལྟ་བུ་ཞིག འདི་ཕྱིའི་བདེ་འབྱོར་རམ། ལྷ་མིའི་གོ་འཕང་ཙམ་དང་། ཡང་ན་ངན་སོང་གི་འཇིགས་པ་ལས་ཐར་པའི་ཆེད་དུ་བསྔོས་ན་བསོད་ནམས་ཆ་མཐུན་ཡིན་པས་འཇིག་རྟེན་པའི་མཆོད་པ་དང་། ཡུལ་དམན་པ་སྲང་མདོར་རྒྱུ་བའི་ཁྱི་ལྟ་བུ་ཞིག་ལ། དངོས་པོ་དམན་པ་ཟན་ཁམ་གཅིག་ཙམ་ཞིག་སྦྱིན་པ་དེ་ཉིད་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པའི་སྒོ་ནས་སངས་རྒྱས་ཐོབ་ཕྱིར་དུ་བསྔོས་ན་ཐར་པ་ཆ་མཐུན་ཏེ་འཇིག་རྟེན་ལས་འདས་པའི་མཆོད་པའོ། །བྱེ་བྲག་ཏུ། ཕྱི་ཉེར་སྤྱོད། ནང་དམ་རྫས་བདུད་རྩི། གསང་བ་སྦྱོར་སྒྲོལ་ཟབ་མོ་སྟེ་གསུམ་ལས། དེ་ལ་ཕྱི་ཉེར་སྤྱོད་ནི། མེ་ཏོག་བདུག་སྤོས་ལ་སོགས་པ་སྟེ། དེ་དག་ཕྱི་མཆོད་ཅེས་པ་མདོ་སྔགས་གཉིས་ཀར་ཡོད་པ་མ་ཟད། འཇིག་རྟེན་དུའང་རྒྱལ་པོ་ནས་སྤྲང་པོའི་བར་ཐམས་ཅད་ཀྱིས་ཉེ་བར་སྤྱད་བྱ་ཡིན་པས་དེ་ལྟར་གྲགས་སོ། །ནང་དམ་རྫས་བདུད་རྩིའི་མཆོད་པ་ནི། བདུད་རྩི་རཀྟ་ལ་སོགས་པ་སྟེ། དེ་ནི་མདོ་ཡི་ཐེག་པར་མ་ཟད་སྔགས་ཕྱི་པ་ལའང་མེད་པའི་ནང་པ་བླ་མེད་ཁོ་ནའི་ཁྱད་ཆོས་སོ། །གསང་བ་སྦྱོར་སྒྲོལ་ཟབ་མོ་ཡང་དེས་མཚོན་ནོ། །སྐབས་དོན་ཉེ་བར་འབྲེལ་བ་ཞི་ཁྲོའི་ཆོ་ག་གཞུང་གི་དབང་དུ་བྱས་ན། ཞི་བ་ལ་ལྷག་ཏིང་དང་། ཁྲོ་བོ་ལ་དེ་ཚབ་རཀྟ་ཚར་གསུམ་གྱིས་བྱས་པའི་གུས་པ་ཕྱག་གི་མཆོད་པ་ལ་སོགས་བཅུ་བཞི་སྟེ། སྡོམས་ ― MLP018_Page_0219 ―
[མ་དཔེ་གཟིགས་ན་འདིར་གནོན།]
སུ་སྟོན་ན། གུས་པ་ཕྱག་དང་ཕྱག་རྒྱ་གར། །ཀུན་བཟང་ཞབས་བསིལ་བཞི་བསྣོལ་ཏེ། །བདུད་རྩི་གཏོར་མ་གསང་བསྣན་དང་། །ལྷག་པ་ཏིང་འཛིན་སྒྲོལ་དང་སྦྱོར། །འདོད་ཡོན་རོལ་མོ་གླུ་ཡེ་ཤེས། །ཞེས་སོ། །དེ་ལ་སོགས་ཏེ་མཆོད་པའི་རྣམ་གྲངས་ཇི་སྙེད་པ་རྣམས་སོ། །བཅུ་པ་སྔགས་དང་ཕྱག་རྒྱ་ལའང་གསུམ་སྟེ། ངོ་བོ་ནི། ཐུགས་ཐིག་ལས། ཡི་གེ་འདུས་པ་གྲུབ་པ་བཞི། །མཐུ་ཅན་རེད་པ་གང་ཡིན་པ། །བཞི་རྫོགས་ཉིད་ལས་མི་འདའ་བ། །གང་ལ་སྣང་བ་དེ་ངོ་བོ། །ཞེས་པས་ཐབས་ཤེས་ཀྱི་ཡི་གེ་ཨཱ་ལི་ཀཱ་ལིར་འདུས་ཤིང་གྲུབ་པ་བཞིས་བྱིན་གྱིས་བརླབས་པས་ནུས་པ་མཐུ་ཅན་དུ་གྱུར་པ་ནི་སྔགས་ཀྱི་ངོ་བོའོ། །གྲུབ་པ་བཞི་ནི། ཆོས་ཉིད་ངོ་བོ་ཉིད་ཀྱིས་གྲུབ་པ། ཆོས་ཅན་རང་བཞིན་གྱིས་གྲུབ་པ། བྱིན་གྱིས་བརླབས་ཀྱིས་གྲུབ་པ། མཐུས་གྲུབ་པ་དང་བཞིའོ། །རིག་པ་ཕྱག་རྒྱ་བཞི་རྫོགས་ཀྱི་ལྷ་ཡི་སྐུར་གསལ་བ་ལས་མི་འདའ་བ་ནི་ཕྱག་རྒྱའི་ངོ་བོའོ། །ངེས་ཚིག་ནི། མནྟྲའི་སྒྲ་ལས་ཡིད་ཤེས་བདེ་མྱུར་དུ་སྐྱོབ་པའི་དོན་གྱིས་སྔགས་ཏེ། དེ་ལ་བ དེ་བའི་སྒོ་ནས་སྐྱོབ་པའི་དོན་ནི། ཇི་སྐད་དུ། འདོད་པའི་ལོངས་སྤྱོད་ལྔ་པོ་ལ། །ཅི་བདེ་བར་ནི་སྤྱོད་པས་འགྲུབ། །ཅེས་སོ། །མྱུར་བ་ནི། གྲངས་མེད་གསུམ་ལ་སོགས་པའི་ཚོགས་གསོག་མི་དགོས་པར། ཐབས་ལ་མཁས་པའི་སྟོབས་ཀྱིས་ཚེ་གཅིག་གིས་ས་ལམ་རྫོགས་པ་ཡོད་དེ། མདོ་སྡེ་རྒྱན་ལས། ཐབས་ཆེན་རྣམས་དང་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །ཞེས་དང་། འདི་ཉིད་ལས། བླ་མེད་ཐེག་པར་རབ་ངེས་ན། །ཉོན་མོངས་འདོད་ལྔ་ཀུན་སྤྱད་ཀྱང་། །བྱས་ལ་མི་གསོག་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་གསུངས་སོ། །ཕྱག་རྒྱའི་ངེས་ཚིག་ནི། མུ་དྲའི་སྒྲ་ལས་འདེབས་ཤིང་མཚོན་པར་བྱེད་པ་སྟེ། ཕྱག་རྒྱ་བཞིས་རྒྱས་བཏབ་པ་ལས་འདའ་བར་དཀའ་བའི་ཕྱིར་མཚན་མའི་དོན་གྱིས་ན་ཕྱག་རྒྱའོ། །དེ་ལ་དབྱེ་ན་སྔགས་ལ་གསང་སྔགས་རིག་སྔགས་གཟུང་སྔགས་དང་གསུམ་ལས། དང་པོ་ནི། ཐབས་དང་ཤེས་རབ་ཀྱི་བདག་ཉིད་དེའི་སྒོ་ཡིག་འབྲུར་སྣང་བ་གསང་སྔགས་ཏེ་ངག་ཏུ་རྗོད་པར་བྱེད་པའི་ལས་ཀྱིས་ ― MLP018_Page_0220 ―
[མ་དཔེ་གཟིགས་ན་འདིར་གནོན།]
ལོག་རྟོག་གི་གཉེན་པོར་གྱུར་པའོ། །གཉིས་པ་ནི། ཤེས་རབ་དང་ཡེ་ཤེས་ཀྱི་བདག་ཉིད་དངོས་པོའི་དོན་རིག་པར་བྱེད་པའི་ལས་ཀྱིས་མ་རིག་པའི་གཉེན་པོར་གྱུར་པའོ། །གསུམ་པ་ནི། དྲན་པ་དང་ཤེས་རབ་ཀྱི་བདག་ཉིད་ཚིག་དོན་མི་བརྗེད་པར་འཛིན་པའི་ལས་ཀྱིས་དྲན་ཉམས་ཀྱི་གཉེན་པོར་གྱུར་པའོ། །དེ་གསུམ་མཚོན་པའི་རྟགས་ལྷར་སྣང་ཚུལ་ཡང་། གསང་སྔགས་རྣམས་ལྷ་ཕོའ་དབྱིབས་དང་། ཕྱི་མ་གཉིས་ལྷ་མོའ་གཟུགས་སུ་འབྱུང་ཞེས་འབྱུང་ངོ་། །བྱེ་བྲག་ཏུ་གསལ་བཀྲ་ལས། རྩ་བ་བསྐྱེད་དང་ལས་སྔགས་དང་། །ཞེས་པས། རྒྱུ་མ་ནོར་བ་རྩ་བའི། སྐྱེད་པ་རྐྱེན་གྱི། བཟླས་པ་ལས་ཀྱི་སྔགས་དང་གསུམ་ལས། དང་པོ་ནི། དེ་དག་རྫོགས་རིམ་དང་སྦྱར་ཏེ་བཤད་ན། ཆོས་སྐུ་བདེ་ཆེན་གྱི་ཐིག་ལེ་རང་ལ་རང་ཆས་སུ་བཞུགས་པ་རྒྱུ་མ་ནོར་བ་རྩ་བའི་སྔགས། དེ་ལ་གནད་དུ་བསྣུན་པའི་ཐབས་ཀྱི་བྱེད་རྩོལ་ནི་སྐྱེད་པ་རྐྱེན་གྱི་སྔགས། དེ་བཟླ་ཞིང་བསྒོམས་པ་བཟླས་པ་ལས་ཀྱི་སྔགས་སོ། །ཕྱག་རྒྱ་ལའང་རྟོག་ཚོགས་ཐམས་ཅད་གདོད་མ་ནས་ལྷའི་དཀྱིལ་འཁོར་དུ་གནས་པ་རང་བཞིན་གྱི་ཕྱག་རྒྱ། དེའི་དོན་ལ་ཤེས་རབ་ཀྱི་མིག་གིས་བལྟ་ཞིང་སྒྲོ་འདོགས་གཅོད་པ་ལྟ་བའི་ཕྱག་རྒྱ། རང་འབྲས་ཇི་ལྟ་བ་བཞིན་མངོན་དུ་གྱུར་པ་འབྲས་བུའི་ཕྱག་རྒྱའོ། །ལྷག་པ་ཏིང་ངེ་འཛིན་གྱི་ཕྱག་རྒྱ་ནི། གསལ་བཀྲ་ལས། དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་ཆེན་པོ་བཞི། །ཞེས་པས་ཕྱག་རྒྱ་བཞི་ལྡན་ཏེ། ནང་གསེས་སུ་ཕྱེ་ན་བདུན་ལྡན་དུའང་འགྱུར་བ་ཡིན་ནོ། །དེ་ལ་དབྱེ་ན་ཞི་ཁྲོ་གཉིས་ལས། དང་པོ་ཞི་བ་ལ། ཕྱག་རྒྱའི་རྒྱུ་དང་། དེ་ལས་འབྱུང་བའི་རིགས་ལྔའི་དམ་རྒྱ། དེ་ལས་འཕྲོས་པ་ལྷ་སོ་སོའ་ཕྱག་རྒྱའོ། །དང་པོ་ནི། འགྲེལ་ཆུང་ལས། དབུ་ནི་བདེ་གཤེགས་རྣམ་སྣང་ཉིད། །ལག་གཡས་རྡོ་རྗེ་མི་བསྐྱོད་པ། །ལག་གཡོན་རིན་ཆེན་སེམས་དཔའི་རིགས། །རྐང་གཡོན་ཆོས་ཀྱི་སེམས་དཔའ་སྟེ། །རྐང་གཡས་ལས་ཀྱི་སེམས་དཔའ་འོ། །ཞེས་གསུངས་པ་ལྟར། ཡན་ལག་ལྔ་རིགས་ལྔར་གསལ་བའི་ཉིང་ལག་གི་གཡས་ཀྱི་སོར་མོ་ལྔ་ལ་ཉི་མའི་དཀྱིལ་འཁོར་རེ་རེ་ལ་རིགས་ལྔ་ཡབ་ལྔའི་ས་བོན་བཀོད། ལག་གཡོན་གྱི་སོར་མོ་ལྔ་ལ་ཟླ་བའི་དཀྱིལ་འཁོར་ལྔར་ཡུམ་ལྔའི་ས་བོན་བཀོད་ ― MLP018_Page_0221 ―
[མ་དཔེ་གཟིགས་ན་འདིར་གནོན།]
ནས་ཐལ་མོ་སྦྱར་བ་ནི་ཕྱག་རྒྱའི་རྒྱུ་རྡོ་རྗེའི་ཐལ་མོ་ཞེས་བྱ་སྟེ། ཐལ་རྒྱུད་ལས། མི་བསྐྱོད་རྡོ་རྗེ་རྩེ་ལྔ་ལ། །ཉི་མའི་ཐིག་ལེ་ཡི་གེ་ལྔ། །རཏྣ་པར་བུའི་ཉིང་ལག་ལ། །ཟླ་བའི་ཐིག་ལེ་ཡི་གེ་ལྔ། །ཐིག་ལེ་ཐབས་ཤེས་ལྔ་ཉིད་རྣམས། །འཕྲད་པའི་དུས་ན་རང་སྣང་བ། །ཕྱག་རྒྱ་ཆེན་པོའི་དངོས་གྲུབ་འབྱུང་། །ཞེས་སོ། །གཉིས་པ་ནི། ཨཱོཾ་དང་མཱུཾ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པ། །ཞེས་པས་བསྟན། གསུམ་པ་དེ་ལས་འཕྲོས་པ་ལྷ་སོ་སོའ་ཕྱག་རྒྱ་ནི། འདི་ཉིད་ལས། འབྲུ་བཞི་སྦས་ནས་ཐུགས་ཀར་བཀན། །ཧཱུྃ་སྒྲེང་རྩེ་མོར་རྡོ་རྗེ་འབར། །ཞེས་པ་ལ་སོགས་པ་རྣམས་ཀྱིས་བསྟན་ཏོ། །གཉིས་པ་ཁྲོ་བོའ་ཕྱག་རྒྱ་ནི། རྣམ་པར་གྲོལ་བ་མཚོན་པའི་ཕྱིར། །དབུས་ཀྱི་ཁྲོ་བོའ་ཕྱག་རྒྱ་ནི། །ཞེས་སོགས་ཀྱིས་ཁྲག་འཐུང་རིགས་ལྔ་དང་། གནས་ཡུལ། སྒོ་སྐྱོང་། དབང་ཕྱུག་རྣམས་ཀྱི་ཕྱག་རྒྱ་རིམ་བཞིན། གནས་དང་ཡུལ་གྱི་ཕྱག་རྒྱ་ནི། །རྒྱུད་གཞན་དག་དང་མཐུན་པར་བཤད། །མ་མོ་རྣམས་ཀྱི་ཕྱག་རྒྱ་ནི། །འཇིག་རྟེན་འདས་མདོ་ཆེ་ལས་བཤད། །ཅེས་སོ། །དེ་དག་ཀྱང་ཕྱག་རྒྱ་བཞི་ལྡན་ཏེ། ལྷ་ཡི་སྐུར་གསལ་བ་ཕྱག་ཆེན། ཐུགས་ཀར་རང་རང་གི་ས་བོན་བསམ་ཞིང་ངག་ནས་སྔགས་ཚིག་བརྗོད་པ་ཆོས་རྒྱ། ཕྱག་མཚན་འཛིན་པའི་ཕྱག་རྒྱ་བཅའ་ཞིང་བསམ་པ་དམ་རྒྱ། ཕྱག་རྒྱ་བཅས་ནས་མདུན་དུ་བསྒྱུར་ཏེ་དགྲོལ་བ་ལས་རྒྱའོ། །དེ་ལྟར་ཡང་ཧེ་རུ་ཀ་འདུས་པ་ལས། སྐུ་ནི་ཕྱག་རྒྱ་ཆེན་པོ་དང་། །གསུང་ནི་ཆོས་ཀྱི་ཕྱག་རྒྱ་དང་། །ཐུགས་ནི་དམ་ཚིག་ཕྱག་རྒྱ་དང་། །ཕྲིན་ལས་ལས་ཀྱི་ཕྱག་རྒྱའོ། །ཞེས་གསུངས་པ་ལྟར་རོ། །བཞི་པ་རྒྱུད་ཀྱི་དགོས་འབྲེལ་ལའང་གསུམ་སྟེ། ངོ་བོ་ནི། ཐུགས་ཐིག་ལས། བརྗོད་འབྲེལ་དགོས་པ་ཡང་དགོས་དང་། །རྒྱུ་རྐྱེན་ཡན་ལག་བཞི་རུ་འགྱུར། །ཞེས་པས་དགོས་སོགས་ཆོས་བཞི་ལས། མཚོན་བྱ་རང་བཞིན་གྱི་རྒྱུད་གནས་ལུགས་དེ་བཞིན་ཉིད་ནི་བརྗོད་བྱ་སྟེ། ཁོག་གཞུང་ལས། མཚོན་བྱ་རང་བཞིན་གཞི་ཡི་རྒྱུད། །ཅེས་སོ། །དེ་ཁོང་དུ་ཆུད་པར་བྱ་བའི་ཕྱིར་མཚོན་བྱེད་ལམ་རྐྱེན་ཡི་གེའི་རྒྱུད་སྒྲར་སྣང་ཞིང་སྒྲར་གྲགས་པ་སྒྱུ་འཕྲུལ་དྲྭ་བའི་རྒྱུད་ནི་རྗོད་བྱེད་དེ། སྔ་མ་ལས། སྒྲོ་སྐུར་མེད་པ་བསྟན་པ་ནི། །མཚོན་བྱེད་སྒྱུ་འཕྲུལ་ ― MLP018_Page_0222 ―
[མ་དཔེ་གཟིགས་ན་འདིར་གནོན།]
དྲྭ་བ་སྟེ། །ཞེས་སོ། །རྗོད་བྱེད་ལ་བརྟེན་ནས་བརྗོད་བྱའི་དོན་གོ་བ་ནི་དགོས་པ་སྟེ། སྔ་མ་ལས། མཛུབ་མོས་རི་བོང་ཅན་བཞིན་ནོ། །ཞེས་སོ། །དེ་ལྟར་ཤེས་ནས་བསྐྱེད་རྫོགས་ཀྱི་དོན་ཉམས་སུ་བླངས་པས་ཉིང་དགོས་ཕྲ་མོ་ཐུན་མོང་གི་དངོས་གྲུབ་དང་། ཉིང་དགོས་མཆོག་སློབ་པ་དང་མི་སློབ་པའི་ཟུང་འཇུག་རྫོགས་པའི་སངས་རྒྱས་ཀྱི་གོ་འཕང་མངོན་དུ་གྱུར་པ་སྟེ། སྔ་མ་ལས། དགོས་པའི་དགོས་པ་འབྲས་བུ་ཉིད། །ཅེས་སོ། །འབྲེལ་བ་ནི། ཤུགས་ལ་བསྟན་པས་གོ་སླའོ། །ངེས་ཚིག་ནི། ཅིའི་ཕྱིར་རྒྱུད་ཀྱི་དགོས་འབྲེལ་ཞེས་བྱ་ཞེ་ན། དེ་ལྟར་དགོས་སོགས་ཆོས་བཞི་པོ་དེ་ནི་ཕན་ཚུན་འབྲེལ་བ་ཅན་དུ་གྲུབ་པའི་ཕྱིར་ཏེ། ཐོབ་བྱ་མཐར་ཐུག་གི་འབྲས་བུ་སྒྲུབ་པ་ལ་མེད་ན་མི་འབྱུང་གི་འབྲེལ་པར་གྲུབ་པའི་ཕྱིར་རོ། །དབྱེ་ན། གྲོལ་ལམ་དབང་བཙན་དུ་བྱས་པ་དང་། ཐབས་ལམ་དབང་བཙན་དུ་བྱས་པ་གཉིས་ལས། དང་པོ་ནི། སྔར་ངོ་བོའ་སྐབས་སུ་བཤད་པ་ལྟར་ཡིན་ལ། གཉིས་པ་ནི། ལྷན་ཅིག་སྐྱེས་པའི་ཡེ་ཤེས་གདོད་མ་ནས་རང་ལ་རང་ཆས་སུ་བཞུགས་པ་ནི་མཚོན་བྱ་རང་བཞིན་གཞིའི་རྒྱུད་དོ། །དེ་ཉིད་རྟོགས་བྱེད་ཀྱི་མན་ངག་ཐིག་ལེ་ཆེན་པོ་ཐབས་དང་བཅས་པ་ནི་མཚོན་བྱེད་ལམ་རྐྱེན་ཡི་གེའི་རྒྱུད་དོ། །དེའི་དོན་ཉམས་སུ་བླངས་པས་བདེ་ཆེན་གྱི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པ་ནི་དགོས་པའོ། །དེ་ལ་གོམས་པར་བྱས་པས་མཆོག་ཏུ་མི་འགྱུར་བའི་ཡེ་ཤེས་ཆེན་པོ་མངོན་དུ་བྱས་པ་ནི་ཉིང་དགོས་སོ། །ལྔ་པ་འཁོར་ལ་གདམས་ཤིང་བསྟན་པ་གཏད་པ་ལ་གསུམ་སྟེ། ངོ་བོ་ནི། བསྟན་པའི་སྙིང་པོ་རང་བཞིན་གསང་བའི་སྙིང་པོ་མཚོན་བྱེད་ལམ་རྐྱེན་ཡི་གེའི་རྒྱུད་དང་བཅས་པ་འདི་ཉིད་མི་ཉམས་ཤིང་བསྲུང་བའི་ཆེད་དུ་འཁོར་རྣམས་ལ་གདམས་ཤིང་གཏད་པའོ། །ངེས་ཚིག་ནི། རང་བཞིན་གཞིའི་རྒྱུད་ཀྱི་དོན་ལས་མི་འགྱུར་བར་གདམས་པ་དང་། ལམ་གྱི་རྒྱུད་དེ་གཞི་རྟོགས་བྱེད་ཀྱི་ཐབས་སུ་མི་ནུབ་པར་ཟུངས་ཤིག་ཅེས་གཏད་པའང་ཡིན་པའི་ཕྱིར་ན་གདམས་གཏད་ཅེས་བྱའོ། །དབྱེ་ན་གཉིས་ལས། དང་པོ་གདམས་པ་ནི། གཞི་རང་བཞིན་གྱི་སྣང་བ་རྟོགས་བྱར་གདམས་པ། ལོག་རྟོག་འཁྲུལ་པའི་སྣང་བ་དག་བྱར་གདམས་པ། ― MLP018_Page_0223 ―
[མ་དཔེ་གཟིགས་ན་འདིར་གནོན།]
གདུལ་བྱ་ལམ་གྱི་སྣང་བ་བགྲོད་བྱར་གདམས་པ། འབྲས་བུ་བདེ་གཤེགས་ཀྱི་སྣང་བ་འཐོབ་བྱར་གདམས་པ་རྣམས་རིམ་བཞིན་སྟོན་པ་སྟེ། ཀྱེ་ཀྱེ། ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །ཅེས་དང་། གཟུང་འཛིན་སྤྲོས་ལ་འཆེལ་བ་ཡིས། །རྣམ་རྟོག་ཞགས་པས་སོ་སོར་འཛིན། །ཅེས་དང་། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་དང་། ཡེ་ཤེས་ངོ་མཚར་རབ་འབྱམས་ཀྱིས། །དོན་དུ་མི་འགྱུར་ཡོངས་མ་གསུངས། །ཞེས་པ་རྣམས་ཀྱིས་བསྟན་ཏོ། །གཉིས་པ་གཏད་པ་ནི། ཁོག་གཞུང་ལས། སྡུད་པ་པོ་དང་བུད་མེད་དང་། །རྣལ་འབྱོར་མིག་ལྡན་སོགས་ལའོ། །ཞེས་པ་ལྟར་གསུམ་ལས། དང་པོ་སྡུད་པ་པོ་ལ་གཏད་པ་ནི། དེ་བཞིན་གཤེགས་པ་ཐམས་ཅད་ཀྱི་བཀའ་ཡི་བསྡུ་བ་པོ་གསང་བའི་བདག་པོ་ལག་ན་རྡོ་རྗེ་ལ་གཏད་པ་སྟེ། འདི་ཉིད་ལས། དེ་བཞིན་གཤེགས་པ་ཐམས་ཅད་ལ། །གསང་བ་འདི་ལས་གཞན་མི་མངའ། །སྒྲོ་དང་སྐུར་པ་ཞི་བ་ཡི། །གསང་བ་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །ཞེས་སོ། །གཉིས་པ་ཕྱི་རབས་ཀྱི་གང་ཟག་ལ་གཏད་པ་ལ་གཉིས་ལས། གང་ཟག་ཆོས་མིག་ཅན་ལ་གཏད་པ་ནི། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་ངེས་པ་འདི། །རྟོགས་ནས་སྨྲ་བར་གང་བྱེད་པ། །དེ་ཉིད་ང་ཡིན་དབང་ཡང་རྫོགས། །ཞེས་སོ། །གཉིས་པ་ངེས་པར་ལུང་བསྟན་པའི་སྒོ་ནས་གཏད་པ་ནི་འཐད་པ་དང་བཅས་པ་ནི། འདི་ཉིད་ལས། དེ་ནི་ངེས་པར་ལུང་བསྟན་ཏེ། །སྲས་ནི་ཐུགས་ལས་སྐྱེས་པ་ཡིན། །ས་རབ་རིག་པ་འཛིན་ལ་གནས། །ཞེས་སོ། །གསུམ་པ་མ་མོ་དང་མཁའ་འགྲོ་མ་རྣམས་ལ་གཏད་པ་ནི། རྒྱས་པ་ལས། ང་ཡི་ཐུགས་ཀྱི་སྙིང་པོ་འདི། །ཕྱོགས་བཅུ་ཀུན་ཏུ་སྤེལ་བ་དང་། །དེ་ཡི་གཟུངས་ལ་གཏད་པ་ནི། །ཡིད་བཞིན་མཛོད་འབྱོར་བཀའ་ཡི་གནས། །བསྟན་པ་འཛིན་པར་ནུས་པ་ལ། །གསང་བའི་སྙིང་པོ་མཆོག་ཏུ་གཏད། །ཅེས་མ་མོ་དང་མཁའ་འགྲོ་རྣམས་ལ་བསྟན་པ་སྐྱོང་ཞིང་ཕྱོགས་བཅུར་སྤེལ་བར་གཉེར་གཏད་པའོ། །གཉིས་པ་ཚིག་གི་རྣམ་གྲངས་རྣམ་པར་དབྱེ་བ་ལ་གསུམ་ལས། ངོ་བོ་ནི། རྒྱུད་ཕྱི་མ་ ― MLP018_Page_0224 ―
[མ་དཔེ་གཟིགས་ན་འདིར་གནོན།]
ལས། གང་གི་བརྗོད་བྱ་འཆད་བྱེད་པ། །དེ་ནས་རྗོད་བྱེད་དུ་བཤད་དོ། །ཞེས་པས། བརྗོད་བྱ་འཆད་པར་བྱེད་པ་ནི་རྗོད་བྱེད་ཀྱི་རྒྱུད་དེ། སྒྲར་སྣང་ཞིང་སྒྲར་གྲགས་པའི་མཚན་ཉིད་ཅན་སྒྲ་ཡི་རྒྱུད་དམ་གླེགས་བམ་དུ་སྣང་བ་ཡི་གེའི་རྒྱུད་དུ་གྲགས་པ་གང་ཡིན་པའོ། །དེ་ཡང་ངོ་བོ་ཚོགས་པ་གསུམ་ལྡན་ཏེ། གདུང་འདེགས་ཀྱི་ཤིང་ལ་ཀ་བ་ཞེས་འདོགས་པ་ལྟ་བུ་ཆོས་གང་ལ་སྒྲ་གང་ཞིག་དེ་ཉིད་ཡིན་པ་ལྟ་བུར་བཏགས་ནས་བརྗོད་པ་ནི་མིང་ཡིན་ལ། མིང་དེ་མང་པོ་འདུས་པ་ནི་མིང་གི་ཚོགས་ཏེ། མངོན་བརྗོད་ཀྱི་བསྟན་བཅོས་ལྟ་བུའོ། །མིང་དེ་ཉིད་ཡན་དུ་མ་བཅུག་པར་དང་པོ་ངོ་བོ་ཙམ་སྟོན་པ། གཉིས་པ་ལས་དང་བྱ་བ་ལ་སོགས་པ་རྣམ་དབྱེ་རྣམས་ཀྱི་བྱེ་བྲག་སོ་སོར་ཕྱེ་ནས་ཆོས་དང་དེའི་དོན་གྱི་ཁྱད་པར་སྟོན་པ་ནི་ཚིག་ཡིན་ཏེ། རྟ་བབས་ཀྱི་སྟེང་ན་ཆོས་འཁོར་གདུགས་དང་བཅས་པའི་གཡས་གཡོན་ན་རི་དྭགས་ཕོ་མོས་བརྟེན་པ་ཞེས་པ་ལྟ་བུའོ། །མིང་ཚིག་དེ་གསལ་བར་བྱེད་པའི་འབྲུ་ལ་ནི་ཡི་གེ་ཞེས་བྱའོ། །དེ་ལྟར་ཡི་གེ་འདུས་པ་ལས་མིང་། མིང་འདུས་པ་ལས་ཚིག དེ་འདུས་པ་ལས་ཚིགས་སུ་བཅད་པ་དང་སྤེལ་མ་ལ་སོགས་ཏེ་གཞུང་ཚོགས་ཡི་གེའི་རྒྱུད་གྲུབ་པ་ཡིན་ཏེ། འདི་ཉིད་ལས། ཡི་གེ་སྒྲ་བཏགས་མིང་ཚོགས་ལས། །བརྟེན་པའི་ཚིག་གིས་རབ་མཚོན་ཏེ། །ཞེས་གསུངས་པའི་ཕྱིར་རོ། །ངེས་ཚིག་ནི། ཅིའི་ཕྱིར་སྒྲའི་རྒྱུད་ཅེས་བྱ་ཞེ་ན། བརྗོད་བྱའི་དོན་དེ་ཉིད་རྟོགས་བྱེད་ཀྱི་ཐབས་རྗོད་བྱེད་ཀྱི་སྒྲར་སྣང་ཞིང་སྒྲར་གྲགས་པའི་དོན་གྱིས་ན་སྒྲ་དང་ཚིགས་སུ་བཅད་པ་སོགས་གཞུང་གི་ཚོགས་རྒྱུན་ཆགས་པའམ། གླེང་གཞི་ལ་སོགས་པ་ལྔ་རྒྱུ་རྐྱེན་འབྲས་བུའི་ཚུལ་དུ་འབྲེལ་བས་ན་རྒྱུད་དོ། །གཞན་དུ་ན་བརྗོད་བྱ་ལ་རྒྱུད་ཀྱི་མིང་ཐོབ་པས་རྗོད་བྱེད་ལའང་རྒྱུད་ཅེས་བཏགས་སོ། །དབྱེ་ན། རྩ་བའི་རྒྱུད་འཆད་གཞིར་གྱུར་པ་དང་། འཆད་བྱེད་དུ་གྱུར་པ་བཤད་པའི་རྒྱུད་གཉིས་སོ། །རྩ་བའི་རྒྱུད་ཉིད་ལའང་ཚིག་གི་ཚོགས་པ་ལེའུ་ཉི་ཤུ་རྩ་གཉིས་སུ་བཅད་དེ་གནས་ལ། དེ་ཡང་ལེའུ་དང་པོས་ལོངས་སྐུའི་གླེང་གཞི། གསུམ་པའི་སྟོད་ཀྱིས་སྤྲུལ་སྐུ་འགྲོ་འདུལ་གྱི་གླེང་གཞི། བཅོ་ལྔ་པས་ཁྲོ་བོའ་གླེང་གཞི་སྟེ། དེ་རྣམས་ཀྱིས་རྒྱུ་གླེང་གཞིའི་རྣམ་བཞག་བསྟན། ལེའུ་གཉིས་པས་རྐྱེན་ ― MLP018_Page_0225 ―
[མ་དཔེ་གཟིགས་ན་འདིར་གནོན།]
གླེང་བསླང་བ། ལེའུ་གསུམ་པའི་སྨད་ནས་ཉེར་གཅིག་པ་ཡན་ཆད་ཀྱིས་འབྲས་བུ་ཡོངས་ཤེས་རྒྱུད་དོན་དེ་དག་ལ་ཁྱབ་བྱེད་དུ་དགོས་འབྲེལ་དང་། ལེའུ་ཐ་མས་གདམས་གཏད་རྣམས་སྟོན་ཅིང་། ཡོངས་སུ་ཤེས་པར་བྱ་བ་རྒྱུད་དོན་ལའང་རྒྱུད་ཀྱི་དངོས་པོ་བཅུའི་སྟོན་ཚུལ་ནི། ལེའུ་གསུམ་པའི་སྨད་དང་བཅུ་གཅིག་པའི་དབུར་ལྟ་བ་གཏན་ལ་འབེབས་ཚུལ་བསྟན་པ་སོགས་ལེའུ་དུ་མ་ནས་དུམ་ཆ་དུམ་ཆས་དང་པོ་ལྟ་བའི་རྣམ་བཞག་སྟོན་པ་ལ་སོགས་ཏེ་ལེའུ་གང་དང་གང་གིས་རྒྱུད་ཀྱི་དངོས་པོ་བཅུ་ཇི་ལྟར་སྟོན་ཚུལ་གཙོ་ཆེ་ཆུང་གི་སྒོ་ནས་གཞུང་ཉིད་ལ་ཞིབ་མོར་དཔྱད་པས་ཤེས་པར་འགྱུར་ཞིང་། ཞི་ཁྲོ་སྤྱི་བྱེ་བྲག་གི་ཆོས་རྣམས་ལེའུ་གང་དང་གང་གིས་སྟོན་ཚུལ་ཡང་། ཞི་བ་སྟོན་པའི་ལེའུ་དགུ། ཁྲོ་བོ་སྟོན་པའི་ལེའུ་ལྔ། ཞི་ཁྲོ་ཐུན་མོང་དུ་བསྟན་པའི་ལེའུ་བརྒྱད་དེ། དེ་དག་གི་ཚུལ་བློ་གྲོས་དང་ལྡན་པས་སྤྲོ་ན་ཞིབ་ཏུ་བསྙད་པས་ཆོག་གོ །སྨྲས་པ། དཔལ་ལྡན་གསང་བ་སྙིང་པོའི་རྒྱུད་དོན་གནད། །བླ་མའི་ཞལ་གསུང་བདུད་རྩིའི་ཉིང་ཁུ་འདི། །བདག་བློའི་སྙིང་གི་ཡོལ་གོར་ཆ་ཤས་ཙམ། །འཁྱིལ་བ་བརྗེད་པར་ཕངས་ནས་ཡི་གེར་བཀོད། །དེང་སང་འདི་ལ་སུ་ཞིག་དགའ་བ་སྐྱེ། །དེ་བས་ཟང་ཟིང་བྲེ་གང་ཙམ་གྱིས་མགུ། །འོན་ཀྱང་མ་འོངས་ཆོས་མིག་ཅན་རྣམས་དང་། །རིགས་སད་ལམ་འདིར་འཇུག་འདོད་སྐྱེས་བུ་ལ། །ཕན་པའི་ཕྱིར་དང་གཏེར་ཆེན་བླ་མ་ཡི། །ལུང་རྟོགས་བསྟན་ལ་བྱ་བ་བྱས་སམ་སྙམ། །དེ་ལྟར་བཀོད་པའི་དགེ་བས་འགྲོ་བ་ཀུན། །ཀུན་ཀྱང་རྒྱུད་དོན་བདུད་རྩིའི་ཉིང་ཁུ་ལ། །ཀུན་ཏུ་སྤྱོད་པའི་སྐལ་བཟང་དགའ་སྟོན་གྱིས། །ཀུན་མཁྱེན་གོ་འཕང་མྱུར་དུ་ཐོབ་པར་ཤོག །ཅེས་པ་འདི་ཡང་གནམ་སའི་དབང་ཕྱུག་ཆོས་ཀྱི་རྒྱལ་པོ་ཆེན་པོ་མི་དབང་འགྱུར་མེད་བསོད་ནམས་སྟོབས་རྒྱལ་གྱི་དབུ་ཡི་བླ་མཆོད་དུ་བཞུགས་པ་ལུགས་གཉིས་ལ་མངའ་དབང་འབྱོར་པའི་གྲུབ་པའི་དབང་ཕྱུག་མངའ་བདག་རིག་འཛིན་རྒྱ་མཚོའི་གསུང་གིས་ཡང་ཡང་བསྐུལ་ཞིང་བྲི་གཞིའི་རྐྱེན་སྦྱར་བ་དང་བཅས་པས། ལུགས་འདི་ལ་དོན་གྱི་སླད་དུ་མཚན་ནས་སྨོས་ན་བདག་གི་མཁན་པོ་ངག་དབང་ཆོས་དཔལ་རྒྱ་མཚོའ་དྲུང་དུ་རྒྱུད་ཀྱི་ ― MLP018_Page_0226 ―
[མ་དཔེ་གཟིགས་ན་འདིར་གནོན།]
བཤད་པ་ལོ་བཅུ་གཉིས་ཀྱི་བར་དུ་ལོ་རེར་ཚར་གཉིས་རེ་དང་། དེ་རྗེས་ནས་ཀྱང་ལོ་ཤས་ནོད་པ་ཅུང་ཟད་བློ་ཡུལ་དུ་བཅག་པ་སྨིན་གླིང་གྲྭ་པའི་ཐ་ཤལ་བ་ཤཱཀྱའི་དགེ་སློང་ཨོ་རྒྱན་ཆོས་གྲགས་ཀྱིས་རང་ལོ་ང་ལྔ་པ་ལྕགས་ཁྱི་ཧོར་ཟླ་བཞི་པ་བདག་ཅག་གི་སྟོན་པ་མངོན་པར་རྫོགས་པར་སངས་རྒྱས་པའི་དུས་ཆེན་ས་ག་ཟླ་བའི་ཚེས་བཅོ་ལྔ་ལ་རང་གི་གྲྭ་ཁང་དུ་རྫོགས་པར་བགྱིས་པ་དགེ་ལེགས་སུ་གྱུར་ཅིག འདིས་ཀྱང་བསྟན་པ་རིན་པོ་ཆེ་ཕྱོགས་དུས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག སརྦ་མདྒ་ལཾ། དགེའོ། །དགེའོ། །དགེའོ།། །། དཔལ་གསང་བ་སྙིང་པོའི་སྤྱི་དོན་གཏན་ལ་འབེབས་པའི་ཐལ་འགྱུར་རིགས་པའི་སྒོ་འབྱེད། རབ་འབྱམས་ཨོ་རྒྱན་ཆོས་གྲགས།― MLP018_Page_0227 ―
[མ་དཔེ་གཟིགས་ན་འདིར་གནོན།]
དཔལ་གསང་བ་སྙིང་པོའི་སྤྱི་དོན་གཏན་ལ་འབེབས་པའི་ཐལ་འགྱུར་རིགས་པའི་སྒོ་འབྱེད་ཅེས་བྱ་བ་བཞུགས་སོ། །རབ་འབྱམས་ཨོ་རྒྱན་ཆོས་གྲགས། ― MLP018_Page_0228 ―
[མ་དཔེ་གཟིགས་ན་འདིར་གནོན།]
དཔལ་གསང་བ་སྙིང་པོའི་སྤྱི་དོན་གཏན་ལ་འབེབས་པའི་ཐལ་འགྱུར་རིགས་པའི་སྒོ་འབྱེད་ཅེས་བྱ་བ་བཞུགས་སོ། །ༀ་སྭ་སྟི། བླ་མ་དང་ལྷག་པའི་ལྷ་དབྱེར་མ་མཆིས་པ་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །བླ་མེད་ཐེག་པའི་བཅུད་འདུས་པའི། །གསང་སྔགས་ཀུན་གྱི་རྒྱལ་པོའི་རྒྱུད། །གསང་བའི་སྙིང་པོར་ངེས་པ་ཅན། །སྟོན་མཛད་དྲུག་པ་ཀུན་ཏུ་བཟང་། །འོག་མིན་ཆེན་པོའི་གནས་མཆོག་ཏུ། །སྐུ་ལྔའི་ཚུལ་གྱི་འཁོར་ལྔ་ལ། །གསུང་ལྔ་རང་བྱུང་རིག་པའི་དབྱངས། །སྒྲོལ་མཛད་ཀུན་བཟང་རིགས་ལྔར་འདུད། །རྒྱལ་བའི་བཀའ་ཡི་བསྡུ་བ་པོ། །གསང་འཛིན་ལག་ན་རྡོ་རྗེ་ནི། །ཞིང་འདིར་འགྱུར་མེད་རྡོ་རྗེའི་མགོན། །རྣམ་ཀུན་རིགས་ཀྱི་བདག་པོར་མཆོད། །གཏེར་ཆེན་བླ་མའི་ཡེ་ཤེས་གང་། །བཞད་པའི་རྡོ་རྗེར་འཕོས་པ་ཡིས། །སྐལ་ལྡན་ཕོ་ཉའི་རྟེན་འབྲེལ་གྱིས། །མཁའ་སྤྱོད་གནས་སུ་ཁྲིད་དེར་འདུད། །ཌཱཀྐི་གསང་བའི་ལུང་བྱང་གིས། །བསྐུལ་བའི་སྐྱབས་མཆོག་བཞད་པའི་བཀའ། །སྤྱི་བོར་ལྷུང་ལས་འགོང་མ་ནུས། །རྩོམ་ལ་སྤོབས་པའི་སྣང་བ་སྩོལ། །མཐའ་བྲལ་ཆོས་ཉིད་ཟབ་མོའ་དོན། །ཐ་སྙད་ཚིག་གིས་མཚོན་མིན་ཡང་། །ཚད་མ་གསུམ་གྱི་གཏན་ཚིགས་ཀྱི། །ཐལ་འགྱུར་རིགས་པའི་སྒོ་འབྱེད་སྤྲོ། །ནོངས་ན་མ་དང་མཁའ་འགྲོ་ཡིས། །བཟོད་པར་བཞེས་ལ་གྲོགས་མཛོད་ཅིག །དེ་ལ་ཐོག་མར་འཕྲོས་ཚུལ་གྱི་རྣམ་བཞག་དང་བཤད་ཚུལ་གཉིས་ལས། དང་པོ་ནི། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་པའི་གཞུང་འདི་ཉིད། གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་པའི་གཞུང་འདི་ལ་འཕྲོས་པ་ཡིན་པར་ཐལ། འཕྲོས་པའི་རྒྱུ་མཚན། གཞུང་སྔ་མའི་སྐབས་སུ་རྒྱུད་འདིའི་ཆེད་དུ་བྱ་བའི་གདུལ་བྱ་ལ་དབང་ ― MLP018_Page_0229 ―
[མ་དཔེ་གཟིགས་ན་འདིར་གནོན།]
པོ་རབ་འབྲིང་ཐ་གསུམ་ཡོད་པའི་ནང་ནས། མཚན་བསྟན་པ་ཙམ་གྱིས་རྒྱུད་དབུ་ཞབས་ཀྱི་དོན་ཁོང་དུ་ཆུད་པར་འགྱུར་བའི་དབང་པོ་ཡང་རབ་མཆོག་ཏུ་གྱུར་པ་རྣམས་ཀྱི་དོན་དུ་སྡུད་པ་པོ་གསང་བདག་གིས་བཀའ་བསྡུ་མཛད་པའི་ཐོག་མར་རྒྱུད་དོན་གྱི་ངོ་བོ་དང་མཐུན་པའི་མཚན་ཀླད་དུ་བཀོད་ཚུལ་གྱིས་རྣམ་བཞག་དེ་ཉིད་བསྟན་ནས། རང་གི་སྟོན་པ་ལ་བསྟོད་ཕྱག་མཛད་ཚུལ་གྱི་རྣམ་བཞག་དེ་སྟོན་པ་ལ། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་པའི་གཞུང་འདི་བྱུང་བ་གང་ཞིག རྒྱུད་ཀྱི་གླེང་གཞི་ཕུན་སུམ་ཚོགས་པ་དེ་ལ། ཐུན་མོང་མ་ཡིན་པའི་ཕྱོགས་བཟུང་ནས་མདོར་བསྟན་པ། རྒྱུད་ཁྱད་པར་གྱི་གླེང་གཞི་ཚོགས་ཚུལ་གྱི་སྒོ་ནས་རྒྱས་པར་བཤད་པ། སྡུད་པ་པོ་གསང་བདག་རང་ཉིད་རིགས་ལྔ་དབྱེར་མི་ཕྱེད་པ་རྒྱལ་བ་དྲུག་པ་ཉིད་དུ་ཁས་བླངས་ནས་གླེང་གཞིའི་དོན་བསྡུས་ཏེ་བསྟན་པ་དང་གསུམ་ལས། ཐུན་མོང་མ་ཡིན་པའི་ཕྱོགས་བཟུང་ནས་གླེང་གཞི་མདོར་བསྟན་གྱི་རྣམ་བཞག་དེ་སྟོན་པར་བྱེད་པ་ལ། འདི་སྐད་བཤད་པའི་དུས་ན། ཞེས་པའི་གཞུང་འདི་བྱུང་། བསྟན་བཤད་བསྡུད་གསུམ་གྱི་སྒོ་ནས་རྒྱུད་འབྱུང་བའི་རྒྱུ་གླེང་གཞི་ཕུན་སུམ་ཚོགས་པ་ལས། རྒྱུད་འབྱུང་བའི་རྐྱེན་གླེང་བསླང་བ་ལ། ཐུན་མོང་མ་ཡིན་པ་དང་། ཐུན་མོང་པ་གཉིས་ལས། ཐུན་མོང་མ་ཡིན་པ་ལྷན་ཅིག་པའི་འཁོར་གྱི་ཆེད་དུ་སྟོན་པས་མདུན་བསུས་ཏེ་གླེང་བསླང་ཚུལ་དེ་སྟོན་པ་ལ། ཡབ་གྱིས་གླེང་བསླང་བ། ཨེ་མ་ཧོ། རྡོ་རྗེ་ཕུང་པོའི་ཡན་ལག་ནི། །རྫོགས་པའི སྐྱེ་མཆེད བྱང་ཆུབ ས་ཆུ མེ་རླུང་ནམ་མཁའ སྲིད་གསུམ ཐམས་ཅད སངས་རྒྱས སངས་རྒྱས་ཉིད་ལ སངས་རྒྱས་ཉིད་ཀྱིས་མི་བརྙེས་སོ། །ཞེས་དང་། ཡུམ་གྱིས་གླེང་བསླང་བ། ཀྱེ་མ་ཧོ། ཕྱོགས་བཅུ་སྟོང་ཁམས་ཡེ་ནས་དབེན། །སྲིད སྙིགས་མ ཕུང་པོ ཐམས་ཅད་མཆོག་གི གཞན་དུ ཉིད་ལས བཙལ་ཀྱང་རྒྱལ་བས་མི་བརྙེས་སོ། །ཞེས་དང་། ཐུན་མོང་དུ་གླེང་བསླང་བ། ཨེ་མ་ཧོ། ངོ་མཚར་རྨད་ཀྱི་ཆོས། །རྫོགས་པའི སྐྱེ་བ སྐྱེས་པ འགག་པ གནས་པ དམིགས་པ འགྲོ་འོང་ཉིད་ན་འགྲོ་འོང་མེད། །ཅེས་པའི་གཞུང་ཚན་གསུམ་པོ་འདི་བྱུང་། ཐུན་མོང་གི་གླེང་བསླང་དེ་ལ་གཉིས་ལས། ― MLP018_Page_0230 ―
[མ་དཔེ་གཟིགས་ན་འདིར་གནོན།]
འཁོར་གྱིས་ཞུས་ཚུལ་ནི། ལྷན་ཅིག་པའི་འཁོར་རྣམས་ཐུན་མོང་མ་ཡིན་པའི་གླེང་བསླང་ལ་བརྟེན་ནས་སངས་རྒྱས་ཏེ། སྟོན་འཁོར་དགོངས་པ་དབྱེར་མེད་དུ་གྱུར་པས་རྒྱུད་ཞུ་མ་དགོས་ཀྱང་། གཞན་དོན་དུ་གོ་ཕྱེ་བའི་འཁོར་རྣམས་རྒྱུ་ལྷན་ཅིག་སྐྱེས་པའི་མ་རིག་པས་ལྷག་པ་དོན་དམ་གྱི་བདེན་པ་མ་རྟོགས་པས་ཡེ་ནས་གསང་། ཀུན་བཏགས་ཀྱི་མ་རིག་པས་ལྷག་པ་ཀུན་རྫོབ་ཀྱི་བདེན་པ་མ་རྟོགས་པས་རང་བཞིན་གྱིས་གསང་། སྣང་སྟོང་ཡ་བྲལ་དུ་བཟུང་བས་ལྷག་པ་བདེན་པ་དབྱེར་མེད་མ་རྟོགས་པས་ངོ་བོ་ཉིད་ཀྱིས་གསང་། ཡུལ་དང་ཡུལ་ཅན་དུ་བཟུང་བས་སྤྱོད་ཡུལ་དང་བྲལ་བར་མ་རྟོགས་པས་ཤིན་ཏུ་གསང་བ་སྟེ། དེ་ལྟར་གསང་བ་བཞིས་ཆོད་པའི་གདུལ་བྱ་རྣམས་ལ་རྒྱུད་བསྟན་པའི་སྒོ་ནས་ཐུགས་རྗེས་བཟུང་བར་རིགས་སོ་ཞེས་ལྷན་ཅིག་པའི་འཁོར་རྣམས་ཀྱིས་སྟོན་པ་ལ་ཞུས་ཚུལ་གྱི་རྣམ་བཞག་དེ་སྟོན་པར་བྱེད་པ་ནི། ཨེ་མ་ཧོ་ཡེ་ནས་གསང་བའི་ཆོས། སྣ་ཚོགས ངོ་བོ གཞན་དུ་མིན་ལས་ཤིན་ཏུ་གསང་། །ཞེས་པའི་གཞུང་འདི་བྱུང་། སྟོན་པས་ལན་སྩལ་ཚུལ་ནི། སེམས་ཅན་ཐམས་ཅད་བདེ་བར་གཤེགས་པའི་སྙིང་པོ་ཅན་ཡིན་པ་ལས། དེ་ལྟར་མ་རྟོགས་པའི་དབང་གིས་བཅིངས་གྲོལ་ལྟར་སྣང་ཡང་། འཇམ་དཔལ་ཞལ་ལུང་ལས། འཁོར་བའི་ཆོས་རྣམས་ཐག་ཁྲ་ཡིས། །སྦྲུལ་ལྟར་མེད་པ་ཉིད་དུ་འདོད། །ཅེས་པ་ལྟར་གཤིས་ལ་བཅིངས་གྲོལ་གཉིས་ཀ་མ་གྲུབ་པའི་ཚུལ་མཚོན་དཔེ་དང་བཅས་པའི་རྣམ་བཞག་དེ་ཉིད་སྟོན་པར་བྱེད་པ་ནི། ཨེ་མ་ཧོ། བདེ་གཤེགས་སྙིང་པོ་ལས། །རང་གི་རྣམ་རྟོག སྣ་ཚོགས གནས་དང་བདག་དང་སུས་ཀྱང་བཅིང་པར རྣམ་རྟོག ནན་གྱིས་མཁའ་ལ་མདུད་པ་བོར། །ཞེས་པའི་གཞུང་འདི་བྱུང་། དེ་ལྟར་སྟོན་པའི་ཐུགས་རྗེ་སྐྱེས་ཏེ། བཅིངས་གྲོལ་མེད་པའི་གཤིས་དེ་ཁོ་ན་ཉིད་ཀྱི་ཆོས་སྟོན་པར་དགྱེས་ནས། རང་ཉིད་སྐུ་དང་ཡེ་ཤེས་སུ་ཡེ་ནས་ལྷུན་གྱིས་རྫོགས་པ་འཁོར་འདས་མཉམ་པ་ཉིད་དུ་གསལ་བའི་དོན་སངས་རྒྱས་ཀུན་གྱིས་ཐུགས་སུ་ཆུད་པའི་ཆོས་དེ་ལྷན་ཅིག་པའི་འཁོར་ལ་དངོས་སུ་བསྟན་ནས། གོ་ཕྱེ་བའི་འཁོར་ལ་བརྒྱུད་ནས་སྟོན་པའི་ཕྱིར། སྤྲུལ་པ་སྤྲོ་བར་ཞལ་གྱིས་བཞེས་ཚུལ་གྱི་རྣམ་བཞག་དེ་སྟོན་པར་བྱེད་པ་ནི། ― MLP018_Page_0231 ―
[མ་དཔེ་གཟིགས་ན་འདིར་གནོན།]
བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །བསྟན་ཕྱིར་སྤྲོ་བ་སྣ་ཚོགས་མཛད། །ཅེས་པའི་གཞུང་འདི་བྱུང་བ་ཡིན་པའི་ཕྱིར། འཕྲོས་ཚུལ་དེ་ཙམ་ཞུས་ནས། གཉིས་པ་བཤད་ཚུལ་ནི། དེ་ལ་ཐོག་མར་མཚན་ཀླད་དུ་སྨོས་པའི་དགོས་པ། དེའི་དོན་བཤད་པ། དེ་ལ་རྩོད་པ་སྤངས་པ་གསུམ། དང་པོ་ནི། མཚན་ཀླད་དུ་སྨོས་པ་ཆོས་ཅན། དགོས་པ་ཡོད་དེ། བུམ་པ་ཞེས་པའི་མིང་ལས། ལྟོ་ལྡིར་ཞབས་ཞུམ་ཆུ་སྐྱོར་གྱི་དོན་བྱེད་ནུས་པའི་དངོས་པོ་གོ་བ་ལྟར། མཚན་མཐོང་བའམ། ཐོས་པ་ལ་བརྟེན་ནས། དབང་པོ་རབ་ཀྱིས་གཞུང་གི་དོན་གོ་བ་དང་། འབྲིང་གིས་དོན་གྱི་རྣམ་གྲངས་ཁོང་དུ་ཆུད་པ་དང་། ཐ་མས་ཀྱང་སྨན་གྱི་ཁ་བྱང་ལྟར་གླེགས་བམ་བཙལ་བདེ་བའི་ཆེད་ཡིན་པའི་ཕྱིར། གཉིས་པ་ནི་འགྲེལ་ཆུང་ལས། འདིས་ནི་རང་བཞིན་ཆེ་བ་དང་། །མཚན་ཉིད་དང་ནི་དོན་བསྟན་ཕྱིར། །སྒྱུ་འཕྲུལ་དྲྭ་བའི་རྒྱུད་ཆེན་ལས། །མདོར་བསྡུས་གཏན་ལ་ཕབ་པ་ཡིན། །རང་བཞིན་གསང་བ་ཞེས་བྱ་སྟེ། །ཆེ་བ་ཞེས་བྱ་སྙིང་པོའི་དོན། །དེ་ཁོ་ན་ཉིད་མཚན་ཉིད་དོ། །ངེས་པས་ངེས་དོན་མདོར་བསྟན་པ། །དེ་ལྟ་རྣམ་པ་བཞི་པོ་རུ། །མདོར་བསྡུས་སྤྱི་ཡི་དོན་དུ་བཤད། །ཅེས་གསུངས་པའི་ཕྱིར་ན། རྒྱུད་འདིའི་ཆེད་དུ་བྱ་བའི་གདུལ་བྱ་དབང་རྣོན་དེ་ཆོས་ཅན། ཁྱོད་ཀྱིས་མཚན་འདི་ལ་བརྟེན་ནས་གོ་ཚུལ་དང་རྟོགས་ཚུལ་ཡོད་དེ། གསང་བ་སོགས་མཚན་བཞིས་རིམ་པ་བཞིན། རྟོགས་དཀའ་བ་དང་། བཅུད་འདུས་པ་དང་། མཚན་ཉིད་གཞན་རྣམ་པར་བཅད་པ་དང་། དྲང་དོན་མ་ཡིན་པར་ངེས་དོན་ཐེ་ཚོམ་དང་བྲལ་བར་གོ་བ་གང་ཞིག སྟོན་ཚུལ་དེ་དང་རྗེས་སུ་མཐུན་པར་རྒྱུད་ཀྱི་རང་བཞིན་དང་ཆེ་བ་སོགས་ཀྱང་རྟོགས་པ་ཡིན་པའི་ཕྱིར། གསང་བ་ཞེས་པའི་མཚན་དེ་ཆོས་ཅན། ཁྱོད་ལ་དབྱེ་ན་གསུམ་དུ་ཡོད་དེ། རང་བཞིན་དང་། གབ་པ་དང་སྦས་པའི་གསང་བ་གསུམ་དུ་ཡོད་པའི་ཕྱིར། རང་བཞིན་གྱི་གསང་བ་ཆོས་ཅན། ཁྱོད་བཤད་དུ་ཡོད་དེ། སེམས་ཉིད་བདེན་པ་དབྱེར་མེད་ལྷག་པའི་ཆོས་སྐུར་ཡེ་ནས་རང་ཆས་སུ་གནས་ཀྱང་བློའི་སྤྱོད་ཡུལ་དང་མ་བྲལ་བར་མ་རྟོགས་པ་ ― MLP018_Page_0232 ―
[མ་དཔེ་གཟིགས་ན་འདིར་གནོན།]
དེ་ཡིན་པའི་ཕྱིར། དཔེར་ན་ནམ་མཁའ་ཉིད་མིག་གིས་མཐོང་བྱར་མ་གྱུར་པ་བཞིན་ནོ། །དེ་ལྟར་ཡང་འདི་ཉིད་ལས། ཨེ་མ་ཧོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མིན་ལས་ཤིན་ཏུ་གསང་། །ཞེས་པས་གསང་ཚུལ་བཞི་ཏེ། ལྷན་ཅིག་སྐྱེས་པའི་མ་རིག་པས་དོན་དམ་བདེན་པ་མ་རྟོགས་པས་ཡེ་ནས་གསང་བ། ཀུན་བཏགས་ཀྱི་མ་རིག་པས་ཀུན་རྫོབ་བདེན་པ་མ་རྟོགས་པས་རང་བཞིན་གྱིས་གསང་བ། སྣང་སྟོང་སོ་སོར་བཟུང་བས་དབྱེར་མེད་མ་རྟོགས་པས་ངོ་བོ་ཉིད་ཀྱིས་གསང་བ། ཡུལ་ཡུལ་ཅན་དུ་བཟུང་བས་སྤྱོད་ཡུལ་དང་བྲལ་བར་མ་རྟོགས་པས་ཤིན་ཏུ་གསང་བ་སྟེ། གསང་ཚུལ་བཞིས་ཆོད་པའི་ཚུལ་དུ་གསང་བ་ཡིན་པའི་ཕྱིར། གབ་པའི་གསང་བ་ཆོས་ཅན། ཁྱོད་བཤད་དུ་ཡོད་དེ། གདུལ་བྱ་འཁྲུལ་པའི་བློ་ཅན་གྱིས་རྟོགས་དཀའ་བ་དང་། རས་ཆོད་ཅན་གྱིས་རྟོགས་སུ་མི་རུང་བས་གབ་པ་ཡིན་པའི་ཕྱིར། དཔེར་ན་མིག་སེར་ཅན་ལ་དུང་གི་ཁ་དོག་བཞིན་ནོ། །དེ་ཡང་རང་བཞིན་གྱིས་རྒྱུད་དུ་གབ་པ་དེ་ཆོས་ཅན། ཁྱོད་རང་ལ་རང་ཆས་སུ་གནས་ཀྱང་རྟོག་པས་བསྒྲིབས་ནས་གབ་པ་ཡིན་ཏེ། དེ་འབྱིན་བྱེད་ལུང་ཚད་མའི་བདག་པོ་སྟོན་པ་སངས་རྒྱས་ཉིད་ཀྱིས་འབྱིན་པར་མཛད་པའི་ཕྱིར། དཀྱུས་ཡི་གེ་ལ་གབ་པ་དེ་ཆོས་ཅན། ཁྱོད་བཤད་དུ་ཡོད་དེ། རས་ཆོད་ཅན་མགོ་རྨོངས་པར་བྱ་བའི་ཕྱིར། རྒྱུད་དཀྲུགས། ལུང་བཅུས། མན་ངག་གབ་པའི་ཚུལ་དུ་གནས་པ་དེ། མན་ངག་ཚད་མའི་བདག་པོ་རྡོ་རྗེ་སློབ་དཔོན་གྱིས་འབྱིན་པར་མཛད་པའི་ཕྱིར་ཏེ། དེ་ལྟར་ཡང་འདི་ཉིད་ལས། ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །ཞེས་གསུངས་པ་ཡིན་པའི་ཕྱིར། སྦས་པའི་གསང་བ་ཆོས་ཅན། ཁྱོད་བཤད་དུ་ཡོད་དེ། རྒྱུད་ཟབ་མོ་འདི་གསང་སྔགས་ཀྱི་མན་ངག་མེད་པ་དང་སྒྲ་ཇི་བཞིན་པར་སྤྱོད་པ་རྣམས་ལ་སྦས་པའི་ཕྱིར་ཏེ། དེ་དག་གི་སྤྱོད་ཡུལ་མ་ཡིན་པའི་ཕྱིར་དང་། གཅན་ག ཟན་ཆེན་པོའི་སྒྱུ་རྩལ་སྤྲེའུས་མི་བཟོད་པའོ། །སེང་ཞོ་སྣོད་ངན་དུ་བླུག་བྱ་མ་ཡིན་པ་བཞིན་ནོ། །དེ་ཡང་གང་སྦ་ན། གསང་སྔགས་ཀྱི་མཛད་སྤྱོད་སྦྱོར་སྒྲོལ་ལ་སོགས་པ་ལྟ་སྤྱོད་འབྲེལ་བས་སྤྱད་བྱར་གསུངས་པ་དེ་དག་བརྡའི་ཚུལ་ ― MLP018_Page_0233 ―
[མ་དཔེ་གཟིགས་ན་འདིར་གནོན།]
གྱིས་སྦས་པ་ཏེ། གསལ་བཀྲ་ལས། གསང་སྔགས་སྐྱོན་ཡོད་མ་ཡིན་ཏེ། །སེམས་ཅན་དོན་ཕྱིར་རབ་ཏུ་གསང་། །གསང་ཐུབ་དངོས་གྲུབ་མི་ཡལ་བས། །གསང་ཕྱིར་བརྡའ་དག་སྣ་ཚོགས་གསུངས། །ཞེས་གསུངས་པ་ཡིན་པའི་ཕྱིར། གཉིས་པ། སྙིང་པོ་ཞེས་པའི་མཚན་དེ་ཆོས་ཅན། ཁྱོད་ལའང་དབྱེ་ན་གསུམ་དུ་ཡོད་དེ། རྒྱུ་དང་འབྲས་བུ་དང་བཅུད་འདུས་པ་དོན་གྱི་སྙིང་པོ་དང་གསུམ་དུ་ཡོད་པའི་ཕྱིར། དང་པོ། རྒྱུའི་སྙིང་པོ་ཆོས་ཅན། ཁྱོད་བཤད་དུ་ཡོད་དེ། རྒྱུད་འདི་ཐེག་པ་ཐམས་ཅད་ཀྱི་འཕྲོ་གཞིའམ་འབྱུང་བའི་རྒྱུ་ལྟ་བུར་གྱུར་པས་ན་དེ་ལྟར་དུ་བརྗོད་པའི་ཕྱིར་ཏེ། འདི་ཉིད་ལས། ཕྱོགས་བཅུ་རྣམས་སུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །ཞེས་གསུངས་པ་ཡིན་པའི་ཕྱིར། །གཉིས་པ་འབྲས་བུའི་སྙིང་པོ་ཆོས་ཅན། ཁྱོད་བཤད་དུ་ཡོད་དེ། ཐེག་པའི་སྒོ་གང་ནས་བསྒྲུབས་ཀྱང་མཐར་རང་བཞིན་གསང་བའི་སྙིང་པོ་འདིའི་དོན་{དུ་}མངོན་དུ་བྱེད་དགོས་པའི་ཕྱིར་ཏེ། འདི་ཉིད་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་དང་། ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་གསུངས་པ་ཡིན་པའི་ཕྱིར། གསུམ་པ་བཅུད་འདུས་པའི་དོན་གྱི་སྙིང་པོ་ཆོས་ཅན། ཁྱོད་བཤད་དུ་ཡོད་དེ། གཏན་ཚིགས་ཀྱི་སྒོ་གང་ནས་གཏན་ལ་ཕབ་ཀྱང་མཐར་ཐུག་སངས་རྒྱས་ཀྱི་དགོངས་པའི་ངོ་ན་རྟོག་ཚོགས་ཐམས་ཅད་སྐུ་དང་ཡེ་ཤེས་བཞི་བཅུ་རྩ་གཉིས་སུ་སངས་རྒྱས་པས་འཁོར་བ་རང་བཞིན་གྱིས་རྣམ་པར་དག་པ་ཡིན་པའི་ཕྱིར་ཏེ། རྒྱས་པ་ལས། དོན་བསྡུས་གསུང་རབ་བཞི་བཅུ་གཉིས། །དེ་བས་ལྷག་པའི་དོན་སྨྲ་བ། །དེ་ནི་རྣམ་དག་ལམ་མིན་ཏེ། །རང་བློས་བསམ་པའི་འཁྲུལ་པ་ཡིན། །ཞེས་གསུངས་པའི་ཕྱིར། གསུམ་པ། དེ་ཁོ་ན་ཉིད་ཅེས་པའི་མཚན་འདི་ཆོས་ཅན། ཁྱོད་ལའང་དབྱེ་ན་གསུམ་དུ་ཡོད་དེ་མ་བཅོས་པའི་དེ་ཁོ་ན་ཉིད་དང་། མ་ནོར་བའི་དེ་ཁོ་ན་ཉིད་དང་། གཞན་མ་ཡིན་པའི་དེ་ཁོ་ན་ཉིད་དང་གསུམ་དུ་ཡོད་པའི་ཕྱིར། དེའི་དང་པོ་མ་བཅོས་པའི་དེ་ཁོ་ན་ཉིད་ཆོས་ཅན། ཁྱོད་བཤད་དུ་ཡོད་དེ། རྟོག་ཚོགས་ཐམས་ཅད་རང་རིག་ལས་མི་གཞན་པས་སྣང་སྟོང་གཉིས་མེད་རང་བྱུང་ ― MLP018_Page_0234 ―
[མ་དཔེ་གཟིགས་ན་འདིར་གནོན།]
གི་ཡེ་ཤེས་ལ་སྒོམ་བྱེད་ཀྱི་བློས་མ་བཅོས་པར་བཞག་པས་ན་དེ་སྐད་དུ་བརྗོད་པའི་ཕྱིར་ཏེ། རྒྱས་པ་ལས། མ་བཅོས་ལྷུན་མཉམ་ཇི་བཞིན་ངང་བཞག་དང་། །ཞེས་གསུངས་པ་ཡིན་པའི་ཕྱིར། གཉིས་པ། མ་ནོར་བའི་དེ་ཁོ་ན་ཉིད་དེ་ཆོས་ཅན། ཁྱོད་བཤད་དུ་ཡོད་དེ། མ་བཅོས་པའི་དེ་ཁོ་ན་ཉིད་དེ་གོམས་པ་ལས་འབྲས་བུ་སྐུ་དང་ཡེ་ཤེས་ཀྱི་ཕྱག་རྒྱ་མང་པོར་སྣང་བ་ནི། མ་ནོར་བས་དེ་ལྟར་དུ་བརྗོད་པའི་ཕྱིར་ཏེ། རྒྱས་པ་ལས། རྒྱུ་འབྲས་ལྷུན་གྱིས་གྲུབ་པའི་ངང་དུ་གནས། །ཞེས་གསུངས་པ་ཡིན་པའི་ཕྱིར། གསུམ་པ། གཞན་མ་ཡིན་པའི་དེ་ཁོ་ན་ཉིད་དེ་ཆོས་ཅན། ཁྱོད་བཤད་དུ་ཡོད་དེ། འབྲས་བུ་དེའང་སྒྲིབ་བྱེད་ཀྱི་ཞེན་པ་དག་པའི་ཚེ་རང་ལ་ཡོད་པའི་དོན་སྣང་བ་ལས། གཞན་ནས་བྱུང་བ་མ་ཡིན་པའི་ཕྱིར་ཏེ། འདི་ཉིད་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཞེས་དང་། རྒྱས་པ་ལས། ཇི་སྙེད་བརྒྱུད་པའི་ཁ་བརྒྱུད་ཀྱང་། །ཡང་དག་དོན་གྱི་སྙིང་པོ་ནི། །གཞན་ནས་བཙལ་ཀྱང་མི་རྙེད་དེ། །རང་རིག་སྒྲིབ་མེད་དག་པ་ཡིན། །ཞེས་གསུངས་པའི་ཕྱིར། བཞི་པ། ངེས་པའོ། །ཞེས་པའི་མཚན་འདི་ཆོས་ཅན། ཁྱོད་ལའང་དབྱེ་ན་གསུམ་དུ་ཡོད་དེ། གཞི་དང་ལམ་དང་འབྲས་བུར་ངེས་པ་གསུམ་དུ་ཡོད་པའི་ཕྱིར། དང་པོ་གཞིར་ངེས་པ་དེ་ཆོས་ཅན། ཁྱོད་བཤད་དུ་ཡོད་དེ། གཞིའི་རྒྱུད་རང་བཞིན་གསང་བའི་སྙིང་པོ་དེ་ཆོས་ཉིད་སྒྲོ་སྐུར་དང་བྲལ་བར་བདེན་པས་ན་དེ་ལྟར་དུ་བརྗོད་པའི་ཕྱིར་ཏེ། འདི་ཉིད་ལས། སྒྲོ་དང་སྐུར་པ་ཞི་བ་ཡི། །གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །ཞེས་གསུངས་པའི་ཕྱིར། གཉིས་པ་ལམ་དུ་ངེས་པ་དེ་ཆོས་ཅན། ཁྱོད་བཤད་དུ་ཡོད་དེ། ཐེག་པ་འདིའི་ལུགས་ཀྱི་ཡེ་ནས་གནས་པའི་འབྲས་བུ་ཉིད་ཤེས་ཐོབ་ཀྱི་བྱེད་པས་ལམ་དུ་བྱེད་པར་ངེས་པའི་ཕྱིར་ཏེ། འདི་ཉིད་ལས། འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །ཞེས་གསུངས་པའི་ཕྱིར། གསུམ་པ་འབྲས་བུར་ངེས་པ་དེ་ཆོས་ཅན། ཁྱོད་བཤད་དུ་ཡོད་དེ། རྒྱུད་འདི་རང་གི་ངོ་བོས་བརྗོད་བྱ་རྒྱལ་བའི་དགོངས་པ་ངེས་དོན་མངོན་དུ་ཕྱུང་ནས་སྟོན་པས་ན་དེ་ལྟར་དུ་བརྗོད་པའི་ཕྱིར་ཏེ། འདི་ཉིད་ལས། རྒྱལ་བའི་དཀྱིལ་འཁོར་ ― MLP018_Page_0235 ―
[མ་དཔེ་གཟིགས་ན་འདིར་གནོན།]
མ་ལུས་ལ། །འདི་ལས་གསང་བའི་ངེས་དོན་མེད། །ཅེས་གསུངས་པ་ཡིན་པའི་ཕྱིར། གསུམ་པ་རྩོད་སྤང་ལ། མཚན་རྒྱུད་དོན་ཡིན་མིན་ལ་རྩོད་པ། མཚན་དུ་རྒྱུད་དོན་འདུས་མ་འདུས་ལ་རྩོད་པ། མན་ངག་ཁོ་ནའི་མཚན་ནས་སྨོས་པར་རྩོད་པ། རྒྱ་སྐད་མི་སྨོས་པར་བོད་སྐད་སྨོས་པར་རྩོད་པ་དང་བཞི་ལས། དང་པོ་ནི། མཚན་རྒྱུད་དོན་ཡིན་ནམ་མ་ཡིན། ཡིན་ན་གླེང་གཞི་གླེང་བསླང་དགོས་མེད་དུ་ཐལ་བ་དང་། མ་ཡིན་ན། རྒྱུད་འདིའི་ཆེད་དུ་བྱ་བའི་གདུལ་བྱ་དབང་པོ་ཡང་རབ་དེས་མཚན་མཐོང་བའམ། ཐོས་པས་རྒྱུད་དོན་མི་རྟོགས་པར་ཐལ་ལོ་ཟེར། དེའི་ལན་ལ། མཚན་རྒྱུད་དོན་ཡིན་ཡང་། གླེང་གཞི་གླེང་བསླང་མི་དགོས་པའི་སྐྱོན་མེད་དེ། སྔོན་བྱུང་འོག་མིན་དུ་གླེང་གཞི་ཚོགས་ཏེ་གླེང་བསླངས་ནས་རྒྱུད་དོན་གསུངས་པ། མི་ཡུལ་དུ་གསང་བདག་གིས་ཚིག་དང་ཡི་གེར་འགོད་པའི་ཚེ། བློ་རབ་འབྲིང་ཐ་གསུམ་ལ་དགོངས་ནས་མཚན་ཀླད་དུ་སྨོས་པའི་ཕྱིར་ཞེས་སྔ་རབས་པ་དག་གིས་ལན་དེ་ལྟར་གསུང་ཡང་མི་འཐད་དེ། མཚན་དེ་ཆོས་ཅན། ཁྱོད་རྒྱུད་དོན་མ་ཡིན་པར་ཐལ། ཁྱོད་དེ་རྟོགས་བྱེད་ཀྱི་ཐབས་ཡིན་པའི་ཕྱིར་རོ། །ཡང་ཁ་ཅིག་ན་རེ། སྟོན་པས་འོག་མིན་དུ་རྒྱུད་འདི་རྗོད་བྱེད་ཚིག་ཏུམ་གསུངས་པར་ཐལ། དམ་བཅའ་དེ་འཐད་པའི་ཕྱིར་ཟེར་ན། དགོངས་པ་བརྡའི་བཤད་པ་ཉིད་གསང་བདག་གིས་ཚིག་ཏུ་བསྡུད་པའི་ཚེ། རང་ཉིད་སྟོན་པ་དང་དགོངས་པ་མཉམ་པར་ཁས་བླངས་ནས། འདི་སྐད་བཤད་པའི་དུས་ན། ཞེས་བསྡུས་པར་བཞེད་པའི་ཕྱིར་ཏེ། འགྲེལ་པ་ཉི་སེང་མར། ད་ནི་སྡུད་པ་པོས་བཅོམ་ལྡན་འདས་ཀྱི་ལུང་དང་མཐུན་པ་ལྟར་རྒྱུད་ཀྱི་གླེང་གཞི་མཛད་པ་བླ་མའི་མན་ངག་གིས་བཤད་པར་བྱ་སྟེ། འདི་སྐད། ཅེས་སོགས་གསུངས་པའི་ཕྱིར་རོ། །གཉིས་པ་ནི། མཚན་དུ་རྒྱུད་དོན་འདུས་སམ་མ་འདུས། འདུས་ན་མཚན་དང་རྒྱུད་ཀྱི་དངོས་པོ་བཅུ་བྲང་སྤྲད་ལ་སྦྱོར་རིགས་པར་ཐལ། མ་འདུས་ན་དབང་རབ་ཀྱིས་མཚན་ལ་བརྟེན་ནས་རྒྱུད་དོན་མི་རྟོགས་པར་ཐལ་བའི་ཕྱིར་ཟེར། དེའི་ལན་ལ། རྒྱུད་ཀྱི་དངོས་པོ་བཅུ་དང་མཚན་དོན་སོ་སོར་སྦྱོར་དུ་མེད་ཀྱང་མཚན་དོན་གཞི་ལམ་འབྲས་གསུམ་དུ་གནས་པས། དེར་རྒྱུད་དོན་མཐའ་དག་འདུས་པའི་ཕྱིར་དང་། ― MLP018_Page_0236 ―
[མ་དཔེ་གཟིགས་ན་འདིར་གནོན།]
མཚན་མཐོང་བས་རྒྱུད་དབུ་ཞབས་ཀྱི་དོན་རྟོགས་པར་གསུངས་པ་དེ་སྔོན་བྱུང་འཁོར་གྱིས་རྟོགས་ཚུལ་ཡིན་ཏེ། དོན་མཐོང་བ་ལ་བརྟེན་ནས་མཚན་དུ་བཏགས་པའི་ཕྱིར་ཏེ། གསང་བདག་གིས་རང་གི་རྒྱུད་དོན་ཐུགས་སུ་ཆུད་ནས་འཁོར་ལ་འཆད་པའི་ཚེ་གསང་བ་སྙིང་པོ་ཞེས་དོན་མཐོང་བ་ལ་བརྟེན་ནས་མཚན་དུ་བཏགས་པའི་ཕྱིར། སྔོན་བྱུང་གི་ངོར་མཚན་དུ་ཚིག་དོན་མཐའ་དག་མ་ལུས་པ་དང་། སྐད་ཅིག་ཙམ་ལ་རྟོགས་པའང་མི་འགལ་ཏེ། རྒྱ་མཚོ་ལས། སྒྲིབ་པ་མཐའ་སྤོང་གདུལ་བྱ་ལ། །སྐད་ཅིག་ཙམ་གྱིས་སྣང་བར་མཛད། །ཅེས་གསུངས་པའི་ཕྱིར། རྗེས་འཇུག་ཏུ་མཚན་ལ་བརྟེན་ནས་དོན་གོ་བ་ནི། དེར་གཞི་ལམ་འབྲས་གསུམ་གྱི་བརྡ་འཕྲད་པ་ཙམ་དུ་གོ་བ་ཡིན་ཏེ། མིང་གིས་དོན་མཚོན་པར་ནུས་པ་ཙམ་གྱིས་མིང་ཡིན་པའི་ཕྱིར་རོ། །དཔེར་ན་བུམ་པ་ཞེས་བརྗོད་པས། ལྟོ་ལྡིར་ཞབས་ཞུམ་ཆུ་སྐྱོར་གྱི་དོན་བྱེད་ནུས་པའི་དངོས་པོ་ཙམ་གོ་ཡང་། གསེར་བུམ་སོགས་ཁྱད་ཆོས་རྣམས་གོ་བས་མ་ཁྱབ་པ་བཞིན་ནོ། །གསུམ་པ་ནི། ཐུགས་ཐིག་ལས། དང་པོར་མཚོན་པ་མཚན་གསུམ་ལྡན། །ཞེས་དང་། ཁོག་གཞུང་ལས། རབ་མཚན་ཐ་སྙད་གསུམ་དུ་གྲགས། །ཞེས་པས་རྒྱུད་འདི་ལས་རྒྱུད་ལུང་མན་ངག་གི་མཚན་གསུམ་དུ་གྲགས་པ་ལས། གླེགས་བམ་གྱི་ཀླད་དུ་རྒྱུད་དང་ལུང་གི་མཚན་ནས་མི་སྨོས་པར། མན་ངག་ཁོ་ནའི་མཚན་ནས་སྨོས་པ་ལ་རྒྱུ་མཚན་མེད་དོ་ཟེར། དེའི་ལན་ནི། མ་ཧཱ་ཡོ་ག་ལའང་ནང་གསེས་ཀྱི་རྒྱུད་ལུང་མན་ངག་གསུམ་མམ། ཕ་མ་གཉིས་མེད་ཀྱི་རྒྱུད་གསུམ་དུ་གནས་པ་ལ། རྒྱུད་འདི་ནི་མ་ཧཱའི་ཨ་ཏི་ཐབས་ཤེས་གཉིས་མེད་དུ་སྟོན་པའི་རྒྱུད་ཡིན་པའི་གནད་ཀྱིས་མན་ངག་གི་མཚན་ནས་སྨོས་པའི་ཕྱིར་རོ། །བཞི་པ་ནི། རྒྱུད་འདི་རྒྱ་གར་ནས་བསྒྱུར་བ་མ་ཡིན་པར་ཐལ། ཀླད་དུ་རྒྱ་སྐད་མ་སྨོས་པའི་ཕྱིར་ཟེར། དེའི་ལན་ལ། གཞན་ལན་དགག་པ་དང་། རང་ལན་གདབ་པ་གཉིས་ལས། དང་པོ་ནི། ཁ་ཅིག་ན་རེ། རྒྱ་སྐད་གཏན་མེད་ན་བོད་དུ་བསྒྱུར་བ་མི་རིགས་པས། བོད་སྐད་དུ་ཞེས་པས་རྒྱ་སྐད་དུ་ཡོད་པར་ཤུགས་ཀྱིས་བརྡའ་འཇལ་བར་བྱའོ། །ཞེས་ཟེར་མི་འཐད་དེ། བོད་ཀྱི་སྐད་ལ་རྒྱ་ནག་ལ་སོགས་པའི་སྐད་ཀྱང་སྦྱར་དུ་རུང་བས། རྒྱ་གར་མར་མི་འགྲུབ་ཅིང་། ― MLP018_Page_0237 ―
[མ་དཔེ་གཟིགས་ན་འདིར་གནོན།]
བོད་དུ་བརྩམས་པའི་བསྟན་བཅོས་རྣམས་ལའང་རྒྱ་སྐད་ཤུགས་ལ་སྦྱར་དུ་རུང་བའི་ཕྱིར་རྒྱ་གར་མར་ཐལ་བ་སོགས་ཀྱི་སྐྱོན་གནས་སོ། །གཉིས་པ་རང་ལན་གདབ་པ་ནི། འདིར་རྒྱ་སྐད་མེད་པས་བོད་མར་འགྱུར་བའི་ཁྱབ་པ་མེད་དོ། །བོད་དུ་བརྩམས་པའི་བསྟན་བཅོས་དུ་མར་ཡང་ཀླད་དུ་རྒྱ་སྐད་བཀོད་པ་ཡོད་མོད། དེས་རྒྱ་གར་མར་མི་འགྱུར་བ་བཞིན་ནོ། །གཞན་ཡང་། ཀླད་དུ་རྒྱ་གར་གྱི་སྐད་གཅིག་པོ་མ་སྨོས་པས་བོད་མར་འགྱུར་རམ། སྐད་གཉིས་ཀ་མ་སྨོས་པས་བོད་མར་འགྱུར། དང་པོ་ལྟར་ན། རྒྱ་ནག་ནས་བསྒྱུར་བའི་ཆོས་དེ་རྣམས་ཆོས་ཅན། བོད་མར་ཐལ། ཀླད་དུ་དེ་མ་སྨོས་པའི་ཕྱིར། གཉིས་པ་ལྟར་རྒྱ་གར་གྱི་དཔེ་དེ་རྣམས་ཆོས་ཅན། བོད་མར་ཐལ། ཀླད་དུ་དེ་གཉིས་ཀ་མ་སྨོས་པའི་ཕྱིར། གཞན་ཡང་རྒྱུད་ཀྱི་རྒྱལ་པོ་ཆེན་པོ་འདི་ཉིད་ཆོས་ཅན། ཁྱོད་བོད་མར་ཐལ་བའི་སྐྱོན་དང་བྲལ་བ་ཡིན་ཏེ། ཁྱོད་ཡོངས་སུ་གྲགས་པའི་རྒྱ་གར་གྱི་པཎ་ཆེན་རྣམས་ཀྱིས་མང་དུ་བཀྲལ་བ་གང་ཞིག གསང་འདུས་ཀྱི་འགྲེལ་པ་བི་ཤྭ་མི་ཏྲས་མཛད་པར་ཡང་རྒྱུད་འདིའི་ལུང་མང་དུ་དྲངས་པའི་ཕྱིར་དང་། དུས་ཕྱིས་ཀྱང་རྒྱ་དཔེ་རྙེད་པ་ལས། ཐར་ལོ་ཉི་མ་རྒྱལ་མཚན་དང་། འགོས་ལོ་གཞོན་ནུ་དཔལ་བ་སོགས་ཐུབ་བསྟན་ཡོངས་སུ་རྫོགས་པའི་ལོ་ཙཱ་བ་ཆེན་པོ་དག་གིས་འགྱུར་མཛད་པའི་ཕྱིར་རོ། །མཚན་དེ་ལྡན་གྱི་རྒྱུད་དོན་བཤད་པ་ལ། སྟོན་པ་ལ་དབང་མི་ཟ་བའི་ཕྱིར་ཀླད་དོན་ཕྱག་དང་། བཀའི་དོན་བདེ་བླག་ཏུ་རྟོགས་པར་བྱ་བའི་ཕྱིར་གཞུང་དོན་གཏན་ལ་ཕབ་པ་གཉིས་ཡོད་པ་ལས། དང་པོ་ནི། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་པ་སྟེ། འདི་ལ་གསུམ། ངག་དོན། ཚིག་དོན། རྩོད་པ་སྤོང་བའོ། །དང་པོ་ནི། བྱེད་པའི་མུ་བཞི་དང་སྦྱར་ན། ཕྱག་གང་གིས་བཙལ་ན། སྡུད་པ་པོ་གསང་བདག་གིས། གང་ལ་ན། རྒྱུད་ཀྱི་སྟོན་པ་བཅོམ་ལྡན་འདས་དཔལ་ཀུན་ཏུ་བཟང་པོ་ལ། དུས་གང་གི་ཚེ་ན་སྡུད་པ་པོས་འོག་མིན་དུ་དང་པོར་ཤེས་རྒྱུད་ལ་བཏུས་ཏེ། དེ་ནས་མི་ཡུལ་དུ་ཚིག་ཏུ་བསྡུད་པའི་ཚེ་ནའོ། །ཚུལ་ཇི་ལྟར་བཙལ་ན་རབ་ལྟ་བ་འཇལ་བ། འབྲིང་བསྒོམ་པ་གོམས་པ། ཐ་ ― MLP018_Page_0238 ―
[མ་དཔེ་གཟིགས་ན་འདིར་གནོན།]
མ་མོས་གུས་ཀྱི་ཕྱག་གསུམ་ལས། འདི་ནི་སྡུད་པ་པོའི་ཕྱག་ཡིན་པའི་ཕྱིར་དང་པོའོ། །གཉིས་པ་ཚིག་གི་དོན་དེ་རྒྱས་པར་འཆད་ན། བི་མ་ལས། འགྲེལ་ཆུང་དུ། མཉམ་ཉིད་དབྱིངས་སུ་བདུད་བཞི་ངང་གིས་བཅོམ། །ཕྱག་རྒྱའི་རང་བཞིན་ཚོགས་གཉིས་རྫོགས་པར་ལྡན། །ཡོད་མེད་མཐའ་འདས་བདག་གཞན་ཡོངས་ཀྱི་དཔལ། །ཐམས་ཅད་རང་བཞིན་རྟོགས་དང་ཐུགས་རྗེ་བཟང་། །ཀུན་བཟང་ལྷ་ཡི་ལྷ་ཁྱོད་དབྱེར་མེད་ལ། །རྟོགས་དང་གུས་པས་རབ་ཏུ་ཕྱག་འཚལ་ལོ། །ཞེས་གསུངས་པའི་དོན་སྦྱོར་བ་ངག་དོན་ཏུ་དྲིལ་ན་སྟོན་པ་ཀུན་ཏུ་བཟང་པོ་ཆོས་ཅན། ཁྱོད་ཀྱི་མཚན་ལ་བཅོམ་ཞེས་པ་དེ་ཆོས་ཉིད་མཉམ་པ་ཉིད་ཀྱི་དབྱིངས་སུ་བདུད་བཞི་ངང་གིས་དག་པས་ན་བདུད་བཞི་བཅོམ་པའི་མཚན་ཡིན་ཏེ། རྒྱུ་ཉོན་མོངས་པའི་མཚན་མ་རང་སར་གྲོལ་བས་འབྲས་བུ་ཉེར་ལེན་གྱི་ཕུང་པོ་མི་ལེན་ཞིང་། དེ་མ་བླངས་ན་སྐྱེ་ཤི་དང་ལྷ་བུའི་བདུད་ཀྱི་བར་དུ་གཅོད་པས་མི་ཚུགས་པའི་ཕྱིར། དེ་ལྟར་ཡང་། རྒྱས་པ་ལས། ཉོན་མོངས་པ་ཉིད་རྣམ་པར་དག །ཕུང་པོ་ལྔ་ཉིད་མངོན་སངས་རྒྱས། །བདག་ཉིད་ལྷ་ཡི་དཀྱིལ་འཁོར་ཏེ། །སྐྱེ་ཤི་མེད་པའི་གཡུང་དྲུང་གནས། །ཞེས་གསུངས་པའི་ཕྱིར། དེ་ཆོས་ཅན། ཁྱོད་ཀྱི་མཚན་ལ་ལྡན་ཞེས་སྨོས་པ་དེ་ཡོན་ཏན་གྱི་མཚན་ཡིན་ཏེ། སྤྱིར་བྷ་ག་ཝན་གྱི་སྒྲ་ལས་བྷ་ག་ནི་བཅོམ་པ་ལ་འཇུག་པར་མ་ཟད། རྣམ་པ་གཅིག་ཏུ་ན་སྐལ་བའམ་ལེགས་པ་རྣམ་པ་དྲུག་ལ་འཇུག་པར་ཡང་བཤད་པའི་ཕྱིར་ཏེ། སམ་བུ་ཊི་ལས། དབང་ཕྱུག་དང་ནི་གཟུགས་བཟང་དང་། །དཔལ་དང་གྲགས་དང་ཡེ་ཤེས་དང་། །བརྩོན་འགྲུས་ཕུན་སུམ་ཚོགས་ལྡན་པ། །དྲུག་པ་དེ་ལ་སྐལ་ཞེས་བྱ། །ཞེས་གསུངས་པའི་ཕྱིར། དེ་ཆོས་ཅན། སྐབས་འདི་ནི་ཚོགས་གཉིས་རྫོགས་པའི་ཡོན་ཏན་དང་ལྡན་པའི་མཚན་ཡིན། ཆོས་སྐུའི་ཕྱག་རྒྱ་ཡེ་ཤེས་ཀྱི་ཚོགས་དང་། གཟུགས་སྐུའི་ཕྱག་རྒྱ་བསོད་ནམས་ཀྱི་ཚོགས་རྫོགས་པས་སྐུ་ལྔ་ལ་སོགས་པའི་ཡོན་ཏན་རང་རིག་པའི་ཡེ་ཤེས་ལ་རང་བཞིན་གྱིས་ལྡན་པའི་ཕྱིར་ཏེ། རྡོ་རྗེ་ལས་རིམ་ལས། སྐུ་ལྔ་ལ་སོགས་ཡོན་ཏན་བརྗོད་ལས་འདས། །ཞེས་གསུངས་པའི་ཕྱིར། འོ་ན་འདས་ཞེས་པའི་དོན་དེ་གང་ཞེ་ན། དེ་ནི་བཀས་བཅད་ལས། འཇིག་རྟེན་པའི་བྷ་ག་ཝན་ལས་ཁྱད་ ― MLP018_Page_0239 ―
[མ་དཔེ་གཟིགས་ན་འདིར་གནོན།]
པར་འདས་ཞེས་བླ་ཐབས་སུ་བསྣན་ཏེ། ཞེས་གསུངས་ཤིང་། བྷ་གའི་སྒྲ་སྲིད་པ་དང་འཇིགས་པར་འགྲོ་བ་ལ་འཇུག་སྟེ། དེ་ལས་འདས་པས་ན་བྷ་ག་ཝན་ནོ། །འདིར་ནི་འདས་པ་ཞེས་པའི་མཚན་དེ་ཆོས་ཅན། མཚན་ཉིད་ཀྱི་མཚན་ཡིན་ཏེ། ཆོས་སྐུ་སྐྱེ་བ་མེད་པས་ཡོད་པའི་མཐའ་དང་། གཟུགས་སྐུ་འགག་པ་མེད་པས་མེད་པའི་མཐའ་སྟེ། སྤྲོས་པའི་མཚན་མ་ཀུན་ལས་འདས་པའི་དོན་ཡིན་པའི་ཕྱིར། དེ་ལྟར་ཡང་། ཕལ་པོ་ཆེ་ལས། སྤྲོས་པ་ཀུན་ལས་རབ་འདས་པའི། །བཅོམ་ལྡན་འདས་ནི་མཁའ་རབ་ཞི། །ཞེས་དང་། རྡོ་རྗེ་ལས་རིམ་ལས། རང་གི་ངོ་བོ་འདི་ཞེས་བསྟན་དུ་མེད། །ཅེས་གསུངས་པའི་ཕྱིར་ཏེ། ཡང་དེ་ཆོས་ཅན། ཁྱོད་ལ་དཔལ་ཞེས་བརྗོད་པ་དེ་ཆེ་བའི་མཚན་ཉིད་ཡིན་ཏེ། རང་བཞིན་ལྷུན་གྲུབ་ཀྱི་དཔལ་གཞི་ཆོས་དབྱིངས་ཤིན་ཏུ་དྲི་མེད་དེ་ཉིད་མངོན་དུ་གྱུར་པས། འབྲས་བུ་ཆོས་སྐུ་རྟོགས་པ་བདག་གི་དཔལ་དང་། གཟུགས་སྐུ་ཐུགས་རྗེ་གཞན་གྱི་དཔལ་མངའ་བ་ཡིན་པའི་ཕྱིར། དེ་ལྟར་ཡང་རྡོ་རྗེ་ལས་རིམ་ལས། རང་བཞིན་མངོན་བྱས་མ་ལུས་རེ་བ་སྐོང་། ཞེས་གསུངས་པའི་ཕྱིར། སྟོན་པ་རིགས་དྲུག་པ་ཆོས་ཅན། ཁྱོད་ལ་ཀུན་ཏུ་བཟང་པོ་ཞེས་བརྗོད་པ་དེ་རང་གི་ངོ་བོའ་མཚན་ཡིན་ཏེ། འཁོར་འདས་ཀྱི་ཆོས་ཐམས་ཅད་འཆིང་གྲོལ་མེད་པའི་རང་བཞིན་མངོན་དུ་རྟོགས་པས་སྤྱོད་ཡུལ་ཡོངས་སུ་དག་པའི་ཕྱིར་ཏེ། འདི་ཉིད་ལས། ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །ཞེས་གསུངས་པའི་ཕྱིར། ཡང་དེ་ཆོས་ཅན། ཁྱོད་ཀུན་ཏུ་བཟང་པོ་ཡིན་ཏེ། གནས་ལུགས་ཡེ་སངས་རྒྱས་པ་ནི་རང་བཞིན་ཀུན་ཏུ་བཟང་པོ། དེ་ཉིད་རྟོགས་པའི་ཡོན་ཏན་མངོན་དུ་གྱུར་པ་ནི། རྟོགས་པ་ཀུན་ཏུ་བཟང་པོ། དེ་ལས་གཟུགས་ཀྱི་སྐུ་མངོན་དུ་སྣང་བ་ནི་ཐུགས་རྗེ་ཀུན་ཏུ་བཟང་པོ་ཡིན་པའི་ཕྱིར། ཡང་དེ་ཆོས་ཅན། ཀུན་ཏུ་བཟང་པོ་ཡིན་ཏེ། འགྲོ་བ་ལ་ཕྱོགས་དུས་ཀུན་ཏུ་གནས་སྐབས་དང་མཐར་ཐུག་གི་ཕན་བདེ་བཟང་པོ་སྟེར་བར་མཛད་པ་པོ་ཡིན་པའི་ཕྱིར་ཏེ། རྒྱུད་ཕྱི་མ་ལས། ཕྱོགས་བཅུའི་འཇིག་རྟེན་ཐམས་ཅད་དུ། །མངོན་མཐོ་ངེས་ལེགས་རབ་སྟེར་བ། །ཀུན་ཏུ་བཟང་པོར་བརྗོད་པ་ཡིན། །ཞེས་གསུངས་པའི་ཕྱིར། ལ་ཞེས་པ་ནི་ཕྱག་བྱ་བའི་ ― MLP018_Page_0240 ―
[མ་དཔེ་གཟིགས་ན་འདིར་གནོན།]
ཡུལ་མཚོན་པར་བྱེད་པའི་རྣམ་དབྱེ་སྟེ། སྡུད་པ་པོ་གསང་བདག་གིས་རང་དང་སྟོན་པའི་ཐུགས་གཉིས་སུ་མེད་པར་རྟོགས་པའི་སྒོ་ནས་ཕྱག་འཚལ་བའི་དོན་ནོ། །དེ་ལྟར་ཡང་འགྲེལ་པ་མངོན་རྟོགས་ལས། དེ་ཡང་ཐུན་མོང་པ་དག་ལུས་ངག་ཡིད་གསུམ་གྱིས་སོ་སོར་བལྟས་ནས་ཕྱག་འཚལ་བ་ནི་ཤིན་ཏུ་འགལ་ཏེ། ཚི་ཆད་པར་འགྱུར་རོ། །རྨད་དུ་བྱུང་བའི་ཐེག་པ་འདིར་ཀུན་ཏུ་བཟང་པོ་དང་རིག་པ་གཉིས་མེད་དུ་འཇལ་བ་ཕྱག་ཏུ་གསུངས་ཏེ། དཔེ་མར་གྱི་ནང་དུ་མར་བླུག་པ་བཞིན་ནོ། །ཞེས་དང་། རིམ་ལྔ་ལས་ཀྱང་། ཇི་ལྟར་ཆུ་ལ་ཆུ་བཞག་དང་། །ཇི་ལྟར་མར་ལ་མར་བཞག་བཞིན། །རང་གིས་རང་གི་ཡེ་ཤེས་གང་། །ལེགས་མཐོང་གང་ཡིན་འདིར་ཕྱག་འཚལ། །ཞེས་གསུངས་པའི་ཕྱིར། གསུམ་པ་རྩོད་པ་སྤང་བ་ནི། རྩོད་པ་འགོད་པ་དང་། དེ་སྤང་བའོ། །དང་པོ་ནི། ཁོ་ན་རེ། ཀླད་དུ་སྨོས་པའི་ཕྱག་འདི་ལོ་ཙཱ་བའི་འགྱུར་ཕྱག་ཡིན་གྱི། སྡུད་པ་པོའི་ཕྱག་མ་ཡིན་ཏེ། སྡུད་པ་པོའི་ཚིག་ནི། འདི་སྐད་བཤད་པའི་དུས་ན། ཞེས་པ་མན་ཆད་ཡིན་པའི་ཕྱིར་ཟེར། གཉིས་པ་དེ་སྤང་བ་ནི། འོ་ན་སྡུད་པ་པོས་བཀའ་བསྡུ་བྱེད་པའི་ཐོག་མར་རང་གི་སྟོན་པ་ལ་བསྟོད་ཕྱག་བྱས་པ་མེད་པར་ཐལ། དམ་བཅའ་དེ་འཐད་པའི་ཕྱིར། འདོད་ན། དེ་ཡོད་པར་ཐལ། སོ་ཐར་གྱི་མདོའ་བཀའ་བསྡུས་པའི་ཚེ་སྟོན་པ་ལ་བསྟོད་ཕྱག་བྱས་ནས་བཀའ་བསྡུས་པའི་ཕྱིར་ཏེ། དེ་ལས་འགྲོ་བའི་གཙོ་ལ་སྤྱི་བོས་ཕྱག་འཚལ་ནས། །ཐམས་ཅད་མཁྱེན་པའི་བསླབ་གཞི་དཀོན་མཆོག་སྣོད། །འཕགས་པའི་ཚོགས་ཀྱི་དབུས་སུ་དབྱེ་བར་བྱ། །ཞེས་གསུངས་པའི་ཕྱིར་བྱས་པ་ལ། ཁོ་ན་རེ། འོ་ན་རྒྱུད་འདི་ལ་ལོ་ཙཱ་བའི་འགྱུར་ཕྱག་མེད་པར་ཐལ། ཀླད་དུ་བཀོད་པའི་ཕྱག་འདི་ནི་སྡུད་པ་པོའི་ཕྱག་ཡིན་ལ། དེ་ལས་གཞན་པའི་འགྱུར་ཕྱག་མེད་པའི་ཕྱིར་ཟེར། དེ་ལ་སྐྱོན་མེད་དེ། ལོ་ཙཱ་བས་རྒྱལ་པོའི་བཀས་བཅད་དང་བསྟུན་ནའང་སྟོན་པ་ཀུན་བཟང་ལ་ཕྱག་འཚལ་བར་རིགས། རང་གི་འདོད་པའི་ལྷ་ལ་འཚལ་ནའང་སྟོན་པ་ཀུན་བཟང་ལ་ཕྱག་བྱ་བར་རིགས་པར་མཐོང་ནས། འགྱུར་ཕྱག་ཟུར་དུ་མ་བཀོད་པའི་ཕྱིར་ཏེ། དུས་འཁོར་བསྡུས་རྒྱུད་ཀྱི་ཀླད་དུའང་ཡི་གེ་པའི་ཕྱག་གིས་གོ་བཅད་དེ་འགྱུར་ཕྱག་མ་བཀོད་པ་བཞིན་ ― MLP018_Page_0241 ―
[མ་དཔེ་གཟིགས་ན་འདིར་གནོན།]
ནོ། །གཉིས་པ་གཞུང་དོན་གཏན་ལ་དབབ་པ་ལ། འདི་ཉིད་ལས། རབ་འབྲིང་ཐ་མའི་བློ་ཅན་ལ། །མཐུན་པར་གསང་བསྒྲག་གཞན་དུ་མིན། །ཞེས་གསུངས་པ་ལྟར་གྱི་རྒྱུད་འདི་ཉིད་ཀྱི་ཆེད་དུ་བྱ་བའི་གདུལ་བྱ་དབང་པོ་རབ་འབྲིང་ཐ་གསུམ་ལ་ལྟོས་ནས་འཆད་ཚུལ་གསུམ་སྟེ། ཁོག་གཞུང་ལས། རབ་ལ་མཚན་བསྟན་འབྲིང་ལ་དབྱེ། །ཐ་མར་འབྲུ་གཉེར་དགྲོལ་བའོ། །ཞེས་གསུངས་པའི་ཕྱིར། དེ་ལས་འདིར་བར་མའི་དབང་དུ་བྱས་ན། གཞུང་ཚོགས་ལེའུ་ཉེར་གཉིས་ཀྱང་ཆོས་ལྔར་འདུ་སྟེ། འགྲེལ་པ་སྤར་ཁབ་ལས། སྤྲོས་པ་ལ་དགའ་བ་དབང་པོ་འབྲིང་གི་དོན་དུ་རྒྱུད་ཀྱི་དོན་རྣམ་པར་ཕྱེ་བས་ལྔ་སྟེ། ཞེས་གསུངས། དེ་ལ་ལྔ་པོ་དེ་གང་ཡིན་ཞེ་ན། འགྲེལ་པ་མངོན་རྟོགས་ལས། རྒྱུད་གཞུང་གཞི་བསླང་ཡོངས་སུ་ཤེས། །དགོས་འབྲེལ་གཏད་དང་རྫོགས་པའོ། །ཞེས་གསུངས་པས། ལེའུ་དང་པོ་དང་། གསུམ་པའི་སྟོད། བཅོ་ལྔ་པ་རྣམས་ཀྱིས་རྒྱུད་འབྱུང་བའི་རྒྱུ་གླེང་གཞི་ཕུན་སུམ་ཚོགས་པ་དང་། ལེའུ་གཉིས་པས་རྐྱེན་གླེང་བསླང་བ་དང་། ལེའུ་གསུམ་པའི་སྨད་ནས་ཉེར་གཅིག་པ་ཡན་གྱིས་འབྲས་བུ་ཡོངས་ཤེས་རྒྱུད་དོན་དང་། དེ་དག་ལ་ཁྱབ་བྱེད་དུ་རྒྱུད་ཀྱི་དགོས་འབྲེལ་དང་། ལེའུ་ཐ་མས་འཁོར་ལ་གདམས་ཤིང་བསྟན་པ་གཏད་པ་དང་ལྔ་ལས། དང་པོ་ལ། གླེང་གཞི་བསྟན་པའི་དགོས་ཆེད། དེའི་མཚན་ཉིད། སྒྲ་དོན། ཇི་སྙེད་བསྟན་པའི་རྣམ་གྲངས་དང་བཞི་ལས། དང་པོ་ནི། གླེང་གཞི་ཚོགས་པ་དེ་ཆོས་ཅན། དགོས་པ་གཉིས་སུ་ངེས་ཏེ། ཁྱོད་ཀྱིས་རྒྱུད་དོན་འབྱུང་བའི་རྒྱུ་བྱེད་པ་དང་། དེའི་ལོ་རྒྱུས་ལ་བརྟེན་ནས་མ་འོངས་པའི་གདུལ་བྱ་རྣམས་ཡིད་ཆེས་ཤིང་རྒྱུད་ལ་འཇུག་པར་འགྱུར་བའི་ཆེད་ཡིན་པའི་ཕྱིར། གཉིས་པ་ནི། སྟོན་པ་ལ་སོགས་པ་ཕུན་སུམ་ཚོགས་པ་ལྔའི་བདག་ཉིད་རྒྱུད་དོན་འབྱུང་བ་དང་ཡིད་ཆེས་ཀྱི་ངེས་པ་སྟེར་བའི་རིགས་གནས། གསུམ་པ་ནི། གང་གླེང་ན་བསྟན་པ་སྟེ། དེའི་རྒྱུའམ་གཞི་ནི་ཕུན་སུམ་ཚོགས་པ་ལྔ་པོ་དེ་ཡིན་པའི་ཕྱིར་དང་། ཡང་ན། དཱ་ན་ཞེས་པའི་སྒྲ་ལས་དྲངས་ན་ངེས་པ་སྦྱིན་པ་ཞེས་བྱ་བ་ཡིན་ཏེ། བཀའ་མ་ཡིན་པར་རྟོག་པའི་ཐེ་ཚོམ་ཅན་གྱི་ ― MLP018_Page_0242 ―
[མ་དཔེ་གཟིགས་ན་འདིར་གནོན།]
བློ་ལ་ཡིད་ཆེས་ཀྱི་ངེས་པ་སྦྱིན་བྱེད་ཡིན་པའི་ཕྱིར། བཞི་པ་ཇི་སྙེད་བསྟན་པའི་རྣམ་གྲངས་དེ་ཆོས་ཅན། ཁྱོད་ལ་རྣམ་པ་གཉིས་སུ་ངེས་ཏེ། ཐུན་མོང་མ་ཡིན་པའི་དང་། ཐུན་མོང་གི་གླེང་གཞི་གཉིས་སུ་ངེས་པའི་ཕྱིར། དེ་ལ་ཐུན་མོང་མ་ཡིན་པའི་གླེང་གཞི་ནི། བཤད་རྒྱུད་རྒྱ་མཚོ་དང་བཤད་རྒྱུད་ཐལ་བ་གཉིས་ཀྱིས་སྟོན་ཅིང་། འདིར་ཐུན་མོང་གི་གླེང་གཞི་དེ་ལ། རྒྱུད་འབྱུང་བ་ཁྱད་པར་གྱི་གླེང་གཞི། ཞར་བྱུང་གདུལ་བྱ་དགོས་བྱེད་དུ་སྟོན་པ་ཁྲོ་བོའ་གླེང་གཞི། སྤྲུལ་སྐུ་འགྲོ་བ་འདུལ་བའི་གླེང་གཞི་དང་གསུམ་ལས། དང་པོ་ནི། འདི་ཉིད་ཀྱིས་ལེའུ་དང་པོས་སྟོན་ཏེ། དེ་ལ་ལྔ་ལས། དང་པོ་ཆོས་ཕུན་སུམ་ཚོགས་པནི། འདི་སྐད་བཤད་པ་ཞེས་པ་སྟེ། དེ་ཡང་སྦྱོར་ངག་ཏུ་སྟོན་ན། འདི་སྐད་བཤད་པ་ཞེས་པ་དེ་ཆོས་ཅན། ཁྱོད་རྒྱུད་དབུ་ཞབས་ཀྱི་དོན་ཐམས་ཅད་མཚོན་པའི་ཚིག་ཕྲད་ཡིན་ཏེ། གསང་བདག་རང་ཉིད་སྟོན་པར་ཁས་བླངས་ནས་ངས་སྔར་འོག་མིན་དུ་བཤད་པ་ཉིད་ཡང་འདིར་བཤད་པར་བྱའོ་ཞེས་པའི་ངག་ཚིག་ཡིན་ཕྱིར་ཏེ། རྒྱུད་ལས། ང་ནི་ཆེ་བའི་རྒྱལ་པོ་སྟེ། །འཆད་དང་ཉན་པའང་ང་ཉིད་ཡིན། །ཞེས་གསུངས་པའི་ཕྱིར། གཉིས་པ་དུས་ཕུན་སུམ་ཚོགས་པ་ནི། དུས་ན། ཞེས་པ་སྟེ། དུས་ན་ཞེས་པའི་དུས་དེ་ཆོས་ཅན། ཁྱོད་དུས་རེ་འགའ་བ་ལས་འདས་པའི་ཐུན་མོང་མ་ཡིན་པའི་དུས་ཡིན་ཏེ། ལོངས་སྐུ་རྟག་པ་རྒྱུན་གྱི་འཁོར་ལོ་ཆོས་གསུང་བའི་དུས་ཡིན་པའི་ཕྱིར། འདི་དག་ལ་རྩོད་པ་སྤང་བ་ལ། རྩོད་པ་འགོད་པ་དང་། དེའི་ལན་གཉིས་ལས། དང་པོ་ནི། ཁོ་ན་རེ། མདོ་རྒྱུད་ཐམས་ཅད་དུ། འདི་སྐད་བདག་གིས་ཐོས་པ་དུས་གཅིག་ན། ཞེས་འབྱུང་བ་ལས། འདིར་དེ་ལྟར་མ་སྨོས་པའི་ཕྱིར། གླེང་གཞི་ལོག་པས་བཀའ་ཡང་དག་པ་མ་ཡིན་ནོ་ཟེར། དེའི་ལན་ལ། གཞན་ལན་ལ་དཔྱད་པ་དང་། རང་ལན་གདབ་པ་གཉིས་ལས། དང་པོ་ནི། ལྷ་རྗེ་གླན་ཤཱཀ་བཟང་ན་རེ། བཤད་ཐོས་གཉིས་ཚིག་མི་མཐུན་ཡང་སྟོན་པས་འཁོར་ལ་བཤད་པ་དང་། འཁོར་གྱིས་སྟོན་པ་ལས་ཐོས་པ་དོན་མཐུན་གསུང་། དེ་ལྟར་ན་ཐོས་པ་ལ་བཤད་པས་ཁྱབ་ཅེས་པའི་སྐྱོན་གནས་སོ། །ཡང་ཁྱེད་བླ་མ་དང་། རྗེ་སྒྲོ་ཕུག་པ་ན་རེ། སྐུ་གཉིས་ཀྱི་བསྟན་པའི་ཁྱད་པར་ཡིན་ཏེ། ལོངས་སྐུ་ཚིག་ཏུ་མི་གསུངས་ ― MLP018_Page_0243 ―
[མ་དཔེ་གཟིགས་ན་འདིར་གནོན།]
པས་རྣ་བས་ཐོས་སུ་མེད་པའི་ཕྱིར་བཤད་ཅེས་དང་། སྤྲུལ་སྐུ་ཚིག་ཏུ་གསུང་བའི་ཕྱིར་ཐོས་བྱ་བར་འོང་བ་ཡིན་ཟེར་བ་ཡང་མི་འཐད་དེ། ལོངས་སྐུས་གསུངས་པའི་རྒྱུད་ཡིན་ན། བཤད་ཅེས་འབྱུང་བས་མ་ཁྱབ་པའི་ཕྱིར། གཉིས་པ་རང་ལན་གདབ་པ་ནི། གསང་བདག་གིས་བསྡུ་བ་བྱེད་པ་ན་རང་ཉིད་སྟོན་པ་ཉིད་དུ་ཁས་བླངས་ཏེ། སྔར་ངས་འོག་མིན་དུ་བཤད་པ་ཉིད་ཡང་འདིར་བཤད་པར་བྱ། ཞེས་དང་། ཉི་འོད་སེང་གེའི་རྒྱ་ཆེར་འགྲེལ་ལས་བཤད་ཅེས་པས་ནི་འཁོར་དང་སྟོན་པ་གཉིས་སུ་མེད་པར་བསྟན་པ་ཡིན་ལ། ཞེས་སོགས་དང་། སྤར་ཁབ་ལས་ཀྱང་། ཐུན་མོང་མ་ཡིན་པའི་གླེང་གཞི་སྟེ། རྒྱུད་གཞན་ལས་ཁྱད་པར་དུ་གྱུར་པའི་ཕྱིར། ཞེས་གསུངས་པའི་ཕྱིར་རོ། །གསུམ་པ་སྟོན་པ་ཕུན་སུམ་ཚོགས་པ་ལ་གཉིས་ལས། དང་པོ་སྟོན་པའི་རང་བཞིན་ནི། དེ་བཞིན་གཤེགས་པ་ཡང་དག་པ་སོགས་ནས་དབྱེར་མེད་པ་ཞེས་པའི་བར་གྱིས་བསྟན། སྟོན་པ་ཀུན་ཏུ་བཟང་པོ་ཆོས་ཅན། ཁྱོད་ལ་དེ་བཞིན་གཤེགས་པ་ཞེས་བརྗོད་པ་དེ་དེ་བཞིན་ཉིད་དུ་ནར་སོན་པའི་རང་བཞིན་མངའ་བ་ཡིན་ཏེ། ཁྱོད་ཆོས་ཉིད་དེ་བཞིན་ཉིད་ཀྱི་དོན་སྒྲིབ་བྱེད་ཀྱི་ཞེན་པ་དང་བྲལ་བས་ནར་སོན་ཞིང་། དེའི་ངོ་བོ་མངོན་དུ་གྱུར་པས་ན་གཤེགས་པ་ཞེས་བརྗོད་པའི་ཕྱིར་ཏེ། རྡོ་རྗེ་ལས། དེ་བཞིན་ཉིད་དུ་གཤེགས་པ་ཡང་། །སྣ་ཚོགས་ཞེན་ལས་གྲོལ་བར་བཤད། །ཅེས་དང་། རྒྱུད་ཕྱི་མ་ལས། གང་ཕྱིར་དེ་བཞིན་ཉིད་དུ་གཤེགས། །དེ་བཞིན་གཤེགས་པར་མངོན་པར་བརྗོད། །ཅེས་གསུངས་པའི་ཕྱིར། དེ་ཆོས་ཅན། ཁྱོད་ལ་ཡོན་ཏན་མ་བཙལ་བར་ལྷུན་གྱིས་གྲུབ་པའི་ཡོན་ཏན་མངའ་བས་ཡང་དག་པར་རྫོགས་པ་ཞེས་བརྗོད་པ་ཡིན་ཏེ། ཁྱོད་ཀྱི་རང་བྱུང་གི་ཡེ་ཤེས་ལ་སྤང་བྱ་མ་གྲུབ་པས་མ་ནོར། མི་འགྱུར། མི་བསླུ་བས་ཡང་དག་པ་དང་། ཐམས་ཅད་འབྲས་བུ་སྐུ་དང་ཡེ་ཤེས་སུ་རང་སྣང་བས་སྤང་ཐོབ་མེད་པར་ཡེ་རྫོགས་སུ་གནས་པས་དེ་ལྟར་དུ་བརྗོད་པའི་ཕྱིར། དེ་ཆོས་ཅན། ཁྱོད་ལ་ཡེ་ཤེས་མཐའ་དབུས་མེད་པར་བརྡལ་བའི་རང་བཞིན་མངའ་བས་སངས་རྒྱས་ཞེས་བརྗོད་པ་ཡིན་ཏེ། མི་མཐུན་པ་དང་གཉེན་པོ་དབྱེར་མེད་པའི་ཡོན་ཏན་མཐར་ཐུག་པས་ན་དེ་ལྟར་དུ་བརྗོད་པའི་ཕྱིར་ཏེ། ལེ་ལག་ལས། མ་རིག་ ― MLP018_Page_0244 ―
[མ་དཔེ་གཟིགས་ན་འདིར་གནོན།]
པ་ཉིད་ཡེ་ཤེས་གསལ། །ཉོན་མོངས་སྡུག་བསྔལ་བྱང་ཆུབ་མཆོག །ཅེས་གསུངས་པའི་ཕྱིར། དེ་ཆོས་ཅན། རང་གི་ངོ་བོ་གཏན་དུ་མེད་པའི་རང་བཞིན་མངའ་བས་བཅོམ་ལྡན་འདས་ཞེས་བརྗོད་པ་ཡིན་ཏེ། བདུད་བཞི་བཅོམ་ཞིང་ཆེ་བའི་ཡོན་ཏན་གྱི་འབྲས་བུ་ལ་མངའ་མཛད་པའི་ཕྱིར་ཏེ། རྡོ་རྗེ་ལས་རིམ་ལས། བདུད་བཞི་ལ་སོགས་རིག་པའི་གདེངས་ཀྱིས་བཅོམ། །སྐུ་ལྔ་ལ་སོགས་ཡོན་ཏན་བརྗོད་ལས་འདས། །རང་གི་ངོ་བོ་འདི་ཞེས་བསྟན་དུ་མེད། །ཅེས་གསུངས་པའི་ཕྱིར། དེ་ཆོས་ཅན། ཁྱོད་ཀྱིས་མཉམ་པ་ཉིད་ཀྱི་དོན་མངོན་དུ་མཛད་ཀྱང་སྤྱོད་ཡུལ་དང་བྲལ་བའི་རང་བཞིན་མངའ་བས་ལོངས་སྤྱོད་ཆེན་པོ་ཞེས་བརྗོད་པ་ཡིན་ཏེ། ཁྱོད་འཁོར་འདས་ཀྱི་ཆོས་ཐམས་ཅད་ལ་སྤྱད་བྱ་སྤྱོད་བྱེད་དུ་འཛིན་པའི་ཞེན་པ་དང་བྲལ་བའི་སྒོ་ནས་ལོངས་སྤྱོད་པས་གཞན་ལས་ཆེས་མཆོག་ཏུ་གྱུར་པ་ཡིན་པའི་ཕྱིར་ཏེ། དེ་ལྟར་ཡང་འཆི་མེད་མཛོད་ལས། ཆེན་པོ་མཆོག་དང་ཚད་མེད་དང་། །མཁས་མཚོན་སྤྲོ་བའི་ལས་འདི་ཉིད། །ཤིན་ཏུ་རྨད་བྱུང་བྱེད་པ་ནི། །ཆེན་པོ་ཞེས་ནི་བཤད་པ་ཡིན། །ཞེས་གསུངས་པའི་ཕྱིར། དེ་ཆོས་ཅན། ཁྱོད་ལ་དེ་བཞིན་གཤེགས་པ་ཀུན་གྱི་བདག་ཉིད་གཅིག་དང་དུ་མ་ལས་གྲོལ་བའི་རང་བཞིན་གྱི་མཚན་སྐུ་གསུང་ཐུགས་རྡོ་རྗེའི་བདག་ཉིད་ཅེས་བརྗོད་པའི་རྒྱུ་མཚན་ཡོད་དེ། ཁྱོད་ཕྱོགས་དུས་བདེ་གཤེགས་ཐམས་ཅད་ཀྱི་རྟེན་བྱེད་པའི་ངོས་ནས་སྐུ་ལྔ། བརྡའ་སྤྲོད་པའི་ངོས་ནས་གསུང་ལྔ། མི་གཡོ་བའི་ཐུགས་ལྔ། དགོས་འདོད་འབྱུང་བའི་ཡོན་ཏན་ལྔ། གཞན་དོན་མཛད་པའི་ངོས་ནས་ཕྲིན་ལས་ལྔ་སྟེ། འབྲས་ཆོས་ཉེར་ལྔ་པོ་དེ་དག་གཅིག་དང་དུ་མ་བྲལ་ཞིང་། རང་བཞིན་དབྱེར་མི་ཕྱེད་པ། མཚན་ཉིད་སྐྱེ་འཇིག་བྲལ་བ། ངོ་བོ་འདུས་མ་བྱས་པ་རྡོ་རྗེའི་བདག་ཉིད་དུ་རོ་གཅིག་པས་དེ་ལྟར་བརྗོད་པའི་ཕྱིར། དེ་ཆོས་ཅན། ཁྱོད་ཁམས་གསུམ་དང་དུས་གསུམ་གྱིས་བསྡུས་པའི་འཁོར་བའི་ཆོས་ཐམས་ཅད་དང་སོ་སོ་མ་ཡིན་ཐ་མི་དད་པའི་རང་བཞིན་ཅན་ཡིན་ཏེ། ཁྱོད་དང་དེ་ལྟ་བུའི་འཁོར་བའི་ཆོས་གཉིས་ཀའང་། ཀུན་རྫོབ་ཏུ་རིག་པ་སྒྱུ་མ་ལྟ་བུ་ཡིན་པས་སོ་སོ་མ་ཡིན། དོན་དམ་པར་སེམས་ཉིད་དུ་མ་སྐྱེས་པས་ཐ་མི་དད །བདེན་པ་གཉིས་ཀའི་ཐ་སྙད་ལས་ཀྱང་འདས་པས་ན། དབྱེར་ ― MLP018_Page_0245 ―
[མ་དཔེ་གཟིགས་ན་འདིར་གནོན།]
མེད་པའི་རང་བཞིན་ཅན་ཡིན་པའི་ཕྱིར། གཉིས་པ་སྟོན་པའི་ངོ་བོ་ནི། སྐུ་མདུན་དང་། རྒྱབ་མེད་པ་ཐམས་ཅད་དུ་ཞལ་ཐལ་ལེ་བར་གསལ་ཞིང་སོགས་ནས། སྐུ་གསུང་ཐུགས་བསམ་གྱིས་མི་ཁྱབ་པའི་དབུ་གསུམ་དང་། ཞེས་པ་སྟེ། དེ་ཆོས་ཅན། ཁྱོད་ཆོས་སྐུའི་བདག་ཉིད་དུ་གནས་པ་ཡིན་ཏེ། ཁྱེད་བདེ་གཤེགས་རང་སྣང་ལ་སྐུ་མདུན་དང་རྒྱབ་མ་གྲུབ་ཅིང་གདུལ་བྱའི་སྣང་བ་ལ་རིས་མེད་པར་ཐམས་ཅད་དུ་ཞལ་ཐལ་ལེ་བར་གསལ་བས་གཟུགས་སྐུའི་ཡོན་ཏན་མི་འགག་པའི་ཕྱིར་ཏེ། སེང་གེ་རྩལ་རྫོགས་ལས། ཀུན་ཏུ་བཟང་པོའི་ཞལ་ནི་ཕྱོགས་བཅུར་གསལ། །ཀུན་གཟིགས་ཀུན་བཟང་སྐུ་ལ་མདུན་རྒྱབ་མེད། །ཕྱོགས་བཅུ་གང་བར་སྤྱན་གྱིས་རྣམ་པར་གཟིགས། །ཞེས་གསུངས་པའི་ཕྱིར། དེ་ཆོས་ཅན། ལོངས་སྐུའི་བདག་ཉིད་དུའང་གནས་པ་ཡིན་ཏེ། ཐུན་མོང་དང་ཁྱད་པར་གྱི་མཚན་གྱི་མེ་ཏོག་ལ་དཔེ་བྱད་ཀྱི་འབྲས་བུས་སྤྲས་པའི་བདག་ཉིད་དུ་གནས་པའི་ཕྱིར། དེ་ཆོས་ཅན། སྤྲུལ་སྐུའི་བདག་ཉིད་དུ་གནས་པ་ཡིན་ཏེ། ཁྱོད་ཀྱི་མཛད་པའི་སྣང་ཚུལ་ནི། རྣམ་པར་འཕྲུལ་པ་བསམ་གྱིས་མི་ཁྱབ་ཅིང་ཚད་མེད་པར་སྣང་བའི་ཕྱིར་ཏེ། གསང་བ་བསམ་གྱིས་མི་ཁྱབ་པའི་མདོ་ལས། ཞི་བའི་བློ་གྲོས་ནམ་མཁའ་ཇི་ཙམ་ཁྱབ་པ་དེ་ཙམ་དུ་དེ་བཞིན་གཤེགས་པའི་སྐུས་ཁྱབ་བོ། །ཞེས་གསུངས་པའི་ཕྱིར། དེ་ཆོས་ཅན། ཁྱོད་ལ་ཐབས་ཤེས་གཉིས་སུ་མེད་པའི་དོན་རྟགས་ཀྱི་བཞུགས་ཚུལ་བཤད་དུ་ཡོད་དེ། ཐབས་སྙིང་རྗེ་ཆེན་པོ་དང་། ཤེས་རབ་སྟོང་པ་ཉིད་ཀྱི་བརྡར་ཞབས་གཉིས་ཡབ་ཡུམ་གཉིས་ཀ་བཞེངས་པ་ལྟ་བུ་མ་ཡིན་པར་ཡབ་རྡོ་རྗེའི་སྐྱིལ་ཀྲུང་དང་། ཡུམ་པདྨའི་སྐྱིལ་ཀྲུང་དུ་བཅིངས་ནས་བཞུགས་པ་ཡིན་པའི་ཕྱིར། ཞར་བྱུང་དུ། འཆད་པའི་སྐྱེས་བུ་རིགས་ལྔ་ཆོས་ཅན། ཁྱོད་རྣམས་ཀྱི་བཞུགས་ཚུལ་ཡོད་དེ། ཡབ་རྣམས་རྫོགས་པའི་སྐྱིལ་ཀྲུང་དང་། ཡུམ་རྣམས་བརྟུལ་ཞུགས་ཀྱི་སྐྱིལ་ཀྲུང་གིས་གཡོན་ཕྱོགས་ནས་འཁྱུད་པའི་ཚུལ་དུ་བཞུགས་པ་ཡིན་པའི་ཕྱིར། སྟོན་པ་ཆོས་ཅན། ཡེ་ཤེས་དྲུག་དང་ལྡན་པའི་དོན་རྟགས་བཤད་དུ་ཡོད་དེ་ཡེ་ཤེས་ལྔ། རང་བྱུང་གི་ཡེ་ཤེས་དང་དྲུག དེས་འགྲོ་དོན་མཛད་པའི་རྟགས་སུ་ཕྱག་མཚན་དྲུག་འཛིན་པ་ཡིན་པའི་ཕྱིར་ཏེ། སྒྱུ་འཕྲུལ་རོལ་པ་ཆེན་ ― MLP018_Page_0246 ―
[མ་དཔེ་གཟིགས་ན་འདིར་གནོན།]
པོའི་རྒྱུད་ལས། ཡེ་ཤེས་དྲུག་གི་བདག་ཉིད་ཀྱི། །ཕྱག་རྒྱ་རིན་ཆེན་འབར་བའི་མཚན། །རྡོ་རྗེ་འཁོར་ལོ་རིན་པོ་ཆེ། །དྲིལ་བུ་པདྨ་རལ་གྲི་འབར། །ཞེས་གསུངས་པ་ཡིན་པའི་ཕྱིར། དེ་ཆོས་ཅན། ཁྱོད་ལ་རྣམ་ཐར་གསུམ་མངའ་བ་ཡིན་ཏེ། དེ་གསུམ་གྱི་མཚན་མར་དབུ་དཀར་དམར་མཐིང་གསུམ་གྱི་ཁ་དོག་ཏུ་བསྟན་པའི་ཕྱིར། བཞི་པ་གནས་ཕུན་སུམ་ཚོགས་པ་ལ། གནས་ཀྱི་རང་བཞིན་དང་། དེའི་ངོ་བོ་གཉིས་ལས། དང་པོ་ནི། འོག་མིན་གྱི་གནས་མཐའ་དང་དབུས་མེད་པ་ན། ཞེས་པ་དང་། གཉིས་པ་ནི། གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལ་སོགས་ནས། གོས་པ་མེད་པ་པདྨ་རིན་པོ་ཆེའི་གདན་ལ་ཞེས་པའི་བར་གྱིས་སྟོན་པ་སྟེ། དེའི་དོན་བཤད་པ་ལ། གནས་ཀྱི་མཚན་ཉིད། སྒྲ་དོན། གཏན་ལ་དབབ་པ་དང་གསུམ་ལས། དང་པོ་ནི། དོན་དབྱིངས་དང་ཡེ་ཤེས་དབྱེར་མེད་པ་ལས། དེའི་རྟགས་སྣང་གཞལ་ཡས་ཁང་གི་དབྱིབས་དང་ཁ་དོག་ཏུ་རང་སྣང་བའི་རིགས་གནས་ཏེ། ཁོག་གཞུང་ལས། གནས་ཀྱི་རང་བཞིན་དེ་བཞིན་ཉིད། །ངོ་བོ་འོག་མིན་གཞལ་ཡས་ཁང་། །ཞེས་སོ། །གཉིས་པ་སྒྲ་དོན་ནི། ཨ་ཀ་ནིཥྛ་ཞེས་པའི་སྒྲ་ལས་དྲངས་ན། འོག་མ་ཡིན་པ་སྟེ། དོན་གདུལ་བྱའི་བློ་ལས་འདས་ཤིང་། རྟགས་དེ་འཇིག་རྟེན་གནས་ཀྱི་འོག་མིན་ལས་ཉིས་འགྱུར་གྱིས་སྤགས་པའི་ཕྱིར་ཏེ། སྒྱུ་འཕྲུལ་རྒྱ་མཚོ་ལས། འཇིག་རྟེན་གནས་ཀྱི་འོག་མིན་ལས། །ཉིས་འགྱུར་ཤིན་ཏུ་སྤགས་པ་ན། །ཞེས་སོ། །གསུམ་པ་གཏན་ལ་དབབ་པ་ལ། གནས་དེའི་རང་བཞིན་ཆོས་ཅན། ཁྱོད་མཐའ་དབུས་ལ་སོགས་པའི་སྤྲོས་པ་ཐམས་ཅད་ལས་འདས་པ་ཡིན་ཏེ། ཁྱོད་ཆོས་ཀྱི་དབྱིངས་ཡིན་པའི་ཕྱིར། དེའང་འགྲེལ་ཆུང་ལས། མཐའ་དབུས་མེད་པ་ཆོས་ཀྱི་དབྱིངས། །དེ་ནི་གནས་ཀྱི་བླ་མར་འདོད། །ཅེས་གསུངས་པའི་ཕྱིར། གནས་ཀྱི་ངོ་བོ་དེ་ཆོས་ཅན། ཁྱོད་དབྱིངས་དང་ཡེ་ཤེས་དབྱེར་མི་ཕྱེད་པའི་རྟགས་སུ་གཞལ་ཡས་ཁང་གི་ཡོན་ཏན་གྱི་རྣམ་པར་རང་སྣང་བ་ཡིན་ཏེ། གཞི་དང་རྒྱུ་དང་རྒྱ་ལ་སོགས་པའི་དོན་བཅུ་གཅིག་གི་རྣལ་འབྱོར་རང་སྣང་བའི་ཕྱིར་ཏེ། འགྲེལ་ཆུང་ལས། གཞལ་ཡས་གཞི་དང་རྒྱུ་དང་རྒྱ། །དབྱིབས་དང་གློ་འབུར་རྩེ་མོ་དང་། །རྒྱན་དང་སྒོ་ཁྱུད་རྟ་བབས་དང་། །མཚན་ཉིད་གདན་གྱི་རྣམ་པ་ ― MLP018_Page_0247 ―
[མ་དཔེ་གཟིགས་ན་འདིར་གནོན།]
སྟེ། །ཞེས་གསུངས་པའི་ཕྱིར། དེའི་སྤྱིའི་འོག་གཞི་ཆོས་ཅན། ཁྱོད་ཡེ་ཤེས་ལྔ་མཚོན་པའི་རྟགས་སུ་འཁོར་ལོའ་རྣམ་པར་སྣང་བ་ཡིན་ཏེ། ཁྱོད་རྒྱ་ཁྱོན་ཚད་མེད་པའི་འཁོར་ལོ་རྩིབས་བཞི་ལྟེ་བ་དང་བཅས་པའི་རྣམ་པར་སྣང་བའི་ཕྱིར། དེའི་ནང་གི་འོག་གཞི་ཆོས་ཅན། ཁྱོད་ལ་སྤགས་པ་ཞེས་བརྗོད་པའི་རྒྱུ་མཚན་ཡོད་དེ། སྒོ་དང་ཁྱམས་སོགས་ནས་ལྟེ་བའི་བར་རིམ་པ་ལྟར་རྡོ་རྗེ་འགྲེང་བུ་རེས་སྤ གས་པ་དེ་ཐེག་པ་འོག་མ་ནས་འདིར་འཕར་བའི་དོན་ཡིན་པའི་ཕྱིར། གཞལ་ཡས་ཁང་དེའི་རྒྱུ་ཆོས་ཅན། ཁྱོད་རིན་པོ་ཆེ་ལས་གྲུབ་པ་ཡིན་ཏེ། ཡེ་ཤེས་ཉིད་རིན་པོ་ཆེའི་དབྱིབས་དང་ཁ་དོག་ཏུ་རང་སྣང་བས་རེ་བ་སྐོང་བ་ཡིན་པའི་ཕྱིར། དེའི་རྒྱ་ཆོས་ཅན། ཁྱོད་ཕྱོགས་བཅུ་ཀུན་ཏུ་ཡོངས་སུ་མ་ཆད་པར་སྣང་སྟེ། ཁྱོད་ཆོས་དབྱིངས་མཐའ་ཀླས་པར་ཁྱབ་པ་རང་སྣང་བའི་ཕྱིར། དེའི་དབྱིབས་ཆོས་ཅན། ཁྱོད་གྲུ་བཞི་པ་ཡིན་ཏེ། ཁྱོད་དེ་བཞིན་གཤེགས་པའི་ཡོན་ཏན་གྱིས་ཁྱབ་པ་དང་མཉམ་པ་དང་། རྒྱས་པའི་དོན་ཡིན་པའི་ཕྱིར་ཏེ། རྒྱ་ཆེར་འ གྲེལ་ལས། མཉམ་པའི་ཕྱིར་དང་ཁྱབ་པའི་ཕྱིར། །རྒྱས་པའི་ཕྱིར་ནི་གྲུ་བཞིར་བརྗོད། །ཅེས་སོ། །དེའི་གློ་འབུར་དེ་ཆོས་ཅན། ཁྱོད་གྲུ་ཆད་ལས་ཕྱིར་འཕྱང་བའི་དབྱིབས་མཁར་གྱི་འབུར་ཐབས་ལྟ་བུ་སྣང་བ་ཡིན་ཏེ། ཁྱོད་ཡེ་ཤེས་རེ་རེའང་ལྷག་པའི་ཡེ་ཤེས་བཞི་བཞི་དང་ལྡན་པའི་རྟགས་སུ་ཁ་དོག་རིགས་བཞིའི་མདོག་ཅན་གྱི་རིན་པོ་ཆེའི་གློ་འབུར་གྱིས་མཛེས་པར་སྣང་བའི་ཕྱིར། དེའི་རྩེ་མོའ་ཚད་དབྱིབས་ཆོས་ཅན། ཚད་དཔག་ཏུ་མེད་པ་དང་དབྱིབས་བུམ་པ་ཟླུམ་པོའི་རྣམ་པར་འཁྱིལ་བའི་རང་བཞིན་དུ་སྣང་སྟེ། ཁྱོད་ཆོས་ཀྱི་དབྱིངས་ཀྱི་ཡེ་ཤེས་ལ་མཐར་ཐུག་པ་མེད་ཅིང་སྤྲོས་པ་དང་བྲལ་བའི་རྟགས་སུ་སྣང་བ་ཡིན་པའི་ཕྱིར། དེའི་རྒྱན་ལ་བདུན་ལས། འོག་རྒྱན་གོང་དུ་བཤད་ཟིན། ལོགས་རྒྱན་ལ་གཉིས་ལས། རིན་པོ་ཆེའི་རྒྱན་དེ་ཆོས་ཅན། ཁྱོད་ཀྱི་ཁྱད་ཆོས་བཤད་དུ་ཡོད་དེ། ཁྱོད་གཉིས་སུ་མེད་པའི་ཡེ་ཤེས་ཀྱི་རྩལ་མ་འགགས་པར་རང་སྣང་བའི་རྟགས་སུ་པཉྩ་རེ་ཁའི་རྩིག་པའི་སྟེང་དུ་རིན་པོ་ཆེའི་ཕ་གུ་དང་། ཕྲེང་བ་དང་། ཆུན་འཕྱང་དང་། ཤར་བུ་དང་། མདའ་ཡབ་ལ་སོགས་པའི་རྒྱན་ཁྱད་པར་དུ་འཕགས་པ་དུ་མས་སྤྲས་པར་སྣང་བའི་ཕྱིར། འདོད་ཡོན་ ― MLP018_Page_0248 ―
[མ་དཔེ་གཟིགས་ན་འདིར་གནོན།]
གྱི་རྒྱན་ཆོས་ཅན། ཁྱོད་འདོད་པའི་ཡོན་ཏན་ལྔ་མ་སྤངས་རྣམ་དག་རྒྱན་དུ་རྫོགས་པའི་རྟགས་སུ་རང་སྣང་བ་ཡིན་ཏེ། ཁྱོད་གཟུགས་རྡོ་རྗེ་མ་ལ་སོགས་པའི་ལྷ་མོས་ཕྱོགས་ཀུན་ཏུ་འཁྲིགས་པར་རང་སྣང་བའི་ཕྱིར། སྟེང་རྒྱན་ཆོས་ཅན། ཁྱོད་བཤད་དུ་ཡོད་དེ། དབུས་བུམ་པ་ཟླུམ་པོའི་སྟེང་དུ་བྲེ་མཚོན་པའི་འཕྱུར་པོའི་རྩེར། པདྨ་ལ་གནས་པའི་འཁོར་ལོ་རིམ་པ་བཅུ་གསུམ་གྱི་སྟེང་ན་རཏྣའི་གདུགས་ཀྱིས་སྤྲས་པའི་སྟེང་། རྡོ་རྗེ་རིན་པོ་ཆེའི་ཏོག་གིས་མཛེས་པར་སྣང་བ་དེ་ཡིན་པའི་ཕྱིར། གཞལ་ཡས་ཁང་དེར་འཇུག་པའི་སྒོ་ཆོས་ཅན། ཁྱོད་བཤད་དུ་ཡོད་དེ་རྣམ་ཐར་བཞིའི་ཏིང་ངེ་འཛིན་གྱི་སྒོ་ནས་བྱང་ཆུབ་ཆེན་པོར་ལྷུན་གྱིས་འཇུག་བྱེད་ཕྱོགས་ཀྱི་དབྱེ་བས་སྒོ་བཞིར་སྣང་བ་དེ་ཡིན་པའི་ཕྱིར། གཞལ་ཡས་ཁང་དེའི་རྟ་བབས་ཆོས་ཅན། ཁྱོད་ཀྱི་གྲངས་ངེས་བཤད་དུ་ཡོད་དེ། རྒྱུའི་རྟ་བབས་བརྒྱད། འབྲས་བུའི་རྟ་བབས་བརྒྱད་དེ་བཅུ་དྲུག་ཏུ་གྲངས་ངེས་པ་ཡིན་པའི་ཕྱིར། རྒྱུའི་རྟ་བབས་ཆོས་ཅན། ཁྱོད་བཤད་དུ་ཡོད་དེ། ཐུན་མོང་གི་རྣམ་ཐར་བརྒྱད་ཀྱི་ཡོན་ཏན་གྱི་རྟགས་སུ་སྒོ་ཕུབས་ཕྱི་ནང་གཉིས་སུ་ཐེམ་སྐས་བཞི་བཞི་དང་ལྡན་པ་དེ་ཡིན་པའི་ཕྱིར། འབྲས་བུའི་རྟ་བབས་ཆོས་ཅན། ཁྱོད་བཤད་དུ་ཡོད་དེ། ཐེག་པ་བརྒྱད་ཀྱི་གྲུབ་མཐའི་ཡོན་ཏན་བརྒྱད་རྫོགས་པའི་རྟགས་སུ་སྒོ་ལོགས་ཀྱི་ཕྱིར་ཟུར་བཞི་ནས་ཀ་བས་བཏེགས་པའི་སྟེང་དུ་རྒྱན་གྱི་རྟ་བབས་བརྒྱད་དང་ལྡན་པ་དེ་ཡིན་པའི་ཕྱིར། གཞལ་ཡས་ཁང་དེའི་མཚན་ཉིད་ཆོས་ཅན། ཁྱོད་ལ་ཕྱི་དང་ནང་མེད་པར་ཀུན་ཏུ་ཡང་ནང་དུ་གྱུར་པ་ཞེས་བརྗོད་པའི་རྒྱུ་མཚན་ཡོད་དེ། ཁྱོད་ཆོས་ཀྱི་དབྱིངས་རྡོ་རྗེ་ཀུན་ཏུ་བཟང་མོའ་བྷ་ག་ཉིད་དུ་འདུས་པས་ན། ཐ་སྙད་ཙམ་དུ་ནང་ཞེས་བརྗོད་པའི་ཕྱིར། གཞལ་ཡས་ཁང་དེའི་གདན་ཁྲིའི་དོན་དེ་ཇི་ལྟ་བུ་ཡིན་ཞེ་ན། དེ་ལ་གསུམ་ཡོད་པའི་དང་པོ་འོག་གཞི་ཆོས་ཀྱི་འཁོར་ལོ་བསྐོར་བའི་གདན་དེ་ཆོས་ཅན། ཁྱོད་བཤད་དུ་ཡོད་དེ། ཁྱོད་རིགས་ལྔ་ཡེ་ཤེས་ལྔའི་ཕྱག་རྒྱས་རྟོག་ཚོགས་གཅོད་པའི་ཆོས་ཀྱི་འཁོར་ལོ་རྒྱུན་མི་ཆད་པར་བསྐོར་བའི་རྟགས་སུ་རང་ཤར་བ་དེ་ཡིན་པའི་ཕྱིར། གཉིས་པ་སའི་ཁྱད་པར་བགྲོད་པའི་གདན་དེ་ཆོས་ཅན། ཁྱོད་བཤད་དུ་ཡོད་དེ། མི་འཇིགས་པ་བཞི་སོགས་ལྷུན་གྱིས་གྲུབ་པའི་ ― MLP018_Page_0249 ―
[མ་དཔེ་གཟིགས་ན་འདིར་གནོན།]
ཡོན་ཏན་གྱི་རྟགས་སུ་སེང་གེ་ལ་སོགས་པ་སེམས་ཅན་ལྔ་པོ་རེ་རེའང་བརྒྱད་བརྒྱད་ཀྱི་གདན་ཁྲི་དང་ལྡན་པ་དེ་ཡིན་པའི་ཕྱིར། གསུམ་པ་ཡོན་ཏན་གྱི་ཆེ་བས་ཉེས་ཚོགས་བཅོམ་པའི་གདན་དེ་ཆོས་ཅན། ཁྱོད་བཤད་དུ་ཡོད་དེ། རྒྱལ་བའི་ཐུགས་རང་བཞིན་གྱིས་འོད་གསལ་ཞིང་ཐབས་ཤེས་དབྱེར་མེད་པའི་རྟགས་སུ་ཉི་ཟླ་དང་། ཉེས་སྐྱོན་གྱིས་མ་གོས་པས་པདྨ་དང་། རེ་བ་སྐོང་ཞིང་དཀོར་བདུན་ལྷུན་གྱིས་གྲུབ་པའི་རྟགས་སུ་རིན་པོ་ཆེའི་ཁྲི་རྐང་མཛོད་མིག་བདུན་ལྡན་རྣམས་སུ་ཤར་བ་དེ་ཡིན་པའི་ཕྱིར། ལྔ་པ་འཁོར་ཕུན་སུམ་ཚོགས་པ་ལ། རང་བཞིན་གཉིས་སུ་མེད་པའི་འཁོར། རིག་པ་ཁྱད་པར་ཅན་གྱི་འཁོར་གཉིས་ལས། དང་པོ་ནི། དེ་བཞིན་གཤེགས་པ་རྣམ་པར་ཤེས་པའི་སོགས་ཏེ། རྣམ་པར་ཤེས་པའི་རྒྱལ་པོ་ལ་སོགས་པ་དེ་བཞིན་གཤེགས་པ་རིགས་ལྔ་པོ་དེ་ཆོས་ཅན། ཁྱེད་རྣམས་ཀྱི་རིགས་དང་ཡེ་ཤེས་ཀྱི་དབྱེ་བ་བཤད་དུ་ཡོད་དེ། མི་བསྐྱོད་པ་ནི་ཐུགས་རྡོ་རྗེའི་རིགས་དང་ཆོས་དབྱིངས་ཡེ་ཤེས། རྣམ་སྣང་ནི་སྐུའི་རིགས་དང་མེ་ལོང་ལྟ་བུའི་ཡེ་ཤེས། རིན་འབྱུང་ནི་རིན་པོ་ཆེའི་རིགས་དང་མཉམ་ཉིད་ཡེ་ཤེས། སྣང་མཐའ་ནི་པདྨའི་རིགས་དང་སོར་རྟོག་ཡེ་ཤེས། དོན་གྲུབ་ནི་ལས་ཀྱི་རིགས་དང་བྱ་གྲུབ་ཡེ་ཤེས་རྣམས་སུ་ངེས་པ་དེ་ཡིན་པའི་ཕྱིར། གཉིས་པ་ནི། རིགས་ཀྱི་ཡུམ་ལྔ་པོ་དེ་ཆོས་ཅན། ཁྱོད་ལ་བཙུན་མོ་ཞེས་བརྗོད་པ་ལ་རྒྱུ་མཚན་ཡོད་དེ། སྐྱེད་པར་བྱེད་པའི་རྒྱུ་དང་། སྤྱད་པར་བྱ་བའི་ཡུལ་དུ་གྱུར་པས་ན་དེ་ལྟར་དུ་བརྗོད་པའི་ཕྱིར། ནང་སེམས་ཆོས་ཅན། ཁྱོད་ལ་དབྱེ་ན་བཞིར་ཡོད་པ་དེ་རྣམས་ལ་མཐོང་བ་ལ་སོགས་པར་སྨོས་པ་ནི་རིམ་པ་ལྟར་མིག་རྣ་བ་སྣ་ལྕེའི་རྣམ་ཤེས་བཞི་ཡིན་པས་རྟོག་པའི་མཚན་ཡིན་ཏེ། ཁྱོད་དབང་པོ་བཞི་ལ་བརྟེན་ནས་ཡུལ་གཟུགས་མཐོང་བ་ལ་སོགས་པ་དབང་ཤེས་བཞིར་འ ཇོག་པའི་ཕྱིར། མཐོང་བ་ལ་སོགས་པ་བཞི་པོ་ཆོས་ཅན། ཁྱོད་ལྷའི་དུས་ན་ཐུགས་ཀྱི་སེམས་དཔའ་བཞི་ཡིན་ཏེ། མཐོང་བ་ས་སྙིང་། ཐོས་པ་ཕྱག་རྡོར། སྣོམ་པ་ནམ་སྙིང་། མྱོང་བ་སྤྱན་རས་གཟིགས་དབང་ཕྱུག་རྣམས་སུ་ངེས་པའི་ཕྱིར། དེ་རྣམས་ལ་ཐུགས་ཀྱི་སེམས་དཔའ་ཞེས་བརྗོད་པ་ལ་ཆོས་ཅན། རྒྱུ་མཚན་ཡོད་དེ། རྟག་པའི་དུས་སུ་རྣམ་ཤེས་ཀྱི་ནང་དུ་འདུས་ ― MLP018_Page_0250 ―
[མ་དཔེ་གཟིགས་ན་འདིར་གནོན།]
པ་གང་ཞིག ལྷའི་དུས་སུ་ཐུགས་རྡོ་རྗེའི་རིགས་སུ་ངེས་པའི་ཕྱིར། འདི་ཉིད་ལས། ཀ་ནི་སྤྱན་གྱི་སོགས་ནང་སེམས་བཞི་པོའི་ཡུམ་ཆོས་ཅན། ཁྱོད་རྣམས་ལ་མཐོང་བར་བྱ་བ་ལ་སོགས་པར་སྨོས་པ་ནི་རིམ་པ་ལྟར་ཡུལ་གཟུགས་སྒྲ་དྲི་རོ་བཞི་ཡིན་པས་རྟོག་པའི་མཚན་ཏེ། ཁྱོད་རྣམས་ཀྱི་མཐོང་བྱ་གཟུགས་ལ་སོགས་པའི་ཡུལ་བཞི་པོ་དེ་ཡིན་པའི་ཕྱིར། དེ་དག་ཆོས་ཅན། ལྷའི་དུས་ན་སྐུའི་སེམས་མ་བཞིར་གྲགས་ཏེ། མཐོང་བར་བྱ་བ་ལཱ་སྱེ་མ། མཉན་པར་བྱ་བ་གཱིརྟི་མ། སྣོམ་པར་བྱ་བ་མཱ་ལེ་མ། མྱོང་བར་བྱ་བ་ནིརྟི་མ་རྣམས་སུ་ངེས་པའི་ཕྱིར། དེ་རྣམས་ལ་སྐུའི་སེམས་མ་ཞེས་བརྗོད་པ་ལ་ཆོས་ཅན། རྒྱུ་མཚན་ཡོད་དེ། ཡུལ་བཞིས་རྣམ་པར་ཤེས་པ་བཞིའི་རྟེན་བྱེད་པའི་ཕྱིར། འདི་ཉིད་ལས། ཙ་ནི་སྤྱན་གྱི་སྐུ་ཡི་མཆོག་སོགས། ཕྱི་སེམས་ཆོས་ཅན། ཁྱོད་རྣམས་ལ་མཐོང་བྱེད་ལ་སོགས་པར་སྨོས་པ་ནི་རིམ་པ་ལྟར་མིག་རྣ་བ་སྣ་ལྕེའི་དབང་པོ་བཞི་ཡིན་པས་རྟོག་པའི་མཚན་ཡིན་ཏེ། ཁྱོད་རྟོག་པའི་དུས་ཀྱི་རྣམ་ཤེས་བཞིས་ཡུལ་བཞི་མཐོང་བའི་བདག་རྐྱེན་དབང་པོ་བཞིས་བྱེད་པའི་ཕྱིར། དེ་དག་ཆོས་ཅན། ཁྱོད་རྣམས་ལྷའི་དུས་ན་གསུང་གི་སེམས་དཔའ་བཞིར་གྲགས་པ་ཡིན་ཏེ། ཁྱོད་རྣམས་རིམ་བཞིན་མཐོང་བྱེད་བྱམས་པ། ཐོས་བྱེད་སྒྲིབ་སེལ། སྣོམ་བྱེད་ཀུན་བཟང་། མྱོང་བྱེད་འཇམ་དཔལ་དབྱངས་རྣམས་སུ་ངེས་པའི་ཕྱིར། དེ་རྣམས་ལ་གསུང་གི་སེམས་དཔའ་ཞེས་བརྗོད་པ་ལ་ཆོས་ཅན། རྒྱུ་མཚན་ཡོད་དེ། དབང་པོས་ཡུལ་དང་ཤེས་པ་གཉིས་ཀྱི་ཕྱི་ནང་གི་བརྡའ་སྦྱོར་བྱེད་པའི་ཕྱིར། འདི་ཉིད་ལས། ས་ནི་སྤྱན་གྱི་གསུང་གི་མཆོག ། ཅེས་སོགས། ཕྱི་སེམས་བཞིའི་ཡུལ་ཆོས་ཅན། དེ་དག་ལ་འདས་པ་ལ་སོགས་པར་སྨོས་པ་ནི་རྟོག་པའི་མཚན་ཡིན་ཏེ། དུས་བཞིས་གོ་ཕྱེ་ནས་དབང་པོ་བཞི་བསྐྱེད་པའི་ཕྱིར། དེ་དག་ཆོས་ཅན། ལྷའི་དུས་ན་དུས་བཞིའི་ལྷ་མོར་གྲགས་པ་ཡིན་ཏེ། འདས་པའི་དུས་བདུག་པ་མ། ད་ལྟར་བ་མེ་ཏོག་མ། འབྱུང་བ་སྟེ་མ་འོངས་པ་མར་མེ་མ། མ་བྱོན་པ་སྟེ་འབྱུང་བར་མ་ངེས་པའི་དུས་དྲི་ཆབ་མ་རྣམས་སུ་ངེས་པའི་ཕྱིར། འདི་ཉིད་ལས། ཡ་ནི་སྐྱེ་བ་རྣམ་པར་དག་པ་སོགས། དུས་བཞི་པོ་དེ་ཆོས་ཅན། བཤད་དུ་ཡོད་དེ། རྒྱུ་འབྲས་གཉིས་ཀ་སྤྱད་ཟིན་པའི་དུས་ནི་འདས་ ― MLP018_Page_0251 ―
[མ་དཔེ་གཟིགས་ན་འདིར་གནོན།]
པ། རྒྱུ་སྤྱད་ཅིང་འབྲས་བུ་མ་སྤྱད་པ་ནི་ད་ལྟར་བ། རྒྱུ་འབྲས་ཚོགས་ལ་མ་སྤྱད་པ་ནི་མ་འོངས་པ། རྒྱུ་འབྲས་ཡོད་ལ་མ་ཚོགས་པ་ནི་འདས་མ་འོངས་གང་ལའང་མ་ངེས་པའི་དུས་ཡིན་པའི་ཕྱིར་ཏེ། དཔེར་ན་དབྱར་གྱི་དུས་ལྟ་བུ་ཞིག་གཞིར་བཞག་ནས་རྩི་ན། དཔྱིད་ནི་འདས་པ། དབྱར་ནི་ད་ལྟ་བ། སྟོན་ནི་མ་འོངས་པ། དགུན་ནི་མ་ངེས་པ་སྟེ། དབྱར་གྱི་དུས་འདི་ལས་སྔར་འདས་ཕྱིས་འབྱུང་གཉིས་ནི་འདས་མ་འོངས་པར་ངེས་ལ་དགུན་ནི་འདས་མ་འོངས་གང་རུང་གཅིག་ཏུ་ཁ་ཚོན་མ་ཆོད་པའི་ཕྱིར་ཏེ། དཔྱིད་ཀྱི་སྔ་ལོགས་ཀྱི་དགུན་ནི་འདས་པ་དང་། སྟོན་གྱི་ཕྱི་ལོགས་ཀྱི་དགུན་ནི་མ་འོངས་པ་ལྟར་སྣང་བའི་ཕྱིར། དེ་ལྟར་ཡང་། རྔམ་གློག་ལས། རྒྱུ་འབྲས་ངེས་པ་མ་ཚོགས་པས། །འབྱུང་བར་མ་ངེས་དུས་ཞེས་གྲགས། །ཞེས་སོ། །གཉིས་པ་འཇོམས་བྱེད་ཁྲོ་བོའི་འཁོར་བཤད་པ་དེ་ལ་མཚན་གཉིས་ལས། དང་པོ་སྤྱིའི་མཚན་ནི། འཇིགས་བྱེད་ཡབ་བཞི་པོ་ཆོས་ཅན། ཁྱོད་རྣམས་ལ་འཇོམས་པ་ཆེན་པོ་རྡོ་རྗེ་ཞེས་པའི་རྒྱུ་མཚན་ཡོད་དེ། ཕྱི་ལུས་ཀྱི་ཆོས་བཞི་དང་སྦྱར་ན། རྟོག་པའི་རང་བཞིན་མངོན་དུ་གྱུར་པའི་ཁྲོ་བོ་བཞིའི་སྐུ་གསུང་ཐུགས་ཀྱི་མཛད་པས་བདུད་དང་ལོག་འདྲེན་རྣམས་འཇོམས་པ་དང་། ནང་གསང་བའི་ཁམས་བཞི་དང་སྦྱར་ན། འོག་སྒོ་གསང་བའི་ཁམས་གསུམ་འདུས་པའི་བདེ་བས་རྟོག་པ་དང་ལྷའམ་བདེ་བར་འཛིན་པའི་ཞེན་པ་གཉིས་ཀ་འཇོམས་པ་ལ་ཐོགས་པ་མེད་པས་ན་རྡོ་རྗེ་ཞེས་བརྗོད་པ་གང་ཞིག དེས་འཇོམས་པའི་ཕྲིན་ལས་གཞན་ལས་ཁྱད་པར་དུ་གྱུར་པས་ན་ཆེན་པོ་ཞེས་བརྗོད་པའི་ཕྱིར། དེ་དག་གི་ཡུམ་བཞི་ཆོས་ཅན། ཁྱོད་རྣམས་ལ་བཙུན་མོ་ཞེས་བརྗོད་པའི་རྒྱུ་མཚན་ཡོད་དེ། དེ་ལྟ་བུའི་འཇོམས་བྱེད་ཀྱི་གཉེན་པོ་དེ་ཡང་རྟག་ཆད་བདག་མཚན་བཞི་མ་ཡིན་པའི་ཆོས་ཉིད་ཡུམ་གྱི་ངོ་བོ་དེས་བསྐྱེད་པའི་ཕྱིར། དཔེར་ན་དཀར་པོ་འཇོམས་པ་དེ་དཀར་པོ་མ་ཡིན་པ་གཞན་ཞིག་གིས་བསྐྱེད་པ་བཞིན་ཡིན་པའི་ཕྱིར། གཉིས་པ་བྱེ་བྲག་གི་མཚན་ནི། སྒོ་བ་བཞི་པོ་དེ་རྣམས་ཆོས་ཅན། ཁྱོད་རྣམས་ལ་རེག་པ་ལ་སོགས་པར་སྨོས་པ་ནི། གསང་བའི་མཚན་ཡིན་ཏེ། ཕྱི་ལྟར་ལུས་ཀྱི་འདུས་ཏེ་རེག་པའི་ཚོར་བ་བསྐྱེད་པ་ལ། རེག་བྱེད་ལུས་དབང་། རེག་བྱ་ཡུལ། དེ་གཉིས་ ― MLP018_Page_0252 ―
[མ་དཔེ་གཟིགས་ན་འདིར་གནོན།]
འདུས་པའི་རེག་ཤེས་རྣམས་སུ་ཡོད་པ་དེ་ཡིན་པའི་ཕྱིར་དང་། ནང་ལྟར་ན་གསང་བའི་ཡུལ་དབང་རྣམ་ཤེས་གསུམ་འདུས་ཀྱི་རེག་པ་བསྐྱེད་པ་ལ། རེག་བྱེད་གསང་དབང་ཐབས་ཀྱི་རྡོ་རྗེ། རེག་བྱ་གསང་ཡུལ་ཤེས་རབ་ཀྱི་པདྨ། གསང་བའི་རེག་ཤེས་དགའ་བ་ཉམས་སུ་མྱོང་བ་རྣམས་སུ་ཡོད་པ་དེ་ཡིན་པའི་ཕྱིར། དེ་དག་ཆོས་ཅན། ལྷའི་དུས་ན་མཐར་བྱེད་སྒོ་བ་བཞིར་རིམ་པ་ལྟར་ཡིན་ཏེ། ཕྱི་ནང་གི་རྟོག་པ་གཉིས་ཀ་གོ་རིམ་བཞིན་དུ། ཁྲོ་བོ་བདུད་རྩི་འཁྱིལ་བ་དང་། རྟ་མགྲིན་དང་། སྟོབས་པོ་ཆེ་དང་། གཤིན་རྗེ་གཤེད་པོ་རྣམས་སུ་དག་པ་དེ་ཡིན་པའི་ཕྱིར། དེ་དག་གི་ཡུམ་བཞི་པོ་དེ་ཆོས་ཅན། ཁྱོད་རྣམས་ལ་རྟག་པར་མ་ཡིན་པ་ཞེས་སོགས་སྨོས་པ་ནི་རྟོག་པའི་མཚན་ཡིན་ཏེ། རྟག་པར་མ་ཡིན་ཏེ་ཕུང་པོ་མི་རྟག་པར་འཛིན་པ་དང་། ཆད་པར་མ་ཡིན་པ་དེ་སྡུག་བསྔལ་གྱི་རང་བཞིན་ངར་འཛིན་པ་དང་། བདག་ཏུ་མ་ཡིན་པ་སྟེ་བདག་མེད་དུ་འཛིན་པ་དང་། མཚན་མར་མ་ཡིན་པ་དེ་སྟོང་པར་འཛིན་པ་རྣམས་སུ་ཡོད་པ་དེ་དག་ལྷའི་དུས་ན་གོ་རིམ་ཇི་ལྟ་བ་བཞིན་དུ་ཁྲོ་མོ་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ་དང་བཞིར་ངེས་པ་དེ་ཡིན་པའི་ཕྱིར། ཡང་རྟག་ཆད་བདག་མཚན་དུ་འཛིན་པའི་ཕྱིན་ཅི་ལོག་གི་རྟོག་པ་བཞི་ལྟར་ན། རྟག་པར་འཛིན་པ་ལ་སོགས་པའི་རྟོག་པ་བཞི་པོ་ཆོས་ཅན། ཁྱོད་རང་ག་མར་སྣང་བ་ལྟར་མ་ཡིན་ཏེ། ཁྱོད་རྣམས་ས་མ་སྤངས་པར་སྒོ་མ་བཞིའི་རང་བཞིན་དུ་དག་པ་དེ་ཡིན་པའི་ཕྱིར། ཞར་བྱུང་གོ་ཕྱེ་བའི་འཁོར་ཆོས་ཅན། ཁྱོད་བཤད་དུ་ཡོད་དེ། ཁྱོད་ཐུན་མོང་འགྲོ་བ་འདུལ་བའི་འཁོར། སྤྲུལ་སྐུ་ཐུབ་པ་དྲུག་དང་། རྗེས་འཇུག་ཆོས་ཀྱི་མིག་དང་ལྡན་པའི་གང་ཟག་སྐལ་བ་དང་ལྡན་པ་རྣམས་ལ་འཇོག་པ་དེ་ཡིན་པའི་ཕྱིར། དེ་ལྟར་ཡང་འདི་ཉིད་ལས། སྲས་ནི་ཐུགས་ལས་སྐྱེས་པ་ཡིན། །ས་རབ་རིག་པ་འཛིན་ལ་གནས། །ཞེས་གསུངས་པའི་ཕྱིར་རོ། །རྗེས་མཐུན་འཁོར་གྱི་གྲངས་ཚད་བཤད་པ་ཆོས་ཅན། ཁྱོད་ལ་དབྱེ་ན་གཉིས་སུ་ཡོད་དེ། ཁྱབ་པའི་ཚད་དང་། མང་བའི་ཚད་གཉིས་སུ་ཡོད་པའི་ཕྱིར། ཁྱབ་པའི་ཚད་དེ་ཆོས་ཅན། བཤད་དུ་ཡོད་དེ། ཀུན་ཏུ་ཁྱབ་ཅིང་མཐའ་ཡས་པར་ཁྱབ་པའི་ཕྱིར་ཏེ། དཔེར་ན་ཏིལ་གང་དེ་ཏིལ་འབྲས་ཀྱིས་གང་ཞིང་ ― MLP018_Page_0253 ―
[མ་དཔེ་གཟིགས་ན་འདིར་གནོན།]
ཁྱབ་པ་བཞིན་དུ་གནས་པ་དེ་ཡིན་པའི་ཕྱིར། མང་བའི་ཚད་དེ་ཆོས་ཅན། ཁྱོད་བཤད་དུ་ཡོད་དེ། ཁྱོད་སྔར་སྨོས་པ་དེ་ལྟ་བུའི་འཁོར་ཚོགས་ཀྱི་གྲངས་ཚད་འདི་ཙམ་ཞེས་བརྗོད་ཀྱིས་མི་ལང་བའི་ཕྱིར། འོ་ན་ཁྱབ་པ་དང་མང་བའི་བདག་ཉིད་ཅན་གྱི་འཁོར་དེ་དག་དང་གཉིས་སུ་མེད་པར་བཞུགས་ཚུལ་དེ་ཇི་ལྟ་བུ་ཞེ་ན། དེ་ཆོས་ཅན། རང་བཞིན་གཉིས་སུ་མེད་པར་བཞུགས་པ་ཡིན་ཏེ། དེ་བཞིན་གཤེགས་པ་དང་བྱང་ཆུབ་སེམས་དཔའ་མ་ལུས་པ་ཐམས་ཅད་དཔལ་ཀུན་ཏུ་བཟང་པོའི་རང་བཞིན་དུ་འདུས་པ་གང་ཞིག་འགྲོ་བའི་ཕུང་ཁམས་སྐྱེ་མཆེད་ཇི་སྙེད་པའང་ལྷའི་རང་བཞིན་དུ་གནས་པའི་ཕྱིར་ཏེ། འགྲེལ་ཆུང་ལས། སྲིད་གསུམ་འགྲོ་བ་ཐམས་ཅད་ཀྱི། །ཕུང་པོ་ཁམས་དང་སྐྱེ་མཆེད་དང་། །བརྗོད་མེད་བརྗོད་ཀྱིས་མི་ལང་བ། །དེ་སྙེད་འཁོར་ལོའ་དཀྱིལ་འཁོར་དུ། །མངོན་རྫོགས་རྒྱལ་པོར་དེ་ཉིད་ངེས། །གཉིས་མེད་ལྷུན་གྲུབ་དཀྱིལ་འཁོར་ན། །ཐམས་ཅད་བདག་ཉིད་རྟག་པར་བཞུགས། །ཞེས་གསུངས་པའི་ཕྱིར། ཞར་བྱུང་ལེའུའི་བསྡུ་བ་དེ། ཇི་ལྟ་བུ་ཞེ་ན། དེ་འཆད་པར་བྱེད་པ་ལ། དེ་ནས་དེ་བཞིན་གཤེགས་པ་བཙུན་མོའ་ཚོགས་དང་གཉིས་སུ་མེད་པའི་ནས། རྡོ་རྗེ་མཆོག་གི་གནས་ཉིད་དོ། །ཞེས་པ་འདིས་བསྟན་པ་ཡིན་ཏེ། དེ་ཡང་ཚིག་དོན་དུ་སྒྲིལ་ན། དེ་ནས་དེ་བཞིན་གཤེགས་པ་ཞེས་སོགས་གསུངས་པ་ལོ་རྒྱུས་སུ་བརྗོད་པའི་དོན་དེ་ཆོས་ཅན། ཁྱོད་བཤད་དུ་ཡོད་དེ། ཁྱོད་དེ་བཞིན་གཤེགས་པ་ཐམས་ཅད་འདུས་པའི་སྤྱི་གཟུགས་རིགས་ལྔ་དབྱེར་མི་ཕྱེད་པའི་སྟོན་པ་ཉིད་ཀྱི་ཐུགས་ལ་རྒྱུད་དོན་ཇི་ལྟར་ཤར་བའི་དོན་མངོན་སུམ་དུ་སྣང་བས་ན་ཕྱུང་ངོ་ཞེས་ཐ་སྙད་དུ་བཏགས་པའི་ཕྱིར། ཨེ་ཨེ་མ་ཨེ་མའོ་ཞེས་སོགས་ཀྱི་དོན་དེ་ཆོས་ཅན། ཁྱོད་ཀྱིས་གང་གསུངས་པའི་བསྟན་པ་དེ་ཉིད་བསྟན་པ་ཡིན་ཏེ། རྒྱུད་དབུ་ཞབས་ཀྱི་བརྗོད་བྱ་གཞི་ལམ་འབྲས་གསུམ་དུ་འདུ་བ་གང་ཞིག གཞུང་འདིས་རྒྱུད་གསུམ་མདོར་བསྟན་པ་ཡིན་པའི་ཕྱིར། ཇི་ལྟར་ན། དེ་བཞིན་ཉིད་ཀྱི་དབྱིངས་ཉིད་ཅེས་པ་དེ་ཆོས་ཅན། ཁྱོད་ཀྱི་གཞིའི་རྒྱུད་མདོར་བསྟན་པ་ཡིན་ཏེ། གནས་ལུགས་དེ་བཞིན་ཉིད་ཀྱི་དབྱིངས་དེ་ཉིད་འཁོར་འདས་ཀྱི་ཆོས་ཐམས་ཅད་ཀྱི་འབྱུང་གནས་སུ་གྱུར་པ་དེ་ཡིན་པའི་ཕྱིར། དབང་ ― MLP018_Page_0254 ―
[མ་དཔེ་གཟིགས་ན་འདིར་གནོན།]
བསྒྱུར་ཞེས་དང་། རང་སྣང་བར་ཉིད་ཏིང་འཛིན་གཟུགས་བརྙན་སྒྱུ་མ་རྣམ་དག་གསལ་བ་ནི། ཞེས་པ་དེ་ཆོས་ཅན། ཁྱོད་ཀྱིས་ལམ་གྱི་རྒྱུད་མདོར་བསྟན་པ་ཡིན་ཏེ། ལམ་ནི་ཤེས་འཇུག་གི་བྱེད་རྩོལ་དང་བཅས་པའི་གདུལ་བྱའི་སྣང་བ་གང་ཞིག གཞི་འཆིངས་གྲོལ་མེད་པའི་གནས་ལུགས་དེ་ཉིད་རྟོགས་པ་ལ་དབང་བསྒྱུར་བའི་ལྟ་བ་དང་། སེམས་ཉིད་ལྷའི་དཀྱིལ་འཁོར་དུ་རང་གསལ་བར་སྒོམ་པའི་ཏིང་འཛིན་གྱི་ཐབས་ཡན་ལག་དང་བཅས་པའི་དོན་འཕྲོ་གཞིའི་རྩ་བ་ཡིན་པའི་ཕྱིར། ཡེ་ཤེས་དཀྱིལ་འཁོར་ཐུགས་རྗེའི་ངང་། །ཞེས་དང་། སྐུ་གསུང་ཐུགས་དང་ཡོན་ཏན་ཕྲིན་ལས། ཞེས་པ་མན་ཆད་ཆོས་ཅན། ཁྱོད་ཀྱིས་འབྲས་བུའི་རྒྱུད་དོན་མདོར་བསྟན་པ་ཡིན་ཏེ། ཆོས་ཉིད་མངོན་གྱུར་སྐྱེད་དུ་བྱར་མེད་པར་སོན་པ་ནི་འབྲས་བུ་བདེ་གཤེགས་ཀྱི་སྣང་བ་གང་ཞིག དེ་ཤེས་འཇུག་གི་རྐྱེན་དེས་རྟོགས་བྱའི་ཡུལ་གྱི་གྲུབ་འབྲས་སུ་ངེས་པའི་ཕྱིར། དེ་ལ་ཁོ་ན་རེ། བསྡུ་བའི་ཚིགས་སུ་བཅད་པ་འདི་ཆོས་ཅན། ཁྱོད་ཀྱིས་བསྟན་པ་རྒྱུད་དོན་མདོར་བསྟན་དུ་བཤད་པ་མི་འཐད་པར་ཐལ། དེ་འཐད་ན་འོག་ཏུ་གླེང་བསླང་བ་དགོས་པ་མེད་པའི་ཕྱིར་ཟེར། འདི་ལ་མགོ་མཚུངས་དང་རྣལ་ལན་གཉིས་ལས། དང་པོ་ནི། ཀླད་དུ་བཀོད་པའི་གསང་བའི་སྙིང་པོ་ཞེས་སོགས་ཀྱི་མཚན་དེ་ཆོས་ཅན། ཁྱོད་ཀྱིས་རྒྱུད་དོན་ཡོངས་སུ་རྫོགས་པ་བསྟན་པ་མི་འཐད་པར་ཐལ། དེ་འཐད་ན། འོག་ཏུ་གླེང་བསླང་བ་ལ་དགོས་པ་མེད་པའི་ཕྱིར། གཉིས་པ་ནི། སྟོན་པའི་ཐུགས་ལ་རྒྱུད་དོན་ཇི་ལྟར་ཤར་བའི་དོན་གསང་བདག་གིས་བསྡུ་བ་བྱེད་པའི་ཚེ་གདུལ་བྱ་དབང་རབ་ཀྱི་ཚུལ་དུ་བསྟན་པ་རྒྱུད་དོན་མདོར་བསྟན་གྱི་ཚུལ་དུ་བསྡུས་པ་ཡིན་པས་སྐྱོན་མེད་ཅིང་འོག་ཏུ་གླེང་བསླང་བ་ལ་དགོས་པ་མེད་པར་ཡང་མི་འགྱུར་ཏེ། གདུལ་བྱ་དབང་འབྲིང་མན་ཆད་ལ་རྒྱུད་དོན་འོག་ཏུ་སྟོན་པས་ན་འདི་ཉིད་གླེང་གཞིའི་དོན་བསྡུས་སུ་བཞེད་པའི་ཕྱིར་རོ། །རྡོ་རྗེ་གསང་བའི་ཚིག་ཏུའོ། །ཞེས་པའི་དོན་དེ་ཆོས་ཅན། ཁྱོད་བཤད་དུ་ཡོད་དེ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་གསང་མཛོད་འཛིན་པ་པོ་རྒྱལ་སྲས་ལག་ན་རྡོ་རྗེ་དེ། རྒྱུད་འདི་ཉིད་ཀྱི་སྡུད་པ་པོར་སྟོན་པས་དེ་ལྟར་ལུང་བསྟན་པའི་ཕྱིར་ཏེ། རྒྱ་ ― MLP018_Page_0255 ―
[མ་དཔེ་གཟིགས་ན་འདིར་གནོན།]
མཚོ་ལས། འཁོར་གྱི་ནང་ན་སྐལ་ལྡན་མཆོག །འདུལ་བའི་དུས་བབ་གསང་བའི་བདག ། ལག་ན་རྡོ་རྗེས་བསྡུ་བ་མཛད། །ཅེས་གསུངས། དེ་ལྟར་རྒྱུད་འདིར་སྡུད་པ་པོ་སྨོས་པ་ཆོས་ཅན། དགོས་པ་ཡོད་དེ། སྡུད་པ་པོ་མེད་ན་སྟོན་པས་བསྟན་ཀྱང་གཏམ་ལྐུགས་པ་ལྟར་ཕྱིས་མི་འབྱུང་བའི་སྐྱོན་དང་། རྒྱུད་འདི་གནས་གང་དུ། སྟོན་པ་གང་གིས། འཁོར་གང་ལ་བསྟན་ཅིང་གཏད། དེ་ནས་སུ་ཞིག་གིས་སྤེལ། ཞེས་པའི་སྒྲོ་སྐུར་སྤང་པའི་ཆེད་ཡིན་པའི་ཕྱིར། འཕྲོས་དོན་དུ་ཞར་བྱུང་གདུལ་བྱ་དགོས་ཆེད་དུ་སྟོན་པ་ཁྲོ་བོའ་གླེང་ཞི་དང་། འགྲོ་འདུལ་སྤྲུལ་སྐུའི་གླེང་གཞི་ནི། གདུལ་བྱ་ལ་ལྟོས་པ་སྟེ། གོང་དུ་སྨོས་པའི་གླེང་གཞི་དེ་ཉིད་གདུལ་བྱའི་སྣང་བ་ལ་སོ་སོར་བྱུང་བ་སྟེ། གདུལ་བྱ་གདུག་པ་ཅན་ལ་ཁྲོ་བོའ་གླེང་གཞི་དང་། ཐུན་མོང་གི་གདུལ་བྱ་རྣམས་ལ་སྤྲུལ་སྐུའི་གླེང་གཞིར་སྣང་བ་སྟེ། འཇམ་དཔལ་སྒྱུ་དྲྭའི་བཤད་རྒྱུད་ལས་ཀྱང་། གླེང་གཞི་རྣམ་པ་གསུམ་ཡིན་ཏེ། །འོག་མིན་གནས་དང་རི་རབ་རྩེ། །འཛམ་བུའི་གླིང་འདིར་གྲགས་པ་ཡིན། །བྱང་ཆུབ་སེམས་དང་ལྷ་རྣམས་དང་། །མི་རྣམས་ཀྱི་ནི་དོན་དུ་གསུངས། །སྟོན་པ་ཡང་ནི་རྣམ་གསུམ་སྟེ། །སངས་རྒྱས་རྡོ་རྗེ་འཆང་ཆེན་དང་། །སྤྲུལ་སྐུ་འཁོར་ལོ་སྒྱུར་བ་དང་། །ཤཱཀྱ་ཐུབ་པ་ཉིད་ཀྱིས་གསུངས། །ཞེས་བཤད་པ་ལྟར་ཡིན་པའི་ཕྱིར། ད་ནི་དེ་དག་ལ་རྩོད་སྤོང་གི་རིགས་པ་འཆད་དེ། དེ་ལ་རྩོད་པ་འགོད་པ་ནི། ཁ་ཅིག ལེའུ་དང་པོའི་འཁོར་འདི་རྣམས་རང་སྣང་ཡིན་པར་མི་འཐད་དེ། བཟང་ངན་དུ་སྣང་བའི་ཕྱིར་དང་། རང་སྣང་ཡིན་ན། གདུལ་བྱ་རང་རྒྱུད་པ་མེད་པར་ཐལ། འདུལ་བྱེད་སྤྲུལ་པ་ཚོགས་པ་དོན་མེད་པའི་ཕྱིར་ཟེར་བ་མི་འཐད་དེ། འདིར་ཚོགས་པའི་འཁོར་ལ་ཆ་གཉིས་སུ་ཡོད་པར་ལུང་རིགས་གཉིས་ཀྱིས་གྲུབ་པའི་ཕྱིར་ཏེ། གནས་ལུགས་ཀྱི་དབང་དུ་བྱས་ན། འགྲེལ་ཆུང་ལས། སྲིད་གསུམ་འགྲོ་བ་ཐམས་ཅད་ཀྱི། །ཕུང་པོ་ཁམས་དང་སྐྱེ་མཆེད་དང་། །བརྗོད་མེད་བརྗོད་ཀྱིས་མི་ལང་བ། །དེ་སྙེད་འཁོར་ལོའ་དཀྱིལ་འཁོར་དུ། །མངོན་རྫོགས་རྒྱལ་པོ་དེ་ཉིད་ངེས། །གཉིས་མེད་ལྷུན་གྲུབ་དཀྱིལ་འཁོར་ན། །ཐམས་ཅད་བདག་ཉིད་རྟག་པར་བཞུགས། །ཞེས་སོ། །རིགས་པས་གནོད་དེ་སྲིད་གསུམ་གྱིས་བསྡུས་པའི་འགྲོ་བ་ཡོད་ ― MLP018_Page_0256 ―
[མ་དཔེ་གཟིགས་ན་འདིར་གནོན།]
དོ་ཅོག་ཆོས་ཅན། ཁྱོད་དཔལ་ཀུན་ཏུ་བཟང་པོའི་རང་བཞིན་དུ་ཡོད་པ་མ་ཡིན་པར་ཐལ། ཁྱོད་ལེའུ་དང་པོའི་གཙོ་འཁོར་གྱི་ནང་དུ་མ་འདུས་པའི་ཕྱིར། ཡང་སྣང་ལུགས་ཀྱི་དབང་དུ་བྱས་ན་ཡང་ལུང་རིགས་གཉིས་ཀྱིས་གྲུབ་སྟེ། སྒྱུ་འཕྲུལ་རྒྱ་མཚོ་ལས། དང་པོའི་སངས་རྒྱས་པ་རྒྱལ་བ། །སེམས་པ་ཆེ་དང་འཇོམས་པ་ཆེ། །བརྗོད་ཀྱིས་མི་ལང་ཚད་མེད་དང་། །རྣམ་གཉིས་ཚུལ་དུ་བཞུགས་པའོ། །ཞེས་སོ། །རིགས་པ་ནི། རྟོག་ཚོགས་སྦྱར་བའི་གཙོ་འཁོར་གྱི་རྣམ་པ་ཅན་གྱི་རྒྱལ་བ་བཞི་བཅུ་རྩ་གཉིས་པོ་དེ་ཆོས་ཅན། ཁྱོད་གང་ཟག་གཅིག་གི་རྟོག་པ་རྒྱལ་བ་བཞི་བཅུ་རྩ་གཉིས་སུ་དག་པ་དེ་མ་ཡིན་པར་ཐལ། ཁྱོད་རྣམས་རྒྱུད་ཐ་དད་པའི་བཟང་ངན་ཅན་ཡིན་པའི་ཕྱིར། རྟགས་ཁས། འདོད་ན། དེ་ཆོས་ཅན། དེར་ཐལ། ཁྱོད་རྒྱུད་འདིའི་མཐར་ཐུག་གི་འབྲས་བུ་རྒྱལ་བ་བཞི་བཅུ་རྩ་གཉིས་སུ་གནས་པ་དེ་ཡིན་པའི་ཕྱིར་ཏེ། རྒྱས་པ་ལས། དོན་བསྡུས་གསུང་རབ་བཞི་བཅུ་གཉིས། །དེ་ལས་ལྷག་པའི་དོན་སྨྲ་བ། །དེ་ནི་རྣམ་དག་ལམ་མིན་ཏེ། །རང་བློས་བསམ་པ་འཁྲུལ་པ་ཡིན། །ཞེས་སོ། །འདུལ་བྱེད་ཚོགས་པའང་དོན་མེད་དུ་མི་འགྱུར་ཏེ། རང་སྣང་དུ་གཙོ་འཁོར་གྱི་རྣམ་པར་བསྟན་ནས་རྒྱུད་མི་གསུང་བའི་གསུང་བ་ཆེན་པོ་དེ་གཞན་སྣང་དུ་དེ་དང་ཆ་འདྲ་བའི་གཙོ་འཁོར་གྱི་བཀོད་པ་རང་ཤར་དུ་བྱུང་ནས་དོན་མཛད་པའི་སྣང་བ་འབྱུང་བའི་ཕྱིར། ཡང་ཁ་ཅིག་ན་རེ། སྐབས་འདིར་རྒྱུད་གསུངས་པ་པོའི་སྟོན་པ་ཕུན་སུམ་ཚོགས་པ་དེ་ཡིན་ན། རིགས་དྲུག་པ་ཀུན་ཏུ་བཟང་པོ་ཡིན་པས་ཁྱབ་སྟེ། དེས་མ་གསུངས་པའི་མདོ་རྒྱུད་མེད་པའི་ཕྱིར་ཟེར་ན། འཆད་པའི་སྐྱེས་བུ་རྡོ་རྗེ་མི་བསྐྱོད་པ་ཆོས་ཅན། དེར་ཐལ། དེ་ཡིན་པའི་ཕྱིར། འདོད་ན། དེ་ཆོས་ཅན། དེ་མ་ཡིན་པར་ཐལ། རིགས་ལྔའི་ནང་ཚན་གྱི་ཐུགས་རྡོ་རྗེའི་རིགས་མི་བསྐྱོད་པ་དེ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། ཐུགས་ཀྱི་སྒྱུ་འཕྲུལ་འཆད་པའི་སྐྱེས་བུ་དེ་ཡིན་པའི་ཕྱིར་ཏེ། རྒྱུད་ལས། ཀུན་འབྱུང་སྒྱུ་འཕྲུལ་སྟོན་པའི་ཚེ། །མི་བསྐྱོད་སྐྱེས་བུ་མདུན་ན་གནས། །ཞེས་སོ། །ཡང་ཁ་ཅིག་ན་རེ། སྟོན་པ་ཕུན་སུམ་ཚོགས་པ་ཡིན་ན། དྲུག་པ་ཀུན་བཟང་དང་། རིགས་ལྔ་གང་རུང་ཡིན་པས་ཁྱབ་ཟེར་ནའང་། ཀུན་ཏུ་བཟང་མོ་དང་། ― MLP018_Page_0257 ―
[མ་དཔེ་གཟིགས་ན་འདིར་གནོན།]
ཐུབ་དྲུག་སོགས་ཀྱིས་སྒྲུབ་བྱེད་སྔར་ལས་དཔགས་ཏེ་ཤེས་པར་བྱའོ། །ཡང་དོགས་སེལ་དུ། མིའི་ཐུབ་པ་ཆོས་ཅན། ཁྱོད་སྟོན་པ་མ་ཡིན་པ་ཐལ། ཁྱོད་འཁོར་ཡིན་པའི་ཕྱིར་ཏེ། གོ་ཕྱེ་བའི་འཁོར་ཡིན་པ་གང་ཞིག་རིག་པའི་སྐྱེས་བུ་ཡིན་པའི་ཕྱིར། ཁ་ཅིག་ན་རེ། རིགས་ལྔ་ནང་ཕན་ཚུན་འགལ་བ་མ་ཡིན་ཏེ། གཞི་གཅིག་གི་སྟེང་དུ་གནས་པའི་ལྷ་ཡིན་པའི་ཕྱིར་ཟེར་ན། འོ་ན་མི་བསྐྱོད་པ་ཆོས་ཅན། རིགས་བཞི་ཀ་ཡིན་པར་ཐལ། གཞི་གཅིག་གི་སྟེང་དུ་གནས་པའི་ལྷ་ཡིན་པའི་ཕྱིར་ཏེ། རྣམ་སྣང་གི་རང་བཞིན་དུ་འདུས་ཤིང་དག་པའི་ལྷ་ཡིན་པའི་ཕྱིར་ཏེ། རྟོག་པའི་དུས་སུ་ཕུང་པོ་གཞན་བཞི་པོ་གཟུགས་ཕུང་ལ་ལྡན་པའི་ཆོས་གང་ཞིག ལྷའི་དུས་སུའང་རྟོག་པ་དེ་རྣམས་རྣམ་སྣང་གི་གནས་དེ་དང་དེ་རྣམས་སུ་དག་པའི་ལྷ་ཡིན་པའི་ཕྱིར། འདི་དག་གི་རྣལ་ལན་ནི། ངོ་བོའ་སྒོ་ནས་ལྷ་གཅིག་གི་བདག་ཉིད་དུ་ཁས་ལེན་ཏེ། ཏིལ་འབྲུ་དང་སྣུམ་གཉིས་རྫས་གཅིག་གི་ངོ་བོར་ཡོད་བཞིན་ཡིན་པའི་ཕྱིར། རྣམ་པ་སོ་སོ་བར་ཁས་ལེན་ཏེ། སྣུམ་ཁུ་བ་དང་། ཏིལ་གོང་བུའི་རྣམ་པ་གཉིས་འགལ་བ་ལྟར་གྲུབ་པའི་ཕྱིར་དེ་ལྟར་ན་ཐ་དད་མ་ཡིན་པའི་ཐ་དད་དུ་ཁས་ལེན་དགོས་ཏེ། རྒྱུད་འདི་ཉིད་ལས། ཐ་དད་མིན་ལས་ཐ་དད་པའི། །ནང་དང་ནང་གི་ཕྱི་རོལ་གྱི། །དཀྱིལ་འཁོར་བསམ་ཡས་ལྷུན་གྱིས་གྲུབ། །འཇིགས་མེད་ཀུན་བཟང་ཕྱག་རྒྱའི་མཆོག །ཅེས་སོ། །དེས་མཚོན་ཏེ་ཐམས་ཅད་ལ་རིགས་འགྲེ་ཤེས་དགོས་སོ། །ཡང་གནས་ཀྱི་སྐབས་སུ་འཇིག་རྟེན་གྱི་ཁམས་དང་། འོག་མིན་ཆེན་པོ་གཉིས་གཅིག་དང་ཐ་དད་ག ང་ཡིན་ཟེར་ན། ངོ་བོའ་སྒོ་ནས་གཅིག་ཏུ་འདོད་དེ་གོང་དུ་སྨོས་པའི་སྣུམ་དང་ཏིལ་གྱི་དཔེ་བཞིན་དུ་ཁས་བླངས་པ་ལ་གནོད་བྱེད་མེད་ཅིང་སྒྲུབ་བྱེད་ཡོད་པའི་ཕྱིར། གནོད་བྱེད་མེད་དེ། རྒྱས་པ་ལས། ཡང་དག་ཤེས་པའི་རང་རིག་བློ་མེད་ན། །སོགས་ནས། ངན་སོང་གནས་ཀྱང་འོག་མིན་དགའ་ལྡན་གནས། །ཞེས་སོ། །སྒྲུབ་བྱེད་ཡོད་དེ། མ་དག་པའི་འཇིག་རྟེན་འདི་ཆོས་ཅན། ཁྱེད་དག་པའི་ངོ་ན་འོག་མིན་གནས་སུ་ཡོད་དེ། ཁྱོད་སྤངས་པའི་ཕ་རོལ་ན་འོག་མིན་ཆེན་པོའི་གནས་བཙལ་དུ་མེད་པའི་ཕྱིར་ཏེ། འདི་ལྟར་དྲི་མ་མེད་པར་གྲགས་པའི་ཐུན་མོང་གི་མདོའ་ལུང་གིས་ཀྱང་ ― MLP018_Page_0258 ―
[མ་དཔེ་གཟིགས་ན་འདིར་གནོན།]
གྲུབ་པའི་ཕྱིར། རྣལ་ལན། འདི་ལྟར་རང་ག་མར་སྣང་བ་འདི་ཡང་མིན་ལ། འདི་ལས་གཞན་དུ་བརྗོད་དུའང་མེད་དོ། །ཞེས་བཞེད་དོ། །ཡང་ཁྲོ་བོའ་གླེང་གཞིའི་སྐབས་སུ་ཁ་ཅིག་ན་རེ། རུ་ཏྲ་དེ་སྤྲུལ་པ་བ་ཡིན་ནམ། ཐ་མལ་བ་ཡིན། དང་པོ་ལྟར་ན། ངན་སོང་གི་སྡུག་བསྔལ་མྱོང་བར་བཤད་པས་རིགས་པ་མ་ཡིན་ནོ་ཟེར། གཉིས་པ་ལྟར་ན། ཡི་དྭགས་སྲིན་པོ་ཆེན་པོ་ཟེར་བས་འདོད་ཁམས་པ་ཡིན་པའི་ཕྱིར། དེས་གཟུགས་ཁམས་དབང་དུ་བསྡུས་པ་མི་འཐད་དེ། དེར་བགྲོད་པ་ལ་བསམ་གཏན་གྱི་ཏིང་ངེ་འཛིན་ཐོབ་དགོས་པའི་ཕྱིར་དང་། དཔལ་ཆེན་པོ་སྤྱོད་ཡུལ་གཅིག་ཏུ་མ་སྤྱད་པའི་ཕྱིར། ཞལ་མཐོང་བའི་དངོས་ཀྱི་གདུལ་བྱར་གྱུར་པའང་མི་འཐད་དོ་ཟེར། དེ་དག་དགག་པ་ལ། སེམས་ཅན་གྱི་དོན་དུ་དེ་བཞིན་གཤེགས་པའི་སྤྲུལ་པ་ཐ་མལ་པའི་གཟུགས་སུ་སྣང་བ་རྣམས་ཆོས་ཅན། ཁྱོད་ཐ་མལ་པར་ཐལ། དམ་བཅའ་དེ་འཐད་པའི་ཕྱིར། འདོད་པའི་རྟེན་ཅན་གྱི་འཕགས་པ་ཆོས་ཅན། ཁྱོད་ཀྱིས་གཟུགས་ཁམས་དབང་དུ་བསྡུ་མི་ནུས་པར་ཐལ། ཁྱོད་འདོད་པའི་རྟེན་ཅན་ཡིན་པའི་ཕྱིར། འདོད་ན། དཔའ་བོས། སྐྱེ་བོ་མ་རིག་གིས་ལྡོངས་པ། །སྲིད་རྩེའི་བར་དུ་སོང་ནས་ཀྱང་། །ཞེས་པའི་ལུང་གིས་གནོད་པའི་ཕྱིར་རོ། །ཤཱཀྱ་ཐུབ་པ་མཐོང་བའི་སེམས་ཅན་རྣམས་ཆོས་ཅན། ཁྱོད་ཀྱིས་ཐུབ་པ་དང་སྤྱོད་ཡུལ་གཅིག་ཏུ་སྤྱད་པར་ཐལ། དེའི་ཕྱིར། རྟགས་ཁས། དེས་རྒྱུད་འབྱུང་བའི་གླེང་གཞི་བཤད་པ་སོང་ནས། གཉིས་པ་རྐྱེན་གླེང་བསླང་བ་ལ། དགོས་ཆེད། ངོ་བོ། སྒྲ་དོན། རྣམ་གྲངས་དང་བཞི་ལས། དང་པོ་གླེང་བསླང་གི་དགོས་པ་ཆོས་ཅན། བཤད་དུ་ཡོད་དེ། རྒྱུད་དོན་གདུལ་བྱའི་བློ་དང་འཚམས་པར་མྱུར་དུ་འབྱུང་བ་དེ་ཁྱོད་ཀྱི་དགོས་པ་ཡིན་པའི་ཕྱིར། གཉིས་པ་གླེང་བསླང་གི་ངོ་བོ་ཆོས་ཅན། བཤད་དུ་ཡོད་དེ། སྟོན་འཁོར་དྲི་ལན་གཅིག་གི་རྐྱེན་དུ་གཅིག་གྱུར་པས་བསྟན་པ་འབྱུང་མ་རག་པ་དེ་ཡིན་པའི་ཕྱིར། གསུམ་པ་གླེང་བསླང་གི་སྒྲ་དོན་དེ་ཆོས་ཅན། བཤད་དུ་ཡོད་དེ། གླེང་བར་བྱ་བ་བསྟན་པ་ཡིན་ལ། དེ་གླེང་བར་བསྐུལ་བ་ནི་བསྟན་པ་འབྱུང་བའི་རྐྱེན་དུ་གྱུར་པས་ན། བསླང་ཞེས་ ― MLP018_Page_0259 ―
[མ་དཔེ་གཟིགས་ན་འདིར་གནོན།]
བརྗོད་པ་དེ་ཡིན་པའི་ཕྱིར། བཞི་པ་གླེང་བསླང་གི་རྣམ་གྲངས་ཆོས་ཅན། ཁྱོད་ལ་དབྱེ་ན་གཉིས་སུ་ཡོད་དེ། ཐུན་མིན་ལྷན་ཅིག་པའི་འཁོར་གྱི་ཆེད་དུ་སྟོན་པས་མདུན་བསུས་ཏེ་གླེང་བསླང་བ་དང་། ཐུན་མོང་པ་གོ་ཕྱེ་བའི་འཁོར་གྱི་ཆེད་དུ་འཁོར་གྱིས་གུས་པས་དྲིས་ཏེ་གླེང་བ་གཉིས་སུ་ཡོད་པའི་ཕྱིར། དེའི་དང་པོ་ཐུན་མིན་ལྷན་ཅིག་པའི་འཁོར་གྱི་ཆེད་དུ་སྟོན་པས་མདུན་བསུས་ཏེ་གླེང་བསླང་བའི་གོ་དོན་ནི། སྟོན་པ་ཡབ་ཡུམ་གྱིས་ལྷན་ཅིག་པའི་འཁོར་ལ་ཟབ་དབང་གསུམ་བསྐུར་བས་ཞེན་པ་དག་ནས་རང་བཞིན་གསང་བའི་སྙིང་པོའི་དོན་རྟོགས་པ་དེ་ཆོས་ཅན། ཁྱོད་ཐུན་མོང་མ་ཡིན་པའི་གླེང་བསླང་བ་ཡིན་ཏེ། དོན་དམ་ངེས་པའི་ཚིག་གིས་རང་བཞིན་གསང་བའི་སྙིང་པོའི་དོན་དངོས་སུ་སྟོན་པ་ཡིན་པའི་ཕྱིར། དེ་ལྟར་ཡང་ཁོག་གཞུང་ལས། ཐུན་མོང་མ་ཡིན་སྟོན་པ་ཉིད། །ཡབ་ཡུམ་ཆགས་བསྐུལ་རོལ་པ་དང་། །དགྱེས་བསྟར་འཁོར་ལ་དབང་བསྐུར་བས། །རྒྱུད་དོན་འབྱུང་ཕྱིར་བསླང་ཞེས་བྱ། །ཞེས་སོ། །དེ་གཏན་ལ་དབབ་པ་ལ་གཉིས་ཏེ། དབང་བསྐུར་བ་དང་། དབང་གཉིས་ཀྱི་ལས་ཐུན་མོང་དུ་བསྟན་པའོ། །དང་པོ་གསང་དབང་བསྐུར་བ་ལའང་། ཡབ་ཀྱིས་ཐབས་ཀྱི་ཆ་བཟུང་ནས་སྐུ་དང་ཡེ་ཤེས་ཀྱི་དོན་གླེང་བསླང་བ་དང་། ཡུམ་གྱིས་ཤེས་རབ་ཀྱི་ཆ་བཟུང་ནས་དབྱིངས་ཀྱི་དོན་གླེང་བསླང་བ་གཉིས། དེའི་དང་པོ་ཡབ་ཀྱི་གླེང་བསླང་བ་དེ་ཉིད་འཆད་པར་བྱེད་པ་ལ། དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་ཡིད་ཀུན་ཏུ་བཟང་པོ་ཐམས་ཅད་མ་ལུས་པའི་ནས། ཞེས་བརྗོད་པས་དེ་བཞིན་གཤེགས་པ་ཐམས་ཅད་མཉེས་པར་གྱུར་ཏོ། །ཞེས་པའི་གཞུང་འདིས་བསྟན་པ་ཡིན་ལ། དེའི་དོན་ནི། རྒྱུད་ཀྱི་སྟོན་པ་རིགས་དྲུག་པ་ཡབ་ཡུམ་གཉིས་ཆོས་ཅན། ཁྱོད་ལ་བྱེད་པ་པོ་རྡོ་རྗེ་ཡིད་དང་། བྱ་བ་མོ་ཆོས་ཞེས་སྨོས་པ་ལ་རྒྱུ་མཚན་ཡོད་དེ། མ་རྟོགས་པའི་དུས་ན་ཡིད་ཀྱི་རྟོག་པ་ནི་འཁོར་བའི་བྱེད་པ་པོ་དང་། རྟོགས་པའི་དུས་ན་འདས་པའི་བྱེད་པ་པོ་རང་རིག་པའི་ཡེ་ཤེས་གཉིས་རང་བཞིན་དབྱེར་མི་ཕྱེད་པས་ན་རྡོ་རྗེ་ཡིད་ཀུན་ཏུ་བཟང་པོ་ཞེས་བརྗོད་པ་གང་ཞིག བྱ་བ་མོ་ནི་དབང་པོ་ལྔའི་ཡུལ་དུ་མ་གྱུར་པའི་འདུས་བྱས་ ― MLP018_Page_0260 ―
[མ་དཔེ་གཟིགས་ན་འདིར་གནོན།]
དང་འདུས་མ་བྱས་ཀྱི་ཆོས་ཀྱི་ཁམས་ཡིན་ལ། དེས་ཡིད་སྐྱེད་པར་བྱེད་ཅིང་ཡིད་ཀྱི་ཡུལ་དུ་གྱུར་པས་ན་བཙུན་མོ་བྱ་བ་མོ་ཆོས་ཀུན་ཏུ་བཟང་མོ་ཞེས་བརྗོད་པའི་ཕྱིར། དེ་ལྟ་བུའི་སྟོན་པ་ཡབ་ཡུམ་གཉིས་སྙོམས་པར་ཞུགས་པ་ལ་ཆོས་ཅན། དགོས་པ་ཡོད་དེ། དེ་ལྟར་ཞུགས་པ་ལས་བྱུང་བའི་ཉི་ཟླ་བྱང་ཆུབ་ཀྱི་སེམས་ཀྱིས་རྒྱུ་བྱས་ཤིང་། ཡབ་ཡུམ་གྱིས་ཉམས་སུ་བསྟར་བའི་དོན་ཆེད་དུ་བརྗོད་པས་རྐྱེན་བྱས་ཏེ། དེའི་འབྲས་བུ་རྟོགས་པ་བརྗོད་པས་ལྷན་ཅིག་པའི་འཁོར་རྣམས་ཀྱིས་བདེན་པ་མཐོང་བའི་ཕྱིར། ཨེ་མའོ་རྡོ་རྗེ་ཕུང་པོའི་ཡན་ལག་ནི། །ཞེས་སོགས་ཀྱི་དོན་དེ་ཆོས་ཅན། བཤད་དུ་ཡོད་དེ། ཡབ་ཀྱིས་ཐབས་ཀྱི་ཆ་བཟུང་ནས་འཁོར་འདས་ཀྱི་ཆོས་ཐམས་ཅད་ཕྱག་རྒྱའི་དཀྱིལ་འཁོར་གཅིག་གི་རང་བཞིན་དུ་སངས་རྒྱས་པ་ལ་ངོ་མཚར་བའི་ཚུལ་གྱིས་དེ་ལྟར་གླེང་བར་མཛད་པས། འཁོར་རྣམས་ཀྱིས་ལྷག་པ་ཀུན་རྫོབ་ཀྱི་བདེན་པ་མཐོང་ནས་ཕུང་ཁམས་སྐྱེ་མཆེད་ཞིང་ལ་སོགས་པའི་ཆོས་ཐམས་ཅད་ལྷ་དང་ལྷ་མོའ་དཀྱིལ་འཁོར་དུ་རྟོགས་པས་སངས་རྒྱས་ཉིད་ལས་གཞན་པའི་ཆོས་རྡུལ་ཙམ་ཡང་མ་གྲུབ་པར་རྟོགས་པ་ཡིན་པའི་ཕྱིར། དེ་ལྟར་བརྗོད་པ་ལ་ཆོས་ཅན། དགོས་པ་ཡོད་དེ། དེ་བཞིན་གཤེགས་པ་ཐམས་ཅད་མཉེས་པར་གྱུར་པ་ཡིན་པའི་ཕྱིར། གཉིས་པ་ཡུམ་གྱིས་གླེང་བསླང་བ་འཆད་པར་བྱེད་པ་ནི། དེ་ནས་བཙུན་མོ་བྱ་བ་མོ་ཆོས་ཀུན་ཏུ་བཟང་མོས་ནས། ཞེས་བརྗོད་པས་ཐམས་ཅད་ཡེ་ནས་སངས་རྒྱས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏེ། ཞེས་པའི་གཞུང་འདིས་བསྟན་པ་ཡིན་ལ། དེའི་དོན་ནི། རྒྱུ་སྔར་བཞིན་ལས། རྐྱེན་ཀྱེ་མའོ་ཕྱོགས་བཅུ་སྟོང་ཁམས་ཡེ་ནས་དབེན། །ཞེས་སོགས་ཀྱི་དོན་ཆོས་ཅན། བཤད་དུ་ཡོད་དེ། ཡུམ་གྱིས་ཤེས་རབ་ཀྱི་ཆ་བཟུང་ནས་རང་གི་ཉམས་སུ་བསྟར་བའི་དོན་དབྱིངས་ཀྱི་དོན་ལ་ངོ་མཚར་བའི་ཚུལ་གྱིས་དེ་ལྟར་གླེང་བར་མཛད་པས། འཁོར་རྣམས་ཀྱིས་ལྷག་པ་དོན་དམ་པའི་བདེན་པ་མཐོང་ནས། ཕྱོགས་བཅུ་སྟོང་ཁམས་དང་། སྲིད་པ་གསུམ་དང་། སྙིགས་མ་ལྔ་དང་། ཕུང་པོ་ལྔ་སྟེ་ཐ་སྙད་བཞིས་བསྡུས་ཀྱི་ཆོས་ཐམས་ཅད་ཡེ་ནས་ཆོས་ཀྱི་སྐུར་མངོན་པར་སངས་རྒྱས་པས་འབྲས་བུ་གཞན་ནས་བཙལ་དུ་མེད་པར་ ― MLP018_Page_0261 ―
[མ་དཔེ་གཟིགས་ན་འདིར་གནོན།]
རྟོགས་པའི་ཕྱིར། དེ་ལྟར་བརྗོད་པ་ལ་ཆོས་ཅན། དགོས་པ་ཡོད་དེ། རྟོག་ཚོགས་ཐམས་ཅད་ཡེ་ནས་སངས་རྒྱས་པར་དེ་བཞིན་གཤེགས་པ་སྟོན་པ་ཉིད་ཀྱིས་མཁྱེན་པའི་ཕྱིར་ཏེ། འཁོར་རྣམས་ཀྱིས་དབང་ཐོབ་པ་ལ་བརྟེན་ནས་དོན་དམ་པའི་བདེན་པ་རྟོག་མེད་ཀྱི་ཡེ་ཤེས་སྐྱེས་ཀྱང་སྟོན་པའི་དགོངས་པ་དབྱེར་མེད་ཀྱི་ཡེ་ཤེས་ཆེན་པོ་ད་དུང་ཉམས་སུ་མ་མྱོང་བའི་ཕྱིར་གསང་བའི་དབང་ཞེས་བརྗོད་པ་ཡང་ཡིན་པའི་ཕྱིར་རོ། །གཉིས་པ་ནི། དེ་ལྟར་གསང་དབང་བསྐུར་ནས། ཤེས་རབ་ཡེ་ཤེས་དང་། དབྱེར་མེད་བདེ་ཆེན་གྱི་དབང་གཉིས་ཀྱི་ལས་ཐུན་མོང་དུ་སྟོན་པར་བཞེད་ནས། དེ་ནས་གཉིས་སུ་མེད་པའི་བདག་ཉིད་ཆེན་པོས་ཞེས་སོགས་གསུངས་པ་ཡིན་ལ། དེ་ལྟར་གསུངས་པའི་དོན་དེ་ཆོས་ཅན། བཤད་དུ་ཡོད་དེ། དོན་དགོངས་པ་དང་། རྟགས་ཡབ་ཡུམ་གྱི་ཉི་ཟླ་གཉིས་སུ་མེད་པའི་ངང་ནས། བདག་དང་མཐའ་ཡས་སེམས་ཅན་རྣམས། །ཞེས་སོགས་ཀྱི་རྟོགས་པ་བརྗོད་པའི་རྐྱེན་ལས་འཁོར་གྱིས་སེམས་ལྔ་བསྐྱེད་པ་དེ་ཡིན་པའི་ཕྱིར། སེམས་ལྔའི་དངོས་གཞིའི་རྟོག་པ་བརྗོད་པ་ནི། ཨེ་མའོ་ངོ་མཚར་རྨད་ཀྱི་ཆོས། །སྐྱེ་བ་མེད་ལས ཞེས་སོགས་གསུངས་པ་ཡིན་ལ། དེ་ལྟར་གསུངས་པའི་དོན་དེ་ཆོས་ཅན། བཤད་དུ་ཡོད་དེ། ཡས་འབབ་དགའ་བཞིའི་འགྲོས་ལ། གཡོ་ལྡང་། འཇིག་འཇུག གནས་པ། སྨོན་པ། མཐར་ཕྱིན་པའི་སེམས་ལྔའི་མཐར་དངོས་པོ་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་ནས་ཤེས་རབ་ཡེ་ཤེས་ཀྱི་དབང་ཐོབ་ཅིང་། མས་བརྟན་དགའ་བཞིའི་འགྲོས་ཀྱིས་སེམས་ལྔའི་མཐར་རང་བཞིན་ལྷན་སྐྱེས་ཀྱི་ཡེ་ཤེས་ཉམས་སུ་མྱོང་ནས་སྟོན་འཁོར་དགོངས་པ་དབྱེར་མེད་དུ་གྱུར་པ་དེ་ཡིན་པའི་ཕྱིར། ཐུན་མོང་གི་གླེང་བསླང་ནི། ཨེ་མའོ་ཡེ་ནས་གསང་བའི་ཆོས། །ཞེས་སོགས། དེ་ལྟར་གསུངས་པའི་དོན་དེ་ཆོས་ཅན། བཤད་དུ་ཡོད་དེ། ལྷན་ཅིག་པ་རྣམས་རང་དོན་དུ་རྒྱུད་ཞུ་མ་དགོས་ཀྱང་གཞན་དོན་གོ་ཕྱེ་བའི་འཁོར་གསང་བ་བཞིས་ཆོད་པ་རྣམས་ཐུགས་རྗེས་བཟུང་བར་རིགས་ཞེས་བརྗོད་པ་དེ་ཡིན་པའི་ཕྱིར། དེ་ལྟར་ཞལ་གྱིས་བཞེས་ནས་ལན་སྩལ་བ་ནི། ཨེ་མའོ་བདེ་གཤེགས་སྙིང་པོ་ལས། །ཞེས་སོགས་གསུངས་པའི་དོན་ནི། སེམས་ཅན་ཐམས་ ― MLP018_Page_0262 ―
[མ་དཔེ་གཟིགས་ན་འདིར་གནོན།]
ཅད་བདེ་བར་གཤེགས་པའི་སྙིང་པོ་ཅན་ཡིན་པས་གཤིས་ལ་བཅིངས་གྲོལ་མེད་པའི་དོན་དེ་ཆོས་ཅན། བཤད་དུ་ཡོད་དེ། སེམས་ཅན་ཐམས་ཅད་མ་རྟོགས་པའི་དབང་གིས་བཅིངས་གྲོལ་ལྟར་སྣང་ཡང་། སྣང་ཙམ་ཉིད་ནས་གཤིས་ལ་དེ་ལྟར་མ་གྲུབ་པས་འཁོར་འདས་མཉམ་པ་ཉིད་ལྷག་པའི་ཆོས་སྐུ་ཆེན་པོར་ཡེ་ནས་ལྷུན་རྫོགས་སུ་བཞུགས་པ་དེ་ཡིན་པའི་ཕྱིར། དེ་ལྟར་སངས་རྒྱས་ཀྱིས་ཐུགས་སུ་ཆུད་པའི་ལྷུན་གྱིས་གྲུབ་པའི་ཆོས་དེ་ཆོས་ཅན། ཁྱོད་མཚོན་པར་བྱེད་པའི་རྒྱུད་འདི་དངོས་བརྒྱུད་ཀྱི་གདུལ་བྱ་ལ་ཇི་ལྟར་བསྟན་པའི་ཚུལ་ཡོད་དེ་དགྱེས་པའི་ཚུལ་དྲུག་གི་སྒོ་ནས་ལྷན་ཅིག་པའི་འཁོར་ལ་དངོས་སུ་བསྟན་པ་གང་ཞིག གོ་ཕྱེ་བའི་འཁོར་གདུལ་བྱ་ཐུན་མོང་པ་རྣམས་ལམ་སྟེགས་ཀྱི་ཐེག་པ་ལ་བརྟེན་ནས་རིམ་གྱིས་ལམ་འདིར་དཀྲི་བའི་ཆེད་དུ་སྤྲུལ་པ་ཐུབ་པ་དྲུག་སྤྲོ་བ་སོགས་སྣ་ཚོགས་སུ་སྣང་ནས་བསམ་གྱིས་མི་ཁྱབ་པའི་མཛད་པ་འཁོར་བ་ཇི་སྲིད་ཀྱི་བར་དེ་སྲིད་དུ་རྒྱུན་མི་ཆད་པར་སྟོན་པ་ཡིན་པའི་ཕྱིར་རོ། །དེ་ཡན་ཆད་ཀྱིས་གླེང་གཞི་དང་། གླེང་བསླང་གཞུང་གི་འབྲུ་འགྲེལ་སྦྱོར་ངག་རྣམས་བཤད་པ་སོང་ནས། ད་ནི་སྤྱིའི་དོན་ལ་འཇུག་སྟེ། རྩ་བའི་ས་བཅད་གསུམ་པ། འབྲས་བུ་ཡོངས་ཤེས་རྒྱུད་དོན་བཤད་པ་ལ་གཉིས་ཏེ། རྒྱུད་གསུམ་གྱི་རྣམ་བཞག་སྤྱིར་བཤད་པ་དང་། ལམ་གྱི་ཆ་རྐྱེན་རྒྱུད་ཀྱི་དངོས་པོ་བཅུ་བྱེ་བྲག་ཏུ་བཤད་པ་གཉིས་ལས། དང་པོ་ནི། རྒྱུད་ཕྱི་མ་ལས། རྒྱུད་ནི་རྒྱུན་ཆགས་ལ་བཤད་དེ། །ཐབས་དང་རྒྱུ་ལས་འབྲས་བུའོ། །ཞེས་པས། ཆོས་ཉིད་རང་བཞིན་གྱིས་རྣམ་པར་དག་པ་གཞིའམ་རྒྱུའི་རྒྱུད། རང་བཞིན་མངོན་དུ་བྱེད་པ་ཐབས་སམ་ལམ་གྱི་རྒྱུད། རང་བཞིན་མངོན་དུ་བྱས་པ་འབྲས་བུའི་རྒྱུད་དེ་ཤེས་ཐོབ་ཀྱི་བྱ་བྱེད་འབྲེལ་པ་ཅན་ནོ། །དང་པོ་གཞི་ལ་སྤྱིར་བཤད་པ་དང་། བྱེ་བྲག་ཏུ་བརྟགས་གཞི་བཤད་པ་གཉིས་ལས། དང་པོ་ལ། ས་བཅད་འདི་ཆད་དམ་སྙམ། མཆན སྤྱིར་མཚན་ཉིད། དབྱེ་བ། ལུང་རིགས་ཀྱི་སྒོ་ནས་མཐའ་དཔྱད་པ་དང་། དེའི་དོན་བྱེ་བྲག་ཏུ་བཤད་པ་དང་བཞི། དང་པོ་ནི། ཆོས་ཐམས་ཅད་ཀྱི་འབྱུང་གནས་སུ་གྱུར་པའི་དྲི་བཅས་དེ་བཞིན་ཉིད་དེ། མཚན་ཉིད་དེས་ནི་ངོ་བོ་དང་ ― MLP018_Page_0263 ―
[མ་དཔེ་གཟིགས་ན་འདིར་གནོན།]
བརྟགས་གཞི་གཉིས་ཀ་ལ་ཁྱབ་ཅིང་། ལམ་དང་འབྲས་བུ་གཉིས་རྣམ་པར་བཅད་པའོ། །གཉིས་པ་དབྱེ་བ་ལ། ངོ་བོའ་གཞི་དང་། བརྟགས་པའི་གཞི་གཉིས་ལས། དང་པོའི་མཚན་ཉིད་ནི། ཆོས་ཉིད་རང་བཞིན་གྱིས་རྣམ་པར་དག་པ། དྲི་མའི་སྦུབ་ན་ཡོད་པའི་གནས་ལུགས་དེ་བཞིན་ཉིད་དེ། དཔེར་ན། འདམ་གྱི་དབུས་ན་ཡོད་པའི་ནོར་བུ་རིན་པོ་ཆེ་ལྟ་བུའོ། །དེ་ལྟར་ཡང་རྒྱུད་ལས། ས་ཡི་ནང་ན་གནས་པའི་ཆུ། །དྲི་མ་མེད་པར་རང་དག་གནས། །ཉོན་མོངས་ནང་ན་ཡེ་ཤེས་ཀྱང་། །དེ་བཞིན་དྲི་མ་མེད་པར་གནས། །ཞེས་སོ། །གཉིས་པའི་མཚན་ཉིད། ལོག་རྟོག་འཁྲུལ་པའི་སྣང་བ་གློ་བུར་བར་གནས་པ་སྟེ། དཔེར་ན། ནོར་བུ་ལ་ཡོད་པའི་འདབ་རྫབ་ལྟ་བུའོ། །དེ་ཡང་མདོ་ལས། གང་ཞིག་ལོག་པར་རྟོག་པས་མེད་མཐོང་བ། །བྱིས་པ་འདི་དག་མེད་པའི་ཆོས་ལ་སྤྱོད། །ཅེས་སོ། །དེ་ཡང་ཡུལ་ཡུལ་ཅན་གཉིས་མེད་ལ་གཉིས་སུ་བཟུང་བས་ལོག་རྟོག དེ་མ་ཡིན་ལ་དེར་བཟུང་བས་འཁྲུལ་པ། ལས་དང་ལོག་རྟོག་གི་བློར་སྣང་བའོ། །གསུམ་པ་ལ། འདོད་པ་བརྗོད་པ་དང་། དེ་དགག་པ་གཉིས་ལས། དང་པོ་ནི། གནས་ལུགས་ངོ་བོ་ཉིད་ཀྱི་གཞི་དེ་ཤེས་བྱ་མ་ཡིན་ཏེ། དེ་ཤེས་བྱའི་ཡུལ་ལས་འདས་པའི་ཕྱིར་ཏེ། ཤེར་ཕྱིན་སུམ་བརྒྱ་པ་ལས། ཆོས་དབྱིངས་ཤེས་བྱ་མ་ཡིན་པས། །དེ་ནི་རྣམ་པར་ཤེས་མི་ནུས། །ཞེས་དང་གལ་པོ་ལས། དོན་དམ་བློ་ཡི་སྤྱོད་ཡུལ་མིན། །ཞེས་གསུངས་པའི་ཕྱིར་ཟེར་བ་དང་། ཡང་ཡུལ་རྫས་སུ་གྲུབ་པ་འདི་དག་ཤེས་པ་ལས་གཞན་དུ་གྲུབ་པའི་ཕྱིར་མི་འཐད་དོ་ཟེར། གཉིས་པ། དེ་དགག་པ་ལ་ལུང་རིགས་གཉིས་ཀྱིས་གྲུབ་པའི་ཕྱིར་ཏེ། ལུང་གིས་གྲུབ་སྟེ། ཡབ་སྲས་མཇལ་བའི་མདོ་ལས། ཤེས་པར་བྱ་བའང་ཀུན་རྫོབ་དང་དོན་དམ་པའི་བདེན་པ་གཉིས་སུ་ཟད་དོ། །ཞེས་དང་། གལ་པོ་ལས་ཤེས་བྱའི་ནང་ནས་དམ་པར་ནི། །གྱུར་ཕྱིར་ངེས་པའི་ཚིག་ཡིན་ནོ། །ཞེས་གསུངས་པའི་ཕྱིར། གཉིས་པ་ནི། གཞིའི་རྒྱུད་དེ་ཆོས་ཅན། ཐ་སྙད་ཙམ་དུ་གཏན་ལ་དབབ་བྱ་མ་ཡིན་པར་ཐལ། ཁྱོད་ཐ་སྙད་ཙམ་དུ་གཞལ་བྱར་མི་རུང་བའི་ཕྱིར། དེར་མ་ཟད་ནམ་མཁའ་ཆོས་ཅན། ཁྱོད་སྐྱེས་བུས་འཇལ་བ་མ་ཡིན་པར་ཐལ། ཁྱོད་སེམས་རྟོག་གི་ཡུལ་ལས་འདས་པའི་ཕྱིར། སྔར་ ― MLP018_Page_0264 ―
[མ་དཔེ་གཟིགས་ན་འདིར་གནོན།]
གྱི་ལུང་རྣམས་དང་མི་འགལ་ཏེ། མདོར་ན་གཞི་ལམ་འབྲས་གསུམ་དུ་ཕྱེ་བ་ཡང་རྨི་ལམ་གྱི་རྒྱུ་འབྲས་སོ་སོར་སྣང་བ་ལྟར། རེ་ཞིག་འཁྲུལ་སྣང་ཀུན་བཏགས་ཀྱི་དབང་གིས་སོ་སོར་སྣང་བ་ཙམ་ལ་བཞག་མོད། ཆོས་ཀྱི་ངོ་བོ་ཉིད་ཀྱིས་ཕྱེ་བ་མ་ཡིན་ཏེ། ངོ་བོ་རང་རིག་པའི་བྱང་ཆུབ་སེམས་སུ་གཅིག་པའི་ཕྱིར་དང་། དོན་དམ་བློའི་སྤྱོད་ཡུལ་མ་ཡིན་ཡང་། བདེན་གཉིས་འབྱེད་པའི་རྣམ་བཞག་གི་ཚེ། གལ་པོར། ཤེས་བྱ་ཙམ་གྱི་སྣང་བ་ལ། །བདེན་པ་གཉིས་ཀྱི་ཞིང་ས་འགྲུབ། །ཅེས་སོ། །གཉིས་པའི་ལན་ནི། ཤེས་པ་ཆོས་ཅན། ཡུལ་ཤེས་ལ་བདག་གཅིག་གི་འབྲེལ་པ་མེད་པར་ཐལ། ཡུལ་ཤེས་བདག་མི་གཅིག་པའི་ཕྱིར་ཏེ། ཀ་བ་དང་། བུམ་པ་བཞིན་ནོ། །དེ་ལ་དེ་བྱུང་གི་འབྲེལ་པའང་མེད་པར་ཐལ། བསྟན་མེད་ཐོགས་མེད་ཀྱི་རིགས་ཙམ་དེ་ལས་བེམ་པོའི་རྫས་སྐྱེ་མི་སྲིད་པའི་ཕྱིར་ཏེ། ནམ་མཁའ་དང་པདྨོ་བཞིན་ནོ། །དེ་ལྟར་འབྲེལ་པ་མེད་པར་འདོད་ན། ཤེས་པ་ཆོས་ཅན། ཁྱོད་ལས་ཡུལ་རྣམས་སྣང་བ་མི་རིགས་པར་ཐལ། ཡུལ་ཤེས་ལ་འབྲེལ་པ་མ་གྲུབ་པའི་ཕྱིར་ཏེ། མིག་དང་སྒྲ་བཞིན་ནོ། །འདོད་མི་ནུས་ཏེ་མངོན་སུམ་ཚད་མས་གནོད་པའི་ཕྱིར་རོ། །དེ་བས་ན་སེམས་ལས་གཞན་པའི་ཆོས་རྡུལ་ཙམ་ཡང་མ་གྲུབ་སྟེ། འདི་ལྟར་ཡུལ་སོགས་སྣང་བ་ཉམས་སུ་མྱོང་བའི་ཕྱིར། རྨི་ལམ་གྱི་སྣང་བ་བཞིན་དང་། སེམས་ཀྱི་ཇི་ལྟར་དབང་བསྒྱུར་བ་ལྟར་རང་སྣང་བའི་ཕྱིར། ཟད་པར་གོམས་པའི་སྣང་བ་བཞིན་ནོ། །དེ་ལྟར་ཡང་། རྒྱས་པ་ལས། ཀུན་གཞིའི་རྣམ་པར་ཤེས་པ་ཉིད། །དངོས་པོ་སྣ་ཚོགས་པར་སྣང་སྟེ། །ཞེས་དང་། འདི་ལྟར་སྣང་བའི་ཆོས་རྣམས་ཀུན། །གདོས་པ་ཅན་གྱི་ཆོས་མིན་ཏེ། །རྟོག་མེད་རང་རིག་འོད་གསལ་བའི། །ཤེས་པ་འབའ་ཞིག་ཁོ་ནའོ། །ཞེས་དང་། ལམ་རིམ་ལས། སེམས་ལས་མ་གཏོགས་ཆོས་མེད་ཕྱིར། །སྒྱུ་མ་རྡོ་རྗེ་བཙན་པོ་མཆོག །ཅེས་དང་། སློབ་དཔོན་དཔལ་དབྱངས་ཀྱི་མཐའི་མུན་སེལ་སྒྲོན་མ་ལས། ཆོས་རྣམས་སེམས་ཀྱི་འཁྲུལ་པ་སྟེ། །སེམས་ལས་མ་གཏོགས་ཆོས་རྣམས་མེད། །ཅེས་དང་། ཐུན་མོང་གི་ལུང་ལས་ཀྱང་གསུངས་ཏེ། ལངྐར་གཤེགས་པ་ལས། ཇི་ལྟར་བྱིས་པས་བཏགས་པ་ཡི། །ཕྱི་རོལ་དངོས་པོ་ཡོད་མིན་པར། །བག་ཆགས་ཀྱིས་ནི་ ― MLP018_Page_0265 ―
[མ་དཔེ་གཟིགས་ན་འདིར་གནོན།]
སྦགས་པའི་སེམས། །དོན་གྱི་དངོས་པོ་རབ་ཏུ་སྐྱེས། །ཞེས་དང་། མདོ་སྡེ་ས་བཅུ་པར་ཡང་ཀྱེ་རྒྱལ་བའི་སྲས་དག ཁམས་གསུམ་པོ་འདི་དག་སེམས་ཙམ་མོ། །ཞེས་སོགས་རྒྱ་ཆེར་གསུངས་པའི་ཕྱིར་རོ། །ཡང་ཁ་ཅིག སོ་སྐྱེའི་ཤེས་པ་སོར་བཞག་འདི་གནས་ལུགས་ངོ་བོ་ཉིད་ཀྱི་གཞིར་འདོད་ན་ནི། ཤེས་བྱ་མ་ནོར་བ་ཡུལ་དུ་བྱེད་པས། འཕགས་པའི་མཁྱེན་པ་དང་ཁྱད་མེད་དུ་འགྱུར་ལ། དེ་ངོ་བོའ་གཞི་མ་ཡིན་ན་ནི། འཁྲུལ་སྣང་འདི་ཆོས་ཉིད་ཀྱི་ཁྱབ་བྱ་མ་ཡིན་པར་ཐལ་བ་སོགས་ཀྱི་སྐྱོན་གནས་སོ་ཟེར་ན། དེའི་ལན་ནི། རང་བཞིན་ཆོས་ཉིད་དུ་ཡོངས་སུ་རྫོགས། རྣམ་པ་འཁྲུལ་ལྡོག་ཏུ་མ་འདྲེས། ངོ་བོ་ལ་དབྱེར་མེད་ཅེས་བྱ་སྟེ། དགོངས་འདུས་ལས། ཞེ་སྡང་མ་འདྲེས་མནར་སེམས་པ། །ཡོངས་སུ་རྫོགས་པར་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཞེས་སོ། །འོ་ན་མ་འདྲེས་པ་ཆོས་ཉིད་མ་ཡིན་པ་བཞིན་དུ། ཡོངས་རྫོགས་ཀྱི་ངོས་ནས་ཀྱང་མ་ཡིན་པར་འགྱུར་ཏེ། དེ་ཉིད་ངོ་བོ་དབྱེར་མེད་ཡིན་པས་སོ་ཟེར་ན། སྐྱོན་མེད་དེ། ཏིལ་འབྲུ་དང་སྣུམ་གཉིས་རྫས་དབྱེར་མེད་ནའང་ཏིལ་འབྲུ་ཁུ་བ་དང་། སྣུམ་གོང་བུར་མི་སྣང་བ་བཞིན་ནོ། །བཞི་པ་གཞིའི་དོན་བྱེ་བྲག་ཏུ་བཤད་པ་ནི། ལྷག་པ་ཀུན་རྫོབ་བདེན་པ་དང་། ལྷག་པ་དོན་དམ་བདེན་པ་གཉིས། ལྷག་པའི་བདེན་པ་དབྱེར་མེད་བཤད་པ་དང་གསུམ་ལས། དང་པོ་ནི། དང་པོའི་མཚན་ཉིད་ནི། ཆུ་ཟླ་ལྟར་བདེན་དངོས་ཀྱིས་སྟོང་པའི་སྣང་བ་རིས་སུ་མ་ཆད་པའི་ཆོས་སོ། །དེ་སྒྲུབ་པ་ལ་ལུང་རིགས་གཉིས་ལས། དང་པོ་ནི། རྒྱས་པ་ལས། ཀུན་རྫོབ་སྒྱུ་མར་མཉམ་པ་ཡང་། །འདུས་བྱས་དངོས་པོ་སྣ་ཚོགས་ནི། །སྒྱུ་མའི་ཚུལ་དུ་ཐམས་ཅད་སྣང་། །འཕྲལ་སྣང་བྱ་བ་ཀུན་བྱེད་ཀྱང་། །རྟོག་པ་ཀུན་གྱི་མཚན་མར་སྣང་། །འདི་དག་ཐམས་ཅད་གཟུགས་བརྙན་དེ། །བྱ་བྱེད་མེད་བཞིན་དངོས་པོ་མེད། །ཆུ་ཟླའི་ཚུལ་དུ་ཐམས་ཅད་གནས། །ཐམས་ཅད་སྣང་ལ་རང་བཞིན་མེད། །ཅེས་སོ། །གཉིས་པ་རིགས་པས་སྒྲུབ་པ་ལ། སྣང་ཙམ་དགག་མེད་དུ་སྒྲུབ་པ་དང་། བདེན་པས་སྟོང་པའི་སྣང་བ་རིས་མེད་དུ་སྒྲུབ་པའོ། །དང་པོ་ནི། སྣང་བ་ཆོས་ཅན། ཁྱོད་འགག་མེད་དུ་སྣང་བ་ཡིན་ཏེ། ཁྱོད་ཀྱི་གཤིས་ ― MLP018_Page_0266 ―
[མ་དཔེ་གཟིགས་ན་འདིར་གནོན།]
ལ་ཡང་དག་པའི་ཡེ་ཤེས་ཤིག་ཡོད་པའི་རྒྱུས་རང་སྣང་བ་ཡིན་པའི་ཕྱིར། དེ་ཡོད་པར་གཏན་ཚིགས་བཞིས་གྲུབ་པའི་ཕྱིར་ཏེ། བཞི་གང་ཞེ་ན། སྣང་བ་མ་གྲུབ་ན་འཁྲུལ་སྣང་འབྱུང་མི་རིགས་པའི་གཏན་ཚིགས་དང་། སྣང་བ་མེད་ན་དོན་དམ་ཤེས་བྱེད་མ་གྲུབ་པའི་གཏན་ཚིགས་དང་། སྣང་ཙམ་པ་འདི་སུས་ཀྱང་དགག་མི་ནུས་པའི་གཏན་ཚིགས་དང་། རང་རིག་པ་ཐམས་ཅད་དུ་རྩལ་མ་འགགས་པར་རང་སྣང་བའི་གཏན་ཚིགས་དང་བཞི་ལས། དང་པོ་ནི། ད་ལྟར་གྱི་འཁྲུལ་སྣང་འདི་ཆོས་ཅན། ཁྱོད་འབྱུང་རིགས་པར་ཐལ། ཁྱོད་སྣང་བ་རིས་སུ་མ་ཆད་པའི་རྒྱུ་ལས་བྱུང་བ་ཡིན་པའི་ཕྱིར། གཉིས་པ་ནི། སྣང་བ་ཆོས་ཅན། ཐལ་བ་ཆད་དམ་སྙམ། ཁྱོད་དོན་དམ་སྟོང་ཉིད་ཀློང་ན་དཀོར་བདུན་དུ་ལྷུན་གྱིས་གྲུབ་པའི་རྩལ་སྣང་ཡིན་པའི་ཕྱིར། གསུམ་པ་ནི། སྣང་བ་འདི་ཆོས་ཅན། ཐམས་ཅད་མཁྱེན་པའི་ཕྱག་གིས་ཀྱང་མི་ཁེགས་པར་བཤད་པ་མི་འཐད་པར་ཐལ། ཁྱོད་ཐམས་ཅད་དུ་རང་སྣང་བ་མ་ཡིན་པའི་ཕྱིར། བཞི་པ་ནི། རང་རིག་པ་ཆོས་ཅན། ཁྱོད་ཐམས་ཅད་དུ་རྩལ་མ་འགགས་པར་རང་སྣང་བ་ཡིན། དེ་མ་ཡིན་ན་ཁྱོད་བེམ་སྟོང་དང་ཁྱད་པར་མེད་པའི་ཕྱིར། གཉིས་པ་སྣང་བ་བདེན་སྟོང་རིས་མེད་དུ་སྒྲུབ་པ་ནི། དེ་ཡང་མཐུན་སྣང་གི་ཆོས་ཅན་གཅིག་ལ་སྒྲུབ་ན། རང་ཅག་མི་རྣམས་ལ་སྣང་གྱུར་ཐུན་མོང་དུ་དམིགས་པའི་ཆུ་འདི་ཆོས་ཅན། རིག་པ་སྒྱུ་མའི་སྣང་བ་ཡིན་ཏེ། སྣང་བའི་ངོ་བོ་རིས་སུ་མ་ངེས་པའི་ཕྱིར་ཏེ། སྐ་བ་དཔལ་བརྩེགས་ཀྱི་ལྟ་རིམ་ལས། དམྱལ་བ་རང་སེམས་མེ་སོགས་སྣང་། །ཡི་དྭགས་སྡིག་སེམས་མི་གཙང་ཡུལ། །བྱོལ་སོང་གྱེན་ཐུར་ངམ་གྲོག་སྟེ། །མི་ལ་མཐོང་ཡུལ་འདི་ཉིད་སྣང་། །དེ་བཞིན་ལྷ་མིན་གོ་མཚོན་སོགས། །ལྷ་ལ་དགེ་སེམས་རིན་ཆེན་སྣང་། །ཞེས་སོ། །རྒྱུ་མཚན་དེས་རིག་པ་སྒྱུ་མའི་སྣང་བ་ཡིན་པར་གྲུབ་སྟེ། ཏིང་འཛིན་རྒྱལ་པོ་ལས། ཇི་ལྟར་སྒྱུ་མ་མཁན་གྱིས་སྤྲུལ་པའི་གཟུགས། །རྟ་དང་གླང་པོ་ཤིང་རྟ་སྣ་ཚོགས་བྱས། །དེ་ལ་ཇི་བཞིན་སྣང་བ་གང་ཡང་མེད། །ཆོས་རྣམས་ཐམས་ཅད་དེ་བཞིན་ཤེས་པར་བྱ། །ཞེས་པ་ལྟར་རོ། །དེ་ཡང་ལམ་རིམ་ལས། སྒྱུ་མ་མིག་ཡོར་སྤྲུལ་པ་དང་། །སྨིག་སྒྱུ་འཇའ་ཚོན་ཆུ་ཟླ་བཞིན། །ཞེས་པའི་དཔེས་སྒྱུ་མའི་དངོས་པོ་ ― MLP018_Page_0267 ―
[མ་དཔེ་གཟིགས་ན་འདིར་གནོན།]
དྲུག་ཏུ་དབྱེ་སྟེ། དེ་ལ་ལོག་རྟོག་སྒྱུ་མ་ནི། སྒྱུ་མའི་རྟ་གླང་ལྟར། དེ་མ་ཡིན་པ་ལ་དེར་འཛིན་གྱི་ཞེན་པའི་ལོག་རྟོག རྟེན་འབྲེལ་སྒྱུ་མ་ནི། དབང་པོ་སླད་པའི་མིག་ཡོར་གྱི་གཟུགས་ལྟར་སྣང་ལ་མ་གྲུབ་པ་དང་། དངོས་པོ་སྒྱུ་མ་ནི། སྣང་ལ་ཚིམ་པ་མེད་པ་སྨིག་རྒྱུའི་དཔེས་བུམ་པ་ལ་བུམ་པར་སྣང་བ་ལྟ་བུའི་སྣང་ཆ་དང་། ཕྱག་རྒྱ་སྒྱུ་མ་ནི། སྣང་ལ་རྟོག་པ་མེད་པ་ཆུ་ཟླའི་དཔེས་བདེན་དངོས་ཀྱིས་སྟོངས་པའི་སྣང་བ་ལྷ་སྐུར་གསལ་བའི་ཆ་དང་། ཡེ་ཤེས་སྒྱུ་མ་ནི། མེད་བཞིན་དུ་རྣམ་པར་བཀྲ་བ་འཇའ་ཚོན་གྱི་དཔེས་རིག་པ་ཕྱི་ནང་མེད་པར་གསལ་བའི་ཆ་དང་། ཐབས་སྒྱུ་མ་ནི་གཅིག་ཏུ་མ་ངེས་པ་སྤྲུལ་པའི་དཔེས་དེ་དང་དེར་སྣང་བ་འགག་མེད་དུ་འཆར་བའི་ཆ་ནས་བཞག་པའོ། །དེ་ལྟར་སྒྱུ་མའི་དངོས་པོ་དྲུག་པོ་ཐ་དད་མེད་པར་རིག་པ་ལ་གསལ་བ་ནི་ལྷག་པ་ཀུན་རྫོབ་ཀྱི་བདེན་པའོ། །དེ་ལྟར་ན་ཀུན་རྫོབ་དང་བདེན་པ་དབྱེར་མེད་ལ་ཁྱད་པར་མེད་པར་འགྱུར་རོ་ཞེ་ན། སྣང་ཡང་བདེན་པས་སྟོངས་པ་ཙམ་དུ་ངོ་བོ་གཅིག་ཀྱང་། གཏན་ལ་འབེབས་ཚུལ་གྱི་ལྡོག་པ་ཐ་དད་པས་སྐྱོན་མེད་དེ། འཁྱག་པ་དངོས་སུ་མཐོང་བས་ཆུ་ལྐོག་གྱུར་དུ་ཤུགས་ལ་རྟོགས་པ་བཞིན་ནོ། །གཉིས་པ་ལྷག་པ་དོན་དམ་བདེན་པ་ལ། མཚན་ཉིད་ནི། སྣང་བ་ངོ་བོ་ཉིད་རྒྱུར་ལྷུན་གྱིས་གྲུབ་པའི་སྤྲོས་བྲལ་གྱི་ཆོས་ཉིད། དེ་སྒྲུབ་པ་ལ་ལུང་རིགས་གཉིས་ཏེ། ལུང་ནི་འདི་ཉིད་ལས། གཞི་རྩ་མེད་པའི་སེམས་ཉིད་ནི། །ཕོ་མོ་མ་ཡིན་མ་ནིང་མིན། །མཚན་མེད་མ་ཡིན་རིགས་བརྒྱུད་མིན། །ཁ་དོག་མ་ཡིན་དབྱིབས་མ་ཡིན། །གནས་སུ་མ་ཡིན་གང་ཡང་མིན། །དེ་བཞིན་ཉིད་ཀྱི་ཡེ་ཤེས་དེ། །ཐབས་ཀྱི་ཕྱག་རྒྱ་ཀུན་གྱི་རྒྱུ། །ཞེས་སོ། །གཉིས་པ་རིགས་པ་ལ། སྤྲོས་བྲལ་དུ་སྒྲུབ་པ་དང་། དེ་ཉིད་སྣང་བ་ངོ་བོ་ཉིད་རྒྱུར་ལྷུན་གྱིས་གྲུབ་པར་སྒྲུབ་པ་གཉིས་ལས། དང་པོ་ནི། ཕར་ཕྱིན་ཐེག་པའི་རིགས་པ་དང་མཚུངས་ལ། གཉིས་པ་ནི་སྤྲོས་བྲལ་གྱི་ཆོས་ཉིད་དེ་ཆོས་ཅན། ཁྱོད་སྣང་བ་ངོ་བོ་ཉིད་རྒྱུར་ལྷུན་གྱིས་གྲུབ་པ་ཡིན་ཏེ། ཁྱོད་སྣང་ཙམ་ཉིད་ནས་བརྟགས་ན་ཡང་དག་པར་མ་གྲུབ་ཅིང་། ཁྱོད་སྣང་ཚོད་ཙམ་ཞིག་མ་འགགས་པའི་ཕྱིར་ཏེ། རྒྱས་པ་ལས། མེད་པ་ཉིད་ན་སྣ་ཚོགས་སྣང་། །ཐམས་ཅད་ཤེས་རབ་དབྱིངས་ལས་བྱུང་། ། ― MLP018_Page_0268 ―
[མ་དཔེ་གཟིགས་ན་འདིར་གནོན།]
ཞེས་སོ། །གསུམ་པ་ལྷག་པ་བདེན་པ་དབྱེར་མེད་ནི། མཚན་ཉིད་ནི། སྣང་སྟོང་དབྱེར་མེད་པར་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པའི་ཆོས་ཉིད། དེ་སྒྲུབ་པ་ལ་ལུང་རིགས་གཉིས་ལས། ལུང་ནི། འདི་ཉིད་ལས། བདེན་པ་གཉིས་ཀ་དབྱེར་མེད་པར། །འཕྲུལ་དགའི་ཚུལ་དེ་ཐ་དད་མིན། །ཞེས་དང་། རྒྱས་པ་ལས། དོན་དམ་ཀུན་རྫོབ་དབྱེར་མེད་པར། །འདུས་མ་བྱས་ཉིད་འདུས་བྱས་ཉིད། །འདུས་བྱས་སྣང་བ་རྡོ་རྗེ་ཉིད། །ཅེས་དང་། ལམ་རིམ་ལས། རྒྱལ་འགྲོས་མ་མཛད་མ་བཅོས་པར། །རང་བཞིན་ངང་གིས་དབྱེར་མེད་སྟེར། །ཅེས་སོ། །གཉིས་པ་རིགས་པ་ནི། བདེན་པ་དབྱེར་མེད་ཆོས་ཅན། ཁྱོད་ཐི་གུ་དཀར་ནག་སྒྲིལ་བ་ལྟ་བུའི་ཐབས་ཤེས་དབྱེར་མེད་མ་ཡིན་ཏེ། ཁྱོད་ཕན་ཚུན་གཅིག་གིས་གཅིག་མི་གཏོང་བའི་ངོ་བོ་བདག་གཅིག་པའི་དབྱེར་མེད་ཡིན་པའི་ཕྱིར་ཏེ། དཔེར་ན། གསེར་དང་གསེར་གྱི་སེར་པོ་དང་། གཡུ་དང་གཡུའི་སྔོན་པོ་ལྟ་བུའོ། །དེ་ཉིད་མཚན་ཉིད་བློ་བྲལ་དུ་སྒྲུབ་པ་ནི། དེ་ཆོས་ཅན། བློའི་ཡུལ་ལས་འདས་པ་ཡིན་ཏེ། རང་རིག་མངོན་སུམ་གྱི་ཡུལ་མེད་རང་གསལ་དུ་ལ་བཟླ་བའི་ཆོས་ཅན་ཡིན་པའི་ཕྱིར་ཏེ། ལུང་ལས། བཤད་དུ་མེད་གང་བརྗོད་དུ་ཇི་ལྟ་ཡོད། །ཅེས་དང་། སློབ་དཔོན་གཉན་དཔལ་གྱིས། ཇི་ཙམ་ཟབ་པའི་ཚིག་བརྗོད་ཀྱང་། །དོན་དང་མཐུན་པར་མི་འགྱུར་རོ། །ཞེས་སོ། །གཤམ་གྱི་ས་བཅད་འདིའི་འཕྲོ་གཞི་མ་རྙེད་པས་མ་དཔེ་དག་པ་རེ་རྙེད་ན་དཔྱོད་རོགས གཉིས་པ་བརྟགས་གཞི་ལ། མཚན་ཉིད་དང་དེ་གཏན་ལ་དབབ་པ་གཉིས་ལས། དང་པོ་ནི། གནས་ལུགས་ལ་: གོ་གོལ་བར་རྟོག་པའི་ཞེན་སྣང་ངོ་། །དེ་ཡང་ལམ་རིམ་ལས། འཁོར་དང་འདས་དངོས་ཞེན་སྣང་བརྟག །ཅེས་སོ། །གཉིས་པ་ལ། འཁོར་བའི་ཆོས་གཏན་ལ་ཕབ་པ་དང་། མྱ་ངན་ལས་འདས་པའི་ཆོས་གཏན་ལ་ཕབ་པ་དང་གཉིས་ལས། དང་པོ་ལ། འཁོར་བར་འཁྲུལ་པའི་གཞི། ཇི་ལྟར་འཁྲུལ་པའི་ཚུལ། འཁྲུལ་བའི་རང་བཞིན་ཆོས་ཉིད་ལས་མ་གཡོས་པར་ལ་ཟླ་བའོ། །དང་པོ་ནི། ཆོས་ཀྱི་དབྱིངས་རང་བཞིན་གྱིས་རྣམ་པར་དག་པ་ཡེ་ནས་དྲི་མ་མེད་པ་བདེ་བར་གཤེགས་པའི་སྙིང་པོའི་སྣང་བ་སྟེ། འདི་ཉིད་ ― MLP018_Page_0269 ―
[མ་དཔེ་གཟིགས་ན་འདིར་གནོན།]
ལས། ཨེ་མའོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །ཞེས་སོ། །གཉིས་པ་ནི། རྒྱུ་རྒྱུད་བདེ་གཤེགས་སྙིང་པོའི་སྣང་བ་དེས་འཁྲུལ་གཞི་བྱས་ནས་རྐྱེན་ལྷན་ཅིག་སྐྱེས་པའི་མ་རིག་པས་འཁྲུལ་ཏེ། རྒྱས་པ་ལས། རྟག་ཏུ་རང་བཞིན་སྣང་གྱུར་ཀྱང་། །མིག་གིས་མིག་བཞིན་མ་རིག་པའོ། །ཞེས་སོ། །ལྷན་ཅིག་སྐྱེས་པའི་མ་རིག་པ་དེ་གང་ཞེ་ན། སྤར་ཁབ་ལས། ངེས་པའི་ཤེས་པ་མ་སྐྱེས་པ་ནི་ལྷན་ཅིག་སྐྱེས་པའི་མ་རིག་པའོ། །ཞེས་གསུངས། དེའི་གྲོགས་ཀུན་བཏགས་ཀྱི་མ་རིག་པ་ནི་ཡུལ་ཡུལ་ཅན་དུ་སྣང་བའི་ལོག་རྟོག་ལས་གཟུང་འཛིན་གཉིས་སྣང་ཤེས་པ་སྐྱེས་པས། ལས་དགེ་སྡིག་གི་བག་ཆགས་ཀུན་གཞི་ལ་བཞག་སྟེ་འཁོར་བ་མཐོ་དམན་དུ་ལྷན་ཅིག་བྱེད་པའོ། །དེ་ལྟར་ཡང་འདི་ཉིད་ལས། མ་རིག་རྟོག་པའི་གཟུང་འཛིན་གྱི། །ཞེས་དང་། གཟུང་འཛིན་སྤྲོས་ལ་འཆེ ལ་བ་ཡི། །རྣམ་རྟོག་ཞགས་པས་སོ་སོར་འཛིན། །ཞེས་སོ། །གསུམ་པ་ནི། དེ་ལྟར་བརྟག་གཞི་འཁོར་བའི་ཆོས་དེ་དག་ཏུ་འཁྲུལ་པ་ལྟར་སྣང་ཡང་རང་བཞིན་ཆོས་ཉིད་ལས་གཡོས་པ་མེད་དེ་ཐོ་ཡོར་ལ་མིར་སྣང་ཡང་ཐོ་ཡོར་ལས་མ་གཡོས་པ་བཞིན་ནོ། །དེ་ལྟར་ཡང་འདི་ཉིད་ལས། རང་བཞིན་ཉིད་ལས་ཉམས་པ་མེད། །ཅེས་དང་། ལོག་རྟོག་ཉིད་ལས་གཞན་དུ་ཅི་ཡང་མེད། །སྟོང་ཉིད་བདག་མེད་ཡེ་མཁྱེན་རང་རིག་ཐུགས། །དམིགས་བྱ་དམིགས་བྱེད་མེད་པར་རང་དབང་བསྒྱུར། །ངོ་མཚར་སྐུ་གསུམ་ཡོན་ཏན་ཞིང་ཁམས་ལས། །གཞན་ན་མེད་དེ་ཉིད་དེ་ལྟར་ཡིན། །ཞེས་སོ། །གཉིས་པ་ནི། མྱང་འདས་ཀྱི་ངོ་བོ་འབྲས་བུའི་སྐབས་སུ་འཆད་ཅིང་། འདིར་སྐུ་དང་ཡེ་ཤེས་སུ་ཞེན་པ་སྒྲོ་བཏགས་ཀྱི་བློ་དེ་བརྟགས་གཞི་ཡིན་ཏེ། རྣམ་བཀོད་ལས། བརྟགས་པའི་སྤྱོད་ཡུལ་གཉིས་ལ་གཞལ། །ཞེས་དང་། འཁོར་དང་འདས་དངོས་ཞེན་སྣང་བརྟགས། །ཞེས་གསུངས་པའི་ཕྱིར་རོ། །གཉིས་པ་རང་བཞིན་མངོན་དུ་བྱེད་པ་ཐབས་སམ་ལམ་གྱི་རྒྱུད་ནི། དཔེ་ཆུང་རང་གནས་ལས། རང་བཞིན་མངོན་དུ་བྱེད་རྒྱུ་ནི། ངོ་བོ་དང་ནི་རྐྱེན་ཉིད་དོ། །ཞེས་པས་བརྗོད་བྱ་དོན་གྱི་རྒྱུད་ལམ་གྱི་ངོ་བོ་ཉིད་དང་། རྗོད་བྱེད་ཚིག་གི་རྒྱུད་ལམ་རྐྱེན་དུ་གྱུར་པ་གཉིས་ཏེ། དབྱེ་ ― MLP018_Page_0270 ―
[མ་དཔེ་གཟིགས་ན་འདིར་གནོན།]
ན་མདོ་སྔགས་གཉིས་ཀའི་འཇུག་ཡུལ་དུ་གྱུར་པའི་ཐུན་མོང་སྤྱིའི་ལམ་དང་། མ་ཧཱ་ཡོ་ག་ཉིད་ཀྱི་འཇུག་ཡུལ་དུ་གྱུར་པ་ཁྱད་པར་གྱི་ལམ་མོ། །ཐུན་མོང་གི་ལམ་ནི་ངེས་འབྱུང་གི་ཐེག་པ་བཞི་དང་ཕྱི་རྒྱུད་སྡེ་གསུམ་མོ། །ཁ་ཅིག་ན་རེ། ཐུན་མོང་གི་ལམ་དེ་ཁྱད་པར་གྱི་ལམ་དུ་འགྲོའམ་མི་འགྲོ། འགྲོ་ན་ཐུན་ཁྱད་ཁྱད་མེད་དུ་ཐལ་བ་དང་གལ་ཏེ་མི་འགྲོ་ན་ཐུན་མོང་གི་དམ་བཅའ་ཉམས་སོ་ཞེ་ན། དེའི་ལན་ནི། དངོས་སུ་ཁྱད་པར་གྱི་ལམ་མ་ཡིན་ཏེ། ལམ་ཐབས་གྲོལ་གང་རུང་ལ་སྤྱོད་མི་ནུས་པའི་ཕྱིར་དང་། རིམ་གྱིས་པ་ལ་ལྟོས་ན་ལམ་དེ་ལ་བསླབ་དགོས་པ། བརྟག་གཉིས་ལས། དང་པོ་གསོ་སྦྱོང་བྱིན་པར་བྱ། །དེ་རྗེས་བསླབ་པའི་གནས་བཅུ་ཉིད། །ཅེས་སོགས་དང་། དེ་ནས་ཀྱཻ་ཡི་རྡོ་རྗེ་བསྟན། །ཅེས་གསུངས་པས། སྔགས་ལམ་དོན་གཉེར་གྱི་གང་ཟག་རིམ་གྱིས་པ་དེའི་བསླབ་བྱ་ཡིན་པའི་ཕྱིར་དང་། སྔགས་ལམ་ཟབ་མོ་དེ་རྟོགས་པའི་ཐབས་རྨད་དུ་བྱུང་བའང་ཡིན་པའི་ཕྱིར་སྐྱོན་མེད་དོ། །དེ་ལྟར་ཡང་འདི་ཉིད་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཡེ་ཤེས་ངོ་མཚར་རབ་འབྱམས་ཀྱི། །དོན་དུ་མི་འགྱུར་ཡོངས་མ་གསུངས། །ཞེས་སོ། །དེ་བས་ན་ལམ་དེ་དག་གིས་རང་རང་གི་འབྲས་བུ་སྒྲུབ་པ་དང་འདིའི་ལམ་སྟེགས་སུ་བགྲོད་པ་ཐུན་མོང་དུ་བྱེད་པའི་ཕྱིར་ཐུན་མོང་གི་ལམ་ཞེས་བྱའོ། །ལམ་རྒྱུད་ཀྱི་མཚན་ཉིད་ནི། རྒྱུ་རྒྱུད་དེ་གློ་བུར་གྱི་དྲི་མ་དང་བྲལ་བར་བྱེད་པའི་ཐབས་ཤེས་ཟུང་འཇུག་གི་བྱེད་རྩོལ་དང་བཅས་པ་དང་། དེ་ཉིད་མཐར་ཕྱིན་པ་གང་རུང་གི་རིགས་གནས། དེ་ཡང་ངོ་བོ་ཤེས་རབ་རྣམ་པ་གསུམ་གྱིས་ཐུན་མོང་དང་མཆོག་གི་སེམས་ལྔ་སྐྱེས་སམ་སྐྱེ་བར་འགྱུར་བ་སྟེ། རིམ་གསུམ་ལས། ངོ་བོ་ཤེས་རབ་རྣམ་གསུམ་གྱིས། །སེམས་ལྔ་སྐྱེས་པར་བསྟན་པ་ཡིན། །ཞེས་སོ། །དེ་ཡང་རྒྱས་པ་ལས། སྐྱེ་ས་རྐྱེན་གྱི་སྐྱེ་ཚུལ་དང་། །སྐྱེས་པའི་ངོ་བོ་སེམས་རིམ་པ། །ཞེས་པས་སྐྱེ་ས་ནི་གཞིའི་ས་ནས་དང་། ལམ་དང་། འབྲས་བུའི་ས་ནས་སྐྱེ་བའོ། །དང་པོ་ལ། རིགས་ངེས་པ་དང་། མ་ངེས་པ་དང་། གནས་སྐབས་རིགས་ཆད་པ་དང་གསུམ་ལས། དང་པོ་ནི། ཉན་རང་བྱང་སེམས་ཀྱི་རིགས་ཅན་གསུམ་མོ། །གཉིས་པ་ནི། སྔར་གྲུབ་ ― MLP018_Page_0271 ―
[མ་དཔེ་གཟིགས་ན་འདིར་གནོན།]
མཐས་བློ་མ་བསྒྱུར་བའི་རྐྱེན་གྱི་དབང་གིས་སེམས་གང་དུའང་སྐྱེར་རུང་བ་སྟེ། རྒྱས་པ་ལས། ཐེག་པ་གང་དུ་བསྟན་པར་མ་ངེས་པའི། །ཞེས་དང་། ཡང་ན་ངེས་མེད་འདི་ཞེས་བརྟག་ཏུ་མེད། །ཅེས་སོ། །གསུམ་པ་ནི། རྒྱས་པ་ལས། ཆོས་ཀྱི་དབྱིངས་ཀྱི་ཀུན་ལ་ཁྱབ་གྱུར་ཀྱང་། །རང་རིག་རྟོགས་པའི་སྐབས་དང་མི་ལྡན་ན། །ཇི་ལྟར་དམུས་ལོང་མདུན་དུ་མདོག་བསྟན་བཞིན། །འདི་ནི་སྐལ་མེད་རིགས་ཆད་ས་པ་ཡིན། །ཞེས་དང་། ཐུན་མོང་གི་ལུང་ལས་ཀྱང་། ལ་ལ་ཐར་པ་ཆ་མཐུན་དགེ་བ་མེད། །ཅེསདང་། དཀར་པོ་དམན་པ་ཡོད་པ་རྒྱུ་དང་བྲལ། །ཞེས་སོ། །དེ་ལ་ཁ་ཅིག་ན་རེ། རང་བཞིན་གྱི་རིགས་ཆད་ཡོད་དེ། །འདི་ཉིད་ལས། ཡང་དག་པའི་ལམ་དང་བྲལ་བ་དག ཅེས་དང་། རྩ་བ་ཡིན་ཏེ་རིགས་མེད་གྱུར། །ཅེས་བཤད་པའི་ཕྱིར་ཟེར་ན། དེ་ཆོས་ཅན། ཁྱོད་ལ་སངས་རྒྱས་ཀྱི་རྒྱུ་བདེ་གཤེགས་སྙིང་པོ་མེད་པར་ཐལ། ཁྱོད་རིགས་ཆད་ཀྱི་སེམས་ཅན་ཡིན་པའི་ཕྱིར། རྟགས་ཁས། འདོད་ན། བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ། །ཅེས་དང་། དགྱེས་རྡོར་གྱི་རྒྱུད་ལས་ཀྱང་། འདི་ཉིད་ཡེ་ཤེས་ཆེན་པོ་སྟེ། །བརྟན་དང་གཡོ་བར་ཁྱབ་ནས་གནས། །ཞེས་སོགས་དང་འགལ་ལོ། །རྩ་བའི་ལུང་དོན་ནི། རེ་ཞིག་ཐར་ཐོབ་ཀྱི་སྐལ་བ་མེད་པ་ལ་རིགས་ཆད་ཅེས་བྱ་སྟེ། སྤྱན་འགྲེལ་ལས། དེ་ནས་ཡུན་རིང་དུ་འགྱང་པ་ཙམ་ལ་བརྗོད་པའོ། །ཞེས་གསུངས། གཉིས་པ་ནི། ལམ་རིགས་བཞི་ནས་སྐྱེ་བ་ཡིན་ཏེ་ལྷ་མི་དང་། ཉན་རང་དང་བྱང་སེམས་དང་། ཕྱི་རྒྱུད་རྣམས་རིམ་གྱིས་བགྲོད་པའམ། གང་རུང་ལ་སྦྱོར་འཕྲོ་ནས་འདིར་འཇུག་པའོ། །དེ་ཡང་ལམ་རིམ་ལས། གཞི་ཡི་ཐེག་པ་དང་པོར་ཞོག །དེ་ནས་རིམ་གྱིས་བགྲོད་བྱ་སྟེ། །ཞེས་དང་། ལམ་ཆུང་ལས། ལ་ལ་ཐུན་མོང་ལམ་རྣམས་ནས། །རྐྱེན་རྒྱུས་འདིར་འཇུག་བསླབ་པར་ངེས། །ཞེས་སོ། །གསུམ་པ་ནི། འོག་མའི་འབྲས་བུ་མཐར་ཕྱིན་ནས་འདིར་འཇུག་པ་སྟེ། ལམ་ཆུང་ལས། ཐུན་མོང་ས་མཐར་བྱས་པའི་ཚེ། །ཞེས་སོ། །སེམས་སྐྱེ་བའི་རྐྱེན་ནི། ལམ་རིམ་ལས། གཤིན་རྗེ་མགོན་ལས་ལུགས་གཉིས་ཐོས། །ཡོན་ཏན་མཐོང་དང་སྐྱོན་མཐོང་དང་། །དེ་ཡི་སྐྱོ་རྨོངས་བྲེད་དང་བས། །གཉིས་པའི་རྒྱུ་རུ་གསུངས་པ་ཡིན། ། ― MLP018_Page_0272 ―
[མ་དཔེ་གཟིགས་ན་འདིར་གནོན།]
ཞེས་སོ། །དེ་ལ་ཁ་ཅིག་ན་རེ། ལམ་རིགས་བཞི་ནས་སེམས་བསྐྱེད་པ་མི་འཐད་དེ། རང་རྒྱལ་སྔགས་ལམ་དུ་མི་འཇུག་པའི་ཕྱིར་ཏེ། དེ་ནས་སྐྱེ་བ་སྔ་མ་སྨོན་ལམ་གསུམ་བཏབ་ནས་སངས་རྒྱས་དང་ཉན་ཐོས་མི་བཞུགས་པའི་དུས་སུ་འབྱུང་བར་བཤད་དེ། ཐུན་མོང་གི་གསུང་ལས། སངས་རྒྱས་རྣམས་ནི་མི་འབྱོན་ཞིང་། །ཉན་ཐོས་རྣམས་ཀྱང་ཟད་པ་ན། །རང་སངས་རྒྱས་ཀྱི་ཡེ་ཤེས་ནི། །བརྟེན་པ་མེད་པར་རབ་ཏུ་སྐྱེ། །ཞེས་གསུངས་པའི་ཕྱིར་ཟེར། དེ་དགག་པ་ལ་རིགས་པ་དང་ལུང་གཉིས་ཏེ། རིགས་པ་ནི། རང་རྒྱལ་ཆོས་ཅན། ཁྱོད་སངས་རྒྱས་ཀྱི་དངོས་ཀྱི་གདུལ་བྱ་མ་ཡིན་པར་ཐལ། དམ་བཅའ་དེ་འཐད་པའི་ཕྱིར། འདོད་ན། དེ་ཆོས་ཅན། དེར་ཐལ་ཏེ། འདི་ཉིད་ལས། རང་རྒྱལ་རྣམས་ལ་བསེ་རུའི་ཚུལ། །ཞེས་གསུངས་པའི་ཕྱིར་རོ། །གཉིས་པ་ལུང་གིས་གྲུབ་སྟེ། རྣམ་སྣང་སྒྱུ་དྲྭ་ལས། རང་རྒྱལ་རྣམས་ལ་གྲོགས་པོའི་གཟུགས། །བསྟན་ནས་ཐེག་ཆེན་དམིགས་ལ་འཛུད། །ཅེས་དང་། རྣམ་པར་འཕྲུལ་པའི་རྒྱལ་པོས་ཞུས་པའི་མདོ་ལས། གང་དག་རང་སངས་རྒྱས་ཀྱི་གཟུགས་ཀྱིས་གདུལ་བར་བྱ་བ་དེ་དག་ལ་ནི་རང་སངས་རྒྱས་ཀྱི་གཟུགས་སུ་འདུག་སྟེ་རྟེན་ཅིང་འབྲེལ་བར་འབྱུང་བ་དང་ལྡན་པའི་ཆོས་བརྡས་ཡང་དག་པར་སྟོན་ཏེ། ཞེས་སོ། །གསུམ་པ་སྐྱེ་ཚུལ་ནི། དབང་པོ་ལ་ལྟོས་ཏེ་རིམ་དང་ཅིག་ཅར་དུ་འཇུག་པས་སྐྱེ་བ་ཡིན་ཏེ། ལམ་རིམ་ལས། དེ་ཡང་རང་བཞིན་སྦྱངས་པ་ཡིས། །སྣོད་དུ་གྱུར་པས་ཉེ་རིང་ཕྱིར། །རིམ་དང་ཅིག་ཅར་བཞི་ཆ་ཡིས། །ཕྱེ་བས་རྣལ་འབྱོར་ཆེན་པོར་འཇུག །ཅེས་སོ། །དབྱེ་ན། རང་རྣོ་དང་། སྦྱངས་རྣོ་གཉིས་ལས། རང་རྣོ་ནི། རང་གནས་རྒྱལ་པོའི་འགྲེལ་པར་ཆོས་ཉིད་ཀྱི་རིགས་པས་མུན་པའི་ས་ནས་སེམས་ཕལ་པ་བརྒྱད་སྐྱེ་སྟེ། ཞེས་གསུངས་པའི་ཕྱིར་རོ། །སྦྱངས་རྣོ་ནི། ལམ་རིམ་ལས། བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་པའི། །ཤེས་རབ་མིག་ལྡན་འདིར་འཇུག་ཕྱིིར། །རིང་བའང་རིམ་དང་ཅིག་ཅར་བའོ། །ཞེས་སོ། །ཁ་ཅིག་ན་རེ། དབང་རྣོན་ཡིན་ན་སྦྱངས་རྣོ་ཡིན་པས་ཁྱབ་སྟེ། རང་བཞིན་གྱི་དབང་རྣོན་གཞི་མ་གྲུབ་པའི་ཕྱིར་ཟེར། འོ་ན། ཆོས་ཉིད་ཀྱི་རིགས་པས་དབང་པོ་ཆིག་ཆོད་ ― MLP018_Page_0273 ―
[མ་དཔེ་གཟིགས་ན་འདིར་གནོན།]
དུ་གནས་པའི་གང་ཟག་དེ་ཆོས་ཅན། དེར་ཐལ། དེའི་ཕྱིར། མ་གྲུབ་ན། ཀུན་བྱེད་རྒྱལ་པོའི་རྒྱུད་ལས། ལྷ་མིའི་སེམས་ཅན་དབང་པོ་མི་མཐུན་པས། །ལ་ལ་དབང་པོ་ཡེ་ནས་ཆིག་ཆོད་ཡོད། །ལ་ལ་སྦྱངས་པའི་དབང་པོ་འཕྲོ་ཅན་ཡོད། །ཅེས་དང་། མངོན་པ་མཛོད་ལས་ཀྱང་། ཁ་གཅིག་ཐོག་མ་ནས་དེའི་རིགས། །ཁ་གཅིག་སྦྱངས་པ་ལས་གྱུར་པའོ། །ཞེས་སོགས་ཀྱིས་སོ། །རྩ་བར་འདོད་ན། ལམ་རིམ་ལས། མ་སྦྱངས་གྲུབ་པ་གསུམ་ཕྱིར་གྱིས། །མཐོ་བརྟན་མྱུར་རྣམས་རྒྱ་ཆེ་ཡངས། །ཟབ་མོ་རྒྱུ་ཡི་གང་ཟག་དེ། །ཞེས་སོགས་དང་འགལ་ལོ། །བཞི་པ་སྐྱེས་པ་རང་གི་ངོ་བོ་ནི། དཔེ་ཆུང་ལས། འཇིག་ལྡང་ལ་སོགས་བྱང་སེམས་ལྔ། །ངེས་པར་སྐྱེས་པ་ངོ་བོར་འདོད། །ཅེས་སོ། །དེ་ལ་གཉིས་ཏེ། གྲོལ་ལམ་དང་ཐབས་ལམ་གྱི་སེམས་ལྔའོ། །དང་པོ་ནི། སྤྱན་འགྲེལ་ལས། དང་པོ་གཡོ་ལྡང་བྱང་ཆུབ་སེམས། །གཉིས་པ་སྨོན་པ་གསུམ་འཇུག་སེམས། །གནས་པ་མཐར་ཕྱིན་བཞི་ལྔ་པ། །ཞེས་སོ། །གཉིས་པ་ཐབས་ལམ་གྱི་སེམས་ལྔ་ནི། ཁམས་ཉེར་གཅིག་པ་ལས། འཇིག་དང་ལྡང་དང་གནས་པ་དང་། །སྨོན་པ་བྱང་ཆུབ་སེམས་ཡིན་ནོ། །གཡོ་དང་བསྐྱོད་དང་ལྡང་དང་གནས། །ཞེས་སོ། །གྲོལ་ལམ་གྱི་མཚན་ཉིད་ནི། གཙོ་བོར་ཐོས་བསམ་སྒོམ་གསུམ་གྱི་སྒོ་ནས་འཆིང་བ་ཆོས་ཉིད་དུ་གྲོལ་བར་བྱེད་པའི་རིགས་གནས་ཏེ། འདི་ཉིད་ལས། ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །ཅེས་སོ། །ཐབས་ལམ་གྱི་མཚན་ཉིད་ནི། གཙོ་བོར་ཐབས་དང་གདམས་ངག་གི་སྒོ་ནས་འཆིང་བ་ལ་བརྟུལ་ཞུགས་ཀྱི་སྤྱོད་པས་འབྲས་བུ་མྱུར་དུ་འགྲུབ་པར་བྱེད་པའི་རིགས་ཅན་ཏེ། ངོ་མཚར་ངན་འགྲོ་ཐར་པའི་ཐབས། །ཡེ་ནས་སྐྱེ་མེད་དེ་བཞིན་ཉིད། །སྒྱུ་མར་སྣང་བ་མིག་ཡོར་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །ཅེས་སོ། །དེ་ལྟར་ལམ་དེ་གཉིས་དཔེས་མཚོན་ནས་བཤད་ན་བདེ་བླག་ཏུ་གོ་བར་འགྱུར་ཏེ། མཀྵི་ཀའི་སྦྱོར་བས་ལྕགས་ཁམས་གསེར་དུ་བསྒྱུར་བ་བཞིན་ཐབས་ལ་མཁས་པའི་མྱུར་ལམ་ཡིན་པས་ཐབས་ལམ་དང་དེ་ལ་མ་བརྟེན་པར་གསེར་འགྱུར་གྱི་ཐབས་གཞན་མེད་པའང་ ― MLP018_Page_0274 ―
[མ་དཔེ་གཟིགས་ན་འདིར་གནོན།]
མ་ཡིན་ཏེ། རིན་པོ་ཆེ་ཀོ་ཏུ་བྷ་དང་ལྷན་ཅིག་བཞག་པའི་རྡོའི་ཁམས་གསེར་དུ་འགྱུར་བ་ཉིད་གྲོལ་ལམ་གྱི་དཔེའོ་ཞེས་བཞེད་དོ། །དེ་ལ་གྲོལ་ལམ་ནི། འདི་ཉིད་ལས། རིམ་གྱིས་ཡང་ན་ཅིག་ཅར་དུ། །ཞེས་པས་རིམ་གྱིས་པ་ནི། འདི་ཉིད་ལས། ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་པས་མཚན་ཉིད་གསུམ་སྟེ། དང་པོ་རྒྱུ་ཤེས་པའི་མཚན་ཉིད་ལྟ་བ་ནི། ལམ་བསྒོམ་པའི་སྔོན་དུ་འགྲོ་དགོས་ཏེ། མ་རྟོགས་པར་བསྒོམས་ཀྱང་ལྟུང་བར་བཤད་པའི་ཕྱིར་ཏེ། ལམ་རིམ་ལས། བསམ་གྱིས་མི་ཁྱབ་མ་མཐོང་བར། །བསམ་མེད་དཀྱིལ་འཁོར་འཇུག་བྱེད་པ། །བླུན་པོ་མུན་སྤྲུལ་བློ་ཅན་དེ། །ལོང་བའི་གྲོང་ཁྱེར་ཆེན་པོར་འགྲོ། །ཞེས་གསུངས་པས་དེ་ཁོ་ན་ཉིད་ལྟ་:བུའི་བའི་རྒྱུད་ཀྱི་སྐབས་སུ་འོག་ཏུ་འཆད་དོ། །གཉིས་པ་རྐྱེན་འཇུག་པའི་མཚན་ཉིད་ཏིང་ངེ་འཛིན་ནི། མོས་སྒོམ་དང་ངེས་རྫོགས་གཉིས་ལས། དང་པོ་ནི། ཏིང་ངེ་འཛིན་ལ་བརྟན་པ་མ་ཐོབ་ཀྱང་མོས་པ་ལམ་དུ་བྱེད་པ་སྟེ། ལམ་རིམ་ལས། སྤྲོས་པའི་འཁོར་ལོ་མོས་བསྒོམ་ཞིང་། །ཞེས་སོ། །གཉིས་པ་ངེས་རྫོགས་ནི། ལམ་སོ་སོ་ལ་གཡོ་ཐོབ་གོམས་བརྟན་མཐར་ཕྱིན་གྱི་ཉམས་ལྔ་མཐར་ཕྱིན་པར་བསླབ་པ་སྟེ། བི་མ་ལའི་ཕྱག་རྒྱ་བསམ་གཏན་ལས། གཡོ་ཐོབ་གོམས་བརྟན་མཐར་ཕྱིན་ལྔ། །བསམ་གཏན་ཉམས་ཀྱི་སྐྱེ་ཚུལ་ཡིན། །ཞེས་གསུངས་པའི་ཕྱིར་རོ། །ངེས་རྫོགས་ཀྱི་ལམ་དེ་ལ་དབྱེ་ན། ལམ་རིམ་ལས། སྲིད་པ་རིམ་པར་སྨིན་ཚུལ་གྱིས། །འཇུག་པའི་ཡན་ལག་ལྔ་རུ་བཞག །ཅེས་པས་ཚོགས་སྦྱོར་གྱི་ལམ་ལྔ་སྟེ། སྟོང་པ་ཆེན་པོ། སྙིང་རྗེ་སྒྱུ་མ། ཕྱག་རྒྱ་གཅིག་པ། ཕྱག་རྒྱ་སྤྲོས་བཅས་ཏེ་ཚོགས་ལམ་གྱི་རྣལ་འབྱོར་བཞི་དང་། སྦྱོར་ལམ་ཚོམ་བུ་ཚོགས་ཀྱི་རྣལ་འབྱོར་རོ། །འདིར་དེ་རེ་རེ་ཡང་ཆོས་བཞི་བཞིས་སྟོན་པ་ལས་དང་པོ་ཚོགས་ལམ་སྟོང་པ་ཆེན་པོའི་དེ་བཞིན་ཉིད་ཀྱི་ཏིང་འཛིན་ལ། མཚན་ཉིད་ནི། ཆོས་སྐུའི་རྟོགས་པ་རྒྱུ་མཐུན་དུ་སྒྲུབ་པར་བྱེད་པའི་ཐར་པ་ཆ་མཐུན་གྱི་རིགས་གནས། དེ་ཡང་མི་དམིགས་པ་སྟོང་པ་ཉིད་ལ་བློ་གནས་པར་བྱེད་པའི་ཐབས་ལ་འབད་པ་འགྲུབ་སྟེ། ― MLP018_Page_0275 ―
[མ་དཔེ་གཟིགས་ན་འདིར་གནོན།]
ཁོག་གཞུང་ལས། དངོས་གྲུབ་མྱུར་དུ་འགྲུབ་འདོད་ན། །ཤིན་ཏུ་མི་དམིགས་དབྱིངས་སུ་བསྒོམ། །ཞེས་སོ། །གཉིས་པ་རྣམ་གྲངས་ནི། སྣང་སྟོང་གཉིས་སུ་མེད་པའི། ལྷུན་གྱིས་གྲུབ་པའི། མཉམ་པ་ཉིད་ཀྱི་དེ་བཞིན་ཉིད་དེ། ལམ་རིམ་ལས། གཉིས་མེད་ལྷུན་མཉམ་དེ་བཞིན་ཉིད། །ཅེས་སོ། །གཉིས་པ་ཚོགས་ལམ་སྙིང་རྗེ་སྒྱུ་མའམ་ཀུན་སྣང་གི་ལམ་ལ་གསུམ་ལས། དང་པོ་མཚན་ཉིད་ནི། སྟོང་འཛིན་གྱི་འཆིང་བ་དགྲོལ་ཞིང་གཟུགས་སྐུའི་རྟོགས་པ་རྒྱུ་མཐུན་དུ་སྒྲུབ་པར་བྱེད་པའི་ཐར་པ་ཆ་མཐུན་ནོ། །དེ་ཡང་རང་རིག་སྒྱུ་མ་ལྟར་གསལ་བའི་སྙིང་རྗེ་བསྐྱེད་པ་སྟེ། ལམ་རིམ་ལས། རང་རིག་ཡེ་ཤེས་སྙིང་རྗེས་གཟིགས། །ཞེས་སོ། །གཉིས་པ་རྣམ་གྲངས་ལ། འཁོར་བའི་ཆོས་ལ་ལྟོས་ནས་ལོག་རྟོག རྟེན་འབྲེལ། དངོས་པོ། སྒྱུ་མ་དང་གསུམ། འདས་པའི་ཆོས་ལ་ལྟོས་ནས། ཐབས། ཡེ་ཤེས་ཕྱག་རྒྱ་སྒྱུ་མ་གསུམ་དུ་ཕྱེ་བས་དྲུག་གོ །གསུམ་པ་ཕྱག་རྒྱ་གཅིག་པ་ལ་གསུམ་ལས། དང་པོ་མཚན་ཉིད་ནི། སྣང་སྟོང་ཐ་དད་དུ་ཞེན་པ་དགག་ཅིང་རྟོག་ཚོགས་སྐུ་དང་ཡེ་ཤེས་སུ་གསལ་བའི་ཐར་པ་ཆ་མཐུན་ནོ། །ཕྱག་རྒྱ་བཞི་ལྡན་གྱི་སྐུ་སྣང་སྟོང་དབྱེར་མེད་དུ་གསལ་བ་སྟེ། འདི་ཉིད་ལས། མཁའ་དཀྱིལ་དྭངས་པའི་དབྱིངས་ཉི་ཟླ། །ཡེ་ཤེས་རྒྱལ་པོ་སྟངས་དཔྱལ་བསྒོམ། །ཞེས་སོ། །གསུམ་པ་རྣམ་གྲངས་ལ། དོན་གྱི་རྒྱ་གཅིག་པ་དང་། རྟགས་ཀྱི་རྒྱ་གཅིག་གོ ། དང་པོ་ནི། བདེན་པ་དབྱེར་མེད་རང་གི་མཚན་ཉིད་དུ་རྫོགས་པའོ། །གཉིས་པ་ལ་ཕྲ་རགས་གཉིས་ལས། ཕྲ་བ་ནི། ཡིག་འབྲུ་ལ་བསླབ་པ་སྟེ། རྒྱས་པ་ལས། ཕྱི་ནང་སྣོད་བཅུད་ཧཱུཾ་དུ་བསྡུ། །ཞེས་སོ། །རགས་པ་ནི། ལྷའི་སྐུ་ཕྱག་རྒྱ་གཅིག་པ་བསྒོམ་པ་སྟེ། ཞི་བ་རྒྱན་གཅིག་པ་དང་། ཁྲོ་བོ་རྒྱན་གཅིག་པའོ། །བཞི་པ་ཕྱག་རྒྱ་སྤྲོས་བཅས་ལ་གསུམ་ལས། དང་པོ་མཚན་ཉིད་ནི། སྤྲོས་བཅས་ལས་སུ་རུང་བས་ཚོགས་སྒྲུབ་ཀྱི་དངོས་རྒྱུར་འགྱུར་རུང་གི་ཐར་པ་ཆ་མཐུན་ནོ། །དེ་ཡང་རྟོག་ཚོགས་མཐའ་དག་རིག་པ་གཉིས་མེད་ཀྱི་ལྷའི་དཀྱིལ་འཁོར་དུ་གསལ་བར་བསྒོམ་པ་སྟེ། རིམ་དྲུག་ལས། དེ་ཕྱིར་བདེན་གཉིས་དབྱེ་བ་མེད། །ཕྱི་ནང་སྣོད་བཅུད་ཡེ་ནས་དག །ཅེས་སོ། །གསུམ་པ་རྣམ་གྲངས་ལ། རང་བཞིན། འབྲས་བུ། ལམ་ཕྱག་ ― MLP018_Page_0276 ―
[མ་དཔེ་གཟིགས་ན་འདིར་གནོན།]
རྒྱ་སྤྲོས་པ་དང་གསུམ་ལས། དང་པོ་ནི། རྟོག་ཚོགས་ཐམས་ཅད་ཡེ་ནས་ལྷའི་དཀྱིལ་འཁོར་དུ་གནས་པའོ། །གཉིས་པ་ནི། འོག་མིན་ན་འཁོར་ལོ་ཚོགས་ཆེན་གྱི་སངས་རྒྱས་དུ་མ་སྙེད་བཞུགས་པ་དེའོ། །གསུམ་པ་ལ། ཞི་བ་ཁྲོ་བོ་གཉིས། དེ་གཉིས་ཀ་ལ། དཀྱིལ་འཁོར་སྤྲོས་པ། ཚོམ་བུ་སྤྲོས་པ། ཞལ་ཕྱག་སྤྲོས་པ། རྣམ་གྲངས་སྤྲོས་པ་དང་བཞི་ལས། དང་པོ་ལ་རྒྱས་འབྲིང་བསྡུས་གསུམ་མོ། །གཉིས་པ་ལ་གཅིག་གསུམ་ལྔ་པའོ། །གསུམ་པ་ལ་ཞལ་གཅིག་ཕྱག་གཉིས་པ་དང་། ཞལ་གསུམ་ཕྱག་དྲུག་པ། ཁྱད་པར་ཁྲོ་བོ་ལ་དབུ་དགུ་ཕྱག་བཅོ་བརྒྱད་པ་ནས། དབུ་ཕྱག་གྲངས་མེད་པའི་བར་རོ། །བཞི་པ་ནི། ཞི་བ་ལ་སངས་རྒྱས་སྟོང་དང་། ཉི་ཁྲི་བཞི་སྟོང་དང་། བསམ་ཡས་ལྷུན་གྲུབ་གསུམ། ཁྲོ་བོ་ལ་སྟོང་བཞི་བརྒྱ་ལྔ་བཅུ་དང་། བདུན་ཁྲི་དྲུག་སྟོང་བརྒྱད་བརྒྱ་ལྔ་བཅུ། བསམ་ཡས་ལྷུན་གྲུབ་གསུམ་མོ། །ལྔ་པ་སྦྱོར་ལམ་བར་ཆད་མེད་པའི་ལམ། ཚོམ་བུ་ཚོགས་སྒྲུབ་ལ་གཉིས་ལས། དང་པོ་མཚན་ཉིད་ནི། ལམ་གཞན་གྱིས་བར་མ་ཆོད་པར་ཆོས་ཉིད་རང་མཚན་མཐོང་བ་ལ་དངོས་སུ་སྦྱོར་བར་བྱེད་པའི་ངེས་འབྱེད་ཆ་མཐུན་ཏེ། འདི་ཉིད་ལས། རྣལ་འབྱོར་ཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོས་པ་འགྲུབ། །ཅེས་སོ། །དེ་ཡང་རྟོགས་ཚོགས་ཐམས་ཅད་སྣང་སྟོང་གཉིས་མེད་ལྷའི་དཀྱིལ་འཁོར་དུ་གསལ་ཞིང་བརྟན་པ་ལ་བློ་གནས་པའོ། །འདི་ཉིད་ལས། སྒྱུ་འཕྲུལ་དྲྭ་བས་མངོན་རྫོགས་པའི། །དཀྱིལ་འཁོར་བསྟན་པའི་ཏིང་ངེ་འཛིན། །ཞེས་གསུངས་པའི་ཕྱིར་རོ། །གསུམ་པ་རྣམ་གྲངས་ལ། ཞི་བ་དང་ཁྲོ་བོའ་ཚོགས་སྒྲུབ་གཉིས། དེ་གཉིས་ཀ་ཉམས་སུ་ལེན་པའི་དུས་སུ། ཕུན་སུམ་ཚོགས་པ་ལྔས་གཞི་བཟུང་། བསྙེན་སྒྲུབ་བཞིས་གཞུང་བསྲང་། རིག་འཛིན་འགྲུབ་པའི་དུས་གསུམ་དུ་བཅིངས་ཏེ་ཉམས་སུ་ལེན་པའོ། །ཞར་བྱུང་ཚོགས་སྦྱོར་གྱི་ལམ་ལྔ་ལ་རྩོད་པ་སྤོང་བ་ནི། འདོད་པ་བརྗོད་པ་དང་ལན་གཉིས་ལས། ཁ་ཅིག་ན་རེ། སྟོང་པ་ཆེན་པོའི་ལམ་དེ། རྒྱུ་ཤེས་པའི་ལྟ་བ་ལས་ངན་དུ་སོང་བར་ཐལ། དོན་དམ་རྐྱང་པ་བསྒོམ་པའི་ཕྱིར་དང་། སྙིང་རྗེ་སྒྱུ་མའི་སྐབས་སུ་ལམ་གོང་དུ་བགྲོད་པ་དོན་མེད་པར་ཐལ། སྔ་མ་དོན་དམ་ལས་ཕྱི་མ་ཀུན་རྫོབ་ཁ་སྤོས་པས་ ― MLP018_Page_0277 ―
[མ་དཔེ་གཟིགས་ན་འདིར་གནོན།]
ངན་དུ་སོང་བའི་ཕྱིར་དང་། སྒྱུ་མའི་ཆོས་དྲུག་ལས། ལོག་རྟོག རྟེན་འབྲེལ། དངོས་པོ་སྒྱུ་མ་གསུམ་སྒོམ་པས་གྲོལ་ན། སེམས་ཅན་ཐམས་ཅད་འབད་མེད་དུ་གྲོལ་བར་ཐལ། དེ་དག་ལ་གོམས་ཤིང་བར་མེད་དུ་སྤྱོད་པའི་ཕྱིར་ཟེར་ན། གཉིས་པ་དེ་དག་དགག་པ་ལ་ལུང་རིགས་གཉིས་ལས། དང་པོ་ལུང་ནི། རྣམ་བཀོད་ལས། དེ་ལྟར་ཚུལ་གསུམ་བརྗོད་པ་ཡིས། །མཐོང་བ་གང་ཡིན་ཤེས་རབ་སྤྱན། །དེ་ཡང་མངོན་སུམ་གཞན་ཡང་ཏེ། །སྒྲ་ཚིག་རྟེན་འབྲེལ་ཞན་ཙམ་མིན། །ཡུམ་མིན་རང་རིག་བདེན་དབྱེར་མེད། །བློ་ཡི་གཏིང་གོ་མངོན་སུམ་ཡུལ། །ཞེས་སོ། །རིགས་པ་ནི། ཚོགས་ལམ་སྟོང་པ་ཆེན་པོ་ལ་གནས་པའི་གང་ཟག་ཆོས་ཅན། ཁྱོད་ཐོས་བསམ་གྱི་ལྟ་བ་དོན་སྤྱི་རྟོགས་པ་དེ་སྔགས་ཀྱི་ཚོགས་ལམ་ཐོབ་ནས་མངོན་སུམ་གྱིས་ཉམས་སུ་མྱོང་ནས་གསལ་བར་རྟེན་དུ་བྱས་པ་མ་ཡིན་པར་ཐལ། དོན་སྤྱི་ལས་མངོན་སུམ་གྱིས་མྱོང་བ་དེ་སྔར་ལས་ངན་པར་ཁས་བླངས་པའི་ཕྱིར། དེ་རིགས་ཀྱི་སྐབས་ལུང་ནི། སྔ་མ་སྔ་མ་རྒྱུད་ལྡན་པས། །ཕྱི་མ་ཕྱི་མ་གསལ་བར་བྱེད། །ཅེས་པས། དེ་རིགས་རྒྱུད་ལ་ལྡན་པའི་སྟེང་ཀུན་སྣང་གི་ཡོན་ཏན་ལྡན་པའི་ཕྱིར་རོ། །རིགས་པ་ནི། ཚོགས་ལམ་སྙིང་རྗེ་སྒྱུ་མ་ལ་གནས་པ་དེ་ཆོས་ཅན། ཁྱོད་བདེན་གཉིས་རེས་འཇོག་ཏུ་བྱེད་པའི་གང་ཟག་ཏུ་ཐལ། ཁྱོད་སྔ་མ་དོན་དམ་ལས་ཕྱི་མ་ཀུན་རྫོབ་ལ་ཁ་སྤོས་པས་ངན་དུ་སོང་བའི་ཕྱིར། རྟགས་ཁས། འདོད་ན། དེ་ཆོས་ཅན། ཁྱོད་ཀྱི་རྒྱུད་ཀྱི་སྣང་བ་ཀུན་རྫོབ་བདེན་པ་དེ་དག་པ་ལྷར་སྣང་གི་ཀུན་རྫོབ་མ་ཡིན་པར་ཐལ། དོན་དམ་སྒྲིབ་བྱེད་ཀྱི་ཀུན་རྫོབ་ལ་འདོད་པའི་ཕྱིར་ཏེ། འཇུག་པར། གཏི་མུག་རང་བཞིན་སྒྲིབ་ཕྱིར་ཀུན་རྫོབ་སྟེ། །ཞེས་བཤད་པ་ལ་འདོད་པའི་ཕྱིར། ཡང་སྒྱུ་མའི་ཆོས་དྲུག་སྒོམ་པའི་ལུང་། ཤེར་ཕྱིན་ལས། འཁོར་བ་ཡང་སྒྱུ་མ་ལྟ་བུ་རྨི་ལམ་ལྟ་བུ། མྱ་ངན་ལས་འདས་པ་ཡང་སྒྱུ་མ་ལྟ་བུ་རྨི་ལམ་ལྟ་བུ། ཞེས་སོགས་གསུངས་པས། ཆོས་ཐམས་ཅད་རང་བཞིན་མ་གྲུབ་པའི་ཚུལ་དུ་བལྟས་ནས་སྒོམ་པ་མ་གོ་བའི་ལོག་རྟོག་གོ །རིགས་པ་ནི། སྙིང་རྗེ་སྒྱུ་མ་ལ་གནས་པའི་ཚོགས་ལམ་པ་ཆོས་ཅན། ཁྱོད་ལོག་རྟོག རྟེན་འབྲེལ། དངོས་པོ་སྒྱུ་མ་རྣམས་བདེན་ཞེན་ཨ་འཐས་སུ་བྱེད་པའི་གང་ཟག་ཡིན་པར་ཐལ། ཁྱོད་ཀྱི་ ― MLP018_Page_0278 ―
[མ་དཔེ་གཟིགས་ན་འདིར་གནོན།]
དེ་གསུམ་ལ་སྤྱོད་པ་དེ་སེམས་ཅན་ཐ་མལ་པས་སྤྱོད་པ་དང་ཁྱད་མེད་པའི་ཕྱིར། རྟགས་ཁས། འདོད་ན། དེ་ཆོས་ཅན། མ་ཡིན་པར་ཐལ། ཁྱོད་ཀྱིས་དེ་གསུམ་འཛིན་མེད་སྒྱུ་མ་ལྟ་བུར་སྤྱོད་པའི་ཕྱིར། གཞན་ཡང་ཚོགས་སྦྱོར་གྱི་ལམ་ལྔའི་འབྲས་བུ་ལ་ལོག་རྟོག་བསལ་བ་ནི། དེ་ཏིང་གི་སྐབས་སུ། ལམ་རིམ་ལས། སྣང་སྟོང་དབྱེར་མེད་རྣལ་འབྱོར་མཐའ། །མངོན་བྱས་ལྷག་པའི་ཆོས་སྐུར་སྦྱོར། །ཞེས་པས་ཆོས་སྐུ་དང་། སྙིང་རྗེ་སྒྱུ་མའི་སྐབས་སུ། ལམ་འདིར་ཆ་རྐྱེན་རྫོགས་བསྒྲུབས་ན། །མཚན་དང་དཔེ་བྱད་ཀུན་དང་ལྡན། །དབང་ཕྱུག་ཆེན་པོའི་གནས་ཉིད་དུ། །མངོན་དུ་འབྱུང་བར་ཐེ་ཚོམ་མེད། །ཅེས་པས་ལོངས་སྐུ་དང་། ཕྱག་རྒྱ་གཅིག་སྤྲོས། ཚོགས་སྒྲུབ་གསུམ་གྱི་སྐབས་སུ། འདི་ཉིད་ལས། རྣལ་འབྱོར་ལས་སུ་རུང་རྣམས་ཀྱིས། །ཕྱག་རྒྱ་ཆེན་པོ་རྫོགས་འགྱུར་ཞིང་། །གསལ་ལ་ཡིད་གཉིས་མེད་པས་ན། །དཀྱིལ་འཁོར་ཆེན་པོ་འབར་བར་འགྱུར། །ཞེས་པས་སྤྲུལ་སྐུ་སྟེ་ངེས་པར་ཏིང་ངེ་འཛིན་དེ་དང་དེས་སྐུ་གསུམ་སོ་སོར་དངོས་སུ་ཐོབ་ཟེར་བ་མི་འཐད་དེ། དེ་ཏིང་གིས་ཆོས་སྐུ་ཐོབ་ན་སྙིང་རྗེ་སྒྱུ་མ་མན་ཆད་བསྒོམ་པ་དོན་མེད་དུ་འགྱུར་ཞིང་། ལམ་རིམ་ལས། ཕྱོགས་མཐུན་བརྗོད་ཀྱིས་རིགས་མ་ཡིན། །ཞེས་པ་དང་ཡང་འགལ་ལོ། །དེས་ན་འདི་དག་ཆོས་མཐུན་བརྩིས་པའི་སྐུ་གསུམ་གྱི་བརྒྱུད་རྒྱུ་ཙམ་དུ་ཁས་བླང་བར་བྱ་བའི་དོན་ནོ། །གསུམ་པ་ལམ་གྱུར་གྱི་འབྲས་བུའམ་ཟག་མེད་ཀྱི་ལམ་ལ་དབྱེ་བ་དང་། དེ་གཏན་ལ་དབབ་པ་གཉིས་ལས་དང་པོ་ལ། མཐོང་ལམ། སྒོམ་ལམ། མཐར་ལམ་རིག་འཛིན་ནོ། །མཐོང་ལམ་ལ་ཡང་། ནང་གསེས་ཀྱིས་དབྱེ་ན་གཉིས་སུ་འགྱུར་ཏེ། ལྷག་མེད་མྱང་འདས་རྣམ་སྨིན་དང་། ལྷག་བཅས་མྱང་འདས་ཚེ་དབང་གཉིས་སུ་ངེས་པའི་ཕྱིར། ལམ་རིམ་ལས། ལྷག་མ་མེད་དང་ཡོད་པ་ཡི། །མྱ་ངན་འདས་པས་མཐའ་སྦྱོར་བ། །ཞེས་པས་རིག་འཛིན་དེ་གཉིས་མཐོང་ལམ་དུ་ཁད་མཉམ་པར་བཤད་དོ། །གཉིས་པ་ལ། རྣམ་སྨིན་རིག་འཛིན། ཚེ་དབང་རིག་འཛིན། སྒོམ་ལམ་ཕྱག་རྒྱ་ཆེན་པོའི་རིག་འཛིན། མཐར་ལམ་ལྷུན་གྲུབ་རིག་འཛིན་བཤད་པའོ། །དང་པོ་ལ་དྲུག་ལས། མཚན་ཉིད་ནི། ཆོས་ཉིད་ཀྱི་བདེན་པ་མཐོང་ ― MLP018_Page_0279 ―
[མ་དཔེ་གཟིགས་ན་འདིར་གནོན།]
ཡང་བློ་ཆུང་བའི་སྟོབས་ཀྱིས་འབྱུང་བ་སྙིགས་མའི་ལུས་ཡེ་ཤེས་ཀྱི་མེས་སྦྱོང་བར་མ་ནུས་པའི་ལྷག་མེད་མྱང་འདས་སོ། །གཉིས་པ་ངོ་བོ། མཚན་ཉིད་གསུམ་ལྡན་ཏེ། ཡིད་ལྷའི་སྐུར་གསལ་ཞིང་རྫོགས་པར་སྨིན་པ། ལུས་རྣམ་སྨིན་ཤ་ཁྲག་གི་ཕུང་པོ་དང་མ་བྲལ་བ། ལུས་རྒྱ་དང་བྲལ་མ་ཐག་ཏུ་ཕྱག་རྒྱ་ཆེན་པོའི་རིག་འཛིན་ལ་སྦྱོར་བ་སྟེ། ལམ་རིམ་ལས། ཡིད་ཀྱིས་ལྷ་ཡི་གཟུགས་བཟུང་ཞིང་། །ལུས་ཀྱི་རྒྱ་མདུད་གྲོལ་གྱུར་ནས། །ལྷ་ཡི་སྐུ་ཉིད་གསལ་གྱུར་པ། །རྣམ་པར་སྨིན་ཞེས་དེ་ལ་བརྗོད། །ཅེས་སོ། །གསུམ་པ་རྣམ་གྲངས་ནི་རྣམ་སྨིན་གྱི་ལུས་འདི་རྒྱ་ཆེན་གྱི་སར་མི་ཁྱེར་བས་ན་ལྷག་མེད་མྱང་འདས་དང་། འབྱུང་བའི་ལུས་མེད་པ་དང་། ལས་ཀྱི་ལུས་མེད་པ་ཞེས་བྱ། རང་དོན་དུ་སྲིད་པའི་མངལ་ཕྱི་མ་མི་ལེན་པས་ན་སྲིད་པ་ཐ་མ་པ་ཞེས་ཀྱང་བྱ་སྟེ། ཡིད་ལྷའི་སྐུར་སྣང་བར་སྨིན་པའི་རྣམ་སྨིན་གྱི་ལུས་མ་དོར་བས་རྣམ་སྨིན་རིག་འཛིན་ཞེས་ཀྱང་བྱ་སྟེ། ལམ་རིམ་ལས། ལྷག་མེད་འབྱུང་མེད་ལས་ལུས་མེད། །མྱ་ངན་འདས་པའི་སྨིན་ཞེས་བརྗོད། །ཅེས་སོ། །བཞི་པ་ཆ་ལུགས་ནི་ལུས་སྔོན་གང་ཡིན་དང་རྩ་བའི་ལྷ་གང་ཡིན་གྱི་ཆ་ལུགས་འཛིན་པ་སྟེ། ཡིད་ཀྱིས་ལྷ་ཡི་གཟུགས་བཟུང་ཞིང་། །ཞེས་སོ། །ལྔ་པ་མངོན་ཤེས་ཀྱི་ཡུལ་དོན་ནི། ཟག་མེད་ལྷ་ཡི་སྤྱན་རྣམ་པར་དག་པ་ལ་སོགས་པས་གླིང་བཞི་པའི་འཇིག་རྟེན་ཙམ་ཡུལ་དུ་གྱུར་ཅིང་དེ་དག་གི་དོན་བྱེད་ནུས་པ་སྟེ། ལམ་རིམ་ལས། དཔག་ཚད་གླིང་ཁམས་ཡུལ་ལ་སྦྱོར། །ཞེས་སོ། །དྲུག་པ་འབྲས་བུ་ནི། རྣམ་སྨིན་གྱི་ལུས་རྒྱ་དང་བྲལ་མ་ཐག་ཏུ་ཕྱག་ཆེན་འོད་ཀྱི་ལུས་ལ་སྦྱོར་བ་སྟེ། དེ་ལས། གང་དེ་བྲལ་མ་ཐག་པ་རུ། །རྒྱ་བཞི་རྫོགས་པར་བདག་གྱུར་པ། །རྡོ་རྗེ་ལྔ་སོགས་རིག་པ་འཛིན། །ཕྱག་རྒྱ་ཆེན་པོའི་རིགས་འབྲས་བུ། །ཞེས་སོ། །ཚེ་དབང་རིག་འཛིན་ལ་ཆོས་དྲུག་ལས། དང་པོ་མཚན་ཉིད་ནི། ཆོས་ཉིད་རང་མཚན་གསལ་བའི་ངོ་བོར་བསྐྱེད་དུ་བྱར་མེད་པར་མཐོང་ཞིང་སྐྱེ་འཇིག་མེད་པ་རྡོ་རྗེའི་ལུས་སུ་གྱུར་པའི་ལྷག་བཅས་མྱང་འདས་སོ། །གཉིས་པ་ངོ་བོ་ནི། ལམ་རིམ་ལས། དོན་མཐོང་འཇུག་པ་མཐར་ཕྱིན་པའི། །ཚོགས་སྤྱོད་སྒྲུབ་པའི་དངོས་གྲུབ་ཀྱི། །ལུས་ཁམས་སྐྱེ་གནས་ཟག་པ་ཟད། །རྡོ་རྗེའི་ལུས་གྱུར་ཚེ་ཡི་རིག །ཅེས་ ― MLP018_Page_0280 ―
[མ་དཔེ་གཟིགས་ན་འདིར་གནོན།]
སོ། །གསུམ་པ་རྣམ་གྲངས་ནི། དེ་ལས། ངོ་བོ་ཐབས་དང་སྨིན་རིག་འཛིན། །རྣལ་འབྱོར་སྒྲོལ་མའི་རིག་འཛིན་དང་། །ལམ་མཆོག་རྫོགས་པའི་རིམ་པ་བཞི། །ཞེས་སོ། །དེ་ཡང་དང་པོ་གསུམ་རྟོགས་གོམས་ཀྱི་མཐུ་མེད་པས་རྫས་དང་ཐབས་རྐྱང་པ་ལ་བརྟེན་པའི་ཕྱིར་ཚེ་ལ་དབང་བར་འདྲ་ནའང་ཟག་བཅས་དང་། ཕྱི་མ་ནི་ཟག་མེད་དོ། །བཞི་པ་ཆ་ལུགས་ནི། མི་དང་འདོད་གཟུགས་ཀྱི་ལྷའི་གཙོ་བོའ་ཆ་བྱད་དུ་སྟོན་ཏེ། དེ་ལས། ལྷ་མིའི་རྒྱལ་པོའི་སྐྱེ་བ་འཛིན། །ཞེས་སོ། །དེ་ལྟ་ནའང་ལྷ་མི་གཞན་དང་ཁྱད་པར་ཆེ་སྟེ་སྐྱེ་བ་ལ་རང་དབང་ཅན་དུ་གནས་པའི་ཕྱིར་ཏེ། འདི་ཉིད་ལས། མི་དང་ལྷ་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ཀྱང་། །ཁྱད་པར་ས་ལ་གནས་འགྱུར་ཡིན། །ཞེས་སོ། །དེ་དག་ཀྱང་སྤྲུལ་པའི་ཆ་ལུགས་ཡིན་ཞིང་། རང་གི་ངོ་བོ་ནི། ད་ལྟའི་ལུས་འདི་རྡོ་རྗེའི་ལུས་ཀྱི་རྣམ་པ་ཅན་ནོ། །ལྔ་པ་མངོན་ཤེས་ཀྱི་ཡུལ་དེ་བཞིན་སྤྱིའི་མངོན་ཤེས་དྲུག་དང་། བྱེ་བྲག་ཏུ་སྒོ་ལྔའི་དབང་ཤེས་ཉི་ཤུ་རྩ་ལྔས་གླིང་བཞི་བྱེ་བ་ཕྲག་བརྒྱའི་ཞིང་ཁམས་དང་མཉམ་པ་ཡུལ་དུ་གྱུར་ཅིང་། དེ་སྙེད་ཀྱི་དོན་བྱེད་པ་སྟེ། ལམ་རིམ་ལས། གཉིས་སུ་མེད་པར་མངོན་རྟོགས་གོམས། །མཐོང་བས་དྲི་མ་དྲུག་སྦྱང་ཕྱིར། །དེ་སྙེད་གཟུགས་སྒྲ་དྲི་རོ་རེག །ཤེས་པའི་བྱེ་བྲག་རྩ་ལྔ་ཤར། །གཞན་དུ་ལྷ་ཡི་རྣ་བ་དང་། །སྤྱན་གྱི་མངོན་པར་ཤེས་པ་དང་། །ཕ་རོལ་གནས་ཀྱི་སེམས་ཤེས་དང་། །ཞེས་སོགས་གསུངས་སོ། །དྲུག་པ་འབྲས་བུ་ནི། རིམ་གྱིས་སམ་ཐོད་བརྒལ་བའི་ཚུལ་གྱིས་ལམ་གོང་མར་སྦྱོར་བ་སྟེ། ལམ་རིམ་ལས། སྔོན་བཞིན་རིམ་དང་ཅིག་ཅར་བའོ། །ཞེས་སོ། །གསུམ་པ་ཕྱག་རྒྱ་ཆེན་པོའི་རིག་འཛིན་ལ་དྲུག་ལས། དང་པོ་མཚན་ཉིད་ནི། བསྒོམ་བྱ་མངོན་དུ་གྱུར་པས་སྔོན་གང་བསྒོམས་ཀྱི་ལྷའི་ཆ་ལུགས་རང་མཚན་པ་འཛིན་ཅིང་མི་གཡོ་བའི་ཏིང་ངེ་འཛིན་གྱིས་ལྷན་ཅིག་གནས་པའི་དྲི་མ་སྦྱོང་བ་ལ་ཞུགས་པའི་བསླབ་པའི་རིག་འཛིན་ཏེ། ལམ་རིམ་ལས། རང་སེམས་ཕྱག་རྒྱ་ཆེན་པོ་སྟེ། །བསྒོམས་པས་མངོན་དུ་གྱུར་པའི་སྐུ། །ཐུན་མོང་མཆོག་གི་མཚན་དཔེར་ལྡན། །ལོངས་སྤྱོད་གཉིས་པ་ཕྱག་རྒྱའི་རིག །ཅེས་སོ། །གཉིས་པ་ངོ་བོ་ནི། ལམ་རིམ་ལས། ཡེ་ཤེས་སྐུ་ཡི་ཆ་ལུགས་ཅན། །འབྱུང་བ་རྡོ་རྗེའི་ལུས་ ― MLP018_Page_0281 ―
[མ་དཔེ་གཟིགས་ན་འདིར་གནོན།]
ལས་གྲོལ། །ཞེས་སོ། །གསུམ་པ་རྣམ་གྲངས་ནི། ཀྲི་ཡའི་རིགས་གསུམ། ཨུ་པ་ཡའི་རིགས་བཞི། ཡོ་གའི་རིགས་ལྔ། མ་ཧཱ་ཡོ་གའི་མཆོག་ལྔ་སྟེ། དེ་ལས། དེ་ཉིད་རིགས་གསུམ་རིགས་བཞི་དང་། །ལྔ་དང་མཆོག་ལྔའི་རིགས་འཛིན་པས། །ཞེས་སོ། །བཞི་པ་ཆ་ལུགས་ནི། ལྷ་སྐུ་ཕྱག་རྒྱ་ཆེན་པོ་ལས་མི་གཡོ་ཞིང་། ཞེས་དང་། རྔོན་དང་སྨད་འཚོང་ལ་སོགས་པ། །སྤྲུལ་པའི་ལུས་ཀྱིས་འདུལ་བར་བྱེད། །ཅེས་སོ། །ལྔ་པ་མངོན་ཤེས་ཀྱི་ཡུལ་དོན་ནི། རྣམ་ཤེས་དྲུག་གི་བྱེ་བྲག་ཉེར་ལྔ་དང་བཅས་པ་ཚེ་དབང་དང་འདྲ་ནའང་། འདི་གསལ་བརྟན་གྱིས་ཁྱད་པར་དུ་བྱས་ཤིང་། ཡུལ་ལོངས་སྐུའི་ཞིང་དང་མཉམ་པས། དོན་ཡང་དེ་སྙེད་དུ་བྱེད་པར་ནུས་པ་སྟེ། ལམ་རིམ་ལས། དེ་སྙེད་ཡུལ་གྱི་ཁྱད་པར་དང་། །དོན་རྫོགས་མཐུ་དང་གདུལ་བྱས་སྤགས། །ཞེས་སོ། །དྲུག་པ་འབྲས་བུ་ནི། ལམ་རིམ་ལས། ལྷན་ཅིག་གནས་པའི་དྲི་མ་དག །རྩོལ་བ་མེད་པར་ལྷུན་གྲུབ་ཐོབ། །ཅེས་སོ། །བཞི་པ་ལྷུན་གྲུབ་རིག་འཛིན་ལ་དྲུག་ལས། དང་པོ་མཚན་ཉིད་ནི། དབྱེར་མེད་ལམ་གྱི་རྟོགས་པ་མཐར་ཕྱིན་པའི་སངས་རྒྱས་ཀྱི་ས་ཐོབ་མ་རག་པའི་རྒྱུན་མཐའ་ལ་གནས་པའི་རིག་འཛིན་ཏེ། ལམ་རིམ་ལས། དེ་ལྟར་དག་པའི་ཤེས་པ་ཉིད། །སྐུ་ལྔ་ལྷུན་གྲུབ་རྡོ་རྗེ་འཛིན། །ལྷུན་མཉམ་ངང་ལས་མི་གཡོ་ཞིང་། །མི་རྟོག་ཉིད་དུ་བཞུགས་པའང་། །བག་ལ་ཉལ་བ་འཇོམས་བྱེད་ཅིང་། །སྐད་ཅིག་རག་ལས་རིག་འཛིན་མཐའོ། །ཞེས་སོ། །གསུམ་པ་རྣམ་གྲངས་ནི། བྱ་རྒྱུད་ཀྱི་རིགས་གསུམ། རྣལ་འབྱོར་རྒྱུད་ཀྱི་རིགས་གསུམ་ལྔ། རྣལ་འབྱོར་བླ་ན་མེད་པའི་སྐུ་ལྔ་ལྷུན་གྲུབ་ཀྱི་རྒྱལ་མཚན་རྣམ་པ་གསུམ་སྟེ། ལམ་རིམ་ལས། བྱ་བ་ལྷུན་གྲུབ་རྣལ་འབྱོར་གྱི། །རིག་འཛིན་ཆེན་པོ་ནང་རིག་འཛིན། །ཞེས་སོ། །བཞི་པ་ཆ་ལུགས་ནི། སྐུ་ལྔ་ལྷུན་གྲུབ་རྡོ་རྗེ་འཆང་ཆེན་པོའི་ཚུལ་འཛིན་པ་སྟེ། ལམ་རིམ་ལས། ཆ་བྱད་རྒྱལ་བ་ཉིད་དུ་སྟེ། །ལྔ་པོ་ལྷུན་གྱིས་གྲུབ་ཕྱིར་ན། །དེ་འདྲ་དེ་ཉིད་རྒྱལ་ཚབ་སྟོན། །ཞེས་སོ། །ལྔ་པ་མངོན་ཤེས་ཀྱི་ཡུལ་དོན་ནི། ཇི་སྙེད་མཁྱེན་པའི་ཡུལ་རྒྱལ་བ་ཉིད་དང་ཤས་ཆེར་འདྲ་ཞིང་ནམ་མཁས་ཁྱབ་ཚད་ཀྱི་དོན་ཡང་ཅི་རིགས་པར་མཛད་དེ། ལམ་རིམ་ལས། ཀུན་མཁྱེན་ཡེ་ཤེས་མངའ་བའི་ཕྱིར། །ཡུལ་ནི་ཚད་ ― MLP018_Page_0282 ―
[མ་དཔེ་གཟིགས་ན་འདིར་གནོན།]
མེད་རྒྱལ་བ་ཉིད། །ཇི་ལྟར་མེ་ལོང་ལྟ་བུའི་ཚུལ། །ཞེས་སོ། །དྲུག་པ་འབྲས་བུ་ནི། མཐར་ལམ་གྱི་སྐད་ཅིག་རྒྱུན་མཐའ་ལ་རྡོ་རྗེ་ལྟ་བུའི་ཏིང་ངེ་འཛིན་གྱིས་བདག་ཏུ་རྟོག་པ་བཟང་ངན་གྱི་མཚན་མ་བག་ལ་ཉལ་ཕྲ་བ་ཡང་བཅོམ་སྟེ་རྫོགས་སངས་རྒྱས་ཀྱི་སར་སྦྱོར་བ་ཉིད་དོ། །དེ་ལྟར་ཡང་སྔ་མ་ལས། རྡོ་རྗེ་ལྟ་བུའི་ཏིང་འཛིན་གྱིས། །བདག་རྟོག་མཚན་མ་ཀུན་བཅོམ་ནས། །རྡོ་རྗེ་དབྱིངས་སུ་ཐིམ་པར་བྱེད། །ཅེས་སོ། །གཉིས་པ་ཐོད་རྒལ་གྱི་ལམ་ལ། གང་ནས་འབྱུང་བའི་ས། གང་ལྟར་འབྱུང་བའི་གོ་བ། དེ་ལྟར་འབྱུང་མི་འབྱུང་གི་རྒྱུ་མཚན། ཇི་ལྟར་འབྱུང་བའི་ཚུལ། ཞར་ལ་ལོག་རྟོག་བསལ་བའོ། །དང་པོ་ནི། ཟག་བཅས་ཀྱི་ལམ་གྱི་ཕྱག་རྒྱ་གཅིག་སྤྲོས་གཉིས་དང་། ཟག་མེད་ཀྱི་ཚེ་དབང་དང་ཕྱག་ཆེན་གཉིས་ནས་འབྱུང་སྲིད་པའོ། །གཉིས་པ་ནི། ལམ་བར་ནས་བོར་ཏེ་གོང་མ་ལ་མཆོངས་ནས་སྦྱོར་བ་ཞིག་གོ །གསུམ་པ་ནི། ཐོད་རྒལ་འབྱུང་བ་ལ་ལམ་རིམ་གྱིས་པ་གང་ཞིག ཆོས་གསུམ་དང་ལྡན་དགོས་ཏེ། གསུམ་གང་ཞེ་ན། ལམ་གཞན་བར་ནས་བོར་དུ་ཡོད་པ། ངང་གིས་བློ་ཆེ་བ། སྟོང་ཉིད་སྙིང་རྗེ་དབྱེར་མེད་དུ་བསྒོམ་ནུས་པ་དང་གསུམ་གཞི་གཅིག་ལ་འཚོགས་པའོ། །བཞི་པ་ནི། རྒྱུ་མཚན་དེའི་ཕྱིར་དེ་བཞིན་དང་ཀུན་སྣང་གཉིས་དབྱེར་མེད་སྒོམ་པའི་ལམ་པ་མ་ཡིན་པའི་ཕྱིར་མི་འབྱུང་ལ། ཟག་བཅས་ཚོགས་སྒྲུབ་དང་། ལྷུན་གྲུབ་རིག་འཛིན་གཉིས་ལམ་བར་ནས་བོར་དུ་མེད་པའི་ཕྱིར་མི་འབྱུང་། རྣམ་སྨིན་གྱི་དངོས་འབྲས་རྒྱ་ཆེན་དུ་ངེས་པའི་ཕྱིར་མི་འབྱུང་ངོ་། །ལྔ་པ་ནི། ཁ་ཅིག་ན་རེ། ཚོགས་སྒྲུབ་ནས་ཀྱང་ཐོད་རྒལ་འབྱུང་སྟེ། རྒྱུད་ལས། གཉིས་མེད་གྱུར་ནས་ཕྱག་རྒྱ་ཆེ། །ཞེས་ཚོམ་བུ་གཅིག་པ་ནས་ཕྱག་ཆེན་ལ་སྦྱོར་བ་དང་། རིག་འཛིན་དངོས་གྲུབ་མཆོག་ཐོབ་འགྱུར། །ཞེས་ཚོམ་བུ་གསུམ་པ་ནས་ལྷུན་གྲུབ་རིག་འཛིན་ལ་སྦྱོར་བ་དང་། དངོས་གྲུབ་མཆོག་གི་སྙིང་པོ་འགྲུབ། །ཅེས་ཚོམ་བུ་ལྔ་པ་ནས་སངས་རྒྱས་སར་སྦྱོར་བར་བཤད་པའི་ཕྱིར་ཟེར་བ་མི་འཐད་དེ། རྒྱུད་ཀྱི་ལུང་ཚན་གསུམ་ནི་ཚོགས་སྒྲུབ་ཀྱི་དུས་ཚོམ་བུ་གཅིག་གསུམ་ལྔ་པ་བསྒྲུབས་པས་ཐོབ་པའི་ཚེ་དབང་དེ། རིམ་པར་རྒྱ་ཆེན། མཐར་ལམ་སངས་རྒྱས་ལ་སྦྱོར་བའི་ལུང་ཡིན་གྱི། ཚོགས་ ― MLP018_Page_0283 ―
[མ་དཔེ་གཟིགས་ན་འདིར་གནོན།]
སྒྲུབ་ནས་ཐོད་རྒལ་འབྱུང་བའི་ལུང་མ་ཡིན་ཏེ། གལ་ཏེ་ཡིན་ན་ཟག་མེད་ལམ་གྱི་འདུ་ས་དང་དབྱེ་ས་མཐོང་ལམ་མ་ཡིན་པར་ཐལ། ཚོགས་སྒྲུབ་ནས་ཐོད་རྒལ་འབྱུང་བའི་ཕྱིར། འདོད་མི་ནུས་ཏེ། ལམ་རིམ་ལས། ལམ་མཆོག་དབྱེ་ས་གཅིག་ཡིན་ནོ། །ཞེས་གསུངས་པ་དང་འགལ་བའི་ཕྱིར་རོ། །གསུམ་པ་ལ། ཟག་བཅས་ཟག་མེད་ཀྱི་ཁྱད་པར་སྤྱིར་བཤད། ཟག་ལྡོག་ཡོད་མེད་ཀྱི་ས་མཚམས་བྱེ་བྲག་ཏུ་བཤད་པའོ། །དང་པོ་ནི། ཀུན་ནས་ཉོན་མོངས་པ་དང་བཅས་པའི་ལས་ཀྱིས་ཀུན་ནས་བླངས་ཏེ་ཁམས་གསུམ་དུ་ཟག་ཅིང་འཕོ་བའི་ཕྱིར་ཟག་བཅས། དེ་ལས་ལོག་པ་ནི་ཟག་མེད་དོ། །དེ་ཡང་ཞེན་པ་ཕྱིན་ཅི་ལོག་གི་སྒྲོ་བཏགས་ཉོན་མོངས་པའི་དང་། ལུས་རང་དབང་མེད་པར་འདོར་བ་ལུས་ཀྱི་དང་། བདེ་མི་བདེ་རང་དབང་མེད་པར་མྱོང་བ་ཁམས་ཀྱི་དང་། ལས་ཀྱི་སྟོབས་ཀྱིས་རང་དབང་མེད་པར་ལུས་ལེན་པ་སྐྱེ་གནས་ཀྱི་ཟག་པའོ། །དེ་ལ་ཉོན་མོངས་པའི་འཛིན་པ་ནི་གཙོ་བོ་སྟེ། དེས་འཁོར་བར་ཟག་པའི་རྒྱུའི་ས་བོན་དྲུང་པ་བྱེད་པའི་ཕྱིར། བྲན་ནི་ཕྱི་མ་གསུམ་སྟེ། དེ་ཙམ་གྱིས་འཁོར་བར་འཆིང་མི་ནུས་པའི་ཕྱིར་རོ། །གཉིས་པ་ལ། སྤྱིར་ཟག་ལྡོག་ཡོད་མེད་ཀྱི་མུ་བཞི་སྟེ། ཟག་པ་མེད་ལ་བཟློག་པ་ཡོད་པའི་ལམ་ནི། ཐེག་པ་ཆུང་ངུའི་མཐར་ཐུག་གི་འབྲས་བུ་དགྲ་བཅོམ་ཐོབ་པ་ཞིག་སྔགས་ཀྱི་ཐེག་པ་ལ་ཞུགས་ནས་ཚོགས་ལམ་གང་རུང་ལ་གནས་པ་དེའོ། །རྒྱུད་རྡོ་རྩེ་མོ་ལས། ཇི་སྲིད་ས་བརྒྱད་མ་ཐོབ་བར། །དེ་སྲིད་ཐེག་པ་དམན་པས་འཇིགས། །ཞེས་སོ། །གཉིས་པ་ཟག་ལྡོག་གཉིས་ཀ་ཡོད་པའི་ལམ་ནི། ཚོགས་སྦྱོར་གྱི་རྣལ་འབྱོར་བཞི་སྟེ། ལམ་རིམ་ལས། དེ་ཕྱིར་ལམ་བཞིར་ཟག་ལྡོག་ཡོད། །ཅེས་སོ། །གསུམ་པ་དེ་ཡོད་ཀྱང་ལྡོག་པ་མེད་པའི་ལམ་ནི། སྦྱོར་ལམ་ཚོམ་བུ་ཚོགས་སྒྲུབ་སྟེ་སྤྱོད་པའི་དུས་གྲངས་ངེས་པས་ཟག་མེད་ལ་དངོས་སུ་སྦྱོར་བའི་བར་ཆད་མེད་ལམ་ཡིན་པའི་ཕྱིར་ཏེ། ལམ་རིམ་ལས། བར་ཆད་མེད་པར་སྦྱོར་བ་ཡིས། །ཞེས་སོ། །བཞི་པ་ཟག་ལྡོག་གཉིས་ཀ་མེད་པའི་ལམ་ནི། རིག་འཛིན་བཞི་སྟེ། ལམ་རིམ་ལས། ཟག་ཀུན་ཟད་པའི་རིགས་ཆེན་འདི། །ཇི་ལྟར་སྤྱད་ཀྱང་ལྡོག་པ་མེད། །ཅེས་སོ། །གཉིས་པ་གྲོལ་ལམ་ཅིག་ཅར་བ་ལ། དགོས་ཆེད། ངོ་ ― MLP018_Page_0284 ―
[མ་དཔེ་གཟིགས་ན་འདིར་གནོན།]
བོ། རྣམ་པར་དབྱེ་བས་གཏན་ལ་དབབ་པའོ། །དང་པོ་ནི། དབང་པོ་ཡང་རབ་ཀྱིས་འབྲས་བུ་མྱུར་དུ་ཐོབ་པའི་ཆེད་དུའོ། །གཉིས་པ་ནི། རྟོགས་གོམས་གཅིག་ཆོད་དུ་མཐར་ཕྱིན་པར་བྱེད་པའོ། །གསུམ་པ་ལ་སྔར་ལྟར་མཚན་ཉིད་གསུམ་ལས། དང་པོ་ལྟ་བ་ནི། ཆོས་ཐམས་ཅད་ཀྱི་གནས་ལུགས་དབྱེར་མེད་ཆིག་ཆོད་དུ་རྟོགས་པས་གཞལ་བྱ་དང་གཏན་ཚིགས་ལ་སོགས་པའི་ཐ་སྙད་ཀྱིས་སྟོངས་པ་སྟེ། ལམ་རིམ་ལས། ཆོས་དང་ཆོས་ཅན་ཀུན་བྲལ་བར། །འཁོར་འདས་རང་སྤྱི་དབྱེར་མེད་དུ། །མི་ཕྱེད་རྡོ་རྗེ་ཐུགས་མཆོག་གོ །ཞེས་སོ། །གཉིས་པ་ཏིང་ངེ་འཛིན་ལ་མཚན་བཅས་མཚན་མེད་གཉིས་ལས། དང་པོ་ནི། ཆོ་གའི་ཡན་ལག་ལ་མ་ལྟོས་པར་སྐད་ཅིག་དྲན་རྫོགས་སུ་བསྐྱེད་ཅིང་གསལ་བ་སྟེ། རྒྱས་པ་ལས། སྐད་ཅིག་སྐུ་གསལ་འོད་དུ་འབར། །སྙིང་པོ་བརྗོད་པས་འཁོར་ལོར་ཤར། །ཞེས་སོ། །གཉིས་པ་ནི། བླ་མ་ལས། ཐིག་ལེ་ཆེན་པོའི་རང་བཞིན་ལ། །བསྒོམ་པ་རྣམ་གསུམ་དུས་གཅིག་རྫོགས། །ཞེས་སོ། །གསུམ་པ་འབྲས་བུ་ནི། རིག་འཛིན་བཞིའི་ཆར་གཏོགས་པའི་ཡེ་ཤེས་ཆིག་ཆོད་དུ་མངོན་དུ་གྱུར་པ་སྟེ། འདི་ཉིད་ལས། མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་པར་འགྱུར། །ཞེས་གསུངས་སོ། །གཉིས་པ་ཐབས་ལམ་ལ། གདམས་ངག་སྟེང་དང་འོག་གི་སྒོ། །ཞེས་པས་གཉིས་ཏེ། རིམ་གྱིས་པ་སྟེང་སྒོ་དང་། ཅིག་ཅར་བ་འོག་སྒོའོ། །དང་པོ་ནི། འཁོར་ལོ་དྲུག་ལ་བརྟེན་ནས་རྔུབ་དགངས་སྐྱིལ་དབབ་ལ་སོགས་ཏེ། གཏུམ་མོ་ཡེ་ཤེས་ཀྱི་མེ་དང་། ཐིག་ལེ་བྱང་ཆུབ་ཀྱི་སེམས་འབར་འཛག་གི་སྦྱོར་བས་འཁོར་ལོ་བཞིར་བདེ་བའི་ཡེ་ཤེས་རིམ་གྱིས་བསྐྱེད་པའི་ཕྱིར་སྟེང་སྒོ་སྟེ། རྒྱ་མཚོ་ལས། འཁོར་ལོ་གསུམ་གཉིས་སྲོག་ཤིང་གསུམ། །ཞེས་སོགས་སོ། །སྒོམ་པའི་འབྲས་བུ་ནི། དངོས་སུ་རླུང་སེམས་ལ་དབང་ཐོབ་པས་འོག་སྒོ་ཉམས་སུ་བླང་དུ་རུང་ཞིང་། བརྒྱུད་འབྲས་འོག་སྒོ་དང་ཐུན་མོང་དུའོ། །གཉིས་པ་ནི་མཁའ་གསང་གཉིས་ལ་བརྟེན་ནས་དབབ་བཟུང་ལྡོག་དཀྲམ་ལ་སོགས་པའི་མན་ངག་གིས་བདེ་སྟོང་གཉིས་མེད་ཀྱི་ཡེ་ཤེས་ཅིག་ཅར་དུ་ཉམས་སུ་མྱོང་བར་བྱེད་པ་སྟེ། འདི་ཉིད་ལས། ལྷ་མོ་ནས། དལ་རྡོ་རྗེ་ལྕེ་ཡི་བླངས་ཞེས་པའི་བར། ― MLP018_Page_0285 ―
[མ་དཔེ་གཟིགས་ན་འདིར་གནོན།]
འབྲས་བུ་ནི་སྔ་མའི་འཕྲོས་ལས། མཁའ་འགྲོ་གསལ་འབར་སོགས་སོ། །གསུམ་པ་ལ། བདག་དོན་གྲུབ་པ་དང་། གཞན་དོན་མཛད་པའོ། །དང་པོ་ལ། ཐོབ་ཚུལ། གོ་དོན། རྣམ་གྲངས་སོ། །དང་པོ་ལ། ཐེག་པ་ཐུན་མོང་གི་དང་། མཆོག་གི་ཐོབ་ཚུལ་ལོ། །དང་པོ་ནི། འདི་ཉིད་ལས། དེ་ནས་ས་བཅུ་རིམ་གྱིས་འབྱང་། །བླ་མེད་བྱང་ཆུབ་ཡང་དག་ཐོབ། །ཅེས་སོ། །གཉིས་པ་ལ་དངོས་དང་། རྩོད་པ་སྤང་བའོ། །དང་པོ་ནི། འོ་ན་གཞི་ཇི་ལྟ་བ་བཞིན་མངོན་དུ་བྱས་པས་སྤངས་ཐོབ་མེད་པར་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བ་མཐར་ཐུག་པའི་ཆོས་སོ། །དེ་ལྟར་ཡང་འདི་ཉིད་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ལས་ཡོད་འོངས་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་འབྱུང་། །ཞེས་དང་། བསམ་གཏན་མིག་སྒྲོན་གྱི་རང་འགྲེལ་ལས། དོན་དུ་རང་རིག་པ་དེ་བཞིན་ཉིད་དུ་སོན་པ་ཉིད་སངས་རྒྱས་ཀྱི་འབྲས་བུ་ཐོབ་ཅེས་བྱའོ། །ཞེས་སོགས་སོ། །རྩོད་སྤོང་ནི། ཁ་ཅིག གསང་སྔགས་ཀྱི་ལམ་བདེ་ཞིང་མྱུར་བའི་ཐབས་ཀྱི་ཁྱད་པར་དུ་བྱས་ཀྱིས། མཐར་ཐུག་གི་འབྲས་བུ་ལ་ཁྱད་པར་མེད་དེ། ཚུལ་གསུམ་སྒྲོན་མེ་ལས། དོན་གཅིག་ནའང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ནས། །ཐབས་ལ་གསང་སྔགས་ཁྱད་པར་འཕགས། །ཞེས་ཟེར། དེ་དགག་པ་ལ། རིགས་པ་དང་ལུང་གཉིས་ལས། དང་པོ་ནི། རྒྱུའི་མཐར་ཐུག་གི་འབྲས་བུ་ཀུན་ཏུ་འོད་ཀྱི་ས་ལ་གནས་པའི་གང་ཟག་དེ་ཆོས་ཅན། སྔགས་ཀྱི་མི་སློབ་ལམ་དུ་འཇུག་མི་དགོས་པར་ཐལ། ཁྱོད་མཐར་ཐུག་གི་འབྲས་བུ་ཐོབ་ཟིན་པའི་གང་ཟག་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་དེ་ཡིན་པར་ཐལ། ཁྱོད་ལ་མཐར་ཐུག་འབྲས་བུའི་དབང་བསྐུར་ནས་སངས་རྒྱ་དགོས་ཀྱི་གང་ཟག་ཡིན་པའི་ཕྱིར་ཏེ། མདོ་སྡེ་རྒྱན་ལས། དགོངས་པ་ཐ་མ་ཐོབ་ནས་ནི། །འོད་ཟེར་ཆེན་པོའི་དབང་བསྐུར་རོ། །ཞེས་བཤད་པའི་ཕྱིར་ལུང་གིས་ཀྱང་གནོད་དེ། ཐབས་ཞགས་ལས། ཀུན་ཏུ་འོད་ལས་འདས་ནས་སུ། །པདྨ་ཅན་དུ་གྱུར་པ་ན། །ཞེས་དང་། དབྱིག་གི་སྒྲོན་མ་ལས། ཁྱོད་ཀྱི་མཐར་ཕྱིན་ཀུན་ཏུ་འོད། །ཐབས་ ― MLP018_Page_0286 ―
[མ་དཔེ་གཟིགས་ན་འདིར་གནོན།]
ཆེན་ཐེག་པའི་བསྟི་གནས་པ། །ཞེས་སོགས་ཀྱིས་གནོད་དོ། །གཞན་ཡང་མདོ་སྔགས་གཉིས་ལ། དབང་དང་ཤེས་འཇུག་རྟོགས་གོམས་ཀྱི་ལམ་ལ་ཁྱད་པར་ཡོད་པ་ལྟར། མཐར་ཐུག་གི་འབྲས་བུ་ལ་ཡང་ཡོད་དགོས་ཏེ། གསང་སྔགས་ཀྱི་དབང་སོགས་ཀྱི་རྒྱུ་མེད་པའི་གསང་སྔགས་ཀྱི་མཐར་ཐུག་གི་འབྲས་བུ་ཐོབ་པ་མི་སྲིད་པའི་ཕྱིར་ཏེ། འབྲས་བུ་ནི་རྒྱུའི་རྗེས་སུ་འགྲོ་བའི་ཕྱིར། ཡང་ཁ་ཅིག་ན་རེ། ལམ་གོམས་པའི་རྒྱུ་རྐྱེན་ལས་བྱུང་བའི་ཕྱིར། འབྲས་བུ་འདུས་བྱས་སུ་འགྱུར་རོ་ཞེ་ན། མ་ཡིན་ཏེ། རང་གི་སེམས་ཉིད་སྐུ་དང་ཡེ་ཤེས་ཀྱི་དཀྱིལ་འཁོར་དུ་ཡེ་ནས་བཞུགས་པ་ཉིད། ལམ་གྱི་ཞེན་པ་དག་པའི་ངོ་ན་དེར་གསལ་བའི་ཕྱིར། དཔེར་ན་སྤྲིན་དེངས་པའི་ཉི་མའི་དཀྱིལ་འཁོར་སྣང་བ་བཞིན་ནོ། །དེའང་འདི་ཉིད་ལས། ཤེས་རབ་དབྱིངས་ཀྱི་དེ་བཞིན་ཉིད། །ཐབས་ཀྱི་ཕྱག་རྒྱར་གྱུར་པའི་ཕྱིར། །ཞེས་སོ། །དེ་ལྟར་ན་མཚན་མ་ཅན་དུ་འགྱུར་ཏེ། འབྲས་བུ་ཀུན་རྫོབ་སྐུ་དང་ཡེ་ཤེས་སུ་སྣང་བའི་ཕྱིར་ཟེར་ན། མ་གྲུབ་སྟེ། དེ་ལྟར་ཡང་དེའི་ངོ་བོ་ཅིར་ཡང་བཟུང་དུ་མེད་པས་ན་ཡོད་པའི་མཚན་མར་མི་འགྱུར་ཞིང་། དེས་དོན་བྱེད་མི་ནུས་པ་ཡང་མ་ཡིན་ཏེ། གཞན་སྣང་གཟུགས་སྐུ་གཉིས་ཀྱང་རང་སྣང་ཡིན་པའི་ཕྱིར། སྒྱུ་མ་ལྟ་བུའི་ཕྲིན་ལས་ཀྱིས་དོན་མཛད་ལ། དེའི་དུས་ན་ངོ་བོ་ཉིད་གཞན་དུ་འགྱུར་བ་མ་ཡིན་ཏེ། འདུས་མ་བྱས་ཤིང་སྐྱེ་འཇིག་དང་བྲལ་བ། ཆོས་ཀྱི་སྐུ་ལས་མི་གཡོ་བའི་ཕྱིར་རོ། །དེ་ལྟར་ཡང་འདི་ཉིད་ལས། ཡེ་ཤེས་རོལ་པ་ཉིད་ཀྱང་གསོག །རྒྱལ་བ་མངོན་བྱུང་སྐྱོབ་པ་དང་། །བྱིན་རླབས་སྟོན་པའང་དེ་བཞིན་ཏེ། །བྱ་བྱེད་ནུས་པའི་གཟི་བྱིན་གྱིས། །སྒྱུ་མ་རྡོ་རྗེ་བཙན་པོའི་མཆོག །ཅེས་སོ། །གཉིས་པ་གོ་དོན་ནི། སངས་རྒྱས་རྣམས་ལ་ཆོས་སྐུས་ཁྱབ་པ་གཅིག་ལས་མ་གཡོས་པར་གཟུགས་སྐུ་ཐ་དད་དུ་སྣང་བའི་ཕྱིར་གཅིག་དང་བྲལ་ལ། ཁྱབ་བྱ་གཟུགས་སྐུ་ཐ་དད་ཀྱི་རང་བཞིན་ཆོས་ཀྱི་དབྱིངས་ལས་མ་གཡོས་པས་རྒྱུད་ཐ་དད་མེད་པའི་ཕྱིར་དུ་མ་དང་བྲལ་ལོ། །དེ་ལ་ལྟོས་པའི་གཉིས་ཀ་དང་གཉིས་ཀ་མ་ཡིན་པའི་མུ་ཡང་མེད་དེ། གཅིག་དང་དུ་མ་མ་གྲུབ་པས་དེའི་མུ་ཁེགས་པའི་ཕྱིར། དེ་ལས་གཞན་དུ་སངས་རྒྱས་ཀྱིས་ཀྱང་གཟིགས་པར་མི་འགྱུར་ ― MLP018_Page_0287 ―
[མ་དཔེ་གཟིགས་ན་འདིར་གནོན།]
ཏེ། གཟིགས་བྱ་གཟིགས་བྱེད་ཀྱི་ཡུལ་ལས་འདས་པའི་ཕྱིར། དེ་བས་ན་དགོངས་པ་ཡུལ་དང་ཡུལ་ཅན་མེད་པར་རང་གསལ་བའོ། །དེ་ལྟར་ཡང་འདི་ཉིད་ལས། གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་སོ། །གསུམ་པ་རྣམ་གྲངས་ལ། མིང་གི ངོ་བོའི། སའི་རྣམ་གྲངས་སོ། །དང་པོ་ནི། ལམ་རིམ་ལས། ཐུན་མོང་མིན་པའི་རྒྱལ་མིང་གྲངས། །བདེ་གཤེགས་དེ་བཞིན་གཤེགས་པ་སྟེ། །བཅོམ་ལྡན་འདས་དང་སངས་རྒྱས་དང་། །དགྱེས་ཆེན་བརྗོད་སོགས་བསམ་མི་ཁྱབ། །ཅེས་སོ། །གཉིས་པ་ལ། ཐུན་མོང་དང་མཆོག་གིའོ། །དང་པོ་ལ། རྟེན་དང་། བརྟེན་པ་གཉིས་ལས། དང་པོ་ནི། སྐུ་གསུམ་སྟེ། འདི་ཉིད་ལས། ཆོས་སྐུ་དཔག་མེད་བརྗོད་དུ་མེད། །ལོངས་སྤྱོད་ཟད་མེད་རིན་ཆེན་གཏེར། །སྤྲུལ་པ་བྱེ་བ་བསམ་མི་ཁྱབ། །ཅེས་སོ། །གཉིས་པ་ནི། ཡེ་ཤེས་བཞི་སྟེ། མདོ་སྡེ་རྒྱན་ལས། མེ་ལོང་ཡེ་ཤེས་མི་གཡོ་སྟེ། །ཡེ་ཤེས་གསུམ་ནི་དེ་ལ་བརྟེན། །མཉམ་པ་ཉིད་དང་སོ་སོར་རྟོག །བྱ་བ་གྲུབ་པ་ཁོ་ནའོ། །ཞེས་སོ། །གཉིས་པ་ལ། མ་འདྲེས་རྣམ་གྲངས་སུ་སྣང་བ་དང་། དབྱེར་མེད་ལྷུན་གྲུབ་ཀྱི་ངོ་བོའོ། །དང་པོ་ལ་རྒྱས་འབྲིང་བསྡུས་གསུམ་ལས། དང་པོ་རྒྱས་པ་ནི། སྐུ་གསུང་ཐུགས་ཡོན་ཏན་ཕྲིན་ལས་ལྔ་རེ་རེ་ལའང་བསམ་གྱིས་མི་ཁྱབ་པ་སྟེ། དེ་ལ་སྐུ་ནི། འདི་ཉིད་ལས། ཀུན་ཏུ་སྐུ་བསམ་གྱིས་མི་ཁྱབ་པ་དང་། ཞེས་སོ། །གསུང་ནི། ཀུན་ཏུ་གསུང་བསམ་གྱིས་མི་ཁྱབ་པ་དང་། ཞེས་སོ། །ཐུགས་ནི། ཀུན་ཏུ་ཐུགས་བསམ་གྱིས་མི་ཁྱབ་པ་དང་། ཞེས་སོ། །ཡོན་ཏན་ནི། རྒྱས་པ་ལས། ཡེ་ཤེས་སྤྱན་གྱིས་སྤྲས་པའི་ཕྱིར། །ཞིང་དང་ཡོན་ཏན་བསམ་མི་ཁྱབ། །ཅེས་སོ། །ཕྲིན་ལས་ནི། འདི་ཉིད་ལས། ཕྱོགས་བཅུའི་འཇིག་རྟེན་རྡུལ་སྙེད་དུ། །སྤྲུལ་པ་རྡུལ་ཕྲན་བསམ་ཡས་ཀྱིས། །སྐད་ཅིག་ཡུད་ལ་ལྷུན་གྱིས་གྲུབ། །ཅེས་སོ། །གཉིས་པ་འབྲིང་དུ་དབྱེ་ན། ཁོག་གཞུང་ལས། དེ་ཡང་སྐབས་ཀྱི་ལྔ་ལྔ་སྟེ། །ཞེས་པས་རེ་རེ་ཡང་ལྔ་ལྔའོ། །དེ་ལས་དང་པོ་སྐུ་ལྔ་ནི། རང་དོན་རྟོགས་པ་མཐར་ཕྱིན་པའི་ངོ་བོ་ ― MLP018_Page_0288 ―
[མ་དཔེ་གཟིགས་ན་འདིར་གནོན།]
དབྱིངས་ཐོག་ཏུ་རིག་པའི་ཡེ་ཤེས་གྲོལ་བ་ནི་ཆོས་ཀྱི་སྐུ་སྟེ། འདི་ཉིད་ལས། སྐྱེ་ཤི་མེད་པའི་གཡུང་དྲུང་སྐུ། །ཞེས་སོ། །དེ་ལས་མ་གཡོས་པར་གདུལ་བྱ་ལས་དག་པ་ས་བཅུ་པའི་ངོར་རྟེན་ལུས་ཉིད་ཟག་མེད་དུ་གྱུར་པའི་བརྒྱུད་འབྲས་ཐུན་མིན་གྱི་མཚན་དཔེ་དང་ལྡན་པར་སྣང་བ་ལོངས་སྐུ་སྟེ། འདི་ཉིད་ལས། ཡང་དག་ཐར་པའི་གཟུགས་སྐུ་དང་། །ཞེས་སོ། །གདུལ་བྱ་མ་དག་པ་འགྲོ་བ་དྲུག་ལ་མོས་པ་དང་མཐུན་པར་སྣང་ནས་དོན་མཛད་པ་ནི་སྤྲུལ་སྐུ་སྟེ། འདི་ཉིད་ལས། འགྲོ་བ་མ་ལུས་འདུལ་བའི་ཕྱིར། །མཐུན་བྱས་སྐུ་ནི་སྣ་ཚོགས་སྟོན། །ཞེས་སོ། །དེ་ལྟར་གཟུགས་སྐུ་གཉིས་སུ་སྣང་ཡང་རང་རྒྱུད་པ་མེད་དེ། ཆོས་ཀྱི་སྐུ་ལས་མ་གཡོས་པའི་ཆོས་སྐུ་དང་གཟུགས་སྐུ་དབྱེར་མི་ཕྱེད་པ་ནི་རྡོ་རྗེའི་སྐུ་སྟེ། འདི་ཉིད་ལས། སྟོན་ཉིད་སྒྱུ་མ་མིག་ཡོར་ཚུལ། །ཚུལ་ཉིད་དབྱིངས་ལས་གཡོས་པ་མེད། །ཅེས་སོ། །དེ་དག་རིག་པའི་ཡེ་ཤེས་ལ། ལྷུན་གྱི་རྫོགས་པས་ཆོས་སྐུ་ལས་མ་གཡོས་བཞིན་དུ་གདུལ་བྱའི་ལས་དང་མཐུན་པར་སྣ་ཚོགས་སུ་སྣང་བ་ནི་མངོན་པར་བྱང་ཆུབ་པའི་སྐུ་སྟེ། འདི་ཉིད་ལས། མ་གཡོས་བཞིན་དུ་སྣ་ཚོགས་པའི། །དེ་ཚེ་མི་མཐུན་སྣ་ཚོགས་ལ། །སོ་སོ་འདྲ་བར་སྣང་བ་ནི། །དེ་བཞིན་ཉིད་ལས་མ་གཡོས་ཀྱང་། །ལས་འཕྲོའི་དབང་གིས་སོ་སོར་སྣང་། །ཞེས་སོ། །གཉིས་པ་གསུང་ལྔ་ནི། སྟོན་པ་སྐུ་ལྔས་རང་གི་འཁོར་ལ་བརྡའ་སྤྲོད་པའི་བདག་ཉིད་ཅན་དེ། དེའང་ཆོས་ཉིད་སྨྲ་བརྗོད་དང་བྲལ་བ་ཉིད་བརྗོད་བྱ་ཀུན་གྱི་གཞིར་གྱུར་པའི་ཆ་ནས་ཆོས་སྐུ་སྐྱེ་མེད་དོན་གྱི་གསུང་སྟེ། འདི་ཉིད་ལས། སྒྲ་དང་མིང་ཚིག་ཀུན་ལས་འདས། །སྣ་ཚོགས་སྒྲ་རྣམས་གསལ་བར་འབྱུང་། །ཞེས་སོ། །མེ་ལོང་གི་བྱད་ཀྱི་དྲི་མ་ངོས་ཟིན་ནས་སེལ་བར་བྱེད་པ་ལྟར་སྐུའི་བརྡས་འཁོར་གྱི་བློ་ལ་དོན་འཇལ་བར་སྟོན་པ་ནི་ལོངས་སྐུ་དགོངས་པ་བརྡའི་གསུང་སྟེ། འདི་ཉིད་ལས། དེ་བཞིན་གསུང་མཆོག་མི་སྨྲ་སྟེ། །སྐུ་ཡི་ཆོས་རྣམས་འཇལ་བར་སྟོན། །ཅེས་སོ། །གང་ལ་གང་འདུལ་གྱི་སྒྲ་སྐད་དང་མཐུན་པར་དུས་གཅིག་ཏུ་ཆོས་སྟོན་པ་ནི་སྤྲུལ་སྐུ་བརྗོད་པ་ཚིག་གི་གསུང་སྟེ། འདི་ཉིད་ལས། བརྗོད་མེད་དེ་ཉིད་སྣ་ཚོགས་སྒྲ། །ཀུན་ལ་གྲགས་ཤིང་སོ་སོར་འཇལ། །ཞེས་སོ། །སྒྲ་སྐད་ཐམས་ཅད་གྲགས་ ― MLP018_Page_0289 ―
[མ་དཔེ་གཟིགས་ན་འདིར་གནོན།]
སྟོང་གཉིས་སུ་མེད་པས་མཐའ་གཉིས་ལས་གྲོལ་བ་ནི་དབྱེར་མེད་རྡོ་རྗེའི་གསུང་སྟེ། སྒྲ་ཉིད་མ་ཆགས་ངང་དུ་གསུངས། །གསུངས་པ་ཉིད་ན་བརྗོད་དུ་མེད། །ཅེས་སོ། །སྒྲ་ཐམས་ཅད་རང་རིག་པའི་ངང་དུ་ལྷུན་གྱིས་གྲུབ་པས་ཅིར་ཡང་མི་འགག་པ་རིག་པ་བྱིན་རླབས་ཀྱི་གསུང་ནི་མངོན་བྱང་གི་གསུང་སྟེ། འདི་ཉིད་ལས། གྲོལ་ཐར་ལམ་དང་འཁོར་བའི་སྒྲ། །ཇི་སྐད་བརྗོད་ཀྱང་གསུང་མཆོག་སྟེ། །ཞེས་སོ། །གསུམ་པ་ཐུགས་ལྔ་ནི། ཡེ་ཤེས་ལྔ་ལ་བྱ་སྟེ། སྟོང་པ་ཉིད་ཀྱི་ཡེ་ཤེས་ནི་ཆོས་སྐུ་རྣམ་པར་མི་རྟོག་པའི་ཐུགས་ཏེ། ལམ་རིམ་ལས། བདེ་བ་ཆེན་པོ་མཆོག་གི་ཐུགས། །ནམ་མཁའ་ལྟ་བུར་ཡེ་གསལ་སྟོང་། །ཞེས་སོ། །མཉམ་པ་ཉིད་ཀྱི་ཡེ་ཤེས་ནི་ལོངས་སྐུ་མཉམ་པ་ཆེན་པོའི་ཐུགས་ཏེ། ལམ་རིམ་ལས། མཉམ་པ་ཉིད་ལས་མི་གཡོ་བ། །མཉམ་པ་ཆེན་པོ་མཆོག་གི་ཐུགས། །ཞེས་སོ། །བྱ་གྲུབ་ཡེ་ཤེས་ནི་སྤྲུལ་སྐུ་འགྲོ་བ་སྒྲོལ་བའི་ཐུགས་ཏེ། ལམ་རིམ་ལས། ཉིད་ཀྱི་དབྱིངས་ལས་མི་གཞན་ཕྱིར། །བྱ་བྱེད་མེད་པར་རྣམ་བཞི་ཡིས། །འགྲོ་བ་ཀུན་སྒྲོལ་ཐུགས་ཆེན་ཡིན། །ཞེས་སོ། །སོ་སོར་རྟོག་པའི་ཡེ་ཤེས་ནི་མི་ཕྱེད་རྡོ་རྗེའི་ཐུགས་ཏེ། ལམ་རིམ་ལས། ཆོས་དང་ཆོས་ཅན་ཀུན་བྲལ་བ། །རང་སྤྱི་དབྱེར་མེད་དུས་གཅིག་ཏུ། །མཁའ་ལ་འཇའ་ལྟར་གསལ་བ་ནི། །མི་ཕྱེད་རྡོ་རྗེའི་ཐུགས་མཆོག་གོ །ཞེས་སོ། །མེ་ལོང་ལྟ་བུའི་ཡེ་ཤེས་ནི་མངོན་བྱང་གིས་ཅི་ཡང་སལ་ལེ་མཁྱེན་པའི་ཐུགས་ཏེ། ལམ་རིམ་ལས། ཆོས་སྤྱི་རང་མཚན་དབྱེར་མེད་ཀུན། །ཡུལ་མེད་མེ་ལོང་ལྟར་གསལ་བ། །མངོན་སུམ་ཀུན་གྱི་མཆོག་ཡིན་ཏེ། །རྣམ་པར་མི་རྟོག་མཆོག་གི་ཐུགས། །ཞེས་སོ། །བཞི་པ་ཡོན་ཏན་ལྔ་ལས། རྣམ་པར་དག་པ་ཞིང་ཁམས་ནི། འདི་ཉིད་ལས། ཕྱོགས་བཅུ་ཐམས་ཅད་སངས་རྒྱས་ཞིང་། །ཞེས་དང་། ཞིང་ཁམས་རྣམ་དག་བསམ་ཡས་ཁང་། །ཞེས་སོ། །རྒྱ་ཚད་དང་བྲལ་བའི་གཞལ་ཡས་ནི། འདི་ཉིད་ལས། རྒྱ་དང་བྲལ་བའི་གཞལ་ཡས་ཁང་། །ཞེས་སོ། །གསལ་ཞིང་དག་པའི་འོད་ཟེར་ནི། །འོད་ཟེར་འཕྲོ་བའི་ཚོགས་ཆེན་པོ། །ཞེས་སོ། །ཁྱད་པར་དུ་འཕགས་པའི་གདན་ཁྲི་ནི། སེང་གེ་གླང་ཆེན་རྟ་རྨ་བྱ། །ནམ་མཁའ་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །ཞེས་སོ། །དགྱེས་དགུར་ ― MLP018_Page_0290 ―
[མ་དཔེ་གཟིགས་ན་འདིར་གནོན།]
སྤྱོད་པའི་ལོངས་སྤྱོད་ནི། རོལ་མོ་སྣ་ཚོགས་སྤྲིན་ཕུང་བཞིན། །ཞེས་སོ། །ལྔ་པ་ཕྲིན་ལས་ལྔ་ནི། ཞི་བ་དང་། རྒྱས་པ་དང་། དབང་དང་། དྲག་པོ་དང་། ལྷུན་གྱིས་གྲུབ་པ་སྟེ། རྒྱས་པ་ལས། ཐུགས་རྗེ་ཆེན་པོའི་བྱིན་རླབས་ཀྱིས། །བྱ་བྱེད་མེད་ལས་རྣམ་བཞིར་མཛད། །མཛད་དང་མཛད་པར་བྱ་བ་མེད། །ཅེས་སོ། །གསུམ་པ་ལ། ཅུང་ཟད་བསྡུས་པ་དང་། ཤིན་ཏུ་བསྡུས་པའོ། །དང་པོ་ནི། འདི་ཉིད་ལས། སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཞེས་པས་ལྔ་སྟེ། ཆེ་བའི་ཡོན་ཏན་མ་ལུས་པའི་རྟེན་བྱེད་པས་ན་སྐུ། གདུལ་བྱ་ལ་བརྡའ་སྤྲོད་པས་ན་གསུང་། ཤེས་བྱ་ཐམས་ཅད་མཁྱེན་པས་ན་ཐུགས། མངའ་ཐང་རྫོགས་པས་ན་ཡོན་ཏན། གདུལ་བྱ་འདུལ་བས་ན་ཕྲིན་ལས་ཏེ། དགོངས་འདུས་ལས། རྟེན་བྱེད་པས་ན་སྐུ་ཉིད་དོ། །གོ་བརྡའ་སྤྲོད་པས་ན་གསུང་ཉིད་དོ། །རིག་ཅིང་མཁྱེན་པས་ན་ཐུགས་ཉིད་དོ། །འདོད་དགུ་འབྱུང་བས་ན་ཡོན་ཏན་ཉིད་དོ། །བྱ་བ་བྱེད་པས་ན་ཕྲིན་ལས་ཉིད་དོ། །ཞེས་སོ། །གཉིས་པ་ནི། རྟེན་སྐུ་དང་། བརྟེན་པ་ཡེ་ཤེས་སོ། །དང་པོ་ནི། སྒྲིབ་བྲལ་གྱི་དགོངས་པ་དབྱིངས་ཡེ་ཟུང་དུ་འཇུག་པ་ཆོས་སྐུ། དེ་ཉིད་འཁོར་སྨིན་པ་རྒྱ་མཚོ་ལ་ངེས་པ་ལྔ་ལྡན་དུ་སྣང་བ་ལོངས་སྐུ། འཁོར་མོས་པ་རྒྱ་མཚོ་ལ་སྣང་བ་སྤྲུལ་སྐུ། དེ་གསུམ་སྣང་ཆ་མ་འདྲེས་པའི་ཆ་ནས་མངོན་བྱང་། དབྱེར་མི་ཕྱེད་པའི་ཆ་ནས་རྡོ་རྗེའི་སྐུ་སྟེ་ལྔའོ། །དེ་གཅིག་གམ་ཐ་དད་ཅེ་ན། སྐུ་ལྔ་ལྷུན་གྲུབ་ཀྱི་བདག་ཉིད་དུ་ངོ་བོ་གཅིག་ལ་དེ་ཉིད་ཡོན་ཏན་གྱི་ལྡོག་ཆ་ནས་སྐུ་ལྔར་སྣང་བ་ཐ་དད་དེ། མཁའ་ཟླ་དང་ཆུ་ཟླ་བཞིན་ནོ། །དེ་ལྟར་ཡང་འདི་ཉིད་ལས། སྐྱེ་ཤི་མེད་པའི་གཡུང་དྲུང་སྐུ། །ཉོན་མོངས་ཀུན་གྱི་ཞིང་དུ་གནས། །ཟད་མི་ཤེས་པའི་གཏེར་དུ་འགྱུར། །ཐམས་ཅད་དབྱེར་མེད་མཉམ་པའི་སྐུ། །ཐམས་ཅད་མཁྱེན་པའི་ཡེ་ཤེས་སྐུ། །དེ་ཚེ་སྐུ་ལྔ་ཀུན་ཀྱང་རྫོགས། །ཞེས་སོ། །དེ་ཡང་ཟུར་པ་རྣམས་མངོན་བྱང་དང་རྡོ་རྗེའི་སྐུ་ནི་ཡོན་ཏན་གྱི་ལྡོག་ཆ་ནས་བཏགས་པ་ཙམ་ཡིན་པའི་ཕྱིར་སྐུ་བཏགས་པ་བ་སྟེ། སྐུ་མཚན་ཉིད་པ་ནི་གསུམ་དུ་ངེས་སོ་གསུངས། ཀུན་མཁྱེན་ཀློང་ཆེན་པ་ནི། ཆོས་སྐུ་མངོན་བྱང་རྡོ་རྗེའི་སྐུ་ ― MLP018_Page_0291 ―
[མ་དཔེ་གཟིགས་ན་འདིར་གནོན།]
གསུམ་སངས་རྒྱས་རང་སྣང་གིས་བསྡུས་པས་སྐུ་མཚན་ཉིད་པ་དང་། ལོངས་སྤྲུལ་གཉིས་གདུལ་བྱའི་བློས་བསྡུས་པས་བཏགས་པའོ་གསུངས་སོ ། །གཉིས་པ་དབྱེར་མེད་ལྷུན་གྲུབ་ཀྱི་ངོ་བོ་ནི། འབྲས་བུ་ཉེར་ལྔ་པོ་དེ་དག་ཀྱང་སྐུ་ལྔའི་བདག་ཉིད་རྒྱལ་བ་དྲུག་པའི་ཡོན་ཏན་གྱི་ལྡོག་པ་ནས་ཤར་ཞིང་། དེའི་ཡོན་ཏན་དུ་འདུ་བའི་ཕྱིར་གཅིག་དང་དུ་མ་ལས་གྲོལ་བའི་བདག་ཉིད་དོ། །དེ་ལྟར་ཡང་དགོངས་འདུས་ལས། སངས་རྒྱས་མཉམ་དང་དབྱིངས་སུ་གྲོལ། །དེ་ཉིད་ཆེན་པོར་ལྷུན་གྱིས་གྲུབ། །ཅེས་དང་། རིམ་གསུམ་ལས། འབྲས་བུ་ཡོན་ཏན་ལྷུན་གྲུབ་པས། །ཡིད་བཞིན་ནོར་བུ་ལྟར་སྣང་བའོ། །ཞེས་སོ། །གསུམ་པ་སའི་རྣམ་གྲངས་ནི། འདི་ཉིད་ལས། ས་ཡི་ཁྱད་པར་བཅུ་དང་གསུམ། །ཞེས་པའི་སྐབས་ཀྱི་ས་བཅུ་པ་མན་ཆད་ནི་མཚན་ཉིད་པ་སྟེ། སྤང་བྱ་སྤོང་བ་དང་གཉེན་པོ་སྐྱེ་བའི་ས་ཡིན་པའི་ཕྱིར། གསུམ་པོ་ནི་བཏགས་པ་བ་ནི། མཐར་ཐུག་འབྲས་བུ་སངས་རྒྱས་ཀྱི་ས་གཅིག་གི་ངོ་བོ་ལ་སྐུ་གསུམ་གྱི་ཆ་ལས་ས་གསུམ་དུ་མིང་བཏགས་པའི་ཕྱིར། དེའང་ལམ་རིམ་ལས། མཐར་ཐུག་ས་གསུམ་ཆ་ལས་བརྗོད། །ཅེས་དང་། ཧེ་རུ་ཀ་གལ་པོ་ལས། དབྱིངས་ལས་ཡེ་ཤེས་ཤར་བ་ཀུན་ཏུ་འོད། །པདྨའི་སྤྱན་འདྲ་མི་འགག་ལོངས་སྤྱོད་རྫོགས། །ཡི་གེ་འཁོར་ལོ་གདུལ་བྱར་སྤྲུལ་པ་འགྱེད། །དེ་བཞིན་གཤེགས་པའི་ས་ཞེས་བྱ་བའོ། །ཞེས་སོ། །དེས་ན་ངོ་བོ་ལ་ཁྱད་པར་མེད་ཀྱང་མཚོན་ཚུལ་ལ་ཁྱད་པར་ཡོད་དེ། དུས་ཐམས་ཅད་དུ་ཆོས་ཉིད་མཐའ་མ་བ སྒྲིབས་པར་གསལ་བའི་དོན་མངོན་དུ་བྱས་པས་ཀུན་ཏུ་འོད་དེ་ཡེ་ཤེས་བླ་མའི་ས་ཞེས་ཀྱང་བྱའོ། །དེའི་ཚེ་ཐབས་སྙིང་རྗེ་ཆེན་པོས་གཞན་དོན་མཛད་ཀྱང་དམིགས་པ་མེད་པའི་ཤེས་རབ་ཀྱི་གདེངས་ཀྱིས་ཉེས་སྐྱོན་གྱིས་མ་གོས་པར་མཁྱེན་པས་པདྨ་ཅན། དེའི་ཚེ་སྤྱོད་ཡུལ་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་སྣང་ལ་མ་ཞེན་པས་ཡི་གེ་འཁོར་ལོ་ཚོགས་ཆེན་གྱི་ས་སྟེ། འདི་ཉིད་ལས། ཐབས་དང་ཤེས་རབ་ས་ཡི་མཆོག །ཅེས་པས་པདྨ་ཅན་དང་། མཚན་དང་དཔེ་བྱད་ཐམས་ཅད་རྫོགས། །སྤྱོད་ཡུལ་ཀུན་ཏུ་མཎྜལ་ལ། །ཚོགས་ཆེན་གཉིས་ཀྱང་རྫོགས་པར་རོལ། །ཞེས་པས་འཁོར་ལོ་ ― MLP018_Page_0292 ―
[མ་དཔེ་གཟིགས་ན་འདིར་གནོན།]
ཚོགས་ཆེན་ཏེ་ཐུན་མོང་དུ་མ་གྲགས་པའི་ས་གཉིས་བསྟན་ཏོ། །འོ་ན་བླ་མ་གོང་མ་དག ཀུན་ཏུ་འོད་ཕར་ཕྱིན་ཐེག་པའི་སངས་རྒྱས་ཀྱི་ས། པདྨ་ཅན་མ་ཧཱ་ཡོ་གའི་ཡི་གེ་འཁོར་ལོ་ཨ་ནུ་ཡོ་གའི་ས། ཞེས་བཤད་པ་དང་འགལ་ལོ་ཞེ་ན། སྐྱོན་མེད་དེ། དེ་དག་ནི་སའི་དབྱེ་ཚུལ་འདི་དང་ཐ་དད་པ་གཞན་ཏེ། འདིར་བཤད་པར་བྱ་བ་མ་ཡིན་ནོ། །གལ་ཏེ་ཡིན་ན། མཐར་ཐུག་ས་གསུམ་ཆ་ལས་བརྗོད། །ཅེས་པའི་སྐབས་ནས་བསྟན་པའི་ཆོས་སྐུའི་ས་ཡེ་ཤེས་བླ་མའམ་ཀུན་ཏུ་འོད་དང་། ཕར་ཕྱིན་ཐེག་པའི་བཅུ་གཅིག་པ་ཀུན་ཏུ་འོད་གཉིས་གཅིག་པར་འགྱུར་ལ་དེ་ལྟར་ན། ལམ་རིམ་ལས། ལམ་གྱི་རྩོལ་བས་ངལ་བ་རྣམས། །བྲོད་པ་སྐྱེ་ཕྱིར་ཀུན་ཏུ་འོད། །རྡོ་རྗེ་འཛིན་སྟུག་བཀོད་པར་བསྟན། །མཐར་ཐུག་ས་གསུམ་ཆ་ལས་བརྗོད། །ཅེས་པའི་རྒྱུའི་ཐེག་པའི་ཀུན་ཏུ་འོད་དང་། མཐར་ཐུག་གི་ས་གསུམ་གྱི་ནང་ཚན་གྱི་ཀུན་ཏུ་འོད་གཅིག་པར་ཐལ། དམ་བཅའ་དེ་འཐད་པའི་ཕྱིར། འདོད་མི་ནུས་ཏེ། སྔ་མའི་འཕྲོས་ལས། རང་ས་ཐོབ་ལ་ངོ་བོ་ཉིད། །གཅིག་པར་སྨྲ་བ་མུན་སྤྲུལ་ལོ། །ཞེས་རྒྱུའི་ཀུན་ཏུ་འོད། ཀྲི་ཡའི་རྡོ་རྗེ་འཛིན་པའི་ས། ཡོ་གའི་སྟུག་པོ་བཀོད་པའི་ས། མཐར་ཐུག་མ་ཧཱ་ཡོ་གའི་ས་རྣམས་ཀྱི་འབྲས་བུ་ལ་ཁྱད་ཆེ་བས་གཞན་དག་ཁྱད་མེད་ཅེས་སྨྲ་བ་ནི་མུན་སྤྲུལ་ལོ་ཞེས་བཞེད་པའི་ཕྱིར་རོ། །དེ་བས་ན་རྒྱུའི་ཐེག་པའི་ཀུན་ཏུ་འོད་སྔགས་ལམ་གྱི་ལྷུན་གྲུབ་རིག་འཛིན་གྱི་ས་ཡིན་པས། ལམ་གྱི་ཆོས་སྐུ་ཞེས་ཀྱང་མིང་དུ་བཏགས་ཏེ། དབུ་མའི་མཁན་པོ་ཨཱ་དེ་བས། རྒྱུ་ཡི་ཐེག་པའི་ཀུན་ཏུ་འོད། །ཐབས་ཆེན་ལམ་གྱི་ཆོས་སྐུ་སྟེ། །ཡང་དག་རྫོགས་པའི་སངས་རྒྱས་ལ། །རྒྱ་མཚོ་རླབས་བཞིན་ཤུགས་ཀྱིས་འཆར། །ཆུ་ཟླའི་གཟུགས་ལྟར་འགྲོ་འོང་མེད། །སྨོན་ལམ་སྟོབས་ལ་རག་མ་ལས། །ཞེས་དང་། བསམ་གཏན་མིག་སྒྲོན་གྱི་རང་འགྲེལ་ལས། དབུ་མས་བསྐལ་པར་སྦྱངས་པས་གྲུབ་པའི་ཀུན་ཏུ་འོད་སྨོན་ལམ་དང་སྙིང་རྗེའི་སྟོབས་ཀྱིས་གཟུགས་སྐུ་འཆར་བ་དང་། ཐབས་ཆེན་པོ་གཉིས་མེད་ཀྱི་སྐུ་ལྔ་མ་བཙལ་རྫོགས་པ་ནི། འཁོར་བ་དང་མྱ་ངན་ལས་འདས་པའི་ཆོས་རིམ་གྱི་བདག་ཉིད་དུ་བཞུགས་པས་རྒྱ་མཚོའ་རླབས་བཞིན་སྤྲུལ་པ་རང་ལ་འཆར་བས་ག་ལ་བསྡོ་སྟེ། ཀུན་ཏུ་ ― MLP018_Page_0293 ―
[མ་དཔེ་གཟིགས་ན་འདིར་གནོན།]
འོད་ནི་བསྟི་གནས་ཀྱི་སའོ། །དེ་ནི་འདིར་ལྷུན་གྱིས་གྲུབ་པའི་རིག་འཛིན་དངོས་སོ། །ཞེས་གསུངས་སོ། །གཉིས་པ་གཞན་དོན་མཛད་པ་ལ། གདུལ་བྱ་ལ་ཐུགས་རྗེ་གཟིགས་ཚུལ། གཟིགས་ནས་ཐུགས་རྗེ་སྐྱེ་ཚུལ། སྐྱེས་ནས་འགྲོ་དོན་མཛད་ཚུལ་ལོ། །དང་པོ་ལ། ཡེ་ཤེས་རྒྱུན་ཆད་ནས་མི་གཟིགས་པར་འདོད་པའི་ལུགས་དང་། རྒྱུན་དང་བཅས་ཏེ་གཟིགས་པར་འདོད་པའི་ལུགས་དང་། མཐའ་གཉིས་དང་བྲལ་བས་ཡུལ་མེད་རང་གསལ་དུ་གཟིགས་པར་འདོད་པའི་ལུགས་སོ། །དང་པོ་ལ། འདོད་པ་བརྗོད་དང་། དེ་དགག་པའོ། །དང་པོ་ནི། སྤྱིར་སངས་རྒྱས་ལ་མཚན་ཉིད་པ་དང་། བཏགས་པ་བ་གཉིས་ལས། མཚན་ཉིད་པ་ནི་ཆོས་སྐུ་སྟེ། དཔེར་ན་བསྲེག་བྱ་ཟད་པའི་སྲེག་བྱེད་མེའི་རྒྱུན་མི་གནས་པ་ལྟར། སྒྲིབ་པ་ཕྲ་རགས་ཐམས་ཅད་སྤངས་པའི་ཤུལ་དུ། སྤོང་བྱེད་གཉེན་པོའི་ཡེ་ཤེས་ཀྱང་དབྱིངས་སུ་ཞི་སྟེ། རྟེན་དང་བརྟེན་པའི་ཡེ་ཤེས་རྒྱུན་ཆད་པའི་ཕྱིར་གཟིགས་བྱ་གཟིགས་བྱེད་ཀྱི་ཐ་སྙད་ལས་གྲོལ་བས་མི་གཟིགས་ལ། བཏགས་པ་བ་གཟུགས་སྐུ་གཉིས་ནི་སྔོན་གྱི་བསོད་ནམས་ཀྱི་ཚོགས་མི་འགག་པའི་འབྲས་བུའམ་སྨོན་ལམ་གྱི་འཕེན་པ་ཙམ་གྱིས་གདུལ་བྱ་ལ་སྣང་བའོ་ཟེར་རོ། །གཉིས་པ་ནི། དེ་ལྟར་ན་ཡེ་ཤེས་དེ་ཉིད་རང་ལྡོག་ནས་ཆད་དམ། གཉེན་པོ་གཞན་ཞིག་གིས་ཆད། དང་པོ་ལྟར་ན། སངས་རྒྱས་ཀྱི་ས་ན་སེམས་ཅན་གྱི་དོན་ལ་གཟིགས་པ་འཇུག་པའི་ཇི་ལྟ་བ་དང་ཇི་སྙེད་མཁྱེན་པའི་ཡེ་ཤེས་མེད་པར་ཐལ། ཡེ་ཤེས་རྒྱུན་ཆད་པའི་ཕྱིར། རྟགས་ཁས། འདོད་མི་ནུས་ཏེ། ཐུན་མོང་གི་ལུང་ལས་ཀྱང་། ཇི་ལྟ་ཇི་སྙེད་ནང་གི་ནི། །ཡེ་ཤེས་གཟིགས་པ་འཇུག་པའི་ཕྱིར། །ཞེས་དང་། སྡུད་པ་ལས། ཡེ་ཤེས་མེད་ན་བྱང་ཆུབ་འཕེལ་མེད་འགྲིབ་པ་མེད། །རྒྱ་མཚོ་འདྲ་བའི་སངས་རྒྱས་ཆོས་ཀྱང་མེད་པར་འགྱུར། །ཞེས་སོགས་ལུང་དུ་མས་གནོད་དོ། །གཉིས་པ་ལྟར་ན། རྡོ་རྗེ་ལྟ་བུའི་ཏིང་ངེ་འཛིན་གྱི་གཉེན་པོ་དེས་རྒྱུན་བཅད་དམ་གཞན་ཞིག་གིས་བཅད་ཧ་ཅང་ཐལ་བས་བག་ཡོད་པར་མཛོད་ཅིག གཉིས་པ་ལ། འདོད་པ་བརྗོད་པ་དང་། དེ་དགག་པའོ། །དང་པོ་ནི། སངས་ ― MLP018_Page_0294 ―
[མ་དཔེ་གཟིགས་ན་འདིར་གནོན།]
རྒྱས་ཀྱི་ས་ན་རྡོ་རྗེ་ལྟ་བུའི་ཏིང་ངེ་འཛིན་གྱིས་སྒྲིབ་པ་སྤངས་པའི་ལག་རྗེས་སུ་ཡེ་ཤེས་རྒྱུན་དང་བཅས་པ་ཡོད་དེ། དེ་ལས་ཀྱང་ཀུན་རྫོབ་མཁྱེན་པའི་ཡེ་ཤེས་ཀྱིས་ཡུལ་དང་ཡུལ་ཅན་དུ་གཟིགས་ཏེ། སྔར་རྒྱུན་ཆད་པ་བཀག་པའི་ལུང་གིས་གྲུབ་བོ་ཟེར། གཉིས་པ་ནི་དེ་ལྟར་ན། སངས་རྒྱས་སའི་ཡེ་ཤེས་དེ་ཉིད་འཁྲུལ་ཤེས་སུ་ཐལ། ཀུན་རྫོབ་ཡུལ་དུ་བྱེད་པའི་ཕྱིར། སོ་སྐྱེའི་ཤེས་པ་བཞིན་ནོ་བྱས་པ་ལ། ཁོ་ན་རེ་སྣང་ཙམ་ཡུལ་དུ་བྱེད་ཀྱང་ཞེན་ཡུལ་དུ་མི་འཛིན་པས་སོ་ཟེར། འོ་ན་སངས་རྒྱས་སའི་ཡེ་ཤེས་དེ་སྤངས་པ་ཕྱོགས་གཅིག་པ་ཐལ། ཞེན་ཡུལ་ལ་འཁྲུལ་བའི་ལོག་ཤེས་སྤངས་ཀྱང་། སྣང་ཡུལ་ལ་འཁྲུལ་བའི་ལོག་ཤེས་མ་སྤངས་པའི་ཕྱིར། འདོད་ན། མདོ་ལས། ཡེ་ཤེས་དམ་པ་བདག་མེད་ལས། །སྣང་བ་མེད་པས་མ་གཟིགས་སོ། །ཞེས་གསུངས་པ་དང་འགལ་ལོ། །གསུམ་པ་ལ། དངོས་དང་རྩོད་པ་སྤང་བའོ། །དང་པོ་ནི། ཡེ་ཤེས་རྒྱུན་ཆད་ཅེས་བསྐུར་པ་མི་འདེབས། མ་ཆད་ཅེས་སྒྲོ་མི་འདོགས། དེ་གཉིས་ཆར་གྱི་མཐའ་དང་བྲལ་བའི་ངོ་བོ་ཉིད་ཀྱི་ཚུལ་གྱིས་རྟོག་མེད་རང་གསལ་དུ་གཟིགས་ཏེ། འདི་ཉིད་ལས། སྟོང་ཉིད་བདག་མེད་ཡེ་མཁྱེན་རང་རིག་ཐུགས། །དམིགས་བྱ་དམིགས་བྱེད་མེད་པར་དྲན་དབང་བསྒྱུར། །ཞེས་དང་། ཏིང་འཛིན་རྒྱལ་པོ་ལས། མྱ་ངན་འདས་པའི་ཆོས་ལ་ཆོས་མེད་དེ། །གང་ཕྱིར་དེ་མེད་ནམ་ཡང་མེད་མི་འགྱུར། །རྟོག་ཅན་དག་ནི་ཡོད་དང་མེད་ཅེས་བྱ། །དེ་ལྟར་བརྟགས་པས་སྡུག་བསྔལ་ཞི་མི་འགྱུར། །ཞེས་སོ། །གཉིས་པ་ནི། ཡུལ་ཡོད་མེད་དབྱེར་མེད་ཀྱི་བརྟག་པ་གསུམ་ལས། ཡུལ་དུ་བྱས་ནས་གཟིགས་ན། སངས་རྒྱས་ཀྱི་ཡེ་ཤེས་གཟུང་འཛིན་ཅན་དུ་གྱུར་ཏེ། ཡུལ་དང་ཡུལ་ཅན་འབྱུང་བའི་ཕྱིར། འདོད་ན། རྒྱུད་དག་པ་མ་ཡིན་པར་ཐལ། གཟུང་འཛིན་ཡོད་པའི་ཕྱིར། སེམས་ཅན་བཞིན་ནོ། །ཡང་ཡུལ་དུ་མ་བྱས་པར་གཟིགས་ན། མིག་གིས་ཀྱང་སྒྲ་ཐོས་པར་ཐལ། དེའི་ཕྱིར། འདོད་ན་གསལ་ལོ། །གཞན་ཡང་སངས་རྒྱས་ཉིད་འཁྲུལ་བར་ཐལ། མེད་པ་གཟིགས་པའི་ཕྱིར། མིག་སེར་ཅན་གྱི་དུང་གི་ཁ་དོག་བཞིན་ནོ། །དབྱེར་མེད་དུ་གཟིགས་ཟེར་བའང་མི་འཐད་དེ། གཟིགས་བྱ་གཟིགས་བྱེད་དུ་འགལ་བའི་ཕྱིར། མིག་གིས་མིག་བཞིན་ནོ་ ― MLP018_Page_0295 ―
[མ་དཔེ་གཟིགས་ན་འདིར་གནོན།]
ཟེར། ― MLP018_Page_0296 ―
[མ་དཔེ་གཟིགས་ན་འདིར་གནོན།]
ལན་དུ། རྗེ་སྒྲོ་ཕུག་པའི་ཞལ་ནས། སྐད་དོག་པར་ཁྱེར་ན། ཡུལ་ཡོད་མེད་ཀྱི་སྒྲོ་སྐུར་སྤངས་ནས་ཆོས་ཐམས་ཅད་མེ་ལོང་ནང་གི་གཟུགས་བརྙན་ལྟར་རྟོག་མེད་རང་གསལ་དུ་གཟིགས་ཏེ། རྒྱས་པ་ལས། རྣམ་རྟོག་མི་མངའ་ཅིར་ཡང་ས་ལེ་མཁྱེན། །ཞེས་གསུངས་པའི་ཕྱིར། སྐད་ཡངས་པར་ཁྱེར་ན། ཡུལ་དུ་བྱས་ནས་ཀྱང་གཟིགས་ཏེ། དུས་གསུམ་གྱིས་བསྡུས་པའི་ཆོས་དང་སེམས་ལས་བྱུང་བ་ཐམས་ཅད་ལག་མཐིལ་དུ་སྐྱུ་རུ་ར་བཞག་པ་བཞིན་དུ་གསལ་མཁྱེན་མ་འགགས་པར་སྣང་བའི་ཕྱིར། ཡང་ཡུལ་མེད་དུའང་གཟིགས་ཏེ། ཇི་ལྟར་སྣང་ཡང་བདེན་པའི་ངོ་བོས་སྟོངས་པའི་ཕྱིར། དབྱེར་མེད་དུ་གཟིགས་ཏེ། ཤེས་བྱའི་གཤིས་ལ་ཐུགས་རྗེ་སྐྱེ་བའི་ཡུལ་སེམས་ཅན་དང་། སྐྱེ་མཁན་རྣམ་མཁྱེན་གྱི་སངས་རྒྱས་གཉིས་དམིགས་སུ་མེད་པའི་ཕྱིར། དེ་ཐུགས་རྗེ་ཅིར་འགྱུར་ཞེ་ན། དེ་ནི་དམིགས་པ་མེད་པའི་སྙིང་རྗེ་སྟེ། སྡུག་བསྔལ་མཐའ་དག་ལས་སྐྱོབ་པའི་ཕྱིར་གསུངས། འོ་ན་ཐུགས་རྗེས་གང་ལ་གང་ལྟར་གཟིགས་ཏེ། གཟིགས་པའི་ཐ་སྙད་མི་འཐད་དོ་ཟེར་ན། ལན་ནི། འཁྲུལ་པ་ཅན་གྱི་བློ་ངོ་ན་སྣང་བ་ལྟར་མ་འགགས་པར་གཟིགས་པས་སྐྱོན་གཉིས་པ་མེད་ཅིང་། ཇི་ལྟར་སྣང་ཡང་གཤིས་ལ་མ་གྲུབ་པར་མཁྱེན་པས་སྐྱོན་དང་པོ་ལས་གྲོལ་ལོ། །དེ་གཉིས་པོས་རྩོད་པ་གསུམ་པའང་ཞོར་ལ་ཁེགས་ཏེ། གཤིས་ལ་གདུལ་བྱ་འདུལ་བྱེད་དབྱེར་མེད་དུ་གཟིགས་ལ། དེ་ལྟར་མ་རྟོགས་པ་རྣམས་འཁོར་བའི་ཆུ་བོ་བཞིས་རྒྱུན་ཕྱོགས་སུ་ཁྱེར་བས་སྡུག་བསྔལ་བའང་གཟིགས་ཤིང་དེ་ལས་གྲོལ་བའི་ཐབས་ཀྱང་མཁྱེན་ནས་སྟོན་པར་མཛད་པ་ཡིན་ཏེ། དཔེར་ན་སྐྱེས་བུ་མངོན་ཤེས་ཅན་གཅིག་གི་དྲུང་ན། སྐྱེས་བུ་གཞན་ཞིག་གཉིད་དུ་སོང་བའི་རྨི་ལམ་དུ་སྡུག་བསྔལ་ཉམས་སུ་མྱོང་བ་རྨི་བ་ན། མངོན་ཤེས་མཁན་དེས་མཁྱེན་ནའང་རང་རྒྱུད་ལ་བདེན་ཞེན་མི་འབྱུང་ཞིང་། གཉིད་སད་ན་སྡུག་བསྔལ་དེ་ལས་གྲོལ་བ་ཡང་མཁྱེན་པ་བཞིན་ནོ། །འདིར་ཡང་གཟིགས་ལུགས་རྗེ་སྒྲོ་ཕུག་པའི་དགོངས་པས་གསུམ་སྟེ། དབྱིངས་ལས་མི་གཞན་པའམ་ཇི་ལྟ་བ་མཁྱེན་པའི་ཡེ་ཤེས་ཀྱིས་གཟིགས་ཚུལ་དབྱིངས་ཡེ་ཤེས་དབྱེར་མེད་དམ་ཇི་ལྟ་ཇི་སྙེད་དབྱེར་མེད་དུ་མཁྱེན་པའི་ཡེ་ཤེས་ཀྱིས་གཟིགས་ཚུལ་གསུམ་དུ་བཞེད་ ― MLP018_Page_0297 ―
[མ་དཔེ་གཟིགས་ན་འདིར་གནོན།]
དོ། །གཉིས་པ་གཟིགས་ནས་ཐུགས་རྗེ་སྐྱེ་ཚུལ་ནི། རིམ་གསུམ་ལས། རྟག་རྒྱུན་རང་བཞིན་ཤུགས་གསོལ་དང་། །ཡུལ་དང་འཕྲད་ནས་བྱུང་བར་སྣང་། །ཞེས་པས་བཞི་སྟེ་རྟག་པ་རྒྱུན་གྱི་ཐུགས་རྗེ་ཆུ་བོའ་རྒྱུན་ལྟ་བུ་དང་། རང་བཞིན་ཤུགས་ཀྱི་ཐུགས་རྗེ་ཉི་མ་དང་འོད་ཟེར་ལྟ་བུ་དང་། བསྐུལ་ཞིང་གསོལ་བ་བཏབ་པའི་ཐུགས་རྗེ་སྙིང་རྗེ་ཅན་ལ་དབུལ་པོས་སློང་བ་ལྟ་བུ་དང་། ཡུལ་དང་འཕྲད་པའི་ཐུགས་རྗེ་མཛངས་པ་སྤྱོད་ལོག་བྱེད་པ་ལྟ་བུའོ། །གསུམ་པ་སྐྱེད་ནས་འགྲོ་དོན་མཛད་ཚུལ་ལ་རྟེན་ཅན་གྱིས་དོན་བྱེད་པར་འདོད་པ། རྟེན་མེད་ཀྱིས་དོན་བྱེད་པར་འདོད་པ། གནས་ལུགས་ངོ་བོ་ཉིད་ཀྱིས་དོན་བྱེད་པར་འདོད་པའོ། །དང་པོ་ནི། བྲམ་ཟེས་མཆོད་སྡོང་སྒྲུབ་པ་ལྟ་བུ་སྟེ། དཔེར་ན་རིག་སྔགས་གྲུབ་པའི་བྲམ་ཟེ་ཞིག་གིས་རིན་པོ་ཆེའི་མཆོད་སྡོང་བསྒྲུབས་ནས་བཞག་པས་རང་ཉིད་ཚེའི་དུས་བྱས་ཀྱང་རྗེས་འཇུག་རྣམས་ཀྱི་འདོད་པ་མཆོད་སྡོང་གིས་སྐོང་བར་བྱེད་པ་ལྟར། སྔོན་ལམ་དུ་ཚོགས་བསགས་པའི་འབྲས་བུ་མཐར་ཐུག་སངས་རྒྱས་ཀྱི་དགོངས་པ་ཆོས་སྐུ་སྒྲིབ་བྲལ་གྱི་ཡེ་ཤེས་དེ་ཉིད་ལ་བརྟེན་ནས། གདུལ་བྱ་ལས་དག་པ་ལ་མཛད་པ་གཟུགས་སྐུ་གཉིས་སུ་སྣང་ནས་དོན་མཛད་པར་བཞེད་པ་ནི། རྒྱ་གར་ན་སློབ་དཔོན་སེང་གེ་བཟང་པོ་དང་། བོད་ན་འབྲིང་མཚམས་ཀྱི་ཞང་ཤེས་རབ་བླ་མ་ལ་སོགས་པའི་དགོངས་པའོ། །གཉིས་པ་ནི། དྲང་སྲོང་དམོད་པ་གྲུབ་པ་ལྟ་བུ་སྟེ། དཔེར་ན་དམོད་པ་གྲུབ་པའི་དྲང་སྲོང་གིས་དམོད་པ་བསྒྲུབས་ནས་བཞག་པས་རང་ཚེའི་དུས་བྱས་ཀྱང་གཞན་སྣང་དུ་ཁོའ་དམོད་པ་ཇི་ལྟ་བར་འབྱུང་བ་བཞིན་མཐར་ཐུག་སངས་རྒྱས་ཀྱི་ས་ན་ཆོས་ཀྱི་དབྱིངས་རྣམ་པར་དག་པ་ཙམ་ལས་རང་རྒྱུད་ཀྱིས་བསྡུས་པའི་ཡེ་ཤེས་མ་གྲུབ་ཀྱང་སྔོན་ལམ་དུ་ཚོགས་བསགས་ཞིང་སྨོན་ལམ་བཏབ་པའི་མཐུས་གདུལ་བྱ་རང་གི་བློ་སྣང་དུ་གཟུགས་སྐུ་གཉིས་སུ་སྣང་ནས་དོན་བྱེད་པར་བཞེད་པ་ནི། རྒྱ་གར་ན་སློབ་དཔོན་ཀླུ་སྒྲུབ་དང་། བོད་ན་རོང་ཟོམ་ཆོས་ཀྱི་བཟང་པོའི་དགོངས་པའོ། །གསུམ་པ་ནི། ཡིད་བཞིན་གྱི་ནོར་བུ་རིན་པོ་ཆེ་ལྟ་བུ་སྟེ། དཔེར་ན་ནོར་བུ་རིན་པོ་ཆེ་བྱི་དོར་བྱས་ཤིང་མཆོད་ན་རང་རང་གི་བསོད་ནམས་དང་འཚམས་པའི་དགོས་འདོད་ ― MLP018_Page_0298 ―
[མ་དཔེ་གཟིགས་ན་འདིར་གནོན།]
འབྱུང་མོད་ཀྱི། འོན་ཀྱང་རིན་པོ་ཆེ་ལ་རྩོལ་རྟོག་དང་ཉེ་རིང་མེད་པ་ལྟར། མཐར་ཐུག་རྒྱལ་བའི་དགོངས་པ་ཡོད་མེད་ཀྱི་མཐའ་ལས་གྲོལ་བའི་ཕྱིར། མཐའི་སྒྲོ་སྐུར་དང་བྲལ་བའི་ངོ་བོ་ཉིད་ཀྱི་སྐུ་དེ་ཉིད་གདུལ་བྱའི་བློ་དང་འཚམས་པར་སྣ་ཚོགས་སུ་སྣང་ནས་དོན་མཛད་པར་བཞེད་པ་ནི་རྒྱའི་མཁས་པ་ཆེན་པོ་ཤྲཱི་སིངྷ་དང་། བོད་ན་ཟུར་ཆུང་ཤེས་རབ་གྲགས་པ་ལ་སོགས་པའི་དགོངས་པའོ། །མདོར་ན་རྒྱས་པ་ལས། ཐུགས་རྗེ་ཆེན་པོའི་བྱིན་རླབས་ཀྱིས། །ཕྱོགས་བཅུའི་འཇིག་རྟེན་རྡུལ་སྙེད་དུ། །འགྲོ་བའི་ཕྲིན་ལས་བསམ་མི་ཁྱབ། །སྐུ་གསུང་ཐུགས་དང་ཡོན་ཏན་དང་། །ལྷུན་གྱིས་གྲུབ་པའི་ཕྲིན་ལས་ཀྱིས། །གདུལ་བྱ་རྣམས་ནི་ཆུད་མ་ཟོས། །ངན་སོང་སྦྱོང་ཞིང་བྱང་ཆུབ་ཞིང་། །ཡེ་ཤེས་ཚོགས་རྫོགས་ཀུན་ཏུ་སྟོན། །ཞེས་གསུངས་སོ། །འབྲས་བུའི་དོན་བཤད་ཟིན་ཏོ། །གཉིས་པ་ལམ་གྱི་ཆ་རྐྱེན་རྒྱུད་ཀྱི་དངོས་པོ་བཅུ་བྱེ་བྲག་ཏུ་བཤད་པ་ནི། ལྟ་བ་སྤྱོད་པ་དཀྱིལ་འཁོར་དབང་། །དམ་ཚིག་ཕྲིན་ལས་སྒྲུབ་པ་དང་། །ཏིང་འཛིན་མཆོད་པ་སྔགས་ཕྱག་རྒྱ། །ཕྱི་མ་གཉིས་བསྡོམས་བཅུ་རུ་འགྱུར། །ཞེས་པ་ལྟར་བཅུ་ལས། དང་པོ་དེ་ཁོ་ན་ཉིད་ལྟ་བ་ལ། དགོས་ཆེད། ངོ་བོ། མཚན་ཉིད། རྣམ་གྲངས། མ་རྟོགས་པའི་སྐྱོན། རྟོགས་པའི་ཡོན་ཏན་དང་དྲུག དང་པོ་ནི། ཐུགས་ཐིག་ལས། གཞན་པའི་ལྟ་དམིགས་བསལ་བ་དང་། །མཆོག་གི་སྤྱན་རབ་མངོན་བྱའི་ཕྱིར། །ཞེས་པས་གཞན་སེལ་དང་། དོན་དུ་གཉེར་བའི་དགོས་པ་གཉིས། དང་པོ་ནི། འདི་ཉིད་ལས། མ་རྟོགས་པ་དང་ལོག་པར་རྟོག །ཕྱོགས་རྟོགས་ཡང་དག་ཉིད་མ་རྟོགས། །ཞེས་པས་མ་རྟོགས་པ་མུ་སྟེགས་ཕྱལ་པ་དང་རྒྱང་འཕེན། ལོག་པར་རྟོག་པ་མུ་སྟེགས་རྟག་ཆད་གཉིས། ཕྱོགས་རྟོགས་ཉན་རང་གཉིས། ཡང་དག་ཉིད་མ་རྟོགས་པ་དབུ་སེམས་གཉིས་ཀྱི་ལྟ་བ་སེལ་ལོ། །གཉིས་པ་ནི། ཆོས་ཉིད་ཡང་དག་པར་རྟོགས་པའི་དགོས་པ། ལས་གང་ལ་སྤྱད་ཀྱང་མི་འཆིང་བའི་དགོས་པ། སངས་རྒྱས་ཉིད་ཐོབ་པའི་དངོས་རྒྱུར་གྱུར་པའི་དགོས་པའོ། །དང་པོ་ནི། རྒྱས་པ་ལས། ཆོས་ཀྱི་རང་བཞིན་ཇི་ལྟ་བུ། །བདག་གིས་ཡང་དག་རྟོགས་པར་བྱ། །ཞེས་སོ། །གཉིས་པ་ནི། དེ་ལས། ― MLP018_Page_0299 ―
[མ་དཔེ་གཟིགས་ན་འདིར་གནོན།]
ཐབས་དང་ཤེས་རབ་རྟོགས་པ་ཡིས། །དུག་གསུམ་དུག་ལྔས་གནོད་མི་འགྱུར། །ཞེས་སོ། །གསུམ་པ་ནི། དེ་ལས། རང་རིག་ཡེ་ཤེས་དོན་རྟོགས་ན། །སྐྱེ་ཤི་མེད་པའི་གཡུང་དྲུང་ཐོབ། །ཅེས་སོ། །དེ་ཡང་དབུ་སེམས་གཉིས་ཀྱིས་ཡང་དག་ཉིད་མ་རྟོགས་པའི་ཚུལ་ཅུང་ཟད་བརྗོད་ན་དེ་ལ་སེམས་ཙམ་པ་དང་དབུ་མ་པའི་ལུགས་གཉིས་ལས། དང་པོ་ལ། དཀར་དམར་སྣ་ཚོགས་སུ་སྣང་བ་ཤེས་པ་དང་བཅས་པ་འདི་ཐམས་ཅད་རང་གི་སེམས་ཀྱི་རྣམ་པར་བདེན་པར་འདོད་པ་སེམས་ཙམ་རྣམ་བདེན་པ་དང་། ཤེས་པའི་རྣམ་པར་རྫུན་པར་འདོད་པ་སེམས་ཙམ་རྣམ་རྫུན་པ་གཉིས་ལས། དང་པོ་ནི། དོན་དུ་སྣང་བ་རང་གི་ཤེས་པའི་རྣམ་པ་ཕྱིར་ཤར་བ་ཙམ་སྟེ། དཔེར་ན། རྫིང་འགྲམ་གྱི་ནོར་བུའི་ཤིང་གི་ཡལ་ག་ལ་བཏགས་པའི་ནོར་བུ་ཀེ་ཀེ་རུའི་གཟུགས་བརྙན་ཆུ་ནང་དུ་ཤར་བ་ན་ནོར་བུའི་རྣམ་པ་ཕྱི་རོལ་དུ་ཤར་བ་བཞིན་ནོ་ཞེས་འདོད་དོ། །འདི་ལ་དབྱེ་ན། རྣམ་པའི་གྲངས་དེ་སྙེད་ལ་ཤེས་པའི་གྲངས་ཀྱང་དེ་སྙེད་དུ་འདོད་པ་དང་། རྣམ་པ་དང་ཤེས་པ་སྒོ་ང་བཀས་པ་ལྟར་འདོད་པ་དང་། རྣམ་པ་དང་ཤེས་པ་སྣ་ཚོགས་གཉིས་མེད་དུ་འདོད་པ་གསུམ་ལས། དང་པོ་ནི། སྒྲ་ཐོས་པའི་དུས་ན་སྒྲ་འཛིན་གྱི་ཤེས་པ་གཅིག་པུ་སྐྱེ་ཡི། གཟུགས་ལ་སོགས་པ་འཛིན་པའི་ཤེས་པ་མི་སྐྱེ་བ་ལྟར། ཡུལ་གང་ལ་འཇུག་པ་དེའི་ཤེས་པ་སྐྱེ་ཡི་གཞན་མི་སྐྱེ་བས། རྣམ་པའི་གྲངས་ཇི་སྙེད་པའི་ཤེས་པ་འདོད་པའོ། །གཉིས་པ་ནི། ཕྱི་རོལ་སྣ་ཚོགས་སུ་སྣང་བའང་ཤེས་པ་ལས་བྱུང་ལ། དེ་འཛིན་པའི་ཤེས་པའང་སེམས་ལས་བྱུང་བས། སྒོ་ང་བཀས་པ་ལྟར་རྣམ་པ་དང་ཤེས་པ་ཡུལ་ཡུལ་ཅན་སེམས་གཅིག་ལ་ཤར་བ་སྟེ། ད་ལྟ་ཡུལ་འཛིན་པ་ན། ཕྱི་རྣམ་པའི་ཤེས་པ་གཅིག་ལ་ནང་འཛིན་བྱེད་ཀྱི་ཤེས་པ་གཅིག་ཤར་བ་ཡང་། ཐོག་མ་མེད་པའི་བག་ཆགས་ཀྱིས་དེ་ལྟར་གཉིས་སུ་སྣང་ཡང་། རང་རིག་པ་གཅིག་པུ་ལས་གཞན་དུ་གྲུབ་པ་མེད་པས་སྒོ་ང་བཀས་པ་ལྟ་བུའོ། །འོ་ན་ཕྱི་རྣམ་པའི་ཤེས་པ་གཅིག་ལ་དེའི་ཚེ་འཛིན་པའི་ཤེས་པ་གཅིག་བྱུང་དུས་རྟོག་པ་གཉིས་གཅིག་ཆར་འགྱུར་རོ་ཞེ་ན། མི་འགྱུར་ཏེ། རྣམ་པའི་ཤེས་པ་དེ་རྟོག་མེད་ཡིན་པའི་ཕྱིར་རོ་ཞེས་འདོད་དོ། །གསུམ་པ་ནི། ཕྱི་ཡུལ་གྱི་རྣམ་པ་སྣ་ཚོགས་ ― MLP018_Page_0300 ―
[མ་དཔེ་གཟིགས་ན་འདིར་གནོན།]
སུ་སྣང་ཡང་། ནང་འཛིན་བྱེད་ཀྱི་ཤེས་པ་གཅིག་གིས་ཤེས་ཏེ། མཁར་གྱི་ནང་དུ་སྤྲེའུ་གཅིག་འཇུག་པ་མྱུར་བས་གློ་སྐར་བཞིར་སྐེ་རིབ་རིབ་བྱུང་ནས་ལྟ་བ་ལྟར། སྒོ་ལྔ་ལ་ཤེས་པ་གཅིག་གིས་ཞུགས་ནས་ཡུལ་རིག་པའོ། །རིག་དུས་ནའང་རྣམ་པ་དང་། ཤེས་པ་གཉིས་ག་སེམས་གཅིག་གི་རང་བཞིན་དུ་ཐ་མི་དད་དེ། རྨི་ལམ་གྱི་སྣང་བ་དང་། འཛིན་བྱེད་རང་དུ་སྣང་བ་གཉིས་ཀ་ཡང་གཉིད་གཅིག་གི་ཤེས་པར་ཐ་མི་དད་པ་བཞིན་ནོ་ཞེས་འདོད་དོ། །གཉིས་པ་རྣམ་རྫུན་པ་ནི། ཕྱི་དོན་གྱི་རྣམ་པར་ཤེས་པ་ལ་འཁྲུལ་པར་སྣང་བའི་བག་ཆགས་རྫུན་པ་བ་ཡིན་གྱི། ཤེས་པར་བདེན་པ་མ་ཡིན་ལ། དེ་འཇལ་བྱེད་ཀྱི་ཤེས་པ་ཡང་རྫུན་པ་བས་གཞལ་གྱི། མྱོང་བ་བདེན་པ་བས་གཞལ་བ་ནི་མེད་དེ། ཡུལ་ཤེས་གཉིས་ཀ་ཡང་འཁྲུལ་སྣང་རྫུན་པ་བའི་རང་བཞིན་ཙམ་དུ་འདོད་དོ། །འདི་ལ་དབྱེ་ན། དྲི་བཅས་སུ་ཤར་བར་འདོད་པ་དང་། དྲི་མེད་དག་པ་བར་འདོད་པ་གཉིས་ལས། དང་པོ་ནི། ད་ལྟའི་རྣམ་པ་སྣ་ཚོགས་སུ་སྣང་བ་དང་། དེ་འཇལ་བའི་ཤེས་པ་གཉིས་ཀ་བློའི་དྲི་མ་ཉིད་སྣང་བ་ཙམ་ལས། དོན་དམ་པར་གཉིས་སུ་མེད་པའི་ཡེ་ཤེས་ཁམས་ཀྱི་ཡོན་ཏན་དང་བཅས་པ་ཙམ་ཞིག་ཡོད་ཀྱི། རྣམ་ཤེས་སུ་གྲུབ་པ་ནི་ཅི་ཡང་མེད་དོ། །སངས་རྒྱས་ཀྱི་ཆོས་སྐུ་ལྷག་མ་མེད་པ་ནི། གཉིས་སུ་མེད་པའི་ཡེ་ཤེས་ཉིད་དེ། དྲི་མ་མེད་པའི་དེ་བཞིན་ཉིད་ཡིན་ལ། ལྷག་བཅས་ཀྱི་གནས་སྐབས་ན་བག་ལ་ཉལ་གྱི་དྲི་མ་ཅུང་ཟད་ཡོད་པས། འཁྲུལ་པར་སྣང་བ་གཟིགས་པ་དང་། རོ་རྒྱབ་སྙུང་བ་ལ་སོགས་པ་ཡོད་དོ། །ཞེས་པ་དང་། ད་ལྟ་སེམས་ལ་ཉོན་མོངས་པ་དང་ཡེ་ཤེས་འདྲེས་པར་གནས་པའི་དྲི་མ་ཉོན་མོངས་པའི་ཆ་རྫུན་པ་བ་བསལ་བས། ལྷག་མ་མེད་པའི་ཡེ་ཤེས་དག་པ་མངོན་དུ་བྱེད་པའོ་ཞེས་འདོད་དོ། །དག་པ་ནི་རྣམ་པ་དང་རྣམ་ཤེས་རྫུན་པ་ཙམ་དུའང་གྲུབ་པ་མེད་དོ། །མངོན་པར་ཆགས་པ་དག་གིས་ན་ཆུང་ཡིད་ལ་བྱེད་པ་གོམས་པ་ལས། ཇི་ཞིག་ན་བསམ་མ་དགོས་པར། དེའི་བྱད་བཞིན་གྱི་སྣང་བ་མེད་པ་གསལ་སྣང་དུ་ཤར་བ་བཞིན་ནོ། །དེས་ན་ཡུལ་གྱི་རྣམ་པ་དཀར་དམར་སྣ་ཚོགས་སུ་སྣང་བ་དང་། འཇལ་བྱེད་ཀྱི་བློ་གཉིས་ཀ་མེད་བཞིན་སྣང་བ་གཟུགས་བརྙན་ལྟ་བུ་སྟེ། དེའི་ ― MLP018_Page_0301 ―
[མ་དཔེ་གཟིགས་ན་འདིར་གནོན།]
དོན་ཉམས་སུ་མྱོང་བའི་སོ་སོ་རང་གི་རིག་པའི་ཡེ་ཤེས་ཙམ་ཞིག་དོན་དམ་པར་ཡོད་དོ་ཞེས་འདོད་དོ། །གཉིས་པ་དབུ་མ་པ་ལ། རང་རྒྱུད་པ་དང་། ཐལ་འགྱུར་བ་གཉིས་ལས། དང་པོ་ནི། འདི་ལྟར་སྣ་ཚོགས་སུ་སྣང་བའི་རྣམ་པ་དང་འཇལ་བྱེད་མེད་པ་གསལ་སྣང་ཙམ་དུ་ཟད། དོན་དམ་པར་སོ་སོ་རང་གི་རིག་པའི་ཡེ་ཤེས་དེ་ཡང་རང་བཞིན་གྱིས་ངོ་བོ་ཉིད་མེད་པའོ་ཞེས་འདོད་དོ། །འདི་ལ་དབྱེ་ན། སྒྱུ་མ་དོན་དམ་དུ་འདོད་པ་དང་། རབ་ཏུ་མི་གནས་པ་གཉིས་ལས། དང་པོ་ནི། ཡུལ་ཡུལ་ཅན་དུ་གྲུབ་པ་མེད་ལ། མ་གྲུབ་པ་རིག་པའི་ཡེ་ཤེས་སྨྲ་བསམ་བརྗོད་མེད་ཙམ་ཞིག་དོན་དམ་པར་སྒྱུ་མའི་ཚུལ་དུ་ཡོད་པས། སྒོམ་པའི་ཡོན་ཏན་ས་ལམ་དང་། མཐར་ཕྱིན་པའི་འབྲས་བུ་སངས་རྒྱས་ཀྱི་ཡེ་ཤེས་སྒྱུ་མ་ལྟ་བུ་ཐོབ་ནས་ཆོས་ཀྱི་སྐུའི་ངང་ནས། སྒྱུ་མ་ལྟ་བུས་དོན་མཛད་པ་ཡིན་ཏེ། ཡུམ་བར་མ་ལས། ཆོས་ཐམས་ཅད་རྨི་ལམ་ལྟ་བུ། སྒྱུ་མ་ལྟ་བུ། མྱ་ངན་ལས་འདས་པ་ཡང་རྨི་ལམ་ལྟ་བུ་སྒྱུ་མ་ལྟ་བུ། མྱ་ངན་ལས་འདས་པ་བས་ལྷག་པའི་ཆོས་ཤིག་ཡོད་དེ། དེ་ཡང་རྨི་ལམ་ལྟ་བུ་སྒྱུ་མ་ལྟ་བུ། ཞེས་སོ། །ཆོས་ཐམས་ཅད་ནི་ཡུལ་ཤེས་སྣ་ཚོགས་པ་ཐམས་ཅད་དོ། །མྱ་ངན་ལས་འདས་པ་ནི་གཟུགས་སྐུ་བརྙེས་ནས་དོན་མཛད་པའོ། །དེ་ནས་ལྷག་པའི་ཆོས་ནི་སོ་སོ་རང་གི་རིག་པའི་དེ་བཞིན་ཉིད་དང་། ཆོས་སྐུ་དམ་པའོ་ཞེས་འདོད་དོ། །འདི་ལའང་སྒྱུ་མ་རིགས་དྲུག་དུ་འདོད་པ་དང་། སྒྱུ་མ་ལྟར་སྣང་དུ་འདོད་པ་ཡང་། སྒྱུ་མ་ཙམ་སོ་སོར་འདོད་པ་ལ་སོགས་པ་རྣམ་གྲངས་རབ་ཏུ་མང་སྟེ། རང་རྒྱུད་འོག་མ་པ་ཞེས་གྲགས་པ་ཡིན་ནོ། །གཉིས་པ་ནི། དོན་དམ་པར་སྒྱུ་མ་ཙམ་དུའང་མི་གནས་ཏེ། ཡུལ་དང་རྣམ་པ་མེད་པས་དེ་མེད་པར་མྱོང་བའི་སོ་སོ་རང་རིག་ཀྱང་མེད་པ་ནི། མོ་གཤམ་གྱི་བུ་མེད་པས་དེ་འཇལ་བྱེད་ཀྱི་ཤེས་པ་མེད་པ་བཞིན་ནོ། །ཀུན་རྫོབ་ལ་བདེན་པར་མེད་པས། དོན་དམ་ལ་གང་ཡང་མི་གནས་ཏེ། རྨི་ལམ་སད་པའི་དུས་ན། རྟ་གླང་གི་རྣམ་པ་འགགས་ཀྱང་། དང་པོ་ནས་མེད་པས་དོན་ལ་འགག་རྒྱུར་མ་གྲུབ་པ་བཞིན་ནོ། །ཡུམ་བར་མ་ལས། དོན་དམ་པར་ནི་འཁོར་བ་ཡང་མེད། མྱ་ངན་ལས་འདས་པ་ཡང་མེད། སྟོང་པ་ཉིད་ཀྱང་མེད་དེ། ཚིག་གི་བླ་དྭགས་ཙམ་དུ་བས་ ― MLP018_Page_0302 ―
[མ་དཔེ་གཟིགས་ན་འདིར་གནོན།]
ལགས་སོ། །ཞེས་གསུངས་པ་ལྟ་བུའོ་ཞེས་འདོད་དོ། །འདི་ལ་ཀུན་རྫོབ་རབ་ཏུ་མི་གནས་པ་དང་། རྒྱུ་མཚན་མི་གནས་པ་དང་། ལྡོག་ཆ་མི་གནས་པ་དང་། ལྡོག་བྱེད་མི་གནས་པ་དང་། གཅིག་མི་གནས་པ་དང་། དུ་མ་མི་གནས་པ་དང་། གཅིག་དང་དུ་མ་དང་བྲལ་བ་མི་གནས་པ་དང་། སྣང་ཙམ་རབ་ཏུ་མི་གནས་པ་ལ་སོགས་པ་རྣམ་གྲངས་དཔག་ཏུ་མེད་པ་ཡོད་དེ། དབུ་མ་རང་རྒྱུད་གོང་མ་པ་ཞེས་གྲགས་སོ། །དབུ་མ་ཐལ་འགྱུར་བ་ནི། དེ་ལྟར་དོན་དམ་པར་མ་གྲུབ་པ་དང་། ཀུན་རྫོབ་ཏུ་སྣང་ཙམ་སྒྱུ་མར་གྲུབ་པ་ལ་སོགས་པ་ཐམས་ཅད་བཀག་ནས། ཡོད་མེད་ཀྱི་མཐའ་ལས་འདས་པའི་རང་བཞིན་ཁས་ལེན་ཐམས་ཅད་དང་བྲལ་བར་འདོད་དེ། འཕགས་པ་ཏིང་ངེ་འཛིན་གྱི་རྒྱལ་པོ་ལས། རྟག་དང་མི་རྟག་འདི་ཡང་མཐའི་ཡིན་ཏེ། །ཡོད་དང་མེད་ཅེས་བྱ་བ་གཉིས་ཀ་མཐའ། །དེ་ཕྱིར་གཉིས་ཀའི་མཐའ་ནི་རྣམ་སྤངས་ནས། །མཁས་པས་དབུས་ལའང་གནས་པར་མི་བྱེད་དོ། །ཞེས་པ་དང་། དཀོན་མཆོག་ཏ་ལའི་མདོ་ལས། དེ་བཞིན་གཤེགས་པ་རྟག་ཏུ་སྐྱེ་མེད་ཆོས། །ཆོས་རྣམས་ཐམས་ཅད་བདེ་བར་གཤེགས་དང་འདྲ། །བྱིས་པའི་བློ་ཅན་མཚན་མར་འཛིན་པས་ན། །འཇིག་རྟེན་དག་ན་མེད་པའི་ཆོས་ལ་སྤྱོད། །ཅེས་པ་དང་། རྩ་བ་ཤེས་རབ་ལས། གང་གིས་རྟེན་ཅིང་འབྲེལ་བར་འབྱུང་། །འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞིར་བསྟན་པ། །རྫོགས་པའི་སངས་རྒྱས་སྨྲ་རྣམས་ཀྱིས། །དམ་པ་དེ་ལ་ཕྱག་འཚལ་ལོ། །ཞེས་པ་དང་། རྩོད་བཟློག་ལས། གལ་ཏེ་ངས་དམ་བཅས་འགའ་ཡོད། །དེ་ཚེ་ང་ལ་སྐྱོན་འདི་ཡོད། །ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་སོགས་ཀྱིས་བློས་བཀོད་པའི་གྲུབ་མཐའ་གང་ཡང་མེད་དེ་སྤྲོས་པ་ཞི་བའི་ཕྱིར་རོ། །ཞེས་འདོད་ཅིང་། སྣ་ཚོགས་སུ་སྣང་ཙམ་འཇིག་རྟེན་པ་ཇི་ལྟར་འཇོག་པ་ལྟར་བརྡ་ཤེས་པའི་ཡན་ལག་ཏུ་བཞག་ཀྱང་། དེ་ཡང་ཁས་ལེན་མེད་པས་ཆོས་སུ་སྣང་བ་བདེན་རྫུན་ལས་འདས་པས་ཡོད་མེད་ཀྱི་མཐའ་དང་ད་ལྟའི་དུས་ནས་བྲལ་བར་འདོད་དོ། །འདི་ནི་དབུ་མའི་ལྟ་བ་མཐར་ཐུག་ཡིན་པ་ཀླུ་ ― MLP018_Page_0303 ―
[མ་དཔེ་གཟིགས་ན་འདིར་གནོན།]
སྒྲུབ་ཞབས་ཀྱི་དགོངས་པ་ཐུན་མོང་མ་ཡིན་པའང་འདི་ཡིན་ཏེ་འདིའི་དོན་གཏན་ལ་འབེབས་: བྱའི་པའིགཞུང་ཆེན་པོ་དབུ་མ་རིགས་པའི་ཚོགས་དྲུག་སྟེ། རྩ་བ་ཤེས་རབ། རིགས་པ་དྲུག་ཅུ་པ། སྟོང་ཉིད་བདུན་ཅུ་པ། ཞིབ་མོ་རྣམ་འཐག རྩོད་པ་ཟློག་པ། ཐ་སྙད་སྒྲུབ་པ་རྣམས་སོ། །གཞན་ཡང་རང་སྟོང་དང་། གཞན་སྟོང་གི་ཚུལ་འཛིན་པའི་དབུ་མ་པ་མང་དག་བྱུང་སྟེ། དེ་གཉིས་ཀྱི་འཇོག་གཞི་ནི། རྒྱུད་བླ་མ་ལས། འདི་ལ་བསལ་བྱ་ཅི་ཡང་མེད། །བསྣན་པར་བྱ་བའང་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ནས་རྣམ་པར་གྲོལ། །རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་དང་། དེའི་འགྲེལ་པར། འདིས་ཅི་བསྟན་ཅེ་ན། གང་གི་ཕྱིར་རང་བཞིན་གྱིས་ཡོངས་སུ་དག་པ་དེ་བཞིན་གཤེགས་པའི་ཁམས་འདི་ལ་བསལ་བར་བྱ་བ་ཀུན་ནས་ཉོན་མོངས་པའི་རྒྱུ་མཚན་ནི་འགའ་ཡང་མེད་དེ། གློ་བུར་གྱི་དྲི་མ་དང་བྲལ་བ་ནི་འདིའི་རང་བཞིན་ཡིན་པའི་ཕྱིར་རོ། །འདི་ལ་རྣམ་པར་བྱང་བའི་རྒྱུ་མཚན་གྱིས་བསྣན་པར་བྱ་བའང་ཅུང་ཟད་ཡོད་པ་མ་ཡིན་ཏེ། རྣམ་པར་དབྱེ་བ་མེད་པའི་ཆོས་དག་པའི་ཆོས་ཉིད་ནི་རང་བཞིན་ཡིན་པའི་ཕྱིར་རོ། །དེས་ན་དེ་བཞིན་གཤེགས་པའི་སྙིང་པོ་ནི་རྣམ་པར་དབྱེ་བ་ཡོད་པ་དང་བྲལ་བ། ཤེས་པ་ཉོན་མོངས་པའི་སྦུབས་ཐམས་ཅད་ཀྱིས་ནི་སྟོངས་པ་ཡིན་ལ། རྣམ་པར་དབྱེ་བ་མེད་པ་བྲལ་མི་ཤེས་པ་བསམ་གྱིས་མི་ཁྱབ་པའི་སངས་རྒྱས་ཀྱི་ཆོས་གང་གའི་ཀླུང་གི་བྱེ་མ་སྙེད་ལས་འདས་པ་ནི་མི་སྟོང་ངོ་། །ཞེས་གསུངས་སོ། །དེ་ལ་རང་སྟོང་ནི། ཆོས་ཅན་ཇི་ལྟར་སྣང་བ་འདི་དག་སྣང་ཙམ་ཉིད་ནས་རང་རང་གི་ངོ་བོས་སྟོངས་པས་མེད་དགག་གི་སྟོང་ཉིད་དོན་དམ་པར་བཞེད་ཅིང་། ངོ་བོ་ཉིད་མེད་པར་སྨྲ་བའི་དབུ་མ་པ་ལ་དོན་དམ་དུ་ཐ་དད་མེད་ཀྱང་། ཀུན་རྫོབ་ཏུ་གྲུབ་པ་སྒྱུ་མ་ལྟ་བུ་ཞེས་རང་རྒྱུད་ཀྱི་དམ་བཅའ་འགོད་པ་དང་། ཐལ་འགྱུར་ཁོ་ན་འཕེན་པས་ཁས་ལེན་པའི་ཀུན་རྫོབ་ཙམ་ཡང་འགོག་པའི་སྲོལ་གཉིས་སྣང་ངོ་། །གཞན་སྟོང་དུ་གཏན་ལ་འབེབས་པའི་དབུ་མ་པ་རྣམས་ལ། ཤེས་བྱ་ཐམས་ཅད་མཚན་ཉིད་གསུམ་ ― MLP018_Page_0304 ―
[མ་དཔེ་གཟིགས་ན་འདིར་གནོན།]
དུ་འདོད་པ་དང་། ཀུན་བཏགས་དང་ཡོངས་གྲུབ་གཉིས་སུ་བསྡུ་བའི་ཁྱད་པར་ལས། ཆོས་ཅན་ངོས་འཛིན་ཚུལ་མི་འདྲ་བ་གཉིས་བྱུང་སྟེ། རྣལ་འབྱོར་སྤྱོད་པའི་གཞུང་དུ། སྟོང་གཞི་གཞན་དབང་དགག་བྱ་ཀུན་བཏགས་ཀྱིས་སྟོང་པའི་ཡོངས་གྲུབ་ཏུ་བཤད་པ་དང་། རྒྱུད་བླ་མ་སོགས་ལས་ཆོས་ཉིད་ཡོངས་གྲུབ་དགག་བྱ་ཀུན་བཏགས་ཀྱིས་སྟོང་པར་གསུངས་སོ། །དེས་ན་ཡོངས་གྲུབ་སེམས་ཀྱི་ཆོས་ཉིད་དོན་དམ་པའི་དབྱིངས་འདིའི་ངོ་བོ་ལ་དོར་བྱའི་དྲི་མ་དང་སྔར་མེད་ཀྱི་ཡོན་ཏན་གསར་དུ་སྒྲུབ་ཏུ་མེད་དེ། ཡེ་ནས་རང་བཞིན་གྱིས་རྣམ་པར་དག་ཅིང་ཡོན་ཏན་ལྷུན་གྲུབ་ཡིན་པའི་ཕྱིར། སྐྱོན་ཡོན་གྲུབ་བསལ་ལས་འདས་པས་དོན་དམ་གྱི་དབྱིངས་དེ་ཁོ་རང་གི་ངོ་བོས་སྟོངས་པ་ཡིན། གློ་བུར་འཁྲུལ་སྣང་གི་ཆོས་གཟུང་འཛིན་སྤྲོས་པའི་ཆ་རྣམས་གཤིས་ལ་མ་གྲུབ་པས་ཀུན་རྫོབ་རང་གི་ངོ་བོས་སྟོངས་པ་ཡིན་ལ། དེ་འདྲ་དེ་དོན་དམ་ཆོས་ཉིད་ལས་གཞན་ཡིན་པས། དོན་དམ་གཞན་གྱི་ངོ་བོས་སྟོང་པ་ཞེས་པའི་དོན་ནོ། །མདོར་ན་ཀུན་རྫོབ་ཀྱི་ཕྱོགས་ནས་གཞལ་ན་མེད་དགག་དང་མ་ཡིན་དགག་གི་སྟོང་ཉིད། དོན་དམ་དབྱིངས་ཀྱི་ཕྱོགས་ནས་གཞལ་ན་རང་ལས་གཞན་རྟོག་པའི་ཡུལ་གྱིས་སྟོངས་པའོ། །འོ་ན་དོན་དམ་རང་གི་ངོ་བོས་སྟོངས་པ་ལྟར་གསུངས་པའི་དགོས་པ་གང་སྙམ་ན། དོན་དམ་ལ་དམིགས་ནས་བློས་བཟུང་བ་ལྟར་མ་གྲུབ་པ་ལ་དགོངས་པ་ཡིན་ནོ། །དེ་ལྟར་ཐོས་བསམ་གྱིས་གཏན་ལ་ཕབ་ནས་སྒོམ་པས་ཉམས་སུ་མྱོང་བའི་ལྟ་བ་ལ། འཁོར་ལོ་བར་པའི་དངོས་བསྟན་རིགས་ཚོགས་སུ་བཀྲལ་བ་ལྟར་ན། ངེས་དོན་མེད་དགག་ལ་བཞེད་པས་ཅི་ཡང་མི་སྒོམ་པ་ལ་སྟོང་ཉིད་སྒོམ་པ་དང་། ཅི་ཡང་མ་མཐོང་བ་ལ་དེ་ཁོ་ན་ཉིད་རྟོགས་པར་འཆད། འཁོར་ལོ་ཐ་མའི་དགོངས་པ་བྱམས་ཆོས་ཀྱི་གཞུང་ཐོགས་མེད་སྐུ་མཆེད་ཀྱིས་བཀྲལ་བ་དང་ཀླུ་སྒྲུབ་ཞབས་ཀྱིས་བསྟོད་ཚོགས་སུ། གཟུང་འཛིན་གཉིས་མེད་ཀྱི་ཡེ་ཤེས་ཉིད་སྒོམ་པས་ཉམས་སུ་མྱོང་བྱར་ཞིང་། དེ་ཉིད་གསང་སྔགས་ཀྱི་རྒྱུད་སྡེ་ཟབ་མོ་རྣམས་དང་ཡང་དགོངས་པ་མཐུན་པ་ཡིན་ནོ། །དེ་ཡང་སྔོན་གྱི་མཁས་གྲུབ་རྣམས་ཀྱིས་ཟུང་འབྲེལ་དུ་ཉམས་སུ་བཞེས་པ་ནི། སོ་སྐྱེའི་སར་ལྟ་བ་ཐོས་བསམ་གྱིས་གཏན་ལ་ ― MLP018_Page_0305 ―
[མ་དཔེ་གཟིགས་ན་འདིར་གནོན།]
འབེབས་པའི་ཚེ་བློའི་མཚན་འཛིན་གཞིག་དཀའ་བས། དེ་ཐོས་བསམ་ལས་བྱུང་བའི་ཤེས་རབ་ཀྱིས་འགོག་པར་བྱེད་པ་ལ་སྒྲོ་འདོགས་གཅོད་བྱེད་ཀྱི་རིགས་པ་ཐལ་འགྱུར་བ་རྣོ་བའི་ཕྱིར་དང་། ཡང་སྒོམ་བྱུང་ཉམས་མྱོང་གིས་གཏན་ལ་འབེབ་པའི་སྐབས་སུ་འཁོར་ལོ་ཐ་མར་གསུངས་པའི་དབུ་མའི་ལྟ་བ་དེ་ཉིད་ཟབ་ཅིང་ཆེས་བཟང་བ་ཡིན་ཏེ། དབྱིངས་རང་བཞིན་གྱིས་རྣམ་པར་དག་པ་དོན་དམ་པའི་བདེན་པ་རང་བྱུང་གི་ཡེ་ཤེས་དེ་ཉིད་ཆོས་ཐམས་ཅད་ཀྱི་གདོད་མའི་གནས་ལུགས་ཡིན་པ་གང་ཞིག གསང་སྔགས་ཀྱི་རྒྱུད་སྡེ་ཟབ་མོ་རྣམས་ནས་བཤད་པའི་ལྟ་བའི་ཉམས་ལེན་དང་ཡང་མཐུན་པའི་ཕྱིར་སྙམ་དུ་དགོངས་སོ། །དེས་ན་ཤིང་རྟའི་སྲོལ་འབྱེད་པ་པོ་ནི། བྱམས་མགོན་དང་སློབ་དཔོན་ཀླུ་སྒྲུབ་གཉིས་ཡིན་ཏེ། དགོངས་འགྲེལ་མཛད་པ་པོ་གཞན་དག་འདི་གཉིས་ཀྱི་བསྟན་བཅོས་ལ་བརྟེན་ནས་འཇུག་པའི་ཕྱིར། དེ་ཡང་ཀླུ་སྒྲུབ་ཞབས་ཀྱིས་འཁོར་ལོ་བར་པའི་དགོངས་འགྲེལ་དུ་ཆོས་ཐམས་ཅད་རང་སྟོང་གཏན་ལ་འབེབས་བྱེད་དབུ་མ་རིགས་ཚོགས་སོགས་དང་། འཁོར་ལོ་ཐ་མའི་དགོངས་འགྲེལ་གཞན་སྟོང་གཏན་ལ་འབེབས་བྱེད་བསྟོད་ཚོགས་སོགས་ཀྱིས་བཀའི་དགོངས་པ་ལེགས་པར་བཀྲལ་ཞིང་དེ་དང་དེའི་སྲོལ་འཛིན་རིམ་བཞིན་ངོ་བོ་ཉིད་མེད་པར་སྨྲ་བའི་ཐལ་རང་གི་སློབ་དཔོན་རྣམས་དང་། འཇིགས་མེད་ཆོས་སྐྱོང་ཞབས་ཡིན་ལ། རྒྱལ་ཚབ་མ་ཕམ་མགོན་གྱིས་གཞན་སྟོང་དུ་གཏན་ལ་འབེབས་པའི་བསྟན་བཅོས་བྱམས་ཆོས་སྡེ་ལྔ་མཛད་དེ། འཕགས་པ་ཐོགས་མེད་ལ་བསྟན་པ་སྐུ་མཆེད་གཉིས་ཀྱིས་ལེགས་པར་བཀྲལ་བའི་སྲོལ་དེ་ཉིད་ཕྱོགས་གླང་ཆོས་གྲགས་དང་ཙནྡྲ་གོ་མི་ལ་སོགས་པས་བཟུང་ཞིང་སྲོལ་འབྱེད་ཀྱི་སློབ་དཔོན་དེ་གཉིས་ཀའང་དབུ་མ་པ་ཆེན་པོ་ངེས་དོན་འཆད་པ་ལ་འཁྲུལ་མེད་ཉིད་དུ་རྒྱལ་བས་ལུང་བསྟན་པ་ཡིན་ཏེ། ཇི་སྐད་དུ། དགེ་སློང་དཔལ་ལྡན་ཞེས་གྲགས་པ། །དེ་མིང་ཀླུ་ཞེས་འབོད་པ་སྟེ། །ཡོད་དང་མེད་པའི་ཕྱོགས་འཇིག་བྱེད། །ང་ཡི་ཐེག་པ་འཇིག་རྟེན་དུ། །བླ་མེད་ཐེག་པར་རབ་བསྒྲུབས་ནས། །ཞེས་དང་། ཐོགས་མེད་ཅེས་བྱའི་དགེ་སློང་ནི། །བསྟན་བཅོས་དེ་ཡི་དོན་ལ་མཁས། །མདོ་སྡེ་དྲང་དོན་ངེས་པའི་དོན། །རྣམ་པ་མང་པོ་རབ་ཏུ་འབྱེད། །ཅེས་ ― MLP018_Page_0306 ―
[མ་དཔེ་གཟིགས་ན་འདིར་གནོན།]
གསུངས་ཤིང་། རིན་ཆེན་འབྱུང་གནས་ཞི་བའི་ཞབས་ཀྱིས་ཀྱང་། ཀླུ་སྒྲུབ་དང་ཐོགས་མེད་རྣམ་གཉིས་གྲུབ་མཐའ་གཅིག་ཏུ་བཀྲལ་ཏེ། དེས་མཛད་པའི་དབུ་མ་རྒྱན་ལས། བྱམས་པ་ཐོགས་མེད་ཀྱིས་གསུངས་ཤིང་། །ཀླུ་སྒྲུབ་ཀྱང་ནི་བཞེད་པ་ཡིན། །ཚད་མ་ལུང་དང་ལྡན་གྱུར་པའི། །བདེན་པ་གཉིས་པོ་འདིར་བཤད་བྱ། །ཞེས་འབྱུང་ཞིང་། ཞི་བ་འཚོ་ལ་སོགས་པ་རྣམས་ཀྱང་དགོངས་པ་ཕྱོགས་མཐུན་པ་སྣང་ངོ་། །སློབ་དཔོན་དེ: ཉིད་གཉིས་དགོངས་པ་མི་གཅིག་པར་བཀྲལ་བ་སོགས་ཀྱི་ལོ་རྒྱུས་སྔོན་གྱི་ཡིག་རྙིང་དག་དང་གཏེར་ཆེན་བླ་མ་ཡབ་སྲས་ཀྱི་གསུང་གི་བདུད་རྩི་ལས་ཐོས་པ་ཅུང་ཟད་བརྗོད་ན། སློབ་དཔོན་སངས་རྒྱས་བསྐྱངས་དང་། སློབ་དཔོན་ལེགས་ལྡན་པ་གཉིས་བྱུང་བ་དེ་གཉིས་ཀྱིས། ཀླུ་སྒྲུབ་ཀྱི་སློབ་མ་སློབ་དཔོན་ཀླུའི་བཤེས་གཉེན་དང་། དེའི་སློབ་མ་སློབ་དཔོན་དགེ་འདུན་བསྲུང་བ་ལ་ཀླུ་སྒྲུབ་ཀྱི་གཞུང་ལུགས་རྣམས་ཐོབ་པར་བྱས་ནས་བསྒོམས་པས་ཡེ་ཤེས་མཆོག་བརྙེས། སྔ་མས་འཇམ་དཔལ་དང་། ཕྱི་མས་ཕྱག་རྡོར་གྱི་ཞལ་གཟིགས་ཆོས་མང་དུ་བསྟན། དབུ་མ་རྩ་བའི་གཞུང་ལ་སློབ་དཔོན་སྔ་མའི་བཞེད་པ་རྣམས་སུན་ཕྱུང་སྟེ་འགྲེལ་པ་མཛད་ཅིང་། ཀླུ་སྒྲུབ་ཀྱི་མན་ངག་ལ་བརྟེན་པར་ཞལ་གྱིས་བཞེས་ནས་མདོ་སྡེ་འགའ་ཞིག་ལ་འགྲེལ་པ་མཛད་ནས། དབུ་མ་ངོ་བོ་ཉིད་མེད་པར་སྨྲ་བའི་གཞུང་བཙུགས་ཤིང་སངས་རྒྱས་བསྐྱངས་སློབ་མ་ཧ་ཅང་མང་བ་མ་ཡིན་ཡང་། ལེགས་ལྡན་པ་སློབ་མ་ཤིན་ཏུ་མང་བས་དགེ་སློང་སྟོང་ཕྲག་མང་པོ་རྗེས་སུ་འབྲང་བ་ཡིན་པས་ཤིན་ཏུ་དར་བར་གྱུར་ཏོ། །སློབ་དཔོན་འདི་གཉིས་མ་བྱོན་གོང་དུ་ཐེག་ཆེན་མཐའ་དག་བསྟན་པ་ཡུག་གཅིག་ཏུ་གནས་ཤིང་། སློབ་དཔོན་འདི་གཉིས་ཀྱིས་ཀླུ་སྒྲུབ་དང་ཐོགས་མེད་གཉིས་ཤིན་ཏུ་ཐ་དད་དེ། ཐོགས་མེད་ཀྱིས་ནི་དབུ་མའི་ལམ་མི་སྟོན་སེམས་ཙམ་ཁོ་ན་ཡིན་པས། ཁོ་བོ་ཅག་གི་འདི་ལས་གཞན་དུ་མེད། ཅེས་མཐའ་གཞན་འགོག་པར་མཛད་པས། སློབ་དཔོན་དེ་གཉིས་སྐུ་འདས་པའི་འོག་ཏུ་ཐེག་ཆེན་ལའང་ནང་དུ་སྡེ་གཉིས་སུ་གྱེས་ཏེ་རྩོད་པ་ཆེན་པོ་བྱུང་བར་གྲགས། དེ་རྣམས་སངས་རྒྱས་བསྐྱངས་ཀླུ་སྒྲུབ་ཀྱི་སྐུ་ཚེའི་སྟོད་ཀྱི་སློབ་མ་དང་། ལེགས་ལྡན་པ་སྐུ་ཚེའི་སྨད་ཀྱི་སློབ་ ― MLP018_Page_0307 ―
[མ་དཔེ་གཟིགས་ན་འདིར་གནོན།]
མ་ཡིན་པ་དང་། རྩོད་པ་བྱས་པ་སྐད། སངས་རྒྱས་བསྐྱངས་ཟླ་གྲགས་སུ་སྐྱེ་བ་བཞེས་ཟེར་བ་སོགས་རིགས་པས་མ་གྲུབ་པའི་ཅོལ་གཏམ་དུ་ཟད་དོ། །དེའི་རྗེས་སུ་དཔལ་ལྡན་ཟླ་བ་གྲགས་པ་བྱོན་ནས་ལེགས་ལྡན་གྱི་སློབ་མ་མང་པོ་དང་། སངས་རྒྱས་བསྐྱངས་ཀྱི་སློབ་མ་ཀ་མ་ལ་བུདྡྷི་ལ། ཀླུ་སྒྲུབ་ཀྱི་གཞུང་ལུགས་དང་མན་ངག་ཐམས་ཅད་མནོས། མཁས་པ་ཆེན་པོར་གྱུར་ནས་དཔལ་ན་ལེནྡྲའི་མཁན་པོ་མཛད། རྩ་འཇུག་བཞི་གསུམ་དང་རིགས་པ་དྲུག་ཅུ་པ་ལ་སོགས་པའི་འགྲེལ་བ་མཛད། སངས་རྒྱས་བསྐྱངས་ཀྱི་ལུགས་དེ་ཉིད་ཆེར་དར་བར་མཛད། རི་མོར་བྲིས་པའི་བ་ལས་འོ་མ་དང་རྩིག་པ་སོགས་ལ་ཐོགས་མེད་དུ་བཞུད་པ་སོགས་ངོ་མཚར་བའི་མཛད་པ་དུ་མ་བསྟན་ཅིང་། མུ་སྟེགས་ཀྱི་རྒོལ་བ་ངན་པ་རྣམས་ཚར་བཅད། བྲམ་ཟེ་དང་ཁྱིམ་བདག་མང་པོ་བསྟན་པ་ལ་བཅུག་ནས་ཆོས་གཞི་ཆེན་པོ་མང་དུ་བཏབ་པར་གྲགས་སོ། །དེ་དང་དུས་མཉམ་སློབ་དཔོན་ཙནྡྲ་གོ་མི་བྱུང་སྟེ། སྤྱན་རས་གཟིགས་ཀྱི་ཞལ་མཐོང་བའི་མུ་སྟེགས་ཀྱི་པཎྜི་ཏ་རྒྱང་འཕེན་པའི་སྟོན་པ་ཞིག་དང་རྩོད་པར་གྱུར་ཏེ། དེའི་རིང་ལུགས་སུན་ཕྱུང་། ཡང་རིགས་པ་ནི་བློས་རྣམ་པར་བཏགས་པ་ཡིན་པས་གང་བློ་བསྒྲིན་པ་དེ་རྒྱལ་བ་ཡིན་གྱི། སྐྱེ་བ་སྔ་ཕྱི་ཡོད་པའི་རྟགས་མངོན་སུམ་མེད་པས་ཁོ་བོ་ཅག་མི་འདོད་ཟེར་བ་ན། དེར་ཡུལ་གྱི་རྒྱལ་པོ་ལ་སོགས་པ་དཔང་པོར་བཞག་སྟེ། ང་ཉིད་སྐྱེ་བ་ལེན་པ་ཡིན་པས་དཔྲལ་བར་རྟགས་ཐོབ་ཅིག་བྱས་ནས། དེས་དཔྲལ་བར་མ ཚལ་གྱིས་ཐིག་ལེ་ཤ་ལ་ཐིམ་པ་གཅིག་བྱས། ཁ་ནང་དུ་མུ་ཏིག་གཅིག་བཅུ ག་ནས་དེ་ཉིད་དུ་འདས་ཏེ། དེའི་ལུས་ཟངས་ཁ་སྦྱོར་གྱི་ནང་དུ་བཅུག་ནས་རྒྱལ་པོས་རྒྱས་བཏབ་བོ། །དེ་རྒྱལ་རིགས་ཀྱི་པཎྜི་ཏ་བི་ཤྭ་ས་ག་ཞེས་པའི་བུར་སྐྱེ་བར་ཁས་བླངས་པ་བཞིན། དེ་ལ་ཁྱེའུ་མཚན་དང་ལྡན་པ་ཞིག་བཙས་མ་ཐག་ཏུ་མཚལ་གྱི་རི་མོ་དཔྲལ་བར་ཡོད་པ་ཁ་ནང་དུ་མུ་ཏིག་ཡོད་པ་དེ་བྱུང་། རྒྱལ་པོ་སོགས་ཀྱིས་སྔར་གྱི་ཕུང་པོ་དེ་ལ་བལྟས་པས་དཔྲལ་བའི་མཚལ་གྱི་རི་མོ་ཡང་བྱི། མུ་ཏིག་གི་ཤུལ་ཧར་རེ་འདུག དེར་མུ་སྟེགས་དེ་ཡང་སྐྱེ་བ་སྔ་ཕྱི་ཡོད་པར་ཡིད་ཆེས་སྐད། ཁྱེའུ་དེ་བཙས་མ་ཐག་ཏུ་མ་ལ་ཕྱག་བྱས་ཏེ་ཟླ་བ་བཅུར་འོ་མ་བརྒྱལ་ལམ་བྱས་ ― MLP018_Page_0308 ―
[མ་དཔེ་གཟིགས་ན་འདིར་གནོན།]
པས་བཙས་མ་ཐག་སྨྲ་བ་ལྟས་ངན་ནོ་སྙམ་ནས་ཁ་རོག་འདུག་བྱས་པས་ལོ་བདུན་བར་ཅང་མ་སྨྲས་པས་ལྐུག་པའོ་སྙམ་མོ། །སྐབས་དེར་མུ་སྟེགས་ཀྱི་རྒོལ་བ་ཤིན་ཏུ་གོ་དཀའ་བ་སྙན་དང་གས་ཀྱི་ཚིགས་བཅད་སངས་རྒྱས་པ་རྣམས་ཀྱི་གྲུབ་མཐའ་འགོག་པར་བྱེད་པ་གཅིག་བརྩམས་ནས་རྒྱལ་པོ་དང་མཁས་པའི་ཚོགས་ཐམས་ཅད་ལ་གྲིམས་སོ། །དེར་བི་ཤྭ་ས་གའི་ཁྱིམ་དུ་བྱུང་བ་ན། དོན་དེ་ཡུན་རིང་བརྟག་པས་མ་གོ་བས་ལན་གདབ་པར་ག་ལ་ནུས། ལན་གཅིག་བྱ་བ་གཅིག་གི་ཕྱིར་ཁྱིམ་གྱི་ཕྱི་རོལ་དུ་སོང་བ་ན། དེར་ཙནྡྲ་གོ་མི་ལོ་བདུན་འགྲོ་བ་དེས་བལྟས་པ་ན། དོན་དེ་ཤེས་པར་དཀའ་བ་མེད། དོན་འགྲེལ་གྱི་ཡིག་ཆུང་བཏབ། ལན་གྱི་ཚིགས་བཅད་ཀྱང་བྲིས་སོ། །ཕས་ནང་དུ་འོངས་པ་ན་དེ་ལྟར་བྲིས་པ་མཐོང་ནས། ཁྱིམ་དུ་སུ་བྱུང་ཞེས་ཙནྡྲ་གོ་མིའི་མ་ལ་དྲིས་སོ། །གཞན་དུ་སུ་ཡང་མ་འོངས་བུ་ལྐུག་པས་བལྟ་ཞིང་བྲིས་སོ། །དེར་ཕས་བུ་ལ་དྲིས་པ་ན་མའི་གདོང་ལ་བལྟ་ཞིང་འདུག མས་སྨྲོས་ཤིག་བྱས་པས། འདི་ནི་བདག་གིས་བྲིས་ཏེ་རྒོལ་བ་འདི་ཟློག་པ་ནི་དཀའ་བ་མ་ཡིན་ནོ་ཞེས་ཟེར། དེ་ནས་ནངས་པར་ཙནྡྲ་གོ་མི་དང་མུ་སྟེགས་ཀྱི་སྟོན་པ་དེ་གཉིས་བརྩད་པས་ཙནྡྲ་གོ་མི་རྒྱལ་ཏེ་བྱ་དགའ་ཆེན་པོ་ཐོབ། ཕྱོགས་ཐམས་ཅད་དུ་མཁས་པའི་གྲགས་པས་ཁྱབ་བོ། །དེ་ནས་ནམ་ཞིག་གི་ཚེ་དཔལ་ན་ལེནྡྲར་བྱོན་པས། དེའི་ཚེ་མཁན་པོར་གྱུར་པ་ཟླ་བ་གྲགས་པ་ཡིན་པ་དང་མཇལ་ནས། ཁྱོད་གང་ནས་འོངས་བྱས་པས། ལྷོ་ཕྱོགས་ནས་འོངས། ཆོས་གང་ཤེས་དྲིས་པས། སྒྲ་པ་ཎི་པ་དང་། བསྟོད་པ་བརྒྱ་ལྔ་བཅུ་པ་དང་། མཚན་ཡང་དག་པར་བརྗོད་པ་གསུམ་ཤེས་བྱས་པས། འདི་གཞུང་གསུམ་ལས་མི་ཤེས་ཞེས་ཚིག་ཁེངས་བསྐྱུངས་ཀྱང་། དོན་ལ་ཐམས་ཅད་ཤེས་པར་ཁས་བླངས་པ་ཡིན་པས་ཙནྡྲ་གོ་མི་ཡིན་ནམ་སྙམ་དྲིས་པས། འཇིག་རྟེན་ན་དེ་ལྟར་གྲགས་གསུངས། དེ་ནས་ཙནྡྲ་གོ་མིས་ཐོགས་མེད་ཀྱི་སྲོལ་ལ་བརྟེན་ཏེ་རྣམ་རིག་གི་ཕྱོགས་བཟུང་། ཟླ་གྲགས་ཀྱིས་ཀླུ་སྒྲུབ་ཀྱི་གཞུང་སངས་རྒྱས་བསྐྱངས་ཀྱིས་བཀྲལ་བ་ལ་བརྟེན་ཏེ་ངོ་བོ་ཉིད་མེད་པར་སྨྲ་བའི་ཕྱོགས་བཟུང་། ལོ་བདུན་གྱི་བར་དུ་བགྲོ་གླེང་གི་བརྒལ་བརྟག་མཛད་དེ། རྩོད་པ་དེ་བལྟ་བའི་ཕྱིར་སྐྱེ་བོ་མང་པོ་རྟག་ཏུ་འདུས་ ― MLP018_Page_0309 ―
[མ་དཔེ་གཟིགས་ན་འདིར་གནོན།]
པ་ལས། གྲོང་པའི་ཁྱེའུ་དང་བུ་མོ་ཚུན་ཆད་ཀྱིས་ཀྱང་ཕྱོགས་ཙམ་རིག་ནས། ཀྱེ་མ་འཕགས་པ་ཀླུ་སྒྲུབ་གཞུང་། །ལ་ལའི་སྨན་ལ་ལ་ལའི་དུག །མ་ཕམ་འཕགས་པ་ཐོགས་མེད་གཞུང་། །སྐྱེ་བོ་ཀུན་ལ་བདུད་རྩིར་གྱུར། །ཅེས་གླུར་ལེན་པ་བྱུང་ངོ་། །ཟླ་གྲགས་ཀྱི་དགོངས་པར། འདི་ལ་རྩོད་པ་སློབ་མི་ཞིག་ཡོད་དམ་བསམ་ནས། ཙནྡྲ་གོ་མིའི་ཕྱི་བཞིན་བྱོན་པ་ན་སྤྱན་རས་གཟིགས་ཀྱི་ལྷ་ཁང་ཞིག་ཡོད་པར་བཞུད། སྒོའི་ཕྱི་ནས་ཉན་པས། སྤྱན་རས་གཟིགས་ཀྱི་རྡོ་སྐུ་དེས་སློབ་དཔོན་གྱིས་སློབ་མ་ལ་སྟོན་པ་བཞིན་ཆོས་གསུང་བ་གཟིགས་པས། འཕགས་པ་ལ་ཉེ་རིང་མི་མངའམ། ཞེས་སྒོ་ཕྱེ་བས་དེ་ཉིད་དུ་རྡོ་སྐུར་གྱུར་ཏེ། ཆོས་སློབ་བཞིན་པའི་ཕྱག་སོར་ཀེ་རེ་ལུས་པས་སྤྱན་རས་གཟིགས་མཛུབ་ཀེར་མར་གྲགས། དེ་སྐབས་ནས་རྩོད་པ་རང་ཞིའོ་ཞེས་བྱུང་ངོ་། །དེ་ལྟར་རང་སྟོང་དང་གཞན་སྟོང་གི་གྲུབ་པའི་མཐའ་མི་གཅིག་པ་དུ་མ་བྱུང་བ་དེ་དག་ཕྱོགས་གཅིག་དག་ལ་ཕྱོགས་གཅིག་མ་དག་ཅེས་སྐུར་པ་གདབ་ཏུ་མི་རུང་སྟེ། འགྲོ་བ་བློ་མཐོ་དམན་ལ་ལྟོས་ནས་དེ་དང་དེ་འདུལ་བའི་ཐབས་སུ་སྟོན་པ་ཡིན་པ་དང་། སློབ་དཔོན་དེ་དག་ཀྱང་འཕགས་པ་ཁོ་ནར་ཟད་པས། བྱིས་པས་འཕགས་པའི་སྤྱོད་ཡུལ་ལ་སྒྲོ་སྐུར་བཏབ་པར་མི་བྱ་སྟེ་འགྲོ་བ་འདུལ་བའི་སངས་རྒྱས་ཀྱི་ཕྲིན་ལས་པ་ཡིན་པའི་ཕྱིར་ཏེ། དེའང་ནམ་མཁའ་དྲི་མ་མེད་པའི་མདོ་ལས། དེ་བཞིན་གཤེགས་པ་ནི་འགྲོ་བ་ཐམས་ཅད་ལ་དངོས་སུ་སྣང་བའང་མ་ཡིན་གྱི། དགེ་བའི་བཤེས་གཉེན་ནི་ཡོངས་སུ་སྣང་བས་དེ་བཞིན་གཤེགས་པ་བས་དགེ་བའི་བཤེས་གཉེན་ལྷག་པར་ཡང་ཟུངས་ཤིག ཅེས་དང་། ཡོན་ཏན་རིན་ཆེན་སྡུད་པ་ལས། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་ཅིང་། །འཆད་དང་རིག་པ་དག་དང་ལྡན་པར་བརྗོད་པ་དང་། །མཆོག་འཕགས་བདེ་བ་བསྐྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། །ཞེས་གསུངས་པའི་ཕྱིར་རོ། །དེ་ཡང་ངེས་པའི་དོན་དུ་ནི་འདི་ལྟར་ཡིན་ཏེ། བཀའ་འཁོར་ལོ་དང་པོར་ནི་ལས་དང་པོ་པ་དང་། དབང་པོ་དམན་པ་རྣམས་ལ་དགོངས་ནས་བདེན་བཞི་སྤང་གཉེན་དུ་བྱ་བས་འཁོར་བ་ལས་བཟློག་པའི་ཕྱིར་སྤང་བྱ་ལས་རྣམ་པར་གྲོལ་བའི་ཐབས་ ― MLP018_Page_0310 ―
[མ་དཔེ་གཟིགས་ན་འདིར་གནོན།]
སོ། །བར་པར་ཡོངས་སུ་སྦྱོང་བ་བྱས་པ་དང་། དབང་པོ་འབྲིང་པོ་ལ་དགོངས་ནས་གཉེན་པོར་འཛིན་པའི་འཆིང་བ་ལས་གྲོལ་བའི་ཐབས་སུ་སྒྱུ་མའི་དཔེ་བརྒྱད་དང་ནམ་མཁའ་ལྟ་བུའི་སྟོང་པ་ཉི ད་བསྟན་ཏེ། ཐ་མར་མཐར་ཕྱིན་པ་དང་དབང་པོ་རྣོན་པོའི་ངོར་ཤེས་བྱའི་གཤིས་ཇི་ལྟར་གནས་པ་དེ་ལྟར་གསུངས་པ་ཡིན་ནོ། །དེ་ལ་འདིར་བཀའ་ཐ་མ་ངེས་པ་དོན་གྱི་མདོ་སྡེ་སངས་རྒྱས་ཐམས་ཅད་ཀྱི་གསང་བ་ཆེན་པོ་ཇི་ལྟ་བ་བཞིན་མངོན་དུ་སྟོན་པ་ནི། འཕགས་པ་གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོ་དང་། དཔལ་ཕྲེང་སེང་གེའི་ང་རོ་སྒྲས་ཞུས་པའི་མདོ་དང་། བུ་མོ་རིན་ཆེན་གྱིས་ཞུས་པའི་མདོ་དང་། ལྷ་མོ་དྲི་མ་མེད་པས་ཞུས་པའི་མདོ་དང་། མིའུ་ཐུང་སོར་ཕྲེང་ཅན་གྱི་མདོ་དང་། འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་དང་། བྱམས་པས་ཞུས་པའི་མདོ་དང་། དེ་བཞིན་གཤེགས་པའི་སྙིང་པོའི་མདོ་ལ་སོགས་པ་རྣམས་ཡིན་ཏེ། དེ་དག་ལས་སེམས་ཅན་ཐམས་ཅད་ལ་ཡེ་ནས་གནས་པའི་ཆོས་ཀྱི་དབྱིངས་རང་བཞིན་གྱིས་དག་པའི་དེ་བཞིན་གཤེགས་པའི་སྙིང་པོ་སྟེ། ཡེ་ནས་གནས་པ་འགྱུར་བ་མེད་པ། དེའི་སྣང་ཆ་ལས་གཟུགས་སྐུ་མཚན་དང་དཔེ་བྱད་ཀྱི་འབྱུང་ཁུངས་དང་། སྟོང་ཆ་ལས་ཆོས་ཀྱི་སྐུ་སྤྲོས་པའི་མཐའ་ཐམས་ཅད་དང་བྲལ་བ་ཡེ་ནས་ལྷུན་གྲུབ་ཏུ་གནས་པ་ཉིད། ཡོན་ཏན་ལྷུན་གྱིས་གྲུབ་པས་ནོར་བུ་དང་། གཞན་དུ་མི་འགྱུར་བས་ནམ་མཁའ་དང་། སེམས་ཅན་ཐམས་ཅད་ལ་རླན་ཞིང་ཁྱབ་པས་ཆུ་དག་པའི་དཔེས་བསྟན་ཏེ། རྒྱུད་བླ་མ་ལས། རིན་ཆེན་ནམ་མཁའ་ཆུ་དག་བཞིན། །རྟག་ཏུ་རང་བཞིན་ཉོན་མོངས་མེད། །ཅེས་སོ། །དེ་ཉིད་སེམས་ཅན་ཐམས་ཅད་ལ་ཡོད་པར་རྒྱུད་བླ་མ་ལས། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་སེམས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་དང་། བརྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །དེ་བསལ་ན་ནི་སངས་རྒྱས་ཉིད། །ཅེས་སོ། །དེའང་སྔར་སེམས་ཅན་པའི་དུས་ན་མེད་པའི་ཡོན་ཏན་ཕྱིས་གསར་དུ་བསྐྱེད་པར་འདོད་པ་ནི་མ་ཡིན་ཏེ། འཕོ་འགྱུར་མེད་པའི་ཕྱིར་ཏེ། ― MLP018_Page_0311 ―
[མ་དཔེ་གཟིགས་ན་འདིར་གནོན།]
སྙིང་པོ་རབ་ཏུ་བསྟན་པའི་མདོ་ལས། ཐོག་མ་མེད་པ་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །འདི་ཡོད་པས་ན་འགྲོ་ཀུན་དང་། །མྱ་ངན་འདས་པ་ཐོབ་པ་ཡིན། །ཇི་ལྟར་སྔོན་དེ་ཕྱིས་དེ་བཞིན། །འགྱུར་བ་མེད་པའི་དེ་བཞིན་ཉིད། །ཅེས་སོ། །དེ་ཡང་དཔེ་དགུས་ཉོན་མོངས་པའི་སྦུབས་ན་གནས་པར་བསྟན་པ་ནི། རྒྱུད་བླ་མ་ལས། སངས་རྒྱས་པད་ངན་སྦྲང་རྩི་སྦྲང་མ་ལ། །སྦུན་ལ་སྙིང་པོ་མི་གཙང་ནང་ན་གསེར། །ས་ལ་གཏེར་དང་མྱུག་སོགས་འབྲས་ཆུད་དང་། །གོས་རུལ་ནང་ན་རྒྱལ་བའི་སྐུ་དང་ནི། །བུད་མེད་ངན་མའི་ལྟོ་ན་མི་བདག་དང་། །ས་ལ་རིན་ཆེན་གཟུགས་ཡོད་ཇི་ལྟ་བར། །གློ་བུར་ཉོན་མོངས་དྲི་མས་བསྒྲིབས་པ་ཡི། །སེམས་ཅན་རྣམས་ལ་དེ་བཞིན་ཁམས་འདི་གནས། །ཞེས་སོ། །གཞན་ཡང་འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་ཆོས་ཀྱི་རྣམ་གྲངས་ལས་ཀྱང་། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་འདི་ལྟ་སྟེ། དཔེར་ན་རྒྱལ་པོ་ལ་གྱད་གཅིག་ཡོད་པའི་དཔྲལ་བ་ན་རྡོ་རྗེའི་ནོར་བུ་གཅིག་ཡོད་པ་གྱད་གཞན་དང་སྟོབས་བཀྱེ་བ་ལས། གྱད་ཕ་རོལ་པོས་མགོས་རེག་སྟེ། དཔྲལ་བའི་ནོར་བུ་དེ་ཤའི་ནང་དུ་ནུབ་ཀྱང་ནོར་བུ་གར་སོང་བ་མི་ཤེས་སོ། །རྨ་བྱུང་བའི་ཕྱིར་སྨན་པ་བོས་ནས་སྨན་པ་ཤིན་ཏུ་མཁས་པས་ནི། ནོར་བུ་ཤའི་ནང་དུ་སོང་བའ་ཕྱིར་རྨ་བྱུང་བས་དེ་ལ་སྨན་མི་བྱེད་དེ། འདི་སྐད་དུ། ཀྱེ་སྟོབས་པོ་ཆེ་ཁྱོད་ཀྱི་དཔྲལ་བའི་ནོར་བུ་ག་རེ་ཞེས་ཟེར་རོ། །གྱད་དེ་དངངས་ནས་སྨན་པ་ལ་འདི་སྐད་དུ། བདག་གི་དཔྲལ་བའི་ནོར་བུ་གར་ཡང་མ་སོང་བའི་རིགས་ཏེ། དེ་མེད་ན་འདི་སྒྱུ་མ་མ་ཡིན་ནམ་སྙམ་སེམས་ཏེ་ཤིན་ཏུ་མྱ་ངན་བྱེད་དོ། །དེ་ནས་སྨན་པ་དེས་ཀྱང་། དེའི་སྤྲོ་བ་བསྐྱེད་ནས། ཁྱོད་དེ་ལྟར་མྱ་ངན་མ་བྱེད་ཅིག ཁྱོད་སྟོབས་བཀྱེ་བ་ན་ནོར་བུ་ཤའི་ནང་དུ་ནུབ་སྟེ། གཟུགས་བརྙན་ཙམ་ཕྱི་རོལ་དུ་སྣང་ངོ་། །ཁྱོད་སྟོབས་བཀྱེ་བ་ན་ཞེ་སྡང་སྐྱེས་ཏེ། ནོར་བུའི་མཐུས་ཤའི་ནང་དུ་ནུབ་ཀྱང་མ་ཚོར་བ་ཡིན་ནོ། །དེ་སྐད་དུ་སྨྲས་ཀྱང་ཡིད་མ་ཆེས་ནས། འདི་སྐད་དུ། སྨན་པ་ཁྱོད་རྫུན་མ་ཟེར་ཅིག ཅི་སྟེ་ཤའི་ནང་དུ་ནུབ་ན་རྣག་ཁྲག་ཤིན་ཏུ་བཙོག་པ་ཡིན་པས་ཕྱིར་འབྱུང་བའི་རིགས་སོ། །ཅི་སྟེ་ཆུ་བའི་ ― MLP018_Page_0312 ―
[མ་དཔེ་གཟིགས་ན་འདིར་གནོན།]
ནང་དུ་སོང་ན་ནི་ཁྱོད་ཀྱིས་ཀྱང་མཐོང་བའི་མི་རིགས་སོ། །དེ་ནས་སྨན་པས་མེ་ལོང་བལྟར་བཅུག་ནས་མེ་ལོང་གི་ནང་དུ་ནོར་བུ་ཡང་གསལ་བར་སྣང་བར་གྱུར་ཏོ། །གྱད་དེས་དེ་ལྟར་གྱུར་པ་མཐོང་ནས་ངོ་མཚར་རྨད་ཀྱི་འདུ་ཤེས་སྐྱེས་སོ། །རིགས་ཀྱི་བུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། དགེ་བའི་བཤེས་གཉེན་ལ་བསྙེན་བསྐུར་མ་བྱས་པས་སངས་རྒྱས་ཀྱི་རང་བཞིན་ཡོད་ཀྱང་མཐོང་བར་མི་ནུས་སོ། །འདོད་ཆགས་དང་། ཞེ་སྡང་དང་། གཏི་མུག་གིས་བསྒྲིབས་ཏེ་ཟིལ་གྱིས་ནོན་པ་འགྲོ་བ་ཐ་དད་པ་མང་པོར་འཁོར་ཞིང་སྡུག་བསྔལ་བར་གྱུར་ཏོ། །ཞེས་པ་ནས། རིགས་ཀྱི་བུ། སེམས་ཅན་ཐམས་ཅད་ཀྱི་ལུས་ཀྱི་ནང་ན་སྟོབས་བཅུ་དང་། མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་ཡང་ཡོད་དོ། །ཞེས་པའི་བར་ཚུལ་དུ་མས་གསུངས་སོ། །དེ་ལྟར་རང་གནས་ཀྱི་ཡེ་ཤེས་དེ་ཉིད་རྟོགས་པའི་ཐབས་ལ་རྒྱལ་བས་འཁོར་ལོ་རིམ་པ་གསུམ་བསྐོར་བའི་ཚུལ་དཔེ་དོན་སྒོ་ནས་སྟོན་པ་ནི། ཡོངས་སུ་མྱ་ངན་ལས་འདས་པའི་མདོ་ལས། རིགས་ཀྱི་བུ་གཞན་ཡང་འདི་ལྟ་སྟེ། དཔེར་ན་བུད་མེད་བུ་ཆུང་ངུ་ཁ་མྱག་གསོ་བ་ཞིག་གལ་ཏེ་ནད་ཀྱིས་བཏབ་ན། བུད་མེད་དེ་ཤིན་ཏུ་མྱ་ངན་གྱིས་གདུངས་ཏེ་སྨན་པ་འཚོལ་ལོ། །དེ་ལ་སྨན་པས་སྨན་མར་དང་འོ་མ་དང་། ཤ་ཁ་ར་གསུམ་དུ་སྦྱར་ཏེ་བུ་ལ་བླུད་ནས། བུད་མེད་ལ་འདི་སྐད་ཅེས་བསྒོའོ། །བུ་འདི་སྨན་བཏང་གིས་རེ་ཞིག་སྨན་མ་ཞུའི་བར་དུ་ནུ་ཞོ་བླུད་དུ་མི་རུང་ངོ་ཞེས་བསྒོའོ། །དེ་ནས་བུད་མེད་དེས་ནུ་ཞོ་མ་བསྣུན་པའི་ཕྱིར་ནུ་མ་ལ་མཁྲིས་པས་བྱུགས་ནས། བུ་ལ་ཁོ་མོའ་ནུ་མ་དུག་གིས་བསྐུས་ཏེ་ནུར་མི་རུང་ངོ་ཞེས་ཟེར་རོ། །བུ་དེ་སྐོམ་གྱིས་གདུངས་ཏེ། ནུ་མ་ནུ་འདོད་ཀྱང་ཁ་བའི་རོ་ཚོར་མ་ཐག་ཏུ་ནུར་མི་བཏུབ་བོ། །སྨན་ཞུ་ནས་བུད་མེད་ཀྱིས་ནུ་མ་དག་པར་བཀྲུས་ཏེ། འདི་སྐད་དུ་བུ་ཚུར་ཤོག ད་ནུ་མ་ནུར་གཞུག་གོ །ཞེས་སྨྲས་ན། ཁྱེའུ་དེ་སྐོམ་གྱིས་གདུངས་ཀྱང་། སྔར་ཁ་བའི་རོ་མྱོང་བས་བོས་ཀྱང་འོང་དུ་མི་གཏུབ་བོ། །དེ་ལ་ཡང་མས་འདི་སྐད་དུ་བསྒོའོ། །ཁྱེད་སྔར་སྨན་འཐུངས་ཏེ་སྨན་མ་ཞུ་བའི་བར་དུ་ནུ་མ་བླུད་དུ་མི་རུང་བས། ཁོ་མོས་དུག་གིས་བསྐུས་པ་ཡིན་གྱིས། ད་ཁྱོད་ཀྱི་སྨན་ཡང་ཞུ་ལ། ཁ་བ་ཡང་ ― MLP018_Page_0313 ―
[མ་དཔེ་གཟིགས་ན་འདིར་གནོན།]
བཀྲུས་ཀྱིས་ད་ནི་ཁ་བའི་རོ་མེད་དོ། །ཞེས་སྨྲས་ན། གདོད་བག་ཀྱིས་ཉེ་སྟེ་འཐུང་དུ་གཏུབ་བོ། །རིགས་ཀྱི་བུ། དེ་བཞིན་གཤེགས་པ་ཡང་དེ་བཞིན་དུ་སེམས་ཅན་བསྒྲལ་བའི་ཕྱིར། སེམས་ཅན་ཐམས་ཅད་བདག་མེད་པའི་ཆོས་ལ་ནན་ཏན་བྱེད་པ་སྟོན་ཏོ། །དེ་ལ་ནན་ཏན་བྱས་པས་བདག་ཅེས་བྱ་བའི་སེམས་མེད་དེ། ཡོངས་སུ་མྱ་ངན་ལས་བཟླའོ། །དེ་ལ་ཡང་འཇིག་རྟེན་རྒྱང་འཕེན་པའི་ངན་པར་ལྟ་བ་བསལ་བའི་ཕྱིར། འཇིག་རྟེན་རྒྱང་འཕེན་པའི་ཆོས་ལས་འདས་པ་བསྟན་པའི་ཕྱིར་གཞན་ཡང་འཇིག་རྟེན་རྒྱང་འཕེན་པ་དག་བདག་ཏུ་ལྟ་བ་ཡང་དག་པ་མ་ཡིན་པར་བསྟན་པའི་ཕྱིར་བདག་མེད་པའི་ཆོས་བསྒོམས་པས་ཡོངས་སུ་དག་པའི་ལུས་སུ་འགྱུར་བའི་ཕྱིར། ཇི་ལྟར་བུད་མེད་དེས་བུའི་ཕྱིར་མཁྲིས་པས་ནུ་མ་བསྐུས་པ་བཞིན་དུ། དེ་བཞིན་གཤེགས་པ་ཡང་དེ་དང་འདྲ་སྟེ། སྟོང་པ་ཉིད་བསྒོམས་པའི་ཕྱིར་ཆོས་ཐམས་ཅད་ལ་བདག་མེད་ཅེས་གསུངས་སོ། །ཇི་ལྟར་བུད་མེད་དེས་ནུ་མ་ཕྱིར་བཀྲུས་ནས་བུ་བོས་ཏེ། ནུ་ཞོ་བླུད་དོ་ཞེས་བྱ་བ་བཞིན་དུ། ངས་དེ་བཞིན་གཤེགས་པའི་སྙིང་པོ་བསྟན་པ་ཡང་དེ་དང་འདྲ་སྟེ། དགེ་སློང་ཁྱོད་ཀྱང་མ་སྐྲག་པར། ཇི་ལྟ་བུ་དེ་ལ་མས་བོས་ཏེ། ནུ་ཞོ་བགས་ཀྱིས་འཐུངས་པ་བཞིན་དུ། དགེ་སློང་ཁྱོད་ཀྱང་བྱེ་བྲག་ཕྱེད་པར་གྱིས་ཤིག དེ་བཞིན་གཤེགས་པའི་སྙིང་པོ་ནི་མེད་པར་བྱ་བ་མ་ཡིན་ནོ། །ངས་སྔོན་ཕ་རོལ་ཏུ་ཕྱིན་པའི་མདོ་བརྗོད་པ་དག་ལས། སྟོང་པ་ཉིད་དུ་བསྟན་པ་དེ་ཡང་། རང་བཞིན་མེད་པ་ཙམ་ལ་དགོངས་ཏེ་གསུངས་པར་རིག་པར་གྱིས་ཤིག གཞན་དུ་ན་ཅི་ཡང་མེད་པའི་སྟོང་པ་ཉིད་བསྒོམས་པ་ལས་ནི། སངས་རྒྱས་ཀྱི་སྐུ་དང་ཡེ་ཤེས་ཀྱང་འབྱུང་བར་མི་འགྱུར་ཏེ། འབྲས་བུ་ནི་རྒྱུའི་རྗེས་སུ་བྱེད་པ་བཞིན་ནོ། །ཞེས་སོ། །འདི་ཉིད་ངེས་དོན་མཐར་ཐུག་ཡིན་པ་ཅིས་ཤེས་ཤེ་ན། སྟོན་པ་མྱ་ངན་ལས་འདས་པའི་ཁར་སོ་སོའ་སྐད་དང་མཐུན་པར་གསུང་གཅིག་གིས་ང་མྱ་ངན་ལས་འདའ་ཡི་སུ་དག་ཐེ་ཚོམ་དང་སོམ་ཉི་ཡོད་ན་ནངས་ཀྱི་ཐ་མ་འདིར་ཞུས་ཤིག་ཅེས་པའི་སྒྲ་ཆེན་པོས་སྲིད་རྩེའི་བར་དུ་ཁྱབ་པར་མཛད་ཅིང་ཞལ་གྱི་སྒོ་ལས་འོད་ཟེར་གྱིས་ཕྱོགས་བཅུའི་སེམས་ཅན་ཀུན་ལ་རེག་པས་སྡུག་བསྔལ་ཞི་བ་སོགས་མཛད་ཚེ། ― MLP018_Page_0314 ―
[མ་དཔེ་གཟིགས་ན་འདིར་གནོན།]
ཀུན་དགའ་བོ་ལ་སོགས་པ་རྣམས་ཀྱིས་ཞུས་པར་སངས་རྒྱས་ཀྱི་རང་བཞིན་ལམ་དབུ་མ་སྟོན་པ་མདོ་སྡེ་མྱང་འདས་གསུངས་ནས། དེང་ཕན་ཆད་མདོ་སྡེའི་མཐའ་ལ་འཇུག་པར་བྱ་ཡི། གང་ཟག་ལ་འཇུག་པ་མ་ཡིན་ནོ། །མདོ་དང་མཐུན། འདུལ་བ་ལ་གནས་ཤིང་། ཆོས་ཉིད་དང་མི་འགལ་ན་དེ་ལ་གུས་པར་ཟུངས་ཤིག དེ་ལས་ལྡོག་ན་དེ་ནི་ཆོས་མ་ཡིན་པར་ཟུངས་ཤིག་ཅེས་ཞལ་གདམས་སུ་སྩལ་བ་ཡིན་ནོ། །མདོ་སྡེ་དགོངས་པ་ངེས་འགྲེལ་ལས་ཀྱང་། འཁོར་ལོ་དང་པོ་གཉིས་ཀྱི་སྐབས་སུ། འཁོར་ལོ་བསྐོར་བ་འདི་ཡང་བླ་ན་མཆིས་པ་སྐབས་མཆིས་པ། དྲང་བའི་དོན། རྩོད་པའི་གཞིའི་གནས་སུ་གྱུར་པ་ལགས་སོ། །ཞེས་དང་། གསུམ་པའི་སྐབས་སུ། ཆེས་ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་བསྐོར་བ་འདི་ནི། བླ་ན་མ་མཆིས་པ། སྐབས་མ་མཆིས་པ། ངེས་པའི་དོན། རྩོད་པའི་གཞིའི་གནས་སུ་མ་གྱུར་ལགས་པའོ་ཞེས་གསུངས་སོ། །དེ་ལ་ཁ་ཅིག་ན་རེ། དེ་ལྟར་ན་གོང་དུ་དབུ་མ་ཡང་དག་ཉིད་མ་རྟོགས་པར་བཤད་པ་དང་འགལ་ཞིང་། མདོ་སྔགས་གཉིས་མཐར་ཐུག་གི་ལྟ་བའང་ཁྱད་པར་མེད་པར་འགྱུར་རོ་ཞེ་ན། དེའི་ལན་ནི། མདོའ་ཐེག་པར་སྒྲིབ་པ་ཤིན་ཏུ་ཕྲ་བ་ནང་དུ་དཀར་དམར་རླུང་གསུམ་འགྲོགས་པས་ཤེས་པ་གཉིས་སྣང་འཁོར་བའི་ཆོས་སུ་ཤར་བར་བྱེད་པ་དོན་ལ་དག་བྱེད་གཉེན་པོ་ལ་ཞེན་པའི་སྙོམས་འཇུག་གི་སྒྲིབ་པ་ཤིན་ཏུ་ཕྲ་བ་དེ་སྔགས་ཀྱི་ཐེག་པ་ཁོ་ནས་སྦྱོང་དགོས་ཤིང་། དེ་སྦྱོང་བྱེད་ཀྱི་:སྙིང་གཉེན་པོ་རྡོ་རྗེ་ལྟ་བུའི་ཏིང་ངེ་འཛིན་ཡིན་མོད་ཀྱང་དེ་ནི་ནང་གི་མངོན་བྱང་ལྔ་ལ་བརྟེན་ནས་དཀར་ཆ་དག་པ་སྐུ་རྡོ་རྗེ། དམར་ཆ་དག་པ་གསུང་རྡོ་རྗེ། ཤེས་རིག་དག་པ་ཐུགས་རྡོ་རྗེ་སྟེ་རྡོ་རྗེ་གསུམ་གྱི་ངོ་བོར་བྱང་ཆུབ་པར་བྱེད་པའི་ལམ་དེ་ཡིན་ཡང་། མདོ་ལམ་དུ་རྡོ་རྗེ་ལྟ་བུའི་ཏིང་འཛིན་ཞེས་པ་ལས་དེ་ཇི་ལྟར་ཡིན་མ་བཤད་པ་དང་། གོང་གི་ལྟ་བའི་སྟེང་དུ་ལྷན་ཅིག་སྐྱེས་པའི་མི་འགྱུར་བའི་བདེ་ཆེན་གྱི་ཡེ་ཤེས་དེ་སྔགས་ཀྱི་ཐུན་མོང་མ་ཡིན་པའི་ལྟ་བ་ཡིན་པར་དེ་གཉིས་མ་བཤད་པས་ཁྱད་པར་བྱས་པ་སྟེ། རྡོ་རྗེ་མེ་ལོང་ལས། རང་བྱུང་ཟག་མེད་ཡེ་ཤེས་གཟུགས། །མི་ཤིགས་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ཁྱབ་པ། །མི་ ― MLP018_Page_0315 ―
[མ་དཔེ་གཟིགས་ན་འདིར་གནོན།]
གནས་ཆོས་སྐུའི་རང་བཞིན་ཡིན། །ཞེས་དང་། དུས་འཁོར་ལས། དེས་ན་གཙོ་བོས་གང་ཞིག་འཕོ་མེད་ལྷན་སྐྱེས་ལུས་ཀྱི་བདེ་བ་སྔགས་ཀྱི་ཐེག་པར་བརྟེན། །ཅེས་གསུངས་པའི་ཕྱིར་རོ། །གཉིས་པ་སྔགས་ཀྱི་ལྟ་བའི་ངོ་བོའམ་མཚན་ཉིད་ནི། མཐའ་གང་དུ་ཡང་མ་རེག་པའི་སེམས་ཉིད་ཡེ་ནས་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པ་ནི་ལྷག་པ་དོན་དམ་བདེན་པ་དང་། དེ་ཉིད་ཀྱི་རྩལ་སྣང་སྣོད་བཅུད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་ཤར་བའི་ལྷག་པ་བདེན་པ་དབྱེར་མེད་སྤྱོད་ཡུལ་དང་བྲལ་བ་སྟེ། རྣམ་བཀོད་ལས། ལྷག་པའི་རྣམ་གཉིས་དབྱེར་མེད་དོན། །མིང་གྲངས་ཅིར་ཡང་བསྟན་མོད་ཀྱང་། །དོན་དུ་སྨྲ་བསམ་ཡུལ་ལས་འདས། །ཞེས་སོ། །གསུམ་པ་སྒྲ་དོན་ནི། དྲྀཥྚའི་སྒྲ་ལས་ལྟ་བ་སྟེ། གནས་ལུགས་དང་རྗེས་སུ་མཐུན་པའི་བདེན་དོན། མཐོང་བས་གདེངས་སུ་གྱུར་པའི་ཤེས་རབ་བོ། །རྒྱས་པ་ལས། ལྟ་དང་ལྟ་བ་བྱར་མེད་དེ། །ཡེ་ཤེས་སྒྲོན་མེ་སྒྲེང་བས་ནི། །ཕྱོགས་བཅུའི་ཞིང་ཁམས་མ་ལུས་མཐོང་། །ཞེས་སོ། །བཞི་པ་རྣམ་གྲངས་ལ། གཏན་ཚིགས་ཀྱིས་གཏན་ལ་ཕབ་པ་དང་། རྣམ་གྲངས་རྣམ་པར་ཕྱེ་སྟེ་དོན་གྱི་ཚིགས་བཟུང་བ་གཉིས་ལས། དང་པོ་ནི། ལམ་རིམ་ལས། གཞི་དང་གཏན་ཚིགས་གྲུབ་པའི་དོན། །ཞེས་པས་ཆོས་གསུམ་གྱི་སྒོ་ནས་རྟོགས་པར་བྱ་སྟེ། གང་གཞལ་བྱ་ཆོས་ཅན། གང་གིས་འཇལ་བྱེད་གཏན་ཚིག དེ་ལྟར་གཞལ་བའི་གྲུབ་མཐའོ། །དང་པོ་ལ་གཞལ་བྱ་དངོས། ཞར་ལ་དོགས་པ་བསལ་བ་དང་། རྩོད་པ་སྤང་བའོ། །དང་པོ་ནི། འདི་ཉིད་ལས། ཇི་སྙེད་འཇིག་རྟེན་འཁྲུལ་པའི་ཆོས། །ཞེས་སོགས་དང་། ལམ་རིམ་ལས། འཁོར་དང་འདས་དངོས་ཞེན་སྣང་བརྟག །ཅེས་དང་། རྣམ་བཀོད་ལས། བརྟགས་པའི་སྤྱོད་ཡུལ་གཉིས་ལ་གཞལ། །ཞེས་སོ། །གཉིས་པ་ལ། གཞལ་བྱ་མེད་པའི་དང་། གཞལ་གྱིས་མི་ལོང་བའི་དོགས་པ་གཉིས་ལས། དང་པོ་ནི། དངོས་པོ་གཉིས་ཀྱིས་བསྡུས་པའི་ཆོས་གཞལ་བྱར་བྱས་ནས་འཇལ་བ་དེ། མྱང་འདས་འཇལ་ལམ། འཁོར་བ་འཇལ། དང་པོ་ལྟར་ན། འདས་པའི་རང་མཚན་ནི། ལས་དང་པོ་དང་། མོས་སྤྱོད་ཀྱི་རིག་ཤེས་ལ་ལྐོག་ཏུ་གྱུར་པའི་ཕྱིར། འོ་སྐོལ་རྣམས་ཀྱི་སྤྱོད་ཡུལ་མ་ ― MLP018_Page_0316 ―
[མ་དཔེ་གཟིགས་ན་འདིར་གནོན།]
ཡིན་པས་གཞལ་བྱར་མི་རུང་སྟེ། རྣམ་བཀོད་ལས། འདས་པ་སྤྱོད་ཡུལ་མ་གྱུར་ཕྱིར། །གཞལ་བྱའི་ཡུལ་དུ་ཇི་ལྟར་རིགས། །ཞེས་དང་། གལ་ཏེ་འདས་པའི་སྣང་བ་ལ། །འཇལ་ན་དང་པོའི་ལྐོག་ཏུ་གྱུར། །ཞེས་སོ། །དེར་ཞེན་པའི་སེམས་དེ་ལ་འཇལ་ལོ་ཞེ་ནའང་། མི་རིགས་ཏེ་མྱང་འདས་འཁྲུལ་ཤེས་ཀྱི་ཡུལ་དུ་གྱུར་པའི་ཕྱིར་ཞེན་དུ་མི་རུང་ཞིང་། གལ་ཏེ་ཞེན་ན་སྒྲོ་བཏགས་འཁོར་བའི་ཆོས་སུ་འགྱུར་བས་འདས་པ་མ་ཡིན་ཏེ། སྔ་མ་ལས། སེམས་ལ་མྱ་ངན་འདས་ཞེན་པ། །དེ་ཉིད་འདས་པར་རུང་མ་ཡིན། །ཞེས་སོ། །གཉིས་པ་ལྟར་ན། འཁོར་བའི་རང་མཚན་སྣང་ཙམ་ཉིད་ལ་འཇལ་ལམ། {ཞེས་པ་}སྒྲོ་བཏགས་ཀྱི་ཤེས་པ་ལ་འཇལ། དང་པོ་མི་རིགས་ཏེ། ཨ་དེ་བས། ཇི་ལྟར་སྣང་ཉིད་དགག་མིན་ཏེ། །རྟེན་ཅིང་འབྲེལ་བར་འབྱུང་བའི་ཕྱིར། །འདིར་ནི་སྡུག་བསྔལ་རྒྱུར་འགྱུར་བའི། །བདེན་པར་རྟོག་པ་བཟློག་བྱ་ཡིན། །ཞེས་པས་རིགས་པས་དགག་པར་མི་ནུས་ཤིང་། བཀག་ན་སྐྱོན་དུ་འགྱུར་བའི་ཕྱིར་ཏེ། ལམ་བསོད་ནམས་ཀྱི་ཚོགས་བཀག་པ་དང་། འབྲས་བུ་ཇི་སྙེད་མཁྱེན་པའི་ཡེ་ཤེས་རྒྱུན་ཆད་པར་འགྱུར་བའི་ཕྱིར་རོ། །འོ་ན་གང་གཞལ་སྙམ་ན། ད་ལྟར་གྱི་ཤེས་པ་སྐད་ཅིག་མ་རང་ཐད་རང་ཐད་ཀྱི་ཞེན་སྣང་ལ་འཇལ་ཏེ། རྣམ་བཀོད་ལས། དེ་ཤེས་ཤེས་པ་སྐད་ཅིག་མ། །དེ་ཡང་རང་ཐད་རང་ཐད་དཔྱད། །ཅེས་སོ། །དེ་ལྟར་ན་ཡིད་སོ་སོར་རྟོག་པའི་ཤེས་རབ་ཏུ་གནས་འགྱུར་བས་གཞལ་བྱ་མེད་དོ་ཞེ་ན། ཡིད་རྟོག་བཅས་བསམ་ཤེས་སུ་རེ་ཞིག་གནས་གྱུར་ཀྱང་ཞེན་པའི་ངོ་བོ་མ་དག་པས་ཀུན་བཏགས་སྐྱེ་རུང་དང་། ཞེན་སྣང་འབྱུང་རུང་དུ་ཡོད་པའི་ཕྱིར། དེའི་སྐྱོན་མེད་དེ། ཡིད་རྟོག་བཅས་ཀྱི་ཤེས་པ་རྩ་བ་ནས་འགག་པར་བྱེད་པའི་གཉེན་པོ་ཤེས་རབ་ཡིན་ལ། དེ་ད་དུང་རྒྱུད་ལ་མ་བསྟེན་པའི་ཕྱིར་ཏེ། རྣམ་བཀོད་ལས། གལ་ཏེ་ཡིད་འགྱུར་ཞེན་པ་ཡང་། །སྐད་ཅིག་མཉམ་པར་འགག་པས་མེད། །དེ་ཚེ་བརྟགས་གཞི་ཡོད་མི་རུང་། །དོགས་ན་ཞེན་པའི་ཡུལ་རྣམས་ནི། །གཏན་དུ་དག་པ་མ་ཡིན་ཕྱིར། །སོ་སོར་སྤྱོད་ཀྱང་ཞེན་ཡུལ་མཐོང་། །ཞེས་སོ། །དེ་ཡང་ཤེས་རྒྱུད་སྐད་ཅིག་གི་སྟེང་དུ་མངོན་འགྱུར་དུས་གཅིག་ཏུ་ཚོགས་ནས་འཇལ་བ་མ་ཡིན་གྱི་གཅིག་མངོན་གྱུར་ ― MLP018_Page_0317 ―
[མ་དཔེ་གཟིགས་ན་འདིར་གནོན།]
གྱི་ཚེ་གཅིག་བག་ལ་ཉལ་དུ་གནས་པའི་ཕྱིར། སྔ་མ་དང་ད་ལྟར། ད་ལྟ་དང་ཕྱི་མ་འཕྲད་པའི་ཚུལ་གྱིས་འཇལ་ཏེ། ད་ལྟར་གྱི་སྐད་ཅིག་མ་དང་པོ་ལ་འཕྲད་ཙམ། གཉིས་པ་ལ་མགོ་ནོན། གསུམ་པ་ལ་བསམ་ཤེས་རྫོགས་པར་སྐྱེས་པའི་ཚེ། སྔ་མའི་ཀུན་བཏགས་མངོན་གྱུར་ཅི་རིགས་སུ་འགག་ཅིང་། རྐྱེན་གཞན་གྱིས་དེའི་རྒྱུན་བརྗོད་པའི་སྐད་ཅིག་ཕྱི་མ་ལ་ཀུན་བཏགས་སྐྱེད་བཞིན་པ་སྟེ། ཡུལ་ཤེས་མ་འདྲེས་པའི་ཕྱིར་གཞལ་བྱ་མེད་པའི་སྐྱོན་མེད་དེ། རྣམ་བཀོད་ལས། གཞལ་བྱ་མེད་པར་དོགས་པ་ཡང་། །ཞེན་པ་ཤེས་པའི་ཕྱི་ཡུལ་ཡིན། །སྐད་ཅིག་གནས་འགྱུར་ཤེས་ཉིད་དོ། །དེ་བས་ཡུལ་སེམས་མ་འདྲེས་ཕྱིར། །ཞེན་སྣང་འཇལ་ལ་སྐྱོན་པ་མེད། །ཅེས་གསུངས་པའི་ཕྱིར་རོ། །མདོར་ན། འཁོར་འདས་གཉིས་ཀྱི་རང་མཚན་ལ་མི་འཇལ་གྱི། འཁོར་བ་ཕྱི་ནང་སྣོད་བཅུད་དུ་ཞེན་པ་དང་། མྱང་འདས་སྐུ་དང་ཡེ་ཤེས་སུ་ཞེན་པའི་ཞེན་བྱེད་ཀྱི་བློ་ཉིད་གཞལ་བྱ་སྟེ། རྣམ་བཀོད་ལས། ངེས་པར་བཞག་པའི་གཞལ་བྱ་ནི། །འཁོར་དང་མྱ་ངན་འདས་པ་ཡི། །རང་གི་མཚན་ཉིད་མི་འདོད་དེ། །དེ་ལྟར་ནང་ན་ཞེན་པ་ཡི། །ཕྱི་རོལ་མེད་ལ་ཡོད་པར་སྣང་། །ཞེན་དང་སྣང་བ་གཉིས་ལ་བརྟེན། །ཅེས་སོ། །བཞི་པ་རྩོད་སྤང་ནི། འོ་ན་སོ་སོར་རྟོག་པའི་བསམ་པའི་ཤེས་རབ་དེ་འཁྲུལ་ཤེས་སུ་ཐལ། འཁོར་བ་པའི་ཤེས་པ་ཡིན་པའི་ཕྱིར་ཞེ་ན། ལན་ནི། སོ་སོར་རྟོག་པའི་ཤེས་རབ་ཆོས་ཅན། ཁྱོད་ཀྱིས་དོན་གཏན་ལ་མི་ཕེབས་པར་ཐལ། འཁྲུལ་ཤེས་ཡིན་པའི་ཕྱིར། རྟགས་ཁས། འདོད་ན། བསམ་ཤེས་སྐྱེས་པ་དོན་མེད་དུ་ཐལ་ལོ། །དེ་ལ་ཁོ་ན་རེ། མ་འཁྲུལ་པའི་ཕྱིར་འབད་མེད་དུ་གྲོལ་བར་ཐལ་ཟེར་ན། འཁྲུལ་མ་འཁྲུལ་གནས་སྐབས་ལ་འཇོག་སྟེ་དབང་པོའི་མངོན་སུམ་བཞིན་ནོ། །འཇལ་བྱེད་གཏན་ཚིགས་ལ། གོ་དོན་དང་། གཏན་ལ་དབབ་པའོ། །དང་པོ་ནི། བསྒྲུབ་བྱའི་དོན་ཤེས་པར་བྱེད་པའི་ཐབས་རྩོད་གཞི་ལ་བཀོད་ནས་དགག་སྒྲུབ་གཉིས་སུ་བྱེད་པའི་ལས་ཅན་ཏེ། ལམ་རིམ་ལས། དེ་ཕྱིར་གཏན་ཚིགས་ལས་ལ་བརྗོད། །ཅེས་སོ། །གཉིས་པ་ནི། དེ་ཉིད་ལས། དེ་ཉིད་དངོས་ལྔ་ཚུལ་དང་ཚིག ། ཅེས་པས་གསུམ་སྟེ། སྔོན་བྱུང་དངོས་ལྔའི་གཏན་ཚིགས། རྗེས་འཇུག་ཚུལ་ལྔ་དང་། ཚིག་ ― MLP018_Page_0318 ―
[མ་དཔེ་གཟིགས་ན་འདིར་གནོན།]
ལྔའི་གཏན་ཚིགས་སོ། །དང་པོ་ནི། སྔོན་བྱུང་དུ་སྟོན་པ་སྐུ་ལྔས་རང་རང་གི་འཁོར་ལྔ་ལ་གསུང་ལྔའི་སྒོ་ནས་ཆོས་ཉིད་ཀྱི་དོན་དངོས་སུ་གཏན་ལ་ཕབ་པ་ནི་དངོས་ལྔའི་གཏན་ཚིགས་ཏེ། དེ་ཉིད་ལས། ཡང་དག་རྫོགས་སངས་རྒྱས་སྟོན་པ། །སྐུ་ལྔས་འདུལ་བའི་འཁོར་རྣམས་ལ། །གསུང་ལྔ་བསྟན་པ་དེ་ཁོ་ན། །གཏན་ལ་འབེབས་ཤིང་འཇལ་བྱེད་པའོ། །ཞེས་སོ། །གཏན་ཚིགས་འདི་ནི་རྗེས་འཇུག་ལ་ལྟོས་པ་སྟེ། སྔོན་བྱུང་ལ་ལྟོས་ན་གཏན་ཚིགས་དངོས་མ་ཡིན་པར་ཤེས་དགོས་སོ། །གཉིས་པ་ནི། དབང་པོ་ཡང་རབ་མཆོག་ཏུ་གྱུར་པ་རྣམས་ལ་སྣང་གྲགས་འདི་དག་གིས་མཚོན་ནས་སྔོན་བྱུང་དུ་དངོས་ལྔས་གཏན་ལ་ཕབ་པའི་སྐུ་ལྔའི་གསུང་གི་ཚུལ་དུ་རྟོགས་པར་བྱེད་པ་ནི་ཚུལ་ལྔའི་གཏན་ཚིགས་ཏེ། དེ་ཉིད་ལས། རྟོགས་དང་ལྡན་པའི་བློ་རྣམས་ལ། །དངོས་པོ་སྣ་ཚོགས་སེམས་གསང་སྔགས། །དེས་ལུང་ཡིན་ཕྱིར་ཆོས་ཚུལ་སྟོན། །བརྗོད་དང་འདྲ་བར་བརྡའ་སྤྲོད་པས། །ངོ་བོ་ཉིད་ཀྱིས་བཤད་པའི་ཕྱིར། །མ་འོངས་དོན་དུ་གཏན་ཚིགས་ངེས། །ཞེས་སོ། །གསུམ་པ་ནི། སྔར་གྱི་ཚུལ་ལྔ་པོ་ཉིད་ཚིག་ཏུ་དངོས་སུ་བརྗོད་པ་ནི་ཚིག་ལྔའི་གཏན་ཚིགས་སོ། །དེ་ཡང་། ཆོས་སྐུའི་ཚིག་ནི་སྐྱེ་མེད་རང་སྣང་དུ་སྟོན་པའི་ཚིག་དང་ཡི་གེ་རྣམས་སོ། །དེ་བཞིན་དུ་ལོངས་སྐུའི་ལྡེམ་དགོངས་བརྡའི། སྤྲུལ་སྐུའི་བཀྲི་དྲང་བརྒྱུད་པའི། རྡོ་རྗེའི་སྐུའི་དབྱེར་མེད་རྡོ་རྗེའི། མངོན་བྱང་གི་ཡེ་ཤེས་རང་སྣང་དུ་སྟོན་པའི་ཚིག་དང་ཡི་གེ་རྣམས་ཏེ། ལམ་རིམ་ལས། ངོ་བོ་སྣང་ཚིག་རང་སྣང་ཚིག །ལྡེམ་དགོངས་ཚིག་དང་བཀྲི་དྲང་ཚིག །འདོད་རྐྱེན་ཚིག་དང་རྡོ་རྗེའི་ཚིག ། རང་རིག་མངོན་གསལ་ཚིག་གིས་མཚོན། །ཞེས་སོ། །དེ་ཡང་བསྡུ་ན། དཔྱད་དུ་མེད་པས་གོ་བ་དང་། ཡོད་པས་གོ་བའོ། །དང་པོ་ནི། སྐུ་བཞིའི་གཏན་ཚིགས་ཏེ། བརྟག་དཔྱད་ལ་མ་ལྟོས་པར་དོན་གོ་བའི་ཕྱིར་རོ། །གཉིས་པ་ནི། སྤྲུལ་སྐུའི་གཏན་ཚིགས་ཏེ་བརྟག་དཔྱད་ལ་བརྟེན་ནས་དོན་གོ་བའི་ཕྱིར་རོ། །དེ་ལ་དབྱེ་ན། ཚད་མ་བཀའ་གཞུང་དང་། སྒྲ་མཐུན་དོན་སྤགས་ཀྱི་གཏན་ཚིགས་གཉིས། དང་པོ་ལའང་རྟོགས་པ་བཞིའི། དག་པ་གསུམ་གྱི། མཉམ་པ་བཞིའི། བདག་ཉིད་ཆེན་པོའི་གཏན་ཚིགས་དང་བཞི། དང་པོ་ནི། འདི་ཉིད་ལས། ― MLP018_Page_0319 ―
[མ་དཔེ་གཟིགས་ན་འདིར་གནོན།]
རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡི། །ཐམས་ཅད་མངོན་རྫོགས་རྒྱལ་པོ་ཆེ། །ཞེས་རྟོགས་པ་བཞི་ལས། རྒྱུ་གཅིག་པ་ནི་འཁོར་འདས་གཉིས་ཆོས་ཅན། རྒྱུ་གཅིག་པ་ཡིན་ཏེ། སེམས་ཉིད་སྐྱེ་བ་མེད་པའི་དབྱིངས་སུ་རྒྱུ་གཅིག་པའི་ཕྱིར། དཔེར་ན་རྒྱལ་བུ་དྭའུ་དམངས་སུ་འཛིན་པའི་སྒྲོ་འདོགས་དང་རྒྱལ་པོར་ངེས་པའི་ཚད་མ་གཉིས་ངོ་བོ་རྒྱལ་བུར་གཅིག་པ་བཞིན་ནོ། །དེའང་རྒྱ་མཚོ་ལས། ཆོས་ཉིད་དབྱིངས་སུ་ཚུལ་གཅིག་པས། །མ་ལུས་རང་སྣང་ཆོས་ཐམས་ཅད། །མ་ལུས་བྱང་ཆུབ་སེམས་སུ་རྟོགས། །ཞེས་སོ། །གཉིས་པ་ཡིག་འབྲུའི་ཚུལ་ནི། སེམས་ཉིད་སྐྱེ་མེད་ཀྱི་གདངས་ཆོས་ཅན། རོལ་པ་འགག་མེད་ལྷའི་སྐུ་གསུང་ཐུགས་སུ་རང་སྣང་བ་ཡིན་ཏེ། མཚོན་བྱེད་ཡི་གེས་མཚོན་ནས་རྟོགས་པའི་ཕྱིར། དཔེར་ན་མཛུབ་མོས་རི་བོང་ཅན་བཞིན་ནོ། །དེ་ཡང་རྒྱ་མཚོ་ལས། སྐུ་གསུང་ཐུགས་སུ་སྣང་བ་ཡི། །མ་ལུས་གསུང་གི་རྒྱན་དུ་རྟོགས། །ཐམས་ཅད་གསུང་གི་ཡི་གེ་སྟེ། །ཐབས་དང་ལྡན་པས་རྒྱས་གདབ་བོ། །ཞེས་སོ། །གསུམ་པ་བྱིན་གྱིས་བརླབས་པའི་ཚུལ་ནི། སྣང་སྟོང་གཉིས་ཆོས་ཅན། དབྱེར་མེད་པ་ཡིན་ཏེ། དེ་གཉིས་དངོས་སུ་རྟོགས་པའི་མཐུས་བདེན་པ་དབྱེར་མེད་དུ་ཡེ་ནས་སངས་རྒྱས་པར་རྟོགས་པའི་བྱིན་རླབས་ཤུགས་ལ་འབྱུང་བའི་ཕྱིར། དཔེར་ན་རས་དཀར་པོ་དམར་པོར་བསྒྱུར་བའི་ནུས་པ་བཙོད་ལ་ཡོད་པ་བཞིན་ནོ། །དེ་ཡང་རྒྱ་མཚོ་ལས། དེ་ཉིད་དབྱེར་མེད་བྱིན་རླབས་ལས། །དེ་ཉིད་དེ་ཡི་བྱིན་རླབས་ཏེ། །གཉིས་མེད་ཚུལ་གྱིས་རང་སྣང་བ། །བྱིན་རླབས་ངོ་མཚར་བསམ་མི་ཁྱབ། །ཅེས་སོ། །མངོན་སུམ་པ་ནི། བདེན་པ་དབྱེར་མེད་ཆོས་ཅན། བློའི་སྤྱོད་ཡུལ་ལས་འདས་པ་ཡིན་ཏེ། རང་རིག་མངོན་སུམ་གྱིས་ཡུལ་མེད་རང་གསལ་དུ་རྗེན་པར་རྟོགས་པའི་ཕྱིར། དཔེར་ན་མིག་སྐྱོན་མེད་པས་དུང་དཀར་པོར་མངོན་སུམ་དུ་མཐོང་བ་དེ་དེའི་གནས་ལུགས་ཡིན་པ་བཞིན་ནོ། །དེ་ཡང་རྒྱ་མཚོ་ལས། རང་སྣང་རང་བྱུང་ཆོས་འདི་དག །གཉིས་མེད་རང་རིག་མ་སྐྱེས་པར། །གསལ་བར་མངོན་སུམ་ཐེ་ཚོམ་མེད། །རྟོགས་པ་ཀུན་གྱི་མཆོག་ཏུ་བཤད། །ཅེས་དང་། རྔམ་གློག་ལས། གཞན་ལ་ ― MLP018_Page_0320 ―
[མ་དཔེ་གཟིགས་ན་འདིར་གནོན།]
མ་བརྟེན་མི་འགལ་བར། །མངོན་སུམ་རིག་པས་ཐག་ཆོད་ན། །རྣལ་འབྱོར་ས་ལ་སླེབས་པ་ཡིན། །ཞེས་སོ། །དེའང་སྤྱིར་མངོན་སུམ་ལ་བཞི་ཡོད་ཀྱང་འདི་རང་རིག་མངོན་སུམ་མོ། །གཉིས་པ་དག་པ་གསུམ་གྱི་གཏན་ཚིགས་ནི། །འདི་ལྟར་སྣང་བ་ཕྱི་ནང་གི་ཆོས་ཐམས་ཅད་ཆོས་ཅན། ཡེ་ནས་སྐུ་དང་ཡེ་ཤེས་ཀྱི་ངོ་བོར་སངས་རྒྱས་པ་ཡིན་ཏེ། དག་པ་གསུམ་དང་ལྡན་པའི་ཕྱིར་ཏེ། སྣོད་འབྱུང་བ་ལྔ་ཡུམ་ལྔར། བཅུད་ཕུང་པོ་ལྔ་ཡབ་ལྔར། རྒྱུད་རྣམ་ཤེས་ཚོགས་བརྒྱད་ཡེ་ཤེས་ལྔར་དག་པའི་ཕྱིར། དེའང་འདི་ཉིད་ལས། སྣོད་བཅུད་རྒྱུད་རྣམས་དག་རྟོགས་ཤིང་། །ཞེས་སོ། །གསུམ་པ་མཉམ་པ་བཞིའི་གཏན་ཚིགས་ནི། འདི་ལྟར་སྣང་བའི་ཆོས་རྣམས་ཆོས་ཅན། ལྷག་པའི་ཆོས་ཀྱི་སྐུར་ཡེ་ནས་སངས་རྒྱས་པ་ཡིན་ཏེ། མཉམ་པ་བཞི་དང་ལྡན་པའི་ཕྱིར། བཞི་པ་ནི། རྣམ་གྲངས་དང་རྣམ་གྲངས་མ་ཡིན་པའི་དོན་དམ་གཉིས་ཀ་སྐྱེ་མེད་དང་། ཡང་ལོག་གི་ཀུན་རྫོབ་གཉིས་ཀ་སྒྱུ་མར་མཉམ་པ་ནི། ཐུན་མོང་གི་མཉམ་པ་གཉིས་སོ། །ལྷག་པའི་མཉམ་པ་གཉིས་ནི། མེད་དགག་དང་མ་ཡིན་དགག་གི་སྟོང་ཉིད་གཉིས་ཀ་དོན་དམ་དཀོར་བདུན་ཆོས་ཀྱི་སྐུ་དང་། མ་དག་པ་ལས་སྣང་དང་དག་པ་ལྷར་སྣང་གི་ཀུན་རྫོབ་གཉིས་ཀའང་གཟུགས་སྐུ་ལྷའི་དཀྱིལ་འཁོར་དུ་མཉམ་པས་ལྷག་པ་སྟེ། འདི་ཉིད་ལས། མཉམ་གཉིས་ལྷག་པའི་མཉམ་གཉིས་ཀྱི། །དཀྱིལ་འཁོར་ཀུན་ཏུ་བཟང་པོའི་ཞིང་། །ཞེས་སོ། །བཞི་པ་བདག་ཉིད་ཆེན་པོའི་གཏན་ཚིགས་ནི། འཁོར་འདས་ཀྱི་ཆོས་རྣམས་ཆོས་ཅན། སྣང་ལུགས་ནས་དུ་མར་སྣང་ཡང་ཡིན་ལུགས་ནས་གཞལ་ན་དེ་ལྟར་མ་ཡིན་ཏེ། སེམས་ཉིད་སྐྱེ་མེད་རང་བྱུང་གི་ཡེ་ཤེས་ཆེན་པོ་གཅིག་གི་བདག་ཉིད་དུ་ཡེ་ནས་གནས་པའི་ཕྱིར། དཔེར་ན་ཕ་མེས་ཀྱི་ལོ་རྒྱུས་བརྗོད་པས་སོ་སོའ་རིགས་རྒྱུད་ཤེས་པ་བཞིན་ནོ། །དེའང་རྣམ་བཀོད་ལས། སྣང་བ་འདི་ཀུན་རང་རང་གི །རང་བཞིན་མེད་པའི་རྣམ་ཤེས་ཉིད། །རང་བྱུང་ཡེ་ཤེས་གནས་མེད་སྣང་། །ཞེས་སོ། །གཉིིས་པ་སྒྲ་མཐུན་དོན་སྤགས་ཀྱི་གཏན་ཚིགས་ནི། ཚིག་མདོ་སྔགས་ཐུན་མོང་དུ་གྲགས་ཤིང་། དོན་འདི་ཉིད་ལྟར་གཏན་ལ་འབེབས་པའོ། །གསུམ་པ་གྲུབ་མཐའ་ལ། རྟོགས་པའི་ཚད། སྐབས་འཕྲོས་ ― MLP018_Page_0321 ―
[མ་དཔེ་གཟིགས་ན་འདིར་གནོན།]
ཀྱི་རྩོད་པ་སྤོང་བའོ། །དང་པོ་ནི། དྲི་མ་མེད་པའི་ཤེས་རབ་གསུམ་གྱིས་ཡོད་མེད་ལ་སོགས་པའི་སྒྲོ་སྐུ ར་གྱི་མཐར་མ་རེག་པར་བཙལ་བ་ལས་རྟོགས་པ་སྟེ། ལམ་རིམ་ལས། ཡོད་ལས་བཙལ་ན་སྒྲོ་བཏགས་ཏེ། །སྒྲོ་འདོགས་བརྒྱད་དུ་ལྷུང་བར་འགྱུར། །མེད་ལས་བཙལ་ན་སྐུར་བཏབ་སྟེ། །སྐུར་པ་བཅུ་ཡི་གནས་སུ་ལྷུང་། །ཡོད་མེད་གཉིས་ལས་བཙལ་བྱས་ན། །དེ་ཉིད་ལུང་དུ་མ་བསྟན་འགྱུར། །ཞེས་སོ། །གཉིས་པ་ནི། གྲུབ་པའི་མཐའི་ངོ་བོ་གནས་ལུགས་ཉིད་རང་གི་མཚན་ཉིད་དུ་རྟོགས་ནས་རིག་པ་ཡུལ་མེད་དུ་གསལ་བ་སྟེ། ལམ་རིམ་ལས། རྒྱ་མཚོ་དང་ནི་གཟུགས་བརྙན་ལྟར། །སྒྲ་བརྟེན་ཡིད་ལ་བྱེད་མིན་པར། །རང་རིག་མངོན་སུམ་དམིགས་བྲལ་བ། །རང་གསལ་གསུམ་བྲལ་མི་བསྒུལ་བར། །ངེས་པར་གདེངས་སུ་གང་བྱས་པ། །ཐོས་བསམ་བརྟེན་པའི་ལྟ་མཐར་ཕྱིན། །ཞེས་སོ། །བཞི་པ་རྩོད་སྤོང་ནི། ལམ་ཞུགས་སུ་ཆོས་ཉིད་མངོན་སུམ་དུ་རྟོགས་པར་ཡོད་པ་ཐལ། དེར་ལྟ་བའི་རང་མཚན་མཐོང་བའི་ཕྱིར་ཏེ། སྒྲ་བརྟེན་ཡིད་ལ་བྱེད་མིན་པར། ཞེས་དང་། དེ་མ་རྟོགས་ན་མངོན་སུམ་པའི་གཏན་ཚིགས་ཀྱང་དོན་མེད་པར་འགྱུར་རོ་ཞེ་ན། དེ་ལ་མགོ་མཚུངས་དང་། བརྒལ་ལན་གཉིས་ལས། ཐོས་བསམ་གྱི་ལྟ་བ་མཐར་ཕྱིན་པའི་ཚོགས་ལམ་དུ་འཇུག་ཁ་མའི་གང་ཟག་དེ་ཆོས་ཅན། ལམ་སྟོང་པ་ཆེན་པོ་མངོན་སུམ་དུ་རྟོགས་པར་ཐལ། ལྟ་བ་འཁོར་འདས་དབྱེར་མེད་དུ་ཐོས་བསམ་གྱིས་གཏན་ལ་ཕེབས་པའི་གང་ཟག་ཡིན་པའི་ཕྱིར། འདོད་མི་ནུས་ཏེ། ལམ་སྟོང་པ་ཆེན་པོ་ནི་ཚོགས་ལམ་དུ་འཇུག་མ་རག་པ་ཡིན་པའི་ཕྱིར་རོ། །བརྒལ་ལན་ནི། ཆོས་ཉིད་སྤྱིའི་རྣམ་པ་དོན་སྤྱིར་མཐོང་བ་ལ་འཇོག་གོ །ཡང་ཁ་ཅིག་ཆོས་ཉིད་རང་མཚན་དེ་ཟག་བཅས་སུ་རང་རིག་མངོན་སུམ་དང་། ཟག་མེད་དུ་རྣལ་འབྱོར་མངོན་སུམ་གྱིས་མཐོང་ངོ་ཞེས་ཟེར་བའང་སྔར་གྱི་སྐྱོན་འབབ་བོ། །གསུམ་པ་རྣམ་གྲངས་རྣམ་པར་ཕྱེ་བ་ལ། ཉམས་སུ་ལེན་བྱེད་ལམ་གྱི་རིམ་པའི་ལྟ་གྲངས་དང་། བསྲུང་བྱ་རྒྱུད་དོན་གྱི་ལྟ་གྲངས་སོ། །དང་པོ་ནི། ཁྱབ་བྱ་ལམ་ཀུན་ལ་ཁྱབ་བྱེད་ལྟ་བས་ཁྱབ་པའི་ཕྱིར་ལམ་གྱི་ལྟ་གྲངས་དགུ་སྟེ། ལམ་རིམ་ལས། མཉམ་ཉིད་ངང་ལས་མི་སྐྲག་པས། །མངོན་བྱས་ངེས་པའི་ཤེས་ ― MLP018_Page_0322 ―
[མ་དཔེ་གཟིགས་ན་འདིར་གནོན།]
རབ་དང་། །རྣམ་པ་ཀུན་ལྡན་སྟོང་ཆེན་མཐོང་། །རང་རིག་ཡེ་ཤེས་སྙིང་རྗེས་གཟིགས། །ཕྱག་རྒྱ་གཅིག་སྐུ་འབྲས་བུར་ལྟ། །ཐམས་ཅད་གསལ་བའི་ལྟ་བ་དང་། །བར་ཆད་མེད་པའི་ཚོགས་ཆེན་མཐོང་། །དབང་བསྐུར་མཉམ་ཉིད་མི་གཡོ་བ། །ཡེ་ཤེས་ཀུན་མཁྱེན་ལྟ་བ་དགུ། །ཞེས་སོ། །གཉིས་པ་ནི། རྒྱུད་ཀྱི་དངོས་པོ་རྣམས་ལ། ཁྱབ་བྱེད་ལྟ་བས་ཁྱབ་པའི་ཕྱིར། རྒྱུད་དོན་གྱི་ལྟ་གྲངས་དགུ་སྟེ། དེ་ཉིད་ལས། རྒྱུད་དོན་གཟུངས་ཀྱིས་ཟིན་པ་ནི། །དམ་ཚིག་དམ་ཚིག་ཅེས་བྱ་བ། །རང་གི་ལྟ་བ་དམ་ཚིག་ཡིན། །ཞེས་པ་ལ་སོགས་པའོ། །ལྔ་པ་མ་རྟོགས་པའི་སྐྱོན་ལ། སངས་རྒྱས་ཀྱི་ཞིང་འཁོར་བའི་གནས་སུ་མཐོང་བའི་དང་། དགེ་བའི་ལས་ལ་སྤྱད་ཀྱང་འཁོར་བ་ལས་མི་གྲོལ་བའི་སྐྱོན་ནོ། །དང་པོ་ནི། རྒྱས་པ་ལས། ཡང་དག་ཤེས་པའི་རང་རིག་བློ་མེད་ན། བདེ་གཤེགས་ཞིང་ཡང་ངན་སོང་གནས་སུ་མཐོང་། །ཞེས་སོ། །གཉིས་པ་ནི། དེ་ཉིད་ལས། ཐབས་ལ་མཁས་པས་མ་ཟིན་ན། །ལམ་གྱི་དགེ་སྤྱད་རྟག་སྤྱད་ཀྱང་། །མཐོ་རིས་ལྷ་དང་མིར་སྐྱེ་ཡི། །སྐྱེ་ཤི་མེད་པའི་ས་མི་འཐོབ། །ཅེས་སོ། །དྲུག་པ་རྟོགས་པའི་ཡོན་ཏན་ལ། ངན་སོང་གི་གནས་སངས་རྒྱས་ཀྱི་ཞིང་དུ་མཐོང་བའི་དང་། ལས་ཅི་ལ་སྤྱད་ཀྱང་མི་འཆིང་བའི་དང་། འཁོར་བར་མི་ལྡོག་ཅིང་འཚང་རྒྱ་བའི་ཡོན་ཏན་ནོ། །དང་པོ་ནི། རྒྱས་པ་ལས། ཐེག་མཆོག་མཉམ་པའི་དོན་ཉིད་རྟོགས་པ་ན། །ངན་སོང་གནས་ཀྱང་འོག་མིན་དགའ་ལྡན་གནས། །ཞེས་སོ། །གཉིས་པ་ནི། འདི་ཉིད་ལས། བླ་མེད་ཐེག་པར་རབ་ངེས་ན། །ཉོན་མོངས་ལས་རྣམས་ཀུན་སྤྱོད་ཀྱང་། །བྱས་ལ་མི་གསོག་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་སོ། །གསུམ་པ་ནི། ལམ་རིམ་ལས། གང་ཞིག་འདི་ལྟར་མཐོང་རྟོགས་པ། །དངོས་གྲུབ་མཆོག་གི་སྙིང་པོ་དེ། །ཆུ་སྲིན་ཕྱག་རྒྱ་ཇི་བཞིན་དུ། དང་པོ་དོན་རྟོགས་མཐའ་མི་གཏོང་། །སྤྱོད་ཡུལ་ཀུན་ཏུ་ཚད་དཔག་མེད། །ཅེས་གསུངས་སོ། །གཉིས་པ་ཟིན་ཆགས་མེད་པའི་སྤྱོད་པ་ལ་དྲུག་ལས། དང་པོ་དགོས་ཆེད་ནི། གཞན་སེལ་སྒྲིབ་པ་འབྱང་ཞིང་བག་ཆགས་འདག དོན་གཉེར་ཚོགས་རྫོགས་ཤིང་ལྟ་སྒོམ་གྱི་བོགས་ ― MLP018_Page_0323 ―
[མ་དཔེ་གཟིགས་ན་འདིར་གནོན།]
འབྱིན་པར་བྱེད་པ་སྟེ། ཁོག་གཞུང་ལས། དེ་ཡང་བདག་གཞན་དོན་ཕྱིར་དུ། །ལམ་རྗེས་མཐུན་པའི་སྤྱོད་པ་ཡང་། །སྐབས་ཀྱི་ཏིང་འཛིན་སྟོངས་ཕྱིར་སྤྱད། །ཅེས་སོ། །གཉིས་པ་ངོ་བོའམ་མཚན་ཉིད་ནི། ལམ་པའི་སྒོ་གསུམ་ཡོངས་སུ་དག་པར་བྱེད་པའི་ལུས་ངག་ཡིད་གསུམ་གྱི་བྱ་བར་གྱུར་པ་སྟེ། འདི་ཉིད་ལས། ལུས་ངག་སེམས་དང་ཆོས་ཐམས་ཅད། །གང་ནའང་མི་གནས་མི་དམིགས་པས། །ཞེས་སོ། །གསུམ་པ་སྒྲ་དོན་ནི། ཙའི་སྒྲ་ལས་སྤྱོད་པ་སྟེ། སྒོ་གསུམ་དོན་ཡོད་པར་བྱ་བའི་ཕྱིར་སྔགས་ཀྱི་སྤྱད་པ་ལ་སྤྱོད་པའི་ལས་ཅན་ནོ། །དེའང་ཁོག་གཞུང་ལས། སྒོ་གསུམ་ལས་ཕྱིར་ངེས་ཚིག་འགྲུབ། །ཅེས་སོ། །བཞི་པ་རྣམ་གྲངས་ལ། གང་གི་ཚེ་སྤྱོད་པའི་དུས་དང་། གང་སྤྱད་བྱ་དངོས་པོ། དང་པོ་ནི། མཉམ་བཞག་ལས་ལངས་ནས་རྗེས་ཐོབ་ཏུ་སྤྱོད་པ་ཅི་ལ་མ་ཆགས་པར་སྤྱོད་པ་སྟེ། དེ་ཉིད་ལས། ཀུན་ཀྱང་མཉམ་ལས་ལངས་ཚེའོ། །ཞེས་སོ། །གཉིས་པ་ལ། སྤྱི་དང་ཁྱད་པར་གཉིས་ལས། དང་པོ་ནི། སྤྱིར་ལུས་ངག་ཡིད་གསུམ་དག་པའོ། །དེའང་ཅུང་ཟད་བཤད་ན། ལས་དང་པོ་པའི་དུས་སུ་བག་དང་ལྡན་པའི་སྤྱོད་པ་སྟེ་དབྱེ་ན། མི་མཐུན་པའི་རྐྱེན་ལས་བྱོལ་བའི་དང་། མཐུན་རྐྱེན་བརྟེན་པའི་སྤྱོད་པ་གཉིས་ལས། དང་པོ་ནི། འཇིག་རྟེན་གྱི་ཆོས་བརྒྱད་སོགས་ཁ་ན་མ་ཐོ་བ་ཐམས་ཅད་ལས་མཐོལ་ནས་གཞན་གྱིས་དགེ་བ་སྤེལ་བའི་ཕྱིར་མཐུན་འཇུག་འཚམས་པའི་སྤྱོད་པ་ལ་འཇུག་སྟེ། རྡོ་རྗེ་རྩེ་མོ་ལས། བརྟན་པ་མ་ཐོབ་བར་དུ་ཡང་། །ཁ་ན་མ་ཐོ་རྡུལ་མེད་ཅིང་། །སྡོམ་པ་གསུམ་ལ་གནས་པར་བྱ། །ཞེས་སོ། །གཉིས་པ་ནི། མཉམ་བཞག་གི་རྟོགས་པ་བག་ལྡན་དུ་བསྲིང་ཞིང་། ཐུན་མཚམས་ཀྱི་བྱ་བའི་ཆ་གཙོ་བོར་བསྟེན་པ་སྟེ། དབུས་མཐའ་རྣམ་འབྱེད་ལས། ཡི་གེ་འབྲི་མཆོད་སྦྱིན་པ་དང་། །ཉན་དང་ཀློག་དང་འཛིན་པ་དང་། །འཆད་དང་ཁ་ཏོན་བྱེད་པ་དང་། །དེ་སེམས་པ་དང་སྒོམ་པ་དེ། །སྤྱོད་པ་འདི་བཅུའི་བདག་ཉིད་ནི། །བསོད་ནམས་ཕུང་པོ་དཔག་ཏུ་མེད། །ཅེས་པས་ཆོས་སྤྱོད་བཅུ་དང་། དེ་ནས་ཅུང་ཟད་གོམས་ཏེ་དབེན་པར་མཉམ་རྗེས་ཁྱད་མེད་དུ་གྱུར་པ་ན་རྟོགས་པ་རྐྱེན་ཐུབ་ཏུ་བྱེད་པ་སྨྱོན་པ་བརྟུལ་ཞུགས་ཀྱི་སྤྱོད་པ་དང་། ཤིན་ཏུ་གོམས་ནས་རྟོགས་པ་ ― MLP018_Page_0324 ―
[མ་དཔེ་གཟིགས་ན་འདིར་གནོན།]
ལ་བྲི་གང་མེད་པར་གྱུར་པ་ན་བཅོས་བསླད་མེད་པར་གཞན་ཕན་བྱེད་པ་རྒྱལ་པོ་ས་འཛིན་གྱི་སྤྱོད་པ་ལྟ་བུ་སྟེ་སྤྱིར་བཤད་པའོ། །གཉིས་པ་ཁྱད་པར་གྱི་སྤྱོད་པ་ལ་གྲོལ་ལམ་བག་ཡོད་ཀྱི་དང་། ཐབས་ལམ་བརྟུལ་ཞུགས་ཀྱི་སྤྱོད་པའོ། །དང་པོ་ལ། རིམ་ཅིག་ཅར་གཉིས་ལས། དང་པོ་ལ་ཟག་བཅས་ཀྱི་ལམ་དུ་དང་། ཟག་མེད་ཀྱི་ལམ་དུ་ཇི་ལྟར་སྤྱོད་པའོ། །དང་པོ་ལ། དད་བརྩོན་གྱི་སྤྱོད་པ་ཤེས་རབ་དང་མཐུན་པ། ཐབས་དང་མཐུན་པ། ཕྱོགས་གཅིག་པ་སྤྲོས་བཅས་ཀྱི། ཚོགས་ཀྱི་སྤྱོད་པ་དང་དྲུག་སྟེ་གོ་སླའོ། །གཉིས་པ་ནི། རྫུ་འཕྲུལ་གྱི་སྤྱོད་པ་སྟེ། རིག་འཛིན་བཞིའི་སྤྱོད་པའོ། །གཉིས་པ་གྲོལ་ལམ་ཅིག་ཅར་བའི་སྤྱོད་པ་ནི། རྗེས་ཤེས་སུ་ཇི་ལྟར་སྤྱོད་ཀྱང་། མི་དམིགས། མ་ཆགས། བྱ་རྩོལ་འཛིན་རྟོག་དང་བྲལ་བ་རྨད་དུ་བྱུང་བའི་སྤྱོད་པ་སྟེ། ཀུན་འདུས་ལས། མི་དམིགས་པ་ལས་རྣམ་པར་སྤྱོད། །དེ་ལྟར་སྤྱོད་པ་ཀུན་སྤྱོད་ཀྱང་། །དམ་པའི་དོན་དེ་སྤྱོད་མཆོག་ཡིན། །ཞེས་སོ། །གཉིས་པ་ཐབས་ལམ་བརྟུལ་ཞུགས་ཀྱི་སྤྱོད་པ་ནི། ཐབས་མཁས་ཀྱི་རྩིས་ཟིན་པའི་གདེངས་དང་ལྡན་པས་འཁོར་བའི་ཆོས་ཅི་ལའང་སྤྱོད་པ་སྟེ། འདི་ཉིད་ལས། བླ་མེད་ཐེག་པར་རབ་ངེས་ན། །ཉོན་མོངས་ལས་རྣམས་ཀུན་སྤྱོད་ཀྱང་། །བྱས་ལ་མི་གསོག་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་སོ། །ལྔ་པ་སྐྱོན་ནི། ཁྱད་པར་གྱི་སྤྱོད་པ་དང་མི་ལྡན་ན་མཐར་ཐུག་གི་འབྲས་བུ་མི་འཐོབ་སྟེ། ཐུགས་ཐིག་ལས། ཁྱད་པར་དོར་ན་མཐར་ཕྱིན་མེད། །ཅེས་སོ། །དྲུག་པ་ཡོན་ཏན་ནི། སྤྱོད་པ་དེ་དག་གིས་བོགས་ཕྱིན་ནས་དངོས་གྲུབ་རྣམ་པ་གཉིས་མྱུར་དུ་འཐོབ་པར་འགྱུར་ཏེ། རྒྱས་པ་ལས། བྱ་བྱེད་མེད་པའི་བརྩོན་འགྲུས་ཀྱིས། །དེས་ནི་བྱང་ཆུབ་སྙིང་པོ་ལེན། །ཞེས་གསུངས་སོ། །གསུམ་པ་བཀོད་པའི་དཀྱིལ་འཁོར་ལའང་དྲུག་ལས། དང་པོ་དགོས་ཆེད་ནི། དབང་སྒྲུབ་མཆོད་ཕྲིན་ལ་སོགས་པའི་དུས་སུ་བདག་གཞན་གྱི་དོན་བྱེད་པའི་རྟེན་ཏུ་གྱུར་པ་ནི་སྤྱིའི་དགོས་ཆེད་དང་། བྱེ་བྲག་དངོས་གྲུབ་ཀྱི་ཐབས་དང་རྟེན་ནི་དཀྱིལ་འཁོར་ཡིན་པའི་ཕྱིར་རོ། །གཉིས་པ་ངོ་བོའི་མཚན་ཉིད་ནི། བཀོད་པ་ལྷའི་འཁོར་ལོར་རྫོགས་པར་སྣང་ ― MLP018_Page_0325 ―
[མ་དཔེ་གཟིགས་ན་འདིར་གནོན།]
བའི་རིགས་སུ་གནས་པའོ། །དེའང་ཐུགས་ཐིག་ལས། གནས་སྐབས་བདུན་དུ་སྙིང་པོ་ལེན། །བཀོད་པ་གང་རྫོགས་དེ་ངོ་བོ། །ཞེས་སོ། །གསུམ་པ་སྒྲ་དོན་ནི། མཎྜ་ལ་ཞེས་པའི་སྒྲ་ལས། སྙིང་པོའི་གཞི་འཛིན་པའམ། སྙིང་པོ་ལེན་པའི་དོན་ཏེ། འགྲེལ་ཆུང་ལས། མཎྜ་ཞེས་བྱ་སྙིང་པོའི་དོན། །ལ་ཞེས་པ་ནི་ལེན་པ་སྟེ། །ཞེས་སོ། །བཞི་པ་རྣམ་གྲངས་ལ། གསུམ་དུ་དབྱེ་བ། བདུན་དུ་དབྱེ་བ། བཅུ་གཉིས་སུ་དབྱེ་བའོ། །དང་པོ་ནི། ཆོས་དོན་ལས། དབྱེ་བ་རང་བཞིན་ཏིང་འཛིན་དང་། །གཟུགས་བརྙན་དཀྱིལ་འཁོར་རྣམ་པ་གསུམ། །ཞེས་སོ། །གཉིས་པ་ནི། རྒྱས་པ་ལས། འདིས་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་གསུམ། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། །ཅེས་སོ། །གསུམ་པ་ནི། འགྲེལ་ཆུང་ལས། དཀྱིལ་འཁོར་རྣམ་པ་བཅུ་གཉིས་ཏེ། །དེ་བཞིན་ཉིད་དང་རང་བཞིན་དང་། །ཐུགས་རྗེ་འདུལ་བའི་དཀྱིལ་འཁོར་དང་། །ཏིང་ངེ་འཛིན་དང་གཟུགས་བརྙན་དང་། །ལྷག་པའི་ཏིང་འཛིན་གཟུགས་བརྙན་དང་། །བྱང་ཆུབ་སེམས་དང་ལྷག་བྱང་སེམས། །ཚོགས་དང་ལྷུན་གྲུབ་དཀྱིལ་འཁོར་རོ། །ཞེས་སོ། །འདིར་སྐབས་བབ་ཀྱི་དབྱེ་ན། རྒྱུད་ཚོད་དང་སྦྱར་བའི་དཀྱིལ་འཁོར་བཞི་དང་། དེ་ལས་སྐབས་དོན་དེང་སང་གི་གང་ཟག་ཕལ་ཆེར་སྨིན་བྱེད་དུ་རུང་བའི་དཀྱིལ་འཁོར་གཉིས་སོ། །དང་པོ་ལ། རང་བཞིན་ཡེ་ཤེས་ཀྱི་དཀྱིལ་འཁོར་དང་། ལྷག་པའི་ཏིང་ངེ་འཛིན་གྱི་གཟུགས་བརྙན་ནམ་སྤྲུལ་པའི་དཀྱིལ་འཁོར་དང་། རིག་པ་ཉམས་ཀྱི་དཀྱིལ་འཁོར་དང་། ལྷག་པ་གཟུགས་བརྙན་གྱི་དཀྱིལ་འཁོར་དང་བཞི་ལས། དང་པོ་གསུམ་ནི་རིམ་པར་སློབ་དཔོན་རྫོགས་པའི་སངས་རྒྱས་དང་མཐར་ལམ་པ་དང་། མཐོང་སྒོམ་ལ་གནས་པས། སློབ་མ་ས་མཐའི་བྱང་སེམས་དང་། མཐོང་སྒོམ་དང་ཚོགས་སྦྱོར་གྱི་ཡོན་ཏན་མཐར་ཕྱིན་པ་རྣམས་ལ་དབང་བསྐུར་བའི་དཀྱིལ་འཁོར་ཡིན་པར་སྒྱུ་འཕྲུལ་རྡོ་རྗེ་ལས་བཤད་པས་འཕགས་པ་རྣམས་ཀྱི་སྤྱོད་ཡུལ་ཡིན་ཞིང་དེ་ལས་འདིར་སྤྲུལ་པའི་དཀྱིལ་འཁོར་ལ་ལྷག་པ་ཏིང་ངེ་འཛིན་གྱི་གཟུགས་བརྙན་ཞེས་པ་ནི་འདིར་སྐབས་སྒྱུ་འཕྲུལ་བའི་སྐད་དོ། ། ― MLP018_Page_0326 ―
[མ་དཔེ་གཟིགས་ན་འདིར་གནོན།]
བཞི་པ་ནི། ཏིང་ངེ་འཛིན་ལ་བརྟན་པ་རྗེས་མཐུན་ཙམ་ཐོབ་པ་ཡན་ཆད་ཀྱི་སློབ་དཔོན་མཚན་ཉིད་དང་ལྡན་པས། སྐལ་ལྡན་གྱི་སློབ་མ་ལྷག་པ་གཟུགས་བརྙན་གྱི་དཀྱིལ་འཁོར་དུ་དབང་བསྐུར་བ་ཡིན་ལ། དེ་ལའང་གདུལ་བྱའི་དབྱེ་བས། སྐལ་དམན་འཇུག་པ་ལ་རྡུལ་ཚོན། འབྲིང་རས་བྲིས། རབ་ཚོམ་བུ་ལྟ་བུར་དམིགས་རྟེན་ཅུང་ཟད་ཙམ་ལ་བརྟེན་ནས་བསྐུར་བ་ཡོད་དེ། བཀའ་བརྒྱད་བདེ་འདུས་ཀྱི་དབང་ཆོག་རྩ་བར། དཀྱིལ་འཁོར་གང་དུ་དབང་བསྐུར་ན། །རབ་འབྲིང་ཐ་མར་གསུངས་པ་ཡི། །མེ་ཏོག་བྲིས་སྐུ་རྡུལ་ཚོན་གསུམ། །དཀྱིལ་འཁོར་གསུམ་དུ་དབང་བསྐུར་རོ། །ཞེས་སོ། །དེ་ལས་ཀྱང་བློ་ཆེ་བའི་སྐལ་ལྡན་ཁ་ཅིག་ཐོག་མ་ནས་སློབ་དཔོན་གྱི་ལུས་དཀྱིལ་དུ་འཇུག་རུང་བའང་ཡོད་དེ། ལུས་དཀྱིལ་ལ་དཀྱིལ་འཁོར་དུ་འདུ་ཤེས་པའི་གང་ཟག་མཁས་པ་དེས་ཕྱི་དཀྱིལ་བརྟེན་དགོས་པའི་ངེས་པ་མེད་པའི་ཕྱིར་ཏེ། སློབ་དཔོན་དྲིལ་བུ་པས། བཅོས་མ་གཉིས་ཀྱི་ངོ་བོ་གང་། །དེ་ནི་གདུལ་བྱའི་དབང་ལས་འདོད། །མཁས་པའི་བསྒྲུབ་བྱ་དེ་མ་ཡིན། །ཞེས་གསུངས་ཤིང་། དོང་སྤྲུགས་ཀྱི་འཇུག་པའི་མེ་ཏོག་དོར་སྐབས་སུའང་། སློབ་དཔོན་སྐུ་ཡི་དཀྱིལ་འཁོར་དུ། །ཞེས་གསུངས་སོ། །ད་ལྟར་གྱི་བླ་མ་དམ་པ་རྣམས་ཀྱི་ཕྱག་བཞེས་སུ་རྡུལ་ཚོན་དང་རས་བྲིས་ཀྱི་དཀྱིལ་འཁོར་གང་རུང་དུ་དབང་བསྐུར་བར་བཞེད་དེ། དེ་ལ་རས་བྲིས་སུ་སྨིན་བྱེད་ཀྱི་དབང་བསྐུར་རུང་བའི་ཁུངས་ནི། མི་གཡོ་བླ་མེད་ཀྱི་རྒྱུད་ལས། ཡང་ན་དཀྱིལ་འཁོར་བྲི་བྱ་བ། །རས་བྲིས་ཚུལ་དུ་བྲི་བར་བྱ། །དཀྱིལ་འཁོར་སྔར་བཞིན་བྲིས་བྱས་ནས། །དབུས་སུ་མི་གཡོ་མཐིང་ནག་བྲི། །ཞེས་སོགས་རས་བྲིས་ཀྱི་དཀྱིལ་འཁོར་བཤད་ཅིང་། སློབ་དཔོན་ཛ་ཡ་སེ་ནས་ཀྱང་། རྡུལ་ཚོན་བྲི་བར་མ་ནུས་ན། །ངེས་པར་བཅོམ་ལྡན་ཧེ་རུ་ཀ །ཕྱག་རྒྱའི་གཟུགས་དང་བཅས་པར་བྲི། །ཞེས་སོ། །སྐབས་དོན་དེང་སང་གི་གང་ཟག་ཕལ་ཆེར་སྨིན་བྱེད་དུ་རུང་བའི་དཀྱིལ་འཁོར་ནི། དབང་བཞི་ལ་ལྟོས་ནས་རྒྱུ་རྟེན་གྱི་དཀྱིལ་འཁོར་བཞི་སྟེ། བུམ་དབང་ལ་ཕྱི་ལྷག་པ་གཟུགས་བརྙན་གྱི་དཀྱིལ་འཁོར་རྡུལ་ཚོན་ནི། དཔེ་བཟླས་དྲངས་པའི་ཆུ་ཚོན་རས་བྲིས་ཀྱི་དཀྱིལ་འཁོར། ཆོག་དབང་གསུམ་ལ་སྤྱིར་བདག་གི་དེ་ཁོ་ན་ཉིད་ནང་ ― MLP018_Page_0327 ―
[མ་དཔེ་གཟིགས་ན་འདིར་གནོན།]
ལུས་ཀྱི་དཀྱིལ་འཁོར་དང་། ཁྱད་པར་གསང་དབང་ལ་སྔགས་ཀྱི་དེ་ཁོ་ན་ཉིད་ཡི་གེ་བྷ་གའི་དཀྱིལ་འཁོར། ཤེར་དབང་ལ་ལྷའི་དེ་ཁོ་ན་ཉིད་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར། དབང་བཞི་པ་ལ་ཡེ་ཤེས་ཀྱི་དེ་ཁོ་ན་ཉིད་དོན་དམ་བྱང་ཆུབ་ཀྱི་སེམས་སྙིང་པོ་ཡེ་ཤེས་རླུང་གི་དཀྱིལ་འཁོར་རོ། །དེའང་གསང་འདུས་ལས། བྷ་ག་དཀྱིལ་འཁོར་ཞེས་བྱར་བཤད། །བྱང་ཆུབ་སེམས་ཀྱང་དཀྱིལ་འཁོར་ཉིད། །ལུས་ནི་དཀྱིལ་འཁོར་ཉིད་དུ་བརྗོད། །དཀྱིལ་འཁོར་གསུམ་དུ་གསུངས་པ་ཡིན། །ཞེས་གསུངས་སོ། །ལྔ་པ་སྐྱོན་ནི། འཆད་འགྱུར་གྱི་ཡོན་ཏན་ལས་བཟློག་པ་སྟེ། ཐུགས་ཐིག་ལས། དེ་ལས་ཟློག་པའི་སྐྱོན་ཅན་བཞི། །ཞེས་སོ། །དྲུག་པ་ཡོན་ཏན་ནི། དཀྱིལ་འཁོར་ལ་བརྟེན་པས་རྟོགས་པའི་ཡེ་ཤེས་འཕེལ་བ་དང་སྡིག་སྒྲིབ་འབྱང་ཞིང་མཚན་རྟོག་འགྲིབ་པ་དང་། ཚོགས་གཉིས་རྫོགས་པའི་ཕན་ཡོན་ཁྱད་པར་ཅན་གྱི་ཐབས་སུ་གྱུར་པ་དང་མཐར་ཐུག་འགྲུབ་པའི་རྟེན་དུ་འགྱུར་བའི་ཕྱིར་ཏེ། དེ་ལས། འཕེལ་འགྲིབ་ཕན་ཡོན་ཐབས་འགྲུབ་བཞི། །ཞེས་གསུངས་པའི་ཕྱིར་རོ། །བཞི་པ་རིམ་པར་བགྲོད་པ་དབང་ལ་དྲུག་ལས། དང་པོ་དགོས་ཆེད་ནི། ཆོས་ཀྱི་རྒྱལ་པོའི་གོ་འཕང་རྒྱུད་ལ་འཇོག་པའི་ཆེད་དུ་སྟེ། དེ་ཐོབ་པ་ལ་སྒྲིབ་པ་འཇོམས་ཤིང་ནུས་པ་འཇོག་པའི་ཐབས་འདིས་རིམ་པར་བགྲོད་དགོས་པའི་ཕྱིར། དེ་ལྟར་ཡང་ཐུགས་ཐིག་ལས། བདག་གཞན་དོན་ནུས་ཚོགས་ལས་འགྲུབ། །དེ་ལ་དེ་ཡོད་ཕྱིར་ནོད་བྱ། །ཞེས་སོ། །གཉིས་པ་ངོ་བོའམ་མཚན་ཉིད་ནི། རྒྱུ་གཉིས་དང་རྐྱེན་བཞི་ཚོགས་པ་ལ་བརྟེན་ནས་ཐོབ་བྱ་གོ་འཕང་གི་འབྲས་བུ་རྒྱུད་ལ་འཇོག་པའི་ལས་ཀྱིས་ཐར་པའི་མྱུ་གུ་མངོན་དུ་བསྐྱེད་པ་དང་། སྐྱེ་ངེས་གང་རུང་གི་རིགས་གནས། དེའང་སྔ་མ་ལས། རྒྱུ་གཉིས་རྐྱེན་བཞིས་ཡན་ལག་བསྙད། །དྲུག་ལ་གནས་པའི་ཐོབ་བྱ་དེ། །ངོ་བོ་ཉིད་ཅེས་རྣམ་པར་བཤད། །ཅེས་སོ། །གསུམ་པ་སྒྲ་དོན་ནི། ཨ་བྷི་ཥིཉྩའི་སྒྲ་ལས་མངོན་པར་གཏོར་བ་ཞེས་བྱ་སྟེ། དངོས་སུ་དྲི་མ་འཁྲུད་པ་ཙམ་ལ་འཇུག་ཅིང་། བརྒྱུད་ནས་དེའི་འབྲས་བུ་ཡེ་ཤེས་ཀྱི་ནུས་པ་ཁྱད་པར་ཅན་འཇོག་པས་ན་དབང་སྟེ། ཧེ་རུ་ཀ་འདུས་པ་ལས། གང་གིས་གང་ལ་དབང་བསྐུར་བས། །རྒྱུད་དག་ ― MLP018_Page_0328 ―
[མ་དཔེ་གཟིགས་ན་འདིར་གནོན།]
ནུས་པ་ཐོབ་ཕྱིར་དབང་། །ཞེས་སོ། །བཞི་པ་རྣམ་གྲངས་ལ་དབྱེ་བ་དང་། ལས་ཀྱི་རིམ་པའོ། །དང་པོ་ལ། རྟེན་གྱི་དཀྱིལ་འཁོར་གྱི་སྒོ་ནས་དང་། བསྐུར་བ་དུས་ཀྱི་སྒོ་ནས་དབྱེ་བ་དང་། མོས་པ་ཐ་དད་པའི་སྒོ་ནས་དབྱེ་བའོ། །དང་པོ་ནི། རྒྱུད་ཚོད་དང་སྦྱར་བའི་དཀྱིལ་འཁོར་བཞིར་འགྱུར་ཏེ་སྔར་བཤད་གྲུབ་པ་ལས་ཤེས་པར་བྱའོ། །གཉིས་པ་ནི། ཐོག་མཐའ་བར་གསུམ་སྟེ། འདི་ལྟར་རྒྱུ་དུས་ཀྱི་དབང་ཐོག་མར་བསྐུར་ཏེ། མ་སྨིན་པ་སྨིན་བྱེད་ཀྱི་དབང་ཡིན་པས་ལམ་གྱི་སྔོན་དུ་འགྲོ་དགོས་པའི་ཕྱིར། ལམ་དུས་ཀྱི་དབང་ནི་དུས་ལ་ནམ་བབས་པའི་ཚེ་བསྐུར་ཏེ། ལམ་གྱི་བོགས་འདོན་ཡིན་པའི་ཕྱིར་རོ། །འབྲས་དུས་ཀྱི་དབང་ནི། ཐ་མར་བསྐུར་ཏེ། ལམ་མཐར་ཕྱིན་ནས་མཐར་ཐུག་སངས་རྒྱས་ཀྱི་ས་ལ་སྦྱོར་བྱེད་ཡིན་པའི་ཕྱིར་རོ། །དེས་ན་ཕྱི་མ་གཉིས་ནི་གྲོལ་བྱེད་ལམ་གྱི་དབང་ཡིན་ནོ། །གསུམ་པ་ལ། ཞི་ཁྲོ་གཉིས་ལས། ཞི་བ་ལ་ནི། ཐུགས་ཐིག་ལས། རྩ་བ་རྣམ་ལྔ་བཅོ་བརྒྱད་དང་། །ཞེས་པའི་རྩ་བ་ལྔ་ནི། རྡོ་རྗེ་ལས། དང་པོ་ས་བོན་འཇོག་པ་སྟེ། །གཉིས་པ་ནུས་པ་བསྐྱེད་པ་ཡིན། གསུམ་པས་ཉམས་མྱོང་བསྐྱེད་པའོ། །བཞི་པས་དེ་ཉིད་བརྟན་པར་བྱེད། །ལྔ་པས་བརྟན་པ་ཉམས་བླངས་པས། །མཆོག་གི་དངོས་གྲུབ་ཚེ་འདིར་འགྲུབ། །ཅེས་པས་ཕན་ནུས་གཉིས་རེ་རེ་དང་། ཟབ་དབང་གསུམ་སོ་སོར་བགྲངས་པའོ། །ཡན་ལག་བཅོ་བརྒྱད་ནི། ཕན་དབང་ལ་བཅུ་དང་། ནུས་དབང་ལ་ལྔར་ཕྱེ་ཞིང་། ཟབ་དབང་གསུམ་དང་བཅས་པའོ། །གཉིས་པ་ནི། ཐུགས་ཐིག་ལས། བསྒྱུར་བ་ལྔ་ལ་སུམ་ཅུ་དྲུག །ཅེས་པས། རྩ་བའི་གྲངས་ཞི་བ་དང་མཚུངས་ལ། དེའི་ཡན་ལག་སོ་དྲུག་ནི། ཁྲོ་བོ་ལས་རིམ་ལས། ལྷ་དབང་ཕྱག་མཚན་རྒྱན་ཆས་དང་། །ནུས་དབང་ལྔ་དང་གདན་གྱི་དབང་། །སྒྲུབ་རྫས་གསང་བ་རྣམ་གསུམ་མོ། །ཞེས་པའི་ནང་གསེས་ཀྱི་གྲངས་སོ་དྲུག་སྟེ། དེ་འདྲེན་ཚུལ་ནི། ཕྱག་རྒྱ་ལྷའི་དང་། བསྣམས་པ་ཕྱག་མཚན་གྱི་དང་། དྲེགས་པ་གདན་གྱི་དབང་གསུམ་ནི་རེ་རེ་དང་། དེ་ལས་གཞན་རྣམས་ཀྱི་བྱེ་བྲག་བགྲང་བའི་སྡོམ་ནི། རྒྱན་ཆས་རྟགས་ལ་བཅུ་ཡིན་ཏེ། །དབུ་རྒྱན་བུམ་པ་སྙིང་པོ་ལྔ། །ཅོད་པན་གོ་ཆ་ཕྲེང་བ་རྒྱན། །ཐོད་ཕྲེང་རྟགས་གསུམ་མེ་དཔུང་ ― MLP018_Page_0329 ―
[མ་དཔེ་གཟིགས་ན་འདིར་གནོན།]
ངོ་། །ནུས་པའི་དབང་ནི་ལྔར་ངེས་ཏེ། །ཉན་སྒོམ་འཆད་ལས་རབ་འབྱམས་དབང་། །སྒྲུབ་པའི་དབང་ལ་བཅོ་ལྔ་སྟེ། །བདུད་རྩི་ལྔ་དང་ཤ་ལྔ་དང་། །རཀྟ་རྒྱལ་མཚན་གདུགས་ཁ་ཊཱཾ། །ཕུར་པ་རྡོར་དྲིལ་རྔེའུ་ཆུང་། །ཡུངས་ཀར་གཟུངས་མ་ཕྲེང་བ་དང་། །ཚེ་དང་བཟའ་བཏུང་མིང་དབང་ངོ་། །ཟབ་དབང་གསུམ་སྟེ་གསང་བ་དང་། །ཤེས་རབ་ཡེ་ཤེས་བདེ་ཆེན་པོ། །ཞེས་སོ། །དེའང་དབང་བཞིར་བསྡུ་བའི་ལས་ཁྲིགས་ཀྱི་སྡོམ། གདན་དང་ལྷ་དབང་ཕྱག་མཚན་དང་། །ཆས་བཅུ་སྒྲུབ་རྫས་བཅོ་ལྔ་སྟེ། །ཕྱི་དབང་ཉེར་བརྒྱད་ཕན་པའི་དབང་། །ནང་ནི་ནུས་པའི་དབང་ལྔ་སྟེ། །གསང་བ་ཟབ་དབང་རྣམ་གསུམ་མོ། །ཞེས་སོ། །གཉིས་པ་ལ། དཀྱིལ་འཁོར་དུ་འཇུག་པ་དང་། དབང་བསྐུར་བའོ། །དང་པོ་ནི། རྡོ་རྗེ་ལས་རིམ་ལས། དབང་ཕྱུག་འཇུག་དང་བཟོད་གསོལ་དང་། །ཁྲུས་དགག་དྲི་དང་ལུས་དབུལ་དང་། །བགེགས་བ སྐྲད་ལྷར་སློབ་དམ་ཚིག་སྦྱིན། །དེ་ཉིད་དབབ་དང་ཆུ་ནན་དང་། །བསྒྲག་དང་རིན་ཆེན་དོར་བ་དང་། །ལྷ་དབབ་པ་དང་ནན་ཏན་དང་། །མིག་དབྱེ་དཀྱིལ་འཁོར་ལེགས་བསྟན་དང་། །ཚོགས་མཆོད་ཡོན་དང་རྣམ་བཅོ་བརྒྱད། །འདི་ཡི་ཡན་ལག་རྫོགས་པར་འགྱུར། །ཞེས་པས་རིགས་བསྡུ་ན་སློབ་དཔོན་འཇུག་པའི་ཆོས་གཉིས་དང་སློབ་མ་འཇུག་པའི་ཆོས་བཅུ་དྲུག་གོ །གསུམ་པ་དབང་བསྐུར་བ་ལ། བསྐུར་བ་དངོས་དང་། རྗེས་ཀྱི་རིམ་པའོ། །དང་པོ་ལ། སྣོད་རིམ་དང་སྦྱར་བ། དབང་གྲངས་དང་རིམ་པ་ལ་དཔྱད་པ། དེ་དབང་བཞིར་བསྡུ་ཚུལ་ལོ། །དང་པོ་ནི། འདི་ཉིད་ལས། དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །སྙིང་རྗེས་ཆུད་མ་ཟོས་པར་བཟུང་། །ཞེས་སོ། །དེ་ཡང་ཇི་ལྟར་བསྐུར་བའི་ཚུལ་ལ། དབང་ཐམས་ཅད་ལ་མཚུངས་ལྡན་དབང་རྫས་བསྐུར་ཐབས་ལ་སོགས་པ་དོན་བརྒྱད་བརྒྱད་དེ། རྡོ་རྗེ་ལས་རིམ་ལས། རྒྱུ་རྐྱེན་ངོ་བོ་འབྲས་བུ་དང་། །རིམ་ལས་སྐྱོན་ཡོན་བརྒྱད་ཅེས་བྱ། །ཞེས་སོ། །གཉིས་པ། གྲངས་ལ་དཔྱད་པ་དང་། རིམ་པ་ལ་དཔྱད་པའོ། །དང་པོ་ནི། ཁ་ཅིག ཟབ་དབང་ནི། ནུས་པ་དངོས་སུ་འཇོག་བྱེད་ཡིན་པའི་ཕྱིར། ནུས་དབང་དུ་འདུ་བས་གྲངས་བཅོ་ལྔ་ཁོ་ནར་འདོད་ ― MLP018_Page_0330 ―
[མ་དཔེ་གཟིགས་ན་འདིར་གནོན།]
པ་དང་། ཁ་ཅིག་ཟབ་དབང་གསུམ་གཅིག་ཏུ་བྱས་ཏེ་བཅུ་དྲུག་ཏུ་འདོད་པ་དང་། ཁ་ཅིག་བུམ་དབང་དང་གསང་དབང་གཉིས་སུ་འདུ་བར་འདོད་པ་ལས། དེ་དག་དགག་པ་ལ་ལུང་རིགས་མན་ངག་གསུམ་སྟེ། དང་པོ་ལུང་ནི། དད་བརྩོན་བརྟུལ་ཞུགས་རབ་རྟོགས་ན། ཞེས་དང་། དབང་གི་གལ་པོ་ལས། ནུས་དང་ཕན་པའི་དབང་ཐོབ་ནས། །བརྟུལ་ཞུགས་ལྡན་པའི་བུ་མཆོག་ལ། །ཞེས་སོགས་ཀྱིས་གནོད་པའི་ཕྱིར། རིགས་པ་ནི་ཕན་དབང་ཆོས་ཅན། ཁྱོད་ལས་གཞན་པའི་དབང་གྲངས་བརྗོད་པ་དགོས་མེད་དུ་ཐལ། དབང་ཐམས་ཅད་ཁྱོད་ཀྱི་ནང་དུ་འདུ་བ་གང་ཞིག ཁྱོད་བདག་གཞན་གྱི་དོན་ལ་ཕན་བྱེད་ཀྱི་དབང་ཡིན་པའི་ཕྱིར། ཟབ་དབང་གསུམ་པོ་དེ་ཆོས་ཅན། ཁྱོད་ངོ་བོ་གཅིག་མ་ཡིན་པར་ཐལ། ཁྱོད་ལ་གོ་འཕང་གི་ཐོབ་བྱ་སོ་སོར་ཡོད་པའི་ཕྱིར། གསུམ་པ་ཡང་དེས་ཁེགས་སོ། །མན་ངག་གིས་ཀྱང་གནོད་དེ། རྡོ་རྗེ་ལས་རིམ་ལས། ངོ་བོ་སྣོད་ཀྱི་མཚན་ཉིད་ཀྱིས། །དབྱེ་བ་རྣམ་པ་ལྔ་རུ་འགྱུར། །ཞེས་སོགས་གསུངས་པའི་ཕྱིར། གཉིས་པ་ནི། དབང་བཅོ་བརྒྱད་པོ་དེ་དབང་བཞིར་འདུས་མ་འདུས་ཀྱི་བཞེད་པ་སྣ་ཚོགས་ཡོད་ཀྱང་། དབང་བཞིར་བསྡུ་བ་འཐད་དེ། རྒྱུད་ཕྱི་མའི་དྲི་བ་བཅུ་གསུམ་པར། དབང་བསྐུར་བ་ཡི་དོན་ཡོད་ཅིང་། །ཞེས་པའི་ལན་དུ། སློབ་དཔོན་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །རྣམ་རྟོག་དྲི་མ་དག་བྱའི་ཕྱིར། །དབང་བསྐུར་རྣམ་པ་བཞི་ཡིན་ནོ། །ཞེས་གསུངས་པའི་ཕྱིར། སྡུད་ཚུལ་ཡང་ཕན་ནུས་ཀྱི་དབང་ལྔ་པོ་ནི་བུམ་པའི་དབང་དུ་བསྡུ་སྟེ། དེ་ཐོབ་པས་ལམ་བསྐྱེད་རིམ་བསྒོམ་པའི་སྣོད་རུང་དུ་བྱས་པའི་ཕྱིར་རོ། །དེ་ཡང་ཕན་དབང་ཐོབ་པས་ཕྱི་དཀྱིལ་དྲང་དོན་གྱི་སྣོད་རུང་དུ་བྱས་པ་དང་། དེའི་སྟེང་དུ་ཉན་སྒོམ་གྱི་དབང་གཉིས་ཀྱིས་ནང་རང་བཞིན་གྱིས་གྲུབ་པའི་ལུས་དཀྱིལ་ལ་བརྟེན་པའི་ངེས་དོན་གྱི་བསྐྱེད་རིམ་སྒོམ་ནུས་པ་དང་། ལྷག་མ་གསུམ་ལས། རྡོ་རྗེ་རྒྱལ་པོ་ནི་རྡོ་རྗེ་སློབ་དཔོན་གྱི་དབང་དངོས་དང་། འཆད་ཕྲིན་གཉིས་དེའི་བྱེད་ལས་ཡིན་པས། དེ་ལྟར་ན་རྡོ་རྗེ་སློབ་དཔོན་གྱི་དབང་ཐོབ་ནས་བུམ་དབང་དང་རྗེས་སུ་འབྲེལ་བའི་ལམ་ཐམས་ཅད་ལ་སྤྱོད་པའི་བདག་པོར་གྱུར་པའོ། །ཟབ་དབང་གསུམ་ནི། རིམ་པ་ལྟར་ ― MLP018_Page_0331 ―
[མ་དཔེ་གཟིགས་ན་འདིར་གནོན།]
གསང་དབང་དང་། ཤེས་རབ་ཡེ་ཤེས་དང་། ཚིག་དབང་རྣམས་སུ་འདུས་པར་ཟད་ལ། དེ་གསུམ་ཐོབ་པས། རྫོགས་རིམ་སྟེང་འོག་གི་སྒོ་དང་བདེ་བ་ཆེན་པོ་དེ་ཁོ་ན་ཉིད་སྒོམ་པའི་སྣོད་རུང་དུ་བྱས་པའོ། །གསུམ་པ་རྗེས་ཀྱི་རིམ་པ་ནི། དབང་རྟགས་རྡོར་དྲིལ་སྦྱིན་པ་སོགས་ནས་ཤིས་པ་བརྗོད་པས་མཐའ་བརྒྱན་པ་རྣམས་སོ། །ལྔ་པ་དབང་མ་ཐོབ་པའི་སྐྱོན་ནི། འདི་ཉིད་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་བརྩོན་པ་ནི། །འབྲས་བུ་མེད་ཅིང་བརླག་པར་འགྱུར། །ཞེས་སོ། །དྲུག་པ་ཡོན་ཏན་ནི། འདི་ཉིད་ལས། དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་དང་། ཧེ་རུ་ཀ་མངོན་འབྱུང་ལས། དཀྱིལ་འཁོར་བདག་པོ་མཐོང་ནས་ནི། །ཅུང་ཟད་དེ་ནི་མི་འགྲུབ་མེད། །སྡིག་པ་ཀུན་ལས་རྣམ་པར་གྲོལ། །དངོས་གྲུབ་མྱུར་དུ་ཐོབ་པར་འགྱུར། །ཞེས་གསུངས་སོ། །ལྔ་པ་མི་འདའ་བ་དམ་ཚིག་ལ་དྲུག་ལས། དང་པོ་དགོས་ཆེད་ནི། གཞན་སེལ་ངན་སོང་དང་ཐེག་དམན་དུ་མི་ལྟུང་ཞིང་། དོན་གཉེར་ཞིང་ས་གཤིན་པོ་ལ་ས་བོན་བཏབ་ན་འབྲས་བུ་སྨིན་པར་འགྱུར་བ་ལྟར་ལམ་དང་། འབྲས་བུའི་གཞི་དམ་ཚིག་གིས་བཟུང་སྟེ་ལམ་གྱི་འབད་པ་དོན་ཅན་དུ་བྱེད་པའོ། །དེ་ལྟར་ཡང་སྔགས་འཆང་རྣམས་དོན་ཡོད་པར་བྱ་བའི་ཕྱིར་དམ་ཚིག་ཆེན་པོ་འདི་ཆེད་དུ་བརྗོད་དོ། །ཞེས་སོ། །གཉིས་པ་ངོ་བོའམ་མཚན་ཉིད་ནི། བསྲུང་བྱའི་དོན་ཁྱད་པར་ཅན་ལས་མི་འདའ་བར་སྡོམ་པའི་སེམས་པ་ས་བོན་དང་བཅས་པ་སྟེ། རྒྱུད་ཕྱི་མ་ལས། གང་ཞིག་ནན་ཏན་ལས་མི་འགོང་། །རྨི་ལམ་དུའང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད། །ཅེས་སོ། །གསུམ་པ་སྒྲ་དོན་ནི། ས་མ་ཡའི་སྒྲ་ལས་དོན་ཇི་ལྟར་བཅས་པ་ལས་འདའ་བར་བྱ་བ་མ་ཡིན་པའི་ཕྱིར་དམ་ཚིག་སྟེ། ཀུན་འདུས་ལས། འདའ་ཀ་རྡོ་རྗེ་དམ་ཚིག་གཏན་གྱི་གཉེར། །ཞེས་སོ། །བཞི་པ་རྣམ་གྲངས་ལ། ཐོབ་བྱེད་ཀྱི་ཆོ་ག་དང་། ཐོབ་པའི་ས་མཚམས། ཐོབ་བྱའི་ངོ་བོ། ཉམས་ན་བསྐང་ ― MLP018_Page_0332 ―
[མ་དཔེ་གཟིགས་ན་འདིར་གནོན།]
བའི་ཐབས་སོ། །དང་པོ་ནི། དེ་བཞིན་གཤེགས་པས་གསུངས་པའི་ཆོ་ག་ཁོ་ན་ལས་ཐོབ་ཀྱི། གཞན་ལས་ནི་དམ་ཚིག་དང་སྡོམ་པ་མེད་དེ། བརྟུལ་ཞུགས་ཙམ་དུ་ཟད་དོ། །དེ་བས་ན་རྒྱུད་སྡེ་སོ་སོའ་དབང་ཆོག་ལས་སོ། །གཉིས་པ་ནི། ཁས་བླངས་ཀྱི་སྔགས་སྡོམ་སྦྱོར་བའི་དུས་རིགས་ལྔའི་སྡོམ་བཟུང་ལན་གསུམ་བཟླས་པའི་བརྗོད་པ་གསུམ་པའི་ཆ་ཐ་མ་ལ་གང་བཟུང་བའི་སྡོམ་པ་དེ་ཉིད་ཐོབ་པ་ཡིན་ཏེ། རྡོ་རྗེ་རྩེ་མོ་ལས། སྡོམ་པ་གསུམ་ལ་ལེགས་བཀོད་ནས། །དེ་ལ་དཀྱིལ་འཁོར་བསྟན་པར་བྱ། །ཞེས་དང་། ཐུན་མོང་གི་ལུང་ལས་ཀྱང་། སྡོམ་པ་ཇི་ལྟར་ཁས་བླངས་ཤིང་། །ཐོབ་ཀྱི་རྒྱུད་ལས་མ་ཡིན་ནོ། །ཞེས་སོ། །འོན་ཀྱང་དེ་ཉིད་སྔགས་སྡོམ་བཏགས་པ་བ་ཡིན་ཏེ། སླར་དབང་སྐུར་བས་ཡེ་ཤེས་ཁོང་ཆུད་ཀྱིས་ཐོབ་པར་བཤད་པའི་ཕྱིར་རོ། །གལ་ཏེ་དབང་དུས་སུ་ཡེ་ཤེས་དངོས་སུ་མ་སྐྱེས་ཀྱང་སྐྱེ་རུང་གི་ནུས་པ་བཞག་པ་དེས་དྲི་མ་སྦྱོང་བ་དང་། ཡོན་ཏན་སྐྱེ་བའི་མགོ་རྩོམ་པ་ཡིན་པས་རྒྱུད་འགྱུར་བའི་ཁྱད་པར་ཏེ། དེ་ལ་རྒྱུད་སྨིན་པ། དབང་ཐོབ་པ། དམ་ཚིག་དང་སྡོམ་པ་ཐོབ་པ་ཞེས་པའི་ཐ་སྙད་ཐོབ་ཅིང་། ཆོ་གས་སེམས་རྒྱུད་ཀྱི་ཡོན་ཏན་དགེ་བའི་ས་བོན་གསོས་བཏབ་པའི་ཆ་དེ་སངས་རྒྱས་ཀུན་གྱི་གསང་བའི་རྡོ་རྗེ་གསུམ་འཛིན་པའི་ཆ་ནས་དམ་ཚིག་ཀྱང་ཡིན་ལ། རང་རྒྱུད་སྡོམ་པའི་ཆ་ནས་སྡོམ་པའང་ཡིན་པའི་ཕྱིར་ཏེ། ཕྲ་རྒྱས་ལ། དེ་ལྟར་སུམ་བརྒྱ་དྲུག་ཅུ་རྣམས། །བདག་གི་རྡོ་རྗེ་མཆོག་གསུམ་པོས། །ལོག་པར་མི་གཏོང་སྡོམ་པའི་དངོས། །ས་གཞི་ལྟ་བུར་གསུངས་པ་ཡིན། །ཞེས་སོ། །དམ་ཚིག་དང་སྡོམ་པ་གཉིས་ངོ་བོ་གཅིག་ལ་ལྡོག་པ་ཐ་དད་པ་ལྟ་བུ་ཡིན་ཡང་། དམ་ཚིག་ཡིན་ན། དེ་ཡིན་པས་མ་ཁྱབ་སྟེ། གསང་བ་བཅུའི་སྐབས་ཀྱི། སྒྲུབ་པའི་གནས་དུས་གྲོགས་དང་རྫས། །བར་དུ་གསང་ལ་བསྒྲུབ་པར་བྱ། །ཞེས་པའི་སྐབས་ཀྱི་དམ་ཚིག་དེ་སྡོམ་པ་མ་ཡིན་པའི་ཕྱིར་རོ། །གསུམ་པ་ངོ་བོ་ལ་སྔགས་སྡོམ་གྱི་མཚན་ཉིད། དབྱེ་བ། དམ་ཚིག་གི་ཆེ་བ། དེའི་རྣམ་གྲངས་བཤད་པ་དང་བཞི་ལས། དང་པོ་ནི། སྡོམ་བྱེད་ཐབས་ཤེས་ཁྱད་པར་ཅན་གྱིས་ཟིན་པའི་བདེ་བ་ཆེན་པོའི་ཡེ་ཤེས་ཀྱིས་བསྡམ་བྱ་སྒོ་གསུམ་ཕྲ་བའི་བག་ཆགས་དང་མཚན་འཛིན་གྱི་རྟོག་ ― MLP018_Page_0333 ―
[མ་དཔེ་གཟིགས་ན་འདིར་གནོན།]
པ་སྡོམ་པར་བྱེད་པའི་སེམས་པ་ས་བོན་དང་བཅས་པ་གང་ཞིག རང་རྒྱུ་དབང་བསྐུར་བ་ལས་གསར་དུ་ཐོབ་པའི་ཚུལ་ཁྲིམས། གཉིས་པ་དབྱེ་བ་ལ། བྱ་བ། སྤྱོད་པ། རྣལ་འབྱོར་རྒྱུད། རྣལ་འབྱོར་བླ་ན་མེད་པའི་སྔགས་སྡོམ་དང་བཞིའི་མཚན་ཉིད་རིམ་བཞིན། བལྟས་པའི་བདེ་བ། དགོད་པའི་བདེ་བ། ལག་བཅངས་ཀྱི་བདེ་བ་གོ་རིམ་བཞིན་དུ་ལམ་དུ་བྱས་པའི་སྒོ་ནས་ཆགས་པ་དེ་དང་དེ་དག་པར་བྱེད་པའི་ཡེ་ཤེས་རང་རྒྱུད་ལ་འཛིན་པའི་ཐབས་ཤེས་ཀྱིས་སྒོ་གསུམ་གྱི་བག་ཆགས་དང་མཚན་རྟོག་སྡོམ་པར་བྱས་པའི་སེམས་པ་ས་བོན་དང་བཅས་པ་གང་ཞིག རང་རྒྱུ་རྒྱུད་སྡེ་རང་ལ་ལྟོས་པའི་དབང་ལས་ཐོབ་པའི་ཚུལ་ཁྲིམས། བླ་མེད་ཀྱི་སྔགས་སྡོམ་གྱི་མཚན་ཉིད་ནི། དབང་པོ་གཉིས་སྦྱོར་བདེ་བ་ལམ་དུ་བྱས་པའི་སྒོ་ནས་ཆགས་པ་དེ་དག་པར་བྱེད་པའི་ཡེ་ཤེས་རང་རྒྱུད་ལ་འཛིན་པའི་ཐབས་ཤེས་ཁྱད་པར་ཅན་གྱིས་སྒོ་གསུམ་གྱི་བག་ཆགས་དང་མཚན་རྟོག་སྡོམ་པར་བྱེད་པའི་སེམས་པ་ས་བོན་དང་བཅས་པ་གང་ཞིག རང་རྒྱུ་བླ་མེད་ཀྱི་དབང་ལས་ཐོབ་པའི་ཚུལ་ཁྲིམས། དབྱེ་ན་གཉིས་ཏེ། བུམ་དབང་ལས་ཐོབ་པ་དང་། དབང་གོང་མ་ལས་ཐོབ་པའི་སྡོམ་པའོ། །དང་པོའི་མཚན་ཉིད་སྦྱོར་བའི་དུས་སུ་རིགས་ལྔ་སྤྱི་དང་བྱེ་བྲག་གི་དམ་ཚིག་ཁས་བླངས་ཤིང་། དངོས་གཞིའི་དུས་སུ་བུམ་དབང་འཁོར་བཅས་བསྐུར་བ་ལས་གསར་ཐོབ་ཀྱི་ཚུལ་ཁྲིམས་གང་ཞིག ཐབས་ཤེས་ཁྱད་པར་ཅན་བསྐྱེད་རིམ་གྱིས་ཐ་མལ་སྣང་ཞེན་གྱི་མཚན་རྟོག་སྡོམ་པར་བྱེད་པའི་སེམས་པ་ས་བོན་དང་བཅས་པ་གཉིས་པའི་མཚན་ཉིད། རང་ཐོབ་བྱེད་ཀྱི་རྒྱུ་དབང་གོང་མ་གང་རུང་བསྐུར་བ་ལ་བརྟེན་ནས་གྱ་ནོམ་ལྷར་ཞེན་གྱི་མཚན་རྟོག་ལས་སྐྱོབ་པའི་ཚུལ་ཁྲིམས་གང་ཞིག ཐབས་ཤེས་ཁྱད་པར་ཅན་རང་བྱིན་བརླབས་པས་སེམས་གསལ་སྟོང་གི་ངོ་བོར་སྡོམ་པའི་སེམས་པ་ས་བོན་དང་བཅས་པ་གསང་དབང་གི་དང་། དེ་གང་ཞིག ཐབས་ཤེས་ཁྱད་པར་ཅན་ཀུན་རྫོབ་ཞུ་བདེས་མཚོན་བྱེད་དཔེའི་ཡེ་ཤེས་བདེ་སྟོང་གི་ངོ་བོར་སྡོམ་པའི་སེམས་པ་ས་བོན་དང་བཅས་པ་ཤེར་དབང་གི་དང་། དེ་དག་གང་ཞིག ཐབས་ཤེས་ཁྱད་པར་ཅན་འཕོ་མེད་བདེ་ཆེན་གྱི་ཟུང་འཇུག་ལྷན་སྐྱེས་ཀྱི་ཡེ་ཤེས་ ― MLP018_Page_0334 ―
[མ་དཔེ་གཟིགས་ན་འདིར་གནོན།]
མཚོན་བྱ་དོན་དམ་པའི་ངོ་བོར་སྡོམ་པའི་སེམས་པ་ས་བོན་དང་བཅས་པ་དབང་བཞི་པའི་སྔགས་སྡོམ་གྱི་མཚན་ཉིད་དེ། དགྱེས་རྡོར་ལས། སངས་རྒྱས་ཀུན་གྱི་སྡོམ་པ་ནི། །ཨེ་ཝཾ་རྣམ་པར་རབ་ཏུ་གནས། །ཨེ་ཝཾ་རྣམ་པའི་བདེ་ཆེན་པོ། །དབང་ལས་ཡང་དག་ཤེས་པར་བྱ། །ཞེས་གསུངས་པའི་ཕྱིར་རོ། །གཉིས་པ་དམ་ཚིག་གི་ཆེ་བ་ལ་སྤྱོད་སྒོ་ཡངས་པའི་དང་། འདུལ་སྡོམ་ཐམས་ཅད་འདུས་པའི་ཆེ་བའོ། །དང་པོ་ནི། གནས་ལུགས་ལ་རྟོགས་གོམས་ཀྱི་གདེངས་དང་ལྡན་ན་མཉམ་པ་ཆེན་པོའི་དམ་ཚིག་ལ་གནས་པའམ། བླ་ན་མེད་པའི་ཐེག་པར་ངེས་པ་ཞེས་བྱ་སྟེ། སྒོ་གསུམ་གྱི་སྤྱོད་པ་ཇི་ལྟར་སྤྱད་ཀྱང་ཕྱོགས་འཛིན་གྱི་བློ་མི་སྐྱེ་བའི་ཕྱིར། དེ་འདྲ་བའི་གདེངས་ཀྱིས་ཟིན་པའི་གང་ཟག་དེས། ལས་དང་ཉོན་མོངས་པ་གང་ལ་སྤྱད་ཀྱང་སྒྱུ་མའི་སྤྲུལ་པ་ལ་སྤྱོད་པ་ལྟར་མ་ཞེན་པའི་ཕྱིར། དེའི་སྒྲིབ་པ་དང་བག་ཆགས་མི་གསོག་པའི་སྟེང་དུ་ཚོགས་གཉིས་རྫོགས་པར་འགྱུར་བ་དང་། སོ་བྱང་ཕྱི་རྒྱུད་ཀྱི་ཚུལ་ཁྲིམས་དང་སྡོམ་པ་ཐམས་ཅད་ཀྱང་དག་པར་འགྱུར་བ་ཉིད་དོ། །བླ་མེད་ཐེག་པར་རབ་ངེས་ན། །ཉོན་མོངས་ལས་རྣམས་ཀུན་སྤྱོད་ཀྱང་། །བྱས་ལ་མི་གསོག་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་སོ། །གཉིས་པ་ནི། བླ་མེད་མཆོག་གི་དམ་ཚིག་ཏུ། །འདུལ་བའི་དབང་གི་ཚུལ་ཁྲིམས་དང་། །ཇི་སྙེད་སྡོམ་པ་བསམ་ཡས་པ། །མ་ལུས་ཀུན་འདུས་རྣམ་པར་དག །ཅེས་གསུངས་པ་ལྟར། དེ་གསུམ་ཀྱང་རྣམ་པ་འགལ་བ་དང་། ངོ་བོ་ཚང་བ་དང་གནས་གྱུར་པ་གཉིས་ལས། དང་པོ་ནི། ལེན་དུས་ཀྱི་རྣམ་པ་སོ་ཐར་ཇི་སྲིད་འཚོའ་བར་དང་། བྱང་སྡོམ་སྙིང་པོ་བྱང་ཆུབ་ལ་ཐུག་གི་བར་དང་། སྔགས་སྡོམ་འཁོར་བ་མ་སྟོངས་ཀྱི་བར་དུ་ཁས་ལེན་པའི་ཁྱད་པར་དང་། བསླབ་ཚུལ་ལ་སོ་ཐར་ཕྱི་ལུས་ངག་གི་སྤང་བ་བདུན་ལ་བསླབ་པ་དང་། ནང་ཡིད་ཀྱི་ལས་གསུམ་གཙོ་བོར་སྤོང་བའི་སྙིང་རྗེ་ལ་བསླབ་པ་དང་། རྟོགས་གོམས་ཀྱི་གདེངས་ཀྱིས་མཉམ་པའི་དོན་ལས་མི་འདའ་བར་བསླབ་པའོ། །གཉིས་པ་ངོ་བོ་ལ། ཚང་བ་དང་། གནས་འགྱུར་གཉིས་ལས། དང་པོ་ནི། སོ་ཐར་ནི་གཞན་ལ་གནོད་པ་གཞི་བཅས་ལས་ལོག་པ་དང་། བྱང་སྡོམ་ནི་དེའི་སྟེང་དུ་ཕན་ ― MLP018_Page_0335 ―
[མ་དཔེ་གཟིགས་ན་འདིར་གནོན།]
འདོགས་པའི་སྦྱོར་བ་ལ་ཞུགས་པ་དང་། སྔགས་སྡོམ་ནི་དེ་གཉིས་ཀ་ལ་ཞུགས་པའི་སངས་རྒྱས་ཀྱི་མཛད་པ་ཉམས་སུ་བླངས་ཏེ་མཉམ་པ་ཆེན་པོའི་ངང་ནས་གཞན་དོན་རྩོལ་མེད་དུ་མཛད་པའི་ཐབས་ལ་མཁས་པས་ཐམས་ཅད་པའི་ཕྱིར། བྲེ་གསུམ་ཡོད་པའི་ནང་དུ་དོ་མ་ཚང་བའི་དོགས་པ་མེད་པ་ལྟར། ཡོན་ཏན་ཡར་ལྡན་དུ་འདུས་པའི་ཕྱིར། དེ་ལྟར་ཡང་གསལ་བཀྲ་ལས། ཐེག་ཆེན་དམ་ཚིག་ལ་གནས་ན། །འོག་མའི་འདུལ་སྡོམ་དམ་ཚིག་ཀུན། །བསྲུང་བ་མེད་པར་ཐུབ་པས་ན། །དགེ་སློང་བྱང་ཆུབ་སེམས་དཔའ་དང་། །རྣལ་འབྱོར་རྣལ་འབྱོར་ཆེན་པོ་ཡིན། །ཞེས་སོ། །རྣམ་པར་དག་པ་ནི། སོ་ཐར་གྱི་གཞན་གནོད་གཞི་བཅས་སྤོང་བ་དང་བྱང་སྡོམ་གྱི་གཞན་ལ་ཕན་འདོགས་པའི་ལྡོག་ཆ་གཉིས་པོ་དེ་རྫས་གོང་འཕེལ་གྱི་ཚུལ་གྱིས་སྔགས་ཀྱི་སྡོམ་རྫས་སུ་ངོ་བོ་གནས་འགྱུར་ཞིང་། མཉམ་པ་ཆེན་པོའི་ཐབས་ཀྱིས་མ་ཟིན་པའི་ཐ་མལ་སྣང་ཞེན་གྱི་ལྡོག་ཆ་རེ་ཡོད་པ་དེ་རྩ་བ་ནས་བཏང་ནས་མཉམ་པ་ཆེན་པོའི་དམ་ཚིག་ཏུ་སོ་བྱང་གི་སྡོམ་པའི་ངོ་བོ་དེ་ཉིད་གནས་འ གྱུར་ཏེ་རྣམ་པར་དག་པ་ཡིན་ནོ། །དེ་ཡང་བྱེ་བྲག་ཏུ་བཤད་ན། དེ་ལ་སོ་ཐར་གྱི་སྡོམ་པ་ནི། ཕས་ཕམ་བཞི་བྱུང་ན་ཞིག་པར་གསུངས་པ་ལས། འདིར་གནས་ལུགས་རྟོགས་པའི་གདེངས་ཀྱིས་ཟིན་ན་ཇི་ལྟར་སྤྱད་ཀྱང་མི་གོས་པས་ངོ་བོ་ཡར་ལྡན་དང་། སླར་ཚོགས་སུ་འགྱུར་བའི་ཕྱིར་ཡོན་ཏན་ཡར་ལྡན་ཏེ། འདི་ཉིད་ལས། བྱས་ལ་མི་གསོག་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་དང་། སྡུད་པ་ལས། སྐྱེ་བོ་ཕལ་ཆེར་མགོ་མང་བྱེ་བ་གཅོད་བྱེད་ཀྱང་། །འགྲོ་ཀུན་སྤྲུལ་འདྲར་རབ་ཤེས་དེ་ལ་འཇིགས་པ་མེད། །ཅེས་སོ། །གཉིས་པ་བྱང་སྡོམ་དང་མི་འགལ་བར་འདུས་ཚུལ་ནི། ཉེས་སྤྱོད་སྡོམ་པའི་ཚུལ་ཁྲིམས་ཀྱིས་རྒྱུད་སྡོམ། གཉེན་པོ་ལེགས་སྤྱོད་དགེ་བའི་ཚོགས་སྒྲུབ་པ། དགེ་བ་ཆོས་སྡུད་ཀྱིས་རྟོགས་པ་དང་ཡོན་ཏན་ཁྱད་པར་ཅན་སྒྲུབ། སེམས་ཅན་དོན་བྱེད་ཀྱི་སྒོ་ནས་གཞན་ལ་ཕན་འདོགས་པ་གསུམ་དུ་འདུ་བ་ལས། འདིར་ཡང་ལས་དང་ཉོན་མོངས་པ་ལ་སྤྱོད་པ་ལྟར་ཡང་མ་ཞེན་པའི་ཕྱིར་དོན་གྱི་ངོ་བོ་ལ་ཅི་ཡང་བྱས་པ་མེད་པ་ནི་སྡོམ་པའི་ཚུལ་ཁྲིམས། གང་ལྟར་སྤྱོད་ཀྱང་སྒོ་གསུམ་རྡོ་རྗེ་གསུམ་ ― MLP018_Page_0336 ―
[མ་དཔེ་གཟིགས་ན་འདིར་གནོན།]
གྱི་ཕྱག་རྒྱས་བཏབ་སྟེ་མི་འདའ་བ་ནི་དགེ་བ་ཆོས་སྡུད། གཞན་དོན་དུ་འགྱུར་ན་འཁོར་བའི་ཆོས་གང་ཡང་མི་འདོར་བར་སྤྱོད་པ་ནི་སེམས་ཅན་དོན་བྱེད་དེ། ཕལ་པོ་ཆེ་ལས། གང་དག་སེམས་ཅན་དོན་འགྱུར་བའི། །ཐབས་དེ་རྒྱལ་སྲས་བསླབ་པའི་མཆོག །སྤྲིན་ལས་ཆར་ཆེན་བབ་པ་ཡིས། །ལོ་ཏོག་ཕུན་སུམ་ཚོགས་པར་བྱེད། །ཅེས་གསུངས་པ་ལྟར་རོ། །དེ་དག་ལ་རྩོད་པ་སྤོང་བ་ལ། འདོད་པ་བརྗོད་པ་དང་། དེ་དགག་པ་གཉིས་ལས། དང་པོ་ནི། ཁ་ཅིག བུམ་དབང་རྫོགས་པར་ཐོབ་པའི་ཚེ། སྔགས་སྡོམ་རྫོགས་པར་ཐོབ་པ་ཡིན་ཏེ། མཆོག་དབང་གོང་མ་གསུམ་ལ་སྔགས་སྡོམ་གསར་ཐོབ་མེད་པའི་ཕྱིར་ཟེར་བ་དང་། ཁ་ཅིག སྨིན་བྱེད་གཞིའི་དབང་བཞི་བསྐུར་བས་སྔགས་སྡོམ་ཐོབ་ཀྱང་། སླར་སྡོམ་ལྡན་རང་ཉིད་ཀྱིས་དབང་བླངས་པའམ། བླ་མས་བསྐུར་བ་གང་རུང་ལ་བརྟེན་ནས་སྔར་མ་ཐོབ་པའི་སྡོམ་པ་གསར་ཐོབ་ཡོད་དེ། དབང་བསྐུར་རེ་རེ་ཐོབ་པའི་ཚེ་གོང་འཕེལ་དུ་འགྲོ་བས། ཇི་ཙམ་འཕེལ་བའི་ཆ་དེ་གསར་ཐོབ་ཡིན་པའི་ཕྱིར་ཟེར་བ་དང་། ཡང་། ཁ་ཅིག གནས་འགྱུར་གྱི་སྐབས། སྡོམ་པ་འོག་མ་གཉིས་གོང་མར་གནས་གྱུར་པ་མི་འཐད་དེ། ཅིའི་ཕྱིར་ཞེ་ན། སོ་ཐར་གྱི་ཕམ་པ་བཞི་འཆབ་བཅས་སྤང་བ་དང་། བྱང་སྡོམ་གྱི་སེམས་ཅན་ལ་འཚེ་བ་ཆ་བཅས་ལས་ལྡོག་ནས་གཞན་ལ་ཕན་འདོགས་པའི་ལྡོག་ཆ་གཉིས་པོ་དེ། འདིར་སྔགས་སྡོམ་གྱི་སྤྱད་པར་བྱ་བའི་དམ་ཚིག་ལྔ་དང་དངོས་སུ་འགལ་བའི་ཕྱིར་ཟེར་རོ། །གཉིས་པ་དེ་དག་དགག་པ་ལ་ལུང་རིགས་གཉིས་ལས། ལུང་དང་པོ་ལ། ལུང་ནི། རབ་དབྱེ་ལས། བླ་མ་བཙལ་ལ་དབང་བཞི་བླངས། །དེ་ཡི་སྡོམ་པ་གསུམ་ལྡན་འགྱུར། །ཞེས་པ་ལ་སོགས་ཀྱིས་གནོད་དོ། །རིགས་པ་ནི། མཆོག་དབང་གོང་མ་མ་ཐོབ་ལ། བུམ་དབང་རྫོགས་པར་ཐོབ་པའི་གང་ཟག་དེ་ཆོས་ཅན། ཁྱོད་རྫོགས་རིམ་གྱི་སྔགས་སྡོམ་པའི་གང་ཟག་དུ་ཐལ། ཁྱོད་སྔགས་སྡོམ་རྫོགས་པར་ཐོབ་པའི་ཕྱིར་ཏེ། བུམ་དབང་རྫོགས་པར་ཐོབ་པའི་ཕྱིར། རྟགས་ཁས། འདོད་མི་ནུས་ཏེ། དེ་ཐོབ་བྱེད་ཀྱི་མཆོག་དབང་གོང་མ་མ་ཐོབ་པའི་ཕྱིར་རོ། །ལུང་གཉིས་པ་ལ། སྨིན་བྱེད་གཞིའི་དབང་བཞི་ཐོབ་པའི་གང་ཟག་དེ་ཆོས་ཅན། ཁྱོད་རིམ་གཉིས་སྒོམ་པ་ལ་དབང་བའི་ ― MLP018_Page_0337 ―
[མ་དཔེ་གཟིགས་ན་འདིར་གནོན།]
གང་ཟག་མ་ཡིན་པར་ཐལ། ཁྱོད་ལ་སྔར་མ་ཐོབ་པའི་སྔགས་སྡོམ་རིགས་མི་འདྲ་བ་གསར་དུ་ཐོབ་རྒྱུ་ཡོད་པའི་ཕྱིར། དབང་གི་གོ་མ་ཕྱེ་བར་ལམ་ལ་བསླབ་པར་མ་གསུངས་པའི་ཕྱིར། འདོད་ན། དེ་ཆོས་ཅན། དེར་ཐལ། ཁྱོད་རྒྱུད་སྨིན་ཟིན་པའི་གང་ཟག་ཡིན་པའི་ཕྱིར། མ་གྲུབ་ན། དེ་ཡིན་ཏེ། མདོ་སྡེ་རྒྱན་ལས། ཇི་ལྟར་རྨ་དང་ཟས་ལ་དེ་དག་གི །གཟག་དང་སྤྱད་དུ་རུང་བས་སྨིན་འདོད་ལྟར། །དེ་ཕྱིར་རྟེན་འདིར་ཕྱོགས་གཉིས་ཞི་བ་དང་། །ཡོངས་སུ་སྤྱད་པ་ཉིད་དུ་སྨིན་པ་བསྟན། །ཅེས་ཕར་ཕྱིན་ཐེག་པར་སྦྱོར་ལམ་ཐོབ་ནས་རྟེན་དེ་ཉིད་ལ་མཐོང་སྤང་སྤང་རུང་དང་། མཐོང་ལམ་སྐྱེ་རུང་ལ་སྨིན་པའི་ཚད་དུ་འཇོག་པ་ལྟར། འདིར་ཡང་བླ་མེད་ཀྱི་ཐེག་པ་འདིར་ཞུགས་ནས་ཚེ་འདི་ཉིད་ལ་སྤང་བྱ་སྤང་རུང་དང་། ཐོབ་བྱ་མཆོག་གི་དངོས་གྲུབ་ཐོབ་རུང་གི་ནུས་པ་ཐོབ་པའི་ཕྱིར། དེས་ན་དབང་ཐོབ་པ་ཉིད་རྒྱུད་སྨིན་པའི་ཚད་དེ། ཆུ་ལུད་དྲོད་གཤེར་འཛོམ་དུས་ཞིང་ལ་ས་བོན་ཐེབ་པ་བཞིན་ནོ། །དེ་ལ་དངོས་ལན་ནི། སྔར་རྒྱུད་ལ་ཡོད་པའི་སྔགས་སྡོམ་གྱི་རྒྱུན་དེ་ཉིད་ཕྱིས་ལམ་དབང་བསྐུར་བ་རེ་རེ་ཐོབ་པའི་ཚེ་གོང་འཕེལ་དུ་འགྲོ་བས་ན། ཇི་ཙམ་འཕེལ་བའི་ཆ་དེ་གསར་ཐོབ་ཡིན་མོད། འོན་ཀྱང་ཐོབ་བྱ་དབང་གི་ངོ་བོ་རིགས་མཐུན་ཕྱིན་ཆད་སྡོམ་པ་རིགས་མི་འདྲ་བ་དང་ངོ་བོ་ཐ་དད་དུ་འཇུག་པའང་མེད་པས་དངོས་གཞི་གསར་ཐོབ་མེད་པའི་ཕྱིར། དབང་བཞིའི་དང་པོ་དེ་ལ་སྨིན་བྱེད་ཀྱི་དབང་ཞེས་སྔགས་སྡོམ་གསར་དུ་ཐོབ་བྱེད་ཀྱི་དབང་ཡིན་ཞིང་། ཕྱི་མ་རྣམས་ལའང་རང་སྐལ་གྱིས་སྨིན་པར་བྱས་པའི་ཆ་རེ་ཡོད་ཀྱང་སྨིན་བྱེད་དང་སྡོམ་པ་གསར་ཐོབ་ཀྱི་ཐ་སྙད་མི་སྦྱོར་ཏེ། སྨིན་ཚུལ་དེ་ཙམ་ཞིག་སངས་རྒྱས་མ་ཐོབ་ཀྱི་བར་དུ་འབྱུང་བའི་ཕྱིར་རོ། །ལུང་གསུམ་པ་ལ་ལུང་དང་རྣལ་ལན་གཉིས་ལས། དང་པོ་ནི། རྒྱུད་འབུམ་པའི་ལུང་ལས། རྡོ་ཡི་རིགས་ཀྱི་བྱེ་བྲག་ཅིག །བཞུ་བས་ལྕགས་དང་ཟངས་དངུལ་འབྱུང་། །གསེར་འགྱུར་རྩི་ཡི་དངོས་པོ་ཡིས། །ཀུན་ཀྱང་གསེར་དུ་བསྒྱུར་བར་བྱེད། །དེ་བཞིན་སེམས་ཀྱི་བྱེ་བྲག་གིས། །རིགས་ཅན་གསུམ་གྱི་སྡོམ་པ་ཡང་། །དཀྱིལ་འཁོར་ཆེན་པོ་འདིར་ཞུགས་ན། །རྡོ་རྗེ་འཛིན་པ་ཞེས་བྱའོ། །ཞེས་སོགས་དང་འགལ་ལོ། །རྣལ་ལན་ ― MLP018_Page_0338 ―
[མ་དཔེ་གཟིགས་ན་འདིར་གནོན།]
ནི། དེ་ལྟར་འོག་མ་རྣམས་དང་རྣམ་པ་འགལ་བ་ལྟར་སྣང་ཡང་ལྟ་བ་རྟོགས་ཤིང་ཏིང་ངེ་འཛིན་གོམས་པ་དང་། ཐབས་མཁས་ཀྱི་སྤྱོད་པས་ཟིན་པའི་གནད་ཀྱིས་མི་འགལ་བར་འོག་མའི་སྡོམ་པ་ཡར་ལྡན་དུ་རྫོགས་པ་ཡིན་ཏེ། རྒྱུ་མཚན་ཉན་ཐོས་ཀྱི་དགེ་སློང་ལ། ཕམ་བཞི་འཆབ་བཅས་བྱུང་ན་སོ་ཐར་གྱི་སྡོམ་པ་ཞིག་པར་གསུངས་པ་ལས། འདིར་མི་ཚངས་སྤྱོད་ལ་བདག་དང་ཡུམ་ལྷ་ཡབ་ཡུམ་དུ་གསལ་བ་ལྷའི་འདུ་ཤེས། མཁའ་གསང་རྡོ་རྗེ་པདྨར་ཤེས་པ་སྔགས་ཀྱི་འདུ་ཤེས་ཀྱིས་གཞིའི་ཡན་ལག་མ་ཚང་། ཐབས་འདིས་བདེ་བ་ཆེན་པོའི་ཡེ་ཤེས་བསྒྲུབ་པར་བྱའོ་སྙ མ་པ་ཆོས་ཀྱི་འདུ་ཤེས་ཀྱིས་བསམ་པའི་ཡན་ལག་མ་ཚང་། བྱེད་པ་སྡོམ་པའི་ཐབས་མཁས་ཀྱི་སྤྱོད་པས་ཟིན་ཅིང་ཆགས་པའི་རོ་ཡེ་ཤེས་སུ་གསལ་བས་མཐར་ཐུག་གི་ཡན་ལག་མ་ཚང་བའི་ཕྱིར་དང་། ཆོས་ཐམས་ཅད་སེམས་ཉིད་ཀྱི་རང་སྣང་དུ་ཤེས་པས་རྨི་ལམ་དུ་སྤྱད་པ་ལྟར་ཉེས་པས་མི་གོས་ཤིང་འཛག་མེད་ཀྱི་ཡེ་ཤེས་འགྲུབ་པ་སོགས་ཀྱི་དོན་དུ་འགྱུར་བས་དགག་དགོས་གནད་གཅིག་པའི་ཕྱིར་མི་འགལ་ཏེ། འདི་ཉིད་ལས། མ་ཆགས་པ་ལ་ཆགས་པ་དང་། །ཆགས་པ་ཉིད་ལ་ཆགས་པ་མེད། །དེ་ནི་ཚངས་མཆོག་རྒྱལ་པོ་སྟེ། །ཤིན་ཏུ་ཆགས་པ་ཆེན་པོ་ཡིན། །ཞེས་དང་། ཡེ་ནས་སྐྱེ་མེད་དེ་བཞིན་ཉིད། །སྒྱུ་མར་སྣང་བ་མིག་ཡོར་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །ཅེས་དང་། ཡེ་ཤེས་རྒྱས་པའི་མདོ་ལས་ཀྱང་། ཇི་ལྟར་སྒྱུ་མའི་མཁན་པོ་དག ། རང་གིས་སྤྲུལ་པའི་སྒྱུ་མ་ལ། །དགེ་དང་མི་དགེའི་འདུ་བྱེད་པ། །ཉེས་པ་གང་གིས་མི་གོས་ལྟར། །ཐབས་ལ་མཁས་པས་རྣམ་པར་སྤྱོད། །ཅེས་སོ། །ཡང་ཁ་ཅིག་སྡོམ་གསུམ་གནས་གྱུར་ངོ་བོ་གཅིག་ཏུ་ཡོད་པ་མི་འཐད་ཟེར་བ་ལ་ལུང་རིགས་གཉིས་ཀྱིས་དགག་སྟེ། ལུང་ནི་འདི་ཉིད་ལས། ཇི་བཞིན་ཉིད་དང་འདུལ་བའི་ཐབས། །ཇི་སྙེད་སྡོམ་པ་བསམ་ཡས་པ། །མ་ལུས་རྣམ་དག་ལྷུན་གྱིས་གྲུབ། །ཅེས་སོགས་ཀྱིས་གནོད་ལ། རིགས་པ་ནི། གསུམ་ལྡན་རྡོ་རྗེ་འཛིན་པའི་རྒྱུད་ཀྱི་གཞན་ལ་ཕན་པ་སྒྲུབ་པའི་སེམས་པ་དེ་ཆོས་ཅན། ཁྱོད་གཞན་ལ་གནོད་པ་སྤོང་བའི་དེ་དང་། སྔགས་ཀྱི་དམ་ཚིག་ལ་བསླབ་པའི་སེམས་པ་གཉིས་ཀ་ཡིན་ ― MLP018_Page_0339 ―
[མ་དཔེ་གཟིགས་ན་འདིར་གནོན།]
ཏེ། ཁྱོད་དེ་གཉིས་དང་ངོ་བོ་བདག་གཅིག་ཏུ་གནས་པའི་ཕྱིར། སྡོམ་པ་གསུམ་གྱི་ལྡོག་པ་འགལ་བ་ཡིན་ཏེ། དཔེར་ན་བསམ་པ་སེམས་བསྐྱེད་ཀྱིས་ཟིན་པས་ཆོ་ག་ཉན་ཐོས་ཀྱི་ལུགས་ལྟར་བླངས་པའི་ཐེག་པ་ཆེན་པོ་ཡིན་པར་ཐལ། ཉན་ཐོས་ཀྱི་དགེ་སློང་གི་སྡོམ་པ་ཉིད་སླར་སེམས་བསྐྱེད་བླངས་པས་དེར་གནས་གྱུར་པའི་རྒྱུད་ཀྱི་སྡོམ་པ་གང་ཡིན་ཡང་རུང་སྟེ། དེ་ཀུན་སློང་བྱང་ཆུབ་སེམས་ཀྱི་ལྡོག་པ་དང་། སྡོམ་པའི་ལྡོག་པ་གཉིས་ཡོད་པ་ལས། སྔ་མ་ཚེ་འཕོས་པའི་དུས་སུ་མི་གཏོང་སྟེ། དེ་བྱང་སེམས་ཀྱི་སྡོམ་པའི་གཏོང་རྒྱུ་མ་ཡིན་པའི་ཕྱིར། ཕྱི་མ་སྡོམ་པ་ཁས་བླངས་པའི་དུས་ཀྱི་ལྡོག་ཆ་ནི་ཚེ་འཕོས་པའི་དབང་གིས་གཏོང་སྟེ་དགེ་སློང་གི་སྡོམ་པ་དེ་ཇི་སྲིད་འཚོའ་མཐའ་ཅན་གྱི་སྡོམ་པ་ཡིན་པའི་ཕྱིར། རབ་དབྱེ་ལས། ཐེག་ཆེན་སོ་སོར་ཐར་ཡིན་ཡང་། །དགེ་སློང་ལ་སོགས་སྡོམ་པ་ཡི། །ལྡོག་པ་ཤི་བའི་ཚེ་ན་གཏོང་། །བྱང་ཆུབ་སེམས་ཀྱི་ལྡོག་པ་དང་། །དེ་ཡི་འབྲས་བུ་ཤི་ཡང་འབྱུང་། །ཞེས་སོ། །སྡོམ་པ་གསུམ་གྱི་སེམས་པ་ལྡོག་པ་ཐ་དད་པ་གསུམ་པོ་དེ་རྣམས་སྐྱེ་འཇིག་གནས་གསུམ་དུས་གཅིག་པ་མ་ཡིན་ཏེ། ཇི་ལྟར་ཁས་བླངས་པ་ལྟར་གནས་འཇིག་བྱེད་པའི་རང་ལྡོག་མ་འདྲེས་པའི་ཕྱིར་དང་། གསུམ་ལྡན་གྱི་རྒྱུད་ཀྱི་སྡོམ་པ་སྔ་མ་རྣམས་ཕྱི་མ་དང་ངོ་བོ་གཅིག ཕྱི་མ་སྔ་མ་དང་། གནས་འགྱུར་ངོ་བོ་གཅིག་པ་མ་ཡིན་ཏེ། སྔ་མ་སྔ་མ་ལས་ཕྱི་མ་ཕྱི་མ་རྒྱ་ཆེ་བའི་ཕྱིར་དང་། ཕྱི་མ་བླངས་ཚེ་སྔར་གྱི་སྡོམ་པའི་རྫས་རྒྱུན་མ་ཡིན་པའི་སྡོམ་རྫས་གསར་པ་དུ་མ་ཞིག་སྐྱེ་བ་ཡོད་དགོས་པའི་ཕྱིར་རོ། །དེ་ལ་ཁ་ཅིག་གསུམ་ལྡན་རྡོ་རྗེ་འཛིན་པའི་རྒྱུད་ཀྱི་དགེ་སློང་གི་སྡོམ་པ་ཆོས་ཅན། དེའི་རྒྱུད་ཀྱི་བྱང་སྡོམ་དང་སྔགས་སྡོམ་དུ་ཐལ། དེ་དང་དེར་གནས་གྱུར་པའི་ཕྱིར་རོ་ཟེར་ན། ལུང་རིགས་གཉིས་ཀྱིས་གནོད་དེ། ལུང་ནི། གསང་བ་སྤྱོད་པའི་རྒྱུད་ལས། དཔེར་ན་རྡོ་ལས་ཟངས་སུ་འགྱུར། །ཟངས་ལས་གསེར་གྱི་རྣམ་པ་སྟེ། །ཟངས་ཀྱི་དུས་ན་རྡོ་མེད་ལ། །གསེར་དུ་གྱུར་པས་ཟངས་མི་སྣང་། །རིག་འཛིན་ནང་གི་དགེ་སློང་ལ། །གཉིས་པོ་གནས་པ་ཉིད་དུ་ནི། །སངས་རྒྱས་ཉིད་ཀྱིས་མ་གསུངས་སོ། །ཞེས་པས་གནོད་ལ། རིགས་པ་ནི། ཀུན་གཞིའི་རྣམ་ཤེས་ཆོས་ཅན། སངས་རྒྱས་ཀྱི་ཡེ་ཤེས་སུ་ཐལ། དེ་ ― MLP018_Page_0340 ―
[མ་དཔེ་གཟིགས་ན་འདིར་གནོན།]
དེར་གནས་གྱུར་པའི་ཕྱིར་རོ། །བཞི་པ་རྣམ་གྲངས་ལ། རྩ་བའི་དམ་ཚིག་ལྔ། ཡན་ལག་ལྔ་ཚན་གཉིས་ཏེ་བཅོ་ལྔ་དང་། དེ་ལས་སྤྲོས་ན་སུམ་བརྒྱ་དྲུག་ཅུར་དབྱེ་བ་དང་། མཐའ་ཡས་པར་སྤྲོ་བ་ལ་སོགས་པ་རྣམས་སོ། །བཞི་པ་ཉམས་ན་བསྐང་བའི་ཐབས་ནི། དགོངས་འདུས་ལས། ཀུན་ཏུ་ཉམས་པ་ཆེན་པོ་དང་། །རྩ་བ་ཉམས་དང་ཡན་ལག་ཉམས། །དེ་བཞིན་བཟླས་ཉམས་ཞར་ཉམས་ལྔ། །ཞེས་པ་ལྟར་ཉམས་ན། དེ་ཉིད་བསྐང་བས་རྫོགས་པར་འགྱུར་བའི་ཕྱིར་འོག་མ་དག་ལས་འཕགས་སོ། །དེའང་ཉན་ཐོས་པ་ནི་ཕམ་པ་འཆབ་བཅས་བྱུང་ན་གསོར་མི་རུང་བས་རྫ་བེའུ་ཆག་པ་དང་འདྲ་ལ། བྱང་སེམས་ནི་གསེར་དངུལ་གྱི་སྣོད་ཆག་པ་མགར་བས་བྱར་རུང་བ་ལྟར་དགེ་བའི་བཤེས་གཉེན་ལ་བརྟེན་ནས་ཉམས་པ་གསོར་རུང་བར་བཞེད་དོ། །འདིར་ནི་གསེར་གྱི་སྣོད་གཞོམ་པ་རང་གི་རྩོལ་བས་སྲོང་ཐུབ་པ་ལྟར་གཞན་ལ་མ་བརྟེན་པར་རང་སྟོབས་ཀྱིས་གསོར་རུང་བ་སྟེ། དགོངས་འདུས་ལས། གང་དེ་བསྐང་བར་བྱ་བ་ཡང་། །ལས་དང་རྫས་དང་འདུན་པ་དང་། །ཏིང་ངེ་འཛིན་དང་དེ་ཉིད་དོ། །ཞེས་གསུངས་པ་བཞིན་ནོ། །ལྔ་པ་ཉམས་པའི་སྐྱོན་ནི། འདི་ཉིད་ལས། རྩ་བའི་དམ་ཚིག་ཉམས་གྱུར་ན། །བསྒྲུབས་པ་ཐམས་ཅད་ལོག་པར་འགྱུར། །ཞེས་སོགས་དང་། ཡན་ལག་དམ་ཚིག་ཉམས་གྱུར་ན། །འབྲས་བུ་མེད་ཅིང་ངན་སོང་ལྟུང་། །ཞེས་སོ། །དྲུག་པ་ཡོན་ཏན་ནི། འདི་ཉིད་ལས། རྒྱལ་བའི་རིག་པ་འཛིན་པ་སྟེ། །འཇིག་རྟེན་གཙོ་དང་འཁོར་གྱིས་བཀུར། །དམ་པ་མཆོག་དང་དམ་པ་ཡིས། །སྲས་དང་སྤུན་དགོངས་བྱིན་གྱིས་བརླབས། །བདེ་གཤེགས་ཉིད་ཀྱི་ཡུལ་ལ་ཞུགས། །འཇིགས་མེད་ཀུན་ཏུ་བཟང་པོར་སྦྱོར། །ཞེས་གསུངས་པའི་ཕྱིར་རོ། །དྲུག་པ་རོལ་པ་ཕྲིན་ལས་ལ་དྲུག་ལས། དང་པོ་དགོས་ཆེད་ནི། ཕན་གདགས་པ་དང་། ཚར་བཅད་པའི་སྒོ་ནས་བདག་གཞན་གྱི་དོན་སྒྲུབ་པའི་བྱ་བ་སྟེ། ཁོག་གཞུང་ལས། བདག་གཞན་དོན་སྒྲུབ་ཕྲིན་ལས་ཏེ། དེའང་ཞི་བས་ཕྱི་རུ་ནད་གདོན་དང་། ནང་དུ་མཚན་རྟོག་ཞི་བར་བྱེད། རྒྱས་པས་ཕྱི་རུ་འཁོར་དང་ལོངས་སྤྱོད། ནང་དུ་ཚེ་བསོད་ཉམས་རྟོགས་འཕེལ་ ― MLP018_Page_0341 ―
[མ་དཔེ་གཟིགས་ན་འདིར་གནོན།]
ཞིང་རྒྱས་པར་བྱེད། དབང་གིས་ཕྱི་རུ་གང་དབང་དུ་སྡུད་པར་འདོད་པ་དང་། ནང་དུ་རང་སེམས་ལ་དབང་ཐོབ་པར་བྱེད། མངོན་སྤྱོད་ཀྱིས་ཕྱི་རུ་དགྲ་བགེགས་དང་ནང་ཉོན་མོངས་པ་ཕྲ་རགས་འཇོམས་པའི་ཕྱིར་ཏེ། ཐུགས་ཐིག་ལས། ཟུག་རྔུ་ཕྱི་ནང་ཞི་ཕྱིར་དང་། །སྤེལ་བྱ་གཉིས་པོ་འཕེལ་ཕྱིར་དང་། །དགུག་དབང་བཞི་པོ་བསྡུ་ཕྱིར་དང་། །གདུག་པ་རྣམ་གཉིས་འཇོམས་ཕྱིར་དང་། །ཞེས་སོ། །གཉིས་པ་ངོ་བོའ་མཚན་ཉིད་ནི། ཚད་མེད་པ་བཞིའི་རྒྱུ་ལས་བྱུང་ཞིང་ཐབས་ཤེས་ཁྱད་པར་ཅན་གྱིས་ཟིན་པའི་སྒོ་ནས་གཙོ་བོར་གཞན་དོན་སྒྲུབ་པའི་ཐབས་མཁས་ཀྱི་མཛད་སྤྱོད་དོ། །དེའང་ཐུགས་ཐིག་ལས། ཕྱི་རོལ་ཚད་མེད་ཉིད་ལས་བཞི། །ཅེས་སོ། །བཞི་པ་རྣམ་གྲངས་ལ། གཞི་ལམ་འབྲས་བུའི་ཕྲིན་ལས་གསུམ་ལས། འདིར་ལམ་གྱི་ཕྲིན་ལས་ལ། དོན་བྱ་བའི་ཡུལ། བྱེད་པའི་ཕྲིན་ལས། བྱ་ཐབས་ཀྱི་རྣམ་གྲངས་སོ། །དང་པོ་ནི། ཁམས་གསུམ་གྱི་སེམས་ཅན་ཐམས་ཅད་ཡིན་ལ། དེ་ཡང་དམིགས་བསལ་གུད་དུ་ཕྱེ་ན། གནོད་སྡིག་ཅན་དང་། དབུལ་འཕོངས་ཅན་དང་། ལོག་ལྟ་ཅན་དང་། གདུག་པ་ཅན་རྣམས་སོ། །གཉིས་པ་ནི། ཞི་རྒྱས་དབང་དྲག་ལྷུན་གྱིས་གྲུབ་པ་དང་ལྔའོ། །གསུམ་པ་ནི། ཁོག་གཞུང་ལས། མཆོད་རྟེན་ཕྱག་རྒྱའི་སྒོ་དང་ནི། །ཧོམ་བྲོ་གླུ་དང་རྫས་ཀྱི་བྱ། །ཞེས་པའོ། །ལྔ་པ་སྐྱོན་ནི། དོན་གཉིས་མི་འགྲུབ་པ་ལ་སོགས་པ་སྟེ། རྡོ་རྗེ་ལས། དོན་གཉིས་མི་འགྲུབ་དེ་ཡི་སྐྱོན། །ཞེས་སོ། །དྲུག་པ་ཡོན་ཏན་ནི། དེ་ལས་བཟློག་པས་རང་གཞན་གྱི་དོན་འགྲུབ་པ་སྟེ། རྡོ་རྗེ་ལས། དེ་ལས་བཟློག་པའི་ཚུལ་ལྡན་པ། །ཡོན་ཏན་ཉིད་དུ་ཤེས་པར་བྱ། །ཞེས་གསུངས་སོ། །བདུན་པ་དོན་དུ་གཉེར་བ་སྒྲུབ་པ་ལ་དྲུག་ལས། དང་པོ་དགོས་བྱེད་ནི། གང་དོན་དུ་གཉེར་བའི་བསྒྲུབ་བྱ་གཉིས་མངོན་དུ་འགྱུར་བའི་ཆེད་དེ། ཐུགས་ཐིག་ལས། ཐུན་མོང་མཆོག་གི་དངོས་གྲུབ་རྣམས། །བདག་གཞན་དོན་ཐོབ་བཞི་ཡི་ཕྱིར། །ཞེས་སོ། །གཉིས་པ་ངོ་བོའམ་མཚན་ཉིད་ནི། མཆོག་ཐུན་གྱི་དངོས་གྲུབ་རྣམ་གཉིས་གང་རུང་སྒྲུབ་པའི་ཐབས་ཁྱད་པར་ཅན་ནོ། །གསུམ་པ་སྒྲ་དོན་ནི། སིདྡྷིའི་སྒྲ་ལས་དངོས་གྲུབ་སྟེ་བསྒྲུབ་བྱའོ། །ས་ ― MLP018_Page_0342 ―
[མ་དཔེ་གཟིགས་ན་འདིར་གནོན།]
དྷ་ནཱའི་སྒྲ་ལས་ཀུན་ཏུ་ལེན་པ་སྟེ། འདོད་པའི་དོན་ལེན་ཅིང་ཐོབ་པར་བྱེད་པའམ་སྒྲུབ་པར་བྱེད་པས་ན་སྒྲུབ་པ་སྟེ། ཧེ་རུ་ཀ་འདུས་པ་ལས། རིག་འཛིན་ལམ་དང་འབྲས་བུ་དང་། །ཚེ་དང་པྲ་དང་རོ་ལངས་དང་། །རྐང་མགྱོགས་མཁའ་འགྲོ་ལ་སོགས་པ། །སྒྲུབ་པས་སྒྲུབ་པ་ཉིད་དུ་བཤད། །ཅེས་སོ། །བཞི་པ་རྣམ་གྲངས་ལ། མཆོག་ཐུན་གྱི་སྒྲུབ་པ་གཉིས་ལས། དང་པོ་ནི། འདི་ཉིད་ལས། སྒྲུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པས། །ཕྱོགས་བཅུ་དུས་བཞི་རྫོགས་པ་ཡི། །དཀྱིལ་འཁོར་ཐམས་ཅད་འགྲུབ་པར་འགྱུར། །ཞེས་སོ། །བཤད་རྒྱུད་ལས་གསུངས་པ་ལྟར་ན། ཁོག་གཞུང་ལས། ཡི་གེ་སྒྱུ་འཕྲུལ་ཚོགས་སྒྲུབ་དང་། །རྡོ་རྗེ་སེམས་དང་སྨན་སྒྲུབ་དང་། །རིགས་ལྔ་སྒྲུབ་པ་རྣམ་གཉིས་སོ། །ཞེས་སོ། །གཉིས་པ་ལ། ཡོན་ཏན་འབྱུང་བའི་དངོས་གྲུབ་དྲུག འབྱུང་ལྔའི་ལྔ། ལས་ཕྲན་ཚེགས་ཀྱི་དངོས་གྲུབ་བརྒྱད་སྒྲུབ་པའོ། །བཤད་རྒྱུད་ལས་གསུངས་པ་ནི། ཁོག་གཞུང་ལས། རོ་ལངས་ཚེ་དང་པྲ་སྒྲུབ་དང་། །ལྷ་ཆེན་པོ་དང་རྒྱལ་པོ་བཞི། །གདུག་པ་ཀླུ་འདུལ་རྒྱལ་བློན་གྱི། །ཆུང་མ་དབང་དུ་བྱ་བ་གཉིས། །ཡུལ་ཁམས་ཅེ་སྤྱང་རྐང་མགྱོགས་བསྐྲད། །མི་སྣང་གཟུགས་སྒྲུབ་ལྷ་ཀླུ་མོ། །རྒྱལ་བློན་དམག་དཔོན་ཞང་བློན་སྒྲུབ། །ཚེ་འདི་ཆེད་ཕྱིར་འཇིག་རྟེན་པའོ། །ཞེས་སོ། །ལྔ་པ་སྐྱོན་ནི། སྒྲུབ་པའི་ཐབས་ཡལ་བར་དོར་ན་བསྒྲུབ་བྱའི་དོན་མི་འགྲུབ་པ་སྟེ། ཐུགས་ཐིག་ལས། ཡལ་བས་མི་འགྱངས་མི་ཐོབ་བཅུ། །ཅེས་སོ། །དྲུག་པ་ཡོན་ཏན་ནི། འདི་ཉིད་ལས། སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་དང་། དབང་སྒྱུར་རིགས་ཀྱི་དམ་པ་འགྲུབ། །ཅེས་གསུངས་སོ། །བརྒྱད་པ་མི་གཡོ་བ་ཏིང་ངེ་འཛིན་ལ་དྲུག་ལས། དང་པོ་དགོས་ཆེད་ནི། རྟོགས་པའི་དོན་ལ་མི་ཡེངས་པར་དབང་བསྒྱུར་བས་སེམས་ལས་སུ་རུང་བར་བྱེད་པ་སྟེ། འདི་ཉིད་ལས། དངོས་རྣམས་ཉིད་ན་དངོས་མེད་པ། །རྟོགས་པའི་དབང་བསྒྱུར་ཏིང་འཛིན་ཡིན། །ཞེས་སོ། །གཉིས་པ་ངོ་བོའམ་མཚན་ཉིད་ནི། བསྒོམ་བྱའི་དོན་ལ་མི་གཡོ་བར་གནས་པའི་སེམས་རྩེ་ ― MLP018_Page_0343 ―
[མ་དཔེ་གཟིགས་ན་འདིར་གནོན།]
གཅིག་པའི་ཏིང་ངེ་འཛིན་ཏེ། ཧེ་རུ་ཀ་འདུས་པ་ལས། གང་དང་གང་དུ་གསལ་བའི་ཡིད། །མ་ཡེངས་པ་ཉིད་ཏིང་ངེ་འཛིན་ཏེ། །ཞེས་སོ། །བཞི་པ་རྣམ་གྲངས་ལ། བསྒོམ་བྱ་ངོས་བཟུང་བ་དང་། ཇི་ལྟར་བསྒོམ་པའི་ཐབས་སོ། །དང་པོ་ལ་རིམ་པ་གཉིས་ལས། དེ་གཉིས་ཀྱི་གོ་དོན་ནི། སྣོད་བཅུད་ཐ་མལ་དུ་འཛིན་པ་སྤང་ཞིང་ལམ་མ་དག་པ་བདུན་དང་འབྲས་བུ་གཟུགས་སྐུའི་རྟེན་འབྲེལ་སྒྲིག་པ། ཁྱད་པར་རང་གི་དངོས་འབྲས་ཐུན་མོང་གི་དངོས་གྲུབ་འགྲུབ་པར་བྱེད་པ་ནི་བསྐྱེད་རིམ་དང་། འཕོ་བའི་བག་ཆགས་ཀྱི་དྲི་མ་སྦྱོང་ཞིང་ལམ་དག་པ་ས་གསུམ་དང་། འབྲས་བུ་ལྷན་ཅིག་སྐྱེས་སྐུའི་རྟེན་འབྲེལ་སྒྲིག་པ། ཁྱད་པར་རང་གི་དངོས་འབྲས་མཆོག་གི་དངོས་གྲུབ་འགྲུབ་པར་བྱེད་པ་ནི་རྫོགས་རིམ་གྱི་དགོས་པ་སྟེ། སྙིང་པོའི་རྒྱུད་ཕྱི་མ་ཁ་ཆེ་འགྱུར་ལས། འཇིག་རྟེན་པ་ཡི་དངོས་གྲུབ་ནི། །བསྐྱེད་པའི་རིམ་པའི་སྦྱོར་བས་ཐོབ། །འཇིག་རྟེན་འདས་པའི་དངོས་གྲུབ་ནི། །རྫོགས་པའི་རིམ་པའི་སྦྱོར་བས་སོ། །ཞེས་སོ། །སྦྱང་བྱ་འཁྲུལ་པ་གློ་བུར་བ་ཀུན་བརྟགས་དང་། ས་བོན་གྱི་ཆ་གཉིས་ལ་ལྟོས་ནས་ཀྱང་སྦྱོང་བྱེད་བསྐྱེད་རྫོགས་གཉིས་གསུངས་ཏེ། བསྐྱེད་རིམ་ནི། ཨུཏྤརྟི་ཀྲ་མའི་སྒྲ་ལས་དྲངས་ན། ཨུཏྤརྟི་ཞེས་པ་བཅོས་པའམ་བརྟགས་པ་ལ་འཇུག་ལ། གང་ལས་བཅོས་ཤིང་གདགས་པའི་གཞི་ནི་རྫོགས་རིམ་སྟེ། དེའི་སྐད་དོད་ནི། ནིཥྤནྣ་ཀྲ་མ་ཞེས་པའི་ནིཥྤནྣ་ནི་མ་བཅོས་པའི་གྲུབ་པ་དང་རྫོགས་པ་ལ་འཇུག་ཅིང་། གཉིས་ཀའི་ཀྲ་མ་ནི་རིམ་པ་སྟེ་ཐབས་སམ་ལམ་གྱི་གོ་རིམ་དུ་འགྱུར་བས། བཅོས་ཤིང་བརྟགས་པ་རྗེས་དཔག་གི་ལྷའི་རྣལ་འབྱོར་འཁོར་བཅས་ལ་བསྐྱེད་རིམ་དང་། བཅོས་མ་དང་བྲལ་བ་མངོན་སུམ་པའི་ལྷའི་རྣལ་འབྱོར་གྱི་ལམ་འཁོར་བཅས་ལ་རྫོགས་རིམ་ཞེས་བྱ་སྟེ། ཕྱི་མ་ཁ་ཆེ་འགྱུར་ལས། ལྷ་ཡི་རྣམ་པའི་སྦྱོར་བ་ཡི། །ཟླ་བ་རྡོ་རྗེ་ལ་སོགས་རིམ། །བསྐྱེད་པའི་རིམ་པ་ཞེས་སུ་བཤད། །རང་བཞིན་གྲུབ་པའི་རྣལ་འབྱོར་ནི། །རྫོགས་པའི་རིམ་པ་ཞེས་བྱར་བརྗོད། །ཅེས་སོ། །དེ་ལ་སྐྱེ་འཕགས་གཉིས་ཀྱི་ལམ་གྱི་གནས་སྐབས་ལས། སོ་སྐྱེའི་དུས་སུ་བསྐྱེད་རིམ་གྱི་མཚན་ཉིད་ནི། ཞུ་བདེ་དང་མཚུངས་ལྡན་དུ་གྱུར་པ་བཅོས་ཤིང་བརྟགས་པ་ལས་བྱུང་བའི་ ― MLP018_Page_0344 ―
[མ་དཔེ་གཟིགས་ན་འདིར་གནོན།]
ཁྱད་པར་བཞི་ལྡན་གྱི་ལྷ་སྐུ་སྣང་སྟོང་ངོ་། །ཁྱད་པར་བཞི་ནི། ཆོ་གའི་ཁྱད་པར་རྒྱུད་ནས་གསུངས་པའི་བསྐྱེད་ཆོག་ཚང་བ། རང་འབྲས་ཀྱི་ཁྱད་པར་སྔགས་ཀྱི་ནུས་པ། ངོ་བོའ་ཁྱད་པར་ཞུ་བདེ་དང་སྟོང་ཉིད་ཀྱི་རང་བཞིན། བྱེད་ལས་ཀྱི་ཁྱད་པར་དག་རྫོགས་སྨིན་གསུམ་ཚང་བའོ། །རྫོགས་རིམ་གྱི་མཚན་ཉིད། ཞུ་བདེ་དང་མཚུངས་ལྡན་དུ་གྱུར་པ་ཁྱད་པར་གསུམ་ལྡན་བཅོས་མིན་གྱི་ལྷ་སྐུ་སྣང་སྟོང་མི་བརྟན་པར་གྱུར་པ་རྒྱུའི་རྫོགས་རིམ་གྱི་དང་། དེ་བརྟན་པར་གྱུར་པ་འབྲས་བུའི་རྫོགས་རིམ་གྱི་མཚན་ཉིད་དེ། རྫོགས་རིམ་རྒྱུད་ལ་སྐྱེས་ཟིན་ནས་བསྐྱེད་རིམ་ལ་བསླབ་མི་དགོས་པའི་ཕྱིར་རོ། །འཕགས་ལམ་གྱི་དུས་ཀྱི་བསྐྱེད་རིམ་མི་འབྱུང་ལ། རྫོགས་རིམ་ལ་སློབ་པ་དང་མི་སློབ་པའི་ཡེ་ཤེས་གཉིས་ལས། དང་པོའི་མཚན་ཉིད། འཕགས་རྒྱུད་ཀྱི་ཡེ་ཤེས་གང་ཞིག ཞུ་བདེ་དང་མཚུངས་ལྡན་དུ་གྱུར་པའི་ལྷ་སྐུ་ཁ་སྦྱོར། གཉིས་པ་ནི། དག་པ་གཉིས་ལྡན་གྱི་ཡེ་ཤེས་མཐར་ཐུག་གང་ཞིག ཁ་སྦྱོར་ལ་སོགས་པའི་ཡན་ལག་བདུན་ལྡན་ཏེ། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་ཆད་དང་འགོག་པ་མེད། །ཅེས་པའི་དོན་དེ་བ་ཙནྡྲས། ལོངས་སྤྱོད་རྫོགས་པ་ནི་རྣམ་པ་ཐམས་ཅད་པའོ། །ཁ་སྦྱོར་ནི་སྟོང་ཉིད་སྙིང་རྗེ་ཟུང་འཇུག་གོ །བདེ་ཆེན་ནི་གཟུང་འཛིན་གྱི་རྟོག་པ་མེད་པའོ། །རང་བཞིན་མེད་པ་ནི་སྐྱེ་བ་མེད་པའོ། །སྙིང་རྗེ་ཡོངས་གང་ནི་མི་འགྱུར་བའི་བདེ་བའོ། །རྒྱུན་མི་ཆད་པ་ནི་རྒྱུན་གྱིས་རྟག་པའོ། །འགོག་པ་མེད་པ་ནི་ཆད་པ་མེད་པའོ། །ཞེས་བཤད་དོ། །དེ་ཡང་འབྲས་བུའི་རྫོགས་རིམ་ཡིན་ན། གཞི་ལམ་འབྲས་གསུམ་གྱི་བཟླས་ཕྱེ་བའམ་འབྲས་བུ་ཡིན་པས་མ་ཁྱབ་སྟེ། འཕགས་པ་སློབ་པ་རྣམས་དང་། ཡེ་ཤེས་ཀྱི་སྐུ་འགྲུབ་པའི་སོ་སྐྱེས་ལམ་གྱི་རྫོགས་རིམ་དེ་འབྲས་བུའི་རྫོགས་རིམ་ཡིན་པའི་ཕྱིར་རོ། །གཉིས་པ་ནི། དེ་ལ་བསྐྱེད་རིམ་ནི། སྦྱང་བྱ་འཁོར་བའི་ཆོས་སྣ་ཚོགས་པར་སྣང་བ་འདི་དག་སྲིད་པར་སྐྱེ་བ་བླངས་པ་ལ་བརྟེན་ནས་འཆར་བས་འཁོར་བའི་ཆོས་ཀྱི་གཙོ་བོ་སྐྱེ་གནས་བཞིའི་བག་ཆགས་སྦྱོང་བ་དང་བསྟུན་ནས། བསྐྱེད་རིམ་སྒོམ་ཚུལ་བཞི་སྟེ། སྒྱུ་འཕྲུལ་དྲྭ་བ་ལ། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་ ― MLP018_Page_0345 ―
[མ་དཔེ་གཟིགས་ན་འདིར་གནོན།]
རྣམ་པ་བཞི། །སྤྲོས་ཅན་སྤྲོས་དང་སྤྲོས་པ་མེད། །ཤིན་ཏུ་སྤྲོས་པ་མེད་བཞིའོ། །ཞེས་སོ། །རྫོགས་རིམ་ནི་ཐབས་ལམ་སྟེང་འོག་གི་སྒོ་ལ་བརྟེན་པ་ལ་སོགས་པ་རྣམས་སོ། །ལྔ་པ་སྐྱོན་ནི། ཏིང་འཛིན་མེད་ན་ལྟ་བའི་གོ་ཡུལ་བཟང་ཡང་འགྲུབ་པར་མི་འགྱུར་ཏེ། ལམ་རིམ་ལས། གལ་ཏེ་ཏིང་འཛིན་འདི་མེད་ན། །རྒྱ་མཚོའི་འཇིངས་ཀྱི་ཕ་བོང་ལྟར། །བསྐལ་པར་ལམ་ལ་འབད་བྱས་ཀྱང་། །དོན་མེད་སྙིང་པོ་བསྐམ་པ་ཡིན། །ཞེས་སོ། །དྲུག་པ་ཡོན་ཏན་ནི། བསྒྲུབ་བྱ་གང་ཡང་ཏིང་ངེ་འཛིན་གྱིས་འགྲུབ་པའི་ཕྱིར་ཏེ། རིན་ཆེན་དྲྭ་བ་ལས། བསྒྲུབ་པའི་གཙོར་ནི་ཏིང་འཛིན་པས། །ཏིང་འཛིན་འདི་ཡིས་ཕྱེད་པར་འགྱུར། །ཞེས་གསུངས་པའི་ཕྱིར་རོ། །དགུ་པ་གནས་སུ་སྟོབ་པ་མཆོད་པ་ལ་དྲུག་ལས། དང་པོ་དགོས་ཆེད་ནི། གཞན་སེལ་སྒྲིབ་པ་འབྱང་ཞིང་ཉམས་ཆག་སྐོང་། དོན་གཉེར་ལྷ་མཉེས་པས་ཚོགས་རྫོགས་ཤིང་ལས་དང་དངོས་གྲུབ་སོགས་བདག་གཞན་གྱི་དོན་འགྲུབ་པའི་ཕྱིར་ཏེ། ཐུགས་ཐིག་ལས། བདག་གཞན་དོན་རྫོགས་མཉེས་སྐོང་བ། །ཞེས་དང་། ཁོག་གཞུང་ལས། ཚོགས་གཉིས་རྫོགས་ཕྱིར་མཆོད་པ་སྟེ། །ཞེས་སོ། །གཉིས་པ་ངོ་བོའ་མཚན་ཉིད་ནི། བཀུར་བྱའི་ཡུལ་དུ་གྱུར་པ་རྣམས་སྒོ་གསུམ་གྱིས་བཀུར་ཞིང་། ཡོ་བྱད་སྟོབ་པའི་སྒོ་ནས་ཀྱང་མཉེས་པར་བྱེད་པའི་རིགས་གནས་ཏེ། ཐུགས་ཐིག་ལས། བྱ་བྱེད་བྱ་བ་བྱེད་འདུས་པས། །དགྱེས་ཚིམ་འགྱུར་བའི་དངོས་པོ་ཉིད། །ཅེས་སོ། །གསུམ་པ་སྒྲ་དོན་ནི། པཱུ་ཛའི་སྒྲ་ལས་མཆོད་པ་སྟེ། དགེ་ལས་ཐམས་ཅད་ཀྱི་སྔོན་དུ་འགྲོ་བའི་ཕྱིར་སྐྱེད་པར་བྱེད་པའི་དོན་དང་། ཡང་དང་ཡང་དུ་དགྱེས་པ་བསྐྱེད་པ་དང་། བཀུར་བའི་དོན་གྱི་གནས་སུ་སྟོབ་པའི་ཕྱིར་མཆོད་པའོ། །དེའང་ཁོག་གཞུང་ལས། གནས་སུ་སྟོབ་ཕྱིར་མཆོད་པ་སྟེ། །ཞེས་སོ། །བཞི་པ་རྣམ་གྲངས་ལ་དམིགས་ཡུལ་ཞིང་གི་དང་། ཡོངས་སུ་བསྔོ་བའི་དང་། འབྲས་བུ་ལ་དམིགས་པའི་དང་། དངོས་པོའི་བྱེ་བྲག་གོ །དང་པོ་གསུམ་ནི་རིམ་པར་འཕགས་པ་མཆོད་པ་དང་། ཐར་པའི་རྒྱུར་འགྱུར་བའི་མཆོད་པ་རྣམས་ནི་འཇིག་རྟེན་ལས་འདས་པ་ཏེ། དེ་ལས་གཞན་པ་རྣམས་ནི་འཇིག་རྟེན་པའོ། །བཞི་པ་དངོས་པོའི་བྱེ་བྲག་ནི་བསམ་གྱིས་མི་ཁྱབ་ཀྱང་། མདོར་བསྡུས་ ― MLP018_Page_0346 ―
[མ་དཔེ་གཟིགས་ན་འདིར་གནོན།]
ཞི་ཁྲོའི་མཆོད་པ་བཅུ་བཞི་བསྡོམས་སུ་སྟོན་ན། གུས་པས་ཕྱག་དང་ཕྱག་རྒྱ་གར། །ཀུན་བཟང་ཞབས་བསིལ་བཞི་བསྣོལ་ཏེ། །བདུད་རྩི་གཏོར་མ་གསང་བསྣན་དང་། །ལྷག་པ་ཏིང་འཛིན་སྒྲོལ་དང་སྦྱོར། །འདོད་ཡོན་རོལ་མོ་གླུ་ཡེ་ཤེས། །ཞེས་གསུངས་ཤིང་། དེ་རྣམས་ཇི་ལྟར་འབུལ་ཚུལ་ཡང་། ཧེ་རུ་ཀ་འདུས་པ་ལས། རྡོ་རྗེ་ལྷ་མོ་རབ་མཛེས་མ། །སོ་སོའི་ཡོ་བྱད་རབ་ཐོགས་ནས། །ནམ་མཁའ་ཁྱབ་པར་རབ་སྤྲུལ་ཞིང་། །ཡོ་བྱད་རང་ལུས་ཐིམ་པ་མཆོད། །ཅེས་སོ། །ལྔ་པ་སྐྱོན་ནི། འཆད་འགྱུར་གྱི་ཡོན་ཏན་ལས་ལྡོག་པ་སྟེ། ཐུགས་ཐིག་ལས། དེ་ལས་བཟློག་དང་མི་སྐོང་གཡེལ། །ཉམས་ཆག་མཐུ་བྱིན་བྲལ་བར་འགྱུར། །ཞེས་སོ། །དྲུག་པ་ཡོན་ཏན་ནི། དགོས་ཆེད་དུ་བསྟན་པའི་རྗེས་སུ་འགྲོ་བ་སྟེ། ཁོག་གཞུང་ལས། ཐུན་མོང་ཁྱད་པར་ཡོན་ཏན་ལྡན། །ཞེས་གསུངས་པའི་ཕྱིར་རོ། །བཅུ་པ་འཆིང་ཟློས་སྔགས་དང་ཕྱག་རྒྱ་ལ་དྲུག་ལས། དང་པོ་དགོས་ཆེད་ནི་སྒྲིབ་གཉིས་སྦྱོང་ཞིང་། ཏིང་ངེ་འཛིན་གྱི་སྟོབས་སུ་གྱུར་པ་ལས་དང་དངོས་གྲུབ་ཐོབ་པར་བྱེད་པའི་ནུས་པ་བསྐྱེད་པ་སྟེ། ཐུགས་ཐིག་ལས། སྦྱང་ཞིང་ཉེ་བར་བསྐྱེད་པ་དང་། ཐོབ་བྱ་ལྔ་པོ་རྫོགས་བྱའི་ཕྱིར། །ཞེས་སོ། །གཉིས་པ་ངོ་བོ་ལ་གཉིས་ལས། དང་པོ་སྔགས་ཀྱི་ངོ་བོའམ་མཚན་ཉིད་ནི། ཐབས་ཤེས་ཀྱི་ཡི་གེ་འདུས་ཤིང་གྲུབ་པ་བཞིས་བྱིན་གྱིས་རློབ་པས་མཐུ་ཅན་དུ་གྱུར་པའི་རིགས་གནས་ཏེ། ཐུགས་ཐིག་ལས། ཡི་གེ་འདུས་པ་གྲུབ་པ་བཞི། །མཐུ་ཅན་རེད་པ་གང་ཡིན་པ། །ཞེས་སོ། །གཉིས་པ་ཕྱག་རྒྱའི་མཚན་ཉིད་ནི། རིག་པ་ཕྱག་རྒྱ་བཞི་རྫོགས་ཀྱི་ལྷའི་སྐུར་གསལ་བ་ལས་མི་འདའ་བའི་རིགས་གནས། དེའང་ཐུགས་ཐིག་ལས། བཞི་རྫོགས་ཉིད་ལས་མི་འདའ་བ། གང་ལ་སྣང་བ་དེ་ངོ་བོ། །ཞེས་སོ། །གསུམ་པ་སྒྲ་དོན་ལ། སྔགས་ནི་མནྟྲའི་སྒྲ་ལས། མན་ནི་ཡིད་དམ་ཤེས་པ། ཏྲ་ཡ་ནི་སྐྱོབ་པའི་དཔུང་གཉེན་ལ་འཇུག་པས། ཡིད་ཤེས་བདེ་མྱུར་དུ་སྐྱོབ་ཅིང་བྱིན་རླབས་འབྱུང་བའི་ཕྱིར་སྔགས་ཏེ། ཡེ་ཤེས་སྙིང་པ་ོལས། མན་ནི་ཡིད་ཅེས་བྱ་བ་སྟེ། །ཏྲ་ནི་སྐྱོབ་པ་ཉིད་དུ་བཤད། །ཅེས་སོ། །ཕྱག་རྒྱ་ནི། མུ་ཏྲའི་སྒྲ་ལས་མཚན་མའི་དོན་ཏེ། འདོགས་ཤིང་མཚོན་པར་བྱེད་པའམ། རྒྱས་ ― MLP018_Page_0347 ―
[མ་དཔེ་གཟིགས་ན་འདིར་གནོན།]
བཏབ་པ་ལས་འདའ་བར་དཀའ་བའི་ཕྱིར་ཕྱག་རྒྱ་ཞེས་བྱའོ། །དེའང་འདི་ཉིད་ལས། སྙིང་པོའི་ཕྱག་རྒྱ་འདའ་དཀའོ། །ཞེས་དང་། རྒྱས་པ་ལས། འདའ་དཀའ་ཇི་བཞིན་མི་ཤིགས་པའི། །རྒྱལ་པོའི་ཕྱག་རྒྱ་མཆོག་གི་གནས། །བདག་ཉིད་ཆེན་པོའི་མཚན་མའི་གཟུགས། །ཕྱག་རྒྱ་ཞེས་ནི་བསྒྲགས་པ་ཡིན། །ཞེས་སོ། །བཞི་པ་རྣམ་གྲངས་ལ། སྔགས་དང་། ཕྱག་རྒྱ་གཉིས་ལས། དང་པོ་ལ། སྤྱི་དང་བྱེ་བྲག་གོ །དང་པོ་སྤྱིར་སྔགས་ལ་གསང་སྔགས། རིག་སྔགས། གཟུངས་སྔགས་དང་གསུམ། དེ་ཡང་ཐབས་ཤེས་ཀྱི་བདག་ཉིད། དེའི་སྒོ་ཡིག་འབྲུར་སྣང་བས་གསང་སྔགས་ཏེ་ངག་ཏུ་རྗོད་པར་བྱེད་པ་དང་བཅས་ཤིང་ཤེས་སྐྱོབ་ཀྱིས་ལོག་རྟོག་གི་གཉེན་པོར་གྱུར་པ་ནི་གསང་སྔགས། ཤེས་རབ་ཡེ་ཤེས་ཀྱི་བདག་ཉིད་དངོས་པོའི་དོན་རིག་པར་བྱེད་པའི་ལས་ཀྱིས་མ་རྟོགས་པའི་སྙིང་པོར་གྱུར་པ་ནི་རིག་སྔགས། དྲན་པ་དང་ཤེས་རབ་ཀྱི་བདག་ཉིད་ཆོས་ཀྱི་ཚིག་དོན་མི་བརྗེད་པར་འཛིན་པའི་ལས་ཀྱིས་དྲན་ཉམས་ཀྱི་གཉེན་པོར་གྱུར་པ་ནི་གཟུངས་སྔགས་ཏེ། འདི་གསུམ་གྱི་རྟགས་ཀྱང་། དང་པོ་ལྷ་ཕོའ་དབྱིབས་དང་། ཕྱི་མ་གཉིས་ལྷ་མོའ་གཟུགས་སུ་བཞུགས་ཞེས་འབྱུང་ངོ་། །གཉིས་པ་བྱེ་བྲག་ཏུ་གསང་སྔགས་ཀྱི་སྒོར་གྱུར་པའི་སྔགས་ལ། གསལ་བཀྲ་ལས། རྩ་བ་བསྐྱེད་དང་ལས་སྔགས་དང་། །ཞེས་སོ། །གཉིས་པ་ཕྱག་རྒྱ་ལའང་། རང་བཞིན་གྱི། ལྟ་བའི། ལྷག་པ་ཏིང་ངེ་འཛིན་གྱི་ཕྱག་རྒྱ་དང་གསུམ་ལས། དང་པོ་ནི། རྟོག་ཚོགས་ཐམས་ཅད་སྒྱུ་དྲྭའི་དཀྱིལ་འཁོར་དུ་ཡེ་ནས་རྫོགས་པ་སྟེ། འདི་ཉིད་ལས། སྒྱུ་འཕྲུལ་དྲྭ་བས་མངོན་རྫོགས་པའི། །ཐམས་ཅད་བྱང་ཆུབ་མཆོག་གི་རྒྱ། །ཞེས་སོ། །གཉིས་པ་ནི། ལྟ་བ་ཕྱག་རྒྱ་ཆེན་པོས་ཐ་མལ་གྱི་རྟོག་པ་ལ་རྒྱས་འདེབས་པར་བྱེད་པ་སྟེ། འདི་ཉིད་ལས། ཕྱག་རྒྱ་ཆེན་པོའི་ཚོགས་མཆོག་ནི། །ཐབས་དང་ཤེས་རབ་ལྡན་འབྱོར་ན། །མ་བསྐྱོད་མ་བསྒུལ་ཐམས་ཅད་ཀྱང་། །ཕྱག་རྒྱ་ཆེན་པོའི་ངང་དུ་གནས། །ཞེས་སོ། །གསུམ་པ་ནི། ཞི་ཁྲོའི་ལྷ་ཚོགས་གང་བསྒོམ་ཡང་། ཕྱག་རྒྱ་བཞི་ལྡན་ནམ། བདུན་ལྡན་དུ་བསྒོམ་པ་སྟེ། གསལ་བཀྲ་ལས། དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་ཆེན་པོ་བཞི། །ཞེས་སོ། །ལྔ་པ་སྐྱོན་ནི། སྔགས་ ― MLP018_Page_0348 ―
[མ་དཔེ་གཟིགས་ན་འདིར་གནོན།]
དང་ཕྱག་རྒྱ་སྤངས་ན་གསུང་གི་དམ་ཚིག་ཉམས་པས་ཕུང་ཞིང་འབྲས་བུ་མེད་པར་འགྱུར་ཏེ། ཐུགས་ཐིག་ལས། རལ་གྲིའི་སོ་ལ་བཟུང་ཉེས་ལྟར། །ནན་ཏན་མེད་པའི་གསང་སྔགས་པ། །ཕུང་ཞིང་འབྲས་བུ་མེད་པར་འགྱུར། །ཞེས་སོ། །དྲུག་པ་ཡོན་ཏན་ནི། དེ་ཉིད་ལས། སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཡིད་ལ་བསམ་པ་ཐམས་ཅད་འགྲུབ། །ཅེས་གསུངས་སོ། །ལམ་གྱི་ཆ་རྐྱེན་དངོས་བཅུ་བཤད་ཟིན་ཏོ། །བཞི་པ་རྒྱུད་ཀྱི་དགོས་འབྲེལ་ནི་གོ་སླའོ། །ལྔ་པ་གདམས་གཏད་ནི། འཁོར་རྣམས་ལ་ཟབ་མོའ་རྒྱུད་གཅེས་སྤྲས་ཀྱི་སྒོ་ནས་གདམས་ཤིང་བསྟན་པའི་སྙིང་པོ་དེ་དར་ཞིང་མི་ནུབ་པར་བྱ་བའི་ཕྱིར་གཏད་པ་སྟེ། རྒྱས་པ་ལས། ང་ཡི་ཐུགས་ཀྱི་སྙིང་པོ་འདི། །ཕྱོགས་བཅུ་ཀུན་ཏུ་སྤེལ་བ་དང་། །དེ་ཡི་གཟུངས་ལ་གཏད་པ་ནི། །ཡིད་བཞིན་མཛོད་འབྱོར་བཀའ་ཡི་གནས། །བསྟན་པ་འཛིན་པར་ནུས་པ་ལ། །གསང་བའི་སྙིང་པོ་མཆོག་ཏུ་གཏད། །ཅེས་གསུངས་པའི་ཕྱིར་རོ། །རེ་ཞིག་དེ་ཙམ་ཞུས་ནས། སྔོན་གྱི་མཁས་པ་རྣམས་ཀྱི་འགྲེལ་བཤད་རྣམས་སུ་བརྒལ་བརྟག་གི་རིགས་པ་ཕྲ་མོའ་བཤད་པ་མཛད་པ་མི་སྣང་བས་མཚན་ཉིད་ཀྱིས་མཚོན་བྱ་ལ་ཁྱབ་མ་ཁྱབ་ཀྱི་མཐའ་མ་ཆོད་ཅིང་། འགལ་བ་དང་མ་འབྲེལ་བ་དང་མ་རྟོགས་ལོག་རྟོག་སོགས་ཀྱི་སྐྱོན་མཁས་པའི་དབང་པོ་རྣམས་ཀྱིས་བཟོད་པར་བཞེས་ནས་ཉེས་སྐྱོན་དག་ལེགས་པར་འཆོས་འཚལ་ལོ། །ཤིན་ཏུ་རྙེད་དཀའ་གསང་ཆེན་རྡོ་རྗེའི་ཚིག །དང་པོའི་འགྲོ་ལ་རྟོག་གེ་རིགས་པའི་ལུང་། །རྣམ་པར་ཕྱེ་འདི་དཔལ་ལྡན་རྒྱུད་རྒྱལ་གྱི། །གསང་ཆེན་ལམ་འདིར་འཇུག་ལ་ཕན་ཕྱིར་དང་། །ཁྱད་པར་སྐྱབས་མཆོག་བླ་ན་མེད་པ་གང་། །ཁྱབ་བདག་རྗེ་དྲུང་བཞད་པ་རྡོ་རྗེ་ལ། །མཁའ་འགྲོའི་གསང་ལུང་ཉིད་ཀྱིས་ལེགས་བསྐུལ་བའི། །བཀའ་ལུང་སྤྱི་བོར་ཕེབས་འཕྲལ་གུས་བཏུད་དེ། །སྔོན་རབས་མཁས་པའི་རྣམ་བཤད་དཔག་མེད་ལས། །བདག་ལྟས་དོན་གཞན་བརྗོད་པར་ནུས་མིན་ཡང་། །རྒྱུད་དོན་ཇི་བཞིན་འཆད་ལ་ཟླ་བྲལ་བ། །དཔལ་ལྡན་བླ་མ་གཏེར་བདག་གླིང་པ་དང་། །ངག་གི་དབང་ཕྱུག་ཆོས་དཔལ་རྒྱ་མཚོ་ཡི། །ཐུགས་མཚོར་འཁྱིལ་ ― MLP018_Page_0349 ―
[མ་དཔེ་གཟིགས་ན་འདིར་གནོན།]
བའི་རྒྱུད་དོན་བདུད་རྩིའི་རྒྱུན། །དད་བརྩོན་རྔ་ཡབ་རྩེ་མོས་བཅུད་དུ་བླངས། །ཅུང་ཟད་མྱོང་འདི་སྐལ་བ་བཟང་པོར་བྱས། །གསང་ཆེན་ཟབ་མོ་བྱིས་པའི་སྤྱོད་ཡུལ་མིན། །འོན་ཀྱང་དམ་པའི་གསུང་གིས་བསྐུལ་བར་བརྟེན། །བླུན་པོས་ཚུལ་འདི་གྲོང་ཚིག་བརྗོད་པའི་གཏམ། །ཡི་གེར་སྤེལ་ལ་ནོངས་པ་གང་མཆིས་བཤགས། །འདི་ལས་རྣམ་དཀར་དགེ་བ་གང་ཐོབ་པ། །དེ་ཡིས་མཁའ་མཉམ་ལུས་ཅན་མ་ལུས་ཀུན། །རྨད་བྱུང་ལམ་གྱིས་དྲི་མ་ཡོངས་སྦྱངས་ནས། །རང་བྱུང་ཡེ་ཤེས་མངོན་དུ་རྟོགས་པར་ཤོག །ཅེས་པ་འདི་ནི་སྐྱབས་ཀུན་འདུས་པའི་བདག་ཉིད་རྗེ་བླ་མ་བློ་བཟང་ཕྲིན་ལས་དབང་པོའམ་མཚན་གཞན་ཁྱབ་བདག་རྗེ་དྲུང་བཞད་པ་རྡོ་རྗེ་ཞེས་སྙིགས་དུས་འགྲོ་བ་ཀུན་གྱི་འདྲེན་མཆོག་དམ་པར་གྱུར་པ་ལ། མཁའ་འགྲོའི་གསང་ལུང་དུ་འདི་ལྟར་བྱུང་སྟེ། ཧྲཱི༔ རྒྱུད་ཐམས་ཅད་ཀྱི་རྒྱལ་པོ་གསང་བ་སྙིང་པོ་ནི་དུས་གསུམ་གྱི་རྒྱལ་བའི་དགོངས་ཉམས་གཅིག་ཏུ་དྲིལ་བ་ཡིན་པས། དེ་ཉིད་འཆད་པ་དང་། བརྒལ་བརྟག་གིས་གཏན་ལ་འབེབས་པ་སྨོན་ལམ་གྱི་མཐུ་གྲུབ་པ་ནི་ཆོས་ཀྱི་མཛོད་འཛིན་སྨིན་གྲོལ་གླིང་དུའོ། །དེ་བས་ན་དེར་དེ་བསྐུལ་བར་བྱའོ། །ཡང་ནས་ཡང་དུ་ཡིན་ནོ། །ཞེས་ལུང་བསྟན་པའི་དོན་བཞིན། འདི་ཉིད་ལ་རིགས་ལམ་ནས་དྲངས་པའི་བརྒལ་བརྟག་གི་ཟིན་བྲིས་ཤིག་རྩོམ་པར་གྱིས་ཤིག་ཅེས་པའི་བཀའ་ལུང་གནང་སྐྱེས་བཟང་པོ་དང་བཅས་སྤྱི་བོར་ཕེབས་འཕྲལ་དང་དུ་བླངས་ཏེ། མདོ་སྔགས་གཞུང་ལུགས་ཀྱི་ཚིག་དོན་ཅི་རིགས་བློ་ཡུལ་དུ་ལོངས་པའི་སྨིན་གླིང་གྲྭ་པའི་ཐ་ཤལ་བ་དགེ་སློང་དྷརྨ་ཀིརྟིས་རང་ལོ་ང་བདུན་པ་བསམ་གཏན་གྱི་ཐུན་བར་རྣམས་སུ་རྩོམ་པའི་བྱ་བ་ལ་ཞུགས་ཏེ། ཆུ་བྱི་ཧོར་ཟླ་གཉིས་པ་དབོ་ཟླ་བའི་དཀར་ཕྱོགས་ཀྱི་བཟང་པོའི་ཚེས་གཉིས་གཟའ་ཚེས་ཕུན་སུམ་ཚོགས་པ་རྗེ་བླ་མའི་དུས་དྲན་གྱི་མཆོད་པའི་ཉིན་རང་གི་གྲྭ་ཁང་དུ་གྲུབ་པར་བགྱིས་པ་དགེ་ལེགས་སུ་གྱུར་ཅིག འདིས་ཀྱང་བསྟན་པ་རིན་པོ་ཆེ་དར་ཞིང་རྒྱས་པའི་རྒྱུར་འ གྱུར་ཤོག དགེའོ། །སརྦ་དཱ་ཀ་ལྱ་ཎཾ་བྷ་ཝནྟུ།། །། རྩ་རྒྱུད་གསང་བ་སྙིང་པོའི་དཀའ་གནས་ལ་དོགས་པ་གཅོད་པའི་ལུང་རིགས་རྡོ་རྗེའི་རོལ་རྩེད། རབ་འབྱམས་ཨོ་རྒྱན་ཆོས་གྲགས།― MLP018_Page_0350 ―
[མ་དཔེ་གཟིགས་ན་འདིར་གནོན།]
རྩ་རྒྱུད་གསང་བ་སྙིང་པོའི་དཀའ་གནས་ལ་དོགས་པ་གཅོད་པའི་ལུང་རིགས་རྡོ་རྗེའི་རོལ་རྩེད་ཅེས་བྱ་བ་བཞུགས་སོ། །ༀ་སྭ་སྟི། རྩ་རྒྱུད་གསང་བ་སྙིང་པོའི་དཀའ་གནས་ལ་དོགས་པ་གཅོད་པའི་ལུང་རིགས་རྡོ་རྗེའི་རོལ་རྩེད་ཅེས་བྱ་བ། བླ་མ་དང་དཔལ་ཀུན་དུ་བཟང་པོ་གཉིས་སུ་མེད་པ་ལ་ཕྱག་འཚལ་ལོ། །རྣམ་མང་ཐེག་པའི་འཇུག་སྒོ་ཇི་སྙེད་ཀྱང་། །རྣམ་གྲོལ་ལམ་གྱི་ཡང་གསང་སྙིང་པོའི་རྒྱུད། །ཚིག་ལས་འདས་ཀྱང་ཐ་སྙད་ཚིག་གི་དོན། །ལུང་རིགས་རྡོ་རྗེའི་རོལ་རྩེད་འདི་སྤྲོའོ། །དེ་ལ་འདིར་རང་གི་ཉེ་བར་གནས་པ་གནས་ལྔ་སྨྲ་བའི་དྭགས་པོ་འགྱུར་མེད་བློ་གསལ་གྱིས་གསང་བ་སྙིང་པོ་ལ་དོགས་སློང་གི་དྲི་བའི་ལན་ལུང་རིགས་རྡོ་རྗེའི་རོལ་རྩེད་འདི་འཆད་པ་ལ། སློབ་དཔོན་དབྱིག་གཉེན་གྱི་རྣམ་བཤད་རིག་པར། ཚིག་དོན་བཅས་ཤིང་མཚམས་སྦྱར་དང་། །བརྒལ་ལན་བཅས་ཏེ་བསྙད་པར་བྱ། །ཞེས་གསུངས་པ་ལྟར་འདིར་བརྒལ་ལན་གྱི་སྒོ་ནས་སྨྲ་བར་བྱ་སྟེ། དེ་ལ་དྲི་བ་དང་པོ་ནི། ལེའུ་དང་པོ་ནས་བཤད་པའི་ལོངས་སྐུའི་གླེང་གཞི་འདི་རང་སྣང་སངས་རྒྱས་ཀྱི་སྤྱོད་ཡུལ་དང་གཞན་སྣང་གདུལ་བྱའི་མཐོང་སྣང་གང་ཡིན། ཡང་གཉིས་ཀའི་མཐོང་ཡུལ་ཡིན་ནམ། ཞེས་པ་ལ། དང་པོ་ལྟར་ན་ལེའུ་དང་པོ་ནས་བཤད་པའི་སྟོན་པ་ལོངས་སྤྱོད་རྫོགས་སྐུ་དེ་ཆོས་ཅན། ཁྱོད་ཞལ་ཕྱག་མཚན་མར་སྣང་བའི་གཟུགས་སྐུ་ཡིན་པར་ཐལ། ཁྱོད་རྣམ་ཐར་གསུམ་ཚང་བའི་དབུ་དཀར་དམར་མཐིང་གསུམ། ཡེ་ཤེས་དྲུག་མཚོན་པའི་ཕྱག་དྲུག ཐབས་ཤེས་གཉིས་མཚོན་པའི་ཞབས་གཉིས་དང་ལྡན་པའི་གཟུགས་སྐུ་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་སངས་རྒྱས་རང་སྣང་གི་སྐུ་མ་ཡིན་པར་ཐལ། ཁྱོད་མཚན་མའི་ཕྱག་རྒྱར་བཞུགས་པའི་གཟུགས་སྐུ་ཡིན་པའི་ཕྱིར། འཁོར་ ― MLP018_Page_0351 ―
[མ་དཔེ་གཟིགས་ན་འདིར་གནོན།]
གསུམ། མ་ཁྱབ་ན། སངས་རྒྱས་རང་སྣང་ལ་མཚན་མ་ཅན་གྱི་སྐུ་ཡོད་པར་ཐལ། སངས་རྒྱས་རང་སྣང་ན་མཚན་མའི་ཕྱག་རྒྱར་བཞུགས་པའི་གཟུགས་སྐུ་ཡོད་པའི་ཕྱིར། འདོད་ན་རང་སྣང་སངས་རྒྱས་ཀྱི་ཞིང་ཁམས་ཆོས་ཅན། ཁྱོད་མཚན་མ་ལས་འདས་པའི་ཆོས་མ་ཡིན་པར་ཐལ། ཁྱོད་མཚན་མ་དང་བཅས་པ་ཡིན་པའི་ཕྱིར། འདོད་མི་ནུས་ཏེ། ལྟ་བ་ཡང་དག་སྒྲོན་མ་ལས། མཚན་མ་མེད་ཅིང་སྤྲོས་དང་བྲལ་བ་དེ། །ངོ་བོ་ཉིད་ཀྱིས་སེམས་ཀྱི་ཡུལ་ལས་འདས། །ཞེས་དང་། རྒྱས་པ་ལས། ཡང་དག་ཤེས་རབ་ཆེན་པོ་ནི། །མཚན་མ་འཇོམས་ཕྱིར་ཁྲོ་བོའོ། །ཞེས་སོགས་བཤད་པ་དང་འགལ་བའི་ཕྱིར། ཡང་མཚན་མ་དང་བཅས་པ་ཡིན་གཟུགས་སྐུ་མ་ཡིན་ཞེས་ཚིག་ཟུར་ལ་བསྙད་ན། ལེའུ་དང་པོ་ནས་བཤད་པའི་སྟོན་པ་ལོངས་སྤྱོད་རྫོགས་སྐུ་དེ་ཆོས་ཅན། ཁྱོད་ཕྱག་ཞབས་འཁོར་ལོའི་མཚན་དང་རུས་སྦལ་ཞབས། །ཞེས་སོགས་བཤད་པ་ལྟར་གྱི་མཚན་དཔེ་འབར་བའི་སྐུ་མ་ཡིན་པར་ཐལ། ཁྱོད་གཟུགས་སྐུ་མ་ཡིན་པའི་ཕྱིར། འདོད་ན། ཧ་ཅང་ཐལ་ཏེ། མདོ་སྡེ་རྒྱན་ལས། དང་པོའི་སྐུ་ནི་སྟོབས་ལ་སོགས། །བྲལ་བའི་ཡོན་ཏན་དག་དང་ལྡན། །གཉིས་པ་སྐྱེས་བུ་ཆེན་པོའི་མཚན། །རྣམ་སྨིན་ཡོན་ཏན་དག་དང་ལྡན། །ཞེས་བཤད་པ་དང་འགལ་བའི་ཕྱིར་རོ། །གཞན་ཡང་སངས་རྒྱས་རང་སྣང་གི་སྐུ་དེ་གདུལ་བྱའི་མཐོང་ཡུལ་དུ་ཡོད་པར་ཐལ། ལེའུ་དང་པོ་ལོངས་སྐུའི་གླེང་གཞིའི་སྟོན་འཁོར་འདི་རྣམས་ས་མཐའི་སེམས་དཔའ་ལ་སྣང་བའི་ཕྱིར་ཏེ། འདི་ཉིད་ལས། འོག་མིན་བླ་མེད་གནས་མཆོག་ཏུ། །སྐུ་ནི་རྣམ་པར་སྣང་མཛད་ཚུལ། །བྱང་ཆུབ་སེམས་དཔའི་འཁོར་རྣམས་ལ། །དེ་བཞིན་གསུང་མཆོག་མི་སྨྲ་ཏེ། །སྐུ་ཡིས་ཆོས་རྣམས་མཇལ་བར་སྟོན། །ཞེས་གསུངས་སོ། །འདོད་ན། རང་སྣང་སངས་རྒྱས་ཀྱི་སྐུ་དེ་ཆོས་ཅན། གདུལ་བྱའི་མཐོང་ཡུལ་དུ་མེད་པར་ཐལ། སངས་རྒྱས་ཁོ་ནའི་སྤྱོད་ཡུལ་ཡིན་པའི་ཕྱིར་ཏེ། སྡོང་པོ་བཀོད་པ་ལས། ཇི་ལྟར་མཚན་ཉིད་སྣ་ཚོགས་པ། །དེ་དག་བྱིས་པའི་སྤྱོད་ཚུལ་ཏེ། །གང་ཞིག་མཚན་ཉིད་ཀུན་མེད་པའི། །སངས་རྒྱས་རྣམས་ནི་མི་མཐོང་ངོ་། །ཞེས་གསུངས་པའི་ཕྱིར་རོ། །འོ་ན་རང་སྣང་སངས་རྒྱས་མཚན་ཉིད་པ་དེ་སེམས་ཅན་གྱིས་མི་མཐོང་ན། ― MLP018_Page_0352 ―
[མ་དཔེ་གཟིགས་ན་འདིར་གནོན།]
སངས་རྒྱས་ཀྱིས་སེམས་ཅན་ལ་གཟིགས་པ་མི་འཇུག་པའི་སྐྱོན་དང་། སེམས་ཅན་གྱིས་སངས་རྒྱས་མི་མཐོང་བའི་སྐྱོན་གཉིས་གནས་སོ་ཞེ་ན། སྐྱོན་དང་པོ་མེད་དེ། རྒྱལ་བ་རྣམས་ཀྱིས་ནི་སེམས་ཅན་ལ་འབྲེལ་བ་གསུམ་གྱི་ཡུལ་དུ་བྱས་པས་གཟིགས་ཏེ། ཆོས་དང་ཆོས་ཅན་རང་བཞིན་གྱིས་འབྲེལ། ཡུལ་དང་ཡུལ་ཅན་ཐ་མི་དད་པར་འབྲེལ། ལས་དང་ཐུགས་རྗེས་ཡོངས་སུ་བཟུང་བར་འབྲེལ་བས་ཐུགས་རྗེའི་འབྲེལ་བས་རྗེས་སུ་བཟུང་བའི་ཕྱིར་ཏེ། འདི་ཉིད་ལས། ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །ཞེས་བཤད་པའི་ཕྱིར། སྐྱོན་གཉིས་པ་མེད་དེ། སེམས་ཅན་རྣམས་ཀྱིས་སངས་རྒྱས་དངོས་གནས་མི་མཐོང་བ་ནི། སེམས་ཅན་རྣམས་ཀྱི་སྒོ་ནས་འབྲེལ་བའི་ཡུལ་དུ་མ་བྱས་པས་དངོས་གནས་ཇི་ལྟ་བ་བཞིན་མི་མཐོང་ཡང་། རང་རང་གི་ལས་ཉོན་དག་ཚབས་ཆེ་ཆུང་ལ་ལྟོས་ནས་རང་རང་གི་ལས་འཕྲོའི་མོས་པ་དང་འཚམས་པ་སོ་སོར་སྣང་སྟེ། འདི་ཉིད་ལས། དེ་བཞིན་ཉིད་ཀྱིས་མ་བཅོས་ཀྱང་། །ལས་འཕྲོའི་དབང་གིས་སོ་སོར་སྣང་། །ཞེས་དང་། མཐུན་པའི་ཡེ་ཤེས་རང་སྣང་ངོ་། །ཞེས་བཤད་པའི་ཕྱིར་རོ། །འོ་ན་དུད་འགྲོ་དང་ཡི་དྭགས་ཕལ་པ་དག་གིས་དེ་བས་ཆེས་བསོད་ནམས་ཀྱིས་འཕགས་པའི་མི་རྣམས་དང་། སྤྱོད་ཡུལ་གཅིག་ཏུ་མ་སྤྱད་ཀྱང་མི་རྣམས་ཀྱིས་མཐོང་བ་བཞིན་དུ། རྒྱལ་བ་རྣམས་དང་ཡེ་ཤེས་མཐུན་པར་མ་གྱུར་ཀྱང་མཐོང་དུ་ཅིས་མི་རུང་ཞེ་ན། ལན་དུ། དེ་འདྲའི་དཔེ་དོན་མི་མཚུངས་ཏེ། འགྲོ་བ་དེ་ཉིད་ཀྱིས་མིའི་གཟུགས་མཐོང་ཡང་མཚན་ཉིད་ཉམས་སུ་མྱོང་བའི་སྒོ་ནས་མི་མཐོང་བའི་ཕྱིར་དང་། སངས་རྒྱས་ཀྱི་ཡེ་ཤེས་ནི་བསམ་གྱིས་མི་ཁྱབ་པའི་གནས་ཡིན་པས་དག་པའི་སེམས་ཅན་རྣམས་ཀྱིས་ཀྱང་སྤྱོད་ཡུལ་དུ་མ་གྱུར་པའི་ཕྱིར་ཏེ། རྒྱུད་བླ་མ་ལས། སངས་རྒྱས་ཁམས་དང་སངས་རྒྱས་བྱང་ཆུབ་དང་། །སངས་རྒྱས་ཕྲིན་ལས་སངས་རྒྱས་ཡེ་ཤེས་ཏེ། །དག་པའི་སེམས་ཅན་གྱིས་ཀྱང་བསམ་བྱ་མིན། །ཞེས་དང་། འཇུག་པ་ལས། བློ་མིག་དག་པའི་འཕགས་མཆོག་གིས་ཀྱང་ཐམས་ཅད་མཐོང་མ་ལགས། །ཞེས་བཤད་པས་སོ། །དྲི་བ་གཉིས་པ་གདུལ་བྱའི་མཐོང་སྣང་ཡིན་ཟེར་ན། ལེའུ་དང་པོའི་སྟོན་འཁོར་གྱི་རྣམ་པར་ ― MLP018_Page_0353 ―
[མ་དཔེ་གཟིགས་ན་འདིར་གནོན།]
སྣང་བ་འདི་རྣམས་ཆོས་ཅན། གང་ཟག་གཅིག་གི་ཕུང་ཁམས་སྐྱེ་མཆེད་རྒྱལ་བ་བཞི་བཅུ་རྩ་གཉིས་སུ་རྣམ་པར་དག་པའི་མཐར་ཐུག་གི་འབྲས་བུ་མ་ཡིན་པར་ཐལ། མཐར་ཐུག་གི་འབྲས་བུ་དེ་བློའི་ཡུལ་དུ་གཟུང་བྱར་མ་གྲུབ་པའི་ཞལ་ཕྱག་མཚན་མའི་སྤྲོས་པ་དང་བྲལ་བ་གཅིག་ཏུ་ཁས་ལེན་དགོས་པའི་ཕྱིར་ཏེ། ཐུན་མོང་གི་ལུང་ལས་ཀྱང་། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་བརྗོད། །ཅེས་གསུངས་པའི་ཕྱིར། འདོད་ན། དེ་ཆོས་ཅན། མཐར་ཐུག་གི་འབྲས་བུ་ཡིན་པར་ཐལ། སྐབས་འདིར་དེ་ལས་ལྷག་པའི་མཐར་ཐུག་གི་འབྲས་བུ་བཞག་ཏུ་མེད་པའི་ཕྱིར་ཏེ། འདི་ཉིད་ལས། འབྲས་བུ་རྒྱལ་བ་སྨིན་གྲུབ་ངོ་མཚར་མིང་ཚོགས་བཞི་བཅུ་གཉིས། །ཞེས་དང་། རྒྱས་པ་ལས། དོན་བསྡུས་གསུང་རབ་བཞི་བཅུ་གཉིས། །དེ་ལས་ལྷག་པའི་དོན་སྨྲ་བ། །དེ་ནི་རྣམ་དག་ལམ་མིན་ཏེ། །རང་བློས་བསམ་པ་འཁྲུལ་པ་ཡིན། །ཞེས་གསུངས་པའི་ཕྱིར། ཡང་གོང་དུ་མ་ཁྱབ་པའི་ལན། བཞི་བཅུ་རྩ་གཉིས་པོ་དེ་མཐར་ཐུག་གི་འབྲས་བུ་ཡིན་ཟེར་ན། དེ་ཆོས་ཅན། གདུལ་བྱའི་མཐོང་ཡུལ་གྱི་སྐུ་ཡིན་པར་ཐལ། ས་མཐའི་སེམས་དཔའ་ལ་སྣང་བའི་སྐུ་ཡིན་པའི་ཕྱིར། འདོད་ན། དེ་ཆོས་ཅན། གདུལ་བྱ་ལ་སྣང་བའི་སྐུ་མིན་པར་ཐལ། སངས་རྒྱས་རང་སྣང་གི་ཡེ་ཤེས་ཀྱི་རྩལ་སྣང་ལས་གྲུབ་པའི་སྐུ་ཡིན་པའི་ཕྱིར་ཏེ། ལེའུའི་བསྡུ་བ་ལས། དེ་བཞིན་ཉིད་ཀྱི་དབྱིངས་ཉིད་དབང་བསྒྱུར་ཡེ་ཤེས་དཀྱིལ་འཁོར་ཐུགས་རྗེའི་ངང་། །རང་སྣང་བ་ཉིད་ཏིང་ངེ་འཛིན་གཟུགས་བརྙན་སྒྱུ་མ་རྣམ་དག་གསལ་བ་ཡི། །སྐུ་གསུང་ཐུགས་དང་ཡོན་ཏན་ཕྲིན་ལས་སེལ་མེད་པ་ཡི་ཡོན་ཏན་ཡིད་བཞིན་རིན་པོ་ཆེ། །མི་ཟད་པར་ལྡན་རྒྱན་གྱི་འཁོར་ལོ་རྡོ་རྗེ་མཆོག་གི་གནས་ཉིད་དུའོ། །ཞེས་བཤད་པའི་ཕྱིར། སྐུ་གསུང་ཐུགས་དང་ཡོན་ཏན་ཕྲིན་ལས་སེལ་མེད་ཅེས་པ་ནི། གདུལ་བྱའི་བློའི་སེལ་བ སླད་མེད་པར་སངས་རྒྱས་ཁོ་ནའི་སྤྱོད་ཡུལ་ཡིན་པའི་དོན་ཡིན་པའི་ཕྱིར་རོ། །ཡང་གོང་དུ་མ་ཁྱབ་པའི་ལན་དངོས་འགལ་ལ་སོང་མོད་ཀྱང་། དེ་དག་གི་ཚེ་ན་ཐུབ་པ་དྲུག་ཀྱང་གདུལ་བྱ་ལ་དངོས་སུ་མི་སྣང་བར་ཐལ། ཐུབ་དྲུག་མ་དྲངས་པར་བཞི་བཅུ་རྩ་གཉིས་མི་ཚང་བའི་ཕྱིར། དེ་དག་གི་རྣལ་མའི་ལན་གོ་ ― MLP018_Page_0354 ―
[མ་དཔེ་གཟིགས་ན་འདིར་གནོན།]
དོན་ལམ་བཞག་གི་དབང་དུ་བྱས་ན། ལེའུའི་དང་པོའི་སྟོན་འཁོར་གྱི་རྣམ་པར་སྣང་བ་འདི་དག་སངས་རྒྱས་དངོས་མ་ཡིན་ཡང་། སངས་རྒྱས་ཀྱི་སྤྲུལ་པའམ། གདུལ་བྱ་བློ་དག་པའི་བློའི་མེ་ལོང་ལ་ཤར་བའི་སངས་རྒྱས་ཀྱི་གཟུགས་བརྙན་ཡིན་པར་གོ་སྟེ། རྒྱུ་མཚན་སྒྱུ་འཕྲུལ་རྡོ་རྗེ་ལས། རྡོ་རྗེ་བཙན་པོ་དམ་ཚིག་མཆོག །སྐུ་གསུང་ཐུགས་ཀྱི་དངོས་གྲུབ་ཆེ། །འགྲོ་བ་ཀུན་ལ་རབ་སྣང་བའོ། །ཞེས་དང་། རྒྱུད་བླ་མ་ལས་ཀྱང་། ཇི་ལྟར་བཻ་ཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །ཞེས་བཤད་པའི་ཕྱིར་རོ། །དངོས་ཡིན་པ་ལ་གནོད་བྱེད་ཡོད་དེ། བཻ་ཌཱུར་ཡའི་ས་གཞི་ལ་སྣང་བའི་བརྒྱ་བྱིན་གྱི་གཟུགས་བརྙན་བརྒྱ་བྱིན་དངོས་མ་ཡིན་པ་དང་། སངས་རྒྱས་ཀྱི་གཟུགས་བརྙན་སངས་རྒྱས་དངོས་མ་ཡིན་པའི་ཕྱིར་ཏེ། གོང་དུ་ལུང་དྲངས་པ་རྣམས་དང་། འདིར་ཡང་ཤེར་ཕྱིན་སུམ་བརྒྱ་པ་ལས། གང་དག་ང་ལ་གཟུགས་སུ་མཐོང་། །གང་དག་ང་ལ་སྒྲར་ཤེས་པ། །ལོག་པའི་ལམ་དུ་ཞུགས་པ་སྟེ། །སྐྱེ་བོ་དེ་དག་ང་མི་མཐོང་། །སངས་རྒྱས་རྣམས་ནི་ཆོས་ཀྱི་སྐུ། །འདྲེན་པ་རྣམས་ནི་ཆོས་ཉིད་བལྟ། །ཆོས་ཉིད་ཤེས་པར་བྱ་མིན་པས། །དེ་ནི་རྣམ་པར་ཤེས་མི་ནུས། །ཞེས་དང་། སྡོང་པོ་བཀོད་པ་ལས། ཇི་ལྟར་མཚན་ཉིད་སྣ་ཚོགས་པ། །ཞེས་སོགས་གསུངས་པའི་ཕྱིར་རོ། །བཞི་བཅུ་རྩ་གཉིས་མཐར་ཐུག་གི་འབྲས་བུ་ཡིན་མོད། དེ་མཐོང་དུ་མི་རུང་ན། གཞན་སྣང་གཟུགས་སྐུ་གཉིས་ཀྱང་མཐར་ཐུག་གི་འབྲས་བུ་མ་ཡིན་པར་ཁས་ལེན་དགོས་པ་ཧ་ཅང་ཐལ་ལོ། །གསུམ་པའི་དོན་ཡང་དེས་ཁེགས། དྲི་བ་གཉིས་པ་མཚན་དཔེའི་དོགས་སློང་ནི། ཡེ་ཤེས་བཅུ་དྲུག་གི་རྩལ་སེམས་དཔའ་བཅུ་དྲུག་ཏུ་བཤད་པས། ལེའུགཉིས་པར། སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ཅེས་གསུངས་པས། མ་དག་པའི་དུས་ཀྱི་ཁམས་བཅོ་བརྒྱད་ཀྱང་སྐྱེས་བུ་གཅིག་ལ་རྫོགས་ཡོང་བ་ལྟར། སངས་རྒྱས་པའི་གནས་སྐབས་སུ་ཡང་སྟོན་པའི་ཡོན་ཏན་གྱི་བྱེ་བྲག་འཁོར་གྱི་ཚུལ་དུ་བཤད་པའི་ཕྱིར་ཕྱི་སེམས་ཡབ་ཡུམ་ ― MLP018_Page_0355 ―
[མ་དཔེ་གཟིགས་ན་འདིར་གནོན།]
བཞི་དང་། ནང་སེམས་ཡབ་ཡུམ་བཞི་སྟེ་བཅུ་དྲུག་བྱུང་ཞིང་། ལྷག་མ་བཅུ་དྲུག་པོ་བརྩི་ཚུལ་ཇི་ལྟར་ཡིན་དང་། འདིར་ནང་སེམས་ཡབ་བཞི་རྣམ་ཤེས་དང་། ཕྱི་སེམས་ཡབ་བཞི་དབང་པོ་བཞི་དང་བྲང་སྤྲད་དེ་བཤད་པ་དང་། ཞི་བ་གནས་དག་གི་སྐབས་སུ། རྣམ་ཤེས་ཚོགས་བརྒྱད་གནས་དག་པ། །སེམས་དཔའ་བརྒྱད་ཀྱི་ཐུགས་དམ་བསྐང་། །རྣམ་ཤེས་ཡུལ་བརྒྱད་གནས་དག་པ། །སེམས་མ་བརྒྱད་ཀྱི་ཐུགས་དམ་བསྐང་། །ཞེས་པས་ལྷ་རྟོག་སྦྱར་ལུགས་མི་འདྲ་བའི་ཁྱད་པར་ཇི་ལྟར་ལགས། ཞེས་པ་ལ། སྟོན་པའི་ཐུགས་ཡེ་ཤེས་ཆེན་པོའི་བདག་ཉིད་དུ་གནས་པ་དེ་ཆོས་ཅན། ཁྱོད་མེ་ལོང་ལྟ་བུ་སོགས་ཡེ་ཤེས་བཞི་པོ་རེ་རེ་ལའང་བཞི་རེར་ཕྱེ་བའི་ཡེ་ཤེས་བཅུ་དྲུག་གི་རྩལ་སེམས་དཔའ་བཅུ་དྲུག་དང་། དེའི་ཡུལ་ཆོས་ཀྱི་དབྱིངས་བཅུ་དྲུག་ལས་སེམས་མ་བཅུ་དྲུག་སྟེ་མཚན་སོ་གཉིས་སུ་བཞག་པ་མ་ཡིན་པར་ཐལ། སེམས་དཔའ་བཅུ་དྲུག་པོར་ཡེ་ཤེས་ལྔའི་རྟགས་རིགས་ལྔས་དབུ་བརྒྱན་པའི་ལྷ་བརྒྱད་ཅུནི་དཔེ་བྱད་བརྒྱད་ཅུར་འཆད་པ་མི་རིགས་པའི་ཕྱིར། འདོད་ན། སྤྱི་མདོ་ལས། མཚན་གྱི་མེ་ཏོག་ལ་དཔེ་བྱད་ཀྱི་འབྲས་བུས་སྤྲས་པའི་ཕྱིར། སྲས་ཀྱི་ཚོགས་ཀྱིས་ཀུན་ནས་བརྒྱན་པའོ། །ཞེས་བཤད་པ་དང་འགལ་བའི་ཕྱིར་རོ། །རྣལ་ལན། ཕྱི་ནང་གི་སེམས་དཔའ་སེམས་མ་བཅུ་དྲུག་ནི། རྒྱུ་སྐལ་བཟང་གི་སེམས་དཔའ་སེམས་མ་དང་སྦྱར་ནས་བཤད་པ་ཡིན་ལ། མཚན་དཔེའི་སྐབས་འདིར་འབྲས་བུ་དཔེ་བྲལ་གྱི་སེམས་དཔའ་ཡབ་བཅུ་དྲུག་དང་ཡུམ་བཅུ་དྲུག་པོ་མཚན་དང་ཡུམ་བཅུ་དྲུག་པོ་ཆོས་ཀྱི་དབྱིངས་ཀྱི་ཕྱག་རྒྱ་ཡིན་པས་དབུ་རྒྱན་མེད་ཅིང་། ཡབ་བཅུ་དྲུག་པོར་ཡེ་ཤེས་ལྔའི་རྟགས་ཀྱི་དབུ་རྒྱན་གྱི་ལྷ་ལྔ་རེ་རྣམས་བསྡོམས་པ་བརྒྱད་ཅུ་དཔེ་བྱད་དུ་བཞེད་པའོ། །གནས་དག་གནས་འགྱུར་གྱི་སྐབས་སུ་ནི་སྤྱིར་བཏང་ཡུལ་ཡུལ་ཅན་གཙོ་ཆེ་བ་བྱས་པས་འདྲ་བར་སེམས་ཏེ། དེ་ལྟར་མིན་ན། ཡིད་ཤེས་སྟོན་པ་ཀུན་བཟང་དུ་དག་སྦྱོར་གཅིག་དང་། ཚོགས་བརྒྱད་ཀྱི་སྐབས་སུ་སེམས་དཔའ་བརྒྱད་ཀྱི་ནང་ཚན་དུ་དག་སྦྱོར་བྱུང་བ་ཟློས་སྐྱོན་གནས་ཤིང་། ཤེས་པ་གཅིག་ལ་ཕྲ་རགས་ཀྱི་གནས་སྐབས་ཕྱེ་བས་ཚོགས་བརྒྱད་བྱུང་ཞིང་། དེའི་ཆ་རྣམས་དག་སྦྱོར་བྱས་པས་སེམས་ ― MLP018_Page_0356 ―
[མ་དཔེ་གཟིགས་ན་འདིར་གནོན།]
དཔའ་བརྒྱད་དང་། ཡིད་ནི་ཆོས་ཐམས་ཅད་ཀྱི་བྱེད་པ་པོ་ཡིན་པས་བྱེད་ལས་ཀྱི་སྒོ་ནས་སྟོན་པ་ཀུན་བཟང་དུ་དག་སྦྱོར་འཐད་དེ། མདོ་ལས། ཡིད་གཙོ་ཡིད་ནི་མགྱོགས་པར་འགྲོ་བ་སྟེ། །ཆོས་རྣམས་ཀུན་གྱི་སྣ་ལ་ཡིད་འགྲོའོ། །ཞེས་བཤད་པའོ། །ནང་གི་མཚན་དཔེའི་སྐབས། སྤྱི་བོ་བདེ་ཆེན་གྱི་འཁོར་ལོ་རྩ་འདབ་སོ་གཉིས་ནི་མཚན་བཟང་པོ་སུམ་ཅུ་རྩ་གཉིས་དང་། ལྟེ་བའི་རྩ་འདབ་རེ་བཞི་ལས་སྟོང་པའི་རྩ་བཞི་ཕྲི་བའི་དྲུག་ཅུ། མགྲིན་པའི་བཅུ་དྲུག སྙིང་གའི་རྩ་ཆེན་བཞི་སྟེ་བརྒྱད་ཅུ་ནི་དཔེ་བྱད་བཟང་པོ་བརྒྱད་ཅུར་བཤད་པ་དེ་ཆོས་ཅན། ཁྱོད་ནང་གི་སྟོན་པའི་མཚན་དཔེ་མ་ཡིན་པར་ཐལ། ཁྱོད་རྩ་འཁོར་གྱི་རྣམ་པར་འདུག་པའི་ཕྱིར། འདོད་ན། ཐལ་འགྱུར་ལས། སྒྲ་དབྱངས་གསུང་གི་གནས་གཞི་ཡི། །དབྱེ་བས་གསུམ་གསུམ་ངོས་གཉིས་དང་། །བཞི་བཅུ་གཉིས་སུ་གྱུར་པ་ཡིན། །ཞེས་གསུངས་པ་དང་འགལ་བའི་ཕྱིར་རོ། །གསང་བའི་མཚན་དཔེ་ཆོས་ཅན། ཁྱོད་སྟོན་པ་ཡབ་ཡུམ་གཉིས་རོལ་བའི་དུས་ཀྱི་དགའ་བ་ལ་འཇོག་པ་མ་ཡིན་པར་ཐལ། ཁྱོད་ཡབ་ཡུམ་གཉིས་ཀྱི་དགའ་བ་བཅུ་དྲུག་བཅུ་དྲུག་ནི་མཚན་སོ་གཉིས་དང་། ཡབ་ཀྱི་དགའ་བ་རེ་རེ་ལའང་ཡེ་ཤེས་ལྔ་ལྔའི་རོ་དང་ལྡན་པ་ནི་དཔེ་བྱད་བརྒྱད་ཅུར་འཇོག་པ་མ་ཡིན་པའི་ཕྱིར། འདོད་ན། རྒྱ་མཚོ་ལས། ཨཱ་ལི་ཀཱ་ལི་བདེ་བ་ཉིད། །ཕན་ཚུན་མ་འདྲེས་གཅིག་པར་ཤེས། །བཅུ་དྲུག་ངོས་གཉིས་མཚན་དང་ལྡན། །ཕྱོགས་གཅིག་ཡེ་ཤེས་ལྔ་ལྡན་པ། །བརྒྱད་ཅུའོ་བཟོད་སོགས་རྒྱུ་ལས་འཕགས། །ཞེས་གསུངས་པ་དང་འགལ་ལོ། །ཁོ་ན་རེ། ནང་དང་གསང་བའི་མཚན་དཔེ་ཆོས་ཅན། ཁྱོད་མཛེས་བྱེད་ཀྱི་རྒྱན་མ་ཡིན་པར་ཐལ། ཁྱོད་རྩ་ཁམས་ཀྱི་རང་བཞིན་དུ་འདུག་པའི་ཕྱིར་ཟེར་ན། རྩ་ཁམས་རྣམ་པར་དག་པ་ཆོས་ཅན། ཁྱོད་རྒྱན་གྱི་ནང་ནས་མཛེས་བྱེད་མཆོག་ཏུ་གྱུར་པ་ཡིན་པར་ཐལ། ཁྱོད་བདེ་བ་ཆེན་པོའི་རང་བཞིན་དུ་རོ་སྙོམས་པའི་ཡེ་ཤེས་ཆེན་པོའི་རྒྱན་དུ་གནས་པའི་ཕྱིར། སྟོན་པ་ཆོས་ཅན། ཁྱོད་ཡེ་ཤེས་ཀྱི་སྐུ་ཅན་མ་ཡིན་པར་ཐལ། ཁྱོད་རྩ་རླུང་ཐིག་ལེ་དང་ལྡན་པའི་སྐུ་ཡིན་པའི་ཕྱིར། འདོད་ན། དེ་ཆོས་ཅན། {དེ་ཡིན་པར་ཐལ།} ཁྱོད་འཚང་རྒྱ་བའི་ཚེ་རྩ་རླུང་ཐིག་ལེ་རྣམས་ཆོས་ཉིད་ཀྱི་ཀློང་ ― MLP018_Page_0357 ―
[མ་དཔེ་གཟིགས་ན་འདིར་གནོན།]
དུ་གྲོལ་ནས་སངས་རྒྱས་པ་མ་ཡིན་པར་ཐལ། ཁྱོད་རྩ་རླུང་ཐིག་ལེ་དང་ལྡན་པའི་སྐུ་ཡིན་པའི་ཕྱིར། འདོད་ན། དེ་ཆོས་ཅན། དེ་ཡིན་པར་ཐལ། རྩ་དག་པས་སྐུ་རྡོ་རྗེ། རླུང་དག་པས་གསུང་རྡོ་རྗེ། ཐིག་ལེ་སྟེ་རྡུལ་དག་པས་ཐུགས་རྡོ་རྗེ་ཐོབ་པའི་ཕྱིར། ཡང་སྟོན་པ་ཆོས་ཅན། ཁྱོད་ཡེ་ཤེས་ཀྱི་སྐུ་ཅན་ཡིན་པར་ཐལ། ཁྱོད་སྐུ་མདུན་དང་རྒྱབ་མེད་པ་ཐམས་ཅད་དུ་ཞལ་གྱི་དཀྱིལ་འཁོར་ཐལ་ལེ་བར་སྣང་བའི་སྐུ་ཡིན་པའི་ཕྱིར་ཏེ། ཡེ་ཤེས་ཉིད་གདུལ་བྱའི་སྣང་ངོར་དབྱིབས་དང་ཁ་དོག་ཏུ་རང་སྣང་བའི་ཕྱིར་ཏེ། འདི་ཉིད་ལས། ཡེ་ཤེས་ལ་ནི་ཡེ་ཤེས་རོལ། །ཡེ་ཤེས་རོལ་པ་ཉིད་ཀྱང་གསོག །རྒྱལ་བ་མངོན་བྱུང་སྐྱོབ་པ་དང་། །བྱིན་རླབས་སྟོན་པ་དེ་བཞིན་ནོ། །ཞེས་གསུངས་པའི་ཕྱིར། ཡང་གསང་བའི་མཚན་དཔེའི་སྐབས། ཡུམ་གྱི་དགའ་བ་བཅུ་དྲུག་པོ་དེ་ཆོས་ཅན། ཁྱོད་ཡབ་ལ་ཡོད་པའི་ཆོས་ཡིན་པར་ཐལ། ཁྱོད་ཡབ་ཀྱི་སྐུ་ལ་ལྡན་པའི་མཚན་དུ་དྲངས་འདུག་པའི་ཕྱིར། འདོད་ན། མ་ཡིན་པར་ཐལ། ཡུམ་ལ་ལྡན་པའི་ཆོས་ཡིན་པའི་ཕྱིར། ཡང་། ཐུན་མོང་མ་ཡིན་པའི་མཚན་དཔེ་ཞེས། སྟོན་པ་དང་འཆད་པའི་སྐྱེས་བུ་ལྔ་ཁོ་ན་ལ་ལྡན་པའི་ཁྱད་ཆོས་སུ་བཞག་འདུག་པར། དེ་ལྟར་ན་ཀུན་ཏུ་བཟང་མོ་དང་འཁོར་གཞན་རྣམས་ལའང་མཚན་དཔེ་མི་ལྡན་པར་ཐལ། ཐུན་མིན་གྱི་མཚན་དཔེ་དེ་སྟོན་པ་དང་འཆད་པའི་སྐྱེས་བུ་གཉིས་ཀྱི་ཁྱད་ཆོས་ཡིན་པའི་ཕྱིར། རྟགས་ཁས། འདོད་ན། བཞི་བཅུ་རྩ་གཉིས་པོ་འདི་རྣམས་གང་ཟག་གཅིག་སངས་རྒྱས་པའི་ཡོན་ཏན་གྱི་རྩལ་སྣང་ལྷར་བཞག་པ་མ་ཡིན་པར་ཐལ། ལྷ་དེ་དག་ལ་མཚན་དཔེའི་ཡོན་ཏན་ཡོད་མེད་ཀྱི་བཟང་ངན་ཅན་དུ་གནས་པའི་ཕྱིར། འདོད་མི་ནུས་ཏེ། རྒྱས་པ་ལས། དོན་བསྡུས་གསུང་རབ་བཞི་བཅུ་གཉིས། །ཞེས་གསུངས་པའི་ཕྱིར་རོ། །གཞན་ཡང་གཞི་གནས་ལུགས་འཆད་པའི་སྐབས་འདིར་སེམས་ཅན་ཡིན་ན། མཚན་དཔེ་དང་ལྡན་པས་ཁྱབ་པ་ཞིག་ཁས་ལེན་དགོས་ཏེ། ཐུན་མོང་གི་ལུང་མདོ་མྱང་འདས་ལས་ཀྱང་། སེམས་ཅན་ཐམས་ཅད་ཀྱི་ལུས་ཀྱི་ནང་ན་མཚན་བཟང་པོ་སུམ་ཅུ་རྩ་གཉིས་ཡོད་དོ། །དཔེ་བྱད་བཟང་པོ་བརྒྱད་ཅུ་ཡོད་དོ། །སྟོབས་བཅུ་ཡོད་དོ། །མི་འཇིགས་པ་བཞི་ཡོད་དོ། །ཞེས་སོགས་བཤད་པའི་ ― MLP018_Page_0358 ―
[མ་དཔེ་གཟིགས་ན་འདིར་གནོན།]
ཕྱིར། རྣལ་མའི་ལན། སྟོན་པ་ཡབ་ཡུམ་གཉིས་པོ་ཡ་མི་འབྲལ་ཏེ། གཅིག་གི་ཡོན་ཏན་གཅིག་ལ་ཡོད་པར་ཁས་ལེན། བཞི་བཅུ་རྩ་གཉིས་པོ་ཐམས་ཅད་ལ་ངོ་བོའ་སྒོ་ནས་བཟང་ངན་མེད་ཀྱང་། གདུལ་བྱར་སྣང་བའི་ཆ་ནས་ཐུན་མིན་གྱི་མཚན་དཔེ་ལྡན་མི་ལྡན་གནས་སྐབས་ཀྱི་སྣང་ཆ་གཙོ་ཆེ་ཆུང་ལ་ལྟོས་ནས་བཞག་པར་མངོན། ཡེ་ཤེས་ཀྱི་སྐུ་གདུལ་བྱས་མི་མཐོང་ན་ཧ་ཅང་ཐལ་ཞིང་། སློབ་དཔོན་པདྨ་སོགས་དང་སར་གནས་ཀྱི་སེམས་དཔའ་མཐའ་དག་ཡེ་ཤེས་ཀྱི་སྐུ་ཅན་ཡིན་ཏེ། རང་ལུས་གདོད་ནས་ཕྱག་རྒྱ་ཆེ། །སྒོམ་པས་མངོན་དུ་གྱུར་པའི་ལྷ། །ཞེས་སོགས་རྒྱ་ཆེར་བཤད་པས་སོ། །རྩ་རླུང་ཐིག་ལེ་ལ་སྤུ་རིས་འབྱེད་དེ་གདོད་ནས་གྲུབ་པའི་རྩ་རླུང་ཐིག་ལེ་ཡེ་ཇི་བཞིན་པའི་རིགས་ལྔར་བཤད་པའི་ཕྱིར་རོ། །བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞེས་པ་འདི་སྟོན་པས་གསུངས་སམ། སྡུད་པ་པོས་བརྩམས་པའི་ཚིག་གང་ཡིན་ཞེས་པ་ལ། སྟོན་པས་སྟོན་པ་ལ་ཕྱག་འཚལ་བ་དགོས་མེད་དུ་ཐལ། དེ་ལྟར་བཙལ་བ་ཐུག་མེད་དུ་འགྱུར་བའི་ཕྱིར། གཉིས་པ་ལྟར་ན་གསང་བདག་ལག་ན་རྡོ་རྗེ་དེ་ཆོས་ཅན། ཁྱོད་སྟོན་པ་དང་དགོངས་པ་དབྱེར་མེད་མ་ཡིན་པར་ཐལ། ཁྱོད་ཀྱི་སྟོན་པ་ཀུན་བཟང་ལྷག་པའི་ལྷར་བྱས་ཏེ་ཕྱག་མཛད་པའི་ཕྱིར། འདི་སྐད་བཤད་པ་ཞེས་པའི་གླེང་གཞི་ཕུན་སུམ་ཚོགས་པ་དེ་ཆོས་ཅན། སྟོན་པའི་གསུང་དངོས་ཡིན་པར་ཐལ། བཤད་ཅེས་པ་དེ་སྟོན་འཁོར་དགོངས་པ་དབྱེར་མེད་ཀྱི་ཕྱོགས་ནས་བཞག་པའི་ཐུན་མོང་གི་གླེང་གཞི་ལས་ཁྱད་པར་འཕགས་པའི་འཕགས་ཆོས་སུ་བཤད་པའི་ཕྱིར་ཏེ། བརྟག་གཉིས་ལས། འཆད་པ་པོ་ང་ཆོས་ཀྱང་ང་། །རང་གི་ཚོགས་ལྡན་ཉན་པའང་ང་། །ཞེས་གསུངས་པའི་ཕྱིར། འདོད་ན། རྒྱུད་འདི་ལ་གླེང་གཞི་མ་ཚང་བར་ཐལ། འདི་སྐད་བཤད་པ་ཞེས་པའི་གླེང་གཞི་དེ་སྟོན་པའི་གསུང་གང་ཞིག གླེང་གཞི་སྟོན་པས་དངོས་སུ་མ་གསུངས་པའི་ཕྱིར་ཏེ། ཉི་འོད་སེང་གེའི་རྒྱ་ཆེར་འགྲེལ་ལས། བཀའ་ཐམས་ཅད་ལ་མགོ་བོར་གླེང་གཞི་དང་། སྒབ་ཏུ་མངོན་པར་བསྟོད་པ་ཆུགས་ལ་བཀའ་ཡང་དག་པའི་དོན་དང་མི་འགལ་བར་སྒྲོགས་ཤིག ཅེས་བཤད་པའི་ཕྱིར། ཡང་བསམ་གྱིས་མི་ཁྱབ་པ་ཐམས་ཅད་ ― MLP018_Page_0359 ―
[མ་དཔེ་གཟིགས་ན་འདིར་གནོན།]
དུ་སྐུ་གསུང་ཐུགས་སྣ་ཚོགས་སུ་སྣང་བ་ཞེས་པའི་རྗེས་སུ། ཐབས་དང་ཤེས་རབ་ཀྱི་ཞབས་གཉིས། ཞེས་བཤད་པས། སྐུ་གསུང་ཐུགས་སྣ་ཚོགས་ལ་ཞབས་གཉིས་ལས་མེད་པར་ཐལ། དེ་ལྟར་བཤད་པའི་ཕྱིར། ཡང་སྐུ་གསུང་ཐུགས་བསམ་གྱིས་མི་ཁྱབ་པའི་དབུ་གསུམ་དང་ལྡན་པ་ཞེས་པས་སྐུ་གསུང་ཐུགས་བསམ་གྱིས་མི་ཁྱབ་པ་ལ་དབུ་གསུམ་ལས་མེད་པར་ཐལ། དེ་ལྟར་བཤད་འདུག་པའི་ཕྱིར། ཡང་། རྒྱ་ཕྱོགས་བཅུར་ཡོངས་སུ་མ་ཆད་པ་ཞེས་པ་དང་། གྲུ་བཞིར་གྱུར་པ་ཞེས་པ་འགལ་ཏེ། རྒྱ་མ་ཆད་ན་གྲུ་བཞིར་སྣང་བ་མི་འཐད་དེ། གྲུ་བཞིར་སྣང་བ་སྟེ་ནམ་མཁའ་གོ་ཕྱེ་ནས་གྲུ་བཞིར་སྣང་བ་ཡིན་པའི་ཕྱིར། ཕྱི་དང་ནང་མེད་པ་ཞེས་པ་དང་། ཀུན་ཏུ་ཡང་ནང་དུ་གྱུར་པ་ཞེས་བཤད་པ་འགལ་ཏེ། ཀུན་ཏུ་ནང་དུ་གྱུར་པ་ཡིན་ན་ཕྱི་ནང་ཡོད་པ་ཡིན་པའི་ཕྱིར། ཡང་གདན་གྱི་སྐབས་སུ་དབུས་སུ་སེང་གེ ཤར་དུ་གླང་པོ། ལྷོར་རྟ་མཆོག ནུབ་ཏུ་རྨ་བྱ། བྱང་དུ་ཤང་ཤང་སྟེ་སྲོག་ཆགས་རེ་རེ་ཡང་བརྒྱད་བརྒྱད་དུ་གནས་ནས་ཁྲི་རྐང་འདེགས་པ་མ་ཡིན་པར་ཐལ། ཁྲི་རེ་རེ་ལ་སྲོག་ཆགས་ལྔ་ཀ་མ་ཚང་བའི་ཕྱིར། དེ་ལྟར་ཚང་དགོས་ཏེ་རྟགས་སྲོག་ཆགས་ལྔ་པོ་ཁྲིར་སྣང་བ་དོན་མི་འཇིགས་པ་བཞི། སྟོབས་བཅུ། རྫུ་འཕྲུལ་རྐང་བཞི། དབང་བཅུ། ཕྲིན་ལས་བཞི་རྣམས་ཐུགས་སུ་ཆུད་པའི་དོན་རྟགས་ཁྲི་རྐང་འདེགས་པའི་རྣམ་པར་ཤར་བའི་ཕྱིར་ཏེ། དབང་བསྐུར་རྒྱལ་པོའི་རྒྱུད་ལས། ཐུགས་ནི་མི་འཇིགས་བཞི་ཡིས་བདུད་བཞི་འཇོམས། །ཞེས་སོགས་གསུངས་པའི་ཕྱིར། ཡང་ཁ་ཅིག་གིས། གདན་གྱི་སྲོག་ཆགས་ལྔ་པོ་འདི་རྒྱུད་མས་སྦྱངས་ཡིན་པ་མི་འགལ་ཏེ། སྨོན་ལམ་གུས་པའི་གདན། བྱང་ཆུབ་སེམས་དཔའི་ལུས་གདན་དུ་ཕུལ་ནས་ཉོན་མོངས་པའི་སྒྲིབ་པ་སྦྱོང་བའི་ཕྱིར། རྣ་བས་ཆོས་ཉན་ནས་ཤེས་བྱའི་སྒྲིབ་པ་སྦྱོང་ཟེར་བ་ཡང་མི་འཐད་དེ། གདན་གྱི་སྲོག་ཆགས་ཀྱི་རྣམ་པར་གནས་པའི་བྱང་ཆུབ་སེམས་དཔའ་དེ་ཆོས་ཅན། ཁྱོད་ཉོན་སྒྲིབ་སྦྱངས་ཟིན་པའི་གང་ཟག་མ་ཡིན་པར་ཐལ། སངས་རྒྱས་ཀྱི་ཞིང་དུ་ཡང་ལུས་གདན་དུ་ཕུལ་ནས་ཉོན་སྒྲིབ་སྦྱོང་བའི་ཕྱིར། འདོད་ན། དེ་འདྲའི་བྱང་སེམས་ཆོས་ཅན། ཁྱོད་ཉོན་སྒྲིབ་ཟད་པར་སྤངས་པའི་གང་ཟག་ཡིན་པར་ཐལ། ཁྱོད་སངས་རྒྱས་ ― MLP018_Page_0360 ―
[མ་དཔེ་གཟིགས་ན་འདིར་གནོན།]
ཀྱི་ཞིང་དུ་གནས་པའི་གང་ཟག་ཡིན་པའི་ཕྱིར། དེ་ལྟར་ཡང་གསེར་འོད་དམ་པ་ལས། ཉོན་མོངས་པའི་སྒྲིབ་པ་དག་ནས་སངས་རྒྱས་སྤྲུལ་པའི་སྐུའི་ཞལ་མཐོང་ངོ་། །ཤེས་བྱའི་སྒྲིབ་པ་དག་ནས་ལོངས་སྤྱོད་རྫོགས་པའི་སྐུའི་ཞལ་མཐོང་ངོ་། །སྙོམས་འཇུག་གི་སྒྲིབ་པ་དག་ནས་སངས་རྒྱས་ཆོས་ཀྱི་སྐུའི་ཞལ་མཐོང་ངོ་། །ཞེས་གསུངས་པའི་ཕྱིར་དང་། ཐུན་མོང་གི་ཐེག་པའི་སྐབས་སུ་ཡང་། ཉོན་སྒྲིབ་ནི་ས་དང་པོ་ཐོབ་པ་དང་དུས་མཉམ་དུ་སྤང་བར་བཤད་པའི་ཕྱིར་རོ། །ཡང་། རྒྱུད་འདི་སྟོན་པས་བསྡུས་སམ་འཁོར་གྱིས་བསྡུས། དེ་གཉིས་ཀས་བསྡུས་སམ། དང་པོ་ལྟར་ན་འདིའི་སྡུད་པ་པོ་དེ་ཆོས་ཅན། སྟོན་པ་མ་ཡིན་པར་ཐལ། འཁོར་གྱི་ནང་ནས་སྐལ་བ་དང་ལྡན་པའི་གསང་བདག་ལག་ན་རྡོ་རྗེ་དེ་ཡིན་པའི་ཕྱིར་ཏེ། རྒྱ་མཚོ་ལས། འཁོར་གྱི་ནང་ནས་སྐལ་ལྡན་མཆོག །འདུལ་བའི་དུས་བབ་གསང་བའི་བདག །ལག་ན་རྡོ་རྗེས་བསྡུ་བ་མཛད། །ཅེས་གསུངས་པའི་ཕྱིར་རོ། །གཉིས་པ་ལྟར་ན། སྟོན་པ་ཆོས་ཅན། ཁྱོད་ཀྱིས་རྒྱུད་འདི་མིང་ཚིག་ཏུ་བསྡུས་པར་ཐལ། དེ་ལྟར་བསྡུས་ནས་གཏན་ལ་ཕབས་པའི་ཕྱིར། འདོད་ན། སྟོན་པ་ཆོས་ཅན། ཁྱོད་ཀྱིས་མིང་ཚིག་སྒྲར་སྣང་བའི་ཆོས་གསུངས་ཡོད་པར་ཐལ། ཆོས་ཕུང་བརྒྱད་ཁྲི་བཞི་སྟོང་མིང་ཚིག་སྒྲར་སྣང་བའི་སྒོ་ནས་གསུངས་པའི་ཕྱིར་ཏེ། འདི་ཉིད་ལས། མ་རིག་པའི་རྣམ་པར་རྟོག་པ་ཉོན་མོངས་པ་སྟོང་ཕྲག་བརྒྱད་ཅུའི་གཉེན་པོར་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞི་གསུངས་སོ། །གསུང་ངོ་། །གསུང་བར་འགྱུར་རོ། །ཞེས་གསུངས་པའི་ཕྱིར། འདོད་མི་ནུས་ཏེ། སྟོན་པས་སྒྲ་དང་མིང་ཚིག་ཏུ་སྣང་བའི་ཆོས་འབྲུ་གཅིག་ཀྱང་གསུང་པ་མེད་དེ། འདི་ཉིད་ལས། སྒྲ་དང་མིང་ཚིག་ཀུན་ལས་འདས། །ཞེས་དང་དཔེར་ན་བྲག་ཆའི་སྒྲ་བཞིན་ནོ། །ཞེས་དང་། ཐུན་མོང་གི་ལུང་ལས་ཀྱང་། ང་མངོན་པར་རྫོགས་སངས་རྒྱས་པ་གང་གི་ནུབ་མོ་ནས་མྱ་ངན་ལས་འདའ་བའི་བར་ཚིག་དང་ཡི་གེར་སྣང་བ་འབྲུ་གཅིག་ཀྱང་མ་གསུངས་སོ། །ཞེས་བཤད་པའི་ཕྱིར་རོ། །ཡང་སྟོན་པས་མ་གསུངས་སོ་ཞེ་ན། སྟོན་པ་ཆོས་ཅན། ཁྱོད་ཀྱིས་གསུངས་པར་ཐལ། ཁྱོད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ནས་གསུངས་པའི་ཕྱིར་ཏེ། དེ་བཞིན་གཤེགས་པ་ ― MLP018_Page_0361 ―
[མ་དཔེ་གཟིགས་ན་འདིར་གནོན།]
ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཞེས་བཤད་པའི་ཕྱིར། རྣལ་མའི་ལན། སྟོན་པས་མིང་ཚིག་ཡི་གེར་སྣང་བའི་ཆོས་མ་གསུངས་ཀྱང་། དཔེར་ན་བྲག་ཆའི་ངོས་ནས་སྒྲ་མ་བརྗོད་ཀྱང་སྐྱེས་བུས་ཇི་ལྟར་སྨྲས་པའི་བྲག་ཆའི་སྒྲ་ལན་དུ་བྱུང་བ་ལྟར་སངས་རྒྱས་དེ་བཞིན་ཉིད་དུ་གནས་པ་ལས་མ་གཡོས་ཀྱང་། གདུལ་བྱའི་སྣང་ངོར་ཐུགས་རྗེ་གསུང་གི་བྱིན་རླབས་སོ་སོའ་བློ་དང་འཚམས་པར་འབྱུང་བ་ཡིན་ཏེ། འདི་ཉིད་ལས། དེ་བཞིན་ཉིད་དུ་གསུང་པ་མེད། །ཡི་གེ་མེད་དང་རིག་པའི་གསུང་། །ལྗགས་ཀྱི་རྩེ་མོར་མ་ཕྱུང་ཡང་། །ཐུགས་རྗེ་གསུང་གི་བྱིན་རླབས་ཀྱིས། །འགྲོ་དོན་སྣ་ཚོགས་སོ་སོར་གསལ། །གསལ་ཉིད་གསུང་གི་རྡོ་རྗེའི་མཆོག །དེ་བཞིན་ཉིད་ལས་མ་གཡོས་ཀྱང་། །དཔེར་ན་བྲག་ཆའི་སྒྲ་བཞིན་ནོ། །ཞེས་གསུངས་པས་སོ། །དྲི་བ་གསུམ་པ་ནི། གང་ཟག་ལ་རང་རྒྱུད་པ་དང་སྤྲུལ་པ་བ་གཉིས་ལས། སྤྱིར་སེམས་ཅན་གྱི་དོན་ལ་བསམ་བཞིན་དུ་སྐྱེ་བ་བཞེས་པ་སྤྲུལ་པ་བ་དང་། རང་གི་རང་མ་རིག་པས་འཁྲུལ་ཏེ་དབང་མེད་དུ་འཁོར་བར་སྐྱེས་པ་ནི་རང་རྒྱུད་པ་ཡིན་འདྲ་ཡང་ཞིབ་ཏུ་ཕྱེ་ན་ཁས་ལེན་ལ་ལྟོས་དགོས་འདྲ་བསམ་པ། ལུང་ལས། ང་ཡི་འདི་ཀུན་ཁྱབ་པ་དེ། །འགྲོ་བའི་རང་བཞིན་གཞན་མ་མཐོང་། །ཞེས་དང་། མཁན་ཆེན་བླ་མས། མདོར་ན་གདོད་མའི་སེམས་ལས་འཕྲོས་པའི་ཕྱིར། །སྐྱེ་བ་བཟང་ངན་ཀུན་ཀྱང་དེའི་རྣམ་སྤྲུལ། །རྦ་རླབས་ཆུ་ལས་གཞན་དུ་གཡོས་པ་མེད། །ཅེས་པས། དག་མ་དག་ཐམས་ཅད་ཆོས་ཉིད་ཀྱི་རོལ་རྩལ་ལས་མ་འདས་པའི་ཕྱིར། བླ་མེད་ཀྱི་ཐེག་པ་འདིའི་གྲུབ་མཐར་སེམས་ཅན་ཐམས་ཅད་སྤྲུལ་པ་བར་ཁས་བླངས་ན་སྐྱོན་ཨེ་ཡོང་ལགས། ཞེས་པ་ལ་གྲུབ་མཐའ་འདིའི་སྐབས་སུ་ཐ་སྙད་སྣང་ལུགས་དང་། དོན་གནས་ལུགས་གཉིས་ལས། དང་པོ་ལྟར་ན། སེམས་ཅན་ཐམས་ཅད་སྤྲུལ་པ་བར་ཁས་བླངས་ན་ཧ་ཅང་ཐལ་ཏེ། སྲིད་པར་སྣང་བའི་སེམས་ཅན་འདི་དག་བདག་འཛིན་གྱི་རྒྱུ་ལས་བྱུང་བའི་ལོག་རྟོག་འཁྲུལ་པར་གནས་པའི་ཕྱིར་ཏེ། འདི་ཉིད་ལས། སྲིད་རྩེའི་ཉེས་དམིགས་བདག་ཏུ་རྟོག་ལས་འཕྲོས། །ཞེས་དང་། ལོག་པར་རྟོག་པ་ཙམ་ཞིག་ལས། ། ― MLP018_Page_0362 ―
[མ་དཔེ་གཟིགས་ན་འདིར་གནོན།]
ཕྲ་ཞིང་ཟབ་པའང་ཡོད་མ་ཡིན། །ཞེས་གསུངས། ཐེག་པ་ཆེན་པོའི་བྱང་ཆུབ་ཀྱི་སེམས་རྒྱུད་ལ་སྐྱེས་པ་དང་། རང་གཞན་གྱི་དོན་གྲུབ་པའི་ལམ་གྱི་རྒྱུར་འགྲོ་བའི་དགེ་ཚོགས་སྒྲུབ་ནུས་ཕན་ཆད་སངས་རྒྱས་ཀྱི་སྤྲུལ་པ་ཡིན་པར་ཁས་བླངས་པ་ལ་སྐྱོན་མེད་འདྲ་སྟེ། སྤྱོད་འཇུག་ལས། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འགྲོ་བ་ལྷ་མིར་བཅས་པས་ཕྱག་བྱར་འགྱུར། །ཞེས་དང་། མདོ་སྡེ་རྒྱན་ལས། སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང་། །དགེ་ལ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་གསུངས་པའི་ཕྱིར། དོན་གནས་ལུགས་ཀྱི་དབང་དུ་བྱས་ན། འདི་ཉིད་ལས། ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །ཞེས་དང་། བརྟག་གཉིས་ལས་ཀྱང་། ང་ཡིས་འདི་ཀུན་ཁྱབ་པ་སྟེ། །འགྲོ་བའི་རང་བཞིན་གཞན་མ་མཐོང་། །ཞེས་སོགས་གསུངས་པས་མཚོན་ནོ། །སེམས་ཅན་གྱི་ཁམས་ལ་གཟིགས་པ་འཇུག་པའི་ཚུལ་ཡང་། སངས་རྒྱས་རང་གི་ངོ་བོ་ཆོས་ཉིད་དེ་བཞིན་ཉིད་ཀྱི་ཀློང་དུ་གཤེགས་པས། རང་རིག་པ་དེ་ཉིད་ཀྱང་ཤེས་རིག་གི་ཆོས་: ཀྱི་སྟོང་ཀྱིས་སྟོངས་པས་གདོད་མ་ནས་འོད་གསལ་བའི་ཕྱིར་རང་བྱུང་གི་ཡེ་ཤེས་ཞེས་བྱ་ཞིང་། དེ་ཉིད་ཡོངས་སུ་དག་པའི་ཞིང་ཁམས་ན་སྐུ་དང་ཡེ་ཤེས་ཀྱི་བཀོད་པ་སྣ་ཚོགས་པར་སྣང་སྟེ། འདི་ཉིད་ལས། རང་བྱུང་ཡེ་ཤེས་གནས་མེད་སྣང་། །ཞེས་སོ། །སྣང་ལུགས་སེམས་ཅན་ནས་གཞལ་ན་འགྲོ་བ་རྣམས་ཀྱིས་ལོག་པར་རྟོག་པས་བརྟགས་པའི་སྒྲིབ་པ་དེ་ཡང་སངས་རྒྱས་རྣམས་ཀྱིས་རྣམ་པར་དག་པར་བྱེད་ཅིང་། :འགྲེལ་འབྲེལཔ་གསུམ་གྱི་:འགྲེལ་འབྲེལཔས་འགྲོ་བ་དྲུག་གི་དུས་དང་གནས་སྐབས་ཐམས་ཅད་དུ་དེ་བཞིན་གཤེགས་པའི་བྱིན་རླབས་འབྱུང་ཞིང་སྣང་བར་འགྱུར་ཏེ། འདི་ཉིད་ལས། ལོག་པར་རྟོག་བརྟགས་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །ཞེས་སོ། །དོན་མཛད་ཚུལ་ཡང་། དཔེར་ན་སྒྱུ་མའི་སྐྱེས་བུས་སྒྱུ་མའི་སྐྱེ་བོ་མང་པོ་སྒྱུ་མའི་ ― MLP018_Page_0363 ―
[མ་དཔེ་གཟིགས་ན་འདིར་གནོན།]
སྡུག་བསྔལ་གྱི་ནང་ནས་བཏོན་ཏེ། སྒྱུ་མའི་བདེ་བ་ལ་བཀོད་པའི་ཚུལ། སྒྱུ་མའི་མིག་འཕྲུལ་ལ་སྣང་བ་བཞིན་དུ་སྤྲུལ་པ་སྒྱུ་མ་ལྟ་བུས་སེམས་ཅན་སྒྱུ་མ་ལྟ་བུ་རྣམས་སྒྱུ་མ་ལྟ་བུའི་འཁོར་བ་ལས་བཏོན་ནས། བྱང་ཆུབ་སྒྱུ་མ་ལྟ་བུ་ལ་འགོད་པའི་ཚུལ་སེམས་ཅན་འཁྲུལ་པའི་བློ་ལ་སྣང་སྟེ། འདི་ལྟར་སྣང་བ་ཙམ་ལ་ཐུགས་རྗེ་ཆེན་པོས་སེམས་ཅན་བསྒྲལ་ཞེས་བྱ་སྟེ། ཇི་སྐད་དུ། སེམས་ཅན་སྒྱུ་མའི་རྣམ་པ་སྟེ། །བྱང་ཆུབ་ཀྱང་ནི་སྒྱུ་མ་འདྲ། །དཔེར་ན་སྒྱུ་མའི་མཁན་པོ་འགས། །གྱོ་མོ་ལ་ནི་སྔགས་བཟླས་ཏེ། །ལེགས་པར་བྱས་པའི་གཟུགས་དག་ལ། །སྦྱོར་བ་གོམས་པས་བསྣུན་ན་ནི། །རྐང་བཞི་པ་ལ་སོགས་པའི་གཟུགས། །ཞེན་པའི་སེམས་ལ་སྣང་བར་འགྱུར། །དེ་བཞིན་བསོད་ནམས་ཡེ་ཤེས་ལས། །བྱུང་བའི་ཚོགས་ནི་བསྒོས་པའི་སེམས། །སེམས་ཅན་རྣམས་ཀྱི་བསམ་པ་ལ། །བླ་མེད་བྱང་ཆུབ་སྣང་བ་བྱེད། །ཅེས་གསུངས་པ་ལྟ་བུའོ། །དྲི་བ་བཞི་པ་ནི། སྔགས་ཀྱི་ས་བཅུ་རྒྱུན་གྱི་ཐ་མར། མདོ་སྡེ་རྒྱན་ལས། སྒོམ་པ་ཐ་མ་ཐོབ་ནས་ནི། །འོད་ཟེར་ཆེན་པོའི་དབང་བསྐུར་རོ། །ཞེས་གསུངས་པ་ལྟར། མཐར་ཐུག་འབྲས་དབང་བསྐུར་བའི་ཚེ། འདོད་ཆགས་བདེ་ཆེན་ལམ་གྱི་ཡས་འབབ་དགའ་བཞིའི་འགྲོས་ལ་ཐུན་མོང་གི་ས་བཅུ་དང་ལམ་ལྔ། མས་བརྟན་དགའ་བཞིའི་འགྲོས་ཀྱི་ཁྱད་པར་གྱི་ས་བཅུ་དང་ལམ་ལྔ་རྫོགས་ནས་འཚང་རྒྱ་ཚུལ་གསུངས་པ། ཐུན་ཁྱད་ཀྱི་ས་ལམ་དེའི་གོང་དུ་རྫོགས་ཚུལ་བྱུང་བ་ཇི་ལྟར་ཡིན་ཞེས་པ་ལ། དེ་ཡང་། སྒྱུ་འཕྲུལ་རྡོ་རྗེ་ལས། ས་དང་ས་ཡི་ཡོན་ཏན་རྣམས། །རྩ་རྣམས་ཀྱི་ནི་སྐྱེ་འབྲི་ལས། །རླུང་དང་ཡེ་ཤེས་ལས་འདོད་དེ། །སྦྱང་གཞི་སྦྱོང་བྱེད་འཕེལ་དང་:འགྲིགའགྲིབ། །སྲེད་དང་མྱ་ངན་འདས་འཕེལ་:འགྲིག འགྲིབ། །རྣམ་བཞིའམ་གསུམ་མམ་ལྔ་འཁོར་ལོ། །གཉིས་གཉིས་ཀྱི་ནི་གཅིག་མ་རྫོགས།། ས་བཅུ་ཐ་མས་ཡེ་ཤེས་བ། །བཞོ་བས་སྟེང་དང་འོག་ཏུ་གྲགས། །ཞེས་པའི་དོན་ཀུན་མཁྱེན་ཆོས་རྗེས་ཡིད་བཞིན་མཛོད་དུ། འཁོར་ལོ་བཞི་ཡི་རླུང་སེམས་ལས་རུང་ཚེ། །ལམ་བཞིའི་ཡོན་ཏན་རིམ་གྱིས་འཆར་བ་སྟེ། །དབུ་མའི་རྩ་མདུད་གཉིས་གཉིས་གྲོལ་བ་ལས། །ས་བཅུའི་ ― MLP018_Page_0364 ―
[མ་དཔེ་གཟིགས་ན་འདིར་གནོན།]
ཡོན་ཏན་ནང་ནས་འཆར་བར་བཞེད། །ཅེས་གསུངས་པ་ལྟར་ལྟེ་སྙིང་མགྲིན་པ་སྤྱི་བོའ་འཁོར་ལོ་ལས་སུ་རུང་བ་ལས་ཚོགས་སྦྱོར་མཐོང་སྒོམ་གྱི་ལམ་བཞིའི་ཡོན་ཏན་འཆར་ཞིང་། དབུ་མ་ལ་རོ་རྐྱང་གི་མདུད་པ་ཉི་ཤུ་རྩ་གཅིག་ཡོད་པ་ལས། མདུད་པ་གཉིས་གཉིས་གྲོལ་བ་ན་དེར་དྭངས་མ་ཡེ་ཤེས་ཀྱི་རླུང་རེ་རེ་ཆུད་པས་ཉི་ཤུའི་ས་བཅུའི་ཡོན་ཏན་དང་། ཐ་མ་ཉེར་གཅིག་པས་གྲོལ་བས་སངས་རྒྱས་ཀྱི་ཡོན་ཏན་འཆར་བར་བཤད་ཅིང་། དེ་དག་ཅུང་ཟད་ཕྱེ་སྟེ་བཤད་ན། ལུས་ལྷར་བསྒོམ་པའི་ཏིང་ངེ་འཛིན་ཐོབ་པས་སྔགས་ཀྱི་ཚོགས་ལམ་དུ་ཞུགས་པ་ཡིན་ཞིང་། དེར་བརྟན་པ་ཐོབ་པ་ན་ལྟེ་བ་སྤྲུལ་པའི་འཁོར་ལོ་རླུང་སེམས་རིམ་གྱིས་ཚུད་དེ་ལས་སུ་རུང་བ་ལས་ཚོགས་ལམ་ཆེ་འབྲིང་ཆུང་གསུམ་གྱི་ཡོན་ཏན་རྣམས་འཆར་བ་དང་། རྟོག་ཚོགས་སྣང་སྟོང་གཉིས་ཀྱི་ལྷའི་དཀྱིལ་འཁོར་དུ་གསལ་བ་ལ་བློ་གནས་པའི་ཏིང་ངེ་འཛིན་མངའ་ཞིང་ཆོས་རྒྱུན་གྱི་ཏིང་ངེ་འཛིན་ཐོབ་པས་སངས་རྒྱས་སྤྲུལ་པའི་སྐུ་ལས་གདམས་ངག་ཉན་ནུས་པ་སྟེ། མདོ་སྡེ་རྒྱན་ལས། དེ་ཚེ་ཆོས་ཀྱི་རྒྱུན་ལས་ནི། །སངས་རྒྱས་རྣམས་ལ་ཞི་གནས་དང་། །ཡེ་ཤེས་ཡངས་པ་ཐོབ་བྱའི་ཕྱིར། །གདམས་ངག་རྒྱ་ཆེར་རྙེད་པར་འགྱུར། །འཇིག་རྟེན་ཁམས་ནི་རྣམས་སུ་འགྲོ། །ཞེས་སོ། །དེ་ནས་ཆོས་ཀྱི་འཁོར་ལོའ་རླུང་སེམས་ལས་སུ་རུང་བས་དྲོད་རྩེ་གཉིས་དང་བཟོད་པ་ཆོས་མཆོག་གཉིས་ཏེ་སྦྱོར་ལམ་གྱི་ཡོན་ཏན་རྣམས་འཆར་ཞིང་། སྣང་བ་ཟུང་འཇུག་ལྷའི་དཀྱིལ་འཁོར་ལ་སྔར་ལས་གསལ་བརྟན་དུ་གྱུར་པ་ཡིན། དེ་ནས་ལོངས་སྤྱོད་འཁོར་ལོའ་རླུང་སེམས་ལས་སུ་རུང་ཚེ་དབུ་མའི་མདུད་པ་དང་པོ་གཉིས་གྲོལ་བས་ཆོས་ཉིད་རང་མཚན་བསྐྱེད་དུ་བྱར་མེད་པ་མཐོང་སྟེ། འཕགས་པའི་ས་དང་པོ་མཐོང་ལམ་གྱི་ཡོན་ཏན་བརྒྱ་ཕྲག་བཅུ་གཉིས་འཆར་ཞིང་ལོངས་སྤྱོད་རྫོགས་པའི་སྐུ་ལ་ཆོས་ཉན་ནུས། དེ་ནས་སྤྱི་བོའ་བདེ་ཆེན་གྱི་འཁོར་ལོའ་རྩ་མདུད་ལས་སུ་རུང་ཚེ་དབུ་མའི་མདུད་པ་གསུམ་པ་ནས་ཉི་ཤུ་པའི་བར་གཉིས་གཉིས་གྲོལ་བས་སྒོམ་ལམ་ས་དགུའི་ཡོན་ཏན་རྣམས་རིམ་གྱིས་འཆར། དེ་ཡང་ས་གཉིས་པ་དྲི་མ་མེད་པ་ནས་ས་དགུ་པ་ལེགས་པའི་བློ་གྲོས་ཀྱི་བར་ས་བརྒྱད་པོ་ཐམས་ཅད་ཡེ་ཤེས་སྒྱུ་མའི་སྐུ་ཅན་ ― MLP018_Page_0365 ―
[མ་དཔེ་གཟིགས་ན་འདིར་གནོན།]
སྒོམ་ལམ་ཕྱག་ཆེན་རིག་འཛིན་དང་། ས་བཅུ་པ་ཆོས་ཀྱི་སྤྲིན་ནི་སྐུ་ལྔ་ལྷུན་གྲུབ་རྡོ་རྗེ་འཆང་གི་ཆ་བྱད་འཛིན་པ་མཐར་ལམ་ལྷུན་གྲུབ་རིག་འཛིན་ཞེས་བྱའོ། །མཁས་པ་སྔ་མ་མང་པོའི་བཞེད་པར་ཏིང་ངེ་འཛིན་གྱི་སའི་སྐབས་སུ་དུས་སྦྱོར་བཅུ་གཉིས་འགགས་པའི་དང་པོ་སྦྱོར་ལམ་ཆོས་མཆོག གཉིས་པ་ནས་རིམ་པར་འཕགས་པའི་བསླབ་ལམ་ས་བཅུ་དང་མི་སློབ་པའི་སངས་རྒྱས་ཀྱི་ས་རྣམས་དང་སྦྱར་ནས་བཤད་ནའང་། ཡེ་ཤེས་ཀྱི་སྐུ་ཐོབ་པའི་སྔ་རོལ་དུ་དུས་སྦྱོར་བཅུ་གཉིས་མ་འགགས་ན་ཡེ་ཤེས་ཀྱི་སྐུ་འགྲུབ་པར་མི་འགྱུར་ཏེ། ཚེ་འདིའི་ཕུང་པོ་མ་འགགས་པར་བར་དོའ་སྲིད་པ་འགྲུབ་མི་ཐུབ་པ་བཞིན་ནོ། །དེར་མ་ཟད་ཡོན་ཏན་གྱི་ཁྱད་པར་ཡང་ཏིང་ངེ་འཛིན་གྱི་ས་དང་པོ་ཐོབ་ནས་ཕྱོགས་བཅུའི་འཇིག་རྟེན་གྱི་ཁམས་གཅིག་གི་དོན་མཐོང་བར་བཤད་པ་དང་། ས་གཉིས་པ་ནས་གཉིས་སོགས་ཕྱི་མ་ཕྱི་མ་ཉིས་འགྱུར་གྱི་གྲངས་ཚད་བཟུང་ནས་དུས་འཁོར་དུ་གསུངས་པ་ལྟར། དེའི་ལུགས་ཀྱི་བཅུ་པ་ཐོབ་ན་འཇིག་རྟེན་གྱི་ཁམས་ལྔ་བརྒྱ་དང་བཅུ་གཉིས་ཀྱི་དོན་མཐོང་བ་ལས་མ་བྱུང་བས་དེ་ལྟར་ན་མདོའ་ཐེག་པའི་སྐབས་སུ་ཡང་། འཕགས་པ་ས་བཅུ་པའི་ཡོན་ཏན་ནི། འཇུག་པ་ལས། རེ་ཞིག་བཅུ་པ་འདི་ཡི་ཡོན་ཏན་དག །ངག་གི་སྤྱོད་ཡུལ་ལས་ཆེས་འདས་གྱུར་ཅིང་། །ངག་གི་སྤྱོད་ཡུལ་མ་ཡིན་བསྡོམས་རྣམས་ནི། །རྡུལ་དག་ཇི་སྙེད་ཡོད་པ་དེ་སྙེད་འགྱུར། །ཞེས་མདོ་སྡེ་ས་བཅུ་པའི་དོན་བསྡུས་ནས་གསུངས་པ་སོགས་མདོ་བསྟན་བཅོས་མང་པོ་དང་འགལ་བའི་སྐྱོན་གནས། དེས་ན་འདིར་གསང་སྔགས་རང་ལམ་གྱི་ས་ལམ་སྦྱོར་ཚུལ་ནི། བསྐྱེད་རིམ་རགས་པ་དང་། ཕྲ་བ་ལ་བརྟན་པ་ཐོབ་ན་རིམ་པས་ཡེ་ཤེས་ཕེབས་པ་དང་ཡེ་ཤེས་ལ་ཆེས་དབང་བ་ཞེས་དྲན་པ་ཉེར་བཞག་དང་ཡང་དག་སྤོང་བས་བསྡུས་པ་ཚོགས་ལམ་ཆུང་འབྲིང་གི་ཡོན་ཏན་རྫོགས། བསྐྱེད་རིམ་ཀླུངས་སུ་ཕེབས་ནས་རྫོགས་རིམ་གྱི་གསལ་སྣང་རྒྱུད་ལ་སྐྱེས་ཚེ་རྫུ་འཕྲུལ་རྐང་བཞིའི་ཡོན་ཏན་གྱི་བདག་ཉིད་ཚོགས་ལམ་ཆེན་པོ་ཐོབ། རྒྱུའི་རྫོགས་རིམ་ལ་གོམས་པས་དབང་པོ་ལྔའི་ཡོན་ཏན་རང་བཞིན་སྦྱོར་ལམ་དྲོད། དེ་ཉིད་བརྟན་པས་རྩེ་མོ་དང་། བཟོད་པ་རྣམས་ཐོབ་སྟེ་ནང་དུ་ཡས་འབབ་དགའ་བཞིའི་སས་བསྡུས་ ― MLP018_Page_0366 ―
[མ་དཔེ་གཟིགས་ན་འདིར་གནོན།]
པའི་ཞུ་བདེ་ལས་བྱུང་བ་སྟེ། ཏིང་ངེ་འཛིན་གྱི་ས་བཅུ་གཅིག་པ་མན་ཆད་ཀྱི་ཡོན་ཏན་རྫོགས་པའོ། །ཏིང་ངེ་འཛིན་གྱི་ས་བཅུ་གཉིས་པའི་སྐད་ཅིག་མ་སྟོང་བདུན་བརྒྱ་གོ་དགུ་ནི། སྦྱོར་ལམ་ཆོས་མཆོག་ཡིན་ཏེ། དེ་ཉིད་མས་བརྟན་གྱི་དགའ་བཞིས་བསྡུས་པ་སྟོབས་ལྔའི་རང་བཞིན་ཡེ་ཤེས་ཀྱི་སྐུ་ནམ་མཁའ་མཛོད་ཐོབ་པའོ། །ས་བཅུ་གཉིས་པའི་སྐད་ཅིག་ཐ་མ་རྫོགས་པའི་དུས་དེར་ཐམས་ཅད་སྟོང་པའི་ཡེ་ཤེས་ཤིན་ཏུ་རྣམ་པར་དག་པ་དོན་གྱི་རྫོགས་རིམ་གྱི་འོད་གསལ་ཐོབ་པས་བྱང་ཆུབ་ཡན་ལག་མཐོང་བའི་ལམ་སྟེ། རྣམ་པ་དག་པའི་རང་བཞིན་བདེན་པ་བཅུ་དྲུག་གོ །དེའི་ཚེ་སྔར་ཕྲ་ཡང་གི་ལུས་ཐོབ་མ་ཐོབ་གང་ཡིན་ཡང་རུང་སྟེ། རང་གི་སྣང་ངོར་སྒྱུ་ལུས་རླུང་སེམས་ཙམ་གྱི་ལྷ་སྐུ་སྣང་བའང་ནུབ་ཅིང་། ཟུང་འཇུག་གི་སྐུ་ཡང་མ་ཐོབ་པས། ཡེ་ཤེས་འོད་གསལ་རྐྱང་པའི་སྐུ་ཞེས་འདོགས་ཏེ། འཕགས་པའི་མཐོང་ལམ་བདེ་སྟོང་དེ་ཁོ་ན་ལ་མཉམ་པར་བཞག་པའི་འོད་གསལ་ཡིན་ལ། དེའི་དུས་སུ་འཁོར་བའི་ལུས་ངག་ཡིད་གསུམ་དང་ཆགས་རྟོག་རྣམས་སྤངས་ཟིན། དེ་རྗེས་འོད་གསལ་དེ་ལས་ལངས་ཚེ་ཆོས་ཉིད་མངོན་སུམ་དུ་རྟོགས་པའི་བདེན་པ་དང་ཡེ་ཤེས་ཀྱི་དཀྱིལ་འཁོར་རབ་འབྱམས་གཉིས་ངོ་བོ་དབྱེར་མེད་དུ་གྲུབ་པའི་ཟུང་འཇུག་དེ་རྒྱུན་མི་ཆད་པར་མཉམ་རྗེས་ཐམས་ཅད་དུ་འབྱུང་བ་ཟུང་འཇུག་རིག་པ་འཛིན་པའི་ཡེ་ཤེས་ཀྱི་སྐུ་གྲུབ་པའི་ཕྱིར། དེ་ནི་འདོད་གཟུགས་ཀྱི་རིག་པ་འཛིན་པ་དང་ལམ་མཆོག་ཡོངས་སུ་རྫོགས་པའི་ཚེ་དབང་སོགས་ལས་ཁྱད་པར་དུ་འཕགས་པས་བསླབ་ལམ་གྱི་མཆོག་གམ། གཙོ་བོར་གྱུར་པ་སྐུ་གསུང་ཐུགས་ཡེ་ཤེས་རྡོ་རྗེའི་གྲལ་དུ་ཚུད་པས་རྡོ་རྗེ་བཞི་དབྱེར་མི་ཕྱེད་པའི་ཡེ་ཤེས་ཀྱི་སྐུ་བརྙེས་པ་ཡིན་ཞིང་། འདི་ནི་འཕགས་ལམ་ཡན་ལག་བརྒྱད་ཀྱི་རང་བཞིན་སྒོམ་པའི་ལམ་གྱི་ས་དགུ་ཡིན། དེ་མན་ཆད་དུ་ལམ་རིགས་མི་འདྲ་བ་ཡོད་ཀྱང་། ས་བཅུ་རྒྱུན་ཐ་ནས་ལམ་འདི་འདྲ་ཁོ་ནས་རྫོགས་པའི་སངས་རྒྱས་ཀྱི་སར་བགྲོད་ཆོག་པའི་ཕྱིར་དང་། རྫོགས་པའི་སངས་རྒྱས་ཉིད་དང་རྣམ་པ་མཚུངས་པའི་ཕྱིར། སངས་རྒྱས་ཉིད་དང་། རྫོགས་པའི་སངས་རྒྱས་དང་། རྫོགས་པའི་བྱང་ཆུབ་དང་། རྡོ་རྗེ་སེམས་དཔའ་སོགས་ཀྱི་མཚན་ཡང་གསོལ་ལོ། །ས་བཅུ་རྒྱུན་ཐ་ ― MLP018_Page_0367 ―
[མ་དཔེ་གཟིགས་ན་འདིར་གནོན།]
འདིར་ལུས་ངག་ཡིད་གསུམ་དང་འཛག་བདེའི་གཉིས་སྣང་བསྐྱེད་པའི་ཆོས་རྟེན་ཁུ་རྡུལ་རླུང་གསུམ་དང་། དེ་གསུམ་དང་རོ་གཅིག་ཏུ་འདྲེས་པའི་བརྟེན་པ་སེམས་རྣམས་རགས་པ་བེམ་ཆོས་སུ་སྣང་བ་མེད་ཀྱང་། ཕྲ་བ་རྣམ་པར་ཤེས་པ་ཙམ་དུ་རིག་པ་ཡོད་པའི་ཕྱིར། གཉིས་སྣང་ཕྲ་མོའང་མ་འགགས་པས་དེ་སྦྱོང་བྱེད་ས་བཅུ་རྒྱུན་གྱི་ཐ་མར་འདོད་ཆགས་ཆེན་པོའི་ལམ་གྱི་དབང་བསྐུར་བས་ས་ལམ་རྫོགས་ཚུལ་གཅིག་བྱུང་བ་ནི། སྔར་གྱི་ས་ལམ་རྣམས་ཀྱིས་སེམས་ཉིད་ཀྱི་ཡོན་ཏན་རིལ་པོ་ཡོངས་སུ་རྫོགས་མ་ཐུབ་པས། བདེ་ཆེན་གྱི་ཡེ་ཤེས་དེ་ཡང་འགྱུར་བཅས་ཀྱི་ན་འཕར་བ་ཡིན་ལ། འདིར་མི་འགྱུར་བའི་བདེ་ཆེན་གྱི་ཡེ་ཤེས་མཐར་ཕྱིན་པའི་འགྲོས་ལ་ས་ལམ་རྫོགས་ཚུལ་དུ་བཞག་སྟེ། དེ་ཡང་མངོན་པར་བྱང་ཆུབ་པ་ཆེན་པོ་ཁུ་རྡུལ་རླུང་གསུམ་གྱི་བག་ཆགས་ཕྲ་མོ་ལྷག་མེད་དུ་འགགས་པས་འཛག་བདེའི་བག་ཆགས་ཀྱང་གཏན་ནས་སྤངས་ཏེ་སྐུ་གསུང་ཐུགས་ཡེ་ཤེས་རྡོ་རྗེ་དབྱེར་མི་ཕྱེེད་པ་སྐུ་བཞིའི་བདག་ཉིད་ཅན་དུ་སངས་རྒྱས་པ་སྟེ། དེ་ཡང་སྙིང་སྟོབས་ཁུ་བ་དག་པས་མཚན་དཔེ་རྫོགས་ཤིང་ཁ་སྦྱོར་གྱི་སྐུ་ཞིང་དང་མཆོད་པར་བཅས་པ་བྱུང་བ་སྐུ་རྡོ་རྗེ། རྡུལ་ཏེ་དམར་ཆ་དག་པས་བདེ་ཆེན་ཉིད་གཞོམ་མེད་ཀྱི་གསུང་རྣམ་པ་ཐམས་ཅད་པར་འཆར་བ་གསུང་རྡོ་རྗེ། མུན་པ་སྟེ་རླུང་དག་པས་བདེ་བ་ཆེན་པོའི་ཡེ་ཤེས་དེ་ཁོ་ནས་རྣམ་པར་མི་རྟོག་བཞིན་དུ་ཇི་ལྟ་ཇི་སྙེད་ཀྱི་ཆོས་ཐམས་ཅད་མཁྱེན་པ་ཐུགས་རྡོ་རྗེ། འགྱུར་བདེ་མྱོང་བའི་ཤེས་པའི་རིགས་རྒྱུན་དག་པས་སེམས་ཉིད་མི་འགྱུར་བའི་བདེ་ཆེན་དུ་གྱུར་པ་ནི་བདེ་བ་ཆེན་པོའི་སྐུ་ཡེ་ཤེས་རྡོ་རྗེའོ། །དེའི་ཚེ་སྤྲོས་བྲལ་གྱི་ཡེ་ཤེས་རང་བཞིན་རྣམ་དག་མངོན་དུ་གྱུར་པའི་ཆ་ཆོས་ཀྱི་སྐུ་རྣམ་པ་ཐམས་ཅད་པ་དང་། དེ་གློ་བུར་རྣམ་དག་མཐར་ཐུག་པས་ཁྱད་པར་དུ་བྱས་པ་རླུང་དབུ་མར་ཐིམ་པའི་སྒྲ་དབྱངས་གསུང་ཆོས་སྒོ་སྣ་ཚོགས་པར་འཆར་བ་ལོངས་སྐུ་དང་། བདེ་ཆེན་གྱི་ཐིག་ལེ་འགྱུར་མེད་ནི་ངོ་བོ་ཉིད་སྐུ་ཡིན་ལ། དེ་སེམས་ཅན་ཐམས་ཅད་ལ་ཁྱབ་ཅིང་སྤྲོས་པའི་ཚུལ་གྱི་གཞན་གྱི་སྡུག་བསྔལ་སེལ་བར་བྱེད་པའི་ཐུགས་རྗེ་ནི་གང་འདུལ་གྱི་སྤྲུལ་སྐུ་མཐའ་མེད་པར་སྟོན་པར་མཛད་ཅིང་། དེ་ཡང་རྡུལ་གྱི་དྭངས་མ་གཙུག་ ― MLP018_Page_0368 ―
[མ་དཔེ་གཟིགས་ན་འདིར་གནོན།]
ཏོར་ནས་ནོར་བུའི་བར་ཆ་བཅུ་གཉིས་སུ་བརྟན་པས་བདེན་དོན་རྣམ་པ་བཅུ་གཉིས་དང་། དཀར་ཆའི་དྭངས་མ་ནོར་བུ་ནས་སྤྱི་བོའ་བར་དགའ་བ་བཅུ་དྲུག་གི་རིམ་པས་བརྟན་པའི་ཕྱིར་དེ་ཉིད་རྣམ་པ་བཅུ་དྲུག་ཟུང་དུ་འཇུག་པའི་ངོ་བོའ་ཡོན་ཏན། ཐུན་མོང་པ་མདོ་སྡེ་ལས་བྱུང་བ་ཟག་མེད་ཀྱི་ཡོན་ཏན་སྡེ་ཚན་ཉེར་གཅིག་སོགས་དང་། ཐུན་མོང་མ་ཡིན་པ་ཁ་སྦྱོར་ཡན་ལག་བདུན་ལྡན་ལ་སོགས་པ་མངའ་ཞིང་། ཡེ་ཤེས་རྒྱ་མཚོ་ཟད་མི་ཤེས་པ་དང་། ཕྲིན་ལས་ནམ་མཁའ་དང་མཉམ་པ་རྒྱ་ཆེ་རྒྱུན་ཆད་མེད་པར་ལྷུན་གྱིས་གྲུབ་པའི་བདག་ཉིད་མངོན་དུ་གྱུར་པ་མཐར་ཐུག་པ་ན་མི་སློབ་པའི་ཟུང་འཇུག་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པའོ། །དྲི་བ་ལྔ་པ་དབང་བསྐུར་གྱི་ལྷ་དང་བྱིན་རླབས་ཀྱི་ལྷ་གཉིས་ཀ་རིགས་ལྔ་ཡིན་པར་བཤད་པ་ལས། ད་ལྟ་ཕྱག་ལེན་དུ། བྱིན་རླབས་སྐུ་གསུང་ཐུགས་གསུམ་གྱིས་བརླབས་པ་ལས། ཡོན་ཏན་ཕྲིན་ལས་གཉིས་ཀྱིས་རློབ་པ་མི་མཛད་པ་འདི་ཇི་ལྟར་ཡིན་ཞེས་པ་ལ། ཡོན་ཏན་ཕྲིན་ལས་ཀྱི་ལྷ་དེ་ཆོས་ཅན། ཁྱོད་ལྟེ་བའི་གཡས་གཡོན་དུ་ཟླ་བ་ལ་སྭཱ་སྔོན་པོ་དང་ཧཱ་ལྗང་གུའི་རྣམ་པར་རྒྱས་བཏབ་སྟེ་བྱིན་གྱིས་རློབ་མི་དགོས་པར་ཐལ། བྱིན་རླབས་ཀྱི་ལྷ་རྡོ་རྗེ་གསུམ་གྱི་ལྷ་དེ་ཡིན་པའི་ཕྱིར། འདོད་ན། དེ་ཆོས་ཅན། དེ་ལྟར་དགོས་པར་ཐལ། དགོས་པའི་རྒྱུ་མཚན་རྒྱུད་ན་བྱིན་རླབས་ཀྱི་སྔགས་ༀ་མ་ཧཱ་ཀཱ་ཡ་ནས་མ་ཧཱ་པཱུ་ཛ་བཛྲ་གྱི་བར་སྔགས་ལྔ་བཤད་པ་དང་། འགྲེལ་པར་སྤྱི་བོའ་དུང་ཁང་དུ་ཟླ་བ་ལ་ༀ་དཀར་པོ། མགྲིན་པར་པདྨ་ལ་ཨཾ་དམར་པོ། ཐུགས་ཀར་ཙིཏྟའི་མདུན་དུ་ཉི་མ་ལ་ཧཱུྃ་སྔོན་པོ། ལྟེ་བའི་གཡས་གཡོན་དུ་ཟླ་བ་ལ་སྭཱ་སྔོན་པོ་དང་ཧཱ་ལྗང་གུའི་ཡི་གེ་ལྔ་ཡོངས་སུ་གྱུར་པ་ལས་རྡོ་རྗེ་ལྔའི་ལྷ་ལྔས་རྒྱས་བཏབ་པར་བཤད་པའི་ཕྱིར་ཏེ། ཐལ་རྒྱུད་ལས་ཀྱང་། གནས་གསུམ་ཁྱབ་འཇུག་ཡི་གེ་ལས། །འོད་ཟེར་འཕྲོ་བའི་ཚོགས་ཆེན་པོ། །ཁམས་གསུམ་བྱིན་རླབས་གཟི་བྱིན་བསྡུ། །རང་བཞིན་རྡོ་རྗེ་གསུམ་གནས་པ། །རྒྱུ་གཉིས་ཚུལ་གྱི་རང་སྣང་བའོ། །ལྟེ་བ་རྣམ་གཉིས་ཟླ་བ་ལ། །སྔོ་ལྗང་ཡི་གེ་སྭཱ་ཧཱ་གཉིས། །རྗེས་མཐུན་འོད་ཀྱི་ཡོན་ཏན་ལ། །ཡན་ལག་རྫོགས་ ― MLP018_Page_0369 ―
[མ་དཔེ་གཟིགས་ན་འདིར་གནོན།]
པའི་གཟི་བྱིན་ལྡན། །ཞེས་གསུངས་པའི་ཕྱིར། ཡང་རིགས་ལྔ་ཀས་བྱིན་གྱིས་རློབ་དགོས་ཟེར་ན། འོ་ན་བྱིན་ལྷ་ལྔ་དང་། དབང་ལྷ་ལྔ་གཅིག་ཏུ་ཁས་ལེན་པར་ཐལ། སྐུ་རྡོ་རྗེ་མི་བསྐྱོད་པ་དང་མི་བསྐྱོད་གཅིག་པ་གང་ཞིག ཕྲིན་ལས་རྡོ་རྗེ་དོན་གྲུབ་དང་། དོན་གྲུབ་གཅིག་པའི་ཕྱིར། འདོད་ན། དབང་ལྷ་ལྔ་པོ་དེ་ཆོས་ཅན། ཁྱོད་ཚོགས་བརྒྱད་ཡེ་ཤེས་ལྔར་དག་པའི་རྟགས་ཀྱི་རིགས་ལྔ་དབུ་རྒྱན་དུ་བཅིངས་པ་མ་ཡིན་པར་ཐལ། ཁྱོད་ལྷ་ཐམས་ཅད་ལ་རྒྱས་འདེབས་པའི་ཁྱབ་བྱེད་རྡོ་རྗེ་ལྔའི་ལྷ་ཡིན་པའི་ཕྱིར་དང་། རྟགས་ཁས། འདོད་ན། དེ་ཆོས་ཅན། དེ་ལྟར་ཡིན་པར་ཐལ། ཕུང་ལྔ་རིགས་ལྔར་དག་པའི་རྟགས་ཀྱི་ཁྱབ་བྱའི་ལྷ་ཡིན་པའི་ཕྱིར། ཡང་། བྱིན་ལྷ་དང་དབང་ལྷ་གཉིས་སྐུའི་ཆ་ལུགས་ཀྱང་གཅིག་ཏུ་ཡོད་པར་ཐལ། གཉིས་ཀ་རིགས་ལྔའི་ལྷ་ཡིན་པ་ལ་མཚུངས་པའི་ཕྱིར། འདོད་ན། མ་ཡིན་པར་ཐལ། བྱིན་ལྷ་ནི་རིགས་ལྔ་ལོངས་སྐུའི་ཆ་ལུགས་འཛིན་པ་ངེས་པར་དགོས་ཏེ། སྤྲུལ་སྐུ་ལས་ལོངས་སྐུ་རྒྱ་ཆེ་བའི་ཕྱིར་དང་། སྤྲུལ་སྐུའི་སྤྲུལ་གཞི་ཡང་ལོངས་སྐུ་ཡིན་པའི་ཕྱིར་དང་། དབང་ལྷ་ནི་ཆ་ལུགས་རིགས་ལྔ་སྤྲུལ་སྐུའི་ཆ་ལུགས་སུ་ཡོད་དོ། །གཞི་གདོད་མའི་ལྷའི་ཡོན་ཏན་གྱི་ཆ་ཤས་ཡེ་ཤེས་ལྔའི་རྟགས་ཀྱི་ཅོད་པན་རིགས་ལྔས་དབུ་བརྒྱན་པར་བཤད་པའི་ཕྱིར། ཡང་རྩ་ལྷ་མི་བསྐྱོད་པས་བྱས་པའི་དཀྱིལ་འཁོར་གྱི་གཙོ་བོ་མི་བསྐྱོད་པ་དེ་ཆོས་ཅན། ཁྱོད་ཀྱི་སྙིང་ཁར་རང་འདྲའི་མི་བསྐྱོད་པ་གཅིག་དང་། བྱིན་རླབས་ཀྱི་ལྷ་མི་བསྐྱོད་པ་གཉིས། སྒོམ་པ་ཚི་ཆད་མ་ཡིན་པར་ཐལ། མི་བསྐྱོད་པ་ལ་མི་བསྐྱོད་པས་བྱིན་གྱིས་རློབ་པ་ཐུག་མེད་ཡིན་པའི་ཕྱིར། ཡང་སྟོན་པ་ཀུན་བཟང་ཆོས་ཅན། ཁྱོད་རིགས་ཐམས་ཅད་ཀྱི་བདག་པོ་མ་ཡིན་པར་ཐལ། ཁྱོད་ལ་སྐུ་གསུང་ཐུགས་ཀྱི་ལྷས་བྱིན་གྱིས་བརླབ་དགོས་པའི་ཕྱིར། འདོད་མི་ནུས་ཏེ། འདི་ཉིད་ལས། སྐུ་དང་གསུང་དང་ཐུགས་རྡོ་རྗེའི་བདག་ཉིད། ཅེས་གསུངས་པའི་ཕྱིར། ཡང་། སྟོན་པ་ཀུན་བཟང་ཆོས་ཅན། ཁྱོད་ལ་རིགས་ལྔས་དབང་བསྐུར་མི་དགོས་པར་ཐལ། ཁྱོད་རིགས་དྲུག་པའི་བདག་ཉིད་ཅན་དུ་གནས་པའི་ཕྱིར། འདོད་ན། ཐལ་རྒྱུད་ལས། མི་བསྐྱོད་བྱེད་པོ་ཡུམ་དང་བཅས། །རྡོ་རྗེ་འཛིན་པའི་ཕྱག་རྒྱར་བསྟན། །བྱམས་པ་ ― MLP018_Page_0370 ―
[མ་དཔེ་གཟིགས་ན་འདིར་གནོན།]
ས་སྙིང་དེ་བཞིན་ཏེ། །གཞན་དག་རང་རང་ཕྱག་རྒྱར་བསྟན། །གཤིན་རྗེ་གཤེད་ལ་རྟག་པར་བཤད། །ཐུབ་ཆེན་རྡོ་རྗེ་འཛིན་བཅས་པ། །ཟླ་དང་བྲལ་བའི་དཔའ་བོ་ཆེ། །ཞེས་པ་དང་འགལ་བའི་ཕྱིར་རོ། །ཐུབ་པ་དྲུག་ཆོས་ཅན། ཁྱོད་སྤྲུལ་པ་མ་ཡིན་པར་ཐལ། ཁྱོད་ལ་དབང་བསྐུར་བྱིན་རླབས་དགོས་པའི་ཕྱིར། མ་ཁྱབ་ན། དབང་བསྐུར་བྱིན་རླབས་དགོས་པར་ཐལ། འདོད་ན། འོད་རིམ་ལས། ཐུབ་དྲུག་སྤྲུལ་པ་རང་བྱུང་ཕྱིར། །བྱིན་རླབས་དབང་བསྐུར་མ་གསུངས་སོ། །ཞེས་བཤད་པ་མི་འཐད་པར་ཐལ། དེ་ལྟར་དགོས་པའི་ཕྱིར། ཡང་། རྣལ་ལན། འོད་རིམ་གྱི་ལུང་དོན། ཟླ་དང་བྲལ་བའི་དཔའ་བོ་ཆེ། །ཞེས་གསུངས་པས་འཁྲུལ་གཞི་བྱས་པར་མངོན་ནས། དབང་བསྐུར་གྱི་སྐབས་དབང་སྐུར་བ་པོའི་སློབ་དཔོན་ཡིན་ན། ངེས་པར་བདག་འཇུག་ལེན་དགོས་པས་ཁྱབ་པར་ཐལ། འཇུག་པའི་ཆོས་དེ་ལ་སློབ་དཔོན་འཇུག་པའི་ཆོས་གཉིས་དང་། སློབ་མ་འཇུག་པའི་ཆོས་བཅུ་དྲུག་བཤད་པའི་སློབ་དཔོན་འཇུག་པའི་ཆོས་གཉིས་པོ་དེ། དཀྱིལ་འཁོར་བཞེངས་སྒྲུབ་ཀྱི་ལས་རབ་འབྱམས་དང་། རིག་པའི་མེ་ཏོག་དོར་བ་ལ་སོགས་པའི་སྒོ་ནས་རང་ཉིད་དཀྱིལ་འཁོར་དུ་ཞུགས་ནས་སློབ་མ་དཀྱིལ་འཁོར་དུ་གཞུག་པའི་གནང་བ་ཞུ་བའི་ཆོས་གཉིས་པོ་དེ་ཡིན་པའི་ཕྱིར། འདོད་ན། སྟོན་པ་ཀུན་བཟང་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ་ཧ་ཅང་ཐལ་བའི་ཕྱིར། ཡང་མཚན་ཉིད་དང་ལྡན་པའི་སྔགས་ཀྱི་རྡོ་རྗེ་སློབ་དཔོན་ཚོགས་ལམ་པ་ལྟ་བུ་ཞིག་ཡིན་ན། ངེས་པར་བདག་འཇུག་ལེན་དགོས་པར་ཐལ། དེ་ལྟར་དགོས་པའི་ཕྱིར་ཏེ། འདི་ཉིད་ལས། ཀུན་བྱས་དབང་ཕྱུག་རིག་པས་འཇུག །དེ་ནས་སློབ་མ་འཇུག་པར་བྱ། །ཞེས་བཤད་པའི་ཕྱིར། འདོད་ན། གསང་སྔགས་པ་མཚན་ཉིད་དང་ལྡན་པ་དེ་གང་ཞེ་ན། འདི་ལྟར་སྣང་གྲགས་ཀྱིས་བསྡུས་པའི་སྣོད་ཀྱི་འཇིག་རྟེན་གཞལ་ཡས་ཁང་དང་། བཅུད་ཀྱི་སེམས་ཅན་ལྷ། གྲགས་པ་སྔགས། དྲན་རྟོག་ཆོས་ཉིད་དུ་ཤེས་པ་དེ་མཚན་ཉིད་དང་ལྡན་པའི་གསང་སྔགས་པ་ཡིན་པས། དེ་འདྲའི་འཕགས་ལམ་མ་ཐོབ་པའི་སྔགས་པ་དེ་ཆོས་ཅན། ཁྱོད་ཀྱི་སློབ་མ་ལ་དབང་བསྐུར་ཚེ་བདག་འཇུག་ངེས་པར་ལེན་དགོས་པར་ ― MLP018_Page_0371 ―
[མ་དཔེ་གཟིགས་ན་འདིར་གནོན།]
ཐལ། ཁྱོད་འཕགས་ལམ་ཐོབ་པའི་དབང་སྐུར་བ་པོའི་རྡོ་རྗེ་སློབ་དཔོན་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་བསྐྱེད་རྫོགས་ཀྱི་ཏིང་ངེ་འཛིན་གྱི་ཡེ་ཤེས་ཀྱི་སྣང་བ་ལ་གནས་པའི་གང་ཟག་མ་ཡིན་པར་ཐལ། དགོངས་པ་དེ་ལས་ལྷག་པའི་བདག་འཇུག་ལེན་རྒྱུ་ཡོད་པའི་ཕྱིར། འདོད་ན། དེ་ལྟར་ཡིན་པར་ཐལ། སྣང་གྲགས་ལྷ་སྔགས་ཡེ་ཤེས་ཀྱི་དབང་དོན་ལ་གནས་པའི་གང་ཟག་ཡིན་པའི་ཕྱིར་ཏེ། འཇམ་དཔལ་སྒྱུ་དྲྭ་ལས། ཡེ་ཤེས་དབང་བསྐུར་ཅོད་པན་ཅན། །རྫོགས་པའི་སངས་རྒྱས་རྒྱན་དུ་ཐོགས། །ཞེས་དང་། ཡེ་ཤེས་རྔམ་པ་གློག་གི་འཁོར་ལོ་ལས། སེམས་ཀྱི་ཆོས་ལ་དབང་ཐོབ་ན། །རྫས་ཚིག་མཚན་མའི་དབང་རྣམས་ཀུན། །མ་བསྐུར་བར་ཡང་ཐོབ་པར་འགྱུར། །ཞེས་བཤད་པའི་ཕྱིར་རོ། །དེང་སང་ཕྱག་ལེན་ལ་བདག་འཇུག་ངེས་པར་ལེན་པ། དབང་བླངས་པས་དབང་གི་ཆུ་བོ་མ་ཉམས་པ་དེ་གོང་འཕེལ་དུ་སོང་ནས་དངོས་གྲུབ་མྱུར་དུ་ཐོབ་པའི་རྒྱུ་བྱེད་པ་དང་། དབང་བསྐུར་བའི་སྔོན་དུ་བདག་འཇུག་ལེན་པ་བླ་མ་རང་གིས་མ་ཚོར་བའི་དམ་ཚིག་ཉམས་པ་སྲིད་པ་དེ་གསོ་བའི་ཆེད་ཡིན་པའི་ཕྱིར། ཡང་རྡོ་རྗེ་རྒྱལ་ཚབ་པས་དབང་རྫས་ཐོགས་ནས་དབང་བསྐུར་བའི་ཚེ་རྒྱལ་ཚབ་ལས་དབང་ཐོབ་པ་ཡིན་པར་ཐལ། དེས་དབང་བསྐུར་བའི་ཕྱིར། འདོད་ན། རྡོ་རྗེ་རྒྱལ་ཚབ་པ་དེ་ཆོས་ཅན། ཁྱོད་དབང་གི་རྒྱུད་པར་འཇུག་དགོས་པར་ཐལ། ཁྱོད་དབང་བསྐུར་བའི་སློབ་དཔོན་ཡིན་པའི་ཕྱིར། འདོད་ན། རྡོ་རྗེ་རྒྱལ་ཚབ་ཆོས་ཅན། ཁྱོད་ཀྱིས་དབང་རྫས་ཀྱི་བྱ་བ་བྱས་ཚེ་རྡོ་རྗེ་སློབ་དཔོན་གྱི་ཏིང་ངེ་འཛིན་གྱི་དགོངས་པས་དབང་ཐོབ་པ་མ་ཡིན་པར་ཐལ། ཁྱོད་ལས་དབང་ཐོབ་པའི་ཕྱིར། འདོད་མི་ནུས་ཏེ། དཔེར་ན་ཕོ་ཉས་རྒྱལ་པོའི་ལུང་དང་བཀའ་རྟགས་ཁྱེར་ཏེ་འབངས་ཀྱི་ཚོགས་ལ་བསྒྲགས་པ་ན། ཕོ་ཉའི་ངག་དེ་རྒྱལ་པོའི་ངག་ཏུ་འཛིན་པ་དང་ཆོས་མཚུངས་པའི་ཕྱིར། དེ་ཙམ་གྱིས་རྒྱལ་ཚབ་དབང་རྒྱུད་ལ་འཇུག་དགོས་ན། གསང་དབང་དང་ཤེར་དབང་གཉིས་ཀྱི་རིག་མ་དེ་ཆོས་ཅན། ཁྱོད་གཉིས་དབང་གི་རྒྱུད་པར་འཇུག་དགོས་པར་ཐལ། ཁྱོད་གཉིས་ཀྱི་བྱེད་ལས་ལ་བརྟེན་ནས་གསང་དབང་དང་ཤེར་དབང་གཉིས་ཐོབ་པའི་ཕྱིར་ཏེ། བདེ་བ་མྱུ་གུའི་རྒྱུད་ལས། ཕྱོགས་ ― MLP018_Page_0372 ―
[མ་དཔེ་གཟིགས་ན་འདིར་གནོན།]
བཅུའི་རྒྱལ་བ་སྲས་བཅས་ཀྱིས། །མཁའ་མཉམ་ཡེ་ཤེས་བདུད་རྩི་ནི། །རྡོ་རྗེའི་ལམ་ནས་རབ་བསྡུས་ནས། །བདེ་བ་སྐྱེད་བྱེད་རིགས་ཀྱི་ཡུམ། །སྲས་རྣམས་གསང་བའི་དབང་བསྐུར་བས། །རྡོ་རྗེའི་བླ་མ་གཉིས་པའོ། །ཞེས་དང་། ཡེ་ཤེས་འབྱུང་བ་ལས། ལྷན་ཅིག་སྐྱེས་པ་བདེ་བྲལ་བ། །ནམ་མཁའ་དང་ནི་མཉམ་པར་སྦྱོར། །རིགས་མཉམ་དཔེ་མེད་བདེ་སྟེར་མ། །སྲིང་མོ་དེ་ཉིད་བླ་མར་བསྔགས། །ཞེས་བཤད་པའི་ཕྱིར་རོ། །དྲི་བ་ལྔ་པ་ལེའུ་བཞི་པ་ལ། འཕྲོས་དོན་ཞིག་བཀོད་ནས་དེའི་ཁོངས་ནས་རྟོགས་པར་བྱའོ། །དེ་ལ། ཕྱོགས་བཅུ་དུས་བཞིར་གཤེགས་པ་ཡི་སོགས་ནས། ཡི་གེ་མགོ་ནས་ཀྵ་ལ་རྫོགས། །ཞེས་པའི་བར་གྱི་གཞུང་འདི། ཀུན་འདུས་ལས། དབྱིངས་ལས་ཨ་བྱུང་ཨ་ལས་ནི། །ཡི་གེའི་ཚོགས་རྣམས་མ་ལུས་འཕྲོ། །ཞེས་པའི་གཞུང་འདི་ལ་འཕྲོས་པར་ཐལ། རྒྱུ་མཚན་ཕྱོགས་བཅུ་དུས་བཞིའི་རྒྱལ་བ་ཐམས་ཅད་ཀྱི་ཆོས་སྐུའི་རོལ་པ་གཟུགས་སྐུའི་དཀྱིལ་འཁོར་ཇི་སྙེད་པ་ཐམས་ཅད་མཚོན་བྱེད་ཀྱི་རྩ་བ་ཡི་གེ་བཞི་བཅུ་རྩ་ལྔའི་རྣམ་བཞག་དེ་བསྟན་ནས། ཡི་གེ་དེ་ཉིད་ཇི་ལྟར་བྱུང་བའི་ཚུལ་དེ་སྟོན་པར་བྱེད་པ་ལ། དབྱིངས་ལས་ཨ་བྱུང་ཞེས་སོགས་ཀྱི་གཞུང་འདི་བྱུང་བ་གང་ཞིག དེ་ལྟར་སྐུ་གསུང་ཐུགས་ཀྱི་ཀློང་ལས་ཨ་སྐྱེ་བ་མེད་པ་བྱུང་བའི་ཨ་ཡིག་དེའི་འོད་ཟེར་སྐུའི་གནས་སོ་སོར་འཁྱིལ་བ་དེ་དང་དེ་ལས་ཡི་གེ་གཞན་རྣམས་བྱུང་བ་ཡིན་ནོ། །ཞེས་སྟོན་པར་བྱེད་པ་ལ། འགྲེལ་ཆུང་ལས། ཨ་ལས་འོད་ཟེར་མགུལ་གྱི་བུམ་པར་འཁྱིལ། །འོད་འཕྲོས་ཀ་ལ་སོགས་པ་འབྲུ་ལྔ་ཤར། །ཞེས་པ་འདི་བྱུང་བའི་ཕྱིར་དེ་ལྟར་འཕྲོས་པ་འདོད་ན། ཡི་གེ་བཞི་བཅུ་རྩ་ལྔ་དེ་ཆོས་ཅན། ཁྱོད་སྟོན་པའི་སྐུའི་གནས་དེ་དག་ལས་བྱུང་བ་མ་ཡིན་པར་ཐལ། ཁྱོད་འབྱུང་བའི་གནས་གཞན་ཡོད་པའི་ཕྱིར། མ་གྲུབ་ན། དེ་ལྟར་ཡོད་པར་ཐལ། སྨྲ་སྒོ་ལས། ཁོག་པ་མགྲིན་པ་རྐང་དང་ལྕེ། །སྣ་དང་སྤྱི་བོ་སོ་དང་མཆུ། །ཞེས་བཤད་པའི་ཕྱིར། ཡང་འབྲུ་ལྔར་ཤར་བའི་ཡི་གེ་དེ་ཆོས་ཅན། ཁྱོད་ངོས་འཛིན་མི་རིགས་པར་ཐལ། རེ་རེ་ནས་བགྲང་དུ་མེད་པའི་ཕྱིར། རང་ལུགས་འདྲེན་པ་ཀ་སྡེ་དང་། ཙ་སྡེ་སོགས་སོ། །ཡང་གོང་དུ་སྐུའི་གནས་ལས་མ་བྱུང་ཟེར་ན། སྟོན་པ་ཆོས་ཅན། ཁྱོད་ ― MLP018_Page_0373 ―
[མ་དཔེ་གཟིགས་ན་འདིར་གནོན།]
ཀྱི་སྐུའི་གནས་ལས་བྱུང་བར་ཐལ། ཁྱོད་ཀྱི་སྐུའི་གནས་ཉི་ཤུ་ལས་བྱུང་བའི་ཕྱིར་ཏེ། འགྲེལ་ཆུང་ལས། བྱིན་པ་སྟ་ཟུར་དཀུ་སྐབས་དང་། །དཔུང་ལས་ཡ་ར་ཝ་ལ་བྱུང་། །ཕྱག་མཐིལ་ཐུགས་ཀ་མཛོད་སྤུ་དང་། །ཞབས་མཐིལ་གསང་གནས་ལས་རིམ་བཞིན། །ཤ་ཥ་ས་ཧཱ་ཀྵ་རྣམས་འཕྲོས། །སྤྱན་སྙན་ཚེམས་ཤངས་རྣམ་བཞི་ལས། །གཉིས་གཉིས་འཕྲོས་པས་ཨི་ཨཱི་དང་། །ཨུ་ཨཱུ་ཨེ་ཨཻ་ཨོ་ཨཽ། །སྤྱི་གཙུག་མཚོག་མ་ལྟེ་བ་ཡིས། །གནས་ལས་མགོ་ཤད་རིགས་གསུམ་ཐོན། །ཅེས་བཤད་པའི་ཕྱིར་རོ། །འོ་ན་སྤྱིར་བཏང་ཡི་གེ་ལྔ་བཅུ་ཐམ་པ་ལ་འདིར་བཞི་བཅུ་རྩ་ལྔ་ལས་མ་བྱུང་བས་ཡི་གེ་ཡོངས་རྫོགས་མ་ཚང་བའི་སྐྱོན་གནས་སོ་ཞེ་ན། སྐྱོན་མེད་དེ། ཨ་རིང་པོ་ཤད་དུ་བསྡུས་ཨཿརྣམ་བཅད་ཚིག་ཏུ་བསྡུས། ཨཾ་སྣ་དང་ལྡན་པ་ཨོ་ལ་སྦྱར་ནས་ༀ་དུ་བསྡུས། མ་ནིང་གི་ཡི་གེ་བཞི་པོ་ར་དང་ལར་བསྡུས་པའོ། །ཡང་འདི་ཉིད་ལས། མགོ་ནི་མ་ནོར་ལམ་ཡིན་པས། །ཞེས་བཤད་པས། ཡི་གེ་ལམ་དེ་ཆོས་ཅན། ཁྱོད་ཡི་གེའི་མགོ་ཡིན་པར་ཐལ། དེ་ལས་གཞན་པའི་དོན་སྨྲ་རྒྱུ་གཞན་མེད་པའི་ཕྱིར། འདོད་ན། ཡི་གེའི་མགོ་ཆོས་ཅན། ཁྱོད་བེར་ག་རིས་ལ་བཤད་པ་མི་འཐད་པར་ཐལ། ལམ་ཡིག་དེ་ཡི་གེའི་མགོ་ཡིན་པའི་ཕྱིར། འདོད་ན། དཔལ་སྦྱིན་གྱིས་ཞུས་པའི་མདོ་ལས། མགོ་ནི་ཐོག་མར་མཚོན་པ་སྟེ། །དྭངས་ལ་གཟུགས་སུ་གང་གནས་པས། །དེ་ནི་ཡི་གེའི་མགོ་ཡིན་ཏེ། །བེར་ཀ་རིས་ལ་མགོ་ཞེས་བྱ། །ཞེས་བཤད་པས་སོ། །ཡང་བེར་ཀ་རིས་དང་ལམ་གཉིས་གཅིག་གོ་ཞེ་ན། འོ་ན་ཡི་གེ་ལམ་དེ་ཆོས་ཅན། ཁྱོད་གླང་པོ་ཆེའི་སྣ་འདྲ་བར་ཡོད་པར་ཐལ། ཡི་གེའི་དབྱིབས་བརྗོད་སྐབས། མགོ་ནི་ཨི་གླང་པོའི་སྣ་འདྲ་བར། ཤད་དེ་ཨ་རིང་པོ་མདའ་ལྟ་བུ། ཚེག་སྟེ་ཨཿརྣམ་བཅད་དབང་ཕྱུག་ཆེན་པོའི་མིག་ལྟ་བུ་ཞེས་བཤད་པའི་ཕྱིར། གཞན་ཡང་དེ་ལྟར་མ་ཡིན་པར་ཐལ། ཡི་གེའི་ཐིག་དེ་མགོ་ཡིན་པར་ཁས་ལེན་རིགས་པའི་ཕྱིར། མ་གྲུབ་ན། ཐིག་ཆོས་ཅན། ཁྱོད་ཡི་གེའི་མགོ་ཡིན་པར་ཐལ། དེ་ཡིན་ཚུལ་སྟོན་པར་བྱེད་པ་ནི། གཟུགས་ཅན་སྙིང་པོས་ཞུས་པའི་མདོ་ལས། ཡི་གེའི་མགོ་ནི་ཐིག་ཡིན་པས། །ཡི་གེ་བཞི་བཅུ་རྩ་གཉིས་རྣམས། །མ་ནོར་དམ་པའི་ཐིག་ཡིན་པས། །ལམ་མཁན་ཐིག་ནས་ ― MLP018_Page_0374 ―
[མ་དཔེ་གཟིགས་ན་འདིར་གནོན།]
ཡི་གེར་ཞུགས། །ཞེས་བཤད་པའི་ཕྱིར། ཡང་། ཏིག་ནི་ཤེས་རབ་མིང་དུ་སྨྲ། ཡི་གེ་ཏིག་དེ་ཤེས་རབ་ཀྱི་མིང་ཡིན་པར་ཐལ། དེ་ལྟར་བཤད་པའི་ཕྱིར། འདོད་ན། ཡི་གེ་ཏིག་དེ་ཆོས་ཅན། ཁྱོད་ཤེས་རབ་ཀྱི་མིང་ཡིན་པར་ཐལ། དེ་ལྟར་བཤད་པའི་ཕྱིར། འདོད་ན། ཡི་གེ་ཏིག་དེ་ཆོས་ཅན། ཁྱོད་ཤེས་རབ་ཀྱི་མིང་མ་ཡིན་པར་ཐལ། ཚེག་ལ་ཏིག་ཅེས་བཤད་པའི་ཕྱིར་ཏེ། ཡོ་ག་རྒྱན་དམ་པ་ལས། བསྡུས་པའི་ཕྱིར་ན་ཚེག་ནི་ཏིག །འཐོར་བ་བསྡུས་ནས་མིང་དུ་སྨྲ། །ཞེས་དང་། ཁྱིམ་བདག་དྲག་ཤུལ་ཅན་གྱིས་ཞུས་པའི་མདོ་ལས་ཀྱང་། ཏིག་ནི་ཚེག་ཏུ་སྒྲུབ་པ་སྟེ། །ཡི་གེ་བསྡུས་ནས་མིང་དུ་སྨྲ། །དེ་ཕྱིར་ཚེག་ནི་ཏིག་ཅེས་བྱ། །ཞེས་སོ། །ཤད་ནི་ཚིགས་སུ་བཅད་པའི་ཡི་གེ་སྟེ། སྤྱི་མདོར། གཅོད་པ་ལ་མཚོན་པར་བྱེད་པའི་ཡི་གེ་ལ་ནི་མིང་དབྱུག་པ་ཞེས་བླ་དྭགས་སུ་གཏགས་སོ། །ཞེས་དང་། དཔལ་སྦྱིན་གྱིས་ཞུས་པའི་མདོ་ལས། ཚིགས་སུ་བཅད་པའི་ལས་ཅན་ལ། །དེ་ཕྱིར་བཤད་དུ་གྲགས་སོ་ཞེས། །ཞེས་གསུངས་སོ། །གཞན་ཡང་སེམས་ཀྱི་རང་བཞིན་ཆོས་ཅན། ཁྱོད་ཡི་གེའི་རྣམ་པར་གནས་པར་ཐལ། ཁྱོད་ཡི་གེ་ཨའི་རྣམ་པར་གནས་པའི་ཕྱིར། འདོད་ན། དེ་ཆོས་ཅན། ཡི་གེའི་རྣམ་པར་གནས་པ་མ་ཡིན་པར་ཐལ། མིང་ཚིག་ཡི་གེ་ལ་འདས་པའི་ཆོས་ཡིན་པའི་ཕྱིར། གཞན་ཡང་། ཨ་ཆོས་ཅན། ཁྱོད་སྐྱེ་མེད་མཚོན་བྱེད་ཀྱི་ཡི་གེ་མ་ཡིན་པར་ཐལ། ཁྱོད་མཚོན་བྱ་སྐྱེ་མེད་ཀྱི་ངོ་བོ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། དེ་ལྟར་ཡིན་ཚུལ། ཨ་ནི་སྟོང་དང་མི་སྟོང་གི །དབུ་མའང་དམིགས་སུ་ཡོད་མ་ཡིན། །ཞེས་པ་དང་། གང་སྐྱེ་བ་མེད་པ་མཚོན་པར་བྱེད་པའི་ཡི་གེ་ལ་ནི་ཨ་ཞེས་པའི་མིང་བླ་དྭགས་སུ་བཏགས་སོ། །ཞེས་གསུངས་པའི་ཕྱིར། གཞན་ཡང་བཞི་བཅུ་རྩ་གཉིས་སུ་སྣང་བའི་ཕྱག་རྒྱའི་ལྷ་དེ་དང་། ཡི་གེའི་ཕྱག་རྒྱར་སྣང་བའི་ལྷ་བཞི་རྩ་གཉིས་པོ་གཅིག་ཏུ་ཁས་ལེན་མི་རིགས་པར་ཐལ། འདོད་ན། འདི་ཉིད་ལས། ཐམས་ཅད་མིང་ཙམ་སངས་རྒྱས་ཀུན། །ཡི་གེ་འཕྲེང་བ་ཉིད་ལ་གནས། །ཞེས་པ་དང་འགལ་ལོ། །དེ་དག་གི་རྣལ་ལན་ནི། མགོ་ནི་མ་ནོར་ལམ་ཞེས་པའི་དོན། གཟུགས་དབྱིབས་ཀྱི་དོན་མ་ཡིན་ཡི་གེ་ཐམས་ཅད་ཀྱི་མགོ་འདྲེན་ཅིང་འཇུག་ ― MLP018_Page_0375 ―
[མ་དཔེ་གཟིགས་ན་འདིར་གནོན།]
པའི་སྒོར་གྱུར་པས་ལམ་དང་འདྲ་བ་ཡིན་པའི་དོན་དང་ཐིག་ཡིན་པའི་དོན་ཡང་། བརྗོད་བྱའི་དོན་ཡང་དག་པ་དྲང་པོར་མཚོན་བྱེད་ཐིག་ཡིན་པར་ཡང་བཤད་པས་ཐིག་དང་ལམ་དོན་གཅིག་པར་བཤད་པ་སྟེ། གཟུགས་ཅན་སྙིང་པོས་ཞུས་པའི་མདོ་ལས། ཡི་གེ་བཞི་བཅུ་རྩ་གཉིས་ལམ། །མ་ནོར་དམ་པ་ཐིག་ཡིན་པས། །རྐང་ལམ་མཐིལ་ནས་ཡི་གེར་ཞུགས། །ཡི་གེའི་མགོ་ནི་ཐིག་ཅེས་བྱ། །ཞེས་སོ། །བེར་ཀ་རིས་ཞེས་པ། སྐྱེ་མེད་མཚོན་བྱེད་ཨའི་ཡན་ལག་གི་དང་པོ་དབྱིབས་བེར་ཀ་རིས་ལ་བཤད་དོ། །ཡི་གེ་ཐམས་ཅད་མཚོན་བྱེད་ཀྱི་ལྷ་ཡིན་པ་དང་། ཕྱག་རྒྱའི་ལྷ་དེ་ཡང་མཚོན་བྱེད་ཀྱི་ཡིན་ཏེ། ཆོས་ཉིད་དེ་བཞིན་ཉིད་ཀྱི་ལྷ་དེ་ཞལ་ཕྱག་ལས་འདས་མོད་ཀྱང་། ཆོས་ཉིད་ཀྱི་ཡོན་ཏན་ཞལ་ཕྱག་དང་མཚན་མས་མཚོན་ནས་རྟོགས་དགོས་པའི་ཕྱིར་རོ། །ཡི་གེའི་དོན་དཔེར་ན་རྡུལ་འདུས་པ་ནི་གོང་བུ་ཡིན་ལ། དེ་བས་ན་རྡུལ་ཕྲན་ནི་གོང་བུ་འཛིན་པའི་གནས་ཡིན་པ་བཞིན་དུ། མིང་གི་མཐར་ཐུག་གི་ནི་མིང་གི་མཐའི་ཡི་གེ་ཡིན་ལ། མིང་མཐའི་ཡི་གེ་འདུས་པ་ལས་དབྱངས་ཡིག་གཅིག་གིས་བཅིངས་པའི་ཡི་གེ་འགྲུབ་བོ། །དེ་འདུས་པ་ལས་ཀ་བ་དང་བུམ་པ་སོགས་དངོས་པོ་རྣམས་ཀྱི་མིང་འགྲུབ། དེ་འགྲུབ་པས་ཚིག་གི་ཚོགས་མ་ལུས་པ་འགྲུབ་པ་སྟེ། དེའི་ཕྱིར་ཡི་གེ་ནི་ཚིག་མ་ལུས་པ་འཛིན་པའི་གནས་སོ། །ཡི་གེའི་རང་བཞིན་སེམས་ཉིད་སྤྲོས་པ་དང་བྲལ་བ་ཡིན་མོད་ཀྱང་། འཕྲུལ་པ་ཙམ་དུ་དབྱིབས་དང་ཁ་དོག་དང་མིང་གི་སྒོ་ནས་སངས་རྒྱས་ཀྱི་མཛད་པ་སྒྲུབ་པར་བྱེད་དོ། །འདི་ཉིད་ལས། དངོས་མེད་ཡི་གེའི་རང་བཞིན་སེམས། །བདག་མེད་མཐའ་བྲལ་མི་དམིགས་ཀྱང་། །དབྱིབས་དང་ཁ་དོག་མིང་ཚོགས་ལས། །རོལ་པ་ཅིར་ཡང་སྤྲུལ་ཅིང་སྟོན། །ཞེས་སོ། །དེ་ཡང་ཡི་གེ་ཉིད་ལྷ་ཡིན་པའི་ཚུལ་ནི། འདི་ཉིད་ལས། ཡི་གེ་འཁོར་ལོ་ཚོགས་ཆེན་འདིས། །སྐུ་གསུང་ཐུགས་ཀྱི་ཕྲེང་བ་བསྡུས། །ཞེས་དང་། འབྲས་བུ་རྒྱལ་བ་སྨིན་གྲུབ་ངོ་མཚར་མིང་ཚོགས་བཞི་བཅུ་གཉིས། །ཞེས་པ་དང་། དེ་བཞིན་གཤེགས་པ་ཐམས་ཅད་ཡི་གེའི་འཁོར་ལོར་གྱུར་ཏོ། །ཞེས་གསུངས་པའི་ཕྱིར་རོ། ། ― MLP018_Page_0376 ―
[མ་དཔེ་གཟིགས་ན་འདིར་གནོན།]
དྲི་བ་དྲུག་པ་ལེའུ་བཅོ་ལྔ་པའི་སྐོར་ལ། འཕྲོས་དོན་ཞིག་སྨོས་ནས་བརྗོད་པར་བྱ་སྟེ། དེ་ནས་དེ་བཞིན་གཤེགས་པ་ཆེ་བའི་རྡོ་རྗེ་བཀོད་པའི་སྒྱུ་འཕྲུལ་དྲྭ་བ་ལས། འཇིག་རྟེན་དྲུག་གི་ཕྱོགས་བཅུའི་སྲིད་པ་གསུམ་གྱི་བདག་པོ་འདུལ་བའི་ང་རྒྱལ་ཆེན་པོའི་གཟི་བརྗིད་སྟོན་པའི་ཕྱིར། ཞེས་སོགས་ཀྱི་གཞུང་འདི། དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་སངས་རྒྱས་ཐམས་ཅད་ཀྱི་ངོ་བོ་ཉིད་ཀྱི་ཁྲོ་བོའ་དཀྱིལ་འཁོར་མངོན་པར་འདུ་མཛད་དོ། །ཞེས་པའི་གཞུང་འདི་ལས་འཕྲོས་པར་ཐལ། རྒྱུ་མཚན་རིགས་དྲུག་པ་དཔལ་ཀུན་ཏུ་བཟང་པོ་དེ་ཉིད་གདུལ་བྱ་གདུག་པ་ཅན་རྣམས་ཀྱི་སྣང་ངོར་སྔོན་བྱུང་ཁྲོ་བོའ་གླེང་གཞི་སྟོན་པ་ཕུན་སུམ་ཚོགས་པའི་རྣམ་བཞག་དེ་བསྟན་ནས། རྨད་དུ་བྱུང་བའི་ཆོས་ཕུན་སུམ་ཚོགས་པ་ཕོ་རྣམས་བསྒྲལ་བའི་ལས་ཀྱིས་འདུལ་བ་དང་། མོ་རྣམས་སྦྱོར་བའི་ལས་ཀྱིས་འདུལ་བའི་ཕྲིན་ལས་ཕུན་སུམ་ཚོགས་པ་ངེས་པར་སྟོན་པར་བྱེད་པ་ནི། དེ་ནས་དེ་ཞིན་གཤེགས་པ་ཆེ་བའི་ཞེས་སོགས་ཀྱི་གཞུང་དེ་བྱུང་བ་གང་ཞིག འཁོར་ཕུན་སུམ་ཚོགས་པ་དེ་ལ་གདུལ་བྱ་གདུག་པ་ཅན་གྱི་འཁོར་དང་། འདུལ་བྱེད་གཉེན་པོའི་འཁོར་གཉིས་ཡོད་པ་ལས། དང་པོ་དེ་སྟོན་པར་བྱེད་པ་ནི། དེ་ཅིའི་ཕྱིར་ན། བདག་ཏུ་རྨོངས་པའི་རྟོག་པ་དང་། །ཞེས་སོགས་བྱུང་། གཉིས་པ་དེ་སྟོན་པར་བྱེད་པ་ནི། ལ་ལ་ནི་དཔལ་ཁྲག་འཐུང་ཆེན་པོ་རྡོ་རྗེར་གྱུར་ཏེ་ཤར་ཕྱོགས་སུ་བཞུགས་སོ། །ཞེས་སོགས་གཞུང་འདི་བྱུང་བའི་ཕྱིར། དེ་ལྟར་འཕྲོས་པ་འདོད་ན། རུ་ཏྲ་དེ་སྔོན་བསྐལ་པ་ཀུན་བཀོད་ཀྱི་དུས་སུ་དགེ་སློང་ཐུབ་དཀའ་གཞོན་ནུ་བསྟེན་ནས། ཇི་བཞིན་ཉིད་དེ་མ་བཅོས་ན། །དངོས་པོ་བཞི་ལ་གནས་སྤྱད་ཀྱང་། །ནམ་མཁའ་ལ་ནི་སྤྲིན་བཞིན་དུ། །འདི་ནི་རྣལ་འབྱོར་དམ་པའི་ལམ། །ཞེས་པ་སྒྲ་ཇི་བཞིན་སྤྱད་པས་གོལ་ཏེ་ལས་ཀྱི་རུ་ཏྲར་སྐྱེས་པར་ཐལ། ལྟ་བའི་གནས་ལུགས་མ་རྟོགས་པར་དེ་ལྟར་སྤྱད་པས་གོལ་བའི་ཕྱིར་ཏེ། ལུང་ལས། མ་རྟོགས་པ་ཡིས་སྤྱད་གྱུར་ན། །ཡི་དྭགས་སྲིན་པོའི་གནས་སུ་སྐྱེ། །ཞེས་པའི་ཕྱིར། རུ་ཏྲ་དེ་ཆོས་ཅན། ཁྱོད་ཀྱིས་གབ་པའི་གསང་བ་ལྟ་བ་གནས་ལུགས་དེ་བཞིན་ཉིད་མ་རྟོགས་པར། སྦས་པའི་གསང་བ་སྦྱོད་པ་སྦྱོར་སྒྲོལ་འཇོལ་ཉོག་ཏུ་སྤྱད་པའི་ ― MLP018_Page_0377 ―
[མ་དཔེ་གཟིགས་ན་འདིར་གནོན།]
རྣམ་སྨིན་གྱི་འབྲས་བུས་དམྱལ་བ་དང་ཡི་དྭགས་སུ་སྐྱེས་ནས་བསྐལ་པ་ཆེན་པོ་སྟོང་ཕྲག་བཅུ་གཉིས་དང་བསྐལ་ཆེན་དྲུག་གི་བར་དུ་དམྱལ་བ་ཚ་གྲང་དང་ཡི་དྭགས་བཀྲེས་སྐོམ་གྱི་སྡུག་བསྔལ་ཉམས་སུ་མྱོང་བར་ཐལ། དེ་ལྟར་གཞུང་ལས་བཤད་པའི་ཕྱིར། དེ་ལྟར་བཤད་པ་ཚུལ་བསྟན་ཡིན་གྱི་དངོས་སུ་མ་མྱོང་ཟེར་ན། འོ་ན་རུ་ཏྲ་ཐར་པ་ནག་པོ་དེ་སྔོན་གྱི་དུས་སུ་གསང་སྔགས་རང་གར་སྤྱད་དེ། ཁྲོ་བོ་དང་ཕྲ་མེན་ལ་སོགས་པའི་ལྷ་རང་རྒྱུད་དུ་བསྒོམས། ར་ལ་ར་ལ་ལ་སོགས་པའི་སྔགས་རང་གར་བཟླས། ཕོ་བསྒྲལ་མོ་སྦྱོར་གྱི་ལས་བརླང་པོར་སྤྱད་པའི་སྲིད་པས་མཚམས་སྦྱར་ནས། ཡུལ་ལངྐ་པུ་རང་གི་སྨད་ཚོང་མའི་མངལ་དུ་ཆགས་པ་ལས། མངལ་ནས་སྐྱེས་ནས་ཞག་བདུན་ལོན་པ་དང་མ་དེ་ཤི་བས་ཡུལ་མི་རྣམས་ཀྱིས་བུ་དེ་མའི་རོའ་མཆན་དུ་བཅུག་ནས་དུག་ཤིང་ནལ་བའི་རྩར་བསྐྱལ་བས། བུ་དེས་མའི་ནུ་ཞོ་དང་ཤ་དང་ཁྲག་དང་རུས་པའི་བར་དུ་ཟོས་པས་ཁོ་ཆེར་བརྟས་ནས་དུར་ཁྲོད་ཀྱི་རོ་རྣམས་ཟས་སུ་ཟ་ཞིང་རོ་གོས་རྣམས་གོས་སུ་གྱོན་པས་ཡི་དྭགས་ཀྱི་འགྲོ་བས་བསྡུས་པའི་ལུས་དང་ཡན་ལག་མི་འཚམས་པར་མཚོན་ཆ་སྣ་ཚོགས་འཛིན་པ། གསོད་བྱེད་ཀྱི་འཁོར་དྲེད་མོ་ལག་བསྡེབས་དང་། འཕར་བ་རྐང་བསྡེབས་དང་། བྱ་སྤྱང་གསོད་བྱེད་ལ་སོགས་པའི་འཁོར་དང་ལྡན་ཞིང་བཞི་བརྒྱ་རྩ་བཞིའི་ནད་བཏང་བའི་སྲིན་པོ་བྱའི་གཤོག་པ་ཅན་ཡིན་པར་ཐལ། དེ་ལྟར་ཡིན་ཚུལ་གཞུང་ལས་བཤད་པའི་ཕྱིར། མ་གྲུབ་ན། གཞུང་ལས། དེ་ནས་སྔོན་གྱི་ལས་ཀྱི་སྒྲིབ་པ་རྩུབ་མོ་དེ་ཁད་ཀྱིས་བསྲབས་པ་དང་། ཞེས་སོགས་དང་འགལ་ལོ། །དེ་དག་ཐམས་ཅད་སྤྲུལ་བཤད་ཡིན་ཟེར་ན། འོ་ན། འདི་དང་ཆ་འདྲ་བའི་རུ་ཏྲ་རང་རྒྱུད་པ་གཅིག་ཁས་ལེན་རིགས་པར་ཐལ། འགྲེལ་པ་ལུང་བསྟན་མ་ལས། དེ་བཞིན་གཤེགས་པ་ཉིད་ཀྱི་ཚུལ་དུ་བསྟན་པ་རིགས་པར་བྱ་སྟེ། དེ་ལ་དགོས་པ་དང་དགོངས་པ་ཅི་ཡོད་ཅེ་ན། རང་རྒྱུད་པའི་གོལ་ས་དགག་པ་དང་། ཆེ་བའི་མཐུའི་ཚད་བསྟན་པའི་དགོས་པ་དང་། ཞེས་སོགས་གསུངས་པའི་ཕྱིར། འདོད་ན། རུ་ཏྲ་རང་རྒྱུད་པ་དེ་དམྱལ་བ་དང་ཡི་དྭགས་ཀྱི་ལས་མྱོང་སྟོབས་ཀྱིས་ཟད་པར་ཐལ། དེ་ནས་རྣམ་པར་སྨིན་པ་དེ་ཁད་ཀྱིས་བསྲབས་པ་དང་ཞེས་ ― MLP018_Page_0378 ―
[མ་དཔེ་གཟིགས་ན་འདིར་གནོན།]
བཤད་པའི་ཕྱིར། རྣམ་སྨིན་སྤྱད་པས་ཟད་དམ། གཉེན་པོས་ཟད། དང་པོ་ལྟར་ན། ཡང་དག་པའི་ལམ་དགོས་མེད་དུ་ཐལ། རྣམ་སྨིན་སྤྱད་པས་ཟད་པའི་ཕྱིར། འདོད་མི་ནུས་ཏེ། འདི་ཉིད་ལས། ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །ཅེས་སོ། །གཉིས་པ་གཉེན་པོ་བསྟེན་པས་ཟད་ན། ངན་སོང་གསུམ་མི་ཁོམ་པའི་གནས་མ་ཡིན་པར་ཐལ། གཉེན་པོ་བསྟེན་དུ་འདུག་པའི་ཕྱིར། གཞན་ཡང་དཔལ་ཆེན་པོས་རུ་ཏྲ་དངོས་སུ་མ་བསྒྲལ་བ་ཡིན་པར་ཐལ། འདིར་བཤད་པ་ནི་སྤྲུལ་པ་བ་ཡིན་ཞིང་། གཞན་གང་དུ་ཡང་རུ་ཏྲ་དངོས་སུ་བསྒྲལ་བ་མ་བཤད་པའི་ཕྱིར། འདོད་མི་ནུས་ཏེ། ལུང་ལས། མ་ཏྲཾ་རུ་ཏྲ་བསྒྲལ་བའི་རྫས་བརྒྱད་ལས། །གསང་སྔགས་འབྱོན་པའི་གནས་བརྒྱད་བྱིན་གྱིས་བརླབས། །ཞེས་དང་། བཀའ་བརྒྱད་བདེར་འདུས་ལས། མ་ཏྲཾ་བྱ་བའི་སྡིག་ཅན་ཁྱོད། །སྔོན་ཚེ་དཔལ་ཆེན་ཧེ་རུ་ཀས། །བསྒྲལ་ནས་དུར་ཁྲོད་ཆེན་པོར་བྱས། །ཞེས་སོགས་ལུང་དུ་མ་དང་འགལ་བའི་ཕྱིར། གཞན་ཡང་། དཔལ་ཆེན་པོ་ཆོས་ཅན། ཁྱོད་ཀྱིས་རུ་ཏྲ་དངོས་སུ་བསྒྲལ་བ་ཡིན་པར་ཐལ། ཁྱོད་ཀྱིས་ཡབ་ཡུམ་སྙོམས་པར་སྦྱོར་བའི་སེམས་སྤྲིན་ལས་ཁྲོ་ཚོགས་སྤྲོ་བསྡུའི་སྦྱོར་བས་རུ་ཏྲ་རྣམས་དངོས་སུ་ཞབས་འོག་ཏུ་མནན་པའི་ཕྱིར། མ་གྲུབ་ན། དེ་ཆོས་ཅན། དེ་ལྟར་ཡིན་པར་ཐལ། ཁྱོད་ཀྱི་ཞབས་འོག་ཏུ་མནན་པས་ད་དུང་དགྲ་ཟླར་མཐོང་སྟེ། ཁྲོས་པའི་གཏུམ་ཚིག་སྨྲས་པས། ལུས་ངག་ཡིད་གསུམ་སྐུ་གསུང་ཐུགས་སུ་བསྡུད་པའི་ཧཱུྃ་གསུམ་གྱི་རྔམས་སྒྲ་དང་། དུག་གསུམ་ཞལ་དུ་གསོལ་བའི་སྲོག་དབུགས་ལ་རྔམས་པའི་ཕྱིར་ཧ་གསུམ་གྱི་བཞད་སྒྲ་དང་། ཤ་ཁྲག་རུས་གསུམ་ལྷག་མ་མ་ལུས་པར་ཞལ་དུ་གསོལ་བར་དགྱེས་པའི་ཁ་ཧི་གསུམ་གྱི་དགྱེས་སྒྲ་དང་བཅས་ཏེ། བདག་འཛིན་རྩད་ནས་གཅོད་ཕྱིར་སྙིང་ཕྱུང་། ཡུལ་འཛིན་གྱི་སྒོ་དགག་ཕྱིར་དབང་པོ། མངོན་ཞེན་དགག་ཕྱིར་ནང་ཁྲོལ་ཀུན་དྲངས། ལས་ངན་གྱི་བག་ཆགས་གཅོད་ཕྱིར་ཡན་ལག་ཀུན་བཅད་གཏུབས་ནས་གཏི་མུག་ཤ་ཀུན་ཟོས། འདོད་ཆགས་ཁྲག་ཀུན་འཐུང་། ཞེ་སྡང་རུས་པ་ཀུན་འཆོས་ནས་ཕུང་པོ་ལྷག་མ་མ་ལུས་པ་ཞལ་དུ་བསྟབས་ནས་བསྒྲལ་བ་ཡིན་པའི་ཕྱིར། ཡང་གོང་དུ་ཐར་པ་ནག་པོ་ ― MLP018_Page_0379 ―
[མ་དཔེ་གཟིགས་ན་འདིར་གནོན།]
ལམ་གོལ་ནས་ལས་ཀྱི་རུ་ཏྲར་སྐྱེས་པ་དེ། སྔོན་བསྐལ་པ་ཀུན་བཀོད་ཀྱི་དུས་སུ་དགེ་སློང་ཐུབ་དཀའ་གཞོན་ནུ་བསྟེན་པའི་སྟོབས་ཀྱིས། ཐུབ་དཀའ་གཞོན་ནུ་དེ་རྡོ་རྗེ་སེམས་དཔར་སངས་རྒྱས་པ་དང་། མཆེད་དན་ཕག་ས་བཅུའི་བྱང་སེམས་གསང་བདག་ཏུ་གྱུར་པའི་ཐུགས་རྗེ་ཡེ་ཤེས་ཀྱིས་གཟིགས་ནས་ཡུལ་དང་འཕྲད་པའི་ཐུགས་རྗེས་མངོན་སྤྱོད་དྲག་པོའི་ལས་ཀྱིས་བཏུལ་བ་མ་ཡིན་པར་ཐལ། ལེའུ་བཅོ་ལྔ་པ་འདིའི་སྟོད་དུ་གདུལ་བྱ་རུ་ཏྲ་གང་ཟག་སྒོས་ཚན་པ་ཞིག་ལམ་གོལ་ནས་གདུལ་བྱར་གཟིགས་ཚུལ་བཤད་ཀྱང་། འདུལ་བྱེད་སྦྱོར་སྒྲོལ་གྱི་ཕྲིན་ལས་ཀྱི་སྐབས་སུ་ཕོ་རྒྱུད་ཉི་ཤུ་རྩ་བརྒྱད་དང་མོ་རྒྱུད་ཉི་ཤུ་རྩ་བརྒྱད་སྦྱོར་སྒྲོལ་གྱི་སྒོ་ནས་བཏུལ་བར་བཤད་པ་ལས་རུ་ཏྲ་བཏུལ་བར་མ་བཤད་པའི་ཕྱིར། མ་གྲུབ་ན་རུ་ཏྲ་ཆོས་ཅན། ཁྱོད་སྐབས་འདིར་སྦྱོར་སྒྲོལ་གྱི་ཕྲིན་ལས་ཀྱིས་བཏུལ་བ་མ་ཡིན་པར་ཐལ། སྦྱོར་སྒྲོལ་ཕྲིན་ལས་ཀྱིས་བཏུལ་བའི་གདུལ་བྱ་ཕོ་རྒྱུད་དང་མོ་རྒྱུད་ཀྱི་ནང་དུ་ཁྱོད་མི་འདུག་པའི་ཕྱིར། དེའི་རྒྱུ་མཚན་སྒྲོལ་བྱེད་དཔལ་ཆེན་པོས་དེ་བཞིན་ཉིད་ཀྱི་དབྱིངས་ནས་གསང་བའི་ཡུམ་སྤྲུལ་ཏེ། མཉམ་པར་སྦྱོར་བའི་སེམས་སྤྲིན་ལས་ཁྲོ་བོ་འཆོལ་པ་མཐའ་ཡས་པར་སྤྲོས། འཇིག་རྟེན་གྱི་ཁམས་ཐམས་ཅད་ཁྲོ་ཚོགས་ཀྱི་ཁེངས་པའི་ཚ་ངམ་དྲག་ཤུལ་གྱིས་ཕྱོགས་བཅུའི་འཇིག་རྟེན་ཐམས་ཅད་གཡོས་རབ་ཏུ་གཡོས་པ་ལ་སོགས་པའི་ལྟས་ཆེན་པོ་བཅོ་ལྔ་བསྟན་པས། འཇིག་རྟེན་དབང་ཆེ་བའི་ལྷ་མ་ཧཱ་དེ་བ་དང་། གཟི་བརྗིད་ཆེ་བའི་ཚངས་པ་དང་། མཐུ་ཆེ་བ་ལྷ་ཁྱབ་འཇུག་དང་དབང་ཕྱུག་ལ་སོགས་པ་ཐམས་ཅད་ཁམས་འཁྲུགས་ནས་དྲན་པ་ཉམས་ཏེ་བརྒྱལ། རབ་ཏུ་བརྒྱལ། ཀུན་ཏུ་བརྒྱལ་བར་གྱུར་པ་བཤད་པའི་ཕྱིར། གོང་དུ་ཕོ་རྒྱུད་ཉི་ཤུ་རྩ་བརྒྱད་ཀྱི་ནང་དུ་རུ་ཏྲ་ཡོད་ཟེར་ན། རུ་ཏྲ་ཆོས་ཅན། ཁྱོད་ཉི་ཤུ་རྩ་བརྒྱད་ཀ་དང་། དེ་གང་རུང་གཅིག་ཏུ་ཁས་ལེན་རིགས་པར་ཐལ། དེ་གཉིས་གང་རུང་གཅིག་ཏུ་ཁས་ལེན་རིགས་པའི་ཕྱིར། འདོད་ན། མ་ཡིན་པར་ཐལ། ཉི་ཤུ་རྩ་བརྒྱད་པོ་གང་རུང་གཅིག་མ་ཡིན་པའི་ཕྱིར། དང་པོ་མ་གྲུབ་ན། ཕོ་རྒྱུད་ཉི་ཤུ་རྩ་བརྒྱད་པོ་ཆོས་ཅན། ཁྱོད་རྣམས་རྒྱུད་ཐ་དད་མ་ཡིན་པར་ཐལ། ཁྱོད་རྣམས་རུ་ཏྲ་དང་རྒྱུད་གཅིག་པའི་ ― MLP018_Page_0380 ―
[མ་དཔེ་གཟིགས་ན་འདིར་གནོན།]
ཕྱིར། གཉིས་པ་མ་གྲུབ་ན། དེ་ལྟར་མ་ཡིན་པར་ཐལ། སྲིན་པོ་ད་ཤ་གྲི་བ། ལྷ་ཚངས་པ། ཉི་མ། ལྷའི་བུ་ཟླ་བ། ལྷ་བེ་ཅོན། སྲིན་པོ་ཁྲག་མིག ལྷ་ཟ་བྱེད། ལྷ་དགའ་བྱེད་དབང་ཕྱུག ལྷ་སྟོབས་བཟང་། ལྷ་བྷྲིཾ་གི་རི་ཏི། འདོད་པའི་ལྷ། ནོར་སྲུང་། རླུང་ལྷ། ལྷ་གསོད་བྱེད། མེ་ལྷ། ས་བདག་ཕག་ཆེན། གཤིན་རྗེ་གན་བྱེད། ཚོགས་བདག་བི་ན་ཡ་ག ཀླུ་ཧང་ཕན། ལྷ་ནག་མོ་ཆེན་མོ། ལྷ་ར་གདོང་ཆེན་མོ། སྲིན་པོ་བུམ་སྣ། ལྷ་གསུས་པོ་ཆེ་སྟེ་ཉེར་བརྒྱད་པོ་གོང་དུ་རེ་རེ་ནས་མ་ཡིན་པའི་ཕྱིར། གཞན་ཡང་། དཔལ་ཆེན་པོས་བསྒྲལ་བའི་རུ་ཏྲ་དེ་བདག་འཛིན་གྱི་རྟོག་པ་ཡིན་པར་ཐལ། བདག་ཏུ་རྨོངས་པའི་རྟོག་པ་དེ་ཡིན་པར་ཁས་ལེན་པའི་ཕྱིར། མ་གྲུབ་ན། དེ་ལྟར་ཡིན་པར་ཐལ། དེའི་ཤེས་བྱེད། བདེ་འདུས་ལས། ཁུངས་དང་རྫས་བཅས་གང་ལས་བྱུང་། །ཁུངས་དང་རྫས་བཅས་བདག་ལས་བྱུང་། །བདག་མེད་སྟོང་པའི་ཐོ་བས་གཞོམ། །ཞེས་བཤད་པའི་ཕྱིར་རོ། །གཞན་ཡང་གོང་དུ་འདིར་བཤད་པའི་རུ་ཏྲ་དེ་སྤྲུལ་བ་པ་དང་། འདི་དང་ཆ་འདྲ་བའི་རུ་ཏྲ་རང་རྒྱུད་པ་ཞིག་ཁས་བླངས་པས། འདི་དང་ཆ་འདྲ་བའི་རུ་ཏྲ་རང་རྒྱུད་པ་དེ་ཆོས་ཅན། ཁྱོད་ཀྱིས་ཚོགས་ཀྱི་དཀྱིལ་འཁོར་ཆེན་པོ་འདི་དངོས་སུ་མཐོང་བར་ཐལ། འདི་དང་ཆ་འདྲ་བའི་རུ་ཏྲ་གང་ཞིག དེས་དེ་ལྟར་མཐོང་བར་བཤད་པའི་ཕྱིར་ཏེ། འདི་ཉིད་ལས། ཁྲོ་བོའི་ཚོགས་ཆེན་པོ་དེ་དག་ཀྱང་དབུ་དགུ་བརྒྱ་ཕྱག་སྟོང་བརྒྱད་བརྒྱ། ཞབས་བརྒྱད་བརྒྱ། སྐུ་འབར་བ་ཆེན་པོའི་ཀློང་ན་བཞུགས་པར་མཐོང་ངོ་ཞེས་བཤད་པའི་ཕྱིར། མ་གྲུབ་ན། དེ་དང་ཆ་འདྲའི་རུ་ཏྲ་མ་ཡིན་པར་ཐལ་ལོ། །གཞན་ཡང་སྡིག་པ་གང་ཆེ་ཆེ་སངས་རྒྱ་བར་ཐལ། མཚམས་མེད་ཀྱི་ལས་རྔམ་པོ་ཆེ་བྱས་པའི་རུ་ཏྲ་དེས་སངས་རྒྱས་ཀྱི་ཞལ་མཐོང་ནས་སངས་རྒྱས་པའི་ཕྱིར། གཞན་ཡང་འདི་ནས་བཤད་པའི་རུ་ཏྲ་དེ་སྤྲུལ་པ་ཡིན་ཟེར་བ་ཡང་མི་འཐད་དེ། ལུང་རིགས་གཉིས་ཀྱིས་གྲུབ་པའི་ཕྱིར། དང་པོ་གྲུབ་སྟེ། བདག་ཏུ་རྨོངས་པའི་རྟོག་པ་དང་རྟག་པ་ལ་མངོན་པར་ཞེན་ནས། ཞེས་སོགས་གསུངས་པའི་ཕྱིར། གཉིས་པ་གྲུབ་སྟེ། སངས་རྒྱས་ཀྱིས་སྤྲུལ་པའི་རུ་ཏྲ་ཆོས་ཅན། ཁྱོད་ཀྱི་སེམས་ཅན་གྱི་ཁམས་ལ་བཞི་བརྒྱ་རྩ་བཞིའི་ནད་འབེབས་པ་ལ་སོགས་ ― MLP018_Page_0381 ―
[མ་དཔེ་གཟིགས་ན་འདིར་གནོན།]
ཐོ་འཚམ་པའི་ལས་ནག་པོ་དེ་ཙམ་བྱེད་པ་མི་སྲིད་པར་ཐལ། ཁྱོད་རྣམ་པ་ཀུན་ཏུ་སེམས་ཅན་མཐའ་དག་ལ་བརྩེ་བ་ལྡན་པའི་ཕྱིར། སངས་རྒྱས་ཆོས་ཅན། ཁྱོད་རུ་ཏྲའི་རྣམ་པར་སྤྲུལ་པ་ལ་དགོས་པ་མེད་པར་ཐལ། ཁྱོད་རུ་ཏྲར་སྤྲུལ་ནས་སེམས་ཅན་ལ་ལས་ངན་གསོག་ཏུ་འཇུག་མི་དགོས་པའི་ཕྱིར། གཞན་ཡང་སྤྲུལ་པ་དང་རང་རྒྱུད་ཀྱི་མཚན་ཉིད་གང་ལ་བྱེད། སྐྱོན་གྱི་སྣང་ཚུལ་ཅན་ལ་རང་རྒྱུད་པ་དང་། ཡོན་ཏན་གྱི་སྣང་ཚུལ་ཅན་ལ་སྤྲུལ་པར་འཇོག དང་པོ་ལྟར་ན། སེམས་ཅན་གྱི་དོན་དུ་སངས་རྒྱས་བྱང་སེམས་སྤྲུལ་པ་བསྟན་པ་དང་སྨད་འཚོང་ལ་སོགས་པའི་རྣམ་པར་བསྟན་པ་དེ་དག་ཆོས་ཅན། ཁྱོད་རང་རྒྱུད་པ་ཡིན་པར་ཐལ། འཇིག་རྟེན་ན་རྔོན་པ་དང་སྨད་འཚོང་ལ་སོགས་སྐྱོན་གྱི་སྣང་ཚུལ་ཅན་དུ་བྱེད་པའི་ཕྱིར། འདོད་ན། མ་ཡིན་པར་ཐལ། སྤྲུལ་པ་ཡིན་པའི་ཕྱིར་ཏེ། རྔོན་དང་སྨད་འཚོང་ལ་སོགས་པ། །སྤྲུལ་པའི་ལུས་ཀྱིས་འདུལ་བར་བྱེད། །ཅེས་གསུངས་པའི་ཕྱིར། གཞན་ཡང་། སྟོན་པ་ཤཱཀྱ་ཐུབ་པ་བདུད་སྡིག་ཅན་དུ་བྱས་པ་དེ་ཆོས་ཅན། ཁྱོད་རང་རྒྱུད་པར་ཐལ། ཁྱོད་སྨད་པའི་ཆ་བྱད་ཅན་དུ་བྱས་པའི་ཕྱིར། འདོད་ན། གོང་གི་སྒྲུབ་བྱེད་བཞིན། མ་གྲུབ། དེ་འདྲ་མེད་ཟེར་ན། དེ་ལྟར་ཡོད་ཚུལ་མདོ་སྡེ་མྱང་འདས་ལས། རིགས་ཀྱི་བུ། དེའི་ཚེ་དེའི་དུས་ན་བདུད་སྡིག་ཏོ་ཅན་ང་ཉིད་ཡིན་ཏེ། གཞན་དུ་མ་རྟོག་ཅིག ཅེས་གསུངས་པའི་ཕྱིར། ཕྱིས་འདི་འདྲའི་རང་རྒྱུད་པ་འབྱུང་བ་ལ་དགོངས་ཟེར་བ་ཡང་མི་འཐད་དེ། སྔར་དངོས་སུ་མ་བྱུང་ན་ཕྱིས་ཀྱང་དངོས་སུ་མི་འབྱུང་བའི་ཕྱིར་ཏེ། རྒྱུ་རྐྱེན་ལ་ཁྱད་པར་མེད་པའི་ཕྱིར། མོ་རྣམས་སྦྱོར་བས་བཏུལ་བའི་ཚེ། དཔལ་ཆེན་པོས་མོ་རྒྱུད་ཉི་ཤུ་རྩ་བརྒྱད་དང་དངོས་སུ་སྦྱོར་བ་མཛད་པར་ཐལ། མོ་རྣམས་སྦྱོར་བ་མཛད་ནས་བཏུལ་བའི་ཕྱིར། འདོད་ན་དཔལ་ཆེན་པོ་ཆོས་ཅན། ཁྱོད་ཀྱི་སྐུ་ལ་མོ་རྒྱུད་ཉི་ཤུ་རྩ་བརྒྱད་མ་འཁྲིལ་བར་ཐལ། ཁྱོད་ཀྱི་སྐུ་ལ་ཕྱོགས་ཀྱི་གཙོ་མོ་བཞི་དང་། སྒོ་མ་བཞི་སྟེ་བརྒྱད་ལས་མ་འཁྲིལ་བའི་ཕྱིར་ཏེ། གཞུང་ན་དེ་ལྟར་གསལ་བའི་ཕྱིར་རོ། །ཕྱོགས་ཀྱི་ལྷག་མ་ལྔ་ལྔ་པོ་དེ་རྣམས་རིགས་བཞི་ཧེ་རུ་ཀ་དང་འཁྲིལ་བའི་ཕྱིར། དེ་ལྟར་ཡང་འདི་ཉིད་ལས། བཅོམ་ལྡན་འདས་དེ་བཞིན་གཤེགས་པའི་སྐུ་ལ་ཚངས་ ― MLP018_Page_0382 ―
[མ་དཔེ་གཟིགས་ན་འདིར་གནོན།]
མ་དང་། འཁྲུགས་མོ་དང་ཞེས་སོགས་གསུངས་པའི་ཕྱིར་རོ། །ཡང་གོང་དུ་ཉི་ཤུ་རྩ་བརྒྱད་དངོས་སུ་སྦྱོར་བ་མ་མཛད། དཔལ་ཆེན་པོའི་སྐུ་ལ་བརྒྱད་དང་། རིགས་བཞི་ཧེ་རུ་ཀའི་སྐུ་ལ་ཕྱོགས་ཀྱི་ལྷག་མ་ལྔ་ལྔ་འཁྲིལ་བ་ཡིན་ཟེར་ན། འོ་ན་དཔལ་ཆེན་པོས་མོ་རྒྱུད་ཐམས་ཅད་དང་སྦྱོར་བ་མཛད་ནས་བཏུལ་བ་མ་ཡིན་པར་ཐལ། དམ་བཅའ་དེ་འཐད་པའི་ཕྱིར། འོ་ན་དཔལ་ཆེན་པོ་ཆོས་ཅན། ཁྱོད་ཀྱིས་མོ་རྒྱུད་ཡོངས་རྫོགས་དང་སྦྱོར་བ་མཛད་ནས་མ་བཏུལ་བར་ཐལ། ཁྱོད་ཀྱིས་ཕྱོགས་ཀྱི་གཙོ་མོ་བཞི་དང་། སྒོ་སྐྱོང་གདོང་མོ་བཞི་མ་གཏོགས་གཞན་རྣམས་དང་སྦྱོར་བ་མཛད་ནས་མ་བཏུལ་བའི་ཕྱིར། རྟགས་ཁས། རིགས་བཞི་ཧེ་རུ་ཀ་ཆོས་ཅན། ཁྱོད་ཀྱིས་སྦྱོར་བ་མཛད་དེ་བཏུལ་བའི་དྲེགས་པ་མོ་རྒྱུད་ཡོད་པར་ཐལ། མོ་རྒྱུད་ཉི་ཤུ་རྩ་བརྒྱད་ལས་ཕྱོགས་ཀྱི་གཙོ་མོ་མ་གཏོགས་པའི་ལྔ་པོ་རྣམས་ཁྱོད་ཀྱིས་སྦྱོར་བ་མཛད་ནས་བཏུལ་བ་ཡིན་པའི་ཕྱིར། འདོད་ན། ཕྱོགས་ཀྱི་གཙོ་མོ་རྣམས་མ་གཏོགས་པའི་མ་མོ་ཉི་ཤུ་པོ་ཆོས་ཅན། ཁྱོད་དཔལ་ཆེན་པོས་བཏུལ་བ་མ་ཡིན་པར་ཐལ། ཁྱོད་རིགས་བཞི་ཧེ་རུ་ཀས་བཏུལ་བའི་ཕྱིར། འདོད་ན། དཔལ་ཆེན་པོས་བཏུལ་ནས་མིང་གི་དབང་བསྐུར་ནས་དཀྱིལ་འཁོར་གྱི་ཁྲག་ཁྱམས་ལ་བཀོད་པ་མ་ཡིན་པར་ཐལ་ལོ། །གཞན་ཡང་། དབང་ཕྱུག་མ་དང་སྦྱོར་བ་མཛད་པའི་དབང་ཕྱུག་མ་རེ་རེའི་ཁ་ནས་ཉེར་བརྒྱད་རེ་མ་ཐོན་པར་ཐལ། དེ་ལྟར་མ་ཐོན་པའི་ཕྱིར། འདོད་ན། དེ་ལྟར་ཐོན་པ་གཞུང་ལས་བཤད་པ་དང་འགལ་ལོ། །མ་གྲུབ་ན། དེ་ལྟར་ཐོན་པ་ཡིན་ཟེར་ན། དེ་ལྟར་མ་ཐོན་པར་ཐལ། མ་ཉི་ཤུ་རྩ་བརྒྱད་ལ་སྲས་ཉི་ཤུ་ལས་མ་བྱུང་བའི་ཕྱིར་ཏེ། གནས་མ་བརྒྱད་དང་། ཡུལ་མ་བརྒྱད། སྒོ་མ་བཞི་སྟེ་ཉི་ཤུ་ལས་མ་བྱུང་བའི་ཕྱིར། གཞན་ཡང་། སྒོ་མ་བཞི་ཆོས་ཅན། ཁྱོད་སྲས་དང་ཡུམ་གཉིས་ཀ་ཡིན་པར་ཐལ། སྲས་ཡིན་པ་གང་ཞིག ཡུམ་ཡིན་པའི་ཕྱིར། དང་པོ་མ་གྲུབ་ན། སྒོ་མ་བཞི་ཆོས་ཅན། ཁྱོད་སྲས་མོ་ཉི་ཤུའི་ནང་ཚན་ཡིན་པར་ཐལ། ཁྱོད་མ་དྲངས་པར་སྲས་མོ་ཉི་ཤུ་མ་ཚང་བའི་ཕྱིར། གཉིས་པ་མ་གྲུབ་ན། དེ་ཆོས་ཅན། ཁྱོད་དཔལ་ཆེན་པོའི་སྐུ་ལ་འཁྲིལ་བ་མ་ཡིན་པར་ཐལ་ལོ། །གཞན་ཡང་། རུ་ཏྲ་ཕོ་རྒྱུད་དེ་རྣམས་ཆོས་ཅན། ― MLP018_Page_0383 ―
[མ་དཔེ་གཟིགས་ན་འདིར་གནོན།]
ཁྱོད་རྣམས་ལ་དཔལ་ཆེན་པོས་དབང་མ་བསྐུར་བར་ཐལ། ཁྱོད་རྣམས་དཀྱིལ་འཁོར་གྱི་གནས་སུ་མ་བཀོད་པ་གང་ཞིག དབང་རྟགས་ཀྱང་མ་བཤད་པའི་ཕྱིར་ཏེ། ད་ལྟ་སྒྲུབ་ཐབས་སུ་ཡང་དབང་མོ་རྣམས་ལ་ལྕགས་ཀྱི་རྡོ་རྗེ་རྩེ་ལྔ་པ་རེ་རེས་དབུ་བརྒྱན་པའི་དབང་རྒྱ་ཡང་བཅའ་དགོས་ཤིང་། ཕོ་རྒྱུད་རྣམས་དབང་རྒྱ་བཅའ་བ་ཡང་མ་བཤད་པའི་ཕྱིར། གོང་དུ་མ་ཁྱབ། ཕོ་རྒྱུད་རྣམས་ལ་དབང་ཡང་མ་བསྐུར། དཀྱིལ་འཁོར་གྱི་གནས་སུ་ཡང་མ་བཀོད་ཟེར་ན། སྟོན་པ་ཡབ་ཡུམ་ཆོས་ཅན། ཁྱོད་ཀྱིས་བདུད་རྩི་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྐུ་གསུང་ཐུགས་དབྱེར་མི་ཕྱེད་པའི་རྡོ་རྗེ་ལས་དབང་རྫས་ཕྱི་བདུད་རྩི་དྲི་ཆེན། ནང་ཉི་ཟླ་བྱང་ཆུབ་ཀྱི་སེམས་འདི་ཕྱུང་ནས་ཕོ་རྒྱུད་རྣམས་ལ་དབང་བསྐུར་བ་ཡིན་པར་ཐལ། ཁྱོད་ཀྱིས་ༀ་བཛྲ་མ་ཧཱ་ཨ་མྲྀ་ཏ་མ་ཧཱ་ཀྲོ་དྷཱ་ཨཾ་ཨཾ་ཨཾ། ཞེས་ལྕེ་སྟེང་དུ་དམ་རྫས་ལན་གསུམ་བཞག་ནས་དབང་བསྐུར་བའི་ཕྱིར། དེ་ལྟར་ཡིན་པར་ཐལ། དབང་བསྐུར་བའི་བྱིན་རླབས་ཀྱིས་ཕོ་རྒྱུད་རྣམས་དྲན་པ་སླར་རྙེད་ནས་རྟོག་ཚོགས་སྐུ་དང་ཡེ་ཤེས་ཀྱི་དཀྱིལ་འཁོར་དུ་གསལ་ཏེ། ཁྲོ་བོ་རང་བཞིན་གྱི་དཀྱིལ་འཁོར་བསམ་ཡས་ལྷུན་གྲུབ་ཀྱི་ཏིང་ངེ་འཛིན་ཐོབ་པའི་ཕྱིར་རོ། །གཉིས་པ་དཀྱིལ་འཁོར་གྱི་གནས་སུ་མ་བཀོད་ཟེར་ན། དྲེགས་པ་ཕོ་རྒྱུད་དེ་རྣམས་ཆོས་ཅན། ཁྱོད་དཀྱིལ་འཁོར་གྱི་གནས་སུ་བཀོད་པར་ཐལ། ཁྱོད་ཁྲོ་བོ་ཐམས་ཅད་ཀྱི་གདན་དུ་བྱས་པ་དེ་ཁྱོད་སྡོད་པའི་གནས་ཡིན་པའི་ཕྱིར། ད་ནི་དེ་དག་གི་རྣལ་མའི་ལན་མདོ་ཙམ་ཞིག་བརྗོད་ན། སྤྱིར་ལས་དག་ཚུལ་ལ། རྟོགས་པས་འདག་པ་ལྟ་བ་གནས་ལུགས་རྟོགས་པས་ཆོས་ཐམས་ཅད་རྨི་ལམ་ལྟ་བུར་ཤེས་པའོ། །བཤགས་པས་འདག་པ་སྟོབས་བཞི་ཚང་བའི་བཤགས་པའོ། །གཉེན་པོས་འདག་པ། མི་དགེ་བ་ཆུང་ངུའི་གཉེན་པོར་དགེ་བ་ཆེན་པོ་སྤྱད་པས་སོ། །དེ་གསུམ་དང་མི་ལྡན་ན་མྱོང་འགྱུར་གྱི་ལས་ཡིན་པས་མྱོང་བས་འདག་སྟེ་རུ་ཏྲ་བཞིན་ནོ། །རུ་ཏྲ་མ་བསྒྲལ་བར་ཐལ། འདིར་བསྒྲལ་བ་བདག་འཛིན་གྱི་རུ་ཏྲ་ཡིན་པའི་ཕྱིར་ལ་མ་ཁྱབ་སྟེ། རུ་ཏྲ་ཐམས་ཅད་ཀྱི་རྩ་བ་བདག་འཛིན་ཡིན་པས་དེ་གཉིས་གཅིག་ཏུ་ཁས་ལེན་དགོས་པའི་ཕྱིར། རུ་ཏྲ་ཞེས་པ་དེ་ལུས་ངག་ཡིད་གསུམ་ ― MLP018_Page_0384 ―
[མ་དཔེ་གཟིགས་ན་འདིར་གནོན།]
ཕྱིན་ཅི་ལོག་བདག་ཏུ་བཟུང་བས་ཡིད་ཕྱིན་ཅི་ལོག་ཏུ་བསྒྱུར་བ་ལས་མ་ཏྲཾ་རུ་ཏྲ། ངག་ཕྱིན་ཅི་ལོག་ཏུ་བསྒྱུར་བ་ལ་ཁ་ཏྲཾ་ཀ་རུ་ཏྲ། ལུས་ཕྱིན་ཅི་ལོག་ཏུ་བསྒྱུར་བ་ཨ་ཀ་རུ་ཏྲ་དེ་རྣམ་པ་གསུམ་ཡིན། དེ་བསྒྲལ་ཚུལ་ནང་དུ་སྣང་གསུམ་བཅོམ་ནས་སངས་རྒྱས་པའི་ཚེ། ནང་གི་རྩ་མདུད་གྲོལ་བའི་རྟགས་སྣང་སྐྱེས་བུ་སངས་རྒྱས་པ་དེའི་སྣང་ངོར་བདུད་བཞི་བཅོམ་པའི་ཉམས་ཀྱི་སྣང་བ་ཡིན་པའི་ཚུལ་ལེའུའི་སྟོད་དུ་གང་ཟག་སྒོས་ཚན་པ་ཞིག་ཡིན་པར་བཤད་པ་དང་། སྦྱོར་སྒྲོལ་གྱི་ཕྲིན་ལས་སྐབས་དེར་དངོས་སུ་མི་འབྱུང་བ་དྲེགས་པ་ཕོ་རྒྱུད་རྣམས་འབྱུང་བ། བདག་འཛིན་གྱི་རུ་ཏྲ་བཅོམ་ན་དེའི་རྩལ་ལས་ཤར་བའི་ཕྱི་རོལ་དྲེགས་པ་རྣམས་བཅོམ་པའི་ཚུལ་བྱུང་བ་ཡིན་པར་མངོན། རུ་ཏྲ་དེ་ཕོ་རྒྱུད་ཉི་ཤུ་རྩ་བརྒྱད་པོ་གང་རུང་གཅིག་ཏུ་ཁས་ཅི་ལ་ལེན། དེའི་རྩལ་ལས་ཤར་བ་དེར་ཁས་ལེན་པ་དང་། དེ་དེའི་རྩལ་དུ་ཁས་ལེན་པ་གཉིས་ཀ་རྣམ་པ་འགལ་བ་ཅན་ཡིན་པའི་ཕྱིར། རུ་ཏྲ་སྤྲུལ་པ་བ་ཡིན་པར་ཁས་བླངས་པ་ལ་སྐྱོན་མེད་དེ། དེའི་དགོས་པ་རང་རྒྱུད་པའི་གོལ་ས་དགག་པ་དང་གསང་སྔགས་ཀྱི་མཐུའི་ཆེ་བ་བསྟན་པ་ལ་སོགས་པ་ཡིན་པའི་ཕྱིར། དེ་དང་ཆ་འདྲའི་རུ་ཏྲ་རང་རྒྱུད་པ་ཡོད་ཀྱང་། མཐུ་དང་རྫུ་འཕྲུལ་འདི་ནས་བཤད་པའི་གཟུགས་ཁམས་དབང་དུ་བསྡུ་བ་དང་སེམས་ཅན་ལ་ནད་བཞི་བརྒྱ་རྩ་བཞི་འདེབས་པ་ལ་སོགས་པ་དང་། འཇིག་རྟེན་གྱི་ཁམས་གཡོ་འགུལ་བྱེད་པའི་རྫུ་འཕྲུལ་ཅི་ལ་ཡོད་དགོས་ཏེ་མི་འབྱུང་བའི་ཕྱིར་ཏེ། རང་རྒྱུད་པ་ཡིན་པའི་ཕྱིར། འོན་ཀྱང་ཕྱི་རོལ་དུ་ཡང་འདི་ནས་བཤད་པ་ལྟར་གྱི་རྟགས་སྣང་འབྱུང་ཚུལ་ཆེ་ཆུང་གཉིས་ཁས་ལེན་དགོས་ཏེ་རྩ་མདུད་རགས་པ་སྦྱོར་ལམ་ཚོམ་བུ་ཚོགས་:དྲུག་ཐར་སྒྲུབ་མཐར་གྲོལ་ནས་མཐོང་ལམ་ལ་སྦྱོར་བ་གཅིག་དང་། ཕྲ་བ་རྒྱུན་མཐར་གྲོལ་ནས་འཚང་རྒྱ་ཚུལ་གཉིས་བཤད་པས། དེ་བཞིན་ཕྱི་རོལ་དུའང་དེ་གའི་ཆ་འདྲ་འབྱུང་བ་ཁས་ལེན་དགོས་ཏེ། ཕྱི་ནང་འགྲོ་ལྡོག་གཅིག་པའི་ཕྱིར། སངས་རྒྱས་ཀྱི་སྤྲུལ་པས་མཚམས་མེད་པའི་ལས་ངན་བྱས་པ་ལྟར་སྣང་བ་ལ་སྐྱོན་མི་འཇུག་སྟེ། སྔོན་སྟོན་པ་མ་ག་དྷ་རྡོ་རྗེའི་གདན་དུ་བྱོན་པའང་སྤྲུལ་བཤད་ཡིན་པར་བཤད་པས། ལྷས་བྱིན་ཡང་སྤྲུལ་པར་ཁས་ལེན་ ― MLP018_Page_0385 ―
[མ་དཔེ་གཟིགས་ན་འདིར་གནོན།]
པ་ངེས་དོན་འདིའི་སྐབས་སུ་འཐད་པའི་ཕྱིར་ཏེ། བཅོམ་ལྡན་འདས་ཀྱི་ཐུན་མོང་མ་ཡིན་པའི་གསང་བ་ཆེན་པོ་ཞེས་བྱ་བ་རྣལ་འབྱོར་ཆེན་པོའི་རྒྱུད་ལས། དེ་ནས་གཞན་ཡང་ཐམས་ཅད་མཁྱེན་པའི་ཕུན་སུམ་ཚོགས་པ་བཤད་པར་བྱ་སྟེ། འཇམ་དཔལ་ནི་རྒྱལ་པོ་ཟས་གཙང་མར་གྱུར་ཏོ། །འཇིག་རྟེན་དབང་ཕྱུག་ནི་ལྷ་མོ་སྒྱུ་འཕྲུལ་དུ་གྱུར་ཏོ། །དཔལ་ལྷ་མོ་ནི་གྲགས་འཛིན་མའོ། །རྡོ་རྗེ་སེམས་དཔའ་ནི་སྒྲ་ག ཅན་འཛིན་ནོ། །སྒྲིབ་པ་ཐམས་ཅད་རྣམ་པར་སེལ་བ་ནི་ཤ་རིའི་བུའོ། །ཀུན་ཏུ་བཟང་པོ་ནི་གནས་བརྟན་ཀུན་དགའ་བོར་གྱུར་ཏོ། །ལྷའི་དབང་པོ་བརྒྱ་བྱིན་ནི་གནས་བརྟན་ལྷས་བྱིན་ནོ། །རྣམ་པར་སྣང་མཛད་ཆེན་པོ་ནི་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པར་གྱུར་ཏོ། །ཞེས་གསུངས་པའི་ཕྱིར་རོ། །གཞན་ཡང་། སངས་རྒྱས་ཀྱི་སྤྲུལ་པ་ལ་ཚད་བཟུང་དུ་མེད་དེ། རྡོ་རྗེ་དྲྭ་བའི་རྒྱུད་ལས། གང་དང་གང་གི་གཟུགས་ཀྱིས་ནི། །ལུས་ཅན་རྣམས་ནི་འདུལ་འགྱུར་བ། །དེ་དང་དེ་ནི་རྣམ་སྟོན་ཏེ། །སྣ་ཚོགས་ནོར་བུ་ཇི་བཞིན་ནོ། །ཞེས་དང་། མདོ་ལས་ཀྱང་། བདུད་ཀྱི་ལས་རྣམས་ཐུགས་ཆུད་ཀྱང་། །བདུད་ཀྱི་རྗེས་སུ་འཇུག་པར་མཛད། །ཅེས་སོ། །སྦྱོར་བའི་སྐབས་དཔལ་ཆེན་པོས་དབང་ཕྱུག་ཉི་ཤུ་རྩ་བརྒྱད་སྦྱོར་བ་མཛད་པར་ཁས་ལེན་དགོས་ཏེ། དབང་མོ་རྣམས་ཀྱི་སྣང་ངོར་ཡང་དཔལ་ཆེན་པོ་རེ་རེ་དང་སྦྱོར་བའི་སྣང་བ་བྱུང་བར་མ་ཟད། རིགས་བཞི་ཧེ་རུ་ཀ་ཡང་སྟོན་པའི་ཐུགས་མེ་ལོང་ལྟ་བུ་ལ་སོགས་པ་བཞི་པོའི་རྩལ་སྣང་རིགས་བཞིར་སྣང་བ་ཙམ་དུ་མ་ཟད་འདུལ་བྱེད་གཉེན་པོའི་འཁོར་ཐམས་ཅད་སྟོན་པའི་ཐུགས་ཡེ་ཤེས་ཀྱི་རོལ་རྩལ་ཙམ་དུ་ཁས་ལེན་དགོས་པའོ། །སྲས་མོ་ཉི་ཤུ་ལས་མ་བྱུང་བ་ཡང་ཉེར་བརྒྱད་པོ་རེ་རེ་ཁ་ནས་ཉི་ཤུ་པོ་རེ་རེ་ཡང་ཉེར་བརྒྱད་རེ་ཐོན། སོ་སོ་ཡང་རིགས་གཅིག་ཏུ་བསྡུས་པའི་དོན་ཡིན་པར་བྱོས་ཤིག །གཞན་རྣམས་འགྲོས་ཀྱིས་གོ་སླའོ། །དྲི་བ་བདུན་པ་ནི། འཕྲོས་དོན་ཞིག་སྨྲོས་ཏེ་བརྗོད་ན། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོངས་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་འབྱུང་། །ཞེས་པའི་གཞུང་འདི། དཔག་བསམ་ཤིང་དང་ཡིད་བཞིན་གྱི། །རིན་ ― MLP018_Page_0386 ―
[མ་དཔེ་གཟིགས་ན་འདིར་གནོན།]
པོ་ཆེ་དང་འབྱུང་བ་ཀུན། །དེ་དག་རྫས་ཡོད་མ་ཡིན་ཏེ། །རང་སེམས་བསོད་རྣམས་བརྟན་པ་ཡིན། །ཞེས་པའི་གཞུང་འདི་ལ་འཕྲོས་པ་ཐལ། རྒྱུ་མཚན་དཔེར་ན་ལྷ་མ་ཡིན་གྱི་ཡུལ་ན་དཔག་བསམ་གྱི་ཤིང་དང་། མིའི་ཡུལ་ན་ཡིད་བཞིན་གྱི་ནོར་བུ་དང་། ལྷའི་ཡུལ་ན་རིན་པོ་ཆེའི་བུམ་པ་བཟང་པོ་དང་གསུམ་པོ་དེ་ལ་རང་རང་གི་དགོས་འདོད་འབྱུང་བ་ལྟར། རང་སེམས་བསོད་ནམས་དང་ཡེ་ཤེས་ཀྱི་མཐུ་ཏིང་ངེ་འཛིན་བརྟན་པ་ལས་དགོས་འདོད་ཀྱི་རེ་བ་ཐམས་ཅད་ཡོངས་སུ་སྐོང་བའི་རྫོགས་པའི་སངས་རྒྱས་འབྱུང་ཚུལ་དེ་བསྟན་ནས། ངོ་མཚར་རྨད་དུ་བྱུང་བའི་ཆོ་འཕྲུལ་ཆེན་པོ་ནི་སྐུ་དང་ཡེ་ཤེས་ཀྱི་དཀྱིལ་འཁོར་ཡིན་ལ། དེ་ཉིད་ཐབས་དམིགས་པ་མེད་པའི་ཏིང་ངེ་འཛིན་ལ་བརྟེན་ནས་ཤེས་རབ་སྟོང་པ་ཉིད་ཀྱི་རྩལ་སྣང་ལས། སྐུ་དང་ཡེ་ཤེས་ཀྱི་དཀྱིལ་འཁོར་དེ་ལྟ་བུ་ཆོས་ཀྱི་དབྱིངས་ཀྱི་མཁའ་ཀློང་ཡངས་པ་དེའི་ངང་ལས་བྱུང་བ་ཡིན་ནོ། །ཞེས་སྟོན་པར་བྱེད་པ་ནི། ངོ་མཚར་ཆོ་འཕྲུལ་རྨད་ཀྱི་ཆོས། །ཞེས་སོགས་འབྱུང་བའི་ཕྱིར། འོ་ན། སེམས་ཅན་འཁྲུལ་པའི་རྒྱུ། འཁྲུལ་གཞི་ཡོད་ནས་འཁྲུལ་ལམ་མེད་པ་ལས་འཁྲུལ། དང་པོ་ལྟར་ན། འཁྲུལ་གཞི་མེད་པར་ཐལ། ཐང་ཕྲོམ་ཟོས་པའི་རྒན་མོའ་མིག་ལ་ནམ་མཁའ་ལས་སྐྲ་ཤད་འཛག་པ་མེད་བཞིན་དུ་འཛག་པའི་སྣང་བ་བྱུང་བ་ལྟར་ཡིན་པའི་ཕྱིར་ཏེ། དམ་ཚིག་གསལ་བཀྲ་ལས། ཉི་མའི་དཀྱིལ་ན་མུན་མེད་ལྟར། །ཞེས་གསུངས་པའི་ཕྱིར། གཞི་རང་བཞིན་རྣམ་དག་ཡོད་མེད་དབུ་མའི་མཐའ་ལས་གྲོལ་བ་དེ་རང་ངོ་རང་གིས་མ་ཤེས་པས་འཁྲུལ་ཏེ། ཐུགས་ཐིག་ལས། དྲུག་གི་འགྲོ་བ་ཐམས་ཅད་ཀྱི། །སེམས་ཉིད་ནོར་བུ་རིན་པོ་ཆེ། །ཇི་ལྟར་བསམ་པ་སྣང་བ་ལས། །འཁྲུལ་གཞི་ཡོད་མེད་སྒྲོ་སྐུར་མེད། །ཞེས་སོ། །གཉིས་པ་ལྟར་ན། ཨེ་མ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །ཞེས་གསུངས་པས། དཔེར་ན། སྨན་ག་པུར་དེ་ཚད་ནད་ཅན་ལ་སྨན་དང་། རླུང་ནད་ཅན་ལ་དུག་དུ་འགྱུར་བ་ལྟར་ཡིན་ཏེ། ཐུགས་ཐིག་ལས། དོན་གཉིས་ཡོད་མེད་རིས་མེད་ལས། །དེ་ཡི་རྒྱུ་རྐྱེན་རང་བཞིན་པས། །སྨན་གྱི་ཕན་གནོད་ཇི་བཞིན་དུ། །ཐམས་ཅད་མ་ལུས་རྒྱུ་གཅིག་ལས། །མི་མཐུན་ཁྱད་པར་སོ་ ― MLP018_Page_0387 ―
[མ་དཔེ་གཟིགས་ན་འདིར་གནོན།]
སོར་སྣང་། །ཞེས་གསུངས་པ་བཞིན་ནོ། །རྒྱས་པ་ལས། མ་རིག་པ་ཉིད་སྤང་དུ་མེད། །རིག་པ་ཡེ་ཤེས་སྒྲུབ་ཏུ་མེད། །ཅེས་བཤད་པས། ཞེ་སྡང་མེད་ན་རང་བྱུང་གི་ཡེ་ཤེས་གསལ་མི་ཐེབས། འདོད་ཆགས་མེད་ན་བདེ་བའི་ཡེ་ཤེས་རྒྱུད་ལ་མི་སྐྱེ། གཏི་མུག་མེད་ན་རྣམ་པར་མི་རྟོག་པའི་ངང་ལ་བློ་མི་གནས། ང་རྒྱལ་མེད་ན་ཆོས་ཉིད་དུ་ལ་མི་བཟླ། ཕྲག་དོག་མེད་ན་མཉམ་པ་ཉིད་ཁོད་མི་སྙོམས་པའོ། །དེ་ལྟར་ཡང་ལུང་ལས། ལམ་གྱི་ནང་ན་ཉེ་ལམ་ཆེན་པོ་ནི། །ཐབས་ཀྱི་ནང་ན་མ་ནོར་དམ་པ་སྟེ། །ཤེས་རབ་ནང་ན་ཤེས་རབ་ཁྱད་པར་ཅན། །ཞེས་དང་། སྔགས་ཀྱིས་ཡོངས་སུ་ཟིན་པའི་ནད། །ཀུན་ལ་གནོད་པར་བྱེད་མི་ནུས། །དེ་བཞིན་ཐབས་ཀྱིས་ཟིན་པ་ཡིས། །དུག་གསུམ་སྡུག་བསྔལ་གནོད་མི་འགྱུར། །ཞེས་སོ། །ཕྱག་རྒྱའི་སྐབས། གོང་དུ། ཐབས་དང་ཤེས་རབ་ལྡན་འབྱོར་ན། །མ་བསྐྱོད་མ་བསྒུལ་ཐམས་ཅད་ཀུན། །ཕྱག་རྒྱ་ཆེན་པོའི་ངང་དུ་གནས། །ཞེས་པ་དང་། འོག་ཏུ། མདོར་ན་བསྒུལ་བསྐྱོད་ཐམས་ཅད་ཀྱང་། །ཕྱག་རྒྱ་ཆེན་པོ་ངང་དུ་གནས། །ཞེས་བཤད་པ་ནང་འགལ་ལོ་ཞེ་ན་སྐྱོན་མེད་དེ། ལྟ་བའི་ངོས་ནས་གོང་མ་དང་། སྤྱོད་པའི་ངོས་ནས་འོག་མ་བཞག་པ་སྟེ། རྒྱས་པ་ལས། རང་བཞིན་ཕྱག་རྒྱ་ཆེན་པོ་ནི། །ཕྱི་ནང་སྣོད་བཅུད་ཐམས་ཅད་ཀུན། །རིགས་ལྔ་བདེ་གཤེགས་ཡབ་ཡུམ་གྱི། །ཕྱག་རྒྱ་ཆེན་པོའི་ངང་དུ་གནས། །ཞེས་སོ། །དེ་ཡང་སྤྱིར་ཕྱག་རྒྱའི་དོན། འདའ་དཀའ་བ་དང་། མཛེས་པར་བྱེད་པ་དང་། བརྡ་སྤྲོད་པ་སྟེ། དཔེར་ན་རྒྱལ་པོའི་བཀའ་རྟགས་དང་། སྒེག་མོའ་སོར་གདུབ་དང་། ཉོ་ཚོང་མཁན་གྱི་ཕུ་དུང་བཞིན་ཤེས་པར་བྱའོ། །མཉེས་པའི་ལེའུ་ཞེས་འདུག་པས་རྒྱལ་བ་ལ་མཉེས་མི་མཉེས་མངའ་ན་གཟུང་འཛིན་ཅན་དུ་འགྱུར་རོ་ཞེ་ན། རྒྱལ་བ་ལ་མཉེས་མི་གཉེས་མི་མངའ་ཡང་། གདུལ་བྱ་རྣམས་ཀྱི་ཚོགས་གཉིས་རྫོགས་པའི་ཆེད་དུ་མཉེས་པ་ལྟར་སྣང་བ་ལ་འགལ་བ་མེད་པའོ། །འདིར་སྐབས་དེ་བཞིན་གཤེགས་པ་དགྱེས་པ་ཆེན་པོ་ཞེས་པ་ཅི་ཟེར་ན། སངས་རྒྱས་ལ་དགྱེས་མི་དགྱེས་ཀྱི་ཐ་སྙད་མི་ཡོང་ཡང་། ལོངས་སྤྱོད་ལ་མཚན་དུ་བཏགས་པ་སྟེ། དགའ་བ་ལ་རྣམ་དབྱེ་བཞི་ལས། ཐུན་མོང་གི་དགའ་བ་ནི་འདོད་ཁམས་འདོད་ཆགས་ཀྱི་བདེ་བ་ལ་སྤྱོད་ ― MLP018_Page_0388 ―
[མ་དཔེ་གཟིགས་ན་འདིར་གནོན།]
པ་དང་། ཁམས་གོང་མ་གཉིས་བསམ་གཏན་གྱི་དགའ་བ་ལ་སྤྱོད་པ་དང་། ས་དང་པོར་བདེན་པ་མཐོང་བའི་ཟག་མེད་ཀྱི་བདེ་བ་ལ་སྤྱོད་པ་དང་། འདིར་ནི་བསམ་གྱིས་མི་ཁྱབ་པའི་བདེ་བ་སྟེ། བླང་དོར་མེད་པའི་ཆོས་ཉིད་མཉམ་པ་ཉིད་ལ་ལོངས་སྤྱོད་པའི་དགའ་བའོ། །ལེའུ་བཞིར་བསྡུ་བ་འབྱུང་ལ། གཞན་ལ་མི་འབྱུང་བ་ཅི་ཞེས་པ། གཞི་དོན་གྱི་གནས་ལུགས་དེ་རྟོགས་བྱེད་རྒྱུའི་ལྟ་བ། གོམས་བྱེད་རྐྱེན་ཏིང་ངེ་འཛིན། དེ་གཉིས་ཀྱིས་མངོན་དུ་གྱུར་པའི་འབྲས་བུ་སྟེ། དེ་བཞིན་རྒྱུད་འདིའི་དོན་མཐའ་དག་འདུས་པའི་རྒྱུ་མཚན་གྱིས་ཡིན་ཏེ། དང་པོ་ལྷག་པ་ཀུན་རྫོབ་ཀྱི་གནས་ལུགས། གསུམ་པར་དེ་ཤེས་བྱེད་ཡང་དག་པའི་ལྟ་བ་འཇོག་བྱེད་གྲུབ་མཐའི་ཁྱད་པར། བཞི་པར་དེ་ཡི་གེས་མཚོན་ནས་ཉམས་སུ་ལེན་ཚུལ་ཏིང་ངེ་འཛིན། དྲུག་པར་དེས་མངོན་དུ་བྱས་པའི་འབྲས་བུ་སྐུ་ལྔའི་གྲུབ་ཚུལ་ལོ། །དུག་གསུམ་སྤྱད་བྱར་བཤད་པའི་དོན། རྒྱས་པ་ལས། མ་འགགས་སྣང་བ་ཐབས་ཡིན་ཏེ། །རང་བཞིན་མེད་པའི་ཤེས་རབ་ཡིན། །ཞེས་བཤད་པས། ཞེས་པའི་དོན་ལ་བློ་འབྱོར་ན་སྐྱོན་མེད་དེ། དཔེར་ན། ཕ་མེས་ཐམས་ཅད་མེས་ཚིག་ནས་ཤི་བའི་མི་ཞིག་ན་རེ། མེ་འདི་སྲེག་པ་ཁོ་ནའོ་སྙམ་པ་ལ། ནམ་ཞིག་འབྲོག་དགོན་ཞིག་ན། རི་དྭགས་མེ་བྱི་དཀོར་བྱ་བ་མེ་ལ་གནས་བཅས་ནས་ཟས་སུ་ཡང་མེ་ཟ། སྐོམ་དུ་ཡང་མེ་འཐུང་བ་ཞིག་མཐོང་ནས་དེའི་མངོན་ཞེན་ལྡོག་པ་བཞིན་ནོ། །ཡང་ན་ཐལ་མོ་རབ་བསྣོལ་ནས། །ཞེས་པའི་དོན། ཐལ་རྒྱུད་ལས། ཐལ་མོ་ཞེས་པ་བརྡེག་པའི་སྒྲ། །དབང་པོའི་ཡུལ་དུ་རབ་སྦྱོར་བས། །ཕྱག་རྒྱ་ཆེན་པོ་ནམ་མཁའི་དབྱིངས། །བརྟུལ་ཞུགས་གཉིས་ཀྱིས་ཕང་དུ་བླངས། །རྡོ་རྗེ་མཛུབ་མོའ་རྩེ་དག་ཏུ། །ཏིལ་འབྲུ་ནམ་མཁའི་གཞལ་ཡས་སུ། །རི་རབ་ཙམ་གྱི་ཕྱག་རྒྱ་འགོད། །ཅེས་པའོ། །མདོ་རྒྱུད་རྣམས་ནས་དུས་རིང་ཐུང་མི་མཐུན་པ་བཤད་པ་ཅི། ཞེས་པ། སྤྱི་ཙམ་དུ་འབྲས་བུ་འགྲུབ་པའི་དུས་ལ་ཐེག་པ་ཆེ་ཆུང་སྣ་ཚོགས་ནས་དུས་ཀྱི་ཚད་གཅིག་ཏུ་ངེས་བཟུང་མེད་པར་བཤད་པ་ནི་སོ་སྐྱེའི་གནས་སྐབས་སུ་གྲགས་ཚོད་ཡིན་ཞིང་། ངེས་པའི་དོན་དུ་ནི་ཚད་ངེས་པར་བཟུང་དུ་མི་རུང་སྟེ། གང་གི་ཕྱིར་ན་དུས་ནི་སེམས་ཀྱི་སྣང་བ་ཡིན་ལ། སེམས་ལ་དབང་མ་ ― MLP018_Page_0389 ―
[མ་དཔེ་གཟིགས་ན་འདིར་གནོན།]
ཐོབ་ཀྱི་བར་དུ་ནི་ཡུལ་དང་དུས་རྣམས་ཀྱང་སོ་སོར་བསྟན་པར་ངེས་པར་སྣང་ལ། སེམས་ལ་དབང་ཐོབ་ཕན་ཆད་ནི་ཡུལ་དང་དུས་ལ་ཅི་དགར་སྣང་ངོ་། །དེ་ལྟར་ཡང་དགོངས་པ་ངེས་འགྲེལ་ལས། སྔོན་གྱི་ལས་ཀྱི་སྒྲིབ་པ་སྦྱོང་བའི་ཚད་ངེས་པ་མེད་དེ། ཞེས་དང་། དྲི་མ་མེད་པར་གྲགས་པའི་མདོ་ལས་ཀྱང་། དུས་ཐུང་བར་འདོད་པ་རྣམས་ལ་བསྐལ་པ་མང་པོ་ཞག་བདུན་གྱིས་འདའ་བར་བྱིན་གྱིས་རློབ་བོ། །ཞེས་གསུངས་པས། སེམས་ལ་དབང་ཐོབ་པས་ཇི་ལྟར་འདོད་པ་བཞིན་སྣང་བ་ཡིན་པར་བཤད་དོ། །ཀོ་རློན་གོས་ནི་སྣ་ཚོགས་གྱོན། །ཞེས་སོགས། དུར་ཁྲོད་ཀྱི་ཆས་དང་དཔལ་གྱི་ཆས་ནི། དཔལ་ཆེན་པོའི་སྐུ་ལ་རང་ཆས་སུ་གནས་པ་ནི་དཔལ་གྱི་ཆས་ཏེ། འཁོར་བའི་རྒྱུ་ལྡོག་པའི་བརྡ་དབུ་སྐྲ་གྱེན་དུ་བརྫེས་པ། ཐབས་ཤེས་ཀྱི་བརྡར་རྡོ་རྗེའི་ཁྱུང་གཤོག རྟག་ཆད་ཟིལ་གནོན་གྱི་ཆས་སྙན་གོང་དུ་ཅོད་པན། རིག་པ་མི་འགྱུར་བའི་ཆས་སྤྱི་བོར་རྡོ་རྗེ་ཕྱེད་པས་མཚན་པ། བ་སྤུ་རྡོ་རྗེའི་གོ་ཁྲབ་ཀྱིས་གཏམས་པ་གཟི་འབར་གྱི་ཆས། ཡུམ་ལ་གཉིས་མེད་སྦྱོར་བ་རང་རིག་པའི་ཡེ་ཤེས་ཤེས་རབ་སྟོང་པ་ཉིད་དང་མི་འབྲལ་བའི་ཆས། གནོད་གདུག་ཟློག་བྱེད་དཔའ་བོ་ལྗགས་ཀྱི་ཆས། ཉོན་མོངས་སྲེག་བྱེད་སྐུ་ལས་མེ་འོད་དུ་འཕྲོ་བ་རྡོ་རྗེ་མེའི་ཆས་ཏེ་དཔལ་གྱི་ཆས་བརྒྱད་དང་། དེ་དག་གི་སྟེང་དུ་བྱང་སེམས་བརྟན་པའི་བརྡར་སྙན་གོང་གཉིས་སུ་ཉི་ཟླས་བརྒྱན་པ་སྟེ་དཔལ་གྱི་ཆས་དགུའམ། ཉི་ཟླ་གཉིས་སོ་སོར་དྲངས་པས་ཆས་བཅུ་ཞེས་ཀྱང་ཟེར་ཏེ། བརྩི་ཚུལ་འདི་ནི་སྒྱུ་འཕྲུལ་བ་སོགས་སྔ་འགྱུར་ཡོངས་གྲགས་ཀྱི་ལུགས་ཡིན། གཞན་དུ་འདུས་པ་མདོའ་རྩ་རྒྱུད་ཀུན་འདུས་རིག་པ་དང་། བཀའ་བརྒྱད་བདེར་འདུས་ཀྱི་རྩ་རྒྱུད་རྣམས་སུ། དཔའ་བོ་ཆེན་པོ་སྟག་གི་ཆས་སོགས་དཔལ་ཆས་བཅུ་འདི་དང་འདྲེན་ཚུལ་མི་གཅིག་ཙམ་ཞིག་འབྱུང་། རྒྱལ་བྱེད་དཔའ་རྟགས་ཀྱི་རྒྱན་ཞེས་དུར་ཁྲོད་ཀྱི་ཆས་བརྒྱད་ནི། སྔོན་དཔལ་ཆེན་པོས་དྲག་པོ་འཇིགས་བྱེད་ཆེན་པོ་བཏུལ་བའི་ཚེ་དེའི་རྒྱན་རྣམས་སྐུ་ལ་མནབས་པ་སྟེ། དེ་ལ་དུར་ཁྲོད་ཀྱི་ཆས་བརྒྱད་ནི། ཐོད་སྐམ་ལྔའི་དབུ་རྒྱན་དང་། ཐོད་རློན་ལྔ་བཅུའི་དོ་ཤལ་ཏེ་ཐོད་རྒྱན་དང་། ཀླུ་རིགས་ལྔ་སྦྲུལ་གྱི་རྣམ་པར་བྱས་པ་སྦྲུལ་རྒྱན་ཏེ་ ― MLP018_Page_0390 ―
[མ་དཔེ་གཟིགས་ན་འདིར་གནོན།]
གདགས་པའི་རྒྱན་གཉིས། དཔྲལ་བར་ཐལ་ཆེན་གྱི་ཚོམ་བུ། སྨིན་མཚམས་སམ། འབུར་བཞི་ལ་རཀྟའི་ཐིག་ལེ། མགྲིན་པར་ཞག་གི་ཟོ་རིས་ཏེ་བྱུག་པའི་རྩི་གསུམ། གླང་ཆེན་གྱི་ཀོ་རློན་དང་ཞིང་ཆེན་གྱི་གཡང་གཞིའི་སྟོད་གཡོགས། སྟག་ལྤགས་ཀྱི་ཤམ་ཐབས་ཏེ་བགོ་བའི་གོས་གསུམ་རྣམས་སོ། །ཡང་ལུགས་གཅིག་ལ་དུར་ཁྲོད་ཀྱིས་ཆས་བརྒྱད་ནི། གདགས་པའི་རྒྱན་གཉིས། བྱུག་པའི་རྩི་གསུམ། བགོ་བའི་གོས་གསུམ་སྟེ་བརྒྱད་དོ། །དང་པོ་ལ་ནང་གསེས་སུ་དབྱེ་ན། ཐོད་སྐམ་ལྔ་རིགས་ལྔའི་རྩེ་ཕྲན་ཅན་གྱི་དབུ་རྒྱན། ཐོད་རློན་ལྔ་བཅུའི་ཚར་གསུམ་ཐོད་པའི་དོ་ཤལ་སྟེ་ཐོད་རྒྱན་གཉིས་སམ། འགའ་ཞིག་ཏུ་ཐོད་ཚལ་གྱི་དཔུང་རྒྱན་བསྣན་ནས་གསུམ་དུ་བཤད། ཀླུ་རྒྱལ་རིགས་དཀར་པོས་སྐྲ་བཅིངས། རྗེ་རིགས་སེར་པོས་སྙན་ཆ། བྲམ་ཟེའི་རིགས་དམར་པོས་སེ་མོ་དོ་དང་མགུལ་ཆུ། དམངས་རིགས་ལྗང་གུས་སྐ་རགས་དང་དོ་ཤལ། གདོལ་པ་ནག་པོས་གདུ་བུ་སྟེ་སྦྲུལ་རྒྱན་ལྔ། བྱུགས་པའི་རྩི་གསུམ་ནི། དཔྲལ་བར་ཐལ་ཆེན་གྱི་ཚོམ་བུ་རྡོ་རྗེ་རྩེ་གསུམ་རིས། སྨིན་མཚམས་སམ་འབུར་གསུམ་དུ་རཀྟའི་ཐིག་ལེ་འདབ་བཞིའི་རིས། མགྲིན་པར་ཞག་གི་ཟོ་རིས་ཟླ་གམ་རིས་སོ། །བགོ་བའི་གོས་གསུམ་ནི། གླང་ཆེན་གྱི་ཀོ་རློན། ཞིང་ཆེན་གྱི་གཡང་གཞི། སྟག་ཤམ་རྣམས་སོ། །ཡང་བཤད་ཚུལ་གཅིག་ལ་དཔལ་གྱི་ཆས་བརྒྱད་དང་དུར་ཁྲོད་ཀྱི་ཆས་བརྒྱད་ལས། དང་པོ་ནི། ཁྱབ་མཛད་རེ་སྐོང་རྡོ་རྗེ་གཤོག་པའི་ཆས། །གནོད་གདུག་བཟློག་མཛད་རྒྱ་གྲམ་ལྗགས་ཀྱི་ཆས། །ཏིང་འཛིན་རབ་བརྗིད་དཔའ་བོ་སྟག་གི་ཆས། །དབང་གི་བསེ་ཁྲབ་གཟི་འབར་བཀོད་པའི་ཆས། །དཔའ་བརྗིད་གཉེན་ལྕུག་སྦྲུལ་ནག་འཁྱིལ་བའི་ཆས། །གཟི་མདངས་ཆེ་བ་ཆུ་སྲིན་སྤྲུལ་པའི་ཆས། །རྡོ་རྗེ་རྩེ་ལྔ་རིག་པ་ཀླག་ཚིག་འདི་གཞུང་དག་ན། ལྷག སློག སླག་སོགས་མི་འདྲ་བ་སྣ་ཚོགས་འདུག མཆན པའི་ཆས། །བསྐལ་མེ་ལྟར་སྲེག་རྡོ་རྗེ་མེ་ཡི་ཆས། །ཞེས་སོ། །གཉིས་པ་ནི། ཐེག་མཆོག་སྟོབས་ཐོགས་གླང་ཆེན་ཀོ་རློན་རྟགས། །བྱང་སེམས་མ་ཉམས་ཞིང་གི་གཡང་གཞིའི་རྟགས། །དཔའ་གཏུམ་དྲག་པོའི་ལས་མཛད་སྟག་ཤམ་རྟགས། །ཡབ་ཡུམ་གཉིས་མེད་འཁྲིལ་བའི་སྦྲུལ་ཆུན་དང་། །དུས་གསུམ་སངས་རྒྱས་བདག་ཉིད་ ― MLP018_Page_0391 ―
[མ་དཔེ་གཟིགས་ན་འདིར་གནོན།]
ཐོད་ཕྲེང་གསུམ། །ཕྲིན་ལས་ཕྱི་བཤོལ་མེད་པའི་ཐལ་ཆེན་དང་། །ཐུགས་རྗེ་ཆགས་པའི་རཀྟའི་ཐིག་ལེ་ཆེ། །དོན་དམ་གནས་ལུགས་བཅུད་ལྡན་ཞག་ཟོ་རིས། །བྱང་སེམས་དཀར་དམར་བརྟན་པའི་ཉི་ཟླའི་རྒྱན། །བསྣན་པའི་དཔལ་གྱི་ཆས་བཅུར་བཞེད་པའོ། །ཡང་ལུགས་གཅིག་ལ། བགོ་བ་ཀོ་རློན་གྱི་གོས་སྣ་ཚོགས་པ་སྟེ། ཐབས་མཁས་ཕྲིན་ལས་ཀྱི་གོས་ཞིང་གི་གཡང་གཞི། ཁྱབ་པ་ཐུགས་རྗེའི་གོས་གླང་ཆེན་གྱི་ཀོ་རློན། ཕྱི་ནང་གསང་བ་སྡུད་པའི་གོས་སྟག་ལྤགས་ཀྱི་ཤམ་ཐབས་རྣམས་སོ། །གཞན་རྣམས་བཤད་པ་གོང་དང་འདྲ། དཔལ་གྱི་ཆས་བརྒྱད་ནི། གཟི་བརྗིད་འབར་བ་ཆུ་སྲིན་བརྗིད་པའི་ཆས། །ཐབས་དང་ཤེས་རབ་ཟུང་འབྲེལ་ཉི་ཟླའི་ཆས། །གདུགས་པ་ཅན་བསྲེག་ཡེ་ཤེས་མེ་ཡི་ཆས། །སྐྱེ་ཤི་རྩད་གཅོད་མཆེ་བ་ཟླ་ཚེས་ཆས། །ཁྱབ་མཛད་རེ་སྐོང་རྡོ་རྗེ་གཤོག་པའི་ཆས། །མངའ་ཐང་ཡོངས་རྫོགས་རྡོ་རྗེ་ཀླག་པའི་ཆས། །སངས་རྒྱས་སར་བགྲོད་དབང་གི་བསེ་ཁྲབ་ཆས། །གནོད་གདུག་བཟློག་མཛད་རྒྱ་གྲམ་ལྗགས་ཀྱི་ཆས། །ཞེས་བཤད་དོ། །རུས་པའི་ཕྱག་རྒྱ་དྲུག་ནི། སྤྱི་བོའ་འཁོར་ལོ་མི་བསྐྱོད་པ། རྣ་ཆ་ཟུང་འོད་དཔག་མེད། མགུལ་རྒྱན་རིན་འབྱུང་། ཕྱག་ཞབས་ཀྱི་གདུ་བུ་བཞི་རྣམ་སྣང་། སྐ་རགས་ཞེས་སྨད་རྒྱན་དོན་གྲུབ། སེ་རལ་ཁའམ་མཆོད་ཐོགས་ཞེས་རྡོར་སེམས་ཀྱི་ཕྱག་རྒྱ་སྟེ་དྲུག་གོ །ཕྱག་རྒྱ་ལྔ་ནི་སེ་རལ་ཁ་སྤངས་པའི་དང་པོ་ལྔའོ། །ཁྲོ་བོའ་མངའ་གསོལ་ནི། རོལ་པ་ཉི་ཤུ། ཆེ་བ་ཉི་ཤུ། རྔམ་ཉི་ཤུ། བརྗིད་པ་ཉི་ཤུ་སྟེ་བརྒྱད་ཅུས་མངའ་གསོལ་བའོ། །སློབ་མའི་སྐྱོན་བཞི་དང་ཡོན་ཏན་ལྔ་ལས། དང་པོ་ནི། སྣོད་ཁ་སྦུབ། ཞབས་རྡོལ། གཞོགས་རལ། དུག་ཅན་བཞིའོ། །གཉིས་པ་ནི། ངང་ཆུ་བོ་ཆེན་པོའི་གཞུང་བཞིན་རིང་བ། ཚུལ་དགེ་སྦྱོང་གསར་བུ་ལྟར་ཞིབ་པ། བསམ་པ་རིན་པོ་ཆེ་གསེར་ལྟར་བཟང་བ། བློ་རི་རབ་ལྟར་བརྟན་ཅིང་མི་འགྱུར་བ། ཤེས་རབ་དང་སྙིང་རྗེ་ནོགས་ཐུབ་པ་སྟེ་ལྔའོ། །ཡང་ན་ཅིས་ཀྱང་སེམས་མི་འཁྲུགས་པས་ངང་བཟང་། སྐྱེ་བོ་རྣམས་ཀྱི་སྤྱོད་པ་ལས་ལོག་པས་ཚུལ་ཤིས། བློ་མི་འགྱུར་བ་རབ་ཏུ་བརྟན་པ། ལུས་དང་ལོངས་སྤྱོད་ཆོས་ཕྱིར་གཏོང་ཕོད་པ། དད་པ་དང་ཤེས་རབ་ཆེ་བའོ། །དྲི་བའི་ལན་བཏབ་ཟིན་ཏོ། ། ― MLP018_Page_0392 ―
[མ་དཔེ་གཟིགས་ན་འདིར་གནོན།]
སྨྲས་པ། རྟོགས་དཀའི་གནས་ལ་དྲི་ཚིག་བདུན་གྱི་ལན། །ཀུན་ལན་ཐེབས་པ་སངས་འཕགས་ཁོ་ནའི་ཡུལ། །མི་ཤེས་མདུད་པ་རྡོ་རྗེའི་ཚིག་གིས་བཀྲོལ། །རྣམ་དཀར་དགེ་བ་བྱང་ཆེན་རྒྱུ་རུ་བསྔོ། །ཞེས་པ་འདི་ནི་རང་གི་ཉེ་བར་གནས་པ་གནས་ལྔ་སྨྲ་བ་དྭགས་པོ་ཨོ་རྒྱན་བློ་གསལ་གྱི་དྲི་ལན་དུ་སྨིན་གླིང་གྲྭ་པའི་ཐ་ཤལ་བ་དྷརྨ་ཀིརྟིས་རང་ལོ་རེ་གཅིག་པར་གནས་ཆེན་ཆུ་བོ་རི་ཚེ་ཆུ་བཀོད་པའི་སྒྲུབ་སྡེའི་བླ་བྲང་དུ་མེ་འབྲུག་དབོ་ཟླའི་ཡར་ཚེས་ཀྱི་དུས་དགེ་བར་བྲིས་པ་དགེ་ལེགས་སུ་གྱུར་ཅིག འདིས་ཀྱང་གསང་ཆེན་བསྟན་པ་རྒྱས་པའི་རྒྱུར་གྱུར་ཅིག མངྒ་ལཾ།། །། |
