བསྟོད་ཕྱག་དང་དམ་བཅའ་བ།༄༅། །དཔལ་སྤྲུལ་ནམ་མཁའ་འཇིགས་མེད་ཀྱི་རྣམ་ཐར་ཆ་ཤས་དང་གསུང་འབུམ་བཞུགས་བྱང་ངོ་མཚར་གསེར་གྱི་སྙེ་མ་ཞེས་བྱ་བ་བཞུགས་སོ། ། ཐུགས་བསྐྱེད་ཚོགས་གཉིས་རྟ་བདུན་ཤིང་རྟ་ཡིས། ། ཉེར་དྲངས་གཟུགས་སྐུའི་བཀོད་པ་ཉིན་མོའི་མགོན། ། སྲིད་པའི་ལྗོངས་འདིར་ཤར་མཛད་ཤཱཀྱའི་ཏོག ། བསྐལ་བཟང་རྣམ་འདྲེན་བཞི་པ་གང་དེར་འདུད། ། རྒྱལ་ཀུན་གསང་གསུམ་ཡེ་ཤེས་སྒྱུ་མའི་འཕྲུལ། ། མ་ལུས་གཅིག་བསྡུས་སྙིགས་འགྲོའི་མགོན་པོ་མཆོག ། སངས་རྒྱས་གཉིས་པ་མཚོ་སྐྱེས་རྡོ་རྗེ་དེས། ། བྱིན་རླབས་རྟོགས་པའི་ཕ་ཕོག་སྙིང་ལ་སྩོལ། ། སྒྲིབ་གཉིས་དྲི་མའི་ཉེས་ཚོགས་ཀུན་ནས་དབེན། ། ཟབ་གསང་ཉམས་ཀྱིས་རྟོགས་པའི་རྩལ་ཆེན་རྫོགས། ། འབྲེལ་ཚད་རིག་འཛིན་ཞིང་ལ་འགོད་མཛད་པ། ། སྔ་འགྱུར་མཁས་གྲུབ་རིམ་བྱོན་ཚོགས་ལ་འདུད། ། མཁྱེན་པའི་ཡེ་ཤེས་གོམ་སྟབས་གཅིག་གིས་ཤེས་བྱའི་གནས་ཀུན་ས་ལེར་གཟིགས། ། རྩ་ཐིག་རླུང་གི་གནད་ལ་དབང་འབྱོར་མ་དག་ལས་རླུང་རྒྱུ་བ་བྲལ། ། ཟབ་གཏེར་མན་ངག་དབྱར་གྱི་རྔ་ཆེན་ནོར་འཛིན་ཁྱོན་ལ་ཡོངས་སུ་སྒྲོགས། ། མཁས་གྲུབ་རྒྱ་མཚོའི་འཁོར་ལོའི་བསྒྱུར་མཛད་ནམ་མཁའ་འཇིགས་མེད་གཏན་གྱི་སྐྱབས། ། པདྨའི་རྒྱལ་ཚབ་གཏེར་ཆེན་ཆོས་ཀྱི་རྗེ། ། གང་གི་ངོ་མཚར་མཛད་པའི་ཆ་ཤས་དང་། ། གྲོལ་བ་བཞི་ལྡན་དགོངས་གཏེར་ཟབ་མོ་རྣམས། ། ལྷག་བསམ་བཟང་པོས་བཞུགས་བྱང་འབྲི་ལ་མོས། ། |