མཆོད་པར་བརྗོད་ཅིང་བརྩམ་པར་དམ་བཅའ་བ།
༄༅། མདོ་ཁམས་གཡུ་ཁོག་ཡུལ་གྱི་ཆོས་སྲིད་ཀྱི་བྱུང་བ་བརྗོད་པའི་དེབ་ཐེར་ངོ་མཚར་ལྷ་ཡི་རོལ་མོ་ཞེས་བྱ་བ་བཞུགས་སོ།།
སྐུ་ཡི་ཞབས་པད་གངས་རིའི་ལྗོངས་སུ་མ་བཀོད་ཀྱང་། །གསུང་མཆོག་དམ་ཆོས་ཉི་མའི་འོད་ཀྱིས་ཁྱབ་འགྱུར་བ། །ཟག་མེད་ཐུགས་ཀྱིས་མཁྱེན་པའི་ལུང་བསྟན་མངོན་དུ་གྱུར། །རྣམ་འདྲེན་བཞི་པ་ཐུབ་དབང་ལྷ་ཡི་བླ་མར་འདུད། །སྲས་བཅས་རྒྱལ་བའི་བརྩེ་ཆེན་དྭངས་མའི་དཔྱིད། །མཁའ་ཁྱབ་འགྲོ་བའི་དཔལ་དུ་མཉམ་བརྡལ་ཡང་། །བསིལ་ལྡན་སཱ་ལའི་ལྗོངས་སུ་སྤྲུལ་པའི་གར། །ཡང་ཡང་སྤྲོ་མཛད་གྲུ་འཛིན་མགོན་དེས་སྐྱོངས། །ཁ་བ་ཅན་གྱི་ཡུལ་ཀུན་ཞབས་ཀྱིས་མ་བཅག་མེད་པར་མཛད། །མི་དང་མི་མིན་ཞིང་གི་ཟབ་ཆོས་མ་ལུས་བོད་དུ་བསྒྱུར། །འཛད་མེད་ཆོས་ནོར་གཏེར་གྱིས་རི་མཚོ་གངས་བྲག་ཡོངས་སུ་གཏམས། །གངས་ཅན་འགྲོ་བའི་བླ་མ་ཨོ་རྒྱན་ཆེན་པོ་སྙིང་ནས་དྲན། །རྒྱལ་དབང་པདྨའི་ཕྲིན་ལས་ཕོ་ཉ་བ། །རྩོད་མེད་སྤྲུལ་པའི་གཏེར་ཆེན་ལུང་རིག་གླིང་། །གདོད་མའི་མགོན་པོ་ཆོས་དབྱིངས་རང་གྲོལ་སོགས། །བསྟན་འཛིན་གསེར་རིའི་ཕྲེང་བར་གུས་པས་འདུད། །ས་ཆེན་སེམས་དཔའ་ཡུལ་ལྷའི་ཚུལ་འཛིན་པ། །དགེ་བསྙེན་ཆེན་པོ་རྡོ་རྗེ་གཡུ་ཁྲོམ་དང་། །ཟོ་དོར་གཞི་བདག་དཀར་ཕྱོགས་སྐྱོང་རྣམས་ཀྱིས། །ཤིས་པའི་མེ་ཏོག་ཆར་དུ་སྙིལ་གྱུར་ཅིག །འདི་རུ་མདོ་ཁམས་གཡུ་ཁོག་པའི། །ཆོས་དང་སྲིད་ཀྱི་ལོ་རྒྱུས་རྣམས། །ཉམས་པར་འགྱུར་བ་ཆེས་ཕངས་ནས། །གང་ཟིན་འབད་པས་བསྡུ་བར་བྱ། །དེ་ལྟར་ཚིགས་སུ་བཅད་པ་མེ་ཏོག་གི་ཆུན་པོས་མདུན་བསུས་ཏེ་གང་ཞིག་གླེང་བར་བྱ་བ་ནི། གངས་ལྗོངས་མདོ་ཁམས་གཡུ་ཁོག་ཡུལ་གྱི་ཆོས་སྲིད་ཀྱི་བྱུང་བ་བརྗོད་པ་ལ་གསུམ། མདོ་ཁམས་གཡུ་ཁོག་ཡུལ་གྱི་སྣོད་བཅུད་ཀྱི་བཀོད་པ་སྤྱིར་བཤད་པ། ཆོས་སྲིད་ཀྱི་བྱུང་བ་བྱེ་བྲག་ཏུ་བཤད་པ། དེང་གི་གནས་བབས་མདོར་བསྡུས་སུ་བརྗོད་པས་མཇུག་བསྡུ་བའོ།། དང་པོ་ལ་སྣོད་བཅུད་ཀྱི་བཀོད་པ་བཤད་པ། བྱིན་ལྡན་གནས་རི་ཇི་སྙེད་མཆིས་ཚུལ་བཤད་པ། ཡུལ་ལྷ་ཟོ་དོར་ཇི་སྙེད་གནས་ཚུལ་བཤད་པ། དམ་པའི་སྐྱེས་ཆེན་དུ་མས་ཞབས་ཀྱིས་བཅགས་ཤིང་བྱིན་གྱིས་བརླབས་ཚུལ་བཤད་པ་དང་བཞི།