གནས་ལུང་གནས་ཡིག་ལེགས་པའི་ལམ་སྟོན། ལྕམ་བླ་འགྱུར་མེད་རྒྱལ་མཚན།༈ གནས་ལུང་གནས་ཡིག་ལེགས་པའི་ལམ་སྟོན་བཞུགས། ། རྒྱལ་ཀུན་དབང་ཕྱུག་སྤྲུལ་པའི་སྐུ། ། མཚོ་སྐྱེས་བླ་མ་ལྷག་པའི་ལྷ། ། རྣམ་ཀུན་བདེ་ཆེན་འཁོར་ལོ་རུ། ། མཆོད་དེ་གནས་ཀྱི་ཡོན་ཏན་བརྗོད། ། གནས་ལུང་ཟངས་མདོག་དཔལ་གྱི་རི། ། བསམ་ཡས་སྒྱུ་འཕྲུལ་དྲྭ་བར་སྣང། ། དེ་ལ་མདོ་བྱང་ཡང་བྱང་སོགས། ། དུས་ཀྱི་མངོན་རྟགས་མང་ཡོད་ཀྱང་། ། གནས་སྐབས་ཤིང་ཕོ་སྤྲེལ་ལོ་འདིར། ། གནས་མཆོག་ཀུན་ལ་གནས་འདུས་དང་། ། ཕན་ཡོན་མང་པོ་ཡོད་མོད་ཀྱང་། ། ཁྱད་པར་གནས་ལུང་དཔལ་རི་ལ། ། ཚནྡྷོ་ཧ་དང་ཉེ་བའི་ཞིང་། ། བསམ་ཡས་བྲག་ཕུག་མ་རཱ་ཏི། ། རྔ་ཡབ་དཔལ་རི་ལ་སོགས་པའི། ། གནས་ཀུན་བྱིན་རླབས་འདི་རུ་འཚོགས། ། འབྲེལ་ཚད་ཟངས་མདོག་དཔལ་རིར་སྐྱེ། ། ཕྱག་སྐོར་འབྲེལ་ཐོག་སེམས་ཅན་ཀུན། ། མངོན་མཐོ་ངེས་ལེགས་ཕན་བདེ་སྐྱེད། ། གཞན་དུ་མ་ཎི་སིདྡྷི་སོགས། ། ཐེར་འབུམ་དུང་ཕྱུར་བཟླས་པ་བས། ། གནས་འདིར་ཚིག་གཅིག་མོས་འདུན་གཙོ། ། ནང་སྐོར་ལན་གཅིག་བྱས་པས་ཀྱང་། ། མ་ཎི་དུང་བདུན་ཕན་ཡོན་དང་། ། བསྐལ་པ་གཅིག་གི་སྡིག་སྒྲིབ་འདག ། ཕྱི་སྐོར་ལན་གཅིག་སུས་བྱས་པས། ། མ་ཎི་དུང་ཕྱུར་བཅུ་གསུམ་ཐོབ། ། གནས་འདིར་དམ་སྐོང་དམ་བསྒྲགས་དང་། ། ཞི་བརྔན་བསང་གསུར་ཆུ་སྦྱིན་དང་། ། ཚོགས་བསགས་སྒྲིབ་སྦྱང་བྱེད་གྱུར་ན། ། ཁྱད་པར་དམག་འཁྲུག་ནད་མུག་སོགས། ། ཉེར་འཚེ་མ་རུང་ཞི་བ་དང་། ། མ་རུང་བདུད་ཀྱི་གཡུལ་ཕམ་ཞིང་། ། དཀར་ཕྱོགས་མཐོ་ཞིང་ནག་ཕྱོགས་ཕམ། ། ཚེ་བསོད་དཔལ་འབྱོར་རྒྱས་པ་དང་། ། ལོ་ལེགས་འབྲུ་འཕེལ་བདེ་སྐྱིད་འབྱུང་། ། མི་མཐུན་བར་ཆད་ཞི་བར་འགྱུར། ། འགྱུར་མེད་རྒྱལ་མཚན་བཟང་པོས་བྲིས། ། དགེ་ཞིང་བཀྲ་ཤིས་པར་གྱུར་ཅིག ། |