ཞི་ཁྲོ་དགོངས་པ་རང་གྲོལ་གྱི་ཕྱག་བཤགས་སྐོང་ཆོག་མདོར་བསྡུས་འཁོར་འདས་རང་གྲོལ།

[Full Size]

ཞི་ཁྲོ་དགོངས་པ་རང་གྲོལ་གྱི་ཕྱག་བཤགས་སྐོང་ཆོག་མདོར་བསྡུས་འཁོར་འདས་རང་གྲོལ་ཞེས་བྱ་བ་བཞུགས་སོ། །

[Full Size]

ན་མོ། །ཡིད་ཆོས་རྣམ་དག་ཀུན་བཟང་ཡབ་ཡུམ་ཆེ། །ཕུང་པོ་འབྱུང་བ་གནས་དག་རིགས་ལྔ་ཡུམ། །ཚོགས་ཡུལ་རྣམ་དག་སེམས་དཔའ་ལྕམ་དྲལ་དང་། །ཉོན་མོངས་དྲུག་དག་བཅོམ་ལྡན་ཐུབ་པ་དྲུག །རྟག་མཚན་བདག་མཚན་སྐྱེ་བཞི་གནས་དག་པ། སྤྲུལ་པའི་སྒོ་བ་མཐར་བྱེད་ཡབ་ཡུམ་བརྒྱད། །ཞི་བ་དབྱིངས་ཀྱི་དཀྱིལ་འཁོར་ལྷ་ཚོགས་ལ། །མི་ཕྱེད་གུས་པ་ཆེན་པོས་ཕྱག་འཚལ་ལོ། །མ་རིག་ཉོན་མོངས་གནས་གྱུར་ཆེ་མཆོག་གཙོ། །དུག་ལྔའི་རྟོག་པ་རང་གྲོལ་ཁྲག་འཐུང་ཡབ། །འབྱུང་བའི་མཚན་མ་གནས་གྱུར་དབྱིངས་ཕྱུག་ཡུམ། །ཚོགས་བརྒྱད་ཡུལ་བརྒྱད་གནས་ཡུལ་མ་མོ་དང་། །སྐྱེ་གནས་བཞི་དག་ནང་གི་སྒོ་མ་བཞི། །རྟོག་

[Full Size]

ཚོགས་གནས་གྱུར་ཕྱི་ཡི་དབང་ཕྱུག་མ། །རིག་རྩལ་རོལ་པ་ཁྲོ་བོའི་དཀྱིལ་འཁོར་ལ། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ཨོཾ་ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི། །ཟླ་རྒྱས་བཞིན་ཏུ་སྤྲོས་པ་མི་མངའ་ཡང་། །ཐུགས་རྗེ་ཉི་གསལ་འོད་བཞིན་སྙོམས་མཛད་དེ། །འདིར་གཤེགས་བདག་ལ་དགོངས་ཤིང་བཞུགས་སུ་གསོལ། །བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེ་སྤྲུལ་པའི་སྐུ། །ཞི་ཁྲོ་སྐུ་གསུམ་ལྷ་ལ་ཕྱག་འཚལ་ལོ། །དངོས་སུ་འབྱོར་དང་ཡིད་ཀྱི་རྣམ་སྤྲུལ་ཏེ། །ཀུན་ཏུ་བཟང་པོ་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེར་

[Full Size]

ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །རྩ་གསུམ་ཞི་ཁྲོ་རབ་འབྱམས་དགོངས་སུ་གསོལ། །ཐུགས་རྗེའི་གདུང་འཚོབ་རྣལ་འབྱོར་བདག་ཅག་གིས། །སྤྱི་དང་ཁྱད་པར་ལྷག་པའི་དམ་ཚིག་ལ། །ཉམས་ཆག་འགལ་འཁྲུལ་གྱུར་པ་མཐོལ་ཞིང་བཤགས། །སྣོད་བཅུད་ཕུང་པོ་ཁམས་དང་སྐྱེ་མཆེད་རྣམས། །གདོད་ནས་ཡེ་ཤེས་ཀློང་དུ་རོ་གཅིག་ཀྱང་། །དེ་ལྟར་མ་རྟོགས་གཉིས་འཛིན་འཁྲུལ་པ་ཀུན། །ཞི་བ་དབྱིངས་ཀྱི་ལྷ་ལ་བཟོད་པར་གསོལ། །མ་རིག་ཉོན་མོངས་རྟོག་ཚོགས་ཇི་སྙེད་རྣམས། །རང་གསལ་རིག་པའི་ཀློང་ལས་གཞལ་མེད་ཀྱང་། །གཉིས་སྣང་དག་གི་ལོག་པར་དཔྱད་པ་རྣམས། །འབར་བ་ཁྲོ་བོའི་ཚོགས་ལ་མཐོལ་ལོ་བཤགས། །བདག་དང་བདག་གིར་འཛིན་པའི་གཞན་དབང་གིས། །ཐོག་མེད་དུས་ནས་འཁོར་བའི་རྒྱ་མཚོར་བྱིངས། །ཉོན་མོངས་ལས་ཀྱིས་སྡིག་ལྟུང་གང་བསགས་པ། །གནོད་འགྱོད་སྨྲེ་སྔགས་དྲག་པོས་བཤགས་པར་བགྱི། །གདོད་ནས་རིག་སྟོང་ལྷུན་རྫོགས་ཀུན་ཏུ་བཟང་། །གཉིས་སྣང་སྤྲོས་པའི་མཚན་མ་ལས་འདས་ཀྱང་། །མ་རིག་འཁྲུལ་པས་ལོག་པར་བལྟས་པ་ཀུན། །གཉིས་མེད་ཆོས་ཉིད་མཉམ་པའི་ཀློང་དུ་བཤགས། །མདོར་ན་རྩ་བ་སྐུ་གསུང་ཐུགས་མཆོག་དང་། །ཡན་ལག་དམ་ཚིག་ཉམས་ཆག་ཅི་

[Full Size]

མཆིས་པ། །སྙིང་ནས་འགྱོད་པས་བཤགས་ཤིང་བསྡམ་བགྱིད་ན། །ཚངས་པར་མཛད་ནས་དངོས་གྲུབ་སྩལ་དུ་གསོལ། །ཡི་གེ་བརྒྱ་པ་བརྗོད། ཧཱུཾ། །རབ་འབྱམས་ཞིང་གི་ལྷ་རྫས་ཉེར་སྤྱོད་ཚོགས། །རྒྱུ་རྐྱེན་རྣམ་དག་བླ་མེད་མཆོད་སྤྲིན་འདིས། །ཞི་ཁྲོ་རབ་འབྱམས་རྒྱལ་བའི་ཐུགས་དམ་བསྐང་། །སྐོངས་གྱུར་དབང་དང་དངོས་གྲུབ་སྩལ་དུ་གསོལ། ཧཱུྃ། །སྣོད་བཅུད་ཀུན་གཞི་ཆོས་ཉིད་བྷནྡྷ་རུ། །རང་རྩལ་ཡེ་ཤེས་རོལ་པའི་བདུད་རྩིར་བསྐྱིལ། །སྐུ་གསུམ་ཞི་ཁྲོ་རབ་འབྱམས་ཐུགས་དམ་བསྐང་། །སྐོངས་གྱུར་དབང་དང་དངོས་གྲུབ་སྩལ་དུ་གསོལ། ཧཱུྃ། །རྩ་གསུམ་འཁོར་ལོ་ལྔ་ལྡན་བྷནྡྷ་རུ། །བདེ་ཆེན་ཡེ་ཤེས་དྭང་མའི་རཀྟས་གཏམས། །རབ་འབྱམས་ཞི་ཁྲོའི་ལྷ་ཚོགས་ཐུགས་དམ་བསྐང་། །སྐོངས་གྱུར་དབང་དང་དངོས་གྲུབ་སྩལ་དུ་གསོལ། ཧཱུྃ། །རང་བྱུང་རྡོ་རྗེ་ལུས་ཀྱི་བྷནྡྷ་རུ། །ཤ་ཁྲག་དྲོད་དབུག་བཀྲག་མདངས་གཏོར་མ་བཤམ། །སྒྱུ་འཕྲུལ་རོལ་པ་རྒྱལ་བའི་ཐུགས་དམ་བསྐང་། །སྐོངས་གྱུར་དབང་དང་དངོས་གྲུབ་སྩལ་དུ་གསོལ། ཧཱུྃ། །རྩ་རླུང་ཐིག་ལེ་སེམས་ཀྱི་ཀོང་བུ་རུ། །ཡེ་ཤེས་སྒྲིབ་མེད་འོད་གསལ་སྒྲོན་མེ་སྤར། །དཀྱིལ་འཁོར་ལྷ་ཚོགས་རབ་འབྱམས་ཐུགས་དམ་བསྐང་། །སྐོངས་གྱུར་དབང་དང་དངོས་གྲུབ་སྩལ་དུ་གསོལ། །ཉམས་ཆག་སྐོངས་

[Full Size]

ཤིང་རྟོག་སྒྲིབ་དབྱིངས་སུ་བྱང་། །ལས་ངན་སྡིག་སྒྲིབ་མ་སྤངས་རང་སར་དག །ཁམས་གསུམ་འཁོར་བ་ཆོས་ཉིད་ཀློང་དུ་སྟོང་། །སྐུ་གསུམ་འབྲས་བུ་ཚེ་འདིར་ཐོབ་པར་ཤོག །ཨོཾ་ཨཱཿཧཱུ། །དུར་གི་དཀྱིལ་འཁོར་དུ། །རྡོ་རྗེ་སློབ་དཔོན་གཉེན་གྱིས་དབུ་བཟུང་ནས། །ཚོམ་བུ་གཅིག་ཏུ་འདུས་པའི་མཆེད་དང་ལྕམ། །མི་འབྲལ་འགྲོགས་པའི་ཏིང་འཛིན་རྩེ་གཅིག་གིས། །ནམ་ཞིག་བྱང་ཆུབ་ལྷུམས་སུ་ཞུགས་པའི་ཚེ། །ཡེ་ཤེས་སྒྲོན་མེའི་སྣང་བ་རབ་འབར་བས། །གཉིས་འཛིན་འཁྲུལ་པའི་མུན་པ་དབྱིངས་སུ་སངས། །ས་ལམ་ཡོངས་རྫོགས་འགྲོ་དོན་མཐར་ཕྱིན་ཤོག་ཧཱུྃ། །ཡིད་ཆོས་ཕུང་པོ་འབྱུང་བ་གནས་དག་པ། །ཀུན་བཟང་རིགས་ལྔ་ཡབ་ཡུམ་ཐུགས་དམ་བསྐང་། །ཚོགས་བརྒྱད་ཡུལ་བརྒྱད་གཟུང་འཛིན་གནས་དག་པ། །བྱང་ཆུབ་ལྕམ་དྲལ་ཚོགས་ཀྱི༴ །ལུས་ཀྱི་ཆོས་བཞི་ལྟ་བ་གནས་དག་པ། མཐར་བྱེད་ཁྲོ་བོ་ཡབ་ཡུམ= །ཉོན་མོངས་རྟོག་ཚོགས་མ་སྤངས་རང་སར་དག །འགྲོ་འདུལ་ཐུབ་པ་དྲུག་གི༴ །ཞི་བ་དབྱིངས་ཀྱི་དཀྱིལ་འཁོར་ལྷ་ཚོགས་རྣམས། །བསྐང་ངོ་མཆོད་དོ་ཉམས་ཆག་རྟོག་སྒྲིབ་དག །ཁམས་གསུམ་འགྲོ་ཀུན་སྐུ་གསུམ་དབྱིངས་སུ་སྒྲོལ། །དབང་དང་བྱིན་རླབས་མཆོག་ཐུན་དངོས་གྲུབ་སྩལ། ཧཱུྃ། །ཡིད་ཆོས་གཟུང་འཛིན་

[Full Size]

ཉོན་མོངས་གནས་གྱུར་པའི། །དཔལ་ཆེན་ཆེ་མཆོག་ཡབ་ཡུམ་ཐུགས་དམ་བསྐང་། །ཕུང་པོ་དུག་ལྔའི་རྟོག་པ་གནས་གྱུར་པའི། །ཁྲག་འཐུང་གཙོ་བོ་དགུ་ཡི་ཐུགས་དམ་བསྐང་། །འབྱུང་ཆེན་སྐྱེ་གནས་རྣམ་བཞི་གནས་གྱུར་པའི། །ཁྲོ་མོ་དབྱིངས་ཕྱུག་དགུ་ཡི= །ཚོགས་བརྒྱད་ཡུལ་བརྒྱད་རྟོག་པ་གནས་གྱུར་པའི། །མ་མོ་ཕྲ་མེན་ཚོགས་ཀྱི= །སྟོང་ཁམས་རིགས་དྲུག་གནས་ནས་སྤོར་བའི་ཕྱིར། །སྤོར་བྱེད་ཆེན་མོ་བརྒྱད་ཀྱི༴ །ཞི་རྒྱས་དབང་དྲག་ལས་རྣམས་མཛད་པའི་ཕྱིར། །དབང་ཕྱུག་ཆེན་མོ་ཉེར་བརྒྱད །སྲིད་པ་ཕུར་བུའི་ཡེ་ཤེས་གྲུབ་པའི་ཕྱིར། །རྡོ་རྗེ་གཞོན་ནུ་ཡབ་ཡུམ་སྲས་མཆོག་དང་། །ཁྲོ་བཅུ་ཕྲ་མེན་བཀའ་ཉན་ཕོ་ཉར་བཅས། །དམ་ཅན་རྒྱ་མཚོ་ཡོངས་ཀྱི་ཐུགས་དམ་བསྐང་། །རིག་རྩལ་རོལ་པ་ཁྲོ་བོའི་ལྷ་ཚོགས་རྣམས། །བསྐང་ངོ་མཆོད་དོ་ཉམས་ཆག་རྟོག་སྒྲིབ་དག །ཁམས་གསུམ་འགྲོ་ཀུན་སྐུ་གསུམ་དབྱིངས་སུ་སྒྲོལ། དབང་དང་བྱིན་བརླབ་མཆོག་ཐུན་དངོས་གྲུབ་སྩོལ། ཧཱུྃ། །དངོས་པོ་ཆོས་ཉིད་སྣང་བ་ཡེ་ཤེས་དབྱིངས། །གསལ་བ་ཤེས་རབ་སྡུག་བསྔལ་ཀ་དག་ཀློང་། །ལྷག་པའི་བདེན་གཉིས་དབྱེར་མེད་ཆེན་པོའི་ངང་། །ཞི་ཁྲོ་རབ་འབྱམས་རྒྱལ་བའི་ཐུགས་དམ་བསྐང་། །ཡེ་སྦྱོར་ཡེ་སྒྲོལ་དོན་གྱི་དགྱེས་མཆོད་བཞེས། དམ་ཚིག་ཉམས་ཆག་

[Full Size]

འགལ་འཁྲུལ་ཉེས་ལྟུང་ཀུན། །ཀུན་བཟང་ཡངས་པ་ཆེན་པོའི་ཀློང་དུ་བསྐང་། །བདེ་ཆེན་ཆོས་ཉིད་དབྱིངས་སུ་དག་གྱུར་ཅིག །ས་མ་ཡ་ཨ་ཨ་ཨ༔ ཞེས་པའང་མཉྫགྷོཥས་སོ། །མངྒ་ལཾ།། །།