འདུ་འབྲལ་སྙིང་པོ་མེད་པར་རྟོགས་པའི་གླུ།འདུ་འབྲལ་སྙིང་པོ་མེད་པར་རྟོགས་པའི་གླུ། སྲིད་པའི་འབྱོར་པ་ལ་ཁའི་ན་བུན། ། འདུས་པའི་སྙིང་གྲོགས་ཚོང་དུས་མགྲོན་པོ། ། མ་ངེས་སྐྱིད་སྡུག་མདང་གི་རྨི་ལམ། ། བསམ་ཞིང་བསམ་ན་སྙིང་པོ་མི་འདུག ། རྒྱུས་མེད་གཤིན་རྗེའི་ཕོ་ཉས་ཁྲིད་ནས། ། ཕྱི་མའི་འཕྲང་རིང་འགྲིམ་པའི་གྲོགས་ལ། ། སྐྱབས་ཀྱི་དམ་པ་རྩ་གསུམ་ལྷ་ཡིས། ། ཐུགས་རྗེ་ཅན་གྱི་སྐྱེལ་མ་མཛོད་ཅིག ། སྐྱེས་ནས་འཆི་བ་འཁོར་བའི་ཆོས་ཉིད། ། བསྒྱུར་དུ་མེད་པ་སྒྱུ་མའི་རང་མདངས། ། མི་བཟློག་གཤིན་རྗེ་རྒྱལ་པོའ་ིབཀའ་ཡིག ། ཉམས་ཆུང་གྲོགས་ཀྱི་སྟེང་དུ་སླེབས་སོང་། ། སྔོན་སྨོན་ལས་ཀྱི་ཆར་ཟིམ་བབས་ཚེ། ། ཡོད་ཡོད་འདྲ་བའི་དགུང་གི་འཇའ་ཚོན། ། དུང་སེམས་ཉི་མས་གསལ་དུ་སོང་ཚེ། ། མི་མཐོང་ནམ་མཁའི་དབྱིངས་སུ་ཡལ་སོང་། ། ན་གཞོན་ལང་ཚོའི་མེ་ཏོག་རྒྱས་དུས། ། 260 མཁས་དབང་དགེ་འདུན་ཆོས་འཕེལ་གྱི་གསུང་རྩོམ་ཕྱོགས་བསྡུས། ཡིད་ཀྱི་ཆུ་བོ་གཅིག་ཏུ་འདྲེས་པའི། ། འདྲིས་འདྲིས་ཆུང་གྲོགས་སེམས་ཀྱིས་འཚེར་ཡ། ། ད་ལྟ་རིགས་དྲུག་གང་དུ་ཡོད་ན། ། སྐྱིད་ཤོད་ལྷ་སའི་གྲོག་ཆུ་ཕྲ་མོ། ། ཞག་གསུམ་འཛོམས་པ་འགྲོགས་པའི་ཐ་མ། ། མི་རིང་འཕྲད་པའི་ཁ་ཆད་བྱས་པ། ། རྨི་ལམ་ངང་ནས་མཇལ་དུས་སླེབས་སོང་། ། རྒན་གཞོན་བར་མའི་སྐྱེ་བོ་མཐའ་དག ། ངེས་མེད་འཆི་བའི་སྣང་ཚུལ་མཐོང་ཡང་། ། ཆུང་སྐྱེས་གྲོགས་ཀྱིས་བོར་བའི་ཕྱོགས་ལ། ། ནང་གི་དུང་སེམས་ཆོད་ཐབས་མི་འདུག ། ཤི་རྗེས་འགྱོད་པ་བླུན་པོའ་ིངང་ཚུལ། ། ལུས་སེམས་རྒུད་པའི་རྒྱུ་ལས་མེད་ཀྱང་། ། ཡུན་རིང་འདྲིས་པའི་སེམས་ཀྱི་བག་ཆགས། ། གོམས་པའི་ཤུགས་འདི་བཟློག་ཐབས་མི་འདུག ། ལུས་ཟུང་ཟད་ལ་ཀེང་རུས་གཟུགས་བརྙན། ། གསོན་དུ་རེ་བའི་ཁོ་ཐག་ཆད་དེ། ། འཆི་བའི་མིག་གིས་ཅེ་རེ་བལྟ་བའི། ། གཏམ་དེ་བདེན་ན་སྙིང་ལ་གཟན་པ། ། མཁས་དབང་དགེ་འདུན་ཆོས་འཕེལ་གྱི་སྙན་རྩོམ་ཐོར་བུའི་སྐོར་ཚངས་སྲས་རྒྱུད་མངས། 261 མ་བརྟགས་སེམས་ཀྱི་འཆར་ཚུལ་ཞིག་ལ། ། ད་དུང་དྲུང་ན་ཡོད་ཡོད་འདྲ་བ། ། དྲན་པའི་གཞུ་མོ་ནང་དུ་བཀུག་ཚེ། ། སྙིང་ཁོང་སྟོང་པའི་རྒྱུ་ལས་མི་འདུག ། བརྩེ་ཞིང་འགྲོགས་པའི་ཕྱི་ཐག་བསམས་ཏེ། ། མཆོག་གསུམ་བསླུ་བ་མེད་པའི་ཞིང་དུ། ། དགེ་བའི་དངོས་པོ་ཅུང་ཟད་བསྒྲུབས་པ། ། ཕྱི་མའི་ཡུལ་དུ་གྲོགས་ལ་བསྲིངས་སོ། ། |