སྐྱབས་སེམས་མཎྜལ་ལྡེབ་ཤར།

སྐྱབས་སེམས་མཎྜལ་འབུལ་བ༔ སྐྱབས་འགྲོ༔ བསླུ་མེད་མཆོག་གསུམ་ངོ་བོ་ཉིད༔ སྐྱབས་ཀུན་འདུས་ཞལ་བླ་མ་རྗེའི༔ རང་བཞིན་བཅོས་མེད་རིག་པ་ལ༔ རང་ངོ་ཤེས་པས་སྐྱབས་སུ་མཆི༔ སེམས་བསྐྱེད༔ ཡང་དག་གནས་ལུགས་མ་རྟོགས་པས༔ འཁོར་བར་འཕྱན་པའི་སེམས་ཅན་རྣམས༔ ཡེ་ཤེས་རྡོ་རྗེའི་རང་བཞིན་ལ༔ བྱང་ཆུབ་མཆོག་ཏུ་སེམས་བསྐྱེད་དོ༔ མཎྜལ་ནི༔ སྐུ་གསུམ་ཡོངས་རྫོགས་བླ་མའི་ཚོགས༔ ཕྱི་ནང་གསང་གསུམ་དེ་བཞིན་ཉིད༔ བདག་ལུས་ལོངས་སྤྱོད་གཏན་དུ་འབུལ༔ བླ་མེད་མཆོག་གི་དངོས་གྲུབ་སྩོལ༔