རྒྱུད་འདོན་གྱི་གྲྭ་རྣམ་གཉིས་ཀྱི་བཅའ་ཡིག་ཟུར་བཀོལ།
རྒྱུད་འདོན་གྱི་གྲྭ་རྣམ་གཉིས་ཀྱི་བཅའ་ཡིག་ཟུར་བཀོལ།
ཡང་རྒྱུད་གྲྭ་བ་རྣམས་ཀྱིས་བགྱི་འོས་ནི། དེ་ཡང་སྔོན་བསྟན་པ་དར་བའི་དུས་ན་གསང་བ་སྙིང་པོ་སོགས་རྒྱུད་སྡེ་འདི་དག་ལ་བཤད་སྒྲུབ་བཟང་རྒྱས་སུ་བྱུང་འདུག་ནའང་། དེང་སང་སྙིགས་མའི་སྤྱོད་ཚུལ་གྱིས་བསྟན་པའི་སྲོལ་ཁ་ཐམས་ཅད་ཇེ་ཕྲར་གྱུར་པས་རྒྱུད་སྡེ་སོ་སོའི་མིང་འཛིན་པ་ཙམ་ཡང་དཀོན་པར་སྣང་བས་དེ་དག་འཕེལ་ཞིང་རྒྱས་པར་འདོད་པའི་ལྷག་བསམ་དང་། ཁྱད་པར་རྒྱུད་སྡེ་ཆེན་པོ་འདི་གཉིས་གསང་སྔགས་བཀའ་གཏེར་གྱི་རྒྱུད་རྣམས་ཀྱི་སྙིང་པོ་དང་གཙོ་བོ་ལྟ་བུ་ཡིན་པས་དགེ་འདུན་རྣམས་ཀྱིས་ཞལ་འདོན་སྒྲིགས་ཆགས་སུ་མཛད་པའི་རྒྱུན་ཚུགས་ན། དམིགས་རྐྱེན་དེ་ལ་བརྟེན་ནས་བློ་རབ་རྣམས་ཀྱིས་རྒྱུད་ཀྱི་མངོན་པར་རྟོགས་པའི་དོན་ལ་དབང་འབྱོར་ཞིང་། བློ་འབྲིང་གིས་ཀྱང་ལེ་དོན་ཙམ་གྱི་ས་ཁོངས་ཆོད་པ་དང་། བློ་དམན་པས་ཀྱང་རྗོད་བྱེད་ཀྱི་ཚིག་རྫོགས་པར་བཏོན་པས་ཀྱང་རྒྱུད་བཀླགས་པས་འགྲུབ་ཅེས་ཕན་ཡོན་བསམ་གྱིས་མི་ཁྱབ་པར་གསུངས་པ་དང་། རྒྱུད་ནི་རྒྱུད་གཞན་གྱི་ངེས་པས་འཆད་པར་གསུངས་པ་བཞིན། རྒྱུད་གཅིག་ཁོ་ནའི་ཚིག་དོན་ཤེས་པས་ཀྱང་རྒྱུད་སྡེ་རབ་འབྱམས་ལ་བློ་གྲོས་ཀྱི་འཇུག་པ་ཇེ་ཡངས་སུ་འགྱུར་བ་དང་། རྡོ་རྗེ་ཐེག་པའི་གཞི་ལམ་འབྲས་བུའི་དོན་ཐམས་ཅད་རྒྱུད་སྡེ་ཆེན་པོ་གཅིག་ཁོ་ནས་ཀྱང་རྟོགས་པར་འགྱུར་བའི་ཕྱིར། སྔགས་ཀྱི་གྲྭ་ས་ཡིན་ཕྱིན་ཆད་རྒྱུད་སྡེའི་བཤད་སྲོལ་ལམ། མ་ཐ་རྒྱུད་ཚིག་འདོན་པ་ཙམ་གྱིས་གཞི་ལམ་འབྲས་བུའི་རྣམ་གཞག་ཙམ་ཆགས་པས་རྡོ་རྗེ་ཐེག་པའི་བསྟན་པ་འཕེལ་རྒྱས་ཀྱི་རྟེན་འབྲེལ་དང་། རང་གཞན་གྱི་དོན་བླ་ན་མེད་པའི་གཞིར་འགྱུར་དུ་རེ་བའི་བདག་རྐྱེན་བྱས་པ་ཡིན་པས། གནས་སྐབས་ཀྱི་རྙེད་འཚོལ་ཙམ་དང་ཁྲལ་ཆོས་སུ་མི་བསམ་པར་སྒོ་གསུམ་རྩེ་གཅིག་པས་ནན་ཏན་དུ་བྱེད་དགོས་ཤིང་། དེ་ཡང་སྡེབས་ཚོགས་ཟུར་ཚོགས་གང་གི་ཚེ་ཡང་དུང་དང་འཁར་རྔ་སོགས་ཀྱི་འཚོག་བརྡ་གང་ཡིན་གྱི་
མཇུག་ནོན་པའི་འདུ་རྐྱེན་པ་དང་། འདུས་ནས་ཀྱང་གྲལ་གཤམ་ནས་ཕྱག་གསུམ་སྔོན་དུ་འགྲོ་བས་རང་རང་གི་གྲལ་ལ་ལུས་ལྟག་ཚུགས་ཟིན་ཅིང་འདུག་སྟངས་ལེགས་པའི་སྒོ་ནས་གསོལ་འདེབས་དང་བདག་བསྐྱེད་གཏོར་འབུལ་འདོན་པའི་མན་ངག་རྣམས་སྔོན་དུ་འགྲོ་བས། རྒྱུད་ངོ་བོའི་འདོན་པ་ལེའུ་རེ་རེ་བཞིན་གདངས་འདུར་སྤེལ་བའི་ཚུལ་གྱིས་གསལ་དག་སྙན་ཅིང་ལྷོད་ལ་འགྲིག་ཆགས་པར་བྱས་མཐར་རྗེས་ཆོག་བསྔོ་སྨོན་བཀྲ་ཤིས་དང་བཅས་པས་མཐའ་རྒྱས་པར་བྱ་ཞིང་། ནད་པ་དང་སྤྱི་དོན་གྱིས་བྲེལ་བའི་རིགས་རྣམས་དུས་གཏོར་རྣམས་དང་མཚུངས་པའི་གནང་བ་དགེ་བསྐོས་དང་སོ་སོའི་དབུ་མཛད་ལ་བརྡ་འབྱོར་བར་ཞུ་ཞིང་། སྒེར་དོན་ཇི་ལྟར་ཆེ་ཡང་ཞུ་སྟེར་བྱེད་ས་མེད། ཚོགས་བརྡའི་རྗེས་མ་ནོན་ན་ཕྱག་བཅུ་འཚོལ། འདོན་པ་ཚུགས་ཙམ་ལ་སླེབས་ན་ཕྱག་ཉི་ཤུ་འཚོལ། དེ་ནས་ཀྱང་འགོར་ན་བརྒྱ་ཕྱག་རེ་རྣམས་ཉེས་པ་ངོས་ཁུར་གྱིས་འཚོལ། གལ་ཏེ་དང་ལེན་མི་བྱེད་ན་ཚོགས་ཆེན་དུ་ཕྱག་ལྡབ་འཕར་རེ་ཁོལ། གྲལ་ལ་འདུག་ནས་ཀྱང་གྲུ་སྲུབས་མགོ་སྒྲིལ་ཤབ་ཤུབ་སོགས་ཅལ་ཅོལ་མི་བྱ་ཞིང་། གལ་ཏེ་བག་ཡངས་བྱས་པ་བྱུང་ན་རྒྱུད་འདོན་རྗེས་མའི་སྟེང་དུ་ཉག་རེའི་མར་མེ་སྤོར་བ་དང་། དང་ལེན་མི་བྱེད་ན་ཉིས་ལྡབ་ཏུ་སྤོར། ཚོགས་གྲོལ་མགྱོགས་པར་བློ་རྩེ་གཏད་པའི་འདོན་པ་བྲེལ་མྱུར་ཟུར་ཁྱེར་བྱེད་པ་བྱུང་ན་སུ་བྱེད་དམིགས་བཟུང་ལ་རྒྱུད་གྲྭར་ཇ་རེ་ཞུ་བ་དང་ཉག་རེའི་མར་མེ་སྤོར། ཚོགས་སྡེབས་གྲོལ་གུང་བསྒྲིགས་པའི་གསང་སྙིང་རྒྱུད་གྲྭའི་གཞོན་པ་རེས་གྲྭ་གཉིས་ཀའི་འགྲོལ་ཆབ་འབུལ། འདོན་པ་སྔ་ཕྱི་མ་སྙོམས་ན་ཡེ་ཤེས་སྐུ་མཆོག །ཀུན་བཟང་སྨོན་ལམ་སོགས་ཇི་ལྟར་འོས་པས་ཁ་:བསླང་༼བསྐང་༽བའི་མཉམ་གྲོལ་ལས་སྔ་ཕྱི་མེད་པ་བྱེད། མདོར་ན་ཚོགས་ཆེན་གྱི་སྒྲིགས་སྲོལ་གང་ཡིན་སྟར་ཆགས་འཕྱུགས་མེད་དུ་མ་ཟད། གྲྭ་རགས་བཟང་བསྡུས་ལྟ་བུ་ཡིན་པས་དེའི་ངོ་སོ་ཐོན་པའི་སྤྱོད་ལམ་ཡོང་བ་བྱེད། དེ་ཐམས་ཅད་ཀྱི་དོ་དམ་འགན་འཁུར་གྲྭ་སོ་སོའི་དབུ་མཛད་དང་བགྲེས་པ་རེ་དམིགས་བཏུས་པས་ཟོམ་ལུས་ཡལ་བོར་མེད་པའི་ནན་ཏན་ཆེ་བ་བྱེད་དགོས། གོང་སྨོས་ཐམས་ཅད་རང་དོན་རང་གིས་སྒྲུབ་པ་ཡིན་པས་གཞན་ལ་དྲིང་ཞིང་ངོ་སོ་
བྱེད་རྒྱུ་མེད་པར་གོ་བ་ལེན་དགོས། གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་ནས་ཡང་དག་འབྱོར་བར་ག་ལ་འགྱུར། །ཞེས་པའང་བསམ་མནོ་ཅུང་ཟད་གཏོང་། གཞན་གྱི་བསོད་ནམས་ཚོགས་སུ་འགྱུར་ཕྱིར་དང་བ་འདྲེན་པའི་དམིགས་རྐྱེན་ཡང་ཆོས་མཐུན་གྱི་སྤྱོད་པ་ལས་གཞན་མེད་དེ། འཇིག་རྟེན་མ་དད་གྱུར་པའི་ལས། །མཐོང་ངམ་དྲིས་ཏེ་སྤང་བར་བྱ། །ཞེས་པ་འདི་ཡང་རབ་ཏུ་བྱུང་བ་རྣམས་ཀྱིས་མི་བསྒྲུབ་ན་སུས་བསྒྲུབ། གལ་ཏེ་དེ་དག་སྤོམ་ཡོར་ཨར་ཉམས་ཀྱིས་ཁྱད་གསོད་བྱེད་པ་བྱུང་ན། དེས་བདུད་ལས་བདག་གིར་བྱས་པ་ཡིན་པས་དགེ་འདུན་ཐམས་ཅད་ཀྱི་སྐུ་ཆག་དེའི་སྟེང་དུ་སྒྱུར་ཅིག་པའི་ཐུགས་འདུན་ཐམས་ཅད་ཀྱིས་གཏོད་པ་དང་། ཉེས་པ་གང་ཡིན་དམིགས་ཕུག་ངོ་བསྲུང་མེད་པར་སྤྱི་སར་ཞུ་བ་དང་། ཆད་ལས་མི་ཆུང་བས་ཚར་གཅོད་པར་གྱིས། དེ་ལྟར་ངེད་རང་གིས་བློས་བཅད་ཁྲིགས་སུ་བཅད་པ་འདི་ལ་སུས་ཀྱང་གྲས་བཟོ་མི་བྱེད་པ་གལ་ཆེ།