ཆང་བསྐོལ་དང་། གནང་བའི་མཚམས་ཚིགས་ཀྱི་བཅའ་ཡིག
ཆང་བསྐོལ་དང་། གནང་བའི་མཚམས་ཚིགས་ཀྱི་བཅའ་ཡིག་ཟུར་འདེབས། ཆང་བསྐོལ་གྱི་རིགས་འདི་བསྐོལ་ན་དེ་ཉིད་ལས་ཉམས་པའི་དབང་དུ་བྱས་ཏེ། དགེ་ཚུལ་སློང་ཕལ་ཆེར་བཞེས་སྲོལ་འདུག་པ་ལྟར། སྔར་ཕན་ནུས་པ་ཉམས་ངེས་ཀྱི་དབང་དུ་བཏང་ནས་བཀག་ཆ་དེ་ཙམ་མ་བྱས་རུང་། ཕྱི་ནས་འབྲེལ་ཆེ་བ་འདྲས་ཆང་བསྐོལ་ཞུ་སྐྱེལ་གྱི་སྲོལ་ཇེ་མང་ལ་སོང་བ། སླར་ཆང་ཁྲིམས་ཀྱི་མཐའ་ཅིར་འགྱུར་ཤེས་དཀའ་བ་འདུག་གཤིས། ད་ཆ་རུང་ཁང་ལྟ་བུའི་སྤྱི་ཐབ་འགྲིམ་པའི་བསྐོལ་ལྡན་ཚོགས་སུ་ཞུ་བ་དང་། ཕྱི་ནང་གི་བཞུགས་གྲལ་སྟོན་མོ་ལྟ་བུར་ཞུས་པ་རྣམས་སུ་མ་ཟད། སྦྱིན་བདག་སར་ཡང་གྲྭ་གྲངས་བཅོ་ལྔ་ཡན་ཆད་ལ་བུར་སྦྲང་ལྟ་བུའི་འཕྲད་བཅས་ཚད་ལྡན་བསྐོལ་ནས་ཞུ་བ་རྣམས་མ་གཏོགས། དེ་ཕྱིན་གྲྭ་ཤག་ཏུ་བསྐོལ་བསྡུ་བྱེད་པ་དང་ཕྱི་ནས་བསྐོལ་ཟིན་ལེན་པ། རྒྱུན་ཆོག་གིས་མཚོན་
གྲྭ་པ་ཞལ་གྲངས་དང་ཁ་ཡར་གང་ཡིན་ཡང་བཞེས་པ་རྩ་བཀག་བྱེད་རྒྱུར། དེ་ལས་འགལ་བའི་གླིང་ནང་དུ་བཞེས་པར་ཉག་དོའི་མར་མེ་དང་། ཕྱི་ཁྱིམ་པའི་ནང་དུ་བཞེས་པར་ཉག་བཞིའི་མར་མེ་འབུལ་དུ་གཞུག ། ༈ སྤྱི་ལས་ལ་ཐེགས་མི་འགས་རང་འཚམས་ཀྱིས་ཚོགས་ལ་གནང་བ་མ་ཞུས་པ་དང་། སྔར་གནང་སྲོལ་གཏན་མེད་པའི་སྐུ་རིམ་ལ་རང་མ་འདུས་པ་འགའ་རེ་བྱུང་འདུག་ཅིང་། ཐོ་མཚམས་ལའང་གནང་བ་མ་ཐོབ་པར་འདས་ནས་ཐེགས་པའི་རྩིང་སྤྱོད་ཅི་རིགས་བྱུང་འདུག་པ་རྣམས་སྔར་ཐལ་ལ་རྗེས་འདེད་མེད་པར་བཞག །ད་ཕྱིན་ཆད་ནས་དགེ་འདུན་གྱི་སྡེ་ལ་གཅེས་པ་སྒྲིགས་རྣམ་ཡིན་པ་ཐམས་ཅད་ཀྱིས་ཐུགས་ལ་བཞག་ནས། ལས་ཁོམ་མ་ཁོམ་གྱི་བྲེལ་བ་ཆེ་ཆུང་གང་ཡིན་ཡང་ཚོགས་ཀྱི་གནང་བ་ངེས་ཏིག་ཞུ་ཞིང་། ཁྱད་པར་ལོ་གསར་ལྟ་བུ་ཡོ་ལངས་ཆེན་པོའི་སྤྱི་ལས་མ་གཏོགས། ཟས་སྣ་བཟོ་མི་སྤྱི་སྒེར་ལ་མ་ལྟོས་པར། ལས་འཕྲོ་འཇོག་མི་ཐུབ་པའི་སྤྱི་ཁང་དུ་བཟོ་མི་གསུམ་གྱི་གྲངས་བཅད་མའི་གནང་བ་སྟེར་སྲོལ་སྔར་རྒྱུན་ལྟར་དང་། དེ་ཕྱིན་སྐུ་རིམ་ལ་དགེ་བསྐོས་ཀྱིས་གནང་བ་མཛད་སྲོལ་མེད་པ་བཞིན་ད་དུང་དེ་ལས་མ་འདས་པ་དགོས། ཐོ་མཚམས་ཀྱི་གནང་བ་ལའང་བྱ་བྱེད་དགོས་དོན་ཡོད་མེད་བརྟག་དཔྱད་མཛད་ནས་གནང་དགོས་ཤིང་། སྔར་ཕན་ཆད་སྐྱ་རྩ་ཞོལ་པ་རང་ཡིན་པ་རྣམས་མ་གཏོགས་དགེ་བསྐོས་ཀྱིས་གནང་སྲོལ་ལ། ད་ཆ་གྲྭ་ཚང་གཞིས་གཏན་ཆགས་པས་ཡུལ་མི་དང་ཕྱོགས་མི་འདྲིས་ཆེ་ཆུང་ཁྱད་མེད་ལྟ་བུར་སོང་འདུག་གཤིས། ད་ནས་ཞོལ་གྱིས་མཚོན་ཁྱིམ་པའི་ནང་དུ་འགྲོ་བར་ཡང་བླ་བྲང་ཕན་ཚུན་གང་རིགས་སུ་གནང་བ་མ་ཐོབ་པར་དགེ་བསྐོས་ཀྱིས་ཀྱང་མི་གནང་ཞིང་། ཞུ་སྣ་ཡང་དགེ་བསྐོས་རང་བརྒྱུད་ནས་ཞུ་བ་དང་། དགེ་བསྐོས་ཀྱིས་ཀྱང་དོན་ཡོད་མེད་བཅད་བརྡར་གྱིས་ངེས་པ་འདྲོངས་ནས་ཞུ་བ་ལས་གང་ཞུས་ཞུ་བ་མི་མཛད། བླ་བྲང་དུ་གནང་བ་ཐོབ་པའི་ཞོར་འདྲོངས་ཀྱིས་བཀྲ་ཤིས་སྣང་བ་དང་། བཀྲ་ཤིས་རབ་བརྟན་སོགས་སུ་ཐེགས་པར་ཡང་སྒེར་ཞུ་མི་མཛད་པའི་སྲོལ་བྱང་འདུག་པས། དེ་དག་ཏུ་ཞལ་ཏ་མ་འདྲ་དང་བཅས་ནག་ཁྲིམས་ཀྱི་མཐའ་བག་ཡངས་སུ་འགྲོ་ཉེན་འདུག་
པས། ཕྱིན་ཆད་བླ་བྲང་དུ་གནང་བ་ཐོབ་པ་རྣམས་ཀྱིས་ཀྱང་། བླ་བྲང་གི་ཞོལ་མིག་རྩེ་རིས་ཀྱི་ཁང་བྲན་རྣམས་དང་། ལོངས་སྤྱོད་གླིང་། བཀྲ་ཤིས་ཁང་གསར། མགྲོན་ཁང་། མཆོད་རྟེན་སོགས་ཀྱིས་མཚོན་གཞན་དུ་ཐེགས་དགོས་ངེས་རྣམས་ཀྱང་དམིགས་བསལ་གྱི་གནང་བ་སྒེར་དུ་ཞུ་དགོས་ཤིང་། དགེ་བསྐོས་ཀྱིས་ཀྱང་དགོས་མིན་ལེགས་པར་བརྟགས་ཏེ་དམིགས་ཕྱེད་པའི་གནང་བ་སྟེར་ལུགས་དང་། དོན་ཆོད་ནས་ཚུར་འབྱོར་མ་འབྱོར་པ་རྣམས་ལ་རྩིས་བཞག་ཐེམས་པ་མཛད། སྨན་ཆུ་རྒྱག་པར་དགོངས་པ་ཞུ་བ་འདི་ཡང་། འཕྲོད་བསྟེན་ལ་དགོས་ངེས་སྨན་པ་དང་དགེ་བསྐོས་བསྟུན་ནས་མཐུན་སྣང་དུ་གྲུབ་རིགས་མ་གཏོགས་ལད་རྐྱེན་དུ་འདུག་པས་གནང་བ་ཞུ་སྟེར་མི་མཛད་ཅིང་། གྲྭ་ཚང་སྦྱིན་བདག་སར་ཕེབས་དུས་འདི་ཁར་བཞུགས་མི་རྣམས་མཐོ་མཚམས་སོགས་ཀྱི་གནང་བ་ཞུ་སྟེར་བགྲེས་པ་སུ་བཞུགས་འོས་པས་མཛད་ནས་གོང་བཞུགས་ལ་ཞུ་དགོས་བཅས་དམིགས་ཕྱེད་པའི་གནང་ལུགས་རྒྱུན་ལས་ལྷོད་དུ་མ་སོང་བའི་ནོན་ཆེ་བ་མཛད་པ་དང་། སྔར་སྐལ་བ་ཉིས་ལེན་བྱས་པར་ཆད་ལས་ཀྱི་བཅའ་བ་སོང་རུང་། འདི་ལོའང་རེ་གཉིས་བྱུང་འདུག་པས། ད་ནས་ཉིས་ལེན་ཕྱི་ནང་གང་དུ་བྱས་པ་བྱུང་ཡང་བགྲེས་གཞོན་སུས་ཚོར་གྱི་དགེ་བསྐོས་ལ་བརྡ་སྦྱར་ངོས། སྐལ་ཐོལ་ངོ་བོ་སྤྱི་སར་ལེན་ཞིང་དེའི་སྟེང་དུ་སྐལ་བ་ཆེ་ཆུང་ལ་གཞིགས་པའི་ཆད་པ་ཉག་གསུམ་ནས་ཉག་གང་གི་བར་གྱི་མར་མེ་སྤོར་དུ་འཇུག །འདི་རྣམས་སྤྱི་སྒྲིགས་ལ་གལ་ཆེ་བ་ཡིན་པས་དགེ་བསྐོས་ཀྱིས་ཀྱང་བཏང་སྙོམས་སུ་མ་ལུས་པའི་རྩིས་བཞག་དང་། ནོངས་པ་རྣམས་ལ་བཅའ་ཡིག་མ་དང་ཟུར་འདེབས་སོ་སོའི་ནང་གསལ་ལྟར་རྗེས་འཇོག་མེད་པའི་ཆད་ལས་འཕྲལ་འཕྲལ་འབེབས་ཤིང་བགྲེས་པ་གཞན་རྣམས་ཀྱིས་ཀྱང་ཆུ་རྐ་འདྲིལ་གྱི་འོན་གསེངས་དང་། དགེ་བསྐོས་ལ་བསྐུལ་བ། སྒྲིགས་ལམ་གྱི་རྒྱབ་གཉེར་རྣམས་ཁ་ཞེ་མེད་པའི་བདག་རྐྱེན་ཐང་བ་མཛད་དགོས།