སྔ་འགྱུར་སྨིན་གླིང་དཔེ་ཚོགས།

ཆུ་ཞུགས་ཀྱི་བཅའ་ཡིག་ཟུར་བཀོལ།

― MLP011_Page_0239 ―

^{[མ་དཔེ་གཟིགས་ན་འདིར་གནོན།]}

ཆུ་ཞུགས་ཀྱི་བཅའ་ཡིག་ཟུར་བཀོལ། ཆུ་ཞུགས་ཀྱི་སྐབས་བཞུགས་པའི་གུར་གཡབས་རྣམས་ཕན་ཚུན་ཁང་ཉེར་འདབས་འབྲེལ་དུ་འབུབས་པ་ལས་ཐག་རིང་དབེན་པར་མི་རྒྱག །ཆང་གི་ཆ་ན་ནིང་ཡང་དགེ་སྐྱོན་ཅི་རིགས་བྱུང་བ་བཅས་གང་དགོས་འོས་བབས་བལྟས་པའི་གནང་བ་མ་ཐོབ་པར་བག་མེད་ཁྱེར་ས་མེད། ཤ་ཡང་རང་བཞིན་གྱིས་འཚོང་མི་ཡོང་ན་ཉོ་བ་མ་གཏོགས་ཆེད་གཏད་དུས་བསྒྲིགས་ཀྱིས་དམིགས་ཤ་སོགས་བྱུང་ན་སྐབས་སུ་གཏན་མི་ཆེ་བས་བག་ཟོན་ཆེ་བ་གལ་ཆེ། གུར་ནང་དུ་མི་སྐྱ་བག་འདྲེས་སུ་འཇོག་པ་འདི་ཡང་འབོད་མི་ཁོ་ནས་བག་ཟོན་བྱེད་པའི་དབང་དུ་བྱས་ཀྱང་གཞན་རྣམ་རྟོག་བརྟག་ཏུ་སྒྲིམ་པ་རང་ཞིག་དཀའ་བས། སྐྱེས་པའི་རིགས་འབོད་པ་ཡང་ཇ་མགྲོན་ལྟ་བུའི་དམིགས་བསལ་ལས་གུར་ནང་དུ་ཁྱུ་འདྲེས་སུ་མི་འཇོག །བུད་མེད་ཀྱི་རིགས་འཕྲད་མི་བྱུང་བ་རྣམས་ལ་གུར་གྱི་ཕ་ཚད་ཀུན་གྱིས་མཐོང་སར་མགྲོན་ལན་སྐྱེལ་བ་ལས་གུར་ནང་དུ་དྲག་ཞན་སུ་ཡང་མི་གཏོང་། བུད་མེད་དང་མི་སྐྱའི་རིགས་སྒར་དུ་ཁད་ཉེར་ཡོད་པ་རྣམས་ཀྱང་སྔ་དྲོ་གྲྭ་མང་ཕེབས་རྗེས་དང་། ཕྱི་དྲོ་གླིང་ཁའི་ཉི་མ་ནུབ་པ་དང་དུས་མཚུངས་འདུ་འགྱེད་ལས་སྔ་སྣུར་ཕྱི་སྣུར་དུ་སུ་ཡང་སྡོད་དུ་མ་འཇུག །དགོང་མོ་གུར་གཡབས་སྲུང་མི་ཡང་མི་ངེས་འདྲོངས་རྟག་ཐུབ་འོས་བཏུས་གསུམ་རེ་ལས་མང་བ་མི་འཇོག་ཅིང་། དེ་དག་གི་སྒྲིགས་གནོན་དུ་དགེ་བསྐོས་ལས་སྣེ་ཐེམས་པ་རེ་ནང་ཤོམས་སམ་རེས་བསྐོར་དུ་བཞུགས་པས་སྐྱོན་གནོན་ངོ་བསྲུང་མེད་པ་བྱེད། ནུབ་མོ་གླིང་ཁྱི་གང་ཡོད་སྒར་ཁྲོད་དུ་གློད་ནས་རྐུན་མ་སོགས་བསྲུང་ཆ་དམ་དོག་ཆེ་བ་བྱེད། གྲྭ་མང་ཡང་ཕྱི་དྲོ་གླིང་ཁའི་ཉི་མ་ནུབ་ཚུན་ཆད་ལ་ཡར་ཕེབས་པ་ལས་ས་རུབ་པ་སོགས་ཧ་ཅང་ཕྱི་མོར་མི་བཞུགས། ཡར་ཕེབས་མར་ཕེབས་ལ་ཡང་སྤྱོད་ལམ་གང་བཟོ་དང་། གླིང་ཁར་ཡང་མཐུན་སྣང་དུ་གྲུབ་པའི་རྩེད་མོ་འོས་བབས་ལས། སྐབས་སུ་མི་བབས་པའི་རིགས་མདའ་རྡོ་རྫོགས་བང་བྱས་ན་

― MLP011_Page_0240 ―

^{[མ་དཔེ་གཟིགས་ན་འདིར་གནོན།]}

[Full Size]

ཉག་ལྔའི་མར་མེ་སྤོར། མཆན། སྐྱུར་གླུ་གཞས་འཇག་བརྒྱངས་འཐེན་པ་སོགས་དང་། ཀུ་ཅོ་བཞད་བགད་ཀྱི་ཀླག་ཅོར་ཆེ་བ་མི་བྱེད། གླིང་ཁའི་ལྕང་ཤིང་དང་རགས་རྩིག་སྐོང་བ་སོགས་ལ་དོགས་ཟོན་བཟན་ཆ་མེད་པའི་ཤ་ཚ་བ་བྱེད། ཐུན་གྱི་ཞལ་འདོན་ཡང་སྒྲིགས་ཆུག་ཉམས་ཆག་མེད་པ་དགོས། མདོར་ན་ཆབ་ཞུགས་ཀྱིས་མཚོན་པའི་དགྱེས་སྤྲོའི་སྐབས་སུ་ཧ་ཅང་བག་ཡངས་ཀྱི་སྲོལ་ལྟར་ཆགས་ན་རྒྱུན་སྒྲིགས་དམ་དོག་གི་རྣམ་ཐར་གཙང་བ་ཐམས་ཅད་ལ་རྒྱས་འདེབས་ཀྱི་ཤན་ཕོག་པའི་ཕུགས་ཡུལ་མིག་རྐྱེན་ཤས་རྒྱུ་མཐའ་མེད་དུ་འགྲོ་བ་བགྲེས་གཞོན་བར་པ་ཐམས་ཅད་ཀྱིས་འཕྲལ་ཕུགས་དགེ་སྐྱོན་གྱི་མཐའ་མྱུལ་བའི་ལེགས་ཚོགས་སུ་གང་འགྲོར་བསམ་སྦྱོར་དྲིལ་བ་ལས། འཕྲལ་སྣང་གདོང་འདེད་ཀྱི་ཨུ་ཚུགས་མཐར་སྐྱེལ་ཉི་ཚེ་བར་སོང་ན་གྲྭ་པ་བྱིངས་ཆུད་ཟོས་སུ་འགྲོ་བ་ལ་ཚེགས་མེད་པས་བྱས་པ་ལས་རོའི་དཔེ་དོན་གནས་ཡོང་། ད་ལྟའི་སྡེ་གོག་སེར་ཁྱིམ་དགོན་འདི་ཚོ་ཡང་དང་པོར་གྲྭ་ཚང་དུ་ཚུགས་པ་ཡིན་མོད། དེས་ན་དེ་དག་གི་སྐྱོན་གནད་ལ་བརྟགས་པའི་ལེགས་ཚོགས་སུ་གང་འགྱུར་ལ་ཉན་འཇོག་བླང་དོར་ཡང་དག་ཡོད་པ་གལ་ཆེ། མེ་བྱི་ཟླ་ཚེས་ལ་བྲིས། ཡང་ཆུ་ཞུགས་སྐབས་ནད་པ་དང་མཁར་ལས་དམིགས་བསལ་དགོས་ངེས་ཀུན་གྱི་མཐུན་སྣང་དུ་གྲུབ་པ་གནང་བ་མི་བྱིན་ཐབས་མེད་འདི་ཁ་ནས་བལྟ་རྒྱུ་ལས། དེ་ཕྱིན་གླིང་ཁར་མ་བྱོན་པར་འདིར་བཞུགས་ས་མེད་པ་བྱེད། བླང་དོར་སྤྱིའི་བཅའ་ཡིག་གལ་ཆེ་བ་བཏུས་ཏེ་ཟུར་དུ་བཀོད་པའོ། །

― MLP011_Page_0241 ―

^{[མ་དཔེ་གཟིགས་ན་འདིར་གནོན།]}

[Full Size]

༈ དཔལ་ལྡན་བླ་མ་དམ་པ་རྣམས་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །གྲྭ་ས་འདིར་གཉུག་མར་གནས་པའི་གཞིས་གྲྭ་དང་ཕྱོགས་ནས་གློ་བུར་དུ་བྱོན་པའི་སློབ་གཉེར་བ་རྣམས་ཀྱིས་ཐུན་མོང་དུ་བླང་དོར་མཛད་རྒྱུའི་བསླབ་བྱའི་རིམ་པ་མདོ་ཙམ་བཅའ་ཡིག་མ་བུ་རྣམས་ཀྱི་དོན་ལྟར་ཟུར་དུ་བཀོལ་ནས་གོ་བདེ་བར་བྱས་པ་ལ། སྤྱིར་སྤྱོད་འཇུག་ལས། འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་བསྟི་དང་། །ཞེས་གསུངས་པ་ལྟར། སྐྱེ་དགུ་ཐམས་ཅད་ཀྱི་མི་འདོད་པ་སྡུག་བསྔལ་དང་། འདོད་བྱ་ཕན་བདེར་འདུ། དེའི་ཕྱིར་སྡུག་བསྔལ་ནད་དང་འདྲ་བ་སེལ་བ་ལ་སྨན་མཆོག་བཟང་པོ་ལྟ་བུ་དང་། ཕན་བདེའི་རེ་བ་མ་ལུས་པ་ཡིད་བཞིན་དུ་འབྱུང་བ་ལ་ནོར་བུ་རིན་པོ་ཆེ་དང་ཆོས་མཚུངས་པ་ནི་རྒྱལ་བའི་བསྟན་པ་འབའ་ཞིག་ཡིན། བསྟན་པ་དེ་ཡང་བསྟན་འཛིན་གྱི་དགེ་འདུན་ལ་རག་ལས། དགེ་འདུན་གྱི་སྡེ་ཚུལ་ལྡན་དུ་འགྲོ་བ་ལ། དེར་ཚོགས་པའི་གང་ཟག་རྣམས་གཞི་ཚུལ་ཁྲིམས་རྣམ་པར་དག་པའི་:དང་༼རང་༽ཚུགས་ལ་གནས་ཤིང་། ཐོས་བསམ་སྒོམ་གསུམ་ལ་བརྩོན་པའི་སྒོ་ནས་བཤད་སྒྲུབ་ཀྱི་བྱ་བས་བསྟན་པ་འཛིན་སྐྱོང་སྤེལ་ནུས་པ་ཞིག་དགོས། དེའི་རྒྱུར་རང་ཕལ་པའི་གནས་སུ་མི་སྡོད་པར་སྙིང་སྟོབས་ཆེན་པོས་བསམ་པའི་གོ་ཆ་གྱོན། སྦྱོར་བ་བརྩོན་འགྲུས་ཀྱིས་ལག་ཏུ་བླངས་ཏེ། དམ་པའི་ཆོས་ལ་ཆོག་མི་ཤེས་པར་སློབ་དགོས། དེའི་རྒྱུ་མཚན། རང་ཅག་ཀུན་རྙེད་པར་དཀའ་བའི་དལ་འབྱོར་གྱི་མི་ལུས་རིན་པོ་ཆེ་ཐོབ། འཕྲད་པར་དཀའ་བ་བླ་མ་དགེ་བའི་བཤེས་གཉེན་ཁྱད་པར་ཅན་གྱིས་རྗེས་སུ་བཟུང་སྟེ་རྒྱལ་བའི་བསྟན་པ་དང་མཇལ། རང་དབང་ཡོད་པའི་དུས་འདིར་སྒོ་གསུམ་ཆོས་དང་མ་བསྟུན་ན། འཆི་ཁར་འགྱོད་ཀྱང་འཕྱིས་པ་ལས་མི་ཡོང་བས་ད་ལྟ་ནས་འབད་པར་རིགས། དེ་ལ་ཆོས་བསྒྲུབ་པའི་བདག་རྐྱེན་བླ་མ་དམ་པའི་བྱིན་རླབས་དང་འདུས་སྡེའི་བཅའ་སྒྲིགས་ལ་རག་ལས་པས། བླ་མ་དམ་པ་ལ་གཡོ་ཟོལ་མེད་པའི་དད་པ་དང་དམ་ཚིག་ཁོག་པའི་སྙིང་དང་མིག་གི་འབྲས་བུ་ལྟར་གཅེས་པའི་སྲོག་ཏུ་བཟུང་ནས། ཅི་མཛད་ལེགས་མཐོང་དང་ཅི་གསུང་ཚད་མར་

― MLP011_Page_0242 ―

^{[མ་དཔེ་གཟིགས་ན་འདིར་གནོན།]}

[Full Size]

འཛིན་པའི་མོས་གུས་ཀྱིས། ལུས་ཀྱིས་ཞབས་ཏོག །ངག་གི་སྙན་པ་སྒྲོག་པ། ཡིད་ཅི་མཛད་ཁྱེད་ཤེས་ཀྱིས་རེ་ལྟོས་འཆའ་ནུས་པ་ཞིག་དགོས་པ་ཡིན་ཏེ་བླ་མ་ལ་དད་པ་མེད་ན། ཆོས་བྱེད་བློ་བྱས་ཀྱང་འགལ་རྐྱེན་མང་། ཐོས་བསམ་ལ་བློ་སྐྱེད་ཆུང་། བསྒོམས་ཀྱང་ཉམས་རྟོགས་མི་སྐྱེ། ཆོས་ཅུང་ཟད་ཤེས་སུ་ཟིན་ཀྱང་གཞན་ལ་ཕན་མི་ཐོགས། དེས་ན་བླ་མ་ལ་དད་གུས་བྱེད་པ་འདི་བླ་མ་ལ་གལ་ཆེ་བ་མ་ཡིན་སློབ་མ་རང་ཉིད་ལ་གལ་ཆེ་བ་ཡིན་པས། བྱ་བྱེད་ཐམས་ཅད་བླ་མ་ཅི་མཉེས་སྒྲུབ་པ་དང་། བླ་མའི་རྣལ་འབྱོར་བསྒོམ་པ་སོགས་ལ་འབད་པ་ཆེན་པོས་སློབ་དགོས་ཏེ། རང་གི་འདི་ཕྱིའི་བདེ་ལེགས་ཐམས་ཅད་བླ་མའི་བཀའ་དྲིན་ཁོ་ན་ལ་རག་ལས་པའི་ཕྱིར་རོ། །དེ་ལྟར་བླ་མ་དམ་པ་ཚུལ་བཞིན་དུ་བསྟེན་ནས། དེས་བླང་དོར་གྱི་གནས་ཇི་ལྟར་འདོམས་པའི་འདུས་སྡེའི་བཅའ་སྒྲིགས་ལ་རང་སྲོག་ལྟར་གཅེས་སྤྲས་ཀྱིས་བསླབ་དགོས། དེ་ཡང་གྲྭ་ས་འདིར་བཞུགས་པ་ཐམས་ཅད་སོ་ཐར་གྱི་སྡོམ་པ་དགེ་ཚུལ་སློང་གང་རུང་དང་། བྱང་སྡོམ་ཐེག་ཆེན་སེམས་བསྐྱེད། སྔགས་སྡོམ་དཀྱིལ་འཁོར་ཆེན་པོར་དབང་གིས་རྒྱུད་སྨིན་པར་བྱས་པ་ཤ་སྟག་ཡིན་པས། དེ་དག་གི་བསྲུང་མཚམས་རྣམས་སྔར་མི་ཤེས་པ་རྣམས་ཀྱིས་རང་བློ་དང་འཚམས་པའི་བསླབ་བྱ་རྒྱས་བསྡུས་ཇི་ལྟར་རིགས་པ་ལ་ཐོས་བསམ་བྱ་ཞིང་། ཤེས་པ་རྣམས་ཀྱིས་ཁྱད་དུ་མི་གསོད་པའི་སྒོ་ནས་ལས་ཅི་ལ་ཐུག་ཀྱང་རང་བཞིན་དང་བཅས་པའི་ཁ་ན་མ་ཐོ་བས་བསྡུས་པའི་ཉེས་སྤྱོད་ཐམས་ཅད་སྤོང་ཞིང་། ལེགས་སྤྱོད་དགེ་བའི་བྱ་བ་རྣམས་ཞེ་ཐག་པ་ནས་བསྒྲུབ་པ་ལ་ངོ་ལྐོག་མེད་པས་རང་སེམས་ཀྱིས་མི་འགྱོད་པ་དང་། གཞན་གྱིས་མི་སྨྲ་ཞིང་དཀོན་མཆོག་ལྷ་དང་བཅས་པས་མི་ཁྲེལ་བ་ཞིག་དགོས་པ་ཡིན། དེའི་ཐབས་སུ་སྤྱིར་དགེ་འདུན་ཐམས་ཅད་ཐུགས་མཐུན་ཞིང་ནང་གཤིན་པས། བླ་མ་དང་གྲྭ་སའི་བསྟན་སྡེའི་ཞབས་འདེགས་དང་འཕེལ་རྒྱས་ལ་ཁ་ཙམ་ཚིག་ཙམ་མ་ཡིན་པར་གྲུ་ནང་གི་མི་བཞིན་ཐམས་ཅད་བསམ་སྦྱོར་ཕྱོགས་གཅིག་པས་འདུན་མ་གཅིག་ཏུ་བསྒྲིལ་ནས་སྤྱི་སྒོས་ཀྱི་སྒྲིགས་ལམ་རྣམ་གཞག་ལ་གནས་པ་གལ་ཆེ། ཁྱད་པར་མཁན་སློབ་དབུ་ཆོས་སོགས་རྒན་ལས་སྣེ་རྣམས་ཀྱིས་རང་གཙང་མ་ཉེས་སྐྱོན་མེད་ཅིང་།

― MLP011_Page_0243 ―

^{[མ་དཔེ་གཟིགས་ན་འདིར་གནོན།]}

[Full Size]

སྤྱི་ཚིས་ཆེ་བ། བློ་སྤྱི་སོར་གནས་པའི་སྒོ་ནས། རང་ནུས་གང་ཐོན་གྱིས་སློབ་པར་འོས་པ་ལ་རང་གིས་དངོས་སུ་སློབ་པའམ་གཞན་བསྐུལ་ནས་སློབ་ཏུ་གཞུག །དམད་པར་འོས་པ་ལ་ཉེས་ཆད་བབས་འབྲེལ་གྱིས་སྤྱོད་པ་ངན་པ་ལས་བཟློག་པའི་ཐབས་སྟོན། དེ་ཡང་འཕྲལ་སེལ་ཉི་ཚེ་བ་ཙམ་དུ་མ་སོང་བའི་འཕྲལ་འཇམ་ཞིང་ཕུགས་ནོན་ཆེ་བའི་རུས་ཐོན་ངོ་ལྐོག་མེད་པ་ལ་འབད་ཅིང་། དེའི་ནང་ནས་ཀྱང་དགེ་བསྐོས་ཚོས་སྒྲིགས་ཀྱི་ཐད་དུ་བཟོད་ཁུར་བཏང་སྙོམས་རང་ལ་སྡང་སྨྲས་བྱུང་དོགས་ཀྱི་ཟོན་སྐྱོར་བྱས་ཚེ་སྤྱི་སྒྲིགས་བག་ལ་ཞ་འགྲོ་བས་འཕྲལ་ཕུགས་ཀྱི་ཁེ་ཉེན་ལ་བསམ་ནས་གཟབ་དགོས་ཤིང་། དགེ་འདུན་གྱི་བཅའ་ཁྲིམས་འདི་འདུལ་བ་ནས་སངས་རྒྱས་ཀྱིས་བྱས་པ་དང་ཁྱད་མེད་པར་གསུངས་པས་དགེ་འདུན་ཐམས་ཅད་ཀྱིས་ཀྱང་ཐུགས་བསམ་ལེགས་པར་བཏང་ནས། སྤྱིའི་ཆོས་ཁྲིམས་པའམ་ཉིན་རེའི་ཞལ་གྲངས་ཀྱི་ཆོས་ཁྲིམས་པས་མཚོན་གྲྭ་པ་བཞི་གྲྭ་ཡན་ཆད་ཀྱི་འགོ་བསྡུས་ཀྱི་སྒྲིགས་གནོན་བྱེད་མི་སོགས་མཁན་སློབ་རྒན་དབུ་ཆོས་རྣམས་ཀྱིས་ཆོས་མཐུན་གྱི་བསླབ་བྱ་བྱས་པའི་ངག་ལ་གུས་པས་ཉན་ཅིང་། ཕྱི་ནང་ངོ་ལྐོག་གང་དུའང་ཆོས་དང་མི་མཐུན་པའི་ཀུན་སྤྱོད་འགྲོ་འཆག་ཉལ་འདུག །ཚོགས་འདུ་འགྲོལ་ཕར་ཚུར་དུ་ཐེགས་བཞུད་སོགས་གནས་སྐབས་ཀུན་ཏུ་ཀུ་རེ་དང་ཀྱལ་ཀ་ཀུ་ཅོ་དང་བཞད་གད། ཆགས་སྡང་གི་གཏམ། ཨར་ཤེད། སྤྱོད་རྩིང་སོགས་བག་ཡངས་ཀྱི་སྤྱོད་ངན་མི་མཛེས་པ་ཐམས་ཅད་སྤངས་ནས། ཞི་དུལ་གྱི་སྤྱོད་ལམ་བག་ཡོད་པས་གཞན་དང་བ་འདྲེན་ཅིང་། རང་བྱས་པ་དོན་ལྡན་གྱིས་རང་མི་འགྱོད་པ་དང་། གཞན་མི་ཁྲེལ་བའི་སྤྱོད་ལམ་ཆོས་མཐུན་ཁོ་ནར་འབད་རྩོལ་ཆེན་པོས་སློབ་པས་གཞུང་བསྲངས་ཏེ། གནས་སྐབས་འདིའི་རྙེད་བཀུར་ཕུགས་ཀྱི་བདེ་ལེགས་ཐམས་ཅད་ཆོས་བཞིན་བྱས་ན་ཆར་བཞིན་འབབ་པའི་དཔེ་ལྟར་ཡོང་བས། འཕྲལ་གྱི་ཟས་གོས་གཉེན་གྲོགས་སོགས་ལ་བརྟེན་པའི་བྱ་བ་ངན་ཞེན་དང་ལེ་ལོར་མ་ལུས་པས། ཆོས་དུས་རྣམས་ཀྱིས་གཙོས་དུས་གནས་ཐམས་ཅད་དུ་ཐོས་བསམ་སྒོམ་གསུམ་ལ་བརྩོན་པ་ཆེ་དགོས། སང་བྱེད་གནང་བྱེད་ཀྱི་སོས་དལ་གྱི་ངང་ལ་མི་ཚེ་ཐལ་འགྲོ། བློ་ཆུང་ལ་ལ་དག་ད་ལྟ་སྐྱིད་

― MLP011_Page_0244 ―

^{[མ་དཔེ་གཟིགས་ན་འདིར་གནོན།]}

[Full Size]

ན་དེས་ཆོག །ཕུགས་ཅི་འདྲ་ཞེས་སེམས་པ་སྲིད། དེ་འདྲ་ཁྱིམ་པ་ལས་ཀྱང་བསམ་སྟངས་ཞན་པ་ཡིན། དེས་ན་ཤེས་རབ་ཆེ་བ་ཚོས་རྒྱུད་འགྲེལ་གྱིས་ཐོག་དྲངས་མདོ་སྔགས་ཀྱི་གཞུང་ལུགས་རྣམས་ལ་ཐོས་བསམ་གྱིས་སྒྲོ་འདོགས་བཅད་ནས་བསྟན་པའི་མིག་རྐྱེན་དུ་འགྲོ་བའི་རྣམ་གཞག་དང་། གཞུང་གི་བློ་ཚོགས་གོ་དོན་གྱི་འགྲོས་འདེད་སོགས་གཞན་གྱི་སྨྲ་བའི་འགྲམ་ཐེག་པ་ཞིག་དང་། བློ་གསར་དོན་གཉེར་རྣམས་ལ་གོ་དོན་མཛུབ་ཁྲིད་ཀྱིས་བརྡ་འཕྲོད་ཅིང་། རང་གི་བླང་དོར་འགལ་འབྲེལ་གྱི་དམིགས་རྣམ་ཕྱེད་པ་ཞིག་དགོས། སྐད་བཟང་བ་རྣམས་ཀྱིས་ཀྱང་ཆོ་ག་ཆོས་སྤྱོད་ཚང་མའི་གདངས་དབྱངས་རོལ་ཚིག་སོགས་ཐམས་ཅད་སྦྱོངས་བརྡར་དཔྱིས་ཕྱིན་རང་སྐྱ་ཕེར་བས་འདོན་པའི་བྱང་འདྲོངས་པ། ལུས་དང་ལག་བདེ་བ་རྣམས་ཀྱིས་གར་འཆམ་དང་གཏོར་མ་དཀྱིལ་འཁོར་ལ་རང་བྱན་ཆུད་པར་སྦྱོང་བ་སོགས་བགྲེས་གཞོན་ཐམས་ཅད་ཀྱིས་རང་ལུགས་ཁུངས་ལྡན་གྱི་ཆོས་དང་ལག་ལེན་ལ་བསླབ་སྦྱངས་གནད་དུ་བསྣུན་པ། གཏུགས་སར་གཏུགས། ཤེས་རྒྱས་མཐའ་བཅད་གོ་བས་སྒྲོ་སྐུར་སྤངས། ལག་ལེན་གྱིས་ཉམས་སུ་ལེན་པའི་དང་ལེན་ལ་འབད་རྩོལ་འདོན་དགོས། ཡོན་ཏན་དེ་ཐམས་ཅད་མི་གཅིག་ལ་བྱུང་ཡང་ཆེས་སྐྱོན་མི་ཡོང་། བགྲེས་པ་དང་ཡོན་ཏན་ཆེ་བ་ཚོས་ཀྱང་ཆོག་ཚོད་མི་ཉན། སངས་རྒྱས་མ་ཐོབ་བར་ཡོན་ཏན་སློབ་རྒྱུ་མི་རྫོགས་པས་ཡོན་ཏན་གྱི་མཐའ་རྒྱ་ཐམས་ཅད་ནས་གང་སྨིན་སྦྱོང་དགོས། ངན་པ་ལ་ལ་ཞིག་གིས་བྱིས་པའི་བསམ་པ་དང་། སྤྱོད་པ་བག་མེད་ཀྱི་མགོ་ཡང་ཀླད་མེད་དང་སྡེབས་ཚོགས་ཚོད་མེད་ཀྱི་ཟ་འཐུང་། ཆགས་སྡང་གི་སྐད་ཆ་དང་འཆལ་གཏམ། ཨར་ཤེད། སྤྱོད་རྩིང་། དབྱེན་བཅོས། མི་དཔུང་གྲ་སྒྲིག་གིས་ངན་པའི་སྣ་འདྲེན་སོགས་བྱས་པས་བློ་ཆུང་གཉེན་པོ་ཞན་པ་རྣམས་ཅལ་སྒྲོག་རྗེས་འབྲང་གིས་སྦལ་པ་རྨ་ཅན་ལྟ་བུའི་སྐྱོན་བསྐྱེད་ནས་མང་པོ་ཞིག་གི་འདི་ཕྱིའི་འདུན་མ་གཏན་ཉེས་སུ་འགྲོ་བར་སྣང་བས། བསམ་ཡོད་ཐམས་ཅད་ཀྱིས་དེ་དག་གི་རྗེས་སུ་འབྲང་བ་ལྟ་ཅི་རྨི་ལམ་དུའང་མི་འཇུག་པ་མ་ཟད། རང་ནུས་གང་ཡོད་ཀྱིས་སུན་འབྱིན་དང་ཚར་གཅོད་བྱེད་དགོས། ལར་ཐོས་བསམ་སྒོམ་གསུམ་གང་ཡང་མི་བྱེད་ཅིང་ཚོང་ཁེ་སྤོགས་འགྲས་འདྲིས་

― MLP011_Page_0245 ―

^{[མ་དཔེ་གཟིགས་ན་འདིར་གནོན།]}

[Full Size]

ཀྱི་ཆགས་སྡང་སོགས་ཚེ་འདིའི་བྱ་བཞག་ལ་མི་ཚེ་སྐྱེལ་བའི་བཙུན་པ་དེ་བཙུན་པའི་གཟུགས་བརྙན་ཡིན། རི་མོ་བྲིས་པའི་བཙུན་པ་དང་འདྲ། བཙུན་པའི་དོན་བྱེད་མི་ནུས་པས་ཐུགས་བསམ་ལེགས་པར་གཏོང་དགོས། ཚོགས་ཀྱི་དུས་ཀྱང་འདོན་པ་ལ་ཐམས་ཅད་ཀྱི་བློ་རྩེ་བཅུར་བས་འཕྲལ་གསུང་སྒྲ་ལེགས་པས་གཞན་དང་བ་འདྲེན། ཕུགས་ཆོས་སྤྱོད་གཟུགས་བརྙན་དུ་མ་སོང་བར་རང་གི་འདུན་མ་གྲུབ་པ་དེ་ཡིན། སྦྱིན་བདག་གིས་མང་ཇ་ཞུ་བ་སོགས་ཀྱང་འཕྲལ་གྱི་རྐྱེན་སེལ་དང་ཕུགས་ཀྱི་ཚོགས་གསོག་སྒྲིབ་སྦྱོང་གི་ཕྱིར་ཞུས་པ་ཡིན་པས། དེ་ལ་མང་ཇ་བཞེས་པ་གཅིག་པུས་མི་ཆོག །ཚོགས་ཡུན་རིང་ཞིང་ཞལ་འདོན་ལེགས་པས་བློ་ཁ་རྫོགས་པ་ཞིག་མཛད་དགོས། ཁྱད་པར་གཤིན་པོའི་དོན་དུ་ཞུས་པ་ཡིན་ན་ཁོ་ད་ལྟ་བར་དོར་གནས་པས་སྐྱབས་དང་སྐྱེལ་མ་གལ་ཆེ་བའི་དུས་ཡིན། གལ་ཏེ་ཁོ་མ་དད་པ་སྐྱེས་ན་ངན་འགྲོར་ལྟུང་བའི་རྒྱུ་གསོག་ཅིང་རང་ཡང་ཤིན་ཏུ་སྡིག་ཆེ་བས་གཟོབ་དགོས། དེ་བཞིན་དུ་གཤིན་དགེ་གསོན་རིམ་གྱི་གྲོང་ཆོག་ཏུ་ཕེབས་པའི་ཚེ་ཡང་དུས་སྐབས་དང་བསྟུན་པའི་དོང་སྤྲུགས་དང་རྡོར་སེམས་གང་རུང་ལས་ཟོར་ཡང་གིས་ཆོག་ཆུང་གཞན་མི་གཏོང་ཞིང་དམིགས་ཡུལ་ལ་བརྩེ་བས་ཀུན་ནས་བསླངས་པའི་ཆོ་ག་སྦྱོར་དངོས་རྗེས་གཙང་ཡོང་བར་མཛད། རྒྱུན་དང་ཆོས་དུས་ཀྱི་སྔ་དགོང་ཆོས་ར་རྣམས་ཀྱི་དཔེ་ཆ་འཛིན་སྐྱོར་གྱི་གྲྭ་སོགས་ལ་ཡང་སྤྱིར་དགེ་བསྐོས་དང་སློབ་དཔོན་རྣམ་གཉིས་ཆོས་འཆད་དང་ཀུན་ར་བྱེ་བྲག་སོ་སོའི་སློབ་ཆུང་དང་དགེ་རྒན་རྣམས་ཀྱིས་ཕ་མ་མཛངས་པས་གཅེས་པའི་བུ་ཚ་ལ་སློབ་པ་བཞིན་དུ་བརྩེ་བའི་བསམ་པ་དང་། ཐང་ལྷོད་མེད་པའི་སྦྱོར་བརྩོན་གྱིས་དུས་དང་བློ་གྲོས་གྲོན་དུ་མི་འགྲོ་བའི་བསླབ་སྦྱོང་ལ་ཉེ་རིང་མེད་པའི་སྐུལ་འདེབས་དང་མིག་ལྟོས་གང་བཟང་སློབ་དགོས། ནས་ཁལ་རེ་རེ་གཉིས་གཉིས་ཀྱི་རྩིས་ཞག་བྱེད་པའི་དོ་ཟླ་མིན། དེས་ན་དུས་ཀུན་ཏུ་གྲྭ་སའི་ལས་སྣེ་དང་རིགས་དང་ཡོན་ཏན་གྱིས་རྒན་པས་བླ་ན་བཞུགས་པའི་བཀུར་འོས་རྣམས་གོང་དུ་འཁུར་ནས་ཕུ་དུད་ཞུ་ཞིང་། བགྲེས་པ་རྣམས་ཀྱིས་ཕན་སེམས་ཀྱི་བསླབ་བྱ་སློབ་པའི་ཚིག་ལ་དང་དུ་ལེན་པས་ཉན་པ་དང་། རང་དང་མཉམ་པའི་མཆེད་གྲོགས་རྣམས་

― MLP011_Page_0246 ―

^{[མ་དཔེ་གཟིགས་ན་འདིར་གནོན།]}

[Full Size]

ཕ་མ་གཅིག་གིས་བསྡུས་པའི་སྤུན་ལྟར་འགྲོགས་གཞུང་བཟང་པོས་བརྩེ་དུང་བྱ་བ་དང་། རང་ལས་གཞོན་པ་རྣམས་རང་གི་བུ་ཚ་ལྟར་མི་ཤེས་པ་སློབ་ཅིང་མ་མཐོང་བ་སྟོན་པས་སྐྱོང་བ་སོགས་རྒན་གཞོན་གྱི་གོ་རིམ་མ་འཆུགས་ཤིང་སོ་སོའི་སྤང་བླང་གི་བྱ་བ་མ་འཛོལ་བའི་ངོས། སྤྱི་སར་ཡང་བསམ་པ་དང་ཕུགས་རྩིས་ཆེ་བ་སོགས་སྒོ་དུ་མ་ནས་ལེགས་ཚོགས་གོང་འཕེལ་དུ་འགྱུར་བ་ཞིག་མཛད། མདོར་ན་གཞི་འདུལ་བའི་ངང་ཚུགས་ལ་བརྟེན་ནས། ཐོས་བསམ་སྒོམ་གསུམ་གྱི་བྱ་བས་ཉིན་མཚན་དུས་འདའ་ཞིང་། མཁས་བཙུན་བཟང་གསུམ་གྱི་ཡོན་ཏན་གྱི་ཁུར་གྱི་ལྕི་བས་སྐྱེས་བུ་དམ་པ་རྣམས་ཀྱིས་བསྔགས་འོས་སུ་གྱུར་པ་ཞིག་ཅི་ནས་ཀྱང་མཛད་དགོས་ཤིང་། ཁྱད་པར་མི་རབས་བགྲངས་ནས་ཀྱང་ད་ལྟ་ཚུགས་པའི་བཤད་སྒྲུབ་ཡན་ལག་དང་བཅས་པའི་བསྟན་རྒྱུན་བཟང་པོ་འདི་མ་ཉམས་པ་ཞིག་དགོས་རྒྱུ་ཐམས་ཅད་ཀྱིས་སྙིང་ཁོངས་སུ་བཅུག་སྟེ། ཁོས་བྱས་ཡོང་། གཞན་གྱིས་བྱས་ཡོང་། མ་བྱུང་ནའང་བཟོད་སྙམ་པ་མི་བྱེད་པར་ཁོ་བོས་བྱེད། བདག་ཅག་གིས་བྱེད། བསྐལ་པའི་བར་དུ་གནས་པ་བྱེད་སྙམ་པས་རང་ནུས་གང་ཡོད་ཆོས་ཀྱི་ཕྱོགས་སུ་འབུངས་ན། དལ་འབྱོར་དོན་ཡོད་པར་སོང་བས་འཆི་ཙ་ན་མི་འགྱོད་ཅིང་ཞེ་བློ་བདེ། རང་གཞན་མང་པོའི་འདི་ཕྱིའི་དོན་འགྲུབ་པས་འཚེངས། གལ་ཏེ་བཅའ་ཁྲིམས་ལས་འགལ་ཞིང་འདས་པ་བྱུང་ན། བཅའ་ཡིག་ལེ་ཚན་ལྟར་བསྡིགས་སྨད་ཕྱིར་འགྱེད་ལ་སོགས་པའི་ཆད་ལས་ཀྱི་སྒོ་ནས་སྐྱོན་རྣམས་འཕྲལ་འཕྲལ་དུ་འཆོས་པའི་ཐབས་ཀྱིས་འདུལ་བར་བྱ་ཞིང་། དེའི་ཚེ་གཞན་ལ་སྐྱོན་དུ་མི་ལྟ་བར་རང་གི་ཉེས་པ་དང་དུ་ལེན་ཅིང་། ཐབས་འདི་ལ་བརྟེན་ནས་ཉེས་པ་གང་བྱས་དེས་ཐོག་དྲངས་ཚེ་རབས་ཀྱི་སྡིག་པ་མང་པོ་དག་པར་འགྱུར་རོ་སྙམ་དུ་བསམ་སྟེ། ཚེ་འདིར་ཡང་སྨད་པའི་གནས་དང་ཕྱི་མར་ངན་སོང་གི་སྡུག་བསྔལ་མྱོང་འགྱུར་དྲན་པས། ཆད་པ་ཆེ་ཆུང་གང་ཡིན་ཡང་སྤྲོ་བས་དང་དུ་ལེན་པ་རང་དྲིན་རང་ལ་ཆེ་བ་ཡིན་པས་དགོངས་དགོས་སོ། །དེ་ནས་ཐམས་ཅད་ཀྱིས་བསྟན་པ་སྤྱི་དང་བྱེ་བྲག་རྙིང་བསྟན་ལ་ཤེད་གང་ཐོན་དང་། སེམས་ཅན་གྱི་དོན་དུ་སྤྱི་འགྱུར་གྱི་འབད་པ་འདོན་དགོས། སྔོན་བསྐལ་པ་བཟང་དུས་བསྟན་པ་ལ་

― MLP011_Page_0247 ―

^{[མ་དཔེ་གཟིགས་ན་འདིར་གནོན།]}

[Full Size]

བྱ་བ་རླབས་པོ་ཆེ་བྱས་པ་ལས། དེང་སང་ཕན་པའི་ལྷག་བསམ་ཕྲ་མོ་ཙམ་ཡང་ཕན་ཡོན་ཆེ་བར་གསུངས་པས་བགྲེས་གཞོན་ཐམས་ཅད་ཀྱིས་ཐུགས་བསམ་བསྐྱེད་ནས་ཀུན་ཏུ་དོན་ཡོད་པའི་བྱ་བ་ལ་བརྩོན་པ་མི་ལྷོད་པར་འཚལ། སྙིང་གཏམ་ལབ་རྒྱུ་དེ་ལས་མེད་དོ། །ཞེས་པ་འདི་ས་སྦྲུལ་ལོ་དར་གླིང་ནས་དགེ་འདུན་སྤྱི་ལ་སྙན་བསྐུལ་དུ་ཕུལ་བ་དང་། མེ་ཕག་ལོ་སྤྱིའི་དན་བཞག་གི་ཡིག་དོན་ལྟར་བསྡེབས་ནས་གོ་བདེ་བ་བཀོད་པ་ཕྱོགས་དུས་ཐམས་ཅད་དུ་བདེ་ལེགས་ཀྱིས་ཁྱབ་པར་གྱུར་ཅིག། །།