མ་མཐོང་ཙམ་གྱི་ལྡོག་ཁྱབ་འདོད་པ་ལ་ལུང་འགལ་སོགས་ཀྱི་གནོད་པ་སྟོན་ཚུལ་བཤད་པ།

༈ གཞུང་ཚན་དང་པོ་དེ་རྣམས་ཀྱང་དོན་ཚན་གསུམ་དུ་འདུ་བ་ཡིན་ཏེ། རྟགས་མི་མཐུན་ཕྱོགས་ལ་མ་མཐོང་ཙམ་གྱིས་ལྡོག་ཁྱབ་གྲུབ་པར་འདོད་པའི་རང་སྡེ་ལ། སློབ་དཔོན་ཕྱོགས་གླང་གི་ལུང་དྲུག་དང་འགལ་ཚུལ་སྟོན་པ། དེ་ལྟར་འདོད་པའི་རང་གཞན་གྱི་སྡེ་པ་གཉིས་ལ་ཐུན་མོང་དུ་མངོན་སུམ་དང་འགལ་ཚུལ་སྟོན་པ། དེ་ལྟར་འདོད་པའི་གཞན་སྡེའི་གཙོ་བོ་གསུམ་ལ་ཁས་བླངས་ནང་འགལ་གྱི་སྒོ་ནས་གནོད་བྱེད་སྟོན་ཚུལ་གསུམ་དུ་འདུ་བ་ཡིན་པའི་ཕྱིར། དང་པོ་འཆད་པར་བྱེད་པ་ལ། འཁྲུལ་པ་ཅན་གྱི། ཞེས་པ་ནས། འཁྲུལ་པ་མེད་པ་ཅན། ཞེས་པའི་བར་བྱུང༌། གཉིས་པ་འཆད་པར་བྱེད་པ་ལ། ཡུལ་ལ་ཞེས་སོགས་རྐང་པ་བཞི་བྱུང༌། གསུམ་པ་འཆད་པར་བྱེད་པ་ལ། བདག་དང་ས་ལ། ཞེས་སོགས་རྐང་པ་བཞི་བྱུང༌། །གཞུང་དང་པོ་དེ་རྣམས་ཀྱང་དོན་ཚན་གསུམ་དུ་འདུ་བ་ཡིན་ཏེ། རིགས་སྒོ་དང་འགལ་ཚུལ་དང༌། ཀུན་བཏུས་ཀྱི་རང་འགྲེལ་དང་འགལ་ཚུལ། ལུང་གི་རབ་དབྱེ་དང་འགལ་ཚུལ་གསུམ་དུ་འདུ་བ་ཡིན་པའི་ཕྱིར། དང་པོ་འཆད་པར་བྱེད་པ་ལ། འཁྲུལ་པ་ཅན་གྱི་གཉེན་པོར་ནི། །ཞེས་སོགས་བྱུང༌། གཉིས་པ་འཆད་པར་བྱེད་པ་ལ། གལ་ཏེ་མ་མཐོང་། ཞེས་སོགས་བྱུང༌། གསུམ་པ་འཆད་པར་བྱེད་པ་ལ། མ་མཐོང་ཕྱིར་རེག །ཅེས་སོགས་རྐང་པ་གཉིས་བྱུང༌། དང་པོ་རིགས་སྒོ་དང་འགལ་ཚུལ་ནི། བྱས་པ་སྒྲ་མི་རྟག་པར་སྒྲུབ་པའི་འཁྲུལ་པ་ཅན་གྱི་མ་ངེས་པའི་གཏན་ཚིགས་ཡིན་ནམ་སྙམ་དུ་དོགས་པའི་གཉེན་པོར་བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་ཆོས་མི་མཐུན་སྦྱོར་གྱི་སྒྲུབ་ངག་ཡང་དག་སྨོས་པ་ལ་དོན་མེད་པར་ཐལ། རྟགས་མི་མཐུན་ཕྱོགས་ལ་མ་མཐོང་བ་ཙམ་གྱིས་ལྡོག་ཁྱབ་འགྲུབ་པའི་ཕྱིར། རྟགས་ཁས། འདོད་ན། རིགས་སྒོ་ལས། རེ་ཞིག་འགལ་བ་དང་མ་ངེས་པའི་གཉེན་པོར་གཉིས་ཀ་བརྗོད་པ་གང་ཡིན་པ་དེ་ནི་རིགས་སོ། །ཞེས་པའི་ལུང་ལུང་ཚད་མར་ཁས་ལེན་པ་དང་འགལ་ལོ། །དེའི་ཉེས་སྤོང་འགོག་པར་བྱེད་པ་ལ། གལ་ཏེ་མ་མཐོང་འབྲས་ཅན་དེ། །ཞེས་སོགས་རྐང་པ་དྲུག་བྱུང༌། གཉིས་པ་ཀུན་བཏུས་ཀྱི་རང་འགྲེལ་དང་འགལ་ཚུལ་དེ་ལ་བཞི་ཡོད་པའི་ནང་ནས། དང་པོ་འཆད་པར་བྱེད་པ་ལ། གལ་ཏེ་མ་མཐོང་བས་ལྡོག་འགྱུར། །ཞེས་སོགས་རྐང་པ་གཉིས་བྱུང༌། དེའི་དོན་ཡང་། རོ་མངར་ཁྱད་པར་ཅན་དང་མི་ལྡན་པ་བསྐལ་དོན་དུ་སོང་བའི་གང་ཟག་གི་ངོར་ཟོས་པའི་ཤིང་ཏོག་དང་གཟུགས་སྨུག་པོར་མཚུངས་པ་དེ་ཆོས་ཅན། ཟོས་པའི་ཤིང་ཏོག་དང་གཟུགས་སྨུག་པོར་མཚུངས་པའི་ཤིང་ཏོག་ལྷག་མ་རྣམས་རོ་མངར་ཁྱད་པར་ཅན་དང་ལྡན་པར་སྒྲུབ་པའི་རྟགས་ཡང་དག་ཡིན་པར་ཐལ། དེ་སྒྲུབ་ཀྱི་ཕྱོགས་ཆོས་གང་ཞིག །དེའི་ལྡོག་ཁྱབ་ཡིན་པའི་ཕྱིར། ཕྱི་མ་དེར་ཐལ། དེ་སྐོར་གྱི་སྐབས་ཀྱི་ཕྱི་རྒོལ་གྱིས་དེ་སྐོར་གྱི་མི་མཐུན་ཕྱོགས་ལ་མ་མཐོང་ཙམ་ཡིན་པའི་ཕྱིར། ཁྱབ་པ་ཁས། འདོད་ན། མདོ་རང་འགྲེལ་ལས། གཟུགས་ལ་སོགས་པ་ཆོས་མཚུངས་པས་རོ་ལ་སོགས་པ་གདོན་མི་ཟ་བར་མཚུངས་པ་དེ་ཡང་རིགས་པ་མ་ཡིན་ནོ། །ཞེས་པའི་ལུང་ལུང་ཚད་མར་ཁས་བླངས་པ་དང་འགལ་ལོ། །གཉིས་པ་འཆད་པར་བྱེད་པ་ལ། ལྡོག་པ་ཅན་ཡང་གཏན་ཚིགས་འགྱུར། །ཞེས་པ་འདི་བྱུང༌། འདིའི་དོན་ཡང་སྲོག་ལྡན་གྱི་ལུས་སུ་ཚད་མས་དམིགས་པ་ཡང་ཡིན། གང་ཟག་གི་བདག་མེད་ཀྱང་ཡིན་པའི་གཞི་མཐུན་པ་ཚད་མས་མ་ངེས་པའི་སྲོག་ལྡན་གྱི་ལུས་སུ་ཚད་མས་དམིགས་པ་དེ་གསོན་ལུས་གང་ཟག་གི་བདག་བཅས་སུ་སྒྲུབ་པ་ལ་ཕྱོགས་ཆོས་ཅན་དུ་སོང་བའི་གང་ཟག་གི་ངོར། སྲོག་ལྡན་གྱི་ལུས་སུ་ཚད་མས་དམིགས་པ་ཆོས་ཅན། གསོན་ལུས་གང་ཟག་བདག་བཅས་སུ་སྒྲུབ་པའི་རྟགས་ཡང་དག་ཡིན་པར་ཐལ། དེ་སྒྲུབ་ཀྱི་ཕྱོགས་ཆོས་གང་ཞིག །དེ་སྒྲུབ་ཀྱི་ལྡོག་ཁྱབ་ཡིན་པའི་ཕྱིར། ཕྱི་མ་གྲུབ་སྟེ། དེ་སྐོར་གྱི་སྐབས་ཀྱི་ཕྱི་རྒོལ་འགའ་ཞིག་གིས་དེ་སྐོར་གྱི་མི་མཐུན་ཕྱོགས་ལ་མ་མཐོང་ཙམ་ཡིན་པའི་ཕྱིར། ཁྱབ་པ་ཁས། འདོད་ན། མདོ་རང་འགྲེལ་ལས། བདག་རྟག་པར་མི་རུང་བའི་ཕྱིར། བུམ་པ་ལ་སོགས་པ་བདག་མེད་པ་ཉིད་དུ་མ་གྲུབ་སྟེ། མ་དམིགས་པ་ཙམ་གྱི་ནི་ཐེ་ཚོམ་གྱི་རྒྱུ་ཡིན་པའི་ཕྱིར། ཞེས་པའི་ལུང་ལུང་ཚད་མར་ཁས་བླངས་པ་དང་འགལ་ལོ། །གསུམ་པ་འཆད་པར་བྱེད་པ་ལ། མ་གྲུབ་སྦྱར་བ་བརྗོད་བྱ་མིན། །ཞེས་པ་འདི་བྱུང༌། འདིའི་དོན་ནི། བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་ལྡོག་ཁྱབ་གྲུབ་མ་གྲུབ་ཐེ་ཚོམ་ཟ་བའི་གང་ཟག་གི་ངོར་བྱས་པ་ཆོས་ཅན། སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པར་ཐལ། དེ་སྒྲུབ་ཀྱི་ཕྱོགས་ཆོས་གང་ཞིག །དེ་སྒྲུབ་ཀྱི་ལྡོག་ཁྱབ་ཡིན་པའི་ཕྱིར། ཕྱི་མ་གྲུབ་སྟེ། དེ་འདྲའི་གང་ཟག་དེས་བྱས་པ་སྒྲ་མི་རྟག་པར་སྒྲུབ་པའི་མི་མཐུན་ཕྱོགས་ལ་མ་མཐོང་ཙམ་ཡིན་པའི་ཕྱིར། ཁྱབ་པ་ཁས། འདོད་ན། ལྡོག་ཁྱབ་ལ་ཐེ་ཚོམ་ཟ་བའི་གང་ཟག་གི་ངོར་ལྡོག་ཁྱབ་མ་གྲུབ་པ་དང༌། ཕྱོགས་ཆོས་མ་གྲུབ་པ་གཉིས་དཔེ་དོན་དུ་སྦྱར་ནས་བཤད་པ་མི་འཐད་པར་ཐལ་ལོ། །འདོད་ན། མདོ་རང་འགྲེལ་ལས། ཕྱོགས་ཀྱི་ཆོས་ནི་རྒོལ་བ་དང་ཕྱིར་རྒོལ་བ་གཉིས་ཀ་ལ་ངེས་པར་བཟུང་ངོ་། །དེ་བཞིན་དུ་མཐུན་པའི་ཕྱོགས་ལ་ཡོད་པ་དང་མི་མཐུན་པའི་ཕྱོགས་ལ་མེད་པ་དག་ལ་ཅི་རིགས་པར་བརྗོད་པར་བྱའོ། །ཞེས་པའི་ལུང་ལུང་ཚད་མར་ཁས་བླངས་པ་དང་འགལ་ལོ། །བཞི་པ་འཆད་པར་བྱེད་པ་ལ། ཁྱད་པར་རྣམ་པར་གཅོད་པ་ཡི། །ཞེས་སོགས་རྐང་པ་གཉིས་བྱུང༌། འདིའི་དོན་ཡང༌། མཉན་བྱ་སྒྲ་རྟག་མི་རྟག་གཉིས་ཀར་སྒྲུབ་པའི་རྟགས་ཡང་དག་ཡིན་པར་ཐལ། དེ་སྒྲུབ་ཀྱི་ཕྱོགས་ཆོས་གང་ཞིག །དེ་སྒྲུབ་ཀྱི་ལྡོག་ཁྱབ་ཡིན་པའི་ཕྱིར། ཕྱི་མ་གྲུབ་སྟེ། མཉན་བྱ་དེ་སྒྲུབ་ཀྱི་ཕྱོགས་ཆོས་ཅན་དུ་སོང་བའི་གང་ཟག་དེས། མཉན་བྱ་རྟག་མི་རྟག་གང་རུང་མ་ཡིན་པ་ལ་མ་མཐོང་ཙམ་ཡིན་པའི་ཕྱིར། ཁྱབ་པ་ཁས། འདོད་ན། མདོ་རང་འགྲེལ་ལས། ཁྱད་པར་ནི་རྣམ་པར་གཅོད་པའི་གཏན་ཚིགས་མ་ཡིན་པར་འགྱུར་རོ། །ཞེས་པའི་ལུང་ལུང་ཚད་མར་ཁས་བླངས་པ་དང་འགལ་ལོ། །དེའི་ཉེས་སྤོང་འགོག་པར་བྱེད་པ་ལ། ཚད་མ་གཞན་གྱིས་གནོད་ཅེ་ན། །ཞེས་སོགས་རྐང་པ་བཞི་བྱུང༌། ལུང་གི་རབ་དབྱེ་དང་འགལ་ཚུལ་འཆད་པར་བྱེད་པ་ལ། མ་མཐོང་ཕྱིར་རེག་མཐོང་བ་ལས། །ཞེས་སོགས་རྐང་པ་གཉིས་བྱུང༌། འདིའི་དོན་ཡང༌། གྲང་མིན་དྲོད་མིན་གྱི་རེག་བྱ་བཏང་སྙོམས་པ་བྱེ་བྲག་པས་མ་མཐོང་བ་དེ་ཆོས་ཅན། བྱེ་བྲག་པས་མཐོང་བའི་ས་ཆུ་མེ་གསུམ་ལ་རེག་བྱ་བཏང་སྙོམས་པ་མི་ལྡན་པར་སྒྲུབ་པའི་རྟགས་ཡང་དག་ཡིན་པར་ཐལ། དེ་སྒྲུབ་ཀྱི་ཕྱོགས་ཆོས་གང་ཞིག །དེ་སྒྲུབ་ཀྱི་ལྡོག་ཁྱབ་ཡིན་པའི་ཕྱིར། ཕྱི་མ་གྲུབ་སྟེ། དེ་སྐོར་གྱི་ཕྱི་རྒོལ་འགའ་ཞིག་གིས་དེ་སྐོར་གྱི་མི་མཐུན་ཕྱོགས་ལ་མ་མཐོང་ཙམ་ཡིན་པའི་ཕྱིར། ཁྱབ་པ་ཁས། རྩ་བར་འདོད་ན། ལུང་གི་རབ་དབྱེ་ལས། གལ་ཏེ་མ་མཐོང་བ་དག་གིས་མཐོང་བ་དག་ལ་འགོག་པར་བྱེད་ན། དེ་ཡང་རིགས་པ་མ་ཡིན་ནོ། །ཞེས་པའི་ལུང་ལུང་ཚད་མར་ཁས་བླངས་པ་དང་འགལ་ལོ། །དེ་ལྟར་ཁས་ལེན་པའི་རང་གཞན་གྱི་སྡེ་པ་གཉིས་ལ་མངོན་སུམ་དང་འགལ་ཚུལ་འཆད་པར་བྱེད་པ་ལ། ཡུལ་ལ་སོགས་པའི། ཞེས་པ་རྐང་པ་བཞི་བྱུང༌། འདིའི་དོན་རོ་མངར་ཁྱད་པར་ཅན་དང་མི་ལྡན་པ་བསྐལ་དོན་དུ་སོང་བའི་གང་ཟག་གི་ངོར། སྐྱུ་རུ་ར་དེ་ལག་མཐིལ་གྱི་སྐྱུ་རུ་ར་རོ་མངར་ཁྱད་པར་ཅན་དང་ལྡན་པར་སྒྲུབ་པའི་རྟགས་ཡང་དག་ཡིན་པར་ཐལ། དེ་སྒྲུབ་ཀྱི་ཕྱོགས་ཆོས་གང་ཞིག །དེ་སྒྲུབ་ཀྱི་ལྡོག་ཁྱབ་ཡིན་པའི་ཕྱིར། ཕྱི་མ་གྲུབ་སྟེ། དེ་སྒྲུབ་ཀྱི་སྐབས་ཀྱི་ཕྱི་རྒོལ་གྱིས་དེ་སྒྲུབ་ཀྱི་མི་མཐུན་ཕྱོགས་ལ་མ་མཐོང་ཙམ་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། སྐྱུ་རུ་ར་ཡིན་ན། རོ་མངར་ཁྱད་པར་ཅན་དང་ལྡན་པས་མ་ཁྱབ་པའི་ཕྱིར། སྐྱུ་རུ་ར་དེ་ལ་ཡང༌། ཡུལ་གྱི་ས་བཟང་ངན་དང་སོ་ནམ་ལེགས་ཉེས་ལ་སོགས་པའི་ཁྱད་པར་ལས། རོ་མངར་ཁྱད་པར་ཅན་དང་ལྡན་པ་དང་མི་ལྡན་པའི་རྫས་དུ་མ་མངོན་སུམ་ལ་སྣང་བའི་ཕྱིར། དེ་ལྟར་ཁས་ལེན་པའི་གཞན་གྱི་སྡེ་པའི་གཙོ་བོ་གསུམ་ལ་ཁས་བླངས་ནང་འགལ་གྱི་སྒོ་ནས་སྐྱོན་སྟོན་པ་ལ། བདག་དང་ས་ལ། ཞེས་སོགས་རྐང་པ་བཞི་བྱུང༌། འདིའི་དོན་ཡང་། རྟགས་མི་མཐུན་ཕྱོགས་ལ་མ་མཐོང་ཙམ་གྱིས་ལྡོག་ཁྱབ་གྲུབ་པ་མི་འཐད་པར་ཐལ། གསོན་ལུས་ལ་བདག་ཚད་མས་མ་དམིགས་ཀྱང༌། གསོན་ལུས་ལ་བདག་ཡོད། ས་ལ་ཤེས་པ་ཚད་མས་མ་དམིགས་ཀྱང་ས་ལ་ཤེས་པ་ཡོད། འོ་མའི་དུས་སུ་ཞོ་ཚད་མས་མ་དམིགས་ཀྱང༌། འོ་མའི་དུས་སུ་ཞོ་ཡོད་པའི་ཕྱིར། རྟགས་དང་པོ་བྱེ་བྲག་པ་ལ་ཁས། གཉིས་པ་གྲངས་ཅན་པ་ལ་ཁས། གསུམ་པ་རྒྱང་འཕེན་པ་ལ་ཁས། དེ་ལྟར་ན་དེ་རྣམས་ཀྱི་དོན་འཆད་པར་བྱེད་པ་ལ། དེ་ཕྱིར་དེ་ཙམ་དང་འབྲེལ་བའི། །ཞེས་སོགས་བྱུང༌། དེས་ན་རྟགས་མི་མཐུན་ཕྱོགས་ལ་མ་མཐོང་ཙམ་གྱིས་ལྡོག་ཁྱབ་གྲུབ་པ་འགོག་པ་ལ། བཤད་བྱའི་ལུང་འགོད་པ་དང༌། ལུང་གི་དོན་བཤད་པ་གཉིས། དང་པོ་ནི། རང་འགྲེལ་ལས། མི་དམིགས་པ་ཐམས་ཅད་ནི་རྟགས་སྦྱོར་བྱེད་པ་མ་ཡིན་ཏེ། དེའི་ཕྱིར་གཅིག་ལོག་པས་གཞན་ལྡོག་པར་འདོད་པ་ནི། དེ་གཉིས་རང་བཞིན་འབྲེལ་པ་འགའ་ཞིག་ཀྱང་འདོད་པར་བྱ་དགོས་སོ། །དེ་ལྟར་མ་ཡིན་ན་གཏན་ཚིགས་གོ་བར་བྱེད་པ་མ་ཡིན་པར་འགྱུར་རོ། །