སྙན་རྩོམ་ཐོར་བུའི་སྐོར། བཅུ་གཉིས་པ།བཅུ་གཉིས་པ། དྭངས་གསལ་དྲི་མ་མེད་པའི་རྒྱ་མཚོ་ན། ། ངང་པའི་བུ་མོ་དལ་གྱིས་རྒྱུ་བ་འདིས། ། སྤྲིན་བྲལ་སྟོན་གྱི་ནམ་མཁའ་དྭངས་པ་ལ། ། ཉ་གང་ཟླ་བ་བགྲོད་པའི་མཛེས་སྡུག་འཕྲོག ། རི་བོང་ཟླ་བའི་ཅོད་པཎ་ཅན། ། ངང་པ་བསུ་བའི་ཁ་ལོ་བ། ། བཅོས་མིན་འོད་དཀར་འདི་མཐོང་ནས། ། 282 མཁས་དབང་དགེ་འདུན་ཆོས་འཕེལ་གྱི་གསུང་རྩོམ་ཕྱོགས་བསྡུས། བརྗོད་མེད་ཡིད་ལ་དགའ་བདེ་སྐྱེས། ། རྨོངས་པའི་ཕ་ཤ་ཟ་བའི་དཔའ་བོ་ཡིས། ། མེ་འབར་རལ་གྲི་ཕྱག་ན་འཕྱར་བ་ལ། ། མ་འཇིགས་སྙིང་ནས་གུས་པས་གསོལ་བཏབ་ན། ། དུག་གསུམ་བདུད་ཀྱི་བུ་ལ་འཇིགས་པ་ཅི། ། གོང་སྡོད་རྗེ་ཡི་གཟུགས་དང་གཡོག་གི་ལུས། ། མཐོང་རྒྱུ་འབྱོར་བའི་ཚེ་དང་སྤྲང་པོའ་ིཚེ། ། བཙུན་པ་བཟང་ཤོས་ཁྱིམ་པ་སྡུག་ཤོས་སོགས། ། སྐྱེ་བ་གཅིག་ལ་ལུས་རྟེན་མང་དུ་བརྗེ། ། མི་ཡི་མི་ཚེ་ཚེ་ཡི་ཁྲལ་ཡིན་པས། ། ཁྲལ་པ་འཆི་བདག་ཡུལ་དུ་མ་འཁྱོལ་བར། ། དགའ་དུས་རིང་དུ་གཏོང་བའི་ཐབས་མེད་ན། ། སྡུག་དུས་ཐུང་དུ་གཏོང་བའི་ཐབས་ཅི་ཞིག ། |