གཞོན་ནུ་ཀུན་རྒྱལ་ལ་གདམས་པ་རང་མཚང་སྒྲོག་པའི་སྤྲིན་གྱི་རྔ་གསང་།

རྡོ་རྗེ་འཛིན་དངོས་བློ་གྲོས་རྒྱལ་མཚན་དཔལ། །ཆོས་ཀྱི་རྒྱལ་པོ་འཇམ་དབྱངས་བླ་མ་རྗེ། །འགྲོ་བའི་རྩ་ལག་ཕ་གཅིག་དགེ་བའི་བཤེས། །འདྲེན་མཆོག་བླ་མ་རྣམས་ལ་གུས་བཏུད་ནས། །དགའ་བསྐྱེད་ཡུལ་ལྔའི་པད་ཚལ་རྒྱས་པ་རུ། །གང་ཞིག་འདོད་པའི་སྦྲང་རྩི་དོན་གཉེར་ནས། །ཡིད་ཀྱི་སྦྲང་མ་རྣམ་པར་འཁྱམས་པ་ཡི། །སྙིང་གི་བུ་ལ་གདམས་པ་བཤད་ཀྱིས་ཉོན། །མཁས་ཤིང་ལང་ཚོ་གསར་པའི་ཉི་གཞོན་དེ། །ཁེངས་དྲེགས་ཤིང་རྟའི་བཞོན་པ་ལ་བརྟེན་ནས། །ལུགས་ཟུང་ལྷ་ཡི་རྫིང་རིང་བརྒལ་བའི་ཚེ། །ཉེས་ལྟུང་སྒྲ་གཅན་གདུག་པས་ཟོས་པ་མཚར། །ཉམ་ཐག་འབྱོར་བས་ཕོངས་པའི་འགྲོ་བ་ཡིས། །འདོད་དགུ་སྦྱིན་པའི་གཏེར་བཟང་ཐོབ་པ་ལྟར། །ད་ལྟའི་རྙེད་དཀའི་མི་ལུས་རིན་ཆེན་འདི། །རྣམ་གཡེང་ངང་དུ་མ་གཏོང་སྙིང་གི་བུ། །པད་སྡོང་འདར་བའི་འདབ་རྩེའི་ཆུ་ཐིགས་བཞིན། །ཚེ་འདི་ཡུན་རིང་གནས་པའི་གདེང་མེད་ཅིང་། །སང་དང་ཕྱི་མའི་སྔ་ཕྱི་རྙེད་དཀའ་བས། །ནམ་འཆི་ཆ་མེད་སོམས་ཤིག་སྙིང་གི་བུ། །གླིང་བཞིའི་བདག་པོའི་འབྱོར་པ་ཐོབ་གྱུར་ཀྱང་། །རྣམ་པར་དཔྱད་ན་སྙིང་པོ་མ་མཆིས་ན། །ད་ལྟའི་དཔོན་ཙམ་ཇི་ལྟར་འབད་པས་སྐྱོངས། །ཚེ་འདི་བློ་ཡིས་ཐོངས་ཤིག་སྙིང་གི་བུ། །ད་ལྟ་ལྷན་དུ་ཚོགས་པའི་མི་རྣམས་ཀྱང་། །གང་ཚེ་ལས་ཀྱིས་སོ་སོར་འབྲལ་བ་ན། །ཆ་རྒྱུས་མེད་པའི་ཡུལ་དུ་གཅིག་པུར་འགྲོ། །ཉེ་དུའི་ཁ་འཛིན་སྐྱུར་ཅིག་སྙིང་གི་བུ། །ཁྱོད་དང་ཡུད་ཙམ་འབྲལ་བར་མི་འཟོད་པའི། །ཡུལ་ལ་མངོན་པར་ཆགས་པའི་གྲོགས་བཟང་གིས། །ཡང་ཡང་བསླུས་པས་ད་དུང་སྲིད་པར་འཁྱམས། །ལས་བསྐོས་འདི་དག་བརྗེད་དམ་སྙིང་གི་བུ། །གཉེན་དང་གྲོགས་ལ་ཆགས་པའི་བདུད་པོ་འདིས། །ལྟར་སྣང་ཕན་པ་སྒྲུབ་པའི་བསླུ་བྲིད་ཀྱིས། །བརྩེ་མེད་གཤིན་རྗེའི་ལག་ཏུ་སྤྲད་ཀྱིས་དོགས། །གཅིག་པུར་རི་ཁྲོད་འགྲིམས་ཤིག་སྙིང་གི་བུ། །རྐྱེན་གྱིས་བསླུས་ཚེ་ཆགས་སྡང་བདུད་པོ་འདིས། །ལོ་མང་སྒྲུབ་པ་བྱས་པའི་རྟོགས་ལྡན་ཡང་། །བརླག་པར་འགྱུར་ན་ཁྱོད་ལྟ་སྨོས་ཅི་འཚལ། །རང་སེམས་ཡན་པར་མ་གཏོང་སྙིང་གི་བུ། །རང་དོན་བསྒྲུབ་ཕྱིར་གཞན་མགོ་སྐོར་དུ་རེ། །རང་སྐྱོན་སྦ་ཞིང་ཆོས་སྲིད་སྐྱོང་འདོད་ནས། །གཡོ་ཆེན་བརྫུན་གྱིས་གཞན་དག་བསླུ་བྱེད་པའི། །ཁྲམ་པ་དེ་འདྲ་མ་བྱེད་སྙིང་གི་བུ། །སྐྱོ་ཤས་སྐྱེས་ཀྱང་རང་ཁྱིམ་དམ་དུ་བཟུང། །བྱ་བཏང་ལགས་མོད་དཔོན་སྡེའི་ཁ་འཛིན་བྱས། །འཆི་བ་དྲན་ཡང་ཚེ་འདིའི་ཆེ་ཐབས་སྒྲུབ། །ཆོས་པ་ངོ་མཚར་ཆེ་འོ་སྙིང་གི་བུ། །ཆགས་པས་བཅིང་བས་ཅི་བྱས་ཚེ་འདིར་སོང་། །ཁྲོ་བས་རྦད་ནས་གྲོགས་རྣམས་སུན་པར་བྱས། །རྨོངས་པས་བསླུས་པས་བླང་དོར་བརྗེད་ནས་འདུག །བདག་ཡིད་སྐྱོ་བར་གྱུར་ཏོ་སྙིང་གི་བུ། །ངེས་འབྱུང་རྭ་གདེང་རྡོ་རྗེའི་གུར་ཁང་གི། །ཕྱི་རོལ་སྒྲུབ་པའི་མེ་དཔུང་འབར་བ་རུ། །འཆི་བ་དྲན་པའི་བདེན་པས་མྱུར་ཁུག་ལ། །ཞེན་པའི་བདུད་པོ་སྲོགས་ཤིག་སྙིང་གི་བུ། །ད་ནི་ཡུན་རིང་ཨེ་སྡོད་མི་ཤེས་པས། །དཔོན་ཆས་བརླག་ཀྱང་འཇིག་རྟེན་བྱ་བ་སྤོང་། །སྲིང་མོ་འཁྱལ་ཡང་འགྱོད་པ་མི་བྱ་བར། །ཚེ་ལྷག་ཆོས་ལ་སྤྱོད་ཅིག་སྙིང་གི་བུ། །གང་ཞིག་སྙིང་རྗེའི་རྩ་བ་ཉམས་དམས་ཤིང་། །སྦྱིན་སོགས་ཐབས་མང་རྐྱེན་གྱིས་བོར་གྱུར་བས། །གཞན་ཕན་སེམས་མཆོག་ལྗོན་པ་ཉམས་ནས་སོང་། །རིས་བྲལ་བརྩེ་བ་སྒོམས་ཤིག་སྙིང་གི་བུ། །བདག་ལྟའི་ཁང་བཟང་ཉམས་དགར་གནས་བཅས་ཤིང་། །རྣམ་གཡེང་དགའ་མར་འདོད་པའི་ཟུར་མིག་གཡོ། །རྣམ་མང་རྟོག་པའི་བྱ་བས་དུབ་གྱུར་པས། །ལྟ་བའི་ངལ་གསོ་སྟེན་ཅིག་སྙིང་གི་བུ། །གང་ཞིག་གྲགས་སྙན་འདོད་པའི་སྤྲིན་གསེབ་ནས། །ཟོལ་མེད་རྣམ་དག་དམ་ཆོས་སྒྲུབ་བོ་ཞེས། །སྒྲ་ཆེན་བསྒྲགས་པ་ནམ་མཁའི་དབྱིངས་སུ་དེངས། །ཁ་ཞེ་མཚུངས་གིན་མི་འདུག་སྙིང་གི་བུ། །གྲགས་འདོད་བཅོས་མའི་ངོམ་ཆོས་ཙམ་ཞིག་ལས། །སྡོམ་གསུམ་བསླབ་བྱའི་ཚོགས་རྣམས་ཡལ་བར་བོར། །དམ་ཚིག་མངོན་ལྐོག་བྱེད་པའི་ཚུལ་འཆོས་མཁན། །རང་ཞེ་རང་ལ་ཁྲེལ་ལམ་སྙིང་གི་བུ། །སྔར་བྱས་སྡིག་ལ་འགྱོད་པར་མི་འགྱུར་ལ། །ཕྱིན་ཆད་སྡོམ་པའི་དམ་བཅའ་མ་མཆིས་ཤིང་། །རྣམ་པར་གཡེང་བའི་སྒོམ་བཟླས་སྒྲིབ་པ་ཡི། །གཉེན་པོར་སོང་བ་མེད་དོ་སྙིང་གི་བུ། །སྔོན་ཚེ་དལ་འབྱོར་རྟེན་བཟང་སྦྱིན་པའི་མ། །འཆི་བདག་རྒྱལ་པོའི་ཁྲིམས་སར་ཁྲིད་པའི་ཚེ། །བུ་འདིས་དམ་པའི་ཆོས་ཤིག་འགྲུབ་རེ་བའི། །ཨ་མའི་ཞལ་ཆེམས་དྲན་ནམ་སྙིང་གི་བུ། །ཆོས་ཀྱི་རྒྱལ་པོ་འཇམ་དབྱངས་བླ་མ་ལས། །ཡང་གསང་བླ་ན་མེད་པའི་ཟབ་ཆོས་ཐོས། །རྣ་བའི་དབང་པོ་སྐལ་པ་བཟང་ལགས་ཀྱང་། །ཉམས་ལེན་མེད་པས་འགྱོད་དོ་སྙིང་གི་བུ། །ཁྱོད་ཀྱིས་དམ་པ་དུ་མའི་སྤྱན་སྔ་རུ། །སེམས་དཔའ་ཡིས་ཀྱང་སྤྱད་པར་དཀའ་བ་ཡི། །དོན་གཉིས་བསྒྲུབ་ཅེས་དམ་བཅའི་ཁུར་ཆེན་པོའི། །ཁས་བླངས་རལ་བར་ཤེས་སམ་སྙིང་གི་བུ། །བག་མེད་སྤྲིན་ལས་ཉེས་པའི་ཆར་འབབ་པས། །སྡིག་ལྟུང་བ་ཚྭའི་རྒྱ་མཚོ་རྣམ་པར་འཕེལ། །བཟོད་དཀའ་ངན་འགྲོའི་གཡང་སར་ཁྱེར་གྱིས་དོགས། །ཚ་གྲང་སྡུག་བསྔལ་སོམས་ཤིག་སྙིང་གི་བུ། །ད་ལྟ་ཉིན་གཅིག་བཀྲེས་པའི་སྡུག་བསྔལ་ཙམ། །བཟོད་པའི་ནུས་པ་ཁྱོད་ལ་མ་མཆིས་ན། །འཇིགས་ཆེན་ནད་ཀྱིས་ཤིན་ཏུ་ཉམ་ཐག་ཚེ། །སྲན་པའི་བློ་སྟོབས་ཡོད་དམ་སྙིང་གི་བུ། །ནམ་ཞིག་ལས་རླུང་དྲག་པོས་རྒྱབ་ནས་དེད། །འཇིགས་རུང་གཤིན་རྗེའི་ཕོ་ཉས་མདུན་ནས་ཁྲིད། །ཐར་མེད་དམྱལ་བའི་སྡུག་བསྔལ་སྙིང་ལ་འཆར། །དེ་ཚེ་མགོན་སྐྱབས་མེད་དོ་སྙིང་གི་བུ། །ལྕགས་སྲེག་ས་གཞིར་གཅེར་བུ་ངུ་ཞིང་རྒྱུག །ཤ་རུས་ལྤགས་པའི་ཚོགས་རྣམས་འབར་ཞིང་བསྲེག །རྔམ་འཇིགས་གཤིན་རྗེས་དྲལ་ཞིང་གཏུབ་པའི་ཚེ། །དེ་ན་གཉེན་བཤེས་མེད་དོ་སྙིང་གི་བུ། །འཁྱག་རུམ་ས་གཞིར་གངས་རིའི་ཕྲེང་བས་བསྐོར། །ཁ་བ་བུ་ཡུག་འཚུབས་ཤིང་གྲང་བས་གདུང་། །ཀྱི་ཧུད་ལ་སོགས་སྐད་ངན་སྒྲོག་པའི་དུས། །ནམ་འོང་ངེས་པ་མེད་དོ་སྙིང་གི་བུ། །མེ་མུར་འོབས་དང་རོ་མྱག་འདམ་དུ་བྱིང་། །རལ་གྲིས་གཏུབ་ཅིང་སྤུ་གྲིའི་ཐང་དུ་འགྱེལ། །རབ་མེད་ཆུ་བོ་བརྒལ་ཡང་ཐར་དུས་མེད་། །མི་འཇིགས་དཔའ་བར་སེམས་སམ་སྙིང་གི་བུ། །ཇི་ལྟར་ཚེས་པའི་དུས་ཀྱི་ཟླ་བ་ལྟར། །རྣམ་དག་ཆོས་པའི་དགེ་བློ་འཕེལ་ནས་འགྲོ། །ཁྱོད་ཀྱི་ལྷག་བསམ་མར་ངོ་བཞིན་དུ་འགྲིབ། །ལས་ཀྱིས་མནར་འདི་མཐོང་ངམ་སྙིང་གི་བུ། །རྣམ་དག་ཚུལ་ཁྲིམས་གཙང་མའི་རྟ་བཞོན་ནས། །བདེ་མཆོག་ཐར་པའི་གླིང་དུ་འགྲོ་བ་ལ། །སྒོ་གསུམ་བག་མེད་ཆང་གིས་མྱོས་གྱུར་ནས། །རྡོ་རྗེ་དམྱལ་བའི་གཡང་སར་ལྟུང་ལ་ཉེ། །རང་མཚང་མཐོང་ནས་འགྱོད་པར་གྱུར་ན་ཡང་། །རང་དབང་མེད་པས་ད་གཟོད་ངན་འགྲོར་འགྲོ། །རང་གིས་རང་ཉིད་བསླུས་པ་འདི་དྲན་ཚེ། །རང་སྲོག་རང་གིས་བཅད་ཀྱང་ཕངས་པ་མེད། །སྟོན་མཆོག་ཐུགས་རྗེའི་བསྟན་པའི་རྗེས་ཞུགས་ཤིང་། །ཡོངས་འཛིན་དུ་མའི་ཞབས་རྡུལ་བསྟེན་པའི་མཐུས། །སྡུག་བསྔལ་མཐའ་ཅན་ཞིག་ཏུ་གྱུར་ན་ཡང་། །འཇིགས་རུང་གཡང་ས་དྲན་ཚེ་མཆི་མ་འཆོར། །ཟབ་རྒྱས་གཞུང་མང་མཐོང་ཚེ་བློ་མི་ཟུམ། །སྨྲ་བརྗོད་ཉུང་ཞིང་སྙོམ་ལས་མལ་དུ་ཉལ། །སྲིད་པ་བསྒྲུབས་ན་ལྕེ་བདེ་བློ་གྲོས་གསལ། །མ་རབས་སྐྱེ་བོ་སྐལ་དམན་ཁྱོད་འདྲ་སུ། །དལ་འབྱོར་ལུས་ལ་བསླབ་གསུམ་རྒྱན་སྤྲས་ཤིང་། །གཏན་བདེའི་གྲོགས་པོ་འཚོལ་དུ་ཕྱིན་པ་ན། །རྣམ་པར་གཡེང་བའི་དགྲ་བོ་དཔུང་བཅས་ཀྱིས། །ཀྱེ་མ་ཆོས་ཀྱི་རྒྱན་བཟང་འཕྲོག་ལ་ལྟོས། །ད་ནི་ཁོ་བོ་སྡོམ་གསུམ་ནོར་གྱིས་ཕོངས་། །བཅས་དང་རང་བཞིན་ལྟུང་བའི་ཁུར་ཁུར་ནས། །གྲོགས་མེད་གཅིག་པུར་ཉམ་ངའི་ལམ་དེར་འགྲོ། །བདག་ནི་ལྷར་བཅས་འགྲོ་བའི་སྙིང་རྗེའི་ཡུལ། །དམན་པ་བདག་ལ་ཐོས་པའི་ནོར་མེད་ཅིང་། །ངོ་ཚའི་གོས་དང་ཁྲིམས་ཀྱི་བཞོན་པ་བྲལ། །བློ་གྲོས་མིག་ལྡོངས་སྒོམ་པའི་ཟས་ཀྱིས་ཕོངས་། །གཅེར་བུ་ལེགས་པའི་ཡོན་ཏན་ཀུན་གྱིས་དབེན། །ཀྱེ་མ་ཚུལ་མིན་ཡིད་བྱེད་ལྟོ་བ་ཡངས། །འདོད་ཆགས་ཁྲག་གི་རྒྱ་མཚོ་རྣམ་པར་འཕེལ། །ཞེ་སྡང་མི་གཙང་འདམ་གྱིས་གང་ཞིང་འཐོར། །གཏི་མུག་ལྤགས་པས་རྣམ་པར་བསྒྲིབས་ནས་ཡོད། །བསྟན་པ་ནུབ་ཅིང་བསྟན་འཛིན་མཆོག་རྣམས་གཤེགས། །སྟོན་པས་བཅས་པ་སྒྲུབ་པ་ཕལ་ཆེར་ཟད། །བདག་སོགས་བསྟན་བཤིག་དུ་མ་དེང་སང་འཕེལ། །སྔོན་གྱི་ལེགས་བྱས་དམན་པ་ད་གཟོད་གོ། །མདོར་ན་ཕྱུགས་དང་ཁྱད་པར་མ་མཆིས་པའི། །བླུན་རྨོངས་བདག་ཀྱང་རང་གི་ཚུལ་འདི་ལ། །ཅུང་ཟད་སྐྱོ་བར་གྱུར་ན་བརྩེ་ལྡན་པའི། །མཁས་རྣམས་སྨོས་ཀྱང་ཅི་དགོས་གྲོགས་པོ་དག །ཁོ་བོ་འཆི་བའི་དུས་ལ་བབ་གྱུར་ནས། །སྲོག་གི་དབང་པོ་འགག་ལ་ཉེ་བའི་དུས། །རྗེ་བཙུན་བླ་མར་གསོལ་བ་འདེབས་ནུས་ན། །དེ་ཚེ་ཐུགས་རྗེའི་ལྕགས་ཀྱུས་མ་གཏོང་ཞིག །གལ་ཏེ་ལས་ཀྱིས་དམྱལ་བར་འཚེད་གྱུར་ན། །ཁྱེད་ཀྱི་མཐུ་སྟོབས་ཐོགས་པ་མ་མཆིས་པས། །འདྲེན་པ་མཆོག་གིས་ཐུགས་རྗེའི་ཕྱག་བརྐྱངས་ནས། །ཉམ་ཐག་བདག་གི་སྡུག་བསྔལ་བསལ་དུ་གསོལ། །བླ་མ་མཆོག་ལས་རེ་ས་བདག་ལ་མེད། །རྩེ་གཅིག་གུས་པའི་ཡིད་ཀྱིས་གསོལ་འདེབས་ན། །འདི་དང་ཕྱི་མ་བར་དོའི་གནས་རྣམས་སུ། །ཨེ་མ་སྐྱོབས་ཤིག་སྐྱོབས་ཤིག་བཀའ་དྲིན་ཅན། །སྙིང་རྗེའི་གཏེར་ཆེན་བླ་མ་སྙིང་ནས་བསྟེན། །སྙིང་པོའི་གདམས་པ་སྙིང་གཏམ་ཚུལ་དུ་གསུངས། །སྙིང་གི་བཅུད་དུ་བཟུང་བའི་སྙིང་ནོར་འདི། །སྙིང་གི་བུ་ལ་སྙིང་དུ་བསམས་ནས་གཏད། །གཞོན་ནུ་གཞོན་ནུའི་བྱ་བས་གཡེང་བ་ལ། །བརྩེ་ཆེན་བརྩེ་བ་དྲག་པོས་མ་བཟོད་ནས། །བློ་ལྡན་བློ་ཡིས་བཤེས་གཉེན་བསྐུལ་བ་ལས། །ལེགས་བྱུང་ལེགས་པར་བཤད་པའི་གཏམ་འདིའོ། །མ་ཆགས་ཚེ་འདིར་ཞེན་པ་གཏིང་ནས་ཆོད། །མ་སྡོད་གཅིག་པུར་དབེན་པའི་རི་ལ་བྱོན། །མ་བརྗེད་ཨ་མའི་ཞལ་ཆེམས་སྙིང་ལ་ཆོངས། །མ་ཡེངས་དམ་པའི་ལྷ་ཆོས་མྱུར་དུ་མཛོད། །ཚུལ་འདི་གཞོན་ནུ་ཀུན་དགའི་རྣམ་ཐར་ལ། །ཡིད་འབྱུང་གཏིང་ནས་སྐྱེས་པའི་སྙོམས་ལས་པ། །བསླབ་གསུམ་རྒྱལ་པོའི་ཁྲིམས་ཀྱིས་མ་ཐུལ་བའི། །ཕོ་རྒོད་བློ་གྲོས་མི་ཟད་ཅེས་བྱས་སྦྱར། །དགེའོ།། །།