ཐེག་པའི་སྒྲོ་འདོགས་སྤྱིར་བཅད་པ།
༈ སྤྱི་དོན་ལྔ་པ་ཆོས་གཞན་ངེས་པའི་རྣམ་གྲངས་བསྟན་པ་ལ་གསུམ་སྟེ། [༡]ཐེག་པའི་སྒྲོ་འདོགས་བཅད་པ། [༢] སྒྲ་མཐུན་དོན་དཔགས་ཀྱིས་ས་ལམ་བརྩི་བ། [༣]རང་གི་གྲུབ་མཐའ་བཤད་པའོ། །[༡] དང་པོ་ལ་གཉིས་ཏེ། ༡ ཐེག་པའི་སྒྲོ་འདོགས་སྤྱིར་བཅད་པ། ༢ རང་གི་སྒྲོ་འདོགས་བྱེ་བྲག་ཏུ་བཅད་པའོ། །དང་པོ་ནི་གོ་དོན་སྤྱིར་བསྟན་པ་དང་། ཁྱད་པར་བྱེ་བྲག་ཏུ་བཤད་པའོ། །དང་པོ་ལ་ངོ་བོ་ནི། ཡཱ་ནའི་སྒྲ་ཐེག་པ་སྟེ་གར་འདོད་སར་བསྐྱེལ་བས་སོ། །ངེས་ཚིག་ནི། ཁུར་ཐེག་པའི་དོན་གྱིས་ན་དེ་སྐད་ཅེས་བྱ། དབྱེ་ན། ཐེག་པ་ཆེ་ཆུང་ངམ་རྒྱུ་འབྲས་གཉིས་སོ། །དེ་ཡང་བཤད་རྒྱུད་ལས། ཐེག་པའི་ངོ་བོ་ཤེས་རབ་སྙིང་རྗེ་ཡིན། །དེ་གཉིས་ཆེ་ཆུང་ཐེག་པ་ཆེ་ཆུང་སྣང་། །ཐེག་པའི་ངེས་ཚིག་འདེགས་དང་བསྐྱོད་པ་ཡིན། །དབྱེ་ན་མང་ཡང་བསྡུ་ན་གཉིས་ལས་མེད། །རྒྱུ་རྐྱེན་ལམ་ཁྱེར་མཚན་ཉིད་ཐེག་པ་དང་། །འབྲས་བུ་ལམ་ཁྱེར་གསང་སྔགས་ཐེག་པ་གཉིས། །སྐྱ་བ་གྲུ་སོགས་མཚན་ཉིད་ཐེག་པའི་དཔེ། །ཟམ་པ་ས་གཞི་གསང་སྔགས་ཐེག་པའི་དཔེ། །ཞེས་སོ། །མཚན་ཉིད་པས་རྒྱུ་རྐྱེན་ལས་སྐུ་གསུམ་བསྒྲུབ་པར་འདོད་པས་རྒྱུ་ལམ་དུ་བྱེད་པ་ལ། སྔགས་ཀྱིས་ལྷུན་གྲུབ་ཀྱི་དཀྱིལ་འཁོར་ཁས་བླངས་ནས་འོག་མས་དེ་དང་མཐུན་པར་སྐུ་གསུམ་གྱི་དཀྱིལ་འཁོར་བསྐྱེད་རྫོགས་བསྒོམས་པས་ཐོབ་པར་འདོད་ལ།
ཐུན་མོང་མ་ཡིན་པ་འདིར་རིག་པ་ལ་བལྟས་པས་རང་དངས་སྐུ་གསུམ་དུ་ཤར་ཏེ། ལོངས་སྤྲུལ་གཟུགས་སྐུ་འོད་སྣང་དུས་ཆོས་སྐུ་སྟོང་གསལ་ཁོང་ནས་ཤར་བ་ལམ་དུ་བྱེད་པས། འབྲས་བུར་གྲགས་པ་སྐུ་གསུམ་གྱི་སྣང་བ་ལམ་དུ་བྱེད་པའི་ཕྱིར་ཆོས་གཞན་ནས་སྐུ་གསུམ་འབྲས་བུར་བཞག་པ། འདིར་ལམ་དུ་ཤར་བས་སྐུ་གསུམ་ལམ་དུ་བྱེད་པ། སྐུ་གསུམ་གྱི་རང་གདངས་ལས་ངོ་བོ་ལ་ས་ཟིན་པར་བྱེད་པ་ནི་འབྲས་བུ་ལམ་བྱེད་དུ་བཞག་གོ །