དགེ་བ་རྫོགས་བྱང་དུ་བསྔོ་བའི་སྒོ་ནས་མཇུག་བསྡུ་བ།

[Full Size]

ལུས་ཅན་ཀུན་ལ་རྗེས་ཆགས་མཁའ་དབྱིངས་བདེར་གཤེགས་ཀུན་གྱི་ཡེ་ཤེས་ཟླ་བ་རང་གཟུགས་རྟག་ཏུ་ལེགས་འཆར་ཡང་། །སྔོན་གོམས་བཟང་པོའི་སྐལ་བར་སྤྱོད་པའི་སྣོད་ལྡན་གདུལ་བྱ་དྭངས་པའི་ཀླུང་ལས་ཀུན་ལ་འཆར་བའི་སྐབས་བྲལ་ཕྱིར། །སྒྲིབ་གཉིས་བག་ཆགས་ཟད་པར་སྤངས་ཀྱང་སྒྲིབ་པའི་ལུས་ཅན་ཚུལ་གྱིས་ཆེས་ཆེར་སྙིགས་མ་ལྔ་བདོའི་འགྲོ་འདྲེན་པ། །ནམ་ཡང་བསླུ་མེད་གཏན་གྱི་སྐྱབས་མཆོག་རྡོ་རྗེ་སེམས་དཔའི་ངོ་བོར་ལེགས་བཞུགས་དམ་པའི་བཀའ་དྲིན་གཞལ་དུ་མེད། །སོ་ཐར་རིན་ཆེན་ཐེམ་

[Full Size]

སྐས་ལ་བརྟེན་ཐུབ་བསྟན་སྒོ་རུ་འཇུག་མཛད་མཁན་ཆེན་བློ་བཟང་ཆོས་རྒྱན་རྗེ། །གྲུབ་མཐའ་རྣམ་བཞི་བཞེད་པའི་གཞུང་དང་འདུས་པའི་རྒྱུད་དོན་སྟོན་མཁས་འཇམ་དབྱངས་དཀོན་མཆོག་ཆོས་འཕེལ་ཞབས། །སྒྲ་སྙན་སྡེབ་སྦྱོར་མངོན་བརྗོད་རྩིས་སོགས་གཙུག་ལག་ཀུན་ལ་བཀའ་དྲིན་ཟླ་མེད་པཎ་ཆེན་སྨོན་འགྲོ་པས། །ལེགས་མཚོན་སྨིན་གྲོལ་གཞུང་བཤད་རིག་པ་གཅིག་གིས་མཐའ་བརྟེན་སྟོན་རྣམས་ཨ་ཧོ་བཀའ་དྲིན་བླ་ན་མེད། །རང་རྒྱུད་ཐ་རྒོད་སྙིང་ནས་དམ་པའི་ཆོས་སུ་སྒྱུར་མཛད་དཔལ་འབྱོར་ལྷུན་གྲུབ་རྡོ་རྗེ་འཆང་། །ཕ་རོལ་ཕྱིན་དང་སྔ་ཕྱིར་འགྱུར་བའི་ཆོས་ཀྱི་གན་མཛོད་ཆོས་དབྱིངས་རང་གྲོལ་འཇམ་དཔལ་དབྱངས། །མ་ནུབ་དབང་གི་ཆུ་བོ་ཀུན་འདུས་གྲོལ་བའི་ལམ་སྟེར་བསོད་ནམས་མཆོག་ལྡན་འཁོར་ལོའི་མགོན། །བཤེས་གཉེན་དམ་པའི་ཞབས་པད་ཡུན་དུ་ཉེ་བར་བསྟེན་འདི་སྔོན་བསགས་ལེགས་བྱས་ཟོང་གིས་ཉོས། །སྐུ་བཞིའི་ས་བོན་དབང་གིས་སྨིན་མཛད་རིན་ཆེན་བསོད་མཆོག་རྡོ་རྗེ་སེམས། །ཐུབ་གསུང་བཀའ་གཏེར་གདམས་པའི་ཆར་འབེབས་བློ་མཆོག་རྡོ་རྗེ་རིག་འཛིན་གཙོ། །པད་མའི་ཞལ་ལུང་དྲོད་རླང་སྟེར་ནུས་གཏེར་བདག་གླིང་པ་སྤྲུལ་པའི་སྐུ། །ངེས་གསང་ཐེག་མཆོག་འཆི་མེད་ཟིལ་དངར་སྙིང་དབུས་གཏམས་འདི་སྐལ་བ་བཟང་། །མང་ཐོས་གསེར་གྱི་བ་གམ་ཁང་བཟང་གི །དྲ་མིག་ལྟ་ན་སྡུག་པའི་མདའ་ཡབ་རྩེར། །གཏན་འདུན་དྲིལ་བུའི་སྒྲ་སྙན་ཡོངས་འཁྲོལ་ཞིང་། །རྒྱལ་བསྟན་རྟ་བབས་གྱེན་དུ་འདེགས་འདི་སྤྲོ། །ཕྱི་རོལ་རྟོག་གེ་ཐ་སྙད་ཙམ་མིན་པར། །ནང་གི་

[Full Size]

རྣལ་འབྱོར་མཆོག་གིས་མགུལ་པའི་མདུད། །བཀྲོལ་ནས་ལེགས་བཤད་གཟེགས་མ་འབུམ་འཛག་པ། །སྔོན་བྱོན་དམ་པ་རྣམས་ལས་བདག་འདྲས་མིན། །འོན་ཏེ་གཟིག་ཤུན་བཅིངས་པའི་བུང་རྒན་གྱི། རྣམ་ཐར་རིགས་མཐུན་དེང་འཛིན་ཆེན་པོའི་ཁྱུར། །སྤྱི་འདྲེའི་བརྟུལ་ཞུགས་དོར་ནས་སྨྲ་བའི་མགྲིན། །མཐོན་པོར་འདེགས་འདི་སྤྱོད་ལྡན་མགུ་བའི་གནས། མདོ་རྒྱུད་ཐ་སྙད་མང་ཞིག་མཚན་ཙམ་ཡང་། །མ་ལུས་ལ་ལ་རྒྱུན་བྲལ་མཐོང་ཐོས་གླེང་། །གླེགས་བམ་ཕལ་ཆེར་དངོས་པོའི་འདུ་ཤེས་ཀྱིས། །བདག་བཟུང་རྡུལ་ཁྲོད་རྩིག་ལ་བཟང་པོར་རློམ། །མཁས་པའི་ཞལ་ལུང་ཆད་པ་མེད་རྣམས་ཀྱང་། །རིམ་བཞིན་ནམ་མཇུག་རྫོགས་པའི་ཆུ་ལྟར་བསྐམས། །འབྲེལ་མེད་རྫུན་ཟོག་བསྒྲིགས་པའི་ཁྲོན་དོང་ནས། །ཆེར་རྨོངས་སྐལ་ངན་ཆོས་ཆུ་འཚོལ་ལ་བྲེལ། །ལྔ་ཕྲག་དྲུག་པའི་དུས་སུ་ཐུབ་པའི་བསྟན། །སླེབས་པར་མཁས་རྣམས་འཆད་ཀྱང་སྣང་ཚུལ་འདིར། །དཔྱད་ཚེ་ལུང་གི་མཇུག་མའི་དུས་འབབ་པའི། །རིང་མིན་རྟགས་ཙམ་འཆར་སྙམ་འཆི་མ་དཀུ། །སྔོན་བྱུང་བསྟན་པའི་བསིལ་ཟེར་ཉ་གང་བ། །དེང་དུས་ཚེས་གསུམ་ཟླ་ཆ་ལྟར་ཕྲ་བར། །ཆོས་རྒྱུན་མི་འཚོལ་རང་ཉིད་ཆེ་ཐབས་སུ། །གཡོ་སྒྱུས་གཞན་འདྲིད་མཁན་རྣམས་འཕྱོན་མའི་གར། །རྒྱལ་བློན་ལོ་པཎ་མཁས་གྲུབ་རིམ་བྱོན་གྱིས། །དཀའ་སྤྱད་རྣམ་ཐར་ཐོས་ཚེ་རྟ་ཁལ་འཁོར། །སྟོབས་འབྱོར་འདུ་འཛིས་ཐུབ་བསྟན་རློམ་དིང་། །ཆེས་མང་ཕལ་ཆེར་གཞན་འཕྲུལ་གནས་ཀྱི་བདག །ལྷ་མིན་རིག་སྔགས་གདོན་གྱིས་ལྷན་ཅིག་སྙིང་། །ཟིན་རྣམས་འཇིག་རྟེན་ཆོས་སུ་སྨྲ་བདེན་ཡང་། །གཟུར་གནས་བླང་དོར་ཤེས་

[Full Size]

པར་ཁས་འཆེའི་ཚོགས། །རྗེས་སུ་འབྲངས་ན་བླུན་པོ་དེ་ལས་སུ། །ཆོས་རྒྱུན་མ་ཐོས་ཐོབ་བརྫུའི་གཡོ་ཁྲམ་མཁན། །ཚེ་རབས་གཞན་དུ་ནོས་རློམ་མུན་པའི་མདའ། །རྩིང་པོར་སྤྱད་ནས་འཕགས་ཆེན་རྣམ་ཐར་ལ། །འགྲན་པའི་སོ་སྐྱེའི་ཚུལ་ལ་ཁྲེལ་དགོད་བྲོ། །འོན་ཏེ་རྒྱལ་བའི་ཐུགས་རྗེ་མཁའ་ལྟར་ཡངས། །ལས་ལྡན་སྐྱེས་བུའི་བསོད་ནམས་མཚོ་བཞིན་ཟབ། །དེ་ཕྱིར་སྔོན་རབས་དམ་པའི་རྗེས་འགྲོ་བའི། །ཐུབ་བསྟན་མེ་རོ་གསོ་བ་མང་འབྱུང་སྙམ། །རྣམ་དཔྱོད་བརྩོན་པས་རིང་བཏང་དམན་བདག་གིས། །རྒྱལ་བསྟན་གཅེས་པར་བཟུང་བའི་ལྷག་བསམ་ལ། །བློ་ལྡན་ཚོགས་ཀྱིས་གཟིགས་ནས་དམ་པའི་ཆོས། །འཚོལ་བའི་བརྟུལ་ཞུགས་སྙིང་སྟོབས་ཁྱོགས་ལ་ལོང་། །ལོག་རྟོག་བདུད་ཀྱིས་ཡིད་དབང་མ་སྒྱུར་ཞིང་། །ཤེས་རབ་རྩལ་དང་ལྡན་རྣམས་སླད་མར་ཡང་། །རིས་མེད་གྲུབ་མཐའི་ཆོས་ཚུལ་ཀུན་མནོས་ནས། །ཤཱཀྱའི་བསྟན་ལ་རི་མོ་མཛད་པར་བསྐུལ། །ཟང་ཟིང་གཏོང་བའི་ལག་པ་རིང་རྐྱོང་བ། །ཁྱིམ་གྱི་བདག་པོ་རྣམས་ཀྱི་རྣམ་ཐར་ཏེ། །གནས་ལྔ་རིག་པར་འཆད་ཉན་ཆོས་ཀྱི་སྦྱིན། །བསྟན་ཞུགས་རྣམ་བཞིའི་འཁོར་གྱི་མཛད་པའི་ཕུལ། །མཁས་གྲུབ་རྒྱུ་སྐར་ལྟར་བྱོན་ལུང་རྟོགས་བསྟན། །དབྱར་མཚོའི་རྗེས་འགྲོ་འཕེལ་ཚེ་འབད་ཅི་དགོས། །རྒྱལ་བསྟན་ནུབ་ཁའི་དུས་འདིར་བརྩོན་འགྲུས་གོ །གྱོན་ན་གཅིག་ཏུ་བསྟན་ལ་བྱ་བ་ཆེ། །ཇི་ལྟར་འདོད་པའི་ཐོས་བསམ་མ་གྲུབ་ཀྱང་། །གཙུག་ལག་མང་པོར་བཟང་པོའི་བག་ཆགས་ཙམ། །བཞག་འདི་མཚུངས་བྲལ་ཡོངས་འཛིན་རྣམས་ཀྱི་དྲིན། །དྲན་ཚེ་སྙིང་གར་ལག་པའི་པདྨ་ཟུམ། །བགྲང་ཡས་དཀྱིལ་འཁོར་འཁོར་

[Full Size]

ལོའི་མགོན་ཁྱོད་རྣམས། །རིས་མེད་འགྲོ་ལ་བུ་ལྟར་རྗེས་བརྩེ་ཡང་། །ཐུགས་རྗེའི་ཉི་མས་གཅིག་ཏུ་བདག་སྙིང་གི །པད་དཀར་འདབ་མ་བཞད་པ་འདི་རྨད་བྱུང་། །རང་བློ་འདིར་སྣང་སྣང་བར་ཆེས་ཞེན་པའི། །ཚུལ་ལ་བསམ་ཚེ་ཚེ་རབས་ཕལ་མོ་ཆེར། །མི་ཁོམ་ལུས་རྟེན་རྟེན་མང་ཉེར་བརྒྱུད་པའི། །བག་ཆགས་སད་ལས་ལས་ངན་སླར་སྤེལ་དོགས། །གཅིག་ཏུ་བཤེས་གཉེན་གཉེན་འདུན་གཏན་གྱི་གྲོགས། །གྲོགས་མཆོག་མང་མཇལ་མཇལ་བ་དོན་ལྡན་ཆོས། །ཆོས་དོན་མང་ཐོས་ཐོས་དོན་བསམ་སྒོམ་ཚུལ། །ཚུལ་འདིར་རང་སེམས་སེམས་བག་གཅིག་ཏུ་དྲོ། །མངོན་མཐོའི་རྟེན་བཟང་ཡིད་བཞིན་ནོར་ལྟར་དཀོན། །དཀོན་མཆོག་རྟེན་དང་མཇལ་བ་དེ་བས་དཀའ། །དཀའ་སྤྱད་ཆོས་ཕྱིར་བྱེད་པ་ཉིན་སྐར་འདྲ། །འདྲ་བའི་མི་གཟུགས་མང་ཡང་བ་ལང་ཁྱུ། །སྔོན་ཆད་ཆོས་བརྒྱད་དབང་སོང་དལ་རྟེན་གྲུས། །ཚེ་འདི་སུམ་གཉིས་སྤྱད་པ་དེས་ཆོག་གི །ད་ནས་ཐོས་དོན་རྒྱུད་ཐོག་ཁེལ་ངེས་པའི། །ཉམས་ལེན་དམ་བཅའི་རི་མོ་སྙིང་ལ་བྲིས། །རུང་མཐུན་གོས་ཀླུབས་བསམ་སྦྱོར་འཇིག་རྟེན་པ། །བླ་ཆེན་སྤྱོད་པ་ཁོ་ནས་མི་འདའ་བར། །འཆད་ཉན་བསམ་སྒོམ་ཡང་དག་བསྒྲུབ་ནུས་པར། །སྲས་བཅས་རྒྱལ་བའི་ཐུགས་རྗེ་བདག་སྙིང་གཞུག །ཐོས་བསམ་ཅུང་ཟད་བགྱིས་མཚོན་དུས་གསུམ་དགེ །ཕུང་པོར་སྤུངས་པ་མྱ་ངན་མེད་པའི་ལྗོན། རྣམ་དག་སྨོན་ལམ་ཆུས་བསྲིངས་ལུང་རྟོགས་འབྲས། །བྱང་ཆུབ་མཆོག་གི་སྲིད་རྩེར་སྙེག་པར་ཤོག །གཅིག་ཏུ་སྙིང་རྗེའི་ཡུལ་གྱུར་མ་རྒན་འགྲོའི། །ཕན་བདེའི་རྩ་ལག་ཟས་གཙང་སྲས་ཀྱི་བསྟན། །ནམ་མཁའ་རང་གི་ངོ་བོ་མི་གཏོང་བ། སྐྱེ་རྒུའི་བསོད་ནམས་ཞིང་དུ་

[Full Size]

གནས་པར་ཤོག །ཚུལ་འཆོས་གཞན་བསླུའི་ཕུབ་ཟོལ་མ་འདྲེས་པ། རྣམ་འདྲེན་རིང་ལུགས་འབྲུ་ཡི་ཕན་བདེའི་ལྟོ། འགེང་མཛད་བསྟན་འཛིན་ཚོགས་རྣམས་དཔག་ཡས་ཚེའི། དབང་ཕྱུག་ཇི་བཞིན་ཞབས་པད་བརྟན་པར་ཤོག །ཁྲིམས་ལྡན་དུར་སྨྲིག་འཆང་བ་རབ་བྱུང་གླིང་། །གོས་དཀར་ལྕང་ལོ་གཡོ་བའི་རིག་འཛིན་ཁྱུ། །མདོ་སྔགས་བཤད་སྒྲུབ་སྡེ་རྣམས་འགྲོ་ཀུན་གྱི། མགོན་དུ་དབྱར་གྱི་ཆུ་བོ་ལྟར་འཕེལ་ཤོག །ལས་ཤུགས་བཙན་པོ་དར་དྲགས་ས་སྤྱོད་རྣམས། །རང་རང་མངའ་རིས་ཙམ་གྱིས་ཆོག་ཤེས་ཤིང་། །དྲང་ཐིག་ཁྲིམས་ཀྱི་ར་བར་རྗེ་འབངས་ཀུན། །རྫོགས་ལྡན་གཞོན་ནུའི་རྩེ་དགའ་རྒོད་པར་ཤོག །དལ་འབྱོར་དོན་ཡོད་སྒྲུབ་བདག་འཚོ་བའི་ཚེ། །གཡུང་དྲུང་ས་སྲུངས་གཙུག་ཏོར་ཁོག་ཡངས་པོར། །སྲོག་གི་མུཀྟི་བརྒྱ་ཕྲག་བགྲང་བྱ་ཡི། །གཞོམ་མེད་རྡོ་རྗེའི་སྲད་བུར་བརྒྱུ་བར་ཤོག །གྲངས་མེད་སྔོན་གོམས་སྡིག་པའི་མཚན་མུན་ཁྲོད། །དུཿཁའི་མལ་ནས་གཉིད་ལས་སློང་བྱེད་པའི། །ལེགས་བྱས་སྐྱ་རེངས་ཀྱིས་དྲངས་བདེ་སྐྱིད་ཀྱི། །ཉིན་མོའི་སྣང་བ་རྟག་ཏུ་འབར་བར་ཤོག །ཐོས་བསམ་བྱེད་ལ་རྡུལ་གྱི་ཆ་ཕྲས་ཀྱང་། །ཕན་པར་སྒྲུབ་ཀུན་རང་ཉིད་ཐེག་ཆེན་ལམ། །ཞུགས་ཚེ་ཆོས་ཀྱི་མཆེད་དང་སློབ་བུ་རུ། །གྱུར་ནས་ཡང་དག་ལམ་ལ་བཀྲི་བར་ཤོག །བཟོད་དཀའ་གནས་ངན་མིང་ཡང་མི་གྲག་པར། །མངོན་མཐའི་རྟེན་བཟང་རིམ་པར་བརྒྱུད་དེ་སྲིད། །ཡང་དག་བསྟན་མཇལ་བཤེས་གཉེན་མགོན་གྱིས་བཟུང་། །དྲིན་ལས་རིང་མིན་སངས་རྒྱས་ས་བརྙེས་ཤོག །བརྒྱ་ཕྲག་ལུས་བཏུད་ཕྱག་འཚལ་ཀུན་བཟང་

[Full Size]

མཆོད་པའི་སྤྲིན་སྤྲོས་སྡིག་ལྟུང་བཤགས། །བདག་གཞན་བསོད་ནམས་གསགས་ལ་ཡི་རང་མགོན་རྣམས་ཆོས་འཁོར་བསྐོར་བར་བསྐུལ། །བསྐལ་བརྒྱར་མི་འདའ་སེམས་ཅན་དོན་གསོལ་བསགས་དང་གསོག་འགྱུར་གསག་བཞིན་པའི། །བསོད་ནམས་ཇི་སྙེད་སྐལ་བར་ཐོབ་གང་འགྲོ་ཀུན་བྱང་ཆུབ་མཆོག་རྒྱུར་བསྔོ། །དངོས་གྲུབ་འབྱུང་གནས་རྩ་བརྒྱུད་བླ་མ་བདེ་གཤེགས་ཞི་དང་ཁྲོ་བོའི་གར་སྒྱུར་དམ་ཅན་ཆོས་སྲུང་རྒྱ་མཚོ་ཡི། །མགྲིན་པ་སྐྱེ་བ་ལྔ་པའི་རི་མོ་གཡས་སུ་འཁྱིལ་ལས་བླ་ནས་བླར་བཏེག་རྨད་བྱུང་སྙན་པའི་སྐད་གསངས་ཅན། །སྭ་སྟི་ཀ་ཡི་སྒྲ་ལས་ཉེར་དྲངས་དུས་ཀུན་དགེ་བ་པི་ཝང་གདངས་དང་ལྷན་ཅིག་གླུ་ལས་བཀྲ་ཤིས་ཀྱིས། །ཡོངས་ཁྱབ་ཕན་བདེའི་རོ་བདག་རྟག་མྱོང་ཨེ་ཝཾ་ཟུང་འཇུག་དཔལ་ལྡན་སྐལ་པ་བཟང་པོའི་མཆོག་དེ་ཐོབ་པར་ཤོག །དེ་ལྟར་ཐོག་མཐའ་བར་གསུམ་དུ་དགེ་བ་ཟབ་པ་དང་རྒྱ་ཆེ་བའི་དམ་པའི་ཆོས་རང་ཉིད་ཀྱིས་ཇི་ལྟར་མནོས་པ་རྣམས་རྒྱུད་ཐོག་ཏུ་ཉམས་སུ་ལོངས་པ་ཞིག་བློ་དང་བརྩོན་པ་དམན་ཞིང་གཞན་དབང་རྣམ་གཡེང་གིས་ཁོལ་པོར་བཀོལ་བས་རེ་གནས་ཙམ་ཡང་མ་མཆིས་རུང་། དེང་སང་ཆེས་ཆེར་སྙིགས་པའི་ལྔ་བརྒྱའི་རང་མཚང་གིས་ཕལ་ཆེར་བརྗོད་བྱའི་དོན་ཁོང་དུ་ཆུད་པ་ལྟ་ཞོག །རྗོད་བྱེད་ཚིག་གི་མིང་དོན་རགས་པ་ཙམ་ཡང་ངོ་མ་འཕྲོད་པར་གསན་གསན་དང་ཐོབ་ཐོབ་ཀྱི་གྲགས་བསྐམ་ཙམ་ལྷུར་ལེན་པ་སྨིག་རྒྱུ་ཆུར་བསྙེམས་པ་ལྟར་རང་གཞན་གང་ལའང་ཕན་པ་ཨེ་རཎྜའི་སྙིང་པོ་བཞིན་མཐོང་ནས། བྱ་ལས་རྗེས་མེད་དུ་མི་འགྲོ་བའི་ཐོབ་ཡིག་གཅིག་འདྲི་འདོད་པའི་བདུན་པས་བརྗེད་ཐོའི་རེག་ཟིག་བཀོད་པ་རྣམས་ལ་སྙིང་པོར་བཟུང་། རྡོ་རྗེ་འཆང་ཕ་

[Full Size]

བོང་ཁ་པ། ཟུར་ཐམས་ཅད་མཁྱེན་པ། ཁྱབ་བདག་གནས་གསར་བ་ཆེན་པོ། འཁོར་ལོའི་མགོན་པོ་ཞ་ལུ་མཁན་ཆེན། མཁས་གྲུབ་ཆེན་པོ་ཁྲ་ཚང་ཆེན་པོ། ཆོས་རྒྱལ་གཏེར་བདག་གླིང་པ་སྟེ་ཡོངས་འཛིན་དམ་པ་ཆོས་བཞིན་དུ་སྤྱོད་པ་རྣམས་ཀྱི་གསན་ཡིག་ལ་གཞི་བྱས། དེ་དག་ལས་འཕྲོས་པའི་ཁ་འགེང་བར་འོས་པ་དང་། ཡིག་སྐྱོན་ཞུགས་པ་སོགས་སོམ་ཉིར་གྱུར་པ་རྣམས་ལ་ཚད་ཐུབ་ཀྱི་དཔང་པོར་སྙིགས་དུས་ཀྱི་ཐམས་ཅད་མཁྱེན་པ་བུ་སྟོན་རིན་པོ་ཆེ། རྒྱལ་བ་གཉིས་པ་ཤར་བཙོང་ཁ་པ་བློ་བཟང་གྲགས་པ། ངོར་པ་རྡོ་རྗེ་འཆང་ཀུན་དགའ་བཟང་པོ། ཀུན་མཁྱེན་རྡོ་རྗེ་གདན་པ་འཇིགས་མེད་དཔའ་བོ། ཕག་གྲུ་མཁན་པོའི་འབུམ་རམ་པ་ཀུན་དགའ་ཆོས་དབང་། ཞ་ལུ་སྐུ་ཞང་མཁྱེན་རབ་ཆོས་རྗེ། རྡོ་རིང་རིན་པོ་ཆེ་དང་ཚར་ཆེན་གཉིས་ཀྱི་གསན་ཡིག་གི་ཁོལ་བུ། སྤྲུལ་པའི་གཏེར་སྟོན་རཏྣ་གླིང་པ། གློ་བོ་ཛར་པ་སྔགས་འཆང་ཆོས་རྒྱལ་བསོད་ནམས། པདྨའི་གདུང་ཚབ་མངའ་རིས་པཎ་ཆེན། རིག་འཛིན་ཆེན་པོ་ལེགས་ལྡན་རྡོ་རྗེ། བྱང་བདག་ཆོས་རྒྱལ་དབང་པོའི་སྡེ། ཐམས་ཅད་མཁྱེན་པ་མཁྱེན་བརྩེའི་དབང་ཕྱུག །སྤྱན་སྔ་མི་ཕམ་ཆོས་ཀྱི་རྒྱ་མཚོ། རྡོ་རྗེ་འཆང་སྔགས་རམ་པ་དགེ་འདུན་ཀུན་དགའ་བཀྲ་ཤིས། རྗེ་ཀུན་དགའ་གྲོལ་མཆོག །ངོར་ཐར་རྩེ་པ་ནམ་མཁའ་དཔལ་བཟང་། ཤར་པ་བྱམས་པ་ཀུན་དགའ་བཀྲ་ཤིས་ཁུ་དབོན། ཨེ་ཝཾ་སྒྲུབ་ཁང་པ་དཔལ་ལྡན་དོན་གྲུབ། ཡངས་ཅན་པཎ་ཆེན་ངག་དབང་ཆོས་གྲགས། ལོ་པ་སྤྱན་སྔ་ཀུན་དགའ་དོན་གྲུབ། ཆོས་རྗེ་དཔའ་བོ་ཆོས་རྒྱལ་དོན་གྲུབ། སྔགས་འཆང་དཀོན་མཆོག་ལེགས་པ། བླ་མ་ཨོ་རྒྱན་བསྟན་འཛིན། བཀྲ་བཟང་པ་ནམ་མཁའ་རིག་འཛིན། གསུང་སྤྲུལ་ཚུལ་ཁྲིམས་རྡོ་རྗེ། དར་

[Full Size]

སྡིངས་རིག་འཛིན་འཕྲིན་ལས་ལྷུན་གྲུབ་རྣམས་ཀྱི་གསན་ཡིག་ལ་ཞིབ་མོར་དཔྱད། འབྲི་ཁུང་པ་ཆོས་རྒྱལ་རིན་ཆེན་ཕུན་ཚོགས། འབྲི་ཁུང་ཆོས་ཀྱི་གྲགས་པ། རྩེ་གདོང་ཁྲི་ཆེན་ཀུན་དགའ་བསོད་ནམས་ལྷུན་གྲུབ། ས་སྐྱ་ཁྲི་ཆེན་ངག་དབང་ཀུན་དགའ་བསོད་ནམས། འདར་ནག་རིག་འཛིན་རྒྱལ་སྲས་བདེ་བ་བཟང་པོ་སོགས་ཀྱི་གསན་ཐོ་དངོས་སུ་མ་འབྱོར་ཡང་དོགས་སེལ་ཧོལ་ཁོངས་གསབ་དགོས་རྣམས་རྩོལ་བས་བསྒྲུབས། བཀའ་འགྱུར་རིན་པོ་ཆེའི་དཀར་ཆག་ལྡན་དཀར་མ། ཚལ་པ་དཀར་ཆག །བུ་སྟོན་ཆོས་འབྱུང་། གཞན་ཡང་རྣམ་ཐར་ཆོས་འབྱུང་སོགས་མང་པོར་ཞིབ་ཏུ་བརྟགས་ནས་ཐེག་པ་མཐོ་དམན་དང་གཞུང་སོ་སོའི་བཞུགས་ཚུལ་གོ་རིམ་རྣམ་པར་ངེས་པས་ཁོག་ཕུབ། རྒྱུན་ཡོད་མེད་དང་ཐོབ་མ་ཐོབ་ཀྱི་མཚམས་མཆན་བུས་རྣམ་པར་ཕྱེ་སྟེ། རྡོ་རྗེ་འཆང་ནས་གང་ལས་འོངས་པའི་བརྒྱུད་པའི་རྣམ་གྲངས་རྣམས་རྟགས་ཀྱིས་མ་འདྲེས་པར་བཀོད་དེ་བསྟན་པ་རིན་པོ་ཆེ་ཡུན་དུ་གནས་པའི་བཙས་དང་རང་དང་སྐལ་མཉམ་རྣམས་ལ་ཕན་པའི་ཆེད་དུ་དམ་པའི་ཆོས་ཀྱི་ཐོབ་ཡིག་གངྒཱའི་ཆུ་རྒྱུན་ཞེས་བྱ་བ་འདི་ནི་ཟ་ཧོར་གྱི་བཙུན་པ་ངག་དབང་བློ་བཟང་རྒྱ་མཚོའི་འཇིགས་མེད་གོ་ཆ་ཐུབ་བསྟན་ལང་ཚོའི་སྡེས་རང་ལོ་ཞེ་དགུ་པ་ཤིང་སྦྲུལ་གྱི་ལོ་ནས་ཉེ་བར་བརྩམས་ཀྱང་། མི་ཆོས་མཐུན་འཇུག་གི་འདུ་འཛི་ལ་རྣམ་དཀར་འཕྲིན་ལས་སྒྲོ་བཏགས་པའི་བན་ལིང་གི་དབང་གིས་དཀྱུས་གཅིག་ཏུ་འདྲི་བའི་རྔོ་མ་ཐོགས་པར་སྒྲིག་རྩོམ་བྱ་བྲལ་གྱི་ངང་ནས་འོ་སྐོལ་གྱི་སྟོན་པ་འགྲོ་བའི་བླ་མ་ཟས་གཙང་སྲས་པོ་ལྕགས་ཕོ་སྤྲེའུའི་ལོ་ལ་སྐུ་བལྟམས་ནས་ལོ་ཉིས་སྟོང་དྲུག་བརྒྱ་ཉེར་དགུར་སླེབ་ཅིང་། ཤམྦྷ་ལའི་ཕོ་བྲང་ཆེན་པོའི་རྒྱལ་སྲིད་ལ་རིགས་ལྡན་སེང་གེས་མངའ་བསྒྱུར་

[Full Size]

ནས་ལོ་བཞི་བཅུ་རྩ་གསུམ་འདས་པ་རང་ལོ་ང་བཞི་པ་དབུས་འགྱུར་འཆང་དུ་སཱ་དྷ་ར་ཎ་ཞེས་ལྗོངས་འདིར་ཐུན་མོང་དུ་གྲགས་ཤིང་། འཇམ་དབྱངས་གོང་མའི་ཁབ་ཏུ་གིང་ཟཱུལ་ཞེས་པ་ལྕགས་ཕོ་ཁྱིའི་ལོ་ཉིན་མོར་བྱེད་པ་ཆུ་སྲིན་གྱི་ཁྱིམ་དུ་སྤྱོད་ཅིང་། ཆུ་ཤེལ་གྱི་དབང་པོ་རྒྱལ་གྱི་དགའ་མས་ཡོངས་སུ་ཉ་བའི་དཀར་ཕྱོགས་ཀྱི་རྒྱལ་བ་གཉིས་པ། དུས་འཁོར་བའི་ཡ་ཎའི་དབྱངས་ཨར། གསལ་བྱེད་ྈྐཿའཆར་ཞིང་། ཁམས་མེ། མུན་པའི་མུན་པ་གསལ་བ་འབྲིང་པོའི་ལང་ཚོ། དབྱངས་འཆར་བའི་དམར་ཆའི་རྒྱལ་བ་གཉིས་པ། དབྱངས་ཨུ། གསལ་བྱེད་ཡ། ཁམས་མེ། འདོད་ཡོན་གཟུགས་འཆར་བའི་ཚེ་གངས་ཅན་གྱི་ལྟེ་བ་འཕྲུལ་སྣང་གཙུག་ལག་ཁང་དང་ཟུང་དུ་འབྲེལ་བ་རང་བྱུང་འཕགས་པའི་ཞིང་ཁམས་ཕོ་བྲང་ཆེན་པོ་པོ་ཏཱ་ལར་རེ་ཞིག་རྫོགས་པར་སྦྱར་བའི་ཡི་གེ་པ་ནི་གནས་གསར་འཇམ་དབྱངས་བསྟན་འཛིན་གྱིས་བགྱིས་པ་ཕྱོགས་དུས་ཀུན་ཏུ་བཤད་དང་སྒྲུབ་པའི་བསྟན་པ་ཆེས་ཆེར་འཕེལ་ཞིང་གནས་པར་གྱུར་ཅིག །སརྦ་མངྒ་ལཾ།། །