ཧོམ་ཁུང་།
ཧོམ་ཁུང་ཟུར་གསུམ་ནི། རྒྱུ་ལྕགས་དང་ས། རྫ་དང་རྡོ་ཤིང་ལས་བཟོས་པ་དང་། ཚད་དང་དབྱིབས་ནི། ཕུར་བ་གསང་རྒྱུད་ལས། གྲུབ་ཁུང་ལས་ཀྱི་དཀྱིལ་འཁོར་ནི། །དཀྱིལ་འཁོར་ཁྲུ་གང་ཙམ་དུ་བྱ། །གྲུ་གསུམ་སུ་བརྩེགས་ཁ་ཁྱེར་ལ། །ཟ་བྱེད་ཞལ་དང་མདའ་གཞུ་བཅས། །མཚོན་ཆ་ལྔ་དང་རྩང་གིས་བསྐོར། །མཐིང་ནག་དར་གྱིས་ཞལ་བཀབ་པའི། །ཞེས་པ་སྟེ། མཚོན་ཆ་ལྔ་ནི། རྡོ་རྗེ། འཁོར་ལོ། རལ་གྲི དབྱུག་ཏོ། རྒྱ་གྲམ་མོ། །ཡང་། རྙིང་རྒྱུད་མགོན་པོ་མཚོན་ཆ་འཁོར་ལོའི་རྒྱུད་ལས། དབུས་ནས་ཁྲུ་གང་གྲུ་གསུམ་ལ། །ཆང་རིས་གསུམ་ལྡན་ཐུར་དུ་བྲུ། །ཐ་མ་ཐོད་པའི་ཕྲེང་བས་བརྒྱན། །དུག་ཤིང་རྩང་དམར་ཉི་ཤུ་བརྒྱད། །རྡོ་རྗེ་འཁོར་ལོ་རལ་གྲི་དང་། །དབྱུག་ཐོ་རྒྱ་གྲམ་རྣམ་པ་ལྔས། །འོག་མ་དག་ལ་བསྐོར་བར་བྱ། །ཞེས་དང་། འགའ་ཞིག་ཧོམ་ཁུང་རིམ་པ་དང་བོའི་ཁ་འཁྱེར་ལ་བྱ་རིགས་དང་། བར་བ་ལ་གཅན་གཟན་ཁྱུང་འབྲུག འོག་མར་མི་རོ་རྟ་རོ། ནང་དམར་ལ་ཕྱི་ནག་པ་མེ་རིས་རི་མོ་དག་བྱེད་དོ། །