འོད་གསལ་གནད་བཞི་སྦྱངས་པའི་སྨོན་ལམ།༈ འོད་གསལ་གནད་བཞི་སྦྱངས་པའི་སྨོན་ལམ་བཞུགས་སོ༔ དུས་གསུམ་རྒྱལ་བའི་སྤྱི་གཟུགས་བླ་མ་རྗེར༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ གཞི་ལ་གནས་པའི་གཉིད་དང་རྨི་ལམ་བཅས༔ སྙོམས་འཇུག་ཐ་མལ་མ་དག་སྐུ་བཞིའོ༔ གཉིད་དུས་འོད་གསལ་མེ་ལོང་ཡེ་ཤེས་ཏེ༔ དེ་ཕྱིར་གསལ་ལ་མི་རྟོག་ཉིན་མཚན་གྱི༔ སྟོང་ཉིད་རྣམ་ཀུན་མཆོག་ལྡན་ཕྱག་རྒྱ་ཆེའི༔ འོད་གསལ་ཆོས་སྐུའི་ངོ་བོ་མངོན་གྱུར་ཤོག༔ རྨི་ལམ་སོར་རྟོགས་མཉམ་ཉིད་ཡེ་ཤེས་སྐུ༔ སྣང་བ་ཞིང་ཁམས་ལྷ་སྐུ་སྒྱུ་མ་དང་༔ གྲགས་པ་སྔགས་ཀྱི་ཐིག་ལེར་གཞིར་བྱས་ནས༔ ཀུན་ཏུ་རྟོག་ཡུལ་ཡེ་ཤེས་ཕྱག་རྒྱར་བཅིངས༔ ཟུང་འཇུག་ལོངས་སྐུའི་ངོ་བོ་མངོན་གྱུར་ཤོག༔ སྙོམས་འཇུག་གནས་བཞིར་དགའ་བཞི་འབྱུང་ལྡོག་མཐའི༔ ལྷན་གཅིག་སྐྱེས་པའི་ཡེ་ཤེས་དེ་ཁོ་ན༔ ལས་ཀྱི་ཕྱག་རྒྱའི་རྣམ་པར་བཅིངས་པའི་མཐུས༔ ཡེ་ཤེས་སྐུ་ཡི་ངོ་བོ་མངོན་གྱུར་ཤོག༔ ཐ་མལ་ཚོགས་དྲུག་སྣང་ཞེན་ལས་ཉོན་བག༔ ཡེ་ཤེས་ལྔ་ཡི་རང་བཞིན་སྒྲིབ་པའི་ནོངས༔ ཆོས་ཀྱི་ཕྱག་རྒྱའི་བཅིངས་པའི་སྟོབས་ཤུགས་ཀྱིས༔ སྤྲུལ་པའི་སྐུ་ཡི་ངོ་བོ་མངོན་གྱུར་ཤོག༔ དེ་དག་མངོན་དུ་བྱེད་པའི་ཡན་ལག་ནི༔ གཏུམ་མོ་ལྔ་ཡི་ཉམས་ལེན་ཀློང་དུ་གྱུར༔ རྒྱུ་ལུས་ལྔ་དང་ཟུང་འཇུག་ལམ་དུ་ལོངས༔ རྨི་ལམ་ཟིན་པའི་བར་དོའི་གྲོལ་ཚད་རྟོགས༔ འོད་གསལ་ལྔ་ཡི་རྟོགས་པ་ཡང་དག་ཐོབ༔ འཕོ་བ་ཆེན་པོའི་ལམ་གྱི་སྟོང་ཐེབ་ནས༔ བར་དོ་མེད་པར་རྫོགས་པའི་སངས་རྒྱས་ཤོག༔ བཀྲ་ཤིས་དེའི་ཀྱང་འགྲོ་ཀུན་བརྒྱན་གྱུར་ཅིག༔ ཅེས་ཀྱང་ཐུབ་པའི་ངོར་ག་གཱས་སོ། མངྒལཾ། ། ༈ ན་མོ་དཀོན་མཆོག་སྐུ་གསུམ་རྩ་གསུམ་ཆོས་ཉིད་དང་༔ ཆོས་ཅན་བསླུ་མེད་བདེན་པའི་སྟོབས་ཤུགས་མཐུ༔ ཁྱད་པར་གུ་རུ་པདྨའི་ཐུགས་བསྐྱེད་ཀྱི༔ བདག་སོགས་ཚེ་འདིའི་སྣང་བ་ནུབ་མ་ཐག༔ དཔལ་རི་པདྨ་འོད་ཀྱི་ཞིང་ཁམས་སུ༔ རིག་འཛིན་རྒྱ་མཚོའི་གྲྭལ་དུ་འཁོད་པར་ཤོག༔ དེ་ཡང་རྡོ་རྗེ་ཐེག་པའི་འཕྲོ་མཐུད་དེ༔ སྦུབ་ལ་མི་གནས་ཡེ་ཤེས་མཐར་ཕྱིན་ཅིང་༔ ཡེ་ཤེས་བླ་མའི་ས་ལ་བྱང་ཆུབ་ནས༔ རང་གཞན་དོན་གྲུབ་སྐུ་གཉིས་མངོན་གྱུར་ཤོག༔ ཅེས་པ་ཡང་ག་གཱས་སོ། ། ༈ ན་མོ༔ བླ་མ་ཡི་དམ་མཁའ་འགྲོ་ཐུགས་རྗེ་ཅན༔ དཔལ་ལྡན་དུས་འཁོར་དམ་པ་མཛོད་ཀྱི་གསང་༔ ཀུན་གྱི་སྤྱི་གཟུགས་རིགས་ལྡན་བརྒྱུད་པར་བཅས༔ ས་སྤྱོད་ཞིང་ཁམས་བྱང་ཤར་ཤམ་བྷ་ལ༔ གསང་ཆེན་རྡོ་རྗེའི་ཐེག་པའི་གན་མཛོད་ཆེ༔ མུ་སྟེགས་ཀླ་ཀློ་རྒྱུ་བའི་གོ་སྐབས་མེད༔ སྐྱེ་བ་གཅིག་གི་མངོན་པར་བྱང་ཆུབ་པ༔ ཡོན་ཏན་དཔག་ཏུ་མེད་པའི་ཁྱད་པར་ཅན༔ འདི་ནས་ཚེ་ཡི་དུས་བྱའི་གྱུར་མ་ཐག༔ བདག་ནི་ཞིང་ཁམས་དམ་པ་ཡོངས་བཟུང་ཞིང་༔ རིགས་ལྡན་རྒྱལ་པོའི་ཞབས་དྲུང་སྐྱེ་བར་ཤོག༔ ཕྱོགས་བཅུ་དུས་བཞི་རྒྱལ་བ་སྲས་བཅས་ཀྱི༔ སྨོན་ལམ་འགྲུབ་པའི་བདེན་དཔང་མཐུན་འགྱུར་མཛོད༔ ཨོཾ་བཛྲ་པདྨ་གུ་རུ་བིདྱཱ་ར་ཛ་པྲ་ནི་དྷ་ནི་བྷནྡྷ་རེ་སྭཱ་ཧཱ༔ ཅེས་ཀྱང་གསེར་སྐོམ་པས་ངོར་ག་ག་ཨ་བྷྱེས་སོ། ། ༈ རང་གི་རྒྱུན་དུ་བཏགས་གྲོལ་གྱི་ལམ་དབང་བླངས་བའི་ཁ་གསོ་བྱ་བཿ རང་ཀུན་བཟང་དུ་གསལཿ བགེགས་བསྐྲད་བསྲུང་འཁོར་བསྒོམཿ བཏགས་གྲོལ་ཞི་ཁྲོའི་ལྷ་ཚོགས་སུ་དམིགས་ལཿ བདག་མདུན་ལས་འོད་ཟེར་འཕྲོས་པས་ཡེ་ཤེས་པ་སྤྱན་དྲངས་ཤིང་བསྟིམཿ ཡིད་ཀྱིས་མཆོདཿ ཚར་དུ་ཐོན་གྱི་རྗེས་སུ་རྟེན་སྙིང་གི་རབ་གནས་བྱསཿ མཐོང་ཐོས་དྲན་རེག་གི་སེམས་ཅན་ཐམས་ཅད་བྱང་ཆུབ་ལས་ཕྱིར་མི་ལྡོག་པར་མཛད་དུ་གསོལཿ ཞེས་བརྗོད་ནསཿ བཀྲ་ཤིས་ཀྱི་མཐའ་རྒྱན་ཞིངཿ དེ་ནས་རང་གི་རྩ་བའི་བླ་མ་དེས་བཏགས་གྲོལ་གྱི་དབང་བསྐུར་བར་མོས་ལ་ཕྱག་འཚལཿ ཚར་ཅི་འགྲུབ་ཀྱི་བཏགས་གྲོལ་འདོན་ཞིང་བླ་མ་དང་དབྱེར་མེད་པར་བཏགས་གྲོལ་དེ་ལ་མཎྜལ་ཕུལ་ཞིང་རང་གི་སྤྱི་མགྲིན་སྙིང་ཀ་ལྟེ་བ་བཞིར་གཏུགས་ཤིངཿ ཚར་རེའམ་ཚར་གཅིག་བཟླས་པས་བཏགས་གྲོལ་ལས་འོད་བྱུང་ནས་སྣང་སྲིད་ཁྱབཿ སྒྲིབ་པ་ཐམས་ཅད་དག་ཅིང་དངོས་གྲུབ་ཡོངས་སུ་རྫོགས་པ་ཐོབ་པར་དམིགས་ལཿ བསྟན་པ་བུ་གཅིག་གི་རྒྱུད་ལས་བྱུང་བའིཿ སངས་རྒྱས་ཐམས་ཅད་ཀྱི་སྲས་གཅིག་པོའི་བདག་མིང་འདི་ཞེས་བགྱི་བའི་ལུས་བྱིན་གྱི་བརླབ་ཏུ་གསོལཿ སྨིན་པར་མཛད་དུ་གསོལཿ གྲོལ་བར་མཛད་དུ་གསོལཿ གང་བར་མཛད་དུ་གསོལཿ ཆེར་འཕེལ་བར་མཛད་དུ་གསོལཿ རྒྱས་པར་མཛད་དུ་གསོལཿ སངས་རྒྱས་ཐམས་ཅད་ཀྱི་སྐུ་དང་གཉིས་སུ་མེད་པར་བྱིན་གྱིས་བརླབ་པར་མཛད་དུ་གསོལཿ གྷ་ཛ་ཀ་ཡཱ་ཨ་བྷི་ཥིཉྩ་ཨོཾཿ མགྲིན་པར་བཞག་ལཿ སངས་རྒྱས་ཐམས་ཅད་ཀྱི་སྲས་གཅིག་པོའི་བདག་ཞེས་བགྱི་བའི་ངག་བྱིན་གྱི་བརླབ་ཏུ་གསོལཿ སྨིན་པར་མཛད་དུ་གསོལཿ གྲོལ་བར་མཛད་དུ་གསོལཿ གང་བར་མཛད་དུ་གསོལཿ ཆེར་འཕེལ་བར་མཛད་དུ་གསོལཿ རྒྱས་པར་མཛད་དུ་གསོལཿ སངས་རྒྱས་ཐམས་ཅད་ཀྱི་གསུང་དང་གཉིས་སུ་མེད་པར་བྱིན་གྱིས་རླབས་པར་མཛད་དུ་གསོལཿ གྷ་ཛ་ཝཀྐ་ཨ་བྷི་ཥིཉྩ་ཨཿ སྙིང་ཀར་བཞག་ལཿ སངས་རྒྱས་ཐམས་ཅད་ཀྱི་སྲས་གཅིག་པོའི་བདག་ཞེས་བགྱི་བའི་ཡིད་བྱིན་གྱི་བརླབ་ཏུ་གསོལཿ སྨིན་པར་མཛད་དུ་གསོལཿ གྲོལ་བར་མཛད་དུ་གསོལཿ གང་བར་མཛད་དུ་གསོལཿ ཆེར་འཕེལ་བར་མཛད་དུ་གསོལཿ རྒྱས་པར་མཛད་དུ་གསོལཿ སངས་རྒྱས་ཐམས་ཅད་ཀྱི་ཐུགས་དང་གཉིས་སུ་མེད་པར་བྱིན་གྱིས་བརླབ་པར་མཛད་དུ་གསོལཿ གྷ་ཛ་ངྷརྨཱ་ཙིཏྟ་ཨ་བྷི་ཥིཉྩ་ཧཱུྃཿ ལྟེ་བར་བཞག་ལ། སངས་རྒྱས་ཐམས་ཅད་ཀྱི་སྲས་གཅིག་པོའི་བདག་ཞེས་བགྱི་བའི་ལུས་ངག་ཡིད་གསུམ་དང་བཅས་པ་བྱིན་གྱི་བརླབ་ཏུ་གསོལཿ སྨིན་པར་མཛད་དུ་གསོལཿ གྲོལ་བར་མཛད་དུ་གསོལཿ གང་བར་མཛད་དུ་གསོལཿ ཆེར་འཕེལ་བར་མཛད་དུ་གསོལཿ རྒྱས་པར་མཛད་དུ་གསོལཿ སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པས་གཉིས་སུ་མེད་པར་བྱིན་གྱིས་རླབས་པར་མཛད་དུ་གསོལཿ གྷ་ཛ་ཀ་ཡ་ཝཀྐ་ཙིཏྟ་ངྷརྨཱ་ཀརྨ་ཨ་བྷི་ཥིཉྩ་ཧཱུྃ་ཨཱཿཨོཾ་ཧྲཱིཿསྭཱ་ཧཱཿ བསྡུ་ན་ཕྱི་མ་འདི་ཁོ་ནས་ཆོག་མཐར་ནིཿ རྟེན་འདི་བཏགས་པའི་བྱིན་རླབས་ཀྱིས། །བདག་ནི་མཐོང་ཐོས་དྲན་རེག་ཀུན། །དེ་མ་ཐག་ཏུ་གྲོལ་གྱུར་ནས། །འབྲེལ་ཚད་དོན་དང་ལྡན་པར་ཤོག །དེ་ནས་ཤིས་བརྗོད་ལ་སོགས་བྱ། ཅེས་ཀྱང་ག་ག་ཨ་བྷྱེས་སྨྲས་པའི་ཡི་གེ་པ་ནི་ཀརྨའི་མིང་གིས་སོ། །ཨོཾ་ཨེ་ངྷརྨཱ་ཤ་ཏ་ཐཱ་ག་ཏ་ཡོ་ནི་ཨེ་བམ་ཏིཥྛ་ལྷན་སི་ཏི་ཧཱུྃ་ཧཱུྃཿ རྟེན་སྙིངའོ། ། ༈ རླུང་བྱེར་ཟུག་ནི་སྤྱི་དང་མཐུན་ཏེ། དེ་ཡང་ཉིན་དུས་ཀྱི་ནམ་ལངས་ནས་དྲོས་པོ་ཆེའི་བར་དུ་བྱེར་པའོ། །དེ་ནས་གུང་ལ་མ་སླེབ་བར་དུ་ཟུག་པའོ། །གུང་མཐིལ་པོ་ནི་སྙོམ་པའོ། །གྲིབ་བསིལ་ཕེབས་ནས་ཉི་མ་ནུབ་པའི་བར་ནི་འཁྲུགས་པའོ། །མཚན་དུས་ཀྱི་སྲོད་བྱེར་བ། སྲོད་ཡོལ་ཟུག་པ། ནམ་ཕྱེད་སྙོམས་པ། ཐོ་རངས་འཁྲུགས་པའོ། །ས་༡གཡོ་བ་ནད་༢མུ་༣གེ །ཉི་ཟླ་༤གཟའ་འཛིན་ཐོག་༥རྟགས་དེ་རྣམས་བྱེར་བ་ལ་བྱུང་ན་ཀློག །ཟུག་པ་ལ་བསྒོམ། སྙོམས་པ་ལ་སྦྱིན་ཡུལ་འབོད་པ་དང༌། ཚེ་ཐར་སྲོག་བསླུ་སོགས་བྱ། འཁྲུགས་པ་ལ་ཚོགས་འཁོར་དང་མཆོད་པ་སོགས་བྱ་བ་སྤྱི་ལྟར་རོ། ། ༈ རྡོར་སེམས་དགོངས་པ་འདུས་པ་ལསཿ གཏེར་གསར་རྙིང་གི་གཅོད་དོན་བསྡུས་པ་བདག་འཛིན་གཅོད་པའི་རལ་གྲི་ནིཿ ཕཊ་ཕཊ་ཕཊཿ བཾཿ རིགས་ལྔའི་མཁའ་འགྲོ་སྡེ་ལྔ་ནིཿ སྐུ་གསུམ་རྒྱལ་བའི་ཡེ་ཤེས་ལྔའིཿ དུག་ལྔའི་བསྐྱེད་བའི་ལྷ་འདྲེ་རྣམསཿ དབྱིངས་ལྔའི་ཀློང་བསྡུད་ཟིལ་གྱིས་གནོནཿ ཕཊ་ཕཊ་ཕཊཿ སྐྱབས་གནས་ཀུན་འདུས་མཁའ་འགྲོ་ལྷརཿ སྒོ་གསུམ་གུས་པས་སྐྱབས་སུ་མཆིཿ མཐའ་ཡས་ཕ་མ་སེམས་ཅན་ཀུནཿ ཡུམ་ཆེན་ས་ལ་བཀོད་པར་བྱཿ ཕཊ་ཕཊ་ཕཊཿ རང་སེམས་ཚངས་པའི་ལམ་བརྒྱུད་དེཿ སྐད་ཅིག་སྟེང་གི་ནམ་མཁར་འཕངཿ《འཕགས།》རྡོ་རྗེ་མཁའ་འགྲོ་ཁྲོས་མར་བཞེངསཿ ཕཊ་ཕཊ་ཕཊཿ ཕུང་པོ་ཐང་ལ་འགྱེལ་བ་དེཿ གྲི་གུག་གདབས་པས་ཐལ་གྱིས་བཤིགསཿ ཐུགས་ཀའི་འོད་གྱིས་མཆོད་རྫས་ནིཿ མ་ཚང་མེད་པའི་སྤྲིན་དུ་གྱུརཿ གནས་གསུམ་མཁའ་འགྲོའི་ཕོ་ཉ་ཡིསཿ མཆོད་སྦྱིན་མགྲོན་ཀུན་སྤྱན་དྲངས་གྱུརཿ ཕཊ་ཕཊ་ཕཊཿ མཆོད་རྫས་དཀར་མངར་ལྷ་མོ་ནིཿ དཀོན་མཆོག་སྲི་ཞུའི་མགྲོན་ལ་བསྟིམཿ ཤ་ལྔ་བདུད་རྩིའི་བསྐང་རྫས་སུཿ མགོན་པོ་ཡོན་ཏན་མགྲོན་ལ་འབུལཿ ཕཊ་ཕཊ་ཕཊཿ ཤ་ཁྲག་དྲི་གསུར་ཁུ་རླང་གིསཿ ལན་ཆགས་བགེགས་རིགས་འཁོར་བཅས་བརྔནཿ གང་འདོད་འཇོ་བའི་འདོད་ཡོན་དུཿ རིགས་དྲུག་སྙིང་རྗེའི་མགྲོན་ལ་བསྔོཿ ཕཊ་ཕཊ་ཕཊཿ བདག་སོགས་མཐའ་ཡས་སེམས་ཅན་ཐམས་ཅད་ཀྱིཿ ཚོགས་རྫོགས་ཉོན་ཤེས་སྒྲིབ་པ་ཀུན་དག་ནསཿ མཆོག་དང་ཐུན་མོང་དངོས་གྲུབ་ཐོབ་པ་དངཿ བྱང་ཆུབ་སེམས་ཀྱི་འགྲོ་ཀུན་རྒྱུད་ཚིམ་ཤོགཿ ཕཊ་ཕཊ་ཕཊཿ མཐར་ནི་འཁོར་གསུམ་དམིགས་པ་མེད་པ་ཡིཿ ཡུམ་ཆེན་དགོངས་པར་ཕྱམ་གཅིག་རྫོགས་སངས་རྒྱསཿ ཨ་ཨ་ཨཱཿ ཅེས་ཀྱང་ག་གཱས་སོ། ། ༈ ཡེ་ཤེས་སྒྱུ་འཕྲུལ་དྲྭ་བ་ལས༔ གླུད་བསྔོ་འཆི་བདག་ཞགས་འགྲོལ་ཞེས་བྱ་བ་བཞུགས༔ འཆི་ལྟས་རྣམ་པ་བརྒྱད་ཅུ་ལ༔ བཟློག་ཐབས་མདོས་དང་འཁོར་ལོ་བསྐོར༔ རྟེན་འབྲེལ་ཐབས་ཀྱི་བཅོས་པ་རྣམས༔ སོ་སོར་རང་རང་དགོས་ཆོས་བཞིན༔ རྫོགས་ཆེན་རྒྱུད་ཀྱི་དྭངས་མ་ནི༔ ཉི་ཟླ་ཁ་སྦྱོར་ཆེན་པོར་གསུངས༔ དེ་ལྟར་ཉམས་སུ་མ་ལོན་ཀྱང་༔ སྤྱི་བཅོས་འདིའི་ཀྱང་ངེས་པར་བཟློག༔ གླུད་དང་མདོས་སྒོ་རང་རང་ལྟར༔ དེ་ནས་བསྔོ་བ་འདི་ལྟ་སྟེ༔ ཀྱཻཿ འཆི་བདག་སྡེ་རུ་གཏོགས་པ་ཡི༔ བགེགས་རིགས་སྟོང་ཕྲག་བརྒྱད་ཅུ་དང་༔ གློ་བུར་དགུ་བཅུ་རྩ་གཅིག་སོགས༔ ཚེ་ལ་རྐུ་ཞིང་སྲོག་ལ་འགམ༔ བླ་ལ་འཇབ་ཅིང་ཡིད་ལ་བརྣག༔ མདངས་དང་དབང་པོ་འཕྲོག་བྱེད་པ༔ ཁྱད་པར་བདུད་པོ་ཁྲམ་བདག་ཆེ༔ ཤྭ་རྡེལ་འགྲིམ་ཞིང་ཞགས་པ་གཡུག༔ ལས་ཀྱི་མེ་རླུང་སོ་སོར་བཟའ༔ དེ་དང་དེ་དག་ཐམས་ཅད་ལ༔ མི་ལས་དགའ་བའི་གླུད་འདི་ཉིད༔ དབང་པོ་ཡན་ལག་ཡོན་ཏན་ནི༔ བརྒྱ་ཕྲག་བཅུ་གཉིས་ཆ་འདྲར་རྫོགས༔ འདོད་པའི་ཡོན་ཏན་ཐམས་ཅད་ཚང་༔ ལྷ་ཡི་བུ་བས་གཟི་བརྗིད་ལྡན༔ དབང་པོའི་གཞུ་ལས་ཁ་དོག་འཚེར༔ ཉི་ཟླ་གཉིས་ལས་འོད་རེ་གསལ༔ ལྗོན་ཤིང་ལས་ཀྱང་ཡན་ལག་རྒྱས༔ ནོར་བུ་བས་ཀྱང་རེ་བ་སྐོང་༔ དྲི་ཟའི་གླུ་ལས་གདེང་རེ་སྙན༔ བདུག་པའི་སྤྲིན་ལས་བསུང་རེ་ཞིམ༔ འཇམ་མཉེན་པཉྩའི་བགོ་བར་ལྡན༔ གང་འདོད་དེར་འགྱུར་འཕྲུལ་སྤྱོད་ཡངས༔ རྣམ་རིག་ཡོན་ཏན་མངོན་ཤེས་ལྡན༔ གཡོས་ལེགས་བདའ་དགུའི་སྦྱིན་ལག་ཡངས༔ དེ་མ་ཐག་དུ་མོད་ལ་འབྱུང་༔ དེ་འདྲའི་ཏིང་འཛིན་སྒྱུ་མའི་འཕྲུལ༔ དེ་བཞིན་གཤེགས་པའི་སྨོན་ལམ་མཐུ༔ རྣལ་འབྱོར་ཡེ་ཤེས་རང་གཟུགས་ཡིན༔ བྱང་ཆུབ་སེམས་ཀྱི་བྱིན་རླབས་ལྡན༔ འབྲེལ་ཚད་དགེ་བའི་འཁྲི་ཤིང་ཡིན༔ བསྔོས་ཚད་ཀུན་གྱིས་བར་ཆད་སེལ༔ ཐོབ་ཚད་ཐམས་ཅད་གཏན་དུ་འཚེངས༔ མྱོང་ཚད་ཟག་མེད་བདེ་བས་ཚིམ༔ འདི་ཉིད་ཁྱེད་ལ་གཏེར་དུ་འབུལ༔ མི་གཙང་ལུས་བརྒྱའི་བསྐྱོད་དུ་མེད༔ མི་དགེའི་སྲོག་ནི་འགམ་པ་ལ༔ འཁོར་མེད་ལན་ཆགས་དེས་ཅི་བྱ༔ ཤེས་ཏེ་ཁྱོད་ཀྱིས་བཀོལ་མི་བཏུབ༔ འཚེང་བར་རློམ་པས་ཕུང་དྲལ་ཏེ༔ བསད་ན་ཚེ་ཐུང་སྲོག་ལན་ཆགས༔ ཁྱོད་རང་ལས་ཀྱིས་ཉེན་སྡུག་བསྔལ༔ སེལ་ལས་ཕྱིར་ཞིང་ནོངས་པའི་རྒྱུ༔ འདམ་ཀའི་ངེས་པ་མ་ནོར་བར༔ བདེན་པའི་ཚིག་འདི་ཉན་པར་གྱིས༔ སྔགས་འཆང་བདག་གི་བཀའ་མ་བཅག༔ ཁྱེར་ཅིག་ཁྱེར་ཅིག་སྟོབས་ལྡན་རྣམས༔ སྲེད་དང་ཆགས་དང་ཞེན་པ་དང་༔ དྲན་དང་བཟུང་དང་བསམ་དང་རེག༔ ཀློད་དང་ཞི་དང་གྲོལ་བར་མཛོད༔ ཆོས་སྦྱིན་སོགས་བྱ༔ གླུད་གཏོར་ལོ་དགྲའི་ཕྱོགས་སུ་འདོར༔ ཕྱི་མིག་མི་བལྟ་རང་གནས་སླེབས༔ བགེགས་བསྐྲད་བསྲུང་བའི་འཁོར་ལོ་བསྒོམ༔ དེས་ནི་འཆི་བ་ངེས་པར་བསླུ༔ དེ་སྐད་རྙིང་སྔགས་རྒན་པོ་ཡི། །རིགས་ཀྱི་མྱུ་གུར་སྐྱེ་སྲིད་འཛིན། །ག་ག་ཨ་བྷྱེའི་མིང་གིས་ནི༑ ༑དབང་ཕྱུག་རྡོ་རྗེའི་བསྐུལ་ངོར་སྨྲས། །སརྦ་མངྒ་ལམ། ། ༈ གསུར་ཆུ་སྦྱིན་གང་ལའང་འདིས་བསྔོའོཿ ཨོཾ་ཨཱཿཧཱུྃ༔ རང་ཉིད་སྤྱན་རས་གཟིགས་དབང་གིཿ(ཡང་ན་གསུར་བྱེད་ན། ཐུགས་ཀའི་འོད་ཀྱི་རེག་པ་ཡིཿ གསུར་མཆོད་འདོད་ཡོན་རྒྱ་མཚོའི་རྡུལཿ དཀར་དམར་མངར་གསུམ་སོགས།) སྐྱབས་སྦྱིན་ཕྱག་རྒྱའི་མཛུབ་རྩེ་ལསཿ བདུད་རྩི་འོ་མའི་རྒྱུན་བབས་པསཿ སྦུ་རླངས་ཟིལ་མ་མཆོད་པའི་སྤྲིནཿ དཀར་དམར་མངར་གསུམ་རོ་དྲུག་ཟསཿ འདོད་ཡོན་ལྷ་མོའི་རྣམ་པ་ལཿ ཟག་མེད་ཡེ་ཤེས་བདུད་རྩི་དངོསཿ ཡི་གེ་གསུམ་གྱི་འོད་དུ་ཐིམཿ རྩིག་མ་དག་བྱེད་རྒྱུན་བཟང་པོཿ ནམ་མཁའ་མཛོད་ཀྱི་གཏེར་དུ་གྱུརཿ ཐུགས་ཀའི་འོད་ཀྱིས་མགྲོན་བཞིའི་ཚོགསཿ སྐད་ཅིག་ཉིད་ལ་སྤྱན་དྲངས་གྱུརཿ རྩ་བའི་བླ་མ་ལ་སོགས་པའིཿ དཀོན་མཆོག་མཆོད་པས་མཉེས་གྱུར་ཅིགཿ ཛཾ་བྷ་ལ་ཡི་དབུར་བཞུགས་ཀྱིཿ དམ་ཚིག་ཅན་གྱི་ཐུགས་དམ་བསྐངཿ དཀོར་དང་སྲོག་དང་ཞོ་ཤས་བསྐྱངཿ ལན་ཆགས་བགེགས་རིགས་ཐམས་ཅད་དངཿ ཡི་དྭགས་རྣམས་ཀྱི་གཙོ་བྱས་པའིཿ རིགས་དྲུག་འདོད་པ་ཚིམ་གྱུར་ཅིགཿ མི་དབང་མི་སླེབ་སྒྲིབ་པ་ཅནཿ ལྷག་མའི་མགྲོན་གྱི་ཐུགས་དམ་བསྐངཿ སོ་སོའི་དགྱེས་པ་ཀུན་ལྡན་གྱིསཿ ཚོགས་རྫོགས་སྒྲིབ་པ་ཡོངས་དག་ནསཿ བདག་དང་སེམས་ཅན་ཐམས་ཅད་ཀུནཿ རྣམ་མཁྱེན་སངས་རྒྱས་ཐོབ་པ་དངཿ ལན་ཆགས་ཤ་མཁོན་བུ་ལོན་སོདཿ སྡུག་བསྔལ་ཀུན་བྲལ་བདེ་ལྡན་ཤོགཿ སཾ་བྷ་ར་དང་ཆུ་སྦྱིན་སྔགས་གང་འོས་ཀྱིས་བསྔོཿ མཐར་ནི་འཁོར་གསུམ་དངོས་པོའི་ཆོསཿ མི་དམིགས་མཉམ་པ་ཉིད་ཕྱམ་གདལཿ ཞེས་པ་འདི་ཡང་ཀློང་ཆེན་ཡངས་བས་བསྐུལ་ངོར་ག་གཱས་སོ། ། |