བཙུན་པ་དགེ་འདུན་འབངས་དང་སློབ་དཔོན་ཆོས་འབངས་སངས་རྒྱས་བསྐྱངས་ལེགས་ལྡན་བཅས།
༈ བཙུན་པ་དགེ་འདུན་འབངས་ནི། སློབ་དཔོན་དབྱིག་གཉེན་གྱི་སློབ་མ་ཞིག་སྟེ་ཡུལ་
ལྷོ་ཕྱོགས་པ་བྲམ་ཟེའི་རིགས། སྡེ་པ་ཐམས་ཅད་ཡོད་སྨྲ་ཡིན། རྡོ་རྗེ་གདན་དུ་ཡུན་རིང་བཞུགས་ནས་དེར་འདུལ་བ་དང་མངོན་པའི་ཆོས་གཞི་ཉི་ཤུ་རྩ་བཞི་བཙུགས། ཁ་ཆེར་བྱོན་ནས་རིན་ཆེན་སྦས་པའི་གཙུག་ལག་ཁང་དང་། ཀུམྦྷ་ཀུཎྜི་ལིའི་གཙུག་ལག་ཁང་བཞེངས། ཐེག་ཆེན་མང་དུ་སྤེལ། ཁ་ཆེའི་ཡུལ་དེར་སྔོན་ཐོགས་མེད་སྐུ་མཆེད་ཀྱིས་ཐེག་ཆེན་ཅུང་ཟད་དར། སློབ་དཔོན་འདིས་ཕྱིས་དར་རྒྱས་མཛད་ནས་མཐར་ཡུལ་དེ་ཉིད་དུ་སྐུ་འདས་སོ། །༈ སློབ་དཔོན་ཆོས་འབངས་ནི། ཤར་ཕྱོགས་བྷངྒ་ལར་འཁྲུངས། སྐུ་མཆེད་གཉིས་ཀྱི་སློབ་མ་ཡིན། ཕྱོགས་བཞིར་འཇམ་དཔལ་གྱི་ལྷ་ཁང་རེ་བཞེངས། རྣལ་འབྱོར་སྤྱོད་པའི་ས་ཡོངས་རྫོགས་ལ་འགྲེལ་པ་མཛད་དོ་ཞེས་གྲགས། ༈ སློབ་དཔོན་སངས་རྒྱས་བསྐྱངས་ནི་ལྷོ་ཕྱོགས་ཏམྦྷ་ལའི་ཡུལ་དུ་འཁྲུངས། སློབ་དཔོན་ཀླུའི་བཤེས་གཉེན་གྱི་སློབ་མ་སློབ་དཔོན་དགེ་འདུན་བསྲུང་བ་ལས་ཀླུ་སྒྲུབ་ཀྱི་གཞུང་ལུགས་རྣམས་ཐོས་པར་བྱས་ནས་བསྒོམས་པས་ཡེ་ཤེས་མཆོག་བརྙེས། འཇམ་དཔལ་གྱི་ཞལ་གཟིགས། འཕགས་པ་ཡབ་སྲས་དང་སློབ་དཔོན་དཔའ་བོ་སོགས་ཀྱི་གཞུང་ལུགས་མང་པོར་རྣམ་བཤད་མཛད། མཐར་རི་ལུའི་དངོས་གྲུབ་སྒྲུབ་པས་གྲུབ་བོ། །༈ སློབ་དཔོན་ལེགས་ལྡན་ནི། ལྷོ་ཕྱོགས་མང་རྒྱ་རར་རྒྱལ་རིགས་སུ་སྐྱེ་བ་བརྙེས། ཡུལ་དེ་ཉིད་དུ་རབ་ཏུ་བྱུང་སྡེ་སྣོད་གསུམ་ལ་མཁས་པར་སྦྱངས། དབུས་སུ་བྱོན་ནས་སློབ་དཔོན་དགེ་འདུན་བསྲུང་བ་ལས་ཐེག་ཆེན་གྱི་མདོ་སྡེ་དུ་མ་དང་ཀླུ་སྒྲུབ་ཀྱི་མན་ངག་མནོས་ཏེ། སླར་ཡང་ལྷོ་ཕྱོགས་སུ་བྱོན་ནས་ཕྱག་རྡོར་གྱི་ཞལ་གཟིགས་ཆོས་མང་དུ་བསྟན། སློབ་དཔོན་སངས་རྒྱས་བསྐྱངས་སྐུ་འདས་པའི་འོག་ཏུ། དེས་མཛད་པའི་བསྟན་བཅོས་རྣམས་གཟིགས། དབུ་མ་རྩ་བའི་གཞུང་ལས་སློབ་དཔོན་སྔ་མའི་བཞེད་པ་དེ་སུན་ཕྱུང་སྟེ་འགྲེལ་བ་མཛད་ཅིང་ཀླུ་སྒྲུབ་ཀྱི་མན་ངག་ལ་བརྟེན་པར་ཞལ་གྱིས་བཞེས་ནས། མདོ་སྡེ་འགའ་ཞིག་ལ་འགྲེལ་བ་མཛད་དོ། །དེ་ལ་སློབ་དཔོན་འདི་གཉིས་ཀྱིས་དབུ་མ་ངོ་བོ་ཉིད་མེད་པར་སྨྲ་བའི་གཞུང་བཙུགས་ཤིང་། སངས་རྒྱས་བསྐྱངས་སློབ་མ་ཧ་ཅང་མང་བ་མ་ཡིན་ཡང་།
ལེགས་ལྡན་གྱིི་སློབ་མ་ཤིན་ཏུ་མང་བས་དགེ་སློང་སྟོང་ཕྲག་དུ་མ་རྗེས་སུ་འབྲང་བ་ཡིན་པས་ལུགས་དེ་ཤིན་ཏུ་དར་བར་གྱུར་ཏོ། །སློབ་དཔོན་འདི་གཉིས་མ་བྱོན་གོང་དུ་ཐེག་ཆེན་མཐའ་དག་བསྟན་པ་གཅིག་ཏུ་གནས། སློབ་དཔོན་འདི་གཉིས་ཀྱིས་ཀླུ་སྒྲུབ་དང་ཐོགས་མེད་གཉིས་ཤིན་ཏུ་ཐ་དད་དེ། ཐོགས་མེད་ཀྱིས་དབུ་མའི་ལམ་མི་སྟོན་སེམས་ཙམ་ཁོ་ན་ཡིན་ལ། ཁོ་བོ་ཅག་གི་འདི་ལས་གཞན་དུ་མེད་དོ་ཞེས་མཐའ་གཞན་འགོག་པར་མཛད་པས་ལེགས་ལྡན་སྐུ་འདས་པའི་འོག་ཏུ་ཐེག་ཆེན་ལའང་ནང་དུ་སྡེ་གཉིས་སུ་གྱེས་རྩོད་པ་བྱུང་ངོ་། །བོད་རྣམས་སངས་རྒྱས་བསྐྱངས་ཀླུ་སྒྲུབ་ཀྱི་སྐུ་ཚེའི་སྟོད་ཀྱི་སློབ་མ་དང་། ལེགས་ལྡན་སྐུ་ཚེའི་སྨད་ཀྱི་སློབ་མ་ཡིན་པ་དང་། རྩོད་པ་བྱས་པ་སྐད་དང་། སངས་རྒྱས་བསྐྱངས་ཟླ་གྲགས་སུ་སྐྱེ་བ་བཞེས་ཟེར་བ་སོགས་རིགས་པས་གྲས་པའི་ཅོལ་གཏམ་དུ་ཟད་དོ། །