བར་དོའི་གནས་སྤྱིར་བསྟན་པ།
༈ སྤྱི་དོན་དྲུག་པ་བར་དོ་གནད་ཀྱི་གདམས་ཚུལ་ལ་གཉིས་ཏེ། བར་དོའི་གནས་སྤྱིར་བསྟན་པ་དང་། གདམས་པའི་མཚོན་ཚུལ་བྱེ་བྲག་ཏུ་བཤད་པའོ། །དང་པོ་ལ་བཞི་སྟེ། རང་བཞིན་གྱི་བར་དོ། ཏིང་ངེ་འཛིན་གྱི་བར་དོ། །ཆོས་ཉིད་ཀྱི་བར་དོ། །སྲིད་པའི་བར་དོའོ། །དང་པོ་ནི། རང་བཞིན་བར་དོ་ནི་སྐྱེས་ནས་མ་ཤིའི་བར་གྱི་སྣང་བ་འདི་ཡིན་ཏེ། ངོ་སྤྲོད་བཞིས་ཤེས་བྱའི་སྒྲོ་འདོགས་བཅད་ནས་སེམས་དང་ཡེ་ཤེས་དབྱེ་བའི་མན་ངག་ཉམས་སུ་བླང་ངོ་། །གཉིིས་པ་ཏིང་འཛིན་གྱི་བར་དོ་ནི། རྣལ་འབྱོར་པ་ཆོས་ཉིད་རང་ངོ་ལ་རྩེ་གཅིག་ཏུ་འཇོག་དུས་ཏེ་དགོངས་པ་རང་བྱུང་ཡེ་ཤེས་ལས་མ་གཡོས་པར་ཉམས་སུ་བླང་ངོ་། །
གསུམ་པ་ཆོས་ཉིད་ཀྱི་བར་དོ་ནི། འཁྲུལ་སྣང་འགགས་ནས་སྣང་སྲིད་སྐུ་དང་ཡེ་ཤེས་ཀྱི་རང་སྣང་དུ་ཤར་བའི་དུས་ཏེ། རང་སྣང་རང་ངོ་ཤེས་ནས་རིག་པ་བཙན་ས་ཟིན་པའི་གནད་ལ་བསླབ། བཞི་པ་སྲིད་པའི་བར་དོ་ནི། ཆོས་ཉིད་ནུབ་ནས་སྐྱེ་བ་ཕྱི་མ་ལོན་པའི་བར་གྱི་འཁྲུལ་སྣང་རྨི་ལམ་ལྟ་བུ་སྟེ། སྐྱབས་སུ་འགྲོ་བ་དང་། སྒྱུ་མ་ལྟ་བུའི་བསྐྱེད་རྫོགས་དང་། བླ་མའི་གདམས་ངག་གིས་ཐམས་ཅད་བདེན་མེད་དུ་སྦྱངས་ལ། ལས་ཀྱི་འཕྲོ་འཐུད་པའི་ཐབས་ངོས་ཟིན་པར་བྱའོ། །དེ་དག་ཀྱང་དོན་ལྔས་བསྟན་པ་ནི། ཀུན་གསལ་ལས། བར་དོ་རྣམ་པ་བཞིར་བཤད་དོ། །རང་བཞིན་དག་གི་བར་དོ་དང་། །ཏིང་ངེ་འཛིན་གྱི་བར་དོ་དང་། །ཆོས་ཉིད་འོད་གསལ་བར་དོ་དང་། །སྲིད་པའི་བར་དོ་རྣམས་སོ། །དེ་ལ་རང་བཞིན་བར་དོ་ནི། །ད་ལྟའི་འཁྲུལ་སྣང་འདི་ཉིད་ཡིན། །ཏིང་ངེ་འཛིན་གྱི་བར་དོ་ནི། །ལས་སུ་མ་རུངས་བསྒོམ་དུས་ཡིན། །ཆོས་ཉིད་བར་དོ་ཞེས་བྱ་བ། །འཁྲུལ་སྣང་འགགས་ནས་ཞག་ལྔའི་བར། །རང་རིག་ཡེ་ཤེས་འོད་དུ་འཆར། །འོད་ལ་གནས་པས་བར་དོ་ཡིན། །སྲིད་པའི་བར་དོ་ཞེས་བྱ་བ། །ཆོས་ཉིད་འོད་གསལ་སྣང་བ་ཡང་། །རྟོགས་པའི་ཤེས་རབ་མ་སྐྱེས་པས། །སྔར་ནས་ཡེ་ཤེས་བག་ལ་ཞ། །སྔར་གྱི་བག་ཆགས་སྣང་བ་འཆར། །དབང་པོ་ཀུན་ཚང་ཐོགས་མེད་ལྡན། །སྲིད་པའི་ཤ་གཟུགས་སྔོན་དུ་ཤར། །རང་དང་རིགས་མཐུན་ལྷ་མིག་མཐོང་། །ལུས་དང་འདུག་ས་འཚོལ་བར་བྱེད། །ངོ་བོ་དབྱེ་བར་བཅས་པའོ། །ངེས་པའི་དོན་ལ་མི་གནས་པས། །རང་ས་མ་ཟིན་བར་དོ་ཡིན། །
ངེས་པའི་གཏན་ཚིགས་ཞེས་བྱའོ། །དཔེར་ན་འཇིག་རྟེན་དོན་གཉེར་བ། །འགྲོ་སར་མ་ཕྱིན་བར་ཞག་བཞིན། །རང་བཞིན་གནས་པའི་བར་དོ་ལ། །རྒྱུད་ལུང་ཀུན་གྱིས་ཁོག་བཀྲོལ་ཏེ། །ངོ་སྤྲོད་རྣམ་བཞིས་གཏན་དུ་དབབ། །རང་རིག་ལྟ་བའི་ཐག་བཅད་པའོ། །ཏིང་འཛིན་བར་དོ་གསལ་བར་བྱ། །ཆོས་ཉིད་བར་དོར་ཡེ་ཤེས་ངོས་བཟུང་བའོ། །གལ་ཏེ་དེ་ལྟར་མ་གྱུར་པས། །སྲིད་པ་བར་དོར་ལས་ཀྱི་འཕྲོ་མཐུད་དོ། །ཞེས་སོ། །དེའང་རང་མལ་གཞི་ལས་གཡོས་ཏེ་བར་དོ་བཞིར་སྣང་བ་མ་དག་ཅིང་འབྲས་བུར་མ་སླེབས་པས་བར་དོ་ཞེས་བྱའོ། །གཞི་ལས་རྩལ་སྣང་ལ་འཁྲུལ་པའི་སྣང་བ་ཁ་ཕྱིར་བལྟས་པའི་དུས་སུ་གདོས་བཅས་དང་བྲལ་དུས་གཞི་སྣང་ལ་རང་ས་བཟུང་བའི་ཤིན་ཏུ་གཅེས་སོ། །