ངོ་སྤྲོད་བཞིས་གཏན་ལ་དབབ་པ།
གཉིས་པ་གདམས་པའི་མཚོན་ཚུལ་བྱེ་བྲག་ཏུ་བཤད་པ་ལ་གསུམ་སྟེ། ངོ་སྤྲོད་བཞིས་གཏན་ལ་དབབ་པ། དུས་གནད་བཞིའི་ཆས་སུ་ཞུགས་པ། གྲོལ་ཚུལ་གསུམ་གྱི་རིམ་པ་བསྟན་པའོ། །༡ དང་པོ་ལ་བཞི་སྟེ། ཆོས་སྐུ་རིན་པོ་ཆེའི་སྦུབས། ལོངས་སྐུ་ལྔ་ལྡན། སྤྲུལ་སྐུ་བར་དོ། །སྐུ་གསུམ་འདུ་འབྲལ་མེད་པ་རྫོགས་ལྡན་ཆེན་པོའི་ངོ་སྤྲོད་པའོ། །དང་པོ་ལ་གཞི་ལྷུན་གྲུབ་དང་། རྟོགས་པ་མངོན་གྱུར་གཉིས་ལས། དང་པོ་ནི་གཞི་ལ་ཚང་ཚུལ་དང་། དེ་ལས་ཤར་ཚུལ་གྱི་དབང་དུ་བྱས་ནས་ཆོས་སྐུ་མན་ཤེལ་ངོ་སྤྲོད། ལོངས་སྐུ་འདྲ་འབག་ལ་ངོ་སྤྲོད། སྤྲུལ་སྐུ་འོད་ཁྱིམ་ཁ་སྦྱོར་ལ་ངོ་
སྤྲོད། སྐུ་གསུམ་འདུ་འབྲལ་མེད་པར་ཉི་མའི་སྙིང་པོ་ལ་ངོ་སྤྲོད་དོ། །འོད་ཁྱིམ་ཁ་སྦྱོར་ནི། ནང་སྙིང་གའི་རང་འོད་དང་ཕྱི་མན་ཤེལ་གྱི་འོད་ཁྱིམ་གཉིས། བར་རྒྱང་ཞགས་སུ་རྟགས་ཀྱི་འོད་ཁ་དོག་སྟེ་འོད་གསུམ་ངོ་སྤྲོད། ནང་གི་དོན་དམར་སེར་རྟགས། ཕྱིའི་འོད་དཔེའོ། །རྟོགས་པ་མངོན་གྱུར་ནི་བར་དོ་ལ་བརྩི་སྟེ་འོད་གསལ་ངོས་ཟིན་ནས་སྤྲུལ་པ་འབྱིན་པ་སྤྲུལ་སྐུར་ངོ་སྤྲོད། ལྔ་ལྡན་ཚོམ་བུར་སྣང་བས་ལོངས་སྐུ་ངོ་སྤྲོད། སྐུ་གསུམ་རང་སྣང་དུ་འདུ་འབྲལ་མེད་པར་རྫོགས་ལྡན་ཏེ་ལོངས་སྐུའོ། །རིན་པོ་ཆེའི་སྦུབས་སུ་ཕྱིན་པ་ནི་རྫོགས་ལྡན་ཆེན་པོ་ཆོས་སྐུའི་ངོ་སྤྲོད། ཡང་ན་ཆོས་ཉིད་རང་སྣང་ཤར་བ་སྤྲུལ་སྐུ། ཚོམ་བུར་སྣང་བ་ལྔ་ལྡན་ལོངས་སྐུ། གྲོལ་ནས་སྤྲུལ་པ་འབྱིན་པ་རྫོགས་ལྡན་ཏེ་འདུ་འབྲལ་མེད་པས་རིན་པོ་ཆེའི་སྦུབས་ཆོས་སྐུ་ངོ་སྤྲད་དོ། །དེ་ལྟར་བཞི་ཡང་ཆོས་ཉིད་ཐིག་ལེ་༼ཉག་གཅིག་གི༽ངོ་སྤྲོད། ལོངས་སྐུ་མ་ཧཱ་ཡོ་གའི་ངོ་སྤྲོད། སྤྲུལ་སྐུ་ལ་ཨ་ནུ་ཡོ་གའི་ངོ་སྤྲོད། འདུ་འབྲལ་མེད་པ་རྫོགས་ལྡན་རྫོགས་པ་ཆེན་པོའི་ངོ་སྤྲོད་བཞིར་བསྟན་ཏེ། སྤྲོད་ཚུལ་མན་ཤེལ་ལ་བརྟེན་ནས་ལག་ཁྲིད་ལྟར་བྱ་གསུངས། དེ་དག་ཀྱང་བཤད་རྒྱུད་ལས། ཀྱེ་གསང་བའི་བདག་པོ་ངོ་སྤྲོད་ནི། བཞིར་ཤེས་པར་བྱ། ༨༦ ངོ་སྤྲོད་བཞི་ཡི་དགོངས་པ་ཡིན། །ཞེས་སོ། །དེ་ལྟར་ངོ་འཕྲོད་པས་བར་དོ་སྔར་འདྲིས་པའི་མི་དང་འཕྲད་པ་ལྟ་བུར་གོམས་པར་བྱ་བ་གཅེས་སོ། །