གསུང་རབ་ཀྱི་དྲང་ངེས་འབྱེད་ཚུལ་མདོར་བསྡུས།

བླ་མ་ལ་ཕྱག་འཚལ་ལོ། །སྐྱོབ་པ་མཚུངས་མེད་ཐུབ་པའི་དབང་པོ་དང་། །འདྲེན་པ་མཉམ་མེད་བླ་མའི་ཞབས་པད་ལ། །སྒོ་གསུམ་གཡོ་མེད་གུས་པས་ཕྱག་བྱས་ཏེ། །དྲི་མེད་ལུང་དོན་ཅུང་ཟད་བདག་གིས་དབྱེ། །སྤྱིར་གསུང་རབ་ཀྱི་དྲང་ངེས་འབྱེད་ཚུལ་ལ། གྲུབ་མཐའ་སོ་སོའི་བཞེད་ཚུལ་མི་མཐུན་ཏེ། བྱེ་བྲག་སྨྲ་བ་རྣམས་བཀའ་རྣམས་ནི་གདུལ་བྱའི་བསམ་པའི་དབང་གིས་སྣ་ཚོགས་སུ་གསུངས་པས་དྲང་ངེས་མང་ལ། ཆོས་ཀྱི་ཕུང་པོ་ལ་སོགས་པའི་མངོན་པ་སྡེ་བདུན་གྱི་བསྟན་བཅོས་རྣམས་ངེས་དོན་ཡིན་ཞེས་འདོད། བརྗོད་བྱ་ལའང་། ཤེས་པ་སྐད་ཅིག་ཆ་མེད་དང་། གཟུང་བ་རྡུལ་ཕྲན་ཆ་མེད་བདེན་པར་ཡོད་པར་བཤད་པ་དེ་ངེས་དོན་གྱི་མདོ་ཡིན་པར་བྱེ་མདོ་གཉིས་ཀས་འདོད་ལ། རྣལ་འབྱོར་སྤྱོད་པ་པ་རྣམས་ཕྱི་དོན་ཡོད་པར་བསྟན་པའི་མདོ་རྣམས་དྲང་དོན་དང་། སྣང་བ་སེམས་སུ་གསུངས་ཤིང་མཚན་ཉིད་གསུམ་བསྟན་པའི་མདོ་རྣམས་ངེས་དོན་དུ་བཞེད། དབུ་མ་གཞན་སྟོང་པ་རྣམས། བདེ་གཤེགས་སྙིང་པོ་རྟག་བརྟན་བདེན་གྲུབ་ཏུ་སྟོན་པ་རྣམས་ངེས་དོན་དང་། བཀའ་བར་བ་དྲང་དོན་ཞེས་གསུངས་པ་ཡང་བྱུང་མོད། སངས་རྒྱས་གཉིས་པ་དཔལ་མགོན་ཀླུའི་དགོངས་པ་ལྟར། དཔལ་ལྡན་ཟླ་བའི་ཞབས་ཀྱིས། སྟོང་པ་བདེ་བར་གཤེགས་པས་བསྟན་པ་ལྟར། །ངེས་དོན་མདོ་སྡེ་དག་གི་བྱེ་བྲག་ཤེས། །གང་ལས་སེམས་ཅན་གང་ཟག་སྐྱེས་བུ་བསྟན། །ཆོས་དེ་ཐམས་ཅད་དྲང་བའི་དོན་དུ་ཤེས། ཞེས་མདོ་དྲངས་ནས་དྲང་ངེས་མཛད་པའི་རྗེས་སུ་འབྲང་བ་ཤིན་ཏུ་མང་ཞིང་། ཁོ་བོ་ཡང་འདིའི་རྗེས་སུ་འཇུག་པར་འདོད་དོ། སྐབས་དོན་སློབ་དཔོན་རིན་པོ་ཆེས་སྤྱི་རྣམ་དུ་བྱང་ཆུབ་སེམས་དཔའི་སྡེ་སྣོད་ཀྱི་མདོའི་ལུང་དྲངས་ནས། དྲང་ངེས་ཀྱི་འབྱེད་ཚུལ་བརྒྱད་ཡོད་པར་གསུངས་པའི་དང་པོ་ནི། ལམ་ལ་འཇུག་པ་དྲང་དོན་དང་། །འབྲས་བུ་ལ་འཇུག་པ་ངེས་པའི་དོན། །ཞེས་པ་འདི་ཕར་ཕྱིན་དྲུག་སོགས་ལམ་གྱི་དབྱེ་བ་སྟོན་པ་དྲང་དོན་དང་། གནས་སྐབས་ཀྱི་འབྲས་བུ་ས་བཅུ་དང་མཐར་ཐུག་གི་འབྲས་བུ་སངས་རྒྱས་ཀྱི་ཡོན་ཏན་སྟོན་པ་མདོ་སྡེ་ས་བཅུ་པ་ལྟ་བུ་ལ་ངེས་དོན་དུ་བྱས་ཀྱང་རུང་མོད་འདིར་མདོ་སྔགས་སྤྱིའི་དྲང་ངེས་འབྱེད་པའི་སྐབས་ཡིན་པས། འདྲེན་པའི་ཐེག་པ་གསུམ་པོ་དག །བཅོམ་ལྡན་ངེས་པར་གསུངས་ལགས་ན། །རྒྱུ་འབྲས་ལྷུན་གྲུབ་ཏུ་སྤྱོད་ཅིང་། །སངས་རྒྱས་གཞན་ནས་མི་ཚོལ་བའི། །ངེས་པའི་ཐེག་པ་ཅིས་མ་གསུངས། ཞེས་པའི་ལན་དུ། རྒྱུ་ལ་མོས་པ་རྒྱུ་ཆོས་ཀྱི། །འཁོར་ལོ་རབ་ཏུ་བསྐོར་བྱས་ནས། །རྡོ་རྗེ་ཐེག་པའི་ཉེ་ལམ་ཞིག །མ་འོངས་དུས་ན་འབྱུང་བར་འགྱུར། ཞེས་གསུངས་པ་ལྟར་རྒྱུ་ལམ་དུ་བྱེད་པ་ཕར་ཕྱིན་ཐེག་པ་ལྟ་བུ་དྲང་དོན་དང་། འབྲས་བུ་ལམ་དུ་བྱེད་པ་རྡོ་རྗེ་ཐེག་པ་ངེས་དོན་དུ་བྱས་ན་འཐད་པར་སེམས་ལགས། གཉིས་པ་ཀུན་རྫོབ་སྒྲུབ་བྱེད་དྲང་དོན་དང་། དོན་དམ་སྒྲུབ་བྱེད་ངེས་པའི་དོན། ཞེས་པ་ནི་ཀུན་རྫོབ་ཐབས་ཀྱི་ཆ་སྟོན་པ་རྣམས་དྲང་དོན་ཡིན་ཏེ། ལེགས་པར་དཔྱད་ན་མ་གྲུབ་ཅིང་། ཆོས་ཉིད་རྟོགས་བྱེད་ཀྱི་ཐབས་ཀྱི་ཆ་ཡིན་པའི་ཕྱིར། གནས་ལུགས་སྤྲོས་པ་དང་བྲལ་བར་གསུངས་པ་རྣམས་ངེས་དོན་ཏེ། ཐབས་ལས་བྱུང་བའི་འབྲས་བུ་ཡིན་ཞིང་དངོས་པོའི་གནས་ལུགས་ཕྱིན་ཅི་མ་ལོག་པ་རྟོགས་ཤིང་ཤེས་པའི་ཕྱིར། གསུམ་པ་ལས་ཀྱི་བྱ་བ་ལ་འཇུག་དྲང་། །ལས་དང་ཉོན་མོངས་ཟད་སྟོན་ངེས། །ཞེས་པ་ལས་རྒྱུ་འབྲས་ཡོད་པར་གསུངས་པ་དྲང་དོན་དང་། དེ་མེད་པར་གསུངས་པ་ངེས་དོན་དུ་བྱས་ནས་གང་ཟག་གཉིས་ཀྱི་ཉམས་ལེན་ལ་སྦྱོར་བར་མཛད་པའང་ཡོད་ལ། ཚིག་གི་འབྲུ་གནོན་པ་དེ་ཡང་རབ་དབྱེ་ལས། ལྟ་བ་སྟོན་པའི་ལུང་དང་བསྒོམ་པ་དང་སྤྱོད་པ་སྟོན་པའི་ལུང་རྣམས་ལུང་སྦྱོར་གྱི། གནས་སྐབས་སོ་སོར་ཤེས་དགོས་པར་གསུངས་པ་ལྟར་གང་ཟག་གཅིག་གི་ཉམས་ལེན་ལ་སྦྱོར་རྒྱུ་བྱས་ན་ལྟ་བས་སྤྱོད་བསྒོམ་ཁྱད་དུ་མི་གསོད་ཅིང་བསྒོམ་སྤྱོད་གཉིས་དམིགས་གཏད་འཛིན་ཞེན་གྱིས་མི་འཆིང་པའི་དགོས་པ་ཡོད་པར་སེམས་ལགས། བཞི་པ་ཀུན་ནས་ཉོན་མོངས་བསྟན་པ་དྲང་། རྣམ་བྱང་བསྟན་པ་ངེས་པའི་དོན་ཞེས་པ་གཟུགས་ནས་རྟེན་འབྲེལ་གྱི་བར་དང་སྦྱིན་པ་ནས་རྣམ་མཁྱེན་གྱི་བར་སྟོན་པ་ལྟ་བུའམ་ཡང་ན་རྟེན་འབྲེལ་ལུགས་འབྱུང་ལྡོག་སྟོན་པ་ལྟ་བུ་ལ་བྱས་ན། སྔ་མ་ལ་རང་རང་གི་ངོ་བོ་ཙམ་སྨོས་པས་ཆོག་ལ་ཕྱི་མ་ལ་སྲིད་པའི་རྩ་བ་མ་རིག་པ་སྤོང་བ་ལ་སྟོང་པ་ཉིད་སྟོན་དགོས་པའི་ཕྱིར་དང་འདིའི་དྲང་ངེས་འབྱེད་ཚུལ་བརྒྱད་པོ་འདིའི་གནས་སྐབས་ཀྱི་བརྗོད་ཚུལ་དང་དགག་དགོས་ཀྱི་ལྡོག་པ་མི་འདྲ་ཡང་། མཐར་ཐུག་གི་དགོངས་པ་དཔལ་ལྡན་ཟླ་བའི་བཞེད་པ་དང་མི་འགལ་བ་ཞིག་དགོས་སམ་སྙམ་ལགས་ཏེ་དེ་བཞིན་གཤེགས་པའི་གསུངས་རབ་ཐམས་ཅད་ཀྱི་དགོངས་པ་དེ་ཁོ་ན་ཉིད་ལ་འབབས་དེ་ཁོ་ན་ཉིད་ལ་གཞོལ་ཞེས་དང་། འཇིག་རྟེན་ཁམས་ནི་སྟོང་དག་ཏུ། །ང་ཡིས་མདོ་རྣམས་གང་གསུངས་པ། །ཡི་གེ་ཐ་དད་དོན་གཅིག་སྟེ། །ཡོངས་སུ་བསྒྲགས་པར་ནུས་མ་ཡིན་ཞེས་གསུངས་པའི་ཕྱིར། ངེས་དོན་ཡིན་ན་སྟོང་ཉིད་སྟོན་པས་ཁྱབ་པ་ཁས་བླངས་དགོས་སམ་སྙམ་ལགས། ལྔ་བ་འཁོར་བར་སྐྱོ་བསྐྱེད་དྲང་དོན་དང་། འཁོར་འདས་གཉིས་མེད་ངེས་པའི་དོན་ཞེས་པ་གནས་སྐབས་འཁོར་བ་ལ་སྐྱོ་བ་བསྐྱེད་བའི་ཐབས་སུ་སངས་རྒྱས་ཀྱིས་ཀྱང་ལས་ཀྱི་རྣམ་པར་སྨིན་པ་མྱོང་བར་གསུངས་པ་དང་། མི་རྟག་པ་དང་མི་གཙང་བ་ལ་སོགས་པ་བསྟན་པ་དང་དངོས་པོའི་གནས་ལུགས་སྤྲོས་པ་ཐམས་ཅད་དང་བྲལ་བར་གསུངས་པ་ལྟ་བུ་ལ་བཤད་དུ་བཏུབ་མོད་ཚིག་ཕྱི་མའི་ནུས་པ་ལ་དཔག་ན་འཁོར་འདས་ཐ་དད་དུ་སྟོན་པ་ཉན་ཐོས་ཀྱི་མདོ་སྡེ་དང་། སྲིད་ཞི་གཉིས་མེད་སྟོན་པ་ཐེག་པ་ཆེན་པོའི་སྡེ་སྣོད་ལྟ་བུ་ལགས་སམ་སྙམ། དྲུག་པ་ཚིག་འབྲུ་སྣ་ཚོགས་སྟོན་པ་དྲང་། ཟབ་ཅིང་རྟོགས་དཀའ་ངེས་པའི་དོན་ཞེས་པ་ཕར་ཕྱིན་དྲུག་པོ་ལྟ་བུ་རེ་རེ་ལའང་དབྱེ་བ་མང་པོ་མཛད་ནས་ཐབས་ཀུན་རྫོབ་གཙོ་བོར་མཛད་དེ་སྤྲོས་པའི་སྒོ་ནས་གསུངས་པ་དང་། སྟོང་ཉིད་རྟོགས་པའི་ཤེས་རབ་དང་ལྡན་པའི་ཏིང་ངེ་འཛིན་གྱི་དགོངས་སྤྱོད་བསམ་གྱིས་མི་ཁྱབ་པ་བསྟན་པ་ལྟ་བུ་ཡིན་ནམ་སྙམ་ལགས། བདུན་པ་ཚིག་མང་སེམས་ཅན་མགུ་བྱེད་དྲང་། ཚིག་ཉུང་བཟུང་བདེ་ངེས་པའི་དོན་ཞེས་པ་ཕུང་ཁམས་སྐྱེ་མཆེད་དང་དེ་ལའང་དམིགས་བཅས་དམིགས་མེད་ཐོགས་བཅས་ཐོགས་མེད་སོགས་ཀྱི་རྣམ་དབྱེ་རྒྱས་པར་ཕྱེ་ནས་ཕྱི་དོན་ཡོད་པར་གསུངས་པ་ལྟ་བུ་དང་། གང་ཟག་དབང་རྣོན་ལ་དགོངས་ནས། ཚིག་ཉུང་ངུས་གནས་ལུགས་ཀྱི་དོན་སྟོན་པར་མཛད་པ་རྣམས་སོ། །བརྒྱད་པ་བདག་སོགས་གཙོར་བཤད་དྲང་བའི་དོན། བདག་མེད་བསྟན་པ་ངེས་པའི་དོན། ཞེས་པ་བདག་འཛིན་ཅན་རྣམས་དྲང་བའི་ཕྱིར་དུ་ང་དེའི་ཚེ་དེའི་དུས་ན་རྒྱལ་བུ་འདི་ཞེས་བྱ་བར་གྱུར་ཏོ་ཞེས་དང་ལས་བྱེད་པ་པོ་དང་རྣམ་སྨིན་མྱོང་བ་པོ་ཡོད་པར་གསུངས་པ་ལྟ་བུ་དང་བདག་མེད་པའི་གནས་ལུགས་ཇི་ལྟ་བ་བཞིན་སྟོན་པ་རྣམས་སོ། །མདོར་ན་དྲང་དོན་དང་ངེས་དོན་ཞེས་པའི་གོ་བ་རྟོགས་བྱ་མཐར་ཐུག་གམ་དངོས་པོའི་ཡིན་ལུགས་དེ་ཁོ་ན་ཉིད་དུ་ངེས་ཤིང་དེ་ལས་གཞན་དུ་མི་འགྱུར་བའི་དོན་སྟོན་པ་ལ་ངེས་དོན་དང་། གནས་ལུགས་དེ་རྟོགས་པའི་ཐབས་སུ་གསུངས་པ་དངོས་བསྟན་དེ་ཆོས་ཉིད་སྟོང་པ་ཉིད་ཀྱི་དོན་ཅན་དུ་སྟོན་པ་དྲང་སྟེ་བཤད་དགོས་པའི་དོན་ལ་དྲང་དོན་ཟེར་བ་ཡིན་པས། གནས་སྐབས་ཟབ་ཁྱད་ཅུང་ཟད་ཡོད་པ་ལྟ་བུ་ལ་གོ་མི་རུང་སྙམ་ལགས་ཏེ་མགོན་པོ་བྱམས་པས། མདོ་སྡེ་རྒྱན་དུ་དགོངས་པ་བཞི་དང་། ལྡེམ་དགོངས་བཞི་གསུངས་པ། རྒྱལ་སྲས་རིན་པོ་ཆེས་འགྲེལ་བར་གསུངས་རབ་ཐམས་ཅད་འདི་བརྒྱད་ཀྱི་ནང་དུ་འདུས་པར་གསུངས་མོད་འཇམ་མགོན་ས་སྐྱ་པཎྜི་ཏ་ཆེན་པོའི་ཞལ་སྔ་ནས་བརྒྱད་པོ་དྲང་དོན་ཡིན་པར་གསུངས་ཤིང་། ཀུན་མཁྱེན་རོང་སྟོན་ཆེན་པོའང་འདི་བཞིན་བཞེད་ཅིིང་། རྗེ་བློ་བཟང་གྲགས་པས་ཀྱང་དེ་བཞིན་དུ་ལེགས་བཤད་གསེར་ཕྲེང་དུ་གསུངས་འདུག་པས་གྲུབ་མཐའ་གཞན་གྱིས་ངེས་དོན་དུ་བྱས་པ་གཞན་གྱི་དྲང་དོན་དུ་འཆད་པ་ཡོད་མོད། རང་ཉིད་ཀྱིས་ངེས་དོན་དུ་ཁས་བླངས་པ་ཕྱིས་དྲང་དོན་དུ་འགྱུར་མི་རུང་བར་སེམས་ལགས། །གཏིང་དཔག་དཀའ་བ་ཐུབ་པའི་གསུང་གི་དོན། །རྨོངས་པ་བདག་གིས་དབྱེ་བར་མི་ནུས་མོད། །བླ་མའི་བཀའ་བཞིན་ཕྱོགས་ཙམ་སྨྲས་པ་ལ། །ནོངས་པ་མཆིས་ན་སྙིང་ནས་མཐོལ་ཞིང་བཤགས། །ཅུང་ཟད་ལེགས་པར་བཤད་པའི་ཆ་མཆིས་ན། །དགེ་བ་དེ་ཡིས་ཚེ་རབས་ཐམས་ཅད་དུ། །དཔལ་མགོན་བླ་མའི་བྲན་དུ་བདག་སྐྱེས་ནས། །བཀའ་བཞིན་བསྒྲུབ་པའི་སྐལ་བ་ཡོད་པར་ཤོག །ཅེས་པ་ཆོས་སྨྲ་བའི་གཟུགས་བརྙན་ཀུན༵་དག༵འ་རྒྱལ༵་མཚ༵ན་གྱིས་གུས་པས་བྲིས་པའོ། །དགེའོ། །སརྦ་མངྒ་ལཾ།