སློབ་དཔོན་སྒེག་རྡོར།
༈ དེ་ལ་སློབ་དཔོན་སྒེག་རྡོར་ནི། ཨོ་རྒྱན་གྱི་གནས་སུ་རབ་ཏུ་བྱུང་ཞིང་གྲུབ་མཐའ་རྣམ་རིག་དབུ་མ་པ། རིག་པའི་གནས་ཐམས་ཅད་ལ་མཁས་པའི་མཐར་ཕྱིན། ཨོ་རྒྱན་གྱི་གླིང་ཕྲན་མ་དྷཱི་མ་ཞེས་བྱ་བར་འཇམ་དཔལ་གྱི་སྒྲུབ་པ་མཛད་པས་བྲིས་སྐུའི་ཞལ་ལས་འོད་ཟེར་ཆེན་པོ་བྱུང་སྟེ་གླིང་དེ་ཡུན་རིང་དུ་སྣང་བར་བྱས། དུས་དེར་ལོག་པར་ལྟ་བ་འགའ་ཞིག་ལ་ནང་པའི་པཎྜི་ཏའི་དབང་པོ་ལྔ་སྒྲུབ་རྫས་ལ་དགོས་པ་བྱུང་། སློབ་དཔོན་བཀྲོང་དུ་འོངས་
པས་གླང་པོ་དང་རྟ་དང་བུ་མོ་ཁྱེའུ་སོགས་སྣ་ཚོགས་ཀྱི་གཟུགས་སུ་བསྒྱུར་བས་ངོ་མ་ཤེས་པར་ཕྱིར་ལོག་པས། སྣ་ཚོགས་གཟུགས་ཅན་ཞེས་པའི་མཚན་གསོལ། དེ་ལ་སོགས་ཏེ་ངོ་མཚར་བའི་མཛད་པ་མཐའ་ཡས། མཐར་འཇའ་ལུས་རྡོ་རྗེའི་སྐུ་བརྙེས་སོ། །དེའི་རྗེས་རྒྱལ་པོ་དྷརྨ་པཱ་ལས་རྒྱལ་སྲིད་ལོ་དྲུག་ཅུ་རྩ་བཞི་བྱས་སྐབས་སུ། ཡེ་ཤེས་ཞབས་བླ་མར་བསྟེན། གསང་འདུས་དང་ཕར་ཕྱིན་ཤེས་པ་པཎྜི་ཏ་ཀུན་གྱི་གྲལ་མགོར་འཇོག་པ་སོགས་དེ་གཉིས་ལ་གུས་པ་ཆེར་མཛད། རྒྱལ་པོ་འདིས་སྤྱིར་ཆོས་གཞི་ལྔ་བཅུ་ཙམ་བཙུགས་པ་ལས། ཤེར་ཕྱིན་འཆད་པའི་ཆོས་གཞི་སུམ་ཅུ་སོ་ལྔ་ཡོད། དཔལ་བི་ཀྲ་མ་ལ་ཤྲཱི་ལའི་གཙུག་ལག་ཁང་བཞེངས་ཏེ། དེ་ཡང་མ་ག་དྷའི་བྱང་ངོས་ཆུ་བོ་གངྒའི་འགྲམ་རི་དེའུ་ཞིག་གི་རྩེ་ལ་ཡོད་ཅིང་དབུས་སུ་བྱང་ཆུབ་ཆེན་པོའི་སྐུ་ཚད་ཀྱི་ལྷ་ཁང་། མཐའ་སྐོར་དུ་གསང་སྔགས་ནང་གི་ལྷ་ཁང་ཆུང་བ་ལྔ་བཅུ་ང་གསུམ། ལྷ་ཁང་དཀྱུས་མ་ལྔ་བཅུ་ང་བཞི་སྟེ་ལྷ་ཁང་བརྒྱ་རྩ་བརྒྱད་ཡོད་པ་ཕྱི་ལྕགས་རིས་བསྐོར་བ་བཞེངས། པཎྜི་ཏ་བརྒྱ་རྩ་བརྒྱད། གཏོར་མའི་སློབ་དཔོན། རབ་གནས་སློབ་དཔོན། སྦྱིན་བསྲེག་སློབ་དཔོན། བྱི་བ་བསྲུང་བ། ཕུག་རོན་བསྲུང་བ་དང་། ལྷ་འབངས་ཀྱི་གཉེར་བྱེད་པ་བརྒྱ་དང་བཅུ་བཞི་ལ་ཟས་གོས་འཚོ་བའི་ཁྱད་པར་འགྲན་དུ་མེད་པར་སྦྱར། ཟླ་དུས་སུ་ཆོས་ཉན་པ་པོ་དང་བཅས་པ་ཐམས་ཅད་ལ་རྟག་རེས་འཁོར་གྱི་སྟོན་མོ་དང་འབུལ་བ་བཟང་པོ་རེ་ཡང་མཛད། རགས་རྩིས་ཙམ་དུ་བྱས་ན་རྒྱལ་པོ་འདི་དང་བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་དུས་མཉམ་དུ་བཤད། འདིའི་དུས་སུ་སངས་རྒྱས་གསང་བ་དང་། སངས་རྒྱས་ཞི་བ་དང་། ཁ་ཆེའི་ཡུལ་དུ་སློབ་དཔོན་པདྨ་འབྱུང་གནས་དབྱངས་དང་། རྟོག་གེ་པ་ཆོས་འབྱུང་བྱིན་དང་། འདུལ་འཛིན་སེང་གེའི་གདོང་པ་ཅན་སོགས་བྱུང་།