འཁོར་ཚུལ་གྱི་དབང་གིས་ས་ལ་དུས་བཞི།
བཞི་པ་དེ་ལྟར་སྤྱད་པའི་ལག་རྗེས་ལ། འཁོར་ཚུལ་གྱི་དབང་གིས་ས་ལ་དུས་བཞི་དང་། མཁའ་ལ་དུས་སྦྱོར་འཆར་རྩིས། རང་རང་གི་རྐང་པའི་དབང་གིས་འཆར་ནུབ་བྱེད་ཚུལ། བསྐོར་ཕྱོགས་ཀྱི་དབང་གིས་ཉི་ཟླ་དང་སྒྲ་གཅན་འཕྲད་ཚུལ། རང་རང་གི་ལོངས་སྤྱོད་ལ་སྤྱད་པའི་དབང་གིས་ངེས་པ་འཕོ་སྡུད་སྐྱེ་ཚུལ་ལོ། །དང་པོ་ལའང་། དུས་བཞི་གནས་ཚུལ་དང་འཁོར་ཚུལ་གཉིས། དང་པོ་ནི་གཡོན་སྐོར་ཏེ། ལྷོའི་དུམ་བུ་གསུམ་ན་དཔྱིད་ཡོད་པའི་དུས་སུ། ཤར་ན་དབྱར། བྱང་ན་སྟོན། ནུབ་ན་དགུན་གྱི་དུས་ཡོད་པའི་ཕྱིར་ཏེ། ལྷོ་གླིང་དབུས་མ་ན་དཔྱིད་འབྲིང་ཡོད་པའི་དུས་སུ། ལྷོ་གླིང་ཤར་མར་དཔྱིད་ཐ། ཤར་གླིང་ནུབ་མར་དབྱར་ར། ཤར་གླིང་དབུས་མར་དབྱར་འབྲིང་སོགས་རིམ་པར་གཡོན་སྐོར་དུ་གནས་པའི་ཕྱིར། གཉིས་པ་ནི། གཡས་སྐོར་ཏེ། དུམ་བུ་རེ་རེ་ལ་ལྟོས་ནས་དཔྱིད་རྗེས་སུ་དབྱར། དབྱར་རྗེས་སུ་སྟོན། སྟོན་རྗེས་སུ་དགུན། དགུན་རྗེས་སུ་དཔྱིད་རིམ་ཅན་དུ་འབྱུང་བའི་ཕྱིར་ཏེ། ལྷོ་གླིང་དབུས་མའི་དཔྱིད་འབྲིང་དེ་ལྷོ་གླིང་ནུབ་མར་འཕོ་ཤིང་། ལྷོ་གླིང་ཤར་མའི་དཔྱིད་ཐ་ལྷོ་གླིང་དབུས་མ། ཤར་གླིང་ནུབ་མའི་དབྱར་ར་ལྷོ་གླིང་ཤར་མར་འཕོ་བ་སོགས། རིམ་པར་གཡས་སྐོར་དུ་འཁོར་ནས་འགྲོ་བའི་ཕྱིར། དེས་ན་དུམ་བུ་གང་དང་གང་ན། དབྱར་ཉི་རིང་བ་མཐར་ཐུག་ཡོད་པའི་ཚེ། དེ་ནས་བགྲངས་པའི་བདུན་པ་ན་དགུན་ཉི་ཐུང་བ་མཐར་ཐུག །གང་ན་དཔྱིད་ཉིན་མཚན་མཉམ་པ་ཡོད་པའི་ཚེ། དེ་ནས་བགྲངས་པའི་བདུན་པ་ན་སྟོན་ཉིན་མཚན་མཉམ་པ་ཡོད་དེ། རང་གར་ཡོད་དང་དེ་ནས་གཞལ་བའི་དུམ་བུ་བདུན་པ་གཉིས་སོ་སོ་ཕན་ཚུན་ལྟོས་ནས་གཅིག་ན་ཡོད་པའི་དོ་ཟླ་དེ་ཅིག་ཤོས་ན་ཡོད་པའི་ཕྱིར། དེ་ལྟར་ཡང་འགྲེལ་ཆེན་ལས། ཕན་ཚུན་ལྟོས་པ་ལས་གང་གི་ཕྱིར་སའི་
དུམ་བུ་དང་པོ་ལས་རི་ཞེས་པ་སའི་དུམ་བུ་བདུན་པ་ལ་སྟེ། ལྷུན་པོའི་ལྷོ་ནས་བྱང་དང་བྱང་ནས་ལྷོར་སའི་དུམ་བུ་བདུན་པ་ལ་ཉིན་མཚན་མཉམ་པར་འགྱུར་རོ། །ཞེས་སོ། །བྱེ་བྲག་ཏུ་སྦྱར་ན། ལྷོ་གླིང་དབུས་མར་ལུག་ཁྱིམ་དུ་དཔྱིད་མཉམ་ཡོད་པའི་ཞག་དེ་ལ། བྱང་གླིང་དབུས་མར་སྟོན་མཉམ་པ་དང་། དེ་བཞིན་སྲང་ཁྱིམ་དུ་ལྷོ་བྱང་གི་དུམ་བུར་སྟོན་དཔྱིད་མཉམ་པ་སྔ་མ་ལས་ལྡོག་པ་སོགས་སྦྱར་བ་ལས། ཁྱད་པར་རང་ཅག་རྣམས་གནས་པའི་ས་འདིར། ཉ་དང་བུ་མོར་མཉམ་གཉིས་དང་། འཁྲིག་གཞུ་ལ་བགྲོད་མཐའ་གཉིས་འཕོག་ཅིང་། དེ་ཡང་ཁྱིམ་ཞག་བརྒྱད་པ་ལ་འགྲིག་པའི་ཕྱིར། དུམ་བུ་བཅུ་གཉིས་པོ་རེ་རེར་རིམ་བཞིན་ཉིན་ཞག་རེ་ལ་ལྡོག་མཉམ་གྱི་ཚིག་རེ་འཕོག་པའི་དུམ་བུ་སུམ་ཅུ་རེ་ཡོད་པ་ལས། ས་འདི་ལྷོ་གླིང་དབུས་མའི་ཚངས་ཐིག་ནས་ཤར་ཕྱོགས་སུ་དུམ་ཕྲན་ཉེར་གཉིས་བགྲངས་པའི་ཉེར་གསུམ་པ་ཡིན་པར་བདེ་བླག་ཏུ་རྟོགས་པར་འགྱུར་རོ། །