སློབ་དཔོན་ཨ་བྷ་ཡ་ཀ་ར་སོགས།

[Full Size]

༈ དེ་ནས་ལོ་མང་ཞིག་སོང་བ་དང་སློབ་དཔོན་ཨ་བྷ་ཡ་ཀ་ར་དང་། ཁ་ཆེའི་ཡུལ་དུ་པཎྚི་ཏ་ཆེན་པོ་ཤཱཀྱ་ཤྲི་བྷ་དྲ་དང་། ཆོས་འབྱུང་ཞི་བ་དང་། བུདྡྷ་ཤྲི་དང་། བཛྲ་ཤྲི་ལ་སོགས་པའི་པཎ་གྲུབ་རྣམས་དང་། ཨ་བྷ་ཡ་ཀ་ར་དང་། ནཱ་རོ་པའི་སློབ་རྒྱུད་ལ་སོགས་པ་རྣམས་ཀྱིས་བསྟན་པ་བསྐྱངས་བར་མཛད་དོ། །དེ་ནས་ལོ་མང་ཙམ་སོང་བ་ན་མུ་སྟེགས་པ་འཕེལ་ཆེ་ཞིང་སྟག་གཟིག་དང་ཀླ་ཀློའི་གྲུབ་མཐའ་འཛིན་པ་ཡང་མང་དུ་བྱུང་བས་རྡོ་རྗེ་གདན་དུ་ཐེག་ཆེན་གྱི་གྲྭ་མ་ཚུགས། ཨོ་ཏནྟ་པུ་རི་དང་བི་ཀྲ་མ་ལ་ཤྲི་ལར་ཡང་རྒྱལ་པོས་རྫོང་གི་རྣམ་པ་ཅུང་ཟད་བྱས་ཏེ་དམག་གིས་བསྲུང་བ་བྱུང་། དེ་ནས་ལོ་འགའ་ཞིག་འདས་པ་ན་གངྒ་དང་ཡ་མུ་ནའི་བར་གྱི་ཡུལ་ཨནྟར་བྷི་དིའི་ཡུལ་དུ་རུཥྐའི་རྒྱལ་པོ་ཟླ་བ་ཞེས་བྱ་བ་བྱུང་། དགེ་སློང་འགའ་རེས་རྒྱལ་པོའི་ཕོ་ཉ་བྱས་པས་རྐྱེན་བླངས་ཏེ། ཡུལ་གཞན་དང་གཞན་ན་གནས་པའི་རྒྱལ་ཕྲན་མང་པོ་ཕྱོགས་གཅིག་ཏུ་བསྡུས་ཏེ། མ་ག་དྷའི་ཡུལ་ཐམས་ཅད་བཅོམ་ཨོ་ཏནྟ་པུ་རིའི་རབ་ཏུ་བྱུང་བ་མང་པོ་ཞིག་བསད། དེ་དང་བི་ཀྲ་མ་ལ་གཉིས་ཀ་བཤིག ཤུལ་

[Full Size]

དུ་སྟག་གཟིག་གིས་རྫོང་བཅས། པཎྜི་ཏ་ཤཱཀྱ་ཤྲི་ཤར་ཕྱོགས་སུ་བྱོན། དེར་ལོ་གསུམ་བཞུགས་ནས་བོད་དུ་བྱོན་པ་ཡིན། པཎ་ཆུང་བརྒྱ་ཙམ་ནུབ་ཕྱོགས་ཀྱི་ཡུལ་དུ་བྱོན། སྟོབས་བཅུ་མངའ་བའི་སློབ་དཔོན་བཛྲ་ཤྲི་དང་པཎ་ཆུང་མང་པོ་ལྷོ་ཕྱོགས་ཐག་རིང་པོའི་སར་བྲོས། མ་ག་དྷར་བསྟན་པ་ནུབ་པ་ལྟར་གྱུར་ཏོ། །དེ་སྐབས་གྲུབ་པ་ཐོབ་པ་དང་། རྫུ་འཕྲུལ་སྟོན་ནུས་པ་མང་ཞིག་ཡོད་ཀྱང་། སེམས་ཅན་སྤྱི་མཐུན་གྱི་ལས་ལ་བཟློག་ཐབས་མ་བྱུང་བར་གྲགས། དེ་རྗེས་བྷཾ་ག་ལའི་ཡུལ་དུ་ཙ་ག་ལ་ར་ཙ་ཞེས་བྱ་བ་ཤུགས་ཆེན་པོ་གཅིག་བྱུང་། དེས་ཏུ་རུཥྐ་ཐམས་ཅད་ལ་དབང་བསྒྱུར། དེ་དང་པོ་བྲམ་ཟེ་ལ་དད་པ་ཞིག་ཡིན་ཡང་། བཙུན་མོ་སངས་རྒྱས་ལ་དད་པས་བློ་བསྒྱུར་ཏེ། དེས་རྡོ་རྗེ་གདན་དུ་མཆོད་པ་ཆེན་པོ་བྱས། ལྷ་ཁང་ཐམས་ཅད་ལ་ཞིག་གསོས་དང་། གནྡྷོ་ཆེན་པོ་དགུ་ཐོག་ཡོད་པའི་ཐོག་བཞི་བར་སྐབས་ཏུ་རུཀྵས་བཤིག་པ་ལེགས་པར་གསོས། པཎྜི་ཏ་ཤ་རི་པུ་ཏྲ་བཞུགས་ཏེ་ཆོས་གཞི་བཙུགས། ན་ལེནྡྲར་ཡང་མཆོད་པ་ཆེན་པོ་བྱས། འོན་ཀྱང་ཆོས་གཞི་རྒྱ་ཆེན་པོ་ནི་མ་ཚུགས། རྒྱལ་པོ་འདི་ཚེ་རིང་པོ་བྱུང་བར་གྲགས། འདི་འདས་ནས་ལོ་བརྒྱ་དང་དྲུག་ཅུ་ཙམ་སོང་བ་ནས་མ་གྷ་དྷའི་ཡུལ་དུ་ཆོས་ལ་སྤྱོད་པ་མ་བྱུང་བར་གྲགས་སོ། །ཆོས་འབྱུང་བསྟན་པའི་ཉི་མ་ལས། རྒྱ་གར་འཕགས་པའི་ཡུལ་གྱི་སྐབས་ཏེ་དང་པོའོ།། །།