རབས་དྲུག་པ། འཁོར་བའི་གནས་ལ་སྐྱོ་བར་བསྟན་པ།
དེ་དག་རང་གི་འདོད་པ་སྒྲུབ་པ་དང་། །གཞན་ཕྱོགས་བཀག་པས་སེམས་བདེ་རྙེད་གྱུར་ཅིང་། །ཕྲག་དོག་གོམས་པས་བདེན་དུ་ཆུག་ན་ཡང་། །རང་ཕྱོགས་འཁོར་གྱིས་ལོག་སྒྲུབ་སྐྱོ་བས་ཉོན། །ལྷག་བསམ་སྙིང་པོའི་བྱང་ཆུབ་སེམས་བསྐྱེད་ནས། །ཉེ་རིང་མེད་པའི་གདུལ་བྱ་སྣ་ཚོགས་ལ། །ཟོལ་མེད་ཕན་པ་སྒྲུབ་ཀྱང་མགུ་དུས་མེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དང་པོ་ལྷར་མཐོང་གསར་ངས་ལྷག་པར་ཆེ། །བར་དུ་མིར་མཐོང་དཔོན་སློབ་འགྲོགས་ཤེས་ཙམ། །ཕྱི་མར་དགྲར་མཐོང་གནོད་པ་སྣ་ཚོགས་སྐྱེལ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཀུན་ཏུ་ཆོས་ཀྱི་དྲིན་ནི་མཐའ་ཡས་ཤིང་། །ལེགས་འདོམས་དུས་སུ་ཕན་པས་བསྐྱངས་བྱས་ཀྱང་། །ལྷག་པར་སེམས་དཀྲུགས་ཉེ་འཁོར་སུན་རྣམས་(༢༠)འབྱིན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ཤེས་མེད་ལ་ཁ་ཏས་མི་ཆུན་ཞིང་། །ཕྲག་དོག་ཚིག་རྩུབ་འཐབ་རྩོད་འབའ་ཞིག་བྱེད། །རང་སྐྱོན་མི་སེམས་ཅི་བྱས་སྡང་བར་མཐོང་། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་རྨོངས་བློ་གྲོས་ཆུང་ཞིང་དགའ་དཀའ་ལ། །ལེགས་ཀུན་ཉེས་པ་གཅིག་གིས་འགོག་པར་བྱེད། །སྐྱོན་མང་ཡོན་ཏན་མེད་ལ་ཉེས་ཀུན་གཞི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །འཕྲལ་གང་ཞི་ལ་ཕུགས་ན་མ་རུངས་པ། །ཁ་ལ་བཟང་ཆེ་ལག་ལེན་ངན་པ་བྱེད། །ཆོས་དང་རྒྱུད་འཛོལ་གཡོ་སྒྱུ་ཁྲམ་པའི་རིགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཉོན་མོངས་འདོད་སྲེད་ཆེ་ཞིང་གཉེན་པོ་མེད། །རང་བཞིན་ཀུན་སྤྱོད་ངན་པ་ཁ་ཁྱེར་མཐོ། །གཞན་གྱི་མཚང་འབྲུ་རང་སྐྱོན་མི་སྤོང་བ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ལེགས་ཉེས་ཤེས་ཀྱང་ཉེས་ལ་ནན་གྱིས་འཇུག །སྤང་བླང་ཤེས་ཀྱང་རྒྱུ་འབྲས་ཁྱད་དུ་གསོད། །དབང་པོ་རྣོ་ཡང་གཟུ་བོར་མི་གནས་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རྐྱེན་ཁར་ཡང་ལ་འགྲོགས་ཁྱེར་མི་མཁས་ཤིང་། །གཞན་ལས་བྱེད་སྐྱེན་བསྒྱུར་ཁ་ཤིན་ཏུ་ཡང་། །ཟུང་མེད་ཕྱོགས་མི་ཐུབ་ལ་གཞུང་ངན་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ལ་དགོས་ན་ཁ་གསག་ངོ་བསྟོད་མཁས། །གཞན་ལ་དགོས་ན་ཐབས་ཀྱིས་ཕྱིར་ཕྱིར་འབྱོལ། །བྱ་བྱེད་གང་ལའང་གཡོ་ཟོལ་ཕུལ་དུ་ཕྱིན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དོན་མེད་འབྲེལ་ལ་དགའ་ཞིང་གསར་ངས་ཆེ། །ཐམས་ཅད་ཀུན་ཏུ་ཁྱབ་ཅིང་བྱ་བྱེད་མཐོ། །འཇམ་འཇམ་འདྲ་ལ་ཕྱི་ནང་ཟེར་མཆུ་མང་། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གཞན་སྣང་བསྒྱུར་མཁས་བཟང་བཟང་འདྲ་ན་ཡང་། །འཇམ་པོས་ཕུག་པར་སྐྱོ་སྔོགས་ཕྲ་མ་བྱེད། །ཕྱི་ནང་འཛོལ་ཡང་ཇོ་བཟང་མ་ཞིག་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གི་རང་མཐོང་གཞན་ལ་ཕྲག་དོག་བྱེད། །དཔོན་དད་ཆུང་ལ་དྲིན་ཆུང་འདྲེན་ལ་དགའ། །ལག་དྲིན་ཁས་གསོད་ང་བདེན་ཡུས་ཀྱིས་བརྣངས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །འདོད་པ་ཆུང་ལ་ཚིག་གིས་བསྟོད་ན་ཡང་། །ཕོངས་པར་གྱུར་ལ་ནན་གྱིས་བརྙས་པ་བྱེད། །ངོས་སུ་བསྟོད་ལ་ལྐོག་ཏུ་གཤེ་སྐུར་འདེབས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གི་བྱ་བྱེད་འདུན་མ་མི་ཤེས་པར། །གཞན་ལ་གྲོས་འདེབས་ཁ་ཏ་ཡས་ཀྱིས་འབུབས། །ཕྲ་མ་སྔ་བཙན་ཕྱོགས་གཏམ་བདེན་པར་འཛིན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཡུན་རིང་འགྲོགས་ཤིང་ཆོས་ཀྱིས་འབྲེལ་ན་ཡང་། །གཡོན་ཅན་སྡིག་པའི་གྲོགས་ཀྱི་ཕྱོགས་བཟུང་ནས། །འདི་ཕྱིའི་ཉེས་དམིགས་མི་སེམས་དམ་ཉམས་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་ཀྱིས་འབྲེལ་ཞིང་ཅི་འགྲུབ་ཕན་བཏགས་ཀྱང་། །ལྐོག་ནས་གནོད་སྐྱེལ་འཕྱར་ཀ་རྟག་ཏུ་གཏོང་། །དངོས་སུ་ཕྱེ་གཏོར་ཟུངས་མེད་ཁ་ཞེ་ཅན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །འགྲོ་བར་ཆས་ན་བཟང་པོའི་ཚིག་གིས་འཆིང་། །བསྡད་པར་གྱུར་ན་ངན་པའི་གནོད་འཚེས་སྐྲོད། །ཟེར་སྤྱོད་འགལ་ལ་རང་བཞིན་མ་ངེས་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བསྡད་པའི་ཚེ་ན་འགྲོ་བའི་བློ་སྣ་འདོན། །ཕྱིན་པར་གྱུར་ན་བསྡད་པས་ལེགས་ཞེས་ཟེར། །ཅི་(༢༡)ཟེར་འདི་ཟེར་རང་བཞིན་ཆ་མེད་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གཞན་དུ་འགྲོ་ན་དེ་ལ་ཤོལ་འདེབས་བྱེད། །སྡོད་རྩིས་བྱས་ན་བྱ་བྱེད་མང་ཞེས་ཟེར། །འཐད་འོས་བསྒྲུབས་ཀྱང་དེ་ལ་ཞད་རེ་འདོགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་གཙོར་བཞག་ནས་བྱང་ལམ་སྒྲུབ་ན་ཡང་། །འཇིག་རྟེན་མ་ཤེས་བྱ་བྱེད་ནོར་ཞེས་ཟེར། །ཅུང་ཟད་བསྟུན་ན་མཐུན་འཇུག་ཆེ་ཞེས་སྨྲ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཅུང་ཟད་བཟུང་ན་ཆགས་ཞེན་ཆེ་ཞེས་སྨྲ། །བཏང་བར་གྱུར་ན་མ་ཤེས་རྩིང་ཞེས་སྒྲོགས། །གང་ལྟར་བྱས་ཀྱང་ཡིན་པའི་སྐབས་མེད་པས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཕན་ཚུན་སྙོམས་པར་ལེགས་པར་བསྐྱང་བྱས་ཀྱང་། །ལན་གཅིག་རྐྱེན་གྱིས་ཐམས་ཅད་ཆུ་རུ་འབོ། །བཟང་པོའི་དྲིན་ལན་ཐམས་ཅད་ཉེས་ཀྱིས་འཇལ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །མཉམ་གཉིས་ཞལ་ལྕེ་སྙོམས་པར་ཕྱེས་ན་ཡང་། །གཞན་ཕྱོགས་ཕུལ་ནས་རྟག་ཏུ་འཁང་ར་རྡུང་། །ཕམ་བློ་བླངས་ཀྱང་ཕན་དུས་མེད་པ་ཡི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གི་ལེ་ལན་སྐྱོན་ལ་མི་རྟོག་པར། །གཞན་གྱི་ཚིག་ལ་ཀོ་ལོང་ཟུར་མགོ་སྡོམ། །ཁོང་ཁྲོ་ཚིག་རྩུབ་ལུགས་དང་མི་མཐུན་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བྱས་ན་དགའ་བ་ཅུང་ཟད་མི་བྱེད་པར། །བཞག་ན་དགའ་ཡི་ངན་སྤྱོད་སྣ་ཚོགས་བྱེད། །རང་གིས་མ་ལན་གཏམ་ངན་ལུང་པ་འགེངས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་སྐྱོན་མི་རྟོག་གཞན་སྐྱོན་འབའ་ཞིག་གླེང་། །གཅིག་སོང་རྗེས་ལ་དེ་ལ་འཕྱར་ཀ་གཏོང་། །མི་སྙན་ཟེར་མཆུ་ངོ་དགའི་སྐྱེལ་བསུ་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གང་དུ་གནས་ཀྱང་གཏམ་ངན་གཟེང་རྩའི་གཞི། །མང་པོའི་ནང་དུ་འཐབ་རྩོད་འཁྲུག་ལོང་སྐྱེད། །གཅིག་པུར་བསྡད་ཀྱང་ཁོང་གཏུམ་མི་འཆམ་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཡ་རབས་དམ་པའི་སྤྱོད་དང་མི་ལྡན་ཞིང་། །མ་རབས་སྨྱོན་སྤྱོད་ཐོ་ཅོ་སྐྱུར་འགོང་ཅན། །གཞན་སེམས་དཀྲུགས་ལ་དུག་ལྔ་སུ་བས་རགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ལ་མི་བཟོད་གཞན་ལ་ཕོད་ཁམས་ཆེ། །འགྱུར་ལྡོག་མང་ཞིང་མི་བརྟན་ཁམས་འདུས་ཆེ། །འགྲོ་ན་མཆོང་ཞིང་ལབ་ན་ཀུ་ཅོ་ཆེ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཕར་ལ་བསླབ་ན་ཚུར་ལ་དེ་བས་ཐུ། །རང་དཔེ་མི་ལེན་གཞན་ལ་རྩོལ་ཕོད་ཆེ། །གླང་པོ་གཅིག་ཚུགས་བཞག་པས་མཆོག་ཅེས་ཟེར། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་བཞིན་བླུན་ལ་འདོད་སྣ་སུ་བས་ཆེ། །ཟེར་མཆུ་མང་ལ་ཀོ་ལོང་གཞན་བས་དམ། །བྱས་པ་མེད་པར་རེ་བ་གཞན་ལས་ཆེ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དུས་སྐབས་མི་ཤེས་བབ་ཅོལ་གཏམ་སྣ་མང་། །ཚིག་ཚོགས་ཆེ་ལ་སྤྱི་བརྟོལ་མཚུངས་པ་མེད། །བརྗོད་པ་མི་གཟོ་ཡིད་དང་མི་མཐུན་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་བཞིན་གྱོང་ལ་འགྲོགས་པ་མི་བདེ་ཞིང་། །མཆོག་ཏུ་མགུ་དཀའ་འཁང་པ་ཤིན་ཏུ་སྐྱེན། །སྤྱོད་ལམ་མི་གཟོབ་རང་ག་ཆིག་ཚུགས་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དད་མེད་ཀུན་ཏུ་འཁྲུག་ཅིང་འགྲོགས་མི་བདེ། །སྒོ་གསུམ་མ་(༢༢)གུས་རྟག་ཏུ་སུན་རྣམས་འབྱིན། །ངོར་འཐབ་ལྐོག་སྨྲ་དོན་མེད་འཕྱར་ཀ་གཏོང་། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་འཁྲུག་གཞན་སྨོད་དུག་ལྔ་སུ་བས་རགས། །ཁོང་ཁྲོ་འཁོན་ངན་ཕྲག་དོག་གདུག་རྩུབ་ཅན། །ཕར་ཟེར་ཚུར་ཟེར་ཕྱི་ནང་གཟིང་རྩ་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བསླབ་ན་ཚུར་འཐབ་མི་ཉན་གཅུ་གྱོང་ཆེ། །རྒྱུ་འབྲས་མི་འཛེམ་རྫུན་དང་དབྱེན་ལ་དགའ། །སྨྲ་མཆུ་མང་ཞིང་མི་སྙན་སྐྱེལ་བསུ་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གཅིག་ལ་བཤད་ན་གཅིག་ཏུ་མི་དགའ་ཞིང་། །གཅིག་ལ་བྱིན་ན་གཅིག་ལ་ཕྲོགས་པ་ཙམ། །སྤྱི་སྙོམས་བསྐྱངས་ཀྱང་ཕྱོགས་འཕུལ་འཕྱར་ཀ་གཏོང་། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །སུ་དང་འགྲོགས་ཀྱང་དེ་དང་མི་འཆམ་ཞིང་། །སྐྱོན་རྣམས་རྟོག་ཅིང་མི་སྙན་འབའ་ཞིག་བརྗོད། །ཐམས་ཅད་དགྲར་ལེན་མཐུན་པ་གཅིག་མེད་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གོ་བར་གྱུར་ཀྱང་རྫུན་དང་གཡོ་སྒྱུ་བྱེད། །འགྲོགས་ཚད་བསླུ་ཞིང་མི་ཚེ་ངན་ལ་སྐྱེལ། །སྟོང་ཟོབ་ཕྱི་ཕྱིར་ཕོ་བཟོ་ཕུན་སུམ་ཚོགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཟ་ན་རང་ལ་བྱེད་ན་གཞན་གྱི་ཕྱོགས། །སྐྱིད་ན་གྲོགས་པོ་སྟོང་གྱོད་ཁ་འཕྱོར་ཅན། །གེགས་ཤིག་བྱུང་ན་བཙལ་གྱིས་མི་རྙེད་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་དང་ཟང་ཟིང་ལེགས་པ་བྱུང་བའི་ཚེ། །འཁོར་ཚོགས་མ་ངེས་གྲལ་རིང་ཆེ་ན་ཡང་། །དགོས་པའི་དུས་ན་ཉུང་ལ་མི་སྟོངས་པ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བཤེས་མེད་གློ་བུར་ལྷགས་དང་ཕོངས་རྣམས་ལ། །ཅུང་ཟད་མཐོང་བས་ཕན་པ་སྒྲུབ་ན་ཡང་། །ཕྲག་དོག་དབང་གིས་གསར་ངས་ཆེ་ཞེས་སྒྲོག །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རྟག་ཏུ་བཟང་སེམས་ཕན་པ་ཅི་བྱས་ཀྱང་། །བསྐྱངས་ཀྱིས་མི་ལང་ལྷ་ཁང་རྙིང་པ་བཞིན། །ཉིན་འབར་མཚན་འབར་ལ་ལས་སྲོད་ཐུབ་གཏོང་། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ལེགས་པའི་ཁ་ཏས་ཟོལ་མའི་ཕྱེ་གཏོར་འགམ། །ཕུགས་ཀྱི་ཤ་ཙས་འཕྲལ་གྱི་བློ་བྲིད་དགའ། །ཟབ་མོའི་ཆོས་ལས་ཡོ་བྱད་དྲིན་གཟོ་ཆེ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཁ་རོག་བསྡད་ན་ཞལ་ཏ་ཞུ་ཞེས་ཟེར། །ཕན་པར་བསླབ་ན་བཀའ་བཀྱོན་གནང་བར་གོ། །ཤ་ཚ་གྲོས་འདེབས་མཆོག་ཏུ་སྡང་བས་མཐོང་། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཕན་འདོགས་ཞུགས་ན་སྤྲོས་ལ་དགའ་ཞེས་ཟེར། །གཅིག་པུར་འདུག་ན་གདུལ་བྱ་སྐྱོང་དགོས་ཟེར། །ཇི་ལྟར་བསམས་ཀྱང་དེ་ལ་ཞད་རེ་འདོགས། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བཤད་པའི་ཚེ་ན་སྒོམ་པ་ལེགས་ཞེས་ཟེར། །སྒོམ་པའི་ཚེ་ན་ཡང་ཡང་ཤོད་ཅེས་ཟེར། །ལེགས་པར་བཤད་ན་ཉན་ཡང་མི་ནུས་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །མདོ་རྒྱུད་བསྟན་བཅོས་ལུང་རིགས་མན་ངག་གཞུང་། །ཆོས་དང་ཆོས་མིན་ཕྱེ་ནས་བཤད་པ་ན། །སྡང་བར་མཐོང་ནས་སླར་ལ་ལོག་པར་ལྟ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དབང་པོའི་ཚོད་ལ་གང་ཕན་ཆོས་བཤད་ཀྱང་། །དེ་ཉིད་མི་སྒྲུབ་གཞན་ལ་ཡར་བལྟས་ནས། །ཟབ་ཟབ་མོ་ཞིག་ཉན་རྗེས་གོ་རྟོགས་མེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཇི་ཙམ་(༢༣)བཤད་ཀྱང་གོ་བའི་དུས་མེད་ལ། །ལག་ཁྲིད་བསླབ་ཀྱང་ཅུང་ཟད་ཤེས་དུས་མེད། །གཅིག་ལ་ཨ་འཐས་དྲག་ཏུ་མི་འགྲོ་བ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་གིས་མ་ཐོས་གོང་དུ་བཤད་ན་དགའ། །ཐོས་རྗེས་གཞན་ལ་ཕྲག་དོག་གཞིར་བཞག་ནས། །ཡང་ཡང་བཤད་དྲགས་བསྒོམ་ན་ལེགས་ཞེས་ཟེར། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དོན་གཉེར་ཆོས་དེ་ཐོབ་པར་མ་གྱུར་ཚེ། །ཟོལ་མའི་དམ་བཅའ་ངོ་སྲུང་སུ་བས་མཁས། །འདོད་དོན་གྲུབ་ནས་གར་འགྲོ་ལ་དོར་བ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཟབ་མོའི་ཁྲིད་ལ་ཞུགས་པའི་མི་རྣམས་ཀྱང་། །བསྡད་ལོང་མེད་པར་ཆོས་རྣམས་རྫོགས་སུ་རེ། །ཀུན་ཏུ་འཁྱམས་ཤིང་ཆོས་མཐུན་སྔ་བསགས་ཞུ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །རང་ཉིད་དམ་ཆོས་གཞུང་བཞིན་མི་སྒྲུབ་པར། །ཟབ་མོའི་ཆོས་རྣམས་དུས་གཅིག་ཐོབ་ཏུ་རེ། །ཆོས་ལ་བརྩེགས་ཞེས་སླར་ལ་འཕྱར་ཀ་གཏོང་། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཟབ་མོའི་ཆོས་ལ་གསང་བ་མི་ཐུབ་ཅིང་། །ཐོས་པའི་མོད་ལ་གསང་བ་གཞན་ལ་སྒྲོགས། །བསླབ་ན་ཁོང་ཁྲོ་འཁོན་ངན་ཚིག་རྩུབ་འབྱིན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཇི་ཙམ་ཐོས་བཞིན་རང་རྒྱུད་གྱོང་དུ་འགྲོ། །ཅུང་ཟད་ཤེས་ཏེ་གཉེན་པོར་མ་སོང་ཞིང་། །གཞན་ལ་ཁྱད་གསོད་ཚིག་རྩུབ་དུག་མདའ་འཕེན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །སྙིང་པོའི་དོན་ལ་ཅུང་ཟད་མི་སྒྲུབ་པར། །འཁོར་ལ་ཕར་བརྡལ་གཞན་ལ་བཤད་པར་རིངས། །ཆོས་བརྒྱད་དོན་གཉེར་ཚེ་འདིའི་མཛེས་ཆོས་ཙམ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཡིན་མིན་བཤད་ཀྱང་བདག་ལྟ་མཆོག་ཏུ་འཛིན། །ཇི་ཙམ་བཤད་ཀྱང་དོན་ལ་སྐྱེད་མེད་པའི། །དབང་པོ་གསལ་ཡང་རྨོངས་པ་གཅིག་ཚུགས་མཁན། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཆོས་ལ་འདུས་ཀྱང་ཆོས་མིན་འབའ་ཞིག་བྱེད། །ཕན་ཚུན་ཚོགས་ཀྱང་ལོང་གཏམ་འབའ་ཞིག་གླེང་། །དབེན་པར་གནས་ཀྱང་རྣམ་གཡེང་འབའ་ཞིག་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །གཅིག་པུར་འདུག་ནས་སྒྲུབ་པར་ཁས་འཆེ་ཡང་། །སོས་དལ་རེས་འགའ་གཉིད་དང་སྙོམ་ལས་ཅན། །རང་རྫུན་རང་ལ་གཏོང་བས་ཉིན་མཚན་འདའ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །སྒྲུབ་ལ་མི་བརྩོན་ཀུན་ཏུ་འཁྱམས་ལ་དགའ། །དར་རེ་གཞི་ལ་ཅུང་ཟད་བསྡད་ན་ཡང་། །རང་གནས་མི་ཚུགས་གཞན་གྱི་གནས་རྣམས་ཉུལ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ནང་དུ་མཚམས་བཅད་ཐང་གི་གང་ལ་ཟ། །ཀུན་ཏུ་འཁྱམས་ཀྱང་སྒྲུབ་ཚུགས་མ་ཞིག་པ། །དམ་བཅའི་ཁྲལ་འཇལ་ས་མཐའི་མི་ངན་འདྲ། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །བླ་མ་མཆོག་ལས་ཉེ་འབྲེལ་གཅེས་པར་འཛིན། །མཆེད་གྲོགས་མཆོག་ལས་སྡིག་པའི་གྲོགས་པོ་འདེམས། །དམ་ཆོས་མཆོག་ལས་ནོར་རྫས་སྙིང་པོར་བྱེད། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །ཇི་ཙམ་བསྟན་ཀྱང་དོན་དུ་མི་གཉེར་བ། །ལེགས་པར་བཤད་ཀྱང་ཅུང་ཟད་མི་ཉན་པ། །སྙིང་པོའི་དོན་ལ་ནམ་ཡང་མི་སྒྲུབ་པའི། །དུས་ངན་འཁོར་ལ་བསམ་ཞིང་སྐྱོ་བ་འཕེལ། །དེ་དག་ལ་(༢༤)སོགས་འཁོར་གྱི་ཉེས་པ་ཀུན། །ཇི་ཙམ་བརྗོད་ཀྱང་ཟད་པའི་དུས་མེད་ལ། །མེ་ཡི་འོབས་བཞིན་བཟོད་པའི་བླག་མེད་པས། །གཅིག་པུར་དབེན་པར་སྒྲུབ་པའི་དུས་ལ་བབས། །ཇི་ལྟར་བསྐྱངས་ཀྱང་མགུ་བར་མི་ནུས་ལ། །གང་ལྟར་བསྟན་ཀྱང་ཕན་པའི་གོ་སྐབས་ཆུང་། །འདི་ལྟར་བཟོད་ཀྱང་སྙིང་པོ་ཅི་འདུག་ཀྱེ། །དེ་ལྟར་བསམས་ནས་མྱུར་དུ་འགྲོ་བར་རིགས། །རང་ལའང་མི་ཕན་གཞན་ལའང་མི་ཕན་པའི། །འཇིག་རྟེན་གཟུགས་བརྙན་འདི་འདྲ་རྣམ་བཤིག་ནས། །གཅིག་པུར་ཞི་བ་དབེན་པའི་ནགས་ཁྲོད་དུ། །ཟབ་མོའི་དོན་གྱི་དེ་ཉིད་སྒྲུབ་པར་རིགས། །ད་རེས་ཚེ་འདིར་སྲིད་མཚོ་མ་བརྒལ་ན། །གཏན་དུ་འཁོར་བའི་གནས་ལས་ཐར་ཐབས་མེད། །དེ་བས་གཅིག་པུར་དབེན་པའི་ནགས་ཁྲོད་དུ། །ཚེ་གང་ཞི་བའི་ཏིང་འཛིན་སྒྲུབ་པར་རིགས། །དུས་ལ་མངོན་པར་སྐྱོ་བའི་རབས་ལས། འཁོར་བའི་གནས་ལ་སྐྱོ་བར་བསྟན་པ་སྟེ་རབས་དྲུག་པའོ།། །།
དེ་ལྟར་སྣ་ཚོགས་མངོན་པར་སྐྱོ་བ་ཅན། །རང་གཞན་ལས་ངན་བསགས་པའི་འཁྲུལ་སྣང་སྟེ། །གང་དུ་བསམས་ཀྱང་སྙིང་པོ་འགའ་མེད་པས། །སེམས་ཤིག་ཡོད་ན་འདི་ལ་སྐྱོ་བར་རིགས། །སྔོན་དུས་བསྐལ་པ་བཟང་པོ་ནུབ་གྱུར་ཅིང་། །ད་དུས་ངན་པའི་རང་བཞིན་འདི་ཤར་བས། །ཕྱོགས་དུས་གང་ནའང་བདེ་བའི་གོ་སྐབས་མེད། །ཀུན་ཏུ་འཁྲུག་ཅིང་ནད་དང་མུ་གེས་ཉེན། །སྣ་ཚོགས་སྡུག་བསྔལ་མང་ལྡན་འདི་དག་ལས། །ཤེས་ལྡན་རྣམས་ཀྱིས་ཐར་པ་སྒྲུབ་པར་རིགས། །མདོར་ན་དིང་སང་ལྔ་བརྒྱ་ཐ་མ་འདིར། །དུས་ངན་འཁོར་དང་འཇིག་རྟེན་སྣང་བ་དང་། །གདུལ་དཀའི་སེམས་ཅན་སྣ་ཚོགས་སྐྱོ་བ་ཅན། །ཡིད་ཆད་མཆི་མ་འཁྲུག་པའི་ཚུལ་ལ་སོམས། །ཕྱི་རུ་བསམས་ཀྱང་སྣང་བའི་ཡུལ་ལ་སྐྱོ། །ཡུལ་རྣམས་མི་རྟག་རྨི་ལམ་སྒྱུ་མའི་ཚུལ། །ནང་དུ་བསམས་ཀྱང་འཛིན་པའི་སེམས་ལ་སྐྱོ། །སེམས་འདི་མི་སྲུན་དགེ་གང་བརྩོན་པར་དཀའ། །བར་དུ་བསམས་ཀྱང་སྣ་ཚོགས་རྐྱེན་ལ་སྐྱོ། །ཚེ་སྲོག་མི་རྟག་རྩྭ་ཁའི་ཟིལ་པ་འདྲ། །གང་དུ་བསམས་ཀྱང་སྐྱོ་བའི་རང་བཞིན་ཏེ། །སྐྱེས་པ་ཤི་ཞིང་འདུས་པ་རྣམས་ཀྱང་འབྲལ། །བསགས་པ་འཛད་ཅིང་འབྱོར་པ་མཐའ་རྒུད་པས། །འཁོར་བའི་གནས་ལས་ད་རེས་འདའ་བར་མཛོད། །མི་ཐེག་ཁུར་དང་མི་ལྕོགས་བྱ་བ་དང་། །དུས་ངན་དཔོན་དང་ཤུལ་ཁའི་མགྲོན་འགྱེད་དང་། །དུས་ལ་མ་བབ་གཞན་དོན་བྱེད་པ་རྣམས། །བཟང་སེམས་ཡོད་ཀྱང་ཕན་པ་འགྲུབ་པར་དཀའ། །དེ་བས་གཅིག་པུར་ཞི་བའི་ནགས་ཁྲོད་དུ། །སྙིང་པོའི་དེ་ཉིད་སྒོམ་པའི་དུས་ལ་བབས། །ནགས་ནི་སྔོན་གྱི་རྒྱལ་བ་རྣམས་ཀྱིས་བསྔགས། །མི་སྲུན་མེད་ཅིང་འཚེ་བ་ཀུན་དང་བྲལ། །བྱ་དང་རི་དྭགས་འགྲོགས་ན་བདེ་བས་གང་། །སྨན་ཤིང་མེ་ཏོག་ལྗོན་པའི་ཚོགས་(༢༥)མང་ཞིང་། །ཕུག་དང་བྲག་རིའི་ཁང་བཟང་རྒྱ་ཆེར་ལྡན། །ཆུ་གཙང་དལ་འབབ་ངང་མོས་བརྟེན་པ་དེར། །གེ་སར་དཔུང་བསྐྱེད་འཛུམ་པའི་མདངས་གསལ་ཞིང་། །དུས་རླུང་སེར་བུ་བདེ་བའི་ངད་དང་ལྡན། །ཙནྡན་བསིལ་བའི་ཁ་ཡི་དབུགས་བསྐྱོད་པའི། །དྲི་ཞིམ་སྤོས་བསུང་ངད་པའི་རང་བཞིན་དང་། །རྣམ་བཀྲ་ཡལ་གའི་ལག་རྩེད་དུད་པ་ཡིས། །གདུང་སྐྱོབ་བསིལ་གྲིབ་བྱེད་ལ་འགྲན་པ་བཞིན། །རྐང་དྲུག་ཚོགས་རྣམས་སྙན་པའི་གླུ་ལེན་ཅིང་། །གདངས་སྙན་བྱ་ཚོགས་མང་པོ་གར་བྱེད་པ། །ལྷ་ཡུལ་དབང་པོའི་དགའ་ཚལ་སོན་པའི་གནས། །མཐོ་རིས་བུ་མོ་དགའ་བས་རྩེ་བ་བཞིན། །ཉོན་མོངས་གདུང་སེལ་ངང་གིས་ཆོས་འཕེལ་བ། །དུས་བཞིར་མི་རྟག་སྐྱོ་བའི་རང་བཞིན་དང་། །ཏིང་འཛིན་ཞི་བ་ཡོན་ཏན་མཆོག་ཚོགས་ཅན། །དག་པའི་ཞིང་གི་ནགས་ཚལ་དམ་པ་བཞིན། །དེ་འདྲའི་གནས་ནི་ཐར་པའི་སྐྱེད་མོས་ཚལ། །དབེན་ཞིང་ཉམས་དགའ་རིག་པ་འཛིན་པ་དེར། །བདག་བློ་ཞི་བའི་ཏིང་འཛིན་མཐར་ཕྱིན་ནས། །སྲོག་དང་བཅས་པའི་ལུས་འདི་གཡོ་བར་ཤོག །དུས་ལ་མངོན་པར་སྐྱོ་བའི་རབས་འདི་ནི། །རྣམ་གྲོལ་ཡོན་ཏན་མཆོག་གི་རྗེས་འགྲོ་བ། །ཐར་ལམ་བྱང་ཆུབ་སྙིང་པོར་ཞུགས་པ་དེས། །སྙིང་ནས་ནགས་སུ་འགྲོ་སླད་སྨྲས་པ་ཡིན། །དགེ་བ་དེ་ཡིས་བདག་དང་འགྲོ་བ་ཀུན། །ཉོན་མོངས་འཁོར་བའི་གྲོང་ལས་ཡིད་བྱུང་ནས། །ཞི་བ་རབ་བཟང་ཐར་པའི་སྐྱེད་ཚལ་དུ། །ཐམས་ཅད་ཕྱམ་གཅིག་སངས་རྒྱས་འགྲུབ་པར་ཤོག །ཚུལ་འདི་བློ་གྲོས་རྫིང་བུ་བཟང་པོའི་ནང་། །དད་བརྒྱའི་པདྨོ་ངེས་འབྱུང་འདབ་སྟོང་ཅན། །ཏིང་འཛིན་སྦྲང་རྩིའི་སྙིང་པོ་འཛིན་པས་སྦྱར། །དད་ལྡན་རྐང་དྲུག་ཚོགས་རྣམས་དགའ་བར་མཛོད། །དུས་ལ་མངོན་པར་སྐྱོ་བའི་རབས་ཞེས་བྱ་བ། བདེ་བར་གཤེགས་པའི་གསུང་རབ་ལས་མང་དུ་ཐོས་པའི་ནོར་གྱིས་ཕྱུག་ཅིང་། ཟབ་མོའི་དེ་ཁོ་ན་ཉིད་ཀྱི་དོན་ལ་ཡང་དག་འཇོག་གི་བསམ་གཏན་པ་ཀུན་མཁྱེན་ངག་གི་དབང་པོས། གངས་རི་ཐོད་དཀར་གྱི་མགུལ། འོད་ཟེར་སྤྲིན་གྱི་སྐྱེད་མོས་ཚལ་གྱི་ནང་། ཀུན་ཏུ་བཟང་པོའི་ཁང་བཟང་དམ་པ། ཟླ་བ་ཆུ་ཤེལ་གྱིས་འཚེར་བའི་གནས་སུ་སྦྱར་བ་འདི་རེ་ཞིག་རྫོགས་སོ།། །།
ཕྱོགས་དུས་ཀུན་ཏུ་བཀྲ་ཤིས་དང་བདེ་ལེགས་ཀྱི་ཆར་བསྐལ་པ་རྫོགས་ལྡན་གྱི་དུས་ཉེ་བར་གནས་པ་བཞིན་དུ་འབབ་པས་བསམ་རྒུའི་རེ་བ་མཐའ་དག་འགྲུབ་པར་གྱུར་ཅིག །མངྒ་ལཾ།། །།