བདེ་མཆོག་གི་སྨོན་ལམ།བདེ་མཆོག་གི་སྨོན་ལམ་བཞུགས། ན་མོ་གུ་རུ་ཤྲཱི་ཙཀྲ་སམྦ་ར་ཡེ། བདག་ནི་དེང་བཟུང་ཚེ་རབས་ཐམས་ཅད་དུ། །བླ་མ་ཧེ་རུ་ཀ་དང་མཁའ་སྤྱོད་མའི། །ནམ་ཡང་འབྲལ་མེད་བརྩེ་བའི་རྗེས་བཟུང་ཞིང་། །མཁའ་སྤྱོད་དག་པའི་ཞིང་དུ་ཁྲིད་དུ་གསོལ། །ཞིང་མཆོག་ཁྱད་པར་ཅན་དེར་ཕྱིན་མ་ཐག །ས་གསུམ་ཕོ་ཉའི་འདུ་བ་ལེགས་ཐོབ་ནས། །ཟག་མེད་བདེ་ཆེན་རྒྱུན་མི་ཆད་པ་ཡི། །ཁ་སྦྱོར་བདུན་ལྡན་ཟུང་འཇུག་སྐུ་ཐོབ་ཤོག །བླ་མེད་འཁོར་ལོ་སྡོམ་པའི་མ་རྒྱུད་འདི། །བརྩོན་པ་དྲག་པོའི་ཡི་དམ་མཆོག་བཟུང་ནས། །བསྐྱེད་རྫོགས་རིམ་གཉིས་བསྒོམ་པའི་རྣལ་འབྱོར་རྣམས། །མཁའ་སྤྱོད་དག་པའི་ཞིང་དུ་ཁྲིད་དུ་གསོལ། །དེར་ནི་ཞིང་སྔགས་ལྷན་སྐྱེས་གྲོགས་འདུས་ཤིང་། །འགྲོ་རྣམས་བདེ་བ་མཆོག་གི་སར་འགོད་ཕྱིར། །དག་དང་མ་དག་ཞིང་ཁམས་རབ་འབྱམས་སུ། །རྫུ་འཕྲུལ་བཀོད་པ་རབ་འབྱམས་སྟོན་པར་ཤོག །རང་གི་ལམ་མཆོག་འདི་ལ་བརྩོན་པའི་མཐུས། །རིང་ནས་དྲིན་ཀྱིས་བསྐྱངས་པའི་ཕ་མ་རྣམས། །རིང་བོར་མི་ཐོག་ཁྱབ་བདག་ཧེ་རུ་ཀའི། །གོ་འཕང་མཆོག་དེ་ཚེ་འདིར་མངོན་གྱུར་ཤོག །ཅེས་བདེ་མཆོག་གི་སྨོན་ལམ་འདི་ནི་ཐུགས་རྗེ་དཔལ་གྱིས་བསྐུལ་ངོར། བསྭེ་སྤྲུལ་མིང་བས་བྲིས་པའོ།། །།སརྦ་མངྒ་ལམ། |