གཉིས་པ། རྒྱས་པའི་ལས་བསྟན་པ།
གཉིས་པ་རྒྱས་པའི་ལས་བསྟན་པཿ ཚེ་དང་བསོད་ནམས་རྒྱས་འདོད་ནཿ སྐྱབས་འགྲོ་སེམས་བསྐྱེད་སྟོང་པའི་ངངཿ ཧཱུྃ་ལས་རང་ཉིད་ཤཱཀྱ་སེངཿ སེར་གསལ་གཙོ་འཁོར་སྔ་མ་བཞིནཿ ཕྱག་གཉིས་རིན་ཆེན་ཀཱ་པ་ལཿ ཐུགས་ཀར་པད་ཉིའི་དབུས་སུ་ཧཱུྃཿ ཕྱོགས་བཞིར་ཧ་རི་ནི་ས་སེརཿ འོད་འཕྲོས་འཁོར་འདས་ཐམས་ཅད་ཀྱིཿ ཚེ་དང་བསོད་ནམས་ནོར་རྣམས་བསྡུསཿ བདག་ལ་དངོས་གྲུབ་ཐོབ་པར་བསམཿ སྣང་སྲིད་བླ་མ་མཁའ་འགྲོ་རྣམསཿ བདག་ལ་བྱིན་རླབས་དངོས་གྲུབ་སྟེརཿ ཧཱུྃ་ཕཊ་གདངས་སྐད་བརྗོད་པར་བསམཿ ཧཱུྃ་གླུ་བླངས་རྗེས་སྔགས་འདི་བཟླསཿ ཨཱ་རི་ནི་ས་ཧ་ཨཱཿཧཱུྃཿ རྗེས་ལ་ཐམས་ཅད་བླ་མ་ལཿ དེ་ཡང་ནམ་མཁའི་ངང་བཞག་བསྔོཿ ཚེ་དང་བསོད་ནམས་འབྱོར་པ་འཁོརཿ ཅི་བསམ་ཡིད་བཞིན་ལྷུན་གྱིས་གྲུབཿ ཤེས་རབ་རྒྱས་པར་འདོད་པ་ཡིསཿ སྐྱབས་འགྲོ་སེམས་བསྐྱེད་སྟོང་པའི་ངངཿ ཧཱུྃ་ལས་བློ་ལྡན་མཆོག་སྲེད་ནིཿ དམར་སེར་གཙོ་འཁོར་སྔར་བཞིན་ལཿ ཕྱག་ན་གླེགས་བམ་ཀ་པཱ་ལཿ ཐུགས་ཀར་པད་ཉི་ཧཱུྃ་གི་མཐརཿ ཧ་རི་ནི་ས་དམར་སེར་ནིཿ སྒྲོན་མེ་འབར་བའི་འོད་ཟེར་གྱིཿ ལུས་ནང་ཁེངས་པས་གཏི་མུག་གིཿ མུན་པ་ཀུན་སངས་ཤེལ་སྒོང་འདྲཿ འོད་འཕྲོས་འགྲོ་བའི་གཏི་མུག་བསལཿ སྣང་སྲིད་བླ་མ་མཁའ་འགྲོར་བསམཿ ཀུན་གྱི་འཆད་རྩོད་རྩོམ་པ་དངཿ འཛིན་བཟང་ཚེ་དང་གཟི་བརྗིད་སྡུདཿ སྙིང་གའི་ཡི་གེ་ལྔ་ལ་ཐིམཿ ཤེས་རབ་ཆེན་པོ་ཐོབ་པར་འགྱུརཿ ཚེ་དང་ཤེས་རབ་བདུད་རྩི་ཡིསཿ རང་གི་ལུས་ཁེངས་བདེ་བར་བསམཿ ཡང་ཡང་སྤྲོ་བསྡུ་དེ་བཞིན་བསྒོམཿ རླུང་བཟུང་མཉམ་པར་གཞག་པར་བྱཿ དེ་རྗེས་སྤྲོ་བསྡུ་སྔར་བཞིན་ལཿ ཧཱུྃ་གླུ་བླང་ཞིང་མ་ཡེངས་བསྒོམཿ རྗེས་ལ་རིག་སྔགས་འདི་ཡང་བཟླསཿ ཨཱ་རི་ནི་ས་ཧ་ཨཱཿཧཱུྃཿ དེ་རྗེས་སྔར་བཞིན་སྤྱོད་པ་ཡིསཿ ཤེས་རབ་འཕེལ་བའི་རྟགས་རྣམས་འབྱུངཿ ཉི་ཤུ་གཅིག་གིས་སྐལ་ལྡན་པརཿ འགྲུབ་འགྱུར་འདི་ལ་ཐེ་ཚོམ་མེདཿ