[༢༦] གནས་རྙིང་པ་ཀུན་དགའ་བདེ་ལེགས།
དེའི་མཁན་བུ་གནས་རྙིང་པ་ཀུན་དགའ་བདེ་ལེགས་ནི། སྔོན་སློབ་དཔོན་ཆེན་པོ་པདྨ་སམྦྷ་བའི་དངོས་སློབ་རྒྱ་འཇམ་དཔལ་གསང་བའི་གདུང་རབས་བརྒྱད་ཅུ་རྩ་བརྒྱད་ཀྱི་བར་ཐུགས་རྗེ་ཆེན་པོས་བྱིན་གྱིས་བརླབས་པའི་གདུང་རིམ་པར་བྱོན་པ་ལས་ཡབ་རིན་ཆེན་གྱི་སྲས་སུ་ཉང་སྟོད་དུ་འཁྲུངས། པཎ་ཆེན་དགེ་འདུན་གྲུབ་ལས་རབ་ཏུ་བྱུང་ཞིང་བསྙེན་པར་རྫོགས་ཤིང་མཚན་ཀུན་དགའ་བདེ་ལེགས་རིན་ཆེན་དཔལ་བཟང་པོ་བསྩལ། མཁན་པོའི་དྲུང་ལས་གཞུང་ལུགས་གདམས་པ་དང་བཅས་པ་ལ་མཁས་པར་སྦྱངས། འབྲས་སྤུངས་དང་འོལ་དགའ་སོགས་སུ་ཕེབས། ཉང་སྟོད་ཕྱོགས་སུ་བསྟན་འགྲོའི་དོན་མཛད་ནས་སྐུ་གཤེགས་སོ། །