འབྲས་བུ་སྐུ་དང་ཡེ་ཤེས་ཐོབ་ཚུལ་གོ་དོན་སྤྱིར་བསྟན་པ།

[Full Size]

[3] གསུམ་པ་འབྲས་བུ་སྐུ་དང་ཡེ་ཤེས་ཐོབ་ཚུལ་གོ་དོན་སྤྱིར་བསྟན་པ། ས་ལམ་ཇི་ལྟར་རྫོགས་ཚུལ། སྐུ་གསུམ་གྱི་རྣམ་བཞག་མདོ་ཙམ་བསྟན་པ་དང་གསུམ་ལས། དང་པོ་ནི། འབྲས་བུ་ཞེས་པའི་ཐ་སྙད་གང་ལ་བཏགས་ཤེ་ན། གཞི་དུས་སུ་སྦྱང་བྱ་བདེ་གཤེགས་སྙིང་པོ་ལ་སྒྲིབ་བྱེད་གློ་བུར་བའི་དྲི་མའི་ཚོགས་གང་ཞིག་ལམ་དུས་བསྐྱེད་རྫོགས་ཁྱད་པར་བའི་ཐབས་ཟབ་མོ་དག་གིས་སྦྱངས་པ་ལས། འབྲས་བུའི་དུས་སུ་གཞི་དེ་ཉིད་ལ་གནས་པའི་སྐུ་དང་ཡེ་ཤེས་ཀྱི་ཡོན་ཏན་རྣམས་ཇེ་གསལ་དུ་སོང་ནས། དྲི་མ་མཐའ་དག་དང་བྲལ་བའི་གནས་སྐབས་དེར་ཡོན་ཏན་ཐམས་ཅད་ཀྱང་རྫོགས་པར་འགྱུར་བ་སྟེ། དཔལ་མགོན་ཀླུས་ཆོས་
དབྱིངས་བསྟོད་པ་ལས། གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱངས་པ་བྱས་པ་ལས། །དག་པ་དེ་ཉིད་མྱ་ངན་འདས། །ཆོས་ཀྱི་སྐུ་ཡང་དེ་ཉིད་དོ། །ཞེས་དང་། ཇི་ལྟར་འོ་མ་རྣམ་སྦྱངས་པས། །མར་གྱི་སྙིང་པོ་དྲི་མེད་འགྱུར། །དེ་བཞིན་ཉོན་མོངས་རྣམས་སྦྱངས་པས། །ཆོས་དབྱིངས་ཤིན་ཏུ་དྲི་མེད་འགྱུར། །ཞེས་གསུངས་པ་ལྟར་རོ། །འོ་ན་ངོ་བོ་ཉིད་མེད་པར་སྨྲ་བ་གང་ཞིག་རྣམ་པ་ཐམས་ཅད་མཁྱེན་པ་ཉིད་ཀྱང་ངོ་བོ་ཉིད་ཀྱིས་མེད་པར་འདོད་པ་འདི་དང་མི་འགལ་ལམ་ཞེ་ན་སྐྱོན་མེད་དེ། དེ་ནི་བདག་ཏུ་ལྟ་བ་ངན་པ་བཟློག་པའི་ཆེད་དང་། མཚན་འཛིན་གྱི་སྤྲོས་པ་འགོག་པའི་ཕྱིར་བསྟན་པ་ཡིན་ལ། འདི་ནི་གནས་ལུགས་ཀྱི་དོན་བསྒོམ་པ་ཉམས་མྱོང་གིས་གཏན་ལ་དབབ་པར་བསྟན་པ་ཡིན་པས། དེ་གཉིས་གནས་སྐབས་གཙོ་ཆེ་ཆུང་གི་དབྱེ་བ་ཙམ་ལས་འགལ་བ་ཅན་དུ་མི་བསམ་སྟེ། སངས་རྒྱས་ཀྱིས་འགལ་བ་ཅན་གསུངས་མི་སྲིད་པས་སོ། །དེ་བས་ན་འཁོར་ལོ་ཐ་མའི་དགོངས་པ་དང་རང་གི་གདམས་པའི་དོན་ཕྱོགས་གཅིག་ཏུ་འབྲེལ་བ་སྤྱིའི་དོན་ཤེས་དགོས་སོ། །