༩ ཝ་ཞྭ།
ཝ་ཞྭ་ནི་ཝ་ལྤགས་སྐྱ་བཤུས་བརྒྱབ་ནས། མ་དྲས་པར་གོན་པ་དང་། ཡང་ན། ཝ་ལྤགས་དྲས་ཏེ་ཞྭ་འདབས་ཡར་བརྫིས་ཏེ་གྱོན། བཟོ་དབྱིབས་ཀྱི་ཐད་ཕོ་མོའི་ཞྭ་གཉིས་ཀར། ཡུལ་ལུང་སོ་སོ་མི་འདྲ་བ་འགའ་ཤས་དང་། གོན་སྟངས་ཡང་མི་འདྲ་བ་འགར་འདུག ཡང་ལ་ལས་ཝ་ཞྭ་འདི་བཙན་པོའི་སྐབས་སུ། ཁྲིམས་ཡིག་ཏུ། སྡར་མ་ལ་ཝ་ཞྭས་མ་སྨད་ན། །དཔའ་བོ་དང་སྡར་མའི་ཤན་མི་འབྱེད། །ཅེས་པ་ལྟར། སྡར་མ་ལ་དམའ་འབེབས་བྱེད་དུ་བསྐྱོན་པ་ཞིག་ཡིན་སྣང་ཡང་། གང་ལྟར་ཕྱིས་སུ་ཝ་མོའི་གྲྭ་ཁ་འདི་མཛེས་པའི་ཆ་ནས། འཕྱོར་ཞྭ་ཞིག་ཏུ་ངོས་འཛིན་པར་བཤད་དོ། །