ཟབ་དོན་སྙིང་པོ་ཞེས་བྱ་བ།༄༅༔ ཟབ་དོན་སྙིང་པོ་ཞེས་བྱ་བ་བཞུགས་སོཿ ཤོག་སེར་སྐོརཿ ༄༅༔ གམཱགྲོ།མཿ ཟབ་དོན་སྙིང་པོ་ཞེས་བྱ་བཿ དཔལ་དུས་ངེས་པའི་ལྷ་ལ་ཕྱག་འཚལ་ལོཿ རྣལ་འབྱོར་འབྲས་བུ་ཚེ་(༨༡)གཅིག་ངེས་པའི་ལུངཿ སྙིང་པོའི་དོན་འདི་ཀུན་གྱིས་མ་རྟོགས་ཤིངཿ དྲི་མེད་འོད་གསལ་དེ་ཉིད་མཐོང་བྱའི་ཕྱིརཿ ཡེ་ཤེས་འོད་ཀྱི་སྣང་བ་བསྟན་པར་བྱཿ འདི་ལ་གསུམ་སྟེཿ མ་དག་པ་སྤྲུལ་པ་སྐུའི་ཞིང་སྣངཿ དག་པ་ལོངས་སྤྱོད་རྫོགས་པའི་སྐུའི་ཞིང་སྣངཿ ཤིན་ཏུ་རྣམ་པར་དག་པ་ཆོས་སྐུའི་ཞིང་སྣང་ངོཿ དང་པོ་ལ་གསུམ་ལསཿ ཞིང་སྣང་ངོས་གཟུང་བ་ནིཿ རྡོས་བཅས་སྒྱུ་ལུས་ཀྱི་ཕུང་པོ་ལཿ རིག་པ་བརྟེན་པ་ཚུན་ཆད་དེཿ ངོ་བོ་མ་དག་པ་གཏི་མུགཿ རང་བཞིན་མ་དག་པ་ཕྱི་ཡུལ་སྣང་དངཿ ནང་སྒྱུ་ལུསཿ ཐུགས་རྗེ་མ་དག་པས་གཟུང་འཛིན་གཉིས་སྣང་གི་རྟོག་པའོཿ དེས་ལས་བསགས་པས་འཁོར་བའི་འཁྲུལ་སྣངཿ སྡུག་བསྔལ་འཁོར་བའི་ལས་བྱེད་དོཿ གཉིས་པ་ངོ་སྤྲད་པ་ནིཿ ད་ལྟ་མ་དག་པ་སྤྲུལ་པའི་ལུས་ལཿ ལོངས་སྐུ་དང་ཆོས་སྐུ་ཇི་ལྟར་ཡོད་ནཿ དཔེཿ དོནཿ རྟགས་གསུམ་ལསཿ དཔེ་མཚན་མོ་སྤྲིན་དང་བྲལ་བའི་ཟླ་བ་ཉ་བར་རྒྱུ་སྐར་གྱིས་བསྐོར་བ་ལྟ་བུ་སྟེཿ དོན་ཙིཏྟ་རིན་པོ་ཆེའི་དབུསཿ འོད་རྩ་ཤེལ་གྱི་ཁང་པ་ནཿ རིག་པའི་ངོ་བོ་སྟོངཿ རང་བཞིན་གསལཿ ཐུགས་རྗེ་རིག་པའི་སྙིང་པོ་ཅནཿ འོད་ལྔའི་གདངས་དང་བཅས་པའི་ཟེར་གདངས་ལུས་མགོ་མཇུག་གི་རྩ་ཕྲན་རྣམས་ནི་སྐར་མ་ལྟར་ཐིག་ལེ་ཐིག་ཕྲན་དུ་གནས་པའོཿ རྟགས་ནི་མུན་སྲོས་མཚམས་སུཿ མིག་གཉིས་དྲག་ཏུ་མནན་ནས་བལྟས་པས་སྟེང་འོག་ཕྱོགས་མཚམས་ཐམས་ཅད་ཐིག་ལེ་ཐིག་ཕྲན་དུ་སྣང་ངོཿ གསུམ་པ་ཉམས་སུ་བླང་བ་ལ་གསུམ་ལསཿ ངོ་བོའི་བླང་ཚུལ་ནིཿ ནམ་མཁའ་སྤྲིན་དང་བྲལ་བ་ལ་རིག་པ་གཏད་ནསཿ མིག་མ་འགུལ་བར་བལྟས་པསཿ སྟོང་གསལ་སྤྲོས་པ་དང་བྲལ་བའི་ཡེ་ཤེསཿ ཤེས་རབ་རང་བྱུང་གི་སྒྲོན་མ་ཇི་ལྟར་མཉམ་པར་གཞག་པའི་བར་ལ་གནས་སོཿ དེ་ཉིད་ཉིན་མཚན་མེད་པར་ཉམས་སུ་བླང་ངོཿ ཀ་དག་གི་ངང་ལ་ད་ལྟ་གནས་པའོཿ རང་བཞིན་གྱིས་བླང་ཚུལ་ལཿ ཉིན་མོ་ལྟ་སྟངས་གང་རུང་གིས་འོད་གསལ་བལྟ་ཞིངཿ ཉི་མ་ནུབ་ནས་མུན་སྲོས་ཀྱི་བར་ཐང་མཚམས་ཀྱི་ནམ་མཁའ་ལ་བལྟས་པསཿ སྔ་(༨༢)མ་བས་བདེ་གསལ་མི་རྟོག་པའི་ཡེ་ཤེས་འཕེལ་ཞིངཿ མཚན་མོ་མུན་ནག་པོར་གུང་མཛུབ་ཀྱིས་རྒྱ་མཚོ་བག་རེ་གཏེམས་ཏེཿ འོད་ཀྱི་སྣང་བ་ཁྲ་མེར་བྱུང་དུས་མཛུབ་མོས་བཏང་ལ་བར་སྣང་ལ་བལྟས་པསཿ འོད་ལྔའི་སྣང་བ་ཐིག་ལེ་དང་བཅས་པ་གསལ་ལོཿ དེ་ཉིད་ལ་བལྟ་ཞིང་ཉམས་སུ་བླངས་པས་ཞག་བདུན་ནཿ སྣང་སྲིད་འོད་སྣང་དུ་འཆར་རོཿ དེ་ཡང་ཕྱི་རུ་སྣང་བ་ལ་བལྟས་པསཿ ནང་དུ་སྟོང་པའི་ཡེ་ཤེས་འཆར་བ་ནིཿ བདེན་གཉིས་ཆུ་ཟླ་ལྟར་རྟོགས་ཏེཿ འཁོར་འདས་མཉམ་ཉིད་དུ་གྲོལ་བའོཿ ཐུགས་རྗེའི་ཉམས་སུ་བླང་ཚུལ་ནིཿ འགྱུ་དྲན་གྱི་རྣམ་རྟོག་རྨི་ལམ་གྱི་ཤེས་པ་ལྟར་འཁྱེར་བ་སྟེཿ དགག་སྒྲུབ་ཀྱི་རོལ་པ་ཅི་ལྟར་ཤར་ཡངཿ དེར་འཛིན་མེད་པས་སྔ་ཕྱིའི་རྟོག་པ་འཕྲོ་མི་མཐུདཿ ད་ལྟར་རྟོག་པ་བླང་དོར་གྱི་སྒྲོག་ཏུ་མི་འཆིངཿ ཡུལ་ཇི་ལྟར་སྣང་ཡང་བློས་དེ་ལྟར་མི་འཛིན་པའོཿ དེའང་སྣང་བས་བཅིངས་པ་མ་ཡིན་ཏེཿ གཟུང་བས་བཅིངས་པའོཿ འདི་ཡིན་གྱི་གཟའ་གཏད་རང་སར་གྲོལ་ནཿ ཆོས་ཉིད་ཀྱི་རོལ་པ་གཟིགས་མོར་ཆེ་བ་ཡིན་ནོཿ ཐམས་ཅད་རྨི་ལམ་སྒྱུ་མ་ལྟར་ཤེས་པསཿ འཁོར་བ་མ་སྤངས་གནས་སུ་དག་སྟེཿ བདེན་རྫུན་འཁྲུལ་པའི་རྩ་བ་བརླག་པའོཿ སྤྱོད་ལམ་ཐམས་ཅད་དུ་གཏད་མེད་ལ་འཛིན་མེད་ཀྱི་ལམ་ཁྱེར་བྱས་ནཿ ཐུགས་འཕྲད་ལམ་གྱི་རྟ་ཕོ་ཞོན་ནས་ཐར་པའི་གྲོང་དུ་ད་ལྟ་ཕྱིན་པའོཿ མདོར་ན་ངོ་བོ་སྟོང་པ་ཕྱོགས་ལྷུང་མེད་པཿ རང་བཞིན་གསལ་ལ་ཅིར་ཡང་སྣང་བཿ ཐུགས་རྗེ་མ་འགགས་པ་ཀུན་ཁྱབ་ཆེན་པོཿ དུས་གསུམ་གཞི་རྫོགས་འཕོ་འགྱུར་མེད་པར་ཤེས་པར་བྱའོཿ གཉིས་པ་དག་པ་ལོངས་སྐུའི་ཞིང་སྣང་ལའང་གསུམ་སྟེཿ ངོས་གཟུང་བ་ནིཿ ནམ་མཁའ་འོད་གསལ་ལ་ཐིམ་པ་ནསཿ ལྷུན་གྲུབ་ཀྱི་སྣང་བ་ཚུན་ཆད་དེཿ ངོ་བོ་དག་པས་སྟོང་ལ་སྤྲོས་པ་དང་བྲལཿ རང་བཞིན་དག་པས་སྣང་བ་ངོས་གཟུང་དང་བྲལཿ ཐུགས་རྗེ་དག་པས་རིག་པ་གཟུང་འཛིན་དང་བྲལ་བའོཿ དེས་ལོངས་སྐུའི་ཞིང་ཁམས་མངོན་དུ་གྱུར་ཏེཿ འོག་མིན་དུ་མངོན་པར་རྫོགས་པར་སངས་རྒྱ་བར་བྱེད་པའོཿ གཉིས་པ་ངོ་སྤྲད་པ་ལ་གསུམ་ལསཿ དཔེ་མདང་སུམ་གྱི་རྨི་ལམ་ལྟརཿ དོན་སྣ་ཚོགས་སུ་སྣང་ཡང་(༨༣)རང་བཞིན་མ་གྲུབ་པའོཿ རྟགས་རྩེའུ་ཆུང་གཏེམས་པས་ཉིན་སྣང་སྐད་ཅིག་ལ་འགགས་པས་ཤེས་སོཿ གསུམ་པ་ཉམས་སུ་བླང་ཚུལ་ལ་གསུམ་ལསཿ ངོ་བོ་ནི་ད་ལྟ་ཀ་དག་ལ་འདྲིས་པར་བྱས་པས་འོད་གསལ་གྱི་སྐད་ཅིག་དང་པོ་ལཿ ནམ་མཁའ་ལྟ་བུའི་སྣང་བ་ཤར་དུསཿ སྔར་གོམས་པའི་འོད་གསལ་དང་འདྲེས་ནས་བར་དོ་མེད་པར་སངས་རྒྱའོཿ རང་བཞིན་ད་ལྟ་འོད་གསལ་ལ་འདྲེས་པར་བྱས་པསཿ ཟུང་འཇུག་ལ་སོགས་པར་སྣང་བའི་འོད་གསལ་ཤར་དུསཿ སྔར་གོམས་པའི་རང་བཞིན་གྱི་འོད་གསལ་དང་འདྲེས་ནས་སངས་རྒྱའོཿ ཐུགས་རྗེ་ནི་ད་ལྟ་ཤར་གྲོལ་ལ་འདྲིས་པར་བྱས་པས་སྲིད་པའི་བར་དོར་ཤར་དུས་སྔར་གོམས་པའི་ཐུགས་རྗེའི་འོད་གསལ་དང་འདྲེས་ནསཿ མངལ་སྒོ་མི་འགྲིམས་པར་དེ་ཉིད་དུ་རང་བཞིན་སྤྲུལ་སྐུའི་ཞིང་དུ་སངས་རྒྱའོཿ གསུམ་པ་ཤིན་ཏུ་རྣམ་པར་དག་པ་ཆོས་སྐུའི་ཞིང་སྣང་ལ་ཡང་གསུམ་ལསཿ ངོས་གཟུང་བ་ནིཿ ལྷུན་གྲུབ་གདོད་མའི་གཞིར་ཐིམ་ནསཿ ཆོས་སྐུ་རོ་གཅིག་ཏུ་གྱུར་པའི་གནས་སྐབས་ནཿ ནང་གསལ་སྤྲོས་པའི་མཐའ་དང་བྲལ་བ་སྟེཿ ངོ་བོ་ཤིན་ཏུ་དག་པས་སྐྱེ་མེད་བསམ་ངོ་ལས་འདསཿ རང་བཞིན་ཤིན་ཏུ་དག་པས་ནང་གསལ་སྐུ་གསུམ་འདུ་འབྲལ་མེདཿ ཐུགས་རྗེ་ཤིན་ཏུ་དག་པས་རིག་པ་རྣམ་ཤེས་ཀྱི་ཚོགས་རྣམ་པར་དག་པཿ ཀུན་གཞི་ཆོས་སྐུར་དག་པས་ལས་དང་བག་ཆགས་ཀྱི་མཐའ་སྟོང་པའོཿ གཉིས་པ་ངོ་སྤྲད་པ་ལ་གསུམ་ལསཿ དཔེ་གནམ་སྟོང་གི་ཟླ་བ་ལྟརཿ དོན་མི་སྣང་ལ་རང་བཞིན་མེད་པསཿ དུས་གསུམ་གྱི་སངས་རྒྱས་ཐམས་ཅད་ཆོས་སྐུའི་ཕོ་བྲང་ན་གཅིག་གིས་གཅིག་མི་གཟིགས་པར་བཞུགསཿ རྟགས་ཆོས་ཉིད་ལ་མཉམ་པར་གཞག་དུས་སྣང་སྟོང་སྤྲོས་པ་དང་བྲལ་བར་ཤེས་སོཿ གསུམ་པ་ཉམས་སུ་བླང་ཚུལ་ནིཿ ནམ་མཁའ་སྤྲིན་མེད་པ་ལ་བལྟས་པས་ངོ་བོ་སྟོང་པཿ གཟའ་སྐར་ལྷུན་གྲུབ་ལ་བལྟས་པས་རང་བཞིན་གསལ་བཿ གང་སྣང་ཅོག་བཞག་ལ་བལྟས་པསཿ རིག་པ་མི་འཕྲོ་བར་གནས་པའོཿ དེ་ཉིད་གོམས་པས་ཀ་དག་གིས་གྲོལ་གཞི་ལ་མཐར་ཕྱིན་ནས་ཡང་དག་པར་རྫོགས་པའི་སངས་རྒྱའོཿ (༨༤)ཨེ་མ་ཧོཿ གསང་སྔགས་ཀུན་གྱི་མཐར་ཐུག་མངོན་སུམ་ལམཿ དེ་དོན་མཁའ་འགྲོ་སྙིང་ཐིག་སྙིང་ཕྱུང་ནསཿ ཡང་ཟབ་གནད་འདི་བདག་གི་སྙིང་ལ་བབསཿ ཕྱི་རབས་དོན་དུ་ཡི་གེར་བཀོད་པ་ཡིནཿ ཤིང་མོ་ཡོས་ལོའི་ཚེ་ཡི་མཐར་ཕྱིན་ཏེཿ ས་ཕོ་འབྲུག་ལ་བུམ་ཐང་དགོན་གནས་འགྲོཿ སྙིང་ནས་སྙིང་པོའི་དོན་ལ་སེམས་པ་དགཿ ཡི་གེ་འདི་ལ་རྟག་ཏུ་ནན་ཏན་མཛོདཿ ད་ནི་མི་སྡོད་རིངས་པར་མྱུར་དུ་འགྲོཿ མི་རྟག་དཔེ་ཡི་ངོ་སྤྲོད་མངོན་སུམ་སྟོནཿ རྟག་འཛིན་ཞེན་པ་ཅན་རྣམས་སྙིང་རེ་རྗེཿ སྡུག་བསྔལ་བདེ་བར་མཐོང་བ་སེམས་པ་སྐྱོཿ ཆོས་སྐུ་རྒྱལ་པོའི་གཏན་སྲིད་མ་ཟིན་ནཿ ཇི་ལྟར་བྱས་ཀྱང་བདེ་བའི་གོ་སྐབས་མེདཿ སྙིང་ནས་འཆི་ཆོས་མཛོད་ཅིག་སྐལ་ལྡན་དགཿ གང་གིས་མི་ཕན་གཅིག་པུར་འགྲོ་དུས་སུཿ འཁྱེར་སོ་ཅི་འདུག་སེམས་ལ་ད་ལྟ་ལྟོསཿ ཀྱེ་མ་ཀྱེ་མ་སྙིང་པོའི་དོན་སྒོམས་ཤིགཿ འཁོར་བའི་གནས་ལས་ཐར་པའི་ཐབས་འཚལ་ལོཿ གངས་རི་ཐོད་དཀར་ཨོ་རྒྱན་རྫོང་གནས་སུཿ ཕྱི་རབས་སྐལ་ལྡན་རྣམས་ཀྱི་དོན་དུ་བཀོདཿ ཟབ་དོན་སྙིང་པོ་དྲི་མེད་འོད་ཟེར་གྱིས་བཀོད་པ་རྫོགས་སོཿ དགེའོཿ |