རྗེ་ཕག་མོ་གྲུ་པ།― MLP001_Page_0174 ―
[མ་དཔེ་གཟིགས་ན་འདིར་གནོན།]
༈ རྗེ་སྒམ་པོ་པས་དགེ་བཤེས་ཁམས་པ་ཆེན་པོ་ཞེས་བསྔགས་པར་མཛད་པའི་རྗེ་ཕག་མོ་གྲུ་པ་ནི། ཐུབ་པའི་དབང་པོ་རང་ཉིད་ཡིན་པར་སངས་རྒྱས་ཉིད་ཀྱིས་ལུང་བསྟན་ཅིང་། རྒྱ་བོད་ཀུན་ཏུ་གྲུབ་པའི་སྐྱེས་མཆོག་རྣམས་སུ་སྐུའི་སྐྱེ་བ་བཟུང་བ་ནི། ཨོ་རྒྱན་གྱི་ཡུལ་དུ་དྲང་སྲོང་འགྲོ་བ་དབུགས་འབྱིན་ཞེས་བྱ་བས་རྗེས་སུ་བཟུང་བའི་དཔའ་བོ་རྡོ་རྗེ། དེ་ནས་རིམ་གྱིས་དམ་ཚིག་རྡོ་རྗེ། པདྨའི་རྡོ་རྗེ། ལྷན་ཅིག་སྐྱེས་པའི་རྡོ་རྗེ། ཐ་ག་པ་རྡོ་རྗེ་སོགས་སུ་སྐྱེ་བ་བཟུང་ནས་བོད་འདིར་ཡུལ་མདོ་ཁམས་ཀྱི་ལྷོ་བརྒྱུད་འབྲི་ལུང་རྣེ་ཤོད་ཏུ་ལྕགས་ཕོ་སྟག་གི་ལོ་ལ་འཁྲུངས། དགུང་ལོ་དགུ་ལོན་ཚེ་སློབ་དཔོན་ལྷིང་ངེ་འོད་ཟེར་རྒྱལ་མཚན་པ་ལས་རབ་ཏུ་བྱུང་མཚན་རྡོ་རྗེ་རྒྱལ་པོར་གསོལ། བཅུ་དགུ་ལོན་ཚེ་དབུས་སུ་ཕེབས། བཀའ་གདམས་པའི་དགེ་བཤེས་གང་པ་དང་དོན་སྟེང་པ་དང་བྱ་ཡུལ་བ་སོགས་ལ་གསན་པ་རྒྱ་ཆེར་མཛད། ཉི་ཤུ་རྩ་ལྔར་ཟུལ་ཕུར་བྱ་འདུལ་བ་ལས་བསྙེན་པར་རྫོགས། དེ་ནས་ས་སྐྱ་པ་ཆེན་པོ་ལ་ལམ་འབྲས་སོགས་གདམས་པ་མང་དུ་གསན། དེ་རྗེས་རྗེ་སྒམ་པོ་པའི་དྲུང་དུ་བྱོན་པས་བླ་མས་ཆོས་གང་ལ་ཉན་ཞེས་སོགས་ཀྱི་གསུང་གླེང་མང་ཙམ་གསུང་བྱུང་བར། བླ་མ་ས་ཆེན་གྱིས་མཐོང་ལམ་རྣམ་པར་མི་རྟོག་པའི་ཡེ་ཤེས་ངོ་སྤྲད་ལགས་ཞུས་པས། ཟན་ཆང་ཞིག་ཕྱག་ན་འདུག་པ་དེར། ཁྱོད་ཀྱི་དེ་ལས་འདི་མི་དགའ་རེ་ཤི་གསུངས་པས་ཐུགས་སྐྱོག་གིས་སོང་བར། ཁྱོད་རང་ཤར་གྱི་རི་དེའུ་ཕ་གིའི་ཁར་ཁམས་སེང་ལ་བྱོན་ཅིགཁོང་འགའ་ཞིག་གིས་ཆོས་ཟིན་པ་དང་། འོ་སྐོལ་གསུང་གླེང་བྱའོ་གསུངས་པས། དེའུ་ཤར་མའི་ཁར་བྱོན་ནས་མནོ་བསམ་མཛད་པས། སྔར་གྱི་ཆོས་ཐམས་ཅད་ཕྱི་ཤུན་དང་སྦུན་པར་སོང་ནས་ནམ་མཁའ་རྣམ་པར་དག་པ་ལྟ་བུའི་རྟོགས་པ་བཟང་པོ་འཁྲུངས། ཐུགས་རབ་ཀྱང་ནམ་མཁའ་ལ་མདུང་བསྐོར་བ་ལྟར་སོང་། དེ་ནས་སྤྱན་སྔར་བྱོན་པས་སྒམ་པོ་པས་མཁྱེན་ཏེ། ད་ང་ལ་ཡང་དེ་ལས་ལྷག་པ་བསྟན་རྒྱུ་མེད་འོན་ཀྱང་ང་རང་གི་ལུགས་ཀྱི་ཁྲིད་ཅིག་བྱའོ་གསུངས་ནས་ལྷན་ཅིག་སྐྱེས་སྦྱོར་གྱི་ཁྲིད་གནང་། དེ་ནས་རིང་པོར་མ་ལོངས་པར་སྒམ་པོ་པ་གཤེགས། དེ་ནས་ཐུགས་དགོངས་ལ། ནགས་ཁྲོད་དབེན་པ་སྟེས་དབང་གིས། ། ― MLP001_Page_0175 ―
[མ་དཔེ་གཟིགས་ན་འདིར་གནོན།]
སྤྱོད་ཅིང་རང་དབང་རྟེན་མཛད་གསོལ། །ཞེས་པའི་གསོལ་བ་བཏབ་ནས། གདན་ས་མཐིལ་དུ་ས་ཕོ་སྟག་གི་ལོར་ཕེབས། དེར་རྒྱ་སྒོམ་རྨི་རས་བྱ་བའི་སྤྱིལ་པོར་བཞུགས་ནས་ཁྱོད་ཀྱི་སྤྱིལ་པོ་འདི་སྐྱིད་བྱ་བ་ལན་གསུམ་གསུངས་པས་བཞེད་ན་ཕུལ་བས་ཆོག་ཟེར། ས་དེ་གནས་ཀྱི་སྙིང་པོར་འདུག་པས་འོ་ན། ཁོ་བོའི་ཀོ་གདན་ལོངས་ཤོག་གསུང་སྟེ་དེ་ཉིད་དུ་གནས་བཅས། དེར་འཇག་སྤྱིལ་ལས་མེད་པས། དེ་ནས་སྟག་ལུང་ཐང་པས་བླ་མའི་སྤྱིལ་པོ་གཅིག་བྱེད་པར་ཞུས་པས། ཉིན་གཅིག་ལ་གྲུབ་ན་གྱིས་གསུངས། དེ་ལས་རིང་བ་མི་རུང་གསུང་ནས་ཉིན་གཅིག་ཁོ་ན་ལ་གླང་སྤྱིལ་དེ་གྲུབ་བོ། །དེར་དགེ་འདུན་མང་དུ་འདུས་ནས་གྲྭ་པ་བརྒྱད་བརྒྱ་ལ་གདུགས་ཐོགས་ཀྱི་སློབ་མ་ལྔ་བརྒྱ་བྱུང་བར་གྲགས། དེ་ལྟར་ཆོས་ཀྱི་ཕྲིན་ལས་རྒྱ་ཆེར་མཛད་ནས་ལྕགས་ཕོ་སྟག་གི་ཟླ་བ་བདུན་པའི་ཚེས་ཉེར་ལྔ་ལ་སྤྲུལ་པའི་སྐུ་བསྡུ་བར་མཛད་དོ། །དེའི་སློབ་མ་བུ་ཆེན་དུ་བྱོན་པ་ནི། མོས་གུས་མཐར་ཐུག་སྟག་ལུང་པ། རྟོགས་པའི་མཐར་ཐུག་སྣ་ཕུ་བ། ཤེས་རབ་མཐར་ཐུག་པར་ཕུ་བ། ནུས་པའི་མཐར་ཐུག་མཆན་བུ་རྒྱ་རས་ཏེ་མཐར་ཐུག་གི་བུ་བཞི། སྐལ་ལྡན་ཡེ་ཤེས་སེང་གེརྟོགས་ལྡན་མི་ཉག་སྒོམ་རིན། གྲུབ་ཐོབ་ཉང་རེ་སེ་བོ། ཀུན་ལྡན་གཙང་པ་རས་ཆུང་རྣམས་ལ་གདམས་པའི་བུ་བཞི་ཟེར། ཆོས་རྗེ་འཇིག་རྟེན་མགོན་པོ། འབན་རྟ་ཕུག་པ། ཆོས་རྗེ་ལྡུམ། ཆོས་རྗེ་གཏུམ་རྣམས་ལ་རོ་གཅིག་རྟོགས་པ་ཕྱེད་བཞི། གཤེ་སྒོམ་དཀར་བ་སོགས་ཐུགས་ཀྱི་སྲས་བཞི་དང་། རིན་ཆེན་ཤུག་རྩར་བ་སོགས་ཡི་གེ་མའི་བུ་བཞི་དང་། ཡེ་ཕུག་པ་སོགས་ཉེ་བའི་སྲས་བཞི་སོགས་མཐའ་ཡས་སོ། །འདི་ལ་འབྲི་གུང་སྒོམ་པ་ཤཱཀ་རིན་གྱིས། གདན་ས་དཔལ་གྱི་ཕག་གྲུ་དེ། །ཆུ་མིག་བརྒྱ་རྩའི་མགོ་བོ་ཡིན། །ཞེས་སྨྲས་པ་ལྟར་བོད་ཀྱི་ཡུལ་འདིར་གཙུག་ལག་ཁང་དང་སྡེ་དགོན་ལ་སོགས་པ་གདན་ས་འདི་ལས་མཆེད་པ་མང་བར་བཤད་དོ། །འབྲི་གུང་ལས་མཆེད་པ་བོད་ཁམས་གཉིས་སུ་བགྲང་གིས་མི་ལང་བ་དང་། གླིང་རས་པ་ལས་མཆེད་པ་འབྲུག་སྐོར་རྣམས་ཀྱིས་བྱ་རྒོད་ཀྱི་ཉི་ལམ་བཅུ་གསུམ་གྱིས་ཁྱབ་པར་གྲགས་པ་ |
