བར་དོ་སྦུབས་འཇུག༄༅༔ བར་དོ་སྦུབས་འཇུག་བཞུགས་སོཿ ཤོག་སེར་སྐོརཿ ༄༅༔ རྒྱ།མ།པཱགཿ བར་དོ་སྦུབས་འཇུག་ཅེས་བྱ་བཿ དཔལ་རྡོ་རྗེ་སེམས་དཔའ་ལ་ཕྱག་འཚལ་ལོཿ འོད་གསལ་ཡེ་ཤེས་རང་སྣང་བའིཿ སྟོན་པ་དེ་ལ་ཕྱག་འཚལ་ལོཿ བར་དོའི་སྣང་བ་འཆར་བའི་སྦུབསཿ འོད་གསལ་གདམས་པ་གསལ་བར་ཉོནཿ ཐོག་(༨༩)མ་གཞི་ཡི་འོད་རྩ་དངཿ གནས་སྐབས་ལུས་ཀྱི་འོད་རྩ་དངཿ བར་དོ་རང་སྣང་འོད་རྩ་དངཿ དུས་དེར་གདམས་པའི་མཚོན་ཚུལ་ལོཿ དང་པོ་ལ་ཡང་རྣམ་པ་གསུམཿ གཞི་དང་གཞི་སྣང་འཁྲུལ་ཚུལ་ལོཿ གཞི་ནི་སེམས་ཉིད་གདོད་མའི་དུསཿ སྟོང་གསལ་ནམ་མཁའ་ལྟ་བུ་ལཿ རང་བྱུང་ཡེ་ཤེས་རྩ་ཆེན་ཤརཿ སྟོང་གསལ་མ་འགགས་རྣམ་པ་གསུམཿ རྩ་ཡི་གཙོ་བོ་གསུམ་ཡིན་ཏེཿ ངོ་བོ་རང་བཞིན་ཐུགས་རྗེའོཿ འདི་དག་བརྟེན་པའི་རང་འོད་གསུམཿ སྔོ་དམར་སྣ་ཚོགས་མདོག་ཅན་གསུམཿ རང་འོད་ཡེ་ནས་ལྷུན་གྱིས་གྲུབཿ མི་སྣང་འཆར་གཞིར་གནས་པ་ནིཿ དཔེར་ན་ཤེལ་གྱི་རང་འོད་ལཿ རྐྱེན་དང་མ་འཕྲད་མི་སྣང་བཞིནཿ དེ་ནི་གདོད་མའི་གནས་ལུགས་སོཿ གཞི་སྣང་གཞི་ཡི་ངང་ཉིད་ལསཿ ཡེ་ཤེས་འོད་ལྔ་ཕྱིར་ཤར་བསཿ ཐུགས་རྗེ་རིག་པའི་སྙིང་པོ་ཤརཿ དེ་དུས་རྩ་གསུམ་ཟེར་ཐག་གམཿ ཤེལ་འོད་ཕྱི་རུ་ཤར་བ་བཞིནཿ རང་བྱུང་ཡེ་ཤེས་ངང་ལས་ཤརཿ མཐིང་ག་ཁྱབ་པ་ཆེན་པོའི་རྩཿ ཆོས་དབྱིངས་ཡེ་ཤེས་རྟེན་དུ་ཤརཿ རྣམ་པར་སྣང་མཛད་གཙོ་འཁོར་སྣངཿ དཀར་པོ་གདངས་གསལ་ཆེན་པོའི་རྩཿ མེ་ལོང་ཡེ་ཤེས་རྟེན་དུ་ཤརཿ མི་བསྐྱོད་རྡོ་རྗེ་གཙོ་འཁོར་སྣངཿ སེར་པོ་ཀུན་ཏུ་མཉམ་བྱེད་རྩཿ མཉམ་ཉིད་ཡེ་ཤེས་རྟེན་དུ་ཤརཿ རིན་ཆེན་འབྱུང་ལྡན་གཙོ་འཁོར་སྣངཿ དམར་པོ་བདེ་ཆེན་རང་གསལ་རྩཿ ཀུན་རྟོག་ཡེ་ཤེས་རྟེན་དུ་ཤརཿ སྣང་མཐའ་གཙོ་འཁོར་ཚུལ་དུ་སྣངཿ ལྗང་གུ་རྫོགས་བྱེད་ཡེ་ཤེས་རྩཿ བྱ་གྲུབ་ཡེ་ཤེས་རྟེན་དུ་ཤརཿ དོན་གྲུབ་གཙོ་འཁོར་རྣམ་པར་སྣངཿ དེ་དག་ཐུགས་ཀྱི་ངོ་བོ་ལསཿ ཡེ་ཤེས་བཞི་སྦྱོར་སྣང་བ་ཤརཿ དེ་དུས་རང་རིག་སྣང་བ་ལསཿ འཁོར་འདས་ཡེ་ཤར་ཡིན་པའི་ཕྱིརཿ ལྷུན་གྲུབ་སྦུབས་སུ་འགྲོ་དྲུག་གཟུགསཿ སྣ་ཚོགས་བརྗོད་ཀྱིས་མི་ལང་བཿ ཐུགས་རྗེ་ཡེ་ཤེས་རྩལ་ལས་ཤརཿ འབྲེལ་ཐག་ལོངས་སྐུའི་གནས་དྲུག་ནསཿ འོད་ཟེར་ཚུལ་དུ་བྱུང་བ་ལཿ འོག་ཏུ་ཤར་བ་ཉིད་དུ་སྣངཿ འདི་ནི་གྲོལ་ལུགས་གཉིས་ཀ་ཡིཿ གཞི་སྣང་ཆེན་པོ་ཞེས་བྱའོཿ (༩༠)འཁྲུལ་ཚུལ་དེ་དུས་རང་སྣང་དུཿ མ་རིག་པས་ན་ལྷན་ཅིག་སྐྱེསཿ རང་ལས་གཞན་བཟུང་ཀུན་བརྟགས་ཏེཿ གཉིས་ཀྱི་ཐུགས་རྗེ་ཕྱིར་གཡོས་པསཿ གཟུང་འཛིན་ཆ་རུ་ཤོར་མ་ཐགཿ སྣང་བ་གཞན་རྣམས་རང་ལོག་ནསཿ འགྲོ་དྲུག་འཁྲུལ་པར་སྣང་བ་ལཿ ཆགས་སྡང་གཏི་མུག་ང་རྒྱལ་དངཿ ཕྲག་དོག་སྐྱེས་པའི་སྐད་ཅིག་ལཿ ཞེ་སྡང་དམྱལ་བ་འདོད་ཆགས་ཀྱིསཿ ཡི་དྭགས་གཏི་མུག་དུད་འགྲོ་ལཿ ང་རྒྱལ་ལྷ་ཡིན་ཕྲག་དོག་གིསཿ རང་སྣང་ལྷ་མིན་དག་ཏུ་འཕངསཿ སྲིད་པར་འཁྲུལ་ནས་བདེ་སྡུག་སྤྱོདཿ དེ་ནི་འཁྲུལ་པའི་བྱུང་ཚུལ་ལོཿ གནས་སྐབས་ལས་ཀྱི་འོད་རྩ་ལཿ དེ་ལྟར་འགྲོ་བའི་རང་ལུས་ལཿ རྩ་བའི་རྩ་གསུམ་གདངས་ཤར་བསཿ རོ་རྐྱང་དབུ་མར་ཤར་བ་སྟེཿ དུག་གསུམ་བརྟེན་ཅིང་ཁམས་གསུམ་འཁོརཿ ལས་གསུམ་གསོག་པའི་རྟེན་དུ་ཆགསཿ དེ་ལས་རྩ་འདབ་གྲངས་རྣམས་ནིཿ ཉོན་མོངས་དག་དང་མཉམ་པ་སྟེཿ བརྒྱད་ཁྲི་བཞི་སྟོང་ཡོད་པའོཿ དབུ་མའི་དབུས་ན་འོད་ཀྱི་རྩཿ རང་བྱུང་ཀ་ཏི་ཤེལ་སྦུག་ཅནཿ སྟོང་གསལ་རྣམ་པ་མ་འགགས་གསུམཿ དེ་ལས་འོད་ལྔའི་རྩ་འདབ་ནཿ དྭངས་མའི་འབྱུང་ལྔ་དག་པའི་རླུངཿ སྲོག་འཛིན་མེ་མཉམ་ཁྱབ་བྱེད་དངཿ རྫོགས་བྱེད་ཡེ་ཤེས་རྟེན་ཅན་ལྔཿ ཡེ་ཤེས་སྲོག་འཛིན་བདེ་ཆེན་དྲོདཿ ཆོས་ཀུན་སྙིང་པོ་གདོད་མར་རྫོགསཿ རང་བྱུང་ཡིན་པའི་ཆ་ལ་བརྟགསཿ རགས་རླུང་ལྔ་མིན་ཆ་བརྟགས་ཡིནཿ དྭངས་མའི་ཁམས་ལྔ་ཞེས་བྱའོཿ སྲོག་འཛིན་ལ་སོགས་རྣམ་ལྔའོཿ དེ་ཡི་གདངས་ལས་རྩ་རྣམས་སུཿ ཐིག་ལེ་ཐིག་ཕྲན་སྣང་བར་གནསཿ རགས་པའི་རྩ་རྣམས་འདུས་བྱས་ཏེཿ རླུང་དང་དྭངས་མ་རྟོག་པ་རྒྱུཿ འཁོར་བའི་རྟེན་གཞི་བྱེད་པ་ཡིནཿ འོད་རྩ་དྭངས་པ་འདུས་མ་བྱསཿ དྭངས་མའི་ཁམས་དང་ཡེ་ཤེས་རླུངཿ ཤིན་ཏུ་མི་རྟོག་ཆེན་པོར་རྒྱུཿ དཔེར་ན་ཤེལ་འོད་དྭངས་མ་བཞིནཿ ཁམས་དང་རླུང་ཞེས་བཏགས་བྱས་ཀྱངཿ དེ་དག་རྒྱུ་བའི་སྐབས་མེད་པསཿ མི་རྟོག་འབའ་ཞིག་ངང་ལ་གནསཿ འོད་ལ་བལྟས་པས་རགས་པ་ཡིཿ རླུང་སེམས་དྭངས་མ་རང་འགགས་ནསཿ འོད་(༩༡)རྩའི་ངང་ལ་མི་གཡོ་བསཿ ཤེས་རབ་རང་བྱུང་སྒྲོན་མ་འཆརཿ འདི་ནི་མངོན་སུམ་སྙིང་པོའི་དོནཿ ད་ལྟ་མངོན་དུ་གྱུར་པ་ཡིནཿ ལུས་གནས་འོད་རྩ་རྣམ་གསུམ་ལསཿ ལྔ་སྐྱེས་དེ་ལས་ཡེ་ཤེས་ཀྱིཿ རྩ་འདབ་བརྒྱད་ཁྲི་བཞི་སྟོང་གིཿ ཆོས་ཀྱི་སྒོ་དང་གྲངས་མཉམ་པསཿ ཡེ་ཤེས་སྣང་བ་ལམ་བདེའོཿ བར་དོ་རང་སྣང་འོད་རྩ་ནིཿ རགས་པ་རླུང་སེམས་སྙིང་ཁར་འདུསཿ སེམས་དང་ཡེ་ཤེས་རྒྱབ་གྱེས་ཏེཿ འཁོར་བའི་ཀུན་རྟོག་དབྱིངས་སུ་ནུབཿ མྱ་ངན་འདས་པའི་ཞིང་ཁམས་ཤརཿ དེ་ཚེ་གཞི་ཡི་འོད་རྩ་ཉིདཿ སྙིང་ནས་མིག་ཏུ་འབྲེལ་བ་ལསཿ རང་བྱུང་ཡེ་ཤེས་འཕོ་བའི་གདངསཿ མཐིང་ག་ཁྱབ་པ་ཆེན་པོའི་འོདཿ སྟོན་ཀའི་ནམ་མཁའ་སྤྲིན་བྲལ་འདྲཿ ཀ་དག་སྣང་བ་ཞེས་བྱའོཿ རང་ངོ་ཤེས་པས་གཞི་ལ་ཕྱིནཿ དེ་ནས་གཞི་སྣང་འཆར་བ་ལསཿ འོད་གསལ་རྩ་ཡི་གདངས་ཤར་བསཿ སྣང་བའི་འོད་ལྔས་ནམ་མཁའ་གངཿ དེ་ནས་ལྷུན་གྲུབ་རྩ་ཡི་གདངསཿ ཞི་ཁྲོས་ནམ་མཁའ་ཀུན་ཏུ་ཁྱབཿ དེ་ནས་ཡེ་ཤེས་གཞི་རྩ་ལསཿ ཡེ་ཤེས་བཞི་སྦྱོར་སྣང་བ་ཤརཿ དེ་ནས་ཐུགས་རྗེའི་འོད་རྩ་ལསཿ ལྷུན་གྲུབ་འགྲོ་དྲུག་སྣང་བ་ཤརཿ འདི་ཡིས་རྩ་རྣམས་མཐར་ཕྱིན་པའིཿ སྣང་བ་ཡིན་ནོ་ས་མ་ཡཿ རྩ་ཡི་ངོ་བོ་ཡེ་ཤེས་ལཿ སྣང་བ་འོད་ལྔ་ཕྲ་ལ་དྭངསཿ དེ་ཡི་སྦུབས་ན་སྣང་བ་ཡངཿ མི་འདྲ་གྲངས་མེད་ནམ་མཁའ་ཁྱབཿ གང་ལ་སྣང་བ་ཡོད་གྱུར་པཿ དེ་ལ་རྩ་རུ་ཡེ་ཤེས་འདུསཿ དཔེར་ན་འཁྲུལ་སྣང་རྩ་འདབ་ཏུཿ རླུང་སེམས་འདུས་པའི་སྣང་བ་བཞིནཿ གཞན་ངོར་མེད་ཀྱང་རང་ངོར་ཡོདཿ འདི་ཡང་དེ་དང་ཆོས་མཐུན་ནོཿ རྩ་གནས་གནད་འདི་མ་ཤེས་ནཿ གཞི་ལམ་འབྲས་བུ་ཤེས་པ་མེདཿ དེ་བས་གནད་འདི་ས་མ་ཡཿ མཁའ་འགྲོའི་ལུང་བསྟན་ཐོབ་ནས་བཀོདཿ དེ་དུས་གདམས་པའི་མཚོན་ཚུལ་ནིཿ སྐད་ཅིག་གསུམ་གྱིས་ཤེས་པར་བྱཿ དེ་ལྟར་རང་སྣང་གང་ཤར་ཡངཿ སྐད་ཅིག་དང་པོར་རང་སྣང་ཤེསཿ གཉིས་པར་ཤེས་ཐོག་ཕྱམ་མེར་བཞགཿ གསུམ་པ་བཞག་པའི་ངང་དེར་གྲོལཿ འདི་ནི་གསང་ཆེན་ངེས་པའི་ལམཿ སྙིང་པོའི་ཡང་ཞུན་བསྡུས་པ་ཡིནཿ རྣལ་འབྱོར་(༩༢)འབྲས་བུ་ངེས་པའི་གནདཿ མཁའ་འགྲོ་སྙིང་ཏིག་གསང་བ་འདིཿ ཕྱི་རབས་སྐལ་ལྡན་རྣམས་ཀྱི་ཕྱིརཿ དྲི་མེད་འོད་ཟེར་བདག་གིས་བཀོདཿ བར་དོ་སྦུབས་འཇུག་རྫོགས་སོཿ ས་མ་ཡཿ རྒྱ་རྒྱ་རྒྱཿ |