དཔལ་ལྡན་ས་སྐྱ་པའི་བླ་རབས།

[Full Size]

༈ བསྟན་པ་ཕྱི་དར་གྱི་དུས་སུ་མངའ་བདག་དཔལ་འཁོར་བཙན་གྱི་སྲས་ཁྲི་བཀྲ་ཤིས་བརྩེགས་པ་དཔལ་གྱིས་རུ་ལག་གི་སའི་ཆར་རྒྱལ་སྲིད་བསྐྱངས་པའི་སྲས་དཔལ་ལྡེ། འོད་ལྡེ། སྐྱིད་ལྡེ་ཞེས་པའི་སྲས་གསུམ་བྱུང་བ་དེས། ལོ་སྟོན་ལ་བདག་གི་ཐད་དུ་མཁན་སློབ་ཟུང་གཅིག་བསྟན་པ་སྤེལ་བར་ཞུས་པས། མཁན་པོ་ཤཱཀྱ་གཞོན་ནུ་དང་། སློབ་དཔོན་ཡེ་ཤེས་བརྩོན་འགྲུས་གཉིས་བཏང་བས། དེ་གཉིས་ཀྱིས་བཀའ་བགྲོས་ནས་འབྲོག་མི་དང་སྟག་ལོ་གཞོན་ནུ་གཉིས་ལ་གསེར་མང་པོ་བསྐུར་ནས་རྒྱ་གར་དུ་བརྫངས་པས་སྟག་ལོས་རྡོ་རྗེ་གདན་དུ་བསྐོར་བ་མཛད་ཅིང་བསླབ་གཉེར་མ་མཛད། འབྲོག་མིས་ཤནྟི་པའི་སར་ལོ་བརྒྱད་བཞུགས་ནས་གསན་པ་མང་དུ་མཛད། སླར་བོད་དུ་བྱོན་སློབ་དཔོན་གཉིས་ཀྱང་དགྱེས་པར་གྱུར། དེ་ནས་བརྟག་གཉིས་ལ་སོགས་པའི་གསང་སྔགས་ཀྱི་ཆོས་མང་དུ་བསྒྱུར། ཤཱནྟི་པའི་དག་ལྡན་ལའང་འགྱུར་མཛད། འགོས་ལོ་ཙཱ་བ་དང་མར་པ་ལོ་ཙཱ་གཉིས་ཀྱང་ཁོང་གི་སློབ་མ་ཡིན་པར་བཤད་དེ། མར་པས། དཔལ་མྱུ་གུ་ལུང་གི་དགོན་པ་རུ། །སྒྲ་སྒྱུར་འབྲོག་མི་ལོ་ཙཱ་ལ། །སྒྲ་ཐད་ཀློག་སྐད་ཀྱིས་ཡིག་ཚང་བསླབས། །ཁོང་བཀའ་དྲིན་མི་ཆུང་ཆེ་བར་འཁུམས། །ཞེས་པའི་མགུར་བཞེས་སྐད། དེ་ལྟར་ན་བླ་ཆེན་འབྲོག་མི་ནི། གདམས་པ་མང་དུ་གསན་པའི་ཡོན་ཏན། བསྐྱེད་རྫོགས་གཉིས་ལ་བསྟན་པ་ཐོབ་ཅིང་། རླུང་གི་

[Full Size]

སྟོབས་ཀྱིས་ནམ་མཁའ་ལ་སྐྱིལ་ཀྲུང་འཆའ་བ། འཆི་བ་ལམ་དུ་བྱས་པས་སྐུ་ལུས་དེ་ཉིད་མ་སྤངས་པར་འཚང་རྒྱ་བར་བཞེད་ནས་རྟེན་འབྲེལ་མ་འགྲིག་པས་བར་དོར་ཕྱག་རྒྱ་ཆེན་པོའི་ཡེ་ཤེས་བརྙེས་པ་ཞིག་གོ། དེ་ལ་སློབ་མ་མང་དུ་ཡོད་ཀྱང་གཞུང་དང་གདམས་པ་གཉིས་ཀའི་བདག་པོར་གྱུར་པ་ནི། དཔལ་ལྡན་ས་སྐྱ་པའི་བླ་མ་རྣམས་ཏེ། དེ་དག་གང་ལས་སུའི་རིགས་བརྒྱུད་དུ་བྱུང་བའི་རིམ་པ་ཡང་། བོད་ཡུལ་དུ་ལྷ་སྲིན་དར་བའི་ཚེ་ཡར་ཀླུང་ཤར་གྱི་གཡའ་སྤང་སྐྱེས་གཅིག་དང་སི་ལི་མ་གཉིས་མཛའ་བར་གྱུར་པ་ན། སྲིན་ཁྲག་མེད་ཀྱང་དེ་ལ་ཆགས་པས་དེ་གཉིས་འཁོན་པའི་བར་དུ་ལྷ་སྲས་སྐྱེས་པ་ལ་ཇོ་བོ་འཁོན་བར་སྐྱེས་ཞེས་གྲགས་པ་ལ། མ་སངས་ལས་འཁོན་ནས་སྐྱེ་བརྒྱུད་རིམ་པར་བྱོན་ཞིང་། རྒྱལ་པོ་ཁྲི་སྲོང་ལྡེ་བཙན་གྱི་ནང་བློན་དུ་གཏོགས་པ་འཁོན་དཔལ་མོ་ཆེའི་སྲས་བཞི་སྟེ། ཁྲི་མཛེས་ལྷ་ལེགས། ཚེ་ལ་དབང་ཕྱུགའཁོན་ཀླུའི་དབང་པོ་བསྲུང་བ། ཚེ་འཛིན་ནོ། །གསུམ་པ་དེ་སད་མི་བདུན་གྱི་དྲུག་པ་ཡིན། བཞི་པའི་སྲས་རྡོ་རྗེ་རིན་པོ་ཆེ་ནས་བུ་བརྒྱུད་རིམ་པ་བཞིན། ཤེས་རབ་ཡོན་ཏན། ཡོན་ཏན་འབྱུང་གནས། ཚུལ་ཁྲིམས་རྒྱལ་པོ། རྡོ་རྗེ་གཙུག་ཏོར། དགེ་སྐྱབས། དགེ་མཐོང་། བལ་པོ་ཤཱཀྱ་བློ་གྲོས། དེ་དག་ཐམས་ཅད་ཀྱང་གསང་སྔགས་རྙིང་མའི་ཆོས་ཀྱི་བདག་པོ་དང་ཡོན་ཏན་དང་ལྡན་པའོ། །དེ་ལ་སྲས་གཉིས། གཅེན་ཤེས་རབ་ཚུལ་ཁྲིམས་ཚངས་སྤྱོད་བསྲུང་། གཅུང་དཀོན་མཆོག་རྒྱལ་པོ་ཤིང་ཕོ་ཁྱི་ལ་འཁྲུངས། བཞི་བཅུ་བཞེས་པ་ཆུ་མོ་གླང་ལ་ས་སྐྱ་བཏབ། དྲུག་ཅུ་རྩ་དགུ་པ་ཆུ་ཕོ་རྟ་ལ་གཤེགས། དེའི་སྲས་ས་ཆེན་ཀུན་སྙིང་ཡབ་ཀྱི་ང་དགུ་པ་ཆུ་ཕོ་སྤྲེལ་ལ་འཁྲུངས། བཅུ་གཅིག་ལོན་པ་ལ་ཡབ་གཤེགས། ལོ་སྐབས་དེར་བ་རི་ལོ་ཙཱ་བ་དྲུག་ཅུ་རྩ་གསུམ་ལོན་པ་གདན་སར་བསྐོས། དེ་ནས་རང་ལོ་ཉི་ཤུ་པ་ནས་དྲུག་ཅུ་རྩ་བདུན་བར་གདན་ས་ལོ་ཞེ་བརྒྱད་བཟུང་ནས་ས་ཕོ་སྟག་ལ་གཤེགས། ས་ཆེན་ལ་སྲས་བཞི་ལས་ཀུན་དགའ་འབར་རྒྱ་གར་ལ་བྱོན་མཁས་པར་གྱུར་ཀྱང་ཉི་ཤུ་རྩ་གཉིས་ལ་རྒྱ་གར་དུ་གཤེགས། གཉིས་པ་སློབ་དཔོན་བསོད་ནམས་རྩེ་མོ་ཡབ་ཀྱི་ང་གཅིག་

[Full Size]

པ་ཆུ་ཕོ་ཁྱི་ལ་འཁྲུངས། བཞི་བཅུ་རྩ་གཅིག་པ་ཆུ་ཕོ་སྟག་ལ་གཤེགས། གསུམ་པ་རྗེ་བཙུན་གྲགས་པ་རྒྱལ་མཚན་ནི། ཡབ་ཀྱི་ང་དྲུག་པ་མེ་མོ་ཡོས་ལ་འཁྲུངས། རང་ལོ་ཉེར་དྲུག་པ་ཆུ་འབྲུག་ནས་གདན་ས་བསྐྱངས། བདུན་ཅུ་པ་མེ་ཕོ་བྱི་བ་ལ་གཤེགས། བཞི་པ་དཔལ་ཆེན་འོད་པོ་ཡབ་ཀྱི་ང་དགུ་པ་ལྕགས་རྟ་ལ་འཁྲུངས། ང་བཞི་པ་ཆུ་མོ་བྱ་ལ་གཤེགས། དེ་ལ་སྲས་གཉིས་ལས། ཆེ་བ་ས་པཎྜི་ཏ་ཡབ་ཀྱི་སོ་གསུམ་པ་ཆུ་ཕོ་སྟག་ལ་འཁྲུངས། དྲུག་ཅུ་རྩ་གསུམ་པ་ཤིང་ཕོ་འབྲུག་ལ་གོང་མ་རྒྱལ་པོས་རྒྱ་ནག་ཏུ་སྤྱན་དྲངས། བདུན་ཅུ་པ་ལྕགས་མོ་ཕག་ལ་གཤེགས། གཅུང་ཟངས་ཚ་བསོད་ནམས་རྒྱལ་མཚན་ཡབ་ཀྱི་སོ་ལྔ་པ་ཤིང་ཕོ་འབྲུག་ལ་འཁྲུངས། ང་དྲུག་པ་ས་མོ་ཕག་ལ་གཤེགས། དེའི་སྲས་བླ་མ་འཕགས་པ་ཡབ་ཀྱི་ང་གཉིས་པ་ཤིང་མོ་ལུག་ལ་འཁྲུངས། ཟུལ་ཕུར་ན་བཟའ་ཕྲེད་གསོལ་ལ་དགེ་ཚུལ་མཛད། ཉི་ཤུ་རྩ་གཅིག་པ་ཤིང་མོ་ཡོས་ལ་བསྙེན་པར་རྫོགས། ཉི་ཤུ་རྩ་དྲུག་པ་ལྕགས་ཕོ་སྤྲེལ་ལ་སེ་ཆེན་རྒྱལ་སར་ཐོན་པས་གོང་མས་བླ་མར་བཀུར། བོད་ཁྲི་སྐོར་བཅུ་གསུམ་སོགས་སྲིད་ཞིའི་དཔལ་འབྱོར་ཕུན་སུམ་ཚོགས་པས་བཀུར་སྟི་བླ་ན་མེད་པ་བྱས། སོ་གཅིག་པ་ཤིང་མོ་གླང་ལ་བོད་ལ་བཏེགསླར་ས་མོ་སྦྲུལ་ལ་གོང་མའི་དྲུང་དུ་བྱོན་ལོ་བདུན་བཞུགས་ནས་ཞེ་གཉིས་པ་མེ་ཕོ་བྱི་བ་ལ་གདན་སར་ཕེབས། མེ་མོ་གླང་ལ་:ཆོས་༼ཆུ་༽མིག་ཆོས་འཁོར་མཛད། བཞི་བཅུ་རྩ་དྲུག་པ་ལྕགས་ཕོ་འབྲུག་ལ་གཤེགས། དེའི་གཅུང་པོ་བླ་མ་ཕྱག་ན་ཡབ་ཀྱི་ང་དྲུག་པ་ས་མོ་ཕག་ལ་འཁྲུངས། ཉི་ཤུ་རྩ་དགུ་པ་མེ་མོ་ཡོས་ལ་གཤེགས། སློབ་དཔོན་རིན་ཆེན་རྒྱལ་མཚན་ཡབ་ཟངས་ཚས་ང་ལྔ་བཞེས་པ་ས་ཕོ་ཁྱི་ལ་འཁྲུངས་ཞེ་གཉིས་པ་ས་མོ་ཡོས་ལ་གཤེགས། ཡང་བླ་མ་ཡེ་ཤེས་འབྱུང་གནས་ཀྱི་སྲས་བདག་ཉིད་ཆེན་པོ་བཟང་པོ་དཔལ་ཡབ་ཀྱི་ཉེར་ལྔ་པ་ཆུ་ཕོ་ཁྱི་ལ་འཁྲུངས། རེ་གཅིག་པ་ཆུ་ཕོ་ཁྱི་ལ་གཤེགས། བླ་མ་འདི་ལ་སྲས་བཅུ་གཉིས་ཡོད་པར་གྲགས། དེ་ལ་སོགས་པ་ནས་ད་ལྟ་སྔགས་འཆང་ཀུན་དགའ་བཀྲ་ཤིས་ཀྱི་སྲས་འདི་རྣམས་འཁོན་གྱི་རིགས་ལས་བསྟན་འཛིན་སྐྱེས་ཆེན་ཟམ་མ་ཆད་པར་བྱོན་པའོ། །