བླ་མའི་རྣལ་འབྱོར་བྱིན་རླབས་སྤྲིན་ཕུང་།

རྒྱལ་བ་ཀུན་གྱི་སྤྱི་གཟུགས་མཆོག །ཁྱབ་བདག་དཔལ་ལྡན་བླ་མ་ལ། །དངོས་པོ་ཀུན་གྱིས་ཕྱག་འཚལ་ཏེ། །དེ་ཉིད་སྒྲུབ་པའི་རིམ་པ་འབྲི། །ཐོག་མར་སྐྱབས་སུ་འགྲོ་བ་ནི། ན་མོ། བླ་མ་བདེ་གཤེགས་འདུས་པའི་གཙོ། །གདོད་ནས་དག་པའི་སེམས་ཉིད་དང་། །འདུ་འབྲལ་མེད་པའི་རང་བཞིན་ལ། །འཛིན་ཞེན་བྲལ་བས་སྐྱབས་སུ་མཆི། ཧོ། ཐམས་ཅད་ཡེ་ནས་སངས་རྒྱས་ངང་། །གཟུང་དང་འཛིན་པའི་བློ་བྲལ་བ། །མཉམ་རྫོགས་འགྱུར་མེད་ཐིག་ལེ་ཆེ། །རང་གྲོལ་རྟོགས་པར་སེམས་བསྐྱེད་དོ། དངོས་གཞི་རྣལ་འབྱོར་གསལ་གདབ་ནི། ཨེ་མ་ཧོ། ཆོས་ཀུན་གདོད་ནས་རྣམ་དག་པའི། །མི་འགྱུར་ལྷུན་རྫོགས་ཡེ་ཤེས་གདངས། །སྣང་སྟོང་ཟང་ཐལ་གཉུག་མའི་དལ། །མ་བསྐྱེད་ཡོངས་གྲུབ་ཆེན་པོའི་ཚུལ། །སྣང་སྲིད་དག་པ་པདྨ་འོད། །བཀོད་པ་རབ་རྫོགས་ཞིང་གི་དབུས། །ཆུ་སྐྱེས་ཉིན་བྱེད་གདན་སྟེང་དུ། །གཞི་ལུས་ཡེ་ཤེས་ཌཱཀྐིའི་སྐུ། །བདེ་སྟོང་ཉམས་འགྱུར་རབ་རྫོགས་ཤིང་། །རིན་ཆེན་རུས་པའི་རྒྱན་གྱིས་སྤྲས། །གྲི་ཐོད་བརྐྱང་བསྐུམ་དོར་སྟབས་མཛེས། །སྤྱི་གཙུག་པདྨ་ཉི་ཟླའི་སྟེང་། །ངོ་བོ་འགྱུར་མེད་ཆོས་སྐུའི་ཀློང་། །རང་བཞིན་འོད་གསལ་ལོངས་སྤྱོད་རྫོགས། །ཐུགས་རྗེ་འགགས་མེད་སྤྲུལ་བའི་སྐུ། །སྐུ་གསུམ་དབྱེར་མེད་དོན་གྱི་ལྷ། །རྡོ་རྗེ་འཆང་དངོས་གཞན་ཕན་པ། །མཛེས་འཛུམ་པཎྜི་ཏ་ཡི་ཆས། །སེམས་ཉིད་ངལ་གསོའི་ཕྱག་རྒྱ་ཅན། །སྣང་སྟོང་འགྱུར་མེད་ཡེ་ཤེས་ཀྱི། །རང་རྩལ་མ་འགག་རྩ་བ་གསུམ། །གང་འདུལ་རྣམ་རོལ་ཕྱོགས་དུས་ཀྱི། །རྒྱལ་བ་རབ་འབྱམས་སྲས་དང་བཅས། །མ་ཚང་མེད་པའི་ངོ་བོར་རྫོགས། །གནས་གསུམ་ཡི་གེ་གསུམ་གྱིས་མཚན། །དེ་ལས་འཕྲོས་པའི་འོད་ཟེར་གྱིས། །སྐུ་གསུམ་རྒྱལ་བ་རྒྱ་མཚོའི་ཚོགས། །མ་ལུས་སྤྱན་དྲངས་དབྱེར་མེད་བསྟིམས། །རང་སྣང་རྣམ་དག་ཕོ་བྲང་དང་། །ལྔ་ལྡན་པདྨ་བཀོད་པ་ནས། །རྗེ་བཙུན་བླ་མ་སྤྱན་འདྲེན་ན། །ཐུགས་རྗེས་བུ་བཞིན་དགོངས་མཛོད་ལ། །རྩ་གསུམ་རྒྱལ་བ་སྲས་བཅས་དང་། །དབྱེར་མེད་རིགས་ཀྱི་བདག་པོ་རུ། །སྤྱི་གཙུག་འཁོར་ལོའི་རྒྱན་དུ་གཤེགས། །འདི་ནས་བྱང་ཆུབ་མ་ཐོབ་བར། །འབྲལ་མེད་རྗེས་སུ་བཟུང་ནས་ཀྱང་། །གསང་བ་གསུམ་གྱི་བྱིན་ཆེན་ཕོབ། །མཆོག་དང་ཐུན་མོང་དངོས་གྲུབ་སྩོལ། མ་ཧཱ་གུ་རུ་ས་མ་ཡ་ཛཿཀྱེ། བླ་མ་རྡོ་རྗེ་འཆང་ཆེན་པོ། །བདག་སོགས་མགོན་མེད་རྣམས་ཀྱི་སྐྱབས། །ཁྱོད་ལས་རེ་ས་གཞན་མེད་པས། །གདུང་བ་དྲག་པོས་གསོལ་བ་འདེབས། །གུས་པས་ཕྱག་འཚལ་མཆོད་པ་འབུལ། །སྡིག་ལྟུང་ཀུན་བཤགས་དུས་གསུམ་གྱི། །དགེ་ལ་ཡི་རང་ཆོས་འཁོར་བསྐུལ། །མྱ་ངན་མི་འདའ་བཞུགས་གསོལ་འདེབས། །དགེ་བས་བྱང་ཆུབ་མཆོག་ཐོབ་ཤོག །རྒྱལ་དང་རྒྱལ་སྲས་ཇི་སྙེད་ཀྱིས། །གདུལ་བར་མ་ནུས་སྐལ་ངན་བདག །ཁྱེད་ཀྱིས་ཐུགས་རྗེས་མ་བཟུང་ན། །ངན་འགྲོའི་གཡང་ལས་སུ་ཡིས་སྐྱོབ། །ཀྱེ་མ་དྲིན་ཅན་ཆོས་ཀྱི་རྗེ། །བཟོད་དཀའ་སྲིད་པའི་ཆུ་གཏེར་དུ། །བྱིངས་པ་བདག་འདྲ་མི་སྐྱོབ་ན། །སྙིང་རྗེའི་མངའ་བདག་ཇི་ལྟར་རུང་། །ངེས་པར་ཐུགས་རྗེའི་སྤྱན་གྱིས་གཟིགས། །བྱམས་ཆེན་སྙིང་རྗེའི་ཐུགས་ཀྱིས་དགོངས། །ཐབས་མཁས་ནུས་པའི་སྟོབས་བསྐྱེད་དེ། །བདག་རྒྱུད་བྱིན་གྱིས་བརླབ་ཏུ་གསོལ། །ཨ་འཐས་འཁྲུལ་སྣང་སྒྱུ་མའི་ཚུལ། །གཏད་མེད་རང་སར་གྲོལ་བ་དང་། །ཞེན་འཛིན་བློ་ཡི་འཆིང་བ་ཀུན། །ཡེ་གྲོལ་ཆེན་པོར་རྟོགས་པར་མཛོད། །རྡོས་བཅས་ལུས་དང་རླུང་ཁམས་དག །རང་དང་ཆོས་ཉིད་ཆེན་པོ་རུ། །གདོད་ནས་གྲོལ་བའི་གཤིས་ཐོག་ཏུ། །ཚེ་འདིར་ཕྱིན་པར་བྱིན་གྱིས་རློབས། །ཨེ་མ་རང་བྱུང་རྡོ་རྗེ་སེམས། །ངོ་བོ་ཉིད་སྐུའི་བླ་མའི་ཞལ། །བློས་བྱས་ཉམས་ཀྱིས་མ་བཅིང་བར། །མངོན་སུམ་རྗེན་པར་རྟོགས་བྱིན་རློབས། ཞེས་མོས་གུས་དྲག་པོས་གསོལ་འདེབས་ལ་བརྩོན་པ་གལ་ཆེ་ཞིང་། གྲངས་བསགས་ན། ཨེ་མ་ཧོ། སྐྱབས་གནས་ཀུན་གྱི་མཁྱེན་བརྩེའི་གཏེར། །དྲིན་ཆེན་བླ་མ་རྡོ་རྗེ་འཆང་། །སྙིང་ནས་གུས་པས་གསོལ་བ་འདེབས། །ཚེ་རབས་ཀུན་ཏུ་ཐུགས་རྗེས་ཟུང་། །དགོངས་བརྒྱུད་རྟོགས་པའི་བྱིན་ཆེན་ཕོབ། །ཉིད་དང་དབྱེར་མེད་རོ་གཅིག་མཛོད། མ་ཧཱ་གུ་རུ་པཱ་ར་ཧི་ཏ་པྲ་བྷ་སརྦ་སིདྡྷི་ཨཱཿཧཱུྃ༔ ཞེས་པས་གསོལ་བཏབ་བླ་མ་ཡི། །གནས་གསུམ་ཨོཾ་ཨཱཿཧཱུྃ་གསུམ་ལས། །འོད་ཟེར་རིམ་དང་གཅིག་ཆར་འཕྲོས། །བདག་གཞན་ལུས་ངག་ཡིད་ལ་ཐིམ། །སྒོ་གསུམ་ལས་སྒྲིབ་བག་ཆགས་སྦྱངས། །དབང་བཞིའི་ལམ་གྱི་ཡེ་ཤེས་དང་། །རྣམ་གྲོལ་སྐུ་བཞི་མངོན་གྱུར་བསམ། །བསམ་བརྗོད་བྲལ་བའི་གཤིས་ཉིད་དུ། །ངེས་ཤེས་སྙེམས་བྲལ་སོ་མར་གློད། །བླ་མ་ཆོས་སྐུའི་རང་ཞལ་བལྟ། རྗེས་ལ་བསྔོ་སྨོན་བྱ་བ་ནི། ཧོ། སྣང་སྲིད་ཡེ་ནས་དག་པ་ཆེ། །བླ་མ་མཆོག་གི་དགོངས་ཀློང་ལས། །གཡོ་མེད་མོས་གུས་མཐར་ཕྱིན་པས། །ཚེ་འདིར་གདོད་མར་གྲོལ་བར་ཤོག །དེ་ལས་སླར་ཡང་གང་འདུལ་གྱི། །ཐུགས་རྗེའི་རྣམ་འཕྲུལ་ཚད་མེད་པས། །འཁོར་བ་སྟོངས་ཀྱི་བར་དག་ཏུ། །རླབས་ཆེན་འགྲོ་དོན་མཐར་ཕྱིན་ཤོག །གཞན་ཡང་མཐོང་ཐོས་དྲན་རེག་གཙོས། །མཁའ་མཉམ་ཡིད་ཅན་མ་ལུས་པ། །འདྲེན་པའི་དེད་དཔོན་བདག་གྱུར་ཏེ། །ཐམས་ཅད་སངས་རྒྱས་སར་འགོད་ཤོག དེ་སྐད་བླ་མའི་རྣལ་འབྱོར་འདི། །རྡོ་རྗེའི་མཆེད་ཀྱི་བཀས་སྐུལ་ཏེ། །ཀུན་རྨོངས་ནཱ་ཐའི་མིང་ཅན་གྱིས། །དད་པའི་གསོས་སུ་མདོ་ཙམ་བྲིས། །སརྦ་དཱ་ཀཱ་ལྱཱ་ཎཾ་བྷ་ཝནྟུ། །