བླ་མའི་རྣལ་འབྱོར་ཡེ་ཤེས་མཆོག་གཏེར།

ན་མ་སརྦ་གུ་རུ་བྷེ། དངོས་གྲུབ་ཀུན་བདག་བླ་མ་ལ། །བཏུད་དེ་དེ་ཉིད་སྒྲུབ་པའི་ཐབས། །ཡེ་ཤེས་མཆོག་གཏེར་འདིར་དགོད་བྱ། །དད་དམ་ཆོས་གུས་སྲོག་འཛིན་པ། །སྐལ་ལྡན་ཚེ་འདིར་གྲོལ་འདོད་པའི། །བླ་མ་སྒྲུབ་པའི་རིམ་པ་ལ། །རྒྱུན་གྱི་རྣལ་འབྱོར་འདི་ལྟར་བསྒོམ། ཧོ། སྐུ་གསུམ་སྤྱི་གཟུགས་བླ་མ་ལ། །བྱང་ཆུབ་བར་དུ་སྐྱབས་སུ་མཆི། །འགྲོ་རྣམས་སངས་རྒྱས་སར་འགོད་ཕྱིར། །ཟབ་མོའི་རྣལ་འབྱོར་བསྒོམ་པར་བགྱི། ཨཱཿ སྣང་སྲིད་དག་པ་ཡུམ་ལྔའི་ཀློང་། །གནས་ཡུལ་རང་སྣང་པདྨ་འོད། །རྒྱན་བཀོད་ཕུན་སུམ་ཚོགས་པའི་དབུས། །ཆུ་སྐྱེས་འདབ་སྟོང་ཉི་མའི་སྟེང་། །རང་ཉིད་མཚོ་རྒྱལ་དཀར་མོ་ནི། །གཞོན་ཚུལ་རིན་ཆེན་རུས་པས་བརྒྱན། །དབུ་སྐྲ་ཕྱེད་བཅིང་ཟལ་བུ་འཁྲོལ། །ཕྱག་གཡས་གསེར་གྱི་རྡོ་རྗེ་དང་། །གཡོན་པས་ཚེ་ཡི་བུམ་པ་བསྣམས། །ཞབས་གཉིས་བརྐྱང་བསྐུམ་གར་སྟབས་ཚུལ། །དེ་ཡི་སྤྱི་བོར་པད་ཟླའི་སྟེང་། །ཁྱབ་བདག་དཔལ་ལྡན་བླ་མ་ནི། །ཨོ་རྒྱན་ཧེ་རུ་ཀ་ཡི་ཚུལ། །གཡས་པས་ཅང་ཏེའུ་ནམ་མཁར་འཁྲོལ། །གཡོན་པ་མཉམ་བཞག་བྷནྡྷ་འཛིན། །རུས་རྒྱན་ཐོར་ཚུགས་སྟག་ཤམ་སྤྲས། །སྣང་སྲིད་ཟིལ་གནོན་ཡེ་ཤེས་སྐུ། །སྣང་སྟོང་ཆུ་ཟླ་ལྟ་བུར་གསལ། །དེ་ཡི་མཐའ་བསྐོར་འོད་ལྔའི་ཀློང་། ། བརྒྱུད་གསུམ ་བླ་མ་ཡི་དམ་ལྷ། །སངས་རྒྱས་བྱང་སེམས་མཁའ་འགྲོར་བཅས། །དཔག་ཡས་ནམ་མཁའི་དབྱིངས་ཁྱབ་བསྒོམ། །གནས་གསུམ་ཡི་གེའི་འཕྲོ་འདུ་ལས། །ཕྱོགས་བཅུའི་ཞིང་ཁམས་རབ་འབྱམས་དང་། །ཁྱད་པར་རྔ་ཡབ་དཔལ་རི་ནས། །རིག་འཛིན་བླ་མ་འཁོར་དང་བཅས། །སྤྱན་དྲངས་དམ་ཡེ་དབྱེར་མེད་གྱུར། ཧཱུྃཿ ཨོ་རྒྱན་ཡུལ་གྱི་ནུབ་བྱང་མཚམས། །པདྨ་གེ་སར་སོགས། གུ་རུ་པདྨ་སིདྡྷི་ཧཱུྃཿ ཧོ། སངས་རྒྱས་ཀུན་གྱི་ཡེ་ཤེས་གཅིག་བསྡུས་པ། །བཀའ་དྲིན་མཚུངས་མེད་དཔལ་ལྡན་བླ་མ་ལ། །སྒོ་གསུམ་གུས་པ་ཆེན་པོས་ཕྱག་འཚལ་ཞིང་། །ལུས་དང་ལོངས་སྤྱོད་དུས་གསུམ་དགེ་བའི་ཚོགས། །ཕྱི་ནང་མཆོད་སྤྲིན་རྒྱུན་མི་ཆད་པར་མཆོད། །དུག་གསུམ་དབང་གྱུར་ཉེས་ལྟུང་སོ་སོར་བཤགས། །རླབས་ཆེན་འགྲོ་དོན་མཛད་ལ་རྗེས་ཡི་རང་། །ཟབ་རྒྱས་ཆོས་ཀྱི་འཁོར་ལོ་བསྐོར་བ་དང་། །མྱ་ངན་མི་འདའ་བཞུགས་པར་གསོལ་བ་འདེབས། །ལེགས་བྱས་འདིས་མཚོན་དུས་གསུམ་དགེ་བའི་ཚོགས། །གཞན་དོན་བླ་མེད་བྱང་ཆུབ་ཆེན་པོར་བསྔོ། །བདག་དང་མཁའ་མཉམ་འགྲོ་བ་མ་ལུས་པ། །སྐྱེ་ཀུན་བླ་མ་མཆོག་གིས་རྗེས་བཟུང་སྟེ། །སྨིན་གྲོལ་བདུད་རྩིའི་བཅུད་ལ་ལོངས་སྤྱོད་ནས། །ནམ་ཞིག་དགོངས་ཀློང་རོ་གཅིག་འདྲེས་པར་ཤོག ཧོ། སངས་རྒྱས་ཀུན་དངོས་རིགས་ཀྱི་བདག །བཀའ་དྲིན་སུམ་ལྡན་བླ་མ་རྗེ། །ཁྱེད་ལས་རེ་ས་གཞན་མེད་པས། །ཐུགས་རྗེའི་སྤྱན་གྱིས་གཟིགས་སུ་གསོལ། །འཁོར་ཚེ་ཐོག་མ་མེད་པ་ནས། །ལས་ཉོན་སྡིག་པས་ཟིལ་གནོན་ཅིང་། །སྡུག་བསྔལ་གསུམ་གྱི་ཆུ་གཏེར་ཆེར། །རྣམ་པར་འཁྱམས་པའི་མགོན་མེད་བདག །འདི་ནས་བྱང་ཆུབ་མ་ཐོབ་བར། །སྐྱིད་སྡུག་ལེགས་ཉེས་ཅི་བྱུང་ཡང་། །ཡིད་ཆེས་མོས་གུས་རྩེ་གཅིག་པས། །མགོན་པོ་ཁྱོད་ལ་གསོལ་འདེབས་ན། །སྙིང་རྗེའི་གཏེར་ཆེན་བདག་གི་ཡབ། །ཐུགས་རྗེ་བཏང་སྙོམས་མ་མཛད་པར། །བདག་རྒྱུད་བྱིན་གྱིས་རླབས་ཏུ་གསོལ། །སྒོ་གསུམ་སྡིག་སྒྲིབ་དག་པ་དང་། །དབང་བཞི་བསྐུར་བར་མཛད་དུ་གསོལ། །ལམ་བཞི་འབྱོངས་པར་མཛད་དུ་གསོལ། །སྐུ་གསུམ་ཐོབ་པར་མཛད་དུ་གསོལ། །མི་བཟད་སྙིགས་མའི་མཐར་སྐྱེས་ཤིང་། །རྒྱལ་དང་རྒྱལ་སྲས་གཞན་སུས་ཀྱང་། །གདུལ་བར་མ་ནུས་སྐལ་ངན་བདག །ཁྱོད་ཀྱི་ཐུགས་རྗེས་མ་བཟུང་ན། །ངན་འགྲོ་གདུག་པའི་གཡང་ས་ལས། །སྐྱོབ་པའི་དེད་དཔོན་སུ་ཞིག་འཚོལ། །ཀྱེ་མ་དྲིན་ཆེན་ཆོས་ཀྱི་རྗེ། །གདུལ་དཀའ་འདུལ་བའི་ཐབས་མཁས་མཐུ། །དེ་རིང་བཏང་སྙོམས་མ་མཛད་པར། །ཡེ་ཤེས་ཐུགས་རྗེའི་ཤུགས་བསྐྱེད་དེ། །བདག་རྒྱུད་སྨིན་ཅིང་གྲོལ་བར་མཛོད། ཅེས་པས་གསོལ་བཏབ་གདུང་ཤུགས་བསྐྱེད། །ལམ་དབང་ཟབ་མོ་འདི་བཞིན་བླང་། །ཁྱབ་བདག་བླ་མ་ཧེ་རུ་ཀའི། ཨོཾ ། སྐུ་ཡི་སྨིན་མཚམས་ཨོཾ་དཀར་ལས། །འོད་ཟེར་ཟླ་ཞུན་ལྟར་འཕྲོས་པས། །སྤྱི་བོར་ཐིམ་པས་ལུས་སྒྲིབ་དག །སྐུ་ཡིས་བྱིན་རླབས་བུམ་དབང་ཐོབ། །སྣང་སྟོང་བསྐྱེད་རིམ་བསྒོམ་ལ་དབང་། །ལུས་རྩ་སྤྲུལ་བའི་སྐུ་རུ་སྨིན། ཨཱཿ གསུང་གི་ཨཱ་ཡིག་དམར་གསལ་ལས། །འོད་ཟེར་པད་རག་ལྟ་བུ་འཕྲོས། །མགྲིན་པར་ཐིམ་པས་ངག་སྒྲིབ་དག །གསུང་གིས་བྱིན་རླབས་གསང་དབང་ཐོབ། །བཟླས་བརྗོད་ལ་དབང་གསལ་སྟོང་རྟོགས། །རླུང་ཁམས་ལོངས་སྤྱོད་རྫོགས་སྐུར་སྨིན། ཧཱུྃཿ ཐུགས་ཀའི་ཧཱུྃ་མཐིང་འོད་འབར་ལས། །འོད་ཟེར་མཐིང་ཞུན་ལྟ་བུ་འཕྲོས། །སྙིང་གར་ཐིམ་པས་ཡིད་སྒྲིབ་དག །ཐུགས་ཀྱིས་བྱིན་རླབས་ཤེར་དབང་ཐོབ། །བདེ་སྟོང་གཏུམ་མོ་བསྒོམ་ལ་དབང་། །ཐིག་ལེ་ཆོས་ཀྱི་སྐུ་རུ་སྨིན། །སླར་ཡང་ཁྱབ་བདག་ཧེ་རུ་ཀའི། །རྡོ་རྗེའི་སྐུ་ཡི་གནས་གསུམ་ལས། །འོད་ཟེར་དཀར་དམར་མཐིང་གསུམ་འཕྲོས། །བདག་གི་སྒོ་གསུམ་དབྱེར་མེད་འདྲེས། །ཤེས་སྒྲིབ་དག་ནས་ཐུགས་རྡོ་རྗེའི། །བྱིན་རླབས་ཡེ་ཤེས་དབང་བཞི་ཐོབ། །བརྗོད་བྲལ་ལྷན་སྐྱེས་དོན་རྟོགས་ཤིང་། །འོད་གསལ་རྫོགས་ཆེན་བསྒོམ་ལ་དབང་། །ངོ་བོ་ཉིད་སྐུའི་ས་བོན་སྨིན། །མཐར་ནི་གཞི་ལུས་རྣལ་འབྱོར་མ། །འོད་ཞུ་བླ་མའི་ཐུགས་ཀར་ཐིམ། །བློ་བྲལ་རིག་སྟོང་རྗེན་པའི་ངང་། །བཅས་བཅོས་མེད་པར་མཉམ་པར་བཞག །ཧོ། བྱིན་རླབས་འབྱུང་གནས་བླ་མ་རྡོ་རྗེ་འཆང་། །མོས་གུས་དད་པས་ཚུལ་བཞིན་གསོལ་བཏབ་མཐུས། །བདག་དང་མཁའ་མཉམ་འགྲོ་བ་མ་ལུས་པ། །སྐུ་གསུམ་དབྱེར་མེད་བླ་མའི་ས་ཐོབ་ཤོག །དེ་མ་ཐོབ་པའི་ཚེ་རབས་ཀུན་ཏུ་ཡང་། །དཔལ་ལྡན་བླ་མ་མཆོག་གིས་རྗེས་བཟུང་སྟེ། །སྨིན་གྲོལ་ཆོས་ཀྱི་བདུད་རྩིས་རྒྱུད་སྨིན་ཅིང་། །རང་གཞན་དོན་གཉིས་ལྷུན་གྱིས་འགྲུབ་པར་ཤོག ཚུལ་འདི་མོས་ལྡན་རེ་བསྐང་སླད། །རྒན་པོ་གུ་ཎས་གང་ཤར་བྲིས། །དགེ་བས་འགྲོ་ཀུན་ཕྱམས་ཅིག་ཏུ། །ཡེ་ཤེས་བླ་མའི་ས་ཐོབ་ཤོག །