[༢] ཐུགས་སྲས་མཆོག་གྱུར་ཁུ་ལུང་པ་ཡོན་ཏན་རྒྱ་མཚོ་ནི།
ཡབ་གནུབས་ཁྲི་རྗེ་རྨུ་ཐོན་བཙན་དང་ཡུམ་ཁྲོམ་བཟའ་འོད་ལྡན་གྱི་སྲས་སུ་གནུབས་ཡུལ་རོང་དུ་སྐུ་འཁྲུངས། དགུང་ལོ་སུམ་ཅུ་པ་ལ་རི་དྭགས་གཤོར་དུ་ཕྱིན་པས་རྗེ་སངས་རྒྱས་ཡེ་ཤེས་སྣར་གྱི་ཤུག་ལ་ནག་པོར་བཞུགས་པ་དང་མཇལ་ཏེ། རུས་གང་ཡིན་གསུངས་པ་ལ། གནུབས་ཡིན་ཞུས་པས། འོ་སྐོལ་གཉིས་ཚེ་སྔ་མ་ཕ་བུར་འབྲེལ་ཞིང་རུས་ཀྱང་གཅིག ཆོས་ཀྱི་ལས་འཕྲོའང་འདུག་གསུངས་ནས་ཆོས་སྒོར་བཅུག་སྟེ་དབང་རྒྱུད་མན་ངག་བསྟན་པ་སྲུང་བའི་ལས་ཁ་དང་བཅས་པ་ཐམས་ཅད་ཚང་སྤྲུགས་སུ་གནང་བས་བཀའི་བཅུད་དང་ཐུགས་ཀྱི་ཉིང་ཁུ་ཐམས་ཅད་ཀྱི་བཀའ་བབ། ཁྱད་པར་གྱི་ཆོས་སྡེ་སུམ་ཅུ་རྩ་ལྔ་ལ་མཁས་པར་གྱུར། སྣར་གྱི་ཡང་གསང་བྲག་ཕུག་ཏུ་དབང་གི་ཆུ་བོ་བཞི་རྫོགས་པར་བསྐུར་ནས་དབང་གི་ཡིག་མདོ་བཅོ་བརྒྱད་གཏད། དབང་རྟགས་སུ་དབང་བསྐུར་རྒྱལ་པོའི་རྒྱུད་བྱིན། ཡོན་དུ་སྟོད་ཀྱི་ལས་སྒོ་ལན་གསུམ་བླངས་ཏེ། གཡུ་དཀར་པོ་འོད་འཛག བེར་ཤ་བ་ཅན། རྟ་མཚལ་ནག་སེང་གེ། དར་མེན་གྱི་ན་བཟའ། ལ་རྫས་ཀྱི་དཀོར་ཆ་དང་རྩི་སྨན་དཔག་ཏུ་མེད་པ་ཕུལ། གསང་མཚན་རྡོ་རྗེ་གཏེར་བཞད་རྩལ་ལམ་རྡོ་རྗེ་རིག་འཛིན་གཏེར་དུ་གྲགས། ཁུ་ལུང་མཁར་གདོང་ལ་སོགས་པར་སྒྲུབ་པ་མཛད་པས་མཆོག་གི་དངོས་གྲུབ་ཆོས་ཉིད་ཀྱི་དོན་རྟོགས། ཟག་མེད་ཀྱི་མངོན་ཤེས་ཤར་བ་དང་འབྱུང་བ་ལ་རང་དབང་བསྒྱུར། ཐུགས་དམ་གྱི་ལྷ་དུ་མས་ཞལ་གཟིགས་ཤིང་དམ་ཅན་རྣམས་བྲན་དུ་ཁོལ། རང་འདྲ་བ་བརྒྱར་སྤྲུལ་ནས་སྐུ་དགྲ་བཏུལ་བ་སོགས་རྫུ་འཕྲུལ་དང་དྲག་སྔགས་ལ་རྟགས་ཐོན་པས་ནུས་པ་ལ་མངའ་བརྙེས་སོ། །