[༧] ཟུར་ཆུང་ཤེས་རབ་གྲགས་པ་ནི།
ཡབ་ཟུར་ཨ་ཙ་རའི་སྲས་ཟུར་སྒོམ་བྱ་བ་དང་། ཡུམ་ཤེས་རབ་སྐྱིད་ཀྱི་སྲས་སུ་ཤིང་ཕོ་སྟག་གི་ལོ་ལ་རྒྱ་འབར་གདོང་བྱ་བར་སྐུ་འཁྲུངས། དགུང་ལོ་བདུན་ནས་འབྲི་ཀློག་དང་ཞི་ཁྲོའི་ཆོག་ཕྲིན་སོགས་རྩོལ་མེད་དུ་མཁྱེན། ཡབ་ཀྱི་རྗེས་སུ་འབྲངས་ནས་འུག་པ་ལུང་དུ་ཐེགས་པས། ལྷ་རྗེ་ཟུར་པོ་ཆེས། ཁྱོད་ཀྱི་རུས་གང་ཡིན། མིང་ལ་ཅི་ཟེར་གསུངས་པ་ལ། རུས་ཟུར་ཆུང་ཆུང་ཞིག་ལགས། མིང་ཤེས་རབ་གྲགས་པ་བྱ་བ་ལགས་ཞུས་པས། འོ་ན་ཟུར་ཆུང་ཤེས་རབ་གྲགས་པ་ཟེར་བར་གྱིས་གསུང་། དེར་ཡབ་ལ་བཙུན་ཆུང་འདི་ངའི་རྩར་ཞོག་གསུངས་པ་ལྟར་ལྷ་རྗེའི་དྲུང་དུ་བཞག་སྟེ་སློབ་གཉེར་བྱེད་དུ་བཅུག་པས། ཤེས་རབ་ཀྱི་རྩལ་ཆེ་ཞིང་སྒོ་གསུམ་གྱི་སྤྱོད་ལམ་བཟང་བས་བླ་མའི་ཐུགས་ཟིན་ཏེ། དབང་བཀའ། བཤད་བཀའ། གདམས་ངག་གི་བཀའ་ཐམས་ཅད་བུམ་པ་གང་བྱོའི་ཚུལ་དུ་བསྩལ། ཁྱད་པར་འུག་པ་ལུང་གི་གཙུག་ལག་ཁང་དུ་མདོའི་དབང་ཆུ་བོ་བཞི་རྫོགས་སུ་བསྐུར་ཅིང་། གསང་མཚན་རྡོ་རྗེ་ལྷུན་གྲུབ་རྩལ་དུ་བཏགས། དེ་དུས་ཡུལ་སྣང་ཐམས་ཅད་འདུས་པ་ཆེན་པོའི་དཀྱིལ་འཁོར་དུ་གསལ་བ་ལས་བླ་མ་ཉིད་གཙོ་བོ་དང་དབྱེར་མེད་དུ་གཟིགས། གཞུང་ལུགས་ཐམས་ཅད་ཐུགས་སུ་ཆུད་དེ་མཁྱེན་པ་རྒྱས་ཤིང་ཉམས་རྟོགས་ཀྱི་ཀློང་བརྡོལ། མི་མ་ཡིན་པ་ཐམས་ཅད་ཀྱིས་ཀྱང་ཞབས་ལ་བཏུད་དེ་ལུང་སྟོངས་ཀྱི་བྱེ་མའི་གསེབ་ཏུ་ཞལ་སྐྱེམས་དང་རི་རྩེར་ཞལ་ཟས་འདྲེན་པ་སོགས་ཐུགས་བཞེད་འབད་མེད་དུ་གྲུབ་པ་བྱུང་བས། ད་ནི་ངས་འགྲོ་དོན་བྱས་ཀྱང་འགྲུབ་པར་འདུག་སྙམ་ཙ་ན། བླ་མའི་ཞལ་ནས། ད་ཁྱོད་ཀྱིས་བཤད་པ་གྱིས་གསུངས་པ་ལྟར་ཟུར་ཆོས་བསྐྱངས་ཏེ་མདོ་དགོངས་འདུས་བཤད་པས་དུས་གཅིག་ལ་དཔེ་འགྲེམས་སུམ་བརྒྱ་བྱུང་། གྲུབ་པའི་མངོན་རྟགས་བསམ་གྱིས་མི་ཁྱབ་པས་ཟུར་པོ་ཆེའི་ཞལ་ནས། རྩེ་མོ་གཞན་གསུམ་ལ་ཁྱེད་རྣམས་མཆེད་གྲོགས་མཉམ་པ་ཡིན་ཡང་། ཟུར་ཆུང་པའི་གྲིབ་མ་ལ་མ་འགོང་ཞེས་བསྔགས་པར་མཛད་པ་དང་། ལན་གཅིག་ཟུར་ཆུང་པ་འུག་པ་ལུང་གི་རྟེན་གཙོའི་ཐུགས་ཀར་ཐིམ་སོང་བའི་མོད་ལ་རྒྱ་ཕུབས་ཀྱི་སྟེང་ན་ལིང་ངེ་གཤེགས་པ་དང་། སྲམ་པའི་རབ་གནས་ཀྱི་ཚེ་གྲོང་པའི་ཕྱུགས་གཡར་ནས། ཟུར་པོ་ཆེས་ཟུར་ཆུང་ལ་ཁྱོད་ཀྱིས་སྒྲོལ་ལམ་གསོ་གསུངས་པ་ལ། ཟུར་ཆུང་བས་གསོ་བར་ཞུས་པས། ཟུར་ཆེན་དགོངས་པ་ལ་བཞུགས་ཏེ་ཡུངས་ཀར་རེ་གཏོར་བས་ཕྱུགས་ཐམས་ཅད་སྤུངས་ཀྱིས་འགྱེལ། ཤ་སྟོན་བྱས་ཟིན་རྗེས་ད་གསོས་ཤིག་གསུངས་པ་ལ། ཀོ་བའི་སྟེང་དུ་རུས་པ་རྣམས་སྤུངས་ཏེ་སེ་གོལ་ལན་གསུམ་གཏོགས་པར་མཛད་པས་ཐམས་ཅད་ལངས་ཏེ་སྔར་ལས་ཉམས་བཟང་བར་གྱུར། དེ་ནས་གཡས་རུ་ཁང་ཁྲིའི་ལྷ་ཁང་དུ་འཆད་ཉན་སྐྱོང་བའི་དུས་སུ་གྲྭ་པ་རྣམས་གོ་མ་ཆོད་གསུམ་ལ་གཏད་ནས་སྐྱོང་དུ་བཅུག་སྟེ་བྲག་རྒྱ་བོར་སྒྲུབ་པ་ལ་གཤེགས། ཅིར་སྣང་ཐམས་ཅད་ལྷའི་རང་བཞིན་དུ་བཀྲ་ལམ་མེར་ཤར་བ་ལ། དེ་དག་ཀྱང་བཟང་རྟོག་གི་མཐུ་བརྟས་པ་ཡིན། ཡང་དག་པར་གཏད་སོ་མེད་སྙམ་དུ་དགོངས་ནས་རྩོལ་བྲལ་གྱི་ངང་ལ་བཞུགས་པས་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་ཤར། ས་རྡོ་རི་བྲག་ཐམས་ཅད་ལ་ཐོགས་རྡུགས་མེད་པའི་རྫུ་འཕྲུལ་གྲུབ། ཡོངས་སུ་གྲགས་པའི་སློབ་མ་ནི། ཀ་བ་བཞི། གདུང་མ་བརྒྱད། ཕྱམ་བཅུ་དྲུག དྲལ་མ་སུམ་ཅུ་རྩ་གཉིས། སྒོམ་ཆེན་མི་གཉིས། ཡུས་པོ་ཆེ་མི་གཅིག དཀྱུས་མ་མི་གཉིས། སྟ་གུར་མི་གཉིས། གོ་མ་ཆོད་མི་གསུམ་ལ་སོགས་པ་མང་དུ་བྱུང་བ་ལས། ཀ་བ་བཞི་ནི། སེམས་ཕྱོགས་ཀྱི་ཀ་བ་གོང་བུའི་སྐྱོ་སྟོན་ཤཱཀ་ཡེ། མདོའི་ཀ་བ་བསྐྱེད་ལུང་གི་ཡང་ཁྱེད་བླ་མ། སྒྱུ་འཕྲུལ་གྱི་ཀ་བ་ཆུ་བར་གྱི་གླན་ཤཱཀ་བཟང་། ཕྲིན་སྒྲུབ་ཀྱི་ཀ་བ་ནག་མོ་རིའི་མདའ་ཏིག་ཆོས་ཤག་གོ། ཡང་མ་ཐོག་བྱང་འབར་དང་བརྒྱུད་པ་ལྔ་ཞེས་ཀྱང་གྲགས་སོ། གདུང་མ་བརྒྱད་ནི། མ་ཐོག་པ་དང་། སྐྱོ་སྟོན་ཆོས་སེང་། གླན་ཤཱཀ་བྱང་། རྩགས་ཤཱཀ་རིངས། གནུབས་སྟོན་བག་མ། དབུས་པ་ས་འཐོར། ཤུ་སྟོན་ཟླ་གྲགས། རྩེ་ཁྲོམ་བྱང་དཔལ་དང་བརྒྱད་དོ། །ཡང་ལང་གཟི་ཆེན། ནལ་རྦ་སྙིང་པོ། རམ་སྟོན་རྒྱལ་མཚན་དང་གསུམ་བཅུག་པའང་སྣང་ངོ་། །སྒོམ་ཆེན་མི་གཉིས་ནི། རྦ་སྒོམ་དིག་མ་དང་། བོན་སྒོམ་ངོ་པའོ། །ཡུས་པོ་ཆེ་ནི་ལ་སྟོད་ཀྱི་ཟི་སྟོན་བསོད་རྒྱལ་ལོ། །སྟ་གུར་ནི་ཞང་སྟོན་སྔགས་སེ་དང་། ཁྱུང་པོ་རྟ་ཆུང་གྲགས་སེའོ། །གོ་མ་ཆོད་པ་གསུམ་ནི། མགོ་བྱ་ཚ། མིག་ཆུང་དབང་སེང་། འགོས་ཆུང་དབང་སོགས་སོ། །དེ་ལྟར་བཤད་སྒྲུབ་ཀྱི་མཛད་པ་རྒྱས་ནས་དྲུག་ཅུ་རེ་གཅིག་པ་ཤིང་སྟག་གི་ལོར་སྐུ་གཤེགས་སོ། །