འཇུག་དོན།
སྨྲས་པ། མཐའ་མེད་འཁོར་བའི་འཇིག་རྟེན་འདིར། །མཐའ་ཡས་བཤེས་གཉེན་ཚུལ་བཟུང་སྟེ། །མཐའ་བྲལ་དབུ་མའི་ལམ་བསྟན་ནས། །མཐའ་དབུས་མེད་པ་ཆོས་ཀྱི་དབྱིངས། །རྩོལ་མཛད་མཁས་གྲུབ་མ་ལུས་པའི། །ཕུལ་བྱུང་ངོ་མཚར་མཛད་པའི་གཏམ། །ཐོས་ཆུང་བདག་འདྲའི་བློའི་མུན་སེལ། །ཆོས་འབྱུང་བསྟན་པའི་ཉི་མ་འདི། །ཉུང་གསལ་གྲོང་ཚིག་བརྗོད་པས་བརྩམས། །འགལ་འཁྲུལ་ནོངས་པའི་ཕུང་པོ་རྣམས། །བླ་མ་ལྷ་དང་འཕགས་པའི་ཚོགས། །མཁས་གཉན་ཀུན་གྱི་སྤྱན་སྔར་བཤགས། །ཀྱེ་མ་དེང་སང་དུས་སྐབས་འདིར། །ལྷག་བསམ་བཟང་པོས་བསྟན་པ་དང་། །སེམས་ཅན་ཕན་པའི་ལས་བྱས་ན། །དཀར་པོའི་བྱ་བཞིན་མི་བདེར་འགྱུར། །ཀུན་དང་བསྟུན་ན་ཅོལ་ཆུང་ཟེར། །མ་སྨྲས་བཏང་སྙོམས་འདུག་གྱུར་ན། །གྱོང་པོ་ཤིང་གི་ལག་པ་ཅན། །རྒྱངས་ཏེ་ཕྱིན་ན་དྲིན་བགྲངས་ཟེར། །ཅར་དུ་བསྡད་ན་ཀུན་གྱིས་དམོད། །ཇི་ལྟར་བྱས་ཀྱང་མ་བདེ་བས། །བསམ་གཏན་ཁང་བུར་ཡིབས་ནས་སུ། །བསམ་གཏན་གྲོགས་ཀྱི་ཟོལ་དག་ཏུ། །བསམ་གཏན་ཐུན་གྱི་བར་རྣམས་སུ། །བསམ་གཏན་ཡིད་ལ་འདི་བྱས་སྤེལ། །འདི་ལས་བྱུང་བའི་དགེ་བ་གང་། །ལུས་བསྐྱེད་ཕ་མས་ཐོགས་དྲངས་པའི། །སེམས་ཅན་རྣམས་དང་ཐུན་མོང་དུ། །བྱས་ཏེ་བྱང་ཆེན་རྒྱུར་བསྔོའོ། །དེ་ལྟར་ཆོས་འབྱུང་བསྟན་པའི་ཉི་མ་ཞེས་བྱ་བ་འདི་ནི་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ་ཡབ་སྲས་ཀྱི་བཀའ་དྲིན་གྱིས་འཚོ་བའི་སྨིན་གླིང་གྲྭ་པའི་ཐ་ཤལ་བ་ཤཱཀྱའི་དགེ་སློང་ཨོ་རྒྱན་ཆོས་གྲགས་ཀྱིས། སྔོན་གྱི་ཡིག་རྙིང་རྣམས་དང་། གཏེར་ཆེན་བླ་མ་ཡབ་སྲས་ཀྱི་གསུང་གི་བདུད་རྩི་མང་དུ་ཐོས་པ་ལ་བརྟེན་ནས་རང་ལོ་ང་དྲུག་པར་བསམ་གཏན་གྱི་ཐུན་བར་རྣམས་སུ་བྲིས་ཏེ་ལྕགས་ཕག་མགོ་ཟླའི་ཡར་ཚེས་ལ་རྫོགས་པར་བགྱིས་པའོ། །འདིས་ཀྱང་བསྟན་པ་རིན་པོ་ཆེ་དར་ཞིང་རྒྱས་པའི་རྒྱུར་གྱུར་ཅིག། སརྦ་མངྒ་ལཾ།། །