[༡༢] གླན་སྟོན་ཆེན་པོ་རྡོ་རྗེ་འོད་ནི།
དམ་པ་འདི་ནི་ཤངས་ཉ་ཚལ་དུ་གླན་གྱི་རིགས་སུ་སྐུ་འཁྲུངས། གཙང་ནག་པ་སོགས་མཁས་པ་མང་པོའི་དྲུང་དུ་མཚན་ཉིད་ཀྱི་གཞུང་ལུགས་རྣམས་དང་ཐུན་མོང་གི་རིག་གནས་ལ་མཁས་པར་སྦྱངས། རྩགས་ཚ་ཤཱཀ་འབྱུང་། ཁ་རག་སྟོན་སྙིང་། གཉོས་ཆུ་བོ་རི་པ་དར་མ་རྡོ་རྗེ། ཤངས་པ་ནག་པོ་སོགས་བླ་མ་མང་པོ་བསྟེན་ནས་གསང་སྔགས་ཕྱི་ནང་གི་དབང་གདམས་ངག་བཤད་བཀའ་མཐའ་ཡས་པ་གསན་པས་རྒྱུད་ལུང་མན་ངག་ཐམས་ཅད་ཀྱི་བདག་པོར་གྱུར། ཁྱད་པར་འཆུམས་ཀྱི་འཆད་འགོ་དགོན་པར་སྲེགས་སྟོན་རྡོ་རྗེ་རྒྱལ་མཚན་ལས་འདུས་པ་མདོའི་དབང་ཡོངས་སུ་རྫོགས་པ་གསན་ཞིང་། ཡོན་དུ་གཡུ་མོ་ཆེས་སྣ་དྲངས་པའི་ཟང་ཟིང་གི་དངོས་པོས་མཆོད་པས་གསང་མཚན་རྡོ་རྗེ་དྲག་པོ་རྩལ་དུ་བཏགས། བླ་མ་དེ་ཉིད་དང་། གཞན་ཡང་སྟོན་སྙིང་། ལྡན་མ། རྩགས་ཚ། སུམ་པ། སྐྱ་རྣམས་ལས་མདོའི་བཤད་པ་མན་ངག་དང་བཅས་པ་གསན། ཤར་རི་རྒྱ་གར་གླིང་ཆུང་དུ་སྒྲུབ་པ་མཛད་པས་གནས་ལུགས་ཀྱི་ལྟ་བ་རྟོགས། ཞུ་བདེའི་ཡེ་ཤེས་འབར། སྣང་འབྱེད་ཀྱི་ཏིང་འཛིན་ཐོབ། ཕྱག་ན་རྡོ་རྗེས་ཞལ་མངོན་དུ་བསྟན་ནས་དབང་བསྐུར་ཅིང་ལུང་བསྟན། ཆོས་ཀྱི་མིག་རྡུལ་བྲལ་བརྙེས་པས་གཞན་གྱི་རྒྱུད་ཚོད་མཁྱེན། ལུང་རིགས་སྨྲ་བ་ལ་འགྲན་གྱི་དོ་མེད་དུ་གྱུར་པས་དཔལ་གསང་ཕུ་ནེའུ་ཐོག་གི་གདན་སར་སྤྱན་དྲངས་ཀྱང་སྔགས་ཀྱི་བཤད་སྒྲུབ་དོན་ཆེ་བར་གཟིགས་ནས་མ་བྱོན། རང་གི་སྐུའི་སྲས་སྤྲུལ་སྐུ་བརྩོན་འགྲུས་སེང་གེ་དང་། གླན་སྟོན་བསོད་ནམས་རྒྱལ་པོ་གཉིས་ལ་ཉ་ཚལ་དུ་ཆུ་བོ་བཞིའི་དབང་བསྐུར་རྒྱུད་བཤད་གདམས་ངག་དང་བཅས་པ་གནང་བ་སོགས་ཆོས་གྲྭ་ཁོར་མོར་བསྐྱངས་ཏེ་བསྟན་པ་རྒྱས་པར་མཛད། ཞིང་འདིའི་གདུལ་བྱ་རེ་ཞིག་རྫོགས་ནས་ཤམྦྷ་ལར་གཤེགས་སོ། །