[༡༣] གླན་བརྩོན་འགྲུས་སེང་གེ་ནི།
གླན་སྟོན་རྡོ་རྗེ་འོད་ཀྱི་སྲས་སུ་སྐུ་འཁྲུངས་ཤིང་རྟེན་རབ་ཏུ་བྱུང་བ་ཡིན། གཟང་ཐང་སྐྱར་ཞིག་པོ་བདུད་རྩིར་གདན་ས་མཛད་ཅིང་ཞིག་པོའི་ཕྱི་རྟེན་དུ་ཐང་སྐྱ་འབུམ་མོ་ཆེ་བཞེངས་པ་སོགས་ཕྲིན་ལས་རྒྱ་ཆེ། གླན་བསོད་རྒྱལ་གྱི་གསང་མཚན་ཕྲིན་ལས་མཐར་ཕྱིན་རྩལ་ཞེས་གསོལ། རང་གི་ཡབ་གླན་སྟོན་རྡོ་རྗེ་འོད་འབར་ལས་ཉ་ཚལ་དུ་འདུས་མདོ་ཆུ་བོ་བཞིའི་དབང་བསྐུར་རྒྱུད་བཤད་གདམས་ངག་དང་བཅས་གསན་སྐབས་གསང་མཚན་རྡོ་རྗེ་དྲག་པོ་རྩལ་དུ་བཏགས། མདོ་སྔགས་ཀྱི་ཆོས་ཐམས་ཅད་ལ་གསན་སྦྱངས་མཐར་ཕྱིན་མཛད་པས་མཁས་པའི་གནས་ཐོབ། སྐུ་ཚེ་སྔ་མར་ཤེས་རྒྱུད་འབྱོངས་པ་ཉིད་འདིར་ཡང་སྒྲུབ་པ་ལ་བརྩོན་པས་རིགས་སད་དེ་ཡི་དམ་གྱི་ལྷས་དངོས་སུ་དབང་བསྐུར། དབང་གི་ཆུ་བོ་རྫོགས་པས་དེ་བཞིན་གཤེགས་པ་རྣམས་ཀྱིས་ལུང་བསྟན་ཅིང་གནས་ལུགས་ཇི་བཞིན་པ་ཐུགས་སུ་ཆུད། བཤད་སྒྲུབ་གང་ལའང་བར་ཆད་ཀྱིས་མི་ཚུགས་ཤིང་གདུལ་བྱ་ཐམས་ཅད་སྨིན་གྲོལ་ལ་བཀོད། སྔར་ཡབ་ལས་གཏད་རྒྱ་གསན་མ་ཐུབ་པས་ཕྱིས་ཡབ་ཀྱི་སློབ་མ་རིག་འཛིན་ཆོས་ཀྱི་སྡོང་པོ་དཀོན་མཆོག་རིན་ཆེན་ལས་གསན་ཞིང་དད་གུས་ཆེན་པོས་བཀུར་བར་མཛད་དོ། །