[༡༤] ལྷ་རྗེ་ལྷ་འབུམ་པ་ནི།
གཙོ་བོ་གླན་སྟོན་ཆེན་པོ་རྡོ་རྗེ་འོད་ཀྱི་ཐུགས་སྲས་མཆོག་གཉིས་ཀྱི་ཡ་གྱལ་བསོད་ནམས་རྒྱལ་པོ་ལས་ཆུ་བོ་བཞིའི་སྨིན་དབང་དང་། རྒྱུད་གདམས་ངག་དང་བཅས་པ་མ་ཚང་མེད་པ་གསན་པས་གསང་མཚན་རྡོ་རྗེ་དྲག་པོ་རྩལ་དུ་གནང་། གླན་སྟོན་ཆེན་པོའི་སྐུ་སྲས་བརྩོན་འགྲུས་སེང་གེ་ལས་ཀྱང་ཟབ་ཆོས་མཐའ་ཡས་པའི་རྒྱུན་བཞེས། མདོ་སྔགས་སྤྱི་དང་ཁྱད་པར་རྒྱུད་ལུང་མན་ངག་ཐམས་ཅད་ལ་མཁས་པས་འཆད་པའི་ཕྲིན་ལས་ཀྱིས་བློ་གསལ་མང་པོའི་མིག་ཕྱེས། ཉིན་གཅིག་ལའང་སྐུའི་བཀོད་པ་དུ་མ་བསྟན་ཏེ་ཤངས་གྱང་ཁང་དང་། ཉང་སྟོད་ལྕོག་སྤེ་ལ་སོགས་པའི་ལྷ་ཁང་བཅུ་གསུམ་གྱི་རབ་གནས་དུས་གཅིག་ལ་མཛད་པར་གྲགས། སྐུ་གཤེགས་པའི་དུས་སུ་ཡང་ཉ་ཚལ་དུ་ཆོས་འཆད་པ་དང་། གཙང་པོའི་ཆབ་ཁར་ཆུ་སྒྲོལ་བ། ཚོང་འདུས་སུ་ཉོ་ཚོང་མཛད་པ་གསུམ་དུས་གཅིག་ལ་བསྟན་པར་མཛད། མངོན་སྤྱོད་ལ་དུས་བཏབ་ཆོག་པས་དྲག་པོའི་ཕྲིན་ལས་ལ་མངའ་བརྙེས་སོ། །