[༢༢] རིག་འཛིན་གཡུ་འབྲུག་རྡོ་རྗེ་ནི།
མཁས་གྲུབ་ཤ་མི་རྡོ་རྗེ་རྒྱལ་མཚན་གྱི་ཐུགས་སྲས་ཏེ་བདེ་ཆེན་གྱི་སྒྲུབ་གནས་སུ་འདུས་པ་མདོའི་དབང་གཏད་རྒྱ་དང་བཅས་པ་རྫོགས་པར་བསྐུར་ཅིང་། བཤད་པ་དང་གདམས་ངག་ཀྱང་བསྩལ་ནས་གསང་མཚན་རྡོ་རྗེ་དྲག་པོ་རྩལ་དུ་གནང་། འོན་དང་རྡོ་སོགས་དབུས་རིའི་དབེན་གནས་རྣམས་དང་གཙོ་བོ་གཡས་རུ་རྟ་ནག་གི་ལ་རྒུ་རྡོས་དགོན་དུ་ཉམས་ལེན་ལ་ཆིག་སྒྲིལ་གྱིས་བཞུགས་པས་སྒྲུབ་ཆེན་ལ་རྒུ་པ་ཞེས་ཀྱང་མཚན་དུ་གྲགས། ཉམས་རྟོགས་ཡོན་ཏན་མཐར་ཕྱིན་པ་བརྙེས། བྱིན་བརླབས་མཛད་པ་ཙམ་གྱིས་ནད་གདོན་ལས་གྲོལ་བ་སོགས་མཐུ་སྟོབས་ནུས་པའི་རྩལ་ཐོན། དགུང་ལོ་ཡང་ཤིན་ཏུ་སྨིན་པར་བཞུགས་ཏེ་དབེན་པར་ཉམས་ལེན་དང་སྦྲགས་ནས་ཐར་འདོད་ཀྱི་གདུལ་བྱ་རྣམས་སྨིན་གྲོལ་ལ་འགོད་པར་མཛད་དོ། །