རིལ་སྒྲུབ།༡ རིལ་སྒྲུབ་ཀྱི་ཆོ་ག་དང་སྒྲུབ་ཚུལ། དགེ་ལུགས་པའི་མ་ཎི་རིལ་སྒྲུབ་གཅིག་པུར་མཚོན་ནའང་། རྒྱལ་དབང་ལྔ་བ་བློ་བཟང་རྒྱ་མཚོ། ལྕང་སྐྱ་ངག་དབང་བློ་བཟང་ཆོས་ལྡན། བཀའ་འགྱུར་བ་བློ་བཟང་ཚུལ་ཁྲིམས། ཀི་རྟི་བློ་བཟང་འཕྲིན་ལས་སོགས་ཀྱི་རིལ་སྒྲུབ་དང་། དམིགས་བརྩེ་མའི་རིལ་སྒྲུབ་ཡང་། ཅོ་ནེ་གྲགས་པ་བཤད་སྒྲུབ། ཞོགས་དོན་ཡོད་མཁས་གྲུབ། ཀུན་མཁྱེན་འཇིགས་མེད་དབང་བོ་སོགས་ཀྱི་རིལ་སྒྲུབ་དང་། དཀོན་མཆོག་རྒྱལ་མཚན་གྱི་མ་ཎི་རིལ་སྒྲུབ་དང་། རྗེ་དོན་ཡོད་མཁས་གྲུབ་ཀྱིས་གསང་བ་ཡེ་ཤེས་མཁའ་འགྲོའི་རིལ་སྒྲུབ་སོགས་བཞུགས་པ་ལྟར། གྲུབ་མཐའ་སོ་སོའི་མཁས་པས་མཛད་པའང་མང་ངོ་། ། རིལ་སྒྲུབ་ནི་བསྒྲུབ་བྱ་དང་མཐུན་པའི་རྫས་རྣམས་ཞིབ་མོར་བྱས་ཏེ་རིལ་བུར་ཕབ་ནས། ཆོ་ག་ཆད་ལྷག་མེད་པའི་སྒོ་ནས་རིལ་བུ་བྱིན་ཅན་བཟོས་པ་ལ་བྱ་ཞིང་། དབྱེ་བ་ཡང་། སྒྲུབ་ཐབས་ཀྱི་སྒོ་ནས་ཚད་བཟུང་མི་ནུས་ཀྱང་། ངོ་བོའི་སྒོ་ནས་ཞི་རྒྱས་དབང་དྲག་གི་རིལ་སྒྲུབ་བཞི་ལས་མ་འདས་ལ། མདོག་གི་དབང་དུ་བཏང་ན། ཤེས་རབ་འཕེལ་བར་སེར་བོ། ཞི་བར་དཀར་བོ། རྒྱས་པར་སེར་བོ། དབང་སྡུད་ལ་དམར་བོ། དབྱིབས་ཀྱི་དབང་དུ་བཏང་ན། ཞི་བར་ཟླུམ་ལེབ། དབང་ལ་ཟླ་གམ། རྒྱས་པར་གྲུ་བཞི་བྱ། སྒྲུབ་དུས་ནི། རྒྱུ་སྐར་རྒྱལ་དང་ཁྲུམས་སྟོད་ཁྲུམས་སྨད་ནམ་གྲུ་དང་། གཟའ་ཕུར་ལྷག་ཟླ་བ་པ་སངས་རྣམས་སུ་བསྒྲུབ་པར་བྱའོ། ། ༢ རིལ་བའི་རྒྱུ། རིལ་བུའི་རྒྱུ་ལ། ཀུན་མཁྱེན་འཇིགས་མེད་དབང་པོས་མཛད་པའི་དགེ་འདུན་རིལ་སྒྲུབ་བྱ་ཚུལ་ལས། སངས་རྒྱས་ཀྱི་འཕེལ་གདུང་། མཁས་ཤིང་གྲུབ་པ་བརྙེས་པའི་དམ་པ་གོང་མ་རྣམས་ཀྱི་གདུང་རུས། བླ་མ་དང་དགེ་འདུན་གྱི་སྡེ་ཁྱད་པར་ཅན་གྱི་བསྒྲུབས་པའི་མ་ཎི་རིལ་བུ། བླ་མ་གོང་མ་རྣམས་ཀྱི་ན་བཟའ་དང་དབུ་སྐྲ་ལྟ་བུ་ནུས་ལྡན་བསྲེགས་པའི་བྱེ་མ་རྣམས་ཞིབ་མོར་བརྡུང་བ་ཞེས་སོགས་དང་། རྗེ་བཙུན་དམ་ཆོས་རྒྱ་མཚོས་མཛད་པའི་འཕགས་མ་མཚོ་ལྡན་མའི་རིལ་སྒྲུབ་བྱ་ཚུལ་ལས། ཨ་རུ་གསེར་མདོག བ་རུ། སྒྲོན་ཤིང་། གོ་སྙོད་ཀྱི་འབྲས་བུ། དུག་མོ་ཉུང་། ལུག་རུ་དཀར་སེར་དམར་གསུམ། སྤང་རྒྱན་དཀར་བོ། ཤིང་མངར་བཅས་ཆ་སྙོམས་པ་ཞིབ་ཏུ་བཏགས་ནས་ཞེས་གསུངས་པ་སོགས་སྒྲུབ་ཐབས་སོ་སོ་ལས་རིལ་བའི་རྒྱུ་མི་འདྲ་བ་མང་དུ་གསུངས་ཤིང། བསྒྲུབ་བྱ་རྩ་བ་གསུམ་མམ། ཡང་ན། ཞི་རྒྱས་དབང་དྲག་གི་ལས་གང་ཞིག་ལ། སྒྲུབ་ཐབས་གང་གིས་རིལ་སྒྲུབ་བྱས་ཀྱང་། གཞན་གྱི་ཁ་ཟས་མི་སྤྱོད་པ། འཆལ་གཏམ་མི་སྨྲ་བ། རིལ་བའི་རྒྱུར་འགོམ་ཡུག་དང་། བཙོག་གྲིབ་ཤོར་བ། དམ་ཉམས་ཀྱི་ལག་ནས་ཐོན་པ་མ་ཡིན་པར་ངོས་གཙང་དགོས་སོ། ། ༣ རིལ་སྒྲུབ་བྱ་ཚུལ། རིལ་བུ་བཟོས་རྗེས་མཚལ་དང་གུར་ཀུམ་སོགས་ཀྱིས་ཁ་བསྒྱུར་ཅིང་། བུམ་པ་སོགས་སུ་བླུགས་ལ། སྒྲུབ་པ་པོས་ཤ་ཆང་སྒོག་ཙོང་སོགས་སྤངས་ཏེ། རང་ཉིད་ལྷ་དང་བླ་མ་གང་རུང་ལ་གསལ་བཏབ་ནས། ཐུགས་ཀ་ནས་འོད་ཟེར་འཕྲོས་པས། སངས་རྒྱས་བྱང་སེམས་རྣམས་ཀྱི་བྱིན་རླབས་དང་ནུས་མཐུ་ཐམས་ཅད་གཅིག་བསྡུས་ཀྱིས་རིལ་བུར་ཐིམ་པ་སོགས་ཆོ་ག་ལྟར་སྒྲུབ་པར་བྱོས་ལ། མངོན་སུམ་དང་རྨི་ལམ་གང་རུང་ལ། འགྲུབ་པའི་རྟགས་མ་བྱུང་གི་བར་དུ་བསྒྲུབ་དགོས། མ་མཐའ་ཡང་གྲངས་དང་བསྙེན་ཚད་ཙམ་ངེས་པར་དུ་འགྲོ་དགོས་སོ། ། ༤ རིལ་སྒྲུབ་ཀྱི་ཕན་ཡོན། འཕགས་མ་མཚོ་ལྡན་མའི་རིལ་སྒྲུབ་ལས། ཞག་བདུན་ཟོས་པས་དིག་པ་དང་། །ལྐུགས་པ་ལྒིན་པ་དག་ཀྱང་འཚོ། །བཅུ་གཅིག་སྐད་བཟང་མགྲིན་པ་བདེ། །ཉི་ཤུས་མི་བརྗེད་གཟུངས་འཐོབ་འགྱུར། །ཟླ་བ་གཅིག་ཏུ་ཟོས་གྱུར་ན། །བློ་ནི་མེ་དང་འདྲ་བར་འགྱུར། །རབ་ཏུ་བསྟེན་ན་ཚེ་རིང་ཞིང་། །རྒས་པའི་སྐྱོན་གྱིས་གོས་པ་མེད། །ཅེས་དང་། གཞན་ཡང་། མི་འཁྲུགས་པའི་རིལ་སྒྲུབ་ཚད་ལྡན་བྱས་པ་ཟོས་ན་ངན་སོང་གི་སྒོ་ཁེགས་པ་དང་། འཇམ་དབྱངས་ཀྱི་རིལ་སྒྲུབ་ཟོས་ན་ཤེས་རབ་འཕེལ་བ། ཚེ་དཔག་མེད་ཀྱིས་ཚེ་རིང་བ། སྨན་བླས་ནད་འཇོམས་པ། དམིགས་བརྩེ་མས་རྒྱུད་ལ་བྱིན་རླབས་འབྱུང་བ་སོགས་ཕན་ཡོན་བསམ་གྱིས་མི་ཁྱབ། འཇུ་མི་ཕམ་གྱིས་ཀྱང་རིལ་བུ་མགུལ་དུ་འདོགས་པའམ། ནངས་མ་རེ་ལ་རིལ་བུ་ཟོས་ན། བརྒྱ་ཡིས་མི་བརྗེད་གཟུངས་ཐོབ་པ་དང་། རྫས་ཀྱི་བཅུད་ལེན་སོགས་ཀྱི་དགོས་པ་དང་། དབང་སྡུད་མངོན་ཤེས་སོགས་འགྲུབ་པར་གསུངས་སོ། །དབྱངས་ཅན་མའི་རིལ་སྒྲུབ་ཀྱི་ཕན་ཡོན་ནི། དམ་པའི་རྒྱ་གཞུང་ལས། རིལ་བུ་རྒྱ་ཆེན་བཞིར་མཐོང་ནས། །ཤེས་རབ་འཇམ་དཔལ་རྡོ་རྗེ་དང་། །སངས་རྒྱས་ཀུན་དང་མཉམ་པར་འགྱུར། །རིལ་བུ་དབྱངས་ཅན་མར་མཐོང་ནས། །སངས་རྒྱས་ཞིང་དུ་འགྲོ་བར་འགྱུར། །རིལ་བུ་ཉི་ཟླར་མཐོང་གྱུར་ནས། །སྔོན་གྱི་སྐྱེ་བ་དྲན་པར་འགྱུར། །རིལ་བུ་འོད་དུ་མཐོང་གྱུར་ནས། །སྒྲ་བཞི་དག་ལ་མཁས་པར་འགྱུར། །འོད་དང་དུ་བ་རྔ་སྒྲ་དང་། །དུང་འབུད་ཉི་ཟླ་ཤར་བ་དང་། །མེ་ཏོག་འཛུགས་དང་ཞིང་རྨོ་དང་། །སྣག་ཚ་འཐུང་དང་ཉམས་དགའ་དང་། །ཡི་གེ་འབྲི་ཀློག་མཐོང་བ་དང་། །མངོན་པར་ཤེས་པ་འཆར་བ་རྣམས། །ཤེས་རབ་འཕེལ་བའི་རྟགས་སུ་འདོད། །ཅེས་སོ། ། འཕོ་བ་འདེབས་སྟངས།༡ འཕོ་བའི་ཁུངས། སྤྱིར་ན་འཕོ་བ་ཟེར་བ་ནི། ནཱ་རོ་བས། རླུང་གི་གཞུ་ལ་སེམས་ཀྱི་མདའ། །ཧིག་གི་སྒྲ་ཡིས་རབ་བསྐུལ་ནས། །རྣམ་པར་ཤེས་པའི་ཆོས་ཉིད་འདས། །མིང་ཡང་འཕོ་བའི་གདམས་ངག་ཟེར། །གསུངས་པ་ལྟར་ལགས་ལ། འཕོ་བ་ཞེས་པའི་གདམས་ངག་ཁྱད་པར་ཅན་འདི་ཉིད། སྔགས་བླ་མེད་ཀྱི་ཕ་རྒྱུད་མ་རྒྱུད་གཉིས་ལས་གསུངས་ཀྱང་། གཙོ་བོ་མ་རྒྱུད་གདན་བཞི་དང་། སམྦུ་ཊ། བདེ་མཆོག་སྡོམ་འབྱུང་སོགས་ལས་གསུངས་ཏེ། གདན་གཞི་ལས། ཐམས་ཅད་ལུས་ལ་གནས་པ་ཡི། །ཡེ་ཤེས་ཀྱིས་ནི་ཡེ་ཤེས་མཆོག། སྟེང་དུ་ཚངས་པའི་སྒོ་འདི་ནི། །མདོ་ལས་འཕོ་བའི་མིང་དུ་བཤད། །ཅེས་སོགས་དང་། པཎ་ཆེན་བློ་བཟང་ཆོས་རྒྱན་གྱིས། ཚུལ་འདི་སྡིག་ཅན་བཙན་ཐབས་འཚང་རྒྱའི་ཐབས། །མ་བསྒོམ་འཚང་རྒྱ་འཕོ་བའི་མན་ངག་ཅེས། །བླ་མེད་རྒྱུད་སྡེའི་སྙིང་བོ་བསྡུས་པ་ཡིན། །ཞེས་དང་། བླ་མཆོད་ལས། ལམ་སྣ་མ་ཟིན་འཆི་བའི་དུས་བྱེད་ན། །བཙན་ཐབས་འཚང་རྒྱ་བླ་མའི་འཕོ་བ་ནི། །སྟོབས་ལྔ་ཡང་དག་སྦྱར་བའི་གདམས་ངག་གིས། །དག་པའི་ཞིང་དུ་བགྲོད་པར་བྱིན་གྱིས་རློབས། །ཞེས་པ་འདི་དག་གོ ། དགེ་ལུགས་པར་མཚོན་ན་སྲད་རྒྱུད་ལུགས་ཀྱི་དགའ་ལྡན་འཕོ་ཁྲིད་ཐུན་མོང་མ་ཡིན་པའི་དམིགས་བརྩེ་མ་འབུམ་གྱི་བཀའ་རྒྱ་ཅན་འདི་འཇམ་དབྱངས་བཞད་པའི་རྡོ་རྗེ་ཡན་ཆད་ལ་ཡི་གེ་མེད་པའི་སྙན་བརྒྱུད་དུ་བཞུགས་པ་ལས། དེའི་དྲུང་དུ་ཐུགས་སྲས་འཇམ་དབྱངས་བདེ་བའི་རྡོ་རྗེས་གསན་ཏེ། ཟིན་བྲིས་བཏབ་པ་ནས་ཡིག་ཐོག་ནས་དར་ཁྱབ་བྱུང་ལ། འདིའི་ཁྲིད་འཐོབ་པ་ལ་དམིགས་བརྩེ་མ་སུམ་འབུམ་མམ། མ་མཐའ་འབུམ་གཅིག་ངེས་པར་དུ་གསུངས་དགོས་སོ། །གཞན་ཡང་། གསར་མའི་ལུགས་སུ་འཕོ་བ་མཁའ་སྤྱོད་མ་དང་འཕོ་བ་སྐར་ཁུང་སོགས་དང་། རྙིང་ལུགས་སུ་པདྨ་འོད་འབར་གྱི་འཕོ་བ་དང་། ཉི་ཟླ་སངས་རྒྱས་ཀྱི་འཕོ་བ་འཇག་བཙུགས་མ། ཀརྨ་གླིང་བའི་ཞི་ཁྲོའི་འཕོ་བ་དྲན་པ་རང་གྲོལ་སོགས་ཡོད་དོ། ། ༢ འཕོ་བའི་དབྱེ་བ། སྤྱིར་འཕོ་བ་ལ་དབྱེ་ན་བཅུ་གཅིག་ཡོད་དེ། སྦྱངས་ཏེ་འཕོ་བ་ཏིང་ངེ་འཛིན། སྲོག་དང་རྩོལ་བའི་འཕོ་བ། རྣམ་ཤེས་བླ་མར་འཕོ་བ། བཙན་ཐབས་དག་ཏུ་འཕོ་བ། སྤྲོས་མེད་ཆོས་སྐུའི་འཕོ་བ། སྤྲོས་བཅས་གཟུགས་སྐུའི་འཕོ་བ། ལོངས་སྤྱོད་རྫོགས་སྐུའི་འཕོ་བ། སྤྲུལ་བ་སྐུ་ཡི་འཕོ་བ། ཡིད་འོང་མཁའ་འགྲོའི་འཕོ་བ་དང་། གཞན་ཡང་། འཕོ་བ་ལ་དྲུག་ཏུ་ཡང་བཤད་དེ། ༡ རབ་ཆོས་སྐུའི་འཕོ་བ་ནི། ཚེ་འདིར་གནས་ལུགས་མ་བཅོས་པའི་ལྟ་བ་མ་ནོར་བ་རྒྱུད་ལ་སྐྱེས་ཤིང་གོམས་འདྲིས་ཡོད་པ་རྣམས། འཆི་ཁའི་ཚེ་ཀ་དག་མཁྲེགས་ཆོད་ཀྱི་གསང་ལམ་ནས་དབྱིངས་རིག་གི་གནད་ལ་བརྟེན་ཏེ་ཆོས་སྐུའི་ཀློང་དུ་འཕོ་བ་དེ་ཡིན། འཕོ་བ་ཐེབས་པའི་ཕྱི་རྟགས་སུ་ནམ་མཁའ་གཡའ་དག་པ་དང་། ནང་རྟགས་སུ་ཕུང་བོ་ཡུན་རིང་བཀྲག་མི་ཡལ་བ་དང་། གསང་རྟགས་སུ་ཨ་དཀར་བོ་དང་ཧཱུཾ་མཐིང་ག་སོགས་འབྱོན་ནོ། ། ༢ འབྲིང་ལོངས་སྐུའི་འཕོ་བ་ནི། བསྐྱེད་རྫོགས་ཀྱི་རྣལ་འབྱོར་ལ་གོམས་འདྲིས་བྱས་ཤིང་སྒྱུ་མ་ལྟ་བུའི་ལྷ་སྐུ་ལ་རྩལ་འབྱོངས་པ་དག་འཆི་ཁའི་ཚེ། བར་དོའི་འཁྲུལ་སྣང་འཆར་བ་དང་མཉམ་དུ་ཟུང་འཇུག་ཡེ་ཤེས་ཀྱི་སྐུར་འཕོ་བ་དེ་ཡིན། ལོངས་སྐུའི་འཕོ་བ་ཐེབས་ན། ཕྱི་རྟགས་སུ་ནམ་མཁའ་འཇའ་དང་འོད་ཀྱིས་གང་བ་དང་། ནང་རྟགས་སུ་སྤྱི་བོའི་ཚངས་བུག་ཏུ་ཁྲག་དང་ཆུ་སེར་ཐོན་པ་དང་། ཟིལ་བ་ཁྲོམ་པ། སྐྲངས་པ་སོགས་འབྱུང་། གསང་རྟགས་སུ་གདུང་རིགས་རྣམ་པ་ལྔའམ་གང་རུང་དང་ལྷ་སྐུ་འམ་ཕྱག་མཚན་སོགས་འབྱོན་ནོ། ། ༣ ཐ་མ་སྤྲུལ་སྐུའི་འཕོ་བ་ནི། གསང་སྔགས་སྨིན་བྱེད་ཀྱི་དབང་ཐོབ་ཅིང་། དམ་ཚིག་ལ་སྐྱོན་མ་ཞུགས་པར་བར་དོའི་གདམས་ངག་དང་ལྡན་ཞིང་། སྐྱེ་བ་སྤྲུལ་བའི་ལམ་འཁྱེར་ལ་བརྟེན་ནས་ཞིང་དག་པའི་གནས་སུ་འཕོ་བ་ཡིན། ཕྱི་རྟགས་སུ་འཇའ་སྤྲིན་དང་མེ་ཏོག་གི་ཆར་འབབ་པ་དང་། ནང་རྟགས་སུ་སྣ་བུག་གཡོན་དུ་ཁྲག་གམ་ཆུ་སེར། ཡང་ན་བྱང་སེམས་ཐོན་པའོ། །གསང་རྟགས་སུ་རིང་བསྲེལ་ལམ་དབུ་ཐོད་བུམ་ཧྲིལ་དང་། ཕྱག་མཚན་སོགས་འབྱོན་ནོ། །༤ ཐ་མལ་འདུ་ཤེས་གསུམ་ལྡན་གྱི་འཕོ་བ་ནི། རྩ་དབུ་མ་ལ་ལམ་གྱི་འདུ་ཤེས། སེམས་རྣམ་ཤེས་ལ་མགྲོན་པོའི་འདུ་ཤེས། གནས་བདེ་ཆེན་དག་ཞིང་ལ་འགྲོ་སའི་འདུ་ཤེས་བཞག་སྟེ་འཕོ་བ་དང་། ༥ སྐད་ཅིག་མའི་འཕོ་བ་ནི། མེ་ཆེན་པོའི་ནང་དུ་ཧྲིལ་གྱིས་ཐིམ་པ་དང་། ཆུ་ཆེན་པོའི་ནང་དུ་བུབ་ཀྱིས་འཁྱེར་བ། གཡང་གཟར་དུ་འཚུབ་བེ་ལྷུང་བ། མགོ་ལ་ཐོག་བརྒྱབ་པའམ། སྙིང་ལ་མདའ་གྲིས་བསྣུན་པ། གཟའ་གདོང་ཐུག་བརྒྱབ་པ་ལྟ་བུ་བྱུང་དུས། རིག་པ་སྤྱི་བོའི་བླ་མ་འོད་དཔག་མེད་ལ་གཏད་པའོ། །༦ གཤིན་པོ་རྗེས་འཛིན་གྱི་འཕོ་བ་ནི། རྟོགས་པ་ཚད་ལྡན་གྱི་དམ་པ་སྣང་སེམས་ལས་སུ་རུང་བ། བར་དོའི་རྒྱུད་མཁྱེན་པའི་རྣལ་འབྱོར་བས། གཞན་འཆི་ཁ་མའམ། བར་དོ་ན་ཡོད་པར་འཕོ་བ་འདེབས་པ་དེ་ཡིན། སྐབས་འདིར་འཆད་བྱའི་འཕོ་བ་ནི་འདི་ཉིད་དོ། ། ༣ འཕོ་སྦྱོང་བྱེད་སྟངས། ཐོག་མར་ཚད་ལྡན་བླ་མ་དམ་པའི་དྲུང་ནས། འཕོ་བ་ལུང་རྐྱང་ཙམ་མ་ཡིན་པར། བླ་སློབ་ཟུང་གིས་དམིགས་རིམ་དང་ལྡན་པའི་སྒོ་ནས། ལུང་ཁྲིད་སོགས་ཁུངས་བཙན་མནོས་རྗེས། དབེན་གནས་སུ་འཕོ་སྦྱང་བྱས་ཏེ། འཕོ་རྟགས་ཐོན་རེག་བར་དུ་སྦྱངས་དགོས་ལ། ཐོན་རྗེས་བླ་མས་གཞན་ལ་འཕོ་བ་འདེབས་པའི་གསུང་གི་གནང་བ་འཐོབ་པ་ན། རང་ཉིད་དམ་སྡོམ་ལ་གནས་པའི་སྒོ་ནས་འཕོ་བ་འདེབས་པ་ཡིན་ནོ། །རྣམ་ཤེས་འཕོ་བའི་སྒོ་ཡང་། རྡོ་རྗེ་གདན་བཞི་རྒྱུད་ཆེན་པོ་ལས། ལམ་བཟང་བོ་ནི་མཛེས་པའི་གནས། །ལམ་ངན་སྲིད་པའི་སྐྱོན་གྱིས་གོས། །ཐིག་ལེ་ལྟེ་བ་སྤྱི་གཙུག་དང་། །མིག་དང་སྣ་དང་རྣ་བ་དང་། །ཆུ་དང་ཆུ་མིག་སྒོ་ཡིན་ཏེ། །སྒོ་དགུ་ཡི་ནི་མཚན་ཉིད་ཡིན། །ལྟེ་བ་འདོད་ཅན་མཐོ་རིས་ཏེ། །ཐིག་ལེ་གཟུགས་ཀྱི་ལུས་ཅན་ནོ། །སྟེང་ནས་སྟེང་གི་གནས་ཡིན་ཏེ། །མི་གདུགས་ལ་སོགས་དེ་རུ་འགྲོ། །རྣ་ནས་གནོད་སྦྱིན་གནས་སུ་འགྲོ། །རྣ་བ་དག་ནི་གྲུལ་བུམ་ལྷ། །གལ་ཏེ་མིག་ལས་ཡེ་ཤེས་འགྲོ། །མི་རྣམས་ཀྱིས་ནི་བདག་པོར་འགྱུར། །སྲིད་པའི་སྒོ་ནི་ཡི་དྭགས་ཏེ། །དེ་ནི་ལྕི་བས་དུད་འགྲོའོ། །ཆུ་མིག་རྣམ་ཤེས་མྱུར་བ་རུ། །དམྱལ་བ་བརྒྱད་དུ་ཤེས་པར་བྱ། །སྒོ་རྣམས་ཀྱི་ནི་བྱེ་བྲག་གི ། འཁོར་བའི་བྱེ་བྲག་འབྱུང་བ་ཡིན། །དེ་བས་སྒོ་ནི་བྱེ་བྲག་ལས། །སྒྲུབ་པ་པོས་ནི་ལམ་བཟང་བསྟེན། །ཅེས་དང་། ནཱ་རོ་པཎ་ཆེན་གྱིས། སྒོ་བརྒྱད་འཁོར་བའི་སྐར་ཁུང་ཅན། །སྒོ་གཅིག་ཕྱག་རྒྱ་ཆེན་པོའི་ལམ། །སྒོ་བརྒྱད་བཅད་ནས་སྒོ་གཅིག་དབྱེ། །ཞེས་དང་། ཡང་བཤང་སྒོར་ཐོན་ན་དམྱལ་བར་མཆི་སྟེ། མཁའ་འགྲོ་མ་ཀུ་རུ་ཀུ་ལེའི་རྒྱུད་ལས། རྣམ་ཤེས་རླུང་ལ་ཞོན་ནས་ནི། །འོག་གི་གནས་སུ་འཕོས་གྱུར་ན། །ཆོས་ལ་གོམས་པའི་གང་ཟག་ཀྱང་། །ངན་སོང་རྒྱུད་དུ་སྐྱེ་འགྱུར་ཏེ། །མགྲོན་པོ་ལམ་དུ་ཞུགས་པའི་མི། །གྲོགས་ཀྱིས་བསྒྱུར་བ་ཇི་བཞིན་ནོ། །གསུངས་པ་དང་། ཁ་ནས་ཐོན་ན་ཡི་དྭགས། ཆུ་ལམ་ནས་ཐོན་ན་དུད་འགྲོ། མིག་ནས་ཐོན་ན་མི། རྣ་བར་ཐོན་ན་ལྷ་མིན། ལྟེ་བར་ཐོན་ན་འདོད་ལྷ། སྣ་ནས་ཐོན་ན་གནོད་སྦྱིན། མིག་དབུས་སྨིན་མཚམས་ནས་ཐོན་ན་གཟུགས་ཁམས་སུ་སྐྱེ་བར་གསུངས་པས་སྒོ་གཞན་བརྒྱད་བཅད་དེ། སྤྱི་གཙུག་གསེར་གྱི་སྒོ་ནས་ཐོན་དགོས་པར་ཁྲི་བློ་བཟང་རྒྱལ་མཚན་སེང་གེས་གསུངས་ལ། སྤྱི་གཙུག་ཚངས་བུག་ནི་དག་པ་མཁའ་སྤྱོད་དུ་འགྲོ་བའི་ལམ་ཡིན་པས་དེ་ལས་རྣམ་ཤེས་ཐོན་ན་ཐར་བ་འཐོབ་པར་འགྱུར་བས། དེར་འདུན་པ་གཏད་པ་གལ་ཆེའོ། ། ༤ འཕོ་བ་འདེབས་སྐབས་ཀྱི་སྦྱོར་བ། རང་ཉིད་འཕོ་འདེབས་ཀྱི་གནས་སུ་མ་སླེབས་གོང་ནས། ཡི་དམ་རྡོ་རྗེ་འཇིགས་བྱེད་ལྟ་བུ་ཡིན་ན། དེའི་ང་རྒྱལ་ལ་གནས་པའི་ཐུགས་ཀའི་ས་བོན་ཧཱུཾ་ཡིག་ལས་ཁྲོ་བོའི་ཚོགས་དཔག་མེད་སྤྲོས་ཏེ། རོ་རྩར་སླེབས་ཚེ་གཤིན་འདྲེ་ལ་སོགས་པ་ལ་ཕན་སེམས་ཀྱི་སྒོ་ནས་གསུར་དང་གཏོར་མ་བཏང་། འདིའི་རྣམ་ཤེས་དང་ཉེ་འབྲེལ་ལ་མ་གནོད་པར་སོང་ཞིག་ཅེས་བརྗོད་ལ། གལ་ཏེ་གནོད་འདྲེ་རྣམས་མི་འགྲོ་བར་གླགས་འཚོལ་བར་སེམས་ན། སྙིང་ཀ་ནས་ཁྲོ་ཚོགས་དཔག་ཏུ་མེད་པ་འཕྲོས་ཏེ། གཤིན་རྗེ་དེ་དག་རྒྱ་མཚོའི་ཕར་འགྲམ་དུ་བསྐྲད་ཅིང་བརླག་པར་བསམས་ལ། སྔགས་དང་གུ་གུལ་བདུག ཡུངས་དཀར་ལ་ཡི་དམ་གྱི་སྙིང་བོ་སོགས་བཟླས་ནས་བྲབས་པར་བྱའོ། ། ༥ འཕོ་བ་འདེབས་ཚུལ་དངོས། འཕོ་བ་འདེབས་ཀྱི་ཚེ། དང་བོ་རྫས་ཀྱི་འཕོ་བ་སྟེ། དེ་བཞིན་གཤེགས་པའི་འཕེལ་གདུང་ངམ། སྐྱེས་ཆེན་དམ་པའི་གདུང་རུས། ཡང་ན། སྒྲུབ་མཆོད་སྐབས་ཀྱི་རྡུལ་ཚོན། མགྲོན་བུ་མེར་བསྲེག་པའི་ཐལ་བ། ཁབ་ལེན་རྡོ་རྣམས་ཕྱེ་མར་འཐག་པ། སྦྲང་རྒོད་དང་མར་སྦྱར་བའི་ལྡེ་གུ སྤྱི་གཙུག་ཏུ་སྲབ་མཐུག་ཀོ་བ་ཙམ་བྱུགས། དེ་ཡང་ཕྱི་དབུགས་ཆད་མ་ཐག་ནས་ལུས་ཀྱི་དྲོད་ཕལ་ཆེར་བསྡུས་ཤིང་། སྙིང་ཀའི་ཐད་དུ་དྲོད་ཅུང་ཟད་ཡོད་པའི་སྐབས་དེར་འཕོ་བ་འདེབས་དགོས། ཚེ་འདས་དེ་ཉིད་ཤི་ནས་ཞག་ཁ་ཡར་སོང་བ་ལྟ་བུ་ཡིན་ན་རྣམ་ཤེས་འགུག་གཞུག་བྱ་དགོས། རོ་མེད་ན་གོས་སམ་མིང་བྱང་སོགས་ཐ་མལ་བའི་ཆ་བྱད་ཅན་ཙོག་པུར་ཐལ་མོ་སྦྱར་ནས་འདུག་པར་བསམ་ལ། སྐྱབས་འགྲོ་སེམས་བསྐྱེད་དང་། ཚད་མེད་བཞི་སྒོམ་སྟེ། མགོན་པོ་འོད་དཔག་མེད་འཁོར་དང་བཅས་པ་སྤྱན་དྲངས། ཚེ་འདས་ཀྱི་རྣམ་ཤེས་ཁ་དོག་དམར་ཞིང་གསལ་ལ་ཨ་ཐུང་གི་གཟུགས་ཅན་དུ་བཀུག་སྟེ། སྤྱི་གཙུག་ནས་སྙིང་ཀར་ཐིམ་པར། བདེན་ཚིག་བརྗོད་དེ་བགེགས་བསྐྲད་བྱས། དེ་ནས། བར་དོ་ངོ་སྤྲོད་དང་བཅས་ཕྱག་ཐལ་མོ་སྦྱར་ནས་འོད་དཔག་མེད་ལ་གསོལ་བ་རྩེ་གཅིག་ཏུ་བཏབ་སྟེ། བླ་མ་སྟོན་པ་འོད་དཔག་མེད་ཀྱི་མཚན་བརྗོད་པ་ཉེར་གཅིག་བྱ། དེ་ནས་ཚེ་འདིའི་ལུས་ལོངས་སྤྱོད་གཉེན་ཉེ་གང་ལའང་མ་ཆགས་པར་འོད་དཔག་མེད་ལ་གསོལ་བ་རྩེ་གཅིག་ཏུ་འདེབས་དགོས་པའི་གསལ་འདེབས་དང་། ལུས་རྙིང་བ་ཙོག་པུར་ཡོད་པའི་དབུས་སུ་རྩ་དབུ་མ་སྦོམ་ཕྲ་མདའ་སྨྱུག་ཙམ་ཡོད་པའི་མར་སྣེའི་ལྟེ་བ་དང་། ཡར་སྣེ་ཚངས་བུག་ཏུ་ཟུག་པའི་མར་སྣེ་ཁ་ཟུམ་ཞིང་། ཡར་སྣེ་སྐར་ཁུང་ཁ་ཕྱེ་བ་ལྟ་བུར་གྱུར་བའི་མར་སྣེའི་ནང་དུ། རྣམ་ཤེས་ཀྱི་ངོ་བོ་ཐིག་ལེ་དཀར་ལ་དམར་བའི་མདངས་ཅན་རྒྱ་སྲན་ཙམ་ཡང་ཞིང་གཡོ་བ་འཕུར་ལ་ཁད་ཀྱི་རྣམ་པར་གསལ་བཏབ་སྟེ། དེ་ལ་དམིགས་པ་བཟུང་ནས། རང་གི་སྙིང་ཀ་ནས་རླུང་ཅུང་ཟད་སྤྲོས་ཏེ། ཚེ་འདས་ཀྱི་སྙིང་གི་ཐིག་ལེ་འོག་ཏུ་གནས་པ་ཆེར་འཕེལ་ཏེ། ཐིག་ལེ་བསྐྱོད་པར་ནུས་པ་དང་ལྡན་པར་བསམ་ལ། ཚེ་འདས་ཀྱིས་ཀྱང་གསོལ་བ་གདབ་པར་མོས་ཏེ། རང་ཉིད་ཀྱིས་སྐད་སྙན་མོས་མགོན་པོ་འོད་དཔག་མེད་ལ་གདུང་ཤུགས་དྲག་པོས་གསོལ་བ་ལན་གསུམ་བཏབ་པས། འོད་དཔག་མེད་ཀྱི་ཐུགས་ཀ་ནས་འོད་ཀྱི་སྦུ་གུ་ཕུ་ཐུང་བརྐྱངས་པ་ལྟ་བུ་ཞིག་བྱུང་སྟེ་ཚངས་བུག་ལ་ཟུག དེའི་ནང་ནས་འོད་ཟེར་ལྕགས་ཀྱུ་ལྟ་བུ་བྱུང་བ་དབུ་མའི་ནང་བརྒྱུད། ཚེ་འདས་ཀྱི་རྣམ་ཤེས་ཐིག་ལེར་གསལ་བཏབ། རང་གི་སྙིང་ག་ནས་སྤྲོས་པའི་ཐིག་ལེ་འོག་ཏུ་གནས་པ་ཆེར་འཕེལ་བ་དེས་བསྐྱོད་པར་བསམ་ལ། སྐད་གསང་མཐོན་པོས[ཧིག] གསུམ་དང[ཕཊ]གཅིག་བརྒྱབ། [ཧིག]དང་བོའི་སྐབས་སུ་ཚེ་འདས་ཀྱི་རྣམ་ཤེས་དེ་སྙིང་ག་ནས་མགྲིན་པར་དྲངས། གཉིས་པས་མགྲིན་པ་ནས་ཚངས་བུག གསུམ་པས་ཚངས་བུག་ནས་སྤྱི་བོ་བླ་མ་འོད་དཔག་མེད་ཀྱི་ཐུགས་ཀའི་ཧྲཱྀ་ཡིག་ལ་ཐིམ། མཐར[ཕཊ]དྲག་པོ་ཞིག་བརྗོད་ཚེ་དཔའ་ཆེན་གྱི་མདའ་འཕངས་པ་བཞིན་བདེ་བ་ཅན་གྱི་སྤྲུལ་གཞི་ལ་ཐིམ། དེའི་ཐུགས་ཀ་ནས་སླར་ཡང་རང་སེམས་ཚུར་འོང། གཤིན་པོའི་རྣམ་ཤེས་ཐིག་ལེའི་རྣམ་ཅན་སྐར་མདའ་མཆེད་པ་བཞིན་འདབ་སྟོང་པདྨའི་སྦུབས་སུ་ཐེག་ཆེན་གྱི་རིགས་ཅན་དབང་རྣོན་དུ་སྐྱེས། སངས་རྒྱས་ཀྱི་ཞལ་མཐོང་ཞིང་། ཆོས་མཐའ་ཡས་པའི་ཡོན་ཏན་བརྙེས་པས། རྒྱལ་བ་འཁོར་བཅས་མཉེས་ཏེ་བླ་ན་མེད་པའི་བྱང་ཆུབ་འཐོབ་པར་ལུང་བསྟན། སངས་རྒྱས་ཀྱི་ཞིང་གྲངས་མེད་དུ་བགྲོད་ནས། ཐེག་ཆེན་གྱི་ཆོས་ཉན་ཞིང་། མ་དག་པའི་འགྲོ་བ་སྒྲོལ་ནུས་པའི་མོས་པ་བྱས་ལ། རྗེས་སུ་བཟང་སྤྱོད་སོགས་སྨོན་ལམ་གྱིས་མཐའ་བརྒྱན་པར་བྱའོ། །ཞིབ་པར་ངག་དབང་འཇམ་དབྱངས་བློ་གྲོས་ཀྱི་འཕོ་ཁྲིད་དགའ་ལྡན་ཞིང་དུ་བགྲོད་པའི་མྱུར་ལམ་སོགས་ལས་ཤེས་པར་བྱའོ། ། ཡང་རྡོ་རྗེའི་གདན་བཞིའི་རྒྱུད་ལས། རིམས་ལ་སོགས་པ་མ་ཕོག་པར། །གོང་དུ་འཕོ་བའི་སྦྱོར་བ་མཆོག། སྔོན་དུ་བུམ་པ་བརྩམས་པ་ཡིན། །སྒོ་རྣམས་ཐམས་ཅད་བཅིང་བར་བྱ། །རྒྱལ་བ་ལྔ་ཡི་མཆོད་རྟེན་གྱི། །སྒོ་ནི་དགག་པར་བསྒོམ་བྱ་སྟེ། །དེ་ལ་འོག་གི་སྒོ་རུ་ནི། །ཆུ་ཡི་ས་བོན་དཀར་བོ་བསམ། །ཆུ་དང་ཆུ་མིག་སྒོ་ལ་ནི། །མེ་ཡི་ས་བོན་འབར་བ་སྟེ། །དེ་ལ་ཤིན་ཏུ་མཉམ་བཞག་པས། །དབུགས་ནི་བུམ་པ་ཅན་དུ་བསྒོམ། །ཞེས་རླུང་སྦྱོར་དང་བཅས་པ་སྒོམ་པར་གསུངས་ནའང། །རྙིང་ལུགས་ལྟར་ཞི་ཁྲོ་འཕོ་བ་རང་གྲོལ་གྱི་སྒོམ་ལུགས་ནི། མཁས་གྲུབ་ཀརྨ་ཆགས་མེད་ཀྱིས། བདེ་བའི་གནས་ལ་སེམས་དཔའི་སྐྱིལ་ཀྲུང་གིས་འདུག་ལ་འཁོར་བའི་སྒོ་དགག་པ་ནི། ལུས་དྲང་བོར་བསྲངས། ལག་པ་གཉིས་ས་ནོན་གྱི་ཕྱག་རྒྱས་པུས་མོ་གཉིས་བཀབ། དཔུང་བ་གཉིས་བརྒྱངས། དེ་ནས་རང་གི་སྙིང་གར་ཡི་གེ་ཧཱུཾ་མཐིང་ནག་འོད་དུ་འབར་བ་གཅིག ཧཱུཾ་གཅིག་ཆད་པས་བཤང་ལམ་དུ་སོང་། དམྱལ་བའི་སྒོ་ཁྲིག་གེར་བཀག དེ་ནས་ཧཱུཾ་གཅིག་ཆད། སྲིད་པའི་སྒོར་སོང་། ཡི་དྭགས་ཀྱི་སྒོ་བཀག དེ་བཞིན་དུ་ཧཱུཾ་གཅིག་གིས་ཆུ་ལམ་དུད་འགྲོའི་སྒོ་བཀག དེ་ནས་སྣ་བུག་གཉིས། དེ་ནས་རྣ་བའི་བུ་ག་གཉིས་ཧཱུཾ་འོད་དང་ལྡན་པ་རེ་རེས་བཀག་པར་བསམ། སྤྱི་བོ་ཚངས་པའི་བུ་ག་ནས་རྔྷི་མགོ་ཐུར་དུ་བསྟན་པས་བཀག་པར་བསམ། ལུས་ཀྱི་དབུས་རྩ་དབུ་མ་ལུག་རྒྱུད་ཀྱི་རྒྱུ་མ་ཕུས་བཏབ་པ་ལྟར། མར་སྣེ་ལྟེ་འོག་ཏུ་ཟུག་པ། ཡར་སྣེ་ཚངས་བུག་ཏུ་ཟུག་པ། དཀར་ལ་འཚེར་བའི་མདངས་དང་ལྡན་པ། ལུས་ཀྱི་དབུས་སུ་དྲང་བོར་ཁྲང་ངེ་ཡོད་པའི་མར་སྣེ་ལྟེ་འོག་རྩ་གསུམ་འདུས་མདོར་རིག་པའི་ངོ་བོ་ཐིག་ལེ་དཀར་ལ་འཚེར་བ་གསལ་ལ་དྭངས་པ། དབུགས་ཀྱི་སྐྱིབ་སྐྱིབ་འཕར་ལྷབ་ལྷབ་ཡར་ལ་ཁད་པ་ཡོད་པར་བསམ། སྤྱི་བོའི་སྟེང་གི་ནམ་མཁར་བླ་མ་དེ་འོད་དཔག་མེད་ཀྱི་ཆ་ལུགས་འཛུམ་དམུལ་ལེར་བཞུགས་པར་བསམ། ལུས་ཤེད་སྟེང་དུ་སྤུག་ལ་སྒྲིམ། བཤང་ལམ་དུ་དྲག་ཏུ་བསྡམས། མིག་གྱེན་དུ་ལྡོག ལྕེ་ཡ་རྐན་ལ་སྦྱར། ལག་པའི་མཐེ་བོང་གཉིས་ཀྱིས་སྲིན་རྩ་མནན་པའི་ཁུ་ཚུར་དྲག་ཏུ་བཅང་ཞིང་ལྟེ་འོག་ནས་ཡར་དྲག་ཏུ་འཐེན་ཅིང་། ངག་ཏུ﹝ཧིག﹞﹝ཧིག﹞ཅེས་ཁོང་ཤེད་དང་ལྡན་པས་དྲངས། འོག་རླུང་གི་ཤུགས་ཀྱིས་ཐིག་ལེ་དེ་རང་དབང་མེད་པར་དབུ་མའི་ནང་ནས་ཡར་ངང་ཧྲིལ་ལེ་དྲངས་པ། ﹝ཧི﹞བདུན་གྱིས་ལྟེ་བར་དྲངས། དེ་ནས་བདུན་གྱིས་སྙིང་གར། དེ་ནས་བདུན་གྱིས་མགྲིན་པར། དེ་ནས་བདུན་གྱིས་སྨིན་མཚམས་སུ། དེ་ནས﹝ཧིག﹞ཅེས་ཚངས་བུག་གི་རྔྷི་དེ་ལ་གཏུགས། ཐུག་པ་དང་ཀ་ཞེས་ཡང་ཐིག་ལེ་དེ་མར་བབས་པ་སྟེ། ལྟེ་འོག་ཏུ་ངང་ཀྱི་ལེར་གནས་པར་བསམ། དེའི་བར་ལ་ཅུང་ཟད་ངལ་གསོ། ཡང་སྔོན་ལྟར་སྦྱངས། ཐིག་ལེ་རིམ་པར་སྤར་བར་གསུངས་ལ། ཡང་འཇག་བཙུགས་པའི་འཕོ་བ་སྦྱང་ལུགས་ནི། སེམས་ཅན་ཐམས་ཅད་ཀྱི་དོན་དུ་བདག་གིས་འཕོ་བ་སྦྱང་བར་བྱའོ་སྙམ་དུ་སེམས་བསྐྱེད་ནས། རང་ཉིད་ཡི་དམ་རྡོ་རྗེ་རྣལ་མའི་སྐུ་ཕྲུ་མ་ཕུས་བཏབ་པ་ལྟ་བུ་ཁོག་པ་སྟོང་སང་ངེ་བར་བསམ་པའི་སྤྱི་བོར་བླ་མའི་ངོ་བོ་སངས་རྒྱས་འོད་དཔག་མེད་སྐུ་མདོག་དམར་བོ་ཞལ་གཅིག་ཕྱག་གཉིས་མཉམ་བཞག་གི་ཕྱག་རྒྱར་མཛད་པ་ཞབས་རྡོ་རྗེ་སྐྱིལ་ཀྲུང་གིས་བཞུགས་པར་བསམ། རང་གི་ལུས་ཀྱི་དབུས་ནས་ཡར་རྩ་དབུ་མ་ཕྱི་དཀར་ལ་ནང་དམར་བ། སྤྱི་གཙུག་ནས་ལྟེ་འོག་སོར་བཞིའི་བར་སླེབས་པ་ཕྲ་སྦོམ་སྦ་ལྕག་འབྲིང་བོ་ཙམ་བསམ་པའི་ཚངས་བུག་ཏུ་རྔྷི་ཡིག་དཀར་བོ་མགོ་ཐུར་དུ་བསྟན་པ། དེ་ནས་རང་གི་དབུ་མའི་ནང་གི་སྙིང་ཐད་དུ་པདྨ་དམར་བོ་འདབ་མ་བརྒྱད་པའི་ལྟེ་བར་རམ་ལས་ཉི་མའི་དཀྱིལ་འཁོར་གྱི་སྟེང་དུ་རང་གི་རྣམ་པར་ཤེས་པའི་ངོ་བོ་ཐིག་ལེ་དཀར་ལ་འཚེར་བ། སྣུམ་ཞིང་འགྲིལ་བ། སྲན་མའི་རྡོག་པོ་ཙམ། འཕར་འདར་ལིང་ལིང་བ་ཞིག་བསམས་ལ། ལུས་ཐ་མལ་བའི་སྐྱིལ་ཀྲུང་སོར་མོ་རྣམས་བསྐུམས། ཉྭ་བཞི་བསྒྲིམས། ལག་པ་རྡོ་རྗེ་ཁུ་ཚུར་བསྡམས། བྲང་གི་སྒྲོག་རུས་གཡས་གཡོན་ནོན་ཙམ་བྱ། མགྲིན་པ་འགུགས། ལྕེ་ཡ་རྐན་ལ་སྦྱར། མིག་གྱེན་ལ་ལྡོག གསུས་པ་སྟོད་དུ་ཡར་སྤུངས་ནས། ངག་ཏུ﹝ཧིག﹞ཞེས་པས་ཐིག་ལེ་སེན་རྡེལ་འཕངས་པ་ལྟར་སྤྱི་བོའི་རྔྷི་ལ་ཕོག་པར་བསམ། ཀ་ཞེས་པས་སྐར་མདའ་ལྷུང་བ་ལྟར་ཧྲིལ་གྱིས་ལྷུང་བར་བསམ། དེ་ལྟ་བུ་ཡར་འཕོ་མར་ཕབ། རྟགས་མ་ཐོན་གྱི་བར་དུ་འབད་དགོས་པར་གསུངས་སོ། །རྟགས་ནི་འཇག་བཙུགས་མའི་གཞུང་ལས། རྟགས་ནི་སྤྱི་བོ་ཟ་བ་དང་། ཚ་ཚག་དང་། སྦྲིད་པ། སྐྲངས་པ། བེམ་པ། གཡའ་བ། སྤྱི་གཙུག་ཏུ་ཆུ་སེར་དང་ཁྲག་ཐོན་པ། འབུར་བ་དང་། འབུག་པོ་ཡིན། ལུས་ཀྱང་ཟོ་མདོག་བདེ། དྲོད་སྐྱེས། ཟས་འཇུ་བ་སོགས་འབྱུང་ངོ་། ། ༦ འཕོ་བ་ཐེབས་པའི་ཕན་ཡོན། གདན་གཞི་ལས། ཉེས་པ་ཀུན་གྱིས་གོས་པ་ནི། །འཕོ་བའི་སྦྱོར་བ་སྦྱར་བས་གྲོལ། །ཉིན་རེར་བྲམ་ཟེ་གསོད་པ་དང་། །མཚམས་མེད་ལྔ་བོ་བྱེད་པ་དང་། །རྐུ་འཕྲོག་འདོད་ལོག་སྤྱད་པ་ཡང་། །ལམ་འདི་ཡིས་ནི་དག་གྱུར་ཏེ། །སྡིག་པས་གོས་པར་མི་འགྱུར་ཞིང་། །སྲིད་པའི་སྐྱེན་ལས་རིང་དུ་འགྲོ། །ཇི་ལྟར་འདམ་སྐྱེས་པདྨ་ནི། །འདམ་གྱིས་གོས་པར་མ་གྱུར་ལྟར། །ཞེས་དང་། སྒྲོལ་མ་རིག་བྱེད་མའི་རྒྱུད་ལས། རྣམ་ཤེས་རླུང་ལ་ཞོན་པ་ནི། །སྟེང་གི་ལམ་ནས་འཕོས་ན་ནི། །སྡིག་ལ་གོམས་པའི་གང་ཟག་ཀྱང་། །མཐོ་རིས་དག་ཏུ་སྐྱེ་བར་འགྱུར། །མགྲོན་པོ་ལམ་དུ་ཞུགས་པ་ལ། །གྲོགས་ཀྱིས་བསྒྱུར་བ་ཇི་བཞིན་ནོ། །ཞེས་དང་། ཡང་། སྔོན་ཁྲི་སྲོང་ལྡེ་བཙན་གྱི་བློན་པོ་ཉི་མ་བྱ་བས་མེ་མཆེད་ཤོར་ཚེ་བླ་མཆོད་དང་ཕ་མ་གཉིས་མི་ཟོག་སུམ་བརྒྱ་ཙམ་ཚིག་སྟེ་དམྱལ་བར་སྐྱེས། བློན་པོ་སེམས་ཁོང་དུ་ཆུད་ནས་ཟས་ཀྱང་མ་ཟོས་པར་མུན་ཁུང་དུ་ཞུགས་ནས་འཆི་ལ་ཉེ་སྐབས། རྒྱལ་བོས། སློབ་དཔོན་པདྨ་འབྱུང་གནས་ལ་ཞུས་པས། སློབ་དཔོན་གྱིས་ཟབ་བེར་གྱིས་དབུ་བཏུམ་ནས་སྐད་ཅིག་གིས་བདེ་བ་ཅན་དུ་བྱོན་ནས། ཚོགས་འཁོར་བསྐོར་ནས་སངས་རྒྱས་བྱང་སེམས་ཐམས་ཅད་སྤྱན་དྲངས་ནས། ཨོ་རྒྱན་གྱི་ཐུགས་ཀར་བསྟིམས་ནས་བཀའ་བསྒོ་མཛད། འཕོ་བའི་གདམས་པ་བླངས་ཏེ་ཚུར་བྱོན་ནས་བློན་པོ་མུན་ཁུང་ལས་བཏོན་ཏེ། བློན་པོ་ཉི་མ་ལ་ཆིག་བརྒྱུད་དུ་བསྩལ། བློན་པོ་ཉི་མས་བསྒོམས་པས་ཞག་གསུམ་ནས་སྡུག་བསྔལ་སངས། ཞག་ལྔ་ནས་ཚེ་འདས་རྣམས་སངས་རྒྱས་འཐོབ་པ་ཀུན་གྱིས་མཐོང་། བློན་པོ་འཇའ་གུར་གྱི་ཀློང་དུ་འཕོ་བ་སྦྱངས་པ་དང་ལྷ་དང་ལྷ་མོ་ཡང་ཞལ་གཟིགས་བྱུང་ངོ་། ། ༧ འཕོ་བ་མ་ཐེབས་པའི་ཉེས་སྐྱོན། འཆི་ཁ་མར་རྩ་བའི་བླ་མ་དྲན་པ་སོགས་རང་ལ་ནུས་པ་ཡོད་ན་གཞན་གྱི་འཕོ་བ་འདེབས་མི་དགོས་པར། དག་ཞིང་སོགས་སུ་བགྲོད་པའི་མཆོག་སྟེ། དཔུང་བཟང་གིས་ཞུས་པའི་རྒྱུད་ལས། སྐྱེས་བུ་གང་ཞིག་འཆི་བའི་ཚེ། །བླ་མ་སྐད་ཅིག་དྲན་གྱུར་ན། །འཕོ་བ་རྣམས་ཀྱི་མཆོག་ཏུ་འགྱུར། །སྐྱེས་བུ་དེ་ནི་མངོན་སངས་རྒྱས། །ཞེས་གསུངས་ལ། འཕོ་བ་བཏབ་ཀྱང་འདེབས་མཁན་དེའི་བསམ་སྦྱོར་མ་དག་ན། རང་གཞན་ཕུང་ལ་སྦྱོར་བ་སྟེ། རྡོ་རྗེ་མཁའ་འགྲོ་ལས། དུས་ལ་བབ་ན་འཕོ་བྱ་སྟེ། །དུས་མིན་ལྷ་རྣམས་གསོད་པར་འགྱུར། །ལྷ་རྣམས་བསད་པ་ཙམ་གྱིས་ནི། །དམྱལ་བར་ངེས་པར་སྲེག་པར་འགྱུར། །དེ་བས་འཆི་བའི་མཚན་མ་རྣམས། །མཁས་པས་འབད་དེ་ཤེས་པར་བྱ། །ཞེས་གསུངས་ལ། འཕོ་ཁྲིད་མི་ཕམ་བླ་མའི་ཞལ་ལུང་ལས། ལས་སྦྱོར་གྱི་ཞལ་ཤེས་ཀྱང་འཆི་ལྟས་བྱུང་ན་བཟློག་ཐབས་མ་བྱས་པར་བཙན་ཐབས་ཀྱིས་འཕོས་ན་ལུས་ལ་དམ་པ་རིགས་བརྒྱ་གནས་པས་ལྷ་བསད་པའི་ཉེས་པ་འབྱུང་བར་གསུང་རྒྱུན་ལས་བྱུང་། ཚེ་འདིའི་ཆགས་ཞེན་ཆེ་ན་འཕོ་རྟགས་ཐོན་ཡང་དག་ཞིང་དུ་འཕོ་དཀའ་བ། བྱ་ནམ་མཁར་འཕུར་ཀྱང་གཤོག་པ་ལ་རྡོ་བཏགས་པ་ལྟ་བུ་ཡིན་གསུངས་པ་དང་ཡང་མཐུན་ནོ། ། རྗེ་བཙུན་མི་ལས། མི་ཤི་བའི་རོ་ཡི་སྔས་མགོ་ལ། །ནོར་ལེན་འདོད་ཀྱི་བན་བོན་ཅ་ཅོ་འདོན། །ཞེས་པ་ལྟར། འཕོ་བའི་སྐབས་ལོངས་སྤྱོད་འཐོབ་འདོད་ཀྱི་བརྣབ་སེམས་དང་། ཡིད་དུང་དུང་དང་། མིག་ཟུམ་ཟུམ། སྨིན་མ་ཟེང་ཟེང་གིས་གཤིན་བསླུས་མཛའ་མགུ་འབའ་ཞིག་ལྷུར་ལེན་པ་ནི། རང་ཉིད་ད་ལྟ་ཉིད་ནས་རྡོ་རྗེ་དམྱལ་བར་མིང་རྟགས་འགོད་པར་གསུངས་ལ། གཞན་ཡང་། གཤིན་དོན་དུ་ངན་སོང་སྦྱོང་བའི་ཆོ་ག་དང་། གཟུངས་སྔགས་བཟླ་བ། འཕོ་བ་སོགས་བྱས་པ་དེ་མ་དག་པ་དང་། བྱིང་རྒོད་ཀྱི་དབང་དང་། དམ་ཚིག་མི་གཙང་བ་སོགས་ཀྱི་དབང་དུ་བཏང་ན། བར་དོ་བ་དེས་མངོན་ཤེས་ཕྲ་མོས་མཐོང་ནས། ཀྱེ་མ་འདི་རྣམས་ཀྱིས་བདག་བསླུས་སོ་སྙམ་ནས་ཡི་མུག་སོགས་ཀྱིས་རྐྱེན་བྱས་ཏེ། ངན་སོང་དུ་འགྲོ་བའི་རྐྱེན་དུ་འང་འགྱུར་བར་གསུངས་སོ། ། |