༤༽ གྲུབ་དབང་རྫོགས་ཆེན་པ་རང་ལུགས་ཀྱི་གསང་བ་སྙིང་ཐིག་གི་བརྒྱུད་སྲོལ་བྱེ་བྲག་ཏུ་བཤད་པ།

(ཀ) བླ་མ་ཡང་ཏིག་གཙོ་བོར་གྱུར་པའི་སྙིང་ཐིག་མ་བུའི་བརྒྱུད་པ།

[༡] ཆོས་རྗེ་བྱ་བྲལ་བ་བཀྲ་ཤིས་འབྱུང་གནས།

བཞི་པ་གྲུབ་དབང་རྫོགས་ཆེན་པ་རང་ལུགས་ཀྱི་གསང་བ་སྙིང་ཐིག་གི་བརྒྱུད་སྲོལ་བྱེ་བྲག་ཏུ་བཤད་པ་ལ། བླ་མ་ཡང་ཏིག་གཙོ་བོར་གྱུར་པའི་སྙིང་ཐིག་མ་བུའི་བརྒྱུད་སྲོལ་འཆད་པ་དང་། མཁའ་འགྲོ་སྙིང་ཐིག་གི་བརྒྱུད་པ་ཐུན་མིན་བཤད་པ་སྟེ་གཉིས་ལས། དང་པོ་སྔ་འགྱུར་གྲུབ་དབང་རྫོགས་ཆེན་པ་ཞེས་ཆོས་མིང་གང་ཟག་ལ་ཐོགས་བྱེད་ཀྱི་མན་ངག་ཟབ་ཆོས་འོད་གསལ་གསང་བ་སྙིང་ཐིག་གི་བཀའ་སྲོལ་རང་ལུགས་བླ་མ་བརྒྱུད་པའི་རྣམ་ཐར་དངོས་བརྗོད་པ་ལས། བླ་མ་ཡང་ཏིག་ཡིད་བཞིན་ནོར་བུ་གཙོ་བོར་གྱུར་པའི་སྙིང་ཐིག་མ་བུའི་བརྒྱུད་པ་ནི། ཀུན་མཁྱེན་ཀློང་ཆེན་རབ་འབྱམས་ལས་ཆོས་རྗེ་བྱ་བྲལ་བ་བཀྲ་ཤིས་འབྱུང་གནས་ཀྱིས་གསན་པ་སྟེ། ཆོས་རྗེ་བྱ་བྲལ་བ་བཀྲ་ཤིས་འབྱུང་གནས་ནི། ཇི་སྐད་དུ། ཡང་ཏིག་བརྒྱུད་པའི་ཕྱག་འཚལ་བྱིན་རླབས་སྤྲིན་ཚོགས་ལས། ངག་གི་དབང་པོའི་རྗེས་སུ་བཟུང་། །རྡོ་རྗེ་ལྟ་བུའི་ཏིང་འཛིན་བརྙེས། །བྱམས་ཆེན་སྙིང་རྗེ་ཆེན་པོའི་བདག །བྱ་བྲལ་ཆོས་རྗེ་ལ་ཕྱག་འཚལ། །ཞེས་པ་སྟེ་འཕན་ཡུལ་དགོན་རྙིང་དུ་ཁྱུང་པོའི་རིགས་སུ་སྐུ་འཁྲུངས། དགུང་ལོ་དྲུག་པ་ལ་ས་སྐྱ་པ་བླ་མ་བསོད་ནམས་རྒྱལ་མཚན་ལས་རབ་ཏུ་བྱུང་། སྤྱན་སྔ་བྱམས་ཆོས་པ་དང་། ཇོ་ལྡན་བློ་གྲོས་དཔལ། བླ་མ་སངས་འོད་པ། གུ་རུ་དཀོན་གཞོན་པ་སོགས་ལས་ཆོས་བཀའ་ཇི་སྙེད་པ་གསན། ཀུན་མཁྱེན་ཆེན་པོ་ལས་སྙིང་ཐིག་ཡ་བཞི་གཙོ་བོར་གྱུར་པའི་ཟབ་ཆོས་མང་དུ་གསན། ཀུན་མཁྱེན་ཆོས་རྗེའི་ཞལ་སློབ་ལས་བསྟན་པ་སྤེལ་བའི་བཤེས་གཉེན་བཞི་ཞེས་གྲགས་པའི་ཡ་གྱལ་ཡིན། གཞན་ཡང་མཁས་གྲུབ་ཐར་བ་གླིང་པ་ལས་བསྙེན་པར་རྫོགས་ཤིང་ཟབ་ཆོས་བུམ་པ་གང་བྱོར་གསན། རི་གཙུག་ཕྱུག་མོའི་མགུལ་དུ་ལོ་གསུམ་དུ་སྒྲུབ་པའི་ཉམས་ལེན་དང་། སླར་ཡང་བླ་མའི་སྐུའི་རིམ་གྲོ་བ་མཛད་ནས་ཕྱིས་བླ་མ་གཤེགས་རྗེས་གདན་ས་རེ་ཞིག་བཟུང་བ་རྗེ་དབོན་ལ་གཏད་ནས་འཕན་ཡུལ་ཟིང་པ་སྟག་མགོའི་རི་ཁྲོད་བཏབ། དེར་འགྲོ་ཕན་རྒྱ་ཆེར་མཛད་པས་སྟག་མགོའི་བྱ་བྲལ་ཆོས་རྗེར་གྲགས། བུ་སློབ་ཆོས་བརྒྱུད་འཛིན་པ་མང་དུ་ཐོན་པ་དང་བཅས་ཞི་བར་གཤེགས་སོ། །

[༢] གུ་རུ་གཞན་ཕན་རྡོ་རྗེ།

དེའི་ཞལ་སློབ་ཆོས་རྗེ་གུ་རུ་གཞན་ཕན་རྡོ་རྗེ་ནི། ཐོས་བསམ་རྒྱ་མཚོའི་ཕ་རོལ་ཕྱིན། །ཡིད་བཞིན་འཕགས་པའི་ནོར་མཆོག་ལ། །དབང་འབྱོར་དོན་གཉིས་ལྷུན་གྲུབ་པའི། །གཞན་ཕན་རྡོ་རྗེ་ལ་ཕྱག་འཚལ། །ཞེས་པ་སྟེ་དམར་རིགས་བསོད་ནམས་སེང་གེ་བྱ་བའི་སྲས་སུ་སྐུ་འཁྲུངས། ཆོས་རྗེ་རྡོ་སྐུ་བར་གྲགས་པའི་གཅུང་ཡིན། གཞོན་ནུ་ནས་བསྟན་པའི་སྒོར་ཞུགས། ལྷོ་བྲག་ཕྱག་རྡོར་པ་ལ་ཡི་དམ་གྱི་ལུང་བསྟན་པའི་སློབ་བུ་བརྒྱད་ལས་གཅིག་ཡིན། ཕྱག་རྡོར་ལོ་དྲུག་བསྒྲུབས་པས་ཞལ་གཟིགས། མི་རབས་བདུན་དུ་བྱིན་གྱིས་བརླབས་པའི་ལུང་བསྟན་ཐོབ། དབུ་རུར་བྱ་བྲལ་ཆོས་རྗེ་ལས་སྙིང་ཐིག་ཡ་བཞི་གསན་པས་མཚོན་བླ་མ་མང་པོ་ལས་ཆོས་བཀའ་ཅི་རིགས་པ་གསན། ཁྱད་པར་རྫོགས་པ་ཆེན་པོ་ལ་སྒོམ་སྒྲུབ་དང་འཆད་སྤེལ་སྙིང་པོ་མཛད། རྒྱལ་སྨད་དུ་དུང་དགོན་རི་ཁྲོད་བཏབ་ནས་དོན་གཉིས་ལྷུན་གྲུབ་ཀྱི་འཕྲིན་ལས་རྒྱ་ཆེར་བསྐྱངས་ཏེ་ཞི་བར་གཤེགས་སོ། །

[༣] རྒྱལ་སྲས་ནམ་མཁའ་རྡོ་རྗེ།

དེའི་ཞལ་སློབ་རྒྱལ་སྲས་ནམ་མཁའ་རྡོ་རྗེ་ནི། ལུང་རྟོགས་ཡོན་ཏན་རྒྱ་མཚོའི་གཏེར། །མཆོག་གཟིགས་གྲུབ་བརྙེས་རྡོ་རྗེ་འཛིན། །མཁྱེན་བརྩེ་ནུས་པས་འགྲོ་བ་འདུལ། །ནམ་མཁའ་རྡོ་རྗེ་ལ་ཕྱག་འཚལ། །ཞེས་པ་སྟེ་གུ་རུ་གཞན་ཕན་པའི་སྲས་སུ་དུང་དགོན་དུ་སྐུ་འཁྲུངས། རྩེད་ཐང་དུ་མཚན་ཉིད་ཀྱི་ཐོས་བསམ་དང་ཐུན་མོང་གི་སྒོམ་ཁྲིད་རྣམས་ཞུས། ཁྱད་པར་ཡབ་ལས་རྫོགས་ཆེན་གྱི་གདམས་ཁྲིད་རྣམས་གསན་ཅིང་བསྒོམས་པས་ཉམས་རྟོགས་ཀྱི་ཀློང་བརྡོལ་ནས་རྫོགས་ཆེན་རྟོགས་པའི་མངའ་བདག་ཏུ་གྱུར། ཕྱག་རྡོར་བསྒྲུབས་པས་གཏུམ་པོ་ཁྱུང་ལྔས་ཡང་ཡང་བསྐོར་བ་གཟིགས། གཟའ་ཀླུ་སོགས་ཀྱིས་གཙེས་པའི་ནད་པ་ལ་སྲུང་མདུད་དང་སྔགས་ཆབ་བཏབ་པས་ཀྱང་ནད་གདོན་ཞི་བའི་ནུས་པ་དང་ལྡན། རྫོགས་ཆེན་གསང་བ་སྙིང་ཐིག་ལ་ཉམས་ལེན་གནད་དུ་ཕྱིན། ཡབ་ཀྱི་གདན་ས་དང་རི་བོ་ཁྲོན་སྟེང་དཔལ་སྡིངས་སོགས་ཀྱང་བཟུང་ནས་འགྲོ་ཕན་རྒྱ་ཆེར་མཛད་དེ་ཞི་བར་གཤེགས་སོ། །

[༤] རྒྱལ་སྲས་འོད་གསལ་ཀློང་ཡངས།

དེའི་ཞལ་སློབ་རྒྱལ་སྲས་འོད་གསལ་ཀློང་ཡངས་ནི། སྤྲོས་པའི་མཚན་མ་བྲལ་བ་ཡི། །རྣམ་གྲོལ་ཞི་བ་ཆེ་ལ་བཞུགས། །སེམས་ཅན་ཀུན་ལ་བརྩེར་ལྡན་པའི། །འོད་གསལ་ཀློང་ཡངས་ལ་ཕྱག་འཚལ། །ཞེས་པ་སྟེ་ཡབ་ནམ་མཁའ་རྡོ་རྗེའི་སྲས་སུ་རྒྱས་སྨན་སྐྱེད་སྦུག་ཏུ་འཁྲུངས། སྤྱན་གཡས་སུ་རབ་ཏུ་བྱུང་བ་དགེ་ཚུལ་གྱི་སྡོམ་པ་བཞེས། དགུང་ལོ་དགུ་ནས་བཅུ་བཞིའི་བར་ཡབ་ལས་བཀའ་ཆོས་རྣམས་གསན་ཅིང་སྦྱངས། གནས་ལུགས་རང་ངོ་འཕྲོད་དེ་རང་སྣང་ཞི་ཁྲོའི་དཀྱིལ་འཁོར་དུ་གསལ་བར་ཤར། དུས་གནས་ཅི་རིགས་པར་གྲུབ་ཐོབ་ཐང་སྟོང་རྒྱལ་པོ་དང་། གཏེར་ཆེན་པདྨ་གླིང་པ། འབྲུག་པ་རྒྱལ་དབང། བྲག་སྒོ་བ་ཀུན་དགའ་བསམ་གཏན། ཀུན་བཟང་རྩེ་པ་བསོད་ནམས་རྒྱལ་མཚན། ཐེལ་ལྷུན་བདེ་རབ་འབྱམས་པ། རྫོགས་ཆེན་པ་ཀུན་དགའ་བཀྲ་ཤིས། བྱམས་སྡིངས་པ་སངས་རྒྱས་རྣམ་རྒྱལ་སོགས་མཁས་གྲུབ་ཀྱི་བླ་མ་ལྔ་བཅུ་ཙམ་ལས་གསར་རྙིང་གི་གདམས་པ་མཐའ་ཡས་པ་གསན། ཁྱད་པར་ཡབ་དང་རྒྱལ་དབང་རྗེ་རྩ་བའི་བླ་མར་བཟུང་ནས་དེ་གཉིས་ཀྱི་ཟབ་ཆོས་གསན་སྒོམ་དང་འཆད་སྤེལ་གྱི་སྙིང་པོར་མཛད། རིག་འཛིན་ཀུ་མ་རཱ་ཛའི་བླ་མ་ནམ་མཁའ་རྡོ་རྗེའི་གདན་ས་རྒྱས་སྨན་མིག་བཞི་དུས་ཀྱིས་ཉམས་པ་གསར་དུ་གསོས། ཟངས་མཚོ་དང་འོད་གསལ་གླིང་རྣམས་ཀྱི་སྒྲུབ་སྡེ་བཙུགས་ནས་ཕྱག་རྫོགས་སྒོམ་པའི་སྲོལ་བཏོད། དགུང་ལོ་བརྒྱད་ཅུ་བརྒལ་བར་བཞུགས་ཤིང་དབུས་གཙང་དྭགས་ཀོང་སོགས་སུ་ཕྱོགས་བྲལ་གྱི་ཕྲིན་ལས་རྒྱ་ཆེར་བསྐྱངས་སོ། །

[༥] རྫོགས་ཆེན་པ་བསོད་ནམས་རིན་ཆེན།

དེའི་ཞལ་སློབ་རྫོགས་ཆེན་པ་བསོད་ནམས་རིན་ཆེན་ནི། སྨིན་ལམ་དབང་བཞིའི་ཆུ་རྒྱུན་གྱིས། །འགྲོ་བའི་སྒྲིབ་བཞི་ཡོངས་སྦྱངས་ནས། །སྐུ་བཞིའི་དབྱིངས་སུ་གྲོལ་མཛད་པ། །བསོད་ནམས་རིན་ཆེན་ལ་ཕྱག་འཚལ། །ཞེས་པ་སྟེ་རྣམ་ཐར་འོག་ཏུ་མཁའ་འགྲོ་སྙིང་ཐིག་གི་སྐབས་སུ་འབྱུང་ངོ་། །

[༦] བྱ་ཁྱུང་པ་ངག་དབང་པདྨ།

དེའི་ཞལ་སློབ་བྱ་ཁྱུང་པ་ངག་དབང་པདྨ་ནི། ལུང་དང་རྟོགས་པའི་འོད་དཀར་ཅན། །ཉོན་མོངས་སྨག་རུམ་འཇོམས་པའི་དགྲ། །བྱང་གྲོལ་ཀུ་མུད་རྒྱས་པའི་གཉེན། །ངག་དབང་པདྨ་ལ་ཕྱག་འཚལ། །ཞེས་པ་སྟེ་འདིའང་འོག་ཏུ་འབྱུང་ང་ོ། །

[༧] རྫོགས་ཆེན་པ་བསོད་ནམས་དབང་པོ།

དེའི་ཞལ་སློབ་རྫོགས་ཆེན་པ་བསོད་ནམས་དབང་པོ་ནི། ཐེག་དགུའི་ཡང་རྩེ་རྫོགས་པ་ཆེ། །ཆོས་ཚུལ་སྨིན་གྲོལ་བདུད་རྩིའི་བཅུད། །འཛིན་མཛད་རྡོ་རྗེ་འཛིན་པ་དངོས། །བསོད་ནམས་དབང་པོ་ལ་ཕྱག་འཚལ། །ཞེས་པ་སྟེ་རྣམ་ཐར་འོག་ཏུ་འབྱུང་ངོ་། །

[༨] ལྷ་བཙུན་ཀུན་བཟང་འཇིགས་མེད།

དེའི་ཞལ་སློབ་ལྷ་བཙུན་ཀུན་བཟང་འཇིགས་མེད་ནི། ཆོས་ཀུན་དེ་ཉིད་ཐམས་ཅད་གཟིགས། །སྲིད་པའི་འཆིང་གཅོད་ཤེས་རབ་འབར། །གང་ཐུགས་ཇི་བཞིན་འཇམ་པའི་དབྱངས། །ནམ་མཁའ་འཇིགས་མེད་ལ་ཕྱག་འཚལ། །ཞེས་པ་སྟེ་ལྷོ་རྒྱུད་ཤར་དུ་མེ་བྱ་ལ་འཁྲུངས། བཱི་མ་ལའི་སྤྲུལ་པའི་མཚན་རྟགས་སུ་ཤངས་ཀྱི་རྩེར་ཨ་ཡིག་ཐིགས་ལ་ཁད་པ་ཡོད། དགུང་ལོ་བཅུ་གཅིག་པ་ལ་གསུང་སྙན་རི་ཁྲོད་དུ་སྤྲུལ་སྐུ་ཨོ་རྒྱན་དཔལ་འབྱོར་ལས་རབ་ཏུ་བྱུང་། དགོངས་འདུས་སོགས་ཆོས་བཀའ་མང་དུ་གསན། ཀོང་པོ་ཐང་འབྲོག་གྲྭ་ཚང་དུ་བྱོན་ནས་སྔགས་ཀྱི་གསན་སྦྱངས་མཛད། ཉེར་ལྔ་པ་ལ་རྫོགས་ཆེན་པ་བསོད་ནམས་དབང་པོ་ལས་གསང་བ་སྙིང་ཐིག་གི་དབང་ཁྲིད་གདམས་པ་མཐའ་དག་གསན་པས་ཆོས་ཉིད་ཇི་བཞིན་པར་ངོ་འཕྲོད། གཞན་ཡང་ལོ་ཆེན་གཞན་ཕན་རྡོ་རྗེ་སོགས་མཁས་གྲུབ་ཀྱི་བླ་མ་བརྒྱ་ཕྲག་ཏུ་ཉེ་བ་ལས་ཆོས་ཀྱི་གསན་པ་མཐའ་ཡས་པ་མཛད། ཤེལ་རི་དང་མཆིམས་ཕུ་སོགས་དབེན་གནས་མང་པོར་སྒྲུབ་པ་ལ་ནན་ཏན་མཛད་པས་རྟོགས་པ་ཀློང་དུ་གྱུར། དགོན་གནས་བདག་བཟུང་མེད་པར་ཕྱོགས་བྲལ་གྱི་དབེན་པར་ཟབ་མོ་སྙིང་ཐིག་གཙོ་བོར་གྱུར་པའི་ངེས་དོན་གྱི་གདམས་པས་འགྲོ་དོན་མཛད་པས། རིག་འཛིན་ཕྲིན་ལས་ལྷུན་གྲུབ། སྤྲུལ་སྐུ་ཕྲིན་ལས་རྣམ་རྒྱལ། གྲུབ་ཆེན་ཡེ་ཤེས་ཕུན་ཚོགས་སོགས་འགྲོ་ཕན་གྱི་བུ་ཆེན་དང་ཉམས་རྟོགས་ཅན་གྱི་སྒོམ་ཆེན་ཕོ་མོ་མང་དུ་བྱོན། དུས་དེར་ལོ་ཆེན་གཞན་ཕན་རྡོ་རྗེ། ཀུན་མཁྱེན་གསུང་སྤྲུལ། ཀོང་པོ་རྒོད་ཚང་པ། སྙིང་ཕུ་རིག་འཛིན་སྙིང་པོ། དར་ལྡིང་པ་ཕྲིན་ལས་ལྷུན་གྲུབ། རོང་པ་རྫོགས་ཆེན་པ་སོགས་རྫོགས་ཆེན་ལ་འཆད་ཉན་སྐྱོང་བ་ཐོག་མཉམ་དུ་བཞུགས་ཀྱང་རྗེ་འདི་རྫོགས་ཆེན་འཆད་སྤེལ་གྱི་ཕྲིན་ལས་ལ་གཞན་འགྲན་མེད་ཅེས་གཏེར་བདག་གླིང་པས་གསུངས། སྒོམ་བྱུང་ཤེས་རབ་ཀྱི་ཀློང་བརྡོལ་བས་བསྟན་བཅོས་ཀྱང་མང་དུ་སྤེལ་བ་སོགས་འཕྲིན་ལས་རླབས་པོ་ཆེའི་ངང་ནས་ལྔ་བཅུ་རྩ་དྲུག་པ་ཆུ་ཕོ་འབྲུག་གི་ལོ་ལ་ཤེལ་བྲག་གི་ཡང་དགོན་དུ་གཤེགས་སོ། །

[༩] རྫོགས་ཆེན་པ་ཀློང་རྫོགས་མཐའ་བྲལ།

དེའི་ཞལ་སློབ་རྫོགས་ཆེན་པ་ཀློང་རྫོགས་མཐའ་བྲལ་ནི། རྣམ་མང་ཐོས་པ་རྒྱ་མཚོ་བསྟེན། །རྣམ་དག་ཏིང་འཛིན་ཟབ་མོ་བརྙེས། །རྣམ་མཁྱེན་གོ་འཕང་མངོན་གྱུར་པའི། །ཀློང་རྫོགས་མཐའ་བྲལ་ལ་ཕྱག་འཚལ། ཞེས་པ་སྟེ་ལྷ་བཙུན་ཀུན་བཟང་རྣམ་རྒྱལ་གྱི་དབོན་དུ་འཁྲུངས། སྐུ་ན་གཞོན་ནུ་ནས་མཁྱེན་རྟོགས་ཀྱི་རྩལ་རྫོགས། བླ་མ་མང་པོ་ལས་གསན་བསམ་མཐར་ཕྱིན་པ་མཛད། ཁྱད་པར་ལྷ་བཙུན་ཆེན་པོ་ལས་འོད་གསལ་རྡོ་རྗེ་སྙིང་པོ་སྙིང་ཐིག་གིས་མཚོན་པའི་ཆོས་ཚུལ་དང་གདམས་པ་མཐའ་དག་བུམ་པ་གང་བྱོར་གསན། ཐོས་དོན་བསྒོམས་པས་གནས་ལུགས་རང་ངོ་འཕྲོད་ཅིང་ཉམས་རྟོགས་ཀྱི་རྩལ་རྫོགས་ནས་རྟོགས་པ་ཀློང་དུ་གྱུར། རྫོགས་ཆེན་གཙོ་བོར་གྱུར་པའི་འཆད་སྤེལ་གྱི་ཕྲིན་ལས་བསྐྱངས་པས་འགྲོ་དོན་གྱི་བཀའ་བབ་བོ། །

རྗེ་དེ་ཉིད་ཀྱི་དྲུང་ནས་གྲུབ་དབང་རྫོགས་ཆེན་པ་པདྨ་རིག་འཛིན་གྱིས་གསན་པ་སྟེ། རྫོགས་ཆེན་ཉམས་བཞེས་ཚད་དུ་ཕེབས། །གྲུབ་པའི་དབང་ཕྱུག་བརྟུལ་ཞུགས་ཅན། །ཁམས་གསུམ་འདྲེན་པ་ཆོས་ཀྱི་རྒྱལ། །པདྨ་རིག་འཛིན་ལ་ཕྱག་འཚལ། །ཞེས་པ་སྟེ་རྣམ་ཐར་རྒྱས་པ་འོག་ནས་འབྱུང་ངོ་། །

གྲུབ་དབང་པདྨ་རིག་འཛིན་ལས་དཔོན་སློབ་ནམ་མཁའ་འོད་གསལ་དང་། རྗེ་དབོན་པདྨ་ཀུན་གྲོལ་རྣམ་རྒྱལ། རྫོགས་ཆེན་གསུམ་པ་ངེས་དོན་བསྟན་བཟང་པོ། རྡོ་གྲུབ་ཆེན་འཇིགས་མེད་ཕྲིན་ལས་འོད་ཟེར། གྲུབ་པའི་དབང་ཕྱུག་དེ་ཉིད་ཀྱིས་རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེ་ལ་གསུངས་ཤིང་། གཞན་ཡང་མི་འགྱུར་ནམ་མཁའི་རྡོ་རྗེ་མཆོག་མགོན་ཁང་དབང་དྲག་རོལ་པར་མཉམ་བཞག་ཏུ་བཞུགས་པའི་འོད་གསལ་གྱི་སྣང་ཆར། ཀུན་མཁྱེན་ཆེན་པོའི་ཡེ་ཤེས་ཀྱི་སྐུས་རྗེས་སུ་བཟུངས་ཏེ་བྱ་རྫོགས་སྐད་གཅིག་གི་ཡུན་ལ་ཡང་ཏིག་ཡིད་བཞིན་ནོར་བུའི་ཆོས་ཚན་མཐའ་དག་ཆིག་རྫོགས་སུ་བསྩལ་བའི་ཤིན་ཏུ་ཉེ་བརྒྱུད་ཀྱང་བཞུགས་སོ། །རྫོགས་ཆེན་བཞི་པ་ལས་རྗེ་དབོན་མཁས་པ་ཆེན་པོ་ཨོ་རྒྱན་བསྟན་འཛིན་ནོར་བུ། མཁན་ཆེན་གཞན་ཕན་ཆོས་ཀྱི་སྣང་བ། མཁན་ཆེན་འཇིགས་མེད་ཡོན་ཏན་མགོན་པོ། དེ་ཉིད་ལས་བདག་གི་རིགས་བདག་བླ་མ་རྟོགས་ལྡན་བློ་གྲོས་རྒྱ་མཚོ་ཞེས་ཀུན་མཁྱེན་ཆེན་པོས་ཞལ་གཟིགས་ཡང་ཡང་ཐོབ་ཅིང་དགོངས་པ་ཀློང་ཆེན་ཡངས་པར་གཏན་སྲིད་ཟིན་ཏེ། མགྲིན་པ་ལོངས་སྤྱོད་ཀྱི་འཁོར་ལོའི་རྩ་མདུད་གྲོལ་བས་རྫོགས་པ་ཆེན་པོ་ཁྲེགས་ཆོད་ཐོད་རྒལ་གྱི་གནད་སྟོན་པའི་བསྟན་བཅོས་ཀུན་མཁྱེན་ཆོས་རྗེའི་གསུང་དང་དབྱེར་མ་མཆིས་པ་རྩོལ་མེད་དུ་རྡོལ་བ། ཕྱི་གསལ་གཟུགས་སྐུའི་བཀོད་པ་ནང་དབྱིངས་ཀ་དག་ཆེན་པོར་བསྡུ་བའི་ཚེ་མངོན་པར་རྫོགས་པར་སངས་རྒྱས་པའི་རྟགས་སྣང་ཐམས་ཅད་ཀུན་ལ་མཐུན་སྣང་དུ་བྱུང་ནས་གདོད་མའི་རྒྱལ་སར་མངོན་སུམ་དུ་གཤེགས་པ་གང་དེས་ལན་གྲངས་གཉིས་སུ་གསན་ཞིང་། རྗེ་ཉིད་ཀྱིས་རབ་བྱུང་བཅུ་བདུན་པའི་ས་ཡོས་ལོར་གནས་དུས་སྟོན་འཁོར་ཕུན་སུམ་ཚོགས་པའི་རྟེན་འབྲེལ་དུས་སུ་བབ་པ་གཟིགས་ཏེ་དཔལ་སེང་གེ་རིའི་ཆོས་གྲྭ་ཆེན་མོ་ནས་བདག་ཅག་སློབ་བུ་བདུན་ཚན་གཅིག་ཁོ་ན་ལ། སྔོན་ཆད་རླུང་ཕྱོགས་ཙམ་ལ་ཡང་བསྒྲགས་པར་མ་མཛད་པའི་ཡང་ཏིག་ཡིད་བཞིན་ནོར་བུའི་ཆོས་ཚན་མཐའ་དག་གི་བཀའ་རྒྱ་བཀྲོལ་ཏེ་ཟླ་བ་གཉིས་ཙམ་ལ་ལྐོག་ཆོས་སུ་རྒྱས་པར་བསྩལ་པ་དང་། གཞན་ཡང་སྔ་ཕྱི་རྣམས་སུ་རྒྱུད་བཅུ་བདུན་དང་། སྙིང་ཐིག་ཡ་བཞི། མཛོད་ཆེན་བདུན། ངལ་གསོ་སྐོར་གསུམ། ཁྲིད་ཡིག་ཡེ་ཤེས་བླ་མ་རྒྱབ་ཆོས་དང་བཅས་པ་སྟེ་འོད་གསལ་རྫོགས་པ་ཆེན་པོ་གསང་བ་སྙིང་ཐིག་གོང་འོག་གི་མན་ངག་རྒྱབ་ཆོས་དང་བཅས་པ་བཀའ་དྲིན་ཆེན་པོས་ཉེ་བར་བསྩལ་ཏེ། རྗེ་ཉིད་ཀྱི་ཞལ་ནས་ཀྱང་། ད་ནི་ཕ་ནོར་བུ་ཡི་ལག་ཏུ་འཕྲོད་པ་ཡིན་པས་ཕྱིན་ཆད་འགྲོ་དོན་ལ་ཅིས་ཀྱང་རེམ་དགོས་ཞེས་དམན་བུ་བདག་ལའང་དགྱེས་བརྩེའི་གསུང་གིས་དབུགས་དབྱུང་གཟེངས་སུ་བསྟོད་པའི་སྐལ་བ་བཟང་པོ་མངོན་དུ་བྱུང་བ་ལགས་སོ། །

(ཁ) རྫོགས་ཆེན་མཁའ་འགྲོ་སྙིང་ཐིག་གི་བརྒྱུད་པ་ཐུན་མིན་བཤད་པ།

[༡] རྒྱལ་བ་ཡེ་ཤེས་རབ་འབྱམས།

ཀུན་མཁྱེན་ཆོས་ཀྱི་རྒྱལ་པོས་རྒྱལ་བ་ཡེ་ཤེས་རབ་འབྱམས་ལ་སྨིན་གྲོལ་ཆིག་རྫོགས་སུ་གནང་བ་སྟེ་བདག་ཉིད་ཆེན་པོ་འདི་ནི། ཐོག་མར་དཔལ་ས་སྐྱའི་ལུགས་ཀྱི་ཆོས་སྒོར་ཞུགས་པས་སྔགས་ཕྱི་རྒྱུད་དང་མཚན་ཉིད་ཐམས་ཅད་ལ་གསན་བསམ་མཛད། བློ་གྲོས་ཀྱི་འཇུག་པ་ཡངས་པས་འཆད་རྩོད་རྩོམ་གསུམ་ལ་མ་རྨོངས་ཤིང་གཞུང་ལུགས་རབ་འབྱམས་སྨྲ་བའི་མཁས་པ་ཆེན་པོར་གྱུར། འོན་ཀྱང་དེ་ཙམ་གྱིས་ཐུགས་མ་ཚིམས་པར་མན་ངག་གི་གདམས་པ་ཟབ་མོ་དགོས་པར་གཟིགས་ཏེ་ཕྱོགས་ཀུན་འདྲི་རྟོག་མཛད། དེའི་ཚེ་ཀུན་མཁྱེན་ཀློང་ཆེན་པའི་མཚན་གྱི་སྙན་པས་ཐུགས་འཕྲོག་ཅིང་རྫོགས་པ་ཆེན་པོ་སྙན་བརྒྱུད་ཀྱི་གདམས་པའི་མངའ་བདག་ཏུ་གཟིགས་ནས་ཞབས་ཀྱི་པད་མོར་བཏུད། གསང་ཆེན་རྙིང་མའི་གདམས་ཟབ་རྒྱུད་ལུང་མན་ངག་དང་བཅས་པ་དཔག་ཏུ་མེད་པ་གསན་ཞིང་། ཟབ་གསང་མཁའ་འགྲོ་སྙིང་ཐིག་གི་ཉམས་ལེན་ལ་བརྩོན་ནས་དབེན་གནས་མང་པོར་དཀའ་ཐུབ་ཀྱི་སྲང་ལ་བཅུར་བས་རྟོགས་པ་ཀློང་དུ་གྱུར་ཏེ་ལྷུན་གྲུབ་ཀྱི་ས་ལ་གཤེགས། རྒྱལ་དབང་ཀློང་ཆེན་པའི་ཐུགས་ཟིན་གྱི་སློབ་མའི་གཙོ་བོར་གྱུར་ཅིང་གསང་བ་སྙིང་ཐིག་གི་བསྟན་པའི་བདག་པོ་མཛད། སྐུ་ཚེའི་སྨད་དུ་སྙེ་ཕུ་ཤུག་གསེབ་ཏུ་བཞུགས་ནས་ཚོགས་པ་བསྐྱངས་པས་མཚན་ཡང་རིན་པོ་ཆེ་ཤུག་གསེབ་པར་གྲགས། ཞལ་སློབ་ཉམས་རྟོགས་དང་ལྡན་པ་མང་དུ་བྱུང་བ་སོགས་འགྲོ་དོན་མཐའ་རུ་ཕྱིན་ནས་ཞི་བར་གཤེགས་སོ། །

[༢] འཁྲུལ་ཞིག་བསམ་གཏན་བཟང་པོ།

དམ་པ་དེ་ཉིད་ཀྱི་ཞལ་སློབ་འཁྲུལ་ཞིག་བསམ་གཏན་བཟང་པོ་ནི་རྟེན་རྣལ་འབྱོར་པ་དཀར་ཆས་སུ་བཞུགས་ཤིང་། ཚེའི་རིག་འཛིན་བརྙེས་པས་དགུང་ལོ་བརྒྱ་ཕྲག་ཏུ་ལོངས་པར་བཞུགས་པར་གྲགས། རྒྱལ་བ་ཡེ་ཤེས་རབ་འབྱམས་ལས་རྫོགས་ཆེན་སྤྱི་དང་ཁྱད་པར་ཟབ་གསང་མཁའ་འགྲོ་སྙིང་ཐིག་གི་གདམས་སྐོར་རྣམས་གསན་ཅིང་ཐུགས་ཉམས་སུ་བསྟར་བས་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པར་དབང་འབྱོར་བས་སྣང་སེམས་ཆོས་སྐུར་འདྲེས། བརྒྱུད་འཛིན་སྐུའི་སྲས་སོགས་སྐལ་པ་དང་ལྡན་པ་རྣམས་ལ་རྫོགས་པ་ཆེན་པོའི་ཉམས་ཁྲིད་ཀྱང་ལན་མང་དུ་བསྩལ་བས་སློབ་མའང་མང་དུ་བྱོན། མཐར་དགུང་ལོ་བརྒྱ་ལྷག་ཙམ་ན་གདུལ་བྱ་རྫོགས་པའི་ཚུལ་གྱིས་ཟག་བཅས་ཀྱི་གཟུགས་སྐུ་གཞོན་ནུ་བུམ་སྐུའི་དབྱིངས་སུ་བསྡུ་བར་མཛད་ཅེས་གྲགས་སོ། །

[༣] གྲུབ་ཆེན་སྦྱིན་པ་བཟང་པོ།

གྲུབ་ཆེན་སྦྱིན་པ་བཟང་པོ་ནི་རྟེན་རྣལ་འབྱོར་པ་དཀར་ཆས་སུ་བཞུགས་ཤིང་གསང་ཆེན་རྙིང་མའི་རིང་ལུགས་ལ་མཆོག་ཏུ་མཁས། ཁྱད་པར་དུ་འཁྲུལ་ཞིག་བསམ་གཏན་བཟང་པོ་ལས་རྫོགས་ཆེན་སྤྱི་དང་ཟབ་གསང་མཁའ་འགྲོ་སྙིང་ཐིག་གི་ཆོས་སྐོར་མ་ལུས་པ་གསན་པས་མཁྱེན་རྟོགས་ཀྱི་རྩལ་རྫོགས་ཏེ་རྫོགས་པ་ཆེན་པོ་གཞི་ལམ་གྱི་རྟོགས་པ་མངོན་དུ་གྱུར། འགྲོ་དོན་རྒྱ་ཆེར་བསྐྱངས་ནས་གཞི་དབྱིངས་ཀ་དག་གི་ཀློང་དུ་མངོན་པར་གཤེགས་སོ། །

[༤] རྫོགས་ཆེན་པ་ཤཱཀྱའི་མཚན་ལྡན།

དེ་ཉིད་ཀྱི་ཞལ་སློབ་རྫོགས་ཆེན་པ་ཤཱཀྱའི་མཚན་ཅན་ནི། ཐོག་མར་གཙང་གསེར་མདོག་ཅན་གྱི་ཆོས་གྲྭར་ཞུགས། དབུ་ཚད་ཕར་ཕྱིན་སོགས་ལ་མཁས་པར་སྦྱངས་ནས་ཐོས་བསམ་གྱི་སྒྲོ་འདོགས་ཡིན་ལུགས་སུ་ཆོད་པར་མཛད། མདོ་ཕྱོགས་ཀྱི་གསན་པ་རྫོགས་ནས་སྔགས་ལ་ཞུགས་ཏེ་ས་ལུགས་ཀྱི་རྒྱུད་བཤད་སོགས་སྦྱངས། སྐབས་ཤིག་ན་སྔོན་གྱི་བག་ཆགས་སད་པ་ལྟ་བུས་རྫོགས་ཆེན་ལ་ཐུགས་མོས་ལྷག་པར་འཁྲུངས་པས་གྲུབ་ཆེན་པ་ལ་གཏུགས་ནས་རྫོགས་ཆེན་གྱི་ཉམས་ཁྲིད་གསན་ནས་ཉམས་ལེན་རང་བསྐྱངས་པས་ཉམས་རྟོགས་ཁྱད་པར་ཅན་འཁྲུངས། སྣང་གྲག་ཐམས་ཅད་ཡེ་ཤེས་སྒྱུ་འཕྲུལ་རྡོ་རྗེའི་རོལ་མོར་གཟིགས། རྫོགས་པ་ཆེན་པོའི་ཆོས་ལ་འཛིན་འཆད་སྤེལ་གསུམ་གྱིས་མཛད་པ་སྐྱོང་པ་གཙོ་བོར་མཛད། སློབ་མའང་མཁས་ཤིང་གྲུབ་པ་བརྙེས་པ་མང་དུ་བྱོན་ནོ། །

[༥] རྫོགས་ཆེན་པ་བསོད་ནམས་རིན་ཆེན།

དེའི་ཐུགས་སྲས་རྫོགས་ཆེན་པ་བསོད་ནམས་རིན་ཆེན་ནི། གཉལ་པེ་ཁུན་དུ་ཁྱུང་པོའི་རིགས་སུ་སྐུ་འཁྲུངས། ལོ་དྲུག་ནས་ཡི་གེ་འབྲི་ཀློག་ལ་མཁས་པར་མཁྱེན། ཀཿཐོག་པ་བསོད་ནམས་བླ་མ་ལས་རབ་ཏུ་བྱུང་ནས་རྫོགས་པ་ཆེན་པོ་བསྡུས་པ་སོགས་གསན་ཅིང་རྫོགས་པ་ཆེན་པོ་ལས་རིགས་སད། རྫོགས་པ་ཆེན་པོའི་རྣལ་འབྱོར་པ་དུས་དེར་གར་བཞུགས་ཀྱི་སར་དོན་གཉེར་དང་དཀའ་སྤྱད་ཆེན་པོས་བསྟེན་པ་ལས་རིན་པོ་ཆེ་འོད་གསལ་ཀློང་ཡངས། གྲུབ་ཆེན་ཀུན་བཟང་རྡོ་རྗེ། གཏེར་ཆེན་པདྨ་གླིང་པ། ཟབ་ལུང་པ་ཤཱཀྱ་བཟང་པོ། སྨན་རྩེ་བ་བློ་གྲོས་རྒྱལ་མཚན་སོགས་བླ་མ་མང་པོ་ལས་སྙིང་ཐིག་རྣམ་བཞིའི་གདམས་པ་ཆ་ལག་དང་བཅས་པས་མཚོན་གསན་སྒོམ་འཆད་སྤེལ་གྱི་ཕྲིན་ལས་སྙིང་པོར་མཛད། ཕྱིས་ཀོང་ཡུལ་གཙང་པོ་འགོ་དགུའི་དབེན་པར་སྒྲུབ་པའི་དམ་བཅའ་བརྟན་པོས་བཞུགས་ནས་དགུང་ལོ་རེ་བརྒྱད་པ་ལ་གཤེགས། ས་དེ་ཤིན་ཏུ་རྩུབ་ཅིང་མི་མ་ཡིན་གྱི་འདུ་ཚོགས་ཆེ་བས་མི་གཅིག་པུར་འགྲོ་མི་ནུས་ཙམ་ཡོད་ཀྱང་། རྗེ་འདིས་སྒྲུབ་པ་མཛད་པ་དང་ཕྱིས་སྐུ་གདུང་རྡོ་གཉན་གྲུ་བཞི་ཞིག་ཡོད་པའི་སྟེང་དུ་ཞལ་ཆེམས་ལྟར་ཞུགས་ལ་ཕུལ་པས་འཚུབ་ཆ་ཀུན་རང་ཞིར་སོང་། གནས་དེར་མཚུངས་མེད་བསྟན་འཛིན་རྡོ་རྗེས་སྒྲུབ་གྲྭ་བཙུགས་ནས་སྙིང་པོའི་རིང་ལུགས་རྒྱ་ཆེར་སྤེལ་ལོ། །

[༦] བྱ་ཁྱུང་པ་ཀུན་མཁྱེན་ངག་དབང་པདྨ།

དེ་ཉིད་ཀྱི་ཞལ་སློབ་བྱ་ཁྱུང་པ་ཀུན་མཁྱེན་ངག་དབང་པདྨ་ནི། གཏེར་ཆེན་སངས་རྒྱས་གླིང་པའི་ལུང་ཟིན་ཆོས་བདག་གཙོ་བོ་དཔལ་ལྡན་སེང་གེའི་སྲས་ཚ་དཔལ་འབར་དབང་ཕྱུག་གི་སྲས་སུ་ཀོང་པོ་རྐྱེན་བྱ་ཁྱུང་དུ་སྐུ་འཁྲུངས། ཡུལ་དེར་དགུང་ལོ་བརྒྱད་པའི་དུས་ཀྱི་ཞབས་རྗེས་ཀྱང་ཤིན་ཏུ་གསལ་བ་ཡོད་པར་གྲགས། ཆུང་ངུ་ནས་དམ་པའི་བག་ཆགས་གསལ་བར་སད། ཡབ་དང་རྫོགས་ཆེན་པ་བསོད་ནམས་རིན་ཆེན་སོགས་བཤེས་གཉེན་མང་པོ་ལས་མདོ་སྔགས་ཀྱི་གསུང་རབ་མང་དུ་གསན་ཅིང་སྦྱངས། ཁྱད་པར་གསང་བ་སྙིང་ཐིག་དང་། སངས་རྒྱས་གླིང་པའི་གཏེར་ཆོས་ལ་མཁྱེན་རྟོགས་ཀྱི་རྩལ་རྫོགས། དགོངས་འགྲེལ་བསྟན་བཅོས་ཀྱང་མང་དུ་མཛད། སློབ་མ་རྣམས་ལ་ཡི་དམ་གྱི་སྐུ་དང་། སྟག་སོགས་གཅན་གཟན་གྱི་གཟུགས་སུ་སྤྲུལ་སྒྱུར་བྱེད་ནུས་ཤིང་། རྫས་གཏེར་འགའ་ཡང་བཞེས། ཀོང་པོའི་ཕྱོགས་སུ་རྙིང་མའི་བསྟན་འཛིན་གཅིག་ལ་མཁྱེན་པ་དང་འཕྲིན་ལས་འགྲན་ཟླ་མེད་པའི་བཤེས་གཉེན་ཆེན་པོར་བྱོན་ནས་ཞི་བར་གཤེགས་སོ། །

[༧] རྫོགས་ཆེན་པ་བསོད་ནམས་དབང་པོ།

དེ་ཉིད་ཀྱི་ཐུགས་སྲས་ཐུ་བོ་རྫོགས་ཆེན་པ་བསོད་ནམས་དབང་པོ་ནི། ཀོང་པོ་རྐྱེན་ཚ་གཞུག་ཏུ་སྐྱུ་རའི་རིགས་སུ་སྐུ་འཁྲུངས། གཞོན་ནུའི་དུས་ཁྱིམ་ཐབ་བཟུང་ནས་སྲས་མོ་ཞིག་ཀྱང་བྱུང་བ་བྱ་ཁྱུང་པ་རྒྱལ་དབང་བསྟན་འཛིན་གྱི་ཕྱག་རྒྱ་མོར་གྱུར། དགུང་ལོ་སོ་བདུན་པ་ལ་སྲིད་པའི་ལས་སྣང་ལ་ངེས་འབྱུང་དང་སྐྱོ་ཤས་དྲག་པོས་རྒྱུད་བསྐུལ་ཏེ་བྱ་ཁྱུང་དུ་ཆོས་སྒོར་ཞུགས། ཀུན་མཁྱེན་ངག་དབང་པདྨ་ལས་རྫོགས་ཆེན་སྙིང་ཐིག་སོགས་ཆོས་ཀྱི་གསན་པ་རྒྱ་ཆེར་མཛད། རྒན་ཞུགས་ཀྱིས་རེ་ཆེན་པོ་མེད་ཀྱང་བླ་མས་ཕྱི་མཐར་གཟིགས་ནས་གདམས་པ་ཐམས་ཅད་ཚང་སྤྲུགས་སུ་གནང་བ་ལ་ནན་ཏན་ཆེན་པོས་བསྒོམས་པས་གནས་ལུགས་ཀྱི་རང་ངོ་འཕྲོད། ཙ་རི་སྟག་ཚང་དོམ་ཚང་དང་པུ་རི་ཟིལ་ཆེན་སོགས་སུ་དཀའ་སྤྱད་ཆེན་པོས་སྒྲུབ་པ་རྩེ་གཅིག་ཏུ་མཛད་པས་ཉམས་རྟོགས་ཕུལ་དུ་ཕྱིན། ཕྱིས་མཚུངས་མེད་བསྟན་འཛིན་རྡོ་རྗེའི་བཀས་གཙང་པོ་འགོ་དགུའི་སྒྲུབ་སྡེར་བཞུགས། བཞུགས་ཁང་སྨྱུག་མའི་གཟིམས་སྤྱིལ་ཞིག་ཡོད་པ་ཕྱིས་སུའང་མཇལ་དུ་ཡོད། དེ་སྐབས་གཙང་བསམ་འགྲུབ་རྩེ་ནས་མཁས་གྲུབ་སོག་ཟློག་པས་མནལ་ལམ་འོད་གསལ་གྱིས་གཟིགས་ནས་རྒྱལ་བ་འབྲོམ་གྱི་སྤྲུལ་པར་བསྔགས་ཤིང་། བརྟན་བཞུགས་ཚིགས་བཅད་ཕུལ་བར། རྫོགས་ཆེན་འབུམ་ཕྲག་དྲུག་ཅུ་རྩ་བཞི་ལ། །རྗོད་བྱེད་ཚིག་དང་སྒྲ་ལ་དབང་བ་མང་། །དོན་གྱི་ཡེ་ཤེས་སྟོན་མཁས་ཁྱོད་མིན་སུ། །ཞེས་སོགས་ཀྱི་བསྔགས་བརྗོད་བསྩལ་བས་ཆོས་ཀྱི་འཕྲིན་ལས་ཀྱི་སྒོ་ཕྱེ་བའི་བདག་རྐྱེན་དུ་གྱུར། དེ་ལ་བརྟེན་ནས་བཀའ་ཆོས་ཞུ་བ་མང་དུ་འདུས་པ་རྣམས་ལ་རྫོགས་ཆེན་སྙིང་ཐིག་སོགས་ངེས་དོན་ཟབ་མོའི་གདམས་པ་གཙོ་བོར་བསྟན་ནས་འགྲོ་དོན་བསྐྱངས། ཁྱད་པར་རྩེ་ལེ་སྤྲུལ་སྐུ་པདྨ་ལེགས་གྲུབ་དང་། ལྷ་བཙུན་ཀུན་བཟང་རྣམ་རྒྱལ། སྤོ་བོ་རྦ་ཁ་སྤྲུལ་སྐུ་སོགས་སྐྱེས་མཆོག་དུ་མས་མཚོན་སྐལ་ལྡན་མང་པོའི་དོན་མཛད་ནས། དགུང་ལོ་དོན་དྲུག་པ་ཤིང་གླང་སྨིན་དྲུག་ཟླ་བའི་ཚེས་ཉེར་ལྔ་ལ་ཀོང་ཡུལ་འགོ་དགུའི་སྒྲུབ་སྡེར་སྙུང་བ་མེད་པར་གཤེགས། གདུང་སྦྱངས་བྱས་ཚེ་དབུ་ཐོད་ལ་ཨ་རང་བྱོན་དང་རིང་བསྲེལ་མང་དུ་འཕེལ་བར་གྲགས་སོ། །

[༨] རིག་འཛིན་ཆོས་ཀྱི་རྒྱ་མཚོ།

གྲུབ་པའི་སློབ་དཔོན་དེ་ཉིད་ཀྱི་ཞལ་སློབ་རིག་འཛིན་ཆོས་ཀྱི་རྒྱ་མཚོ་ནི། སྤོ་བོ་རྦ་ཁ་དགོན་གསང་སྔགས་ཆོས་གླིང་དུ་གྲགས་པའི་བཤད་སྒྲུབ་ཀྱི་སྡེ་ཆེན་པོའི་བླ་མ་ཡིན་པར་གྲགས། སྐུ་ན་ཕྲ་མོའི་དུས་ནས་རྫོགས་ཆེན་པ་བསོད་ནམས་དབང་པོའི་ཞབས་པད་མཉེས་པ་གསུམ་གྱིས་བསྟེན། རྗེ་ཉིད་ཀྱིས་ཐུགས་བརྩེས་རྗེས་སུ་བཟུང་སྟེ་གསང་ཆེན་རྙིང་མ་སྤྱི་དང་སྙིང་ཐིག་རྣམ་གཉིས་སོགས་རྫོགས་ཆེན་གྱི་གདམས་སྐོར་མ་ལུས་པ་གནང་། དོན་བརྒྱུད་ཀྱི་བསྟན་པ་ཡོངས་སུ་གཏད་དེ་གདུལ་བྱ་རྗེས་སུ་འཛིན་པར་བསྐུལ། དུས་དེའི་དབུས་གཙང་གི་མཁས་གྲུབ་ཐམས་ཅད་ཀྱིས་རྗེ་འདིའི་མཁས་ཚུལ་གསུམ་གྱི་མཛད་པར་བསྟོད་བསྔགས་མགྲིན་གཅིག་ཏུ་མཛད། དེ་ལྟར་དོན་གཉིས་ལྷུན་གྲུབ་ཀྱི་མཛད་པ་ཕྱོགས་བརྒྱར་བསྐྱངས་ནས་དགོངས་པ་མྱ་ངན་འདའ་བའི་ཚུལ་བསྟན་ཏོ། །

གྲུབ་པའི་རིག་འཛིན་སློབ་དཔོན་ཆེན་མོ་དེ་ཉིད་ཀྱི་ཞལ་སྔ་ནས་མདོ་ཁམས་རྫོགས་ཆེན་པ་པདྨ་རིག་འཛིན་གྱིས་སྨིན་གྲོལ་མན་ངག་གི་ཟབ་ཁྲིད་མཐའ་དག་ལྷག་མེད་བུམ་པ་གང་བྱོའི་ཚུལ་དུ་གསན་ཅིང་། དེ་ཉིད་ལས་རིམ་པར་དཔོན་སློབ་ནམ་མཁའ་འོད་གསལ། གྲུབ་དབང་སྐུ་རབས་གཉིས་པ་འགྱུར་མེད་ཐེག་མཆོག་བསྟན་འཛིན། རྗེ་པདྨ་ཀུན་གྲོལ་རྣམ་རྒྱལ། ནམ་མཁའ་ཚེ་དབང་མཆོག་གྲུབ། མི་འགྱུར་ནམ་མཁའི་རྡོ་རྗེ། ཨོ་རྒྱན་བསྟན་འཛིན་ནོར་བུ། མཁས་མཆོག་གཞན་ཕན་སྣང་བ། འཇིགས་མེད་ཡོན་ཏན་མགོན་པོ། དེ་ཉིད་ཀྱི་ཞལ་སྔ་ནས་བདག་ཅག་གི་སྐྱབས་རྗེ་བླ་མ་ཐུབ་བསྟན་ལུང་རྟོགས་བསྟན་པའི་རྒྱལ་མཚན་དང་རྟོགས་ལྡན་བློ་གྲོས་རྒྱ་མཚོ་རྣམ་གཉིས་ཀྱིས་མན་ངག་ཆིག་རྫོགས་སུ་གསན་ནས་སྤེལ་བའི་བརྒྱུད་པ་བར་མ་ཆད་པ་ད་ལྟའི་བར་བཞུགས་ཚུལ་འོག་མའི་ཚོམས་ལས་རྒྱས་པར་འབྱུང་ངོ་། །

དེ་ལས་གཞན་པའི་བརྒྱུད་པའང་གོང་གི་རང་ལུགས་རྩ་བའི་བརྒྱུད་སྲོལ་དང་གཅིག་འདྲེས་སུ་བཞུགས་པ་སྟེ་རྣམ་ཐར་རྒྱས་པ་ཆོས་འབྱུང་ལོ་རྒྱུས་གཞན་དག་ན་བཞུགས་པས་འདིར་མཚན་ཙམ་སྨོས་པ་ནི། ཀུན་མཁྱེན་ཆེན་པོ་ནས་མཁན་ཆེན་ཁྱབ་བརྡལ་ལྷུན་གྲུབ། སྤྲུལ་སྐུ་གྲགས་པ་འོད་ཟེར། འཁྲུལ་ཞིག་ཤེས་རབ་རྒྱ་མཚོ། རྒྱལ་སྲས་ཟླ་བ་གྲགས་པ། གྲུབ་ཆེན་ཀུན་བཟང་རྡོ་རྗེ། ཆོས་རྗེ་ཀུན་དགའ་རྒྱལ་མཚན། སྤྲུལ་སྐུ་སྣ་ཚོགས་རང་གྲོལ། སྤྲུལ་སྐུ་བསྟན་འཛིན་གྲགས་པ། མཁས་གྲུབ་མདོ་སྔགས་བསྟན་འཛིན། གཉོས་སྟོན་ཕྲིན་ལས་ལྷུན་གྲུབ། རིག་འཛིན་གཏེར་བདག་གླིང་པ། རྒྱལ་སྲས་རིན་ཆེན་རྣམ་རྒྱལ། ཨོ་རྒྱན་བསྟན་འཛིན་རྡོ་རྗེ། རྫོགས་ཆེན་གསུམ་པ་ངེས་དོན་བསྟན་འཛིན་བཟང་པོ། རྡོ་གྲུབ་འཇིགས་མེད་ཕྲིན་ལས་འོད་ཟེར། རྒྱལ་སྲས་གཞན་ཕན་མཐའ་ཡས། མཁན་ཆེན་པདྨ་བཛྲ། འཇམ་མགོན་མི་ཕམ་རྣམ་རྒྱལ། པདྨ་ཐེག་མཆོག་བློ་ལྡན་ནམ་ཨ་བུ་ལྷ་སྒང་། འཇིགས་མེད་ཡོན་ཏན་མགོན་པོ། དེ་ཉིད་ལས་བདག་ཅག་གི་རིགས་བདག་བླ་མ་རྣམ་གཉིས་ལ་བརྒྱུད་པ་དང་། གཞན་ཡང་ངེས་དོན་བསྟན་འཛིན་བཟང་པོ་ནས་འཇིགས་མེད་རྒྱལ་བའི་མྱུ་གུ་སློབ་བརྒྱུད་དང་བཅས་པར་གྱེས་པ་དང་། རྡོ་གྲུབ་ཆེན་དང་རྒྱལ་བའི་མྱུ་གུ་རྣམ་གཉིས་ལས་མི་འགྱུར་ནམ་མཁའི་རྡོ་རྗེ་དང་རྒྱལ་སྲས་གཞན་ཕན་མཐའ་ཡས་རྣམ་གཉིས་ལ་བརྒྱུད་པ། བདག་ཉིད་ཆེན་པོ་འདི་དག་རྣམས་ལས་དཔལ་སྤྲུལ་འཇིགས་མེད་ཆོས་ཀྱི་དབང་པོ་དང་ཨོ་རྒྱན་བསྟན་འཛིན་ནོར་བུ་རྣམ་གཉིས་ལ་བརྒྱུད་པ། རྡོ་གྲུབ་འཇིགས་མེད་ཕྲིན་ལས་འོད་ཟེར་དང་དཔལ་སྤྲུལ་རིན་པོ་ཆེ་རྣམ་གཉིས་ལས་མདོ་མཁྱེན་བརྩེ་སྐྱེས་བུ་ཡེ་ཤེས་རྡོ་རྗེ་ལ་བརྒྱུད་པ། དཔལ་སྤྲུལ་སེམས་དཔའ་ཆེན་པོ་ལས་སྨྱོ་ཤུལ་ལུང་རྟོགས་བསྟན་པའི་ཉི་མ་ལ་བརྒྱུད་པ། འཇིགས་མེད་རྒྱལ་བའི་མྱུ་གུ་དང་མཁན་ཆེན་པདྨ་བཛྲ་ལས་འཇམ་དབྱངས་མཁྱེན་བརྩེའི་དབང་པོ་སློབ་བརྒྱུད་དང་བཅས་པར་བརྒྱུད་པ། དཔལ་སྤྲུལ་སེམས་དཔའ་ཆེན་པོ་དང་མཁན་ཆེན་པདྨ་བཛྲ་རྣམ་གཉིས་ལས་མུ་ར་པདྨ་བདེ་ཆེན་བཟང་པོ་དང་ཨ་འཛོམས་འབྲུག་རྒན་འགྲོ་འདུལ་དཔའ་བོ་རྡོ་རྗེ་སློབ་ཚོགས་དང་བཅས་པར་བརྒྱུད་པ། མཁན་ཆེན་པདྨ་བཛྲ་དང་འཇམ་དབྱངས་མཁྱེན་བརྩེའི་དབང་པོ་རྣམ་གཉིས་ལས་འཇམ་མགོན་མི་ཕམ་རྣམ་རྒྱལ་དང་རྡོ་གྲུབ་བསྟན་པའི་ཉི་མ་ལ་བརྒྱུད་པ་སོགས་བཀའ་སྲོལ་ཐ་དད་པའི་རང་ལུགས་སྣ་ཚོགས་འཛམ་གླིང་ཕྱོགས་ཀུན་ཏུ་ཁྱབ་པར་གྱུར་ཀྱང་། བསྟན་པའི་ཆུ་འགོ་གྲུབ་དབང་རྫོགས་ཆེན་པ་ཡབ་སྲས་ཀྱི་སློབ་བརྒྱུད་ཡང་སློབ་དུ་མ་གཏོགས་པའི་སྙིང་ཐིག་པར་ཁས་འཆེ་བ་དེང་དུས་སུ་ཡང་མེད་པར་སྣང་ངོ་། །

སྨྲས་པ།

རྡོ་རྗེ་འཆང་དབང་ཞལ་གྱི་བུམ་སྒོ་ལས། །བབ་པའི་གསང་ཆེན་རྒྱུད་སྡེ་ཛ་ཧུའི་རྒྱུན། །སྔོན་བྱོན་ལོ་པཎ་ཐུགས་བསྐྱེད་ཡུར་བ་ཡིས། །བསིལ་ལྡན་ར་བ་དཀར་པོའི་བཅུད་དུ་དྲངས། །བརྒྱུད་གསུམ་བླ་མའི་ཐུགས་མཛོད་གསང་བའི་ཆོས། །ཟབ་ལས་ཆེས་ཟབ་གསང་ཆེན་ཏནྟྲའི་བཅུད། །རིང་བརྒྱུད་བཀའ་ཡི་ཆུ་བོ་མ་ཉམས་པ། །རྡོ་རྗེ་ཐེག་པ་ནང་རྒྱུད་སྡེ་གསུམ་རྨད། །བསྐྱེད་པ་དག་རྫོགས་སྨིན་པའི་རྣལ་འབྱོར་གྱིས། །སྣོད་བཅུད་གདན་གསུམ་ལྷ་ཡི་དཀྱིལ་འཁོར་དུ། །མངོན་པར་བྱང་ཆུབ་རིག་འཛིན་རྣམ་བཞིའི་སར། །བགྲོད་པའི་ཐེག་མཆོག་མ་ཧཱ་ཡོ་གའི་ལམ། །རྫོགས་པའི་རིམ་པ་ཟབ་གསལ་གཉིས་མེད་ཀྱིས། །སྣང་གྲགས་འཛིན་རྟོག་བདེ་སྟོང་ཡེ་ཤེས་སུ། །མ་ལུས་འུབ་ཆུབ་ཐབས་མཆོག་ཉེ་རྒྱུའི་ལམ། །ནང་གི་རྣལ་འབྱོར་ལུང་ཆེན་ཨ་ནུའི་ལུགས། །བྱར་མེད་ཀ་དག་ལྟ་བའི་གཏན་སྲིད་ཟིན། །ལྷུན་གྲུབ་སྣང་བཞིའི་སྒོམ་པ་ཚད་དུ་འཁྱོལ། །ཟུང་འཇུག་སྐུ་གསུམ་འབྲས་བུའི་དགའ་སྟོན་སྨིན། །ཤིན་ཏུ་རྣལ་འབྱོར་རྫོགས་པ་ཆེན་པོའི་གནད། །ཕྱོགས་རེ་མ་ཡིན་རིམ་དགུ་ཐེག་པའི་བབས། །ཆ་ཙམ་མ་ཡིན་བཀའ་དང་དགོངས་འགྲེལ་གཞུང་། །འགལ་འདུ་མ་ཡིན་མདོ་སྔགས་ཟུང་འཇུག་ལམ། །ཚང་ལ་མ་ནོར་གསང་ཆེན་བརྒྱུད་པའི་སྲོལ། །གྲུབ་བརྙེས་ནོར་བུའི་བཅུད་ཀྱིས་ཡོངས་གཏམས་པའི། །མདོ་སྒྱུ་སེམས་གསུམ་མ་དྲོས་ཆོས་ཀྱི་མཚོ། །བཤད་སྒྲུབ་རྦ་རླབས་འཕྱུར་བའི་རྩེ་དགའ་ཅན། །ཆེ་བ་དྲུག་ལྡན་གསང་ཆེན་རྒྱལ་བའི་བསྟན། །མདོ་སྔགས་ཆོས་ཚུལ་རྫོགས་པའི་གོས་བཟང་རྩེར། །རྣམ་གསུམ་ཡོ་གའི་ཏོག་གིས་ཉེར་མཛེས་པ། །ངེས་དོན་སྙིང་པོའི་ཆོས་ཀྱི་རྒྱལ་མཚན་འདི། །དུས་ཀྱི་མཐར་ཡང་མི་ཉམས་ཡུན་བརྟན་ཤོག །ཅེས་པ་ནི་རིང་བརྒྱུད་བཀའ་མའི་ཆུ་བོ་སྔ་འགྱུར་ནང་རྒྱུད་སྡེ་གསུམ་གྱི་བསྟན་པའི་བབ་སོ་རྒྱས་པར་བཤད་ཟིན་པའི་སྐབས་སུ་དང་བའི་བློས་ཆེད་དུ་བརྗོད་པའི་ཚིགས་སུ་བཅད་པའི་ཕྲེང་བའོ། །

སྔ་འགྱུར་གྲུབ་དབང་རྒྱལ་བ་རྫོགས་ཆེན་པའི་གདན་རབས་ཆོས་བརྒྱུད་དང་བཅས་པའི་བྱུང་བ་བརྗོད་པའི་གཏམ་ཡིད་བཞིན་དབང་གི་རྒྱལ་པོའི་ཕྲེང་བ་ལས། རིང་བརྒྱུད་བཀའ་མའི་ཆུ་བོ་ནང་རྒྱུད་སྡེ་གསུམ་གྱི་བརྒྱུད་སྲོལ་རྒྱས་པར་བཤད་པའི་སྐབས་ཏེ་སརྒ་བརྒྱད་པ་རྫོགས་སོ།། །།